CLOSE WINDOW

D4236
བོད་ཡིག

@##/ /rgya gar skad du/ saM ban+d+ha pa rIk+Sha TI kA/ bod skad du/ 'brel ba brtag pa'i rgya cher bshad pa/ 'jam dpal gzhon nur gyur pa la phyag 'tshal lo/ /'gro ba thams cad 'brel med par//'gro ba'i bla ma gang gsungs pa/ /de la rab tu phyag 'tshal nas/ /'brel ba brtag pa bshad par bya/ /'brel ba dngos por gyur pa bsal bar 'dod nas zhes bya ba'i tshig dang po 'dis rab tu byed pa 'di'i 'brel ba dang /brjod par bya ba dang / dgos pa rnams ston to/ /gzhan du na 'brel ba dang / brjod par bya ba dang / dgos pa rnams dang bral ba'i rab tu byed pa ni blang bar bya ba ma yin par 'gyur ro//de la 'brel pa dngos por gyur pa zhes bya ba'i tshig 'dis ni brjod par bya ba bstan to/ /bsal bar 'dod nas zhes bya ba'i tshig 'dis ni dgos pa bstan te/'di ltar 'brel pa dngos por gyur pa bsal ba ni 'dir dgos pa yin no/ /smras so zhes bya ba 'dis ni 'brel ba smos te/ 'di ltar 'brel ba dngos por gyur pa bsal ba'i phyir rab tu byed pa 'di bstan to//de lta bas na 'brel ba dngos por gyur pa bsal ba la rab tu byed pa ni thabs kho nar bstan pa yin te/ 'di ltar rab tu byed pa 'di thos pas 'brel pa dngos por gyur pa med do zhes bya bar nges par 'gyur ro//de nas rab tu byed pa ni thabs yin no/ /'brel pa dngos por gyur pa bsal ba ni thabs las byung ba ste/ rab tu byed pa dang dgos pa 'di gnyis ni thabs dang thabs las byung ba'i mtshan nyid du 'brel to//'di ni re zhig spyi'i don to/ /yan lag gi don ni dngos por gyur pa zhes bya ba'i rdzas su yod pa dang / don dam pa dang / bcos ma ma yin pa dang / ma brtags pa zhes bya ba'i bar du'o/ /'brel ba zhes bya ba ni 'brel bas na 'brel pa ste/sbyor ba dang ldan pa dang / reg pa dang / phrad pa dang / dngos po nye bar gyur pa zhes bya ba'i bar gyis bstan to/ /bsal bar 'dod nas smras pa zhes bya ba ni so sor bsal bar 'dod pa dang / so sor spang bar 'dod nas smras pa zhes bya ba'i don to//gzhan dbang kho na zhes bya ba la sogs pa zhes bya bas ni tshigs su bcad pa ston to/ /gzhan dbang ni gzhan la rag las pa ste zhes bya ba gzhan la rag las pa'i tshig gis gzhan dbang ston te/'di lta ste/ gzhan dang 'brel ba dang / gzhan la rag las pa dang / gzhan la brten pa dang / gzhan gyi dbang zhes bya ba don gcig go/ /de 'brel ba yin na zhes bya ba ni kha cig gzhan gyi dbang kho na 'brel pa yin par 'dod do/ /de ni 'brel ba can grub pa'am ma grub pa zhig gi yin zhes bya ba 'di la 'brel ba yod pas 'brel ba can no//grub pa ni rang gi ngo bor red pa'o/ /ma grub pa ni rang gi ngo bor ma red pa'o/ /'am gyi sgra ni rtog pa'i don to/ /'di skad bstan te/ 'brel ba can ma grub pa'i ngo bo'am/ ma grub pa'i ngo bo'i gzhan gyi dbang yin//ma grub pa ni med pa'i ngo bo yin pa'i phyir 'brel pa dngos por yod pa ma yin no zhes bya ba ni 'di ltar 'brel ba can ma grub ste ngo bo med pa yin na des na ma grub pa'i ngo bo yin pa'i phyir 'brel ba dngos por yod par ji ltar 'gyur/ 'brel ba can grub na gzhan dbang ci zhig yod ces bya ba ni gang gi tshe 'brel ba can gyi rang gi ngo bo grub pa de'i tshe yang 'brel ba can re ba med pa'i phyir ci zhig rag las na gang gis 'di gzhan dbang du 'dod/ci zhig ces bya ba ni sgra 'di 'dri ba ma yin gyi 'o na ci zhe na/ sel bar byed pa yin te/ med pa nyid de gzhan dbang ci yang med do zhes bya ba'i don to/ / de bas na 'brel ba med pa nyid do zhes bya bas ni de bas na 'brel ba gzhan dbang med do zhes bya ba'i don to/ /grub tu zin kyang cung zad ma grub pa yod do zhe na zhes bya ba ni gal te pha rol 'di snyam du smra ste/ rnam pa thams cad du grub pa ni gzhan gyi dbang du mi 'dod do/ /'on kyang 'brel ba can grub tu zin kyang cha shas kha cig ma grub pa yod pas de dag grub par bya ba'i phyir 'brel ba can gzhan gyi dbang du 'dod ce na/de'i phyir de ltar rnam par rtog pa yang de grub par bya ba'i ched du gzhan gyi dbang kho nar yang mi 'gyur te zhes bya ba'i tshig gis sel bar byed do/ /rnam pa de lta bu'i cha shas grub par bya ba'i sgo nas kyang gzhan gyi dbang du mi 'thad do//ci'i phyir zhe na/ de'i phyir grub pa dang ma grub pa las gyur ba'i nyes pa'i rnam par rtog pa las mi 'da' ba'i phyir ro zhes bya ba smras te/ grub pa dang ma grub pa ni grub pa dang ma grub pa ste/ grub pa'i phyogs dang ma grub pa'i phyogs zhes bya ba'i don to//grub pa dang ma grub pa las gyur pa'i ngang tshul can gang dag yin pa de dag grub pa dang ma grub pa las gyur ba'o/ /nyes pa rnams kyi rnam par rtog pa ni nyes pa'i rnam par rtog pa ste/ rnam par rtog pa'i sgras ni 'dir rnam par ston to/ /grub pa dang ma grub pa las gyur pa yang yin la nyes pa yang yin zhes tshig bsdu'o//de dag las mi 'da' ste/ de bas na grub pa dang ma grub pa las gyur pa'i nyes pa'i rnam par rtog pa las mi 'da' ba'i phyir ro zhes de skad smos so/ /'di skad bstan te/ grub pa'i ngo bo'i phyogs kyi nyes pa gang yin pa dang ma grub pa'i phyogs kyi ngo bo'i nyes pa gang yin pa de dag thams cad phyogs 'di la yang yod de/'di ltar cha shas grub pa gang yin pa de dag ni/ grub pa'i phyir gzhan gyi dbang du mi rung ngo / /ma grub pa yang med pa'i ngo bo yin pa'i phyir gzhan gyi dbang dngos por gyur pa ma yin no/ /dngos po gcig la grub pa dang ma grub pa'i ngo bo gnyi ga yang med do zhes bya ba ni dngos po gcig la grub pa dang ma grub pa'i ngo bo yang med de/'di ltar cha shas med pa ni dngos por 'dod do/ /cha shas dang bcas pa gang yin pa de ni kun rdzob tu yod pa yin no/ /gang gi phyir de ltar grub pa'am cig shos kyi gzhan gyi dbang kho na med pa zhes bya ba ni ji skad du smos pa'i tshul gyis ji ltar grub pa'am ma grub pa'i gzhan gyi dbang mi 'thad de/'di lta ste/ grub pa'i phyogs la gzhan gyi dbang kho na med cing ma grub pa'i phyogs la yang gzhan gyi dbang dngos por mi 'thad do/ /de bas na dngos po thams cad kyi 'brel ba yang dag nyid du dngos por med de/dngos po thams cad kyi 'brel ba gzhan gyi dbang gi mtshan nyid don dam par med do zhes mjug sdud pa'o/ /dngos por zhes bya ba 'dis ni yang dag nyid du zhes bya ba de bshad do/ /rnam par rtog pas bkod pa ni mi dgag go zhes bya ba ni rtog pas gzhag pa'i gzhan gyi dbang gang yin pa de ni mi dgag ste/ci'i phyir zhe na/ de'i phyir dngos po med pa'i phyir zhes bya ba smras te/ gang gi phyir rtog pas bskyed pa'i gzhan gyi dbang ni dngos por yod pa ma yin pa de'i phyir mi dgag go/ /ngo bo 'dres pa 'brel ba yin gyi gzhan gyi dbang kho na ni ma yin no zhe na zhes bya ba ni 'on te 'di snyam du nga ni gzhan gyi dbang gi mtshan nyid 'brel ba yin par mi smra'i 'o na ci zhe na/ngo bo 'dres pa'i mtshan nyid do/ /ngo bo gnyis kyi'am ngo bo rnams kyi 'dres pa ni ngo bo 'dres pa ste/ rang gi ngo bo phrad ces bya ba'i don to/ /de ni mi rung ste/ gnyis nyid yin zhes bya ba 'di'i bshad pa ni 'brel ba can gnyis kyi ngo bo yin na zhes bya ba yin no//'di skad bstan te/ 'brel ba can ni 'dir ngo bo nyid kho na yin na ngo bo 'dres pa de yang zhes bya ba la/ ngo bo 'dres pa'i sgra rang gi ngo bo gcig pa'i mtshan nyid ces bya ba des bshad de/ /rang gi ngo bo gcig pa'i mtshan nyid der yang ji ltar 'gyur zhes bya ba'i don to//'di'i bshad pa ni mi 'gyur ba nyid do zhes bya ba yin te/ 'di ni 'gog pa yin te dri ba ma yin no zhes bya bar bsams pa'o/ /'di skad bstan te/ ji srid du 'brel ba can gnyis kyi ngo bo mi 'dor ba de srid du rang gi ngo bo gcig pa'i mtshan nyid kyi ngo bor 'dres par ji ltar 'gyur/'on te yang de'i tshe 'brel ba can gnyis kyi ngo bo ma yin gyi/ 'o na ci zhe na/ 'brel ba'i dus na ngo bo gcig par 'gyur ro zhe na/ de'i phyir gcig tu gyur na yang 'brel ba can gnyis med pa'i phyir 'brel pa gang zhig yin gyi zhes bya ba smos te/ ci ste 'brel ba can gcig tu gyur na de'i tshe 'brel pa can gnyis med pas shin tu yang 'brel pa mi grub po//ci'i phyir zhe na/ de'i phyir na zhes bya ba ni 'on te yang ngo bo 'dres pa'i sgra ngo bo gcig la mi zer 'di gnyis la gnas pa'i phyir ro zhes bya ba smos te/ 'di ltar 'brel pa ni gnyis la gnas par 'dod do//'di skad bstan te/ 'brel pa'i gzhi ni du ma yin na 'brel pa can ngo bo gcig tu gyur na ji ltar 'gyur/ 'on te 'di skad du 'dres pa ni ngo bo nyid gcig tu gyur pa ma yin gyi 'o na ci zhe na/ bar med pa yin no zhe na zhes bya ba'am 'on te yang ngo bo 'dres pa'i sgra ngo bo gcig pa la mi zer gyi 'o na ci zhe na/dngos po rnam par med pa kho na ngo bo 'dres pa yin no/ /zhes smra na/ yin du zad mod ci zhig dgag ste/ ci ste bar med pa la ngo bo 'dres pa'i sgrar brjod na legs par brjod shin tu brjod de de ni nga 'gog pa med do/ /bar med pa ni bar med pa tsam du zad pas 'brel pa dngos por gyur pa yod par mi 'gyur ro zhes bya ba 'di la bar dang bral bas bar med pa ste/bar gyi sgra ni phrag la bya'o/ /bar med pa'i ngo bo ni bar med pa'o/ /ci ste ngo bo 'dres pa'i sgra bar med pa la brjod na de'i tshe mi 'dod pa ci zhig brjod pa yin te/ 'on kyang 'brel ba dngos por gyur pa ni mi 'grub po/ /gzhan yang ci ste bar chad med pa 'brel ba yin na bar dang bcas pa na yang 'brel ba ci ste mi 'dod de zhes bya ba ni ci ste bar med par gnas pa la bar med pa zhes bya ba'i 'brel ba yin par khas len na de'i tshe so sor gnas pa la yang bar dang bcas pa zhes bya ba'i 'brel ba ci ste khas mi blang ci ste yang ji ltar na bar med pa'i 'brel pa khas len na bar dang bcas pa'i mtshan nyid kyi 'brel ba yang yod par 'gyur ba yin zhe na/de'i phyir gnyi gar yang 'brel ba can gnyis rang gi ngo bo la gnas par bye brag med pa'i phyir ro zhes bya ba smos te/ ji ltar 'brel pa can gnyis 'dres pa na sngon gyi rang bzhin mi 'dor ba bzhin du so sor gnas pa na yang sngon gyi rang bzhin ma bor ba yin no/ /de bas na ji ltar 'brel pa can gnyis par med pa la 'brel bar 'dod pa de bzhin du bar dang bcas pa la yang 'dod par byas shig /yang na ni gnyis kar yang 'brel ba khas blang bar mi bya'o//'on te yang bar med pa la ni ngo bo 'dres par khas len pa ma yin no/ /'o na ci zhe na/ phrad pa yin no zhe na/ de'i phyir phrad pa la sogs pa yang bar chad med pa'i don du 'dus pa kho na yin pas rjod par ma byed cig ces bya ba smos te/ bar du med pa'i don du 'dus pa'i ngang tshul can gang dag yin pa de dag ni bar med pa'i don du 'dus pa kho na ste/bar med par bstan pa gang yin pa de nyid phrad par bstan pa yang de yin no/ /sogs pa'i sgras ni nye ba dang / rig pa dang bar mchod pa la sogs pa blta bar bya'o/ /gang gi phyir bar med pa'i rnam grangs phrad pa la sogs pa yin pa de'i phyir 'dir de skad ston pa ni chen po mi rung ngo //gang gi phyir de ltar ngo bo 'dres pa'i mtshan nyid kyang 'brel ba ma yin pa zhes bya ba la/ srid ces bya ba ni tshig gi lhag ma'o/ /de'i phyir rang bzhin tha dad pa la zhes bya ba'i bshad pa ni 'og nas dngos po thams cad kyi rang gi ngo bo tha dad pa zhes bya ba yin te/rang gi ngo bo sna tshogs pa'i dngos po de dag thams cad la 'brel ba yang dag nyid du med de/ don dam par de dag rang gi ngo bo 'dres pa'i mtshan nyid kyi 'brel ba med do/ /rtog pas sgro btags pa las ma gtogs par zhes bya ba ni rtog pas brtags pa'i 'brel pa ni mi dgag go//'on te gzhan ltos pa 'brel ba yin gyi ngo bo 'dres pa ma yin no zhe na zhes bya ba ni gal te yang nga ni ngo bo 'dres pa'i mtshan nyid la 'brel bar khas mi len gyi 'o na ci zhe na/ ltos pa'i mtshan nyid la 'brel bar smra'o/ /de bas na ji skad du smos pa'i skyon du mi 'gyur ro zhe na/'dir yang gzhan ltos pa na ltos pas 'brel pa can du gyur pa'i phyogs 'di la yang myu gu la sogs pa gzhan gang yin pas bon la sogs pa la ltos te/ myu gu la sogs pa de ltos pa na ltos pa'i mtshan nyid kyis 'brel te/ 'brel pa can du khas len na brtags pa gnyis te/ltos nas yod pa zhig ltos sam med pa zhig ltos/ yod pa ni rang gi ngo bor grub cing yod pa'o/ /med pa ni rang gi ngo bor ma grub cing med pa'i don to/ /ci ste med na zhes bya ba ni re zhig ci ste med pa'i ltos par khas len na med na de ni ci ltar ltos zhes bya ba de nyid kyi bshad pa ni 'og nas rang gi ngo bor ma grub pa'i dngos po la ltos pa'i chos med pas zhes bya ba smras te/gang zhig rang gi ngo bor ma grub cing ma thob pa de ji ltar ltos par byed par 'gyur/ bas zhes bya ba'i sgra ni de ni des na zhes bya bar rig par bya ste/ med pas gang zhig gang gi 'brel ba yin zhes bya ba ni de bas na ltos pa'i mtshan nyid kyi 'brel ba gang yang med la/gang gi yang ma yin no/ /yod na yang kun la rag ma las zhes bya ba ni gang zhig rang gi ngo bo thams cad grub pa de ni rnam pa thams cad du re ba med do/ /de nyid kyi bshad pa ni rang gi ngo bo thams cad skyes pa ltos pa med pa'i dngos po zhes bya ba yin te/thams cad kyang yin la rang gi ngo bo yang yin pas rang gi ngo bo thams cad do/ /de dag skyes pa la de skad ces bya ste/ skyes pa'i sgra ni byung ba la bya'o/ /rang gi ngo bo thams cad bskyed par bya ba'i phyir mi ltos te/ rang gi dngos po thams cad skyes pa ltos pa med pa'i ngo bo ltos pa gang gis ni 'brel bar 'gyur ba ji ltar ltos pa yin/gang zhig rnam pa thams cad du yongs su rdzogs pa'i ngo bo de gang gis na 'brel par khas blang bar 'gyur ba ltos pa'i rnam pa gang gis gzhan ltos pa yin/ lhag ma ni gzhan gyi dbang bzhin du brjod par bya'o zhes bya ba ni 'di la lhag ma brjod par bya ba gang yin pa'ang yod de/de ni gzhan gyi dbang dpyad pa ji skad brjod pa de bzhin du brjod par bya'o/ /de yang 'di skad du brjod par bya ste/ ci ste pha rol po na re rnam pa thams cad du yongs su grub pa ni ltos pa'i chos can du mi brjod do//grub tu zin kyang 'on kyang cung zad ma grub pa yod pas de grub par bya ba'i phyir ltos so zhes smra na de yang mi rung ste/ grub pa dang ma grub pa las gyur ba'i nyes pa las mi 'da' ba'i phyir dang / gcig la'ang grub pa dang ma grub pa'i ngo bo gnyis ka yang med do zhes sngar bstan pa bzhin du bya'o//'brel pa rnam pa gsum po de ni 'brel pa can gyi rang gi ngo bo las rang gi ngo bo tha mi dad par khas len pa la dpyad pa yin te/ 'di ltar smra ba gang dag 'brel pa can nyid kyi nang du 'dus shing 'brel ba can gyi ngo bo la 'brel pa'i sgrar brjod pa de'i ched du 'di bstan pa yin no//da ni smra ba gang dag 'brel pa can las ngo bo tha dad pa'i 'brel pa khas len pa de bsal ba'i phyir nyes pa 'dir mi 'gyur bar bya ba'i phyir zhes bya ba smos te/ gang yang 'brel pa rnam pa gsum po 'brel pa can gyi rang gi ngo bo nyid kyi phyogs la nyes pa bstan pa 'dir mi 'gyur bar bya ba'i phyir zhes bya ba'i don to//gnyis zhes bya ba 'di'i bshad pa ni 'brel pa can gnyis zhes bya ba yin te/ 'di ltar 'brel pa can gnyis so/ /de bas na de gnyis ni 'brel pa gcig pu'i ste/ 'brel pa gcig pu ni 'og nas smos pa'i sbyor ba gcig pu zhes bya ba'i don to//yon tan du brjod pa'i sbyor ba don tha dad pa gcig pu zhes bya ba de ni 'brel pa can las don tha dad pa yon tan du brjod pa ming sbyor ba zhes bya ba gcig pu gang yin pa de dang / tha dad pa med pa'i chos sam zhes bya ba ni ci ste yang 'brel ba can las tha dad pa ma yin pa'i ngo bo gnas skabs kyi bye brag gi ngo bo'i chos la ming btags pa'am/brjod du med pa dngos por gyur pa ni de nyid dang gzhan du brjod du med pa'i ngo bo rdzas su yod pa'o/ /de bas na gcig pu de dang mngon par 'brel ba rgyus ci ste 'brel bar 'dod na zhes bya ba ni ji ste don tha dad par gyur ba'am/ don tha dad pa ma yin pa'am/ brjod du med pa dang mngon par 'brel ba'i rgyus 'brel ba can gnyis phan tshun 'brel bar 'dod na de'i tshe 'brel ba don tha dad pa ma yin par 'dod pa'i phyogs la ni 'brel ba can gnyis brtags pa kho nar 'gyur bas zhes bya ba ni don tha dad pa ma yin pa'i phyogs gang yin pa de la ni 'brel ba can gnyis brtags par 'gyur te/'di ltar 'brel ba'i rgyus 'brel pa can gnyis la 'brel ba zhes brjod pa yin na phyogs de la ni 'brel ba don dam par med do/ /de bas na 'brel ba med par yang 'brel ba can khas blang bar gyur pa'i phyir ro/ /'brel ba gang yang med do zhes bya ba ni gang gi tshe 'brel ba can gnyis brtags pa yin pa de'i tshe don dam par 'brel ba gang yang med do zhes bya ba'i tha tshig go//de lta na yang 'brel pa las 'brel pa can gzhan ma yin pas gcig tu gyur pa'i yang phyir ro zhes bya ba ni ji ste 'brel pa gcig pu las 'brel pa can gnyis tha dad pa ma yin na ni des na 'brel pa can gnyis med pa'i phyir gang gi 'brel pa yin/'brel pa ni gzhi du ma can yin na 'brel pa can gnyis med par de yod par ji ltar 'gyur/ brjod du med par dngos por gyur pa yang rigs pa'i tshul gyis na don tha dad pa dang don tha dad pa ma yin pa'i rnam par rtog pa las mi 'da' ba'i phyir ro zhes bya ba ni gang zhig brjod du med pa'i dngos por gyur ba khas len na de ni don tha dad pa dang don tha dad pa ma yin par rigs pa'i tshul gyis grub ste/'di lta ste/ don tha dad pa dang don tha dad pa ma yin pa gnyis kyis thams cad bsdus pa'i phyir dngos por gyur pa ni don tha dad pa'am/don tha dad pa ma yin pa gcig tu 'gyur ro/ /gang gi phyir de ltar gyur pa de'i tshe don tha dad pa ma yin pa'i phyogs la ni 'brel pa dang 'brel pa can gang yang med do zhes bya ba ni gang gi tshe 'brel pa can dag las 'brel pa dbyer med par 'dod pa de'i tshe 'brel pa med do//gang gi tshe 'brel pa gcig pu las 'brel pa can gnyis dbyer med par 'dod pa de'i tshe/ 'brel pa can gnyis yod pa ma yin no/ /de ltar re zhig 'brel pa brjod du med pa ni rigs pa'i tshul gyis don tha dad pa ma yin par 'gyur ba'i nyes pa bstan zin to//gang yang brjod du med pa'i rigs pa'i tshul gyis don tha dad par gyur pa de'i nyes pa ni 'og nas sbyor ba bsal ba'i phyogs las rig par bya'o/ /de ltar na tha dad pa ma yin pa'i phyogs dang / brjod du med pa'i phyogs gnyis bsal ba yin no/ /gang yang phyogs gsum pa yon tan du brjod pa'i sbyor ba bstan par gsum pa de bsal ba ni sbyor ba dang 'dul ba bsal ba las rig par bya'o//don tha dad pa'am cig shos kyi 'brel ba yod du chug kyang zhes bya ba ni ha cang bsdams pa 'dis ci zhig bya ste/ 'brel pa don tha dad pa'am don tha dad pa ma yin pa yin yang rung ste/'on kyang de dang gnyis 'brel pa gang yin zhes bya ba 'di'i bshad pa ni gcig pu de dang gnyis su 'brel pa gang yin zhes bya ba yin te/ 'brel pa rgyur gyur pa gang yin pas 'brel pa can gnyis 'brel ba 'dod na de dang de gnyis lhan cig pa la yang 'brel pa gzhan bsal dgos te/gzhan du na ni 'brel pa can gnyis kyis 'brel pa 'di yin no zhes rgyu mtshan gang zhig gis rab tu dbye ba drug par 'gyur/ med pa nyid do zhes bya ba 'dis ni 'gog pa'i tshig yin gyi 'dri ba'i tshig ma yin par ston pa'o/ / ci'i phyir 'brel pa dang 'brel pa can gnyis lhan cig pa la 'brel pa gzhan mi srid ce na/ de'i phyir ji skad smos pa'i skyon yod pa'i phyir ji ltar 'brel pa can gnyis 'brel pa med pa de bzhin du de dang yang 'brel pa can gnyis kyi 'brel pa med ces bya ba smos te/ ji ltar 'brel pa can nyi tshe la phan tshun du gzhan gyi dbang la sogs pa bkag pa de bzhin du 'brel ba 'di dang yang 'brel ba can gnyis lhan cig tu gzhan gyi dbang la sogs pa mi 'thad do//gzhan du na 'brel pa can gnyis nyi tshe 'brel pa la yang ci zhig zhe sdang du yod ces bya ba ni ci ste 'brel pa dang 'brel pa can gnyis lhan cig pa'i gzhan gyi dbang la sogs pa khas len na de'i tshe 'brel pa can nyi tshe la yang mi bzod du ci zhig yod de/gang gis na de gnyis phan tshun du gzhan gyi dbang la sogs pa'i 'brel par mi 'dod/ gzhan yang zhes bya bas ni skyon gzhan ston pa'o/ /ci ste 'brel pa'i don gcig dang 'brel pa'i phyir 'brel par 'dod na de'i tshe 'brel ba dang 'brel pa can gnyis la yang 'brel pa zhig yod par bya dgos te zhes bya ba ni ji ste 'brel pa can nyi tshe 'brel pa gzhan dang ldan pa'i phyir phan tshun 'brel par 'dod na de'i tshe 'brel pa dang 'brel ba can gnyis kyang 'brel ba gzhan dang ldan pa'i phyir 'brel par 'dod par bya dgos so//ci'i phyir zhe na/ de'i phyir de lta bur 'brel pa khas len pa'i phyir ro zhes bya ba smos te/ 'di ltar khyod 'brel pa gcig gi rgyus 'brel par 'dod pa des na 'brel pa dang 'brel pa can gnyis la yang 'brel pa gcig gis 'brel par 'dod par bya dgos so/ / de la yang 'brel pa'i don gcig pu zhig yod pas zhes bya ba ni ji ltar 'brel pa dang po dang 'brel pa can gnyis lhan cig pa la 'brel pa gzhan khas len pa de bzhin du 'brel pa gnyis pa dang yang 'brel pa can gnyis dang 'brel pa dang po dang lhan cig pa'i 'brel pa gzhan yang khas blang bar bya'o/ /de bzhin du 'brel pa gsum pa dang 'brel pa can gnyis dang 'brel pa dang po dang gnyis pa dang lhan cig pa'i 'brel pa gzhan bzhi pa yang yod par bya dgos te/de bas na thug pa med par yang 'gyur ro zhes bya ba ni ji skad du smos pa'i tshul gyis na thug pa med par 'gyur ro/ /de ste 'ga' zhig tu 'brel pa gcig pu'i don ma grub ste/'brel pa med na ni thams cad du/ de bzhin 'brel med shes par bya/ /zhes bya ba ni ci ste ji skad du bstan pa'i tshul gyis thug pa med par 'gyur ba de'i tshe nges par 'dis thug pa med pa spang ba'i phyir 'ga' zhig tu gnas skabs kha cig tu 'brel pa gcig pu'i don khas blang bar mi bya'o//lnga pa'am drug pa'i gnas skabs gzhan kha cig tu 'brel pa gcig pu dang 'brel par khas mi len na ni gnas skabs de ni 'brel pa can gnyis kyi 'brel pa med par 'gyur ro/ /ji ltar na de na 'brel pa can gnyis kyi 'brel pa gcig pu med pa de bzhin du thams cad du yang 'brel pa can gnyis kyis 'brel pa gcig pu med par bya dgos so//thug pa med par 'gyur bas 'brel pa'i shes pa ni dngos po'i rjes su zhugs pa ma yin no zhes bya ba ni ci ste ji skad du bstan pa'i tshul gyis thug pa med par gyur pa de'i tshe 'brel pa'i shes pa ni 'brel pa dngos por gyur pa'i rgyu mtshan can ma yin no//kha cig tu 'brel pa gcig pu'i don med par yang 'brel ba rtog na ni 'brel pa can dang po gnyis las yang don gcig pu dang 'brel pa'i phyir 'brel par mi 'gyur ro zhes bya ba ni 'on te yang gnas skabs kha cig tu 'brel pa gcig pu'i don med par yang 'brel pa khas len na de'i tshe 'brel pa can dang po gnyis la yang 'brel pa gcig pu'i rgyu mtshan gyis 'brel par khas blang bar mi bya'o//'on te yang 'brel pa can gnyis 'brel pa'i don gcig pus 'brel ba ma yin gyi 'brel pa can nye tshe zhig 'brel par 'gyur ro zhe na/de'i phyir nyi tshe zhig 'brel pa yin na yang nyes pa smras zin to zhes bya ba smos te/ 'brel pa can nyi tshe'i 'brel pa yang khas blang bar mi bya ste/ 'di ltar de la nyes pa sngar bstan zin to/ /bar med pa la sogs pa'i chos tha dad par rtog pa'i lan kyang des btab zin to zhes bya ba ni 'brel pa gcig pu'i don gyi sgo nas 'brel pa can gnyis 'brel par smras pa gang yin pa de bsal ba nyid kyis bar med pa dang /phrad pa dang nye ba la sogs pa'i chos tha dad pa nyid bsal bar rig par bya ste/ bar med pa la sogs pa'i chos gzhan 'brel pa gcig pu'i don gyis 'brel pa can gnyis 'brel par mi 'thad do zhes bya ba'i don to//gang gi phyir de ltar 'brel pa rnam par rtog pa rung ba ma yin pa zhes bya ba ni 'brel pa can gcig pu'i sgo nas kyang 'di ltar 'brel pa'i rnam par rtog pa shin tu mi 'thad do/ /de bas na dngos po de gnyis zhes bya ba 'di'i bshad pa ni 'brel pa can du mngon par 'dod pa zhes bya ba yin te/'brel pa can ni 'dir dngos por bshad do/ /de las gzhan pa zhes bya ba 'di'i bshad pa ni 'brel pa zhes bya ba yin te/ 'brel pa ni 'dir de las gzhan pa'i sgras brjod do/ /de dag thams cad ces bya ba 'di'i bshad pa ni ji skad du smos pa zhes bya ba yin te/'brel pa dang 'brel pa can du mngon par 'dod pa zhes bya ba'i bar du'o/ /bdag nyid gnas zhes bya ba 'di'i bshad pa ni 'og nas rang gi ngo bo la gnas pa yin no zhes bya ba yin te/ bdag nyid kyi rang gi ngo bo la gnas zhes bya ba'i tha tshig go/ /de bas na de'i phyir zhes bya ba la de bas kyi sgra ni de'i phyir zhes bya ba 'dis bshad do//ma 'dres pa zhes bya ba 'di'i bshad pa ni 'brel pa med pa'o zhes bya ba yin te/ so so na 'dug ces bya ba'i don to/ /rang zhes bya ba 'di'i bshad pa ni bdag nyid ces bya ba yin te/ rang gi ngo bo la zhes bya ba'i don to//dngos zhes bya ba ni dngos po'o/ /'di skad bstan to/ /'brel pa can gnyis dang 'brel pa ni gang gi phyir so so rang gi ngo bo la gnas pa de bas na dngos po thams cad rang gi ngo bo ma 'dres pa ma phrad pa/ ma 'brel pa yin no/ /'o na ji ltar rag las pa'i ngo bo de dang des 'brel pa yin par brjod ce na zhes bya ba ni ci ste dngos po thams cad 'brel pa med na ji ltar 'brel pa de dang des rag las pa'i ngo bor ston te/'di lta ste/ rje khol gyi sgo nas rgyal po'i mi zhes bya ba dang / cha shas dang cha shas can gyi sgo nas shing gi yal ga zhes bya ba dang / rgyu 'bras kyi sgo nas sa bon gyi myu gu zhes bya ba dang rig pa 'dzin pa'i sgo nas mkhan po dang slob ma zhes bya ba dang /de la sogs pa'i 'brel pa ji ltar bstan zhes bya ba'o/ /'brel pa yang dag pa ni gang yang med kyi zhes bya ba ni 'brel pa zhes bya ba don dam par gang yang med kyi dngos po de dag 'dres pa med kyang rtogs pas 'dres par byed par zad de/dngos po rnams rtog pa nyid kyis 'dres par byed do/ /de yang gzhan la rag las pa'i ngo bo lta bur mtshan ma 'ga' zhig ston pa skye'o zhes bya ba ni rtog pa ni mtshan ma cung zad cig bzung nas dngos po rnams gzhan la rag las pa'i ngo bo lta bur ston to/ / 'tsho ba sbyin pa dang bka' bzhin du byed pa'i sgo nas rgyal po dang 'bangs zhes rje khol 'brel par rtog go/ /spyi dang cha shas dbyer med pa dang / spyi gdags pa'i rgyu mtshan gyi sgo nas shing gi yal ga zhes bya ba cha shas dang / cha shas can 'brel bar rtog par byed do/ /de la rag las te skye ba dang /de'i rigs kyi rjes su 'brang ba'i sgo nas sa bon gyi myu gu zhes rgyu dang 'bras bu 'brel par ston par byed do/ /shes rab mngon par 'du byed pa dang de'i spyod pa'i rjes su byed pa'i sgo nas mkhan po dang slob ma zhes sdom brtson gyi rtsa ba'i mtshan nyid kyi 'brel pa ston par byed do//de bas na rtog pa nyid kyis dngos po rnams 'brel par byed kyi don dam par 'dres pa med do/ /de ltar re zhig rje khol gyi dngos po la sogs pa'i 'brel pa bkag go/ /bya ba dang byed pa'i 'brel pa yang dgag par 'dod nas de'i zhes bya ba 'di'i bshad pa ni rtog pa zhes bya ba yin no//tshig le'ur byas pa las de'i yang zhes byung ba las yang gi sgras ni 'ang gi sgra'i don du bstan te/ 'di'i 'ang zhes bya'o/ /rjes su 'brang ba'i skyes bu yis/ /zhes bya ba ni rtog pa nyid kyi rjes su 'brang ba'i srog chags kyis bya ba'i don to/ /bya ba dang ni byed pa'i tshig /ces bya ba 'di'i bshad pa ni bya ba'i tshig dang byed pa'i tshig ces bya ba yin te/ kha cig ni bya ba'i tshig yin te/ ji skad du 'tshed do// /klog go zhes bya ba la sogs pa'o/ /kha cig ni byed pa'i tshig yin te/ dper na lha sbyin gyis rdza mar 'bras chang 'tshed do zhes bya ba la sogs pa'o//smra ba po dag 'god par byed ces bya ba 'di'i bshad pa ni 'di ni bya ba brjod pa'o/ /'di ni byed pa brjod pa'o zhes tshig 'god par byed do zhes bya ba'o/ /'tshed pa la sogs pa'i sgra ni bya ba la tha snyad 'dogs so/ /lha sbyin la sogs pa'i sbra ni byed pa po la tha snyad 'dogs so ci'i phyir ming 'dogs/ci'i phyir tha snyad 'dogs she na/ dngos po tha dad rtogs bya'i phyir te/ 'di nyid kyi bshad pa ni 'og nas dngos po tha dad pa ni gzhan bsal ba'o/ /de khong du chud par bya ba'i phyir zhes bya ba yin te/ rtogs pa'i dus na ji ltar na gzhan las bzlog pa'i rtogs par 'gyur bar bya ba dang byed pa po'i tshig gi sgra tha snyad du byed do//tha snyad kyi tshe na ni tshig 'god do/ /'di lta ste/ ji ltar na lha sbyin kho na byed pa po yin gyi gzhan ma yin no zhes byed pa po gzhan bsal ba'i phyir lha sbyin gyi tshig sbyor bar byed do/ /de bzhin du rtswa dang lo ma la sogs pa'i byed pa bsal ba'i phyir shing gis zhes bya ba'i sgra 'god par byed do//zangs bu dang phru ba la sogs pa'i gzhi nyid bsal ba'i phyir rdza ma zhes sbyor bar byed do/ /sngo tshod dang sran tshod la sogs pa'i las bsal ba'i phyir 'bras chan zhes sbyor bar byed do/ /ston mo bsham pa'i bya ba bsal ba'i phyir 'tshed pa'i sgra 'god par byed do//de bzhin du gzhan la yang ci rigs par brjod par bya'o/ /bya ba dang byed pa po'i 'brel pa dngos su yod pa ma yin no zhes bya ba ni bya ba dang byed pa po'i 'brel ba yang don dam par ni med do/ /'di ltar bya ba dang byed pa yang gzhan gyi dbang nyid la sogs pa'i mtshan nyid kyi 'brel pa grub na grub pa zhig na de yang ji skad smos pa'i tshul gyis bsal zin to//bsgrub par bya ba dang sgrub par byed pa'i 'brel pa'am 'grub pa dang 'grub par byed pa'i 'brel pa de yang rgyu dang 'bras bu'i 'brel pa nyid yin la/ rgyu dang 'bras bu'i dngos po'i mtshan nyid kyang 'og nas sel bar 'gyur na bya ba dang byed pa'i mtshan nyid kyi 'brel pa gang zhig yin/'o na rgyu dang 'bras bu'i mtshan nyid kyi 'brel pa 'grub mod ce na zhes bya ba ni ci ste pha rol po na re ji skad sngar smos pa'i 'brel pa de dag ma grub tu zin kyang rgyu dang 'bras bu'i mtshan nyid kyi 'brel pa yod mod ces smra ba'o//de mi rung ste zhes bya ba ni 'gog pa'i tshig go/ /'di ltar rgyu dang 'bras bu'i dngos po yang zhes bya ba 'di'i bshad pa ni 'brel pa ji ltar grub ces bya ba'o/ /'di'i bshad pa ni mi 'grub pa nyid do zhes bya ba de yin no/ /ji lta bu zhig ce na zhes bya ba ci 'dra ba'i 'brel pa mi 'grub ces bya ba la/gnyis la gnas par zhes bya ba smras te/ gzhi gnyis la zhes bya ba'i don to/ /ci'i phyir zhe na zhes bya ba ni dam bcas pa tsam gyis don mi 'grub pas gtan tshigs 'dri ba'o/ /de gnyis zhes bya ba 'di'i bshad pa ni rgyu dang 'bras bu zhes bya ba de yin no/ / lhan cig mi gnas pa'i phyir zhes bya ba ni mnyam du mi 'dug ces bya ba'i don to/ /mnyam du mi 'dug pa nyid ston pa ni 'di lta ste/ gang gi tshe rgyu yod pa de'i tshe 'bras bu med do zhes bya ba yin te/ ma skyes pa'i phyir ro/ /'bras bu yod pa'i tshe yang rgyu med de zhig pa'i phyir ro/ /rgyu dang 'bras bu gnyis dus gcig tu mi 'thad pa'i phyir ro zhes bya ba ni 'di ltar rgyu dang 'bras bu'i dngos po gnyis dus gcig tu mi 'thad pa'i phyir ro//ci ste pha rol po dag na re skad cig ma ma yin pa'i rgyu dang 'bras bu lhan cig tu 'dug pa des na 'brel bar 'gyur ro zhe na/ de'i phyir skad cig ma ma yin pa yin pa yang dngos po med pa'i phyir rgyu dang 'bras bu'i dngos po lhan cig tu gnas pa ma yin pas smra bas brjod pa yang rigs pa ma yin pa'i phyir zhes bya ba ni skad cig ma ma yin pa'i dngos po ni rim dang cig car don byed pa'i nus pa dang bral ba'i phyir ri bong gi rwa bzhin du dngos po med pa de dag la rgyu dang 'bras bu'i dngos po ga la yod/lhan cig gnas pa yang ga la yod/ de bas na de skad du smra ba ni lan du mi rung ba kho na yin pa'i phyir gang gis na gnyis la 'brel pa gnas pa 'grub par 'gyur ba'i 'brel pa can gnyis dngos su lhan cig tu gnas pa med do zhes bya ba ni de bas na 'brel pa can gnyis dngos su lhan cig tu gnas pa gang na yang mi srid do//ci ste srid na ni de'i tshe de'i gzhi can gyi 'brel ba yang srid par 'gyur ro/ /gnyis la mi gnas pas zhes bya ba 'di'i bshad pa ni dngos po zhes bya ba 'di yin no/ /ji ltar 'brel zhes bya ba ni 'brel pa'i ngo bo nyid dam 'brel pa'i rang bzhin ji ltar grub ces bya ba'i don to//ma yin pa nyid do zhes bya ba ni sel bar ston to/ /'di skad bstan to/ 'brel pa ni thams cad du gnyis la gnas pa yin na gnyis la mi gnas na 'brel pa nyid du mi 'gyur ro/ /de ste yang 'di skad du ji ste rgyu'i tshe na 'bras bu med du zin kyang 'on kyang blos sprel te 'brel pa yod par 'gyur ro//de bzhin du 'bras bu'i tshe na rgyu drangs te gnas par 'gyur ro/ /de ltar na 'brel pa ni gnyis la gnas par 'gyur ro zhe na/ de'i phyir blos sprel te 'brel na ni rnam par rtog pas skyed par 'gyur ro zhes bya ba smos te/ci ste 'brel pa can gnyis blos sprel te gnyis la gnas pa'i 'brel par khas len na de'i tshe 'brel pa ni rtog par 'gyur gyi don dam par ni ma yin no/ /rgyu'am 'bras bu la rim gyis 'brel pa gnas so zhe na/ de yang mi rigs te zhes bya ba ni 'on te brgya la 'di skad du sngar rgyu la gnas nas phyis 'bras bu la gnas par 'gyur ro//de ltar na 'brel ba ni gnyis la gnas par 'gyur ro zhes zer na de yang mi rigs te/ 'di ltar rim las kyang dngos po gcig la zhes bya ba 'di'i bshad pa ni rgyu'am 'bras bu gcig la zhes bya ba yin te/ sngar rgyu la'o/ /de nas 'bras bu la'o//gnas na zhes bya ba 'di'i bshad pa ni 'brel pa zhes bya ba yin te 'brel pa zhes bya ba de gang yin pa zhes sbyar ro/ /gzhan la re ba med ces bya ba 'di'i bshad pa ni 'og nyid nas rgyu la gnas pa na 'bras bu la ltos pa med do/ /'bras bu la gnas pa na rgyu la ltos pa med pa zhes bya ba ni gang gi tshe rgyu la gnas pa de'i tshe 'bras bu la mi ltos so//gang gi tshe 'bras bu la gnas pa de'i rgyu la mi ltos so/ /gnyis la rim gyis gnas na ni 'brel par mi rung ste zhes bya ba ni gang gi tshe gnyis la gnas pa na de'i tshe 'brel par mi 'gyur ro/ /gang dang 'brel pa med ce na/de'i phyir gzhan la re ba med pa zhes bya ba smras te/ 'di nyid kyi bshad pa ni 'og nas gang du re ba med pa de dang 'brel pa med do zhes bya ba yin te/ de ni go sla'o/ /'brel pa ci 'dra ba zhig yod pa ma yin zhe na/ gcig la gnas pa can zhes bya ba smos te/ gcig dang 'dug pa ni gcig la gnas pa'o//de gang la yod pa de ni gcig la gnas pa can no/ /de nyid ston pa ni rgyu dang 'bras bu la rim gyis gnas pa zhes bya ba yin te/ rgyu dang 'bras bu la rim gyis gnas pa'i ngang tshul can gang yin pa 'di ni rgyu dang 'bras bu la rim gyis gnas pa'o/ /ci'i phyir 'brel pa med ce na/de'i phyir de med par yang yod pa'i phyir zhes bya ba smos te/ 'di'i bshad pa ni rgyu dang 'bras bu gnyis phan tshun med par yang 'brel pa zhes bya ba'i don yod pa'i gtan tshigs kyis na zhes bya ba yin te/ gang gi phyir rgyu la gnas pa na 'bras bu med par yang yod pa yin la 'bras bu la gnas pa na ni rgyu med par yang yod pa yin te/de bas na de gnyis 'brel pa kho na yin pa 'di mi rung ngo / /'di skad bstan te/ kha cig tu 'brel pa ni gnyis la gnas par khas len la/ rgyu dang 'bras bu gnyis la rim gyis gnas pa ni gnyis la gnas par mi 'thad do//nyes pa 'dir mi 'gyur bar bya ba'i phyir zhes bya ba ni gong du ji skad smos pa'o/ /gzhan du zhes bya ba 'di'i bshad pa ni rgyu'am 'bras bu la zhes bya ba yin te/ rtogs sla'o/ /'di zhes bya ba 'di'i bshad pa ni 'brel pa zhes bya ba'o/ /rim gyis gnas pa na zhes bya ba ni rim gyis 'dug pa'o//ci ste de gnyis la zhes bya ba 'di'i bshad pa ni rgyu dang 'bras bu zhes bya ba de yin no/ /gcig la ltos so zhes bya ba 'di'i bshad pa ni rgyu'am 'bras bu zhes bya ba yin te/ de ni rtogs sla'o/ /re ba dang bcas pa nyid kyis gnyis la gnas pa kho nar 'dod do zhe na zhes bya ba ni de ltar re ba dang bcas pa nyid kyis na 'brel pa ni gnyis la gnas par 'gyur ro//'di skad bstan te/ gang gi tshe rgyu la 'brel pa gnas pa de'i tshe 'bras bu la mi ltos pas gnas so/ /gang gi tshe 'bras bu la gnas pa de'i tshe rgyu la mi ltos pas gnas so//ltos pas ni 'brel pa ni gnyis la gnas par 'dod kyi de la gnas pa ni ma yin no/ /de bas na ji skad du smos pa'i skyon du thal bar mi 'gyur ro zhes bya ba ni phyogs snga ma'o/ /'dir grub pa'i mtha' smra ba rnams de lta na yang ltos pa des phan pa byed par 'gyur ro zhes bya ba smras te/ 'brel pa gang zhig 'di la ltos na ni des de'i tshe 'brel pa la phan pa byed par 'gyur ro/ /ci'i phyir zhe na zhes bya ba ni snga ma bzhin du gtan tshigs 'dri ba'o/ /'di ltar ltos pa phan pa byed par 'gyur te gzhan du ma yin no zhes bya ba ni gang phan par byed pa de la ltos par rigs kyi phan pa med pa la ni ma yin no//ltos pa na phan pa byed pa yin mod ce na zhes bya ba ni ci ste ltos pa gang yin pa phan pa byed pa yin mod ce na/ de med na ji ltar phan pa byed ces bya ba ni med pa nyid yin na ji ltar phan pa byed/ de nyid ltos pa ni rgyu'i tshe na 'bras bu zhes bya ba'i don med do/ /'bras bu'i tshe na yang rgyu zhes bya ba'i don med de zhes bya ba ni gang gi tshe rgyu'i dus na 'bras bu med pa de'i tshe med pa ni ri bong gi rwa dang 'dra ba yin na ji ltar phan pa byed/gang gi tshe 'bras bu'i dus na rgyu med pa de'i tshe de yang shi ba'i ro bzhin yin na de ji ltar phan pa byed/ phan pa byed pa ma yin no zhes bya ba ni spong ba ston to//ci'i phyir zhe na/ mthu med pas zhes bya ba smras te/ gang gi phyir med pa ni lus med pa bzhin du phan pa byed pa'i mthu med do/ /gzhan yang zhes bya ba ni skyon ston pa'o/ /ci ste don gcig 'brel pa'i phyir zhes bya ba 'di'i bshad pa ni gtan tshigs kyis zhes bya ba ste//ci ste don gcig dang ldan pa'i phyir zhes bya ba'i don to/ /de gnyis zhes bya ba 'di'i bshad pa ni rgyu dang 'bras bur mngon par 'dod pa zhes bya ba yin te/ de ni go sla'o/ /rgyu 'bras nyid yin par zhes bya ba 'di'i bshad pa ni 'dod na zhes bya ba'i don to/ /de'i tshe grangs su brjod pa gnyis nyid la sogs pa 'brel pa'i phyir zhes bya ba'i gtan tshigs kyis phyugs kyi g.yas g.yon rwa yang rgyu dang 'bras bu kho na thob par 'gyur ro zhes bya ba ni phyugs kyi g.yas g.yon gyi rwa gnyis kyang gnyis nyid ces bya ba'i gcig dang 'brel pa yod do//de'i phyir de gnyis kyang rgyu dang 'bras bu'i dngos po 'thob par 'gyur ro//de ltar na mi 'dod na zhes bya ba ni de gnyis rgyu dang 'bras bur mi 'dod na'o/ /de las gzhan yang 'gyur re skan zhes bya ba ni de bas na mngon par 'dod pa la yang mi 'gyur ro sogs pa smos pas ni pha rol nyid dang tshur rol nyid dang / rwa nyid la sogs pa dang 'brel pa'i phyir zhes bsdu'o zhes bya ba ni pha rol nyid dang /tshu rol nyid dang rwa nyid ces bya ba gcig pu ni rwa nyid dang ldan pa yod do/ /de bas na de gnyis kyang rgyu dang 'bras bu'i dngos po thob par 'gyur ro/ /'di skad bstan te/ ci ste don gcig dang ldan pa'i phyir rgyu dang 'bras bu'i dngos por khas len na de'i tshe rwa gnyis kyang gnyis nyid ces bya ba gcig dang ldan pa yod pas de gnyis kyang rgyu dang 'bras bu'i dngos por khas blang bar bya dgos so//ma yin na ni mngon par 'dod pa la yang mi rung bar 'gyur ro/ /ci ste pha rol po na re gang yang rung ba cig dang 'brel pa'i phyir ma 'brel pa ni ma yin no//'o na ci zhe na/ 'brel pa'i mtshan nyid dang ngo zhe na zhes smra ba ni bdag dang gang yang rung ba cig dang ldan pa'i phyir dngos po rnams 'brel par smra ba ni ma yin gyi 'on kyang 'brel pa zhes bya ba gcig dang 'brel pa'i phyir zhes 'brel par smra'o zhe na/ de ni mi rung ste zhes bya ba ni 'gog pa'i tshig go//dngos po'i don 'ga' zhig gnyis gnas pa zhes bya ba 'di'i bshad pa ni 'brel ba yin gyi zhes bya ba'i tshig yin te/ gnyis la gnas pa'i dngos po'i don ni 'brel ba zhes bya'o zhes bya ba'i don to/ /de las zhes bya ba 'di'i bshad pa ni don gnyis dang mngon par 'brel pa can zhes bya ba yin te/don gnyis kyis mngon par 'brel pa zhes tshig sbyar ro/ /de 'di la yod pas ni don gnyis dang mngon par 'brel pa can no/ /yang na don gnyis la mngon par 'brel pa'i ngang tshul can 'di gang yin pa de don gnyis dang mngon par 'brel pa can te/dngos po gnyis dang ldan pa zhes bya ba'i don to/ /gzhan du de'i zhes bya ba 'di'i bshad pa ni de'i 'brel ba'i mtshan nyid mi 'thad na zhes bya ba yin te/ 'di'i 'brel pa'i mtshan nyid gzhan mi 'thad do zhes bya ba'i don to/ /gang gis na grangs la sogs pa las de'i khyad par rnam par gzhag par bya zhes bya ba ni gtan tshigs gang gis na grangs la sogs pa dang mi 'dra ba'i mtshan nyid khas len par byed/'di skad bstan te/ don gnyis dang mngon par 'brel pa can ma gtogs par gzhan du 'brel pa'i mtshan nyid brjod du med pa yin na gang gis na grangs la sogs pa dang mi 'dra ba'i mtshan nyid khas blang bar bya/'dir yang pha rol bo dag smra ba 'ga' zhig yod na yod par 'gyur la zhes bya ba ni sa bon yod na myu gu yod ces bya ba'i don to/ /med na med par 'gyur te zhes bya ba ni sa bon nyid med na myu gu med pa yin zhes bya ba'i bar du'o/ /yod par gyur pa dang med par gyur pa de gnyis kyang zhes bya ba ni sa bon yod na myu gu yod pa yin te/de bas na gnyis ka yang 'dod pa'i sgras brjod do/ /sa bon med na myu gu med pa yin te/ de bas na gnyis ka yang med pa'i sgrar brjod do/ /yod pa dang med pa gang yin pa zhes bya ba ni sa bon dang myu gu'i 'brel pa can yod pa dang med pa gang yin pa zhes bya ba'i don to//de'i bye brag can khyad par gyi sbyor ba gang yin pa de ni 'brel ba zhes bya ste zhes bya ba ni yod pa dang med pa gnyis kyi dmigs kyis phye ba gang yin pa 'di ni 'brel pa zhes bya ba'i don to/ /yod pa dang med pa'i bye brag can gyi sbyor ba 'di ci ste rgyu 'bras kho na yin te zhes bya ba ni yod pa dang med pas dmigs kyis phye ba'i 'brel pa ni rgyu 'bras kho nar 'dod kyi thams cad ni ma yin no zhe na zhes bya ba ni phyogs snga ma'o//'dir grub pa'i mtha' smra ba dag gis ci ste yod pa dang med pa dag gis bye brag can gyi sbyor ba rgyu 'bras kho na yin na de'i tshe sbyor ba'i bye brag can gang yin pa'i yod pa dang med pa de nyid 'dir ni rgyu 'bras ci'i phyir min zhes bya ba ni ci ste yod pa dang /med pa gnyis kyis bye brag tu byas pa'i sbyor ba ni rgyu 'bras su khas len na de'i tshe yod pa dang med pa de gnyis nyid rgyu 'bras kho na yin par ci ste khas mi len na gang gis yod pa ma yin zhing don med pa'i 'brel pa rtog par byed ces bya ba ni yod pa dang med pa gnyis rgyu 'bras nyid yin na nyes pa ci yod na gang gis na khyed yod pa ma yin zhing dgos pa med pa'i 'brel pa rtog par byed/tha dad ces bya ba 'di gnyis rnam par dbye ba ni 'di snyam du yod na yod pa yin la/med na med pa yin no zhes bya ba 'di ni brjod par bya ba mang po yin te zhes bya ba ni rgyu dang 'brel pa can gyi yod pa dang med pa gnyis dang / 'bras bu dang 'brel pa can gyi yang gnyis so/ /don gcig rjod par byed pa rgyu dang 'bras bu kho nar zhes bya ba'i sgras brjod pa'i yul du de mi rigs pas zhes bya ba la rgyu dang 'bras bu ni rgyu 'bras so//de'i dngos po ni rgyu dang 'bras bu kho na ste/ 'di ni dngos po'i rkyen gyis bsdu ba'o/ /dngos po'i rkyen gyis ni de la 'brel pa yod par brjod do/ /de bas na rgyu dang 'bras bu kho na'i sgras 'brel pa brjod la de yang gcig yin no/ / de bas na rgyu dang 'bras bu kho na'i don gcig rjod par byed pa rgyu dang 'bras bu kho na zhes bya ba'i sgras brjod pa'i yul du don mang po de mi rigs pas yod pa dang med pa'i rgyu dang 'bras bu kho nar mi 'dod do zhe na zhes bya ba ni de bas na yod pa dang med pa rgyu dang 'bras bu kho nar mi 'dod do zhes bya ba ni phyogs snga ma'o//'dir grub pa'i mtha' smra bas sgra 'di ni smra bar byed pa'i skyes bu la brten pa ma yin nam zhes smras te/ sgra thams cad smra bar byed pa la brten pa ma yin nam/ smra bar byed pa yang ji ltar 'dod pa bzhin du sbyor gyi dngos po ji lta ba bzhin du ma yin no/ /de ltar na smra bar byed pa la brten pa'i phyir zhes bya ba yin te/smra bar byed pa'i kha na las pa'i phyir zhes bya ba'i don to/ /sgra gang yin pa 'di ni ji ltar sbyor ba de bzhin du smra ba yin te zhes bya ba ni gang gi tshe sgra ni smra bar byed pa la rag las pa de'i tshe sgra 'di ni smra bar byed pa rnam pa gang gis don gang la sbyor ba'i sgra de don de la rnam pa des brjod kyi rang dgar ma yin pas na du ma la yang sgra gcig yod pas lan du mi rung ba nyid de de ltar na don du ma la yang sgra gcig 'jug go//des na 'di lan du mi rung ngo / /de bas na yod pa dang med pa de nyid rgyu dang 'bras bur rigs te zhes bya ba ni gang gi phyir de lta yin pa de bas na yod pa dang med pa kho na rgyu dang 'bras bu nyid yin par rigs kyi 'brel pa zhes bya ba gzhan ni ma yin no//ci'i phyir zhe na 'di ltar gcig pu mthong na zhes bya ba 'di'i bshad pa ni rgyur mngon par 'dod pa zhes bya ba yin te/ rgyu gcig cig snang ba gang yin pa 'di ni mngon par 'dod pa zhes bya ba'i don to/ /rig bya'i mtshan nyid du gyur pa 'bras bu zhes bya ba ma mthong ba mthong ba ni zhes bya ba ni rgyur mngon par 'dod pa mthong ba na rig bya'i mtshan nyid du gyur pa sngon ma mthong ba 'bras bur mngon par 'dod pa gang yin pa mthong ste/de mthong ba ni gang mthong na mthong ba yin te/ rgyur mngon par 'dod pa dmigs pa na dmigs par 'gyur zhes bya ba'i don to/ /de ma mthong na 'bras bur mngon par 'dod pa ma mthong ba ni zhes bya ba ni rgyur mngon par 'dod pa de ma mthong ba na gang gi tshe 'bras bur mngon par 'dod pa mi mthong ba'o//de'i tshe 'bras bu yin pa nyid do shes te zhes bya ba 'di'i bshad pa ni 'di las 'di 'byung ba'o zhes rtogs pa'o zhes bya ba yin te/ sa bon las myu gu 'di yod par 'gyur ro zhes rtogs pa'o/ /ston pa'i skye bo yang med pa zhes bya ba 'di nyid kyi bshad pa ni 'og nas 'di las 'di 'byung ngo zhes bya ba 'di 'chad pa med par ro zhes bya ba yin te/sa bon 'di las myu gu 'di yod par 'gyur ro zhes de ltar brgya la 'chad pa 'ga' yang med na yang 'on kyang sa bon las myu gu yod par 'gyur bar rtogs so/ /'di skad bstan te/ sa bon mthong ba na sngon ma mthong ba'i myu gu mthong ba dang sa bon ma mthong ba na ma mthong na ni/sa bon las byung ba ni myu gu yin par rtogs so/ /brda sprad na shes so zhes bya ba yang tshig tsam du zad de zhes bya ba ni kha cig dag mthong ba dang ma mthong ba las sa bon las byung ba myu gu yin par rtogs pa ni ma yin gyi 'o na ci zhe na/ brda sprad pa'i dbang gis so zhes smra ba de ni tshig tsam du dgongs pa'o/ /'di ltar brda sprad du zin kyang yod pa dang med pa dag las gzhan du ni rtogs par mi 'gyur te zhes bya ba ni gang gi phyir brda sprad pa'i dbang gis 'di rtogs kyang yod pa dang med pa nyid rtogs kyi gzhan du ni ma yin no/ /gang gi phyir brda sprad du zin kyang gzhan rtogs pa ma yin pa de bas na gang rtogs na gang khong du chud par 'gyur ba de ni de'i don te zhes bya ba ni gang nges par chod pa na gang nges par bcad pa ni de'i yul du ston te/'di lta ste/ snam bu dkar po rtogs na dkar po khong du chud pas dkar po kho na rtogs pa bzhin du zhes bya ba ni de ni gang gi tshe snam bu dkar po rtogs pa de'i tshe dkar po khong du chud pas dkar po nyid la rnam par gzhag gi gzhan du ma yin pa de bzhin du yod pa dang med pa rtogs pa na rgyu dang 'bras bu nyid khong du chud pas na yod pa dang med pa nyid rgyu dang 'bras bu khong du chud pa las don gzhan ma yin no zhes bya ba ni 'di ltar yod pa dang med pa rtogs pa ni rgyu dang 'bras bu'i dngos po rtogs pa yin te/de bas na rgyu dang 'bras bu khong du chud pa las don gzhan ma yin no zhes bya ba ni 'di ltar yod pa dang med pa rtogs pa ni rgyu dang 'bras bu'i dngos po rtogs pa yin te/ de bas na rgyu dang 'bras bu rtogs pa'i yul ni yod pa dang med pa nyid yin gyi gzhan rgyu dang 'bras bu nyid ces bya ba'i 'brel pa ni ma yin no//'di snyam du yod pa dang med pa ni sgrub par byed pa yin la/ rgyu dang 'bras bu nyid ni bsgrub par bya ba yin pas gzhan no zhe na zhes bya ba ni brgyal pha rol po dag 'di skad du yod pa dang med pa gnyis kyi rgyu dang 'bras bu nyid sgrub par byed de/sgrub par byed pa las bsgrub par bya ba gzhan yin no zhes smra ba'o/ /'dir grub pa'i mtha' smra bas gzhan yin na yang de'i ngo bo ci'i phyir mi bstan zhes bya ste/ ci ste yod pa dang med pa las rgyu dang 'bras bu gzhan yin na'o na ngo bo 'di'o zhes ci'i phyir mi bstan/'on te skyed par byed pa dang bskyed par bya ba'i ngo bo kho na yin no zhe na zhes bya ba ni pha rol po dag de dag gi ngo bo ni skyed par byed pa dang bskyed par bya ba'i ngo bo kho na yin no zhe na/ grub pa'i mtha' smra bas gang de skad du smra ba de'i ming gi rnam grangs kyi sgo nas don tha dad par 'gyur ram ci zhes bya ba smras te/gang khyod de skad smra ba de ming gi rnam grangs bstan pa tsam gyi sgo nas don yang tha dad par bstan par 'gyur ram ci zhes bya ba'o/ /'di ltar skyed par byed pa dang bskyed par bya ba'i ngo bo dang / skye ba dang bskyed pa'i ngo bo dang /rgyu dang 'bras bu'i ngo bo zhes bya ba la sogs pa rnam grangs su gtogs pa'o zhes bya ba ni go sla'o/ /de bas na mthong ba dang ma mthong ba zhes bya ba 'di'i bshad pa ni yul can gyi yul bstan pa'i phyir yod pa dang med pa ma gtogs par zhes bya ba yin te/ mthong ba dang ma mthong ba ni yul can no/ /yod pa dang med pa ni yul lo/ /de bas na yul can mthong ba dang ma mthong ba gnyis kyi yul du gyur pa'i yod pa dang med pa gnyis bstan te/ des bstan pa yod pa dang med pa ma gtogs par zhes bstan pa yin no/ /'bras bu'i blo ni mi srid pa'i gtan tshigs kyi phyir zhes bya ba ni yod pa dang med pa ma gtogs par 'di ltar 'bras bu'i blo mi srid do//'di la 'bras bu la sogs sgra'ang zhes bya ba la 'bras bu thog mar byas pa gang yin pa de ni 'bras bu la sogs pa ste/ 'bras bu la sogs pa yang yin la de'i sgra yang yin pas na 'bras bu la sogs pa'i sgra ste/rgyu dang 'bras bu'i sgra zhes bya ba'i bar du'o/ /'di la zhes bya ba'i sgra 'chad pa ni yod pa dang med pa gnyis zhes bya ba yin te/ yod pa dang med pa gang yin pa la rgyu dang 'bras bu'i sgra 'di yod do/ /de ni tshig so so'i phreng ba 'di snyed cig 'jig rten pa rnams ma brjod kyang rung snyam nas tha snyad sla bar bya ba'i phyir rnam par bkod do zhes bya ba ni rgyu yod na 'bras bu yod la rgyu med na 'bras bu med do zhes bya ba 'di ni tshig gi phreng ba shin tu mang ba yin te/tshig gi phreng ba shin tu mang po ni tshig du ma ste/ 'jig rten pa rnams ma brjod kyang rung zhes tha snyad sla bar bya ba'i phyir rgyu dang 'bras bu'i sgra gcig pu bkod do//'di skad bstan te/ mang po de dag gi don ji ltar na tshig gcig gis bstan par 'gyur snyam nas rgyu dang 'bras bu'i sgra gcig pu 'dir gzhag go/ /pha rol po dag kyang rjes su 'gro ba dang ldog pa las rgyu dang 'bras bu gzhan ma yin na yang ji ltar yod pa dang med pa gnyis kyis bsgrub par bya zhes bya ba smras te/ji ste rgyu dang 'bras bu nyid ni yod pa dang med pa las logs shig na yod pa ma yin na ji ltar de gnyis kyis de bsgrub par bya/ tha dad pa med pa la ni bsgrub par bya ba dang /sgrub par byed pa'i dngos po gang yang ma mthong ngo zhes bsams pa'o/ /grub pa'i mtha' smra bas de yod na yod pa'i gtan tshigs kyi phyir zhes bya ba smras te/ de yod pa ni de yod na zhes bya ba yin te/ rgyu yod na zhes bya ba'i don to/ /de yod na yod pa ni de yod pa'o/ /de bas na de yod na yod pa'i rtags las de 'bras rtogs zhes bya ba la de'i 'bras bu ni de 'bras so//de'i 'bras bu rtogs pa ni de 'bras rtogs pa'o/ /de nyid bstan pa'i phyir gang yod na yod pa de ni 'bras bur rtogs so zhes bya ba smras te/ gang yod na dngos po gang yod pa'i dngos po de ni 'bras bu zhes bya'o//gang yang rjes su smra ba ni zhes bya ba 'di nyid ni 'og nas rgyu 'di'i 'bras bu 'di'o zhes bya ba'i tshig gis ston te/ rgyu 'di'i 'bras bu 'di'o zhes gang nges shing de smra bar byed pa gang yin pa'o/ /brda'i yul du de brjod de zhes bya ba 'di'i bshad pa ni de yod na yod pa nyid kyis gang yang de skad du smra ba'i rgyu dang 'bras bu'i tha snyad kyi yul du de bstan gyi zhes bya ba yin te/rgyu yod na 'bras bu yod par 'gyur ba ni de yod na yod pa nyid do/ /de ltar gang yod na yod pa nyid kyis 'bras bu yin par brjod pa de rgyu dang 'bras bu gnyis kyi tha snyad kyi yul du bstan to/ / don tha dad pa ni med do zhes bya ba ni 'dir rgyu dang 'bras bu yang gzhan la/ de yod na yod pa nyid kyang gzhan pa ma yin no/ /ci 'dra zhe na zhes bya ba ni dpe 'dri ba'o/ /lkog shal sogs las glang rtogs bzhin/ /zhes bya ba ni ji ltar lkog shal la sogs pa glang khong du chud pa bzhin no/ / de nyid ston pa ni 'di ni ba lang yin te/ lkog shal la sogs pa dang ldan pa'i phyir ro zhes bya ba 'dis ba lang gi tha snyad kyi yul du ston to zhes bya ba ni gang gi phyir lkog shal la sogs pa dang ldan pa de ba lang yin no zhes bya ba des ji ltar lkog shal la sogs pa dang ldan pa nyid ba lang gi tha snyad kyi yul du bstan pa de bzhin du de yod na yod pa'i don gang yin pa de 'bras bu'i zhes 'bras bu'i tha snyad kyi yul du bstan to//gzhan yang pha rol po dag smra ba ji ste yod pa dang med pa gnyis rgyu dang 'bras bu nyid yin na rgyu nyid 'ba' zhig gam 'bras bu 'ba' zhig kyang gnyi gar gtogs te yod pa dang med pa la ltos par 'gyur ro zhes bya ba ni ji ste yod pa dang med pa rgyu dang 'bras bu nyid du khas len na de'i tshe rgyu nyid 'ba' zhig kyang gnyis kar gtogs shing yod pa dang med pa ltos la de bzhin du 'bras bu nyid 'ba' zhig kyang gnyi gar gtogs shing yod pa dang med pa la ltos par 'gyur ro//gzhan du na yod pa tsam rgyu'am 'bras bu ji ltar yin zhes bya ba ni ji ste yang rgyu dang 'bras bu gnyis so sor gnyi gar gtogs shing yod pa dang med pa la ltos par khas mi len na de'i tshe yod pa tsam 'bras bu yin pa dang yod pa tsam rgyu yin par khas blang bar 'gyur ro//de lta yin du zad mod nyes ba ci yod na de'i phyir smras pa/ yod pa dang med pa yin pa yang rgyu'am 'bras bu ni yod pa dang med pa gnyis kar yang gtogs pa ma yin gyi zhes bya ba ni/ rgyu dang 'bras bur gtogs pa'i yod pa dang med pa ni rgyu nyid 'ba' zhig kyang ma yin la 'bras bu nyid 'ba' zhig kyang ma yin no//rgyu dang 'bras bu kho na yin na ni rung ngo zhe na zhes bya ba ni/ rgyu dang 'bras bu kho na yin na yod pa dang med pa gnyi gar gtogs par rung ngo / /'dir grub pa'i mtha' smra ba dag gis de mi rung ste zhes bya ba de ni 'gog pa'i tshig go//gnyi gar gtogs su zin kyang phyi ma yod pa dang med pa'i bye brag gis rgyu snga ma yod pa dang med pa yin la/ snga ma yod pa dang med pa'i bye brag gis 'bras bu phyi ma yod pa dang med pa yin te zhes bya ba ni yod pa dang med pa gnyis kar gtogs mod kyi 'on kyang myu gu yod pa dang med pa gnyis dmigs kyis phye ba ni sa bon yod pa dang med pa yin te/rgyu nyid yin no/ /sa bon yod pa dang med pas dmigs kyis phye ba ni myu gu yod pa dang med pa nyid yin te/ 'bras bu yin no/ /'di skad bstan te/ phyi ma yod pa dang med pa la ltos nas snga ma yod pa dang med par gyur pa ni rgyu nyid yin no//snga ma yod pa dang med pa la ltos pa ni phyi ma 'bras bu nyid yin gyi rgyu 'ba' zhig gam 'bras bu 'ba' zhig ni gnyis kar gtogs pa'i yod pa dang med pa ma yin te/ 'di ltar yod 'gyur yod ces bya ba 'di'i bshad pa ni yod par 'gyur ba'i chos can yod na de yod pa ni zhes bya ba yin te/de ma thag tu yod par 'gyur ba ni 'bras bu'o/ /de yod pa ni zhes bya ba 'di'i bshad pa ni rgyur mngon par 'dod pa yod pa'o zhes bya ba yin no/ /de ni yod pa nyid do zhes 'dir yang nges par gzung bar bya'o zhes phyis bshad pa nyi tshe nges par gzung bar bya ba la brten pa ma yin gyi 'o na ci zhe na/rgyur mngon par 'dod pa 'dir yod pa nyid do zhes nges par gzung bar blta'o/ /de bas na tshig gi don 'dir 'gyur te/ de ma thag tu skye ba'i chos can gyi 'bras bu la gdon mi za bar rgyu yod de/ 'di ltar rgyu'i rgyu nyid ni 'bras bu de ma thag tu 'byung ba la gdon mi za bar nye ba yin no//'dis ni bzlog pa yang don gyis 'dren to zhes bya ba ni nges par gzung bas bzlog pa don gyis 'dren par rig par bya'o/ /de'i phyir don 'dir 'gyur te/ yod pa nyid yin gyi med pa ni ma yin no/ /des na 'di skad bstan te rgyur mngon par 'dod pa gdon mi za bar nye ba yin gyi mi nye ba gang yin pa de ni ma yin no//rgyur mngon par 'dod pa yod pa nyid na yod par 'gyur ba ni 'bras bur mngon par 'dod pa'i 'bras bu nyid do zhes bya ba ni 'bras bur mngon par 'dod pa'i 'bras bu de nyid 'di ltar rgyu gang yin pa nye ba nyid yod na yod pa'o//rab tu grub ces bya ba ni grags zhes bya ba'i don to/ /gang gis grub ce na/ mngon sum mi dmigs pa dag las zhes bya ba smras te/ mngon sum gyis dang mi dmigs pas zhes bya ba'i don to/ /gang grub ce na/ rgyu 'bras zhes bya ba smras te/ rgyu dang 'bras bu ni rgyu 'bras te/rgyu dang 'bras bu zhes bya ba'i don to/ /de gnyis kyi dngos po ni rgyu dang 'bras bu kho na'o/ /de la rgyu yod na 'bras bu yod pa ni mngon sum gyis shes so/ /rgyu med na 'bras bu med pa ni mi dmigs pas shes so/ /gang gi phyir mngon sum dang mi dmigs pa gnyis kyi yod pa dang med pa rtogs pa de la rgyu dang 'bras bu'i tha snyad 'jug par byed pa de bas na yod pa dang med pa ni rgyu dang 'bras bu yin pa kho nar gnas te/de ltar na yod pa dang med pa nyid rgyu dang 'bras bu yin gyi gzhan ma yin no zhes bya ba de ni rtogs par zad do/ / de bas na re zhig de tsam yang dag don zhes bya ba la de bas na zhes bya ba ni gtan tshigs kyis so/ /lhag ma ni rang nyid ston te/ re zhig de tsam nyid ces bya ba de'i bshad pa ni yod pa dang med pa'o zhes bya ba yin no/ /de dag nyid yang dag pa bden pa ste/ 'di gang gi don yin pa de dag nyid yang dag pa'o//don de ni gang dag rnam par rtog pa rnams kyi ste/ re zhig de tsam yang dag don/ /zhes bya ba yan lag gi don rnams ni go sla'o/ /spyi don bshad pa ni/ re zhig de tsam sa bon no/ /zhes bya ba yin te/ re zhig de tsam rgyu mtshan yin no/ /'di skad bstan te/rgyu dang 'bras bu'i rnam par rtog pa'i rgyu mtshan ni don dam par yod pa dang med pa tsam yin no/ /rgyu dang 'bras bu'i spyod yul rnams zhes bya ba ni gang dag gi spyod yul dang 'bras bu zhes bya bar bzung ste/ rgyu dang 'bras bu yul zhes bya ba'i tha tshig go/ /ston pa de yang 'brel pa'i don bzhin ston te zhes bya ba 'di'i bshad pa ni 'brel pa yod pa bzhin du'o zhes bya ba yin te rtogs par sla'o//ma 'brel ba'i don la yang zhes bya ba ni don dam par 'brel pa med kyang rnam par rtog pas ni 'brel pa yod pa 'dra bar ston par byed do/ /de ltar byed pas na log pa'i don yin no zhes bya ba ni gang gi phyir de ltar dngos po rnams 'brel pa med kyang 'brel pa yod pa 'dra bar ston par byed de/de bas na rnam par rtog pa de'i don log pa yin no/ /'brel pa yang dag pa ma yin pa'i don gcig de dag gis bstan tam ci gang gis log pa'i don yin zhe na zhes bya ba ni rnam par rtog pa rnams kyis 'brel pa med pa'i don kho na zhig bstan tam ce na/gang gis na de dag mi bden pa'i don du 'dod/ de de bzhin te zhes bya ba ni de yang dag pa ma yin pa'i 'brel pa rtog par byed pa gang yin pa de bden no/ /cis mngon zhe na/de'i phyir 'di ltar 'dir brtag par bya ba gnyis te/ rgyu dang 'bras bu yang dag par don tha dad pa'am/ tha dad pa ma yin pa zhig 'brel zhes bya ba smos te/ gang rgyu dang 'bras bu'i don yang dag par 'brel pa 'di khas len na de ci dngos su tha dad dam/ 'on te tha dad pa ma yin zhes rtog pa gnyis su ston to//ci ste tha dad na zhes bya ba ni ji ste re zhig rgyu dang 'bras bu gnyis ngo bo tha dad pa yin na de'i tshe tha dad pa yin na ci zhig 'brel te/ ngo bo tha dad pa de la 'brel pa gang zhig yin/ ma yin pa nyid de zhes bya ba ni snga ma bzhin no/ /ci'i phyir ma yin zhe na/de'i phyir rang gi ngo bo la gnas pa'i phyir ro zhes bya ba smos te/ bdag bdag rang gi ngo bo la gnas pa'i phyir ro zhes bya ba'i don to/ /'on te tha dad pa ma yin na ni zhes bya ba ni 'on te yang tha dad pa ma yin par 'dod na de'i tshe/ tha dad min na rgyu 'bras gang / / zhes bya ba ni tha dad pa ma yin pa yang rgyu dang 'bras bu'i dngos po nyid du mi srid do/ /ma yin pa nyid de zhes bya ba ni snga ma bzhin no/ /ci'i phyir mi srid ce na/ de'i phyir bskyed par bya ba ma skyes pa la byed pa'i phyir la tha dad pa med pa'i phyir ro zhes bya ba smos te/ 'di ltar tha dad pa med pa'i phyogs la gang bskyed nas rgyu dang 'bras bur 'gyur ba'i ma skyes pa'i bskyed par bya ba med do//gnyis 'brel pa ga la yod ces bya ba ni gnyis 'brel pa'i go skabs thag bsrings so/ /brgya la pha rol po dag ci ste de nyi tshe tha dad pa'am tha dad pa ma yin pa 'brel pa ma yin gyi zhes bya ba ni gang gis na tha dad pa dang tha dad pa ma yin pa'i phyogs la yod pa'i skyon du gyur pa 'brel pa can nyi tshe 'brel pa'i sgrar brjod pa ni ma yin no//'o na ci zhe na/ 'brel pa zhes bya ba gcig dang 'brel pa'i phyir ro zhe na zhes bya ba ni 'on kyang gang gi tshe 'brel pa zhes bya ba gcig dang /rgyu dang 'bras bu gnyis su sbyor ba de'i tshe de gnyis 'brel par 'dod pa'o/ /'dir yang zhes bya ba ni de ltar rtog pa la'o/ /yod de zhes bya ba 'di'i bshad pa ni yod pa yin na yang zhes bya ba yin te/ bdog na zhes bya ba'i bar du'o//gzhan zhig ces bya ba 'di'i bshad pa ni 'brel pa zhes bya ba yin te/ 'brel pa'i ming can zhes bya ba'i don to/ /ma 'brel pa gnyis zhes bya ba ni so so na 'dug pa zhes bya ba'i don to/ ma 'brel pa gang zhe na rgyu dang 'bras bur mngon par 'dod pa zhes bya ba smras te/ de ni go sla'o/ /de gnyis 'brel par ji ltar byed/ /ces bya ba ni de gnyis 'brel par ji ltar 'gyur zhes bya ba'i don to/ /'di bstan te/ dngos po don gzhan zhig nye ba na dngos po'i don ma 'brel pa rnams 'brel pa'i rang gi ngo bor ji ltar 'gyur zhes bya ba'o/ /'brel pa zhes bya ba'i ngo bo de nyid gzhan zhig yod par zad pa'i phyir gzhan de yod pas dngos po gang yang 'dres par gyur pa med pa'i phyir yang dag par ji ltar 'brel pa yod ces bya ba ni gang na gnyis 'dug pa de'i nang du gsum pa 'ongs na de der lhag pa yin gyi de nye bas gnyis kyi ngo bo 'dres par 'gyur ba ni med do//gang gi tshe de ltar gyur pa de'i tshe don dam par dngos po rnams 'brel pa lta ga la yod/ de ltar re zhig rgyu dang 'bras bu'i dngos po'i mtshan nyid rnams 'brel pa med do zhes bstan zin to/ /sbyor ba dang 'du ba la sogs pa sel bar byed par 'dod nas/sbyor ba can dang 'du can sogs/ /zhes bya ba smos te/ sbyor ba can dang 'du ba can nam sbyor ba can dang 'du ba can no/ /de thog mar byas pa gang yin pa ni sbyor ba can dang 'du ba can la sogs pa'o/ /sogs pa smos pas rje khol la sogs pa yongs su bzung zhes bya ba'i tshig gi lhag ma'o//thams cad ces bya ba ni ma lus pa'o/ /des kyang zhes bya ba 'di'i bshad pa ni bshad ma thag pa'i phyir 'brel pa 'gog pa'i gzhung gis dpyad pa yin te zhes bya ba ni gang yang spyir 'brel pa sel ba/ gzhan zhig yod na ma 'dres gnyis/ /de gnyis 'dres par ji ltar byed//ces bya ba'i ngo bo des sbyor ba dang rje khol la sogs pa'i 'brel ba thams cad bsal bar rig par bya'o/ /sbyor ba la sogs pa'i mchan nyid kyi 'brel pa ni dngos su med do zhes bya ba ni gzhan gyi dbang can la sogs pa'i 'brel pa don dam par mi 'thad par ma zad kyi 'o na ci zhe na/sbyor ba la sogs pa yang don dam par mi 'thad pa kho na yin no/ /re zhig 'du ba can yang 'brel pa ma yin te zhes bya ba ni re zhig 'du ba zhes bya ba sel bar byed do/ /ji ltar yon tan dkar po snam bu la 'du ba zhes bya ba ni dkar po nyid ni snam bu la 'du zhes grag go//de gnyis zhes bya ba ni dkar po nyid dang snam bu nyid do/ /phan tshun zhes bya ba 'di'i bshad pa ni gcig la gcig ces bya ba de yin no/ /phan pa mi byed de zhes bya ba 'di'i bshad pa ni bskyed par bya ba dang / skyed par byed pa'i dngos po med pa'i gtan tshigs kyi phyir zhes bya ba yin te/gang gi phyir dkar po nyid dang snam bu gnyis gcig la gcig bskyed par bya ba dang skyed par byed pa'i dngos po med ces bya ba'i don to/ /'du ba can gyi mtshan nyid de dang 'dra ba la 'brel ba med do zhes bya ba 'di'i bshad pa ni phan par bya ba dang phan par byed par gyur pa med ces bya ba yin te/de ni rtogs par sla'o/ /'di ltar gang zhig gang gis phan gdags par bya ba de ni de la ltos pa yin no zhes bya ba ni 'di ltar phan pa la ltos pa ni rigs kyi gzhan la ma yin no/ /gang ltos pa de ni de dang 'brel pa yin na zhes bya ba ni ltos pa nyid kyis de ltar lhan cig 'brel par rigs kyi gzhan du ma yin no//dkar po dang snam bu gnyis ni de lta bu ma yin te zhes bya ba ni dkar po nyid dang snam bu gnyis la ni phan tshun phan par bya ba dang / phan par byed pa'i dngos po med do/ /de med pa'i phyir phan tshun ltos pa med do/ / ltos pa med pa'i phyir phan tshun 'brel pa lta ga la ci zhig yin/ ci'i phyir phan par bya ba dang phan par byed pa'i dngos po med ces/ rang gi ngo bo grub pa'i phyir ro zhes bya ba smos te/ 'di gnyis ka yang rang gi ngo bo grub pa yin no/ /de bas na phan tshun phan pa byed pa na yang ci zhig phan par byar yod/'on te pha rol po dag 'on kyang gzhi dang gnas pa'i dngos por 'gyur ro zhes smra na/ de'i phyir gzhi dang gnas pa'i dngos po yang rgyu dang 'bras bu'i dngos por ma gyur ba ma yin te zhes bya ba ni rgyu dang 'bras bur gyur pa nyid gzhi dang gnas pa'i dngos por 'thad kyi gzhan du ma yin no//'di ltar gzhong pa la sogs pa rang gi steng na 'bra go la sogs pa'i rgyun skyed par byed pa na gzhi yin par ston to/ /de lta ma yin na gzhong pa la sogs pa ci yang byed pa med na ci'i phyir gzhi zhes brjod/ gal te pha rol po dag ci ste rgyu dang 'bras bu'i dngos po med pa dkar po nyid dang /snam bu gnyis 'du ba can kho na yin par 'thad pa med na/ kye 'o na ni rgyu dang 'bras bu'i dngos po yod do zhe na/ de'i phyir rgyu dang 'bras bu yin na ni de la yod pa'i nyes par 'gyur ro zhes bya ba smos te/ ci ste 'di gnyis rgyu dang 'bras bu'i dngos por khas len na de'i tshe rgyu dang 'bras bu'i phyogs la nyes pa gang yin pa de 'dir yang thal bar 'gyur te/dkar po dang snam bu gnyis rang gi ngo bor grub pa'i phyir rgyu dang 'bras bu'i dngos po ma yin no/ /yang na rgyu dang 'bras bu'i mtshan nyid 'brel pa'i phyogs la nyes pa yod pa gang yin pa de 'dir blta bar bya'o//dkar po dang snam bu gnyis rgyu dang 'bras bu yin te/ gzhi dang gnas par gyur pa'i phyir 'brel bar rtogs pa yang legs pa ma yin te zhes bya ba ni ci ste yang dkar po nyid dang snam bu gnyis rgyu dang 'bras bu'i dngos por khas blangs nas gzhi dang gnas pa'i tshul gyis 'brel par rtogs pa de'i tshe rtogs pa de yang rung ba'i ngo bo ma yin te/'di ltar de gnyis la ni 'jig rten pa'i gzhi dang gnas pa'i dngos po yang med do zhes bya ba ni 'jig rten pa yang gzhong bu dang 'bra go la sogs pa lus can rnams gzhi dang gnas pa'i dngos po yin na khyed kyi phyogs la dkar po'i yon tan lus can ma yin na de ji ltar 'jig rten pa'i gzhi dang gnas pa'i dngos po yin/bskyed par bya ba dang skyed par byed pa'i dngos po'i mtshan nyid gzhi dang gnas pa'i dngos po yang spyi dang de dang ldan pa phan tshun phan pa mi byed pa gnyis 'du ba'i mtshan nyid kyi 'brel par mi rung ngo zhes bya ba ni 'on te yang bstan bcos pa rnams bskyed par bya ba dang skyed par byed pa'i tshul gyis dkar po dang snam bu gnyis gzhi dang gnas pa'i dngos por khas len na de'i tshe spyi dang de dang ldan pa 'du ba'i mtshan nyid kyi 'brel par mi 'gyur te/'di ltar spyi ni rtag pa yin pa'i phyir bskyed par bya bar mi srid do/ /'on te 'di skad du yan lag can gyi ngo bo 'bras bur brjod pa skyed par byed pa'i 'du ba can 'ga' zhig yod do zhes bya ba ni ci ste yang pha rol po dag yan lag can zhes bya ba skyed par byed pa gang yin pa'i 'du ba can 'ga' zhig ni yod do//de bas na de skyed pa'i phyir 'brel pa can du 'gyur ro zhes smra na 'dir grub pa'i mtha' smra ba rnams kyis de ltar 'du ba can ni 'ga' zhig gis 'bras bu skyed par byed pa zhes bya ba bshad de/ 'di'i tshig khong nas dbyung ba ni khas len na zhes bya ba yin no/ / des na de'i tshe 'du ba can de med ces bya ba 'di'i bshad pa ni bskyed pa'i dus na bskyed par bya ba ma skyes pa zhes bya ba yin te/ skyed pa'i tshe na 'bras bu skad cig ma phyi ma la 'byung bas de'i tshe 'bras bu skyes pa yod pa ma yin no/ /de ltar na ji ltar 'du ba can yin/ ci ste ma yin na de'i phyir gnyis tshogs pa med pa'i phyir ro zhes bya ba smos te/de'i tshe na rgyu dang 'bras bu gnyis lhan cig tu tshogs pa med pa'i phyir ro/ /'bras bu skyes pa na yang rgyu 'gags pa'i phyir ro zhes bya ba ni gang gi tshe 'bras bu skyes pa de'i tshe rgyu 'gags pas gnyis tshogs pa med do 'di skad bstan te/ci ste 'du ba kha cig skyed pa yin na 'on kyang 'du ba can nyid du mi 'thad de/ gnyis tshogs pa med pa'i phyir ro/ /ma 'gags na yang lhan cig tu 'dug pa gnyis phan par bya ba dang phan par byed pa'i dngos po med pa'i phyir ro zhes bya ba ni ci ste yang rgyu dang 'bras bu gnyis tshogs par 'dod na de'i tshe dus gcig tu tshogs pa gnyis la phan par bya ba dang phan par byed pa'i dngos po med pas shin tu yang 'brel pa can mi 'thad do//de ltar re zhig 'du ba can kho na mi 'thad par bstan zin to/ /da ni khas blangs nas thal bar 'gyur ba'i gleng slong bar byed do//'du ba can 'ga' zhig yod na yang zhes bya ba ni yan lag can zhes bya ba 'du ba can du khas len pa'o/ /de las min zhes bya ba 'di'i bshad pa ni skyed par byed pa'i gtan tshigs kyi phyir ro zhes bya ba yin te/ 'di skyed par byed pa'i phyir 'du ba can nyid du khas blang bar rigs pa ma yin no/ /ci'i phyir zhe na smras pa/ shin tu thal ba'i phyir ro/ /rdza mkhan yang bum pa skyed pa'i phyir dang 'brel pa can du 'gyur ro zhes bya ba ni shin tu thal ba de nyid ston par byed de/ rdza mkhan yang bum pa skyed par byed do//de bas na rdza mkhan yang bum pa 'du ba can nyid 'thob bo/ /skyon 'dir mi 'gyur bar bya ba'i phyir zhes bya ba ni phan par byed pa'i phyogs gang yin pa 'di la smras pa'i skyon der mi 'gyur bar bya ba'i phyir ro zhes bya ba'i don to/ /'du ba can de gnyis kyang gcig la gcig phan pa mi byed ces bya ba ni ci ste 'du ba can gnyis gang gi tshe phan tshun phan pa mi byed pa de'i tshe 'brel par 'dod pa'o//'brel pa can de gnyis kyang 'du ba la phan pa mi byed de zhes bya ba ni ci ste 'brel ba can gnyis 'du ba la phan pa mi byed pa de'i tshe yang ci ste 'brel pa yod par khas blang ba'o//ci'i phyir de la gnyis kyis phan pa mi byed ce na/ de'i phyir de rtag pa'i phyir ro zhes bya ba smos te/ 'du ba rtag pa yin na de gang gis ji ltar phan par bya 'du ba can de gnyis dang 'du ba dang gzhan yang gang yang phan par mi byed par zhes bya ba ni ci ste 'du ba can gnyis dang 'du ba gzhan yang gang yang phan par mi byed pa de'i tshe yang 'brel par ci ste 'dod/de ci ste khas len na de'i tshe mtha' dag 'gro ba thams cad kyang 'gyur te mtha' dag ces bya ba'i tshig 'di bshad pa ni/ 'gro ba thams cad ces bya ba de yin no//ci 'dra ba'i 'gro ba yin zhe na/ phan tshun ma 'brel pa'i zhes bya ba smos te/ de ni rtogs par sla'o/ /phan tshun 'brel pa can du 'gyur/ /zhes bya ba ni 'du ba'i mtshan nyid kyi 'brel pas na 'gro ba rnams gcig la gcig 'brel par 'gyur ro/ /'di skad bstan te/ ci ste phan pa byed pa med par yang 'du ba can du 'dod na de'i tshe 'gro ba thams cad phan tshun 'du ba can du 'gyur ro/ de lta yang ma yin pa zhes bya ba ni 'gro ba thams cad phan tshun 'du ba ma yin pa'o/ /de bas na phan par byed pa dang phan pa mi byed pa'i phyogs la 'du ba med la zhes bya ba ni bshad zin pa'i rnam pa de bas na phan par byed pa'i phyogs dang /phan pa byed pa med pa'i phyogs la yang 'du ba'i mtshan nyid kyi 'brel ba mi 'thad do/ /rnam pa gzhan yang mi srid do zhes bya ba ni phan pa byed pa dang phan pa byed pa med pa las ma gtogs par gang du 'brel par 'gyur ba'i rnam pa gsum pa mi srid do//'dis sbyor ba can gyi lan kyang btab po zhes bya ba ni 'du ba can bsal bas sbyor ba can yang bsal bar rig par bya ste/ 'di ltar sbyor ba can yang rang gi ngo bo grub pa'i phyir skye ba dang skyed par byed pa'i dngos po ma yin la/ gzhi dang gnas pa'i dngos po yang ma yin no//phan par byed pa med pa yang sbyor ba can mi 'thad de/ shin tu thal bar 'gyur ba'i phyir ro zhes thams cad sbyor bar bya'o/ /gzhan yang zhes bya ba ni 'dir skyon gzhan lhag par ston pa'o/ /sbyor ba ni 'bras bu yin pa'i phyir zhes bya ba ni sbyor ba ni bskyed par bya ba'o//de bas na de skyed pas na ci ste de gnyis sbyor ba can yin na zhes bya ba ni ci ste yang gang gi phyir 'brel pa can gnyis ni sbyor ba skyed par byed pa de bas na sbyor ba can du 'dod do/ /de'i tshe de ltar sbyor ba skyed kyang zhes bya ba ni ci ste sbyor ba skyed du zin kyang zhes bya ba'o/ /'on kyang des de gnyis mi 'dod do//des zhes bya ba 'di'i bshad pa ni sbyor ba skyed pa'i gtan tshigs kyi phyir zhes bya ba de yin no/ /de gnyis zhes bya ba 'di'i bshad pa ni sbyor ba can zhes bya ba de yin no/ /'di skad bstan te/ ci ste 'brel pa can dag gi sbyor ba skyed par khas blangs mod kyi 'on kyang sbyor ba skyed pa'i phyir de gnyis sbyor ba can du 'dod par mi bya'o//ci'i phyir zhe na zhes bya ba ni dam bcas pa tsam gyis 'dod pa'i don 'grub par ma mthong bas gtan tshigs 'dri ba'o/ /las la sogs pa sbyor ba can du 'grub pa'i phyir te zhes bya ba 'di'i tshig 'og mas bshad de/ci ste sbyor ba skyed pa'i phyir sbyor ba can yin par khas len na zhes bya ba tshig gi lhag ma'o/ /de'i tshe las kyang sbyor ba can du 'gyur te zhes bya ba ni las kyang sbyor ba can du 'gyur ba'i phyir ro/ /ci'i phyir zhe na/ de'i phyir 'di lta ste/ 'ga' zhig gi las kyis skyes pa dang gnyis ka'i las kyi skyes pas ni sbyor ba 'dod ces bya ba smos te/sdong po dang bya khra gnyis ni 'ga'i las las skye'o/ /lug 'thab pa gnyis ni gnyis ga'i las las skyes pa ste/ sbyor bar khas len pa'o/ /sogs pas ni sbyor ba yang sbyor ba can du 'gyur bar bsdu ste zhes bya ba ni sbyor ba yang sbyor ba can 'thob bo zhes bya ba de'i tshig gis sdud do//ci'i phyir zhe na/ 'di ltar de ni sbyor ba las skyes par yang 'dod ces bya ba smos te/ gang gi phyir sbyor ba ni sbyor ba las skyes par yang khas len to/ /sbyor ba skyed pa'i phyir sbyor ba can ma yin gyi 'o na ci zhe na/'jog par byed do zhe na yang zhes bya ba ni 'on te pha rol po dag smra ba skyed pa'i phyir de sbyor ba can du smra ba ma yin gyi 'on kyang sbyor ba 'jog pa'i phyir sbyor ba can du khas len to/ /'dir grub pa'i mtha' smra ba rnams kyis de ni mi rung ste zhes bya ba smras pa de ni 'gog pa'i tshig yin no//gnas par byed pa'ang rab tu 'jog/ /ces bya ba 'di'i bshad pa ni gzhag pa dang 'jog par byed pa gnyis ni bskyed par bya ba dang skyed par byed pa yin pa'i phyir gnas pa gzhan med do zhes tshad ma rnam 'grel las spros zin to zhes bya ba ni gnas par byed pa ni gnas par bya ba skyed pa nyid las 'jog par byed ces bya'i de las ma gtogs par gnas pa 'ga' yang byed pa med do//'di ltar gzhag par bya ba'i dngos po las gnas pa tha dad pa'am tha dad pa ma yin pa zhig yin/ re zhig tha dad pa ni ma yin te//'di ltar gzhag par bya ba'i gnas pa'o zhes bya ba'i 'brel pa mi 'thad do/ /tha dad pa ma yin pa zhig byed na yang 'jog par byed pa gzhag par bya ba nyid du byas par 'gyur ro zhes de dag tshad ma rnam 'grel las rgya cher spros so/ /pha rol po dag la yang smra ba/ci ste sbyor ba la sogs pa med par sbyor ba la sogs pa'i blo yod na ni zhes bya ba ni ci ste sbyor ba la sogs pa med par sbyor ba la sogs pa'i blo yod par khas len na de'i tshe bral ba'i ngo bo gang yin pa de ldan pa'i ngo bo yang yin par 'gyur zhes bya ba 'brel pa can gnyis so sor gnas pa'i ngo bo gang yin pa de nyid ldan pa'i gnas skabs kyang yin par 'gyur ro de bas na bral ba'i gnas skabs su yang ldan pa'i blo ni ci ste 'byung bar mi 'gyur/de bzhin du ldan pa'i ngo bo gang yin pa de nyid bral ba'i ngo bo yang yin zhes bya ba ni ldan pa'i gnas skabs su yang bral ba'i blo ci ste 'byung bar mi 'gyur/mi gnas pa gang yin pa gnas pa yang yin pas na zhes bya ba ni gzhi la mi gnas pa'i ngo bo gang yin pa de nyid gnas pa yang yin pa dang / des na mi gnas pa'i gnas skabs su yang gnas pa'i blo ci ste 'byung bar mi 'gyur/ de ltar yang ma yin pa zhes bya ba ni bral ba la yang ldan pa'i blo med la/ldan pa la yang bral ba'i blo med/ mi gnas pa la yang mi gnas pa'i blo med/ mi 'gro ba la yang 'gro ba'i blo med pa de bas na sbyor ba dang / bral ba'i las ni sbyor ba la sogs pa'i blo'i rgyu mtshan yin no zhe na zhes bya ba de ni go sla'o//pha rol po'i bsam pa ni 'di yin te/ ci ste blo de dag gi rgyu mtshan rdzas yin na de'i tshe rdzas ni dus thams cad du ngo bo gcig pa yin na ci'i phyir dus thams cad du sbyor ba la sogs pa'i blo mi 'byung / 'dir grub pa'i mtha' smra ba dag gis de mi rung ste/ dri ba mtshungs pa'i phyir ro zhes bya ba bshad de/de bstan par khyed kyi'ang ngo bo 'dri ba yin na bral ba la sogs pa las sbyor ba la sogs pa yang ci ste mi 'du zhes bya ba ni 'brel pa can gnyis rnam pa ji lta bu'i tshul gyis ldan pa'i ngo bo yin pa de bzhin du bral ba'i rnam pa yang de nyid yin na bral ba'i gnas skabs der khyod kyis sbyor ba 'du ba yod do zhes ci'i phyir khas mi blang /de bzhin du ldan pa'i gnas skabs la bral bar gyur pa yod do zhes ci'i phyir mi 'dod/ de bzhin du gnas pa la sogs pa yang brjod par bya'o/ /de skyed par byed pa'i las med pa'i phyir sbyor ba ni bral ba ma yin no zhe na zhes bya ba ni/ci ste pha rol po dag bral ba'i gnas skabs na sbyor ba skyed par byed pa'i las med do/ /de bzhin du ldan pa'i gnas skabs na bral ba skyed par byed pa'i las med do/ de bas na gnas skabs de gnyis na sbyor ba dang bral ba med do//'dir grub pa'i mtha' smra ba rnams kyis de lta na las kyang ci ste med ces smos pa ni 'brel pa can ngo bo 'dra ba yin na de lta na las kyang ci'i phyir yod par mi 'gyur/ 'on te las byed pa med pa'i phyir las med do zhe na/ de'i phyir de byed pa yang zhes bya ba smos te/ ji ste khyad par med pa'i ngo bo'i dngos po yin na las byed pa yang ci'i phyir yod par mi 'gyur/ 'on te las byed pa la rgyu med do zhes zer na/ de yang ji ste med ces 'dir yang de nyid kyis lan glan no/ /de bas na lan de nyid yin pa'i phyir lan gdab dka'o/ /de bas na khyed nyid kyis kyang sngar bral ba la sogs pa'i ngo bor mi rung ba phyis sbyor ba la sogs pa'i gnas rung bar dngos por de 'gyur te zhes bya ba ni ji ltar gyur kyang mi phan te/sngar sbyor ba la sogs pa'i gzhir rung ba'i rdzas kyi ngo bo de de'i 'og tu phyis kyang de'i gnas su rung bar 'gyur ro zhes khyed nyid kyis de skad brjod par bya dgos so//ci'i phyir zhe na zhes bya ba ni snga ma bzhin du gtan tshigs 'dri ba'o/ /ji ltar sbyor ba la sogs pa dang ldan par rung ba'i dngos po rtag na ni zhes bya ba ni ci ste yang 'brel pa can ni dus thams cad du sbyor ba la sogs pa'i gzhir rung ba'i ngo bor 'dug ces bya ba'i don to//de dang bral ba 'gal phyir te/ /zhes bya ba 'di'i bshad pa ni sbyor ba la sogs pa dang ldan pa ni 'brel pa 'gal lo zhes bya ba yin te/ de ni rtogs par sla'o/ /nged kyis kyang sbyor ba la sogs pa dang bral ba yin no zhes de skad brjod par bya'o zhes bya ba ni sbyor ba la sogs pa dang bral bar de thams cad nged kyis kyang brjod par bya ste/nged la yang 'brel pa can gnyis so sor 'brel pa na gang gis ldan pa'i blor 'gyur ba'i ldan pa'i blo skyed par rung ba nyid med do/ /rung ba med par yang de'i rgyu med de zhes bya ba la sogs pa'o/ / de bzhin du bral ba'i blo la sogs pa yang brjod par bya'o/ /rung ba'i tshig brjod pa na don gyi ngo bo 'di la nges par brjod ces bya ba ni de bas na rung ba'i tshig gis dngos po'i don gyi ngo bo nyid la brjod par bya'i de las ma gtogs par rung bar khas blang bar mi bya'o/ /gang gis brjod ce na/bral dang ldan dang 'gro rnams kyis/ /zhes bya ba 'di'i bshad pa ni sbyor ba dang bral ba'i las kyi tshig gis zhes bya ba yin te/ gang gi sbyor ba la sogs pa'i sgras brjod par rung ba ni dngos po 'di nyid yin par ston pa de'i tshe don med par 'gro ba la sogs pa gzhan brtags pas ci zhig bya ste zhes bya ba ni 'gro ba las la sogs pa don med pa brtags te dgos pa ci yod/cung zad kyang mi dgos so zhes bya ba ni spong bar byed pa'o/ /sogs pa'i nang du sbyor ba dang / bral ba dang / gzhan dang / gzhan ma yin pa la sogs pa ste zhes bya ba ni de dag brtags pa yang dgos pa ci yang med do//ci'i phyir zhe na zhes bya ba ni snga ma bzhin du gtan tshigs 'dri ba'o/ /gang gi phyir de dag rnams la zhes bya ba 'di'i bshad pa ni 'gro ba la sogs pa la zhes bya ba de yin no/ /yod na yang zhes bya ba ni 'di'i bshad pa ni brtags te zhes bya ba de yin no//'di'i zhes 'brel pa mi 'grub pa'i phyir te zhes bya ba 'di'i bshad pa ni 'og nas gzhan gyi dbang can zhes bya ba la sogs pa 'brel pa rnam pa thams cad du bkag pas na 'di'i las dang / sbyor ba dang / bral ba zhes bya ba'i 'brel pa mi 'grub pa'i phyir de'i rgyu mtshan can gyi brjod pa ga la yod ces bya ba yin te/gang gi tshe gzhan gyi dbang can la sogs pa rnam pa thams cad du bkag pa de'i tshe dngos po 'di'i las 'di'o/ /sbyor ba 'di'o/ /bral ba 'di'o zhes 'brel ba gang gis brjod par byed/'brel pa med na yang 'di 'di'o zhes bya ba la sogs pa 'brel pa'i rgyu can gyi tshig ji ltar 'byung bar 'gyur/ ji ltar gzhan du rtogs pa'i las la sogs pa ni de gzhan dang 'brel pa ma yin te/ ma 'brel pa'i phyir ro/ /mngon par 'dod pa yang de bzhin no zhes bya ba ni ji ltar lha sbyin gyi yin par rtogs pa'i las la sogs pa ni 'brel ba med pa'i phyir mchod sbyin dang 'brel pa can ma yin no//de bzhin du rang gi yin par rtogs pa'i las la sogs pa yang 'brel pa med par 'dra bas na de yang de bzhin du 'brel par mi 'gyur ro//gang gi phyir de ltar las la sogs pa dang 'brel pa'i phyir 'gro ba la sogs pa ma yin pa de bas na rgyun mi 'chad par skye ba'i gzhi rkyen gzhan dang gzhan gyis skad cig ma so sor skye ba'i dngos po rnams ni dngos po tha dad 'di yin rigs te/ de dang ldan pa dang bral ba dang / 'gro ba la sogs par rigs kyi zhes bya ba ni gang gi phyir ji skad du smos pa'i tshul gyis 'gro ba dang / sbyor ba dang / bral ba la sogs pa'i tshig la sogs pa'i rgyu mtshan can ma yin pa de bas na skad cig ma'i dngos po rnams rgyun mi 'chad par skye ba'i rgyu mtshan gzhan dang gzhan gyi rgyu rnams kyis dngos po tha dad par byed pa 'di ni 'di lta ste/ldan pa dang / bral ba dang / 'gro ba zhes bya ba'i rigs so/ /de ltar na gang gi tshe so sor bral bar 'dug pa rnams sdud pa'i rkyen gyis rgyun ma chad par skyed pa de'i tshe ldan pa'i blo dang / ldan pa'i tshig ni dngos po bar med par skyes pa'i rgyu mtshan can yin no//de bzhin du gang gi tshe bar med par 'dug pa rnams bral bar byed pa'i rkyen rnams kyis bral ba bskyed pa de'i tshe bral ba'i blo dang bral ba'i tshig ni dngos po bral bar 'byung ba'i rgyu mtshan du 'gyur ro/ /de bzhin du gnas par gyur pa rnams gang gi tshe yul tha dad par gnas pa'i rgyu mtshan rnams kyis rgyun mi 'chad par bskyod pa de'i tshe 'gro ba'i blo dang 'gro ba'i tshig ni dngos po rgyun mi 'chad par 'byung ba'i rgyu mtshan can yin no//de bzhin du gzhan la yang ci rigs par brjod par bya'o/ /bstan pa gcig pu'i ngo bo ni sbyor ba la sogs pa'i 'brel pa ma yin pas zhes bya ba ni skad cig ma yin pa'i dngos po rnams ni ldan pa la sogs pa'i blo'i rgyu mtshan nyid ma yin la/skad cig ma'am/ skad cig pa ma yin pa sbyor ba la sogs pa'i dngos po rgyu mtshan can yang ldan pa la sogs pa'i blo dang tshig ma yin no/ /de bas na sbyor ba la sogs pa'i mtshan nyid kyi 'brel pa yang dag par gang yang med do zhes bya ba ni de bas na don dam par sbyor ba la sogs pa'i mtshan nyid kyi 'brel pa gang yang med do zhes bya'o//de bas na dngos po thams cad kyi rang bzhin ni 'brel pa med de zhes bya ba ni gang gi phyir de ltar dpyad na 'brel ba gang yang yod pa ma yin pa de bas na dngos po thams cad ni rang gi ngo bo 'brel pa dang bral ba yin te/don dam par gang gis 'brel pa gang yang med do zhes bya ba ni mjug sdud pa'o/ /'brel pa dpyad pa'i bshad pa rnam phye bas/ /dge ba rgya chen thob pa gang yin des/ /'khor ba'i 'brel pa'i mi mthun phyogs gyur pa//bla med zhi ba sems can gyis thob shog /'brel pa brtag pa'i rgya cher bshad pa/ slob dpon dul pa'i lhas mdzad pa rdzogs so// //rgya gar gyi mkhan po dz+nyA na gar+b+ha dang lo tsA ba ban+de nam mkhas bsgyur ba'o// //