CLOSE WINDOW

D4232
བོད་ཡིག

/[ ]@##/ /rgya gar skad du/ na ya bin+du pUrba pak+She saM k+Ship+ta/ bod skad du/ rigs pa'i thigs pa'i phyogs snga ma mdor bsdus pa/ bcom ldan 'das dag gi dbang phyug la phyag 'tshal lo/ /log par rtogs pa ni rnam pa bzhi ste/ grangs la log par rtogs pa dang /rang gi ngo bo la log par rtogs pa dang / spyod yul la log par rtogs pa dang / 'bras bu la log par rtogs pa'o/ /de la grangs la log par rtogs pa ni/ 'di lta ste/ phur bu ba rnams ni mngon sum gcig tu kho na tshad ma yin gzhan ni ma yin no zhes zer ro/ /grangs can pa rnams ni mngon sum dang /rjes su dpag pa dang / sgra las byung ba dang tshad ma gsum kho na'o zhes zer ro/ /rigs pa can rnams ni mngon sum dang / rjes su dpag pa dang / dpe dang / sgra las byung ba dang / tshad ma bzhi kho na'o zhes zer ro/ /rgyal dpog pa rnams ni mngon sum dang /rjes su dpag pa dang / dpe dang / sgra las byung ba dang / don gyis go ba dang / dngos po med pa zhes bya ba dang / tshad ma drug kho na'o zhes zer ro/ /tsa ra ka la sogs pa ni/ rigs pa dang / mi dmigs pa dang / srid pa dang zhes grags pa dang snyam du sems pa zhes bya ba tshad ma gzhan dag kyang yod do zhes zer ro//de la rang gi ngo bo la log par rtogs pa ni/ 'di lta ste/ rigs pa can rnams ni mngon sum du thams cad nges pa'i bdag nyid yin pa'i phyir/ rnam par rtog pa dang bcas pa kho na'o zhes zer ro/ /rgyal dpog pa rnams ni gtod par byed pa'i shes pa skad cig ma dang po kho na rnam par rtog pa med par skye la/de'i 'og rol gyi mngon sum thams cad ni rtog pa dang bcas pa nyid do zhes zer ro/ /de bzhin du gzhan dag ni dung la ser por shes pa la sogs par 'khrul pa yang tshad ma nyid yin par 'dod do//de bzhin du bye brag pa la sogs pa ni rnam par shes pa'i ngo bo ma yin pa nyid de/ dbang po dang / don 'brel pa yin par brjod do/ /kha cig ni bdag dang yid 'brel pa'i ngo bo yin par brjod do/ /gzhan dag ni mngon sum rna ba la sogs pa'i dbang po 'jug pa'i ngo bo yin par brjod do//de bzhin du rnam phug la sogs pa ni yid kyi zhes bya ba'i mngon sum tshad mar rigs pa ma yin te/ sngar mngon sum gyis gzung ba las yul gzhan ma yin na de bzung zin pa 'dzin pa'i phyir tshad ma ma yin pa kho na'o/ /yul don gzhan nyid yin na ni/ 'di rang dbang du 'jug pa'i phyir dang /don thams cad yul yin pa'i phyir/ 'ga' yang long ba la sogs pa'i dngos por mi 'gyur ro zhes zer ro/ /bye brag tu smra ba la sogs pa ni rang rig pa'i mngon sum yang rigs pa ma yin te/ bdag nyid la byed pa 'ga' ba'i phyir ro zhes zer ro/ /rgyal dpog pa rnams na re skyes bu thams cad ni 'dod chags la sogs pa dang ma rig pas 'khrul pa yin te/'gro ba 'di lta bu ma yin pa ni 'ga' yang med do/ /thams cad la dbang pos mi sod pa'i don mthong ba'i thabs med pa'i phyir la mngon sum la sogs pa'i tshad mas grub pa'i rnal 'byor ba dag kyang med de/de'i phyir dbang pos mi sod pa'i don mthong ba mi srid pas rnal 'byor ba'i shes pa med pa kho na'o zhes zer ro/ /de la yul la log par rtogs pas ni 'di lta ste/ rigs pa can la sogs pa na re spyi'i dngos por gyur pa yang yod pa'i phyir la/ de yang mngon sum gyis yongs su gcad par bya ba yin pa'i phyir te/de'i phyir mngon sum ni spyi'i mtshan nyid kyi yul can yang yin no/ /de bzhin du bdag la sogs par rang gi mtshan nyid kyi ngo bo yang rjes su dpag pa'i tshad mas yongs su gcad par bya ba nyid yin pa'i phyir/ rjes su dpag pa yang de'i yul can gyi tshad mas yin par rigs so zhes zer ro//de la 'bras bu la log par rtogs pa ni 'di lta ste/ rgyal dpog pa la sogs pa na re/ 'jig rten na bsgrub par bya ba dang sgrub pa bdag ni phan tshun tha dad pa'i bdag nyid du grags pa'i phyir/ 'bras bu ni tshad ma las don gzhan du gyur ba kho na yin par rigs te/dgra sta nyid chad pa ma yin no/ /de lta bas na de kho na nyid 'di ni rnam pa bzhir yongs su rdzogs pa yin te/ 'di lta ste/ 'jal bar byed pa dang gzhal bya dang tshad ma dang rtogs pa'o/ /'di la 'jal bar byed pa ni skyes bu yin no//gzhal bya ni gzugs la sogs pa'i yul yin no/ /tshad ma ni dbang po la sogs pa yin no/ /rtogs pa ni don yongs su chod pa yin no/ /gang gi tshe shes pa kho na tshad ma yin pa de'i tshe yang / shes pa phyi ma phyi ma ni 'bras bu yin la/ snga ma ni tshad ma yin te/ spyi la sogs pa'i khyad par gyi shes pa gang yin pa de ni tshad ma yin no//rdzas la sogs pa'i khyad par can gyi shes pa gang yin pa de ni 'bras bu yin no zhes zer te/ gzhan dag de ltar mngon sum la log par rtogs pa rnams pa mang po zhig yod pa de dag dgag par tshad ma'i mtshan nyid ji lta ba bzhin 'di byas so//'di ni bcom ldan 'das kyang bzhed pa kho na yin te/ ji skad du/ dge slong dag gam mkhas rnams kyis/ /bsregs bcad bdar bas gser bzhin du/ /yongs su brtags nas da yi bka'/ /blang bar bya yi gus phyir min/ /zhes gsungs pa lta bu'o/ /'dis ni mngon sum dang rjes su dpag pa'i mtshan nyid rnam pa gnyis kho na zhal gyis bzhes pa yin te/dpe la sogs pas yongs su brtags par zhal gyis bzhes pa'i phyir ro/ /mngon sum gyi dpe ni bsregs pa dang chos mthun par bstan pa'i phyir ro/ /rjes su dpag pa ni bdar ba dang chos mthun par bstan pa'i phyir ro//phan tshun du mi 'gal ba ni bcad pa dang chos mthun par yongs su brtags par gsungs te/ de yang rjes su dpag pa kho na yin no/ /'di ltar don ni rnam pa gsum ste/ mngon sum dang / lkog tu gyur pa dang / shin tu lkog tu gyur pa'o//de la bka'i don mngon sum la ni bsregs pas gser bzhin du mngon sum gyis brtags pa yin no/ /don lkog tu gyur pa la ni bdar ba bzhin du rjes su dpag pas brtags pa yin no/ /de nyid kyi don shin tu lkog tu gyur pa la ni bcad pas gser bzhin du phan tshun mi 'gal ba'i sgo nas brtags pa yin te/de ltar yongs su dag pa'i lus la ni yul lkog tu gyur kyang / rtog pa dang ldan pa tshad ma yin par yid ches pa rnams 'jug pa'i phyir ro/ /chos mngon pa las mig gi rnam par shes pa dang ldan pas sngon po shes kyi sngon po'i snyam du ni ma yin no zhes bya ba dang /don la don du shes kyi don la chos su 'du shes pa ma yin no zhes gsungs te/ sngon po shes pa dang don du 'du shes kyi zhes bya ba 'di gnyis kyis ni yul phyin ci ma log par bstan pa'i phyir/ ma 'khrul pa nyid bshad pa yin no/ /sngon po'o snyam du ni ma yin no zhes bya ba dang /chos su 'du shes pa ni ma yin no zhes bya ba 'di gnyis kyis ni ming dang 'brel pa'i don 'dzin pa spangs pa'i phyir rtog pa dang bral ba nyid bshad pa yin te/ de nyid las mig la sogs pa'i rnam par shes pa nges par rtog pa dang / rjes su dran pa'i rnam par rtog pas/rnam par mi rtog pa nyid du yang brjod par mig la sogs pa'i rnam par shes pa'i tshogs gzugs la sogs pa'i skye mched kyi rang gi mtshan nyid kyi yul can yin par yang bstan to/ /mdo las kyang / 'du byed thams cad skad cig ma/ /mi gnas bya ba ga la yod/ / 'di dag 'byung ba de nyid ni/ /bya ba de nyid byed por brjod/ /ces gsungs te/ 'dis ni byed pa po dang las la sogs pa'i dngos po yang dag par bkag pas bya ba la sogs pa thams cad kyi khongs su 'dus pa spangs pa'i phyir/ bya ba'i mtshan nyid kyi 'bras bu don gzhan du gyur pa bkag pa yin no//rjes su dpag pa la yang log par rtogs pa snang ste/ 'di lta ste/ brda sprod pa rnams ni rjes su dpag pa tshad ma ma yin te/ 'khrul pa srid pa'i phyir ro zhes zer ro/ /snod kyi rjes na re ni gzhan du mi 'thad pa'i ngo bo gcig pu kho na gtan tshigs kyis rtogs par byed pa nyid kyi yan lag yin gyi/phyogs kyi chos la sogs pa'i mtshan nyid kyi tshul gsum pa ni ma yin no/ /'di ltar sngo bsangs yin te de'i bu yin pa'i phyir/ de'i bu snang ba yin no zhes bya ba'i gtan tshigs 'di la tshul gsum pa yod kyang gzhan du mi 'thad pa nyid kyi yan lag med pa'i phyir rtogs par byed pa nyid ma yin no//tshul gsum pa med kyang gzhan du mi 'thad pa dang ldan pa tsam kho nas gtan tshigs rtogs par byed pa yin pa yang mthong ste/ 'di lta ste/ dngos po dang dngos po med pa ni ji ltar yang yod pa'i bdag nyid dag yin/ji ltar yang dmigs pa'i bya ba yin pa'i phyir ro zhes bya ba lta bu'o/ /'di la ni chos mthun pa dang chos mi mthun pa'i dpe dag med de/ dngos po thams cad kyi tshogs dngos po dang / dngos po med pa phyogs su byas pa'i phyir ro/ /de dag la ma gtogs pa gzhan med pa'i phyir gang zhig dpe nyid yin par 'gyur/phyogs kyi chos kyang gzhan du mi 'thad pa nyid kho na'i khongs su 'dus pa'i phyir ro/ /de ltar na rtags ni tshul gcig pa kho na yin par rigs kyi tshul gsum pa nyid ni ma yin pa'i rigs so zhes zer ro/ /gzhan dag ni phyogs kyi chos nyid dang / mthun pa'i phyogs la yod pa nyid dang /mi mthun pa'i phyogs la med pa nyid dang / gnod pa med pa'i yul can nyid dang / brjod par 'dod pa'i grangs gcig pa can nyid dang / shes pa nyid ces bya ba mtshan nyid drug pa kho na'o zhes zer ro/ /grangs can pa rnams na re rjes su dpag pa ni 'brel pa gcig las lhag ma grub pa yin no//lhag ma grub pa ni 'dir nye bar btags pa'i sgo nas rtags shes pa kho na yin te/ rjes su dpag par 'dod kyi/ rjes su dpag par bya ba shes pa ni ma yin no zhes zer ro/ /slob dpon dbyig gnyen yang med na mi 'byung ba'i don mthong ba'i der rig pa'i rjes su dpag pa yin no zhes zer te/'di yang rjes su dpag pa ni rtags shes pa kho na yin la/ rjes su dpag par bya ba shes pa ni 'bras bu yin par 'dod de/ phyir rgol ba 'di thams cad ni 'bras bu tshad ma las don gzhan kho na yin par yang 'dod pa nyid do/ /bye brag pa la sogs pa ni yang dag par ma grub pa yang gtan tshigs su nye bar rtogs par byed de/'di lta ste/ bdag ni thams cad ni yod pa yin te/ thams cad na yon tan dmigs pa'i phyir ro zhes bya ba la sogs pa lta bu'o/ /rgyal dpog pa la sogs pa ni mi mthun pa'i phyogs la yod pa yang gtan tshigs su nye bar brten te/'di lta ste/ sgra ni rtag pa ste/ gzhal bya yin pa'i phyir ro zhes bya ba dang / de bzhin du brjod par 'dod pa'i skyes bu 'ga' zhig thams cad mkhyen pa ma yin te/ gzhal bya dang / shes bya dang / dngos po dang / yod pa'i phyir ro zhes bya ba la sogs pa lta bu'o/ /de rnam par gcad pa'i phyir nges par gzung ba yin no//grangs can pa la sogs pa ni gtan tshigs 'gal bar mthong bzhin du yang shin tu ngo mtshar che ba'i ma rig pas blo gros phyin ci lo tu gyur pas mi 'gal ba bzhin du rtogs par byed de/ 'di lta ste/ mig la sogs pa ni gzhan gyi don yin te/ bsags pa yin pa'i phyir/mal cha dang stan la sogs pa'i yan lag bzhin no zhes bya ba la sogs pa lta bu'o/ /de rnam par gcad pa'i phyir/ mi mthun pa'i phyogs la med pa smos so/ /gang dag rang gi phyogs grub par bya ba'i phyir/ mi mthun pa'i phyogs gcig la yod pa la yang gtan tshigs su rtogs par byed de/'di lta ste/ sgra ni rtag pa ste/ brtsal ma thag tu 'byung ba yin pa'i phyir ro zhes bya ba la sogs pa lta bu de rnam par gcad pa'i phyir nges pa'i gzung ba yin no/ /gnyi gar yang khyad par can gyi gnas su nges par gzung ba ni brtsal ma thag tu 'byung ba la sogs pa mthun pa'i phyogs gcig la yod pa yang mi rtag pa nyid la sogs pa sgrub pa nyid du 'gal ba med do zhes bya ba rab tu bstan pa'i phyir ro//tshul gsum pa'i dngos kyi tshul du yod kyang ji srid du rtogs par ma grub pa de srid du de la bsgrub par bya ba rtogs par mi 'gyur ro zhes bya ba rab tu bstan pa'i phyir/ nges pa'i zhes bya ba smos pa yin te/ de bzhin du dper brjod pa yang 'di nyid las ston par 'gyur ro/ /rjes su dpag par bya ba chos dang chos can gyi spyi yin pa'i phyir/ de ma grub pa de la rtag pa yod pa rtag tu ma grub pa kho na'o/ /'on te sgrub pa na ni bsgrub par bya ba snga nyid nas grub pa'i phyir/ rtags kyi rjes su 'brang ba don med do zhes bya ba'i klan ka yongs su spang ba'i phyir/'di las rjes su dpag par bya ba ni/ 'dir zhes bya ba la sogs pa bshad do/ /grangs can pa la sogs pa gang dag bsgrub par bya ba'i chos dang mi 'dra ba'i yang phyogs dang mthun pa nyid du rtogs par byed de/ 'di lta ste/ mal cha dang stan la sogs pa'i yan lag bzhin no zhes bya ba la sogs pa lta bu ste/ de'i phyir mthun pa'i phyogs bye brag tu bshad do/ /rigs pa can la sogs pa gang dag med pa'i ngo bo mi mthun pa'i phyogs yin par mi 'dod do/ /med pa'i ngo bo las 'ga' yang ldog par mi rung ba'i phyir ro//de'i phyir 'dus ma byas med par smra ba byas pa'i phyir mi rtag go zhes bya ba sgrub par byed pa rnams kyi gtan tshigs ma nges pa yin no zhes zer ba de dag la mi mthun pa'i phyogs bye brag bshad do/ /kha cig rjes su dpag pa'i rab tu dbye ba dang /rang gi ngo bo gzhan du brjod de/ 'di lta ste/ rigs pa can rnams na re/ de sngon du 'gro ba'i rjes su dpag pa ni rnam pa gsum ste/ snga ma dang ldan pa dang / lhag ma dang ldan pa dang / spyir mthong ba'i rjes su dpag pa'o zhes zer ro/ /bye brag rnams ni rtags las byung ba ni 'di'i 'di zhes bya ba ste/'bras bu dang / rgyu dang / 'brel pa dang / don gcig dang ldan pa dang / 'gal ba'o zhes zer ro/ /ser skya pa la sogs pa ni rjes su dpag pa rnam pa gnyis te/ spyir mthong ba dang / khyad par du mthong ba'o zhes zer ro/ /de'i phyir 'di dag gi log par rtogs pa bsal ba'i phyir rtags kyi rab tu phye ba brjod do//rgyal dpog pa la sogs pa ni thams cad mkhyen pa la sogs pa dmigs pa'i rig byar ma gyur pa yang rang gi dmigs pa la log pa tsam gyis go nas 'gog par byed de/ de'i phyir mi dmigs pa bye brag tu bshad do/ /gnas ma'i bu'i sde pa la sogs pa ni mi rtag pa la sogs pa phyis 'byung ba yang byas pa la sogs pa'i rang bzhin yin par brjod do//de bsal ba'i phyir rang bzhin gyi gtan tshigs kyi yul bsnyad do/ /brda sprod pa la sogs pa me ma yin pa brgya byin gyi spyi po la sogs pa las kyang du ba 'byung ba mthong bas/ me la sogs pa 'grub par bya ba la sogs pa 'bras bu'i rtags 'khrul pa smra ste/ de'i phyir 'bras bu'i gtan tshigs brjod do/ /grangs can pa rnams ni dngos po rnams kyi 'brel pa rnam pa bdun brjod do/ /'di lta ste/ bdag dang bdag gir 'brel pa ni lha sbyin dang mchod sbyin lta bu'o/ / rang bzhin dang 'brel pa ni 'jim pa dang bum pa lta bu'o/ /rgyu dang rgyu can du 'brel pa ni rdza mkhan dang bum pa lta bu'o/ /rgyu dang 'bras bur 'brel pa ni sa bon dang myu gu lta bu'o/ /pha dang ma lta bur 'brel pa ni yal ga dang shing ljon pa lta bu'o/ /lhan cig spyod pa'i 'brel pa ni ngur pa dang khyo shug lta bu'o//dgra zla'i 'brel pa ni bya rog dang 'ug pa lta bu'o zhes zer ro/ /rigs pa can la sogs pa ni rnam pa lngar brjod de/ 'byor ba'i mtshan nyid kyi 'brel pa ni du ba dang me lta bu'o/ /ldan pa'i mtshan nyid kyi 'brel pa ni de nyid dang gzugs lta bu'o/ /'phrod pa'i 'du ba'i mtshan nyid kyi 'brel pa ni de nyid dang gzugs dang ldan pa nyid lta bu'o//'du ba'i ldan pa'i mtshan nyid kyi 'brel pa ni dper na de nyid dang du ba la yod pa'i gzugs la sogs pa lta bu'o/ /ldan pa'i 'phro ba'i 'du ba'i mtshan nyid kyi 'brel pa ni/ dper na me de nyid dang du ba la yod pa'i gzugs la sogs pa dang ldan pa nyid lta bu'o//de dag gi gzhung lugs kyi 'brel pa de dag kho nar 'brel pa'i gtan tshigs ni rtogs par byed pa yin te/ de bsal ba'i phyir 'brel pa gnyis pa brjod do/ /spyod pa pa rnams ni da ltar thams cad mkhyen pa la sogs pa mi dmigs pa'i phyir/ma 'ongs pa'i dus na yang de'i sgo nas de med par shes te/ de bsal ba'i phyir mi dmigs pa brjod do/ /rgyal dpog pa la sogs pa gang dag rang gi dmigs pa la sogs pa rgyu ma yin pa dang / khyad par byed pa ma yin pa dang / 'bras bu ma yin pa'i bkag pa dang /tshig la sogs pa dngos po dang bsgrub pas kyang mi 'gal ba bsgrub pa'i sgo nas thams cad mkhyen pa la sogs pa 'gog par smra ste/ de dag gi de rigs pa ma yin no zhes bya bar bstan pa'i phyir dang / 'jig pa rgyu dang bcas par smra ba 'gag pa'i phyir/ mi dmigs pa'i rab tu dbye ba brjod do/ /dgag pa'i gtan tshigs kyi sbyor ba'i dbye ba rnam pa mang po zhig yod kyang / me la sogs pa me nyid la sogs pa gzhan las dgag pa 'grub pa ma yin gyi/ 'on kyang rang bzhin mi dmigs pa kho nas yin no zhes bya ba bstan pa'i phyir/ khongs su 'du ba 'thad pa dang bcas pa brjod de/'thad pa ni thams cad la zhes bya ba la sogs pas bstan to/ /bskal pa'i yul zhes bya ba la sogs pa ni/ pha rol pos rab tu sbyar ba'i mi dmigs pa la nus pa med par bstan pa yin no/ /rjes su dpag pa 'di'i mtshan nyid ni/bcom ldan 'das rjes su dpag pa'i rten gyi rtags ston par mdzad pa nyid kyis gsungs te/ 'di la rtags ni bsgrub par bya ba med na ni 'byung bar nges pa yin na/ rjes su dpag pa'i shes pa'i rgyu yin te/ de yang dge slong dag kun du 'byung ba'i chos can gang ci yang rung ba de thams cad ni 'gog pa'i chos can yin no zhes de skad du bsgrub par bya bas/gtan tshigs la khyab par ston par mdzad pas/ bsal ba kho nar rab tu bstan pa yin no/ /rtags de yang rang bzhin dang / 'bras bu dang / mi dmigs pa'i bdag nyid rnam pa gsum du yang bstan pa kho na ste/de la dge slong dag kun 'byung ba'i chos can gang ci yang rung zhes bya ba 'dis ni rang bzhin zhes bya ba'i gtan tshigs bshad do/ /'bras bu zhes bya ba yang / du ba las ni mer shes te/ /chu skyar las ni chu yin no/ /byang chub sems dpa' blo ldan gyi/ / rigs ni mtshan ma rnams las shes/ /zhes bya ba 'dis bstan pa kho na yin no/ /mi dmigs pa tsam tshad ma nyid yin pa spang bar mdzad pas/ mi dmigs pa'i khyad par zhes bya ba yang bstan pa kho na ste/ ji skad du/ dge slong dag gang zag gis gang zag la tshod ma 'dzin cig / gang zag la tshad kyang ma 'dzin cig /dge slong dag gang zag gis gang zag la tshod 'dzin pa ni nyams par 'gyur te/ gang zag gi tshod ni nga 'am nga dang 'dra ba yod pa gang yin pas gzung bar bya'o zhes gsungs pa lta bu'o/ /'dis ni ngo bo nyid kyis bskal pa'i don dag la mi dmigs ba tsam tshad ma nyid yin pa sbong bar mdzad pas/mi dmigs pa kho na tshad ma yin gyi/ gzhan ni ma yin no zhes bstan par 'gyur ro/ /rigs pa can la sogs pa ni gzhan gyi don gyi rjes su dpag pa tshig yan lag lnga pa yin te/ yan lag lnga ni/ dam bcas pa dang / gtan tshigs dang / dpe dang / nye bar sbyar ba dang / mjug bsdu ba rnams so zhes zer ro/ /rang gi sde pa kha cig kyang / gzhan gyi don gyi rjes su dpag pa ni/ tshig yan lag gsum pa yin te/ yan lag gsum ni dam bca' ba dang / gtan tshigs dang / dpe rnams so zhes bya bar bstan to//gzhan dag ni sngar bshad pa'i yan lag lnga po de kho na ltar 'dod de/ de dag dgag par 'di'i rang gi ngo bo bstan to/ /rtog ge ba gzhan thams cad ni/ 'di re zhig chos mthun pa dang / chos mi mthun pa dang ldan pa'i tshig sbyor ba gang yin pa 'di tsam zhig chu la yin no/de lta ma yin na chos mthun pa tsam zhig sbyar bas kyang / ji ltar chos mi mthun par rtogs par 'gyur/ chos mi mthun pa tsam zhig sbyar na yang chos mthun pa rtogs par ga la 'gyur/ de lta bas na gnyi ga rtogs par bya ba'i phyir gnyi ga brjod par bya dgos so zhes bya bar rtogs so//de bsal ba'i phyir de ni rnam pa gnyis te zhes bya ba la sogs pa rab tu dbye ba brjod do/ /de la sbyor ba gcig gi yang nus pa nye bar bstan pa'i phyir/ dper brjod pa bsnyad do/ /bye brag pa la sogs pa ni skye ba dang ldan pa thams cad la 'brel pa la sogs pa khyad par sgra rnams 'jug pa'i rgyu mtshan tha dad pa kho na yod par nye bar rtog cing /sgra tsam tha dad pa'i sgo nas don tha dad par rtogs te/ de dag gi gzhung lugs dgag pa'i phyir/ rang bzhin gyi gtan tshigs kyis rab tu dbye ba rnam pa gsum bstan to/ /rang bzhin gyi gtan tshigs rnam pa 'di gsum char gyi yang log par rtogs par bsal ba'i phyir/sngar bshad pa kho na'i yul nye bar bstan par bsgrub pa'i chos de dag thams cad ni zhes bya ba la sogs pa smos so/ /sbyor ba gcig la yang tshul gsum pa'i rtags bsgrub pa'i nus pa yod pa kho na'o zhes bya bar bstan pa'i phyir/chos mthun pas kyang zhes bya ba la sogs pa chos nye bar brjod do/ /rang gi sde pa gang dag nye bar sbyar ba dang / mjug bsdu ba dag ni ldog pa yin pa'i phyir ma bstan pa la yang rag na phyogs go ci ste ston par mi byed snyam ste sems pa de dag la sbyor ba 'di gnyi ga la yang phyogs bstan par nges pa med de zhes bya ba la sogs pa smos te/gzhan dag bsgrub par bya ba ma yin pa yang bsgrub par bya ba nyid du bzung nas/ de'i sgo nas gtan tshigs kyi skyon rjod par byed de/ de dag bsal ba'i phyogs kyi mtshan nyid bshad do//rigs pa can la sogs pa ni dam bca' ni bsgrub par bya ba bstan pa yin no zhes phyogs kyi mtshan nyid kha na ma tho ba dang bcas par nye bar ston to/ /de bzhin du rang gi sde pa kha cig gis kyang mtshan nyid yongs su ma dag par nye bar bstan te/ de skad du slob dpon dbyig gnyen gyis rnam par dpyad par 'dod pa'i don phyogs yin no zhes bshad do//nam mkha'i gos can rnams ni phyogs kyi phyogs gcig la yod par yang gtan tshigs yin par rtogs te/ dper na shing rnams ni sems can yin te/ nub mo nyal ba'i phyir ro zhes zer ba lta bu'o//de dag gis nyal ba 'dab ma 'khums pa la sogs pa tsam gyi mtshan nyid yin par brjod par 'dod mod kyi/ 'on kyang 'di ni phyogs su byas pa'i shing thams cad la ma grub ste/ de shing ti na ti ka la sogs pa kho na la mthong ba'i phyir ro/ /de rnam par gcad par go rims bzhin du rjes su dpag par bya ba la yod pa dang /nges par gzung ba smos te/ yul khyad par can du nges par gzung ba ni 'dod pa'i don rtogs par bya ba'i phyir ro/ /de lta ma yin na bshad ma thag pa'i don rtogs par mi 'gyur ro/ /bye brag la sogs pa ni rjes su dpag par bya ba kho na la yod pa thun mong ma yin pa ma nges pa yang dngos su gtan tshigs yin par khas len te/dper na gson po'i lus ni bdag dang bcas pa yin te/ srog la sogs pa dang ldan pa'i phyir ro zhes zer ba lta bu'o/ /de bzlog pa'i phyir mthun pa'i phyogs la yod pa brjod do/ / phyogs kyi mtshan nyid 'di rnam par gnyi ga yang ha cang khyab che ba'i nyes pa yod la/ de dag la gtan tshigs dang dpe ma grub pa smra ba yang yod pa'i phyir te/ de'i phyir yang phyogs kyi mtshan nyid bstan pa/ grangs can pa rnams ni rgol ba dang phyi rgol ba dag la ma grub pa yang bsgrub par bya ba nyid du ston te/dper na mig la sogs pa ni gzhan gyi don yin no zhes zer ba lta bu'o/ /gzhan gyi don ni spyi yin pas de'i phyir rang gi ngo bo zhes bya ba smos so/ /kho na zhes bya ba ni ha cang yang khyab ches pa'i nyes ba bsal ba'i phyir ro/ /grangs can pa la sogs pa ni rgol ba mi 'dod kyang bla ste/bstan bcos byed par 'dod pa thams cad bsgrub par bya ba kho na yin no zhes bya bar rtogs so/ /de'i sgo nas byas pa nyid la sogs pa yang dag pa'i sgrub pa la yang 'gal ba rjod par byed de/ de dang 'dra bar chos can sgra la nam mkha'i yon tan yang med par bsgrub pa'i phyir/bye brag pa la sogs pa'i gtan tshigs ni 'gal ba yin no zhes zer ba lta bu ste/ de'i phyir bdag ces bya ba smos so/ /grangs can pa la sogs pa na re tshig tu smras pa kho na bsgrub par bya ba yin gyi ma smras pa ni ma yin no zhes zer zhes grags te/ de'i phyir 'dod pa zhes bya ba smos so//rgyal dpog pa rnams ni rang rig pa'i mngon sum du rab tu grub pa blo dang bde ba la sogs pa yang mngon sum ma yin pa de nyid du rab tu shes te/ de dag gis dam bca' ba ni sgra mnyan par bya ba ma yin pa nyid du dam bca' ba de bzhin du/ mngon sum gyi gnod pa yin no zhes bstan pa'i phyir/'gal ba dang po brjod do/ /de dag nyid sgra rtag pa nyid sgra shes la/ grangs can pa la sogs pa gsal bar smra ba rnams kyang rtag pa nyid du gsal ba kho nar khas len pas/ de'i phyir rjes su dpag pas gnod pa bsal to/ /brda sprod pa kha cig sgra bzang po kho na rjod par byed pa yin gyi mi bzang ba ni ma yin no zhes zer ba ni/dngos po thams cad sgra brjod par bya ba nyid du rung bar 'dod pa tsam gyi rjes su byed pa skye bo gnag rdzi mo yan chad la grags pa 'dod par byed pa yin te/ de'i phyir grags pas gsal ba bsal to//'jig rten rgyang pan pa rnams ni gzhan dag la rang gi brjod par 'dod pa'i don lkog tu gyur pa'i tshig rtags de med na mi 'byung ba'i sgo nas rjes su dpog par byed kyang / rjes su dpag pa tshad ma ma yin no zhes bya bar rab tu shes te/ de'i phyir rang gi tshig dang 'gal ba brjod do//rigs pa can rnams ni gtan tshigs ltar snang ba rnams kyi mtshan nyid ni/ 'khrul pa dang bcas pa dang / 'gal ba dang / skabs dang / mtshungs pa dang / bsgrub par bya ba dang / mtshungs pa dang / dus las 'das pa ni gtan tshigs ltar snang ba dag yin no zhes gzhan du 'chad par byed de/de la 'khrul pa dang bcas pa ma nges pa yin te/ dper na sgra ni rtag pa ste/ lus can ma yin pa'i phyir ro zhes bya ba lta bu'o/ /grub pa'i mtha' khas blangs pas de dang 'gal bar byed pa ni 'gal ba ste/ dper na bye brag ni rdul phra rab dag ni lus can ma yin pa'i phyir rtsom par byed pa ma yin zhes zer ba lta bu'o//gang gi phyir skabs bsam pa de gtan la dbab pa'i phyir/ bstan pa ni skabs dang mtshungs pa ste/ dper na bdag ni rtag pa ste lus las gzhan yin pa'i phyir ro zhes bya ba lta bu'o/ /bsgrub par bya ba dang khyad par med pa bsgrub par bya ba yin pa'i phyir bsgrub par bya ba dang mtshungs te/dper na sgra ni rtag pa ste/ lus can ma yin pa'i phyir blo lta bu zhes bya ba lta bu dang / gzhan dag na re rdzas yin te/ lus las 'ong ba dang ldan pa'i phyir ro zhes dper rjod par byed pa lta bu'o/ /dus 'das nas bstan pa ni dus las 'das pa ste/dper na sgra ni mi rtag pa ste bum pa bzhin no zhes smras nas dris pa dang byas pa'i phyir ro zhes gtan tshigs smras pa lta bu'o zhes zer ro/ /bye brag pa rnams na re ston pa ma yin pa ni rab tu ma grub pa dang / med pa dang / the tshom za ba'o zhes zer te/gang la rtags dang rtags can dag 'brel par ma grub pa de la ma grub pa yin no/ /'brel pa med pa ni med pa ste/ dper na rwa can yin pa'i phyir rta'o zhes bya ba lta bu'o/ /rwa can yin pa'i phyir ba lang ngo zhes bya ba lta bu ni the tshom za ba yin no zhes zer ro/ /de dag dgag pa'i phyir dang gzhan gyis rab tu sbyar ba'i gtan tshigs rnams kyi ma grub pa nyid la sogs pa'i skyon brjod pa'i phyir gtan tshigs ltar snang ba dag bstan to//shing dag la sems yod pa yin no zhes bya ba ni nam mkha'i gos can rnams kyis dam 'cha' ba yin no/ /bde ba la sogs pa la sems med do zhes bya ba ni grangs can pa rnams kyi yin no//bdag ni thams cad la yod pa yin no zhes bya ba ni rigs pa can rnams kyi yin no/ /sgra ni rtag pa yin no zhes bya ba ni dpyod pa pa rnams kyi yin no/ /skyes bu thams cad thams cad mkhyen pa nyid ma yin par dam 'cha' ba ni rgyal dpog pa rnams kyi yin no//rang gi sde ba kha cig kyang 'dod pa la gnod pa byed pa zhes bya ba 'gal ba gzhan yang yod do zhes rjod par byed do/ /de dgag pa'i phyir 'dod pa la gnod pa byed pa 'gal ba gsum pa ma yin nam zhes bya ba la sogs pa smos so//rigs pa can rnams na re/ gson po'i lus ni bdag dang bcas pa yin te/ srog la sogs pa dang ldan pa'i phyir ro zhes zer ro/ /rang gi sde pa kha cig ni dngos po'i stobs kyis zhugs pa'i rjes su dpag pa la yang 'gal ba mi 'khrul ba can zhes bya ba ma nges pa'i gtan tshigs yod do zhes brjod de/de la dper brjod pa ni dper na sgra mi rtag pa ste byas pa'i phyir bum pa lta bu'o zhes bya ba la yang gang gi tshe gzhan zhig gis brgal te/ sgra ni rtag pa ste mnyan par bya ba yin pa'i phyir sgra nyid lta bu'o zhes smras pa de'i tshe sbyor ba snga ma ma nges pa yin no zhes zer ro zhes grags te/de dgag pa'i phyir 'gal ba mi 'khrul ba can yang zhes bya ba la sogs pa smos so/ /pe'i lu ka na re spyi ni thams cad na yod pa yin te/ gsal ba dag dang de dag gi stong ba thams cad na yod pa'i phyir ro zhes zer ro/ /pe'i tha ra na re de ni gsal ba thams cad na yod pa yin gyi/bar gyi yul la yod pa ni ma yin no zhes zer ro/ /rigs pa can la sogs pa ni mtshan nyid gsum pa'i gtan tshigs las ma gtogs pa dpe zhes bya ba sgrub pa'i yan lag yod do zhes zer te/ de bsal ba'i phyir/ mtshan nyid gsum zhes bya ba la sogs pa smos so//gzhan gyis rab tu sbyar ba'i dpe kha cig kyang skyon can nyid du brjod pa'i phyir/ dpe ltar snang ba nye bar bkod de/ bye brag pa la sogs pa'i ltar na rdul phra rab rnams ni rtag pa yang yin la lus can yang yin te/ lus can ni rdzas thams cad na yod pa ma yin pa'i mtshan nyid yin no//las ni lus can yang ma yin la mi rtag pa yang yin no/ /bum pa ni mi rtag pa yin la lus can yang yin no/ /ser skya la sogs pa ni 'dod chags dang ldan pa yin te smra ba'i phyir lam po'i che'i mi bzhin no zhes bya ba ni rgyal dpog pa rnams kyi sbyor ba yin no//bye brag pa la sogs pa na re/ sgra mi rtag pa ste byas pa'i phyir bum pa bzhin no zhes zer ro/ /de dag nyid rjes su 'gro ba rab tu bstan pa'i gtan tshigs kyang rab tu sbyor bar byed do/ /ser skya la sogs pa thams cad mkhyen pa ma yin no zhes bya ba la sogs pa ni nam mkha'i gos can rnams kyi sbyor ba yin no//gsum rig pa'i bram zhes ni mi 'ga' zhig gis brjod par 'dod pa'i tshig gzung bar mi bya ste zhes bya ba la sogs pa ni bram ze rnams kyi sbyor ba yin no/ /ser skya la sogs pa ni 'dod chags dang bral ba ma yin no zhes bya ba la sogs pa ni nam mkha'i gos can rnams kyi yin no//smra ba'i phyir 'dod chags dang bral ba ma yin no zhes bya ba la sogs pa ni dpyod pa pa rnams kyi yin no/ /sgra ni mi rtag pa nyid de byas pa'i phyir ro zhes bya ba la sogs pa ni rigs pa can gyi yin no/ /de la ltag chod rnams kyi dper brjod pa phyogs tsam zhig brjod par bya ste/dper na mi rtag pa nyid la sogs pa ni bsgrub par byas pa nyid dang brtsal ma thag tu 'byung ba la sogs pa yang dag par sbyar kyang ltag chod smra bas rgol ba khyod kyi gtan tshigs 'di ci bsgrub par bya ba dang phrad nas sgrub par byed dam 'on te ma phrad nas/gal te phrad nas yin na ni/ de'i tshe bsgrub par bya ba dang khyad par med par 'gyur te/ klung gi chu rgya mtsho dang phrad pa bzhin no/ /gzhan yang 'di bsgrub par bya ba grub zin pa dang lhan cig phrad par 'gyur ram/ ma grub pa dang phrad/ re zhig ma grub pa dang ni ma yin te/ri bong gi rwa bzhin med pa'i phyir ro/ /bsgrub par bya ba grub zin na yang 'di gang gi gtan tshigs yin par 'gyur/ de'i phyir phrad pa'i phyogs ni rigs pa ma yin no/ /yang ma phrad ces bya ba'i phyogs kyang ma yin te/ gtan tshigs ma phrad pa rnams dang khyad par med pa'i phyir ro zhes bya ba lta bu yin no//'di ni phrad pa dang ma phrad pa mtshungs pa zhes bya ba'i ltag chod yin te/ rigs pa med pas gtan tshigs sun 'byin pa'i phyir ro/ /gang la phrad pa dang ma phrad par yod par chos mthun pa tsam gyis gtan tshigs kyi mtshan nyid dang ldan pa yang gtan tshigs ma yin par 'gyur ro zhes bya ba 'di la rigs pa ci zhig yod/chu dang 'byung ba nyid la sogs par chos mthun pa'i phyir mes mi bsreg pa ni ma yin no/ /bsgrub par bya ba yang ri bong gi rwa bzhin du shin tu ma grub pa nyid ma yin no/ /'o na ci zhe na/ nges pa ma skyes pa'i phyir ro/ /khyod kyis sun 'byin pa la yang klan ka 'di thams cad mtshungs pas sun 'byin pa ma yin pa nyid do//de lta bas na 'dri ba log pa de lta bu dag la mtha' med pas/ de dag gi mtshan nyid logs shig tu brjod par mi bya ste/ tshad ma'i mtshan nyid ji skad bshad pa nges par gzung ba kho nas de dag bsal ba nyid do snyam du bsams pa yin no//rigs pa'i thigs pa'i phyogs snga ma mdor bsdus pa/ slob dpon mang du thos pa ka ma la shI las mdzad pa rdzogs so// //rgya gar gyi mkhan po shud+d+ha siM ha dang / zhu chen gyi lo tsA ba dge slong dpal brtsegs rak+Shi tas bsgyur te gtan la phab pa'o/