CLOSE WINDOW

D4228
བོད་ཡིག

@##/ /rgya gar skad du/ pra mA Na bi ni sh+tsa ya TI kA/ bod skad du/ tshad ma rnam par nges pa'i 'grel bshad/ thams cad mkhyen pa la phyag 'tshal lo/ /blo bzang gang gis phyi rol don ni zhal bzhes pa dang de bzhin rnam rig tsam// /bden pa gnyis bsgrub pa dang lta ba gzhan gzhig pa dang lam kun mdzad pa yi//sgrub byed nyid ni yang dag shes pa mngon sum de bzhin rjes dpag de rnam gnyis/ /rigs pa kun tu sgrub mdzad chos kyi grags pa dpal de yun ring rgyal gyur cig /de ni dpal ldan zhes bya ba'i tshigs su bcad pa 'dis ni phyogs kyi glang po'i zhal snga nas bshad pa'i yang dag pa'i yul can gyi rigs pa rab tu byed pa 'dis gsal bar bya'o zhes ston to//tshad ma rnam 'grel du ni bstan bcos tshad ma kun las bsdus pa la sogs pa'i tshig gi don gyi cha gtsor rtogs par byed do/ /de nyid kyi phyir tshad ma rnam 'grel ni rnam 'grel zhes bya'o//bstan bcos 'di ni rigs pa'i cha gtsor ston pa'i phyir rigs pa'i bstan bcos yin gyi rnam 'grel ni ma yin no/ /de nyid kyi phyir bstan bcos 'di zlos pa ma yin no/ /kha cig 'di la rnam 'grel du 'chad par byed pa de ni mi rigs te/ zlos par thal bar 'gyur ba'i phyir ro/ / de nyid kyi phyir rigs pa'i cha yang dag pa'i shes pa mthar phyin par ston pa'i yang dag pa'i shes pa bstan pa'i phyir 'di brtsam mo zhes gsungs te/ rigs pa dang bcas pa'i yang dag pa'i shes pa ma gtogs pas mi mkhas pa rnams la zhes bya'o/ /de dag kyang gzhan gyi sde pa mtha' dag dang /rang gi sde pa kha cig go/ /de zhes bya ba ni phyogs kyi glang po'i zhal snga nas te/ de'i lugs ni gsal bar bya'o zhes bya bar 'brel to/ /de ji lta bu zhig gi zhe na/ dpal ldan ni sbyin pa nas bsam gtan gyi bar bsod nams kyi tshogs dang ldan pa'o/ /dri med blo mnga' ni nag nog med pa'i blo ste/shes rab kyi pha rol du phyin pas ye shes kyi tshogs rnam par dag pa dang ldan pas bsod nams kyi tshogs phun sum tshogs par ldan pa'o/ /de nyid ni 'bras bu las rtogs par bya ste/ 'phags pa rang nyid bsnyen pas rjes su gzung gang zhes bya ba gsungs so/ /de la 'phags pa zhes bya ba ni thog ma med pa'i byang chub sems dpa' rje btsun 'phags pa 'jam dpal dang 'brel to//de yang 'di skad grags te/ slob dpon phyogs kyi glang po bstan bcos mtha' dag chub par mdzad nas dgon pa'i phyogs shig tu nyan thos kyi lam gyis bdag nyid dul ba na zhi ba'i phyir brtson pa na/'phags pa 'jam dpal nyid kyis drung du gshegs nas/ rigs kyi bu khyod ni sems can thams cad kyi don bya bar bzod pa yin na/ ci'i phyir bdag nyid kyi don byed/ 'di thong la sems can gyi don la spro bar gyis shig ces gsungs so/ /de nas slob dpon gyis gsol pa/ 'phags pa bdag gi sems g.yo ba 'di rngo mi thogs so/ /'phags pas gsungs pa/ khyod sangs rgyas kyi sar ma phyin pa'i bar du ngas yongs su gzung gis dogs par ma byed cig/ /de nas slob dpon gyis rab tu byed pa mang po brtsams pa la sogs pa 'jig rten la phan par mdzad do zhes mkhas pa rnams brgyud de grags pa yod do//rang nyid ces bya ba ni rjes su gzung ba chung ngu ni blo ma btang ba'o/ /'bring ni sprul pa bstan pa'o/ /mchog ni rang nyid kyis rjes su bzung pa'o/ /de nas slob dpon ni tshogs bsags pa ste/ de lta ma yin na rjes su bzung ba mchog ga la srid de/gang zhes bya ba ni de'i dpal ldan skyon bral blo mnga' 'phags pa rang nyid bsnyen pas rjes su gzung gang zhes dang / gang de'i tshig lci ba zhes dang / gang de'i lugs ni zhes bya bar 'brel to/ /gang yang 'jig rten nye bar bsten pas rgyas par byed de la zhes dang 'brel to//yang ci'i phyir de'i lugs dgrol bar gus she na/ snying rjes so zhes bstan pa'i phyir/ de'i tshig ces bya ba la sogs pa smos te/ de ni phyogs kyi glang po'i zhal snga'o/ /tshig lci ba zhes bya ba ni tshig gi rnam pa'o/ /nges bar rtogs pa med par zhes bya ba ni gsal bar ma rtogs pa'o//de'i tshig lci ba ni phyi'i byed pa'o/ /'jig rten blo gros blun pa ni shes rab mi gsal ba ste/ de ni nang gi byed pa'o/ /de dag gis slob dpon la smod pa byed par 'gyur gyi/ slob dpon ni skyon med pa nyid do/ /ji lta bu zhig la zhe na/ 'jig rten nye bar bstan pa ste/'gro ba la zang zing gi bsnyen bkur gyis mgu ba byas pas snod du gyur ba rnams la chos bstan pas rgyas par byed pa la'o/ /ji ltar smod ce na/ rmongs pas te/ de kho na nyid legs par ma bsams so zhes bdag nyid mi shes pa slob dpon la sgro 'dogs pas so//de ltar yon tan mchog dang ldan pa la cung zad smod byed pa'ang / don ma yin pa ni don gyi mi mthun pa'i phyogs te/ ngan 'gro la sogs pa mi 'dod pa'o/ /de lta bu chen po skyed byed de sbyin par byed pa yin na/ mang du snod pa lta ci smos pa'o/ /de ltar sdug bsngal gyi rgyu la gnas pa'i 'jig rten la snying brtse ba ste/sdug bsngal gyi rgyu dang bral bar 'dod pas so/ /de'i lugs ci lta bu zhig ce na/ sngar rigs pa'i bstan bcos so zhes smras te/ de'i phyir phan pa dang mi phan pa zhes bya ba la sogs pa ngag gnyis pa gsungs te/ 'dis ni yang dag pa'i shes pa'i rang bzhin gyi rigs pa dgos pa dang bcas par ston to//snga ma'i tshigs su bcad pa stag rnam par rtsen pas ni/ zlos pa'i skyon spang ba dang / rtsom pa'i rgyu bstan to/ /gal te yang dag pa'i shes pa'i dgos pa bstan pa la dgos pa ci yod ce na/ las rtsom pa thams cad la dgos pa bstan pa ni las de las gzhan dag 'jug par bya ba'i don to zhes bdag dang gzhan gyi sde pa kha cig zer ro//de la kha cig na re dgos pa ston pa'i ngag ni tshig yin la de dang don du 'brel bas nges pa med la/ tshig kha cig don la skyes pa yod kyang de'i bye brag rtogs dka' bas na rtog pa dang ldan pa dag 'dzin par mi 'gyur ba'i phyir rtog pa dang ldan pa 'jug pa'i rgyur 'gyur zhe'o//de la kha cig na re rtog pa dang ldan pa nges pa ma yin yang / gnod byed ma mthong bas don la the tshom skye la de las 'jug go zhes zer ro/ /de la snga ma na re ngag de ma brjod kyang sgrub par byed pa dang /gnod par byed pa ma mthong ba'i phyir rang bzhin gyis the tshom du gnas pas ngag dgos pa med la/ the tshom ni tshad mar mi rung ba'i phyir des 'jug pa yang rtog pa dang ldan pa nyid nyams so zhes zer ro/ /the tshom las mi 'jug na ngag dang po ci dgos she na/ gzhan dag khyod kyis rab tu byed pa 'di brtsam par mi bya ste/dgos pa med pa'i phyir ro zhes 'gog pa'i gtan tshigs ma grub par bstan pa'i don du'o zhe'o/ /kho bo ni 'di skad smra ste/ gzhan gyi gtan tshigs ma grub par bstan pa'i phyir zhes bya ba ci/ dgos pa yod pa'i phyir ro zhe na/ ngag dang po dgos pa yod par nges pas rtog pa dang ldan par 'jug par 'gyur ro//dgos pa la the tshom skyes pas gtan tshigs the tshom za ba'i ma grub par byed na ni ngag ngag gi dgos pa the tshom skyed pa yin no zhes smra ba'i phyogs nyid gnas pa yin no/ /de lta bas na 'di ltar shes par bya ste/ gang dag bstan bcos mdzad pa la yid ches pa de dag bstan bcos kyis dgos pa la sogs pa la yang dag gi sgo nas yid ches par 'gyur te/yid ches pa'i tshig yin pa'i phyir ro/ /bstan bcos mdzad pa la yid ches pa yang ji ltar zhe na/ bstan bcos gzhan du ji ltar ngag dang pos dam bcas pa ltar/ gzhung gi don dmigs pas na mi slu bar grub pas/'dir yang de nyid kyi bstan bcos rtsom pa'i skabs kyi ngag yin pas so/ /des na ngag gi bye brag ni don dang 'brel bar skabs la sogs pas gzung bar bya ste/ de lta ma yin na skyes bu'i 'jug pa med par thal bar 'gyur ro/ /phan pa ni blang bar bya ba'o/ / mi phan pa ni dor bar bya'o/ /phan pa dang mi phan pa ni phan pa dang mi phan pa dag go/ /'thob pa dang spong ba ni 'thob pa dang spong ba dag ste/ phan pa la sogs pa dang go rims bzhin no/ /de la phan pa ni 'jig rten pa dang 'jig rten las 'das pa'i dbye bas gnyis so/ /'jig rten pa yang tshe 'di ba tsan dan dang /me tog phreng ba la sogs pa'i don dang / tshe gzhan pa bde 'gro dang / longs spyod la sogs pa'i rang bzhin no/ /'jig rten las 'das pa yang thar pa tsam dang / byang chub sems dpa' nyid dang / sangs rgyas nyid kyi bye brag gis te/ de ltar na rnam pa lnga yin no//yang de dag gi rgyu lnga ste bcu'o/ /dor bar bya ba yang bcu ste/ 'jig rten pa dang 'jig rten las 'das pa'i bye brag gis so/ /de la 'jig rten pa'i tshe 'di nyid dug dang sbrul la sogs pa'o/ /tshe gzhan pa ni ngan 'gro la sogs pa'o/ /'jig rten las 'das pa'i dor bar bya ba ni/thar pa mi mthun pa'i phyogs 'khor ba nyid dang / byang chub sems dpa' nyid kyi nyan thos la sogs pa dang / srid pa dang / sangs rgyas nyid kyis ni/ sangs rgyas nyid ma yin pa'o/ /de bzhin du de'i rgyud la ste bcu'o/ /de ltar rnam pa nyi shu ni phan pa dang mi phan pa zhes brjod do/ / de dag thob pa dang spong ba dag ni nges par yang dag pa'i shes pa sngon du 'gro ba ste/ log pa'i shes pa las ni don dang phrad pa cung zad kyang med do/ /bstan pa dang phrad na yang dag pa'i shes pa nyid yin pa'i phyir ro/ /yang dag pa'i shes pa de yang gang zhe na/ yang dag pa'i shes pa ni rnam pa gnyis te zhes grangs nges par gzung bar mdzad do//'di'i rgyu ni 'og nas ston to/ /gnyis gang zhe na/ mngon sum dang rjes dpag ces gsungs te zhes bya ba ni ji skad brjod pa gnyis nyid yin gyi/ sgra dang don gyi go ba la sogs pa gzhan ni ma yin no zhes bya ba'i don to/ /mngon sum dang rjes su dpag pa ni mngon sum dang rjes su dpag pa dag go//de la dbang po la brten pa'i phyir mngon sum ste sgra bshad pa'i rgyu mtshan yin no/ /sgra 'jug pa'i rgyu mtshan ni don mngon sum du byed pa ste/ don rang gi mtshan nyid kyi rnam par snang ba zhes bya ba'i don to/ /rjes su mthun pa'i tshad ma ni rjes su dpag pa ste/'dir 'jal bar byad pas tshad ma ste mngon sum mo/ /de dang rjes su mthun pa'i 'jal bar byed pa ni rjes su mthun pa'i tshad ma ste rjes su dpag pa zhes bya'o/ /rjes su mthun pa yang ci zhe na/ don dang 'brel ba'o zhes ston to/ /'di dag ces bya ba ni mngon sum dang rjes su dpag pa'o//mi slu'o zhes bya ba ni slu ba med do zhes bya ba'o/ /de'i phyir mi slu ba can yang dag pa'i shes pa yin no zhes spyi'i mtshan nyid yin pas shes pa'i gsal ba gnyi ga gang yod pa nyid du ston to/ /de ltar na yang dag pa'i shes pa spyi'i mtshan nyid bstan to//gang zhig tshad ma yin pa de ni mngon sum dang rjes su dpag pa 'dir 'dus te mngon sum dang rjes su dpag pa grags pa dag lta bu'o/ /gzhan dag gis 'dod pa yang tshad ma yin pa'i phyir zhes bya ba ni rang bzhin gyi gtan tshigs te/ tshad ma nyid tsam dang 'brel pa ni 'dir 'dus pa nyid do//de nyid kyi phyir tshad ma rnam gnyis kho na ste/ don dang 'brel par 'dra ba'i phyir te/ don las dngos su skyes pa mngon sum don dang 'brel ba ltar mngon sum min pa rjes su dpag pa yang don dang 'brel ba'i rang bzhin gyi rtags kyis don rab tu rtogs pa'i phyir ro//tshad ma nyid la 'dir 'dus pas khyab pa sgrub pa'i phyir don ni rnam pa gnyis kho na ste zhes gsungs so/ /mngon sum dang mngon sum ma yin pa zhes bya ba dag phan tshun spangs te gnas pa nyid kyi phyir phung po gsum pa med do/ /gal te gnas gsum pa shin tu lkog tu gyur pa don gsum pa yod pa ma yin nam zhe na/de ni mngon sum ma yin pa nyid do/ /rang gi mtshan nyid gcig gzhal bya zhes bshad pas don gnyis ma yin nam zhe na/ de ltar ni tshad ma yang gcig nyid du 'dod pa yin te mi slu ba zhes bya'o/ /de ltar na mngon sum pa shes pa'i tshad ma yin na ni mngon sum nyid du 'dus la/lkog tu gyur pa rtogs pa'i tshad ma nyid yin na ni rjes su dpag pa nyid du 'dus te/ de la mngon sum pa la ni mngon sum las gzhan pa rjes su dpag pa dang / de ma yin pa'i rtog pa dang 'khrul pa'i shes pa dag las gang gis kyang mi rtogs te/ rtog pa dang 'khrul pas ni rang gi mtshan nyid mi 'dzin pa'i phyir ro/ /mngon sum ma yin pa yang rjes su dpag pa las gzhan pa mngon sum dang / rtags ma yin pa las byung ba'i rtog pa dang 'khrul pa'i shes pa dag gis mi rtogs pa'i phyir ro/ /de'i phyir tshad ma nyid la 'di dag tu 'dus pas khyab pa nyid do//de nyid 'di ltar rtogs par bya ste/ gzhal bar bya ba gnyis nyid yin pa ni rgyu gnyis nyid du ston la/ de gnyis kyang rang la dmigs pa'i shes pa'i 'bras bu'i bye brag so sor nges te/ gcig ni mngon sum kho na skyed la/ gzhan ni rjes su dpag pa kho na skyed pas so//de ltar na gang 'bras bu'i bye brag re re bskyed par nges pa'i rgyu'i tshogs pa gnyis nyid yin pa de ni 'bras bu'i bye brag gnyis skyed par rung ba nyid yin te zhes bya bar rang bzhin gyi rtags kyis tshad ma gnyis nyid du sgrub pa'am/ yang na gang 'bras bu'i bye brag re re so sor nges pa'i rgyu'i tshogs pa gnyis nyid dang ldan pa de ni/'bras bu bdag nyid kyang gnyis nyid yin no zhes rang bzhin gyi rtags gzhan 'phangs so/ /sbyor ba snga ma'i khyad par dang / phyi ma gnyis kyi rtags ma grub pa spangs pa'i phyir de dag las gang la zhes bya ba la sogs pa smras te/ gang la zhes bya ba ni don gang la'o//rjes su byed pa ni shes pa'i snang ba'o/ /gzhan ni zhes bya ba ni mngon sum ma yin no/ /rjes su dpag pa las gzhan gang gis kyang rtogs par mi rigs pa can nyid do/ /rtags dang rtags 'brel ba'i don rtags la brten nas rtogs pa ni spyi'i rnam pas rtogs kyi rang gi mtshan nyid kyi rnam pas ni mi rtogs te/rjes su 'gro ba'i stobs kyis yin pa'i phyir dang / rang nyid mi snang ba'i phyir ro/ /rtags ni 'brel pa'i stobs kyis go bar byed par bstan pa dang / gzhan dag de las brtsams nas gal te 'brel pa kho na zhes bya ba la sogs pa smras te/'brel pa yang yin la gzung bar bya ba'i chos can ni shes par 'dod pa'i chos can te/ de la mthong ba ni chos can yod pa nyid de phyogs kyi chos kyang ngo / /phyogs kyi chos de sgra la yod pa ma yin te/ rig byed kyi sgra ni gang la yang mi brten la nam mkha'i yon tan gyi sgra yang brjod par bya ba'i chos can la mi brten par 'dod pas so//'on kyang de don rtogs par ni byed do/ /des na tshad ma gzhan nyid do snyam pa'o/ /lan sbyin pa ni de lta na zhes bya ba la sogs pa ste/ de lta na zhes bya ba ni gzung bar bya ba'i chos dang ldan pa'i chos can la med na'o/ /de zhes bya ba ni sgra'o//de la zhes bya ba gzung bar 'dod pa ni chos can la'o/ /ma mthong na ma mthong ba des chos can de la ji ltar 'dod pa sgrub pa'am/ de dang 'gal ba 'gog par 'gyur/ gal te sngar mthong ba la sgra yis dran par byed na'o/ /lan ni sgra dang rtags dag med par yid kyi nye bar gtod pas kyang dran par 'gyur ro zhes bya ba'o//gal te sgras dran pa dang nye bar gtod pas dran pa dag la khyad par yod do zhe na/ 'di dag ni gnas skabs dag la zhes gsungs te/ bye brag med do zhes bya ba'i don to/ /gzung bar 'dod pa'i chos can la ma grub pa de'i phyir/ sgra 'dis chos can 'ga' zhig la yang ngo / /ji ltar sgrub par byed pa ste tshad ma ma yin no zhes bya ba'i don to/ /de dag las zhes bya ba ni sgra dag las so/ /ci'i phyir snyam pa la sgra de dang don de dag 'brel pa ma grub pa'i phyir te/ 'di nyid 'og nas ston to/ /brjod par 'dod pa dang 'brel pa gang gi phyir ro//de lta na ni 'bras bu'i rtags nyid yin no/ /gal te de lta na zhes bya ba la sogs pas ni tsi ran ta la sogs pa ste/ de yod na yod pa zhes bya ba dang / rigs pa dang mi dmigs pa zhes bya ba'i tshad ma gzhan yod pas gnyis nyid la gnod par 'dod pa'o/ /de yod na yod pas ni skyed par sgrub par byed la mi dmigs pas ni med pa'o//de dag mngon sum ni ma yin te/ gzhan gyis gzhan rtogs pa'i phyir ro/ /rjes su dpag pa yang ma yin te/ rjes su 'gro ba med pa'i phyir ro/ /rjes su 'gro ba med pa nyid bshad pa'i phyir ro/ /'di la dpe yod pa ma yin no zhes bya ba smos so//dpe med pa nyid bstan pa'i phyir sgrub par byed pa de yod na yod pa'i phyir zhes bya ba dang mi dmigs pa zhes bya ba las khyad par du gyur pa'i sgrub par byed pa gzhan med pa'i phyir ro/ /de dpe gzhan gyis sgrub par byed na yang de la snga ma 'dra ba'i phyir dpe gzhan dgos par 'gyur bas na dpe thugs pa med par thal bar 'gyur ro zhe na'o//ma yin te zhes gsungs te/ dpe thug pa med pa yang ma yin la/ rjes su dpag pa ma yin pa yang ma yin no/ /ji ltar zhe na/ de yod na yod pa dang / mi dmigs pa'i yul mthong ba na/ yul can bskyed pa dang med pa'i tha snyad dag kyang sngon de na yod na yod pa dang mi dmigs pa dag las/bskyed pa dang med pa'i tha snyad zhugs pa'i rtags dang rtags can 'brel pa dran pas 'jug pa'i phyir ro/ /dpe mngon sum gyis grub pa yod do/ /rjes su 'gro ba dang ldog pa ni yod na yod pa yin la/de las gzhan pa'i rgyu dang 'bras bu de dag gi ngo bo ni med do/ /de yang mngon sum gyis sngon grub pa nyid do/ /dmigs par rigs pa de ltar ma dmigs na de med do zhes 'jig rten 'di mngon sum gyi stobs kyis smra'o/ /de ltar med pa'i tha snyad kyi rgyu mtshan mi dmigs pa nye bar bstan pa ste/yod na snod du rung ba las mi dmigs pa'i phyir med de/ sngon gnas khang na dmigs par rigs pa las ma dmigs pa bzhin no zhes grangs can la sogs pa rmongs pa dag las/ dmigs par rigs pa mi dmigs pa'i rgyus med pa'i tha snyad du rung ba nyid ston te/ med pa grub kyang tha snyad du rung ba nyid ma grub pa la tha snyad du rung bar byed pa/ dper na skyed par byed par khas len pas pha nyid grub kyang pha'i tha snyad du ma grub pa la skyed par byed pa'i phyir ro/ /pha yin no zhes bstan pa bzhin no/ /de ltar shin du rmongs pa ma yin na dmigs par rigs pa ma dmigs pa'i mngon sum nyid kyis med pa'i tha snyad kyang grub pa nyid do//de nyid kyi phyir med par nges kyang med pa'i tha snyad las bzlog pa can gyi rmongs pa la ste/ ji skad du/ rtsa mchog rtse na glang chen brgya/ /sngon chad ma mthong yod do zhes/ /de skad grangs can phyugs las gzhan/ / ngo tsha bcas pa su brjod rtsol/ /zhes bya ba dang / de ni shin tu rmongs don te/ /gnag rdzi mo bar grags phyir ro/ /zhes gsungs so/ /de bzhin du de yod na yod pa dang / rmongs pa la tha snyad bsgrub pa ste/ bskyed pa nyid dang med pa nyid sgrub na ni dpe thug pa med par 'gyur gyi/ tha snyad bsgrub pa la ni skyon med de tha snyad zhugs pa la ni dpe yin la rmongs pas tha snyad ma grub pa la ni rgyu ston pas so//snang ba mi dmigs pa ni bstan nas/ mi snang ba mi dmigs pa yang rtags nyid du bsdu ba'i phyir rgyu med pas yod pa'i tha snyad 'gog pa ste zhes bya ba la sogs pa gsungs te/ rgyu mtshan skyed par byed pa ma yin pa la pha'i tha snyad mi bya ba bzhin no/ /de ltar de yod na yod pa dang mi dmigs pa'i rang bzhin dang 'bras bu'i rtags nyid yin pa de'i phyir don rang gi rnam pa snang bar grub pa ma yin pa thams cad ni grub par byed pa don rang nyid las gzhan pa mi 'khrul pa ni mi slu ba'o//de'i rgyu ni don dang 'brel pa ste don rang la rag las pa'o/ /de la rang rtogs pa ltos pa'i phyir/ ma 'brel pa las ni mi rtogs pas 'brel ba las rtogs pa ni rjes su dpag pa nyid yin pas na/ mngon sum ma yin pa'i tshad ma ni rjes su dpag pa las gzhan yod pa ma yin no//de'i phyir tshad ma nyid yin na 'di dag tu 'dus pas khyab cing / mngon sum dang mngon sum ma yin pa gnyis nyid dang de gnyis kyang tshad ma re re kho na skyed par byed pas sbyor ba gnyis pa'i rtags kyang grub po zhes rtogs par bya'o/ /yang rgyang 'phen pa gzhan ni mngon sum las gzhan pa'i tshad ma yod pa ma yin te/mngon sum gcig pu tshad ma zhes zer ro/ /de ni mi rigs te zhes bya ba ni/ rjes su dpag pa tshad ma ma yin no zhes zer ba ni rang gi tshig dang 'gal ba nyid yin pas so/ /ji ltar zhe na/ gang gi phyir zhes bya ba la sogs pa gsungs te/rgyang 'phen pa de rang nyid rtags gsum nyid khas len pa'i phyir te/ tshad ma dang ni cig shos spyi'i/ /rnam gzhag phyir zhes bya bas rang bzhin gyi rtags so/ /blo gzhan rtogs phyir zhes bya bas ni 'bras bu'i rtags so/ /gang dag gis ni 'gog phyir yang / /zhes bya bas ni mi dmigs pa'i rtags te/de zhes bya ba ni rgyang 'phen pa'o/ /shes pa'i bye brag rnams las zhes bya bas ni 'chad par byed de/ 'di ni don gang mi slu ba de tshad ma yin la slu ba de tshad ma ma yin te/ des na bdag dang gzhan gyi rgyud la zhugs pa'i mngon sum dang / rjes su dpag pa'i gsal ba ma lus pa'i yul rnams slu ba dang /mi slu ba dag las/ tshad ma dang tshad ma ma yin pa gang rnam par gzhag par bya ste/ de yang mi slu ba can gyi mngon sum gyi shes pa'i gsal ba 'ga' zhig mngon sum gyi tshad mar rab tu grags pa dag mi slu ba'i rjes su dpag pa'i tshad ma nyid kyi dper gang rgyang 'phen pa dag la ston par byed de/des rim pa 'dis rjes su dpag pa tshad mar khas blang bar bya ba yin no/ /gzhan du na mngon sum dang rjes su dpag pa gnyi ga tshad ma'am tshad ma ma yin par rnam par gzhag pa mi 'grub po zhes ston par mdzad de/shes pa'i bye brag rnams las zhes bya ba ni/ bdag dang gzhan gyi rgyud la zhugs pa'o/ /de dag gi mtshan nyid kyis khyab pa zhes bya ba ni/ gang slu ba de tshad ma ma yin la mi slu ba de tshad ma yin no zhes so/ /ji ltar ma smras na rang gi slob ma la bstan pa'i thabs gzhan med do//de ltar ston na ni mngon sum gyi shes pa'i gsal ba 'ga' zhig tshad mar rab tu grags pa'o/ /yang na shes pa'i gsal ba 'ga' zhig rab tu grags pa'o/ /de dag ji ltar mthong ba dang mthun pa ni shes pa'i gsal ba 'di yang mi slu ba'am slu ba'i phyir tshad ma'am tshad ma ma yin no zhes so//rjes su dpag par bya ba nyid du gnas na rjes su dpog pa yang yod do/ /de yang ma grub pa'i phyir zhes bya ba ni rgyang pan pa khyed la rjes su dpag pa khas mi len pas ma grub pa zhes bya ba'i don to/ /gzhan du zhes bya ba ni spyi rnam par gzhag nas khyab pa mi smra ba'o//de ltar rjes su dpag pa ni tshad mar mi 'gyur mod kyi/ rang gi 'dod pa la ni gnod par 'gyur te/ ji ltar zhe na/ yul nyams su myong ba las te rgyu'o/ /bstan du med pa zhes bya ba ni rang ngam gzhan gyi rgyud la yod pa'i shes pa'i gsal bya'i bye brag gcig cig go//de lta bu re re ste rjes su 'gro ba'am/ ldog pa'i khyab pa bstan pa dang bral ba'o/ /de lta bu'i shes pa yang yin la bye brag kyang yin pas shes pa'i bye brag go/ /rnams las te/ de lta bur rjes su 'gro ba dang bral ba'i rgyu las so/ /bdag dang slob mar rang gi rgyud la yod pa de rjes su 'gro ba med pa'i phyir tshad ma'am tshad ma ma yin par mtshon par mi nus so//de'i phyir/ bstan bcos la 'bad par mi bya ba nyid de/ 'di ltar rjes su dpag pa tshad ma yin pa nyid la sogs pa'i mtshan nyid kyi yul nyams su myong ba'i shes pa rang gi rgyud la yod pa de ni bstan bcos kyi sgra'i rtags las gzhan la bstan par bya ba'i don yin na/rtags kyi mtshan nyid khyab pa khas len pa med pas rjes su dpag pa med pa'i phyir don med pa'i phyir ro/ /gal te de ltar go bar bya ba'i phyir bstan bcos la 'bad par byed na'o/ /co 'dri ba 'di ni rang gi mtshan nyid dang 'gal ba ste/rjes su dpag pa yang spong la/ rang nyid rjes su dpag pa sbyor ba'i phyir ro/ /de nyid pha rol gyis zhes bya bas ston te/ 'di ni 'bras bu'i rtags khas blangs pa bshad do/ /gal te rjes su dpag pas bsam pa'i don ston pa ma yin gyi lus nyid blo yin pas blo mngon sum gyis rtogs so zhe na/lus nyid ni blo ma yin te zhes bya ba la sogs pa gsungs te/ lus nyid ni blo ma yin te/ yin na lus rtogs pa ltar blo yang rtogs par 'gyur ba zhig na/ de la the tshom za ba'i phyir rtogs pa med do/ /gal te sgra skad cig ma yin la de rtogs pa ltar 'di yang de lta'o zhe na/'o na ni mngon sum du grub pa nyid nyams so/ /gzhan yang blo 'dis lus kho na yin na lus nyid yin pa'i phyir 'khrul pa'i rgyu med de lus nyid bzhin no/ /de ltar na blo yang rtogs par 'gyur na de ni med do zhes dgongs so/ /de lta bas na snang ba de ni de nyid yin pa la de grub na grub pas khyab la//de la mi dmigs pa 'phangs te/ gang zhig grub kyang gang grub pa med pa de ni de nyid ma yin te/ sngon po dang ser po lta bu'o/ /blo yang lus grub kyang ma grub pa'i phyir ro/ /blo de skyes bu gzhan dang 'brel pa ni skyes bu mngon sum du grub pa tsam gyis gzhan gyis mi rtogs so//da ni mi dmigs pa'i rtags khas blangs pa ston te/ 'di zhes bya ba ni rgyang pan pa'o/ /'ga' zhig la zhes bya ba ni nam mkha' 'byung ba lnga pa nyid la sogs pa la'o/ /bsgribs pa shes pa bskyed pa'i nus pa med pa la yang ngo / / 'gal lo zhes bya ba ni rang gi tshig dang ngo / /yang na mngon sum 'di log pas med do zhes bya ba gang la zhig ste/ mngon sum don gyi rgyu'am khyab par byed pa ma yin pa'i phyir/ de med pas don med par nges pa med pa'i phyir ro/ /gal te mngon sum med pas don med par nges pa de yod na ni ste/de ni mi dmigs pa'i rtags las gzhan gyis mi 'grub pa'i phyir ro/ /gzhan yang yod pa ni mi 'khrul par 'dod pa'i don las don gzhan las skyes pa'o/ /med par yod pa yang mi 'khrul par 'dod pa'i don med par ro/ /de ni de la rag ma las pa'i phyir der 'khrul pas na mi slu bar mi rigs pa'i phyir ro//don mthong ba zhes bya ba'i rang bzhin de yang don la yod pa ste don gyi chos yin pa'o/ /mthong ba'i rang bzhin nyid yin pa'i phyir dang / mngon sum nyid yin pa'i phyir don thams cad skyes bu thams cad kyis mthong bar thal bar 'gyur ro//mthong ba zhes bya ba de gal te shes pa la yod na'o/ /don dang shes pa 'brel bar khyod mi 'dod pa'i phyir ji ltar mthong ba zhes bya ba'i shes pa gzhan yod pas/ shes pa dang ma 'brel pa'i don gzhan yod par nges pa zhes bya ba'i tha tshig go//gal te mthong ba zhes bya ba'i shes pa yod par 'grub po zhe na/ don dang shes pa'i 'brel pas shes pa la don mi 'khrul bar 'dod na/ 'brel pa'i rgyu mi 'khrul ba de ni rang bzhin dang 'brel pa'i rtags la yang mi 'khrul ba'i rgyur mtshungs pa'i phyir/ gang de las skyes pa'i rjes su dpag pa yang don dang 'brel pa yin la/don dang 'brel pa'i phyir don la mi slu ba'o/ /don la mi slu ba'i tshad ma yin te/ mngon sum gyi tshad ma bzhin no zhes sgrub pa'i 'bras bu gnas pa'i phyir/ rjes su dpag pa'i tshad ma'i mtshan nyid mi 'dor ro/ / de ltar na rim pa 'dis rjes su dpag pa tshad ma nyid du phur bu ba dag gis khas blang bar bya'o/ /b+ha ti ha ris kyang mngon sum dang rjes su dpag pa gnyi ga tshad mar khas blang bar bya ste/ 'di ltar rig byed kyang gang don la mi slu bar byed pa tshad ma yin gyi/ slu na ni der mi 'gyur ro//mi slu ba nyid ni ji skad bshad pa'i shes pa dag la yod pa'i phyir tshad ma yin te/ rig byed bzhin no zhes bya ba ni rim pas so/ /rig byed pa gang dag mngon sum dang sgra gnyis tshad mar smra bas kyang rigs pa de nyid kyis rjes su dpag pa khas blang bar bya'o/ /gang yang tshad ma cung zad kyang med do zhes smra ba'i grub pa'i mtha' ni mi snang mod kyi/'on kyang de skad rtogs pa yod na des kyang tshad ma cung zad cig khas blang bar bya ste/ /de lta ma yin na 'jug pa dang ldog pa'i tha snyad med par 'gyur ba'i phyir/ tshad ma cung zad kyang med do zhes bya ba nyid du yang mi 'gyur ba'i phyir ro//de bas na cung zad nges pa'i tha snyad sgrub par byed na 'di'i rgyu de ni tshad ma'o zhes bya bar gnas te/ de nyid la tshad ma'i tha snyad grags pa'i phyir ro/ /de ltar tshad ma spyi'i mtshan nyid kyi rab tu byed pa bshad nas/ da ni mngon sum gyi rab tu byed pa bshad par bzhed nas/de la zhes bya ba la sogs pa gsungs te/ tshad ma'i dbye ba gnyis bshad pa de la'o/ /mngon sum nyid bye brag tu bstan pa ni zhes bya ba'i don to/ /de yang gzhan dag mngon sum gyi mtshan nyid la log par rtogs pa snang bas de dag bsal ba'i phyir te/ de dag kyang ji lta bu zhe na/drang srong rkang mig pa na re dbang po dang don 'brel ba las skyes pa'i shes pa bstan du med pa mi 'khrul pa zhen pa'i bdag nyid can ni mngon sum zhes zer ro/ /de yang rigs pa can gyi zhugs pa yin te/ bye brag pa yang de dang 'dra'o/ /grangs can gyi zhugs pa thub pa ser skya ni yul la so sor zhen cing mthong ba ni mngon sum mo zhes zer ro//drang srong chur lhung na re dbang po lnga dang ldan pa gang sems kyis phyi rol gyi dngos po nye bar gzhag pas/ spyi dang bye brag gi mtshan nyid kyi dngos po las bye brag nges par 'dzin pa/ sems kyi 'jug pa lnga las mchog gi 'jug pa ni mngon sum yin no zhes smra'o//dpyod pa pa na re/ dang por yod pa'i lta ba'o/ /shes pa rnam rtog med pa can/ /byis dang lkugs sogs blo 'dra ba/ /dag pa'i dngos las skyes pa'o/ /de las gzhan pa'i dngos po yang / /rigs kyi chos sogs gang dang gang //blo ni zhen par byed pa de/ /mngon sum nyid du 'dod pa yin/ /zhes zer te/ de dag thams cad kyang mngon sum rtog pa dang bcas par 'dod do/ /bstan bcos 'di rigs pa rnam par nges pa nyid yin pa'i phyir/ de dag rigs pa'i sgo nas bsal bar bzhed nas/mngon sum rtog pa dang bral zhing zhes bya ba la sogs pa gsungs te/ mngon sum zhes bya ba ni rjes su 'gro ba dang ldog par byed cing don la mngon sum du byed par grags pa rjes su brjod pa'i ngag ste/ des ni mtshan nyid kyi gzhi grub par bstan to//rtog pa dang bral zhing zhes bya ba la sogs pas ni de'i mtshan nyid ma grub pa sgrub pa'i ngag ste/ de dag sgrub par byed pa'o/ /mdo'i go rims ma yin yang brjod pa nyung ba'i phyir ma 'khrul ba sngar bshad do/ /'di thams cad dbang po'i shes pa 'khrul ba'i rgyu nyid yin pas/de'i rjes su byed pa ni yid kyi yang yin no/ /rang rig pa'i blo rnams thams cad du rang gi ngo bo la 'khrul ba'i rgyu gang yang med do/ /'on kyang rtog pa ni ma rig pa nyid rab rib yin pas de'i dbang gis rang rig pa ma yin yang rang rig pas nga rgyal ba'i phyir/ rab rib kyis 'khrul pa'i rgyu nyid srid do//rnal 'byor gyi mngon sum ni ma rig pa nyid rab rib yin pas dbang phyug dang skyes bu la sogs par snang ngo / /'dod chags la sogs pa 'khrul ba'i 'khrugs pa'i sgrar brjod do/ /des na rnal 'byor pa'i shes pa 'khrul pa srid par rtog par shes par bya'o/ / mngon par rjod par byed pas mngon par brjod pa ste/ don gyi spyi 'dzin par snang ba sgra'i spyi ste/ sgra rang gi mtshan nyid ni mngon par rjod par byed pa ma yin no/ /de dang ldan pa ni der snang ba'i rtog pa'o/ /don de so sor snang ba na snang bar 'gyur ba don la rjod par byed pa'i rang bzhin sgra'i spyi'i sgra ste/bsten pa'i tshul gyis yod pa ma yin zhes bya ba lhag ma'o/ /yang b+ha ra ti ha ri na re/ thog ma tha ma med tshangs pa/ /sgra yi de nyid gang 'jig med/ /de gyur ba las don rnams so/ /'gro ba ji lta bzhin du spyod ces don rnams sgra'i bdag nyid du 'dod pas na/ de'i phyir de'i bdag nyid du spong ngo zhes gsungs so/ /yang de nyid/ sgra yi rjes 'gro ma gtogs pa'i/ /shes pa 'jig rten na yod min/ /shes pa rjes su bsgrub pa nyid/ /thams cad sgra ru shes par bya/ /zhes sgra ni shes pa'i srog lta bu ste/ shes pa'i bdag nyid yin par 'dod pas de'i phyir 'di la don ma reg par rig pa tsam gyis chos kyang ma yin te zhes gsungs te/ci'i phyir zhe na/ sgra'i shes pa don 'di bum pa zhes nye bar sbyor gyi bum pa zhes bya ba'i sgra shes pa rang nyid la ni ma yin no/ /de ltar sbyor na ni sgra las don bum pa mi rtogs par thal bar 'gyur te/bum pa zhes bya ba'i sgras shes pa nyid brjod pa'i phyir ro/ /de'i phyir sgra'i shes pas sgra dmigs pa ni don gyi sgra rab tu sbyor gyi/ shes pa'i rang bzhin du ma yin pa'i phyir ro/ /rig pa tsam gyi chos kyang ma yin te zhes bya bar grub pa'o/ /don la sgra yod pa ma yin pa de'i phyir/don 'di nye bar sbyor bar gyur pas rnam par shes pa skyed pa na/ don gyi bdag nyid ma yin pa'i sgra'i so sor snang ba mdun du byed par rigs pa ma yin te/ ro nye bar sbyor bar gyur bas shes pa skyed pa na ro la bdag nyid du med pa'i gzugs ro'i shes pas mdun du mi byed pa bzhin no//sogs pa zhes bya ba'i sgras ni dri la sogs pa phan tshun sbyor ba ma yin pa bstan to/ /des ni don gyi dbang du byas pa'i so sor nges pa bstan nas/ de ni shes pa'i dbang du byas te/ de'i stobs las skyes pa'i shes pa don gzhan gzugs la sogs pa'i rjes su 'brang ba ste/de 'dzin par rigs pa ma yin no/ /gal te don la rjod par byed pa'i sgra yod par khas blangs na/ don gzugs la sogs pa dbang po gzhan gyi shes pa skyed pa de'i bdag nyid ma yin pas dbang po gzhan gyi shes pa skyed par mi nus pa'i phyir mi skyed do//bskyed na ni don gcig gis dbang po thams cad kyi blo skyed par thal bar 'gyur ro/ /de lta na yid kyi shes pa ltar dbang po'i shes pa gcig kyang don thams cad la dmigs par 'gyur te/ mig kyang gzugs la brten nas skyes pa'i shes pa gcig gi don gzhan sgra yang 'dzin pa'i phyir ro//gal te de ni de ltar yin te yid kyi shes pa bzhin kho na'o zhe na/ rnam par rtog pa can gyi yid kyi shes pa kho na yin gyi/ dbang po'i blo ni ma yin no/ /ji lta zhe na/ yid ni don gyi nus pa nye ba la mi ltos pa yin la dbang po'i blo ni don nye ba la ltos pa nyid de/don nye ba la mi ltos na cis skyed ce na/ rtog pa'i bag chags kyis bslang ba/ /zhes gsungs te/ de'i dbang gi yul snang ba'o/ /yid ni dbang po'i don ma nges par 'dzin la dbang po'i blo ni de las bzlog par nyams su myong bar grub pa'o/ /rtog pa'i bag chags kyang ci'i phyir don du snang bar bskyed pa yin zhe na/de ni mngon sum gyi snang ba gzugs dang sgra la sogs pa gang yang rung ba myong ba dang 'brel ba'i phyir te/ des 'phangs pa'i phyir sgra dang don du lhan cig gam ste 'di bum pa zhes so/ /so sor te brda la ma byang ba'i sgra dang don du snang ba lta bur ro//don ni dbang po shes pa skyed par nye bar sbyor te skyed par mngon sum du phyogs te mthar thug pa na'o/ /sgra dran pa'i nye ba la ltos nas dbang po'i blo skyed na'o/ /dbang po'i blo de'i don bsgribs par 'gyur te/ don nye ba tsam gyis skyed par mi 'gyur te/ don yod pas shes pa mi skyed kyi dran pa bskyed pa'i phyir ro//brda'i dus na yod pa'i mngon par brjod pa'i spyi dran pa med pa'i don la sgra de nye bar sbyor ba ste/ sgra'i sgo nas 'dzin pa yod pa ma yin te/ sgra gang gzhan brdar ma byas pa bzhin no/ /dper na bum pa la brda ma byas pa'i snam bu'i sgra bzhin no/ / de lta bas na sngon gyi sgra dran pa nyid 'dod par bya dgos so/ /dran par rigs pa yang ma yin te/ don gyis lhan cig byas pa'i bye brag ste/ don gyis dran pa'i bag chags sad par byas pa'i 'gyur ba nang ste/ shes pa la med na sgra'i bye brag ste/ don de'i ming dran par rigs pa ma yin te/sgra'i bye brag dran pa de des byas pa nyid ma yin na/ don de dang 'brel ba med pa'i phyir snam bu kun nas bslang ba ma yin pa'i bum pa'i sgras snam bu mi 'dzin pa ltar de'i ming des don de rtogs par mi 'gyur ba'i phyir ro/ /gal te dran pa ma skyes pa nyid du dran pa'i bag chags sad pa'i 'gyur ba dran ba la mi ltos pas blo la don gyis byed na ni/blo skyed pa nyid kyang dran pa la ci ste ltos zhes bya ba'i don du rtogs par bya'o/ /don blo skyed par zhugs pa na dran pas bar chad du 'gyur ba des na'o/ /nus pa zhugs pa'i don gyis dran pa bskyed pa'i dus na blo skyed par byed pa ma yin pa de nyid kyi phyir/gang sngon blo yi skyed byed min/ /nye bar sbyor ba dbyer med do/ /nus pa zhugs pa nyid du bye brag med pa'i phyir ro/ /don de ni des kyang ste dran pa skyed pa na yang blo skyed par byed pa ma yin pa de nyid du 'gyur ro/ /blo gcig la yang sngar bskyed par bya ba ma yin pa dang /phyi nas bskyed par bya ba nyid du mi rigs so/ /de ltar don de'i skyed pa ma yin la blo yang des bskyed par bya ba ma yin pa de'i phyir don med kyang mig blor 'gyur ro/ /de don la mi ltos pa'i phyir ro/ /dran pas nye bar sbyor ba ste dran pa yod na de ma thag tu yod pa'i phyir blo'i don 'di'i rjes su bya ba ste des bskyed par bya ba'o//dngos po ni rang bzhin des rang bzhin de la mi ltos pa ste rang bzhin de la mi brten pa'o/ /bye brag tu byed pa dbyug pa dang / bye brag tu bya ba skyes bu dang / de dag gi 'brel ba dang / 'jig rten pa'i rnam par gzhag pa ste/skyes bu dbyug pa can zhes bya'i dbyug pa skyes bu can zhes ni ma yin no/ /de snyed bzung nas bye brag tu byed pa'i blo yis skyes bu dbyug pa can zhes ba sdu ba'o/ /de lta na bye brag tu rtogs kyi gzhan du de las bzlog na ni ma yin pa'o/ /dbyug pa can la sogs pa zhes bya bas ni ba lang 'gro ba can zhes bya'i 'gro ba ba lang can zhes bya ba ma yin no zhes bya ba la sogs pa gzung ngo //rnam par gzhag pa mi shes na bye brag tu byed pa la sogs pa'i shes par mi 'gyur ro/ /mtshan nyid tha dad kyi 'brel pa dag tha dad pa mngon sum gyi blo la mi snang bas/ rigs la sogs pa'i bye brag tu byed pa dang /bye brag tu bya ba'i shes par mi 'gyur ro/ /'o ma dang chu dag sngar tha dad par mthong na ni 'o ma chu dag ces rtogs kyi/ sngar 'o ma dang der 'dre ba'i chu dag bye brag ma mthong na ni de la 'o ma chu can zhes bya bar ni mi rtogs pa bzhin no/ /gang yang dbyug pa can la sogs pa ni bye brag tu byed pa dang /bye brag tu bya ba tha dad pa rtogs pa de la yang ngo / /brda dran pa'i tshul ni brda dran pa'i thabs te snga phyir dran pa'i rim pas so/ /ci lta zhe na/ sngar dbyug pa dang / skyes bu dang / de dag gi 'brel ba dang de nas de dag bsdus nas dbyug pa can zhes sdud pa'i rim gyis so//snga ma dang phyi ma la mi dmigs kyi da ltar tsam la dmigs pa'i mig gis zhes bya ba ni dbang po'i shes pas so/ /de ji ltar sdud par mi nus so zhes bya ba'i don to/ /yid dang dbang po'i shes pa dag bye brag med na ni nyams su myong ba dag dang 'gal bar thal bar 'gyur ro zhes bstan pa'i phyir/'das pa dang ma 'ongs pa'i zhes bya ba la sogs pa gsungs so/ /gal te yid kyi rnam par shes pas 'di bum pa 'di bum pa zhes bya ba'i yul mngon par 'du byas pa'i sgra dbang po'i shes pas rtogs so zhe na/ rigs la sogs pa zhes bya bas ni rdzas te/dbyug pa can dang / yon tan de ba lang dkar po dang / las te ba lang 'gro ba zhes bya ba dang / ming gi ste 'di ba lang ngo zhes bya ba rtags lnga bstan te/ de dag gi tha snyad ni brda'am de dag gcig tu bsdus pa dbyug pa can dang ba lang dkar po zhes du ma bsdus pa snang ba'o//de dag yul ma yin pa de'i phyir dbang po'i shes pa ni/ don du ma gcig tu sbyor bar byed par rtogs te don rnams sbyor bar byed pa yang de yin la rtogs pa yang de yin pas/ don rnams sbyor bar byed par rtogs pa ste de'i nang du mi 'jug go/ /rnam par rtog pas bslang ba yin na dbang po'i blo de'i tshogs pa mig dang snang ba dang gzugs dag 'dus pa dang ldan pa gang rang gi yul ba lang du snang ba yang 'di ltar brtag par bya'o snyam pa'i 'dod pas ldog par 'gyur te rnam par rtog pa yin pa'i phyir rnam par rtog pa gzhan yin te/'dod pa'i rtog pa gnyen po'i 'dod pas ldog pa bzhin no//de nyid rnam par rtog pa ni zhes bya bas 'chad par byed do/ /dbang po'i blo 'di don nye ba la mi ltos par yang 'gyur te rtog pa yin pa'i phyir ro/ /gzhon nu ma len la sogs pa'i rtog pa dang bcas pa'i mngon sum smra ba dag gi lugs brtag par bzhed nas/re zhig de dag gi 'dod pa legs par dgod pa ste/ gzhan min 'di zhes pa'o zhe na/ bya ba 'brel ba dang bcas pa smos so/ /de la lan gdab pa ni nye ba nges pa zhes bya ba deng yod pa ma yin te/ 'di ltar mun pa na yod pa'i bum pa ni dbang po'i shes pa skyed par mi nus pa'i phyir med pa dang /bye brag med pa la yang bum pa der reg pa las kyang 'di bum pa'i blo de 'byung la/ de ni mngon sum don nye ba nges pa ma yin te/ mun pa na gnas pa'i bum pa gang dbang po'i yul gyi don dbang po'i rnam par shes pa bskyed pa la bum pa de ni nus pas stong pa'i phyir/med par dang bye brag med pa'i phyir 'di bum pa'o snyam pa'i blo ni thams cad du bum pa'i gzugs de'i mthu las mngon sum du mi 'jug pa'i phyir ro/ /gal te reg pas lus kyi blo skye la de las mngon sum gzugs la skye'o zhe na/ brgyud pas nye bar sbyor na 'das pa'i yul dang blo dag byas la/de las da ltar mngon sum skye bas da ltar gyi mngon sum gyis 'das pa dag mthong bar thal bar 'gyur ro/ /don nye ba nges pa'i yul can du khyed kyang 'dod pa'i phyir ro/ /'das pa ni mi nye bas mngon sum de'i yul ma yin no//yul ma yin pa la 'jug na ni ha cang thal bar 'gyur ro/ /de'i phyir med pa las khyad par du ma gyur pa la yang reg na 'di bum pa'o zhes rtog pa ni/ bum pa'i gzugs mngon sum du gyur pa can du mi 'gyur ro/ /gal te bum pa'i gzugs ni reg pas mngon sum du mi 'gyur mod kyi/bum pa'i rdzas dag reg pas kyang mngon sum du bya ba yin pa'i phyir 'di bum pa'o snyam pa'i blo ni reg pa'i sgo nas rdzas kyi don nye bar nges pa yin no zhe na/ reg pas bskyed pa ni reg bya'i dngos po las skyes pa yin na/ bum pa 'di zhes shes pa ni reg bya'i dbang pos skye bar mi rigs te/de ltar rtog par byed pa na blo de la kha dog kyang so sor snang ba'i phyir ro/ /kyang gi sgras ni reg bya yang snang ba'o/ /de ltar gzugs dang reg bya gnyi ga blo gcig la snang ba de'i phyir ro/ /yang dbang po'i shes pa dag rang gi ming gi sgo nas don dag shes par byed pa nyid yin na/sgra gang zhig brda'i dus na yod pa'i ming du mthong ba'i sgra ni/ don de mthong ba na sgra de dran par rigs te/ 'di bum pa zhes don 'dzin pa yin pa'i phyir ro/ /yid kyi nye bar gtod pas kyang sgra dran par ni 'gyur mod kyi/ de ni don de'i sgo nas don dag shes pa ma yin no/ / de'i phyir don 'dzin pa'i sgra ni ma rtogs par 'byung bar mi rigs te/ don ma rtogs kyang dran na ni don dang mi 'dzin pa'i phyir mngon sum nyid du mi 'gyur ro/ /don de sgra dran bar sngar rtogs par yang mi 'gyur te/ don rtogs pa'i sgra dran pa la ltos pa'i phyir la de yang ma dran pa'i phyir ro/ /de ltar don de rtogs pa med pa la sgra'i bye brag gang don 'dzin pa ji ltar dran te don ma rtogs par de sgra dran na don mi 'dzin par thal bar 'gyur ba'i phyir ro//sgra de mi dran na yang skyes bu des sgra dang bsres pa'i don rtogs so zhes bya ba de ji ltar srid/ ji ltar dran par mi rigs she na/ sgra de ni don 'dzin pa yin pa'i phyir don mthong ba ni don de las brda'i dus na 'brel ba'i sgra dran par rigs te/'brel ba shes pa'i me dang du ba dag bzhin no/ /de lta yin na yang skyes bu 'di sgra la ltos nas dbang po'i blo skye ba'i phyir sgra med pa can gyi don mi mthong la/ don mi mthong na yang sgra mi dran no//sgra ma dran na yang sgra'i sgo nas don la 'jug par mi sbyor ro/ /sgra ma sbyar na yang don mi rtogs pa'i phyir 'gro ba ma lus pa don rtogs pa med pa'i phyir/ long ba nyid 'ongs pa yin te/ 'on pa la sogs pa yang 'ongs pa yin no/ /de lta bas na dbang po'i shes pa'i gtam yang ldog par 'gyur ro zhes gsungs so//gal te don shes pa skyed pa la mngon du phyogs pas tshogs pa nang gi sgra'i 'du byed bag chags sad par byed pa des na sgra dran pa ma yin te/ de lta na don las sgra skye bar 'gyur la de lta na ni don dang sgra dag gi 'brel pa dngos po'i dbang gis gnas par 'gyur na de ni med do/ / ci'i phyir zhe na/ brda ma bstan pa la 'brel ba de med pa'i phyir ro zhes bya ba smos te/ brda kho na'i rjes su 'gro ba'i phyir don gyis bskyed pa ni med do/ /gal te don dang brda gnyis la brten nas dngos por 'gyur ba'i 'brel ba skye'o zhe na/ brda ni 'dod pas 'jug pa'i phyir la/ skyes bu'i 'dod pas ni don rnams ni gzhan du mi 'gyur ba'i phyir/don gyi rang bzhin du 'brel pa 'dod pas zhugs pa'i brda'i dus na skyes pa'i rang bzhin med do/ /gal te skyes bu'i 'dod pas don rnams gzhan du 'gyur te/ don gyi rang bzhin gyi 'brel pa skye na ni don de nyid du 'gyur bas na brda ma bstan pa'i skyes bu gzhan la yang de'i ming gis 'dzin par 'gyur te/du ba las me bzhin no/ /gal te 'brel pa de skyes bu'i dbang gis tha dad de des na skyes bu ma bstan pas rtogs par mi 'gyur ro zhe na/ skyes bu so sos 'brel ba'i don rnams bdag nyid tha dad par 'gyur ba ni med de/ 'brel pa de'i bdag nyid med par thal bar 'gyur ba'i phyir te/de bdag nyid kyi rang bzhin du gnas pa med pa'i phyir ro/ /dbang po'i 'dis so/ /sgra'i sgo nas rtogs pa med kyang don nye ba'i dbang gis mthong ba ste/ der snang ba'i phyir ro/ /yang na rigs pa du ma bstan pa de dag ni gzhan gyi lugs brtags pas/rjes su dpag pas slob dpon phyogs kyi glang po'i dgongs pa bstan pa ste/ da ni dbang po'i blo rtogs pas stong pa nyid du mngon sum gyis grub pa'i zhes bstan pa'i phyir 'di ltar zhes bya ba la sogs pa gsungs te/ mngon par brjod pa'i bsam pa thams cad yongs su spangs te/gang blo rtogs pas ma bskyod pa'i bdag nyid brtan par gnas pa'i skyes bus kyang mig gis gzugs shes pa'i bdag nyid dmigs te/ de ni dbang po las skyes pa'i blo mngon par brjod pa med par 'dod do/ /gal te rtog pa skye ba dang 'gag pa dag bltar mi rung bas na mi rtogs pa'i phyir med pa nyid mi 'grub bo zhe na/rtog pa 'dis zhes bya ba la sogs pa gsungs te/ 'di ltar skyes bu bsam pa spangs te gnas pa la/ yang rnam par rtog pa byung ba na 'di snyam du/ yang bdag rnam rtog cung zad cig /rtog pa byung bar 'gyur mthong ngo / /zhes byar rtogs kyi/sngar smos pa bsam pa yongs su spangs pa'i gnas skabs na dbang po'i shes pa yod pa la mi rtogs pa phyis byung ba ji lta ba de lta bu yod par rtogs pa yin no/ /skyes bu de yang bsam pa thams cad yongs su spangs pa las langs pa'i sems kyis cung zad rnam par rtog pa'i skyes bu de rang gi sems kyi rgyud la 'di snyam du bdag la 'di lta 'di ltar rnam par rtog pa byung ngo zhes rtogs pa'i phyir te/des na rtog pa 'di mngon sum du gyur ba mthong ba la ji ltar na nye bar bkod pa'i rtog pa ngo mi shes zhes bya ste ngo shes pa nyid do/ / de ltar rtog pas stong pa'i shes pa dang / yang rtog pa dag rang rig pa bltar rung ba de ni rnam par rtog pa dang ma 'dres pa'i mngon sum sngar ma mthong ba'i bdag nyid la/ phyis mthong ba'i bdag nyid kyi rtog pa'i bdag nyid med par grub pas na/ rtog pa mngon sum de'i bdag nyid yin par brtag pa 'gog par byed de/bum pa snang ba'i bdag nyid la 'dre snang ba'i bdag nyid 'gog pa bzhin no/ /yang phyis mthong ba'i bdag nyid kyi rtog pa mngon sum sngar mthong ba la brten par mthong bas ni/ rtog pa dang ldan pa 'gog pa'i snang ba mi dmigs pa dbang po'i shes pa la rnam par rtog pa yod par brtags pa spong bar byed de/sa phyogs la bum pa 'gog pa bzhin no/ /gzhon nu ma len na re/ gal te blo mngon sum ma yin pa la zhes bya ba la sogs pas/ rtog pa mngon sum yin yang blo mngon sum ma yin pas na yul ba ltar mi rung ba'i phyir/ dbang po'i shes pa rtog pa med par khas len pas mi dmigs par gnod par mi 'gyur ro zhes zer ba dgag pa'i phyir phyogs snga ma bkod pa'o//lan sbyin pa ni de yang re zhig bltar rung bas na yang dag par rigs pa'i rtog pa 'di phan tshun spangs nas gnas pa'i phyir/ don dang blo dag las gzhan pa mi srid pas don dang blo gang gis bdag nyid du gzhag par bya zhes rnam par rtog pa gnyis so//de la don gyi bdag nyid du mi rigs te/ nang sems kyi bdag nyid du skye ba dang 'gag pa g.yo ba'i phyir dang / yang don gyi bdag nyid du gyur pa na skyes bu'i 'dod pa'i dbang gis te/rtog pa ni skyes bu'i 'dod pas 'jug pa dang / ldog pa can yin par 'dod pas phyi rol gyi don skye ba dang / 'gag par yongs su g.yo ba nyid mi rigs pa'i phyir ro/ /de'i phyir rnam par rtog pa'i dbang gi blo g.yo bar 'gyur gyi don ni ma yin no/ /blo la ni rnam par 'gyur ba yod mod kyi zhes bya bas 'dod pas 'gyur ba'i rtog pa yod par rung yang ngo //blo de yang rig pa'i mngon sum ma yin pa'i phyir rnam par rtog pa 'jug kyang gsal bar mi 'gyur te rtogs par mi 'gyur ro/ /rtog pa de don gyi bdag nyid snang ba'i dbang gis don nyid skye ba dang / 'jig pa de ltar 'jug pa gsal ba yang ma yin te/don gyi bdag nyid du 'dus pa sun phyung zin pa'i phyir ro/ /don dang blo dag las gzhan pa'i phung po yang yod pa ma yin pa'i phyir/ gzhan cung zad dang rjes su 'brel pas kyang ma yin zhes bya ba la sogs pa gsungs so/ /rjes su gzung ba ni phan pa'o//nye bar gnod pa ni gnod par byed pa'o/ /bdag nyid kyis ma myong ba'i phyir skyes bu gzhan gyis yang dag par myong bas/ bdag la rjes su gzung ba dang nye bar gnod par mi 'gyur ba bzhin no/ /gang yang mngon sum gyis rang gi blo rnam par mi rtogs na skyes bus bdag rang yang ji ltar bdag nyid kyis rtogs par 'gyur/blun po ni bzhad gad du bya ba yin pa'i phyir lha rnams dga' ba'o/ /dbang po dang don dag las blo yod par mi 'khrul na rtags nyid yin mod kyi/ mi 'khrul ba ni med do zhes bya ba'i don to/ /gal te blo'i rtags nyid yin no zhe na/ de yang zhes bya ba la sogs pa smos so//gal te bye brag pa dag rnam par shes pa nyid ma yin gyi/ rnam par shes pa'i rgyu nyid yin te/ de'i dbang gis rnam par shes pa yul gzhan mi 'dzin pa yin no zhe na/ de gsal ba'i phyir de'i bya ba gsungs te/ yid de'i yul gzhan la rnam par shes pa'i skyed pa nus pas shin tu stong par 'gyur na/rnam par shes pa gzhan yul la mi skyed pa'i phyir la/ de lta bu'i rnam par shes pa de yang blo'i rang bzhin yin pa'i phyir ma grub po/ /gal te yul gsal ba blo'i rtags yin no zhe na/ blo de'i bye brag gsal ba nyid kyang khyod la ma grub pa nyid do//yul gsal ba don gyi rang bzhin nyid yin na don gyi bdag nyid kyang rang dang gzhan gyi thun mong ba nyid yin pa'i phyir gzhan gyi blo yang dpag par thal bar 'gyur ro/ /'di la don thams cad kyis rtogs par yang thal bar 'gyur te/ rgyang pan pa la dpyad pa nyid kyis rtogs par rung ba'i phyir 'dir ma gsungs par shes par bya'o//gal te gsal ba yul gyi rang bzhin yin par khas blangs nas rtags grub tu chug kyang / blo nam yang ma grub pa dang 'brel ba gzung ba med pa'i phyir rjes su mi dpogs so/ /de ltar blo mngon sum ma yin ba nyid mi rigs pa de'i phyir mngon sum nyid du rang rig pas grub pa de la rtog pas stong par mngon sum ma ma snang ba mi dmigs pas grub pas na/mngon sum thams cad ni mngon par brjod pa dang 'dres pa med pa kho nas don rtogs so zhes brjod do/ /gzhan yang dbang po'i byed pa med pa ste/dbang po'i shes pa med na sgra 'ba' zhig las don rtogs ba ni/ dbang po'i shes pas don gsal ba nyid dang / don byed pa nyid ji lta bar sgra'i don sgra'i blo la so sor mi snang ba'i phyir/ dbang po'i shes pa'i yul de ni brjod med rtogs pa'o/ /gsal ba dang don byed pa nyid de mngon sum mngon par brjod pa med pa'i yul yin te/dbang po'i byed pa med na dbang po'i shes pas mthong ba ltar sgras blo la so sor snang ba ma yin pa'i phyir ro/ /de ltar sgra dang dbang po'i shes pa'i yul mtshan nyid mi 'dra ba nyid du grub pa'i phyir/ gang sgra'i don ma yin pa de zhes bya ba la sogs pa gsungs so//ro'i blos dri bzhin zhes bya ba ni mthun pa'i dpe'o/ /mig gis blos gzugs bzhin zhes bya bas ni mi mthun ba'o/ /rjes su 'gro ba dang ldog pa'i rjes su mi byed pa de'i phyir rnam par 'jog par nus pa zhes bya ba la sogs pa gsungs so/ / gzhan yang don rtogs par bya ba'i phyir sgra sbyor ba zhes bya ba'i don la tha snyad du bya ba'i phyir ro/ /dbang po'i don ni brda'i rgyus sgras 'brel pa'i don phyis mthong ba'i dus na brda dang rjes su mthun par tha snyad du byed pa'i rtog pa'i rjes su 'gro bar byed pa ma yin te/ dbang po'i shes pa nyid dang don lhan cig 'gag pa'i phyir ro//de nyid rgyas par bstan pa'i phyir de 'di ltar zhes pa gsungs te/ dbang po'i don de'i rang gi mtshan nyid ni rigs 'dra ba dang mi 'dra ba thams cad las tha dad pa'i phyir/ yul dang lhan cig tu mthong ba'i dngos po'i skad cig ma ni/ 'gar yang gzhan du mi mthong ba'i phyir ro//mngon sum gyi don rnams rjes su 'gro ba med pa'i phyir gsal ba las tha dad par 'gyur ba'am/ gzhan pa tha mi dad pa spyi ni med de de ltar 'dzin pa'i blo'i bye brag med pa'i phyir ro/ /spyi gang la sgra 'jug pa gsal ba las tha dad pa'o/ /'dis ni snang ba mi dmigs pa 'phangs so//nye bar mi mtshon pa ni nges par mi nus pa'o/ /ba lang ba lang zhes gcig tu 'dzin pa'i blo dang sgra spyi la zhugs nas brdar byas pa'i blo dang sgra de gzhan gsal ba la 'jug pa nyid yin na/ spyi ma rtogs na ni gsal ba spyi'i blo dang sgras mi mtshon par 'gyur na/ khyed kyi lugs kyis spyi de las gsal ba mi mtshon pa min no//spyi'i blo dang sgra'i rjes su 'gro ba dang mi ldan pa ste/ spyi med pa'i bye brag gsal ba 'di spyi mthong ba'i stobs kyis gsal ba yang brda'i dus kyi rang bzhin tha snyad kyi dus kyi tshe yang yod par rtogs pas spyis gsal ba la blo dang sgras yul du byed pa'i phyir ji ltar mi mtshon zhes bya/de nyid kyi phyir gang las gang la zhes bya ba la sogs pa smos so/ /spyi so sor snang na yang mi gsal ba las tha dad pa'i phyir rjes su 'gro ba med pas so/ /yang na so sor snang na yang zhes bya ba ni spyi dbang po la so sor snang na yang dbang po la snang ba dag la 'dres pa med par snang bas rjes su 'gro ba med pa'i phyir ro//sngon bum pas chu 'dzin pa'i 'bras bu byed pa de mthong ba'i bum pa de phyis mthong ba rnams la/ mthong ba snga mas dran pa'i sa bon bzhag cing mthong ba phyi mas bag chags de nyid sad par byed pas myong ba'i mthu las byung ba'i dran pa 'dis chu 'dzin pa'o snyam pa las de don du gnyer ba'i mngon par 'dod pa skyes pa'i tshul gyis tha snyad rab tu 'jug par 'gyur ro//mngon sum don la lta ba tsam yin yang don byed pa nyams su myong ba las byung ba'i bag chags kyi mthu las byung ba'i dran pas phyis don byed pa snga ma dang 'dra ba gzhan nyams su myong ba sngon gyi de nyid 'di'o zhes nyams su myong ba dag mtshams sbyor bar byed pa na don med pa sngar mthong ba de nyid de de dang rigs mthun pa mthong ba na de dag gcig tu byas nas mngon par 'dod pa dang /cig shos mi 'dod pa 'byung la/ de las ni 'thob pa dang spong ba'i tha snyad dag 'jug par 'gyur ro/ / 'di'i nus pa 'jug pa zhes bya ba ni dran pa'o/ /dran pa las ni mngon par 'dod pa dang cig shos kyi nus pa yang 'thob pas de dag kyang skye'o/ /de las ni blang ba dang dor ba la 'jug go/ /mtshungs pa de ma thag pa'i rkyen zhes bya bas ni rgyud gcig gis dbang po'i shes pa dang / yid kyi shes pa nyid 'brel bar bstan te/ gzhan du rnal 'byor pa rgyud gzhan dang 'brel ba'i dbang po'i shes pa la dmigs pa'i yid kyi dbang pos ni dmigs pa'i rkyen byas pa yang dbang po'i shes pas skyed pa yin pas so/ /dbang po'i shes pa rang gi yul gyi de ma thag pa ste/ de'i bar med pa'i yul gyi skad cig ma'o//de dang dbang po'i shes pa lhan cig byed pas so/ /rnam par shes pa smra ba dag don dang de shes pa dag dus mnyam bar 'dod pas dbang po'i shes pa'i yul ni de nyid dang dus mnyam pa la yod la de'i de ma thag pa'i yul ni de nyid dus phyis yin pas na yid rang gi shes pa dang dus gcig na yod pa yin gyi yul de dbang po'i shes pa dang byed pa'i dus mi mtshungs pas so//dbang po'i shes pa dang de'i yul gyi de ma thag pa'i yul gnyi ga yang dus mtshungs pa ste/ dbang po'i shes pa'i dus na rang gi yul ni med de rgyu yin pa'i phyir 'das pas so/ /des na dbang po'i shes pa rang dang dus gcig pa de ni skad cig gnyis pa'i yid kyi yul yin te/de'i phyir lhan cig byed pa nyid do/ /gzhan du rgyu yul dang 'bras bu shes pa dag dus mnyam na ni/ rgyu dang 'bras bu nyid med pas na snga na ni nus pa med la zhes bya ba la sogs pa gsungs so/ / gal te dbang po'i shes pa'i yul gyi de ma thag pa 'dzin na/ bzung zin pa 'dzin par 'gyur ro zhe na/ 'di tshad ma snga ma'i zhes bya ba la sogs pa smos te/ bcad pa'i yul can tshad ma yin na dran pa yang tshad ma nyid du ha cang thal bar 'gyur ro/ /de nyid ji lta zhe na/ mthong ba'i 'du byed ma brjed pa//zhes gsungs te/ dran pa de las khyad par med pa'i phyir ro/ /dran pa dang 'dra ba'i nyid na yang tshad mar mi rung bar bstan pa'i phyir bya ba'i las byas zin pa las zhes bya ba smos te/ shes pas rtogs zin pa la shes pa gzhan gyis bsgrub par bya ba med pa'i phyir phyi ma ni sgrub par byed pa ste/ma rtogs pa rtogs par byed pa yin no/ /gal te don rnams ni rtag pa yin pa'i phyir snga ma nyid dbang po'i shes pas gzung ba yid kyis kyang gzung ba'i phyir yid ni tshad ma nyid ma yin no zhe na/ de gsal bar don de nyid rgyur gyur pa'i blo zhes bya ba la sogs pa smos te/rgyu la khyad par med pa'i phyir dbang po dang / yid kyi shes pa dag rim gyis 'byung bar yang 'gal lo/ /gal te lhan cig byed pa'i bye brag gis rim gyis 'byung ngo zhe na/ don rtogs pa bcos su med pa la gzhan la ltos par yang mi rigs pa'i phyir ro/ /gal te bya ba shes pa tha dad pas rim gyis 'byung ngo zhe na/bya ba tha dad pa nyid yin na yang de'i byed pa yang gzhan du 'gyur ba rtag pa nyid nyams par 'gyur ro/ /de ltar rtag pa mi 'thad pas na don rnams ni skad cig ma nyid ma yin pas 'das pa med pas ni yid don nye ba la ltos pas gzung ba ma yin no//de ltar na bya ba gcig la grub pa dang / bde ba gcig po'i shes pa dag kyang so sor skad cig gi bye brag gis tshad mar 'gyur na de ni mi 'dod do zhe na/ de ni tha snyad kyi dbang gis tshad ma rnam par gzhag pa yin pas don gcig byed pa'i phyir tshad ma gcig nyid do/ /gal te de lta na yid kyang dbang po'i shes pa dang /don gcig byed pa'i yul can du 'gyur ro zhe na/ 'di ni rnal 'byor pa skad cig mas tha snyad du byed pa'i dbang du bya ba yin pas/ skad cig rnams don dam par 'bras bu tha dad pa'i phyir yid ni skad cig so so nas tshad ma nyid yin no/ /gal te skad cig la phrad pa med pa'i phyir tshad mar mi 'gyur ro zhe na/rang gi yul la tshad ma gzhan gyis gnod par mi byed pa nyid 'di'i mi slu ba yin no/ /yang na ma rtogs pa'i don gsal bar byed pa nyid tshad ma yin la 'dis kyang don byed nus pa'i dngos po ma rtogs pa rtogs pa nyid yin pa'i phyir/ tshad ma'i bdag nyid don dam par thob pa nyid do/ /yid 'di yang dbang po'i shes pa rnams 'gags pa'i che chad ma nyid yin no/ /don dam par skad cig rnams tha dad pa'i phyir dbang po'i shes pa las gzhan pa'i bdag nyid kyi skad cig gi mtshan nyid kyis dmigs pa'i rkyen gyis bskyed pa'i yid kyis ni don gzhan kho na rtogs so//brda ni don gzhan sgra las tha dad pa dang sgra dag sbyor bar byed na/ rang las gzhan pa'i yul cung zad kyang mi dmigs pas brda sbyor bar nus pa ma yin no/ /gal te rang rig pa ma 'ongs pa'i sgra'i yul du byed do zhe na/bde ba la sogs pa rang gi mtshan nyid so sor nges pa'i bdag nyid ma skyes pa rnams yul du bya ste yang dag par myong ba ni med de/ rang myong ba de skyes pa de'i bdag nyid kyi mtshan nyid kyi yin pa'i phyir de yang med do/ /de ltar rang nyid las gzhan cung zad kyang mi rtogs pa de 'di rang nyid mngon par brjod pa dang sbyor bar byed pa ma yin te/cha shas su rtog pa med pas bdag nyid la brjod par bya ba dang / rjod par byed pa'i rnam pa de lta bu 'jug pa 'gal ba'i phyir ro/ /gal te brda sbyor ba med kyang brda las byung ba'i sgras dmigs so zhe na/ rang rig pa des rang de'i bdag rang gi mtshan nyid sngar ma mthong ba'i phyir la/brda las byung ba'i sgras ni sngon gyi de 'di'o zhes snga ma mthong ba can yin pa'i phyir ro/ /gal te bdag nyid la sgra gdod sbyor zhe na/ mngon par brjod par gzo ba na gzo de nyid yin pa'i phyir sbyor ba'i dus na yul mi srid pa'i phyir ro//gal te shes pa phyi mas so zhe na/ rang rig pa yin pa'i phyir gzhan gyis na yang zhes bya ba la sogs pa smos so/ /snga ma rang gi mtshan nyid de tha snyad kyi dus na yang 'byung ba med pa'i phyir brda don med pa yang yin no/ /gzhan dag ni bye brag pa'o/ /don gcig ni bdag nyid gcig la'o//'du ba shes pa dang bde ba la sogs pa 'brel ba'i shes pas te bdag gcig gis so/ /shes pa des bde ba la sogs pa myong bar bya ba yin gyi/ bde ba nyid kyis myong ba ma yin no/ /rnam shes rgyu las gzhan min zhes bya bas ni/ rnam par shes pa nyid kyi rgyu mtshungs pa de ma thag pa dang /dmigs pa dang dbang po zhes bya ba dag yin la/ de dag kho na las skyes pa bde ba la sogs pa ci'i phyir shes pa ma yin te/ tshogs pa 'du ba la skyes pa'i phyir ro/ /'dir nye bar len pa dang lhan cig byed pa'i rgyu dag mtshungs pa'i phyir ro zhes bya ba'i don to//gal te bud shing gi nye bar lan pa dang de'i lhan cig byed pa gcig las thal ba dang du ba dag mtshan nyid mi 'dra ba dag snang ba'i phyir ma nges pa nyid do zhe na/ de'i skyon med de/ du ba'i nye bar len pa ni bud shing gi chu'i khams yin la/ thal ba ni sa'i khams so/ / gal te bud shing gis thal ba dang / thal ba ma yin pa shing gi rang bzhin dag skyed par byed pa'i phyir 'bras bu rigs tha dad pa yang skyed do zhe na/ gang thal ba skyed pa de dag gis ni thal ba nyid skyed kyi shing ma yin no/ /gang yang tshogs pa 'dra ba las ni 'dra bar dpag gi tshogs pa gcig la ni mi 'dra ba tshad mas grub pa'i don yin no//de'i phyir mar me'i tshogs pa las rang gi rigs 'dra ba dang snying po tshig pa dang 'od dang sor mo la sogs pa sreg pa dang mig gi rnam par shes pa skyed pa dag srid la/ de dang 'dra bar gzhan la yang de bzhin du mtshungs so/ /de'i phyir tshogs pa'i rigs mtshungs pa ni rgyu mtshungs pa'o//rgyu'i tshogs pa 'dra ba nyid las kyang 'bras bu mi 'dra bar 'gyur na ni sna tshogs kyi tha dad pa dag rgyu med par 'gyur ro/ /gal te tshogs pa 'dra yang byas pa'i shugs zhes bya bas 'du shes kyi bye brag gi shes pa dang shes pa ma yin pa nges par 'gyur ro zhe na/byas pa'i shugs kyis nus pa tshad mas ma mthong ba'i phyir ro/ /byas pa'i shugs kyang nye bar len pa la 'dod na ni gang gi goms pa'i bye brag can gyi rnam par shes pa nus pa can nyid yin par mthong ste/ de'i phyir nang gi byed pa la brten pa'i bde ba la sogs pa rnams zhes bya ba la sogs pa smos te/nang gi rnam par shes pa goms pas gsal ba la bde ba la sogs pa yang sgrin la/ blun pa la ni blun par snang ba'i phyir ro/ /gal te rgyu bye brag med pas 'bras bu yang mtshungs pa nyid na rgyu mtshungs pa'i phyir bde ba la sogs pa yang bde ba'am sdug bsngal lam btang snyoms pa gcig tu 'gyur ro zhe na/yul dang yid la byed pa la sogs pa nang gi bye brag bde ba dang sdug bsngal la sogs par 'gyur gyi/ shes pa ma yin par ni ma yin te/ tshogs pa 'dra ba las skyes kyang / nang gi bye brag gis the tshom dang gtan la phebs pa la sogs pa'i shes pa'i bye brag bzhin no//gzhan ni grangs can no bye brag pa dang sangs rgyas pa gnyi ga'i ltar nang gi yang ma yin la/ sangs rgyas pa ltar sems pa can yang ma yin no/ /'o na ci zhe na/ grangs can rang gi bsam pa bstan pa'i phyir bde ba la sogs pa de'i bdag nyid ni sgra la sogs pa zhes bya ba smos te/de dag gi 'don pa'i go rims ni rna ba dang / pags pa dang / mig dang / lce dang / sna zhes bya ba yin pas de'i go rims pas yul yang dang por sgra smos te/ reg bya la sogs pa yang gzung ngo / / des na bde ba la sogs pa yul gyi rang bzhin no zhes bya ba'o/ /gzhan yang / sems can yang yin rig bya'i phyir/ /de bdag min pa rigs min phyir/ /'dir dgongs pa ni me'i bud shing sreg par byed kyang de'i nang du ma zhugs pa ni sreg pa med de me'i 'od kyi nang du chud pa kho na sreg go//de bzhin du shes pa yang rang gi ngo bo'am/ rnam par shes pa'i bdag nyid du gyur na shes par 'gyur ro/ /de'i phyir gang rang rig pa ni rang gi ngo bo kho nas shes par 'gyur ba yin la/ gzhan ni rnam pa'i sgo nas yin pa'i phyir gang yul gyi rnam pa yang dag pa myong ba med pa de zhes bya ba gsungs so//yul 'di'i shes pa 'di'o/ /gal te yul las skyes pa myong ba'i rgyu mtshan nyid yin na ni dbang po la yang thal bar 'gyur ro/ /sogs pas ni mtshungs pa de ma thag pa yang ngo / /grangs can pa dag ni sems yod pa ni bdag yin la/ de ni rtag pa nyid yin pas 'dra bar yod pa'i tshe ni rtogs la gzhan du mi rtogs so zhes bya bar mi rung ste 'dra ba'i sngon du 'dra ba med pa dang de 'dra ba'i dus su nyams pa dang phyis 'dra ba 'gags pa na nyams pa ji lta bu zhe na/'dra ba yod na mi rtag par 'gyur ba las skyon gzhan de 'dra ba med na shes par mi rung ba zhes bya ba'o/ / gal te shes pa rnam pa med par 'dod pa dag rig pa yin pa'i phyir don shes pa yin gyi rnam pa yod pas ni ma yin no zhe na/ rig pa yod pa tsam gyis zhes bya ba smos te/ rig pa tsam ni don thams cad la bye brag med pa'i phyir/ shes pa gcig gis don thams cad rig par thal bar 'gyur ro//'dra ba yod na ni shes pa las 'dra ba yod pa'i don ni rtogs la med pa ni mi rtogs pa'i phyir thal ba med do/ /de ltar shes pa'i rang bzhin du ma grub pa ni rtogs par mi rung la/ kho bo bde ba yang shes pa'i rang bzhin 'di nyid yin pas myong bar rung ba nyid de/ gang rje btsun sangs rgyas nyid kyis bde ba'i tshor ba gang zhe na/myong ba phya le ba'o zhes gsungs pa'i phyir bde ba la sogs pa ni sems can du grub po/ /gal te yul dang 'dra ba yul de yang dag bar myong ba'i bdag nyid yin na/ bde ba la sogs pa dang 'dra ba yang dag par myong bar 'gyur la bde ba la sogs pa ni sngon po la sogs pa bzhin du yang dag par myong ba ma yin pa de'i bdag nyid du 'gyur ro zhe na/ma yin te zhes bya ba la sogs pa smos te/ shes pa'i ngo bor ma gyur pa myong bar mi rung ba'i phyir bde ba la sogs pa yod na de shes pa'i ngo bo nyid kyi yang dag par myong ba yin no zhes bstan pa'i don du ste/gang myong ba yod pa de la de 'dra ba'i phyi rol gyi don yod do zhes smra ba ni ma yin no/ /de nyid rgyas par bshad pa ni/ de la yang dag par myong ba nyid ni gcig tu nang gi dga' ba dang yongs su gdung ba'i bdag nyid yin par blta ste zhes bya ba smos te/ 'chad par 'gyur ba'i rigs pas so//de yang 'di lta ste/ bde ba la sogs pa 'di myong ba'i bdag nyid 'di gzhan phyi rol gyis gzhag par mi rigs te/ phyi rol gyi de'i bye brag med kyang srog chags kyi rang bzhin dang / goms pa'i bye brag las bde ba la sogs pa de'i bdag nyid kyi bye brag 'grub pa'i phyir ro//ro'i bye brag gcig nyid srog chags kha cig gi bde ba'i rgyur 'gyur la/ gzhan gyi sdug bsngal la sogs par 'gyur ba'i phyir ro/ /gal te blo zhes bya ba rig pa'i bdag nyid ma yin par 'dod de/ de bde ba la sogs pa'i bye brag dang ldan gyi yang dag par myong ba ni shes pa nyid du bsams pa ste/de ni bde ba la sogs pa bye brag dang ldan pa ni ma yin no zhe na/ blo ni yul gyi rnam pa can te/ gal te yang dag par myong ba ma yin pa'o// /gzhan don yang dag par myong ba ni myong ba'o zhe na/ 'dra ba gzhan shel la yod pa'i 'dra ba dag la blo der 'gyur ba'o/ /yang dag par myong ba med pa nyid shel 'dra ba dang blo 'dra ba dag gi bye brag yod na ni smros shig /gal te shel ni phyi yin la blo ni nang gi byed pa nyid yin pas/ de nyid bye brag de'i rgyu mtshan yin no zhe na'o/ /de yang blo'i bye brag rtogs par byed pa'i yan lag ma yin pa'i phyir/ yan lag tu brjod par mi bya'o//ji ltar yan lag ma yin zhe na/ shin tu dang ba'i rang bzhin dang / sogs pa'i sgras nang gi byed pa bzung ste/ de lta bu gzhan mig la sogs pa yod pas de dag kyang blo'i rang bzhin du thal bar 'gyur ba'i phyir ro/ /yul gyi rnam par gzhag pa yang dag par myong ba la brten pa ste/de la ltos pa yin na'o/ /blo de sems pa med pa la yul med pa'i phyir ji ltar de las don gyi rnam par gzhag par 'gyur te/ de lta na 'dra ba tsam gyi phyir sngon po nyid sngon po'i yul dang / bum pa yang bum pa'i yul nyid du ha cang yang thal bar 'gyur ba'i phyir ro/ / gal te sgra'i don gcig la yang srog chags dang goms pa'i bye brag gis bde ba la sogs pa tha dad pa dag la 'gal ba med de sgra la sogs pa'i bdag nyid phyi'i bde ba la sogs pa bye brag med kyang blo'i bdag nyid kyi bde ba la sogs pa ni bye brag can du skye'o zhe na/ blo'i bdag nyid kyi bde ba ni zhes bya ba la sogs pa smos te/bde ba la sogs pa phyi'i bdag nyid gcig la goms pa la sogs pas gcig par gzhan du 'gyur ba 'gal ba'i phyir ro/ /sems pa can las gzhan du yul gyi bdag nyid kyang ma yin pa bde ba la sogs pa'i rnam pa'i bye brag dang ldan pa'i blo zhes bya ba ni med do//sems pa can de'i bdag nyid log pa la/ blo'i mtshan nyid yul 'dzin pa mi dmigs pa'i phyir ro/ /de lta bas na yul myong ba ni gcig ste/ blo dang yang dag par myong ba zhes bya ba gnyis ni med de yang dag bar myong ba gcig pu'o/ /rangs pa dang ma rangs pa ni yang dag par myong ba de nyid kyi bye brag tu rnam par 'jug ste/bye brag gi rang bzhin du blta'o/ /yang dag bar myong ba de la ming ni blo dang shes pa la sogs pa ji ltar 'dod pas byed do/ /yul nye bar longs spyod pa ni skyes bu shes pa yod pa nyid yin na/ yul nye bar longs spyod pa shes pa nyid mngon sum ma yin na'o//yul nyams su myong ba'i shes pa mngon sum ma yin yang / yul nye bar longs spyod pa nyid yin na'o/ /yul yod pa nyid tsam gyis yul longs spyod par yang thal bar 'gyur ro/ /shes pa mngon sum ma yin pa'i phyir yul de nyams su myong bas longs spyod par mi 'gyur te/yul nyams su myong ba yod kyang nyams su myong ba grub pa'i phyir yul dang nyams su myong ba dag med pa dang khyad par med pa'i phyir ro/ /gal te blo las myong ba dpag pa'i phyir rjes su dpag pas longs spyod do zhe na/ rtags las zhes bya ba la sogs pa smos so/ /sngar dbang po'i mngon sum ma yin pa la 'brel pa gzung ba med do zhes ji skad smos pa bzhin no/ /gal te blo kho nas yul nye bar longs spyod do zhe na/ yul la mngon sum du dmigs pa zhes bya ba smos te/ blo yul mngon sum du dmigs pas yul rtogs pa'i tha snyad ma tshang ba med pa'i rdzogs pas na blo las gzhan pa shes pa yod pa brtag pa'i don med do//shes pa yod pa de yang yul mngon sum du byed pa nyid du blo dang bdag nyid gcig par tshad mas mthong ba'i phyir ro/ /gal te blo dang shes pa dag tha dad kyang 'dres pas rnam par dbye mi shes te/lcags gong me bzhin du de cir 'dzin zhe na/ me nyid du 'dzin te reg pa na me 'di'i bdag nyid mngon par 'gyur ba'i phyir ro/ /gal te bde ba la sogs pa dang sngon po la sogs pa tha dad par snang ba yang gcig la bye brag mi mngon yang tha dad pa nyid 'dres pa'i bdag nyid kyis yod par khas len na ni/de lta na ni dngos kun la/ /tha dad tha dad min gzhag nyams te don gcig tu dmigs pa rnams la 'dres par rang bzhin gzhan the tshom za ba'i phyir gcig pa nyid du mi snang ba'i phyir dang / sngon po la sogs pa dang bde ba la sogs pa'i rnam pa dag tha dad par dmigs kyang bde ba la sogs pa ni sngon po la sogs pa phyi rol gyi bdag nyid du 'dod pas tha dad pa ma yin pa'i phyir ro//tha dad min par shes pas rig pa dang ni gcig nyid ces bya'o/ /gcig nyid du shes pa de ltar gang min te du ma shes pas rig pa de ni mtshan nyid tha dad can du 'grub po//tha dad pa dang tha mi dad pa'i shes pas rig pa 'di tha dad pa dang / tha mi dad par gzhag pa'i rgyu nyid yin na/ tha dad pa grub byed mi 'grub po ste tha mi dad pa yang de bzhin no zhes skabs kyis rtogs par bya'o//de nyid rgyas par bstan pa ni/ dkar dang sdug bsngal sogs/ tha dad par rig pa dang phyi rol nyid gcig tu khas len cing / blo dang myong ba dag yul gcig tu rang rig pa'i tshad mas grub pa dang ni tha dad par khas len ce na'o/ /me dang 'brel pa las 'bar ba zhes bya ba don gzhan skyes pas so//blo'i tha dad par rig pa ni tha dad par gzhag pa'i rgyu yin pa de'i phyir/ bde ba la sogs pa dang yang dag par myong ba dag dkar po la sogs pa rigs pa ma yin pa las tha dad pa yin no/ /de la yang dag par myong ba ni blo ste/ myong ba dang gcig tu mthong ba'i phyir ro//kha cig ni bde ba la sogs pa dag nang yang yin la/ sems pa can yang yin no zhes 'dod de/ de dag gi ltar na ni rtogs par zad do/ /gang zhig gang goms par byed pa de ni goms pa yongs su rdzogs pa las de la de gsal bar snang bar 'gyur te/ 'jigs pa la sogs pa goms par byed pa lta bu'o//rnal 'byor pa 'ga' zhig kyang thos pas bzung ba'i don rig pas bsams pas don rnam par gzhag pa goms par byed do zhes bya ba rang bzhin gyi rtags so/ /gsal ba'i phyir rnam par mi rtogs la/ rigs pas gzhag pa'i don rtogs pa'i phyir slu ba med pa dang mngon sum gyi tshad ma yin te/mngon sum gyi tshad ma gzhan grags pa lta bu'o/ /'dod pa yid la byed pa goms pas ni ji ltar rgyal po'i shing rta bcu pa'i bu dga' byed kyis rol rnyed ma yid la byas pa na/ bdag gis de mthong / 'di na mdun dang rgyab dag tu/nang dang phyi dang yongs su bskor dang rnam par 'gyur bar ro zhes bya ba lta bu'o/ /mya ngan gyi rgyal po'i btsun mo dri za mas rang gi bu rnams mthong ba lta bu'o/ /'jigs pa la sogs pa la yang ci rigs par dpe brjod par bya'o/ /yid la rnam par rtog pa yin pa'i phyir de dag lkog tu gyur pa nyid yin no zhe na/myur ba dang nan tan byed pa rab thob phyir/ lkog tu gyur par 'du shes la de lta'o ste myur ba dang nan tan byed pa'o/ /de yang ji ltar dga' byed sems nyid lta bu ste/ snum pa'i sngo bsangs sdug gus byugs pa'i mkha' la sprin tshogs gseb na chu skyar rtse ba dang / / rlung gis bskyod pa'i chu yi thigs pa chu 'dzin mdza' bo dag pas yid 'ong sgra sgrogs pa/ /'dod par gyur pa dag ni brtan zhing sra ba'i snying gis dga' byed ba dag gis thams cad bzod/ /lus can ma ni ji ltar gyur na snyam du de ltar yid la byas pas mthong gyur nas/ /e ma'o kyi hud lha mo bstan par gyis zhes myur du smra ba dang nan byed pa la sogs pa lta bu'i 'jug pa ma mthong ba'i phyir ro//bar skabs kyi tshigs su bcad pa zhes bya bas ni sngar ma bshad pa cung zad rgyas par bshad pa'o/ /de ltar 'jig rten la rab tu grags pa'i dpe dag bsnyad nas/ bstan bcos la grags pa bstan pa'i phyir/de ltar mi gtsang ba dang zhes bya ba la sogs pa smos so/ /'di ni chos rnams kyi ngo bo nyid de bslad pa'i blo dag kyang rung mngon par brjod pa dang 'dre ba'i shes pa thams cad la don gsal bar snang ba mi gnas pa nyid do/ /dran bya ni gsal bar snang ngo de dran par byed pas te/de nyid la dran par byed pa'i shes pa la ni don de mi gsal bas don mi 'dra ba nyid do/ /bslad pa na yang bslad pa'am ma bslad pa'i gnas skabs na nyams su myong ba de dran pa na bslad pa na'ang rnam par rtog pa 'byung ste/ nyams su myong ba de gsal bar snang ba ltar dran pa ni ma yin no//rnam par rtog pa med pa'i phyir ro zhes bya ba ni slob dpon gyis mngon sum mtshan nyid rtogs pa dang bral ba tsam zhig gsungs pa'i phyir ro/ /'dir mi 'khrul ba sngar bstan la/ slob dpon gyis kyang mi 'khrul pa nyid bzhed do/ / ji skad du/ 'khrul dang kun rdzob shes pa dang / /rjes dpag rjes su dpag pa can/ /dran dang sngon 'dod zhes bya ba/ /mngon sum ltar snang rab rib bcas/ /zhes 'khrul pa dag mngon sum ltar snang ba nyid du gsungs pa'i phyir ro/ /slu ba la tshad ma nyid med la mngon sum tshad ma nyid yin par bstan pas rtogs par nus pa'i phyir rtog pa med pa gcig pus mngon sum ston par mdzad do//'di ltar/ dngos po mi 'dzin phyir rnam rtog /mngon sum ltar snang zhes bya bar 'brel to/ /slu bar byed pa'i phyir 'khrul pa mngon sum ltar snang ba zhes bya'o//dbang skyes kyang zhes bya bas ni rtog pa med kyang mngon sum ma yin no zhes bstan to/ /de la gzhan las khyad med phyir/ dbang po las skyes pa'i bslad pa gang zhig bslad pa de las gzhan pa'i dbang po las skyes pa ma bslad pa las bye brag med pa'i phyir ro/ /dbang po las skyes pa nyid du bstan par bzhed pa de nyid kyi phyir 'khrul pa rnams ston pa na dran dang mngon brjod ces bya bas bar du bcad nas 'khrul pa dang rab rib zla ba gnyis su snang ba dag bstan par mdzad de/'di ni dbang po las skyes pa yin zhes dmigs kyis bsal ba dang bcas par 'khrul pa bstan pa'i don du gsungs so//bstan bcos kyi phyogs gzhan du slob dpon gyis mig la sogs pa'i rdul phra rab rnams 'khrul pa zla ba gnyis par snang ba dang / ma 'khrul pa sngon por snang ba'i dpe'o/ /de ltar mngon sum gyi rab tu dbye ba bshad nas tshad ma'i 'bras bu'i rab tu byed pa bshad par rtsom ste/yul brtag pa ni sngar mngon sum dang lkog tu gyur pa dag gi dbye bas kyang bstan la/ le'u gnyis pa nas kyang ston par 'gyur ro/ /yang zhes bya ba ni tshad ma spyi'i rab tu byed pa dang mngon sum gyi rab tu byed pa dag bsdu ba'o/ /tshad ma'i mtshan nyid gang las tshad ma 'di'i gzhal bar bya ba rtogs pa dang bar chad med pa ste/tshad ma gang yod pa tsam gyis gzhal bar bya ba rtogs pa de nyid 'thob pa'o/ /de nyid gang zhe na/ de la zhes bya ba smos te/ tshad ma zhes bya bstan pa de la'o/ /'di ni sngon po rtogs pa'o zhes don dang shes pa dag so sor nges pa'i 'brel pa byed pa'o// /gal te dbang po dang rtags dag kyang rtogs par byed pa nyid ma yin nam zhe na/ bya ba sgrub par byed pa'i phyir te zhes bya ba la sogs pa smos te/ tshad ma nyid ni byed pa'i don nyid yin na gang la bya ba dang / gang las 'ongs pa dang gang gi phyir zhes bya ba kun kyang bya ba sgrub par byed pa nyid yin mod kyi byed pa nyid ni ma yin gyi/'on kyang 'bras bu gang byed pa gang yod pa tsam las yin pa de byed pa nyid yin no/ /de ltar na dbang po la sogs pa yod pa tsam gyis gzhal bar bya ba rtogs pa mi 'grub kyi/ don dang 'dra ba gang yod pa tsam gyis so//gal te 'dra ba med kyang don rig pa nyid tshad ma yin no zhe na/ nyams su myong ba tsam ni zhes smos te/ don ni don gang dang yang yul dang yul can nyid du 'brel ba'i rgyu mtshan med pa nyid du 'dra ba'i bdag nyid yin pa'i phyir/ las dang byed pa'i rang bzhin gzhag par mi rung bas don dang 'dra ba gang yang yul 'di'i shes pa 'di'o zhes 'dra ba des yul dang yul can so sor nges pa'i las dang byed pa rnam par 'byed pa ste/de yang don rtogs pa'i bdag nyid du gyur pa yin no/ /sogs pa'i sgras ni don la lta ba dang / bye brag tu byed pa'i shes pa la sogs pa gzung ngo //de dag yod kyang shes pa las gzhan du gyur pa'i las de yul de dag gis shes pa'i bdag nyid las gzhan ma yin pa don rtogs pa'i rang bzhin gyi bya ba'i bye brag 'di sngon po rtogs pa nyid do zhes nges par nus pa ma yin no/ /tshad ma ni byed pa po'i don nyid kyis yin zhing / byed pa po'i yang bya ba'i rgyu mtshan gyis byed pa po'i de kho na nyid yin la/dbang po la sogs pa shes pa'i bdag nyid ma yin pa de las kyang shes pa 'dis sngon po rtogs so zhes bya ba de'i bye brag mi 'grub pa'i phyir ro/ /gal te de'i bye brag med kyang dbang po la sogs pa las shes pa gsal ba la sogs pa'i bye brag yod do zhe na/gsal ba la sogs pa'i bye brag yod kyang las dang byed pa'i yan lag ma yin pas na shes pa des byed pa po'i 'grub pa ma yin pa'i phyir de dag tshad ma nyid ma yin no/ /yul 'di shes pa 'di'i las su nges par 'grub par byed pa de tshad ma nyid yin no/ /de yang gang zhe na/shes pa la zhes bya ba smos te/ don dang 'dra ba 'di las gzhan mi srid de/ don dang mi 'dra na de rtogs par mi rung ba'i phyir ro/ /gal te dbang po la sogs pa'i dbang gis shes pa gsal ba la sogs pa yod do zhe na/ dbang po la sogs pa'i g.yeng ba dang zhes bya ba la sogs pa smos so//dbang po la sogs pa de don 'di'i rtogs pa ni 'di'o zhes las dang byed pa'i 'brel pa 'grub pa'i rgyu ma yin pa'i phyir nye ba'i rgyu med pa'o/ /gal te rnam pa med par smra ba dag don gyi rnam pa med kyang don gyi bye brag gis byas pa ste/ bskyed pa'i shes pa'i rang bzhin gyi bye brag las las dang byed pa'i 'brel ba 'di rtogs kyi 'dra ba las ni ma yin no zhe na/ci ste shes pa'i bye brag de'i mtshan nyid mi ston te bstan par byos shig /gal te myong ba'i bye brag de 'di'o zhes bstan par mi nus so zhe na/ rang nyid kyis kyang zhes bya ba la sogs pa smos so//don gyi rnam pa las gzhan pa'i sgrub byed gzhan yin te/ dbang po la sogs pa don gyi rnam pa ma yin pa dag las so/ /las ni yul lo/ 'brel pa'i yul ni 'di'i rtogs pa ni shes pa 'di'i shes so/ /'brel pa don gyi rnam pa de yang don de shes pa'i bdag nyid du gyur pa nyid do//de'i phyir don gyi rnam pa de las don gzhan tshad ma'i 'bras bu min/ 'bras bu'i bdag nyid dang tshad ma'i bdag nyid gcig pa de'i phyir 'bras bu'i bdag nyid du gyur pa'i 'dzin pa ste/ tshad ma de yang rang gi yul la byed pa dang bcas pa'i phyir byed pa po nyid do/ /ci zhig ce na/don rtogs pa'i bdag nyid kyis de'i yul de rtogs par byed pa'i phyir ro/ /lta bu zhes bya ba'i sgras ni ji ltar 'jig rten na grags pa rtswa'i rgyun dang / de gcod pa'i zor ba dang / de dum bu gnyis su byed pa dang 'bras bu dag tha dad pa'i bdag nyid med kyang byed pa dang 'bras bur snang bas na/byed pa zhes gzhag go zhes ston to/ /de nyid bshad pa ni rang gis te/ dngos po'i ngo bo nyid kyis 'bras bu dang byed pa tha dad pa byed pa can ma yin yang don gyi rnam pa de'i dbang gis 'bras bu de rnam par gzhag pa'i phyir ro/ /bar chad med pa ni gang zhig yod pa tsam gyis don rtogs pa nyid du gnas pa'o//dbang po la sogs pa la de med pa'i phyir yul rtogs pa'i rgyur gyur pa'i byed pa po khyad par can de nye ba'i rgyur mi 'grub pa'i phyir ro/ /gal te dbang po la sogs pas rtogs pa de la sbyor te de dag med na de yang med pa'i phyir ro zhe na/ thams cad ces bya ba la sogs pa smos te/ dbang po la sogs pa yod kyang don 'di rtogs pa ni 'di'o zhes shes pa la bye brag med pa'o/ /gang gis rtogs pa 'di'i yul sngon po ste gzhan ni zhes shes pa dang / don so sor bye brag tu 'byed pa la byed pa po zhes brjod do/ /ba lang gi rdzas ni bye brag tu bya ba'o//ba lang nyid dang / 'gro ba nyid dang / dkar po nyid bye brag tu byed pa'o/ /de la bye brag tu byed pa'i shes pa tshad ma nyid du 'dod pa dag la yang yul gyis bya ba'i bye brag yul gyi rnam pa med na rtogs pa sgrub par byed pa ma yin pa nyid du 'bras bur 'dod pa la ba lang gi rdzas la dmigs pa'i shes pa dang /bye brag med pa'i phyir tshad ma dang 'bras bu'i rnam par gzhag pa mi 'grub pa'i phyir tshad ma nyid ma yin no/ /bya ba 'bras bu'i rdzas kyi yul can dang / byed pa tshad ma rigs la sogs pa'i yul can dag yul tha dad par yang 'gal ba'i phyir te/tshad mas yul du ma byas pa rtogs par mi rigs pa'i phyir ro/ /bye brag med pa 'ga' zhig tu ma zad do zhes bya ba ni yang gi sgra'i don to/ /yul tha mi dad pa nyid na yang tshad mar 'dod pa'i shes pa nyid kyis de rtogs zin pa'i phyir 'bras bu gnyis pa don med do/ /don med pa 'ba' zhig tu ma zad kyi don de nyid kyis bskyed pa'i shes pa rim gyis 'byung ba yang rgyu mtshan tha mi dad pa'i phyir bkag pa yin no//gal te bye brag tu byed pa dang bya ba'i shes pa dag dus gcig tu gyur na don med par ma zad kyi yang sgrub par byed pa ste/ skyed par byed pa dang / bsgrub par bya ba ste/bskyed par bya bar mi 'gyur ro/ /gal te shes pa'i don dang 'dra ba nyid dang / de rtogs pa dag kyang dus gcig pa'i phyir skyon der 'gyur ro zhe na/ shes pa'i cha shas dag ni zhes bya ba la sogs pa smos so/ /gal te chos kyi bye brag yod kyang dngos por gyur pa'i bye brag med pa'i phyir mi rung ngo zhe na/dngos po tha dad pa med kyang nus pa'i bye brag gis tha dad pa dper na mar me rang gsal bar byed do zhes rnam par gzhag pa mthong ba'i yang phyir te/ dpe yang grub po zhes bya ba'i don to/ /gal te dngos por gyur ba'i tha dad pa med pa'i phyir rnam par gzhag pa yang mi srid do zhe na/tha dad pa 'di zhes bya ba smos te/ byed pa dang bya ba'i tha snyad 'di'o/ /de yang bya ba de nyid byed pa por brjod ces bya ba 'dod pa'i phyir ro/ /bum pa'i gzugs dang ro la sogs pa thams cad nye yang / gzugs sam ro la sogs pa 'ga' zhig kho na rtogs te/des na nye ba la bye brag med kyang gzugs sam ro kho na rtogs pa'i bye brag de'i blo'i so sor snang ba ste/ don gyi rnam pa nyid kyis byas pas de kho na tshad mar rigs te/ rtogs pa'i sgrub par byed pa yin pa'i phyir ro/ /de ltar phyi rol gyi don yod par smra ba'i lugs la brten te bshad nas rnam par shes par smra ba'i lugs bstan par bzhed nas 'di ltar zhes bya ba la sogs pa gsungs te/tshad ma'i 'bras bu rtogs pa nyid yod mod kyi 'on kyang don rtogs pa zhes bya ba la 'di ci zhig ces 'dri ba brtsams so/ /don la skyes pa dang don 'dra ba dag las myong bar gzhag go/ /bum pa'i rnam pa can du 'dra bas yul mtshungs pa'i 'das ma thag pa'i shes pa ste/mtshungs pa de ma thag pa'i shes pa yul 'dra ba can yang rigs pa nyid du thal bar 'gyur ro/ /gal te de lta na 'di nyams su myong ngo zhes bya ba 'di ci zhig ste de med par 'gyur ro zhe na/ don de nyid rjes su ste khyod kyis phyi rol 'di'i zhes bsgrubs na kho bos kyang don rtogs kyi de lta ma yin na tshad ma kho bos ma mthong ngo zhes ston to//mngon sum gyis mthong ba dang thos pa dag las de'i rjes su byed pa'i nges pa'i shes pa dag tu 'gyur la de ltar 'grub pa de dag don de nyams su myong ba'o zhe na/ 'di bltas so 'di mnyan no zhes bya ba de dag nyid rgyu ji ltar na shes pa de don de'i mthong ba yin no zhes don dang shes pa 'brel par byed pa'i rgyu 'dir dpyod pa ma yin nam/gal te 'di dpyad par ci dgos she na/ don de dag mthong ba rnam par gzhag pa ni don de dag shes pa'i 'brel pa brten nas rnam par nges te/'brel pa de med na ni 'di bltas 'di mnyan to zhes bya ba der mi 'gyur te/ 'brel pa med pa dag kyang de dag tu thal bar 'gyur ba'i phyir ro/ /don yod pa ma yin par bsams te rnam par dpyad nas/ da ni don yod kyang blo la de dang 'dra ba nyid med do zhes bstan pa'i phyir shes pa'i yul dang 'dra ba yang ma yin te zhes smos te/dang po rang gi sde pa'i lugs dpyad pa'i phyir de'i snang ba ni zhes bya ba la sogs pa smos so/ /blo'i snang ba'o/ /phyi rol pa'i lugs dpyad pa'i phyir yul la zhes bya ba la sogs te/ gal te blo la rags par snang ba nyid don gyi rnam pa yin te/ yul la yan lag can rags pa gcig yod pa'i phyir ro zhe na/yul la rags pa gcig tu rtogs par 'gyur ba de lta bu ni med do/ /yul rags pa gcig nyid yod na lag pa'am/ rkang pa la sogs pa gcig g.yo bas lus thams cad g.yo bar 'gyur te/ g.yo ba de nyid las gzhan ma yin pa'i phyir ro//gos khrus mkhan gyi dbyug pa las brgyang ba las chus khru ba na gos ni gnas la chu ni mi gnas par 'dzag pa bzhin no/ /yang na phyogs gcig ma bsgribs na yang tha dad pa med pa'i phyir/ gang la yang ma bsgribs pa'i phyir ro/ /gal te cha shas lag pa la sogs pa bsgribs kyi cha shas can lus ni ma bsgribs so zhe na/lus 'di ni sngon du ma bsgribs pa bzhin du na'o/ /gal te cha shas 'di thams cad kyi sgo nas cha shas can mthong ba'i phyir gcig nyid yin pa'i phyir ro/ /gal te cha shas thams cad mthong ba la rag las na lag pa la sogs pa cha shas rnams kyang de'i phyi rol dang dbus mtha' dag cig car mthong bar mi nus pa'i phyir cha shas can 'di thams cad du mi mthong bar ro//gcig nyid kyi phyir cung zad kha bsgyur na thams cad kha bsgyur ba'am cung zad kha ma bsgyur na yang thams cad kha ma bsgyur bar rtogs par thal bar 'gyur ro//don dang blo la 'dra ba cung zad kyang med pa de nyid kyi phyir blo las gzhan don myong ba yod min la blo nyid myong ba yin no/ /blo de myong ba yang blo gzhan ni ma yin gyi/ /blo de'i myong ba blo de'i bdag nyid kho na ste/ thams cad du gzung ba dang 'dzin pa mi ldan te med pa'i phyir ro//de'i phyir/ blo 'di 'di ltar rang gis rang gsal byed/ /'dra ba med pa dang de las byung ba dang / de 'dra ba yang 'khrul pa dang yul dang 'dra ba las gzhan gyis kyang 'dzin par mi rigs pa dag gis yul gyi mtshan nyid gsal ba'i phyir don 'ga' yang nyams su myong ba med la/ blo 'di yang rang las gzhan 'ga' yang nyams su myong ba ma yin te/blo gzhan de la yang gzung ba dang 'dzin pa'i mtshan nyid dang mi ldan pa'i phyir ro/ /mar me la sogs pa'i gsal ba'i dngos pos rang gsal bar byed pa bzhin no/ /gal te de lta na sngon po myong ba zhes bya ba'i drug pa ji ltar 'thad ce na/sngon po la sogs pa zhes gsungs te/ sngon po rang bzhin de nyid nyams su myong ba yin pa'i phyir sngon po yang de yin la myong ba yang de yin pas sngon po myong ba ste/ ut+pal sngon po bzhin no/ /gal te yul med na blang ba dang dor ba dag med par 'gyur ro zhe na/gang gi tshe 'dod pa dang mi 'dod pa'i rnam par nyams su myong bas zhes bya ba la sogs pa smos so/ /rang rig pa kho nas te/ blo rang gi rnam pa myong ba kho nas don rtogs pa rdzogs par 'gyur bas rang gi rnam par myong ba de kho nar 'bras bur rig pa'o//gal te don de rang nyid kyis ji ltar rnam par gnas pa rtogs par 'gyur na/ don gcig la shes pa thams cad 'dod pa gcig nyid du nges par 'gyur gyi/ skyes bu'i bye brag gis sna tshogs su myong bar mi 'gyur te/ don gcig la sna tshogs nyid 'gal ba'i phyir ro/ / gal te gcig tu nges so zhe na/ rnam pa ni sna tshogs su zhes bya ba la sogs pa gsungs so/ /srog chags kyi bye brag gis dbang po'i bde ba sdug bsngal nyid du skye ba'i phyir te/ lus dang lces reg pa tsam gyis 'dor ba dang len pa'i phyir ro/ /don mthun par 'dzin pa ma yin pa de'i phyir rang gi rnam par rig pa'i rang rig pa'i bdag nyid kho na don rtogs pa yin no//rtogs pa de'i sgrub par byed pa ste/ tshad ma yang yul gyi rnam pa nyid yin te/ rnam pa de'i sgo nas rang rig par gzhag pa'i mtshan nyid yin pa'i phyir te/ rnam pa ji ltar snang ba ltar shes pa 'di'i rnam par gzhag pa'i phyir yin gyi/phyi rol gyi don gyi dbang gis ni ma yin te/ de la 'dod pa dang mi 'dod pa sna tshogs 'gal ba'i phyir ro/ /de ltar na rtogs pa 'di rang rig pa yin yang phyi rol las skyes pa'i phyir de'i 'bras bu yin pas na don rig par blta bar bya'o/ /rnam pa dang rtogs pa gnyi ga'ang don gyi 'bras bu de nyid kyi phyir tshad ma dang 'bras bu dag yul tha mi dad do//de ltar phyi'i don khas blangs nas tshad ma la sogs pa smras kyi/ don dam pa'i rang bzhin sems pa na/ don mi rigs par sngar bsgrubs pa'i phyir/ don rig blo de'i bdag nyid yin pa'i phyir ro//rang nyid rig pa sngon po la sogs pa de ltar rab tu snang ba'i shes pa sngon po de 'dra ba'am/ de las gzhan te sngon po ma yin pa de 'dra ba'am ste/ sngon po med par rang nyid nang gi byed pa de ltar snang ba yang rung ba'o/ /yang 'dod pa dang mi 'dod pa dag phyi rol la med kyang shes pa 'dod pa dang mi 'dod par snang ba'i phyir don dang mi 'dra'i shes pa de snang ba ni don las gzhan 'dra ba'o//don dang 'dra ba nyid med kyang 'on kyang shes pa de skyed pa'i rgyu'i don phyi rol de yang de'i don du 'dod pa yin te/ khas blangs pas gzhal bya ste yul du gzhag pa yin no/ /gal te shes pa 'dra bar nges par mi 'dod na rgyu tsam gyis ji ltar shes pa des don gzung bar 'grub ce na/bden zhes bya ba smos te 'dra ba med pas na don gzung ba zhes bya bar mi 'gyur ba de ni bden te don gzung ba zhes bya bar sgrub par byed pa med la/ de la gnod par byed pa ni sngar bstan pa'i phyir dang 'og nas kyang ston par 'gyur bas/don gzung ba zhes bya ba 'di 'dra bdag la'ang shes pa med de/ 'on kyang rang nyid rig pa zhes bya bar tshad mas gnas so zhes bya ba'i don to/ /gal te yul kho na'i rnam pa 'ga' zhig nang du ste/ blo la yongs su gcod de rtogs pa na yang rnam pa de rang gis rig par skye bas na yul dang rtogs pa dang tshad ma dag nye bar mtshon pa ste ngo shes par 'gyur ro//de la yang phyi rol gyi don med kyang / tshad ma'i gzhal bya 'bras bu yi/ /rnam gzhag log pas de bslad pas/ /gzung dang 'dzin dang nyams myong zhes/ /dbye ba rtogs pas mtshon de shes par 'gyur ba'o//gzung ba dang ni gzhal bya'o/ /'dzin pa ni 'jal byed do/ /rig pa ni 'bras bu'o/ /de dag ni 'khrul bas ji ltar mthong ba bzhin du byas te/ 'khrul ba las gzhan du yang dag par na rang rig pa'i dngos po gcig cig la gzung ba dang 'dzin pa dang rig pa mtshan nyid tha dad par rtogs pa/ji ltar bden pa'i rnam pa yin/ /de bden na shes pa gcig pa nyid ni nyams par 'gyur ro/ /shes pa de gcig nyid yin na gzhan rnam pa de'i gzhan de du ma nyid kyang nyams par 'gyur ro/ /gal te rnam pa rnams kyis dben pa'i shes pa gcig yod do zhe na/de ni med do/ /gcig gi bdag nyid ma mthong phyir/ /de nam yang myong ba med do/ /de lta bas na gcig pa nyid du gzhag pa'i rgyu tshad mas bdag nyid tha mi dad par mthong na gdod blo yis tha mi dad par rtogs kyi/ gzhan du ma yin pa'i phyir rnam pas dben pa'i shes pa gcig pu nyid ni khas mi blang ngo //de ltar rnam pa dang bcas pa dang / rnam pa med pa gnyi ga yang mi 'thad pa'i phyir rnam par shes pa smra ba yang mi gnas pas ngo bo nyid med par 'jug pa'i phyir/ gang gis dngos po rnam dpyad na de'i zhes bya ba la sogs pa gsungs so//gal te 'khrul pa'i rgyu chos mthun pa mthong ba dang / yul mi gsal ba la sogs pa phyi rol gyi rgyu la ltos nas 'khrul par 'gyur te/ dngul g.ya' dkar po yod pa dang 'dra ba mthong nas nya phyis la 'khrul pa lta bu'o/ /phyi'i rgyu med na ni yul med pa'i 'khrul pa med na/shes pa rang rig pa gcig pu 'di la chos mthun pa mthong ba de/ shes pa gcig pu nyid gang la yang gzung ba la sogs pa'i bye brag dang 'dra ba de dag tu gnas pa med pas/ 'gro bas tha dad pa der mthong ba med pa'i phyir tha dad par 'khrul pa mi srid do zhe na/ 'di yang yin mod kyi zhes bya ba la sogs pa smos so/ /gal te tshad ma la sogs pa'i zhes bya ba 'dri ba 'di ni sngar gsal zin mod kyi/ lan gzhan bstan pa'i phyir yang nye bar bkod do/ /zla ba gnyis pa la sogs pas ni skra shad la sogs pa'o/ /sngon po dang / de shes pa dang /zla ba gnyis pa dang / de shes pa 'di dag las rnam pa gcig mi dmigs na gzhan dmigs pa yod pa ma yin no/ /de ltar lhan cig dmigs par nges pa de rang bzhin tha dad pa la rigs pa ma yin te 'brel pa med pa'i phyir ro/ /gal te gzugs dang snang ba dag 'brel pa med la lhan cig dmigs par nges pa yang yod do zhe na/gzugs dang snang ba dag ni gzugs shes pa de skyed pa la lhan cig byed pas nus pa 'thob pa'i mtshan nyid kyi 'brel pa yod do/ /snang bas mig gi dbang po'i nus pa skye ba'i mtshan nyid yod pa'i phyir snang ba med na gzugs dmigs par mi 'gyur te/de'i phyir 'bras bu gzugs dmigs pa la rgyu snang ba mi 'khrul pa'i phyir lhan cig dmigs pa nges so/ /de nyid snang ba dang gzugs dag ces bya ba smos te/ gzugs dang snang ba dang lhan cig pa nyid gzung ba'i mtshan nyid du 'gyur gyi/lhan cig ma yin pa ni mi 'gyur ro/ /yang na de dag lhan cig dmigs par nges pa nyid ma yin te/ gzugs med pa'i snang ba'i nam mkha' 'ba' zhig mthong ba'i phyir dang / byi la sogs pa srog chags kyi bye brag gis mun pa na yang gzugs la dmigs pa'i phyir ro//lhan cig dmigs par nges pa nyid ma grub par 'dod pas gal te zhes bya ba smos te/ shes pa'i rgyu yin pa'i phyir dus snga ma yin pas yul ni sngar dmigs la/ yul de ni yang dag par myong ba'i shes pa ni phyis dmigs so zhe na/ dmigs par byed pas dmigs pa ste shes pa'o//de yul dmigs pa'i dus na rang rig pa'i mngon sum ma yin na/ yul de mthong ba yang rab tu mi 'grub po/ /yul mthong ba ni ma yin gyi yul yod pa tsam gyis so zhe na/ yul yod pa tsam gyis yul la shes pas dmigs pa ni ma yin no//'on kyang yul de la dmigs pa'i shes pa yod pas so/ /shes pa de yang rang rig pa'i tshad mas grub pa ma yin pas bden pa'i rgyu mtshan can te/ tshad ma'i rgyu can gyi yul dmigs pa'i tha snyad mi 'grub po/ /shes pa de ma grub na de yul yang yod par mi 'grub ste/mi rtogs pa'i phyir 'gro ba'i bye brag sna tshogs ni nus par te mi rtogs par 'gyur ro/ /gal te yul dmigs pa'i shes pa phyis byung ba gzhan gyis yang dag par myong ngo zhe na/ de lta na yul de ji srid bdag nyid dmigs pa ste/ rang gi rnam par shes pas gzung bar rung ba'i tshe na mi 'grub ste/rang gi shes pa grub pa ma yin pa'i phyir dang / shes pa phyi mas yul las gzhan de'i shes pa'i tshe ni yul de rtogs pa 'grub pas/ yul rang dmigs kyang yul de ma 'grub la/ de las gzhan shes pa dmigs pa'i tshe ni ma 'grub pas/rang dmigs pa na ni mi rtogs la gzhan dmigs pa'i tshe rtogs so zhes bya ba phyin ci log go/ /shes pa gzhan gyis myong ba khas blangs te bshad nas/ da ni gzhan gyis myong ba nyid bkag pa'i phyir yang dag par myong ba gzhan zhes bya ba smos te/ rang rig pa khas mi len na shes pa de phyi ma de yang mi dmigs pa nyid yin pas de yang rang gis mi 'grub pas/rang yang dag par myong ba sgrub par byed pa ma yin pa'i phyir/ rang rtogs par bya ba'i phyir dmigs pa gzhan gyi rjes su 'brang ba ste/ de yang ltos par 'gyur ro/ /dmigs pa gsum pa de yang gzhan gyi rjes su 'brang ba'i rim gyis dmigs pa'i mtha' rtogs pa'o//shes pa rang rig pa yin na/ de nyid kyi yul yang rig pa des na shes pa dang de yul lhan cig dmigs pa nges pa 'grub ste/ yul dang shes pa gcig nyid yin pa'i phyir de 'grub pa nyid kyis de yang grub pa'i phyir rim gyis dmigs par byed pa 'gal ba'i phyir ro//de grub pas grub pa yang de dag bye brag med pa'i phyir ro/ /de ltar na rig par bya ba med pa'i phyir yang dag par rig pa nyid du mi 'gyur ro zhe na/ yang dag par rig pa zhes bya ba yang yang dag par rig pa de'i bdag nyid yin pas na rang de ltar gsal ba'o//gsal ba de rang las gzhan gang gi yang gsal byed ma yin te/ de'i rig pa'i cha'i bdag nyid rig pa bzhin no/ /rig pa'i cha de las kyang sngon po'i cha de don gzhan yin par rig pa ma yin no/ /sngon po la sogs pa shes pa de'i bdag nyid du gyur pas de ltar gsal ba na'o//yang 'khrul pas gnyis su rig pa'i phyir rang dang gzhan gyi bdag nyid gsal bar byed pa yin te mar me bzhin no/ /gzhan yang gsal bar byed pa de'i phyir yul 'dzin pa yang yin la/ rnam pa yang yin pas 'dzin pa'i rnam pa ste/ des yang dag par myong ba sgrub par byed pa 'dod do//yul gyi rnam pa de las yul myong ba'i ngo bo de rnam par gzhag pa'i phyir te/ yul dang 'dra ba med na shes pas de myong ba mi rung ba'i phyir ro/ /yul dang de'i tshad ma bstan pa de la 'dod chags la sogs pa rig pa rnams ni/ rang nyid yul la tshad ma nyid rnam gzhag de ni rang rig pa thams cad la kun du sbyar ro//rang rig pa de la yang myong ba'i bdag nyid yin pa'i phyir/ de bdag nyid rig par nus pa yin phyir de'i nus pa tshad ma'o/ /bdag nyid gzhal bya rang rig 'bras/ /nus pa zhes bya ba de nyid ci zhe na/ 'khrul pa'i rnam pas bsdus pa ste 'dzin pa'i rang bzhin no//de yang bdag nyid yongs gcod de bdag nyid 'dzin pa'i mtshan nyid de/ bdag nyid gcod pas nus pas nus pa zhes kyang yongs gcod ces bya ba la sogs pa'i ming du slob dpon gyis mdzad do/ /de ni rang bdag rig pa'i tshad ma'o//de ni rnam par shes par smra ba dang phyi rol gyi don du smra ba dag gis thun mong du bstan nas/ phyi rol gyi don du smra ba'i dbang du byas te/ phyi'i don kyang zhes gsungs te/ de zhes bya ba ni lhan cig dmigs pa nges pa dang rig par bya ba dag gis so/ /phyi'i don kyang lhan cig dmigs pa nges pa rang rig par bya bas zhes bya ba'i gtan tshigs dag las ni/sngon po la sogs pa blo'i snang ba dang / de rig pa dag tha mi dad par grub po/ /blo la snang ba de las gzhan pa phyi rol yod do zhes bya ba gang las she na/ mig dang / snang ba dang shes pa dag nus pa'i rgyu gzhan yod kyang /sngon po'i rnam par shes pa grub pa med na/ rgyu de dag las gzhan zhig ma tshang bar rtogs par bya ba yin la/ de ni phyi rol gyi don sngon po yin par 'gyur ro/ /ldog pas phyi rol sgrub pa 'dis gang gi tshe rnam par shes par smra ba dag nang gi nye bar len pa'i dngos po'i bye brag gis byas pas 'bras bu sngon po shes pa ldog pa yin par mi smra na phyi rol 'grub par 'gyur ro//bag chags mi brten pa ni shes pa mtshams sbyor mi nus pa ste/ mthong ba'i shes pa dang prad pa'i shes pa 'dra bar skyed par mi nus pa'o//mi mkhas pa ni bstan bcos goms par ma byas pa'o/ /gzhan ni tshad ma'o/ /bag chags brtan pa ni mthong ba dang mthun pa'i shes pa'i rgyun skyed par nus pa'o/ /'khor ba kun du ni thams cad mkhyen pa nyid ma thob pa'am/ mya ngan las 'das par ma zhugs kyi bar du'o//mi slu ba dang mi 'bral bar 'jug pa'i phyir ro/ /tha snyad ni 'jig rten pa'i grags pa la ltos te'o/ /gal te 'jig rten pa'i tha snyad kyis tshad ma'i mtshan nyid yin na/ 'jig rten nyid kyis rtogs pa'i phyir de'i don du bstan bcos rtsom pa don med do zhe na/de lta yin na yang tshad ma'i mtshan nyid 'di la yang pha rol rigs pa can la sogs pa blun po dag mkhas pa'i nga rgyal gyis tha snyad dang 'gal ba'i bstan bcos kyis 'jig rten dag slu bar byed pa dag bsal ba'i phyir tshad ma'i mtshan nyid kyi bstan bcos bya ba ni rigs pa nyid do//tshad ma'i mtshan nyid thams cad tha snyad pa yin nam zhe na/ don dam pa'i tshad ma ni thos pa'i don rigs pas bsams pa'i rang bzhin gyi shes rab goms par byas pa las goms pa yongs su rdzogs na/ tshad ma dag gi don 'dzin pa'i phyir/ rnam par 'khrul pas dben pa/ dri ma ni zag pa ste bral ba'o/ /de dag nyid kyi slu ba med pa'i phyir bstan pa yin la/ de yang rtags la mi brten par yang dag pa'i don mngon sum du byed pa'o/ /tshad ma rnam par nges pa'i 'grel bshad las mngon sum gyi le'u ste dang po'o// //mngon sum la ni gzhan gyi don gsal bar mi bya ste/'di ltar 'di na'o de na'o zhes bya bar zad pas rtogs par sla ba'i phyir ro/ /rang gi don ni shes pa'i bdag nyid do/ /gzhan gyi don ni brjod pa'i mtshan nyid do/ /rang gi rgyud la yod pa'i shes pa the tshom yin pa'i phyir/ gzhan gyis go bar byed pa ma yin la/bdag nyid kyis rtogs zin pa'i don gzhan la brjod pa'i phyir gzhan ma yin pa bdag nyid kyis go bar byed pa ma yin no/ /gal te rjes su dpag pa tshul gsum pa nyid du bye brag med pa'i phyir sgra ste gzhan gyi don gyi rjes su dpag pa logs shig tu brjod par mi bya'o zhe na/don gyi bdag nyid kyi tshul gsum ni rtags can go bar byed la/ rtags can de'i rtags ni tshul gsum pa'i sgra yis go bar byed pas so/ /gal te 'jug pa'i bye brag yod kyang sgra'i bye brag gi mtshan nyid logs shig tu smra bar mi bya ste/ rang gi don gyi mtshan nyid gsum rtogs pa nyid kyis/de'i sgras mtshan nyid kyang rtogs pa'i phyir te/ 'di ltar rtags gang phyogs gang la mthong ba'i bsgrub par bya ba dang 'brel pa rtogs pa'i rtags de nyid la bsgrub par bya ba'i dngos po rtogs par byed pa zhes brjod la/ de la go bar byed pa rtags kyi mtshan nyid rang gi don gyi bstan bcos las bstan pas/logs shig tu bstan par 'dod pa'i ngag gi rim pas bstan par byas pa nyid de/ rtags kyi rang bzhin gsum las gzhan 'dir ma bstan pa brjod pas ni go bar byed pa'i chos gtan tshigs bstan par mi 'gyur ba'i phyir ro/ /de'i phyir ston pa po gang dag rtags kyi mtshan nyid kyi don gang rtogs pa de smra bar shes pa ste/lkugs pa la sogs pa ma yin pa'i smra ba'i tshig de nyid rtags kyi mtshan nyid rtogs par byed pa'i brjod pa yin gyi/ mtshan nyid gsum brjod pa las gzhan pa'i brjod pa thabs kyi man ngag la ltos pa med do zhe na/mtshan nyid rtogs pa tsam gyis mtshan nyid gsum ston par shes na de nyid kyis gzhan gyi don gyi mtshan nyid shes pa de ni bden na/ de lta mod kyi mtshan nyid shes kyang de ston pa'i ngag gi rim pa mi shes pa'i byis pa la bstan pa'i thabs 'di'o/ /khyab pa dang ldog pa med pa des med na mi 'byung ba ma smras pa'i phyir ston pa'i tshogs ma yin la/de bzlas pa'i dpe dang bsgrub par bya ba dag bzlas te brjod pa'o/ /de dag ni dgos pa med pa'i phyir rjod par byed pa ma yin pa'o/ /'bras bu brtags pas tshad ma yang rtogs par nus pa'i phyir ma smos so/ / don dang ji ltar 'brel zhe na/ rang bzhin dang zhes bya ba smos te/ rang bzhin ni tha dad pa med pa'o/ /bdag nyid grub pas ni 'bras bu'o/ /bdag nyid rgyu med na rang bzhin dang 'bras bu dag mi 'byung ba de bzhin du de dag med na de dag la skyes pa'i rtags shes pa med par 'gyur bas/ rtags shes pa des rab tu bskyed pa'i rjes su dpag pa ngo bo dang rgyu rtogs pa yang med par 'gyur ba'i phyir ro/ /rang bzhin dang 'bras bu med na mi 'byung ba blta bar bya ba'i dngos po sngon po la sogs pa dang / mig dang / snang ba dang / yid la byed pa dag ma tshang ba med par yod pa ste/bsgrub par bya ba log pa bstan to/ /de mthong ba med par mi 'gyur te dmigs pa kho nar 'gyur ba'i phyir rtags mi 'byung bar bstan to/ /de ltar brgyud de don dang 'brel ba'i dngos po rjes su dpag pa la so sor snang ba de nyid don rang gi mtshan nyid yin par ni rigs pa ma yin te/ rjes su dpag pas gzung ba'i don de mngon sum la gsal ba don bya ba byed pa gzhan du snang ba'i phyir ro/ /rtags gang dag rang bzhin dang skye bas 'brel ba'i dngos po sngar bshad pa'i ji lta ba de 'dra ba'i rtags ni rtags shes pa'i blo'i rgyu yin la shes pa des skyed pa ni rtags can blo ste rjes su dpag pa'o//de'i phyir ji bzhin dngos la ste/ 'brel pa ji lta ba'i dngos po la 'brel to/ /dngos su'am zhe na/ 'di ltar rtags can rtags blo dag /brgyud de dngos dang 'brel phyir ro/ /zhes gsungs so/ /'brel pa de'i phyir slu bar byed pa min no/ /'o na 'khrul pa ji ltar rung zhe na/rjes su dpag pa de'i snang ba'o/ /yul de don rang gi mtshan nyid stong pa la/ de'i mtshan nyid du zhen pa las 'khrul par gzhag par byas te/ de la mi slu ba yang rnam par bslad pa'i sgo nas so/ /gal te bslad pa yin na ji ltar tshad mar 'gyur zhe na/ rnam pa phyin ci log pas ldog pa'i shes par dbyer med kyang bye brag tu don byed pa las/ji ltar rigs par nor bu 'thob pa'i don byed pa ni/ yang dag par yin pa la cig shos ni log pa nyid do/ /de bzhin du rjes su dpag pa dang de med pa dag kyang 'khrul bar bye brag med kyang / mthong ba'i don dang phrad pa'i don byed pa dang 'brel pas rjes su dpag pa tshad ma nyid du rnam par gzhag go//don byed pa don du gnyer ba rnams kyis 'di gnyis bstan bcos la dpyad par bya'o/ /ji ltar rigs pa ni bde ba'i rgyu blang bar bya ba nyid dang / cig shos spang bar bya ba nyid du'o/ /nye bar gzhag pa ni rtogs par ro//de dag gi rgyu tshad ma cung zad yongs su brtag pa'i rtog pa dang ldan pa mkhas pa ni/ 'bad pa 'bras bu med pa la sogs pas nyon mongs pa nyid du mi 'gyur ro/ /gal te rjes su dpag pa'i yul gyis don bya ba sgrub pa nyid ma yin pas na ji ltar de brtag par bya ba yin zhe na/rjes su dpag pa so sor snang ba zhes bya ba smos te/ de ni rnam par rtog pa'i yul spyi yin la/ de la yang don byed pa'i dngos po 'gags kyang spyi de mi 'gag pa'i phyir don byed pa'i dngos po nyid so so ma yin no/ /gal te de ltar na spyi khas len tam zhe na/ des zhes bya ba smos te/don grub par med pas des na'o/ /spyi ni yod kyang kun rdzob nyid yin gyi don dam pa'i don nyid ni ma yin no/ /gal te de nyid kyi phyir rjes su dpag pa tshad mar mi 'gyur ro zhe na/ dngos po mtshan nyid la zhes bya ba smos so/ /mi slu ba yang ci'i phyir zhe na/ yang de dang 'brel pa'i rtags zhes bya ba smos so//de'i phyir mi slu ba nyid do/ /yang na de ltar rjes su dpag pa'i so sor snang ba dang mi slu ba'i yul gnyis su bstan to/ /yang don de gnyis su slob dpon phyogs kyi glang pos kyang bstan to zhes bstan pa'i phyir yang de dang 'brel ba'i zhes bya ba smos te/ don byed pa sgrub pa de dang 'brel pa'i rtags kyis bskyed pa'i snang ba ni rtags kyi dngos po ste/ 'bras bu la rgyu nye bar btags nas/ rjes su dpag pa la so sor snang ba'i yul la bya'o/ /de la ltos te slob dpon gyis kyang don dbye ste/ yul gyi dbye ba gsungs she na'o/ /zhe'o zhes bya ba ni slob dpon gyi tshig yin par ston pa'o//bye brag med pa ni gcig pa nyid do/ /de dgag pa ni gcig pa ma yin pa'o/ /de ltar na rjes su dpag pa dang mngon sum gyi so sor snang ba'i yul dag gcig pa ma yin te/ dngos bo dang dngos po med pa yin pa'i phyir ro zhes bya ba yin gyi/ de dag so sor snang ba'i yul mang ba ste/dngos po gnyis su bstan pa ni ma yin te/ mang po nyid du bsgrub pa ni dngos po'i yul ma yin na/ rjes su dpag pa rnam par rtog pa'i so sor snang ba ni dngos po med pa'i phyir ro/ /gal te rnam par rtog pa'i yul spyi yin pa'i phyir yul gnyis yod do zhe na/spyi yang dngos po las gzhan nyid du brjod par bya ba ma yin te/ gzhan nyid ni dngos po'i yul la yin pa'i phyir ro/ /gang zhig bsregs pa'i dgos pa dang ldan pa'i don me shes par 'dod pa la me de las bzlog pa ma yin pa las bzlog pa de me tsam mo//de las zhes bya ba rtags las so/ /rang gi mtshan nyid kyi bye brag so sor mi 'dzin pas so/ /smig rgyu la chu bzhin du dngos po yod pa shin tu ring ba ste/ brgyud pas kyang ma 'brel pas ni ma yin no/ /rtags rtogs pa'i blo yang du ma spyi'i yul can ni yin pa'o/ /ci'i phyir zhe na/rtags ni rjes su 'gro ba la brten pa'i phyir/ rang gi mtshan nyid la ni rjes su 'gro ba mi srid pa'i phyir ro/ /cig shos ni zhes pa ni mngon sum mo/ /yang zhes bya ba ni rang gi yul las gzhan brtags bsams pa'o/ /des mi nus pa'i phyir ro zhes bya ba ni rtags des rang gi mtshan nyid ston par ro//tshig le'ur byas pa'i cha rtags las don mthong ba'o zhes bya ba bshad nas/ tshul gsum zhes bya ba cha snga ma bshad par bzhed pas/ tshul gsum po de yang zhes bya ba la sogs pa smos so/ /nges pa mtha'i tshig 'di ni snga ma gnyis la yang sbyar bar bya'o/ /'dir zhes bya ba ni tha snyad du byed pa'i dus dang khyab pa rtogs par byed pa'i dus dag spong bas gtan tshigs kyi mtshan nyid byed pa'i dus 'dir ro zhes bya bar ston to//'dir yang rjes su dpag pa zhes bya ba'i sgra'i don gtso bo ni chos can dang sgrub par 'dod pa'i chos sdom pa yin pas de nyid gzung na rtags dgos pa med pa zhig gis mtshan nyid du bstan par 'gyur te/bsgrub par bya ba sgrub pa la yod pa zhes pa smras pa'i phyir ro/ /rtags rjes su dpag pas bzung ba'i dpyod pa pa dag la sgra la byas pa nyid rkyen gyi bye brag gis tha dad pa can nyid kyis sgrub pa lta bu'o/ /rjes su dpag par bya ba la yod pa nyid tshad mas grub pa yin pa de bzhin du de dang mthun pa nyid la yang ngo //rjes su dpag par bya ba nyid la yod pa zhe na ni chos can bye brag can gyi chos su bstan pas gzhan mthun pa'i phyogs su 'jug par mi 'gyur la/ gal te rjes su dpag par bya ba kho na'i chos zhes ma smras na/ yang de'i chos sam gzhan gyi chos kyang rung zhes bya bar 'gyur gyi/ rjes su dpag par bya ba'i chos nyid du mi 'gyur ro zhe na/ mi ldan pa dang / gzhan dang ldan pa dang / gtan mi ldan pa rnam par gcod pa zhes bya ba'i bye brag gis chos kyi yod pa dang med pa rnam par gcod pa'o/ /ldog par byed pa ste//rnam par gcod pa sgrub pa'i'o/ /tshig gi phrad ni 'dir nges par gzung ba'o/ /ldog par byed pa yang yin la tshig gi phrad kyang yin pas ldog par byed pa'i tshig phrad do/ /de dag kyang gang zhe na/ go rims bzhin du mi ldan pa rnam par gcod pa'i tshig gi phrad ni bye brag tu byed pa dang lhan cig brjod pa ste/de la yod pa kho na zhes pa lta bu'o/ /'di nyid 'og nas ston to/ /gzhan dang ldan pa rnam par gcod pa ni bye brag tu bya ba dang ngo / /gtan mi ldan pa rnam par gcod pa ni bya ba dang lhan cig brjod pa'o/ /gal te 'dir tshig le'ur byas par nges par gzung ba ma smos na ji ltar nges par bya zhe na/nges par gzung bar brjod par 'dod pa yin la/ nges par gzung ba'i sgra ma sbyar kyang nges par gzung ba'i don de rtogs par 'gyur ba'o/ /ci'i phyir snyam pa la/ rnam par gcod pa zhes bya ba nges par gzung ba dag gi 'bras bu yin pa'i phyir te/ ji ltar nag pa gzhu 'dzin zhes smra na/ nges par gzung ba'i sgra ma sbyar kyang / nag pa gzhu 'dzin pa kho na'o zhes bye brag tu byed pa gzhu 'dzin pa dang / tshig phrad pa'i don du go'i/ gzhan du gzhu kho na'o zhe'am/ nag pa kho na zhes ni ma yin no/ /srid sgrub gzhu 'dzin zhes nges par gzung ba'i sgra med par smras kyang srid sgrub kho na gzhu 'dzin no zhes bye brag tu bya ba srid sgrub dang tshig phrad sbyar ba'i don du'o//gzhu 'dzin pa kho na zhe'am/ gzhu kho na zhes ni ma yin no/ /sngon po mtsho skyes zhes smras na/ sngon po mtsho skyes yin pa kho na'o zhes dngos po tsam dang 'brel ba dang / tshig phrad sbyar bar go'i/ sngon po kho na mtsho skyes she'am/ mtsho skyes kho na sngon po zhes ni ma yin pa lta bu'o/ /de la snga ma gnyis ni chos dang chos can gyi bye brag sems pas so/ /gsum pa ni dngos po tsam zhig sems pa ste/ mtsho skyes sngon po mi srid do zhes zer ba la/ mtsho skyes sngon po zhes bya ba srid pa nyid ces gtan med bar 'gog pa'o/ /de ltar na nag pa gzhu 'dzin nam mi 'dzin snyam pa la/ nag pa gzhu 'dzin zhes smras pas gzhu 'dzin pa nyid ces bya ba'i don du go bar bya ste/ gal te mi 'dzin pa yang srid par 'gyur na ngag de don med de the tshom bstan pa'i phyir ro//de bzhin du srid sgrub gzhu 'dzin par grub pa de dang 'dra bar gzhu 'dzin pa yod dam snyam pa la/ srid sgrub gzhu 'dzin ces smras pas srid sgrub kho na zhes go bar bya ste/ de lta ma yin na gzhan yang 'dzin pa srid pa yin na ngag de don med pa yin pa'i phyir ro//mtsho skyes sngon po srid dam mi srid snyam pa la/ sngon po mtsho skyes so zhes smra na/ sngon po mtsho skyes srid pa nyid do zhes go bar bya ba yin gyi/ mi srid pa yang ston pa srid na ni ngag de don med do/ /de'i phyir 'dir nges par gzung ba ma smos kyang der go ste/ ngag gi 'bras bu nges par gzung ba med na ngag don med pa'i phyir ro//gal te de ltar nges par gzung bar ni go bar 'gyur na srid sgrub gzhu 'dzin zhes bya bas mi ldan pa/ rnam par gcod pa kho nar 'gyur ba dang / gnyis pa gzhan dang ldan pa dang gsum pas gtan mi ldan pa kho nar ji ltar 'gyur zhe na/ da la'ang 'gal ba gzhan gcod pa'i//don de rtogs par 'gyur ba ste/ /brjod par bya ba dang 'gal ba yin pa'i phyir/ de kho na dag gcod pa'i don der go bar 'gyur ro/ /gal te de dag kho na ltar 'gal ba yang ji ltar shes she na/ de ltar grags pas zhes bya ba smos te/ gzhan gzhu 'dzin par grags la/nag pa la ni the tshom za ba'i nyan pa po'i skabs kyis dang / srid sgrub gzhu 'dzin par grags la/ de dang 'dra ba gzhan la the tshom za ba dang / mtsho skyes sngon po srid dam mi srid snyam pa'i skabs kyis de dag kho na 'gal ba yin pa'i phyir ro/ /'o na nges par gzung ba ci'i phyir ma sbyar zhe na/sgra ni rjod par 'dod pa'i rjes su 'brang ba'i phyir bsdus te rjod par 'dod pas so/ /des na 'dir yang rjes su dpag par bya ba ni yod pa nyid ces mi ldan pa rnam par gcod pas bye brag tu byed pa'i phyir rjes su 'gro ba med pa'i skyon yod pa ma yin no/ /gal te gzhan dang ldan pa rnam par gcod pa ji ltar 'gyur zhe na/tshig gi phrad pa gnyis pa gzhan dang ldan pa rnam par gcod pa nyid yin pa'i phyir te/ rjes dpag bya ba'ang de mtshungs la/ /yod dang med nyid la med nyid/ /ces gzhan mthun pa'i phyogs med pa la ldan pa rnam par gcod pa'i phyir ro/ /de nyid kyi phyir tshig phrad dang po ni gzhan dang ldan pa gcod pa ma yin te/rang dang gzhan la yang yod par ston pa'i phyir ro/ /gal te de lta ma yin na khyad par du byed pa dang ldan pa'i tshig gi phrad dang po dang / khyad par du bya ba dang ldan pa'i tshig gi phrad gnyis pa dag bye brag med par 'gyur na/ de ltar ma yin te/dang po ni gzhan dang ldan par smra ba'i phyir dang / gnyis pa ni gzhan dang ldan pa 'gog par ston pa'i phyir ro/ /ngag gi 'bras bu nges par gzung ba yin pa des na bsgrub par bya ba'i chos can la sgrub par 'dod pa'i chos yod pa yang bye brag tu bya ba dang / bye brag tu byed pa'i dngos po go bar bya ste/'di la sgrub par 'dod pa'i chos yod pa nyid do zhes bye brag tu byed pa dang lhan cig brjod par ro/ /ma 'brel pa tsam bcad pa des na bye brag tu byed pa ste nges par gzung ba yod kyang mthun pa'i phyogs la yod pa'i phyir rjes su 'gro ba med par mi 'gyur ro/ /mi ldan pa rnam par gcod pa de nyid kyi phyir rjes su 'gro ba med pa tsam gyis spyi yin yang rjes su 'gro ba rtogs pa mi 'grub pa'i phyir bsgrub par bya ba grub pa yang ma yin te//bsgrub par bya ba'i chos de dang mi ldan pa rnam par gcod pa ma grub pa'i phyir ro/ /rjes su dpag par bya ba la'ang / de mtshungs la'ang zhes bsdu ba byas nas so//de lta ma yin na bsdu ba'i sgra don med par 'gyur ro/ /ji ltar drang srong rgyas pas bshad pa stobs bzangs dang yang khyab 'jug nyid ces bya ba lta bu ste/ 'di ni pha rol la grub pa dper brjod pa'o/ /de las khyab 'jug nyid ces smos kyang stobs bzangs nor lha'i bu yin pa nyid mi gcod de bsdu ba'i sgras so zhes bya ba bzhin no//rgyu dang rang bzhin gzung bar bya ba ste/ dmigs su rung ba'i yul dmigs pas ldog pa 'grub kyi 'brel ba las gzhan gyis ni ma yin zhes brjod do/ /mi dmigs pa yang bsgrub par bya ba med pa'i tha snyad du rung ba log na mngon sum 'jug pa'i phyir gtan tshigs mi 'byung ste/med pa'i tha snyad du dung ba ni dmigs par regs pa mi dmigs pa la de yod de yod pa'i 'brel pa can yin pa'i phyir ro/ /gal te mthun pa nyid la yod pa zhes smos pa nyid kyis ldog pa rtogs pa'i phyir med pa nyid la med pa nyid ces smos pa dgos pa med do zhe na/med pa la med pa nyid gtan tshigs yin gyi/ gzhan pa la yang ma yin te/ 'di ltar gzhan pa ni bsgrub par bya ba'i chos las gzhan dang ldan pa yin la/ de lta na ni phyogs dang mthun pa'i phyogs dag kyang mi mthun pa'i phyogs su 'gyur te/ de dag kyang bsgrub par bya ba'i chos las gzhan rdo dang rtswa dag la sogs pa dang ldan pa'i phyir ro//des na de dag la med pa rtags kyi mtshan nyid du 'gyur ro/ /'gal ba la med pa yang ma yin te/ 'di ltar 'gal ba la med pas zhes bya bas ni bsal bar 'gyur te/ 'gal ba kho na la med par zhes bya bar ro/ /de lta na me yin pa'i phyir dro ba'o zhes bya ba gtan tshigs ma yin par 'gyur te/me dro ba dang 'gal ba grang ba'i reg pa kho na las ldog par 'gyur ba de lta na me dro ba dang 'dra bar reg pa btang snyoms pa las kyang ma log pa'i phyir de dang yang 'brel pa srid do/ /de lta na me yin pa'i phyir dro ba'am reg pa btang snyoms pa gang 'grub ma nges pa'i phyir ro//de lta bas na med pa nyid mi mthun pa'i phyogs yin la de kho na la med pa kho na'o zhes nges par bya ba'i phyir ro zhes slob dpon dbang phyug sde zer ro/ /de la de ni de lta ma yin te/ chos gzhan 'jug pas mthun pa'i phyogs la sogs pa nyams pa ni mi srid de/bram ze'i bdag nyid du 'gyur ba de'i rigs las skyes pa yod na dkar sham nyid dang mang du za ba'i chos gzhan dang ldan pas bram ze nyams pa ni mi srid pa'i phyir ro/ /des na bsgrub par bya ba'i chos dang ldan pas mthun pa'i phyogs su gyur ba chos gzhan dang ldan pas kyang ji ltar nyams/ phyogs kyang bsgrub par byar rung bar 'dod pas yul du byas na chos gzhan gyis de nyams pa med do/ /des na bsgrub par bya ba dang mi ldan pa nyid la gzhan zhes bya ste/ de la med pa yang yin no/ /'gal ba mi mthun pa'i phyogs yin pa 'gog pa la yang grang ba'i reg pa kho na dro ba dang 'gal ba ni ma yin gyi/grang ba yang ma yin/ dro ba yang ma yin pa'i reg pa yang phan tshun spangs pa dang ldan pas 'gal ba yin pa'i phyir de las kyang ldog pa nyid la skyon med do/ /grang ba'i reg pa kho na la gtan tshigs 'gog na ni skyon du 'gyur ro/ /'gal ba kho na zhes bya ba ni lhan cig mi dmigs pa kho na'o/ / de dang mthun pa'i phan tshun spangs pa'i rang bzhin dang ldan pa'o/ /de las gzhan pa dang 'gal ba dag mi mthun pa'i phyogs yin pa des na med nyid la med ces mi mthun pa'i phyogs 'di ma bsnan yang skyon med pa'i phyir ro/ /gal te khyed kyi phyogs la bsnan pas ci zhig ston ce na sbyor ba bstan pa'i phyir zhes bya ba la sogs pa gsungs te/pha rol gang dag 'brel ba khas mi len na mthong ba dang ma mthong ba tsam gyi khyab pa smra bar bya dgos pa ltar 'dir ni ma yin te/ 'di ltar khyab pa nges pa can gyi zhes bya ba la sogs pa smos so/ /gcig gis kyang sbyor bar 'gyur bas gnyi ga la sbyar bar mi bya ste dgos pa med pa'i phyir ro//gal te ji ltar ldog pa'i mtshan nyid kyi tshig gis sbyor ba de ltar ston par byed ce na/ med nyid la med par nges pa'i zhes bsnan pa smos pas ni/ bsgrub par bya ba med na med pa tsam ni ma yin gyi/ bsgrub par bya ba kho na la yod pa nyid ces rjes su 'gro ba yang rtogs par bya ba'i phyir ro//de ltar na ldog pas kyang rjes su 'gro ba rtogs so zhes rtogs so/ /de lta ma yin na rjes su 'gro bas ldog pa rtogs pa tsam zhig tu 'gyur gyi/ ldog pas kyang rjes su 'gro ba rtogs so zhes don gnyis pa ni rtogs par dka' ste/ shugs kyi shugs la rag las pa'i phyir ro//mnyan par bya ba nyid ni yod pa yin la dngos po'i chos nyid yin dngos po thams cad las ldog par ni gal te/ mnyan par bya ba dang 'gal te/ mnyan par bya ba dngos po thams cad las ldog na dngos po med par thal bar 'gyur ba'i phyir ro/ /des na mnyan par bya ba de rtag pa'am mi rtag pa gcig la 'jug par dogs pa nyid yin pas na rtag pa'am// mi rtag pa de dag la the tshom za ba yin no/ /gal te de lta yin na ci'i phyir ldog pa can zhes brjod ce na/ rjes su 'gro ba ma mthong ba tsam gyi ldog pa dang ldan par slob dpon gyis gsungs so/ /go bar byed pa'i ldog pa ni sngar gong du rang bzhin dang 'bras bu dag ni ngo bo dang /rgyu log na mi 'byung ba dag yin te zhes bya ba la sogs pa bstan zin to/ /ston par 'gyur ro/ /med pa de yang zhes bya ba ni go bar byed pa'i ldog pa'o/ /bsgrub par bya ba de yod pa kho na la gtan tshigs yod pa ste/ 'brel bas mthong bas so//gzhan dag na re zhes bya ba ni gsal byed de thub pa rkang mig gi mdo'i rnam 'grel byed pa slob dpon dpal chos kyi grags pa'i zhal snga nas dang dus mnyam par byung pa'o/ /gang mi rigs par mthong na zhes bya ba bzar mi rung ba dang bgrod du mi rung bar mthong ba de nyid kyi tshe de spyod par mi byed de/de las ldog pa gsal byed de ni phyugs las kyang phyugs yin te/ chen po yang chen po slob dpon phyogs kyi glang po la smod pa ste/ mi rigs par mthong nas bdag nyid mi rigs pa de nyid la 'jug pas smod pa'i phyir ro/ /de slob dpon nyid skyon chags pa ni ma yin gyi/ bdag nyid mi shes pa ste/ rmongs pa nyid las gzhan ci zhig yin na/ gsal byed de nyid don log pa ste/ med pa la tha snyad mi 'jug par smra ste/ med pa ldog pa'i yul du mi rung ngo zhes so/ /gzhan la med pa'i tha snyad 'gog pa ste med pa las ldog pa mi rung ngo zhes ldog pa'i tha snyad nyid 'gog par byed pas na 'di bdag nyid ni med pa la dgag pa'i tha snyad byed la/gzhan la ni 'gog pa'i phyir rigs pa med par smra ba'i phyir gsal bar rgyal po'i bka' yin no/ /med pa las gtan tshigs mi ldog pas ldog pa ni rtags med pa'o/ /de'i ni ldog pa ni mi mthun pa'i phyogs la rtags yod pa ste/dngos po med pa dngos por ji ltar 'dod par byed/ log pa ni gtan tshigs med pa'o/ /de med na ni yod pa'i dngos po bsgrub par 'gyur ro/ /de nyid bshad pa ni med pa'i dngos po med pa'i phyir na yod pa'i dngos por yang 'gyur te zhes bya'o/ /rab rib can lta bu'i spyod pa ni log par mthong ba'o//la la ni 'dir phyugs long ba ni rnam par bsgyings zhes 'don te/ de lta na ni phyugs long ba zhes bya bas ni shin tu mi shes par ston to/ /rnam par bsgyings zhes pas ni log pa'i nga rgyal can du brjod do/ /gal te mi mthun pa'i phyogs med pa de las gtan tshigs ldog mi 'dod/'o na de la gtan tshigs 'jug par cis mi 'dod/ de la 'jug pa'am ldog pa las phung po gzhan ni mi srid de/ /'jug pa de yang mi 'dod na khyod kyi dgag pa 'di kho bo'i ldog pa ji ltar 'gog par byed de ldog par 'gyur ro/ /ci'i phyir zhe na/ sgrub pa'am ni dgag pa'i zhes bya ba la sogs pa smos so//dngos po med pa 'dir ni dgag pa dang / sgrub pa gnyi ga mi srid pa'i phyir lkugs pa nyid 'thob po// /gzhan yang yod rnams yod par dgag pa med med pa la yang yul med pas dgag pa mi 'jug pas na khyed kyi tshul 'dis 'gro ba med do zhes bya ba med pa'i don ni nyams pa ste tha snyad mi srid par 'gyur ro//gal te dngos po nyid ni dgag par mi nus la med pa yang ma yin gyi/ yul de la med ce na'am dus de na med pa 'gog ce na/ yul dang dus gang ltar yod pa de ni de bzhin du yod pa'i phyir dgag par bya ba ma yin la gang ltar yod pa ma yin pa de lta na yang med pa dgag pa'i yul du mi srid pas 'gog mi byed/de lta bas na dgag pa'i yul ni yod pa dang med pas khyab la de gnyi ga la yang dgag pa'i tha snyad du mi rung ba'i phyir/ dgag pa'i tha snyad thams cad chad par 'gyur ro/ /khyed kyi lugs ltar na ci lta bu zhe na/gzhan du tha snyad chad par 'gyur ba de'i phyir/ sgra don la brten nas te dngos po ma yin pa la'o/ /dngos po nyid ni brjod par mi nus pa'i phyir sngar bzhin no/ /dngos dang dngos med dag gi gzhi ste yul yin no/ /dgag pa dang sgrub pa'i tha snyad thams cad kyi gzhi ni phyi rol min pa ste/blo'i snang ba yin par 'dod do/ /des ni chos can der 'brel par de yod par rtogs so/ /med pa'ang des stong par rtogs par lta'o/ /ci'i phyir blo'i rtogs pa la snang ba kho na dgag pa dang sgrub pa'i tha snyad kyi yul du 'dod ce na/ sgra'i 'jug pa yod pa ste sgras de kho na ston pa'i phyir ro//sgra ston pa de nyid dag gi ste/ sgra'i tha snyad du 'dod do/ /blo'i snang ba las gzhan du tshig don dngos po yin na/ chos gcig gi ni dgag pa ste/ sgra la rtag pa'i chos gcig bkag pa ste sgra la rtag pa'i chos gcig bkag pas mig gi yul la sogs pa thams cad bkag pa grub par 'gyur ro//bsgrub pa ste mi rtag pa nyid gcig bsgrub par byas pas brtsal ba las byung ba'am ma zin pa nyid la sogs pa kun gyis bsgrub par 'gyur te/ de dag de'i bdag nyid du tha dad med phyir ro/ /gal te de dag rten sgra las tha dad do zhe na'ang du ma ste/tha dad pa'i dngos po la dgag pa'am bsgrub pa byas pa ltar te sngon po la dgag pa'am bsgrub pa byas pas ser po la ma yin pa ltar chos can de la bsgrub pa dang dgag pa dag sbyar bar byas par mi 'gyur ro/ /'o na ji ltar dgag pa'am bsgrub pa bya zhe na/sna tshogs chos te ldog pa'i bye brag go/ /de'i gzhir gyur pa'i chos can gcig ni blo la snang ba chos du ma gzhi gcig gi ngo bo ltar snang ba la brten te'o/ /de la sgrub par 'dod pa'i ldog pa'i chos gcig bsgrub pa na chos gzhan dgag pa dang bsgrub pa med pas btang snyoms su byas nas ni/chos gcig sgrub pa byed pa yin/ dgag pa yang gzhan dag btang snyoms su byas nas dgag par 'dod pa de ni stong pa ste/ de las gzhan pa btang snyoms can yin no/ /gal te dngos po cha shas med pa la ji ltar chos so sor dbye zhe na/ tha snyad don de ni dngos min pa rtog blos sbyar ba ste/rtog pa med pa'i snang ba ma yin pa bzhin du'o/ /rtog pa'i blos sbyar ba de'i phyir de kho na nyid ma brtags par rtogs pas byas pa'i chos kyi bye brag la brten nas chos tha dad par rtogs so/ /gal te don rnams la bdag nyid tha dad pa med na rtogs pas ji ltar du 'dzin zhe na/thog med bag chags te 'khrul pa'i sa bon las skyes pa'i blo 'jig rten pa la grags pa'i don ni mkhas pa rnams kyis dor bar mi bya ste/ de la gnod pa mi bya'o/ /de la gnod pa byas na tha snyad thams cad chad par 'gyur ba'i phyir ro/ /phyi'i sa bon cung zad yod de/ de 'bras can te me gang sreg pas de'i 'bras can de/me las gzhan thams cad la de'i 'bras bu med pas/ me gcig las me ma yin pa de dang de rnams don tha dad do/ /tha dad pa de dang de la brten nas nye par bslad pa yin/ me de la yang me ma yin pa de dag las tha dad pa du ma bsgrub pas shes pa dang de dag las tha dad pa kha cig bkag pas me de la tha dad pa kha cig nyams pa lta bur snang ngo //tha dad pa mang po de dang don ldan pa min yang de dag don de'i bdag nyid kyis gcig tu 'brel ba'i phyir/ chos gang gis dgag pa'am bsgrub pa byas kyang don yul du byed do/ /tha dad pa de dag rten dang 'brel pa dang /tha dad pa lta bur snang ba'i bye brag la ni rten pa de/ de'i bdag nyid la med pa'i phyir mi shes pa'i bslad pa ste/ mi mkhas pa dag chos du ma/ rten las tha dad pa nyid do snyam pa'o/ /mkhas pa dag gis ni de sgra'i don tsam nyid du rtogs pas bslad pa ma yin no/ /mtshan nyid gsum dang ldan pa'i mi dmigs pa dang /mtshan nyid gsum dang ldan pa'i rang bzhin dang / mtshan nyid gsum dang ldan pa'i 'bras bu zhes sbyar la phyis de dag la rtags zhes so sor yang sbyar ro/ /de lta na rtags re re yang mtshan nyid gsum pa yin gyi/ mtshan nyid gsum dang rtags gsum dag go rims bzhin du ma yin no zhes bstan par 'gyur ro//gsum las nyung ba nyid ma yin te/ gnyis ni dngos po bsgrub pa yin la de yang rang gi bdag nyid bsgrub pa dang bdag nyid ma yin pa bsgrub pa'i dbye bas so/ /gcig ni dgag pa bsgrub pa nyid kyis so/ /de la snga ma gnyis ni dngos po yang de yin la bsgrub pa yang de yin pas dngos po sgrub pa ste/dngos po nyid gtan tshigs yin gyi/ lung la grags pa tsam dang / rang rigs brtags pa ni ma yin pa'i phyir ro/ /yang na dngos po'i tshul gyis dngos po bsgrub pa yin pa'i phyir dngos po bsgrub pa ste/yod pa'i don gyis yod pa'i don gyi bsgrub par bya ba'i sgrub par byed pa yin pas so/ /phyi ma gcig ni dgag pa'i gtan tshigs te/ ma yin pa dgag pa'i bsgrub par bya ba dang ldan pa'o/ /de yang dgag pa kho na'i gtan tshigs yin pas dgag pa'i gtan tshigs yin gyi/dgag pa kho nas ni ma yin te/ rang bzhin dgag pa la sogs pas bsgrub pas kyang srid pa'i phyir ro/ /dgag pa kho na ni ma yin te/ yod pa bsgrub na rang bzhin gyi rtags su 'gyur ba'i phyir ro/ /de bzhin du snga ma gnyis kyis kyang dgag pa bsgrub na mi dmigs pa nyid du 'gyur ba'i phyir dngos po kho na bsgrub pa'o//gal te ci'i phyir gsum las lhag pa med ce na/ rang bzhin 'brel pa yod na zhes bya ba la sogs pa smos te/ rang bzhin 'brel pa ni gsum po 'di kho na la nges pa'i phyir ro/ /chos dang chos can nyid kyis tha dad pa ni blos yongs su brtags pa yin gyi/mi rtag pa nyid dang byas pa nyid don kyang ni blos brtags pa ma yin te/ gal te de dag kyang blos brtags pa yin na ni don la cung zad kyang mi rten pa'i phyir blo de rang dga' bar 'gyur la/ des ni don mi 'thob pa'i phyir blo bye brag rang dga' ba zhes bya ba la sogs pa gsungs so//dngos kun rang bzhin gyis zhes bya bas ni rang gi ngo bos sam/ rang gi rgyu las so/ /rang dngos ni rigs 'dra ba'o/ /gzhan gyi dngos kyi rigs mi 'dra ba'o/ /des na sgra'i don gyis tha dad par gnas la/ rtags dag kyang gzhan sel bas 'jug pa'i phyir ldog pa'i bye brag tha dad pa 'ga' zhig sgrub par byed kyi rang gi bdag nyid ni sgrub par mi byed de/sgrub par byed pa las gzhan pa'i ldog pa yin pa'i phyir ro/ /sngon dmigs par rigs pa mi dmigs pa'i yul dpe la med pa'i tha snyad kyis khyab pa grub na/ phyis kyang yul de lta bu yod pa la sngon tha snyad grub pa'i rim pas med pa'i tha snyad mi 'khrul pas so//gal te dpyod pa po la sogs pa mi dmigs pa zhes bya ba de la dmigs pa'i shes pa med par dgag pa'i rang bzhin rtags su gyur pas dngos po med pa sgrub par 'dod pa dag ste/ ci'i phyir med pa'i tha snyad nyid bsgrub par bya ba yin gyi med pa ma yin zhe na/mi dmigs pa'i rtags kyis zhes bya ba smos te/ dmigs pa med pa ste/ de la dmigs pa'i shes pa med pa yang ngo / /de lta na shes pa med par sgrub de yang mi dmigs pa kho na yin pa'i phyir med pa yin pas mi dmigs pa gzhan la ltos la/ de yang gzhan la zhes bya ba'i rigs pa thug pa med par 'gyur bas rtogs par mi 'gyur ro/ /gal te dgag par 'dod pa de la dmigs pa'i shes pa med pa mi dmigs pa yin na/ de rang gis grub po zhe na/ de bzhin du dgag par 'dod pa'i yod pa med pa nyid yin pa'i phyir rang gis grub pa'i phyir mi dmigs pa'i rtags don med pa can yin no//gal te 'di ltar sa phyogs la dmigs pa'i shes pa gzhan dmigs pa grub pas dgag par bya ba la dmigs pa med pa'i mi dmigs pa 'grub pa'i phyir mi dmigs pa mngon sum gyis grub pas mi dmigs pa gzhan las ma yin pa de bzhin du gzhan sa phyogs yod pa grub pas gzhan bum pa la sogs pa dgag par 'dod pa med pa yang cis na mi 'grub/rnam pa 'di lta bu zhes bya ba ni dgag par bya bas dben pa'i phyogs dmigs pa yod pa ste/ dgag par bya bas dben pa'i phyogs dmigs pa yod pa dgag par bya ba dang /de la dmigs pa'i shes pa ma yin par dgag pa'i rang bzhin mi dmigs pa'i rtags grub pa nyid kyis med pa rnams te dngos po med pa dang / de la dmigs pa med pa'o/ /med pa de rnams grub pas na dngos po med pa ni bsgrub par bya ba ma yin gyi/ yul mi dmigs pa'i rtags kyis yul can med pa'i shes pa dang sgra dang tha snyad rtogs par byed de sgrub par byed do/ /de yang ji ltar zhe na/ sngon dmigs par rigs pa'i sbrul gnas khang du mi dmigs pas mngon sum gyis sprul med pa'i tha snyad rtogs nas kyang ste/ yang sgrub par 'dod pa'i chos can la tha snyad kyi yul mi dmigs pa mthong ba na sngon rtogs pa'i dus bzhin du dmigs par rigs par mi dmigs pa'i phyir med pa'i tha snyad 'jug pa'i phyir te/dper na sngar ba lang dkar po la nog dang lkog shal la sogs pa'i yul can gyi ba lang gi tha snyad rtogs pa la/phyir ba lang sngon po la lkog shal la sogs pa'i yul mthong ba na tha snyad mi 'grub pa'i blun po la 'di ba lang yin te/ lkog shal la sogs pa 'dus pa'i bdag nyid can yin pa'i phyir ro zhes bya ba lta bu'o/ /sngon mngon sum nyid kyis tha snyad grub pa la phyis yul bstan pas tha snyad grub pa de'i phyir snang ba mi dmigs pa la dpe ma grub par rgol ba yang bsal ba yin no//gal te mi dmigs pa ni med pa rnams kyi med pa grub pa yin no zhes bshad pa dngos po log pa ni med pa yin la/ mi dmigs pa ni mi dmigs pa log pa yin na ji ltar med pa zhes brjod/gang yang dgag par bya ba yod pa dmigs pa'i ste bltar rung ba'i dmigs pa log pas kyang ji ltar med pa 'grub pa yin te/ bltar rung ba yod pa'i shes pa ldog pa mi srid do/ /gal te shes pa log par khas blangs na yang de yod pa ldog par mi 'grub ste/'bras bu de la dmigs pa'i shes pa log pas rgyu de'i yul gyis don log pa ni mi 'grub po zhe na/ dmigs pa'i rgyu can de lta bu zhes bya ba ni dgag par bya ba dang shes pa gcig pa la 'drer rung ba'i phyogs dang / snang ba dang / yid la byed pa dang / dbang po dang / bltar rung ba'i bdag nyid kyi don rnams so//de dag la dgag par 'dod pa'i don dang / de'i shes pa dag yod pa zhes gdags pa yin gyi/ bltar rung ba de na yod pa nyid ni ma yin no/ /de'i phyir mi dmigs pa med par 'grub po/ /ci'i phyir yod pa gdags she na/ rgyu mtha' dag tshang ba la dmigs pa'i yod pa ste shes pa dang /de'i yul dag dmigs pa'i bdag nyid yod pa der mi 'khrul te nges par dmigs pa kho nar 'gyur ba'i phyir ro/ /gal te rgyu tshogs pa yang rgyur 'gyur ba la ltos pa'i phyir 'bras bu dmigs pa mi skyed pa srid pa'i phyir 'khrul pa srid pa ma yin nam zhe na/'bras bu'i dus na ste 'bras bu byed par nus pa thogs pa med pas phyogs la sogs pa'i 'bras bu shes pa dmigs pa'i dus na dgag par 'dod pa yang shes pa de nyid skyed par nus pa thogs pa med par phyogs dang 'dra ba nyid yin pa'i phyir/ rang gi 'bras bu shes pa yod par 'gyur na/da ltar 'bras bu med na de lta bu don rang gi shes pa skyed par nus pa thogs pa med pa can yang med par mi dmigs pas 'grub bo/ /gal te de na dgag par bya ba yod kyang rnal 'byor pa la sogs pa'i mthu'i bye brag gi byin gyi rlabs kyis rang gi shes pa mi skyed do zhe na/ma yin te zhes bya ba smos te/ rang gi dmigs pa skyed par nus pa thogs pa med pa'i dus na ni rang gi shes pa skyed pa'i rang bzhin du grub zin pa'i phyir mthu'i yul las dbang po gzhan du bya bar nus te/ nus pa thogs pa med par rang gi bdag nyid grub zin pa'i phyir de don yod na rang gi shes pa skyed do//gal te dus phyis yul lam dbang po byin gyi rlabs kyis 'dus byas na yang ngo / /de lta na yang nus pa thogs pa med pa'i don ma yin te/ byin gyi rlabs kyis bsgyur du rung ba ni nus pa thogs pa med pa'i rang bzhin ma thob pa yin gyi thob na ni rang gi 'bras bu skyed pa la gags mi nus pas so//des na shes pa dang de'i yul dgag par bya ba'i don ni yod par gdags pas yod pa yin la/ de dag log pa ni mi dmigs pa'i med pa yin no/ /de lta bas na dmigs pa yang med pa zhes brjod do/ /de tsam gyis zhes bya ba ni mtha'i tshogs pa ni 'bras bu 'khrul pa med de/'bras bu dang ldan pas bstan pas so/ /rgyu ni 'bras bu med par yod pa yang srid pas dmigs pa med pa yul med pa mi 'grub po zhes bya ba'i lan yang rab tu brjod pa yin no/ /rgyu mtshan can gzhan ni lkog shal la sogs pa ba lang gi rgyu mtshan log nas bshad par bya'o zhes bya ba ni le'u gsum pa las so//gzhan dag 'gal ba zhes bya ba ni mi dmigs pa las gzhan pa'i rtags kyis dgag pa go bar 'dod pa de bsal ba'i phyir/ ji srid cung zad dgag pa de thams cad ni zhes bya ba smos so//dpyod pa pa gang dag lus dang blo thams cad mkhyen pa la sogs pa dang mi 'gal ba dag gis thams cad mkhyen pa dag 'dod chags dang bral ba dag 'gog par byed pa de dag dgag pa'i phyir yang 'gal ba dag bshad do/ /yang rgyu yang ma yin la khyab par byed pa yang ma yin pa rang gi dmigs pa log pas kyang dgag par byed pa de bsal ba'i phyir rgyu dang khyab par byed pa la sogs pa mi dmigs pa bstan to//skad cig la dbyer med pas so zhes bya bas ni mtha'i tshogs pa ni 'bras bu skyed par byed pa nyid kyi rang bzhin yin pa nyid kyi phyir skyed pa ma yin par byar med de rang nyid grub pa'i phyir la/rang bzhin gzhan du 'gyur du rung na ni de mtha'i rang bzhin du yang mi 'gyur ro/ /mtha'i tshogs pa skad cig ni bsgyur du med pa'i phyir rang bzhin gzhan du bsgyur ba cung zad kyang mi byed na ni gags su yang mi 'gyur ro/ / rtags bzhi par rtog pa dgag pa'i phyir mi dmigs pa de yang rang bzhin mi dmigs pa nyid du 'dus par brjod do zhes gsungs so/ /'di dag thams cad kyang snang ba mi dmigs pa kho na'o zhes bstan pa'i phyir ro/ /'dir med pa dang zhes bya ba la sogs pa smos te/ bltar rung ba'i rgyu dang 'bras bu de rnams dang 'gal ba dag dbang po dang shes pa dang / snang ba zhes bya ba dmigs pa'i rgyu gzhan nye ba ste bltar rung ba kho na dag las rgyu dang 'bras bu la sogs pa ma grub pa dang / 'gal bar grub par rig par bya'o/ /gzhan dag ces bya ba ni bltar mi rung ba'o//de dag la ni rgyu dang 'bras bu'i dngos po yod pa zhes bya bar sbyar te/ 'brel pa'i rang bzhin yod pa'o/ /'gal ba med pa zhes sbyar te/ gzhan med pa ni 'gal ba'i rang bzhin no/ /de dag mi 'grub ces bya ba'i tha tshig go/ /blta bya ni bum pa la sogs pa'o/ /mthong ba med pa'i rgyu ni dbang po'am yid la byed pa'am snang ba dag ma tshang na/dgag par 'dod pa'i don bskal pa'o/ /de dag mi srid pa ni rgyu de dag tshang ba'o/ /de lta bu'i yod pa'i dngos po mi dmigs pas ni dngos po med par rtogs par 'gyur gyi blta bya'i mthong ba med pa'i rgyu gang yang rung ba yod pa mi dmigs pas ni ma yin no//mtha'i skad cig ma nyid yin pa'i phyir mngon sum nyid yin no zhes bya ba ni de lta na rang bzhin 'gal ba dmigs pa nyid du 'gyur ro zhes bya ba'i don to/ /nus pa thogs pa'i rgyu gang yod pa'i phyir grang ba'i reg pa med de/ rtogs pa'i rgyu'i rang bzhin rtogs par mi 'gyur ro//sbyor ba'i bye brag gis rnam pa bcu'o zhes bya ba ni 'dir bshad pa'i rim pa 'gal bas khyab pa dmigs pa yang gzhan du bshad mod kyi/ 'dir ma bshad de le'u gsum pa las skabs su bab pa na ston pa'i phyir ro/ /'gal 'bras la yang zhes bya ba'i sgras ni rgyu 'gal ba'i 'bras bu dmigs pa dang 'bras bu rtags dag la yang ngo //'das pa dang da ltar dang ma 'ongs pa gang gis kyang ma dmigs pa de ji ltar mi rigs pa las med pa ma yin zhe na/ thams cad ces bya ba dus gsum pa'i skyes bu thams cad kya dmigs pa log pa ni snang ba mi dmigs pa 'dir rtags ma yin pa'i phyir te/de lta bu'i rtags ni rgol ba bdag nyid dang gzhan gyi phyir rgol ba gnyi gas mi rtogs so/ /de'i phyir mi dmigs pas 'dir bdag nyid kyi dmigs pa log pa nyid gang 'gog pa'i tshad ma yin te/ bdag nyid kyi dmigs pa log pa ma yin pa bskal pa na yod pa ni mi dmigs kyang yod pa ma yin pa ma yin no//gal te yod pa de la yang mngon sum 'jug go/ /de lta ma yin yang rjes su dpag pa'o/ /de lta ma yin yang lung 'jug ste/ rig byed las ston par 'gyur na gang 'dod chags dang bral ba la sogs pa ni de lta ma yin pa'i phyir med pa nyid do zhe na/ma yin te re zhig bstan bcos te lung ni skyes bu'i don sgrub pa'i thabs cung zad la brten nas 'jug ste/ skyes bu la mkho ba ma yin pa ni yang dag par ma 'brel par 'gyur bas chad ma ma yin par 'gyur te/ 'dod pa'i don ma grub pa med pa'i phyir ro//skyes bu'i don bsgrub pa de la yang de'i skabs su bab pa ma yin pa'i don ma yin pa mang por nges par ston pa ni ma yin te/ ji ltar gling stong pa na yod pa'i 'bras bu dang / me tog la sogs pa so sor nges pa ste/ gzhan dang ma 'brel pa'i bdag nyid gang dag dang /skyes bu rnams kyi sems kyi 'jug pa dag tha dad pa ste/ 'dod pa sna tshogs pa de ltar 'jug pa'i rgyu mtshan gcig tu nges pa med pa ste/ sngon goms pa dang / yul gyi dbang dang / grogs po dang 'bad pa dag la sogs pa sna tshogs par nges pa med pas de dag gis don bsgrub pa'i thabs kyang mi mthun pa cung zad tsam yang med do//de lta bu'i don rnams dus dang yul gyi rnam par gzhag pas tha dad pa dag skabs su bab par rigs pa ma yin te/ de dag ni skabs su mi dgos pa'i phyir ram yang na de dag gi rdzas kyi bye brag so sor nges par bstan par mi nus pa'o/ / de'i phyir de dag ni bstan bcos kyis bstan pa'i yul du mi byed pa'i phyir bstan bcos log pas med par mi 'grub pa'o/ /don so sor nges pa mtha' yas pa de rnams ni bskal pa yin pas rang gi don shes pa la nye bar 'jog par nus pa ma yin pas mngon sum gyi shes pa skyed par nus pa ma yin pa'i phyir ro//de bzhin du zhes bya ba'i sgras ni mngon sum log kyang med pa mi 'grub ste/ yul du mi byed pa'i phyir ro zhes snga ma ltar sbyar ba ston to/ /'byung ba la tshad ma med do zhes mi 'gegs kyi 'on kyang tshad ma srid do/ /de'i phyir tshad ma mthong ba'i phyir spang bar mi 'os so zhes bstan to//ma mthong ba tsam gyis dgag par mi nus pa des na dgag par bya ba 'dir tshu rol mthong ba'i mthong ba ni rang bzhin gyi don nam 'brel pa'i don dag gis mthong ba zin pa ma yin te/ thams cad nges par mi nus pa'i phyir rgyu las 'bras bu skye ba na nges par 'byung bar 'gyur yang rgyu mthong ba tsam gyis nges par mi nus pa'i phyir ma 'ongs pa na 'byung ba'i shes par byed pa ma grub po//des na mthong ba 'di tsam gyis 'bras bu de ma 'ongs pa na 'byung ba med pa ni ma yin te/ sngar ma mthong ba gang dag gi yang brgyud de phyis 'bras bu 'byung ba gsal bar 'gyur ba mthong bas so//des na mngon sum dang rjes su dpag pa med pas med pa mi 'grub po/ /lung gi sgra yang med pa go bar mi byed do zhes sbyar te/ ci'i phyir snyam pa la sgra ni dngos po ci lta ba bzhin du nges par 'jug pa ma yin pa'i phyir ro/ /brjod par 'dod pa de ma thag pa ste/de dang 'brel pa zhes bya ba'i don to/ /gal te 'dod pa dngos po ji lta ba bzhin du 'jug go zhe na/ skyes bu 'dod pa thams cad ni zhes bya ba la sogs pa smos so/ /ji lta ba bzhin gyi don mthong ba la sogs pa'i sgras ni chags pa dang g.yo ba la sogs pa nyes pa zad par bsdu'o//gal te skyes bu de lta bu'i bye brag shes par nus na 'di lta bu'i skyes bu tshig 'di yis don phyin ci ma log par ston to zhes kho bo yang 'dod pa nyid do/ /de lta bas na rtog pa sngon du gtong ba rnams kyis lung de la 'jug par 'dod pas lung yid ches par bya ba yin nam ma yin rtog par byed la/brtags nas rnam par dag pa'i lung la 'jug par byed pa ni don med pa'i ngal ba dang mi 'dod pa gzhan dang phrad pas nyon mongs par mi 'gyur ba nyid do/ /lung gis rang gi rang bzhin brtags pas stong ste/ lung de'i skyes bu brtags te 'jug par byed pa na'o/ /nyes pa zad pa la sogs pa de lta bu ni sems kyi chos yin pas rang bzhin gyis bskal pa'i phyir shes par mi nus pa'i phyir ro//dbang po las 'das pa'i phyir rang bzhin gyi rtags med do/ /rang las skyes pa zhes bya ba la sogs pas ni 'bras bu'i rtags med par ston to/ /bsam pa sngon du btang ste zhes bya ba ni lus dang ngag gi tha snyad kyi skyes bu 'dod pas 'jug go//de rnams zhes bya ba ni chags pa dang bral ba dang chags pa can rnams so/ /bsam pa sna tshogs pa ste dgos pa'i dbang gis chags pa dang bral ba dag kyang chags pa can ltar g.yo la/ chags pa can dag kyang cig shos ltar g.yos pas so//de ltar na yid ches pas bstan pa zhes bya ba'i lung gi tshad ma nyid bsal to/ /yang skyes bus ma byas pa nyid kyi lung rig byed tshad mar 'dod pa dgag par bzhed nas/ gal te skyes bu la brten pa'i ngag ni zhes bya ba la sogs pa gsungs so/ /skyes bu lung phog par ni brda bstan pa'o//de la ltos pa yang yin gyi sgra tsam gyis ni ma yin no/ /gang yang rig byed ni rtag pa nyid du 'dod na rtag tu dmigs pa'am/ yang na mi dmigs pa nyid du 'gyur na/ de lta yang ma yin te res 'ga' bar dmigs pa nyid kyi phyir rtag pa nyid med do/ /gal te rtag tu yod pa nyid yin mod kyi dmigs par rigs pa'i gnas skabs na ni dmigs la de las gzhan pa'i gnas skabs su ni ma yin no zhe na/dmigs pa'i tshe dmigs par rigs pa'i bdag nyid 'thob la/ dmigs par mi rigs pa de'i bdag nyid btang ngo / /mi dmigs pa de'i tshe ni bzlog pa'o//de ltar 'thob pa dang gtong ba dag las rang bzhin gzhan skye ba dang nyams pa zhes bya ba gzhan ma yin gyi de dag nyid yin no/ /de'i phyir rig byed mi rtag pa nyid du grub po/ /gal te rtag na res 'ga' dmigs pa med par thob par 'gyur bas mi rtag pa log na/ res 'ga' dmigs pa ldog par ston to//gal te lhan cig byed pa la ltos pa'i phyir ro zhe na/ lhan cig byed pa des rig byed rtag pa'i phyir bdag nyid bogs byar med pa de la cung zad kyang mi byed do/ /gal te rig byed las gzhan pa'i khyad par byed do zhe na/ rig byed las khyad par gzhan pa zhig byed pa ni rig byed de dang khyad par gzhan de 'brel pa mi rigs pa'i phyir rig byed la ci yang khyad par med do//gal te 'brel pa med par ji ltar shes she na/ de dang 'brel pa yang phan pas yin na rig byed rtag pa'i phyir phan pa byed pa ma yin pa dang / de nyid kyi phyir khyad par phan par bya ba ma yin pa dag ci zhig 'brel/rtag pa de'i bdag nyid kyis phan pa ni mi nus so/ /rig byed de las gzhan pa'i bdag nyid gzhan gyis phan par byed na yang rig byed kyis phan pa byas pa ma yin pa'i phyir/ de'i khyad par du mi 'gyur ro zhes bya ba'i rtsod pa mtshungs so//gal te phan pa de'i phan pa rig byed kyis byas so zhe na/ de la yang rig byed bdag nyid kyis ni ma yin te/ rtag pa'i phyir de las gzhan par 'gyur la/ de la yang phan pa dang don gzhan pa brtag par bya dgos pa'i phyir thug pa med par 'gyur ro/ /gang zhig res 'ga' ba skyes bu'i 'dod pa'i rjes su 'brang ba de ni skyes bus byas pa yin te/de'i phyir sgra ni res 'ga' zhes bya ba la sogs pas ni skyes bus byas par ston te/ skyes bu byed pa dang rjes su 'gro ba nges pa'i phyir/ skyes bus byas par 'dod pa'i bstan bcos bzhin no/ /rig byed kyang res 'ga' ba nyid skyes bu'i 'dod pa'i rjes su 'brang ba'i phyir zhes bya ba'i sbyor ba bstan to//skyes bus brdar byas pa las gzhan du na yang sgra rnams don dang med na mi 'byung ba med pas rang las gzhan pa'i don du bas me rtogs pa lta bu ni med do/ /da ni sgra dang don rang bzhin gyis 'brel pa lung gi tshad mar 'dod pa brtag pa'i phyir sgra yod pa nyid kyis zhes bya ba smos te/gal te don med na sgra mi 'byung ba'i phyir sgra yod pa nyid kyis don gyi bye brag dang 'brel to zhe na/ ma yin te/ sgra'i yod pa nyid tsam ni don thams cad kyi 'brel pa de bye brag med pa'i phyir bye brag gi don mtshon par mi 'gyur ro/ /gal te dpyod pa pa dag / ji ltar dbang rnams don gyis na/ /rung bas thog ma med nas 'brel/ /de bzhin sgra rnams don rnams kyis/ /rung bas thog ma med nas 'brel/ /zhes byas pa yin pas/ gal te dbang po dang don bzhin du zhes bya ba la sogs pa gsungs so/ /gal te dbang po'i don las ji ltar skye zhe na/don de las phan pa byas pa'i dbang po ni rang gi shes pa skyed par byed pa yin pa'i phyir dbang po de lta bu'i don las skyes pa'o/ /de las ma skyes na ni yul gzhan med kyang rang gi yul las shes pa skyed pa ltar rang gi yul med kyang rang gi shes pa skyed par 'gyur ro/ /ci'i phyir rang gi yul de phan pa byed pa yin zhe na/mngon sum la bsnyon par mi nus so zhes bstan pa'i phyir/ 'di la dngos po'i rang bzhin lan 'debs par zhes bya ba la sogs pa smos so/ /de med par zhes bya ba rig byed rtag pa'i phyir don las skye ba de med pas so/ /sgra'ang don 'di'i sgra 'di zhes bya bar mi 'grub la/don kyang sgra la nges pa ma yin no/ /gal te ming gi sgra gang yang don las skye ba med pa'i phyir sgra thams cad kyis don brjod par mi 'gyur ro zhe na/ rab tu sbyar ba zhes bya ba ni 'di'i ming 'di'o zhes sam 'di'i sgra 'di'o zhes brda rab tu sbyor ba'i phyir sgra de ni don dang ldan pa yin te/lus kyi rig byed bzhin te kho bo mdzub mo 'greng ba na don 'dir go bar gyis shig ces bya ba bzhin no/ /sogs pa'i sgras ni rgyal po rtags la sogs pa rtags mtshan gzhan dag gzung ngo / /brda'i dus kyis don de las 'ongs pa ma yin pa ni brda ma byas pa'o/ / yang na de las 'ongs pa ma yin pa ni brjod par 'dod pa de las ma 'ongs pa ste/ brjod par 'dod pa las ma skyes pa'i sgra'o/ /des brdar ma byas pa'i sgra'i don go bar mi nus te/ nam mkha' la sogs pa ni skyes bu la sogs pas so/ /gal te sgra rnams kyi ngo bo don gang las skyes pas de de la nges pa ni ma yin gyi 'on kyang shes pa byed pa'i nus pa las 'di'o de'o zhes go bar byed do zhe na/nus pa de yang don yod na yod la med na med pa dag gi rang bzhin ni rang bzhin de dag gis don dang 'brel pa yin gyi/ gzhan du don med kyang nus pa yod na ni 'brel par mi nus pa'i phyir 'bras bu'i rang bzhin nyid mi gtong ste/'bras bu gzhan du ba la sogs pa dag gi mtshan nyid kyang ngo / /don de las zhes bya ba ni sgra las gzhan pa'i nus pa'o/ /de las don shes pa skye ba'i phyir ro/ /don dang sgra'i 'brel pa yang mi 'grub ste/ sgra las gzhan pa'i nus pas don go bar byed pa'i phyir ro//ma 'brel ba go bar byed pa ma yin pa de'i phyir don thams cad kyi dus thams cad du go bar byed pa gang na nges pa'i rang bzhin du gyur pa nyid ni rang gi rgyu'i rang bzhin nges pa can gyi skyed par byed pa'i dngos po snang bar byed de go bar byed do/ /mar me gzugs las byung ba ma yin yang gsal bar nus pas so zhes bya ba'i don to//gal te ji ltar rang bzhin gyis gsal bar byed pa ma yin zhe na/ 'brel ba yod pa dang med pa mthong ba dang ma mthong ba ste/ de dran pa las sgra dang rtags dag gis rang gi don gyis yul rtogs par byed do/ /mang po mthong ba la zhes bya ba ni sgra gcig la don mang po mthong ba ste go'i sgra lta bu'o//de la yang don gcig tu blta bar mi nus te rtogs par mi nus so/ /yang dang yang ste don gzhan dang gzhan mthong na yang de dag kyang yin te/ khyad par gzhan mthong nas yang sgra de don gzhan du sbyor bar byed pa ni phyin ci log yin te/sgra'i don snga ma las bzlog par 'gyur ro/ /de'i phyir sgra'i don la de ltar the tshom za ba nyid srid do/ /de ltar don du ma la yang ji ltar 'jug ce na/ brda'i dus na ji ltar mthong ba'i don ni rtogs la mthong ba gzhan du gyur pa ni sgra de nyid don gzhan la brdar byas pa'o/ /de ltar na don gzhan de yang 'dzin par 'gyur ba'i phyir sgra don du ma dang ldan pa'o//de nyid dper brjod pa ni ji ltar ka li zhes bya ba la sogs pa smos so/ /brda'i dbang gis 'jug pa de'i phyir brda'i 'brel pa mthong ba dang ma mthong ba nyid la ltos nas so/ /don gags mi byed pa'i phyir don ni kho bo sgra 'dis brjod par mi bya'o zhes mi spong bas so//'khrugs par 'gyur ro zhes bya ba ni don sna tshogs 'gyur ba'o/ /dpyod pa pa 'di dag ni skyes bu thams cad 'dod chags la sogs pa dang ldan par 'dod pas thams cad mkhyen pa med par rig byed kyi don phyin ci ma log par bdag nyid kyis kyang ma rtogs la/gzhan gyis lung phog ste bshad pas kyang mi rtogs te de yang 'dod chags la sogs pa dang ldan pa'i phyir ro/ /rig byed nyid kyang bram ze'i don ni 'dir yin te 'di ma yin no zhes zer bas de nyid kyis kyang mi rtogs so/ /de ltar na brda'i dbang gis don sna tshogs la de la 'gog pa med pa'i phyir/mtho ris 'dod pas me la sbyin sreg sbyin zhes bya ba rig byed kyi tshogs 'di sgra'i nus pa ni 'di lta bu ste/ me ni ag ni ste skad kyi dbyings las a ge ga ste zhes bya ba la sogs pa 'gro ba'i don to/ /de ltar na khyi yang 'gro ba'i phyir 'gro ba'i sgras bstan to/ /sbyin sreg ni ho tra ste/skad kyi dbyings las ho ni da na a da na zhes 'dren pa na a da na'i bza' ba ste/ sha yang bza' ba yin pa'i phyir/ a da ni sgras bstan to/ /sbyin ni dzo ha yAd de 'dir ho'i sgra snga ma dang 'dra bas bza'o zhes bya bar 'dren pas na khyi sha za zhes bya bar 'gyur ro/ /gal te 'jig rten la grags pa ste sgra'i nus pa ji lta ba bzhin ni ma yin no//sgra'i don khyi sha bza' zhes bya ba yang yin pas don du ma yin pa las cig shos bor te grags pa kho na btus pa de ji lta bu grags pa'i don yin gyi cig shos ni ma yin no zhes bya ba'i khyad par ni mi snang ste/ dbang pos mi gsod do/ / 'on kyang grags pa kho na 'di'i don yin no zhes bya ba de shes pa dbang po las 'das pa'i don mthong ba'i thams cad mkhyen pa'i skyes bu 'ga' yod dam zhes bya ba'i don to/ /gzhan yang sgra'i nus pa sna tshogs pa las grags pa 'di kho na'o zhes mngon sum gyis ni mi 'grub po/ /de'i phyir sgra dang mngon sum gnyis tshad mar 'dod pa'i phyogs bsal lo//rig byed gcig tshad mar 'dod pa ni shin tu yang bsal lo/ /gal te gzhon nu ma len la sogs pa sgra dang mngon sum dang rjes su dpag pa gsum du smra ba yang bsal te/ rig byed ni shin tu lkog tu gyur pa'i don la dgongs pa yin la/me'i sbyin sreg bya'o zhes bya ba'i don 'jig rten gyi grags pa kho na yin no zhes bya ba'i rtags kyang yod pa ma yin pas dbang po las 'das pa'i don yin no/ /gal te de ltar sgra'i don ma grags par smra ba med do zhe na/ gzhon nu ma len gyis mtho ris kyi sgra ni 'dod pa'i dga' ba yin par bshad de lha'i don du grags pa bor ro//u pa si'i sgra'i blugs gzar ram srub shing du bshad de/ brgya byin gyis chung ma grags pa bor ro/ /me la sbyin sreg sbyin zhes bya ba'i sgra gzhan yang de bzhin du'o/ /grags pa kho na 'di'i don yin no zhes sgrub par yang nus pa ma yin te/de ci'i phyir zhe na/ rang las ma grub nus ma yin/ /des dpyod pa pa khyod rang la grags pa kho na'i don yin par ma grub ste/ mtho ris la sogs pa khyed ma grags pa'i sgra sbyor ba'i phyir ro/ /la la ni sgra don rab tu ma grub phyir zhes 'don te/des ni sgra dang don dngos por gyur pa'i 'brel pa rab tu ma grub pa'i phyir zhes bya bar rtogs par bya'o/ /brgal zhing brtag pa mtshungs pa ni snga ma ltar na ni khyod gzhan yang ma grags pa'i don sbyor ro zhes so/ /phyi ma ltar na ni rig byed rtag pa nyid kyi phyir de'i bdag nyid ni dngos por mi byed la/de las tha dad ni de dang 'brel pa med do zhes sngar bshad pa lta bu'o/ /mi'i brjod pa zhes bya ba ni skyes bu ste/ de yang 'dod chags la sogs pa dang ldan pa'i'o/ /de yang ni 'dod chags pa dang ldan pa'i brjod pa'o/ /de dag las ni tshad ma ma yin pa'o grags pa des ni rig byed kyi don yang rtogs par 'dod do//mi'i grags pa de nyid las gcig par tshad ma ma yin par sdang ba dang / rig byed kyi don rtogs pa'i phyir tshad mar smra bar 'dod pa can nam ci ste rang gi tshig dang 'gal ba'o zhes bya ba'i don to/ /gal te grags pa mi 'dod ce na/gal te grags pa btang na ni rig byed kyi don brtag pa'i rgyu mtshan te thabs med par 'gyur la/ gal te grags pa bzung na yang / grags pa'ang skyes bu'i yin pas tshad ma ma yin phyir/ ci'i rgyus ni grags pa de 'dzin byed/ /gzhan yang grags pa bzung na sgra don nges par bya ba la zhes bya ba la sogs pa smos te/skyes bu'i thams cad mkhyen pa nyid spangs na shin tu lkog tu gyur pa na don dngos su mthong ba'i grags par brda byed pa med pa'i phyir yid gnyis kho nar 'gyur ro zhes bya bar ston te/ gal te grags pa gang la rigs pa'i gnod pa med pa de'i don gzung ngo zhe na/rigs pa'i rtsod pa med pa ni zhes bya ba smos te/ skyes bu g.yon can dag bslu ba'i thabs brda dka' ba smra ba ste/ skyon med pa'i bram ze mo la 'di ltar lkog tu sus kyang ma mthong ba na nyes pa med ces smra ba ste/ de la rigs pa gang yang gnod pa mi byed de/ lkog tu mngon sum mi 'jug pa'i phyir dang rtags kyang med pa'i phyir ro//lung de'i don ni shin tu bskal ba yin te mngon sum pa dang lkog tu gyur pa dag ni lung gcig pu'i don ma yin pa'i phyir ro/ /thams cad mkhyen pa'i skyes bu nyid med na lung gi don spyad pa 'dis rigs pa srid pa ma yin no/ / gal te rig byed kyi dum bu phyogs gzhan gyis gsal bar byed do zhe na/ de yang sgra nyid yin pa'i phyir snga ma ltar the tshom nyid byed do/ /de lta bas na mjug bsdu ba'i phyir/ sgra bdag nus zhes bya ba la sogs pa smos so/ /de'i phyir don ston pa'i sgra ni skyes bu la brten pa nyid kyi phyir/ gal te kho bos ci zhig shes rig byed las de skad bstan to zhes smras kyang rgyal dpog pa bdag nyid kyis me la sbyin sreg bya ba'i don grags pa kho na yin par smra bas bstan pa yin la rig byed nyid ni ma yin te/ dper na skyes bu 'ga' la lam dris pa na/ 'di skad ces sdong du ma 'di na re lam 'di yin no zhes zer zhes smra ba dang /gnyis pa kho bos rang lam 'di yin no zhes smra'o zhes zer ba dag gi khyad par rtogs te/ de dag rang nyid las ston par khyad par med kyi/ cig shos sdong dum ston pa ni mi rigs par brjod par zad do/ /gal te brda la ltos pa med na don kun tu ni rigs pa las so//mi sbyin sreg la sogs pa'i don/ /gcig pu nges pa 'di ga las/ /de lta bas na brjod par 'dod pa'i tshig las gzhan gang gis dbang po las 'das shes zhes bya ba smos so/ /gal te brda'i phyogs la ji ltar don nges she na skyes bus sgra 'dis 'di brjod par bya'o zhes 'dod pa'i don nges par byed pa'i rgyu'o//brda yis ni nges pa de gsal bar byed de tha snyad kyi dus su go bar byed pa'o/ /gal te rang bzhin gyis sgra'i don nges par ston to zhe na/ gzhan du zhes bya ba 'phags pa'i yul dang 'gro lding ba dag tso ra zhes bya ba'i sgra gcig nyid chom rkun dang bza' ba lta bur sbyor ba de yang med par 'gyur ro//gal te brda yis rang bzhin gyis 'brel ba de gsal bar byed do zhe na/ yang brda ni sna tshogs su 'jug pa'i phyir don gcig tu nges pa ga las te me'i sbyin sreg lta bu'o/ /gal te brda ji lta ba bzhin nges pa yang de lta'o zhe na/ gang la rang dgas te brda gang la skyes bu'i 'dod pas 'jug pa de la de'i rjes su 'jug pa'i nges pa la yang nges pa zhes bya ba ci zhig yod/de lta bas na/ brda yis gsal bar byed na ni/ /khyi sha bza' zhes bya ba ltar/ /mi 'dod pa nyid kyang gsal bar byed par 'gyur ro/ / yang kha cig lung gi tshig gi phyogs gcig nges par mi slu bar grub pas tshig de'i lhag ma rnams kyang de'i phyogs gcig yin pa'i phyir/ nges par mi slu ba'i lung gi mtshan nyid du smra'o/ /de ni rigs te zhes bya ba ni sgra'i don tsam ni yod pa kho na'o zhes bya bar ston te/ 'dod pas sgra sbyor bar nus pa'i phyir 'jig rten pa dag phyi'i don dang mi mthun par tha snyad byed pa yang mthong ba'i phyir lung gi mtshan nyid la the tshom za ba nyid do//mngon sum log pa ni zhes bya ba ni bltar rung ba ma dmigs pa'o/ /thams cad nyid ces bya ba ni dngos po'o/ /thams cad du zhes bya ba ni yul dang dus so//gal te ma mthong ba tsam gyis mi dmigs pas cung zad dgag pa mi 'grub bam zhe na/ 'jug pa'i sngon du blo 'gro'i phyir/ /zhes bya ba smos te/ yod pa'i tha snyad 'jug pa'i sngon du de dmigs pa 'gro ba'i phyir dmigs pa med pa tsam de ni rgyu med pa nyid kyi phyir yod pa'i tha snyad mi 'jug pa ste/'gog pa'i 'bras bu can no/ /gzhan ni snang ba mi dmigs pa'o/ /de ni med pa'i tha snyad 'jug pa'o/ /yod na mthong bar rigs pa mi dmigs pa ni med pa'i tha snyad kyi rgyu mtshan te de mthong ba'i phyir ro/ /rang gi rgyu yod pas zhes bya bar sbyar te/rang ni med pa'i tha snyad do/ /de'i rgyu ni snang ba mi dmigs pa'o/ /de yod pa yang yod pa'i tha snyad 'gog par byed do/ /bzlog pa'i rgyu med pa zhes sbyar te bzlog pa ni yod pa'i tha snyad do/ /de ni rgyu ni dmigs pa'o/ /de med pa ni mi dmigs pa tsam mo/ /de yang yod pa'i tha snyad 'gog pas so//med pa'i tha snyad sgrub pas ni mi snang ba mi dmigs pa la the tshom za la/ gzhan snang ba mi dmigs pa la ni the tshom las bzlog pa'i phyir/ 'di gnyis 'bras bu mi 'dra ba'o/ /dang po nyid ni snang ba mi dmigs pa'o/ /de ldog pa mthong ba 'dir ro//de'i bdag nyid ni gtan tshigs de'i bdag nyid de bsgrub par bya ba'i chos so/ /de tsam ste rtags yod pa tsam dang ngo / /rjes su 'brel pa ni rtags yod pa tsam gyis bsgrub par bya ba yod pa tsam ste/ de las gzhan la mi ltos pa'i rang bzhin no/ /gal te bye brag la mi ltos pa dper na mi rtag pa nyid de/yod pa'i phyir ro zhes bya ba lta bu'o zhes bya ba la/ yod pa zhes bya ba yang rgyu med pa can ma yin pa'i phyir rgyu'i don 'phel mod kyi/ de ni don gyis 'phangs kyi sgra yis ma brjod pa'i phyir bye brag la mi ltos pa zhes brjod do/ /rang bzhin gyi gtan tshigs kyi dbye ba gzhan ni brtsal ma thag tu byung ba la sogs pa'o//tshad ma dag gis rang gis bsgrub par bya ba'i chos zhes bya ba ni mthun pa'i phyogs la gnod pa can 'jug pa'am/ mngon sum dang mi dmigs pa dag go/ /khyab pa dang chos can la brten pa dag tshad mas ma des pa'i rang bzhin can gyi rtags des bsgrub par bya ba go bar byed pa ma yin pa'i phyir ro//gal te rtags kyi don rang nyid kyis go bar byed pa nyid ma yin nam tshad mas nges pa ci dgos she na/ gsal bar byed pa yin pa'i phyir zhes bya ba smos te/ gsal ba de'i mtshan nyid tshad mas ma mthong bar ni mar me rang gi don bum pa gsal bar rtogs par byed pa med do//de bzhin du rtags kyang rang nyid go bar nus pa yin mod kyi/ 'brel pa dang phyogs kyi chos tshad mas ma nges pa ni rtags can go bar mi byed do/ /tshad mas 'brel pa nges pa de'i phyir/nges pa'i khyab bya go byed de/ /zhes bya ba la sogs pa smos so/ /phyogs nges par bstan pa ma yin te/ mi bstan pa kho na ste/ rtags kyi 'brel pa ma rtogs pa'i dus su ni/ phyogs bstan pas go bar mi nus la/ phyogs kyi chos nyid dang bya ba pa nges pas ni phyogs rtogs zin pa'i phyir yang phyogs bstan pa dgos pa med pa'i phyir ro//de'i bdag nyid kyis 'brel par tshad mas ma nges na ni/ bsgrub par bya ba de log pas rtags de'i ldog pa yang nges pa med do/ /de'i phyir tshad mas 'brel pa zhes bya bar nges par rab tu bsgrubs nas ldog pa nges par brjod par bya'o//ma mthong ba tsam gyis ni ma yin te/ de tsam dang ldan pa la yang go bar byed pa ma yin pa gzugs khyad par med pa zhes bya ba mthong ba'i phyir ro/ /rang bzhin dang ni rjes 'brel nyid/ /ces bya ba ni/rang gi rgyu las de ltar skyes pa'am/ yang na rang gi ngo bo nyid yin no zhes bya ba'i tha tshig go/ /'di ltar ltos pa'i chos rnams ni/ /zhes bya ba la sogs pas ni gang zhig 'byung ba rgyu gzhan la ltos pa de ni nges pa med pa ste/ dper na gos grub pa la dmar po nyid bzhin no//chos 'byung ba rnams kyang 'jig pa rgyu gzhan la ltos pa'i phyir ro zhes bya ba sbyor ba 'phen par byed do/ /dngos po 'jig pa rang gi rgyu las gzhan la ltos pa med pa nges par 'jig par 'gyur gyi/ bum pa la sogs pa 'jig pa'i rgyu gzhan la ltos pa dang bcas pa nyid yin na ni/bum pa la sogs pa de dag gal te 'jig pa'i rgyu dang ma phrad na rtag par 'gyur ro/ /gal te tho ba dang char dag la sogs pa 'jig pa'i rgyu mang po dag yod pas gang yang rung bas nges par 'jig go zhe na/ gal te zhes bya ba smos te/ 'jig pa'i rgyu mang po de dag kyang 'jig par byed pa la rang rang gi rkyen nye ba la ltos pa yin pa'i phyir/rgyu gzhan la ltos pa'i phyir/ 'jig par byed par nges pa med de gos la tshon bzhin no/ /'jig pa rgyus gnas pa zhes bya ba ni rgyu gzhan la ltos pa'o/ /de 'bras bur brjod pa ni 'jig pa nyid do//ma nges pa ni rgyu gzhan la ltos pa'i phyir ro/ /yang rgyus gnas pa ni gtan tshigs kyis gzhag pa'o/ /rtags kyang gang zhe na/ 'bras bur brjod pa ste byas pa'i phyir ro zhes bya ba'o/ /rtags de ni ma nges pa ste/ 'jig pa rgyu gzhan la ltos pa'i phyir ro//de lta bas na 'jig pa rgyu dang bcas smra ba'i/ /rgyu dang rtags dang de dag nges pa ma yin nyid/ /dngos po 'di rang yod pa tsam las gzhan pa'i rgyu la 'jig pa mi ltos na dngos po de la 'jig pa de 'byung bar nges te/ rang yod pa tsam gyi rgyus 'jig pa de'i rgyu tshang ba'i phyir ro//de'i phyir/ gang zhig de yod gzhan ltos med/ /de dag de yod la nges yin/ /zhes gsungs so/ /dngos po nus pa la sogs pa ni sa bon la sogs pa rdzas tshogs pa rnams rgyu gzhan du gyur pa la ltos pa de bzhin du gang la yang 'jig pa ltos pa med do//de la yang zhes bya ba ni sa bon la sogs pa'i tshogs pa'o/ /mtha'i tshogs pa ni ma tshang ba yang med pa la bar chad kyang byar med de rang skyed par grub zin pa'i phyir bar chad bya bar mi nus so/ /de yang mtha'i tshogs pa ni nges par 'bras bu dang bcas pa'o zhes mi dmigs pa'i sbyor ba'i skabs su smras pa dang 'dra ba nyid do//gal te ltos pa med pa zhes bya ba ni mtha'i tshogs pa'o/ /de ni nges par 'bras bu skyed par smras pa'i phyir/ nas kyi sa bon tshogs pa mthar thug pa yang sA lu'i myu gu skyed pa ma yin nam ste sA lu'i myu gu'i rkyen sa bon dang chu la sogs pa rnams nus pa mthar thug pa nye ba'i phyir ltos pa med pa dang /gags nus pa med pa'i phyir zhe na/ de'i rang bzhin zhes bya ba ni sA lu'i myu gu skyed pa'i rang bzhin te/ sA lu'i sa bon no/ /de la ltos te sA lu'i myu gu skyed pa yin na de ni ma tshang ba de'i phyir ltos pas mi ltos pa nyid med do/ /gal te sa bon dang chu la sogs pa'i tshogs pa mthar thug pa yin na yang de'i rang bzhin ltos pa de lta na'o//de nyid kyi rang bzhin zhes bya ba ni mi rtag pa'o/ /de byas pa dang yod pa la yod pa ma yin te/ byas pa de dag kyang 'jig pa'i ngang can gyi rang bzhin gzhan la ltos pa'i phyir la/ byas pa dang yod pa de yang yod pa'i 'jig pa'i ngang can ma yin no//de'i phyir byas pa nyid ltos pa dang bcas pa'i phyir mi rtag pa nges pa ma yin zhe na/ rgyu'i nus pa nges pa can te rgyu nus pa mi 'dra bas bskyed pa'o/ /de yang rang gi mtshan nyid yin te rgyu'i nus pa ji lta bar ma 'dres pa'i mtshan nyid yin pa'i phyir ro//rang bzhin gyis tha dad par nges pa'i don gyi mtshan nyid tha dad pa nyid ni rgyu med pa can du mi rigs te/ rgyu med pa la ni gang la yang ltos pa med pa'i phyir/ rgyu'i yul dang dus dang rdzas nges pa la ltos pa mi rigs pa'i phyir la/ dngos po rnams ni ltos pa nyid du tshad mas grub pa'i phyir ro//de'i phyir nas dang sA lu'i sa bon dag gi nus pa'i mtshan nyid tha dad pa dag ni rang gi rgyu nus pa tha dad pa dag las byung ba yin no/ /de bzhin 'dir yang zhes bya ba ni byas pa dang yod pa 'di la ni yang ngo / / gang gi phyir rgyu 'dis na ni byas pa la sogs pa 'jig pa'i mtshan nyid can du skye la gzhan las ni rtag par ro zhes nges pa'i rgyu mtshan te/ rgyu'i dbye bar smra bar byos shig pa'o/ /rang dang gzhan gyi sde pa dag na re skye ba can de skyes pa rnams 'jig pa yin gyi/ 'dus ma byas rnams dang /sa dang chu la sogs pa rtag pa'i rdzas rnams ni skye ba med pa'i phyir 'jig pa ma yin no zhe na/ skye ba 'jig pa'i rang bzhin gyi rgyu ma yin zhes bya ba smos te/ skye ba nyid 'jig pa'i rang bzhin yin pa'i phyir ro/ /gal te de nyid kyi phyir skye ba can 'jig ma skyes pa ni ma yin no zhe na/'o na ni 'jig pa'i phyir 'jig go zhes bya bar 'gyur te/ rtags ma grub pa'am don med do/ /gal te rang bzhin yin pa'i phyir 'jig go zhe na/ rang bzhin nges pa zhes bya ba yang de ltar nges pa skyed pa'i rgyu las yin gyi rgyu med par ni mi rung ngo / /de lta bas na skye ba ni 'jig pa'i rgyu ma yin pa'i phyir des 'bras bu'i rang bzhin nges par gzhag par mi nus so//tshogs pa mtha' dag ma mthong ba'i phyir zhes bya ba ni thams cad mkhyen pa ma yin pa dag gis so/ /mthong na rtags ni don med do zhes ston to/ /gal te don byed pa'i nus pas stong pa dngos po med pa yin pa de lta na gzugs med par lhag ma med par 'jug pa'i mtha'i skad cig ma dang rang gi 'bras bu bskyed pa med pas/dngos po med par thal bar 'gyur ro zhe na/ sems can gyi grangs nyid du skad cig ma gzhan nye bar mi len bya ba ni srid par nyid mtshams mi sbyor ba'i phyir srid pa tha ma zhes bya ba ste//byang chub chen por sems bskyed pas tshul gzhan gyis gnas par 'dod pa'o/ /shes bya mtha' dag la khyab pa'i rje btsun thams cad mkhyen pa'o/ /de'i ye shes la nus pa yod pa ste/ de'i smon nas shes pa'i dmigs pa yin pa'i phyir ro/ / khams gzhan te 'dod pa'am gzugs na'o/ /de dag ni pha rol gyi sems shes pa thams cad mkhyen pa ma yin pa dag gi sems la yang ngo / /gal te thams cad mkhyen pas gzugs med pa'i srid pa'i mtha'i sems la ched du ma gtang na nus pa med do zhe na/ gdul ba'i rgyud dam dngos po'i gnas skabs kyi chos gcig ma shes na yang ngo //gang dag bya ba byed pa'i phyir/ /zhes bya ba ni tha ma'i sems de yang srid pas nying mtshams sbyor ba'i bya ba mi byed kyang / sems kyi rgyun gzhan gyis gnas pa'i bya ba byed pa ste/ byang chub chen por sems bskyed pa la sogs pa'o/ / yang na sngar bshad pa dag mi byed kyang rkyen ma tshang bas yin gyi nus pa med pas ni ma yin te rkyen tshang na byed pa nyid do/ /sngon nas byed na sngon sdod pa ni byed pa po ma yin pa'i rang bzhin yin pas phyis kyang byed par mi 'gyur ba'o/ /gal te ltos pa dang bcas so zhe na bshad zin te/ rig byed rtag pa ltos pas rtag pa'i rang gi ngo bo la ni phan par nus la/rang las gzhan na ni de ci yin zhes bya ba la sogs pas so/ /de'i rang bzhin gyi zhes bya ba ni byed pa'i rang bzhin no/ /de'i rang bzhin rtag pa de yod bzhin du 'bras bu'i cig car byas nas phyis mi byed pa ni mi rigs pa'i phyir ro/ / phyis yang byed pa na ni cig car byed par mi 'gyur ro/ /yang na skye ba can ni byas pa yin pas byas pa thams cad mi rtag ces bya bar phung po dang khams dang skye mched tsam zhig bsgrub par bya ba yin pa'i phyir/ tshogs pa mtha' dag mthong ba la ltos so zhes bya ba'i skyon med de/ mjug thogs su rigs pa 'byung bas so//phung po la sogs pa'i de'i mtshan nyid la ni sgrub pa'i tshad ma med pa'i phyir rab tu ma grub la/ de lta bu la yang gang byas pa de zhes rjes su 'gro ba brjod par mi dmigs te byas pa dag 'gal ba'i phyir ro/ /byas pa zhes bya ba yang phung po la sogs pa nyid do/ chos mngon pa las/ 'dus byas kyi chos gang dag ce na zhes gsungs te/ byas pa'i chos gang dag ce na zhes bya ba yin no/ /ltos pa dang bcas pa ni rang gi yul dang snang ba dang yid la byed pa las ltos nas rnam par shes pa bskyed pa'o/ /yul yang de bzhin no zhes bya ba ni rnam par shes pa rnam par chad pa la sogs pas so//bde ba dang zhes bya ba la sogs pa ni tshor ba'i phung po'o/ /rgyu mtshan nye bar mtshon pa ni 'du shes so/ /'dod chags la sogs pa ni 'du byed do/ /yul la nye bar dmigs pa ni rnam par shes pa'o/ /bsgrub pa ni skye ba'o/ / 'gag pa ni 'jig pa'o/ /so sor rig pa ni rang rig pas so/ /rang bzhin des goms par 'gyur ba ni mi rtag pa'i rang bzhin gyis so/ /gal te chos kyi khams dang skye mched dag na 'dus ma byas dag yod pa ma yin nam zhe na/ /phung po gsum tsam ste/ tshor ba dang / 'du shes dang / 'du byed tsam ste/ de las gzhan pa'i dngos po med pa nyid du rig par bya ste/ rtag pa la dngos por mi 'thad pa'i phyir dang / rig byed ma yin pa yang gzugs kyi rdzas su med pa'i phyir te/ 'di ni sngon gyi slob dpon rnams kyis bshad par bya'o/ /ji ltar byas pa bshad pa 'dis ni yod pa yang mi rtag pa'i rang bzhin can gyi phung po la sogs pa kho na'o zhes bshad par rig par bya ste/bram ze thams cad thams cad ces bya ba ni skye mched bcu gnyis so zhes gsungs pa lta bu'o/ /gtan tshigs gzhan zhes bya ba ni 'bras bu rnam par shes pa chad pa dang rnam par 'gyur ba la sogs pa'o//de lta bu'i bye brag gzhan zhes bya ba ni mngon sum du ma gyur pa'i yul dang dbang po dang blo dag go/ /ltos pa med pa nyid yin na ni yul dang dus dang rdzas la rag las pa'i phyir/ gang du ltos nas de'i dus la sogs par 'jig pa 'gal te rgyu med pa'i phyir rgyu de med par rang bzhin gyis rtag tu 'jig pa nyid sgrub par byed do//'jig pa'i rang bzhin zhes bya ba ni 'jig pa'i mtshan nyid de/ dngos po'i bdag nyid do/ /de'i dngos po'i chos yin na rgyu med pa nyid mi rung ba'i rgyu med pa can du 'gyur ro zhes thal bar 'gyur bar rgol ba'o/ /yod pa 'byung ba ste yod pa grub pa na yod pa de tsam las gzhan la mi ltos par 'jig pa 'byung ba'i phyir ro//yod pa de dag dang 'dra bar yod pa 'grub pa'i rgyu nyid las 'jig pa de nyid 'byung ba rgyu med pa can ma yin no/ /'ga' zhig las 'byung ba ni rgyu las skye ba'o/ /grangs can dag la ni med de/gsal ba tsam du 'dod pa'i phyir ro/ /gang gi yang zhes bya ba ni dngos po ste bum pa'am snam bu'i'o/ /ji ltar yang zhes bya ba ni rdza mkhan nam tha ga pas so/ /gang na yang zhes bya ba ni yul lam dus so/ /de ltar na rgyu med pa'i phyir bum pa yang rdza mkhan gyi yul dang dus la mi ltos par 'gyur te/de la rgyu med pa'i phyir ro/ /de'i phyir des rtsom par mi byed do/ /snam bu la yang tha ga pa ji bzhin no/ /gal te de dag de las skye ba ni ma yin gyi nye bar zhi ba las gsal bar gyur pa yin no zhe na/ 'di ltar zhes pa smos te/ cung zad nye bar zhi ba ni ma skyes pa'am zhig pa na rgyu'i rang bzhin gyur nas yang rang bzhin ngo bo mi gsal bar gnas pa'o//ma yin pa ni nye bar zhi ba ma yin pa ste/ rang gi ngo bo gsal bar 'byung ba'o/ /yul dang dus dang rdzas cung zad la 'brel ba ste ltos pa'o/ /ma 'brel ba ni mi ltos pa'o/ /rnam par rtog pa gnyis smos pa las gzhan pa'i phung po mi srid pas de gnyis las ma 'brel pa mi srid pa nyid ni/'brel pa nyid du 'khrul pa med do/ /de'i phyir yod pa gang zhes bya ba smos te/ yod pa ni mngon par byung ba'o/ /de rgyu dang 'brel pa nyid ma yin na ni rdza mkhan la sogs pa'i tshogs pa dang de'i yul dang dus kho na la bum pa nges pa 'di ni med par thal bar 'gyur ro//de bzhin du tha ga pa la sogs pa'i tshogs pa dang / de'i yul dang dus las snam bu nges pa 'di yang med par 'gyur ro zhes bya ba la sogs pa sbyar bar bya'o/ /de ltar mngon par gsal ba'i ltos pa'i de nyid rgyu dang bcas pa zhes bya ba yin pa'i phyir ltos pa'i yang dngos po 'di gang na yang rgyu med pa can med do//mi ltos pa'i dngos po yang med de ltos pa med pa la 'grub pa med pa'i phyir ro/ /de'i phyir rgyu las byung ba nyid na de nyid las 'jig pa yang 'byung ba'i phyir skye ba dang ldan pa dag mi rtag pa nyid du grub bo/ /skyes pa de nyid yod pa dang byas pa zhes brjod do//yod pa nyid 'jig pas khyab pa sgrub pa'i rigs pa gzhan yang 'jig pa zhes bya ba dngos po las gzhan pa nyid gang yang yod pa ma yin pa'i phyir yod pa mi rtag pas khyab pa nyid do/ /'o na ji lta bu zhe na/ dngos po nyid 'jig pa yin la zhes bya ba la sogs pa smos so//gal te dngos po de nyid skad cig ma nyid yin nam dngos por rtogs pa nyid skad cig mar rtogs she na/ 'di'i rang bzhin de zhes bya ba ste/ de'i dbang gis zhes bya ba ni gyo mor gyur ba'i dbang gis de 'dra ba 'khrul pa'i rgyu med par de'i dbang gis so/ / phyis zhes bya ba ni gyo mo nges pa na de bum pa'i skad cig ma tha ma mthong ba las dus phyis so/ /dus der bum pa'i skad cig ma rnam par gzhag par bya'o/ /de skad cig mar grub na bar dang thog ma'i gnas skabs kyang skad cig ma nyid kyis khyab par 'grub ste/ sngar dug mthong yang dug mi shes pa la skyes bur rnam par 'gyur ba mthong nas/dug sngar mthong ba la 'jug pa nyid du tha snyad 'jug pa ltar yod pa de log na de las gzhan ci la yang 'jig pa ltos pa med pa nyid kyi phyir yod pa de 'jig pas khyab par bya ba yin te/ yod pa nyid rgyu ma tshang ba na 'jig pa yang rgyu ma tshang bas yod pa'i phyir/de las gzhan la mi ltos pa'i phyir ro zhes bya ba'i don to/ /de ni rgyus nus pa yang min zhes bya ba ni 'jig pa med par dgag pa'i dbang du byas pa ste/ 'jig pa skad cig tu gnas pa'i don la ni rgyu gzhan don med pa nyid du sngar bstan to/ /ji ltar nus pa ma yin zhe na/'di la rnam par rtog pa gnyis te/ 'jig pa'i rgyus dngos po nyid byed dam/ de las tha dad pa zhig byed ces bya'o/ /de la dngos po nyid ni mi byed de dngos po grub zin na rgyus grub pa de yang byar med pa'i phyir mi byed do/ /de las tha dad pa yang mi byed de/ bya ba dngos po las gzhan yin na yang dngos po de ci'i yang ma yin te/dngos po ni mi 'jig pas de bzhin du gnas pa'i phyir ro/ /de dang de ma yin pas gzhan pa yang mi srid do/ /gzhan mi ltos pa de'i phyir 'di 'jig pa 'di rang bzhin ma yin te/ rang gi 'byung gnas rgyu nyid las 'byung ba'am/ yang rang gi rang bzhin te rang gi bdag nyid yin no/ /dngos por brjod pa ni dngos po tsam mo/ /'dis zhes bya ba ni 'jig pas so/ /gzhan du'ang zhes bya ba ni mngon sum du gyur pa las gzhan du ste lkog tu gyur pa rnams la yang ngo / /rang bzhin gyis zhes pa ni mi ltos pa'i dngos po'i rang bzhin yin pa tsam gyis so//'gyur zhes bya ba ni mi rtag par ro/ /'jig pa de'i mi ltos pa nyid ces bya ba'i rang bzhin te/ bum pa mthar gyur ba'i dngos po 'ga' zhig mthong ba'o/ /de bzhin du mthong ba'i dngos po las gzhan pa'i 'jig pa yang mi ltos pa'i rang bzhin de nyid khyad par med pa'i phyir ro//ji ltar yod pa nyid rgyu gzhan la mi ltos pas zhes bya ba'i tshad mas rang dang 'brel pa grub pa de bzhin du rang bzhin gyi gtan tshigs gzhan dag kyang ste/ shing sha pa yin pa'i phyir zhes bya ba ni mngon sum dang mi dmigs pa dag gi tshad mas so zhes bya ba dang /rkyen gyi bye brag gis tha dad pa nyid can yin pa'i phyir byas pa zhes bya ba yang mngon sum dang mi dmigs pas so zhes bya ba la sogs pa rang gi tshad ma ji lta bas so/ /de nyid mngon sum rang gi ngo bo yin no zhes bya ba ni 'jig pa de nyid dngos su gtan tshigs kyi rang gi ngo bo yin te/de lta ma yin na/ yod pa'am byas pa'i dngos po mi rtag pa nyid med pa'i phyir 'jig pa dngos po'i chos su mi 'gyur ro/ /gal te 'jig pa dngos po med pa nyid yin no zhe na/ med pa la ni 'jig pa nyid mi srid la rgyus bya bar yang mi rung ngo zhes bshad zin to/ /chos gzhan gtan tshigs yin na de dang ji ltar de'i chos yin zhe na/bya ba ni nges pa'i tshig gi tshul las brtsad pa ste 'dzin pa'i phyir chos zhes brjod de rang gi mtshan nyid 'dzin pa'o/ /des ni gzhan la mi rigs so snyam pa'o/ /grags pa'i tshul gyis de la brten pa la yang chos nyid du brjod pa'i phyir te/de la brten pa'i phyir ro zhes gsungs so/ /gzhan dag ni rgya shug dang rdza ma dag dus mnyam pas bskyed par bya ba dang skyed par byed pa med par rten dang brten pa'i dngos po 'dod pa'i phyir du ba me la brten par bshad na/ ji ltar rgyu dang 'bras bu'i dngos por 'gyur zhe na zhes 'dri bar byed do//slob dpon de nyid kyi phyir zhes gsungs te/ rgyu dang 'bras bu de nyid kyi phyir rten dang brten pa yin no/ /gzhan du phan par bya ba dang / phan par byed pa med pa na rten dang brten pa nyid du mi 'grub po/ /de ltar yang rgyu shug gi mi ltung ba'i rang bzhin ni bum pas byas pa nyid yin te gzhan du na mi 'thad pa'i phyir ro//du ba de'i rgyu me yang phyogs de la brten pa'i phyir phyogs ni brgyud pas du ba'i rgyu nyid yin no/ /thams cad go bar bya ba ni mi gsal ba dang rtsa'i dang zhes bya ba la sogs pa du bas go bar ro/ /thams cad go bar byed pa na skya bo nyid dang rdzas nyid la sogs pa me'i go bar byed par ro//gsal ba dang rtsa'i zhes bya ba de med kyang mi tsam mi gsal ba dang / shing gi las kyang 'byung ba'i du ba de dag ni gsal ba la sogs pa de dag skye bar nges pa med pa'i phyir go bar mi byed par 'dod pa nyid do/ /yang skya bo dang / rdzas la sogs pa de dag kyang me de las skye bar nges pa med de/ rtsig pa dang chu la sogs pa las kyang yin pa de dag go bar mi byed pa yang 'dod pa nyid do/ /rgyu la rang bzhin sreg pa nyid de bud shing 'gyur bas du ba bskyed pa zhes bya ba'i rang bzhin ji snyed cig med na mi 'byung ba/ mig mchi mar byed pa dang / lkog mar gnod pa dang nag por byed pa dang / gyen du 'thul ba zhes bya ba'i rang bzhin de ni 'bras bu yin la de dag go bar byed pa'i gtan tshigs yin te/'bras bu nyid du nges pa'i phyir ro/ /skya bo tsam ni nges pa ma yin pa'i phyir ro/ /rgyu 'bras bu'i chos sreg pa dang bud shing 'gyur ba dang / du ba byed pa dang / mig 'phyid par byed pa dang / snam par byed pa la sogs pa de dag kyang rgyu dang 'bras bu de nyid kyi chos zhes bya bar rang gi ngo bor te de dag dang tha dad du mi 'jug pa rnams yin gyi so sor srid pa dag ni ma yin no//me dang du ba'i rang bzhin cha med pa la me'i gsal ba'i cha skyed par byed pa ma yin zhing / du ba'i rdzas nyid bskyed par bya ba ma yin la/ cha shas kyis bskyed par bya ba dang skyed par byed par thal bar 'gyur ro zhe na/des bskyed par bya ba ni rtsa'i mes bskyed par bya ba'i du ba'i bye brag gzung na go bar bya ba nyid du 'dod pa'i phyir dang / rtags du bas khyad par du byas pa'i spyi ste du ba'i rdzas dang du ba'i skya bo zhes so/ /de dag kyang go bar byed par 'dod pa'i phyir thams cad du bskyed par bya ba dang skyed par byed pa nyid do//gang dag brgya byin spyi bo las du ba 'byung bar mthong nas gal te du bas me la mi 'khrul lo zhes bya ba 'di zhes dri bar byed do/ me de las du ba 'khrul te me med par yang yod na du ba 'di rgyu dang ldan pa las 'das 'gyur phyir mi 'khrul lo/ /me dang du ba de lta bu'i mtshan nyid dag mi dmigs pa las shes ni rgyu dang 'bras bur 'dod pa dag yod na snang du rung ba zhes bya ba mi dmigs pa snang du rung ba nyid du bstan to//gang dag dmigs na zhes bya bas ni me dang bud shing gang dag dmigs pa ste mngon sum gcig go/ /gang dag dmigs la zhes bya ba ni du ba ste mngon sum gnyis pa'o/ /de las gcig med na zhes bya ba ni me dang bud shing ste mi dmigs pa gnyis so//mi dmigs pa zhes bya ba ni du ba ste/ mi dmigs pa gsum pa'o/ /de lta bu'i rjes su 'gro ba dang ldog pa can dag ni 'bras bu'i rang bzhin yin la de yang du ba la yod pa'o/ /'bras bu ma yin pa ni lan gcig kyang ma yin te/ nas kyi sa bon dang sA lu'i myu gu lta bu'o//rgyu las gzhan du ste rgyu med par ro/ /me gang gi 'bras bu du ba gang me med par brgya byin gyi spyi bo las 'byung na ni me de du ba'i rgyu ma yin te/ me med par 'byung ba myu gu'i rgyu me ma yin pa bzhin no/ /du ba yang me las gzhan gyi me med par brgya byin gyi spyi bo las 'byung na de med par 'byung ba ni de'i rgyu can zhes bya ba de'i 'bras bu ma yin te/me med par 'byung bas nas kyi sa bon dang myu gu ni me'i 'bras bu ni ma yin pa bzhin no/ /de la yang mtshungs pa'i phyir ro zhes bya ba ni brgya byin gyi spyi bo de la yang rgyu ma yin par mtshungs pa'i phyir te/ de med kyang me las 'byung ba'i phyir ro/ /de'i phyir 'di ltar brgya byin gyi spyi bo gang med par 'byung ba du ba de'i rgyu ni brgya byin gyi spyi bo ma yin te/brgya byin gyi spyi bo med par 'byung bas nas kyi myu gu brgya byin gyi spyi bo ma yin pa bzhin no/ /du ba de yang brgya byin gyi spyi bo'i 'bras bu ma yin te/ de med kyang 'byung ba'i phyir nas kyi myu gu bzhin no/ /zhes 'khrul pa mtshungs pa'i phyir ro//de'i phyir rgyu'i tshogs pa rigs gnyis pa can ni rgyu med pa nyid do zhes bya ba yin pa'i phyir ro/ /rjes su 'gro ba dang / ldog pa 'khrul pa las gzhan yang zhes bya ba ni yang gi sgra'i don to/ /de yang ji lta bu zhe na/ gal te me de'am gzhan brgya byin gyi spyi bo de du ba skyed pa rang bzhin ma yin na ni/de'i rang bzhin ma yin pa las ji ltar du bar 'byung / rang bzhin gyis du ba skyed par mi byed pa'i phyir de las 'byung bar 'dod pa'i du ba rgyu med pa nyid du 'gyur ro/ /thams cad las thams cad skye bar 'gyur ro/ /zhes bya ba ltos pa med pa la yul dang dus mi nges par rung ngo zhes rang bzhin gyi gtan tshigs kyi skabs su skyon brjod zin to//gal te nus pa dang 'brel mod de tsam gyis rgyu dang bcas par mi 'gyur ro zhe na/ nus pa'i dngos po de yang rgyu'i dngos po las gzhan ci zhig yin zhes bya ba smos te/ gal te ltos pa rgyu yin yang yul dang / dus kho na la 'jug nus par ji ltar 'gyur zhe na/des na yul dang dus gcig gtang ste zhes bya ba la sogs pa smos so/ /yang na brgya byin gyi spyi bo las byung ba de du ba ma yin te/ du ba skyed par byed pa'i rang bzhin ma yin pa las byung ba'i phyir/ sA lu las byung ba'i myu gu bzhin no/ /du ba de'i rang bzhin yin na ni/brgya byin gyi spyi bo de nyid bud shing dang ldan pa yin te/ du ba dngos su skyed par byed pa yin pa'i phyir/ tshang bang gi me bzhin no/ /gal te brgya byin spyi bo'i me zhes bya ba du ba skyed par byed pa'i don to/ /de me'i rang bzhin yin zhes bya ba ni du ba skyed par byed pa'i rang bzhin ma yin na'o/ /nus pa'i bye brag ldan zhes bya ba ni nus pa'i bye brag des grags kyi de med na ni me nyid du mi 'gyur ba'o//de lta na me med par yang du ba de du ba'i rgyu min/ brgya byin spyi bo las byung na du ba'i nus pa med par 'byung ba'i rgyu med 'gyur ro/ /rgyu tha dad pa las 'bras bu gcig pa bkag pa dang gzhan dag dang ni ji ltar na lhan cig byed pa zhes bya ba la sogs pas dri bar byed do//gcig pu zhes bya ba la sogs pa smos te/ skyed par byed pa ni cung zad kyang med do zhes bya bar sbyar ro/ /ci'i phyir zhe na/ de'i rang bzhin gcig pus skyed pa'i rang bzhin yin pa ni cung zad kyang med do zhes bya ba ste/ dngos po rnams rang bzhin gyis skyed par byed pa ni de lta bu'o zhes ston to//de yang ji ltar shes she na/ tshad mas tshogs pa kho na rtsom par 'grub pa'i phyir ro/ /rgyun ni rang nyid kyi tshogs pa snga ma tsam las 'byung ste/ gzugs can rnams ni ci rigs par gzugs dang / reg bya la tshogs pa dang / shes par ni mtshungs par ldan pa'i tshogs pa dang kha cig dbang po dang lus kyi rten dag yod pa tsam gyis 'byung ngo //'bras bu'i dngos por gnas pa ste 'grub pa'i'o/ /tshogs pa'i gnas skabs na skyed par byed pa de nyid kyi phyir lhan cig byed pa zhes bya ba yang rnam grangs ma yin par te/ rim gyis ma yin par dus gcig tu skyed pa yin no/ / ut+pala'i sa bon las byung ba dang / ba lang gi lci ba las byung ba dag la sha lu ka zhes brjod par zad de cung zad 'dra ba'i phyir sgra mtshungs pa'o/ /yang na de ma thag pa'i rgyu zhes bya ba du ba las byung ba'i du ba me 'gags pa'i gnas skabs can gyis brgyud pa'i rgyu me dpag pa ma yin gyi me nye ba ste/ me la dngos su brten pa'i gnas skabs can gyis me dpag pa'am/yang na chu shing rgyas pas rang gi rgyu ma chod pa sdong bu nyid dpag gi sdong bu de'i rgyu sa bon bye brag ni ma yin pa'o/ /rgyas par ni sdong bu las byung ba ste sa bon las ni phra ba'o/ /don tha dad pa las khas blangs nas zhes bya ba ni so sor nye bar sbyor ba dang / skye ba dang / 'jig pa dus tha dad pa 'dod na'o/ /de ltar zhes bya ba ni gcig ces brjod pa'o/ /de'i phyir dmag dang nags kyi sgra bzhin du ming gcig pa nyid kyi don tha dad pa yin no/ /de ni grangs can dag ni sna tshogs yon tan gyi rang bzhin gcig tu smra ba yang bsal ba yin no/ /rgyu don gzhan ma yin pa nyid dpes bya ba ni 'jig pa rgyu med par smra ba'i ltar na'o//dngos po'i dus na mi rtag pa ma grub ces bya ba ni mi rtag pa ni zhig pa'o snyam du bsams pa'o/ /mtshungs pa ma yin nam zhe na zhes bya ba ni sgrub pa dang / ma grub pa 'gal ba nyid du'o/ /mang du brjod zin to zhes bya ba ni sngar gzhan yang 'jig pa zhes bya ba ni gzhan cung zad yod pa ma yin gyi zhes bya ba la sogs pas so//gal te dngos po nyid 'jig pa yin na dngos po'i 'jig pa zhes drug pas tha dad par ston pa dang / dngos po 'jig pa zhes bya ba chos can du ston pa'i bye brag ji lta zhe na/ chos dang chos can nyid kyis zhes bya ba la sogs pa smos so/ / gal te dngos po nyid 'jig pa yin na dngos po mthong ba nyid na 'jig pa na yang mthong bar 'gyur ro zhe na/ 'di'i rang bzhin de mthong du zin kyang zhes smos te/ rnam par gzhog par mi nus te zhes bya bar nges par mi nus so zhes bya ba'i don to/ /gal te de nyid ci'i phyir zhe na/ yod pa dmigs pa zhes bya ba smos te/kha cig yod pa dmigs pa ste bar du stong pa'i skad cig ma ma mthong bas dngos po mi 'dra ba rnams la yang thams cad du snga ma de yod par the tshom za bas bslus pa'am/ yang na kha cig ni 'dra ba gzhan dang gzhan 'byung bas so/ /gal te mtha'i skad cig ma mthong bas nges zhes bya ba ni mar me la sogs pa rjes su 'gro ba med pa dang /bum pa la sogs pa gyo mo la sogs pas te rjes su 'gro ba can gyis 'jig pa mthong na'o/ /go bzhin yod pa dmigs pa dang 'dra bas bslus pa rnams kyis 'jig pa nges par 'gyur ba'i phyir ro/ / bum pa 'di phyis mi dmigs pa na bum pa'i mtha'i skad cig mthong ba de skad cig ma nyid du nges te/ 'khrul pa'i rgyu mtshan bsal ba'i phyir ro/ /gal te mtha'i skad cig nges kyang dbus dang dang po'i gnas skabs dag ni yin pa kho na'o zhe na/ 'di la mi mkhas pa rnams kyis nges pa ma yin pa kho na'o//mkhas pas ni nges pa ste/ ji ltar zhe na/ mtha'i skad cig ma la 'jig pa'i rgyu sngar bshad pa'i rigs pas mi rung ba'i phyir rgyu la mi ltos so/ /de ltar na ni rtag tu yod pa nyid du 'grub ste/ 'jig pa'i rang bzhin gzhan la mi ltos pa nyid du bye brag med pa'i phyir ro/ /gal te dngos po med pa las yang 'jig pa yod par thal bar 'gyur ro zhe na/mi ltos zhes bya ba dngos po yod pa las rgyu yod pa las rgyu gzhan la mi ltos so zhes rtogs par bya'i/ cung zad mi ltos so zhes ni ma yin no/ /de'i phyir dngos po yod pa tsam la ltos pa'i phyir dngos po tsam ltos pa'i phyir dngos po tsam gyis 'jig pa yod par 'grub ste/de las gzhan la mi ltos pa'i phyir ro/ /dngos po de nyid mi rtag par gnas pa las gzhan du yin na ni'o/ /dngos po de dang ldan par mi 'gyur te zhes bya ba ni dngos po mi rtag pa dang ldan par ro/ /ci'i phyir zhe na/ nye bar sbyor ba med pas so zhes bya ba ni dngos po nyid mi rtag pa ma yin pa'i phyir/mi rtag pas dngos la ci yang mi sbyor te/ mi nus pas so/ /nye bar sbyor ba yod na ni zhes bya ba ni dngos po mi rtag pa'i rang bzhin du byed na'o/ /gzhan ci zhig dgos te dngos po nyid mi rtag pa yin pa'i phyir te/ 'dis ni bdag gi 'brel pa bsnyad do/ /mi rtag pa de ni rgyu nyid du 'gyur gyi mtshan nyid ni yin no//chos gzhan de yang zhes bya ba ni sdug bsngal ba dang / stong pa dang / bdag med pa'o/ /phyis 'byung phyir na rgyu nyid min/ /zhes bya ba 'di nyid rigs par bshad pa yin mod kyi/ gang kha cig ma 'ongs pa'i rgyu smra ba yod de/ de ni rtsod pa tsam gyis rgyal bar 'dod pa yin gyi dngos po'i de kho na nyid tshad mas spyod pa ni ma yin te/ma 'ongs par ni rang nyid ma skyes pas med pa ma yin nam yod na ni ma 'ongs par ga la 'gyur/ rgyu ni nus pa yin la nus pa yang dngos po yod pa kho na'i yin no/ /de lta bas na rnam grangs med pa nyid/ zhes bya ba ste/bla brdol lta bu 'di mkhas pa rnams kyis dpyad par mi 'os so/ /de tsam dang rjes su 'brel pa yang de nyid do zhes bya ba mi rtag pa nyid dngos po yod pa tsam las gzhan mi ltos pa'o/ /nyams par mi 'gyur ba'i phyir zhes bya ba ni phyis byung ba'i 'jig pa ni dngos po'i rang bzhin gyi bdag nyid ma yin pa'i phyir dngos po 'jig par mi 'gyur ba'i phyir ro//sngar smos pa'i thal ba ni dngos po mi rtag pa dang ldan par mi 'gyur ba'i dngos po la nye bar sbyor ba yod na ni mi rtag pa gzhan ci zhig dgos zhes bya ba'i'o/ /gal te mi dmigs pas dgag pa bsgrub pa ma yin nam mi mthun pa'i phyogs lam mthong ba yang mi dmigs pa yin no zhe na/mi dmigs pa thams cad go bar byed pa ni ma yin te zhes bya ba smos so/ /'brel ba 'ga' zhig kyang 'dod par bya ste/ de lta na ni 'brel pa'i yul log na de la rag las pa'i rtags kyang ldog pa nges par 'gyur ba'i phyir ro/ / de lta ma yin na mi mthun pa'i phyogs yin pas bsgrub par bya ba log kyang gtan tshigs ldog par nges pa med de rtags rag ma las pa'i phyir ro/ /rag las na ni bsgrub par bya ba med pa las ldog par 'gyur ro/ /de lta ma yin na ni bsgrub par bya ba med par yang rtags yod par the tshom za ba'i phyir bsgrub par bya ba go bar byed pa ma yin par 'gyur ro//de'i zhes bya ba ni 'brel pa yod na go bar byed pa yin pa rgyu de yis so/ /yang na de yis zhes bya ba ni slob dpon phyogs kyi glang po'i zhal sngas so/ /rab tu grags pa zhes bya ba ni nges pa'i don ston pa ste/ nges pa nyid kyang 'brel bas 'gyur gyi gzhan du ma yin no//chos mi mthun pa brjod pa zhes bya ba ni mi mthun pa'i phyogs la med pa nyid brjod pa'o/ /gal te mi mthun pa'i phyogs la gtan tshigs ma mthong ba bshad pa yin yang / mi mthun pa'i phyogs lam mthong ba de med pa zhes bya ba'i tshig de ma smos kyang rtogs par 'gyur te/du ba ni sa phyogs me dang nye ba me dang bral ba dag la ma mthong ba yod pa'i phyir ro/ /gal te ma mthong ba'i 'khrul pa bzlog pa'i phyir ro zhe na/ gtan tshigs yang dag pa dag mi mthun pa'i phyogs la mthong ba srid pa ma yin pa'i phyir med pa brjod pas ldog par 'gyur ba sngon mthong ba'i 'khrul pa ni med do//gal te ma mthong ba'i 'khrul pa yod do zhe na/ the tshom ni brjod pas mi ldog ces 'og nas ston to/ /rjes su 'gro ba mthong ba ma rtogs te brjed nas sgrub pa'i yan lag ma yin pa'i phyir ro/ /mthong ba ni mthong ba med pa yin la de ni ma brjod kyang bdag la mthong ba med do zhes rang gis go bar nus so//gal te mi mthun pa'i phyogs la ma mthong ba yod de de gsal ba'i phyir brjod do zhe na/ mthong ba med pa de la ni mthong bas gnod par 'gyur te/ ma mthong ba nyid med par 'gyur ro zhe na/ de lta na ni brjod pas ldog par mi 'gyur te/ tshig tsam yin pa'i phyir ro//gnod pa de med na ni ma mthong ba rang gi ngang gis grub pa kho na yin pa'o/ /gal te mi mthun pa'i phyogs bsgrub par bya ba mi dmigs pas gtan tshigs med par go bar byed do zhe na/ gcig mi dmigs pas zhes bya ba smos te/ 'brel pa khas mi len na bum pa log pas snam bu log par ha cang thal bar 'gyur ro//gal te bsgrub par bya ba med pa des rtags de med par sgrub pa ni ma yin gyi/ 'on kyang gtan tshigs gang la dmigs pa de nyid dgag par byed do zhe na/ snang ba ma mthong ba de med do zhes bya ba ni rigs te/ snang ba de med pa yis te mi snang ba'i rang bzhin gyi mi mthun pa'i phyogs kyi gtan tshigs med pa ni mi dmigs pas med par grub par mi rigs te 'brel ba khas mi len pa'i phyir dang /ma mthong ba tsam dang yod par 'gal ba med pa'i phyir ro/ /gal te mi mthun pa'i phyogs mthong ba tsam la snang du rung ba ma dmigs pas med pas sgrub po zhe na/ de ltar na khyab pa mi 'grub ste/de ni yul dang dus thams cad du nges pa'i rang bzhin yin pa'i phyir ro/ /gal te 'dod rgyal gyi bya rog dang ta la'i tshul du khyab par grub po zhe na/ bya rog dang ta la'i tshul du de ltar srid kyang rtags dang rtags can de dag 'brel pa med na 'dod rgyal gyi yul dang / dus rdzas gar yang khyad par ldog pa mi 'grub ste/rag ma las pa'i phyir rta dang ba lang bzhin no/ /gal te smra ba po'i ngag phyogs kyi chos la sogs pa la tshad ma yin pa'i phyir des med do/ /des brjod pas ldog pa rtogs so zhe na/ bsgrub par bya ba nyid brjod pas rtogs pa'i phyir/ gtan tshigs mi dgos par ha cang thal bar 'gyur ro/ /ldog pa 'dod pas zhes bya ba ni mi mthun pa'i phyogs mngon du ma gyur pa thams cad la yang bsgrub par bya ba med pa nyid kyis gtan tshigs yod mi srid do zhes khyab par 'dod pas so/ /rig pa nyid 'brel ba nyid du dgongs te gzhan du gtan tshigs rag ma las na bsgrub par bya ba log par nges pa med do//rta la rag ma las pa'i ba lang bzhin no/ /tshig gis kyang zhes bya ba la mthong ba tsam gyis log pa ma nges na de nyid brjod pa'i tshig gis kyang mi nges so zhes bsdu ba ste/ tshig gis kyang ma mthong ba tsam zhig brjod pa'i phyir ro/ / cung zad brjod zin mod kyi zhes bya ba ni 'das ma thag pa rnams so/ /zos pa las gzhan zhes bya ba ni zos pa ni mthun pa'i phyogs so/ /gzhan ni mi mthun pa'i phyogs so/ /de'i tshe gcig las skyes pa zhes bya ba'i gtan tshigs sam/ gzugs khyad par med pa zhes bya ba dag mi mthun pa'i phyogs la ma mthong ba med de zos pa las gzhan gtan tshigs dang ldan pa thams cad phyogs su byas pa'i phyir ro//kha cig na re zhes bya ba ni slob dpon dbang phyug sde'i'o/ /phyogs su byed pa'i yul la med/ /ces bya ba ni mngon sum ma yin pa'i phyir ro/ /gal te da ltar mngon sum pa yang phyogs mngon sum du zhugs pas gnod par dogs so zhe na/gzhan la gzhan yang zhes bya ba ni lhag ma dang ldan pa las gzhan la yang ngo / /ci'i phyir zhe na 'brel ba khas mi len na mngon sum gyis gnod pa med par nges pa med pa'i phyir ro/ /gzhan yang tshad ma zhugs pa gnod par byed pa yin gyi tshad ma ma zhugs par yang gnod na ni gtan tshigs thams cad la yid brtan du med de/tshad ma zhugs pa gnod pa dang / khyad par med pa'i phyir ro/ /de'i phyir ldog pa ni grub pa kho na zhes bya ba smos te nges pa kho na'o/ /grub pa zhes bya ba ni go bar byed pa'o// /de lta bu'i ngo bo ni zhes bya ba ni grub pa kho na sgrub pa'o/ / nges pa zhes bya ba ni rag las pa la'o/ /ltos so zhes bya ba ni 'brel pa kho nas ldog pa nges par sgrub nus so zhes bya ba'i don to/ /gal te khyod kyi ltar na lhag pa dang ldan pa'i 'khrul pa ji lta bu zhe na/ mi dmigs pa'i sgo nas ni zhes bya ba la sogs pa gsungs so/ / ji ltar yang zhes bya ba ni sgrub par byed pa gzhan no/ /bum pa la sogs pa zhes bya ba'i sgras ni shi ba'i lus la sogs pa'o/ /mthong ba ni mngon sum pa'o/ /ma mthong ba ni de ma yin pa'o/ /de rnams kyis bdag med pa de la srog la sogs pa med pas khyab pa'i phyir/ gson po'i lus la khyab par byed pa srog la sogs pa med pa log pa'i phyir/khyab par bya ba bdag med pa yang ldog pas na bdag dang bcas pa nyid du rtogs par thal bar 'gyur ro/ /gal te khyod kyi ltar na srog la sogs pa ldog pa med pa can yin zhe na/ bdag ltar mi rung ba mi dmigs pas bum pa la sogs pa la med pa nyid du ma grub na bum pa la sogs pa bdag med par ma grub pa'i phyir de la srog la sogs pa med pa yang bdag med pas med do zhes pa mi 'grub pa'i phyir bdag log pa thams cad du srog la sogs pa ldog go zhes bdag log pa la srog la sogs pa ldog pas khyab par ldog pa med do// de ltar khyab par byed pa ma grub na khyab par bya ba ldog pa yang mi 'grub pas bdag rtogs par byed pa ma yin no/ /da ni ji ltar na bdag 'grub ste de yang med par sangs rgyas pa khas len pa'i phyir ro/ /gal te khas len pa de tshad ma ma yin no zhe na/ gzhan sangs rgyas pa'i bdag med pa khas blangs pa tshad ma ma yin pa'o//gson po'i lus la bdag med pa khas blangs pa ni kho bo cag dang mi mthun pa'i phyir tshad ma ma yin no zhe na/ gal te khas blangs pa kho na bdag dang bcas pa dang bdag med pa rnam par phye nas te mthun par khas blangs nas bum pa bdag med pa nyid du mi mthun par khas blangs pas gson po'i lus bdag dang bcas par ro//ma grub sbyar ba ni rjes su dpag par bya ba la yod pa dang med pa dang gnyi ga zhes bya ba'o/ /de bzhin du mthun pa'i phyogs la yod pa la sogs pa yang ci rigs par brjod par bya'o zhes bya ba ni mthun pa'i phyogs la yod pa dang med pa dang /gnyi ga dang zhes bya ba dang / mi mthun pa'i phyogs la yod pa dang med pa gnyi ga zhes bya'o/ /de brjod par bya ba ma yin par 'gyur te/ ldog pa mi dmigs pa kho nar zad na/ the tshom za ba nyid ldog pa nyid de/ mi mthun pa'i phyogs la gtan tshigs dmigs na the tshom de med par 'gyur gyi dmigs pa med na the tshom du gnas pa'i phyir/the tshom za ba nyid 'dod pa yin pa'i phyir ma grub pa sbyar bas mi mthun pa'i phyogs la med pa smos pa dgos pa med do/ /de ltar mi dmigs pa'i phyir ldog go zhes byas na mthong ba tsam dang yod par 'gal ba med pa'i phyir mi mthun pa'i phyogs la yod par the tshom du gyur pa yang ma bzlog par 'gyur ro//brjod pa gang gang zhig gnyi ga la nges pa ste/ mi mthun pa'i phyogs la med par brjod pa yang rgol dang phyir rgol ba gnyi ga la med par nges pa kho na zhes gsungs pa nyid yin pas so/ /stsogs pas ni sgrub pa dang sun 'byin pa yin no zhes bya bar bsdu ba'o//ci rigs par gsungs pa ci zhe na/ de ni mi mthun pa'i dpe la gzhi ma grub pa skyon med pa yang srid pa bstan pa'i phyir ro/ /ldog pa nges pa gsungs pa de'i phyir mi dmigs kyang the tshom za bas ldog pa med par dgongs te/ the tshom za ba de dag dgag pa med par nges par bshad pa yin no/ /gzhan yang ma mthong ba tsam gyis ldog pa des na mnyam par bya ba nyid kyang zhes bya ba la sogs pa gsungs so/ /gal te ldog pa yin du zad mod de/ ci'i phyir de dag gcod pa'i gtan tshigs su 'gyur zhe na/rnam par gcod pa ni de dag las ldog pa las gzhan ma yin no zhes bya ba smos te/ de dag las ldog pa ni de dag gcod pa nyid yin gyi/ don gzhan ma yin te/ rang gi bsgrub par bya ba kho na la nges pa na de med pa las ldog pa yin la de nyid rang yod na bsgrub par bya ba la mi 'khrul na bsgrub par bya ba med pa gcod par mi 'khrul pa'i phyir ro//gal te mnyan par bya ba nyid rtag pa dang mi rtag pa gnyi ga gcod pa ma yin pa ci'i phyir zhe na/ rnam par gcod pa ma yin pa ni zhes gsungs te/ ma mthong ba tsam gyis rtag pa dang mi rtag pa gang las kyang ldog pa nyid du ma nges pa'i phyir gcod pa ma yin no//gal te ldog pa ma nges pa ma yin gyi gnyi ga rnam par gcod par tshad ma gzhan gyis gnod pa'i phyir ro/ /tshad ma gang zhe na/ phan tshun rnam par gcod pa'i ngo bo can dag ni gcig rnam par bcad pas/ gzhan cig shos bsgrubs pa yin te/ de ma bsgrubs na cig shos rnam par gcod par mi 'gyur ba'i phyir ro/ /de'i phyir rtag pa nyid rnam par bcad na mi rtag pa nyid bsgrub par 'gyur la/ gnyi ga gcod na ni mi rtag pa de nyid dgag par yang 'gyur bas na bsgrub pa dang dgag pa dag ni mi rtag pa cig la 'gal ba'i phyir zhe na/de lta na da ni ma mthong ba ldog pa bsgrub pa'i tshad ma ma yin te tshad ma gzhan gyis gnod pa'i phyir ro/ /ji ltar mnyan par bya ba de bzhin du ma mthong ba tsam gyis ldog pa'i bsgrub pa du ba la sogs pa gzhan dag la gnod pa srid do/ /ci'i phyir zhe na mtshan nyid dang ldan pa la zhes bya ba smos te ma mthong ba tsam gyis ldog pa'i mtshan nyid dang ldan pa cig la gnod pa srid na de'i mtshan nyid sun phyung ba kho nar 'gyur bas de'i mtshan nyid thams cad la yid brtan du mi rung ste/tshad ma ma yin pa nyid du dogs par 'gyur ro/ /gal te rjes su dpag pa'i yul la yang zhes zer ba ni rgyang pan pa'o//'gal ba mthong bas zhes bya ba ni cig las skyes pas zhes bya ba la mngon sum gyis dang / sgra yin pa'i phyir rtag tu ste sgra'i nyid lta bu'o zhes bya ba la byas pa'i phyir zhes bya ba'i rjes su dpag pas 'gal ba mthong bas so/ /ji skad bshad pa ni med na mi 'byung ba dang ldan pa'i rtags gsum la'o//mi srid pa'i phyir zhes bya ba ni tshad ma gzhan gyis gnod pa'o/ /gal te rtags gsum la 'gal ba mi srid na slob dpon phyogs kyi glang pos 'gal ba mi 'khrul pa can bshad pa mi brjod par 'gyur te/ rtags gsum ga la 'gal ba mi srid pa'i phyir te/'gal ba mi 'khrul pa can ni rang gi bsgrub par bya ba la mi 'khrul pa kho na la yod par gsungs so snyam pa'o/ /rjes su dpag pa'i yul la slob dpon gyis ma brjod pa'i phyir gtan tshigs gsum la mi srid par 'dod pa kho na yin no/ /'o na slob dpon gyis gang la gsungs she na/'di'i yul ni le'u gsum pa las bstan par bya'o/ /gal te yang mthong ba tsam gyis sa la sogs pa ma mthong ba dag las grang ba yang ma yin/ dro ba yang ma yin pa'i reg pa 'gog par byed na yang rigs pa ma yin no zhes bya ba slob dpon gyis gang bshad pa 'brel pa la mi ltos par ma mthong ba tsam gyis dgag pa 'grub pa'i phyir la/mthong ba ni sa la sogs pa mngon sum ma yin pa dag la yang yod pa'i phyir dgag pa 'di rigs pa nyid yin na/ ji ltar rigs pa ma yin no zhes bshad pa de'i phyir/ mi dmigs pas med par 'grub pa'i phyir ro zhes bya ba smos te des na dgag par rigs pa nyid du 'gyur ro//snang ba yod na snang du rung ba'o/ /de'i yul ni snang ba'i yul te/ rtogs pa po mngon sum du gyur pa'i chos can no/ /'o na ji ltar zhe na/ bye brag pa des ni sa la sogs pa spyir bzung nas te/ 'di ltar dro ba'i reg pa ni me'i yon tan no//grang ba ni chu'i'o/ /grang ba yang ma yin dro ba yang ma yin pa ni rlung gi'o/ /de ltar na sa dang chu dang me snang ba dang / mi snang ba thams cad la reg pa btang snyoms pa med de ma dmigs pa'i phyir ro zhes dgag pa smras so/ /gal te ji ltar na ma dmigs pas dgag pa 'di rigs pa ma yin nam zhe na/de yang zhes bya ba smos te/ de yod kyang zhes bya ba ni sa nyid de yod kyang ngo / /reg pa tha dad pa ste/ 'jam pa dang / yang ba nyid la sogs pa tha dad pa mthong ba yod de sa'i sra ba nyid du mtshungs pa ma yin pa'i phyir/ grang ba yang ma yin/ dro ba yang ma yin pa'i reg pa 'di yang sa la sogs pa'i bye brag 'ga' zhig la srid par dog par 'gyur bas so//yul de ba rnams kyis de ltar mthong zhes te zhes bya ba ni sgyu ru ra bska ba mthong gi mngar bar ma mthong ba'o/ /de ltar mngar la sgyur ba ma mthong ba tsam gyis sgyu ru ra mthong ba tsam skyu ru ra bska ba kho nar 'grub par mi 'gyur te ci'i phyir zhe na/rgyu dag la khyad par srid na de'i 'bras bu yon tan dag la khyad par srid pa dag gi phyir ro/ /'dir yang sgyu ru ra dang bska ba nyid dag 'brel pa med pa'i phyir/ bska ba med kyang sgyu ru ra nyid mi ldog go snyam du dgongs so/ /rgyu las 'bras bu'i khyad par 'grub pa'i 'brel par rig byed dgag pa bzhed nas/rgyu la khyad par med na ni/ /zhes gsungs te/ rig byed ni skyes bus ma byas pa nyid du spyod pas bshad la de la ni rgyu la khyad par med pa'i phyir skyes bus byas pa nyid du rjes su dpag go/ /ji ltar khyad par med ce na/ tshig la khyad par med pa'i phyir//zhes bya ba smos te/ skyes bus byas pa'i tshig dang khyad par med pa'i phyir ro zhes bya ba'i tha tshig go/ /de'i phyir skyes bus byas par yang grub bo/ /gal te de nyid ji ltar shes she na/ thams cad skyes bu dag gis byed par mthong ba'i phyir ro zhes bya ba smos te/ sgra gsal ba dang /mi gsal ba dang / ring po dang / thung ngu dag dang dug zhi ba la sogs pa dang / don brjod pa dang / go dka' ba la sogs pa thams cad skyes bus byed par mthong ste/ rig byed kyi sgra la yod pa'i rang bzhin de thams cad skyes bus byed pa'i phyir ro/ /de ltar na de na skyes bus byas pa dag dang /rang bzhin khyad par med pas rgyu la khyad med pa nyid du grub pa'i phyir 'bras bu yang skyes bus byas par khyad par med pa nyid dpag ste/ khyad par rgyu med pa mi rung ba'i phyir ro/ /de ltar grub na skyes bus byas pa dang / khyad par med pa'i rang bzhin yin pa'i phyir skyes bus ma byas pa nyid med de/skyes bus byas pa'i rang bzhin dang khyad par med pa'i phyir ro/ /yang na skyes bus byas pa yin te/ skyes bu dang rang bzhin khyad par med pa'i phyir ro zhes bya ba'i don to/ /yang na rgyu la khyad par yod na 'bras bu'i khyad par dpag pa'i phyir skyes bu thams cad mkhyen pa dgag pa dpyod pa pa smra bas yang dag par bzhed nas/gang gis na tshig la sogs pa cung zad ces bya ba smos te/ 'dis na 'bras bu dang rang bzhin gyis ma 'brel ba dang / rtags su 'dod pa smra ba'i phyir/ /zhes bya ba la sogs pa 'gog par byed do/ /yon tan thams cad la khyad par mthong ba'i phyir ro zhes bya ba ni thos pa dang sgyu rtsal la sogs pa yon tan thams cad la goms par byas pa la sogs pa'i rgyu las chung ngu dang /'bring dang / chen po dang / shin tu chen po khyad par mthong ba'i phyir ro/ /de'i phyir lus dang ldan pa'i phyir 'dod chags dang ldan pa'o zhes bya ba la sogs pa'i rtags ni skyu ru ra yin pa'i phyir bska ba kho na'o zhes bya ba ltar 'khrul pa nyid do//gzhan la yang zhes bya ba ni 'dod chags dang bral ba la sogs pa'o/ /de dag la yang lung phyin ci log pa goms pa'i legs par bya ba'i khyad par gyi rgyus khyad par de lta bu srid do/ /'dod chags dang bral ba sogs pa la sgrub par byed pa srid par bstan nas/'gog par byed pa med do zhes bstan pa'i phyir/ mi srid par rjes su dpag pa la zhes bya ba smos te/ 'dod chags dang bral ba la sogs pa mi srid par ro/ /ci'i phyir gnod pa can med ce na/ 'dod chags bral ba ma mthong ba'i phyir zhes bya ba la sogs pa smos so//gal te 'bras bu la 'dod chags dpog pa de nyid gnod pa can yin no zhe na/ 'dod chags la sogs pa'i 'bras bu zhes bya ba smos so/ /gal te 'dod chags kho nas bskyed pa'i tshig kyang srid do zhe na/ srid kyang zhes bya ba smos te/ de lta bu'i tshig srid kyang tshig gi bye brag ni rtogs par dka' ste/dgos pa'i dbang gis 'dod chags dang bral ba yang chags pa ltar smra ste/ dgra bo dang slu ba na'o/ /de las bzlog pa yang smra ste/ de'i phyir bye brag blta bar mi nus pa'i phyir rtags mi 'grub po/ /gal te 'dod chags dang bral ba ma mthong ba'i phyir spong ngo zhe na/de lta bu dag ni zhes bya ba smos te ma mthong ba tsam dag ni'o/ /spang bar rigs pa ma yin te/ ma mthong ba dang yod par mi 'gal ba'i phyir ro/ /gal te rig byed kyi tshig dag la yang khyad par yod mod kyi blta bar mi nus so zhe na/ tshig rnams ni zhes bya ba smos te/dug sel ba la sogs pa'i bye brag rnams bltar rung ba'i phyir ro/ /gal te de ltar bltar mi rung ba'i khyad par yod do zhe na/ bltar mi rung ba nyid gcig yin na yang zhes bya ba la sogs pa gsungs so/ /rigs mi mthun pa ni skyes bus ma byas pa la sogs pa'o/ / khyad par bltar mi rung ba yang ma yin te/ 'di ltar dug sel ba la sogs pa snang ba de dag ni gzhan skyes bu'i sgra rnams la yang bya bar nus pa'i phyir ro/ /gal te khyad par mngon sum yin yang 'khrul pa'i phyir mi nges te skad cig ma bzhin no zhe na/ 'khrul ba'i rgyu mtshan med pa'i yang / / zhes bya ba smos te/ bye brag bltar rung ba 'ba' zhig tu ma zad do zhes bya ba ni yang gi don to/ /ci'i phyir 'khrul ba'i rgyu mtshan med ce na/ gnod par byed pa med pa'i phyir zhes bya ba smos te/ skad cig ma ma yin pa nyid du 'khrul ba la ni rjes su dpag pa gnod par byed pa'i phyir 'khrul bar 'grub po//sgra rnams mtshungs pa nyid du 'dzin pa la ni gnod par byed pa med pas 'khrul ba nyid du mi 'grub po/ /gal te skyes bu dag 'dra bar 'dzin pa la yang gnod par byed pa med do zhe na/ skyes bu dag ni zhes bya ba la sogs pa smos so/ /gal te khyad par tshig la gzhan yin pa'i sgra rtags kyang de mi 'grub po zhe na/tshig gi khyad par zhes bya ba la sogs pa smos so/ /khyad par med pa'i phyir skyes bus byas pa rnams kyang skyes bus ma byas par 'gyur ba'i phyir 'ga' yang skyes bus byas pa ma yin pa thal bar 'gyur ro/ /gang gi phyir 'brel pa med pa ma mthong ba tsam gyis ldog pa med pa de'i phyir de tsam dang 'brel pa zhes bya ba la sogs pa smos so//kha cig slob dpon phyogs kyi glang pos bshad pa'i tshig 'brel ba ston pa dang / de rnams shes byed ces lung tsam du smra zhing 'brel ba ston pa'i tshig rgyu dang 'bras bu'i dngos po'am zhes bya ba la sogs pa la rigs pa smra ba yod de/de ni sgra'i bstan bcos kyi dri ba 'dir smra ba yin gyi don ni ma yin te/ rigs pa'i bstan bcos las bstan pa'i don 'di rnams ni gtan tshigs la sogs pa'i ngo bo nyid yin pas slob dpon phyogs kyi glang po'i tshig gi don rnams kyang 'brel pa bsgrub pa'i rigs par bstan par bya'o//de lta ma yin na rigs par 'dod pa dag kyang lung nyid du nus so/ /dgag pa'i gtan tshigs ni gsum kho na ste zhes bya ba ni slob dpon phyogs kyi glang pos bshad pa'o/ /ma rtogs pa ni 'bras bu mi dmigs pa la sogs pa'o/ /rtogs pa ni rang bzhin 'gal ba la sogs pa dmigs pa'o//tshad ma rnam par nges pa'i 'grel bshad las/ rang gi don gyi rjes su dpag pa'i le'u ste gnyis pa rdzogs so// //gal te rjes su dpag pa ni shes pa'i bdag nyid yin na/ ji ltar sgra rjes su dpag par brjod ce na/ de'i phyir rgyu las 'bras bu btags pa'i phyir ro//zhes gsungs te/ 'dogs pa'i rgyu ni rgyu dang bcas par 'brel ba'o/ /dgos pa ni rjes su dpag pa'i shes pa bskyed par nus pa bye brag tu rtogs par bya ba'i phyir te/ ma grub pa dang / rjes su 'gro ba ma tshang ba la sogs pa ni mi nus pa yin la/ dam bca' ba dang por brjod pas yang mi nus pa nyid do//nye bar sbyar ba dang / mjug bsdu ba dag ni nus pa'i tshig las lhag ma yin pa'i phyir sgrub par byed pa ma yin no zhes bstan to/ /de lta bas na ma grub pa la sogs pa'i skyon dang bral ba brjod pa'i sbyor ba'i ngag ni tshad ma'o zhes rtogs par bya'o/ /rgol ba dang phyir rgol ba gnyi gas dngos po la mthong ba ma yin pa lung las mthong ba ni dper na grangs can pa kha cig na re/gzhan phyir rgol ba sangs rgyas par rtogs par bya ba'i ched yin pa'i phyir grangs can rgol ba rang gi rtags ma mthong yang ste/ rang la ma grub kyang sgrub par byed pa yin te/ dper na bde ba la sogs pa zhes bya ba la sogs pa smos so//ma byung ba las byung ba ni skye ba yin na de grangs can bdag nyid la ma grub ste/ dngos po yod pa nyid gsal ba la skye bar 'dod pa'i phyir ro/ /yod pa gtan nas med par 'gyur ba ni mi rtag pa yin na grangs can de ni yod pa mi mthong ba las mi rtag par 'dod pa'i phyir ro/ /rjes su dpag pa'i yul la zhes bya ba ni don gyis don rtogs par byed pa la'o//de ltar dngos po go bar byed pas na/ lung ni tshig yin pa'i phyir ngag tshad ma nyid mi srid pa'i phyir ro/ /gal te ci'i phyir tshad ma ma yin zhe na/ gang tshad ma yin na ni rjes su dpag pa zhes bya ba rtags 'jug par mi 'gyur te/ ngag gi dam bcas pa sgrub par 'dod pa'i don grub na'o//gal te ngag khyad par can zhes bya ba 'dir smras pa'i skye ba can nam mi rtag pa'i lung ngo / /'di ni lung gi tshad ma pa'i skabs le'u gnyis par ro/ /gal te lung 'di la sngar dpyad pas mi gnod do zhe na/ gzhan yang 'di la zhes bya ba ni skye ba can nam mi rtag pa lung 'di la'o//mi slu ba'i tshad ma'i khyad par gzhan las bye brag tu gyur pa ni cung zad kyang med do zhes bya ba smos te/ ngag nyid don dang ma 'brel ba nyid du 'dre ba'i phyir ro/ /mi slu na ni zhes bya ba don dang 'brel ba'o/ /des grub pa ni zhes bya ba dngos po dang 'brel ba des so/ /grub pa des ni gzhan sangs rgyas pa 'ba' zhig grub pa ni ma yin te/dngos po'i stobs kyis 'ongs pa ni khyod nyid la grub pa'i phyir ro/ /khas blangs nas 'jug pa ni ma yin gyi zhes bya ba ni gzhan gyis khas blangs pas don 'grub par byas nas don gdod dpyod pa'i brtag pa 'jug pa ni ma yin te dpyad pa dgos pa med pa'i phyir ro//'o na ci zhe na/ brtag par rtsom pa na ni khas blangs par 'os sam mi 'os zhes dpyod pa pa khas len pa'i rgyu sems pas rgyu brtags nas gdod khas len pa'i phyir ro/ /sangs rgyas pa de'i lung dang gnod pa sems pa med pa nyid bsgrub par bya ba'i phyir dang pha rol sangs rgyas pa la skye ba can dang mi rtag pa smras pa/gnod pa de'i phyir sangs rgyas pa de'i lung 'di tshad ma yin par 'gyur la/ tshad ma ma yin pa des grub pa'i skye ba can dang / mi rtag pa ni dngos por grub pa ma yin pa'i phyir gtan tshigs ma grub pa de las ji ltar bsgrub par bya bar sems pa med pa 'grub/gal te gtan tshigs de skye ba can la sogs pa'i lung dang ldan pa sangs rgyas pa de la grub po zhe na/ don gyis don dpyod pa'i skabs na gang gi lung gang yin te/ lung ni gang gi yang sgrub par byed pa ma yin no zhes bya ba'i tha tshig go/ /gal te khas blangs pa'i'o zhe na/lung de skye ba can gyi tshad mas gnod na khas mi len pa'i phyir ji ltar lung yin/ gal te tshad mas gnod kyang bdag nyid kyis khas blangs pa'i phyir lung yin no zhe na/ des khas blangs pa tsam gyis rang gi lung zhes bya ba 'di mi rigs te/ skye bo lung khas blangs pa med par reng bur skyes gyur cing lhan cig pa'i lung med do//gal te phyis rang gi grub pa'i mtha' khas blangs pas rang gi lung yin no zhe na/ tshad mas bsgrub pa'i yon tan dang / tshad mas gnod pa'i skyon ma mthong bar te/ mi rtog par grub mtha' 'dzin pa 'di/ kye ma ste kye hud rmongs pa'i tha snyad dbang byed par gzhan gyis byin nam/'di rang nyid 'gal bas len pa ni mi rigs so zhes bya ba'i don to/ /sangs rgyas pa de'i lung dang / 'gal ba bde ba la sogs pa sems pa med pa nyid khas blangs te/ lung la gnod pa'i tshad mas khas blangs pas lung tshad ma ma yin par byas nas yang lung de nyid kyis bstan pa skye ba can la sogs pa de ltar gtan tshigs grub pa yin/gal te lung de khas blangs pa yis grub pa'i phyir gtan tshigs grub po zhe na/ lung de khas blangs na yang lung de la tshad mas gnod phyir lung de btang ba yin la/ btang ba'i lung ni lung gi tshad ma ma yin pas des grub pa yang ma yin ma grub pa yang ma yin pa'i phyir bsgrub pa'i yan lag ma yin pas bsgrub par bya ba rtogs par rigs pa ma yin pa'i phyir ro//gal te tshad mas gnod pa'i phyir lung ma yin yang sangs rgyas pa des khas blangs pas lung du gzhag pa yin la tshad mas gnod pas byas pa'i skye ba can la sogs pa grub pa ma yin pa de gtan tshigs su byas te/gtan tshigs de'i phyir sems pas med pa'i dngos po gnas pa'i phyir yang dngos po legs par gnas pa yin no zhes bya ba ste ba sting ba'o/ /yang zhes bya ba'i sgra ni gang gi lung gang yin ma grub par ma zad kyi gtan tshigs ma grub pas bsgrub par bya ba sgrub pa 'gal ba yang ma yin no zhes bya ba'o//gal te gtan tshigs skye ba can la sogs pa ni sangs rgyas pa'i 'dod pas gzhan la kho bo cag la ni ma grub mod kyi zhe na/ skyes bu'i 'dod pa zhes bya ba la sogs pa smos so/ /skyes bu'i 'dod pa'i byas pa ni gtan tshigs nyid du 'dod pa dag kyang dngos po la 'jug pa ste/mi slu bar nges pa med pa'i phyir ro/ /de'i phyir gtan tshigs ltar snang ba dang bye brag med do/ /yang na 'dod pa ni dngos po ji lta ba bzhin du 'jug par nges pa med pa ste/ bdag nyid la 'jug pa'i tshig brjod par 'dod pa mthong bas so//dngos po la gtan tshigs kyi don yod pa nyid yang de rtags shes pa'i rtogs pa la ltos te/ bsgrub par bya ba dang sgrub par byed pa yin gyi/ rtags kyi don med par rtogs pa tsam 'ba' zhig ste/ rnam par rtog pa 'ba' zhig ni bsgrub par bya ba sgrub pa ma yin na/ gang gi phyir pha rol gyis khas blangs pa rtogs pa tsam gyis bsgrub par bya ba 'grub par 'gyur/gal te skye ba la sogs pa dngos por yod pa yang srid do snyam na yod kyang zhes bya ba smos te/ skye ba la sogs pa dngos po yod kyang rtags rtogs pa lung tsam las grub pas dngos pos byas pa ma yin na rtogs pa ma yin pa'i phyir de ni rtags ma yin dngos pos yod pa'i rtogs pa dang bye brag med pa ste/rtags tshad mas ma nges pa ni yid ches par byed pa ma yin par mtshungs pa'i phyir ro/ /gal te 'bras bu dang rang bzhin dang mi dmigs pa ji skad bshad pa lta bu ni gtan tshigs yin la de lta bu'i rtags shig yin na ni tshad mas nges pa yin pa'i phyir dngos po la grub pa rtags kyi mtshan nyid yin na ci'i phyir grangs can bdag nyid la sogs pa la ma grub/gal te rang nyid la tshad mas ma grub po zhe na/ sangs rgyas pa la sogs pa'i phyir rgol ba la yang tshad ma las gzhan gyis rtags 'grub par rigs pa ni ma yin pa nyid do//gal te lung las grub pa rtags ma yin na gzhan gyis khas blangs pa'i rtags kyis thal bar bsgrub pa ji lta bu zhe na/ thal bar 'gyur ba ni pha rol gyis kun brtags pa ste/ 'gal ba'i chos khas blangs pas de'i 'gal ba ston par zad kyi bsgrub par bya ba bsgrub pa ni ma yin no zhes bya ba'i don to//de nyid bstan pa'i phyir dper na zhes bya ba smos te/ dpyod pa pa dang bye brag pa dang gang dag spyi ni gcig pur khas len la/ rang gi gsal ba yul dang / dus dang / gnas skabs nges pa'i bye brag gsal ba gcig dang rnam par ma chad pa zhes bya ba spyi'i rang bzhin cha shas lus pa med par spyi rdzogs pa'i bdag nyid 'dre ste 'brel par 'gyur te/spyi la de dang 'brel ba'i rang bzhin gcig las gzhan ma 'brel ba'i rang bzhin med pa'i phyir ro zhes 'dod pa du ma la 'jug par yang khas len to/ /de la 'di ltar 'gal ba khas blangs pa ston te gsal ba du ma 'jug pa spyi gcig po de yul la sogs pa ste/dus dang gnas skabs nges pa'i bye brag bzhin du gzhan du ste/ du mar ni rigs pa ma yin te/ gcig pu'i rang bzhin de lta bu'i rang bzhin can gyi spyi ni yul la sogs pa ste dus dang gnas skabs gzhan de mi 'dra ba rnams dang 'brel pa zhes bya ba 'jug par 'gal te/gcig dang du ma 'gal ba'i phyir ro/ /de ltar khas len pa de ni chos du ma la 'jug pa gcig khas blangs na/ cig shos rang bzhin tha dad pa khas blangs par bstan pa'i don du ste/ de ltar na gcig nyid dang 'gal lo/ /gal te tha dad pa nyid khas mi len na ste gcig nyid du 'dod na tha dad par ldog par 'gyur bas du ma la 'jug pa dang 'gal lo//gal te de ltar gyur pa nyid ci'i phyir zhe na/ du ma la 'jug pa la tha dad pas de'i bdag nyid kyis khyab pa'i phyir dbye bar mi nus pas tha dad pa log na du ma la 'jug pa yang ldog par 'gyur ro//gal te de'i bdag nyid yin pa ji ltar 'grub ce na/ de zhes bya ba ni bdag nyid kyis 'brel ba'o/ /bzhin du ste dpe la'o/ /dngos po zhes bya ba ni bdag nyid gcig par ro/ /'brel to zhes bya ba ni 'brel bar rtogs pa'o/ /ji ltar zhe na/ gang zhig du ma la 'jug pa de ni tha dad pa yin te/ rdzas dang yul la sogs pa du ma la zhugs pa'i sngon po dang ser po lta bu'o zhes so/ /da ni zhes bya ba ni pha rol gyi ste gal te spyi la tha dad pa mi srid pa der ji ltar rtogs par 'gyur snyam pa'o/ /lan sbyin pa ni tha dad pa mi srid na du ma la 'jug pa de yang spyi de srid de/ khyab par byed pa tha dad pa log pa la khyab par bya ba du ma la 'jug pa ldog pas khyab pa'i phyir te/yul la sogs pa nges pa'i gsal ba gcig bzhin no/ /gal te du ma la 'jug pa'i gcig po de mi ldog par khas len na de la khyab par byed pa tha dad pa gzhan de nges par 'thob pa'i phyir tha dad pa dor bar dka' 'o/ /gal te khyab pa de lta mod kyi sangs rgyas pa la thal bar 'gyur ba'i gtan tshigs gcig du ma la 'jug pa zhes bya ba ma grub ste/rang gi 'dod pa spyi gcig du ma la 'jug par 'dod pa las gzhan du gnas te/ de lta bu mi 'dod pa'i phyir te/ gal te de khas blangs na dam bcas pa la rang gi 'dod pas gnod pa'i phyir ro zhe na/rtags kyi don gang rtogs na de rtogs nas rang gi khyab par byed pa mi 'dor ba'i phyir shugs kyis gzhan med de khyab par byed pa'i chos kyang rtogs te/ khyab par bya ba gang khas blangs pas khyab par byed pa de khas blangs par 'gyur te'o/ /don las don rtogs pa de'i phyir grub pa'i mtha' gzhan du gnas kyang don rtogs pa la gags byed cing phan pa yang med pa'i phyir grub pa'i mtha' gzhan du gnas pa'i skyon brjod pa'i skabs na ma yin no//de lta bas na grub pa'i mtha' dang 'gal yang don gang rigs pa'i stobs kyis 'ongs pa de dang de dag thams cad khas blang bar bya ste'o/ / yang na 'ga' yang ste khyab par byed pa khas mi len na/ khyab par bya ba rang gis khas blangs pa'i rtags kyi chos du ma la 'jug pa la sogs pa yang khas blang bar bya ste/ khyab par byed pa khas mi len pa'i phyir ro/ /de ltar grub pa'i mtha' ma grub kyang skyon med do zhes smras nas da ni ma grub pa yang ma yin pa nyid du bstan par bzhed pas ma grub pa yang ma yin te zhes gsungs te/gal te du ma la 'jug pa yin pa lta na tha dad pa 'di yang yin la tha dad pa ma yin na du ma la 'jug pa dang gnyi ga ma yin no zhes chos de gnyis 'brel bar ston pa'i phyir ro/ /gcig tu nges par gcig du ma la 'jug pa nyid du yongs su bzung nas rtags ma grub pa'i skyon 'dir 'gyur gyi de ltar khas mi len pa ni ma yin no//yang na gtan tshigs du ma la 'jug pa la sogs pa dngos po'i don du yod na grub pa'i mtha' dang 'gal yang rtags la khyab pa'i rigs pa'i stobs las thob pa ni nges par yongs su gzung bar rigs te/sngar bshad pa ltar de khas blangs na zhes smos pa bzhin no/ /'o na don 'di sngar bshad ma thag pa nyid yin pas zlog par 'gyur ro zhe na/ ma yin te gal te khas blangs pas gnod par mi 'gyur ram zhe na/ khas blangs pas rigs pa la gnod par mi nus so zhes bya ba 'di 'og nas bshad par bya'o zhes bya ba ni gzhung 'di bstan pa'i 'brel ba'i don du bzlas pas so//de lta bas na khyab par bya ba'i chos gcig khas blangs pa can gyis nges par chos gzhan khyab par byed pa khas blang par bya ste/ rigs pas byas pa la grub pa'i mtha' dag gi gnod par mi nus pa'i phyir ro//gzhan yang gtan tshigs gcig du ma la 'jug pa zhes bya ba de med na yang rtsa ba'i gtan tshigs te gtso bor gyur pa du ma la 'jug pa zhes bya ba nyid kyis 'dod pa rtogs te khyab par bya ba du ma la 'jug pa yin la de la yang khyab par byed pa tha dad pa nyid du gnas pa'i dngos po 'di sngon po dang ser po la sogs par sgrub par byed la/des ni ldog pa'i khyab pa tha dad pa med na du ma la 'jug pa'i yang ldog par ston pas du ma la 'jug pa dang gcig nyid 'gal bar ston par byed kyi/ de las bzlog pa du ma la 'jug pa dang gcig mi 'gal ba sgrub par byed pa ni ma yin te/ gcig du ma la 'jug pa zhes bya ba'i gtan tshigs tshad ma can ma yin te/'gal ba'i don de 'dra ba mi srid pa'i phyir ro/ /gal te kho bo yang skye ba dang ldan pa la sogs pas thal bar 'gyur ba byed do zhe na/ gal te 'dir yang du ma la 'jug pa de bzhin du sems pa med pa bzlog pa nyid kyis mi rtag pa nyid dang / skye ba dgag par bya bar thal ba yin na/khyed grangs can pa'i smra ba 'ga' yang de ltar dgag par byed pa ni med de skye ba dang / mi rtag pas sems pa can 'gog par zad pas so/ /gal te de ltar dgag par bya ba'o zhe na/ de ltar bya ba yang mi nus te zhes bya ba smos te/ dgag pa de mi nus so/ /ci'i phyir zhe na/sems pa can gzhan dag skye ba dang mi rtag pa 'gal ba ma grub pa'i phyir/ thal bar 'gyur ba skye ba'am/ mi rtag pa'i phyir sems pa med pa can/ thal ba las bzlog pa sems pa med pa log pas skye ba la sogs pa ldog pa dag gi gtan tshigs go bar byed pa ma yin pa'i phyir ro/ / gal te go bar byed pa ma yin pa ji lta bu zhe na/ 'di ltar thal ba ni gang skye ba'am/ mi rtag pa de sems pa med pa ste/ dper na bum pa lta bu'o zhes bya ba yin na/ 'dir sems pa can skye ba can la sogs pa 'gal ba ma grub pa'i phyir/ de'i phyir rgol bas ni sems nyid skye ba dang mi rtag par mthong ba'i phyir ro//thal ba las bzlog pa gang sems can de ni skye ba la sogs pa med de/ dper na bdag shes pa yod pa bzhin no zhes bya ba yin na 'di yang sems pa can mi rtag pa la sogs pa 'gal ba phyir rgol ba las ma grub po/ /gal te ji lta bu zhe na/ sngar rgyu ma tshang ba med pa 'byung ba zhes bya ba la sogs pa zhes bya ba smos so//de ji ltar ma grub ce na/ skye ba can dang mi rtag pa rgyu ma tshang ba med par yod pa la sems pa can byung na/ skye ba la sogs pa med par 'gyur ba dang / skye ba dang 'jig pa dag phan tshun spangs pas sems pa can du gnas pa dang / de sbangs pas skye ba la sogs par gnas pa'i 'gal ba 'di dag ma grub pa'i phyir te/sems pa can yang yin la skye ba dang 'jig pa can yang yin par mthong ba'i phyir ro/ /gal te khyod kyis thal ba du ma la 'jug pa dang gcig pa dag ji ltar 'gal zhe na/ gcig pa'i yang zhes bya ba smos te rtag pa dang / mi rtag pa 'ba' zhig tu ma zad do zhes bya ba ni yang gi don to//gcig pa ni spyi'o/ /rnam par ma chad par 'brel ba zhes sngar ji skad smos pa du ma'i rang bzhin gyis stong par khas blangs pa'i phyir yul la sogs pa ste/ dus dang rdzas gzhan dang spyi 'brel ba zhes bya ba 'jug pa med de gcig de yin pa dang du ma dang 'brel pa gcig de ma yin pa dag phan tshun spangs te gnas pa'i mtshan nyid yin pas 'gal ba'i phyir ro//de lta bas na thal ba du ma la 'jug pa'i phyir tha dad de sngon po dang / ser po lta bu'o/ /spyi yang du ma la 'jug pa yin no zhes bya ba dang / thal ba las bzlog pa tha dad pa med na du ma la 'jug pa yang med de/dper na yul la sogs pa nges pa'i gsal ba gcig bzhin no/ /spyi yang tha dad pa med pa yin no zhes bya ba'i rtags go bar byed pa yin no/ /slob dpon dag gis zhes bya ba dbyig gnyen gyi zhal snga la sogs pas so/ /gal te gcig dang du ma la 'jug pa dag 'gal mod spyi ni gnyi ga'i rang bzhin no zhe na/'gal ba dag ni zhes bya ba smos te du ma la 'jug pa zhes bya ba du ma'i rang bzhin gcig khas blangs na/ gcig nyid yongs su gtong ste/ spong ba med na ste gcig ma yin khas mi len na du ma rang bzhin du khas blangs mi 'byung ste/ mi srid pa'i phyir/spyi la gcig dang / gcig ma yin pa'i chos gnyi ga yod pa ma yin no/ /gal te spyi de lta bu med na ni ji zhig la dpyod par byed ce na/ dpyad pa'i skabs ni zhes bya ba smos te/ grub pa'i mtha'i don dpyad pa'i skabs na'o/ /grub pa'i mtha' rigs pa'am mi rigs par khas blangs pa'i phyir de las grags pa'i don khas blangs te/de la dpyad pa bya'i de lta ma yin na de'i don dpyod par mi 'gyur ba'i phyir ro/ /de'i phyir gzhan du khas blangs zhes bya ba smos te/ grub pa'i mtha' las gzhan du spyi med par khas blangs nas spyi dpyad pa ni mi rigs pa'i phyir ro/ /de ltar lung las mthong ba bkag nas rnam par btags pa dgag pa'i phyir don med pa zhes bya ba smos te/dngos por gyur pa'i nye ba zhes bya ba ni dngos por gyur pa'i rjes su 'gro ba'o/ /'o na ji lta zhe na/ smra ba po'i brjod par 'dod pas gang yang rung zhes bya ba'i 'dra ba yin par brjod do/ /res 'ga' bum pa dang /sgrar 'dra ba yin pa'i phyir mi rtag ces smras la gzhan yang nam mkha' dang sgrar 'dra ba'i phyir rtag pa'o zhes brjod de/ mi rtag pa'i zla yin pas dang rtag pa'i zla yin pas zhes bya ba'i don to/ /gal te rtag pa dang cig shos kyi zla gnyi ga ji lta bu zhe na/ de nyid kyi phyir brjod par 'dod pa mi rtag pa dang /cig shos mi rtag pa ma yin pa dag la ring ba dang ring ba med pa ste/ nye ba dang 'gal ba dang / mi 'gal ba dag smra ba po brjod par 'dod pa la yod pa ma yin pa'i phyir de ltar sbyar bar zad do/ /dngos po'i rang bzhin nyid yin na ni sngar mi rtag pa dang 'dra bar smras nas yang brjod par 'dod pa rtag pa dang 'dra bar brjod par mi bya ste 'gal ba'i phyir ro//gal te brjod par 'dod pa 'gyur ba ma yin gyi cig car du'o zhe na/ dus gcig tu zhes bya ba la sogs pa smos te/ yang zhes bya ba ni rim 'ba' zhig tu zad do zhes bya'o/ /de bzhin du 'jug par mi 'gyur ro zhes bya ba ni dngos po ji lta ba bzhin du sgra 'jug par mi 'gyur ba'o//de lta bas na gtan tshigs de lta bu ni sgra tsam du zad kyi don ni med do/ /de'i phyir de las don mi 'grub ste/ dngos po'i mtshan nyid dag la rtags de lta bu ni ring ba ste ldog pa dang / nye ba ste rjes su 'gro ba ma grub pa'i phyir ro/ /gal te ring ba dang nye ba de grub na ni gang yang rung ba cig yin pa'i phyir zhes bya ba go bar byed pa yin te/dper na 'ga' zhig tu zhes bya ba rgyab kyi cha mthong ba'i dus 'ga' zhig tu'o/ /de dang 'dra ba zhes bya ba rwa can dang 'dra ba'i'o/ /gal te 'di ltar dngos pos ma yin na yang kho bos de ltar 'dod pa'i phyir rtag pa nyid grub po zhe na'o//'dod pas sbyar ba des don rtag pa'am mi rtag pas stong pa de'i phyir de ltar brjod par 'dod pa tsam ni 'bras bu'i sgra'i sgo nas kyang ngo / /don rtag pa'am cig shos ni mi 'grub ste/ smra ba po'i brjod par 'dod pa dngos po kho na la 'jug par nges pa med pa ste/'di ltar chu klung gi 'gram na bu ram gyi phung po yod do zhes med bzhin du yang 'jug pa'i phyir ro/ /de nyid kyi phyir 'dod pa la dngos pos khyab pa ma grub pas na 'dod pas byas pa'i rtags dngos po la 'khrul pa'i phyir ro/ /'dod pa tsam dang rjes su 'brel ba yin na/ / 'dod pa las ni dngos po yang ni gzhan yin pa'i phyir dngos po'i rjes su 'brel pa ma yin no/ /de'i phyir 'dod pa des byas pa'i rtags ni dngos po la 'khrul ba yin no/ /mngon sum ni phyogs kyi ngag rang gis so/ /brgyud pas ni phyogs kyi ngag las skyes pa la brten nas so//phyogs dang rtags brjod dag ces bya ba ji ltar de rtags brjod pa ni sbyor ba'i ngag yin pa'i phyir go bar byed pa ma yin nam zhe na/ rang gi sgrub byed du gnas pa zhes bya ba smos te/ dngos su don rtogs pa sgrub par byed par gnas par yod pa ma yin par phyogs dang mtshungs pa'i phyir ro/ / brjod pa zhes bya ba ni sgra'o/ /'brel pa nges pa med pa'i phyir zhes bya ba ni bsam pa'i dbang gis 'jug pa'i phyir ro/ /gdags par 'dod do zhes bya ba ni sbyor ba'i ngag ni sgrub par byed pa rtogs pa'i rgyu yin pas so/ /gdags pa'i dgos pa ni sngar bshad zin to/ /gal te de las zhes bya ba ni phyogs kyi ngag las so//ji ltar 'jug ce na/ sgra mi rtag go zhes brjod na ci'i phyir zhes the tshom du 'gyur ba las byas pa'i phyir ro zhes gtan tshigs kyi ngag 'jug go/ /nang du rtogs pa zhes bya ba ni de'i rang bzhin gyi don to/ /de la zhes bya ba ni 'das ma thag pa'o/ /de dran pa skyed pa zhes bya ba ni tshul gsum gyi nang du gtogs pa'i don dran pa skyed pa'o//yang zhes bya ba ni don tshul gsum kho na yin par ma zad kyi ngag kyang tshul gsum brjod pa kho nar nus pa rnam par gzhag pa'o/ /yul brjod pa zhes bya ba ni phyogs so/ /rtags brjod pa 'jug pa mi srid pa ni rtags yul med pa'i phyir ro/ / 'di brjod zin to zhes bya ba ni brgyud pas kyang ni nus ma yin zhes bya ba dang / the tshom las kyang shes par 'dod pa zhes bya bas so/ /gzhan yang zhes bya ba ni mi nus pa 'ba' zhig tu ma zad kyi dgos pa med pa yang yin no/ /nges par de ma bstan to zhes bya bar ni phyogs so/ /gal te snga phyi gang du yang chad pas bcad pa'i gnas yin no//tshig bzhi ste zhes bya ba ni mi rigs te ma bsal ba yang yin pa'i phyir ro zhe na/ 'di bzhi ni phyogs kyi mtshan nyid mi 'jug pa bsal bas ni gnod par 'gyur ba bsal ba'i phyir logs su bstan to/ /nges par khas blangs pa ni sgra mi rtag pa'o/ / de'i med na mi 'byung ba ma yin pa ni nam mkha'i yon tan no/ /med na mi 'byung ba ni dper na/ bdag med par khas blangs pa'i med na mi 'byung ba mi rtag pa dang / sdug bsngal ba dang / stong pa dag ste/ de dag khas ma blangs na bdag med pa mi 'byung bas so/ /skabs kyi ste zhes bya ba ni sangs rgyas pas bdag med do zhes brtsad pa ni/grangs can gyis skabs de bzlog pa'i phyir smras pa lta bu ste/ bdag gi don zhes ma smras kyang rtogs par 'gyur ro/ /de lta ma yin na rtags don med pa'i phyir ro/ /'dus pa ma yin pa'i don byed pa nyid do zhes khyad par gzhan spangs pa'i tshig gis chos kyi bye brag nyid do//'dus pa ma yin pa'i don zhes bya bar gzhan ma spangs pa'i tshig gis chos can gyi bye brag tu byas pa'o/ /rnam par gzhag pa tsam zhes bya ba ni sgra'i brjod pa'i lugs tsam mo/ /de ltar brjod pa las chos kyi bye brag las bzlog pa bsgrub pa'i 'gal ba dang chos can gyi bye brag las bzlog pa bsgrub pa'o zhes bya ba'i ming gi khyad par tsam gyi 'gal ba nyid ni gcig kho na'o//gal te gzhan zhes smras kyang 'dus pa na yin pa zhes ni ma yin no zhe na/ gzhan yang rang bzhin bye brag can de dag tu 'dod pas 'dus pa ma yin pa kho na'i don zhes skabs kyis bsgrub par bya ba yin te/ gzhan du rtags don med pas so//gal te de lta na yang ji ltar skyon du 'gyur zhe na/ de dag gang gis 'brel zhes bya ba smos te/ dpe la ni 'dus pa'i don kho na dang rtags 'brel gyi cig shos dang ni ma yin pa'i phyir 'brel ba ma grub bo/ /gang gis ji ltar brjod pa ni gzhan gyi don tsam mo/ /de ni dpe la gzhan 'dus pa nyid kyi don byed pa'i bsgrub par bya ba dang rtags rjes su 'gro ba grub po//de lta yin yang bsgrub par bya ba de dang rjes su 'gro ba med pa ste/ de dang 'gal ba 'dus pa ma yin pa'i don byed pa yang de dang 'gal ba dang / rjes su 'gro ba can gyi rtags kyis 'dren na ha cang thal bar 'gyur te mes kyang grang ba'i reg pa la sogs par ro//de ltar na gtan tshigs thams cad 'gal zhing zhes bya ba dag gis khyab par byed pa dang 'gal ba 'dren pa'i phyir ro/ /dpe yang bsgrub par bya ba ma tshang bar 'gyur te/ rang gi khyab par bya ba dang 'gal ba dpe la mi srid pa'i phyir ro/ /yang na dpe mal cha la sogs pa la 'dus pa ma yin pa'i don byed pa ma tshang ba'o//de tsam du zhes bya ba ni 'gal ba dag kyang ngo / /gang na yang zhes bya ba ni dpe gang la yang ngo / /rjes su 'gro ba zhes bya ba ni rtags dang 'brel ba'o/ /rtags dang dpe dag med pa de'i phyir rtags gang las kyang rtogs par mi 'gyur ro//brjod pa'i chos de 'dus pa ma yin pa nyid kyi don byed pa tshig tu brjod na ni skyon 'di zhes bya ba ni 'gal ba dang dpe med pa dag go/ /bsgrub par bya ba nyid du khyad par med pa'i phyir zhes bya ba ni rtags kyis rtogs par bya ba yin pa nyid du smras pa dang 'dra ba'i phyir ro//gal te 'dod kyang ma smras pa 'gal ba la sogs pa'i skyon med na'o/ /'dod pa la ni gnod par byed pa la yang 'gal ba'i skyon med par thal bar 'gyur ro/ /gal te skyon med par 'dod do zhe na/ skyon med pa ma yin te/ gtan tshigs mi mthun pa'i phyogs la 'jug pas bsgrub par bya ba phyin ci log tu bsgrub pa'i mtshan nyid yin ba'i phyir ro//smras pa phyin ci log tu bsgrub pa dang khyad par med pa'i phyir ro/ /gal te 'dus pa yin pa'i phyir zhes bya ba la phyin ci log med do zhe na/ ji skad smos pa ste/ 'dus pa ma yin pa'i don nyid do zhes bya ba la sogs pas chos dang chos can gyi bye brag nyid du bstan pa ste/gzhan du bye brag tu ma byas pa'i gzhan gyi don tsam ni rtags don med pa'i phyir ro/ /de lta bas na de la 'dus pa ma yin pa'i don rjes su 'gro ba med par 'dod pa nyid de/ ji skad du slob dpon dbyig gnyen gyi zhal snga nas kyis/ bdag gzhan zhe na ma grub phyir/ /zhes gsungs pa lta bu ste/ bdag ma grub pa de nyid 'dod pa la gnod par byed pa'i 'gal ba yin te/ bdag de dang rjes su 'gro ba med kyi de dang 'gal ba'i rjes su 'gro ba'i phyir ro/ /gang las rtsod pa zhes bya ba ni bdag gang las te/ de bsgrub pa'i phyir bsgrub pa bkod pa'o//de lta na yang zhes bya ba ni bsgrub par bya ba bkod pa'i 'bras bu bdag bsgrub par bya ba yin par 'dod na yang ngo / /phyin ci log tu grub pa zhes bya ba ni 'dus pa'i rjes su 'gro ba'i phyir 'dus pa'i don du grub pas so/ /gal te 'dus pa'i don nyid bsgrub par bya ba yin no zhe na/'bras bu med pa nyid ces bya ba smos te/ de ni phyir rgol ba yang 'dod pa nyid do/ /'gal ba 'bras bu med pa de nyid dpes bstan pa ni sgra'i mtshan nyid ni zhes bya ba smos te/ b+ha tri ha ri na re/ shes dang ldan dang phyi don dang / /rang gi ngo bo nyid kyang ste/ /de de sgra brjod pas rtogs pas//spyi ni 'brel bar rab tu gnas/ /zhes zer ba lta bu'o/ /de nyid sgra rnams ni ming dang 'brel bar ma gyur pa'i sngon nas kyang don dang ldan pa yin te zhes bya ba smos te/ ming dang 'brel ba ni brdar byas pa'o/ /de'i sngon rol ni de ma grub pa na yang ngo / /don dang ldan te/ sgra 'don pa na brjod par 'dod pa'i shes pa dang ldan par go bar byed/phyi'i don go bar nus/ rang gi ngo bo go bar byed de/ go'u zhes bya ba'i sgras brjod par 'dod pa dang / ba lang dang / rang gi ngo bo ga dang o dang u dag go bar byed pas so/ /des na brda'i sngon rol nas kyang brjod par 'dod pa'i shes pa dang rang gi ngo bor go bar byed do//rnam par dbye ba can du mthong ba'i phyir zhes bya ba ni dang po dang gnyis pa la sogs pa'i rang bzhin las mi 'da' ba'i phyir ro/ /'dir rang gi ngo bo tsam gyi don dang ldan par sgrub par 'dod la rnam par dbye bas ni phyi rol gyi don gyis don dang ldan par 'gyur ba'i phyir mi 'dod pa bsgrub pa'am/rang gi ngo bo tsam gyi don ni grub kyang don du skyes bus 'dod pa med pa'i phyir rtags don med de/ sgra las rang gi ngo bo rtogs par 'dod pa gzhan pa'i rtogs par bya ba ci yang med pa'i phyir ro/ /gzhan gyi don bye brag tu ma byas pas zhes bya ba ni 'dus pa ma yin pa gzhan gyi zhes bye brag tu ma byas na ni sgrub par 'dod pa bdag gi don du mi 'gyur ro//gzhan gyi don nyid khas blangs pa zhes bya ba ni bye brag tu ma byas pa sgrub na ni phyir rgol ba sangs rgyas pas khas blangs pa'i phyir ro/ /gnyis pa can gyi sbyor ba ni rgyang pan pa'o/ /de dag rjes su dpag pa tshad mar mi 'dod pa ma yin nam ji ltar rtags sbyor ba smras she na/'di ni 'gal ba med de gzhan la rab tu grags pa rjes su 'dod pas/ gzhan nyid la ston pas byed do zhes zer ro/ /sems pa can du gsal ba'i lus kyi mtshan nyid kyi skyes bu zhes bya ba ni de dag gi grub pa'i mtha' ni 'di lta bu ste/skyes bu dang sems zhes bya ba dag lus las gzhan pa ni ci yang med de 'byung ba'i rang bzhin gyi lus nyid sems dang skyes bu zhes bya'o/ /de'i phyir sems pa can du gsal ba'i lus kyi rang bzhin gyi skyes bu ste dgun chang rnams so/ /so ga'i dus su dang bar 'gyur ba dag chang nyid las gzhan ma yin pa de bzhin du/sems dang skyes bu yang 'byung ba yongs su gyur pa nyid yin gyi 'byung ba'i lus las gzhan ma yin no zhes bya ba'o/ /de ltar sgrub pa'i phyir ngan g.yo'i sbyor ba ste/ bum pa sems pa'i ngo bor gsal ba'i lus kyi mtshan nyid kyi skyes bus zla dang bcas par grub na lus nyid sems dang skyes bu yin par shugs kyis grub pa'o//rtsig pa ni rjes su 'gro ba'i yul te/ de la bum pa dang skyes bu de lta bu'i zla dang bcas pa rtags can dang / ut+pal ma yin pa nyid kyi rtags dag yod par snang bas so/ /de la yang rjes su 'gro ba med par bstan pa ni de lta bur gyur pa ste sems nyid kyi ngo bor gsal ba'i lus kyi skyes bus gnyis pa can du ma grub ste/lus ni sems las tha mi dad par the tshom za ba'i phyir ro/ /de ltar na sems gsal ba'i lus gnyis pa can zhes bya ba bsgrub par bya ba'i chos la the tshom za ba'i phyir dper mi 'gyur ro//de'i phyir rjes su 'gro ba med do/ /gal te spyis sgrub par 'dod pa'i phyir zhes bya ba ni spyi gnyis pa can tsam du sgrub kyi sems su gsal ba'i lus kyis gnyis pa can zhes bye brag mi 'phen pa'i phyir lus de tsam gyis sam/ yang na bum pas gnyis pa can yin pa'i phyir/ dpe la rjes su 'gro ba la the tshom mi za'o zhe na/gal te sems pa can du gsal ba'i lus kyis gnyis pa can du mi 'grub na grub par byed pa ut+pal ma yin pa nyid kyi 'bras bu ci zhig yin/ bum pa lus tsam gyis gnyis pa can du ni phyir rgol ba dag kyang 'dod pa'i phyir ro/ /yang na zhes bya ba ni rnam par rtog pa bzhi ste/gal te dpe la yod pa'i bsgrub par bya bar sems las bzlog pa'i bum pas gnyis pa can yin te/ skyes bus ni the tshom za ba'i phyir ma yin pa'i phyir sems pa can du gsal ba ma yin pa'i gnyis pa can dang gtan tshigs rjes su 'gro bar dpe la grub pas bum pa la yang mi 'dod pa grub pa'i phyir 'gal bar 'gyur ro zhes sngar grangs can pa la smra ba dang 'dra'o//gzhan yang gal te yang zhes bya ba smos te/ skyon sngar ma zad do zhes bya ba ni yang gi don to/ /gal te dpe la rjes su 'gro ba med pa spang ba'i phyir bye brag mi 'phen zhes smra ba bye brag de sgrub par byed pa rtags kyis yul du mi byed na ji ltar na rtags ut+pal ma yin pa'i phyir zhes bya ba des sems pa can du gsal ba'i lus kyis gnyis pa can de 'grub ste/sgrub par 'dod pa 'di ltar sems pa can du gsal ba'i zhes smra/ gal te gtan tshigs ut+pal ma yin pa nyid kyis sems pa can du gsal ba'i gnyis pa can du 'grub na ni zhes bya ba bye brag 'phen na ni ji ltar na de rtags kyi yul ma yin te/bye brag de 'phangs pa'i phyir mi 'phen no zhes bya ba mi rigs so/ /gal te yul yin no zhes bya ba bye brag 'phen na'o/ /rang la brten par 'gyur ba'i skyon ni sems pa can du gsal ba'i lus su the tshom za ba'i phyir rjes su 'gro ba la the tshom za ba'o//de lta bu yang zhes bya ba ni rjes su 'gro ba yod pas ni 'dod pa ma grub na ni rjes su 'gro ba yod pas ni 'dod pa mi 'grub la 'dod pa grub na ni rjes su 'gro ba med pa'i phyir skyes bu'i lus khyad par can 'phen du yang mi rung la mi 'phen du yang mi rung ba'i rgyang pan pa'o//ut+pal ma yin pa'i phyir zhes bya ba'i rtags nus pa med pa la/ mi 'dod pa sgrub pa de la brten pa'i bsgrub par bya ba de 'grub par bya ba'i sgrub par byed pa de lta bus nye bar 'tsho ste bde bar gnas na'o/ /pha rol sun 'byin pa klan ka'i 'jigs pa med pa ni mi 'tsho'am ci ste rang gi nyes pa la mi lta bar pha rol gnon pa ni rgyal rigs kyi rnam par gzhag pa ste/rigs pa la brten pa ma yin zhes bya ba'i don to/ /klan ka dang bcas pa dgod pa la mi bde ba med na sun 'byin pa 'jigs pa med pa de'i phyir ji srid don du gyur pa ste/ sems pa can du gsal ba'i lus kyi gnyis pa can no//sgrub par byed pa'i mthus grub pa 'phangs pa ni ut+pal ma yin pa nyid sgrub par 'dod pas 'phangs pa'o/ /des khyab pa ni bsgrub pa ma btang gi ngar du'o/ /sun 'byin pas kyang khyab ste/ ji srid du rjes su 'gro ba the tshom za ba'am/ the tshom mi za na phyin ci log gam zhes smra bar 'gyur bas so//gzhan yang de lta bu'i bye brag can sems pa can du gsal ba'o/ /khas mi len na zhes bya ba ni sems pa can du gsal bar the tshom za ba'i phyir de lta bu nyid du khas mi len no/ /spyi zhes bya ba ni gnyis pa dang bcas pa tsam nyid do/ / lus de lta bu ni ma grub pa'i phyir dang bum pa yang gnyis pa can du bsgrub par bya ba'i bum pa la mi srid par ston par 'gyur ba'i phyir gang yang rung ba la gnyis pa can gyi don nyid med pa'i phyir ro/ /gcig za ba mi srid pa ni gang yang rung ba gcig za zhes bya ba 'di sbyor bar mi 'dod la/ smra ba po za ba po gnyis la the tshom mi za ste/ lha sbyin kho na za snyam na yang gang yang rung ba gcig za'o zhes bya ba'i sgra 'di sbyor bar mi 'dod do/ /de nyid bstan pa'i phyir ji ltar zhes bya ba smos te bum pa rang nyid bum pa las don gzhan yin par ni khas mi len te de nyid las gzhan ma yin pa'i phyir ro/ /gal te bum pa nyid bum pa las gzhan yin par khas len na ni yang 'gal ba'i phyir te/bum pa dang bum pa ma yin pa 'gal ba'i phyir ro/ /de'i phyir bum pa las gzhan ma yin pas lus tsam zhig bum pa las don gzhan du gyur pa zhes bya ba yin par gnyis pa can gyi tshig gi don shugs kyis te/rigs pas rnam par gnas pa gzhan gcig las med pa'i phyir gang yang rung ba gcig gis gnyis pa can zhes smos pa ni don med do/ /gzhan du zhes bya ba ni bum pa las gzhan yin pa'o/ /gal te lus nyid 'dir don gzhan du 'dod pa kho na'o zhe na/ de nyid de skad ces brjod par bya'o zhes bya ba ni lus kyi gnyis pa can yin te zhes dam bca' bar bya ba'i bum pa dag las gang yang rung ba zhes ma brjod do//bum pa yang de skad ces bya bar 'gal bas mi srid pa'i brjod pa mi rigs pas so/ /gang yang rung ba zhes bya ba ni spyir brjod pa yin la/ spyir ni rdzas brjod par 'dod pa thams cad la srid na rung gi rdzas thams cad la srid pa ma yin pa de ni spyi mi rigs pa'i phyir te/de ltar na bye brag kyang de thal bar 'gyur ba'i phyir ro/ /bram ze la sogs pas ni rgyal rigs la sogs pa gzung ngo / /de ltar bram ze la sogs pas gang yang med pa la rigs nyid kyi spyi'i chos mi srid do//gzhan yang dbang po zhes bya ba'i spyi'i mtshan nyid dbang po las skyes pa ma yin pa nyid rtog par byed pa'i yid kyi shes pa la dbang po las skyes pa zhes bya ba'i mtshan nyid dang mi ldan pa lta bu'o/ /de ni ji ltar dbang po las skyes pa ma yin pa nyid ce na/ de ltar rtogs pa ma yin te/ dbang po las skyes pa'i mig gi shes pas gsal ba dang bya ba byed par nus pa de ltar rtog pas rtogs pa ma yin pa'i phyir dang /dbang po de 'gyur yang rtog pa tsam mi 'gyur ba'i phyir dang / dbang po med par yang rtog pa 'byung ba'i phyir ro/ /de dag la de ltar khas len na zhes bya ba ni don gzhan du ma grub pa de dag la gang yang rung ba zhes khas len na'o//'gyur ro zhes bya ba ni spyo bsgrub par bya ba'o/ /gal te ci'i phyir don gzhan med ce na/ de yang zhes bya ba smos te/ rjes su 'gro ba med pas the tshom za la zhes bya ba rtsig pa la sems pa'i rang bzhin gyi lus kyis gnyis pa can nyid ma grub pa ste/lus nyid sems pa yin par the tshom za ba'i phyir ro/ /des na bum pa la yang sems par gsal ba'i lus kyis gnyis pa can du the tshom za ba'i rtags kyis 'grub pa med do/ /'gal ba'i phyir zhes bya ba ni sngar bshad pa nyid yin no/ /de'i phyir lus dang bum pa gnyis pa la ni mi srid do//de ltar na rdzas bye brag med pa'i spyi lta zhig ga la 'grub/ dper na lha sbyin dang zhes bya ba la sogs pa smos te za ba'i chos gnyi ga la srid na gang yang rung ba zhes spyir brjod pa rigs kyi/ gnyi ga la za ba nyid mi 'dod na gang yang rung ba gcig za'o zhes bya ba gcig cig sod dam zhes bya ba'i don to//gal te lha sbyin kho na za ba ma yin no zhes bya ba las lha sbyin gcig pu za ba zhes bya ba chos 'di lha sbyin la 'gog pa tsam zhig bsam pas gang yang rung ba gcig za'o zhes brjod par mi rung ba'i skyon med do zhe na/ gcig gzung bar thal ba ste/ rdzas gcig gi chos bsam pa'i skabs yin par thal ba ste/mi 'dod pa der 'gyur ba'i skabs med pa'i phyir te/ du ma'i gnyis pa can sems pa'i gnas skabs yin pa'i phyir ro/ /'di rnam par brtag pa'i yul yin pa'i phyir ro zhes bya ba ni 'di'am 'di'o zhes gnyis las gang yang rung ba gcig tu rtog pa'i yul yin pa'i phyir gcig gi chos sems par thal ba med do//der ni zhes bya ba ni rnam par rtog pa'i yul der ro/ /bum pa yang gnyis pa ma yin la/ lus de lta bu'i khyad par can yang gnyis pa ma yin no zhes bya bar mi 'dod de/ rigs pa ma yin te/ gnyi ga yang mi srid na brtag pa'i yul med pa'i phyir ro/ /de ni re zhig gcig kho na za ba ma yin no zhes dgag par rtog pa bsal nas/ gal te lha sbyin dang mchod sbyin dag las gang yang rung ba gcig za'o zhes bya ba za ba po gcig nyid yin no zhes sgrub pa yin na yang rigs pa ma yin te/ gnyis po dag las cig shos kyis gnyis pa nyid mi srid kyi gcig gi gnyis pa dang bcas par sgrub na yang rnam par rtog pas bsdu ba ste/'di'am 'dis gnyis pa can yin no zhe na/ gang yang rung ba gcig gis gnyis pa can yin no zhes brjod par mi rigs so/ /de ltar na rang gi 'dod pa'i don yang rjes su 'gro ba med pa'i phyir mi 'grub la spyi yang bye brag mi srid pas ma yin gcig tu dgag pa dang sgrub pa yang mi rigs pa'i phyir mi 'grub pas na/da ni ut+pal ma yin pa'i phyir zhes bya ba yang rtags 'dis ci zhig sgrub par nus/ phyogs dang mthun pa'i phyogs dag las gang yang rung ba zhig yin pa'i phyir zhes bya ba la yang rjes su 'gro ba med pa nyid dang /gcig tu nges par gzung ba yang mi 'thad pa dag tu rab tu brjod pa yin no/ /ji ltar zhe na/ nam mkha' dang bum pa dag la mthun pa'i phyogs nyid yin gyi/ phyogs dang mthun pa'i phyogs dang / bdag nyid med pa'i phyir gang yang rung ba zhes bya ba'i rtags med pa'i phyir rjes su 'gro ba med do//gal te phyogs sam mthun pa'i phyogs gcig yin gyi cig shos ni yin pa mi srid pas nges par bzung na yang gang yang rung ba'i sgrar mi 'thad do zhes bya bar sun dbyung bar brjod pa yin no/ /gzhan yang zhes bya ba ni rtags ma grub pa'am rdzas med na spyi mi rung ba'o//ji ltar spyi dang rtags ma grub ce na/ gnyi ga la srid par 'gal ba med na phyogs dang mthun pa'i phyogs de dag de ltar de gang yang rung ba zhes brjod pa'i phyir 'gyur ro/ /de ltar srid pa ni med de 'di ltar gang yang rung ba gcig ces bya ba mthun pa'i phyogs bum pa'am nam mkha' zhes bya ba gzhan du gyur na rtags de phyogs sgra la ma grub ste/'di ltar sgra rtag pa'am mi rtag pa zhes bya ba lta bu'i bye brag gi ste/ bsgrub par bya ba ni sgra de ni phyogs dang mthun pa'i phyogs dag las gang yang rung ba zhes bya ba spyi'i rang bzhin ma yin te/ rnam par brtag pa ni 'di'am 'di yang rung zhes spyir brjod pa yin la sgra'i bdag nyid ni so sor nges pa ste/phyogs kho na gnas kyi mthun pa'i phyogs ma yin pa'i phyir so sor nges pa dang ma nges pa 'gal ba'i phyir ro/ /so sor nges pa nyid khas mi len na ma nges par spang bar 'gyur ba'i phyir ro/ /de ltar na sgra la mthun pa'i phyogs kyang yin pa zhes bya ba med pa'i phyir rtags ma grub po//de'i mthun pa'i phyogs la yang phyogs yin pa nyid pas rjes su 'gro ba med pa yin mod kyi/ de ni sngar bshad zin pas rtogs pa'i phyir 'dir brjod pa ma mdzad do/ /phyogs dang mthun pa'i phyogs dag so sor nges pa la spyi mi srid pa'i phyir spyi ma grub po//de ltar zhar la 'ongs pa bstan nas don dkyus ma nyid bshad de/ gal te rtsig pa ni spyir gang yang rung bas gnyis pa can yin par smra bas gnyis pa can du 'gyur ba'i phyir rjes su 'gro ba yod do zhe na/ gang yang rung bas zhes spyir smras kyang sgrub par 'dod par 'dod pa'i skabs kyi don gyi shugs kyis gnyis pa ni lus kho nas so zhes bye brag tu yang gnas te/lus sems par gsal bar sgrub par 'dod pas lus kho na gnyis par rtogs kyi bum pa ni dgos pa med pa'i phyir rtogs pa ma yin no/ /'gro ba dang 'ong ba rigs pa can srog chags la sogs pa 'ga' zhig la the tshom za'i/ ri'am shing la ni ma yin pa bzhin no/ /gal te lus kho na brjod pa'i bye brag gi sgra cung zad kyang med pa'i phyir ma yin no zhe na/ bye brag gi sgra dang nye ba kho na zhes bya ba smos te/ skabs kyi shugs la sogs pa ste/ de smra ba 'dod pa'i dbang gis kyang ngo / /don gzhan du gyur pa gnyis rigs pa ma yin zhes bya ba ni lus kho na rigs pa'i phyir ro//yang na don gzhan pa gcig kyang med de gnyi ga zhes bya ba lus bye brag can dag ma grub pa dang bum pa yang bum pa las don gzhan du mi rung bas so/ /khas mi len zhes bya ba ni phyir rgol ba'am rigs pas na gnyi ga yang ngo / /gal te sgra dang bum pa'i bye brag gis zhes bya ba ni gal te spyi gang yang rung ba zhes smras pa la dpe rtsig pa la bum pas gnyis pa can yin yang lus kyi ma yin la/bum pa la lus tsam gyis gnyis pa tsam yin yang lus bye brag can gyis gnyis pa ma yin zhes bya bar rtog na/ gal te bum par gyur pa'i mi rtag pa yin na sgra la ma grub pa yin la/sgra'i mi rtag pa ni rjes su 'gro ba med do/ /gal te mi rtag pa spyir yin na gnyis pa can tsam spyir rtags yin no zhe na/ dpe la grub pa'i mi rtag pa de dang sgra ldan par bsgrub pa'i phyir ro/ /mi rtag pa grub pa de ltar gnyis pa can gang gis yang don gzhan du gyur pa'i lus dang bum pa dag khas len na gang yang rung bas gnyis pa can gyi don gzhan du gyur pa'i spyi srid par 'gyur na don gzhan de ni mi srid do zhes bsgrubs zin to//de ltar 'dus pa yin pa'i phyir zhes pa dang / gnyis pa can gyis spyad pa de de dag gis tshig dag gzhan du snang yang 'dod pa bsgrub par bya ba smras pas na/chos dang chos can dag gis khyab par byas pa ste/ 'di nyid kyi dper brjod pa ni 'og nas ston te/ sel ba ni de las gnod pa can smra ba ste/ de la yang lan so sor brjod pa yin te/ dper na mi rtag pa'i sgra'i sgra yin te byas pa'i phyir ro zhes bya ba ste/de la gnod pa smra ba na re/ de ni de lta ma yin te/ mi rtag pa'i chos dang ldan pa'i sgra de'i sgra ni de brjod pa'i sgra ste/ de ltar rtags byas nas bsgrubs na sgra rang brjod pa'i sgra dang ldan par 'gyur gyi sgra mi rtag par ni mi 'gyur ro/ /gang yang sgra'i mi rtag pa nyid dang ldan pa yin te byas pa'i phyir ro zhes bya ba la yang gnod par smra ba ste/sgra'i mi rtag pa sgra las gzhan pa zhig dang ldan par grub na yang sgra mi rtag par mi 'gyur ro/ /sgra dang mi rtag pa'i spyi la gnod pa smra bas chos dang chos can brjod pa'i don la 'gal te skyon smra ba de med pa'i phyir de yang 'dod pa bsgrub par bya ba smras pa 'dis gsal ba yin no//ji ltar zhe na/ de ltar smra ba'i rgol ba de dag kyang 'dod pa ni sgra mi rtag ces spyi de brjod pas sgrub par 'dod pa yin pa'i phyir sgra mi rtag par mi 'gyur ba'i skyon med do/ /de'i phyir mi rtag pa'i sgra'i brjod pa'i sgra yin no zhes bya ba ni ma yin te/ de ltar gyur par sgrub par 'dod na sgra mi rtag par mi 'gyur te/sgra mi rtag pa'i sgra'i sgrar te/ de'i rjod par byed pa bsgrub pa'i phyir mi rtag pa'i sgra'i sgra zhes bya bar 'gyur ro/ /de yang sgrub par mi 'dod pa'i phyir mi rtag pa sgrub par 'dod pa la der mi 'gyur ba'i gnod pa 'ga' yang med do/ /de'i phyir mi rtag pa zhes bya ba'i chos 'ba' zhig chos can sgra la sgrub par bya ba'am/de ma yin pa grub na phyin ci log tu ste/ 'dod pa la gnod par byed pa'i 'gal ba byed do/ /de ltar 'dod pa'i spyi ni sgra mi rtag ces bya'o/ /phyin ci log kyang mi 'dod pa'i spyi ste/ sgra rtag ces bya ba lta bu'o/ /de ltar na 'gal ba ste 'dod pa la gnod par byed pa 'ba' zhig ni thams cad du spyi ste/chos can dang mi 'dod pa'i chos bsdoms pa de nyid la yin no/ /'gal ba de gal te chos kyi sgo nas brjod pa ni mig la sogs pa gzhan gyi don nyid do zhes pa lta bu ste/ de 'dod pa las phyin ci log tu gyur na chos kyi bye brag las bzlog pa zhes tha snyad du byed do//gzhan gyi don mig la sogs pa zhes bya ba ni chos can gyi sgo nas brjod pa ste/ de'i 'gal bar 'gyur ba yang chos can gyi bye brag las bzlog pa zhes tha snyad du byas kyi 'dod pa phyin ci log nyid kyi don ni gcig pa nyid do/ /de bzhin du gtan tshigs la yang sgra mi rtag ces pa dang /mi rtag pa'i sgra zhes bya ba dag tha snyad du bye brag yod kyi sgra mi rtag pa nyid du don la ni gcig go/ /de bzhin du mi rtag pa'i sgra'i sgra zhes bya ba ni chos kyi chos can bye brag pa'i sgo nas tha snyad du byas pa ste/ rtag pa'i sgra las sgra bye brag tu byas te brjod pa'o/ / sgra mi rtag pa nyid dang ldan pa zhes bya bas ni chos can sgras mi rtag pa bye brag tu byas pas brjod pa ste/ sgra ma yin pa'i mi rtag pa las sgra bye brag tu byed pa'i phyir ro/ /de dag don du ni bye brag cung zad kyang med de/ thams cad kyang mi rtag pa zhes bya ba'i chos sgra dang ldan par rtogs pa 'dod pa'i phyir ro//de yang byas pa'i rtags kyis rtogs par nus pa'i phyir 'dod pa la gnod pa med do/ /'dus pa yod pa'i phyir bya ba la sogs pa ni 'dod pa sgrub par nus pa ma yin pa'i phyir ro/ /gal te bdag nyid bsgrub par mi 'dod na bstan bcos byed pa'i 'dod pa gzhan thams cad bsgrub par bya ba yin pa gsal bar rigs pa'i phyir rang nyid smos mi dgos so zhe na/'dod pa gzhan thams cad ces bya ba la sogs pa gsungs so/ /bdag ni bye brag par gyur pa'i smra bas smra'o zhes rtsod pa na/ bye brag pa des sgra byas pas mi rtag par bsgrub pa na/ dpyod pa pa na re/khyed kyi ston pa thub pa gzegs can gyis sgra la nam mkha'i yon tan du khas len pa'i phyir/ sgra mi rtag na nam mkha' dag yon tan du 'gyur ro zhes sgra rang gi ston pa'i khas blangs pa med par 'gyur ba'i phyir gtan tshigs gzhi ma grub pa dang / dam bcas pa rang gi bstan bcos dang 'gal bar gtan tshigs dang dam bca' ba'i skyon du 'gyur ro zhes bye brag pa yang khas len par sems la/dpyod pa pa yang skyon yin par bye brag pa dang dpyod pa pa la kha cig zer ro/ /gal te de lta bas na rgol ba de dag byas pas sgra 'jig par bsgrub pa la de nyid kyis dri za'i yon tan nyid yin par 'dod pa'i don phyin ci log tu 'gyur te/sgra mi rtag na bstan bcos las gzhan pa'i yon tan du 'dra ba'i phyir/ dri yang mi rtag par 'gyur la/ mi rtag pa nas rtag pa'i yon tan ma yin par 'gyur te/ byas pa'i gtan tshigs 'gal bar 'gyur na/ skyon 'di ci'i phyir mi sems de gzhan la yang zhes bya ba ni nam mkha'i yon tan la yang mtshungs te/rtag pa'am mi rtag pa sems pa'i skabs yin gyis nam mkha'i yon tan ma yin no/ /ma yin te zhes bya ba ni nam mkha'i yon tan ni skabs ma yin pa ni ma yin pa'o/ /ci'i phyir zhe na/ chos can de sgra'i chos su mi rtag pa dang gcig pa'i phyir ro zhe na/ dngos po'i 'brel pa med pa'i phyir zhes bya ba ni nam mkha'i yon tan nyid bstan bcos byed par brtags pa 'ba' zhig yin gyi dngos po'i chos ma yin pa'i'o//de nyid kyi phyir bstan bcos las zhes bya ba la sogs smos so/ /gal te bstan bcos las khas blangs pas kyang gnod na ni/ de lta na dril sa'i yon tan nyid de yang bstan bcos pas khas blangs par mtshungs pa'i phyir 'gal bar 'gyur ro//de mi 'gyur na nam mkha'i yon tan nyid kyang mi 'gyur te/ khyad par med pa'i phyir gal te sgra las nam mkha'i yon tan nyid rgol ba'i 'dod pa yin pa yang bsgrub par bya ste/ rigs pa ci zhe na/rjes su dpag pas te/ 'di ltar bsgrub par bya ba sgra mi rtag pa'i spyi'i phyogs gcig sgra'i rang bzhin nam mkha'i yon tan yin pa'i phyir bsgrub par bya ba'i chos mi rtag ces pa spyi'i phyogs gcig rgol ba'i 'dod pa yin no zhe na/ bye brag yin pa tsam gyi zhes bya ba ni nam mkha'i yon tan nyid sgra'i rang bzhin yin par khas blangs nas brjod pa'o//don ni de'i rang bzhin zhes bya ba rang gi chos kyi bye brag tshul mtha' yas pa rnams nam yang mi 'dor bar rgol ba'i 'dod pa 'jug pa ste/ bsgrub par bya ba rgyun mi 'chad de mtha' yas par thal bar 'gyur ro/ /de la thal bar 'gyur ba ci yod ce na/bsgrub par mi nus par 'gyur ba'i phyir te/ de snyed kyi rtags dang 'brel ba ma rtogs pa'i phyir ro/ /phyin ci log nyams su myong ba ni sgra la nam mkha'i yon tan nyid sgrub par 'dod pa ni blo'i'o/ /de 'gog pa ni de dang 'gal ba ste/ de ltar mi 'dod pa'i blo mi rtag pa tsam sgrub par 'dod pa'o//de ltar 'jug pa ni de ltar rang rig pa nyams su myong ba ste/ de la tshad ma med bzhin stobs kyis de 'dod rgyal gyis nam mkha'i yon tan sgrub par 'dod pa yod do zhes sgrub pa'i rgol ba ni byas pa'i gtan tshigs smra ba'i rgol ba'i 'dod pa nam mkha'i yon tan sgrub par mi 'dod pa'i rang rig pa'i mngon sum gyis grub pa dang 'gal ba kun du spyod do//gal te mi rtag pa tsam zhig sgrub par 'dod pa'i bdag nyid kyis rtogs na 'di la nam mkha'i yon tan sgrub par 'dod pa med do zhes rang gi nyams su myong ba dang 'gal ba yang kun du spyod do/ /de rtogs pa ni bsgrub par bya bar 'dod pa'i nyams su myong ba ste/de yang 'dod pa kho na dang mthun pa yin gyi/ mi 'dod pa nyams su myong ba med pa'i phyir ro/ /de la stobs kyis te nyams su myong ba'i tshad ma dang 'gal yang ngo / /myong ba mi 'dod pa yang 'dod pa yin no zhes pa'o/ /gal te spyi'i phyogs gcig yin pa'i phyir zhes ma smras sam zhe na/rgol ba'i bsam pa'i 'bras bu'i rtags ma yin pas so/ /rang bzhin gyis rtags ni med de bsam pa rang bzhin gyis bskal ba'i phyir de'i rang bzhin mi rtogs pas so/ /de'i phyir 'dod pa dang ma 'brel ba'i don nam mkha'i yon tan nyid gang yang mi rtogs pas gzhan mi rtag pa rang gi rtags kyis go bar nus pa la ci yid gnyis te mi gnod/gal te bstan bcos kyis gnod do zhe na/ rjes su dpag pa rang gi yul dngos po'i stobs kyis rtogs pa la'o/ /lung la mi ltos te/ des phan pa'am gnod pa med de dngos po'i rang bzhin tshig bzhin du mi 'gyur ba'i phyir ro//des grub pas ni rjes su dpag pas so/ /gal te nam mkha'i yon tan nyid btang na kho bo bye brag pa'i smra ba po zhes bya ba'i rtsod pa btang par 'gyur ro zhe na/ de'i tshe zhes bya ba smos te/ rtsod pa'i tshe 'di ni zhes bya ba'i rtsod pa'i de'i lung khas len pa'i thabs yin te brtsad nas rigs pas grub na lung gzod khas blang par bya'o//de'i tshe zhes bya ba ni rtsod pa'i che'o// /de yod kyang zhes bya ba lung yod kyang ngo / /thags min te rigs pas rtsod pa ni lung gis phan pa'am gnod pas mi nus pas so//de ltar zhes bya ba ni rigs pas so/ /yul gnyis zhes bya ba ni mngon sum dang lkog tu gyur pa'i lung ni don to/ /rnam dag ni tshad mas grub pa ste/ gzugs dang tshor ba la sogs pa lung gi don mngon sum gyis grub pa'o/ /mi rtag pa dang stong pa nyid la sogs pa rjes su dpag pas grub pa'o//de lta bu bstan bcos tshad mas grub cing tshad mas ma grub pa don la yang tshad ma dang rang gi tshig gis mi gnod pa yongs su bzung ste/ khas blang bar bya'o/ /de'i phyir rtsod pa ni lung khas blangs pa'i thabs yin no/ /yang yongs su gzung bar 'dod na gzung ba de'i dus yin pas zhes bya ba ni lung nyid la grub pa'i don lung nyid kyis yongs su gzung bar 'dod na'o//de tshe bstan bcos kyis rtags dang dam bca' ba'i skyon gyis brtsad de/ lung des grub pa'i don la ni lung de dang mi 'gal bas sems par rigs pa ste/ 'gal ba mi 'khrul pa can zhes bya ba bsgrub pa'i skyon du 'gyur ba'i phyir ro//gal te de ltar lung gis brtsad pa de tshad mas grub pa la yang ma yin zhe na/ gnas gsum par ni 'jug pa na zhes bya ba smos te/ shin tu lkog tu gyur pa la dpyod pa na ste/ mngon sum dang lkog tu gyur pa la ni ma yin te de la lung mi ltos pa'i phyir ro//lung gis brtsad pa de la yang bsgrub bya'i chos kyis ni 'brel bar 'gyur ba ste/ stong pa nyid kyi 'brel ba mi rtag pa dang sdug bsngal ba la sogs pa lta bu'i chos gang med na/ bsgrub par bya ba stong pa nyid mi 'byung ba dag la gnod pa'i lan gdab po/ /thug pa med par thal 'gyur phyir//de bstan bcos kyi don mtha' yas pa'i phyir ro/ /gal te bstan bcos med par rtog ge ba 'ba' zhig gis mi rtogs pa'i phyir tshad ma las lung gis phan par bya ba 'grub po zhe na/ sems pa kun la zhes bya ba la sogs pa smos so/ /gal te sgrub byed cig la bstan bcos kyi don kun gyi dpe dag ni zhes bya ba rtags dang 'brel ba dag mthong na ste/grub na de grub nyid du 'gyur gyi rang gi don tsam grub pas ni ma yin no/ /zhes bya ba ni/ 'jig rten 'das pa'i lus zhes bya ba ni 'jig rten na srid pa'i tha snyad las 'das te shes par mi nus pa'am/'jig rten gyi grags pa dang 'gal ba'i dngos pos ma 'dres pa'i chos nam mkha'i yon tan lung las grags pa ma grub pas/ rang gi khyab par byed pa mi rtag pa de ci 'grub pa'am yang na sgra dang ma 'brel ba nam mkha'i yon tan ma grub pas sgra'i byas pas mi 'grub bam/de'i rtags byas pas rang gi ngo bo mi rtag pa de bsgrub par brjod pa la 'dod pa la'o/ /mi rtag pa byas pa de grub pa la ji ltar byed dam bca' ba dang gtan tshigs kyi skyon can yin de'i phyir dpe'i chos can tshang bang dang / rang gi ngag las ni bstan bcos las grags pa'i chos mtha' dag mthong ba ma yin yang ngo /gal te de ltar grub pa nyid kyang ci'i phyir zhe na/ rang bzhin dang ni zhes bya ba la sogs pa smos so/ /rtsod pa'i gnod pa ni lung la sogs pa gang gis kyang ste/ dngos po la tshig gis mi gnod pa'i phyir dang / tshad ma la tshad mas mi gnod pa'i phyir ro/ /de ltar rang gi don gyi rjes su dpag pa dpyad nas/gzhan gyi don gyi rjes su dpag pa yang gzhan la bstan par 'dod pas kyang zhes bya ba la sogs pa smos so/ /de'i gtan tshigs nges so/ /lung med par ji ltar rtogs pa ma yin te/ rtogs pa nyid do/ /gal te bstan bcos kyi rigs pa la gnod do zhe na/bstan bcos mi rigs pa yin te/ nam mkha'i yon tan las byas pa'i tshad mas gnod pas so/ /gzhan rigs pa smra ba ste/ byas pa dang 'brel ba'i dngos po mi rtag par bsgrub pa'o/ /mjug bsdu ba'i phyir don kun mtshungs par byas nas ni zhes bya ba smos te/bstan bcos kyi don kun mtshungs par zhes bya ba gtan tshigs gcig gis bsgrub par ro/ /nyams par 'gyur te mi srid par 'gyur ro/ /de'i phyir zhes bya ba rang nyid 'dod pa kho na bsgrub par bya ba yin pa'i phyir ro/ /gcig gis grub pa la 'gal ba med kyang zhes bya ba ni gtan tshigs gcig gis te byas pas mi rtag pa dang sdug bsngal ba dag grub pa la'o//'gal ba med kyang zhes bya ba ni tshad mas mi gnod kyang ngo / /gnod pa ni bstan bcos te thub pa gzegs can gyi tshig gis so/ /de ni gzhan gyi yul la ste dris pa'i yon tan nyid la yong ngo / /gal te de nyid la gnod pa yin gyi zhes bya ba ni sgra mi rtag pa nyid la'o//de rang gis bsgrub par bya ba la 'gal ba med kyang zhes bya ba ni byas pa de rang gis mi rtag pa bsgrub pa la tshad mas mi gnod kyang ngo / /gzhan gyis byas pa la yang mtshungs pa'i phyir zhes bya ba ni dri la'o/ /gal te gzhan thub pa gzegs zin gyi bstan bcos pa na nam mkha'i yon tan can yang dam bcas pa'i skyon yin pa nyid de yid ches pa gsal ba'o zhe na/yin mod kyi zhes bya ba yid ches pas gsal ba yin pa'o/ /gzhan gyi yul ni dri la yang ngo / /gal te byas pas gnod par byas pa'i chos can sgra'i brjod par 'dod pa'i phyir/nam mkha'i yon tan nyid la gnod pa yin gyi gzhan dri la ni ma yin pa'o/ /gzhan la yang 'gyur ro zhes bya ba ni dri la yang ngo / /byas pa gang yang rang gi mi rtag pa sgrub par nus pa de'i phyir bstan bcos kyi gnod pa 'di'o/ /ha cang thal bar 'gyur ba'i phyir ro zhes bya ba ni dri la sogs pa bstan bcos las bshad do cog bsgrub dgos par ro//de'i nus pa ma yin te sngar bshad pa de'i phyir bstan bcos khas blangs pa'i phyir zhes bya ba ni kho bo ni bye brag pa'o zhes so/ /bstan bcos ma grub pa ni sgra la mig gis gzung ba'o/ /de yang dam bca' bar 'gyur te/bstan bcos las mig gis gzung ba bshad pa de sgra la ma grub pa'i bstan bcos las bshad pa'i ma grub pa yin pa'i phyir ro/ /rigs pas grub pa'i bsgrub par bya ba mig gis gzung ba ste bstan bcos las byung ba yin pa'i phyir nam mkha'i yon tan bzhin no zhes bya ba'i rigs pas 'ongs pa'o//de kho na'i tshig gis bzlog par nus pa ma yin te/ rigs pas 'ongs pa ni dngos po'i ngo bo nyid yin pa'i phyir ro/ /gzhan yang bdag nyid ces bya ba'i sgra yang rgol ba bdag nyid kyis 'dod pa zhes bya ba phyogs kyi rang bzhin gyi don can yin na/ gal te bdag nyid mi 'dod kyang bstan bcos byed pas 'dod pas yang phyogs pas phyi rol tu gyur pa ste don can du 'gyur ba'i phyir 'dod pa zhes bya ba'i sgra kho nas 'grub pa'i phyir bdag nyid kyi sgras ni don 'ga' yang rgyas par byed pa ma yin no//gal te sangs rgyas pa'am/ bye brag pa'i bstan bcos la sogs pa dag la bdag gi 'dod pas 'jug pa zhes bya ba'i don du bdag nyid kyi sgra smos pa yin no zhe na/yang zhes bya ba ni snga ma rnams mi rigs par ma zad do zhes bya ba'i don to/ /bstan bcos la bdag nyid mi 'dod pas mi 'jug ces bya ba'i dogs pa 'di ga las te/ 'di ni mi rigs so/ /ci'i phyir zhe na/ bdag nyid ces ma smras kyang bdag nyid 'dod na 'jug pa'i phyir ro/ /de'i phyir rgyu gang gis na bdag nyid ces bya ba'i sgra sbyor ba'i 'bad pa byed/ gal te bskul ba'i don du'o zhe na/ tshad mas zhes bya ba smos te bstan bcos la mngon sum la sogs pa'i tshad mas gags mi byed de mi gnod na cis ldog par 'gyur te rang 'jug par mi 'gyur ro//tshig gis zhes bya ba ni bdag ces bya ba'o/ /gang yang mi 'jug go zhes bya ba ni mngon sum la sogs pa'i tshad mas gnod na'o/ /yang rnam par bshad pa byed pa gzhan dag ni bdag nyid ces bya ba'i sgra 'di ltar 'chad de/ gzhung lugs zhes bya ba'i grub pa'i mtha' la yod pa'i'o//rab tu grags pa'i tshad mas grub pa'o/ /dpyod pa'i skabs su nyid kyis zhes bya ba ni rtags sbyor ba'i skabs kyis so/ /de ni zhes bya ba ni rang gi mtshan nyid kyi chos can gzung ba'i don du 'chad pa'o/ /ci yang ma yin no zhes bya ba'i don med pa'o//gal te dpyod pa'i skabs nyid kyis rang gi ngo bo grub pa'i chos can ci'i phyir rtogs she na/ rang gi 'dod pas brtags pa'i bye brag ste spyi gcig du ma la 'jug pa nyid sgra la nam mkha'i yon tan nyid dang / mi rtogs pa la spyi gsal ba las tha dad pa dang /don gcig la 'du ba can yod pa dag lta bu'o/ /de nyid tshig gi don yin no/ /des na bdag nyid 'dod pas brtags pa'i bye brag nyid tshig gi don to/ /brtags pa'i bye brag gis tshig gi don kyang yin la don la rag las pa'i nye bar sbyor ba can ma yin pa yang yin pas/ brtags pa'i bye brag gis don la rag las pa'i nye bar sbyor ba can ma yin pa'o/ /de ni du ma yin pa'i phyir rnams te/ skyes bu'i 'dod pas brtags pa'i don la rag las pa'i nye bar sbyor ba ste/ rag las pa yang yin la nye bar sbyor ba yang yin pas/ rag las pa'i nye bar sbyor ba can te/ don gyis bskyed pa'i snang ba'o/ /de ma yin pa ni ma yin pa ste rang dgar snang ba'o/ /de lta bu'i don med pa rtogs pa tsam dag la rnam par gzhag pa ni sgrub pa'o/ /dgag pa ni gsal ba'o/ /sbyor ba ni rtags la sogs pas rtogs pa'o/ /'ga' yang med de rtog pa dang ldan pa dag gi 'jug pa ni don bya ba'i don du gnyer ba yin la/de lta bu ni don byed pa med pa'i phyir ro/ /des na/ ma ning gzugs bzang mi bzang zhes/ /'dod ldan rnams kyis brtags ci phan/ /zhes bshad pa lta bu'o/ /gal te rang gi mtshan nyid ma yin pa dag kyang dgag pa'i phyir/ dpyod par byed pa ma yin nam zhe na/de bzhin du zhes bya ba smos te/ rang gi mtshan nyid gnyi ga la grub pa'i gzhi med pa de bzhin du'o/ /rgol ba dang phyir rgol la spyir grub pa'o/ /'di'i rang bzhin ji lta bu zhes dpyod pa'i gzhir byed pa med de/ gzhi ma grub pa'i phyir ro/ /de'i phyir gzhi tha snyad byed pa ni med de/spyir mthun pa'i tha snyad bya bar mi nus pa'i phyir ro/ /de lta bas na brtags pa dag dgag par bya bar ni rigs kyi rtags kyi gzhir bya ba ni ma yin no/ /rang nyid kyi sgras ni rtags kyi yul ston pa'i phyir ro/ /yang kha cig ste chos can ni rab tu grub pa kho na ste yin par brjod pa ste/'dod pas so/ /de grub pa nyid yin pas chos can bsgrub par bya ba ni ma yin no zhes bstan par bya ba'i phyir/ bdag nyid zhes bya bas bsgrub par bya ba'i ngo bo phyogs yin par brjod do zhes zer na/ de yang rigs pa ma yin te/ rang gi ngo bo zhes dang por bstan pa 'di nyid kyis chos can bsgrub par 'gyur ba dgag pa'i don rtogs pa'i phyir te/'di ltar rang gi ngo bo zhes bya ba gang gis chos can la sogs pa grub pa dang / sgrub par byed pa ste/ rtags dang dpe dag bsgrub par bya bar bstan pa srid na'o/ /gal te rang gi bdag nyid la grub pa'i chos can bsgrub par 'gyur pa dgag pa'i phyir/bdag nyid kyi sgra smos pa yin te/ rang nyid 'dod ces brjod pas rang gi mtshan nyid ni bdag nyid mi 'dod pas so/ /gal te rang gi mtshan nyid kyi chos can dgag pa yongs su gzung ba'i phyir bdag nyid kyi sgra mi brjod na'o/ /rang gi mtshan nyid bsgrub pa 'grub par thal bar 'gyur ba de yang ma yin te/rjes su dpag pa'i yul ni spyi nyid do/ /zhes bya ba nyid kyis rang gi mtshan nyid ma yin no zhes bya ba de'i don rtogs pa'i phyir ro/ /de nyid chos can zhes bya ba la sogs pas 'chad par byed do/ /nyes pa gzhan bstan par bzhed nas/ rnam par rtog pas bslad pa'i phyir ci ste/chos can la sogs pa smos so/ /mi nus pa'i phyir ro zhes bya ba ni pha rol gyi'o/ /ci'i phyir bya ba ni grub pa'i mtha' smra ba'i'o/ /gal te gtan tshigs bye brag gi rjes su 'gro ba med pa'i phyir ro zhes bya ba ni pha rol gyi'o/ /cha shas gzhan la ltos pa'i phyir ro zhes bya ba ni cha shas dang po dam bcas pa'o//gnyis pa ni gtan tshigs so/ /gsum pa ni dpe'o/ /de las 'di dam bca' ba las gzhan pa'i cha shas kyi nyes pa yin pa'i phyir/ dam bca' ba'i skyon du mi 'gyur na/ ci'i phyir dam bca' ba'i skyon du smra zhes bya ba'i don du'o/ /de ltar cha shas phye nas dpyod pa'i skabs btang ste dpyod na ni gtan tshigs la sogs pa ste/dpe'i skyon yang ngo / /phyogs kyi skyon du 'gyur te/ de ltar na cha shas kyi rnam par gzhag pa med par 'gyur ro/ /cha shas kyis dbye ba med par 'gyur ba de'i phyir phyogs tsam ste/ gtan tshigs la sogs pa bsal bas dben pa nyid kyis rjes su 'brel pa ste phyogs dang 'brel ba'o//de lta ma yin na phyogs la sogs pa'i mtshan nyid rtogs par dka' ba'i phyir ro/ /dka' ba de'i phyir rtogs par bla ba'i phyir/ gtan tshigs la sogs gnod spangs las/ logs shig phyogs kyi mtshan nyid ni brjod pa ste zhes bya bar sbyar ro//ji ltar bstan ce na/ ma khyab pa dang ste grangs can dag tshig tu smras pa tsam phyogs su smra ba'o/ /bzlog pa dag ni khyab ches pa ste/ bye brag pa dang / dpyod pa pa dag byas pas mi rtag pa sgrub pa na/ nam mkha'i yon tan yang sgrub par 'dod pa'o//phyogs kyi mtshan nyid lugs gzhan yang slob dpon gyis bstan pa bshad pa'i phyir/ sgrub bya khas blangs phyogs mtshan nyid/ /ces bya ba smos te/ de las gzhan phyogs ma yin te/ bsal ba dag ni gnod 'gyur bas/ /khas len par mi 'gyur bas so/ /lhag ma ni ma khyab pa dang bzlog pa dag go//mtshan nyid mi 'jug phyir/ ma khyab phyir ni phyogs ma yin pa'i phyir mtshan nyid la mi 'jug pa bzlog pa la ni phyogs kyi'o/ /log par rtogs pa mthong bas na/ /zhes bya ba ni gzhan gyis dam bcas pa sgra la nam mkha'i yon tan la sogs pa phyogs su 'dod pa'o//ci'i phyir log par rtogs pa yin zhe na/ bsgrub byar 'dod cing mi nyams la/ /mi rtag pa dag nyid sgrub par 'dod pa la gnod pa med pa'i phyir ci zhig gnod/ gal te mi gnod kyang bstan bcos khas blangs pa'i phyir bsgrub par bya ba yin no zhe na/ thug pa med pa'ang gzigs phyir ro/ / zhes bya ba smos te/ bstan bcos kyi don thams cad bkag par gzigs pa'i phyir ro/ /gal te bdag nyid dang 'dod pa/ /zhes bya ba dag gis kho na'i don rtogs pa'i phyir kho na zhes bya ba brjod par mi bya'o zhe na/ 'dir zhes bya ba la sogs pa smos te/ bstan zhes bya ba'i sgra dus gsum dang mngon par 'brel pa'i phyir 'das pa dang /da ltar bsgrub par bya bar ma bstan kyang rtags ma grub pa la sogs pa phyis bstan par 'gyur ba'i yang de ltar phyogs su thal bar 'gyur ba'i phyir de rnam par gcod pa'i don du kho na'i sgra smos te/ ma 'ongs pa na yang rung rang gi ngo bo kho na'o zhes bya bar rtogs par bya ba'i don du'o//de ltar na thams cad du bsgrub par bya ba'i ngo bo ma grub ba'o/ /gal te 'dod 'gyur ces bya ba'i sgras 'dogs par 'gyur ba bsal zin pa yin nam zhe na/ 'dir de rang gi ngo bo dang nyid bstan ces bya ba 'dir ro/ /'dod 'gyur ces bya ba ni nus pa med pa'i phyir/ de ltar rtogs par byed pa'i yan lag ma yin no/ /don gcig tu 'dus pa'i chos can gcig la 'brel ba ste/ de lta bu'i zla med kyang byas pa'i rtags kyis mi rtag pa nyid bsgrub par bya ba yin gyi rgol bas mi 'dod pa nam mkha'i yon tan gyis khyad par du byas pa ni ma yin no/ /tha dad par gyur pa zhes bya ba ni rten gsal ba las so//dbang pos yongs su gzung ba ni bltar rung ba'o/ /gzhan du na ste phyir rgol ba khong du chud par mi 'dod na skabs dang ma 'brel ba smra ba nyid yin no/ /gal te bye brag 'ga' ni rtag par bsgrub pas spyi sgra nyid la sogs pas 'phen pas spyi de grub par rgol ba'i 'dod pa grub pa ma yin nam zhe na/rtogs par byed pa ste/ nyan pa po mi rtag /la la 'ba' zhig rtogs par 'dod pa'i skabs yin pa'i phyir ro/ /gzhan yang nges par spyi'i don bye brag gi nges pa ste/ rtogs pa'i don can yin pa ni med de/ dngos por gyur pa'i 'brel pa med pa'i phyir ro//bye brag dang 'brel pa dngos por yod na yang / khyad par gzhan la mi rtsod pa yang srid de me la tsha ba nyid la rtsod pa na 'byung ba'am 'byung ba las gyur pa'i bye brag la mi rtsod pa lta bu'o/ /gal te stong pa nyid du rtsod pa la bdag med pa lta bu ni khyad par nges pa sgrub pa yin te/ de med na stong pa nyid mi 'byung ba yin na/de lta bu ma yin pa mi rtag pa la nam mkha'i yon tan dang spyi la sogs pa bsgrub par bya ba ma yin no/ /spyi la sogs pa'i chos kyi bye brag da lta bu ni gzhung lugs de la mi gnas pa rnams la gang na yang de'i rjes su 'gro ba ste/ de sgrub par 'dod pa med do/ / 'dod na yang mi 'khrul ba'i rtags yod pa ma yin te/ de dag dngos po'i chos ma yin pa'i phyir ro/ /spyi bsgrub pa mi srid par bstan pa 'dis gnyis pa can gyi sbyor ba la yang sun dbyung ba rab tu brjod pa yin te/ de yang spyi bkod pa'i phyir ro/ /spyi la sogs pa bstan bcos las byung ba'i phyir 'dod pa yin no zhe na/yang ha cang thal bar 'gyur ba'i phyir bshad pa yin no/ /skabs su bab pa kho na zhes bya ba ni rtogs pa po'i 'dod pa kho na'o/ /bye brag tu ma byas pa ni nam mkha'i yon tan dang / spyi dang don gcig la 'du ba can zhes bye brag tu ma byas pa'i mi rtag pa'i chos can nyid do//gzhan du na zhes bya ba ni rtogs pa po'i mi 'dod pa sgrub par byed na'o/ /don gzhan du 'gro ba ste bstan par bya ba ma yin pa ston pa ni skabs su ma bab pa ston pas mi rigs pa'i phyir chad pas bcad pa ste/ phan pa'i gnas su 'gyur ro/ / bstan par bya ste zhes bya ba ni rang gi ngo bo zhes bstan par bya zhes bya ba ni gsal ba zhes bya ba'i bar kun la sbyar ba bstan to/ /yid ches pa dag gis zhes bya ba'i du ma'i tshig tu byas pa ni bstan bcos dang rang gi tshig gi dbye bas so/ /mngon sum don zhes bya ba'i don zhes bya ba ci dgos she na/ mngon sum gyi don zhes smos pa ni zhes bya ba la sogs pa smos so//bsgrub par bya ba the tshom za ba la gtan tshigs brjod de ston pa yin na'o/ /rten ma yin zhes bya ba ni de la gtan tshigs 'jug pa mi srid pa'o/ /ci'i phyir zhe na/ chos can gcig la ni phyin ci log pa'i yang dag pa'i shes pa dag ste/ mngon sum mam rjes su dpag pa gcig na chos de 'gog la/yang de la rtags yang dag pa la brten pa'i rjes su dpag pa'i chos de nyid de la sgrub pa 'gal ba gnyis mi srid pa'i phyir ro/ /gtan tshigs kyi yul nye bar bstan pa'i phyir yang ste/ phyogs bstan pa yang gtan tshigs kyi yul nye bar bstan pa'i phyir yin na gtan tshigs kyi yul nye bar bstan pa'i phyir yin zhes rim pa gzhan du sbyar ba'o//the tshom ni rgyu'i byed pa'i yul yin no zhes bya ba ni bsgrub par bya ba yod par srid pa gtan tshigs kyis sgrub par byed pa'i yul yin te/ bsal bas bsgrub par bya ba mi srid pa'am/ grub zin pa gtan tshigs kyi byed pa'i yul ma yin te/ de la byed pa mi srid pa'i phyir ro/ /rjes su dpag pa'i dbye ba ni dngos po'i stobs kyis rjes su dpag pa gcig dang 'bras bu dang / rang bzhin du brtags pa dag gi dbye bas so/ /rang gi 'bras bu yang dag par brjod cing zhes bya ba ni rang gi don yang dag par brjod cing ngo //de dang 'gal bar khas len pa'i gags byed ces bya ba ni the tshom za bar byed de zhes bya ba'i don to/ /gags byed par mtshungs pa de'i phyir 'di ltar rang gi tshig dang bstan bcos dag mngon par bsdus te/ mtshungs par yid ches 'bras bu yan lag ces brjod do//rang tshad ma ma yin na rjes su dpag pa tshad ma ma yin no zhes bya ba'i tshig 'jug par mi 'gyur ro/ /'on kyang rang gi don de mthong la de nyid la yang gzhan la phyin ci ma log par brjod par 'dod nas smra ba'i phyir ram mi smra bar khas len to/ /bstan bcos ma brten na der grags pa ste/shin tu klog tu gyur pa tshad ma gnyis kyis mthu'i yul ma yin pa dpyad pa yang mi 'jug pa de lta bas te/ bstan bcos tshad mar khas ma blangs na dpyad pa 'jug par mi 'gyur bas bstan bcos tshad mar khas blangs nas 'jug go/ /mtshungs par lta bar bya ba'i phyir ro zhes bya ba ni gnyi ga yang khas blangs pas gnod par byed pa yin no zhes bya bar mtshungs par ro//mtshungs par gsungs te zhes bya ba ni slob dpon phyogs kyi glang pos so/ /tshad ma dang des gzhal bar bya ba'i don dag med do zhes bya ba ni rig byed kyi gzhung lugs so/ /rang gi tshig dag mi rigs te/gal te rang gi tshig don la mi slu bar 'gyur na ni de nyid tshad ma yin la/ tshad ma ma yin na ni tshig gi don med do/ /bstan bcos kyang tshad ma ma yin na mi rigs te dogs pa med pa'i phyir ro/ /de la zhes bya ba ni tshad ma dang des gzhal bar bya ba don med do zhes bya ba dper brjod par bya'o//'dir chos can ni chos so/ /de rnam par gzhag pa ni bstan bcos de la brten pa'i phyir bstan bcos de la gnod pa nyid na des gzhag pa'i gzhi chos nyid mi gnas par ni bde ba rab tu sbyin pa la sogs pa'i bye brag bsam pa'i gzhi med pa'i phyir mi 'jug pa'i phyir bstan bcos las grags pa'i phyir bye brag sems pa de lta bu la nges par bstan bcos tshad mar bya dgos so//da ni ji ltar 'bab stegs dag tu zhes bya ba ni phyi rol gyi ste/ bstan bcos dang 'gal skyon yin na sangs rgyas pa dag ste 'bab stegs su khrus byas pas chos ma yin pa dag par mi 'gyur ro zhes bstan bcos mang po las khrus kyi chos ma yin pa dag par bshad pa dang 'gal bar smra ba zhes bya ba yin no//ma mthong ba rtogs par byed pa ni gcig tu bskal ba rtogs par byed pa'o/ /thams cad ces bya ba ni sangs rgyas pa'i bstan bcos dag de ltar mi smra'o zhes bya ba yin no//bkag pa'i skyon med de rang gi bstan bcos dang mi 'gal ba'i phyir ro/ /gzhan yang zhes bya ba ni bstan bcos gzhan dang 'gal ba med do zhes ston to/ /de la yang zhas bya ba ni gzhan gyis khas blangs pa'i bstan bcos so/ /smra zhing sems pa'i phyir ro zhes bya ba ni de'i phyir tshad mar khas mi len pas na de dag dang 'gal ba med do zhes bya ba'i don to//'o na bstan bcos gang zhig dang 'gal ce na/ bstan bcos gang zhes bya ba la sogs pa smos te/ bstan bcos des gzung ba'i phyir ro zhes bya ba des bstan pa'i don rnams gzung ba'i phyir yin pa na de dang 'gal bar 'gyur ba sems kyi gzhan dang ma yin no zhes bya ba'i don to//bstan bcos gnas pa zhes bya ba ni de khas len pa'o/ /de la mi brten pa'i dngos po zhes bya ba ni bstan bcos las bstan pa ma yin pa'i don to/ /de bstan bcos dang 'gal bar 'gyur na ni de dang bstan bcos dag phan tshun gnod pa ni ma yin gyi phan tshun gags su 'gyur te/gnyi ga yang khas blangs par mtshungs pa'i phyir ro/ /de bzhin no zhes bya ba ni/ stobs mtshungs pa'i phyir gags nyid yin gyi gnod pa ni ma yin pa'o/ /stobs mtshungs pa de yang rang gi tshig dang 'gal ba yin gyi bstan bcos dang ni ma yin te/bstan bcos dang stobs mtshungs pa ni bstan ma thag pa yin no/ /de gnyis las zhes bya ba ni bstan bcos dang rang gi tshig dang 'gal ba las so/ /gzhan la zhes bya ba ni tshad ma med pa la'o/ /gnod par byed pa yin no zhes bya ba ni de'i don 'gog par byed pa'o//gags ni 'gog par mi nus kyi the tshom du byed pa'o/ /gzhan du zhes bya ba ni tshad ma med pas so/ /dam bca' bar stobs mtshungs pa'am zhes bya ba ni bstan bcos dang / bstan bcos dang / rang gi tshig dang rang gi tshig tu'o/ /de dag phan tshun rigs pa med pa'i dam bca' bas ji ltar gnod par 'gyur/de dag gi cig shos don ji lta ba bzhin gyi rjes su dpag pa can la yang rigs pa med pa'i dam bca' bas ji ltar gnod par 'gyur ba'o/ /gal te lung yang tshad ma nyid yin pa'i phyir gnod par byed do zhe na/ lung tshad ma nyid ni rang gi don gyi rjes su dpag par bsal zin to/ khas blangs te zhes bya ba ni bstan bcos tshad ma nyid du'o/ /de nyid kyi phyir zhes bya ba ni lung dang rang gi tshig dag don gyi 'bras bur brjod pa'i phyir ro/ /yul gyi dbye ba bstan pa'i phyir te/ yul gang zhe na/ khas blangs pa'i yul la gnod pa dang gags byed par gnod pa'i phyir te/dngos po'i don la gnod pa ni ma yin pas so/ /rjes su dpag pa'i don ni dngos po'i yul la'o/ /gzhan du na ni zhes bya ba yul gyi dbye ba med na'o/ /rtags kyi bye brag gi dbye bas mtha' yas ha cang thal bar 'gyur ba'i phyir ro//gal te de dag rjes su dpag par 'dus na ni khas blangs pa dang 'gal ba logs shig tu byas pa don med do/ /gal te khas blangs pa dang 'gal bar mtshungs pa na ci'i phyir rang gi tshig dang 'gal ba bstan bcos las logs su bstan ce na/ ngag brjod pa tsam de nyid la de nyid gags byed pa nyid kyi don gyis so//gal te bstan bcos kyang tshad ma nyid ma yin pa de'i phyir de yang bstan bcos la gags byed pa nyid do zhe na/ gzhi yod pa la zhes bya ba la sogs pa smos te/ bstan bcos kyis so sor gzhag pa yin na/ bstan bcos de la gnod pa byas na des gzhag pa'i chos can yang 'gog par 'gyur ba'i phyir gnod par byed pa zhes brjod do//gal te bstan bcos de dam bca' ba tsam yin pa'i phyir de ltar tshad ma yin na'o/ /bye brag med do zhes bya ba ni bstan bcos rang gi tshig dag khas blangs pas tshad mar mtshungs pa'i phyir ro/ /chos can 'gogs par byed pa de'i phyir bstan bcos dang chos su 'gal ba dag ni gegs zhes bya ba the tshom du byed pa ma yin gyi gnod par byed pa ste/chos can 'gog par byed pa yin no/ /sngar khas blangs pa la phyi ma gzhan gyis gnod pa ni bstan bcos dang 'gal ba'o zhes bya ba slob dpon phyogs kyi glang pos gsungs so//gal te bstan bcos dang rang gi tshig dag tshad ma ma yin pa de bas na gags kyang ji ltar yin zhe na/ de stobs mtshungs te/ gnyi ga yang rigs pas stong pa'i khas blangs pa nyid yin pa'i phyir ro/ /gal te bstan bcos dang rang gi tshig de dag gang la tshad mar yod par gyur na ni rang gi don grub pa nyid yin pas de dang 'gal ba tshad ma med pa de tshad ma dang ldan pa'i gags ma yin to/tshad mas tshad ma ma yin pa la gnod pa'i phyir ro/ /gal te tshad ma med pa'i bstan bcos dang tshig dag kyang rgol ba des tshad mar khas blangs pa'i phyir tshad ma ma yin pas rang dang 'gal ba'i dngos po thams cad la gnod par byed pa nyid yin no zhe na/gang khas blangs pa zhes bya ba la sogs pa smos so/ /ci zhig yin te cir mi rung ste khyad par med pa'i phyir ro/ /skyes bu'i 'dod pa tsam ste/ dngos po la mi ltos pa khas blangs pas tshad mar byas nas gnod pa byed par gzhan yang yongs su rdzogs pa'i tshad ma ste/tshad ma'i mtshan nyid rdzogs pa'o zhes bzhad gad du bya ba'o/ /the tshom za ba'i de phyogs kha na ma tho ba med pa la yang mtshungs te/ de la yang bsgrub par bya ba'i don la the tshom yod kyi des pa ni ma yin/de nyid kyis zhes bya ba ni phyogs bstan pa nyid kyis so/ /nges pa ni bsgrub par bya ba la'o/ /'gal ba'i skyon dang ldan par smra ba lta bu ni ma yin no/ /gal te de ltar na de ci'i phyir/ de ltar the tshom du 'gyur zhe na/ gang rtags kyi mtshan nyid gsum smra ba'i tshig ji tsam gyis bsgrub par bya ba rtogs par nus pa de phyogs kyi tshig gis mi nus pa'i phyir ro//the tshom za ba yin gyi/ bsal ba bzhin du mi srid par ston pa ni ma yin gyi/ gnod pa med pa'i phyir srid pa'i bsam pa med pa dam bca'i tshig gis rab tu ston pas na khyad par yod do/ /mi srid pa gang zhe na/tshad ma ste/ mngon sum dang rjes su dpag pa dag gis gnod na mi srid pa yin no/ /gal te khas blangs pa dang rang gi tshig dag ni tshad ma ma yin pa'i phyir des 'gal yang srid pas phyogs su 'gyur ro zhe na/ de bzhin du stobs mtshungs pas chos can gcig la chos gnyis sbyar ba yang mi srid pa nyid do//gal te khas blangs pa dang rang gi tshig dag 'gal ba sbyar ba ni smra ba'i skyon nyid yin gyi dngos po la ni ma yin pas de spyad pas ci zhig dgos she na/ gzhan gyi don zhes bya ba smos te/ gzhan gyis khong du chud pa la dgos pa'i phyir ro/ /gal te smra ba po'i skyon yang gzhan la ci gnod ce na/smra ba po'i don ji lta ba bzhin ma yin pa gzhan ma rtogs par 'dod pa dag the tshom skyes pas tho 'tshams pa'i phyir smra ba po'i yon tan yang dpyad par bya ste smra ba de nyid gzhan gyis rtogs pa la sogs pa'i rgyu yin pa'i phyir ro/ /bye brag cung zad kyang med na zhes bya ba ni sngar khas blangs pa bye brag med kyang ji ltar gcig tshad ma dang zhes smras pas so//grub pa'i mtha' la ma brten par dpyod pa rab tu mi 'jug pa zhes bya ba ni mngon sum dang rjes su 'jug par mi nus pa'i yul la'o/ /thams cad la yin par brjod do zhes bya ba ni khas blangs par mtshungs pa'i bstan bcos dang 'gal ba yang rang gi tshig dang 'gal ba nyid yin pa'o//gal te bstan bcos dang 'gal ba ni pha rol gyis smras pa dang 'gal ba ma yin nam zhe na/ bstan bcos dang 'gal ba 'di la yang rgyu cis na nges par pha rol gyis khas blangs pa kho na'o zhes bya ba la rten/ 'di ltar bstan bcos khas len pa'i skyes bus de nyid bstan bcos de'i don te gzhan gyi kha nas te/bstan bcos byed pa 'di skad zer ro zhes gzhan yang de bdag nyid kyis khas blangs pa'i phyir don de rang gi yin la/ yang de dang 'gal bar smra ba yin na/ don de nyid kun du slong bar byed de/ mi gnas par byed pa'i phyir rang gi tshig dang 'gal ba nyid do//grags pa dang 'gal bar byed pa ji lta bu zhe na/ 'dod pa dang 'brel ba'i don de rnam par rtog pa'i yul du gyur ba don rnams la'o/ /'dod pa'i sgra zhes bya ba yang rnam par rtog pa'i yul nyid do/ /de'i ste sgra'i brjod par bya ba nyid yin pa ste/ des de rtogs par nus pa la'o//de'i brjod par bya ba ma yin no zhes dam bcas pas brjod par mi nus pa ste/ de nyid kyi phyir dam bca' ba la des gnod pa'o/ /grags pa'o zhes bya ba de nyid bstan pa'i phyir tha snyad las skyes pa'i zhes bya ba smos te/ rnam par rtog pa'i yul gyis don gyi chos te grags pa'i sbrar brjod do//sna tshogs kyi rang bzhin gyi grags pa'i dngos po'i yul gyi don to/ /byas dang ma byas pa'i brda grub pa dang ma grub pa'o/ /'dod pa tsam gyis brda 'jug par rung ba yin te/ brda ni 'dod pa la brten pas so/ /des zhes bya ba ni 'jug par rung ba nyid kyis so//don tsam zhes bya ba ni yul dang dus dang rdzas nges pa med pa'o/ /de'i phyir rung ba de ni don thams cad dang 'brel ba'i rang bzhin no/ /de nyid kyi phyir 'das pa dang ma 'ongs pa'i sgra dag gis te dus mi mtshungs pa'i sgra dag gis kyang brjod par rung ba de dang 'gal bar byed pa ni brjod par bya ba ma yin no zhes dam bca' bas so//gal te sgra gang dag brdar ma byas pa'i rung ba nyid dag gis don rtogs par mi byed pa yin nam/ ji ltar de dag 'gal ba ma grags pa dang 'gal ba zhes bya zhe na/ sgra thams cad don 'di dag dang 'brel to zhes dngos su grags pa ste/brda grub pa med mod kyi 'on kyang grags par rung ba'i stobs nyid kyis kyang ste/ brdar byas pa nyi tsher ma zad par don der sgra de rab tu grags pa nyid du slob dpon phyogs kyi glang pos gsungs te/ ji skad du gang la yang thun mong ma yin pa yin pa'i phyir zhes bya ba ni ri bong can zla ba'i sgras brjod par bya ba ma yin te/yod pa'i phyir bum pa bzhin no zhes gzhan dag rung ba nyid la gnod pa smras te/ de ni bum pa yang zla ba'i sgras brjod par rung ba nyid du yod pa 'gal ba ma grub the tshom za ba'i phyir dpe la bsgrub par bya ba ma tshang bas thun mong ma yin pa nyid yin pas na rjes su dpag pa med do//sgra rab tu grags pa da ltar med kyang 'das pa dang ma 'ongs pa dag rab tu grags pa mi 'gal ba'i don gyis bsal te des gnod pa'o/ /de'i phyir ma grags pa ni rung ba dang 'gal ba yang phyogs ma yin par gsungs pa'i phyir rung ba 'gal ba yang grags pa dang 'gal ba nyid do//bum pa'am snam bu la sogs pa thams cad la rung ba nyid dag srid pas na gang la yang zla ba'i sgra'i don ma yin par ma grub pa'i dpe ma grub pas so/ /'di dgag par mi nus te/ gnod pa can thun mong ma yin pa nyid kyi phyir thun mong ma yin pa nyid rab tu grags pa ni mi 'gal ba zhes de skad gsungs so//de la 'gog par byed pa'i tshad ma med par nges pa yang yin te rung ba nyid tshad mas grub pa'i phyir ro/ /de ltar na yod pa nyid kyang 'gal ba yin no/ /rung ba nyid mi nges pa'i phyir ro zhes bya ba ni dus gsum pa dag yin pa'i phyir ro/ /gtan tshigs thams cad kyang zhes bya ba ni yod pa las lhag par 'jug pa'i dngos po ni med pa'i phyir yod pas ma rnyed na de dag gis mthun pa'i phyogs rnyed par mi 'gyur ba'i dper brjod pa'i 'bras bu'o zhes bya ba'i yod pa nyid dper byas pa'i'o//sngar rung ba nyid tshad mas grub pa'i phyir zhes bshad pa'i tshad ma de 'di yin te/sgra'i brda la yang dag par brten la brda de ni 'dod pa tsam la yang dag par brten pa'i phyir ma grub pa ma yin gyi/ sgra'i tha snyad du zhes bya ba'i sgra yis brjod par rung ba nyid du grub ste/ 'dod pa ni thams cad du 'jug pa'i phyir ro/ /de'i gang rnam par rtog pa'i yul yin pa de ni brdar byas te brjod par rung ba yin te zla bas ga pur bzhin no//ri bong can yang rnam par rtog pa'i yul yin no zhes bya ba rang bzhin gyi gtan tshigs kyis so/ /de lta bas na sgra rab tu grags pa zhes gsungs so/ /gal te brjod par rung ba la gags byed pa de gnod par byed pa'i tshad ma srid par yid gnyis za na the tshom can du gyur pa'i phyir rung bar mi 'grub na gags kyang mi snang ste/'di ltar yun ring du ma mthong bar don rnams te sngon ma rtogs pa'i don rnams la'o/ /phyis bye brag tu rtogs par mthong ba ste nges par rtogs pa'o/ /de dang sgras yul du byas nas rtogs pa mthong ba srid pa ste mthong na'o//mthong ba de yod na skyes bu tsam ste skyes bu gang gis kyang rung ba ste med par ma nges te/ mthong ba dang ma mthong ba kun la rung ba nyid grub pa'i phyir ro/ /rang bzhin gyis gtan tshigs kyi grub par gsungs pa la/ de'i phyir slob dpon gyis tshad mas rung ba nyid du nges par gsungs pa na/rjes su dpag pa'i yul la 'gal ba mi 'khrul pa can mi srid par don gyis bstan pa yin te/ gnod pa can gyi tshad ma yod na rab tu grub mi srid pa'i phyir ro/ /de'i phyir gnod pa'i tshad ma med par nges pa yin no/ /tshad ma nges pa la gnod pa can mi srid par bshad pa de dag gi mngon sum dang rjes su dpag pa dag mtshungs pa nyid du bshad pa yin te/de gnyi ga yang tshad ma nyid yin par bye brag med par tshad mar 'gyur ba'i phyir mngon sum bzhin du rjes su dpag pa la gnod pa byed pa mi srid do/ /gal te tshad ma'i mtshan nyid de dag kyang ldan du zin kyang gcig tu ste rjes dpag la 'gal zla mthong na/de la mthong ba'i phyir mtshan nyid mtshungs pa'i phyir mngon sum la yang 'gal zla yod par dogs par 'gyur ro/ /gal te bye brag yod na ni bye brag des gcig ste mngon sum grub par byed pa zhes bya bar tshad mar rnam par gzhag la/de'i bye brag las phyi rol tu gyur pa ni med do/ /de tsam gyis ni gang dag rjes su dpag pa tshad ma ma yin te 'khrul pa mthong ba'i phyir ro zhes zer ba/ phur bu pa la sogs pa gsal ba yin no/ /de ni rigs pa can la sogs pa'i lugs dgag pa'i phyir gal te zhes bya ba smos te/rjes su dpag pa la gnod pa can mi srid de brjod par 'dod pa'i grangs gcig pa can yin pas so/ /gtan tshigs la 'gal zla med pa nyid 'di 'dra ba nyid rnam par nges pa yod dam zhes bya ba smos te/ med na mi 'byung ba khas mi len na nges par mi nus so snyam du dgongs so//mtshan nyid khyad par med pa zhes bya ba ni med na mi 'byung ba med pa'i rang bzhin du mtshungs pa'o/ /de 'dra ba las 'gal zla'i gtan tshigs mthong ba dang 'dra ba gzhan la yang 'gal zla ldog par nges par byas par mi nus so zhes 'das ma thag par bshad zin to/ /gal te gnod pa can ma mthong ba dag brjod par 'dod pa ni grangs gcig pa can yin no zhe na/skyes bu'i rtogs pa'i bye brag las te/ dngos po rtag pa btang bas so/ /dngos po de yang de ltar nges par bya bar nus pa ma yin te/ ma mthong ba tsam gyis 'gal ba med pa'i don dag lhan cig pa dgag par mi nus pa'i phyir ro//gal te mthong na med par nges pa ma yin yang rtags su sbyor ro zhe na/ de'i mtshan nyid la ste rtags kyi mtshan nyid gnod par byed pa med pa nyid la'o/ /gal te nges par ma shes kyang dngos po la gnod pa med pa nyid kyang srid do zhe na/ shes pa nyid kyang ste tshad mas rtags kyi mtshan nyid nges pa nyid kyang rtags kyi mtshan nyid du thams cad kyis smos so//gal te khyod la yang 'gal zla med pa nyid ji ltar nges she na/ sngar smos pa'i mtshan nyid de med na mi 'byung ba'o/ /de nyid kyi phyir brjod par 'dod pa'i grangs gcig pa can de yang med na mi 'byung ba can 'di'i yul la mi 'dod do//'o na gang la 'dod ce na/ 'di'i yul yang 'og nas bshad par bya'o/ /dngos po'i stobs la 'gal ba mi 'khrul pa can mi srid pa de'i phyir 'di ltar slob dpon gyis mngon sum dang rjes su dpag pa gnyis phyogs la gnod par byed pa'i tshad mar bshad pa na de la gtan tshigs kyi rten du mi srid pas na de la rjes su dpag pa mi srid par bshad pa yin la/de la rjes su dpag pa srid na gnod par byed par nges pa gsungs pa yin no/ /yang na thun mong ma yin pa nyid yin pas zhes bya ba ni 'jig rten gyi brjod pa ste/ tha snyad kyi dngos por brjod par bya ba nyid kyi rjes su dpag pa ni med do zhes slob dpon gyis gsungs pa yin no//de'i phyir rnam par rtog pa la snang ba'i don la rjes su dpag pas brjod par bsgrub kyi phyi rol gyi dngos po la ni ma yin pa'o/ /yul tha dad pa can ni rjes su dpag pa ni phyi'i dngos po la gnod par byed la grags pa ni rnam par rtog pa'i yul la'o//dngos po la rjes su dpag pa ji ltar med ce na/ ri bong can gyis zla ba dngos por brjod par mi 'dod na ming du grags pa gang yang dngos por brjod par mi 'dod pa'i phyir ri bong can gyis zla ba dngos su brjod de yod pa'i phyir dper na bum pa bzhin no zhes brjod na dpe de yang ma grub pa'i phyir ro//gal te rnam par rtog pa'i yang thun mong ma yin nam zhe na/ 'dir yang ste/ rnam par rtog pa'i yul yin pa'i phyir brjod par nus pa tsam yin no zhes bya ba la'o/ /thun mong ma yin pa nyid ma yin te/ rnam par rtog pa'i yul nyid du ni ga pur la sogs pa zla ba'i sgras brjod par grub pa mthong ba'i phyir dper grub pas so//de'i phyir brda'i stobs kyis 'jug pa na zhes bya ba la sogs pa gsungs so/ /gal te dngos po ma yin pa ci'i phyir zhe na/ gal te sgra de'i don 'ga' zhig tu nges par grub na de'i don dngos pos grub pa yin gyi dngos po dag la mi ltos na ni ma yin no//gal te sgra'i don grags pas grub par khas len na ri bong can la yang sgra'i don du 'gal ba byed pa med de grags pa yin pa'i phyir ga pur la sogs pa zla ba'i sgra'i don yin pa bzhin no/ /gal te ga pur la sogs pa ni yid dga' bar byed pa dang /bsil ba'i dngos po yin pa'i phyir zla ba'i sgras brjod par byas pa yin zhe na/ de zhes bya ba smos te/ ga pur de lus bsil bar byed pa'i dngos pos zla ba'i sgras brjod par grub na ni ri bong can lus bsil bar byed pa la sogs pa'i dngos pos zla ba'i sgras brjod pa med na ni ri bong can la yang dngos su brjod pa la gags byed kyang 'dod pa'i phyir skyon cung zad kyang med do//'di la yang zhes bya ba ni grags pa 'di la yang ngo / /brjod par nus pa de dag 'gog pa la 'gal bar 'gyur ba ste/ phyin ci log tu sgrub par byed par bshad pa yin te/snga ma rnams nyi tsher ma zad pa'o/ /sgra don rgyu mtshan can dang ni zhes bya ba ni lus bsil bar byed pa'i phyir zla ba zhes bya ba lta bu'o/ /de lta bu'i sgra dag 'gog par byed pa ste lus bsil bar byed pa med pa'i phyir zla bar mi brjod do zhe na/ 'gal ba med de mi 'dod pa med do zhes des de slob dpon gyis mdzad pa'o//yang na gong du bshad pa'i gtan tshigs kyis so/ /don dam don can ni dngos su sgra'i don yin pa can te/ de yang de dang 'dra'o/ /snga ma bzhin zhes bya ba ni rjes su dpag pas bsal ba bzhin no/ /grags pas bsal ba'i bye brag dag skyon med pa de bzhin du/mngon sum gyis bsal ba yang dbye ba bstan pa'i phyir/ mngon sum gyis gsal ba yang zhes bya ba smos te/ mtshan nyid sna tshogs pa zhes bya ba ni rigs dang las dang yon tan dag go/ /'brel pa gzhan med pa ni rigs la sogs pa rnams dngos por gyur pa'i 'brel pa med pa'i phyir gnyis su med pa ste dngos po nyid rigs la sogs par brjod pa'i phyir/chos dang chos can gnyis su med pa ste/ rnam pa sna tshogs kyis so sor snang ba ni chos dang chos can tha dad pa'o/ /blos mi mthong ba ni mngon sum gyis so/ /de'i phyir mi mthong ba de dag bkag kyang des bsal ba ma yin te/de la mi snang ba'i phyir ro/ /de nyid 'gog na zhes bya ba ni mngon sum la snang ba'o/ /de'i don du zhes bya ba ni mngon sum gyis gzung ba'i don de bye brag tu byas pa'i phyir ro/ /lhag ma ni ldog pa'i mtshan nyid do zhes bya ba ni rtogs par byas pa'i bye brag dag yin gyi dngos po'i ngo bo ma yin pa nyid kyi phyir spyi yin te rnam par rtog pa'i yul yin gyi dbang po'i blo'i spyod yul ma yin pa'o//rang gi mtshan nyid de ni rnam pa kun du sgras brjod min phyir/ sgra'i yul dang 'gal bar byas kyang mngon sum dang 'gal ba yin no//ldog pa de dag kyang dngos po de la brten nas grub pa ste rtogs pa'o/ /de'i stobs de dngos po'i stobs kyis brjod de/ dngos po'i mnyan par byed pas dbang po'i spyod yul du gnas kyi rigs la sogs pa dbye bas ni ma yin pa'i phyir ro/ /lhan cig 'dug kyang mi 'jig pa ste/'jig pa'i rgyu dang lhan cig 'dug kyang ngo / /bum pa zhig pa de la yang bsal ba ste de snang ba las so/ /mi snang bar gyur pa ste/ gtso bo'i rang bzhin du gnas par 'gyur ba'i phyir zhig gi snyam du sems par zad pa ste/ de ni grangs can dag gi lus so/ /mi gnas pa ste gsal bar mi gnas pa de nyid la mi rtag pa nyid du smra ste/'gal ba med par 'gyur ba'i phyir ro/ /rtag pa yang de kho na bzhin du gnas pa la bya'o zhes rim pa bzhin du blta'o/ /rgyus de zhig pa la yod na ni zhig pa'am mi snang ba zhes bya ba'i ming 'di la khyod dang kho bo dag gis zhe na ngar mi bya ba ste don de kho na ltar yod pa'i phyir ro//tshig gi don rnam par gzhag pa la gnod de zhes bya ni grangs can bdag nyid rdul dang mun pa snying stobs dang shes pa can rnams la'o/ /sems pa yod pa ni sems can de bdag gis de dag phan tshun tha dad par 'dod pa yin na/ mi dmigs kyang de la de yod na rdul la sogs pa dag kyang yod pa'i phyir de dag gi mtshan nyid bye brag ste phan tshun stongs par mi 'gyur ro//de dag phan tshun med pa de sgrub na mi dmigs pa ma rtogs pa sgrub pa'i rkyen 'ga' yang med de dgag pa ni mi dmigs pa kho nas yin pa'i phyir ro/ /de lta bas na rdul la sogs pa gcig la gcig med par sgrub pa na rdul gyi mtshan nyid ni yang ba dang 'gal ba/mun pa ni lci ba dang snying stobs ni g.yo ba dang srom pa dag yin la/ de dag gcig la gcig gi rang bzhin dgag pa mi dmigs pas byed de yod na de'i rang bzhin ltar dmigs par 'gyur ba ma dmigs pa'i phyir zhes so//de dag dang sems pa yod par yang tha dad pa de dag ni sems pa med par 'dod pas so/ /de'i bde ba yang mi rigs pas so/ /mi dmigs pas dgag pa 'grub pa ste/ de nyid kyi phyir mi dmigs pa'i mtshan nyid kyi zhes bya ba la sogs pa smos so//de lta bu'i dngos po'i rjes su dpag pa'i ma yin te/ zho dang myu gu dag ni 'o ma dang sa bon bzhin du bltar rung ba yin pa'i phyir ro/ /de nyid kyi phyir gal te de yod na zhes bya ba smos te/ bar gyi gnas skabs ni mngon par byung ba'o/ /de ni mi 'gyur ba'i rang bzhin yin pa'i phyir sngar yang bar gyi mngon par byung ba'i rang bzhin de nyid yin pa'i phyir dmigs pas mthong ba nyid yin no//gal te sngar mi mthong ba'i mtshan nyid yin no zhe na/ mi mngon pa'i mtshan nyid de/ bar du btang na ni de'i 'jig pa yin no//gal te mtshan nyid zhig kyang bum pa'i rdzas nyid na rtag go zhe na/ rdzas gzhan du gyur pa nyid mi mthun pa nyid yin gyi gzhan ci yang med do/ /de ltar snang ba dag 'gal ba'i mtshan nyid yin pa'i phyir de rnams gzhan pa nyid du sngar mang du brjod zin to/ /de'i phyir skye ba'i gtan tshigs dang rgyu 'o ma la sogs pa de'i 'bras bu zho de ltar skyes par skyed pa'i rang bzhin 'grub kyi 'bras bu de'i dngos po rgyu la yod pa ni ma yin pa'o//ri bong gi rwa las khyad par gyi bye brag ci yod ces bya ba'i don to/ /'o ma ni zho de'i bdag nyid ma yin yang ste 'o ma la zho med na yang ngo / / gal te 'o ma de'i zho kho na skyed pa'i rang bzhin de las 'ongs she na/ rang gi rgyu zhes bya ba la sogs pa smos so/ /'di ltar nus pa yang ci zhig yin zhes bya ba ni mi snang ba'i gnas skabs na ni nus pa'i rang bzhin du rgyu la gnas so zhes bya ba ni grangs can dag gi yin de dpyad pa'o/ /gal te zho de nyid do zhe na/de kho na ltar zhes bya ba la sogs pa smos so/ /khyad par yod na yang de bzhin du 'byung ba yin no zhes bya ba 'das ma thag tu smras zin to/ /gal te 'bras bu zho de las nus pa gzhan no zhe na/ ji ltar gzhan zhes bya ba la sogs pa smos so/ /rigs pa de dag gis rgyu dang 'bras bu'i gnas skabs dag rang bzhin gzhan nyid du rab tu brjod pa yin no//de ltar gzhan gyi don gyi rjes su dpag pa'i mtshan nyid dang dam bca' ba'i mtshan nyid dag bshad nas/ da ni gtan tshigs bshad par 'dod na phyogs kyi chos zhes bya ba smos te/ mthun pa'i phyogs la yod med rnam gnyis te//de la yod pa dang med pa dang rnam gnyis so/ /phyogs kyi chos la yang rnam gsum ste/ de la yod pa dang med pa dang gnyi ga yin pa'o/ /de bzhin du mi mthun pa'i phyogs la rnam pa gsum mo/ /so sor zhes bya ba ni mthun pa'i phyogs la sogs pa la yang so sor rnam pa gsum zhes sbyar ro//gal te gtan tshigs phyogs kyi chos yin na bsgrub par bya ba dang dam bca' ba dang / phyogs dag ming gi rnam grangs yin pa'i phyir bsgrub par bya ba'i chos zhes bya bar 'gyur la/ de ltar na rtags don med de bsgrub par bya ba grub zin pa'i phyir ro//ma grub na ni gzhi ma grub par 'gyur ro zhe na/ phyogs ni chos can te/ nye bar btags pa'i phyir ro/ /sgra'i don dngos la gnod pa yod cing btags pas gnod pa spong pa dang / gdags pa'i rgyu mtshan yod na gdags par byas na/ 'dir slob dpon dbang phyug sde na re dgos pa med pa'i phyir gdags par mi bya'o zhe na/dgos pa med pa ma yin te/ chos can thams cad kyi chos ni bsgrub par bya ba'i chos can gyi dang po'i chos can gyi dang gnyi ga ma yin pa'i chos can gyi chos te/ du ba dang mig gis gzung ba dag dang / kha bzang dkar te khra'i gnag pa'i phyir zhes bya ba go rims bzhin no//de thams cad gtan tshigs yin pa dgag pa'i don yin pa'i phyir dgos pa yod pas so/ /dgos pa de yang ji ltar 'grub ce na/ bsgrub par bya ba'i phyogs de'i phyogs gcig yin pa'i phyir te/ chos can yin pa'i phyir phyogs zhes spyi nye bar gdags su rung ba'i chos can de 'dra ba rtogs par bya ba'i phyir yin pas phyogs su gdags su mi rung ba'i chos can dag sel bar byed do//de ltar na yang zhes bya ba ni phyogs ma yin pa'i chos can sel ba na'o/ /mig gis gzung bar bya ba yin pa'i phyir zhes bya ba la sogs pa de khra'i gnag pa zhes bya ba dag spangs pa yin te/de dag phyogs kyi chos ma yin pa'i phyir ro/ /gal te 'dir chos can gyi chos zhes brjod par bya ste/ de la chos zhes smra bas kyang gzhan la ltos pa yin pa'i phyir chos can don gyis rtogs pas chos chos can la brten pa tsam du grub ste rtogs so//der chos can zhes smos pa bsgrub par bya ba'i chos can yin par shugs kyis 'grub po zhes sbyar ro/ /ci'i phyir zhe na/ nye ba yin pa'i phyir te/ gtan tshigs ni bsgrub par bya ba'i rgyu yin la/ de yang bsgrub par bya ba'i chos can la yod pa rgyu yin gyi/dpe la sogs pa la yod pa ma yin te grub zin pa'i phyir dang / gtan mi nus pa'i phyir ro zhe na/ dpe'i chos can yang nye ba yin pa'i phyir te/ 'di ltar 'brel pa de grub pas bsgrub par nus kyi/ gzhan du ni ma yin pa de yang dpe la yod pas 'grub pas dpe'i chos can yang 'grub par byed pa'i don gyis nye ba'i phyir ro//gal te mthun pa'i phyogs la yod ces smras pa'i phyir dpe'i chos can bshad zin pas so/ /bshad pa byed pa 'di yis te/ /chos zhes bya bas chos can rtogs pa la yang chos can smos pas nye ba'i phyir/ bsgrub par bya ba'i chos can du grub pa dang / de las yang dpe'i chos nye bar brtsad pa na mthun pa'i phyogs la yod ces smos pa'i phyir zhes bya ba 'bad pa spang ba'o/ /phyogs zhes smos pas legs par bzhag par 'gyur te/ phyogs kyi yan lag gi chos can no zhes spyi yan lag la btags pas tshigs chung dus rtogs pa'i phyir ro//de ltar yang slob dpon nyid kyis/ spyi ni bsgrub bya yin pa'i phyir/ /chos sam yang na chos can ni/ /gtso bo ming yang phyogs gcig phyir/ /bsgrub bya nyid du nye bar gdags/ /zhes gsungs so/ /gal te gtan tshigs ni sgrub par byed pa yin la/de yang bsgrub par bya ba'i chos can kho na bsgrub par bya ba yin pa'i phyir/ sgrub par byed pa yang de'i chos kho nar go'o/ /de'i phyir nye bar gdags par ma bya'o zhe na/ don gyis go ba na yang rtogs par dka' ba yongs su spang ba'i phyir te/sgrub par byed pa'i don gzung na dpe'i chos can la the tshom du 'gyur ba'i phyir ro/ /yang zhes bya ba ni dgos pa snga mar ma zad pa'o/ /dngos sam brgyud pa zhes bya ba ni med pa las ni mngon sum du'o/ /gzhan dag las ni brgyud pa ste/ bsgrub par bya ba med pa'i phyir khyab par byed pa log pas rtogs med do zhes brgyud pas so//'di de kho na nyid ni phyogs la yod pa dang med pa dang gnyi ga yin pa dag go/ /ci rigs par gtan tshigs la sogs pa ste/ gtan tshigs dang gtan tshigs ltar snang ba nges par gzung bar bya'o/ /cis nges par gzung zhe na/rang gi rtogs pa sgrub par byed pa ste/ phyogs kyis gsum gyi de kho na nyid dang / rjes su 'gro ba dang ldog pa dag gi de kho na nyid gsum gsum dag rang gi de kho na nyid rtogs pa grub par byed pa ste/ mngon sum dang rjes su dpag pa'i tshad mas nges par gzung bar bya ste/phyogs kyi chos med dam the tshom za bar tshad mas grub pa ni ma grub pa'i gtan tshigs ltar snang ba'o/ /de las bzlog pa ni gtan tshigs so/ /phyogs kyi chos grub pa la tshul lhag ma gnyis ma grub na 'gal ba'o/ /de gnyis la the tshom za na ma nges pa'o/ /mi mthun pa'i phyogs la med pa ma grub pa ni thun mong gi ma nges pa'o//de nyid la the tshom za na yang ma nges pa'o/ /rjes su 'gro ba dang / ldog pa dag nyes par smra na yang gtan tshigs ltar snang ba'o zhes gzung bar bya'o/ /ldog pa yin la the tshom dang gcig la ma grub pa ni dngos po la yod pa yang yin pa yang gzung bar bya'o//tshul gsum po dag tshang ba dang ma tshang ba de dag gi de kho na nyid la the tshom za ba dang phyin ci log ste/ de kho na ltar ma rtogs pa gang yang gzhan du gnas pa la gzhan du rtogs pa'o/ /de lta bu'i mtshan nyid kyis ni 'dod pa bsgrub par bya ste grub par ro//mi 'dod pa bsgrub par bya ba ste sun 'byin pa'o mi rtogs pa'i phyir zhes bya ba ni mi nus pa'i phyir ro/ /ma nges pa ni phyogs kyi chos nyid yin te zhes bya ba ni gtan tshigs dang 'gal ba dag ni phyogs kyi chos nyid yin par 'grub ste/ sgrub par byed pa yin pa'i phyir ro//ma nges pa ni sgrub par mi nus pa'i phyir ro/ /dgos par mi 'gyur bas ma smos so/ /ma grub pa ni phyogs kyi chos ma yin pa nyid yin no/ /ma nges pa ni mthun pa'i phyogs dang mi mthun pa'i phyogs la yod pa'am med par nges pa ni ltos te/ srog la sogs pa dang mnyan bya dag dngos po la gcig tu nges pa yin na yang rtogs pa po the tshom za ba'i sgo nas ma nges pa'i skyon du 'gyur la the tshom za ba'i skyon de dngos po la ma nges pa yang mtshungs te/skyon de kho nas ma nges par 'gyur ba'i phyir ro/ /de de ltar brjod pa yang 'dir sun 'byin pa nyid yin no zhes bya ba ni rgol ba gang ma nges pa'i bsgrub pa dgod pa la 'di ma nges zhes phyir rgol bas brjod na yang sun 'byin pa yin te/gzhan gyi 'dod pa phyin ci log tu byas pa 'ba' zhig tu ma zad pa'o/ /rang gi rtogs pa sgrub par byed pa'i tshad mas nges pa las gzhan du rgol ba dang / phyir rgol ba gang yang rung ba rtags tshul gnyis sam gcig la the tshom za ba ste/ mthun pa'i phyogs dang mi mthun pa'i phyogs dag la yin no/ /phyogs kyi chos ma grub na ni ma nges pa dang 'gal bar mi 'gyur ba'i phyir gnyis smos kyi gsum ni ma yin no/ /tshul gcig phyin ci log ste mi mthun pa'i phyogs la med par phyin ci log na'o//'dod pa'am 'dod pa'i gags de ltar rtogs par byed pa ni nus pa med pa'i phyir ro/ /de'i phyir 'di ni ma nges pa'o zhes sun 'byin par smra ba na'ang / 'di'i phyir ma nges pa yin te/ dper na 'di lta bu'i zhes tshad mas nges pa'i rtags la brten pa yin no//de'i phyir mnyan par bya ba nyid thun mong ma yin pa nyid du bsgrub pa ni sun 'byin pa'i gtan tshigs gnyi ga las ldog par mi rigs pa'i phyir zhes bya ba la sogs pa smos so/ /gnyi ga las phyi rol du gyur par mi rigs pa'i phyir zhes bya ba ni rtag pa dang mi rtag pa dag gi dngos pos bsdus pas phung po gzhan med pa'i phyir ro//gal te gcig las tshad mas nges na yang ma nges par mi 'gyur na/ gcig la yod par rtogs par byed pa'i sgrub par byed pa ste/ tshad ma yang med pa'i phyir mi mthun pa'i phyogs la 'jug pa dang /mi mthun pa'i phyogs las ldog pa la the tshom za ba nyid kyi phyir bsgrub par bya ba dang / cig shos la ma nges pa yin/ thun mong gi ma nges pa bzhin no zhes bya ba lta bu'o/ /gzhan las ma yin zhes bya ba skyes bu yon tan mtshungs pa dag las gzhan las ma yin pa'o//ji snyed du zhes bya ba ni slob dpon gyis gsungs pa'o/ /'di gnyis gcig tu bsdus pas zhes bya ba ni rtag pa dang mi rtag pas bsdus pa dang / gcig tu nges pa log pa dag go/ /ldog pa nges na ni phung po gsum pa srid na'o/ /khyad par rnam par gcod pa ni rtag pa dang cig shos gnyi ga 'gog pa'o//smras pa ni le'u gnyis par ro/ /gal te nges pa'i gtan tshigs zhes bya ba ni yang dag pa'i gtan tshigs so/ /smra ba'i skyon ni rjes su 'gro ba phyin ci log la sogs pa smras pas so/ /de yang zhes bya ba ni yang dag pa'i rtags nye bar smras pa'o//gcig tu ma nges pa ni ma yin no zhes bya ni dngos po'i ngo bos ni nges pa ma yin pa'o/ /dngos po'i mtshan nyid ston pa'i phyir te/ de'i rgyus nges par ma yin te/ smra ba'i skyon gyis byas pa'i phyir te/ 'on kyang dngos pos ni ma nges par mi 'gyur ro zhes bya ba ste/'di'i bsam pa ci zhe na/ mnyan par bya ba dang srog la sogs pa rtogs par nges par ma grub kyang dngos po la ni nges pa zhig yod pa'i phyir rtags su 'gyur ro snyam pa'o/ /gzhan gyis don gyi rjes su dpag pa ni dngos po'i chos nyi tshe la yang dag par brten te'o/ /smra ba'i skyon spangs te pha rol gyis rtogs par bya ba'i phyir yin la de yang sgra la ltos pa'i phyir ro//gal te de lta yin na zhes bya ba ni ma nges pa yin te/ 'di'i phyir ro zhes bya ba sun 'byin pa yin no/ /phyogs kyi chos gcig la ma grub pa'am zhes bya ba smos te/ gal te ma grub pa ni gcig la ma grub pas na ma grub pa yin na the tshom dang /gcig la ma grub pa ni dngos po la yang yin no snyam du bsams pa'o/ /'dod pa mi 'thob pas de ni de ltar yin no zhes bya ba ni/ rgol ba gang ma grub pa'i gtan tshigs kyis bsgrub pa smra ba de la phyir rgol bas 'di'i phyir 'di ma grub po zhes smras nas/rgol ba'i 'dod pa dang ste bsgrub par bya ba mi 'thob ste/ de'i gags su 'gyur ba'i phyir ro/ /de ni de lta yin te sun 'byin pa yin no/ /phyin ci log thob pa med par yang sun 'byin pa yin nam ste sun 'byin pa ni phyir rgol ba mi 'dod par byas pa'am tshul phyin ci log tu byas pa 'ba' zhig yin no snyam pa'o//sgrub par byed pa'i gags byed nus pas sun 'byin par gzhag ste/ 'di ni the tshom za ba'am/ gcig la ma grub pa'o zhes smras na/ ngag des gtan tshigs ltar snang ba de'i ngo bor rtogs par byed pa'i phyir bsgrub par bya ba 'grub par bya ba'i gags byed nus pa'i phyir ro//gal te mig gis gzung ba nyid gtan tshigs kyi mtshan nyid gnyi ga la grub pa las phyin ci log yin no zhe na/ 'di la yang zhes bya ba ni the tshom za ba dang gcig la ma grub pa'o/ /ma nges pa ni nges pa med pa de'i phyir sgrub pa ni ma yin la de de kho na ltar phyir rgol bas brjod na ni sun 'byin pa yin te/phyir rgol ba brjod pa des rgol ba'i 'dod pa la gags nus pas so/ /ma grub pa yang de bzhin no/ /de'i phyir gtan tshigs dang 'gal ba dag kho na rang gi khyab par byed pa la nges pa'i phyir/gnyi ga sgrub pa yang yin la sun 'byin pa yang yin te/ pha rol gyi 'dod pa la gags nus pa'i phyir ro/ /phyogs kyi chos dgur bstan pa zhes bya ba ni gang mig gi cha dgur grags pa'o/ /de nyid gang zhe na/ gzhal bya yin pa'i phyir zhes bya ba la sogs pa'o//'di dag go rims bzhin du char gong ma dang / bar ma dang tha ma rnams su yi ge'i phreng gi rim pa ltar rim gyis ma 'khrugs par bri bar bya'o/ /de ltar na mthun pa'i phyogs la yod pa dang med pa dang gnyi ga dang / mi mthun pa'i phyogs la yod pa dang /med pa dang gnyi ga dag gi dbye ba dang / gtan tshigs dang 'gal ba dang ma nges pa'i dbye ba dag cha so sor phye ba rtogs par 'gyur te/ phreng ba'i lugs dang mthun par brtags pas ni mthun pa'i phyogs kyi gsum mo/ /gyen thur du brtags pa gsum gyis ni mi mthun pa'i phyogs la gsum mo//'dir phyogs kyi chos kyi tshe dbye ba yin pa'i phyir ma grub pa ni med do/ /steng dang 'og gi gtan tshigs so/ /g.yas g.yon dag gis 'gal ba'o/ /zur bzhi ni thun mong gi ma nges pa dag go/ /dbus ni thun mong ma yin pa'o//de nyid kyi mtshams dang po dang dbus kyi rtsod pa gnyis so/ /mtshams lhag ma gsum gyis ni ldog pa grub pa'o/ /phyogs bzhi rang bzhin 'bras bu'o/ /gzhal bya byas pa mi rtag pa/ /byas pa srog sogs rtsol las skyes/ /mi rtag rtsol dang reg bya min/ /gtan tshigs dgu ru grags pa yin//rtag dang mi rtag rtsol 'byung dang / /rtag dang bdag bcas rtag nyid dang / /rtsol 'byung min dang mi rtag rtag /bsgrub bya'i chos su rab tu grags/ /zhes bya ba bsdu ba'i tshigs su bcad pa'o/ /gtan tshigs med par 'gyur ba ma yin nam zhes bya ba ni phyogs dang mthun pa'i phyogs dag kyang mi mthun pa'i phyogs su 'gyur ba'i phyir ro//ci'i phyir zhe na/ chos thams cad ces bya ba bsgrub par bya ba'i chos la gzhan phyogs dang mi mthun pa'i phyogs yod pa rnams so/ /de dag bsgrub par bya ba las gzhan yin pa'i phyir la/de dang ldan pa'i bye brag de dag kyang mi mthun pa'i phyogs gzhan par 'gyur ba'i phyir ro/ /chos gzhan dang ldan pa ni ser skya'am mang du za ba'am/ ring ba nyid dang ngo / /brjod par 'dod pa bram ze'i rigs las skyes pa'o/ /de mi brten te med na 'dod ser skya la sogs pa bram ze las gzhan yin pa'i phyir bram ze ma yin par 'gyur ro//yul gzhan la ni zhes bya ba ni mthun pa'i phyogs la sogs pa la'o/ /yang na chos gzhan pa dag go/ /de ma yin pa'i sgrub pas rnam par phye nas zhes bya ba mi mthun pa'i phyogs ni mthun pa'i phyogs ma yin par bstan nas te/ci'i phyir zhe na/ brjod par 'dod pas bsgrub par bya ba'i chos dang mi ldan pas bye brag tu byas nas 'jug ste/ rtogs par byed pa'i phyir de dang mi ldan pa'i mtshan nyid phyogs la sogs pa la med pa'i phyir ro/ / rnam pa de lta bu mi srid ces bya ba ni spyi 'ba' zhig las chos gzhan dang mi ldan pa'o/ /brjod par 'dod pa'i chos dang ldan par chos gzhan ma spangs pas mthun pa'i phyogs su byed pa de'i phyir ro/ /'on kyang chos des zhes bya ba ni brjod par 'dod pa bsgrub par bya ba'i chos des so/ / rtsod pa'i phyir zhes bya ba ni 'di dag gtan tshigs nyid yin par kha cig 'dod la gzhan ni de 'gogs pas so/ /de ltar na 'dir kha cig ni rtsod pa med kyang / dgos pa gzhan gyis dper brjod pa yang yod par ston to/ /brtsal ma thag tu byung ba'i shes pa mi rtag pa'i 'bras bu zhes bya ba ni sgra mi rtag pa'i 'bras bu'o//'dir brtsal ma thag tu byung ba'i shes pas rgyu mi rtag par grub pas/ de'i rgyu sgra yang mi rtag par sgrub pas rig byed kyi sgra rtag par smra ba dag gis 'dri bar byed pa'o/ /snga na yod pa la zhes bya ba ni rtag pa'i sgra brtsal ma thag pa'i shes pa'i gong nas yod pa'o//de ltar na sgra rtag tu yod pa'i phyir de'i 'bras bu shes pa yang res 'ga' bar mi 'gyur ro/ /gal te rtsol ba las sgra la lhan cig byed pas de'i dbang gis shes pa res 'ga' bar 'gyur ro zhe na/ de la skyes bu'i rkan dang 'dod pa la sogs pas brtsal ma thag tu byung ba'i shes pa zhes bya ba ni/de la nye bar sbyor ba med ces bya bar sbyar ro/ /nye bar sbyor ba 'bras bu nges pa mi 'byung ba'i phyir ro/ /gags sam zhes bya ba ni de bsal ba'o/ /dbang po la yang nye bar sbyor ba sbyar te/ des dbang po sbyor bar mi byed pa'o/ /gags mi srid pa zhes bya ba ni shes pas dmigs pa'am/mi dmigs pa'i rang bzhin du rtag pa'i phyir ro/ /dum bur mi byed ces bya ba ni thos par rung ba la mi rung bar mi byed na'o/ /cung zad kyang khyad par du byed do zhes bya ba ni dus mnyam pa'i rtsig pas so snyam du dgongs pa'o/ /rnam par shes pa'i rgyu yin te zhes bya ba ni yul la sogs pa phan par byed pas nus pa mthar thug par 'gyur ba rnams so//nye bar bskyed par bya ba ma yin pa ni sgra rtag pa'o/ /ltos par mi rigs pa ni lhan cig byed pa'o/ /ci'i phyir zhe na/ mi nus pa'i rang bzhin du rtag pa'i phyir ro/ /lhan cig byed par nus pa can de rnams zhes bya ba ni yul dang dbang po la sogs pa mi rtag pa rnams so//gags rtsig pa la sogs pa yod na snang ba zhes bya ba med pa'i phyir ram rgyu mi nye ba'i phyir ro/ /sngar skyed par nus pa de gags sam zhes bya ba ni/ de ma 'gags na gags bya bar mi nus pa'i phyir ro//de 'gags kyang gags med na yang shes pa skyed nus pa skye ba srid pas gags yod na zhes bya ba smos te/ rgyu'i 'phen pa zad pas rgyun chad pa yang rtogs par bya'o/ /de'i rang bzhin ma nyams pa'i phyir ro zhes bya ba ni nus pa de'i gags bya bar mi nus te nus pa'i rang bzhin grub pa'i phyir ro//gags bya bar nus na ni nus pa'i rang bzhin yang ma yin no/ /de'i rang bzhin ma nyams pa'i phyir ro zhes bya ba ni gags byed pa'i tshe yang nus pa'i rang bzhin ma nyams pa ste/ dngos po'i rang bzhin nus pa grub pa ni yang mi nus pa'i phyir mi 'gyur ro//mi rtag pa dag kyang grub pa'i rang bzhin bzlog tu mi rung na rtag pa lta ga la rung / yang zhes bya ba ni rnam par brtag pa gzhan te/ skad cig ma'i rang bzhin zhes bya ba mi rtag pa bum pa la sogs pa'o/ /phan tshun de rtsig pas kyang bum pa'i nye bar len pa dang lhan cig shes pa mi skyed pa'i rang bzhin gyi bum pa'i skad cig ma gzhan skyed pa nyid du srid pa'o//des na sgrib pa las rang bzhin dum bur byed do/ /gzhan du zhes bya ba ni khyad par du byed pa las gzhan du khyad par mi byed na'o/ /cung zad kyang mi byed na ni zhes bya ba ni bum pa la sogs pa la lhan cig byed pas khyad par du mi byed na'o//de ltar gags rtag par 'gyur te gags mi byed pas so/ /rtag pas de bzhin du mi 'gyur gyi zhes bya ba ni gags rtag pas so/ /de lta bu med de zhes bya ba ni shes pas res 'ga' dmigs pa'i phyir ro//des khyad par du byed pa can du rtogs so zhes bya ba ni gags kyis so/ /don de las thob pa'i khyad par zhes bya ba ni lhan cig byed pa'i don de las thob pa'i khyad par de/ rang bzhin gyi 'bras bu nye bar sbyor te skyed do zhes zer ro/ /gyis shig ste khyod nyid kyis rtag par 'dod pa nyams par 'gyur ro snyam du dgongs pa'o//'bras bu cung zad byed na sgra de sngar gyi ste phan pa ma byas pa'i rang bzhin no/ /nges pa zhes bya ba ni rtag pa'o/ /mi 'gyur te zhes bya ba ni med do zhes bya ba'i don to/ /gal te lhan cig byed pa de'i phan pa sgra las don gzhan yin no zhe na/de'i phan pa don gzhan pa nyid ces bya ba la sogs pa smos so/ /de la yang zhes bya ba phan pa don gzhan de las shes pa skye pa la'o/ /de shes pa ma yin par 'gyur te zhes bya ba ni sgra de shes pa des shes par mi 'gyur te/ sgra las gzhan pa'i phan pa dang 'brel gyi sgra dang ni ma yin pas so//dbang po'am nye ba dag la/ lhan cig byed par ltos pa ma yin te zhes bya bar sbyar ro/ /bdag gam zhes bya ba ni bdag nyid kyi khyad par te rang las tha dad pa'i khyad par gyis ni rtag pa la khyad par mi skyed pa'i phyir dang / rang nyid las tha dad pa yang mi srid pas so//gzhan yang rung zhes bya ba ni snga ma dag las gzhan pa ste/ skyes bu'i rtsol ba la sogs pa'o/ /thams cad kyis zhes bya ba ni dbang po la sogs pas so/ /de dag gis zhes bya ba ni sgra nyid la nye bar sbyor ba mi rigs par bshad pa dag gis so/ /sgra'am dbang po zhes bya ba ni sgra gcig po ma yin gyi dbang po dag la rtsol ba la sogs pas phan par byed pa'o//lhan cig byed par nye bar sbyor ba'i phyir la zhes bya ba ni phan pas byas pa'i dbang pos sgra la lhan cig byed par nye bar sbyor bar 'gyur te/ ma sbyar na dbang po dgos pa med pa'i phyir ro/ /rtag tu dmigs par 'gyur te zhes bya ba ni shes pa'i rgyu nus pa skye ba dang nyams pa med pa'i phyir ro//ci'i phyir skye ba dang nyams pa med ce na/ 'di ltar gal te zhes bya ba smos te/ sgra ni rtag pa nyid du 'dod la/ de ni gang las kyang nus pa 'thob pa'am nyams pa med na rtag par 'gyur ro/ /gal te nus pa sgra las don gzhan yin no zhe na/shes pa skyed pa'i nus pa zhes bya ba la sogs pa smos te/ don med pa zhes bya ba ni sgra rtag pa gzhan la mi ltos pa'i phyir ro/ /don gzhan pa nyid kyi skyon ni sngar bshad pa ltar don gzhan de dang shes par 'brel gyi sgra sgra dang ma yin pa'i phyir sgra de shes pas mi shes pa'o//'bad pa ma byas sam 'bad pa rdzogs te rgyun chad na'o/ /res 'ga' yang sgra dmigs pa med do/ /de'i phyir zhes bya ba ni dmigs pa gnyis dang ldan pa de'i phyir ro/ /de'i bdag nyid las zhes bya ba ni sgra'i rang gi ngo bo la'o/ /phan pa 'ga' zhig srid de zhes bya ba ni rtsol bas so//rgyu'i chos mthong ba'i phyir zhes bya ba ni rjes su 'gro ba dang ldog pa bshad ma thag pa'o/ /gal te de ltar na rtsol ba'i rjes su 'gro ba dang ldog pas mi rtag par 'gyur gyi/ shes pas ni ma yin no zhe na/ rtsol ma thag tu shes pa ste zhes bya ba smos te/brtsal ma thag tu byung ba'i shes pa yod pa'i phyir zhes rtags su byed kyi shes pa tsam du ni ma yin no/ /de yang brtsal ma thag tu byung ba sgra la dmigs pa'i shes pa zhes bya ba'i don to/ /de yang sgra brtsal ma thag tu byung ba ltar shes pa yang de bzhin no/ /sngar yod nges pa nyid kyis ming //zhes bya ba ni brtsal ba las sngar yod par nges pa ste/ rtag pa nyid kyi sgra shes pa skyes pa ni ma yin pa'o/ /gags dang dbang po dag la lhan cig byas pas phan pa srid kyang sgra rtag pa la ni gang gis kyang bye brag tu mi byed do/ /de'i gags bsal ba dang / dbang po la phan btags pa gang la yang ltos pa med pa'i sgra res 'ga' yang 'bras bu rnam par shes pa mi byed pa 'gal ba'i phyir ro/ /shes pa 'di 'dra ba ni brtsal ma thag tu byung ba'am res 'ga' ba'o/ /de dag ces bya ba ni mi rtag pa'i'o/ /dpe'i yul la zhes bya ba ni brtsal ba las byung ba'i dper brjod pa'i yul la'o//de'i bdag nyid du zhes bya ba ni rang bzhin gyi gtan tshigs su'o/ /gal te 'o na gzhal bar bya ba la sogs pa ci'i phyir bstan ce na/ gtan tshigs bye brag tu rtogs par bya ba'i phyir zhes bya ba smos te/ gtan tshigs dang der snang ba dag go//de nyid yin no zhes bya ba ni rang gi don gyi rjes su dpag par bshad pa'i mtshan nyid gsum ni gtan tshigs kyi mtshan nyid yin la/ de dag ma tshang ba ni ci rigs par gtan tshigs ltar snang ba'o/ /bye brag rtogs par bya ba yin pa de nyid kyi phyir/'bras bu'i rtags kyi dper brjod pa ni brtsal ma thag tu byung ba'i shes pa'o/ /rang bzhin gyi phyogs gcig ni brtsal ma thag tu byung ba'i skye ba'o/ /cha ni brtsal ma thag tu byung ba'i ste/ cha cig shos rang bzhin gyi rtags kyi cha sgra brtsal ma thag tu byung ba'i skye ba'o/ /gal te 'bras bu dang rang bzhin gyi dbye ba nyid ci dgos she na/gang med na mi 'byung ba yod pa'am zhes bya ba smos te/ rang bzhin tha dad pa dag med na mi 'byung ba yod pa'o/ /ldan pa can ni rjes su dbyug pa dang 'brel ba ste/ tha dad pa'i 'brel pa'o/ /sogs pas ni 'du ba'i 'brel pa ste/de ni tha mi dad pa ltar byed pa'o/ /gang yang don gcig la 'du ba ste gzhi gcig par byed pa'o/ /de 'dra ba'i 'brel ba ni med na mi 'byung ba'o/ /de nyid kyi phyir/ 'khrul pa srid pa can nyid phyir/ /zhes bya ba la sogs pa smos so/ /mi dmigs pa'i zhes bya ba gtan tshigs yod na snang bar rung ba las ma dmigs pa'o//med pa ni bsgrub par bya ba ste med pa'i tha snyad du rung ba'o/ /mi dmigs pa las gzhan ma yin zhes bya ba ni gtan tshigs las gzhan ma yin pa'o/ /gal te de lta na mi dmigs pa'i rtags kyis ci zhig sgrub ce na/de'i rgyu mtshan can shes pa dang sgra dag ste snang ba mi dmigs rgyu can gyi med pa'i tha snyad rmongs pa la bsgrub pa'o/ /ji ltar de bzhin du rtogs par bya zhe na/ zhes bya ba ni rgyu yod pas 'bras bu yod par sgrub pa'o/ /'di yi tha snyad grub 'gyur na/ /zhes bya ba ni dpe la ste/ sngon gnas khang na sbrul snang du rung ba mi dmigs pa'i med do zhes tha snyad du rung bar grub par 'gyur ba la'o/ /dpe la 'brel pa de grub pa la phyis yul gang na snang ba mi dmigs pa can de la yang yod na snang du rung ba las mi snang ba'i phyir/ med pa'i tha snyad du rung ba yin te gnas khang bzhin no zhes brjod pas/snang ba mi dmigs pa de'i 'bras bu nyid blo sgra yang 'grub ste/ de'i 'bras bu khyab pa'i phyir ro/ /lan 'ga' ma yin par kun du dpyad zin pa ni dpe nges par khyab pa rtogs pa'o/ /spyi dran pa yang dran par 'gyur/ zhes bya ba ni snang du rung ba mthong bar nges na med pa'i tha snyad du rung ba'o zhes bya ba dran pa ste/chos can gyi bye brag tu ma byas pa'o/ /de nyid dpe'i chos can la ni nges pas dran par byed pas so/ /mthong ba dang ma mthong ba nyid kyis grub ces bya ba ni/ dpe brjod pa ste/ mngon sum dang mi dmigs pas chos tha dad pas rjes su 'gro ba dang ldog pa rtogs pas rgyu dang 'bras bu'i rang bzhin grub pa nyid yin yang rmongs pas rgyu dang 'bras bu tha snyad mi shes pa la rjes su 'gro ba dang ldog pa'i phyir 'bras bu dang rgyu dang ngo bo zhes tha snyad rtags dang rtags can tha dad pa ltar snang ba ni brtags pa tha dad kyi rang gi ngo bor ma yin pa bzhin no//tha snyad kyi de tsam du gzhan du 'grub ste zhes bya ba ni de tsam du zhes bya ba bsgrub par bya ba dang gtan tshigs kyi tha snyad pa'o/ /gzhan du zhes bya ba ni dpe la'o/ /yang na tha dad par ro/ /khyad par med pa'i phyir ro/ /zhes bya ba ni don dam par ro//gal te mi dmigs pa de nyid ji ltar grub ces bya ba ni snang ba mi dmigs pa nyid gang gis grub ces bya'o/ /med pa de yang zhes bya ba ni mi dmigs pa ni shes pa med pa yin par bsam pas so/ /gcig dmigs pa'i mthu yis zhes bya ba ni mi dmigs pa mngon sum gyis 'grub par ston to//rang gi yul gyi shes pa med pa las zhes bya ba ni gzhan gyi lugs dgag pa ste/ pha rol kha cig ni de la dmigs pa'i shes pa med pas med par smra'o/ /rang bzhin khyad par can gyi shes pa yod pa zhes bya ba ni dgag par 'dod pas dben pa'i shes pa yod pa las so//thams cad mi rtogs na zhes bya ba ni pha rol 'dod pa ltar shes pa med pa tsam gyis des dben pa'i chos dmigs pa ma yin na'o/ /gang la zhes bya ba ni chos can gang la'o/ /'di dmigs la gzhan ni mi dmigs pa'o zhes bya ba ni phyogs dben pa 'di dmigs la/dgag par 'dod pa mi dmigs pa'o/ /gal te nyams su myong ba yang gang gis grub ce na/ rang gi ngo bo'i bye brag yang dag par myong ba ste/ rang rig pa las so/ /de lta bas na shes pa bdag nyid kyi bye brag ste/ rang nyid phyogs dben pa rtogs pa'o zhes shes pa bdag nyid kyis grub cing de nyid kyi yul gyi don gyi bye brag ste/'di ni dmigs la 'di ni mi dmigs so zhes bye brag tu byed do/ /gzhan du zhes bya ba ni rang rig pa las gzhan du'o/ /don gyi yang zhes bya ba ni shes pa rang la yod pa'i bye brag gis grub pa ltar don gyi rang gi bye brag 'grub pa ni ma yin no zhes bzlog pa bsdu ba ni yang gi don to//rnam par shes pa la yod pa'i bye brag phyogs gzhan dang ma 'dres pa dmigs par rang nyid kyis grub pa'i bye brag las phyogs ni dmigs la dgag par bya ba ni mi dmigs so zhes bya ba grub pa'i phyir ro//thams cad mi rtogs pa thal bar 'gyur ro/ /zhes bya ba ni le'u dang por rgyas par bshad zin to/ /khyad par can gyi myong ba la zhes bya ba ni sa phyogs dgag par bya bas dben pa'i myong ba'o/ /gzhan 'gog pa ni dgag par bya ba med do zhes rtogs par byed pa'o/ / gzhan ma yin zhes bya ba ni khyad par can myong ba nyid yin pa'o/ /mngon sum nyid kyis grub pa yin zhes bya ba ni khyad par can dmigs pa nyid dgag par bya ba mi dmigs pa'i phyir ro/ /de'i phyogs 'ba' zhig ni dmigs par bya ba mi dmigs pa yin la/ de la dmigs pa'i shes pa ni dmigs par byed pa'i mi dmigs pa yin te/de dag dmigs pa'i rang bzhin yin yang dgag par 'dod pa'i chos kyi dmigs pa dag yin pa'i phyir ma yin pa dgag pas mi dmigs par gzhag ste/ grong gi phag ni bza' ba ma yin pas bzar med do zhes bya ba bzhin no/ /de nyid de nges pa las zhes bya ba ni ma 'dres pa nyams su myong ba de nyid de nges pa las de nyams su myong ba ni phyogs 'ba' zhig myong ba yin gyi dgag par bya ba myong ba ni med do zhes bya ba dang /de'i yul ni phyogs dgag par bya ba dang ma 'dres pa yin gyi dgag par bya ba med do zhes nges pa'i shes pa skyed par byed pa ni de kho na yod do zhes nges par byed pa ste/phyogs dang de nyams su myong ba kho na'o/ /gzhan yod pa ni dgag par bya'o/ /gzhan nyams su myong ba yang dgag par bya ba'i nyams su myong ba'o/ /med pa'i tha snyad kyi rgyu yang de yin no zhes bya ba ni gcig nges par dmigs pa'i yul dang shes pa de dag ma yin par dgag pas med pa'i ngo bo nyid yin pa'i phyir don med pas grub zin pa'i phyir rmongs pa la med pa'i tha snyad kyi yul nyid du sgrub par byed de/snang du rung ba'i don mi dmigs pa thams cad du de'i don med par shes par bya ba brjod par bya ste de ltar spyad par bya ba yin te/sngon gyi gnas khang na snang du rung ba'i mi dmigs pa lta bu'o zhes bsgrub pa ste rgyas par sngar bshad zin to/ /rang bzhin khyad par can gyi shes pa yod pa zhes bya ba ni dgag par bya ba dang ma 'dres pa'i don shes pa'o/ /gzhan du ni de 'dra ba'i shes pa med par spang ngo //mun par lag pas byug pa na zhes bya ba ni mun pa'i sa phyogs na bum pas stong pa myong ba med de mi mthong ba'i phyir ro snyam du sems pa'o/ /de la yang zhes bya ba ni mthong ba 'ba' zhig khyad par can myong ba ma yin gyi reg pa las kyang bum pa stong pa myong bas de nyid bye brag can myong ba mi dmigs pa yin no//'bad pa dang bcas pa ni thogs pa ste/ dgag par bya ba yod pa'o/ /'dis ni yod na nges par dmigs par 'gyur ba bstan to/ /'bad pa med pa ni mi dmigs pa'o/ /de med na zhes bya ba ni bar snang stong pa'i reg pa dmigs pa de med na'o/ / gzhan med pa ni de las gzhan bum pa la sogs pa dgag par 'dod pa med ba'o/ /yang pha rol kha cig na re dmigs pa'i rgyu gzhan yod la zhes bya ba dbang po gzugs snang ba dang bcas pa dang / shes pa phyogs ma 'dres la dmigs pa dag yod la de las gzhan pa ni phyogs las gzhan pa dgag par bya ba'o//de las dmigs pa'i shes pa med pa las dgag par bya ba med par 'grub ste/ 'dis ni dgag par bya ba la dmigs pa med pa tsam yin gyi/ dmigs pa'i rgyu gzhan yod la de las dmigs pa med pa zhes bya ba nyes pa med pa khyad par can bstan to//de lta ma yin na zhes bya ba ni med pa khyad par can ma yin gyi/ shes pa med pa tsam du gyur na'o/ /de lta na gnyid log pa la sogs pa ste brgyal ba dang / kha phar bltas pa la sogs pa gnas skabs na bum pa la sogs pa mi dmigs pa gang dag ni med par yang rtogs par thal bar 'gyur ro//med pa khyad par can bzung na ni gnyid la sogs pa med pa mi 'grub ste/ gnyid la sogs pa de la ni yon tan dang ldan pa'i dbang po la sogs pa ste snang ba dang yid la byed pa shes pa skyed par nus par ro/ /de zhes bya ba ni gnyid log pa la sogs pa'o//shes pa med pa tsam gyi dmigs pa khyad par can med pa'i phyir te/ rgyu des de nyid yod bzhin du gang dag gi med par ma rtogs pa ni ma yin gyi/ 'on kyang mi dmigs pa tsam du zad pas na ma rtogs pa yin/ de mi dmigs pa de 'dra ba nyid med pa'i phyir te/ dmigs pa'i rgyu gzhan yod pa'i dmigs pa med pa'i phyir ro//de yod na ni gang dag gi med par rtogs par 'gyur ro zhes zer ro/ /'dir ma dmigs pa'i rgyu gzhan yod na zhes bya ba de nyid dbang po la sogs pa de dag gi yon tan 'jug pa ste/ bya ba byed pa nyid brjod pa yin la yon tan de lta bu ni dmigs pa 'jug pas ston pa ste/rang gi shes pa skyes pas yon tan ston pa yin te/ de lta na ni zhes bya ba ni dmigs pa 'jug na'o/ /gdod dbang po la sogs pa yon tan dang ldan pa yin te/ rang gi 'bras bu dmigs pa 'jug pa'i phyir ro/ /de lta ma yin na yon tan dang ldan pa nyid du rtogs so//de ltar na dmigs pa'i rgyu gzhan yod la zhes bya ba de yang dmigs pa nyid yin te/ dmigs pa med na gnyid log pa la sogs pa ltar yon tan gyi rgyur mi 'gyur ba'i phyir ro/ /de ltar dmigs pa yin dang kho bo cag gi smra ba nyid la brten par 'gyur te/ khyod kyi dmigs pa khyad par can gyi dmigs pa zhes bya ba yang don gang yod na snang du rung ba'i dmigs pa de nyid kyi dmigs pa'i khyad par can med pa ste/dgag par bya ba dang ma 'dres par chos can gyi rnam pa gcig tu so sor nges pa'o/ /gzhan du zhes bya ba ni mi dmigs pa nyid mi dmigs pa yin pa las gzhan du don dmigs pa med pa mi dmigs pa yin na'o//don gyi med pa nyid ni dgag par bya ba med pa nyid do/ /de shes pa mi dmigs pa yis rtogs 'gyur na/ shes pa mi dmigs pa ni med pa nyid de shes pa de lta bu'i med do zhes bya ba rtags gzhan gyis rtogs pa yin phyir te/de rang gis ni mi rtogs te med pa yin pa'i phyir don gyi med pa bzhin no/ /rtags de yang mi dmigs pa nyid yin te dgag pa med pa'i snga ma bzhin no/ /de'i phyir de mi dmigs pa yin pa'i phyir yang rtags gzhan la ltos te snga ma bzhin zhes bya ba'i rim gyis thug pa med 'gyur ro/ / gzhan yang dag par myong ba med par zhes bya ba smos te/ dgag par bya ba'i phyir yang dag par myong ba ste shes pa ste'o/ /de med par shes pa rang gis rang rig pa'i stobs kyis phyogs ma 'dres pa la dmigs pa'i shes pa rang nyid kyis mi 'grub ste/ nges pa'i shes pa mi skyed na'o//'o na ni shes pa de'i khyad par gyis yul la yang dgag par bya ba med pa'i khyad par du mi rtogs par thal bar 'gyur te/ 'di ltar yang dag par myong ba ni bdag nyid kyi khyad par te 'di nyams su myong ba yod kyi 'di nyams su myong ba ni med do zhes rang gi khyad par rtogs pas gzhan don gang gi dmigs pa med pa'i don gzhan de yang de bzhin du shes pa bzhin du med par rtogs par byed la gang gi dmigs pa yod pa ni yod par ro//gzhon nu ma len na re gang gi skyon med la zhes zer te/ mi dmigs pa'i rtags thug pa med pa la gang gi skyon med pa la'o/ / rang bzhin khyad par can gyi shes pa med pa ste shes pa med pa ma yin par smra ba dag gi ltar yang ma yin pa'i phyir yang thug pa med do/ /'o na ci zhe na/ 'on kyang gang mi dmigs pas te/ zhes bya ba smos te/ de nyid bshad pa'i phyir bum pa med do zhes bum pa de nyid med pa dmigs pa las med rtogs te/rnam par rtog pa can des kyang rang gi mtshan nyid 'dzin pa'i phyir rtog pa med pa las rang rgyud pa'i tshad ma yin no zhes zer ro/ /de ltar zhes bya ba ni bum pa med do zhes shes pa'o/ /gang las te bum pa med pa gang las bum pa med do zhes shes pa'i rgyu yin pas 'dod pa de ji ltar shes pa'i rkyen yin/ci'i phyir zhe na/ med pa ni zhes bya ba la sogs pa smos so/ /med pa ni med pa gzhan la mi ltos pas zhes bya ba ni med pa'i phyir med pa de gzhan gang la yang mi ltos te ltos pa med pa'i phyir ro/ /yang na med par bya ba'i phyir gzhan la mi ltos pa de rgyu phyi nas med pa'i phyir med pa byed na byed pa 'gog par 'gyur ba'i phyir ro//de las byung ba ni med do snyam pa'i rtog pa can gyi tshad ma'o/ /bye brag la brten pa'i mtshan nyid yin pa'i phyir zhes bya ba bye brag skye ba'i mtshan nyid yin pa'i phyir ro/ /de nyid la yang brten pa'i sgra 'jug pas so//mtshan nyid de dag dang ldan pa zhes bya ba ni shes pa skyed par nus pa dang gzhan la bye brag skye ba ste bya ba byed pa dang rang grub pa'o/ /'di la rkyen du 'gyur ba mi srid do zhes bya ba ni bum pa med pa 'di med do zhes shes pa'o/ /tshad ma rang rgyud pa dgag pa'i phyir mthong ba'i de ma thag pa can zhes bya ba smos te/khyed dang kho bo cag la mthun par grub pa'i mthong ba rtog pa med pa'i de ma thag pa can gyi shes pa mthong ba kho na'i stobs las skyes shing de kho na'i rjes su byed pa'o/ /de'i stobs kyis skye ba zhes bya ba ni dngos po'i stobs kyis rang dga' 'am rtags las ma yin pa'o//shes pa de yang dngos po de nyid du nus pa'i phyir te zhes bya ba ni rtogs par nus te shes pa nyid kyis yongs su bcad zin pa'i phyir dang po shes pa rtogs pa med pa de kho na don de la tshad mar 'gyur ro/ /de ltar rnam pa gcig tu mthong bas rnam par rtog pa gcig tu nges pa can bskyed pas gcig tu nges pa de'i mthus gcig po las gzhan pa dgag par bya ba med do//'gog pa'i phyir snga ma kho na tshad ma yin gyi de'i mthu las skyes pa de'i rjes su byed pas ma rtogs pa rtogs pa med pa rnam par rtog pa can ni rang rgyud pa'i tshad ma ma yin no/ /mthong ba rnam pa gzhan dang 'dres na ma mthong ngo zhes shes pa'i rtogs pa can de mi 'byung ba'i phyir ro//de dag gi mjug bsdu ba'i phyir de phyir zhes bya ba smos te/ mthong ba kho nas don de rtogs zin pa dang / rtog pa can de yang mthong ba'i mthu las byung ba'i phyir rang dgas rtogs pa med pas so//gzhan gyi stobs kyis bskyed pa de nyid bye brag tu bstan pa'i phyir dbang po la mi brten pa zhes sbyar te/ 'di mtshon pa yin pas bsgoms pa la brten pa ma yin no zhes kyang sbyar ro/ /de'i phyir mngon sum ma yin par bsams pa'o/ /phyi rol gyi don nges pa'i shes pa yin pa'i phyir rang rig par dogs pa ni med do//rtags dag la brten pa ma yin pas ni rjes su dpag pa ma yin pa'o/ /de'i phyir zhes bya ba ni mthong ba nyid kyis sngon po rtogs zin pas de la nges pa'i rtogs pa ni sngon po de nyid la rtogs par byed par zad kyi ma rtogs pa'i dngos po'i chos rtogs pa med pas de tshad ma ma yin no//snang ba mi dmigs pa brten nas mi snang ba mi dmigs pa bstan pa'i phyir/ ma mthong bas med mi rigs phyir/ /zhes bya ba smos te/ ma mthong ba tsam dang don yod par 'gal ba med pa'i phyir ro/ /gzhan ni yod pa zlog byed de/ /zhes bya ba ni snang ba mi dmigs pa las gzhan mi snang ba mi dmigs pas ni yod pa zlog byed de yod pa'i tha snyad ni yod pa'i 'bras bu yin pa'i phyir yod pa'o//de'i phyir yod pa'i tha snyad zlog byed de/ med na mi 'byung ba med pa'i phyir ro/ /dper na rtags med rnam rtog sogs/ /de rtags ltar snang ba la brten pa'i rtogs pas kyang gzhan yod sgrub pa ma yin te/med na mi 'byung ba med pa'i phyir ro/ /de bzhin du gzhan dag gis 'dod pa'i ma mthong ba tsam gyi mi dmigs pa 'di yang de 'bras nges pa de med pa'i tha snyad kyi 'bras bu nges pa can ma yin te/ dngos po med na mi dmigs par mi 'byung bar nges pa med pa'i phyir ro//de'i phyir ldog pa sgrub par nus min no/ /de dngos po 'gog pa sgrub par nus pa ma yin no/ /gtan tshigs dang po'i dbang byas te/ /zhes bya ba ni sngar bshad pa ste snang ba mi dmigs pa'o/ /nges pa nyid ni sgrub byed yin te med par nges pa'o//rang gi ngo bo sbyor ba ni rtags snang ba mi dmigs pa rang gis sgrub pa'o/ /tshad mas gnod pa'i phyir yang zhes bya ba 'di yang 'gal ba yin no zhes bsdu ba'o/ /tshad mas gnod pa zhes bya ba ni gcig spangs pas cig shos gnas pa ma yin yang de gnyis bdag nyid gcig par 'gal bar tshad ma gzhan gyis bsgrub pas 'gal ba ste/phan tshun spangs pas gnas pa'i chos dang ldan pa dag go/ /bdag nyid gcig par tshad mas gnod pa'i 'gal ba de nyid khas len pa la sbyor bar gnod pa can de phan tshun dgag par bya ba'i don bkod pa yang 'gyur te 'gal bas khyab pa dmigs pas zhes bya ba mi dmigs pa'i sbyor ba gnod pa can gyi don sbyor bar 'gyur ro//de rtags kyang 'gal bar 'gyur te zhes bya ba ni 'gal ba khas len pa de'i rtags nges mi 'dod pa bsgrub pa'i phyir 'gal ba'i gtan tshigs ltar snang bar 'gyur ro//de nyid bshad par 'dod pas dper na ltos pa dang bcas pa dang nges par 'byung ba dag lta bu'o/ /de nyid gcig par tshad mas gnod par bstan pa'i phyir tshad ma yang zhes bya ba smos so/ /gos la tshon bzhin zhes bya ba ltos pa dang bcas pa la nges pa med pas khyab par bstan to//de'i phyir ltos pa dang bcas pa ni nges pa med pa nyid sgrub pa'i phyir gzhan ni rgyus 'jig pa'i phyir mi rtag par nges par 'gyur ba las bzlog pa sgrub pa'i phyir/ gtan tshigs ltos pa dang bcas pa nyid 'gal bar 'gyur ro/ /nges pa'i phyir zhes bya ba ni 'jig pa nges pa'i phyir 'gal ba'am skyon med pa'o//ma yin te/ de dag ces bya ba ni 'jig pa'i rgyu de dag go/ /rang gi rgyu'i tshogs pa la rag las pa'i bum pa'i rang gi rgyu las grub zin pa dag /rgyu gzhan la mngon du phyogs pa ste rag las par mthong ba med do/ /rang gi rang bzhin rdzogs zin pa'i phyir te/gzhan de la rag ma las pa'i phyir ro/ /gal te 'jig par byed pa 'di chos nyid yin pa'i phyir nges par 'byung ba de bzhin no zhe na/ chos nyid yin par khas len pa de nyid skad cig ma yin 'dod par 'gyur te/ skad cig ma zhes bya ba grub ma thag tu 'jig pa'i rang bzhin ma yin na 'jig pa'i chos ma yin par bye brag med pa'i phyir sngon 'jig pa ma byung ba de phyis 'jig pa'i rgyus kyang mi 'byung bar thal bar 'gyur ba'i phyir rang bzhin gyis 'jig par 'gyur ro//gzhan yang chos nyid du khas len na de'am zhes bya ba ni dngos po'o/ /rang bzhin nges na bya bas sbyor te/rgyu las mi rtag pa'i rang bzhin du nges na'o/ /de rgyu zhes bya ba 'jig pa'i rgyu'o/ /de yang mi rtag pa'i rgyu rang bzhin nges na'o/ /de'am zhes bya ba dngos po'am de'i skyed par byed pa ste/ 'jig pa'i rgyu gzhan ma yin pa'o/ /rang bzhin yin par de dngos po rang bzhin gyis 'jig pa'o//de'i skyed par byed pa dang yang 'jig pa'i rang bzhin du skyed pa'i rang bzhin yin par cis mi 'dod de/ ji ltar na brgyud pas yin de skyed par byed pa las ni dngos po'o/ /des na ni 'jig pa'i rgyu las 'jig pa'o/ /thog ma nas de'i rang bzhin ma yin pa nyid la ni zhes bya ba ni rang bzhin skyed pa'i rgyu las skye ba na mi rtag pa de'i rang bzhin ma yin pa nyid yin na ni phyis 'jig pa ni rgyus kyang 'jig pa de 'byung bar mi nus te/nam mkha' bzhin no/ /de dag gis zhes bya ba ni gzhan la rag las pa ma nges pa khyab par bshad pas so/ /res 'ga' ba'i rang bzhin ni ma nges pa'o//ltos pa med pa nges pa ste/ /gang zhig de yod gzhan ltos med/ /de dag di yod la nges yin/ /zhes gsungs pa lta bu'o/ /phan tshun spangs te gnas pa'i mtshan nyid kyi 'gal ba ni/ res 'ga' ba'i rang bzhin dang ltos pa med pa dag go//de dag nyid ma nges pa yin pa'i phyir ma nges pas zhes bya ba la sogs pa smos so/ /'gal ba zhes bya ba ni phan tshun spangs te gnas pa'i 'gal ba'o/ /tshad mas grub pa ma yin pa zhes bya ba ni phan tshun spangs pas gnas pa nyid yin gyi tshad mas gnod pa zhes bya ba ni gzhan gsum pa ni ma yin pa'o//tshad mas gnod pa ma yin te phan tshun spangs pas gnod pa zhes bya ba rang bzhin 'gal ba dmigs pa nyid yin par 'gyur bar ro/ /'gal bas khyab pa'i rang bzhin yang zhes bya ba ni phan tshun spangs pas gnas pa'i 'gal ba ma yin yang ngo / /de 'gal bar bzhag pa ni phan tshun spangs pas gnas pa ma yin te/ltos pa dang bcas pa spangs pas nges par 'byung ba nyid du mi 'grub pa'i phyir te/ de ri bong gi rwa la sogs pa rang nyid med pa'i phyir ltos pa po med pas ltos pa dang bcas pa nyid spangs kyang nges par 'byung ba mi gnas pa'i phyir ro//de nyid la nges par 'byung ba spangs kyang ltos pa dang bcas par mi gnas pa'i phyir ro/ /'o na ji lta bur zhe na/ phan tshun spangs te gnas pas khyab pa'i rang bzhin yin pas de nges par 'byung ba dang / nges pa med pa ni phan tshun spangs te gnas pa'i 'gal ba ste/de'i dngos po dang de'i dngos po med pa yin pa'i phyir ro/ /nges pa de'i dngos po med pas khyab pa ni gzhan la ltos pa ni'o/ /de yang shugs kyis te phan tshun spangs pa ma yin yang de dang ldan pa'i chos yin pa'i phyir shugs kyis zhes bya ba brgyud pas 'gal ba ste/de dang de med pa ni mngon sum du 'gal la/ 'gal ba de dang ldan pa ni de'i shugs kyis so/ /shugs kyis 'gal ba de sgrub par byed pa'i tshad ma ni mi dmigs pa'i sbyor bar 'gyur ro zhes bya ba sbyor ba des rang bzhin 'gal ba las gzhan sbyor ba dang /shugs kyis 'gal ba yang grub par 'gyur ro zhes de ltar bstan pa'i phyir 'gal bas khyab pa mi dmigs pa zhes bya ba rang bzhin 'gal ba dmigs pa las sbyor ba tha dad par bstan pa yin no/ /chos can gyi ngag dag gi sbyor bar brjod pa ni don chos can yod pa la rung gi med pa la mi rung ba'i phyir te/de sgra'i don phyi'i don ma yin par bsams pa'o/ /de bkag par mi 'gyur te zhes bya ba ni the tshom la sogs pa dgag par mi 'gyur ba'o/ /ci'i phyir sbyor ba brjod par mi bya zhe na/ yul med pa zhes bya ba smos te/ rtags gzhi ma grub pa'i phyir/dgag pa'i sbyor ba mi dmigs pa'i phyir ro zhe na/ rnam par rtog pas yod bzhag pa ni rnam par rtog pa la snang ba la yod par snang ba ni yod par rten pa'o/ /med par snang ba ni med par rten pa'o/ /yod pa dang med pa gnyi gar snang ba ni gnyi gar rten pa ste bum pa dang ri bong gi rwa dang lus can ma yin zhes bya ba rnams dang go rims bzhin te/lus can ma yin pa ni nam mkha' la sogs pa yod par snang ba dang / ri bong gi rwa la sogs pa med pa dag tu snang ba gnyi gar bstan pa/ der ni phyi dngos nyer blangs te/ /zhes bya ba gtso bo la sogs pa dgag pa der ni phyi'i dngos zhes bya ba rnam par rtog pa la snang ba las gzhan pa rang gi mtshan nyid do//de nye bar bzung ste dgag par bsgrub par bya ba ma yin no/ /de ltar na yang sgra don med min te rnam par rtog pa la snang ba'i gtso bo la sogs pa chos can med pa ni ma yin no/ /ci'i phyir zhe na sbyor ba brjod phyir te rnam par rtog pa la snang ba med pa ni brjod pa mi srid pas so//de'i rnam pa can gyi rnam par skyed pa'i phyir yang ngo zhes bya ba ni smra ba po sgras ston pa yang ngo / /rgyu dang 'bras bu'i shes pa la zhes bya ba ni ston pa dang nyan pa po'o/ /so sor mi snang ba ni rang gi mtshan nyid kyi don to//so sor rang gis rig pa yin pa'i phyir ro/ /zhes bya ba rgol ba dang / phyir rgol ba la rang rig pa'i mngon sum gyis grub pa'o/ /'di la gzhan rigs pa ni med de/ gzhan de brdzun pa'i phyir ro/ /yang dag par ma thob pa ni ma 'ongs pa'o/ /'di la gnod pa med pa'i phyir ro zhes bya ba ni rnam par rtog pa la snang ba 'di la gnod pa med pa de med par mi 'gyur ba'i phyir ro//'di dag blo don yul can 'dod/ /ces bya ba ni sgra 'di dag thams cad dngos su ni blo la snang ba'i don can no/ /de la yang rnam par gzhag pa'i mtshan nyid rgyu med pa can bsgrub pa zhes bya ba ni gtso bo la sogs pa dgag pa de la yang pha rol gyis ji ltar bzhag pa ste/mi gsal ba dang rtag pa dang spyi dang skyed par byed pa dag tu blo la snang ba de'i phyi'i rgyu med pa can du sgrub par byed pa de lta bu'i mi dmigs pa'i yod pa'i phyir te/ rnam par rtog pa la snang ba'i gzhi sgrub pas so//de blo nye bar gzhag pa'i don du zhes bya ba ni gtso bo la sogs pa'i snang ba'i blo de'i phyi'i rgyu ma yin no zhes nye bar sgrub pa'i don du'o/ /'dir ni dngos po nyid sems te/ /zhes bya ba ni gtso bo dgag pa la sogs pa 'dir ro/ /dngos po nyid yin nam ma yin pa sems kyi sgra'i don rnam par rtog pa la snang ba ni sems pa'o//dngos po kho na sems pa yang ci'i phyir zhe na/ 'bras bu skyed dang 'brel phyir ro/ /zhes bya ba smos te/ dngos po kho nas 'bras bu skyed la rtog pa dang ldan pa yang 'bras bu yod pa kho na la blang dang dor bar rtog go/ / de kho na nyid kyang yang dag par mi rtogs pa'i phyir ro zhes bya ba ni rnam par rtog pas so/ /'di dag thams cad ni zhes bya ba ni rtog pa dang ldan pa thams cad do/ /gsungs te zhes bya ba ni slob dpon phyogs kyi glang pos so/ /brjod zin pa yin no zhes bya ba ni le'u gnyis par ro//grangs can dag gtso bo yod pa nyid spyi de sgrub par 'dod nas/ yod pa rang bzhin gtan tshigs na/ /zhes bya ba smos te/ yod pa'i phyir mi rtag ces bya ba'o/ /spyi yod pa ji ltar bsgrub bya min te/ bsgrub par bya bar 'gyur ba'o/ /gal te rtag pa dang mi gsal ba dang /skyed par byed pa zhes bya ba'i bye brag rjes su 'gro med ce na zhes bya ba ni dpe ma grub po zhe na/ gtan tshigs bsgrub bya dag 'gal 'gyur te/ khyed kyi gtan tshigs byas pa'i phyir mi rtag ces bya ba yang sgrar 'gyur ba'i mi rtag pa ni bum pa la med la rtags kyang de dang 'dra'o zhes pa'o//gal te 'di ltar bye brag ces bya ba nas gsungs te zhes bya ba'i bar ni bye brag rjes 'gro med ces zhes bya ba'i cha 'chad do/ /tshad ma yul gyis mi shes pa'i phyir ro zhes bya ba ni bye brag tshad mas ma grub pa'i phyir ro/ /gsungs so zhes bya ba ni slob dpon phyogs kyi glang pos so//gtan tshigs kyang yin pa'i phyir ro zhes bya ba ni bye brag la brten na bum par gyur pa'i yod pa yang dpe la med pa'i phyir ro/ /bye brag gis bsgrub par bya ba kho na skyon dang bcas pa ma yin gyi zhes bya ba ni yod pa bye brag gis te/gtso bo yod pa spyi nyid dang rtag pa dang skyed par byed pa'am dbang phyug yod pa rtag pa dang bde ba dang rjes su gzung ba dang / chad pas gcod par byed pa la sogs pa bye brag tu byas te sgrub na rjes su 'gro ba med pa'i skyon yod pa nyi tsher ma zad de 'on kyang yod pa gtan tshigs su byas na yang rjes su 'gro ba med par skyon mtshungs pa yin te/bum par gyur pa'i yod pa ni sgra la med pa'i phyir ma grub pa yin la sgrar gyur pa'i yod pa ni dpe la med pas so/ /skyon 'di med de zhes bya ba ni mtshungs pa'o/ /yod pa tsam zhig nyer blangs te/ /zhes bya ba rtag pa dang skyed par byed pa la sogs pa'i bye brag bor te'o//don 'ga' grub par mi 'gyur la/ zhes bya ba ni khyod kyi 'dod pa'am ma rtogs pa'i don no/ /yod pa tsam ste kho bo cag kyang yod pa tsam ni 'gog par mi byed do/ /bye brag gang la yang yongs su ma sbyar bar smras pas zhes bya ba ni rang dgar dang skyed par byed pa dang //rtag pa la sogs pa'i bye brag gang la ma sbyar ba'i yod pa'o/ /yod pa de ni sgrub byed na/ /bye brag kho nar bsgrub bya yin/ /zhes bya ba ni gzhan du na rtags don med pa'i phyir ro/ /gzhan yang rung zhes bya ba ni dbang phyug yod par 'dod pas kyang rang dbang dang bde ba dang 'byin pa po la sogs par dang /des ni de'i rang bzhin sgrub par byed pa yin te zhes bya ba ni bye brag tu bsgrub pa'i rtags des sam smra ba po de gtso bo la sogs pa de'i rang bzhin no/ /rjes su 'gro ba med pa yin no zhes bya ba ni de lta bu tshad mas gar yang mthong ba med pa'i phyir gzhi bye brag gis bye brag can du 'dod na zhes bya ba ni ri'i me zhes bya bar sgrub na'o//de ltar gzhi des bye brag tu byed pa ni ma yin te zhes bya ba ni ri'i me yod do zhes sgrub pa ni ma yin pa'o/ /'o na ci zhe na/ mi ldan pa rnam par gcod pa ni bye brag ste/'di la me yod pa'o zhes me dang mi ldan pa rnam par gcod pa'o zhes le'u gnyis par bshad zin to/ /de la spyi kho na zhes bya ba ni chos can de la spyi me tsam ste cha bye brag tu ma byas pa ldan par 'grub pa'o/ /gang la yang med pa'i phyir te/ bye brag med pa ni zhes bya ba ni dper 'dod pa'i chos can gang la yang rtag pa dang /bde ba dang / rang dbang can tshad mas ma grub pa'i phyir bye brag de lta bu dag dang ldan pa'i rjes su 'gro ba med pa yin no/ /gal te ji ltar med de zhes bya ba ni rjes su 'gro ba ji ltar med de yod pa de shes bya ba la sogs pa yin la de lta na shes bya ba la sogs pa ni rjes su 'gro ba can yin no zhe na/ci zhig 'grub par 'gyur zhes bya ba ni shes bya ba la sogs pa ni grub zin pa'i phyir dang / de grub pa yang khyed kyi 'dod pa ni ma yin no zhes bya ba'i don to/ /rnam par rtog pa'i blo'i snang ba ni don la ni zhes bya ba ni rnam par rtog pa ni rtag pa dang bde ba dang 'byin pa po dag snang la de'i rten rang gi mtshan nyid sgrub par byed pa ma yin nam/du bas me la sogs pa yang rnam par rtog pa la snang ba'i rten grub pa nyid yin pa bzhin zhes bya ba'o/ /sgrubs shig ces bya ba ni gal te me la sogs pa ltar rten rang gi mtshan nyid kyi don can bsgrub par nus na ni sgrubs shig ste/dpe ma grub pa'i phyir nus pa mi srid snyam du dgongs pa'o/ /gal te phyi rol gyi don gyi rten can nyid du mi 'grub pa'i phyir gtso bo la sogs pa ste/ dbang phyug la sogs pa de'i mtshan nyid kyi bye brag ste/phyi'i don gyi mtshan nyid la mi brten na ste/ de lta bur mi 'grub na rtags zhes bya ba la sogs pa de'i sgra'i don tsam ste/ rang gi mtshan nyid kyis stong pa'o/ /rten gyi chos de dag nye bar brtags pa yin te/ gtso bo'i bye brag gi rang bzhin rten sgrub par byed do zhes bya ba'i rten gyi don btags pa tsam du zad kyi me la sogs pa ltar don dam pa'i rten ni mi srid do//ci'i phyir zhe na/ rten ma grub pa la zhes bya ba smos te/ don dam pa'i rten dang rjes su 'gro ba gar yang ma grub pa'i phyir de bye brag med pas zhes bya ba ni yod pa shes pa la sogs pa de rtag pa dang bde ba la sogs pa'i bye brag rjes su 'gro ba grub pa med pas rnam par rtog pa la snang ba'i rten gyis don nyid don yod pa tsam nyid de bye brag dang bral ba'o//don med pa yin no zhes bya ba ni rtags so/ /gzhan du ni zhes bya ba la sogs pas rjes su 'gro ba yod pa rnams so//me spyi de chos can gyi bye brag gis dben pa'i me tsam du ba tsam dang 'brel pa grub pa'o/ /de nyid chos can de la ma grub pa'i phyir sgrub par byed pa'i phyir skyon med do/ /de spyi yis zhes bya ba ni bsgrub par bya ba'i chos dang chos can 'brel pa'i spyi yin pa'i phyir chos can la mi ldan pa spangs kyang 'brel pa'i spyi dang rjes su 'gro ba med do snyam pa'o//de ltar gyur pa'i bdag nyid kyi rjes su 'gro ba zhes bya ba ni bsgrub par bya ba grub zin pa'i bdag nyid dang rjes su 'gro ba'o/ /byed pa ni zhes bya ba de dang rtags 'brel ba 'dzin pa rigs pa la mkhas pa su yang med de dgos pa med pa'i phyir ro//'o na ji ltar rjes su 'gro ba ston ce na/ pha rol gyis go bar byed pa ni zhes bya ba smos te/ nyan pa pos bsgrub par bya ba ma gtogs pa la ston pa na'o/ /me tsam gyis zhes bya ba ni chos can dang ma sbyar ba'o/ / dper na tshang bang lta bu zhes dpe'i chos can smos pas ni rjes su 'gro ba dran par bya ba tsam yin gyi chos can sdud pa ni ma yin no/ /khyad par byed pa ni mtshon par byed pa yin pa'i phyir du ba yang chos can gyi bye brag dang bral ba nyid la rjes su 'gro bar blta'o/ /de ltar me tsam gyi du ba tsam la khyab par grub pa dang /chos can gang kho na la du ba de 'dra ba rang nyid mthong ba'i chos can kho na la me'i blo skyed par byed pa ste/ des khyab par shes pa'i phyir ro/ /de lta na ri me dang ldan pa zhes sgrub par byed pa shugs kyis rtogs pas bsgrub par bya bar bstan pa ni ri'i me zhes rjes su 'gro ba'i tshe bstan pa ni ci yang ma yin te/de 'dra ba'i rjes su 'gro ba mi srid pa'i phyir dang / dgos pa med pa'i phyir ro/ /de lta bas na de la brten cing zhes bya ba ni chos can de la du ba de brten cing ste phyogs kyi chos brjod cing khyab pa brjod pa ste me dang du ba tsam gyi rjes su 'gro ba dang ldog pa 'brel pa'i rtsa ba can brjod pa tsam gyi 'dod pa ri me dang ldan pa zhes bya ba bsgrub par bya ba sgrub pa'i phyir rjes su 'gro ba med par yang ma yin la rtags don med pa'ang ma yin no//de'i phyir spyi rjes su 'gro ba'i tshe kho bo cag gis ma bstan na ji ltar rtags de khyad par can gyi rjes su 'gro ba ste/rjes su 'gro ba med par 'gyur/ yang de'i bkod pa sngon du 'gro ba can ni bsgrub par bya ba bkod pa sngon du 'gro ba can gang na du ba yod pa de ni ri'i me yod do zhes spyi bkod pa can gyi'o/ /'dir yan lag ma yin no zhes bya ba ni bsgrub par bya ba ma rtogs par bya ba'i ched du rjes su 'gro ba smra ba yin pa'i phyir rjes su 'gro ba ston pa na'o//sgrub par byed pa'i ngag las dam bca' ba'i ngag logs shig tu bya bar ji ltar 'gyur zhes bya ba ni bsgrub par bya ba dngos spyi dang rjes su ston pa yin no/ /dam bca' ba'i ngag nyid rjes su 'gro ba dang ldog pa'i ngag yin pas sgrub pa'i ngag ste/sbyor ba'i tshig tu 'gyur ba'i phyir de las logs shig ste/ sgrub par byed pa'i ngag las logs shig tu dam bca' ba'i ngag ni sgrub pa'i yan lag ma yin no zhes ston par ji ltar 'gyur te/ de sgrub pa'i ngag nyid du bstan par 'gyur ro zhes bya ba'i don to//rtags kyi chos kyis mi 'khrul pa zhes bya ba ni rjes su 'gro ba'o/ /chos can la bstan pa ni zhes bya ba ni bsgrub par bya ba'i chos can bsam pa med par chos can gzhan dpe'i chos can la chos tsam dang 'brel pa rab tu bstan pa'o//de la rab tu grub pa yis bya ba chos tsam dang 'brel pa bstan pa'i rtags bsgrub par bya ba'i chos can la rab tu grub pas so/ /chos can la yang ldan par rtogs/ /de rtags dag la grub pa'i chos can de la yang khyab par byed pa'i chos de rtogs so/ / gsungs zhes bya ba ni slob dpon phyogs kyi glang pos so/ /me la sogs pa rjes su 'gro ba yod pas sgrub par byed pa ltar gtso bo la sogs par yod pa yang kha na ma tho ba med pa ste skyon med pa ma yin no/ /gzhan gyi phyogs sun 'byung ba bshad nas rang gi phyogs kyi klan ka'i lan gdab pa'i phyir/bye brag yongs su mi sbyor phyir/ /zhes bya ba smos te/ sgra'i yod pa zhes bye brag yongs su mi sbyor ba'i phyir te yod pa tsam mo/ /dngos po tsam zhig ces bya ba ni mi rtag pa tsam zhig go/ /sgrub byed ces bya ba ni khyab par byed pa de tsam zhig dang khyab pa grub pa'i yod pa yis so//gal te sgra'i yod pa zhes bye brag tu ma gzung na ji ltar sgra la grub par byed ce na/ de la bye brag gzung bar bya ba nges pa ni med do zhes bya ba smos te/ sgra'i yod pa zhes bya ba rjes su 'gro ba gzung bar nges pa ni med de/ yod pa tsam la brten pa'i rjes su 'gro bas kyang bya ste/bye brag med kyang bsgrub par bya ba'i chos can la 'dod pa sgrub pa nus pa'i phyir te/ 'di ltar yod pa tsam la mi rtag pa tsam gyis khyad par grub pa ni khyab pa dang ldan pa'i yod pa de chos can gang la yod par phyogs kyi chos su brjod pas rang la khyab par byed pa'i chos mi rtag pa yang chos can de la yod pas rtogs pa'i phyir ro//yod pa bsgrub par bya ba nyid yin na ni bye brag rjes su 'gro ba med pa la yod pa tsam ni grub zin pa'i phyir rtags gzhal bar bya ba la sogs pa 'bras bu med do/ /gzhan yang zhes bya ba ni skyon rnams sdud pa'o//yod pa ma grub pa la ji ltar 'gyur zhes bya ba ni/ gtso bo la sogs pa yod par nam yang ma grub pa de la de'i rang bzhin gyi rtags yod par ji ltar 'gyur/ gtso bo la sogs pa rang bzhin yod pa'i rang bzhin gyi chos 'ga' zhig rtags su grub na ni de'i rang bzhin grub pa'i phyir gtso bo la sogs pa'i de yod pa de nyid yin par yang ji ltar mi 'dod pa de tha dad pa med pa'i phyir ro//gal te rang bzhin gyis rtags bsgrub par bya ba nyid kyi ngo bo yin na ji ltar rtags dang rtags can gyi bye brag tu 'gyur zhe na/ rang gi ngo bo nyid yin yang ste/gtan tshigs bsgrub par bya ba'i rang gi ngo bo yang khyad par gzhan spangs pa 'ga' zhig la ltos te chos zhes chos can las ldog pa lta bur bstan te tha dad pa lta bur ro/ /chos dang chos can gyi tshig sgra dag ste sgra'i don tha dad pas kyang ngo / /brjod par bya ba ni de dag gi rten phyi'i don to//'di ni rang bzhin gyi rtags med par bstan pa'o/ /'bras bu yang mi srid par don gyis rtogs par bya ste/ gtso bo la sogs pa ji ltar 'dod pa'i bye brag can la ma grub pa'i phyir de'i 'bras bu yang cung zad tsam yang mi 'grub pas so/ / dngos po la mi brten pa zhes bya ba ni med pa'i dngos po la mi 'jug pa'o/ /gal te ma yin par dgag pa med pa yin yang dngos po la 'jug go zhe na/ ma yin par dgag pa ma yin par zhes bya ba smos so/ /'o na de ji ltar zhe na/ med par bkag pa ste dngos po'i chos thams cad du ldog pa tsam gyi med pa ste/rnam par rtog pas gzhag pa yod pa las gtan tshigs so/ /de yang mi 'gal ba ste de yang ji lta bu zhig ce na/ ji ltar lus med bya ba lus med pa nyid ni yod pa ma yin pa nyid de ci yang med pa la yang 'jug go/ /yang zhes bya ba'i sgras ni sems la sogs pa yod pa la yang 'jug go//de'i phyir gnyi ga'i chos 'khrul pa'o/ /med pa la bkag pa'i sgras 'jug par bshad pa na gsal byed pa na re/ yod pa ma yin pa med pa'i phyir te/ gzhi med pa'i phyir bkag pa'i yul ma yin pa yin no zhes zer ro//de ni zhes bya ba yod pa ma yin pa dgag pa'i yul ma yin na'o/ /da ni de ji ltar zhes bya ba ni yod pa ma yin bsgrub pa'i yul ma yin na'o/ /gal te ma yin pa nyid kyis dgag pa'i yul du 'gyur ba yang ji ltar zhe na/ dgag pa'i mtshan nyid ni sgrub pa log pa nyid yin pa'i phyir ro//'on te sgrub pa'i tshul ma yin pa nyid kyis dgag pa'i yul du gyur pa yang ji ltar zhe na/ dgag pa'i mtshan nyid ni sgrib pa log pa nyid yin pa'i phyir ro zhes bya ba smos te/ mtshan nyid dang yul dag gzhan nyid ni ma yin no//gal te yongs su bgrangs pa kho na la zhes bya ba ni gang la dgag pa 'jug par 'dod pa kho na la dgag pa la 'jug pa ste/ dper na grangs can gang dag dbang phyug med pa dag ni gtso bo 'ga' zhig las sna tshogs skye bar 'dod la/ de dag na re grangs can rnal 'byor spyod pa la drang srong chu klung la sogs pa dbang phyug tu smra ba dag bkag pa'i phyir dbang phyug med do zhes bya ba ni gtan tshigs med par 'jug gi med pa gzhan la ni ma yin te/de la 'jug par mi 'dod pa'i phyir ro zhes zer ba lta bu'o/ /de'i phyir lus med ces bya ba yang sems la sogs pa kho na la 'jug gi yod pa ma yin pa la ni ma yin te/yongs su ma bgrangs pa'i phyir te/ de la 'jug par mi 'dod pa'i phyir ro zhes zer na'o/ /kye ma zhes bya ba ni skyo bar ston pa'o/ /yang na snying rje ba'o/ /sdug bsngal bas 'tsho ba sgrub pa 'di zhes bya ba ni rang gi 'dod pa'i skyon chags pa'i nyes pa bsrung dka' ba'i phyir ro//bdag nyid kyi gson pa sdug bsngal bar byed pa'o/ /ji ltar bsrung bar mi nus she na/ brda las byung ba zhes bya ba smos te/ sgra'i 'jug pa ni brda las byung ba ste de la brten pa'o/ /brda de yang skyes bu'i 'dod pa tsam dang rjes su 'brel pa ste/dngos po yod pa kho na la brten par ma nges pa'o/ /de lta bu'i sgra de 'dod pa tsam las brgyud de/ 'jug pas lus med ces bya ba yod pa ma yin pa la yang 'jug ste/ skyes bus de la yang brda byas pa'i phyir ro/ /de 'dra ba'i sgra de don la nges par te rang 'dod pas 'jug pa gzhan du zhugs par 'dod pa ste grags pa'i dngos po dang 'gal bar byed 'dod pa de'i tshe'o//cho nges btab kyang zhes bya ba ni lus med ces bya ba yod pa ma yin la ma brjod cig ces gsol ba shin tu btab kyang ngo //'jig rten mi ldog go zhes bya ba ni grags pa brda ji lta ba bzhin du go bar 'gyur bar mi ldog pa'o/ /'jig rten ni yod pa ma yin pa yang rtogs par bya ba'i phyir med ces bya ba'i sgra la brdar byed pa'o/ /gal te brdar byas kyang mi rtogs na ni 'dod pa dang bye brag med pa'i phyir te/mi rtogs par 'dod pa'i yod pa ma yin pa dang brdar byas par bye brag med pa'i phyir gnyis pa ma yin par dgag pa sems la sogs pa la yang lus med ces bya ba ni sgras mi rtogs par thal bar 'gyur ba'i phyir ro/ /de las kyang rtogs pa yang dag par brten pa'i phyir te zhes bya ba ni ma yin par dgag pa sems la sogs pa'i brda las kyang rtogs pa med pa'i sgra la brten pa'i phyir te/med pa'i sgras rtogs pa'o/ /de ni gzhan la yang mtshungs pa'i phyir ro zhes bya ba brda'i mthu las rtogs pa'o/ /the tshom za ba yang rnam par bcad pas go bar byed pa nyid thob ste rtags su 'gyur ba yin na/rnam par gcad pa cam lus med ces bya ba de ni ma yin par bkag pas sems la sogs pa yod pa la yang 'jug pa yod pa la yin pa ri bong gi rwa la sogs pa la yang srid pas so/ /de ji ltar de'i bdag nyid du sgrub par byed ces bya ba ni gnyi ga la srid pa'i rtags ji ltar na yod pas de'i bdag nyid du nges pa sgrub par byed ces bya ba'i don to//rnam par gcad pa ma yin pa'i mtshan nyid ces bya ba ni dgag pa ma yin pa ste sgrub pa'o/ /dngos po med pa la yang blos rnam par gzhag pa'i phyir zhes bya ba ni brda'i dbang gis so//zhes bya ba la sogs pa gtan tshigs yod pa de med pa la yang 'jug pa'i phyir thun mong gi ma nges pa yin no zhes snga ma rnam par bcad pas bshad pa yin to go bar bya ba yin no/ /gnyi ga'i chos de zhes bya ba lus med ces bya ba'o//yod pa las gzhan yod pa ma yin pa la 'jug pa rang gi ngag gis smras pas bshad ces bya ba ni/ gtan tshigs gnyi ga'i chos yin pa'i rtogs pa'i skabs kyis so/ /gnyi ga'i chos nyid yin yang zhes bya ba ni rtag pa dang mi rtag pa gnyi ga'i chos yin yang ngo //skyon med de zhes pa ni ma nges pa'i'o/ /de yang rtag pa dang mi rtag pa gnyi ga yin pas ci'i phyir 'khrul pa can ma yin zhe na/ phyogs nyid 'khrul pa'i yul ni ma yin te/ bum pa dang nam mkha' dag mthun pa'i phyogs nyid du byas pa'i phyir de la 'jug pas mi mthun pa'i phyogs la 'jug pa'i 'khrul par mi rigs pa'i phyir ro snyam pa'o//khyod ces bya ba ni phyogs dang mthun pa'i phyogs la gang yang rung ba zhes bya ba smra ba'o/ /de ji ltar zhes bya ba ni bsgrub par bya ba med pa mi mthun pa'i phyogs yin na gnyi ga'i chos zhes bya ba rtag pa dang mi rtag pa nam mkha' dang bum pa'i chos de bum pa'i chos nyid du ni bsgrub par bya ba rtag pa med pa la 'jug pa nam mkha'i chos ni bzlog pa la'o//de'i phyir gnyi ga'i chos de ji ltar mi mthun pa'i phyogs la mi 'jug /gal te de dag mthun pa'i phyogs nyid du byas pa'i phyir mi mthun pa'i phyogs ma yin no zhe na/phyogs dang mi mthun pa'i phyogs rnam par phye ba la ltos pa zhes bya ba ni skyes bu'i 'dod pas rnam par phye ba la ltos pa ste/ de'i stobs kyis mi 'khrul pa dang cig shos su mi 'gyur ba'o/ /ci'i phyir zhe na/ mi 'khrul pa dang 'khrul pa ni dngos po ba ste/dngos po'i stobs kyis yin pa'i phyir ro/ /de'i phyir phyogs kyis byas pa thams cad ces bya ba smos te/ rgol bas phyogs su byas pa la yod pa'i byas pa yin na ji ltar gyur kyang mi rtag pas khyab po zhes bya ba'o/ /khyab pa tshad mas nye bar ston te zhes bya ba ni 'dod pa ma yin pa'o//byas pa thams cad ces bya ba ni phyogs kyi byas pa zhes bya ba ni bye brag dang bral ba'o/ /de ltar grub na zhes bya ba ni dngos po'i stobs kyi khyad par ro/ /gzhan du zhes bya ba'i skyes bu'i 'dod pas gal te 'dod pas khyab pa sgrub pa yang ci'i phyir go bar byed pa ma yin zhe na/skyes bu'i 'jug pa ni zhes bya ba la sogs pa smos so/ /gang zhig skyes bus bsgrub par bya ba nyid du 'dod pa de phyogs yin te zhes bya ba ni skyes bus byas pa yin pa'o/ /de yang 'dod pa 'ba' zhig gi phyogs su mi 'gyur gyi dngos po gang kho na mi 'khrul pa'i yul du mthong ba zhes bya ba gnod pa med pa dang /brjod par 'dod pa'i grangs gcig pa can kho nar gnas pa de phyogs su byed pa'i phyir/ dngos pos yin la de yod pa yang dngos pos yin pa'i phyir gnyi ga'i chos mi 'khrul pa nyid do zhe na'o/ /rjes su dpag pa'i yul la zhes bya ba ni dngos bo'i stobs zhugs la'o//mngon sum gyis gnod pa yod pa yang zhes bya ba ni rjes su dpag pas gnod pa yang ngo / /smras zin to zhes bya ba ni le'u gnyis pa la sogs pa mang du'o/ /gnod pa med pa nyid kyi mtshan nyid kyang de la ma nges pa'i mtshan nyid do zhes kyang ngo zhes bya ba ni de yang sngar smras zin to zhes bya ba ste le'u 'di nyid du'o//de dag gis ci zhig brjod ce na/ phyogs kyi mtshan nyid ji skad du smra ba de lta bus ni dngos po'i stobs kyis zhugs pa'i rtags la phyogs rnam par phye bas rtags kyis go bar byed pa'i mtshan nyid la phan par 'gyur ba'am gnod par 'gyur ba ma yin no zhes bstan pa yin no//de ltar na zhes bya ba ni phyogs kyi mtshan nyid kyi gtan tshigs kyi go bar byed par mi 'gyur na'o/ /de ltar bsgrub par bya ba la mi ltos na go bar byed pa nyid do zhes bya ba 'di ci zhig ces bya ba 'di bsgrub par bya ba las gzhan pa'o//gang gis zhes bya ba ni bsgrub par bya ba la ma ltos pa'i rtags kyis so/ /gang gi phyir zhes bya ba ni gtan tshigs gang gi rgyus so/ /don la mi 'khrul par sems par byed pa ste/ don dam pa'i don la mi slu ba'o/ /de'i phyir zhes bya ba ni don dam pa'i don la mi slu bar sems dang ba'o//dngos pos khyab pas ni don dam pas so/ /de'i phyir skyes bus phyogs nyid du mi 'dod kyang dngos pos khyab pa'i rtags yod na khyab par byed pa'i don de la mi 'khrul la/ dngos pos khyab pa de med na skyes bus phyogs su byas kyang mi slu bar mi 'gyur ro zhes bya bar rtogs par bya'o//de'i phyir rtags gang zhig mi mthun pa'i phyogs la 'jug kyang mi mthun pa'i phyogs de skyes bu 'di phyogs su byed na rtags mi 'khrul la gzhan phyogs su mi byed pa dag ni 'khrul par 'gyur ro zhes bya ba 'di ni shin tu rnam par dag pa'i tshad ma yin te/dngos po dang mi mthun par zhugs pa yin pa'i phyir 'thing slad du byas pa'o/ /de ltar gnyi ga'i chos gtan tshigs 'khrul par bstan pa bshad nas med pa'i chos 'gal bar bstan pa'i phyir med pa tsam gyis khyab pa ni med par bkag pas khyab pa'o//don gyi rnam par bcad pa ni yod pa'i don log pa tsam mo/ /yang 'di zhes bya bas rang gi phyogs la klan ka'i lan 'debs pa ste 'di zhes bya ba ni yod pa'o/ /de tsam gyis khyab pa zhes bya ba ni mi rtag pa sgra la sogs pa'i bye brag dang bral ba'o/ /spyi'i dngos po zhes bya ba yod pa yang sgra la sogs pa'i bye brag dang bral ba'i dngos po'o//des na zhes bya ba ni spyi'i dngos po khyab pa grub pas so/ /ldog pa med pas so zhes bya ba ni mi rtag pa'i phyir zhes bya ba'i rtags ni mi mthun pa'i phyogs sgra la sogs pa las ma log pa'i phyir ro/ /'dir yang de ltar yin te zhes bya ba ni log pa yod pa yin pa'o//ji ltar zhe na/ mi mthun pa'i phyogs bum pa la sogs pa la ldog pa yod pa'i phyir ro/ /rjes su 'gro ba gtso mi che ba'i phyir ro zhes bya ba ni stobs chung ba'i phyir snyam pa'o/ /ji ltar zhe na/ bye brag pa'i lugs ltar rdul phra rab dag rtag pa yin la de la reg par bya ba ma yin pa nyid rjes su 'gro ba med pa'i phyir mthun pa'i phyogs la ma khyab pas so//gal te de ltar na 'di go bar byed par 'gyur te/ 'dir mi rtags pa nyid mthun pa'i phyogs rtsol ba las byung ba thams cad la rjes su 'gro ba'i phyir stobs dang ldan pa'o//mi mthun pa'i phyogs nam mkha' la sogs pa 'ga' zhig las ldog pa yang yod la de stobs chung ba ste mi mthun pa'i phyogs glog dang rtsal la sogs pa las ldog pa med pa'i phyir ro/ /rtag pa rnam par bcad pa zhes bya ba ni thams cad du rtag pa la sogs pas so/ / gzhan du zhes bya ba ni rjes su 'gro ba nyi tshe mnyam pa'am de stobs che bas so/ /'di yod pa tsam zhes bya ba ni rjes su 'gro ba'o/ /'di'i nus pa yongs su rdzogs pa'i phyir ro zhes bya ba ni rtags dag gis sgrub par 'dod pa'i phyir ro/ /bye brag de dag 'ba' zhig ces bya ba ni sgra dang phyogs rtag pa dang /me med par rnam par bcad pa dag go/ /'o na ci zhig na/ mi mthun pa'i phyogs ma yin pa ni spyi ste phyogs nyid ces bya ba'i spyi bsgrub par bya ba yin no zhes bya ba'i don to/ /spyi yis ni mi mthun pa'i phyogs ma yin pa nyid ces bya bar rtogs par 'gyur la/mi mthun pa'i phyogs dang ma 'dres pa de ni gzhan rnam par bcad pa rtogs pa nyid kyis grub pa'i phyir spyi'i tshad mas ma grub cing dgos pa med pa des ci zhig bya zhes bstan pa'i phyir gal te gzhan dang ma 'dres pa zhes bya ba la sogs pa smos so/ /de ltar ldog pa gtso cher sgrub pa zhes pa ni rtags kyang ldog pa stobs dang ldan par grub la rtags can yang ldog pa ste/rnam par gcad pa nyid gtso bo yin gyi spyi ni mi dgos so zhes grub pa'o/ /mi mthun pa'i phyogs la ma mthong du zin kyang zhes bya ba ni ma mthong ba tsam 'brel pa'i yul log pas zhes bya ba tshad ma'i stong ba'o//lus dang dbang po dang blo dag ces so sor phye nas sbyar te/ dpyod pa'i sbyor ba gsum po dag ni rig byed kyi lud de nyid kyi tshad ma de skyes bu'i thams cad mkhyen pa ni mi srid do zhes zer ro/ /de'i phyir lus la sogs pa rnams 'dod chags la sogs pa'i rgyu yin mod kyi nye bar len pa'i tshul bzhin ma yin pa yid la byed pa dang bral ba rnams ni nus pa shin tu med do//bdag dang bdag gi'o zhes ma mthong ba nyid las zhes bya ba ni log pa na 'dod chags la sogs pa ldog go zhes bya bar ston to//dper na bdag dang bdag gir ma bzung ba'i dngos po lta bu'o/ /de'i phyir bdag dang bdag gir 'dzin pa yod pa tsam gyis 'dod chags la sogs pa yod la de med na med pa'i phyir lus la sogs pa nyi tshe'i nus pa ma yin pa'i phyir mi mthun pa'i phyogs thams cad mkhyen pa dang 'dod chags dang bral ba dag la ma mthong du zin kyang de dag dang 'gal ba med de de dag yod la 'dod chags la sogs pa skyed mi nus pa srid pa'i phyir ro//gal te de ltar na rgyu dang 'bras bur ma gyur pa gzhan ro la sogs pas gzugs la sogs pa rtogs pa zhes bya ba ni de ltar ba'i ro la sogs pa ste/dus mnyam pa'i dngos po gnyis la rgyu dang 'bras bu med pa'i phyir ro/ /'di la rtogs pa'i rim pa dang skye ba'i rim pa gnyis su shes par bya ste/ de la mod las ni shes pa'i rim pas bshad do/ /'grel pa las ni skye ba'i rim pa sngar bshad nas de'i rjes la rtogs pa'i rim pa bshad do//grog mo'i nye bar len pa'i rgyu ni grog mo'i skad cig ma snga ma'o/ /de lhan cig byed pa ni 'byung bar 'gyur ba'i bye brag char 'bab pa'i rgyu'o/ /de'i phyir grog mo 'pho ba'i rgyu'i rang bzhin char 'bab pa'i rgyu 'byung bar 'gyur ba'i lhan cig byed pa can nam/grog mo'i 'pho ba'i nye bar len pa char 'bab pa'i rgyu 'byung bar 'gyur ba lhan cig byed pa yin pa nyid dpag pas char 'bab pa dpog pa'i phyir 'bras bu'i rtags las skyes pa'i rjes su dpag pa yin no/ /nya 'phar ba la sogs pa yang de bzhin no//rwa can yin te glang yin pa'i phyir ro zhes pa cha shas can gyis cha shas rtogs pa zhes bya ba rtags gsum pa las gzhan pa sde gzhan yin pa'i phyir rang bzhin gyi rtags ma yin la dus mnyam pa'i phyir 'bras bu'i rtags ma yin zhing dgag pa mi byed pas mi dmigs pa yang ma yin no snyam pa'o//spyi ru rnam par gzhag pa ni zhes bya ba ni glang nyid du'o/ /spyi can ni nog pa dang ral sogs pa'o/ /yang gzhan dag chu mi g.yo bar mthong nas de'i gting gi gzhi rjes su dpog pa yang snga ma'i tshul gyis rtags bzhi par 'dod de brten pas rten dpog pa'o//de lta bu'i bdag nyid kyi chu zhes bya ba ni thur du mi ltung bar gnas pa'i rang bzhin no/ /de gzhi las mngon par zhugs pa zhes bya ba ni gzhi las skyes pa ste chu'i nye bar len pa dang gzhi'i nye bar len pa dag lhan cig byas pas chu brtan pa'i rang bzhin skyes pa'o/ /de las phan pa nyams su myong ba med na zhes bya ba ni gzhi las chus khyad par cung zad ma thob na'o//de las gnas skabs kyi bye brag thob par mi rigs so zhes bya ba ni rten de las brten pa chu brten pa nyid thob par mi rigs pa ste phan pa med pa la rten dang brten pa nyid mi 'thad pa'o/ / sngar brjod zin to zhes bya ba ni lan mang du'o/ /yang dag par sbyor ba'i phyir ro zhes bya ba ni rten dang brten pa sbyor ba'i 'brel pa yang dag par sbyor ba zhes bya bas brtan par gzhi dang sbyor ba'o/ /ci ste de dag gi yang dag par sbyor ba yin zhes bya ba ni rgyu cung zad med na yang dag par sbyor ba mi rung ba'i phyir ro//gal te de dag las zhes bya ba ni gzhi dang chu dang las yang dag par sbyor ba skye bo 'du bas so zhes bya ba ni gzhi dang chu dag las yang dag par sbyor ba mi skye ba'i de dag la 'du ba ste de dang 'brel pa ste/ ci ste gcig la zhes bya ba ni rten nam chu la'o//de ltar na yang dag par sbyor ba rten med kyang chu 'ba' zhig brtan par gnas par rung ba'o/ /gal te de las mi nus pa'i phyir ro zhes bya ba ni gcig kho na la'o/ /de dang 'dra ba'i phyir zhes bya ba ni gzhi dang chu dag khyad par skyes pa'i phan par bya ba dang / phan par byed pa ma yin pa 'dra bas so//phan pa med pa de'i phyir yang dag par sbyor ba las gzhi dang chu dag yang dag par sbyor ba de dang ldan pa zhes bya bar mi 'gyur ro/ /yang na yang dag par sbyor ba la yang dag par sbyar bar bya ba bzhin dang / chu de dag dang ldan par mi 'gyur ro/ / de dang mi ldan na yang de las brtan par gnas par mi 'gyur ro/ /gal te lhan cig pa la zhes bya ba ni gzhi dang chu lhan cig tshogs pa la'o/ /phan tshun zhes bya ba ni yang dag par sbyor ba'i stobs kyis chu dang gzhi dag la dang de dag gis kyang yang dag par sbyor ba la'o//bskyed par bya ba dang skyed par byed pa ma yin pa la zhes bya ba ni yang dag par sbyor bas ni dus gcig pa'i rten dang brten bdag 'brel par byed pa'i phyir 'brel pa can dag phan tshun bskyed par bya ba dang skyed par byed pa dag med pas so/ /de nyid kyi phyir rang gi ngo bo la ni sgrub pa'i phyir ro zhes bya ba smos te/'brel pa can dag gsum pa 'brel pa bdag tu mnyam par 'brel ba yin pa'i phyir gsum ka yang grub zin pa'i phyir ro/ /gzhan gyis kyang zhes bya ba ni 'brel pa'i chos dag gi ngo bo las gzhan pa'i phan pa'o/ /rnam pa gang gis kyang zhes bya ba ni rang ngam gzhan gyi ngo bo gang gis kyang ngo //de'i phyir dngos po thams cad kyi 'brel pa nyid ni zhes bya ba ni dngos po tha dad pa'i'o/ /de dag la zhes bya ba ni bum pa dang sa gzhi dang btar dang rgya shug dang chu dag la'o/ /de lta bu'i bdag nyid kyi tha snyad ces bya ba ni rten dang brten pa'i'o//bskyed par bya ba dang skyed par byed pa'i dngos po de bum pa'i lhan cig byed pa dang chu'i nye bar len pa dag lhan cig byas par chu brten pa nyid du skye la sa gzhi la sogs pa yang de dang 'dra'o/ /'di dag de'i med na mi 'byung ba ma yin pa'i phyir zhes bya ba 'di rten dang brten pa zhes bya ba 'di dag yang dag par sbyor ba de'i med na mi 'byung ba ma yin te rten dang brten du 'dod pa tsam gyis de la brten pa'i mtshan nyid 'grub pa'i phyir brgyud pas btags pa ni brgyud pa yang ma yin la btags pa yang ma yin pas brgyud pas btags pa ste/de la rten dang brten par 'dod pa gnyis las ni yang dag par sbyor ba nus pa'o/ /de las ni de brten pa'i rang bzhin no zhes bya ba'o/ /de nyid brtag pa ste yang dag par sbyor ba tshad mas grub pa med pa'i phyir ro/ /don med pa'i phyir ro zhes bya ba ni rten dang brten pa dag yod pa tsam gyis brten pa'i gnas par 'grub par tshad mas 'grub pa'i phyir ro//phan btags pas bshad pa ni gnas pa brten pa nyid yin na ni de dus mnyam pa la mi 'thad de grub zin pa la phan pa mi srid pas so/ /gzhan du gyur pa yang de la phan pa ma yin no zhes so//gags byed pa yang ci zhig ces bya ba ni de nyid dam de ma yin pa zhig ces btags pa'o/ /de la rtog pa dang po'i dbang du byas te/ de'i ltung ba'i gags byed pa'i phyir zhes bya ba gang gnas pa de nyid kyi rang bzhin du gyur pa'i gags byed pa'i phyir ro/ /de kho na la zhes bya ba ni brten pa'i chos las gzhan du gyur pa'i gags zhes bya ba'i rang bzhin te de nyid la gzhi nye bar sbyor ba'i phyir brten pa'i dbang po la ni ci yang mi byed pa'i phyir gzhi de ji ltar brten pa'i dbang po ltung ba'i gnas yin te/gags byed pas mi ltung ngo zhes bya ba ni gzhi gags la gags kyis mi ltung bar byed do zhes bya bar rtogs na yang ngo //mi ltung ba de yang brten pa'i dngos po de nyid dam de ma yin zhes brgal zhing brtag pa mtshungs so/ /gags kyi tshigs don byas pa zhes bya bar de cung zad byas pa zhig yin par bshad na yang de mi 'thad de/ thug pa med par yang 'gyur te zhes bya bar ni khyad par de las khyad par 'ga' zhig ma thob na ni de'i khyad par du yang mi 'gyur la de las khyad par gnyis pa zhig thob na yang snga ma ltar brtag pa mtshungs pa'i phyir khyad par rnams thug pa med par 'gyur ro//gnod pa de dag gi rtsa ba de ni de'i bdag nyid du gyur pa'i phan pa khas mi len pa'i phyir ro//de yang cis na khas mi len zhe na/ de khas blangs na de'i rang bzhin rten las grub par gyur la de lta na yang rgyu dang 'bras bur 'gyur zhing rten de las rtogs pa yang 'bras bu'i rtags las skye bar 'gyur du 'ongs pas so/ /rang gi bdag nyid gzhan du ma gyur pa'i phan pa mi 'thad pa de'i phyir ltung ba med pa'i gags yin no zhe na/snga ma bzhin du thal bar 'gyur ro zhes bya ba le'u gnyis pa'i rang bzhin gyi rtags bshad pa la sogs par bshad pa ltar ro/ /de nyid bstan pa'i phyir 'di byed pa'i dngos po 'gog pa zhes bya ba la sogs pa smos so//de yang 'dod pa yin no zhes bya ba ni gzhi ltung ba mi byed do zhes kho bo la grub zin pa'i phyir khyed kyis brjod pa ni don med do/ /de la yang nyes pa gzhan bstan pa'i phyir de ltar ltung ba de byas pa med kyang zhes bya ba la sogs pa smos so//skad cig ma'i dngos po rnams zhes bya ba ni gzhan gyis lhan cig byas pa'i rgyun skad cig ma gzhan la skye bar rung ba'o/ /de la yang brten pa'i rgyu dang yul mtshungs pa nyid skye ba ste/ de dang nye bar 'bras bu'i rgyun skye ba'o/ /gzhi la skye bar grub po zhes bya ba ni de las skyes pa'i rtags can shes pa yang 'bras bu'i rtags las skyes pa nyid du 'gyur ro//'bras bu'i zhes rjes su 'jug go zhes bya ba ni mdo snga ma las bdag nyid de 'dra'i rgyu/ de'i 'bras bu zhes smos pa ltar ro/ /med pa mi 'byung bar nges pa'i phyir ro zhes bya ba ni bsgrub par bya bar 'dod pa med par yang gtan tshigs su 'dod par 'byung srid pa'i phyir ro//rtogs pa rnams kyi sgrub byed min/ /zhes bya ba ni rgol ba dang phyir rgol ba rnams kyi gtan tshigs ltar snang ba yin no zhes bya ba'i don to/ /shes byed yan lag kyang ci yin zhe na/ gtan tshigs kyang tshul gsum pa go bar byed pa yin te zhes bya ba smos so//ma 'brel pas ni mi rtogs te/ /zhes bya ba ni chos can dang sgrub par 'dod pa'i chos dag dang ngo / /de la chos can dang ma 'brel ba go bar mi byed pa bstan pa'i phyir/ tshad ma la sogs pa mthong ba ste/ sgrub par 'dod pa'i chos dang 'brel ba mthong ba yang ngo //rgya mtshor me bzhin zhes bya ba ni chos can dang 'brel par ma grub pa'i dper brjod pa'o/ /ma 'brel bas zhes bya ba ni chos can dang chos dag dang ngo / /go bar bya ba dang / go bar byed pa dag gi cig gam gnyi ga la ma grub pas the tshom za ba ni ci rigs par de dag nyid kyi gtan tshigs ltar snang ba yin te rgol ba la ma grub pa dang phyir rgol ba gnyi ga la ma grub pa zhes bya ba'o//the tshom za ba yang de bzhin no/ /gcig rab ma grub the tshom za/ /zhes bya ba ni ci rigs pa ste/ chos can dang ma 'brel pa'i don gcig ma grub bam the tshom za ba ni ma grub ces bya bar sbyar ro//mthun pa'i phyogs nyid la yod pa gcig gam/ mi mthun pa'i phyogs la med pa nyid gcig ma grub bam the tshom za na 'khrul par 'gyur zhes bya bar sbyar ro/ /gnyis ma grub pa dang the tshom za zhes bya ba ni mi mthun pa'i phyogs nyid la yod pa dang /mi mthun pa'i phyogs la med pa nyid dag gcig rab ma grub na 'gal bar 'gyur zhes bya bar sbyar ro/ /the tshom za na 'khrul pa can/ /zhes bya bar sbyar ro/ /'chi ba khas blangs nas sems pa can nyid ji ltar khas blangs par mi 'gyur zhes bya ba ni/rnam par shes pa 'gag pa'i mtshan nyid kyi 'chi ba khas blangs na'o/ /gal te 'chi ba'i sgra la 'jug pa'i phyir ro zhes bya ba ni shun lpags bshus nas 'chi'o zhes grags pa'i phyir ro zhe na/ ha cang thal bar 'gyur ro zhes bya ba'i phyir ro zhes bya ba ni/ sgras gang brjod par grub par thal ba ste/dper na chu ngogs stong pa la chu 'gram ni bu ram gyi phung po yod do zhes brjod na yang de yod pa la sogs pa'o/ /dngos pos go bar bya ba'i dngos po grub pa ni ma yin no zhes bya ba ni rtags dngos por gyur pas go bar bya ba'i chos dngos po grub pa ma yin pa'o/ / 'o na ci zhe na/ sgra'i don tsam zhig 'grub par 'gyur ba'o/ /mi rtag pa'i phyir dbyibs dang ldan pa'i phyir zhes bya ba ni grangs can dag mi rtag pa'i phyir ro/ /blo sems pa med par bsgrub pa dang / dbang phyug tu smra ba dag dbyibs dang ldan pa'i phyir sa stengs dag khyad par du 'phags pa'i blo sngon du 'gro ba can du grub pa dag kyang ma grub pa yin par bshad pa'o//khyad du 'phags pa'i blo ni dbang phyug ste/ thams cad mkhyen pa'i blo des bya bar 'dod pa'o/ /de la yang zhes bya ba ni mi rtag pa dang dbyibs dang ldan pa dag go/ /de dag las mi rtag pa'i phyir zhes bya ba sgra nyid tsam du bshad pa'i phyir nyams pa'i bdag nyid ces bya ba smos te/nyams pa ni yod pa gtan sa med pa'i 'jig pa'o/ /nye bar zhi ba'i mi rtag pa ni mi mngon rgyu la gnas pa'o zhes grangs can dag gis 'dod pa de nyams pa'i rang bzhin mi rtag pa yin par pha rol grangs can mi 'dod pa'o//de'i phyir rgol ba nyid la ma grub pa'o/ /yang na grangs can gyi sangs rgyas pa las ma grub pa'i phyir gnyi ga la ma grub pa'o/ /gal te spyir grub pa la zhes bya ba mi rtag pa zhes bya bar brjod pa'i spyir grub pa'i phyir bye brag nyams pa'i mi rtag pa dang /nye bar zhi ba'i mi rtag zhes brtag par mi bya ste/ spyir grub pa la bye brag tu rtogs par byed na lan phyin ci log ste 'bras bu mtshungs pa zhes bya ba'i ltag chod yin te khyed la byas pa nyid bum par gyur pa'am/ sgrar gyur pa zhes bya bar 'gyur ro zhes bya ba'i don to//gnyi ga yang 'dod pa zhes bya ba ni grangs can dang phyir rgol ba dag la'o/ /spyi'i dngos po mi rtag pa zhes bya ba gnyi ga la mthun par grub pa'o/ /mthun par grub pa'i dper brjod pa ni dper na byas pa'i phyir bya ba'i gtan tshigs lta bu'o//gal te 'di yang sangs rgyas pa dang grangs can dag la spyir grub pa med de de dag ni yod pa nyid gsal bar 'gyur ba byas pa yin par 'dod pa ma yin nam zhe na/ byas pa de tshad mas grub pa'i dbang du byas te grub par brjod pa yin gyi grub pa'i mtha'i dbang du byas na ni ma grub pa yin no zhes 'og nas 'chad par 'gyur ro//mi mngon pa nyid yod pa ma yin nam zhes bya ba'i spyir grub pa yin te nyams pa dang nye bar zhi ba gnyi ga yang mi gsal ba'i rang bzhin du gnyi ga 'dod pa'i phyir ro snyam pa'o/ /pha rol gyi mi rtag pa nyid de lta bu zhes bya ba ni sangs rgyas pa la sogs pa ni mi rtag pa nyid nye bar zhi ba lta bu mi 'dod pa'o//mtshan nyid 'di zhes bya ba ni mi rtag pa'i mtshan nyid mi mthong ba 'dis so/ /gtso bo dang skyes bu dag kyang mi rtag par 'gyur te/ de dag kyang grangs can gyi gzhung las mi mthong bar 'dod de 'di ltar/kwa yi rnam shes su yis shes/ /zhes bya ba dang gtso bo ni mi mthong ba'i tshigs su 'jug go zhes smra ba'i phyir ro/ /gal te snga ma'i chos las gzhan pa'i mi gsal ba zhes bya ba ni sngar gsal bas mi gsal bar 'gyur ba'i mi gsal ba ni rtag par 'dod pa'o/ /chos snga ma las kyang gzhan la zhes bya ba ni mi gsal ba sngar gsal ba las mi 'dra bar 'gyur ba'o//mi nyams pa'i bum pa'i rdzas rtag par yang 'dod pa'o/ /gnas skabs ldog pa zhes bya ba ni bum pa'i gsal ba dang mi gsal ba'i gnas skabs ldog pa ste/ de'i 'jig par smra ba'o//de nyid bshad pa'i phyir gang yang gnas skabs zhes bya ba la sogs pa smos so/ /mtshungs par brjod de zhes bya ba ni nyes par dran par ro/ /de nyid bstan pa'i phyir de yang zhes bya ba smos te/ gnas skabs ldog pa de'i yang ngo / /mi nyams pa yang yin no zhes bya ba ni gang 'gal ba yin pa'o//de ldog na cig shos ma log kyang zhes bya ba ni chu 'dzin pa'i gnas skabs de log na cig shos gnas skabs can ma log ste/ phra ba'i rang bzhin gyi bum par gtso bo la zhi bas gnas skabs kyang de thams cad mi 'byung ste/ bum pa de/ thams cad du med do zhes rtogs so zhes bya ba'i don to/ /de'i gnas skabs de nyid ces bya ba ni chu 'dzin pa'i gnas skabs de nyid do/ /de yang log pa zhes bya ba ni bum pa'i mtshan nyid du chu 'dzin pa'o/ /mi ldog pa'i gnas skabs can gyi nus pa'i dzas gnas par 'dod pa ni brgal zhing brtag par bya ba yin te zhes bya ba 'gal ba'i tha snyad yin no zhes sngar bshad pa'i nyes pas gos par 'gyur te/'di ltar bum pa de'i mtshan nyid med pa'i phyir yod pa ma yin la gal te bum pa yod na yang bum pa chag pa ma yin pa'i phyir ro/ /gal te dngos po gcig pa nyid yin na yang zhes bya ba ni skyes bu'i dngos po gcig yin yang ngo //gnas skabs gos dang rgyan dang spyod pas tha dad pa mthong ba yin no zhe na/ gnas skabs tha dad pa de nyid dngos po'i tha dad pa yin te dngos po nyid gzhan dang gzhan du skyes pa yin gyi gnas skabs can gyi dngos po logs gcig na ni med pa'i phyir de nyid dngos po tha dad pa'i mtshan nyid du cis na mi 'dod de 'dod par bya'o//'dod pa de lta bas na bde ba la sogs pa ste/ snying stobs bde ba nyid sdug bsngal ba nyid mun pa btang snyoms nyid tha dad pa dang bems po de dag dang skyes bu shes pa yod pa dag tu tha dad pa nyid yin pa la the tshom med do//gal te tha dad pa'i mtshan nyid yin yang dngos po tha dad pa ma yin na ni bde ba la sogs pa yang dngos po tha dad par mi 'grub po/ /gnas skabs tha dad kyang zhes bya ba ni zlos gar mkhan gyi skyes bu dga' byed kyi gnas skabs gser gyi mdog can dang nor bu bum rna'i gnas skabs nag po la sogs pa tha dad kyang de nyid gzugs rjes su byed de yod pas na gnas skabs can gzugs ni rtag par yod par 'grub ce na/de'i bde ba la sogs pa nang rnams dang / de dag dang skyes bu rnams su yang mtshungs par 'gyur te de dag kyang bde ba dang sdug bsngal ba dang / btang snyoms dang / bems po dang shes pa yod pa dag gnas skabs tha dad pa yin gyi dngos po gcig nyid du mtshungs par thal bar 'gyur bas na khyed kyi tha snyad la gnod do//gal te tha dad na rim gyis gsal ba 'gal ba'i phyir zhes bya ba ni tha dad pa dag gi ba lang gi rwa g.yas g.yon ltar dus gcig tu gsal bar 'gyur ba'i phyir ro/ /de'i phyir bde ba la sogs pa ni sems pa can sems pa med pa dag cig car gsal ba'i phyir tha dad par 'gyur la bum pa'i chu 'dzin pa ni rim gyis gsal ba'i phyir de dag gcig pa nyid do zhe na/rim gyis gsal ba'i phyir gcig dang gcig nyid yin pa de lta na da ni bum pa dang zho la sogs pa ji ltar du ma nyid yin te/ gcig tu thal bar 'gyur ro zhes sbyor ci'i phyir zhe na/du mar bzhag pa'i mtshan nyid gcig par gsal ba zhes bya ba dang 'gal ba'i rim gyis gsal ba dmigs pa'i phyir te/ thog mar ni bum pa grub la de nas de la brten pa'i zho la sogs pa gsal ba'i phyir zlos gar mkhan ltar gcig par thal bar 'gyur bas so/ /de lta na tha dad pa'i mtshan nyid rim pa ma yin par gsal ba zhes bya ba ni ma khyab pa'i skyon chags la gcig pa'i mtshan nyid rim gyis gsal ba ni khyab ches pa'i phyir ro//yang na rim pa ma yin par gsal ba'i phyir bum dang zho la sogs ba tha dad ba nyid yin zhes bya ba ni de dag rim gyis gsal ba'i phyir tha dad pa'i mtshan nyid rim ma yin par gsal ba dang 'gal ba'i phyir dang /gcig pa'i mtshan nyid rim gyis gsal ba yod pa'i phyir ji ltar du ma nyid yin te ma yin no zhes bya ba'i don to/ /rim gyis gsal ba la tha mi dad pas khyab pa ma grub pa'i phyir dang zhes bya ba ni bum pa dang zho la sogs pa nyid kyis te/rim gyis gsal yang tha mi dad pa med pa'i phyir ro/ /ci zhig 'gal zhes bya ba ni rim gyis snang ba dang tha dad pa dag go/ /gal te bum pa dang zho la sogs pa rim gyis snang ba yang ci'i rgyu yin zhe na rim gyis yin pa ni zho dang bum pa de'i 'bras bu yin pa'i phyir te/rgyu de ma grub na 'bras bu mi 'grub pa'i phyir ro/ /des na rim gyis gsal ba'i phyir snga phyi tha dad pa nyid du 'grub po/ /gal te tha mi dad na cha shas med pa'i phyir rim ma yin par thal bar 'gyur te/ gcig gi bdag nyid gsal ba nyid gcig bzhin no//gal te 'bras bu yin pa'i phyir tha mi dad do zhes bya ba ni grangs can pa dag ni 'bras bu rgyu'i rang bzhin du yod par 'dod pas so/ /gal te 'grel pa grub na zhes bya ba ni 'bras bu nyid gcig pa dang ngo / /de yang zhes bya ba ni 'brel pa'o/ /bshad par bya'o zhes bya ba ni srog la sogs pa rjes su 'gro ba med na gnyis la the tshom za ba'i skabs su'o//'jig pa dang cig shos dag ces bya ba ni bsags pa dang nye bar zhi ba dang / mi rtag pa dag bye brag med de gnyis grub par mi gsal ba la sogs pa brtags kyang ngo / /spyi'i chos zhes bya ba ni rgol pa la mthun pa'o//mi mthun pa'i dpe ni dper na rgyu rnams la zhes bya ba rkan dang / mchu dang / brjod par 'dod pa la sogs pa'i rjes su 'gro bas sgra skyes bus byas par 'dod pa dang / rdza mkhan la sogs pa'i rjes su 'gro bas bum pa byas pa spyir brjod pa lta'o/ /'brel pa tha dad pa dag kyang ngo zhes bya ba ni byas pa nyid ces bya ba'i spyi'i chos gzhan gyis brtags pa la dpyad kyang ste/de med kyang byas pa nyid tshad mas grub po/ /gzhan yang bum pa'i byas pa dang sgra'i byas pa chos can dang 'brel pa'i tha dad pa zhes bya ba bye brag ma spyad kyang byas pa spyi gnyi ga la grub po//dmigs na ni der 'gyur ro zhes bya ba spyi grub par 'gyur ba'o/ /ci ste skabs nyid gtan tshigs su brjod na yang der spyi grub kyang ma nges pa nyid du gyur pa'i phyir 'brel ba legs par dpyad par bya ba yin te/ 'bral pa des bsgrub par bya ba 'grub pa'i phyir ro//ji ltar khang bzangs la sogs pa zhes bya ba ni ba lang gi gnas khang dang / tshong khang gi skabs la sogs par blo sngon du btang bas byas pa'i rnam par rjes su mthun pa'o/ /gal te mthong na ni zhes bya ba ni sa'i snying dang ri la sogs pa yang de lta bu'i dbyibs kyi rnam par mthong na'o//de bzhin du gtan tshigs su 'gyur ro/ /zhes bya ba ni khang bzangs la sogs pa de bzhin du spyir grub pa'i gtan tshigs su 'gyur/ skyes bu'i byed pa ni shing mkhan la sogs pa'i byed pa yod pa dang med pa'o/ /rjes su 'jug can ni de dang rjes su 'gro ba dang ldog pa can no//de ni khang bzangs la dang rta babs la sogs pa'o/ /de lta bur sa stengs kyi dbyibs la sogs te kha dogs la sogs pa gang mthong bar 'grub na dbyibs de'i phyir blo sngon du song ba gang zhig dpag pa de'i rigs te/ dngos po mtshungs par 'grub pa'i phyir ro//gzhan du dngos po tha dad grub pa la zhes bya ba ni dbyibs dag rigs kyi 'dra ba ri dang khang bzangs la sogs pa la/ sgra mtshungs tha dad med pa yis/ /dbyibs dang ldan pa zhes bya ba ni sgra mtshungs so/ /skye bo yis brdzangs sogs te gyen du 'gro ba tsam la sogs pas so//don tha dad kyang sgra mtshungs pas rtogs na 'ji ba'i rnam par 'gyur ba sa phung dang bum pa la sogs pa'i byed pa por rdza mkhan grub pa'i phyir ro/ /grog mkhar yang 'ji ba'i rnam par 'gyur ba yin pa'i phyir rdza mkhan gyis byas par 'grub par 'gyur ro/ /bsgrub byas khyab pa ni mi rtag pa'i rjes su 'gro ba spyi yis zhes bya ba ni byas pa nyid gnyi ga la grub pas so//'brel pa'i tha dad smras pa yis/ /zhes bya ba ni sgras gyur pa'i byas pa bum pa la med pa'i phyir rjes su 'gro ba med par mtshungs so zhes klan ka bas smras pa'o/ /skyon ni zhes bya ba ni sun 'byin pas so//des don 'bras bur mtshungs par yin par 'dod/ ces pa ltag chod kyi bye brag 'bras bu mtshungs pa zhes bya ba yin no/ /rigs gzhan par ni bya ba dngos po rigs mi mthun par grub pa la'o/ /sgrub byed mi rigs gong bu bzhin/ /zhes bya ba ni sgra mtshungs par sgrub par byed par mi rigs te/ngag la sogs pa yang ra dang ldan par thal bar 'gyur te gong bu sgras mtshungs pa'i phyir glang bzhin no/ /dngos po grub pa ma yin la/ /zhes bya ba ni phyogs kyi chos dang 'brel ba dag go/ /ma grub pa rigs zhes bya ba ni ma grub pa dang ma nges pa la sogs pa phyogs kyi chos dang 'brel ba dang ma grub par rigs so//grub na ni zhes bya ba dngos po la 'dod pa'i rtags dang rjes su 'gro ba grub na/ rtags kyi don ma grub kyang ma grub pa'i nyes par mi 'gyur ba'o/ /dper na/ sgra yi nam mkha' rten sogs pa'i zhes bya ba smos te/sgra la nam mkha'i yon tan nyid dang 'brel pa'i byas pa dang byas pa de nyid nam mkha'i yon tan dang rjes su 'gro ba nyid ma grub kyang byas pas mi rtag pa grub pa'i phyir brjod pa bzhin no/ /'ug pa ba ni bye brag pa'o/ /sgrub byed/ lus can la sogs smra ba bzhin//zhes bya ba ni lus can yin pa'i phyir mi rtag pa zhes bya bar smras pa na/ sangs rgyas pa la 'ug pa pas 'dod pa'i lus rtag pa nyid dang thams cad du song ba ma yin no zhes bya ba ni tshad ma zhes bya ba'i chos brtags pa'i sgra mtshan nyid de dag gi ma grub kyang reg par bya ba nyid kyi lus rtags su 'dod pa grub pa'i phyir don grub pa bzhin no//gal te de ltar slob dpon phyogs kyi glang pos byas pa phyir rgol ba grangs can la ma grub po zhes bshad pa ma yin nam/ de'i phyir byas pa yang spyir grub pa med do zhe na/ gang yang bstan bcos la brten pa'i cig shos la ma grub par slob dpon gyis gsungs so//ji skad du gsungs she na/ mngon par gsal ba smra ba la byas pa nyid ma grub po zhes so/ /de la mngon par gsal ba smra ba ni grangs can te/ mi mngon par rgyu dag gis mngon par byas kyi med pa las rgyus byas par mi 'dod pas so//rjes su dpag par thams cad la zhes bya bas ni lung la brten pa'i dang / dngos po'i stobs kyis zhugs pa dag go/ /tshad mas mthong ba la zhes bya ba byas pa nyid rgyu'i rjes su 'gro ba dang / ldog par tshad mas grub pa la'o/ /dam bca' bas ma grub par brtsad par mi rigs pa'i phyir ro zhes bya ba ni grangs can gyi grub mtha' ma grub pas ma grub par bya bar mi rigs pa'o//rjes su dpag pa ni bstan bcos kyi dbang du byas pa yang ma yin zhes bya ba ni dngos po'i stobs kyis zhugs pa ni bstan bcos la mi brten pa'o//de'i phyir mtshan ma kho nas dngos po stobs kyis zhugs pa'i rjes su dpag pa de la gnod kyi lung gis ni ma yin no/ /gal te tshad mas rtogs pa ma yin te/ tshad mas grub pa las bye brag tu bya ba'i don ma yin na/ ci mngon par gsal ba smra ba la zhes gsungs te ma grub po zhes bya ba 'ga' zhig tu gsungs par 'gyur ro//de bas na mngon par gsal ba la zhes bya bas ni lung la ltos te gsungs so/ /gzhan du ni mi shes pa nyid la de skad ces bya ba'o zhes bya ba ni bstan bcos las ma grub pa las gzhan du dngos po la zhugs pa la ni tshad mas ma shes pa tsam la ste/ma rtogs pa tsam la de skad ces bya ba'o zhes bya ba ni ma grub pa zhes te/ mngon par gsal bar smra ba la zhes bye brag tu mi dgos pa'o/ /yang na zhes bya ba ni rnam par rtog pa gzhan te/ de zhes bya ba mngon par gsal ba smra ba la byas pa ma grub pa zhes bya ba smra ba de'o//dper brjod pa ma yin te zhes bya ba ni dper brjod pa nges par byas pa ma yin pa ste/ phyogs tsam zhes bya ba gcig la ma grub pa tsam bstan pa gtsor brjod kyi tshad mas grub pa dang lung gi dbye ba ma dpyad pa'o/ /bsgrub par bya ba dang sgrub par byed pa tha dad pa'i phyir zhes bya ba ni tha mi dad na de dag gi rang bzhin du mi rung ba'o//de yod pa tsam gyis zhar la 'ongs pa zhes bya ba ni sgra yod pa tsam gyis zhar la ste de nyid kyis so/ /'ongs pa zhes bya ba ni grub pa'o/ /de yang chos can sgra grub pa nyid kyis grub pa'o//de ltar grub pa la yang sgra 'byin pa'i phyir ro zhes bstan pa ni don med do/ /de nyid rgyas par bshad pa ni sgra de ltar/ gyur na zhes bya ba ni chos can grub pa nyid kyis sgra rang grub pas na phyogs bstan pa ste/ chos can bstan pa nyid kyis de ltar sgrar grub la/ phyis rang nyid las kyang zhes bya ba ni sgra yin pa'i phyir zhes rtags bstan pas kyang sgra nyid las gzhan rtogs pa med pas so//de'i phyir sgra de phyogs su byas nas de grub par bya bar byas na'o/ /de nyid gtan tshigs kyang yin na zhes bya ba ni sgra phyogs yin pa de nyid gtan tshigs yin na'o//yang na bstan par mi bya'o zhes bya ba ni yod pa tsam gyis zhar la 'ongs pas yang de bstan pa ni don med do zhes 'das ma thag tu bshad zin to/ /rtsod pa med par yang 'gyur te zhes bya ba ni rtags don med pa'o/ /gal te rjes su 'gro ba ma mthong pas rjes su 'gro ba ma grub pa yin no zhe na/de ni zhes bya ba la rtags nyid grub par 'dod na rjes su 'gro ba ma mthong ba ni ma yin te/ 'di la rjes su 'gro ba mi srid pa yin te/ 'di ltar ji ltar chos can chos can gzhan la rjes su 'gro ba yin te/ de ni mi srid pa ste chos can gyi bye brag la rtags kyis grub pa'i phyir ro//de'i phyir rtags kyi rang bzhin ma yin no/ /des na de grub pa na rtags grub pa ma yin no/ /gal te mar me la sogs pa rang gis rang rtogs pa'i shes pa skyed pa'i byed pa ltar rtags kyang rang gis rtogs par byed do zhe na/ mar me la sogs pa ni zhes bya ba la sogs pa smos so//rang gi shes pa'i yul du rtags can rtogs pa ni ma yin no zhes bya ba smos te/ rtags rtogs pa'i shes pa nyid yul du bsgrub par bya ba nyid rtogs pa ni ma yin te/ /rtags shes pa las dus phyis rtags can rtogs pa ste/ de dag rgyu dang 'bras bu nyid yin pa'i phyir dus gcig pa ma yin no//'dir thal bar 'gyur ro zhes bya ba rtags shes pa rtags can yul du byed pa'o/ /gal te chos dang chos can zhes bya ba ni byas pa dang mi rtag pa dag kyang don dam par tha mi dad pa'i phyir skyon mtshungs pa'o snyam pa'o//smras zin te zhes bya ba ni le'u gnyis par ro/ /de ltar gyur pa ma grub ste/ /zhes bya ba ni chos dang chos can gyi tha dad pa ma grub pa'o/ /de dang gzhan nyid dgag par bya/ /zhes bya ba ni chos dang chos can dag de nyid dang gzhan nyid dgag par bya ba'i don dam par de nyid dang gzhan nyid kho na'o//rang gi bye brag la brten pa'i/ /zhes bya ba ni byas pa dang mi rtag pa dag gi ldog pa'i chos kyi bye brag la brten pa'o/ /shes la ji ltar tha dad par/ /zhes bya ba ni chos dang chos can dag de nyid dang gzhan nyid dang bral bar snang ba'i phyir byas pa dang mi rtag pa'i chos du ma snang ba de la rtags dang rtags can gyi tha snyad brten pa'i phyir skyon mi mtshungs pa'o//'dir ni zhes bya ba ni sgra yin pa'i phyir zhes bya ba 'dir ro/ /tha snyad la mthong ba'i zhes bya ba ni byas pa dang mi rtag pa ldog pa'i khyad par gyis rtags dang rtags can du byed pa'i tha snyad la tha dad pa'i mthong ba'i blo de nyid la yang ma reg phyir te/ldog pa'i bye brag 'dzin pa'i blo la'ang ma reg pa ste/ de dang 'dra ba'i bye brag kyang mi snang ba'o/ /nyid la'ang zhes bya ba ni dngos pos tha dad pa du ma lta bu ga la zhig ces bya ba'i don to//de yang sgra las sgra ni ldog pa'i bye brag med pa'i phyir go bar bya ba dang go bar byed pa med do/ /gnyi ga la ma grub pa'i phyir zhes bya ba ni rgol ba dang phyir rgol ba gnyi ga la yang phyogs tha dad pa cung zad kyang ma grub pas so/ /de dag gis chos kyang bshad pa yin te zhes bya ba sgra mi rtag ste mi rtag pa'i phyir ro zhes bya ba chos nyid gtan tshigs nyid du brjod pa'i ma grub pa yang bshad par rig par bya'o//mi mthun pa'i phyogs las ldog pa zhes bya ba ni mi mthun pa'i phyogs ma yin pa nyid do/ /de la yang zhes bya ba ni chos can nam chos nyid sgrub par byed par 'gyur ba'o//nyid yin no zhes bya bar bstan pa'i phyir ro/ /bsgrub par bya ba'i chos nyid yin pa'i phyir rtags ma grub pa yin no/ /gal te phyogs la sogs pa ste/ /mthun pa dang mi mthun pa'i phyogs dag gis phan tshun tha dad pa gsum du gnas pa'i phyir mi mthun pa'i phyogs ma yin pa nyid ces bya ba rtags kyi rang bzhin gyi chos mi mthun pa'i phyogs kyang ma yin la/bsgrub par bya ba can du gyur pa mthun pa'i phyogs kyang ma yin pa gsum pa phyogs la yod pa nyid ma yin nam/ de'i phyir rtags grub po snyam mo/ /gang gis zhes bya ba ni rgyun gyis so/ /de las bzlog pa mi mthun pa'i phyogs so zhes bya ba ni sgrub par mi 'dod pa'o//da ltar na zhes bya ba ni bsgrub par mi 'dod pas mi mthun pa'i phyogs su rnam par gzhag gi dngos po ma yin na sgrub par 'dod pas ni phyogs su 'gyur ba'i phyir mi mthun pa'i phyogs bsgrub par bya ba med pa dngos pos gnas pa yang 'dod pas 'jig par 'gyur te/mi mthun pa'i phyogs ma yin par 'gyur ro/ /de lta na gtan tshigs 'ga' yang ma nges par mi 'gyur te/ mi mthun pa'i phyogs kyang 'dod pas byas pa'i phyir 'dod pas mi mthun pa'i phyogs med par byas nas rtags nyid du 'gyur ba'i phyir ro/ / mang du smras so zhes bya ba ni le'u 'di nyid du'o/ /gal te bsgrub par bya ba ma grub pa tsam thams cad ces bya ba ni bsgrub par bya ba med pa tsam mo/ /gnyi ga la nges bya ba ni rgol ba dang phyir rgol ba gnyi gas bsgrub par bya ba med par nges pa'o/ /de'i phyir chos can la zhes bya ba ni bsgrub par bya ba'i chos can la'o//ma nges pa'i phyir zhes bya ba ni rgol ba dang phyir rgol ba dag gis bsgrub par bya ba med par ma nges pa'i phyir mi mthun pa'i phyogs ma yin pa nyid ces bya ba ni gtan tshigs kyi rang bzhin grub po zhe na/ 'dir mi mthun pa'i phyogs ma yin yang zhes bya ba ni bsgrub par bya ba'i chos gtan tshigs su byas pa 'dir bsgrub par bya ba la des na ni mthun pa'i phyogs su 'gyur bas bsgrub par bya ba la the tshom za ba yin pa'i phyir mi mthun pa'i phyogs ma yin zhes bya ba gtan tshigs yin no//de lta na gtan tshigs de bsgrub par bya ba log pa mi mthun pa'i phyogs yin la/de las log pa'i mtshan nyid du ma nges na ni bsgrub par bya ba grub pa'i phyir lam log na nges pa yang mi mthun pa'i phyogs nyid du grub pa'i phyir ldog pa ma nges pa de ji ltar na sgrub par byed pa yin te/ rtags de'i mtshan nyid ldog pa nges pa ma nges pa ste ma grub pa'i phyir ro//gal te de nyid kyis na de zhes bya ba ni mi mthun pa'i phyogs ma yin pa de nyid kyis na gtan tshigs te/ rtags kyi ldog pa'i mtshan nyid nges so zhe na/ ji ltar ma nges pas nges pa yin no zhes bya ba ni des na sngar smos pa'i skyon du 'gyur ba'i phyir ldog pa ma nges pa rtags yin na des ji ltar nges pa yin/de nyid bshad pa'i phyir ldog pa ma nges pa ni zhes bya ba la sogs pa smos so/ /'di 'di la the tshom za ba'i phyir zhes bya ba ni rtags 'di mi mthun pa'i phyogs ma yin par the tshom yang za la/ de nyid kyi phyir te the tshom za ba de nyid kyi phyir mi mthun pa'i phyogs 'di gtan tshigs 'di la med do zhes bya ba'o//chos rnams 'jug pa dang ldog pa'i phyogs rnam par gzhag pa la mi ltos pa'o zhes bya ba ni bsgrub par bya ba yod pa dang med pas phyogs dang mi mthun pa'i phyogs su dngos po'i dbang gis gnas kyi skyes bus phyogs su byas pa dang / ma byas pa las bsgrub par bya ba mi ldog par mi 'gyur ba'o/ / phung po gsum pa'i ldog pa ni med do zhes bya ba ni mi mthun pa'i phyogs ma yin zhes bya ba rtags su 'dod pa gang bsgrub par bya ba yod pa'am/ med pa las gzhan pa phung po gsum pa ni med do/ /de dag gcig ldog na gzhan 'jug pa'i phyir zhes bya ba ni bsgrub par bya ba yod pa dang / med pa dang de dag las phyogs la gcig log na cig shos 'jug pa'i phyir ro//de lta ma yin na mi rtag pa med pa log pa zhes bya ba mi mthun pa'i phyogs ma yin pa nyid ces bya ba'i rtags kyis so/ /mi rtag pa bsgrub par bya ba'i chos can la zhes bya ba sgra la'o/ /ji ltar sgrub par byed de phyogs kyi chos phung po gsum par gyur pa na/ bsgrub par bya ba la the tshom za ba'i phyir te yod pa dang med par nges pa ma yin par 'dod pa'i phyir ro//yang ji ltar na mi rtag pa med pa ldog pas zhes bya ba ni mi rtag pa nyid kyis so/ /mi rtag pa bsgrub par bya ba'i chos can la sgrub par byed de rtags nyid grub zin pa'i phyir bsgrub par bya ba med do/ /gal te da ni zhes bya ba ni gal te skyes bu'i 'dod pas phyogs dang mi mthun pa'i phyogs ma yin na'o//phyogs su 'dod kyang dngos pos bsgrub par bya ba med pa'i yang srid pa'i phyir phyogs su byas pa dang yang mi mthun pa'i phyogs su 'gyur ram zhe na'o/ /rnam grangs kyis na zhes bya ba ni res 'ga' ste bsgrub par bya ba med pa la rtags ltar snang bas phyogs su byas na dngos pos mi mthun pa'i phyogs nyid ma yin pa'o//gal te de ltar na phyogs dang mi mthun pa'i phyogs dag bye brag med par 'gyur zhe na/ mtshan nyid kyi bye brag ni zhes bya ba phyogs kha na ma tho ba med pa ni mi mthun pa'i phyogs dang ma 'dres par bstan zin to/ /yang na mi mthun pa'i phyogs kyi mtshan nyid sngar smras pa yin te/bsgrub par bya ba'i chos dang mi ldan par zhes so/ /gzhan yang mi mthun pa'i phyogs kyi the tshom med pa la zhes bya ba ni gtan tshigs mi mthun pa'i phyogs ma yin par nges pa nyid yin la de la yang phyogs kyi chos su gyur na phyogs la mi mthun pa'i phyogs zhes bya ba bsgrub par bya ba med par the tshom za bar 'gyur ro/ / de lta bu'i phyogs la bsgrub par bya ba med pa zhes bya ba mi mthun pa'i phyogs rnam par bcad pa grub zin pa la'o/ /yang bsgrub par bya ba med pa 'chad pa'i don du gtan tshigs brjod pa ni don med do/ /gal te khyod ci ltar na yang phyogs ni bsgrub par bya ba ma nges pa yin la de'i chos kyang ji ltar ldog par nges she na/ de 'ba' zhig nyid kyi zhes bya ba phyogs la sogs pa'i rtogs pa stong pa'i rtags kyi chos kyi'o//gang dag gis zhes bya ba ni sgrub par 'dod pa'i chos de me dang mi rtag pa la sogs pa'i dbye bas du ma'i tshig tu byas so/ /de dag yod pa dang med pa go rims bzhin du gtan tshigs 'jug pa dang ldog pa nye bar ston la/ de ltar bsgrub par bya ba'i rjes su 'gro ba dang ldog pa can grub pa'i bdag nyid kyi rtags kyi dngos po'i phyogs la yod par grub na/de'i khyab pa'i rang bzhin shugs kyis phyogs de bsgrub par bya ba yod pa de ltar grub na bsgrub par bya ba grub pa de'i rjes la chos can dang sgrub par 'dod pa'i chos can dag sdom pa'i spyi'i phyogs kyi mtshan nyid du tha snyad btags pa 'byung bas phyis shugs kyis phyogs kyi yul de phyogs kyang yin la yul yang yin pas de skad brjod do//de'i phyir phyogs kyi chos dang 'brel pa nye bar ston pa'i dus na phyogs ni yan lag ma yin pa'i phyir de'i mtshan nyid kyi sgo nas 'ongs pa'i chos ni rtags nyi tshe ba'i mtshan nyid du nges pa'i sgo nas 'ongs pa'i bsgrub par bya ba'i chos dag rtogs pa'i dus na ste 'brel pa dang /bsgrub par bya ba'i chos can la rtogs pa'i dus na phyogs la sogs pa'i rtogs pa dag yod pa ma yin yang bsgrub par bya ba rtogs pa nus pa'i phyir phyogs la sogs pa'i mtshan nyid ni rtags kyi yan lag ma yin no/ /cig shos zhes bya ba ni bsgrub par bya ba med pa'i bye brag 'ba' zhig go//de las bzlog pa ni mi mthun pa'i phyogs yin no/ /de las grol ba ni de ma yin pa'o/ /ji lta bu bya ba ni ma grub pa yin nom ma yin snyam pa'o/ /de la yang skyon med pa nyid de zhes zer ba ni pha rol lo/ /ci'i phyir zhe na/ cig shos zhes smras pa'i phyir ro zhes zer ro/ /'di ltar bsam pa ni de las bzlog pas stong pa 'ba' zhig smos na ni de bsgrub par bya ba'i chos nyid du 'gyur ba'i phyir skyon snga ma nyid du 'gyur ro//'dir cig shos zhes bya ba smos pas bsgrub par bya ba gang yang rung ba ste bsgrub par bya ba med pa tsam las ldog pa ni rtags ma yin gyi med pa'i khyad par 'ga' zhig las ldog pa'i phyir rtags 'grub po snyam pa'o//ji ltar zhe na/ med pa tsam las ldog pa ni/ bsgrub par bya ba yin la bye brag 'ba' zhig las log pa ni rtags yin pa'i phyir ro/ /lan gdab pa 'di la yang zhes bya ba smos te/ cig shos la zhes rtags bye brag tu smos pa la rang gi 'dod pas gnod pa nyid de/ phyogs la yang bsgrub par bya ba med par khas blangs pas so//de ltar na bsgrub par bya ba med pa nyid las cig shos las log pas zhes bya ba 'thad pa'i phyir ro/ /de med par khas mi len na zhes bya ba ni phyogs de la bsgrub par bya ba med pa nyid khas mi len na'o/ /nus pa med ces bya ba ni dgos pa med pa'o/ /pha rol gyis bsam pa zhes bya ba ni sangs rgyas pa khyed kyi bsam pas 'di med pa yin pas zhes bya ba mi mthun pa'i phyogs gsum du 'dod pas de dag la cig shos med pa las log pa zhes brjod do//mi mthun pa'i phyogs de las cig shos med pas rtags dben pa khyod khas len pa'i phyir khyod la grub brjod do zhe na/ de la nyes pa med pa ma yin te/ 'di ltar med pa la don dam par te dngos pos so//cig shos zhes brjod par bya ba'i dbye bas phyogs las phan tshun gzhan du gzhag par rung ba ci zhig yod/ /'o na med pa zhes bya ba nyid ji ltar bzhag ce na/ 'di ltar gcig gi mtshan nyid gzhan ser po la sogs pa ma mthong na blos sngon po 'di las ser po 'di rnam par dbye ba ste/ sngon po med pa'i zhes rtogs so//de'i phyir med pa 'di ni dngos po'i chos nyid de/ de yin pa'i phyir ro zhes bya ba ni bye brag tu gzhag pa'o/ /gal te de lta na khyed kyi mi mthun pa'i phyogs kyi dbye ba gsum du ji ltar 'gyur te med pa ni dbye bar mi srid pa'i phyir ro zhe na/ rnam par rtog pas brtags pa 'ga' zhig zhes bya ba la sogs pa smos te/ ldog pa dngos su rtogs pa ni bsgrub par bya ba'i med pa dgag pa tsam gyis rtogs par nus pa'i phyir dang dbye ba gsum pa yang blos byas pa'i phyir skyon med par ston to/ /yod pa dang rjes su 'brel ba can zhes bya ba ni ma yin par dgag pa ste de las phan tshun tha dad pa can te/ de las grol bas 'di rtags su brjod na yang rtags des bsgrub par bya ba med pa thams cad sel bar byed de de lta na yang rtags 'di bsgrub par bya ba med pas stong pa zhes bya bar 'gyur bas/de nyid bsgrub par bya ba yin pa'i phyir/ rtags ma grub pa yin no/ /yang na 'khrul pa can yin no zhes bya ba ni bsgrub par bya ba ma yin par dgag pa'i rang bzhin 'gal ba dang /gzhan pa yin la des stong na zhes bya ba de dag rnam par bcad pa tsam gyi rang bzhin yin pa ni/ gtan med pa'i bdag nyid kyang yin pa'i phyir mi rtag pa'i dngos po las gzhan gtan med pa yang 'jug pa'i phyir ro/ /gal te 'di ltar yang de zhes bya ba rgol ba de 'dod pa 'ba' zhig ste/ de kho na las tha dad pa zhes bya ba de las grol ba rtags nyid kyi ngo bor bzhag pa yin pas de gtan med pa la yang mi 'jug la cig shos la zhes bya ba'i bye brag kyang 'grub ste/bzlog pa 'gal ba dang gzhan pa dag las cig shos ltar med pa las grol ba yin pa'i phyir dam bca' dang khyad par yod la cig shos kyi sgras phyogs ma bzung ba'i phyir ro//'dod pas gnod pa yang med do zhe na/ de lta na zhes bya ba ni bshad ma thag pa'o/ /de las tha dad pa ni de ltar mi 'gyur gyi zhes bya ba ni bsgrub par bya ba med pa las grol ba ni de rtags su mi 'gyur ba ste/ 'gal ba dang gzhan pa dag las grol ba yang rtags ma yin pa'i phyir ro/ /'on kyang 'dod pas yin la zhes bya ba ni rgol ba'i 'dod pas dngos po mtshungs kyang 'ba' zhig kho na rtags su byed pa'o//'di ltar 'dod pa bzhin du gyur na zhes bya ba 'dod pas med pa las grol ba yin la 'dod pa bzhin du gyur na/ 'gal ba la sogs pa dag la yang rtags su thal bar 'gyur ro/ /de'i phyir dngos pos rtags gnas pa med kyi 'dod pas gnas pa'i phyir 'dod pa kho nas bsgrub par bya ba'i dngos po drangs par rab tu brjod par 'gyur te/de ltar bstan par 'gyur ba'i phyir de kho na ste kho bo 'dod pa'i phyir 'di ltar yin no zhes 'dod pa kho na rtags su brjod par rigs kyi phan tshun spangs te cig shos las grol bas ci zhig bya/ de la yang zhes bya ba 'dod pa de la yang ngo / / don rnam par gzhag pa'i lugs ni gzhung 'di dag gi phyogs so/ /brtsal ma thag tu byung ba'i sgra ni mi rtag ste/ brtsal ma thag tu byung ba'i phyir zhes bya ba ni gtan tshigs nyid yin no/ /lan ni de nyid ces bya ba smos te/ sgra mi rtag ste sgra yin pa'i phyir zhes bya ba ni de nyid ldog pa tha dad pa ste sgra dang sgra nyid dag ni sgra ma yin pa las log pa nyid du zad pas chos can rtogs pa la rtags kyi rtogs pa tha mi dad pa'i yul gyis tha snyad du byed pa'i phyir ro//brtsal ma thag tu byung ba nyid 'di la ni bsgrub par bya ba'i chos can du yang bye brag byas pa zhes bya ba brtsal ma thag pa las byung ba'i sgra zhes so/ /gtan tshigs spyi'i chos zhes bya ba ni rtsol ba las byung ba tsam mo//yan lag ni rtags so/ /yan lag can ni rtags can no/ /phyogs yan lag la mi gnod phyir te/ phyogs dang yan lag dag chos kyi bye brag tha dad pa'i phyir ma grub pa'i gnod pa med pa'o/ /chos can tha dad ma grub pa min te rtags rtsol ba las byung ba'i sgra zhes bya ba ma grub pa ma yin pa'o/ /rwa can ni gong bu'i bye brag go//rwa can phyir zhes bya ba ni spyi'o/ /yang na zhes bya ba ni chos dang rtags dag kyang gcig pa ma yin pa'o/ /bsgrub bya'i dus na ni zhes bya ba rtogs pa'i dus na'o/ /yan lag min rtags kyis rnam par rtog pa med pas na/ bsgrub par bya ba'i chos dang gcig pa ma yin te/ bsgrub par bya ba de rtogs kyi rtog pas nye bar mtshon te khong du chud par byas nas rtags kyi rtog pa nyid dgag pa'i phyir de ldog pa'i phyir rtags dang rtags can nyid dag gcig pa med pas na'o//chos kyi bye brag ni mi rtag pa dang btsal ma thag tu byung ba dag go/ /tshang tshing zhes bya ba ni ri'i gsab gseb dag go/ /yang na nags ma tshang tshing ngo / /pha'i tha snyad btags pa'i rgyu ni bdag nyid nying mtshams sbyor te pha'i byed pa'o//'dis ni phyis dmigs pa med de mi dran pa'i phyir ma mthong ba dag 'dra bas so/ /'gal ba med pa'i mtshan nyid can zhes bya ba ni smra ba dang 'dod chags dang bral ba la sogs pa'o/ /dbang pos mi sod pa yang de dag nyid de sems kyi chos kyi rang bzhin gyis bskal ba yin pa'i phyir ro//bdag nyid rang gis rtogs pas zhes bya ba ni rang nyid 'dod chags la sogs pa dang ldan par ro/ /ha cang thal bar 'gyur ro zhes bya ba ni mang du za ba dang sngo bsangs pa la sogs pa yang gzhan nyid du za ba dang / dkar sham dag la rtogs par 'gyur ba'o/ /gal te mthong bas 'gal bas zhes bya ba ni mi sbyor te de dag mthong bas gnod par 'gyur ba'i phyir ro zhe na/rigs pa mtshungs bzhin du zhes bya ba ni bdag nyid la mthong bar 'dod chags dang dkar sham dag mtshungs zhes mang du za ba la sogs pa ci'i phyir mi sbyor te/ mthong bas gnod par mi rigs so snyam pa'o//yang na de rigs pa'i mtshan nyid du brjod par mi bya ba ste zhes bya ba ni bdag nyid rtogs pa de'o/ /de ci'i phyir zhe na/ 'gal ba srid pa'i phyir ro zhes bya ba ni mthong bas gnod pa srid pa'i phyir ro/ /ldog pa las kyang zhes bya ba mi mthun pa'i phyogs la ma mthong bas grogs byas pa'i bdag la mthong bas 'dod chags la sogs pa dpog par byed de/'dod chags dang bral ba rdo la sogs pa la smra ba ma mthong bas so/ /de med na zhes bya ba ni ldog pa de med na ste/ bdag nyid la mthong ba des mang du za ba la sogs pa gzhan la dpog par mi byed de de gzhan nyung ngu za ba ma yin pa bdag nyid la mthong ba yin par mthong bas mi mthun pa'i phyogs las ldog pa med pa'i phyir sgrub par mi byed ce na/mi mthun pa'i phyogs la zhugs pa'i bdag nyid la mthong ba'i mang du za ba la sogs pa dang / 'jug par the tshom za ba bdag la mthong ba dang 'dod chags la sogs pa dag gis mi mthun pa'i phyogs la rtags nges pa mi 'grub pa'i phyir 'dod chags la sogs pa yang bdag nyid la mthong bas bsgrub par mi bya'o//de nyid rgyas par bshad pa la mthong ba yang zhes bya ba ni dkar sham la sogs pa mthong ba dang 'gal ba mthong ba dag kyang bdag nyid la mthong ba mang du za ba la sogs pa de dag dang gzhan la de'i bdag nyid du dpag pa dag tu mthong ba dag 'gal ba dmigs pa'i phyir gzhan la bsgrub par mi bya'o//'gal ba ma mthong ba dag kyang bdag nyid 'dod chags la sogs pa'i rang la mi mthong ba'i bdag nyid rnams ni mi mthong ba nyid kyi phyir 'dod chags dang bral ba la sogs bdag dang 'gal ba so sor sbyar ba mi 'grub pa'i phyir/ gzhan la bsgrub par mi bya ste/ 'di ltar rgyu gang gis na 'gal bas mi mthun pa'i phyogs la bsam par nges na rtags des bsgrub par bya ba nges pa yin no//bdag nyid kyi nang gi chos zhes bya ba ni 'dod chags la sogs pa gang dag dang bdag nyid ldan par rang gis rtogs pa ste/ gzhan gyis shes pa'i spyod yul ma yin pa'i chos de dag rang la ji lta bar gzhan thams cad la yang nye bar sbyor ba'i bdag nyid gcig par tha snyad du byed pa'i skyes bus 'dis rigs pa'i dal ba ste/rig pa bslab pa'i dka' ba byas pa'i 'bras bu'o/ /rab tu 'dod pa ni bsting ba ste/ rmongs pa nyid thob pa'o/ /ci rmongs pa yin zhe na/ bud med dang dmangs rigs dag gis kyang bdag dang gzhan gcig gi rang bzhin ma yin par gsal bar shes te bdag nyid kyi bsam pa ni rang gis rtogs la gzhan gyis ni ma rtogs pas so zhes gsal bar rtogs pa de rang la mthong ba'i chos gtan tshigs su byed pa'i skyes bu 'dis mi rtogs pa'i phyir ro//sngar smos pa'i snang ba mi dmigs pa'o/ /'di 'dra ba'i sbyor ba ni zhes bya ba ni mi snang bar mi dmigs pa ste/'di ltar skyes bu'i sems kyi chos dmigs pa'i rig byar ma gyur ba dag la 'dod chags dang bral bar 'gog par byed pa'o/ /gal te smra ba'i rtags 'dod chags dpog par byed pa de lta na de dang 'gal ba 'dod chags dang bral ba 'gog pa'i phyir 'gal ba dmigs pa nyid yin no zhe na/'dod chags la sogs pa yang don gzhan yin pa'i phyir zhes bya ba ni de'i bdag nyid kyi 'brel ba med pa'o/ /gal te smra bas 'dod chags dpag pa ni 'bras bu yin pas 'gal ba'i 'bras bu dmigs pa yin no zhe na/ 'dod chags la sogs pa 'bras bu yang ma yin zhes bya ba smos te/'dod pa'i phyir skyon med do zhes bya ba ni g.yo ba dang brjod par 'dod pa 'dod chags yin no 'dogs na'o/ /gal te des na 'dod chags grub pa nyid ma yin no zhe na/ ma yin te 'dod chags dang rang bzhin mi 'dra ba'i phyir te/ 'di ltar 'dod chags la sogs pa ni rtag pa la sogs pa phyin ci log las byung ba zag pa dang bcas pa kho na'i yul can yang dag pa ma yin pa'i yon tan la dga' ba'i rnam pa can de 'di ltar 'di'i dmigs ni ut+pal sngon po'i 'dab ma lta bu zhes bya ba la sogs pas dga' ba'i rnam pa can no//rnam 'brel du bshad zin to zhes bya ba ni rgyas par bshad pa'o/ /'di dag gi rgyu dmigs pa mdo tsam du de ma thag tu ston par 'gyur ro//'di dag gi rnam pa ni brjod pa mang du dogs pas ma bstan par rtogs par bya'o/ /'dod chags dang bral ba'i phyir rigs pa ma yin no zhes bya ba ni/ gzhan gyi don la yang 'dod pa dang bral ba'i phyir ro/ /mtshan nyid tha dad de zhes bya ba 'dod chags dang snying rje la sogs pa'o/ /phyin ci log med na med pa'i phyir ro zhes bya ba ni rtag pa dang /bde ba dang / bdag dang bdag gir 'dzin pa ste/ bdag yin na ni gzhan du shes la zhes bya ba la sogs pa'i rim gyis 'dod chags la sogs pa 'byung ba'i phyir ro/ /'bras bu rtsom pa med pa'i phyir zhes bya ba ni bdag nyid kyi don cung zad kyang med pa'i phyir snyam du bsams pa'o/ /gal te gzhan gyi don 'dod pa nyid kyang 'dod chags yin no zhe na/'di ni snying rjes so zhes sngar bshad zin to/ /'khrul pa'i phyir mi dpog na zhes bya ba ni dkar sham dang mang du za ba la sogs pa bdag la mthong ba yang gzhan la de las bzlog par mthong ba'i phyir 'khrul pas so/ /'di la mi 'khrul lo zhes bya ba gang la des zhes bya ba ni 'dod chags la sogs pa la'o//gal te 'di la mi mthun pa'i phyogs la ma mthong ba'i phyir 'khrul pa med do zhe na/ ma mthong ba tsam la yang brjod zin to zhes bya ba ni sngar mi mthong ba'i bdag nyid 'gal bar so sor sbyor bar yang mi nus so zhes bya ba la sogs pas so/ /lhan cig 'byung ba dang cig shos dag ni 'gal ba med pa dang 'gal ba dag go/ /bskal pa'i don zhes bya ba ni mi snang ba'i bdag nyid dag la ni gcig nye na cig shos med par gtan la dbab par mi nus te the tshom za ba'i phyir ro//byed pa'i yon tan ni ngag grims pa'i nus pa rkan bya ba'o/ /gal te 'di la yang bdag nyid la mthong ba zhes bya ba ni byed pa'i yon tan dang brjod par 'dod par smra bas dpog pa 'di yang ngo / / bdag nyid la gzhan du yang mthong ba'i phyir zhes bya ba ni 'dod chags med par smra ba dmigs pas so/ /gal te sems med pa'i ldog pa'i yul yin no zhes bya ba ni rdo ba'i dum bu la sogs pa rnams la smra ba ma mthong ba'i phyir ldog pa'i yul yin pa ste ldog pa rtogs pa'o/ /ldog pa'i rnam pa de lta bu zhes bya ba ni ma mthong ba tsam gyis so//'o na bum pa yod pa dang med pa nyid snying rjer rtogs she na/ de'i rgyu zhes smos te/ 'dod chags de'i rgyu'i nus pa zhes bya ba tshogs pa gzhan de rdo'i dum bu las gzhan pa dbang po dang sems la yod pa la sogs pa rdo la yod kyang 'bras bu 'dod chags mi bskyed na dbang po la sogs pa las rgyu gzhan nus pa rjes su dpog par byed do//sa dang drod dang chu dag yod kyang myu gu mi skye na/ de las rgyu gzhan pa sa bon dpog par byed pa bzhin no/ /sems med pa las mi srid de zhes bya ba ni rdo ba'i dum bu la sogs pa'o//sems pa yod pa dang byed pa'i yon tan de goms pa la sogs pa ste/ dbang po la sogs pa nus pa'i rgyu snang ba zhes bltar rung ba yin te rdo'i dum bu de la mi srid pa'i phyir nus pa med do zhes bya bar mi rtogs te/ nus pa'i rgyu gzhan dag tshang bar yod kyang 'bras bu 'dod chags mi skyed na gdod rdo'i dum bu nus pa med ces bya bar rjes su dpog pa'i phyir 'dod chags kyis nye bar phan mi 'dogs na zhes bya ba ni rdo'i dum bu las 'dod chags nyid med pa'i phyir ro//bdag nyid du gyur pa'i yon tan de chos de lta bu la nus pa nye bar btags pa'i phyir te/'dod chags kyi tshig smra ba bskyed pas 'bras bu 'dod nus pa ni 'dod chags nyid yin pa'i phyir ro/ /gal te 'dod chags kyi rgyu'i rang bzhin gyi nus pas smra ba skyed par byed do zhe na de'i nus pas kyang mi nus so zhes bya ba ni 'dod chags kyi 'bras bu la 'dod chags kyis phan par mi nus na 'dod chags kyis bar du chod pas kyang mi nus so//gzhan la ni zhes bya ba ni 'brel ba med pa dag la'o/ /cis na 'di ma smos zhes bya ba ni 'gal ba mi 'khrul pa'i dper brjod pa dbye ba gnyis bstan pa'o/ /gal te smras pa la sogs par bsgrub pa dang /ma smras pa la sogs par sgrub pa zhes bya bar dbye bar rigs pa ma yin nam zhe na/ gcig pa brjod par bsgrub par bya ba bye brag med par rtogs par bya ba'i phyir ro/ /'ga' zhig tu brjod pa dang zhes bya ba ni byas pa dang rtsol ba las byung ba dag go/ /shugs kyis 'dus pa yin pa'i phyir zhes bya ba'o//shugs kyis 'dod pa phyin ci log de la yang sbyor ba'i bye brag gis 'ga' zhig tu chos su brjod par 'dod pas de 'dus pa ni gzhan gyi don nyid do zhes so/ /'ga' zhig tu chos can du brjod pas te gzhan gyi don mig la sogs pa zhes bya bas chos dang chos can gyi bye brag las bzlog pa bsgrub pa dag gis so//de dag kyang sbyor bar brjod par 'dod pas rnam par gzhag pa yin pa bsgrub par bya ba phyin ci log tu sgrub par ni bye brag ci yang med do/ /gal te 'gal ba bzhin du gtan tshigs kyang ci'i phyir tha dad du ma byas she na zhes bya ba ni yang dag pa'i gtan tshigs dag kyang 'dod pa brjod pa bsgrub pa dang /shugs kyis 'dod pa bsgrub pa zhes so/ /shugs kyis 'dod pa'i gtan tshigs kyang tha dad du byas pa nyid de ma smras kyang 'dod pa bsgrub par bya ba yin par bstan pa nyid kyis bstan pa yin no/ /yang na 'dus pa nyid kyis 'dus pa'i don nyid sgrub par 'dod na ma brjod par yang bsgrub pa nges par bstan pa nyid kyis shugs kyi 'dod pa bsgrub pa'i gtan tshigs bshad pa'i phyir ro//ci'i phyir 'gegs par byed ces bya ba ni ma bstan to zhes bya bar rgol ba mi rigs so zhes bya ba yin no/ /gal te 'dus pa rnams gzhan 'dus pa ma yin pa la phan par zhes bya ba ni 'dus pas 'dus pa ma yin pa'i don byed pa'o//kha cig 'dus pa gzhan rnams gzhan 'dus pa la phan pa zhes 'don to/ /de ltar na bdag med par smra ba la klan kar sbyar ba'o/ /'gal ba ma yin pa nyid du bsgrub pa ni 'dra ba nyid do//snga ma ltar na ni 'gal ba yin par bsgrub par bya ba tsam du bya'o/ /gal te 'ga' zhig tu 'bras bu bskyed pa'i don rnams mthar thug par tshogs pa yang yin zhes bya ba ni nges par 'bras bu 'byin pa'i phyir gzhan la phan pa byed pa mi 'grub ste/ ci'i phyir zhe na/de lta mod kyi zhes bya ba la sogs pa smos so/ /so sor phan pa byed pa dag las zhes bya ba la sogs pas ni 'dus pa kho na la phan par byed par bsgrub pas 'gal ba nyid du ston te/ so sor phan pa byed pa ni 'dus pa rnams so sor phan pa byed pa'o/ /phan par bya ba'i rang bzhin gzhan skye ba'i phyir zhes bya ba ni snga ma las khyad par du gyur pa'o//de ltar na phan par byed pa de ni mi rtag pa nyid do/ /rang bzhin gzhan mi skye ba ni phan par bya ba nyid ma yin no/ /tha dad pa'i rang bzhin gyis phan pa zhes bya ba ni snga ma las gzhan du gyur pa ni phan pa ste/ skad cig ma gzhan skyed pa yin gyi phan par bya ba gcig la dus gcig tu phan pa du ma byed pa ni ma yin te/phan par bya ba du mar gyur na 'dus pa phan par bya ba ma yin gyi re re la phan par thal bar 'gyur ba'i phyir ro/ /de lta bas na phan par bya ba'i skabs gzhan dang gzhan dag skye ba'i phyir mi rtag pa kho nar 'gyur ro//de'i phyir phan par bya ba'i skad cig ma 'dus pa kho na la don byed par grub pa'o/ /gal te phan pa bdag la don gzhan yin na phan pa las gzhan pa'i bdag de las phan pa ma yin no zhes bya ba la sogs pa ste/ phan pa rnams phan pa skye na yang bdag de las tha dad pa zhig ma yin zhes bya ba thug pa med par 'gyur ba la sogs pa'i rig byed brtag pa la sogs pa smras zin to//gal te bdag la mi phan pa nyid yin na bdag de la phan pa'i don du sgrub pa bkod pa don med pa nyid yin pas bdag la phan par byed pa de'i don du sgrub pa ni rang gi tshig dang 'gal ba yin no//de'i phyir rang bzhin gcig tu mi 'gyur ba'i phyir zhes bya ba ni phan pa'i khyad par phyi ma phyi ma dag tu skyed pa de'i phyir phan par bya ba de rang bzhin gcig tu mi 'gyur ba'i phyir 'dus pa'i kho na'i don byed par grub pas 'dus pa ma yin pa'i don byed par 'dod pa las phyin ci log tu bsgrub pa'i phyir 'gal ba'i gtan tshigs ltar snang ba nyid yin no//gnyis ka la ma grub pa yang 'gal ba yin te zhes bya ba ni yang gi sgras ni'o/ /bdag dang bcas pa dang bdag med pa las gzhan pa'i phung po gang la zhes bya ba ni de gnyis pas phyi rol tu gyur pa'i chos 'ga' zhig la'o//gal te de la yod par gyur na ni srog la sogs pa bdag dang bdag med pa gnyi ga las phyi rol du gyur pa'i phyir de dag la the tshom za bar mi 'gyur te gnyi ga las ldog par grub pa'i phyir ro/ /de'i bdag nyid kyis grags par ma grub pa'i phyir ro zhes bya ba la sogs pa'i don bdag dang bdag med pa'i bdag nyid kyis chos su tshad mas ma grags pa'i phyir ro//de dag las ldog pa med do zhes bya ba ni bdag bcas dang bdag med gnyi ga las ldog pa ma grub po zhes bya ba'i don to/ /gal te bdag dang bdag med pa gang la yang yod par ma grub pa'i phyir//ma grub pa'i gtan tshigs ltar snang ba yin pas na rtogs par byed pa ma yin pa'i phyir ma nges pa ma yin no zhe na/ go bar mi byed pa yang ma yin te zhes bya ba smos te/ ci'i phyir zhe na/ gang zhig dang 'brel pa'i phyir zhes bya ba ni srog la sogs pa 'di chos can gson po'i lus la 'ga' zhig dang 'brel ba'i phyir/rtags de las chos can de las rtogs pa 'jug par 'gyur ba'i phyir te/ 'di ltar srog la sogs pa 'di ci bdag dang bcas pa zhig gam bdag med pa zhig gi chos can yin no zhes so/ /ma 'brel pa zhes bya ba ni chos dang ngo //gnyi ga las phyi rol du gyur pa zhes bya ba ni srog la sogs pa bdag dang bdag med pa gnyi ga dag las phyi rol du gyur pa yin na ni/ de bdag dang bdag med pa gnyi ga las log pa'i phyir srog la sogs pa de las gson po'i lus de la go ba dang the tshom za bar mi byed pa der 'gyur ro/ /gal te de lta na zhes bya ba ni srog la sogs pa bdag dang bdag med pa gang la yang yod par ma grub kyang de las ston pa 'jug pa de lta na'o//ma 'brel pa'i phyir zhes bya ba ni mig gis gzung bar bya ba de chos can dang ma 'brel ba'i phyir ro/ /srog la sogs pa'i bye brag la zhes bya ba ni bdag dang bdag med pa'i chos yin pa'i bye brag la'o//bskal pa'i phyir zhes bya ba ni bdag tshad mas ma mthong ba'i phyir ro/ /'jug pa dang ldog pa ni bum pa la sogs pa chos can khyad par gyi khyad par gang la yang bdag yod pa dang med pa nges par ma grub pa'i phyir ro//de la srog la sogs pa yang ngo zhes bya ba ni bdag de la srog la sogs pa 'jug pa dang / ldog pa yang tshad mas ma mthong ba'o/ /'jug pa dang ldog pa ma grub pa de'i phyir don gzhan srog la sogs pa bdag gi 'bras bur ma gyur pa'i phyir bdag la sogs pas rjes su 'gro ba ma grub pa yin no//de nyid rgyas par bstan pa'i phyir srog la sogs pa dang bdag tu zhes bya ba la sogs pa smos so/ /gzhan dag ces bya ba ni rigs pa can no/ /go bar byed pa kho nas zhes bya ba ni srog la sogs pas bdag go bar byed pa kho na ste/ srog la sogs pa de ni 'di'i rigs can de dag bdag sgrub pa'i gtan tshigs yin te/gcig tu ldog pa can zhes bya bar 'dod pa'o/ /de gcig tu ldog pa can yin pa'i phyir ro zhes bya ba ni mi mthun pa'i phyogs kho na las ldog pa zhes 'dod pa'i phyir ro/ /de nyid kyi phyir srog la sogs pa mi mthun pa'i phyogs kho na la mi 'jug pa'i phyir mthun pa'i phyogs las ni ldog pa med de mthun pa'i phyogs med pa'i phyir de gson po'i lus thams cad phyogs su byas pa'i phyir la gson po'i lus las gzhan pa thams cad ni mi mthun pa'i phyogs yin par 'dod pa las mthun pa'i phyogs med pa la/med pas ldog pa ni yul du mi rigs pa'i phyir ro/ /gcig tu rjes su 'gro ba can ni 'og nas ston to/ /mnyan par bya ba nyid kyang rtag pa dang mi rtag pa gang la yang yod par ma grub pa'i phyir phyogs kyi thun mong ma yin pa'i chos ma yin pas ldog pa can gyi rtags nyid du 'gyur ro zhe na bye brag pa na re mnyan par bya ba nyid ni de lta ma yin te/gnyi ga las ldog pa'i phyir ro zhes bya bas mthun pa'i phyogs las kyang ldog pa'i phyir te/ log pa ni 'dir ma mthong ba yin pas so/ /srog la sogs pa ni de lta ma yin zhe'o/ /de lta bu'i ldog pa'i rnam pa zhes bya ba ni mi mthun pa'i phyogs las gcig tu ldog pa smras pa des so//bdag med pa nyid la med pa nyid do zhes nges pa smra na don gyis gzhan ma yin pa bdag dang 'dre bas bdag la srog la sogs pa 'jug par brjod pa yin la/ de lta na bdag kho na la 'jug pa de nyid med na mi 'byung ba yin no//de nyid kyi rjes su 'gro ba grub pas srog la sogs pa ldog pa nyi tshe can ma yin no/ /de'i phyir zhes bya ba ni ma mthong bas ldog pa mi 'grub pa'i phyir srog la sogs pa bdag gam bdag med pa'i bye brag gi rjes su 'gro ba med pa la ldog pa yang med do//gal te ma mthong bas ldog pa mi 'grub ste/ de lta na slob dpon phyogs kyi glang pos mnyan par bya ba nyid ji ltar ldog pa can zhes gsungs she na/ slob dpon gyis ni zhes bya ba la sogs pa smos so/ /de tsam gyis zhes bya ba ni ma mthong ba tsam gyis so/ / gzhan du na zhes bya ba ni ma mthong ba tsam gyis ldog pa des na mnyan par bya ba nyid the tshom za ba'i rgyur nges pa'i gtan tshigs ltar snang bar slob dpon gyis gsungs so/ /'di ltar rtags mnyan par bya ba gang rtag pa gang la mi srid pa de sgra la dmigs pa las sgra rtag pa de la the tshom za bar rigs pa ma yin te/'di ltar me med pa la mi srid pa'i du ba phyogs la dmigs pa las me med pa la the tshom bya bar mi rigs pa bzhin no/ srog la sogs pa med pas bdag med pa ni shi ba'i lus dang bum pa la sogs pa la khyab pa'i phyir du ba med pas me med pa la khyab pa ltar ro//de'i phyir nye ba'i lus dang bum pa la sogs pa rgyu bdag log pa'i phyir/ srog la sogs pa log pa'i phyir te me log pas du ba log pa bzhin no/ /de ltar na 'bras bu srog la sogs pa ldog pa'i khyab par byed pa yin la/ de gson po'i lus la log ste srog la sogs pa yod par gyur na khyab par bya ba dag med pa yang ldog pa'i phyir gson po'i lus la bdag grub po snyam pa'o//lan sbyin pa ni ma 'brel pa srog la sogs pa med pa ste ldog pas nye bar mi sbyor ba bdag med pa ste log pa la khyab pa mi 'grub ste/ 'brel pa med pa'i phyir ro/ / de log pas mi 'jug ces bya ba ni bdag log pas srog mi 'jug pa'o/ /bzlog pa'i 'brel pa ni nye bar sbyor ba log pa de dang 'brel pa log pas khyab pa'o/ /shin tu bskal pa de ni bdag go/ /srog la sogs pa med pas khyab pa bdag med pa yang gang zhes bya ba ni ldog pa'i khyab pa'i yul mi mthun pa'i dpe 'dri ba'o//gzhan la yang mi mthong na zhes bya ba ni ma mthong ba tsam gyis bdag med par 'grub na gzhan yang phyogs la yang ma mthong ba'i phyir de yang bdag med par 'gyur la/ de lta ma yin pa bdag de bum pa la sogs pa la med do zhes bya ba gang las de ma mthong ba tsam du khyad par med pa'i phyir ro//ldog pa mi shes pa med pas de'i zhes bya ba ni bdag gang las log pa mi shes pa de'i'o/ /'ga' zhig mthong ba kho na la zhes bya ba ni gson po'i lus 'ga' zhig kho na la'o/ /bdag ni de ltar gzhan yod pa dang med par rtogs pa ma yin no//gal te gang yang zhes bya ba la sogs pa ni ldog pa can gyi sbyor ba'i ngag go/ /de la yang zhes bya ba ni bdag log pas srog la sogs pa ldog par sgrub pa de yang ngo / /rgyu dang 'bras bu dngos po ma yin pas zhes bya ba ni bdag ni rang las tha dad pa srog la sogs pa rgyu ma grub pas so//de yang le'u gnyis par mi dmigs pa'i dbye ba'i skabs su don gzhan dgag par smras pa yin no/ /ma mthong ba'i phyir ro zhes brjod ces 'das ma thag par brjod zin te/ 'di ltar bdag dang bcas pa'i dpe'i chos 'ga' yang tshad mas grub pa'i phyir ro//gal te 'ga' zhig tu bdag mthong bar khas blangs kyang mthun pa'i phyogs la mthong ba tsam gyis ni rjes su 'gro ba mi 'grub ste/ ldog pa ma grub pa'i phyir ro/ /de lta bu'i ldog pa las ni zhes bya ba bum pa la sogs pa la bdag ma mthong ba tsam gyis med par 'dod pa'o//nus pa'i rgyu gzhan zhes bya ba ni blo la sogs pa bum pa yod kyang srog la sogs pa mi 'byung na/ blo la sogs pa'i gzhan pa'i rgyu med pas srog la sogs pa med par 'gyur ro zhes dpag par rung na de lta bu'i ni bum pa la sogs pa la mi srid do//gal te blo la sogs pa de yang bdag med pas so zhes bya ba ni bum pa la sogs pa la blo la sogs pa med pa de yang bdag med pas so zhe na/ ma yin te zhes bya ba ni bdag med pas blo la sogs pa med pa ni ma yin pa'o/ /ci'i phyir zhe na/ blo la sogs pa de la bdag las gzhan pa'i dngos po'i nus pa ma mthong ba'i phyir ro//de yang ji ltar zhe na/ re zhig ces bya ba ni rim la ltos pa ste/ shes pa dang / dbang po dang / yul rnams kyi rim pas so/ /rnam par shes pa snga ma ni mtshungs pa de ma thag pa'o/ /gzhan dag shes pa'i rgyu yod ces bya ba rtag pa yod par 'dod de yul du ma dag nye yang shes pa yul kun cig car skye ba'i phyir yid ces bya ba gcig yod par rjes su dpag ste/yid gcig po'i dbang gis shes pa rim gyis skye ba de lta ma yin na ni/ yul kun la dus gcig tu shes pa skye bar thal bar 'gyur ro zhes zer te/de dgag pa'i phyir de yang yul gzhan spang ba dang zhes bya ba smos te/ nus pa ma yin pa'i shes pa snga ma de yul gzhan spong ba ste/ yul gcig la gtod par 'dod pas yul gzhan la dmigs pa'i rnam par shes pa gzhan dus gcig tu mi skye ba yin gyi/yid rtag pa nus pa med pas ni ma yin te/ rtag pa ni rim dang cig car du re res don med pa dag mi rung ba'i phyir ro/ /gnod pa can las ni rnam par shes pa phyi ma 'khrul pa skye'o zhes bya bar sbyar ro/ /stsogs pa'i sgra gnyis kyis ni mi gsal ba las ni mi gsal ba skye'o zhes go rims bzhin du sbyor ro//dbang po la sogs pa'i zhes bya ba ni yul rnams kyang ngo / /blo yang dbang po la sogs pa rnams kyi rkyen yin par brjod do/ /de yang dbang po la sogs pa rnams kyi bdag po yin pa'i phyir ro/ /de tsam gyis zhes bya ba ni dbang po la sogs pa'i rgyu dag gis so//'di zhes bya ba ni blo la sogs pa 'bras bu rnams so/ /bdag nyid kyi dngos po ni 'bras bur gyur pa blo la sogs pa rnams rang gi bdag nyid kyi dngos po dang rjes su 'gro ba ste yod pa dang ldog pa ste med pa'o/ /can zhes bya ba ni rgyur gyur pa'i chos de dag tsam gyi rjes su 'gro ba ldog pa dang ldan pa yin pa'o//'di nyid rgyu yin te zhes bya ba ni gang gi rjes su 'bras bu byed pa de nyid rgyu yin te/ rjes su bya ba'i chos gzhan bzhin no/ /gang gi rjes su 'bras bu byed pa de nyid rgyu yin pa de'i phyir de la yang ma mthong bar rgyu gzhan brtag na rgyu thug pa med par thal bar 'gyur ro//gang du yod na yod pa nyid ces bya ba ni sa bon dang / sa dang / chu dang / drod dang gang zhig yod na rgyu yin pa la'o/ /de las gzhan du zhes bya ba las sa bon la sogs pa de las gzhan pa yang ngo / /sngar bshad pa'i rim pa rjes su 'gro ba dang ldog pa gnyis las the tshom za ba de'i phyir/mnyan par bya ba nyid dang / srog la sogs pa yang 'khrul pa can du mtshungs te/ srog la sogs pa go bar byed pa ma yin no/ /ldog pa 'khrul pa'i phyir ro zhes bya ba ni mnyan par bya'o/ /ji ltar 'khrul zhes bya ba ni grub pa'i mtha' smra ba'o/ /de la mi mthun pa'i phyogs kho na las ldog pa ni ma yin pa'i phyir ro zhes bya ba ni mnyan par bya ba nyid de mi mthun pa'i phyogs las kyang log pa'i phyir te bum pa la sogs pa ni mi rtag pa nyid du bsgrub pa'i mthun pa'i phyogs yin no//de bzhin du 'di zhes bya ba ni mnyan par bya ba nyid mthun pa'i phyogs las log pa de bzhin du'o//'di zhes bya ba ni srog la sogs pa 'di'o/ /mthun pa'i phyogs la rjes su 'jug pa med pas smra ba ma yin nam zhes bya ba rjes su 'gro ba med par sngar smras pa ma yin nam zhes bya ba'i don to/ /de ltar na srog la sogs pa de mthun pa'i phyogs la med pa nyid yin la mthun pa'i phyogs la med pa de gzhan mnyan par bya ba la yang mtshungs te/mthun pa'i phyogs la rjes su 'jug pa nyid yin pas so/ /gzhan yang srog la sogs pa mi mthun pa'i phyogs nyid la med pa zhes brjod pas kyang ngo //dgag pa gnyis kyis zhes bya ba ni mi mthun pa'i phyogs nyid la zhes bya ba dang med pa zhes bya ba dag gis so/ /rnal ma rtogs pa zhes bya ba ni mthun pa'i phyogs la yod par rtogs pa'o/ /gzhan du zhes bya ba ni rnal ma'i don mthun pa'i phyogs la yod pa mi rtogs pa'o/ / rnam par gcad pa med pas zhes bya ba ni mthun pa'i phyogs med pa rnam par gcod na/ mi mthun pa'i phyogs nyid la med pa zhes bya ba gcig tu ldog pa can du smra ba nges par gzung ba gcad par bya ba med pas so/ /de ltar nges par gzung bar 'bras bu dang bcas par 'dod na ni/mthun pa'i phyogs la med pa rnam par gcod pa'i phyir rjes su 'gro ba yod par bstan pas gcig du ldog pa can du mi 'gyur ro/ /gal te mi mthun pa'i phyogs nyid la med par nges par gzung ba med par smra na yang / mi mthun pa'i phyogs kho na la med par mi 'gyur gyi mthun pa'i phyogs la yang med pa zhes bya bar 'gyur bas rjes su 'gro ba med par ni 'gyur mod kyi/de lta na ldog pa nges par mi 'grub pa'i phyir te/ ldog pa nges pa ni rjes su 'gro ba la rag las pa'i phyir ro/ /de nyid de dag nyid ces bya ba la sogs pas 'chad par byed de/ mthun pa dang mi mthun pa'i dpe dag las gang yang rung ba gcig gis te/ mthun pa'i phyogs dpes rjes su 'gro ba dngos su ston cing ldog pa shugs kyis ston te/ de med na rjes su 'gro ba nyid 'grub pa'i phyir ro/ /des na de gnyi ga rtags la yod pa nyid du bstan pa yin no/ / mi mthun pa'i dpe ni ston pa dngos su ston cing rjes su 'gro ba shugs kyis yin par bstan pa chos mthun pa dang / mi mthun pa nyid kyi sbyor bas slob dpon gyis gsungs so/ /dgag pa bkag na zhes bya ba ni mthun pa'i phyogs la med pa bkag na'o/ /sgrub pa'i rang bzhin ni mthun pa'i phyogs la yod par 'gyur ba ste de lta ma yin na mthun pa'i phyogs la med pa nyid rnam par gcad par mi 'gyur ba'i phyir ro//gal te mthun pa'i phyogs yod pa ma yin pas zhes bya ba ni srog la sogs pa mthun pa'i phyogs yod pa ma yin te/ srog dang ldan pa thams cad phyogs su byas pa'i phyir/de'i phyir mi mthun pa'i phyogs zhes bya ba cung zad kyang ma grub pa de las ldog pa mi srid de yul med pa'i phyir ro/ /ldog pa'i ldog pa ni med pa med pa'o/ /de ni mthun pa'i phyogs med pa la ji ltar 'dod de/ 'di ltar med pa bkag pa ni zhes bya ba smos te/med pa la de yod la zhes bya ba ni de mthun pa'i phyogs med pa yin te/ yang rjes su 'gro ba med pa bkag pa rjes su 'gro ba yod pa de yod la mthun pa'i phyogs med pa de la rjes su 'gro ba yod pa dgag pa med pa rang gi rang bzhin ni mi srid do zhes bya ba med pa la yod pa yod la med pa med do//zhes 'gal ba ni mi srid do zhes sgo gnyi gar 'gal ba smra ba ni 'thing slad du bya ba'o/ /de nyid bshad pa'i phyir gang de dag dgag pa'i yul yang mi 'dod la zhes bya ba ni med pa dgag pa'i yul yang mi 'dod la/ yod pa ma yin pa med do zhes bya bas yod pa yod par yang tha snyad du byed pa'o//stsogs pas ni med pa la med pa ni mi srid par tha snyad du byed pa'o/ /med pa la med pa nyid tsam bya ba'i skabs ni le'u gnyis par rtags kyi mtshan nyid bstan pa'o/ /yod par bsgrub pa 'jug pa'i phyir/ /zhes bya ba ni srog la sogs pa bdag dang 'gal ba'i ma grub pa'i rtags yod pa'i phyir bdag med pa yang ma yin la go bar mi byed pa yang ma yin no//'on kyang sngar bshad pa'i tshul gyis 'brel pa yang ma grub pa'i phyir srog la sogs pa las the tshom za bar 'gyur ro/ /gal te ma yin te zhes bya ba ni srog la sogs pa bdag la the tshom za ba ni ma yin te ldog pa nges pa'i phyir ro//de yang ji ltar zhe na/ bum pa la sogs pa bdag med pa dag las log pa'i phyir de dag bdag med pa nyid du ni sangs rgyas pas khas blangs pa'i phyir ro zhe na/ tshad ma ma yin pa khas blangs pa zhes bya ba ni rigs par byas pa ma yin par khas blangs pa las de ltar gyur na zhes bya ba ni sangs rgyas pas khas blangs pas bum pa la sogs pa bdag med par gyur na ni gson po'i lus kyang med pa nyid du ha cang yang thal bar 'gyur te/de ltar pha rol khas len pa'i phyir ro//gal te gson po'i lus ni kho bo cag gis bdag dang bcas par khas blangs pa'i phyir la bum pa la sogs pa ni bdag med par khas blangs pa'i phyir khyad par yod do zhe na/ lung gis bdag 'grub par 'gyur gyi zhes bya ba smos te/ bdag yod par rang gis khas blangs pas 'grub pa bdag med par yang gnyi ga'i khas blangs pas 'grub pa'i phyir ro//srog la sogs pa bdag la the tshom za ba de'i phyir gal te mthun pa'i phyogs med pa'i phyir de las ma log kyang de log pa ma mthong na yang srog la sogs pa mthun pa'i phyogs las ldog pa la the tshom za bar 'gyur te de las ldog par 'gyur ro de nyid bstan pa'i phyir bdag the tshom za ba'i phyir ro zhes bya ba smos te/bdag nyid thams cad du bltar mi rung ba'i phyir gang na yod pa dang med pa nyid du ma grub pa'i phyir bum pa la sogs pa las srog la sogs pa yang mthun pa'i phyogs las log pa yin par dogs par 'gyur ro//mthun pa'i phyogs la nges pa med pa de nyid mi mthun pa'i phyogs la yang mthun pa'i phyogs gcig la nges par 'grub na gzhan gyi mi mthun pa'i phyogs la mi 'jug par nges par 'grub ste/ de lta na gdod mthun pa'i phyogs nyid la yod par nges par 'grub pa'i phyir ro//de las gzhan du mi mthun pa'i phyogs la gzhan la mthun pa 'ga' zhig la rtags med par grub kyang mi mthun pa'i phyogs de nyid ma mthong ba dag la ni ldog pa ste/ the tshom za ba yin te/ rdzas kyi bye brag mtha' dag ma yin pa la khyab pa zhes bya ba ni de 'dra ba thams cad la yod pa ma yin pa'i don kha cig go//de dag mthong ba'i rdzas kha cig la med par grub kyang yang rdzas de dang rigs 'dra ba gzhan la yang srid pa mthong ba ste/ sa'i rang bzhin can shing dang rus pa dang / rdo la sogs pa phal che ba kha cig lcags kyis 'joms te/gcod pa dang / 'bigs pa dang / gcod pa dag mthong yang / yang sa'i rang bzhin dang 'dra ba'i rdo rje dag la lcags kyis 'joms pa med pa bzhin no/ /de'i phyir mthun pa'i phyogs kho na la yod par nges na de nyid mi mthun pa'i phyogs la med par nges pa yin gyi de mthun pa'i phyogs kho na la nges pa de ma grub na mi mthun pa'i phyogs mthong ba 'gal zhig la med pa'i yod kyang de ma mthong ba dag la med pa nyid la the tshom za bar 'gyur te/mthun pa'i phyogs kho na la yod par nges na de nyid mi mthun pa'i phyogs la yang yod par dogs pa'i phyir ro/ /'gal ba'i mtshan nyid bstan pa dag kyang ma grub pa'i phyir zhes bya ba ni 'gal ba'i mtshan nyid gnyis sngar bstan pa dag kyang bdag ltar mi rung ba dang lhan cig ma grub pa'i phyir/bdag med pa la srog la sogs pa ldog pa la the tshom za'o/ /gal te 'gal ba gnyis po dag ma grub kyang tshad mas gnod pa'i 'gal ba yod do zhe na/srog la sogs pa rnams nges par bdag de'i 'bras bu yin na ni bdag med pa dang / srog la sogs pa 'gal bar 'gyur te/ srog la sogs pa dang de med pa ni phan tshun spangs pas gnas pa'i phyir ro/ /'gal ba nyid yin la/ de dang 'gal ba srog la sogs pa med pa de khyab pa dag med pa yod pa'i phyir dgag par bya ba srog la sogs pa de dang 'gal ba srog la sogs pa med pas khyab pa bdag med pa dmigs pa rtags kyi tshad mas gnod pa'i 'gal bar 'gyur na/ 'gal ba 'di'i rtsa bar gyur ba srog la sogs pa dang bdag tu 'brel ba 'ga' yang ma grub pa'i phyir 'gal bas khyab pa dmigs pa rtags mi srid do//'bras bu smos pa ni mtshon pa yin pa'i phyir de bdag nyid kyi 'brel pa yang ma grub ste/ bdag rang gi ngo bo grub pa med pa'i phyir ro/ /de nyid de yang ma grub po zhes bstan zin to//zhes bya ba bdag ltar mi rung ba la mthong ba dang ma mthong ba gnyis kyis rang bzhin la mngon sum la rag las ba'i 'brel ba'i mi 'grub po zhes 'das ma thag tu bstan zin to/ /gal te srog la sogs pa de bdag med pa las log pa yod na yang / de ltar na srog la sogs pa de yod pas gson po'i lus la bdag med pa med par 'gyur te/ bdag med pa yod na srog la sogs pa med par 'gyur te de las log pa'i phyir ro/ /des bdag med pa med par 'grub kyang bdag ni mi 'grub po/ /ci'i phyir bdag med pa log na bdag mi 'grub ce na/gang gi khyod kyi lugs ltar na ldog pa med na yang zhes bya ba med pa med na yang ngo / /med pa med pa de la yod pa grub par ni mi 'dod do/ /ji ltar mthun pa'i phyogs la srog la sogs pa ldog pa med kyang de srog la sogs pa yod par mi 'dod pas so//dngos po'i rang bzhin bsam pa la ni mthun pa'i phyogs la mi ldog na zhes bya ba rtags ldog pa med na mthun pa'i phyogs la gtan tshigs su 'gro ba dang ldan de med pa med pa ni yod pa yin te/ dgag pa bkag pa ni bsgrub pa'i rang bzhin yin pa'i phyir ro//mthun pa'i phyogs la ldog pa med rjes su 'gro ba med na ni mi mthun pa'i phyogs la rjes su 'gro ba med kyang ldog pa yod par 'gyur ro/ /de ltar na ni srog la sogs pa rtags kyis bdag yod ma yin/ bdag med min de gang yang rtogs par mi 'gyur ro//gal te srog la sogs pa bdag med pa las ldog pa gson po'i lus la yod pas bdag med pa ldog pa des na bdag yod par rtogs pa ni ma yin no/ /de'i phyir ldog pa nges pa bsam pa'i skyon gyis gos pa med do snyam pa'o/ /bsgrub pa'i sgo kho na nas zhes bya ba ni srog la sogs pa yod pa tsam gyi rjes su 'gro ba dang ldog pa dran pa la mi ltos par bdag grub na'o//da ni zhes bya ba ldog pa las mi ltos na'o/ /bdag med pa las ldog pa'i zhes bya bas ldog pa can gyi rtags kyi'o/ /'di ni zhes bya ba ldog pa can gyi rtags de ni'o/ /de la mi srid pa zhes bya bas bdag med pa de la srog la sogs pa mi srid pa ste/ldog pa can yin pa'i phyir ldog pa can srog la sogs pa gson po'i lus la yod na rtags de rang de la yod pas gson po'i lus de la bdag med par mi srid par sgrub par byed pa'i phyir bdag med pa de srid na bdag yod par bsgrub pa'i phyir/de la ldog pa can gyi rtags yin par khyod brjod na/ da ni ldog pa'i thabs las gzhan pa bsgrub pa 'ga' zhig gis bdag nye bar grub na'o/ /yang na ni zhes bya ba skyon gzhan ston pa ste 'di ltar bsgrub pa'i sgo kho na nas grub na yang srog la sogs pa de bdag kho na la yod par nges pa'i rgyu mtshan ci zhig grub pas srog la sogs pas grub pa'i sgo nas bdag gson po'i lus la go bar byed do zhes brjod par bya/de ltar grub na zhes bya ba ni nges pa'i rgyu cung zad med par grub pa'i sgo nas nges pa de ltar gyur na bum pas snam bu sgrub pa'i sgo kho na nas nges pa la sogs pa ha cang thal 'gyur ro//thun mong ma yin pa'i ma nges pa zhes bya ba ni mthun pa'i phyogs sam mi mthun pa'i phyogs 'ga' yang ma grub pa'i phyir de dag la yod pa dang / med pa zhes bya bar nges pa ni med la phyogs ni yod pa'i phyir ro/ /thun mong ba zhes brjod pa ni gzhal bar bya ba nyid de zhes bya ba ni mi rtag pa grub pa la mthun pa'i phyogs dang mi mthun pa'i phyogs gnyi gas yod pa'i phyir thun mong ma yin pa ma yin pa'i phyir ro//gal te nam mkha' la sogs pa 'dus ma byas rtag pa dag gzhal bar bya ba nyid yin pa'i phyir gzhal bar bya ba nyid mi rtag pa la ma nges pa yin nam zhe na 'dus ma byas la skur pa 'debs pa zhes bya ba smos te/gang dag 'dus ma byas brtags pa yin gyi dngos po yod pa ma yin par 'dod pa dag la yang 'dus ma byas med pa'i phyir/ yul med pa la 'jug pa mi rigs pa'i phyir de la gtan tshigs rjes su 'gro ba mi rigs pa'i phyir ma nges pa med la/de nyid kyi phyir mthun pa'i phyogs mi rtag pa kho na la yod pa'i phyir rjes su 'gro ba mi 'khrul pa'i phyir gzhal bar bya ba nyid ni rjes su 'gro ba can zhes bya ba ni gtan tshigs nyid rigs pa can dag smra ba'o/ / 'di la yang zhes bya ba ni ldog pa can ldog pa nyi tsher mi rigs par ma zad do zhes bya ba ni yang gi sgra'i don to/ /'di pa zhes bya ba ni rjes su 'gro ba can 'di la ji ltar mi mthun pa'i phyogs las ldog pa med de rjes su 'gro ba yod na ldog pa yod pa'i phyir ro/ /ci'i phyir zhe na/ 'di ltar rjes su 'gro ba can zhes bya ba ni mthun pa'i phyogs kho na la yod pa yin la/de ltar ci mthun pa'i phyogs kho na la yod pas mi mthun pa'i phyogs la yod pa nyid rnam par mi gcod na ni de na srid par ston pa yin la de lta na ni/ mthun pa'i phyogs kho na la yod pa zhes bya ba'i nges par bzung ba'i 'bras bu yang ci'i phyir ro//de ma yin pa yang yod pa'i phyir ro/ /mi mthun pa'i phyogs la yod pa rnam par gcod na yang mi mthun pa'i phyogs la med pa'i phyir ji ltar ldog pa med pa yin/ gal te yod pa rnam par gcod pa med de ldog par ji ltar 'gyur zhe na/yod pa rnam par gcad pa las gzhan pa ni ldog pa ni med do zhes bya ba smos te/ yod pa rnam par gcad pa nyid ldog pa'i rang bzhin yin pa'i phyir ro/ /gal te mi mthun pa'i phyogs med pa'i phyir gzhi med pa las ldog pa dang / rjes su 'gro ba gnyi ga la med do zhe na/gang kho na zhes bya ba la sogs pa smos so/ /gal te med pa ni gzhir mi rung ba'i phyir ro zhe na/ des na med pa la ldog pa mi rigs so zhes bya ba 'di yang 'ongs pa yin te/ de la yang kho bos yang ji ltar na med pa la rjes su 'gro ba 'gog cing smras te zhes bya ba 'das ma thag tu bstan pa'i rim pas 'gog par byed do//gal te med pas kyang des stong pa'i dngos po 'dren par byed pa'i phyir gzhal bar bya ba nyid med pa la zhugs pas kyang mi rtag pa kho na la zhugs pa yin no zhe na/ dngos po'i mtshan nyid rjes su 'dren pa ni med par bkag pas mi srid pa'i phyir te mi nus pa'i phyir ro//de 'dren na ni de med pas bkag pa nyid du mi 'gyur ro/ /gal te med ces bya ba ni sgra'i yul ni med par bkag pa ma yin no zhe na/ med ces bya ba'i yul ni ma yin par bkag pa dngos po 'dren pa gcig pu ma yin gyi/ 'on kyang bkag pa yang yin te gtan med pa lta bu'o//de'i phyir med par bkag pa de dang med pa'i sgra mi 'gal lo/ /de ltar na gzhal bar bya ba ni med par bkag pa yang 'jug ste/ med ces bya ba'i sgra dang shes pa yul du byed pa'i phyir ro/ /de lta na med pa la ni mi rtag pa nyid med de mi rtag pa nyid ni 'dir dngos po g.yo ba don byed pa'i rang bzhin la brjod pa'i phyir ro//de la med par bkag pa'i med pa la med pa'i phyir ro/ /gzhal bar bya ba nyid de la zhugs pa mthun pa'i phyogs la yod pa nyid yin no/ /gal te yang mi srid do zhes zer ba ni gsal byed de/ 'di ltar gtan med pa de la med pa'i sgra 'jug pa mi srid de/'di ltar gzhi la sogs pa zhes bya ba med pa la 'jug go zhes bya ba bdun pa'i don la sogs pas med pa las mi ldog ces bya ba la dngang ba la sogs pa'i rnam par dbye ba'i don rnams med pa'i yul la nye bar dran par mi rigs te/ yul med pa'i phyir ro zhe na/'di'i lan brjod zin to zhes bya ba ni le'u gnyis pa'i med ces bya ba la sogs par yang dang yang du bstan zin to/ /de'i phyir zhes bya ba ni ldog pa med pa na rjes su 'gro ba med cing rjes su 'gro ba yod na/ de nyid kyis ldog pa yang yod de/ nges pa ni sgra gnyis pa can yin pa'i phyir rdzas su 'gro ba can zhes bya ba ldog pa dang mi ldan pa'i rjes su 'gro ba can zhes bya ba'i rtags ni 'ga' yang med do//gzhan yang gzhal bar bya ba nyid rjes su 'gro ba nyid ces bya ba nyi tshe ma yin par zad kyi thun mong gi ma nges pa nyid kyang yin par bstan pa'i phyir/ gzhal bar bya ba nyid mi mthun pa'i phyogs la rjes su 'gro ba zhes bya ba 'dir yod pa'o//de ni mi rigs pa yang ma yin te zhes bya ba smos te/ gsum du brjod zin to zhes bya ba ni le'u gnyis par ro/ /rjes su 'gro ba med pa nyid kyi chos kyis stong pa zhes bya ba ni rjes su 'gro ba med par rnam par gcod pa'o//gal te rnam par gcod pa ni rnam par rtog pas byas pa ste/ dngos po'i ngo bo ni ma yin no zhe na/ dngos po'i mtshan nyid kho na chos yin pa ni ma yin te 'di ltar rang gi mtshan nyid 'dzin pa'i don gyis chos nyid yin na ni dngos po yang yin na/yid kyis gzhan la brten te brtags pa yang chos nyid yin pa'i phyir rnam par gcad pa dag kyang chos zhes bya ba ste/ ldog pa'i bye brag gi chos rnams de lta bu de'i phyir yod pa la brten nas/ de la ltos te rnam par gcad pa tsam yang yin la rang gi mtshan nyid 'dzin pa'am/gzhan la brtan par snang ba'i phyir chos zhes bya'o/ /de nyid bshad pa'i phyir med pa yang rnam pa 'ga' zhig gi tha snyad kyi lam du sbyor ba'i phyir zhes bya ba smos te/ sngar bshad pa'i tshul gyis rnam par gcad pa'i mtshan nyid 'dzin pa dang / yid la snang bas tha snyad du nges pa'i phyir ro//gzhan du na zhes bya ba med pa la sgra'i yul chos su mi sbyor na'o/ /de la tha snyad du mi bya bar yang mi 'gyur ro zhes bya ba ni med pa la med par rtogs pa'i sgra dang shes pas mi gcod par 'gyur ro/ de ltar na yod pa'i chos kyi tha snyad kyang yod par mi 'gyur te/de'i dngos po med par ma bsal bar de'i ngo bo nges par mi nus pa'i phyir ro/ /gnyi ga dang gnyi ga ma yin pa'i zhes bya ba ni med pa la med par gnyi ga dang / de gnyi ga ma yin pa'i rnam par gzhag pa dag grub par byed pa ste/ tshad mas ma nges na'o/ /yod par 'dod pa'i grub mtha' la sogs pa'i so sor mi mthun par smra ba dang ldan pa dag de'i grub mtha' dang ldan pa dang ldan pa de ma yin pa dag gcig tu bye brag byed par nges par gzung bar mi 'gyur te/'di ltar med pa shes pas yul du ma byas na yod pa yang mi nges pa'i phyir dang / de grub pa'i mtha' med par ma nges na de'i grub pa'i mtha' dang ldan pa yang nges par mi nus pa'i phyir/grub pa'i mtha'i dbye ba dag nges par bzung ba ste/ tha snyad du byed par mi 'gyur ro/ /gzhung lugs tha dad pa'i tha snyad kyang med par nus pa de'i phyir gang ltar ji ltar yang rung zhes bya ba ni ma yin par dgag pa'am med par yang rung /yod pa las bzlog pa tsam yod pa'i chos kyi bye brag rtogs kyang rung / sgra dang nges pa'i shes pa 'dis med par byed pa na'o/ /med pa de nyid gzhal bar bya ba zhes bya'o/ /de'i phyir gtan med pa la yang gzhal bar bya ba nyid rjes su 'gro ba'o//gal te sgra dang rtogs par rang dga'i yul ni dngos po med pa'i phyir gzhal bar bya bar mi 'gyur ro/ /de'i phyir gzhal ba ni med pa la mi 'jug gi tshad ma'i yul kho na la gzhal bar bya ba yin la de ni dngos por yod pa ste/ mi slu ba can yin pa'i phyir ro zhe na/tshad ma'i yul zhes bya ba la sogs pa smos so/ /gal te med pa tshad ma'i yul yin na de ni cung zad kyang med pa'i phyir mi slu bar mi 'gyur ro zhe na/ tshad ma'i mtshan nyid ni zhes bya ba la sogs pa smos so/ /rang gi yul la gzhan gyis mi gnod pa ste zhes bya ba ni tshad ma rang gi yod pa'am/med par gnyi ga'am/ gnyi ga ma yin par gzhag pa la tshad mas gzhan gyis mi gnod pa ste/ de dang tshad ma slu bar mi byed pa yin no/ /slu bar mi byed pa de ni med par 'jog pa 'di'i tshad ma'i mtshan nyid la yod pa'i phyir med pa gzhal bar bya ba nyid du grub po//gal te med pa 'ga' yang med de zhes bya ba thams cad kyang rtag par yod pa nyid de zhig pa dang ma skyes pa dag kyang ngo bo'i rang bzhin du mi gsal bar gnas pa'i phyir ro/ /'gro ba thams cad ji ltar yang ste gsal ba'am mi gsal ba ji ltar yang yod pa'i phyir/gzhal bar bya ba'i yod pa kho na la 'jug go zhe na/ gang ltar de yod pa ma yin pa'i rnam pa ste/ gsal ba na sngar mi gsal ba yod pa'i rnam pa de ltar yod pa ma yin pa de nyid la mi gsal ba med pa zhes bya zhing / zhig pa na yang mi gsal bar grub pas gsal ba'i rnam pa de med pa nyid la med pa zhes bya'o//yang gang dag ri bong rwa med ces smra ba la/ ri bong yang yod pa lang la sogs pa'i rwa dag kyang yod pa'i phyir/ ri bong rwa med ces smra ba ni bzhad gang du byed pa de ni bdag nyid la bzhad gad du byed pa yin ste/de ltar ri bong gi rwa zhes bya ba la sogs pa smos te 'dir ri bong gi yan lag tu gyur pa'i rwa 'gog gi ba lang la sogs pa'i rwa tsam thams cad med par ni mi smra ba la'o/ /ci zhes bya ba ni dri ba ste/ 'brel pa kho na med par bye brag tu byed la rwa can zhes bya ba la yang rwa dang ba lang la sogs pa'i rdzas bor nas 'brel ba zhig yod do zhes 'brel pa tsam yod par bye brag tu byed kyi rwa la sogs pa la mi ltos sam zhes bya ba'o//rwa dang rdzas kyi rang bzhin yang rgyu ba lang gi rdzas dang 'bras bu'i rang bzhin so sor tha dad pa grub pa'i phyir tha dad pa rgyu dang 'bras bur gnas pa de nyid 'brel pa yin pa de'i phyir/cis na ri bong gi rwa med ces bya ba 'di la ri bong gi rdzas rwa dag la rgyu dang 'bras bu'i rang bzhin med do zhes smras pa yin/ rgyu cis na rdzas rwa dag bor te 'brel pa nyi tshe med ces brjod par bya'o zhes bya ba la brten te gal te rwa can ba lang dag dang de'i rwa dang rang bzhin mi 'dra ba'i bye brag yod la/ri bong rwa la ni ba lang dang rwa'i bye brag de lta bu rang bzhin cung zad kyang med de ri bong ni rdzas las gzhan ba lang ltar med do zhe na/gang zhig 'brel pa med do zhes bya bar 'dod pa yang / rang bzhin bye brag can rgyu dang 'bras bus 'brel pa de nyid med par 'dod pa yin no/ /gal te 'brel pa med do zhes brjod par mi bya ste/ 'di ltar 'brel pa can ri bong gi rdzas nyid yod kyi 'brel pa can rwa ni med pa'i phyir gnyis mi srid pa la 'brel zhes bya ba dgag par bya ba mi srid pas dgag pa 'brel med ces kyang mi brjod do zhe na/mkhas pa'i tshig rigs pa dang ldan no zhes bya ba ni rdzas gnyis med pa de nyid 'brel pa yin la de la 'brel pa med ces brjod du mi rung bar yang smra bas bsgrub pas 'brel pa med pa yang yin la 'brel pa med pa nyid du gzhag par 'dod pas so//'o na ni med pa la ci zhig dgag ce na/ 'brel pa brtags pas khas blangs pa de bkag pa med pa'i phyir ro/ /gal te khas blangs pa'i 'brel pa dang /'brel pa can gyi rdzas kyang med de ma 'brel pa'i ri bong gi rdzas gzhan 'ga' zhig go zhe na/ kho bo 'dod pa nye bar gzhag pa yin te/ 'di ltar rwa dang 'brel pa'i ri bong med ces pa'i phyir ro/ /pha rol zhes bya ba ni sgrub pa'i mtha' mdzad pa'o//phan tshun 'gal bar 'grub cing rang gi bsgrub par bya ba la mi 'khrul pa can gyi rtags gnyis chos can gcig la dus gcig tu 'jug pa'i 'gal ba mi 'khrul ba can no/ /'gal ba mi 'khrul ba nyid srid pa med pa la zhes bya ba ni med na mi 'byung ba dang 'gal ba sgrub pa'i gtan tshigs kyis zla dag tu 'gal ba'i phyir ro//gal te 'bras bu dang rang bzhin dang mi dmigs pa las gzhan pa srid do zhe na/ mi 'khrul ba can gzhan ni mi srid do zhes bya ba smos te/ 'dir rang gis bsgrub par bya ba la mi 'khrul ba can ni 'dod pa de ni rtags gsum pa gzhan 'ga' yang med pa'i phyir dngos pos zhugs pa'i rtags la 'dir mi srid do//'o na gang la 'di srid ce na/ rang bzhin phyin ci log tu nye bar ston pa'i phyir de phan tshun 'gal bas khyab pa'i chos gnyis nye bar sbyor bar byed pa srid pa'i phyir ro//de ltar na lung la brten te lung gi don de dpyad pa dag la 'gal ba dang / rang gis bsgrub par bya ba la yang mi 'khrul te lung gis tshul gsum sgrub pa nyid du stobs mtshungs pa'i phyir/ gang gis kyang sun dbyung bas gnod pa ni mi nus kyi 'on kyang phan tshun the tshom du byed pa'i phyir gags dag byed pa'o//thams cad du song ba zhes bya ba ni ba lang nyid kyi ming ni rang gi rten ba lang dag dang des stong pa'i yul nam mkha'i phyogs la sogs pa thams cad du yod pa'o zhes bya bar sgrub pa'o/ /gtan tshigs ni rang dang 'brel pa can yul thams cad na gnas pa dag dang cig car du mngon par 'brel pa'i phyir zhes bya ba ste/spyi ba lang nyid dang 'brel pa can ba lang gi gsal ba khra bo dang 'phel rgyud phyogs thams cad na yod pa dag dang / cig car du mngon par 'brel pa zhes pa ba lang gi gsal ba gcig la yod pa'i ba lang gi gsal ba dag kyang spyi ma bcad par 'brel pa ste/spyi ba lang nyid ni gcig pa cha shas gzhan dang phan tshun g.yo ba dang bral ba yin pa'i phyir ro/ /de'i phyir gsal bas stong pa dag na yang spyi yod do/ /de ltar na ma yin na dum bur gyur pas gcig nyid nyams la gal te gcig po 'gro bas rim gyis gsal ba rnams dang 'brel pa ni g.yo ba'i bya ba can du yang 'gyur la cig car 'brel par yang mi 'gyur ro//de nyid bshad pa'i phyir de dang 'brel pa can gyi rang bzhin tsam dang zhes bya ba smos te/ba lang gi gsal ba gcig dang 'brel pa can rang bzhin tsam ste/ de la tha dad med de gcig nyid yin pa'i phyir ro/ /rang bzhin de kho na dang yul dang rdzas so sor nges pa'i gsal ba thams cad rjes su 'brel pa'i gsal ba de thams cad kyi yul na spyi de nyid gnas pa yang yin te/de'i phyir bar dag na yod par 'dod pa'o/ /de las zlog na ni gang zhig gang na med pa de ni zhes bya ba smos te/ de gsal ba'i bar rnams na med na ni gsal ba ltar yul dang rdzas dang nges pa'i phyir gsal ba de'i yul na gsal ba gcig la yod pa'i bdag nyid kyis khyab pa ma yin te/dper na gsal ba dag bzhin no zhes zer ro/ /cig shos na re gal te nam mkha'i yul de bar snang na bum pa'i gzugs nyid kyi spyi bo yod pa ma yin yang bum pa'i gsal ba yul thams cad na gnas pa dag gi yul na gzugs nyid kyis khyab pa can ma yin nam/sogs pas ni ut+pal sngon po dri nyid kyi spyi yang bar na yod pa min yang ut+pal sngon po'i gsal ba yul thams cad la gnas pa dag gi yul na bdag nyid kyis khyab pa ma yin nam zhes bya bas de'i yul na bdag nyid kyis khyab par byed pa nyid bar na med pa nyid la 'jug pas ma nges pa smra'o//cig shos lan sbyin pa ni yang dag par sbyor ba dang 'du ba'i dag las zhes bya ba smra ste/ de la yang dag par sbyor ba ni nam mkha'i zhes bya ba phyogs can dang phyogs bum pa la sogs pa tha dad pa dag 'brel par 'dod pa'o//'du bas ni bum pa dang bum pa nyid bdag nyid cig car 'brel ba'o/ /des na bum pa'i gzugs nyid dang ut+pala'i dri nyid gcig yin yang 'brel pa'i stobs kyis gsal ba thams cad 'brel pa dag smra ba ni bstan bcos te/ drang srong gzegs can gyis bshad pa'i lung yin no//de lta na ni gzugs nyid gcig gis gsal ba'i bar na med kyang 'du ba'i stobs kyis gsal ba mtha' dag dang 'brel par 'gyur mod kyi bstan bcos las blangs pa bzhag ste/ 'jig rten pa'i phyogs la bstan nas zhes bya ba mthong ba'i tshad ma la brten te dpyod pa'o//gal te 'jig rten pa'i phyogs la brten na ji lta bu zhe na/ rnam par bcad pa dang rnam par ma bcad pa sna'i rnam par shes pa skye ba'i mtshan nyid du smras te zhes bya ba smra ste 'brel pa can dang 'brel pa dag chad par snang ba dang ma chad par snang ba dag gis tha dad pa dang tha mi dad pa'i 'brel par brjod do//tha dad pa dang tha mi dad par 'brel ba grub pa dag la go rims bzhin du yang dag par sbyor ba dang 'du ba dag gis 'brel par brjod pa'o/ /de ltar lung las bstan pa bzhag ste/ rigs pas 'ongs pa bcad pa des na spyi 'di rang gsal ba gcig la yod pa tsam de dang gsal ba gzhan mtha' dag dang 'brel pa can yin pa'i phyir bar rnams la yang gnas pa ni bsgrub par bya ba'o//de dang 'brel pa'i phyir zhes bya ba ni don tsam ste/ cig car cha shas med par 'brel pa'i phyir ro/ /gal te zhes bya ba gang dag kha cig ces bya ba'i don to//gang gi rten la khyab par grub na zhes bya ba ni gsal ba'i bar na med par 'dod pa'o/ /des kyang de'i yul na gnas pa zhes bya ba gsal ba gcig gi yul na gnas pa'i spyi de nyid gzhan de dag gi yul na yang gnas par ci ste mi 'dod de/ de de ltar 'dod pa nyid ma yin nam/de ltar 'dod na ni gsal ba'i bar na yang yod par khas blangs pa yin te/ spyi gcig nyid yin pa'i phyir dang g.yo ba yang med pas so/ /gal te spyi gsal ba gcig la 'brel nas yang yul gzhan na gnas pa dag dang rim gyis 'brel to zhe na/ bya ba med pas zhes bya ba smos te/phan tshun g.yo ba'i bya ba med pa'i phyir rim gyis mi srid do/ /gal te gsal ba gcig dang 'brel pa de g.yo ba med na ni gsal ba nyid la 'brel gyi bar na med pa'i phyir/ gsal ba med pa'i yul gzhan du sngon ma byung ba'i ba lang gi gsal ba'i dngos po skyes pa na spyi de sngar de na med pa'i phyir dang der 'gro ba yang med pa'i phyir gsal ba de dang spyir 'brel par mi rigs pa'i phyir de ba lang nyid du mi 'grub pa'i phyir ro//spyi rang gi rang bzhin gcig dang gsal ba thams cad 'brel pa ni bar na yod pa med na mi 'byung ba'o/ /nyi ma'i 'od kyis zhes bya ba gcig gis mang po dang 'brel pa ni bar stong pa dag na yang yod pas khyab pa'i yul bstan pa'o//dmigs pa'i rig byar gyur ba la zhes bya ba ni spyi ni dbang pos gzung bar 'dod pas so/ /mngon par gsal ba'o zhes bya ba ni mngon sum du gyur pa'o/ / gal te gsal ba yod pa'i yul na ni gsal ba de'i bar na ni mi gsal lo zhe na/ tha mi dad pa'i phyir zhes bya ba smos te spyi de ni gcig nyid yin pa'i phyir ro/ /gcig la gsal ba ltar zhes bya ba ba lang la gsal ba ltar ba lang de'i bar dag na yang gsal bar 'gyur te mi gsal bas stong pa ste/gsal ba gcig pu yin pa'i phyir ro/ /gal te bsgribs pa'am gnas thag ring ba'i phyir mi gsal lo zhe na/ gcig nyid yin pa de'i phyir bsgribs pa yang ma yin la zhes bya ba ni bsgribs pas kyang mi gsal bar mi rung ste/ mi gsal ba stong pa'i phyir ro/ /gnas thag ring ba bas kyang bar du mi gsal bar mi rigs te snga ma bzhin no//gal te bar na yod pa la mthong ba'i rgyu med do zhe na/ mthong ba'i bdag nyid kyang dbang po dang rang gi rten gsal bar 'brel pa ste/ des spyi gsal bar byed pa'o/ /de ni spyi gcig pa nyid yin pa na yod pa 'di la yang yod de spyi tha dad pa med pa nyid kyi phyir rten 'du ba can te/'du ba ma 'brel pa yang ma yin pa ste bar na gnas pa ma 'brel la gsal ba gnas pa 'brel pa ni gcig nyid du mi 'gyur ro/ /gal te spyi'i yul na gnas pa'i gsal ba dang / dbang po'i sbyor ba la mi gsal ba ltos na/ spyi de rten dang yul mtshungs pa ni mthong ba bar na gnas pa yul mi mtshungs pa ni mi mthong bas na rten dang mtshungs pa dang mi mtshungs par 'gyur ro//'gal ba yang brjod pa yin no zhes bya ba ni yul mtshungs pa dang mi mtshungs pa spyi gcig la 'gal ba 'ba' zhig tu ma zad pa gcig la the tshom skyed par byed do zhes bya bar spyi gcig par na gnas pa dang /mi gnas par the tshom skyed par byed do/ /'gal ba'i chos dang 'brel pa can nyid gnyis zhes bya ba ni 'gal bas khyab pa nges pa'i chos gnyis so/ /de yang 'dir ni rang gi ngo bo tsam dang cig car mtha' dag 'brel pa dang dbang pos gzung bar bya ba dag go/ /gcig la de dag med do zhes bya ba ni chos can gcig la 'gal ba mi 'khrul pa'i rtags kyi dngos pos 'jug pa med pa'o//gal te de ltar na slob dpon phyogs kyi glang pos byas pa'i phyir zhes bya ba dngos po'i stobs kyis zhugs pa las 'gal ba mi 'khrul pa can bstan pa ji lta bu zhe na/ slob dpon gyis ni zhes bya ba la sogs pa smos so//phyogs tsam zhes bya ba ni dngos po'i stobs kyis zhugs pa'o zhes bya bar ma byas par gnyi ga yang lung las grags par mtshungs pa tsam du dgongs nas gsungs pa'o/ /'dir gzhan dag ni slob dpon phyogs kyi glang pos dgongs pa 'di ltar 'dren te slob dpon gyis dper brjod pa ni legs par rdzogs pa yin te/bya ba nyid gtan tshigs yin la sgra nyid 'gal ba mi 'khrul pa can zhes bya ba gtan tshigs ltar snang ba nyid yin par ston par bzhed pas so zhes zer ro/ /sgra nyid ces bya ba sgra spyi'i gsal ba las ldog pa can de tha dad pa dang / spyi de nyid dbang pos rtogs par bya ba dang /de nyid rtags de gsum po 'di dag ni bye brag pa dang dpyod pa 'di'i tshad ma ma yin pas 'jug ste khas len pa'o/ /gal te byas pa nyid bye brag pa'i lung las grags pa yin pa'i phyir/ gnyi ga mtshungs pa'i phyir 'gal ba mi 'khrul pa can yin no zhe na/byas pa'i gnas skabs kyang zhes bya ba ni byas pa'i rang bzhin ni lung la mi brten te/ lung med pa dag gis kyang tshad mas rtogs pa'i phyir lung las bkod pa ma yin no/ /de'i phyir mtshungs pa ma yin no/ /gal te sgra nyid kyang dngos po ste gzung bar bya ba yin no zhe na/ bsgrub par bya ba yang 'brel pa las yin na zhes bya ba smos te/mnyan par bya ba nyid ces bya ba sgra nyid tshad mas grub tu chug na yang rtag pa dang 'brel pa ni nam yang grub pa med de/ de dmigs pa'i phyir dang / rtag pa la rjes su 'gro ba dang ldog pa nges pa yang med de brtags par ldog pa med pa la ldog pa mi srid la de med na rjes su 'gro ba yang mi 'grub pa'i phyir ro//de ltar gzhan gyi don gyi rjes su dpag pa'i mtshan nyid kyi rab tu byed pa dang / dam bca' ba dang gtan tshigs dag bstan nas/ da ni dpe'i rab tu byed pa bstan pa'i phyir/ gtan tshigs mtshan nyid gsum nyid phyir/ / zhes bya ba la sogs pa smos te/ gtan tshigs ni bsgrub par bya ba rtogs pa'i rgyu'o/ /de tsam gyis rjes su dpag pa skyed nus pa'i phyir ro/ /dpe dag logs shig mi brjod do/ /'di ltar dpe ni gtan tshigs kyi khongs su 'dus pa yin gyi rtags logs shig tu sgrub par byed pa ni ma yin no//de tsam gyis don rtogs pa'i phyir zhes bya ba ni bsgrub par bya ba rtogs pa de rjes su dpag pa skye ba'o/ /gal te dpe logs shig tu sgrub par byed pa ma yin pas dpe'i mtshan nyid shes par bya ba'i phyir ci ste mi bstan zhe na/ don rtogs pa'i phyir ro zhes bya ba ni gtan tshigs kyi mtshan nyid bstan pa de nyid kyis dpe'i mtshan nyid kyang rtogs par nus pa'i phyir te/'di ltar gtan tshigs kyi mtshan nyid ni/ bye brag med par zhes bya ba de las byung ba dang de'i bdag nyid kyis 'brel pas ma phye bar ro/ /gzhan du na zhes bya ba ni dpe bstan pa las gzhan du spyi'i mtshan nyid mthun pa'i phyogs la yod pa dang / mi mthun pa'i phyogs la med pa dang /de'i 'bras bu nyid du nges pa'am/ rang bzhin gyis khyab pa dag bstan par mi nus te/ 'di ltar tshang bang la sogs pa rgyu dang 'bras bu gnyis ka dmigs na 'brel pa 'dzin pa de nyid kyi rjes su 'gro bar go bar 'gyur ro/ /'brel pa la sogs gnyi ga med na ldog par rtogs par 'gyur ro//'di yang zhes bya ba ni gtan tshigs kyi mtshan nyid bstan pa 'di yang rjes su 'gro ba dang ldog pa'i don bstan pa na ste/ tshang bang dang gzhan lta bu'i zhes bya ba la sogs pa ni dpe'i mtshan nyid bstan pa yin te/ dpe'i mtshan nyid rjes su 'gro ba la tshang bang lta bu'o zhes bsgrub par bya ba dang / sgrub par byed pa gnyi ga nges par brjod pa dang 'brel pa la sogs pa la gnyi ga med par nges par bstan pa de tsam du zad pas so//de dag gis dpe'i skyon rnams kyang gsal ba yin te zhes bya ba ni dpe'i mtshan nyid mthun pa'i dpe ni bsgrub par bya ba dang sgrub par byed pa gnyi ga yod par nges shing cig shos ni gnyi ga med par nges par rjes su 'gro ba dang /ldog pa nges pa can du bstan pa nyid kyis mthun pa'i dpe la ma tshang ngam ma nges sam/ rjes su 'gro ba ma tshang na dpe ma yin no zhes don gyis rtogs te dpe don mi byed pa'i phyir ro/ /cig shos kyang gnyi ga med par ma gyur tam ma nges sam/ ldog pa med dam/ ma bstan na dpe ltar snang ba'o zhes rtogs te rang gi don mi nus pa'i phyir ro//de'i tshul la reg min nyid 'gyur zhes bya ba ni gtan tshigs kyi tshul phyogs kyi chos dang 'brel pa'o/ /de la ma reg pa ni de'i rang bzhin mi ldan pa'o/ /de lta bu'i shes par 'dod pa'i chos dang bsgrub par bya ba dag dang ma 'brel phyir na don med pa'o//gal te chos can bsgrub par bya ba dag dang 'brel na ni/ gtan tshigs kyi rang bzhin yin pa'i phyir/ dpe zhes ming tsam la dgag pa med do/ /gal te rang bzhin de dag mi ldan na ni sgrub par byed pa'i don med do/ /chos can dang ma 'brel par bsgrub par bya ba dang / ma 'brel bas ni 'dod pa rtogs pa med de ha cang thal bar 'gyur ba'i phyir ro//gal te khyod ci ltar na yang dpe'i phyogs kyi chos ston pa ni ma yin nam zhe na/ bden te 'di phyogs dang ma 'brel/ /zhes smos pa ni de'i gtan tshigs las logs shig tu sgrub par byed par 'gyur ba dgag pa'i phyir te/ gtan tshigs kyi mtshan nyid gsum dang bral ba la sgrub par byed pa mi srid do zhes bstan pa'i don du'o//dpe gtan tshigs las logs shig tu sgrub par byed pa ma yin te/ de ni gtan tshigs kyi mtshan nyid shes par bya ba'i yan lag yin la/ gtan tshigs kyi mtshan nyid rtogs pas ni bsgrub par bya ba khong du chud pa'i phyir ro//gzhan du gal te gtan tshigs kyi mi 'khrul pa'i chos nyid rjes su 'gro ba dang / log pa dag dang 'brel pa gnyis dpe yis rab tu mi ston na/ bsgrub par bya ba bsgrubs pas dpe des ci zhig phan par byed de/ 'di ltar dpe de chos can dang ma 'brel pa'i phyir tshang bang du mthong ba'i du ba'i rgya mtshor me bzhin no//gal te nye bar 'jal ba'i tshad ma ni dpe yin te/ 'di ltar ba men ma rtogs pa la rtags sbyar ba med par ba men ba lang 'dra ba'o zhes bstan pa ni ba men gyi rnam pa rtogs pa'o zhe na/ de la yang ba men rtogs pa ni med kyi ba lang gi rang bzhin can gyi rnam pa 'ba' zhig go/ /gal te rwa can la sogs pa rnam pa 'dra ba'i phyir rtogs so zhe na/'ga' zhig gi 'dra ba tsam gyis bdag nyid gzhan ba lang las tha dad pa'i chos kyang / so sor nges par nye bar 'jal bas bsgrub par 'gyur ba med do/ /'di ltar don rnams la tshul gang dag kyang cung zad dam mang ba ji ltar mi 'dra ba ni med de bum pa dang /ba men du yang gzugs nyid dang / /shes bya nyid la sogs pa 'dra ba'i phyir/ /des ba men nye bar 'jal bar 'gyur ro/ /gal te cung zad 'dra bas bdag nyid thams cad mtshungs par rtogs na ni/ sna tshogs thams cad kyi bdag nyid du 'gyur te/ cung zad mi 'dra ba ni med pa'i phyir ro/ / gal te de lta yin no zhe na/ de yang rigs pa ma yin te/ mngon sum la sogs pas gnod pa'i phyir ro/ /'dra ba tsam thams cad ni sgrub par byed pa'i yan lag ma yin te/ de'i phyir bsgrub par bya ba des mngon par khyab pa ste nges pa yod pa'i khyab par bya ba'i chos kyi 'brel pa ste/ khyab par byed pa la rag las pa'i dngos po de dang ldan pa ste/rang bzhin de dang gtan tshigs dang ldan par dpes rab tu ston pa'i phyir/ khyab pa rab tu ston pa'i 'dra ba dpe zhes bya ba de kho na sgrub pa'i yan lag ste/ de yang gtan tshigs kyi mtshan nyid rtogs pa'i yan lag gi tshul gyis brgyud pas sgrub par byed par brjod kyi dpe dngos su bsgrub par bya ba'i rtogs pa ni med do//des na dpe 'di mngon par sgrub par byed pa rang rgyud pa ma yin te/ de ma 'brel pa na zhes bya ba dpe de chos can la ma 'brel na ste 'brel pa ma yin pas don med pa can yin no/ /yang na gtan tshigs de dpes 'brel pa ma bstan dpe nyid kyis bsgrub par bya ba kho na bsgrub par mi nus pa'i phyir don med pa can yin no//gal te gtan tshigs de 'brel pa bsgrub na ni/ de nyid kyis phyogs rtogs pa'i phyir dpe logs shig tu don byed pa med pa can yin no/ /rtogs pa'i tshig gi don brgyad de mngon sum dang der snang ba la sogs pa'o/ /de yang le'u dang pos ni mngon sum dang mngon sum ltar snang ba gnyis bstan to//gnyis pas ni rjes su dpag pa dang / der snang ba gnyis so/ /gsum pas ni sgrub pa dang / der snang ba dang / sun 'byin pa ngo bo dang / der snang ba dag bstan pa las drug bshad zin pas/ da ni sun 'byin pa der snang ba dag bshad par bzhed nas/ ma tshang ba la sogs pa brjod pa sun 'byin pa zhes bya ba la sogs pa gsungs so//ma tshang ba la sogs pa zhes bya ba ni ma grub pa dang / ma nges pa dang / 'gal ba dag gi dbye ba rgyas par bstan pa rnams so/ /de dag rjod par byed pa ni zhes bya ba ni rgol ba gang sgrub pa ma tshang ba la sogs pa smra ba des/ smra ba na phyir rgol bas de kho na ltar phyir rjod par byed pa ste/ma tshang ba la ma tshang ba zhes bya ba la sogs pa phyin ci ma log par brjod na/ phyir rgol gyis brjod pa de dag ni sun 'byin pa zhes bya ste/ tshig des ni pha rol de rgol ba'i 'dod pa'i don grub pa la gegs byed pa'i nus pa'i phyir/ gal te skyon ma brjod kyang zhes bya ba la sogs pas ni brjod par 'dod pa grub pa la gegs byed do zhes brjod pa de ni mi rigs te/ don de nyid ma tshang ba la sogs par gnas pas mi nus pa yin gyi/ brjod pas mi nus par mi byed snyam pa'i klan ka'o/ /skyes bu'i nus pa grub po zhes bya ba ni log par rtogs pa can dang /yang dag pa'i shes pa can nyid kyis skyes bu'i bye brag gis rang gi 'dod pa grub par mi nus pa dang / gzhan dgag par 'dod pa nus pa'i phyir/ rtsod pa 'phen pa dang / rgyal ba'i bye brag ni brjod pas grub ste/ sgrub pa sun 'byin pa dag gis pham pa dang / rgyal ba dag gi nus de yang brjod pa las gzhan gyis mi 'grub pa'i phyir brjod pa ni sun 'byin pa zhes bya ste/de yang skyon de lta bur rjod par byed pa ste/ ma tshang ba la sogs pa'i sgrub pa smras zin pa ni phyir rgol bas kyang ma tshang ba la sogs pa nyid skyon brjod zin pa'i phyir/ yang rgol bas yongs su rdzogs par smra ba la sogs pa ste/gzhan du bsgrub pa la sogs pas legs par 'jog par byed na/ phyir rgol bas skyon brjod pas des rgol ba'i 'dod pa phyi ma'i gags mi byed pa'i phyir ro/ /sgrub par byed pa gzhan yin pa'i phyir ro zhes bya ba ste/ snga ma'i mtshan nyid yin na de grub par byed pa gzhan yin pa'i phyir/snga ma'i gags byed pa'i phyir/ sun 'byin pa nyid yin no/ /phyogs snga ma smra bar 'dod pa dang bcas par gyur na zhes bya ba ni/ tshang bar 'dod pa la sogs pas smra ba'i bsam pa rdzogs pa'i phyir smra bar 'dod pa dang bcas par gyur na ni/ bar der ma tshang ba la sogs pa skyon brjod kyang skabs ma yin pa'i phyir sun 'byin pa ma yin no//ngag gnas par gyur pa na zhes bya ba ni phyogs snga ma smra ba ni brjod par 'dod pa rdzogs par gyur na'o/ /de lta bas na khyed smra ba yongs su rdzogs sam zhes dris te/ rdzogs so zhe na sun 'byin par brjod par bya'o/ /gzhan du na sun 'byin pa ltar snang bar 'gyur ro//de nyid kyi phyir ngag gnas par gyur pa na de la skyon brjod pa ni de grub par bya ba la sun 'byin pa nyid do zhes gsungs te/ /gzhan du ni ma yin te/ de nyid der snang ba ste sun 'byin pa'i gnas su sbyar la sun mi phyin pa'i phyir ro/ /der snang ba ni ltag chod de sun 'byin pa'i gnas su smra ba sun 'byin par mi nus pa ste nyes pa ma yin pa brjod pa'o//de'i phyir/ nyes pa nye bar brjod min pa/ /zhes bya ba gsungs so/ /gal te ltag chod kyi rab tu byed pa ni grangs nges par thub pa rkang mig la sogs pas bstan na de 'dir ci'i phyir ma bstan zhe na/ log pa'i lam la mtha' med nyid//phyir na de 'dir spros mi bya/ /zhes bya ba smos so/ /mtha' med yang ci'i phyir zhe na/ log pa'i lam gyi rgyu tshul bzhin ma yin pa'i rnam par rtog pa dag la mtha' med de 'dod rgyal du 'jug pa'i phyir ro/ /ji skad smra ba'i mtshan nyid ces bya ba ni thub pa rkang mig gis smras pa'i mtshan nyid do//ltag chod de dag gi nang du yang mi 'du bas na gzhan yin no/ /'on te sun 'byin pa yin na yang lhag pa'i ltag chod tu mi 'gyur na de sun 'byin pa'i nang du yang mi 'du ste/ /'di ltar nyes pa nye bar mi brjod pa'i phyir ro/ /ji ltar zhe na/ bdag med ces bya ba sgra'i don rnam par rtog pa'i yul ni mi 'gog par de la skur pa mi 'debs kyi/'on kyang bdag khas len pa nyid kyang ma yin te/ rang gi mtshan nyid de'i phyir don du bdag med do zhes 'gog pa'i phyir med ces bya ba'i smra ba dang mi 'gal lo/ /gal te rnam par rtog pa la snang ba'i bdag sgra'i don ci'i phyir mi 'gog ce na/ de ni bsgrub par mi 'dod pa'i phyir bsgrub par bya ba'i don las phyi rol tu gyur pa yin pa'i phyogs kyi mtshan nyid kyis bstan zin to//de mi 'dod pa yang ci'i phyir zhe na/ rtog pa dang ldan pa dag ni phyi'i kho na la gtad nas bkag pa dang / bsgrub pa'i tha snyad dag byed de don byed pa dang 'brel pa'i phyir ro zhes le'u 'di nyid du bstan zin to//de'i blo la snang ba yod mod kyi de btang snyoms su byas nas/ des don byed pa med pa'i phyir ro/ /'dod pa dang ldan pa'i skyes bu ni ma ning gi gzugs la rtogs pa mi byed do zhes so/ /gal te gang yang rung ba'i shan tsam gyis zhes bya ba sun 'byin pa'i gnas su rjes su brjod pa la sogs pa cung zad tsam gyis ltag chod smra ba dag gi khongs su 'du na'o//mi mtshungs pa ste 'du bar mi 'dod pa ltag chod kyang cung zad 'dra ba'i phyir phan tshun 'du bar 'gyur la de lta na ni dbye ba nges par 'grub bo/ /de lta bas na spyi'i mtshan nyid sun 'byin pa ltar snang ba na ltag chod do zhes so//khyad par nang gi bye brag dag ni khongs su mi 'du ba'i phyir/ de log pa'i rtog pa sna tshogs pa'i phyir ro/ /spyi'i mtshan nyid de yang sun 'byin pa ltag chod do zhes snga ma ltar brjod par bya'o/ /gal te ltag chod kyi spyi'i mtshan nyid kyang ci'i phyir rgyas par mi bstan zhe na/ sgrub pa dang sun 'byin pa sngar rgyas par bstan pa'i mtshan nyid shes pa nyid kyis lan ltar snang ba'i mtshan nyid kyang bde blag tu rtogs pa'i phyir te/tshang bang la sogs pa yul yin pa la der brjod par zhugs pa la ni sun 'byin pa yin te/ rang gi yul la zhugs pa'i phyir ro/ /gal te skyon med pa'am yod kyang brjod pa ma yin pa ltag chod kyi yul ma yin pa ste/de la sun 'byin pa mi 'jug pa'i phyir ro/ /de ni sun 'byin pa ltar snang ba'i phyir ro/ /de ltar yul la ma zhugs pa des ni rgol ba'i 'dod pa'i rtogs pa'i gegs mi byed pa'i phyir ro/ /sun 'byin pa ma yin te/ de'i mtshan nyid rtogs pa'i gags byed pas stong pa'i phyir ro/ / don 'di rigs phyir mdo ni yod pa'i lugs gzigs pa'i lung ni rnam par ma spangs pa zhes bya bar sbyar te/ bdag gi slob dpon phyogs kyi glang po'i lugs ma spangs par te lung dang mthun par gzhung 'dir bshad do zhes bya ba'i don to/ /de ltar na slob dpon gyi lung nyid bdag gis blangs kyi slob dpon gyi rnam par bshad pa byed pa dag la ni ltos pa med de/de dag mi rigs par smra ba'i phyir ro/ /de'i phyir mdo ni don yod lugs zhes bya ba gzhan dag gis bshad pa'i 'grel pa dag ni mdo ma yin no/ /de'i phyir slob dpon gyi lung kho na blangs te/ rigs pa dang ldan pa'i don ston pa'i phyir ro//don yod ces bya ba ni slob dpon gyi mdo don yod pa ste/ 'bras bu med pa cung zad kyang med ces bya ba'i tha tshig go/ /lugs ni de'i rigs pa'i gzhung lugs so/ /gzigs pa ni slob dpon phyogs kyi glang pos bdag gis rtogs par bya phyir zhes bya ba ni/ bdag nyid dang 'jig rten gzhan dag gis so//de'i phyir zhes bya ba ni mdo'i'o/ /dri med blo yis te/ slob dpon phyogs kyi glang po'i'o/ /de ltar na dri med blo yi mdo dgongs pa zhes bya bar sbyar ro/ /nges par 'di nyid yin te zhes bya bar sbyar te 'dir kho 'os bshad pa ltar ro/ /de ltar na rang dang gzhan gyi sde pa dag gis bshad pa ltar ni ma yin te/de dag ni rigs par smra la/ mdo'i don ni rigs dang ldan pa'i phyir dang / de yang slob dpon blo dri ma med pa'i phyir te/ gzhan dag gis bshad pa ltar yin na ni mdo yang rigs pa dang ldan par mi 'gyur la/ blo dri ma med par mi 'gyur te mi rigs pa'i don rjod par byed pa'i phyir ro/ /gal te khyed kho nas rigs pa rtogs par ji ltar zhe na/ma bsgoms blo can skye bos rtogs ma yin/ /zhes bya ba smos te/ rang dang gzhan gyi sde pa gang dag ma byangs pa'i blo can dag gis slob dpon dri ma med pa'i blo mnga' ba'i dgongs pa rtogs par mi nus kyi/ gang dag skye ba nas skye ba rnams su sbyangs pa'i skye bos rtogs pa yin no zhes bya bar bdag nyid ni skye ba dang /skye ba rnams su blo bsgoms pa dang ldan par ston to/ /de ltar slob dpon phyogs kyi glang po'i rab tu byed pa rnams kyi don gyi tshul dag phyin ci ma log par rtogs pa ni/ slob dpon gyi don rab tu byed pa nyid yin gyi bshad pa byed pa dag las ni ma yin no zhes bya bar ston to/ /de yang bdag nyid kyis shin tu yun ring por goms pa ched che bar byas pa'i stobs kyis zhes bya ba'i tha tshig go//rtog ge ngan pa'i stobs kyis rnam dag rigs pa'i bad ma 'di/ kha 'byed tshig bshad nyi zer dag gis rab tu gsal byas las/ /ston ka'i zla ba ltar dkar bdag gis thob des 'jig rten kun/ /snang byed ye shes dpal bzang bdag nyid thob pas dga' bar shog /tshad ma rnam par nges pa'i 'grel bshad las/ gzhan gyi don rjes su dpag pa'i le'u ste gsum pa'o// //tshad ma rnam par nges pa'i 'grel bshad mkhas pa'i grags pas rgya mtsho'i mthas klas par khyab pa/ slob dpon ye shes dpal bzang po'i zhal snga nas mdzad pa rdzogs so// //gnas brtan mkhas pa chen po dz+nyA na shrI b+ha dra dang //lo tsA ba dge slong chos kyi brtson 'grus kyis bsgyur/ khyung po mtshan bzhi khams zla hor phrug gis sbyin par bya ba'i chos rnams nye bar sbyar zhing gsol ba btab nas/ gzhung nye bar sbyar te brtsams nas bsgyur ba lags so// //