CLOSE WINDOW

D4244
བོད་ཡིག

@##/ /rgya gar skad du/ bA h+ya r+tha sid+d+hi kA ri kA nA ma/ bod skad du/ phyi rol gyi don grub pa zhes bya ba'i tshig le'ur byas pa/ dus gsum gyi de bzhin gshegs pa thams cad la phyag 'tshal lo/ /gang gis rang don brnyes gyur nas/ /gzhan don ma lus rnams kun mdzad//de la don kun grub bya'i phyir/ /phyag 'tshal nas ni don dpyad do/ /rnal gnas mig la sogs pa yi/ /rnam shes spyod yul phyi'i don min/ /shes phyir don du snang ba'i phyir/ /rmi lam zla ba gnyis blo bzhin/ /de ltar blo tsam smra ba yis/ /phyi yi dngos med par bsgrubs pa//dang po mi slu mthong ba'i phyir/ /de yod smra ba min zhes smras/ /shes pa slu ba'i phyir ram ni/ /gzugs sogs rung ba ma yin phyir/ /dmigs pa med par 'gyur grang na/ /de gnyis kyang ni mi bzang ngo / /rang gi yan lag bcad la sogs/ / rmi lam mthong ba de dag med/ /gal te don rnams gtan med na/ /sad na'ang de bzhin mi 'gyur ram/ /khyod ni sad pa'i mgo bcad dang / /lus rgyas pa yang rmi lam bzhin/ /'dod na ci'i phyir de spong dang / /'thob phyir khyod ni 'bad dang ldan/ /gal te 'khrul pas thams cad du//'jug go zhe na ming ldog med/ /shes pa mi slu ma 'khrul te/ /slu ba dag ni 'khrul pa yin/ /yul dang dus dang mi gzhan la/ /shes pa mi slu gang yin pa/ /de ni ma 'khrul yin par shes/ /ma 'khrul mtshan nyid gzhan med do/ /ring dang phra sogs shes pa las//rnal 'byor can zhes bye brag dbye'i/ /thams cad mkhyen min thal 'gyur phyir/ /gnyis kyi rnam pa las grol min/ /sangs rgyas nyid ni de slu ba/ /yod do zhes ni ji ltar rtogs/ /rmi lam sogs bzhin thams cad du/ /ci phyir slu ba srid mi 'gyur//gal te bag chags brtan phyir zhes/ /rmi lam ci phyir yang mi brtan/ /de las grong dang kun dga' dang / /gzhal bya nyid sogs mthong ba 'dra/ /dbang don med la skyes pa'i blo/ /bag chags skad cig skad cig la/ /smin pa thob dang bar chad do/ /dbang po don dag bstan pa'i rgyu//gang gi shes pa ngo gcig cing / /dbang po don las ma byung ba/ /de yi de yi ngo bo ni/ /gtan du brtan pa'am mi brtan 'gyur/ /gal te gnyid sogs mtshungs ldan phyir/ /de de'i smin byed ma yin nam/ /smin pa'i rgyu ni yod bzhin du/ /smin pa yang dag zad mi rigs//gnyid kyi rmi lam na mthong ba/ /de na phyi phyir mi brtan zhing / /'khrugs 'gyur ji ltar de yis ni/ /yongs smin bdag nyid yang dag zad/ /gang gis dbang don bral ba'i phyir/ /brtan pa'i rgyu ni med pa la/ /smin pa 'thob dang yang dang yang / / yongs su zad pas rung bar 'gyur/ /mi slu bag chags brtan pa yis/ /byas so zhes pa gang las 'dod/ /gal te gzugs sogs mi rung phyir/ /de la 'og nas brjod par bya/ /gal te yongs smin brtan pa'i phyir/ /sad pa'i tshe na mi slu na/ /rab rib ji srid brtan pa'i bar/ / de srid mi slu ci phyir min/ /de blos rab tu bcug pa yang / /slu ba dmigs pa'i phyir ba dang / /de blo min la'ang mi slu'i phyir/ /de blos byas par mi 'dod do/ /'jog dang yongs su smin pa'i mthu/ /dngos po gzhan las byung ba'i phyir/ /bdag nyid las skyes las min te/ dper na me tog las til dang //chu sogs las ni sa bon bzhin/ /gang tsam gang las skyes pa nyid/ /de der rang dang mthun pa yi/ /'bras bu skyed phyir bag chags dag /mi 'jog me dang du ba bzhin/ /don gzhan las ni byung ba yi/ /las las 'ga' zhig bsgo bar byed/ /dper na sna ma'i me tog dang //phrad pas til las dri 'byung bzhin/ /'di la len pa'i rnam shes las/ /shes pa bdun ni skye 'gyur zhing / /de la de yi sa bon 'jog /gzhag pa'ang smin par byed pa nyid/ /de phyir don gzhan las byung ba'i/ dngos po med phyir bag chags ni/ /'jog dang rgyas par mi rung zhes//mthu la mkhas pa'i skye bo smra/ /'on te gal te rang rgyud las/ /rtogs pa'i shes pa skyes nas der/ /sa bon 'jog cing smin pa ltar/ /bdag gi'ang de dang 'dra zhe na/ /phyogs 'di la ni sdang ba'i phyir/ /len pa'i shes la yang dag brten/ /gnyi ga'ang mtshungs pa nyid yin na//gcig tu gcig la brten mi rigs/ /gang gi dbang don las skyes pa'i/ /shes pas mthu rnams 'jog byed cing / /yul dus lus la sogs pa yi/ /khyad par gyis ni rgyas 'gyur ba/ /de yi phyogs la nyes pa med/ /gang gi len pa zhes bya ba'i/ /shes pa las rgyu gzhan med pa//de yi shin tu 'brel pa med/ /blo tsam nyid du bsgrubs pa la/ /shes phyir la sogs bsgrub pa gang / /mi mthun rigs dang mi 'gal phyir/ /thams cad lhag dang bcas shes bya/ /legs dpyad dga' mgur rab 'jug cing / /phan dang mi phan 'thob gtong ba/ /sad par gyur pa'i tha snyad ni//rmi lam na ni thams cad med/ /gnod pa'i dbang gis 'ga' zhig tu/ /dbang po las skyes shes 'khrul na/ /de med par yang thams cad du/ /'khrul zhes bya ba ming sprul lo/ /gzhan dag rnam shes thams cad ni/ /yul yod rtog pas 'khrul sems kyi//shes bya rang sems las skyes gang / /gzugs sam de yi ming yin no/ /don med yang dag bsgrub pa la/ /re re yongs su mi chod phyir/ /rdul phran mi snang zhes smras pa/ /sems dang sems byung rnams kyis kyang / /the tshom za ba nyid du 'gyur/ /ji ltar skad cig 'jig pa rnams//re re nas mi rtogs pa ltar/ /de bzhin gshegs pas yongs bcad la'ang / /rdul phran nges par mi 'gyur ro/ /'dra ba'i skad cig gzhan 'byung phyir/ /ji ltar rtag pa nyid 'khrul ltar/ /rgyun chags rigs mthun 'dzin pa la/ /sngon po nyid du 'khrul pa skye/ / blo yis rtag tu rgyun chags dang / /rigs mthun pa la 'dzin mod kyi/ /rnam par rtog pa'i shes pa yis/ /de gcig nyid du nges par byed/ /de phyir rang gi mtshan nyid kyis/ /rnam par shes la rdul phran rnams/ /mi snang zhes ni smra ba gang / /de dag thams cad sgrub ma yin//gang ltar snang de de las min/ /rdzas med phyir zla gnyis bzhin zhes/ /smras pa'i sgrub pa gang yin pa/ /de la'ang gtan tshigs ma nges nyid/ /rdul phran gang dag phrad gyur cing / /rigs mthun bya ba gcig byed pa/ /de dag 'dus pa zhes brjod na/ / de dag rdzas med ga la zhig /gcig gi sgrar brjod de dag ni/ /de dag la ni gcig med do/ /sgra yi don ni rnam brtags te/ /dbang po'i sems la mi snang ngo / /gang gi blo la cha gcig gi/ //rnam pa snang ngo zhes smras pa/ /de ni nges par ri mo yi/ /gding ba mthong ba ma gtogs so//la la dag tu gang zhig la/ /gzugs kyi rnam pa gcig 'dzin pa/ /de yang mtho dman rten pa yi/ /dbye bas bkra bar snang ba yin/ /shes gcig snang ba'i rdul phran gang / /phan tshun med na mi 'byung phyir/ /de la rnam par bcad nas ni/ /ji ltar re re snang bar 'gyur//rdul phran rnams ni re re nas/ /rang dbang 'byung ba mi srid do/ /de phyir phra rab rdul rnams ni/ /re re snang bar mi 'gyur ro/ /rdul phran phyogs cha tha dad phyir/ /med ces smras gang de ma 'brel/ /'ga' yis khyad par dang bcas pa'i/ /rdul la phyogs kyi sgrar bstan bya//de phyir phyogs cha'i khyad par gyi/ /de ni mang pos yongs bskor bar/ /brjod par zad kyi rdul rnams ni/ /cha shas bcas pa'i bdag nyid min/ /rdul phran tshu rol ngos na gcig /pha rol gzhan rnams gnas pa ni/ /tshu rol pha rol cha gnyis kyis/ /rdul de gnyis su thal ba med/ / du ma'i dbus na 'dug pa'i phyir/ /du ma nyid du rnam rtog la/ /'di ltar ldog pa'i sgo dag nas/ /mang po nyid du spyir rtog cing / /de las gzhan pa la ltos na/ /ngo bo gzhan yang dper 'dzin pa/ /de der kho nas yod min te/ /tshu rol pha rol sogs dbye bzhin/ /gal te mang por 'dab chags phyir//cha shas bcas par 'dod na ni/ /skad cig snga phyi 'dab chags la/ /ci phyir de dang 'dra mi 'gyur/ /shes pa'i skad cig gnyis dag gis/ /'dab chags yin yang de la ni/ /cha shas bcas gzugs mi 'dod ltar/ /rdul phran rnams la'ang de bzhin no/ /gang zhig dang ni nye ba las//'gros ldan gang gi 'gros 'gag pa/ /des de'i sgrib pa rab bshad pa/ /cha shas gzhan gyi ma yin no/ /nyi ma'i sgrib pa yod na ni/ /grib ma kun du 'byung 'gyur gyi/ /grib ma nyi ma rdul gnyis kyi/ /bar na gnas par mi rigs so/ /grib ma dang ni sgrib pa la/ /mang po'i mthu ni skye ba ltar//de bzhin rdul phran rnams la ni/ /re re nas ni gtan du min/ /de phyir tha dad ma yin phyir/ /gong bu de dag ma yin zhes/ /gang smras de ni res 'ga' zhig /gal te 'gyur ba med la rigs/ /phan tshun bdag nyid ma reg pa/ /cha shas med par rnam gnas te//de phyir sa yi dkyil 'khor sogs/ /bsags pa las ni byung ba yin/ /phan tshun du ni phan 'dogs pa'i/ /bye brag gis ni brgyus pa bzhin/ /rdo rje la sogs rdul phran rnams/ /de dag chad par mi 'gyur te/ /ji ltar sngags kyi mthu yis ni/ /'dre sbrul la sogs 'dzin pa bzhin//rdzas kyi mthu yis phan tshun du/ /rdul phran kha cig srid 'gyur gyi/ /gzhan dag nus pa stobs chung ngo / /mi g.yo sogs gnas blo ldan ni/ /grangs la sogs pa'i bye brag gis/ /dmyal sogs rdul phran la rtog pas/ /de phyir med par mi rung ngo / /gal te de 'khrul dbang las gsungs//drug pa blo tsam rtogs pa ni/ /ji ltar brgyad par rdul phran gyi/ /grangs sogs 'khrul pa skye bar 'gyur/ /de yi de ltar rtogs pa de/ /gal te sems can mthun bya'i phyir/ /dmyal ba la sogs rnam shes las/ /phra rab rdul rnams mi snang phyir/ gal te de yi rtogs pa de//gzhan gyi 'khrul pa las yin na/ /gtso bo skyes bu la sogs la/ /grangs sogs rnam pa'i mtshan nyid du/ /ci yi phyir na gsungs ma gyur/ /de yi gnas skabs thob pa ste/ /yon tan phul du phyin 'dod pas/ /nor par rnam par rtog na ni/ /rtog pa sngon du ma btang 'gyur//de bas rdul phran yod pa nyid/ /mi g.yo sogs gnas blo ldan ni/ /de las gzhan nges ma bzung ba'i/ /de dag shes phyir yongs su rtog /mi gnyis pa la lhan cig tu/ /dmigs pa nges par bstan pa gang / /shes dang shes bya'i rang bzhin ni/ / nges phyir lhan cig myong ba nyid/ /shes pa las gzhan 'dzin pa med/ /yul med par ni dbang blo med/ /de phyir lhan cig rig pas na/ /sngon po'i de blo gcig phyir min/ /gal te rnam shes mi 'dzin pa'am/ /yul med par yang shes yod na/ /de tshe de ni de skad du/ /brjod par rigs kyi gzhan du min//dus gcig tu ni brjod 'dod pas/ /sangs rgyas mkhyen bya'i sems dang ni/ /sems dang sems byung rnams kyis kyang / /kun du gtan tshigs ma nges 'gyur/ /gal te lung las grub pa'i phyir/ /sems byung rnams kyi 'khrul min na/ /'dre dmyal la sogs rnam shes kyis//ci yi phyir na 'khrul par brjod/ /gal te 'brel pa med pa la/ /khyad par du ni 'dod byed na/ /de ni ma grub mi 'dod na'ang / /'khrul pa'i phyir ni bsal ba yin/ /'jig rten 'di na lhan cig sgra/ /gzhan med par ni 'ga' na'ang min/ /gal te lhan cig myong yod na/ / de phyir gtan tshigs 'gal ba'ang yin/ /gal te lhan cig sgra gcig don/ /de ltas gzhan la ma grub nyid/ /thun mong gi ni dngos po la/ /gcig pus ji ltar mthong ba yin/ /gal te thams cad mkhyen pa yi/ /ye shes shes bya sems kun nas/ /de tshe gcig pu kho na yis/ /dmigs pa grub pa gang du brjod//gzhan gyis dmigs pa 'gog pa ni/ /tshad ma min pas mi 'grub ste/ /rang bzhin bskal pa yin pas na/ /de phyir the tshom ma grub po/ /phyi'i dngos med pas grub 'gyur na/ /rang gi cha gcig mthong 'gyur na/ /blo tsam du ni smra ba yis/ /de grub gtan tshigs 'di nyid do//snang dang tha dad min sgrub na/ /grub pa sgrub pa nyid du 'gyur/ /shes pa rnam bcas smra ba dang / /de la rtsod pa yod ma yin/ /gal te don gcig kho na zhig /dmigs par gal te rtog byed na/ /shes pa'i ngo bos dben pa yis/ /de ni ji ltar kun du myong / /don dmigs tshe na gdung ba dang //dga' ba'i tshor ba de dag ni/ /gal te shes pa'i ngo bo yi/ /tshor ba med par mi srid do/ /gal te rtog pa rang ngo bo/ /'ga' zhig kho na myong zhe na/ /shes dag ngo bo mi myong bas/ /de yi phyir na de mi rigs/ /de bas myong dngos gnyis yin yang / /zla ba'i ngo bo gnyis bzhin du//bstan bcos byed pas gcig go zhes/ /rab tu grub pa de mi rigs/ /gang gis lhan cig myong 'gyur ba/ /tshogs pa snga ma kho na las/ /shes pa yul bcas skad cig ste/ /snang ba dang bcas gzugs bzhin no/ /gang tshe shes pa dang don dag / snga phyi kun du 'byung de'i tshe/ /de dang 'dra phyir de ming gi /dngos su lhan cig myong ma yin/ /myong bar bya phyir rnam shes las/ /don gzhan ma yin gzung ba yi/ /cha bzhin shes bsgrub smra ba gang / /de la gtan tshigs ma nges nyid/ /shes pa myong bar rang bzhin phyir/ /myong bar bya ba zhes brjod do//yul ni rab tu snang ba yi/ /shes pa skyed phyir myong ba yin/ /myong bar bya ba'i sgrar 'dra yang / /de yi don ni tha dad nyid/ /dper na ba lang nyid kyi phyir/ /ba lang dag la sogs pa rnams/ /de bzhin rnam par mi 'grub phyir/ /thams cad mkhyen pa'i ye shes kyi/ / myong bar bya ba rgyud gzhan la/ /dgos pa'i chos rnams gang dag yin/ /de dag gis kyang ma nges te/ /rtog med ji ltar thams cad mkhyen/ /shes pa rnam bcas phyogs la ni/ /de ltar snang ba myong bya nyid/ /de dang tha dad min sgrub na/ /grub pa sgrub pa nyid du 'gyur/ /gzugs dang 'dra ba'i byed pa'i don//'bras bu'i sgo nas myong byar 'dod/ /de dngos myong bya ma yin pas/ /tha dad min par mi 'gyur ro/ /de 'dzin byed de ji ltar zhes/ /de ni yongs su gcod pa yi/ /mtshan nyid yin te de yi phyir/ /de ni ji lta ci 'dra zhes/ /the tshom za bar mi bya'o/ /rnam shes ngo bo gzhan gyis ni//rnam par gzhag nas sgro btags te/ /ji lta bur ni de yi don/ /yongs su gcod ces brjod par bya/ /gang gi tshe na rnam shes don/ /yongs gcod tsam du 'dod de'i tshe/ /shes pas ji ltar rang gi yul/ /rig par 'gyur zhes smras ma 'brel/ / rnam shes de ni byed po min/ /dam pa'i don du bya ba'ang min/ /rig pa tsam du zad mod kyi/ /byed pa nyid du sgro btags gsungs/ /ji ltar thogs med gzigs pa yi/ /mkhyen pa kun du 'jug pa ltar/ /de bzhin cung zad mthong ba yi/ /shes pa gzugs la sogs la 'jug /thams cad mkhyen dang gzhan dag tu/ /shes pa tsam du khyad par med/ /kun du thams cad rnam mkhyen pas/ /bdag nyid che rnams bye brag dbye/ /rnam pa bcas sam ci rnams med/ /dus mnyam mi mnyam las skyes shes/ /sangs rgyas mkhyen la'ang ci yi phyir/ /byis pa rab tu 'jug mi byed//khyod kyis de la rnam pa gang / /srid pa shes pa de nyid kyi/ /rnam pas gzugs la sogs pa la/ /nged kyang rab tu rtog par byed/ /sgrib pa spangs phyir shes bya la/ /mi rigs zhes pa 'brel pa med/ /ji ltar de ni shes bya la/ /'jug pa de tsam mthun par bsgre/ /yod dam med pa'i don la yong //blo ni dpyod pa'i bdag nyid do/ /don yod gang la mi slu ba/ /don med rab rib la sogs la/ /ji ltar rab tu dpyad bzhin gzugs/ /sngon po nyams su myong snyam du/ /blo la sgro btags nas brjod kyi/ /rnam pa 'ga' yang yod ma yin/ /yod dam yang na med rtog kyang //rnam shes rtog pa'i bdag nyid de/ /don rab dpyod pa'i bye brag gis/ /shes pa tha dad par brjod do/ /ji ltar khyod kyi shes pa ni/ /yang dag du na rnam med kyang / /yang dag min rnams myong ba ltar/ /kho bo'i yang dag don de bzhin/ /shes pa de yi bdag nyid min/ /gnyis min bdag nyid 'gal phyir ro//yang dag min ni myong ma yin/ /de ni ma 'khrul thal 'gyur ro/ /ji ltar nor pas brtags pa ltar/ /rnam par gzhag 'di byas she na/ /'khrul pa'i rnam pa nges gzung ba/ /med na ji ltar rtog par 'gyur/ /de bas rnam shes yang dag tu/ /rnam pa med kyang mig la sogs//'gyur ba las na yod pa 'am/ /med kyang rung ste yongs su gcod/ /gal te mar me bdag dang gzhan/ /ji ltar snang bar byed pa ltar/ /de bzhin rnam par shes yin na'ang / /dmigs pa gnyis kyi ngo bo ste/ /'ga' yang 'gal ba yod ma yin/ / gzugs sgra la sogs don rnams ni/ /dbang bo tha dad spyod yul lo/ /des na de dag gcig pu yi/ /myong bar bya ba ma yin 'dir/ /tha dad pa yi rgyu ma yin/ /shes pa dmigs pa'i mtshan nyid ni/ /gang las skye zhing gang 'dra ba/ /de ma thag pa'i shes pa gang / /yul mtshungs yul du 'gyur ro zhes//'khrul pa nyid du bshad pa ni/ /de ni brtags pa ma yin no/ /gang phyir yul du snang ba las/ /'dra ba rang rig med phyir ro/ /shes pa'i rnam par 'dra ba ni/ /sems pa thams cad la yang yod/ /de ltar 'dod na yul 'dra zhes/ /khyad par brjod par mi bya'o/ / gzung bar snang ba 'di la ni/ /de ma thag pa'i shes mi snang / /yul ni mtshungs pa nyid kyi phyir/ /sngon po la sogs kho na snang / /sngon po la sogs snang ba'i shes/ /gal te de ma thag yin na/ /de tshe de yul de yin na/ /de tshe de yang don mi mtshungs/ /yod pa nyid bden mtshungs ma yin//ji ltar mi rtag mi sdug sogs/ /de bzhin gshegs pas de la yang / /gzung bar snang ba ma yin no/ /phyi rol dmigs pa mi rung phyir/ /yul ni gzung ba'i char 'dod na/ /de yang mtshan nyid mi 'thad par/ /blo yis ci phyir rnam mi rtog /de nyid sems kyi snang ba yin//der snang ba yi blo ma yin/ /yul ni tha dad ma yin phyir/ /skyed par byed pa'ang ma yin na/ /ji ltar de ni 'dod par byed/ /phyi yi rdul phran 'dus pa ni/ /yan lag re re ma tshang phyir/ /dmigs pa min na ji lta bur/ /gnyi ga'ang med par 'dod par byed/ /'dzin pa'i rnam pa'i shes pa ni//mtshan nyid gnyi ga'i rnam spangs na/ /ji ltar dmigs pa ma yin bzhin/ /gzung ba'i rnam pa'ang mi 'dod do/ /shes pa 'dra ba snga ma la/ /dmigs par 'dod pa gang yin pa/ /de yang mi rigs shes pa la/ /shes pa de ma thag mi snang / /gal te sgra shes mjug thogs su//gzugs kyi rnam par shes 'byung na/ /shes pa dmigs dang de dang ni/ /ji lta bur na 'dra ba yin/ /kha cig shes pa mtshungs skyed pa'i/ /nus pa dmigs pa yin par 'dod/ /de yang mi rigs gang gi phyir/ /dbang po sems la nus mi snang / / gzung bar bya la yul nyid du/ /nges pas yul du gnas yin na/ /'jig rten las ni don grub phyir/ /mtshan nyid yod pa nyid mi brjod/ /shes dang mthu ni 'jig rten na/ /don du nges par byas min la/ /mtshan nyid kyang ni yod min na/ /de ni ji ltar dmigs pa yin//'jig rten rigs pa lung bstan nas/ /phyi rol dmigs pa nyid du ni/ /yongs su brtag par bya rigs kyi/ /shes bya gtan du ma yin no/ /'dod dang mi 'dod la sogs gzugs/ /yang dag tu na phyi gcig min/ /de ltar 'di ni blo tsam zhes/ /bya ba de ni 'brel ma yin/sdug la sogs pa gzugs gcig la/ /yon tan sogs goms rgyu bcas te/ /rgyu yi dbye bas 'bras bu yang / /phan 'dogs pa yi bye brag dbye/ /don la sngon por snang ba yi/ /shes pa de yi de ma thag /goms pa las ni sdug sogs gzugs/ /de bzhin gzhan las gzhan 'byung ngo //dga' dang gdung gnyis goms pa yi/ /khyad par gyis ni bye brag dbye/ /don gyi rnam pa las min par/ /'dod na de ni ci yi phyir/ /sgro btags nas ni sun 'byin byed/ /de bas dmigs pa med pa'i dngos/ /ji lta bur yang mi 'thad do/ /don byed snang phyir grub pa yin//de med phyir na de med do/ /rmi lam gnod bzhin don rnams ni/ /med par yang ni byed 'dod pas/ /de phyir don byed yod pa'i phyir/ /gal te phyi rol med 'dod na/ /kho bo byed pa tsam gyis ni/ /phyi don grub par mi smra ste/ /log par shes pa'i rang bzhin las/ /byed par 'grub par mthong phyir ro//'on kyang don nges thob pa yis/ /lus la phan dang gnod byed pa/ /'khrul pa la ni de med kyi/ /byed ba tsam zhig yod phyir ro/ /rmi lam na ni 'dod spyod pa/ /de yi nges pa skye 'gyur ba/ /khu ba 'byung tsam ma yin na/ /'dod pa'i don thob ga la zhig /khu ba 'dod chags 'bras yin phyir//rmi lam las gzhan dag tu'ang 'byung / /'dod pas bud med reg yin na/ /ji lta bur ni mi slu yin/ /gal te bud med snang ba la/ /'dod pa bsten las byung yin na/ /rmi lam gnod bzhin sen mo dang / /ci phyir sos btab la sogs min/ /gal te bud med med par yang //de la brten pa 'byung na ni/ /rmi lam gnod bzhin sen mo dang / /ji ltar sos btab la sogs min/ /chags las khu ba byung ba la/ /blo yi don ni byas so zhes/ /bya ba de ni bzang ma yin/ /ji ltar bya ba tsam mi brjod/ /bu rnyed la sogs gang dag tu/ /rmi lam bden pa mthong ba ni//mthong ba de yang slu ba yin/ /rjod par byed pa las las skyes/ /de bzhin dmyal ba'i srung la sogs/ /yod phyir rnam shes rnam pa tsam/ /don byed gang yang ma yin no/ /de phyir sems tsam ma grub bo/ /tha dad lus su snang ba la/ /rgyud gzhan du ni grub yin na//dmyal ba pa yang de bzhin yod/ /ci phyir sems can gzhan ma yin/ /de bzhin dkyil 'khor nges rtogs ba'i/ /cho gas dug rnams 'jig 'gyur ba/ /lha yis rjes su 'dzin mdzad cing / /rang gi dam tshig la gnas ba/ /sngon gyi cho ga dang bral ba/ /gang phyir don byed mi nus pas//de phyir sems kyis de ma byas/ /gzhan sems shes pa'i shes pa ni/ /ji bzhin don min ji lta bur/ /gang tshe gzhan gyi sems yod na/ /shes pa de ni rnam par 'jug /don yod de yi rnam pa yi/ /rnam par shes pa 'dzin par 'dod/ /rang gi yul gyi drung song nas//bya ba bzhin du 'dzin ma yin/ /gang gis mjug thogs su 'byung ba/ /rang sems shes pa'ang de bzhin no/ /ji skad bshad pa'i mtshan nyid kyis/ /'dzin par byed pa sems de yin/ /'das par gyur ba'i sems dran pa/ /yang dag 'jug pa gang yin pa/ / sems de de yi rgyu las ni/ /byung ba min phyir 'dzin ma yin/ /sangs rgyas spyod yul mi gnyis pa'i/ /ngo bo rab tu ma shes phyir/ /don bzhin min zhes gang smras pa/ /de bzang min gnyis min pa'i phyir/ /shes pa 'dzin pa kho na yis/ /de gzung ma lus 'dzin pa'i phyir/ / thams cad mkhyen par bshad pa yin/ /gnyis min rnam par rig phyir min/ /bstan par bya min ngo bo zhig /rig go zhes ni gang smras pa/ /gzhan gyi rig bya gang yin pa/ /de ci rab tu bstan nus sam/ /pha rol sems ni yongs shes phyir/ /de phyir dmigs pa yod pa'i phyir//yid kun dmigs med ma yin no/ /gal te de dag gang du yang / /phyi yi gzung ba min zhe na/ /thams cad mkhyen pa ji lta bu/ /rang sems tsam zhig rnam shes pas/ /rang rig kho nar zad na go/ /rang sems tsam zhig rnam shes phyir/ /thams cad mkhyen zhes brtag par zad//logs shig pa zhig shes na ni/ /blo tsam lta bar mi 'gyur ro/ /mi gnyis kho na shes pa'i phyir/ /gal te nyes pa med 'dod na/ /ji ltar de bzhin rnam shes kyang / /de yul dmigs pa yod pa nyid/ /gnyis rnam grol ba'i shes pa la/ /rnam pa kun du kun rig ces//bya ba de ni ya mtshan che/ /de phyir 'dzin ba'i ngo bor yod/ /thams cad mkhyen yang dmigs pa gzhan/ /cung zad med ces bya ba ni/ /mkhas pa rnams kyis mkhyen grang gi /bdag gi blo ngan de rdugs so/ /sngon du rgyu phyir res 'ga' zhig /gnyen po goms pa srid pa'i phyir//'dod chags la sogs nyes pa'i tshogs/ /gtan du yongs su zad srid kyi/ /byis pa'i sems ni thams cad du/ /gnyis kyi rnam pa yin pas na/ /gang zhig goms pas yongs zad pa/ /gnyen po'i skabs ni yod ma yin/ /stong ngo snyam pa'i shes pa gang //brjod pa'i rnam par 'jug pa yin/ /gnyis kyi ngo bo dang ldan na/ /ji ltar de ni gnyen po yin/ /'dod chags ngo bo goms pa las/ /ji ltar 'dod chags mi zad ltar/ /de bzhin gnyis kyi ngo bo la/ /goms pas gnyis zad mi 'gyur ro/ /blo la dngos cha sgro btags nas//bdag med pa la sogs pa bsgom/ /gnyis med pa la sgra tsam ste/ /don med de dag bsgom ma yin/ /rtag par dmigs pa kun nyon mongs/ /mi rtag myur du mya ngan 'das/ /dmigs pa thams cad med pa las/ /sangs rgyas nyid thob gdon mi za//dmigs pa thams cad med pa ni/ /thams cad du yang bya ba med/ /'bad dang sbyor ba med par yang / /sangs rgyas nyid du 'dod par 'gyur/ /de phyir sems can snying rje dang / /de la phan dang thabs dang ni/ /'dus byas mi rtag bsgoms pa las/ /bde bar gshegs pa'i go 'phang 'thob//blo sgra tsam la ji lta bur/ /sbyin pa la sogs yongs su rdzogs/ /sbyin bya med pas de yi phyir/ /sangs rgyas nyid kyang mi srid do/ /gal te phan tshun dbang gis na/ /rnam par rig par nges pa las/ /sbyin dang len pa'i rnam pa yis/ /blo zhig gal te skye zhe na//de ni mngon sum rjes dpag dang / /yid ches lung gis rab ma bsgrubs/ /de ni rtog pa kho na tsam/ /'ba' zhig yongs su bsgrags par zad/ /rnam shes sbyin pa'i rnam pa can/ /brgya phrag rnams su goms byas kyang / /'on kyang sems can 'ga' zhig gi /dbul dang bral bar mi 'gyur ro/ /rnal 'byor rnams kyi yid la byed/ /gang tshe tshad med sgom na yang / /de tshe bde dang sdug bsngal ba/ /'thob dang yang dag zad mi 'gyur/ /kun la thams cad sbyin pa dang / /snying rjes sbyin pa yongs rdzogs pa/ /don bdog pa dang bye brag med//de la mi sbyin dgag pa yin/ /yongs su mya ngan 'das pa yi/ /sku gdung dang ni shi ba'i ro/ /khyim dang lha gang mthong ba dag /ji ltar gzhan gyi dbang las skye/ /gal te de rang rgyud smin las/ /ji ltar 'das ba rjes su dpag /gal te 'das pa rjes mi dpogs//de ni shin tu 'jig rten thal/ /nyan thos grol bas rnam dag gi /sku gdung mthong ba chags bral ba'i/ /gal te rjes su dpag med par/ /ji lta bur na gus pa skye/ /gal te brgyud pas yin zhe na/ /gson po dum bur bcad mthong ba/ /de ni de yi dbang min na/ / yongs su 'das pa ji lta bur/ /'jig rten pa yi tshul gnas pa/ /sa bon sogs las myu gu sogs/ /'byung zhes bya 'di sems tsam du/ /smra la rung ba ma yin no/ /gal te shes gang mjug thogs su/ /shes pa nges par skye 'gyur ba/ /rgyu de de yi 'bras bu de/ /nges pa'ang yod pa ma yin te//'di ltar me yi rnam par shes/ /med par du ba'i blo skye'o/ /sa bon med pa'i sems la yang / /myu gur snang ba'i blo yod do/ /me yi blo yis bsgos pa'i sems/ /du ba'i sems kyi rgyu yin na/ /nus pa du ma yod pa la/ /bye brag rtogs pa ga la zhig /me'i blo de ma thag pa'i rgyu//du ba'i sems kyi rgyu yin na/ /de yang bzang min du ba yi/ /sems la me yi yid ma nges/ /'brel pa rab tu ma grub na/ /ji ltar 'di dang 'di las min/ /rgyu la tha snyad ma 'dres pa/ /ji lta bur na 'jug par 'gyur/ /de phyir brtags pa la brten nas//khams gsum pa ni sems tsam zhes/ /thams cad rab tu bshad yin gyi/ /gzugs sogs med phyir ma yin no/ /gang la chags la sogs 'byung ba/ /brtags pa mngon sum mdzad nas ni/ /nyes pa zhi bar bya ba'i phyir/ /de phyir yul la bdag med bstan/ /de bzhin gzhan du'ang ji lta bur//byis pa rnams kyis rnam brtags ltar/ /phyi dngos yod pa min zhes gsungs/ /ci yi phyir na khyad par mdzad/ /de ma thag tu bstan pa las/ /byed par mngon par zhen pa las/ /bya ba rnams su yongs su shes/ /de phyir bdag ni bkag ces gsungs//de bzhin gzhan du'ang bstan pa las/ /brtags dang rnam par brtags pa dang / /chos nyid gzugs zhes bka' stsal te/ /chos nyid rang gi mtshan nyid do/ /dngos po tsam ni brtags pa'o/ /rnam par brtags pa khyad par du'o/ /chos nyid kyi ni dbye ba 'di/ /dngos po med na mi rung ngo //gal te gzugs stong gsungs she na/ /de la gzugs sgra ji lta bur/ /brtags te bstan pa yin na ni/ /'bras bu 'dod pa ci zhig yin/ /gang du mi slu srid pa yi/ /de bas de dngos yod pa nyid/ /thams cad med pa kho na las/ /rmi lam bzhin du dmigs ma yin//phyi rol don du smra rnams kyis/ /blo tsam smra la de skad smras/ /'di ci rigs pa'am 'on te min/ /mkhas pa rnams kyis dpyad du gsol/ /rigs dang mi rigs dpyod pa la/ /bdag la mkhas blo mtshar bcas med/ /'on kyang gzhan smras bden pa ni/ /mang por mdor bsdus nas bstan gyis//shes pa'i snang bas gti mug gi/ /mun bcom mkhas pas mngon mdzad cing / /de ring phyin tshad che rnams kyi/ /lam du skye bo glen dengs shig /phyi rol gyi don grub pa zhes bya ba'i tshig le'ur byas pa/ /slob dpon dge srungs kyis mdzad pa rdzogs so/