CLOSE WINDOW

D4254
བོད་ཡིག

/ //rgya gar gyi mkhan po skal ldan rgyal po dang / lo tsA ba dge slong blo ldan shes rab kyis bsgyur ba'o//[ ]@##/ /rgya gar skad du/ k+Sha Na b+ha ga sid+d+hi ba nA ma/ bod skad du/ skad cig ma 'jig pa grub pa'i rnam par 'grel pa/ 'jam dpal gzhon nur gyur pa la phyag 'tshal lo//skad cig 'jig pa grub par byed pa'i tshad ma'i rgyu can 'gog pa'i thabs shes par bya ba'i phyir de brjod pa la gzhung nyung ngus bde blag tu gzung bar bya ba'i don du rab tu byed pa 'di brtsams so/ /de la grangs can la sogs pa rgol ba'i tshogs kyi phyogs snga mas sun dbyung ba'i don du 'dus byas thams cad ces bya ba la sogs pa grub pa'i mtha' rjes su rjod par byed do//rgyu dang rkyen tshogs pas skyed pa'i phyir 'dus nas byas pa ni 'dus byas rnams te/ byas pa zhes bya ba'i don to/ /blo dang me lce la sogs pa dus gcig zhig pa ma yin pa de dag cung zad kyang logs par rtog pa med kyi bye brag med pa yin no zhes khyad par nye bar blangs pa yin no//da ni de la zhes bya ba la sogs pas skyon rnams kyi rim pa ston pa yin no/ /grub pa'i mtha' mngon par 'dod pa'i skad cig gis sgra'i don 'jig rten la rab tu ma grags na de'i rjes su 'gro ba skad cig ma'i sgra'i don ma grub po//de'i phyir khyad par ma grub pa'i phyogs kyi skyon yin no zhes bsams pa'o/ /de dag gi gzhung zhes bya ba 'dis ni rigs pa dang bral bar ston par byed do/ /skyes pa'i don ni zhes bya ba la sogs pa skad cig gzhan du gnas par sgrub par byed do/ /bye brag pa dang rigs pa can dag ni rang gi rgyud la yod pa dang 'du bar skye ba yin no zhes smra zhing grub pa dang 'brel pa dag kyang dus gcig pa nyid yin gyi dngos po skye ba las dus tha dad par yod pa dang 'brel ba ni ma yin no zhes lta ba ma yin nam/dpyod pa po la sogs pa la ni 'du ba nyid 'ga' zhig byed kyi 'on kyang yod pa tsam yin no zhe na/de la kha cig gis smras pa/ bden te/ rdzas skye ba la phyis gzugs la sogs pa dang 'du ba yin no zhes bya ba'i lus 'di la bsams pa yin no zhes zer te/ yod pa'i sgra ni ci zhig ltar de dag nyid nye bar mtshon pa'i don du'o/ /'dis ci zhig grub ce na/'dis ni grub ste rdzas skyes pa ni gzugs la sogs pa dang 'du ba'i dus su sdod pas skad cig gzhan du gnas par 'gyur te/ de lta ma yin na rnam pa de ltar mi dmigs par thal bar 'gyur ba'i phyir ro/ /de ltar na rdzas kho na skad cig gzhan du gnas par bstan par 'gyur gyi/yon tan la sogs pa ni ma yin pa ma yin nam/ gal te de lta na 'di las cir 'gyur re zhig thams cad skad cig ma nyid du dam bcas pa btang bar 'gyur ro/ /de ltar brjod pa na grub pa'i mtha' la yod pa rtag par khas ma blangs pa'i skyon bsal ba yin no/ / de'i phyir gzegs zan gyi slob ma kha cig nyid kyis 'di 'dod pa yin no zhes brjod pa yin no/ /des na byas pa skad cig ma yin no zhes bya ba'i ngag 'di la tshig dag phan tshun 'gal ba'i don nyid rjod par byed pa yin te/ nga'i ma mo gsham yin no zhes bya ba bzhin no/ /khyad par ma grub pa la sogs pa'i phyogs kyi skyon 'ba' zhig tu ma zad de de lta bu'i chos dang 'brel pa'i rgol ba gnyi ga la grub pa'i dpe yang yod pa ma yin no zhes smras pa ni des na zhes bya ba la sogs pas so//'di med mod ces ni brjod par mi bya ste/ de med na khyab pa sgrub par byed pa'i tshad ma dran pa med pa'i phyir la/khyab pa ma nges pa can gyi yod pa zhes bya ba'i gtan tshigs ni sgrub par byed pa'i yan lag ma yin no/ /des smras pa ni khyab pa zhes bya ba la sogs pas so/ /blo la sogs pa'i myur du 'jig pa yin na yang yod pa dang 'du ba'i dus la ltos pa dang bcas pa yin pa'i phyir skye ba nyid na 'jig par ma grub po//yang na the tshom du gyur mod de la bsgrub bya nyid la the tshom za ba'i skyon yin no zhes bshad pa ni blo zhes bya ba la sogs pa'o/ /yod pa'i gtan tshigs kyang lhag ma dang ldan pa'i ma nges pa yin no zhes bshad pa ni don bya ba byed pa'o//'di nyid kyi 'thad pa ni 'di ltar zhes bya ba'o/ /gzhan gyi dogs pa bsu ba ni 'di snyam du zhes bya ba'o/ /lhan cig byed pa rnams rim gyis nye bar len par gyur ba'i dngos po rim gyis 'bras bu'i tshogs byed do zhes bya ba'i lugs 'di la lan cig byed pa rnams 'di la cung zhig byed pa yin te/de ltar ma yin na de las gzhan pa bzhin du ltos pa med pa nyid du bral bar 'gyur ba'i phyir ro/ /tha mi dad pa 'ga' zhig byed pa ni ma yin te de ni rang gi rgyud la skyes pa'i phyir la/ byas pa la byed pa mi rung ba'i phyir ro/ /tha dad pa byed pa'i khyad par byed na yang de ltos pa med pa'i phyir ro//de nyid kyi phyir rang bzhin gzhan byed na kho bo cag gi phyogs khas blangs pa'i phyir skad cig ma ma yin pa'i rim gyis byed pa ni mi 'thad do zhes bya ba'o/ /'di bdag nyid kyi lta ba'i dpe bstan pas sel ba ni/ de ni mi rigs te zhes bya ba rtsom mo/ /bum pa la sogs pa nye bar len pa rnams ni thob la sogs pa bsnun pa'i khyad par gyi lhan cig byed pa'i rgyu nye bar blangs nas 'jig pa zhes bya ba'i 'bras bu skyed par byed de zhes grag go//tho bas bum pa'i 'jig pa skye ba la rjes su mthun pa'i khyad par 'ga' zhig byed pa ni ma yin no/ /tho ba la sogs pa 'jig pa'i rgyu ma yin no zhes kyang brjod par mi bya ste/de ni tho ba la yod pa dang med pa'i rjes su byed pa'i phyir ro/ /de bshad pa ni rjes su 'gro ba zhes bya ba'o/ /yang dper na zhes bya ba 'dis rjes su 'gro ba dang ldog pa'i tshad ma can dngos po'i ngo bo'i rnam pa'i 'bras bu skyed pa dper byed do//de bzhin du zhes bya ba ni de ma thag tu bstan pa'i dpe can mjug bsdu ba'o/ /de ltar re zhig tho ba la sogs pa bum pa la sogs pa la cung zhig mi byed kyang bdag nyid ldog pa la ltos pa yin no zhes sa bon la sogs pa bstan pa sgrub par byed do/ /des na lhan cig byed pa rnams khyad par mi byed kyang ltos pa nyid du sngar bstan pa dpes bsgrubs pa yin no//ji ltar zhes bya ba la sogs pa la 'dres pa dang tha dad ma grub ces bya ba ni khyad par dang 'brel pa ma 'thob pa'o/ /des na zhes bya ba la sogs pas ni sngar dam bcas pa'i mi mthun pa'i phyogs la ldog pa la the tshom za ba'i mtshan nyid kyi lhag ma dang ldan pa'i ma nges pa'i 'thad pa mjug sdud do//da ni gzhan yang zhes bya ba la sogs pas ni gtan tshigs de nyid ma grub par ston to/ /sngar ni grub par khas blangs nas ma nges par brjod pa yin te/ phyogs chos med par ni the tshom skyed par byed pa nyid du 'thad pa ma yin te/'brel pa med pa'i phyir rnam par dpyad par mi rigs so zhes gang bshad pa yin no/ /ma grub pa yang mthong ba'i dngos po dang 'brel pa 'di la bstan pa khyad par bral ba ni mngon sum gyis rtogs pa med do/ /gnas pa'i khyad par du rtogs pa ni skad cig ma nyid las bzlog pa bstan pas khyab pa des na 'gal ba nyid do//'gal ba'i phyir nus pa med pas nye bar dgod par mi bya'o zhes brjod pa ni rnal ma'i bsgrub bya sgrub pa'i nus pa med pas 'gal bar brjod par 'dod nas bstan pa yin gyi bzlog pa bsgrub pa la bsams pa ni ma yin no zhes kha cig blo 'khrul par 'gyur bas der ma gyur cig ces yang nye bar sbyar nas smras pa ni ci 'dra ba zhes bya ba'o//de bzhin du zhes bya ba ni dam bca' ba'i don la mngon sum gyis don gnod pa sdud pa yin no/ /gzhan dag mngon sum gyis grub pa'i dngos po skad cig ma nyid kyis phyogs su byed do//de ni spyi dang khyad par gyi bdag nyid do/ /spyi'i cha la ni ngo shes pa'i bdag nyid kyi mngon sum bstan par 'dzin par bsnyon du med do/ /des na des gnod do/ /de mngon sum ma yin pa yang ma yin te/rtog pa med pa dang mtshungs par brjod pa'i phyir te/ don nye ba'i yul can dbang po las skyes pa ni mngon sum mo zhes bya ba dang mtshan nyid khyad par med pa'i phyir ro/ /gsal ba dang 'du ba tha mi dad pa'i ngo bo ni spyi yin no/ /gzhan ni rtogs par sla'o/ /rjes su dpag pas gnod pa'i phyogs kyi skabs su 'dir zhes bya ba la sogs pas de'i 'brel ba bstan pa'i don du bzlog pa bshad do//'dir gtan tshigs ni ngo shes pa dang dran par byed pa'o/ /sogs pa smos pas ngo shes pa po brjod par 'dod do/ /snga ma dang phyi ma'i dus dang 'brel pa'i rtsod gzhir gyur pa rnams skad cig gis tha dad par bsgrub par bya ba la gsal bar tha dad pa'i lhas byin dang mchod sbyin dag ni mi mthun pa'i phyogs yin no//ngo shes la sogs pa de dag las ldog pa na rnam pa gzhan med pa'i phyir tha mi dad pas khyab par bya ba yin no/ /de bshad pa ni lhas byin zhes bya ba'o//gzhan gyis mthong zhes bya ba 'di ni dran pa po'i dran pa'i bzlog pa bshad do/ /de ni byed pa po gcig gis myong ba la yin te/ byed pa po du ma la med pa'i phyir ro/ /ngo shes pa la yang 'di lta bu kho na'o/ /de bstan pa ni lta ba dang ngo shes par byed pa zhes bya ba'o/ / gal te skad cig gi bdag nyid tha dad pa dgag pa bsgrub par bya ba la mi dmigs pa'i gtan tshigs blang bar bya ba ma yin nam/ dgag pa gang ji snyed pa de thams cad mi dmigs pa las yin no zhes rnam par gzhag pa yin na 'di la mi dmigs pa gang zhig yin zhes skabs tshol zhing dogs pa la des na 'dir zhes bya ba la sogs pas khyab byed mi dmigs pa yin par bstan to//de ltar gtan tshigs kyi don bzhag nas sbyor ba la 'god par byed pa ni gang zhes bya ba'o/ /lta ba po du ma'i dbus na gnas pa'i gar ram gyad tha mi dad par the tshom med par cig car mthong ba ni chos mthun pa'i dpe'o//mthong ba po rnams phan tshun ngo shes pa'i mtshan nyid kyis mi slu ba de la yod pa'i phyir rjes su 'gro ba grub po/ /de bzhin du zhes bya bas phyogs kyi chos ston to/ /dngos po 'ga' zhig ces bya ba ni rtsod pa'i gzhir byas pa'i skad cig gi bdag nyid snga ma dang phyi ma'i dus su tha dad pa phyogs su byas pa bstan to//rjes su 'gro ba 'phangs pa dang gtan tshigs kyi ldog pa sngar brjod pas tshul gsum tshang ngo / /de ltar ngo shes pa nyid kyi gtan tshigs kyi sbyor ba nye bar bstan pas ngo shes pa nyid mgo bsgres te don gyis ston par byed pa ni/ngo shes pa po la ltos pa'i thabs zhes bya ba la sogs pas so/ /dran pa po nyid kyi gtan tshigs kyi sbyor ba yang mgo bsgres par bstan pa ni de bzhin du zhes bya ba la sogs pas so/ /'di ni ldog pa 'ba' zhig pa'i gtan tshigs kyi sbyor bar brjod par bya ste/ mthun pa'i phyogs la med kyang mi mthun pa'i phyogs la ldog pa'i stobs kyis bsgrub bya sgrub pa'i phyir ro//des na de ltar zhes bya bas sngar bstan pa nye bar sdud par byed do/ /mngon sum dang rjes su dpag pa med par gang du brjod nas mjug sdud par byed ce na/ gtan tshigs ma grub par ston pa'i skabs su mngon sum med par bstan la/gtan tshigs la sogs pa'i skyon gyi rjes su dpag pa med par bstan pa yin no/ /dam bcas pa'i don 'jig rten pa thams cad kyi grags pa dang yang 'gal te/ ri bong can zla ba ma yin no zhes bya ba bzhin no/ /ci ste skyon gcig gis spangs pa la gnyen po gzhan don med do//thal bar byas pa la me sbar ba bzhin no zhe na/ rtsod na bden te/ bstan bcos su ni thabs rnam pa sna tshogs nye bar bstan pas 'ga' zhig ci zhig ltar 'ga' zhig gi tshe nye bar bstan pa'i skyon med do/ /des na zhes bya ba la sogs pas phyogs kyi don snga ma nye bar sdud par byed do//de'i phyir khyad par ma grub pa'i phyogs nyid dang / rang gi tshig dang 'gal ba dang / dpes bsgrub bya la the tshom za ba nyid dang / gtan tshigs ma nges pa nyid dang / ma grub pa'am 'gal ba nyid dang / dam bcas pa'i don mngon sum dang rjes su dpag pas gsal ba dang /'gro ba'i grags pa dang 'gal ba'i phyir dngos po 'jig par brjod pa nyid ni 'jig go zhes bya ba ni phyogs snga ma'i don to/ /grub pa'i mtha' nye bar dgod pa'i phyir slob dpon gzhan don du gnyer bar byed pa'am yang na dus la bab nas 'di la lan nyon cig ces bya ba smos so//skad cig gi sgra'i don grub par bstan pas dang po bkod pa'i khyad par ma grub pa sel bar byed do/ /'jig rten skad cig gi sgra rab tu sbyor ba ni shin tu chung ba'i dus kyi dum bu la rjod par byed do/ /de bstan pa ni/ 'di ltar zhes bya ba'o/ /skar ma shes pa'i gtsug lag de nyid la 'di grags pa yin no zhes bstan pa ni skad cig thang cig ces bya ba la sogs pa'o/ /de la bstan bcos byed pa ni srog chags rnams kyis las sna tshogs byas pas 'bras bu sna tshogs pa skye ba dang bag mar 'gro pa la sogs pa dus tha dad par ston pa yin no//des na dus tha dad pa rnam par phye bas dus shin tu nyung ba ni skad cig tu brjod do/ /'ga' zhig rdul phra rab gcig 'dus pa'i dus ni skad cig go zhes bya ba ni mtshon pa yin no/ /ji srid du rdul phra rab gcig gis rdul phra rab gcig rgal ba'i dus cung zad pa de ni skad cig go//de ltar rdul gnyis la ltos nas ches phra ba rdul phra rab yin pa de bzhin du snga ma dang phyi ma'i cha dang ldan pa'i dus cung zhig pa la ltos nas cha dang bral ba'i shin tu nyung ba'i dus kyi cha ni skad cig yin pa'i phyir rnam pa du mas skad cig gi don shes par bla bas de'i gnas skabs ni skad cig ma'o//de bas na khyad par ma grub pa nyid ma yin no/ /gnyi ga la grub pa'i dpe yod pa ma yin no zhes gang smras pa de la ci sgrub par byed pa'i chos kyis byas pa'i chos mthun pa'i dpes phyogs la bsgrub bya nges la de med pa'i phyir rjes su dpag pa ma yin no zhes tshe dang ldan pas bsams sam/kwa'i dpe nye bar len pa'i dgos pa mi shes par 'di skad du smra bar byed de/ khyab pa bsgrub pa'i tshad ma zhugs pa dran par bya ba'i phyir nye bar len pa yin gyi dpe'i phyir ni ma yin no/ /chos mthun pa ston pa ma yin no zhes bya ba la sogs pas bsgrub bya sgrub pa'i yan lag ma yin pa'i phyir ro//'di ni chos mthun pa nyid ni rnam pa gnyis te zhes bya ba la sogs pas tshad ma brtag par yang bstan zin to/ /khyab pa sgrub pa'i tshad ma dran pa de nyid kyis ci zhig bya zhe na/ khyab pa rab tu grub pa'i zhes bya ba la sogs pa 'di smos so//ni zhes bya ba ni gtan tshigs kyi don to/ /de ltar na yod pa'i mtshan nyid kyi gtan tshigs skad cig ma nyid dang lhan cig tu de'i bdag nyid du sgrub par byed pa'i tshad ma khyab byed mi dmigs pa'i ngo bo gang la kha cig tu ston pa de ni dpe yin no/ /dpe med kyang gnod par byed pa'i tshad ma dper byed do zhes gang bshad pa yin no//log par rtog pa med par rgol ba gnyi ga la de'i ngo bor rab tu grags pa med na yang 'brel pa sgrub par byed pa'i tshad ma rten du byas pa thams cad dpe yin no zhes bshad pa ni/ des na zhes bya ba'o/ /gal te de ltar na zhes bya ba ni zur na gnas ba zhig rtsod par byed do//chos can sgra la sogs pa skad cig nyid dang ldan par bsgrub par bya ba la zlog pa la gnod par byed pa'i tshad ma nye bar sdud pa bsgrub bya dang 'brel pa sgrub par byed pa na bum pa bzhin du sgra la sogs pa skad cig ma la sogs pa'i bsgrub bya'i chos dang ldan par stan par byed de/de na yod pa la sogs pa'i gtan tshigs nye bar bsdu ba la dgos pa ci zhig yod ce na/ de la chos can nyid la zhes smos so/ /'di la snying po'i don ni 'di yin te gang la sgra la sogs pa sgrub par byed pa'i chos can nyid la khyab byed mi dmigs pa la sogs pa gnod par byed pa'i tshad ma 'jug pa de brjod pa bsgrub bya'i chos can spyi mthar thug par 'jug pa de la bsgrub bya'i chos kyi blo skye ba des na don byas pa nyid kyi phyir sgrub byed nye bar sdud pa don phyir rjes su rjod par byed pa ni gang yang zhes bya ba'o//de'i lan 'debs pa ni 'du ba lta re zhig ces bya ba la sogs pas so//gal te skye ba dang ldan pa rnams kyis yod pa dang 'du ba la sogs par rtog pa med na de las de'i gnas pa 'phangs pas skad cig ma ma yin pa nyid du brjod pa mdzes par 'gyur ro/ /yod pa nyid ni da 'dir gzhan gyis khas blangs pa'i rtog pa yod pa dang med pa'i phyi mo la brten pas 'du ba thag bsrings so//des ma grub pa gang zhig ma grub pas bsgrub par bya ba yin/ ji skad du zhes bya bas gtan tshigs la nges pa nyid du bsgrub pa'i phyir gzhan gyis 'jig pa'i rgyu'i dpe nye bar bkod pa sun dbyung ba'i ched du rjes su rjod par byed do//de yang zhes bya ba la sogs pas sun 'byin par byed do/ /sA lu'i myu gu la zhing la sogs pa bzhin du bum pa ni 'jig pa'i rgyu'i dngos po la brten par 'gyur bar 'os pa ma yin no/ /des na lhan cig byed pa'i dngos po nye bar len pa la cung zad kyang ltos pa yin zhes bya ba'i bum pa'i dpe ma grub pa'i phyir dpe las byung ba'i ma grub pas skad cig ma ma yin pa yang rim gyis byed pa po nyid du srid pa yin no zhes bya ba'i ma nges par brjod pa rtsa ba dang bcas te ston pa yin no zhes bya ba ni gzhung 'di'i bsdus pa'i don to//tho ba la sogs pa bum pa'i 'jig pa byed do zhes brjod pa 'di'i don ci yin//ci bum pa nyid byed dam 'on te 'jig pa'i sgras brjod par bya ba'i dngos po de las tha dad pa zhig yin/ phyogs dang po ni ma yin te/ bum pa ni 'jim pa la sogs pa las grub pa'i phyir byas pa la byed pa mi rung ba'i phyir ro/ /gnyis pa yang ma yin te/'jig pa zhes bya ba dngos po gzhan byed na snam bu bzhin du bum pa snga ma ltar dmigs pa dang don byed pa dag tu thal bar 'gyur ba'i phyir ro/ /'di ni 'jig byed du mi 'thad do zhes bya ba'i bar gyi gzhung gis bshad do/ /grangs can gyi 'dod pa dgos par byed pa ni 'di snyam du zhes bya ba'o//dmigs pa ni yod pa nyid mi snang ba'o/ /de yang zhes bya ba la sogs pas sun 'byin par byed do/ /dmigs pa gang yin de nyid ni mi dmigs pa ma yin te/ 'gal ba'i phyir ro/ /de'i phyir mi dmigs pa'i dus na snga ma'i rang bzhin nyams pas 'dod par bya'o/ / gzhan ni shes par sla'o/ /'di snyam du zhes bya ba gzhan gyi dogs pa bsu bar byed de/ 'bras bu'i dngos po'i ngo bo nyid na gdon mi za bar tha dad pa dang / tha mi dad pa nyid kyi rjes su bya ba yin no 'jig pa ni med pa yin pa'i phyir tha dad pa dang tha mi dad pa'i rnam par rtog pa mi 'jug go//grub pa'i mtha' can gyi dngos po med pa la rjes su 'brang bar byed pa ni dngos po med pa yang zhes bya ba'o/ /dngos po med pa gnyis nyid yin te/ ma yin par dgag pa dang / med par dgag pa'o/ /ma yin par dgag pa ni bum pa las gzhan don gyi dngos po snam bu lta bu ste/de la ni tha dad pa dang tha mi dad pa'i rnam par rtog pa spangs pa ma yin no/ /med par dgag pa'i phyogs la rgyu ni rgyu ma yin pa kho na ste/ med pa ni med par dgag pa ngo bo nyams pa ci'i ngo bo yang ma yin pa de ni rgyu'i bya ba'i yul ma yin no/ /med pa ni gdon mi za bar 'bras bu ma yin par 'dod par bya ste/'bras bu nyid ni dngos po'i ngo bor khas blangs so zhes rim gyis sgrub par byed pa ni 'di ltar zhes bya ba la sogs pas so/ /kha cig tu sa bon la sogs pa myu gu la sogs pa skyed pa nye bar len pa sa bon gyi gnas skabs las gnas skabs tha dad pa dang gzhan las kyang ldog pa'i lus med par 'gyur ro zhes bya ba'i skyon 'di ni nang gi khyab pa smra ba la yod do//de dag gi smra ba ni rigs pa'i rjes su 'gro ba ma yin te/ 'di ltar nang gi khyab pa'i gnod par byed pa'i tshad mar rtogs pa'i rim pa 'di yin te/ gal te sgra skad cig ma la sogs pa'i rang bzhin du 'gyur na rim dang cig car dag gis don byed pa 'di rigs pa ma yin no//des na khyab byed mi dmigs par thal bar 'gyur bas skad cig ma yin no zhes khas blang dgos so/ /'di la yang brjod na gzhan 'di dag smra bar byed do/ /'di bstan pa yin yang bum pa bzhin du 'bras bu byed do zhes so//de la yang gnod par byed pa 'jug go zhes so/ /pha rol dmigs pa dang / mi dmigs pa srid par byas nas de bzhin du bstan pas dngos po mtha' dag gi yul can gnod par byed pa nye bar 'god pas kha rog bsdad par bya'o//de ltar yin dang phyi'i khyab pa 'ongs pa yin te/ bsgrub bya'i chos can las phyi rol du gyur pa'i bum pa la sogs pa rnams la gdon mi za bar de bstan par bya ba nyid kyi phyir ro/ /de nyid kyi phyir de dag dpe yin no/ /bsgrub bya nges pa med pa ma yin nam/ ji ltar de nyid yin zhe na/ rnam pa gzhan du sus brjod/ de la bsgrub bya ni gnod par byed pa'i tshad ma 'jug pas nges pa kho na yin la sgrub par byed pa yang mngon sum gyis so/ /des na de ltar tshad ma la rag las pa'i phyir ro zhes bya ba'i bar gyi gzhung gis snying po'i don bshad do/ /'di'i bar gyi gzhung gis yod pa zhes bya ba'i gtan tshigs nye bar blangs pa'i don med pa'i klan ka nang gi khyab par lta ba de ni legs pa ma yin te/gzhan gyis bkod pa'i gtan tshigs mi mthun pa'i phyogs la gtan tshigs 'jug pa'i dogs pa las bzlog pa'i phyir ro/ /de la bzlog pa'i don du gzhan la 'jug pa'i phyir 'brel pa sgrub par byed pa'i tshad ma la nan gyis phyi'i khyab pa blangs pa yin no zhes nges par brjod pa yin no//'di la yang rgol ba ni yod pa'i gtan tshigs nye bar bsdu ba don med pa'i rtsod pa ma spangs par gyur te/ 'di rtsod pa med pa ni gal te zhes bya ba'o//gal te phyi'i khyab pa bsgrub bya'i chos can yongs su spangs te gnod pa byed pas dpe kho na la rjes su 'gro ba dang ldog pa'i mtshan nyid can gyi khyab pa sgrub par byed pa ni ma yin gyi 'on kyang spyi dang bye brag med par mthong ba dang ma mthong ba'i dngos po mtha' dag gi yul la dus gcig tu byed pa yin no//phyi'i khyab pa zhes bya ba phyi rol nyid mi ldan pa rnam par gcad pas khyad par du byas pa yin gyi phyi rol kho na'i khyab pa ni phyi rol khyab pa'o zhes bya ba ni ma yin te/ nang gi khyab pa bzhin no/ /de ltar na 'brel pa sgrub par byed pa'i gnod par byed pa'i tshad ma nyid las bsgrub bya'i chos can skad cig ma nyid du rtogs pa la gang gi don du yod pa'i gtan tshigs nye bar sdud pa yin de ltar yin dang go bar byed pa'i gtan tshigs tshul gnyis pa nyid du 'gyur ro zhes bya ba ni gzhan gyis bsams pa'o//bden te zhes bya ba la sogs pas lan 'debs par byed do/ 'di la bsdus pa'i don ni 'di yin te/ gnod par byed pa'i bya ba ni gang yod pa de ni skad cig ma yin no zhes bya ba 'di yin gyi des sgra'i yod pa dang dngos su 'dzin pa ma yin zhing shugs kyis len pa yang ma yin la yod pa'i rang bzhin skad cig mar sgra med par rtogs par nus pa yang ma yin no//de'i phyir tshad ma gzhan gyis grub pa'i yod pa nye bar bsdu bar bya ba kho na'o/ /skyon gzhan spang bar bya ba'i yul dang dus tha dad pa ni rgol ba gnyi ga la dngos po'i rang bzhin du grub po zhes grag go/ /gal te bum pa'i dngos po med pa yang med pa'i gnas skabs las tha dad pa'i gnas skabs can tho ba la sogs pas lhan cig byas pa de'i nye bar len pas bskyed pas yul dang /dus tha dad par khas len pa ni rung ste/ de ni dngos po nyid du 'gyur ro/ /dngos po'i ngo bo ni de'i mtshan nyid can yin pa'i phyir ro/ /de lta yin dang sngar gyi gnas skabs las tha dad pa dang / tha mi dad pa'i rnam par rtog pa las ma 'das so//gal te dngos po ni don byed nus pa yin la med pa ni de lta ma yin no zhes zer na/ de la de nyid don byed nus pa'i dngos po zhes bya ba 'di smras so/ /de nyid sgrub par byed pa ni don gzhan las tha dad pa zhes bya ba la sogs pa'o/ /'dir brjod par nus zhes rjes su dpag pas zhes bya ba lhag ma'o//de nyid gsal bar byed pa ni gang byed pa zhes bya ba ni gtan tshigs kyi don to/ /rgyu dag gi khyad par zhes bya ba don gyis thob pa rjes su brjod pa'o/ /'di ni rang bzhin gyi gtan tshigs te byed bzhin pa ni don byed pa po bdag nyid kyi rang bzhin yin pa'i phyir ro//de'i bdag nyid kyi 'brel pa ni 'og nas sgrub par 'gyur ro/ /gal te ji ltar zhes bya ba ni mi mthun pa'i phyogs la 'jug pa srid pa nyid kyi gtan tshigs ma nges pa nyid du dgos par byed do/ /rgyu'i nus pa rnams ni sna tshogs te/ dper na kha cig dngos po'i ngo bo'i 'bras bu skyed par byed la/ yang gzhan ni med pa yin pa de ltar sa bon la sogs pa rnams gdon mi za bar 'bras bu byed par nus pa'i myu gu la sogs par byed do/ /bum pa dang dbyig pa'i tshogs phal cher 'bras bu mtha' dag gi rgyur nus pa med pa'i dngos po med par skyed par byed do//'bras bu med pa byed pa ma yin na yang / 'ga' zhig tu 'bras bu byed pa 'di la 'gal ba ci yod/ gzhan gyi bsam pa blangs nas sel bar byed pa ni gang dngos po med pa'i ngo bo gdon mi za bar khyed kyis mngon par 'dod pa rgyus skyed pa/de yang 'og nas 'byung ba'i rigs pas khyad par gyi rnam pa dang ldan par 'dod par bya'o/ /gal te de ni bdag cag gis mngon sum gyis bzung ba'i mtshams las 'das pa'i yul can du 'gyur na yang rjes su dpag pa la sogs pa rnam par rtog pa'i yul nyid du ni nam yang spang bar 'os pa ma yin no//de ltar yin dang rtog pa po gcig rgyud de yang dag pa'i khyad par mtshungs pa'i rnam par rtog pas yang nas yang du bslan pa'i mtshan nyid kyi bsgom pa rab kyi mthar thug pa las byung ba'i gsal bar snang ba'i thams cad mkhyen pa'i ye shes kyi spyod yul du nges par 'gyur ba'i de nyid kyi rgyur 'gyur te/rgyu ma yin pa yul ma yin pa zhes bya ba'i rigs pas so/ /des na 'di ni gdon mi za bar mthar thams cad mkhyen pa'i ye shes kyi 'bras bu byed par 'gyur ro/ /des na thams cad mkhyen pa'i mngon sum gsol bar bya ba'am/'bras bu med pa de'i 'bras bu byed pa nyid du khas blang bar bya'o/ /de spong bar byed pa'i rgyu yang dag par ni yod pa yin te/ dbang po las 'das pa nyid kyi rang bzhin mi dmigs pa'i bya ba ma yin la/ de ni rtsa ba nyid yin pa'i phyir gzhan gyis yang ma yin no//sgrub par byed pa ni srid pa'i rjes su dpog par byed pa yod de/ yang goms pa las khyad par du 'gyur ba srid pa de ni gsal bar snang ba'i shes pa srid pa yin te/ 'di lta ste dper na/ 'dod pa dang mya ngan la sogs pa goms pa'i gnas skabs kyi bur med kyi ngo bo lta bu'o//sgra dang / rnam par rtog pa rjes su dpog pas yul du byas pa'i blang bar bya ba dang dor bar bya ba dang / de'i thabs kyi tshogs 'dzin pa'i 'gro ba yang goms pa las khyad par srid do zhes bya ba la sogs pa'i rjes su dpag pa ni gzhan du bstan to//de bshad pa ni sgrub par byed pa yang yod pa bzhin no zhes bya ba'o/ /lhag ma ni gsal lo/ /de ltar rgyu byas pa'i gtan tshigs ma nges pa nyid spangs nas 'grel pa nges par byas pa'i phyir mi mthun pa'i phyogs la ldog pa sgrub par byed pa'i tshad ma bshad pa ni des na don bya ba mtha' dag ces bya ba'o//dngos po med pa la bya bas don byed par nus pa bsgrub par bya ba la don byed nus pa thams cad dang bral ba ni de'i mi mthun pa'i phyogs yin no/ /de la bya ba nyid kyis ngo bo nyid dang 'gal ba med pa ngo bo ma yin pa ngo bo dang bral bar 'gyur la/ nus pa thams cad dang bral ba ni ngo bo dang bral ba'i bya ba ngo bo dang ldan pa yul dang dus dang gnas skabs kyi khyad par gyi rgyus byed pa yin no zhes bstan zin to//des na bya ba nyid kyi ngo bo dang ldan pa dang / 'gal ba la ngo bo dang bral bar thal bar 'gyur bas bsgrub bya las bzlog pa don byed nus pa dang bral ba las ldog pas don byed nus pa bsgrub bya dang de'i bdag nyid du sgrub pa'i phyir rjes su 'gro ba dang ldog pa grub po//bya ba nyid kyang pha rol pos khas blangs pa byas pa'i phyir mtshan nyid gsum tshang ngo / /'di ni thal bar 'gyur ba'i gtan tshigs so/ /gang gi don du 'di brjod pa de mjug sdud par byed pa ni de bas na don byed pa zhes bya ba'o//khyed kyis smras pa'i rnam pas bum pa med pa ni dngos po nyid du 'gyur te/ bshad pa'i rigs pas don byed par nus par 'gyur ba'i phyir ro/ /de ltar na de ni bum pa las tha dad pa'am/ tha dad pa ma yin pa zhes bya ba'i phyogs gnyis su thal bar 'gyur ba'i skyon so na 'dug pa yin no//rang gi mngon par 'dod pa'i rnam pa bstan pa'i phyir des na dngos po med pa zhes bya ba smos so/ /bum pa med pa zhes bya ba rgyus bya ba ni ma yin te/ gang gis 'di yul dang dus dang rnam pa nges pa'i ngo bor 'gyur/ 'on kyang ngo bo dang bral ba de bum pa'i ci'i ngo bo yang ma yin pa rang gi ngo bo nyams pa yin no//de ni cung zad ma yin la ma yin pa 'ba' zhig go zhes gang bshad pa yin no/ /thal ba las bzlog pa ni 'di yin te/ gang don thams cad byed par mi rung ba de ni de'i 'bras bu ma yin te/ nam mkha'i me tog bzhin no/ /bum pa med pa yang don thams cad byed par mi rung ba'i phyir zhes bya ba ni khyab par byed pa mi dmigs pa'o//'o na bum pa med pa byed do zhes bya ba smra ba 'di'i don ci yin/ de ston par byed pa ni dngos po med pa byed do zhes bya bas ni zhes bya ba la sogs pa'o/ /bshad pa'i rigs pas dngos po med pa byed ces bya ba las kyi don ni 'thad pa ma yin te/don ji lta ba bzhin du so sor brtags na bum pa'i dngos po mi byed do zhes bya ba 'di nyid rigs pa'i rjes su 'gro'o/ /'o na de ltar byed do zhes bya ba'i don dang 'brel pa la ltos pa'i dgag pa ni tshig phyi ma lhan cig bsdu bar mi 'gyur te/ nus pa med pa'i phyir ro//da ni ji ltar nyi ma mi mthong ba'i zhes bya ba la sogs par sbyar ro/ /de dag nyid la sbyar bar 'os so zhe na/ gzhan la ci ste mi 'gyur nus pa ni gzhung lugs kyi rjes su byed pa'i phyir ro/ /'o na ni nyi ma mi mthong zhes bya ba la sogs pa sbyar bar mi bya'o/ /de dag sbyor ba ni 'chad pa po'i tshig yin pa'i phyir ro//de'i bshad par bya ba dang 'gal ba 'chad pa po'i tshig la gus par bya ba ni ma yin no/ /'chad pa po dag ni mdo byed pa las ches mngon par brtson pa'i phyir de'i tshig ni tshad ma yin no zhe na/ de dag gis ches khyad par 'phags pa 'ga' zhig ces khyad par mi shes pa'i phyir 'jig rten sbyor na ni slu ba dang cig shos dag las khyad par shes pa yin no//de ltar gang nyi ma mi mthong ba'i zhes bya ba la sogs pa bzhin du dngos po med pa byed do zhes bya ba la sogs pa yang 'jig rten spyad pa sbyor bar 'os so/ /sbyor ba po dang rtogs pa po mtshungs par rtogs pa ni yod de/de la bstan bcos byed pas khas ma blangs pa'i byed pa can spong ba'i rgyu ni bstan par mi bya'o/ /de'i brang brdungs shing cho nges btab kyang 'jig rten mi ldog pa'i phyir ro zhes bshad zin to/ /gzhan yang skyes bus 'dod rgyal du yongs su sbyar ba'i brda tsam gyi rjes su byed pa'i sgra rnams rang dbang du gnas pas sus zlog par byed/zlog par byed na yang glang po che smyo ba bzhin du de dag 'pham par 'gyur ro/ /'di ni kho bos rab tu byed pa gzhan du brjod pa'i phyir 'dir mang po mi brjod do/ /de kyus ma la sbyor bar byed pa ni mi byed pa'i byed pa po de yang zhes bya ba'o/ /de lta yin dang cung zad kyang mi byed pa'i lhan cig nyid nye ba'i rim gyis 'gyur bas skad cig ma ma yin par rim gyis 'bras bu byed pa yin te/'jig pa'i rgyu bzhin no zhes gang smras pa de ni dpe ma grub pas bsal ba yin no/ /de ltar re zhig 'jig pa'i rang gi ngo bo dpyad pas tho ba la sogs pa'i rgyu'i dngos po bsal nas da ni gzhig par bya bar mngon par 'dod pa'i bum pa la sogs pa'i dngos po'i rang gi ngo bo dpyad pas de dag gi rgyu nyid bsal bar bya ba'i don du mi nus pa dang don med pa sgrub par byed pa ni gzhan dang gzhig par bya ba'i dngos po ci zhes bya ba la sogs pas so// phyogs dang po la ni don med par bstan la phyi ma la ni mi nus pa'o/ /de rgyu nus pa med phyir dang / /gang zhes der rang bzhin gyis 'gyur/ /zhes kyang bshad zin to/ /rnam pa gzhan dogs par byed pa ni 'di snyam du zhes bya ba'o/ /rdza mkhan la sogs pa rang gi rgyu las bum pa la sogs pa tho ba la sogs pas 'jig pa'i rgyu nye ba'i dus tshun chad du mi 'jig par skye ba yin no//de bas na 'jig pa'i rgyus bskyed pa yod pa yin no zhes bya ba'o/ /des sel bar byed pa ni de yang zhes bya ba la sogs pas so/ /de ltar brjod pa na de dag dus cung zhig gnas pa'i rang bzhin can yin no zhes khas blangs par 'gyur ro//dus cung zhig gnas pa'i chos can rnams la zhes bya ba ni dus cung zhig gnas pa gang dag la yod pa de dag go/ /dus yud tsam mam mig 'byed pa'i dus su gnas pa'am/ skad cig gnyis su gnas pa yang rung ste/ gang gi tshe skad cig gnyis pa'i dus su de dag gi 'jig pa'i rgyu lhags pa de'i tshe sngar rang gi rgyu las skyes pa'i skad cig gnyis su gnas pa'i rang bzhin snga ma de yod dam 'on te med/med pa'i phyogs la 'on te yang zhes bya ba la sogs pas phyis skyon ston par 'gyur ro/ /gal te yod do zhe na/ 'o na de ni skad cig gnyis sdod pa'i rang bzhin yin pa'i phyir skad cig gnyis pa dang gsum pa la gnas par 'phan par 'gyur ro//de ltar skad cig gnyis su gnas pa ma bsal ba'i phyir bzhi pa dang lnga par yang rga ba dang 'chi bar mi 'gyur ba kho na'o/ /'di bshad pa ni rnam grangs 'di zhes bya ba ste/ zol brjod pas so//de nyid kyi phyir zhes bya bas phyogs gzhan skyon gyi gnas skabs mtshungs par ston par byed do/ /sngar ni 'jig pa'i rgyu nye ba la ltos pa'i dus la bsdad nas cung zad gnas pa ni srid par byas nas sun phyung la/ da ni yongs su brtsis pa'i skad cig cung zad kyi mtshams su mi 'jig par dngos po de'i rgyu las skyes pa yin no zhes bya ba ni bye brag go//skyon ni snga ma bzhin no/ /de bshad pa ni phyogs 'di yang zhes bya ba'o/ /des na de ltar 'jig pa'i rgyu nye ba'i dngos po sngar skyes pa'i skad cig gnyis su sdod pa'i rang bzhin de yod do zhes bya ba'i rnam pa la sun 'byin pa brjod nas med do zhes bya ba'i phyogs 'di la yang brjod pa ni 'on te yang zhes bya ba smos so//de la bshad pa de ltar na ni sngar gyis zhes bya ba ste/ mthar phyis skyes pa'i rang bzhin gyis snga ma'i mtha' la'o/ /rtag pa'am mi rtag pa zhes bya ba ni bdag nyid kyis 'jig pa mi 'jig pa'i ngang can zhes bya ba'i don to//phyogs gnyis ka la yang mi nus pa dang don med pa snga ma bzhin du brjod par bya'o/ /phyis skye ba la yang rnam pa de ltar brtag pa byas la rnam pa de lta bu nyid kyi skyon brjod par bya'o/ /'dir ni'i sgra ni gtan tshigs kyi don to/ /des na zhes bya bas mjug sdud par byed do/ / gang phyogs snga ma smra bas dpe bsgrub par bya ba'i phyir dpe gzhan brjod pa tho ba la sogs pa bum pa la sogs pa'i 'jig pa'i rgyu rnams de'i 'jig pa skyed pa la rjes su mthun pa'i khyad par yang ma yin te/ 'di lta ste dper na myu gu la sogs pa skyed pa'i rgyu sa bon la sogs pa la rnam pa de skye ba'i rjes su mthun pa'i khyad par mi byed pa yin no zhes bya ba de rjes su brjod nas sun 'byin par byed pa ni de yang zhes bya ba la sogs pa ste/dpe dang don dag shin tu mi mtshungs zhes bya ba'i tha tshig go/ /des ni gang gi tshe de nyid ni nye bar brjod pa med pa 'du bya ba'i snod ma yin pa de'i tshe sa bon la sogs pa myu gu skyed pa'i sngar tha dad pa'am de lta bu ma yin pa mi byed pa nyid du rigs pa yin no//'o na de dag 'di'i ci byed pa yin zhes bya ba 'di la bshad pa 'di'i gzhan zhig byed pa ni ma yin gyi 'on kyang de nyid kyi snga na med pa'i 'jug pa skyed par byed pa yin no//de bshad pa ni sa bon la sogs pa zhes bya ba'o/ /gzhig par bya ba dang 'jig par byed pa dag ni bskyed par bya ba dang / skyed par byed pa dang mi mtshungs pa nyid du ston par byed pa ni gzhig par bya ba zhes bya ba'o/ /gzhig par bya ba mngon par 'dod pa'i dngos po'i ngo bo yin pa'i phyir 'jig pa'am de dang rjes su mthun pa'i khyad par tha dad pa'am rnam pa gzhan du zhes rnam par rtog pa gnyis las ma 'das so//de bzhin du gzhig par bya ba yang ci rang las ldog pa'i chos can nam 'on te de lta bur gyur pa ma yin pa zhes brgal zhing brtag pa'i rigs so//de ltar brgal zhing brtags pa na ji ltar rigs par rgyu nus pa med pa dang / don med par thal bar 'gyur ro/ /rtsod pa 'di mi nus pa dang don med pa'i khongs su 'dus par bstan par ni ci tho ba la sogs pa zhes bya ba smos so/ /gzhig par bya ba bskyed par bya ba dang mi 'dra bar brjod par mjug sdud par byed pa ni gzhig par bya ba'i zhes bya ba'o//gang yang zhes bya ba ni tho ba la sogs pa 'jig pa nyid kyi rjes su 'gro ldog gi rjes su grub par byed pa sngar bstan pa rjes su brjod nas de yang zhes bya ba la sogs pas sun 'byin par byed do/ /'di skad du bstan pa yin te/rjes su 'gro ba dang ldog pa dag las gzhan ma yin pa nyid du grub na de'i 'bras bu skyed par nges pa yin te/ rnam pa gzhan du grub pas ni de dag bum pa la 'gog go/ /'jig pa'i rang bzhin byed pa la sngar brjod pa'i nyes pa bstan pas lhag mar gyur pa gyo mo'i rgyun bskyed pa nyid kho bo'i rjes su 'gro ldog byed par 'thad pa de ni rigs pa dang ldan pa'i phyir kho bo cag gis khas blangs pa yin no//de bshad pa ni de yang zhes bya ba'o/ /gang gi don du 'di brjod pa de mjug sdud par byed pa ni des na zhes bya ba la sogs pa'o/ /'jig pa'i rgyu sel bar byed pa 'di yang sngon gyi slob dpon rnams kyis/rgyu med phyir na 'jig pa ni/ /rang gi ngo bos rjes 'brel nyid/ /ces bya ba la sogs pa skad cig ma 'jig pa grub par rigs par gzhan gyis brjod do/ /gzhung byed pa 'di ni yod pa'i gtan tshigs nyid kyis stobs rtogs par bya la/ de'i skyon bsal bar bya ba'i phyir nye bar bkod do/ /da ni gzhan rang gi mngon par 'dod pa'i grub pa'i mtha' la 'dod pa med par rtogs par byas nas grub pa'i mtha' smra ba g.yeng bar bya ba'i phyir skabs tshol bar byed pa ni gal te zhes bya ba la sogs pa'o/ /ji ltar bshad zin pa'i rigs pas skad cig ma ma yin pa don byed pa la lhan cig 'thad par 'gro ba ma yin pa de bzhin du 'chad par 'gyur ba'i rigs pa skad cig ma yang zhes dam bcas nas 'thad par smras pa ni 'di ltar zhes bya ba'o//sa bon skad cig ma yang zhing la sogs pa'i lhan cig byed pa la ltos pa nas myu gu dang rjes su mthun pa'i rgyud mtshungs pa'i skad cig gzhan byed do//de la gal te sa bon zhing la sogs pa'i lhan cig byed pas byas pa'i khyad par la ltos pa med par myu gu dang rdzas su mthun pa'i khyad par skyed na myu gu skyed pa la'ang / de bzhin du 'gyur te/ khyad par med pa'i phyir ro/ /ci ste myu gu bzhin du des byas pa'i khyad par la ltos pa kho nas de la mngon du byas pa skyed na yang thug pa med do/ /ji lta zhe na/ sa bon gyis rang gi nye bar len pa las byung ba'i 'bras bu thams cad la chu la sogs pa lhan cig byed pas byas pa'i khyad par la ltos par bya'o zhes khas len na myu gu dang rjes su mthun pa'i mtha'i skad cig gis mtshan nyid kyi khyad par bskyed par bya ba la de skyed pa'i rjes su mthun pa'i khyad par la ltos la de'i khyad par bskyed par bya ba la yang de'i rjes su mthun pa'i khyad par la ltos pa de srid du sa bon chu la sogs pa dang phrad pa'i skad cig bskyed pa 'di ni gang yang rung ba gnas pa'i chu la sogs pa nye bas byas pa'i khyad par la ltos par 'dod par bya dgos pa'i phyir thug pa med do//de la 'di snyam du sa bon skye ba'i mtshams su lhan cig byed pas byas pa'i khyad par brgyud pa yin pa'i phyir thug pa med pas byas pa'i skyon yod pa ma yin no snyam du sems na/skyes pa nas zhes bya ba smos te/ ji ltar zhe na/ 'di la bshad pa nges pa'i dus su zhes bya ba'o/ /skyon 'di spang ba'i phyir de 'dod par mi bya zhes bya ba'i don to/ /chu la sogs pa nye ba'i dus tha dad pa'i rjes su byed pa'i phyir sa bon kha cig lo phyed kyi mthar thug pa'am/kha cig lo'i mthar thug pa'i nges pa'i dus su skye ba'i myu gu de gtan du 'byung bar 'gyur ro zhes rang gi dus tshigs su zhes bya ba'i 'og gi dpyad pa dang rjes su 'brel par bya'o/ /de nyid 'byed par byed pa ni/ 'di ltar zhes bya ba'o//bshad zin pa'i rab tu byed pas chu la sogs nye bas sa bon gyi bangs pa dang ches bangs pa la sogs pa'i khyad par byed pa dang phrad pa'i skad cig skye ba'i rjes su mthun pa'i khyad par shin tu ring ba ma yin par 'jug pas de'i gnas skabs dang rjes su mthun pa yang ring bar 'jug pa de ltar gang yang rung ba na gnas pa 'di dag rtag tu 'byung bar 'gyur ba'i phyir myu gu dang rjes su mthun pa dang ches rjes su mthun pa dang ches shin tu rjes su mthun pa la sogs pa'i khyad par 'byung ba'i rim gyis sa bon las nyi ma gnyis sam gsum na myu gu skye bar 'gyur gyi sa bon la sogs pa lhan cig byed pa nye ba'i dus kyi mtshams tha dad pas kha cig zla ba'i mthar thug pa'am/lo'i mthar thug pa'o zhes ni ma yin no/ /yang na myu gu thams cad kyi tshe 'byung bar nges te/ nyi ma gnyis sam gsum tshun chad du myu gu skye bar thal ba de ni nges pa'i dus su zhes bya ba 'di nyid kyi don du'o//ci ste 'di skye ba'i dus kyi mtshams nyi ma gnyis sam gsum las yin no zhes gang las nges par bzung zhe na/ brjod pa gang gi tshe skye ba'i dus nyid na chu la sogs pa dag dang phrad par byed pa de'i tshe dus de tsam gyis myu gu skye bar mthong ba de 'di'i rang gi dus tshigs yin no zhes de'i tshe shes so//sa la sogs pa nye ba'i sa bon gyi khyad par bskyed par bya ba'i khyad par 'ga' zhig la brten pa ma yin te/ gang yang rung ba na gnas pa byed pa po nyid du khas len pa'i phyir de 'dra ba rtag tu yod par 'gyur ro/ /thal bar 'gyur ba brjod nas de'i bzlog pa bshad pa ni/ de ltar yang ma yin no zhes bya ba'o//phan par byed pa ma yin pa'ang / /ltos par bya ba ma yin no/ /zhes bshad pa ni/ de med pa'i phyir zhes bya ba'o/ /de bzhin du sa bon yang ltos par bya ba ma yin no/ /de lta yin dang zhes bya ba ni sngar bkod pa'i rtsod pa mjug sdud par byed do/ /'di snyam du zhes bya ba ni grub pa'i mtha' can gyi 'dod pa dogs par byed do//gang gis sngar brjod pa'i rim pas thug pa med pa la sogs pa'i nye bar thal bar 'gyur ba chu la sogs pa'i nang na gnas pa'i skad cig skyed pa ltos pa'i sa bon zhing la sogs pas byas pa'i khyad par ni khas mi len to/ /'o na ci zhe na/nye bar 'du ba'i rkyen tshogs pa'i rgyun rnams kyis byas pa'i khyad par sa la sogs pa de dang phrad pa'i skad cig skyed par byed la/ phyis ni sa bon la sogs pa myu gu dang rjes su mthun pa'i khyad par gyi don nyid du byed do/ /nye bar tshogs pa'i rgyu dag rtag tu yod pa yang ma yin te/de dag kyang rang gi rgyu nye bas byas pa nyid yin pa'i phyir ro/ /des na sngar brjod pa'i skyon du 'gyur ba ma yin no/ /gzhan ni 'di la yang thug pa med par bstan par bya ba ni nye bar 'god par byed pa ni de la yang zhes bya ba'o/ /nye bar 'du ba rnams sa bon la sogs pa bsre ba'i gnas skabs kyi khyad par skye ba nye bar 'du bar byed pa gzhan gyis byas pa'i khyad par nyid du ldan par rigs kyi de lta ma yin na res 'ga' byed pa mi rung ba'i phyir ro//de lta na yang thug pa med do/ /yin mod ce na/ 'bras bu 'grub pa re re zhing rgyu btsal bar bya ba la nye bar 'du ba'i rkyen 'di tsam brtag par bya bar nus pa ma yin no//'di la brjod pa zhes bya ba la sogs pas grub pa'i mtha' byad do/ /bsdus pa'i don ni 'di yin te/ gang zhig rang gi rgyud du gtogs pa'i nye bar len pa las byung ba'am/ lhan cig byed pa gzhan gyi rgyud du gtogs pa nyid kyis 'bras bu skyed par 'gyur ba rgyud gzhan gyis byas pa'i khyad par la rgyab kyis phyogs par 'jug par nye bar len pa'i rgyud 'ga' zhig ni srid pa ma yin no//'ga' zhig lhan cig byed par 'gyur ba chu la sogs pa rgyud gzhan gyis byas pa'i khyad par la ltos la/ kha cig ni nye bar 'du ba'i rkyen zhes bya ba rgyud gzhan gyis byas pa'i rjes su 'jug pa'i khyad par gyi don snod du byed do//dper na sa bon gyi rgyun chu la sogs pa'i rgyun gyis byas pa'i phangs pa la sogs pa'i 'du byed la ltos nas myu gu skyed par byed pa la sogs pa mtshams dang bcas pa'i yul du 'jug pa 'bras bu sa bon gyi skad cig gzhan skyed pa'i phyir sa bon gyi rgyun gang yang rung ba na gnas pa'i chu la sogs pa'i khyad par bdag gir byas pa srid pa ma yin na gang gis phyogs snga mas brjod pa'i skyon dang bcas par 'gyur/'on kyang phan tshun nye bar 'du ba'i rgyu rlung dang 'debs pa po la sogs pa rgyud gzhan nyid kyis de'i gnas skabs thob pa'i phyir ltos par byed do//nye bar 'du ba'i rkyen thug pa med par 'gyur ba yang sa bon dang myu gu thug pa med pa bzhin du gnod par byed pa ma yin no/ /de lta mod kyi lan rgyas par brjod par bya ste/ rlung la sogs pa rang gi rgyu tshogs pa kho na las yang dag par skye ba thob pa'i khyad par skye ba de dag nye bar 'du ba gzhan la ltos pa ni ma yin no//ji srid du skye ba'i rgyu la thug pa de srid du zhing gi bdag po'i skyes bu'i lung las gnas skabs de lta bu'i brtson pa thob la zhing gi bdag po yang de'i ngo bor brten pa ni gzhan las yin la/de yang gzhan las yin la/ de yang gzhan las yin no zhes thug pa med do/ /'dir snga ma dang phyi ma'i gzhung rnam par dpyad pas ba lang dang glang gi tshul gyis sa bon la sogs pa lhan cig byed pa la nye bar 'du ba'i rkyen las tha dad pa'i sgra gzhung byed pas byas so zhes bshad par bya'o//de la myu gu ni khyad par brgyud pa las skye ba'i chos can yin la zhes bya ba ni lhan cig byed pa sa bon la sogs pas byas pa'i khyad par brgyud nas skyes pa'i rang bzhin gang la yod pa de la skad cig ces bya'o/ /khyad par dang po ni zhes bya ba ni 'dir sa la sogs pa dang phrad pas brtsams pa de dang tshogs pa'i sa bon gyi skad cig dang po la brjod par 'dod de/de nyid thams cad kyi thog ma yin pa'i phyir ro/ /de ni lhan cig byed pa sa la sogs pa nye bas skyed pa phyi ma phyi ma'i khyad par brgyud pa la ltos nas myu gu dang rjes su mthun pa la brten pa ma yin te/ nye bar 'du ba byed pa nyid las 'di skyed par byed do zhes bya ba'i don to//sa bon ni zhes bya ba ni nye bar len pas sa bon la sogs pa 'bras bu rtsom pa na rgyud gzhan gyis nye bar ma byas par ni rnam pa thams cad du mi rtsom ste/ gang gi phyir res 'ga' bar 'gyur/ rgyud gzhan la ltos pa med par 'gyur na yang bye brag med par 'gyur ro zhes bya ba'i don to//lhag ma ni snying po bkrol ba'i phyir shes par sla'o/ /des na zhes bya ba ni ji skad du bshad pa'i don nye bar sdud par byed do/ /'bras bu la la chu la sogs pa dang phrad pa'i sa bon gyi gnas skabs kyi bdag nyid phan par byed pa ma yin pa'ang gang yang rung ba na gnas pa'i chu la sogs pa 'thad par rigs te/de la ni nye bar 'du ba'i rgyu rnams kho na phan par byed pa nyid yin pa'i phyir ro/ /de nyid ni bangs pa dang ches bangs pa dang ches shin tu bangs pa'i gnas skabs la sogs pa 'bras bu gzhan la myu gu'i mthar thug par sa bon gyi bogs byed par nus pa yin no zhes bya'o//des na de ltar bar na gnas pa'i rtsod pa yongs su bsal nas phyogs snga mas brjod pa'i skyon spang bar bya ba'i phyir gang yang zhes bya ba 'di smos te/ de yang dpyad pa'i skad kyi dbyings ni dpyad pa'i yan lag gi bsal ba la 'jug go//de dpyad nas bsal bar bya'o zhes bya ba'i don to/ /'di la tshad ma ni thob par byed pa yin no zhes bya ba la brtsam par bya ba la tshad ma brtag pa'i gzhung shin tu mang ba 'dir tha snyad kyi dbang du blangs pa ni de nyid du bkrol ba'i phyir yang 'dir bshad par mi bya'o/ /de'i snying po'i don ni 'di tsam yin te/yod pa dag ni mngon sum gyis ma rtogs pa'i phyir ma grub pa yin no zhes gang smras pa de ni ngan par smras pa yin te/ mi slu bar byed pa'i shes pa ni tshad ma yin no/ /mi slu ba ni slu ba med pa'o/ /de ni thob par byed pa'o/ /de yang 'jug par byed pa'o//shes pa ni ston par byed pa nyid 'jug par byed pa yin pa'i phyir ston par byed pa nyid 'jug par byed pa yin no zhes bshad zin to/ /des na de ltar tha snyad 'dogs pa po tha snyad la nye bar mkho ba'i shes pa ni tshad ma nyid du smras pa yin no/ /rjes su dpag pa ni rnam par rtog pa'i rang gi rigs las skyes pa zhen pa'i bdag nyid yin pa'i phyir tha snyad 'dogs pas 'jug pa la sogs pa'i tha snyad kyi/yan lag tu mi 'thad pa ma yin no/ /mngon sum yang don la lta ba tsam zhen par ma byas pa ni/ tha snyad 'dogs pa po tha snyad kyi yan lag nyid du nus pa ma yin pa kho na'o//des na mthong ba nyid du zhen pa'i mthar thug pa 'jug pa'i yul ston par byed pa yin no/ /sgro 'dogs re re rnam par gcod pa'i yul can gyi zhen pa de dag zhen pa gcig tu ldog pa gcig gi mthar thug pa'i dngos po'i ngo bo rtogs pa ni ldog pa gzhan la brten nas 'jug pa ma yin no//des na chos can sgra la sogs pa'i yul can gyi mngon sum gyi shes pa ni mi rtag pa nyid dang skad cig ma nyid kyi chos spangs nas yod pa ma yin pa las log pa'i bdag nyid kyi yod pa nyid kyis mthar thug go/ /de'i mthar thug pa'i yod pa ni med na mi 'byung ba nyid kyis skad cig ma nyid 'phen pa'i phyir gzhan dag tshad ma'i byed pa'i yul mi shes pas ma grub pa la sogs pa brtsad pa de ni ji skad du bshad pa'i tshad ma'i bya ba'i bstan pas dor bar bya'o//skyon gzhan yang bsal ba'i phyir dran par byed pa gang yang zhes bya ba'o/ /de yang zhes smos pas bsal ba yin no//'di la zhes bya ba la sogs pa'i don phal cher bshad zin pa'i phyir zos zin par za bar mi bya'o/ /de ni de nyid de'i yul yin zhes bya bas mngon sum gyi ngo bor brjod pa yin no/ /'di la gling gzhan zhes bya ba la sogs pa la slob dpon gyis 'di ni ba lang ste/ rkang pas reg par mi bya'o zhes bstan zhes gling gzhan du 'ongs zhes de ltar go rims bzlog pa la sbyar bar bya'o//yul gzhan du ba lang mthong ba ngo shes pa skye'o zhes bya ba la yul gzhan gling gzhan du shes par bya ste/ gling gzhan dang ldan pa'i rigs pa'i phyir ro/ /de ltar yin dang ba lang gi gsal ba gsal bar tha dad par bstan par 'gyur te/gling gzhan nas de 'ong ba ni 'thad par dka' ba'i phyir ro/ /ngo shes pa skye zhes bya ba ni de nyid 'di yin no zhes sngar rtog pa la mngon du phyogs pa skye ba'o/ /des na tha dad par rtogs pa'i snying po can tha mi dad par rtogs pa ni rang nyid nyams pa tshad ma ma yin te/rab rib dang 'brel ba can gyi zla ba gnyis su shes pa bzhin no/ /des na bstan pa'i zla ba gcig shes pas mdun du byas pa gsal ba skyes kyang rab rib la sogs pa'i rgyu la bkod pas 'jig pa'i phyir nyams pa yin no zhes grag go/ /'di snyam du zhes bya ba ni gal te yang gsal bar rtogs pa tha dad pa'i khyad par gyis tha mi dad pa 'jig pa der gtogs pa'i tha mi dad pa 'gal ba'i phyir de 'dzin par mi nus pa de lta na yang de dang 'brel pa'i spyi 'dzin pa la 'gal ba med do//gsal ba tha dad kyang de ni tha mi dad pa yin no/ / de sel bar byed pa ni de yang mi rung ste zhes bya ba la sogs pa'o/ /gang gi phyir khyed cag ngo shes pa mngon sum du 'dod pas de nyid mngon sum gyis rtogs so zhes brjod do/ /'di yang nye bar bkod pa'i gnas skabs nyid du 'di la de nyid mngon sum gyis gzung ba yin no zhes bya ba 'dir smras zin to//mngon sum du mngon par 'dod pa'i ngo shes pa 'di ni ba lang nyid la sogs pa'i spyi mthong bar zhen par byed pa ma yin te/ skye ba la sogs pa dang rjes su 'brel pa'i kha dog dang dbyibs kyi khyad par dang ldan pa'i dngos po zhen par nyams su myong ba'i phyir ro//'di snyam du zhes bya ba la sogs pa ni gnyi ga ngo shes pa'i yul yin no zhes gzhan gyi 'dod pa dogs par byas nas de ni ma yin te zhes lan 'debs par byed do/ /gzhan dag gi bsam pa ni 'di yin te/ spyi dang khyad par dag 'dres pas khra bo la sogs pa rang gi mtshan nyid ngo shes pa'i mngon sum yang 'dres par snang ngo //gang gi phyir de nyid 'di yin no zhes de ltar skyes te/ de zhes bya ba ni tha dad pa'i cha la reg pa yin te/ yul dang dus tha dad pa ni ngo bo tha dad pa yin pa'i phyir ro/ /nyid do zhes bya ba ni tha mi dad pa'i cha snang ba yin te/sngar rtog pa gang yin pa de ni lkog tu ma gyur pa'i rnam pa la sogs pa 'di yin no zhes gzhan du 'dzin pa ma yin te/ 'on kyang tha mi dad ces bya ba'i don to/ /de lta yin dang skye ba la sogs pa'i chos can snang ba dang 'gal ba yang med do zhes bya'o/ /grub pa'i mtha' smra ba ni spyi snang ba mi dmigs pas sel bar byed de/gal te spyi snang na de las da ltar yang ji lta ba bzhin du ma rtogs pa'i rgyal ba dang rgyal dpog pa'i slob ma dag spyi la brten pa'i rtsod par mi 'gyur ro/ /de'i phyir tha dad pa'i ngo bor snang ba'i dbang gis ngo shes pa las nyams pas dus gzhan du gnas pa'i dngos po gzhag par mi nus pa ma yin no//'di snyam du zhes bya ba la sogs pas ku mA ra ri la sogs pa'i 'dod pa dogs par byed do/ /'ug pa pa dag mtha' gcig tu spyi gsal ba las tha dad de/ de dag ni spyi'i shes pa tha mi dad par snang ba dang 'gal te/ma nges par smra ba la ni ci zhig ltar tha dad pa la ci zhig ltar tha mi dad de/ de la tha dad pa'i phyogs dang rjes su 'brel pa la ni tha mi dad pa'i phyogs kyis bsal la/ cig shos kyi phyogs ni tha dad pa'i phyogs la brten nas sel bar byed par 'gyur ba'i phyir tha dad pa'i ngo bor snang ba 'gal bar 'gyur ba ma yin no//slob dpon ni mngon par mi 'dod pa'i spyi'i bdag nyid brjod par bya ba ma yin pa 'di tshig tsam gyis khas blangs/ tshad mas dgag par 'dod nas brjod par bya ba ma yin mod ces bya ba smos so/ /gang gi phyir tha dad pa'i rnams las tha mi dad par snang ba shes pa dmigs pa dang bcas pa nyid du sgrub pa'i phyir gzhan dag de la brten pas/gang gi phyir yul par ni blo/ /skye bar 'dod pa ma yin pa/ /des na de dag khyad par las/ /spyi ni gzhan du nges par 'dod/ /ces bya ba la sogs pa smras so/ /de las cir 'gyur zhe na/des na gal te zhes bya ba smos te/ tha dad pa'i khyad par shes pa de la ci yang bsal ba med pa'i phyir gzhung 'di thams cad dang 'di'i rnam grangs so/ /gsal ba yang goms pa myur ba la sogs pa lhan cig byed pa'i skyon dang bral ba'i phyir nye bar mi mtshon no zhes bya ba'i tshig ni rigs pa'i rjes su 'gro ba ma yin no//tha dad pa rnams la de'i rgyu mtshan gyi sgra 'jug par khas len pa'i phyir rgyu mtshan mi dmigs pas rgyu mtshan 'jug pa mi 'thad do/ /de las gzhan la blo dang ni/ /sgra 'jug phyir na mi rtog min/ /de las tha dad yod ma yin/ / spyi yi blo ni tha dang phyir/ /zhes kyang bshad do/ /de lta yin dang tha mi dad pa'i rnam pa'i shes pa nyid med pas yul gang zhig brtags pas spyi tha dad pa'am/ tha mi dad pa'am tha dad pa dang tha mi dad pa yongs su rtog par byed/ des na gal te spyi'i bdag nyid ji ltar gyur pa de bzhin du/ de'i dmigs pa mi ston pas de'i tshe spyi ngo shes pa log par khas blang bar byas pa'o/ /rang gi yul dang rjes su mi mthun pa'i phyir ro/ /spyi'i shes pa yang log pa yin te/ de'i rjes su byed pa'i shes pa med pa'i phyir ro/ /khyab pa'i ngo bo zhes bya ba ni tha mi dad pa'i zhes bya ba'i don to/ / tha mi dad pa cha nyid la rtsod pa srid pas de smos pa nyid kyis bsal ba byas pa yin no/ /gzhung phyi ma ni 'di nyid kyis spros pa'i don te shes par sla'o/ /de ltar rnam pa gcig pa can gyi shes pa bsal nas gzhan dag du ma la gcig yod pa'i dbang por gyur pa sgra gcig ston par byed pa de dag la snang ba mi dmigs pa stobs dang ldan pas mi snang ba nyid du grub pa'i mtha' can sel bar byed pa bshad pa ni ba lang ngo zhes bya ba la sogs pas so//dmigs par bya ba'i spyi gzhan dag gis kun du brtags so/ /de la mngon sum las bla lhag pas mtshon pa mdzes pa ma yin te/glang po mthong ba la de'i rjes kyis rjes su dpog pa ma yin no zhes rigs pa la mkhas pa smra'o/ /gal te zhes bya ba la sogs pas ngo shes pa tha mi dad pa'i rnam pa bsal nas gzhan gyi sgo nas rjes su brjod do/ /lan brjod par 'dod pa'o//lan gyi skabs byed pa ni de ni mi 'thad do zhes bya ba'o/ /tha dad pa dag mtshams sbyor ba ni ngo shes pa'i don yin no/ /'di la rnam pa tha mi dad pa'i dri ba yang yod pa ma yin no zhes lan brgyar nges par byas so/ /shes pa skad cig ma ni bstan pa 'dzin par 'thad pa ma yin no zhes bya ba'i rigs pa ni tshad ma brtag par dpyad zin to//kha cig ni rnam par rtog pa'i shes pa gsum po 'di nyams su myong ba'i bag chags la sogs pa'i tshogs las skyes pa'i tshig gsum po ni tha mi dad pa mtshon par byed do zhes rjod par byed do/ /de zhes bya ba ni sngar nyams su myong ba'i lkog tu gyur pa dran pa'o//'di zhes bya ba ni lkog tu gyur pa ma yin pa zhen pa'o/ /nyid ces bya ba ni gnyi ga mtshams sbyor ba'i shes pa'o/ /ngo shes pa ni gsum po de dag la brjod do/ /yang na ji skad du bstan pa'i so so'i shes pa dang 'dra ba rgyu dang rkyen gyi khyad par las skyes pa'i mi'i seng ge 'dra ba'i ngo shes pa gcig nyid yin no snyam du gzhan dag sems so//lta ba gnyi ga la'ang tha dad pa mtshams sbyor ba'i ngo shes pa cig shos kyi shes pa'i khyad par byed do/ /don gcig pa ni ma yin zhes bya ba ni gang las 'di skad cig ma ma yin pa nyid kyi tshad mar 'gyur ba snga ma dang phyi ma dag tha mi dad pa'i ngo bor snang ba ni ma yin no//mtshams sbyor ba nyid ni don gcig 'dzin pa ma yin no zhes dogs nas gzhan la 'dri bar byed pa ni mtshams sbyor ba zhes bya ba'i don ci zhe na zhes bya ba'o/ /slob dpon gyis bsams pa de rig nas lan 'debs pa ni 'ga' zhig la zhes bya ba'o//tha dad pa dang snang ba yongs su ma spangs pa kho nar rnam pa gcig gi 'bras bu byed pa la sogs pa'i rgyu mtshan la ltos pa gcig tu brtags pa ni mtshams sbyor ba zhes bya ba'i don to/ /mngon sum dang lkog tu gyur ba'i yul rnam par rtog pas sgro btags pa'i rnam pa tha dad par zhen pa'i rgyu mtshan yang mtshams sbyor ba 'thad pa ni gzhan sel du bstan pa bzhin no//lhag ma ni bsal lo/ /rjes su dpag pas gnod pa sel bar byed pa'i skabs kyi don bsdu ba ni spyi 'dzin pa mngon sum ni ma yin te zhes bya ba'o/ / 'di skad bstan pa yin te/ re zhig ji skad du bshad pa'i rigs pas mngon sum ltar snang ba'i ngo shes pas skad cig gis 'jig pa la gnod par mi nus so/ /ci ste ji ltar 'og nas ston pas rjes su dpag pa blangs nas 'di la gnod par nus so snyam du sems na/ 'di la brjod pa skad cig ma'i bdag nyid can gyis tha dad pa dgag pa bsgrub par bya ba la ngo shes pa po dang ngo shes par bya ba'i shes pa po dang shes bya dag sgrub byed du bstan pa yin la/de dag ni mi mthun pa'i phyogs tha dad pa'ang srid pas lhag ma dang ldan pa'i ma nges pa nyid do/ /gal te yang rgyud tha dad du gnas pa la de ma mthong ba de lta na'ang rgyu gcig tu gtogs pa'i nye bar len pa dang /nye bar len pa las byung ba byed pa dag la yang de 'gyur ba'i phyir mi mthun pa'i phyogs la log pa la the tshom za'o zhes 'di la mi rigs pa ci yod ces bya ba'i gzhung 'di'i bar gyis de'i don bstan to/ / gang yang grags pas gnod do zhes smras pa de ni kha cig la skad cig ma nyid du mthong ba yang grub pa'i phyir mi rigs so/ /des na zhes bya ba la sogs pas gzhan gyis brjod pa'i skyon bsal ba mjug sdud pa dang / rang gi phyogs sgrub par brjod pa'i phyir dam bca' bar byed do/ / da ni de bsgrub pa brjod pa gang zhes bya bas sgrub byed rjes su brjod nas de zhes bsgrub bya sgrub po/ /dper na zhes bya bas khyab pa'i yul bum pa la sogs pa dper byed do/ /yod pa yin no zhes bya ba ni sgrub par byed pa yod pa sgra la sogs pa la phyogs kyi chos nyid ston pa'o//de ni tshul gsum go bar byed pa'i rgyu can sgrub par byed pa'i ngag yan lag gnyis pa ni yan lag gcig gi rjes su 'gro ba dang ldog pa dag sgra'am don gyi nus pa dag la nye bar len pa'i phyir ro/ /phyogs chos smos pas phyogs chos nyid brjod do/ /'on kyang sgrub par byed pa'i yan lag rjes su 'gro ba la sogs pa nus pa med pa'i phyir sgrub byed yan lag mi brjod pa'i rgol ba tshar bcad pa'i gnas su thal bar 'gyur ba de'i don du gzhan gyis brjod pa'i ma nges pa nyid kyis dogs pa sel bar nus pa'i rjes su 'gro ba dang ldog pa'i rtsa bar gyur ba'i rang bzhin 'brel pa sgrub par byed pa'i gtan tshigs mi mthun pa'i phyogs la gnod par byed pa'i tshad ma khyab par byed pa mi dmigs pa'i mtshan nyid 'jug pa'i phyir nye bar 'god pa ni gang yang dngos po rnams zhes bya ba'o//phyogs kyi chos nyid kyang mngon sum gyis sgrub pas 'bad par bya ba ma yin no//don bya ba byed pa'i bdag nyid kyis yod pa ni khyab par byed pa yin la/ rnam par brtag par bya ba rim dang cig car dag ni khyab par byed pa yin no/ /gal te zlas dbye ba ni rang gi don la mthong gi'am gzhan gyi don la ma yin pa ma yin nam de ji ltar rim pa'am cig car dag ces bya ba'i don 'di la rim dang cig car dag gis zhes bya zhe na/brjod pa/ 'dir don go bas yod pa dang 'di dag la dang gi don yod pa kho na ste/ don byed pa la nye bar sbyor ba'i rnam pa re re yin gyi gnyi gas ma yin pas rnam par brtag pa yin pa'i phyir skyon med do/ /yang na dang bzhin du 'am la yang zlas dbye ba mthong ba'i phyir ma Ni ni'i tshig la gdon mi za bar gus par bya ba ma yin no//de'i phyir brang brdungs shing cho nges btab kyang 'jig rten mi ldog pa'i phyir ro zhes kyang bshad zin to/ /lam gyi don la zlas dbye bas mthong ste/ 'di lta ste/ dper na/sgra rnams thams cad dag gi ni/ /dngos po nye bar dpyad pa na/ /rigs sam yang na rdzas nyid la/ /dngos por brtag tu brjod phyir ro/ /zhes bya ba lta bu'o/ /'dir zlas dbye bar mtshungs par mthong ba'i phyir gcig lhag ma yin no/ /des na 'di dag ji ltar yod pa'i khyab par byed pa yin pa de ltar bstan pa ni rnam pa gzhan zhes bya ba la sogs pas so//rnam pa gzhan srid par 'gyur ba la ni khyab par nyams par 'gyur te/ /yod pa rnam pa gsum pa la srid pa'i phyir ro/ /de mi srid par 'gyur na gnyis nyid du nges pas de dag gis khyab po/ /ji ltar rnam pa gzhan mi srid ces bya ba 'di la bshad pa ni 'di ltar zhes bya ba'o//rnam pa der 'gyur na rim dang cig car bzhin du dmigs par bya ba kho nar 'gyur na dmigs par bya ba yang ma yin te/ des na med do zhes bya ba'o/ /'di snyam du rnam pa de dmigs par bya ba ma yin par 'gyur ro snyam du sems na/de ltar ni rigs par 'gyur ba ma yin te/ rnam pa gzhan rim gyis phyogs las phyi rol du gyur na gcig gi sde tshan du nges par bab la cig car las phyir byung na rim gyis bdag nyid kyi nang du 'dus pa yin te/ de dag ni phan tshun spangs te gnas pa'i mtshan nyid yin pa'i phyir ro//des na mi dmigs pa'i rnam pa gzhan ni med do/ /ci ste rim dang cig car dang rim dang cig car zhes bya ba'i rnam pa gsum po de dag kyang tha dad pa dang 'dus nas 'bras bu byed par grub par dmigs pa'i rang bzhin yin no zhes smra'o//de bsal bar 'dod nas 'di ltar zhes bya ba smos so/ /don 'di yin te/ re zhig mthong ba'i dngos po rnams kyi 'bras bu'i rim pa mi slu ba dang ldan pa'i mngon sum gyis dmigs la/ de bzhin du cig car yang ngo / /rim pa ni rim dang ldan pa du ma yin la cig car yang gcig dang du ma yin no//gal te yang rim dang cig car gyi bdag nyid kyi rnam pa gzhan 'ga' zhig srid par 'gyur na/ de las rim dang cig car gyi ngo bo tha dad pa nyid ma 'dres pa nyid du mthong bar byed do/ /de las cir 'gyur zhe na/ de lta yin dang zhes bya ba smos te/ gang zhig gang rim pa dang gang yang cig car ba 'ba' zhig pa de nyid ni cig shos kyi ngo bo dang 'dres par dmigs par thal bar 'gyur ba dang /'bras bu sna tshogs bskyed par yang thal bar 'gyur ro/ /'ba' zhig pa dang 'ba' zhig ma yin pa dag dmigs par ci'i phyir thal bar 'gyur/'ba' zhig pa dang 'ba' zhig pa ma yin pa dag ni rnam pa tha dad par khas len pa'i phyir ro zhe na 'di la de'i rim dang rim ma yin pa'i bdag nyid kyi rang bzhin gnyis po yang da ltar bdag cag gis mthong ba ci 'dra bar de tha dad pa de 'dra ba kho nar 'gyur ro zhes bshad zin to/ / de las cir 'gyur zhe na/ de las 'dir 'gyur te/ ji ltar tha dad par 'dres pa dang 'dra bar de bzhin du 'dres pa'i ngo bo yang tha dad pa dang 'dra bar 'gyur te/ 'dra ba ni gnyis la gnas pa'i phyir ro/ /de ltar gyur dang 'dres pa'i rnam pa la brten pa de dag ngo bo phan tshun 'du bas dmigs pa nyid kyi phyir gang dang gang na gnas pa de dang der 'dres pa'i rang bzhin nyid du 'gyur ro//de ltar yin dang rim dang cig shos kyi ngo bo la cig car yang rim gyis ngo bor dmigs pas de 'dra ba'i don bya ba byed pa'i phyir ro zhes legs par 'brel to/ /rang bzhin nam zhes bya ba la sogs pa'i thal ba las zlog pa'i gzhung ni go bar sla'o//de lta yin dang zhes bya ba ni phan tshun ma 'dres par dmigs pa nyid yin na dmigs pa'i tshad ma stobs dang ldan pas de dag phan tshun spangs pa'i rang bzhin kho na'o/ /de ji ltar de dag las 'dres pa'i rnam pa gzhan tha mi dad pa'i rang bzhin du 'gyur bar 'os/ngo bo tha dad pa 'dres na 'dres pa'i rnam pa rang gi ngo bo'i khyad par du 'gyur ro/ /ngo bo phan tshun nang du 'dus pa'i phyir tha dad pa ma yin te/ dngos po tha dad pa ni rang bzhin tha dad pa'i mtshan nyid can yin pa'i phyir ro/ /tha mi dad pa'i phyogs la re re gnyi ga'i ngo bor dmigs par thal bar 'gyur ro zhes bshad zin to//rim dang cig car las tha dad pa 'dra ba gnyi ga'i ngo bo rnam pa gzhan ma rtogs pa ma yin nam/ gang gis na sngar gyi skyon dang ldan par 'gyur/ de ni 'dra ba ma yin pa'i ngo bo'i tha dad pa yin no zhe na/des na lan smras pa ni 'di 'dra ba ma yin no zhes bya ba'o/ /gal te 'dra ba ma yin pa'i ngo bo tha dad pa de rnam pa gzhan yin par 'dod do zhes ni mi zer gyi 'on kyang de ni rim dang cig car gyi bdag nyid yin no zhes so/ /gzhan la yang rigs pa de mgo bsgre bar bshad pa de ltar gyur dang zhes bya ba'o//mthong ba ni sngon po dang sngon po ma yin pa la sogs pa'o/ /brtags pa ni rtag pa dang skad cig ma nyid la sogs pa ste/ phan tshun 'gal ba brjod par 'dod do/ /des na zhes pa ni sngar gyi gnas skabs nye bar sdud par byed do/ /des na de ltar rim dang cig car dag yod pa'i khyab par byed pa grub na bsgrub bya las bzlog pa skad cig ma ma yin pa nyid la/de dag med par bstan pa'i phyir skad cig ma ma yin pa zhes bya ba smos so/ /'di ltar zhes bya ba 'dis ni rim pa'i rnam pa mi 'thad pa sgrub par byed do/ /de la snying po'i don ni 'di yin te/ skad cig ma ma yin par smra ba rnams kyi dngos po rnams kyi gnas skabs ji snyed pa ni mi g.yo ba'i rang bzhin yin no/ /g.yo ba nyid yin 'jig par khas blang bar thal bar 'gyur ro/ /des na skad cig gzhan du 'byung ba'i 'bras bu'i rnam pa de nyid du 'byung bar 'gyur te/ thams cad du rang bzhin gcig pa'i phyir dang /rang bzhin gyis kyang 'bras bu byed pa'i phyir ro/ /des na 'bras bu byed pa ni de'i rjes su 'gro ba dang ldog pa'i rjes su byed pa'i phyir ro/ /mjug sdud par byed pa ni de lta yin dang zhes bya ba'o/ /lhan cig byed pa ni nye ba'i rim pa la ltos nas rim gyis byed pa yang sngar bsal lo zhes bstan pa ni tha dad pa dang zhes bya ba'o//'di snyam du zhes bya ba ni cig car gyi phyogs bsal ba'i phyir rjes su brjod pa'o/ /de yang zhes bya ba la sogs pas sel bar byed pa ste/ 'di ni bsal lo/ /khyab par byed pa med pa bshad zin to//da ni khyab par byed pa mi dmigs pa'i gtan tshigs can gyi yod pa'i gtan tshigs mi mthun pa'i phyogs skad cig ma ma yin pa las ldog par bstan pas rnam pa gzhan med pa'i phyir snal ma'i bsgrub bya skad cig ma nyid dang / de'i bdag nyid kyi 'brel pa'i rgyu can gyi khyab pa bsgrubs nas rab tu byed pa sdud par byed pa ni des na rnam grangs 'dis zhes bya ba la sogs pas so//gsar pa'i tshig med dang dngos po'ang gsar pa med/ /'dir ni kha cig 'dod pa mchog tu snying / /de lta na yang lha yi spobs tshig gis/ /rab tu dang bas de gsum sna tshogs byed//slob dpon bram ze mu tig bum pas mdzad pa skad cig ma 'jig pa grub pa'i rnam par 'grel pa rdzogs so// //rgya gar gyi mkhan po bi na ya ka dang / lo tsA ba dge slong grags 'byor shes rab kyis bsgyur ba'o// //