CLOSE WINDOW

D4249
བོད་ཡིག

'gro ba kun gyi don grub 'gyur bar shog /tshad ma brtag pa slob dpon chos mchog gis mdzad pa rdzogs so// //dge slong blo ldan shes rab kyis bsgyur ba'o/ /[]@##/ /rgya gar skad du/ pra mA Na pa rI k+Sha/ bod skad du/ tshad ma brtag pa/ thams cad mkhyen pa la phyag 'tshal lo/ /gang gi che ba rnams kyis shes par ma gyur pa/ /sdug bsngal brgyud pa zhi ba'i go 'phang chen po ni/ /rab tu bstan nas don gnyer tshogs kyis thob mdzad pa'i/ /tshad mar gyur pa de la bdag ni rab tu 'dud//tshad ma ni mi slu bar byed pa'i shes pa'o/ /mi slu bar byed pa ni don byed nus pa'i dngos por rab tu bstan pa thob par byed pa'o/ /thob par byed pa nyid ni 'jug pa'i yul ston par byed pa nyid kyis 'jug par byed pa'o/ /des na tshad ma'i bya ba ni thob par byed pa nyid kyis yan lag tu gyur pa rab tu ston par byed pa nyid de/mthong ba nyid du lhag par zhen pa'i mngon sum gyis don rab tu bstan pa yin la/ ma mthong ba 'khrul pa med pa'i rtags kyis nges pa ni rjes su dpag pas bstan pa yin no/ /ci ste tshad ma zhes bya ba 'di ci zhig /gang gis 'jal bar byed pa de yin no zhe na ni tshad ma thams cad shes par 'gyur ro//ci ste gang gis dngos po 'dzin pa de tshad ma yin na/ ci dngos po 'dzin pa de yang phyogs su lhung bas rnam par dpyad par bya ba'am/ 'on te nye bar mkho ba nyid kyis yin/ de la re zhig dngos po 'dzin pa ni rtog pa dang ldan pa don bya ba don du gnyer ba la mkho ba ma yin te/de las don bya ba las mi 'grub pa'i phyir ro/ /don bya ba bsgrub pa'i thabs yin no zhe na/ gzung ba'i skad cig ma gang yin pa de mi 'thob pa yin nam/ zhen par byas pa'i rgyun thob par bya ba yin no zhe na/ de lta na ni rgyun gyi yul can gyi zhen pa thob par byed pa yin gyi 'dzin pa ni ma yin no//des na 'di ltar rnam par rtog pa can gyi rjes su dpag pa gang yin pa de yang thob par byed pa yin no/ /de lta na ni 'o na don bya ba nus pa rtogs pa tshad ma yin no zhe na/ rtogs pas kyang don bya ba don du gnyer ba la mkho ba med pa ma yin nam/de las don bya ba mi 'grub pa'i phyir ro/ /don bya bar nus pa thob pa'i thabs yin no zhe na/ de lta na ni 'o na don bya bar nus pa thob par byed pa nyid rtogs pa dang ldan pa don du gnyer bar bya ba'i phyir de nyid bstan bcos las rnam par dpyad par 'os kyi/ don bya bar nus pa rtogs pa ni ma yin no//gang gi phyir don bya bar nus pa'i rtogs pa yod du zin kyang shes pa la don du gnyer bar bya ba'i don du gnyer ba nyid yongs su rdzogs pa'i phyir ni ma yin gyi 'on kyang shes pa'i rang bzhin don bya bar nus pa'i thob par byed pa nyid kyi tshe rjes su tshol bar byed pa yin no/ /gang gi phyir gal te yang rtogs pa nyid thob par byed pa yin pa de lta na yang rtogs pa'i bdag nyid kyis ni shes pa don du gnyer bar bya ba ma yin gyi/'on kyang don thob par byed pa'o/ /de'i phyir don bya bar nus pa la mi slu ba nyid tshad ma yin gyi don bya bar rtogs pa na ni ma yin no/ /sgra'i don gyi rjes su yang 'brang bar bya ba ma yin nam/gal te mi slu bar byed pa nyid tshad ma yin na ni sgra'i don btang ba yin no zhe na/ btang ba ma yin te/ gang gi phyir mi slu bar byed pa nyid ni rab tu bstan pa thob pas byed pa la brjod la de yang 'jug pa'i yul rab tu ston par byed pa la brjod pa yin no zhes 'chad par 'gyur ro//de lta na yang shes pas gzhal ba gang yin pa de thob par byed pa tshad ma yin pa'i phyir de thob pa'i yan lag tu 'gyur ba'i 'jal ba'i tshad ma yin gyi 'ba' zhig pa ni ma yin no/ /dper na rdza mkhan gyi sgra 'jug pa'i rgyu mtshan ni rdza mkhan gyi rigs kyi khyad par yin pa de bzhin du tshad ma'i sgra 'jug pa'i rgyu yang thob pa'i yan lag gi 'jal byed yin no//thob pa'i yan lag tu 'gyur ba'i 'jal bar byed pa la yang slu ba med pa can gyi shes par lta'o/ /de nyid kyi phyir/ tshad ma slu med can shes pa/ /zhes bya ba dang / bsam pa la ni slu med phyir/ /'khrul pa yin yang tshad ma nyid//ces bya ba dang 'di gnyis kyi don yongs su gcad nas 'jug pa na don bya ba la slu bar mi 'gyur ro zhes gsungs pa yin no/ /gtan tshigs thigs pa las kyang rnam par rtog pa de las kyang der lhag par zhen pas 'jug la/ zhugs pa na yang rnam par rtog pa mngon sum du grub pa tha mi dad pa'i phyir ro zhes 'jug pa sngon du 'gro ba can gyi dngos po nyid thob par byed pa nyid la tshad mar bshad do//mi slu ba'i rnam grangs yin pa'i phyir tshad ma'i sgra nyid kyis rab tu bstan pa thob par byed pa'i don thob po/ /de lta na yang ma rtogs pa'i yul can tshad ma yin no zhes bya ba yang rang gi mtshan nyid ma rtogs pa zhes khyad par du bya'o zhes bya ba 'di yang tshad ma'i sgra nyid kyis mi slu ba nyid thob pa na rang gi mtshan nyid rtogs pa zhes gnyi ga tshad ma'i sgra'i shugs kyis rnam par gnas so zhes 'chad par 'gyur ro//de'i phyir mi slu bar byed pa rab tu bstan pa thob par byed pa ni tshad ma nyid yin par dgongs so//'jig rten ni dam bcas pa thob par byed pa mi slu bar byed pa'i tshad ma yin nam zhes brjod pa de bzhin du shes pa yang rab tu ston pa thob par byed pas mi slu bar gyur pa ni tshad mar brjod pa'i phyir tshad ma'i sgra'i don mi slu ba yin pa ni 'jig rten pa nyid do//shes pa skad cig ma ji ltar don thob par byed pa yin zhe na/ kye don gyi yul du skyes bu skyel ba'am/ skyes bu'i yul du don 'gugs pa thob par byed pa'i tshad ma yin nam/ ci nas gang gis skad cig ma yin pa'i phyir thob par byed par mi 'gyur ro//'o na ji lta zhe na thob par byed pa nyid ni thob par bya ba'i yul la 'jug par byed pa nyid yin no/ /des na tshad ma'i thob par byed pa nyid ni 'jug par byed pa nyid ma yin no/ /'jug par byed pa yang 'jug pa'i yul rab tu ston par byed pa nyid de/ gang gi tshe 'dis 'jug pa'i yul rab tu bstan pa de'i tshe skyes bu rab tu 'jug cing don kyang thob pa'i phyir tshad ma'i bya ba yongs su rdzogs pa yin no//gal te rab tu ston par byed pa nyid tshad ma'i bya ba yin no/ /'o na mi slu ba nyid ni rab tu ston par byed pa yin no zhes de ltar bya ba yin nam/ mi slu ba ni rab tu bstan pa thob par byed ces ci'i phyir brjod/ rab tu ston par byed pa nyid thob par byed pa yin no zhe na ni rab tu bstan pa thob par byed pa zhes brjod pa na rab tu bstan pa thob par byed pa'i tshad ma yin no zhes bya ba'i don du rtogs par 'gyur na/ de lta na ni rigs shing don 'brel pa ma yin no zhe na/dpe'i rab tu ston par byed pa nyid ni tshad ma ma yin gyi/ 'on kyang thob par byed pa nyid do/ /'on kyang ci zhig byas pas thob par byed pa yin zhes 'dri ba na rab tu ston par byed pas na 'jug par byed pa yin no zhes 'jug par byed pa'i rgyu nyid rab tu ston par byed par brjod pa yin la/rab tu ston par byed pa'i thabs kyis rab tu 'jug par byed pa yin gyi/ gzhan gyis ni ma yin no zhes bya ba yin te/ de'i phyir de ltar re zhig thob par byed pa'i rgyu mtshan nyid kyis ston par byed pa tshad ma yin gyi/ 'ba' zhig pa ni ma yin no/ / des na rab tu bstan pa thob par byed pa nyid tshad mar brjod de/ 'di la de kho na'i don ni 'di yin te/ shes pa 'ba' zhig gis don thob par byed pa ma yin gyi/ 'on kyang tshogs pa mang pos yin no/ /de dag las 'ga' zhig ni rnam pa ji zhig ltar thob pa la nye bar sbyor ba yin no/ / shes pa ni 'jug pa'i yul ston pa nyid kyis thob pa las nye bar sbyor gyi rnam pa gzhan gyis ni ma yin no/ /dper na gsad par bya ba gcig la mnga' bdag dang / dbang po dang yi ge dang / rigs ngan rnams las 'ga' zhig ni rnam pa ci zhig ltar gsod par byed pa yin la/ bdag po ni bka' bsgo ba nyid kyis gsod par byed pa yin no zhes brjod pa'i phyir gsod par lung bsgo ba nyid kyis gsod par byed pa ni bdag po yin par brjod do//'di la gsod pa'i yan lag ma yin par gsod par lung bsgo ba la gsod byed du brjod pa ni ma yin gyi/ 'on kyang gsod pa'i yan lag kho na'o//de bzhin du rnam par shes pa ni 'jug par byed pa nyid kyis thob par byed pa yin no zhes brjod pa'i don du ston par byed pa la thob par brjod do/ /'dir thob pa'i yan lag ma yin pa rab tu ston par byed par tshad mar byed pa la tshad mar brjod pa ni ma yin no/ /des na rab tu ston pa thob par byed pa tshad ma ma yin gyi ston par byed pa tsam ni ma yin no zhes bya ba 'di ni rigs par brjod pa yin no//gal te mngon sum pa ni bstan pa'i dngos po thob par byed pa ma yin te/ de ni skad cig ma las phan chad du med pa'i phyir ci zhig thob/ rjes su dpag pa yang ma yin te/ rjes su dpag pas gzung ba gang yin pa de ni dngos po ma yin pa'i phyir dang /ma bzung ba yang mi thob pa'i phyir ro zhe na/ shes pa rnams kyi yul yang rnam pa gnyis te/ gzung ba dang lhag par zhen pa'o/ /gzung ba ni gang dngos po'am dngos po med pa gzung ba'o/ /lhag par zhen pa ni 'di ni 'di'i tshe 'di na'o zhes lhag par zhen par byas pa'o//de la skad cig ma nyid bzhin du bzung ba zhen par ma byas pa ni 'jug pa'i yul ma yin no/ /'di 'jug pa'i yul ma yin pa yang ji lta zhe na/ gang zhig yul dang dus dang rnam pa nges pa nges par tha snyad byar mi nus pa de la ji ltar 'jug pa ma nges pa de ni tha snyad du bya ba ma yin pas na 'jug pa'i yul ma yin pa ni thob par nus pa ma yin no//mngon sum gyi gzung ba skad cig ma ni thob par nus pa ma yin la/ rjes su dpag pa'i gzung ba yang dngos po med pa yin la/ dngos po yang ma bzung ba de'i phyir ji ltar thob par 'gyur/ de'i phyir tha snyad du bya ba ma yin pa'i phyir dang /skad cig ma nyid kyis thob pa'i dus na rjes su 'jug pa med pa'i phyir gzung ba ma nges pa'i thob par byed pa ni mngon sum ma yin no/ /dngos po ma yin pa'i phyir rjes su dpag pa yang gzung ba'i thob par byed pa ma yin no/ /gang zhig yul dang dus dang rnam pa nges par byas pa tha snyad du nus pa de 'jug pa'i yul du 'gyur ba thob par nus pa yin no//mngon sum gyi gzung ba ni skad cig gcig gi cha shas dngos po'i rgyun nges par byed la/ de yang skad cig brgyud pa dpag tu med pa'i bdag nyid yin pa'i phyir thob pa'i dus rjes su 'jug pa'i phyir thob par nus pa yin no//rjes su dpag pas kyang gal te yang bzung ba gang yin pa de dngos po ma yin pa de lta na yang de'i rang bzhin ma yin pa las 'dogs par sgro btags pas phyi rol nyid du sgro btags pas na nges par phyi rol nges par 'gyur ba yin la/ de yang 'jug pa'i yul yin pa'i phyir thob par nus pa yin no//de'i phyir tshad ma ni gzung ba thob par byed pa ma yin gyi/ 'on kyang nges pa thob par byed pa yin no/ /des na ston par byed pa ni zhen pa yin gyi 'dzin pa ni ma yin no/ /de skad du yang / gzung ba'i yul tha dad pa don gyi dbye ba bshad kyi tshad ma'i bya ba'i yul tha dad pa ni ma yin no zhes bshad pa dang /thob pa'i yan lag tu 'gyur ba'i zhen par byed pa ni tshad ma'i bya ba yin gyi/ 'dzin pa ni ma yin no zhes bya ba dang / zhen par byas pa thob par byed pa tshad ma yin par nges par bzung nas dngos po'i yul can tshad ma nyid ces bya ba dang / 'di gnyis kyi don yongs su bcad nas zhes kyang bshad do/ /yongs su bcad pa ni zhen pa yin gyi bzung ba ni ma yin no/ /bsam pa la ni slu med phyir/ /'khrul ba yin yang tshad ma nyid/ /ces gang bshad pa bsam pa ni mngon par 'dod par bya ba ste/ zhen pa nyid la brjod do/ / de lta na yang zhen par byas pa'i thob pa ni mi slu ba yin no/ /gang gi phyir zhen pa nyid tshad ma'i bya ba yin pa de nyid kyi phyir 'di ni gdon mi za bar bya ba yin no/ /gang byas pas shes pa tshad mar 'gyur ba de ni gdon mi za bar bya ba yin la/ de gdon mi za bar bya ba gang yin pa de yang 'bras bur brjod do//de nyid kyi phyir tshad ma ni zhen par byas pa'i 'bras bu can yin no/ /tshad ma nges pa'i 'bras bu can zhes gang bshad pa la nges pa zhes bya ba ni gtan la 'bebs pa ste zhen pa la brjod do/ /'di la zhen pa ni thob pa'i yan lag la brjod do zhes 'jug pa'i 'bras bu can zhes kyang gsungs te/'jug pa'i yan lag tu gyur pas na thob pa'i yan lag gi zhen pa ni tshad ma yin no zhes bya ba'i don to/ /gang gi phyir 'jug pa'i rgyu yin pas thob pa'i yan lag zhen pa nyid yin pa de'i phyir tshad ma ni ma rtogs pa'i yul can yin no/ /gal te rtogs par byed pa las thob par byed pa gzhan yin na ni rtogs pa'i dngos po gang yin pa la shes pa gzhan yang thob par byed pa yin pa'i phyir rtogs zin pa'i yul can yang tshad mar 'gyur ba yin na/gang gi phyir zhen pa nyid thob par byed pa yin pa de'i phyir gang gi dngos po de rtogs pa de nyid kyi skyes bu bcug cing don thob par byed pa de'i phyir gnyis pa'am gsum pa gzhan la snga ma med pa'i thob par byed pa nyid med pa'i phyir tshad ma ma yin no//gal te thob pa'i yan lag gi zhen pa tshad ma'i bya ba yin na/ 'o na ni mngon sum tshad mar mi 'gyur te/ gang gi phyir de la ni tshad ma'i bya ba med pa'i phyir ro//ci ste mngon sum las sgrub pa dang dgag pa'i rnam par rtog pa 'byung ba ni de'i bya ba yin no snyam na/ de lta na ni 'o na tshad ma las bya ba tha dad par 'gyur na de yang rigs pa ma yin no/ /gzhan yang bya ba nyid ni 'bras bu yin la de lta na yang 'bras bu tha dad par smra ba yongs su gzung ba mi 'dod par thal bar 'gyur ro//gal te de lta na mngon sum zhes bya ba 'di ni shin tu chung bar smra ba yin te/ rjes su dpag pa yang tshad ma ma yin par 'gyur ro/ /gang gi phyir tshad ma'i bya ba ni thob pa'i yan lag tu gyur ba'i zhes pa yin la rjes su dpag pa ni skad cig las phan chad du mi gnas pas de'i bdag nyid du gyur ba'i zhen pa ldog pa na rjes su dpag pa la thob pa'i yan lag gi zhen pa srid par ji ltar 'gyur/ji ste rjes su dpag pa las gzhan gyi rnam par rtog pa skye ba na gang gis thob par 'gyur ba yin no zhe na/ de lta na ni 'o na thob pa'i de ma thag pa'i mthar thug pa'i rjes su dpag pa la sogs pa'i tshogs tshad mar 'gyur ba'am/yang na thob pa'i de ma thag pa'i rnam par rtog pa 'ba' zhig tshad mar 'gyur gyi rjes su dpag pa ni ma yin par 'gyur ro/ /'dis ni mngon sum rnam par rtog pa dang bcas pa yang bshad pa yin no//de'i phyir 'dir ni 'di ltar rnam par gnas te/ chos can la khyab par bya ba shes pa na khyab par byed pa gdon mi za bar nges pa ni rjes su dpag bas bya ba yin la rnam par rtog pa gzhan gyi bya ba ni spyod pa tsam yin no/ /'di ltar dbang po'i rnam par shes pa mtha' dag 'gags pa na rnam par dpyod pa de'i tshe bdag ni rnam par dpyod par byed kyi mthong ba'am chos can la khyab par bya ba mthong bas 'brel ba can gyi chos can chos gzhan la nges par rtogs pa ni ma yin no zhes nyams su myong ba las rnam par rtog pa'i bya ba ni dpyod pa tsam yin no zhes nges so// de na 'di dag gi rang gi byed pa las blo lhag par snang ba gang yin pa de ni rjes su 'gro ba dang ldog pa dag las shes pa gzhan gyis byas pa yin par blta bar bya'o/ /bdag gis mthong ngo zhes mthong ba nyid du nges pa yang rtog pa la bla lhag pa yin no/ /rnam par rtog pas ni don de mthong ba ma yin gyi 'on kyang dpyod pa yin no//de'i phyir rtog pa ni rang gi bya ba la dpyod pa yang spangs nas lta ba'i bya ba'i mthong ba'i rjes su byed pa yin te/ des na ni ji srid mngon sum gyi bya ba mthong ba nyid yod pa de srid du yul rnam par 'jog par byed pa mngon sum nyid yin la/ ji srid du 'brel pa gzhan mthong ba na 'brel pa can gzhan rtog pa de srid du rjes su dpag pa'i byed pa yin no//ji srid du 'di yod pa de srid du rjes su dpag pa nyid rab tu ston par byed pa yin te/ 'brel pa gzhan mthong ba las 'jug pa'i yul rab tu ston par byed pa ni rnam par rtog pa gzhan gyis bya bar mi nus so//de nyid kyi phyir rnam par rtog pa lta ba'i bya ba dang ldan pa gang ji snyed pa de thams cad ni 'du byed ma nyams pa can gyi mthong ba rab tu ston pa'i tshad ma yin la/ rjes su dpag pa'i bya ba dang ldan pa'i ji snyed pa de la ni 'du byed pa nyams pa med pa can gyi rjes su dpag pa tshad ma yin no//des na thob par byed pa ni mngon sum dang rjes su dpag pa nyid yin no/ /de lta na dper na rjes su dpag pa rang gi bya ba thob pa dang mthun pa'i nges par byed pa nyid rtog pa gzhan dang gzhan la 'jog pa de bzhin du mngon sum la yang shes par bya'o/ /'di ni rig pa yang yin te/gang gi phyir 'jug pa'i yul ston par byed pa gang yin pa de ni tshad ma yin la 'jug pa'i yul ston par byed pa gang yang 'jug pa'i yul bstan par shes pa de nyid yin no/ /de bzhin du gang bstan pa ni 'jug pa'i yul yin zhing bstan pa ni gang bstan par shes pa de yin no//gang zhig bstan par mi shes pa de ni gzung du zin kyang ma bzung ba dang 'dra ba'i skad cig ma nyid bzhin du 'jug pa'i yul ma yin no/ /de bzhin du ston par byed pa ni ston par byed pa nyid du ma shes pa gang yin pa de yin la/ ston par byed pa nyid du ma shes pa gang yin pa de ni yod du zin kyang gsal bar byed pa ma yin no//de ltar na yang mngon sum la brten pa'i rnam par rtog pa rnams la ston par byed pa ni mngon sum nyid yin gyi rnam par rtog pa ni ma yin no/ /gang gi phyir de ni dngos po mthong ba nyid du rnam par rtog gi rnam par dpyod pa nyid du ni ma yin no/ /mthong ba yang mngon sum gyi byed pa yin pa de'i phyir rnam par rtog pa rnams la ston par byed pa ni mngon sum yin gyi rnam par rtog pa ni ma yin no//de nyid kyi phyir mngon sum ni zhen pa skyed par byed pas yul nges par byed pa ni ma yin te/ 'on kyang rnam par rtog pa 'byung ba sngar gyi mngon sum de nyid nges pa'i bdag tu skyes pa yin no//gang gi phyir rnam par rtog pa ni de'i tshe dngos po mthong bar zhen pa yin no/ /des na sngar gyi lta ba nyid zhen par 'gyur ba yin te/ rnam par rtog pa la rang gi bya ba thob pa'i yan lag 'jog pa'i phyir ro/ /zhen pa yang lta ba nyid du gyur pa yin te/rang gi bya ba dpyod pa spangs nas lta ba'i bya ba mthong ba 'dzin pa'i phyir ro/ /de'i phyir mngon sum ni rnam par rtog pa'i shing rta la zhon nas nges par byed par shes par bya'i rang nyid rnam par mi rtog pa'i phyir nges par byed pa ni ma yin no/ /zhen pa'i ston par byed pa ni mngon sum yin gyi/ rnam par rtog pa ni mngon sum las logs su ni nges par byed pa ma yin la/ mngon sum zhen pa'i bdag nyid kyis zhen par byed pa yin par mi lta'i 'on kyang sngar bshad pa'i tshul gyis so/ /de'i phyir mngon sum nyid thob pa'i yan lag gi zhen pa'i bdag nyid yin pa'i phyir thob par bya ba 'jug pa'i yul gyi ston par byed pa yin no//de bzhin du rjes su dpag pa yang rnam par rtog pa gzhan la 'jog pas thob pa'i yan lag gi zhen pa'i bdag nyid yin pa'i phyir thob par bya ba'i thob par byed pa yin no/ /de'i phyir mngon sum dang rjes su dpag pa'i bya ba dang ldan pa'i rnam par rtog pa ni mngon sum dang rjes su dpag pas byas pa yin no//'dir de kho na nyid 'di yin te/ rnam par rtog pa ni tshad ma'i bya ba 'jug pa'i yul ston pa'i byed mkhan ni ma yin gyi 'on kyang tha snyad byed pa po yin no/ /ston par byed pa 'di'i sgo nas tha snyad du byed pa'i ston pa po mngon sum mam rjes su dpag pa de gang yin pa de yin gyi gzhan ni ma yin no//gzhal bya ni sngon po'i sngon po nyid la sogs pa tha dad du byas pa'i cha gang yin pa de kho na nyid yin gyi/ gzhan tha dad du ma byas pa'i skad cig nyid la sogs pa ni ma yin te/ tha snyad du ma byas pa ni yod kyang med pa dang khyad par med pa'i phyir ro//de ltar mngon sum dang rjes su dpag pa ni thob par byed pa'i yan lag gi zhen par byed pa yin pas bstan pa thob par byed pa yin pa'i phyir tshad ma yin no/ /gal te don thob par nus pa'i tshad mar brjod pa ma yin nam zhe na/ bden te don de ni rab tu bstan pa nyid thob par byed pa bzhin yin gyi 'ba' zhig la ni ma yin la tshad ma'i thob par byed pa nyid kyang thob pa'i nus pa nyid yin no/ /des na bstan pa thob par byed pa'i sgra ni thob par nus pa gsal bar byed pa yin no/ /thob pa'i yan lag gi zhen pa'i bdag nyid kyis ni shes pa thob par nus pa yin gyi/gzhan du ni ma yin no/ /de'i phyir thob pa'i yan lag gis zhen pa'i rang bzhin nyid don thob pa'i nus pa yin pa'i phyir nus pa zhes bya bas thob pa'i yan lag gi zhen pa nyid kyi don bstan pa yin gyi gzhan ni ma yin no/ /gang yang don med na mi 'byung ba'i phyir tshad ma zhes brjod pa de la don 'di yin te/shes pa'i don thob pa'i yan lag gi zhen pa'i don gyi 'bras bu yin pa'i phyir te/ don gyi 'bras bu ma yin pa de la ni thob pa'i yan lag gi zhen pa med do zhes bya ba yin no/ /ci ste 'di dag las gzhan pa'i shes pa ji ltar thob par byed pa ma yin zhe na/nyon cig gang yul thob par nus pa de ni thob par byed pa'i yan lag yin la/ gzhan ni thob par nus pa ma yin no/ /re zhig log pa'i shes pa ni bstan pa thob par nus pa ma yin te/ dngos po med pas thob par nus pa ma yin pa'i phyir ro//dngos po yin na yang log pa'i shes pa nyid du mi 'thad pa'i phyir ro/ /the tshom yang yod pa'am med pa ma nges par dngos po 'jog par byed pa yin no/ /ma nges pa ni yod pa ma yin no/ /dngos po ni yod pa nyid du nges pa'am/ med pa ma yin gyi yod pa dang med pa ma nges pa yin no//de'i phyir the tshom ni thob par byed pa ma yin no/ /gang yang khung na chu yod do zhes gcig tu nges pa ni dngos po'i rang bzhin snang ba ma yin la/ med na mi 'byung ba mthong ba'i rgyu mtshan yang ma yin te/ des na nges par 'jog pa'i nus pa med pas de ni the tshom nyid do//gang gi phyir de ni bdag gis dngos po'i rang bzhin nam de dang 'brel pa mthong ba ni ma yin no zhes ma rtogs pa ma yin no/ /dngos po'am 'brel pa yang ma mthong bar cha yod bzhin du nges pa gang yin pa de ni gcig tu ma nges par nges pa nyid du yin pa de bas na the tshom kho na'o/ / gang gi tshe thag ring po nas sbrang bu'i tshogs la du bar bsams nas bden pa me nyid du rtog pa de'i tshe/ du ba'i rang bzhin gyi nges pa bdag nyid kyi rang bzhin ma shes par du ba'i rang bzhin nges par rtogs pa ma yin no/ /rang bzhin nges pa med pa'i du ba sngon du song ba'i mi shes pa ni the tshom yin pa'i phyir thob par byed pa ma yin no//rjes su dpag pa ni 'brel ba'i dngos po mthong ba yod pa'am med pa'i dngos po nges par 'jog pa'i phyir thob par byed pa yin la/ mngon sum yang snang ba'i rang bzhin nges pa 'jog pas thob par byed pa yin no/ / lag te bdag cag mngon sum la the tshom skyes so zhe na bden te/ mngon sum la snang ba'i don 'di yang dag pa yin nam 'on te ma yin snyam du the tshom za'o/ /'di snang ngam mi snang snyam du ni ma yin te/ de la ni snang ba me nyid du 'jog par byed pas mngon sum 'jug pa'i yul du med pa yin no//phyis kyi yang dag pa'i don gyi yul can gyi the tshom za bas ni mngon sum gyi bya ba mi gnod do/ /mngon sum gyi bya ba ni nges par snang ba la zhe na par byed pa yin la de yang des byas pa'i phyir de la the tshom gyis ci byar yod/ snang ba ni don snang bar nges par ma nges par mi snang ste/des na rnam par rtog pa the tshom gyi yul la ltos sam/ ma nges pa mngon sum gyi don ma yin no/ /nges pa ni rnam par rtog pa'i don yin la snang ba ni mngon sum gyi don yin no/ /bar ti ka las mngon sum gyi don snang ba'i dbang gis rnam par gzhag pa yin la rnam par rtog pa ni zhen pas so zhe na/gang du phyin ci log tu nges par byas pa de la ni mngon sum tshad ma ma yin te/ dper na tshur nges par byed pa ni smig rgyu'i rang gi mtshan nyid du 'dzin pa mngon sum tshad ma ma yin pa bzhin no/ /gang gi phyir 'jug pa'i yul ni nges pa yin la chu yang nges pa yin na de mi 'thob bo//smig rgyu'i rang gi mtshan nyid ni mngon sum gyis ma nges pa des na de ni 'jug pa'i yul ma yin pa de'i phyir dbang po la brten pa'o/ /phyin ci log gi zhen pa'i bzung ba yin la rjes su mthun pa'i zhen pas gnod pa tshad ma yin no zhes bya ba 'di la ci zhig the tshom za/gang yang de lta na the tshom gyis zin pa'i mngon sum skyes pa de ji ltar zhe na/ de yang tshad ma yin no/ /gang gi phyir 'di me'am me tog gi tshogs yin/ yang dag pa'am yang dag pa ma yin zhes khyad par ram/ dngos po dang dngos po ma yin pa la the tshom za ba yin no//de la me nyid du ma zhen na ni gnyis la dmigs pa'i the tshom nyid du mi 'gyur ro/ /me nyid du zhen na ni the tshom gyis byas pa cha gzhan zhen pa mngon sum gyi bya ba las bla lhag pa yin pa'i phyir mngon sum gyi bya ba la gnod pa ma yin no/ /'di snyam du mngon sum gyi bya ba ni mtha' gcig tu nges pa yin no snyam na de ni mi rigs te/'jug pa'i yul ni mngon sum du snang ba yin gyi the tshom ni bzung ba ma yin la/ de yang nges pa yin gyi ma nges pa ni ma yin no/ /de nges par 'gyur na ma nges pa'i zhen pas yul du byas kyang nges pa nyid du gnas pa des na de la mtha' gcig tu nges par ci zhig bya/gal te zhen pa'i snang ba 'jug pa'i yul yin na ni mtha' gcig tu nges pa nyid mngon sum gyi 'bras bur 'gyur te/ mtha' gcig tu ma nges pa'i zhen pa'i yul ni thob par mi nus pa'i phyir ro/ /'jug pa'i yul ni mngon sum gyi rnam pa yin te/gang gi phyir de mthong bar zhen pa yin gyi spyod pa ni ma yin no/ /mthong ba yang mngon sum la gnas pa yin te/ des na des mthong ba'i me de nyid nges pa yin pa'i phyir na 'jug pa'i yul yin no/ /'jug par byed pa'i mngon sum yin gyi the tshom ni ma yin no/ /de'i rnam par 'jug pa'i yul ma yin pa'i phyir ro//gang yang the tshom gyi rnam pa gzhan sgro btags pa gang yin pa de ni tshad ma gzhan gyis sel bar byed do/ /gal te 'jig rten the tshom las kyang 'jug par mi 'gyur na ni the tshom za na ldog par bya ba yin na gang gi phyir 'jug pa yin pa des na the tshom ldog par byed pa ma yin no//'gal ba'i rang bzhin du nges par byas pa mthong ba tsam ni rab tu bstan pa ma yin pa des na 'jug pa'i yul ma yin pas mngon sum 'jug par byed pa ma yin no/ /de ltar na 'gal ba'i rang bzhin des na ni tshad ma ma yin par 'gyur gyi the tshom gyis ni ma yin no//des na 'jug par byed pa ma yin pa'i zhen pa la mtha' gcig par ci zhig bya/ gang du zhen pa nyid 'jug par byed pa der ni mtha' gcig pa nyid tshol ba yin te/ dper na rjes su dpag pa bzhin no/ /de'i phyir rnam par rtog pa la ni rjes su dpag pa tshad ma yin te/ nges pa'i yul can yin pa'i phyir dang / yul nges pa yod pa dang med pa yang thob par nus pa'i phyir ro/ /gzhan yang mngon sum thams cad kyi 'jug pa'i yul ni snang zhing nges pa'i dngos po'i rgyun yin gyi rtags ni ma yin no/ /snang ba'i nges pa rnam par 'jog pa po yang mngon sum yin gyi zhen pa ni ma yin no//de'i phyir 'jug pa'i yul nges pa'i rnam par 'jog pa po ni lta ba nyid yin la/ ma nges par 'jog pa po ni the tshom zhes bya ba'i zhen pa yin gyi lta ba ni ma yin no/ /gal te dngos po thob pa'i yan lag gi zhen pa mngon sum gyi bya bar brjod pa ma yin nam zhen bden te/mthong bar zhen pa yin gyi zhen pa tsam ni ma yin no/ /mngon sum gyi bya ba ni mthong bar zhen pa yin te/ ma zhen na ni skad cig ma nyid bzhin du yul dang dus dang rnam par nges pa tha snyad du bya bar mi nus pa'i dngos po 'jug pa'i yul ma yin no/ / de ltar na the tshom gyis mthong ba nyid du nges na yang yul dang dus dang rnam par nges pa'i dngos po snang zhing nges pa tha snyad du byas pa yin no/ /gal te the tshom gyis zhen par byas pa'i sngon po ma nges pa yin la gzhan du ni thob par nus pa'i phyir 'jug pa'i yul ni ma nges pa ma yin nam zhe na/ de ltar ni bden na ma nges pa ni zhen par byas pa yin la snang ba ni ma nges pa yin te/ des na snang ba nges pa lta ba la rag las pa yin gyi/ 'on kyang zhen pa ni ma yin no/ /gal te dngos po'i nges pa zhen par ma byas pas skad cig ma yang de ltar 'jug pa'i yul ma yin nam zhe na/the tshom gyis ni ci 'di sngon po nyid dam/ 'on te dngos po ma yin pa nyid ces nges pa nyid zhen par byas pa yin gyi/ gang gi phyir nges pa zhen par ma byas par 'gyur pa 'di ni sngon po yang yin no zhes bya bar ni ma yin no/ /de'i phyir nges pa'i 'jug pa'i yul ni mthong ba nyid du zhen par byas pa yin la de ni the tshom gyis kyang mthong ba nyid tha snyad du bya ba yin no//'on kyang the tshom ni rang bzhin gcig tu mi gnas la mthong ba ni gnas pa 'ba' zhig tu zad do/ /the tshom ni mi gnas pa yin la/ mthong ba ni gnas pa yin no zhes 'jig rten na yang shes pa yin no//de'i phyir mthong ba'i bya ba'i rjes su byed pa'i the tshom dang mtha' gcig tu nges par snang ba'i tha snyad du bya bar khyad par yod pa ma yin no/ /de nyid kyi phyir gal te 'khrul ba'i rgyu mtshan gyis zhes bya ba la sogs pa sgro btags pa nyid mngon sum gyi gnod par brjod kyi the tshom ni ma yin no//gang yang dngos po'i rang bzhin lam reg pa'i the tshom ni dper na chu dmar po la ci 'on te me'am 'on te pa la sha'i me tog gi tshogs yin zhes bya ba lta bu dngos po'i cha spangs pa ste/ sgro btags dang 'dra bar mngon sum la gnod pa yin no/ / mngon sum mi snang ba nges pa zhen pa gang yin pa de ni thob par nus pa'i phyir na de nyid thob par byed pa yin pa'i phyir tshad ma yin no zhes gnas so/ /'brel ba las ni thob pa yin no zhes bya ba 'di yang rjes su dpag pa ji ltar nges par byas pa de yang 'brel pa yin la shes pa gzhan ji ltar nges par bya ba de dang ma 'brel pa yin te des na thob par byed pa ma yin gyi 'dir nges pa la mi ltos pa'i phyir 'brel pa 'dod pa ni shes par mi bya'o//gal te des nges par 'jug pa'i yul yin na ni nges par rtog pa dang nges pa mthong ba zhen pa tshad ma'i bya ba rdzogs pa yin no/ /ci ste dngos po gang zhig nges pa na gang 'jug pa'i yul du mi 'gyur ba nges par ma byas pa zhes bya ba gang zhe na/'di la brjod par bya ba ci yod nges par rtogs pa gang yin pa de las gzhan du nges pa gang yin pa'o/ /de yang gang zhe na/ yul dang dus dang rnam pa 'ga' zhig ma nges pa 'gal ba'i chos dang ldan pa gang yin pa'o//yul dang dus dang rnam pa tha dad pa yang tha dad par byed pa yin pa'i phyir te/ tha dad par byed pa ma yin pa ni sna tshogs gcig tu thal ba'i phyir ro/ /'di tsam nyid 'gal ba'i chos dang 'brel ba ma yin te/ 'dir ni nye bar mtshon pa'i don du ji tsam zhig rjod par byed par 'os pa de tsam zhig bshad do//de la dngos po ni mthong ba de nyid yin no/ /yul gzhan dang 'brel ba yin na ni tshad ma'i yul ma yin no/ /dper na sgo leb kyi bu gar nor bu nges pa khang ba'i nang na gnas pa'i nor bu las nges pa bzhin no/ /'dir re zhig nor bu tsam nges pa yin nam zhe na/yul dang dus dang rnam pa'i khyad par dang ldan pa'i nor bu ma nges pa yin no/ /nor bu tsam don du gnyer ba'i phyir ni thob par bya ba ma yin gyi/ 'on kyang nges pa las yin la nges pa yang khyad par gyi yul can yin pa'i phyir gong bu tsam ni thob par bya ba ma yin no//'bras bu 'dod pas skyed pa de sgrub par byed pa'i don ched kyi bya ba 'jug pa yin no/ /de yang lus dang ngag dang lhan cig pa'i blo 'jug par byed pa'i shes pa'i bya ba lta bu dang rtog pa'i rjes su 'gro ba can de nyid kyis nye bar bstan pa yul dang dus dang rnam pa nges pa'i dngos po thob par 'dod pa 'jug par byed pa'i shes pas brtsams pa rab tu bstan pa'i dngos po'i mthar thug pa ni gcig yin par lta'o//dngos po'i yul can ni gzhan yin no/ /skabs su bab pa'i don bya ba la nye bar sbyor ba ma nges par shes pa gang yin pa de ni du ma yin yang 'jug pa gcig gi yul yin no//'jug pa gcig gi yul yang tshad ma gcig gi yul yin no/ /nye bar sbyor ba gang yin par shes pa de ni nges pa med do/ /res 'ga' ni tshad ma gcig gi yul yin la/ res 'ga' ni tshad ma du ma'i yul yin no//de la mngon sum ni skad cig tha dad pa la nye bar sbyor ba nges pa med par zhen par byed kyi tshogs pa tha dad pas ni ma yin no/ /gang gi phyir mthong ba'i bum pa rnams la ni gal te nus pa thams cad kyi bsgrub par bya ba gcig gam du ma cung zad cig dgos la de'i tshe bum pa rnams nye bar sbyor ba tha dad pa rnams kho nar shes pa yin no//yang gang gi tshe bum pa gcig gi bsgrub par bya ba dgos pa de'i tshe mthong ba'i mdo kho na la nges pa gcig len par 'dod pa yin no/ /blang bar 'dod pa nyid kyang ma yin pa kho na yin gyi gzhan ni ma yin no/ /des na nges par blang bar 'dod pa ni nges par sbyor bar nges pa yin pa de'i phyir 'jug pa'i yul tha dad par nges pa yin no//rjes su dpag pa'i tshogs tha dad pa la ma nges par zhen pas byed pa dper na rtsig pa bzhis bskor ba'i khyim gyi dang rar du ba mthong nas me ma yin pa las log pa'i me tsam nges par byed pa na ji snyed yod pa de thams cad rjes su dpag cing gang gi phyir thams cad kyang nye bar sbyor ba nges pa med par 'gyur ba yin no//de lta yin dang khyim gyi dang ra de nyid du du ba gzhan mthong bas mer nges pa de la ni shes pa tshad ma yin gyi/ 'on kyang dran pa nyid ma yin no/ /gang gi phyir dang ra na gnas pa'i me ma yin pa las ldog pa'i rang bzhin don bya ba'i nye bar mkho ba ni snga ma bzhin du bzung ba yin no//gang gi tshe nye bar sbyor ba tha dad pa de'i tshe ni du ba gzhan dang gzhan gyis gzhan la yang don bya ba byed pa'i phyir na de'i yul can rnams tshad ma tha dad pa kho na'o/ /yang gang gi tshe phyogs bzhir du ba bzhi las me rjes su dpag pa la don byed pa la/gcig nye bar mkho ba de'i tshe yang rjes su dpag pa'i mod kho na la nges par zhen par 'dod la/ gang blang bar bya ba 'dod pa de nyid kyis nye bar mkho ba yin pa'i phyir de dag nye bar sbyor ba tha dad pas tshad ma tha dad pa'i gzung ba yin no//'di thams cad brjod pa'i don du du ba gzhan dang gzhan gyis bcad pa'i me nye ba bzhin no zhes bshad do/ /de'i phyir nges pa'i dbang gis thob par bya ba yin gyi don du gnyer ba'i dbang gis ni ma yin no zhes bya ba 'di rigs pa yin no/ /dus tha dad pas kyang dngos po tha dad pa'i phyir te/mtshan mo bu 'ongs pa mthong na mthong nas nyin mo bu 'ongs pa de lta na yang mtshan mo bu mthong ba ni tshad ma ma yin te/ nam phyed kyi khyad par can gyi bu 'ongs pa med pa'i phyir ro/ /rnam pa zhes bya ba ni don byed par bzod pa'i rang bzhin la brjod do/ /don de la ni kha dog don dam pa yin gyi dbyibs ni ma yin te/rdul phra rab la ni ring ba la sogs pa med pa'i phyir dang / rdul phra rab ma gtogs pa'i gzugs kyang med pa'i phyir ro/ /rdul phra rab ni kha dog yin la/ dbyibs ni yod du zin kyang kha dog gi rdul phra rab rnams las tha dad pa ma yin no//des na dper na skad cig ma nyid sngon po la sogs pa las tha dad pa ma yin la sngon po la sogs pa ma bzung na ni de'i ngo bor gyur pa'i dngos po nyid ma yin pa de bzhin du dbyibs kyang ngo / /spyi'i chos rnams ni khyad par gyi rang bzhin du yod pa yin la/ khyad par ma bzung na ni mi zin la/khyad par gzung ba na ni bzung ba yin zhing ma nges na ni tshad ma gzhan gyis nges par byed do/ /gang gi tshe smig rgyu la chur 'khrul du chug kyang dngos po nyid tsam la ni ma yin no zhes ni brjod par mi nus te/ gang gi phyir chu la 'khrul pa na chu yod pa la nges par 'khrul ba yin la gzhan gyi yod pa yang gzhan gyi khyad par bzhin du gzung ba de'i phyir gang zhig la 'khrul pa med/de bzhin du dung gi dkar po btang na de'i rang bzhin du 'gyur ba'i dbyibs btang na ser po'i rang bzhin phyin ci log tu 'gyur na de'i rang bzhin du gyur pa'i dbyibs phyin ci log yin pa'i phyir dung la ser por shes pa la ni mi slu ba'i zhad tsam yang yod pa ma yin te/dkar po dang ser po dag tha dad pa'i phyir ro/ /des na rnam pa tha dad pa'i phyir ser po las ni dung dkar po thob pa yod pa ma yin no/ /'o na ji ltar ser po shes pa las zhugs pa las dung dkar po thob ce na/shes pa gzhan las yin par smra'o/ /dkar po dang ser po snang ba dag 'brel pa gzung ba yod na ni rjes su dpag pa yin te/ dper na ral gu'i nang na gnas pa'i lus rjes su dpag pa bzhin no/ /yang dper na chu'i shes pa las ni smig rgyu thob pa ma yin gyi shes pa gzhan las yin pa de bzhin du'am/the tshom las zhugs pas shes pa gzhan las don thob par byed pa de bzhin du thob pa ni tha na reg bya'i shes pa las yin no/ /sgo gseb kyi bu gar gnas pa'i mthong ba'i mig gi rnam par shes pa las ni khang phugs na gnas pa'i nor bu'i gnas 'dzin par byed pa yin pas na nor bu thob po zhes smra'o//de'i phyir phan tshun spangs te gnas pa'i mtshan nyid kyis 'gal ba nges pa las gang shin tu ma nges pa yin pa'i phyir na yul ma yin no/ /gal te de ltar na skad cig ma ma yin pa nyid dang / rags pa dang / tshad chung ba dang / mi gsal ba dang 'dres pas thag ring po na gnas pa rnams nges pa na ji ltar skad cig ma dang phra mo dang gsal ba dang / tshad che ba dang / ma 'dres pa'i shing la sogs pa'i tshad mas thob ce na/ rigs pa nyon cig /'di la dngos po dbyibs dang ldan pa nges par don bya ba'i rang bzhin ni mngon sum ma yin no//sngon po de yang skad cig ma nyid dang skad cig ma ma yin pa'i thun mong gi tshogs yin te/ snang ba'i sngon po la ni yun ring ba mi 'gal ba'am myur du yang rung ste/ gang yang nges pa yod pa ma yin no/ / de'i phyir gal te 'khrul pa'i rgyu mtshan 'ga' zhig la thun mong gi rang bzhin du nges pa la skad cig ma ma yin par sgro 'dogs kyang de tsam gyis skad cig ma yin pa nyid du nges par 'gyur ram/ skad cig ma nyid dang 'gal ba'i rang bzhin bzung na ni sna tshogs skad cig ma ni ma yin par rung ste/nges pa ni yod pa ma yin no/ /des na thun mong du yod pa yin te/ de'i phyir skad cig ma yin pa ni dus phyis 'khrul pas sgo btags pa yin no zhes bya bar gzung ngo / /de bzhin du gcig gi rang bzhin phra mo yin la/ du ma ni rags pa yin no/ /de la gal te rags pa gcig mthong na ni 'gal ba mthong bar 'gyur ba yin na/gang gi tshe du ma mthong ba de'i tshe gcig ni phra mo yin la du ma nyid ni rags pa'i phyir 'gal ba ci yod/ gang yang ma mthong ba nyid ni phra mo'i tshogs pa yin par bsgrub par nus pa'i phyir mi 'gal lo/ /gang yang gsal ba yang rgyang ring po nas mi gsal bar snang ba de yang rdul dang 'dras ba yin te/rdul dang 'dres pa yang mthong ba dang mi gsal ba yin no/ /de'i phyir 'dres pa 'dzin pa mi gsal bar 'dzin pa yin gyi/ gcig la 'gal bar gzung ba ni ma yin no// rta rmig gis snad pa'i lam nas langs pa'i rdul gyis bar du chod pa'i snam bu sngon po bzung ba yin no//rdul yang bsags pa na snang bar 'gyur ro/ /ji srid thag ring po na de srid du snang bar 'gyur la/ ji srid du nye bar 'gyur ba de srid du mi snang bar 'gyur te/ ma bsags pa'i phyir ro/ /dper na rdul gyi cha cung zad dang dmar po'i rang bzhin gyi ser po nyams par dmigs kyi rdul logs su mi snang ba bzhin no//de ni rdzas gzhan nyid skyes pa yin no zhes brjod par mi nus te/ yang mkhas pas de dag so sor byed pa mthong ba'i phyir te/ nye bar len pa gcig la rang bzhin tha dad pa dag skye ba mi 'thad pa'i phyir ro/ / de bzhin du rdul ni mi dmigs pa de dag 'dres pa'i kha dog gzhan mi gsal bar dmigs pa'i phyir gnyis ka mi gsal bas bzung ba yin gyi/ gcig la gsal ba dang mi gsal ba nyid du bzung ba ni ma yin pa'i phyir ci zhig 'gal/ chen po la chung ngur nges pa zhes brjod pa gang yin pa de la yang /dbyibs zhes bya ba ni snang ba'i chos yin gyi dngos po ni ma yin no zhes brjod do/ /tshad kyang dbyibs kyi chos yin te/ de'i phyir dbyibs sngon po ma yin na tshad kyang dngos po'i chos su mi 'gyur bas de la 'khrul kyang dngos po las 'gal ba yod pa ma yin no/ /gal te de lta na ni mya ngam na chung ngu la chen por 'dzin par 'khrul pa ji ltar zhe na/nyon cig de la yul de dang de ma yin pa'i rgyu mtshan can gyi 'gal ba yod pa yin te/ gang gi phyir na chung ngu ni yul gzhan la gnas pa yin la/ chen po ni rgya chen po'i go skabs kyi yul khyad par mthong ba yin pa de'i phyir yul de na gnas pa dang //de'i yul na mi gnas pa'i rgyu mtshan can gyi 'gal ba yod pa yin te/ dper na mgal me'i 'khor lor snang ba'i shes pa dbyibs 'khrul pa ni yul de na mi gnas pa'i yul de na gnas pa nyid de'i yul 'gal bar 'dzin pa de bzhin no/ /rnam pa de nyid kyis chung ngu la chen por 'dzin pa yul 'gal ba yod pa yin no zhes 'dod pa de ni ma yin te/gang gi phyir dngos po de'i so mtshams gang dang ldan par mthong bas so/ /mtshams de nyid la ma 'khrul ba thag ring po na chung ngur snang ba yin la chung ngu la chen por snang ba gang yin pa de ni dngos po'i so mtshams las 'das nas nam mkha'i cha khyab par snang ba'i phyir chen po la chung ngur snang ba 'khrul pa yin la chung ngu chen por snang ba ni ma 'khrul pa yin no//gang yang shing la sogs pa ma 'dres pa la 'dres par 'dzin pa de ni bar chad ces bya ba'i dngos po gzhan ma bzung bar de stong pa'i dngos po nyid bzung ba de'i tshe bar ma chad par bzung bar 'gyur gyi/yul dang dus dang rnam pa la sogs pa la 'khrul pa yod pa ni ma yin pa des na 'gal ba med do/ /'di snyam du bar chad dang bcas pa dang bar chad med pa 'gal lo snyam na de ni mi rigs te/ gang gi phyir 'dir dngos po'i rang bzhin la ni 'gal pa 'ga' yang med kyi/'on kyang bar chad ces bya ba ni dngos po gzhan ma bzung ba yin no/ /des na bar chad dang bcas pa zhes bya ba ni bar chad ces bya ba'i dngos po yod par brjod pa yin no/ /bar chad med pa zhes bya ba ni de ma bzung bar brjod pa yin gyi/med pa ni ma yin no/ /gal te rnam pa thams cad du dngos po nyid dam 'dzin pa 'ba' zhig bar chod pa dang bcas pa'am bar chad med par smra na/ de'i tshe 'gal bar 'gyur ba yin na/ gang gi tshe dngos po'i bar chad dang bcas pa gzung gi bar chad med pa de'i tshe bar chad dang bcas pa dang bar chad med pa dag yul tha dad pa'i phyir ci zhig 'gal/de'i don ni 'di yin te/ 'di ni nges pa las gzhan thob pa ma yin gyi/ 'on kyang skad cig ma ma yin pa nyid dam mi gsal ba nyid dam/ mi rigs pa nyid dam gzhan yang rung ste/ nges par byas shing thams cad mi thob par zad do//'di ltar sngon po'i rang bzhin gyi skad cig ma nyid ni mthong ba'i sngon po'i rang bzhin nyid yin gyi gzhan ni ma yin no/ /de'i phyir mthong ba dang 'gal ba snga na med pa ni ci zhig thob/ phan tshun spangs te gnas pa'i mtshan nyid ni 'gal bar 'gyur ba yin na skad cig ma nyid ni sngon po spangs te gnas pa ma yin te de'i rang bzhin yin pa'i phyir ro//nges pa'i skad cig ma ma yin pa nyid dang ni sngon po'i rang bzhin du zhen pa'i skad cig ma 'gal ba yin no/ /skad cig ma ma yin pa nyid ni thob pa yin na gang gis na 'gal bar 'gyur/ thob pa ni sngon po yin la de la ni 'gal ba yin no/ /gang yang yul gzhan na gnas pa'i nor bu'i rang bzhin ni de na gnas pa'i rang bzhin yongs su spangs nas gnas pa yin la dkar po yang ser po'i rang bzhin yongs su spangs te gnas pa des na/ de la ni nges pa las gzhan thob ba yin no//de'i phyir khang pa'i nang na gnas pa'i nor bu dang dung dkar po ni sgo gseb na gnas pa'i nor bu 'dzin pa dang / dung ser por 'dzin pa'i shes pa'i bya ba ma yin pa'i phyir nges pa dang ma nges pa dang 'gal ba thob pa yin no/ /gal te 'o na ni skad cig ma thob kyang gzhan thob par mi 'gyur gyi/mngon sum ma nges par thob par byed par 'gyur ro/ /de'i phyir tshad ma'i bya ba ni nges par bya ba yin no zhes bya ba de nyams so zhe na/ nyams pa med de de ltar yod par mthong ba'i sngon po de nyid skad cig ma'i rang bzhin yin gyi/ gzhan ni ma yin te/ des na ci'i phyir ma nges pa thob pa yin//gang gi phyir sngon po de skad cig mar ma nges pa'i phyir mngon sum ni sngon po 'ba' zhig thob par byed pa yin no/ /don dam pa'am skad cig ma'i dngos po thob kyang de'i skad cig ma nyid kyis ni thob pa ma yin te/ ma nges pa'i phyir ro/ /'o na gang gi tshe thag ring po nas shing la shing nyid du nges shing shing sha par ni ma nges pa de'i tshe shing sha pa nyid gang las thob pa yin zhe na/nyon cig mthong ba'i shing gang yin pa de nyid ni don byed nus pa yin no/ /don byed nus pa yang spyi'i shing nyid ma yin gyi/ 'on kyang khyad par shing sha pa la sogs pa'i don byed nus pa yin no//des na sha pa shing nyid du nges par byas pa 'bras bu la nges par sbyor ba'i shing sha pa nyid tshad mas thob pa yin no/ /de'i don ni 'di yin te/ spyir nges pa ni khyad par gyi mthar thug pa yin pa'i phyir spyi'i yul can gyi nges pa ni khyad par gyi thob par byed pa yin no//khyad par gyi nges pa ni spyi'i mthar thug pa ma yin te/ gang gi phyir don bya bar ni khyad par dang 'brel pa yin gyi/ spyi la rag las pa ni ma yin no/ /khyad par yang mthong ba yin te/ de'i phyir de la ni spyi la ltos pa 'ga' yang med do/ /gal te spyi ma nges na ni tshad ma gzhan las nges par bya'o//ci ste nges na ni don bya ba byed pa'i yul can yin pa'i phyir tshad ma de yang khyad par gyi mthar thug pa nyid do/ /gal te der tshad ma ni mngon sum nyid yin pa tshad ma'i bya ba ni nges par byed pa yin no/ /mngon sum sngon po nges par byed pa ltar skad cig ma ma yin pa dang /rdul phra rab ma yin pa nyid du nges pa skyed par byed pa yin no/ /des na gal te skad cig ma yin pa nyid la tshad ma ma yin na/ /de sngon po nyid la de ji ltar tshad ma yin/ ci shes pa gcig nyid kho na tshad ma yin la/ gzhan tshad ma ma yin nam zhe na/ nyon cig tshad ma'i bya ba ni nges par byed pa yin la/nges pa yang dngos po'i rang bzhin 'dzin par nus pa ma yin te/ phan tshun log pas sgro btags pa'i mthar thug pa yin te/ de dang de las ldog pa'i brten nas dngos po gzhan las ldog pa'i mthar thug par rang bzhin du rtogs par byed do//de'i phyir nges pa'i yul ni ldog pa gcig gi mthar thug pa'i rang bzhin yin no/ /nges pa yang tshad ma'i bya ba yin pa'i phyir ldog pa gcig tshad ma'i bya ba yin pas tshad ma'i bya ba ni ldog pa gcig gi rang bzhin gyi mthar thug pa yin pas yongs su rdzogs pa yin no/ /de ltar gyur na ni sngon po ma yin pa las log pa'i sngon po la ni shes pa de tshad ma yin no//skad cig ma las ldog pa'i skad cig ma ma yin pa la tshad ma yin no/ /skad cig ma nyid la ni tshad ma med pa yin gyi/ tshad ma yin pa ni ma yin no/ /des na yul du ma la ltos nas tshad ma dang tshad ma ma yin pa'i phyir mi 'thad pa ci yod/de lta na ni phyogs gcig pa'i yul can tshad mar 'gyur la de ltar 'gyur na yang / shes pa thams cad tshad mar 'gyur ro/ /gang gi phyir gang zhig tha na dngos po tsam la yang mi slu ba ma yin pa'i shes pa de ni yod pa ma yin no/ /smig rgyu la chur 'du shes pa yang gzugs can nyid dang g.yo ba nyid dang yod pa nyid la mi slu bas tshad mar thal lo zhe na/nyon cig 'di la spyi rnyed pa de lta ba thams cad ni dngos po med pa yin te/ spyi'i rang bzhin ma dmigs pa'i phyir dang / spyi la rag las pa'i don bya ba la ma dmigs pa'i phyir ro//khyad par ni dngos po yod pa yin te/ de'i rang bzhin dang de la rag las pa yod par rnam par 'jog pa'i rgyu don byed pa ma dmigs pa'i phyir ro/ /yod pa ma yin pa'i spyi de yang gang zhe na/ skad cig ma nyid dang yod pa nyid dang lus can nyid dang / gzhan du ma'i thun mong bar yongs su brtags pa ste/spyi ni du ma'i thun mong ba yin pa'i phyir ro/ /skad cig ma nyid gzhan gang zhig yod na rang bzhin gyi gtan tshigs kyis bsgrub par bya zhe na/ sgra'i skad cig ma nyid thams cad du ni med pa ma yin gyi/ 'on kyang skad cig ma nyid ma yin pa las ldog nas skad cig ma gcig du ma'i thun mong du brtags pa yang yin pa de 'dra ba med kyi sngon po la sogs pa'i khyad par so sor tha dad pa gang yin pa de ni yod pa kho na'o//de ltar yin yang spyi gang yin pa de ni khyad par gyi bdag nyid kho na'o/ /yod pa yin zhing khyad par gyi mthar thug pa kho nar gzung bar bya ba yin no//khyad par med dam ma bzung na ni spyi yang med par ma bzung bar 'gyur ro/ /de'i phyir khyad par yod na ni spyi yod la khyad par med na ni spyi yang med par 'gyur ro/ /de ltar gyur na smig rgyu la chur shes pa chu med na chu'i rang bzhin du 'gyur ba'i dngos po nyid dang skad cig ma nyid dam lus can nyid la sogs pa med cing /dkar po'i rang bzhin btang na de'i ngo bor 'gyur ba'i dbyibs med pa yin no/ /phyogs 'dis khyad par la mi slu ba spyis thams cad bshad pa lta bu'o/ / khyad par la mi slu ba la yang la lar spyi la slu ba'i phyir tshad ma ma yin no/ /khyad par la ni tshad ma nyid do/ /gal te nges par byas pa la mi slu ba tshad ma yin na/ 'o na ni cha shas dang skad cig ma ma yin pa nyid mthong zhing zhen par byas pa las mi slu ba yod pa de'i phyir te/ yang yod pa dang de la dmigs pa'i yang tshad mar 'gyur ro zhe na bden te/gang la mi slu ba mthong ba nges par de ni yod pa nyid de/ snam bu'i bgo ba la sogs pa'i don byed pa yan lag can yin par mi 'thad de/ tshad mas gsal bas na don byed pa mi 'thad pa'i phyir ro/ /skad cig ma ma yin pa yang ngo //don byed pa de ni tshad mas 'thad pa'i rdul phra rab dang skad cig ma kho nas yongs su rdzogs pa yin gyi/ yan lag can nam skad cig ma ma yin pa la ni ma yin no/ /snang ba 'di ni rags pa gcig tu mi snang ba'i phyir ro/ /rags pa yin na gcig pu 'gal ba'i phyir ro/ / de bzhin du skad cig ma ma yin pa nyid du ni yun ring du mi gnas pa yin no/ /de ni mthong ba'i skad cig mas lta bar nus pa ma yin te/ yun ring du gnas pa snga phyi cha shas med pa'i mthong bas ji ltar lta bar byed/ mthong ba'i skad cig ma ma yin du chug kyang lta ba'i bya ba ni snga phyi cha shas med pa nyid de/skad cig ma dang po mthong ba las phyis mthong bar mi nus pa'i phyir ro/ /de ltar gyur na yang 'byung ba dang 'byung ba'i bya ba'i yul gyi rang bzhin gyi snga ma dang phyi ma cha shas med pa'i yul ma yin pa'i phyir yun ring por 'dug pa'i rang bzhin ni mthong ba'i bya ba'i gzung ba ni ma yin te/de'i phyir snang ba gang yin pa de ni skad cig ma ma yin pa nyid kyi thun mong ba yin no/ /des na skad cig ma ma yin pa nyid mthong ba ni ma yin gyi/ 'khrul pa'i rgyu mtshan 'ba' zhig las nges pa skyed pa yin te/ dper na gcig dang 'gal ba mthong ba yang gcig tu zhen par byed pa bzhin no//gal te thob par byed pa tshad ma ma yin na/ 'o na thob par byed pa ma yin pa tshad mar mi 'gyur ro zhe na/ kwa'i thob par byed pa de'i tshad ma spang ba thob pa ni ma yin te/ gang gi phyir thob pa ni phyis kyi shes pa'i khyad par yin na de ji ltar shes pa snga ma snga ma'i rang bzhin du 'gyur te/tshad ma ni nus pa'i rang bzhin las gzhan ma yin no/ /de'i phyir thob par byed pa yang thob par nus pa'i tshad ma yin gyi/ thob pa nyid ni ma yin no/ /thob pa'i nus pa de yang don med na mi 'byung ba'i phyir ro/ /don med na mi 'byung ba de ni gang zhig thob par mi byed pa de la yang yod pa'i phyir tshad ma yin no//gal te de ltar na don thob pa ni nus pa'i rgyu mtshan don med na mi 'byung ba tshad ma gang gi yul yin zhe na/ mngon sum gyi'o/ /don nges par byed pa'i mngon sum gyi bdag nyid don gsal bar byed par nyams su myong ba gang yin pa de nyid don med na mi 'byung bar nges pa yin pa'i phyir nges par byed pa yin no//yang gang gi tshe/ don la the tshom za ba de'i tshe/ bdag nyid la yang the tshom za bar 'gyur bas gzhan las yin par 'dod de/ the tshom ni mngon sum la gnod par byed pa ma yin no zhes sngar bshad zin to//tshad ma mngon sum yin pa 'ba' zhig tu ma zad kyi tshad ma ma yin pa yang yul nyams su myong ba'i mngon sum nyid do/ /gang gi phyir zhugs pa'i skyes bu la smig rgyu'i rang bzhin 'dzin pa'i mngon sum skyes pa de nyid du chu'i shes pa tshad ma ma yin par 'dzin pa yin no/ / gang gi phyir don med par 'dzin pa nyid ni tshad ma ma yin la smig rgyu'i de kho na nges par byed pa nyid kyang sgro btags pa'i chu med par nges par byed pa yin no/ /de lta na yang ji ltar bum pas dben pa'i sa phyogs shes pa nges par byed pa nyid bum pa'i shes pa nges par byed pa yin pa des na bum pa shes pa med pa mngon sum nyid yin pa de bzhin du 'di la yang shes par bya'o//'dir shes pa phyi ma dang / tshad ma ma yin pa'i shes pa snga ma go bya go byed ni ma yin te/ gang grub na gang ma grub pa de ni de'i rtags brjod pa yin gyi gcig par grub pa dag ni rtags dang rtags can gyi dngos po ma yin no//gal te tshad ma dang tshad ma ma yin pa mngon sum yin na/ 'o na/ tshad dang cig shos spyi gzhag dang / /zhes bya ba dang / chos mthun pa ji lta ba las de ltar nges par byed pa na rjes su dpag par bya ba las ma 'das so zhes bshad pa gang yin pa de ji ltar rtogs par bya zhe na/smras pa rang dang gzhan gyi rgyud la yod pa'i nyams su ma myong ba rnams ni nyams su myong ba'i shes pa gsal ba rnams dang chos mthun pa mthong ba'i rjes su dpag pas tshad ma dang tshad ma ma yin pa'i rang bzhin rtogs pa na nye bar ston par byed kyi rang gi rgyud la yod pa'i nyams su myong ba nyid la ni ma yin te/de dag gis ni de dag la tha snyad du bya bar mi rigs pa'i phyir ro/ /de nyid kyi phyir mdor spyir smos pa bya ste/ gzhan du tshad ma dang cig shos gzhag pa dang zhes spyi ma smos par gsung bar 'gyur ro/ /gal te rang gi rgyud la yod pa'i shes pa'i gsal ba'i rnams kyang rjes su dpag pa nyid las tshad ma dang tshad ma ma yin pa yin/ji ltar slob dpon nyams su myong ba'i yul can gyi shes pa'i gsal ba rnams las ma gtogs pa zhes gsung bar 'gyur ro/ /gang gi tshe shes pa gsal ba thams cad rjes su dpag pa las tshad ma dang tshad ma ma yin na ni de'i tshe ma gtogs pa zhes bya ba smos pa don med par 'gyur ro//nyams su myong ba smos pa ni tshad ma ma yin pa'i don du ste/ ji srid yul med par nyams su ma myong ba de srid du tshad ma ma yin par shes par mi nus pa de'i phyir na gang gi yul med par nyams su myong ba de ni tshad ma ma yin par shes par bya'o zhes brjod pa'i phyir yang nyams su myong ba'i yul can smos so//tshad mar nges pa'i yang yul nyams su myong ba med na ni mi 'gyur bas tshad mar shes pa yang tshad mas yul nyams su myong ba las nges par 'gyur ba yin no zhes brjod pa'i phyir yang nyams su myong ba'i yul can zhes smos so//gal te shes pa snga ma dang chos mtshungs pa las shes pa phyi ma tshad mar nges na mngon sum du mi 'gyur ba ma yin nam zhe na/ mngon sum du mi 'gyur ba ma yin te/ gang gi 'di ni shes pa snga ma dang 'dra'o zhes de ltar ni brtag pa 'ga' yang med kyi/'on kyang tha snyad 'gog pa las shes pa'i rtogs pa nyid na tshad mar nges par 'gyur ro/ /yang na nyams su myong ma thag kho nar shes pa thams cad don med na mi 'byung / rtogs pa yin pa de bas na phyis the tshom 'byung yang tshad ma dang tshad ma ma yin pa ni mngon sum nyid kyis 'dzin pa yin no//gzhan yang ji srid mngon sum gyis byung ba'i zhen pas tha dad pa med par bzung ba'i dngos po de dag las dngos po gcig la rgyu dang 'bras bu nyid du bzung na thams cad gzung bar 'gyur ba yin no/ /ji ltar shes pa gcig la brdar byas na spyi med kyang ngo bo gcig zhen ba'i gzung ba'i 'gyur ba'i shing mtha' dag la brdar byas par 'gyur ba de bzhin du me tha dad kyang mer shes pa'i rten yin no zhes bya ba la sogs pa gsung ba'i phyir ro//gal te me 'di du ba'i rgyu yin la du ba 'di me'i 'bras bu yin te/ sngar mthong ba dang chos mthun pa'i phyir na sngar mthong ba'i me dang du ba bzhin no zhes chos mthun pa'i rtags las rjes su dpag bar bya ba ma yin nam zhe na/ chos mthun pa'i rnam pa gnyis te/ snang ba dang brtag pa'o/ /de la tshogs pa nges par ma rtogs pa de nyid yin no zhes gcig tu zhen par byas pa'am nges par rtogs pa ste 'di ni sngar mthong ba dang 'dra ba yin no zhe na/nges par bzung ba shing la sogs pa rnams la mthong ba'i tshogs pa chos mthun pa yod pa yin na de'i rgyu tha dad pa can gyi reg pa dang myangs pas 'khru ba'i a ru ra dag la yang yod pa yin no//de'i phyir gcig gi skyed pa nyid la yang 'khrul pa'i phyir rtags ma yin no/ /cha shas chos mthun pa ni ba lang dang ba men mthong ba dag la yod pa yin no/ /mthong ba de ni tshogs pa gcig la rag las pa'i phyir ma mthong ba rwa can gyi rtags yin yang rwa la sogs pa mthong ba ni mthong ba'i cha shas gzhan rjes su dpag par bya ba med pas rtags ma yin no//brtag pa'i chos mthun pa ni chos gzhan gyis byas pa ste/ dper na byas pas byas pa sgra dang bum pa gnyis kyi lta bu ste/ gang la ltos nas chos mthun pa can gyi rjes su dpag par 'gyur ba'am mi rtag pa nyid kyis byas te/ gang la brten nas chos mthun pa'i dper 'gyur ro/ /de yang chos gzhan nyid gtan tshigs su brjod pa yin gyi/ des byas pa chos mthun pas the tshom za bas ci zhig bya dngos po nyid la sogs pas byas pa'i chos mthun pa ni 'khrul pas brtags pa ma yin la/ bskyed par bya ba nyid kyis khyad par 'gyur ba'i chos mthun par 'gyur ba ni ma yin no/ /lus can ma yin pa'i rnam par shes pa gnyis ni chos kyis byas pa'i chos mthun par 'gyur na/ de la yang chos de nyid tshad ma dang tshad ma ma yin pa'i gtan tshigs yin gyi chos mthun pa ni ma yin no//gal te yul dang dus dang gsal bar byed pa'i khyad par can du 'gyur ba shes pa na mthong ba'i phyir 'di ni dngos po yin pa yin te/ sngar mthong ba yin no zhes dngos po yod par grub na shes pa yang tshad mar grub po zhe na/ mngon sum du 'gyur ba'i rang bzhin la gang zhig yod pa rjes su dpag par 'gyur te/de'i phyir 'di la rjes su dpag pa yod pa ma yin no/ /de'i phyir mngon sum dang mi dmigs pa dag gis rgyu dang 'bras bu nyid gcig la mthong na tha mi dad pa'i zhen pas gzung bar bya ba'i dngos po gzhan thams cad mthong ba yin pa'i phyir/ rjes su dpag par bya ba ma yin gyi/dran par bya ba yin no zhes nges so/ /de'i phyir de ltar skyed par byed pa nyid gcig la mthong na gzhan la dran par bya ba yin gyi rjes su dpag par bya ba ni ma yin te/ rgyu rnams la ni 'bras bu 'khrul pa'i phyir ro/ /de nyid kyi phyir tshogs pa las 'bras bu rjes su dpag pa ma yin par bshad do//dran pa ni yod kyang spangs te don gzhan la ltos nas rtags su bshad do/ /gal te 'dra ba rtags yin na ni gcig kyang 'dra ba yin pa de'i phyir de yang yongs su brtags nas brtags pa'i mthar bzung ba yul gyi rjes su dpag par bya bar 'gyur te/res 'ga' de las 'bras bu yod par 'gyur ro zhes bya bar ro/ /'bras bu res 'ga' ba'i yul nyid kyang tshogs pa nyid la nges kyi/ dngos po gcig la ni ma yin no/ /'bras bu 'gar yang ma nges la tshad ma'i yul ni nges pa yin te/ de'i phyir skyed par byed pa nyid kyi shes pa lkog tu gyur pa la skyes pa ni dran pa yin gyi/rjes su dpag pa ni ma yin no/ /de ltar yang de mthong ba nyid na mthong ba rnams la myong ba'i mthu las byung ba'i dran pa las zhes gsungs te/ dran pa ni dran par byed pa po'i dus na 'di dag gis don yongs su bcad nas 'jug pa na zhes bya ba de la mngon sum gyis ni dngos po tsam mthong la rjes su dpag pas ni rgyu dang 'bras bu nyid du ste/de thams cad du mngon sum gyi yul la mngon sum dang rjes su dpag pa dag kho na 'jug par byed pa ni ma yin no zhes gang smras pa de ni spangs pa yin no/ /gang gi phyir mngon sum nyid kyis dngos po'i 'bras bu skyed nus pa 'dren pa de'i phyir na 'jug par byed pa ni mngon sum de nyid yin no//de ltar gshol dang ral gri dang / gtun shing la sogs pa mngon du snang ba mngon sum snga mas byas pa'i dran pa'i sa bon sad pas 'di lta ste/ rmo ba dang gcod pa dang 'dru ba la sogs pa'i shes pa ni 'dra ba nyid yin pa lta bu'o//des na 'jug par byed pa ni mngon sum ma yin no/ /gang yang chos mthun pa mthong ba las shes pa gang bshad pa de la ni don 'di yin te/ dngos pos bskyed pa tsam gyi rgyu tsam gyis ni sangs rgyas pa rnams kyi tshad ma yin la/dngos po 'dzin pa tsam gyi rgyu mtshan gyis ni 'jig rten rgyang pan pa rnams kyi tshad ma yin no/ /des na dngos po skyed pa nyid dang dngos po 'dzin pa nyid gnyi ga'i tshad ma dang phan tshun khyab par bya ba dang khyab par byed pa yang yin no/ /des na khyab par bya bas byas pa'i dpe dang chos mthun pa gang yin pa las bsgrub par bya ba'i chos can de bzhin du bsgrub pa'i phyir tshad mar nges pa yin la/khyab par byed pa mi dmigs pas byas pa'i chos mthun pa las de ltar sgrub pa'i phyir na tshad ma ma yin pa zhes bya ba'i don yin gyi/ chos mthun pa nyid kyis ni rtags ma yin no//gang gi tshe tshad ma la the tshom za ba de'i tshe 'jug pa dang phan tshun bsten pa'i nyes par mi 'gyur ram zhugs pa las don bya ba thob pa'i phyir tshad mar nges pa las 'jug pa'i phyir phan tshun bsten pa ma yin no zhe na/ gang gi phyir tshad ma la the tshom yod kyang don du gnyer ba snang ba'i rang bzhin la snang ba dang ldan pa'i tshad ma las rab tu 'jug pa de'i phyir phan tshun bsten pa'i nyes pa yod pa ma yin no//don la the tshom yod pa las kyang rtog pa dang ldan pa 'jug pa'i phyir don la the tshom za ba las ldog par ji ltar 'gyur/de'i phyir thams cad kha na ma thob med do/ /la lar mngon sum la lar 'thad pas slob dpon gyis gzhag tshad ma ni/ /rim par rjes su brjod pas bzhag nas bdag gi dge ba gang thob pa/ /des ni nyon mongs rnam grol thar lam tshad ma'i mthar thug 'gyur ba yi/