CLOSE WINDOW

D4235
བོད་ཡིག

@##/ /rgya gar skad du/ he tu bin+du bi ba ra Na/ bod skad du/ gtan tshigs thigs pa'i 'grel pa/ bcom ldan 'das rdo rje 'chang ba la phyag 'tshal lo/ /skye bo'i tshogs kyi nyon mongs skyob pa'i phyir na thugs rje chen po yang dag bskyed pa can/ /bsod nams ye shes bdag nyid rab tu bsags pa rgya che ba yi rgyu dag ngal ba rnam par bsal//shes bya ma lus rab 'byams dri ma med pa'i shes rab 'char ba'i ri bo la brten nas/ /'jig rten snying gi mun pa 'joms mdzad rgyal ba nyi ma gang yin de la spyi bos phyag 'tshal lo/ /chos kyi grags pa'i rnams la ni/ / dpyad zin kyang ni dpyad pa mdzes/ /rgun ni btsir ba gyur kyang ni/ /mngar ba cis na 'dor 'gyur ram/ /'gro rnams phyogs gcig gang gi blo/ /rigs lam gnas nas gzhal gyur na/ /rgyal gyur de gsung zab mo gang / /bdag blo blun pos ga la yin/ /de lta na yang bdag las kyang / / gang dag kha cig blo dman pa/ /yod pa rnams la bdag gis ni/ /gtan tshigs thigs par rnam par dbye/ /kha cig ni don lkog tu gyur pa la sogs pa rab tu byed pa rtsom pa'i dgos pa gsungs pa de yang nyan pa'i skye bo 'jug pa'i don yin no zhes bya ba de la/ /bstan bcos thams cad nyid dam ni//yang na bya ba 'ga' zhig la/ /ji srid dgos pa ma brjod par/ /de srid gang gis gzung bar bya/ /zhe na/ de ni mi rigs te/ gang gis rab tu byed pa 'di'i dgos pa 'di yin no zhes brjod pas dgos pa'i khyad par dag gi rab tu byed pa ni thabs su nges pa yin te/ thabs ma yin pa la mi 'jug pa'i phyir de don du gnyer ba'i rtog pa dang ldan pas rab tu byed pa mnyam pa la sogs pa 'jug par 'gyur ro zhes rjod par byed pa don dang ldan par smra ba de skad ston pa de ni mi rigs te/gang gi phyir rtog pa dang ldan pa rnams kyis dgos pa don du gnyer ba rnams ni de'i thabs nges pa de yod pa las yin te/dper na zhing rmo ba la sogs pa rnams lo thog la sogs pa'i thabs sa bon la sogs pa sa bon ma yin pa las dben pa'i sa bon la sogs pa nges par 'gyur ba bzhin no/ /gzhan du na thabs ma nges pa'i thabs las byung ba don du gnyer ba ni rtog pa dang ldan pa rnams spong bar 'gyur te/thabs las byung ba'am 'byung bar 'gyur ba la tshad ma'i bya ba mi srid pa'i phyir ro/ /ma nges su zin kyang 'brel pa ma tshang ba med pa'i thabs nges par rung ba 'di dag brjod par 'dod pa'i 'bras bu bsgrub par 'gyur ba srid pas rtog pa dang ldan pa 'jug par 'gyur bas des na yongs su mi spong ngo //nges pa yang tshad ma kho nas yin na dgos pa'i ngag la tshad ma med de/ sgra rnams dang phyi rol gyi don la 'brel ba med pa'i phyir ro/ /brjod par 'dod pa'i tshad ma de la yang ji lta ba'i dngos po la 'jug pa'i nges pa med pa'i phyir des na rab tu byed pa'i dgos pa khyad par gyi thabs la nges pa med do//gang gis ji ltar don gang brjod par 'dod pa de ji lta bar des rjes su mi sgrub po/ /gzhan bsams nas gzhan du brjod pas 'jug pa na slu ba mthong ba'i phyir 'jig rten pa thams cad la yid brtan du med pas so/ / gal te dgos pa'i khyad par nye bar dgod pa de'i thabs su gyur pa'i rab tu byed pa'i yul la the tshom skye ba de'i phyir de ni zhing rmo ba la sogs pa nyid las sa bon dang sa bon ma yin par nges pas 'jug par brjod do zhe na/ ma yin te/ dgos pa'i khyad par gyi thabs la the tshom skye ba ni de brjod pa las sngar yong pas sgrub par byed pa dang /gnod par byed pa'i tshad ma med pa de ni rigs pa'i stobs las 'ongs pa'i phyir ro/ /rjes su dpag pa de'i dgos pa la sogs pa bstan pa'i phyir rab tu byed pa rnams mthong bas ci 'di rjes su dpag pa bstan pa'i dgos pa'am/ gzhan cung zad cig yin zhes de lta bu'i dngos po'i the tshom sngar 'jug pa na gang gis bsal bar nus/gzhan yang ci 'di dgos pa med pa'am/ yang na kho bo cag mngon par 'dod pa'i dgos pa dang ldan pa yin no zhes shes par 'dod pa 'jug pa srid pas dgos pa'i ngag nye bar dgod pa don med do/ / de'i phyir gang dgos pa spangs pa'i ngag gam de'i don la rtog pa dang ldan pa rtsom pa byed pa'am ston par mi 'gyur te/ dper na se'u bcu pa zhes bya ba la sogs pa'i ngag dang / bya rog gi so rtog pa bzhin no/ /'di 'am 'di'i don kyang dgos pa med pas zhes bya ba ni khyad par byed pa mi dmigs pas rgol ba na/de ma grub par brjod pa'i phyir thog mar dgos pa'i ngag nye bar bkod do/ /de la de bstan pa'i phyir zhes bya ba'i tshig gi bdag nyid 'dis ni rab tu byed pa'i dgos pa gsungs te/ ji ltar ngag gis brjod par bya ba rtogs pa ni ngag gi dgos pa yin te/ de yang 'di la yod de tshig gi nang tshan rnams dang ngag phan tshun du 'brel pa las bsdus pa'i don rtogs so//de lta na rab tu byed pa 'dir rjes su dpag pa bstan to zhes bya ba de ni brjod par bya ba yin te/ de'i sgra ni de nyid dang 'brel pa'i phyir ro/ /gal te lkog tu gyur pa'i don rtogs pa'i zhar la rjes su dpag pa byung ba de lta na yang smra ba po'i bsam pa dang rjes su 'brel pa'i sgra 'jug pas de'i sgra rab tu sbyar gyi/gzhan du na gtso bo la sbyar bar yang ji ltar 'gyur/ sgra rnams kyi rang gi ngo bo ni don dang 'brel pa med pa'i phyir dang phyogs kyi chos zhes bya ba la sogs pas rjes su dpag pa bstan pa'i phyir ro//rang gi ngo bo phyin ci ma log par rtogs pa de bstan pa ni rab tu byed pa'i dgos pa yin te/ de bsgrub par bya ba'i phyir ro/ /de nyid kyi phyir rjes su dpag pa bstan pa'i yul ni rab tu byed pa'i bya ba yin pa bstan te/ de bstan pa'i phyir zhes bya ba Ni tsa'i rkyen gyis bstan te/ des kyang rab tu byed pa dag gi dgos pa ni bsgrub par bya ba dang / sgrub par byed pa'i mtshan nyid 'brel par bstan pa yin no/ /gal te sgra 'jug pa'i yul bstan pas rab tu byed pa'i bya ba gtso bo yin par bstan pa de lta na yang dngos po'i 'jug pa kho na gtso bo yin par bstan te/ de ni de'i bsgrub par bya ba yin pa'i phyir ro/ /cig shos kyi thabs de ni dor bar bya ba yin te gtso bo ma yin pa'i phyir ro/ /de'i phyir rjes su dpag pa bstan pa kho na dgos par rtogs pas rab tu byed pa'i bya ba ni ma yin no zhes bya'o/ /don lkog tu gyur pa rtogs pa ni rjes su dpag pa la brten pa'i phyir zhes bya ba la sogs pa 'dis ni rab tu byed pa'i don rjes su dpag pa'i mtshan nyid kyi dgos pa gsungs so//ngag rang gi don rtogs pa'i mtshan nyid kyi dgos pa nyid la rtog pa dang ldan pa 'jug par mi 'gyur ro/ /'on kyang de'i brjod par bya ba'i don skyes bu la nye bar mkho ba yin te/de yang de la yod de/ gang gi phyir lkog tu gyur pa'i don rtogs pa gang yin pa de ni nges pa'o// /rjes su dpag pa'i tshul gsum pa'i rtags de rgyu la 'bras bu nye bar btags pa'i phyir thabs gzhan ma yin pa bsgrub par bya ba de bstan pas gzhan gyi 'dod pa bsal ba'i phyir ro//rten ni rgyu'o/ /rjes su dpag pa'i rten gang yin pa zhes bya ba thun mong du rnam par sbyor ro/ /des na rjes su dpag pa rten yin pas zhes bya ba bye brag gang gi yin zhes bya ba rtogs pa na gal te yang don lkog tu gyur pa rtogs pa ni sgra'i 'brel pa mo rtags su go ba de lta na yang de tshig gi sbyor ba'i dus su nye ba ma yin pas phyi rol du gyur pa'i phyir mo rtags kyi rgyu mtshan ma yin te/dper na 'di bram ze mor bden no zhes pa dang / snod 'di 'bru bzhag pa zhes bya ba bzhin no/ /'dis kyang don lkog tu gyur pa rtogs pa thams cad tshad mar gyur pa las yin gyi gzhan gyis de rtogs so//mi rigs pa'i phyir tshul gsum pa'i rtags la brten pa kho na bshad pa yin te/ rjes su dpag pa nyid la brten pa'i phyir zhes nges par gzung ba'i phyir ro/ /des kyang sgra la sogs pa rnams yin na ni rjes su dpag pa'i tshad ma ma yin te/ gzhan du na de rnams kyang bstan par thal bar 'gyur te rgyu mtshan mtshungs pa'i phyir ro//de lta na lkog tu gyur pa'i don thams cad rtogs pa ni tshad ma'i bdag nyid las yin gyi rang dgas ni ma yin no/ /de rang gi don dang 'brel pa med pas nges pa na de mi slu bar rigs pa ma yin pa'i phyir dang / tshad ma ni mi slu ba mtshan nyid yin pa'i phyir ro//gzhan yang 'brel pa med pa las ma yin pa'i phyir de thams cad las thams cad rtogs par thal bar 'gyur ro/ /chos can dang ma 'brel du zin kyang thams cad la rtogs pa skye ste nye ba la bskal ba med pa'i phyir ro/ /de ltar gyur pa tshul gsum pa'i rtags kho na las yin pa'i phyir lkog tu gyur pa'i don thams cad rtogs pa ni tshul gsum pa'i rtags las skyes pa nyid rjes su dpag pa las tha dad pa ni ma yin no zhes bya'o//don 'di yang phyogs chos de chas khyab pa ni/ gtan tshigs su'i zhe na/ lkog tu gyur pa'i don rtogs pa yin no zhes rang bzhin 'brel ba bshad do//phyogs kyi chos nyid dang de'i chas khyab pa nyid lkog tu gyur ba'i don rtogs pa'i gtan tshigs so zhes nges par gzung ba'i phyir ro/ /don smos pa ni lkog tu gyur pa'i don rtogs so zhes bya ba rjes su dpag pa yang rang gi mtshan nyid kyi yul can gyi tshad mar bstan te/don byed par nus pa ni don yin te/ rang gi mtshan nyid kho na'i bdag nyid do/ /de nyid kyi phyir dngos po la brten nas tshad ma rnam par gzhag pa ni yin no zhes 'chad par 'gyur ro/ /gzhan du na don byed pa don du gnyer ba rjes su dpag pa las 'jug par mi 'gyur ro/ /spyi'i dngos po yang shes pa tsam gyi mtshan nyid yin pa'i phyir/de'i don byed pa yin te/ de yang de las skye ba kho nar grub pa'i phyir ro/ /rigs ni btso bo dang bsreg pa la sogs pa la nye bar mkho ba med de/ /rang gi mtshan nyid kho na de la nye bar mkho ba'i phyir ro/ /gal te de dang 'brel bar de la 'jug par 'gyur ro zhe na/ma yin te rtag pa la phan gdags par bya ba 'ga' zhig dang 'brel pa med pa'i phyir ro/ /'brel pa yod du zin kyang / ji ltar gzhan rtogs pa na gzhan la 'jug pa yin na ha cang thal bar 'gyur ro/ /gal te 'du ba na phye ba nyid kyis tha dad par mi nges pas de nges pa la 'khrul pas de la 'jug par 'gyur ro zhe na/de lta na 'on te 'khrul pa kho na yin pa bla'i bar du lhag pa'i spyis ci zhig bya/ gal te 'khrul pa las sa bon med pa mi rigs pa'i phyir ro zhe na/ de kho na gsal bas 'bras bu gcig pa de cis na sa bon ma yin/ kha dog dang dbyibs kyi rnam pa mtshungs pa las spyir shes pa yin no//spyi yang de'i ngo bo ma yin te/ /de ji ltar 'khrul pa'i sa bon yin/ gzhan dag ni 'dra ba'i rgyu mtshan las 'khrul par 'dod pa de spyi shes pa ni gsal ba kho na rigs mi mthun pa las ldog pa rnam pa 'dra ba de dang / de kho na 'khrul pa'i rgyu mtshan yin te/ de ma yin pa las ldog pa de'i rang bzhin yin pa'i phyir spyi dngos por gyur pa dang 'brel pa med pas de rnams la yod par mi rung ba'i phyir ro//gang yang gsal ba'i bdag nyid kho na la spyir btags te/ /de rang gi mtshan nyid kyi yul can gyi rjes su dpag par khas blangs par 'gyur ro/ /rang gi mtshan nyid kyi spyi yin na rjes su dpag pa la ji ltar so sor snang ba yin zhes bsam par bya ste/gsal ba'i dngos po spyi las gzhan pa'i ngo bo'i spyi mi 'dod pas bye brag pa'i lta ba khas len par thal bar 'gyur ro/ /de la yang sngar bshad pa'i skyon gyis lkog tu gyur pa rang gi ngo bos rtogs par mi nus pas rtags la brten pas mngon sum las rjes su dpag pa logs shig tu bshad de/de nyid kyang rang gi mtshan nyid de ma yin pa las ldog pa la spyi'i mtshan nyid du bshad zin to/ /'dis mtshon par byed pas na mtshan nyid ni zhes spyi'i mtshan nyid du byas pa des na rjes su dpag pa'i mtshan nyid yul yin pa la 'gal ba med pa'i phyir rgya cher mi bshad do//mdor bsdus nas zhes bya ba ni zlos par dogs pa bsal ba yin te/ rgya cher ni rnam 'grel la sogs par bshad pa'i phyir ro/ /rtags kyi mtshan nyid rjes su dpag pa bstan pa ni/ rang gi ngo bo dang / rab tu dbye ba dang / tshad ma dang / de nges pa'o/ /de la phyogs chos de'i chas khyab pa ni/ gtan tshigs zhes bya bas ni rang gi ngo bo bstan to/ /de ni rnam gsum nyid ces bya bas rab tu dbye ba'o/ /med na mi 'byung zhes bya ba la sogs pas ni rab tu dbye ba nges par byed pa'i tshad ma nye bar bkod do//rnam gsum gyi rab tu dbye ba yang rtags gsum po rnams kyi ngo bo dang re re'i ngo bo nges par byed pa'i tshad ma 'jug pa bshad par bya'o/ /de la phyogs kyi chos ni phyogs kyi cha'i chos kyis khyab pa med na mi 'byung ba yin no zhes mtshan nyid bstan to/ /gtan tshigs zhes bya bas ni mtshan gzhi bstan to//gtan tshigs de ni rnam gsum nyid/ /ces bya bas dbye ba brjod do/ /'on te gtan tshigs gzhan med par nges par gyur na rnam pa gsum kho na zhes bya ba rigs kyi 'gran zla med par nges pas yod pa rnams la nges par gzung ba dang bcas par gtan la dbab po/ /de smras pa/ gang phyir 'di kho na yin zhes//'di yod par ni gtan la 'bebs/ /dngos gzhan med par rigs pa ci/ /rjes 'gro med na 'di ma yin/ /zhe'o/ gtan tshigs med par ni mngon sum gyis mi rtogs te/ /de yul med pa dang 'gal ba'i phyir ro/ /de lta na dngos po med pa ni dngos po'i bdag nyid kyi cha'i med pa'i mtshan nyid yin na de'i dbang po dang nye ba med pa'i phyir mngon sum gyi yul yin par 'gal lo//gang yang / re zhig dbang pos 'di med ces/ /blo ni skyed par byed pa yin/ /dngos po'i cha dang 'brel nyid kyi/ /dbang po rung ba yin phyir ro/ /zhes bya ba smos so/ yang na nus pa thams cad kyis stong pa'i mtshan nyid de yang don gyi nus pa la ltos pa'i mngon sum gyi yul du 'gal ba'i phyir ro//rjes su dpag pas kyang gtan tshigs gzhan med pa mi rtogs te/ /de ni rtags rnam pa gsum la brten pa kho nar bshad pas so/ /rnam gsum nyid ces bya ba da ni bshad par bya ste//de la 'bras bu dang rang bzhin dag ni sgrub pa sgrub par byed pa'i phyir dgag pa mi byed la mi dmigs pa las kyang gtan tshigs gzhan med par nges pa ma yin no/ /gang gi phyir de ni rnam pa bzhir gnas te/ /rang bzhin dang 'bras bu dang khyab par byed pa mi dmigs pa dang 'gal ba dmigs pa sgrub pa ste de la mtshungs par rung ba'i ngo bo shes pa gcig la 'dre ba rang bzhin mi dmigs pa ni gzhan gyi ngo bo mi dmigs pas med pa'i tha snyad kyi gtan tshigs su 'dod pa dang /gtan tshigs gzhan gtan med par khas blangs pas rjes su bstan pa'i ngo bo ma yin no/ /gal te zhig na yul la sogs pa kho na la 'gog na ni 'dir 'gyur gyi gtan med pa ni ma yin te/rgyu dang khyab par byed pa mi dmigs pa dag kyang 'bras bu khyab par bya ba med pa'i gtan tshigs kyi dngos po yin na gtan tshigs gzhan ni gtan med par khas blangs pa la rnam pa 'di lta bu mi srid do/ /de ji ltar de dag gis de med par go bar 'gyur/'gal ba yang rgyu ma tshang ba med par 'byung ba gzhan yod na med par go bar bya ba yin pa'i phyir 'gal ba dmigs pa yang mi srid do/ /srid pa yang 'bras bu mi dmigs pa la sogs pa rnams ji ltar gtan 'gog par byed pa yin zhes dogs pa la/ gtan tshigs ltar snang de las gzhan//ces bya ba smos te/ des na gang gi phyir gtan tshigs rnam pa gsum las gzhan pa'i gtan tshigs ltar snang ba yin pa de'i phyir/ de ni rnam gsum nyid ces de ltar dgongs so/ /'dir ni gang dang gang nges pa de dang de las bzlog pa la mi mthun pa'i phyogs kyis khyab pa de'i nges pa grub pa yin te/dper na gang yod pa de skad cig ma kho na'o zhes pas yod pa skad cig ma rnams la nges par brjod pas yod pa las bzlog pa med pas skad cig ma'i mi mthun pa'i phyogs skad cig ma ma yin pa la khyab pa grub pa de bzhin du 'dir yang gtan tshigs rnam pa gsum du nges pas gtan tshigs las bzlog pa'i gtan tshigs ltar snang ba la grangs gsum las phyi rol du gyur pa'i don gyis khyab pas grangs gsum kho nar nges pa yin no//des na gtan tshigs rnam pa gsum po las tha dad pa'i don rnams kyis gtan tshigs ltar snang ba bstan to//des na rang bzhin 'gal ba dmigs pa dang 'bras bu dang rang bzhin dang mi dmigs pa las tha dad pa'i don rnams ni gtan tshigs ma yin par nges pa'i phyir ro/ /gtan tshigs dang der snang ba dag phan tshun spangs te gnas pa'i mtshan nyid de nyid gtan tshigs su rtog pa'i dus kho nar 'gal bar rtogs te/de'i bdag nyid du de nges par snang ba'i shes pa nyid de las bzlog pa gzhan pa de snang bar rtogs pa ni phan tshun gcig la gcig med par nges pa'i phyir ro/ /de la gtan tshigs rnam pa gsum las bzlog pa'i don rnams la gtan tshigs ltar snang ba nye bar dmigs pas rang nyid dang 'gal ba'i gtan tshigs gsal ba de yang gtan tshigs gsum las phyi rol du gyur pa'i don ni gtan med par khas ma blangs so//'on kyang de rnams la gtan tshigs dgag pa ni gtan tshigs su rmongs pa 'ba' zhig gis gzhan la grags pa de nyid de la sgro 'dogs pa'am the tshom za ba de 'gal ba dmigs pas bsal to//gtan med na ji ltar 'gal ba yin zhes de ji ste brjod/ lhan cig mi gnas pa'i mtshan nyid kyi 'gal ba med na gang gis na de'i rigs pas thams cad la nye bar brjod dam/ gang dang gang 'gog pa de dang de la 'gal bar rtogs pa ma yin na gang gis ji ltar med pa 'ga' zhig dang 'gal bar rtogs zhes rtsod pa yin te/'di na grang ba'i reg pa med de me yod do zhes bya ba bsgrub par bya ba'i chos can kho na la grang ba'i reg pa dang me 'gal bar mi 'byung la/ ji ltar rtogs pa nyid 'di gzhan la 'gal bar rtogs pa'i mes bsgrub par bya ba'i chos can la 'gog pa de bzhin du gtan tshigs ltar snang ba nye bar dmigs pas gtan tshigs rnam pa gsum las phyi rol du gyur pa'i don rnams la bkag pa yin na/thams cad la gtan med pa yang mtshan nyid kyi 'gal bar rtogs te/ dper na skad cig ma bzhin du skad cig ma ma yin pa de ni dngos po 'ga' zhig la yang mi srid pa'i phyir ro//de bzhin du yod pa dang med pa yang ngo / /nus pa thams cad dang bral ba'i mtshan nyid yin pa'i phyir blo gros ngan pa'i 'dod pa de rnams la shin tu grub pas chog go/ /gtan tshigs rnam pa gsum kho nar nges pas de las bzlog pa la de'i mi mthun pa'i phyogs kyis khyab par gyur pa 'di gnas pa yin te//de la nges par gyur pa yin no zhes dgos pa dang ldan pas bzlog pa la khyab pa bstan pa'i phyir gtan tshigs ltar snang de las gzhan zhes bya ba 'di gsungs so/ /de ltar gyur na de ni skad cig ma'i mi mthun pa'i phyogs la yod pa las bzlog pas khyab pa la gnod par byed pa'i tshad mas nges kyi//'dir ni gsum gyi grangs las phyi rol du gyur pa'i don rnams la gtan tshigs ltar snang bas khyab pa la tshad mas gang zhig gis nges she na/ /med na mi 'byung nges phyir ro/ /zhes bya ba gsungs so//gtan tshigs rnam pa gsum las tha dad pa'i rtags khas len pa'am/ /the tshom za ba nyid la dngos po la phyogs kyi chos nyid yod du zin kyang med na mi 'byung ba med do zhes bya ba'i don to/ /de ltar yang 'chad par 'gyur te de ni gtan tshigs rnam pa gsum las gzhan yod pa ma yin no zhes nges par brjod pa'i phyir ro//med na mi 'byung ba ma tshang na gtan tshigs ltar snang ba ma grub pa dang 'gal ba dang ma nges pa chos mtshungs pas khyab pa'i gzhal bya nyid la sogs par nges pa bzhin du gtan tshigs ltar snang ba ni bsgrub par bya'o/ /med na mi 'byung ba ma tshang las zhes bya bas rang bzhin gyi gtan tshigs so//med na mi 'byung ba ma tshang ba yang gtan tshigs rnam pa gsum la tha dad pa yin pa'i phyir de las gzhan pa'i don rnams khyab par byed pa mi dmigs pas de grub pa yin te/ /de ltar de'i bdag nyid dang de las byung ba dag gis med na mi 'byung ba la khyab bo/ /de dag de la gdon mi za bar yod la de yang de dag kho na la yod de de'i rang bzhin ma yin pa dang de las byung ba ma yin pa ni de la rag las pa med pas de la mi 'khrul par nges pa med pa'i phyir ro//rgyu dang 'bras bu'i dngos po'am/ /rang bzhin nges par byed pa las/ /med na mi 'byung nges pa ste//ma mthong las min mthong las min/ /gzhan du gzhan ni gzhan dag dang / /nges par yod pa'i nges pa gang / /don gzhan rgyu mtshan can gyi chos/ /yin na gos la tshon bzhin no/ /zhes gsungs so/ /gzugs la sogs pa yang ro la sogs pa med na mi 'byung ba rang gi ngo bo ni ma yin la 'on kyang rang gi rgyu la mi 'khrul ba'i sgo nas de'i rgyu las byung ba kho na med na mi 'gyur ba'i rgyu mtshan yin no zhes bya'i//gzhan du na de'i bdag nyid ma yin pa dang / /de la rag las pa'am rgyu la rag las pa de med na mi 'byung bar brtags na ni thams cad kyis thams cad kyi don me med na mi 'byung bar 'gyur te/khyad par med pa'i phyir ro/ /gal te don gcig tu 'du ba'i rgyu mtshan gzugs dang ro la sogs pa med na mi 'byung ba yin no zhe na/ 'on te 'du ba yang brten pa dang rten du gyur par nye bar brjod de/ de yang rten dang brten pa'i dngos po'i bdag nyid yin na phan 'dogs pa med par ha cang thal bar 'gyur bas mi 'grub po//tshogs pa gcig la rag las pa kho na la don gcig tu 'du ba yin te/ ji ltar 'du ba'am gzhan pa'i 'brel pa mi srid pa de ltar 'brel ba brtag par bstan bcos mdzad pas rgyas par bstan pas de nyid du nges par bya'o/ /gal te des de rgyu'am bskyed par bya ba dang /skyed par byed pa'i dngos po'am de'i bdag nyid du zin kyang des na mi 'byung ba las gzhan ma yin no zhes 'dir dngos po'i rang bzhin gyi lan brjod de/ gang 'di ltar gyur pa ni kho bo 'ba' zhig gis ma yin gyi khyod kyis kyang mthong ngo zhe na/ de lta na glo bur bde dngos po rnams kyi rang bzhin yin no zhes bya bar 'ga' zhig mi 'gyur ba ma yin na/gtan tshigs yul dang dus dang rdzas nges par mi rung ngo / /de cung zad gcig la lar 'jig pa'am ma yin pa dang gang gang la cung zad cig rag las pa'am rag las pa med pa de lta ma yin na khyad par med pa'i phyir 'dod pa'i yul dang dus rdzas bzhin du yul la sogs pa gzhan na yod pa la gang gis na bsal bar nus/de'i phyir gang gang zhig las med kyang 'byung bar mthong ba de dang de ni 'khrul pa'i rgyu yin pa de kho na nyid sems pas 'di brjod kyi/ rkang pa brkyang ba'i dmigs pa ni ma yin no/ /de yang mi 'khrul pa'i rgyu ji ltar bshad pa las gzhan du rjes su sbyor na ni de ma tshang bas gtan tshigs kyi mtshan nyid la brten pa ma yin no snyam nas//de skad du yang / ldan pa la sogs gang rnams la/ /'brel pa de 'dra yod min na/ /de ni gtan tshigs min zhes bshad/ /'khrul pa srid pa nyid kyi phyir/ /zhes gsungs so//'dir sbyor ba ni gang dang gang de'i bdag nyid dang de las byung ba med pa de dang de ni med na mi 'byung ba ma yin te/ dper na gzhal bya la sogs pas mi rtag pa bzhin no/ /rang bzhin dang 'bras bu dang mi dmigs pa las tha dad pa'i don de rnams kyang 'ga' zhig tu de'i bdag nyid dang de las byung ba med pas zhes bya ba ni khyab par byed pa mi dmigs pa'o//rang bzhin mi dmigs pa ni rang bzhin gyi gtan tshigs kyi nang du 'dus pa'i phyir 'di ni de'i bdag nyid kyi mtshan nyid kyi 'brel pa kho na'o/ /khyab par byed pa dang / rgyu mi dmigs pa yang de'i bdag nyid dang de las byung ba'i mtshan nyid kyi 'brel pa kho nas khyab par bya ba dang 'bras bu ldog pa sgrub par byed do//de skad du yang / de'i phyir de tsam dang 'brel pa/ /ngo bo nyid kyis ngo bo nyid/ /ldog par 'gyur ba'am rgyu yis ni/ /'bras bu 'khrul pa med pa yin/ /zhes gsungs so/ /de ltar des gtan tshigs kyi mtshan nyid dang grangs nges pa dang /de'i 'thad pa zhes bya ba don rnam pa gsum tshigs su bcad pa 'dir rgyas par bshad do/ /yang na rnam gsum nyid ces bya ba ni phyogs kyi chos de rnam pa gsum ste/ rang bzhin dang / 'bras bu dang mi dmigs par bshad pa ni de'i chas khyab pa las gzhan ma yin te/de yang de'i chas khyab pa rnam pa gsum yin no zhes bya bar 'brel to/ /ci'i phyir zhe na/ med na mi 'byung bar nges pa'i phyir ro/ /med na mi 'byung ba la khyab pa'i phyogs kyi chos rnam pa gsum kho na dang / phyogs kyi chos nges pa rnam pa gsum ste/ med na mi 'byung bar nges pa'i phyogs kyi chos nges par rang bzhin dang 'bras bu dang mi dmigs pa'i bdag nyid phyogs kyi chos tha dad pa rnam pa gsum mo//de'i chas khyab pa ma yin pa ni gtan tshigs ma yin te 'bras bu dang / rang bzhin dang mi dmigs pa'i bdag nyid rnam pa gsum la phyogs chos de'i chas khyab pa kho na yin pa'i phyir de ni gtan tshigs med pa ma yin no zhes bshad zin to//de'i phyir gtan tshigs rnam pa gsum las phyi rol du gyur pa la med na mi 'byung ba med pa'i phyir gtan tshigs kyi tha snyad du byed pa gtan tshigs rnam pa gsum la med na mi 'byung ba gdon mi za bar yod pas de gtan tshigs ma yin par brjod pa bsal ba yin no//de lta na yang de ni gtan tshigs ltar snang ba yang mtshan nyid 'di brjod na/ de la slob ma rnams gtan tshigs kyi tha snyad ldog par 'gyur ro snyam nas/ gtan tshigs ltar snang de las gzhan/ zhes bya ba smos so//de bas na phyogs chos de'i chas khyab pa ni zhes bya ba gtan tshigs kyi mtshan nyid las gzhan pa de dag ni mtshan nyid ma tshang ba'o/ /gtan tshigs ltar snang ba go bar 'gyur ro snyam nas de'i mtshan nyid ma brjod do/ /'di ltar phyogs chos zhes brjod pas gang la phyogs chos med de gtan tshigs ma yin no//de'i chas khyab pa zhes bya ba brjod pas gang la de'i chas khyab pa dang bral ba'i khyab par bya ba dang khyab par byed pa phyin ci log pa'o/ /de la yod pa dang med pa de'i gtan tshigs kyi tshul ma tshang ba ni ma grub pa'am 'gal ba'am ma nges pa'i gtan tshigs ltar snang bar go bar bya'o//'di ltar mtshan nyid gang gi don gang yin slob ma la bstan pas de'i mtshan nyid dang bral ba la de'i tha dad rnam la rang nyid 'jug par mi 'gyur ro/ /de ma yin pa'i ngo bo yongs su spangs nas de'i ngo bo rtogs pa'i phyir de ni 'bad pa med pa'i 'bras bu dang ldan pa yin no/ / gzhan du gtan tshigs ltar snang ba bstan pa gang yin pa de blo dman pa'i dbang du byas pa'o/ /rab tu byed pa 'di ni blo rgya che ba rnams la bstan na mdzes te mdor bsdus nas brjod pa'i phyir ro/ /de nyid ni mdor bsdus nas ji lta bar bshad pa bzhin du rtogs par nus pas blo dman pa dag ni ma yin te/de dag ni rgyas par brjod pa las gzhan pa ji lta ba bzhin du don rtogs pa med pa'i phyir ro/ /de nyid kyi phyir na don gyis 'phangs pa'i nye bar bkod pa snga ma kho na bzhin du gtan tshigs ltar snang ba'i mtshan nyid dang de la nye bar brjod do/ /de ni 'dir gtan tshigs kyi mtshan nyid dang grangs nges pa dang de ni gtan tshigs rnam pa gsum du nges pas bzung bar bshad do//de ni gnyi ga'i rgyu yin pa'i phyir gnyi ga dang 'brel bar bshad pa dang gtan tshigs ltar snang ba'i mtshan nyid shugs kyis bshad pas/ rjod par byed pa'i rgyu mtshan ma yin no snyam nas tshigs su bcad pa'i don rnam pa drug tu rgyas par bshad do//gzhan yang 'di dag kyang legs par mthong ste/ rnam gsum nyid ces bya ba ni/ rang bzhin dang / 'bras bu dang / mi dmigs pa tha dad pas gtan tshigs de ni tha dad pa'o/ /de bzhin du rnam gsum nyid ni phyogs kyi chos dang rjes su 'gro ba dang ldog pa'i ngo bo tha dad pa rnam pa gsum ni tshul gsum kho na'o//de'i chas khyab ces brjod pas rjes su 'gro ba dang ldog pa dag brjod do/ /gnod pa med pa'i yul can la sogs pa'i tshul gzhan rung ba yin du zin kyang de ni gtan tshigs ma yin no/ /gang las she na/ gang gi phyir gtan tshigs ltar snang ba rang bzhin la sogs pa rnam pa gsum po de las sam phyogs kyi chos la sogs pa tshul gsum po dang 'brel pa las gzhan ni yang dag par ldan pa la sogs pa gzhan dang gnod pa med pa'i yul can la sogs pa las tha dad pa'i tshul dang ldan pa kho na'o//ci'i phyir zhe na/med na mi 'byung ba rnam pa gsum yin/ rnam pa gsum kho na dang tshul gsum po kho na'i gtan tshigs nges pa gzhan la rang bzhin la sogs pa las tha dad pa dang tshul gzhan la rung ba med do zhes bya ba'i don to/ /rang bzhin la sogs pa las tha dad pa'i 'brel pa'i rgyu mtshan med na mi 'byung ba mi srid pa de bzhin du tshul gzhan yang med do//ji ltar med na mi 'byung ba'i tshul gzhan yang srid pa kho na yin no zhes bya ba de ltar mtshan nyid rnam pa drug la sogs pa'i skabs su phyogs kyi chos zhes bya ba 'dir gtan tshigs kyi mtshan nyid kyi dbang du byas pa'o/ /gal te phyogs spyi yin par nye bar bzung na ni gang rjes su dpag pa'i yul thams cad la gtan tshigs ma grub par 'gyur ba'am//grub na ni rjes su dpag pa don med pa yin no zhe na/ phyogs ni chos can no zhes bya ba smos so/ /gal te spyi'i tshig yin na ji ltar phyogs kyi sgra chos tsam la 'jug pa yin zhe na/yan lag la spyir nye bar btags pa'i phyir ro/ /phyogs kyi sgra ni chos dang / chos can yan lag gnyi ga'i spyi yin te de ni 'dir chos can tsam la spyir nye bar btags nas phyogs kyi sgra 'jug pa'i phyir ro/ /de'i phyogs gcig tu gyur pa'i rgyu mtshan gyis spyir nye bar btags pa'i phyir/bsgrub par bya ba'i chos can las gzhan pa de thal bar mi 'gyur ro/ /de skad du/ spyi don bsgrub bya nyid yin pas/ /chos tsam yang na chos can la/ /gtso bo min yang nye bar btags/ /bsgrub bya'i phyogs gcig yin phyir ro/ /zhes gsungs te/ de 'dir slob dpon gyis bshad pa la/ dbang phyug sde spong ba'i lan btab par 'dod pas phyogs snga ma ni/ gal te dgos pa med pa'i phyir/ /zhes bya ba la sogs pa smos te/ dgos pa med na dngos kyi sgra'i don khyad du gsad par mi 'dod pa'i phyir dgos pa med pas nye bar gdags par mi rigs so//de'i phyir chos can gyi chos yin pa bla'o snyam du gzhan sems na/ dgos pa med pa ma yin te/ gang las she na thams cad ni rtsod pa'i gzhi'am gzhan pa'i chos can no/ /de'i chos de dgag pa'i don du nye bar btags pa'i dgos pa de yang yod pa de'i phyir nye bar btags pa ni chos can thams cad kyi chos dgag pa'i phyir zhes bya ba dgos pa med pa ma yin pas gtan tshigs ma grub pa yin no//gal te de ltar yon tan ci zhig tu 'gyur zhe na/ de lta na mig gis gzung bar bya ba yin pa'i phyir zhes bya ba la sogs pa smos te/ khwa'i nag po zhes bya ba la sogs pa smos pa ni gzhi tha dad pas ma grub pa yin/yongs su spangs pa ni gtan tshigs kyis bsal ba yin no/ /chos can gyi chos zhes thung mong du brjod pa de dag gis kyang de gtan tshigs su 'gyur bas chos can smos pas kyang de grub pas nye bar btags su med do/ /de'i phyir nye bar btags pa kho na don med do snyam nas gzhan gyis/chos brjod pas kyang zhes bya ba smos te/ chos can 'ba' zhig brjod pa ni ma yin te/ chos can yin par gzhi lta grub ste gzhi chos can yin pas gzhi smos pa de grub pas de las yin no/ /gal te yang chos ni chos gzhan la brten pa'i rgyu mtshan ci zhig yin ce na/chos ni gzhan la brten pa yin pas zhes bya ba smos te/ gzhan gyi dbang yin pa'i phyir gdon mi za bar 'dis chos can 'phangs pa yin no/ /de'i phyir chos can lhag par brjod pas bsgrub par bya ba'i chos can kho na bye brag tu bstan pas gang yang rung ba ni ma yin no//chos can smos pas mngon par 'dod pa'i khyad par can gyi chos can 'ba' zhig rtogs pa de yang bsgrub par bya ba'i chos can yin no snyam du 'dod pas ga las she na/ nye ba yin pa'i phyir zhes bya ba'i grags pa smos te/ nye ba yang chos can brjod pas mngon par 'dod pa kho nar rig par bya'o//chos can brjod pa yang chos can tsam 'phangs pa khyab pa'i rigs pa yin na ni/ chos can brjod pa don med pa'i phyir ro/ /nye bar gyur pa 'di bsgrub par bya ba'i chos can yin te/ de la thog mar gtan tshigs bstan pa'i phyir ro/ /gal te bsgrub par bya ba'i chos can nye bar brjod pa ma yin no//ga las she na/ dpe'i chos can yang yin te bsgrub par bya ba'i chos can 'ba' zhig nye ba ma yin te/ res 'ga' khyab pa bstan pa sngon du 'gro ba'i gtan tshigs kyi sbyor ba la dpe'i chos can la yang thog mar gtan tshigs yod par ston pa'i phyir ro/ / gal te nye bar bsgrub par bya ba'i chos can du ma grub pa de ltar yongs su lhag pa las yin te/ gang gi phyir gtan tshigs de'i chas khyab pa ni dpe'i chos can la yod par grub pas dpe med na gtan tshigs dang bsgrub par bya ba'i khyab pa bstan par mi nus so snyam du bsams nas/ chos can lhag par smos pa des na bsgrub par bya ba'i chos can yongs su gzung ngo //de'i chas khyab pa zhes bya bas kyang de'i sgra ni chos brjod pa la ltos nas chos can dang 'brel pa'i phyir de'i 'brel pa'i don kyang chos can smos par dgos par mi bya'o/ /gang la dgos pa med na mi 'byung ba de ni yongs su lhag pa'i yul yin te/chos can brjod pa dang dgos pa gzhan dang 'brel pa yin na ni/ de yongs su lhag pa ga la yin chos can brjod pas ni bsgrub par bya ba'i chos can yongs su bzung ngo snyam du sems na grub pa'i mtha' smra bas/ grub kyang zhes bya ba smos te/de'i chas khyab pa dpe'i chos can la yod pa la yang chos can brjod pas dpe'i chos can kho na'i chos gang yin pa de gtan tshigs yin no zhes bsnan pa'i don du dogs pa des na mig gis bzung ba la sogs pa kho na yang gtan tshigs su 'gyur gyi byas pa la sogs pa ma yin pas mi 'dod pa nyid du 'gyur ba de'i phyir nye bar btags par byas so//ci rtog ge'i bstan bcos la bsnan pa'i phyir brjod pa mthong ngam zhe na/ mthun pa la yod pa kho nas zhes bya ba la sogs pa smos te/ de la gang mthun pa la yod pa zhes bya ba 'dir gtan tshigs kyi mtshan nyid de/rigs mthun pa kho na la yod pa zhes bya ba nges par gzung bas gtan tshigs kyi ldog pa grub mod/ gang la zhe na/ bsgrub par bya ba med pa'o/ /gang 'di med pa de ni 'di yin no zhes bya bas med pa med par smos pa ni bsnan pa'i don du slob dpon gyis/ med pa la med pa zhes bya ba bshad pas ji lta ba med pa ni gzhan pa dang 'gal ba la ma yin pa bzhin du/de lta na 'dir yang chos can gyi chos zhes brjod pas bsnan pa'i don du dogs par 'gyur ro/ /gang gi tshe zhe na/ dpe'i chos can la yod par grub kyang ngo / /ga las she na/ de'i chas khyab pa zhes smos pas so//gang la zhe na/ yod pa bsnan pa'i don yin pas so/ /de nyid la dpe'i chos can la yod par dogs pa srid do/ /gang las she na/ yongs su lhag pas bsgrub par bya ba'i chos can yongs su bzung ba na'o/ /'o na ni phyogs kyi chos med na gtan tshigs med pa'i phyir bsnan pa'i don du dogs par mi bya ste/de lta na bsgrub par bya ba'i chos can gyis khyab pa'i chos kyang gal te chos can kha cig la nye bar dmigs pa de dang de nyid la rang gi khyab par byed pa la rtog pa skye'i gzhan du na nye ba dang / ring ba'i rim pa blta bar mi 'gyur ro/ /chos can kha cig la mi dmigs na ji ltar go bar byed pa yin de ltar yin na yang thams cad du rang gi khyab par byed pa rtogs par 'gyur te/nye ba dang ring ba med pa'i phyir ro zhe na/ des na shugs kyis zhes bya ba la sogs pa smos te/ gal te 'di de ma thag tu shugs kyis nye bar brjod pa de'i phyir shugs kyi don ni bsgrub par bya ba'i chos can gyi mtshan nyid yongs su bzung ba nyan pa po blo rnon pos rtogs par 'gyur te/'on kyang sgra med pa'i don la rang nyid rjes su zhugs nas rtogs par dka' bar 'gyur ba dang / de la nye bar btags pa tsam gyis rang nyid sgra med pa'i don la rtog pa na/chos can gyi chos zhes bya ba 'di dang phyogs chos zhes bya ba yi ge mnyam pa dang rtogs par dka' ba yang yongs su spangs pa yin no zhes bya ba'o/ /'dir yang gi sgra ni gang gzhan gyis bstan pa la re ba dang bcas pa des na don 'di'i mtshan nyid brjod pas rtogs par mi 'gyur ro zhes bya ba'o//ji ltar mtshan nyid rtogs pa'i phyogs kyi chos med pas gtan tshigs med na dogs pa 'di gang las yin snyam pas de'i phyir de dag mtshan nyid kyi rjes su 'brang ba rnams la bsnan pa'i don du dgos pa yongs su spang pa'i phyir yang nye bar btags pa byas so/ / 'dir sgra'i sbyor ba la gdon mi za bar rnam par gcod pa'i 'bras bu can nyid du nges par gzung bar bya ste/ phyogs kyi chos zhes bya ba 'dir drug pa'i bsdu ba yin gyi/ gzhan gyi bsdu ba ni srid pa ma yin no/ /de lta na yang phyogs kyi chos zhes bya ba kho nar nges pa bzung bas de'i chas khyab pa dang 'gal ba yin no zhes 'gal ba'i mtshan nyid brjod pa na/gal te phyogs chos zhes bya ba la sogs pa smos te/ phyogs kyi khyad par gzhan rnam par gcod pa la ltos pa'i phyir/ de'i khyad par la ltos pa'i chos ni gzhan la phyogs su byas pa dang gzhan gyi tshe'i mthun pa'i phyogs la rjes su mi 'jug go//de ltar na phyogs kyis khyad par du bya ba ni mthun pa'i phyogs kho na yin gyi gzhan du ni ma yin te/ dper na lha sbyin gyi bu gang yin pa de kho na'i yin gyi/ mchod sbyin gyi ma yin pa bzhin du des na gzhan la mi 'jug pas thun mong ma yin pa nyid du thun mong pa ni ma yin pas de'i chas khyab pa dang 'gal lo zhes bya ba'i don to//de'i chas khyab pa ni bstan pa'i phyir thun mong ba yin pa des ni phyogs kyi chos ni de'i chas khyab pa ma yin la/ yang na de'i chas khyab pa ni phyogs kyi chos ma yin pas 'gal ba'i mtshan nyid yin no zhes bya'o/ /'on kyang de'i chas khyab pa ni bsgrub par bya ba'i chos khyab par byed pa de ni gtan tshigs su 'gyur ba gzhi chos can de la yod pa kho na'am/yang na khyab par bya ba'i gtan tshigs de nyid ni khyab par byed pa bsgrub bya'i chos su gyur pa kho na la yod pa zhes bya ba rang gis bsgrub par bya ba dang / med na mi 'byung ba'i mtshan nyid 'chad par 'gyur ro//'dis kyang phyogs su byas pas gzhan la 'jug pa gdon mi za bar 'phangs pa ni med na gang gi mtshan nyid la gnod par dogs pa yin/ de lta na phyogs su byas pa de nyid la yod pa kho na bsgrub par bya ba'i chos can la gtan tshigs gnas pa don de'i chas khyab pa bstan pa yin no//gang zhig de'i chos can la rang gi bsgrub par bya ba med na mi 'byung ba de nyid go bar byed pa'i rgyu mtshan yin pa'i phyir gzhan gyi chos can de la yang rang gi bsgrub par bya ba med na mi 'byung ba'i rgyu mtshan ni sgrub par byed pa'i tshad ma'i rgyu mtshan ma yin no/ /la lar mthun pa'i phyogs phal che ba'am lhan cig yod pa tsam mthong ba rgyu mtshan ma yin te/dper na rdo rje la mtshon gyis gcod pa yin te sa yin pa'i phyir shing bzhin no zhes bya ba la sogs pas gzhan la mtshon gyis gcod pa med na mi 'byung ba yang rdo rje la de bzhin du yod par 'gyur ba ma yin no/ /gal te phyogs su byas pa las gzhan kho na la khyab pa bstan par bya'o zhes bya ba'i nges pa de ji ltar yin/yod pa nyid skad cig ma'i dngos po rnams la bstan pa gang yin pa ni don thams cad skad cig mas khyab par 'dod pas de las 'ga' zhig kyang mthun pa'i phyogs su gyur pa med de/ /gang zhig me lce 'bar ba la sogs pa 'ba' zhig la skad cig ma khas blangs su zin kyang de yang mngon sum ma yin te/skad cig ma'i tha dad par gyur pa ni shin tu phra bas nye bar mi rtogs pa'i phyir ro/ /gzhan kho na la khyab pa ma bstan par bsgrub par bya ba'i chos can la ma yin no zhes bya ba'i rigs pa 'di ci zhig yin/ / de lta na gtan tshigs kyi mtshan nyid bstan pa brtag pa yin gyi/ dngos po'i stobs kyis zhugs pa ma yin no/ /de'i phyir rang gi bsgrub par bya ba dang 'brel pa las kyang gtan tshigs la khyab pa 'grub ste/ de yang mi mthun pa'i phyogs la gnod pa can gyi tshad ma yod na bsgrub par bya ba'i chos can la yang 'grub pa'i phyir gzhan la rjes su 'brang ba la cung zad kyang ltos pa ma yin pas so//de nyid kyi phyir/ gzhan du gang dang gang la 'ga' zhig tu mthong ba de'i 'brel par rig pa ni/ de dang de ni de la go bar byed pa yin no zhes dngos po'i go bar byed pa mtshungs te/ gang yang rjes su dpag pa dang //de mtshungs la yang yod gyur pa/ /zhes bya ba la sogs pa'i mtshan nyid ni de la bsgrub par bya ba'i chos dang ldan pa ni/ mthun pa'i phyogs su brjod do/ /des na yod pa nyid ni bsgrub par bya ba'i chos yod pa yin no zhes bya ba de bzhin du de dang de'i chos kyis bsgrub par bya ba'i chos can yang mthun pa'i phyogs kyi dngos po las ldog pa ma yin no//bsgrub par bya bar 'dod pa nyid kyis 'dod pas gzhan pa'i phyogs kyi mtshan nyid de bsal bar mi nus pa'i phyir ro/ /de'i phyir/ de'i chas khyab pa zhes brjod pas rang gi bsgrub par bya ba dang / med na mi 'byung ba'i 'brel pa'i rgyu mtshan las gzhan du mi rigs par brjod do//gdon mi za bar gzhan la mi 'jug pas 'phangs so zhes ji ltar dogs pa yin zhe na/ bden te/ gtan tshigs thams cad phyogs su byas pa kho na'i chos can la rang gi bsgrub par bya ba dang 'brel pa tshad mas nges par nus na ni 'dis dogs par mi bya ste/dper na yod pa'i mtshan nyid kyi rang bzhin gyi gtan tshigs ni skad cig ma bsgrub par bya ba'i bdag nyid las bzlog pa la gnod pa can gyi tshad ma 'jug pa bzhin du/ 'bras bu'i gtan tshigs ni phyogs su byas pa'i chos can dang rang bzhin gyi gtan tshigs 'ga' zhig gi 'brel pa ni mngon sum dang mi dmigs pas sgrub na/ji ltar lkog tu gyur pa'i bsgrub par bya ba'i chos gzung bar bya ba yin/ de'i phyir gzhan la rab tu grub pa de las yin no zhes bya'o/ /de la ltos pas gzhan la mi 'jug pas thun mong ma yin pa srid par dogs pas de ni bsgrub par bya ba dang bzlog pa gzhan dag la 'jug pa ma nges pa ni de gnyi ga las/de'i chos can phyi rol du gyur pa mi rigs pas ma nges pa dang / bsgrub par bya ba la 'jug pa dang rnam par gcod pa dag gis thams cad bsdus pas gtan tshigs de la the tshom za bar 'gyur ro//la lar sngar rten la yod par bzung ba brjed pa la 'brel pa sgrub pa'i tshad mas dran pa ni gzhan la 'jug pa la ltos pa yin snyam sems nas 'di dag gi lan ni ma yin te zhes bya ba smos te/ gzhan la mi 'jug pa ni ma yin no/ /ga las she na ma 'brel pa ni 'brel pa med pa'o//rnam par gcod pas bye brag tu byas pa'i phyir yin gyi phyogs ni gzhan dang ldan pa rnam par gcod pas bye brag tu byas pa ma yin no/ /de lta na yang ma 'brel pa rnam par gcod pa yang chos can la chos yod par gang la the tshom za ba de la ma 'brel pa rnam par gcod pa'i rigs pa thob pa'i phyir te/dper na nag pa 'phong skyen no zhes bya ba lta bu'o/ /nag pa 'phong skyen pa ci yod dam med ces the tshom za ba de'i phyir nag pa 'phong skyen no zhes bya ba de la yod par ston par byed pa thos nas phyogs gzhan yod par gyur pa nyan pa po dogs par rnam par gnas pa bsal ba'i phyir ma 'brel pa rnam par gcod pa'i rigs pa 'dir thob pa'i phyir ro//gzhan gyi 'dod pa'i rnam par gcod pa bsal bar 'dod pa ni/ gzhan dang ldan pa rnam par gcod pas khyad par du byas pa ma yin no zhes bya ba smos te gzhan la rjes su mi 'jug pas thun mong ma yin pa zhes bya bar sbyar ro//'dir yang dpe ni dper na/ srid sgrub 'phong skyen no zhes bya ba lta bu'o/ /sgra mtshungs kyang 'di 'phong skyen no zhes bya ba'i sgra'i nus pas yon tan khyad par can la 'jug ste/ srid sgrub 'phong skyen par grub pa'i phyir ma 'brel pa dogs pa med de 'di 'dra'i khyad par bcas pa gzhan la yang yod dam med ces gzhan dang ldan pa'i nyan pa po dgos pa na gang gi tshe srid sgrub 'phong skyen no zhes brjod pa de'i tshe gzhan dang ldan pa rnam par gcod pa'i rigs pa 'thob po//bstan par bya ba la the tshom gnas pa'i phyogs dag phan tshun mi mthun pa'i phyir gcig la bstan pa des gzhan rnam par bcad par rigs pa'i stobs kyis 'ongs pa'i phyir ro//de 'dir phyogs la chos 'di yod dam med ces dogs pa la phyogs kyi chos zhes de la yod pa nyid bstan pa'i ma 'brel pa rnam par gcod pa yin gyi/ gzhan dang ldan pa ni ma yin no/ /de'i chas khyab pa'i de bstan pas na de la the tshom za bar 'gyur ro snyam nas de'i cha ni de'i chos so//de'i sgras ni phyogs khyad par du byed kyi chos ni ma yin te/ chos la chos rten pa mi srid pa'i phyir ro/ /cha ni chos la bya'i phyogs gcig ma yin te/ phyogs kyi sgra chos can tsam brjod pa'i phyir ro/ /de'i cha ni cha shas ma yin te phyogs gcig med pa'i phyir ro//phyogs kyi chos la yod pa de'i khyab pa ni gang khyab par bya ba dang / gang khyab par byed pa de gnyi ga'i chos su rtogs pa yin te/ gang gi tshe khyab par byed pa brjod par 'dod pa de'i tshe khyab par byed par go bar bya'o/ /de la zhes bya ba ni yod pa'i 'dun pa'i don gtso bo yin gyi 'dir nges par gzung ba ni ma yin te/chos la chos mi rten pa'i phyir ro/ /des na 'di'i don ni de la khyab pa ni chos can gang la khyab par bya ba yod pa de la khyab par byed pa yod pa kho na ste/ bdag nyid du gyur pa'i chos kyis khyab pa yin no/ /de yang khyab par bya ba yod pa la ltos nas khyab par byed pa kho na'i khyab par rtogs so//de bzhin du nges bzung gis khyab par byed pa kho na de la yod pa ni ma yin te/ gtan tshigs med par thal bar 'gyur bas khyab par byed pa ma yin pa lus can nyid la sogs pa de yod pa'i phyir ro/ /de kho na la yod pa yang ma yin te/rtsol ba las byung ba la sogs pa gtan tshigs ma yin par 'gyur ba dang / thun mong gi gtan tshigs su 'gyur te/ gzhal bya la sogs pa nyid mi rtag pa la yod pa'i phyir ro/ /gang gi tshe khyab par bya ba'i chos brjod par 'dod pa de'i tshe khyab par bya ba'i go bar byed pa ni khyab par byed pa de kho na la yod pa'o//chos can gang la khyab par byed pa yod pa de kho na la yod pa na de med du zin kyang khyab pa yin no/ /'di yang khyab par bya ba kho na de la yod pa zhes nges par bzung ba ni gtan tshigs med pa thal bar 'gyur bas brten par mi bya ste/ khyab par bya ba ma yin pa yang yod pa'i pa'i phyir ro//khyab par bya ba ni de la yod pa kho na yang ma yin te/ /mthun pa'i phyogs kyi phyogs gcig la yod pa gtan tshigs su mi 'gyur ba dang thun mong ba gtan tshigs su 'gyur te/ /gzhal bya ni rtag pa rnams la gdon mi za bar yod pa'i phyir ro/ /khyab par bya ba dang //khyab par byed par brjod pa'i khyab pa ni gnyi ga la chos mtshungs pas gcig tu rtogs na ni ldan pa la sogs pa gzhan du ma gyur cig ces bya ba'i phyir bstan to/ /'di ltar sngar mi ldan par rnam par bcad pas nges par bzung nas phyis gzhan dang ldan pa'i rnam par gcod pa yin na gnyi ga la rnam pa gcig gis khyab po zhes bya ba las yin/de skad du yang / rtags la rtags can yod nyid dang / /cig shos rtags can kho na la'o/ /nges pa las ni bzlog pa la/ /rtags dang rtags can 'brel pa med/ /ces bya ba gsungs te/ des na slob dpon gyis ldan pa'i stobs kyis go bar byed pa gzhan dag la nyes pa brjod do//ldan yin me dang du ba na/ /cha 'ga' zhig gis ma yin te/ /du ba des ni thams cad kyi/ /gsal byed thob par 'gyur phyir te/ /'di la 'jug pa ma yin no/ /zhes bshad do/ /'di ltar ldan pa ni gnyi ga la khyad par med par thal bar 'gyur bas khyab pa ma yin no//khyab par byed pa'i chos kyis khyab pa ci 'dra ba khyab par bya ba chos de 'dra ba ni ma yin no snyam nas/ de skad du/ gang tshe 'brel pa gnyis la gnas/ /rtags dang rtags can lhan cig ste/ /rten dang brten pa'i yod pa bzhin/ /ldan pa la ni de med do//zhes gsungs so/ /des na khyab par byed pa ni khyab par bya ba ma yin la khyab par bya ba dang khyab par byed pa ma yin no/ /de'i chas khyab pa ni gtan tshigs zhes brjod pas/ ldan pa'i phyogs brjod pa'i skyon du mi 'gyur ba dang gnyi ga go bar bya ba dang go bar byed par thal bar mi 'gyur ro//ji skad du bshad pa'i gtan tshigs kyi mtshan nyid kyi khyab par byed pa ni go bar bya bar rtogs la khyab par bya ba ni go byed du rtogs so/ /gal te de lta na phyogs chos de'i chas khyab pa zhes bya ba de tsam gtan tshigs kyi mtshan nyid yin pa de'i phyir phyogs kyi chos dang de'i chas khyab pa zhes bya ba gtan tshigs kyi tshul gnyis su 'gyur la/gzhan du tshul gsum du bshad pa dang ji ltar 'gal bar mi 'gyur zhe na/ de'i chas khyab pa zhes bya ba'i tshig 'dis rjes su 'gro ba dang ldog pa dag bshad par rig par bya'o zhes bya bar sbyar te/ rjes su 'gro ba dang ldog pa dag gi tshul nyid kyis khyab pa yod pa'i phyir ro//'di ltar gang kho na'i rjes su 'gro ba dang gang ldog na ldog pa de nyid des khyab par brjod de de'i bdag nyid yin pa'i phyir na khyab pa yin no/ /khyab pa brjod pas rjes su 'gro ba dang / ldog pa brjod de/ de'i phyir khyab pa'i tshig gis rjes su 'gro ba dang ldog pa brjod pas 'gal ba med pa'i phyir ro//des na shes par byed pa'i gtan tshigs kyi dbang du byas nas nges pa yin no/ /nges pa yang tshad ma du ma kho nas sam yang na bdag nyid ji lta ba gang dang gang gi tshad ma des nges ba ste/ tshad ma gang dang gang yin pa de ni phyis bshad par bya'o/ /'am gyi sgras ni rjes su 'gro ba dang ldog pa dag ni don mtshungs par bstan gyi tshigs ni ma yin no//des na mthun pa'i phyogs sam mi mthun pa'i phyogs dag gi sbyor ba gcig gis gnyi ga rtogs te/ dpag pa dang sgrub pa'i tshul dag gi 'jug pa tha dad kyang don dam pa de'i bdag nyid yin pas gnyi ga rtogs par bstan to//ldog pa ni bsgrub bya ldog pas rtags ldog pa'i chos yin to/ rang bzhin gcig tu gyur pa'i chos yin na ni rjes su 'gro ba'i ngo bo 'di dngos po la 'di 'gal ba med do/ /ci phyogs kyi chos kyang yin nam zhe na/ bdag nyid ji lta ba'i tshad mas bshad pa yin no zhes bya bar sbyar te/ nges pa'i zhar la de yang 'dir bstan pa'i phyir ro/ /gal te nges pa go bar byed pa nyid du bshad pas ji ltar slar yang rjes su 'gro ba'i don gyis khyab pa yin zhe na/ gang gi tshe gtan tshigs thams cad la zhes bya ba smos te/ gtan tshigs gang dang gang la bsgrub par bya ba de dang de las med pa de'i tshe bsgrub par bya ba'i chos des gtan tshigs de la khyab pa mi 'grub bo//de'i phyir gtan tshigs gang dang gang la bsgrub par bya ba'i chos de dang de la yod pa ni khyab par byed pa'i chos kyi ngo bo khyab pa yin no zhes bya ba ni rjes su 'gro ba'i ngo bo'i khyab pa'o/ /gang dang gang ldog pa nges pas de yang ldog pa des khyab par 'grub kyi bzlog pa ni ma yin no//des na khyab par bya ba'i ngo bo'i khyab pa ni ldog pa'i bdag nyid yin pa'i phyir ro/ /yang na bsgrub par bya ba'i chos khyab par byed pa med na khyab pa mi 'grub pa'i phyir ro/ /de na gtan tshigs kyi khyab par bya ba spangs pa yin no/ / bsgrub par bya ba'i chos khyab par byed pa med pa ga las she na/ bdag nyid ldog na gtan tshigs ldog pa med pa'i phyir ro/ /ldog pa'i bdag nyid ni ldog par byed pa khyab par byed pa yin pa'i phyir/ cig shos de med pa la med pa kho na khyab par bya ba yin pa'i phyir ro/ /de'i phyir ldog pa yod pa nyid kyis bsgrub par bya bas khyab pa ldog pa'i bdag nyid kho na la yod par rtogs te khyab par bya ba'i chos kyi mtshan nyid grub pa yin no//de bas na de'i chas khyab pa'i tshig gis gang gi phyir rjes su 'gro ba dang ldog pa bshad pa'i phyir ro/ /de ltar de'i phyir rjes su 'gro ba dang ldog pa dag bdag nyid ji lta ba'i tshad mas nges pa dag gis de'i chas khyab pa nges pa yin no//ji skad bshad pa'i bdag nyid ji lta ba'i tshad mas rjes su 'gro ba dang ldog pa dang phyogs chos nges pa bshad pa'i phyir ro/ /de la tshad ma gang dang gang gis nges pa de bstan pa'i phyir de la zhes bya ba la sogs pa smos te/ de la phyogs kyi chos la sogs pa de rnams la'o//phyogs kyi chos nges pa'i skabs phyis bstan du zin kyang mdo'i rim pas thog mar brjod pas phyogs kyi chos nges pa zhes bya bar sbyar ro/ /rab tu grub pa 'di ci zhig yin zhe na rtogs pa'o/ /gang la zhe na/ bsgrub par bya ba'i chos can la'o//gang gis she na/ mngon sum dang rjes su dpag pa'i sgo nas so/ /phyogs kyi chos thams cad mngon sum dang rjes su dpag pas nges pa ni ma yin te/ 'on kyang 'ga' zhig la kha cig gis yin no zhes bstan pa'i phyir 'am gyi sgra smos pa yin no/ /mngon sum gyis kyang rang nyid kyi rang gi mtshan nyid kyi rnam pa nyid yin du zin kyang de ma thag tu spyir rtog pa'i rnam pa skyed pa'i phyir rab tu grub pa la nye bar brtags nas nges par brjod do//mngon sum gyi rjes las byung ba'i rnam par rtog pa la ma gtogs pa rtogs pa med do zhes bstan to/ /des na gal te spyi'i ngo bo'i rtags rnam par 'jog pa de lta na yang rang gi mtshan nyid rtogs pa kho na de rnam par 'jog pa'i rgyu mtshan yin pa'i phyir phyogs kyi chos mngon sum yin par bsgrub par bya ba'i chos can rab tu grub pa zhes brjod do//'di yang de ma thag kho nar gsal bar byed par 'gyur ro/ /yang na rjes su dpag par bsgrub par bya ba'i chos can la phyogs kyi chos rab tu grub par nges pa dang /tshad ma dang 'bras bu tha dad ni rjes su dpag pa dang rjes su dpag pas nges so/ /'dir dpe ni rim pa ji lta ba bzhin du dper na sa phyogs la du ba zhes bya ba smos so gang zhig du ba'i spyi mngon sum gyis nges so snyam du sems nas sa phyogs dang 'brel pa'i me mngon sum ma yin la/gang yang mngon sum la nam mkha'i cha'i ngo bo snang ba la sogs pa du ba'i bdag nyid dang ldan par mthong ba 'di me dang ldan par mthong ba ni med pa de'i phyir ji ltar sa phyogs kyi du ba mngon sum la rab tu grub pa yin na/ de'i phyir du ba kho na chos can du rigs te/du ba 'di me dang bcas pa yin te/ du ba yin pa'i phyir zhes bsgrub par bya ba yin no zhe na/ me dang bcas pa'i du ba'i cha shas yongs su snang na steng du gnas pa'i cha me dang lhan cig tu yod pa ma yin te/ mngon sum ma yin pa'i phyir ji ltar du ba'i spyi'i chos can mngon sum ma yin/gal te du ba'i yan lag mngon sum du grub pa yin no zhe na/ yan lag las tha dad pa med pa'i phyir 'jig rten pa gcig tu mngon par zhen pa'am/ sa phyogs kyang de tsam du gcig tu brtags pa gsal bar mi nus so/ /sa phyogs nyid la yang me bstan par bya ba yin gyi du ba ni ma yin no/ / 'bras bu'i gtan tshigs yul dang dus la sogs pa la ltos nas go bar byed pa ni gang / 'gal 'bras la yang yul dang ni/ /dus la sogs pa ltos par 'dod/ /gzhan du 'khrul 'gyur mi grang ba/ /sgrub pa la ni thal ba bzhin/ /zhes bya ba smos te/ de'i phyir yul la sogs pa la ltos pa me sgrub par byed pa'i du ba dang ldan pa'i sa phyogs chos can du bzung na 'gal ba med do//dper na chu skyar dang ldan pa'i shing la sogs pa yul la sogs pa la ltos nas chu sgrub par byed pa'am/ /sgra la byas pa ni rkyen tha dad pas tha dad pa'i phyir zhes bya ba la sogs pa rjes su dpog pa bzhin no//'dir ji ltar mngon par brjod pa'i mngon sum gyis bsgrub par bya ba'i chos can phyogs kyi chos su rab tu grub pa dgos pa ma rtogs nas gzhon nu ma len gyis ji ltar spyi'i bdag nyid du ba la sogs pa'i rtags mngon sum du rtogs pa med pa las yin/rang gi ngo bo 'dzin pa'am chos can la yang de tsam zhig nye bar sbyor ba na 'di dag gi 'brel pa gang gis 'dzin pa yin snyam nas slar rtsod pa ni des na mngon sum sngon du song ba dang rjes su dpag pa la sogs pa'i chos kyi rgyu mtshan yin no zhes rnam bshad byed pas/ mngon sum sngon du 'gro nyid kyis//rjes dpag la sogs ji ltar 'gyur/ /gal te rtogs med dbang po'i blo/ /dran pa la ni mi ltos na/ /rtags dang chos can 'brel pa dag /de ltar rtogs pa med pas kyang / /mi 'dzin ces bya ba la rtags la sogs pa mngon sum gyis 'dzin pa spangs pa yin na rnam par rtog pa med pa'i phyir/rnam rtog de la don dngos kyis/ /phan 'dogs par ni mi 'dod phyir/ /snga ma lta ba'i shes pa ni/ /dang por rnam rtog med par yod/ /byis pa lkugs sogs shes pa dang / /'dra ba nyi tshe'i dngos las skyes/ /de las gzhan yang dngos chos nas//rigs la sogs pa gang gang gi/ // nges par byed pa'i blo de yang / /mngon sum nyid du 'dod pa yin/ /zhes smras na/ bde bar gshegs pa kho na la 'dir rtags dag dang chos can gyi 'brel pa 'dzin pa'i mtshan nyid rnam par rtog pa med pa'i mngon sum 'di dag skyon yin gyi/kho bo cag rtog pa dang bcas pa'i mngon sum 'dod pa la bshad pa ltar mi 'gyur snyam na/ de'i phyir/ de yis skyon brjod pa bsal ba'i phyir du ba dang bcas pa'i phyogs zhes bya ba la sogs pa smos te/ de'i 'dir bsdus pa'i don ni 'di yin te/ mngon sum ni mdun na gnas pa'i rten dang brten pa du ba dang sa phyogs la sogs pa bsgrub pa'i ngo bos du ba la sogs pa rigs mthun pa dang rigs mi mthun pa las ldog pa ni rang rang gi ngo bo la rnam par gnas pas thams cad kyi nus pa rnams phan tshun ma 'dres pa'i ngo bo yin pa'i phyir/de'i nus pa las 'byung ba'i ji ltar gnas pa'i rjes su byed pa las phyis dgag pa dang sgrub pa'i rnam par rtog pa gnyis skye bar 'gyur ro//gang gis sa phyogs kyi du ba chos dang chos can du grags pa de yang rten dang brten pa bzhin du 'dir yin gyi gzhan du ni ma yin no zhes brtag pa ste/ ji ltar nyams su myong ba goms pa bsal ba dang / lhan cig byed pa'i rkyen gzhan gyis rnam par rtog pa skye'o/ /de'i phyir/ chos dang chos can gyi ngo bo nges pa dang 'brel pa/ nges pa mngon sum gyi rgyu mtshan gyis 'grub par 'gyur ro/ /de lta na du ba de nyid phyogs la 'brel par nges pa ni gang 'di la 'di'o zhes nges par byed pa dang / de ni rnam par rtog pas kyang mngon sum gyis ji skad du bshad pa'i rnam pa grub pa kho na yin te/rten dang brten pa'i rnam par gnas pa med pa'i phyir ro/ /dngos po rnam pa gnyis las gzhan kho na rten dang brten pa'i mtshan nyid 'ga' zhig gi 'brel pa gang yin pa de ni med do/ /mngon sum gyis nyams su myong ba las phyi nas rnam par 'gyur te/dngos po las gyur pa de bzhin du bkag pa'i phyir ro/ /de'i phyir de nyid de bzhin du gnas pa don gnyis la brten nas rnam par rtog pa 'di sgro 'dogs pa kho na ste/ de ni 'brel pa dang 'brel pa can dang tha dad pa khyab par gzhan spong ba dang mi spong ba dag gis 'jig rten na chos can gyi tha snyad du byed kyi don dam par ma yin no//spyi'i tha snyad kyang rigs mi mthun pa'i ldog pa dngos po la mi brten pa ni ma yin par rgya cher byas so/ /de dag nyid tha dad kyang nyams su myong ba'i sgo nas rigs mi mthun pa las ldog pas dben pa'i ngo bo can ni gcig tu nges pa'i shes pa'i rgyu yin pa'i phyir ro//de skad du yang / gcig rtogs don shes la sogs pa/ /don gcig sgrub la kha cig ni/ /tha dad yin yang rang bzhin gyis/ /nges te dbang po la sogs bzhin/ /zhes bya ba gsungs so/ /des na spyi'i rnam par rtog pa'i dran pa kho na bzang ba la 'dzin pa yin la/der snang ba'i du ba'i rnam pa dang rigs mi mthun pa las ldog pa ni mngon sum kho nas 'dzin pa'i phyir ro/ /rigs mi mthun pa las ldog pa ni log pa las gzhan ma yin te/ gang 'ga' zhig mngon sum gyis mi 'dzin par 'gyur ro/ /de'i phyir ji ltar mthong ba'i du ba la sogs pa rang gi mtshan nyid gzhan las ldog pa ni bdag gis brtags pa yin no zhes rtogs par byed pa po yang nges pa'i dbang gis dran pa nyid kyi rnam par rtog pa yang rnam pa gnyis te//mngon sum gyi stobs las byung ba nyid ni dngos po'i yul med pa yang yin no//de'i phyir gang / spyi ni nyams myong med pas na/ /dran dang rnam par shes pa 'di/ /tha dad med par gang brjod na/ /nges par dran pa'i nus pa yis/ /mo gsham bu yang yod par 'gyur/ /zhes bya ba bshad pa de dag kyang gsal ba yin no/ /yang na gzhon nu ma len gyis smras pa mngon sum gyi yul ni rang gi mtshan nyid yin la rjes su dpag pa'i yul ni spyi'i mtshan nyid yin no zhes brjod pas du ba la sogs pa'i spyi ni rjes su dpag pa'i gzung ba kho na ste//de la rtags 'dzin pa yang thug pa med par 'gyur te rjes su dpag pa de ni gzhan gyi stobs kyis skye la de yang spyi'i ngo bo ste/de rjes su dpag pa gzhan gyi yul can yin pa'i phyir ro/ /de bzhin du gzhan de yang 'ga' zhig gi rtags gcig kyang dus stong phrag gis kyang rtogs par byed pa med na kye ma ci skyes bu'i tshe thung ngu yis yin nam/ de skad du/ /rjes su dpag pa med na ni/ /gang gi spyi rtogs med pa dang //rtags ni rnam par bsal ba na/ /rjes su dpag pa 'jug pa med/ /spyi ma yin pa'i rtags kyang ni/ /'ga' zhig kyang ni mi 'dod na/ /rtags ni rtogs pa med pa yi/ /cung zad yod par bstan du med/ /de yang rjes su dpag pa ni/ /gzhan gyis rtogs par 'gyur na slar//de las byung ba'i rtags las ni/ /spyi shes pa dang 'brel pa las/ /de'i yang rjes su dpag pa nyid/ /rtags las kyang ni yang dag byung / /rjes su dpag pa gzhan nyid kyi/ /de bzhin shes par brtag na ni/ /rtags dang rtags can rjes dpag dag /mtha' yas phyir na rtags gcig la//dus mi stong phrag mang pos kyang / /rtogs par byed pa yod ma yin/ /ces dogs pa la du ba dang bcas pa'i phyogs zhes pa la sogs pa smos pa ni 'di snyam du dgos pa yin te/ rjes su dpag pa las gzhan gang gis spyi rtogs pa med na ni khyod zer ba'i skyon 'dir 'gyur na/kho bo cag mngon sum gyi rjes las byung ba'i rnam par rtog pas kyang rang bzhin gyis 'khrul pas spyi rtogs te/ dper na nor bu'i 'od las nor bu 'khrul pa bzhin du rtags kyi rnam par rtog pa rang gi mtshan nyid la rten pa'i phyir brgyud pas dngos po dang 'brel pas mi slu ba yin no//'bras bu'i gtan tshigs nyid kyang rnam par rtog pa la snang ba'i du ba'i spyi rtags su 'jog pa ni du ba mthong ba la brten nas der nges pa yin no/ /du ba'i rang gi mtshan nyid kyi du ba ni rtags su gzhag par rigs pa ma yin no/ /de thun mong ma yin pa mthun pa'i phyogs la 'jug pa med pa'i phyir de'i chas khyab pa mi rigs so//bsgrub bya sgrub byed brtags pa la/ dngos po mthong ba med pa'i phyir/ /zhes pa dang / spyi'i mtshan nyid ni rjes su dpag pa'i yul yin no zhes bya ba yang gang gsungs pa na/ de la spyi'i mtshan nyid ni rjes su dpag pa kho na'i yul yin no zhes nges par gzung bar mi bya ste/mngon sum gyi rjes las byung ba'i rnam par rtog pa dang / de ni rnam par rtog pa gzhan gyi'ang yul yin pa'i phyir ro/ /'on kyang spyi'i mtshan nyid kho na rjes su dpag pa'i yul yin no zhe na/ nges par gzung bas rang gi mtshan nyid yul yin pa dgag pa'i phyir ro/ /de la du ba dang lhan cig tu gnas pa ni du ba dang bcas pa'i zhes bya bas phyogs kyi chos kyi don bstan pa nyid rigs pa dang /sgrub pa'i rnam par rtog pa 'di'i sa bon du ba dang bcas pa mthong ba dang ldan pa mngon sum gyis zhes bya bar 'brel to/ /ci 'dra ba zhe na/ don gzhan gyis dben pa'i ngo bo'o/ /don gzhan ni rigs mthun pa dang /rigs mi mthun pa'o/ /dben pa ni ma 'brel pa'o zhes 'dir rnam par sbyar ro/ /dngos po thams cad rang rang gi ngo bo la rnam par gnas pa yin te/ rang gi ngo bo la 'dre ba mi srid pa'i phyir ro/ /de lta ma yin na thams cad thams cad la nye bar sbyor bar thal bar 'gyur ro/ / 'dis ni dgag pa'i rnam par rtog pa'i rgyu mtshan bshad pa dang spyir nye bar rtogs pa'i sa bon yin te/ de skad du/ /ming don gang ldan phan tshun du/ /tha dad pa 'di sa bon yin/ /ces bshad do/ /'di ltar don gzhan las ldog pa ni phan tshun tha dad kyang spyir nye bar mthong bas de dag tha dad pa'i ngo bo mi mngon pa la tha mi dad pa'i rang bzhin du sgro btags nas rnam par rtog pa skye'o//thun mong ma yin pa'i bdag nyid ces bya ba ni don gzhan las tha dad pa'i ngo bo ste/ ji ltar gzhon nu ma len gyis don gzhan gyis dben pa'i ngo bo / dngos po med pa'i tshad mas bzung ba yin gyi mngon sum gyi nges pa ni ma yin no snyam du bsam pa ltar ma yin te/dngos po'i nus pa las byung ba'i mngon sum las gzhan du mthong ba ni mi srid de 'khrul pa thal bar 'gyur ba'i phyir ro/ /de na bdag nyid mthong ba dang ldan par gyur pa'i skyes bu la de ma thag tu dran pa rtags shes pa skye'o zhes bya bar 'brel to//dran pa ni dran pa'o/ /rtags snang ba'i shes pa ni rtags shes pa'o/ /'di mngon sum gyi rjes la byung ba'i rtogs pa la spyi snang bas nges rtags rnam par 'jog go/ /don dam pa yul ci zhig yin zhe na/ 'di ltar mthong ba tha dad pa'i yul can zhes bya ba smos so/ /gang dang gang du ba la sogs pa mthong ba ni ji ltar mthong ba'o//de tha dad pa ni don dam par de gzhan las ldog pa'i yul can gyi rtags shes pa gang dgag pa dang sgrub pa'i bdag nyid do/ /de ni de skad du/ nges pa'i shes pa rnams ni sgro 'dogs pa rnam par gcod pa'i 'bras bu can yul med kyang de'i yul du brjod do zhes gsungs so//rtogs par byed pa pos nges pa'i don ni ji ltar mthong ba tha dad pa de'i yul can yin pa de'i phyir dran pa'i ngo bo don dam pa ma yin no/ /rnam par rtog pas ji ltar mthong ba'i dngos po las gyur pa tha dad pa la reg pa med pa'i phyir ro/ /'o na ni khyed de ltar brjod pa na kho bo cag gi 'dod pa'i rjes su 'brangs pa kho na ste/rang dang gzhan gyi ngo bo yod pa dang med pa dag gi bdag nyid kho na'i dngos po mthong ba ni dgag pa sgrub pa'i rtogs pa khas blangs pa'i phyir dang mthong ba'i lta ba'i shes pa'i ming yin no/ /kho bo cag mngon sum sgrub pa'i rnam par rtog pa la khyed kyang mngon sum gyi tshad ma nyid der snang bar brjod do//thams cad rigs mthun pa'i rjes su 'gro ba'i spyi'i ngo bo mthong bas ma rtogs pa rtogs pa yin pa'i phyir ro/ /de ni sngar med don shes pa/ /nges pa gnod pa spangs pa dang / /ma nyams rgyu las byung ba ni/ /tshad mar 'jig rten yang dag 'dod/ /ces bya ba'i tshad ma'i mtshan nyid dang ldan pa dang yod pa'i don dang 'brel par gyur pa dang dbang po rnams yod pa'o//dgag pa'i rnam par rtog pa yang med pa'i tshad ma'i 'bras bu dngos po med par bshad pa ni tshad ma gzhan gyi yin no/ /dngos po'i yul can gyi rnam par shes pa mngon sum la sogs pa des ni med pa'i cha ma yin la dngos po nyid rtogs pa yin te/de ni yod pa'i cha'i yul can yin pa'i phyir ro/ /de'i phyir dgag pa'i rnam par rtog pa skyed par byed pa nyid kyis de dngos po med pa'i tshad mar bshad do/ /ji ltar gzugs la sogs pa shes pa bskyed pa nyid kyi dbang po'i mngon sum zhes bya'o/ /de la de lta bu nyid 'ba' zhig ni dran pa'i rtags shes pa zhes bya ba mi rigs te/sgrub pa'i rnam par rtog pa ni spyi ma bzung bas dran pa nyid srid pa'i phyir ro/ /dgag pa'i rnam par rtog pa la yang rtags shes pa mi 'dod do/ /'di ga las she na dran pa nyid des spyi bzung ba la 'dzin pa dang / med pa'i cha 'dzin pa yin no zhes rgyal dpog pa rnams kyis brjod pa'i dogs pa'i gnas skabs mthong nas dgag pa dang sgrub pa'i rnam par rtog pa tshad ma dang tshad ma ma yin pa dpyad pa rtsom pa ni de la de rnams mthong ba la dgag pa dang sgrub pa'i rnam par rtog pa rnams kyi dang po gang yin pa 'di ni/snga mar lta ba'i shes pa ni//thog mar rtog pa med pa yod/ /ces bya ba la sogs pa rnam par rtog pa med pa'i rab tu 'jug pa zhes bya ba dang por bshad pa yul thun mong ma yin pa ni rang gi mtshan nyid kyi yul bstan pa de nyid tshad ma yin gyi dgag pa dang sgrub pa'i rnam par rtog pa yang ma yin te de nyid la tshad ma'i mtshan nyid rigs pa'i phyir dang cig shos la mi srid pa'i phyir ro//'di ltar ma rtogs pa'i yul can dang don byed pa sgrub par byed pa'i yul can gyi tshad ma'i mtshan nyid bstan pa nyid mthong ba la yod pa yin te/ de la dang po zhes bya ba ni sngar med pa'i don gyi rnam par shes pa bshad do/ /yul thun mong ma yin pa zhes bya ba ni don byed pa sgrub pa'i yul nyid de/rang gi mtshan nyid kyis don byed pa sgrub par nus pa'i phyir ro/ /de la re zhig dgag pa'i rnam par rtog pa ni mngon sum gyis bzung ba'i don gyi yul gyis dran pa bstan pa yin te/ de la zhes bya ba smos te/ thun mong ma yin pa de ltar gyur pa don gzhan dang ma 'brel pa'i ngo bo mthong bas ma 'dres pa'i ngo bo'i nus pa las byung ba mthong ba rtogs par gyur pa de lta na yod pa'i cha las tha dad pa med pa'i cha 'dod pa yang yod pa'i cha'i rang bzhin ma 'dres pa'i ngo bo'i brtags pa na gzhan du ni med pa'i cha de nyid mi 'grub bo//rang bzhin gyis ma 'dres pa'i ngo bo med na med pa'i cha yod par gyur pa yang rigs pa ma yin no//'dres pa'i ngo bo ni rang gi rgyu'i stobs las 'ongs pa cung zad cig kyang byed pa med pa'i chas srid kyang spang bar mi rigs pa'i phyir dang / de nyid kyis na de 'jig pa la 'jig pa'i rgyu mi rigs so zhes 'chad par 'gyur ba'i phyir ro//des 'dres pa'i ngo bo 'jig pa ni rang gi rgyu kho na'i rang bzhin ma 'dres pa'i ngo bo las skyes na mdzes kyi/ ci dka' thub kyi la tu ba'i rigs pa khas len par byed dam/ de'i phyir rang bzhin kho na yod pa rnam la gzhan pa'i ngo bo brtag pa'i phyir med pa'i cha ni bzhin ma yin no/ /de yang de ltar mthong nas 'dzin pa kho na'o//de'i tshe de ltar gyur pa de'i don gang dang gang gis thun mong ma yin par mthong ba'i dngos po ni spyi'i ngo bo ma yin te/ de'i ngo bo ma tshang ba'i rang bzhin yin pa'i phyir ro/ /de thun mong ma yin pa de dang des ma yin pa'i ngo bo ni spyi'i rang bzhin ma yin pa de dag nyid gsal bar byed do//de'i phyir don gzhan las tha dad pa mtshan nyid mi mthun pa'i 'di gzhan kyi ngo bo ma yin pa'i phyir ro/ /mngon par brjod pa ni mngon du smras pa'o/ /mtshan nyid mi mthun par rab tu 'jug par mthong ba'i mngon sum gyi stobs kyis dran pa skyes pa yin gyi/ gang rtags kyi stobs kyis bskyed pa'i rnam par bcad pa'i yul la yang dran pa yod pa ni ma yin pa'i phyir ro//yul ci zhig ce na/ de ma yin pa la ldog pa'i yul can no/ /de'i sgras ni mthong ba'i yul gyi dngos po la snyegs so/ /de ma yin pa ni rigs mi mthun pa de ma yin pa'o/ /de las ldog pa ni de ma yin pa las ldog pa'o//de'i yul gang yin pa de ni de bzhin du ste/ ji ltar mthong ba nyid don gzhan dag las tha dad par brtags pa ni rtogs par byed pa pos mngon par zhen nas de skad brjod kyi don dam par yul med pa'i phyir ro/ /de tshad ma yin pa ni med pa tshad ma'i 'bras bu ma yin no zhes bya ba'i don to/ /dran pa skyed par byed pas tshad mar mi rigs so//ci'i phyir tshad ma ma yin zhe na/ ji ltar mthong ba'i rnam pa gsal ba la sogs pa rkyen gzhan la ltos pa dang bcas pa'i bye brag de 'dzin pa'i phyir ro/ /mthong ngo zhes bya ba ni rnam par rtog pa'i gzung bar bya ba'i ma yin te/ mthong bar khyad par med pa'i phyir rnam pa thams cad la rnam par rtog pa skye bar thal bar 'gyur ro//'on kyang 'ga' zhig goms pa la sogs pa'i rkyen la ltos pa'i phyir rnam pa 'dzin par brjod do/ /khyed kyang ji ltar mthong ba'i rnam pa 'dzin pa yin yang / ci'i phyir tshad ma'i mtshan nyid brjod pa de bsal bar bstan pa'i phyir snga ma lta ba'i shes pa skye ba'i dus su thun mong ma yin la ma 'dres pa'i ngo bo mthong nas thun mong ma yin pa ni don gzhan gyi ngo bor mi 'gyur ro zhes mngon par brjod pa ni mngon par brtags pa'o//dgag pa'i rnam par rtog pa ni sngon med pa'i don rtogs pa med pa'i phyir sngon med pa'i don rnam par shes pa spangs pa yin no//sngar med pa'i don gyi rnam par shes pa tshad ma yin no zhes khyed kyis brjod do/ /ji skad bshad pa'i rnam pas dgag pa'i rnam par rtog pa tshad ma ma yin no/ /de lta na ni sgrub pa'i rnam par rtog pa tshad mar 'gyur te/ de sngon med pa'i rnam par shes pa mi srid pa ma yin te/de so sor snang ba'i rjes su byed pa'i spyi'i rnam pa ni thun mong ma yin pa'i ngo bo la dmigs pa ni ma mthong bas ma rtogs pas rtogs pa'i phyir/ de gang gis na tshad ma ma yin/ de skad du/ de las gzhan yang dngos chos ni/ /zhes bya ba la sogs pa smras pa 'di dag gzhon nu ma len gyis brjod pa'i dogs pa bsu nas sgrub pa'i rnam par rtog pa'i tshad ma yang bsal ba ni/don byed pa bsgrub pa zhes bya ba smos te/ rang gi mtshan nyid la lta ba'i shes pas mthong ba'i phyir dang / de bsgrub pa mthong ba med pa ni don byed pa sgrub pa'i ngo bo rnam par rtog pas rtogs pa med pas sgrub pa'i rnam par rtog pa tshad ma ma yin no//gal te des kyang ma rtogs pa'i spyi rtogs pa yin no zhes brjod pa de lta na yang de'i don byed pa sgrub pa ma yin pa'i phyir de'i rtog pa ni rab rib can gyi shes pa la sogs pa bshad pa bzhin du sgrub pa'i rnam par rtog pa tshad ma ma yin no/ /de la gzhan yang dngos chos ni/ / rigs la sogs pa gang gang gi/ /blo yis nges pa zhes brjod do/ /de las gzhan yang dngos po 'dzin pa rnam par mi rtog pa'i mngon sum gyi yul nyid ni dngos po'o/ /rigs la sogs pa ni bye brag tu rtogs pa ni blo yis mngon par zhen par brjod de/ de ni rnam par mi rtog pa'i shes pas rtogs pas de la tshad ma yin gyi/rigs ni don byed pa sgrub pa med pa'i phyir/ skra shad la sogs pa'i shes pa bzhin du ma rtogs pa rtogs pa tshad ma ma yin no/ /de nyid kyi phyir don byed pa'i nus pas stong pa'i spyi ni dbang po dang 'brel pa med pa'i phyir mngon sum srid pa ma yin no//dang gi sgras ni dran pa nyid dang zhes sngar bshad zin pa bsdu'o/ /dran pa nyid kyang phyis bshad par bya'o/ /rjes su dpag pa bzhin ces bya ba'i chos mi mthun pa'i dpe yin no/ /ji ltar mngon sum gyis don byed pa sgrub pa'i sa phyogs chos can rtogs kyang me don byed pa sgrub pa'i spyi'i rnam pa lkog tu gyur pa rtogs pa med do//rang gi mtshan nyid kyis rnam par rtog par mi nus pa'i phyir ro/ /rtogs par byed pa pos sgrub pa'i rnam par rtog pa spyi'i rnam pa don byed pa sgrub pa ma rtogs pa rtogs pa med do/ /de lta ba'i shes pas rtogs pa de'i phyir dran pa zhes bya ba 'dir tshad ma ma yin no//gal te don byed pa sgrub par byed pa'i yul kho na la tshad ma yin gyi cig shos la ma yin no zhes bya ba ga las shes she na/ gang gi phyir don byed pa don du gnyer ba'i skyes bu ni phan pa dang mi phan pa thob pa dang / yongs su spangs pa thams cad don du gnyer gyi bya rog dang ta la'i rigs pas ni 'ga' zhig kyang ma yin te/rtog pa dang ldan pa blo sngon du gtong ba tshad ma'am tshad ma ma yin pa zhig yin/ tshad ma las ni thams cad du 'jug par byed kyi/ tshad ma ma yin pas ni 'ga' zhig gi tshe yang ma yin te/ slu ba srid pa'i phyir ro zhes gnyi ga tshol ba yin gyi nyon mongs pa ni ma yin no//de'i phyir don byed pa sgrub par byed pa'i yul kho na la tshad mar brjod de/ de'i don byed pa sgrub pa ni 'jug pa'i yan lag yin pa'i phyir dang / cig shos ni bzlog pa yin pa'i phyir ro/ /de ltar ni tshad ma ni mi slu bar byed pa ma 'khrul pa zhes 'jig rten yang brjod do//gang don byed pa sgrub pa ma rtogs na de la 'jug pa med pas 'di ga las thob pa yin/ de ji ltar mi slu bar byed pa de rtogs pa sngon du gtong bar byed pas tshad mar brjod par 'gyur/ gal te de lta na spyi yang don byed pa sgrub pa nyid des de'i yul la sgrub pa'i rnam par rtog pa tshad mar 'gyur ro zhe na/spyis ni zhes bya ba smos te/ cung zad cig kyang des bsgrub par bya ba khas ma blangs te/ tha mi dad pa'i shes pa'i mtshan nyid brjod pa'am gzhan la ni bsal bas bsgrub par bya ba'i don byed par nye bar btags pa yin no/ /ci 'dra ba zhe na/ rang gi mtshan nyid rtogs pa'o/ / gsal ba rtogs pa ni lta ba'i shes pa'i ming yin no/ /'og tu ni dus phyis de'i mthu las skyes pa'i rnam par rtog pa can gyi/ rnam par shes pa'i bzung ba yin pas so/ /de'i sgra ni rang gi mtshan nyid rtogs pa dang 'brel to/ /de las gzhan pa'i dngos po yang zhes bya ba la sogs pa gzhan gyis brjod pa ni ji skad du brjod pas mthong ba'i rjes la rnam par rtog pa ni mngon sum gyi tshad ma nyid do zhes bsal ba yin te/phyis ni thams cad du cung zad cig kyang don byed par nye ba btags pa med do/ /rjes su dpag pa'i rnam par rtog pa'i gzung bar bya ba'i spyi ni rgyu'am khyab par byed pa dang /rtags 'brel pa nges pa'i sgo nas don byed pa sgrub pa'i yul ma rtogs pa'i don byed pa rtogs pa'i phyir de'i yul tshad ma yin gyi/ 'di ni de ltar rtogs pa med pa'i phyir don byed pa sgrub par byed pa ni lta ba'i shes pa yin no zhes bya'o/ /'dir dpe ni/ dper na sngon po mthong ba na sngon po'o snyam du shes pa snang bzhin te zhes bya ba ni lhag ma'o//spyi ni cung zad cig kyang don byed par nye bar brtag par mi bya'o zhes rnal ma dang sbyar ro/ /'o na 'di rtags kyi rnam pa la snang ba'i spyi'i gnas skabs su de la dpe gzhan gyis ci zhig bya zhe na/ mthong ba thams cad kyi rjes las byung ba'i rnam par rtog pa mngon sum gyi tshad ma dang mtshungs par gzhan gyis khas blangs pa bsal ba'i phyir ro//gal te sngon po yin no zhes mthong ba'i rjes las byung ba'i rnam par rtog pa las snang ba'i spyi don byed par cis na brtag par mi bya/ gsal ba'i bsgrub par bya ba'i don de yang don gzhan gyis de'i don byed pa brtag par mi bya ba'i phyir de yang don byed pa sgrub pa med pas na dngos po med par thal bar 'gyur ro//'o na te tha mi dad pa'i shes pa'i mtshan nyid dang brjod pa'i rang bzhin bsgrub par bya ba sgrub par byed pa yin pas ma grub pa yin te/ rang gi bsgrub par bya ba'i rgyu yin pa'i phyir ro snyam du dogs pa la/de nyid ces bya ba smos te/ /lta ba'i shes pas nye bar dmigs pa gang yin pa de ni/ /sngon po'i rang gi mtshan nyid ni sngon po'i gsal ba'o/ /rnam pa de lta bus bsgrub par bya ba'i don byed pa yin te/ rnam pa de lta bu'i sgras ni spyi tsam du mngon par 'dod pa ni 'dra ba nyid ming gi rnam grangs yin pa'i phyir thun mong pa'i ngo bo 'di yang 'dra ba'i phyir ro//des na rnam pa de lta bu'i bsgrub par bya ba ni sngon po'i spyi bsgrub par bya ba tha mi dad pa'i shes par brjod pa'i mtshan nyid don gyi bya ba byed par nus pa ni rang gi mtshan nyid 'di yin no zhes de bzhin du bshad do//'di snyam du dgongs pa yin te/ 'di ltar gsal ba tha dad pa yang 'ga' zhig dang nye bar gyur pa las dang 'bras bu gcig tu nges pa'i mtshan nyid du mtshungs pa gcig tha mi dad pa byed pas na/ de las gzhan pa'i spyi dang ldan pa med de/ de lta ma yin na thug pa med par thal bar 'gyur ro/ /de ltar na tha mi dad pa'i shes pa dang brjod pa'i bdag nyid kyi don bya ba sgrub par byed do/ /gang gi phyir tshad ma med pa dang tshad mas gnod pa'i spyi yang khas blangs pas ci zhig bya/ 'di ltar rjes su dpag pa la sogs pa'i shes pa la ji lta ba'i rnam pa 'di mi gsal ba'i ngo bo snang ba la de lta bu'i rnam pa gsal ba mthong ba rnams la de nye bar mi rtogs so//gsal ba gcig kho na mthong ba'i dus su sngon po la sogs pa'i ngo bo gsal bar snang ba na de ji ltar mthong ba med par brtags nas bdag nyid la bdag nyid slu bar byed dam/gal te gsal ba'i ngo bo dang 'dres pas 'di lcags kyi gong bu'i me bzhin du snang ba yin no zhe na/ ma yin te/ thams cad du tha dad pa dang / /tha mi dad pa'i rnam par gzhag pa med par thal bar 'gyur te/ 'di'i lan ni gzhan du yang rnyed par sla ba'i phyir ro/ / spyi'i ngo bo la gsal ba dang mi gsal ba rnam pa gnyis ni med de/ gang gi gcig ni mthong ba'i rnam pa dang / gzhan rjes su dpag pa la sogs pa'i shes pa'i don gnyis su khas blangs par thal bar 'gyur te/ so sor snang ba tha dad pa nyid thams cad du dngos po tha dad par rnam par gzhag pa'i rgyu mtshan yin pa'i phyir ro//spyi la spyi gzhan yod par thal bar 'gyur ba spyi gzhan med par khas blangs pa'i phyir ro/ /'dis ni/ dngos rnams kun la ldog pa dang / /rjes su 'gro ba'i bdag nyid blo/ /skye ba'i bdag nyid gnyis med na/ /de yang rigs pa ma yin no//gang rung 'dir ni 'khrul pa dang / /nye bar btags par mi 'dod do/ /thams cad dus su blo brten phyir/ /'khrul par brjod pa de 'khrul pa/ /zhes bya ba gang smras pa de dag kyang bsal bye yin no/ /gal te gang gi phyir dbang po'i blor mngon par brjod par 'dod pa de'i tshe ma grub pa yin te/sngon po la sogs pa mi gsal ba'i rnam pa sngon po la sogs pa gsal ba'i rnam pa de la nye bar mi rtog pa'i phyir ro/ /gsal ba yang gnyis pa'i rjes su 'gro ba dang de yod na 'gyur na gsal ba gnyis kyi bar du ma khyab pa dang ldan pa de ji ltar de'i rjes su 'gro ba yin/ yang na khyab par nye bar dmigs par 'gyur na de ni de la rtogs pa med pa ga la yin/ gsal ba mi gsal ba'i ngo bor mi srid de gcig pa'i phyir ro/ /de skad du/ gal te rigs ni kun la yod/ /gcig de gsal bas gsal ba nyid/ /tha dad med phyir kun la mthong / / de yang gsal ba la ltos min/ /ces bya ba smos te/ gsal ba gcig la nye bar dmigs par gyur na yang 'jig rten na gsum po ma lus pa khyab pa'i ngo bo'am ma lus pa'i rten la khyab pa mthong bar 'gyur na/ /gang la cung zad gcig kyang skad cig ma la sogs pa bzhin du mthong ba dang ma mthong ba ni mi 'thad do//gal te mthong ba yang rten gcig la mthong bar mthong bar zhen gyi thams cad la ma yin no zhe na/ ma yin te/ rnam par rtog pas de mthong bar khas blangs pa'i phyir ro/ /nges pas yul du byas pa ma nges pa yin no zhes bya ba mi rigs te/ des na thams cad du song ba'i ngo bo mthong na don thams cad mthong bar thal bar 'gyur ro//de ni mthong ba de dang lhan cig nye bar dmigs pa'am/ de dang tha mi dad pa rang bzhin nye bar mi dmigs pa rigs pa ma yin na/ de ji ltar dbang po'i blo yis gnyis kyi bdag nyid yin/yang na rjes su dpag pa la sogs pa'i blo'i yin na/ de yang rang gi mtshan nyid snang ba med pas gang las gnyis kyi bar du 'gyur/ de rnams kyi spyi 'dzin pa rnams la gsal ba lta bu'i mtshan nyid gsal ba ni med de/ rang gi mtshan nyid la snang ba de med kyang de srid pa'i phyir dang /rnam pa gzhan rang gi shes pa la so sor snang ba'i phyir ro/ /gcig la rnam pa du ma mi rigs pas ha cang thal bar 'gyur ba'i phyir ro/ /de'i phyir tha dad pa'i don gyi gzung bar bya ba 'di tha mi dad pa'i spyi'i blo la so sor snang ba ni rang gi mtshan nyid snang ba ma yin te/ 'on kyang thog ma med pa'i phyin ci log gi rnam par rtog pa goms pa'i bag chags las skye ba yod pa de bzhin du snang ba'i phyir dang /brten pa'i phyir blo ni 'jig pa med par 'gyur na skad cig mar khas blangs pa'i phyir ro/ /'on kyang gnod pa med pa nyid de yang 'di mi srid de gnod par byed pa'i cha tsam bshad pa'i phyir ro//rgyas pa yang yod pa 'jig pa ji lta ba'i gnas skabs 'di nyid de dang der bshad pa'i gnod par byed pa nges par gzung bar bya'o/ /de'i phyir ji ltar gsal ba la spyi gzhan med kyang gcig pa byed pa de lta na tha mi dad pa'i shes pa brjod la 'jug par yang byed pa'i phyir/de nyid sngon po'i rang gi mtshan nyid dag spyi bsgrub par bya ba'i don byed par khas blangs pa'i phyir ro/ /gang yang / gal te spyi gzhan mi 'dod na/ /de yi 'jug pa nges pa can/ /ba lang nyid kyang med na ni/ /ci phyir ba lang blor mi nges/ /ji ltar tha dad nyid mtshungs kyang / / ldog rnams 'ga' la 'jug pa ni/ /ba lang nyid sogs rgyu mtshan ni/ /med kyang de bzhin blo 'byung 'gyur/ /zhes bya ba phyogs snga mar byas nas/ yul med na ni blo rnams ni/ /skye ba med par 'dod pa yis/ /gzhan las bye brag 'dod pa na/ /des na spyi de nges pa yin/ / des na de med skye na ni/ /yul med phyin ci log tu 'gyur/ /gzhan med na ni mi 'gag na/ /spyi 'di la ni nyes pa med/ /ces bya ba gang yang phyin ci log pa'i thal bar 'gyur ba'i skyon brjod pa 'di de bzhin gshegs pa'i gzhung lugs kyi rigs pa dri ma med pa'i blo la gnod pa med do//spyi'i blo rnams ni gnod pa byed pa'i rkyen gyi mtshan dang ldan pa'i phyin ci log tu khas blangs pa'i phyir ro/ /ci phyir nog sogs ldan rnams la/ /ba lang gang phyir de bdag nyid/ /ci phyir 'di de'i bdag ce na/ /rang bzhin yin zhes go bar bya/ /zhes bya ba smos pa ni/ / gsal ba'i rang bzhin thun mong ma yin pa gsal ba skye ba dang 'jig pa dag gi spyi skye ba med pa dang ldan pa mi rigs te 'gal ba'i chos dang ldan par tha dad par thal bar 'gyur ba'i phyir ro/ /gal te de yis bdag nyid 'dod/ /gsal ba'i skye dang skye med dang / /'jig dang 'jig med ci ste 'dod//de bzhin rjes 'gro med ces min/ /gsal ba'i skye bas mi skye grang / /rten gzhan las ni 'ong med pa/ /de yi yul na sngar yod min/ /de yis ji ltar 'brel pa yin/ /gal te gsal 'jig mi 'jig na/ /gsal ba gzhan la med 'gro ba/ /des stong yul la gnas pa med//rigs de gang la yod pa smos/ /gal te gsal ba'i skye ba dang / /rigs de 'brel par mi 'dod na/ ma bslad pa yi blo can la/ /de yi bdag nyid ji ltar 'dod/ /gal te sngon po la sogs pa'i rang gi mtshan nyid kho na spyi'i don gyi bya ba byed par de nyid des rtogs na rnam par rtog pa tshad mar 'gyur ro zhe na//de'i sngon po'i rang gi mtshan nyid ces bya ba smos te/ /bdag nyid des sngon po'i bsgrub par bya ba'i don bya ba byed par rang bzhin mthong ba nyid lta ba'i shes pa zhes pa'o// /de'i phyir bya ba grub pa las khyab par mi byed pa'i rnam par rtog pa'i shes pa ji ltar tshad mar 'gyur//'on te spyi nyid de ltar lhag par rtogs pa'i sngon po'i rnam par rtog pa'i tshad ma yod do/ /spyi don med pa'i bya ba byed pa ni ma yin te sngon po bsgrub par bya ba'i don byed pa'i sngon po dang lhan cig tu byung nas byed par 'gyur ba'i gsal ba'i rang bzhin nyid spyi yin par 'dod do zhe na//de'i rang gi mtshan nyid bzung ba'i dus phyis byung ba'i sngon po zhes bya ba smos te/ /gsal ba'i dus phyis byung bar nus pa'o/ /gal te rtags bzung ba'i dus phyis byung ba ni sngar bshad pa'i rnam pa gsal ba'i bsgrub par bya ba'i don bya ba byed pa ni spyi'i rnam par rtog pas gzhag par nus pa yin no snyam nas//sngon po'i rnam par rtog pa'i yul gyi sngon po'i spyis sngon po'i don gyis bsgrub par bya ba byed pa gtso bo la sogs pa byed pa yin no/ /de gsal ba ni rang bzhin du rung bar gyur pa la rnam par rtog pa'i ngo bo de mi srid pa'i phyir ro//rtag pa'i rang bzhin de 'dzin pa ni sngon po'i rnam par rtog pa'i yul gyis ni sngon po'i bsgrub par bya ba'am gzhan pa'i don bya ba mi byed de/ /rim dang / cig car la sogs pas 'gal ba'i phyir ro snyam mo/ /de ltar sngon po de mthong ba na sngon po'o zhes shes pa la so sor snang ba'i spyi ni cung zad cig kyang don byed par nye bar btags par mi bya'o//bsgrub par bya ba'i don byed pa med pa'i yul yin na yang mngon sum gyis rjes las byung ba'i rnam par rtog pa tshad mar thal bar 'gyur na ni ha cang khyab ches so snyam nas/de la snga na med pa'i don gyi rnam par shes pa yin no zhes tshad ma'i mtshan nyid dpyod pa bas khyad par can nye bar bstan pa'i phyir bshad pa ni/ de lta bas na zhes bya ba smos te/ gang gi phyir de ltar don byed pa med pa sgrub pa'i yul gyis ni mthong ba'i rjes las byung ba'i rnam par rtog pa yang tshad mar mi rigs so//de'i phyir kho bo cag 'dod pa'i tshad ma mi slu ba can shes pa zhes bya ba'i tshad ma'i mtshan nyid bsal nas ma rtogs pa'i don gyi yul can ni tshad ma ste/ de la snga na med pa'i don rnam par shes pa yin no zhes 'dir yang bdag gis kyang bya snyam nas tshad ma'i mtshan nyid gzhan byed pa ha cang khyab ches pas de yongs su spangs nas khyad par gyi khyad par can du nye bar bstan pa ste/khyad par ji ltar yin zhe na/ rang gi mtshan nyid ma rtogs pa yin no zhes bya ba khyad par la 'dis rjes su dpag pa'i rnam par rtog pa yang tshad mar grub la/ lta ba'i shes pa'i rjes las byung ba'i rnam par rtog pa tshad ma yin pa bsal ba yin no zhes bya bar thams cad legs par gnas so//de lta na sgrub pa'i rnam par rtog pa don bya ba med pa sgrub par byed pa'i yul gyis spyi ma rtogs pa rtogs pa'i tshad ma yang bsal to/ /rang gi tshig ni bsdus pa yin te dran pa nyid dgag pa'i rnam par rtog pa thun mong ba tshad ma ma yin pa'i rgyu ni/rang gi mtshan nyid rtogs nas zhes bya ba smos te/ lta ba'i shes pa de'i mthu las skyes pa can rang gi mtshan nyid rtogs pa'i stobs kyis byung ba'i rnam par rtog pa ni de'i rjes las dngos su skyes pa ni ma yin pa'i phyir dang /mthong ba'i 'du byed pas 'phangs pa'i dbang gis sngon po'i rang gi mtshan nyid kyi rnam pa mi gsal ba'i rjes su byed pa ni snang ba dang / brtag par bya ba dag gcig tu byed par brjod do/ /dngos po yod pa'i cung zad cig kyang 'di nyid rjes su byed pa med pa de ni dran pa kho na'o//ga las she na/ dngos po'i yul gyi 'bras bu yin pa'i phyir don dam pa ma yin no/ /skyes bu rang gi mtshan nyid la 'jug pa 'di'i 'bras bu ste der mngon par zhen pas so/ /gang gi phyir de'i yul can gyi 'bras bu yin pa'i phyir dran pa kho na yin pa de bas na mthong ba'i stobs las skyes pa'i rnam par rtog pa tshad ma ma yin te/de lta na dran pas nyams su myong ba'i rang gi mtshan nyid kyi cha'i yul yin du zin kyang don dam pa de'i yul ma yin pa nyid de/ rang gi mtshan nyid kyi dbang po'i blo 'gyur ba gsal ba'i ngo bo dran pa la snang ba med pa'i phyir ro/ / 'on kyang ji skad bshad pa'i 'bras bu kho na ste/ de yang sgrub pa'i rnam par rtog pa dang mtshungs pa'i phyir ji ltar 'di dran par mi 'gyur/ 'on te de la 'dir rjes su dpag pa'i rnam par rtog pa dran pa'i ngo bo yin yang tshad mar 'dod de'i ltar gang me ma yin pa las ldog pa kho na'i dngos po tsam tshang bang la sogs pa nyams su myong bar gyur pa de nyid phyogs kyi khyad par la du ba mthong bas dran pa yin pa de bzhin du sgrub pa'i rnam par rtog pa yang tshad mar 'gyur ro zhe na/dngos po'i ngo bo ma rtogs pa rtogs pa med pa'i phyir zhes bya ba smos so/ /'di snyam du dgongs pa yin te/tshang bang la sogs pa me ma yin pa las ldog pa'i dngos po tsam sngar nyams su myong ba gang yin pa de yul la sogs pa dang 'brel pa nyid la rjes su dpag pa ni dran pa ma yin no/ /'on kyang phyogs gang la sngar nyams su myong ba de dang 'brel pa de bas na bsgrub par bya ba'i chos can la dang dpe la bzung ba gnyi ga me ma yin pa las ldog pa'i dngos po'i ngo bo ma rtogs pa ma 'brel pa rnam par bcad nas rtogs par bshad pas 'di tshad ma yin gyi mthong ba'i rjes las byung ba'i rnam par rtog pa ni ma yin te/de phyin ci log pa'i phyir ro//gal te dngos po'i ngo bo ma rtogs pa rtogs pa med pa'i tshad ma yin par ci'i phyir na mi 'gyur zhe na/ dngos po'i rten can yin pa'i phyir ro zhes bya ba la sogs pa smos te/ tshad ma'i rnam par gzhag pa ni dngos po'i rten can nyid do/ /tshad ma'i yul bya ba mngon par 'dod pas brjod kyi dmigs pa'i mtshan nyid ni ma yin no//de lta ma yin na rjes su dpag pas kun du brtags pa'i spyi la dmigs pa ni dngos po la rten pa med pa'i phyir mtshan nyid rnam par gzhag pa ma khyab par 'gyur ro/ /gal te dngos po la brten nas tshad ma rnam par 'jog na/ bskal ba'i yul la dmigs pa ji ltar tshad ma yin zhe na/'dir yang gtso bo la sogs pa'i rnam par rtog pa nyid dngos po nye bar len pa des bsgrub par bya ba'i phyir/ gzhan yang dngos po la rten pa can nyid yod pa'i phyir nyes pa med do/ /'on te tshad ma'i rnam par gzhag pa ni dngos po la rten pa can kho na'o zhes bya ba ga las she na/don byed pa zhes bya ba smos te/ bde ba dang sdug bsngal gyi mtshan nyid du rung ba gang yin pa de ni nus pa'i yul can yin pa'i phyir ro/ /de don du gnyer ba ni thob pa dang 'dor ba'i mtshan nyid kyi don byed pa don du gnyer ba 'jug go/ /gal te don byed par rung ba la don du gnyer ba 'jug pa de lta na yang ji ltar tshad ma'i rnam par gzhag pa dngos po la brten pa yin/don byed par rung ba la brten pa de lta yin na ni 'gyur ro zhe na/ dngos po don byed rnams la rung ba gang yin pa de'i mtshan nyid do/ /de'i phyir don byed par rung ba la rten pa kho na dngos po la brten pa yin na ji ltar ma yin zhes bya bar 'gyur snyam du bsams pa'o//'dir tshad ma'i rnam par gzhag pa ni dngos po la brten pa bstan pa ni rang gi mtshan nyid ma rtogs pa zhes lhag par brjod do zhes brgya la gzhan smra na dngos po tsam gyi rgyu mtshan gyi tshad ma rnam par gzhag pa ni rang gi mtshan nyid la brten pa nyid ma yin no//gang gi phyir/ gal te yang ma rtogs pa ni rang gi mtshan nyid rtogs pa ma yin pa de lta na dngos po'i ngo bo ma rtogs pa'i rnam par rtog pa tshad mar 'gyur ro snyam nas ma grub pa'i don brjod pa na/ dngos po'i ngo bo ma rtogs pa zhes bya ba la sogs pa bshad zin to//de ma grub par brjod pa ni dngos po'i rang gi ngo bo ma rtogs pa rtogs pa tshad ma yin gyi cig shos ni ma yin no zhes ga las yin zhe na/ don byed par rung ba'i zhes bya ba'i brgal zhing brtag pa bshad zin to/ /de lta na dngos po'i yul can gyi tshad ma brjod pa ni rang gi mtshan nyid kyi yul can kho na bshad pa yin te/de nyid don byed par nus pa'i mtshan nyid yin pa'i phyir dang / spyi ni bzlog pa ni yin pa'i phyir zhes bya bar bsams pa'o/ /nyams su myong ba'i dus phyis byung ba'i sngon po'i rnam par rtog pa'i tshad ma yang gsal ba'i gtan tshigs lhag par bshad pa ni/de las kyang zhes bya ba smos te/ ji skad bshad pa'i sgrub pa'i rnam par rtog pa 'ba' zhig ma yin te/ sngon po rang gi mtshan nyid nyams su myong ba'i phyir dngos po nyid rang gi mtshan nyid do/ /de la mngon par zhen pa ni rang gi mtshan nyid la mngon par zhen pas yin gyi gzhan du na de la 'jug par mi rigs so//skyes bu'i 'jug pa ni rang rang gi mtshan nyid ma rtogs pa ni de'i mthu las skyes pa rnam par rtog pa tshad ma ma yin no zhes bya bar 'brel to/ /sngar ma rtogs pa'i don ma rtogs pa tshad ma ma yin par bshad do/ /phyis rtogs pa nyid rtogs pa'i phyir sgrub pa dang dgag pa'i ngo bo tha dad pa dag skye ba yin no//yang na/ gal te de'i yul gyi 'bras bu yin pa'i phyir zhes gang bshad pa de nyid lhag pa'i gtan tshigs thabs kyis bsal bar byas so/ /gal te de la mngon par zhen nas dngos po la skyes bu 'jug pa de lta na yang spyi ma rtogs pa 'dzin pa mthong bas tha dad pa'i tshad ma cis na mi 'dod ce na/bden te/ rang gi mtshan nyid kho na la zhugs na zhes bya ba smos te/ mngon sum lta ba'i shes par grags pa dang / grub pa dang bde ba tha mi dad pa'i phyir ro/ /grub pa ni ma mthong ba'i yul yongs su gcad pa'i mtshan nyid thob pa'o//bde ba ni de'i don byed pa rjes su sgrub pa'i mtshan nyid yongs su skyong ba'o/ /grub pa dang bde ba tha mi dad pa ni 'di yin no zhes de bzhin du bshad do/ /de la rnam par rtog pa dang rnam par mi rtog pa mngon sum tha mi dad pa grub pa ni rang gi mtshan nyid lhag par zhen pa'o//tha mi dad pa'i bde ba ni lta ba'i shes pa la sogs pa sgrub pa'i rnam par rtog par yang rang gi mtshan nyid kho na la 'jug go/ /'di'i dgos pa ni 'di yin te/ gang gi tshe rtogs pa dang mi rtogs pa'i sems gzhal bar bya ba gzhan gyi yul yin pa de'i tshe de la skyes bu 'jug cing bsgrub par bya ba'i don byed par rtogs pa'am 'jug pa nyid ni med do//de'i yul nyid du mngon par 'dod pa'i spyi tha mi dad pa'i shes pa kho na'i don byed par khas blangs pas rnam par rtog pa skye bar grub pa yin no/ /sngon por nyams su myong ba las gzhan pa'i gzhal bya ser po la sogs pa'i yul gyi shes pas ni sngon po'i dngos po la skyes bu 'jug pa ma yin te/sgrub par byed pa'i don byed pa yang 'ga' zhig tu yin pa'i phyir ro/ /de'i phyir lta ba'i shes pa nyid gzhal bya las gzhan gyi yul gyi bye brag can dag la de bzhin bshad pa ni rnam par mi rtog pa can las//gnyis kyi bdag nyid dngos po 'dzin zhes bya ba bshad pa ni ma yin no/ /de'i phyir sngon po mthong ba kho na rnam par mi rtog pa'i tshad mar rigs so/ /de tha mi dad pa la nye bar sbyor ba'i dran pa'i rnam par rtog pa nyid kyang mthong ba las tha dad pa ni ma yin te/de lta ma yin na tshad ma gzhan du rtog par byed pa ni 'bras bu med de/ dran pa dang / 'dod pa dang / sdang ba dang / rtsol ba la sogs pa tshad mar thal bar 'gyur bas tshad ma 'di tsam nges pa rnam par nyams par 'gyur ro/ /gang gi tshe sngon po la sogs pa'i dngos po gcig la rgyun mi 'chad par dbang po'i shes pa skye ba de'i tshe snga ma dang grub pa dang bde ba tha mi dad pa'i phyir phyi ma'i dbang po'i shes pa rnams tshad ma ma yin par thal bar 'gyur bas ma nges pa yin no zhes tshad ma bslad par smra bas bstan pa ni/gal te mngon sum snga ma dang phyi ma zhes bya ba la sogs pa smos te/'di dag gi lan ni phyi ma tshad ma ma yin par thal bar mi 'gyur te/ gang gi phyir du ma la grub pa dang bde ba tha dad pa'i phyir ro/ /'di ltar skad cig ma re re'i yongs su gcod pa'i yul gyi mtshan nyid ni grub pa'o/ /de'i don byed pa sgrub pa'i mtshan nyid ni bde ba yongs su skyong ba ste ngo bo tha dad pa'o//de'i phyir mi mthun pa'i phyogs las ldog pas gtan tshigs ma nges pa ma yin no/ /gang gi tshe du ma grub pa dang bde ba tha dad pa ni/ skad cig ma'i bye brag gis bsgrub par bya ba'i don du 'dod pa na'o/ /gang gi tshe skad cig ma'i bye brag gis phan pa dang mi phan pa'i mtshan nyid thob pa dang yongs su spong bar 'dod pa'i rnal 'byor pa rnams ni gzhan pa la phan pa nye bar bstan pa yin te/'ga' zhig gi rnam pa 'gas la lar nye bar mkho ba yin pa de'i tshe'o/ /dper na mthong ba 'di lam gyi sdug bsngal la chos shes pa'i bzod pa mthong bas bag la nyal gyi bag chags 'gog pa bzhin no//de'i gzhi la 'gal ba skye ba'i phyir ro/ /sdug bsngal la chos shes pa ni nyon mongs pas dben pa'i mya ngan las 'das pa'i mtshan nyid kyi thob pa skyed pa yin no/ /bag la nyal dang 'gal ba'i rten la brtan pa skyed nas/ / des de dag 'dzin pa ni gzhan gyi sems pa la tha dad pa'i tshad ma yin no/ /gzhan la phan pa'i sbyin pa dang dbang bskur ba dang ldan pa dngos po ma lus pa rgya che ba la khyab pa'i snang ba la gzigs pa nang gi bdag nyid kyi bcom ldan 'das ni don gyi skad cig ma 'ga' zhig gis 'ga' zhig gi gzhan gyi don du rjes su bzung ba'am 'ching ba yin no zhes bya'o//dngos po thams cad kyi skad cig ma re re rnams kyi mtshan nyid la gzigs pa rnams kyi mngon sum gyi sems de'i yul skad cig ma rnams la tha dad pa'i don byed pa dang bcas par nye bar sbyor ba'i grub pa dang bde ba tha dad pa'i phyir ro/ / de gang gi tshe mngon sum rnams skad cig ma tha dad pa mthong ba'i dbang du byas par brjod pa de'i tshe tha dad pa la nye ba so so ba nyid la ma nges pa med do/ /yang na don thams cad gcig tu byed par 'dod pas mngon par zhen pa tha snyad du byed par skyes bu mngon par 'dod pas brjod na/de'i tshe ma lus pa nyid kyis sngon po'i rgyun gyi don gcig pa dang / /brten pa'i ngo bor bsgrub par bya ba'i don gcig pa'i bdag nyid du mngon par zhen pa'i phyir phyi ma yang tshad mar mi 'dod pas ma nges pa ga la yin ces bstan pa ni 'bras bu thun mong pa zhes bya ba smos te/ de rgyun du gnas pa'i skad cig ma thams cad la gcig tu mngon par zhen nas tha snyad du byed do//gang thun mong pa'i skad cig re re la phan tshun du rgyu byed pas tha dad du tshug kyang don dam par phyin ci log pas gcig tu mngon par 'dod pa'i 'chos pa la sogs pa sngon po la sogs pa'i 'bras bu'o//de la phyi ma'i shes pa'i skad cig ma de dag gi mthus don thob par byed pa'i nus pa tha dad pa med do/ /mngon sum snga ma'i yul gyi skad cig ma kho na la de rnams 'jug pa na dang po 'di nyid de la tshad ma yin no/ /de lta na don byed pa don du gnyer ba rnams de sgrub par byed pa thob par nus pa'i shes pa tshad ma'i tha snyad du byed do//blo ma nyams pa'i don byed pa'i sgrub par byed pa tha dad pa nyid kyis tshad ma las tha dad pa'i tha snyad shes pa rnams la rigs so/ /de lta ma yin na dran pa la sogs pa yang tshad mar thal bar 'gyur bas bsal bar bya ba'am 'bras bu med pa'i tshad ma rnam par 'jog pa la rtogs pa dang ldan pa ji ltar gus par byed/de dag thun mong gi 'bras bu'i nus pa tha mi dad pa gang zhig yin snyam na/ du ba gzhan dang gzhan gyis zhes bya ba smos te/ de'i gzhal bar bya ba me de dang nye ba de rnams la de'i yul lta bu rjes su dpag pa'i shes pas me tsam bsgrub par bya ba'i don la 'bar ba la sogs pa la su zhig slu ba yin/de'i don bya ba sgrub par byed pa thob par nus pa tha dad pa med pas ji ltar tshad ma tha dad par mkhas pa la mi rigs pa de bzhin du 'dir yang yin no/ /gang gi tshe gdung ba lnga pas gdung bar 'dod par gyur pa de'i tshe du ba gzhan dang gzhan gyis gzhal bar bya ba'i me dang nye ba'i yul la yang rjes su dpag pa'i nus pa tha dad pa'i tshad ma bsal bar mi nus so//de ltar na ji ltar sngon po mthong nas sngon po'o snyam pa'i shes pa zhes bya ba'i dpes sngon po'i rnam par rtog pa tshad ma yin pa bsal nas rnal ma'i don la nye bar sbyor ba/'dis ni zhes bya ba smos te/ sngon po'i rang gi mtshan nyid mthong ba'i dus phyis byung ba'i sngon po'i rnam par rtog pa tshad ma bsal ba nyid do/ /de min 'dod pa'i phyir rnam par rtog pa la yang don gyis phan 'dogs so zhes gzhon nu ma len gyis smras pa na/ phyogs la sogs pa mthong ba'i dus phyis byung ba chos can gyi rnam par rtog pa dang /de dang 'brel pa rtogs pa'i dus su me'i rang gi mtshan nyid mthong ba'i dus phyis byung ba'i me'i spyi'i yul la bsgrub bya'i chos kyi rnam par rtog pa dang / du ba mthong ba'i shes pa'i rjes las byung ba'i spyi snang ba'i rtags kyis rnam par rtog pa dang /sogs pa smos pas chos dang chos can gyi 'brel pa'i rnam par rtog pa dang tshad ma'i rjes las byung ba'i chos la sogs pa'o/ /rang gi ngo bo tsam gyi yul la lta ba'i ming can gyi mngon sum du song ba yin gyi rnam par rtog pa med pa ni rtags dang chos can gyi 'brel pa de bzhin du mi 'dzin no snyam pa'i 'jigs pas tshad mar khas blangs pa gang yin pa de bsal ba ni spangs pa yin no//snga ma rang gi mtshan nyid kyi yul mthong ba gang yin pa la gzhan gyi lta ba'i shes pa zhes tha snyad byed pa de nyid tshad ma yin gyi/ de'i stobs las byung ba'i rnam par rtog pa ni ma yin te/ji skad bshad pa'i rigs pas de dag legs par gnas so/ /phyogs kyi chos dang bsgrub par bya ba'i chos can mngon sum dang rjes su dpag pas grub par nges pa'i phyir ro/ /de nyid kyis mngon sum gyi phyogs kyi chos nges par brjod pas zhar la mthong ba'i rjes las byung ba'i rnam par rtog pa tshad ma yin pa bsal bas mngon sum rtogs pa dang bral zhing ma 'khrul ba yin par bstan to//gal te de lta na ci'i phyir rjes su dpag pa bstan pa'i phyir 'di tsam pa yin gyi yang dag pa'i shes pa bstan pa'i phyir zhes thun mong du ma yin no zhe na/ grangs la sogs pa la log par rtog pa nyid bsal bas kyang 'dir de'i yul yang bsal ba yin te/lkog tu gyur pa rtogs pa ni rjes su dpag pa la brten pa yin no/ /ci'i phyir zhe na/ phyogs chos kho na dang / de'i chas khyab pa nyid dang / gtan tshigs dang rgyu mtshan dang de las gzhan ma yin no zhes brjod pas lkog tu gyur pa'i don gyi yul can gyi tshad ma thams cad rjes su dpag pa'i nang du 'dus pas grangs la log par rtog pa bsal bas ni yang dag pa'i shes pa'i yul la log par rtog ba bsal to//de ltar khyab par byed pa'i cha go bar bya bar rtogs pas de'i chas khyab par brjod pas rjes su dpag pa'i yul ni spyi yin la mngon sum gyi yul ni rang gi mtshan nyid yin no zhes bstan par 'gyur te/de thun mong yin pa'i phyir ro/ /thun mong ma yin pa yin na yang khyab par byed par mi rigs pa'i phyir dang / rnam par rtog pa'i yul yin pa'i phyir ro//de la dang por thun mong ma yin pa'i yul yin no zhes brjod pas rang gi mtshan nyid mngon sum gyi yul kho nar bshad do/ /mthong ba nyid tshad ma yin no zhes bya ba bshad pas tshad ma'i 'bras bu nyid bstan pa yin te/ de ni don rtogs pa'i ngo bo yin pa'i phyir dang /de bzhin du de'i ngo bo yin pa'i phyir ro/ /de bzhin du de'i sbyor ba rnam pa gnyis bstan par bya ba'i phyir gzhan gyi don gyi rjes su dpag pa bshad par bya ba yin te/ de'i tshul gsum pa'i rtags bshad pa'i ngo bo yin pa'i phyir ro/ /mdor bsdus nas rjes su dpag pa bstan par 'dod pa yin na de yang thams cad kyang yod pa'i phyir na 'dir ci'i phyir rjes su dpag pa bstan pa'i phyir zhes bshad par bya zhe na/bden na gtso bo yin pa'i phyir de smos so/ /'di ltar gtso bo ni skyes bu la nye bar mkho ba'i de kho na nyid 'phags pa'i bden pa bzhi'i rjes su dpag pa kho nas nges pa yin pa de gtso bo yin no//de ltar mngon sum gyi yul la yang slu ba srid pas rjes su dpag pa gzhan gtan la 'bebs pa'i rgyu mtshan yin pa de'i phyir de gtso bo yin pa dang 'jug par byed pa yin pa 'di'i gtso bo yin no/ /de lta na yang gang nyams su myong ba'i 'bras bu bde ba dang sdug bsngal sgrub par byed pa'am nyams su myong bar gyur pa 'bras bu mthong ba la de 'jug pa'i yul ma yin te/'bras bu grub pa'i phyir ro/ /de'i phyir gang ma 'ongs pa'i 'bras bu bde ba dang sdug bsngal sgrub par byed pa'i mngon sum de la yang rjes su dpag pa kho na rab tu 'jug go/ / de ma 'ongs pa'i bde ba dang sdug bsngal du rung ba nyid ni mngon sum gyis nges pa ma yin te/ 'bras bu lkog tu gyur pa'i phyir ro/ /de skad du/ mngon sum ma yin pa'i rgyu las 'bras bu dngos po mi rtogs so zhes bshad do/ /de'i phyir sngar nyams su myong ba'i bde ba dang sdug bsngal sgrub par byed pa dang chos mthun pa mngon sum gyi yul yin du zin kyang ma 'ongs pa'i dngos po rung ba mngon sum gyis nges par mi nus so//de skad du/ dper na mthong ba dang chos mthun pa de bzhin du sgrub par byed pa'i rjes su dpag pa de nyid thob bo zhes bya ba smos so/ /de lta na gnyi ga yang 'jug par byed pa nyid de gnyi gas don yongs su bcad nas 'jug go zhes bshad pa ji ltar yin zhe na/bde ba dang sdug bsngal sgrub par byed pa me dang chu la sogs pa rang gi ngo bo mngon sum du grub la ma 'ongs pa'i 'bras bu rung ba'i yul ni rjes su dpag pas yin pa'i phyir gnyi ga yang 'jug par byed pa dang /yang dag pa'i shes pa sngon du song ba nyid phan pa dang mi phan pa thob pa dang yongs su spangs pa dag la ma 'ongs pa'i 'bras bu'i rung ba'i yul la mngon sum gyis nges pa ma yin no zhes bshad zin to/ /tshu rol mthong bas ma 'ongs pa'i 'bras bu rung ba nges pa de'i phyir rjes su dpag pa gtso bo yin pas de smos so zhes bya ba spros pas chog pas rgya cher mi sbyar ro//de la rang bzhin mi dmigs pa dang / 'bras bu'i phyogs kyi chos nges pa'i bsgrub par bya ba'i thabs mtshungs pas tha mi dad par bshad do/ /rjes su 'gro ba dang ldog pa nges pa yang bsgrub par bya ba'i thabs tha dad pas tha dad par bstan pa 'bras bu yin no//re zhig rang bzhin gyi gtan tshigs kyi rjes su / 'gro ba nges par rang gi tshad mas rgyu mtshan bstan pa ni/ rjes su 'gro ba nges pa yang zhes bya ba smos te/ phyogs kyi chos nges pa 'ba' zhig bstan pa ni ma yin no//'on te rjes su 'gro ba nges pa gang yin pa yang rang bzhin gyi gtan tshigs la brjod do zhes bya ba lhag ma'o/ /sgrub par byed pa'i chos kyi yod pa tsam ni thob pa la sogs pa rgyu mtshan gzhan la ltos pa ma yin no/ /de dang rjes su 'brel pa'i rjes su 'gro ba'i khyab pa de grub pa gang yin pa de ni rang zhin gyi gtan tshigs kyi 'brel ba nges pa'o//sgrub par byed pa'i chos kyi dngos po tsam dang 'brel par su zhig la grub ce na/ bsgrub par bya ba'i chos dang ngo / /bsgrub par bya ba ni 'dir chos dang chos can gyi spyi'i phyogs gcig yin pa'i phyir chos yin no zhes bya ba de bzhin bshad do//gang dang gang la sgrub par byed pa'i chos yod pa de dang de la bsgrub par bya ba'i chos kyang rgyu mtshan gzhan la mi ltos par yod pa'i phyir don de ni rang bzhin gyi gtan tshigs kyi rjes su 'gro ba nges par grub pa yin no/ /ji ltar bsgrub par bya ba'i chos dang sgrub par byed pa'i chos yod pa tsam la rag las pa yang yin zhe na de yod pa na sgrub par byed pa'i chos de yod pa ni 'di'i rang bzhin yin te de yod pa des de yod pa yin pas so//gang gi tshe sgrub par byed pa'i chos dang bsgrub par bya ba'i chos de'i rang bzhin gyis de tsam dang 'brel pa ji ltar yin zhe na/ rang bzhin med par thal bar 'gyur ba'i phyir ro//'o na ni de'i rang bzhin tha mi dad pa'i phyir ji ltar bsgrub par bya ba dang sgrub par byed pa yin zhe na/ dngos su na zhes bya ba smos te/ don dam par ro/ /bsgrub par bya ba dang sgrub par byed pa'i rnam par rtog pa'i dus su de ma yin pa las phan tshun ldog pa'i don gyi rgyu mtshan rtog pa can gyi blo tha dad par snang bas bsgrub par bya ba dang /sgrub par byed pa la nyams pa med do/ /'di don dam par na sgrub par byed pa dang bsgrub par bya ba'i chos dang chos can dang byas pa la sogs pa tha dad par dmigs par bya ba med de/ 'brel pa med pas bsgrub par bya ba dang sgrub par byed pa mi rigs pa'i phyir ro//gal te byas pa dang mi rtag pa la sogs pa la 'du ba'i 'brel pa yin no zhe na/ ma yin te/ de yang don gzhan la 'dis don 'di la 'du ba zhes bya ba 'brel pa med par 'gyur ba de'i gnas skabs yin par 'brel pa gzhan brtag dgos pas thug pa med par thal bar 'gyur ba dang /'du ba'i yod par brtag na ni byas pa la sogs pa rtag pa dang bdag la sogs pa 'dod na'ang 'gyur ro/ /gang byas pa nyid la sogs pa sgra kho na la 'du ba stobs gang yin pas de nyid la 'jug par 'gyur na/ de nyid rtag pa mngon par 'dod pa rnams la yang gcig pa nyid du khas len pa'i phyir byas pa la sogs pa bdag la sogs pa 'jug pa gang gis na bsal bar nus/'on te gang ma byung ba las byung ba'i chos dang byung nas kyang med pa'i chos ni mi brtan pa'i ngo bor yod pa de nyid la byas pa la sogs pa 'jug go zhes rnam par gzhag go zhe na/de lta na de nyid ma byung ba las byung ba rang bzhin nam byung zin pa mi brten pa'i dngos po nyid la de phyin ci log tu sgro 'dogs pa rnam par gcad pa'i yul can gyi rnam par rtog pa'i blo rgyu mtshan du ci ste mi 'dod/ de nyid kyis don dam par tha mi dad pa dang ldan pa'i chos dang chos can 'jug na bar du lhag pas ci zhig bya/byas pa'i phyir zhes bya ba la sogs pa ldog pa dang ldan pa ni khas blangs dgos so/ /de lta na/ yod pa tsam gyis byas pa'i phyir/ /zhes bya ba la sogs pa'i chos kyi bsgrub par bya ba'i chos rtogs pa'i rgyu mtshan ma yin no/ /de dag rtag du nye ba nyid kyis gtan tu de'i chos rtogs par thal bar 'gyur ro//'on kyang rnam par rtog pa'i snang ba kho na ste/ de yang rnam par rtog pa'i rang gi snang ba nyid kyi rnam pa phyi rol dngos po lta bur mngon par zhen pa'i rjes su 'brangs nas byas pas mi rtag pa la sogs pa'i dngos po'i ngo bo rtogs par byed kyi/don dam par na reg pa med kyang de'i ngo bo brgyud pas de'i rgyu yin pa'i phyir ro/ /ldog pa'i chos kyang de skye ba'i rgyu mtshan tsam gyis yongs su brtag par bya ba yin no/ /de rnam par rtog pa'i rgyu mtshan gang yin pa de nyid rnam par rtog pa skye ba'i rgyu mtshan du yod pa de mchog yin pas gdon mi za bar khas blangs par bya ba'i phyir dang /ldog pa dang ldan pas chos grub zin pa'i don du khas blang ba'i phyir de brtags pas chog go/ /gdon mi za bar mi rtag pa tha dad pa'i sgo nas kyang dngos po kho na la gnas pa'i bdag nyid du rtogs par bya ba yin te/de dang rjes su mthun pa don byed pa don du gnyer ba rab tu 'jug pa'i phyir ro/ /gzhan du na mi rtag pa las tha dad pa'i rtag pa yin pa'i phyir de khong du chud pa don du gnyer ba sgra 'di mi rtag par bsgrub par bya ba don byed pa don du gnyer bas sgra rtag pa la sogs par bsams nas ci mi rtag pa phan pa med pa dpyod par byed dam/gal te rtag pa la yang mi rtag pa khong du chud pas de nyid la 'jug te cis na sgra mi rtag pa'i bdag nyid yin/ de'i sgo nas rab tu rtogs so zhe na/ /ci bar du gcod pa 'dis ci zhig bya/ bar du gcod pa med pa kho nas rtogs pa yod na mdzes te/de nyid don du gnyer ba'i phyir ro/ /de 'dir shin tu spros pa ni yongs su rdzogs par dka' bas chog go/ /rgyal dpog pa gang dag gis bsams pa/ gang dag shin tu tha dad pa dang ldan pa'i chos de dag nyid 'di ni rigs pa can la sogs pa la skyon yin gyi kho bo cag rnam pa 'gas tha dad pa dang /tha mi dad pa dang ldan pa'i chos rnams kyi rang bzhin la skyon med do zhe na/ de dag kyang dngos po'i ngo bo sgrub par byed pa'i chos kyi ngo bo khas blangs nas bsgrub par bya ba chos rnam pa 'ga' zhig tha dad par khas blangs pa'i 'bras bu cung zad cig nye bar ma mthong ste/bsgrub par bya ba dang sgrub par byed pa'i dngos po ni rnam par rtog pa tha dad pa'i sgo nas 'thad pa yang yin no/ /bdag nyid gcig pa la rnam pa 'ga' zhig tha dad pa ni rigs pa ma yin te/ rang bzhin gcig pa la tha mi dad pa'i phyir ro/ /gal te de las kyang de dag rnam pa 'ga' zhig gis tha dad pa dang tha mi dad pa de nyid yin no zhe na/ma yin te/ thug pa med par thal bar 'gyur ba'i phyir ro/ /de lta na chos de dag gi rang bzhin gcig pa yin du zin kyang tha dad pa ldan pa des na rang bzhin gyis rnam pa 'ga' zhig tha mi dad pa'i rgyu mtshan ni tha mi dad pa gzhan pa zhig gi rang bzhin khas blang bar bya dgos te/de bzhin du de las gzhan pa yin no zhes tha dad pa dang tha mi dad pa mtha' yas pa'i rang bzhin brgyud pa blos brtags su zin kyang / gnyis ga'i ngo bo mtha' yas pa'i rang bzhin brgyud pa snang ba ni med pa'i phyir de brtags pas bdag nyid ci slu bar byed dam/khyed rnam pa 'gas tha dad pa khas blangs pas na tha dad pa'i phyogs rnams kyi ji ltar skyon gyi gnas skabs med pa yin/ gang bdag nyid kyi mdun na gnas pa la 'di chos so 'di chos can no zhes rnam par gzhag par bya'o/ /gal te des tha dad pa de ni tha dad pa kho na yin pa'i phyir ma nges par rtsod pa ga la yin/'on te tha mi dad na 'di sgrub par byed pa'i chos sam 'di bsgrub par bya ba'i chos sam 'di ni chos can zhes tha dad pa de ji ltar don dam par rnam pa gsum 'grub pa yin/ de'i phyir de dang de las gzhan pa'i ngo bo ldog pa'i brten pa ni blos brtags nas tha dad pa dang ldan pa lta bu'i chos dang chos can du snang bas bsgrub par bya ba dang sgrub par byed pa'i dngos po de tsam dang rjes su 'brel pa'i dngos po de dang de'i rang bzhin yin par rigs so snyam du bsams pa'o//de'i dngos po ni ngo bo'i tshig gis bshad do/ /'dir yang dngos po de ngo bo gang dang gang gi rgyu las byung ba bsgrub par bya ba'i chos dang /sgrub par byed pa'i chos kyi ngo bo tsam dang rjes su 'brel pa su zhig yin zhe na/ sgrub pa zhes bya ba smos so/ /de ni dngos su de'i rang bzhin yin pa bsgrub par bya ba las ldog pa'i mi mthun pa'i phyogs de la gtan tshigs kyi gnod par byed pa'i tshad ma gang yin pa des bzlog pa'i chos dang mi mthun par 'jog pa'o//gang gis bsgrub par bya ba'i gtan tshigs de la mi 'jug ste 'gal ba gnyis gcig la lhan cig par mi srid pas de la 'jug pa ni gnod pa can gyi tshad ma rab tu 'jug pa dang /bsgrub par bya ba nyid kyi dngos su de'i rang bzhin yin pas gnod pa can gyi tshad ma 'jug pa bshad do/ /de'i mi mthun pa'i phyogs la gtan tshigs ldog pa yod pa ni/ /bsgrub par bya ba'i chos can la 'jug pa'i phyir bsgrub par bya ba'i chos can la don gzhan la med pa'i sgrub par byed pa'i chos ni rang bzhin du grub bo//de yang dngos su de'i ngo bo nyid yin pas sgrub par byed pa'i chos yod pa tsam dang rjes su 'brel pa ni bsgrub par bya ba'i chos su 'gro ba nges pa yin no/ /gang dang gang la sgrub par byed pa'i chos yod pa de dang de la bsgrub par bya ba yod do zhes de ltar dngos po nye bar skye'o//'di'i dpe ni/ dper na gang yod pa de ni skad cig ma kho na yin no zhes nges par bzung bas ni khyab pa smras pa yin no/ /sgrub pa'i chos kyi ngo bo tsam dang rjes su 'brel ba de dag gi ngo bo bshad pa yin no/ /rgyu mtshan gzhan med pas yod pa kho na skad cig ma yin no zhes bya bar bstan pas de yang dngos su na de'i rang bzhin yin pas grub pa yin no//de grub pa'i thabs gnod par byed pa'i tshad ma yod par bstan pa ni/ skad cig ma ma yin pa skad cig ma nyid las bzlog pas yod pa'i don byed nus pa dang 'gal ba'i phyir don gyi 'bras bu'i bya ba grub pas de dang 'gal ba'o//de'i mtshan nyid ni don byed pa'i mtshan nyid do/ /dngos po nyid kyi don byed par nus pa'i bdag nyid gang yin pa de ni de bzhin du bshad do/ /don byed pa ni de'i gnas pa'i ngo bo'i dngos po nyid mtshan par bya ba ste/ de rnam pa de lta bus dngos po nyid nyams pa ni ldog pa'o/ /de las bzlog pa'i ngo bos med pa nyid 'dren pa'i phyir na/ gnod par byed pa'i tshad ma 'di yang khyab par byed pa mi dmigs pa'i ngo bo ste phyis skabs su bab pa dang rang nyid chad par 'gyur ro/ /de ni gnod par byed pa'i tshad ma yod pa 'dis bsgrub par bya ba'i chos kyi ngo bo sgrub par byed pa'i chos rang bzhin du grub bo//de yang dngos su na de'i rang bzhin yin pas sgrub par byed pa'i chos tsam dang rjes su 'brel bar grub po/ /de ltar na rang bzhin gyi gtan tshigs la bzlog pa la gnod pa can gyi tshad ma yod pa de'i bdag nyid du grub pas rjes su 'gro ba nges pa bshad pa yin no//'bras bu'i gtan tshigs bstan par bya ba ni/ 'bras bu'i gtan tshigs kyi rjes su 'gro ba nges pa zhes bya ba'i skabs yin te/ 'dir rgyu nyid dang 'bras bu dag gi ngo bo ci zhig /rgyu nyid dang 'bras bu nyid dang / /der grub pa ni rtogs pa zhes bya'o//de ni 'bras bu'i gtan tshigs kyi rjes su 'gro ba nges pa dang / ji ltar rgyu dang 'bras bu'i dngos por grub pa de ltar bstan pa ni/ 'di lta ste zhes bya ba smos so/ /'di lta ste zhes bya ba'i sgra ni nye bar mtshon pa'o/ /du ba la sogs pa 'di me 'di dmigs na nye bar dmigs so zhes bya ba 'brel pa'o//'dis ni rgyu dang 'bras bu'i dngos por grub pa mngon sum gyi byed pa yin no/ /mngon sum 'ba' zhig gis rgyu dang 'bras bu'i dngos po dngos po the tshom med par grub pa ma yin te/ 'on kyang sngar mi dmigs pa 'jug pa dang lhan cig brtan par bya ba ni/dmigs pa'i rig byar gyur pa'i mi dmigs pa zhes bya ba smos te/ gal te du ba la sogs pa de dmigs pa'i rig byar gyur ba'i nye bar dmigs pa'i rkyen yod la snang ba'i bdag nyid kyi yod pa ni dmigs par 'gyur ro/ /me la sogs pa'i tshogs pa nye ba las sngar me la sogs pa'i tshogs pa nye bar dmigs pa las 'bras bu yod par nye bar dmigs pa 'grub bo//nye bar dmigs pa'i rkyen gzhan ma tshang na ni mi skye bar nye bar dmigs pa'i ngo bo yod pa de'i yul nye ba yin du zin kyang dmigs pa'i rig byar ma gyur pas me la sogs pa'i tshogs pa nye bar gyur pa las sngon du nye bar dmigs pa ni med do//dmigs pa'i rig byar gyur ba las mi dmigs pa me la sogs pa'i tshogs pa nye ba skye ba las sngar gzhan nas 'ongs pa'am de yul dang dus nye bas rtsig pa dang re lde la sogs pa la de skye ba'am de'i yul na yod pa yin zhes bya ba rnam pa gsum gsal ba yin no//rnam pa 'di rnams kyis de ma yin pa'i 'bras bu 'gyur na ni 'gyur ro/ /de'i phyir mi dmigs pas de ma yin pa'i 'bras bu'i dogs pa bsal nas de yod na yod par mngon sum gyis bzung ba'i rgyu mtshan gyis rgyu dang 'bras bu'i 'brel pa the tshom med par grub po//gal te me dang bud shing la sogs pa'i dngos po nges pa nye ba na mi snang ba'i bdag nyid 'ga' zhig las du ba 'byung bar 'gyur ro zhes dogs pa la/ me dang bud shing la sogs pa tha dad pas rjes su byed pa'i du ba ni tsan dan dang ga pur dang / a ka ru dang / skra dang bal la sogs pa'i bud shing tha dad pa de'i rjes su mthun pa'i ngo bo tha dad pa 'di mthong ba'i phyir dang /bud shing gi 'gyur ba che ba dang chung ba'i byed pas me de dang rjes su mthun pa dang me dang bud shing la sogs pa nye ba mi snang ba'i bdag tu nges pa nye ba las mi rigs te/ 'brel pa med pa'i phyir ro/ /'brel pa nyid ni rgyu 'am 'bras bu'i dngos po las yin no//de'i 'bras bu yin na me dang bud shing phrad pas rgyun mi 'chad par du ba skye bar mi 'gyur ro/ /de yod na yong pa'i rjes su byed pa 'di yang 'bras bu nyid yin na/ de yang du ba la yang mtshungs so/ /bud shing la sogs pa mi snang ba'i bdag nyid ni rgyu ma yin te bud shing la sogs pa rang gi rgyu shing la sogs pa las 'byung ba mthong ba'i phyir de la yang de bzhin du dngos po rtogs na de nyid kyi lan brjod par bya'o//yang rtsod na yang de kho na la lan yin pas thug pa med par 'gyur ro/ /'dis tshogs pa gcig la rag las pa yang bsal ba yin no//de'i rjes su 'gro ba dang ldog pa'i rjes su byed pa du ba nyid kyi rgyu brtag par bya'o/ /gal te de yang me dang mtshungs par de yang rgyu yod pa yin no zhe na/ me la sogs pa yod na gdon mi za bar yod pa la gzhan yang rgyu nyid du brtag par mi bya ste rgyu mtshan med pa'i phyir ro//'bras bu la tha dad pa'i rgyu mtshan gyis rgyu'i dngos por brtag na/ ji ltar me dang bud shing la sogs pa'am gzhan gang yang rung ba yod na yong ba 'am gzhan yang de yod par nges pa'i nye ba'i rgyu las yin na de tsam gyis ni me la sogs pa'i rgyu nyams pa ni ma yin no/ /gang las du ba la sogs pa mthong ba'i phyir nges pas de la 'jug na de ni slu bar 'gyur ro//sems can thams cad kyi las kyi dbang gis skye ba nyid kyang 'gro ba sna tshogs su mthong ba'i rgyu nyams pa ni ma yin no/ /de'i 'bras bu mthong ba'i phyir 'jug par 'gyur ba na de ma yin pa thob pa med pa'i phyir ro//zhar la 'ongs pas chog go/ /ci yang 'dir rgyu dang 'bras bu'i dngos po la mi dmigs pa dang lhan cig pa'i mngon sum gyi rgyu mtshan gyi ngo bo yin zhe na de yod na ni yod la med na ni med pas zhes bya ba smos te/ rgyur mngon par 'dod pa gang yin pa de kho na yod la 'bras bur mngon par 'dod pa yod pa kho na dang /de med pa ni rgyur mngon par 'dod pa de med na med pa nyid ni 'bras bur mngon par 'dod pa med pa'o/ /de nyid rgyu dang 'bras bu'i yod pa las gzhan ma yin no/ /de ni de dag las gzhan gyi rang bzhin du gyur pa rgyu dang 'bras bu'i ngo bor ma rtogs pa 'am/yang na rang bzhin du gyur pa kho na'i rgyu dang 'bras bu'i bdag nyid yin/ gang gi tshe dang po'i phyogs yin pa de'i tshe thams cad rgyu dang 'bras bu'i dngos por 'gyur te/ rgyu'i dngos po nges pa med pa des na thams cad thams cad kyi 'bras bur thal bar 'gyur ba dang / rang bzhin gyis de'i ngo bo yin na ni gzhan dang 'brel pa yang de'i ngo bo ma yin no//dngos po so sor nges pa'i ngo bo spangs nas gzhan dang ldan pa yang ma yin te/ ngo bo gzhan la mi brten pas so/ /gang gis gzhan dang ldan pa de dag gis snga ma'i ngo bo ni 'jig pa yin te/ 'jig pa'i rgyu ni mi rigs par phyis bshad par bya'o//sngar med pa yang skye ba ma yin te/ de las don gzhan pa nyid du thal bar 'gyur ro/ /de rnams la grub pa rnams sngar ma grub ba tha mi dad pa'i rgyu can ni de'i rang bzhin du mi rigs pa'am tha dad pa dang tha mi dad pa 'di dag rgyu med par 'gyur ro//dngos po rnams la gang chos 'gal ba gnas pa dang rgyu tha dad pas so/ /de'i phyir rgyu mtshan gzhan med pas tha dad pa med pa de lta na sna tshogs pa gcig par 'gyur ba la sogs pa thal bar 'gyur ro/ /so sor snang ba tha dad pa yang gcig la gcig med pa'i ngo bos 'gal ba'i chos gnas pa las 'da' ba ni med do//de'i phyir snga ma'i dngos po de'i gnas skabs kho na yin pa'i phyir de dag gzhan dang ldan pa yang rgyu dang 'bras bu'i ngo bo thob pa med do/ /yang na phyogs gnyis pa yin pa de'i tshe rang bzhin kho nas rgyu dang 'bras bu'i ngo bo yin pa'i phyir de'i rang bzhin gzhan don med pa ji ltar nyams su myong bar mi 'gyur/rgyu dang 'bras bu'i blo yang de kho na yod pa nyid tsam dang rjes su 'brel pas/ /don gzhan pa'i rgyu mtshan de ni dmigs pa'i rig byar gyur pa las rgyu dang 'bras bu'i ngo bos dben pa'i ngo bos gzhan mi snang ba'i phyir ro//rnam pa de lta bu yang bzung nas brtag na ni ha cang thal bar 'gyur ro/ /de'i don gzhan pa'i rgyu dang 'bras bu'i blo'i rgyu mtshan ni mi dmigs pa'i mtshan nyid dang ldan pas ji ltar rang yod pa tsam gyis de'i blo 'jug par mi 'gyur rtag tu nye ba nyid kyis de dag 'dir thams cad kyi tshe skye bar thal bar 'gyur ro//bye brag ma bzung bar bye brag tu bya ba yang rang nyid bye brag can du shes pa'i rgyu mtshan mi rigs te/ de mi dmigs pa'i mtshan nyid kyir gyur ba yin no/ /mthong ba yang mi rtogs par mi rigs te/ rgyu dang 'bras bu'i blo la de'i rgyu mtshan khas blangs pa'i phyir ro//gang gi rgyu mtshan gyis gzhan la de'i blo rten cing nges pa gang yin pa de ni de'i nye bar mtshon par mi rigs pa nyid de dbyig pas dbyig pa can nges par byed pa med na lha sbyin dbyug pa can nye bar mi mtshon pa bzhin no/ /rgyu dang 'bras bu dag gi 'brel pa don gzhan pa ni 'thad pa ma yin la/'brel pa gzhan brtags na ni thug pa med par thal bar 'gyur ba dang / /rgyu dang 'bras bu'i ngo bo khas blangs pa yang rgyu dang 'bras bu dag lhan cig mi 'byung bar de yod pa dang / de bas na rgyu dang 'bras bu de nye ba ma yin pas ji ltar rgyu dang 'bras bu'i blor 'gyur/'gags pa dag de'i shes pas sgro btags nas brtags pa la rtogs pa'i yul nyid kyi rgyu dang 'bras bur mngon par zhen pa yin na ni dngos po'i yul ni ma yin no/ /de yang khyad par can yod pa dang med pa'i rgyu mtshan khas blangs pa'i phyir ci don gzhan du brtags nas rtogs pa'i yul der mngon par zhen pa de don med do//rgyu dang 'bras bu cig car ma yin te/ lhan cig tu 'di dag skye ba med do/ /so sor skye na yang ji ltar rgyu dang 'bras bu'i ngo bo yin/ gang gi tshe rgyu las skye ba de'i tshe ci rang gi 'bras bu lhan cig skye'am yang na 'ba' zhig yin/'ba' zhig kyang ci rang gi 'bras bu'i sngar ram yang na phyis yin/ gal te rang gi 'bras bu dang lhan cig gnyi ga gzhan las yod pas phan tshun 'brel pa med pa'i phyir 'bras bu'i 'brel pa med pa nyams pa yin no/ /yang na 'ba' zhig rang gi 'bras bu las sngar de skad cig ma rgyu yin pas de nyid skye bar 'gyur ba nyid na zhig pa'i phyir ji ltar 'bras bu byed pa yin/de yang yod na ji ltar rgyu 'di la ltos pa yin/ de med pa las yin na ji ltar rgyu ma yin pas 'bras bu rgyu dang 'brel ba las skye ba yin/ yang na rang gi 'bras bu byas zin nas phyis skye na ni de yang 'bras bu'i tshe zhig pa'i phyir med pa de dus phyis 'byung ba'i rgyu dang 'bras bu'i dngos po skyed pa ga la yin de'i dngos po yang 'brel pa brjod na/rgyu dang 'bras bu ni lhan cig mi 'byung ba'i phyir gnyis la gnas par gal 'gyur de med na ji ltar 'brel pa yin/ skad cig ma ma yin pa nyid kyang rgyu dang 'bras bu dag skyes pa las sngar de rten la yod pa ma gtogs pa dag phyi nas kyang rang bzhin gzhan la 'jug pas de ma yin pa la brten pa nyid dang rten med pas de dngos po'i rkyen nam rgyu ma yin no//yang na 'du ba'i rgyu mtshan nyid kyis rgyu dang 'bras bur brjod pa dang shes pa dag yin de'i tshe 'du ba can gyi rgyu nyid kyi 'bras bu ni 'du ba las rgyu nyid du 'gyur/rgyu mtshan dang 'du ba med pa'i rgyu dang ma yin te/ 'bras bu ni de 'dra ba'i 'bras bu nyid de/ de yang thams cad la bye brag med pas dngos po thams cad phan tshun rgyu dang 'bras bu'i ngo bor 'gyur ro//snga ma dang phyi ma yong pa dang med pa'i bye brag gis de yang 'dir de ni 'brel ba med par mi rigs pas bogs dbyung du med pa la de mi rigs so/ /de dag nyid dam de'i khyad par dag de'i mtshan nyid yin no zhes dgongs nas de yod na ni yod la de med na ni med pas rgyu dang 'bras bu'i ngo bo zhes bshad do//de ltar re zhig mi dmigs pa dang lhan cig pa'i mngon sum dag gis rgyu dang 'bras bu dag yod na yod pa'i yul la rgyu dang 'bras bu yod pa yin te/ de yod na ni yod la de med na ni med pa mtshan nyid sgrub par byed pa bshad do/ / res 'ga' zhig mi dmigs pa'am mngon sum sngon pas rgyu dang 'bras bu sgrub pa'i phyir de'i yul re zhig bstan pa ni/ rgyu gzhan rnams yod kyang zhes bya ba smos te/ du ba la sogs pa'i 'bras bu me dang bud shing la sogs pa'i skye bo'i tshogs pa can dag ni tshogs pa las gzhan ma yin te/tshogs pa rnams rgyu med pa nyid du thal bar 'gyur ro/ /'bras bu de la ltos pa ma yin na dngos po med par thal bar 'gyur ro/ /gal te de dang 'brel pas de la ltos pa yin no zhe na/ /'dir su zhig skyed par byed pa ma yin na don gzhan dang 'brel pas yin/skyed par byed na yang tshogs pa'i rang gi ngo bo kho nas skyed par byed pa yin te/ /'bras bu gcig byed pa la 'di dag nus pa med dam gang gis na gzhan zhig bstan par bya/ de la yang gzhan gyi tshogs pa dang 'brel la ltos pa yin na ni thug pa med par 'gyur ro//de'i phyir tshogs pa kho nas skyed par byed pa de dag kyang rgyu re re thabs kyis 'bras bu tha dad pa de dpag par bya'o snyam nas/ rgyu gzhan rnams yod kyang zhes bya ba smos te/ tshogs pa can gyi nang du gtogs pa'i rgyu'i skyed par byed pa rnams ni so sor de dag kyang skyed par byed pa'i phyir 'di skyed par byed pa med pa nyid du bzung nas/brjod par 'dod pa'i med pa las yod pa ma yin no zhes bya ba 'dis mi dmigs pa'i yul bshad do/ /yang na mngon sum gyi 'jug pa ni sngar bshad pa'i mi dmigs pas spangs nas de yod na yod pa 'dzin pa ni srid pa yin te/de bzhin du 'dir yang de yod na yod la de med na ni med pa'i rgyu dang 'bras bu'i dngos po sgrub par byed pa ci zhig snyam na/ mngon sum dang mi dmigs pas sgrub par byed do zhes bya ba smos so/ /mngon sum sngon du song ba'i mi dmigs pa don gzhan gyis dben pa 'dzin par byed pa mngon sum gyi bdag nyid 'di sgrub par byed pa yin no zhes mngon sum dang mi dmigs pas rgyu dang 'bras bu'i ngo bo sgrub par byed pa yin gyi gang mi dmigs pa la ltos pa dang bcas pa'i mngon sum gyis bsgrub par bya'o zhes sngar bshad do//de mi dmigs pa sngon du song ba'i mngon sum 'di sgrub par byed pa'i phyir mi dmigs pa dang mngon sum sgrub par byed par brjod par bya'o//rgyu dang 'bras bu'i dngos po de'i rjes su 'gro ba ldog pa grub par nges pa dag ji skad bshad pa ni mngon sum dang mi dmigs pa dang rgyu dang 'bras bu'i 'brel pa nges pa yin no zhes bya bar sbyar ro/ /'o na ni 'bras bu'i gtan tshigs kyi rjes su 'gro ba nges pa thams cad du 'bras bu 'byung ba ni rang gi rgyu yod pa'i rjes su 'gro ba yin no zhes bya bar sgrub pa'i skabs yin na ji ltar rgyu dang 'bras bu'i dngos por sgrub pa nyid 'dir brjod snyam du dogs pa la/rgyu dang 'bras bu'i dngos po grub pa rgyu mtshan yin pa'i phyir rjes su 'gro ba nges pa ni rgyu la 'bras bu nye bar btags nas gzhan ma yin pa'i thabs kyis bsgrub par bya ba bstan pa ni mthong ba tsam gyi rgyu mtshan gang dag 'dod pa de'i 'dod pa bsal ba'i phyir 'di bstan pa'i phyir bshad do//rgyu dang 'bras bu'i ngo bo nyid ces bya ba smos te//rgyu dang 'bras bu'i ngo bo nyid ni yod pa'o/ /ni zhes bya ba ni gang gi phyir ro/ /don gzhan pa ni bsgrub par bya ba las tha dad pa'o/ /gang tha mi dad pa de ni bzlog pa la gnod pa can gyi tshad ma 'jug pas de'i bdag nyid du nges pa kho na'i rjes su 'gro ba sngar bshad pa'i phyir ro/ / don gzhan smos pa ni de ni don gzhan pa nyid la'ang de ltar 'gyur ro/ /ji ltar gang na la lar du ba yod pa de la me gdon mi za bar nges pas me de la yod do zhes bya ba 'dis gzugs kyi rjes su 'gro ba yang yin te/ gang rgyu dang 'bras bu'i ngo bo ma yin yang ro don gzhan pa gzugs las rjes su 'gro ba nges pa de ni tshogs pa gcig la rag las pas de'i rang gi rgyu'i sgo nas mi 'khrul pa'i phyir nyes pa med do//yang na gal te me'i 'bras bu du ba yin pa de lta na yang gang na 'di yod pa de la gdon mi za bar me yod pa cis na yin/ gang gi rgyu dang 'bras bu yod par grub pa'i rgyu mtshan gyi rjes su 'gro ba brjod do snyam na/me yod na yod pa kho na zhes bya ba smos te/ ni zhes bya ba ni gang gi phyir ro/ /yod na yod pa 'bras bu nyid du ba yin pa'i phyir ro/ /de'i phyir rgyu dang 'bras bu la yod na yod pa nyid ji skad bshad pa ni rjes su 'gro ba nges pa yin no/ /gal te gang na du ba yod pa de la gdon mi za bar me yod par ma gyur la de me med kyang yod pas me'i yod pa'i dngos po'i mtshan nyid kyi rgyu dang 'bras bu nyams par 'gyur ro//da ni mi dmigs pa'i 'brel pa nges pa bstan pa'i phyir/ mi dmigs pa zhes bya ba smos te/ rang bzhin dang 'bras bu'i gtan tshigs 'ba' zhig gi rjes su 'gro ba nges pa bshad pa ma yin gyi 'on kyang mi dmigs pa'i rjes su 'gro ba nges pa yang brjod par bya na 'di'i ngo bo ci zhig yin ce na/med pa'i tha snyad kyi zhes bya ba smos te bsgrub par bya ba'i chos su rung ba ni bsgrub par bya ba yin pa'i phyir/ de med pa'i tha snyad du rung bar mngon par 'dod do//de ni dmigs pa'i rig byar gyur pa'i mi dmigs pa de ni gzhan mi dmigs pa'i ngo bo'o/ /de tsam ni rgyu mtshan la mi ltos par med pa'i tha snyad la 'jug pa'o/ /de sgrub par byed pa ni rjes su 'gro ba nges par grub pa'o/ / yang med pa'i tha snyad tsam la 'jug par 'gyur ba ga las she na/ rgyu mtshan gzhan med par mthong ba'i phyir ro zhes bya ba smos so/ /gang med pa'i tha snyad kyang ji skad bshad pa'i mi dmigs pa las tha dad pa'i blo dang sgra don byed nus pas stong pa la sogs pa rgyu mtshan ma yin no zhes bya ba bsgrub pa de'i tshe ji skad bshad pa'i mi dmigs pa tsam gyi 'jug pas grub pa ma yin te/de'i tshe mi dmigs pa'i rjes su 'gro ba grub pa yin no/ /de lta ma yin na rgyu mtshan gzhan la ltos par dogs pa yang bden no/ /ji skad bshad pa'i mi dmigs par gdon mi za bar med pa'i tha snyad mi 'gyur na gang las rjes su 'gro ba nges pa yin snyam na/rgyu mtshan gzhan med pa ni rtsod pa'i rigs par rgya cher bshad pas de nyid du nges par gzung bar bya'o/ /yang na yod pa'i tha snyad kyi rgyu mtshan dmigs pa'i rig byar gyur ba las yod pa de ni med pa'i tha snyad kyi rgyu mtshan yin pa'i phyir rgyu mtshan ni de la mi dmigs pas med pa nye bar bstan pa'i tshad ma gang yin pa de nyid kyis bshad do//des na yod pa'i dngos po ni mi srid par nges pas mi dmigs pa'i rjes su 'gro ba nges pa'i ldog pa dpyad pa'i tshe bshad par bya'o/ /de nyid ni gtan tshigs rnam pa gsum po'i bdag nyid ji lta ba'i tshad ma bshad pa yin no//rang bzhin gyi gtan tshigs las bzlog pa la gnod pa can gyi tshad ma yod pa de'i bdag nyid 'brel pa grub pa'i phyir dang / 'bras bu'i gtan tshigs ni mngon sum dang mi dmigs pa dag gis rgyu dang 'bras bu'i dngos po'i rgyu mtshan grub pa'i phyir ro//mi dmigs pa la rgyu mtshan gzhan med pas sgrub par byed pa'i tshad mas de med pas gtan tshigs su grub pa'i phyir ro/ /re zhig gtan tshigs rnam pa gsum yang rang rang gi tshad mas ldog pa nges pa'i rgyu mtshan bstan to//ldog pa nges pa yang rjes su 'gro ba nges pa 'ba' zhig ma yin te/ bdag nyid ji lta ba'i tshad ma dag gi rgyu mtshan bshad kyang 'bras bu rang bzhin gyi gtan tshigs kyi ldog pa nges pa yang bdag nyid ji lta ba'i tshad ma'i rgyu mtshan brjod do/ / yang ci 'dir bsgrub par bya ba med na med par grub pa gang de'i bdag nyid yin nam/ bsgrub par bya ba med na med par grub pa de dag tshad ma gang gis yin zhe na/ rgyu dang khyab par byed pa mi dmigs pa dag las 'bras bu'i gtan tshigs ni rgyu mi dmigs pas bsgrub par bya ba med na med par nges pa yin no//rang bzhin gyi gtan tshigs ni khyab par byed pa mi dmigs pas so/ /nam zhig na mi dmigs pa de sgrub par 'gyur/ rgyu dang 'bras bu dang khyab par bya ba dang / khyab par byed pa'i ngo bor grub na'o/ /mngon sum dang mi dmigs pa dag gi rgyu dang 'bras bu'i ngo bor grub pa bden na rgyu mi dmigs pas 'bras bu'i gtan tshigs kyi bsgrub par bya ba med na sgrub par byed pa med pa 'grub bo// /bzlog pa la gnod pa can gyi tshad ma de yod pa'i rgyu mtshan 'jug pa na grub pas khyab par bya ba dang khyab par byed pa'i dngos por grub pa yod na/khyab par byed pa mi dmigs pas rang bzhin gyi gtan tshigs kyi bsgrub par bya ba med na sgrub par byed pa med pa 'grub bo// /de ni de skad du brjod pas gang la de'i bdag nyid dang de las byung ba'i mtshan nyid kyi 'brel pa nges pa nyid kyis gnyi ga'i rjes su 'gro ba dang ldog pa bshad pa yin no//de nyid kyis na gzhan du rgyu dang 'bras bu'i ngo bo yin no zhes bshad zin to/ /ci 'dra ba dag yin zhe na/ ji skad bshad pa'i bltar rung ba'i yul gang dag yin pa de dag la'o/ /gang gi tshe rgyu dang khyab par byed pa dmigs pa'i rig byar gyur pa las mi dmigs pa de'i tshe mi dmigs pa de'i bsgrub par bya ba med na sgrub par byed pa med do zhes bya ba'i don to//nam zhig na de dag snang du rung ba'i yul gyi bye brag la ltos pa dang bcas pa yin zhe na/ nye bar bstan pa'i yul la zhes bya ba smos te/ nye bar bstan pa ni brjod pa'o//yul ni chos mi mthun pa'i dpe'i gzhi'i mtshan nyid gang bsgrub par bya ba'i chos med na med pa de nye bar bstan pa ni bya ba yin no/ /gal te de la yang snang du rung ba'i yul la ci'i phyir ltos she na/ mi dmigs pa zhes bya ba la sogs pa smos te gzhan du na ni gal te snang du rung ba'i yul gyi bye brag gi mi dmigs pa la mi ltos pa na'o//gang dmigs pa'i rig byar ma gyur ba'i yul gyi chos mi mthun pa'i dpe bstan pa de'i tshe dmigs pa'i rig byar ma gyur ba de ni rgyu dang khyab par byed pa yin no zhes mi dmigs pa'i mtshan nyid kyir gyur pa'i rgyu'am khyab par byed pa la lar bskal ba'i yul ri rab la sogs pa med par mi 'grub na ci bsgrub par bya ba med pas sgrub par byed pa med pa dag ji ltar 'grub bar 'gyur snyam na/rgyu dang khyab par byed pa mi dmigs pa nyid du grub pas 'grub pa'i phyir ro snyam du dgongs so/ / 'on te yul nye bar ma bstan kyang med pa nye bar bstan pa'i mi dmigs pa snang ba'i yul gyi bye brag la cis na ltos par bya ba ma yin zhe na/ yul nye bar ma bstan pa zhes bya ba smos te/ yul nye bar ma bstan pa ni chos mi mthun pa'i dpe'i ngo bo'o/ /gang la bsgrub par bya ba med pa la med pa bshad pas de'i 'brel pa tsam grub ste yod na snang ba'i yul gyi bye brag med kyang gang gi phyir 'grub pa de'i phyir de la yul nye bar ma bstan pa ni ldog pa sgrub par byed pa'i mi dmigs pa bltar rung ba'i yul gyi bye brag la ltos pa ma yin pa ni yan lag tu mi byed do// de lta na don mtha' dag yongs su ma bzung ba'i spyir brjod pa yang dang gang la 'brel pa'i rang bzhin de'i bdag nyid dam de las byung ba de dag ni de med med na gdon mi za bar med pa yin te/ rang bzhin dang rgyu ma yin par thal bar 'gyur ro/ /de skad du/ rang bzhin la yang med mi 'byung //yod pa tsam dang 'brel pa yin/ /de med par ni rang yod dag /med 'gyur tha dad med phyir ro/ /de bzhin du/ me yi 'bras bu du ba ste/ /du ba chos kyi rjes 'jug pa/ /de med par ni de yod na/ /rgyu dang ldan pa las 'das 'gyur/ /ces bshad do/ /de dang de ni snang ba'i yul la ltos par bya ba la phan 'dogs par mi byed na//de dag ni cung zad cig kyang med do/ /'brel pa tsam grub pa yin no zhes bya ba 'dis 'brel pa'i gtan tshigs brjod pa ma yin te/ 'on kyang mthong ba tsam nyid kyis ldog pa brjod pa mi srid do zhes bstan to/ / de lta na 'brel pa med kyang gang gi tshe bsgrub pa bya ba thams cad spangs pa'i don mthong bar 'gyur ba de'i tshe de rnam par mi dmigs pa'i sgrub par byed pas med par grub po snyam nas gzhon nu ma len gyis de yang / yul de dag tu bgrod song na/ /don gzhan nye bar mi dmigs pa/ /de rgyu gzhan ni med pa'i phyir//med pa yin ces rtogs par bya/ /zhes smras te/ yul la sogs pa bskal pa'i mi snang ba yod kyang de la gtan tshigs mi dmigs pa tsam srid pas the tshom za ba yin no/ /'dir ni bsgrub par bya ba ma lus pa med na ldog pa'i mtshan nyid yin te/ rnam pa de lta bu nyid gang dang gang la bsgrub par bya ba med pa de dang de la sgrub par byed pa med do zhes slar yang tshig dag gis brjod pa'i phyir ro//rjes su 'gro ba nges pa yang sngar 'brel pa'i rgyu mtshan nyid brjod do/ /de'i phyir des kyang gzhan dag mthong ba tsam gyi rgyu mtshan gyis rjes su 'gro ba grub par 'dod pas med par brjod pa kho na'o//don thams cad kyi gtan tshigs su 'dod pa bsgrub par bya ba'i chos dang ldan par rjes su dpog par byed pa rnams kyis mthong bar mi nus pa'i phyir ro/ /ma lus pa'i yul dang phyogs la sogs pa'i bsgrub par bya ba'i don rjes su 'gro ba ni gang dang gang la gtan tshigs yod pa de dang de la bsgrub par bya ba yod do zhes ma lus par bstan pa'i phyir ro//yul la sogs pa nyung zad cig tu bsgrub par bya ba'i chos dang sgrub pa byed pa'i chos lhan cig tu yang dang yang khyab pa grub pa mthong yang 'brel pa med pa ni la lar phal cher de bzhin du mthong yang srid pas mi srid pa la gnod par byed pa'i tshad ma med pa'i phyir ro//mi dmigs pa'i gtan tshigs kyi dbang du byas nas da ni/ mi dmigs pa'i ldog pa nges pa zhes bya ba smos so/ /brjod do zhes bya ba lhag ma'o/ /'di'i bdag nyid ci yin zhe na/dmigs pa'i rig byar gyur pa zhes bya ba smos te yod pa'o/ /mi dmigs pa ni shes pa gzhan gyis sam bltar rung ba'i rang bzhin no/ /de ni yod pa'i phyir bsgrub par bya ba med pa'i ngo bos mi dmigs pa de nye bar dmigs pa'i bdag nyid kyi med pa'o/ / de gang 'dzin pa ni mngon sum mo/ /de yod pa'i mtshan nyid du de bstan pa ni bstan par bya zhing shes par bya ba 'dis bstan pa ni nye bar bstan pa can gyi tshad mas de'i bdag nyid kyi mi dmigs pa'i ldog pa nges pa dang de'i gtan tshigs de ni tshad ma de bzhin du brjod do/ /gal te yod na ni gzhan nye bar dmigs pa'i shes pa la snang du rung ba'i rang bzhin du 'gyur te/'on kyang nye bar mi dmigs na ji ltar 'di snang du rung ba'i bdag nyid du 'gyur gang zhig yod pa gzhan rnams kyang dmigs pa'i rkyen du yod pa ni mngon sum du 'gyur ba de nyid du snang du rung bar bshad do//des na rnam pa de lta bu nye ba las gdon mi za bar rnam pa de lta bu'i mngon sum 'jug par 'gyur ro/ /gzhan du na res 'ga' zhig kyang mngon sum gyi yul du mi 'gyur te khyad par med pa'i phyir ro/ /gang dang gang la rgyu mtshan tsam yod pa de dang de la nges par 'gyur te/ dper na sa bon la sogs pa tshogs pa tsam gyi rgyu mtshan gyis myu gu bzhin no/ /yod pa'i dngos po yang ji skad bshad pa'i dmigs pa'i rig byar gyur pa tsam gyi rgyu mtshan dang ldan pa'i phyir rnam pa de lta bu'i mngon sum du 'gyur ro zhes bya ba rang bzhin gyi gtan tshigs so/ / tshad ma 'dis ni rang bzhin ma dmigs pa'i bsgrub par bya ba med na med pa'i mtshan nyid kyi ldog pa nges pa'o/ /'di yang rjes su 'gro ba nges pa'i rgyu mtshan gyi tshad ma 'dis kyang mi dmigs pa la rgyu mtshan gzhan med par bstan pa'i phyir ro/ /rgyu dang khyab par byed pa mi dmigs pa rjod par 'dod pa dag 'brel pa nyid grub pa'i thabs kho nas rjes su 'gro ba dang ldog pa grub pa'i rgyu mtshan yin no//de yang 'bras bu dang rang bzhin gyi gtan tshigs nye bar bstan pa nyid kyis tha dad par ma brjod do/ /de bzhin du rgyu dang khyab par byed pa dag med pas 'bras bu dang khyab par bya ba dag med par gdon mi za bar rjes su 'gro'o//'bras bu dang khyab par bya ba med pa las ldog pa'i yod pa de ni yod pa'i mtshan nyid la gdon mi za bar ldog pas khyab par byed pa dang rgyu dag yod pa'i phyir ro/ /de lta ma yin na 'bras bu dang khyab par bya ba dag rgyu med pa'am rang bzhin ma yin par thal bar 'gyur ba'i phyir cung zad cig kyang tha dad par brjod pa med do//gzhung 'di tsam gyis ni phyogs chos de'i chas khyab pa'i gtan tshigs zhes bya ba de bshad pa yin no/ /da ni rnam gsum nyid ces bya ba de bshad par bya ste/mtshan nyid 'dis zhes bya ba smos te phyogs la chos yod pa de'i chas khyab pa de ni gtan tshigs yin no zhes de'i mtshan nyid gang yin pa de nyid/ gtan tshigs de ni rnam gsum ste/ /zhes pa'i mtshan nyid do/ /de zhes bshad pa ni gtan tshigs rnams so/ /rnam gsum ste zhes bya ba'i 'brel pa ni rnam gsum kho na'o//gtan tshigs de rnams kyi rang rang gi ming grags pa ni/ rang bzhin dang 'bras bu dang mi dmigs pa'o/ /dang zhes bya ba ni gtan tshigs kyi bsdu ba'i phyir ro zhes bya ba ni rdzogs par bstan pas nges par bzung ba'i don kho nar gsal lo//dper na sgra 'ga' zhig la mi rtag pa bsgrub par bya ba yod pa lta bu'o zhes bya ba rang bzhin gyi gtan tshigs nye bar bstan pa dang me dang ldan par sa phyogs la bsgrub par bya ba du ba lta bu'o zhes bya ba 'bras bu'i gtan tshigs bstan pa dang med pa la zhes bya ba ni med pa'i tha snyad do//dmigs pa'i rig byar gyur pa'i mi dmigs pa zhes bya ba ni mi dmigs pa nye bar bkod pa'o/ /ci'i phyir gtan tshigs rnam pa gsum kho na yin zhes dogs pa la/ gtan tshigs rnam pa gsum las tha dad pa'i don rnams kyi gtan tshigs ltar snang ba dang gtan tshigs 'gal bas khyab pas gtan tshigs gsum nyid du nges pa yin te gtan tshigs ltar snang ba tshad ma yin pa de las ldog pa ste nye ba bstan pa ni/'di kho na zhes bya ba smos te/ rang bzhin dang 'bras bu dang mi dmigs par bshad pa'i gtan tshigs rnam pa gsum med na mi 'byung bar nges pa zhes bya'o//gtan tshigs rnam pa gsum gyi ldog pa ni de rnams kyi don la med na mi 'byung bas gang med pa zhes bya ba'i don to/ /des kyang med na mi 'byung ba ma tshang ba yin pa'i phyir rang bzhin dang / 'bras bu dang / mi dmigs pa las tha dad pa ni gtan tshigs ltar snang ba ste/gzhal bar bya ba la sogs pa bzhin du 'gyur ro zhe na/ med na mi 'byung ba med pas gtan tshigs rnam pa gsum ldog pa yin pa'i phyir de'i bdag nyid dang de las byung ba med na khyab pa med do zhes bya ba na khyab par byed pa mi dmigs pas rtags so//'on te med na mi 'byung ba zhes bya ba ci zhig su zhig gis yin/ 'di ji ltar rnam pa gsum du nges par brjod ce na/ ji skad bshad pa zhes bya ba smos te/ khyab par byed pa'am de'i rgyu de dag yod pa des na gang la de khyab par bya ba dang 'bras bu dag nye ba de la yod pa nyid do/ / gang la khyab par bya ba dang 'bras bu'i rang bzhin de'i rgyu yod par bstan pa'am khyab par byed pa nye ba'i chos can de nyid la de med na mi 'byung ba yin no zhes khyab par bya ba dang khyab par byed pa'i chos kyi khyab par bshad pa ni ji skad du bshad pa'i med na mi 'byung ba yin no/ /su'i zhe na/ phyogs kyi chos bsgrub par bya ba'i chos can gyi chos de nyid kyi ngo bo'i med na mi 'byung ba gtan tshigs rnam pa gsum ji skad du bshad pa'o//gtan tshigs las de gzhan la de ldog pa'i don gyis yod pa'o/ /'dir yang rnam pa gsum yod pa la de'i bdag nyid dang de las byung ba'i med na mi 'byung ba'i khyab pa dag yod pa'i phyir byas pa nyid dang mi rtag pa bzhin du 'dis khyab par bya ba dang khyab par byed pa yod pa de ni khyab pa mnyam pas gcig la ci mi 'khrul ba yin no//de'i phyir gtan tshigs rnam pa gsum po 'di nyid las de gzhan pa la med pa'i sgo nas nges par brjod do//des na gtan tshigs ltar snang de las gzhan zhes bya ba med na mi 'byung ba'i nges pa'i 'thad pa dang lhan cig tu de'i don bshad do/ /ji ltar gtan tshigs rnam pa gsum las gzhan pa ni med na mi 'byung ba med pa de ltar sngar bshad zin to/ /yang na gal te rang bzhin las gzhan pa'i don ni don gzhan 'bras bu las kyang gzhan rgyu'am gnyi ga ma yin pa dang /mi dmigs pa las gzhan ji skad du bshad pa'i mi dmigs pa tsam 'am nye bar dmigs pa'am dgag pa'am de las gzhan pa yang 'gal ba'am/ mi 'gal ba'o/ /de la don gzhan ni brgya la de ma thag pa'i 'bras bu yin na ni tshu rol mthong bas rtogs par mi nus pa'i phyir rtags ma yin no//'bras bu mthong nas tha dad par nges par byed pa yang / bsgrub pa grub pa'i dus phyis 'byung ba'i phyogs kyi chos dang rjes su 'gro ba rtogs pa don med do/ /'bras bu dang bar du chod pa'i rgyu rnams las kyang 'bras bu de'i rtags ma yin te/bar du chod pa la gegs byed pas ma tshang bas srid pas 'khrul pa'i phyir ro/ /de skad du/ tshogs pa'i 'bras bu'i nus pa rnams/ /'gyur ba dang 'brel 'bras bu yang / /ma nges pa ni nyid yin te/ / gags byed pa dag srid phyir ro/ /zhes gsungs so/ /rung ba rjes su dpag pa ni don gzhan pa'i rtags ma yin no/ /gnyi ga ma yin pa yang 'brel pa med pas gtan tshigs su mi rung ngo / /ji ltar smin drug shar ba las snar ma yod par rnam par shes pa nges pa yin zhe na/ 'on te de yang 'brel pa med par mi rigs te khyad par med pa'i phyir thams cad kyi thams cad rtogs par thal bar 'gyur ro zhes bshad pa'i phyir ro//de'i phyir rgyu skar gyi 'khor lo'i 'phong ba ni gtan tshigs kho na yin te/ dus kyis bar du chod par 'ga' zhig gis brtag par bya'o/ / dper na 'byung ba 'khrug pa las dus phyis char 'byung ba bzhin du gtan tshigs kyis rgyu'i chos rjes su dpog par 'bras bu'i rtags las skyed par brtag par bya'o/ /mi dmigs pa tsam yang the tshom za ba'i gtan tshigs te tshad ma ldog pas kyang don med par mi 'grub bo / /nye bar dmigs pa'i dgag pa yang ji ltar dngos po med par sgrub par byed pa yin/nye bar dmigs pa ma 'khrul pas med par mi rigs so/ /'gal ba dmigs pa yang mi mthun pa'i dngos po sgrub par byed pa yin te/ 'on kyang 'gal ba de yod pa na gzhan nye bar mi dmigs pa kho nas grub pa'i phyir de'i sgo nas mi dmigs pa nyid sbyor bar rigs par 'gyur gyi/de lta ma yin na dmigs su yod pa la dgag pa mi 'grub po/ /'gal ba med pa nye bar dmigs pa yang dgag par ma nges pa yin te/ 'gal ba med pa rnams ni lhan cig yod pa srid pas so//rnam pa gzhan yang mi srid pas med na mi 'byung ba las gzhan yod pa ma yin pa'i phyir ro/ /da ni rang bzhin gyi gtan tshigs kyi yod pa'i mtshan nyid ni de la zhes bya ba smos te/ gtan tshigs rnam pa gsum las re zhig rang bzhin gyi gtan tshigs kyi mtshan nyid brjod do/ / bsgrub par bya ba la gang gis de sgrub par byed pa de'i chos de'i ngo bo ni de'i ngo bo de nyid kyis sgrub par byed pa'i chos kyi ngo bo tsam dang de'i rjes su 'gro ba gang yin pa de yod de/ bsgrub par bya ba'i chos kyi cha shas la spyi nye bar btags nas de la rang bzhin gyi gtan tshigs yin no/ /bsgrub par bya ba'i chos ni mnyan par bya ba yin pa'i phyir de nyid rang bzhin yin no zhes rtogs par bya'o//ji ltar 'di bsgrub par bya ba'i chos kyi rang bzhin ji snyed pa tha mi dad par rtogs pa yin zhe na/ phan tshun zhes bya ba smos te/ med pa dang mi rtag pa ma yin pa la sogs pa las ldog pa'i gtan tshigs su gyur bas bsgrub par bya ba'i chos dang sgrub par byed pa'i chos dag tha dad pa de la yod kyang dngos po ni don dam par rtags can gyi rang bzhin kho na bsgrub par bya ba'i chos kyi rang bzhin nyid do//de lta na med pa las ldog pa gang yin pa de nyid skad cig ma la sogs pa de nyid chos can gcig la tha mi dad pas bsgrub par bya ba dang sgrub par byed pa'i chos kyang don dam par tha dad pa med pa'i phyir ro//gal te dngos su na rtags can gyi rang bzhin gyi sgrub par byed pa'i chos ci'i phyir sgrub par byed pa'i chos yod pa tsam dang rjes su 'brel pa ni bsgrub par bya ba'i chos kyis khyad par du bya ba yin/gang gi rang bzhin gang yin pa de ni ji ltar de tsam gyi rjes su 'gro ba yin/ rang bzhin ma yin par thal bar 'gyur bas de'i rang bzhin yin no snyam nas gang gi phyir/ gtan tshigs kyi rang bzhin zhes bya ba smos te/ gang gi bsgrub par bya ba'i chos de la gtan tshigs kyi rang bzhin ni bsgrub par bya ba'i chos kyi rjes su 'gro ba las 'khrul pa med pas sgrub par byed pa'i chos yod pa tsam gyi rjes su 'gro ba de la 'khrul pa med pa dang 'khrul pa srid na ni khyad par rnams rigs so//'dir yang 'khrul pa mi srid pa nyid kyi phyir khyab par mi rigs pa nyid do zhe na/de ltar yang rang bzhin gyi gtan tshigs kyi mtshan nyid byed pa dang / gang 'di dag bsgrub par bya ba'i chos de tsam gyi rjes su 'gro ba'i sgrub par byed pa'i chos yod pa tsam gyi rjes su 'gro ba'i khyad par ni gzhan gyi 'dod pa la ltos pa ni rigs pa can la sogs pa'i 'dod pa la ltos pa'o//de nyid pha rol po'i log par rtog pa bstan pa ni/ gzhan zhes bya ba smos te/ rigs pa can la sogs pa gang don gzhan gyi rgyu mtshan gyis skyed par byed pa'i don gyis don gzhan la bsnun pa'i rdzas dang ldan pa la sogs pa gang yin pa de'i rgyu mtshan yin no//de nyid 'di ltar bsnun pas rdzas dang ldan pa cha shas rnams la bya ba skyed pa yin te/ de rnams kyi cha shas su phye bas ldan pa zhig go/ /de na rtsom pa'i 'bras bu'i rdzas zhig pa yin no zhes smra'o/ /de ltar na don gzhan la ltos pa'i rgyu mtshan ni byas pa nyid la sogs pa yod kyang de med pas so//de ma yin pa yod pa tsam gyi rjes su 'gro ba de byis pa nyid la sogs pa yod na yod pa kho na de tsam ni de'i rjes su 'gro ba yod pa gang yin pa de ni bsgrub par bya ba'i chos mi rtag pa'i mtshan nyid do/ /de las bzlog pa yang byas pa nyid la sogs pa'i rang bzhin du 'dod do//gang gi phyir khyad par du byas pa de'i phyir des na khyad par gyi rnam pa de lta bu'i don gzhan pa'i rgyu mtshan can gyi 'jig pa de'i rang bzhin ma yin te/ mtshan nyid khyad par du byas pa zhes bya ba smos te/ rang yod tsam gyis 'byung ba nyid/ /rang bzhin nyid ni gzhan la min//zhes bya bas khyab par bstan to/ /de bzhin du de la don gzhan pa'i rgyu mtshan ni/ /bsgrub par bya ba la gtan tshigs bya ba la sogs pa 'khrul pas ma nges pa yin te 'dir dpe ni dper na 'jig par bsgrub par bya ba la/ rgyu dang ldan pa'i byas pa lta bu'o zhes bya ba smos te/gtan tshigs kyi rang bzhin ma yin pas 'khrul pa yin no/ /'o na ni tha dad par khas blangs pas byas pa'i rang bzhin yin pa'i mi rtag pa ni gzhan dag mi 'dod pa des ci zhig brjod ce na/ des yod pa tsam dang rjes su 'brel pa'i rang bzhin du 'dod pa yang yin no snyam du de ltar sems na ni byas pa dang mi rtag pa'i chos kyi rtog pa yang khas blangs pa rnams kyis gdon mi za bar ma byung ba las byung ba dang /byung nas kyang med pa'i mi gnas pa'i rang bzhin khas blang bar bya dgos te/ gzhan du na bdag la sogs pa dang byas pa nyid dang mi rtag pa nyid khyab par med pa yod par 'gyur ro//de'i phyir gang ma byung ba las byung ba dang byung nas med pas mi gnas pa de dag nyid de ni mthong ba'i stobs las skyes pa'i byas pa dang mi rtag pa'i chos tha dad par rtog pa la snang ba'i sgo nas bsgrub par bya ba dang /sgrub par byed pa dag las cis tha dad pa'i chos gnas pa yin/ brtags su zin kyang dngos po'i bdag nyid don byed pa'i rgyu mtshan de don du gnyer ba rnams kyis bsams pa'i phyir ro/ /de skad du yang / yod med phyogs ni tha dad pas/ /sgra don skur 'debs med rnams kyis//gang la 'brel pas 'bras skyed pa'i/ /dngos po kho na dpyad par bya/ /don byed nus pa med pa la/ /de 'dod brtags pas ci zhig bya/ /ma ning gzugs bzang mi bzang zhes/ /'dod ldan rnams kyis brtag ci phan/ /zhes bshad do/ /de'i phyir mthong du zin kyang dngos po 'ga' zhig gis bdag nyid du ma yin pa gzhan las ldog pa'i rnam pa 'ga' zhig nges so//de ma yin pa gzhan gyis kyang de yin pa'i ngo bo las ldog pa'i bdag nyid la 'khrul pa'i rgyu yod pa srid pas ma nges pa yin pas ma nges pa nyid do/ /nges pa dag gi ngo bo ni tshad ma gzhan gyi 'brel pa nges pas mdun na gnas pa la rjes su dpag pa yis nges pa'i phyir mi rtag pa'i rang bzhin du gyur pa'i byas pa nyid kyis 'jig pa'i rtags su rigs so//de bzhin du 'jig pa'i rang bzhin kho na gtan tshigs su ji skad bshad pa'i rigs pas de 'dod pa yin te/de ni de tsam dang rjes su 'brel pa nyid la don gzhan gyi rgyu mtshan gyis bye brag ni rang bzhin ma yin par brjod do/ /gal te byas pa nyid kyi dngos su rgyu dang ldan par 'di rjes su dpag par bya ste/ des na sngar zhig pa med pa'i bye brag gis yod pa de 'du ba'i 'brel pas mi rtag pa rnam par gzhag go//'di nyid bdag la sogs pa rtag pa la thal bar 'gyur ba med la 'jig pa zhes bya ba ni yod pa med pa 'jig pa'i mtshan nyid du 'dod pa na/ byas pa nyid 'du ba'i srid pa'i 'brel pa'i khyad par gyis 'jig pa'i rang bzhin du bstan pa la cung zad cig kyang mi 'dod pa med do snyam du sems pa na de ni mi rigs te/rnam pa de lta bu'i 'jig pa ni rgyu dang ldan pa 'gal ba'i phyir ro zhes slob dpon rang nyid 'di 'chad par 'gyur ro/ /'di ni rjes su dpag par byed na cung zad cig kyang don byed par nus pa med pa brtag pa'i phyir ro/ /bde ba dang sdug bsngal sgrub par byed pa shes pa ji ltar rigs pa rtogs par 'dod pa ni cung zad cig yongs su brtag par byed do//de'i phyir 'dir mi brtan pa'i rang bzhin gyi yod pa nyid rjes su dpag par bya ste de nyid kyi rgyu dang ldan pa brtag par bya'o/ /de lta ma yin na med pas dben pa'i skad cig ma'i dus su med pa thob pa la sogs pas bskyed pa ni dngos po la nye bar mi mkho ba'i phyir ro//de yod pa ni de nyid du gnas pa kho na yin te/ ji ltar de'i khyad par gyis sam yod pa de 'du bas mi rtag par 'gyur/ dngos po mi 'gyur thob pa la sogs pas byas nas zhig nas med pa'i khyad par gyis yod pa ldan pa'i 'brel pas gal te mi rtag pa yin no ci ste/bdag la sogs pa la yang thal bar 'gyur ba gnas pa yin no/ /rang gi rgyu las ma byung ba las byung ba la yod pa dang 'du ba ni mi 'dod de mi 'grub pas so/ /ma byung ba las byung ba gang yod pa de nyid la byas pa nyid ces brjod do//yod pa la 'du ba'i 'brel pas mi rtag par khas blang par mi bya ste/ bogs dbyung du med pa'i phyir/ snga ma zhig nas med pa'i bye brag mi rigs so/ /ma byung ba las 'byung bar khas blangs pa de nyid ni byas pa nyid kyi mi brten pa'i rang bzhin gyi 'jig pa yod na 'bras bu byed pa tshad ma med cing tshad mas gnod pa'i don gzhan brtags pas ci zhig bya/de ltar na byas pa 'jig pa de'i bdag nyid du pha rol pos kyang gdon mi za bar khas blang bar bya dgos so/ /de'i phyir 'jig pa mi gnas pa'i mtshan nyid la don gzhan pa'i rgyu mtshan khas blangs nas byas pa nyid ma yin pa'i rang bzhin gyi bye brag tu bstan na de grub pa dang ma grub pa dang tha dad pa'i rgyu can ni de'i rang bzhin du mi rigs pas de ltar bsgrub par bya ba de la byas pa nyid ma nges pa yin no//gang dang gang rgyu mtshan gzhan la ltos pa de dang de ni gdon mi za bar 'byung ba ma yin te/dper na gos kha bsgyur ba bzhin no/ /byas pa nyid rnams kyi 'byung ba zhig nas med pa yang rgyu mtshan gzhan ltos pas zhes bya ba 'gal bas khyab pa dmigs pa yin no/ /'on te gos la tshon gyis bsgyur ba ni tshad yod pa'i rgyu yin pa'i phyir de yang rang gi rgyu la rag las pas nye ba na de'i rten la mi mthun pa'i rkyen dang phrad pas mi brtan pas na gdon mi za bar 'byung ba mi rigs kyi 'jig pa la ni ma yin te/rgyu rnams ni mtha' yas pas gdon mi za bar bum pa la sogs pa 'ga' zhig la nye ba dang 'jig pa'i rten pa la snga ma'i rgyu de nye bas kha cig nye bar 'jig ste/gang gi phyir de med na 'jig pa mi rtsom mo zhe na/ de ni mi rigs te/ gal te yang gang gi phyir 'jig pa'i rgyu mang po yod pa de lta na yang rang gi rgyu gang yin pa nye ba'i phyir ro/ /de bzhin du de'i rgyu rnams dang nye ba na yang de dang 'gal ba mtha' yas pa yod pas de'i nus pa la gegs byed pas gdon mi za bar rgyu ni 'bras bu dang ldan pa ma yin pa'i phyir 'ga' zhig zhig pa yang ma nges 'jig pa ma yin no//'on te gos la tshon la sogs pa 'di ni ltos pa dang bcas par yang gal te thams cad du nye bar dmigs pa des na gdon mi za bar cis na 'byung ba ma yin zhe na/gal te de bzhin du nye bar dmigs kyang de ni gzhan du 'dzin to/ /gal te de lta na de bzhin du thams cad zhig pa nye bar dmigs pa las gzhan du yod par dogs pa la yid skyo bar mi bya'o zhe na/ /ci dngos po ma lus pa'i ngo bo rgya che ba la yang shes pa'i snang bas khyab pa yin par gang gis brjod na ni de ltar yin na yang ji ltar rjes su dpag pa mi 'jug par thal ba las 'jug pa mthong bas na don med pa la brten par 'gyur te/gang zhig rgyus byas pa'i 'jig pa mthong du zin kyang rgyu gang zhig las gzhan du skye bar yang mthong bas dogs pa skye ste//yul dang dus dang rang bzhan gyis bskal pa rnams la ji ltar de bzhin du yod par nges pa yin/ byas pa nyid la yang 'di yod pa dang med pa'i mtshan nyid kyi 'jig pa ni rtag par khas blangs pas de'i 'jig pa khas blangs pa ni dngos po las skye bar thal bar 'gyur ba dang / bum pa la sogs pa bzhin du 'jig pa'i rgyu 'ga' zhig nye bar mi dmigs so/ /de skad du/ dper na bum pa la sogs par/ /'jig pa'i rgyu ni mthong ba yin/ /de bzhin 'jig de rgyu med las/ /de yi skye ba ci ltar yin/ /zhes bya ba smras pa de'i phyir byas pa nyid la ni sgrub pa de nyid kyis ma nges pa cis ni ma mthong /gal te dngos po rnams kyi gcig tu nges pa chos nyid yin no zhe na/ de dag kho na yin par ga las nges/ gal te de dag las gzhan pa yod par nye bar mi dmigs so zhe na/ 'o na ni 'di mi dmigs par 'gyur zhe na/ bdag la sogs pa la yang ci'i phyir ldog par mi 'gyur ji ltar 'dir gzhan du yod pa ldog par 'gyur ro//des rjes su dpag pas nye bar dmigs so zhes brjod na rjes su dpag pa de dang de la mi mthun pa'i phyogs las ldog pa ni mi dmigs par kho nas gtan tshigs ci ltar ldog par 'gyur 'di ni ci yang ma yin no//de'i phyir rgyu dang ldan pa'i 'jig pa ni byas pa nyid kyi rang bzhin ma yin pa dang / 'khrul pas na legs par bshad pa smras pas chog go/ /da ni rang gi don gyi rjes su dpag pa'i skabs gang yin pa de dag na yang 'ga' zhig sbyor ba'i yan lag nyid bstan pa'i phyir rang gi don gyi rjes su dpag pa yang srid pas zhar la gzhan gyi don gyi rjes su dpag pa'i sbyor ba bstan pa ni/de'i sbyor ba zhes bya ba smos te rang bzhin gyi gtan tshigs ni rnam pa gnyis so/ /mtshan nyid gsum bstan pa'i tshig gi dpe ni sbyor ba'o/ /de nyid bstan pa ni chos mthun pa mtshungs pa gang yin pa de ni de la yod pa des na chos mthun pa ste/sbyor ba gcig dang gzhan chos mi mthun pa mi 'dra ba gang yin pa de la yod pa des na chos mi mthun pa'o/ /rim pa ji lta ba 'dis de'i dpe brjod pa ni/ dper na gang dang gang yod pa/ /zhes bya ba smos te/gang gi sgra ni zlos pa gtso bo yin no/ /de thams cad ces bya ba ni de'i sgra yang zlos pa gtso bo nyid do/ /thams cad smos pa ni ma lus pa yongs su bzung bas phyi rol gyi khyab pa bsal ba yin no/ /dper na bum pa zhes bya ba ni gang yod pa dang skad cig ma 'brel bsgrub par byed pa'i tshad ma bum pa la sogs pa la 'jug pa de la dran pa kun nas slong ba'i phyir dper brjod kyi dpe tsam las sgrub pa med pa'i phyir ro//gcig la yod pa de bzhin du thams cad la yod pa ma yin no/ /ha cang thal bar 'gyur ba'i phyir ro/ /sgra la yang yod pas zhes bya ba ni phyogs de la chos bsdu ba'o//chos mi mthun pa'i sbyor ba'i dpe ni/ de bzhin du zhes bya ba la sogs pa'o/ /de bzhin du zhes bya ba smos pa ni chos mi mthun pa'i sbyor ba'i dpe bsdus pa yin no/ /'dir yang thams cad ces bya ba de ni rnam par dbye ba 'gyur bar 'brel pa yin te skad cig ma nyid med pa thams cad la yod pa nyid med pa yin zhes bya ba ni sbyor ba gnyi ga la yang thams cad smos pa 'bras bur bstan pa yin no//thams cad ni bsgrub par bya ba'i chos can dang dpe'i chos can nyid do/ /bsgrub par bya ba'i chos nye ba bsdu ba ni nye bar bsdus pa dang bsdoms pa des na khyab par bya ba ni khyab par byed pa de kho na la yod pa la zhes pa la sogs pa'i ngo bo'o//de bstan pa ni rab tu bshad pa'o/ /de'i mtshan nyid ni gang dang gang de skad du bshad pa'o/ /de'i phyir gang bsgrub par bya ba'i chos can yongs su spangs nas phyi rol gyi khyab pa bstan pa ni gal te yang dpe'i chos can la bsgrub par bya ba'i chos kyis sgrub par byed pa'i chos la khyab pa de tsam gyis thams cad la de bzhin du yod pa dang med pa las bsgrub par bya ba 'grub par mi rigs pas bsal ba yin no//yang na thams cad du bsgrub par bya ba'i chos kyis sgrub par byed par chos la khyab pa yod par 'gyur na ni rnam pa de lta bu cis na ma bstan/gang gis phyi'i khyab pa la nus pa med par bshad pa ni de ni sngo bsangs yin te de'i bu yin pa'i phyir sngo bsangs kyi bu mthong ba bzhin no zhes bya ba de'i bu yin pas sngo ba sangs su bsgrub par bya ba phyi rol du mthong ba'i bu la khyab pa bstan kyang bsgrub par bya ba 'grub par mi 'gyur ro//de'i phyir thams cad kyi nye bar bsdus pa'i 'brel pa tshad mas grub pa'i rgyu mtshan gyis shugs la bsgrub par bya ba grub pa gang yin pa de dran pa bstan to/ /thams cad nye bar bsdus nas khyab pa bstan pa yang chos kyis khyad par byas pa'i chos can de nyid shes pa med pas/gang gi phyir phyogs kyi chos bstan pa'i de ma thag pa'i dus phyis 'byung ba'i rjes su dpag pa na dran pa nyid du 'gyur na de bsgrub par bya ba'i chos can med na/ mi 'byung ba chos rtog pa'i rgyu mtshan nyid kyi de bstan pa las sngar ni mi srid pa'i phyir ro//de ni khyab pa sngon du song ba'i de ma thag tu bye brag gi yul la rjes su dpog pa na ji ltar dran par 'gyur/ 'o na chos mthun pa'i sbyor bas khyab pa bstan pa'i mtshan nyid ni rigs te/ sgrub par byed pa'i chos yod na bsgrub par bya ba'i chos gdon mi za bar yod par bstan pas so//chos mi mthun pa'i sbyor ba ni bsgrub par bya ba med pas gtan tshigs med pa 'ba' zhig ji ltar de la brjod gtan tshigs yod pas bsgrub par bya ba yod pa ni ma yin no zhe na/ de dag gi skyon ni med de 'dir bsgrub par bya ba med na gtan tshigs med pa ni dngos po'i ngo bo bstan pa de'i gtan tshigs kyi khyab par bstan pa'i mtshan nyid kyi ngo bo 'gal ba dang ldan pa ma yin no//dngos po'i chos kyi yod pa la sogs pa'i gtan tshigs de'i bdag nyid med par ji ltar 'gyur te/ gang las gtan tshigs tshul gsum par 'gyur/'on kyang bsgrub par bya ba ldog pa las ldog pa'i chos nyid rang gi chos su gtogs pa de lta bu bstan pa ni chos mi mthun pa'i sbyor bas rnam pa de lta bu'i sgrub par byed pa'i chos las gdon mi za bar bsgrub par bya ba rtogs pa yin gyi gzhan du na ldog pa dang ldan pa gcig pa nyid du mi rigs pa'i phyir khyab pa'i mtshan nyid bstan pa med na chos mi mthun pa'i sbyor bar mi rigs so//'o na ni sbyor ba rnam pa gnyis la dam bca' ba'i sbyor ba ma bstan pa'i de ji ltar shugs kyis go bas de'i don rtogs par 'gyur/ gang yang sgrub par byed pa'i sbyor bar mngon par mi 'dod ce na/'dir ni zhes bya ba smos te sbyor ba'o/ /phyogs kyi chos dang 'brel pa brjod pa'i shugs kho nas zhes 'chad par 'gyur ro/ /dam bcas pa'i don ni chos dang chos can gyi spyi'i mtshan nyid bsgrub byar rtogs pa'i phyir gtan tshigs las dam bca' ba'i sbyor ba bstan par mi bya'o//gal te gzhan shugs kyis brjod pa ni/ rab tu ma bstan pa zhes bya ba smos te ma brjod pa'o/ /gzhal bar bya ba ni bsgrub par bya'o/ /ji ltar ni rnam pa 'ga' zhig mi rtogs pa'o/ /gal te dam bcas pa'i don de bzhin du rtogs pa yin no snyam du sems na/ rang gi don gyi rjes su dpag pa'i skabs su de rang nyid la gzhan gyis bstan pa med par rtogs na gzhal bya nye bar ston par byed pa su zhig yod ces bya ba ni su yang ma yin no/ /rang nyid kyis bsgrub par bya ba med na mi 'byung ba'i sgrub par byed pa'i chos mthong bas gzhal bya rtogs pa yin no/ / de bzhin du gzhan gyi don gyi rjes su dpag pa las yang de nyid kyis de rtogs na dam bca' ba brjod pas ci zhig bya/ gal te rang nyid rtogs pa'i dus na gzhal bar bya ba 'ga' zhig nye bar bstan pa med pa de lta na de ji ltar rtogs she na/ phyogs na yod pa zhes bya ba smos te bsgrub par bya ba'i chos can la yod pa'o//du bsgrub par byed pa'i chos nye bar dmigs pa ni mngon sum gyis mthong ba ldan pa'o/ /du ba de dang de la bsgrub par bya ba'i chos me dang 'brel pa tshad mas nges pa'i stobs kyis sngar khyab pa rtogs la med na mi 'byung ba dran par 'gyur ba'i mthu kho nas phyogs kyi chos kho na bzung ba dang khyab pa dran pa'i mthu kho nas dam bca' ba'i sbyor ba spangs pa las 'di na me yod do zhes de lta bu'i ngo bo dam bca' ba'i don shes par 'gyur ro//de la 'dir yang sha za la sogs pa 'ga' zhig gis gzhal bar bya ba rna bar brjod pas de ltar 'gyur ro snyam du sems na/ de na 'di la zhes bya ba smos te/ de la rang gi don gyi rjes su dpag pa dus su sha za la sogs pa 'ga' zhig mi snang ba'i me 'di na de ltar yod do zhes gzhal bar bya ba 'di rtogs par byed pa ston cing brjod pa ni med do/ /gal te khyod bden par smra bas yin na de ltar brjod par ni mi rigs la/ de bzhin du kho bos kyang sa phyogs la yod pa'i du ba mthong nas de mes khyab par dran pa la ltos nas me'i rtogs pa 'byung ngo / /yod par 'ga' zhig brjod par mi byed na yang me 'di na yod do zhes de rtogs par byed pa de bzhin du de ni gzhan la yang rim pa dang bcas pas rtogs pa kho na yin pa'i phyir ro//gal te 'ga' zhig ston pa med pa de lta na yang rang nyid kyis gzhal bya rnam par gzhag pa rtogs pa na rtogs kyi rjes su 'brang bar 'dod do zhe na/ bdag nyid kyi zhes bya ba smos te/ gal te 'ga' zhig ston par mi byed na rang nyid 'ba' zhig gis kyang rtags kyi byed pa las sngar cung zad cig kyang me la sogs pa rtogs pa med do//gal te ci'i phyir zhe na tshad ma ni rgyu'o/ /med pa ni stong pa'o/ /me 'di na yod do zhes de ltar rtogs pa'i rgyu mtshan med pa'i phyir de lkog tu gyur pa rtogs pa'i rgyu mtshan tshul gsum pa'i gtan tshigs med na de ji ltar 'gyur/ gal te rtags med kyang de ltar rtogs par 'gyur ro zhes smra na de'i tshe de ltar rtogs par 'dod pa yin na rtags don med do//de ni rjes su dpag par bya ba'i rtogs pa'i ched yin pa'i phyir de med kyang de rtogs na de ji ltar 'di dgos pa med par mi 'gyur gzhan dag shin tu rmongs par ston pa ni bdag nyid ces bya ba smos te//rang dgar 'di la me yod do zhes rnam par 'jog pa ni ji ltar ba bcol du rnam par gzhag par bya ba yin no/ /ci'i phyir tshad ma med kyang rnam par 'jog par 'gyur/ de rtogs pa ni rgyu mtshan ni gzhal bya rnam par gzhag pa rtogs pa'i ched du phyi nas rtags de'i rgyu mtshan gyi rjes su 'brang ngo zhes bya ba rtogs pa'i rim pa char phye ba 'di ci zhig yin/de lta na dang po rtags kyi rjes su 'brangs pa de las bsgrub par bya ba rtogs so zhes bya ba rim pa 'thad pa yin na/ gang sngar rjes su dpag par bya ba yin no zhes bya ba de ni phyin ci log la brten pa'i phyir bzhad gang du 'gyur te/'jig rten na skra bregs nas skar ma 'dri'o zhes bya ba gang yin pa de'i glu de dang rim pa 'di mtshungs pa'i phyir ro/ /de'i phyir phyogs kyi chos bzung nas khyab par dran pa'i mthu kho nas rang nyid rtogs pa yin no/ /de yang ston par byed pas brjod pa yin no zhes bya ba ni cung zad cig kyang gzhal bya bstan pa med do//gal te rang gi don rjes su dpag pa'i dus su rang nyid kyis bsgrub par bya ba rtogs pa ni rigs te brtag kyang de la bdag nyid kho nas rtogs so zhes de skad du bshad kyi/ gzhan gyi don gyi rjes su dpag pa ni gzhan gyis ji ltar rtags bstan pa de bzhin du gzhal byar bya ba yang gzhan kho nas bstan par bya ba de'i phyir dam bca' ba'i sbyor ba rigs so snyam na/de gzhan gyis shes brjod na yang / /zhes smos te/ bdag nyid kho na nyi tshe sngar rnam par 'jog par byed na bslad pa yin te/ gzhan rgol bas de'i gzhal bar bya ba brjod pa yang bslad pa nyid do//de brjod pa ni don la the tshom za ba rjod par byed de/ de ni nges pa'i yan lag ma yin pas gzhal bar bya ba zab pa rtogs par dka' ba brgyud pas kyang de ma yin pa dang 'brel pa brjod par 'dod pa tsam gyi rgyu mtshan gyis stong par gnas pa yin no//ci'i phyir bslad pa yin zhe na/ nye bar mkho ba med pa'i phyir ro/ /'dir bsgrub par bya ba rtogs pa la nye bar mkho ba cung zad cig kyang med de/ /de shes pa dang shugs la dbyer med do zhes bya ba'i don to/ /gzhan dag ni 'ga' zhig tu nye bar mkho ba yod do zhes dgongs pas yul nye bar bstan pa zhes bya ba smos te/gtan tshigs kyi yul ni bsgrub par bya ba gang yin pa de bstan pa ste/ dam bca' ba'i tshig nye bar mkho ba yin zhe na/ de nyid kyis zhes bya ba smos te yul lo/ /re zhig smos pa ni rim gyis so/ /yul nye bar bstan pas don dang ldan pa yin de bstan na ni dam bca' ba'i tshig dogs par 'gyur na/yul bstan pa nyid kyis ci zhig phan te dgos pa ci zhig yod ces bya'o/ /gal te de ni bsgrub par bya ba rtogs pa dang / chos mthun pa can gyi sbyor ba la sogs pa rtogs pa'i yul nye bar bstan pa'i don de dang de bstan pa la dam bca' ba'i tshig brjod dgos te de lta na bsgrub par bya ba bstan par bya ste/byas pa nyid mi rtag go zhes brjod pa 'dir ci zhig chos mthun pa can gyi sbyor ba yin/ yang na chos mi mthun pa can yang mi shes te/ 'dir gnyi ga la dogs pa skye ste/ byas pa nyid kyis mi rtag pa bsgrub par bya ba dang chos mthun pa can dang rtag pa ni ma byas pa nyid ni chos mi mthun pa zhes bya ba sgra ni mi rtag ste byas pa nyid do zhes dam bca' ba'i tshig gis the tshom med par rtogs pa dang /gtan tshigs 'gal ba dang ma nges pa rtogs par mi 'gyur te/ dam bca' ba sngon du song ba'i sbyor ba ni sgra mi rtag ste byas pa'i phyir zhes gtan tshigs yod par rtogs pa las byas pa'i phyir rtag go zhes bya ba ni 'gal ba dang /rtsol ba las byung ba yin te byas pa'i phyir zhes bya ba ni ma nges pa dang / gtan tshigs tshul gsum pa'i rtags go bar bya bar mi 'gyur te de bsgrub par bya ba ltos pa'i phyir ro//dam bca' ba'i tshig ni cha shas la spyi brtags pa'i phyir ro/ /bsgrub par bya ba'i chos can la phyogs zhes bya ba ste/ de la yod pa'i byas pa nyid ni phyogs kyi chos so/ /bsgrub par bya ba'i chos ni spyi'i don ni phyogs so/ /de la 'jug pa ni mthun pa'i phyogs la yod pa dang /mi mthun pa'i phyogs la med pa ste mthun pa'i phyogs zhes bya ba bsgrub par bya ba'i chos spong ba ni mi 'jug pa'o/ /mi mthun pa'i phyogs la med par rtogs pa yin no zhes dogs pa la/ gal te zhes bya ba smos te/ bsgrub par bya ba'i chos kyi mtshan nyid nges pa dang /chos mthun pa can gyi sbyor ba la sogs pa rang gi ngo bo nges par bzung ba'i bdag nyid las gzhan du na ni dam bca' ba'i tshig med pa na'o/ /de ni mi rigs te bsgrub par bya ba 'grub pa don du chos mthun pa can gyi sbyor ba la sogs pa shes pa'i don la yul nye bar bstan par bya ba yin na ni de thams cad legs par 'gyur ro//ji srid du rang gi don rjes su dpag pa'i dus su dam bca' ba'i tshig med kyang phyogs kyi chos bzung nas 'brel pa dran pas bsgrub par bya ba 'grub pa'i mtshan nyid rtogs pa yin no zhes bshad pa de bzhin du gzhan gyi don gyi rjes su dpag pa la yang 'gyur te/gang gi phyir de ltar de lta bas na dam bca' ba'i sbyor bar smra ba ni gang gi tshe rang nyid kyis bsgrub par bya ba rtogs pa de'i tshe bdag nyid kyi bsgrub par bya ba rtogs pas yul rnam par 'jog par byed na gang gis na yul dam bca' ba'i tshig gi sgo nas skyes bu 'ga' zhig gis de med kyang rtogs pas bsgrub par bya ba nges pa ni rtags kyi mthu kho na las yin no//kho bo cag gis rtogs pa gang yin pa de ni kho bo cag don du gnyer ba mthong ba ni bsal ba'o/ /dam bca' ba'i sbyor ba mtshan nyid ni ci dus ston gyi bram ze bzhin du rnyed pa tshol bar byed dam/dper na yod med kyang gzhan dag gi khyim du bram ze la gzhan dag dad pa can la sogs pa dus ston don du gnyer ba na dad pa can la smras pa mar gyis bkang zhing so sor yon ster na ni kho bo za'i gzhan du na ma yin no zhes bya ba de dang mtshungs par khyod la yang yin no//gzhan yang gal te smras pa gzhan gyi don gyi rjes su dpag pa'i dus su ji ltar rtags gzhan gyis ma brjod na rtogs pa med do zhes bstan pa de bzhin du bsgrub par bya ba yin no zhes brjod na/ nam gyi tshe dgos pa yin/ gal te 'di rgol bas brjod pa tsam gyis rtags kyang nges la de'i rjes su 'brangs nas bsgrub bya rtogs par 'gyur ba dang gzhan la rtogs pa don du gnyer ba yin na kho bo yang rtags brjod pa spangs nas dam bca' ba la cis na sbyor ba mi byed/kho bo cag gi tshig nyid de rtogs pa'i tshad ma yin pa de nyid kyi rjes su dpag par bya ba rtogs pa ni brjod pas grub pa'i phyir na de ni yod pa ma yin no//gang gi phyir kho bo cag gi tshig 'ba' zhig gis kyang ma yin te/ rang gi don rjes su dpag pa'i dus su kho bo cag gis brjod pa med pa'i phyir ro/ /kyang gi sgras ni 'on kyang gang gi tshe kho bo cag gi brjod pa 'jug pa de'i tshe yang kho bo cag gi tshig las rtags kyang rtogs pa med na gang kho na las bsgrub bya 'grub pa'i rjes su 'brang bar 'gyur/'on kyang gang gi tshe de'i rtags tshad ma 'ga' zhig las de 'dir rang nyid grub par gyur pa de la kho bo cag gis dran pa skyed par byed pa tsam yin pa de'i tshe rtags bdag nyid grub pa'i rjes su 'brangs nas bsgrub par bya ba rtogs kyi tshig gis ni ma yin no//de'i phyir gang gis na dam bca' ba brjod pa dang ma brjod pa'i bdag nyid kyi gnas skabs 'di gnyis la khyad par med de rtags kyi bdag nyid grub pa'i nus pa kho nas bsgrub par bya ba rtogs pas ci yang ma yin no//des na rang dang gzhan gyi don rjes su dpag pa rtags kyi bdag nyid kyi rjes su 'brangs pa des bsgrub bya rtogs te/ bsgrub bya rtogs pa la bye brag med pa'i phyir gzhan gyi rjes su dpag pa la dam bca' ba don med pa nyid de rtags kyang re zhig 'dir ma brjod pa yin na/gang de sngar grub pa'i bdag nyid rjes su dran pas ma yin na ci the tshom za ba'i don brjod par bya ba'i dam bca' ba brjod par khas len pa yin/ gal te bsgrub par bya ba 'grub pa la dam bca' ba mi brjod pa nye bar mi mkho bas de'i don la 'di sbyor ba ma yin gyi chos mthun pa'i sbyor ba la sogs pa shes pa'i phyir de brjod pa la gnas pa nyid de de bzhin du na rtogs pa med pa'i phyir ro snyam na dam bca' ba smos pa med pa zhes bya ba smos te/chos mthun pa'i sbyor ba la sogs pa dam bca' ba brjod pa med par yang rtogs pa mthong ba de'i phyir de'i don la dam bca' ba nye bar dgod pa mdzes pa ma yin no//chos mthun pa'i sbyor ba la sogs pa med na yang bsgrub par bya ba bstan pa rtogs pa ga la yin zhe na/ phyogs kyi chos dang 'brel pa smos pa tsam gyis zhes bya ba smos te/ 'di snyam du dgongs pa yin te 'ga' zhig byas pa yin pa de ni mi rtag go zhes bya ba de tsam brjod pa tsam gyis ma yin te/btang snyoms su 'dug pa dang / sgrub par byed pa ma tshang ba gang yin pa kho nas phan pa'i phyir ro/ /'on kyang gtan tshigs chos can la nye bar bsdu ba ni gdon mi za bar bya ba yin no//de la gang gi tshe sgra yang byas pas shes brjod pa de'i tshe chos mthun pa can gyi sbyor ba rtogs pa'am/ yang na gang gi tshe brtag pa brjod pa de'i tshe chos mi mthun pa can yin no zhes 'brel pa brjod pa sngon du song ba'i phyogs kyi chos brjod pas sbyor ba gnyi ga rtogs pa yin no//gtan tshigs 'gal ba dang ma nges pa yang phyogs kyi chos smos pa tsam gyis rtogs so/ /gang gi 'brel pa rjod par byed pa de'i tshe ji ltar mi rtogs/ de lta na gang byas pa de ni mi rtag pa yin no zhes bya ba ni phyogs kyi chos brjod pa na 'brel pa bshad pa la gtan tshigs su khong du chud pa ni bsgrub pa'i rjes su bzlas pas khyab pa yin no//gang byas pa de ni rtag pa yin no zhes brjod pa ni 'gal ba ste khyab pa phyin ci log pa yin la/ gang byas pa de ni rtsol ba las byung ba yin no zhes bya ba bstan pa ni 'khrul pas ma nges pa yin par nges so//tshul gsum pas rtags go bar bya ba yin te gang gi phyir khyab pa ston pa'i dus su khyab par byed pa'i chos bsgrub par bya ba rtogs par bya'o/ /gang la khyab par bya ba'i chos chos can la nye bar sdud pa de khyab par byed pa'i chos khyad par can rtogs par bya ste/ bsgrub par bya ba'i spyi'i phyogs gcig phyogs yin no zhes nye bar bsdu ba ni khyab par bya ba'i chos phyogs kyi chos nyid du rtogs par bya'o/ /de yang khyab pa chos can gang nye bar bstan pa de ni bsgrub par bya ba'i chos kyi spyi dang don mthun pa la mthun pa'i phyogs su shes par bya'o zhes mthun pa'i phyogs la yod pa yang rtogs pa dang /shugs kyis khyab par byed pa ldog pas khyab par bya ba ldog pa gang la nges pa de ni mi mthun pa'i phyogs la med pa yang nges pa yin no/ /gal te phyogs la sogs pa rnams kyang shes pa ni cung zad cig dogs pa ni tha snyad du byed pa rnams phyogs la sogs pa'i brda la ltos nas lkog tu gyur pa'i don rtogs pa ma yin gyi/gang la lar dpe gang la 'brel pa'i rnam pa de dang des rtogs pa de la 'jig rten pa dngos po rtogs par gyur pa ni phyogs la sogs pa brda bzung pa la ltos pa ma yin no//de la bstan bcos byed pa ji ltar 'dod pa'i lung gi ngo bo rtogs pa rang nyid kyi brda la/ gzhan pa'i mtshan nyid byed pa yang tha snyad kyi dus su de'i rjes su 'brang ba rnams la 'ba' zhig tu nye bar mkho ba med do/ /de'i brda bstan pa nyid ni ji skad bshad pa'i lung gi ngo bo la nye bar mkho ba'i tha snyad du byed pa rnams gal te de las rtogs pa de tsam nyid kyi bsgrub bya 'grub pa skyed pa'i phyir phyogs dang mthun pa'i phyogs la sogs pa'i brda yongs su shes pa la yang cung zad nyams pa med do//de nyid kyi phyir slob dpon gyis med na mi 'byung ba'i don bstan pa de rjes su dpag pa yin no zhes go bar byed pa'i ngo bo tsam gyi phyogs la brda la mi ltos par rtsod pa bsgrub par bshad do//rang gi shes rab kyis nyes pas yin gyi/ de la cung zad cig kyang skyon du grags pa med pa'i phyir 'dir ci zhig brjod par bya/ de'i chos mthun pa can gyi sbyor ba la sogs pa shes pa'i phyir dam bca' ba brjod pa yin na/ phyogs kyi chos dang 'brel pa brjod pa tsam kho nas ji skad bshad pa'i rnam pa rtogs par mi rigs pa'i phyir ro/ /de'i dam bca' ba brjod pa dgos pa ci zhig yod de/ ci yang med pa kho na'o//rang nyid kyang 'di brjod pa'i rim pa gang gis rjes su dpag par bya ba rtogs pa de khyab par du bsal nas gzhan la rtogs pa rim pa gzhan la brten pa ni gzhan slu ba g.yo can gyi rtogs pa kho na yin gyi bden pa ma yin no zhes bstan pa ni rang la nges pa bzhin du zhes bya pa la sogs pa smos te/ji ltar rang la nges pa skyes par byas pa de bzhin du gzhan la yang nges pa skyes par byed pa ni gzhan la yang phan par dga' bas sgrub pa brjod do/ /de la ni de'i rigs par gyur pa la'o/ /bdag nyid ni rgol ba 'di'o/ /gzhal bya nye bar bstan pa ni nye bar bstan pa su zhig gis brjod pa med kyang rang gi don gyi rjes su dpag pa'i dus su gzhal par bya ba la rtogs la gzhan la the tshom za ba la sogs pa la ston pa ni bdag nyid kyis rtogs pa'i gzhal bya khong du chud pa sngar rang nyid kyis rtogs pa'i dus su gang snga ma'i gzhal bya rtogs pa'i thabs kyi rim pa nyams su myong ba de las gzhan la brten pa yin no zhes bya ba 'di la rim pa gzhan la brten pa'i rgyu ci zhig yod/ci yang med pa nyid de gzhan dag rmongs par 'gyur bas spang bar bya'o/ /'di ltar gang gi tshe bdag nyid kyis rtogs pa'i rim pas rtogs pa'i rgyu mtshan yin na cis na des yongs su spangs nas rim pa gzhan la brten pa yin/yang na rtogs pa'i rgyu mtshan ma yin pa'i rim pa gzhan la brten pa yin na ni ji ltar des rang nyid kyis rtogs pa dang ldan pa khyed kyi yin pa'i phyir ro/ / de lta bas na gang gi phyir de ltar na'o/ /gzhal bar bya ba bsgrub par bya ba smos te/ dam bca' ba brjod pa ni cung zad cig kyang dgos pa med do/ /gang las gzhan du yang ni med kyang des rtogs pa ste bsgrub par bya ba'i rtogs pa skye ba'i phyir zhes bya ba mjug bsdu ba'o/ / de ltar dam bca' ba'i ngag sgrub par byed pa yin pa bsal bas gzhan dag gi nye bar sbyar ba dang mjug bsdu ba la sogs pa gzhan dag gis yongs su brtags pa'i sgrub par byed pa'i ngag bsal ba ni rigs pa lhag par bshad pa ni 'dis ni zhes bya ba smos te/ gzhan las kyang rtogs pa skye ba yin no zhes bya ba'i rigs pa ni nye bar gtod pa dang mjug bsdu ba la sogs pa'o//sogs pa smos pa ni the tshom za bas shes par 'dod pa la sogs pa spangs shing bsal ba yin no/ /de la dpe la ltos pa de bzhin du nye bar sbyar ba'am/ de bzhin du ma yin pa las bsgrub par bya ba ni nye bar gtod pa'o//dam bca' ba slar brjod pa ni mjug bsdu ba'o zhes bya ba 'dis bsgrub par bya ba'i mtshan nyid bstan pa ni dam bca' ba yin pas dam bca' ba'o/ /'dis ni zhes bya bas de nyid bstan pa yin te 'di tsam nyid kyis phyogs kyi chos dang 'brel pa brjod pa tsam gyis nye bar gtod pa la sogs pa spangs nas bsgrub bya rtogs pa btub pa'i phyir ni skye'o//'dir 'od kyi smras pa re zhig dam bca' ba ni yul nye bar bstan pa'i phyir gdon mi za bar brjod par bya ste/ 'jig rten sngar gcad par bya ba la sogs pa'i las nges par dpyad pa de'i phyir sta re la sogs pa sgrub par byed do//nye bar gtod pa yang ji srid du dpe mthong ba nus pas gtan tshigs chos can la nye bar ma bsdus pa de srid du gang las bsgrub bya rtogs par 'gyur/ rang gi don gyi rjes su dpag pa dang mthong ba ni nges pa'i shes pa 'dis don ston to//de ltar rang gi don gyi rjes su dpag pa ni thog mar sa phyogs la du ba mthong na de ni gang dang gang la du ba bdag gis mthong ba de dang de la me yod do zhes mes khyab pa dran pa dang / /des na 'di na yang du ba yod do zhes slar nges so/ /de so sor nges pa'i don gzhan gyi rjes su dpag pa la nye bar gtod pa zhes brjod do//mjug bsdu ba yang gdon mi za bar brjod par bya ste/ gang gi phyir gang yang sngar sgra mi rtag go zhes brjod pa de tsam gyis nges pa skye ba ma yin gyi da ltar tshad ma'i stobs kyis 'ongs pa'i don de shes pa'i don 'dis mjug bsdu ba yin no/ / ma lus pa'i tshad ma'i bya ba 'dis nye bar sdud pa yin te/ 'di ltar dam bca' ba ni lung ngo / /gtan tshigs ni rjes su dpag pa'o/ /dpe ni mngon sum mo/ /nye bar gtod pa ni nye bar 'jal ba'o/ /des na tshad ma rnam pa bzhi po de dag gi bya ba yang mjug bsdu bas nye bar sdud pa yin pa'i phyir ji ltar 'bras bu dang bcas pa ma yin snyam pa de dag bstan pa ni/re zhig kha bya'i chags pa yongs su dor zhes bya ba la sogs pa smos te/ kha bya ni gcer bu slob dpon no/ /de ni 'bras bu med pa'i ming rtseg ma 'bri ba la chags pa des na de lta bu gzhan gyis bshad pa'i de'i steng du gdon mi za bar mi rigs pa 'bras bu med par yang brjod par byed pa yin pa'i phyir gnas med pa la mngon par zhen pa ni spang bar bya'o//mig tshugs la zhes bya ba ni rnam par g.yeng ba nye bar bsdus pa la sogs pa'o/ /re zhig 'di tsam gyi phyogs kyi chos dang 'brel pa smos pa tsam gyi ngag gis bsgrub bya rtogs par gyur pa cis nam yin ji srid du ji snyed pa'i gzhan gyi don gyi rjes su dpag pa'i don brjod pa na kho bo cag rnams kyis rjes su rang don ji lta ba bzhin shes la de srid du nyung ba dang lhag par chags pa med pa'i rang gi don gyi rjes su dpag pa'i rtogs pa la yang gtan tshigs dang /dpe de'i nus pa la nyams pa ci zhig yod/ 'di gzhan gyi don gyi rjes su dpag pa la yang gang gis rtogs pa mi skye/ de tsam gyis rtogs pas dam bca' ba dang nye bar gtod pa dang mjug bsdu ba'i mtshan nyid smos pa'i phreng bas ci zhig bya/ yang na byis pa 'jug par byed pa de la nye bar mkho ba nye bar brjod pa ni mtshan nyid yin no//de lta na dam bca' ba nye bar gtod pa dang mjug bsdu ba'i mtshan nyid spros pa'i phreng bas ci zhig bya/ yang byis pa 'jug par byed pa de la nye bar mkho ba nye bar brjod pa ni mtshan nyid yin no//de lta na dam bca' ba ni nye bar gtod pa dang mjug bsdu ba'i sbyor ba yang gal te tshad mas des na rang gi bsgrub byas khyab pa'i sgrub par byed pa'i chos su mi 'gyur ba'am/ bsgrub par bya ba'i chos can la yod pa yin pa de 'dir gtan tshigs su mi 'gyur ro/ /de'i gtan tshigs yod pa yin na dam bca' ba med kyang rang gi don rjes su dpag pa lta bu'i go bar byed pa'i ngo bo ma tshang ba med pas/de'i bsal bar mi bya ba'i phyir gnas med pa la cis na zhen par byed/ sgrub par byed pa'i chos 'phen pa'i nus pas stong pa'i bsgrub par bya ba'i chos brjod pa tsam gyis rgol ba bsgrub par bya ba nges par rigs pa ma yin te/gtan tshigs nye bar bkod pa don med par thal bar 'gyur ba'i phyir ro/ /de des 'phangs pa'i nus pa nyid kyis dam bcas pa yin no/ /gang gis dam bca' ba'i yul nye bar bstan pa ni gzhan du bstan bcos byed pa nyid kyis bshad pas smras pa'i lan btab zin to//gang yang sgrub par byed pa la rab tu sbyar ba des na kho bo sgrub par byed pa 'dis bsgrub par bya ba che ge mo zhig rtogs par bsgrub par bya'o snyam pas/ las la nges par dpyad pa nyid de la rab tu sbyar ba'i phyir 'jig rten pa'i rigs las 'das pa ma yin no//de ltar ma yin na gal te sgrub par byed pa las gang gi bsgrub par bya ba rtogs pa skye ba des na las la nges par dpyod pa de med par gyur pa'i rang gi don gyi rjes su dpag pa'i bsgrub bya 'grub pa ni sgrub par byed pa'i rgyu mtshan las ji ltar 'gyur/nang yang me dang du ba'i 'brel pa sems la rnam par gnas kyang gang na me yod ces me tshol ba na du ba dang bcas pa'i phyogs mthong ba tsam gyis me rtogs pa yin no zhes ji ltar rang gi don gyi rjes su dpag pa la nges pa'i shes pas shes par 'gyur/ yang na res 'ga' de la mthong ngo zhes gzhan gyi don la bstan pa yin na ni de'i tshe zho la sogs pa zos nas res 'ga' du ba las me rtogs pa yang yin no zhes/zho la sogs pa zos pa yang res 'ga' zhig cis na su zhig gis brten par bya ba ma yin gang phyir brjod pa lung yin no zhes bya ba de la gal te rgol ba'i tshig nyid lung yin pa de'i tshe de nyid las bsgrub par bya ba 'grub par gtan tshigs bstan pa don med do//yang na dam bca' lung du smra na lung dam bca' ba yin pa de'i tshe/ phyogs 'di na me yod do zhes lung 'ga' zhig las bshad pa med na ji ltar lung dam bca' ba yin/ gtan tshigs rjes su dpag pa yin no zhes bya ba yang mi rigs te phyogs kyi chos tsam gtan tshigs ma yin gyi de ni tshul gsum pa yin pa'i phyir ro//dpe thams cad kyang mngon sum ma yin pa'i phyir ji ltar dpe mngon sum du 'gyur/ nye bar gtod pa yang tshad ma ma yin na ji ltar de'i byed pa nye bar bsdu ba yin/nye bar gtod pa ni gal te nges par dpe mthong ba'i nus pas gtan tshigs chos can la nye bar gtod pa de ni nye bar gtod par bla'i/ /ci byas pa'i phyir zhes bya ba phyogs kyi chos bstan pa yin de nyid mthong ba'i nus pas gtan tshigs nye bar bsdu bar 'gyur bas phyogs kyi chos bstan par mi bya bas ci yang ma yin no//des na gang la dam bca' ba thog ma kho nar sbyor ba mi 'dod de/ de la de yang brjod pa gang las mjug bsdu bar 'gyur snyam na/ phyir zhes bya ba smos te de'i phyir na 'di nyid phyogs kyi chos dang 'brel pa tsam gyis sgrub par byed pa'i bdag nyid kyang gang gi sbyor bas sbyor ba na tshig yan lag lnga pa'i bdag nyid ma yin no zhes bya bar gnas so//'di bsgrub par bya ba'i ngag gis dam bca' ba la sogs pa 'ba' zhig sbyor ba mi rigs te/ sngar gzhan gyis khas blangs pa gtan tshigs kyi sbyor ba'i dpe yin no zhes bya ba'i rim pa nges pa ni 'ga' yang med do/ /ga las she na thams cad du gang gi tshe sngar gtan tshigs yin la phyi nas khyab pa'am/yang na sngar khyab pa yin la phyis phyogs kyi chos la rab tu sbyar ba de lta na yang go bar byed pa'i phyir ro/ /'o na ni de'i sbyor ba rnam pa gnyis yin no zhes bya ba mi rigs par bshad pa yin te gang gi phyir rigs pa can gyi gtan tshigs ni rnam pa gsum ste/rjes su 'gro ba dang / ldog pa dang / rjes su 'gro ba dang ldog pa dang ldan pa'o/ /des na de'i sbyor ba ni rnam pa gsum ste/ chos mthun pa dang chos mi mthun pa dang chos mthun pa dang chos mi mthun pa can dag go zhes brjod par bya'o zhe na/'brel pa smos pa dag gis kyang zhes bya ba smos te/ rim pa nges pa 'ba' zhig ni rigs pa ma yin te/ 'on kyang gnyi ga la yang don tha dad pa ni 'ga' yang med de gang la yang tshul gsum yod par gyur pa de'i phyir gtan tshigs thams cad rjes su 'gro ba dang ldog pa nyid dang rjes su 'gro ba can nam/ldog pa can gyi gtan tshigs 'ga' zhig med pa des na gang las sbyor ba rnam pa gsum du 'gyur bar sems pa yin/ /gal te gang las don tha dad pa med pa yang yin na gnyis ka smos so zhe na/ gnyis ka zhes bya ba smos te chos mthun pa dang chos mi mthun pa sbyor ba la sogs pa la yang dgag pa dang sgrub pa'i ngo bos chos tha dad par rtogs so//de lta na sgrub par byed pa'i chos de yod pa nyid bsgrub par bya ba'o/ /rang bzhin du gyur pa kho na chos mthun pa dang / chos mi mthun pa'i sbyor ba dag gis bshad pa'i phyir ro/ /'o na ni chos mthun pa'i sbyor ba ni gtan tshigs yod na bsgrub bya yod pa dang /chos mi mthun pa bsgrub par bya ba med na gtan tshigs med par sgra las rtogs kyi de'i bdag nyid ma yin na de cis na brjod/ gal te de'i rang bzhin du bstan pa'i phyir zhe na de'i rang bzhin ma yin pa zhes bya ba smos te gang gi tshe chos mthun pa'i sbyor bas de'i rang bzhin du ma 'phangs pa de'i tshe sgrub par byed pa de'i rang bzhin du ma gyur pa ci de ltar gcig tu nges par gdon mi za bar bsgrub par bya bar 'gyur te/res 'ga' ba zhig tu 'gyur srid do/ /gang byas pa de mi rtag pa yin no zhes bya bar gcig tu nges par gyur pa'i gtan tshigs la bsgrub byas khyab pa ni chos mthun pa la sogs pa'i sbyor bar brjod do//de yang de'i bdag nyid ma yin na ni don gzhan la shugs kyis de 'phen pa mi srid pa'i phyir ro/ /ji ltar de'i rang bzhin du gyur ba'i gcig tu nges pa las gzhan la yod pa ma yin zhe na/byas pa nyid yod na zhes bya ba la sogs pa smos so/ /gal te rtsol ba las byung ba nyid med du zin kyang byas pa nyid yod pas de'i rang bzhin ma yin pas mi rtag pa yang 'di nyid kyi lugs kyis de yang de'i bdag nyid spangs pa'i phyir na rtsol ba las byung ba nyid mi rtag pa'i rjes su 'gro bas mi 'gyur ba'am/ldog na ldog par mi 'gyur bas ji ltar de las de rtogs par 'gyur zhe na/ nyes pa 'di dag med de/ rtsol ba las byung ba'i don gyi rang bzhin gyis mi rtags pa nyid des sgrub par byed pa de la yang de'i bdag nyid yod pas rjes su 'gro ba dang ldog pa dang bsal bar mi nus so//byas pa nyid mi rtag pa nyid tsam la ltos pa de'i bdag nyid ni 'dis spong bar byed par 'dod pa'i phyir ro/ /'o na ni me ldog pas de'i rang bzhin ma yin pa'i du ba ldog pa dang rjes su 'gro ba yang mthong ngo zhe na/ 'bras bu ma yin pa zhes bya ba smos te/ rjes su 'gro ba dang ldog pa dag ni 'brel pa'i rgyu mtshan des de la khyab pa na/ de med na de med pa'i phyir dang / de la don gzhan pa'i du ba me de las byung ba'i mtshan nyid kyi 'brel ba ni rjes su 'gro ba dang ldog pa'i rgyu mtshan du yod par gyur pa'o/ /de dag gang la don gzhan ma yin par brjod pa de ni gdon mi za ba'i bdag nyid yin no zhes bya bar dgongs so//'dir dpe ni dper na byas pa nyid dang rtsol ba las byung ba de dag nyid las byung ba zlog pa ste gcig ldog pas gzhan ldog pa ni ma yin te gang rtsol ba las byung ba ma yin pa de ni byas pa yang yin no zhes bya ba de lta bu'i ngo bo yin no//gang gi phyir de ltar na de'i phyir rjes su 'gro ba dang ldog pa dag las mtshan nyid ji lta ba'i gtan tshigs yod na bsgrub par bya ba gdon mi za bar yod pa dang / bsgrub bya med na gtan tshigs gdon mi za bar med pa'i phyir chos mthun pa'i sgo nas sam chos mi mthun pa'i sgo nas sbyor ba gcig gis gnyis pa 'phen pas bdag nyid la khyab par byed pa'i rgyu mtshan gyis 'phangs pas de yang cig shos ni khyab par bya ba yin pa de'i phyir gang la yang tshul gsum pa rtogs pas gcig ni tshig gis yin la gzhan ni don gyis yin no zhes 'brel pa brjod pa'i sbyor ba kho nas dgag pa'i sgo nas sam sgrub pa'i sgo nas tha dad kyi don ni ma yin no zhes bya bar grub po//de'i phyir de'i sbyor ba gnyis te chos mthun pa dang chos mi mthun pa'o/ /chos mthun pa dang chos mi mthun pa dag gnyis kas ma yin la/ de'i don gyis yin te gang yang rung ba kho nas ston pa'i phyir ro//gtan tshigs thams cad rjes su 'gro ba dang / ldog pa'i dngos po can de rjes su 'gro ba can nam ldog pa can gyis ma yin no zhes bya 'di dag kyang nye bar bsdu ba ni gnyis pa 'phen pas zhes bya ba smos te/ gcig pu ni ma yin no/ /rjes su 'gro ba'i sgo nas sam ldog pa'i sgo nas sgrub par byed pa'i ngag gnyis kyis rjes su 'gro ba dang ldog pa dag gi sbyor ba dngos su sgra yis bstan par 'dod pa ni don med pas rtogs pa'i shes pa la dgos pa med pa'i phyir ro//don de nyid gzhan gyi bsal ba rtogs par bya ba ni de'i rang bzhin yin pa nyid ces bya ba la sogs pa smos te/gang gi tshe de'i rang bzhin gyis bsgrub bya dang gtan tshigs kyi rjes su 'gro ba grub bo/ /de'i rang bzhin yin pa de nyid kyi phyir de med na med par yang grub pa nyid do/ /de'i rang bzhin med pa ni gang gi bdag nyid med pas med par rigs pa'i phyir ro//de bzhin du de'i rang bzhin gyis bsgrub par bya ba med na sgrub par byed pa med par grub pa bden pa de nyid kyi phyir gtan tshigs grub pa dang rjes su 'gro ba yang grub pa yin no/ /kha cig chos mthun pa can gyi sbyor ba bshad pa na de med pa nyid ni gtan tshigs mi mthun pa'i phyogs la med par gsungs pa ji ltar gzhan pa dang 'gal ba mi mthun pa'i phyogs yin na gtan tshigs med par thal bar 'gyur ba dang 'gal ba kho nas rnam par bcad pa thal bar 'gyur bas na bsnan pa bstan pa'i phyir ldog pa'i sbyor ba yin no zhe na/de dang de'i don du yang mi rigs te/gang gi phyir gzhan pa dang 'gal ba dag kyang yin te/ de med pa 'ba' zhig gis mi mthun pa'i phyogs yin na chos gzhan dang ldan pas gzhan yin na/ brjod par 'dod pa'i chos kyi rten ma yin pa ma yin no/ /'gal ba nyid kho na mi mthun pa'i phyogs ma yin te lhan cig mi gnas pa'i mtshan nyid 'gal ba dang /phan tshun spangs te gnas pa'i mtshan nyid kyis so/ /de'i mi rtag pa las gzhan pa dag med pa la sogs pa'i chos dang ldan pa'i don la byas pa nyid la sogs pa 'jug pa ni gtan tshigs med par thal bar 'gyur ro/ / dro ba bsgrub par bya ba'i me'i mtshan nyid kyi gtan tshigs dang 'gal ba ni grang ba ste grang ba yang ma yin dro ba yang ma yin pa gzhan yang rnam par bcad par thal bar 'gyur bas dro ba gcig tu nges pa mes go ba byed par mi 'gyur ro zhes bya ba de 'di'i skyon du 'gyur gyi/ slob dpon gyis bshad pa gang gi tshe gcig tu mi mthun pa'i phyogs su 'dod pa de'i tshe de med pa mi mthun pa'i phyogs yin gyi 'gal ba dang gzhan ni ma yin na de ni gzhan la yang brjod par 'dod pa'i chos mi rten pa dang 'gal ba yang yod pas de med pa las gzhan pa dag ni rigs pa ma yin no// kho bo cag ni mi mthun pa'i phyogs kyang rnam pa gsum 'dod pa dang / brjod par 'dod pa'i chos kyi rten ma yin pa gzhan yin no zhes bya ba yod pa ma yin no/ /gal te rang bzhin gyi gtan tshigs kyi rjes su 'gro ba dang ldog pa dag ni sgrub par byed pa'i chos bsgrub par bya ba'i rang bzhin du gyur pa'i rgyu mtshan gyis rjes su 'gro bas sam/ldog pas chos mthun pa dang chos mi mthun pa can gyi sbyor ba dag brjod pas de'i bdag nyid kyi sgo nas don gyis cig shos 'phangs par brjod do/ /de'i tshe tshad ma grub pa nyid de de'i rang bzhin du gyur pa de'i rgyu mtshan gyis yin gyi sgra tsam shes pas ni ma yin no zhes bya bar dgongs so snyam nas/gzhan gyis gang gis na zhes bya ba la sogs pa smos te/ gang gis na zhes bya ba ni yod pa 'jig pa'i rang bzhin du gyur pa nyid kyis yod pa'i mtshan nyid kyi gtan tshigs skad cig ma nyid kyi rang bzhin du gyur pa yin no zhes bya ba'i don to//'di 'dri ba'i bsam pa ni yod pa ni rnam pa gnyis te/ byas pa bum pa la sogs dang ma byas pa nam mkha' la sogs pa'o/ /de la gang re zhig ma byas par yod pa rgyu med pa ni rtag pa'i mtshan nyid dang ldan pa ni mi rtag pa kho nar mi 'gyur te/ gang kho na las skad cig ma yin zhes bya/yod pa ni skad cig ma'i rang bzhin ma yin no/ /gang yang yod pa dang byas pa nyid de dag kyang tho ba la sogs pa'i rjes su 'gro ba dang / ldog pa'i rjes su byed pas 'jig pa ni rgyu dang bcas pa'i phyir de'i rgyu nye bar 'jig go/ /byas pa'i bdag nyid yin du zin kyang yod pa ma lus pa nyid skad cig ma'i rang bzhin ma yin te rjes su 'gro ba dang ldog pa dag mi srid pa'i phyir gdon mi za bar 'jig pa ni dbyug pa la sogs pa'i rjes su 'gro ba dang ldog pa'i rnam pas mthong ba'i phyir ro//de skad du yang / bsnun dang me dang 'brel pa ni//'jig pa'i rkyen du nye ba yin/ /gang gi tshogs pa med pa ni/ /bum pa la sogs 'jig pa med/ /ce'o/ /bde bar gshegs pa pas gzhan la yang rjes su 'gro ba dang ldog pa'i rjes su byed pa nyid rgyu dang ldan pa'i tha snyad du byed pa'i rgyu mtshan du khas blangs pas de 'dir yang yod pa yin no zhes de'i tha snyad cis ni 'jug par mi 'gyur zhe na/'o na ni rjes su 'gro ba nges pa yang bstan te gnod par byed pa'i tshad ma 'jug pa'i dbang gis rang bzhin yin pa sngar bstan zin la/ rjes su 'gro ba nges pa yang rang bzhin gyi gtan tshigs la sogs pa la brjod pas de gang gis phyogs snga ma'i go skabs su 'gyur ro zhe na//bden te 'on kyang sngon gyi slob dpon gyis byas pa nyid skad cig pa nyid bsgrub par bya ba la mthar gzhan gyis byas pa ste/ gdon mi za bar 'jig pa'i rgyu dang 'brel par khas len pa'i phyir/ de'i rgyu dang mi ldan par bstan pas ltos pa med par 'jig pa las bzlog pa la gnod pa can gyi tshad ma rnams kyis de'i bdag nyid du sgrub par byed par bshad pa de'i zhar la byung bas byas pa dang yod pa'i mtshan nyid ni de'i bdag nyid go bar byed pa yin gyi gzhan du bstan par mi bya ste don byed pa'i mtshan nyid dang 'gal bas na yod pa thams cad ni dngos po tsam kho na zhes sngar bshad du zin kyang /spros par 'dod nas phyogs snga ma nye bar bkod do/ /ma byas pa'i mtshan nyid can gyi yod pa ni mi srid pa kho nar nges te rgyu med na yul dang dus dang rang bzhin nges par mi rigs pa'i phyir ro//des na sngon gyi slob dpon gyis yod pa rgyu med pa can gyi rtag pa ni yan lag ma tshang ba nyid kyi rtag pa mi srid pa'i phyir de'i bdag nyid du de la 'bad pa ma mdzad do/ /bstan bcos byed pa ni yod pa'i spyi dang byas pa'i mtshan nyid kyang skad cig ma'i rang bzhin du yul dang dus dang rang bzhin gyis bskal du zin kyang de'i bdag nyid du dngos po la gnas pa kho na ste/gzhan gyis khas blangs pa'i don byed par 'gal ba dang phyis gdon mi za bar 'jig pa rgyu med pa ni khyad par med pas skye ba tsam med par thal bar 'gyur bar bstan par bya'o/ /de la sngon gyi slob dpon gyis yod pa dang byas pa thams cad la mthar rgyus byas pa'i 'jig par gdon mi za ba yin no zhes gang pha rol po 'dod pa de ni ltos pa med pa'i rim pas 'jig pa'i rgyu mi rigs pa'i phyir ro zhes bshad do//gal te 'jig pa'i rgyu med pa de lta na de dag gi byas pa 'jig pa ste/ gdon mi za bar 'byung ba ni 'jig go zhes bya ba gang las yin de glo bur ba 'ba' zhig gi rang bzhin mi rigs she na/ rang gi ngo bo kho nas zhes bya ba smos te/ kho bo cag de las 'byung ba 'bras bu yin pas dngos po'i rgyu'i sgras brjod do/ /rang gi rgyu kho nas 'jig pa ni 'jig pa'i ngang can ni khab kyi rtse mor yungs kar gyi gnas med pa bzhin du rang gi bdag nyid dngos po las skye ba de dag byas pa'i mtshan nyid kyi yod pa'i dngos po rnams rang gi rgyu las grub pa ni gzhan gyis bcol ba la sogs pas 'jig pa skyed pa ni ma yin no//gang las yin zhe na/ de bcom pa me dang 'brel pa la sogs pa la rgyur khas blangs pa de ni nus pa med pa'i phyir ro/ /me dang 'brel pa la sogs pa cha rnam pa gsum du dpyad par bya ste/ de nyid shing la sogs pa 'jig pa'am sol ba la sogs pa gnas skabs gzhan pa'am shing la sogs pa ldog pa'i mtshan nyid kyis dngos po med pa can ma yin pa'i ngo bo zhig yin/gang la me la sogs pa dang 'brel pa'i byed pa las gzhan ni bsam par mi bya'o/ /re zhig dngos por gyur pa la la zhig la 'dir 'jig pa rgyu'i nus pas ni mi rigs so/ /gang gi phyir 'jig pa'i rgyu yod pa yis bud shing la sogs pa rang gi rgyu las bstan pa'i ngo bor skyes pa'i rang bzhin kho na mi brten pa'i bdag nyid kyi mtshan nyid can du mi byed do//gang gis she na/ bud shing la sogs pa rang gi rgyu kho na ldog pas so/ /gnas pa'i bdag nyid ldog pa med pa gzhan du dngos po med pa de'i bdag nyid du byed par nus pa ma yin no//de'i rgyu gzhan gyis phyis 'byung ba ni don gzhan pa nyid du thal bar 'gyur na de ni gzhan du rigs pa ma yin te de la rgyu'i byed pa brtag par mi nus pa'i phyir ro/ /yang na ji srid du rnam gsum brtag par bya ste/ 'jig pa ni shing la sogs pa'i rang bzhin me dang 'brel pa la sogs pas 'jig pa rgyus byed par 'gyur na de'i rang gi rgyu kho nas ldog pa'i phyir ro//gzhon nu ma len gyis bsam pa me dang 'brel pa la sogs pas med pa'i rang bzhin du byed pa ni ma yin te/ 'on kyang bud shing la sogs pas zhig nas med pa de yang bud shing la sogs pa'i ngo bo ma tshang ba na sol ba la sogs pa phyis byung ba kho na ste/de ni zho la 'o ma med pa la zhig nas med par bshad pa'i rnam pa de bzhin du med pa rgyu dang ldan par khas blang par bya ba la 'gal ba med do/ /de bzhin du gzhan zhig kyang / dngos po gzhan gyis dben pa yi//mi dmigs pa las srid pa na/ /de yi de ni dngos med 'dod/ /cis na rgyu las 'byung ma yin/ /zhes smras te/ /gzhon nu ma len gyis 'dod pa de dang de dag bsal ba ni dngos po rnams kyi zhes bya ba la sogs pa smos te/ 'bras bu'i bdag nyid phyi ma ni dngos po gzhan kho na med pa gang yin pa de ni me dang 'brel pa la sogs pa las sol ba la sogs pa 'byung ba ni kho bo cag mngon par 'dod pa nyid de/'on kyang dngos po gzhan rgyur khas blangs pa na me la sogs pa bud shing la byed pa med par dngos po'i bud shing la sogs pa'i gnas skabs kho nar 'gyur ro//des na yang ji ltar me la sogs pa dang 'brel pa las sngar bud shing la sogs pa nye bar dmigs pa las gzhan pa de'i bsgrub par bya ba'i yang don byed pa de bzhin du sol ba la sogs pa skyed pa na nye bar dmigs par thal bar 'gyur ro/ /ci ste dngos po gzhan zhig nas med pa'i ngo bo de skyed pa ni bud shing la sogs pa zhig nas med pas ji ltar nye bar dmigs par thal bar 'gyur zhe na/'di snyam du dgongs pa yin te 'jig pa 'di bud shing la sogs pa las gzhan ba lang la sogs pa dag kyang dngos po de ltar ma gyur cig snyam nas sol ba la sogs pa la zhig pa rnam par 'jig pa'i rgyu mtshan brjod pa yin no//gal te 'di yod pa las de ldog pa yin no zhe na/ tshig la mkhas pa'i ngo mtshar de gang yod pas ldog pa yin/ ci yang ma yin pa'i rang bzhin ni khas ma blangs pas de nyid dngos po gzhan pa sol ba la sogs pa la ldog par brjod na/de'i don 'di grub zin pas sol ba la sogs pa'i dngos po'i sol ba la sogs pa yod pas sol ba la sogs pa la zhig pa zhes bya'o/ /sol ba la sogs pa de yod pas de yod pa ni ma yin no/ /rang gi bdag nyid kyi rgyu'i dngos po mi rigs te me la sogs pas de skyed par brjod pa'i phyir ro//bud shing nye bar bcom pas sol ba la sogs pa 'byung bas 'di 'jig pa'i ngo bo yin no zhe na/ nye bar bcom pa zhes bya ba 'di ci zhig /gal te ldog pa ni sol ba sogs pa'i mtshan nyid du khas len na snga ma las khyad par med do/ / de'i phyir rang gi ngang gis ldog pa na shing la sogs pa la me la sogs pas sol ba la sogs pa skyed pa nyid ni mdzes te/ de lta na yin na shing la sogs pa de bzhin du nye bar dmigs pa la sogs pa thal bar ji ltar 'gyur/ gzhan yang / gal te dngos po gzhan pa la zhig nas med pa 'di'i 'gyur ba rjes su skyes pa yin na ni mar me dang blo la sogs pa zhig pa de dag gang las dngos po gzhan pa'i zhig pa rnam par gzhag par bya/gal te de yang mi gsal ba'i bdag nyid kyi dngos po 'gyur ba kho na la zhig par dmigs so zhe na/ mar me la sogs pa'i ngo bo mi gsal bar 'gyur ba la tshad ma med pa'i phyir ro//gang gi tshe nus pa'i ngo bo thob mi gsal ba yin pa de'i tshe nus pa ni 'bras bu mthong ba las dpag par bya ba'i ngo bo yin pa'i phyir med pa ji ltar mar me la sogs pa'i nus pa'i bdag nyid du gnas par brtag par bya/ yang na ma tshang ba med pa'i bdag nyid thob pa'i nye bar dmigs su rung ba mi gsal ba yin na 'di la yang de'i bdag nyid du gnas pa'i tshad ma med pa nyid do//mkhas pa ni tshad ma med pa'i tshig la gus par mi byed pa dang / bdag nyid med pa'i phyir ji ltar yod pa yin/ blo la sogs pa rnams kyi 'gyur ba dang yongs su 'gyur ba gzhan du byas pa'i brtag pa rgyas pa zhar la byung bas chog go//gal te dngos po gzhan sol ba la sogs pa ni sgrib pa yin pas bud shing la sogs pa nye bar dmigs par mi 'gyur ro zhes bya bar 'dod do zhe na/ ngo bo nyid gzhan ni zhes bya ba la sogs pa smos te/ rang bzhin gzhan pa 'di bud shing la sogs pa sgrib par rigs pa ma yin no/ /de so na 'dug pa'i ngo bo bud shing la sogs pa de la gyur pa sgrib par yang nye bar dmigs su med pas mi rung ba'i phyir ro/ /dngos po 'ba' zhig gi rang bzhin ma yin la/ dngos po gzhan ni 'jig pa'i rgyus mi byed pas so//dngos po dang dngos po med pa yang byed pa med do snyam nas/ 'jig pa'i rgyus zhes bya ba la sogs pa smos te/ ga las she na/ dngos po med pa sgrub pa dang ma yin par dgag par yang / brjod pas 'dod pa ma yin te med pa mi gzhan gyi 'bras bur khas len par byed pa na ci bud shing la sogs pa'i ngo bo las don gzhan pa zhes bya ba'am/tha dad pa dang tha dad pa ma yin par rnam par rtog pa las ma 'das pa'i phyir ro/ /de la yang bshad zin pa'i skyon nyid do/ /'o na ni med par dgag pa ci yang ma yin pa'i ngo bo 'di me la sogs pa las skye bar khas len te de yod kyang bud shing la sogs pa rang bzhin med pa gang la yin//snga ma'i skyon du 'gyur ro/ /de yang nges par me la sogs pa yod pa dang med pa'i rjes su byed pas de'i 'bras bu de'i yod pa'i tha snyad du byed la gzhan yang de'i rgyu mtshan gyis yin pa'i phyir ro/ /de skad du/ shes pa'i spyod yul gyur pa na//de yod par ni nye bar dmigs/ /zhig la zhig pa'i ngo bo de/ /ji ltar 'bras bur 'gro ba min/ /dper na sngon med las byung ba'i/ /dngos po rgyu las skye ba yin/ /byung zin pa ni mi 'gyur ba/ /de ni rgyu las byung ma yin/ /ces smra ba na/ dngos po dgag pa zhes bya ba la sogs pa smos te//'di'i dgongs pa ni gang gi tshe dngos po gzhan pa'i tshogs pa la ltos pa med pa tsam nyid na ci yang ma yin pa'i ngo bo'i zhig pa yin pa de'i tshe de la byed pa po'i byed pa mi srid de srid na ni chos can kho na la de srid pa'i phyir ro/ /gal te de yang ma byung ba las byung bar khas blangs pas 'bras bu nyid du 'gal ba med do zhe na/ma yin te byung ba chos can la yod pa'i ngo bo thob pa na dngos po med pa nyams pa yin no/ /gang gi phyir byung ba zhes bya ba yod par brjod kyi myu gu la sogs pa la yang yod pa'i sgra 'jug pa'i rgyu mtshan ma yin no/ / gal te don byed par nus pa yin no zhe na/ nus pa thams cad kyis stong pa de lta na ji ltar shes pa'i yul du 'gyur/ rgyu ma yin pa ni yul ma yin te ha cang thal bar 'gyur ba'am/ de'i yul ma yin na ji ltar rgyu dang ldan par rtogs pa yin/ dngos por gang gis brjod/ ci yang ma yin pa'i ngo bo kho na dngos po yin no snyam na/shes pa skyed par byed pa nyid ji ltar nus pa de dag 'brel pa ma yin/ gal te shes pa'i yul med na ji ltar yod par 'gyur/ 'di ni 'bras bu yang ji ltar yin/ gal te rang gi rgyu yod pa las yod pa yin no zhe na/ de lta na 'bras bur yod pa de shes pa'i yul yin no//'di ltar gal te rang gi rgyu yod pa las byung ngo zhes shes pa na yod do zhes pa yang shes so/ /gang gi phyir yod do zhes pa dang bdog go zhes mkhas pas brjod pa ni yod pa dang yin pa dang mchis pa dang bdog pa sgra'i ming yin gyi don dam par na don la tha dad pa 'ga' zhig kyang med do//gal te med pa'i bdag nyid de byung ba 'di yin no zhe na/ ma yin te 'gal ba'i phyir gang gi phyir ma byung ba'o zhes bya ba med par brjod na de ji ltar byung ba yin no zhes bstan par bya/ gal te ngo bo 'ga' zhig gis rab tu gnas pa shes pa'i bdag la so sor snang bas yod pa ma yin no zhe na/shin tu lkog tu gyur pa'i mig la sogs pa med par 'gyur ro/ /ma yin te de dag shes pa'i rgyu'i ngo bor snang ba'i phyir ro zhe na/ 'di yang 'byung bar byed pa'i ngo bor snang ba'i phyir dang dngos po thams cad kyis dben pa ji ltar byung ba dang 'brel pa yin/ngo bo cung zad cig gis mngon par gyur pa dang shes pa'i yin pas kyang rgyu'i ngo bor snang ba mtshungs pa'i phyir dang rgyu ma yin pa yul nyid du mi rigs pa'i phyir ro/ /kho bo cag kyang dngos po med pa'i blo ni rang gi bag chags yongs su smin pa'i rjes su 'gro bas yul med pa nyid do//dngos po med pa 'byung bar byed pa la ji ltar ma yin par dgag pa dang med par dgag pa tha dad par brjod pa yin/ gal te de'i ngo bor mi byed pas ma yin par dgag pa las de tha dad do zhe na/ ma yin te med pa'i ngo bo yang 'byung ba las 'gal ba med pa'i phyir ro//byung ngo zhes bya ba byung zin pa'i yod pa la mi slu ba ste/ de la ji ltar yod pa'i ngo bo'i rnam pas ma yin par dgag pa yin/ de nyid dgag pa'i don du gcig par 'gyur te thams cad du sgrub pa gtso bo yin pa'i phyir ro/ /gang gi tshe de ltar na cung zad cig rnam pa 'gas ldog pa yin pa de'i tshe de ni de ma yin pa las tha dad pas de las bzlog par shes so//de yang med pa ni thams cad las ldog pa yin par bshad la dngos po nyid ni 'ga' zhig gis byed pa de bzhin du 'dis dngos po la dmigs par bshad par 'gyur na/ de dag tha dad pa ni med do/ /tha dad pa med na ma yin par dgag pa ma yin pa dang /skabs ma yin pa brjod par yang 'gyur te dngos po ldog pa'i skabs su med pa'i bdag nyid kyi dngos po gzhan brjod pa'i phyir ro/ /rang gi ngo bos med pa'i bdag nyid ni ma yin te/ rang gi ngo bos med na 'bras bu nyid du 'gal ba'i phyir ro/ / gzhan gyi ngo bos yin na ni dngos po thams cad med pa'i bdag nyid du 'gyur te bum pa dang la la zhig khyad par med do/ /yang na yin du chug na med pa 'di me la sogs pa dag las de 'byung ba yin na cis na shing la sogs pa nye bar mi 'gyur/ 'di ltar me la sogs pa gzhan gyi byed par don 'di grub pa'i phyir bud shing la sogs pa ldog pa med pas na snga ma bzhin du nye bar dmigs par 'gyur ro//gal te de nye bar bcom pa las zhig pa skye ba yin no zhe na/ ji ltar de nye bar bcom pa yin/ re zhig zhig pa med pa ma yin te bud shing yod pa'i dus su de med pa'i phyir ro/ / me la sogs pa rnams kyis zhig pa ni ma yin te/ mi mngon pa nyid du de dag byed par khas blangs pa'i phyir ro/ /bcom pa na zhig pa'i med pa ma yin te bud shing la sogs pa nyams pa dang dus mnyam par thal bar 'gyur bas zhig pa dang 'jig pa de la rnam par rtog pa rnam pa gsum rnam par gnas pa'i phyir ro//des na thug pa med pa yin no/ /gal te de nyid zhig pa bud shing la sogs pa la me la sogs pa skye ba na ldog pa des na 'di mi dmigs pa yin no zhe na/ ji ltar gzhan gyis gzhan ldog pa yin na ha cang thal bar 'gyur ro/ /gal te 'di rgyu dang ldan pa de dag nyid tha dad pas tha dad par cis na mi 'gyur/'bras dang nas kyi myu gu yang rgyu tha dad pa bdag nyid tha dad pa shin tu mtshan nyid mi mthun par mngon sum gyis nyams su myong ba nyid du nges pa yin no/ /'di ltar dngos po gzhan gyi tshogs pa la mi ltos pa'i 'pho ba tsam gyi mtshan nyid ni zhig pa ma yin te me la sogs pa dang phrad pa'i rgyu tha dad kyang de la gnod pa med de ci yang ma yin pa'i ngo bor ro gcig par shes pa'i bdag nyid la snang bas dngos po'i stong pa nyid spangs na gzhan pa de la ngo bo cung zad cig mthong ba ni med do//de yang rgyas par ni skad cig ma 'jig par grub par dpyad zin pa de re zhig 'dir gzhag go/ /de'i phyir me la sogs pa dang 'brel pa de cung zad cig 'byung ngam mi 'byung zhes khas blangs par mi rigs so//gang dag zhig pa zhes bya ba 'di cung zad cig 'byung ba med de 'on kyang gang gi phyir rang nyid mi gnas pa'i ngo bo byung zin pa ma yin pa de'i phyir zhig pa zhes bya ba'i med pa ni 'di'i 'am gzhan pa cung zad cig 'byung ba med do//de ltar na 'byung ba'i chos 'ga' zhig med pas na dngos po gzhan pa'i dngos po byed pa ma yin pas me la sogs pa dang phrad pas ni bya ba dgag pa nyid du 'gyur ro/ /de ltar na me la sogs pa dang 'brel pa las byed pa po yod par mi 'gyur ro zhes bya bas/ byed pa po ma yin pa rgyu nyid ma yin pa de'i phyir 'jig pa'i rgyu 'ga' zhig yang med do//'ga' zhig mi nus pas 'jig pa'i rgyu mi rigs pa dang de nyid don med pa'i yang phyir ro/ /gal te dngos po'i rang gi ngo bo 'jig pa zhes bya ba smos te/ 'jig pa'i ngang tshul can te/ rang gi ngo bos mi gnas na gnas par mi nus te khab rtser yungs kar bzhin du de la 'jig pa'i rgyu ni ci yang ma yin te rgyu gcig yin zhe na/bdag nyid 'jig pa'i phyir ro/ /de'i rang gi ngo bo nyid ni mi gnas pa'i rang bzhin nyid de/ rang bzhin ni gnas par mi nus te khab rtser yungs kar mi gnas na 'bad pas 'bras bu dang ldan par mi 'gyur ro//'dir khyab pa bstan pa ni gang zhig gang gis zhes bya ba la sogs pa smos te/ de'i ngo bo ni rang bzhin gyi skyed par byed pa'i rgyu las yin gyi rgyu gzhan la ltos pa ni ma yin no/ /bsal ba la sogs pa zhes bya bas ni dpe rnam par 'grel to//de'i bdag nyid la rgyu gzhan la mi ltos pas khyab la/ de'i bdag nyid du sgrub par byed pa'i tshad ma bstan pa ni/ de'i bdag nyid la gang gi rang bzhin yin pa de'i rang bzhin gyi de'i bdag nyid med pa rgyu gzhan la ltos pa na ni rang gi rgyu las grub pa'i rang gi ngo bo nyid med pas bdag nyid med pa ni rang bzhin med par thal bar 'gyur bas so//de dang 'dra ba ni gsal ba la sogs pa dang ldan pa'o/ /yang ni phyi nas so/ /de'i bdag tu byas pa'i phyir ni mi gnas pa'i chos can du'o/ /rgyu gzhan la mi ltos so zhes bya ba ni tshad ma'i 'bras bu'o/ / gal te mi gnas pa'i chos can zhig yin na ni 'jig pa'i rang gi ngo bo nyid kyis rang gi rgyu las grub bo zhes bya bar ni phyogs la chos bsdu ba'o/ /'gal bas khyab pa dmigs pa 'di ni rgyu gzhan la ltos pa dang mi ltos pa dag phan tshun spangs te gnas pa'i mtshan nyid des 'gal ba'i phyir ro/ /rgyu gzhan la mi ltos pa ni/de'i rang gi ngo bos khyab pa'i phyir ro/ /'dir gzhan gyi tshig gi dogs pa'i go skabs ni sa bon la sogs pa bzhin du zhes bya ba la sogs pa smos so/ /'di snyam du zhes bya ba la sogs pa smos te/ de nyid rnam par dbye ba ni 'ba' zhig skyed par mi byed do zhes bya'o/ / gang las yin zhe na/ chu dang zhing la sogs pa rang gi rgyu nas tha dad pa myu gu la sogs pa skyed pa'i rang bzhin yang sa bon la sogs pa rnams kyi bdag nyid la ltos pa'i phyir ro/ /des na de'i rang bzhin ni rgyu gzhan la ltos pa ma yin no zhes bya ba ma nges pa yin no/ /de bzhin du bud shing la sogs pa rang gi rgyu las 'jig pa'i bdag nyid du grub pa'i 'jig pa ni bdag nyid 'jig pa yin no zhes bya ba ni dpe don yin no zhe na/sa bon la sogs la bzhin du ma nges pa ma yin no/ /gang las she na/ de'i rang bzhin du myu gu la sogs pa skyed par byed pa'i sa bon la sogs pas myu gu la sogs pa skyed pa'i phyir de'i bdag nyid 'di rgyu gzhan la mi ltos pas so//phyi nas zhing la sogs pa la ltos nas skyed pa ma yin pa dang sbyang ba la sogs pa na gnas pa skyed pa la sogs ma yin te de'i ngo bo nyid ma yin pa'i rang bzhin nyid kyi myu gu la sogs pa skyed pa'i ngo bo nyid med pas de ni de'i bdag nyid kyi mtshan nyid can gyi rgyur gnas pa ma yin pa'i phyir ro//des na ma nges pa ma yin no/ /'o na ni ngo shes pa'i mngon sum kho nas sa bon la sogs pa gcig gi ngo bo nyid du rtogs so/ /de la 'di skyed par byed pa'i rang bzhin nyid dang skyed pa ma yin pa'i rang bzhin nyid kyi mtshan nyid tha dad pa ga las yin/gang gi phyir ma nges par mi 'gyur zhe na/ ngo shes pa tshad ma ma yin pa ni ma yin te de la sngar med pa'i don rnam par shes pa zhes bya ba la sogs pa tshad ma'i mtshan nyid dang ldan pa'i phyir yod pa dang yang dag par 'brel pa'i dbang po rnams las byung ba ngo shes pa ni mngon sum kho na yin te mngon sum las gtso bo'i tshad ma ni yod pa ma yin no//gang las de'i yul tha dad par grub pa'i gnod pa yod pas 'di dag tshad ma ma yin par 'gyur zhes dogs pa la/ de nyid kyi zhes bya ba smos te skyed par byed pa dang / skyed par nges pa ma yin pa 'gal ba'i chos gnas pas so//de dag gi gnas skabs ni skyed par byed pa dang skyed par byed pa ma yin pa'i gnas skabs sa bon la sogs pa'i dngos po tha dad pa'o/ /dngos po tha dad par nges pa ni zhen pas so/ /'di ltar 'bras kyi sa bon ni de'i myu gu'i rgyu'i rang bzhin yin te de yod na 'bras kyi myu gu yod pa mthong ba'i phyir mngon sum gyis khong du chud do//nas kyi sa bon yang de skyed pa'i rang bzhin de yod na 'bras kyi myu gu mi dmigs so/ /des dben pa'i nas kyi sa bon 'dzin pa ni mngon sum gyi ngo bos rtogs so/ /de bzhin du 'dir yang gnas skabs kyi sa bon ni de'i myu gus dben pa dang dben pa ma yin pa'i gnas skabs 'dzin pa ni mngon sum gyi stobs nyid kyis rang gi myu gu skyed par byed pa dang skyed par mi byed pa'i rang bzhin cis na nges par mi 'gyur/gal te gnas skabs tha dad par 'dod pa nyid de gnas skabs can tha mi dad pa yin no zhe na/de'i gnas skabs kyi ngo bo gzhan gyis dben pa mngon sum la snang bar thal bar 'gyur ro/ /bdag nyid kyi ngo bo ma yin pas dben par rang gi shes pa la snang ba gang yin pa de ni mngon sum du mi rigs pa ma yin no/ /gal te gnas skabs can dang ldan pa'i rang bzhin tha dad pa med pas ji ltar ngo bo gzhan yin zhe na/'o na ni gnas skabs rnams mthong ba'i ngo bo ni tha dad pa'i gnas skabs lta bur bdag nyid tha dad pa de tha dad pa yod pa tha mi dad pa dang 'brel pa ma yin no/ /des na 'di gnas skabs bzhin du tha dad par nyams su myong bas ji ltar gnas skabs su byed pa po yin gal te gnas skabs tha dad pas kyang tha dad pa'i ngo bor de bzhin du rnam par 'jog pa'i phyir rnam pa 'ga' zhig gis kyang tha dad pas nyes pa med do zhe na/gang zhig mdun na gnas pa'i bdag nyid la 'di gnas skabs so zhes brjod pa des gnas skabs de dang ldan pa tha dad pa dang de tha mi dad pa nyid ni rnam pa 'gas yin no zhes bya ba 'di ni long ba'i 'dod pa'o//des na 'di mngon sum gyis de'i bdag nyid ma yin pa'i ngo bo gzhan du snang bar thal bar 'gyur ba mi bzlogs so/ /des na bdag nyid tha dad pa'i gnas skabs bzhin du tha dad par thal bar 'gyur ba'am/ gnas skabs can de bzhin du gnas skabs rnams tha mi dad par 'gyur ro/ /de dag kyang rnam pa 'ga' zhig tha dad pa dang tha mi dad pa bsam par bya ste/ de lta na gnas skabs can dang de'i gnas skabs ni bdag nyid tha mi dad pa dang ldan pa na/ rnam pa 'gas tha mi dad pa'i rgyu mtshan dngos po gzhan zhig 'dod par bya ba dang /de bzhin du de yang de rnam pa 'gas tha dad pa yang gzhan yin no/ /de rang bzhin gcig par shin tu tha mi dad pa'i gnas skabs dang ldan pa ni brgyud pas shin tu tha dad pa dang tha mi dad pa dngos po gzhan pa zhig tu thal bar 'gyur ba dang / rnam pa 'ga' zhig tha dad pa'i rgyu mtshan gyi ngo bo ni gzhan yin pa la de bzhin du de las gzhan pa la yang yin pa'i phyir dngos po re re la dpag tu med par thal bar 'gyur ro//dpag tu med pa'i ngo bo snang ba ni mngon sum gyis nyams su myong ba med de nyams su myong ba med na ji ltar brtag pa bdag nyid bslu bar bya ba'am/ de'i phyir gnas skabs kyi ngo bo rnam par dpyad na dmigs pa'i rig byar gyur pa las mi dmigs pa'i phyir dang / dpag tu med pa'i ngo bor thal bar 'gyur ba'i phyir rnam pa 'gas tha dad pa dang tha mi dad pa dang ldan pa'i gnas skabs can gyi med pa kho na'o/ /de yang skyed par byed pa dang / skyed par mi byed pa'i rang bzhin gyi gnas skabs tha dad pa dang ldan par mngon sum gyis rtogs pa'i phyir ro/ /de gcig pa nyid du mngon par zhen pa'i ngo bo shes la nyams su myong bas gnod pas ji ltar tshad mar 'gyur/ gang gi phyir sa bon la sogs pa rnams myu gu la sogs pa skyed pa'i rang bzhin can yang de'i bdag nyid kyi rgyu gzhan la ltos kyang snga ma'i gtan tshigs ma nges par mi 'gyur ro//gnas skabs can 'ga' zhig yod du chug kyang de yang de nyid kyis tha dad pa skyed do/ /de lta na de dag skyed par byed pa dang skyed par mi byed pa'i gnas skabs dag yin no zhes bya ba 'di ni bdun pa'i gnyis pa'i tshig yin pas de'i tshe 'gyur ro//des na don 'di skyed par byed pa'i gnas skabs dang / 'di skyed par mi byed pa'i gnas skabs ni dngos po'i chos kyi mtshan nyid tha dad pa'i rang bzhin du ma yin pa de nyid kyi phyir skyed par byed par dang skyed par mi byed pa'i rang gi ngo bo yin par mngon sum gyis nges par grub bo//tha dad par nges pa'i mtshan nyid du de la tha snyad byed pa'i yul la chos 'gal ba gnas pa'i mtshan nyid bstan pa'i phyir ro/ /gnas skabs kho na myu gu la sogs pa'i skyed pa'i rang bzhin du brjod par nus pa ma yin pas gnas skabs med pa'i phyir nus pa thams cad spangs pa'i mtshan nyid ni med par thal bar 'gyur ro//de'i phyir yod pa gcig tu ngo shes pa rnams la dngos po rnams kyi snga ma dang phyi ma'i dus dag skyed pa'i byed pa dang skyed par mi byed pa'i rang bzhin tha dad par rnam par 'jog pa'i mngon sum gyis nyams su myong ba'i rgyu mtshan gyis gnod par ji ltar tshad mar 'gyur/de'i snang ba tha dad pa med pa'i ngo bo ni brdzun pa nyid do/ /dbang po las byung ba'i nyams su myong ba 'jug pa yod pa 'di la rab tu sbyor ba med pa'i phyir rab rib la sogs pas bskyed pa bzhin du mngon sum du ga la 'gyur/ don byed pa'i rgyu mtshan can gyi ngo bo yang sa bon la sogs pa las gzhan ma yin te don dam pa yin pa'i phyir ro/ /rang bzhin gyis yod pa gang khong du chud pa'i phyir ngo shes pa tshad mar 'gyur na don byed pa'i nus pa'i mtshan nyid yin pa'i phyir don dam par yod pa'o/ /de'i phyir 'dra ba gzhan byung ba'i rgyu mtshan 'di yin te/skra shad dang chu shing gi sdong po la sogs pa bzhin du rnam pa 'dra ba tsam gyis snying 'phrogs pa rnams 'khrul pa nyid du de kho na nyid nges pas bsam par bya'o/ /des na yod kyang skad cig ma re re'i tha dad pa nye bar mi rtogs pas byis pa rnams gang gi tshe mi mthun pa'i rkyen dang phrad pas mi 'dra ba'i dngos po gzhan skyed pa de'i tshe 'di'i de kho na nges par gyur na ngo shes pa'i dmigs pa mi 'byung ngo //de rnams pa gcig tu nges pa'i shes pa skyed par byed pa la gzhan zhig 'dra ba tha dad pa yang med de rang gi rgyu'i stobs las 'ongs pa'i rang bzhin gyi dbang gis kha cig tu rnam pa gcig tu nges pa'i shes pa'i mtshan nyid dam/don shes pa la sogs pa'i mtshan nyid don gyi bya ba byed pa las gzhan ni med do zhes mkhas pa bstan bcos mdzad pas rnam 'grel du bshad pas 'dir mi smra'o/ /gdon mi za bar sa bon la sogs pa skyed par byed pa dang skyed par mi byed pa'i gnas skabs ni dngos po tha dad pas ji skad bshad pa bzhin du khong du chud par bya'o zhes bstan pa'i phyir tha mi dad pa la rjes su dpag pas gnod pa ni dngos po rnams zhes bya ba smos te/sa bon la sogs pa rnams rang gi 'bras bu skyed par byed pas so/ /rang gi ngo bo de dang de rnams la yod pa las gzhan du gyur pa med pa'i phyir res 'ga' ba'i skyed par byed pa ni mi srid pa'i phyir ro//de'i ngo bo myu gu la sogs pa skyed pa'i rang gi ngo bo phyis bzhin du ni 'bras la sogs pa'i rgyu nye ba bzhin du'o/ /snga ma sbyang la sogs pa na gnas pa'i dus su yang rang gi 'bras bu skyed par thal bar 'gyur ro//de lta na 'bras bu la sogs pa nye ba yang sa bon la sogs pa'i rang gi ngo bo kho nas 'bras bu skyed kyi gzhan gyi ngo bos ni ma yin no/ /gang yang 'di de'i tshe 'bras bu skyed par byed pa'i rang bzhin phyis yod pa gang yin pa de nyid yin no zhes ngo shes pas mdun na gnas pa'i skyed par byed pa'i rang bzhin snga ma'i ngo bo la tha mi dad par nges pa yin pa nges na sngar yang cis na de'i 'bras bu byed pa ma yin/sbyor ba ni gang dang gang gi tshe skyed pa'i rang bzhin de dang de ni de'i tshe skyed par byed pa nyid de/ skyed par mi byed pa dang skyed par byed pa 'gal ba'i phyir gzhan yang de'i rang bzhin thob par 'gyur ro//dper na de nyid kyis sa bon la sogs pa nye ba'i dus bzhin no/ /sbyang la sogs pa na sa bon la sogs pa 'di yang rang gi 'bras bu skyed par byed pa'i rang bzhin nyid du ngo shes pas rnam par 'jog pa'i phyir zhes bya ba ni thal bar rang bzhin gyi gtan tshigs so/ /de skyed pa ni ma yin te de'i phyir de skyed pa'i rang bzhin ma yin no zhes bya ba ni bzlog pa'i sbyor ba'o//gang dang gang gi tshe skyed pa'i rang bzhin la log pa'i 'bras bu mi skyed pa de dang de ni de'i tshe skyed pa'i rang bzhin ma yin te/ dper na 'bras kyi myu gu skye ba'i rang bzhin las log pa'i 'bras bu mi skyed pa'i ko tra ba'i sa bon bzhin no//'bras la sogs pa'i rgyu nye ba las sngar 'bras bu skyed pa'i rang bzhin las ldog pa can gyi 'bras bu'i sa bon la sogs pa yin pa'i phyir zhes bya ba 'di khyab par byed pa mi dmigs pa'o/ /de'i phyir rjes su dpag pas kyang gnod par nyams su myong bas ngo shes pa ji ltar tshad mar 'gyur/'dis gnod par byed pas tshad ma ma yin pa'i phyir ji ltar gnod par byed par 'gyur/ tshad mas ma nges par gyur na gang gis na gnod pa gcig la gcig brten par 'gyur/ ngo shes pa tshad ma ma yin pas 'di rjes su dpag tshad ma gnod pa med de 'on kyang rang gi bsgrub bya la 'brel pa'i phyir ro//de yang bzlog pa la gnod par byed pa ni tshad ma'i stobs kyis nges pa'i phyir ro/ /ma yin te mngon sum ni gzhan pas tshad ma'i gtso bo yin no zhe na/ ngo shes pa mngon sum du grub pa med do zhe na rjes su dpag pas mngon sum gyi bdag nyid du yod pa la gnod pa yin no zhes ni mi smra'i/mngon sum stobs dang ldan pas ci zhig byed/ de ni don med na med pa'i phyir tshad mar brjod do/ /rjes su dpag pa de yang don dang 'brel pa'i rtags las skyed pas mtshungs pa'i phyir khyad par ci yang med do/ /gal te rjes su dpag pa dang 'gal bar brjod kyang ngo shes pa'i tshad ma de dang rnam pa mtshungs pas ston na ni sngon po dang cig shos kyi me tog la sogs pa kha phye ba'i dngos por gcig nas tshad ma ma yin no//me tog gi 'bras bu la sogs pa'i 'bras bu mthong bas dpag pa nas tha dad pa ni ma yin te/mngon sum gyis de ltar med par myong ba dang ngo shes pa'i tshad ma 'gegs pa'i skad cig ma'i 'jig pa'i grub par rgyas par byas pas chog go/ /gang gi phyir de ltar gnas pa'i rnam pas skyed par byed pa dang skyed pa med pa'i gnas skabs kyi sa bon gyi dngos po tha dad pa de'i phyir mtha' ma'i gnas dang khyad par med pa de ma thag tu myu gu la sogs pa'i 'bras bu skyed pa gang yin pa de kho na myu gu skyed pa'i rang bzhin no//'bras bu mthong bas dpag pa'i ngo bo nyid de skyed pa'i rang bzhin yin pas so/ /gal te de lta na de kho na myu gu skyed pa'i rang bzhin yin la sngar byung ba'i gnas skabs ni de skyed pa'i rang bzhin ma yin pa'i phyir ji ltar de rnams la de'i rgyur bshad/myu gu don du gnyer ba rnams kyis de nye bar len to zhe na/ sngon gyi gnas skabs zhes bya ba smos te/ sbyang la sogs pa na gnas pa'i dus su yod pa'i gnas skabs dang khyad par med pa'i myu gu la sogs pa'i rgyu tha ma'i gnas skabs dang khyad par med pa'i rgyu ni rkyen gzhan la rag las pa'i khyad par gyis yin no//brgyud pas skye ba de'i phyir de rnams ni btags pa'i phyir ro/ /myu gu don du gnyer ba rnams kyis rgyur brjod pa nye bar len to/ /gang gi phyir sa bon la sogs pa de'i ngo bo rgyu gzhan la ltos pa ni skyed par byed pa de la ltos pa'i phyir de'i de skyed pa'i ngo bo nyid yin no zhes bya'o//de'i phyir sa bon la sogs pa dang ldan pas ma nges pa ma yin te de'i ngo bo nyid yin pa'i phyir zhes bya bas gtan tshigs kyi mjug bsdu ba yin no/ /de lta na de ni gang gi tshe re zhig ngo shes pa mngon sum gyi tshad ma rtag pa grub par gzhan dag brjod pas sa bon la sogs pa dang ldan pas ma nges par bstan pa de'i tshe sngar bshad pa'i rnam pas mngon sum dang rjes su dpag pa dag gis gnod pa'i phyir de'i bdag nyid med pa yin na gang gis na de las gcig pa nyid du yod pa yin/gang gi phyir ma nges par 'gyur zhes bstan zin to//gang gi tshe ngo shes pa yin pa'i phyir sa bon la sogs pa snga ma dang phyi ma'i dus dag rang bzhin gcig pa yin no zhes gtan tshigs su gzhan dag brjod na/ de ni 'dir gtan tshigs ma grub pa yin te la lar dngos su yod pa ni ma yin te/ 'dir skad cig ma'i dngos po rnams la gcig pa nyid med pa'i phyir ro shes kho bo cag 'dod do zhes bya bar sbyar ro//'on te gang yang skad cig ma'i dngos po de yang sa bon la sogs pa'i skad cig ma re re'i gcig pa'i ngo bo bye brag kyang mi rtogs pa'i phyir skad cig ma tha ma bzhin du thams cad kyang skyed bar byed pa'i rang bzhin yin te/de'i ngo bo ni chu la sogs pa la ltos pa'i phyir de'i gnas skabs kyi ma nges pa yin no zhes dogs pa la/ gzhan dang gzhan skye bas zhes bya ba la sogs pa smos te/ skad cig ma la ma nges pa med do/ /rkyen gzhan dang gzhan las skad cig ma so sor skye bas skad cig ma rnams tha dad pas nus pa'i phyir skad cig ma tha ma bzhin du skyed par byed pa'i rang bzhin spangs nas de yang gang gis na ma nges pa yin/rgyu tha dad pa la rag las pa'i skye ba rnams ni bye brag nye bar rtogs su zin kyang tha mi dad par mi rigs so/ /rgyu tha dad pa'i rjes su mi byed na rgyu med par thal bar 'gyur ro/ / de skad du yang 'du byed pa'i rgyun las gzhan dang gzhan pa'i rkyen dang ldan pas skad cig ma re re la nus pa tha dad pa can dag 'ga' zhig mtshungs pas ngo bo 'dra bar shes mod kyi de lta na de dag gi ngo bo tha dad pa kho na yin te/ des na 'ga' zhig gi rgyu yin zhes gsungs so/ /ji skad du de'i ngo bo nyid bskyed pa'i phyir zhes bya ba la sogs pa la gzhan dag ma nges pa brjod pa ni de zhes bya ba smos te/sa bon dang zhing la sogs pa'o/ /mtha' ma ni tha ma'i dngos po so sor myu gu skyed par nus pa rgyu rnams kyis nas 'bras bu skyed pa med par khyed rnams 'dod pa yin yang ci'i phyir re re skyed par mi byed/ des na 'di rnams kyi re re nyid 'ga' zhig las myu gu skye bar 'gyur gyi de dag gzhan de'i ngo bo yin du zin kyang mi skyed pa yin na ni de'i ngo bo skyed pa yin no zhes bya ba ma nges pa yin pas de bzhin du sbyang la la sogs pa na gnas pa sa bon la sogs pa yang myu gu la sogs pa skyed pa'i rang bzhin yin du zin kyang mi skyed par 'dod pa'i phyir ro//de ma nges pa yin pas de'i gnas skabs kho na yin no zhes gzhan dag sems pa na/ 'dir mi byed ce na zhes bya ba smos te/ de ltar gal te gzhan gyis bsam pas spyi'i sgro nas brjod pa spyi yis lan btab pa ni skyed par byed pa kho na'o zhes bya ba smos pa ste 'dir rang gi 'bras bu skyed pa'o//de lta ma yin na dngos po skyed par byed pa ma yin par dogs so/ /gang las she na/ ngo bo nyid ldog pa med pa'i phyir ro/ /gal te skyed par byed pa'i rang bzhin ma yin na skyed par byed par mi 'gyur te de'i rang bzhin du 'dod na ni gdon mi za ba skyed pa yin no/ / de lta na yang gang las ma nges pa'i dngos por 'gyur/ mtha' ma'i skyed par byed pa gcig yod pas 'bras bu gcig pa nyid skyed pa yin gyi gzhan dag ni nye bar sbyor ba'i yul med pa'i phyir skyed par byed pa ma yin no snyam du gzhan dag sems pas gal te de lta na lhan cig byed pa zhes bya ba smos te/ lhan cig pa ni cig car ba'i rgyur rung ba rnams so//de'i 'bras bu byed pa'i rung bas khas blangs pa'i yod pa'i 'bras bu la gcig kho nas bskyed pa'i phyir gzhan gyi nye bar sbyor bar ci zhig dgos te ci yang ma yin no/ /de skyed par byed pa kho na'o zhes bya ba ci zhig brjod ce na/ 'di'i lan ni dngos po rnams zhes bya'o//dngos po rnams ni sa bon la sogs pa'o/ /rtog pa sngon du gtong par byed cing blo sngon du gtong par byed pa ni 'ga' yang med do/ /gang gi phyir rtog pa sngon du gtong par byed pas 'di kho bo cag gang yang rung ba gcig pus kyang 'bras bu skyed par nus na bdag cag gis ci zhig bya zhes brtags nas gzhan dag ldog par 'gyur zhing btang snyoms su 'dug pa la brten pa na de'i 'bras bu skyed par byed pa na'o//gang gi phyir sa bon la sogs pa'i dngos po de ni sems pa med pa'i byed pa can no/ /dpyad na stong pa'i byed pa ni gcig gis skyed pa na gcig gi 'bras bu la thams cad byed pa kho na yin no/ / dngos po chos can gyi 'bras bu de dag sngar yod pa'i byed pa las de bzhin na mi rigs so/ /gang gi tshe byed pa can de las gzhan pa'i byed pa yin pa de'i tshe de nyid las 'bras bu skyed pa'i byed pa dang ldan pas byed pa po nyid dor bar bya'o/ /gal te de 'di byed pa ni byed pa po de las de yin no zhe na/ 'o na ni de ltar byed pa po ni nye bar mkho ba yin gyi/'bras bu la nye bar mi mkho ba ni de la btags pa yin pas don dam par na byed pa po dor bar bya'o/ /byed pa 'di dang su zhig 'brel pa yin 'du ba yin na ni sngar bsal zin pa'i phyir ro/ /'du ba yang byed pa dang ldan pa yin na/ gzhan yang de'i 'bras bu la nye bar mi mkho ba de yod par thal bar 'gyur ro//'du ba 'di'i blo'i rgyu yin no snyam na gcig pa nyid kyis thams cad mtshungs pa'i phyir ro/ /gal te mngon par 'dod pa nyid byed pa yin pas de'i byed pa bskyed pa yin pas ha cang thal bar mi 'gyur ro zhe na/ 'o na ni des na de las skye bar de nyid la 'du bar brjod de de yang thams cad la mtshungs te/gang gis byed pa'i 'bad pas skye ba yin na/ des 'bras bu nyid cis na mi skyed/ gang gis bar du chod pa la brten pa de lta na rang dang nye ba tsam gyi byed pa 'dis bskyed pa yin no/ /byed pa gzhan gyis ni ma yin te thug pa med par thal bar 'gyur ro/ / de lta na de nyid kyi phyir rang dang nye ba tsam gyi byed pas yin no zhes bshad zin to/ /de'i phyir phyis 'byung ba'i 'bras bu ni sngar yod pa rgyu'i byed pas yin no/ /de yang thams cad la yod pa yin no zhes thams cad kyi 'bras bu skyed pa'i byed par bstan te/ 'bras bu thams cad skyed par byed pa de yod pa'i phyir ro//'bras bu'i rgyur mngon par 'dod pa ni yod na yod pa ma yin pa gzhan las skye ba med do/ /de ltar yod pa ni de nyid la rgyu'i byed pas 'bras bu byed pa 'di mi srid pa'i phyir ro/ /de'i phyir yod du zin kyang rgyu rnams la ji ltar nye bar dmigs par mi 'gyur/ gal te de dang 'brel pa las skye ba'i rgyu yin pa'i phyir ro zhe na/ma yin te/ med pa des 'brel par mi rigs pa'i phyir ro/ /bdag nyid yod pa kho nas skyed pa'i don ni mi 'thad pa'i phyir skye ba'i dus na nye bar dmigs pa'i bdag nyid yin na sngar yang 'byung ba bzhin du dmigs par thal bar 'gyur ro/ /ngo bo gzhan gyis yod pa yin na ni dngos por mi 'gyur ro//dngos po ni mtshan nyid tha dad pa'i phyir dngos po tha dad do/ /de'i phyir nye bar dmigs pa'i bya ba'i bdag nyid kyi skye ba las sngar yod pa'i mi dmigs pa de'i phyir skye ba yang 'brel pa ga la yin/ de'i phyir 'bras bu ma byung ba nyid rgyu yod pa las byung ba des na skye ba yin no zhes thams cad kyis de ltar bskyed do//'on te gcig gis kyang de skyed par nus na gzhan dag de la de nye ba'i mtshan nyid kyi byed pa don med do snyam nas de la gzhan dag yod pa dang 'brel pa ma yin no zhe na/ rang gi rgyu zhes bya ba smos te/ zhing dang chu dang sa bon gyi tshogs pa'i mtshan nyid yongs su gyur bas 'bras bu skyed pa dang rjes su mthun pa'i yon tan gyi bye brag dang ldan pa ni skad cig ma re re nye bar bsags pa phul du byung ba las skad cig ma gzhan skye'o//des na nye ba ni 'bras bu dang yul nye ba rnams gang yin pa de ltar gyur ba la 'bras bu dang klan ka btsal bar 'os pa ma yin no//rgyu gcig gis kyang de'i 'bras bu nus pa'i phyir 'dir khyed nye bas ci zhig bya zhes brgal zhing brtag par 'os pa ma yin no/ /de la gzhan pa dang nye ba med na gcig gis kyang yod par mi skyed do/ /gang las de'i rang bzhin yin zhe na/ de'i rang bzhin las zhes bya ba ni dngos po gtso bor bstan te zhing dang chu dang sa bon la sogs pa'i tshogs pa yongs su gyur pa skyed pa'i rang bzhin yin pa'i phyir re re la nus pa de med do zhe na/tshogs pa'i sgras brjod pa tha dad pa'i nus pas rang rang gi mtshan nyid gzhan pa skyed pa'i phyir dang de yang skad cig ma re re bsags pa phul du byung ba skyed pa'i phyir 'ba' zhig pa rnams la ni de skyed pa'i rang bzhin ma tshang ba de las gzhan rkyen ni skyed par rung ba'i rang bzhin yin pa'i phyir skyed pa'i byed par nus rgyu las so//'di yang ji ltar skabs su bab pa de dang der bsal bar bya'o/ /de'i phyir tshogs pa skye ba'i rang bzhin dag yod pa gang yin pa de dang de la gcig med dam rgyu ma tshang ba las mi srid pa'i phyir ro//tshogs pa gcig pa las skye ba ni lhan cig 'byung bar nges te de dag yod na yod pa las 'bras bu thams cad skyed pa'i phyir ro/ /de'i ngo bo las skye ba yin no zhes bya ba la sogs pa 'dir ma nges pa med do zhes gang gis bsams nas mtha' ma'i nus pas cis na skyed par mi byed ces sngar de bsal bar bshad do//gal te nus pa dag ces bya ba la sogs pa smos te/ grub pa'i mtha' smra bas kyang mtha' ma bskyed pa yin no zhes bya ba'i dgongs pa gang yin pa de ni bshad zin pa ston pa ni ma yin te/ de kho na zhes bya ba la sogs pa smos te/de dag nyid bshad pa ni gcig pu de nyid ces bya ba la sogs pa smos te/ 'di'i dgongs pa 'di nus pa dag mngon sum dang mi dmigs pa'i grub par byed pa dag gis rjes su 'gro ba dang ldog pa dag gi tha dad byed ba las rgyu mtshan gzhan med pa'i phyir ro/ /de yang rjes su 'gro ba dang ldog pa dag gcig la mthong ba ni gzhan dag gzhan la ma yin la/gcig pu de nyid bskyed par bya bar nus par rtogs par bya'o/ /gzhan dang gzhan ni bskyed par bya ba ma yin no/ /de yang gang gi gnas skabs su skyed par mthong ba de cis skyed pa'i rang bzhin yin/ de nyid yin nam yang na sngar yang yin zhes 'dir brtsod de/de la sngar yang de'i rang bzhin yin na phyi ma bzhin du ni snga ma yang skyed par thal bar 'gyur ro/ /skad cig ma re re tha dad par brjod na ni slar gzhan gcer bu pa dang / rgyal dpog bdag ma nges pa brjod cing smra ste/ tha dad pa phan tshun ldog pa mig la sogs pa gang yin pa de dag gi lhan cig byed pa dag gis cig car du byed pa rnams kyis rnam par shes pa'i mtshan nyid 'bras bu gcig pa skyed pa bden te phal cher tha dad pa'i rang bzhin gyi rgyu rnams 'bras bu gcig tu tha dad pa'i rang bzhin yin na ni rgyu'i bye brag las 'bras bu'i bye brag med par 'gyur ro//des na mig la sogs pa tha dad pa'i bdag nyid kyi 'bras bu gcig skyed par 'dod par mi bya ste/ 'on kyang tha mi dad pa'i 'bras bu gcig pa 'di skyed par byed pa ni spyir gyur pa'i ngo bo khas blangs pa gang gis tha mi dad pa'i 'bras bu skyed do/ /de yang tshogs pa'i gnas skabs nyid la 'bras bu skye'i//ma tshogs pa'i gnas skabs ni ma yin no/ /re re yod pa la de'i bdag nyid med pa ni ma yin te/ res 'ga' med pa 'gal ba'i phyir ro/ /de 'di skyed par byed pa'i rang bzhin ni skyed par byed pa dang skyed par mi byed pa ldan pa ni ma yin te/ tshogs pa dang cig shos kyi gnas skabs tha dad pa thal bar 'gyur ro//de lta na yang spyi'i rang bzhin nyams pa yin pa de'i phyir mig la sogs pa tshogs pa rnams skyed par byed pa'i ngo bo gang yin pa de ni re re yod du zin kyang skyed par byed pa ma yin gyi de ni ngo bo skyed pa'i phyir zhes bya ba ma nges pa yin no zhe na/ grub pa'i mtha' smra bas ma yin te/bdag nyid ji lta ba zhes bya ba la sogs pa smos te/ 'di snyam du dgongs pa yin te/ ci byed kyang mngon par 'dod pa'i rgyu 'di mig la sogs pa re re las gal te yin na de mi rigs la/ /tshogs pa'i rang bzhin las skye ba'i phyir 'bras bu rgyu ni de kho na yin pa'i phyir ro/ /'o na ni de'i gnas skabs na re re la sogs pa'i sgras brjod pa skyed pa'i rang bzhin du khas blangs pas mig la sogs pa re re rgyu yin no zhe na/gal te de ltar nges pa 'di la ci zhig yod/ gang khyed du ma las yin gyi gcig las ma yin no zhes bya ba la zlog pa la gnod par byed pa'i tshad ma med pa'i phyir ro/ /gcig de'i 'bras bu bya dgos so zhes bya ba nges pa ni ma mthong ste/gcig de'i 'bras bu byed do zhes bya ba gang las nges pa yin/ de yod pa las yod pa yin no zhes bya ba de 'dir du ma las 'di mtshungs so/ /de skad cig de nyid skyed par nus kyi gzhan la ni ma yin pas gzhan dang gzhan bskyed pa ma yin no zhes bshad do//du ma yin pa las du ma thob pa ni ma yin te/ gang gi phyir kho bo cag gis khyed bzhin du rgyu kho nas 'bras bu'i bdag nyid du khas ma blangs te/ gang du ma yongs su gyur pa las du ma'i rang bzhin yin pa'i phyir 'bras bu du mar 'gyur ba zhig na/ 'on kyang snga ma nyid 'ga' zhig yod par gyur pa de yang du ma yod pa nyid las yod pa'i phyir de'i 'bras bur brjod na de gang las du mar thal bar 'gyur ba yin/gang yang tha mi dad par skyed par brjod pa'i phyir/ de gcig tu gnas kyang khyed kyi de'i 'bras bu skyed pa'i rang bzhin nyid yin pa de'i phyir 'bras bu skyed par thal bar 'gyur ro/ /de gzhan nye ba dang de la bye brag med pa'i phyir ram de yang mi skyed par 'gyur ro//de'i phyir de rnams yod pa dang med pa dang ldan pa las rang gi 'bras bu yod pa dang med pa dang ldan pa mthong ste de nyid bye brag tu skyed pa yin pa'i phyir ma nges pa ga la yin/ 'on te tshogs pa'i rgyu la brten par brjod na ni rgyu tha dad pas 'bras bu tha dad par mi 'gyur ro zhe na/de ni ma yin te ji ltar bdag nyid gang dang gang gi tshogs pa'i bdag nyid kyis rang bzhin de tha dad pas de khyad par la nye bar sbyar na de'i rnam par shes pa 'bras bu'i mtshan nyid gang gi khyad par ni tshogs pa'i ngo bo'i bye brag gis de rnams la nye bar sbyor ba'i phyir ro/ /de'i nye bar sbyor bas tshogs pa tha dad pa'i byed pas bya ba'i rang bzhin gyi khyad par ni bya ba dang khyad par can gyi rang bzhin de dag tshol ba med pa'i phyir ro//phan tshun tha dad pa'i ngo bo yin pa'i phyir tshogs pa tha dad pa tha mi dad pa'i ngo bo'i 'bras bu yin na ji ltar rgyu tha dad pa las 'bras bu tha mi dad par 'gyur/ de lta na tshogs pa gcig pa'i yid la byed pa yod pa'i nus pa la sogs pa'i mtshan nyid de las rnam par rtog pa'i shes pa bskyed do/ /gzhan yang 'di la byed pa dang dbang po tsam gyi mtshan nyid de las 'khrul pa'i dbang po'i shes pa 'byung ngo / /de las gzhan yul dang dbang po dang yid la byed pa'i bdag nyid de las ma 'khrul pa'i rnam par shes pa 'byung ba'i phyir tshogs pa tha dad pas bskyed pa'i 'bras bu'i rang bzhin khyad par ma 'chol ba yod pa nyid de tshogs pa'i mtshan nyid rgyu tha dad pas 'bras bu tha dad pa'i phyir ro//'o na ni gang gi tshe yul dang dbang po dang yid la byed pa rnams kyis rnam par shes pa skyed pa de'i tshe de dag nye bar sbyor ba'i yul gcig pa'i phyir ji ltar 'chol ba med pa yin zhe na/rnam pa de lta bu 'chol ba 'dod pa'i phyir skyon med do/ /de skad du de la gcig pus kyang nus zhes bya ba la sogs pa bshad do/ /de lta na ji ltar skyed par byed pa yin/ gal te de dag tha dad pas 'bras bu tha dad pa ni med de/'on kyang tshogs pa rnams gzhan dang gzhan gyi 'bras bu skyes pa ni skyed par byed pa nyid de gang gi phyir med na med par 'gyur te/ de dag gi skyed par byed pa de yod na 'ga' zhig yod pa'i phyir ro/ /de la gcig gam du ma yod pa de dag gcig gam du ma'i skyed par byed par brjod do//'o na ni tshogs pa gcig dang tshogs pa du ma'i dngos po skyed pas phan tshun tha dad par 'gyur na/ de dang de ma yin pa'i ngo bo'i rgyu las skyed pa nyid de dang de ma yin pa'i dngos por mi 'dod do/ /de la gang gi tshe mig dang gzugs dang yid la byed pa rnams rnam par shes pa bskyed pa'i bdag nyid yin pa de'i tshe mig dang gzugs dag kyang rnam par shes pa'i dngos por tha mi dad pa'i rgyu las skyes pa'i phyir de dag gi rnam par shes pa'i bdag nyid rnam par shes pa'am/de gzugs nyid du ji ltar thal bar mi 'gyur snyam du na/ /de dang de min dngos po ni/ /de dang de min rgyu las skyes//gzugs sogs cis te shes pa yin/ /rnam shes tha dad rgyu las skyes/ /zhes bshad pas/ nyes pa 'di dag med do/ /de dag ji ltar rang rang gi ngo bo tha dad pa'i rgyu mtshan ni nye bar len pas der nye bar sbyar ro/ /yid la byed pa ni rnam par shes pa'i nye bar len pa'i rgyu ste/dbang po ni rang gi rnam par shes pa'i skyed par rung ba skye ba ni lhan cig byed pa'i rgyu yin no/ /de bzhin gzhan dag la yang ci rigs par brjod par bya'o/ /des na gzhan 'dra ba'i tshogs pa dbang po'i skad cig ma skyed par byed pa ni rnam par shes pa dang mi 'dra ba'i phyir mtshan nyid mi mthun pa'i 'bras bu mtshan nyid mi mthun pa'o//ci ste de dag thams cad kyi rjes su 'gro ba dang ldog pa'i rjes su byed pa de'i tshe dbang po la sogs pa'i skad cig ma 'di tha dad pa ga la yin zhe na/ 'di dag nye bar len pa'i dngos pos 'di nye bar sbyor gyi gzhan la ni lhan cig byed pa'i rkyen yin pa'i phyir/rtogs pa'i ngo bo la phan 'dogs pa dang phan mi 'dogs pa dag ste yod pa la mi 'khrul pa dang 'khrul pa yin no/ /de lta na rnam par shes pa rtogs pa'i ngo bor yid la byed pas phan 'dogs pa'i phyir dbang po bems po'i ngo bo nyid ma yin no zhes gzhan la'ang de bzhin du shes par bya'o/ / rnam par shes pa tsam gyi dngos po ni de ma thag pa'i rkyen gyi byed pa las yin par nges pa nyid dbang po la sogs pa ni ma yin no/ /dbang po'i skad cig ma phyi ma skyed pa ni snga ma'i dbang po las phyi ma yin gyi rang gi rnam par shes par rung ba'i rgyu mtshungs pa de ma thag pa ni rkyen ma yin no/ /de bzhin du gzugs la sogs pa yang brjod par bya'o//de'i phyir gnas skabs tha dad kyang rnam pa gcig tu nges par byed pa'i shes pa'i rgyu mtshan gyis rang gi rgyun 'byung ba'i 'bras bu skyed pa'i rgyu mtshan yin te/ de ni nye bar len pa'i rgyu yin pa'i phyir ro/ /gang rgyun gzhan ni sngar gyi gnas skabs la ltos nas khyad par la sogs pa'i rgyu mtshan de lhan cig byed pa'i rgyu yin te/de yang dngos po 'di rnams rang gi rgyu brgyud pa las 'ongs pa'i rang bzhin no/ /cung zad cig rang gi 'bras bu'i rgyun rnam par 'jog pa'i rgyu mtshan skyed pa yin te/ gzhan yang rgyun gzhan du brjod pa'i rgyu mtshan yin pa'i phyir ro//de nyid kyi tshogs pa gzhan gyis bye brag tu byas pa'i phyir dbang po dang / gzugs dang rnam par shes pa'i skad cig ma rnams ni phan tshun mtshan nyid mi mthun pa la 'gal ba med do/ /de'i phyir gang gi tshe re re'i rgyu du ma yin pa'i phyir 'bras bu'i bye brag nyid yin pa de'i tshe 'brel ba med pas ma nges par 'gyur na de yang khas blangs pa'i phyir ci yang med do//'on te tshogs pa'i mtshan nyid kyi rgyu'i bye brag gi tshogs pa gzhan las 'bras bu'i bye brag kyang mtshan nyid mi mthun pa de'i phyir rgyu rnams las rang bzhin tha dad par brjod pa de'i tshe de 'dir med pas ji ltar rgyu'i bye brag las 'bras bu'i bye brag tu mi 'gyur zhes bya ba'i bsam pa ni rgyu'i bye brag las 'bras bu'i bye brag tu mi 'gyur ba ma yin no zhes gang las yin zhe na/bdag nyid ci lta ba zhes bya ba la sogs pa brjod do/ /gnyis ga yang 'di dag gi 'bras bur tshad mas mthong ba yin no zhes bya ba bstan pa ni dper na zhes bya ba la sogs pa smos te/'jim pa'i gong bu la sogs pa dag las byung ba'i bum pa rgyu du ma yin du zin kyang du ma'i ngo bor mi 'gyur ro/ /tshogs pa gzhan gyis bskyed pa ma yin pas tha mi dad pa'i ngo bo 'di dpe brjod pa'i phyir ro/ /de la tshogs pa gzhan gyis bskyed pa ni re zhig tha dad par bstan pa ni 'jim pa'i gong bu zhes bya ba la sogs pa smos te/'dir 'jim pa'i gong bu dang rdza mkhan dang skud pa ma tshogs pa'i rang bzhin ni rgyu gzhan pa dang lhan cig pas so phag la sogs pa'i mtshan nyid gzhan gyis bskyed pas dngos po tha dad pa'i 'bras bu rnams sgrub pa yin no//tshogs pa'i mtshan nyid mi mthun pa de dag gis bum pa'i bdag nyid skyed pa de bzhin du rdza mkhan la sogs pa la ltos pa med pa 'jim pa'i gong bu de las gzhan skyed pa'i shing la sogs pa mtshan nyid mi mthun pa'i nye bar len pa las byung bas sa'i bdag nyid kyi 'bras bu skye ba mthong ngo //rdza mkhan la sogs pa dang lhan cig pas kyang de'i bdag nyid kyi bum pa de'i rgyus byas pa'i bye brag ni 'jim pa'i gong bu 'ba' zhig las tha dad pa'i ngo bos de'i 'bras bu so phag la sogs pa dang mtshan nyid mi mthun pa byed do/ /de ltar rdza mkhan la sogs pas kyang gzhan gyi nye bar len pa'i lhan cig byed pa'i dngos pos 'bras bu byed pa gang yin pa de ni mtshan nyid mi mthun pa nyid 'jim gong dang lhan cig tu de'i rgyus byed pa'i bye brag can dag bum pa'i bdag nyid kyi 'bras bu skyed do zhes bya ba ni bsdus pa'i don to//de la 'jim pa'i gong bu las tha dad pa'i rang bzhin bum pa las gzhan pa'i nye bar len pa'i rgyu de ni 'jim pa'i ngo bo ma yin pa shing la sogs pa de rnams las 'byung ngo //rdza mkhan dang 'jim pa'i gong bu'i nye bar len pa'i byed pa phul du byung ba la lhan cig byed pa'i dngos pos nye bar sbyor bas bum pa de nyid kyi 'jim pa'i gong bu'i nye bar len pas sa'i bdag nyid yin pa de nyid dbyibs kyi bye brag chu 'dzin pa la sogs pa'i rnam pa de'i bdag nyid kyis de las gzhan pa gang dag 'jim pa'i gong bu de las gzhan pa'i rgyu mtshan dang nye bar len pa'i rgyu lhan cig tu so phag la sogs pa ni de dag las tha dad pa'i ngo bor 'gyur te/skud pa las ni 'jim pa'i gong bu dang rdza mkhan gyi rgyus byas pa'i bye brag las bum pa de nyid sa'i dbyibs kyi bye brag ni 'jim pa'i gong bu la rdza mkhan dag de skyed pa'i ngo bo yin pa'i phyir bum pa'i ngo bor rigs so/ /de dag kyang skud pa'i rgyus byas pa'i bye brag de dag la mi ltos pa'i gnas skabs tha dad pa'i bdag nyid 'khor ba la sogs pa las rnam par phye zhing rnam par dpyad pa'i rang bzhin du 'gyur ro//de'i phyir rgyu rnam pa gsum du gnas pa las skye ba'i bum pa de las gzhan pa re re'i 'bras bu dang gnyis pa'i 'bras bu tha dad pa'i ngo bo skyed pa'i phyir tshogs pa tha dad pas tha dad pa'i rgyu nyid phan tshun mi mthun pa'i ngo bor 'gyur ro//des na nye bar sbyor ba'i 'bras bu'i rang bzhin gyi bye brag ma 'khrul par grub bo/ /de yang re re gnas skabs su 'byung ba de ni rgyu'i bye brag gi rjes su 'gro ba dang ldeg pa'i rjes su byed pa des cha shas kyis skyed pa ni med do//de dag re re'i skyed pa nyid kyang dngos po nyid de re re'i rigs mi mthun pa'i rgyu gzhan dang nye ba las mthong la de dang nye ba las bye brag mthong ba'i phyir de skye'o zhes bya ba 'di ni de kho na nyid sems pas rnam par dpyad pa yin no/ /gang gi phyir 'bras bu'i bye brag don du gnyer ba rgyu du ma yongs su bzung ba byas nas phan tshun phan 'dogs par byed pa brgyud pa'i 'bras bu la mi slu ba ni 'bras bu skyed par 'os ba'i rgyu'i tshogs pa'i dngos po yin pa'i phyir ro//gang gi phyir de ltar tshogs pa'i bye brag las bye brag tu gyur pa'i so phag dang 'khor los rnam par phye ba'i bum pa ste/des rnam par phye ba ni bum pa'i mtshan nyid 'bras bur 'gyur ro/ /de'i phyir de ltar bshad pas rdza mkhan las ni 'jim pa'i gong bu spangs ba de ni tshogs pa gzhan pa'i nang du 'dus pa'i 'jim pa'i ngo bo ma yin te/ 'bras bu 'ga' zhig 'jim pa'i gong bu'i rgyus phan btags pa'i bdag nyid kho na de dang bye brag tu byed pa'i rgyu yin pa'i phyir ro//'jim pa 'ba' zhig ni ma yin te/ de dang de'i tshogs pa las phyi rol du gyur pa'i dbyibs kyi bye brag rdza mkhan gyi nye bar len pas phan btags par byas pa nyid kyis 'jim pa'i dbyibs kyi bye brag gi bdag nyid kyi 'bras bu'i rgyu yin pa'i phyir ro//de ltar na tshogs pa'i bye brag las 'bras bu'i bye brag tu 'gyur ba'i dpe bstan nas lhan cig byed pa nyid du mas kyang du ma'i bdag nyid du 'gyur ba spangs par ston pa ni/ de nyid kyi bum pa zhes bya ba smos te/ 'jim pa dang rdza mkhan gnyis lhan cig byed pa dag phan tshun phan 'dogs par byed pa'i bdag nyid gang gis nus pa'i bye brag ni rkyen gzhan dang lhan cig pa'i gnas skabs bye brag can du rung ba de'i yul de ni gnas skabs gzhan pa'i yul tha dad par gyur kyang ji ltar de gzhan las tha dad pa de ltar ngo bo ni tha dad pa med do//'bras bu'i rang gi ngo bo yang du ma nyid dang gcig pa nyid ma yin te/ de rnams kyis bskyed pa'i 'jig pa dang dbyibs kyi bye brag gi bdag nyid de bzhin gyi tshogs las skye bas tha dad pa'i phyir tha dad pa'o/ /gal te de gzhan las yin pa bzhin du rang gi ngo bo la tha dad pa med do zhes ji ltar shes par bya zhe na/'jim pa dang dbyibs dag ces bya ba la sogs pa smos te/ gang gi tshe rdza mkhan dang 'jim pa de'i gnas skabs su 'byung ba'i nus pa'i bye brag gi yul 'dzin pa dang dbyibs dag gi bye brag gi bdag nyid de ni gzhan las yin pa bzhin du rang gi ngo bo dag kyang tha dad pa de'i tshe 'jim pa dang dbyibs phan tshun bdag nyid ma yin pa phan tshun spangs pa'i bdag nyid kyi rgyus dbyibs kyi khyad par dang 'jim pa'i ngo bo dang dbyibs kyi bye brag ni de gzhan gyi ngo bo bzhin du snang ba med do//gang dang gang gi rang bzhin ma yin pa de dang de'i bdag nyid ni rang gi 'dzin pa'i shes pa las snang ba med de gzugs dang ro'i shes pa bzhin no//de ma tshang ba'i nus pa las skye ba na de'i ngo bo'i rjes su byed par mi rigs te 'khrul pa nyid du thal bar 'gyur bas de'i dbang gis don rnam par gzhag pa med par thal bar 'gyur ro/ /de'i phyir 'jim pa dang dbyibs dag gcig gi bdag nyid yin pa'i phyir rgyu du ma las 'bras bu du ma'i bdag nyid yin pa'i ma nges pa yin no//mig la sogs pa tha dad pa'i ngo bo dag lhan cig byed pa las 'bras bu gcig byed pa 'gal ba yin no/ /de dag thun mong pa'i tshogs pa zer gcig pas 'bras bu gcig byed pa'am/tha mi dad pa'i ngo bos thun mong ma yin pa'i rgyu dang 'bras bur 'dod pa yin te/ 'di dag kyang tshogs pa gcig pa la ltos nas rgyu dang 'bras bu gcig pa nyid brjod kyi don dam par de'i tshogs pa'i nang du 'dus pa'i rigs mthun pa'i skad cig ma gzhan skyed pas tshogs pa gzhan pa'i bdag nyid kyis 'bras bu gzhan skyed pa yin du zin kyang ji ltar rkyen gcig skyed par byed pa cung zad kyang med pa de bzhin du rkyen du ma yang skyed pa yin no//rgyu du ma las 'bras bu du ma nyid khas blangs pa la res 'ga' zhig kyang gnod pa med do/ /de na 'bras bu gcig pa la ltos nas du mar thal bar 'gyur ba ni ldog pa la the tshom za ba yin te/sgrub par byed pa thun mong du grub pas bsgrub par bya ba yin no/ /'o na ni 'jim pa dang dbyibs kyi bye brag dag ngo bo gcig kyang ngo tsha med par grangs can la sogs pa rnams tha dad pa dang tha mi dad pa 'dod pa ji ltar rkyen du ma las skye ba gcig nyid 'di dper 'gyur/thams cad du rdzas dang rnam grangs dang ming dang mtshan nyid dang 'bras bu dang tha dad pas tha dad pa yin gyi/ yul dang dus dang ngo bo tha mi dad par 'dod de dper na bum pa dang gzugs la sogs pa de bzhin du bum pa ni gcig dang gzugs la sogs pa ni mang po zhes brjod pa ni grangs so//bum pa dang gzugs pa la sogs pa zhes bya ba ni ming tha dad pa'o/ /rjes su 'jug pa'i mtshan nyid rdzas dang rtag pa'o/ /ldog pa'i mtshan nyid tha dad pa dang skad cig ma'o/ /rgyal dpog pas kyang cung zad cig dus gzhan du gnas pa'i mtshan nyid kyang tha dad pa'o//bum pa chu 'dzin par byed kyi gzugs ni ma yin la/ gzugs kyi dngos po la chags pa zhes bya ba 'bras bu tha dad do/ /de ltar thams cad du rdzas dang rnam grangs la sogs pa tha dad pa dang yul la sogs pa rnams kyis kyang tha mi dad pa'i phyir 'jim pa dang dbyibs dag 'jim pa dang rdza mkhan dag gis rnam pa 'ga' zhig skyed pas rgyu gcig pa la gcig yod pa nyid do//ji ltar gcig pa de bzhin du de rnams tha mi dad pa'i bdag nyid skye ba'i phyir ro/ /du ma'i rgyu gang yin pa de las du ma nyid de gang gcig pa nyid gang yin pa de ni lhan cig byed pas tha mi dad pa'i ngo bo gcig pa ni rgyu gcig pa nyid yin pa'i phyir 'khrul pa med do zhe na/de ni mi rigs te/ rang bzhin gyis tha dad par khas mi len na gzhan du na tha dad par mi 'grub pas du ma las gcig pa'i 'bras bu skyed pa la 'gal ba med do/ /rang bzhin gyis tha dad par khas blangs pa 'jim pa dang dbyibs dag tha dad pa med pa'i bdag nyid de/dbyibs dang 'jim pa'i ngo bo'i bye brag rnams de dag snang ba med pa ni spang bar dka' ba nyid do/ /gal te rang bzhin gyis tha dad pa med pa chos dang chos can gyi rnam grangs la sogs pa tha dad du zin kyang tha mi dad do/ /gzhan gyi ngo bo tha dad par grangs la sogs pas kyang bdag nyid tha mi dad pa la gnod par mi nus so//re zhig grangs tha dad pas nus pa med de/ rdzas gcig pa la tha snyad mang po mthong ba'i phyir ro/ /dper na bla ma zhes bya ba bzhin du mang po'i tshig brjod pa la nges pa ma mthong ba'i phyir gzugs la sogs pa 'dir rgyu mtshan ma yin te/gzugs la sogs pa rgyu mtshan yin na ni bla ma zhes gcig gi tshig res 'ga' zhig kyang mi brjod par 'gyur ro/ /gal te chos can gyi ngo bo brjod pa srid pas brjod par 'dod do zhe na/ de gcig pa nyid brjod par 'dod pa thams cad dang / bla ma dag mi snang ba yin par thal bar 'gyur ro/ /'bru zhes rigs brjod pa na chos can dang / gzugs la sogs pa ma brjod pas gnyis ka'i ngo bo cung zad kyang bshad pa med de/ /dngos po rnams la bla ma'i sgras brjod pa'i phyir/ ji ltar chos can gyi ngo bo la srid pas gcig tu brjod pa 'dod pa yin de'i phyir bla ma gcig pu zhes gzhi mthun par bstan pas rnam grangs pa yang gcig gi grangs kyi yul la de yang rnam grangs pa'i ngo bos tha dad pa yin no//ji ltar grangs tha dad pas tha dad par grub pa yin/ ming yang brda'i rgyu mtshan can te/ de yang 'dod pa la rag las nas 'jug pa'i phyir gang las don tha dad pa yin/gcig la yang ming tha dad pa mthong na ji ltar tha dad pa'i rgyu mtshan yin/ dper na dbang po dang brgya byin dang rtseg ma 'dzin ces bya ba bzhin no/ /'dir yang dbang byed pa dang brgya ster ba dang / rtseg ma 'dzin pa'i nus pa tha dad par rtogs so zhe na/ma yin te/ thams cad bya ba dang byed pa po ma yin pa'i phyir/ dbang ster ba dang / brgya ster bar nus so 'dzin to zhes bya ba ma yin no/ /de lta na ci zhig yin/ chos can gyi ngo bo yang gcig tu khas blangs pa'i phyir dang / nus so zhes bya ba la sogs pa'i tshig de brjod pa na gzhi mthun pa mthong ba'i phyir ro//'khrul pa'i shes pa'i yul ma yin pa'i phyir nye bar btags pa mi rigs so/ /gang dag gi rnam grangs kyi don 'ga' yang rjes su rtogs pa med na 'di de la ci zhig brjod par bya/ mtshan nyid tha dad pa'i gtan tshigs kyang ma grub pa'i phyir dang / gcig gi dngos po la lar rjes su 'gro bar grub pa med pa'i phyir ro//de lta na gtan du gnas pa'i rtag pas rdzas rtag pa ma yin par ngo tsha med par 'dod de/ yongs su gyur pa'i rtag pa khas blangs pa'i phyir snga ma dang phyi ma'i skad cig ma'i rgyun tu gnas pa 'di rnam grangs pa lta bu ni ma yin te/ rgyun chad pa'i ngo bos rnam grangs pa nyid de/rnam grangs pa'i ngo bo 'gal ba'i phyir rdzas rtag pa yin no zhes khas blang bar mi bya'o/ /'di yongs su gyur pa'i rtag pa ni gtan du gnas pa'i rtag pa bzhin du srid par mi 'gyur ro/ /rnam grangs las tha dad pa'i rdzas ma grub la de dmigs pa'i rig byar gyur pa las de lta bu'i gcig pa mi rtogs so//rnam grangs pa rnams ni bya ba dang byed pa ngo bo mtshungs pa rnams la rdzas su mngon par zhen nas blo dman pa rnams kyis gzhan yang mtshan nyid mi mthun pa mi rtogs so/ /'bras bu tha dad pa ni kho bo cag la ma grub pa nyid de/ gzugs la sogs pa 'ga' zhig gi bya ba dang byed pa yin pa'i phyir/de bzhin du khas blang bar bya bar brjod do/ /'bras bu ni dus mnyam pa dang mi mnyam pa rnam pa gnyis te de la sngar yod pa las 'di 'byung ba ni tha dad pa'i rgyu mtshan yin na de ni mi srid de/ chos dang chos can dus mtshungs pa'i phyir ro/ /dus mnyam pa 'bras bu tha dad pa ni ma nges pa yin te rnam par phye ba'i yongs su gyur pa ni snam bu la sogs pa la srid pa'i phyir ro//'bras bu gcig pa nyid du brjod kyi don dam par de'i tshogs pa'i nang du 'dus pa'o/ /snam bu la sogs pa ni rnam par phye ba'i yongs su gyur pa yin no/ /'bras bu du ma byed pa mthong yang chos can gyi ngo bo las tha dad pa med pa'i phyir dang /gcig tu mi byed pa la 'gal ba med pa'i phyir/ 'dir rgyu nyid 'bras bu'i bdag nyid du khas ma blangs pa'i phyir ro/ /gang gi phyir rgyu gcig gi bdag nyid las 'bras bu gcig gi bdag nyid du khas len pa na/ de las gzhan pa'i ngo bo med pas de gzhan gyi bdag tu khas blang bar mi bya ste/'on kyang sngar 'ga' zhig yod pa nyid la sngar med pa'i phyir ro/ /de la yul dang dbang po dang yid la byed pa gcig la gcig nye bar len pas byas pa'i ngo bo tha dad pa rnams dang nye ba'i bye brag can rang dang gzhan pa'i skad cig ma re rer yod pa na yod pa de rgyu mtshan yin la/de yang du mar byed par rjes su byed pa'i phyir ro/ /du ma byed par khas blangs pa la 'gal ba med do/ /gang gi phyir gcig byed pa yang de yod pa yod pa de rgyu mtshan yin la/ de yang du ma byed par mtshungs so/ /'o na ni de dang nye ba'i rnam par shes pa'i mtshan nyid kyi 'bras bu srid pa de skyed pa'i rang bzhin kho nar de dag nges pa yin no//'bras bu'i rang bzhin la ltos nas rgyu skyed par byed par rnam par 'jog pa de'i phyir rnam par shes pa'i rang bzhin re re dag gis ji ltar gzhan 'bras bu skyed pa yin/ yang na de yod na de dag skyed pa'i rang bzhin du 'gyur na/des kyang rnam par shes pa kho na byed par mi 'gyur te/ de gzhan skyed pa'i rang bzhin yin pa'i phyir ro zhe na/ 'di la nyes pa med de/ de dag du ma'i 'bras bu byed pa ni rang bzhin yin pa'i phyir ro/ /de ltar na de'i gnas skabs su re re'i bye brag gis rigs mthun pa dang cig shos kyi skad cig ma skyed pa'i bdag nyid du de dag de yod pa las mthong ba'i phyir ro//de la rnam par shes pa skyed pa'i rang bzhin kho na yin pa'i phyir de skyed pa'i rang bzhin rgyun mi 'chad do/ /de nyid dang mi mthun pa'i phyir rang bzhin gzhan skyed pa ma yin no/ /des na de dag du ma'i bdag nyid du mi 'gyur te/gcig gi bdag nyid du phul du byung ba'i 'bras bu'i rgyu yin pa'i phyir ro/ /de gzhan la ltos nas mi mthun pa las ldog pa la nye bar brten pa la sgra du mas brjod pa na dngos po du ma'i ngo bor bstan pa ni med de/ bye brag du ma gcig pa'i bdag nyid la de bzhin brjod pa'i phyir/dper na gzugs dang bstan du yod pa dang thogs pa dang bcas pa zhes bya ba bzhin du rang bzhin tha dad pa'i rgyu mtshan ni sgra ma yin te gzhi mthun pa med par thal bar 'gyur ba'i phyir ro/ /gal te de'i rgyu mtshan gcig pa yod pa ma yin no zhe na/ ma yin te/ de dag gcig pa nyid kyi phan 'dogs pa la mi ltos pa ni mi rigs pa'i phyir ram ltos pa la ji ltar gcig pa las du ma'i 'bras bur mi 'gyur/gal te du ma nyid kyi bdag nyid nye bar mi rigs pa'i phyir ro zhe na/ ma yin te gzhi mthun pa med pa'i skyon de'i gnas skabs su thal bar 'gyur ba med do/ /sngon po la sogs pa la bdag nyid tha dad pa mngon sum gyis mthong ba med la/'bras bu tha dad pas de dag tha dad par rjes su dpag na ni 'brel pa med pa'i phyir dang / de 'dzin pa'i tshad ma med pa'i phyir ro/ /sngon gyi 'bras bu ma yin du zin kyang dngos po rnams bdag nyid gcig pa kho nar rtogs te mar me la sogs pa bzhin no//rjes su dpag pa ni ma yin te/ de bzlog pa la yang gnod par byed pa'i tshad ma med pa'i phyir dang / gcig gis du ma byed par khas blangs pa gang yin pa gzugs dang ro dang dri dang reg bya'i bye brag rnams 'di la lar lhan cig 'byung bar nges pa'i tshad mas de yongs su mthong bar mi 'gyur te tha dad pa'i rgyu mtshan can lhan cig 'byung bar nges pa mi rigs pa'i phyir ro//de'i rgyu mtshan rnams kyang rgyu gcig pa de la rag las nas skye bar nges pa ni lhan cig 'byung ba med pa'i phyir ro/ /gal te chos can gcig gi rang bzhin gyis gcig la lhan cig 'byung bar nges so zhe na/ma yin te gcig pa ni du ma'i rang bzhin kho nar bsams pa'i phyir dang / du ma ni gcig gi ngo bo nyams su myong ba'i phyir de dang ldan pa'i du ma ni spang bar dka' ba'i phyir ro/ /de lta ma yin na chos dang chos can gyi tha dad pa ji ltar nges par 'gyur/ de ltar na bdag nyid kyi mdun na gnas pa la 'di chos can dang rnam grangs so zhes rnam par gzhag par 'gyur te/gang gi tshe tha dad pa de'i tshe tha dad pa nyid yin na ni du mas kyang 'bras bu gcig tu mi 'gyur na/ phan tshun phan 'dogs par byed pa la mi ltos na yul dang dbang po dang yid la byed pas lhan cig pa kho nas 'bras bu gcig rtsom pa mi rigs te/gcig pa nyid ni cung zad cig la lar skyed pa med do/ /de'i phyir rgyu dang 'bras bu thams cad kyi dngos po rgyun chad par 'gyur ro/ /gcig pas du ma dang du mas gcig byed pa spangs pa na rnam pa gzhan ni mi srid pa'i phyir dang / sna tshogs rgyu med pa nyid kyang ma yin te yul dang dus dang rang bzhin so sor nges pa'i phyir ro//de'i phyir tshogs pa gcig la rag las pa'i skye ba nyid lhan cig 'byung bar nges pa'i dngos po rnams 'bras bu gcig byed par nges pa kho na yin no/ /de bas na rang gi rgyun gyi skad cig ma dang cig shos kyi nye bar len pa cig car byed pa yin no//ji ltar gcig las du ma'i 'bras bur mi 'gyur/ de'i phyir ji ltar 'bras bu tha dad pas tha dad par brtag pa yin/ rdzas dang rnam grangs dag ngo bo gcig par brjod na gcig pas du ma'i 'bras bu nus pa'i phyir ji ltar mi skyed pa yin/ rang bzhin ni dngos po yin pa'i phyir ro/ / de lta ma yin na de ni rang bzhin med par thal bar 'gyur ro/ /rang bzhin gcig pa'i rdzas dang rnam grangs de 'bras bu tha dad pa dngos po ni gcig dang 'brel pa yin no snyam nas/ 'bras bu tha dad pas tha dad par brjod pa na/ 'di ni ngo tsha med par bsal bas spang bar 'os pa yin/bye brag pa rnams kyang rdzas gcig pa'i rdzas dang / yon tan dang las dang 'du ba'i rgyur brjod pa na/ las ni gcig la 'brel pa'i bye brag gi 'du byed pa'i rgyu mtshan can gcig pa du ma byed pa spong ba na rang gis byas pa la zhe sdang bas spong ba yin no/ /'dir nus pa tha dad pa ni rgyu mtshan ma yin te/gang gi phyir de gcig pa la mi ltos na ji ltar de nus pa nges pa'i don la brten nas slar cha shas med pa gsal bar byed pa yin/ gang las gcig pa'i bdag nyid phul du byung bas du ma'i nus pa la phan 'dogs pa de kho na las 'bras bu du ma byed pa yin no zhes bya ba rgyas par brjod pas chog go//yul dang dus dang rang bzhin tha mi dad par khas blangs pa de yang mi 'thad pa nyid de/ de lta na yul dang dus dag tha mi dad kyang gzugs dang ro dang dri dang reg bya rnams rnam grangs pa'i ngo bos tha dad pa de'i phyir ji ltar rang bzhin yang tha mi dad par grub/ gang gi tshe rdzas dang rnam grangs dag kyang gcig la rjes su 'jug pa dang ldog pa'i ngo bo yin pa de'i tshe bum pa dang snam bu bzhin du dngos po gnyis su 'gyur gyi gcig gi ngo bo ni ma yin pa'i phyir ro//de'i phyir ji ltar tha mi dad par grub pa yin/ rjes su 'jug pa dang ldog pa'i ngo bor mi rigs te/de dag rjes su 'jug pa can dang / ldog pa can la rag las pa'i phyir dang / de'i phyir rjes su 'jug pa dang ldog pa dang ldan pa dag gi rang bzhin las gzhan du na brjod par bya'i/ de dag rjes su 'jug pa dang ldog pa nyid rang bzhin yod pa nyid kyis yod pa la rag mi las pa'i phyir ro//dran pa dran par byed pa rang bzhin du mi 'gyur te khyab pa dang ldog pa'i rang bzhin gyi mtshan nyid yin pa'i phyir rang bzhin tha dad par brjod par bya'o/ /gal te sa la sogs pa'i ngo bor rang bzhin yin no zhe na/ 'dir yang tha mi dad do zhes bya ba/ gang gi tshe 'dra bar brjod na de ni tha dad pa kho na yin te/'dra ba'i dbang du byed pas 'dra ba'i phyir ro/ /de'i phyir don gnyis su 'gyur na gcig la ngo bo gnyis ni med do/ /'on te gcig ni gnyis kyi ngo bo spangs pa de tha mi dad par khas len na de lta na ji ltar gzugs dang sgra ngo bo gnyis 'dir rang bzhin du brjod pa yin/ de'i gcig pa ji ltar gnyis kyi ngo bo yin/gcig gi rang bzhin de bkag pas gnyis kyi ngo bo yin no snyam na/ 'on te rang bzhin gcig pa yang khas ma blangs pas de lta na ji ltar de gcig tu brjod pa yin/ re zhig du ma rnams rgyu gcig las skye ba'i phyir thams cad du nye bar len pa'i rgyu mtshan gyi byed pa tha dad pas rgyu tha dad par mi 'grub ste/'bras bu gcig byed pa ma yin pa'i yang phyir ro/ /gcig kyang yongs su 'gyur ba'i rnam par dbye ba dang rnam par ma phye ba'i yongs su 'gyur bas 'bras bu tha dad par khas blangs pa'i phyir ro/ /rjod par byed pa gcig pas brjod par bya ba gcig pa'i phyir yang gcig pa la rnam grangs du ma mi srid pa'i phyir dang /byas pa dang ma byas pa sna tshogs pa'i rung ba rnams rjod par byed pa dang brjod par bya ba gcig pa nyid la lar mi srid pa'i phyir ro/ /nus pa tha dad pa yul tha dad par brjod pa na lan bshad zin no/ /rnam par shes pa gcig gi yul ma yin pa'i dang re re la yang rnam par shes pa du ma skye ste/de lta na zla ba la sogs pa la mang pos mthong ba na de ji ltar gcig pa nyid du khas blang bar bya ba yin/ mang po rnams kyang rnam par shes pa gcig gi yul yin par srid pas sngon po la sogs pa rnams gcig tu thal bar 'gyur ro/'di ltar gcig gnyis kyi ngo bo yin no zhes bya ba 'di dag ni thams cad du rnam pa 'ga' zhig kyang 'brel pa med do/ /rnam par shes pa yang sngon po'i gzugs brnyan las skyes pa na ser por snang ba rnam par bcad nas bye brag can du snang ba yin gyi 'di yang khyod kyi gnyis kyi ngo bor ni med do//'on te rdzas dang rnam grangs dag kyang lhan cig 'dres pa'i phyir mi'i seng ge bzhin du gcig pa 'dren ma'i ngo bo yin pa'i phyir gnyis kyi ngo bor brjod do zhe na/ de mi rigs te/ mi'i seng ge 'dren ma'i ngo bor ma grub ste/ rdul phra rab du ma dang 'brel pa'i ngo bor lhan cig pa de yang rdul phra rab re re mi'i seng ge'i ngo bor mi 'gyur te/de'i steng gi cha ni seng ge'i gzugs yin la 'og gi cha ni mi'i gzugs yin na rigs gzhan de nyid mi'i seng ge yin pas 'dren ma'i ngo bo med do/ /sna tshogs pa'i ngo bo ni 'dren mar brjod do/ /sna tshogs pa ni du ma'i ngo bo yin te du ma'i ngo bo yin na gcig gi ngo bo ga la yin/du ma nyid de dag kyang nags dang dpung zhes bya ba bzhin du mang po rnams las 'bras bu gcig pa mthong ba'i phyir gcig gi tha snyad du byed do/ /blun po blo zhan pa phyin ci log pa gang yin pa de dag de ltar re zhig rgyus so so ba nyid du yul dang dus dang rang bzhin rnams gcig sgrub par byed pa tshogs pa rnams kyang rnam grangs pa la 'khrul pa yin no//de lta na rnam grangs ni yul dang dus dang rang bzhin dag rnam grangs pa'i ngo bos tha dad par sngar bshad pa dang / chos dang chos can bkag pas gnyis dang ldan pa mi srid pa'i phyir ro/ / rdzas dang rnam grangs ngo bo'i phyir/ /dngos po gnyis kyi ngo bor grags/ /de dag bdag nyid gcig pa dang / /tha dad ming sogs kyis 'byed pas/ /dbang po yi ni shes pa la/ /dngos po'i ngo bo mi snang ba/ /sgra yi spyod yul min na cis/ /de ming tha dad tha dad 'gyur/ /don dam par ni gcig pa nyid//ces bya la sogs de bzhin gsungs/ /sgra yi byed pa'i don dag ni/ /dbang po'i blo la snang med phyir/ /mthong ba bzhin du de yi sgra/ /rtogs pa yi ni spyod yul lo/ /gal te rtags des tha dad nyid/ /ming gis tha dad 'gyur zhe na/ /'ga' zhig ldog pa'i tha dad pa/ / dngos po la ni rnam 'gags min/ /grangs tha dad kyang gzhan 'dod pa'i/ /tshig las tha dad med phyir ro/ /de phyir brtags pa nyid kyang ni/ /rnam 'gas tha dad par 'gyur gyi/ /gang dag gi tshig dngos po'i dbang / /zhes bya sogs kyis dngos la min/ /'jig pa med pa ldog med pa//ldog pa 'jig par brjod pa yin/ /rdzas kyi rnam grangs 'jig pa na/ /'jig na bdag min cis mi 'dod/ /gal te rnam grangs ngo bo zhes/ /rdzas kyi rang bzhin nyid yin no/ /ci de gzhan pa'i ngo bor 'gyur/ /gal te min na de bzhin 'jig /ji ltar rdzas dag gnas pa las//phyis byung de yang de bdag gam/ /'gal ba'i chos ni gnas pa na/ /rnam grangs su zhig ci zhig 'gyur/ /gang phyir de la brtag pa yi/ /tha dad ngo bor gal te 'dod/ /gal te rnam grangs tha dad dngos/ /rdzas kyi ngo bos 'gyur zhe na/ /de 'di tha dad med gyur pa/ /'di la 'brel pa med nyid yin//rdzas dang rnam grangs rang bzhin dag /gcig pa nyid du khas len na/ /gcig las skye dang mi skye dang / /'jig dang mi 'jig thal bar 'gyur/ /de'i phyir mtshan nyid tha dad pas/ /de dag tha dad nyid mi 'gyur/ /gal te 'bras bu tha dad pas/ /rang bzhin des tha dad 'gyur na//rang bzhin tha dad med gyur des/ /tha dad med na de bzhin du/ /rang bzhin kho nas tha dad pas/ /cis na tha dad grags mi 'gyur/ /phyis 'byung 'bras bu tha dad pas/ /de yi tha dad byed pa min/ /rang bzhin 'gyur ba med pa'i phyir/ /'jig pa'i rgyu ni mi rigs so//gcig des tha dad med pa na/ /de'i dngos po yang de bzhin no/ /de dag gi ni tha dad rnams/ /gang gis dbyer med tha dad 'gyur/ /gal te de dag tha dad grub/ /tha dad don la brtag ce na/ /de yang gzhan gyi rang bzhin du/ /gang de tha dad med grub pa'i/ /gzhan gyi rang bzhin brtag na ni//de bzhin thug pa med par 'gyur/ /mtha' yas pa yi rang bzhin nyid/ /don byed nus las byung ba yi/ /shes la snang ba med pa la/ /gang gi de bzhin khas len 'gyur/ /gal te gcig nges dbyer med 'gyur/ /tha dad med pas dbyer med na/ /de ni gcig las ldog med phyir//tha dad pa nyid rnam par nyams/ /tha dad med yongs ma spangs par/ /tha dad rtog pas byas par 'gyur/ /de ni bden par yong gyur na/ /tha dad med don brdzun par 'gyur/ /phan tshun med pa'i ngo bo rnams/ /gzhan min pa yi rgyu can yin/ /gang phyir gcig pa'i dngos de'i phyir//gcig la gnyis pa'i ngo bo med/ /phan tshun med pa'i ngo bo yang / /rnam grangs yin na tha dad med/ /rdzas ni 'jig pa'am mi 'jig 'gyur/ /de ltar de ni gzhan zhig yin/ /gtan du gnas pa'i rtag pa'i rdzas/ /tha dad skad cig mas 'jig par/ /cis na mi 'dod 'gal zhe na//tha dad mtshan nyid 'dod bya min/ /de 'dod ci yi phyir na spyi/ /gsal ba kun gyi rjes 'gro ba/ /gcig 'dod na ni ma dang yang / /chung ma cis na gcig mi 'dod/ /tha dad tha dad med pa'i skyon/ /bshad zin de dag 'dod na gang / /ji ltar so sor thal mi 'gyur//de ni ji ltar gnyis 'gyur min/ /bu ram bad kan rgyur 'gyur la/ /dong gra mkhris pa'i rgyu yin zhe/ /de yi rtsa ba'am gzhan sbyar 'di/ /bu ram dong gra'i ming can yin/ /mngar kun gyis ni bad kan gyi/ /rgyu min dper na sbrang rtsi bzhin/ /dper na ma ga d+h+wa can bzhin//rno ba'ang mkhris pa skyed pa min/ /so so nye bar gyur pa gang / /ma sha'i snum dang rno ba yis/ /bad kan mkhris pa skyed pa bzhin/ /rang gi bdag 'dres ci mi 'dod/ /nus la ltos pa'i 'bras yin na/ /yon tan tsam dang 'brel ba ni/ /'ga' zhig cung zad nyid yin gyi//de ni kun la yod pa min/ /tha dad tha mi dad tsam gyis/ /skyon gang ji ltar 'byung ba yin/ /'gal ba nye bar 'gyur ba'i skyon/ /de ni skye bar gyur na yang / /de ni de bdag nyid gyur pa/ /mi 'dod ldog par mi 'gyur na/ /de lta de ltar dbyibs dag ni/ /cha shas nyid ni snang gyur pa//de bzhin 'ga' zhig kyang ma yin/ /cha shas snang ba med pa'i phyir/ /de yang sgra gcig gis brjod pa'i/ /rnam 'gas tha dad med pa med/ /rang gi mtshan nyid shes pa la/ /sgra yi don ni snang ba med/ /sgra dag gis ni de nyid la/ /mi gsal ba yi ngo bor rtogs/ /de phyir tha dad dbyer med rtags//gang gis 'di dag lhan cig 'gyur/ /cha med pa yang du ma yi/ /tha dad yul sbyor ji ltar 'dod/ /gal te rtogs so zhe na ni/ /skad cig 'jig par nyams myong ba'i/ /rnam grangs pa ni rtogs pa la/ /gnas pa 'dzin par ga las 'dod/ /tshad ma gzhan gyis yin zhe na//de 'dir gnod pa byed par mtshungs/ /gcig yin na gzhan gzhan min phyir/ /tha dad tha dad med brjod dag /phan tshun de dag tha dad par/ /des na chos dang chos can ni/ /de dag kyang ni tha dad 'gyur/ /gal te gang gi bdag nyid des/ rnam grangs rdzas de yin snyam na//gal te tha dad des bdag na/ /tha dad ldan pa'i mtshan nyid gyur/ /gcig pa gnyis kyi ngo bo min/ /rdzas dang rnam grangs ngo bo las/ /'ga' zhig 'dir ni gzhan yod min/ /rang bzhin gang yin rgyu mtshan gyur/ /de dag gcig pa nyid du btags/ /de phyir de dag tha dad med/ / rang gi bdag nyid nyams par thal/ /de tha dad kyang de dag yin/ /zhe na gang tshe bdag nyid gang / /chos dang chos can de 'am gzhan/ /gal te tha dad de bdag na/ /tha dad nyid dam de la yang / /de las gzhan du yongs su brtags/ /de dag tha dad med grub phyir/ /snga ma bzhin du thal bar 'gyur//de ni de dbang yin pa'i phyir/ /chos can bzhin du de 'gyur ro/ /de gzhan de bzhin rtogs med pa/ /des na rgol ngan brjod 'di brtags/ /las kyi nus pa rnams kyis kyang / /cha ni med par gnas pa na/ /gang la mngon par zhen pa'i dngos/ /srog chags rnams kyi bde sdug sogs//las rnams kyis ni bskyed pa de/ /de dag nyid las tshad med par/ /phan tshun can la ltos yod pa/ /de bzhin lus ni gnas pa yin/ /zhes mang du brjod pas chog go/ /de ltar 'jim pa dang dbyibs dag gcig pa'i rang bzhin yin pa de ni rnam pa 'gas tha dad pa mi srid pa'i phyir lhan cig byed pa rnams kyang 'bras bu du ma yin no zhes bya ba 'dir dper gyur pa ni 'di yin no//'di bye brag pa'i 'dod pa'i dogs pa bsu ba ni yon tan ni zhes bya ba la sogs pa smos te/ dbyibs ni cha shas kyi bkod pa yin par brjod de/ de yang ldan pa'i mtshan nyid yin pa'i phyir/yon tan gyi ngo bo yin no/ /de'i phyir 'jim pa'i rdzas las gzhan pa nyid de rdzas dang dbyibs ni ma 'dres pa'i rang bzhin yin pa'i phyir ro/ /des na gang gi tshe 'jim pa'i gong bu ni 'jim pa'i bdag nyid byed pa yin la/ de yang rdza mkhan gyis ni dbyibs kyi bye brag byed par brjod pa de'i tshe de dag shin tu tha dad pas rgyu du ma nyid las 'bras bu du ma nyid 'thob bo//grub pa'i mtha' smra bas bshad zin to zhes bya ba smos so/ /'jim pa dang dbyibs rang bzhin tha dad pa las 'jim pa dang / dbyibs dag phan tshun bdag nyid can ma yin zhes bya ba la sogs pa'i skyon bshad zin to//dbyibs las 'jim pa'i rdzas gzhan pa ni ma yin te/ de'i phyir 'jim pa'i gong bu nye bar len pa phul du byung bas byas pa de'i 'bras bu'i mtshan nyid la rdza mkhan ni lhan cig byed pa yin la/ /de'i nye bar len pa'i bdag nyid kyis byas pa de'i 'bras bu'i mtshan nyid la 'jim pa'i gong bu ni lhan cig byed pa so so ba'am/ma lus pa nyid las 'jim pa'i dbyibs kyi bdag nyid kyi 'bras bu byed pa'i phyir rgyu du ma las kyang 'di du ma nyid ma yin no/ /'dir gtan tshigs lhag pa bshad pa ni gzhan yang zhes bya ba la sogs pa smos te/bum par gtogs pa'i dbyibs gang yin pa de/ gang gi tshe de 'jim pa las 'jim pa tha dad par gyur pa de'i tshe rdza mkhan gyis ci'i phyir logs shig tu mi byed tha dad pa ni gdon mi za bar logs shig tu mi byed pa ma yin no/ /rdza mkhan gyi rjes su 'gro ba dang ldog pa dag gis de dbyibs kyi rgyur rtogs par bya ba'i phyir de logs shig tu byed par 'gyur ro//gzhan yang gal te yon tan zhes bya ba la sogs pa smos te rdzas la brten pa'i yon tan ldan pa ma yin pa ldan pa'i rnam par dbye ba rnams rgyu ma yin pa la mi ltos pa zhes bya ba la yon tan gyi mtshan nyid thams cad du yon tan ni rdzas kyi gzhan gyi dbang yin pas de ji ltar res 'ga' zhig logs shig tu byed pa yin/bye brag pa nyid sangs rgyas pa la rtsod par dogs pa ni gal te rang bzhin gyis zhes bya ba la sogs pa smos te/ gal te rang bzhin gyis dbyibs ni de'i yon tan gyi bdag nyid yin te/bya ba dang ldan pa las dang ldan pa zhes bya ba la sogs pa brjod pas rdzas de ni rten gyi rang bzhin nam/ dbyibs ni gyo mog gi rnam pa de lta bu'o/ /de la rag las/ pa bdag nyid yin na de'i tshe rdza mkhan gyi byed pa la ltos pa ci zhig dgos rang nyid kho na ci'i phyir ma yin zhes rtsod pa'i bsam pas de ltar bye brag pa rtsod par dogs pa la lan bshad pa ni ma yin te de las zhes bya ba la sogs pa smos te/'jim pa'i rdzas su chu 'dzin par byed pa la sogs pa gang yin pa de'i dbyibs de dag gi 'bras bu dang 'brel pa rten pa dang brten pa'i mtshan nyid do//de la rung ba gang yin pa de ni gnyi ga yang yin no/ /de rdza mkhan las gang thob pa'i phyir ro/ /de'i phyir rdza mkhan la ltos pa yin no/ /rdza mkhan la mi ltos pa'i skyon ni de lta ma yin na zhes bya ba smos te/ gang gi tshe de dag phan tshun 'brel par rung ba 'di rdza mkhan la ltos pa ma yin na/de'i tshe 'jim pa'i rang bzhin kho na rnam pa de lta bu dbyibs dang 'brel par rung ba nyid do/ /de la yang dngos po kho nar gyur pa'i dbyibs dang 'brel par rung ba'i chos yod pa'i rdza mkhan dang nye ba las sngon yang dbyibs kyi khyad par dang 'brel par 'gyur snyam pa'i bye brag pa'i rtsod pa'i lan ni grub pa'i mtha' smra bas de la yin na zhes bya ba smos te/gang gi phan tshun 'brel par rung ba ni rdza mkhan la sogs pa dang ltos pa de lta yin na 'o na 'jim pa'i rdzas kyi rung ba rdza mkhan las gyur ba 'thob pa yin no/ /'jim pa'i rdzas dang rung ba 'di gnyis so/ /rang bzhin tha dad pa du ma ma yin pa'o//gang gi tshe rung ba nyid ma yin pa de ni rdzas las logs shig tu byed par snga ma bzhin du thal bar 'gyur ro/ /yang na rung ba yin na yang rdzas kyi gzhan dbang yin pas logs shig tu grub par brjod pa ma yin te/ de'i tshe de yang dngos po'i chos nyid kho nas snga ma bzhin du 'brel par mi 'gyur ro snyam nas rdzas dang lhan cig 'brel par rung ba dang gzhan rdza mkhan las byung ba'i rung bar 'dod par bya'o//de yang logs shig byed par thal bar 'gyur bas rdzas la tha dad pa'i rang bzhin du khas blang bar mi bya ste/ logs shig byed pa'i thal ba yang 'gyur ba de nyid kyis lan gdab par bya'o//yang de nyid kyi lan yin na ni thug pa med par thal bas gdon mi za bar gyo mog gi bdag nyid dang 'jim pa'i rdzas kyi rung ba dag rang bzhin tha mi dad par khas blang bar bya'o/ /de lta yin na cir 'gyur zhe na/ grub pa'i mtha' smra bas re zhig ces bya ba la sogs pa smos te/'jim pa'i gong bu dang rdza mkhan dag gi gyo mog gi rdzas dang ldan pa'i khyad par gyi 'brel par rung ba skyed pa'i phyir gcig gi rang bzhin la yang gcig la rkyen du mas khyad par du bya ba'i bye brag nyid gang yin pa de grub bo/ / kho bo cag gi phyogs de las kyang kho bo cag 'jim pa dang dbyibs dag rang bzhin gcig pa nyid du sgrub pa la shin tu 'bad pas ci zhig bya/ gang gi tshe rung ba la brten na yang rkyen du mas skyed pa'i gcig pa yang du ma nyid du thal bar 'gyur ba 'grub ste/ 'bras bu ni rdzas dang yon tan dang ldan pa spangs pas 'dir dgos pa ci yang med kyi gzhan pa nyid de spong bar byed pa'i phyir zhes bya ba dgongs pa yin no//'bad par 'dzin pas kyang 'jim pa dang dbyibs dag phan tshun bdag nyid ma yin pa 'di gnyis dbyibs dang 'jim pa'i khyad par gyi ngo bo dag tu mi snang bar thal bar 'gyur ba'i phyir ro zhes bya ba 'thad pa 'dis sgrub pa nyid de/'dis gcig pa nyid rigs pa gzhan srid kyang de rjod par byed pa'i mtshan nyid la 'thad pa mi byed de rang bzhin gyis grub pa las gzhan du yang 'byung ba yin no zhes brjod do/ /de lta na de ni tshogs pa tha dad pa las tshogs pa gzhan skyed pas tha dad pa yin no//lhan cig byed pa rnams du ma las kyang 'bras bu gcig pa nyid la 'gal ba med de zhes bstan pa'i phyir mjug bsdu ba ni des na dngos su zhes bya ba la sogs pa smos te/ gang gis rkyen gzhan bsags pa de'i tshogs pa ma tshang ba las tshogs pa gzhan skyed do//de yang tshogs pa snga ma las skye bas tha dad pa'i 'bras bu gzhan nyid skyed pa dang / tshogs pa gcig par bstan pa yul la/ lhan cig byed pa du ma nyid kyang du ma gcig byed pa la 'gal ba med pa'i phyir rjes su 'gro ba dang ldog pa'i rjes su byed pa'i 'bras bu gcig mthong ba'i phyir rang bzhin gcig pa nyid sgrub par byed pa'i rgyu des na lhan cig byed pa ni lhan cig byed pa'i ngang tshul can tshogs pa gcig pa'i nang du 'dus pa'o//rkyen ni tshogs pa gzhan pa'i lhan cig la nye bar sbyor ba med de yul gcig la nye bar sbyor ba gang yin pa de ma yin no//tshogs pa gzhan pa nyid ni lhan cig pa tha dad pa'i yul la nye bar sbyor ba'i rigs pa'i stobs kyis rtogs so/ /gang sngar rnam par rtog pa 'dis gang gi tshe byed pa'i sgras ni tshogs par brjod pa de'i tshe tha dad pa yod pa de ni tshogs pa rnams las skye ba yin no//'bras bu tha dad pa yin no zhes bya bas ci zhig brjod ce na rgyu tha dad pas tha dad pa ni ma yin te/ 'di dag gi dpe bstan pa'i mjug bsdu ba'o/ /yang na rgyu'i sgras ni tshogs par bshad pa'i yul lhan cig byed par brjod do/ /de'i tshe tha dad pas du ma'i mtshan nyid las 'bras bu du ma'i mtshan nyid tha dad par mi 'dod pa kho na ste/du ma'i byed pa la 'gal ba med pas gcig pa du ma nyid las skye ba mthong ba'i phyir ro/ /'jim pa dang dbyibs dag bdag nyid gcig par bstan pa'i mjug bsdu ba ni 'jim pa dang dbyibs kyi bdag nyid kyi 'bras bu'i rang bzhin gcig pa nyid kyang du ma'i rang bzhin ma yin pa yang ngo //dngos su ni don dam par ro/ /rnam par rtog pa'i blo la 'jim pa dang dbyibs dag tha dad par snang ba'i phyir ro/ /de skad du tshogs pa tha dad pas 'bras bu tha dad pa ni du ma'i tshogs pa'i yul la rkyen tha dad pas du ma'i 'bras bu yin pa'i dpe bstan pa ni mig la sogs pa gang skyed pa'i gnas skabs so//ji ltar zhes bya ba smos pa ni dpe'o/ /rgyu tha dad pa ni tshogs pa tha dad pa'o/ /rdza mkhan ma tshang ba'i 'jim pa'i gong bu dang de lhan cig skud pa dbang du byas pa'i tshogs pa rnam pa gsum gyi mtshan nyid tha dad pa rnams rang bzhin du ma'i bye brag rnams ni so phag dang 'khor los gcod pa dang bum pa de'i rnam par dbye ba ni bum pa'i mtshan nyid la nye bar sbyor bas 'bras bu gcig ma yin no//'on kyang 'bras bu tha dad pa kho na ste/ de bzhin du rnam pa de nyid kyis mig la sogs pa las mig gi rnam par shes pa skye ste/tshogs pa gzhan pa'i tshogs pa'i mtshan nyid tha dad pa'i rgyu las 'bras bu du ma yin par rig par bya'o/ /de nyid rnam par dbye ba ni de bzhin du zhes bya ba la sogs pa smos te/ gang mig gi ngo bo spangs pa'i mtshungs pa de ma thag pa'i rkyen du bshad pa ni rnam par shes pa'i mtshan nyid de/rkyen gzhan la ltos pa dang bcas pa de las rnam par rtog pa'i rnam par shes pa'am/ cig shos de nye bar brten nas rtogs pa'i ngo bo dang nye bar dmigs pa dang bcas pa'i mig gi rnam par shes pa yang 'gyur ro/ /mig gi rnam par shes pa de nyid nye bar dmigs pa'i bdag nyid ci 'dra ba zhig ce na/de las byung ba'i skye ba de nyid 'bras bu gcig pa so sor nges pa ste mig gi dbang po dang nye ba la las ni mtshungs pa de ma thag pa'i nye bar len gyis byas pa de las gzugs 'dzin par so sor nges pa'i gzugs kyi rnam pa so sor nges pa'o/ / sgra la sogs pa'i rnam pas dben pa nyid kyi 'bras bu ste/ mig dang lhan cig pa'i mtshungs pa de ma thag pa'i rkyen gyis tshogs pa skyed par byed pa'i phyir yul la dbang byed pa'o/ /mtshungs pa de ma thag pa'i rkyen dang dbang po de dang yul ni 'dra ba'i ngo bo nyid de gzugs de 'ba' zhig pa snang ba ni 'khrul pa'i rnam par shes pa ni ma yin no zhes yul dang dbang po dang yid la byed pa tshogs pa'i mtshan nyid kyi 'bras bu kho nar bstan to//de dang gzhan pa'i 'bras bu gcig pa dang gnyis skye ba ni rang nyid kyis brtags pa ni 'di tha dad pa yang dngos po'i 'bras bu ste/ mig gi rnam par shes pa'i mtshan nyid kyi rgyu rnams yul dang dbang po dang yid la byed pa rnams kyi ngo bo 'ba' zhig de dag ngo bo de las tha dad pa nyid de/des bskyed pa'i bye brag rnams rtogs pa'i ngo bo la sogs pa'i mtshan nyid du 'gyur ro/ /de'i phyir skyed bar byed pa la ltos nas gcig gi bdag nyid kyang du mar bstan to//de ltar na gang gi phyir zhes bya ba ni de'i phyir te/ rgyu tha dad pa ma yin yang ji ltar tshogs pa gcig gi nang du 'dus pa'i rkyen kyang tha mi dad pa de bzhin du tshogs pa'i mtshan nyid tha dad kyang tha mi dad do/ /tshogs pa gzhan skyes pa rnams kyi 'bras bu'i khyad par ni 'bras bu khyad par can no zhes bya ba des gang brjod pa'o//gal te lhan cig byed pa rnams tha dad kyang 'bras bu tha mi dad par 'gyur ba ni tshogs pa tha dad kyang tha mi dad pa yod pa yin no/ /'on te tshogs pa tha dad pas tha dad par 'gyur te/ lhan cig byed pa tha dad kyang cis na tha mi dad par 'gyur ba yin/khyad par med pa'i phyir ro zhe na/ de ni bsal ba yin te de la phan tshun 'dus pa la brten nas rkyen gyi khyad par las 'bras bu gcig par bstan pa dang gcig la gcig gi rgyun la phan 'dogs pa ste/ lhan cig byed pa so sor nges pa'i nus pa rnams las skyes pa'i 'bras bu gcig mi skyed do//mtshungs pa de ma thag pa'i 'bras bu gzhan skyed par nus pa dang 'brel pa rnams ni gzhan pa las yin te/ rang bzhin tha dad pa dang ldan pa yod pas 'bras bu tha dad pa skyed pa'i phyir/ gang las khyad par med pa yin/ 'o na ni 'bras bu sgrub par byed pa'i gzhi ni ji ltar rten pa'i ngo bo de 'byung ba dag gis bskyed pa de ni gzhan pa nyid la brten pa yin no zhes khyed 'dod pa de bzhin du gzhan rnam par shes pa la sogs pa'i 'bras bu la yang yin na/de'i phyir 'dis kyang rgyu cung zad cig la brten pa dang / de'i rgyu snga ma ni skyed par byed pa nyid 'bras bu phyi ma'i rten nyid de skyed pa ma yin pa de'i phyir de ni ngo bo yis skyed pa yin no zhes bya ba de dag ma nges pa'i gnas skabs su 'gyur zhe na/rgyu'i nus pa tha dad pa de dag kho na zhes bya ba smos te/ bshad ma thag pa'i rgyu'i nus pa tha dad pa ni rgyu rnams kyi nus pa'i khyad par ro//ci 'dra ba'i bdag nyid ji lta ba de dag gi rgyu'i nus pa tha dad pa rnams lhan cig byed pa'i mtshan nyid gang gi bdag nyid kyi tshogs pas skyed pa'i phyir khyad par can gyi 'bras bu de skyed pa'o/ /bar du chod pa med pa ni bar du gcod pa'am gags byed par mi nus pa ste nus pa med pa gang gi dngos po de dag gi nus pa chod pa med pa'o//gdon mi za bar 'bras bu byed par nus par nye bar gnas so zhes bshad do/ /tshogs pa yod pa'i 'bras bu ni rkyen gcig las skye ba ni res 'ga' yang mi srid pas thams cad tshogs pa kho nas 'bras bu byed pa'i phyir tshogs pa 'bras bu'i ngo bo nyid gnas pa'i rten yin no zhes brjod do//ci'i phyir nus pa chod pa med pa yin zhe na/ skad cig ma yin pa'i phyir ro/ /skad cig ma'i nus pa la gags bya bar mi nus so/ /rang bzhin gzhan la brten pa bzhin du ji srid 'brel pas byed pa de srid du skad cig ma rang gi 'bras bu byas nas 'gag pa'i phyir ro//ji ltar dus mi mnyam pa'i rgyu rten du sbyor ba yin zhe na/ 'di ltar zhes bya ba la sogs pa smos te gang gi phyir rnam par shes pa'i mtshan nyid kyi 'bras bu de dag kyang mig la sogs pa'i ngo bo ma lus pa dag las rtogs pa pa la sogs pa gzhan las de ma yin pa'i khyad par can skyed do//rang gi ngo bo la cha shas su 'bras bu mi skyed pas re re las ma lus pa nyid 'byung bas gcig skyed pa de'i phyir rten du bshad do/ /skyed par byed pa las gzhan pa nyid phan 'dogs par byed pa yin gyi phan 'dogs par mi byed pa ni rten ma yin te ha cang thal bar 'gyur ro//de'i phyir dus tha dad pa rten pa'i dngos por 'gal ba med do/ /gang yang 'byung ba rnams rten pa'i ngo bo 'jug par brjod do/ /de yang rang gi yul 'di skyed par byed pa nyid yin no zhes snga ma'i 'byung ba skyed par byed pa ni phyi ma 'jog pa'i rgyu yin no//gang gi phyir ma nges pa yin gzhan yang de'i ngo bo skyed pa yin no zhes bya ba 'dir ma nges par brjod par gyur par gzhan dag dogs pa na gal te nus pa 'gog pa med pa zhes bya ba smos te/ 'gog pa med pa ni gags byed pa'i nus pa med pa'o//gang dag nus pa 'gog pa med pa de ni 'bras bu mjug thogs pa yin pa'i phyir gang skyes pa'i dus la mi sdod pa'i 'bras bu byed pa de dag kyang nus pa 'gogs pa ma yin gyi skyes pa'i mjug thogs su 'bras bu byed do/ /skad cig ma 'di zad pa la gnod pa byed pa med la phan 'dogs pa spong bar brjod pa ni khyad par du bogs dbyung du med pa dag ces bya ba smos te/de yang khyad par bogs dbyung du med pa'i skad cig ma rnams zhes bya ba 'dis skad cig ma bye brag tu byed par mi nus pa'i phyir ro zhes bshad do/ /khyad par du bogs 'byin pas lhan cig 'byung ba'i mjug thogs te skye ba'i phyir dang de'i tshe de 'gags pa'i phyir ro//de rnams la rnam pa de lta bu'i rkyen rnams phan tshun lhan cig byed pa'i don ci zhig yin gang gis lhan cig byed par brjod/ 'on te khyad par bogs dbyung du med pa nyid kyis lhan cig byed pa nyid med do zhes bstan pa'i don 'di ci zhig yin/nus pa 'gog pa med do zhes bya ba'i nus pa 'gog par byed pa'i lhan cig byed par brjod pa med do zhe na/ bden te/ thams cad du de la cung zad cig byed pa med par shes par bya ba'i don du 'di dag bshad do/ /nus pa la gegs byed pa med pas phan 'dogs pa nyid du btags pa'i lhan cig byed pa ni 'gags pa de'i phyir khyad par phul du byung ba mi srid pa'i phyir ro//skad cig ma rnams rang gi rgyu tsam dang 'brel pa nyid skyed par byed pa nyid de yang rnam pa de lta bu'i thams cad du yod pa 'ba' zhig skyed pa ma yin te de'i ngo bo skyed pa yin no zhes bya ba ma nges pa yin no snyam du sems na/'di dag yongs su spong pa ni bogs 'byin pa nye bar len pa'i lhan cig byed pa ma yin no/ /gang gi phyir de med pas lhan cig byed par mi 'gyur/ gang la bogs dbyung ba'i nye bar len pa ni lhan cig byed par yang mi 'gyur thams cad du la lar yang lhan cig 'byung ba phul du byung ba'i nye bar len pa'i mtshan nyid mi srid do//de lta na lhan cig byed pa ci zhig yin zhe na/ mang po dag don gcig byed ces bya ba la sogs pa smos te/ 'bras bu gcig sgrub pa'o/ / gang mang po dag la yang srid de rigs pa'i stobs kyis rnam pa de lta bu lhan cig byed pa thams cad la srid pa ni gzhan ma yin no/ /'di dpe ni dper na rgyu'i tshogs pa tha ma lta bu zhes bya ba ni de ma thag tu myu gu'i 'bras bu'o/ /rgyu'i tshogs pa ni rkyen gyi tshogs pa'o/ /'di dag ni nye bar btags par gyur na lhan cig byed pa 'di dag phul du byung ba bskyed pas dngos po yin no zhe na/'di nyid ces bya ba smos te/ 'bras bu gcig byed pa'i mtshan nyid ni gtso bo yin gyi lhan cig byed pa rnams ni phul du byung ba mi bskyed pa'i mtshan nyid de nyid ni phal pa yin pa'i phyir ro//'di dag gi lan ni phyis gdab par bya'o/ /'di ga las she na/ tha ma de nyid ces bya ba smos te/ brjod par 'dod pa'i 'bras bu'i rgyu yin pa'i phyir ro/ /rgyu ni lhan cig byed par bshad pa ni rgyu ma yin te/ gang gi phyir cig car lhan cig byed pa ni lhan cig byed par brjod de/mtha' ma'i rgyu'i tshogs pa'i rnam pa de lta bu yin pa'i phyir dper na tha ma'i don gcig pa'i lhan cig byed pa nyid yin pa de bzhin du snga ma'i tshogs pa las phyi ma phyi ma'i skad cig ma khyad par can tha dad par nges te tha ma nyid dper bstan pa'i phyir ro/ /de'i phyir myu gu la sogs pa'i 'bras bu thams cad kyi bye brag gi mtshan nyid du ma'i rkyen gyis bskyed pa'i phyir ro//thams cad du don gcig byed pa'i 'bras bu 'phel pa dang 'grib pa'i rgyu ni lhan cig byed pa'i rgyu'i tshogs pa nyid du khyad par du skyed pa yin no zhes bya'o/ / 'di dag don gcig byed pa yang de la lhan cig byed pa yod na khyad par du skyed pa mtshan nyid yin no zhe na/ skad cig ma de la zhes bya ba smos te/ tha ma'i bye brag tu byed par mi nus pa nyid na lhan cig byed pas kyang khyad par du byed pa ma yin no/ /gang las khyad par du byed par mi nus she na/gcig la zhes bya ba smos te/ ngo bo nyid gcig la cha shas dbyer med pa de la 'di khyad par du mi byed pa ni char mi byed pa'o/ /rang gi rgyu las skyes pa 'di lhan cig byed pas khyad par du byed pa'i phyir dbye ba yod pa ma yin no/ /gal te dbyer med pa la khyad par yod na ci'i phyir mi byed ce na/khyad par du 'byung ba'i mtshan nyid ni ngo bo nyid gzhan 'byung ba'i phyir ro zhes bya ba smos so/ /cha med pa ga la yin ngo bo nyid gzhan rnam par 'jog pa na bdag nyid las gzhan pa'i khyad par yod pa yin no zhe na/ ngo bo gzhan 'byung na zhes bya ba la sogs pa smos te/gang gi tshe dngos po gzhan pa'i mtshan nyid khyad par du 'gyur ba de'i tshe tha ma'i rgyu nyams pa yin te/ gal te nyes pa ci zhig yod ce na/ de'i phyir tha ma ma yin pa'i phyir mngon sum gyi rgyur mi 'gyur ro/ /de lta bas na gang gi phyir rgyu'i gtso bo ni lhan cig byed pa rnams ma yin no//dngos su khyad par du skyed pa'i phyir don gcig byed pa nyid lhan cig byed pa yin no/ /'o na ni lhan cig byed pa rnams khyad par du skyed pa mi bden na 'bras bu skyed pa'i nus pa de dag mi rigs so zhe na/ de dag ces bya ba la sogs pa smos te/ gal te de dag gi ngo bo nyid kyi nus pas skye ba de dang de dag lhan cig byed pa dag gi nus pa las skye bar khas blangs pa'i phyir ro//ji srid tha ma'i ngo bo nyid kyi nus pa ni rkyen dang lhan cig tu skad cig ma tsam thogs nas de dag skad cig ma gcig la skyed pa nges pa'i phyir ro/ /des na sngon dang phyi ma tha dad pa'i ngo bo med pa gang gi mjug thogs su 'bras bu 'byung zhing skyed kyi dus gzhan du ni ma yin no//de la ni de rnams la'o/ /rnam pa de lta bu rnams la bya ba gcig pa kho na'i lhan cig byed pa nyid yin gyi khyad par du skyed pa'i mtshan nyid ma yin te/ ngo bo nyid kyis nus pa'i dngos po dang phan tshun 'gal bas nus pa las skyed par khas len par rigs pa ma yin no snyam du gzhan dag sems nas/gal te nus pa de dag gang las zhes bya ba smos so/ /grub pa'i mtha' smra bas rang gi rgyu dag las zhes bya ba smos te/ gzhan gyi 'dod pa la ltos nas 'dir ngo bo nyid ces bya ba bshad do//gzhan dag skyed pa la rgyu dang lhan cig pa rnams kyi nus pa 'dod na ni de dgag pa'i phyir gzhan la ngo bo nyid ces brjod kyi ngo bo nyid cung zad cig skyed pa med de/ de'i rgyu gcig nyid du thal bar 'gyur ba'i phyir ro/ /don gcig byed par nges pa'i skad cig ma ni mi rigs te/mtha' ma'i skad cig ma 'ba' zhig dang 'dra ba mthong ba'i phyir ro/ /'di ltar 'di lta bu'i ngo bo dang / 'di lta bu'i ngo bo ma yin pa zhes mthong ba dang ma mthong ba dag las rnam par 'byed pa'i phyir ro/ /de zhing la sogs pa ci 'dra ba de la rkyen gzhan dang nye ba las nye bar dmigs pas de 'dra ba nyid 'ba' zhig dang yin no//de'i phyir de las gzhan pa dang lhan cig pa lta bu 'ba' zhig gi nus pa las kyang myu gu la sogs pa skyed pa ni rang rang gi skad cig ma'i mjug thogs su skye ba yin no/ /'ba' zhig kyang myu gu la sogs pa skyed pa'i phyir rang bzhin mi skyed pa yin na/de'i ngo bo las skyed pa yin no zhes bya ba ma nges pa yin no snyam du bsams nas gzhan gyis gal te de dag gis zhes bya ba smos te/ rang gi rgyu ni zhing dang sa bon la sogs pa las gzhan pa'i nus pa las gzhan pa'i rkyen gzhan nye ba kho nas skyed la ci'i phyir 'ba' zhig pas ma yin/lhan cig byed pa ni thams cad kyi tshe mi srid pa'i phyir ro snyam na/ res 'ga' zhig ni zhes bya ba smos te/ dus 'ga' zhig gi tshe'o/ /gzhan du yang ni 'ba' zhig pa las kyang 'byung bar 'gyur ro/ /'di ltar nang gi bdag nyid dang phyi rol du mthong ste la lar 'bras bu ci 'dra ba dang lhan cig pa gang de 'dra ba nyid de spangs pa'i 'ba' zhig pas kyang skyed par 'gyur ba'i nus pa la rkyen ci zhig yod ce na/des na 'ba' zhig kho na zhes bya ba smos te gcig kyang skyed par byed pa srid pas du ma nyi tshe ni ma yin no//'ga' zhig tu yul la sogs pa'i nus pas skyed pa ni zhing dang sa bon la sogs pa 'bras bu skyed pa'o/ /gang gi tshe de'i rang bzhin ni gdon mi za bar skyed pa na 'ba' zhig skyed pa ma yin no/ /de'i rang bzhin srid na yang de las gzhan dag ma nges pa yin no zhes zer ba'i lan ni 'di yin te gzhan dang gzhan la zhes bya ba la sogs pa smos te gzhan dang gzhan sbyar nas khur khyer pa'i skyes bu'i 'bad pas sgye la sogs par bcug na zhing du 'gro ba dang btsugs pa la sogs pa'i rkyen gyis sbyor ba gang yin pa de ni rgyu skad cig ma tha dad pa'i nus pa ni res 'ga' zhig kyang snga ma dang phyi ma'i dus su 'byung ba nus pa gcig pa ma yin no//gzhan dang gzhan rkyen ldan pa'i mtshan nyid rgyu tha dad pa yang nus pa tha dad pa ni rgyu med par thal bar 'gyur ro/ /gzhan yang 'bras la sogs pa'i sa bon gyi nus pa tha dad pa ni rgyu med par thal bar 'gyur ro//gzhan yang 'bras la sogs pa'i sa bon gyi nus pa tha dad pa'i rgyu tha dad pa dang 'brel pa'i phyir 'du byed pa dang nye bar tshogs pa'o/ /rkyen gyi byed pa rgyud ma las rgyu 'byung ngo / /gal te kha dog dang dbyibs sam gzhan pa mtshungs pa ni med de rnam pa cung zad cig 'dra bas rnam pa gcig tu shes pa skyed pa'i mtshan nyid mtshungs pa'i ngo bo de dag yin pa'i phyir 'dra ba dang mtshungs par rtogs pa ngo shes pa yin no//de ltar bcos ma dang ma bcos pa'i nor bu dang mu tig la sogs pa rkyen gzhan dang 'brel pa'i mtshan nyid tshogs pa tha dad pas tha dad pa nyid de/mi 'dra ba nyid la ngo bo shes pa'i dbang gis tha mi dad pa ni ma yin te/ sa bon la sogs pa 'di dag gi rang bzhin mtshungs pa'o/ /de ltar na gang gi phyir ngo bo tha dad pas nus pa tha dad pa gzhan dang gzhan pa'i tshogs pa skyed pa nyid kyis skad cig ma grub po//gang cung zad cig zhing dang sa bon la sogs myu gu la sogs pa 'bras bu 'ga' zhig des skyed par nus kyi/ thams cad kyis thams cad skyed pa ma yin no/ /zhing dang sa bon la sogs pa ma tshogs pa la myu gu skyed pa'i rang bzhin nam skad cig ma'i nus pa'i ngo bo med pas de'i rang bzhin skyed pa dang mi skyed pa'i ngo bo yin pa'i phyir 'dir ma nges pa ma yin no//gang gi phyir gang dang gang gi ngo bo yin pa de ni rang gi rgyus bskyed pa nyid de dang 'dra bar 'gyur gyi/ de ni rgyu'i ngo bo gzhan la ltos pa med na ni ma nges par 'byung bar 'gyur na ngo shes pa'i 'dra ba'i yul la tshogs pa tha dad pa'i ngo bos gnod pas tshad ma ma yin pa des na 'dra ba grub pa med do//skad cig ma zad pas snga ma de nyid de dag gi gnas skabs kyi dngos po tha dad par nges pa yin no zhes bya ba la sogs pas ngo shes pa med pa'i yul gcig pa med pas bsal to//de ltar ni mtshungs pa'i ngo bo dang yul tha dad pa'i sgo nas 'di dag kyang de la gzhan dang gzhan las skye ba yin no zhes bya ba 'di bshad zin pa de yul bstan pa'i don du 'dir nye bar bkod do/ /cung zad cig 'ga' zhig gi rgyu yin no zhes bshad zin to//de ci su zhig gi rgyu yin zhes bya ba'i nus pa gcod pa nang gi bdag nyid can rnams la re zhig bstan pa ni de la zhes bya ba la sogs pa smos te/ de la ni de rnams la'o/ /skad cig ma tha ma'i nus pa'i ngo bo'i skad cig ma'i dngos po rnams la bar du gcod pa can no/ /sogs pa smos pa ni gang bdag nyid shin tu ring ba'am nye ba la sogs pa'o//de'i yul chod pa med pa gang la de chod pa med pa'o/ /yul chod pa med pa la sogs pa gang yin pa de ni yul chod pa med pa ste/ gzugs dang dbang po la sogs pas ni yid la byed pa dang 'dra ba'i dbang po la sogs pa'o/ / de yang tshogs pa ni tshogs pa can gyi mtshan nyid bshad do/ /yul la sogs pa ma chod pa ni yul dang 'dir dbang po la sogs pa'i tshogs pa de rnam par shes pa skyed par nus pa'i rgyu yin gyi gzhan ni ma yin no/ /de yod pa nyid ni de yod kyi gzhan yod na yang med pas 'di dag tsam rgyu mtshan yin pas nus pa dang mi nus pa rnam par gzhag go//gang dbang po la sogs pa de dag phan tshun nye bar sdud pa'o/ /sogs pa smos pa ni bar du chod pa dang 'grib pa la sogs pa'o/ /rten dang rgyu dang rkyen gyi khyad par la dngos su byed pa'i rkyen las tha dad pa'i rnam par shes pa de skyed par nus pa'i rgyu ni de yod na yod pa nyid du mthong ba nyid do//nus pa de dag las byung ba yin zhe na/ rang gi zhes bya ba de ji skad bshad pa'o/ /de la 'di 'dra ba dang nus pa gang yin pa de gnyi ga yang de'i rgyur bshad do/ /gang bzlas nas bshad pa ni gzhan dag rkyen gzhan dang nye ba nyid las skye ba ni brgya la zhig gzhan du yang 'gyur ro zhes bya ba de'i lan gdab pa'i phyir dang de dag nus pa dang mi nus pa'i rgyu de rnam par gzhag pa ni sngon med pa ni dngos po yul ring ba'am shin tu ring ba'am bar du chod pa la sogs pa'i dus so//phan tshun rjes su 'gro ba la sogs pa'i rten dang rkyen nye ba na phyis med pa ni de'i gnas skabs dor ba dang bar du chod pa la sogs pa rtogs pa'o//so sor med pa ni dngos po re re'i dus su yod pa'am bdog pa'i rgyu med pa'i phyir ro/ /de'i phyir nus kyang ngo / /kyang gi sgras ni rgyu'i nus pa mang po yang sngon dang phyi ma dang so sor yod pa las byung ba ni snga ma dang phyi ma dang so sor yod pa'i gnas skabs kyi ngo bor gyur pa'i tshul gang dag la rkyen gzhan dang nye ba las ci'i phyir skye ba yin/sngon dang phyis dang so sor cis na mi skyed ces skyon brjod pa na sngon dang phyis dang so sor skyed pa'i mtshan nyid la des mi go ste 'byar ba ma yin no//res 'ga' gzhan du yang 'gyur ro zhes gang bshad pa de yang 'dis bsal ba yin no snyam nas des na zhes bya ba smos te/ gang gis gang dag gang gi gnas skabs su nges pa de ni gzhan du 'gyur ba med de skad cig ma yin pa'i phyir ro//gang 'byung ba de ni de nyid ma yin pa'am de dang 'dra ba gzhan dang 'dra bar gyur pa des na rgyus so/ /de dag ni dbang po la sogs pa'o/ /phan tshun nye bar 'gro ba ni gzhan dang gzhan rung ba'i yul du tshogs pa'o/ /bar du chod pa spang ba'i rgyu gang yin pa de ni rnam par shes pa skyed par nus pa'o//rgyu ni de'i lhan cig byed pa'i rkyen dbang po la sogs pa'i nus pa rnams rang gi skad cig ma skyed pa'i phyir ro/ /de ltar byed pa de'i nus pa'i rgyu ni phan tshun nye bar 'gro ba la sogs pa'i rten pa'i rkyen gyi bye brag gi lhan cig byed pa dbang po la sogs pa ni res 'ga' zhig gzhan du 'gyur ba med do//phan tshun nye bar 'gro ba la sogs pa'i rten rkyen gyi bye brag med kyang yod pa des ci zhig brjod pa yin na res 'ga' zhig gzhan du 'gyur ba yang yin pa'o/ /des na 'ga' zhig kyang la lar skyed pa yin no zhes bya ba la gzhan du 'gyur ba srid pas phan tshun nye bar 'gro ba la sogs pa'i rten pa'i rkyen gyi bye brag gis nye bar len pa dang lhan cig byed pa rnams nus pa'i rgyu yin te/dbang po la sogs pa nye bar len pa'i nus pa'i rgyus dbang po la sogs pa skyed pas de med na yod pa ni mi rigs so/ /lhan cig byed pa gang gis 'bras bu gcig byed par nges pa de dang de med na de skyed pa ma yin te de nyid tshogs pa gcig la rag las pa de mi srid pa'i phyir ro//rnam pa de lta bu'i rgyu dang 'bras bu'i dngos po so sor nges pa'i bdag nyid rnams la rtsod pa med pa ni gzhan la yang mthong bar bstan pa ni tshul 'dis zhes bya ba la sogs pa smos te/gang dag gzhan pa'i rgyu dang 'bras bu'i dngos po so sor nges pa tshul bshad pa gang yin pa de ni gzhan la yang thams cad du blta bar bya'o/ /thams cad la zhes bya ba brjod pas skad cig ma ma yin pa rnams la so sor nges par ma gyur cig snyam na/ skad cig ma re re la zhes bya ba la sogs pa smos te/gang la skad cig skad cig las gzhan dang gzhan gyi rang bzhin tha dad pa'i rjes su 'gro ba can gyi nus pa las 'byung ba de la 'dir don gcig byed pa so sor nges pa'i lhan cig byed par blta'o/ /gang dag dngos po brtan pa gcig pu'i ngo bo can dag ni ma yin pa'o gzhan gyis brtags pa'i phyir ro//de rnams la yang brtan pa ni rgyun la brten nas bshad pa'o/ /gcig pu smos pa ni skad cig ma gcig yod pa'i phyir brtan par 'dzin to/ /ci'i phyir dngos po brtan pa las yang gcig pu'i ngo bor mi 'dod do zhe na/ngo bo nyid ces bya ba la sogs pa smos te/ su dag dngos po rang nyid las mi 'byung na bdag nyid kho na'i ngo bo gzhan las 'byung ba ma yin no/ /de'i phyir bstan pa'i don ni gal te 'bras bu skyed par nus pa'i rang bzhin yin pa de bas na mi byed par mi 'thad de/thams cad du byed par 'gyur ro/ /gzhan du na nus pa med pa'i ngo bo yin pa de yang byed pa mi 'thad pas thams cad du dngos po byed pa ma yin no/ /gang yang res 'ga' zhig byed pa res 'ga' ma yin pa mi rigs te/ des na skad cig ma med pa dag de'i 'bras bu byed par nus pa'i ngo bo nyid la lhan cig pa dang lhan cig ma yin pa gnas skabs dag gcig gi ngo bo yin pa'i phyir 'ba' zhig pa dag kyang de'i 'bras bu byed par thal bar 'gyur bas don gcig byed pa'i so sor nges pa'i mtshan nyid ni lhan cig byed pa rnams las 'byung bar ga la 'gyur/gzhan gyis 'dir gzhan dang lhan cig byed pa zhes bya ba la sogs pa smos te gal te 'ba' zhig pa 'di skad cig ma med pa'i nus pa'i ngo bo yin pa de lta na yang gzhan dang lhan cig byed pa'i 'ba' zhig ni ma yin te/'di yang 'di'i ngo bo gzhan dang lhan cig byed pa gang rang gi 'bras bu byed pa'i nus pa'i ngo bo yod pa 'ba' zhig gis ni ma yin no zhe na/grub pa'i mtha' smra bas ci 'ba' zhig gis zhes bya ba la sogs pa smos te/ gzhan dang lhan cig pa nyid kyi rang gi 'bras bu byed kyi 'ba' zhig pas ma yin no zhes bya ba de 'ba' zhig pa'i ngo bos mi nus pas mi sbyor gyi gzhan gyis yin no snyam du bsams nas gzhan 'dri ba ni ma gtogs so zhes dgongs nas nus na ci'i phyir mi skyed ces bya ba smos te/skad cig ma med pa'i 'ba' zhig pa nus pa'i ngo bo kho na gzhan du yod na ni skad cig ma med pa nyams pa yin no/ /nus na ci'i phyir mi byed/ nus na mi byed pa ni lhan cig pa'i gnas skabs kyis sbyor ro zhes bya ba lhan cig pa kho na byed par 'dod kyi 'ba' zhig pa nus pa med pa'i ngo bo yin par khong du chud par bya'o//yang na 'ba' zhig pa gal te mgo bo gcod pa de lta na yang mi byed do zhes 'dod na mi byed na zhes bya ba la sogs pa smos te 'ba' zhig pa ni res 'ga' zhig kyang 'bras bu byed par nus pa med na/ ji ltar nus par brtag par bya/'dir gang nus pa'i ngo bos gdon mi za bar 'bras bu byed par nges pa ma yin te/ gzhan la yang mthong ngo snyam du sems nas gzhan gyis gal te thag pa la sogs pa zhes bya ba smos so/ /grub pa'i mtha' smra bas bzhad gad byed pa ni rtse ba'i ngang tshul can zhes bya ba smos te/ lha rnams dga' ba ni blon po drang po'o/ /de bde ba skyed pa'i phyir dga' ba'i rang bzhin can no/ /rtse ba ni byis pa'i chos so/ /de dang chos mthun pas ni shes rab nyams par bshad do/ /skyid de bar skyes pa ni bstan bcos la mi sbyor ba'o/ /mi sbyor ba'i blo ngan pa gang yin pa de ni byas kyang dngos po brjed pa'i ngang tshul can yang byed pa'o//byas pa ni rab tu brtsams pa'o/ /yang byed pa zhes bya ba ni slar yang rtsom pa'o/ /gang la slar yang rtsom par byed ce na/ 'di ltar zhes bya ba smos te/ sa bon bzhin du ma nges pa yin no zhes bya ba'i gnas skabs des 'di dag bsal ba yin no/ /'di nyid skad cig ma med pa'i nus pa'i ngo bo nyid la lhan cig byed pa nyid kyis 'bras bu gcig byed pa'i ngo bo 'gal bas 'ga' zhig byed par 'thad pa ma yin no zhes bstan pa'i mjug bsdu ba ni de lta bas na zhes bya ba smos te/'bras bu byed par nus pa'i ngo bo gzhan du 'gyur ba mi srid pa'i phyir res 'ga' zhig kyang mi nus pas na mi srid pas de'i chos kyi 'bras bu byed pa 'di lta bu ni tha ma'i gnas skabs bzhin du lhan cig byed pa'i gnas skabs dngos po'i 'bras bu byed pa bzlog tu mi rung ngo /gal te skad cig ma med pa'i 'ba' zhig ni nus pa med pa nyid de/ des na 'ba' zhig ni mi byed pa lhan cig pa'i gnas skabs 'di nyid kyi nus pa dang lhan cig byed pas skye'o//de'i phyir lhan cig byed pas byed do zhe na/ tha ma'i gnas skabs na zhes bya ba smos te/ nus pa las skye ba 'dra ba sngon nus pa med par yod pa'o/ /de'i nus pa gang yin pa de las skye ba de'i rang gi ngo bo nyid du spyod pa la sogs pa rnams 'dod pa de dag nus pa dang mi nus pa'i ngo bo tha dad par mngon par 'dod pa ni rnam pa 'gas tha dad kyang de'i ngo bo nyid du rtogs pa'i phyir ro zhes 'dod na de sngon med pa skye ba nyid yin no//'o na med pa'i dngos po de skyed pa gang yin pa de ni ngo bo'i nus pa yin no/ /ngo bo gcig pa'i nus pa nyid sngar med pas skyed par mi nus zhes pa mi rigs te/de dag ngo bo tha dad par thal bar 'gyur te chos 'gal ba gnas pas mtshan nyid tha dad pa'i phyir ro/ /gal te nus pa dang ldan pa skyed pa dang mi skyed pa ngo bo nyid gcig par rtogs pa kho na ji ltar spong bar nus pa yin no zhe na/ ma yin te/ tshad mas rtogs pa las gzhan du rtogs pa la khyed rjes su 'brang na zla ba gnyis pa la sogs pa yang spang bar mi bya'o//gal te gnod par byed pa'i tshad ma srid pas khyad du gsod pa yin no zhe na/ 'dir yang nges pa gcig gi ngo bo la skyed pa dang mi skyed pa phan tshud 'gal bas gnod par cis na mi 'dod/ rdo rje rdo ba'i chos can de'i ngo bos skyes pa yin no zhes rnam par 'byed pa nyid kyi snga ma dang phyi ma'i dus dag zad pa med na ji ltar tha dad par rtogs par 'gyur/rnam par shes pa la sogs pa'i 'bras bu mi skyed pa cig car skyed par thal bar 'gyur ro/ /gal te mig la sogs pa dang nye ba las sngon nus pa med pa las skye ba ni rim pa dang ldan pa yin no zhe na/gal te de ltar rnam pa gcig pa snga ma dang phyi ma dag gi dbang du byas pa ngo shes pa skye ba na snga ma'i nus pa tha dad pa'i rdo ba la sogs pa'i gzung bar bya ba la yang rjes su dpag pa'am don gyis go bas gnod pas nyams su myong ba tshad ma ma yin no zhes khas blang par bya'o//de ltar skyed pa dang mi skyed pa'i ngo bo gcig pa 'gal ba'i phyir nus pa kho nas sngar ma myong ba skyed do/ /'dra ba gzhan 'byung ba 'dzin par byed pa na tshu rol mthong ba gcig tu 'khrul pa dang sen mo la sogs pa bregs nas yang skye ba bzhin du cis na mi 'dod/ 'on te lhan cig byed pa'i rkyen dang nye ba'i mtshan nyid las nus pa de'i ngo bo yin pa'i phyir sngon med pa skye bar thal bar mi 'gyur ro zhe na/rigs pa can la sogs pa gzhan dag smos pa 'dir ma yin pas de'i ngo bo ma yin pa zhes bya ba smos te/ gzhan gang dag sa bon la sogs pa don gyi nus pa lta bu de'i ngo bo yongs su spangs nas phyi ma'i byed pa po nyid kyang ma yin no//gang las she na nus pa zhes bya ba bshad pa ni de gzhan pa'i lhan cig byed pa'i rkyen gyi mtshan nyid gang yin pa de nyid la khyad par gyi sgras brjod do zhes rigs pa can gyis khas blangs pa de nyid kyi phyir de yod na yod pa nyid kyis 'bras bu skyed do/ / de yang lhan cig byed pa'i rkyen rnams ni skad cig ma med pa gang yin pa de rnams la thal bar 'gyur ba 'di mi 'dogs pa'i phyir ro/ /skad cig ma nyid don gcig byed par nges pa'i mtshan nyid la lhan cig byed pa nyid 'dod par khas blangs so/ /gzhan yang skad cig ma med pa rnams la don gcig byed pa so sor nges pa bsal ba'i rgyu lhag pa ni gzhan yang zhes bya ba la sogs pa smos te/skad cig ma med pa dngos po gang yin pa 'di lhan cig byed pa mtha' dag dang ldan pa rang gi 'bras bu byed par 'dod pa yin na/ re zhig de dang de nyid ci'i phyir mi byed/ rgyu gang gis de'i 'bras bu byed pa ngo bo nyid kyis de'i tshe byed pa yin no//de nyid bstan pa'i rang bzhin yin pa'i phyir sngon yang byed par 'gyur ba des na don gcig byed par so sor nges pa'i dngos por ga la 'gyur/ ji lta ba de mthong ba la rigs pa gzhan btsal bas ci zhig bya/ de ltar na thams cad la 'di mi rigs so snyam du gzhon nu ma len sems nas skyed pa mthong ste zhes bya ba la sogs pa smos te/gang gi phyir de nyid don gcig byed pa mthong ba des na mthong ba'i stobs kyis byed pa yin no zhes kho bos smra'o/ /sngar byed pa ma mthong ba des na mi byed do zhes bya ba 'di mthong ba'i rigs pa'i 'thad pas ci zhig bya snyam na/skad cig ma med par khas len pa la don gcig byed par ma grub pa'i phyir ro/ /rang gi mthong bas 'bras bu byed pa de'i phyir 'di bshad par rigs pa ma yin no zhes bzhad gad byed pa ni mthu chen po can zhes bya ba la sogs pa smos te/ mthu chen po can gyi mthong ba ni nus pa chen por gyur pa'o//gang gi phyir khyed kyi rgyu dang 'bras bu'i dngos po 'di dag ma tshang bar mi 'gyur te/ gal te rgyu dang 'bras bu'i ngo bo yin pa'i phyir dngos po'i 'bras bu byed pa de nyid kyi lan cis na mi brjod/ gang gis 'bras bu byed pa mthong ba lan du byed pa yin no snyam na/ rang gi ngo bo tsam gyis byed pa ni bdag nyid yod pa tsam gyis rnam pa sna tshogs pa rnams la sbyor bar byed pa de ji ltar nus pa chen po tsam ma yin/ 'dir 'ga' zhig gis kyang nus pa ma yin 'on kyang brgya la 'ga' zhig ci zhig ltar bsgribs pa'am mi sdod pa'o// /'dir khyod kyi zhes bya ba ni zhes brjod pa'o//mthong ba las 'das pa ni de las rgal ba'o/ /de dang gzhan du brjod pa 'di dag skyed pa'i chos de dang 'di ni mi skyed pa'i chos yin pa de'i phyir rgyud med par 'gyur bas 'di kho bo cag gi bsam pa ni sems la gdung bar byed do/ /gzhan gyis kho bo ni de'i zhes bya ba la sogs pa smos te/kho bo rgyu dang 'bras bu'i ngo bo spangs nas/ dngos po rnams kho bo cag gis mthong ba'i dbang gis 'bras bu byed par ni mi smra ste/ 'on kyang ngo bo nyid kyis de yod pa de la 'bras bu byed pa ngo bo yin pa de'i phyir rang gi 'bras bu byed pa de mthong ba 'ba' zhig mi skyed do// /de dag byed pa po'i rang bzhin du mthong ba ni ji ltar gnas pa'i dngos po shes par byed kyi med pa'i rang gi ngo bo byed pa ni ma yin no zhe na/ grub pa'i mtha' smra bas 'di yang yod pa bden pa zhes bya ba smos te/ kho bo cag rigs pa la rjes su chags pa rigs par brjod pa la cis na btang snyoms su byed pa 'dir yang khyed kyis thams cad kyi tshe rigs pa brjod pa spangs pa yang ras 'ga' zhig rigs pa dang ldan par smra ba la dga' ba skye ste/'o na de ci yin zhes dris pa na/ de dag 'bras bu skyed pa zhes bya ba smos te/ 'bras bu skyed pa'i chos ni dngos po'i 'bras bu byed pa'i chos so/ /rgyu des na rkyen mtha' dag dang ldan pa rnams ni lhan cig byed pa'i tshogs pa'o/ /gang dag 'bras bu mi skyed par btang snyoms su gyin 'dug pa ma yin par rtogs pa'i phyir khyed kyis rigs pa brjod pa 'di yang yod par bden no//'on kyang 'di dag 'di ltar blta bar bya ste/ ci de dag mi sdod par skyed pa'i chos kyi ngo bo nyid do/ /ci de dag tha ma'i gnas skabs de kho na'i tshe ni tshogs pa'i gnas skabs su gang de ma thag tu 'bras bu skyed pa de kho na skyes pa yin nam/ yang na sngon yang phan tshun spangs pa'i gnas skabs su byung zin pa yang yin/de la de nyid skyes pa nyid yin na med pa'i ngo bo gzhan skyes pas 'di byed pa po nyid yin na ni sngar bshad pa'i skyon gyis 'jigs pas/ gzhan gyis yod pa gang zhig yin/ /zhes bya ba smos so/ /'pho ba dang skyes pa ni 'pho ba dang skyes pa ste de bkag pa ni mi 'pho ba dang ma skyes pa'i brtan pa gcig pu'i ngo bo gang dag gi dngos po de dag nam yang ngo bo nyid 'ga' zhig 'dir dmigs pa med pa 'gal ba'i phyir ro//skad cig ma rnams la ji srid du mthong ba'i ngo bo las gzhan du 'gyur ba de srid du de gzhan yin pa'i phyir mi 'pho ba dang /mi skye ba snga ma dang phyi ma'i ngo bo rnams brtan pa'i ngo bo ma yin no zhe na/ 'dir da ni zhes bya ba la sogs pa smos so/ /'di'i tshig 'di kho bo cag 'dra ba'i tshig yin no zhes mi 'dod na de'i phyir mi sdod par zhes bya ba smos te/ gang gi tshe 'di dag 'dis mtshungs par mi 'gyur ba de'i tshe lhan cig byed pa mtha' dag gi 'bras bu'i gnas skabs las sngar yang mi sdod par skyed pa'i ngo bo ni 'bras bu byed pa'i ngo bo mi thogs pa'o//'bras bu mi skyed pa yang yin no zhes smras pa'i don ci zhig yin/ reg pa can gyi bsams pa dngos po rnams kyi lhan cig byed pa'i nye ba dang mi nye ba la ltos pa'i byed pa po ma yin pa'i rang bzhin gyi rnam par gzhag pa dang /ngo bo nyid des mi 'pho ba dang / mi skye ba brtan pa gcig pu'i ngo bo nyid ma yin la/ sngar yang rang gi 'bras bu skyed pa'i ngo bo ma yin no/ /'on kyang lhan cig byed pa'i rkyen mtha' dag nye ba yin no zhes de'i 'dod pa'i dogs pa bsu ba ni/gal te de'i ngo bo nyid ni zhes bya ba la sogs pa smos so/ /de dag bsal ba ni 'o na ni 'ba' zhig kyang gzhan la zhes bya ba la sogs pa smos te/ brgya la lhan cig byed pas rang gi 'bras bu skyed pa'i ngo bo 'ba' zhig dang de las bzlog pa'i ngo bo gzhan ma yin par ci'i phyir mi 'gyur zhe na/dngos po thams cad tha dad pa/ /zhes bya ba smos te/ dngos po tha dad pa ni dngos po'i mtshan nyid tha dad pa'o/ /gal te de'i 'bras bu skyed par byed pa dang skyed par mi byed pas tha dad pa yin te/ 'bras dang nas kyi sa bon bzhin du ji ltar dngos po tha dad par mi 'gyur te/ngo bo las gzhan pa'i dngos pos ni ma yin te gang gi phyir de tha dad kyang tha mi dad na rang bzhin med par thal bar 'gyur ba'i phyir ro/ /'o na ni bdag nyid skyed par byed pa dang skyed par mi byed pa'i ngo bo spangs pa'i phyir rkyen gzhan pa'i ngo bo la ltos pa'i phyir skyed par byed pa dang /skyed par mi byed pa'i ngo bos de tha dad kyang gang las dngos po tha dad par thal bar 'gyur ro/ /de gzhan la ltos pa'i ngo bo nyid tha dad pa'i mtshan nyid yin pa'i phyir ro/ /lhan cig byed pa nyid yin yang / /zhes bya ba la sogs pa smos te/ gal te dngos po gang yin pa 'di la lhan cig byed pa gzhan mngon par 'dod na nam zhig khyed kyi lan 'di mi slu bar 'gyur/ de'i rang gi ngo bos nye ba yin pas ma nges par 'gyur ro/ /rang gi ngo bos ma yin na 'di dag yod pa ma yin te/ de ltar na dngos po ni don dam par na de nyid gzhan gyi byed pa por 'gyur gyi de la byed pa po nyid du bshad pa ni rtogs pas sprul pa nyid ma yin no//rtogs pa'i rjes su byed pa ni don byed pa gzhan med de bram ze'i bu la sreg pa nye bar btags pa sreg pa rag las pa ni ma yin no/ /de'i phyir phan mi 'dogs pa'i dngos po la 'bras bu ltos par mi 'gyur te/de spangs pa nyid lhan cig byed pa rnams las 'byung ba'am/ gang de rnams las kyang mi 'byung bas so/ /de dag kyang gzhan gyi ngo bos byed pa yin gyi rang nyid byed pa ma yin pa'i phyir ro/ /des na thams cad du rang kho na byed pa po nyid ma yin la gzhan gyi ngo bos kyang byed pa po ma yin pa'i phyir thams cad du byed pa po med pas cung zad cig kyang 'ga' yang skyed pa med do//de'i gang gi ngo bo kho nas dngos po'i 'bras bu byed kyi gzhan gyi ngo bos ni ma yin pas lan gyi go skabs med do/ /des na gzhan dang lhan cig dang gzhan 'ba' zhig pa zhes bya ba de mi g.yo ba nyid do//yang rang gi ngo bo gang gis skyed par byed pa 'di lhan cig pa dang lhan cig pa ma yin pa'i gnas skabs dag thams cad du yod pa de'i tshe rang gi 'bras bu skyed par byed pa yang brtan pa'i ngo bo sngon yang lhan cig ma yin pa'i gnas skabs de kho na gang lhan cig pa'i gnas skabs kyi dus la mi sdod par skyed pa'i rang bzhin du 'gyur bar zad do//de'i phyir ji ltar res 'ga' zhig mi skyed par bral ba yin/ yang res 'ga' gzhan gyis smras pa rang gi rgyu 'di rkyen gzhan la ltos nas rang gi 'bras bu skyed pa na ngo bo nyid kyis skye'o zhes bya ba 'ga' zhig gis byed pa ni ma yin no/ / lhan cig byed pa dang lhan cig byed pa ma yin pa'i gnas skabs 'di ngo bo tha dad pa rkyen gzhan la ltos nas rang gi 'bras bu skyed pa'i rang bzhin ni thams cad du med pa de'i phyir lhan cig pa nyid de yin na yang zhes bya ba la sogs pa smos te/ rang gi ngo bo nyid kyis byed pa yin pa'i phyir dang de sngon yang yod pa'i phyir ro//rkyen gzhan la ltos pa de las thob pas de'i bdag nyid phul du byung ba mi skyed pa phan 'dogs pa'i mtshan nyid 'di mi rigs pa'i phyir ro/ /de lta ma yin na ha cang thal bar 'gyur bas 'ba' zhig 'bras bu byed pa sel bar mi 'gyur ro/ /ji ltar lhan cig byed pa dang lhan cig byed pa ma yin pa'i gnas skabs kyi dngos po tha dad par mi 'gyur ba'i phyir rkyen gzhan la ltos pa'i rang gi 'bras bu byed pa'i rang gi ngo bo la yang gzhan gyi ngo bos byed pa po yin te/rkyen gzhan dang nye bar rtogs pa'i dus su byed pa po nyid yin gyi sngon ma yin no zhes bya ba 'di'i don to//des kyang 'di res 'ga' zhig 'bras bu byed pa'i ngo bo ni thams cad du ma yin no zhes brjod na/ ji ltar thams cad du rang gi 'bras bu skyed pa'i rang bzhin du 'di bshad par 'gyur/ 'o na ni de ltar ngo bo tha dad pa nyid du de dang de ma yin pa'i dus su sgrub par 'gyur ro/ / de'i phyir skad cig ma rnams don gcig byed par nges pa'i mtshan nyid lhan cig byed pa nyid yin no zhes par nges so/ /gzhan gyis gzhan dag skyon mtshungs par brjod par 'dod pa ni gang gi zhes bya ba la sogs pa smos pa ni go bla'o/ /gal te skad cig ma rnams de ltar yang ji ltar mi 'gyur zhe na/ ji lta bu'i skyed pa ni bshad zin to zhes bya ba smos te/ lhan cig byed pa rnams kyis tha mi dad par skyed par byed pas mtha' ma'i rkyen gyi ngo bos nus pa nyid do/ /lhan cig skyed kyang skad cig ma gang dag sngon dang phyis dang so sor nus pa med do zhes bya ba 'dir de ji ltar skad cig ma la rung ba yin/ gang la mtha'i skad cig ma skyed pa'i ngang tshul can gzhan du 'gyur/ mtha' ma'i skad cig ma las sngon dang phyi ma dang tha dad pa'i ngo bo gzhan du 'gyur te/ tha ma'i skad cig mar gyur pa de nyid lhan cig byed pa'i rgyun gyis phan 'dogs pa'i ngo bo la ltos nas skyed pa'i chos ni ma yin pa'i phyir skad cig ma med pa'i phyogs la bshad pa'i skyon 'dir mi 'gyur ro//skad cig ma ma yin pa'i phyogs la gang gis she na/ byed pa po dang byed pa po ma yin pa zhes bya ba la sogs pa smos te/ byed pa po ni tha ma'o/ /byed pa po ma yin pa ni de las gzhan pa de dag gi ngo bo'o//tha dad pa de yang tha mi dad par brjod par 'dod pa na gcig pa nyid du brjod la/ de ltar na byed pa po ni gang mtha' rgyu las skyes pa dang byed pa po ma yin pa rgyu gang yin pa de ni gzhan pa ste de yang tha mi dad par brjod par 'dod pa ni gcig pa nyid du bshad pa des na byed pa po dang byed pa po ma yin pa de dag gi ngo bo de dag chos can gcig la 'gal ba'i phyir ro//de lta na de dag gi ngo bo la skyed par byed pa rgyu ni byed pa po gcig gi ngo bo dang skyed par byed pa las gzhan byed pa po ma yin pa'i ngo bo skyed par byed pa de dag kyang chos can gcig pa 'gal bas gzhan pa nyid de/ byed pa po'i rang bzhin skyed par byed pa'i rgyu las skyes pa'ang byed pa po ma yin te ngo bo gzhan ma yin pa'i phyir gang zhig 'gyur ba de ni de nyid ma yin no zhes thal ba 'dir mi 'gyur ro//gzhan yang de lta ma yin pa brtan pa'i ngo bo rnams la don gcig byed par nges par brtags pa'am dngos po nye bar dgod pa ni gang zhig de'i ngo bo zhes bya ba la sogs pa'o//dngos po ltos nas skyed pa'i chos kyi ngo bo ni thams cad kyi tshe su yang mi brjod kyi lhan cig byed pa nye ba la ltos nas dngos po rnams byed pa por rnam par 'jog na bdag nyid kyis ma yin pa'i phyir rang nyid byed pa po ma yin na gzhan gyi ngo bos byed pa po mi rigs pas byed pa po rgyun chad par thal bar 'gyur ro//rnam pa de lta bu de ni rang gi ngo bos res 'ga' zhig lhan cig byed pa'i 'bras bu la mi ltos so/ /gang gzhan lhan cig pa dang gzhan 'ba' zhig pa ni byed pa po ma yin pa tha dad par 'gyur ro/ /gal te de lta na de thams cad du de'i ngo bo 'bras bu byed pa cis na ma yin zhe na/'bras bu rkyen gzhan la ltos pa'i ngo bo des de la skyed par byed pa nyid du gnas su zin kyang 'ba' zhig pa las mi 'byung ba de 'dir 'bras bu kho na'i skyon yin te/ gang de la 'ba' zhig skyed par byed par gnas su zin kyang rkyen gzhan la ltos pa'i phyir ro/ /de'i phyir de'i 'bras bu'i bdag nyid lhan cig byed pa rnams kho na las skye bas don gcig byed pa'i mtshan nyid lhan cig byed pa nyid skad cig ma ma yin pa la yang 'thad pa'i phyir ro zhe na/grub pa'i mtha' smra bas snga ma'i skyon las ma 'das par bstan pa ni de lta na yang zhes pa smos te/ rgol bas ji ltar de rtag par mngon par 'dod pa'i dngos po 'ba' zhig gis skyed pa ni mi thogs par skyed pa'i chos kyi ngo bo nyid yod do zhes brjod pas lhan cig pa nyid las 'gyur te/tshogs kyi ngo bos skyed pa yin no zhes brjod pa de'i phyir 'ba' zhig pa las ma yin te de'i gnas skabs 'gal ba yin par sngar bshad do//'di ltar gang la mi thogs par skyed pa'i chos de ni gdon mi za bar 'dis 'bras bu byed pa yin no/ /gdon mi za bar byed pa'i rang bzhin ma yin pa ji ltar thogs pa med pa'i ngo bo yin/ mi thogs pa las 'bras bu mthong bas thogs pa med par skyed pa'i ngo bor khong du chud par bya'i gzhan du ni ma yin no snyam pa'i gzhan gyis bsams pa'i dogs pa bsu ba ni gal te 'ba' zhig ces bya ba la sogs pa smos te/kho bo ni 'ba' zhig byed do zhes mi smra ste 'on kyang mi sdod par skyed pa'i ngo bo yin no zhe na/ 'dir da ni ji ltar zhes bya ba la sogs pa smos te/ gal te byed pa nyid kyang mi 'dod na ji ltar mi sdod par skyed pa'i ngo bo yin par brjod/'on te de ltar yin no zhes smra na/ de'i tshe 'di skad du brjod pa 'dis yongs su bstan par byas pa ma yin nam ci zhig de skyed pa yin snyam na/ de nyid mi sdod par skyed pa'i ngo bo'o/ /gang dang gang skyed pa yin pa de gdon mi za bar skyed pa'i ngo bor de ji ltar 'gyur/gang 'bras bu 'di nyid gzhan la rag las pas skyed par byed par gnas pa de yang rkyen gzhan la rag las pa yin no zhes bya ba de ni rigs kyi/ gang gi phyir 'bras bu yang skad cig ma med pa'i dngos po 'ba' zhig pas nus pa yod kyang rkyen gzhan la ltos nas ji ltar btang snyoms su 'dug /mi ltos pa ma yin na yang ci zhig byed/ gzhan la zhes bya ba smos te/ rkyen gzhan la mi 'chol bar ni ma spangs par bya'o/ /de'i 'bras bu'i stobs kyis skyed par 'gyur ro/ /gal te de ltar yin na yon tan ci zhig yod ce na/ de lta na zhes bya ba smos te/ gzhan la mi 'chol bar stobs kyis rang gi 'bras bu skyed pa 'dis 'ba' zhig pa la yang nus pa yod pa gang yin pa de ni bdag nyid 'ba' zhig gis kyang de nus par bstan pa yin no/ /de lta ma yin na lhan cig byed pa kho na byed pas 'ba' zhig pas kyang res 'ga' zhig kyang mi byed pas 'ba' zhig pa 'dis nus pa ma yin no zhes gzhan dag gi blor 'gyur na de las 'di spangs nas skye ba lta bu'i ji ltar rjes su 'brang /de'i phyir 'bras bu rkyen gzhan la ltos pa yin no zhes bya ba ni mi rigs par brjod do/ /'bras bu gzhan la ltos pa 'gal ba de'i gnas skabs bstan pa ni 'bras bu gzhan la ltos nas zhes bya ba la sogs pa smos te/'bras bu gzhan la ltos par brjod pa 'ba' zhig pa'i rgyus mi skyed do zhes gdon mi za bar smras pa yin no/ /'ba' zhig pa des kyang nus pa'i phyir 'ba' zhig pa de las khyed 'bras bu skyed pa yin la/'dis kyang gcig kho na'i 'bras bu yin pa de'i phyir gcig la skyed pa dang mi skyed pa phan tshun 'gal bas ji ltar 'bras bu gcig par bshad/ chos can de la chos 'gal ba gnas pa ni mtshan nyid tha dad pa yin pa'i phyir gcig par brjod pa na ma yang yin la mo gsham yang yin no zhes brjod pa 'di dang 'dra bar 'gyur ba'i sngar bshad pa'i skyon de las mi 'grol lo//gang gi phyir 'di ltar brjod pa na 'gal bar brjod pas mi rtogs pa de lta bas na skad cig ma med par brjod pas skad cig ma'i phyogs la gnod pa med pas de'i rtsod pa rnams rdzogs par bstan to//mi bzod pa'i mtshan nyid ni phrag dog go/ /zug rngu ni sdug bsngal gyi rgyu yin pa'i phyir ro/ /des na gnad du bsnun pa nad kyis zug pa'o/ /phrag dog gi zug rngus gnad du bsnun pas mchog tu yid mi bde ba can 'di 'gal bar brjod pas mi rtogs pa ni 'chal ba ste/ snga ma dang phyi ma mi 'brel pas 'chol pa'o//'khang bas 'gal bar byed pa'i phyir sems ni bde zhing bskyed par 'dod pa mi gus pas de'i skyon brjod pa na myur du sdug bsngal bskyed pas rma lab tsha btab pa dang mtshungs pa'i phyir/ mkhas pa blo dang ldan pas btang snyoms su bya bar 'os so/ /de nyid skad cig ma med pa rnams la rnam pa 'ga' zhig don byed pas nges pa'i mtshan nyid kyi lhan cig byed pa nyid srid pa ma yin no zhes bstan pa'i mjug bsdu ba ni de lta bas na zhes bya ba la sogs pa smos te/gang dag brtan pa'i ngo bo so sor yod pa srid pa de dag skad cig med pa rnams so sor 'ba' zhig pas 'bras bu skyed pa srid pas lhan cig mi byed pa'i phyir lhan cig byed pas nges pa mi rigs so//don gcig byed pa'i mtshan nyid kyi lhan cig byed pa nyid 'di skad cig ma rnams kho na la de dag rang gi rgyu yongs su gyur pa dang nye ba'i chos phan tshun nye bar len pa dang lhan cig byed pa'i rkyen tshogs pa gcig pas skyed pa tha dad pa srid pa'i phyir ro//'o na ni phul du byung ba bskyed pa'i mtshan nyid kyang lhan cig byed pa nyid las 'byung bar mthong ba'i phyir de ji ltar thams cad phul du byung ba skyed pa'i lhan cig byed pa ma yin no zhes sngar bshad pa yin/ de lta na mang po rnams don gcig byed pa ji ltar yin zhe na/des na/ gang du rgyun du phan 'dogs pas/ /zhes bya ba la sogs pa smos te/ don gcig byed pa'i mtshan nyid kyi lhan cig byed pa nyid thams cad du phul du byung ba skyed pa ni mi srid de gang la rkyen gyis phan 'dogs pa snga ma snga ma'i rkyen rnams las skad cig ma phyi ma phyi ma'i khyad par can dang khyad par can du skyed pa yod de lhan cig byed par brjod par 'dod pa 'bras bu'i rgyu yin par bstan te/dper na 'bras thug po che la sogs pa las 'bras chan la sogs pa dang / me dang chu dang sa bon la sogs pa las myu gu la sogs pa skyed pa'i sa la sogs pa de la khyad par du skyed pa'i rkyen rnams lhan cig byed par 'jig rten pa brjod pa ni rgyun la brten nas snga ma snga ma'i skad cig ma rnams las gnyis pa la sogs pa'i khyad par gyi mtshan nyid dang rgyun gyi 'bras bu mtshan nyid du bshad pa la brten nas snga ma dang phyi ma'i skad cig ma dag gcig tu mngon par zhen nas de nyid 'di yin zhes khyad par du 'byung ngo zhes bya ba'i rdzas la brten nas ma yin te dngos po la brten pa btags pa yin pa des na don dam pa ma yin no//snga ma dang snga ma'i rang gi rgyu yongs su gyur pa dang nye ba'i chos rnams las phyi ma phyi ma khyad par can du skyed de rgyu'i tshogs pa snga ma'i don gcig byed pa'i mtshan nyid ni don dam par na lhan cig byed pa nyid kyis yin no zhes bya ba de la cung zad cig kyang nyams pa med do//ci'i phyir rdzas la brten nas khyad par du 'byung ba skyed par mi 'dod ce na/ skad cig ma'i rdzas la khyad par las byung ba skyed pa med pa'i phyir zhes bya ba ni de ni de ma thag pa'i dngos po skad cig ma'i ngo bo yin pa'i phyir ro//gal te de lta na 'bras thug po che la sogs pa'i rdzas skad cig ma la khyad par du mi skyo'o/ /de ma thag pa las kyang 'dir mi 'gyur ba de'i phyir ji lta ba'i phan tshun khyad par can du sgrub pa yang skad cig ma dang lhan cig pa kho nas byed kyi skad cig ma ma yin pa 'ba' zhig pa las ni ma yin no//des na de dag don gcig byed pa'i mtshan nyid ni lhan cig byed pa las 'byung ngo / /gang dang gang sngar byed pa po ma yin pa de ni phyis kyang ma yin no zhes brjod par mi nus so/ /de lta ni snang ba las mun khung du zhugs pa'i dbang pos don rtogs par mi byed pa yang phyis nas byed pa mthong ngo //de skad du/ khyim la sogs pa'i nang rnams su/ /snang ba la ni zhugs tsam gyis/ /dbang pos bzung yang ma yin na/ /don snang ba ni med par 'gyur/ /zhes bshad do zhe na/ de'i phyir 'bras thug po che la sogs pa zhes bya ba la sogs pa smos te/ nye ba dang mi nye ba yang mtshungs pa'i phyir khyad par du mi skyed de/me la sogs pa yod kyang thug po che la sogs pa las 'bras chan la sogs pa mi bskyed pa'am/ de bzhin du snang ba nas mun khung du zhugs pa'i dbang po la rang gis phan 'dogs pa las rim gyis khyad par du byung bar ma bstan na de'i tshe snga ma bzhin du phyi nas kyang don rtog pa bskyed par mi 'gyur ro//de'i phyir 'bras bu srid pa gang la mthong ba gang yin pa de ni de'am gzhan pa 'bras kyis bon la sogs pa gso ma'i sa bon la sogs pa dang khyad par du 'byung ba med pa las gzhan pa nyid khyad par du 'byung bas de'i 'bras bu byed pa ma yin no//re zhig de ltar na gang la lhan cig byed pa las 'bras bur 'gyur ba de la phul du 'gyur bar bskyed pa'i mtshan nyid du rtag pa dang lhan cig byed pas don gcig byed pa'i mtshan nyid la yang yongs su bstan to/ /gang la nye ba tsam gyis mi thogs par lhan cig byed pas 'bras bu byed pa yin no//'on te de yang rgyun la bstan nas phul du byung ba'i mtshan nyid yod pa yin no zhe na/ gang gi phyir thogs pa med par skyed pa zhes bya ba la sogs pa smos te/ gang bar du chod pa med pa la sogs pa'i yul la dbang po la sogs pa rang gi rgyu las skye ba de rnams la dus mi ring bar byed pa khyad par du skyed pa med de phan tshun 'byung ba ma yin te/skad cig ma yin pa'i phyir zhes sngar bshad zin to/ /gal te khyad par du mi skyed pa de'i tshe ji ltar khyad par med pa'i shes pa rgyu las 'byung ba yin zhe na/ gang gi phyir de la zhes bya ba smos te/ bdag nyid ji lta ba'i gang dang gang gi bdag nyid kyi rkyen yod pa phan tshun nye bar 'gro ba bar du mchod pa'i yul la sogs pa'i rten du gyur pa gang skyed par rung ba 'di shin tu nye ba dang shin tu bskal pa spangs pa'i yul la sogs pa gang yin pa de ni bar du ma chod pa'i yul la sogs pa de la gnas pa can gang yin pa'o//de dag lhan cig pa'i ngo bor grub pa dang ngo bo ma yin pa las grub pa tha dad do zhes shes pa'i rgyu byed pa nyid du de rtogs na/ de la cis na phan tshun khyad par du skyed pa don du nye bar 'gyur/ gal te rang gi rgyu rnams kho na phan tshun nye bar 'gro ba la sogs pa la rten pa rnams rang gi 'bras bu skye bar rung ba'i yul la sogs pa na gnas pa'i mtshan nyid ni khyad par du sbyor zhing skyed par mi 'gyur na phan tshun khyad par skyed pa de dang 'di dag don du gnyer bar byed na/rang gi rgyu kho na las rnam pa de lta bu skyed pa ni ma yin no/ /gang gi phyir de lta bas na zhes bya ba ni de'i phyir te/dbang po la sogs pa thogs pa med par gnas pa don gcig byed pa kho na gtso bo yin la lhan cig byed pa nyid rgyun la brten nas rnam par gzhag pa ni ma yin te khyad par du 'byung ba skyed pa ni phal pa zhes bya'o/ /'on te khyad par du skyes pa'i mtshan nyid la lhan cig byed pa nyid ji ltar rnam par mi gzhag /de yang 'jig rten la grags pa'i phyir rnam par gzhag par bya'o zhe na/ de'i phyir gang la zhes bya ba smos te/ 'bras bu bar du ma chod pa la sogs pa'i yul dang nye ba tsam gyis dbang po la sogs pa lta bu lhan cig byed pa'i rkyen du der rtogs so/ /'on kyang brjod par 'dod pa'i 'bras bu skyed par nus pa'i skad cig ma re re so sor phye nas khyad par du byed pa ma yin no//de la dus ring po nas 'byung ba'i 'bras bu byed pa'i rgyu'i rgyun skad cig ma gzhan dang gzhan du yod pa'i mtshan nyid yul du byung ba'i bdag nyid skyed pa'i phyir lhan cig byed pa'i rkyen gzhan la ltos pa yin gyi de'i dus mtshungs pa'i skad cig ma ma yin pa'i phyir ro//de'i phyir rkyen gzhan pa de dag las ngo bo nyid gzhan pa'i 'bras bu skyed par nus pa khyad par can brgyud pa'i mtshan nyid thob pa'i rgyun la 'jig rten gcig pa nyid du brjod par mos so//don dam par na de la yang snga ma snga ma'i tshogs pa la phyi ma phyi ma'i 'bras bu skyed par nus pa khyad par can gyi mtshan nyid skad cig ma so sor nges so zhes bya ba'i don gcig byed pa'i mtshan nyid ni lhan cig byed pa nyid ni rjes su 'byung ngo / /ji ltar ngo bo gzhan thob pa de dag kyang gang gis na rim gyis 'bras bu ldog par byed pa yin zhe na/gang gi phyir rang gi ngang gis zhes bya ba la sogs pa smos te/ de la ni de ni'o/ /rgyu ni rgyun gyi rgyu ste nye bar len pa'i rgyur bshad pa'o/ /rkyen ni lhan cig byed pa'i ming can de dag go/ /snga ma ni gang thog mar nye bar phrad pa'o//skad cig ma de dag 'jig pa'i rgyu la mi ltos par rang gi ngang gis ldog pa ni bden pa'i skad cig ma dang por de dag kho na rang gi ngang gis ldog pa dang / 'bras bu skyed par nus pa'i khyad par gyis khyad par can du bskyed do/ /skad cig ma gsum pas de dag kyang nus pa khyad par can dang ldan pa'i mchog dang /skad cig ma bzhi pas de dag kyang nus pa'i khyad par ches mchog dang ldan pa de bzhin du mtha' ma'i bar du phul byung ba dang ldan pa'o/ /mtha' ma'i rgyu'i tshogs pa las skyes pa de'i phyir 'bras bu skyed pa zhes bya'o/ /de ltar lhan cig pa rnams kyis ngo bo gzhan thob pa mi thogs par 'bras bu skyed pa 'dir gzhan dag rtsod pa ni lhan cig byed pa las zhes bya ba smos te/lhan cig byed pa'i ngang can gyi rgyu las skyes pa ni gcig gi tshig ni gang dang 'brel pa las byung ba khyad par du bshad ma thag pa'i rnam pas mtha'i tshogs pa'i rgyu'i skad cig ma'i mtshan nyid de las myu gu la sogs pa'i 'bras bu skyed par 'dod pa na/de nyid kyi khyad par la sogs pa'i 'bras bu 'di skyed pa'i nus pa gang rim gyis 'phel ba'i 'bras bu skyed par 'dod pas de skyed par ni mi 'gyur ro/ /skad cig ma dang po dang nye bar phrad pa rnams brgyud pas khyad par skyed pa'i phyir dang skad cig ma rnams dbye ba med par khas blangs pa'i phyir ro//phan tshun khyad par ma thob pa nyid 'bras bu skyed par nus pas khyad par rtsom pa yin no zhe na/ khyad par ma yin pa las khyad par ma yin dag ces bya ba smos te/ phan tshun 'bras bu skyed pa'i nus pas skyed par 'dod na ni myu gu la sogs pa 'bras bu gang yang khyad par med par 'gyur ro zhes bya bar bsams nas des kyang phan tshun khyad par du skyed pa na lhan cig byed pa la mi ltos par 'bras bu skyed par 'gyur ro//gal te de ltar gyur na ci zhig 'grub par 'gyur zhe na/ des zhes bya ba smos te/gang gis skad cig ma yang khyad par du skyed pa la mi ltos pa kho nar rang gi 'bras bu gcig byed pa'i mtshan nyid du nges pa ni lhan cig byed pa nyid du bstan to/ /rgyu des na skad cig ma ma yin pa rnams kyang rgyu nyid du 'gyur la/ ltos par bya ba rnams la ngo bo nyid khyad par du skyed par mi 'gyur ro//skad cig ma ma yin par brjod pa rnams skad cig ma la ltos nas rang gi phyogs dang mtshungs par ston pa ni gang dag /ngo tsha med pa'am mi shes pa/ /ma gtogs de ltar brjod pa gang / /gang phyir su la mdzes par 'gyur/ /skad cig rnams la'ang de kun mtshungs//khyad par gyi ni rgyu 'di dag /rnam pa 'gas kyang rkyen du min/ /skad cig ma rnams dbyer med na/ /rtag pa bzhin du sbyor ba min/ /zhes smra'o/ /de ltar ni 'gyur na skad cig ma dang po yang zhing sa bon la sogs pa phan tshun 'brel par 'byung ba'i khyad par kho na nye ba las yin te/gang dang de ni rtag tu 'brel/ /ring na gnas kyang de dang der/ /zhes bya ba'i rigs pas yul ring po ni 'dug pa yang rgyu dang 'bras bur 'gyur ro snyam du dogs pa na lhan cig byed pas byas pa zhes bya ba la sogs pa smos te/ lhan cig byed rnams phan tshun phrad nas ma tshang yang dngos po'i chos nyid kho nas phan tshun nye bar skyed de/lhan cig byed pa'i 'bras bu skyed pa ni nus pa'i khyad par gyis skyed pa'o/ /byas pa'i khyad par kho na ni sred pa'i dus su'o/ /nye bar gnas par gyur pa de lta na ni thug pa med par 'gyur ro/ /'di ltar de khyad par du skyed na yang lhan cig byed pa'i bye brag gzhan gyis byas par khas blang bar bya ste/de ltar de las skye ba yang gzhan yin pa'i phyir ro/ /'on te lhan cig byed par phan tshun 'bras bu skyed pa'i rjes su 'brang ba'i khyad par gyi rgyu mtshan gyis gzhan pa'i khyad par mi skyed do/ /rang bzhin kho nas de dag de la rung ba'i phyir ro zhe na/de'i phyir lhan cig byed pa zhes bya ba la sogs pa smos te/ lhan cig byed pa rnams ni zhing dang sa bon la sogs pa phan tshun 'bras bu skyed ba rjes su 'brang ba'i khyad par de las skyed par rung bar rtag tu gnas pa ma yin te/ gang gis rung ba'i gnas skabs ni rtag tu rjes su nus pas rtag tu rjes su 'brel pa zhing dang sa bon la sogs pa 'bras bu skyed pa dang rjes su 'brel pa'i bye brag ni skyed par byed pa'i bye brag las 'gyur na gang gi phyir khyad par med pa las kyang khyad par gyi 'bras bu yang skye bar 'gyur ro zhes bya ba 'di dag spangs so//'di ga las she na/de yod pa dang zhes bya ba la sogs pa smos te/ de dag zhing dang sa bon la sogs pa rnams yod par rung ba'i yul dang nye bar phrad pa'o/ /'bras bu gsal bar mthong ba'i phyir ni 'bras bu skyed par mthong bas so/ /med pa ni phan tshun phrad ba dang bral bas 'bras bu dang bral ba mthong bas 'bras bu mi skyed pa mthong bas so//gal te 'bras bu skyed par nus pa'i khyad par du skyed pa ni thams cad kyi tshe ring bar gnas par 'gyur bas de'i tshe yang thams cad kyi tshe khyad par du 'gyur ro/ /de yang de brgyud pas 'bras bu 'byung ngo snyam na de yod pa dang med pa dag 'bras bu skyed pa dang mi skyed par mi 'gyur ro//de'i phyir lhan cig byed pa'i 'bras bu skyed pa ni nus pa'i khyad par las rung ba'i gnas skabs na skye'i thams cad du ma yin no/ /gang gi lhan cig byed pa logs shig tu gnas pa na thug pa med pa'i 'jigs pas khyad par grub par nye bar gnas pa med do//de phan tshun thog mar phrad pa'i skad cig ma 'byung ba yod par sbyor ba ma yin pa nyid do/ rgyu des na dang po'i khyad par gyi 'bras bu skyed pa dang rjes su 'brel pa'i lhan cig byed pa dus mtshungs pas phan mi 'dogs te/ zhing dang sa bon la sogs pa mi skyed pa dang skyed pa 'di 'dod pa'i phyir ro//des na tshogs pa'i gnas skabs bzhin du thams cad kyi tshogs pa'i gnas skabs su 'byung ba'i skad cig ma rnams kyang khyad par de skyed pa'i ngo bos mi skyed pa las tshogs pa'i gnas skabs na skyed pa'i phyir dper na skad cig ma rnams don gcig par byed pa so sor nges pa'i mtshan nyid kyi lhan cig byed pa de bzhin du brtan pa'i rang bzhin yang 'gyur te thabs thams cad zab pa'i phyir ro//skad cig ma yin par smra ba na nad snyoms pa nyid la lhag par sems pa bzhin du de nyid la mchog tu byed par 'gyur ro/ /grub pa'i mtha' smra bas skabs su gzhan bzhad gad byed pa ni kho bo ni yang dang yang zhes bya ba la sogs pa smos te/gal te yang dang yang brjod kyang 'jig rten gyi rigs rtogs par 'gyur na brgya phrag smras pas ci zhig bya/ /lan gnyis dang gsum gzhan gyi don la mi 'jug pa la kho bo cag yang dang yang du rjod par byed pa la cung zad kyang yid skyo bar mi 'gyur ro//de ltar rgol ba la bstan bcos byed pas rnam grangs gzhan gyis la lar de nyid kyi don gsal bar byed pas zlos pa yongs su spong ba la 'bad pa de dag ni gnas ma yin pas yongs su ngal ba nyid do/ /gal te skyo ba med pa de lhan smos shig ce na/gang gi phyir lhan cig byed pa rnams ni khyad par du mi skyed pa'i phyir lhan cig byed pa nyid don dam par na 'ga' zhig tu srid de/ gang gi phyir skad cig dang po byung na sa bon la sogs pa de rnams med pa'i phyir 'bras bu skyed pa dang rjes su mthun pa'i khyad par du byed pa'i lhan cig byed pa spangs par 'gyur ro//'on kyang don gcig byed pa kho na'i lhan cig byed pa rnams ni don dam par na lhan cig byed pa nyid du sngar bshad pa'i rigs pa rnams kyis srid pa yin no/ /de yang thog mar phrad pa la rten pa yod pa nyid yin na cis na lhan cig byed par mi 'gyur/gzhan gyis smras pa don gcig byed par khas blangs na de'i tshe so so'i gnas skabs de na skyed par nus par khas blangs pas de'i gnas skabs lta bur so so ba la yang 'gyur ro/ /de lta na de'i gnas skabs kyang phan tshun khyad par med pa kho nar skyed do//de dag so so bas kyang de khyad par du byed na ji ltar thal bar mi 'gyur/ gang dag tshogs pa dang ma tshogs pa'i gnas skabs 'ga' zhig la khyad par yod pa'i phyir ro/ /gal te yin na nyes pa ci zhig tu 'gyur zhe na/ de lta na 'bras bu skyed pa dang 'brel pa'i khyad par so sor byed par thal bar 'gyur ba de'i phyir khyad par las byung ba'i ngang tshul can myu gu la sogs pa'i 'bras bu'i khyad par bzhin du 'ba' zhig ba las lhan cig byed par 'gyur ro zhes sems pa na 'di dag thams cad kyi lan btab zin to//de lta na tshogs pa dang ma tshogs pa'i gnas skabs khyad par med pa kho nar skad cig mas 'jig pa yin no zhes gang brjod pa de ci khyad par tsam la ltos pa yin nam yang na 'bras bu bskyed par rjes su 'brel pa'i khyad par skyed par byed pa la ltos pa yin/gal te rdzas la sogs par rnam par rtog na ni de mi rigs so//'ga' zhig khyad par tsam spangs pa'i gnas skabs ni mi srid de thams cad du rkyen gzhan dang gzhan rung ba'i rgyu mtshan gyis gzhan dang gzhan pa'i khyad par byung bas res 'ga' cung zad cig gcig pa nyid ma yin te/ rten dang grib ma dang nyi ma dang rlung dang grang ba la sogs pa bzhin du 'byung ba srid do//de yod kyang de dang 'dra ba'i rgyu tha dad pa med pa'i phyir ro/ /'di tsam du 'gyur te 'ga' zhig la lar 'bras bu dang rjes su 'brel pas yin gyi thams cad kyis thams cad la ma yin no zhes de yang sngar bshad zin to/ /bstan pa ni skad cig ma re re rkyen gzhan dang gzhan 'brel pas skad cig ma re re nus pa tha dad pa'i 'du byed rgyun dang ldan pa'o//gal te yang 'ga' zhig las 'dra ba'i ngo bor rtogs pa de lta na yang tha dad pa kho na 'di dag ngo bo cung zad cig 'ga' zhig gi rgyu yin no zhe na/ skad cig pa'i ngo bo rnams gzhan dang gzhan skyed pa la gcig pa med pa'i phyir zhes shin tu bsdus pa 'dir bshad pa dang /de ltar kho bo cag gis yang dang yang du brjod do zhes gnyi ga smos pa yang rigs so/ /ji ltar rnam pa gang gis dngos po'i rgyun la khyad par du skye ba de yang bshad zin to//de la skad cig ma snga ma ni rang gi ngang gis ldog pa kho nas khyad par can gyi skad cig ma skyed pas khyad par skyed pa yin no zhes bya'o/ /'on te 'bras bu skyed par nus pa'i khyad par skyed par byed pa'i khyad par la ltos pas snga ma bzhin du thog mar phrad pa la rten par phan tshun khyad par med pa yin no zhes mngon par 'dod pa de yang mi rigs so//gang gis 'bras bu skyed par nus pa'i khyad par skyed par byed pa ni zhing dang sa bon la sogs pa ci 'dra ba'i bar du chod pa la sogs pa spangs pa'i yul nye ba na de yod pa nyid de/ yod pa de tsam gyi rgyu mtshan dang skyed par byed par rnam par gzhag go//rnam pa de lta bu de yang thams cad la yod pa ma yin pa'i phyir ji ltar so sor yang 'bras bu skyed pa dang rjes su mthun pa'i khyad par 'di dag skyed par 'gyur ro/ /gang gi phyir 'ba' zhig pa yang 'bras bu byed par thal bar 'gyur ba de bstan to/ / gang dag yul rung ba can de ni rung ba'i yul de las byung bas rung ba'i yul can no/ /de la sogs pa gang dag bar du mchod pa'i yul can la sogs pa'i gnas skabs tha dad pa de bzhin du bshad do/ /de yang de'i gnas skabs tha dad pa yang de skad du rung ba'i yul can ni bar du ma chod pa'i yul la sogs pa'i gnas skabs kyi bye brag zhing dang sa bon la sogs pa rnams kyis nye bar bskyed pa gang yin pa de ni 'bras bu skyed par nus pa'i mtshan nyid 'bras bu byed pa'i ngang tshul can te/rnam pa de lta bu'i sa bon la sogs pas thams cad du ni ma yin no zhes bshad do//ji ltar 'di dag so sor yang rnam pa de lta bu'i khyad par 'gyur zhe na/ 'di dag kyang sngar bshad zin to/ /de la bar du chod pa'i yul la sogs pa'i gzugs dang dbang po la sogs pa'i tshogs pa gang yin pa de rnam par shes pa skyed par nus pa'i rgyu yin no zhes brjod pa de yang dpe tsam yin pa'i phyir ro//'dir yang de la bar du ma chod pa'i yul la sogs pa'i zhing dang sa bon la sogs pa'i tshogs pa gang yin pa de ni 'bras bu skyed pa dang rjes su 'brel pa'i khyad par skyed par nus pa'i rgyu yin no zhes rtogs pa kho na'o/ / de yang rnam pa de lta bu'i khyad par gyi skyed par byed pa po khyad par dang ldan pa gang las skyes pa de ni de dag phan tshun nye bar 'gro ba la sogs pa rten dang rkyen gyi bye brag gang yin pa de ni de'i rgyu yin te skyed par nus pa'i rgyu yin pa'i phyir ro/ /'di dag kyang sngar bshad zin to/ /de dag kyang zhes bya ba smos te 'bras bu skyed par nus pa'i khyad par gyi skyed par byed pa po khyad par dang ldan pa gang las skyed pa de ni phan tshun nye bar 'gro ba la sogs pa rten dang rkyen gyi bye brag gang yin pa de ni de'i rgyu yin te/skyed par nus pa'i rgyu yin pa'i phyir ro/ /de lta na phan tshun nye bar 'gro ba la sogs pa'i rten bdag nyid ji lta ba'i rkyen gyis rung ba'i yul la sogs pa gnas skabs las skyes pa de dag lhan cig pa'i ngo bo nyid du grub pa shes pa'i rgyu nyid du bstan to zhes bya ba 'dis 'dir yang rtogs par bya ba yin no//de'i phyir gal te 'di dag kyang phan tshun mi skyed na khyad par du mi 'gyur te/rang gi rgyus byed pa gang gis bsal bar nus/ rang gi kho na las skye ba khyad par rnams 'byung ba ni phan tshun de'i yon tan mi byed do/ /gang gi phyir phan tshun khyad par du rung bar bstan pa ni mdzes te/ de dag 'bras bu skyed par rung ba'i khyad par skyed par byed pa rnams re re nus kyang cha shas kyi 'bras bu skyed pa'am ma lus pa re res byed pa ni mi rigs so//ji lta bu'i 'ba' zhig pa rnams kyi bya ba dang byed pa po'i khyad par du ma chod pa la sogs pa'i yul gyi zhing dang sa bon la sogs pa can so sor re re nas nus pa'i dngos po las mi 'byung ba'i phyir ro zhes bya ba de dag sngon yang med phyis kyang med so so ba'i ngo bos kyang med pas nus pa yang sngon dang phyis dang tha dad pa'i ngo bos 'byung ba'i nyes pa dag gis gos pa med do zhes bya ba 'di dag kyang lan mang du bshad zin to//des na rnam pa de lta bu'i khyad par rang gi nye bar len pa tsam dang rjes su la 'brel pa khas mi len pa dang 'ga' zhig pa las thal bar mi 'gyur bas gang las 'bras bu skyed par nus pa'i khyad par du skyes pas 'bras bur yang 'gyur/slar yang 'di 'dod par gyur na rnyed par ga la 'gyur gang gi tshe myu gu la sogs pa'i 'bras bu ni lhan cig byed pa phan tshun 'bras bu skyed par nus pa'i khyad par brgyud par skyed par byed pa yin no//'bras bu skyed par nus pa'i khyad par yang bar du chod pa la sogs pa'i yul gyi rim pa tsam gyis yin pa de'i phyir 'bras bu rnam pa gnyis so zhes bya ba smos te gang gi phyir de ltar rnam par phye ba de'i phyir ro/ /ji ltar 'bras bu rnam pa gnyis pa yin zhe na lhan cig byed pas zhes bya ba la sogs pa smos te/lhan cig byed pa bar du ma chod pa la sogs pa'i yul gyi mjug thogs su skyes pa can phan tshun snga ma'i gnas skabs la ltos pa'i khyad par can gyi skad cig ma'i mtshan nyid kyi khyad par de na phyi ma phyi ma khyad par can dang chos khyad par can la sogs pa'i skad cig ma'i dngos po'i ngo bo nyid skyed pa'i chos gang yin pa de'i bdag nyid kyi 'bras bu gcig pa dang gzhan ni de las bzlog pa'o//gang lhan cig byed pa nye ba tsam 'byung ba ni phan tshun byed pa dang khyad par phan tshun byed pa la mi ltos so//'dir dpe ni myu gu la sogs pa'o/ /sogs pa'i sgras ni 'bras chan la sogs pa gzung ngo / /mi sdod par skyed pa'i rgyu'i tshul dbang po gang yin pa de'i rnam par shes pa lta bu'o/ /snang ba las mun khung du zhugs pa'i dbang po bsal ba'i phyir khyad par 'di dag yin no//'di dag ga las she na/ rgyu dang 'bras bu'i ngo bo nyid tha dad pa'i phyir ro/ /'bras bu 'ga' zhig rgyu'i tshogs pa dang nye ba tsam las skye ba'i rang bzhin dang de las gzhan pa ni de'i yongs su 'gyur ba la ltos pa yin no/ /rgyu rnams kyang cung zad cig rang dang nye ba tsam gyis 'bras bu skyed pa'i ngo bo ni rang gi rgyu kho nas yin no//gang gis phan tshun byas nas khyad par brgyud pas rang gi 'bras bu byed pa la ltos pa yin gyi gzhan pa ni de las bzlog pa'i rang bzhin yin no/ /dper na cung zad cig 'bras kyi myu gu skyed pa'i ngo bo dang gzhan ni de las bzlog pa ste/'bras kyi myu gu skyed pa'i rang bzhin de ni nas kyi myu gu skyed pa'i rang bzhin ma yin pa dngos po ni rang gi rgyu'i stobs kyis 'ongs pa tshad mas rtogs pa'i rang bzhin la brgal zhing brtag par mi rigs so/ /gang dang gang skyed pa'i rang bzhin du tshad mas rtogs pa de ci thams cad kyi rang bzhin de yin nam/yang na ni de nyid kyi zhes de ltar dpyad pa 'jug pa na/ de la thams cad du de'i rang bzhin yin na ni phyi ma bzhin du sngon yang de'i 'bras bu byed par thal bar 'gyur la/ gzhan gyi ngo bos ni byed pa po ma yin pas rang bzhin tha dad do/ /'bras dang nas kyi sa bon bzhin du byed pa po ma yin pa'i gnas skabs dpyod pa ni de kho na nyid sems par brjod do//'dre ba gzhan 'byung ba'i rgyu mtshan gyis gcig tu ngo shes pa yin te skra dang sen mo la sogs pa rnams bregs pa las skye ba bzhin du 'dir yang 'gal ba med pa'i phyir ro//gang gi tshe rgyu dang 'bras bu'i ngo bo nyid tha dad pas 'bras bu gnyis su rigs par bya'o/ /de la ni de ltar gyur na'o/ /lhan cig byed pa rnams ni zhing dang sa bon la sogs pa'o/ /de dag phan tshun rgyun gyis phan 'dogs pa la ltos pa'i rgyu mtha' ma'i gnas skabs su gyur pa gang yin pa de ni myu gu la sogs pa'i 'bras bu gang yin pa de skyed pa'i rgyu mtshan gyi lhan cig skyed pa'i rkyen skad cig ma dang po'i mjug thogs su skad cig ma gnyis pa'i dngos po khyad par can gyi ngo bo ni gang khyad par gyi 'bras bu skyed par nus pa'i dang po las byung ngo //de dang de dag lhan cig byed pa rnams thog mar phrad pa la rten pa'i phan tshun khyad par du byas pa'i khyad par gang yin pa de ni skyed pa can ma yin te phan tshun nye bar 'gro ba la sogs pa la brten pa nyid kyi rkyen gyi bye brag la de 'byung ba'i phyir ro//des na 'bras bu skyed pa dang rjes su mthun pa la sogs pa gang gi khyad par las skad cig ma dang po dang nye ba'i lhan cig byed pa rnams dang gzhan sgrub pa'i khyad par skyed pa nyid dang mtshungs so//de phan tshun gyi khyad par ni 'dren ma yin te/ de phyi ma phyi ma'i skad cig ma'i dngos po'i mtshan nyid skyed pa'i phyir ro/ /de dang de dag skye ba'i lhan cig byed pas byas pa'i khyad par skyed pa'o//gang las she na/ de'i rang bzhin yin pa'i phyir de dang po 'di'i khyad par ni phan tshun 'dus pa la sogs pa'i brten pa'i rkyen gyi khyad par gyis sgrub pa dang rjes su mthun pa'i khyad par gyi lhan cig byed pa rnams phan tshun phan 'dogs pa la mi ltos par skyed pa'i rang bzhin yin pa'i phyir dang /'di dag gi khyad par rnams lhan cig byed pas byas pa'i 'bras bu skyed pa dang rjes su mthun pa'i khyad par skyed pa'i rang bzhin yin pa'i phyir ro/ /gang gi de lta yin pa de'i phyir thug pa med pa ma yin no zhes gnas skabs du mar sngar bshad zin to//'on te lhan cig byed pa zhing la sogs pa dang sa bon la sogs pa dang / sbyang la sogs pa na gnas pa de la yang zhing la sogs pas byas pa'i khyad par nye bar gnas pas de ltar thug pa med par 'gyur ro zhe na/ de'i bye brag khas ma blangs pa'i phyir skyes bu'i rtsol ba la sogs pas zhing la sogs pa rmo ba'i rgyu bar du ma chod pa'i sa gshin pa sa bon dang phrad pa'i mtshan nyid las 'bras bu skyed par nus pa'i khyad par dang skyed par byed pa'i khyad par khas blangs pa'i phyir ro//de la gzhan gyi de skad du bshad pa'i ji ltar thog mar phrad pa la brten pa'i zhing dang sa bon la sogs pa phan tshun khyad par du byed pas 'bras bu skyed pa dang rjes su mthun pa'i khyad par skyed na ni de bzhin du brtan pa'i ngo bo yod pas kyang de'i 'bras bu gcig tu nges par 'gyur te phan tshun byas pa'i khyad par la mi ltos pa kho nar 'byung bas de yang khas blang bar gyis shig /gal te zhes bya ba la sogs pa smos te/ skad cig ma bzhin du skad cig ma ma yin pa brgya la 'bras bu skyed par 'gyur ro zhe na/ skyed la ni rag ste/ cung zad cig 'dzin pa ni med do/ /'on kyang gang gi phyir ngo bo nyid kyis 'bras bu byed pa de ni gal te mi thogs shing mi sdod par 'bras bu skyed par byed pa'i chos tsan gyis byed pa ni de lta bu'i ngang tshul can gang yin pa des yin te/de skad du de'i tshe so so na yod pa 'ba' zhig gis kyang yin no/ /'ba' zhig pa ni lhan cig ma yin pa'o/ /de ltar 'gyur ba ni rgyu dang 'bras bur 'gyur ro zhes lan mang du bshad zin to//de'i ngo bo nyid ma yin pa ni mi sdod pa'o/ /skyed par byed pa ma yin pa ni ma tshang ba'i ngo bo nyid do/ /de'i tshe yang zhes bya ba ni lhan cig pa'i gnas skabs na yang sngon bzhin du mi skyed pa nyid du 'gyur ro/ /gzhan gyi ngo bo skyed par byed pa nyid ni sngar bkag zin to//de ltar na don gcig byed pa dang khyad par skyed pa ni skad cig ma ma yin pa la lhan cig byed pa bkag pa'i mjug bsdu ba ni de lta bas na zhes bya ba la sogs pa smos te/ rnam pa gnyis pa la yang lhan cig byed pa nyid mi rigs te skad cig ma ma yin pa la lhan cig byed pa 'ga' zhig kyang med pas de 'ba' zhig gis kyang skyed par 'gyur ro//lhan cig byed pa'i rkyen la ltos pa'i skad cig ma ma yin pa gzhan dag rgyur brjod pa la rigs pa ci zhig yod snyam nas bstan pa ni dngos po'i zhes bya ba la sogs pa smos so//rgyu rtag par smra ba gang yin pa de ni gang gi tshe lhan cig byed pa'i rkyen gzhan la ltos nas 'bras bu skyed pa yin na ni de'i tshe rtag pa'i rgyu de ni rkyen gzhan la ltos nas skyed par byed pa'i ngo bo gzhan zhig skye zhes bya bar gdon mi za bar gsal ba yin no//'bras bu ma yin pa dang 'bras bu der nyams su mi myong ba ma yin pa ni ltos par brjod do/ /gang gi tshe lhan cig byed pa tshogs shing nye bar gyur pa gang yin pa de ni gnas pa can no/ /de la da ltar ba'i dngos po ni rgyun no/ /phal cher ni mang po'o/ /lhan cig byed pa'i rkyen gyi khyad par skyed pas rang gi 'bras bu skyed pa mthong ste sa bon la sogs pa bzhin no//de'i phyir 'di ltar rnam par dbye bar bya ste/ phal cher smos pa ni mi sdod pa'i dbang po la sogs pa'i tshogs pa rnam par gcad pa'i phyir ro/ /de srid par 'gyur ba'i tshul gyis skad cig ma ma yin pa la sogs pa rnams so sor yod pa srid pas res 'ga' bar brtag par yang mi nus pa'i phyir ro//sngon skyed par byed pa ma yin pa phyis skyed par byed pa'i ngo bo nyid kyis skyed pa la 'gal ba med do/ /de nyid skyed par byed pa de'i bdag nyid kyi ngo bo ni skyed par mi byed pa mi rigs te de'i bdag nyid ma yin no//de nyid kyi phyir ngo bo gzhan gcig 'dzin to/ /de la 'ba' zhig pa'i skyed par byed pa'i rang bzhin rang gi ngang gis 'gag pa tsam du khas blangs pas de thams cad legs par gnas pa yin no/ /yang na skyed par byed pa'i rang bzhin gzhan pa yin pa'i gzhung 'dod pas gal te rtag pa'i rgyu sngon skyed par byed pa'i ngo bor mi 'gyur gyi de ni sngar yang yod pa las rkyen gzhan la ltos nas de skyed pa yang rigs pa yin no zhe na/skyed par byed pa'i ngo bo zhes bya ba la sogs pa smos te/ gang gi tshe tshogs pa'i gnas skabs las sngon yang skyed par byed pa'i rang bzhin du gyur pa de'i tshe mi byed pa ni mi rung ngo //tshogs pa'i gnas skabs na yang de'i rang bzhin yin pa kho nas byed pas gzhan gyi ngo bo'i skyed par byed pa sngon bkag pa'i phyir skyed par mi byed do/ /de'i phyir de 'di'i ngo bor yin na ni sngon med par gyur te/gal te rkyen gzhan gyis kyang 'di byed pa ma yin na cis na da ltar gzhan la ltos pa nyid du 'gyur zhe na/ de ltar na de dang de'i ngo bos skyed pa yin pa'i phyir gang dang gang gi rang bzhin yin pa de ni rang gi rgyu kho na las de dang 'dra bar skye bar 'gyur ro/ /de'i dngos po 'di ni rgyu gzhan la ltos pa ma yin no zhes bya ba ma nges pa spangs par bshad pa la rnam grangs gzhan gyis ma nges pa brjod pa de yongs su spong bar 'dod nas phan tshun rkyen du rung ba zhes bya ba la sogs pa mdzad do//de la rigs pa gang gis skad cig ma rnams la rgyu dang 'bras bu yod pa de ni skad cig ma ma yin pa rnams la mi srid par bstan pa ni zhar la byung ba nye bar bkod pa de rdzogs nas/rnal ma brjod pa ni de lta bas na gang gi bdag nyid ces bya ba la sogs pa smos te/ gal te ngo bo nyid kyis mi gnas pa'i chos nyid kyi dngos po la 'jig pa'i rgyu dgos pa med na ngo bo nyid kyis gnas pa chos 'byung bar 'gyur ram zhe na/dngos po gnas pa'i chos can la yang zhes bya ba la sogs pa smos te gnas pa'i chos can la ni 'jig pa'i rgyu dag cung zad kyang mi dgos pas de ni rang gi rgyu las yang dag par skye'o/ /brtan pa'i ngo bo gang yin pa de ni gzhan mi brtan par skyed par su zhig gis kyang bya bar mi nus pa'i phyir ro//dngos po'i bdag nyid mi 'gyur na/ rgyun kho na la bdag nyid rang gi ngo bo yongs su gtong bar mi 'gyur ro/ /yang na rtag pa'i chos kyang gzhan du rtogs so zhes 'dod na/de'i tshe gzhan du rtogs na de'i ngo bo kho na rtag pa'i chos can gyi bdag nyid du mi 'gyur ro/ /mi rtag pa'i chos kyi ngo bo ni sngar med pa las phyis byung ba rigs pa yin pa'i bdag nyid yin pa de la ni res 'ga' 'byung bar mi rigs so//de'i ngo bo nyid ma yin par thal bar 'gyur te/ 'gal ba'i chos nye bar gnas pa ni tha dad pa'i mtshan nyid yin pa'i phyir ro zhes bshad zin to/ /de ltar gyur na snga ma nyid rnam par rtog pa'i ngo bo ni mi brtan pa'i chos yin no zhes bya ba dang de la 'jig pa'i rgyu don med do zhes bya ba'i skyon rnams brtag pa snga mar zad pas sngar bshad zin to//yang na 'di brtan pa'i ngo bo nyid 'ba' zhig pa 'di sngar mi brtan pa'i ngo bo yin na ni 'jig pa'i rgyu las skye ba yin gyi/ gzhan du na ldog par mi rigs so zhe na/pha rol las zhes bya ba smos te/ 'jig pa'i rgyu yis gnas pa'i chos can de las gzhan gyi ngo bo nyid du gnas pa'i chos nyid kyi mtshan nyid du 'gyur te/ de sngon gnas pa'i chos ni rang gi rgyu las yang dag par 'byung ba'i phyir ro/ /ngo bo nyid las pha rol po ni gzhan gyi ngo bo nyid de de ni grub pa dang ma grub pa'i phyir dang rgyu tha dad pa'i phyir ji ltar de'i ngo bor 'gyur/gal te da'i bdag nyid du snang ba'i phyir ro zhe na/ 'dra ba las tha dad par mi rtogs pas de bzhin du snang bar 'gyur gyi gang gi tshe 'di snga ma'i ngo bor gyur ba las gzhan du 'gyur ba de lta ma yin na tshad ma dang 'gal ba gang gis zlog par 'gyur/gal te gzhan gyi ngo bo yin no zhe na/ gang zhig gzhan gyi ngo bo yin na de ji ltar de yin gzhan gzhan gyi ngo bo yin pa ni mi rigs te ha cang thal bar 'gyur ba'i phyir ro/ /gang zhig gzhan gyi ngo bo yin pa de cis der mi 'gyur zhe na/dngos po tha dad pa ni zhes bya ba la sogs pa smos te/ dngos po gzhan pa nyid de gzhan pa'i ngo bor 'gyur ba la nyes pa ci zhig yod ce na/ de lta na zhes bya ba smos te/ dngos po gzhan du 'gyur ba ni 'jig pa'i rgyu la skyes pa'i rang bzhin no/ / dngos po snga ma ni rang gi rgyu la skyes pa'o/ /'pho ba med pa'i chos la gnas pa ni gnas pa ldog pa la brten par mi 'gyur ba'o/ /'jig pa'i rgyus dngos po gzhan skyed par byed pa'i phyir de gnas pa'i chos la gzhan du 'gyur ba'i ldog pa med do/ /tho ba la sogs pas dngos po gzhan 'byung ba na gzhan ldog par rigs pa ma yin te/ha cang thal bar 'gyur ba'i phyir ro/ /de nye ba nas de skyed pa yin pa yang sngar bshad zin to/ /'o na ni zangs ma la sogs pa sra ba la sogs pa'i ngo bo 'jig pa'i rgyus zhu ba la sogs pa'i rang bzhin gzhan skyed pa mthong ba nyid de snga ma 'pho ba med pa'i chos ma yin no zhe na/'dis ni zhes bya ba la sogs pa smos te/ bshad ma thag pa'i sra ba la sogs pa'o/ /sogs pa smos pas ni snyi ba la sogs pa bsdu'o/ /me dang grang ba la sogs pas zangs ma dang gser la sogs pa dag snyi ba dang sra ba la sogs pa rang bzhin gzhan skyed par rnam par gnas pa'i ngo bo zangs la sogs pa bsal zhing spangs pa yin te skyon mtshungs pa'i phyir ro//de lta na 'on te snga ma 'pho ba med pa'i chos la gnas pa med par mi rigs te de la ngo bo gzhan 'byung ba yin no zhe na/ de la yang zhes bya ba smos te/ sra ba la sogs pa'i ngo bo can gyi zangs ma la sogs pa snga ma sra ba dang snyi ba la sogs pa'i ngo bo rang gi ngang gis 'jig pa can yin pa'i phyir 'jig pa'i rgyu dang 'brel pas zhig pa yin no/ /me la sogs pa smos pas ni chu blugs pa dang grang ba dang rlung la sogs pa lhan cig byed pa phan tshun nye bar 'dus pa la sogs pa rten gyi khyad par gyis phul du byung bar skyed pa dang /nye bar len pa la rag las pa sra ba la sogs pa'i ngo bo can gyi zangs ma la sogs pa rang gi ngang gis ldog pa yin no/ /de nyid kyi phyir nye bar len pa'i rgyu dang me la sogs pa lhan cig byed pa'i rkyen gyis nye bar len pa khyad par du skyed do//gzhan kho na ni sra ba dang snyi ba la sogs pa'i ngo bo gzhan zhig go/ /snyi ba smos pa ni nye bar mtshon pa nyid yin pas snga ma sra ba dang snyi ba la sogs pa'i ngo bo can gyi zangs ma la sogs pa rnam par gnas pa'i bdag nyid sra ba dang snyi ba la sogs par 'gyur ba ni skyes pa yin gyi yongs su gyur pa ni ma yin no//gzhan gyis 'dir de ni zhes bya ba smos te/ ji ltar gnas pa'i chos can du gyur pa la 'jig pa'i rgyus mi brtan pa'i ngo bo skyed do//des na 'jig pa yin no zhes su zhig gis smras/ /gang gis gang yang pha rol las gzhan du 'gyur ba'i phyir na gzhan gyi ngo bo yin no zhes brjod de/ 'on kyang de rang gis gnas pa'i chos can kho na rang gi rgyu las skye ba ni mi brtan pa'i ngo bo yin pas 'jig pa'i rgyu las mi skye bar ji ltar shes rang gi rgyu ji lta ba rnams kyis rang bzhin gyis gnas pa'i chos can kho na skye ba yin no snyam na ni me la sogs pa 'jig pa'i rgyu mi srid na gnas pa'i phyir ro//gang gi tshe rang bzhin gyis gnas pa'i chos can rgyu las skye bar 'gyur ba de'i tshe mi srid kyang gnas pa ma yin na ni de'i phyir de'i ngo bo nyid kyis gnas pa'i chos can yod pa las rang gi rgyu kho nas 'di gzhan gyi ngo bor nges pa yin gyi/dper na me la sogs pa gzhan dang 'gal ba las 'jig par bdag nyid kyis nyams su myong ba bzhin no//gzhan gyis zhes bya ba ni las su bya ba'i lnga pa dbye ba brjod pa ste/ gzhan la ltos so zhes bya ba'i don to/ /rang gi rgyu rnams kyis 'di'i ngo bo nges par bskyed pa yin te/ dper na khyed kyi 'gal ba la ltos nas rang nyid ldog par 'gyur ba bzhin no//de skad du/ de yi ngo bo yod pa yang / /gang la ltos nas ldog 'gyur ba/ /dper na gzhan gyi 'gal ba dag /brjod bzhin tho ba la sogs yin/ /zhes bshad do/ /gal te 'jigs pa ni 'gal ba dang nye ba na rang nyid ldog pa yin na rgyu med par 'gyur ro//rgyu med pa yin na yul dang dus dang ngo bo nyid nges pa mi rigs pa ma yin nam zhe na/ de ni zhes bya ba smos te 'jig pa zhes bya ba 'jig pa can las gang gis gzhan pa'i ngo bo ni 'gyur ba med do/ /'on kyang dngos po 'pho ba kho na 'jig pa yin te yang rang bzhin med pa'i phyir rgyu dang ldan pa mi rigs so//de ni de'i ma yin la 'ba' zhig pa ni rang nyid kho na ma yin pa de'i phyir 'byung ba med pas gang gi rgyu dang ldan par rtogs par bya/ grub pa'i mtha' smra bas lan ni 'di ni zhes bya ba smos te/ rnam par rtog pa gnyis las mi 'da'o zhes bshad zin to//rnam par rtog pa gnyis ci 'dra ba zhig ce na/ ci dngos po'i ngo bo rtog pa zhig gam zhes bya ba la sogs pa smos so/ /'on te dus gzhan zhig tu gnas pa'i chos can du khas len pas rtag par rnam par rtog pa'i go skabs med do zhe na ma yin te/ de khas blangs na yang rtag pa nyid khas blangs par 'gyur ro/ /de lta na gang gi tshe logs shig tu gnas pa'i chos 'dir rang gis rgyu rnams kyi skyed pa de'i tshe lo gcig rdzogs pa gang yin pa phyi ma'i dus kyi lor gnas pa'i chos kyi ngo bo yin no/ /gang gi phyir 'di lor gnas pa de'i mtha' yang de nyid yin pa de'i phyir lo gzhan du gnas pa de'i mtha' yang thog mar lor gnas pa'i chos kyi ngo bo yongs su spangs pas lo gzhan du gnas par thal bar 'gyur ro//dus gzhan du gnas pa'i chos su khas blangs kyang rtag pa khas blangs par 'gyur bas rtag pa'i rnam par rtog pa spang bar dka'o//'jig pa'i rgyu dang nye ba las rang nyid ldog pa yin no zhes khas blangs pas mi rtag pa'i rnam par rtog pa dang 'jig pa'i bdag nyid kyi rnam par yin pa de lta na 'jig pa'i rgyur mngon par 'dod pa nye bar rang nyid 'jig pa'i ngo bo gang yin pa de nyid yod pa'i ngo bor gcig pa'i phyir skyes pa tsam de nyid na 'jig par thal bar 'gyur bas ji ltar dus gzhan du gnas pa'i chos nyid srid pa yin/de ltar brtag par byas na phyi ma'i rnam par rtog pa khas blangs pas dus gzhan du gnas pa 'di spang pa'i phyir rtag pa nyid 'dir khas blang bar bya'o//de la 'jig pa'i rgyu dang nye ba las rang nyid 'jig par 'gyur ba ji ltar dus gzhan khas blangs pa sngar ni rtag par gyur pa nyid la phyis ni mi rtag pa 'dzin pa'i rang bzhin du brjod par 'gyur ro zhes de ltar rnam pa gnyis brjod par 'gyur ro//yang smos pa ni phyi ma rtogs par gyur pa nyid la phyis ni mi rtag pa 'jig pa'i rang bzhin du brjod par 'gyur ro zhes de ltar rnam pa gnyis brjod par 'gyur ro/ /yang smos pa ni phyi ma la ltos pa'o/ /gnyis su 'gyur ba ji 'dra ba zhig ce na/ rtag pa dang mi rtag pa'i rang bzhin tha dad pa gang yin pa de ltar 'di sngar rtag pa'i ngo bo gang yin pa de ni rtag par mngon par 'dod la/ rang nyid phyi nas zhig par brjod pa ni thams cad du skad cig ma re re kho na'i 'jig par brjod do/ /de lta ma yin na sngar bshad pa rigs pas phyis 'jig par mi srid pa'i phyir ro//yang na skad cig ma re re 'di 'jig par mi 'gyur ba de'i tshe phyis kyang de mi rigs pas thams cad du mi 'jig par rab tu smras zin pas snga ma la rtag par mngon par 'dod pa'i rang bzhin la 'jig pa'i rgyu nus pa thogs pa med pa des ci yang mi byed pa nyid do//'o na 'jig pa'i rgyu nyid la nus pa med par gzhan gyis khas mi len gyi 'gal ba dang nye ba la ltos nas rang nyid 'jig par khas len to zhe na/ 'jig pa de nyid kyi rgyu mtshan ma yin par thal ba'i phyir ro/ /de lta ma yin pa cung zad cig byed pa med do zhes bya ba 'di rgyu yod pa la ltos pa'i mtshan nyid yin pa'i phyir ro//gal te rang gi rgyu kho na'i 'di nyes pa yin te/ gang cung zad cig byed pa med kyang de la ltos na 'jug pa yin no/ /slar yang gnas pa ma yin pa la mngon par zhen pa de dag gis ci zhig bya/gang de la de ltar 'jug pa de'i phyir phan 'dogs pa la ltos pa nyid ni rang gi rgyu yis nges par sbyor na mdzes pa yin no/ /de lta ma yin na 'bras bu'i bdag nyid de yang de la nges par sbyor ba la gus par mi byed do/ /ji ltar cung zhig byed pa med pa 'gal ba yin/'di 'gal ba med par mngon par 'dod na khyad par 'ga' yang med pas 'di ni gyi na'o/ /gang yang dper na skad cig mar smra ba gzhan dag bum pa ni tho ba la sogs pa la ltos nas cung zad cig kyang byed pa med kyang ldog pa de bzhin du kho bo cag kyang dus gzhan du gnas pa can gyi dngos po yin no zhe na/de yang gzhan gyi gzhung lugs mi shes par smra ba yin te/ kho bo cag ni gang gi phyir rgyun zhes bya ba skad cig ma las tha dad pa yod pa ni ma yin te tho ba la sogs pa nye bas cung zad cig kyang ldog pa la byed pa med do/ / skad cig ma kho na 'ba' zhig yod pa de yang rang nyid ldog pas tho ba la sogs pa la ltos pa ni ma yin te/ rang gi ngang gis 'gog pa'i phyir ro/ /gang yang gyo mo la sogs pa de dag bskyed pa'i mtshan nyid ma yin pa'i 'jug pa dang ldog pa yod pa gang yin pa ni 'dra ba gzhan byung ba'i 'khrul pa'i rgyu mtshan gyis 'jig rten pa gcig pa nyid mngon par zhes par khas len pas bum pa la sogs pa ldog pa yin no zhes tha snyad du byed do//de la tho ba la sogs pa cung zad cig kyang byed pa med pa nyid du yod pa ma yin te/ de yod pa nyid las de dag 'byung ba'i phyir ro//mgyogs pa bsnun pa'i tho ba la sogs pa ni lhan cig byed pa'i rkyen yin te/ bum pa'i skad cig ma dang phan tshun nye bar 'dus pa la sogs pa'i rkyen gyi khyad par las gyo mog la sogs pa phul du byung ba skyed par 'gyur ba'i chos yin pa'i phyir dang / de yang de skyed pa'i rang bzhin yin pa'i phyir ro//ngo bo gnyis su khas blangs par thal bar 'gyur ba la sogs pa de bsal bar 'dod pas gzhan gyis gal te sngar rtag pa zhes bya ba la sogs pa smos te/ 'di ga las she na/ ngo bo nyid gcig pa'i phyir ro/ /thams cad du ngo bo gcig pas thams cad du rtag pa yin gyi/phyi nas mi rtag pa'i ngo bo ni mi srid pa'i phyir ro/ /grub pa'i mtha' smra bas 'o na zhes bya ba smos te/ dngos po thams cad du rtag pa'i ngo bo nyid kyi rang bzhin gyis 'jig pa mi 'jig par rtogs na ji ltar 'jig pa zhes bya ba yin/ga las she na/ de'i ngo bo nyid dang 'jig pa dag ni rtag pa'i ngo bo dang 'jig pa mi rtag pa'i ngo bo nyid ni phan tshun med pa'i ngo bo yin pa nyid kyi phyir phan tshun yongs su spangs pa'i phyir ro/ /mjug bsdu ba ni de lta bas na zhes bya ba smos te/rtag pa'i chos la 'jig pa mi rung ba de'i phyir 'jig pa yod pa gang gi tshe gdon mi za bar 'byung ba'i byas pa'i ngo bo dang 'jig pa yod par pha rol po 'dod pa de'i tshe 'jig pa'i ngo bos 'jig par 'gyur ro/ /gnas pa med pa'i phyir 'jig pa ste byed pa po'i tshig gi g+ha nya'i rkyen yin no//de'i ngo bo gang yin pa des 'jig pa'i rang bzhin gyis mi gnas pa'i chos yin pa des na byas pa'i ngo bo dang lhan cig pa'i yod pa ni rang gi rgyud las byung ba yin no/ /de lta ma yin na gdon mi za bar 'byung bar khas blangs pa byas pa'i bdag nyid la 'jig pa yod pa mi rigs pa'i phyir ro//gal te yod pa nyid yin no zhe na/ de lta na yang zhes bya ba smos te/ rang nyid kyis 'jig pa'i ngo bo nyid kyi ngo bo ma yin te/ gzhan pa nyid mi srid pa'i phyir 'jig pa'i rgyu don med do/ /rnam par rtog pa dang po nye bar bkod pa de nyid bshad zin pas yang bshad par mi bya'o//des na zhes bya ba la sogs pa ni go bla'o/ /de ltar na 'jig pa la ltos pa med pas nus pa yang don med do/ /de'i rgyu dang 'brel pa las byas pa'i mtshan nyid dang yod pa ni sngon gyi slob dpon rnams kyis bstan cing bshad do//de'i bzlog na gnod pa can gyi tshad ma ji lta ba de rjes su myong ba de bstan pa ni lta bas na dngos po 'jig pa la zhes bya ba smos te/ 'di ltar sbyor ba ni gang dang gang gi dngos po yod pa la ltos pa med pa de dang de'i dngos por nges pa yin te/dper na tha ma'i rgyu'i tshogs pa rang gi 'bras bu bskyed pa yin no/ /byas pa'i ngo bo'i dngos po yod pa'i 'jig pa ni gzhan gyis dngos po 'byung ba gdon mi za bar 'jig par khas blangs pa yang gzhan la mi ltos pa'i phyir ro zhes bya ba ni rang bzhin gyi gtan tshigs so//thal bar 'gyur ba bzlog pa la gnod pa can gyi tshad ma sngon gyi slob dpon gyis bstan to/ /des na de'i dngos por nges pa'i 'jig pa ni res 'ga' ba yin pa'i phyir skyes ma thag 'jig pa yin no/ /yod pa gang yin pa de ni byas pa'i mtshan nyid kyi dngos po'o//'jig pa ni 'jig pa'i rang bzhin yin no/ /'jig pa nyid bsgrub par bya ba'i chos log na byas pa'i bdag nyid kyi yod pa ldog pa yin pa'i phyir byas pa dang ma byas pa'i mtshan nyid la skad cig ma'i yod pas rjes su 'gro ba dang ldog pa grub cing rdzogs pa'o//mi ldog pa bshad pas yod pa dang skad cig ma de'i bdag nyid du grub pa'i rgyu mtshan gyis rjes su 'gro ba dang ldog pa dag kyang nges pa yin no/ /de ltar na de ni sngon gyi slob dpon gyis byas pa'i yod pa med pa'i ma byas pa'i yod pa rgyu med pa can ni rtag pa zhes bya ste/rtag pa'i mtshan nyid spangs pas de ni rtag pa ma yin no/ /yod pa skye ba dang ldan pa gang yin pa de bshad pa'i rigs pas gdon mi za bar 'jig par khas blang bar bya'o/ /gzhan dus gzhan du gnas par 'gyur ro zhes bya ba'i lan bshad zin kyang gang dang gang yod pa de dang de ni skad cig ma yin no zhes thun mong du brjod kyi byas pa dang ma byas pa'i mtshan nyid kyi yod pa tha dad pa la ltos pa med pa rgol ba rnon po yin no//byas pa nyid kyang gdon mi za bar 'jig pa yin no zhes gzhan gyis khas blangs pa la mi ltos pa de'i tshe 'jig pa mi ltos pa nyid du thams cad la mi 'grub bo//gang dag 'jig par 'gyur ba bum pa la sogs pa la mthong ba de dag nyid la rgyu mi rigs pas de la mi ltos pa ni rung ngo / /gang yang yul la sogs pa bar du chod pa dang ri bo la sogs pa la 'jig pa dang mi 'jig pa ma mthong bas de dag nyid gdon mi za bar 'jig par khas blangs pa'i rgyu mtshan med pa'i phyir ro//mtha' ma 'jig pa ni ltos pa med pa bzhin du 'jig pa la khyad par med pas dngos po yang de'i ngo bor nges pa yin no zhes brjod par mi nus pa'i phyir ro/ /de'i ngo bo yang ltos pa dang bcas pa'i phyir 'jig pa la ltos pa med pa nyid ma grub bo//ma byas pa dang nam mkha' la sogs pa rnams la 'jig pa'i ngo bo ltos pa dang bcas pa bzhin du ltos pa yod na 'jig pa'i rang bzhin du ma grub po/ /rjes su 'gro ba dang ldog pa dag de'i rgyu mtshan du mi rigs pa mthong ste/don byed par 'gal ba'i mtshan nyid yin pa de'i tshe gnod pa byed pa'i tshad mas de'i bdag nyid rab tu sgrub par byed par brjod par 'gyur ba yin no snyam nas phyogs snga ma slang pa ni gal te ngo bo nyid kyis 'jig pa zhes bya ba smos te/bshad zin pa'i rigs pas 'jig pa bum pa la sogs pa la yongs su mthong du zin kyang yul la sogs pa bskal ba 'ga' zhig gam/ ri bo la sogs pa la byas pa dang 'jig pa mi dmigs pa'am nam mkha' la sogs pa byas pa ma yin pa'i yod pa de'i ngo bo yang mi 'jig pa'i ngo bo ma yin par yang 'gyur ro//yang smos pa ni srid par 'gyur ro/ /'jig pa'i ngo bo de'i sgrub par byed pa'i tshad ma med par dogs pa de dang 'di dag gis 'jig pa'i ngo bo ltos pa dang bcas pa'i phyir ltos pa med pa ma grub pa yin no//de'i dbang gis bsgrub par bya ba skad cig ma nyid yod pa'i ngo bor ma grub po/ /de'i rgyu mtshan gyi rjes su 'gro ba dang log pa yang ma grub pa'i phyir ro/ /yang 'dir dogs pa'i rgyu mtshan ci zhig yin gang gis na 'ga' zhig de ma yin pa la yang dogs pa yin snyam na/thams cad kyi ngo bo nyid thams cad yin pa ni med pas zhes bya ba smos te/ rnam pa sna tshogs pa'i dngos po'i ngo bo mthong ste/ kha cig thogs pa dang bcas pa dang / kha cig thogs pa med pa dang / de bzhin du sngon po dang sngon po ma yin pa la sogs pa'i ngo bo dang /de bzhin du kha cig 'jig pa dang gzhan ni mi 'jig pa'i rang bzhin du phyogs snga ma dogs pa la ma yin te/ kha cig de'i ngo bo ma yin pa la yang 'gyur ro zhes dogs na de bzhin du dngos po de ni skad cig ma ma yin pa nyid du 'gyur ba dang de la yod pa dngos po nyid du thal bar 'gyur bas de ma yin pa'i ngo bor 'gyur dogs pa ga la yin/'o na ji ltar skad cig ma ma yin pa dngos po med par thal bar 'gyur/ des na yod pa dang skad cig ma nyid kyi ngo bo yin pas rjes su 'gro ba dang ldog pa grub po zhe na/ dngos po'i zhes bya ba la sogs pa smos te/'di snyam du sems pa yin te 'dir re zhig 'di nyid rnam par dpyad par bya ste/ ci dngos po de rnams kyi mtshan nyid rigs pa yin nam/ de la yod pa dang 'brel pa'i mtshan nyid ni ma khyab pa yin te spyi la sogs pa rnams la med pa'i phyir ram/mo gsham gyi bu la sogs pa la yang yod pas khyab ches pa nyid do/ /mo gsham gyi bu la sogs pa med pa'i phyir ji ltar yod pa dang 'brel pa yin zhe na/ ma yin te gcig la gcig brten pa nyid kyi phyir ro/ /gang gi phyir med pa de dag ni yod pa dang 'brel pa spangs pa nyid dang de spangs pa yod pa yin pa'i phyir ro//gal te yod pa ni yod pa dang 'brel pa yin pa de lta na 'o na te gzhan las yod pa'i mtshan nyid du brjod pa'i phyir yod pa dang 'brel pa yang don med do/ /de nyid kyi phyir dngos po yod pa'i phyir ro/ /gal te don byed pa'i nus pa thams cad kyis stong pas de dag yod pa dang 'brel pa med pa yin no zhe na/de ltar gyur na don byed nus pa'i mtshan nyid dang ldan pa gang yin pa de nyid yod pa dang 'brel pas don byed nus pa nyid dngos po nyid du 'ongs pas yod pa dang 'brel pa don med do//de ltar na de bzhin du gzhan spyi la sogs pa rnams ji ltar rang gi ngo bos yod par 'gyur/ don byed nus pa ni 'di dag thams cad la yod pas de nyid yod pa'i mtshan nyid do/ /skye ba dang 'jig pa dang gnas pa dang 'brel pa yod pa yin no zer ba de dag ni mi rigs so//gnas pa dang skye ba dang 'jig pa 'gal bas chos can gcig la mi rigs so/ /gal te res 'ga' skye ba dang 'gag pa yin la res 'ga' gnas pa yin no zhe na/ skye ba dang 'jig pa ji lta ba de bzhin du gnas pa med do/ /gnas pa ji lta ba de bzhin du skye ba dang 'jig pa med do//ji skad bshad pa'i dngos po gcig gi mtshan nyid du mi 'gyur ro/ /de'i phyir dngos po gzhan gyi mtshan nyid dang 'brel pa'i nus pa mtha' mas de'i shes pa skyed par khas blangs pa'i phyir ro/ /gzhan gyis tshig gi don drug la sogs pa rnam par gzhag pa de nyid ni yod pa'i mtshan nyid du mi rigs te/nus pa thams cad dang bral ba yang dngos po med pa'i mtshan nyid yin no/ /thams cad smos pa ni dngos po thams cad ni dngos po gzhan gyi nus pa dang bral ba'i ngo bo yin pa'i phyir med pa bsal ba'i don du gang nus pa med pa gang yin pa de ni gcig tu nges pa'i med par brjod do//nus pa'i mtshan nyid ni skad cig ma'i yod pa yin no/ /des na skad cig ma'i bdag nyid ni med par mi 'grub bo/ /gang las rjes su 'gro ba dang ldog pa yin zhe na/skad cig ma ma yin pa ni 'ga' yang gang yang rung ba tha ma'i shes pa skyed pa'i mtshan nyid kyi nus pa skad cig ma yin pa de'i nus pa dang bral bar 'gyur/ gang 'dir nus pa thams cad kyis stong pa'i mtshan nyid kyi med pa dang 'gal bas sel bar byed pa'i yod pa skad cig ma'i bdag nyid du nyams su myong na ni gang gi rjes su 'gro ba dang ldog pa de yin no zhe na/rim dang cig car dag gis zhes bya ba la sogs pa smos te/ stong pa dang nus pa thams cad kyis stong pa skad cig ma ma yin pa ni mngon sum ma yin gyi/ 'on kyang de'i khyad par byed pa stong pa'i phyir ro//de lta na rim dang cig car dag gis bya ba byed pa la khyab ste rnam pa gzhan ni mi srid pa'i phyir ro/ /des na skad cig ma yin pa la khyab par byed pa'i nus pa de dag dang 'gal bas khyab par bya ba ldog pa yin te/ gang gi bya ba byed pa'i nus pa yang ldog pa'i phyir ro//nus pa thams cad kyis stong pa'i mtshan nyid kyi med pa skad cig ma ma yin pa'i khyab par byed pa mi dmigs pas 'dren pa yin te/ 'gal ba dag gcig la mi srid pa'i phyir ro/ /des na ldog pa can gyi yod pa'i skad cig ma rnams ni gnas pa yin te de'i bdag nyid yin pa'i phyir ro//gang yang yod pa de ni skad cig ma kho na yin no zhes bya ba ni rjes su 'gro ba dang ldog pa'i ngo bos khyab pa grub par nges pa yin no/ /'o na ni rnam pa gzhan mi srid pas myu gu la sogs pa'i 'bras bu la sa bon la sogs pa rim dang cig car la sogs pa dag gis byed par brjod na/de nyid rnam pa gzhan dang bral ba'i 'bras bu skye ba rag las grub pa yin/ rnam pa gzhan ni dmigs pa'i rig byar gyur pa yin na ji ltar gtan med pa dang / yul la sogs pa la dgag pa 'ba' zhig tsam nyid yin/ dmigs pa'i rig byar ma gyur pa nyid ni yod pa nges pa ma yin te bskal pa yin pa'i phyir gang las med pa grub pa yin/ de'i phyir rnam pa gzhan don byed pa srid pas rim dang cig car ldog pas kyang don byed nus pa ldog pa ma yin na gang las skad cig ma yin/ nus pa thams cad dang bral ba'i mtshan nyid ni med pa yin na gang gis yod pa dang skad cig ma'i bdag nyid rjes su 'gro ba dang ldog par 'gyur zhe na/ma yin te gnyi ga la yang skyon med pa'i phyir ro/ /'di ltar rim pa zhes bya ba ni go rims so/ /'bras bu gzhan dang lhan cig pa myu gu la sogs pa 'ba' zhig go//cig car yang de las gzhan pa'i sa bon la sogs pa 'bras bu dang lhan cig pa'o/ /rnam pa gzhan ni myu gu la sogs pa de gnyi ga spangs pa yang gzhan du gyur pa rnams so/ /de yang myu gu la sogs pa gzhan dang lhan cig pa dang 'ba' zhig pa'o//med pa ni mngon sum gyis rtogs par bya ba ste yod na mi dmigs pa'i rig byar gyur pa kho na'i ngo bo yin na rim dang cig car med pa dang / mi mngon pa dang mi dmigs pas so/ /dngos po'i dmigs par bya ba dang gzhan dang lhan cig pa dang 'ba' zhig pa med pa'i phyir des dben pa'i yul la sogs pa mngon sum la snang ba skyed pa'i rang bzhin mi dmigs pa kho na med par nges pa la sogs pa'i mtshan nyid kyi tha snyad 'jug go//de'i myu gu la sogs pa'i rang bzhin gyi gnas skabs gnyis las phyi rol du gyur pa dgag pa ni 'ga' zhig yul dang dus dag las yul gzhan la sogs pa'i rim gyis myu gu la sogs pa 'byung ba cig shos la med kyang nyes pa cung zad kyang med do//de'i phyir mngon sum kho nas rnam pa gzhan med par grub pas rim dang cig car dag gis ji ltar don byed par nus pa ma khyab par 'gyur/bstan bcos byed pas ji ltar mngon sum kho nas rnam pa gzhan med par gyur pa de bzhin du rang nyid kyis rim pa dang rim pa can ma yin pa la sogs pa 'di khas blangs pa bshad cing 'chad par 'gyur ro/ /dmigs pa'i mtshan nyid du gyur pa yang rim dang cig car la sogs pa dag phan tshun rnam par gcod pa'i ngo bo yin pa'i phyir rnam pa gzhan med par grub po//de lta na phan tshun rnam par gcod pa'i ngo bo ni gcig dgag pa ni gzhan sgrub pa yin la de yang dgag pa ni ma yin te/ dgag pa dang sgrub pa dag 'gal bas gnyi ga dgag pa'i bdag nyid kyi rnam pa gzhan srid par ga la 'gyur/'dir sbyor ba ni gang dang gang gi rnam pa bcad nas gang gi tshe cig shos kyi rnam pa rnam par gnas pa de dang de la rnam pa gzhan mi srid do/ /dper na sngon po'i rnam pa rnam par bcad nas sngon po ma yin pa'i rnam pa rnam par gnas pa'i ser po bzhin no//thams cad du rgyu dang 'bras bur gyur pa'i dngos po la yang rim dang cig car la sogs pa dag las rnam pa gzhan rnam par gcod pas de las gzhan pa'i rnam pa rnam par gnas pa'i rnam par bcad pa'i yul du byed pa'i phyir zhes bya ba ni rang bzhin 'gal ba dmigs pa'o//rnam par bcad pa'i rnam pas cig shos rnam par gnas pa la rnam pa gzhan ni mi srid pa de'i phyir phyi rol du gyur pa'i mtshan nyid yin no zhes bya'o/ /des na dngos po gzhan gyi ngo bo dag phan tshun spangs te gnas pa'i mtshan nyid yin pa'i phyir ro//'di la yang gnod par byed pa gzhan yod par dogs pas thug pa med par dogs par mi bya ste/ sngar 'gal bar rab tu grub pa dran pa tsam yin pa'i phyir ro/ /'gal ba dmigs pa ni chos can la yod pa'i dngos po nye bar bstan pas 'gal ba sgrub par byed pa nyid kyi gnod par byed pa de yang 'di la yod de/des na 'gal ba dag gcig la mi srid pas mi mthun pa'i dngos por nges te grang ba dang dro ba'i reg pa lta bu dang yod pa dang med pa lta bu'o zhes bya ba thug pa med pa ga la yin/ de la skad cig ma ma yin pa rnams rim gyis 'bras bu mi byed pa la khyad par med pas mi byed pa'i gnas skabs bzhin no//lhan cig byed pa la ltos pa rnams gnyis kyang lhan cig byed par mi rigs pas nye bar dgod par mi bya'o/ /thams cad la bya ba gcig byed pa'i dus de na byed par thal bar 'gyur te/ byed pa po'i rang bzhin de nyid yin pa'i phyir ro//cig car yang rigs pa ma yin te mngon sum dang 'gal ba'i phyir dang / /slar yang byed par thal bar 'gyur ro/ /gal te byas zin pas ma yin no zhe na/ ma yin te nus pa ma zhig pa'i phyir ro/ /de lta ma yin na sngar yang mi byed par 'gyur te mi byed pa'i ngo bo dang khyad par med pa'i phyir ro//gal te byas zin pas byed par mi nus pa'i phyir ro zhe na/ de lta na nus pa dang mi nus pa dag gcig la 'bras bu thal bar 'gyur te/ 'bras dang gso ma'i sa bon bzhin no/ /rtag pa yang gang gi tshe cig car byed pa des na sngar yang yod pas de nyid kyis de byed par thal bar 'gyur ba de'i phyir ches sngar yang de bzhin du res 'ga' zhig cig car byed par mi 'gyur ro//snga ma dang phyi ma dus dag gcig pa'i cha cig car byed pa ni don byed nus pa thams cad bral ba'i mtshan nyid can gyi med par 'gyur ro//ji ltar skad cig ma ma yin pa nyid rim dang cig car ma yin snyam na/ rim pa med pa'i phyogs de la yang sngar bshad pa'i skyon yin no/ /de ltar skad cig ma ma yin par gyur na mig la sogs pa la rag las pa rnams med par thal bar 'gyur bas skad cig ma nyid kyis yod pa'i phyir ro//gang yod pa de ni skad cig ma kho na yin no zhes yod pa 'jig pa'i bdag nyid du grub pas rjes su 'gro ba dang ldog pa'i ngo bo'i khyab pa grub pa yin no/ /bram ze a tsa ta yis rnam par sbyar ba'i 'grel ba las rang bzhin gyi gtan tshigs kyi dbang du byas pa'o// //de ltar rang bzhin gyi gtan tshigs kyi de'i bdag nyid du grub pa'i rgyu mtshan gyi rjes su 'gro ba dang ldog pa nges pa bstan nas 'bras bu'i gtan tshigs rgyu dang 'bras bu'i dngos por grub pa rgyu mtshan yin pa'i phyir de dang de dag mngon sum dang mi dmigs pa'i rgyu mtshan gyis sngar bstan zin pa'i phyir der gtogs la gzhan yang gzhan dag la 'khrul pa'i rgyu bsal ba de'i yul bstan pa ni don gzhan zhes bya ba smos te/gtan tshigs las tha dad pa'i dngos po go bar bya ba las 'bras bu'i gtan tshigs yin te/don gzhan ma yin pa ni rang bzhin gyi gtan tshigs so zhes bshad do/ /ci'i phyir don gzhan nyid 'bras bu'i gtan tshigs yin zhe na/ 'khrul pa med pa'i phyir ro zhes bya ba smos te/ 'bras bu nyid don gzhan pa la mi 'khrul pa yin gyi gzhan du ni ma yin no//des na 'bras bu nyid las gzhan pa'i rgyu go bar bya bar brjod de/ yang dag par ldan pa'i stobs kyis go bar byed pa nyid yin na cha shas 'ga' zhig gis ma yin no zhes bya ba la sogs pa sngar ji skad bshad pa/ gang thams cad du go bar bya ba dang /go bar byed pa'i dngos por thal bar 'gyur bar slob dpon gyis bshad pa de gzhan gyis 'dir yang 'bras bu'i gtan tshigs 'ga' zhig la yang thal bar 'gyur ro zhes dogs pas/ gal te rgyu dang 'bras bu'i dngos po zhes bya ba la sogs pa smos te/ gal te 'bras bu'i gtan tshigs su brjod pa de'i tshe rgyu dang 'bras bu'i dngos po yin pas rgyu'i go bar byed pa nyid do/ /de ltar gyur na thams cad du shes par bya ba dang shes par byed pa'i dngos por 'gyur te/ me'i spyi'i chos bzhin du bye brag gi chos kyang rtswa dang lo ma la sogs pa go bar bya bar 'gyur ro//du ba yang bye brag gi chos bzhin du rdzas dang sa la sogs pa spyi'i chos kyang go bar byed par 'gyur ro/ /gang las she na/ rnam pa thams cad du bskyed par bya ba dang skyed par byed pa'i dngos po yin pa'i phyir ro/ /bskyed par bya ba dang skyed par byed pa'i dngos po ni rgyu dang 'bras bu'i dngos por brjod do//me dang du ba dag kyang cha shas kyis ni ma yin te/ 'on kyang rnam pa thams cad kyis so/ /de ltar na ji ltar me nyid dang rdzas nyid dang yod pa nyid la sogs pa rnams kyi spyi'i chos skyed par byed pa de bzhin du rtswa dang lo ma la sogs pa'i khyad par chos kyis kyang yin no//dper na du ba'i du ba nyid dang skya bo nyid la sogs pa rnams kyi khyad par gyi chos skye bar rang nyid la nges pa de bzhin du spyi'i chos yod pa nyid dang / rdzas nyid la sogs pas kyang yin no/ /des kyang ji ltar de dag rgyu dang 'bras bu'i dngos po yin pa de bzhin du go bar byed pa dang go bar bya bar 'gyur ro//'di dag de'i rgyu mtshan yin no zhes bya ba phyogs snga ma pa dogs pa la/ 'dir rnam pa thams cad du skyed par byed pa dang bskyed par bya ba'i dngos po ma yin te/ des kyang de bzhin du go bar bya ba dang go bar byed pa'i dngos por gyur pa ga la yin/ci'i phyir zhe na/ de med par ni rtswa dang shing la sogs pa de dag gi khyad par gyi chos med par 'byung ba'i du ba tsam nyid las khyad par gyi chos 'byung ba'o/ /de ltar de'i bdag nyid dang de las byung bar nges pa med pa'i phyir ro//de ltar de med par ni me med par rdzas la sogs pa spyi'i chos rnams 'byung ba'o/ /me kho na las 'di 'byung ba yin no zhes bya ba de lta bu'i ngo bo ni de las byung bar nges pa med pas gang las bskyed par bya ba dang / skyed par byed pa'i ngo bor 'gyur/ gang gis na thams cad shes par bya ba dang shes par byed pa'i ngo bo yin pa med na de las 'byung bar nges pa'i bskyed par bya ba dang skyed par byed pa'i dngos po rnam par gzhag par mi nus so//gang gi phyir 'di ltar de bas na 'bras bu ni du ba la sogs pa'o/ /ngo bo ji snyed cig ni du ba la sogs pa rnams so//'di rang gir gtogs pa'i mtshan nyid kyi gsum pa'o/ /med na mi 'byung ba ni med na mi srid pa'o/ /ci med na mi srid pa yin zhe na/ rgyu'i ngo bo ji snyed cig yin no zhes 'dir yang sbyar bar bya'o/ /rgyu la brten pa'i ngo bo ji snyed cig med na 'bras bur gtogs pa'i rang bzhin mi 'byung bar 'di dag gi rgyu yin no zhes bya bar sbyar ro//ci med na mi 'byung ba yin zhe na/ /rgyu'o/ /rgyu'i don gzhan pa'i yul rgyu yin te gzhi'i bdun pa'o/ /da ni rgyu yod pa'i ngo bo ji snyed pa rnams me'i rdzas la sogs pa med na mi 'byung ba dag gi rgyur gtogs pa'i spyi'i chos ni rgyu'o//ci'i phyir 'bras bu go bar byed pa yin zhe na/ de'i 'bras bu nyid du nges pa'i phyir ro zhes bya ba smos so/ /de nyid rgyur gtogs pa'i spyi'i chos de'i 'bras bu yin no zhes de lta bu'i ngo bor nges pa yod pa'i phyir ro/ / rgyu'i spyi'i chos la res 'ga' zhig kyang de'i 'bras bu 'khrul pa med do/ /de ltar rgyur gtogs pa'i cha shas kyi phyi ma don du gnyer bas nges par dpyad na snga ma don du gnyer bas 'bras bur gtogs pa'i cha shas nges par dpyod do/ /gang dag ces bya ba la sogs pa smos te/'bras bu'i chos dang de dag nyid kyi bdag nyid du gtogs pas rgyur gtogs pa'i chos rnams go bar byed do/ /gang yang don gzhan pa srid pa ni du ba nyid dang skya bo la sogs pa khyad par gyi ngo bo de ni rgyur gtogs pa'i chos med na mi 'byung ba'o/ /'dir yang de'i 'bras bu nyid du nges pa la ltos pa'o//'bras bur gtogs pa de dag nyid kyi khyad par gyi chos rnams kyi rgyur gtogs pa'i spyi'i chos la ltos nas 'bras bu nyid du nges pa'i phyir ro/ /'bras bur gtogs pa'i khyad par gyi chos de ni rgyur gyur pa'i spyi'i chos med na res 'ga' zhig kyang mi 'byung ngo //de ltar na de'i rgyu'i ni spyi'i chos kho na go bar bya ba yin la bye brag gi chos ni ma yin no/ /'bras bu yang bye brag gi chos kho na go bar byed pa yin gyi spyi'i chos ni ma yin pa des na 'bras bur nges pas so/ /gang yang rgyu'i bye brag gi chos de'i 'bras bu nyid du nges pa'i 'bras bu tsam ni med pas de ni mi rtogs so//'bras bu spyi'i chos ni rdzas la sogs pa gang yin pa de dag de'i 'bras bur nges pa med pas go bar byed pa med do/ /rgyu dang 'bras bu dngos po go bar byed pa yin na rnam pa thams cad du go bar byed par thal bar ga la 'gyur/gzhan mi 'dod pa'i dogs pa bsu ba ni gal te cha shas kyis zhes bya ba la sogs pa smos te/ gal te rgyu spyi'i chos go bar bya ba yin la 'bras bu'i bye brag gi chos nyid kyang go bar byed pa yin pas de 'bras bu nyid du nges par 'dod na/de lta na cha shas kyis bskyed par bya ba dang skyed par byed pa'i dngos por 'gyur ro/ /rgyu'i spyi'i chos kho na skyed par byed pa yin la bye brag ni ma yin te/ 'bras bu'i bye brag gi chos kho na bskyed par bya ba yin gyi spyi'i chos ma yin no zhes bya bar 'gyur te/rnam pa thams cad bskyed par bya ba dang skyed par byed pa'i dngos por mngon par 'dod pa'i phyir khas blangs pa dang 'gal lo zhe na/ 'di dag gi lan ni cha shas kyis bskyed par bya ba dang skyed par byed pa'i dngos por thal bar mi 'gyur ro/ / dngos po'i bdag nyid thams cad cha shas med par de khas/ blangs pa'i phyir go bar bya ba dang go bar byed pa'i dngos po yang rnam pa thams cad du mngon par 'dod pa'i phyir de ni nges bskyed par bya ba zhes bya ba la sogs pa smos te/ gang 'bras bu ni rgyur gyur pa'i khyad par gyi chos kyis bskyed par bya ba yin na ni khyad par de gzung bar bya ba yin la/de'i tshe nges bskyed par bya ba'i khyad par gzung nas rgyur gyur pa'i khyad par gyi chos go bar bya ba nyid du mngon par 'dod pa'i phyir ro/ /de lta na du ba la sogs pa'i rtags kyi khyad par gyi ngo bo'i bye brag rnams 'bras bur gyur pa'i rdzas la sogs pa spyi'i gang yin pa de dag kyang go bar byed pa nyid du mngon par 'dod pa'i phyir ro//de lta na a ka ru'i du ba bzung bar gyur pa las de nyid me rjes su dpog pa dang / du ba nyid kyi khyad par rdzas la sogs pas me rjes su dpog pa yin no//rnam pa thams cad du bskyed par bya ba dang skyed par byed pa'i dngos po yod pa tsam gyis go bar bya ba dang go bar byed par mi 'gyur ro/ /de ni shes pa la ltos pa'i phyir ro/ /de lta na yod pa tsam gyi rtags ni go bar byed pa ma yin te de shes par byed pa la ltos pa'i phyir ro//shes par byed pa ni rang nyid nges pa la ltos nas shes par bya ba'i don shes par 'gyur gyi gzhan du ni ma yin no/ /ji ltar de med par 'byung ba ni de las 'byung bar nges pa med pa'i phyir zhes bshad pa na/ rnam pa thams cad du bskyed par bya ba dang skyed par byed pa'i dngos po khas blangs pa 'di med par 'byung ba ni med pa yin no zhe na/khyad par can ma yin pa zhes bya ba la sogs pa smos te/ gal te de skyed pa'i khyad par 'dzin pa spangs pa ni khyad par can ma yin pa'i 'bras bu tsam khas blangs pa'am/ rtags kyi khyad par spangs pa'i rdzas la sogs pa yin pa de'i tshe khyad par med pa'i spyi yang brjod par 'dod pa yin no//rgyur gyur pa'i khyad par yod pas kyang du ba tsam 'byung ba de'i khyad par can ma yin pa'i rdzas la sogs pa ni med kyang 'byung bas 'khrul pa yin pa'i phyir rnam pa thams cad du bskyed par bya ba dang skyed par byed pa de med pas go bar bya ba dang go bar byed par mi 'dod do//khyad par ni rjod par 'dod pa ma yin te de la 'khrul pa srid pa'i phyir ro/ /'di ltar gal te du ba tsam gyi rtswa dang shing la sogs pa'i khyad par med kyang 'byung ba yin/ skyed pa'i khyad par ni ma yin te/ gang gi tshe de 'dzin par nus pa de'i tshe khyad par go bar bya ba nyid du yod pa kho na ste rtags nges pa'i phyir ro//de lta na gal te rdzas nyid dang yod pa nyid tsam me yod pa las 'byung ba yin gyi du ba'i bdag nyid ma yin pas de'i khyad par ni mi 'khrul pa'i go bar byed pa yin yang bsal bar mi bya'o/ /'di gzhan gyi dogs pa brjod pa'i go skabs ni gal te res 'ga' zhig ces bya ba smos te/'ga' zhig ni du ba la sogs pa'o/ /res 'ga' zhig ni dus kha cig tu'o/ /'ga' zhig las ni me la sogs pa'o/ /'byung ba yang ni yod do/ /thams cad ni du ba'o/ /de dang 'dra ba ni/ gang dang 'dra bar me la sogs pa gcig las 'byung ba mthong ba'o//de las skyes pa ni rnam pa de lta bu'i skye ba ni rnam pa ji lta ba de gcig las 'byung bar mthong ba de 'dra ba nyid skye ba gang yin pa de ni rnam pa de lta bu'i skye ba'o/ /'di dag tshad ma gang las nges pa yin zhe na/ 'bras bu'i gtan tshigs kyi rgyu dang 'bras bu'i dngos po sgrub pa'i rgyu mtshan gyi rjes su 'gro ba dang ldog pa gang yin brjod pa yin no//gal te de lta na mngon sum dang mi dmigs pa dag gis du ba 'ba' zhig me'i tshogs pa'i 'bras bur gtogs pa ci de tsam gyis gzhan de dang 'dra ba'i de dang 'dra ba 'bras bu grub par 'gyur ram/ de la de'i rgyu mtshan dag mngon sum dang mi dmigs pa dag gis byed pa med de/ gang la de dag kho na gzhan gyis byed pa de ni gzhan de'i 'bras bur 'gyur ro/ /de gzhan yin na ci zhig tu 'gyur/ gang gis rnam pa de lta bu'i skye bar 'gyur/ de lta na du ba'i gsal ba 'ga' zhig me la sogs pa las skye ba mthong ba de cis na bum pa la sogs pa las kyang khas mi len gzhan par khyad par med pa'i phyir ro//gal te de dag las nyes pa cir 'gyur zhe na/ de ltar gyur na tshad ma med pas de ltar rnam par dbye ba'i bdag nyid la nges pa med pas de dang mi 'dra ba las skye bar dogs pa na de 'dra ba'i du ba la sogs pa dang rjes su 'gro ba dang ldog pa dag la nges pa med na gang gis 'bras bu gtan tshigs go bar byed pa nyid yin/yul dang dus gcig na gnas par nges pa gang yin pa de kho na'i me'i khyad par gyi rgyu can gyi du ba mngon sum dang mi dmigs pas rtogs kyi de nyid kyi rjes su 'gro ba dang ldog pa rtogs pa ni med de de yul gzhan na mi srid pa'i phyir ro//de lta na 'on te de 'dra ba'i spyi'i bdag nyid rtags yin pas de'i rnam pa de lta bu yang skye bas sems rnam pa de lta bu'i rjes su 'gro ba'am ldog pa ga la yin/ de skad du/ yul dang dus dang gnas skabs rnams/ /tha dad nus pa tha dad la/ /dngos rnams rjes su dpag pa yis/ /rtogs pa shin tu rnyed par dka'/ /zhes bshad do zhe na/ grub pa'i mtha' smra ba la ma yin te/ de las byung ba zhes bya ba la sogs pa smos te/ 'dir lan cig du ba la sogs pa'i tshogs pa las 'byung ba mngon sum dang mi dmigs pa dag gis nges pa'i ngo bo yang de 'dra ba dang de dang mi 'dra ba yod pa dag ji lta bar yongs su mthong ba las gzhan pa nyid dang mtshungs par dogs pa dang /de la me la sogs pa'i tshogs pa las skye ba'i du ba'i khyad par lan cig nges pa gang yin pa de la ltos pa ni de las gzhan pa'i khyad par de dang 'dra ba dang gang de dang mi 'dra ba'i dngos po rnams kyang nus pa sna tshogs pa dang de las 'byung ngo zhes dogs pa la/de bzhin du de yang lan cig me la sogs pa'i tshogs pa las 'byung bar nges pa de'i tshe dang 'dra ba nyid ni gzhan la ltos pa'o//de la gang gi tshe de las gzhan pa de 'dra ba las de dang 'dra ba skye bar 'gyur ba de'i tshe de dang mi 'dra ba'i ngo bo ni me la sogs pa'i tshogs pa las skye ba'i ngo bo ma yin te/ yongs su ma mthong ba'i du ba de yang me'i tshogs pa rgyu yin par 'gyur ro//de dang 'dra ba'i ngo bo ni me la sogs pa'i tshogs pa dang mtshan nyid mi 'dra ba'i rgyu'i ngo bo las skye ba'i phyir dang / des na me la sogs pa'i tshogs pa rgyu ma yin pa'i phyir de nyid lhan cig pa de las byung bar mthong ba'i du ba gang yin pa de yang mi 'byung bar 'gyur ro//gang 'di'i rgyu ma yin pa de dang de ni lan 'ga' yang de las 'byung bar mi 'gyur te de rgyu med par thal ba'i phyir ro/ /de las 'byung ba ma yin pa zhes bya ba las de smos pa ni me la sogs pa'i rgyu brjod par 'dod pa gzung ngo / /de ma yin pa ni de med pa'o//de dang mtshan nyid mi mthun pa dang de dang mi 'dra ba brgya byin gyi spyi bo la sogs pa'o/ /de'i phyir 'byung ba'i ngang tshul can de ni de las byung ba'o/ /de dang 'dra ba'i mtshan nyid de'i du ba'i dngos po'o/ /lan 'ga' yang ni lan cig kyang ngo / /me la sogs pa de las mi 'byung bas yod par 'gal ba'i phyir ro//de 'dra ba yin du zin na me la sogs pa'i tshogs pa de las de dang 'dra ba'i ngo bo ni de dang 'dra ba nyid rgyu yin no zhes lan cig 'byung ba kho nas mngon sum dang mi dmigs pa dag gis rtogs par bya ba yin na/ gang las 'khrul par dogs par bya/des na ci 'dra ba'i du ba dang me la sogs pa'i tshogs pa las byung bar mthong ba de 'dra ba de ni de'i ngo bos de dang 'dra ba nyid du 'byung bas so/ /gang du ba yod pa de la me'i tshogs pa yod par rjes su 'gro ba dang ldog pa nges pa yin no/ /yang na gzhan du bshad par bya ste/'dir mngon sum dang mi dmigs pa rgyu mtshan gyi 'bras bu dang rgyu'i dngos por grub po zhes sngar bshad zin to/ /de'i rgyu mtshan gyi rjes su 'gro ba dang ldog pa dag bstan par 'dod pa de ni mi rigs te/ 'di ltar du ba 'ga' zhig me la sogs pa'i tshogs pa las gzhan la 'byung ba ste/res 'ga' zhig 'di thog mar skye ba'i dus dang po ni me la sogs pa'i tshogs pa las kyang skye'o/ /thams cad du de dang 'dra ba ni ma yin te du ba'i skad cig ma dang po ci 'dra ba 'byung ba'i skad cig ma gnyis pa la sogs rnams kyang mngon sum kho nas de dang 'dra ba de ni snga ma dang mtshan nyid mi mthun par rtogs te/rnam pa de lta bu'i skye ba zhes bya ba ni/ ji lta bu'i rnam pa'i me dang bud shing gi tshogs pa'i mtshan nyid dang por du ba skyes pa'i rnam pa de lta bu skye ba gang yin pa de ni rnam pa de lta bu'i skye ba yin no zhes bya ba 'di gang gis ma yin/de ni du ba las kyang 'byung ba'i phyir ro/ /de ltar gang dang gang las mthong ba de ni gzhan la yang yod par mthong bas thams cad la yid brtan du med do snyam du sems pas de ltar na zhes bya ba smos te/ me ma yin pa'i du ba las kyang du ba 'byung la brgya byin gyi spyi bo la sogs pa las kyang 'byung bas 'gal ba med do//me dang du ba la rjes su 'gro ba dang ldog pa dag ma yin no zhes sems pa phyogs snga ma'i dogs pas 'di skad du/ skad cig dngos po kha cig tu/ /ji ltar rag las 'jug pa yin/ /rgyur grags pa ni yod pa las//'di 'byung de las yod pa yin/ /de phyir mes min du ba las/ /du ba srid yin ji lta ba'i/ /brgya byin spyi bo de bzhin de/ /srid pa gang gis bsal bar nus/ /zhes bshad do zhe na/ grub pa'i mtha' smra bas ma yin te zhes bya ba smos te/ bud shing gi tshogs pa las skyes pa ci 'dra ba'i du ba de 'dra ba kho na du ma las kyang 'byung ba yang ma yin te/rgyu'i nus pa tha dad pas bdag nyid 'ga' zhig las 'dra bar nges pa yang mi 'dra ba yin pa'i phyir ro/ /de dang 'dra ba me dang bud shing gis tshogs pa'i skad cig ma gzhan las skyes pa dang po kho na las gzhan pa'i skad cig ma yin pa de bzhin du de las gzhan pa'i dngos po nyid me dang bud shing gi tshogs pa gzhan las skye bas de 'dra ba'i du ba ni dus 'byung ba mi srid do//la lar 'bras bu la yid brtan du med pa ma yin no//de bzhin du ci 'dra ba'i skad cig ma gnyis pa la 'byung ba ni du ba'i skad cig ma dang po la skye ba'i du ba'i skad cig ma de dang 'dra ba du ba gzhan gyi skad cig ma dang po las skyes pa can gyi du ba'i skad cig ma gnyis pa dang gsum pa la sogs pa'o/ /de bzhin du skad cig ma gsum la sogs pa'i myu gu la sogs pa rnams la yang thams cad du brjod par bya'o//gang las 'di'i rnam par dbye bar bya ba yang yin zhe na/ de las 'byung ba can ma yin pa ni me dang bud shing la sogs pa'i ngo bo de las ma yin pa'i du ba las 'byung ba'i ngang tshul can skad cig ma dang po dang mtshan nyid mi mthun pa'i du ba ni lan 'ga' yang ni lan gcig kyang ngo //de las ni me la sogs pa'i tshogs pa las mi 'byung ba'i phyir 'byung ba mi rigs so/ /dper na skad cig ma dang po la ltos pa'i gnyis pa de dang 'dra ba de bzhin du skad cig ma dang po la ltos pa de yang de 'dra ba nyid du khyad par med pas de dang 'dra ba yin no//me ma yin pa las 'byung ba can me las skyes pa de dang 'dra ba'i ngo bo med pas lan 'ga' yang de las mi 'byung ba'i phyir ro/ /des bskyed par bya ba'i ngo bo yin na ni bdag nyid yin pas mi 'dra bar ga la 'gyur/ de'i phyir mi 'dra ba las byung ba las mi 'dra ba ma yin pa des na 'khrul pa med do/ /gal te du ba'i skad cig ma thams cad ni mgul pa skam pa dang mchi ma 'byung ba dang / kha dog gnag par byed pa la sogs pa'i don byed pa nye bar mkho bas/ ji ltar de dang 'dra ba'i rang bzhin du mi 'gyur zhe na/de la yang don byed pa med de skad cig ma tha dad pa la rag las pa'i ngo bo ni de dang 'dra ba med pas de las skyon mtshungs pa'i phyir ro/ /gal te de lta na 'jig rten pa thams cad ji ltar du ba'i tha snyad pa yin zhe na/ 'dra ba gzhan 'byung ba'i rgyu mtshan gcig tu mngon par zhen pa'i dbang gis skad cig ma'i tha snyad du rung ngo //gal te 'dra ba de dang 'dra ba ji ltar ma yin zhe na/ 'dra ba ni de dang 'dra ba las gzhan yin pa'i phyir ro/ /de lta na ba lang dang 'dra bar gyur pa'i ba men ni de dang 'dra ba ma yin gyi ba lang nyid gzhan de dang 'dra ba'i phyir ro//don dam par na de dang 'dra ba med kyang blo dman pa rnams de dang 'dra ba 'dod pa 'byung ba gang gis bsal bar nus pa de lta na tshu rol mthong ba de ma yin pa re zhig der mngon par zhen pa bsal bar nus pa ma yin na/ de dang 'dra ba mngon par zhen pa la ci zhig byar yod/de skad du/ dbyibs dang kha dog mtshungs pa yi/ /rgyu gzhan skye bar gyur pa la/ /de min de blo'i skye bo ni/ /rgyun gcig pa la'ang ci byar yod/ /ces bshad do/ /de kho na nyid sems pas ni de dang 'dra ba de dang mi 'dra ba'i rgyu tha dad pas de dang 'dra ba dang de dang mi 'dra ba rnams rjes su dpog go//de 'dra ba nyid ma yin pa gang gi tshe de dang 'dra ba ma yin pa la yang de dang 'dra ba med pa de'i tshe de skyed pa'i ngo bo ma yin pa'i phyir de las 'byung ba can ma yin pa ni lan 'ga' yang de las 'byung bar mi 'gyur ro/ /don byed par nus pa ni phan tshun ltos pas zhes bya ba la sogs pa smos te/rgyu la ltos nas bskyed par bya ba'i rgyu dang 'bras bu'i ngo bo la ltos pa'o zhes shes so/ /de lta ma yin na de las byung ba dag cig shos mi rigs pas des bskyed par bya bar mi rung ba'i phyir ro/ gal te de ltar de las dpag phas ci zhig 'grub ce na/ de la zhes bya ba smos te/ de la rig par gyur pa'o/ /gal te du ba ci 'dra ba dang por me la sogs pa'i tshogs pa las skyes pa skad cig ma gnyis pa la sogs par byung ba de dang 'dra ba'o/ /me la sogs pa'i tshogs pa'i ni bud shing la sogs pa'i tshogs pas de skyed par byed pa'i ngo bo'o//de spangs pa ni de las gzhan pa'o/ /me dang bud shing la sogs pa'i tshogs pas bskyed par bya ba de las gzhan pa las du ba'i skad cig ma 'byung bar gyur na de ni de dang 'dra ba'i ngo bo 'di'o//des bskyed par bya ba ni me'i tshogs pas bskyed par bya ba'i ngo bo ma yin no/ /'on kyang du ba bskyed par bya ba kho na byas zin pa lan 'ga' yang me la sogs pa'i tshogs pa las mi 'byung ngo / /de dang 'dra ba'i du ba'i ngo bo gzhan las 'byung na des bskyed par bya'i ngo bo ni ma yin pa la sogs pas bskyed par bya ba'i ngo bo'o//gang las she na/ lan 'ga' yang de las 'byung bar mi rigs so/ /'dir dpe ni don gzhan bzhin no zhes bya ba ni dper na myu gu las don gzhan pa de ma yin pas bskyed par bya bar mngon par 'dod pa ni gzhan las 'byung bas de ma yin pas bskyed pa'i ngo bo ste/me la sogs pa'i tshogs pa las skye ba'i ngo bo ma yin pa'i phyir lan cig kyang de las 'byung bar mi 'gyur ba de bzhin du de dang 'dra ba'i du ba yang de las byung ba dang mi 'dra ba nyid 'dir rtogs par bya'o//gal te me la sogs pa'i tshogs pas 'di de ma yin pas bskyed par bya ba'i ngo bo yin yang de dang 'dra bar stobs kyis skyed par byed la rag las na de'i nyes pa yin no zhes 'dod na/ de skyed pa zhes bya ba smos te/ de skyed pa'i ngo bo ma yin pa'i bdag nyid 'ba' zhig de las mi 'byung ngo //'on kyang me la sogs pa'i tshogs pa des kyang de dang 'dra ba'i du ba skad cig ma gnyis pa 'byung ba ci 'dra bar mi skyed do/ /gang las she na/ de skye ba'i ngo bo ma yin pa'i phyir ro/ /de dang 'dra ba gzhan las 'byung na ni de kho na des bskyed pa'i ngo bo yin te me la sogs pa'i tshogs pa de skyed pa'i ngo bo ma tshang na ji ltar de skyed par 'gyur/'dir dpe ni tshogs pa gzhan yin no/ /dper na tshogs pa gzhan de ma yin pa skyed par mngon par 'dod pa'i ngo bo ni des bskyed pa ma yin pa de bzhin du me la sogs pa'i tshogs pa las kyang yin no//de lta na de bdag nyid kyi ngo bo'i rjes su 'brang bas 'jug pa yin no/ /de'i phyir tshogs pa'i stobs kyis 'di skye bar ga la 'gyur/ gal te me la sogs pa'i tshogs pa las skye ba'i ngo bo las kyang de dang 'dra ba'i du ba'i ngo bo skyed pa yang yin te/dper na du ba de nyid bud shing las skye ba'i ngo bo dang me las skye ba'i ngo bo gnyi ga yang yin pa de bzhin de 'dra ba du ba yang tshogs pas bskyed par bya ba'i ngo bo yin pas gnyis las 'byung bar 'gyur ro zhe na/ du ba de ni zhes bya ba smos te de dang 'dra ba'i du ba de dang de ma yin pas bskyed par bya ba ni me la sogs pa'i tshogs pas bskyed par bya ba dang du bas bskyed pa'i ngo bor rigs pa ma yin na rigs pa dang 'brel pa ga la yin/ngo bo gcig yin pa'i phyir na de dang 'dra ba'i du ba tha dad pa med pa'i phyir ro/ /de'i dus tha dad pas kyang de'i ngo bo tha dad par mi 'gyur ba ma yin no//tha dad pa ni mi 'dra ba las byung ba'i mi 'dra ba brtsad par mi rigs so/ /gang gi tshe de'i de 'dra ba dang de mi 'dra ba'i rgyus bskyed pa de ni de 'dra ba dang de mi 'dra ba ngo bo nyid du 'gyur ro/ /de nyid bstan pa ni du ba dang du ba ma yin pa zhes bya ba la sogs pa smos te/du ba smos pa ni ci 'dra ba'i me la sogs pa'i tshogs pa la skyes pa de dang 'dra ba'i ngo bor mngon par 'dod do/ /du ba ma yin pa smos pas kyang mi 'dra ba'i rgyu las skyes pa'i du ba ma yin pa mi 'dra ba'o/ /de dag kyang de dang 'dra ba dang mi 'dra ba'i rgyu las skyes pas de dang 'dra ba dang de dang mi 'dra ba'i ngo bor 'chad par mi 'gyur ba'i rigs pas khong du chud par bya'o//des na me dang du ba'i mtshan nyid las du ba las du ba skyed pa'i ngo bo ni de dang de mi 'dra ba skyed pa'i ngo bo yin pas de dang 'dra ba dang de mi 'dra ba dag 'byung ba yin na du ba dang du ba ma yin pa dang de 'dra ba dang de mi 'dra bar 'gyur ro//gang las 'dra ba nyid yin zhes ga las she na/ 'bras bu'i ngo bo nyid rnams zhes bya ba la sogs pa smos te/ 'bras bu'i ngo bo nyid rnams ni phan tshun 'byung ba gang yin pa de ni phan tshun mtshan nyid mi mthun par rgyu'i tshogs pa'i rang bzhin gyis byas pa yin gyi ngo bo nyid kyis ni ma yin te/rgyu med par thal bar 'gyur ro/ /de'i phyir de 'dra ba dang de mi 'dra ba las byung ba'i du ba de 'dra ba dang de mi 'dra ba'i ngo bor mi 'gyur ro/ / gal te de 'dra ba dang de mi 'dra ba'i ngo bo ni rgyu de 'dra ba dang de mi 'dra ba la ltos nas/ 'bras bu skyed pa tsam kho na rgyu la ltos pa yin par 'dod do zhe na/ rgyu la mi ltos zhes bya ba smos te/ de 'dra ba dang mi 'dra ba'i ngo bo dag de dang 'dra ba dang de mi 'dra ba'i rgyu la mi ltos na de dang 'dra ba dang de mi 'dra ba dag rgyu med pa nyid du thal bar 'gyur ba'i phyir ro//de 'dra ba dang de mi 'dra ba'i ngo bo ma byung ba las tha dad pa gzhan 'ga' zhig skye ba ni med do/ /gang la de 'dra ba de mi 'dra ba'i rgyu la mi ltos pa rnams kyang de la ltos par 'gyur ro//de lta bas na skyed pa smos pas ni de dang 'dra ba dang de mi 'dra ba'i ngo bo nyid brjod do zhes bya'o/ /de la rgyu la ltos par khas blangs pa ji ltar de 'dra ba dang de mi 'dra ba rgyu la mi ltos pa yin/ de'i phyir tshogs pa ni de 'dra ba dang de mi 'dra ba yin pas rgyu rnams de 'dra ba dang de mi 'dra ba'i ngo bo rnam par dbye bar bya ba yin na gang gis na mi 'dra ba las 'dra bar 'byung bar 'gyur ro zhes de ni bshad zin to//dper na du ba gcig kyang me dang bud shing mtshan nyid mi mthun pa dag las skye bar 'gyur ba de bzhin du 'bras bu gcig pa yang mi mthun pa'i tshogs pa gzhan las kyang 'byung bar 'gyur ro zhe na/de ni mi rigs te/ gang gi phyir kho bo cag kyang mtshan nyid mi mthun pa rnams skyed par byed pa nyid sel bar ni mi byed kyi bskyed par bya ba nyid phan tshun mtshan nyid mi mthun pa yang rang gi rgyu yongs su gyur pa las skyes pa'i chos de'i gnas skabs nges pa'o//de'i 'bras bu gcig pa de ni de dag phan tshun ltos nas bskyed par bya ba dang skyed par byed pa'i ngo bo nyid du nges pas de dang 'dra ba las de 'dra ba kho na skye bar brjod kyi mi 'dra ba las ma yin te/ de ni des bskyed pa'i ngo bo yin pa'i phyir ro/ / de med kyang gzhan yod pas de skyed pa nges pa ni mi srid pas rgyu dang 'bras bu'i dngos po ma nges pa ni mi rigs pa'i phyir ro/ /gal te me dang bud shing gi nye bar len pas phan btags pa ni bud shing bzhin du de'i nye bar len pas phan btags pa de'i gnas skabs nges pa ni de rigs mi mthun pa las kyang du ba la sogs pa rigs mthun pa'i du ba skye bar 'gyur na mngon sum dang mi dmigs pa dag gis kyang de bzhin go bar 'gyur ro//de ni me la sogs pa bzhin du de yang de bskyed pa'i rang bzhin du nges pas rigs 'dra ba skyed par byed par cis na rjes su mi dpag /de med kyang rigs mthun pa 'byung bas de bskyed par bya ba dang skyed par byed par ngo bos nges pa med do/ /gang gis na rgyu dang 'bras bur de dag gis rigs mthun pa dang rigs mi mthun pa'i dngos po'i rgyu can du 'gyur ba gang gi phyir/ de ltar na de'i phyir de bud shing la sogs pa'i tshogs pa'i khyad par dang ldan pa dang por du ba skyed pa gang yin pa de'i du ba ni dang por me la sogs pa'i tshogs pa'i khyad par las skye ba kho na yin gyi gzhan ni ma yin no zhes rgyu dang 'bras bu grub pa dag grub pa de ltar ji skad bshad pa'i rigs pas bskyed par bya ba dang /skyed par byed pa'i rang bzhin du nges par mthong ngo / /gang rgyu rnams lan 'ga' mngon sum dang mi dmigs pa dag gis nges pa'i phyir ro/ /rigs mi mthun pa ni mi 'dra ba'i rgyu las skye ba de dang 'dra ba'i 'bras bu ma yin gyi mi 'dra ba sel ba ni ma yin no//de ltar na de ni de 'dra ba dang de mi 'dra ba'i rgyu byas pa nyid de dang 'dra ba dang de mi 'dra ba'i ngo bor rtogs par bya ba'i mjug bsdu ba ni de lta bas na zhes bya ba smos te/ ci 'dra ba'i 'bras bu ni ci 'dra ba'i rgyu las byung bar mngon sum dang mi dmigs pa dag gis mthong bas lan cig nges pa de ni de la 'khrul pa med do//de 'dra ba mi 'dra ba las mi 'byung ste rgyu gang yin pa des na rgyu dang 'bras bu'i dngos po grub po/ /de 'dra ba'i 'bras bu ni de 'dra ba'i rgyu kho na las nges par gyur pas/ ji skad bshad pa'i rigs pas 'bras bu la rgyus khyab pa'i rjes su 'gro ba dang ldog pa'i ngo bo grub pa yin no//rigs mi mthun pa las byung ba las byung bar mthong ste rgyu rigs mi mthun pa las rgyu dang mi 'dra ba mi skye ba ma yin no zhes don med par bstan pa ni rigs mthun pa'i rgyu las 'bras bu mi skye'o zhes bya ba 'di'i don 'dir mngon par 'dod do snyam nas gzhan dag rtsod pa ni gal te rang nyid rigs mi mthun pa las kyang 'bras bu cung zad 'byung ba mthong na/de rigs mi mthun pa las mi skye'o zhes bya ba ji ltar mthong ba dang 'gal bar mi 'gyur ro/ /dpe ji lta bu zhe na/dper na ba lang gi lci ba zhes bya ba smos te/ sogs pa smos pas ni rwa dang chu shel la sogs pa'o/ /sha lu ka la sogs pa smos pas ni smyug ma dang chu la sogs pa'o/ /grub pa'i mtha' gzhan gyi 'khrul par bstan pa ni rigs mi mthun pa las byung ba ma yin te zhes bya ba smos te/gang gi phyir rgyu gang las 'byung bar mthong ba de dang de ni mi 'dra ba las mi 'byung ngo zhes bya ba 'di'i don 'dir brjod par 'dod kyi 'bras bu rigs mi mthun pa las ma yin pa'i phyir de la 'khrul pa med do/ /de ni de lta bu kho na'i zhes bya ba smos te/ba lang gi lci ba la sogs pa'i ngo bo de dang 'dra ba'i ut+pal la sogs pa'i dang po'i rgyu mtshan de/ ut+pal la sogs pa'i rgyun gyi dang po thog mar rtsom pa'i skad cig ma de'i rgyu yin par grub pas ut+pal la sogs pa'i rgyun du gyur pa las rgyu tha dad pa mi 'dra bas skyed pa ni ma yin no//thams cad kyis de'i tshe dang por ba lang gi lci ba la sogs pa rgyu mtshan yin pa'i phyir ro/ /gang gi tshe rgyun gyi sngon ma'i skad cig ma rgyu mtshan yin pas phyi ma phyi ma'i skad cig ma rnams rgyan gyis bskyed pa'i mtshan nyid du 'jug par 'gyur ba de'i tshe smyug ma las smyug ma 'byung ngo //de ni de bzhin du gang gi rgyun rwa la sogs pa dag las 'byung ba ni smyug ma de dang 'dra ba ma yin no/ /gang yang smyug ma de las phyi ma phyi ma 'byung ba de dang rwa las byung ba mi 'dra ba'i phyir rigs mi mthun pa'i rgyu las mthong ba dang 'dra ba mi srid pas 'bras bu'i gtan tshigs kyi rjes su 'gro ba dang ldog pa nges so//gang gi tshe ut+pal sogs pa snga ma snga ma rigs mthun pa dang rjes su 'brel ba thog ma med pa nas rgyun du 'byung bar 'dod pa de'i tshe yang ba lang gi lci ba la sogs pa yang brgya la 'byung ba yang de dang 'dra ba med pas 'khrul pa yin no zhes bstan pa ni yang na zhes bya ba la sogs pa smos te/ut+pala'i rgyun gang yin pa dang ba lang gi lci ba la sogs pa'i rgyun gang yin pa yang thams cad du rigs mthun pa'i rgyu mtshan dag gis ba lang gi lci ba dang / cig shos las skye ba can gyi ut+pal ngo bo nyid tha dad pa yod do//gal te phan tshun mi 'dra ba nyid kyi gzugs kyi rnam pa tha dad par gyur pa la yang rnam pa mtshungs pa yin na ji ltar mi 'dra ba yin zhe na/ dngos po rnams kyi rnam pa mtshungs pa kho na'i zhes bya ba smos te/ ni zhes bya ba ni gang gi phyir ro//de nyid de dang 'dra ba'i rgyu mtshan ni ba lang gi lci ba dang cig shos las skye ba can gyi ut+pal dag rnam pa mtshungs par 'gyur gyi/ rigs tha dad pa'i rgyu ma yin/ 'di ga las she na/ rnam pa tha dad pa ma yin pa zhes bya ba la sogs pa smos te/ gang dag rnam pa mtshungs pa nyid kha cig gis dngos po de dag kyang gang las rnam pa las khyad par gzhan gyi sgo nas tha dad par mthong ba'i phyir ro//de'i phyir rnam pa mtshungs pa nyid rigs gcig pa'i rgyu mtshan ma yin no/ /de ltar na rnam pa mtshungs kyang kha cig me tog tha dad pa mthong ste sngon po dang cig shos kyi ku su ma'i zhwa mo lta bu'o//la lar 'bras bu'i sgo nas gzhan pa cig shos kyi karko ta lta bu'o/ /la lar ro'i sgo nas gzhan pa dang cig shos kyi ga gon lta bu'o/ /la lar dri'i sgo nas shing dang cig shos las byung ba'i tsam pa ka lta bu'o/ /la lar nus pa'i sgo nas reg pa dang zos pa las 'khru ba'i a ru ra lta bu'o//de'i phyir rnam pa mtshungs pa'i rgyu mtshan gyis gang la de nyid 'di yin no zhes ngo shes pa skyed pa'i ba lang gi lci ba dang cig shos las skyes pa la ut+palar nye bar rtog go/ /de bzhin du mtshan nyid mi mthun pa'i tshogs pa las skyes pa de dag rigs tha dad pa nyid du rtogs par bya ste rigs gcig pa ma yin no//de nyid kyi phyir ngo shes pa ni 'khrul pa nyid des de dang 'dra bar brtags pa ni brdzun pa'i phyir ro/ /gal te ba lang gi lci ba dang cig shos la sogs pa las skyes pa'i ut+pal la sogs pa'am/me las skyes pa'i du ba la sogs pa la du ba ngo shes pa'i dbang gis mtshan nyid mi mthun pa'i tshogs pa'i rgyu mtshan can yang mtshungs pa'i ngo bo nyid du 'gyur ba la nyes pa ci zhig yod ce na/ de lta ma yin na zhes bya ba la sogs pa smos te/ gal te rigs mthun pa'i mtshan nyid can gang yin pa dang rkyen gzhan dang lhan cig pa'i tshogs pa rigs mthun pa la mi ltos pa'i ba lang gi lci ba la sogs pa'i ngo bo las/ ut+pal la sogs pa'am/ du ba ni me dang bud shing la sogs pa'i mtshan nyid can nam brgya byin gyi spyi bo la sogs pa'i ngo bo las du ba'i bdag nyid can yin pa de'i phyir mtshan nyid mi mthun pa'i tshogs pa yang mtshan nyid med pas de dang 'dra ba'i 'bras bu du ba dang ut+pal sogs pa skye ba yin na ni de'i tshe rgyu ni tshogs pa'i ngo bo'o//tha dad pa dang / tha dad pa ma yin pa dag las ni mtshan nyid mi mthun pa'i dang mtshan nyid mi mthun pa med pa'o//de dang rigs mthun pa dang rigs mi mthun pa'i bdag nyid du gyur pa'i phyir sna tshogs par grub pa'i don thams cad kyi tshogs tha dad pa dang tha mi dad pa dang / rigs mthun pa dang rigs mi mthun pa dag rgyu med par 'gyur ro//de'i phyir gang la mtshan nyid mi mthun pa'i phyogs yod pa de rnam pa 'ga' zhig gis gzugs mtshungs kyang rigs mi mthun pa'i 'bras bu kho na'o/ /gal te me dang bud shing la sogs pa'i tshogs pa tha dad kyang du ba la rigs tha dad pa med par mtshungs par mkhas pas de ma yin pa'i ngo bo dang gzhan la gnas pa gnyi ga la yang mtshungs par rtogs so zhe na/skyon 'di ni med skad cig ma tha dad pa phra ba la brten pa la nang tshan gyi rigs tha dad kyang rgyun rags pa la brten pa ni rigs mi mthun pa las ldog par mtshungs pa'i phyir ro/ / khra mo la sogs pa nang tshan gyi rigs tha dad kyang ba lang ma yin pa las ldog pa'i rgyu mtshan gyis ba lang gi rigs dang ba men bzhin no/ /du ba thams cad rigs gcig par rnam par 'jog pa ni nye bar len pa'i rgyu'i skad cig ma tha dad pa yang rnam pa gcig tu shes pa'i rgyu mtshan gyis mtshungs pa'i phyir ro//gal te dang po 'di bud shing las byung ba ji ltar yin zhe na/ ma yin te du ba thams cad ni bud shing gi rigs kyi rjes su byed pas so/ /de lta na a ru ra dang ga pur dang tsan+dan la sogs pa'i rigs tha dad pa'i rjes su byed pa'i du ba de dang lud pa 'byin pa la sogs pa 'joms pa'i rdzas las byas pa'i reng bu'i du ba de ni tha dad pas de'i ro dang nus pa dang smin pa'i 'bras bu'i rjes su byed pa'i phyir ro//rigs mi mthun pa'i rgyu las byung ba ni ma yin no/ /gang gi phyir rnam pa tha dad pa dang tha mi dad pa'i rgyu mtshan gyi rigs mthun pa dang rigs mi mthun pa ni ma yin pa'i phyir ro//'bras kyi myu gu la sogs pa de ni sa bon gyi rnam pa'i rjes su mi byed do/ /de'i rigs de ni 'bras bu ma yin pa la sogs pa las ldog pa nyams su ma myong ba yin no/ /de'i phyir bud shing rnams ni de'i nye bar len pa'i rgyu yin la me la sogs pa ni lhan cig byed pa'i rkyen las bye brag tu skyed do//rnam pa de lta bu'i du ba dang myu gu la sogs pa'i 'bras bu tha dad par byas nas skyed pas zhar la byung bas chog go/ /'o na ni gang gi tshe tshogs pa tha dad pas kyang 'bras bu tha mi dad pa de'i tshe rgyu tha dad pa yod kyang de med pas de rgyu med pa can du 'gyur na tha mi dad pa ga las 'ongs pa yin/des na gnyi ga yang rgyu med pa can du brjod pa ni 'di ltar zhes bya ba la sogs pa smos te/ gal te tshogs pa tha dad pa yod kyang 'bras bu tha dad pa mi skye na de rgyu med pa nyid du 'gyur ro//de'i rgyur gyur pa med na res 'ga' zhig kyang rgyu dang ldan par 'thad pa ma yin no/ /de'i tshe thams cad kyi 'bras bu tha dad pa gang yin pa de yang rgyu tha dad pa las yin pa'i phyir tha dad pa med par skyes pa de yang rgyu dang ldan pa ga la yin/ gal te rgyur gyur pa med pa ni rgyu dang ldan pa ma yin no//de ltar rgyu med kyang 'byung ba ni rgyu dang ldan par ga la 'gyur/ gal te rgyu tha dad pa nyid kyi tha mi dad pa rgyu mtshan yin pa'i phyir ma yin no zhe na/ de lta na tha dad pa 'di la la zhig dang ma 'brel par mi 'gyur ro/ /'bras bu dang rtsom la sogs pa yang rgyu tha dad pa'am tha mi dad pa nyid las rgyu mtshan gzhan pa'i khyad par brtag pa med pa'i phyir ro//so sor snang ba tha dad pa 'ga' zhig gi 'khrul pa'i rgyu mtshan las don dam par nye bar mtshon pa'i phyir ro/ /gal te de dag de dang 'dra ba las kyang 'dra ba 'byung bar 'dod pa gang yin pa de'i tha dad pa tha mi dad pa ni rgyu med pa can du 'dod la/dngos po kho na 'ba' zhig rgyu dang ldan pa yin no zhes 'dod do zhe na/ de la ma gtogs pa zhes bya ba la sogs pa smos te/ tha dad pa dang tha dad pa ma yin pa las logs shig pa'i dngos po ngo bo ni 'ga' yang yod pa ma yin pas de dag rgyu med pa can nyid kyang rgyu dang ldan par 'gyur ro//de ni de nyid dam gzhan nyid dam 'di tha dad pa'am tha mi dad pa'i rnam pa dang 'brel pa med par thal bar 'gyur bas so/ /de la 'brel pa gzhan zhig brtags na ni thug pa med par thal bar 'gyur ro//gzhan ma yin na yang tha dad pa dang tha mi dad pa'i dngos po'i ngo bo dag rang nyid kyi gnas skabs la phan mi 'dogs na gang las 'brel pa yin/ phan 'dogs par brtags na yang gal te dngos po'i rang bzhin la rang gi bdag nyid kyis tha dad pa dang tha mi dad pa 'ga' yang skyed par mi 'dod pa de'i tshe de yod kyang rang bzhin las gzhan pa med pa la gang las tha dad pa dang tha mi dad pa'i dngos po'i ngo bor 'gyur na yang tha dad pa'i stobs kyis dngos po las tha dad pa dang tha mi dad par bstan pa'o//de yang gal te tha dad pa de'i tshe dngos po'i ngo bo'i gnas skabs kho na yin te de'i ngo bo la tha dad pa dang /tha mi dad pa 'ga' yang med pa'i phyir ro/ /slar yang de'i dbang gis tha dad pa dang tha mi dad par brtags pa'i dngos po de'i gnas skabs sam gnas skabs ma yin pa tha dad pa dang tha mi dad pa dag go/ / yang na tha dad pa dang tha mi dad pa de'i tshe dngos po'i ngo bo tha dad pa dang tha mi dad par byas so zhes bya bar 'gyur ro/ /de'i ngo bo las gzhan pa'i rgyu mi srid pa'i phyir ro/ /de rgyu gzhan nyid las phyis byung ba ni/ de las gzhan pa nyid du 'gyur ro/ /dngos po'i ngo bo nyid kyi byed pa ma yin te de'i rang gi rgyu nyid ldog pas so//rang gi rgyu kho na las dngos po ngo bo res 'ga' zhig tha dad pa dang tha mi dad pa'i bdag nyid du skye bar brtag na/ tha dad pa dang tha mi dad pa la ma gtogs pa ni don med do/ tha dad pa dang tha mi dad pa'i blo yang de nyid kyis grub bo/ /de'i phyir bye brag pa la sogs pas brtags pa'i tha dad pa dang /tha mi dad pa'i bye brag gi spyi'i bdag nyid ni mi rigs so/ /dngos po'i ngo bo nyid kho na tha dad pa dang tha mi dad pa'i sgrar brjod do/ /de dag rgyu med pa nyid kyis dngos po'i ngo bo nyid rgyu med par 'gyur ro/ /de'i phyir dngos po rnams rgyu med pa can yin pa'i phyir rtag tu yod pa'am med pa zhig tu 'gyur te rgyu med pa ni/gal te dngos po rnams res 'ga' zhig yod pa dus thams cad du yod par 'gyur ro/ /yang na res 'ga' zhig med pa de yang dus thams cad du 'gyur gyi res 'ga' zhig yod pa ni mi rigs so//ci'i phyir zhe na/ rgyur gyur pa la res 'ga' zhig kyang ltos pa med pa'i phyir ro/ /gang gi phyir ltos pa ni rgyu yod na yod la med na med pa gang yin pa de ni ltos pa ste res 'ga' ba'o/ /res 'ga' ba'i dngos po ni rigs gzhan ni ma yin no//de'i phyir mtshan nyid mi mthun pa las mtshan nyid mi mthun pa med pa'i 'bras bu skyed par khas blangs pa la ji skad bshad pa'i rigs pas rgyu med par thal bar 'gyur ro/ /slar yang mtshan nyid mi mthun pa'i phyogs las mtshan nyid mi mthun pa med pa'i 'bras bu skyed pa'i skyon gzhan yang bsgrub par bya ba smos te/so sor nges pa'i bsgrub par bya ba rnams ni bum pa dang snam bu la sogs pa rnams so/ /sgrub par byed pa ni 'jim pa la sogs pa rnams 'jig rten pa nye bar sbyor ba'o/ /bum pa la sogs pa don du gnyer ba 'jim pa'i gong bu la sogs pa de la nges par sbyor ro//snal ma las snam bu don du gnyer gyi snal ma yang ma yin 'jim pa'i gong bu yang ma yin pas der mi 'gyur ro/ /ci'i phyir zhe na/ rgyu'i nus pa zhes bya ba smos te tshogs pa gang gis nus pa'i bdag nyid du phul du byung ba'i mtshan nyid de dang de ni so sor nges pa 'ga' zhig gi tshogs pa kha cig gis 'bras bu la nye bar sbyor gyi gzhan gyis ni de lta bu'i ngo bo ma yin no//gang gi phyir sa la sogs pa cung zad cig gis bum pa la sogs pa 'ba' zhig sgrub par byed pas khyad par du byed kyi/gzhan ni de dang mtshan nyid mthun pa snal ma la sogs pa las ma yin no/ /ci'i phyir zhe na/ 'jim pa la sogs pa de nyid bum pa la sogs pa de la nus par rung ba'i phyir dang gzhan ni de kho na la mi nus so/ /gal te ci'i phyir de nyid kyis de la nus kyi gzhan gyis ma yin zhe na/de gnyis zhes bya ba smos te/ sa la sogs pa dang snal ma la sogs pa de skyed pa'i ngo bo nyid bum pa la sogs pa skyed pa'i ngo bo nyid dang cig shos kyi ngo bo nyid kyis bum pa la sogs pa skyed pa tha dad pa'i phyir gzhan nyid ni med pas so//'jim pa la sogs pa dang snal ma la sogs pa'i ngo bo de las gzhan pa des bskyed pa'i cig shos kyi ngo bo ma yin no/ /gang gi tshe tshogs pa phan tshun mtshan nyid mi mthun pa'i nus pa so sor nges pa mi 'dod na mtshan nyid mi mthun pa las kyang mtshan nyid mi mthun pa med pa'i 'bras bu khas blangs pas de'i ngo bo ma yin pa mtshan nyid mi 'dra ba las kyang du ba la sogs pa skyed pa'i ngo bor 'gyur ro//me dang bud shing la sogs pa'i rgyu'i tshogs pa'i mtshan nyid gang yin pa de dang mtshan nyid mi mthun pa'i brgya byin gyi spyi bo la sogs pa'am/skad cig ma la brten pa'i du ba ni me dang bud shing gi tshogs pa las kyang byung yang du ba de'i skad cig ma skyed par 'dod na de skyed par nus pa nges pa med pa brjod par 'dod de/ du ba la sogs pa'i 'bras bu skyed pa'i nus pa so sor nges pa med pas so//pas zhes bya ba ni de'i phyir te ci yang rung ba'i 'bras bur 'gyur ro/ /rgyu gang yang rung ba las 'byung bar 'gyur te/ ji ltar mthong ba dang ji ltar ma mthong ba'i thams cad las thams cad skye bar 'gyur ro zhes bya ba'i don to/ /de'i phyir nus pa so sor nges pa'i rgyu rnams khas blang bar bya'o//de'i phyir mtshan nyid mi mthun pa'i phyogs las 'bras bu 'ga' zhig las mtshungs na ni 'dra ba'i nye bar mtshon pas kyang mi 'dra ba yin pas thams cad du de dang 'dra ba rnam pa de lta bu'i skye bar grub bo/ /gal te mtshan nyid mi mthun pa'i tshogs pa las kyang de'i 'bras bu'i mtshan nyid skyed par nus pa mtshungs pa'i phyir de'i 'bras bu'i mtshan nyid 'byung bar 'gyur ro//'ga' zhig las de bzhin du 'byung ba ni ji skad bshad pa'i skyon gyi skabs su 'gyur ro zhe na/ de skyed par nus pa mtshungs zhes bya ba la sogs pa smos te/re zhig 'dir phyogs snga mas du ba de ma yin pa las skye ba'i ngo bo ma yin no zhes bya ba la sogs pa'i skyon khas blangs pa ni bshad zin to/ /ci 'dra ba'i me'i lhan cig byed pa'i rkyen de la rag las ba ni bud shing gi 'gyur ba la sogs pa'i rang bzhin tha dad pa'i rgyu'i nus pa'i bdag nyid du phul du byung ba de 'dra ba'am brgya byin gyi spyi bo la sogs pa'o//gang gi tshe de'i tshogs pa las skye ba'i du ba mtshan nyid mi mthun pa las nus pa'i bdag nyid phul du byung ba'i mtshan nyid kyi 'bras bu skyed pa yin pa de'i tshe de nus pa mtshungs pa ni de nyid yin pas me dang bud shing la sogs pa nyid las gzhan du brjod pa ma yin te/de dang mtshan nyid mi mthun pa dang / de dang mtshan nyid mi mthun pa med pa'i bdag nyid phul du byung ba mi srid pa'i phyir ro/ /de nyid me dang bud shing la sogs pa'i 'gyur ba las dang po du ba skyed pa ma yin te de yang bud shing gang me la rag las pa'i 'gyur bas du ba rang gi rigs kyi rjes su byed pa yin te/gal te brgya byin gyi spyi bo la sogs pa yang de lta bu'i ngo bor khas blangs pa de'i tshe 'ba' zhig la rtsod pa med par 'gyur ba'i don du khas blang bar bya ba de bzhin du brjod pa'i phyir ro//gang gi phyir de lta bas na zhes bya ba ni de'i phyir te du ba la sogs pa 'bras bur lan cig mthong ba mngon sum dang mi dmigs pa dag gis nges pa ste/ de ma yin pa'i ngo bo las ldog pa'i bdag nyid kyi rgyu bud shing la sogs pa'i rgyun la ltos pa'am skad cig ma la ltos pa la 'khrul pa med de/de dang mtshan nyid mi mthun pa'i phyir ro/ /'bras bu'i gtan tshigs kyi rjes su 'gro ba dang / ldog pa nges par grub pa'i phyir gzhan du 'gyur ba ma yin no//gtan tshigs thigs pa'i 'grel pa bram ze a tsa tas rnam par sbyar ba 'bras bu'i gtan tshigs kyi dbang du byas ba le'u gnyis pa'o// //de ltar 'bras bu'i gtan tshigs de ni gang dang gang las lhan cig skye bar mngon sum dang mi dmigs pas mthong ba de dang 'dra bar thams cad du yin gyi/rnam pa de lta bu'i skye ba rigs mi mthun pa las kyang 'bras bu gsal bar mi byed do/ /dngos po 'ga' zhig la khyab pa mthong bas rjes su 'gro ba dang ldog pa grub pa yin no zhes bstan to/ /mi dmigs pa yang ji skad bshad pa'i rgyu mtshan gzhan med par bstan pa dang 'brel pas rjes su 'gro ba dang ldog pa la log par rtog pa med do//'di rang gi ngo bo nyid las gzhan dag log par rtog pa de lta na yang dmigs pa'i rig byar gyur pa'i dngos po cam mi dmigs pas ni med par 'gag pa'i bdag nyid tshad ma gzhan gyis rtogs par bya bar dbang phyug sde la sogs pa kha cig 'dod do//gzhan yang dgag par bya ba'i yul gyi shes pa'i ngo bo yongs su gyur pa'i bdag nyid dam/ de las gzhan pa'i dngos po yul can gyi rnam par shes pa nyid las med par rtogs pa ni mngon sum dang rjes su dpag pa dag gi tshad ma las gzhan du dpyad pa brjod do//dngos po gzhan pa'i yul can gyi rnam par shes pa ni mngon sum dang rjes su dpag pas med par rtogs pa ma yin te/ de ni dngos po'i yul can yin pa'i phyir ro/ / dngos po med pa dang ldan pa dang med do zhes shes pa skyed pa gang yin pa de ni dngos po med pa'i tshad mar brjod pa 'thob ste/ dper na dbang po rang gi yul rtogs pa skyed par byed pa nyid kyis mngon sum du brjod pa de bzhin du gzhan gyi dngos po'i mtshan nyid dam shes pa'i mtshan nyid mi dmigs pas med pa kho na sgrub par byed par smra'i/med pa'i tha snyad ni ma yin no/ /mi dmigs pa'i rtags kyis dngos po med pa grub pas rang nyid kho na tha snyad la 'jug pa yin no/ /rig pa can yang med pa 'ba' zhig shes pa kho na yin gyi yul la sogs pa 'dzin pa'i shes pa de ma thag tu byung ba'i mngon sum ni gzhan med pa la tshad ma yin te/ci yang ma yin par yongs su bcad pa'i bdag nyid du brjod de de nyid bum pa la sogs pa dgag pa'i mi dmigs pa'i sgras brjod pa la 'gal ba med do zhe na/ de nyid mi dmigs pa las tha dad par gyur pa'i blo yis rgol ba na/de tshar gcad pa'i phyir mi dmigs pa'i rang bzhin gyi ngo bo bstan pa ni dmigs pa'i rig byar gyur pa'i mi dmigs pa'i zhes bya ba la sogs pa smos te/ dmigs pa'i rig byar gyur ba ni dmigs pa'i rkyen gzhan te/rgyu dang de ma thag pa dang bdag po'i rkyen gyi ming can ma lus pa dang dmigs pa'i rkyen rang bzhin khyad par can yin no/ /rang bzhin gang yin pa de yod la dmigs pa'i rkyen gzhan yang yod na mngon sum kho nar 'gyur ro/ /de lta bu'i ngo bo la bstan bcos byed pa gzhan rig pa can la sogs pas bshad pa'i log par rtog pa bsal ba'i phyir de dmigs pa'i rig byar gyur pa smos so//chen po nyid dang du ma'i rdzas dang ldan pa dang gzugs can gyi rdzas rnams su smra ba dang / chen po du ma'i rdzas dang ldan pa nyid kyi ngo bo med pa ni dmigs su rung bar brjod pa de ltar na dmigs pa'i rig byar gyur pa las mi dmigs pa yod kyang dngos po srid pas na med pa'i tha snyad sgrub pa las ma nges par brjod do//dmigs kyang gzhan gyi chen po nyid dang du ma'i rdzas nyid dang gzugs ni dmigs par rung ba ma yin pa dang yod pa ma yin pas de tsam gyi mi dmigs pas kyang med pa'i tha snyad du de la byed par mi nus so//bshad pa byed pas gang smras pa rjes su dpag pas dmigs par bya ba dang mngon sum dang mi dmigs pa'i gtan tshigs kyi dngos po med pa ma yin te/ dbang po nyid dang pags pa la sogs pa bzhin du mig dang rjes su dpag pas thob par byed pa ni/mig gi 'od zer du nye bar dmigs pa de ni mngon sum dang mi dmigs pa yin na ji ltar med pa'i tha snyad sgrub par byed pa yin/ de dmigs pa'i rig byar gyur pa'i mi dmigs pa med pa'i tha snyad du byed pa la ma nges par rigs pa can brjod de dgag pa'i phyir dmigs pa'i rig byar gyur pa'i phyin ci ma log pa bstan bcos mdzad pas bstan pas gnod pa'i phyir ro//de lta na dmigs pa'i rkyen gzhan mtha' dag dang / rang bzhin khyad par can ji skad bshad pa ni dmigs pa'i rig byar gyur par brjod do//du ma'i rdzas dang ldan pa nyid la sogs pa med pa de srid du 'khrul pa'i go skabs ga la 'gyur/ dngos po yod pa la de mi srid pa'i phyir ro/ /chen po nyid la sogs pa ni mi srid par dmigs pa'i rig byar gyur pa'i sgrar brjod par mi bya'o//gzugs la sogs pa las tha dad pa'i rdzas de'i snang bas dben pa'i rnam pa gzhan rang gi shes pa la snang ba med do/ /snang ba med pa ma yin pa ni bdag nyid kyi ngo bo ma yin pas tha dad pa'i ngo bor mngon sum gyis nyams su myong bar thal bar 'gyur ba'i phyir de'i yod pa dang chen po nyid la sogs pa 'di srid pa ga la yin/rang gi ngo bos chen po dang de dang 'brel pas kyang 'di'i chen po'am gzhan gyi ngo bor 'dzin pa med na ji ltar 'khrul pa'i shes pa de ma 'khrul pa yin de'i phyir chen po dang rdzas dang dmigs par byed pa po ngo bo de yang rang gi ngo bo 'dzin pa med de/rdzas bdag nyid shin tu lkog tu gyur pa'i phyir ro/ /rdzas kyi ngo bo tha dad pa yang nye bar mi rtogs pas de bzhin du 'dzin par byed pa po'am chen po'i ngo bo med de/ gang gi phyir rdzas kyi yon tan 'du ba'i rgyu yin par 'dod pas rdzas skye ba'i dus khas blangs pa'i phyir ro//de yang dmigs pa'i bdag nyid kho nar de bzhin du nyams su myong bas na skad cig ma dang po'i rdzas dang yon tan kho na skad cig ma gnyis pa na snga ma'i ngo bor 'dor ba las ngo bo gzhan du gyur pa ni med do/ /gang las sngar chen po nyid la sogs pa'i rten gyi dngos por rtogs nas phyis yon tan gyi rten du 'gro bar 'gyur ba'i phyir ro//skyed par byed mi byed na rten ma yin te skyed par byed pa ni skad cig ma nyid kyis don byed pa mi 'gal bas skad cig ma ma yin pa de las 'du ba'i rgyu srid par ga la 'gyur/ gang gi phyir rang gis skyed pa'i 'bras bu skye bar de bzhin du bstan pa de yang skad cig ma ma yin pa la sngar rten ma yin pa la phyi nas brten pa'i dngos po ma yin no//'du ba'i rgyu mi srid pa nyid dang du ma'i rdzas dang ldan pa nyid kyang mi srid do/ /gang gi phyir du ma'i rdzas kyis bskyed pa 'du ba'i rgyu'i bdag nyid du yod pa gang yin pa de ni de ltar bstan pa'i rdzas med pa dang du ma'i rdzas dang ldan pa ni ma yin la/chen po nyid la sogs pa yod pa yang 'dir dmigs pa'i rig byar gyur pa ni ma yin par kho bo cag mngon par 'dod la khyed kyang 'dod do/ /de dag dmigs pa'i rig byar gyur pa las mi dmigs pas med pa'i tha snyad du grub pa ma nges pa ma yin no zhes bstan bcos byed pas bstan par 'gyur ba dang dmigs pa'i rig byar gyur ba las mi dmigs pa'i rgyu dang khyab par byed pa bkag pas gzhan gang yin pa de 'bras bu dang khyab par bya ba med pa'i gtan tshigs te med pa'i tha snyad kyi gtan tshigs so// gang yang dgag pa ni dmigs pa'i rig byar gyur pa las mi dmigs pas med pa'i tha snyad kyi gtan tshigs yin no zhes 'am gyi sgras bstan to/ /mi dmigs pa'i mtshan nyid kyir gyur pa mi dmigs pa ni mngon sum dang rjes su dpag pa ldog pa'i mtshan nyid de ni the tshom gyi rgyu yin te/tshad ma log kyang don med par mi 'grub ste rgyu mtshan med pa'i phyir yod pa'i tha snyad 'gog pa'i rgyu yin no zhes khong du chud par bya'o/ /de la re zhig gang dmigs pa med pa tsam mi dmigs par 'dod na ni rnam par shes pa'am gzhan pa'i dngos po yin no zhes brjod pas de'i gzhan pa'i dngos po'am rnam par shes pa kho na dgag pa'i don du shes pa dang shes bya'i mtshan nyid kyi chos mi dmigs par ston par byed pas dmigs pa nyid rnam pa gnyis su bstan pa ni de la dmigs pa zhes bya ba smos te/dmigs pa'i ngag gis dmigs par thos te bya ba'i ngo bo nyid de ni gang gi tshe byed pa po la ltos pa de'i tshe de'i dmigs pa ni byed pa po'i chos nyid la ltos la/de'i shes pa ni rten pa'am dmigs pa ste shes pa gang yin pa de dmigs par brjod pa dang / dmigs pa ni blo dang dbang po dang lus kyi tshogs pa kho na skad cig ma snga ma bzung nas nye bar dmigs pa skyed par byed par brjod do//de bzhin du dmigs pa skyed par byed pa'am rten pa'am/ byed pa por gzhan dag brjod pa dang / dbang po la sogs pa las gzhan gyis skyed par byed pa nyid du mi srid de gang gi phyir rjes su 'gro ba dang ldog pa'i rjes su byed pa rgyu dang 'bras bu'i tha snyad byed pa de yang rjes su 'gro ba dang ldog pa dag dbang po la sogs pa las gzhan la mi srid pa'i phyir dang dbang po la sogs pa yod pa rnams las nges par dmigs pa'i phyir ro//gang gi tshe dbang po la sogs pa rnams yod kyang res 'ga' zhig dmigs pa mi skye ba de'i tshe rgyu gzhan yod pa rnams kyi nus pa las 'bras bu mi skyed de rgyu gzhan ma tshang ba bstan pa'i phyir ro//de las tha dad pa'i rgyu gzhan yongs su bstan na ni bdag kyang yod pa ma yin la/ de ji ltar bdag nyid las skye ba yin/ rgyu mtshan med par khas blangs na ni ha cang thal bar 'gyur ba'i phyir ro//de skad du/ gang zhig yod na gang 'byung ba/ /de las gzhan ni brtags na ni/ /de rgyu nyid kyis thams cad du/ /rgyu rnams thug pa med par 'gyur/ /zhes bshad do/ /rten pa nyid kyang skyed par byed pa kho na yin te de yang de'i bdag nyid du srid pa ma yin no//gal te 'jig par byed pa'i phyir rten yin no zhe na/ skad cig ma ma yin pa yang 'jig pa med pas gnas pa med do/ /'di ltar mi 'jig par dmigs pa kho na gnas pa zhes brjod kyi lci ba med pa'i phyir ltung ba med do/ /gal te ldan pa med pa ni lci ba'i phyir ltung ba yin no zhes gzhan dag brjod de ldan pa la brten pa yin no zhe na/'o na de yang rten dang brten pa'i 'byung ba rnams yod par 'dod pas mi ltung ba'i chos kyi rten du dmigs pa ni ci yang med do/ /'du brten pa yin na ni gzhan la yang thal bar 'gyur te/ de'i bdag nyid thams cad la mtshungs pa'i phyir dang 'di gcig pa nyid du khas blangs pa'i phyir dang / rim dang cig car gyi don gyi byed pa 'gal ba 'di ni yod pa ma yin no/ /de'i phyir skyed par byed pa nyid dang rten par byed pa ga la yin/ 'di dag btags pa la 'thag par byed pa yin no//de ltar dmigs pa bstan nas mi dmigs pa bstan pa ni ma yin par zhes bya ba smos te/ bzar mi rung ba ni bzar mi rung bar rjod par 'dod pa de ni bza' ba las gzhan yin pa'i phyir grong gi khyim bya bzar mi rung ba las gzhan pa ni bzar rung bar yang brjod do/ /reg tu mi rung ba bzhin zhes bya ba ni reg tu rung ba dang 'gal bar brjod par 'dod pa'i reg tu rung ba las gzhan yin pa'i phyir reg tu mi rung ba don la sogs pa de las gzhan pa ni reg par bya ba yin no//de ni dmigs pa'i rig byar gyur pa'i mi dmigs pa 'dod par bya'o/ /gal te ma yin pa ni dgag pa'i yul la yin pa'i phyir ji ltar dngos po'i ma yin zhe na/ma yin par 'jug pas zhes bya ba smos te/ ma yin pa dgag pa'i don spangs nas khyad par gyi don la 'jug pa de la dgag pa gzung bar mi bya ste/ dgag pa ni dngos po'i yul can yin te/ gang la sgrub pa gtso bos dgag pa'i don bzung nas/ rang gi tshig gi sgrub par ston pa'i ngag gcig pa de la ma yin par dgag pa 'jug pa dang sgrub pa gtso bor brjod pas dmigs pa ni gzhan dmigs pa yin pa de ltar ngag gis gzhan dmigs par brjod do/ /gzhan dmigs par brjod pa na shugs kyis mi dmigs pa kho na brjod par 'dod do//dgag par rtog pa brjod par 'dod pa ni dmigs pa ldog pa med na de la ltos nas gzhan du brjod par mi rigs pa'i phyir ro/ /rang gi tshig gis dgag pa dang sgrub pa la brten par ma brjod pa de lta na 'on te sgra yis ma yin pa la brten pa sgra gzhan nyid kyi ngag gis rab tu sbyor ba'i phyir ro//gzhan dmigs pa'i mi dmigs pa yin pa'i phyir ro/ /dgag pa ni sub kyi mtha' yin la/ ti'i mtha' ni ma yin te/ ngag gcig pa nyid dmigs pa med pa mi dmigs pa yin no//med par dgag pa ni 'di dag las kyang bzlog par rig par bya'o/ /de la dgag pa ni gtso bo yin la sgrub pa ni shugs kyis go bar bya ba dag tha dad pa yin la/ rang gi tshig gis dgag pa la brten pa mi slu ba'o/ /de ltar de'i shes pa'i chos kyi mtshan nyid kyi mi dmigs pa bshad nas shes par bya ba'i chos kyi mtshan nyid bstan par bya ba'i phyir dmigs par bya ba'i chos nyid yin na ni zhes bya ba la sogs pa smos te/gang gi tshe las la gnas pa'i bya ba la ltos pa na dmigs par bya ba'i dngos po'i chos dmigs par brjod par 'dod pa de'i tshe yul gyi rang bzhin gyi dmigs par rig par bya'o//gal te yul gyi ngo bo ci 'dra ba zhig yin zhe na/ rang gi yul zhes bya ba la sogs pa smos te/ bum pa la sogs pa dgag par bya ba'i bdag nyid kyi yul can gyi rnam par shes pa gang yin pa de ni skyed par rung ba'i mtshan nyid do//yul gyi ngo bo la dmigs pa'i sgra brjod do/ /gal te yul gyi ngo bo ji ltar dmigs su rung ba'i mtshan nyid yin/ chos dang chos can ni tha dad pa yin zhe na/ rung ba'i nyid ni zhes bya ba la sogs pa smos te/ rung ba ni don dam par na dngos po'i ngo bo nyid de/dngos po'i ngo bo las tha dad pa ni med do/ /de lta ma yin na dngos po'i rung ba nyid du mi 'gyur ba dang / rung ba 'di yin no zhes dngos po dang 'brel par yang mi 'gyur ba dang / 'brel pa can brtags na yang thug pa med par 'gyur ro zhes lan mang du bshad zin to//de nyid dmigs par bya ba yul gyi chos su bstan pa na mi dmigs pa rtog pa yin par de las gzhan pa zhes bya ba la sogs pa smos te/ de'i phyir bum pa la sogs pa dgag par bya ba yul can gyi rnam par shes pa skyed par rung ba las gzhan pa dmigs par skyed par rung ba nyid de las phyin ci log pa ni ma yin no//bum pa'i rang bzhin gyis dben pa'i phyogs kyi ngo bo de nyid la 'dir mi dmigs pa'i sgras brjod do/ /snga ma nyid kyi rigs pa tsam 'dir bstan pa ni snga ma bzhin zhes bya ba la sogs pa smos te/brjod par 'dod pa'i dmigs pa las gzhan yin pa'i phyir bzar mi rung ba dang reg tu mi rung ba bzhin du ma yin par dgag pa la 'jug go/ /ji ltar dgag pa yang gzhan gyi don la 'jug pa yin/ thun mong ba'i bum pa yod pas dben pa'i phyogs kyi shes pa'am sa phyogs te bum pas dben pa'i mi dmigs pa 'di ma yin par dgag pa 'jug par rab tu btags pa yin gyi/khyad par med par 'di dag thams cad kyang gzhan gyi sgras brjod par mi bya'o snyam nas gang du gang zhig ces bya ba la sogs pa smos te/ gang du ni yul dang dus dang gnas skabs bar du mchod pa la sogs pa'i mtshan nyid can no//gang zhig ni sa phyogs kyi ngo bo la sogs pa dmigs par bya'o/ /nges par ni gdon mi za ba'o/ /don gzhan bum pa la sogs pa'i ngo bo dmigs par 'gyur ro/ /de ni bum pa la sogs pa'i ngo bo de dang 'dre ba des nas phyogs la sogs pa'i ngo bo dang 'dre ba'o//gal te gcig la dmigs par bya ba yang ji ltar gzhan la nges par dmigs par 'gyur zhe na/ rung ba nyid du khyad par med pa'i phyir ro/ /sa phyogs kyi bum pa'i ngo bo dag ni rang gi yul can gyi rnam par shes pa skyed par rung bar mtshungs so//gang gi tshes phyogs kyi ngo bo bar du chod pa'i skal ba la sogs pa spangs pa ni rnam par shes pa la rang gi rnam par 'jog pa yin pa de'i tshe bum pa'i ngo bo yang de la de bzhin du rang gi rnam pa gtod par 'gyur ba nyid do/ /gal te rung ba de dang de ni rang rang gi ngo bo la gnas pa yin ji ltar de dang 'dre ba yin zhe na/shes pa gcig dang 'dre ba'i phyir ro/ /shes pa gcig la de gnyis kyang de dag gi rnam pa'i sgo nas 'dre ba ni dngos su ma yin pas de'i rnam par shes pa don gyi rnam pa gnyis skyes pa dag gi bdag nyid 'dre bar bstan to//ci de'i shes pa la don gyi rnam pa gnyis gdon mi za bar yang 'gyur ram/ gang gis de gnyis shes pa'i sgo nas 'dre ba yin zhe na/ de gnyis zhes bya ba la sogs pa smos te/ de dag mtshungs par rung ba'i ngo bo gang yin pa de dag gang gi tshe yod par gyur pa de'i tshe rnam pa gcig nges par rtogs par mi 'gyur te/ci'i phyir zhe na/ mi srid pa'i phyir ro/ /'di dag yod par srid na mtshungs par rung ba'i ngo bo gnyis las gcig kho na snang ba ma yin te gzhan du ma yin no/ /de lta na rung bar khyad par med pa'i phyir cis na de la rang gi rnam pa gtod par mi byed de cig car snang bar yang nyams su myong bas grub bo//nyams su myong ba dang 'gal bar mi mkhas pa yis brjod pa la gnod pa med pas brjod par mi bya'o/ /gal te mgyogs par 'byung ba'i phyir cig car snyam du sems so zhe na/ma yin te gnod par byed pa'i rkyen spangs pas 'khrul par brtag par mi rigs pas thams cad du de bzhin du dngos po med par thal bar 'gyur ba'i phyir ro/ /gal te rgyu'i chos 'di kho na gang gi tshe las su bya ba gcig sgrub pa du ma mi byed la dbang po de las du mar rtogs pa'i rgyu byed pa ni ma yin no zhe na/ji ltar mar me la sogs pas rtogs par byed pa mang po rnams la du ma skyed par byed pa yin/ byed pa po tha dad pas skyon med do zhe na/ byed pa po gcig yin pa'i phyir bya ba dang las gcig yin pas ji ltar rgyu'i chos yin zhes bya ba la sogs pa brjod pa ni bslang ba yin no//dngos po rnams skad cig ma re re so sor gyes pa la don dam par med pas so/ /byed pa po dang byed pa po la sogs pa'i dngos po'am bya ba 'ga' zhig kyang mi rigs so/ /thams cad kyi byed pa po dang rjes su 'gro ba dang ldog pa'i rjes su byed pa'i 'bras bu 'ga' zhig phul du byung ba yod pa ma yin te/gang gis 'di byed pa po dag dang byed par rig pa yin no zhes bya ba la sogs pa gzhan gyis yongs su brtags pa de'i phyir rung ba de nyid du khyad par med do/ /ga las she na/ gcig gi ngo bo nges par rtogs pa srid pa'i phyir shes pa gcig la tshogs par grub pa dang /rung ba'i ngo bo nyid du mtshungs pa 'di dag nyid rtags yin no/ /rung ba'i ngo bo nyid du med pa dang mtshungs pas cig car dbang po las skyes pa'i shes pa las so sor snang ba ni gzugs dang ro bzhin du mi srid pa'i phyir ro/ /de la gang dag bde bar gshegs pa rnams kyis skye mched gcig gi gzung ba ma yin par 'di bstan to//du ma la yang dbang po'i shes pa gcig skye ba'i phyir de dag shes pa gcig la tshogs pa ni gtso bo kho na yin no/ /de la yang don re re tha dad pa nyid dbang po gcig gi rgyu mtshan las gzhan pa dus gcig pa gang yin pa de'i yul rnams cig car nye ba na rang gi shes pa la nus pa khyad par med pa'i phyir ro//de nyid kyi phyir 'jig rten pas gcig tu mngon par zhen pa'i shes pa skyed pa yin no zhes brjod de/ de dag dbang po gcig las skyes pa yin pa dang skye mched gcig gi yul yin pas dus gcig pa rnams la 'jig rten pas de bzhin du nges pas gcig gi tha snyad du byed pa ni btags pa yin no//gal te de ltar shes pa gcig la tshogs pa de ni 'dre ba yin pa de lta na yang thun mong du thams cad la gzhan pa'i bdag nyid du ci ste dgag par mi rtogs she na/ de lta bas na zhes bya ba la sogs pa smos te/gang gi phyir rung ba nyid du khyad par med pa'i phyir rung ba nyid ni ji skad bshad pa'i rnam pas shes pa gcig la gnyis gang yang tshogs pa de'i phyir rung ba nyid kyi ngo bo khyad par med pa can gang dang gang yin pa de nyid las shes pa gcig la tshogs pa de dag yin pa de'i phyir de dag de lta bu'i ngo bo phan tshun ltos pa kho na yin gyi gzhan pa tshig gi don thams cad la ltos pa ma yin no//gzhan pa nyid ni 'dir mi dmigs pa la 'gyur ba med do/ /gal te 'jig rten pa yang don gzhan pa ma lus pa la ltos nas gzhan pa nyid khyab pa'i rigs pa la brten nas la lar dgag pa brjod do//de lta na yang de ni 'dir gzung bar mi bya'i nye ba'i rigs pa la brten nas shes pa gcig la tshogs pa'i mtshan nyid ni nye ba'i rigs pa la brten nas tshad mar bsam pa la 'gyur ba med do/ /de lta ma yin na mi dmigs pa ma nges pa nyid du 'gyur ro//de'i phyir de kho na nyid sems pas rnam pa de lta bu'i gzhan pa nyid la brten nas mi dmigs pa'i rgyu mtshan la 'khrul pa med pa gang yin pa de yang ji skad bshad pa bzhin du dgongs pa yin no/ /de ltar na de ni shes pa gcig la tshogs pa la ltos nas gzhan pa nyid du rtogs pa ni mi dmigs par bstan pas ni de 'ba' zhig la zhes bya ba la sogs pa smos te/de nyid gang gi tshes phyogs 'ba' zhig ji ltar bshad pa'i bum pa la ltos pa de'i phyir gzhan zhes brjod pa de'i tshe bum pas dben pa'i sa phyogs sam shes pa la mi dmigs pa yin/dper na dbang phyug sdes bsams pa'i dmigs pa med pa tsam gyis mi dmigs pa bzhin du ma yin te/ 'chad par 'gyur ba'i skyon dang ldan pa'i phyir ro/ /bum pas dben pa'i phyogs kyi ngo bo ni des dben pa'i shes pa nyid ni ma yin te/ji ltar gzhon nu ma len gyi rnam par shes pa'am gzhan pa'i dngos po gzhan du ma yin te/ ji ltar gzhan gyi dngos po'i yul gyi rnam par shes pa nyams su myong ba rnams dang mi mthun pa'i dran pa ltos pa med pa'i tha snyad du byed pa'i rgyu mtshan yin pa de lta na des dben pa'i sa phyogs kyang yin no//de lta na rtogs par byed pa 'ga' zhig gis gang gi phyir phyogs 'ba' zhig gi rnam pa nyid kyi shes pa'i bdag nyid du rigs pa yin gyi bum pa'i rnam pa ma yin pa de'i phyir 'dir bum pa med do zhes bya ba de bzhin du med pa'i shes pa skyed pa yin no//gang gi phyir 'ga' zhig gis phyogs 'ba' zhig mthong ba gang yin pa ni bum pa dang lhan cig pa ma yin pa de'i phyir 'dir bum pa zhes bya ba de ltar yin no/ /de'i phyir med pa'i shes pa skyed pa'i nus pa mtshungs pa'i gnyi ga yang mi dmigs par rnam par gzhag par rigs so/ / de la gang gi tshe de shes pa yin pa de'i tshe shes pa nyid kyi chos kyi mtshan nyid ni mi dmigs pa ste/ byed pa po la gnas pa'i bya ba la ltos pa'o/ /gang gi tshe de'i ngo bo yin pa de'i tshe shes par bya ba'i chos kyi mtshan nyid ni las la gnas pa'i bya ba la ltos pa yin no/ /de ltar mi dmigs pa ni ma yin par dgag pa la 'jug pa'i rnam par gzhag pa'i bsgrub par bya ba 'di yang bstan pa ni de med pa zhes bya ba la sogs pa smos te/thams cad du gzhan dmigs pa'i rig byar gyur pas dben pa'i phyogs la sogs pa yang snang ba yin la/ gang la bum pa la sogs pa zla bo gzhan med pa rnams kyis 'di dran par 'gyur te/de ni med pa'am med pa'i tha snyad sgrub par byed pa yin no/ /rgyu dang khyab par byed pa mi dmigs pa ni med pa dang med pa'i tha snyad sgrub par byed do/ /rang bzhin mi dmigs pa ni med pa'i tha snyad du byed pa nyid do/ /med pa dang med pa'i tha snyad du byed pa ni shes pa dang rjod par byed pa dang rab tu 'jug pa'i mtshan nyid do//de la 'di na bum pa med do zhes bya ba de lta bu'i rnam pa'i shes pa dang / rnam pa de lta bu'i dngos po brjod pa ni rjod par byed pa'o/ /dogs pa med par phyogs de la 'gro ba dang 'ong ba'i mtshan nyid ni rab tu 'jug pa'o//'dis dbang phyug sde dang gzhon nu ma len gyis tshig gi go skabs su dogs pa la grub pa'i mtha' yas rnam par gzhag pa byed pa ni de'i 'dod pa bsal nas yang gzhan sun dbyung ba'i phyir smras pa/ ji ltar na gzhan yod na zhes bya ba la sogs pa smos te/ dbang phyug sde'i 'dod pa ni 'bras bu dang rang bzhin gyi gtan tshigs dag yod pa'i ngo bo las mi dmigs pas tha dad par byed pas gdon mi za bar 'di med pa'i ngo bo nyid yin no//de lta ma yin na tha dad par byas pa don med pa nyid du 'gyur ro/ /khyod kyis kyang gzhan bkag pas dben pa'i sa phyogs sam de'i shes pa med pa'i ngo bo nyid du ni dmigs par bstan te/'di yod pa la de med pa de ni nyung ste gang gis de ltar brjod par bya ba 'di dag mi rigs so/ /yod pa dang med pa dag 'gal bas gcig gi bdag nyid du mi 'thad pa'i phyir ro/ /gzhon nu ma len yang 'di snyam du sems te/gang dag gang shes par byed pa dang shes par bya ba'i chos kyi mtshan nyid rnam pa gnyis mi dmigs pa'i ngo bor yod par khyed kyis brjod de/ de med pa ni med pa nyid shes pa'i sgrub par byed pa yod de/ 'on kyang de nyid ni gzhan dgag par bya bas dben pa ni dngos po dgag par bya ba'i shes pa'am gzhan pa ste/de'i shes pa gang yod pa dang med pa'i cha de ji ltar med par dgag par bya ba'am shes pa yin/ ji ltar med pa'i cha la sbyor ba ma yin te/ yod pa dang med pa'i cha chos kyi ngo bos tha dad pa yod kyang chos can gyi ngo bo la tha dad pa med do/gal te de dag yod pa dang med pa dag gzung ba dang gzung ba ma yin par rnam par gnas te/ ji skad du/ chos can tha dad med na yang / /chos dag tha dad 'dod pa na/ /yod dang med pa'i tha dad phyir/ /'dzin pa rnam par gnas pa yin//zhes bshad do/ /lan bshad zin pa 'di bstan pa ni 'dir ji ltar zhes bya ba la sogs pa smos te/ ji ltar ma yin par 'jug pa la ltos pa'i sgo nas ni dgag pa dag ni de shes pa la ltos nas des dben pa'i don dang shes pa med pa dag mi dmigs par brjod par bya ba'i phyir dbang phyug sde'i lan btab pa yin no//med par dgag pa kho na 'ba' zhig dgag pa'i don ma yin gyi/ 'on kyang ma yin par dgag pa yang yin no/ /de'i phyir gzhan yod la gzhan med pa'i gtan tshigs dang mi dmigs pa tha dad par byed pa ni rtogs par byed pa po'i bsam pa'i dbang gis yin no//rang bzhin gyi gtan tshigs rtogs pas dngos po khong du chud par nges pa dang / mi dmigs pa yis dngos po med pa rtogs par nges pa yin no/ /don dam par dgag pa ni med pa'i tha snyad du rung ba'i dngos por gyur pa nyid kyi phyogs bsgrub par bya ba yin pas rang bzhin gyi gtan tshigs ma yin gyi rang bzhin mi dmigs par rigs par bya'o//gang yang ltos pa med pa'i don gzhan pa'i tshogs pa dgag pa tsam ni mi dmigs pa yin no zhes dbang phyug sdes bsams pa de sun 'byin par byed pa ni dgag pa tsam ni zhes bya ba la sogs pa smos te/ci'i phyir zhe na/ de'i sgrub par byed pa ma grub pa'i phyir zhes bya ba la sogs pa smos te/ dngos po med pa nus pa thams cad kyis stong pa'i mtshan nyid can du sgrub par byed pa 'grub pa'i gtan tshigs mi 'grub bo/ /nus pa thams cad kyis stong pa de yang mi rigs pa'i phyir ram/gtan tshigs nyid ni nus pa dang 'brel pa'am/ dngos po'i ngo bo'i mtshan nyid yin pa'i phyir dngos po'o/ /dngos po med pa'i ni lhan cig byed pa la ltos pa med par rag las pa'i phul du byung ba med pas med do zhes pa'i shes pa skyed pa na de rtag tu skyed par thal bar 'gyur ro//de'i phyir sgrub par byed pa dang ma 'brel pas med pa'i tha snyad mi 'grub bo/ /yang na med par dgag pa'i bdag nyid dmigs pa med pa'i sgrub par byed pa cung zad cig kyang mi 'grub ste de ni med pa nyid las gzhan pa'i dmigs pa med pas bsgrub par bya bar 'gyur la de la yang gzhan yin pas thug par 'gyur ro//dbang po bzhin du dgag pa'i shes pa'i rgyu rtag tu nye bas lhan cig byed pa la de nyid mi ltos pas de rtag tu skyed par thal bar 'gyur ba'i phyir ro/ /don rnam pa gnyis po 'di ji ltar med pa yin/'ga' zhig rtogs dang rtogs pa'i rgyu de yang ji ltar rtogs pa yin zhes bya ba gzhung 'di'i nang du slob dbon rang nyid kyis rnam par 'byed par 'gyur ro/ /yang gzhon nu ma len gyi lan ni de'i zhes bya ba smos so/ /'di zla bo dngos po gzhan dang 'dre ba'i ngo bo 'di dngos po gzhan dang 'dre ba med pa khyed kyi mngon par 'dod pa grub pa yin te/yod pa'i cha nyid kyi med pa'i cha'i ngo bo rigs so zhes 'dod pa/ de lta na yang med pa'i cha yang gzhan pa'i ngo bo dang mi 'dre ba nyid kyis med pa bstan gyi de lta ma yin na de mi 'thad do/ /de yang dngos po'i cha la yang mtshungs pa'i phyir de nyid med pa'i rgyu mtshan dang mtshungs pa'i phyir ci gzhan pa med pa'i cha khas blang bar bya/de nyid kyi phyir ma 'dres pa'i ngo bo khyad par can yin na/ gang gi phyir de lta bas na zhes bya ba ni de'i phyir gzhan yod pa ni gzhan gyi dngos po'o/ /yod pa yang khyed mngon par 'dod do//yod pa'i cha 'ba' zhig kyang ma yin gyi/ med pa'i cha khyed 'dod pas med pa yin no zhes tha snyad 'dogs so/ /kho bo cag ni des na yod pa'i cha'i med pa ngo bo brjod par gyur pa la 'gal ba ci yang med do/ /ji skad du shes par byed pa dang / shes par bya ba'i chos kyi mtshan nyid kyi rang bzhin mi dmigs pas med pa'i tha snyad sgrub par byed pa yin gyi med pa ni ma yin no zhes bshad do//gzhan bsal ba'i phyir gang yang dag pa tsam ni mi dmigs pa de sgrub par byed par mi 'grub bo zhes bshad zin to/ /bshad pa gnyis pa ni dgag pa tsam gyis mi dmigs pa sgrub par byed pa ma yin par bstan pa ni gzhan yod pa'i mtshan nyid ces bya ba la sogs pa smos te/'jig rten pa ni 'di snyam du sems te/ sa phyogs dag pa mthong nas bum pa med par thog mar rtogs pa'am sa phyogs nyi tshe shes pas nyams su myong ba'i sgo nas bum pa med pa'i rtogs pa'o//de'i phyir bum pa med pa'i tha snyad du byed pa nges na 'jig rten pa'i shes pa'i rjes su 'brangs nas dgag par byed pa'am/ gzhan sa phyogs la dgag par bya ba'i shes pa gnyis te/ de shes pa dag yod pa'i mtshan nyid kyi dngos po med par ro//rang gi tshad mas ni dbang po'i mngon sum dang rang rig pa'i mngon sum gyis dngos su'am brgyud pas ji lta ba'i rim pas sgrub pa gang yin pa de yang bum pa med pa'i tha snyad byed pa yin no zhes de ltar rnam par gzhag par rigs so/ / de ltar rnam par bzhag kyang khyed kyi phyogs nyams pa ci yang med do/ /de lta na brgyud pas kyang mi dmigs par khas blangs pa gang yin pa de grub pa des na de nyid kyis grub par 'gyur ba'i phyir ro/ /dgag pa tsam gyi mi dmigs pa de nyid de sgrub par byed par bstan pa 'di'i dgongs pa ni ji ltar khyed shes par byed pa dang /shes par bya ba'i chos kyi mtshan nyid kyi dngos po ngo bo rnam pa gnyis mi dmigs pa de lta na kho bo yang shes par byed pa dang / shes par bya ba'i chos kyi mtshan nyid dmigs pa med pa dang mi dmigs pa'i ming can rnam pa gnyis su 'gyur ro//de la shes par bya ba'i chos kyi mtshan nyid ni gzhan yod pa mngon sum gyis grub pa dgag par bya ba med pa ni shes par bya ba'i mtshan nyid dmigs pa med pa'i ngo bo mi dmigs pa med pa'i ming can du grub par 'gyur ro/ /shes par byed pa'i chos kyi mtshan nyid dang gzhan yod pa ni sa phyogs dag pa shes pa'i bdag nyid rang rig pas grub pa dang /shes par byed pa'i chos dgag par bya ba'i shes pa med pa'i ngo bo mi dmigs par mtshungs par bshad pa grub par 'gyur ro/ /des na gang las thug pa med par 'gyur/ gang gis na sgrub par byed pa mi 'grub par 'gyur ba de la gzhan yod pa'i mtshan nyid dgag par bya ba dang /de'i shes pa ni gzhan yod na dgag par bya bas dben pa'i sa phyogs dang de'i shes pa de'i bdag nyid med pa brjod par 'dod pa'i phyir ro/ /yod pa dgag par bya ba dang de'i shes pa gzhan mi dmigs par khyed 'dod pa'o//rang nyid ni rang gi ngo bo tshad ma ste dbang po'i mngon sum dang rang rig mngon sum gyis grub bo/ /de ni de dgag pa ni med pa'i tha snyad kyi shes pa'i rjod par byed pa 'jug pa'i mtshan nyid kyi sgrub par byed pa 'grub pa'am/ de 'grub pas de gzhan pa'i dngos po'i mtshan nyid kyi med par ji skad bshad pas grub pa'am/de med par grub pa'am/ de dgag par bya ba de shes pa ni med pa zhes bya ba de ltar 'dod na/ khyed mngon par 'dod pa'i mi dmigs pa dang kho bo cag mngon par 'dod pa'i mi dmigs pa la khyad par 'ga' yang med na kho bo cag gi lta ba cis na spong bar byed/'o na ni khyad par yod par 'dod de gzhan yod pa'i mtshan nyid mi dmigs pa dang cig shos bar du ma chod pa'o/ /de med pa'i tha snyad sgrub par byed pa yin no snyam nas de la khyad par med de zhes bya ba smos te/ khyad par med na gang gis na mi dmigs pa med pa'i ngo bo dngos po dang 'brel pa spong bar kho bo cag mngon par 'dod pa'i med pa'i tha snyad du sgrub pa dang 'gal bar 'gyur/gzhan gyi khyad par yod pa la yang gnod pa med pa'i phyir med par mtshungs pa kho na'o/ /de skad du de'i sgrub par byed pa med pas med pa'i tha snyad mi 'grub par thal bar 'gyur ro zhes bshad zin to zhe na/de yang mi bden te/ gang gi phyir de nyid khyod mngon par 'dod pa'i gzhan yod pa dgag par bya bas dben pa'i sa phyogs bdag nyid de'i yul dmigs pas mi dmigs par 'dod pa dang de med pa'i mi dmigs par kho bo cag 'dod pa'i dgag par bya ba med pa dang /de dmigs pas med pa ci'i phyir na sgrub par byed pa'i rtags su cis na mi 'dod/ de lta na yod par 'jig rten pa la grags pa'i rjes su 'brang bar 'gyur na/ ci'i phyir gzhan yod par rnam pa gnyis su grub pa nyid de med par grub na de'i bsgrub par bya ba gzhan 'ga' zhig yod par 'gyur zhes kho bo cag 'dod pa'i 'jig rten pa las shin tu 'das pa mi 'dod do zhes bya ba phyogs snga ma bzhin no//'dir so sor ma grub pa'i phyir zhes bya ba smos te/gzhan yod pa 'dis med pa'i rtags dang rtags can ga la yin/ de bzhin du 'brel pa med pa'i phyir ni gzhan yod pas de med pa'i rtags dang rtags can ma yin no/ /thog mar re zhig rgyu'i 'brel pa ni gzhan yod pa'i zhes bya ba smos te/ de dben pa'i sa phyogs kyis bdag nyid de ni sgrub par byed pa ma yin la dgag par bya ba med pa'i rtags ma yin te dmigs pa yang de med pa'i sgrub par byed pa ma yin par phyi mas bshad par bya'o//de'i don nyid ni re zhig gi sgra'o/ /ci'i phyir gzhan yod pa sgrub byed ma yin zhe na/ gang zhig grub na zhes bya ba smos te/dngos po la grub par grags pa'o/ /gang gzhan gyi dngos po mi 'grub pa ni ma grags pa'o/ /de'i dngos po de ni dngos po don dngos po'i rtags can du 'gyur ro zhes 'dir rtags dang rtags kyi rigs pa'o/ /'dir dpe ni me dang du ba lta bu'o//ji ltar gang gi tshe du ba rtogs pa me mi rtogs pa de'i tshe de dag rtags dang rtags can gyi dngos por 'gyur te/ du ba rtogs pa'i dus su mi rtogs pa ni ma yin no/ /gal te de lta na des ci ste zhe na/ gzhan zhes bya ba smos te/ yod pa ni dngos po'i ngo bo gang yin pa der grub pa nyid de rtogs pa'o//de med pa ni dgag par bya ba de med pa'o/ /grub pa ni rtogs pa'o/ /gzhan yod pa nyid de med pa'i bdag nyid yin pa'i phyir de grub pa nyid kyis de grub pa'i mtshan nyid yin pa'i phyir ro/ /rigs pa can yang dgag par bya ba ni med par dgag pa'i bdag nyid can med pa'i ngo bo yin pa de ni ji ltar gzhan yod pa'i ngo bo yod pa dang med pa dag 'gal ba med par 'gyur/ji ltar gzhan yod par grub pa nyid kyis de med par grub par 'gyur snyam du sems na de las zhes bya ba smos te/ de med pa'i phyogs kyi mtshan nyid yin pa de'i phyir gzhan dgag par bya ba bum pa la sogs pa'o//ma 'dres pa'i ngo bo ni spangs pa'i bdag nyid nyi tshe dgag par bya bas stong pa'i bdag nyid do/ /'dis ni sa phyogs nyi tshe yang med par dgag pa'i bdag nyid du smra na ni ji ltar yod pa ci yang ma yin pa'i ngo bo ni rang bzhin dang 'gal par 'gyur ro zhe na/gzhan gyi ngo bos de yang ci yang ma yin pa'i ngo bo ma yin pa'i phyir ro/ /ji lta ba'i ltos pa med pa'i dngos po gzhan med par dgag pa dang stong pa dang rnam par rtog pa'i snang ba dgag par bya ba ci yang med pa'i ngo bo dang de'i ngo bo spangs pa ni de lta bu de ni gzhan yod kyang dgag par bya ba dang ma 'dres pa'i ngo bo yin pa de'i phyir ji ltar 'di dgag par bya ba med pa'i ngo bo dang 'gal bar 'gyur/rang gi ngo bos ni 'di ci yang med pa'i ngo bo yin gyi gzhan gyi ngo bos ni ma yin no/ /de lta ma yin na ji ltar gzhan yod pa 'di gzhan pa'am de la med par 'gyur/gang dang gang med par mi 'gyur ba de nyid 'di yin te/ de'i ngo bo bzhin no/ /de'i phyir 'gro ba thams cad phan tshun gyi bdag nyid can du thal bar 'gyur ro/ /de'i phyir dngos po thams cad gzhan gyi ngo bo med par yin la rang gi ngo bos ngo bo nyid la gnod pa med do//de lta na ci ste med par dgag pa dang ma yin par dgag pa tha dad pa yin/ ci yang ma yin no/ /ltos pa med pa 'ba' zhig ngo bo gzhan med pa tsam ni med par dgag pa yin no zhes 'jig rten pa brjod la ngo bo gzhan la gzhan gyi ngo bos stong pa ni ma yin par dgag pa'o/ /ngo bo gzhan ma yin la gzhan gyi ngo bo med pa tsam ni ma yin te/ngo bo gzhan la de'i ngo bos stong par nyams su myong ba kho na yin no/ /ji ltar de med par dgag pa'i bdag nyid du 'gyur/ gzhan gyi ngo bo'i shugs kyis de las de rtogs pa yin no zhe na/ ma yin te rgyu rtogs pa med na shugs mi srid pa'i phyir ro//de'i bdag nyid du med pa'i med par dgag pa ni ma yin rtogs pa'i rgyus yod par gyur par rtogs kyi gzhan du ni ma yin no/ /de 'dir ma 'dres pa'i ngo bo can gang yin pa de nyid dgag par bya ba med pa ci yang ma yin pa'i ngo bo rnam par 'jog par byed pa'i tshad ma mngon sum gyi ngo bo de kho nas de dus phyis 'byung ba ma yin pa'i bum pa 'di na med do zhes brtags pas de gzung ba la 'dzin pa'i dran pa tshad ma ma yin pa'i phyir gzhan bum pa la sogs pa rnam par gcod pas med pa grub ste/de med pa'i bdag nyid kyi sa phyogs des bzung ba'i phyir ro//sa phyogs dang / bum pa dang ma 'dres pa'i rnam pa gnyis po 'di ngo bo 'di yang ldog pa'i ngo bo yin no/ /de'i phyir gzhan pa'am bum pa 'ba' zhig kyang ma yin pa bum par rtogs pa'i rten yod pa des na rnam pa gnyis mngon sum gyis 'dzin te/ bum pa las gzhan pa nyid dang bum pas stong pa 'dzin par 'gyur ba'i phyir ro/ /dngos po ma 'dres pa grub par bya ba'i phyir ram 'di med do zhes bya ba de lta bu'i phyir tshad ma gzhan brtsam pa ma yin phyi nas 'di rgyas par 'chad par 'gyur bas re zhig gzhag go/ /gang gi phyir gzhan yod par 'grub pa nyid de med par bshad pa'i rigs pas grub pa de'i phyir gzhan yod pa ni ma yin no//dgag par bya ba med pa'i rtags gnyis pa'i rgyu brjod pa ni 'brel pa med pa'i yang phyir zhes bya ba smos te/ gzhan yod pa dang de med pa dag la 'brel ba cung zad cig kyang yod pa ma yin pa de'i phyir gang las rtags dang rtags can gyi dngos po yin/de yang na ma zhig tshe brjod par bya na/ gang gi tshe de med pa'i ngo bo nyid gzhan yod pa'i ngo bor khas blangs pa la ltos pa de'i tshe gzhan yod pa las tha dad pa de med pa ci yang ma yin pa'i ngo bo gzhan 'dod pa na yin no/ /de lta ma yin na gzhan yod pa nyid de med pa'i ngo bo nyid bshad pa'i rigs pas de'i bdag nyid yin na ji ltar 'brel pa med pa yin/mngon sum gyis grub pa de nyid phyogs gzhan gyis byed par mi 'gyur te/ de dang de zhes bya ba la sogs pa la ltos pa'i sgo nas 'brel pa ni gcig la 'du ba zhes bya ba gzhan gyi gzhung gis bshad pa'o//gzhan ni rigs pa can la sogs pas byas pa dang mi rtag par brjod pa tha dad pa'i chos chos can gcig la 'du bas byas pa dang mi rtag pa dag chos can gcig la 'du ba'i 'brel pa yin no/ /'du ba dang 'brel pa'i dpe gzhan ni 'dir don gcig la 'du ba'i phyir yang dag par ldan pa nyid la 'du ba'i sgras brjod do//ldan pa dang 'du ba dag ni rtag pa'i phyir tha dad par bshad pa la gus par mi byed do/ /pha rol pos me dang du ba dag rang gi yan lag can la 'du ba yin gyi de gnyis don gcig la ni 'du ba ma yin te/ me dang du ba gzhan gyi lugs kyis rten dang brten pa'i dngos po yin no zhes 'jig rten pas 'brel par bshad do/ /bskyed par bya ba dang skyed par byed pa zhes bya ba ni don dam pa'i 'brel pas byas pa'o/ /'o na ni don dam par me ni skyed par byed pa'i phyir cig shos ni bskyed par bya ba yin na/ dbang phyug sde dang lhan cig dpyad pa byas zin pa de rigs pa can gyi 'dod pa'i 'brel pa de yang gzhan yod na de med pa dag la mi srid na ci ste brjod pa yin/ bden te zhar la byung bas de'i 'dod pa yang dgag pa'i phyir bshad do/ /sngar gzhan yod pa mngon sum gyis grub pa'i phyir dgag par bya ba med pa de'i don la mngon sum las gzhan brtags na ni shin tu thal bar 'gyur ro//zhar la byung ba bshad nas da ni 'di brjod par bya ste/ gang gi tshe gzhan yod par 'dzin par mngon sum gyis grub pa de med par mi 'gyur ba de'i tshe mngon sum las gzhan pas bum pa med do zhes bya ba de lta bu'i rnam pa khyad par dang khyad par du bya ba yod pa'i mtshan nyid dang nye ba la sogs pa 'dod par 'gyur ro snyam na/'brel pa med na gzhan yod na de med pa dag khyad par dang khyad par du bya ba'i dngos po mi rigs te/ ha cang thal bar 'gyur ba de'i phyir gang las de'i mtshan nyid dang nye ba de med na mngon sum du 'gyur ba yin/de ltar 'brel pa'i rang gi ngo bo bshad pa de 'dir mi srid pa ni dngos po yod pa dang zhes bya ba smos te/ ji lta ba'i byas pa dang mi rtag pa dang me dang du ba dag don gcig tu 'du ba la sogs pa'i mtshan nyid kyi 'brel pa ni yod pa dang med pa dag la de lta bu 'ga' yang med do//'brel pa dag ni de med pa gzhan yod pa la sgrub par byed par mi 'gyur ro/ /de lta na don gcig pa'i chos can la gnas pa gnas pa gang yin pa de dag don gcig la 'du ba yin te/ gzhan la yod pa ni sa phyogs su bshad do/ / rang gi yan lag can la gnas pa des na de la bum pa med pa'o/ /de lta na sa phyogs kyi cha shas la bum pa med do zhes bya ba ni sa phyogs ma yin no/ /sa phyogs kyi yan lag can ni rtsom pa ma yin te/ de rdzas kyi bdag nyid ni rdzas las gzhan pa nyid kyis rtsom pas bum pa'i med pa ni rdzas ni rnam pa dgur 'dod do//bya ba dang ldan pa la sogs pa rdzas kyi mtshan nyid yin na de lta yod pa ma yin no/ /yon tan gyi ngo bos de la 'jug pa med do/ /yon tan ni nyi shu rtsa bzhi nyid du 'dod pa 'di de dag las gzhan pa ma yin no/ / las kyi ngo bo rnam pa lnga ni ma yin te rang gi las dang rang gi de ma thag tu 'byung bas de'i mtshan nyid spangs pa'o/ /rdzas gcig ces bya ba la sogs pa de'i mtshan nyid rnams so/ /de dang de dag med pa ni mi srid pa yin no/ /spyi la sogs pa'i ngo bos kyang ma yin te/ de'i ngo bo spangs pa'i phyir ro//gzhan yod pa'i de med pa dag las me dang du ba dag bzhin du ldan pa ni med de/ rdzas nyid du de khas ma blangs pa'i phyir ro/ /de med pa ni rdzas yin no zhes ma bshad do/ /rten dang brten pa'i dngos po yang med de snod 'di la rgya shug yod pa bzhin du gang gi phyir de yang ldan pa'i rgyu mtshan du brjod pa'am/snal ma 'di rnams la snam bu'o zhes bya ba ni 'du ba'i rgyu mtshan yin no/ /med pa ni rdzas kyi bdag nyid ma yin no/ /ldan pa ma lus pa yang 'du ba rnam pa lnga nyid kyis rdzas la sogs pa rnams la 'du bar 'dod kyi dngos po med pa ni ma yin no//rnam pa lnga ni rang gi nang du 'dus pa yin te/ de'i bdag nyid la phan 'dogs pa med pa'i yod pa ni rten du tha snyad gdags pa mi srid do/ /phan 'dogs par byed pa ni bskyed par bya ba dang skyed par byed pa'i dngos por 'gyur na de med pa bskyed par bya ba ma yin te/'bras bu thal bar 'gyur ro/ /'bras bu yang 'dir mi srid de gang las rang gi rgyu dang 'dra ba'am yod pa dang 'dra ba 'bras bus brjod na/ khyed gzhan yod pas sa phyogs su bshad pa rgyu ma yin gyi 'di ltar rnam pa gsum ste/ rdzas dang yon tan dang las rnams kyis rdzas dgur 'dod do//med pa ni rdzas kyi mtshan nyid ma yin pas yod pa'i 'du ba yang shes pa yod pa'i yul de med par 'gyur na med pa ni shes pa'i yul ma yin no/ /sa phyogs yod pa la yang bum pa med pa srid pas de 'bras bur ga la 'gyur/ de'i yul tha dad pa ni med de rnam pa gcig pa'i shes pa'i yul yin pa'i phyir ro//'brel pa tha dad pas ni tha dad pa nyid ni spyi la yang thal bar 'gyur ro/ /'du ba yang de ma thag tu sun phyung bas rang gi rgyu yod pa las 'byung ba'i ngo bo'i 'bras bu de med par ga la 'gyur 'dis ni bskyed par bya ba dang skyed par byed pa'i dngos po yang bsal to//des na rnam pa thams cad du 'brel pa med pa'i phyir ji ltar gzhan yod pas de med pa'i sgrub par byed par 'gyur/ 'brel pa gzhan bstan pa'i phyir gal te yul dang zhes bya ba la sogs pa smos te/ dper na don ni yul lo/ /sgra ni yul can no/ /yul dang yul can gyi dngos po de dag 'brel pa bzhin du gzhan yod pas de med pa dag kyang yul dang yul can gyi dngos po'i 'brel pa las 'byung bar 'gyur ro/ /sa phyogs su snang ba gzhan yod pas bum pa med par shes par 'gyur ro zhes bya ba ni phyogs snga ma'i dogs pa'o//sgra dang don dag 'brel par 'gyur ro zhes mngon par 'brel pa'i ngo bo ci zhig yin/ rgyu dang 'bras bu'i mtshan nyid do/ /yang ji ltar don gyi 'bras bur sgrar 'gyur/ de ston pa ni don ston pa'i bsam pa yod pa la rjod par 'dod pa yod par sgra'i sbyor bas sgra brjod pa des na don rjod par 'dod pa la 'jug go//sgra ni rgyu dang 'bras bu'i mtshan nyid kyi 'brel pa ni med do/ /gal te na yang sgra dang don dag gi spyi'i ngo bo la blos yongs su brtags pa de lta na yang so sor snang ba'i rjod par 'dod pa'i sgra'i spyi las rtog pa dang 'brel pa'i sgra ni rang gi mtshan nyid kyis kun nas bslang ba'i sgo nas rgyu dang 'bras bur brjod do//med na mi 'byung ba'i mtshan nyid yin par gzhan la rab tu grags par brjod do/ gzhan ni med na mi 'byung ba'i mtshan nyid kyi sgra dang don dag la 'brel to zhes tha snyad byed do//des na 'brel pa'i rgyu mtshan yin no/ /gal te nyan pa po dang 'chad pa po dag yod pa'i ngo bo'i yul dang yul can gyi ngo bor rigs kyi/ de med pa'i gzhan yod pa dag kyang de bzhin du 'gyur ro zhe na/ rnam pa 'di yang zhes bya ba smos te/rnam pa 'di ni de med pa gzhan yod pa las mi srid do zhes bshad ma thag pa yin no/ /bum pa med par bstan pa'i bsam pa la yod pa'i sa phyogs kyi mtshan nyid gzhan yod par rab tu sbyor bas grub pa med do/ /bum pa med par ston pa'i bsam pa'i snga rol du sa phyogs rang gi rgyu kho na las grub po//de'i bsam pa yongs su zin kyang gzhan yod pa dang de med pa de yang ji ltar rgyu dang 'bras bu'i dngos po de'i sgo nas sam med na mi 'byung ba las 'gyur/ gang gis na yul dang yul can gyi dngos por brtag par bya ba yin/ gal te ji ltar sgra dang don dag bsgrub par bya ba dang sgrub par byed pa'i rgyu mtshan yul dang yul can gyi dngos po yin pa de ltar gzhan yod pa dang de med pa dag kyang re zhig de tsam gyi sgra dang don dag gi dpe yin no zhe na/ grub na ni zhes bya ba smos te/ sgra dang don dag ni rgyu dang 'bras bu'i dngos po'i rgyu mtshan gyis bsgrub par bya ba dang sgrub par byed pa yin gyi/de lta ma yin na don gzhan pa nyid ni der mi rigs pa'i phyir ro/ /de bzhin du 'dir yang de med pa dang gzhan yod pa dag bsgrub par bya ba dang sgrub par byed pa'i dngos por 'grub par 'gyur na/ de'i tshe de'i sgo nas ni bsgrub par bya ba dang sgrub par byed pa'i sgo nas so/ /yul dang yul can gyi dngos por 'gyur na/ ji srid du de nyid bsgrub bya dang sgrub byed kyi dngos po'i 'brel pa med na rgyu dang 'bras bus dngos po gang gis 'grub par 'gyur/ thams cad bsgrub bya dang sgrub byed du thal bar 'gyur ba'i phyir ro//gal te ji ltar dbang po rang gi yul du 'grub pa'i rgyu mtshan yin zhe na/ phan tshun nye bar 'gro ba la sogs pa brten pa'i rkyen gyi khyad par la sogs pa'i dbang po dang yul dag rnam par shes pa gcig bskyed par nus pas skyed pa'i tha snyad 'dogs pa de bzhin du 'dir ma yin te/gzhan yod pa dang de med pa dag de mi rigs pa'i phyir ro/ /rtags dang rtags can gyi dngos po'i mtshan nyid kyi bsgrub par bya ba dang sgrub par byed pa rnal ma yin pa'i phyir/ de la yang 'brel pa gzhan pa mi rigs so/ /'brel pa gzhan pa'i rgyu mtshan ni gzhan yod pa dang de med pa la med do//gal te bsgrub par bya ba dang sgrub par byed pa'i dngos po yang yul dang yul can gyi dngos po'i rgyu mtshan kho na yin no zhe na/ de lta ma yin na zhes bya ba smos te/ 'brel pa gzhan mi 'dod kyi 'on kyang yul dang yul can yin pas bsgrub par bya ba dang sgrub par byed pa'i dngos po yin pa de'i phyir yul dang yul can gyi dngos po yin pa des 'di gcig la gcig brten pa yin par 'gyur ro//de lta na yang gcig ma grub pas gnyi ga yang ma grub pa yin no/ /gzhan yang / gzhan yod par gyur pa rtags las so//med pa ni rtags can no/ /rjes su dpog par 'dod pa'o/ /'di spyi bsgrub par bya bar 'gyur na gzhan yod pas de med pa 'ba' zhig nyid sgrub pa'i phyir dang / 'ba' zhig pa la 'brel pa med pa ma yin pa'i phyir bsgrub par bya ba dang sgrub par byed pa'i dngos po mi rigs so//spyi yang khyad par du bya ba dang khyad par byed pa la brten pa'i chos dang chos can mtshan nyid bsgrub par bya bar 'dod pas de med pa la skyon du yang 'gyur bas kyang smos pa yin no/ /gal te thams cad kyi spyi bsgrub par bya bar mi 'dod do zhe na/ de lta na zhes bya ba la sogs pa smos te/chos tsam yang rang rgyud pa'i bsgrub par bya bar khas blangs pa de las gzhan yod pa'i phyir bum pa med do zhes bya ba de lta bu'i ngo bo bum pa yul thams cad dang thams cad kyi tshe med par thal bar 'gyur ro/ /chos can la la'i chos kyi yon tan du gyur pa sgrub par byed par de nyid la de'i tshe kho na yod par rigs te gzhan du ni ma yin no//thams cad du spyi bsgrub par bya bar khas blangs pas chos 'ba' zhig ni ma yin no snyam na gzhan gyi 'dir ma yin te zhes bya ba la sogs pa smos te/ spyi bsgrub par bya ba la gzhan yod na de med pa 'brel pa med pa ga la yin/phyogs la sogs pa zhes bya ba la sogs pas ni/ sa phyogs 'di la bum pa med do zhes bya ba de bzhin du bum pa med pa'i sa phyogs la sogs pa chos can khyad par du byed pa yin te/ bum pa dang bcas pa'i phyogs la sogs pa tha dad par rnam par 'jog pa'i phyir de'i khyad par gyis thob pa yin no//bsgrub par bya ba ni bum pa med do zhes bya ba de lta bu 'ba' zhig ma yin par chos can 'ga' zhig la yon tan yod par ston pa de'i phyir spyi bsgrub par bya ba yin pa'i phyir gang gis ni de'i skyon 'byung bar mi 'gyur/kho bo cag gi phyogs la ni rtags dang rtags can gzhan pa'i bdag nyid ma yin la phyogs la sogs pa'i chos can la 'brel pa med par thal ba'i skyon du mi 'gyur ro/ /gzhan yod pa gang zhig yin snyam na bum pas dben pa'i sa phyogs la sogs pa'i mtshan nyid phyogs kyi chos can dang de'i bdag nyid kyi 'brel pa yod pa'i phyir ro//de lta na sgra la sogs pa'i chos can la byas pa nyid de'i bdag nyid kyi mtshan nyid kyi 'brel par khyed 'dod pa de bzhin du 'dir yang yod pa yin no zhes bsams nas de yang 'brel pa'i phyir ro zhes bya ba mi rigs pa bshad do snyam du sems na grub pa'i mtha' smra bas kyang bsgrub par bya ba'i chos kyi mtshan nyid kyi rtags can bum pa med pa dang /gzhan yod pa'i rtags dang 'brel pa med pa ma yin na sngar bshad pa'i chos can la med pa des na lan 'di dag la 'brel pa ci zhig yod snyam du dgongs nas/gzhan yod par bshad pa dang chos can 'brel pa med par bstan pa ni ma yin te zhes bya ba smos te rtags dang rtags can gyi 'brel pa med pa ma yin te zhes bya ba smras pa ma yin te zhes bya bar sbyar ro/ /de ltar spyi sgrub par byed pa ma yin pas 'on kyang rtags dang rtags can gyi 'brel pa med pa nyid dang spyi sgrub pa med par de bzhin du brjod pa'i phyir ro//chos can du rnam par gzhag pa ni gzhan yod pa yin pa'i phyir gzhan yod pa'i mtshan nyid rtags yin na phyogs la sogs pa ga la yin/ 'di dag bstan pa ni phyogs gang kho na la chos can du khyed kyi brtags pa la bum pa la sogs pa med do zhes brjod do//'jig rten pas phyogs la sogs pa de nyid la bum pa la sogs pa de dang 'dre ba med pa ste/ tshogs pas byas pa spangs pa'i gzhan yod pa rtags su 'dod pa las gzhan ni 'ga' yang med do//gang gi phyir de mthong ba kho nas ni bum pa dang ma 'dres pa'i phyogs la sogs pa mthong ba kho nas rtogs par byed pa pos 'di na bum pa med do snyam pa'i rnam par rtog pa rtags can gyi shes pa de dag khas blangs pa de nyid kyi phyir gzhan yod pa'o/ /gang kho na mthong ba rnams rtags kyi shes pa skyed pa de kho na rtags su brjod do//bum pa dang ma 'dres pa'i phyogs la sogs pa kho na yin pa de'i phyir gzhan yod pa'i mtshan nyid de nyid rtags su khas blangs pa des na ji ltar de kho na gzhan yod pa la ldog pa yin du zin kyang rtags dang rtags can gyi dngos po ste rtags nyid dang rtags can nyid tha dad par 'gyur/chos can du gyur pa rtags nyid du 'os pa ma yin te/ chos rtogs pa nyid las bsgrub bya rtogs pa'i rjes su 'gro ba la sogs pa'i rjes su 'brang bar mi rigs pa'i phyir ro/ /de las gzhan pa'i chos can med pa'i phyir ro//ji ltar gzhan yod pa'i bdag nyid de rtags sam spyi bsgrub byar sbyar bar bya/ sgra dang byas pa nyid kyang don dam par na de'i bdag nyid yin du zin kyang ldog pa tha dad pa'i rgyu mtshan yod pa nyid kyis tha dad do/ /des na sgra la sogs pa chos can du rtogs la mi rtags pa la sogs pa yang rtogs par byas pa nyid la sogs pa de bsgrub byar 'gyur ba ni rigs so//gal te spyi dang bye brag tu brtags nas rtags dang rtags can du yang 'gyur ro snyam du sems so zhe na/ gang gis na zhes bya ba smos te/ 'dir gzhan yod pa'i rang bzhin la spyi dang bye brag gi dngos por brtag pa yang mi srid de gang gis na spyi dang khyad par du brtags nas spyi ni gtan tshigs su 'gyur la khyad par ni chos can du 'gyur ba yin/ spyi bsgrub par bya ba'i de rtags dang rtags can du 'brel par 'gyur ro//gang gis na mi srid pa yin zhe na/ de khyad par rtogs pa kho nas zhes bya ba smos te/ bum pas dben pa'i phyogs kyi khyad par de kho na de med pa ste bum pa med par rtogs pa'i phyir dang / gang gi phyir khyad par kho na bum pa med par rtogs pa'i rgyu mtshan yin pa de'i phyir ci de la spyir rtogs par byed pa ni/gal te de nyid kyi khyad par gzhan la 'jug pas spyi'i ngo bor rtogs par 'gyur ro zhe na/ bum pas dben pa'i phyogs kyi khyad par de yang gzhan rigs mthun pa la rjes su 'gro ba dang rjes su 'jug pa med pa'i phyir gang las spyi'i bdag nyid du 'gyur/'di yul dang dus dang gnas skabs nges pa'i bye brag rnams ni gzhan gyi rjes su 'gro ba med pa'i phyir ro/ /'di nyid kyi gtan tshigs lhag par bstan pa ni dam bca' ba'i don zhes bya ba la sogs pa smos te/ gang gi tshe bum pas dben pa'i phyogs kyi khyad par gyi chos de kho na gtan tshigs su 'dod pa de'i tshe dam bca' don chos dang chos can gyi spyi yin la de'i phyogs gcig chos can gyi mtshan nyid gtan tshigs su 'gyur ro//dam bca' ba'i don gyi phyogs gcig ldog pa yin yang tha dad par nyams su ma myong bas gtan tshigs ma grub pa yin no//'on te de dag gi skyon du ma gyur cig snyam nas bum pas dben pa'i phyogs kyi bye brag gtan tshigs su mi 'dod na bum pas dben pa'i bye brag spangs pa'i phyogs tsam yin no zhe na/ gang na phyogs tsam yod pa de la bum pa med pa yang ma yin no zhes bya ba smos te/bum pa dang bcas pa'i phyogs kyang phyogs tsam la yod pas gtan tshigs ma nges par 'gyur ro/ /pha rol gyis spyi dang bye brag gi dngos po de lta ma yin par bstan pa ni de dang 'dra ba ci 'dra ba'i bum pas dben pa 'ba' zhig pa 'di'o/ /phyogs ni mdun na gnas pa'o//de dang 'dra ba'i phyogs thams cad la bum pa med pa kho na yin pas gang gis ma nges par 'gyur/ rnam pa de lta bu'i phyogs kyi bye brag rtogs pa nyid bum pa med pa rtogs pa yin pa de'i phyir gzhan yod pa na de med pa dag rtags dang rtags can du mi 'thad pa nye bar bstan pa ni de ni 'ba' zhig ces bya ba la sogs pa smos te/gang 'ba' zhig pa ni 'di phyogs kyi bye brag gi chos can du rnam par gzhag pa de 'ba' zhig gang yin pa de ni 'ba' zhig pa zhes bya ba khyod kyis bye brag tu brjod pa 'dis bum pa spangs pa 'di nyid bum pa med pa yin no zhes smras pa yin no//de yang bum pa spangs pa rtags su gyur pa 'ba' zhig pa'i phyogs rtogs pa kho na'i tshe grub pa yin gyi dus phyis ni ma yin no/ /de'i phyir rnam pa gzhan kho na'i sgo nas du ba la sogs pa'i me bsgrub par bya ba yin pa des na rtogs pa las bsgrub par bya ba rtogs pa yin/rtags dang rtags can ni 'ga' zhig kyang yod pa ma yin te/ shes par 'dod pa la bum pa med pa grub na gang 'ga' zhig ni shes par mi 'dod pa'i phyir ro/ /phyogs 'ga' zhig pa rtogs pa nyid dang / bum pa spangs pa rtogs pa gang yin pa 'di dag dus phyis gang dang gang phyogs 'ba' zhig pa/de dang de ni bum pa spangs pa yin no zhes bya ba'i rjes su 'gro ba smos pa'i rjes su 'brang ba don med de bsgrub par bya ba dang por rtogs pa'i phyir ro/ /gang gi phyir de ltar de lta bas na gzhan yod pa 'ba' zhig sa phyogs kyi mtshan nyid ni bsgrub par bya ba dang sgrub par byed pa bye brag med pas dngos po med pa sgrub pa ma yin pa de ltar na spyi bsgrub par bya ba de yang rtags dang rtags can gyi 'brel pa bstan pas gzhan gyi phyogs la sogs pa'i chos can gyi khyad par la med pa sgrub par byed pa'i phyir ro zhes gang bshad pa la de tha dad par ma grub pa'i phyir sun 'byin pas bsal ba yin no//yul dang yul can du gyur pa'i 'brel pa yang bsal bas pha rol po bsgrub par bya ba dang sgrub par byed pa la 'brel pa gzhan ston pa ni gal te 'gal ba'i zhes bya ba smos so/ /gzhan yod pa dang de med pa dag la 'gal ba'i 'brel ba yod par bshad pa de'i 'brel pa yod pas gzhan yod pa las dngos po med par gyur par 'dod ce na/grub pa'i mtha' smra bas bsgrub par bya ba dang sgrub par byed pa dag la 'gal ba mi srid pas gang zhig gang dang 'gal zhes gang zhig dris pa'o//sgrub par byed pa dang bsgrub par bya ba dag la 'dir 'gal ba mi srid do zhes bsams pa yin no/ /gzhan 'gal bar mngon par 'dod pa mi shes pas ston pa ni gzhan med pa'i phyogs 'ba' zhig gi bdag nyid dang zla bo ni gang med pa'o//'jal bar 'dod pas bum pa la sogs pa de yin no zhes pha rol pos de ltar smras pa ni ma 'brel par brjod par bstan pa ni ci zhes bya ba smos te/ zla bor 'dod pa'i bum pa la sogs pa 'jal bar 'dod par gang gis zla bo gzhal bar bya ba nyid kyis rtags dang rtags can la 'gal ba'i 'brel pa brjod pa ni med do//gal te zla bo 'jal bar byed par 'dod pa ni ma yin te 'on kyang de med pa yin no zhe na/ dngos po med pa'i zla bo zhes bya ba smos te bsgrub par bya ba'o/ /de dang gzhan yod pa dang 'gal ba med pa nyid do/ /gang las she na lhan cig gnas pa'i phyir ro//zla bo dngos po med pa dang gzhan yod pa dag lhan cig gnas pa'i phyir ro/ /'di gang gzhan gyi 'dod pa la ltos nas brjod pa yin gyi de lta ma yin na gang kho na'i phyogs 'ba' zhig de kho na bum pa med pa yin no zhes bstan pas gang zhig gang dang lhan cig gnas pa yin te/de la gzhan yod pa dang lhan cig gnas pa'i de med pa'i gzhal bar bya ba la rtags dang rtags can dag ji ltar 'gal ba yin/ rnam pa 'ga' zhig kyang ma yin no zhes bya'o/ /'brel pa med pa nyid de dag yin pa'i phyir ro/ /'dir yang 'gal ba'i 'brel pa la ltos nas gzhan yod pa ni rtags yin pa'i phyir/gzhan pa'i chos can mi srid pas spyi med pa sgrub par byed pa'i gnas skabs la gang sngar gyi skyon de dang der byung ba so na 'dug ste yongs su spangs pa med do/ /'di ltar pha rol gyis 'brel pa med par rnam par gzhag pa'i gzhan yod par rtogs pas de med pa'i rtog pa grub pa'i mtha' la mi srid par gzhan gyis bstan pa ni med pa dang zhes bya ba la sogs pa smos te/gzhan yod par rtogs pa nyid las de med par rtogs pa'i phyir rtags dang rtags can gyi dngos po rnam par 'byed pa ni gang dang gang gzhan yod par rtogs pa las de med par rtogs par sngar bshad pa de yang gzhan yod pas de med pa dag la 'brel pa yod par gyur na yin gyi/rtags dang rtags can 'ba' zhig pas ni ma yin no/ /de'i phyir khyed kyis gdon mi za ba de dag la 'brel pa 'ga' zhig 'dod par bya dgos na de nyid kho bo yang 'dod pa yin no zhe na/grub pa'i mtha' smra bas 'brel pa zhes bya ba smos te/ 'brel pa gang las cung zad cig 'brel pa la brten/ pa gzhan yod pas de med pa shes par byed par mi 'dod kyi/ 'on kyang kho bo ni gzhan phyogs 'ba' zhig yod pa kho na de gzhan bum pa la sogs pa med pa yin no//gzhan yod pa las gzhan du gyur pa ci yang ma yin pa'i ngo bo yin pa'i phyir zhes sngar 'di dag bshad zin to/ /gzhan yod pa la yang de med pa yin no zhes tha snyad btags pa ni 'dir rigs pa can sun 'byin pa yin no//gang gi tshe de lta yin pa de'i tshe de gzhan yod pa dang gzhan bum pa la sogs pa dang ma 'dres pa ni lhan cig pa'i ngo bo gang yin pa de ltar ni ma yin no/ /gzhan ma yin pa dang 'dre ba'i ngo bo 'di dag nyid ston pa ni 'ba' zhig pa zhes bya ba ni nyi tshe ba nyid du brjod do//bdag nyid kyi rang bzhin du rnam par gnas pa yin te de'i bdag nyid gzhan dang lhan cig pa ma yin pa'i bdag nyid du'o/ /de'i nus pa las byung ba de'i ngo bo nyid du rjes su byed pa'i mngon sum gyis yongs su gcod pa de nyid gzhan bum pa la sogs pa de la yod pa rnam par gcod do//rnam par mi gcod par med pa rtogs pa yin na ni gang gis na gzhan yod pas de med pa dag go bar bya ba dang go bar byed pa'i dngos po yin/ gang gi phyir de dag 'brel pa yin par kho bo 'dod do/ gzhon nu ma len gyis bsam pa yod pa'i cha las tha dad pa 'di nyid med pa'i cha yin pa de'i phyir gzhan yod pa de med pa ma yin pa ji ltar de rtogs pa yin/'di ltar 'di med pa dang / snga na med pa la sogs pa tha dad pas tha dad pa ni dngos po med pa las tha dad pa mi srid pas 'di dngos po'i ngo bo nyid yin no/ /ji skad du/ dngos po med la 'di mi 'gyur/ /tha dad des na 'di dngos yin/ /zhes smras so/ /dngos po'i cha ni dngos po med pa'i char mi rung ngo / /de dbang po dang ldan pa'i 'brel pa'i stobs kyis rtogs kyi/ cig shos rtogs pa yang de dang 'brel pa'i rgyu med pa'i phyir ro//de skad du/ 'brel de yod pas de bzhin du/ /yod pa'i ngo bor rtogs pa yin/ /'di la 'di dang 'dir de med/ /'brel med pa yi rgyu can yin/ /zhes bshad do/ /de ji ltar de rtogs pa nyid las gzhan rnam par gcod pa yin zhe na/ de sun dbyung ba'i phyir de las gzhan pa rtogs pa zhes bya ba smos to//phyogs 'ba' zhig pa'i bdag nyid gcig pu lhan cig pa med pa de nyid gzhan zla bo bum pa la sogs pa ma tshang ba med pa yin no zhes bya'o/ /de'i phyir gzhan gyi yod pa kho na la khyod dngos po'i cha'i ngo bor mngon par 'dod pa'i zla bo dngos po med pa ni de ma yin te tha dad par gyur pa'i chos gzhan yin no zhes brjod do//bde bar gshegs pa'i sras rnams ni de las kyang de rtogs pa nyid de de las gzhan pa yod pa rtogs pa nyid da med par rtogs pa yin no/ /de mi rtogs pa ni de'i zla bo mi rtogs pa ste/ med pa mi rtogs so zhes bya ba'i don to/ /'di snyam du sems te/ gang dang gang med pa'i cha dang yod pa'i cha dag tha dad par gyur pa'i dngos po med pa'i chos su yongs su brtags pa la bum pa dang bcas pa la sogs pa med pa'i bdag nyid de'i ngo bo ni ma tshang ba nyid nyams su myong ba'i gzhan du ni ma yin no//de yang de'i ngo bo ma tshang ba gzhan pa'i dngos po'i yod pa'i cha la yang yod na de med pa yin te de las gzhan pa'i dngos po 'dor bar 'gyur bas gang dang gang gi ngo bo ma tshang ba ma yin pa de dang de ni gzhan pa nyid du rigs par mi 'gyur te dper na rang gi ngo bo bzhin no/ / med pa'i cha yang der mi 'grub pas sna tshogs pa thams cad kyang rdzas gcig tu thal bar 'gyur ba dang / des na lhan cig tu skye ba la sogs pa thal bar 'gyur ba dang / thams cad thams cad la sbyor bar 'gyur ba'i phyir gdon mi za bar gzhan pa'i dngos po yod pa'i ngo bo nyid de gzhan med pa'i bdag nyid kho na yin pa de bzhin du rtogs pa nyid de/de las gzhan pa'i yod pa rtogs pa ni dbang po dang 'brel pa kho nas yin la de med pa ni ma 'brel pa las so zhes bya bas ci zhig brjod ce na/ 'di la 'di dang 'dir de med de/ rgyu dang 'brel pa med pa yin zhes bya ba rnam par rtog pa la ltos nas brjod pa yin no zhe na ni de dang de la gnod pa med de mngon sum gyis de'i rnam par skyes nas gzhan med pa de'i bdag nyid kyi dngos po'i ngo bor rtogs pa'i phyi nas ji ltar 'dzin pa'i mngon par brjod pa'i rnam par rtog pa khas blangs pa'i phyir ro//rgyas par tshad ma gnyis su bsgrub pa'i gzhung gi dngos po med pa rnam par dpyad pa de dngos po med pa'i gzhal bya dang tshad ma rnam par dpyad pa byas zin pas de nyid du blta bar bya'o/ /gdon mi za bar de las gzhan yod par rtogs pa nyid de med par rtogs pa yin pa de'i phyir dngos po ma 'khrul pa sgrub pa'i don dang 'di la 'di med do zhes bya ba med pa'i tha snyad kyi don du med pa'i tshad ma brtag pa ni mi rigs pa yin no zhes bstan pa ni de lta ma yin na zhes bya ba smos te/gang gi tshe de rtogs pa nyid de med par rtogs par mi 'dod pa de'i tshe de las gzhan pa'i dngos po'i rang gi ngo bo yongs su de las gzhan pa de ma yin pa'i ngo bo rnam par gcod pas de dngos po med par rtogs pa mi sel na de yongs su gcod pa nyid du mi 'gyur te de las gzhan pa'i dngos po'i rang gi ngo bo rtogs pa nyid du mi 'gyur ro//ci'i phyir zhe na/de dang de ma yin pa'i ngo bo ni de dang de las gzhan pa'i ngo bor rtogs par nges so/ /khams gsum po ma lus pa'i mtshan nyid mi mthun pa gang yin pa de ma yin pa'i ngo bo de'i ngo bor mi 'gyur te/ gzhan gyi ngo bo de dag rnam par ma phye ba'i phyir ro/ /rnam par ma phye bas rnam par dbye ba rnam par ma bzhag pa'i phyir ro//ma 'chol ba rab tu ma bsgrub pa'i phyir gzhan ma lus pa'i ngo bo mi 'chol ba de'i ngo bo'o/ /gal te de dang de las byung ba'i mngon sum gyis de bzhin du rjes su mi byed de 'ba' zhig pa las grol ba'i rnam pa nyid skyes na ni de'i tshe ji ltar des de yongs su gcod par 'gyur/gang gi ngo bo'am gang gi dngos po de'i rjes su mi byed pa'i shes pas de yongs su gcod par mi rigs te/ dper na dung dkar po'i rjes su mi byed pas mig ser gyis dung ser por snang ba'i shes pa bzhin no/ / so sor nges pa'i rjes su byed pa na de ma yin pa yongs su gcod pa nyid ji ltar gzhan rnam par mi gcod pa yin/ des na so sor nges pa de'i ngo bo de'i rjes su mi byed na/ de las gzhan pa rnam par mi gcod de de lta na yang de yongs su gcod pa med do zhes bya'o/ /de ltar yin na de las nyes pa ci zhig tu 'gyur zhe na/la lar 'ga' zhig ces bya ba smos te/ skye bo thams cad kyis rtogs pa'i me la sogs pa 'ga' zhig gi dngos po yul la lar mthong nas de dang 'brel pa thob pa'i phyir dang mthong ba des ma mthong ba yongs su spangs pa'i phyir 'jug pa dang ldog pa'i mtshan nyid du mi 'gyur te/ci'i phyir zhe na/ ni zhes bya ba gang gi phyir te/ me ni mthong yang 'di rtogs pas de dang de ma yin pa'i ngo bo 'dres par snang ba ni mngon sum gyis so/ /de lta ma yin na mthong ba'i ngo bo nyams par 'gyur ro/ /de lta na ma 'dres pa'i ngo bo ma mthong na 'dres pa yang gal te mi mthong bas de'i tshe bong ba la sogs pa'i rnam pa lta bu 'ga' zhig gis 'di dag ji ltar mthong bar 'gyur/de ltar gyur pa de ni 'dres par mthong ba dang ldan pa'i me nyid mthong ba na chu la sogs pa ni ma yin par rtogs so/ /'on kyang 'dres pa'i ngo bos dngos por snang ba'i shes pa des ji ltar chu don du gnyer ba me'i yul de la 'jug par mi 'gyur/rang gzhan gyi tshig gis dogs pa'i go skabs ni gal te mi dmigs pas zhes bya ba la sogs pa smos te/ mi snang ba'i shes pa la me'i rang gi ngo bo nyid rtogs kyi chu med pa gang yin pa de ni chu de la mi dmigs pa'i shes pa yin pa des na shes pa gnyis de dang de ma yin pa'i ngo bo dag rnam par 'byed pas 'jig rten pa 'jug pa dang ldog pa'i mtshan nyid so sor nges pa'i tha snyad grub pa yin no zhe na/grub pa'i mtha' smra bas mi dmigs pa zhes bya ba 'di ci zhig ces bya ba smos so//gzhan gyis smras pa res 'ga' zhig chu dmigs pa spangs pa tsam yin no snyam nas gal te chu'i dmigs pa zhes bya ba la sogs pa smos te/ gzhon nu ma len gyis chu'i dmigs pa ldog pa tsam ci yang ma yin pa'i ngo bo dngos po med pa'i mtshan ma ni mngon par 'dod kyi/mngon sum la sogs pa ma skyes pas tshad ma dngos po med par brjod ces bya ba'am/ de'i bdag nyid yongs su ma gyur pa'am rnam par shes pa med pa ste dngos po gzhan du brjod do/ /'on kyang de'i bdag nyid bkag pa'i dngos po gang snang ba'i shes pa'i bdag nyid yongs su ma gyur pa de dang de las gzhan pa'i dngos po snang ba'i shes pa dang lhan cig tu rgyu bar khas blang bar bya ste 'ba' zhig ni ma yin no zhes gzhan gyis khas blang ba'i ched du 'di nye bar dgod do//de lta na yang gzhan pa'i dngos po rnam par shes pa nyid dngos po med pa'i tshad ma yin pa bla'i/ci tshad ma med pa'i bdag nyid yongs su ma gyur par bshad pa'i chos yongs su brtags na ni de las gzhan pa'i dngos po rnam par shes pa yongs su gyur pa las gzhan pa nyid yongs su ma gyur pa ni ma yin te/ khyed dngos po las gzhan pa nyid kyi dngos po med par khas blangs pa'i phyir ro//nus pa mtshungs pa'i ngo bo shes pa gcig la tshogs pa ni gzhan pa'i dngos po rnam par shes pa rnams so/ /de bzhin thabs gzhan med pas de shes pa las gzhan zla bo med par grub pa yin gyi gzugs shes pas/ro la sogs pa med par rtogs pa'am shin tu yul la sogs pas bskal pa ni rigs pa ma yin no/ /gzhan pa'i dngos po rnam par shes pa so sor nges pa'i ngo bo so sor snang ba nyid las dngos po gzhan du snang ba de chu la sogs pa dmigs pa med pa kho nar mi 'grub kyi/de ltar zla bo med pa ni mngon sum gyis nges pa nyid do/ /de med pa'i tha snyad du kho bo cag mngon par 'dod pas mi dmigs pa las 'ongs pa ma yin no zhes bstan pa 'dis nye bar dgod do/ /de la gang gi tshe chu dmigs su med pa ci yang ma yin pa'i ngo bo mi dmigs pa yin pa de'i tshe med pa de ji ltar 'ga' zhig gis rtogs pa yongs su gcod pa yin/ji srid du yongs su gcod pa ni shes pa'i chos yin pa'i phyir ro/ /yang na de rtogs pa'i ngo bor mi 'dod kyi 'on kyang de'i phyir rgyur yod pa yin no zhe na/rtogs pa'i rgyu'am zhes bya ba smos te/ nus pa thams cad kyis stong pa'i mtshan nyid kyi dngos po med pa ni rtogs pa'am rtogs pa'i rgyur yod par mi rigs so/ /chu'i dngos po nyid yin na lhan cig byed pa la de ltos pa med pa'i phyir de rtag tu shes pa skyed pas dngos po med pa'i shes pa gcig pu kho na rtogs par 'gyur te/shes pa gzhan gyi go skabs med par 'gyur ro/ /shes pa med pa ni med pa nyid shes par rigs so zhe na/ de yang zhes bya ba smos te chu dmigs pa med par ji ltar rtogs/ yang na chu 'di dmigs pa med pa ni de 'dir rtogs pa med pa kho na chu med par rtogs pa de'i tshe res 'ga' skye ba yin no//de skad du yang de'i chu dmigs su med pa'am de la chu las gzhan pa me la sogs pa'i rnam par shes pa gzhan pa'i dngos po yin no zhes bshad do/ /des na bdag nyid yongs su ma gyur pa ni tha dad pa rnam par gzhag pa'am de la yang de khas len pas na bdag nyid yongs su gyur pa de'i bdag nyid yin pa'i phyir de las tha dad par rnam par gzhag par mi bya'o//de yang de'am gzhan pa yang rung res 'ga' zhig kyang rtogs pa med kyang gang gi tshe chu la sogs pa dngos po med par rtogs na de'i tshe gnyid log pa la sogs pa'i gnas skabs na yang gnyid log kyang chu la sogs pa dngos po med pa cis na mi rtogs/des kyang de med par rtogs par 'gyur ro zhes tshad ma rnam par nges pas de rnam par dpyad pas de nyid du blta bar bya'o/ / bar du chod pa la sogs pa smos pa ni 'di dag bstan pa yin te/ gzhan pa'i dngos po yang gzhan pa nyid dang mtshungs par rung ba'i ngo bo la ltos par khas ma blangs so/ /de ltar na kho bo cag gis nye bar brjod pa mi dmigs pa grub pas so/ /gang gi tshe ji skad du bshad pa'i mi dmigs pa'i rnam pas chu med par rtogs pa la mi sbyor ba dang mer snang ba'i shes pa so sor nges pa'i rnam pa khas blang bar mi bya'o//de lta bas na 'dis me mthong bar rtogs pa na me mthong yang shes pa la 'dres pa'i ngo bor snang bas/ 'di na me yin gyi chu ma yin no zhes mi nges pas mi shes pa'o//chu rang gi ngo bor snang yang de don du gnyer ba ni 'dug pa la 'jug par mi bya/ 'gro bar mi bya ba ni chu don du gnyer ba la 'jug par mi bya ba'o/ /de ltar na chu zhes brjod pa gang yin pas gdung ba bgrod par dka' ba ste/ de'am gzhan pa'i ngo bo ma lus pa ma 'dres pa so sor nges pa'i rnam par shes pa la snang ba yin na 'di'am gzhan pa nyid 'dren ma'i ngo bor yang cis na snang bar 'gyur/des kyang 'jug pa dang ldog pa dag 'gal bas cig car nyams su blang bar mi nus pa'i phyir ro/ /rgol bar dka' ba ni nyon mongs shing rtogs par 'gyur ba'o//'dir gzhan gyi dogs pa smra ba'i go skabs ni gal te gcig mthong ba zhes bya ba la sogs pa smos te/ kho bo ni chu la dmigs pa ldog pa tsam ci yang ma yin pa'i ngo bo de med par rtogs pa ni mi brjod do/ /ji skad bshad pa'i skyon du thal bar 'gyur bas so//'on kyang 'di gcig pu 'ba' zhig pa'i me mthong ba gang yin pa de nyid las gzhan pa yin te de la chu snang ba med par rtogs par 'gyur ba'am rnam par shes pa la gzhan pa'i dngos por brjod do/ /grub pa'i mtha' smra bas ji ltar gcig mthong bas zhes bya ba la sogs pa smos te/ci de gcig mthong ba'i shugs kyis kyang gzhan med par rtogs par 'gyur ram/ de lta na mthong ba de'i tshe de nyid yod do zhes khong du chud par 'gyur la/ de las gzhan med do zhes cis na nges par 'gyur ba yin/ me la sogs pa 'ba' zhig pa de nyid yongs su mthong ba na chu dang ma 'dres par mthong bas me shes pa la so sor snang ba na chu med do zhes shes pa skye ba yin no//de lta na me bzhin du chu yang gang gis de las 'byung bar 'gyur ba de'i tshe me bzhin du de mthong ba'i shes pa la snang bar 'gyur ro/ /de dag gi rang gi shes pa khyad par can yin pa'i phyir/gcig snang bar rung ba yin par rigs so/ /de'i phyir gcig snang ba gzhan med pa ni mi 'byung ba yin pa'i phyir/ gzhan pa'i yod pa'i shes pa skye ba na gzhan pa'i dngos po'i rnam par shes pa med do/ / zhes bya ba'i shes pa skye ba'o/ /gzhan gyi dngos po de yang gzhan dang ma 'dres pa'i rang bzhin de nyid kyis de med par rnam par rtog pa'i rgyu yin no zhe na/ grub pa'i mtha' smra bas 'di nyid ces bya ba la sogs pa smos te/ 'on te kho bo cag gis 'di dag kyang de dag yod pa na gcig gi ngo bor nges pa rtogs pa mi srid pa ma yin no zhes bya ba la sogs pa'i tshig gis sngar bshad zin to//de'i phyir gzhan dang ma 'dres pa 'ba' zhig pa snang ba gang yin pa de las gzhan med pa yang yin no/ /de nyid 'ba' zhig de las gzhan med pa'i bdag nyid yin pa'i phyir ram gzhan med pa'i cha ni sun phyung ba'i phyir dang /de ni mngon sum la snang ba'i phyir de med pa ni de'i stobs kyis phyis tha snyad 'jug par byed de gzugs med pa nyid kyi rnam par rtog pa'i shes pa skye ba yin no/ /des ma rtogs na cung zad cig kyang go bar bya bar mi 'gyur te/gang gi phyir de gzhan gyi dngos po rnam par shes pa ni mngon sum gyi bdag nyid kyis kyang mi rtogs kyi de las gzhan med pa'i shes pa skye bas dngos po med pa'i tshad ma logs shig tu rnam par mi gzhag go/ /de lta na de gzhan gyi rnam pas stong pa myong ba kho na las de med par rig go//rnam par rtog pa'i shes pa yang de'i rnam pas stong pa'i ngo bor rigs pas de las gzhan med par rig pa ni med de/ 'ba' zhig pa 'di rnam par rtog pas 'byed do/ /de'i phyir 'di ltar rtog pa med pa'i shes pa bzhin du la lar med par nges pa na 'di na me yod ces phyis nas rnam par rtog pa'i shes pas/tha snyad rab tu 'jug pa tsam de las tha dad pa'i tshad ma ni med par sngar ji skad bshad pa de bzhin du med pa'i shes pa yang rnam par rtog pa de'i 'bras bu'i sgo nas gzhan pa'i dngos po rnam par shes pa'i mngon sum las dngos po med par grags pa'i tshad ma tha dad pa med pa'i phyir ro//de'i phyir kho bo cag gis bshad pa'i de las gzhan med par rtogs pa gang yin pa de nyid khyed kyis kyang bstan na ci'i phyir ma rangs par ston/ gang gi phyir dngos po med pa'i tshad mar bshad pa tha dad pa ni khas mi len pas khas len pa la bzhad gad ston pa yin no//de lta na khyed kyis da ltar thabs zad pas gzu bor gnas par brjod pa yin gyi de lta ma yin na 'di sngar yang cis na mi brjod/ cal col du brjod pas bdag dang gzhan nyon mongs pa yin no zhes mjug bsdu ba ni de lta bas na 'gram ma mthong ba'i bya bzhin du zhes bya ba la sogs pa smos te/dper na grur zhugs pa'i tshong pa rnams kyis bya ba bkrol nas kyang 'gram mthong ba yin na de gang gi tshe 'gram du gnas la/ mtha' ma rnyed pa de'i tshe ni gru nyid du phyir 'ong ba de bzhin du 'di la yang blta bar bya ste/ gang gis kyang gdon mi za bar khas blang bar bya ba gang dang gang gi phyogs yin pa de bas na ma rig pa'i gting mi tshugs pa can gyi phyogs bsgrubs pa 'di la cung zad cig kyang dgos pa med do//de ltar na gzhan gyi gzhan yod pa de med pa dag rtags dang rtags can gyi dngos por 'dod pa la 'brel pa med pas 'di rigs pa ma yin no//gzhan gyis bstan pa 'brel pa med pas gzhan yod par rtogs pas kyang med par rtogs par mi 'gyur ro zhes rtsod pa ni 'dir 'brel pa la sogs pa 'ga' zhig gis byas pa med kyi/ de las gzhan pa kho na de med pa yin te/gzhan med par rtogs pa nyid kyis de med par rtogs pa'i phyir ro zhes rab tu bsgrubs so/ /gzhon nu ma len gyis yongs su brtags pa'i dngos po med pa'i don 'ga' zhig dang dngos po med pa'i tshad mas rtsod pa ni zhar la sun phyung nas da ltar ni dngos po 'khrul pa grub pa ni de'i tshad ma yang rten ces bya ba 'di dag dngos su gsal bar byed pas phyogs snga ma kun nas bslang ba ni gal te de ltar gcig yongs su bcad pa zhes bya ba la sogs pa smos te/gang gi tshe gcig pu 'ba' zhig yongs su bcad pas gzhan rnam par bcad pa 'grub/ de'i tshe khyad par gzhan thams cad kyi yul gang yin pa de la 'di gcig tu mthong ba de la med par 'grub par 'gyur bas/khyad par 'dzin par mtshungs par rang gi shes pa skyed par rung ba'i gnas skabs gang yin pa de nyid de/ dper na 'di dang mtshungs par rung ba'i ngo bo'i don gyis dben pa'i ngo bo dmigs pa de las gcig tu nges pa'i rnam pa can gyi shes pa yin pa de bzhin du de dang mtshungs pa ma yin pa'i ngo bo'i don gyis dben pa'i bdag nyid la yang yin no//des kyang des dben pa'i rnam pas/ de las gzhan yod pa sgrub par byed pa khyad par med pas sa phyogs kyi ngo bo shes pa'i bum pa med pa bzhin du ro la sogs pa med pa yang sgrub par byed pas bum pa med pa yang ma yin no//gzhan yang gang dmigs pa'i rig byar gyur pa las mi dmigs pas med pa sgrub par byed pa'i khyad par bshad pa yang brjod mi dgos so//ci'i phyir zhe na/ gang dang gang dmigs pa'i rig byar ma gyur pa de dag kyang yul de dang de dag la rnam pa gcig pa'i shes pas rnam par gcod par 'gyur ba nyid do/ /de bzhin du ji lta ba'i dmigs pa'i rig byar gyur pa de'i rnam pa gcig pa'i shes pa la snang ba des kyang rnam par gcod pa yin no//de bzhin du dmigs pa'i rig byar ma gyur pa'i mtshan nyid la yang yin na/ ci dmigs pa'i rig byar gyur pa'i khyad par 'dis yin nam zhes bya ba de lta na yang phyogs snga ma rnam par bzhag nas/gal te de las gzhan pa rnam par gcod pa des tha dad par byed pa rnams gzhan gyis rnam par gzhag pa mngon par 'dod pa de khas blang bar bya ba kho na'o/ /'on te de'i yul dang dus dag tu med pa de mi rigs so/ /gang gis nus pa mtshungs par rung ba'i ngo bo dmigs pa'i rig byar gyur ba las kyang med pa sgrub par byed pa yin la de dang nus pa mi mtshungs par rung ba'i ngo bo dmigs pa'i rig byar ma gyur pa la mi srid pa ma yin no//de dag yod pa la gcig tu nges par rtogs pa mi srid pa ma yin pas de ltar de med pa sgrub par byed do//'di dag gzhan la yod pa ma yin pas/ rtogs par byed pas bdag nyid gcig yongs su bcad pas zhes bya ba la sogs pa nye bar bstan to/ /gang de'i mdun na gnas pa mngon sum la snang ba yin te/ de'i gcig gi bdag nyid du nges pa de'i ngo bo yongs su bcad pas de'i rnam pas bskyed pa'i sgrub pa'i rnam par rtog pa skye'o//de las gzhan ni de dag las gzhan te de las tha dad pa de thams cad do/ /gang bdag gi ngo bo de las rnam par gcod pa tha dad pa dang / logs shig tu byed pa dang gzhan pa nyid kyis sgrub par byed pas ma 'dres pa'i ngo bo'i shes pa rnams su 'gyur ro//yang ji ltar gcig gi bdag nyid yongs su gcad pas gzhan pa'i bdag nyid rnam par gcod par mngon sum gyis byed pa yin no/ /ji srid du mngon sum gyis mdun na gnas pa'i don gyi nus pa las byung ba'i ngo bo nyid du rtogs pa gang yin pa de las ldog pa ma lus pa'i don las skyes pa de'i bdag nyid du de'i mdun na gnas pa'o//ji ltar de rnam par gcod par byed pa dang de rnam par bcad pa'i don dngos po med pa'i tshad ma khas blang bar bya/ gang gi phyir dngos po ma 'dres pa'i grub pa dang /de'i tshad ma la yang dag par brten pa yin no snyam nas de'i bdag nyid du nges par snang ba'i shes pa yin no zhes bya ba smos te/ gang mdun na gnas gcig dngos po la gzhan gyi ngo bo dang ma 'dres pa'i bdag nyid dngos po kun gyi rang bzhin ni rang rang gi ngo bo la gnas pa'i phyir dang gzhan gyi ngo bo dang ma 'dres pa'i bdag nyid yin pa'i phyir ro//de lta ma yin na ji ltar dngos po med pa'i chad mas kyang ma 'chol bar de dag grub par 'gyur/ 'dres pa'i dngos po rnams ma 'chol bar sgrub par byed pa na 'khrul par thal bar 'gyur ba'i phyir ro//de'i phyir gzhan gyi ngo bo dang ma 'dres pa'i rang bzhin kho na de'i bdag nyid du nges par snang ba na gzhan gyi ngo bo dang ma 'dres par snang ba kho na de'i don gcig gi nus pa las byung ba'i mngon sum ni gzhan gyi ngo bor snang bar mi rigs pas de 'khrul par gyur na ni mngon sum nyams pa yin no//de skad du/ de'i nus pa las skyes pa rnams de'i ngo bo'i rjes su byed pa la sogs pa de don med do zhes bya ba bshad do/ /de dang de'i bdag nyid du nges par snang ba'i shes pa las rang rig pa'i mngon sum gyis rig pa'i phyir ro//de rig pa ni mngon sum gyis de'i ngo bo rnam par bcad pa dang so sor byed pa de'i stobs kyis dus phyis gzhan pa'i bdag nyid 'di ma yin no zhes ma 'dres par rnam par gnas pa shes pa'i rnam par rtog pa skye ste/ gzung ba la 'dzin pa des na sngon med pa cung zad cig kyang shes pa med kyi/gzhan pa'i ngo bo dang ma 'dres pa'i bdag nyid kyi mngon sum de nyid kyi rnam pa'i rjes su byed pas yongs su gcod pa yin pa'i phyir ro/ gal te de'i bdag nyid du nges par snang ba'i shes pa yin pa de lta na yang / ji ltar gzhan gyi bdag nyid las de logs shig tu byed pa yin zhe na/ de'i bdag nyid ni zhes bya ba la sogs pa smos te/ gang gi phyir de'i dngos po'i bdag nyid gang gzhan gyi ngo bo dang ma 'dres pa de gzhan ma lus pa'i dngos po'i bdag nyid ma yin no/ /thams cad de las gzhan pa'i rang bzhin yin pa'i phyir ro//de lta ma yin na de nyid dam gzhan nyid nyams pa yin pas so/ /de'i phyir de'i bdag nyid du nges par snang ba'i shes pa nyid ni de'am gzhan pa rnams las ldog pa yin no/ shes pas don lag pas 'dzin pa ni ma yin gyi gzhan las ldog pa yin no//gzhan gyi ngo bo dang ma 'dres pa 'ba' zhig gcig pu'i bdag nyid kyi rjes su byed pa nyid de gzhan las ldog par bshad pa'i phyir ro/ /yang na gzhan gyi bdag nyid rang gi yul las mi 'dogs pa de'i tshe rang gi yul la gzhan gyi bdag yongs su rnam par bcad do//bdag dang gzhan yang tha dad par rnam par gzhag pa ni de la yang yongs su bcad pa las 'gyur ro/ /de lta ma yin na gzhan rnam par ma bcad pas 'di nyid gcig gi bdag nyid du yongs su bcad pa'i bdag nyid de ldog pa'i ngo bor 'gyur ro//des kyang rnam par ma bcad pas gzhan gyi bdag nyid yongs su gcod par thal bar 'gyur ba dang 'jug pa dang ldog pa med pas snga ma bzhin du thal bar 'gyur ba ni me mthong yang me kho na ma mthong zhes bya ba la sogs pa'o/ /'ba' zhig pa de gzhan gyi bdag nyid las ldog pa yin na de'i bdag nyid la yang gzhan ma lus pa ma yin no zhes bstan pa ni yul dang zhes bya ba smos te/de yang mdun na gnas pa'i yul dang dus dang ngo bo nyid dang gnas skabs su nges pa de las gzhan pa yul la sogs pa rnams las ldog pa'i bdag nyid ni rang gi rgyu rnams kho na las 'byung ba'i de'i bdag nyid do//yul la sogs pa nges pa'i bdag nyid kyi rnam pa de lta bu'i ngo bo'i rjes su byed pa'i blos dmigs pa de kho na nyid 'pho ba med pa'o/ /yul dang dus dang ngo bo nyid dang gnas skabs kyi bdag nyid 'di rang gi yul la rnam par gcod pa ste tha dad du byed pa'o//yang ci'i phyir gzhan gyi yul la sogs pa de las tha dad par rnam par gzhag ce na/ de lta na zhes bya ba smos te/ na zhes bya ba ni gang gi phyir ro/ /gzhan gyi yul la sogs pa de las tha dad par byed pa gdod ma nas yul la sogs pa nges pa'i don yongs su gcod pa yin te/de'i ngo bo'i rjes su byed pa'i phyir ro/ /de lta ma yin na de la gzhan gyi yul la sogs pa de'i ngo bo'i rjes su mi byed na rnam par gcod par mi 'gyur ro/ /de kho na nyid kyang de'i yul la sogs pa nges pa nyid de'i tshe de kho na mthong ba yin no/ /gzhan gyi yul la sogs pa ni gzhan ma yin par 'dod do//gang gi phyir de lta na zhes bya ba ni de'i phyir ro/ /gzhan du gyur pas ni gzhan gyi yul la sogs pa dang ldan pa'o/ /de lta bur gyur pa ni de'i yul la sogs pa dang ldan pa rnam par gcod pa nyid ni rtogs par byed pa'o/ / de yongs su gcod pa yin no zhes bya ba ni snga ma'i mjug bsdu ba'o/ /de bas na de lta bur gyur pas gzhan du gyur pa nyid rnam par gcod pa nyid kyis mjug bsdu ba'i 'bras bu yin no/ /de skad du bshad pa'i rigs pa 'dis mngon sum mam rjes su dpag pa'i tshad ma gcig 'jug pa'o//de yang de bzhin du rang gi yul yongs su gcod pa'o/ /'jug pa ni rab tu 'jug pa'o/ /dngos po thams cad phung po gnyis te de nyid dang gzhan nyid du rnam par 'jog par byed de/ /de bas na de yongs su gcod pa'i tshad ma'i stobs kyis ma 'dres par grub pa yin na/ci de don du gnyer ba yang med pa la rtogs par byed dam/ /'o na ni 'di dang 'di dag gzhan gyi bdag nyid ma yin la gzhan yang de'i bdag nyid ma yin no zhes bya ba rnam par rtog pa'i byed pa yin gyi mngon sum ni rtog pa med par 'dod na de ji ltar ma 'dres par de las grub par 'gyur zhe na/de ni rjes su 'gro ba zhes bya ba la sogs pa smos te/ mngon sum de ni sgrub pa dang dgag pa'i rnam par rtog pa gang gi tshe rang gi yul la skye ba de nyid 'di'i 'bras bu dang bcas pa yin te/ de nyid kyang tshad mar 'dod kyi gzhan du ni ma yin no//de nyid kyi phyir don gcig gi rang bzhin mngon sum gyi cha shas med par bdag nyid thams cad yongs su gcod kyang 'khrul pa'i rgyu mtshan yod par gyur pas skad cig ma la sogs pa'i rjes su 'gro ba dang ldog pa'i blo skyed par mi nus pas de la tshad mar mi 'dod do snyam na/gal te phung po gnyis su grub pa ni 'chol bar ma gyur cig snyam nas dngos po med pa'i tshad ma brtag pa yin te/ 'on kyang rnam pa gzhan med par 'gyur na de med par grub pa la mngon sum gyis byed pas cung zad kyang rtog pa med do zhes 'dod na zhe na/ de la ma brtags pa zhes bya ba la sogs pa smos te/de'i phyir yongs su mthong ba las tha dad pa ma lus pa'i dngos po rnam par gcod pa ni de las logs shig tu byed pa gzhan pas khyab pa gang yin pa de/ sgrub pa kho nas rnam pa gzhan ni de nyid dam gzhan nyid las phyi rol du gyur pa med par grub pa yin no//des na de'i don la yang dngos po med pa'i tshad ma brtag par mi rigs so/ /yang na ma lus yongs su mthong ba dang blta bar bya ba las gzhan pa nyid ma khyab pa na mngon sum gyis grub par mi 'gyur te/ de gang gis phung po gsum pa med par mngon sum nyid du gyur/ de las med pa'i tshad ma brtag pa don med par 'gyur ro zhe na/ de zhes bya ba smos te/ phung po gsum par brtag par bya ba ni mthong ba dang de las gzhan pas ma khyab pa yin pa des na rang gi yul gyi don de mngon sum gyis rnam par ma bcad pas logs shig ma byas na de'i don gyi phung po gzhan brtag par bya ba yin na/rang gi yul la rnam par ma bcad pa'i phyir yang dngos po yongs su ma bcad par thal bar 'gyur ba de ni de'i yul gzhan gyi ngo bo ma lus pa dang 'dres pa'i bdag nyid de gal te des bdag nyid yongs su mi gcod pa dang des bdag nyid yongs su bcad pa nyid ji ltar de'am gzhan pas thams cad la khyab par ma bsgrubs pa yin/de lta ma yin na gcig kyang de'am gzhan pa nyid du mi 'gyur te rgyu mtshan mtshungs pa'i phyir ro/ /gang gi phyir de ltar de bas na dngos po 'ga' zhig la tshad ma mngon sum la sogs pa rab tu 'jug pa de'i dngos po so sor nges pa'i bdag nyid yongs su gcod pa na de las gzhan pa de'i ngo bo ma tshang ba rnam par gcod pa yin no//de'am gzhan pa nyid kyi rnam par gzhag pa las rnam pa gsum pa de nyid dang gzhan pa nyid las phyi rol du gyur pa rnam pa gzhan med par bstan te gzhan pas thams cad la khyab par bsgrub pa'i phyir ram/de dang 'gal bas dngos po thams cad rnam pa gnyis su bsgrub pa'i phyir ro/ /de ltar tshad ma gcig gi bya ba 'di dag bshad ma thag pa de nyid kyi mjug bsdu ba bde blag tu rtogs par 'gyur ba bstan pa na 'di ltar zhes bya ba smos te/dngos po 'ga' zhig la mngon sum la sogs pa 'jug pa'o/ /de nyid kyi dngos po de las gzhan pa'i ngo bo rnam par gcod pa ste de las tha dad par byed pas so/ /de'i ngo bo ni ma 'dres pa'i ngo bor khong du chud par bya'o/ /don dam par na de ni de'i ngo bo yin pa'i phyir dang /ji lta ba'i dngos po'i mngon sum gyi ngo bos rjes su byed pa'i phyir ro/ /ci 'di gzhan gyi ngo bo rnam par gcod par byed pa yin te/ de nyid gzhan pa'i ngo bo ma tshang ba'i gcig gi ngo bo yongs su gcod pa'i phyir dang / de bzhin du gzhan pa nyid de ni de las de snang ba las gzhan pa'i rnam par gcod pa'o//ga las she na/ de las de rang gi yul las so/ /rang gi yul 'ba' zhig gzhan la rnam par gcod pa ma yin te/ gzhan pa yang rang gi yul las yin no zhes bya'o//'di ga las she na/ gzhan ni de las gzhan pa ste de la rnam par mi gcod do/ /gdon mi za bar yongs su bcad pa ni yongs su bcad pa las gzhan nyid yin no/ /gang gi phyir de ltar de'i phyir tshad ma de nyid gcig gi dngos po yongs su gcod par byed pa na rnam pa gzhan med par sgrub par byed de dngos po med par bshad pa ni ma yin no//'di ga las she na/ de snang ba na dngos po min pa de las gzhan pa nyid kyis de las gzhan te rnam par gcod pa ni gzhan nyid do/ /de las gzhan pa nyid du snang ba ni de las gzhan pa nyid du snang ba ste/ des na thams cad de las tha dad par rnam par 'jog pa'i phyir ro//de ma yin pa las gzhan du brjod pa gang yin pa ni gzhan ma yin te/ mdun na gnas pa gzhan ma lus pa'i ngo bo las ldog pa las ldog pa de nyid de las snang ba'i rnam par gzhag go/ /rigs pa 'di nyid kyis gzhan la yang bstan pa ni 'dir rim pa dang rim pa ma yin pa zhes bya ba la sogs pa smos te/rigs pa gzhan pa 'dis don gcig tu nges pa'i ngo bo dang rjes su mthun pa'i blo skye ba na de las bzlog pa'i ngo bo thams cad rang gi yul las rnam par gcod pas na phung po gnyis yin la/gsum pa'i rnam pa gzhan med par sgrub par byed pa na gzhan gang yang rung ba 'ga' zhig rnam par gcod do/ /rim dang rim ma yin pas rtag pa dang mi rtag pa la sogs pa de bshad pa yin no/ /de lta na 'bras bu rim pa la rkyen dang lhan cig ma yin pa nyid kyi blo de dang / rim ma yin pa'i 'bras bu gzhan dang lhan cig pa yin pa de'i phyir tha dad par byed do/ /rim dang rim ma yin pa'i ngo bo de las gnyis su grub pas rnam pa gsum pa srid pa bkag pa yin no/ /rim pa'i dngos pos tha dad pa'i 'bras bu skyed pa thams cad ni de dang gzhan rnam pa gnyis su rnam par 'jog pa'i phyir ro//de ltar skye ba dang 'jig pa ni skad cig mar brjod do zhes bya ba rnam par 'jog pa kho na'i dus su blos de las bzlog pa'i ngo bos ni rang gi yul la phan mi 'dogs pas de las gzhan pa nyid kyi rnam pa gzhan du 'jog pa'i phyir rdzas gzhan med pa yin no//de ltar na tshang ma gcig gi rgyu mtshan gyis ma 'dres par grub pa'i mjug bsdu ba bstan pa ni de lta bas na zhes bya ba smos so/ /de skad du bshad pa'i rim pas gcig tu so sor nges pa'i bdag nyid du dmigs pas de'i dmigs par bya ba de las gzhan pa gang yin pa de dang mtshungs par rung ba'i ngo bo de las bzlog pa ni de'i ngo bo ma tshang ba de'i bdag nyid rnam par gcod pa ste tha dad par byed pa'o//de'i dmigs par bya ba mi dmigs pa'i rang bzhin gyi ngo bo gzhan du snang ba'i phyir ro/ /de bzhin du de'i rang gi yul de las gzhan pa'i bdag nyid med pa gtso bo yin par bstan pas rnam par gcod pa yin la ma 'dres par sgrub par byed do//des na gang gi tshe 'di dag gzhan thams cad dang bye brag med par de la med par grub par 'gyur ro zhes gang la mngon par 'dod pa de'i tshe grub pa la sgrub pa yin no/ / gang gi phyir thams cad bye brag med par de dang rnam pa gcig pa'i blo de ma yin pa'i ngo bo ma tshang ba ni rang gi yul las rnam par bcad par bya ba yin te/ gzhan gyi ngo bo thams cad de la mi snang ba'i phyir ro/ /yang na de'i yul dang dus dag tu bzlog pa'i ngo bo thams cad med par rnam par gcad par bya bar 'dod pa de mi rigs so zhes ston pa ni de'i yul dang dus dag tu gang la 'di nges pa na khams gsum po ma lus pa dang /mtshan nyid mi mthun pa'i don du dmigs par bya ba ma yin no/ /de la dngos po gzhan thams cad dang mtshungs par rung ba'i ngo bo'am cig shos rnam par gcod pa dang dgag pa yin no//rgyu gang gis de mtshungs par rung ba'i ngo bo de la mi snang ba'i bkag pa de las de'i ngo bo gcig tu nges pa'i ngo bos rtogs pa mi srid pa'i phyir ro/ /de med na mi 'byung ba ni de la rag las pa de'i dgag pa go bar byed pa yin pas de rgyu ma yin pa dang /dmigs pa'i rig byar ma gyur pa de dang mtshungs par rung ba'i ngo bo ni srid pa'i phyir ji ltar med pa 'grub par 'gyur/ de dag gi mjug bsdu ba ni de lta bas na de'i bdag nyid ma yin pa zhes bya ba smos te/ de las bzlog pa'i ngo bo gzhan thams cad de'i rnam pa gcig pa yul dang dus su yang sgrub par byed par mi 'gyur la/de'i snang ba gang dang gang yul dang dus de dang de dag tu yang 'gyur ro/ /ci dang 'dra zhe na/ ro dang gzugs la sogs pa bzhin no/ /gzugs so sor snang ba'i shes pas de'i ngo bo dang 'dra ba'i ro rang gi yul las tha dad par byed pa yang de dang ma 'dres par sgrub par byed pas kyang de'i yul dang dus dag med par sgrub par byed do//des na yang thams cad dang mtshungs par mi rung ba'i gnas skabs kyang de la med par 'gyur ram/ dmigs pa'i rig byar gyur pa'i bye brag rnams kyang brjod par mi bya'o//gang gi phyir de ltar de bas na ji skad bshad pa'i mi dmigs pa kho na las res 'ga' la la zhig tu 'ga' zhig dngos po med par 'grub bo/ /dmigs pa'i rig byar gyur pa'i de dang mtshungs par rung ba'i ngo bo dmigs pa'i bdag nyid de lta bu'i ngo bos yin gyi/spyi yis ni ma yin no/ /ji skad du bshad pa'i pha rol po'i tshad ma lnga po gang la dngos po'i ngo bo las skyes ba ni dngos po yod pa rtogs pa'i phyir ro/ /de la med pa'i tshad ma yin pa de ni dmigs pa'i rig byar ma gyur pa'i tshad ma lnga po rab tu mi 'jug pas kyang de med par 'grub bo//yod kyang de ni rang bzhin gyis bskal ba la sogs pa la tshad ma lnga po 'jug pa mi srid pa'i phyir ro/ /des na de ltar zhar la byung ba rdzogs nas gang bshad pa de nyid gzhan gyis smras pa/ gzhan yod pa de'i yul can gyi dmigs pas de med par cis na sgrub par mi byed ce na/de la gzhan yod pas de med pa'i rtags ni sun phyung nas de'i yul gang la nye bar dmigs pa bsal ba ni gzhan yod pa'i yul can zhes bya ba la sogs pa smos te/ gang gzhan yod pa'i yul can gyi dmigs pas de med pa cis na sgrub par mi byed ces yang bzlas nas bshad pa ni des de med par sgrub par byed par kho bo cag 'dod pa kho na yin gyi ji skad bshad pa 'di rtags nyid du ni ma yin no//ci'i phyir zhe na/ gang gis de la gzhan yod pa'i yul can gyi dmigs pa gang yin pa dngos po med pa logs shig pa gzhan yod pa dang mtshungs pa'i phyir de ni gzhan yod pa'i yul yin pa dang /de med pa 'ga' zhig tu 'du ba la sogs pa'i ngo bo'i 'brel pa yod pa ma yin no/ /tha mi dad par grub pa 'dir yang mtshungs so zhes bstan pa ni rtags 'byung ba'i dus su zhes bya ba la sogs pa smos te/gang dang gang gzhan yod pa'i yul can nye bar dmigs pa rtags su 'dod pa de dang des dben pa'i phyogs kyi rnam pa 'byung ba'i dus kho na ni rtog pa skye ba'i dus kho nar ro/ /de med par 'grub pa'i phyir ro/ /de lta na der snang bas dben pa'i gzhan yod par snang ba'i blos rig pa nyid de med par rig pa yin no zhes bya'o//'di dag nyid sgrub pa ni gzhan na des dben pa yod par rtogs par bya ba gdod nas rtogs pa ni dus phyis de rtogs pa'o/ /gzhan yod par rtogs pa de med pa ni rjes su 'gro ba dang ldog pa dag rab tu bsgrubs nas 'brel pa sgrub par byed pa'i tshad mas de med pa rtogs pa ni ma yin no//'o na ci zhe na/ de las gzhan pa des dben pa'i ngo bo rtogs pa kho na de'i zla bo med pa rtogs pa yin te/ de nyid de med pa'i bdag nyid yin pa'i phyir ro/ /'di ltar bum pa dang bcas pa'i phyogs dang ma 'dres pa'i ngo bo 'ba' zhig gi phyogs snang ba nyid bum pa med par snang ba yin no//'di na bum pa med pa'am/ bum pa 'di dang ldan pa ma yin te bum pa dang bcas pa la gzhan yin pa dang / /don la ni tha dad pa ci yang med do/ /des na bum pa dang bcas pa las gzhan pa 'ba' zhig pa'i phyogs snang ba nyid bum pa med par snang ba yin pa'i phyir bum pa 'di na med do zhes shes pa ni gzung ba la 'dzin pas dran pa yin no//gal te ji ltar shes she na mthong ba can du rjes su 'gro ba dang / /ldog pa sgrub pa'i mtshan nyid kyis bar du chod pa med par 'di na bum pas dben pa'i phyogs kyi ngo bo yod do//'di na bum pa'i dngos po med de zhes phye nas rnam par rtog pa nyid kyis shes par byed pa'i phyir ro/ /des na 'di na yod do zhes bya ba rjes su 'gro ba dang ldog pa'i rjes su byed pa med do//gang yang / gzhan yod pa'i yul dmigs pa de med par sgrub pa ma yin te dpe ma grub pa'i phyir ro/ /'di nyid ldog pa'i sgo nas bstan pa ni de ni gang zhig ces bya ba la sogs pa smos te/ gal te 'di la yang rjes su 'gro ba yod do zhe na/ 'di skad du yang zhes bya ba la sogs pa smos so//ci'i phyir bstan par mi nus she na/ de dmigs pa gcig pu gzhan ma yin pa dang tshogs pa gcig par yod pa gang dmigs pa khyad par gyi ngo bo de ni gzhan gang na yang med pa'i phyir ro/ /'on te des dben par nye bar dmigs pa thun mong ba'i gtan tshigs su brjod pa yin/gang dang gang na bum pas dben pa'i sa gzhi dmigs pa de dang de na bum pa med de dper na sngar nyams su myong ba'i bum pas dben pa'i phyogs bzhin no zhe na/ spyi rab tu bstan pa zhes bya ba smos te/ spyi rab tu bstan par byed pa'i dpe la yang sngar nyams su myong zin pa'i bum pas dben pa'i sa phyogs na bum pa med par sgrub par byed pa'i tshad ma mngon sum la sogs pa gzhan ni gzhan yod pa'i yul la dmigs pa ni med do//'on kyang de kho na gzhan yod pa dmigs pa yin no/ /bsgrub par bya ba'i chos de med pa sgrub par byed pa de yang ji lta ba bsgrub par bya ba'i chos can la de med par sgrub pa ni dpe la ltos pa yin na/dpe yang de bzhin du gzhan de la yang ltos na ni thug pa med pa dang / dpe yang thug pa med pa'i phyir thams cad la de med par rtogs pa ma yin no/ / gang gi phyir de bas na rtags gang las kyang ni de las gzhan yod pa dmigs pa nyid las so/ /de med par mi 'grub bo/ /gang gi tshe de las gzhan yod pa las de med par sgrub par mi byed do/ /yang cis rtags kyis sgrub par byed pa ma yin zhe na/ mngon sum gyi zhes bya ba smos te/mngon sum gyi mtshan nyid brjod par 'dod pa'i dmigs pa gzhan pa mi dmigs pa yin pa'i phyir de'i mtshan nyid mi dmigs pas grub ste/ nyams su myong ba'i tha snyad sgrub pa'i phyir ro/ /las la gnas pa'i bya ba la ltos nas de gzhan pa yod pa mi dmigs pa'i ngo bo yin pa'i phyir ro//yang cis na 'di med pa'i tha snyad sgrub pa yin zhe na/ bsgrub par bya ba rtogs pa las te gang yul/ rtogs zin nas yul can la rmongs pa dran pa nyid kyis de med pa'i tha snyad du byed do/ /mngon sum gyi rgyu mtshan kho na mi dmigs pa'i rtags ma yin no zhes gzhan legs par dpyad zin pas 'dir zhar la 'ongs pas chog go//des na mi dmigs pa'i gtan tshigs kyi log par rtogs pa ma lus pa bsal nas rang gi ngo bo rnam par gzhag pa'i dbye ba bstan pa'i phyir/ de 'dir ji skad bshad pa'i mi dmigs pa gsum ste zhes bya ba smos te/ ji ltar yin zhe na/ sgrub par byed pa'i tshad ma de yis rgyu dang 'bras bu'i dngos po grub par gyur na rgyu mi dmigs pa yin no/ /ci 'dra ba zhig ce na dngos po med par grub pa'o/ /de bzhin du khyab par bya ba dang khyab par byed pa'i dngos po grub pa yod na de sgrub par byed pa'i tshad ma'i stobs kyis gzhan dngos po med par sgrub pa'i khyad par byed pa mi dmigs pa'o//zhar la ji skad bshad pa'i rang bzhin mi dmigs par yang grub pas de ltar mi dmigs pa rnam pa gsum yin no/ /yang ji ltar khyab par byed pa dag gis med pa'i tha snyad du 'grub/gang las de dag med par 'grub pa smos shig ce na/ de la rgyu dang khyab par byed pa dag gis kyang zhes bya ba smos te/ 'ba' zhig pa gang yin pa dngos su med pa'i tha snyad sgrub pa ma yin gyi rang bzhin mi dmigs pa'i ngo bos med pa'i tha snyad 'grub po/ /gzhan des dben pa yod par grub pa gang yin pa de nyid med pa'i tha snyad 'grub pa'i rgyu yin pa'i phyir de skad du brjod do//rgyu dang khyab par byed pa med pa de ni de ltar grub pa ni gzhan yod pa mngon sum gyi ngo bos grub na dngos po med par 'grub la dngos po med pa'i tha snyad kyang 'grub pa yin no//'bras bu dang khyab par bya ba dag dgag pa ni gang gi tshe de dag dang mi mthun pa'i yul gyi khyad par de'i mi dmigs par mi 'grub pa de'i tshe dngos po med pa'am dngos po med pa'i tha snyad sgrub par byed pa yin te/ 'am gyi sgra ni bsdu ba'i don to/ /ci 'on te rang bzhin mi dmigs pas kyang med par bsgrub par bya ba'i rtags su 'gyur ram zhe na/ rang bzhin mi dmigs pa zhes bya ba la sogs pa smos te/ tha snyad kho na med pa yang ma yin te de mngon sum gyis grub pa'i phyir ro/ / 'dir gzhan gyis dogs pa'i skabs su brjod pa ni gal te rgyu dang khyab par byed pa zhes bya ba smos te/ med pa'i tha snyad du grub pa gang dang gang yin pa de med pa yin na gang gis de gzhan rgyu dang khyab par byed pas dben pa'i mngon sum gyi bdag nyid kyis grub ba dang / de'i ngo bo mi dmigs pas gzhan 'bras bu dang khyab par bya ba dngos po med pa dang med pa'i tha snyad sgrub par byed do/ /de yang gzhan yod pa dmigs pas de dag gi rgyu dang khyab par byed pa dmigs pa'i rig byar gyur pa kho na yod pas med pa'i tha snyad du sgrub par byed kyi gzhan du ni ma yin no zhes 'dod par gyur na/ji ltar de dag rgyu dang khyab par byed pa mi dmigs pa lkog tu gyur pa'i don gyi yul la sbyor ba yin/ gang gi tshe 'bras bu dang rang bzhin gyi gtan tshigs kyi ldog pa'i sbyor ba byed pa ni gang dang gang na me med pa de dang de na du ba yang med pa de bzhin du/gang dang gang na shing med pa'am/ skad cig ma med pa de dang de na shing sha pa'am yod pa med do zhes ma lus pa'i don yongs su bzung nas ldog pa'i sbyor bar 'gyur na/ me dang shing dang skad cig ma nyid des dben pa'i don thams cad mngon sum ma yin pa de'i phyir na ji ltar des dben pa'i dmigs pa'i mtshan nyid kyi mi dmigs pa'i spyod pa nyid kyis dmigs pa'i rig byar gyur pa ni mi 'grub po//de lta na ji ltar ma lus pa bsdoms nas khyab par bya ba dang 'bras bu dang rang bzhin gyi gtan tshigs kyi ldog pa grub pa yin/ yang na de grub na ji ltar 'dis go bar byed pa yin/de'i phyir la lar ma mthong ba tsam las ldog pa dang de bzhin du mthong ba tsam las rjes su 'gro bar 'dod par bya ste/ de lta na yang 'brel pa brjod pa don med do zhes gzhan dag sems na/ grub pa'i mtha' smra bas rtags ma nges pa zhes bya ba smos te/lkog tu gyur pa'i don la rgyu dang khyab par byed pa mi dmigs pa'i sbyor ba'i ldog pa bstan pa'i dus su tshad mas ma yin la rgyu dang khyab par byed pa mi dmigs pa'i tshad mar gyur pa kho nas sbyor ba ma yin te/ ci'i phyir zhe na/ rgyu dang khyab par byed pa mi dmigs pa'i rtags kyi mtshan nyid ni de med pa'i mtshan nyid la ma nges pa'i phyir ro//de mi dmigs pa'i ngo bo la the tshom za ba'i phyir na de med pa nyid la yang the tshom za ba'i phyir ro/ /de lta na ji ltar de'i tshe de dag la sbyor bar 'dod pa yin zhe na/ rgyu dang zhes bya ba smos te/ rgyu dang khyab par byed pa ni rgyu dang 'bras bu'i dngos po sgrub par byed pa dang khyab par bya ba dang khyab par byed pa sgrub par byed pa sngar bshad pa'i de las byung ba dang de'i bdag nyid kyi mtshan nyid kyi 'brel pas grub par byed pas 'brel pa grub pa yin na/gal te med pa gang dang gang la med par 'gyur bas gzhan dang 'bras bu dang khyab par bya ba gdon mi za bar med par nges so//de lta ma yin na ma yin par thal bar 'gyur ba'i phyir dang / rang bzhin med par thal bar 'gyur ba'i phyir ro/ /de'i sgo nas 'brel pa grub par byed pa'i tshad mar 'gyur ro/ /ji ltar 'gyur zhe na/'dir de'i don bstan pa'i phyir rgyu dang khyab par byed pa mi dmigs pa 'di rab tu sbyor ba 'ba' zhig tu zad do/ /gang la mthong ba dang ma mthong ba'i stobs kyis sgrub pa ni gcig mthong ba na gzhan mthong la/ ma mthong ba nyid na mi mthong ba de nyid la de yod pa dang med pa nyid du 'gyur na ci'i phyir thams cad la 'gyur ba yin/'brel pa med pa'i bdag nyid ba lang dang rta la sogs pa rnams la lar de bzhin du yod par mthong yang thams cad la de bzhin du yod par mi 'gyur ro/ /skyes bus kyang thams cad kyi tshe 'ga' zhig tu gcig yod pa dang med pa dag las gzhan yod pa dang med pa mthong ba ni 'dod rgyal ba bzhin du mi slu ba ma yin 'brel pa med do//de skad du/ yul la sogs pa'i khyad par las/ /rdzas la nus pa tha dad snang / /de la gcig mtha' gzhan la ni//de 'byung nges par rigs ma yin/ /zhes bya ba bshad de/ /de'i phyir gdon mi za bar 'brel pa las bsgrub par bya ba sgrub par byed par khas blang par bya'o/ /de nyid kyis rjes su 'gro ba dang ldog pa dag gi sbyor ba bstan pa dang / 'di nyid kyis bstan pa med par khyab pa bstan par mi nus pa'i phyir ro//gang dang gang na zhes bya ba ma lus pa'i don yongs su bzung nas khyab pa ni 'brel pa tshad mas grub par gyur na gdon mi za ba yin te/ gang dang gang na 'bras bu yod pa de dang de na rgyu yod pa dang / gang dang gang na de med pa de na 'bras bu yang med pa yin gyi de lta ma yin na rgyu med kyang 'bras bu 'byung na ni rgyu med pa nyid du 'gyur ro//des na rtag tu yod pa dang med pa la sogs par thal bar 'gyur ro/ /de bzhin du gang dang gang la gang gi rang bzhin yin pa de dang de la de'i rang bzhin yin gyi de lta ma yin na bdag nyid med par 'gyur bas so//khyab pa nyid dang rjes su 'gro ba dang ldog ba bstan pa ni 'brel pas khyab pa yin na nus kyi gzhan du na ma yin no zhes snga ma nyid du rgyu cher bstan zin te/ /de ltar 'bras bu dang rang bzhin dang mi dmigs pa'i mtshan nyid kho na'i phyogs kyi chos 'di dag gi rgyu sgrub par byed pa'i tshad ma yod par gyur pas rjes su 'gro ba dang ldog par yod par gyur pa nyid yin gyi gzhan du ni ma yin no zhes bstan pa'i mjug bsdu ba ni de lta bas na zhes bya ba smos te/rang bzhin dang 'bras bu dang mi dmigs pa'i mtshan nyid kyi phyogs kyi chos 'di dang rjes su 'gro ba dang ldog pa dang ldan pa yin pas 'brel pa yod par gyur pa 'di dag nyid kyi rang bzhin dang 'bras bu dang mi dmigs pa'i mtshan gzhi yin no//gang gi phyir de yang rjes su 'gro ba dang ldog pa dang ldan pa'i 'brel pa sgrub par byed pa'i tshad ma yod par gyur par rigs pa bshad zin pa yin pa de'i phyir de'i chas khyab pa ste/rjes su 'gro ba dang ldog pa nges pa'i dbang gis de'i chas khyab pa nges pa yin no/ /sngar ji skad du bshad pa'i de'i chas khyab pa zhes brjod pas mtshan nyid gsum dang tshul gsum dang rnam pa can gyi gtan tshigs go bar byed pa yin gyi mtshan nyid gzhan ni med de/ji skad bshad pa'i tshul gsum yod pa las gzhan pa ni don med pas so/ /ji skad du bshad pa'i tshul med na tshul gzhan brtags kyang ma 'khrul pa'i go bar byed pa med pa'i phyir ro/ /de'i phyir tshul gsum po kho na can gyi rtags rnam pa gsum po kho na go bar byed pa yin gyi mtshan nyid gzhan gyis ma yin no zhes bstan to//rang gis bsgrub par bya ba la mi 'khrul pa'i phyir ro zhes mtshan nyid gsum kho na rang gis bsgrub par bya ba'i chos la mi 'khrul pa'i phyir ro/ /rang gis bsgrub par bya ba'i chos la mi 'khrul pa nyid go bar byed pa yin pas tshul gzhan brtags pa don med de/'brel pa'i rgyu mtshan gyis rjes su 'gro ba dang ldog pa'i rjes su byed pa'i tshul gzhan brtags na yang rang gis sgrub par bya ba'i chos la 'khrul pa des na 'dir rnam gsum nyid ces bya ba mtshan nyid gsum kho na'o//gtan tshigs de ni med na mi 'byung ba yin pas rang gis bsgrub par bya ba la mi 'khrul pa'o/ /nges pa ni gdon mi za bar yod par gyur pa'i 'brel pa'i rgyu mtshan no/ /de'i chas khyab par khas blangs pa nyid tshul gzhan du brtags pa yang gtan tshigs ltar snang de las gzhan no//gtan tshigs thigs pa'i 'brel pa bram ze a tsa tas rnam par sbyar ba las mi dmigs pa'i gtan tshigs bshad pa ste gsum pa'o// //ji skad bshad pa'i mtshan nyid gsum las gzhan pa'i tshul gzhan gang yang rung bar brtags pa ni gtan tshigs ltar snang ba'o//med na mi 'byung ba'i rang gi bsgrub par bya ba'i chos la mi 'khrul pa de rnams la med par bstan pa ni ji skad bshad pa'i mtshan nyid gsum kho na las gzhan ni mtshan nyid ma yin pa'i phyir de la gzhan dag gis log par rtogs pa bstan pa ni gzhan dag ni gtan tshigs mtshan nyid drug pa'o zhes zer te zhes bya ba smos te/rigs pa can dang spyod pa ba la sogs pas bsams pa gtan tshigs gcig pu yod kyang tshul drug tu 'dod pas gsum po de dag dang zhes bya ba smos te/phyogs kyi chos dang rjes su 'gro ba dang ldog pa bstan pa'o/ /de bzhin du gnod pa med pa'i yul ni tshul bzhi pa'o/ /bsgrub par bya ba'i chos kyi mtshan nyid gang yin pa de la tshad mas ma bsal ba ni gnod pa med pa ste/ de yod pa de nyid las tshul gzhan no//rnam pa de lta bu brjod par 'dod pa'i grangs gcig pa'i tshul gzhan ni grangs gcig pa gang gi gtan tshigs kyi rdzas de'i grangs gcig pa yin te/ brjod par 'dod pa'i grangs gcig pa'i gtan tshigs kyi rdzas la brten pa nyid gang gi gtan tshigs kyi spyi de'i brjod par 'dod pa'i grangs gcig pa ste de yod pa las gzhan pa'i tshul lo//gal te grangs gcig pa yongs su bcad pas 'gran zla'i gtan tshigs spangs pa'i bsal ba'i gtan tshigs 'di gtan tshigs su srid pa de'i tshe go bar byed pa nyid yin te/ 'gran zla'i gtan tshigs dang bcas pa'i grangs gnyis pa can yang mi rigs pa'i phyir ro/ /gal te 'gal ba mi 'khrul pa can gyi gtan tshigs gzhan pha rol pos bstan to zhes bya ba'i don to/ /de bzhin du shes pa nyid dang shes pa'i yul te/ mi shes pa nyid ni gtan tshigs ma yin la rang yod pa tsam gyis go bar byed par mi rigs so zhes bya'o//de la ni de rnams la'o/ /tshul gzhan pa gang yin pa de dag gnod pa med pa'i yul can zhes bya'o/ /des na re zhig 'brel pa'i rgyu mtshan rjes su 'gro ba dang ldog pa dag med na mi 'byung bar 'gyur ba de las tha dad pa'i mtshan nyid gzhan ma yin te de'i bdag nyid du de brjod par 'dod pas bshad zin pas bshad par mi bya'o//ci'i phyir mtshan nyid tha dad par mi 'gyur zhe na/ gnod par byed pa dang med na mi 'byung ba dag 'gal ba'i phyir ro/ / lhan cig mi gnas pa'i mtshan nyid kyi 'gal ba sgrub par byed pa ni med na mi 'byung ba zhes bya ba la sogs pa smos te/ bsgrub par bya ba'i chos gtan tshigs med na mi 'byung bar brjod pa la de la tshad mas gnod par gyur na/ gal te de yod pa kho na de la med pa'i yul can gyi tshad ma 'jug na de'i tshe de ni 'khrul pas tshad mar mi 'gyur ba'i phyir gnod pa ga la yin/des na gtan tshigs dang bcas pa de'i mtshan nyid kyi bsgrub par bya ba chos can la mi 'byung bar 'gyur/ /'dir yang bsgrub par bya ba'i chos su ji ltar na mi 'gyur/ gang gi phyir gnod par byed pa'i go skabs 'gyur ba de'i phyir med na mi 'byung ba dang tshad mas gnod pas lhan cig mi gnas pas med na mi 'byung bas nye bar gnas pas chos can la bsgrub par bya ba'i chos yod par tshad mas gnod pa nye bar 'jog pa yin no/ /de dang de med pa chos can gcig la phan tshun spangs te gnas pa'i mtshan nyid kyi 'gal ba srid pa yin no//de nyid 'gal bar gsal bar byed pa'i zhar la bzhad gad byed pa ni mngon sum dang rjes su dpag pa zhes bya ba la sogs pa smos te/ bsgrub par bya ba la gnod par byed pas mngon sum dang rjes su dpag pa des chos can gyi mgul pa nas bzung nas rang gi gnas las bton nas gang gi phyir de la bsgrub par bya ba'i chos yod pa kho nas de dang med na mi 'byung ba'i phyir gtan tshigs yod pa ni bsgrub par bya ba'i chos bsal nas btsan thabs kyis gtan tshigs chos can de la 'jog par byed do zhes bya ba ni kye ma mchog tu bsgrub par bye ba'i chos kyi mtshan nyid can gyi dngos po rnams rab tu nyam thag par 'gyur ro//de lta na 'khrul 'khor gnyis kyis gtsir bas dbugs mi phyin pa 'chi ba nyid du 'gyur ro/ /gzhan gyi gnod pa dang med na mi 'byung ba'i yul gyi dbye ba bstan pa ni gal te gzhan la zhes bya ba smos pa ni bsgrub par bya ba'i chos can yongs su spangs nas dpe'i chos can la bsgrub par bya ba'i chos dang med na mi 'byung ba'i gtan tshigs yin gyi yang bsgrub par bya ba'i chos kho na la ni ma yin no// des na gnod pa dang med na mi 'byung ba gzhan la 'gal ba ga la yin/ gnod pa'i chos can la bsgrub par bya ba med pa sgrub pas gtan tshigs gzhan gyis de yod par sgrub pa'i phyir ro/ /de lta na rnam pa de lta bu'i med na mi 'byung ba yod kyang gnod pa yod pas gnod pa med pa'i yul can gyi tshul gzhan srid pa'i phyir rnam pa de lta bu'i med na mi 'byung ba khas len to//gnod pa med pa'i yul can la sogs pa'i tshul gzhan yod kyang gtan tshigs ltar snang de las gzhan te tshul gzhan srid pa yin no zhes bstan to//gtan tshigs ltar snang ba de'i rnam par 'grel pha ni gzhan la bzhad gad byed pa sngon du 'gro ba ni de ci zhes bya ba smos te/ 'di bsgrub par bya ba'i chos can no/ /nyon mongs ni dka' thub can no/ /ma ning dang 'khrig pa las te de la bsgrub par bya ba'i chos sgrub par byed pa'i nus pa med pa'i gtan tshigs yongs su bstan pas bsgrub par bya ba'i 'bras bu tshol bar byed dam/de dag nyid gsal bar byed pa ni gang zhig chos can la bsgrub par bya ba'i chos med par 'dod kyang bsgrub par bya ba'i chos med na mi 'byung bar gzhan la khas blangs pas rnam pa de lta bu'i bsgrub par bya ba'i chos can nye bar bstan na ji ltar chos can la bsgrub par bya ba'i chos dang ldan par brjod/rgya mtsho'i chu lan tshwa med na mi 'byung ba yin du zin kyang de las tha dad pa'i chu lan tshwa dang ldan pa ma yin te/ bsgrub par bya bar 'dod pa'i chu yod pa la yang lan tshwa yod par mi 'grub pa'i phyir ro//gzhan gyi tshig gi go skabs su dogs pa ni gal te de nyid kyi phyir zhes bya ba la sogs pa smos te/ 'di dag nyid rnam par 'grel pa ni 'di snyam du khyed kyi 'dod pa gang gi phyir gtan tshigs gzhan du yang bsgrub par bya ba'i chos las gzhan pa'i chos can la yod pa yin te/chu la sogs pa de bzhin du mthong ba'i phyir bsgrub par bya ba'i chos spangs kyang med na mi 'byung ba khas blangs pa'i phyir ro/ /de nyid kyi phyir tshad ma dag gis gnod pa med pa'i chos dang ldan pa'i chos can du brjod pa'o//gang gi tshe mngon sum dang rjes su dpag pa dag gis bsgrub par bya ba'i chos can gyi gtan tshigs kyi yul bsgrub par bya ba'i chos la mi gnas pa ni dper na chu lan tshwa dang ldan pa nyid de'i tshe de go bar byed pa yin gyi gzhan du ma yin pa de'i phyir gzhan la med na mi 'byung ba tsam gyis bsgrub par bya ba grub par khas ma blangs pa'i phyir sngar bshad pa'i nyes pa med do zhe na/grub pa'i mtha' smra bas de da ni zhes bya ba smos te/ gang gi tshe gtan tshigs chos can la med na mi 'byung bas khas ma blangs pas bsgrub bya 'grub par mi 'gyur bas de de grub pa'i tshul gzhan gnod pa med pa'i yul can du brjod do//de'i tshe gtan tshigs la nus pa cung zad cig kyang med na ci'i phyir gnod pa med pa'i gtan tshigs gzhan yang yin/ bsgrub par bya ba grub na gtan tshigs cung zad cig kyang byed pa med pa kho na'o//de ltar na 'di rnam par rtog pa gnyis te/ gnod par byed pa'i tshad ma 'jug pa na bsgrub par bya ba med par nges par 'gyur ram/ nges pa med pa yin/ de la gang gi tshe snga ma'i rnam par rtog pa yin pa de'i tshe bsgrub par bya ba'i chos med pa la gnod par byed pa'i tshad ma 'jug par nges pas de nyid yod pas de med par mi 'gyur ba'i phyir ro//de'i phyir gnod pa med de gnod par byed pa'i tshad ma 'jug pa na med par bsgrub par bya ba med pa yang med pas bsgrub par bya ba grub par gyur pas gtan tshigs don med pa nyid kyis nye bar bkod par mi bya'o//de bas na su zhig la gnod pa'i yul nyid kyis tshul gzhan du 'gyur/ gnod par byed pa'i tshad ma 'jug pa med par gyur cig snyam nas gtan tshigs med par yin te/ gang gi tshe bsgrub par bya ba la gnod pa can gyi tshad ma chos can la 'jug pa na de'i gtan tshigs bsgrub bya sgrub par mi rung bar 'gyur ro zhes 'dod na gnod pa med pa na zhes bya ba la sogs pa smos te/gang gi tshe gnod par byed pa'i tshad ma 'jug pa de'i tshe yang des bsgrub par bya ba med par chos can la sgrub na tshangs pas kyang de med par byed par mi nus pa'i phyir yang ci ro lta bu'i gtan tshigs kyis yin nam/gang las sgrub par byed pa'i gtan tshigs su rung ba yin/ de nyid kyi phyir khyed kyis gnod pa med pa'i yul can gyi tshul gzhan smos pa'o/ /yang na gnas par byed pa'i tshad ma 'jug pas/bsgrub par bya ba med pa nges pa med na med par yang mi 'gyur ro zhes bya ba tshogs gnyis pa 'dod na/ de yang gnod pa med pa nus pas stong par bstan pa ni ma nges pa zhes bya ba smos te/ gnod par byed pa'i tshad ma 'jug pas bsgrub par bya ba med par 'dod par 'gyur na 'di thob ste/gnod par byas pa'i tshad ma rnams med par gyur kyang bsgrub par bya ba sgrub par byed pa la nus pa med na gnod pa med pa yod kyang bsgrub bya med pa srid pa'i phyir ro/ /de la sbyor na yang gtan tshigs ltar snang kho na yin no//ji skad bshad pa'i gnod pa med pa ni bsgrub bya 'grub pa la don med pa'i gtan tshigs yin no/ /de la gzhan du don la gnod pa med pa bstan pa'i gtan tshigs kyi nus pa bstan pa ni gnod pa med pa zhes bya ba smos te/ gnod pa can med pa ma yin par pha rol po 'dod de/'o na ci zhe na/ gnod pa mi dmigs pa yin te/ de dang de mi dmigs pa ni yul la lar gnod pa byed pa srid kyang skyes pa'i nus pa ma tshang ba de'i phyir gnod par byed pa mi dmigs pa tsam gyis bsgrub bya 'grub par mi srid pa'i phyir ro/ /de grub pa ni gtan tshigs gdon mi za bar brjod dgos pas de ni gtan tshigs sbyor ba'i yul yin no//de lta na gtan tshigs rang gi bsgrub bya 'grub pa la ji ltar mi nus par 'gyur zhe na/ grub pa'i mtha' smra bas gtan tshigs gnod pa zhes bya ba smos te/ gtan tshigs gnod pa gang dmigs pa des 'jigs kyi slar gnod pas mi 'jigs sam ce na/gang gis gnod pa yod du zin kyang khyad du bsad nas de mi dmigs pa yis yod pa la sbyor bar bya bar khyed 'dod/ /brgya la pha rol na re gnod pa nyon mongs yod du zin kyang de la dmigs pa nyid kyi srid pa la thabs ci byar yod/de'i phyir de nyid las gtan tshigs 'jigs pas de med par rab tu sbyor ba yin no zhe na/ de ltar na gtan tshigs zhes bya ba la sogs pa smos te/ de lta na 'on te don dam par na gcig gnod pa yod dam med kyang rung de la mi ltos kyi gnod pa mi dmigs pa la sbyar bar bya ba'am/ci zhes bya ba ni dri ba'o/ /brgya la gzhan dag na re 'di dag ni bshad zin pa ci'i phyir 'dri snyam nas/ ci'i phyir sbyar bar bya zhes bya ba smos te/ gnod pa mi dmigs kyang de yod na bsgrub bya sgrub pa la sbyor ba'i phyir ro zhes bsams pa'o//gzhan gyis bsams pa ma rtogs bsgrub bya sgrub pa'i phyir zhes bya ba smos te/ gnod par byed pa'i rkyen med na tshad ma 'dod pa'i phyir de las bsgrub bya sgrub pa la mi 'gal lo snyam du sems na/ grub pa'i mtha' smra bas gnod pa yod pa de mi dmigs kyang bsgrub bya 'grub pa ni mi srid pas 'dod rgyal ba yin pa ni de la las gnod pa yin bzhin du yang zhes bya ba la sogs pa smos te/yang ci gtan tshigs 'di gnod pa yod du zin kyang bsgrub bya sgrub byed do zhes khyed brjod na gang gis na gnod pa med par nges par bya ba la 'bad pa dang gtan tshigs kyang sbyor bar mi byed dam/gal te de dag de ltar yin no zhe na/ de lta na yang gnod pa bzhin du yang bsgrub bya sgrub par nus par khas len par gyur na gnod pa med pa'i yul can gtan tshigs kyi mtshan nyid ma yin te ci'i phyir zhe na/ gnod pa yod bzhin du yang 'dis nus pa'i phyir dang nus pa khas blangs pa'i phyir ro/ /de lta gtan tshigs kyi mtshan nyid du brjod na gang gis na bsgrub bya med na sgrub par byed par mi 'gyur/ gnod pa mi dmigs pa'i gtan tshigs kyi mtshan nyid don dam par na gnod pa med pa'i yul can ma yin no zhes 'dod na/de lta na yang zhes bya ba la sogs pa smos te/ de lta na gnod pa yod par gyur pa'i dngos po srid pa yang de khas blangs nas mi dmigs pa tsam gyis gtan tshigs kyi sbyor bar 'gyur te/ gang gi tshe gnod pa khas blangs nas gtan tshigs sbyor bar mngon par 'dod par gyur pa de mi dmigs pa tsam gyis gnod pa yod na yang the tshom yin te/res 'ga' zhig la mi dmigs pa srid pas the tshom can de'i gtan tshigs kyi sbyor ba la 'jug pa mi rung ba'i phyir ro/ /de'i phyir the tshom gyi 'jug pa gang yin pa de ni yod par khas blangs pa yin na 'jug pa yin no//de lta na yang ji lta ba'i gnod pa mi dmigs pa la khas blangs nas gtan tshigs sbyor ba de bzhin du de dmigs pa la yang sbyar bar bya'o/ /gnod pa'i dngos po yod par khas blangs par gyur pa na de dmigs pa dang mi dmigs pa la khyad par med pas mi dmigs pa'i gnod pa nyid kyang gtan tshigs kyi mtshan nyid du sbyar bar mi rigs so//gnod pa'i rkyen spangs par 'gyur kyang 'brel pa'i tshad ma yod pa ga la yin/ gzhan gyi tshig gi dogs pa'i go skabs ni gal te gnod pa yod na zhes bya ba la sogs pa smos te/gnod pa yod pa'i gtan tshigs kyi nus pa ni mi 'dod do/ /des na ji ltar de dmigs kyang sbyor bar 'gyur/ grub pa'i mtha' smra bas ni gal te de ltar zhes bya ba smos te/ gnod pa yod na gtan tshigs kyis mi nus par 'dod na gnod pa mi srid par de gtan la ma phab par gtan tshigs gang yin pa de rnam pa de lta bu'i sbyor ba mi dmigs pa tsam gyis 'os pa ma yin no//ci'i phyir zhe na/ gnod pa srid pa'i phyogs la sbyar kyang gtan tshigs kyis bsgrub bya sgrub par mi mus par 'gyur du 'ong bas so//phyogs snga mar smra bas gal te gnod pa mi dmigs na zhes bya ba smos te/ gnod pa mi dmigs pa'i phyir dmigs pa'i rkyen yod par gyur na yod par gdon mi za ste/ don rnams med pas gtan tshigs kyis nus pa yin no snyam du sems pa'o//grub pa'i mtha' smra bas dmigs pas gnod pa zhes bya ba la sogs pa smos te/ don rnams dmigs pa'i 'bras bur 'gyur ba'i rgyu dang 'bras bu'i khyab pa yang med do/ /rgyu rnams ni gdon mi za bar 'bras bu dang ldan pa ma yin te gags byed pa srid pa'i phyir ro//ji ltar khyab par byed pa ma yin pa'i dmigs pa de log pas gnod pa ldog par 'gyur ram/ gang gi gtan tshigs la gnod pa srid par grub pa'i mi nus pa mi srid pa yin no zhes gzhan gyis kyang 'dod pa kho na'i tshad mas gnod pa ni skye bo'i dus su gnod pa mi dmigs pa dus gzhan na gnod pa rkyen gyis bskyed pas yod par tshad mas khas blangs pa'i phyir ro//'on te khyab par byed pa ma yin pa'i yang dmigs pa ldog pas gnod pa ldog cing 'gag pa ni phyin ci log gi skyon can gyi shes pa la 'bad pa yin no/ /rigs pa 'di nyid kyis shes pa ldog pas gnod pa ldog pa med pa ni de lta na ni zhes bya ba smos so//gtan tshigs don med pa yin te/ ga las she na/ gnod pa mi dmigs pa kho nas gtan tshigs kyi sbyor ba spangs nas bsgrub bya 'grub pa'i phyir ro/ /ci'i phyir zhe na/ mi dmigs na gnod pa mi srid pa'i phyir ro//de lta na gang la gnod pa mi dmigs pa de la don dam par na de yod pa ma yin no snyam du sems na/ gang la don dam par med pa de la bsgrub bya med pa yang don dam pa kho nar med pa yin te/ gzhan du don dam par med pa mi rigs pa'i phyir ro/ / des kyang bsgrub par bya ba'i chos med na med par 'gyur ba la yod na yod par 'gyur ba'i bsgrub bya mi rtogs na gtan tshigs don med do/ /'on te rigs pa dang 'gal bar ma gyur cig snyam na dmigs pa log pas gnod pa ldog par 'dod par mi bya'o/ /de la dmigs pa log kyang zhes bya ba smos te/gnod pa yod pa mi ldog par 'dod pa ni gtan tshigs nus pa med pa gang yin pa de'i gnas skabs su gnod pa dmigs pa gang yin pa so na 'dug pas gtan tshigs sbyor ba ma yin no/ /gang zhig gnod pa med pa'i yul can gyi tshul gzhan du 'gyur/ 'di dag nyid kyi mjug bsdu ba ni de lta bas na zhes bya ba smos te/ gang gi phyir de ltar gtan tshigs kyi khyab pa ni thams cad du bsgrub par bya ba dang med na mi 'byung ba khas ma blangs na/ khyab pa phyi rol pa ni dga' bas gtan tshigs kyi sbyor bas don med par 'thob po/ /de'i phyir rang gi bsgrub par bya ba yod pa dang med pa dag las yin gyi gzhan du yang yin na ni rang gi bsgrub bya yod kyang med la med kyang yod pas so//gtan tshigs chos can la cung zad cig kyang bsgrub par bya bar mi 'gyur la sgrub par byed par yang mi 'gyur ro/ / 'gog par yang mi byed pa ni de las bzlog pa 'gog par mi byed pa'o/ /des na sgrub pa dang dgag par byed pa dag spangs pa yin na sbyor bar mi nus so/ /rang gi bsgrub par bya ba med na mi 'byung ba'i gtan tshigs kyi sbyor ba gdon mi za bar gtan tshigs thams cad khas blangs par 'dod par bya'o//de yang gags byed pa'i rgyu mtshan gyis mthong ba dang ma mthong ba la rag las pa ni ma yin no/ /gang gi phyir sngar ji skad bshad pa bzhin du gnod pa dang med na mi 'byung ba dag 'gal bar grub po zhes bya ba'i mjug bsdu ba ni de lta bas na zhes bya ba la sogs pa smos te/de ni de las khyad par gzhan pa'i dngos por gnas na mtshan nyid mdzad pas kyang ngo bo gzhan zhig smos par 'os par 'gyur na gang zhig khyad par yod bzhin du yang gang zhig du 'gyur te/ gang las khyad par gyi gzhi dang khyad par yod pa dag 'khrul pa srid kyi 'ba' zhig pa kho na la mi srid do//dpe smos pa ni dper na zhes bya ba la sogs pa smos te/ mnyan bya la sogs pa chos can dang 'brel pa yod kyang mthun pa'i phyogs la med pa'o/ /mig gis gzung bya la sogs pa mthun pa'i phyogs yod du zin kyang bsgrub par bya ba'i chos can la med pa'o//des na gang zhig khyad par gyi gzhi la khyab pa yod pa gang yin pa la 'khrul pa srid kyi mtshan nyid kyis ma bstan to/ /gal te 'dir yang de 'byung bar 'gyur ba yin no zhe na/ 'di dag 'di ni de ma thag tu bshad zin to/ /med na mi 'byung ba yod pa la gnod pa srid pa yin no//med na mi 'byung ba la gnod pa med pa yod de/ yod par gyur bas 'khrul pa mi srid do/ /gang gis na khyad par gyi gzhi dang khyad par yod pa mtshan nyid gzhan du bstan par 'os pa ma yin/ bsgrub bya dang med na mi 'byung ba'i gtan tshigs dang 'gal ba ni bsgrub bya dang bzlog pa ma yin na/med na mi 'byung ba'i yul la gnod pa mi srid do/ /bshad zin pa'i rnam pas yang dag pa'i gtan tshigs nyid las bzlog pa yul med pa la sbyor ba ni gtan tshigs ltar snang bar brjod do/ /gang gi phyir de ltar phyir zhes bya ba ni de'i phyir ro//de med pa ni gnod pa spangs pa'o/ /logs shig tu ni med na mi 'byung ba can gyi rjes su 'gro ba dang ldog pa'i bdag nyid kyi gtan tshigs dang 'gal ba 'di gnyis kyi mtshan nyid gzhan du brjod par mi bya ste/ ma 'khrul pa'i ngo bo gzhan mi rigs pa'i phyir ro/ /gang gi phyir med na mi 'byung ba yod pa la gnod pa mi srid pa de'i phyir ji skad bshad pa'i mtshan nyid can gyi gtan tshigs kyi sbyor ba la go bar bya ba'i don dam bcas pa'i nyes pa mngon sum dang 'gal ba la sogs pa rnams kyang mi srid do//de ji ltar gnod pa spangs pa'i gtan tshigs kyi tshul gzhan brjod pa yin/gal te mi srid kyang de dag brjod na ni 'bras bu med pa ga la yin/ 'ba' zhig pa'i sbyor ba srid pa yin no zhe na/ dam bca' ba la sogs pa smos te/ gtan tshigs kyi sbyor ba la dam bca' ba 'ba' zhig la sbyor ba med do/ / gtan tshigs kyi yul nyid du khas blangs pas yul med na gtan tshigs de yod pa mi rigs pa'i phyir ro/ /des na bstan bcos mdzad pa slob dpon phyogs kyi glang pos kyang mngon sum dang 'gal ba la sogs pa dam bca' ba'i skyon gsungs pa yin no/ /bsgrub par bya ba dang bsgrub par bya ba las bzlog pa log par rtogs pa mthong bas sbyor ba mi 'os su zin kyang phyogs kyi mtshan nyid brjod pa'i rigs pa 'thob pa nyid do/phyogs nyid la bsal ba'i tshig gis tshad ma dang 'gal ba bshad do/ /ha cang thal bar 'gyur bas phyogs kyi mtshan nyid rnam par gcad par mi bya ste the tshom gyi bsgrub par bya ba yin pa'i phyir ro//tshad mas gnod par bya ba dang gnod par byed pa mi 'jug pa'i phyir de kho na gnod pa med pa'i yul can yin te tshul gzhan ni bsal bar bya ba sel bar byed pa ni 'dis kyang zhes bya ba smos te/ med na mi 'byung bar gyur pa gnod pa med pa bstan pas brjod par 'dod pa'i grangs gcig pa can 'gal ba mi 'khrul pa'i skyon gyi mi mthun pa'i phyogs brjod pa bsal cing sngangs pa yin no//gzhan gyis dris pa ji lta bu zhe na/ rnam pa gang gis ji lta bu'i med na mi 'byung ba dang lhan cig mi gnas pa'i rnam pa de lta bu gtan tshigs kyi zla bo dang med na mi 'byung ba dag kyang yin/gang gis brjod par 'dod pa'i grangs gcig pa dang ldan pa bsal ba yin zhe na/ grub mtha' smra bas yang dag par bstan pa ni gcig gi zhes bya ba la sogs pa smos te/gtan tshigs gcig gi mtshan nyid rigs te/ gal te rang gi bsgrub par bya ba yod pa kho nas yod pa'i phyir rang gi bsgrub bya la 'khrul par ji ltar 'gyur/ de lta ma yin na med na mi 'byung ba'i mtshan nyid nyams par 'gyur ro/ /chos can gang la mtshan nyid gcig yod par gyur pa chos can de kho na yin pa la yin pa de'i phyir 'gran zla'i gtan tshigs gzhan yang 'gal ba yin pa des na gtan tshigs kyi mtshan nyid dang ldan par ji ltar 'gyur/gtan tshigs gcig gi bdag nyid kyi bsgrub par bya ba de la gnod par byed pa ni de dang 'gal ba'i chos gzhan yod pa kho na ste med kyang yod pa'i phyir med na mi 'byung ba ma yin pas gnod pa dang mtshungs so//gnod pa mi srid pa mtshungs pas gtan tshigs kyi zla bos bsal ba kho nas bsal to/ /'dir yang skyon gzhan brjod par 'dod nas rnam par rtog pa ni gzhan yang zhes bya ba la sogs pa smos te/dngos po ni don dam pa ste gtan tshigs kyi zla bo gang yin pa de ni mi srid pa ci 'di yang dag pa'i shes pa'am/ bzlog pa nye bar bkod pa'am/ bsgrub par bya ba'am de las zlog pa'i shes pa gtan tshigs su 'dod/ gang las brjod par 'dod pa'i grangs gcig pa can gyi mtshan nyid du brjod/ yang na 'di gtan tshigs kyi zla bo de bsgrub par bya ba dang / bzlog pa sgrub par byed pa ma bstan pa zhig yin/ don dam par yod pa yin yang skyon gzhan ma mthong ngo snyam nas cir 'gyur zhes bya ba smos so//gal te snga ma'i rnam par rtog pa'am phyi ma de la nyes pa ci zhig yod snyam pa'o/ /grub pa'i mtha' smra bas gal te gtan tshigs kyi zla bo mi srid pas yang dag pa'i shes pa la sogs pa'i gtan tshigs su 'dod na de'i tshe 'di mtshan nyid ma yin pa ni brjod par 'dod pa'i grangs gcig pa'o//ci'i phyir zhe na/ nges par bya bar mi nus pa'i phyir ro/ /gang gi dngos po la gtan tshigs kyi zla bo mi srid pa nyid du de bzhin du bshad do/ /gzhan gyi 'dod pa la ltos nas 'di dag brjod pa yin gyi/ gzhan dag gis mthong ba dang ma mthong ba dag las 'brel pa med kyang med na mi 'byung ba 'dod pa de'i phyir/de'i gtan tshigs kyi zla bo rnam pa de lta bu yod pa srid pa yin te/ de yang mi dmigs kyang res 'ga' zhig 'byung bas dngos po nyid la de med par ma nges pa yin te/ 'brel pa'i rgyu mtshan gyis med na mi 'byung bar smra ba kho bo cag la ni gtan tshigs kyi zla bo mi srid do//shin tu nges pa kho na ste/ de'i bdag nyid dang de las byung ba'i mtshan nyid kyi 'brel pa tshad mas grub pa'i med na mi 'byung ba'i rgyu mtshan can gyi gtan tshigs gcig gis rang gi bsgrub par bya ba sgrub par byed pas slar yang de nyid kyi chos can la de'i mtshan nyid de dang 'gal ba sgrub par byed pa'i 'gran zla'i gtan tshigs mi srid par nus so//dngos po rnams la 'gal ba'i rang bzhin gnyis mi rigs pas 'gal ba'i chos gnas na mtshan nyid tha dad pa'i phyir dang / 'gal ba'i chos sgrub par byed pa srid na de nyid kyi rang gi bsgrub par bya ba la med na mi 'byung bar thog mar de la tshad mas yod par sgrub par mi rigs pa'i phyir ro//gal te dngos po la gtan tshigs kyi zla bo med par nges par kho bo cag gis nges par mi nus kyi de lta na yang gtan tshigs kyi zla bo mi srid pas brjod par 'dod pa'i grangs gcig pa bstan na gtan tshigs kyi mtshan nyid du 'dod par gyur pa ci'i phyir ma yin zhe na/sgrub par byed pa'i chos ma nges pa zhes bya ba la sogs pa smos te/ rtogs par byed pa'i chos kyi gtan tshigs de ma nges pa'i ngo bo yin na ni gang gi phyir de'i mtshan nyid ni sgrub par byed pa'i chos su mi 'gyur te/dper na phyogs kyi chos the tshom can bzhin no/ /the tshom can gyi mtshan nyid gang yin pa de ni gtan tshigs ma yin pa 'gal yang gtan tshigs su mi 'gyur ro/ /gang yang gtan tshigs kyi zla bo ma mthong ba de dngos po kho na la gtan tshigs kyi zla bo mi srid pa'i phyir ro//dngos po de la gtan tshigs kyi zla bo mi srid par dogs na ni gnod par byed pa'i shes pa med na gnod par dogs pa ni mi rigs pa'i phyir ro/ /de skad du/ gnod pa'i shes pa ma skyes pas//dogs pa tshad ma med na min/ /zhes bshad do zhe na/ mtshan nyid mtshungs pa zhes bya ba la sogs pa smos te/ gtan tshigs kyi zla bo la dogs pa ni mthong ba dang ma mthong ba'i rgyu mtshan gyi mtshan nyid mtshungs kyi med na mi 'byung ba de la mthong ba na 'gran zla'i gtan tshigs la gnod pa srid pa'o//gang gi phyir de dag kyang mtshan nyid mtshungs pa rnams ni 'gran zla ma mthong ba de rnams la yang gtan tshigs kyi zla bo srid pa'i yul dogs pa skyed par byed do/ /ci'i phyir zhe na/ zla bo srid pa mthong ba dang zla bo mthong ba la khyad par med pa'i phyir ro/ / 'di dang cig shos la khyad par 'ga' yang med pa gang yin pa de las srid par dogs par mi bya'o/ /skyes bu'i nus pa ma tshang ba la sogs pas de mthong ba srid pa yin zhe na/ des ci zhig/ /brjod dogs tshad ma med na min/ /zhes bya'o/ /yang na khyad par ni 'brel pa'i mtshan nyid med na mi 'byung bar nges par mthong bas gtan tshigs kyi zla bo ma mthong ngo zhes bya bar 'dod na ni gang gi tshe 'gran zla srid par dogs pa khas blangs pa nyams pa yin pa de'i tshe khyad par yod na ni de gtan tshigs kyi mtshan nyid yin te/ci'i phyir zhe na/ gang gi phyir des gtan tshigs kyi khyad par gyis mi mthun pa'i phyogs cha gcig tu sel ba rnam pa de lta bu'i gtan tshigs srid pas rang gi bsgrub par bya ba nges par byed pa'i phyir ro//rnam pa de lta bur mi 'gyur ba de ni khyad par spangs pa'i gtan tshigs kyi zla bo la ma mthong ba gang yin pa de mtshan nyid can la ma yin pa gtan tshigs su mi 'gyur ro//de lta na yang gal te gtan tshigs dang zla bo'i gtan tshigs mthong ba'i rgyus ci zhig tu gyur na gang gis de ldog pa de la brjod par 'dod pa grangs gcig pa can du byed de/ ji skad bshad pa med na mi 'byung bar brjod pa kho nas de ldog par 'gyur ro zhe na/de lta na zhes bya ba smos te/ gtan tshigs de'i khyad par dang 'brel pa la zla bo'i gtan tshigs srid par gyur na brjod par 'dod pa'i grangs gcig pa can dgos pa med do/ /ji srid bshad pa'i khyad par khas blang ba mtshan nyid kyi gtan tshigs mi srid pas gang zhig brjod par 'dod pa'i grangs gcig pa rnam par gcod par byed pa yin/gang gis 'di don dang bcas pa nyid du 'gyur ba ni 'gal ba mi 'khrul pa can gyi gtan tshigs ltar snang bar rnam par gcod pa'i phyir/ brjod par 'dod pa'i grangs gcig pa can gtan tshigs kyi mtshan nyid du byed pa yin na/dngos po la 'gran zla'i gtan tshigs med pas gtan tshigs su grub pa ni 'brel ba mtshan nyid can gyi khyad par gyi gtan tshigs 'dod pa na 'gal ba mi 'khrul pa can gyi gtan tshigs ltar snang ba srid par mi 'gyur te/ de las rnam par bcad pa med pas brjod par 'dod pa'i grangs gcig pa can du ci ste 'gyur snyam bstan pa ni de'i phyir zhes bya ba smos te/'brel pa'i mtshan nyid kyi khyad par khas blangs pas 'gal ba mi 'khrul pa'i gtan tshigs ltar snang ba'i mtshan nyid gang yin pa nyams par 'gyur te mi srid pa'i phyir ro//yang 'gal ba mi 'khrul pa'i mtshan nyid ci zhig yin zhe na/ rang gi mtshan nyid ces bya ba la sogs pa smos te/ gtan tshigs kyi bdag nyid ni mtshan nyid gang yin pa de dang ldan pa'i gtan tshigs dag chos can gcig la 'gal ba bsgrub par bya ba dang /sgrub par byed pa phan tshun 'gal ba 'du ba na 'gal ba 'khrul pa med pa zhes bya'o/ /'gal ba mi 'khrul pa'i mtshan nyid rnams ni de dang 'brel ba khas blang bar 'gyur na mi srid do/ /de'i bdag nyid dang de las byung ba dag rang gi bsgrub par bya ba dang 'brel pa dang ldan pa gtan tshigs gcig ni chos can 'ga' zhig la srid pa yin gyi/gnyis pa de'i mtshan nyid dang ldan pa de nyid la gtan tshigs mi srid pa'i phyir ro/ /dngos po rnams kyi rang bzhin la 'gal ba rnam pa gnyis mi srid pa'i phyir ro/ /chos 'gal ba gnas na mtshan nyid tha dad pa'i phyir de la mi 'khrul pa'i gtan tshigs gnyis pa de la srid pa'i go skabs su ga la 'gyur//'o na ni gal te rnam pa de lta bu khyad par yod par gyur na ni 'gal ba mi 'khrul pa nyams par 'gyur na/ brjod par 'dod pa'i grangs gcig pa can med do//de lta na yang gtan tshigs med par thal bar mi 'gyur na gtan tshigs med par des bshad pas ci zhig bya zhe na/ khyad par de'i ngo bo yang zhes bya ba smos te/ 'brel ba'i mtshan nyid ni gang gi phyir dngos po la 'gran zla'i gtan tshigs mi srid pas de'i bdag nyid dang de las byung ba'i mtshan nyid nges pa'i ngo bor khyod kyis ma bstan gyi/kho bo cag gis ni ji lta ba bstan to/ /gang zhig gang gi ngo bor rtogs nas zla bo ni mi rtogs pas srid dam mi srid pa dag blta bar bya'o/ /gang la khyad par dang bcas pa med pa de la 'gran zla srid pa de yin te/ lung la brten pa'i rjes su dpag pas rtogs par byed do/ /gang la khyad par dang bcas pa yod pa'i dngos po stobs kyis zhugs pa'i rjes su dpag pa de la sbyor ba'i zla bo mi srid pa'i phyir ro/ /gang gi phyir de ltar de bas na dngos po la khyad par med pa kho nas khyed rnams shes par byed pa la yang khyad par med pa kho na yin pas so//de'i phyir thams cad du gang la yang sbyor ba'i zla bo ma mthong / de la yang sbyor ba'i zla bo'i yul la dogs pa 'byung bar 'gyur ro/ /de nyid kyi dogs pa bstan par byed pa ni zla bo'i gtan tshigs mthong ba zhes bya ba la sogs pa smos te/ gang yang zla bo'i gtan tshigs mthong ba de yang dang por 'gran zla mthong ba dang cig shos dus thams cad du zla bo ma mthong bas khyad par cung zad kyang mi rtogs so/ /gang mthong ba las shes pa de la 'gran zla srid pa yin gyi gzhan ni ma yin no/ /mthong ba dang ma mthong ba tsam gyi rgyu mtshan gyis rjes su 'gro ba dang ldog pa dag thams cad du mtshungs pa'i phyir ro//de lta na yang phyi nas de la 'gran zla'i sbyor ba mthong bar gyur na thams cad du de'i mtshan nyid mtshungs par 'gran zla yod par dogs par ldog par mi 'gyur ro/ /gal te gang dag 'gran zla srid pa de rnams la gdon mi za bar res 'ga' zhig 'di dmigs par 'gyur ro//yang na skyes bu'i chos kyang de dag dmigs par mi 'gyur ro/ /gal te de rnams la 'di med pa nyid des na rnam pa de lta bu gtan tshigs de 'byung ba yin na de ji ltar gtan tshigs de kho bo cag la med pa yin zhe na/ gang zla bo'i gtan tshigs zhes bya ba la sogs pa smos te/ gang dag la 'gran zla'i gtan tshigs srid pa de rnams la yang thams cad du de'i zla bo'i gtan tshigs rtogs par byed pa rnams kyis dmigs pa ma yin no/ /thams cad gzigs pa'i dmigs pas ni dngos po yod pa thams cad la khyab pa yin te/'brel pa ma tshang ba mi dmigs pa'i phyir ro/ /'o na ni gang la thams cad du rtogs par byed pas 'gran zla ma mthong ba de la de'i tshe dogs pa ji ltar yin/ de skad du yang / gnod pa'i shes pa ma skyes na/ /dogs pa tshad ma med na min/ /zhes bshad do//de bzhin du 'ang pha rol gyis/ /nye bar brtags la rmongs pas na/ /gnod par byed pa'ang ma skyes na/ /tha snyad bya ba thams cad la/ /the tshom zad bdag rjes 'brang 'gyur/ /zhes smra'o/ /shes rab phul du byung ba dang ldan pa zhes bya ba la sogs pa smos te/ de lta na 'jal bar byed pa kha cig rtswa ku sha'i rtse mo lta bu shin tu phul du byung ba'i shes rab dang ldan pas gtan tshigs kyi zla bo brtags na kho bo cag gis mthong ste/ dper na rig byed kyi byed pa po sel ba'i gtan tshigs bde bar gshegs pa slob ma dang yang slob brgyud pas gzhon nu ma len skyes pa'i snga rol 'gran zla'i sbyor ba rnams nye bar dgod pa ma mthong ba de nyid shes rab phul du byung bar sbyar bas gtan tshigs kyi zla bo brtags na/de dang de mthong bas ji srid 'tsho'i bar du zla bo'i gtan tshigs mthong bas de'i dogs pa nam yang ldog par mi 'gyur ro/ / des na ji ltar dogs pa tshad ma med pa can yin zhes brjod/ mtshan nyid mtshungs pa zhes bya ba la sogs pa yang 'gran zla srid pa'i dogs pa'i rgyu bshad zin pa nyid de/ zla bo srid par dogs pa la de'i rgyu mtshan srid pas rtogs pa la sogs pas bltas/ pa tsam gyis bzlog par mi nus so/ /des 'gran zla'i sbyor ba 'di khyad du bsad pa'i rgyu cung zad cig brjod par bya dgos te/ dper na kho bo cag gis rang bzhin gyi gtan tshigs su brjod pa la bzlog pa la gnod pa can gyi tshad ma'i dbang gis de'i bdag nyid du nges pa'i rjes su 'gro ba dang ldog pa yod pa gtan la phab pa dang /'bras bu'i gtan tshigs la ji skad bshad pa'i mngon sum dang mi dmigs pas rgyu dang 'bras bu'i dngos po grub par nges pa bzhin no/ /gang gi phyir de ltar thams cad la 'gran zla'i dogs pa bzlog par mi nus so/ /khyod kyis mthong ba de'i rgyus ni ma nges pa yin te/zla bo srid dang mi srid pa dag ni 'dir zla bo srid pa yin no zhes de lta bu'i ngo bo nges pa yin pa de'i phyir dngos po la gtan tshigs kyi 'gran zla mi srid pa gang yin pa de gtan tshigs kyi mtshan nyid de ni ma nges pa'i phyir/ brjod par 'dod pa'i grangs gcig par smra ba rnams la cung zad cig kyang gtan tshigs su mi 'gyur ro//ma nges pa ni gtan tshigs kyi mtshan nyid du mi 'gyur ba'i mjug bsdu ba ni des na de ltar na ci 'dod pa la mi srid pa'i gtan tshigs zla bo gang yin pa de ni yang dag pa'i shes pa'i gtan tshigs las bzlog par 'dod pa yin no//rang gi rnam par rtog pa bsal nas rnam par rtog pa gnyis pa bsal bar 'dod nas 'on te zla bo'i gtan tshigs rab tu ma bstan pa zhig ces bya ba la sogs pa smos te/ yang dag pa'i shes pa las bzlog pa'i gtan tshigs su 'dod pa'o zhes bya bar sbyar ro//'di'i phyogs kyang slob dpon phyogs kyi glang po yang bzhed pa yin par gzhan gyis bstan pa ni 'di skad du zhes bya ba smos te/ slob dpon phyogs kyi glang pos ci zhig bshad ce na 'o na ni gang gi tshe zhes bya ba la sogs pa smos te/ mnyan par bya ba'i mtshan nyid phyogs kyi chos kyi gtan tshigs nyid du 'gyur te/sgra ni rtag pa yin te mnyan par bya ba yin pa'i phyir sgra bzhin no zhes de skad du gzhan gyis bshad par gyur pa la slob dpon gyis sgrar bshad pa'i chos can gang dang gang la mi rtag pa nyid kyi gtan tshigs byas pa nyid dang rtsol ba las byung ba la sogs pa'i mtshan nyid 'ga' zhig bye brag pa la sogs pa mi ston pa de'i tshe khyed kyi gtan tshigs 'di 'gran zla nyid ma bstan par gyur na zhes bya ba bshad pa lta bu'o zhe na/de skad du de slob dpon gyi zhal snga nas dbang po yin pas phyag brkyang nas bstan bcos mdzad pas sngon mdzad pa yin te/'di ni de ni zhes bya ba la gang gi tshe slob dpon yang de bzhed pa yin no zhes 'ga' zhig 'chad pa de dang de dag ni ches shin tu nyon mongs par gyur pa ji lta bar byas pa'i phyir bsgrags su mi rung ba'o/ /bla ma'i skyon bsgrags su mi rung ba dang rigs pa'i rjes su 'brang ba rnams kyis bcab tu mi rung ba ste sba bar mi rung ba'o//des na ci bla ma'i skyon brjod dam yang na rigs pa la ltos par bya ba yang yin/ des gnyi ga yang mi nus pa'i phyir ches shin tu nyon mongs par gyur ba ji ltar rgal bar nus pa yin te res 'ga' yang ma yin no//'di la nyes pa ci zhig yod/ gang gis na 'di shin tu nyon mongs pa yin/ re zhig gtan tshigs 'di zhes bya ba smos te/ mnyan par bya ba nyid la sogs pa gtan tshigs kyi mtshan nyid do/ /dngos po ni sgra la sogs pa'o/ / rang gi bsgrub par bya ba'i de nyid ni rtag pa'o/ /de'i rang bzhin ni de'i bdag nyid du byas pa'o/ /de mnyan bya nyid la tshad ma can gang dag gis so/ /skyes bu rnams ni dpyod pa dang byA ka ra Na ba la sogs pa rnams so/ /des mngon par mtho ba ni mtho ris so/ /nges par legs pa ni byang grol la sbyor bar byed de/de lta na dngos po'i de kho na nyid bsgoms pas nyon mongs pa ma spangs na ni re zhig mtho ris su skye bar byed do/ /nyon mongs pa spangs pa yin na ni mya ngan las 'das pa'i pha rol tu byon par 'gyur ro/ /yang na sgra rtag pa nyid du rtogs pa'i rig byed tshad mar byed pas me la mchod sbyin la sogs pas mtho ris sgrub par byed la rig byed kyi mtha' bsten pa las byang grol yin no//khyed shes rab kyi rigs kyis bye brag pa la sogs pa skyes bus ma byas pa las gzhan pa'i gtan tshigs 'gran zla'i gtan tshigs bstan pa ni gang 'dir rtag pa nyid sgrub par byed pa'i gzhung 'jug pa ni gtan tshigs 'gran zla ma bstan na ni 'grub bo//de nye bar bstan na de bsal ba yin no/ /dngos po de dag dang ni rtag pa nyid kyi phun sum tshogs pa las nyams pas de tshad mar byed pa'i skyes bu rnams mtho ris dang byang grol phun sum tshogs pa nyams pa'i mnyan bya'i mtshan nyid kyi gtan tshigs nus pa ma tshang bas skyob par byed mi nus pa ni rgyal srid shor ba ltar dka' thub kyi nags tshal du 'gro ba ste/rang nyid nyes par brjod pas 'dir khyed kyis ji skad du smra bar bya/de nyid bzhad gad du byed pa'i de'i phyogs la skyon bstan pa ni sgrub pa nyid skyes bus spobs pa zhes bya ba la sogs pa smos te/ gang gi tshe 'gran zla gtan tshigs ma bstan pa gtan tshigs su 'dod pa de'i tshe skyes bu'i spobs pas byas pa'i sgrub par byed par khas blangs bar 'gyur ro//des kyang dngos po las cung zad cig sgrub pa dang sgrub pa ma yin no/ /de ltar na gang gi tshe gtan tshigs kyi 'gran zla ma bstan pa de'i tshe sgrub par byed pa'o/ /gang gi tshe bstan pa de'i tshe sgrub pa ma yin pas skyes bu'i spobs pas byas pa'i sgrub par byed par 'gyur ro/ / gzhan yang 'gran zla'i gtan tshigs ma bstan pa'i gtan tshigs de gtan tshigs su khas len par byed na rnam par rtog pa gnyis te ci don dam par na gtan tshigs de'i chos yod pa'am yang na de ma yin pa'i chos yod pa yin/ de la rnam par rtog pa dang po'i dbang du byas nas gtan tshigs de yang zhes bya ba smos te/thog ma'i khyad par de ni gang gi ngo bo nyid kho na de la bsgrub par bya ba'i chos yod par gyur na de lta bu'i rang bzhin las mngon par 'dod pa'i 'brel ba gang yin pa 'dod na de'i tshe ji ltar gzhan du byed par 'gyur/ gtan tshigs gzhan de ma yin pa'i chos yod par ji ltar byed par 'gyur/rnam pa 'ga' zhig kyang ma yin no/ /ci'i phyir zhe na/ dngos po rnams ni gtan tshigs kyi mtshan nyid gang gi ngo bo yod pa nyid bsgrub par bya ba'i chos yod pa'i bdag nyid de las gzhan du gyur pa ni de las bzlog pa ste med pa'i phyir ro//rang gi bsgrub par bya ba'i chos med na mi 'byung ba'i rang bzhin kho na chos can gcig la dngos po gnyis 'gal bas gnyi ga'i rang bzhin gcig tu gyur ba'o/ /gcig la 'gal ba gnyis kyi ngo bo nyid mi srid do/ /'gal ba'i chos gnas pa de'i gcig pa nyams par thal bar 'gyur ba'i phyir ro//yang na rnam par rtog pa gnyis pa yin pa de'i tshe de ma yin pa'i chos yod pa can med na yang bsgrub par bya ba'i chos kyi ngang tshul can dang 'brel par khas blangs pa'i phyir ro/ /ji ltar gzhan las kyang 'gran zla'i gtan tshigs ma bstan par gnas skabs su yang 'ga' zhig gis sgrub par byed pa yin//de yang sgrub par byed pa ma yin te gtan tshigs bstan pa'i gnas skabs 'ba' zhig ni ma yin no/ /mjug bsdu ba ni de lta bas na ngo bo nyid kyis zhes bya ba la sogs pa smos te/gang gi phyir de ltar dngos po rnams kyi rang bzhin ni gzhan du bya bar mi nus pas 'gal ba gnyis kyi ngo bo yang gcig la mi srid pas de'i phyir don dam par na rang rang gi bsgrub par bya ba la med na mi 'byung bar ji skad bshad pa'i mtshan nyid kyis rang bzhin dang 'bras bu'i gtan tshigs de'i mtshan nyid kyi rang bzhin dang 'bras bu'i mtshan nyid la 'gran zla'i gtan tshigs mi srid pa'i phyir rjod par 'dod pa'i grangs gcig pa ni mtshan nyid ma yin pas rjod par 'dod pa'i grangs gcig pa can gyi mtshan nyid ma yin no// ci'i phyir zhe na/ rnam par gcad par bya ba zhes bya ba la sogs pa smos te/ rjod par 'dod pa'i grangs gcig pas 'gran zla'i gtan tshigs rnam par gcad par bya bar brjod do/ /yang na 'gran zla'i gtan tshigs su rigs kyi 'bras bu dang rang bzhin ma yin pa'i phyir ji ltar gtan tshigs kyi mtshan nyid du 'gyur/de ltar na 'dis tshul gnyis pa srid pa ni ji skad bshad pa'i med na mi 'byung ba srid pa las tshul gzhan khas blangs pa yang gtan tshigs ltar snang ba nyid de/ gtan tshigs ltar snang de las gzhan/ /zhes bya ba de'i don gyi 'grel pa yin no//shes pa nyid bsal bar bya ba ni yang shes pa nyid ni zhes bya ba la sogs pa smos te/ gnod pa med pa'i yul can dang rjod par 'dod pa'i grangs gcig pa ni 'bras bu dang rang bzhin gyi gtan tshigs nyid med na mi 'byung bar 'gyur ba la gnod pa med pa'i 'gran zla'i gtan tshigs mi srid pa'i phyir ro//rnam par gcad par bya ba med par gyur pa la yang rtags kyis chos kyi mtshan nyid du mi 'gyur ro zhes bshad do/ /shes pa ni shes pa nyid do/ /de nyid ni shes pa yod par brjod pas so/ /de lta na shes pa'i sgra 'jug pa'i rgyu mtshan ni shes pa nyid du brjod do//de yang shes pa kho na skyed par gyur pa la shes pa nyid ces tha snyad du byed do/ /rtags kyi ngo bo ni ma yin na ji ltar rtags kyi mtshan nyid du 'gyur/ gal te yang rnam par rtog pa'i snang ba spyi'i rnam pa'i rtags su rnam par gzhag pa de lta na yang shes pa ni rtags kyi chos ma yin no//'dir rang dga' ba ni rtags ma yin te/ de skad du rnam rtog tha dad pa rang dga' ba ni don gyi rten ma yin te/ rnam par rtog pa'i yul khong du chud pa ni don med pa la dmigs pa med pa kho nar 'gyur ro zhes bshad do//de'i phyir phyi rol gyi dngos po la brten pa kho na rtags su rnam par gzhag par bya'o/ /bsgrub par bya ba dang sgrub par byed pa'i rtog pa ni dngos po mthong ba las nyams pas na/ rang gi mtshan nyid la ni rjes su 'gro ba 'ga' yang med do/ /de'i chos de nyid kyi rjes su 'brang ba'i rnam par rtog pa du ma las ldog pa ni dngos po yod pa mthong ba'i brgyud pa dang 'brel pas mi slu bar byed pa ma yin te/'bras bu la sogs pa'i rtags su bstan pa'i rgyu mtshan bshad zin to/ /de 'bras bu la sogs pa'i bdag nyid kyi ngo bo shes pa'i rnam par rtog pa la snang ba spyi'i rnam par rnam par rtog pa'i bdag nyid du gyur pa ni ma yin te/de ngo bo med pa dngos po'i ngo bo 'gal ba'i phyir dang / de'i ngo bo ni rnam par rtog pa'i gzugs brnyan spyi'i bdag nyid ni spangs pa'i phyir ro/ /gang gi phyir phyi rol du ma gyur kyang phyi rol du mngon par shes pa ni rjes su mi 'gro ba yang rjes su 'gro bas spyi'i bdag nyid do//de lta na rnam par rtog pa'i ngo bor bshad pa ni ma yin no/ /ji skad du/ shes las tha dad ma yin pa/ /ji ltar don gzhan 'brang bar 'gyur/ /zhes bshad pa'o//rnal ma'i don bsam par bya ste/ rtog par byed pa'i skyes bu gang mi slu bar byed pa'i rtags de'i rang gi ngo bo brjod par bya ba bstan bcos byed pas de mthong ba'i ngo bo 'di rtogs par byed pa gang la de'i ngo bo srid pa de'i sgrub par byed pa yin no/ /de ma tshang ba ni sgrub par byed pa ma yin no zhes rnam par gzhag par bya'o//de la sgrub par rnam par gzhag pa gang yin pa de ni 'dod pa'i don dang nye bar 'jog par byed pa la yid ches nas 'jug pa'i dmigs pa yin no/ /de la de ni rigs pas rnam par gzhag pa'o//'di rtags kyi bdag nyid kyi ngo bo gang yin pa de'i mtshan nyid du 'gyur bas 'os pa yin te/ phyogs kyi mtshan nyid bzhin no/ /gzhan gyi ngo bo ma yin no/ /'di shes pa rtags su sgrub par byed pa ni rigs pa nyid de bsgrub bya sgrub pa la nye bar sbyor ba rtags kyi mtshan nyid yin no zhe na/rtog pa skye ba la zhes bya ba la sogs pa smos te/ gang gi tshe rjes su dpag par bya ba rtog pa skye ba la nye bar sbyor bas de tsam gyis rtags kyi mtshan nyid du 'dod na ni de'i tshe ha cang thal bar 'gyur ba yin no/ /de nyid ni de lta na ni rtog pa skye ba la nye bar sbyor ba tsam rtags kyi mtshan nyid yin na gzhal bya don dang skyes bu 'jal bar byed pa po dang sogs pa'i sgras ldan pa dang 'du ba la sogs pa dang snang ba dang yid la byed pa la sogs pa rtags kyi mtshan nyid du 'gyur ro//'dir rgyu ni de dag med par zhes bya ba smos te/ gzhal bya la sogs pa med par ni rtags can la shes pa skye bar mi 'gyur bar byas so/ /'dir gzhan dag mi 'dod par brjod pa ni 'o na ni nges pa smos pa zhes bya ba la sogs pa smos te/ gal te gzhan gyi ngo bo nyid shes pa rtags kyi mtshan nyid ma yin na de'i tshe slob dpon gyis/rjes dpag bya dang de mtshungs la/ /yod dang med pa la med par/ /nges pa ni zhes bya ba gang yin pa 'di dag mdzad pa'i nges pa smos par khyed 'dod pas de ni mi mdzad pa kho nar 'gyur ro zhe na/ de'i nges pa smos pa ni rtags kyi ngo bo bstan pas don gzhan yin pa'i phyir ro//de nyid don gzhan yin pa bstan pa ni/ mthun phyogs mi mthun phyogs dag la/ /zhes bya ba la sogs pa gsungs te/ gzhan gyis mthun pa'i phyogs mthong ba tsam dang mi mthun pa'i phyogs mthong ba tsam go bar byed pa'i gtan tshigs su 'dod pas de dag mthong ba dang ma mthong ba bsgrub bya sgrub par nus pa'i gtan tshigs su mi 'gyur ba kho nas shes par 'dod pa'i don nges pa smos pa mdzad pa yin no//gang gi phyir de dag mthong dang ma mthong ba yod bzhin shes par byed pa'i gtan tshigs ma yin par mthong ba'i phyir de sngo bsangs yin te sngo bsangs kyi bu yin pa'i phyir zhes bya ba la sogs pa bzhin no//gang gi phyir de ltar rgyu des na mthun pa'i phyogs la yod pas mi mthun pa'i phyogs thams cad la med par khyad par du byed pas na/ mthun pa'i phyogs ma yin pa thams cad la med pa mthun pa'i phyogs la de'i bdag nyid dang de las byung ba'i mtshan nyid yod pa khyad par can ni go bar byed pa'i gtan tshigs yin no zhes bya ba 'di don shes pa'i phyir mtshan nyid gsungs pas nges pa smos pa mdzad do zhes khong du chud par bya'o//'di skad ston pa yin te gang mthun pa'i phyogs dang mi mthun pa'i phyogs dag la yod pa dang med pa'i 'brel pa sgrub pa'i tshad ma 'jug par nges pa de dag nyid kyis gtan tshigs go bar byed par 'gyur gyi/ res 'ga' zhig mthong ba dang ma mthong ba tsam gyis 'di don shes par bya bar nges pa smos par mdzad pa ni ma yin no//rnal ma'i don gyi mjug bsdu ba ni des na zhes bya ba la sogs pa smos te/ gang gis yod pa dang med pa khyad par can dag bstan pa'i ched du nges pa smos pa mdzad do/ /tshul gzhan brjod pa ma yin te bdag nyid ma yin pa'i tshul ni mtshan nyid du mi rung ngo //des na gzhan gyi tshul ni rtags kyi mtshan nyid ma yin te/ gang gi phyir des na shes pa la sogs pa tshul gzhan gyis rtags kyi tshul 'ga' zhig la khyad par mi ston pa'i phyir ro/ /'o na ni mthun pa'i phyogs dang mi mthun pa'i phyogs la yod pa dang med pa gnyis go bar byed pa'i gtan tshigs su gzhan dag 'dod de mthong ba dang ma mthong ba de dag nyid sgrub par byed par de cis na don nges pa la smos pa zhe na/des na zhes bya ba la sogs pa smos te/ gal te rang bzhin dag yod pa dang med pa dag go bar byed pa'i gtan tshigs su 'dod do/ /de lta na yang mthun pa'i phyogs kho na la yod pas mi mthun pa'i phyogs la med pa nyid do zhes yod pa dang med pa mthong ba dang ma mthong ba tsam gyis rnam par gzhag pa yin te/de de las rnam pa de lta bu mi 'grub ste 'brel pa nyid med par byed pa'i tshad mas de'i bdag nyid dang de las byung bas sgrub par byed pa'i yul 'jug par khong du chud par bya ste/de las thabs gzhan med pa'i phyir ro/ /de khas ma blangs pa'i gtan tshigs mthun pa'i phyogs kho na la yod pa gtan tshigs su 'dod pa thams cad la gnod pa gzhan med pa'i rgyu des na yod pa dang med pa'i khyad par 'di gnyis bstan pas/ nges pa zhes bya ba'i sgra sbyar ba yin/mtshan nyid ni mtshan nyid mdzad pas so/ /'o na ni yod pa dang med pa brjod pa tsam kho nas tshad ma las nges pa 'thob na gzhan du na de dag yod pa mi 'grub bo zhe na/ des na gal te zhes bya ba la sogs pa smos te/ rjes dpag bya dang de mtshungs la/ /yod dang med pa la med par/ /zhes brjod pa tsam gyis kyang nges pa smos pa la mi ltos pas yod pa dang med pa de gnyis la sgrub pa'i tshad ma gang yin pa de 'jug na brgyal 'phel bar 'gyur ro//ji ltar nges pa ma smos pas yod pa dang med pa brjod pa tsam gyis de la 'jug pa 'phangs pa ma yin zhe na/ de lta ma yin na zhes bya ba smos te/ gal te de sgrub pa'i tshad ma 'jug pas 'phangs pa yin pa de'i tshe de dag nyid mthun pa'i phyogs dang mi mthun pa'i phyogs gnyis la yod pa dang med pa dag gis yod par rang gi ngo bor rnam par gzhag pa gang yin pa de mi 'grub bo/ /ci'i phyir mi 'grub ce na/ shes par bya ba la sogs pa smos te/shes pa dmigs su yod pa las skye ba'i rgyu mtshan yin pa'i phyir shes bya yod pa dang med pa'i mtshan nyid yod par rnam par 'jog pa ni rang gi ngo bo rnam par gnas pa yin no/ /dmigs pa'i rgyu mtshan med na rang nyid kyis don 'grub pa ni med de thams cad las 'grub par thal bar 'gyur ba'i phyir ro//de'i phyir 'di'i ngo bo ni 'di lta bu yin no/ /'di lta bu ma yin zhes bya ba de'i rnam par shes pa skyed pa nyid du rnam par gzhag par bya'o/ /gang gi phyir de ltar de'i phyir thams cad ni bstan bcos dang 'jig rten pa nyid kyi zhes bya'o/ /yod par rnam par gzhag pa nyid ni nges pa smos pa med kyang yod pa sgrub par byed pa'i tshad ma 'dren cing 'phen pa yin no//gzhan yang bstan bcos byed pa ni gzhan gyi don yin pa'i phyir des de sgrub par byed pa'i tshad ma 'dres pa yin no zhes bya bar sbyar ro/ /yang ci 'dra ba zhig bstan bcos byed pa gzhan gyi don ngo bor gang rang nyid rnam par 'jog cing shes bya yod par sgrub pa'i tshad ma 'phen pa yang yin zhe na/tshul gsum pa'i rtags zhes bya ba smos te/ mi slu bar byed pa ni thob par byed par 'dod pa de'i don la yin no/ /gal te de lta bu'i ngo bo bstan bcos byed pa gzhan gyi don yin pa de lta na yang ji ltar de sgrub par byed pa'i tshad ma 'jug pa 'phen pa yin zhe na/gang dag tshul de zhes bya ba smos te/ tshul gsum po'i rtags kyi tshul gyi ngo bo rang bzhin te/ bstan bcos las bshad pa rtogs par byed pa pos mi shes pa de dag ni des te tshul gsum pa'i rtags bstan bcos nas bshad pa 'dod pa'i don la 'jug par mi 'gyur ro//shes pa nyid kyi don ni shes par byed pa rang yod pa tsam gyis 'jug pa med pa'i phyir ro/ /gang gi phyir de ltar na phyir zhes bya ba ni de'i phyir te gzhan mtshon par byed pa'i phyir ni gzhan dag gis shes par byed par tshul gsum pa'i rtags shes par grub mod kyi/gal te yang nges pa zhes bya ba smos pa lhag ma yin te/ 'on kyang khyed cag rtags kyi mthun pa'i phyogs dang mi mthun pa'i phyogs dag la yod pa dang med pa'i khyad par bstan bcos byed pas mthun pa'i phyogs kho na la yod pa dang mi mthun pa'i phyogs la med pa kho na zhes bya ba la/de ltar rigs pa can la sogs pa gzhan dag mthong ba dang ma mthong ba tsam gyis gang mthong ba dang ma mthong ba'i 'brel pa sgrub par byed par khyod kyis de tsam gyis rnam par 'jog pa yin te/ gang gi phyir zhes bya ba ni de'i phyir ro/ /rgol ba de dag dgag pa'i phyir mtshan nyid mdzad pas nges pa'i sgra slob dpon gyis rab tu sbyar ba ni kho bo cag khas len pa yin gyi/gang gzhan la log par rtogs pa med na de'i tshe 'di rab tu sbyor ba ma yin no/ /'on kyang yang mthong ba dang ma mthong ba dag gis yod pa dang med pa'i yul dag gis mthun pa'i phyogs dang mi mthun pa'i phyogs kyi khyad par du byed do//yod pa dang med pa las rjes su 'gro ba dang ldog pa cis na mi 'dod ce na/ yod pa dang med pa zhes bya ba la sogs pa smos te/ la lar mthun pa'i phyogs la yod pa mthong ba'i gtan tshigs la lar mi mthun pa'i phyogs la med pa mthong ba yod du zin kyang de ni sngo bsangs yin te/sngo bsangs kyi bu yin pa'i phyir zhes bya ba la sogs pa bzhin rjes su 'gro ba dang ldog pa la the tshom za ba'i phyir ro/ /de lta na rjes su 'gro ba ni thams cad du bsgrub bya yod pa nyid kyi gtan tshigs yod pa la khyab pa'am bsgrub bya med na gtan tshigs med pa'i ldog pa ni la lar bsgrub bya dang gtan tshigs yod pa mthong ba tsam gyis ma yin te thams cad la yod pa dang med pa ni 'brel pa med pa'i ngo bo rnams lhan cig 'byung bar nges pa med pa'i phyir ro//de ltar la lar bsgrub par bya bar mngon par 'dod pa de med par gyur pa las med par mthong ba'i gtan tshigs kyang thams cad du de med na gdon mi za bar med pa de ni 'bad pa med par de ldog par nges pas ldog par 'gyur ba med pa'i phyir ro//de'i phyir 'brel pa sgrub par byed pa'i tshad ma yod pa nyid ji skad bshad pa'i mthun pa'i phyogs dang mi mthun pa'i phyogs la yod pa dang med pa grub pa yin gyi gzhan du ni ma yin no zhes log par rtogs pa bsal ba'i ched du nges pa smos pa mdzad pa yin no zhes bstan pa ni gang las zhes bya ba la sogs pa smos te//kho bos zhes bya ba ni slob dpon gyis nges pa smos pa mdzad pa ni gzhan du kho bo cag mngon par 'dod pa'i phyir kho bos zhes bya'o//des na de ltar log par rtogs pa bsal ba'i phyir nges pa'i smos pa med kyang log par rtogs par mi bya'o zhes bstan pa de nyid kyi rigs pas shes pa nyid tshul gzhan ma yin par bstan pa ni gang gi phyir zhes bya ba la sogs pa smos te/tha dad par gyur pas ni phyogs kyi chos la sogs pa ni tshul gsum pa las so/ /gang las she na/ tshul gsum pa de nyid kyi tshig gis de sgrub par byed pa'i tshad ma 'phen par rtogs pa'i phyir ro/ /ci 'dra ba'i zhe na/ phyogs kyi chos nyid las nye bar gtod pa'i don bzhin no//dper na phyogs kyi chos brjod pa kho na gtan tshigs nye bar gtod pa'i don rtogs pa de nyid kyis can la gtan tshigs yod par gyur par bstan pa'i bdag nyid yin pa'i phyir dang / phyogs kyi chos brjod pa de'i tshul yin pa'i phyir ro/ /des na tha dad pa nye bar gtad pa tshul gzhan du ni mi 'gyur te/de ltar tshul gsum pa'i tshig de nyid brjod pa'i phyir ro/ /'dir gzhan dag mi 'dod pas spong ba ni/ 'o na ni rjes su 'gro ba dang ldog pa dag kyang zhes bya ba la sogs pa smos te/ gal te tshul gsum pa'i tshig gis yang dag pa'i shes pa skyed pa zhes bya ba des na de las tha dad par brjod par mi bya ba de lta na ni rjes su 'gro ba las tha dad pa'i ldog pa brjod par mi bya ba la ldog pa las tha dad pa'i rjes su 'gro ba yang ngo //ci'i phyir zhe na/ rjes su 'gro ba'am ldog pa gcig gi sbyor bas gnyi ga rtogs pa'i phyir ro/ /de gnyis tshig tha dad pa ni byas pa de bzhin du shes pa nyid kyang tshul gsum pa'i go bar bya ba las kyang tha dad par brjod par bya'o zhe na/grub pa'i mtha' smra bas ma yin te zhes bya ba smos te/ rjes su 'gro ba dang ldog pa dag tha dad pa ni med kyi 'on kyang tshul tha dad pa nyid do/ /de lta na rjes su 'gro bas mthun pa'i phyogs la yod par brjod do//yang ldog pas ni mi mthun pa'i phyogs la med pa de dag ni phan tshun ltos pas so/ /phan tshun nang du 'du ba yin te/ sgrub pa dang dgag pa'i tshul tha dad pa'i ngo bo yin pa'i phyir ro/ /gang dang gang tha dad pa'i ngo bo de dang de'i nang du 'du bar 'gyur ba mi rigs so/ / 'o na ni gang rjes su 'gro ba dang ldog pa ngo bo tha dad pa de lta na ji ltar tshul gsum du brjod par bya// phan tshun tha dad pa'i bdag nyid ni gcig pa nyid du mi rung ngo zhe na/ ngo bo nyid tha dad pas mtshan nyid tha dad pa'i phyir dngos po tha dad pa la nyes ba 'di med do/ /gang gi phyir ji lta ba'i rjes su 'gro ba dang ldog pa rnam pa rnam par gzhag par bya ba de lta bu 'dis nang du 'du bar brjod de/gzhan du ni ma yin no/ /ji ltar 'di dag rnam par gzhag ce na/ ldog pas byas pa tha dad pa la brten pa'i de lta na yang tshul tha dad pa 'di nyid ni ldog pa tha dad pa yin du zin kyang don dam par tha dad pa med de rtags gcig la tshul gsum du brjod do//'o na ni 'di ni don la tha dad pa 'ga' zhig kyang med kyi gzhan du sbyor ba tha dad pa yin no zhes sngar bshad pa ji ltar yin zhe na/ tshig gcig gis kyang zhes bya ba la sogs pa smos te/ rjes su 'gro ba dang ldog pa'i sgo nas rab tu sbyor ba na tshig gcig gis rjes su 'gro ba dang ldog pa tha dad pa'i mtshan nyid go bar byed pa yin no zhes kho bo cag brjod la/don gcig la rang bzhin gnyis med do zhes brjod do/ /phan tshun tha dad pa nyid dag gi don gyi ngo bo yin pa'i phyir ro/ /'dir gzhan dag na re/ 'on ni de kho na la zhes bya ba la sogs pa smos te/bsam pa ni 'di yin te/ mtshan nyid gsum pas bstan pa'i rjes su 'gro ba dang ldog pa la brten pa phan tshun nang du 'du bar bshad pa ni der yang rig par bya ba kho na ste/ de lta na de kho na la yod do zhes bya ba mtshan nyid kyi ngag de'i shugs kyis de med pa la med par rtogs so//de med pa la gdon mi za ba med do zhes bya ba 'dis kyang de yod pa yin no/ /'brel pa med na ni ma yin te/ gcig med pas gzhan med pa ni 'brel pa de'i bdag nyid dang de las byung ba dag gis de yod na yod pa'i ngo bo kho na'o/ /des kyang mthun pa'i phyogs sam mi mthun pa'i phyogs dag la yod pa dang med pa gcig rtogs par byed pas 'brel pa khyad par can gyi mtshan nyid kyi tshig gis gnyi ga rtogs par ma brjod par mi bya'o snyam na/de lta na tshig gcig gi don gyi nang du 'dus pas tha dad pa'i ngo bo yang 'dir rnyed par dka'o//des kyang ji skad du bshad pa'i rjes su 'gro ba dag kyang 'on te logs shig tu mi bya ste/ de dang de'i gnas skabs kho na yin no zhe na/ grub pa'i mtha' smra bas tshig 'dis ni zhes bya ba smos te/ de kho na la yod pa zhes bya ba la sogs pa gnyi ga yang 'phen pa ni rab tu bstan pa'o//ga las she na/ shus kyis gnyi ga bstan par nus pa'i phyir ro/ /gal te ji lta bu yin zhe na/ gcig gis kyang zhes bya ba la sogs pa smos te dag ci 'dra ba zhig /nges par bstan pa ni mthun pa'i phyogs kho na la yod pa dang mi mthun pa'i phyogs la med pa kho nas thun mang du gnyis pa 'phen pa ni med na mi 'byung ba yin pa'i phyir ro//re zhig tshig gcig tu bstan pa tsam gyis gnyi ga gcig gi ngo bo dang tha dad pa'i ngo bo'i don rnams kyi ngag gcig gis bstan par mi bya ba'i phyir ro/ /mtshan nyid kyi tshig gcig gis gnyi ga rtogs kyang tha dad par brjod pa gang yin pa de ni sbyor ba nges pa'i phyir chos mthun pa'i sbyor ba la mi mthun pa brjod par mi bya ba dang /chos mi mthun pa'i sbyor ba la yang chos mthun pa mi brjod do/ /yang gcig rjod par byed pas tshul gzhan bstan pa'i don mi rtogs pa ni ma yin no/ /de ltar tshul gsum pa brjod pa ni shes pa dang rjes su 'brel pas shes bya la yod par rnam par gzhag par mi bya'o//bstan bcos byed pa la brten nas gzhan gyis khong du chud par bya ba'i don du shes pa nyid ni tshul gsum pa bstan pas go na/ shes pa yang brjod pa ni dgos pa cung zad cig kyang yod pa ma yin no/ /'di tha dad par brjod par mi rigs pa'i phyir ro//'on te 'ba' zhig pa yang tshig gcig gi don gyi nang du 'du bar 'gyur ba phan tshun tha mi dad pa'i rang bzhin du 'gyur ro/ /de nyid kyi phyir tshig gcig gi don gyi nang du 'dus pa yin par 'dod do zhe na/ yod pa dang med pa zhes bya ba smos te/ ngag gcig pa'i don la mi ltos par de'i nang du 'dus pa tsam gyis mthun pa'i phyogs dang mi mthun pa'i phyogs ma yin pa dag gi yod pa dang med pa dag phan tshun 'phen pa'i nang du 'du bar 'gyur ba'i tha dad pa'i ngo bo'i don rnams kyang tshig gcig gi don gyi nang du 'du bar ma mthong ba'i phyir ro//'o na ni nges pa dang ldan pa'i yod pa dang /med pa 'ba' zhig pa nyid de dag kyang phan tshun 'phangs pas 'ba' zhig pa yang der thal bar 'gyur ro zhe na/ nges pa dang ldan pa zhes bya ba smos te/ de nges par gzung ba'i ngag tu bstan pas 'ba' zhig ni ma yin no/ /'on kyang lhan cig pa nyid kyis so/ /gang las she na nges pa na nges par gzung ba'i ngag ni gnyi ga'i ngo bo yin pa'i phyir ro//des na de ltar thun mong du brjod pas rjes su 'gro ba dang ldog pa 'ba' zhig brjod pas de'i nang du 'du bas gnyi ga rtogs pa yin no/ /'on kyang phan tshun nang du 'du bar gyur pa nyid lhan cig tu tshig gcig gis brjod pa yin no zhes mjug bsdu ba ni de'i phyir zhes bya ba smos so de nyid la mthun pa'i phyogs kho na la yod pa zhes bya ba 'dis mthun pa'i phyogs la yod pa brjod pa ni ma yin te/'on kyang de lta na mthun pa'i phyogs med pa yang yin nam de bzhin cig shos kyis kyang ste/ mthun pa'i phyogs la med pa kho na zhes bya ba'i tshig gis med pa nyid 'ba' zhig brjod pa ni ma yin no//'on kyang mthun pa'i phyogs la yod pas kyang yin te/ gang gis 'ba' zhig pa tshig gis yod pa'am med pa de'i bdag nyid kyi gnyis pa 'phen pas so/ /gang gi phyir 'dis tha dad par brjod par mi 'gyur ba de'i phyir gang gi tshe rjes su 'gro ba dang ldog pa'am med pa tha dad pa'i ngo bo yin pa'i phyir ji ltar de las logs shig pa nyid yin/'on te nges pa dang ldan pa'i tshig gis byas pa'i de'i ngag gcig pa nyid kyis gnyi ga rtogs pa yin pa'i phyir logs shig tu brjod par mi bya'o/ /de byas kyang ma rtogs pa rtogs pa med de/ 'on kyang sbyor ba nges pa'i don yin no zhes bshad do/ /gal te ji lta ba'i rjes su 'gro ba'am ldog pa'i yod pa'i mtshan nyid phan tshun bdag nyid ma yin pa dang /des de gnyis phan tshun tshul gzhan yin pa de bzhin du/ bstan bcos byed pa ni gzhan gyis shes par byed pa yin pas shes pa nyid ni mtshan nyid gsum las tha dad do/ /de'i nang du 'du bar 'gyur ba ma yin pa de'i phyir tshul gzhan du 'gyur ro zhe na/shes pa ni de ltar zhes bya ba smos te/ rjes su 'gro ba dang ldog pa'i yod pa dang med pa'i mtshan nyid phan tshun nang du 'du bar 'gyur ba de bzhin du shes pa ni ma yin te/ gzhan gyis shes par byed pa'i bstan bcos bshad pa'i mtshan nyid gsum gyi nang du ma 'dus pa yin te/ gzhan gyi mtshan nyid yin pa'i phyir ro/ / gzhan gyis shes par byed pa'i tshul gsum pa'i yul rtogs pa'i 'bras bu yin/ bstan bcos de las gang gis tshul gsum pa rtogs pa gang yin pas shes pa ni ma bzung ngo / /de'i phyir tha mi dad pa'i shes pa ni ma bzung bas mtshan nyid gsum gyi nang du 'dus so zhes bya ba'i don to/ /bas zhes bya ba ni de'i phyir te mtshan nyid gsum las tha dad pa ma yin pa'i phyir ro//gal te shes pa nyid shes pa'i sgra 'jug pa'i rgyu mtshan du bshad pa'i rnam pa kho nar brjod do/ /de'i tshe de'i rtags kyi bdag nyid ma gyur pas de'i mtshan nyid ma yin no/ /yang na shes pa la ltos pa'i las su bya ba shes pa nyid du brjod na de'i tshe yang shes bya yod par rnam par 'jog pa'i rgyu mtshan ni shes pa yod pa yin pa'i phyir tshul gsum rnam par gzhag pa kho nas de yod par 'jog par byed pa'i shes pa rnams kyang 'phen pa yin no//de'i phyir de la ltos kyang las bya ba'i yod pa ni ma brjod kyang grub pas de'i tshig gis logs shig tu brjod par mi bya'o/ /de ltar bstan bcos ni gzhan gyis shes par byed pa'i phyir bshad pas ma bzung ba'i shes pa ni mtshan nyid gsum las tha mi dad pa'i phyir ro//de nyid gnod pa med pa'i yul can la sogs pa yin pa'i phyir tshul gsum bsal ba'i mjug bsdu ba ni de lta bas na gtan tshigs mtshan nyid drug ma yin par zhes smos so/ /de lta na mtshan nyid gsum kho na yin no zhes bya'o//gtan tshigs thigs pa'i 'grel pa bram ze a tsa Tas rnam par sbyar ba las mtshan nyid drug bshad pa ste bzhi pa'o// //thub pa nyi ma'i gsung gi rigs pa'i sgron ma yis/ /rtog ge ngan pa ma lus lam ni zad mdzad pa'i/ /'grel pa 'di yis bsod nams bsags pa gang yin des/ /'gro ba gzhan dag rnam par dag par byed gyur cig /gtan tshigs thigs pa'i rgya cher 'grel pa bram ze a tsa Tas rnam par sbyar ba rdzogs so// //'dzam gling snying po kha che'i grong khyer du/ /mkhas pa'i snying po chos kyi grags pa'i 'grel/ /dam chos snying po tshad ma bsgyur ba las/ /snying po med pa rnams kyi snying por shog/ //