CLOSE WINDOW

D4241
བོད་ཡིག

/ //[]@##/ /rgya gar skad du/ a laM b+ha na pa rI k+Sha TI kA/ bod skad du/ dmigs pa brtag pa'i 'grel bshad/ sangs rgyas dang byang chub sems dpa' thams cad la phyag 'tshal lo/ /thugs rjes zin pa'i dgongs pa can//thams cad mkhyen la spyi bo yis/ /phyag 'tshal dmigs pa brtag pa yi/ /rnam par bshad pa rab tu bya/ /gang dag mig la sogs pa'i rnam par shes pa'i zhes bya ba'i tshig dang po 'dis ni rab tu byed pa 'di'i brjod par bya ba dang / phyin ci log gi rgyu mtshan bstan to//dgos pa dang 'brel pa dag ni shugs kyis dpag par bya ste/ shugs kyang skabs su bab nas bstan par bya'o/ /rab tu byed pa 'di'i 'brel pa dang / brjod par bya ba dang dgos pa rnams ni gdon mi za bar brjod dgos so/ /de lta ma yin na 'brel pa med pa dang brjod par bya ba med pa dang dgos pa med pa'i rab tu byed pa ni nyan pa po rtog pa sngon du gtong ba dag khas mi len to//de lta bas na 'dir gang dag mig la sogs pa'i rnam par shes pa'i dmigs pa phyi rol gyi don yin par 'dod pa de dag rdul phra rab rnams yin pa'am/ de 'dus pa yin par rtog grang na zhes bya ba 'dis ni spang bar bya ba'i rang bzhin gyi brjod par bya ba bstan to//de'i rgyu yin pa'i phyir zhes bya ba dang / der snang ba'i shes pa skye ba'i phyir zhes bya ba 'dis ni phyin ci log gi rgyu mtshan bstan to/ /dgos pa dang 'brel ba dag ni shugs kyis bstan to/ /de la shugs ni 'di yin par khong du chud par bya ste/phyi rol gyi dmigs pa dag dgag pa'i phyir dang / nang gi rab tu sgrub pa'i phyir rab tu byed pa 'di brtsam mo/ /de lta bas na phyi dang nang gi don dag dgag pa dang / rab tu sgrub pa'i phyir rab tu byed pa 'di rtsom pas shugs kyis na 'gog pa dang rab tu sgrub pa dag ni dgos pa nyid yin la/rab tu byed pa ni thabs nyid yin par bstan par 'gyur te/ 'di ltar rtog pa sngon du gtong ba rnams ni dgos pa med pa la yang 'jug par mi 'gyur la/ thabs ma yin pa la yang ma yin no/ /'dir rigs pas phyi rol gyi dmigs pa dgag pa dang /nang gi rab tu sgrub pa 'di ni brjod par bya ba yin no/ /de nyid 'gog pa dang rab tu sgrub pa dag ni dgos pa yin no/ /dgos pa de yang rab tu byed pa 'dis byed pas rab tu byed pa ni dgos pa 'di'i thabs yin no/ /de'i phyir rab tu byed pa dang / dgos pa dag thabs dang thabs las byung ba'i mtshan nyid kyis 'brel pa yin no//de lta bas na phyi dang nang gi don dag dgag pa dang / rab tu sgrub pa'i phyir rab tu byed pa 'di brtsam mo zhes bya bar gnas so/ /de ltar gnas pa la brgya la 'ga' zhig 'gog pa dang / rab tu sgrub pa 'di dag gis ci zhig bya ste/ de dag ni gang du yang mi mkho'o zhes gleng bar byed na 'dir smras pa/ dor ba dang / blang ba dag 'gog pa dang rab tu sgrub par byed pa gang dag yod pa de dag ni/ de gnyis 'dor ba dang len par byed pa yin no/ /'di ltar phyi rol gyi don dor bar bya ba'i phyir 'gog par byed de/ ci nas kyang 'gog pa las phyi rol gyi don dor bar bya ba nyid yin par shes nas dor bar bya'o snyam ste 'gog par byed do//de bzhin du rab tu sgrub pa las nang gi don blang bar bya ba nyid yin par shes nas blang bar bya'o snyam ste/ rab tu sgrub par byed do/ /de bas na phyi dang nang dor bar bya ba dang / blang bar bya ba dag dor par bya ba dang blang ba'i phyir 'gog pa dang / rab tu sgrub par byed pas dgos pa yang bshad pa yin no/ /de lta na 'o na ni ji ltar tshig dang po 'dis spang bar bya ba'i rang bzhin gyi brjod par bya ba bstan pa de bzhin du/ blang bar bya ba'i rang gi ngo bo yang bstan dgos so zhe na/'dir smras pa/ phyi rol gyi don du smra ba rnams ni phyi rol gyi don du yongs su rtogs pas shin tu gnod de/ de'i phyir de kho na tshig dang pos bstan nas gtsor de dag dgag par bya'o/ /phyis ni zhar la/ nang gi ngo bo'i shes bya ni/ /phyi rol ltar snang gang yin te//don yin zhes bya ba 'dis nang gi len par byed de/ re zhig 'di ni spyi'i don yin no/ /yan lag gi don brjod par bya ste/ gang dag mig la sogs pa'i rnam par shes pa zhes bya ba ni rgol ba ril gyis dmigs pa phyi rol gyi don yin par 'dod pa ni ma yin pas de'i phyir gang dag ces bya ba smos so//dbang po gang dag la mig la sogs pa yod pa de dag ni mig la sogs pa ste/ sogs pa smos pas ni rna ba la sogs pa yid la thug pa'i bar gzung ngo / /'di ltar yid kyang phyi rol gyi don gyi dmigs pa can du 'dod pa nyid de/de'i phyir de'i dmigs pa yang 'dir tshar gcig tu dgag par bya'o/ /de gzhag pas ci zhig bya ste/ bstan bcos byed pa gang gis ni de gzhag par bya ba de'i yul logs shig tu 'gog par ni mi byed do/ /de'i phyir slob dpon chos skyong gis rang gi 'grel bshad las/yid kyi rnam par shes pa'i dmigs pa gzhag pa'i phyir mang po zhig smos pa gang yin pa de ni de nyid shes grang / bdag gis ni de'i bsam pa zab pa'i phyir mi rig go/ /mig la sogs pa dag gi rnam par shes pa ni/ mig la sogs pa'i rnam par shes pa'o/ /mig la sogs pa'i rnam pa mang po nyid kho nas rnam par shes pa'i rnam pa yang mang ba nyid du bstan par 'gyur bas rnam par shes pa la mang po'i tshig bstan par bya ste dper na/zangs dang lo ma dag la dmar por gyur pa zhes bya ba lta bu'o/ /dmigs pa phyi rol gyi don zhes bya ba la/ phyi rol gyi don ni phyi rol gyi ste/ rnam par shes pa la ma gtogs pa zhes bya ba'i tha tshig go/ /rtogs par bya bas na don te shes par bya zhing gzung bar bya ba'o zhes bya ba'i tha tshig go/ /don zhes bya ba'i sgra ni 'dir yul gyi rnam grangs yin par bstan par bya'i rdzas yod par byed pa ni ma yin te/ 'di ltar 'dus pa yang yul nyid du 'chad par 'gyur mod kyi/ 'di rdzas su yod pa ni ma yin no/ /dmigs pa yin par 'dod pa zhes bya ba ni gzung ba yin par khas len pa zhes bya ba'i tha tshig go/ /de dag rdul phra rab dag yin pa'am zhes bya ba ni rgol ba de dag rnam par shes pa'i yul rdul shin tu phra ba dag yin par khas len par 'gyur ba'am zhes bya'o//de dag ni rdul yang yin la phra rab kyang yin pas/ rdul phra rab dag ste/ gang phan chad ches phra ba gzhan med pa'i phyir shin tu phra mo zhes bya ba'i tha tshig go/ /rdul phra rab 'dus pa kho na skye zhing 'gag mod kyi/'on kyang gzhan dag 'di dag 'dus pa re re yang dmigs pa nyid yin par 'dod de/ ji ltar dbang po rnams kyi nus pa so sor nges pa'i phyir gzugs dang ro la sogs pa gcig tu 'dus pa dag kyang so sor nges pa'i dbang po'i gzung ba yin pa de bzhin du rnam par shes pa yang rdzas yongs su gcod pa la nus pa nges pa'i phyir/rdul re re zhing dmigs pa yin gyi spyi ni ma yin no zhes grag go/ /'dus pa yin du zin kyang 'on kyang shin tu phra mo de dag ji ltar dmigs par 'gyur zhe na de'i phyir de'i rgyu yin pa'i phyir zhes bya ba smos te/ de dag phra mod kyi/ 'on kyang gang gi phyir rdzas su yod pas rnam par shes pa'i rgyu'i dngos por 'gyur ba de'i phyir dmigs par 'dod do/ /'di'i bsam pa ni dmigs pa'i don ni rgyu'i don to snyam pa yin te/ rkyen rnams ni nang du dmigs pa bstan pa'i phyir dang / rkyen yang rgyu yin pa'i phyir ro//rgyu nyid yin pa 'di yang gzhan gyi ltar rdul phra rab rnams dmigs pa nyid du yongs su brtag pa la phyin ci log gi rgyu mtshan yin te/ 'di ltar de dag rnam par shes pa'i rgyu'i dngos por 'gyur ba na phyi rol gyi don du smra ba rnams dmigs pa yin par 'dod do/ / de'i rgyu yin pa'i phyir zhes bya ba la/ de zhes bya ba'i sgras ni rnam par shes pa dang sbyar ro/ /phyogs gnyis pa nye bar dgod pa'i phyir/ de 'dus pa yin par rtog grang na zhes bya ba smos te/ rnam par shes pa'i dmigs pa rdul phra rab 'dus pa yin par rtog grang na'o/ /de dag 'dus pa ni de 'dus pa'o//de zhes bya ba'i sgras ni 'dir rdul phra rab dag dang sbyar te/ des na rdul phra rab 'dus pa zhes bshad pa yin no/ /yang ci'i phyir de dag 'dus pa dmigs pa yin par 'dod ce na/ der snang ba'i rnam par shes pa skye pa'i phyir zhes bya ba smos te/ gang gi phyir mig la sogs pa'i rnam par shes pa ni rtag tu 'dus par snang bar skye ba de'i phyir 'dus pa dmigs par 'dod do/ /'dir yang 'dus pa dmigs pa nyid yin par yongs su brtag pa la phyin ci log gi rgyu mtshan ni 'dus par snang ba nyid yin no/ /gang gi phyir rnam par shes pa 'dus par snang ba de'i phyir gzhan 'dus pa dmigs pa yin no snyam du sems te/'di ltar rnam par shes pa gang ltar snang bar skye ba de ni de'i yul yin par 'dod do zhes bshad do/ /rnam par shes pa 'di la de lta bur snang ba yod pas 'di ni der snang ba'o/ /'dir yang der zhes bya ba'i sgras ni 'dus pa dang sbyar ro//de ni der snang ba yang yin la rnam par shes pa yang yin pas zhes tshig rnam par sbyar te/ der snang ba'i shes pa skye ba zhes tshig bsdu'o/ /de ltar na 'dir gzhan dag dmigs pa'i mtshan nyid du 'thad pa'i phyir rdul phra rab dang /'dus pa dag dmigs pa nyid yin no snyam du sems so zhes bya ba ni phyogs snga ma yin no/ /de la re zhig phyogs snga ma bsal ba'i phyir/ dbang po'i rnam par rig pa'i rgyu/ /phra rab rdul dag yin mod kyi/ /zhes bya ba la sogs pa smos so/ /rdul phra rab rnams ni yang dag pa'i don du na rdzas su yod pa ma yin te/cha shas dang bcas pa nyid du rtog na ni kun rdzob tu yod pa nyid du thal bar 'gyur la/ cha shas med pa nyid du rtog na yang grib ma dang sgrib pa la sogs pa med pa nyid du thal bar 'gyur te/ de'i phyir 'di dag rgyu nyid lta ga la yin/'on kyang rdul phra rab rnams rgyu nyid du khas blangs nas/ dmigs pa nyid yin pa dag go/ /rdul phra rab rnams rnam par shes pa'i rgyu'i ngo bor 'gyur mod kyi/ 'on kyang gang gi phyir de dag rdul phra rab kyi rnam pa can gyi rnam par shes pa mi skye ba de'i phyir dmigs pa ma yin te/dper na dbang po bzhin no/ /dbang po'i rnam par shes pa'i rgyu'i dngos por 'gyur mod kyi de de'i yul yin par ni pha rol po mi 'dod do/ /'di ltar rnam par shes pa dbang po'i rnam pa can du mi skye bas so/ /dbang po'i rnam par rig pa'o zhes bya ba la/ dbang po smos pas ni yid la thug pa'i bar dbang po drug car gzung ste/ 'dir gtan tshigs ni bshad zin to/ /phra rab rdul dag ces bya ba 'di ni don go bar zad do/ /yin mod kyi zhes bya ba 'dis ni khas len pa'i rgol ba ston te/ der mi snang phyir zhes bya ba la/ gang la de dag lta bur snang ba yod pa de ni der snang ba ste/der zhes bya ba'i sgras ni rdul phra rab dag dang sbyar ro/ /der mi snang ba ni der mi snang ba ste/ gsum pa ni 'dir gtan tshigs la blta bar bya ste/ de bas rdul phra rab kyi rnam pa can ma yin pa'i phyir zhes bshad pa yin no/ / de'i zhes bya ba ni dbang po'i rnam par rig pa'i'o/ /yul ni/ rdul phran ma yin dbang po bzhin/ /zhes bya ba ni ji ltar dbang po rnams yul ma yin pa ltar rdul phra rab rnams kyang de dang 'dra'o zhes bya ba'i tha tshig go/ /dbang po zhes bya ba'i sgras ni 'dir dbang byed pa rnams brjod do//gal te rnam par shes pa rdul phra rab kyi rnam pa can du ma gyur na de ni de nyid kyis nyes par 'gyur grang / rdul phra rab rnams go skyed par byed pa yin bzhin du/ ci'i phyir yul du mi 'gyur zhe na/ de'i phyir yul zhes bya ba la sogs pa smos te/ 'di ltar yul ni gang gi rang gi ngo bo de'i rnam par skye bar nges par 'dzin pa de la bya'o//ni zhes bya ba'i sgra ni gang gi phyir zhes bya ba'i don to/ /rang gi ngo bo nges par 'dzin pa zhes bya ba la/ rang gi ngo bo smos pas ni rang dang spyi'i mtshan nyid du bsams pa yin no/ /de nges par 'dzin pa ni rtog pa ste/yongs su gcod cing 'dzin pa zhes bya ba'i tha tshig go/ /de'i rnam par skye ba'i phyir ro zhes bya ba ni yul gyi rnam par skye ba ma gtogs par gzhan du rnam par shes pas yul nges par gzung bar mi nus te/ de'i phyir sngon po la sogs pa'i rnam par skye ba'i rnam par shes pas sngon po la sogs pa'i don nges par 'dzin to zhes bya'o//'di la gang zhig byed na/ rnam par shes pa 'dis yul nges par 'dzin to zhes tha snyad gdags par bya ba nges par 'dzin pa'i mtshan nyid kyi byed pa ni 'ga' tsam yang med do/ /ji ltar ba'i rnam pa'i rjes su byed par skye ba'i bus pha'i gzugs 'dzin to zhes bya ba de bzhin du/rnam par shes pa yul gyi rnam pa'i rjes su byed par skye bas kyang yul 'dzin to zhes tha snyad gdags so/ /de la 'di snyam du rdul phra rab rnams kyi yang de bzhin du de'i rnam par skye bas rang gi ngo bo nges par 'dzin to snyam du sems na/de'i phyir rdul phra mo dag ni de'i rgyu nyid yin du zin kyang de lta ma yin zhes bya ba la sogs pa smos te/ rdul phra rab rnams ni de'i rgyu nyid yin du zin kyang / rnam par shes pa so sor nges pa'i rnam pa'i rjes su mi byed na de ni ji ltar de dag gi rang gi ngo bo 'dzin par 'gyur/ nges par mi 'dzin na yang ji ltar yul du 'gyur/ de'i rgyu nyid yin du zin kyang zhes bya ba ni rnam par shes pa'i rgyu nyid yin du zin kyang ngo zhes bya ba'i tha tshig go/ /'dir dper dbang po bzhin no zhes bya ba smos te/ ji ltar dbang po rgyu'i dngos por 'gyur yang / de'i rnam par skye ba'i rnam par shes pas rang gi ngo bo nges par mi 'dzin pas/yul nyid du mi 'dod pa ltar rdul phra rab rnams kyang de dang 'dra bar blta bar bya'o/ /dbang po yang dmigs pa nyid du thal bar 'gyur du 'ong bas dmigs pa ni rgyu mtshan nyid tsam 'ba' zhig ni ma yin no/ /de ltar rdul phra rab rnams dmigs pa nyid yin pa bkag nas mjug bsdu ba'i phyir/de ltar na re zhig ces bya ba la sogs pa smos te/ dmigs pa'i mtshan nyid du mi rung ba'i phyir rdul phra rab rnams dmigs pa ma yin no zhes bya ba'i tha tshig go/ /'dir sbyor ba ni rdul phra rab rnams dmigs pa ma yin te/rang snang ba'i rnam par shes pa skyed par byed pa ma yin pa'i phyir dbang po bzhin no/ /chos mi mthun pa ni gzung ba'i cha'o/ /rang snang ba'i rnam par shes pa skyed par byed pa ma yin pa yang dmigs pa nyid yin na ha cang thal bar 'gyur ba ni gnod pa can gyi tshad ma'o/ / yang na rdul phra rab rnams ni dmigs pa ma yin te/ rang gi ngo bo nges par mi 'dzin pa'i phyir dbang po bzhin no/ /chos mi mthun pa ni gzung ba'i cha ste/ gzung ba'i cha dmigs pa nyid yin par ni sgrub par 'gyur ro/ /rang gi ngo bo nges par mi 'dzin pa yang dmigs pa nyid yin na ha cang thal bar 'gyur ba ni gnod pa can gyi tshad ma'o//sbyor ba 'di gnyis ni slob dpon chos skyong gi bshad pa bdag gis bris kyi rang gi bshad pa ni ma yin no/ /de ltar na re zhig rdul phra rab rnams dmigs pa nyid yin pa bkag pa yin no/ /'dus pa yang dgag pa'i phyir/'dus pa der snang ba nyid yin du zin kyang zhes bya ba la sogs pa smos te/ rnam par rig pa 'dus pa can du snang mod kyi/ 'on kyang 'dus pa dmigs pa ni ma yin te/ 'di ltar rnam par rig pa de de las mi skye bas so/ /de las mi skyer chug na yang dmigs bar go ci'i phyir mi 'gyur te/de'i phyir don gang zhig rang snang ba'i zhes bya ba la sogs pa smos te/ 'di ltar don gang zhig rang snang ste bdag nyid du snang ba'i rnam par rig pa skyed pa de ni dmigs pa yin par rung ngo / /'di skad du rnam par shes pa don gang zhig gi ngo bo'i rjes su byed la/de yang skyed par byed pa yin na de'i tshe dmigs pa'i rkyen du rung gi gzhan du ni ma yin no zhes bshad pa yin no/ /skyed par byed pa kho na dmigs pa yin par 'gyur ro zhes bya ba 'di ga las she na/ 'di ltar de ni zhes bya ba la sogs pa smos te/ 'di ltar de ni bstan bcos las skye ba'i rgyu mtshan nyid du bshad do//bstan bcos las ni 'di skad du/ don gang zhig sems dang sems las byung ba rnams skye ba'i rgyu mtshan yang yin la/ de rnams skyes na don de nyams su myong ba'i tha snyad 'dogs par yang byed pa de ni dmigs pa yin no zhes 'byung ngo //'di skad du/ don gang zhig sems dang sems las byung ba rnams skyed par byed la/ sems dang sems las byung ba de rnams skyes nas/ don de la 'di ltar nyams su myong ngo zhes de lta bu'i tha snyad 'dogs par byed pa'i don de ni dmigs pa zhes bya'o zhes bshad pa yin no//de'i phyir skye ba'i rgyu mtshan yang yin la zhes smos pas/ dmigs pa'i rkyen skyed par byed pa nyid yin par grub po/ /de'i rnam pa can nyid ni phyogs 'di la rab tu grags pa'i phyir ma bshad do/ /de bas na gnyis ka'i mtshan nyid dang ldan pa'i don gang yin pa de dmigs pa yin no zhes bya bar bshad pa yin no//de la 'di snyam du 'dus pa yang skyed par byed pa yin no snyam du sems na/ de'i phyir 'dus pa ni de lta yang ma yin te zhes bya ba smos te/ 'dus pa ni skyed par byed pa ma yin no//de rnam par rig pa mi skyed na ji ltar dmigs pa yin par 'gyur/ ci ste skyed par byed pa ma yin zhe na/ rdzas su med pa'i phyir zhes bya ba smos te/ gang gi phyir 'dus pa rdzas su yod pa ma yin pa de'i phyir skyed par byed pa ma yin te/ rdzas su med pa rnams la ni 'bras bu skyed pa'i nus pa med do//'dus pa rdzas su med pa nyid ni 'og nas sgrub par byed do/ /gang rdzas su yod pa ma yin pa de ni skyed par byed pa ma yin no zhes bya ba 'di la dpe zla gnyis bzhin zhes bya ba smos te/ 'di ltar rdzas su med pa'i phyir zla ba gnyis pa ni zla ba gnyis par snang ba'i shes pa'i rgyu'i dngos por mi 'gyur ro//de bzhin du 'dus pa yang rang snang ba'i shes pa'i rgyu'i dngos por mi 'gyur ro/ /gal te zla ba gnyis pas de mi skyed na/ 'o na ni de'i rgyu mtshan med pa can du 'gyur ro zhe na/ de'i phyir dbang po ma tshang pa'i phyir zhes bya ba la sogs pa smos te/rgyu mtshan med pa can ni ma yin te/ 'di ltar dbang po nyams pas zla ba gnyis su mthong bar mi 'gyur ro/ /'di ltar gang gi tshe mig gi dbang po rab rib kyis nyams par 'gyur/ de'i tshe zla ba gnyis su snang ba'i shes pa skye bar 'gyur te/ de zla ba gnyis pas skyed pa ni ma yin no//gang gi tshe de des ma skyed pa de'i tshe/ zla ba gnyis kyi shes pa zla ba gnyis par snang du zin kyang / de'i yul ni ma yin no/ /de bas na skyed par byed pa ma yin pa'i phyir yul du mi 'gyur ro zhes bshad pa yin no/ /'dir ma tshang ba zhes bya ba'i sgras ni nyams pa brjod do//de ltar dpe la rab tu bsgrubs nas/ dngos bo la nye bar sbyor ba'i phyir/ de bzhin du rdzas su yod pa ma yin pa nyid kyi zhes bya ba la sogs pa smos te/ ji ltar zla ba gnyis pa rdzas su med pa'i phyir shes pa'i rgyu ma yin la/ rgyu ma yin pa'i phyir de'i yul ma yin pa de bzhin du 'dus pa yang rdzas su med pa'i phyir shes pa'i rgyu ma yin la/rgyu ma yin pa'i phyir de'i yul ma yin no/ /'dir sbyor ba ni/ 'dus pa ni rgyu ma yin te/ rdzas su med pa'i phyir zla ba gnyis pa bzhin no/ /chos mi mthun pa ni rnam par shes pa'o/ rdzas su med pa rnams la nus pa med pa ni gnod pa can gyi tshad ma'o//yang na 'dus pa ni dmigs pa ma yin te/ rgyu ma yin pa'i phyir zla ba gnyis pa bzhin no/ /chos mi mthun pa ni gzung ba'i cha ste/ gzung ba'i cha rgyu nyid yin pa dang / dmigs pa nyid yin par ni sgrub par 'gyur ro//rgyu ma yin pa yang dmigs pa nyid yin na/ zla ba gnyis pa la sogs pa yang dmigs pa nyid yin par 'gyur bas ha cang thal bar 'gyur ba ni gnod pa can gyi tshad ma'o/ /tshad ma 'di gnyis kyang slob dpon chos skyong gis bshad pa yin no/ /de ltar phyogs gnyis ka bkag nas mjug bsdu ba'i phyir/de ltar phyi rol gnyi gar yang / /blo yi yul du mi rung ngo / /zhes bya ba la sogs pa smos te/ de ltar bshad pa'i tshul gyis na gnyi ga ltar na yang phyi rol gyi don rnam par shes pa'i yul du mi rung ngo / /phyi rol ni rnam par shes pa las ma gtogs pa'o/ /gnyi gar zhes bya ba la ni rdul phra rab kyi phyogs dang /'dus pa'i phyogs ltar ro/ /blo'i zhes bya ba ni shes pa'i'o/ /ci'i phyir mi rung zhe na/ de'i phyir yan lag gcig ma tshang ba'i phyir zhes bya ba la sogs pa smos te/ 'di ltar rdul phra rab kyi phyogs la ni rgyu nyid yod kyi de'i rnam pa nyid med do//'dus pa'i phyogs la yang de'i rnam pa nyid yod kyi rgyu nyid med do/ /de lta bas na yan lag re re ma tshang ba'i phyir rdul phra rab ces bya ba dang / 'dus pa zhes bya ba'i don dmigs pa ma yin no/ /'di skad du dmigs pa nyid kyi yan lag gi rnam pa gnyis te/ rang gi rnam pa 'jog pa dang /rgyu nyid yin pa'o/ /'di yang rdul phra rab dang / 'dus pa dag la med pas/ de gnyis yul nyid ma yin no zhes bshad pa yin no/ /gang las yul ni chos nyid gnyis dang ldan pa'o zhes 'byung ba der yang yan lag de gnyis kho na chos nyid gnyis kyi sgrar brjod par zad do//de ltar phyogs gnyis ka bkag nas phyogs gsum pa nye bar dgod pa'i phyir/ 'di la ni kha cig ces bya ba la sogs pa smos te/ phyi rol gyi don du smra bas phyogs 'di la yang pha khol la sogs pa kha cig rdul phra rab 'dus pa'i rnam pa dag dbang po'i rnam par shes pa'i rgyur 'dod do//de dag 'di skad ces rdul phra rab rnams la ni 'dus pa'i rnam pa yang yod do/ /rdul phra rab rnams la gang cung zad ci yod pa de thams cad ni/ rdzas su yod pa yin no/ /rdzas su yod pa'i phyir 'dus pa'i rnam pa de rnam par shes pa'i rgyu nyid du 'gyur ro//rags pa'i phyir na rnam par shes pa la rang gi ngo bo yang 'jog par 'gyur te/ de bas na rdul phra rab rnams tshul gzhan gyi yul nyid yin no zhes zer ro/ /ni zhes bya ba'i sgra ni yang zhes bya ba'i sgra'i don du blta bar bya'o/ /'dus pa'i rnam pa ni 'dir rags pa'i rnam pa'o//bsgrub pa zhes bya ba ni rgyu'o/ /rdul phra rab rnams kyi rnam pa ni rab tu phra bar grags pa ma yin nam/ de bas na 'di dag la 'dus pa'i rnam pa 'di lta ga la yod srid pa yod du chug na yang gcig la rnam pa gnyis ji ltar rung zhe na/ don thams cad ni rnam pa du ma can zhes bya ba la sogs pa smos te/'di ni 'dir nyes pa ma yin te/ gang gi phyir dngos po gzugs can thams cad ni rnam pa du ma can yin pas so/ /'di ltar gzugs can thams cad ni 'byung ba chen po bzhi'i ngo bo nyid yin la/ de dag kyang sngon bo dang dri zhim pa dang / mngar ba dang /rtsub pa la sogs pa'i rnam pa dang ldan pas rnam pa du ma can yin no/ /yang ji ltar rdul phra rab rnams la rnam pa du ma dang ldan pa 'di yod pa de bzhin du 'dus pa'i rnam pa 'di yang de dag la yod par 'gyur ro/ /gal te don thams cad rnam pa du ma can yin na/ ci'i phyir rnam pa thams cad du mi shes she na/ de'i phyir de la rnam pa 'ga' zhig gis zhes bya ba la sogs pa smos te/ 'di dag rnam pa du ma can yin mod kyi 'on kyang rnam pa 'ga' zhig gis 'di dag mngon sum nyid du 'dod kyi/ rnam pa thams cad du ni ma yin te/ 'di ltar de dag gi nus pa so sor nges pa'i phyir dbang po rnams ni don thams cad 'dzin pa ma yin no//'di ni btsun pa sangs rgyas lha'i gzhung lugs kyi rjes su 'brangs nas bshad pa yin te/ de ltar na skye mched bcu ni 'byung ba tsam du zad do/ /de ltar rnam pa du ma can nyid du bsgrubs nas rnal ma dang sbyar ba'i phyir rdul phra rab rnams la yang zhes bya ba la sogs pa smos te/rdul phra rab rnams la yang 'dus par snang ba'i shes pa bskyed pa'i rgyu'i dngos po yod de/ rdul phra rab rnams kyi 'dus pa'i rnam pa can gyi shes pa bskyed do zhes bya ba'i don to/ /rdul phra rab rnams la 'dus pa'i rnam pa yod pa sgrub par byed pas rdul phra rab rnams la 'dus pa'i rnam pa yod do zhes brjod par bya ba ma yin nam/ci'i phyir 'di skad du rdul phra rab rnams la yang 'dus par snang ba'i shes pa skyed pa'i rgyu yod do zhes smras she na/ 'dir smras ba/ dmigs pa'i cha gnyis rab tu bstan pa'i phyir de skad ces smras te/ de la shes pa skyed pa'i rgyu'i dngos po zhes bya ba smras pas ni/ rgyu nyid yin par rang gi sgras bstan to/ /'dus par snang ba zhes smras pas ni rnam pa 'jog pa dang 'dus pa'i rnam pa yod pa nyid kyang bsgrubs pa yin te/gang gi phyir don gyis ni rnam par shes pa la rang gi bdag nyid la yod pa'i rnam pa 'jog gi med pa ni ma yin pa de'i phyir 'dus pa'i rnam pa yod par yang smras pa kho na yin no/ /gal te rdul phra rab rnams la rags pa'i rnam pa yod na go/ /ji ltar de dag la rdul phra rab ces bya/ji ltar phra mo'i rnam pa de nye bzhin du yang mi 'dzin zhe na/ de'i phyir rdul phran rnam pa zhes bya ba la sogs pa smos so/ /de nyid rnam par dgrol ba'i phyir ji ltar sra ba nyid la sogs pa zhes bya ba smos te/ ji ltar sra ba nyid dang / gsher ba dang / dro ba la sogs pa'i yul rnams yod bzhin du yang /dbang po'i nus pa so sor nges pa'i phyir mig gi blo'i yul nyid du mi 'gyur ba de bzhin du rdul phra mo yang de bzhin du yang mi 'gyur ro/ /rnam pa de nyid la brten nas kyang 'di dag la rdul phra rab ces tha snyad gdags so//ni zhes bya ba'i sgra ni nyid ces bya ba'i don du blta bar bya'o/ /de ltar phyogs gsum pa nye bar bkod nas sun dbyung ba de dag ltar na bum pa dang / kham phor la sogs blo zhes bya ba la sogs pa smos te/ gang dag rdul rab rnams la 'dus pa'i rnam pa yod par khas len pa de dag la brgal zhing brtag par bya ste/rdul phra rab rnams la 'dus pa'i rnam pa gang zhig khas len/ re zhig 'jig rten na ni bum pa dang / kham phor dang / phor bu la sogs pa dang / ka ba dang dri la sogs pa la 'dus par grags so/ /'di dag gi nang na rnam pa gang zhig rdul phra rab rnams la yod par 'dod/gal te bum pa'i rnam pa'o zhe na de'i tshe kham phor la sogs pa 'dus pa thams cad la bum pa'i blo 'byung bar 'gyur ro/ /'on te kham phor gyi rnam pa'o zhe na/ de'i tshe yang thams cad la kham phor gyi blo 'byung bar 'gyur gyi kha cig la ni bum pa'i blo kha cig la ni kham phor gyi blo zhes bya ba blo tha dad pa dag yin pa 'dir mi 'gyur ro//'di skad du/ blo ni yul la rang gi ngo bo'i rjes su byed cing skye la/ yul yang ngo bo gcig pa yin na de ji ltar blo tha dad par 'gyur zhes bshad pa yin no/ /de la 'di snyam du/bum pa la ni rdul phra rab mang la/ kham phor la ni ches nyung ste/ de bzhin du ni gzhan dag la yang mang ba dang nyung ba nyid rig par bya'o/ /de'i phyir mang ba dang nyung ba nyid kyis byas pa'i blo'i khyad par 'di yod do snyam du sems na/ de'i phyir bum pa dang kham phor la sogs pa'i rdul phra rab rnams la ni zhes bya ba la sogs pa smos te/'di la ni/ nyung ngu dang mang po nyid kyis byas pa'i blo'i khyad par mi rung ste/ 'di ltar bum pa la rdul phra rab mang la/ kham phor la ches nyung mod kyi/ 'on kyang rdul phra rab tu gtogs pa 'dus pa'i rnam pa la rang la yod pa'i khyad par ni 'ga' yang med do//de'i phyir nyes pa de'i so na 'dug ste/ gang du rdul phra rab mang ba der ni bum pa che la/ gang du ches nyung ba der ni bum pa chung ngo zhes bya ba 'di tsam zhig tu 'gyur bar zad kyi 'dus pa'i rnam pa 'dra ba las mang po las ni bum pa'i blo/ nyung ngu la ni kham phor gyi blo 'byung ngo zhes bya ba 'dir ni mi 'gyur ro/ /'dir gzhan gyi tshig gi go skabs bstan pa'i phyir/ gal te rnam pa'i dbye bas dbye zhes bya ba smos so/ /de nyid rnam par dgrol ba'i phyir/ gal te 'di snyam du zhes bya ba la sogs pa smos te/ gal te 'di snyam du bum pa'i mgrin pa ni gyen du blta la/de yang zhum pa yin/ lto ni rked na 'dug la de yang yangs pa yin te/ de lta bu la sogs pa ni 'di'i rnam pa'i dbye ba yin no/ /kham phor ni kha ni yangs la/ zhabs ni zhum pa zhes bya ba la sogs pa rnam pa'i dbye ba yin te/ de'i phyir rnam pa'i dbye ba'i sgo nas/bum pa dang kham phor la sogs pa'i blo rnams tha dad par 'gyur ro snyam du sems na'o/ /rnam pa'i khyad par las zhes bya ba la rnam pa zhes bya ba ni dbyibs te/ bkod pa dang / gnas pa zhes bya ba'i tha tshig go/ /rnam pa'i dbye ba yul ma yin pa nyid du bstan pa'i phyir/khyad par 'di ni bum pa la sogs pa la yod kyi zhes bya ba la sogs pa smos te/ khyod kyi bum pa dang gzhan kham phor la sogs pa'i rnam pa'i khyad par bstan pa gang yin pa de dag gi khyad par 'di ni yod de/ de ni kho bo cag kyang mi bsnyon mod kyi/ 'on kyang rdul phra rab rdzas su yod pa gang dag yin pa de dag la ni rnam pa'i dbye ba de med do//de ci'i phyir zhe na/ tshad dbye med phyir ro zhes bya ba smos te/ 'di ltar rdul phra rab rnams kyi tshad zlum po zhes bya ba gang yin pa de la ni dbye ba med do/ /bum pa'i rdul phra rab rnams kyang rdzas gzhan kho na yin la/kham phor gyi yang rdzas gzhan ma yin nam/ de ji ltar tshad dbye ba med ce na/ de'i phyir rdul phra rab rnams ni zhes bya ba la sogs pa smos te/ gang gi phyir bum pa dang / kham phor la sogs pa'i rdul phra rab rnams rdzas gzhan nyid yin du zin kyang zlum po la tha dad pa med pa de'i phyir rdul phra rab rnams la rnam pa'i dbye ba med do//ji ltar khyed kyi ltar na rdul phra rab rnams las ji dang / ji snyed pa yod pa de thams cad rdzas su yod pa de bzhin du/ rdul phra rab rnams la tshad cung zad ci yod pa de thams cad kyang zlum po'i ngo bo nyid yin la/rdul phra rab rnams kyi zlum po yang ngo bo nyid gcig pa kho na yin no/ /de'i phyir ji ltar de dag gi dbye bas tha dad par 'gyur/ 'dus pa'i rnam pa rags par 'dod mod kyi/ 'on kyang rdzas su yod pa'i phyir de yang cha shas med pa nyid du 'gyur dgos so/ /de lta ma yin te/ 'di cha shas dang bcas pa yin na rdzas su yod pa nyid du mi 'gyur ro/ /cha shas med pa'i phyir de la bkod pa tha dad pa lta ga la yod de/ gang dag cha shas dang bcas pa de dag ni nus pa sna tshogs pas bkod par 'gyur gyi/ cha shas med pa dag ni ma yin no/ /de ltar rdul phra rab rnams kyi rnam pa'i dbye ba bkag nas mjug bsdu ba'i phyir/de'i phyir de rdzas med la yod/ /ces bya ba smos te/ gang gi phyir de ltar bshad pa'i rnam pas cha shas med pa rnams la bkod pa tha dad pa mi srid pa de'i phyir/ de ni rdzas su med pa rnams kho na la blta bar bya'o/ /bstan bcos byed pas mdo'i don bstan pa'i phyir/rnam pa'i dbye ba ni zhes bya ba la sogs pa smos te/ rnam pa'i dbye ba gang yin pa de ni/ kun rdzob tu yod pa dag kho na la yod de/ cha shas dang bcas pa'i phyir ro/ /rdul phra rab rnams la ni ma yin te/ cha shas med pa'i phyir ro/ /bye brag pa'i ltar na bum pa la sogs pa rdzas su yod pa nyid yin te/de'i phyir brgya zhig la de bum pa la sogs pa kun rdzob tu yod pa'o zhes bya ba 'di ji ltar shes zhes smra bar gyur na/ de'i phyir bum pa la sogs pa ni kun rdzob tu yod pa nyid ces bya ba la sogs pa smos te/ bum pa la sogs pa ni kun rdzob tu yod pa nyid do zhes bya ba de ltar shes par bya ste/'di ltar rdul phra rab re re nas yongs su brtsal bar byas na yang bum pa'i rnam pa can gyi shes pa mi skye'o/ /der snang shes pa nyams 'gyur phyir/ /zhes bya ba ni shes pa 'di la de lta bur snang ba yod pas na/ 'di ni der snang ba ste/de zhes bya ba'i sgras ni bum pa dang sbyar ro/ /snang zhes bya ba'i sgras ni 'dra bar brjod do/ /de ni der snang ba yang yin la/ shes pa yang yin pas na/ der snang shes pa'o/ /de nyams pa ni der snang shes pa nyams pa ste/ der snang shes pa nyams pa de'i phyir ro/ / rdul phra rab re re nas yongs su bsal na bum pa la sogs pa'i rnam pa can gyi shes pa mi skyed zin kyang / ci de tsam gyi bum pa la sogs pa kun rdzob tu yod pa nyid du 'gyur ram zhe na/ de'i phyir/ rdzas su yod pa rnams la ni/ /zhes bya ba la sogs pa smos te/ 'di ltar gang dag rdzas su yod pa de dag ni/'brel pa can bsal kyang rang gi blo yongs su mi 'dor te/ dper na kha dog la sogs pa lta bu'o/ /gal te bum pa la sogs pa yang rdzas su yod pa zhig yin par gyur na ni de'i tshe de dag kyang rang dang 'brel pa can yongs su bsal kyang / rang gi blo mi 'dor bar 'gyur ro/ /rdul phra rab re re nas yongs su bsal bar byas nas/ rdzas rtsom par byed pa'i sbyor ba zhig pa'i phyir/ bum pa zhig pas de'i phyir bum pa'i blo mi skye ba yin nam/ thams cad kyi thams cad du med pa'i phyir ni ma yin no zhe na/ 'dir bshad pa gal te/rdul phra rab las ma gtogs pa bum pa la sogs pa yan lag can gyi rdzas zhig yod na/ de'i tshe rdul phra rab dag la yod do zhes brjod par bya ba ci de dag la ji snyed yod pa'i ngo bos yod dam/ 'on te phyogs gcig gis yin/ de la rtsom par byed pa'i cha shas ma gtogs pa gang dag gis ni de de la yod par 'gyur ba cha shas can gyi phyogs gcig gis yod pa ma yin no//gal te phyogs gcig gis yod pa ma yin no zhe na/ de'i tshe ji snyed yod pa'i ngo bos yod do zhes bya bar gyur to/ /de'i phyir rdul phra rab dag ji snyed pa de snyed kyi bum pa la sogs pa'i cha shas can du 'gyur te/des na cha shas can gyi gcig pa nyid nyams par 'gyur ro/ /'dir sbyor ba ni cha shas can ni rdzas su yod pa ma yin te/ dus gcig tu dngos po du ma nye bar len pa'i phyir/ rta ma yin pa nyid la sogs pa bzhin no//chos mi mthun pa ni rang gi mtshan nyid do/ /dngos po'i ngo bo nyid yin na ni bshad pa'i rnam pas dus gcig tu dngos po du ma nye bar len pa nyid du mi 'thad pa ni gnod pa can gyi tshad ma'o/ /de ltar na phyogs gsum char la yang / phyi rol gyi don dmigs pa nyid du mi 'thad do zhes bsgrubs nas mjug bsdu ba'i phyir/de lta bas na dbang po'i zhes bya ba la sogs pa smos te/ gang gi phyir de ltar rdul phra rab rnams dmigs par mi rung ba de'i phyir dbang po'i blo rnams kyi phyi rol gyi don gyi yul can ma yin no zhes bya bar grub po/ /de ltar gzhan gyi gzhung lugs bkag nas rnam pa thams cad du dmigs pa bkag nas/khas blangs pa la grags pas gnod par 'gyur du 'ongs pas rang gi gzhung lugs la dmigs pa rnam par gzhag pa bstan pa'i phyir/ shes bya nang gi ngo bo ni zhes bya ba la sogs pa smos te/ mdo'i don ni shes pa la/shes bya'i rnam pa beg bur chad pa lta bur snang ba gang yin pa de kho na shes pa'i yul yin no zhes bya ba yin no/ /nang zhes bya ba ni nang ste/ de yang 'dir shes pa yin par blta bar bya'o/ /nang zhes bya ba'i sgra 'di ni rang bzhin gyis bdun pa'i don yin te/ des na shes pa la nang zhes bshad pa yin no//shes bya'i ngo bo zhes bya ba ni yul gyi rnam pa gzung ba'i cha zhes bya ba'i tha tshig go/ /ni zhes bya ba'i sgras ni nges par gzung ba dang / bar du chod pa'i don du blta bar bya'o/ /phyi rol ltar snang zhes bya ba ni phyi rol lta bur mngon pa ste/ rnam par chad pa lta bur zhes bya bya ba'i tha tshig go//de de ltar snang ba'i rgyu mtshan yang nam mkha'i khams snang ba yin no/ /nam mkha' de ni rnam par shes pa la snang bas na/ rnam par shes pa las beg bur chad pa bzhin du/ des gzung ba'i char ston par byed de/ dper na zla ba'i gzugs brnyan me long gi ngos su 'byung ba na/nam mkha'i khams kyi gzugs brnyan gyi dbang gis khron pa na 'dug pa ltar beg bur chad par snang ba bzhin no/ /phyi rol gyi yul med na rnam par shes pa'i dmigs pa'i rkyan nyid 'ga' yang yod pa ma yin nam zhe na/ de'i phyir phyi rol gyi don zhes bya ba la sogs pa smos so//'di la dmigs pa'i rkyen med pa'i nyes pa med de/ 'di ltar phyi rol gyi don med mod kyi/ 'on kyang nang na phyi rol lta bur snang ba yod pa kho na bas/ de ni dmigs pa'i rkyen du 'gyur te/ dper na rab rib can gyis skra shad dang / sha sbrang la sogs pa'i rnam pa can gyi blo la/skra shad la sogs pa'i rnam pa lta bu'o/ /'di skad du gzung ba'i cha de ni dmigs pa'i mtshan nyid du rung ba'i phyir dmigs pa'i rkyen nyid du bshad do zhes bshad pa yin no/ /yang 'di ji ltar dmigs pa'i mtshan nyid du rung zhe na/ de'i phyir rnam shes ngo bo'i phyir zhes bya ba la sogs pa smos te/gang gi phyir shes pa sngon po dang ser po la sogs pa spros pa'i bag chags yongs su smin pa'i dbang gis sngon po dang ser po la sogs pa'i rnam pa dang ldan par skye ba de'i phyir/ sngon po la sogs pa'i rnam pa can yin pas de'i rnam pa can nyid du grub la gang gi phyir sngon po la sogs pa'i rnam pa de rnam par shes pa de'i rkyen yin pa de'i phyir rgyu nyid du yang grub po//de'i rkyen ni de'i rkyen nyid de/ de zhes bya ba'i sgra ni rnam par shes pa dang sbyor ro/ /de'i ngo bo ni de'i rkyen nyid do/ /de'i rkyen nyid yin pa de'i phyir te/ gsum pa 'di ni gtan tshigs la blta bar bya'o//bstan bcos byed pas mdo'i don rnam par dgrol ba'i thabs kyi mjug bsdu bar bya ba'i phyir nang gi rnam par shes pa ni don du snang ba dang zhes bya ba la sogs pa smos te/ gang gi phyir rnam par shes pa ni nang na yod pa'i don gyi rnam pas de'i rnam pa can dang /don gyi rnam pa de yod na de skyes pa de'i phyir/ chos nyid gnyis dang ldan pas na nang gi nyid dmigs pa yin par rigs so/ /'di skad du/ rnam par shes pa ni nang na yod pa'i don gyi rnam par bris pa'i rnam pa lta bur snang ngo / /de lta bas na de'i rnam pa can yin te/ dper na rgya bris pa'i rnam pas de'i rnam pa can yin pa lta bu'o/ /gang gi phyir gzung ba'i cha yod na skyes pa de'i phyir/ rnam par shes pa de ni de las skyes pa zhes kyang bya ste/ de bas na dmigs pa'i cha gnyis ka yod pas 'di ni dmigs pa nyid du rigs so zhes bshad pa yin no//'dir gzhan gyi tshig gi go skabs bstan pa'i phyir/ re zhig de ltar snang ba nyid yin la ni rag na zhes bya ba la sogs pa smos pa rnam par shes pa la nang na yod pa'i shes bya snang ba nyid ni yin la rag ste/ 'di ltar de ni shes bya'i rnam pa nges bris pa'i rnam pa lta bur skye'o zhes bshad na de'i phyogs gcig tu gyur pa dang /lhan cig skyes pa shes bya'i rnam pa gang yin pa de go ji ltar rnam par shes pa de'i rkyen du 'gyur/ de lta yin na ni bdag nyid la byed par khas blangs pa dang / ha cang thal bar 'gyur te/ 'dzin pa'i cha yang gzung ba'i cha skyed par byed par 'gyur la/ba lang gi rwa g.yas g.yon kyang phan tshun skyed par byed pa nyid du thal bar 'gyur ba ma yin nam zhes bya ba ni phyogs snga ma'o/ /'di la bstan bcos byed pas lan gdab par/ gcig cha'ang mi 'khrul phyir na rkyen/ /zhes bya ba smos so//de nyid rnam par dgrol ba'i phyir/ /lhan cig par gyur du zin kyang zhes bya ba la sogs pa smos so/ /'di ni 'dir nyes par mi 'gyur te/ gang gi phyir gzung ba'i cha ni lhan cig 'byung bar 'gyur du zin kyang / rkyen gzhan rgyu dang mtshungs pa de ma thag pa dang / bdag po dag las skyes pa'i rnam par shes pa'i dmigs pa'i rkyen nyid du 'gyur bas so/ /'di ltar gzung ba'i cha de med par rnam par shes pa de mi 'byung ste/ de ni dbyug pa la brten pa'i tshul du dmigs par bya ba 'ga' zhig tu zad kyi/ 'di rkyen ril gyi bya ba byed pa'am/ rkyen re re la sgro gdags pa ni ma yin no/ /gal te yang shes pa de gzung ba'i cha de las phan 'dogs pa mi re na ci ste/ de med par yang mi 'byung ste/ 'di ltar phan mi 'dogs pa la ltos par mi 'gyur la/ phan mi 'dogs pa ni med du zin kyang 'ga' yang mi 'byung bar mi 'gyur ro//gal te rnam pa 'dis gzung ba'i cha yang rgyu nyid du 'gyur du zad de/ 'gal ba ci zhig yod/ ba lang gi rwa g.yas g.yon dag ni 'khrul ba'i phyir rgyu dang 'bras bu'i dngos po med do/ /bdag nyid la byed pa yang la lar 'dod pa nyid de/ dper na mar me lta bu'o//de ni bdag nyid kho nas bdag nyid gsal bar byed do/ /cha'i bye brag gis ni bdag nyid la byed pa yang yod re skan/ rgyu dang 'bras bu'i dngos po mi 'khrul pa'i rgyu mtshan can yin no zhes bya ba 'di ga las she na/ 'di ltar gtan tshigs pa dag ni yod pa dang med pa dag gi zhes bya ba la sogs pa smos te/'di ltar gtan tshigs pa dag ni yod pa dang med pa dag gi yod pa dang med pa nyid gang yin pa de ni rgyu dang rgyu dang ldan pa'i rim gyis skye ba dag gi yang mtshan nyid yin par smra ste/ gang zhig yod na gang yod la/ /de med na med pa de ni rgyu yin la/cig shos ni rgyu dang ldan pa yin no/ /'di la yang gzung ba'i cha yod na shes pa yod la med na med de/ de lta bas na lhan cig 'byung ba de gnyis kyang rgyu dang rgyu dang ldan pa nyid du 'grub po/ /gtan tshigs pa dag ces bya ba ni gang dag gtan tshigs kyi tha snyad 'dogs pa de dag ni gtan tshigs pa dag ste/rtog ge ba zhes bya ba'i tha tshig go/ /de dang ldan pa nyid ces bya ba ni yod pa dang med pa dang ldan pa nyid do/ /rgyu dang rgyu dang ldan pa zhes bya ba ni rgyu dang 'bras bu dag ces bya ba'i don to/ /de ltar re zhig yul dang yul can gyi dngos po dus mnyam pa bstan nas/da ni rim gyis yul dang yul can gyi dngos po bstan pa'i phyir/ yang na/ nus pa 'jog phyir rim gyis yin/ /zhes bya ba smos te/ yang na gzung ba'i cha de nus pa 'jog pa na rim gyis skyed par byed pa'i ngo bo'i yul du 'gyur te/ 'di ltar gzung ba'i cha de 'gag pa na/ /kun gzhi rnam par shes pa la nus pa 'jog par byed do//nus pa de gal te skad cig ma gnyis pa la lhan cig byed pa rnams sgrub na ni de'i tshe skad cig ma gnyis pa kho na la rang dang mthun pa'i rnam par shes pa skyed do/ /gal te mi sgrub na ni de'i tshe skad cig ma gsum pa'am/ bzhi ba la yang rung gang gi tshe 'di sgrub par 'gyur ba de'i tshe/yongs su smin nas rang dang mthun pa'i rnam par shes pa skyed par 'gyur ro/ /phyogs 'di la ni bdag nyid la byed pa 'gal ba'i phyir dang / phyogs gcig yin pa'i phyir dang / lhan cig skyes pa yin pa'i phyir zhes bya ba la sogs pa'i nyes pa mi srid de/'di ltar shes pa snga ma la gzung ba'i cha sngon po la sogs pa'i rnam pa yod pa gang yin pa de/ sngon po la sogs pa'i rnam pa can gyi shes pa phyi ma skyed par byed do/ /de'i phyir nyes pa 'di rnams lta srid re skan/ gal te nus pas shes pa skyed na/de lta na 'o na ni nus pa kho na yul du 'gyur gyi/ gzung ba'i cha snga ma ni ma yin no snyam du sems na/ rim gyis kyang yin te zhes bya ba la sogs pa smos te/ 'di ni nyes pa med do/ 'di ltar rim gyis kyang gzung ba'i cha de ni rang dang mthun pa'i 'bras bu skyed pa'i phyir kun gzhi rnam par shes pa'i rten can gyi nus pa byed do//gal te gzung ba'i cha des nus pa de gzhag par ma gyur na ni nus pa des shes pa de lta bu skyed par yang mi 'gyur ro/ /de'i phyir nus pa las skye ba'i shes pa de yang gzung ba'i cha de kho na las skyes pa yin pas 'gal ba 'ga' yang med do//phyogs 'di la ni chos nyid gnyis dang ldan pa shin tu yang 'thad de/ 'di ltar gzung ba'i cha des rang dang mthun pa'i shes pa phyi ma de skyed pas de'i phyir chos nyid gnyis dang ldan pa yod do/ /'dir gzhan gyi tshig gi go skabs bstan pa'i phyir/ gal te 'o na nang gi gzugs kho na zhes bya ba la sogs pa smos te/ gal te khyod nang gi gzugs kho na dmigs pa'i rkyen yin par 'dod na/ de'i tshe ji ltar nang gi gzugs de dang mig la brten nas mig gi rnam par shes pa skye ste/ 'di ltar mig sngar snang bar gyur ba'i gzugs gang yin pa de dang lhan cig pa'i mig gis rang gi rnam par shes pa skyed na/nang gi gzugs ni mig sngar snang bar yang mi 'gyur na/ de ji ltar nang gi gzugs de dang lhan cig pa'i mig gis mig gi rnam par shes pa skyed ces brjod par bya/ de ni nam yang mdun na mi 'dug na/de ji ltar snang bar 'gyur zhes bya ba ni phyogs snga ma'o/ /bstan bcos byed pas 'di'i lan gdab par/ lhan cig byed dbang nus pa yi/ /zhes bya ba la sogs pa smos te/ gal te dbang po 'byung ba las gyur pa yin na ni de'i tshe nyes pa 'dir 'gyur na/ kho bo cag ni dbang po nyid du 'dod pa'i dngos po yul lhan cig byed pa'i nus pa gang yin pa de dbang po yin par 'dod de/de'i phyir kho bo cag gi ltar na ji ltar gzugs nang gi yin pa de bzhin du mig kyang nang gi kho na yin pas ji skad smras pa'i nyes par lta zhig ga la yod/ lhan cig byed dbang zhes bya ba 'di ni yul dang lhan cig byed pa'i dbang por 'dod pa'i zhes bya bar de ltar blta bar bya'o//de lta ma yin gyi dbang po'i dbang po zhes byas nas ni 'brel ba med par 'gyur la/ dbang po'i dbang po zhes brjod na mdzes par yang mi 'gyur ro/ /yang dbang po nus pa'i ngo bo nyid yin no zhes bya ba 'di ji ltar shes she na/de'i phyir/ dbang po ni zhes bya ba la sogs pa smos te/ gang gi phyir dbang po ni rang gi 'bras bu rnam par shes pa'i mtshan nyid las nus pa'i ngo bo nyid du rjes su dpag gi /'byung ba las gyur pa nyid du ni ma yin pas so/ / 'di ltar 'bras bu las ni rgyu tsam rjes su dpag par nus kyi/ rgyu'i khyad par ni ma yin te/ khyad par gyi rtags la khyab pa mi srid pa'i phyir ro/ /ji ltar du ba las me tsam rjes su dpag par nus kyi/ me'i khyad par rtswa dang lo ma la sogs pa ma yin pa de bzhin du/ 'bras bu'i rnam par shes pa'i mtshan nyid las rgyu tsam rjes su dpag par nus kyi/rgyu'i khyad par 'byung ba las gyur pa nyid la sogs pa ni ma yin te/ 'di ltar bye brag tu smra ba'i ltar na ni dbang po 'byung ba las gyur pa yin/ btsun pa sangs rgyas lha'i ltar na ni 'byung ba'i ngo bo nyid yid/ rnal 'byor spyod pa'i ltar na ni rnam par shes pa'i ngo bo nyid yin/ dbu ma pa'i ltar na ni kun rdzob tu yod pa yin/ grangs can pa'i ltar na ni nga'o snyam pa yin pas de lta bu la sogs pa'i khyad par rjes su dpag par mi nus so/ /de lta bas na nus pa rgyu tsam du rjes su dpog par byed pas nus pa tsam rjes su dpog par 'gyur ro//de la 'di snyam du nus pa ni nus pa dang ldan pa la ltos te/ nus pa can gzhi med par ni mi rung ngo / /nus pa dang ldan pa ni dbang po yin la/ de yang 'byung ba las gyur ba yin pas dbang po 'byung ba las gyur ba yin par grub po snyam du sems na/de'i phyir/ de yang rnam rig la mi 'gal/ /zhes bya ba smos te/ gal te rten zhig gdon mi za bar dgos na/ rnam par shes pa de nyid rten yin du zad de/ 'di ltar rnam par shes pa la ni yul so sor rnam par rig pa'i ngo bo yin pa'i phyir dang /rang rig pa'i ngo bo yin pa'i phyir gnyi ga la grags so/ /de'i phyir de nyid las kyis yongs su bsgos pa rten yin du zad de/ nus pa ni gang gis na de rnam par shes pa'i rten can du mi rung bar 'gyur pa rnam par shes pa dang lhan cig 'gal ba ni med do/ /de la 'di snyam du 'byung ba las gyur pa la rnam par gnas pa'i nus pa yang 'bras bu gzhan skyed la/rnam par shes pa la gnas pa yang gzhan skyed do/ de lta bas na dbang po ni gdon mi za bar 'byung ba las gyur pa kho na yin par shes par bya'o snyam du sems na de'i dogs pa bsu bar nus pa ni rnam par shes pa la yod kyang rung zhes bya ba la sogs pa smos so//'di la ni rten gyis byas pa'i khyad par med de/ 'di ltar nus pa ni gal te rnam par shes pa la rnam par gnas kyang rung / 'on te gzhan la rnam par gnas kyang rung / rnam pa thams cad du des ni gzugs mthong ba la sogs pa tsam zhig bya bar zad pas de'i phyir 'bras bu bskyed par bya ba la khyad par med do//bstan du med pa'i rang gi ngo bo la zhes bya ba ni gzhan 'dod pa'i dbang po'i rang gi ngo bo ni dbang pos mi sod pa'i phyir brtag par mi nus so/ /ma brtags pa yang bstan par mi nus te/de'i phyir gzhan 'dod pa'i dbang po ni bstan du med pa'i rang gi ngo bo yin no/ /'o na dbang po'i nus pa de'i rgyu gang yin zhe na/ mjug bsdu ba'i thabs kyis de bstan pa'i phyir/ de ltar yul gyi ngo bo dang zhes bya ba la sogs pa smos te/ ji ltar rnam par shes pa 'di dbang po'i nus pa las skye ba de bzhin du/ dbang po'i nus pa 'di la yang / /dbang po 'phen par byed pa'i rnam par shes pa yang snga ma las skye la/ sngon gyi rnam par shes pa de yang dbang po'i nus pa yang snga ma las skye'o/ /de ltar na 'di lta ste dbang po'i nus pa dang /yul gyi rnam pa can gyi rnam par shes pa 'di gnyis ni phan tshun gyi rgyu can du 'jug la/ rgyu dang 'bras bu brgyud pa 'di'i dus kyi thog ma yang med pas 'di gnyis thog ma med pa'i dus par blta bar bya'o/ /bstan bcos byed pas mdo'i don bstan pa'i phyir/mig ces bya ba'i zhes bya ba la sogs pa smos te/ mig ces bya ba'i dbang po'i nus par bstan pa gang yin pa dang / nang gi gzugs lhan cig skyes pa'am/ sngar byung ba la brten nas ma nges pa'i don gyi rnam pa can gyi rnam par shes pa skye'o//ji ltar phyi rol gyi don du smra ba ltar na nges pa'i don kho na las rnam par shes pa skye ba ltar/ 'di la ni de lta ma yin pas de'i phyir 'di skad du/ rnam par shes pa don du snang ba dmigs kyis ma phye ba skye'o zhes bshad do/ /gzhan dag ni brjod du med pa'i don du snang ba zhes zer te/de ni don shin tu 'brel par mi snang ste/ brjod du med pa nyid ni 'dir cung zad kyang mi dgos so/ /'di ltar rang gi mtshan nyid thams cad ni brjod du med pa ste/ gal te der snang ba'i shes pa skye ba yin na des na dngos su ci zhig 'grub par 'gyur/ 'on te don gyi rnam pa can gyi shes pa skye ba gang yin pa de brjod par mi nus so zhe na/de la yang ci med pa'i phyir brjod par mi nus sam/ 'on te rang gi mtshan nyid kyi phyir re zhig gal te med pa'i phyir ro zhe na/ de ni rigs pa ma yin te/ 'di ltar med pa'i ri bong gi rwa la sogs pa yang rjod par byed do//'on te rang gi mtshan nyid kyi phyir ro zhe na/ 'di la ni lan btab zin to/ /mig ces bya ba'i nus pa la brten nas zhes bya ba 'dir sogs pa zhes bya ba'i sgra ni mngon par rtogs par bya ste/ des ni mig la sogs pa zhes bya ba la zhes bshad pa yin no//'o na nus pa de gang las skye zhe na/ 'di gnyis kyang phan tshun gyi rgyu can dang zhes bya ba smos te/ nus pa de yang dbang po 'phen par byed pa'i rnam par shes pa snga ma las skye zhing / rnam par shes pa de yang nus pa yang snga ma las skye la/ nus pa de yang dbang po 'phen par byed pa'i rnam par shes pa zhes snga ma las skye bas/rgyu dang 'bras bu'i ngo bo brgyud pa 'di ni thog ma med pa'i dus can nyid yin no/ /de ltar na re zhig dbang po'i nus pa dang / rnam par shes pa rgyu dang 'bras bu'i dngos por bstan pa yin no/ /'di gnyis kyang phan tshun gyi rgyu can dang /thog ma med pa'i dus pa yin te/ zhes bya ba'i tshig 'di kho nas/ yul gyi nus pa dang rnam par shes pa phan tshun rgyu mtshan nyid dang / thog ma med pa'i dus can nyid du ston to/ /phan tshun gyi rgyu can nyid bstan pa'i phyir/ res 'ga' ni nus pa yongs su smin pa las zhes bya ba la sogs pa smos te/res 'ga' ni spros pa'i bag chags zhes bya ba'i nus pa yongs su smin pa las rnam par shes pa'i yul gyi rnam pa nyid du 'byung la/ res 'ga' ni yul gyi rnam pa can gyi sems las nus pa skye'o/ /'di la yang rgyu dang 'bras bu'i brgyud pa 'di'i rgyun chad pa med pas thog ma med pa'i dus can nyid du shes par bya'o//yang ci dbang po dang yul gyi nus pa 'di dag rnam par shes pa las tha dad pa zhig yin nam/ 'on te ma yin/ gal te tha dad pa na de'i tshe ming tsam zhig la ldog par rtogs par zad kyi don ni mthun te/ rnam par shes pa la ma gtogs pa'i dbang po dang /dmigs pa dag khas blangs pa'i phyir ro/ /'on te tha mi dad na ni de'i tshe nus pa 'di ni dbang bo'o/ /'di ni yul lo zhes bya ba'i rnam par gzhag pa 'dir mi 'gyur ro zhe na/ de'i phyir rnam par shes pa dang / de gnyis zhes bya ba la sogs pa smos te/ gal te dngos kyi tshul dpyad na ni/ de'i tshe nus pa rnams gnas skabs kyi khyad par gyi bdag nyid yin pas kun rdzob tu yod pa'i phyir/ rnam par shes pa las gzhan nyid dam/ gzhan ma yin pa nyid du brjod par bya ba ma yin no/ /de'i phyir ji skad smras pa'i nyes pa gnyi gar thal ba med do//'on te 'jig rten gyi tha snyad la brten na ni/ /de'i tshe ci dgar res 'ga' ni rnam par shes pa de dag las gzhan pa nyid du brjod par bya la/ res 'ga' ni gzhan ma yin pa nyid du'o/ /'di ltar kun rdzob tu yod pa rnams ni 'jig rten na res 'ga' ni tha dad par tha snyad 'dogs te/ dper na tsan dan gyi dri zhes bya ba la sogs pa lta bu'o/ /res 'ga' ni tha mi dad pa ste/ dper na gzugs la sogs pa la bum pa zhes bya ba lta bu'o/ /de ltar phyogs gnyi ga la yang dmigs pa nang gi yin par bstan nas mjug bsdu ba'i phyir/ de ltar na nang gi zhes bya ba la sogs pa smos te/de ltar na bshad pa'i rnam pas rnam par shes pa dang tha mi dad pa'i dmigs pa la chos nyid gnyis dang ldan pa yod pas yul nyid du 'thad pa yin no/ /dmigs pa yongs su brtag pa yi/ /rnam par 'grel pa gsal byas pas/ /dge ba thob pa gang yin des/ /'gro ba sangs rgyas nyid thob shog /dang po'i las can dga' bya'i phyir/ /rgya cher bshad pa dul ba'i lhas/ /khams bcu dang ni bral bar byas/ /de phyir mkhas rnams bzod par gyis/ /nyes pa 'dzin pa lhur len pas/ /'di ni 'dod 'dod dpyad du med/ /rang gi rnam rtog dbang gis na//nyes pa med pa'am blo la snang / /dmigs pa brtag pa rgya cher bshad pa slob dpon dul ba'i lha shes bya'i dmigs pa mtha' dag la gzhol ba smra ba'i seng ge mu stegs can glang po che'i glad pa [(]'gims [,]'gums [)]par mdzad pas sbyar ba rdzogs so// //