CLOSE WINDOW

D4224
བོད་ཡིག

@##// //rgya gar skad du/ pra mA Na bArti ka s+ya br-it+ti nA ma/ bod skad du/ tshad ma rnam 'grel gyi 'grel pa zhes bya ba/ bam po dang po/ bcom ldan 'das 'jam dpal ye shes sems dpa' la phyag 'tshal lo/ /srid pa'i gnas 'jug nga rgyal gyis byas 'bigs byed de nyid kyis khyab gang yin la//rab rib dbang gis mi bzad mun pa ltar 'jug pha rol lta ba 'di dag ni/ /'dod pas myos pa las rgyal ba zhes rab grags de kho na nyid snang ba can/ /'jig rten ma lus snang byed bdud rtsi'i bde ba des ni 'jig rten dag byed shog /de ltar 'phags pa'i bden pa bzhi la 'jug pa yin pa'i phyir rjes su dpag pa rnam par bzhag nas de nyid bstan par bya ba'i phyir le'u gnyis pas phyag 'tshal ba'i tshigs su bcad pa gsal bar bshad par mdzad do//'dir tshad ma'i mtshan nyid dang / bcom ldan 'das tshad mar gyur par bzhed nas/slob dpon gyis bstan bcos kyi dang por tshad mar gyur pa zhes pas bstod pa gsungs so/ /tshad mar gyur pa 'gro la phan mdzad bzhed/ /ston pa bde gshegs skyob la phyag 'tshal nas/ /rang gi gzhung lugs 'thor las 'dir gcig nyid/ /tshad ma grub pa kun las btus pa brtsam//zhes gsungs te/ 'dir yang snga ma phyed kyis ni rgyu dang 'bras bu phun sum tshogs pas tshad mar gyur pa'i bcom ldan 'das bstan par mdzad do/ /de la rgyu phun sum tshogs pa ni gnyis te/ snying rje dang / thabs so/ /de la snying rje ni 'gro la phan par bzhed ces bya bas bstan to//thabs goms par bya ba ni ston pa zhes bya bas so/ /'bras bu phun sum tshogs pa yang gnyis te/ rang gi don phun sum tshogs pa dang / gzhan gyi don phun sum tshogs pa'o/ /de la rang gi don phun sum tshogs pa ni bde gshegs zhes pas bstan te/ de la bde ba'i sgras ni don gsum nye bar 'dzin te/rab tu mdzes par gshegs pa dang / phyir mi ldog par gshegs pa dang / lhag ma med pa'i don du gshegs pa'i phyir/ gzugs bzang po dang / rims nad legs par byang ba dang / bum pa rab tu gang ba bzhin no/ /gzhan gyi don phun sum tshogs pa yang skyob pa zhes pas bstan te/yongs su mya ngan las ma 'das pa'i chos kyi skus 'gro ba thams cad yongs su skyob pa'o/ /de lta bur gang gyur pa de ni tshad mar 'khrungs pa zhes bya'o/ /'og ma phyed kyis ni dgos pa dang / bstan bcos kyi bsdus pa'i don bstan te/de la tshad ma grub pa zhes bya ba'i tshig gis dgos pa bstan to/ /lhag pas ni rang gi gzhung lugs bsdus pa'i rang bzhin du bstan to/ /de ltar tshigs su bcad pa'i don du gnas pa las kha cig rtsod par byed de/ tshad mar gyur pa'i bcom ldan 'das ci'i phyir sgrub par byed/'di ltar rig byed pa'am/ de las skyes pa'i shes pa la gnod pa dang bral ba'i phyir tshad ma yin te/ mngon sum dang / rjes su dpag pa bzhin no/ /gnod pa med pa'i shes pa ni tshad ma'o zhes gal te tshad ma'i mtshan nyid la rtsod pa de'i lan gdab par 'dod nas/rnam par 'grel pa mdzad pa thun mong gi mtshan nyid nye bar bstan pa'i phyir/ tshad ma slu med can shes pa/ /zhes bya ba smos te/ shes pa ni tshad ma ste/ de yod na yongs su gcod pa 'grub pa'i phyir dang / dbang po la sogs pa la de bzlog pa'i phyir ro/ /gang la slu ba med pa yod pa de'i shes pa yod pa de ni gdon mi za bar tshad ma ste/slu ba la de bzlog pa'i phyir ro/ /gzhan du na gal te dbang po la sogs pa tshad mar gyur na ni rab rib kyis bsgribs pa'i dbang po yang tshad mar thal bar 'gyur ro/ /rab rib la sogs pa'i nyes pas nyams pa'i phyir ji ltar tshad mar 'gyur zhe na/dbang po las 'das pa'i phyir mig rab rib dang bcas par ji ltar shes/ gal te slu bar byed pa'i shes pa skye bas skyon dang bcas par ston nges so zhes zer na/ de lta na 'o na ni slu bar byed pa dang bral bar mthong ba skyes pa nyid las rgyu dag par nges pa'i phyir slu ba med pa'i shes pa nyid tshad ma yin no//slu ba med pa smos pas kyang tshad ma'i mtshan nyid gzhan bzlog pa nyid yin no/ /de'i phyir blo rtogs pa'i bdag nyid du gyur pa ni tshad ma nyid du ji ltar 'gyur te/ gang gi phyir rtogs pa'i bdag nyid kho nar gyur pa tshad mar khas blangs pas zla ba gnyis su mthong ba tshad mar 'gyur ro//'on te gnod pa med pa'i rtogs pa tshad ma yin na gnod pa med pa'i shes pa nyid gang gi tshe mthong ba de'i skye ba'am/ 'on te dus gzhan du gnod pa med pa'i shes pa skye/ de'i tshe ni gnod pa dang bral ba nyid du ma grub pas tshad ma'i mtshan nyid du ji ltar 'gyur/ dus gzhan du yang gnod pa nyid du mi 'gyur ro zhes bya ba nges pa'i thabs yod pa ma yin no//gzhan yang phyogs dang po khas len na/ de'i tshe yang mig rab rib kyis nyams pas zla ba gnyis su mthong ba skyes pa'i tshe gnod pa med pa'i phyir/ zla ba gnyis su mthong ba'i shes pa tshad mar thal bar 'gyur ro/ / 'on te dus gzhan du gnod pa can mthong bas zla ba gnyis su mthong ba'i shes pa tshad mar mi 'gyur na de'i tshe yang thug pa med par 'gyur ro/ /'on te gnod pa can ni tshad ma yin pa'i phyir gzhan la mi ltos kyi log pa'i shes pa nyid ni gzhan gyis nges par 'gyur ba'i phyir tshad ma ma yin no zhe na/de ni ma yin te/ gnod pa can gyi tshad ma la gal te gnod pa med par nges na de'i tshe sngar gyi shes pa yang tshad ma ma yin par 'gyur gyi gzhan du ni ma yin no/ /'on te gnod pa can la gnod pa ma mthong bas tshad ma yin na ni yongs su shes pa tsam gyis kyang tshad mar mi 'gyur te/ 'o na ci zhe na gnod pa ma mthong ba'i phyir ro/ /de la gnod pa ma mthong ba tsam gyis kyang dus gzhan du gnod pa dang bral ba'o zhes bya bar nges pa yod pa ma yin no/ /'on te gnod pa can de la gnod pa yod na ni de'i tshe/ dang po nyid kyi shes pa yang tshad mar 'gyur na de ni rigs pa ma yin no/ / de la yang gal te gnod pa yod na ni gnod pa srid pa'i phyir tshad mar nges pa med do/ /'on te rgyu'i nyes pa zla ba gnyis su mthong ba'i shes pa tshad mar 'gyur ba la gnod na ni rab rib la sogs pa'i skyon yongs su shes pa yang slu ba nyid kyi shes par 'gyur ba'i phyir slu ba med pa dang / slu ba dang bcas pa dag nyid tshad ma dang /cig shos su rnam par gzhag par rigs te/ de'i phyir rtsod pa'i gzhir gyur pa'i shes pa ni tshad ma ma yin te slu ba med pa dang bral ba'i phyir bcom ldan 'das nyid tshad mar gyur pa'o zhes 'bad pas sgrub par byed do/ /'on te slu ba med pas shes pa snga ma tshad mar 'dod na slu ba med par shes pa nyid tshad ma yin nam tshad ma min/gal te tshad ma ma yin na/ ji ltar don byed par gnas 'on te tshad ma yin na ni de'i tshe de la yang slu ba med par shes pa gzhan dang ldan pas tshad ma thug pa med par 'gyur ro/ /gzhan yang gal te slu ba med pa'i shes pa tshad mar khas blangs pa de'i tshe rmi lam du mthong ba dang dung dkar po la ser por shes pa yang don bya ba byed nus pa'i phyir tshad mar 'gyur ro snyam du sems na/de'i phyir don byed pa ru gnas pa ni mi slu ba yin te zhes bya ba smos te/ don ni bsreg pa dang btso ba la sogs pa'o//byed pa ni sgrub pa ste/ gnas pa ni khong du chud pa'am mi 'gyur ba nyid la bya'o/ /'di snyam du gang la tha dad pa'i don byed pa de la ji srid du tshad ma dang 'brel pa'i phyir dang / gang du tha mi dad pa'i don byed pa yod pa de nyid ni shin tu yang tshad ma yin no/ / 'di ltar slu ba med pa'i shes pa skyes pa de'i tshe don byed par khong du chud par 'gyur ba de bas na de nyid la skyes bu'i don thams cad yongs su grub pa'i phyir de la yongs su brtag pas dgos pa med do snyam du dgongs so/ /'dis ni dang po'i shes pa slu ba med par shes pa la ltos pa ji lta ba de bzhin slu ba med pa'i shes pa la ltos pas so zhes zer ba de bsal ba yin no//don byed pa las mi 'gyur ba nyid do zhes bstan pas kyang rmi lam du mthong ba bsal ba yin te/ de la don byed pa las 'gyur ba'i phyir 'di ltar rmi lam na brtan pa ma yin pa dang / ldog pa nyid du 'gyur gyi sad pa'i shes pa la ni de las bzlog pa yin no//dung la ser por mthong ba nyid tshad ma ma yin te don bya ba byed pa dang bral ba'i phyir ro/ /dbyibs bsgrub par bya ba'i don bya ba byed par 'gyur ro zhe na/ de la rjes su dpag pa nyid tshad mar 'gyur te/ 'di ltar snang ba'i khyad par nyid ni de lta bur gyur pa'i dbyibs med na mi 'byung ba'i phyir dang /ser po sgrub pa'i don byed pa med pas mngon sum du ser po bzung ba la tshad ma ma yin no/ /yang na gal te gang gi tshe/ slu ba med pa'i shes pa tshad ma ma yin pa de'i tshe/ shes pa'i bdag nyid du gyur pa dang / slu ba med pa nyid rang gi ngo bo yongs su gcod pa'i dus su gcod pa'i phyir rab tu brtag par bya ba ma yin no zhes bya ba'am/ 'on te rang gi ngo bo yongs su mi gcod na/ de'i tshe shes pa rang rig par mi 'gyur ro zhes rtsod par 'gyur du 'ong ngo snyam nas/ don byed pa ru gnas pa ni mi slu ba yin te zhes bya ba smos so//des ni 'di skad du shes pa'i rang bzhin nyid la mi slu ba ma yin te don byed par khong du chud pa la mi slu ba yin no/ /mi slu ba dang 'brel pas slu ba med pa nyid do/ /rang gi ngo bo yongs su gcod pa'i tshe shes pa don byed par snang ba ni ma yin la nyams su ma myong na don byed pa de dang 'brel pa ni ma yin no snyam du dgongs so//de skad du yang 'bras bu mngon sum du ma gyur par rgyur nges pa med do zhes bshad do/ /gal te don byed par gnas pa la slu ba med pa de'i tshe sgra'i shes pa dang khra bo mthong ba ni tshad mar mi 'gyur te/ tha dad pa'i don byed pa med pa'i phyir mtshan nyid ma khyab pa'i skyon yod do snyam du sems na de'i phyir bsam pa rtogs par byed pas na sgra las byung ba'am zhes bya ba smos te/sgra ni sgra'i dngos po ste sgra las byung ba ni sgra'i yul can gyi shes pa zhes bya ba'i tha tshig go/ /'ang gi sgras ni khra bo la sogs pa mthong ba yang gzung ngo //de la bsam pa ni 'dod pa'o/ /rtogs pa ni khong du chud par byed pa'i phyir ro/ /'dir yang bsam pa'i yul gyis 'dod pa'i don ston pa'o/ /des ni 'di skad du sgra'i shes pa ni tha mi dad pa'i don byed pa dang phrad par byed pas tshad ma ste/ 'di ltar dbyangs thos pa nyid don byed par 'dod pa'o//khra bo la sogs pa mthong ba yang khong du chud pa'i don byed do/ /don byed par gnas pa khyad par med par gzung bas ni slu ba med pa zhes bstan pa yin no/ /de'i phyir 'dis ni/ thos pa'i blo ni tshad ma min/ /cig shos dang ni 'brel med phyir/ /zhes bya ba de bsal ba yin no//de lta mod kyi gang la tha dad pa'i don byed pa de la don byed pa'i yul can gyi shes pa ni gzhan gyi yul can gyi tshad mas ji ltar rnam par gzhag ce na/ der yang gzugs dang / reg pa dang tshogs pa gcig la rag las pa'i phyir de de nyid du mngon par zhen pa'o/ / gang du mthong ba 'dzin pa nyid kyi don byed pa der de'i 'bras bus phrad pa'i rang bzhin ni gcig tu zhen pa yin te tshad ma ni kun du tha snyad la ltos pa'o zhes 'og nas 'chad par 'gyur ro/ /gal te slu ba med pa tshad ma ma yin nam/ /sgra las byung ba'i shes pa ni tshad mar mi 'gyur te/ 'di ltar phyi rol gyi don de la mi slu ba med de 'brel pa med pa'i phyir ro/ /'on te bsam pa rtogs par byed pas sgra las byung ba tshad mar khas len gyi/ don la ma yin na de lta mod kyi bsam pa ni tha dad pa'am/ tha dad pa ma yin par don byed pa dang phrad par mi nus pa'i phyir ji ltar tshad ma yin/ de la yang slob dpon gyis sgra las byung ba ni tshad ma gzhan pa ma yin te/rjes su dpag par bya ba'i phyir ro zhes bya bas tshad ma nyid du smras so zhe na 'dir smras pa/ smra ba po yi byed pa'i yul/ /blo la snang ba'i don gang yin/ /de la sgra ni tshad yin gyi/ /don gyi de nyid rgyu can min/ /smra ba po'i byed pa bsam pa'i yul gyi don gang yin pa de'i sgra'i shes pa la gsal ba ni rab tu snang ba ste/sgra ni mngon par 'dod pa'i don de nyid la tshad ma yin gyi don gyi de kho na nyid kyi rgyu can ni ma yin no/ /'di'i don ni phyi rol gyi don la sgra tshad mar khas len pa ni ma yin gyi 'on kyang bsam pa la ste smra ba po'i rigs pa la mi slu ba grub pa yin no zhes bya bar dgongs so//gal te de ltar mi slu bas tshad ma yin na sre ba'i shes pa yang de nyid 'di yin no zhes nges par zhugs pas skyes bu'i don 'grub par 'gyur ba'i phyir/ ji ltar sre ba'i shes pa tshad ma ma yin/ 'di ltar slu ba med pa dang / snga nas med pa'i don 'dzin pa ni tshad ma yin na 'dir yang cha shas can la sogs pa'i shes pa kun rdzob kyang tshad mar 'gyur te/de la yang mi slu ba mthong ba'i phyir ro/ /'on te sre ba'i shes pa zhugs par gyur pa'i de ma thag pa ma yin pa'i phyir tshad ma ma yin te/ 'dod pa nyid kyis chod pa'i phyir ro zhe na ni/de lta na yang mthong ba ni shin tu chod pa'i phyir tshad mar mi 'gyur ro/ /'on te sre ba'i shes pa gtod par byed pa'i shes pa las skyes pa'i phyir tshad ma ma yin na/ de bzhin du mthong ba yang rtogs pa med pa'i dbang po las skyes pa de nyid tshad mar mi 'gyur ro/ /de bas na gal te rgyu gzhan nas gzhan du brtags pa de'i tshe gtod par byed pa ni tshad mar mi 'gyur ro//de bas na tha snyad du phan 'dogs pa'i de ma thag par 'jug pas de'i tshe rtog pa dang bcas pa tshad mar 'gyur ro zhes sems na de'i phyir/ gzung ba 'dzin phyir kun rdzob ni/ /mi 'dod blo ni tshad ma nyid/ /blang dang dor bya'i dngos po la//'jug la de gtso nyid phyir ro/ /zhes bya ba smos te/ kun rdzob kyi shes pa ni tshad mar 'dod pa ma yin te gzung ba 'dzin pa'i phyir ro/ /sre ba'i shes pa ni rtag pa la gcig tu mngon par zhen pas tshad mar khas len na/ sre ba'i shes pas rtag pa nyid snga na med pa mthong ba ma yin te mthong ba'i dngos po nyid la des/mngon par zhen pa'i phyir ro/ /'di ltar sre ba shes pa'i yul sngon gyi de dang gcig pa nyid yin gyi/ da ltar byung ba la de nyid du log par rtogs pa ni ma yin no zhe na/ sngar gyi dngos po de yang sngon gyi rtogs pa ste/ da ltar byung ba'i dus kyi dngos po dang bral ba dang /da ltar gyi dngos po ni da lta nyid du mthong bas sngon gyi dngos po dang bral bar rtogs par bya'o/ /des na mthong ba'i rjes su 'brangs pa'i nges pa'i shes pas mthong bas khong du chud pa nyid la nges pa yin te/ gzhan du na sngar shes pa med pa'i rtogs pa nges pa'i shes pa 'khrul par thal bar 'gyur ro//mthong bas ni snga ma dang phyi ma'i rang bzhin tha dad par myong ba'i phyir la nges pas ni de la de nyid du gzhag pa'i phyir ji ltar 'khrul par mi 'gyur/ de'i phyir de nyid 'di yin no zhes pa ni shes pa'i shes pa nyid de/ gang gi phyir dang po mthong ba nyid kyi rjes su 'brangs nas lkog tu gyur pa'i rang bzhin la zhen pa'i phyir shes pa'i shes pa'o//de ni da ltar gyi mthong ba'i stobs kyis kyang da ltar ba la zhen nas de nyid 'di'o zhes shes pa'o/ /de bas na rigs pa 'di nyid kyis cha shas can gyi shes pa bkag pa yin no/ /de la yang mig dang reg pa las skyes pa'i shes pa khas len na mig gi rnam par shes pa la ni kha dog gsal ba'i rang bzhin snang la/reg pa'i shes pa la ni tsha ba la sogs pa'i khyad par snang gi /de la kha dog dang / reg pa dang bral ba'i yan lag can gyi rdzas snang ba ni ma yin no/ /des na mthong ba dang reg pa la zhen pa'i shes pa ni gang mthong ba de nyid reg pa'o zhes gzugs dang /reg par ldan pa'i cha shas can snang bar mi 'gyur ro/ /gal te gcig tu rtog pa'i shes pa tshad ma ma yin na de'i tshe snga ma dang / phyi ma dang bral ba'i da ltar byung ba'i 'dzin pa las rtog pa med pa mthong ba las ji ltar 'jug /'on te snga phyi mtshams su sbyar bas rjes su dran pa'i sgo nas 'jug par khas len na ni/ 'di ltar mngon sum du snang ba las skyes bu 'jug par mi 'gyur ro/ /gzhan du gzung ba'i dngos po la 'jug pa yod pas sreg pa dang 'tshod pa nyams su myong bas kyang rgyun mi 'chad par 'jug par 'gyur ro zhe na/de'i phyir mthong ba'i dngos po la 'dod pa nyid kyis 'jug pa'i 'bras bu ni shes pas yin gyi de nyid du 'dzin pa sre ba'i shes pa la ni cung zad kyang dgos pa med de gzhan la tha snyad grub pa'i phyir ro/ /de lta na 'o na 'dod pa nyid kyis 'jug pa'i phyir tshad mar 'gyur ba yin no zhe na/de ltar ni 'gyur mod kyi mthong ba'i dngos po la 'dod pas 'jug pa'i phyir mthong ba nyid tshad ma ma yin na de ltar na grogs dag mig phye bas gzugs mthong ba la 'jug pa yang tshad mar mi 'gyur ro/ /gzung ba 'dzin pa 'dod pa'i tshad ma bzlog par mi nus te//gang gi phyir mthong bas khong du chud pa nyid ni dran pas rtogs pa ma yin gyi dran pa'i yul du byas pa'i 'bras bu ni da ltar ba dang 'brel pa'i sa yul du byed pa'i phyir ro/ /yang na bzung ba 'dzin pa nyid kyang tha snyad kyi don byed pas dbang po la sogs pa ni tshad mar khas blangs par 'gyur te/gnod pa med pa'i phyir ro snyam du sems na de ni yod pa ma yin te blo nyid tshad ma yin gyi dbang po dang 'dod pa ni ma yin no/ /ci ste zhe na/ blang dang dor bya'i dngos po la/ /'jug la de gtso nyid yin phyir/ /zhes bya ba smos te/blang dang dor bya'i dngos po la 'jug pa la blo gtso bo nyid yin te/ dbang po yod pa tsam gyis su yang 'jug pa med pa'i phyir ro/ /'dod pa las nye bar 'jug pa yod du chug na yang / de ni 'jug pa'i yul nye bar ston pa med pa'i phyir gtso bo ma yin no/ /ci ste de 'dod pa las 'jug par 'gyur na de med pas 'jug par mi 'gyur ba'i phyir/ci ste gtso bo ma yin zhe na/ de lta na 'o na ni stobs dang ldan pa la sogs pa ma gtogs par 'jug pa mi dmigs pas nus pa la sogs pa tshad mar 'gyur ro/ /gzhan yang ji ltar 'dod pa ma gtogs par mthong ba'i dngos po la 'jug par mi nus la de bzhin du 'dod pa yod pa las kyang mthong ba ma gtogs par so sor nges par 'jug par mi 'gyur ba'i phyir nus pa mtshungs par mthong ba yin no//de lta bas na 'jug par 'gyur ba'i shes pa ni ci byed pa las gtso bo yin zhe na/ yul nye bar mthong ba'i phyir blo nyid gtso bo yin te 'dod pa ni tha snyad skyes pa tsam du zad do//de yang tshad ma yin na ha cang thal ches par bshad do/ /yang bzlas te gzung ba 'dzin pa nyid ni tshad ma yin no zhe na/ de ni mi rigs te/ gang gi phyir gzung ba 'dzin pa ni lhag pa mi byed pa'i phyir don med pa nyid de 'bras bu med pa'i tshad ma bsam par 'os pa ma yin la 'jug pa'i yul nye bar ston pas na blo nyid tha snyad la gtso bor 'gyur gyi dbang po dang 'dod pa'i shes pa ni tshad ma ma yin no zhes bya bar gnas so//gal te yang tshad ma'i 'bras bu 'jug pa'i mtshan nyid can skal ba'i dbang po la ma yin te/'bras bu de dang 'brel bas/ mig la sogs pa tshad ma ma yin gyi/ 'on kyang tshad ma'i 'bras bu ma chod pa rtogs pa'i mtshan nyid de skyed par byed pas na tshad ma yin no/ /rtogs pa'i 'bras bu 'byung zhing bskyed pa ni tshad ma'i bya ba yin pas 'jug pa nyid la phan 'dogs par byed pas dbang po ni de bzhin du tshad ma'o snyam du sems na/'dir smras pa/ yul can rnam pa tha dad phyir/ /blo rtogs tha dad pa yin pas/ /yul nyid kyi rnam par ni yul gyi rnam pa ste/ de'i rnam pa nyid dam/ yul rtogs pa'i rang bzhin de nyid tha dad pa'i blos te shes pa'i rtogs pa nyid tha dad pa de bas na blo ni tshad ma'o zhes bya bar snyegs so//'di ltar mig la sogs pa bems po yin pas tshad ma ma yin no/ /'on te gsal ba ma yin yang dbang po la sogs pa ni shes pa skyed par byed pas tshad ma yin na de'i tshe bdag dang / yul dag kyang shes pa skyed pa'i phyir tshad mar 'gyur ro//byed pa po dang las kyi mtshan nyid dang mi mthun pa'i shes pa la byed pa yod na de tshad ma ma yin nam/ skyes bu ni byed pa po yin la/ las ni yul nyid de dag ni tshad ma yin pa'i phyir ro zhe na/ gal te de lta na las de nyid yul du ji ltar shes/ rnam par shes pa la snang bas so zhe na/'o na ni mthong ba nyid kyang yul mthong ba'i phyir de nyid tshad mar rigs pa yin gyi mig la sogs pa ni mthong ba las chod pa'i phyir tshad ma ma yin no/ /ci ste yang yul gyi rnam pa tha dad pas rtogs pa tha dad de/ gang zhig tha dad pas 'bras bu tha dad par 'gyur ba de ni de'i sgrub byed dam pa'o//sgrub byed dam pa yang tshad ma yin pa'i phyir/ de'i rnam pa yongs su gcod par byed pas/ byed pa po nyid de dbang po la sogs pa ni ma yin no/ /shes pa ni de don thams cad la thun mong ma yin pa'i phyir rtogs pa tha dad par nus pas na rnam pa ni shes pa'i bdag nyid du gyur pa'i phyir blo nyid tshad ma yin no//de ltar na 'gyur mod kyi dbang po yang dag pa dang / ma dag pa las rtogs pa tha dad pa'i phyir ji ltar sgrub byed min zhe na/ 'dir smras pa/ de yod na 'di yod pa'i phyir/ /de'i rnam pa yod pa nyid la yongs su gcod pa 'di yod par rnam par 'jog pa'i phyir ro/ /des ni 'di skad du ston par 'gyur te rnam pa tha dad pa nyid kyis blo tha dad par 'gyur te/mig la sogs pa ni 'di ltar rang gi ngo bo dag pa dang / ma dag pa tha dad par gyur pas rtogs pa tha dad pa nyid du gyur kyang / de ltar thams cad la yod pa yin pas tshad mar mi 'gyur ro/ /'di ltar mig la sogs pas sbyangs pa'i mig la sngon po dang /ser po la sogs pa'i shes pa tha dad pa dmigs par 'gyur ba de ni dbang po tha dad pas ma yin pa'i phyir ji ltar sgrub byed nyid du 'gyur/ yang na gal te dbang po ni nges par rtogs pa'i sgrub byed ma yin pas rgyu mtshan ma yin te rnam pas chod pa'i phyir ro//de'i tshe yul ltar snang ba yang shes pa tha dad par nges par byed pa ma yin pas tshad ma yin no snyam du sems na/ de'i phyir/ de yod na ni yod phyir ro/ /zhes bya ba smos te/ 'dis ni 'di snyam du sngon po la sogs pa'i gzugs kyi rnam par skyes pa na nges par khong du chud par 'gyur te rnam pa ni rtogs pa'i bdag nyid kyi phyir ro snyam du dgongs so//de lta na 'o na ni tha dad pa med pa'i phyir tshad ma'i 'bras bu yod par ji ltar 'gyur zhe na/ tshad ma las tha dad pa'i 'bras bu ni med do/ /'on kyang shes pa nyid sngon po la sogs pa'i rnam pas tshad mar 'dod la rtogs pa'i rang bzhin gyis ni 'bras bu yin par shes par bya'o//ci ste phyogs mthong ba las de dang phrad par ji ltar shes pa yin te mngon sum gyi shes pas mi slu ba mthong ba ma yin te/ de dang nye ba'i sngon po la sogs pa'i rnam pa tsam snang ba'i phyir mi slu ba dang cig shos kyi shes pa tha dad par byed pa ni ma yin no//gzhan du na shes pa skyes pa'i dus nyid du phrad pa dang cig shos nges pa'i phyir gang yang 'khrul pa med pa dang bzlog pa mthong ba'i phyir ro/ /de ltar ni 'gyur mod kyi gal te don med na mi 'byung ba'i rigs pa nyid tshad mar 'gyur te/ khong du chud pa'i rang bzhin la rtogs par gyur pa de dang tha dad pa ma yin pa'i phyir/'khrul pa'i rgyu yod pa nyid kyis kyang la lar nges pa ma yin pa nyid kyis de la ni gzhan las tshad ma yin gyi gang du phrad pa la shin tu goms pas 'khrul pa spangs nas shes pa 'jug pa can de ru ji lta ba'i nyams su myong ba skyed pa'i phyir rang nyid tshad ma yin no//de bas na don med na mi 'byung ba ni don dang phrad pa la rag las pas rnam par gzhag pa'am/ da ltar gyi snang ba la sogs pa'i yul la ltos pa yin te/ de la sngon du yod pas yongs su 'dzin par byed do zhes zer na de ni rigs pa ma yin te/ don dang phrad par snang ba med na de med na mi 'byung ba mi 'dzin pa'i phyir ro//ci ste de'i tshe phrad par bya ba snang ba ma yin yang de med na mi 'byung ba nyid ni shes pa'i rang bzhin yin pas ji ltar mi shes she na/ de la smras pa/ slu ba med pa ma bzung bar/ /med na mi 'byung ba 'dzin no/ /zhes gal te rtog na/ phrad pa pa la bye brag med pa de'i tshe 'dod pa'i don byed pa la slu ba med pa bzhin du mi 'dod pa'i 'bras bu nus pa 'dzin pa'i shes par 'gyur ro//de'i phyir shes pa la rang gi ngo bo nyid snang bar 'gyur gyi phrad pa'i don med na mi 'byung ba nyid ni ma yin no/ /'on te phyogs gnyis pa khas len par byed na de'i tshe mdun na gnas pa'i don med na mi 'byung ba nyid kyi zla ba la rnam pa gnyis su mthong ba de yang tshad mar 'gyur ro//'on te don byed par mthong ba las sngar gyi shes pa tshad mar nges par 'gyur ro zhe na/ de lta mod kyi gcig la gcig brten pa'i nyes par 'gyur te/tshad ma nges par 'jug pa de las don bya ba byed par rtogs pa de bas na shes pa snga ma tshad ma yin pa'i phyir 'khor lo 'khor ba bzhin du 'jug par 'gyur ro/ /gzhan yang don byed par mthong ba ni btso ba dang / sreg pa la sogs par snang ba dang / sgrub byed snang ba'i yul snga ma'i gzugs la sogs pa yin pa'i phyir yul tha dad pas tshad ma ma yin no//'on te don byed pa'i shes pa nyid yul gcig pa de lta na yang don mtshungs pa'i phyir ji ltar shes pa snga ma la the tshom za bar 'gyur ro/ /gzhan yang mi slu ba'i shes pa skyes pa'i tshig shes pa snga ma med pa de bas na shes pa snga ma'i yul med pa can la byed pas dus phyis 'byung ba'i shes pa ji ltar tshad mar thob par 'gyur te/ha cang thal bar 'gyur ba'i phyir ro/ /'on te/ rjes su dpag pa don byed pa'i rtags las skyes pa'i yul med na yang shes pa snga mas tshad mar 'gyur ba ste/ du ba yod pas me yod bya ba bzhin no zhe na/rjes su dpag pa de yang ji ltar tshad ma yin par nges par byed/ de ltar ni 'gyur mod kyi rjes su dpag pa ni tshad mar rang nyid kyis nges pa ste 'brel pa nges pa'i rtags kyi stobs las skyes pa'i phyir ro/ /mngon sum la ni 'khrul pa'i tshogs kyis g.yogs par mthong ba'i phyir tshad mar gzhan gyis rtogs par byed pa yin no zhe na/de ni mi bden te 'di ltar rang gi rtags nges pa mngon sum gyis yin nam/ rjes su dpag pa las yin gal te mngon sum gyis yin na de'i tshe mngon sum gyi rtags nges pa de bas na de la rjes su dpag pa dang / rjes su dpag pa las mngon sum tshad med nges pas gsal bar gcig la gcig brten par 'gyur ro//'on te rjes su dpag pa las rtags nges pa yin na/ de'i tshe rjes su dpag pa rtags gzhan la brten pas thug pa med par 'gyur ro/ /gzhan yang gal te 'ga' zhig tu me'i gzugs mthong ba las sreg pa la sogs pa'i don nges par byed do zhe na/de lta mod kyi gzhan dag tu yang de ji ltar 'gyur/ de'i don mthong bar byed pa nyid tshad ma snga mas yin no zhe na/ gang du sngar don byed par snang ba ni tshad mas grub pa ste/ gang tshad mas med na mi 'byung ba des don byed par nges so/ / gang du don byed pa de tshad ma yin no zhe na/ 'dir don byed pa tshad mar ma grub pa las mthong ba ma yin nam/ tshad mar ma grub pa la nges par don dang phrad pa med pa'i phyir ji ltar de la don byed pa tshad ma yin/ de lta mod kyi/ 'on kyang nges par don byed pa dang phrad pa med pa'i phyir ji ltar tshad ma de la mi slu ba ma grub pa yin/de'i phyir rang bzhin tsam bzung ba las tshad mar nges pa ni ma yin no/ /shin tu goms par bya ba las gzugs kyi khyad par rig pa nyid las slu ba med par nges so zhes bshad pa ma yin nam zhe na/ de ni rig pa ma yin te/ goms pa de mngon sum gyis rtogs pa la yin nam/rjes su dpag pas rtogs pa la 'jug pa yin/ de la rjes su dpag pas shes pa la ni gal te goms par gyur pa las don byed pa ma 'khrul par gzugs kyi khyad par rig pa'i phyir de'i tshe rjes su dpag pa yang mngon sum med na mi 'jug pa'i phyir gcig la gcig brten par 'gyur ro//'on te mngon sum gyi yul du byas pa'i me'i gzugs mthong na/ btso ba dang sreg pa la sogs par snang ba yang goms par byed na gang gi tshe gzugs mthong ba'i de ma thag tu don byed pa nyams su myong bas de nyid nges pa yod pa yin pas yul gzhan du yang de bzhin du gzugs don byed pa med na mi 'byung ba ji ltar mi nges/thams cad mkhyen pa ma yin pa'i mngon sum du yul dang dus thams cad du 'gro ba dang lhan cig spyod pa dang / nye bar ston pa ma yin pa de bas na mngon sum ni slu ba med pa nges par byed pa ma yin zhing / rjes su dpag pas kyang nges pa ma yin no//des na rang nyid tshad ma yin par rigs so snyam du sems na/ 'dir smras pa/ rang las rang gi ngo bos rtogs/ /tha snyad las ni tshad ma nyid/ /ces bya ba la rang mngon sum gyi ngo bo nyid thun mong ma yin pa dang / rang nyid kyis nyams su myong ba yin gyi tshad ma ma yin no//'di la tshad ma slu ba med pa nyid du brjod pa yang de la snang ba ni ma yin par bshad do/ /'on te rtogs par byed pa nyid tshad ma yin la/ rang nyid las rtogs pa ste de ni tshad ma ma yin no/ /gang gi phyir spyod pa pa'i lta bas shes pa lkog tu gyur pa yin na/ ji ltar tshad ma de rang gis grub/ci ste yang shes pa skyes pas tshad ma nyams su myong ba yin te don nyams su myong ba las gzhan du mi 'thad pa'i phyir ro/ /shes pa khong du chud nas phyis mi slu bar nges pa ni ma yin pa'i phyir rang nyid du brjod pa'o/ /de nyid kyi phyir gal te slu ba med pa'i mtshan nyid ni tshad mar khas len pa de lta na rang khong du ma chud kyang don yongs su gcod par byed par 'gyur la/phyis ni don gyis go bar rtogs pa'i phyir nyes pa ci yang med do zhe na/ de ni mi rigs te/ rang nyid tshad mar khas len na 'khrul pa'i shes pa yang rang gi don 'dzin par byed pa ni gzhan la mi ltos pas rang nyid kyis tshad ma ma yin pa thob par 'gyur ro//de nyid smras pa/ tshad ma min pa don la ni/ /'dzin par byed na rang nyid las/ /zhes so/ /'on te de la gnod pa yod pas log pa nyid du bzung bas ni bzlog pa'i phyir gzhan las tshad ma ma yin par gzhag go zhe na/ de ni ma yin te/gnod par bya ba nyid dang bral ba'i phyir ro/ /de yang 'di ltar shes pa la gnod dam/ yul la gnod par 'gyur grang na/ de la shes pa la gnod pa ma yin te/ de'i shes pa skyes pa'i phyir ro/ /yul la ni ma yin te/ yul ni shes pa la brten nas rang gi ngo bo snang ba'i phyir de la cis gnod par 'gyur/'on te 'khrul pa'i shes pa la snang ba'i yul de la don byed pa mi 'thob pa'i phyir brdzun pa zhes brjod do zhe na/ de ni rigs pa ma yin te/ gang gi phyir de la don byed pa mi 'thob tu chug na yang de lta mod kyi sngar bzung ba mthong ba de la ci zhig tu 'gyur na gang gis brdzun pa zhes/dngos po gzhan du gyur pa snang ba dang bral bas ni sngar gyi snang ba mi bden par rigs pa ni ma yin te thal ches pa'i phyir ro/ /'on te don gyi bya ba byed pa nyid dang bral ba ji ltar bden zhe na/ rang gi ngo bo nyid snang ba nyams su myong ba'i phyir ro//de la gang gi phyir tha dad pa'i don byed pa nyid med kyang rang gi ngo bo nyid snang ba ni yod de gang du yang gnod pa yod pa ma yin pas so/ /gzhan yang gnod pa can gyis bzung ba la ni log pa'i shes pa nyid ldog pa med pa'i phyir gzhan las tshad ma ma yin pa de'i tshe tshad ma yang gzhan las ma nges na 'jig rten pa mi 'jug pa'i phyir/de yang gzhan las yin no/ /de bas na gal te slu ba med pa nyid tshad ma yin pa'am/ rtogs pa'i khyad par tshad mar 'dod pa de lta mod kyi gzhan la ma ltos pa nyid tshad ma yin no zhes zer ba de bsal ba yin te/ yongs su shes pa ma gtogs par 'jug pa'i yan lag med pa ni 'bras bu la phan mi 'dogs pa'i phyir ro//'on te dngos po la ltos nas rang nyid tshad ma yin no zhes brjod na de ji ltar shes pa yin/ gang gi phyir don yongs su gcod par nus pa'i mtshan nyid tshad ma yin na/ nus pa ni shes pa las sngar yod pa ma yin te rten med pa'i phyir ro//mthong ba dang lhan cig skye ba yang ma yin te/ de'i tshe ni gang du de byed par rnam par gzhag skye ba las phyis de'i nus pa 'byung ba yang ma yin te/ de'i tshe shes pa nyid skad cig ma yin pas yod pa ni ma yin no zhe na/ de lta na 'o na ni phyin ci log gi don yongs su gcod par nus pa yang rang nyid yin pas tshad ma ma yin pa yang rang nyid kyis thob par 'gyur ro/'on te rab rib kyi nyes pa rjes su 'gro ba dang / ldog pa 'jug pas gzhan las tshad ma ma yin par khas len na de lta na ni grogs dag yon tan can gyi rgyu yod pa dang /med pa'i rjes su 'jug pas gzhan la tshad mar khas blang bar bya'o/ /'on te yon tan can gyi rgyu ma gtogs par yang rgyu tsam las rjes su dpag pa'i tshad ma skye ba mthong na de la yon tan can gyi byed pa med par 'gyur ro/ /de lta na yang nyes pa'i rgyu ma gtogs par yang rgyu tsam gyis bskyed pa'i the tshom za ba'i shes pa dang /nya phyis la dung du mthong ba'i phyir/ tshad ma ma yin pa la nyes pa'i byed pa med par 'gyur ro/ /'on te de la the tshom za ba dang / phyin ci log gi shes pa mthong bas blo g.yer bag can ma yin par dpag go zhe na de lta mod kyi 'on kyang rjes su dpag pa tshad mar mthong ba las rtags kyi yon tan gsal bar nges par dag go//de lta bas na nges pa ma gtogs par rtags las shes pa skye ba ni ma yin no/ /de'i phyir rgyu'i yon tan sngon du song ba nyid ni tshad ma yin par gzhag go/ /yon tan gyi byed pa skyon las bzlog pa ma yin nam/tshad ma la ni ma yin no/ /'o na tshad ma ma yin pa der yang nyes pas byed pa ni ma yin te/ yon tan log pa'o zhes bya bar ci ste rtog par mi byed/ des na yod pa la ltos nas rang nyid tshad ma ma yin no/ /gzhan yang gal te nus pa rgyu med na ci ste de thams cad du 'jug par mi 'gyur te rgyu med na yul la sogs pa nges pa mi 'thad do//nus pa ni chos ma yin nam/ chos kyang chos can ma gtogs par mi 'byung bas shes pa'i khyad par nyid 'ga' zhig la brten pa yin no zhe na/ de lta mod kyi 'on kyang nus pa ni rgyu med pa'i chos can gyi dbang du 'gyur bar mi rigs te/phan 'dogs pa med pa'i phyir ro/ /'di ltar nus pa ni dngos po las gzhan na med de/ gang gi dngos po'i 'bras bur 'gyur/ nus pa 'bras bu ma yin na 'brel pa ma grub pa yin no/ /gal te nus pa tha dad pa dang / so sor nges pa'i rdzas kyi dngos po yin na/de'i tshe de yod na yod pa'i phyir yod pa khyad par can grub pa dang / gzhan du yang rjes su 'gro ba dang / ldog pa 'jug pa rgyu dang 'bras bu'i mtshan nyid yin pa'i phyir dngos po ltos pa'am/ nges pa la ltos pa gnyis srid pas rang las tshad ma ma yin no/ /de lta bas na don byed pa mthong bas tshad mar rtogs pa de'i tshe yang btso ba dang /sreg pa la sogs pa'i rang gi ngo bo snang ba de la sngar mthong ba sngon du mi byed pa'i phyir de la ji ltar tshad mar 'gyur/ sreg pa la sogs pa tshor ba'i de ma thag par dran pa skye bas tshad mar 'jog pa ma yin nam zhe na/de ni rigs pa ma yin te/ dran pa yang mthong ba'i rjes su 'brangs nas skye la/ mthong ba ni snga phyi'i dngos por rang gi rang bzhin snang bar nges pa nyid yin pa de bas na dran pas ni don byed pa dang 'brel pa mi mthong ngo / /gal te mthong bas khong du ma chud pa nyid 'brel bar sgro 'dogs na ni 'khrul par thal bar 'gyur ro//gang yang dran pa ni rang gi ngo bo nyid la gnas pa mi gsal ba'i rnam pa myong ba des na der yang rang gi ngo bo rtogs pa nyid do/ /'on te mi slu ba nyid rjes su dpag pas myong na/ der yang yongs su gsal ba ma yin pa nyid kyi dngos po myong bar 'gyur ro//yang rjes su dpag pa mngon sum ma yin par mi 'byung ba de bas na 'brel pa 'dzin pa ni mngon sum nyid yin no zhes bstan to/ /des ni rang gi ngo bo nyid thams cad rig par snang gi tshad ma ni ma yin pa'i phyir ngo bo nyid rang gis rtogs pa'o zhes bya bar gnas so/ /de lta na tshad ma ni tshad ma yin pa las log par ji ltar shes she na/de'i phyir/ tshad ma tha snyad las yin no/ /zhes smos pa la/ des ni 'di skad du ston par 'gyur te tshad ma ni kun du tha snyad pa'o/ /tha snyad ni ji lta ji ltar rnam par brtags pa de lta de ltar med pa ste/ 'khor ba gang du yang don dam par na med pas grol ba nyid du thal bar 'gyur ba nyid do zhe na/de'i phyir re zhig 'khor ba ni tha snyad du grub par yod la dpyad na stong pa yin pa de bzhin du/ tshad ma dang tshad ma ma yin pa'i cha yang tha snyad du yod pa'o/ /'o na don dam pa la tshad ma med do zhe na/ de de bzhin te/ tshad ma gang yin pa ni kun rdzob tu yin no zhes smras so//gal te yang don dam pa'i tshad ma mngon sum las sam/ rjes su dpag pa las yin na/ tha snyad ces pa'i tshig ci ste brjod ce na/ de'i phyir tshad ma tha snyad las yin no zhes pa la tha snyad du grub pa'i rjes su dpag pa'i stobs kyis nges par shes pas mngon par 'dod pa'i don byed pa ni sgrub par byed pa nyid du 'jug cing goms pa phul du byung ba'i tshe/rjes su dpag pa med par yang shes pa 'jug pa'i phyir mngon sum yang tshad mar brjod do/ /'di ltar sreg pa la sogs pa'i don byed 'dod pas ba lang la sogs pa yang sems shing sreg pa la sogs par dmigs te/cig car sreg pa la sogs pa dang / ba lang la sogs pa la rtog pa 'jug pa ni ma yin pa'i phyir rtog pa med pa'i shes pa nyid der 'jug par byed pa'o/ /yang na tha snyad ni don byed pa'i shes pas tshad mar rtogs pa'o//yang na 'dis tha snyad 'dogs par byed pas tha snyad ni rjes su dpag pa ste/ des na tshad ma'o/ /'di ltar de lta bu'i shes pa ni slu ba med pa nyid du shes pa'o/ /rjes su dpag pa ni 'brel pa nges par bzung ba las 'jug pa ma yin nam/ 'brel pa 'dzin pa ni mngon sum gyi tshad ma nyid de/rjes su dpag pa las thug pa med par 'gyur ba'i phyir ro/ /de tshad ma yin par yang rjes su dpog pa'i phyir/ gcig la gcig brten pa'i nyes pa nyid du 'gyur ro zhe na/ de ni rigs pa ma yin te/ gang gi phyir 'brel pa nges par 'dzin pa ni gzhan dag tu mngon sum dang mi dmigs pas so//'dir yang gzugs la sogs pa'i snang ba yod na sred pa la sogs pa'i dgos pa mthong bar 'gyur gyi/ de med na dmigs par mi 'gyur ro/ /de bas na yod pa dang med par 'jug pas 'brel pa 'dzin pa'i phyir 'dir rjes su dpag pa la ci ste thug pa med par 'gyur/rjes su 'gro ba dang / ldog pa nges pas ni gdon mi za bar bskyed bya skyed byed kyi mtshan nyid du 'gyur te/ gzhan du na tha snyad rgyun chad par brjod par 'gyur ro/ /de ltar ni 'gyur mod kyi/ mthong ba ni reg pa nyams su myong ba la da ltar gyi dus su myong ba phrad pa'i rang bzhin can snang ba ni ma yin te/rang gis mthong bas yul du byas pa'i sngon po la sogs pa las rgyud gzhan pa 'dzin pa nyid kyi nges pa ni ma yin no/ /de bas na reg pa la sogs pa'i shes pas gzugs kyi yul la tshad mar ji ltar 'gyur te/ yul tha dad par 'gyur ro zhes bstan pa yin no zhe na/de yang rigs pa ma yin te/ gzugs dang / reg pa dag la de nyid du gcig par tha snyad rnam par 'jog pa der yang yul la sogs pa tha mi dad pa'i phyir/ gcig tu mngon par zhen pa yin te/ mthong ba gang yin pa de nyid dang phrad pa'i phyir/ phrad pa ni sngar mthong ba de dang lhan cig rgyud gcig la 'jug pa'i phyir dang /don gcig la 'jug pa'i phyir mngon par zhen pa la ltos nas tshad ma yin no zhes bstan to/ /phrad par byed pa tshad ma ma yin nam/ de yang ci ste don byed pa'i shes pas byed dam/ 'on te mi byed par khas blang bar bya/ de la gal te phyogs gnyis pa ltar na/de'i tshe don byed pa'i shes pa ma gtogs par mthong ba ji ltar de skyed pa yin/ 'on te dang po ltar na de ltar na yang mthong ba'i dngos po ni gang gi tshe don byed par dmigs par byed pa de'i tshe/ don byed par shes pa pos ji ltar phrad par shes par bya zhe na/ 'dir smras pa/ gal te thabs las byung ba la ni ma 'ongs pa la tshad ma'i byed pa med pas the tshom za'o/ /da lta na yang thabs nges pa'i phyir de nyid tshad ma yin no/ /'di ltar mthong bas ni thabs shes par bya'i don byed par bya ba ni ma yin no/ /rgyu gzhan dang 'brel pa las sreg pa la sogs pa byed par ji ltar shes par byed pa nyid du nus/thabs nges par gyur na thabs las byung ba la the tshom za ba 'jug pa yang mthong ste/ so nam byed pa na 'khor las byed pa lta bu'o/ /de lta bas na 'khor lo lta bu'i skyon mi 'jug ste/ 'di ltar sgrub byed nges pa'i don la dang po zhugs pa ni tshad ma nges pa ma gtogs pa yang srid pa yin no//slu ba med pa nyid kyis sngar bzung ba la goms pa'i stobs kyis 'jug pa yin te/ de'i rigs yin pa'i phyir ro// //tshad ma rnam 'grel gyi 'grel pa las/ bam po gnyis pa/ gal te yang tshad ma nges pa nyid thams cad du tha snyad pa yin na gcig la gcig brten par 'gyur ro zhe na/de yang med de/ 'ga' zhig thams cad don du gnyer ba med par yang slu ba med pa dang po'i dus su nges pa ste/ 'di ltar grang ba dang ldan pa 'ga' zhig me nye bar gnyer te de der me'i rang bzhin sreg pa la sogs pa'i don byed pa'i 'brel pa dpyod par byed do//de bzhin du ji ltar me'i phyogs su 'gro ba des ji zhig ltar 'brel pa shes pas thams cad du tshad mas nges par 'dzin pa can 'jug par byed pa yin no/ /'on te yang don byed pa ni/ dus dang rnam pa thams cad du rjes su 'gro ba ma 'khrul pa'i rang bzhin gyis ma yin nam/de ji ltar khong du chud par 'gyur te/ gang du ma 'khrul ba nyams su myong ba de nyid du 'gyur gyi yul la sogs pa gzhan du ni shes pa'i byed pa med pas ji ltar nges pa yin te/ gang du don byed pa nyams su myong ba der yang sreg pa la sogs pa 'ba' zhig nyams su myong ba'i phyir/snga ma'i shes pa don byed par mthong bas slu ba med pa nyid ji ltar khong du chud par 'gyur/ 'di ltar de'i shes pa 'das pa de'i tshe dgos pa rig pa'i dus na ni med la/ gang du gzugs dang reg pa'i rig pa dag lhan cig 'byung ba yin pa de'i tshe yang phan tshun log pa'i yul tsam rtogs pa'i phyir tshad mar nges pa ni ma yin no//'on te don byed pa'i shes pa rtags las byung ba ni ma yin zhing / snga ma'i shes pa tshad mar mngon sum gyis rtogs pa ni ma yin te/ sngar mthong ba 'das pa'i phyir dang / gsal ba nye bar gyur pa ma gtogs par nar son pa'i tshad ma mi shes pa'i phyir ro//'o na ci zhe na/ sreg pa la sogs pa myong bas tshad ma la the tshom za ba bsal to/ /tshad ma ni don med na mi 'byung ba nyid de yang rang nyid las yin no zhe na/ 'dir smras pa/ the tshom bzlog pa tsam la rtogs pa sngon du 'gro ba dag 'jug pa ni ma yin te/'o na ci zhe na/ mngon sum dang / rjes su dpag pas so/ /de la gal te mngon sum nyid kyis 'jug na de'i tshe mngon sum kho nas tshad mar nges so zhes bstan par 'gyur ro/ /de bzhin du rjes su dpag pas kyang nges par gdon mi za bar khong du chud par bya ste/ gzhan du na nges pa ma gtogs par the tshom ji ltar ldog par 'gyur/gal te yang don bya ba byed pa las the tshom ldog na gdon mi za bar don byed pa rtags yin no/ /gang gi phyir sgro btags pa'i the tshom bzlog pa nyid rjes su dpag pa nyid de/ der yang 'brel pa nges pa med na med do zhes brjod do/ /de'i phyir tshad ma tha snyad kyis yin no zhes smras te/des ni 'di skad du gang 'brel pa 'dzin pa de ni tha snyad du btags pas rjes su 'gro ba dang / ldog par 'gyur bar gzhag gi yod pa dang med par gyur pa nyid mngon sum gyis grub pa ni ma yin te/ de la snga phyi 'jug pa med pas so/ /der don byed pa'i shes pa tshad ma ni tha mi dad par don byed pa myong ba'i phyir/de'i bdag nyid kyi 'brel pa yin no/ /gang du shes pa la shin tu brtan par gnas pas nges pa der yang sngar gyi shes pa la gnas pa gang yin pa de nyid don byed pa'i rang bzhin gyis tha snyad pa'i lam 'jug ste/ des na btags nas de'i bdag nyid ces bya bar ston gyi/don dam par ni bskyed bya skyed byed kho na'i 'brel pa ste/ sgrub pa dang / don byed pa dag gi phyir tshad ma tha snyad las so zhes bya bar gnas so zhes bya bar ston to/ /gal te de ltar tha snyad kyis tshad mar rnam par 'jog pa yin na de'i bstan bcos kyis ci zhig bya ste/ 'di ltar bstan bcos kyi bshad pa yang tha snyad las tshad ma khong du chud pa'i phyir ro zhe na/'dir bstan bcos rmongs pa zhes smras te/ rmongs pa ni sgro btags pa'o/ /bzlog pa ni 'dis bzlog pa yin no/ 'di'i dgongs pa ni gal te tha snyad kyis phyin ci ma log pa'i tshad ma'i rgyur gyur pa'i bstan bcos kyi phan tshun 'gal bar tshad ma'i mtshan nyid bstan pa sel bar byed pa yin te/de bas na phyin ci log tu sgro btags pa rnam par bcad pa'i phyir bstan bcos byas so/ /'on kyang tshad ma'i mtshan nyid bstan bcos las bshad pa la 'bras bu med de/ bcom ldan 'das kyi gsung rab nyid las rmongs pa ldog gi gzhan las ni ma yin no zhes bya ba de bsal bar 'dod nas/mi shes don gyi gsal byed pa'ang / /zhes smras so/ /'on kyang tshad ma'i mtshan nyid ni/ mi shes don gyi gsal byed 'di yin te/ 'dis gsal bar byed pas ma bzung ba'i don 'dzin pa'i shes pa'o zhes bya ba'i tha tshig go//mi shes pa nyid smos pas der kun rdzob kyi cha shas can gyi shes pa la sogs pa bstsal to/ /don smos pas ni don med par snang ba dung la ser por shes pa bstsal to/ /gsal byed ces smos pa ni dbang po la sogs pa la de'i gsal bar byed pa nyid med pa'i phyir ro//slu ba med pa smos pa ma gtogs par zla ba gnyis mthong bar gyur pa yang tshad mar thal bar 'gyur ba ma yin nam/ 'on te don smos pas de gsal ba yin na/ de la don dang bral ba ji ltar rtogs/ mi slu ba las yin na/ 'o na de nyid slu ba med pa tshad ma'i mtshan nyid du 'gyur ro zhe na/de ni bden pa ma yin te/ bsam par bya ba mtshan nyid ma yin pa'i phyir ro/ /gal te bsam par bya ba yang / /tshad ma'i mtshan nyid mi slu ba nyid yin na/ de'i tshe dngos po la sogs pa yang mtshan nyid du 'gyur ro/ /de lta bas na gang dngos su byung ba de ni mtshan nyid de/gzhan du shugs las byung ba ni ma yin no/ ci ste yang dngos po ni tshad ma'i mtshan nyid la mngon sum du grogs byed pa ma yin yang / gzhan nas gzhan du brgyud pa yang yin pa ma yin nam/ dngos po yang tshad ma khong du chud pa la phan 'dogs so zhe na/de lta na yang mi shes pa'i don smos pas ni gzung ba 'dzin pa'i shes pa bstsal ba yin gyi/ mi slu ba smos pas sel ba ni ma yin te/ kun rdzob dang / cha shas can la slu ba med pa mthong ba'i phyir ro/ /slu ba med pa'i shes pa kho nas de'i don nyid du byed pa ni ma yin te/gzhan du yang mthong ba dang 'brel pas mi slu ba srid pa'i phyir ro/ /yang na don ni don dam pa la brjod de mi shes pa'i don gsal bar byed pa ni don dam pa rtogs pa la bshad do/ /don dam pa ni gnyis su med pa kho na'o/ /phyi rol gyi tshul la yang 'phags pa'i bden pa bzhi shes pa ni/don dam pa'i tshad ma'i mtshan nyid du brjod pa ni ma yin te/ gzhan gyi ni kun rdzob yin no/ /gal te mi shes pa nyid kyi don gsal ba tshad ma yin na ni spyi'i shes pa ste/ rigs la sogs pa'i shes pa yang / gtod par byed pa'i shes pas ma mthong ba mthong ba'i phyir tshad mar thal bar 'gyur ro//de'i shes pa ni dran pa'o zhes brjod par mi nus te gtod pa'i shes pas rigs ma rtogs pa'i phyir ro zhes pa de bstan pa'i phyir/ rang gi ngo bo rtogs las gzhan/ /spyi yi shes pa'ang thob par 'gyur/ /zhes smos pa la/ rang gi mtshan nyid kyis rang gi ngo bo rtogs pa las gzhan te dus phyis spyi'i yul gyi shes pa skye ba gang yin pa'i shes pa de tshad mar thob par 'gyur ro zhes bya bar 'brel to zhe na/'dir smras pa/ rang gi mtshan nyid mi shes na/ /shes pa gang yin bsams pa las/ /zhes bya ba la/ rang gi mtshan nyid mi shes pa shes pa ni don byed pa'i shes pa skyes pa gang yin pa de tshad ma yin no zhes bya bar bsams nas/ spyi'i shes pa ni tshad mar mi 'gyur ro zhes bya bar snyegs so/ /gtod par byed pa'i shes pas khong du chud pa'i rang gi mtshan nyid ni spyi'i shes pas ma rtogs pa'i phyir tshad ma ma yin no//spyi snga na med pa 'dzin pa'i phyir ma yin nam/ ci ste tshad ma ma yin na/ khong du chud pa'i mtshan nyid 'dzin pa ni gnod pa'i shes pa dang bral ba'i phyir ro/ /de lta na mtshan nyid ni/ de la sngon med don shes pa/ /nges te gnod pa spangs pa dang / /skyon med pa las skyes pa ni//tshad mar 'jig rten pa 'dod do/ /zhes zer ba de 'dir bzlog par bya ba'i phyir/ rang gi mtshan nyid dpyad phyir ro/ /zhes bya ba la/ yod pa nyid dang / med pa nyid kyi gzhal bya mthong ba'i shes pa ni tshad mar brjod do/ /rang gi mtshan nyid la yod pa nyid dang / med pa nyid dpyod de/don byed pa sgrub pa'i phyir ro/ /spyi la ni sreg pa la sogs pa'i byed pa dang bral ba'i phyir des tshad ma la phan 'dogs pa med do/ /spyi'i shes pa ni sngar med pa'i don bzung ba las tshad ma ma yin te/ thal ches pa'i phyir te/ 'di ltar zla ba gnyis su mthong ba yang sngar med pa 'dzin pas tshad mar 'gyur ro//'on te de la gnod pa mthong bas tshad ma ma yin no zhe na/ 'on ni gnod pa can gyis kyang don byed pa'i dngos po dang bral ba shes par byed pa'i phyir rang gi mtshan nyid rten par dpyod do/ /de lta ni 'gyur mod kyi/ spyi'i shes pa ni de nyid 'di yin no zhes nges pas rang gi mtshan nyid la 'jug go zhe na/ci zhig ltar spyi'i zhen pa ma gtogs par mthong ba nyid las 'jug pa yod pa ma yin nam/ mthong ba las ma gtogs par ni spyi'i shes pas mi 'jug pa'i phyir mthong ba nyid tshad ma yin no/ /gzhan yang spyi'i shes pa rigs la 'jug par 'gyur ram/rang gi mtshan nyid la yin/ de la/ de rigs la ni ma yin te/ /spyi yi dgos pa shes pa dang / /brjod pa ni rang gi rtogs pa tsam du gyur pa'i phyir ro/ /rang gi mtshan nyid la yang ma yin te/ de gtod par byed pa'i shes pa'i yul yin pa'i phyir ro//'on te spyi'i shes pa'i yul rang gi mtshan nyid yin na/ de lta mod kyi gzung ba 'dzin pa'i phyir tshad ma ma yin te dag par mthong ba'i shes pa nyid spyi dang ldan par khyod 'dod pa'i phyir ro/ /de ltar yang rnam par mi rtog pa'i blos/ dngos po gnyis su yang 'dzin pa yin zhes smras so//gang gi tshe yang don dam pa'i tshad ma'i mtshan nyid du 'dod pa de'i tshe rang rig pa'i ngo bo nyid khong du chud pa las de las gzhan pa'i spyi gzung ba dang / 'dzin pa ni mngon par zhen pa ni yang dag par rig par khong du ma chud pa ni gzung ba dang /'dzin pa len pa'i phyir tshad mar 'gyur bar blta bar bya'o zhe na/ shes pa'i rang gi mtshan nyid mi shes par shes pa gang mngon du 'dzin pa de ni tshad ma ma yin no zhes bya bar dgongs pas 'dzin pa la sogs par 'byung ba ni ma yin no/ /'o na ji ltar bcom ldan 'das kyis phyi rol gyi don gsung ba mdzad ce na/gdul bya'i skye bo'i ngor phyi rol gyi don la mngon par zhen pa gzung bar bya ba'i phyir/ phyi rol gyi don du bstan te/ don dam pa la ni gzung ba dang / 'dzin pa dang bral bas rang rig pa nyid yin no/ /de nyid gang las shes she na/ /rang gi mtshan nyid dpyad pa las te/dpyad nas gzung ba dang 'dzin pa'i dngos po thams cad nyams par 'gyur bas gnyis su med do/ /de nyid gnyis su med par dpyad pa'i phyir gsung rab ma lus pa la 'jug par bya ste/ phyi rol gyi don lhag par bshad pa ni drang ba'i don nyid do/ /'o na ji ltar phyi rol dang nang gi bye brag gis tha dad ce na/rtogs pa tsam gyis phyi rol dang / nang tha dad pa yin no/ /mngon sum dang rjes su dpag pa tha dad pa tsam du tshad ma ma yin nam/ ji ltar bcom ldan 'das tshad mar 'gyur zhe na/ bcom ldan 'das ni yang dag pa'i tshad ma yin te/ 'di ltar/ de ldan bcom ldan tshad ma yin/ /zhes smos pa ji ltar na mngon sum dang / rjes su dpag pa tshad ma yin pa de bzhin du ye shes kyi gzugs can bcom ldan 'das kyang mi slu bar mdzad pas de bzhin gshegs pa ni/ rang las nges pa'i mngon sum gyi tshad ma kho na'o/ /de bzhin gshegs pa kho na tshad ma yin gyi/rig byed ni tshad ma ma yin pa de ga las shes te/ de la yang phyogs gcig la slu ba med pa'i phyir ro zhe na/ de'i phyir/ yang dag ma yin bzlog phyir ro/ /yang dag par brjod sgrub la ltos/ /de bas tshad ma nyid du rigs/ /zhes bya ba smos te/gang gi phyir yang dag pa ma yin pa bzlog pa ni sgro 'dogs pa bzlog pa ste/ de'i phyir na bcom ldan 'das ni yang dag pa'am/ gyur pa zhes brjod de/ bden pa'i don to/ /de'i phyir bcom ldan 'das nyid sgrub byed la ltos nas/ tshad mar rigs so/ /sgrub byed kyang 'dir bden pa mi slu ba'i tshig nyid de/des na bcom ldan 'das nyid tshad ma yin gyi rig byed ni ma yin te/ phyogs gcig la mi slu ba yin yang thams cad la ma mthong ba'i phyir sgrub byed ma yin no/ /bcom ldan 'das kyi bden pa'i gsung nyid tshad ma'i yul la mngon sum dang /rjes su dpag pas mi gnod pa'i phyir ro/ /mtho ris la sogs pa'i yul dbang po las 'das pa rang gi tshig dang 'gal ba med pas khong du chud par bya'o/ /de la gal te mngon sum dang rjes su dpag pa dag las 'das pa'i yul la byed pa med de/ gcig ni der nye ba tsam yin la gzhan ni rtags las skyes pa'i phyir thams cad mkhyen pa sgrub par byed na/de lta mod kyi/ rtag pa nyid dang / dbang phyug la sogs pa tshad ma yin te/ ci'i phyir rgyu dang 'bras bur rtogs par byed ce na/ de bzlog pa'i phyir/ tshad ma rtag pa nyid yod min//dngos yod rtogs pa tshad phyir dang / /shes bya mi rtag pa nyid des/ /mi brtan phyir na rim skyes pa/ /rtags las skyes pa'i mi rung ste/ /ltos pa mi rigs pa yi phyir/ /zhes bya ba smos te/ rtag pa'i dbang phyug la sogs pa la ni tshad ma med do/ /gang las shes she na/ / gang du yang des phan btags pa mthong ba'i phyir ro/ /gang gi phyir dngos po yod pa las rtogs pa ni/ tshad ma ste phyin ci log gi shes pa tshad ma ma yin pa'i phyir ro/ /dngos po yod par rtogs pa yang shes bya mi rtag pas 'jig par 'gyur ba de bas na 'dir rtag pa ma yin no zhes bya ba ni dam bca' ba'o//dngos yod rtogs pa tshad phyir dang / /zhes bya bas ni gtan tshigs ston pa'o/ /shes bya mi rtag pa nyid des/ /zhes bya bas ni mi mthun pa'i phyogs la gnod pa can gyi tshad ma'o/ /des ni 'di skad du ston te/ rtag pa ni tshad ma ma yin te/ dngos po yod pa rtogs pa'i rang bzhin yin pa'i phyir mngon sum bzhin no//dbang phyug la sogs pa'i shes pa tshad ma yin na ni rtag pa ma yin te/ 'di ltar shes pa'i tshad ma nyid yul gyi byed pa yin na/ de las byung ba'am/ yul gyi rnam pa yin na/ de la gal te rtag pa nyid dbang phyug gi shes pa rim gyis gzhal bya la byed na de'i tshe/byed pa dang / mi byed pa tha dad pa'i phyir rtag pa nyid ma yin no/ /cig car byed pa yang ma yin te/ shes bya rim par shes pa'i phyir ro/ /'on te ji ltar me long la sogs pa mi 'gyur bar gzugs brnyan gzhan dang /gzhan du mthong ba de bzhin du dbang phyug gi shes pa mi 'gyur ba nyid du gzhan dang gzhan gyi dngos po 'dzin to zhe na/ de lta na 'o na ni shes bya la shes pa'i byed pa med pas rang dbang kho nas de rig par 'gyur ro/ /de ltar ni 'gyur mod kyi/ ji ltar mig phye na mi 'gyur yang gzhan dang gzhan gyi dngos po rung ba'i gnas su 'dzin pa de bzhin du rtag pa'i shes pa yang mi 'gyur ba nyid du shes bya thams cad 'dzin to zhe na/de ni bden pa ma yin te gang gi phyir mig la dngos po'i byed pa yod pa ste/ de med na shes pa mi skye bas so/ /dbang phyug gi shes pa yang rtag pa'i phyir ldog pa med do zhes 'og nas bshad par bya'o//des na de las byung ba dang de'i rnam pa nyid ni rtag pa nyid la mi srid do/ /dbang phyug gi shes pa ni mi rtag kyang dbang phyug rtag pa ma yin nam zhe na/ 'dir smras pa/ rim gyis skye ba'i shes pa gang yin pa de ni rtag pa ste/ dbang phyug las skye bar mi 'thad pa'i phyir te rgyu dang ma bral bas so//des ni 'di skad du ston te/ gal te rgyu rtag pa ni 'bras bu rim gyis skye ba ma yin te/ rgyu rtag tu yod pa'i phyir ro/ /de bas na shes bya gzhan nas gzhan du 'byung ba na/ rim pa nyams su myong bar mi 'gyur ro/ / de ltar ni 'gyur mod kyi dbang phyug gi shes pa rkyen dang phrad nas shes pa skyed do zhe na/ de'i phyir dbang phyug rtag pa la ni ltos pa mi rung ba'i phyir te/ de la phan 'dogs pa med pa yin no/ /'di ltar phan 'dogs pa'i rgyu don gcig la byed pa yin nam/ lhag par byed pa'i rgyu yin par brtag grang na/de la don gcig la byed pa'i rgyu nyid kyis yul la phan 'dogs pa'i rgyu mtshan ni ma yin te/ snga ma nyid du de yod pa'i phyir ro/ /de lta bas na de dang bral ba'i don byed pa snga ma nyid du phan 'dogs par 'gyur ro/ /'on te phyogs gnyis pa ltar na yang lhag pa ni tha dad pa dang /tha dad pa ma yin par rtogs pa mi 'thad pas de ni bden pa ma yin no/ lhag pa ni tha dad pa'am/ tha mi dad pa ni ma yin no zhes 'chad par 'gyur ro/ /de bas na rtag pa la ltos pa med de phan 'dogs pa'i rgyu rnams gnyis dang bral ba'i phyir ro/ /de lta mod kyi 'on kyang dbang phyug mi rtag pa nyid ni sbyin pa la sogs pa'i rkyen la mi ltos te/ngo bo nyid kyi ye shes dang / 'dod chags dang bral ba dang / dbang phyug la sogs pa phun sum tshogs pa 'byung bar 'gyur te/ snga ma snga ma'i skad cig 'gyur ba tsam gcig las skyes pa'i phyir ro zhe na/'dir smras pa/ rnam 'gas phan 'dogs med pa'i phyir/ /mi rtag na yang tshad ma med/ /dbang phyug mi rtag na yang tshad mar rigs pa ma yin no/ /ci'i phyir zhe na/ 'ga' zhig gis phan 'dogs pa nyid med pa'i phyir ro/ /gang gi phyir rgyu 'ga' zhig gis phan 'dogs pa'am/gnod pa shes pa de'i tshe bsgoms pas 'dod chags la sogs pa'i gnyen po yongs su shes pa las srog chags la snying rje bas phan pa ston par byed do/ /gang gi tshe yang ngo bo nyid kho nas de'i shes pa yin na des gzhan la gnyen po ji ltar ston par byed de/ 'di ltar rang gi rgyud la 'dod chags dang bral ba'i thabs shes pa ma yin te/ de'i rang gi ngo bo nyid 'dod chags dang bral ba'i phyir ro/ /rgyud gzhan la bsgom pa'i thabs shes pas 'dod chags dang bral ba thob par bya ba'i phyir/ de la ston pa ma yin nam zhe na/ de lta mod kyi/ 'on kyang rgyud gzhan pa nyid la rgyu'i stobs kyis skyes pa'i 'dod chags kyi gnyen po yongs su shes pa can gyi tshad ma yod bzhin du dbang phyug gis ci zhig bya/ 'on te rgyud gzhan de nyid la dbang phyug gis ston to zhe na/ 'o na gang gi tshe de la dbang phyug gis ston pa de'i tshe/ 'dod chags la sogs pa'i gnyen por ji ltar shes/gzhan yang grol ba'i bdag nyid can la dmigs nas shes so zhe na/ de lta mod kyi/ 'on kyang thog ma med pa nas 'dod chags dang bral ba brgyud pa'i phyir/ rtag pa ni tshad mar yod pa ma yin no zhes bya ba legs par smras so//yang na gal te 'dzin par byed pa'i tshad ma yod pa ma yin pas tshad ma med pa can nyid do/ /de'i don ni de sgrub par byed pa'i tshad ma yod pa ma yin pas nam yang phan 'dogs pa med pa'i phyir zhes pa de ni ltos pa med pa dang ldan pa'i gtan tshigs so/ /'on te sdod cing 'jug pa dang /dbyibs kyi khyad par dang / don byed pa la sogs pa dbang phyug sgrub pa ma yin nam/ gang sdod cing sdod cing 'jug pa de thams cad ni blo dang ldan pa'i rgyu yis byas pa ste/ sta re la sogs pas gcod pa bzhin no/ /gang gi phyir sta re la sogs pa rang nyid 'jug na ni rgyun du 'jug par thal bar 'gyur ro//lus dang / dbang po dang / sa la sogs pa ni sdod cing 'jug pa'o/ /de bzhin du gang dbyibs kyi khyad par ldan pa de thams cad byed pa pos byas pa ste/ dper na bum pa la sogs pa bzhin no/ /lus dang dbang po la sogs pa yang dbyibs kyi khyad par dang ldan pa'o//de bzhin du gang don bya ba byed pa de thams cad byed pa pos byas pa ste/ ste'u la sogs pa bzhin no/ /lus dang / mig dang sa la sogs pa yang don bya ba byed pa'i phyir zhes bya ba'o/ /sogs pa'i sgras ni byas pa nyid nye bar bzung ste/ 'bras bu gang yin pa de thams cad ni blo dang ldan pa'i rgyu las byung ba ste/yal ga la sogs pa bzhin no/ /ri la sogs pa yang 'bras bu yin zhes zer na/ 'dir smras pa/ sdod 'jug dbyibs kyi khyad par dang / /don byed pa la sogs pa la/ /'dod pa grub pa'am dpe ma grub/ /yang na the tshom za ba yin//'dir sdod cing 'jug pa la sogs pa rnams kyi gtan tshigs ni spyir blo dang ldan pa rnams kyi rgyur sngon du 'gro ba nyid du sgrub bam/ phul du byung ba'i sems pas byin gyis brlabs pa nyid kyi khyad par yin par brtag grang na/ de la gal te spyi grub pa de lta na ni phyogs ma yin te/phyogs ni ma grub pa la 'dod pa'i phyir ro/ /spyir sems sngon du 'gro ba tsam ni grub pa nyid de/ de ltar yang gsungs pa/ las las 'jig rten sna tshogs skyes/ /las ni sems pa dang des byas/ /sems pa yid kyi las yin no/ /zhes gsungs so/ /'on te las sna tshogs pa'i sngon du sems 'gro ba nyid de/las 'jug pa dang ldog pa'i don du dbang phyug khas blang bar bya ste/ de ltar yang de ni dbang phyug gis bskul ba las chos ston to zhes bshad do/ /de bas na byed pa pos byas pa'i las sngon du song ba'i ni grub pa la sgrub pa ni ma yin te/dbang phyug gis byas pa'i las khas blangs pa'i phyir ro zhe na/ de ni ma yin te/ las nyid sems kyi rang bzhin yin pa'i phyir/ sna tshogs la 'jug pa nyid yin no/ /sems med pa'i 'bras bu gang yin pa de ni rang nyid skye bar 'jug pa ma yin te/ de 'di yin zhes dpyad nas 'jug pa ma yin pa'i phyir ro//'di ltar rang nyid dpyad nas 'jug pa dpyod pa pos bskul nas 'jug par gyur grang na/ sems med pa ni rang nyid 'jug pa ma yin no/ /de la gal te las sems kyi ngo bo nyid yin na gzhan gyis dpyad pa de la dgos pa ci yod/gzhan du na ji ltar las sems kyi rang bzhin yin yang / dbang phyug gis bskul nas 'jug pa de bzhin du rdza mkhan yang dbang phyug gis bskul ba'i 'bras bu'o zhes ci'i phyir khas mi len/ 'on te dbang phyug gis byin gyis brlabs pa'i 'bras bu la 'jug pa yin na/'o na ni dbang phyug kyang dbang phyug gzhan gyis byin gyis rlob par 'gyur ro/ /'on te dbang phyug ni rang nyid yongs su shes pas 'jug gi rdza mkhan ni mi shes pa'i phyir/ rang nyid la dpyod pa'i mthu med pas dbang phyug gis bskul nas 'jug pa'o/ /de'i phyir/mi shes skye bo rang dbang med/ /bdag des sdug bsngal du 'gyur ba/ /dbang phyug gis ni bskul ba las/ /mtho ris dang ni ngan 'gror 'gro/ /zhes smras pa/ de ni bden pa ma yin te/ de thams cad shes par mi 'grub pa'i phyir ro/ /'on te rgyu las 'bras bu yongs su shes par 'dod pa de ltar na yang gcig la gcig brten par 'gyur te/thams cad mkhyen pa sgrub pa na/ bya ba byed pa yin zhing bya ba byed pa nyid las kyang thams cad mkhyen pa sgrub pa'i phyir ro/ /gzhan yang gal te dbang phyug gis bskul ba'i las las 'bras bu skye ba de lta na yang chos nyid ni rjes su gnod par 'gyur gyi/chos ma yin pa ji ltar gnod par 'gyur/ 'khor ba nyid du skyes pa la legs pa ster bas gzhan la phan pa byed par 'gyur ro/ dbang phyug ni 'dod chags dang bral ba dang byed pa dang ldan na/yang ji ltar 'jig rten pa la chos ma yin pa gnod cing mi phan pa ster ba yin/ chos ma yin pa de ni 'jig rten las kyis bskul zhing sdug bsngal bskyed pa ma yin nam zhe na/ de lta na yang / 'khor ba dbang phyug las ma yin par 'gyur ro/ /dbang phyug gi 'dod pa ma gtogs par las gcig pu las 'bras bu skye ba ma yin par smra na/de lta na yang log par rtogs pa nyid do/ /de lta bas na spyi bsgrub par bya ba la 'dod pa grub pa'o/ /'on te phul du byung ba'i blo dang ldan pa sngon du song ba nyid sgrub par byed na/ de'i tshe dpe ma grub par 'gyur te/thams cad mkhyen pa'i byed pa po sngon du 'gro ba nyid gang du yang rjes su 'gro ba ma yin no/ /'dod pa'i yul du byed pa'i bsgrub bya nyid ni brjod pa tsam gyis byed pa po sngon du 'gro bar ston pa ni ma yin te/ de la log par rtogs pa la rgyu med pa'i phyir ro/ /da ni gtan tshigs kyi skyon bshad par bya ste/yang na the tshom za ba yin zhes de la sdod cing 'jug pa dang / don bya ba byed pa la ni shin tu gsal bar ma nges pa nyid do/ /dbang phyug ni sdod cing 'jug pa dang / don byed pa can gyi byed pa po gzhan gyis byas pa ni ma yin no/ /'on te 'dis sems dang ldan pa yin na/'o na ni bde ba dang / sdug bsngal nyams su myong ba'i srog chags kyang sems dang ldan yang dbang phyug gis byin gyis brlabs pa ma yin te/ thams cad shes pa ni rang dbang du ma grub pa'o zhes bstan to/ /dbyibs kyi khyad par ni the tshom za ba'i ma nges pa yin te/'di ltar dbyibs kyi khyad par la phan 'dogs par 'gyur yang sems dang ldan pa byin gyis brlabs pa ma yin pa 'di la 'gal ba ci yod/ don byed pa la sogs pa yang lhag ma dang ldan par mtshungs so/ /ma nges pa de dag dang ldan pa'i phyir de dag ni gtan tshigs sam/rtogs par byed pa ma yin no/ /yang na the tshom za ba dang ma grub par 'gyur ro/ /dbyibs ni sems las skyes par dmigs pa ma yin nam/ ri la sogs pa'i dbyibs kyang rgyu sems las ma rtogs par ji ltar skye bar 'gyur te/ dper na me yis bskyed pa'i du ba me ma rtogs par skye ba ma yin te/'bras bu nyid ma yin par thal bar 'gyur ba'i phyir ro/ /de bzhin du dbyibs ni ji ltar sems ma rtogs par 'byung bar 'gyur zhe na/ 'dir de bzlog pa'i phyir/ byin rlob yod med rjes 'jug can/ /bkod sogs ci 'dra bar grub la//de la rjes su dpog gang yin/ /de ni rigs pa nyid yin no/ /zhes bya ba la 'bras bu nyid tsam mam/ dbyibs nyid tsam gyis ni ma yin te/ mngon par 'dod pa'i rgyu mtshan rtogs pa'i rtags med na ma yin no/ /'on kyang bkod pa la sogs pa ci 'dra bar nges pa ste/'bras bu ni byin gyis rlob pa yod pa dang med pa dag gi rjes su 'jug cing rjes su 'gro ba dang / ldog pa la rag las pa ste de dang ldan pa'o/ /de bas na bkod pa la sogs pa nges pa las gang blo dang ldan pa'i rgyu sngon du song ba nyid yang thog la sogs pa la rjes su dpog pa de ni rigs pa ste mdzes pa'o//'di ltar don byed par ma mthong bar yang / yang thog la sogs pa mthong ba'i phyir blo yis byas pa yin par dpag gi /ri la sogs pa'i dbyibs kyi khyad par yod pa ni sems kyis bskyed pa nyid du mthong ba ni ma yin no/ /de lta ni 'gyur mod kyi/gang gi phyir ri la sogs pa'i dbyibs mthong bar gyur kyang / sems kyis bskyed pa nyid du nges par 'gyur ba ni ma yin te/ de lta bas na bsgrub par bya ba ste/ dper na yod pa'i don mthong yang / mi rtag pa nyid du ma nges pas rjes su dpog pa bzhin no zhe na/ yod pa la sogs pa'i rtags nges pa ni 'brel pa nges par 'dzin pa med pa las mi rtag pa la sogs pa nges pa ma yin pa'i phyir 'dir 'khrul par rigs pa ma yin nam/ 'di ni ra la sogs pa'i dbyibs rigs pa la blo dang ldan pa'i rgyu med na mi 'byung ba dbyibs kyi khyad par dran par yod na ci'i phyir rjes su dpog pa 'byung ba ma yin/tshig gis kyang tshul gsum dran par byed de de ni sngon du yod par nges pa 'gro na/ de yod pa ni ma yin te/ dbyibs kyi khyad par ni byed pa po med par 'byung bas ma grub po/ /de dag gi ni dbyibs kyi khyad par rtags ma yin par bstan no//de ltar 'gyur mod kyi khyad par spangs pa'i spyi dbyibs kyi rtags yod na khyad par ni rtags ma yin pa'i phyir te rjes su 'gro ba dang bral bas so snyam du sems na de'i phyir/ dngos tha dad la rab grub pa/ /sgra mtshungs pas tha dad med phyir/ /rjes dpog rigs pa ma yin te//rdzas sngon po las me dpog bzhin/ /zhes bya ba smos te/ spyi'i rtags de nyid kyang bsgrub bya med na mi 'byung ba dang / 'brel pa med pas yang dngos po tha dad pa la ste/ yod pa'i khyad par bum pa la sogs pa la sems las skyes par grub kyi/ ri la sogs pa la rjes su dpog pa ni rigs pa ma yin no//ci'i phyir zhe na/ sgra mtshungs pa ste/ mngon par brjod pa mtshungs pas gang tha mi dad pa ni rnam pa gcig tu shes pa ste dbyibs mtshungs pa'o/ /de ji lta bu zhe na/ dper na sngon por mtshungs pa'i rdzas ni me dpog pa'i rtags ma yin te/me nges par 'dod pa la sngon po'i khyad par nges par gzung bar byas na me med na mi 'byung ba'i dngos po nyid gang yin pa de rtogs par byed pa yin no/ /sngon po nyid tsam mtshungs pa ni khang pa skya bo la'ang yod pa'i phyir rtogs par byed pa ma yin no/ /rdzas sngon po la me rjes su dpog pa la gnod pa yod de/de dang 'gal ba'i mkhar skya bo la sogs pa mthong ba ma yin nam/ dbyibs mtshungs pa 'di la sems las skyes pa nyid du dpog pa la gnod pa ma mthong ba'i phyir de ji ltar rjes su dpog pa min zhe na/ 'dir smras pa/ de lta min na rdza mkhan gyis//bum pa la sogs 'jim pa yi/ /'gyur ba 'ga' zhig byed pa'i phyir/ /grog mkhar yang byas des grub 'gyur/ /gnod pa med pa nyid kyis rjes su dpog pa skye ba ni ma yin te/ 'on kyang 'brel pa nges pa las so/ /gzhan du 'brel pa nges pa ma gtogs par dbyibs mtshungs pa las sems kyis byas pa nyid du rjes su dpog na/rdza mkhan gyis 'ga' zhig tu 'jim pa'i 'gyur ba bum pa la sogs pa byas pa na grogs mkhar la rdza mkhan gyis bum pa bzhin byas par dpog par 'gyur te/ 'jim pa'i 'gyur ba yin pa'i phyir ro/ /'di snyam du dgongs te grog mkhar la rdza mkhan gyis bskyed pa nyid la gnod pa ma mthong bas rjes su dpag par 'gyur ro//rdza mkhan gyis byas pa las byung bar ma mthong ba nyid gnod pa can ma yin nam zhe na/ de lta mod kyi/ 'on kyang ljon shing la sogs pa sems las byung ba nyid du ma dmigs pa'i phyir/dbang phyug gis byas pa nyid la ji ltar gnod pa med pa yin/ de lta na 'o na ni dmigs par ma gyur pa'i las kyis kyang ji ltar nus pa yin zhe na/ 'gro ba sna tshogs par mthong ba'i phyir/ las yod par bshad par bya'o/ /de'i phyir dbyibs mtshungs pa ni rtags ma yin te 'brel ba dang bral ba'i phyir ro zhes bya bar gnas so//'di ni 'bras bu dang mtshungs pa'i ltag chod ma yin nam/ dper na brtsal ma thag tu 'byung ba nyid du rtogs pa 'di ci ste brtsal ma thag tu 'byung ba dngos po yin nam/ 'on te shes pa yin/ de la brtsal ma thag tu 'byung ba dngos po yin na ni ma grub pa ste/rtag pa nyid du khas blangs pa las rgyu yod pa dang ldan pa ni rtag pa'o zhes smras pas so/ /'on te gsal bar byas pas ni brtsal ma thag tu 'byung ba nyid yin pa de lta na yang mi rtag pa ma yin te/ rtsol bas yod pa nyid du gsal bar byed pa'i phyir ro//ji ltar sgron mas bum pa gsal bar byed pa bzhin no/ /de bzhin du dbyibs kyi khyad par 'dir yang yin te/ ci bum pa la yod pa'i dbyibs yin nam/ 'on te sa la sogs pa'i yin zhes rtogs pa ni 'bras bu dang mtshungs pa'i ltag chod yin no zhe na/'dir smras pa/ bsgrub bya'i rjes 'gro phyir 'bras bu/ /spyis kyang sgrub par byed yin na/ /'brel pa can ni tha dad pas/ /tha dad skyon brjod 'bras mtshungs 'dod/ /ces bya ba la/ spyis kyang rtsol ba las byung ba'i 'bras bu byed kyi yul la skyon gang yin pa de ni 'bras bu mtshungs par 'dod do//skyon ji lta bu zhe na/ tha dad par brjod pa'i skyon te/ tha dad par brjod pa ni bkod pa ste/ 'bras bu zhes bya ba ci mngon par gsal ba la gnas pa ma yin nam/ 'on te skye ba la gnas pa yin zhes 'brel pa can tha dad pa las tha dad par brjod pa'i skyon gang yin pa de ni/'bras bu mtshungs par 'dod kyi yang dag pa'i skyon ni ma yin no/ /ci'i phyir zhe na/ bsgrub bya'i ste/ mi rtag pa'i rjes su 'gro ba'i phyir te khyab pa'i phyir ro/ /'di'i don ni 'bras bu rtsol ba las byung ba nyid ni gal te skye ba la gnas sam mngon par gsal ba la gnas pa de lta na yang rtsol ba'i de ma thag tu byung ba nyid spyir rtag pa la mi srid do//ji ltar yang rtag pa dang 'gal ba'i rtsol ba las byung ba nyid ji lta ba de bzhin du le'u bzhi pa las rtogs par bya'o/ /de lta bas na spyi gzung ba'i rtsol ba las byung ba nyid 'brel pa tha dad pas/tha dad pas brjod pa ni ltag chod nyid yin te/ gal te yang rtsol ba las byung ba'i shes pa dang rtag pa la sogs pa 'gal ba med pa de'i tshe ma nges pa nyid yin no/ /gal te blo sngon du byed pa'i rjes su 'gro ba'i shes pa yod pa ni ma yin pa de lta na yang dbyibs kyi sgra brjod par bya ba nyid kyi rjes su 'gro ba nyid de/dbyibs dbyibs zhes bya ba mngon par rjod par byed pa mthong ba'i phyir ro/ /de'i phyir dbyibs kyang 'brel ba tha dad pas ci dbyibs 'di bum pa la gnas pa'i rtags yin nam/ 'on te ri la sogs pa la gnas pa yin zhes gtan tshigs la rtogs pa gang yin pa de ni skyon ltar snang ba ma yin nam zhe na/'dir smras pa/ rigs gzhan la ni rab grub pa'i/ /sgra yi spyi ni mthong ba'i phyir/ /sgrub byed mi rigs ngag la sogs/ /go nyid yin phyir rwa can gzhan/ /zhes bya ba la/ji ltar tshig las tha dad pa'i rigs gzhan la rab tu grub pas rwa dang ldan zhes te/ tshig la go zhes bya bas ni ma yin te/ tshig la tha mi dad par dpag par bya'o/ /de bzhin du ljon shing la sogs pa dang mtshan nyid mi mthun pa la sems dang ldan par grub kyang dbyibs kyi sgra mtshungs par mthong ba las ri la sogs pa las sems sgrub byed grub pa ni ma yin no//de'i phyir 'dis ni rjod par byed pa ni rtags ma yin par bstan te/ don gyi spyi ni rtags ji lta ba de bzhin du brjod do/ /sgra yang dbyibs kyi khyad par las tha dad pa'i ri la sogs pa la ji ltar 'jug ste/ sgra rnams ni don dang 'brel pa'i phyir ro//des na sgra las dbyibs kyi khyad par grub pa ma yin nam/ de lta bas na sems kyis byas pa nyid do snyam du sems na de'i phyir/ rjod par 'dod pa'i gzhan dbang phyir/ /sgra rnams don dang 'brel ma yin/ /de yod pas ni don grub na/ / thams cad las ni thams cad 'grub/ /ces bya ba la sgra de dag srid pa'i phyir mngon par 'dod pa'i don 'grub pa ste/ nges par mngon par 'dod pa'i don thams cad srog dang bcas pa'i 'jig rten thams cad kyis thob par 'gyur ro/ /gang gi phyir brjod par 'dod pa gzhan gyi dbang gi phyir te/rjod par 'dod pa gzhan la rag las pa'i phyir sgra gang la med pa yin te thams cad la yod do zhes bya ba'i tha tshig go/ /sgra de'i don 'grub na ni su yang phongs par mi 'gyur ro/ /de'i phyir gzhan gyis khas blangs pa'i sgrub byed ni bden pa ma yin no//des ni mi rtag stsogs pas kyang / /ser skya la sogs sems med sogs/ /shun lpags bshus nas 'chi ba'i phyir/ /sems dang ldan pa dpyad pa yin/ /zhes bya ba las sgrub byed ma grub pa des ni brjod pa mtshungs pa'i phyir zhes rtags med pa de ma thag par bstan pas ser skya la sogs pa te/sogs pa'i sgras ni gcer bu pa rnams gzung ngo / /mi rtag pa la sogs pa'i sgras byas pa nyid bstan pa yin te/ sems med pa la sogs par de dag gis spyod pa dang / 'chi ba la sogs pa las sems dang ldan par dpyod par byed do//grangs can ni mi rtag pa la sems med pa dang / gcer bu pa ni shun lpags thams cad bshus pas 'chi ba'i rtags las shing rnams sems yod par ro/ /de dag gnyi ga ni ma grub pa yin no/ /grangs can pa yang yod pa ma yin pa las skye ba ma yin te/yod pa nyid gsal bar byed pas khas len pa'i phyir ro/ /gang yang dngos po'i byas pa nyid gang yin pa des mi shes pa'i phyir tshad ma mi shes pas rgol ba la grub po zhes brjod do/ /ji ltar sems dang mi ldan pa la rtags med pa de bzhin du bstan par bya'o/ /rtags gnyis pa ni phyir rgol ba la ma grub pa yin te/'di ltar sangs rgyas pa ni rnam par shes pa dang / dbang po dang / tshe 'gags pa'i mtshan nyid 'chi ba yin gyi/ gal te shing la de grub na ni sems dang ldan pa grub pa nyid du 'gyur ba de bas na skam pa tsam la 'chi ba zhes smra ba de ni sha skam pa la sogs pa la yang mthong ba'i phyir ro//sogs pa'i sgras ni gnyid log pa la sogs pa gzung ste de ni ma grub pa'o/ /gnyid dang ldan pa'i sems kyi gnas skabs ni gnyid log pa zhes brjod de/ de lta bur gyur pa'i gnyid log pa ni shing la grub pa ma yin no/ /lo ma 'khums pa las gnyid log pa'i sgrar smra ba ni sgra brjod pa tsam las don grub pa ni ma yin no zhes bstan to//gal te 'brel pa can du rtogs pas 'bras bu dang / dbyibs ni sems kyis bskyed pa nyid kyi rtags ma yin na/ 'o na ni byas pa nyid kyang rtags ma yin par 'gyur ba ma yin nam/de la yang tha dad par rtogs pa las 'di ci ste med pa skyed pa yin nam/ 'on te yod pa nyid gsal bar byed pa yin/ de la brtag pa dang po ni grangs can la ma grub pa yin zhing / gnyis pa ni sangs rgyas pa la ma grub pa'i phyir/ ma grub pas byas pa ni rtags ma yin no zhe na/lan smras pa/ dngos po'i rang bzhin ma grub na/ /'di rigs gzhan du grub na ni/ /khyad par gnod pa can min te/ /sgra ni nam mkha' rten yin bzhin/ /zhes bya ba la dngos po ni sgrub byed dam/ chos can gyi rang bzhin la ma grub na 'di rig pa nyid yin te/ de ma grub pa'i mtshan nyid du blta bar bya'o//byas pa nyid la sogs pa'i sgrub byed grub na/ khyad par med pa skyed pa'am/ yod pa gsal ba zhes bya ba de lta bu'i rnam pa ni khyad par gyis gnod pa can la ma grub pa yin no/ /des ni 'di skad du/ rgyu dang rkyen 'brel pa nyid yod pa de'i tshe/ med pa skyed pa nyid kyi phyir ram/yod pa nyid gsal ba las khyad par sems pa ni mkho ba ma yin no/ /mi rtag pa nyid ma rtogs par rnam pa thams cad du nam yang dmigs pa ma yin pa'i phyir byas pa ni rtogs par byed pa yin no zhes bstan pa yin no/ /gal te yang rtag pa la gsal ba mi srid pas gdon mi za bar byas pa nyid go bar byed par 'gyur te/grangs can gyi gsal ba nyid byas pa'i sgrar brjod pa'i phyir ro/ /dper na sgra rna ba'i gzung bya ni nam mkha'i yon tan du ma grub pa las ma grub par 'dren pa ni ma yin no/ /grangs can la byas pa nyid brjod pa las med pa bskyed pa ni gang du yang ma grub pa ma yin nam/de bas na rjod byed ma grub pas gzhan don gyi rjes su dpag par ji ltar rigs she na/ sgra ma grub kyang dngos po ni/ grub na grub par 'gyur te dper/ /'ug pa pa la sangs rgyas pas/ /lus sogs sgrub byed bshad pa bzhin//zhes bya ba smos te/ rjod par byed pa nges pa med kyang dngos po la rtags kyi mtshan nyid gsal byed mi rtag pa la grub pa yin te/ rtag pa la gsal ba mi 'thad pa'i phyir ro/ /dper na 'ug pa pa ste/ bye brag pa la sangs rgyas pas lus la sogs pa'i sgrub par byed pa ste/rtogs par byed pa bshad pa de bzhin du de la 'di ni tshad ma yin te/ rdul phra rab ni mi rtag pa ste/ lus can yin pa'i phyir ro/ /sogs pa'i sgras ni reg par bya ba yin pa'i phyir gzung ngo / /de la gal te bye brag pa la sgra ma grub na yang kun du 'gro ba ma yin pa'i bong tshod kyi lus yin pa dang /reg par bya ba rdzas la tha dad pa'i yon tan sangs rgyas pas reg par bya ba nyid lus can gyi sgrar brjod de/ reg par bya ba'i sgra'i rdzas las tha dad pa'i yon tan grub pa ni ma yin no/ /reg par bya ba don la grub pa'i phyir sgrub byed yin no//ji ltar don ma grub pa nyid dang / ma nges pa la sogs pa ni rtags ma yin pa de bzhin du sgra yang ma grub pa'am/ ma nges na gtan tshigs ma yin pa yin nam zhe na/ 'dir smras pa/ de nyid 'khrul la sogs yin na/ /sgra ni 'khrul pa med na yang //sgrub byed skyon ldan shes bya ste/ /dngos las dngos po grub phyir ro/ /zhes bya ba la de nyid de don la 'khrul pa'o/ /sogs pa'i sgras ni ma grub pa'am/ 'gal bas skyon dang ldan pa'i sgrub byed du shes par bya ba'i sgra la ma yin te/ don de dang 'brel pa med pa'i phyir ro zhes bshad do//don ni 'brel pas go bar byed pa yin te/ de dang bral na go bar byed pa ma yin pas don la brten pa nyid kyis skyon du rnam par gzhag par bya'o/ /yang na sgra rnams 'khrul pa med par grags pa yin du chug na yang 'khrul pa med pa'i sgra ni dngos po dang bral na sgrub byed skyon can no//ci'i phyir zhe na/ dngos po las dngos po grub pa'i phyir te/ dngos po nyid dngos po'i go byed de 'brel pa'i phyir yin gyi/ sgra ni ma yin te/ 'khrul pa'i phyir ro/ /'o na ni ma 'khrul par ji ltar 'gyur zhe na/ grags pa'i khyad par can gyi yul la nges par byed pa'i phyir ro//de lta bas na rtogs par 'dod pas 'khrul pa med pa nyid yin pa de lta na yang 'brel pa'i rgyu dang bral ba'i phyir sgra rnams go bar byed pa ma yin no/ /de la glang phrug gi bye brag ni mche ba can te/ lag can yin pa'i phyir ro zhes bya ba 'di ni dper brjod pa ste/'dir yang gtan tshigs kyi don glang po che dang 'brel pa la brjod par 'dod do/ /lag pa dang ldan pa ni rwa can las tha dad pa'i skyes bu la sogs pa yod pa'i phyir rtags 'khrul pa yin no/ sgra ni glang po che la 'jug par grags te/ lag pa can tsam don ni ma yin no//rtogs pa pos mngon par zhen pa'i dbang gis sgra ma 'khrul pa nyid yin no/ /de lta bas na mi rtag na yang tshad ma yin no zhes bya ba 'di legs par gnas so/ /yang gi sgras ni rtag pa yang ngo / /gal te yang dbang phyug la sgrub par byed pa'i tshad ma go byed med pa de lta na yang dbang phyug gis bskyed pa'i sna tshogs la gnod par byed pa med pa ma yin nam/dbang phyug de ji ltar med par nges she na/ 'dir smras pa/ ji ltar dngos de rgyu yin la/ /de ltar de nyid gang gi tshe/ /rgyu min de ni gang gi rgyur/ /'dod la rgyu min cis mi 'dod// //tshad ma rnam 'grel gyi 'grel pa las/ bam po gsum pa/ ji ltar rang bzhin gang gis sna tshogs pa'i rgyu de dbang phyug ces bya ba'i dngos po yin pa de ltar rang bzhin de nyid kyi rgyu ma yin pa de'i tshe de'i rgyu tshad ma gang gis 'dod cing / rgyu ma yin pa nyid du ci'i phyir mi 'dod 'di'i dgongs pa ni 'dod chags la sogs pa dang bral ba dbang phyug rtsom par byed pa la sngar rgyu med pa de bzhin du rtsom par byed pa'i tshe yang rgyu med pa nyid do//dbang phyug gi sems byed pa la zhugs pa na/ srog chags rnams sdug bsngal la 'jug par 'dod pa ni med do//yang na las kyi stobs nyid kyis gson pa'i 'jig rten bde ba dang / sdug bsngal bar 'gyur gyi dbang phyug gis ni ma yin no/ /las kyi 'jug pa ni rang gi 'bras bu skyed pas dbang phyug gi 'dod pa med na med par bstan pa ma yin nam zhe na/ de'i phyir 'dod chags dang bral ba ni gzu bo nyid yin gyi ci'i phyir bde ba dang / sdug bsngal la skul zhing 'gyegs pa la 'jug par byed pa yin/ yang na khyab pa nyid dang / gcig pu nyid kyi dbang phyug ces bya ba'i dngos po de nyid thams cad du rgyu yin na/ de bzhin du de nyid khyab pa nyid dang /gcig pa nyid kyi nam mkha' la sogs pa la de gang gi tshe rgyu min pa yin pa na de'i tshe/ dbang phyug ces bya ba la gang gis rgyur 'dod par bya ste nam mkha' bzhin du rgyu ma yin par ci'i phyir mi 'dod/ 'on te 'bras bu byed 'dod pa de la yod cing nam mkha' la sogs pa la de dang bral ba'i phyir rgyu ma yin pa nyid ces bya'o zhe na/byed 'dod pa tsam nyid kyis sna tshogs dbang phyug gi 'bras bu ni ma yin no/ /'on kyang byed pas yin na/ de yang med par rjes thogs su bshad par bya'o/ /byed 'dod pas ni 'bras bu 'byung bar 'gyur ba stes dbang du yang mi srid do//gal te yang kho bo cag gis dbang phyug bya ba byed par ma mthong yang de kho na nyid mthong bas de gzigs pa ma yin nam zhe na/ de ni rigs pa ma yin te/ dbang phyug du mar rtogs par thal bar 'gyur ba'i phyir ro//dbang phyug du mar 'gyur mod skyon ci yod ce na/ mtshon dang sman gyi 'brel ba las/ /nag pa'i rma ni 'tsho ba na/ /'brel med sdong dum ci yi phyir/ /rgyu nyid du ni rtog mi byed/ /ces bya ba smos te/ bdag cag la sogs pas byed pa ma mthong ba can gyis sdong dum la dbang phyug bzhin du rgyu nyid du ci'i phyir mi rtog /gang gi 'bras bur zhe na/ /mtshon dang 'brel ba las rma 'byung zhing / sman dang 'brel ba las rma 'tsho bar 'gyur te dbang phyug bzhin no/ /sdong dum la byed pa ltar rung ba mi dmigs pa las bdag gi dngos po shes pa ni rigs pa ma yin la/dbang phyug ni ltar rung ba ma yin zhing / ma mthong ba las kyang bya ba byed pa mi ldan pa ma yin nam zhe na/ 'di la lan gdab pa'i phyir/ rang bzhin tha dad med par ni/ /don byed pa yang mi rung ngo / /rtag la ldog pa nyid med phyir//nus pa nyid ni rtogs par dka'/ /zhes bya ba la rtag pa ni rgyun gyis rtag pa las sam/ gzhan yang rung ste/ dbang phyug gis byed pa mi rigs pa'i phyir ro/ /rang bzhin tha dad pa med pa ni 'bras bu phul du byung ba med pa ste/ gal te rdza mkhan gyis byas pa'i dbyibs la sogs pa'i khyad par bzhin/ri la sogs pa dbang phyug gis byas pa'i khyad par dmigs na ni dbang phyug gis nus pa yin no/ /yang gal te dbang phyug de nyid rang bzhin gcig pa yin na/ 'bras bu'i dus su rang bzhin gyis tha dad par blta ste/ rtag pa la tha dad pa dang 'brel pa'i phyir/'bras bu la nus pa ring du gyur pa ni rtag pa la tha dad pa'i dngos po med do/ /de ltar ni 'gyur mod kyi/ tha dad pa las dbang phyug gi 'bras bu nus pa ma yin gyi/ 'on kyang rtag pa dang khyab pas 'bras bu'i yul du nye bar byed par nus pa yin no/ /sdong dum la ni gdon mi za bar nye ba med pa'i phyir rma 'tsho ba'i rgyu med do zhe na smras pa/gang dag yod pas yod 'gyur nyid/ /gang de dag las gzhan rtog na/ /de rgyu nyid du thams cad la/ /rgyu rnams thug pa med par 'gyur/ /zhes bya ba la gang dag ste sa bon dang zhing sa la sogs pa'o/ /yod par 'gyur ba nyid de med na ni ma byung ba yin no//gang ste myu gu la sogs pa'o/ /de dag ni gzhan dbang phyug go/ /de rgyu nyid myu gu'i rgyu yin par rtog na ni mtha' med par 'gyur ba de ltar na so sor nges pa'i rgyu nyid nges pa ma yin no/ /rtag pa nyid dang khyab pa nyid kyis rgyu nyid bsal ba yin no//'o na gal te sa yongs su ma gyur pa'i rang bzhin myu gu la sogs pa skyed par byed pa de bzhin du dbang phyug kyang 'bras bu gzhan dang gzhan skyed par byed do zhe na smras pa/ myu gu skye la sa la sogs/ /rang bzhin yongs su gyur nas ni/ /rgyu yin legs par sbyangs pa na/ /de yi khyad par mthong phyir ro//zhes bya ba la/ rang bzhin yongs su gyur pa ni gong nas gong du 'bras bu'i khyad par skyed pa'i rjes su 'gro ba phul du byung ba ste/ des na rgyur gyur pa ni sa la sogs pa'o/ /sogs pa'i sgras ni sa bon la sogs pa bzung ste myu gu la sogs pa skyed pa'i rgyu yin no//rang bzhin ma gyur pa ni ma yin te/ ci'i phyir zhe na/ sa la sogs pa de sbyangs pa na/ 'bras sA lu la sogs pa btab na/ myu gu'i khyad par gzhan dang / gzhan gyi rang bzhin mthong ba'i phyir ro/ /gal te sa la sogs pa ma gyur pa nyid myu gu'i rgyu yin na de'i khyad par la ltos pa ma yin no//'dir smras pa/ ji ltar yul dang dbang po yis/ /tshogs pa khyad med blo rgyu yin/ /de ltar 'di yin zhe na zhes bya ba la/ ji ltar mig phye na gzhan dang gzhan mthong ba de bzhin du gzugs la sogs pa'i yul gzhan dang gzhan mthong bar 'gyur gyi de la gzhan dang gzhan du 'byung ba'i 'bras bu 'gyur bar dpog pa ni ma yin no//de ltar mi 'gyur ba'i rang bzhin 'phrog byed ni sa gsum skyed pa yin no zhe na/ mig de la'ang khyad par yod phyir ro/ /zhes bya ba la mig la sogs pa de la yang khyad par yod pa yin te/ 'di ltar gzugs kyi khyad par yul nye ba dang ring ba las gsal ba dang /mi gsal ba'i rig pa skye ba de bzhin du mig cung zad zum pa las mi gsal bar snang ba'i phyir/ mig la sogs pa'i khyad par phul du byung bar rnam par shes pa las grub pa yin no/ /de ltar ni 'gyur ba mod kyi/mig la sogs pa la gnas pa'i khyad par mngon sum las 'das pa'i phyir/ ji ltar nges pa yod pa yin te/ gang gis na de tha dad pas 'bras bu tha dad par bya zhe na/ 'dir smras pa/ so so so sor nus med rnams/ /rgyun la phul byung med pa na/ / tshogs pa yod na'ang nus med 'gyur/ /de'i phyir phul byung gyur pa yin/ /zhes bya ba la/ gang gi phyir mig la sogs pa rnams so/ /so sor ni nus pa med pas mig la sogs pa'i rig pa ni rang bzhin so sor nges par skye ba ni ma yin te/ yul gyi rnam pa rtogs pa'i rang bzhin ma mthong ba'i phyir ro//tshogs pa yod na yang rgyun phul du byung ba ste/ khyad par du gyur pa med na nus pa med par gyur te gnas skabs so so ba bzhin no/ /mthong bas dbang po 'grub pa de bzhin du mig la sogs pa rnams la phul du byung ba grub pa yin no/ /'di'i dgongs pa ni ji ltar 'bras bu mthong bas dbang po la sogs pa yod pa de bzhin du 'bras bu'i khyad par mthong ba las phul du byung ba nges so//de phyir so sor nus med gang / /tshogs la yon tan srid 'gyur ba/ /de dag rgyu yin dbang phyug sogs/ /ma yin khyad par med phyir ro/ /zhes bya ba la/gang gi phyir de ltar tshogs pa na yang phul du byung ba ma rtogs par 'bras bu skyed pa med de/ de'i phyir so sor mi nus pa gang yin pa mig la sogs pa rnams la yon tan srid par 'gyur te/ grogs byed pa 'am nye bar sdud par skyed pa'o/ /sdud pa'i tshe dbang phyug la sogs pa tha dad pa med pas rgyu ma yin pa nyid do//sogs pa'i sgras ni dus dang phyogs rnams bzung ngo / /de lta bu 'dis ni dbang phyug la gnod par byed pa'i tshad ma dang / don byed pa la sogs pa'i sgrub par byed pa'i tshad ma med par bstan pa yin no/ /ji ltar rtag pa'i tshad ma la rgyu dang rtags med pa de bzhin du mi rtag pa'i tshad ma la yang de bzhin du med pa ma yin nam/gang gi phyir/ lkog gyur don shes tshad ma yin/ /de la sgrub byed med pa'i phyir/ /'jug par byed pa yod min zhes/ /kha cig rab tu rjod par byed/ /ces bya ba la/ tshad ma ni lkog tu gyur pa ste/ dbang po las 'das pa thams cad rig par khas len na de yang dbang po las 'das pa'i rig pa sgrub par byed pa'i gtan tshigs gang yin pa de med pa'i phyir ro//thams cad mkhyen pa sgrub pa'i yul la 'jug pa mi srid do zhes kha cig rjod par byed de/ 'di ltar thams cad mkhyen pa'i gtan tshigs med pa'i phyir ro//'di ltar gdon mi za ba thams cad shes pa rtogs pa'i rgyu nges pa ma dmigs pa yin te/ gang sngags la sogs pa dmigs pa de ni grub pa'i mtha' thams cad la thun mong ba'i phyir gtan tshigs nyid do zhes bya bar nges pa ni ma yin la/ thams cad rig par nges pa'i gtan tshigs yod pa ma yin te/bdag cag gis ma dmigs pa'i phyir ro/ /mngon sum gyi nges par mi byed la phyogs gcig tu myong ba la nges pa yang ma yin te/ rig byed la sogs pa la yang yod pa'i phyir ro/ /shes bya thams cad mngon sum du byed par 'gyur ba ni ma yin te/da ltar byung ba dang rung ba'i yul ni mig la sogs pa'i stobs kyis 'dzin pa'i phyir ro/ /gzhan yang dngos po thams cad mngon sum du byed pa thams cad mkhyen pa yin na/ mi gtsang ba la sogs pa'i ro yang myong bar 'gyur te/ phrad pa 'dzin pa'i phyogs la yang //ji ltar dbang pos thams cad rig /'on te yid kyi rnam par shes pas thams cad shes na ni de yang dbang po'i shes pas gzung ba des 'dzin pa'i phyir te/ gzhan du na yid 'khrul par thal bar 'gyur ro/ /rjes su dpag pas gzung ba la yid 'jug pa ni ma yin te/de ni yul dang dus nye ba yin pa'i phyir ro/ /yid kyi rnam par shes pa bstan bcos kyi yul la 'jug pa ni ma yin te/ de las phyin ci log gi don la 'jug pa'i phyir ro/ /shes bya thams cad mngon sum du byed pa yang rim gyis sam/ cig car yin par brtag grang na/de la rim gyis ni ma yin te/ shes bya dpag tu med pas yongs su mi rdzogs pa'i phyir ro/ /cig car mngon sum du byed pa yang ma yin te/ rjes las thob pa'i shes pa gzung ba 'dzin pas tshad ma yin par 'gyur ba'i phyir ro/ /thams cad rig pa 'di yin no//zhes bya bar nges pa'i thabs yod pa ni ma yin te/ bdag cag la sogs pas shes bya ma lus pa 'dzin pa med na thams cad shes pa nges pa ma yin pa'i phyir ro/ /thams cad rig pa ma grub na de'i sgrub pa nges pa med pa'i phyir 'jug par mi 'gyur ro snyam na/ de la lan btab pa/mi shes ston par byed pa la/ /'khrul par dogs pa can rnams kyis/ /de bshad dogs par bya ba'i phyir/ /shes ldan kha cig tshol bar byed/ /ces bya ba la/ shes pa dang ldan pa kha cig shes pa dang ldan pa des brjod pa la ci'i phyir 'jug pa na rtogs par bya ba'i phyir te/ci zhe na/ mi shes pa ston par byed pa la 'jug na 'khrul par dogs pa'i phyir ro zhes spyod de/ de ltar dogs pa'i the tshom dang ldan pa rnams don du gnyer bar byed do zhes bya bar snyegs so/ /de'i don ni 'di yin te gang du 'jug par 'dod pa der ye shes don du gnyer bar byed kyi gzhan du mi shes pa la ma yin te/'dod pa'i don la 'khrul pa srid pa'i phyir ro/ /'on kyang mngon par 'dod pa'i yul la yongs su shes par 'dod pa de tsam zhig tshad mar 'gyur te/ 'di ltar bcom ldan 'das thams cad mkhyen pa'i phyir na tshad ma ma yin gyi/ 'on kyang slu bar mi byed pas tshad ma ma yin no//de'i thams cad mkhyen pa ni rjes su dpag par bya ba ste/ 'di ltar gtso bor gyur pa ni skyes bu'i don shes pa dang / tshad mas mthong ba'i don shes par 'gyur ba'i phyir gzhan du yang yongs su shes pa yod do/ /gang yang tshad mas mthong ba'i don gtso bor gyur pa ma shes na/de tshad ma ma yin no/ /ji ste tshangs pa la sogs pas bstan ce na/ rmongs pa gcig nas gcig tu bstan pa'o/ /'o na bcom ldan 'das kyang ji ltar mngon sum du byed pa rjes su dpag ce na/ tshad mas mthong ba gtso bor gyur pa'i don ston pa'i phyir ro//gal te yang mngon sum du byed pa med na tshad mas mthong ba gtso bor gyur pa'i don la bcom ldan 'das mi slu bas/ dbang po las 'das pa la sogs pa 'jug par 'gyur ba na rtogs pa sngon du gtong ba yin no/ /rig byed la ni don mngon du byed pa'i tshad ma ma mthong zhing /gtso bor gyur pa'i don la mi slu ba med pa'i phyir/ rnam pa thams cad du 'jug pa ma yin no/ /de phyir de la 'jug pa yi/ /shes pa rnam par dpyad bya yi/ /srin bu'i grangs ni yongs shes pa/ /de ni kho bo la ci mkho/ /zhes bya ba la/ gang gi phyir 'jug pa gang yin pa de nyid du yongs su shes pa tshol ba de bas na 'phags pa'i bden pa bzhi'i yul la 'jug par gyur pa dang /las dang 'bras bu'i 'brel pa yongs su shes pa dag bcom ldan 'das la dpyad par 'os kyi srin bu'i grangs yongs su shes pa ni de bzhin gshegs pa de la kho bo cag ste/bdag cag mtho ris dang thar pa don du gnyer ba rnams la cung zad kyang nye bar mkho ba ma yin no/ /gal te gtso bor gyur pa'i don la slu ba med pas bcom ldan 'das thams cad mkhyen par brjod na/ lo gcig khyud skor la zla ba bcu gnyis yod par mi slu bas rig byed kyang tshad mar 'gyur ro zhe na/'dir smras pa/ blang dang dor bya'i de nyid ni/ /thabs dang bcas par rig mdzad pa/ /gang yin de ni tshad ma ste/ /thams cad rig mdzad ma yin no/ /zhes bya ba la/ dgos pa med pa'i phyogs gcig mkhyen pa las bcom ldan 'das tshad ma ma yin no/ /'on kyang blang ba dang dor ba'i de kho na nyid ni sdug bsngal dang 'gog pa ste/de'i thabs ni rim pa bzhin kun 'byung dang / lam rig par mdzad pa gang yin pa de ni tshad mar 'dod kyi/ srin bu la sogs pa thams cad kyi grangs yongs su shes pa las ni ma yin no/ /'dis ni 'phags pa'i bden pa bzhi mngon du byed pa dang /mtho ris kyi lam rig pa las bcom ldan 'das tshad ma yin par ston to/ /ci thams cad rig pa mi srid dam yang na de yis gcig tu dgos pa med pas gtso bor gyur pa'i don yongs su shes pa'i tshad mar brtag ce na/ smras pa/ ring por mthong ngam ma mthong yang //'dod pa'i de nyid mthong ba yin/ /ring mthong tshad ma yin na ni/ /tshur shog bya rgod bsten par gyis/ /zhes bya ba la/ thams cad rig pa med pa ni ma yin te/ 'on kyang tshad ma la phan 'dogs pa med do/ /'di ltar ring por mthong ba'am/ thams cad ma mthong yang rung ste/ 'dod pa'i de kho na nyid 'phags pa'i bden pa bzhi mthong ba'i phyir tshad ma'o//'on te ring du mthong ba tshad ma yin na skabs su bab pa'i don ma shes par de'i tshe grogs dag song ngam/ shog la thar pa 'dod pa la mtho ris don du gnyer ba khyed kyis ring du mthong ba'i bya rgod bsten par gyis shig /'di'i don ni 'di yin te/thams cad mkhyen pa rnam pa kun nas spong ba ma yin te/ 'on kyang thabs dang bral bas kho bo cag yongs su shes pa'i lam du 'jug pa ni ma yin no/ /gang zhig tshad mar gyur par 'dod pa des shes bya thams cad mngon sum du bya ba ste gzhan du na yongs su tshang ba'i don mi srid pa'i phyir ro//ci ste don gyi gtso bo shes pa dang / thams cad rigs pa'i tshad ma nyid la rgyu ci zhig yod ce na/ de'i phyir sgrub byed thugs rje zhes bya ba smos te/ pha rol sdug bsngal dang bral bar 'dod pa'i snying rje de yang rab kyi mthar phyin pa ste de ni thams cad mkhyen pa'i sgrub byed do//snying rje ni thabs ma shes na sdug bsngal gyi rgyu sgrub pa ma yin nam/ 'di ltar ji srid du srog chags rnams la snying rje skyes pa de srid du sdug bsngal gyis nyon mongs par 'gyur ba'i phyir/ rang nyid sdug bsngal na/ ji ltar thams cad mkhyen pa 'grub par 'gyur te/sdug bsngal can la phan 'dogs pa dang bral ba'i phyir ro/ /'on te de'i thabs yongs su shes pa yod pas snying rjes sdug bsngal mi skyed na/ 'o na ni lam nyid sgrub byed yin na snying rjes ci zhig bya ste/ 'di ltar lam mngon du byas pas/ sdug bsngal thams cad ldog go zhe na/'dir smras pa/ thams cad shes pa skyed pa snying rje ni ma yin te/ 'on kyang thabs goms pa nyid kyis thams cad mkhyen pa nyid thob bo/ /snying rjes kyang thams cad mkhyen pa'i thabs la skyes bu 'jug par byed pas sgrub byed du brjod do/ /gal te yang srog chags rnams la snying rje med na ni thams cad mkhyen pa'i thabs la 'jug pa ma yin la/bdag dang bdag gir 'dzin pa med na 'dod chags la sogs pa zad pa 'gyur ba'i phyir bdag med par mthong ba de ni gnyen po yin no/ /de'i phyir yid snying rje dang ldan par gyur na sdug bsngal thams cad dang bral te/thams cad mkhyen pa nye bar skye bar 'gyur ro/ /rab kyi mthar phyin pa'i snying rje de nyid gang la skye bar 'gyur zhe na/ de'i phyir/ goms pa la zhes bya ba smos te/ skye zhing skye ba thams cad du snying rje de nyid goms pa las rab kyi mthar phyin par 'gyur te/ 'di ltar dge ba'i bshes gnyen gyis yongs su zin pa'am/rang nyid kyis nyams su myong ba chen pos sems can rnams la snying rje skyes te yang de nyid la mngon du byas nas skye ba du ma ru bskyed cing goms pa mthar phyin par gyur nas snying rjes skyes bu rnams la phan 'dogs pa'i shes pa 'jug pa'i phyir/ de nyid thams cad rig pa'i sgrub byed do/ /'dir brjod pa/ blo ni lus la brten pa'i phyir/ /goms pa grub pa med ce na/ /zhes bya ba la blo ni lus 'di la brten pa ste/ 'di ltar pha dang ma'i rjes su 'brang ba'i gzugs dang / yid dang snyan pa dang / tha snyad la sogs pa bu'i yul mthong ngo //dper na ri mo mkhan gyis bris pa'i ri mo rtsig pa'i logs la gnas pa ni rtsig pa las gzhan du brten pa ma yin zhing / khang pa zhig na 'jig par 'gyur ro/ /ma du lung ga'i 'bras bu la brten pa'i gzugs la sogs pa ni de nyams na 'jig par 'gyur te/ de'i yon tan yin pa'i phyir dang /'bras bu gzhan la mi brten pa'i phyir ro/ /mes skyed pa'i nges par gyur pa'i du ba yang de'i 'bras bu yin pa'i phyir de zhig na 'jig par 'gyur ro/ /chang gi nus pa yang chang gi rdzas la brten pa nyid de/ chang gzhan la mi brten pas rang gi rten nyams na ldog par 'gyur ro//de bzhin du blo yang lus la brten pa'i phyir/ lus zhig na 'jig par 'gyur te/ lus gzhan dang 'brel pa med pa'i phyir ro/ /des na skye ba gzhan nyid med pa'i phyir skye ba gzhan du goms pas bsags pa mi 'grub po zhe na/ de ni rigs pa ma yin te/min te rten ni bkag phyir ro/ /zhes bya ba la/ sngar gyi rnam par shes pa la ma ltos pa'i lus ni rgyu rgyun nyid kyis sam/ yon tan gyis sam/ nus pa'i rang bzhin gyis rten du gyur pa'i dngos po bkag pa'i phyir ro/ /ji ltar lus la brten pa med par de ltar yang bshad par bya'o//ji ste pha dang ma'i mig la sogs pa dang 'dra bar bu'i mig la sogs pa dmigs par gyur pas 'jig rten gzhan las 'ongs pa nyid ni ma yin na/ de ji ltar 'jig rten pha rol par yod par nges she na/ 'dir smras pa/ skye zhing skye ba len pa na/ / rang gi rigs la ltos med can/ /'byung rngub dbang po blo rnams ni/ /lus gcig pu las ma yin te/ /thal ches phyir ro zhes bya ba la 'byung ba dang rngub pa dang / dbang po dang / blo de dag gi g.yo ba la sogs pa'i rang bzhin gyi khyad par las rang gi rigs la ltos pa med pa'i yul las skye ba ni ma yin te/gang gi phyir mi srun pa ni bdag dang bdag gir goms pa'i rgyu can yin gyi/ pha dang ma'i rang bzhin kho na'i rgyu can ma yin no/ /dam pa ma yin pa dang 'grogs na skye bo dam pa yin par snang ste/ g.yo ba la sogs pa des sngon mi srun pa la goms pa'i rgyu can yin no//ma la sogs pa'i sems kyi dpyod pa la sogs pa bu la snang ba ma yin nam zhe na/ ma yin te pha dang ma'i rang bzhin 'dod pa'i stobs nyid las/ der pha dang ma dag yongs su 'dzin te dper na mkhan pos chos bshad pa'i lugs slob ma de la goms pa'i khyad par nyid snang ste/mkhan po'i blo las slob ma shes pa skye ba can du khas len pa ni ma yin te/ slob dpon ni gcig tu bdag po tsam nyid do/ /slob dpon gyis bshad pa la/ rang 'dod pa goms pa'i stobs kyis chos 'dzin par byed do/ /de bzhin du ma la sogs pa'i chos 'dzin pa 'di yang rang 'dod pa la goms pa nyid do//gang ma la sogs pa'i rang bzhin 'dod pa tsam ni pha la sogs pa'i spyod pa 'dzin pa ma yin no/ /de'i phyir lus 'ba' zhig las srog chags rnams skye ba ni ma yin no/ /'on te srog chags rnams kyi skye ba ni lus 'ba' zhig las 'byung bar khas len te/goms pa las mi srun pa la sogs pa mthong ba las ni gnod pa dang bral ba'i phyir srog chags rnams ni lus las skyes pa la gnod pa med do zhe na/ de lta na yang skye ba yongs su 'dzin pa la thal ches te/ da ltar byung ba'i dus su mi srun pa la sogs pa la goms par 'jug par mi 'gyur ba de bas na/rgyu dang 'bras bu'i dngos po thams cad nyid nyams par 'gyur ro/ /de lta bas na 'bras bu'i chos gang yin pa de ni rgyu med pa ma yin no/ /gal te yang sngon byis pa'i gnas skabs na mi srun pa la sogs pa ma gtogs par mi srun pa la sogs pa la goms pa dang 'brel par da ltar yang snang ngo //du ba ni du ba las kyang skye zhing me las kyang byung ba dang / de bzhin du 'bras sA lu ni sA lu nyid dang res 'ga' ba lang gi lci ba las 'byung ba dang / ri mo ni ri mo mkhan gyis byas pa dang / ri mo mkhan ma gtogs par bya'i gshog pa la snang ba de bzhin du/goms pa ma gtogs pa nyid du mig la g.yo ba la sogs pa mthong ba'i ma yin nam zhe na/ de ni rigs pa ma yin te/ gang gi phyir du bas bskyed pa'i du ba'i rnam pa bzhin du/ me las 'byung ba ni ma yin te/ me yis bskyed pa'i du ba ni rgyun 'jug pa yin la/ du bas bskyed pa'i du ba ni skad cig re re la 'jig cing 'jug par shes par bya'o//'di ni byis pa'i dus su goms pa ma gtogs par goms pa las byung ba'i g.yo ba la sogs pa ji lta ba de bzhin g.yo ba la sogs pa shes par bya ste/ des na sngon rang gi rigs la goms pa sngon du 'gro ba yin no//yang na thal ches par 'gyur te/ gal te lus 'ba' zhig las 'byung 'jug la sogs pa 'byung ba de'i tshe sa la sogs pa las dbugs 'byung bar 'gyur te/ 'byung ba nyid du khyad par med pa'i phyir ro/ /de lta bas na sa'i steng thams cad srog chags kyi rang bzhin du thal bar 'gyur ro//'on te 'byung ba yongs su gyur pa'i khyad par nyid srog chags su skye na yongs su gyur pa'i khyad par de yang / yongs su gyur pa'i khyad par gzhan las yin pas yongs su gyur pa gzhan dang gzhan du mtha' med par 'gyur ro/ /ji ste yongs su gyur pa de mthong du rung ngam mi rung /gal te mthong du rung na ni med de mi dmigs pa'i phyir ro/ /'on te mthong du mi rung na ni yod par ji ltar shes/ 'byung ba ma gtogs pa gang yang yongs su gyur pa'i rgyu med de/ gal te gyur pa rang gi nye bar len pa tsam dang 'brel pa yin na/yul dang dus thams cad par 'gyur ro/ /ji ste 'byung 'jug la sogs pa rnams 'bras bur 'gyur ba'i dbang po la sogs pa skye ba gzhan du 'jug pa ni grub tu chug na ma 'ongs pa'i skye bar 'jug par ji ltar grub/ 'chi ba'i gnas skabs kyi mig la sogs pa'i 'jig rten gzhan gyi shes pa'i 'bras bu ma yin pa ma yin no zhe na/de ni bden pa ma yin te/ /gang gi phyir na mthong ba gang / /nying mtshams sbyor bar nus pa ni/ /de cir 'gyur na phyis gang med/ /gang gis mtshams sbyor ldan med yin/ /zhes bya ba la/ srog chags la sogs pa sngon gyi dus su nying mtshams sbyor bar nus pa dang ldan pa gnas skabs bar mar mthong ba gang yin pa'am/'jig rten gzhan du 'jug pa'i srog chags la sogs pa de ni sngar yod pa la lhag pa ci zhig yod na/ rgyu gang zhig med pa yin/ phyi nas 'chi ba'i gnas skabs su gang gi de lhag pa'i rgyu ba dang bral bas/phyis 'chi ba'i dus su 'jig rten gzhan du 'byung ba'i srog la sogs pas srog la sogs pa nying mtshams sbyor ba ni ma yin zhing / de'i rgyu med pa yin/ g.yo ba la sogs pas ni mi g.yo ba goms pa las 'byung ste nyam chung ba la sogs pa'i mtshan nyid las nyam chung ba ni lus la brten pa des na skye ba snga ma ma grub pa ma yin nam/de bas na skye ba thog ma med pa brgyud pa ma grub pas thog ma med pa nyid med kyang dper na du ba du ba gzhan gyis bskyed pa rgyun chad pa de bzhin du rigs mthun pas bskyed pa'i srog la sogs pa yang kun du mi 'jug pa'i phyir ro//srog chags rnams thog ma med pa ma yin no/ /snga ni med pa'i sems can gyi skye ba yang sngon gyi rgyun 'chad pa'i phyir ro zhe na/ 'dir smras pa skye ba rnams nyam chung ba la sogs pa rang bzhin nyid kyis ma yin te/ 'on kyang rang gi rigs goms pa las so//ji ltar g.yo ba la sogs pa de goms pa las yin pa de bzhin du nyam chung ba la sogs pa yang le lo goms pa las te/ 'di ltar gnyid goms pa las mig rdib par 'gyur zhing sad na ni mi g.yo ba'i phyir log pa dang sad pa bzhin mngon du gyur pa'i bag chags las sad pa dang po skye ba'i tshe mig la sogs pa dang ldan no//lus gzhan la gnas pa lus gzhan du ji ltar 'pho bar 'gyur zhe na/ ji ltar rdzas gzhan la gnas pa'i nus pa sngags la sogs pa'i mthus rdzas gzhan la 'pho ba ste/ 'di ltar dug gi nus pa sngags kyi stobs kyis kha ra la sogs pa la 'pho ba de bzhin du las kyi mthus lus la gnas pa'i mig la sogs pa lus gzhan la 'phen par byed pas de bas na mig la sogs pa thog ma med pa grub pa yin no//snyi ba la sogs pa'i khyad par bzhin 'byung po'i tshogs gang yang rung ba'i srog la sogs pa yang ma yin nam zhe na/'dir smras pa/ gang la drod gsher sogs skye bas/ /skye bo skye bar mi 'gyur ba'i/ /sa sogs cha ste 'ga' yang med/ /de'i phyir thams cad sa bon bdag /ces bya ba la sa la sogs pa'i cha 'am/ bye brag 'ga' yang yod pa ma yin te/sa la sogs pa'i cha gang zhig tu srog chags skye ba ma yin pa'o/ tha ma na drod gsher las skye ba ni mthong ba ste sogs pa'i sgras ni sgo nga las skye ba la sogs pa gzung ngo / /'di ltar ras la gtums pa'i chu yang zhag cung zad cig gnas pa na der sems can gnas te rgya mtsho chen po na ni srog chags cha byad sna tshogs pa thams cad snang ba yin no//de'i phyir de bas na/ 'byung ba'i skyed pa thams cad srog chags dang ldan pa de'i phyir srog la sogs pa ni cha shas med pa yin no/ /'o na khyod kyi lugs kyis kyang thams cad srog chags dang ldan pa ma yin nam/sa la sogs pa thams cad la srog chags skye ba med ce na/ 'dir smras pa/ de ltar dbang po sogs rigs las/ /ltos med rnams ni 'byung ba na/ /ji ltar gcig ni 'gyur ba yin/ /kun 'gyur khyad par med phyir ro//zhes bya ba la 'byung ba rnams las su rung yang rigs mthun pa la ma ltos par shes pa skye ba ma yin te/ 'on kyang las bdag por gyur pa las srog chags rnams 'byung ba yin no/ /des na bag chags sad pa skye ba gang yin pa der srog chags rnams skye ba yin no//khyod la ni 'byung ba las ma gtogs pa'i las khas mi len pa'i phyir 'byung ba tsam dang 'brel pa'i mig la sogs pa rnams 'dod do/ /de bas na dbang po la sogs pa rnams rigs mthun pa la ma ltos par 'byung na ni dper na 'byung ba'i tshogs gcig la srog chags kyi gzugs su gyur pa de bzhin du 'byung ba rnams thams cad la yang 'gyur ro//nur nur po la sogs pa'i rim gyis lus kyi mngal du mig la sogs pa dmigs pa grub pa'i mthas gzhag pa ma yin nam/ der yang mig la sogs pa'i shes pa rnams skye ba ste/ de ji ltar 'jig rten pha rol gyi dbang po las yin par brjod par bya zhe na/'dir smras pa/ dbang rnams so so la gnod kyang / /yid blor gnod pa yod ma yin/ /'di 'jig na ni de dag gi /'jig pa dag kyang mthong bar 'gyur/ /zhes bya ba la/ yid kyi rnam par shes pas 'phangs pa nyid kyi mig la sogs pa ni rang gi bya ba byed pa ste/yid kyi rnam par shes pa dbang po la brten pa ni ma yin no/ /'jig rten pha rol gyi yid de nyid las yin te/ 'byung ba'i tshogs la brten pa ni ma yin no/ /so so pa ni re re ba'i mig la sogs pa la gnod kyang de yid kyi blo la ni gnod pa ma yin te 'gyur ba ni ma yin no//yid kyi blo de la ni mya ngan la sogs pas 'jig pa ste gyur na/ mig la sogs pa de rnams 'jig pas te nyams pa 'am 'gyur bar mthong ba yin no/ /de gyur pas 'gyur ba ni 'bras bu nyid yin pa de bas na yid kyi rnam par shes pa dbang po la rten pa ni ma yin no//'on kyang de nyid de la brten pa yin no/ /gal te yid kyi rnam par shes pa la mig la sogs pa brten na 'o na ni yid kyi rnam par shes pa rten med pa nyid du 'gyur te/ rnam par shes pa drug ni rten dang bcas par khas blangs pa ma yin nam zhe na/ 'dir smras pa/de phyir blo gnas pa yi rten/ /blo nyid 'ga' zhig la brten te/ /dbang po rnams kyi rgyu mtshan yin/ /de phyir blo las dbang po yin/ /zhes bya ba la/ dbang po'i gnas pa'i rten ni 'phen par byed pa'i las yin te/ 'di ltar dge ba dang / mi dge ba'i las kyis 'phangs pa'i yid kyi blo so sor nges pa'i dus su yod pa yin no//dbang po rnams kyi rgyu mtshan 'phen par byed pa'i las ni blo gnas pa'i rten yin no/ /las de ni las zhes bya ba nyid de dbang po'i rten yin te sngon gyi blo nyid la brten pa yin no/ /de ltar yang sems kyi las ni sems nyid kyis byed pa yin te/'dis ni las ni yid kyi blo'i rten yin par bstan te/ las kyang yid kyi blo snga ma nyid yin no/ /de lta bas na thog ma med pa'i las ni sems la nye bar sbyar ba'i phyir ro/ /de'i phyir dbang po ni blo las yin te dbang po las ni ma yin te/ de ltar ni 'gyur mod kyi nga dang bdag gi rnam pa yid kyi rnam par shes pa las da ltar byung ba'i skye ba yongs su 'dzin gyi ma 'ongs pa'i skye ba ji ltar 'dzin ce na/'dir smras pa/ ci ste 'phen byed yod gyur na/ /phyis kyang de dang 'dra bar 'gyur/ /zhes bya ba la 'jig rten pha rol 'das par gyur pa'i blo la ma rig pa dang sred par ldan pa de lta bu yod par gyur na tshe 'di'i mig la sogs pa rnams la 'phen par byed pa yod pa'am/da ltar gyi dus su yid kyi blo 'phen pa yang rung ste/ de bzhin du 'chi ba'i gnas skabs su yang dbang po la sogs pa rnams 'jig rten pha rol tu 'gro bar 'gyur ba'i 'phen par byed pa yod pa yin no//de lta bus ni gsung rab las bstan pa'i yid kyi rnam par shes pa phyi ma'i 'jig rten pha rol du 'gro bar nus pa yin la/ sngon gyi ni mthong ba gang zhes bya ba la sogs pa ste g.yo ba la sogs pa'i rang bzhin dang ldan pa mig la sogs pa 'jig rten pha rol po yin par mthong ba gang zhes pas bstan to//yid kyi rnam par shes pa yang lus la brten par gsung rab las gsungs pa ma yin nam/ de dang ji ltar mi 'gal zhe na/ 'dir smras pa/ shes pa de yis phan 'dogs phyir//yid ni lus la brten par bshad/ /ces bya ba la/ de'i shes pa ni lus kyi shes pa ste/ mig la sogs pa las skyes pa'o/ /phan 'dogs phyir te phan par byed pa'i phyir bcom ldan 'das kyis yid ni lus la brten par bshad kyi/ don dam par ni yid lus la brten pa ni ma yin no//de'i phyir ngar 'dzin pa'i mtshan nyid kyis yid kyi rnam par shes pa ni dbang po dang lus la brten par gnas pa ni ma yin no/ /yang bdag dang bdag gir 'dzin pa'i yid don dam par lus la brten pa nyid du ci'i phyir khas mi len te/ lus dang bral ba'i rtsig pa la yid ma mthong ba'i phyir ma yin nam zhe na de ni bden pa ma yin te/ma mthong ba tsam gyi 'bras bu nyid ma yin gyi/ 'on kyang yod pa dang med pa'i rjes su 'brang ba'i phyir ro/ /de yang lus yid kyi rnam par shes pa la brten pa ni mthong ste/ 'di ltar mya ngan la sogs pa yid gyur na/lus rid par gyur pa dang / yid dga' bar gyur na lus tshon por gyur zhing chen por 'gyur ro/ /yang na ji ltar dbang po med blo min/ /de med par ni de dag kyang / /de ltar phan tshun rgyu nyid yin/ /de phyir phan tshun rgyu can no/ /zhes bya ba la/ gal te yang dbang po med na rtsig pa la sogs pa la blo mi 'byung ba de ltar mig la sogs pa de yang yid kyi mtshan nyid kyi blo med na 'byung ba ma yin pa des na ji ltar mig la sogs pa dang 'brel pa can gyi blo 'am/lus dang 'brel pa can de bzhin du mig la sogs pa'i blo dang 'brel pa can rnams yin no//de lta na yang phan tshun rgyu nyid yin te/ phan tshun rgyur 'gyur ba yin no/ /de lta bur gyur pa la skyon ci yod ce na/ de dag phan tshun rgyu yin pa'i phyir/ /dus da ltar ba bzhin du skye ba dang 'chi ba'i tshe lus dang yid phan tshun rgyu nyid du 'gyur bas 'jig rten pha rol med pa ni ma yin no//mig la sogs pa dang 'brel pa la gnod pa can brjod kyi lus dang 'brel pa la ni gnod pa med pa ma yin nam thal ches phyir ro zhes bstan pa'i phyir ro zhe na ma yin te/ yid kyi rnam par shes pa rang brgyud pa 'jig rten pha rol du 'gro bas skabs su bab pa'i phyir ro//de yang g.yo ba la sogs pa'i tha snyad rang gi rigs la goms pa sngon du 'gro bar bstan to zhe na/ 'dir smras pa/ rim pa min las rim can min/ /khyad par can min ltos pa'ang min/ /lus la rim pas blor 'gyur na/ /de yang rim pa gsal bar byed/ /ces bya ba la yid kyi rnam par shes pa dang 'brel pa'i lus bstan na/lus dbang po dang bcas pa yang bstan pa nyid de/ yid kyi blo dang 'brel pa'i rigs pa mtshungs pa'i phyir ro/ /de ltar yang smras pa/ rgyu lus te rtag pa yin nam mi rtag pa yin/ /de la mi rtag pa yin na gang gi phyir rim min las te rim pa yod pa ma yin pa'i lus las rim pa can gyi rnam par shes pa skye ba yod pa ni ma yin te/rnam par shes pa rim gyis skye ba'i phyir ro/ /lus rtag pa las yin na ni/ dus rtag tu 'bras bu cig car byed par 'gyur ba'i phyir ro/ /de ltar ni 'gyur mod kyi lus rtag pa'i grogs byed pa la ltos pa rgyu nyid yin gyi yan gar ba ni ma yin no//grogs byed pas kyang 'bras bu rim gyis skyed do zhe na 'dir smras pa/ phan 'dogs pa'i yul la rtag pa ste ltos pa ma yin te/ de lta bu yin na khyad par can ma yin pa ste/ 'di la khyad par med pa'i phyir ro/ /'di'i dgongs pa ni rtag pa'i lus la grogs byed pa ni don gcig byed pas yin nam phul du byung bas 'jog pas yin/ de la rtag pa'i grogs byed pa don gcig byed pas yin na/ tshogs pa'i dus bzhin sngar yang dus so sor 'byung ba'i phyir ro//des na de dang 'brel pa'i 'bras bu de'i tshe 'thob par 'gyur te/ de ltar tshogs pa nyid kyis skyed pa yin/ 'on te lhag par gzhag pa yin pa de'i tshe yang rtag par mi 'gyur ba nyid kyis yod pa ma yin no/ /'gyur na ni mi rtag pa nyid do zhes bshad do/ /'on te lus sngar gyi blo la ltos nas rnam par shes pa rim gyis skyed pa de lta na yang lus kyang skad cig ma nyid du 'gyur te/de lta bas na lus blo dang lhan cig pa snga ma snga ma'i lus ni blo dang lhan cig skye ba thob par 'gyur ro/ /de lta na ni/ skad cig snga ma snga ma ni/ so so'i skad cig sngar med de'i//rgyur 'gyur de yi phyir na rgyu/ /thams cad du ni mthong bar 'gyur/ /zhes bya ba la/ skad cig ma so so snga na med pa ni shes pa dang bcas pa'i lus de'i shes pa dang bcas pa'i lus nyid snga ma snga ma lus kyi skad cig ma rgyur 'gyur ro//de bas na dus dbu ma bzhin mthong ba nyid rgyu yin te/ shes pa dang bcas pa'i lus bskyed pa skye ba dang 'chi ba dag la yod de/ 'dis ni lus nyid rgyu yin yang 'jig rten pha rol 'grub po zhes bstan to/ /'chi ba'i sems gang yin pa de yang sems gzhan dang nying mtshams sbyor ba ni ma yin no//dper na tha ma'i sems bzhin no/ /'chi ba'i sems kyang 'chi/ /'pho ba'i dus su bdag la sogs pas rnam par shes pa ma yin nam/ ji ltar 'jig rten pha rol grub ce na/ de'i phyir smras pa tha ma'i sems ni sems gzhan dang mtshams sbyor ba la 'gal ba ci yod ces bya ba la/'chi ba'i sems ni sems gzhan te/ 'jig rten pha rol por gyur pa dang mtshams sbyor ba la 'gal ba ci zhig yod de/ 'di ltar 'chi ba'i sems su 'ang 'gyur la/ sems gzhan dang mtshams sbyor ba yod par 'gyur ba 'di la 'gal ba ci yod/'dis ni the tshom za ba'i ma nges pa nyid bstan pa yin no/ /'on te 'chi ba'i sems gzhan dang nying mtshams sbyor ba dgra bcom pa la 'gal bar mthong ngo zhe na/ 'dir smras pa/ dgra bcom sems gang de yang ni/ /gang phyir mtshams sbyor med par 'dod/ / ces bya ba la/ dgra bcom pa'i tha ma'i sems sems gzhan dang mtshams mi sbyor bar tshad ma gang gis shes pa yin te/ 'dis ni dpe la bsgrub bya ma tshang bar ston to/ /de ltar ni 'gyur mod kyi/ 'dod chags dang bral ba'i 'chi ba'i sems sems gzhan dang mtshams sbyor bar 'gyur ba ma yin par grub pa'i mtha' nyid kyis ston pa'i phyir ro//ji ltar/ sems ni rnam par thar ba na/ /mar me bzhin du mya ngan 'da'/ /zhes gsungs so zhe na/ 'dir smras pa/ tshad mas ma grub don can gyi/ /grub mtha' don du rtogs sam ci//zhes bya ba la/ tshad mas ma grub pa'i don can ni yongs su ma grub pa'i don can gyi grub pa'i mtha'o/ /des ji ltar rtogs par 'gyur/ 'di'i don ni grub pa'i mtha' tshad ma yin nam tshad ma ma yin/ de la gal te tshad ma ma yin pa de lta na yang / ji ltar grub pa'i mtha' bstan pa'i 'dod chags dang bral ba'i sems gzhan dang mtshams sbyor bar mi 'gyur ro zhes bzung ba de bzhin du grub pa'i mtha' brjod pa'i bdag la sogs pa'i sems sems gzhan dang mtshams sbyor ro zhes bstan pa 'di yang ci'i phyir gzung bar mi bya/'on te de tshad ma ma yin pa de'i tshe 'dod chags dang bral ba'i sems mtshams sbyor med do zhes ji ltar shes par bya/de la 'dod chags dang bral ba'i sems ni bdag nyid thams cad kyi rgyun chad pa ma yin te/ 'on kyang nyon mongs pa rgyun 'chad pa nyid kyi yongs su dag pa'i sems yod do//mar me bzhin du mya ngan las 'das pa'i rang bzhin gyi thar pa ni phyi rol gyi tshul la yin gyi/ don dam par ni ma yin no/ /zhes bshad par bya'o// //tshad ma rnam 'grel gyi 'grel pa las/ /bam po bzhi pa/ 'dir rgol ba'i lan ni/ de rgyu ma tshang phyir yin na/ /de nyid 'dir ni cis mi brjod/ /ces bya ba la/ de ltar 'gyur mod kyi rgyu ni ma rig pa dang sred pa'i mtshan nyid de ma tshang ba'i phyir na 'dod chags dang bral ba'i sems de sems gzhan dang mtshams sbyor bar mi 'gyur ro zhe na/ de lta na yang rgyu ma tshang ba de nyid 'dir te bdag cag la sogs pa 'chi ba'i sems la ci'i phyir mi brjod de/'chi ba'i sems nyid yin pa'i phyir/ /zhes bya ba la sogs pa ma nges pa'i gtan tshigs ci ste 'god par byed/ 'o na rgyu lus kyi mtshan nyid 'chi ba'i dus su ma tshang ba'i phyir rgyur len par byed pa yin no zhe na de yang 'dir lhag par bkod pas ci bya ste/'on kyang 'chi ba'i sems kho na 'god par bya'o/ /'on te de ni ma nges pa'i phyir mi 'god na/ de lta na yang rgyu ma tshang ba yang ma grub pa'i phyir mtshungs par gtan tshigs ltar snang ba yin no/ /rgyu ma tshang ba la sogs pa gtan tshigs ma grub pa ma yin te/'di ltar lus nyid dbang po dang bcas pa las sam/ dbang po med pa las yin te/ sen mo la sogs pa bzhin yid kyi shes pa skye ba ma yin no/ /gang gi phyir snying ga'i phyogs su sems pa rtogs pa'i rnam pa dmigs so zhe na/'dir smras pa/ dbang po bcas la yid shes min/ /de blo bzhin 'dzin thob phyir ro/ /shes bskyed nus pa tha dad phyir/ /thams cad las ni ma yin no/ /sems nyid med phyir gzhan las min/ /rgyu dbyer med pas lhan cig gnas/ /dbang bzhin gzugs dang ro bzhin no//don gyi sgo nas 'gyur ba yin/ /zhes bya ba la/ yid kyi blo'i rgyu mtshan dbang po dang bcas pa'i lus yin nam/ dbang po med pa yin/ re zhig dbang po dang bcas pa ni ma yin no/ /de bzhin de dbang po'i blo bzhin no/ /yid kyi rnam par shes pa nyid 'dzin par 'gyur phyir te/snang ba thob par thal bar 'gyur ba'i phyir ro/ /dbang po dang bcas pa ni dbang po dang ldan par 'jug pas/ dbang po'i lus so/ /de'i phyir yid kyi rnam par shes pa skye bar 'gyur ba ma yin te/ ji ltar mig gi stobs kyis skyes par gyur pa gsal bar snang ba de bzhin du/ mig las skyes pa'i yid kyi rnam par shes pa gsal bar snang bar 'gyur ro zhes bya ba'i tha tshig go/ /rgyu gcig nyid las mtshan nyid mi mthun pas 'bras bu nye bar bskyed pa ni mthong ba ma yin nam/ dper na me ni du ba dang thal ba skyed par byed pa na tshogs de'i dbye bas yod par 'gyur ro//de la gzugs kyis phan 'dogs pa'i mig gsal bar so sor snang ba'i shes pa skye la mig gzugs dang bral ba ni yid kyi rnam par shes pa skyed par byed do/ /de bzhin du rna ba la yang blta bar bya'o zhe na/ de ni bden pa ma yin te mig gi rjes su 'brangs pa'i shes pa dbang po las skyes pa yin te/dbang po la ni yid kyi shes pa'i byed pa med na/ de ji ltar yid kyi rnam par shes pa dbang pos skyed pa yin/ de'i blo bzhin du 'dzin pa thob par 'gyur ro zhes bya ba'i tha tshig go/ /dbang po'i byed pa'i rjes su 'brang ba la ni mig gi blo yis don 'dzin pa yin no zhes tha snyad 'dogs so//gal te yid kyi blo yang dbang po las skye na/ mig gi shes pa bzhin du dbang po la brten nas don rtogs pa yin no/ /dbang po'i bya ba dang bral na/ ji ltar yid kyi shes pa dbang po las skyes zhes brjod par bya/ mig gi byed pa yang yid la mi dmigs te/ des na dbang po la skyes pa ni yid kyi shes pa ma yin no/ /de dag gis ni so sor dbang po las skyes pa ma yin no zhes bya bar bstan to/ /de ltar 'gyur mod kyi mig la sogs pa'i tshogs pa las yid kyi rnam par shes pa skye bar 'gyur ro zhe na thams cad las kyang ma yin pa'i phyir te/dbang po la sogs pa'i tshogs 'dus pa las kyang yid kyi shes pa skye ba ma yin no/ /ci'i phyir zhe na/ shes pa skyed pa'i nus pa tha dad pa'i phyir te/ shes pa skyed pa'i nus pa so sor tha dad pa ste/ phan tshun ltos pa med par mig la sogs pa la mthong ba'i phyir ro//gang du sa la sogs pa'i tshogs pa las 'bras bu skyed pa de nyid du rgyu gcig dang bral na 'bras bu 'byung ba ni ma yin no/ /mig la sogs pa 'dus pa nyid las shes pa skye na ni re re dang bral bas mi skye ba'i phyir dbang po re re ba dang bral yang /dbang po gzhan las shes pa dang / /yid kyi blo mthong ba yin no/ /des na tshogs pa las kyang mi skye'o/ /kyang gi sgras ni gtan tshigs snga ma gzung ngo / /'on te yid kyi rnam par shes pa sems med pa'i lus las 'byung ba de'i tshe sems med pa'i phyir rgyu mtshan gzhan las yid kyi rnam par shes pa skye ba ma yin no zhes zer na/'o na te sems med pa'i phyir zhes bya ba'i don ni gal te dbang po'i shes pa dang bral ba'i phyir yin na/ de ni 'dod pa nyid de/ 'di ltar dbang po'i shes pa dang bral bar gyur na/de'i shes pa skra dang sen mo la sogs pa mi skye ste/ yid kyi rnam par shes pa ni skye'o/ /'on te yid kyi rnam par shes pa dang bral ba'i phyir yin na/ de lta na yang skra la sogs pa la yid kyi shes pa med pa ni bsgrub par bya'o/ /yid kyi shes pa dang bral ba ni gtan tshigs yin pa'i phyir dam bca' ba'i don gyi phyogs gcig gis ma grub bo zhe na/'dir smras pa ji ltar sems pa po reg pa la sogs pas dmigs pa na de shes pa yin te/ de bzhin du yid kyi rnam par shes pas/ skra dang / sen mo la sogs pa la ni ma yin te/ de dang 'brel pa nyid kyis de med na yid kyi rnam par shes pa yang med par 'gyur ro//sen mo btab na yid 'khrugs par 'gyur bas/ gal te yid kyi rnam par shes pa lus la brten pa ma yin na/ ji ltar lus dang / sems dag lhan cig par 'gyur ba yin zhe na/ 'dir smras pa/las zhes bya ba'i rgyu de dang lhan cig gnas pa nges pa'i rgyu tha dad pa med pa'i phyir/ lus dang sems lhan cig gnas pa yin te/ dbang po bzhin dang / gzugs dang ro bzhin te/ ji ltar dbang po rnams dang / gzugs dang / ro dag ni phan tshun bsten pa ma yin yang /rgyu tha dad med pas dus cung zad cig lhan cig gnas pa yin no/ /de la gal te yid kyi blor gyur pas dbang po'i 'gyur ba de'i 'gyur ba de ni/ mig la sogs pa de la brten pa yin pa de'i tshe/ bad kan la sogs pas lus gyur pa na/ yid kyi rnam par shes pa yang 'gyur ba'i phyir yid de la brten par 'gyur ro zhe na/de'i phyir don gyi sgo nas zhes bya ba smos te don ni gzung ba ste/ mtshon cha la sogs pa btab pa'i sgo nas te/ lus 'gyur ba byed pa brten pa med na yang 'gyur ro/ /'di'i dgongs pa ni ral gri la sogs pas btab pa'i lus gyur pas yid 'gyur bar yang dmigs so//yid 'gyur ba tsam gyis ni brten par 'jog pa ma yin nam/ khrag la sogs pa mthong ba tsam gyis kyang rang bzhin gyis sdar ma'i yid 'gyur bar mthong ba'i phyir yin gyi/ phyi rol gyi khrag tsam la yid brten pa ni ma yin no//gzhan yang lus gyur na rnam par shes pa 'gyur ba ni rgyur gyur pa yin nam phan 'dogs pas yin grang na/ de la rgyu nyid kyis ni lus yid kyi rnam par shes pa zlog par byed pa ma yin te/ rgyu nyid ma yin pa'i phyir ro/ /de nyid smras pa/ gang zhig yod nyid phan 'dogs byed//rtag tu de ni rjes 'jug phyir/ /de rgyu bdun pa dang da las/ /skye ba zhes ni brjod pa yin/ /zhes bya ba la/ gal te rgyu ldog par byed pa po gang zhig yod pa nyid phan 'dogs par byed pa'i 'bras bu de ldog pa'i rgyu yin no/ /ji ltar yod pa nyid phan 'dogs pa yin zhe na rtag tu de'i rjes su 'jug pa'i phyir te 'bras bu'i rjes su 'jug pa'i phyir ro//rjes su 'jug pa ni 'brang ba'o/ /rtag tu ni rgyun du'o/ /rgyu gang zhig yod pa nyid phan 'dogs pa na rtag tu 'bras bu'i rjes su 'jug pa'i phyir ni rgyu yin no/ /de log na 'bras bu yang ldog par byed de/gang zhig res 'ga' phan 'dogs pa de med na/ gzhan du res 'ga' phan 'dogs nus pa der 'gyur gyi/ de nyid ldog par byed pa ni ma yin no/ /dper na phul du byung ba'i rgyu 'bras sA lu la sogs pa'i rgyu sa bon log par byed pa ma yin pa de bzhin du/lus rnam par shes pa'i 'bras bu med pa ni lus kyi 'gyur ba med na yang sngar gyi sems tsam 'gyur ba las/ res 'ga' 'gyur ba mthong ba'i phyir ro/ /de lta bas na lus kyi yod pa nyid yid kyi rnam par shes pa las phan 'dogs par byed pa ma yin no/ /'di ltar lus yid kyi rnam par shes pa'i rgyu nyid yin na/shes pa skyes nas shes sam/ de las ma skyes par yin/ de las ma skyes pa ni ma yin te/ rnam par shes pa nyid med pa'i phyir ro/ /shes pa skyes nas kyang rgyu lus las yid kyi rnam par shes pa can skye bar shes pa ma yin no//nga 'am bdag gi rang bzhin la rang la dmigs nas/ rnam par rtog gi de la ma dmigs pa'i shes pa gzhan 'dzin pa ma yin te thal ches pa'i phyir ro/ /'on te mi gzhan gyi rnam par shes pa las sngar gyi lus shes pa nas/ de las lus la shes pa so sor nges pa yin no zhe na/gang du skyes bu gzhan gyis pha rol gyi lus dmigs pa de ru pha rol gyi shes pa dmigs na yang pha rol gyi shes pa las the tshom za ba ma yin nam/ dper na gnyid log pa'i 'bras bu lus ni mthong ba las/ gnyid log pa'i shes pa la the tshom za ba bzhin no//de bas na pha rol gyis kyang shes pa lus kyi 'bras bur mi rtogs so/ /lci ba las sA lu skye ba yang / lci ba'i yod pa nyid phan 'dogs par byed pas sA lu'i rjes su 'brang ba ma yin te/ de lta na yang lci ba med par sA lu'i dngos po yod pa ma yin nam zhe na/de ni mi bden te/ ji ltar lci ba las sA lu skye ba de bzhin du de nyid las sA lu skye ba ma yin no/ /yid kyi rnam par shes pa ni g.yer bag dang ldan pa/ skye ba 'di dang phyi ma la nges pa ma yin no/ /'di yod pas 'di yod pa 'di skyes pas 'di skye ba rgyu dang 'bras bu'i mtshan nyid ma yin nam/de'i ji ltar 'gal ba med pa'i mtshan nyid yin zhe na/ smras pa/ rtag tu phan 'dogs par byed pas bdun par brjod de/ 'di yod pas 'di yod cing / 'di skyes pa las 'di skye zhes lnga pas rtag tu 'jug par brjod do/ /de bas na lnga pa bdun pa'i mtshan nyid kyis 'gal ba med de don gcig pa'i phyir ro//'on te yid kyi rnam par shes pa la phan 'dogs par byed pas lus ldog par byed pa po yin no zhe na/ de la smras pa/ bum sogs la ni me sogs bzhin/ /'ga' zhig tshe na sems rgyun la/ /phan 'dogs byed pa'ang yin sla ste//de tsam gyis ni ldog ma yin/ /zhes bya ba la shes pa la phan 'dogs par byed pa lus yin mod kyi/ de lta na yang lus la sogs pa de tsam gyis te/ phan 'dogs pa tsam gyis rnam par shes pa ldog pa ni ma yin no/ /dper na bum pa la sogs phan 'dogs par byed pa me yin pas dmar po la sogs pa'i yon tan 'jog par byed pa de lta na yang ldog par byed pa ma yin no//'di la brjod par bya ste/ lus la gnas pa yin na sems/ ldog pa med par thal phyir ro/ /de yod yod dang dbang 'gyur phyir/ /de las 'byung rngub de ma yin//zhes bya ba la/ gal te rnam par shes pa'i rgyu lus yin pa de lta na yang lus la gnas pa ste/ rten yin yang sems ldog par mi 'gyur ro/ /'byung ba dang rngub pa ni sems kyi rgyu ma yin nam/ de'i phyir 'chi ba'i lus la 'byung ba dang rngub pa ma tshang na/rnam par shes pa ldog pa'i phyir ro zhe na/ 'dir smras pa/ 'byung ba dang 'jug pa ni sems de nyid las yin pa de bas na/ 'jug pa la sogs pa sems de med na ma yin no/ /de ci'i phyir zhe na/ de yod na yod pa'i phyir te/ sems yod na 'byung ba dang rngub pa yod pa dang / sems med na med pa de bas na 'byung ba dang rngub pa de ni sems dang 'brel pa'o zhes bya bar nges pa yin no/ /dbang du gyur pa'i yang phyir te/ 'byung ba dang 'jug pa sems kyis ma bskyed na ni de'i tshe dbang du mi 'gyur ba las 'byung ba dang 'jug pa dag sems kyi dbang du gyur par dmigs so//gal te yang 'byung ba dang 'jug pa dag rgyu gzhan dag las skye ba yin na/ sems la rag las par mi 'gyur te/ sems kyi dngos po ni rgyu gzhan dang 'brel pa la dbang du byed pa ni ma yin no/ /'on te 'byung ba dang 'jug pa rgyu gzhan las skye bas sems las nges pa ma yin te/dper na jo bos khol po bzhin no zhe na/ de ni bden pa ma yin te/ khol por gyur pa'i skye ba ni/ rgyu gzhan las skyes pa'i phyir/ jo bos bskyed pa ni ma yin gyi/ 'byung ba dang 'jug pa ni sems ma gtogs par mi skye ba'i phyir sems dang 'brel pa nyid do//gnyid log pa'i tshe yang 'byung ba dang / 'jug pa yod na de la sems med pa'i phyir de dag ji ltar sems dang 'brel par 'gyur snyam du sems na/ de ni de lta ma yin te/ sdur pa drag po la sogs pa'i 'gyur ba thams cad sngon gyi rnam par shes pa'i bag chags kyi khyad par gyi rjes su 'gro ba ste/'di ltar dbugs gzhan pa la goms pas rmi lam du gzhan par rgyu zhing / shin tu ring ba la goms pas dbugs ring bar 'gyur ro/ /de la smras pa/ dbugs 'byin pa dang 'dren pa de'i/ /'bad rtsol med par gang las 'byung //zhes bya ba la/ gal te srog dang rtsol ba'i 'bras bu sems yin na de'i tshe 'byung ba dang rngub pa dang spro ba dang / 'dren pa dag de'i 'bad rtsol med par 'gyur na/ de ltar rtsol ba med par 'byin pa dang / 'dren pa ma mthong ba'i phyir ro/ /'on te spro ba dang / 'dren pa'i 'byung ba dang / rngub pa dag rtsol ba la rag lus kyi ngo bo nyid ma yin te/ de rgyu gzhan las 'byung ba'i phyir ro/ /de'i phyir 'byung ba la sogs pa'i ngo bo nyid ni sems la ma yin gyi/ sems la 'dren pa dang spro ba yin no zhe na/ rlung rten pa rgyu yin nam/ma yin par brtag na/ gal te rgyu ma yin na de'i tshe rnam par shes pa mi 'gag par 'gyur te lus yod pa'i phyir ro/ /'on te rlung rten pa shes pa'i rgyu yin na/ de lta na yang shi ba'i lus la yang rlung rten pa'i rang bzhin yod pas/ 'byung 'jug ni rlung rten pa'i 'bras bu ste/des na de dang 'brel pa'i sems ldog pa ma yin no/ /de'i phul byung 'grib pa las/ /phul byung 'grib pa dag tu 'gyur/ /phul du byung ba dang 'grib pa las sems kyang 'phel zhing 'grib pa thob par 'gyur te/ 'byung ba dang 'jug pa'i 'bras bu yin pa'i phyir gdon mi za bar 'grib par 'gyur ba'am/'phel bar 'gyur ba ste 'bras bu nyams pa dang skye bar 'gyur gyi/ gzhan du na ji ltar rgyu ru 'gyur/ /de dag gis ni 'byung ba dang 'jug pa dag ni sems dang 'brel pa bkag nas snga ma'i shes pa dang 'brel par bstan pa yin la/ da ni 'byung ba la sogs pa'i 'bras bu sems yin na/'gag par mi 'gyur ro zhes bstan pa'i phyir/ de dag thal bar mtshungs na yang zhes bya ba smos te/ de dag 'byung ba dang 'jug pa dag dgag pa med par thal bar mtshungs pa yin no/ /lus la brten par 'gyur ba'am/ rlung rten pa la 'brel pa'i 'byung ba dang 'jug pa dag ni 'gag pa med par 'das ma thag pa nyid du bstan pa yin no/ /lus dang 'brel pa nyid yin yang lus yod na 'gag pa ni ma yin pa bzhin du sems kyi rgyu sems yin nam/ 'byung ba la sogs pa yin na sems 'gag pa med par thal bar 'gyur te/sngon bzhin du yod pa'i phyir ma yin nam zhe na/ 'dir smras pa/ sems rgyu yin yang mtshungs ma yin/ /gnas pa 'phen par byed pa yi/ /rgyu gzhan yin par 'dod pa'i phyir/ /zhes bya ba la/ skyon mtshungs pa ma yin te/ gang la zhe na/ sems ni sems kyi rgyu can yin yang ngo //ci'i phyir zhe na rgyu mtshan gang gi gnas pa zhes bya ba dus cung zad cig sdud pa'o/ /'phen par byed pa'i rgyu las sam/ ma rig pa zhes bya ba sems las gzhan pa yang khas blangs pa yin no/ /de'i dgongs pa ni 'di yin te/ dper na rmi lam ni gnyid dang rjes su 'brel pa yin kyang gnyid la rnam pa sna tshogs pa'i snang ba 'byung ba nyid yin te/'di ltar gnyid du mtshungs pa yin yang / gang la la kha cig tu rmi lam mthong ba ni bag chags sad pa'i rgyu nyid kyi/ rmi lam gyi shes pa de dag sna tshogs pa yin pa'i phyir sna tshogs pa mthong ba yin no/ / de bzhin du shes pa ni sems kyis bskyed pa yin yang / las kyi bag chags kyi cha yis byas pas srog chags rnams 'tsho ba'i dus su tha dad pa yin no/ /nyes pas nyams pas lus rgyu min/ /sdong bu la sogs bzhin zhe na/ /zhes bya ba la sogs pa bad kan dang mkhris pa la sogs pa'i nyes pas nyams par ni gyur pa'i lus rgyur mi 'gyur te/dper na chu la sogs pas bslad pa'i sdong bu ni mar me skyed par byed pa ma yin no/ /des ni ldog pa med par thal bar 'gyur ro zhes brjod pa de bsal ba ma yin nam zhe na/ 'dir smras pa/ shi ba'i nyes pas nyams gyur tshe/ /slar yang skye ba nyid du 'gyur//zhes bya ba la/ shi ba'i lus la nyes pa rims dang dug la sogs pa'i skyon mnyam pas 'gag par 'gyur na/ slar yang dus phyis lus ma tshang ba med pa nyid du 'gyur ba'i phyir slar 'tsho ba nyid du thal bar 'gyur ro/ /ji ltar rlung la sogs pa'i nyes pas nyes pa'i lus la rnam par shes pa skye bar mi 'gyur/gang gi tshe shi ba'i lus la skyon dang bral ba de lta na yang ci'i phyir rnam par shes pa skyed par mi byed/ dper na ling tog gis nyams pa'i mig gzugs kyi rkyen mi byed kyi/ ling tog dang bral bar gyur na mig gis mthong bar 'gyur ba lta bu'o//'dir brtsad pa/ gal te me ni ldog na yang / /shing gi 'gyur ba mi ldog bzhin/ /zhes bya ba la/ shing 'gyur bar byed pa'i rgyu me log par gyur kyang me yis byas pa'i shing 'gyur ba thal ba ni/ slar ldog pa ma yin pas shing gi dngos por khas len pa med pa ji lta ba de bzhin du shi ba'i lus la sems 'gyur ba'i rgyu rims la sogs pa log kyang sems de ldog pa ni med do zhe na/ma yin gso sbyor yod phyir ro/ /zhes bya ba la/ de ni rigs pa ma yin te/ /gso ba'i sbyor ba yod pa'i phyir ro/ /des ni 'di skad du ston par 'gyur te/ gal te rlung la sogs pa'i nyes pa nyams na'ang /shing 'gyur ba bzhin de'i tshe me yis cung zad tsam bsgyur bas shing mi ldog pa de bzhin du rims la sogs pa'i skyon gyis byas pa shin tu chung ngus kyang ldog par mi 'gyur ba'i phyir/ gso bas skyon sel ba ma yin par 'gyur ba las gso ba las skyon nyams par mthong ba yin no//'chi ba'i 'gyur ba las snga ru nyes par cung zad 'gyur ba nyid de nyes pas gzhag pa'i 'chi ba sel bar mi 'gyur ro/ /des na rlung la sogs pa'i nyes pa 'gyur bar byed pas ldog pa dang ldog pa med pa yod ce na/ 'dir smras pa/ slar yang mi 'byung phyir la la//kha cig 'gyur ba skyed par byed/ kha cig bzlog pa yin phyir dper/ /shing dang gser la me lta bu'o/ /dang po chung yang ldog pa min/ /phyir ldog rung ba'i 'gyur ba gang / /de ni slar 'byung ba yin te/ /gser gyi sra ba nyid bzhin no/ /zhes bya ba la 'di'i don ni 'di yin te/chos can la la la slar yang mi 'byung ba yis 'gyur ba kha cig skyed par byed de/ dper na shing la me yis slar mi 'byung ba'i 'gyur ba rtsom par byed la/ chos can kha cig la ni bzlog nas slar 'byung ba yis 'gyur ba kha cig skyed par byed de/ dper na me nyid kyis gser la slar 'byung ba'i 'gyur ba skyed do//'di ltar gser zhu bar gyur nas yang sra bar 'gyur la/ dang po ste shing chung ba ste bag tsam cig tshig pa yang ldog pa min te/ slar rnal mor mi 'gyur te/ 'di ltar mes shing chung ngu cig bsregs kyang slar 'byung bar mi 'gyur la/ gser cung zad bzhu ba'i mtshan nyid ni bskyar te/gser du 'gyur bas gang zhig 'gyur ba da ni slar 'byung zhing sngon gyi rang bzhin du 'gro ba ste/ dper na gser gyi sra ba bzhin no/ /de bas na rims la sogs pa'i nyes pas byas pa'i 'gyur ba chung ngu la ldog par nus pa'i phyir 'chi ba'i mtshan nyid kyi 'gyur ba chen po yang slar ldog pa ste/slar yang 'gyur ro/ /'di ltar gnyid kyis byas pa'i sems 'gags pa'i mtshan nyid kyi 'gyur ba ni gnyid med na ldog par 'gyur ro/ /'on te gnyid kyi gnas skabs su shes pa mi 'gag na de bzhin du nyams su ma myong ba'i rang bzhin shes pa yin par 'gal bar 'gyur ro//gal te gnyid log pa'i shes pa myong ba med pa yin na ni/ shi ba'i ro la rig pa med par gsal bar yang 'dra bar 'gyur te/ ro dang gnyid log pa dag la khyad par cung zad kyang med par 'gyur ro/ /de bas na ji ltar gnyid log pa sad par nus pa bzhin du ro yang sman gyi sbyor ba las 'tsho bar 'gyur ro//'on te gnyid log pa la myong ba med kyang / nus pa'i rang bzhin gyis yod na ni nus zhes bya ba 'di ci yin/ gal te sems nyid yin na ni/ de'i tshe sems nyid yod pas ji ltar myong ba med pa yin/ 'on te sems las nus pa gzhan yin na ni/'o na lus nyid nus par 'gyur te/ gnyid log dus su gzhan med pa'i phyir ro/ /de ltar na ni lus nus par gnas pas ro'i dus su yang sems mi ldog par 'gyur ro/ /de bas na de'i tshe nus pa'i lus zhig nas gzhan pa'i nus pa med pa skyes so zhe na nus pa med pa 'di ci yin/shes pa dang bral ba nyid do zhe na/ gnyid log pa na yang shes pa dang bral ba'i phyir sad pa'i tshe myong ba skye bar mi 'gyur ro/ /'on te gnyid log pa'i tshe 'byung ba dang 'jug pa yod pa de bas na gnyid log pa'i tshe lus la shes pa skyed pa'i nus pa yod do zhe na 'o na ni shes pa skyed pa'i phyir sad pa nyid du 'gyur ro//'on te 'byung ba dang / 'jug pa'i grogs las gnyid sad par byed pa las sems skye'o zhe na/ gnyid ces bya ba ni ci yin/ sems med pa'o zhe na/ shes pa med pa'i ro la yang sems yod par 'gyur ro/ /'on te dbugs med pas lus 'ba' zhig las mi skye na ni brgyal ba la sogs pa 'gyur ba na/dbugs la sogs pa med pa'i phyir sems med par 'gyur ro/ /des na dbugs la sogs pa ni shes pa'i rgyu ma yin te 'byung ba dang 'jug pa ni sems kyi rgyu ma yin no zhes sngar bstan to/ /gzhan yang lus las skye bar mtshungs kyang /gnyid log pa sad pa'i tshe sngar goms pa bzhin du myong bar snang ste/ des na lus sam/ 'byung 'jug ni rgyu ma yin no/ /sngar goms pa'i grogs byed pa yod na lus las shes pa skye ba ma yin nam zhe na/ de ni mi bden te/ sad pa'i tshe goms pa nyid yod pa ma yin pas lus kyi grogs byed pa med de/lhan cig byed pas stong pa'i phyir ro/ /yod pa dang med pa lhan cig pa ni med pa'i phyir sngar gyi shes pa nyid sad pa'i rgyu yin gyi lus ni ma yin no/ /thun la sogs pa sad pa'i rgyu yin nam zhe na/ gdon mi za bar brtsangs pa la sogs pa kho nas sad pa ma yin te/ma brtsangs par yang rang nyid sad par mthong ba'i phyir ro/ /sad pa'i tshe mthong ba'i dngos po dang 'brel pas dang po dngos po'i blo skye ba ma yin nam/ de la da ltar ba mthong ba dang / sngar gyi shes pa dag la/ ji ltar grogs byed pa 'thad ce na/ 'di la yang nges pa med de/sad par gyur na gang dmigs pa de dang 'brel pas dus nye bar rtogs par 'gyur te/ 'di ltar 'jungs pas phangs nas gnyid log pa gang yin pa de bzhin du de nyid la sad pa'i tshe yang skye bas nang gi reg bya myong ba ni sad pa'o/ /gang sngar goms pa'i rkyen ci 'dra ba de dang mthun par sad pa'i tshe/lus kyi bde ba goms par 'gyur te/ 'di ltar bred par gyur pa'i yid 'bros pa'i rnam pa'i rgyu mtshan myong ba na sad pa'i dus su yang / sdug bsngal myong bar 'gyur ba de bzhin du shin tu gdug pa'i yid can gzhan la gnod pa dang mthun pa'i ral gri 'don pa la sogs pa'i bde ba sad pa na 'byung ba ste/de bas na sems ni lus dang 'byung 'jug gi rgyu can ma yin gyi/ 'on kyang sngar goms pa'i shes pa'i rgyu can no/ /gal te lus rgyu yin na ldog pa med par 'gyur ro/ /'on te skyon gyis bsgyur bas rgyur mi 'gyur ro zhe na/ skyon rnams slar mi 'byung ba'i 'gyur ba rtsom par byed na ni des byas pa'i 'gyur ba chung ngu rid pa la sogs pa dang /brgyal ba la sogs pas shes pa rgyun chad pa'i tshe na ldog pa med par 'gyur ro/ /rid pa la sogs pa gang gis byas pa'i 'gyur ba de gso bar rung na/ de nyid kyis byas pa'i 'chi ba'i mtshan nyid kyi 'gyur ba yang gso bar rung ste/gser gyi sra ba bzhin no/ /gang gi phyir gser sra bar gyur kyang 'gyur ba'i rgyus 'ju zhing slar yang sra bar 'gyur ro/ /gso ba'i sbyor bas 'gyur ba gso bar rung ba dang / gso bar mi rung ba'i nad kyis slar mi 'byung bar bsgyur ba ma yin nam des na skyon med do zhe na/'dir smras pa/ cung zad gsor mi rung brjod pa/ /'tsho byed rnyed dka' nyid phyir ram/ /tshe zad phyir ro nyes pa ni/ /gcig tu gsor mi rung ba med/ ces bya ba la rlung la sogs pa'i nyes pas byas pa'i 'gyur ba ldog par nus pa'i sman nam 'tsho bar byed pa'i sman pa rnyed par dka' zhing phrad par mi nus pa'i phyir ram/tshe zad pa'i phyir cung zad gso bar mi rung bar brjod do/ /tshe zhes bya ba ni las kyi yod pa'i mtshan nyid de/ de zad pas kyang cung zad nad la sogs pa gso bar mi rung bar brjod do/ /yang na dge ba dang mi dge ba'i las kyi nus pa zad pa nyid las zad do//las dang bral na rlung la sogs pa'i nyes pa ni gcig tu gsor mi rung ba med de/ slar 'byung ba'i 'gyur ba rtsom par byed pa'i phyir ro/ /ro'i lus la rlung la sogs pas byas pa'i 'gyur ba ldog pa med pa ma yin nam/ brgyal ba la sogs pas byis pa'i 'gyur ba ldog pa bzhin dus gzhan du 'byung ba ni ma yin te lus nyid med pa'i phyir dang /brgyal ba la sogs pa la ni lus yod pa yin pas 'gyur ba med na shes pa 'byung ba yin la/ ro'i lus de nyid du bsregs pa'i phyir ram/ gzhan du yang gyur pa'i khyad par dang ldan pa'i phyir/ nyams par gyur pas slar 'tsho ba ma yin no zhe na/ 'dir smras pa/ lus sam 'byung 'jug dag rnam par shes pa'i rgyu ma yin par bstan zin la/ shes pa'i rgyu ni sems yin par gnyid log pa dang / sad pa bzhin skye ba gzhan len to zhes bshad par bya'o/ /yang na/ ro yi dug sogs 'dus pa las//de yi so rjes bcad pas kyang / /'gyur ba'i rgyu dang bral nas su/ /de ci slar 'tsho mi 'gyur ram/ /zhes bya ba la/ srog chags kyi ro'i dug la sogs pa sos bzung ba'i gnas su 'dus te/ 'di ltar ji srid gson pa de srid du/ lus thams cad khyab par dug 'jug la/srog btang nas so rjes su 'ong bar 'gyur ro/ /rma btod pa'i lus kyi cha bcad na/ srog chags rnams mi 'chi ba mthong ba'i phyir/ /de'i so rjes bcad pa'i rgyu las te/ /kyang gi sgras ni a gad la sogs pa'i sbyor bas so/ /'gyur ba'i rgyu dug dang bral nas ci'i phyir slar 'tsho bar mi 'gyur/de'i phyir/ lus ni gnas pa yin na sems/ /ldog pa med par thal phyir ro/ /zhes bya ba 'di gnas so/ /de ltar ni 'gyur mod kyi ji ltar mes bsgyur ba'i sa bon ni myu gu'i rgyu ma yin pa de bzhin du/ 'dir yang rims la sogs pas bsgyur ba'i lus ni/ 'chi ba'i tshe rnam par shes pa'i rgyu ma yin no zhe na/'dir smras pa/ skyon rnams slar 'byung ba'i 'gyur ba rtsom pa'i phyir/ shin tu chad pa ni ma yin no/ /sA lu la sogs pa'i myu gu skyed pa'i nus pa sa bon la sogs pa la bdag nyid thams cad kyis brlag pa'i phyir myu gu la sogs pa med par 'gyur ro//yang na/ nyer len 'gyur ba med par ni/ /nyer len can gyi 'gyur ba dag /byed par mi nus dper 'ji ba/ /'gyur ba med par bum sogs bzhin/ /zhes bya ba la/ nye bar len pa 'gyur ba med par ni nye bar len pa'i shes pa 'gyur bar byed par mi nus te/ 'ji ba ma gyur par bum pa la sogs pa 'gyur ba ma mthong ba'i phyir/rgyur gyur pa las 'bras bu 'gyur ba gang yin pa 'di ni nye bar len pa'i chos yin no/ /rgyu mang po nye bar gyur pa las gang zhig gang la lar kho na'i nye bar len pa'i rgyu ste/ lus rgyu nyid yin yang / lus 'gyur ba nyid kyis shes pa 'gyur ba ni ma yin no//lus 'gyur ba med par 'jig pa dang / mya ngan la sogs pas sems 'gyur ba mthong ba'i phyir ro/ /chu gyur pas kyang myu gu 'gyur ba ma yin nam/ de'i nye bar len pa ni ma yin no zhe na ma yin te/ rgyun gyi rgyu nye bar len pa yin pa'i phyir ro/ /sa bon yang rgyun gyi rgyu yin gyi/chu la sogs pa ni gnas skabs khyad par can du byed pa'i phyir ro/ /nus pa la sogs pa ni thun mong gi rgyu yin pas rgyun gyi rgyu ni ma yin no/ /chu la sogs pas sA lu'i rgyun ldog pa ni ma yin te/ de med kyang sA lu'i rgyun mi ldog pa'i phyir ro/ /gang yang myu gu'i gnas skabs chu'i rgyun can de ni de med na ldog par 'gyur ba kho na'o//de'i phyir lus nye bar len pa ma yin pas/ de rlung la sogs pas lus gyur kyang sems ldog pa ma yin no/ /'o na lus dang sems dag nye bar len pa dang / nye bar len pa can ma yin par ji ltar nges she na/ dngos gang 'gyur ba med par ni/dngos po gang zhig rnam 'gyur ba/ /de de'i nyer len du mi rigs/ /ba lang ba men la sogs bzhin/ /zhes bya ba la/ dngos po gang zhig ste lus ma gyur pas 'gyur ba'i dngos po gang yin pa mya ngan la sogs pas rnam par shes pa 'gyur ba de ni/ lus de'i nye bar blang bar bya ba ma yin te/dper na ba lang gyur pa med kyang ba men 'gyur bas de de'i nye bar len pa ma yin pa bzhin no/ /ba lang dang / ba men dag nye bar len pa dang / nye bar blang bar bya ba med pas ldog pa dang ldog par byed pa ma yin pa las lus dang sems la ci zhig mtshungs te/gzhan la skyon yod pas gzhan skyon dang yon tan can du mi 'gyur ba'i phyir ma yin nam zhe na/ 'dir smras pa/ sems dang lus dag de bzhin te/ /de rgyu can 'bras bskyed pa ni/ /grogs byed phyir na lhan cig gnas/ /me dang zangs ma'i zhu nyid bzhin/ zhes bya ba la/ de'i rgyu ste lus dang shes pa'i rgyu sngon gyi dus su 'byung ba las/lus dang shes pa nyid 'bras bu bskyed pas lus kyi gnas skabs gong nas gong du khyad par can du byed pa'i mtshan nyid can no/ /grogs byed pa ste lhan cig tu phan 'dogs par byed pa'i phyir/ lhan cig tu gnas pa ste me dang zangs ma'i zhu ba nyid bzhin du/dper na me dang zangs ma'i zhu ba nyid lhan cig na yod pa grogs byed pa me yod pa las zangs kyi zhu ba nyid skyed pa'i phyir ro/ /de bzhin du sems ni lus kyi grogs byed pa can nam/ lus kyang sems kyi grogs byed pa can te/ gong nas gong du lus dang sems skyed pa'i phyir lus dang sems dag ni lhan cig tu gnas pa'o//de ltar na 'gyur mod kyi gal te lus sems kyi nye bar len pa ma yin yang rten du ni 'gyur te/ des na lus zhig na shes pa ldog par 'gyur zhing / lus gzhan la 'pho ba med de/ dper na rtsig pa la brten pa'i ri mo rtsig pa zhig pa na 'jig cing /rtsig pa gzhan la 'gro ba med pa bzhin no zhe na de ni mi bden te/ gang gi phyir ri mo la sogs pa ras la sogs pa la gnas pa ni rten gzhan las 'ongs par shes pa ma yin gyi/ sems ni rmi lam gyi mtha' can gyi lus dang bred pa la sogs pa'i lus kyi rjes su 'brang ba las sad pa'i gnas skabs dang /dang po skyes pa'i tshe skye ba gzhan gyi lus la gnas pa'i 'du byed kyi rjes su 'gro bar rtogs pa yin pa de bas na/ ri mo bzhin rten so sor nges pa ni ma yin te/ so sor nges pa'i rten nyid ni lus zhig na 'jig pa'i phyir ro/ /gzhan yang lus sam gzhan la yang rten nyid med pa'i phyir lus zhig na 'jig par ji ltar 'gyur/ri mo la sogs pa ni rtsig pa las tha dad pa ma yin pa nyid de bas na rang bzhin nyid kyis 'jig par gyur gyi rten zhig pas ni ma yin no/ /'o na tha dad pa med pas rten dang brten pa'i dngos por ma gyur mod/lus dang sems dag rten dang brten pa ji ltar mi 'gyur zhe na/ 'dir smras pa/ yod med dag la rten med phyir/ /rten ni gnas pa'i rgyu ma yin/ /yod pa yin na 'di rten med/ /gnas pa po las gzhan min phyir/ /tha dad na yang de yi rgyu/ /de yi dngos po la ci bya/ /zhes bya ba la/yod pa ma yin pa la ni rten med de/ nam mkha'i me tog la rten med pa'i phyir ro/ /'on kyang rgyu las skye ba nyid du 'dod la yod pa ma yin pa med pas rgyu nyid med na rten ma yin no/ /yod na yang gzhan la rag ma las pa'i phyir/ lus rten ma yin no/ /yod kyang gnas pa'i rgyu yin pa'i phyir rten ma yin nam zhe na/'di ni mi 'thad de/ gnas pa 'di gnas pa po la tha mi dad pa'i phyir ro/ /gal te lus la sogs pas shes pa gnas pa yin na de nyid kyis byas par gyur pa las shes pa ni lus las skyes pa ma yin no zhes 'di ni sngar bstan zin to/ /dngos po grub pa la yang cung zad ma grub pa'i cha yod pa ma yin nam/rgyu de'i phyir rten yin la/ bdag nyid thams cad kyis bskyed pa ni rgyur brjod do/ /gang la la chos skyed pa de ni gzhi yin gyi dngos po la brten pa tha dad pa ma yin te/ ltung ba ni dngos po yang ngo bor yod pa'i phyir ro/ / gal te gnas pa tha dad pa ma yin na/ de'i tshe ngo bo nyid kyi gnas pa ni rtag tu yod par 'gyur ba de lta bas na gnas pa tha dad pa'o zhe na/ 'di ni de'i rten ma yin te/ de bas na shes pa'i dngos po la ci zhig byed na/ gang gis 'di rten yin zhe na brjod par bya ste/ 'di ltar gnas pa dang / dngos po la bdag nyid gcig pa yod pa ma yin te/dngos po skye bar thal bar 'gyur ba'i phyir ro/ /de las byung ba yang ma yin te/ dngos po nyid gnas par skyed pa'i phyir ro/ /rten gzhan pa rtags pa don med pa'i phyir ro/ /gal te yang lus sems kyi rten yin te gnas pa'i rgyu yin pa'i phyir ro zhe na/ de'i tshe lus gnas pa na sems kyang gnas pas/ 'jig pa med par thal bar 'gyur/ de 'jig rgyu las 'dod pa ni/ /de yang thal ba mtshungs pa ste/ /gnas pa'i rgyus kyang ci zhig bya/ /ces bya ba la// //tshad ma rnam 'grel gyi 'grel pa las/ bam po lnga pa/de ltar ni 'gyur mod kyi sems 'jig pa 'jig pa'i rgyu las khas len par byed de/ 'gal ba'i rkyen yod pa'i phyir ro zhe na/ de la yang rtag pa mtshungs pa nyid du thal bar 'gyur te/ 'jig pa zhes bya ba ni dngos po las tha dad pa med pa'i phyir ro/ /'jig pa tha dad na yang 'jig pa'i rgyus ci zhig byed de/de'i phyir 'jig pa'i rgyus ci yang mi byed do/ /de bas na mi 'jig pa'i phyir rang nyid gnas pa yin pas gnas pa'i rgyus ci zhig bya/ gal te yang ji srid 'jig pa'i rgyus 'jig pa mi skyed pa de srid du rang nyid gnas pa yin pa'i phyir gnas pa'i rgyus ci zhig bya ste/ cung zad kyang gnas pa'i rgyus mi byed pa nyid do//'jig pa'i rgyu ma 'ongs par du de la gnas na zhes bya ba la/ 'jig pa po ma 'ongs pa ste/ ma byung ba'i bar te sngar sems kyi gnas pa lus de las yin no zhe na/ lan smras pa/ 'jig pa ni/ dngos chos nyid 'gyur gnod med 'di/ /gnas pa'i rgyu yis ci byar yod//ces bya ba la/ 'o na de ltar na 'jig pa'i rgyu don med du thal bar 'gyur ba'i phyir rang gi rgyu nyid las 'jig pa'i rang bzhin yin pas na 'jig pa dngos po'i chos nyid du 'gyur te/ dngos po'i ngo bo nyid 'jig pa yin pa'i phyir/ 'di la 'gal ba med pa ste/ 'gal ba med pa 'di la yod pas/dngos po'i ngo bo nyid gang gis kyang gzhan du bya bar mi nus pa'i phyir/ gnas pa'i rgyu yis ci zhig byed/ 'on te gnas pa'i rgyu med na 'jig pa de gnas pa'i rgyu yod na 'jig pa bkag par 'gyur ro zhe na/ de lta na 'o na ni 'jig pa 'gegs pas 'jig pa 'di las gzhan la byed pa nyid do//des na 'jig pa la ci yang ma byas pas 'jig pa med pa kho nar 'gyur na/ ji ltar sems mi gnas pa yin/ chu la gzhi mthong ba ma yin nam/ de la rtag pa rgyus kyang gnod pa ma yin pa de bas na rten yin no/ /des na yod pa dang med par rtog pa don med do zhes bstan pa'i phyir/dper na chu la sogs pa'i gzhi bzhin no zhe na/ chu la sogs pa'i gzhi sa phyogs na mthong ba de bzhin du/ shes pa'i yang rten lus yin no zhe na/ de'i phyir smras pa/ 'di la 'ang mtshungs/ dngos rnams skad cig re rer 'jig /dngos rgyun de ltar skye ba'i phyir//rgyun nyid yin phyir de rten yin/ /de ltar min na rig pa min/ /'bo ba yis ni gegs byed phyir/ /chu la sogs pa'i rten 'gyur gyi/ /'gro ba med can yon tan spyi/ /las rnams la rten gyis ci bya/ zhes bya ba la/ 'di yang chu'i gzhi sa'i steng la sogs pa la yod pa dang / med pa dag gi rten ma yin zhes bya ba'i brtsad pa mtshungs pa yin no//chu'i gzhir gyur pa'i sa gzhi la sogs pa mthong ba'i phyi ma yin nam/ des na brtsad par mi rung ngo zhe na/ de ni bden pa ma yin te/ sa phyogs ni chu mi 'bo ba'i rten du gyur pas rten yin gyi/ 'bo ba gang yin pa de'i ni rten ma yin la/rten gang yin pa de'i 'bo ba ni ma yin pa'i phyir 'bo ba dang / mi 'bo ba dag phan tshun spangs pas gnas pa'i phyir ro/ /sngar ni 'bo ba la phyis nas mi 'bo ba ma yin nam des na 'gal ba med do zhe na/ de lta na ni gang 'bo ba de'i rten ma yin te/ mngon sum gyis g.yo ba dang / mi g.yo ba dag gcig pa nyid du mi rtogs pa'i phyir ro//'bo ba dang mi 'bo ba dus gcig pa nyid du dmigs pa ni ma yin no/ /dus mi gcig na ni ji ltar gnas par byed de/ dus gsum du gnas par byed pas bzung ba yin gyi/ dus mang po dang 'brel pa can nyid cig car 'dzin pa ma yin no//rim gyis rtogs par byed do zhe na/ rim pa'i don nyid bsam par bya ste/ 'di ltar rim pa zhes bya ba'i tha snyad ni yod pa dang med pa dag ste/ de yang tha dad pa'i dus dag ma yin nam/ yod pa dang med pa dag kyang gzung ba'am 'dzin pa yin/ de la bzung ba'i yod pa dang / med pa 'jog na 'dzin pa gcig pa nyid du mi 'gyur ro//'dzin pa dus ma yin na/ gzung ba yang rim par 'gyur ba'i phyir 'dzin pa'i gnas skabs can gcig pa nyid ma yin pa de bas na/ chu mi 'bo ba da ltar 'dzin cing / 'bo ba ni ma 'ongs pa'i rtog pa'i spyod yul yin pas 'bo ba dang / mi 'bo ba'i gnas skabs na yod pa'i chu gcig pa nyid du mngon sum gyis mthong ba ma yin no//'di'i don ni/ /yod med dag la rten med phyir/ /zhes bya ba yin te/ rten dang brten pa'i dngos po mthong ba ma yin no/ /'o na ji ltar mthong ba ma yin par rten dang brten pa'i dngos por brtag par bya zhe na/ de lta mod kyi da ni phyin ci log tu rtog pa la ni med par 'gyur gzhan yang dngos po rnams skad cig re re la 'jig par khas blangs par gyur pa ni/dngos po'i rgyun te/ ngo bo'i rgyun de ltar brtags pas nye bar len pa dang mtshungs pa'i yul du chu skye ba'i phyir/ sa phyogs de rgyu yin pas rten yin no/ /de ltar na ma yin te skye bar khas mi len na rten nyid du de rigs pa ma yin no//yang na rgyu ma yin pa yang rten yin no zhes bya ba 'di khas len na de lta na yang 'bo ba'i chos can gyi chu la sogs pa rnams 'gro ba'i gags byed pa'i phyir sa phyogs la sogs pa rten du 'gyur gyi/ 'gro ba dang bral ba'i yon tan rnams ji ltar rten yin/rdzas 'bo ba'i gags byed pa'i phyir rten du 'gyur ro/ /yon tan la sogs pa ni byed pa med pa'i phyir 'bo ba yod pa ma yin no/ /de bas na sems yon tan nam/ las sam/ spyir gyur pa'i rten lus ma yin no zhes bya bar gnas so/ /sems la 'gro ba med kyang yon tan yin pa'i phyir so sor nges pa'i lus la brten pa ma yin nam/de log na ldog ste/ dper na gzugs rang gi rten zhig na 'jig pa bzhin no zhe na/ 'dir smras pa/ des ni 'phrod pa 'du ba dang / /'phrod pa 'du ba'i rgyu dang ni/ /rigs la sogs pa'i rnam gzhag nyid/ / rten med phyir na gsal ba yin/ /zhes bya ba la/ 'dis ni 'gro ba med par rten dang / brten pa rtag par rigs pa ni ma yin zhing / yon tan med pa la rten med do zhes bya ba bstan pa yin no/ /rten dang brten pa'i dngos po spangs pa de dag gis ni 'phrod pa 'du ba yang gsal ba dang /'du ba'i rgyu yang gsal ba yin te/ 'di ltar 'du ba yin na rten dang brten pa'i dngos po ma yin te/ cig car yod pa'i phyir ro/ /'on te 'du ba ma yin na de'i tshe 'phrod pa 'du ba'i rgyu nyid med par 'gyur ro/ /rigs la sogs pa ste/ sogs pa'i sgras ni nam mkha' dang / 'gro ba dang gcig pa nyid la sogs pa'o//rnam gzhag nyid ni rdzas la brten pa nyid de/ 'bras bu nyid ma gtogs par rten du brjod pa gang yin pa de yang gsal ba yin no/ /gal te yang rigs la sogs pa rten pa nyid yin yang rdzas la sogs pa so sor nges pa gnas pa nyid bkag pa ste/'di ltar gsal ba la brten pa'i rig gsal ba'i khyad par so sor nges pa nyid la brten pa ni ma yin te/ gsal ba gzhan gyi yang rjes su 'gro ba'i phyir ro/ /de bzhin du lus la brten pa'i sems lus med kyang lus gzhan gyi rjes su 'gro ba'i phyir ro/ /de bas na 'jig rten pha rol ma grub pa ma yin no//de'i phyir bskyed par bya ba dang / skyed par byed pa la ma gtogs par gang la yang rten dang brten pa'i dngos po yod pa ma yin no/ /'di ltar/ gzhan las dngos po 'jig na ni/ /de yi gnas rgyus ci zhig bya/ /de gzhan med par 'jig na yang / /gnas pa'i rgyu rnams nus med 'gyur//zhes bya ba la/ gal te tho ba la sogs pa gzhan nyid las dngos po 'jig na ni/ de'i tshe 'bras bu'i rdzas de'i yon tan la sogs pa de'i gnas pa'i rgyu rten gyis ci zhig bya/ 'on te rdzas la sogs pa de ni mi mthun pa'i sbyor ba rnams med par yang 'jig par 'gyur na ni/ de ltar na 'o na ni rang gi rgyu nyid las 'jig par 'byung ba'i phyir rdzas la sogs pa rnam par gnas pa'i rgyu skyed pa'i rdzas rnams la nus pa med par 'gyur ro//'di dag gis ni yon tan la sogs pa 'gro ba dang bral ba rnams la rten med do zhes bstan pa yin no/ /de ni dngos po dang rten dang bcas pa nyid yin na gang la yang 'jig par mi 'gyur ro zhes bstan pa'i phyir/rten bcas thams cad gnas ldan pas/ /skye ba can kun rten bcas yin/ /de phyir dngos po thams cad ni/ /nam yang 'jig par mi 'gyur ro/ /zhes bya ba la/ dngos po gang cung zad gnas pa dang ldan pa de thams cad rten dang bcas pa ste/rten dang lhan cig 'jug pa'i phyir ro/ /skye ba thams cad kyang rten dang bcas pa ste/ skye ba can yin pa'i phyir ro/ /'di ltar rang gi rgyu yod pa dang / 'du ba ni skye ba ste/ des na gang cung zad skye ba de thams cad rang gi rgyu la brten pa'o/ /de'i phyir rdul phra rab la sogs pa rgyu rtag pa la gnas pas ji ltar de la brten pa'i 'bras bu thams cad 'jig par 'gyur te/'di ltar rten zhig pa nyid na 'jig par rigs te/ gzhan du na rten du mi rung ba'i phyir ro/ /rten dang brten pa'i dngos po thams cad 'gegs pa bsdu ba'i tshigs su bcad pa ni/ gal te rang 'jig ngang tshul bdag /yin na de gnas byed gzhan gang / /gal te rang 'jig ngang tshul bdag /min na de gnas byed gzhan gang / /zhes bya ba la/ gal te rang gi ngo bo nyid kyis 'jig pa'i ngang tshul gyi bdag nyid can gyi dngos po yin pa de lta na yang / de'i gnas par byed pa ste/ gnas pa'i rgyu gzhan gang zhig yod de/ med ces bya ba'i tha tshig go/ /'on te rang nyid 'jig pa'i ngang tshul gyi bdag nyid can ma yin pa de lta na yang / rang nyid gnas pa'i phyir/ dngos po la gzhan gnas pa'i rgyu yis ci zhig bya/ de ltar ni 'gyur mod kyi/ sgron ma dang / 'od dag gzhi dang /gzhi can ma yin yang rten dang brten pa'i dngos po ste/ 'od 'bo ba'i gnas ma yin yang gang gis de'i rten sgron mar 'gyur ba'i phyir ro/ /'on kyang sgron ma la rten gyi dngos po yin te/ de log na 'od ldog gi sgron ma gzhan la 'bo ba ni ma yin no/ /de bzhin du lus la brten pa'i shes pa yang lus log na de yang ldog par 'dod kyi/'di na sgron la 'pho ba ni ma yin no zhe na/ 'dir smras pa/ lus kyi 'phel 'grib med par yang / /blo yis byed pa'i khyad par gyis/ /shes rab la sogs phul byung zhing / /'grib pa dag tu 'gyur ba yin/ /'di ni sgron ma 'od la sogs/ / rten pa rnams la yod ma yin/ /sems la phan pa mi 'dogs pas/ /de las khyad par du mi 'gyur/ zhes bya ba la/ 'di'i don ni sgron ma'i 'od ni de 'gyur bas 'gyur ba'i phyir rten dang brten pa'i dngos po yin gyi/ 'dir lus kyi yon tan 'phel ba dang 'grib pa ste lhag pa dang 'grib pa med par yang /blo'i bya ba'i khyad par gyis te 'du byed pa'i khyad par can gyi dbang gis shes rab dang / yid gzhungs pa'i la sogs pas 'phel ba dang / 'grib par 'gyur bas te/ gang yang lus 'du bya ba'i khyad par med par yang blo sbyangs pas shes rab la sogs pa mchog tu 'gro ba na/de'i tshe ji ltar lus la yid brten par rigs te de yod pa min par bstan pa'i phyir lus sbyangs pa med kyang 'di ste/ sngon du blo sbyangs pa'i khyad par gyi rjes su 'gro ba nyid kyi sems gang yin pa de ltar/ sgron ma la sogs pa'i chos can rnams la yod pa ma yin no/ / 'di ltar sbrul gyi sgron ma'i 'od 'gyur bar byed kyi de'i rten ni ma yin te/ sgron ma ma bslad par yang / 'od sbrul la sogs pa rnams kyis 'gyur ba nyid ma yin nam zhe na ma yin te/ mar me nyid gyur pa yin te/ 'od mi gsal ba'i mtshan nyid can du byed pas de bas na sgron ma gyur pas/ring du 'phro ba'i 'od 'gyur bar byed do/ /bcud kyis len la sogs pa rnams kyis lus khyad par can du byas na shes rab la sogs pa khyad par can du snang ba'i phyir/ lus nye bar len pa'am rten du 'gyur ro zhe na/ 'dir smras pa/ sems la phan 'dogs par mi byed na/ bcud kyis len la sogs pas sbyangs pa'i lus de las kyang shes rab la sogs pa khyad par du mi 'gyur te/bcud kyis len la sogs pas bcos pa'i lus las sems la phan btags pa'i sgo nyid kyis shes rab la sogs pa sad par byed do zhes bya ba'i tha tshig go/ /'di ltar bcud kyis len la sogs pa brten pas yid mi 'khrugs te/ji ltar sngar myong ba'i 'du byed sad pa las 'ga' zhig kha cig tu shes rab khyad par can du 'gyur ro/ /dper na bkres pas nyen pa na/ chos bshad pa 'khrug pa nyid la sogs pa 'byung la/ bkres pa la sogs pa'i gnod pa zhi ba na/ sngar goms pa'i bshad pa 'jug par 'gyur ba bzhin no/ /gal te yang bcud kyis len la sogs pa brten na/ sngar med pa'i sems g.yer bag can du 'jug pa de'i tshe kha cig gis shes rab phul du 'byung bar 'gyur la/ kha cig gis de bzhin par gnas pa 'di ni nges pa ste/ bcud kyis len gyi sbyor ba mtshungs pa'i phyir de ltar mi 'gyur zhing bstan bcos la thams cad kyis 'dris par gyur pa las kyang /ci'i phyir bstan bcos las nges pa med par shes par snang / de bas na sngar goms par byas pa gang yin pa de shes par bcud kyis len la sogs pas bag chags sad par byed par nges pa yin no//'dod chags la sogs pa blo'i ngo bo nyid ma yin nam/ de rnams kyang bcud kyis len la sogs pas lus rgyas na/ gsal zhing 'phel bar 'gyur ba'i phyir 'dod chags la sogs pa bzhin blo yang lus la brtan par 'gyur ro/ /de lta ma yin na de'i rjes su 'gro bar mi 'gyur ro zhe na/de ni yod pa ma yin te/ chags sogs lus rgyas la sogs pas/ /'phel zhing res 'ga' bde sdug las/ /skye ste de dag khams snyoms pa/ /la sogs nang don nye phyir ro/ /zhes bya ba las/ lus rgyas pa la sogs pa las 'dod chags la sogs pa 'phel ba ni thams cad du ma yin gyi 'on kyang res 'ga' ba nyid de/gang gi tshe tshul bzhin ma yin pa yid la byed pa la mngon du phyogs pa na'o/ /gang zhig mi sdug pa sgom pa de la ni de nyid bzlog nas chags pa med par 'gyur ro/ /'dod chags la sogs pa 'phel ba de yang bde ba dang sdug bsngal bdag las kyang skye ste/bde ba myong na 'dod chags 'phel la/ sdug bsngal myong ba ni zhe sdang skye bar 'gyur ro/ /ji ltar sdug bsngal ba las zhe sdang skye zhe na/ nyon mongs pas ni thams cad mi phod de/ sdug bsngal dang bral bar 'dod pa 'di dag nyid ni zhe sdang kho na yin pa'i phyir ro/ / 'dir sdug bsngal bar gyur na zhe sdang skye zhes nges pa ni med de/ yongs su shes pa dang ldan pa sdug bsngal bar gyur kyang / rang sdug bsngal myong ba las gzhan gyi sdug bsngal dang bral bar 'dod pa lhag par 'jug pa'i phyir ro/ /de ltar ni 'gyur mod kyi/ blo'i ngo bo nyid bde ba dang sdug bsngal ba yin na ni gal te blo las lus skye ba bzhin lus las kyang blo nyid skye bar 'gyur ro zhe na/de ni ma yin te bde ba dang / sdug bsngal de dag khams snyoms pa las kyang 'byung ste/ sogs pa'i sgras khams ma snyoms pa bzung ste/ rgyu de las nang gi don reg bya'i bye brag gang zhig nye ba de las 'phel bar 'gyur ro//'di'i dgongs pa ni nang gi reg bya'i bye brag la dmigs nas bde ba skye'i/ rten gyi sgo nas ni ma yin no/ /de bas na lus rten du gyur pa las bde ba dang sdug bsngal bskyed pa ni ma yin gyi/ 'on kyang yul du gyur pa las so/ /yul yin pas bde ba la sogs pa rgyu nyid kyi phyir gyi rten yin na ni phyi rol la yang yul yin pas rten du thal bar 'gyur ro//gang gi tshe nang gi bye brag dmigs pa yid du 'ong ba la sogs pa mthong ba de'i tshe bde ba dang sdug bsngal dag phyi rol la brten par 'gyur gyi/ yul rten ni ma yin zhing de log na ldog pa yang ma yin no//ji ltar nang gi yul la bde ba 'byung ba de bor nas sdug pa yid du 'ong ba de mthong ba'i tshe/ phyi rol gyi yul la 'pho ba de bzhin du 'jig rten pha rol la sogs pa'i lus gzhan la bde ba 'pho bar 'gyur ro/ /mig la sogs pa'i stobs kyis rnam par shes pa skye ba ma yin nam/rab rib la sogs pas bsgyur ba'i mig gyur pa'i phyir/ mig gi rnam par shes pa de la brten pa yin pa ji lta ba de bzhin du 'dus pa'i nad kyis bsgyur ba'i lus la yid 'gyur ba yin gyi/ de'i stobs kyis bskyed pa yin pa'i phyir yid lus la brten pa'o zhe na/'dir smras pa/ des ni 'dus pa la sogs las/ /dran pa nyams pa la sogs bshad/ /nang gi khyad par las skye ba'i/ /blo nyid 'gyur bar byed pa yin/ /zhes bya ba la/ 'dod chags la sogs pa bde ba dang sdug bsngal las skyes pa nyid du bstan pa des ni dran pa nyams pa la sogs pa yang bshad pa yin te/sogs pa'i sgras ni glen pa dang / rnam par g.yeng ba la sogs pa gzung ngo / /der yang 'dus pa la sogs pas nang gi don gyi khyad par la dmigs pa'i blo nyid kyis yid 'gyur ba skyed par byed pa yin gyi lus ni ma yin te/ lus 'dus pa la sogs pas bsgyur pa yid kyi rnam par shes pa'i rten du mi 'thad pa'i phyir ro//mig la sogs pa ni rjes su 'gro ba dang ldog pa dang de gyur na 'gyur ba'i phyir rten gyi dngos po yin gyi/ lus ni rten gyi dngos por mi rigs te/ lus 'gyur ba med par yang srin po la sogs pa mthong ba las dran pa nyams pa la sogs par 'gyur ba'i phyir ro//phyi rol la dmigs nas kyang ji ltar yid 'gyur ba yin zhe na/ smras pa/ dper na sdar ma'i rgyud kha cig /khrag sogs stag la sogs pa dag /mthong ba dang ni thos pa las/ /rmongs pa la sogs 'byung ba bzhin/ /zhes bya ba la/dper na stag dang / sha za la sogs pa thos pa dang / khrag dang bu shi ba la sogs pa mthong ba las shin tu sdar ma'i skyes bu kha cig rmongs pa la sogs par 'gyur te/ sogs pa'i sgras yid g.yeng ba la sogs pa gzung ngo / /phyi rol gyi khrag la brten pa ni ma yin pas de log kyang yid mi ldog pa de bzhin du nang gi don la dmigs pa nye ba las/'dus pa la sogs pa'i dus na/ dran pa nyams pa la sogs par 'gyur ba'i phyir blo lus la brtan pa ni ma yin no/ /de'i phyir gang zhig 'dus byas nyid/ /nges par rjes su 'jug pa yi/ /sems ni de med mi 'byung ste/ /de'i phyir sems la brten pa'o//zhes bya ba la/ sems gang zhig 'dus byas par nges par rjes su 'jug pa ni sems yin gyi lus ni ma yin te/ rten nyid du mi snang ba'i phyir ro/ /yul gzhan la yengs pa'i sems ni yul gzhan la gal te tha mi dad na ni de'i tshe rma mthong na sdug bsngal yang dmigs par 'gyur ro//'o na gal te srog chags rnams 'byung ba chen po tsam las ma skyes kyi/ 'on kyang skye bo gzhan nas 'ongs pa yin na de'i tshe mi gtsang ba'i phyogs su skye bar mi 'gyur te/ rtog pa sngon du gtong ba ni gnas ngan par 'ong bar byed pa ma yin pa'i phyir dang / dbang phyug gis bskul nas srog chags gnas ngan pa len par yang mi rigs so zhe na/'dir lan btab pa/ bdag la chags pa dang ldan pas/ /bde sdug dor thob 'dod pa yis/ /sems can gzhan gyis bkri min par/ /dman pa'i gnas ni yongs su len/ /sdug bsngal phyin ci log blo dang //srid pa'i 'ching ba rgyu yin te/ /skye bo gang la de med pa/ /de ni skye ba mi len to/ /zhes bya ba la/ sems can gzhan gyis khrid pa ma yin pas sems can gzhan gyis bkri ba min pa'i srog chags de dman pa'i gnas can mngal du yongs su len par bdag la chags pa gang la yod pa de/ci rigs par bde ba dang sdug bsngal dor ba dang thob par 'dod pa gang yin par 'gyur ro/ /'di'i dgongs pa ni gal te rtog pa po dang ldan pa yin na de'i tshe rang la rang gi ngo bo rtogs kyi thob par bya ba ni ma yin te/ des na su yang grong la sogs pa gang du yang 'jug par bya ba ma yin te/'khor ba pa med pa'i phyir ro zhes bstan zin to/ /'on kyang 'bras bu 'dod pas ci zhig ltar grong la sogs par 'gro ba'i rtog pa sngon du gtong ba can ni ma yin no/ /de lta na bdag la chags pas bskul ba yang dman pa'i gnas len par 'gyur te/dman pa yang phyin ci log gi dbang gis len par 'gyur ro/ /'di lta bu yang 'dir las kyi nus pa nyid de/ gang gis sems can gzhan gyis ma bkris par yang gzhan gyis bskul ba bzhin dman pa'i gnas su 'gro ste/ 'di ltar dman pa'i len pa yang sdug bsngal spang bar 'dod pa dang /bde ba blang bar 'dod nas dge sbyong smad 'tshong ma'i khyim du 'gro ba bzhin du 'byung ngo / /dbang phyug gis bskul ba ni ji ltar dman pa'i gnas len par mi rigs pa de bzhin du bstan to/ /de'i phyir bdag la chags pa nyid ni dbang phyug ste/ des bskul ba'o/ /gal te rang dbang can dang /mi gtsang ba'i gnas su shes pa ma yin nam/ ji ltar 'jug ste/ mi shes na ni mi 'jug pa'i phyir ji ltar 'jig rten pha rol du 'gro zhe na/ 'di ni gal te phyin ci log med na rigs par 'gyur te/ gang gi phyir sdug bsngal la phyin ci log gi blo can te/ bde ba'i blo can dang sred pas bskul ba'i 'ching ba ni skye ba gzhan len pa'i rgyu yin no//gang la srid pa dang phyin ci log gi blo de dag med pa 'di ni skye ba len par mi 'gyur ro/ /gal te 'gro 'ong ma mthong na/ /dbang po mi gsal phyir mthong ba/ /ma yin dper mig gsal min can/ /du ba chung ngu mi dmigs bzhin/ /zhes bya ba la/ gal te skye ba snga ma nas 'ongs shing / ma 'ongs pa'i skye bar 'gro ba ma yin nam/de'i tshe 'gro ba dang 'ong ba dag mthong bar 'gyur na/ /'gro ba dang 'ong ba dag mthong ba ni ma yin no zhe na/ 'dir smras pa/ gal te yang 'gro 'ong ma mthong na yang de lta mod kyi/ de dag med pa ni ma yin te/ dbang po rnams g.yer bag med pas mthong ba ste/dper na mig ni gsal ba can gyi du ba phra mo mi dmigs la skye ba ma yin pa'i phyir/ sems ni sems med par mi 'byung bas sems snga ma la brten pa'o/ /'di ltar gang gi tshe 'du byed pa stobs can du gyur pa de'i tshe g.yeng ba ldog par 'gyur la/ gang gi tshe g.yeng ba stobs dang ldan pa de'i tshe 'du byed pa yod kyang rang dang mthun pa'i rnam par shes pa mi skyed do//de bas na sems ni sems snga ma'i rjes thogs pa'i phyir/ sems kyi de ma thag pa yin pas de log pa nyid kyis de yang ldog par rigs pa ma yin no/ /'o na sems ni sems kyi rten yin mod/ de lta na yang 'jig rten pha rol mi 'grub cing 'jig rten 'di sems la brten pa ni grub pa la sgrub pa ste/ pha ma'i sems la brten par 'dod pa'i phyir la/ 'jig rten pha rol gyi sems la brten pa ni ma nges pa ste/ pha ma'i ngo bo nyid kyi rjes su 'brang ba'i phyir ro snyam du sems na/ de'i phyir gang zhig ces bya ba la sogs pa smos te/gdon mi za bar pha dang ma'i ngo bo nyid kyi rjes su 'jug pa ni ma yin te/ pha ma'i sems ma gyur par yang 'gyur ba mthong ba'i phyir dang / de dag gyur kyang mi 'gyur bar mthong ba'i phyir ro/ /gal te yang pha ma'i 'du byed pa las byung na mkhas pa la sogs pa'i yon tan rnams kyang 'byung bar 'gyur ro//de bas na rang gi rgyud la 'jug pa'i shes pa'i 'du byed pa sems la 'jug pa nyid yin gyi/ rgyud gzhan gyi 'du byed la 'jug pa ni ma yin no/ /mkhan po'i 'du byed slob ma la 'jug par mthong ba ma yin nam zhe na/ma yin te/ rang gi rgyud kyi shes pa snga ma nyid 'dod pa'i khyad par las mkhan po'i 'du byed kyis bzhag pa ste/ 'dod pa med na ni mkhan po'i bshad pa'i lugs 'dzin pa ma yin pa'i phyir rang gi rgyu nyid rgyud nas bla ma'i 'du byed kyi 'jug pa nyan pa po la gnas pa yin no/ / lus dang sems dag dbyer med pa ma yin nam/ lus log na sems skye ba gzhan du 'pho ba ni ma yin te/ sems skye ba gzhan du 'pho ba ni tha dad par 'gyur ro/ /lus dang sems dag tha dad par ni rigs pa ma yin te/ lus nyid la nang gi bde ba la sogs pa dmigs pa'i phyir sems de las tha dad pa ni ma yin no zhe na/'dir smras pa/ lus dang sems dag tha dad pa med cing 'byung ba chen por gyur pa yin na yang / 'jig rten pha rol gyi 'byung ba chen po rjes su dpag tu rung ba ste/ gnyid log pa las sad pa bzhin no/ /tha dad par yang mi rigs te/ gang gi phyir/ji ltar thos pa sogs 'du byed/ /byams pa sems dang sems las dus/ /kyis gsal tha dad med pa'i phyir/ /de ltar lus la'ang yon tan 'gyur/ /zhes bya ba la/ gang dang gang thos pa la sogs pa'i 'du byed sems la byas pa ni rmi lam la sogs pa'i gnas skabs na mi gsal ba/sad pa'i tshe dus kyi gsal ba de bzhin du lus la yang mi gsal ba sems lta bur shes par bya ste dbyer med pa'i phyir ro/ /dper na lus kyi yon tan rig pa la sogs pa pha rol gyi mthong ba de bzhin du/ sems kyi yon tan yang ci ste mthong bar mi 'gyur te/ de lta yin na/ dmigs pa'i rig byar 'gyur ba'i phyir ro//rtog pa ni nang gi reg bya'i khyad par gyi rang bzhin yin pas gzhan gyis mi mthong ngo zhe na ma yin te/ phyi rol gyi reg bya rma gzhan gyis mthong yang / de la yod pa'i sdug bsngal la sogs pa mi dmigs pa'i phyir ro/ /de bzhin du bar ma do'i lus dang ba'i phyir nying mtshams sbyor ba dang 'pho ba mi mthong ngo //bar ma do'i srid pa'i lus gzugs can yin pa'i phyir/ ji ltar rtsig pa la sogs pa sna tshogs kyis chod pa la 'gro bar 'gyur te/ rtsig pa la sogs pas chod pas da lta ba'i lus bzhin no zhe na/ 'dir smras pa/ lus can yin yang phra ba'i phyir//su yang la lar thogs bcas min/ /chu bzhin gser la dngul chu bzhin/ /ma mthong phyir na'ang med nyid min/ /zhes bya ba la/ bar ma do'i srid pa'i lus phra ba ste/ dang ba'i phyir khyim la sogs pa la lar thogs pa med de/ dper na bum pa la sogs pa la chu bzhin dang / shel la sogs pa'i mdangs bzhin dang / gser la dngul chu 'jug pa bzhin no/ /yang na chu bzhin dang / gser la dngul chu bzhin yod pa ma yin pa nyid ma yin nam/ yang srid pa bar ma'i lus ma mthong bas med pa nyid de/ 'di ltar 'chi ba dang skye ba'i srid pa dag gi bar ma ni bar ma do'i srid par 'dod ce na/ngar 'dzin pa de ni med pa ni ma yin no/ /chod par gyur pa yang / dus dang yul dag tu skye ba'i phyir te/ 'di ltar rmi lam dang / bar ma chad par sngar pa Ta li pu tra la sogs par 'gro ba na/ bar na yod pa'i yul dang grong khyer la sogs pas ma chod par kha cig skad cig tsam yul gzhan du bdag nyid kyis phyin par mthong ba de bzhin du/'gro bar bya ba'i yul du 'jig rten pha rol du srid pa bar ma'i lus thogs pa med par 'gro zhing 'pho ba yin no/ /rmi lam ni mi bden pas srid pa bar ma'i lus kyang yod pa ma yin pa ma yin nam zhe na/ dpe dang don bdag nyid thams cad kyis mtshungs pa ma yin pa'i phyir dang /bag chags mthug po las yod pa nyid du yang 'gyur ro/ /rmi lam las sad pa'i tshe dang 'jig rten pha rol du bde ba dang sdug bsngal myong ba la bye brag med do zhes bshad par bya'o/ /des na rmi lam du gzhan gyis 'gro ba dang 'ong ba mi mthong ba de lta na yang /de dag yod pa nyid kyi phyir ma mthong ba ni nges pa ma yin no/ /de bas na 'gro ba'i rten gyi dngos po med pa nyid kyang ma yin no/ /gzhan yang gal te sems lus las tha mi dad pa de lta na yang lus ni rdul phra rab tshogs pa tsam yin pa'i phyir ro/ / rdul phra rab thams cad rig par 'gyur ro/ /'on te lus rags pa yan lag can te de ltar mthong ba'i phyir ro zhe na/ de ltar na yang lus ni rdul phra rab la gnas pas rdul phra rab dmigs par 'gyur te/ rdul phra rab la reg pa'i phyir ro/ /'on te rig pa rdul rab las skyes pa'o zhe na/de ltar rdul phra rab las skyes pa'o zhes rig par byed pa ci zhig yin te/ rang gi rig pa ni tha dad pa mi rigs pa yin pa'i phyir ro/ /gzhan kho na rig pa ste/ rang rig par mi rung ba ma yin nam/ rang las byed pa 'gal ba'i phyir ro zhe na/ de lta na ji ltar bde ba myong bar 'gyur tha dad pa'i shes pas so zhe na/bde ba la sogs pa las gzhan pa'i rig pa mi dmigs pa ma yin nam/ de ji ltar bde ba la sogs pa shes pa gzhan gyis rig par 'gyur/ /lus nyid bde ba la sogs pa'i rigs pa'o zhe na/ bde ba la sogs pa dang / sngon po la sogs pa las tha dad pa'i lus mi dmigs pa'i phyir rig bya nyid yin gyi rigs pa ni ma yin no//de lta na 'o na ni mig la sogs pa'i rig pa'o zhe na/ ri bong gi rwa la rig par ci ste khas len par mi byed/ 'on te mig la sogs pa rnams la nus pa yod pas rig pa po yin gyi/ ri bong gi rwa las nus pas stong pa'i phyir rig pa por mi rung ngo zhe na/mig la sogs pa la nus pa dmigs par ji ltar nges pa yin/ 'bras bu'i sgo nas nus pa nges so zhe na/ 'bras bu gang zhig yin/ gzugs la sogs pa dmigs pa'o zhe na/ dmigs pa de yang nus pa yin pa'i phyir dmigs par mi 'gyur ro//lhag mar gyur pa'i phyir gzugs la sogs pa kho na rtags yin te/ des kyang rnam par shes pa'i nus pa 'bras bu ste/ mig la sogs pa'i 'bras bu nyid yin na sngar mi snang bar 'gyur ro/ /'on te mthong bar 'gyur ba'i dus su gzugs la sogs pa rnams mig la sogs pa'i 'bras bu'o zhe na/de lta na ni rdul phra rab yod tshad dmigs par 'gyur te/ rdul phra rab rnams la ni 'dus pa'i gnas skabs dang / so so'i dus la khyad par cung zad kyang med pa'i phyir ro/ /'dus pa'i gnas skabs na ni nus pa bskyed pa nyid khyad par yin no zhe na/ de lta na yang /gcig la gcig brten par 'gyur te/ rdul phra rab rnams kyi khyad par ni mthong du rung ba nyid yin la/ mthong du rung ba myong ba'i nus pa dang ldan pa'i phyir ji ltar nus pa grub pa med par rig pa nyid grub par 'gyur te/ mthong du rung ba grub na/ ji ltar nus pa rjes su dpog pa yin/sngon po la sogs pa grags tshod bde ba la sogs pa tsam nyid shes pa ste/ shes pa'i bde ba'o zhes gzhi mthun pa mthong ba'i phyir ro/ /sngon po la sogs pa gsal byar dmigs pa ma yin nam/ ji ltar shes pa yin zhe na/ rang gi ngo bo myong ba las sngon po gsal byar myong ba nges pa med par nges shing /sngon po las de myong ba yod pa ni ma yin no/ /de gsal bya'i tha snyad kyang lus la ltos nas brtags pa'o zhes bshad par bya'o/ /de bas na sngon po la sogs pa gzhan gyi lus la 'pho ba dang ldan pa ni shes pa de'i bdag nyid kyis yin pa de bzhin du gzhan gyi lus khu ba dang /khrag la yang shes pa 'pho ba dang ldan pa nyid yin no/ /de'i phyir shes pa ni gzugs la sogs pa'i rang bzhin nyid yin pa'i phyir rdul phra rab rig par thal bar 'gyur ro/ /sangs rgyas pa la yang ci ste rdul phra rab rig par mi 'gyur ro zhe na/ yul gyi rnam pa can gyi shes pa tha dad pa myong ba'i phyir/de lta mod kyi cha shas can gyi shes pa'i ngo bo nyid yod kyi/ shes pa'i rgyu pha rol po'i yang rdul phra rab tha dad par gyur pa yod pa ma yin no zhe na/ cha shas can gyi lus 'ba' zhig yod pa ma yin nam/ de yang gcig pa nyid yin na ni/ lag pa la sogs bsgul na kun/ /'gul bar 'gyur te 'gal ba can//las ni gcig la mi rung phyir/ /gzhan du tha dad grub par 'gyur/ /gcig la bsgribs pas thams cad la/ /bsgrib par 'gyur ba'am ma bsgribs na/ /mthong 'gyur gcig tshon gyis bsgyur na/ /dmar po'ang mi dmar bar rtogs 'gyur/ /zhes bya ba la/yan lag can gyi rdzas ni bya ba dang ldan pa dang / yon tan dang ldan pa'i rdzas 'phrod pa 'du ba'i rgyu ste/ gal te de'i byed pa yin na/ 'du ba'i rgyu yin pa'i phyir rdzas thams cad 'gul bar 'gyur ba de bas na lus kyi lag pa la sogs pa bskyod cing bsgul na lus thams cad 'gul bar 'gyur ro//'gul ba dang mi 'gul ba nyid kyis yan lag can gcig pa'o zhe na/ de ni rigs pa ma yin te/ 'gal ba'i las can gyi cha shas can gcig pa nyid mi rigs pa'i phyir ro/ /'di'i dgongs pa ni gal te 'gul ba dang bcas pa dang / 'gul ba med pa yan lag can gcig pa nyid yin na/lha sbyin dang mchod sbyin la sogs pa'i rang bzhin yang 'gro ba po la sogs pa dang ldan pa'i yan lag can gcig tu 'gyur ro/ /'on te lus la 'gul ba dang mi 'gul bar mthong ba'i phyir 'gal ba ci zhig yod ce na/ gcig pa zhes bya ba 'di ci yin gal te snang ba tha dad pa med pa yin na ni de ni med de/'gul ba dang mi 'gul ba dag gcig pu snang ba med pa'i phyir ro/ /'on te 'bras bu gcig pa yin na ni gal te 'bras bu gcig pa de lta na yang / yan lag can gcig par ji ltar 'gyur te gzhan gcig pas gzhan gcig par 'gyur ba'i phyir ro//de nyid kyi phyir/ gzhan du na gal te gcig bsgul ba na thams cad 'gul bar khas mi len na ni/ 'gul ba dang bcas pa dang mi 'gul ba dag tha dad par grub cing / so so bar grub par 'gyur ro zhes bstan to/ /'dis ni bya ba'i 'du ba'i rgyu nyid rdzas yin pa bkag pa yin na/ /gcig yin na sgrib pa yis kyang thams cad la sgrib par 'gyur ro//'dres pa'i bye brag gis yan lag la sgrib kyi/ yan lag can la ma yin no zhe na/ de lta mod kyi yan lag can la mi sgrib na rdzas thams cad mthong bar 'gyur ro/ /yan lag gi sgo nas sgrib na cung zad kyang mi mthong ba nyid do/ /thams cad mi dmigs par 'gyur ro//gcig pa yin yang thams cad mthong bar mi nus pa ma yin nam zhe na/ mthong ba dang mi mthong ba dang ji ltar gcig par 'gyur/ rgya skyegs la sogs pa'i tshon gyis gcig tu bsgyur ba na thams cad dmar por 'gyur ro/ /phan 'dogs pa'i bye brag gis rdzas gzhan pas yan lag dmar por 'gyur ba yin gyi yan lag can ma yin no zhe na/dmar po yang mi dmar ba'i rdzas su 'gyur ro/ /gtan tshigs de gsum gyi phyir yan lag can gyi rdzas tshogs pa gcig yod pa ma yin no/ /gal te du ma nyid yin na'ang / /mi rtogs sngon bzhin khyad par ni/ / med phyir phra phyir khyad med pa/ /mi 'grub khyad par can dbang po'i/ /yul 'gyur de phyir rdul phran min/ /zhes bya ba la/ gal te lus du ma yin na de'i tshe lus rtogs pa por mi 'gyur te/ ci'i phyir zhe na/ gnas skabs so so bar 'gyur ba'i phyir ro/ /rdul phra rab rnams 'dus pa'i tshe yang khyad par med pa'i phyir dang /tha dad pa'i yan lag can ni mi skye ba'i phyir/ snga ma bzhin du phra ba'i phyir/ /zhes bya ba la smos na ni ji ltar rdul phra rab rnams so so ba'i dus na mi dmigs pa de bzhin du rdul phra rab rnams 'dus pa'i tshe yang khyad par med par mi 'grub ste/ nyams su myong ba'i tshe rags par mthong bar 'gyur ba'i phyir ro//des na khyad par med pa mthong du mi rung ba ni med do/ /'di nyid kyi phyir nyams su myong ba la snang ba'i khyad par can ni dbang po'i yul nyid de/ rdul phra rab nyid ni grogs mi byed pa'i phyir rdul phra rab ma yin no/ /de lta na ni yul dmigs par ji ltar 'gyur zhe na/ de'i rnam pa can gyi shes pa dmigs pa nyid kyis yul dmigs par 'gyur ro//khyed la yang rdul phra rab kyi rnam pa can du ci ste 'gyur zhe na/ 'di yang le'u gsum pa las bstan par bya'o/ /sna tshogs rdul phra mo tsam du khas len pa ma yin nam/ sgrib g.yogs dang gags byed pa la sogs par ji ltar 'gyur te/ji ste 'dus pa'i yan lag can ma gtogs par rdul phra rab nyid gcig pu ni thogs pa med pa phan tshun rjes su 'jug pas ji ltar sgrib pa yin te/ sbyor ba med pa'i phyir ro/ /ma sbyar bar sgrib na ni thams cad kyi thams cad la sgrib par 'gyur ro zhe na/ 'dir smras pa/ de ni sgrib byed la sogs pa/ /med pa dag kyang gsal ba yin/ /gser dang dngul chu la sogs pa'am/ /rdo tshan la sogs ji ltar snang / /dbang sogs re res nus med rnams/ /ji ltar rtogs par 'gyur ba yin/ /ldan pas yin na 'dir thal mtshungs/ /gal te gser dang dngul chu yi//ma mthong can rten ro dang gzugs/ /sogs 'brel 'gal bar ji ltar shes/ /nye bas brtags pa la 'dod na/ /blo yis tha dad yod bla ste/ /ji ltar phreng ring ba zhes bya/ /zhes bya ba la/ rdul phra rab rnams ni phrad pa dang bral ba'i phyir/ ji ltar sgrib par 'gyur zhes rtsod pa ni rigs pa ma yin te/yan lag can dang 'brel pa'i sgrib g.yogs gang du yang ma mthong ba'i phyir gang gis de med na med pa yin/ de ltar gags byed pa la sogs pa yang shes par bya'o/ /ji ste rdul phra rab rnams sbyor ba med pa'i phyir ji ltar sgrib pa la sogs pa yin zhe na/ de lta mod kyi khyod kyi ltar na/ldan pa med pa'i rdul phra rab kyis kyang ji ltar yan lag can skyed par byed/ 'dus nas so zhe na/ 'o na 'dus pa yang bdag nyid thams cad kyis yin nam/ phyogs gcig gis yin te/ de la phyogs gcig gis ni ma yin te/ rdul phra rab rnams la phyogs gcig med pa'i phyir ro//bdag nyid thams cad kyis 'dus pa yang ma yin te/ gong bu yang rdul phran tsam du thal bar 'gyur ba'i phyir ro/ /rdul phra rab kyis ldan pa skyed do zhe na/ bar dang bcas pas ji ltar ldan pa nyid bskyed de/ de ltar brtsad pa mtshungs pa yin no/ /de phrad pa yang med do zhes bstan zin to//gal te phrad pa yod na ldan pa dang yan lag can gzhan gyis ci zhig bya/ 'on te bar dang bcas pas ldan pa skyed do zhe na/ bar dang bcas pas ji ltar ldan pa nyid bskyed de/ de lta na yang 'brel pa nyid kyis gegs byed pa la sogs pa'i bya ba byed pa'i phyir dper na skra shad dang / sbrang ma la sogs pa dag gis kyang bar med pa nyid mthug po'i rnam par snang ba skyed pa de bzhin du/rdul phra rab phrad pa med pa nyid gegs byed pa la sogs pa'i bya ba byed pa yin no/ /de'i phyir 'dus pa'i gnas skabs na khyad par bstan pa des ni sgrib par byed pa dang / gegs byed pa la sogs pa med par rtsod pa gang yin pa de yang bsal ba yin no zhes bya ba smos so//yang na gser dang dngul chu la sogs pa 'dres par gyur na ni/ yan lag can med par ji ltar gegs byed pa la sogs pa'i rgyur gyur/ rdo tshan te la sogs pa bsreg pa la sogs pa'i bya ba mthong ba ji ltar yin/der yan lag can mi skye ba'i phyir te/ gser dang dngul chu dang rdo dang me la sogs pa rnams rigs mi mthun pa'i phyir ro/ /yang na gal te rdul phra rab las tha dad pa'i rdul med kyang / rags pa gcig ji ltar mi snang ba yin te/ de'i phyir gser dang dngul chu la sogs pa zhes smos te/de'i dgongs pa ni dper na gser la sogs pa dngul chu dang 'dres pa dang / rdo ba la sogs pa tsha bar gyur par snang ba de ni yan lag can med kyang de ltar snang ba'o/ /sogs pa'i sgras ni chu tshan la sogs pa bzung ngo / /de bzhin du bum pa la sogs pa la yang rdul phra rab kyi stobs nyid kyis rags par snang ba ste/'di ltar khyad par can gyi rgyu las khyad par can gyi 'bras bu skye ste/ re re ste so sor dbang po la sogs pa nus pa med pa sna tshogs pas 'bras bu mig gi rnam par shes pa skyed kyi/ mig la sogs pa rnams 'dre ba dang ldan pas yan lag can bskyed pa ni ma yin no//mig la sogs pa rnams la sbyor ba yod na phyogs la yang sbyor zhing / phrad pas 'bras bu ji ltar mi skye zhes bya ba'i brtsad pa mtshungs par 'gyur ro/ /gal te mig la sogs pa tshogs pas bskyed pa la/ 'dre ba gzhan dgos na ni de'i tshe thug pa med par 'gyur ro/ /'on te dbang po la sogs pa ngo bo nyid kyi shes pa 'dres pa skyed na ni de lta na ni rdul phra rab kyis kyang 'dre ba dang yan lag can med par sngon po la sogs pa'i rnam pa can gyi shes pa skyed par byed de yan lag can gyis ci zhig bya/de ltar ni 'gyur mod kyi gal te gser dang dngul chu dag rigs mi mthun pa'i phyir rdzas bskyed pa ma yin yang /de dag ldan pa snang ba yin no zhe na/ rten ma mthong ba gang yin pa de ni ji ltar shes par 'gyur te/ 'di ltar gser dang dngul chu'i rdul phra rab rnams dbang po las 'das pa'i phyir de'i ldan pa yang dbang po las 'das pa nyid do/ /dper na mig gi dbang po lkog tu gyur pa'i phyir de la brten pa'i don dang /'dre ba yang lkog tu gyur pa bzhin no/ /gzhan yang dbang po rtsa dang 'brel pa las shes pa skye la/ gser dang dngul chu 'dres pa ni yon tan yin pa'i phyir/ 'dre ba dbang po las 'das pa ma yin pa'i phyir ci'i phyir mthong du rung ba nyid ma yin/ 'on kyang rten du gyur pa'i rdul phra rab 'dres pa las/de yang ldan pa skyed do zhe na/ de lta mod kyi ldan pa dang 'phrod pa 'du ba las rdul phra rab kyi gzugs kyang 'dzin par 'gyur ro/ /gal te yang gser dang dngul chu la sogs pa'i phrad pa nyid bltar rung ba'o zhe na/ de lta na yang btung ba bzang po la sogs pa la bu ram la sogs pa 'dres pa'i rang bzhin gzugs dang ro la sogs pa 'gal te/btung ba bzang po mngar ba'o zhes bya ba la sogs pa'o/ /yang don gcig la 'dus pa'i gzugs la sogs pa nye bar brtags nas ldan par 'dod pa ma yin nam zhe na/ de lta mod kyi 'on kyang rdul phra rab 'dres pa can rnams kyi gzugs la sogs pa gang yin pa de nyid 'dres pa'i gzugs la sogs pa dang tha dad par snang bar 'gyur ro//de'i phyir/ blo yi tha dad yod bla ste/ /zhes bya ba gsungs so/ /gzugs dang ro dag gcig par snang ba ni 'dres pa las yin te/ lcags gong mer bsregs pa bzhin ma yin nam zhe na/de lta mod kyi rdzas gzhan brtags te ci zhig bya ste/ rdul phra rab rnams nyid rags pa la sogs pa'i gzugs su snang ba'o/ /gal te yang khyed rdul phra rab las gzhan pa'i rdzas 'dod na ni de'i tshe phreng ba ring po yod par mi 'gyur te/ phreng ba zhes bya ba'i dngos po cung zad kyang med pa'i phyir ro//gang gi phyir 'dres pa med pa'i phyir ma 'dres pa dang / 'dres pa med pa nyid kyi rdzas kyang med pa dang / rigs kyang med pa ste pho brang gcig kyang phreng ba nyid du thal bar 'gyur ba'i phyir shing bzhin no/ /med pa nyid ni ring po nyid du rigs pa ma yin no//de bas na ji ltar bkod pa'i khyad par gyis phreng ba'i blo skyed pa de bzhin du rdul phra rab rnams la rags pa la sogs pa'i blo 'byung ngo / /mngon sum nyid kyis rdzas dang grangs dang / ldan pa la sogs pa shes pa ma yin nam/ 'di ltar mig gi byed pa'i rjes la bum pa dang ldan pa dag gcig pa'o zhes bya bar rtogs pa'o zhe na/'dir smras pa/ grangs dang ldan pa la sogs kyang / /de dang ldan pa'i dngos nyid dang / /brjod pa dag las tha dad par/ /ngo bo blo la mi snang ngo / /zhes bya ba la/ grangs ni gcig nyid la sogs pa'o/ /ldan pa ni ldan pa'i shes pas gzung ba'o//las ni 'gro ba la sogs pa'o/ /sogs pa'i sgras ni rigs la sogs pa gzung bar bya'o/ /de dag dang ldan pa'i dngos po nyid las te grangs la sogs pa de gang la yod pa'i gzugs la sogs pa'i dngos po de rnams las tha dad par dbang po las skyes pa'am/ rtogs pa dang bcas pa'i blo la gnas yan lag can la sogs pa'i ngo bo nyid snang bar mi 'gyur ba'am/rdzas la sogs pa rjod par byed pa las tha dad par rtogs pa'i blo la mi snang ste/ 'di ltar yan lag can la sogs pa ma lus pa yon tan sogs pas stong par 'dod cing / mig gi shes pas kyang ldan pa can gzugs la sogs pa rtogs par 'gyur gyi rdzas la sogs pa tha dad pa ni ma yin no//rtogs pa'i shes pa la yang gsal ba'i rang bzhin nyid snang ba 'am/ brjod pa'i rang bzhin nang gi shes pas brjod par 'gyur ba nyid yin gyi rigs la sogs pa rnams kyi ngo bo nyid kyis snang ba ni ma yin no//'di dag gis ni mi dmigs pa bstan pa yin no/ /gal te rigs la sogs pa mngon sum gyis mi shes pa de lta na yang brjod pa dang shes pa gcig gi rnam pa can mthong ba'i phyir rigs la sogs pa nges par byed pa ste/ rang gi mtshan nyid kyi rgyu mtshan las rigs la sogs pa mi rtogs pa ma yin nam zhe na/de mi rigs te gang gi phyir/ /dngos po tha dad rjes 'brang ba'i/ /rnam par rtog pas sgra dang shes/ /brtags don can de dper yon tan/ /sogs pa'am zhig dang ma skyes bzhin/ zhes bya ba la/ shes pa dang brjod pa'i bye brag mi 'dra ba nyid kyis dngos po tha dad pa ni ma yin gyi/'on kyang mngon sum gyi snang ba tha dad pas te/ rtogs pa'i bag chags kyi stobs las byung ba'i rtogs pa'i blo ni rigs la sogs pa nyid du snang gi dngos po'i rgyu can ni ma yin pa'i phyir ro/ /des na rjes su 'gro ba dang / ldog pas kun du brtags pa'i tha dad pa la brten nas rigs la sogs pa'i blo skye ste/'di ltar ba lang gi gong bu la gzhan du dkar po nyid mthong zhing / dkar po nyid la gzhan du ba lang nag po mthong ba'i phyir rjes su 'gro ba dang / ldog pa des rigs mi mthun pa rnam par gcod pa'i dngos po tha dad pa'i rjes su 'brang ba'i rnam par rtog pas brtags pa'i don can te/sgro btags pa'i yul la sgra dang shes pa tha dad pa dag gis rigs dang yon tan la sogs pa tha dad par ji ltar sgrub par byed de/ dper na yon tan la sogs pa rang bzhin gcig la/ yon tan nyi shu rtsa bzhi dang / las lnga yod kyang yon tan la sogs pa'i grangs yod pa la/grangs yod pa ni ma yin te/ de rdzas la brten pa'i phyir ro/ /rten gyi grangs la brtags nas de ltar tha snyad gdags par mi rung ste rten tha dad kyang gcig pu nyid do// //tshad ma rnam 'grel gyi 'grel pa las/ bam po drug pa/ zhig dang ma skyes rnams la yang //ji ltar gcig pu nyid du shes/ /nye bar btags las 'dir 'dod na/ /de rgyu can 'dod gang yin pa/ /de nyid dngos rnams thams cad la/ /de dag gis rgyu cis mi 'dod/ /ces bya ba la/ gal te zhig pa dang ma byung ba dag la gcig pa nyid nye bar btags nas tha snyad 'dogs pa dang /rtogs pa ni 'das pa la sogs pa la nye bar btags pa 'di ni rtogs pa'i shes pa'i rgyu can te/ thog ma med pa'i rtogs pas lhag par gzhag pa de nyid dngos po rnams thams cad la sgra dang shes pa dag gi rgyur 'gyur gyi/ dngos po reg pa ma yin no//nye bar 'dogs pa'ang kun du min/ /gal te tha dad khyad par can/ /dngos zhes bya ni 'dis ci shes/ /gal te tha dad med pa dag /tha dad med don can zhe na/ /don gzhan min rgyu can yin yang / /dkar po sogs la grangs la sogs/ /ldan pa can sgra rnam grangs min/ /gal te de la'ang don gzhan na//yon tan dang rdzas khyad med 'gyur/ /zhes bya ba la/ de ltar ni 'gyur mod kyi nye bar btags pa zhes bya ba dngos kyi rgyu can te/ de ji ltar dngos med na gdags par rung / dngos ni tha dad par 'jig rten pa la grags pa'i dbyug pa can la sogs pa'i khyad par can bzhin la tha mi dad pa'i khyad par ces ni btags pa'o//sangs rgyas pa ni snga ma snga mas rtogs pas gzhag pa tsam ste/ khyad par can mi srid pas/ /tha dad par gyur pa'i khyad par can nyid med na/ dngos po med pas kun du btags par med par 'gyur ro zhe na/ de ni ma yin te/ gang gi phyi tha dad pa'i khyad par can gang yin pa de ni dngos zhes bya na/de yang cis shes te/ tha dad pa'i khyad par can dang bral ba yang / rtogs pas mthong ba'i tha dad pa'i khyad par can grags tshod tsam ni dngos po kho na ste/ ma bkyogs par rtogs pa'i blo'i yul ni dngos yin la/ bkyogs pa ni rtogs pa can gyi shes pa'i yul ni btags pa'o zhe na 'jig rten pa la grags pa'o//gzhan yang yul tha dad pa can nyid dngos yin la/ cig shos btags pa'o zhe na/ de lta bu thams cad btags pa nyid yin mod kyi/ tha dad pa'i khyad par can med pa'i phyir ro/ /'das pa la sogs pa la ni khyad par yang med pa'i phyir nye bar btags par 'gyur ro//gal te tha dad pa'i khyad par can med na/ de'i tshe tha mi dad pa'i brjod par bya ba ni tha dad med pa'i don can te rnam grangs pa'i rang bzhin nyid du 'gyur zhing / bum pa gcig ces bya ba gzhi mthun par yang mi 'gyur te/ rnam par dbye ba'i rgyu mtshan yod na der 'gyur ba'i phyir ma yin nam zhe na de ni mi bden te/gang gi phyir 'di la don gzhan pa'i rgyu med pa can de'i dngos po 'di ni don gzhan min pa'i rgyu can te/ dkar po la sogs pa'i yon tan rnams la grangs la sogs pa'i ldan pa can gzugs gcig ces bya ba la sogs pa'i sgra rnam grangs ma yin par mthong ba de bzhin du rdzas la sogs pa rnams kyang rnam grangs ma yin pa'o//dkar po la sogs pa de la yang grangs la sogs pa don gzhan ma yin nam zhe na/ de lta na ni rdzas dang / yon tan dag la khyad par med par 'gyur te/ 'di ltar bya ba dang ldan pa dang / yon tan dang ldan pa dang / 'du ba'i rgyu can ni rdzas yin no//gal te yang yon tan la sogs pa la yang grangs la sogs pa la yod na/ de lta na ni yon tan dang ldan pa'i phyir rdzas nyid dang gcig tu 'gyur gyi/ yon tan la sogs pa tha dad pa ni yod pa ni ma yin no/ /gal te gzhan gyi gzhung la dkar po la sogs pa la grangs la sogs pa'i sgra mi rigs pa de lta na yang khyed kyi lugs kyis don tha dad par ji ltar 'gyur te/mi 'gyur ba ma yin nam zhe na/ 'dir smras pa/ ldog pa tha dad phyir tha dad/ /'gyur te don gzhan min don can/ /yin yang las rdzas min sgra bzhin/ /zhes bya ba la/ sangs rgyas pa'i lugs kyis grangs la sogs pa'i sgra tha dad pa yin no//ji ltar zhe na/ ldog pas byas pa'i tha dad pas kun du btags pa'i tha dad pa can gyi brjod par bya ba tha dad pa'i phyir/ dper na rdzas ni las ma yin la/ las ni rdzas ma yin gyi/ 'di na don gzhan yod pa ma yin no/ /de ltar na yang las ma yin pa dang rdzas ma yin pa'i sgra la sogs pa rnams/rnam grangs pa ma yin pa de bas na ldog pa tha dad pa nyid sgra dang shes pa'i rgyu yin gyi rigs la sogs pa ni ma yin no/ /gal te rigs la sogs pa med na/ 'o na ni ba lang dkar po dang ba lang gi dkar po nyid ces bya ba'i gzhi mthun pa dang / tha dad pa'i rten can du ji ltar 'gyur zhe na/'dir smras pa/ dngos po brjod pa'i sgra rnams kyis/ /de dang ldan las tha dad bzhin/ /grangs sogs brjod pa gang de yang / /chos gzhan gcod par byed pa yin/ /de tsam shes par 'dod pa la/ /ma lus gzhan ni spong can sgra/ /tha dad chos bzhin rjod byed de//la lar sor mo gshibs pa bzhin/ /don gcig brjod kyang thams cad ni/ /spong min phyir chos can brjod can/ /grags te sor mo gshibs pa bzhin/ /de lta'i brdar ni gnas pa can/ /zhes bya ba la/ gang yang zhes bya ba ni grangs la sogs pa'o/ /sogs pa'i sgras ni ldan pa la sogs pa bzung ngo //grangs la sogs pa gang la yod pa de dang ldan pa'i chos can de las tha dad pa bzhin du brjod do/ /gang gis she na/ sgra rnams kyis te/ dngos po brjod pa ni chos brjod pa rnams kyis grangs la sogs pa de chos gzhan gcod par byed pa ste tha dad pas gnas pa'o/ /de nyid kyi phyir chos gzhan spong ba'i chos de tsam zhig shes par 'dod pa ste/bstan par bya ba la sgras tha dad pa'i chos bzhin ston pa'o/ /sgra ji lta bu zhe na/ ma lus gzhan spong ba can te/ gzhan dag ma lus pa'i chos de'i bdag nyid kyis spong bar byed pa gang yin pa'i sgra de'o/ /'dir yang dper brjod pa ni la la zhig tu sor mo gshibs pa bzhin zhes bstan pa yin te/chos brjod pa can du grags pa'i sgra'o/ /sor mo gshibs pa bzhin zhes bya ba ni chos can ston pa'i sgra ste/ ji ltar zhe na/ chos rnams thams cad spangs pas de'i bdag nyid du ston pa'i phyir/ don dam par na sor mo ma gshibs pa rnam par bshad nas don gcig tu brjod cing ston gyi/'dir ni rnam par dbye bar rtogs pa ma yin pa'i phyir ro/ /'o na don gzhan spong ba dang / mi spong ba nyid du spyi med par ji ltar shes she na de'i phyir/ de yi brdar ni gnas pa can/ /zhes bya ba smos te/ de ltar chos gzhan spong ba dang / mi spong ba dag gis byas pa'i brdar gnas pa gang yin pa'i sgra de de ltar snang ba yin no//'dir 'di dag gis bsdus pa'i don ni ji ltar shes pa'i brjod bya tha dad pas rnam grangs par mi 'gyur ba de bzhin du brjod do/ /brjod par bya ba don dam par tha mi dad kyang ldog pa'i chas brtags pa tha dad par mthong ba ste/ dper na gtun bu'i lus dang / skra can gyi mgo bo lta bu'o/ /de bzhin du ba lang gi dkar po nyid kyang yin pa'i phyir ba lang gi rnam pa gcig tu rtogs pa skye ba ni ba lang thams cad la yin par brjod la/ dkar po zhes bya ba ni ba lang gi phyogs gcig yin yang / dkar por rtogs pa skyed pa ni don gzhan yang ston pa ni ma yin no//de bas na ba lang nyid dang dkar po nyid ni rjes su 'gro ba dang ldog pa dag gis tha dad par brtags pa yin pa'i phyir/ ba lang gi dkar po yon tan yin no zhes tha dad pa'i rnam par dbye bar byed pa brjod de/ gang gi tshe ba lang gi rnam pa la zhen pa med par 'brel pa can gyi khyad par can dang bral ba dkar po 'ba' zhig nges par byed pa de'i tshe dkar po 'di su'i yin zhes dris na/ba lang gi rdzas nges pa can gyis ston par byed pas kyang ba lang gi dkar po zhes ston par byed do/ /der yang de'i bdag nyid kho nar 'dod pa ldog pa ston pa ni dang po dkar po 'ba' zhig nges shing ba lang gi gong bu ma nges pa'i phyir ldog pa bstan to//gang gi tshe yang dkar po nyid 'ba' zhig 'dod par mi 'gyur ba'i phyir ba lang dkar po'am/ gzhan gyi dkar po yin snyam du 'brel pa can gyi khyad par shes par bya ba la/ blo dman pa nyid can gyi nyan pa pos dkar po 'di ba lang yin nam/gzhan ci zhig yin zhes 'dri bar byed cing smra ba pos kyang ba lang yin zhes gzhi mthun pas lan 'debs par byed de/ chos khongs su chud pa nyid kyis 'dri ba'i phyir dris pa dang mthun par lan yang gdab par rigs so/ /de'i phyir ba lang dang / dkar po nyid dag rjes su 'gro ba dang ldog pa nges pa las tha dad par nges pa ste/rjes su 'gro ba dang ldog pa de dag kyang thog ma med par gnas pa'o/ /de dag gis ni rigs dang yon tan gyi rjod byed dag tha dad par bstan pa yin no/ /gal te gzugs la sogs pa las tha dad pa'i yan lag can med na/ de'i tshe bum pa dang gzugs la 'di don gcig pa nyid du 'gyur ba ma yin nam zhe na/'dir smras pa/ gzugs sogs nus pa'i khyad par rnams/ /spong bas de 'bras mtshungs pa yi/ /rgyu min pa ni rnam gcod na/ /bum pa'i sgra ni 'jug par gyur/ /de'i phyir bum pa gzugs zhes pa/ /gzhi mthun pa can sgra ma yin//zhes bya ba la/ gang gi phyir bum pa la gnas pa'i gzugs la sogs pa'i nus pa ni gnyis te/ chu len par byed pa dang so sor nges pa'i mig la sogs pa'i rnam par shes pa skyed par byed pa'o/ /de la gang gzugs la sogs pa la so sor nges pa'i nus pa'i khyad par de rnams spong ba ste/de ma bstan par bum pa'i sgras 'jug par 'gyur ro/ /gang du zhe na/ bum pa la sogs pa de rnams kyis chu len pa la sogs pa 'bras bu gcig pa gang yin pa de'i rgyu ma yin pa shing la sogs pa gang yin pa de la rnam par gcod pa na 'jug par 'gyur te/rdzas du ma yod na yang / chu len pa'i nus pa bstan pa'i phyir brdar byas pa'i phyir ro/ /gzugs la sogs pa de rnams la yang bum pa zhes bya ba nus pa gcig la tshig gcig rigs pa yin gyi/ gang gi phyir de ltar tha dad pa de'i phyir bum pa'i gzugs zhes bya ba don gcig pa can gyi sgra ma yin zhing /gzhi mthun pa can yang ma yin te/ gzhi mthun pa ni rigs brjod pa dang / khyad par brjod pa yod na yin te/ gzhi mthun pas khyad par 'phen pa yin no/ /nye bar bsdu ba'i phyir/ rigs dang tshogs kyi rjod byed kyi/ /khyad par 'di yang 'dod pa yin/ /zhes bya ba smos te/de'i phyir tshogs pa rjod par byed pa bum pa zhes bya ba gzugs la sogs pa'i tshogs la ltos pa'i phyir ro/ /rigs rjod par byed pa ni gzugs zhes bya ba ste/ de dag gi khyad par ni spong ba dang mi spong ba'i mtshan nyid 'di nyid yin no/ /tshogs pa gzhan la ltos na bum pa'i sgra yang rigs brjod pa nyid de/tshogs pa'i sgra kha cig tshogs pa'i rjod byed yin te/ dper na 'bigs byed kyi sgra bzhin no/ /kha cig gnyi ga'i rjod byed yin te/ dper na bum pa'i sgra bzhin no/ /gal te de ltar gzugs la sogs pa 'ba' zhig bum pa'i sgra'i brjod bya yin gyi/ rdzas ma yin na ni de'i tshe bum pa'i gzugs la sogs pa zhes bya ba ji ltar tha dad pa yin zhe na/'dir smras pa/ bum pa'i gzugs la sogs rnams zhes/ /spyi de dmigs kyis dgar ba can/ /de yi nus pa'i khyad par ston/ /phyogs 'dis gzhan la 'ang brjod pa yin/ /zhes bya ba la/ bum pa'i gzugs la sogs pa zhes brdar btags pa 'dis ni bum pa'i spyi de khyad par du dmigs kyis 'ger ba gang yin pa'i gzugs la sogs pa de rnams kyi nus pa so sor nges pa'i bye brag mig gi rnam par shes pa skyed par byed par ston te/ gzugs la sogs pa chu len pa la sogs pa'i dgos pa can zhes bya ba'i tha tshig go//phyogs 'dis ni tshogs pa'i sgra gzhan la yang brjod par bya ste/ dper na me tog gi dri zhes bya ba lta bu'o/ /de la yang me tog las dri zhes bya ba gzhan pa'i rdzas med do/ /'o na ci zhe na dri gzhan du ma rnam par gcad pa'i phyir me tog gi ngo bo nyid kyi drir brjod do//tshigs su bcad pa 'di gsum gyis ni tshogs pa'i sgra rnams la gzhi mthun pa med pa dang / gzugs la sogs pa'i sgra tha dad par bstan pa yin no/ /de'i phyir yan lag kho na ste/ yan lag ma yin pa ni med do/ /gal te yan lag can med na yang de'i tshe yan lag rnam par shes pa'i rgyu nyid yin mod ce na/'dir smras pa/ ma lus rgyu nyid yin na yang / /yan lag gcig dang bral na'ang min/ /re re'ang nus pa nyid yin na/ /cig car mang po 'byung bar 'gyur/ /zhes bya ba la/ re zhig lus las tha mi dad pa'i sems yod pa ma yin te/rdul phra rab thams cad rigs par thal bar 'gyur ro zhes bstan to/ /'on te lus kyi yan lag las tha dad par gyur pa'i shes pa skye ste/ des na rdul phra rab rnams rgyu nyid yin gyi/ rigs pa ni ma yin te/ dper na mig la sogs pa bzhin no zhe na/ de la smras pa/ lus kyi yan lag rnams tshogs pa'i mig la sogs pa nyid du myu gu'i yin pa bzhin yin nam/dper na me 'bar ba la rtswa rnams bzhin yan lag so so ba shes pa'i rgyu yin grang na/ de la yan lag rnams ma lus pa nyid shes pa'i rgyu yin na ni lag pa la sogs pa'i yan lag gcig ma tshang na yang yid kyi shes pa med par 'gyur te/gang du phan tshun grogs byed pas de dag gi bya ba 'bras bu gcig byed pa ni der gcig med na mi 'byung ba'i phyir ro/ /de med par 'bras bu skye na ni 'di rgyu med par 'gyur ro/ /'on te yan lag phan tshun ltos pa med pa nyid du 'bras bu skyed pas de'i phyir lag pa la sogs pa bcad kyang yid kyi rnam par shes pa 'byung bar 'gyur ro zhe na/de lta na ni re re bas nus par 'gyur la/ re re bas nus pa de la ni shes pa mang po skye bar thal bar 'gyur te/ dper na re re ba'i sa bon nus pa can mang po yod na myu gu du ma 'byung ba bzhin no/ /'on te 'byung ba dang rngub pa dag skyed par byed pa yin gyi yan lag rnams ni grogs byed pa nyid de 'byung ba dang rngub pa gcig yin pa'i phyir/yan lag du ma yin yang shes pa gcig pa nyid do/ /phan 'dogs pa'i rgyu tha dad pas 'bras bu tha dad pa ni ma yin te/ dper na thag sha gzhan dang gzhan yod kyang snam bu la sogs pa tha dad pa ma yin pa lta bu'o zhe na/de la smras pa/ du ma nyid du mtshungs pa'i phyir/ /'byung rngub dag ni nges byed min/ /zhes bya ba la/ 'byung ba dang rngub pa dag kyang du ma yin pa'i phyir nges par byed pa ma yin no/ /'on te yan lag thams cad rgyu nyid yin na/ de'i tshe yan lag gcig med na shes pa mi 'byung zhing /re res nus pa ni cig car mang po 'byung ste/ 'di ltar 'byung rngub kyang du ma yin pa'i phyir lus bzhin no/ /'on te 'byung rngub dag gcig pa yin pa de bas na nye bar len pa gcig las shes pa gcig kho na skye'o zhe na/ 'dir smras pa/ gcig nyid yin na'ang rtag gsal 'gyur//de rgyu rtag tu nye phyir ro/ /du ma rgyu min zhe na ni/ /rim pas kyang min khyad med phyir/ /zhes bya ba la/ 'byung ba dang rngub pa dag gcig pa nyid yin na yang shes pa rtag tu gsal ba ste skye bar 'gyur ba de bas na 'dod chags la sogs pa rtag tu skye bar 'gyur te/ 'dod chags la sogs pa de'i 'byung rngub de rtag tu kho nar nye ba'i phyir ro/ /gal te rgyu yod kyang 'dod chags la sogs pa mi 'byung na/ de rgyu dang bcas par mi 'gyur ro/ /'byung rngub shes pa du ma'i rgyur mi 'gyur ba nyid yin na ni/ rgyu dang 'bras bur gyur pa ni nges pa yin pa'i phyir/ rgyu dang 'bras bu'i dngos por nges pa la brtsad par mi rung ba'i phyir/dper na me las du ba gcig tu 'byung ba bzhin no zhe na/ 'dir smras pa/ de ltar na shes pa du ma'i rgyu 'byung rngub ma yin zhing / rim pas kyang shes pa du ma'i rgyu ma yin no/ /ci'i phyir zhe na/ 'byung rngub dag la khyad par med pa'i phyir ro//mes ni sngon gyi ngo bo kho na las du ba gzhan dang gzhan skyed pa ma yin la/ 'byung rngub las ni sngar gyi ngo bo nyid kho na las 'byung ba'i phyir/ rkyen gzhan dang ldan yang khro ba la sogs pa'i sems mi 'byung ngo / /de lta na 'o na ni 'byung rngub gcig pa yin yang phyi rol gyis sad par byed pa nges pa las/'dod chags la sogs pa nges par 'gyur ro zhe na/ sad par byed pa'i rkyen yang nges par byed pa ma yin te/ sngar goms pa'i stobs rgyu yin pa'i phyir ro/ /de bas na gal te 'byung rngub de nyid sems de'i cig car ba'i rgyu ma yin na ni 'byung rngub las dus phyis kyang shes pa 'byung ba ma yin no//sngar gyi lus shes pa'i rgyu nyid du khas blangs nas 'byung rngub nges par mi 'gyur ba'i skyon brjod nas da ni nges pa nyid med do zhes bstan pa'i phyir/ 'byung ba gcig la don du ma/ /'dzin byed de las nges pa min/ /blo gcig gis du ma shes pa/ /nyid na'ang de nyid cig car 'gyur//'gal ba med phyir rim gyis kyang / /mi 'gyur de khyad med pa'i phyir/ /zhes bya ba la/ dbugs dal bar rgyu ba la sogs par 'byung ba gcig gi dus su yang don du ma 'dzin par byed pa las blo du ma skye ba'i phyir/ 'byung rngub de las sems su nges pa ma yin no/ /'o na ji ltar nges she na/shes pa nyid snga ma snga ma las sems phyi ma phyi ma nges pa'i rgyu yin pa'i phyir ro/ /shes pa gcig kho na rim pa du mar zhen pa'i rang bzhin te/ des na blo du mar mi 'gyur ba ma yin nam zhe na/ de lta na yang blo gcig gis don du ma rim gyis 'dzin par khas blangs na yid kyi blos don du ma dus gcig tu 'dzin par 'gyur ro//'on te blo gcig gis kyang dus gcig tu don du ma 'dzin pa ma yin na/ de'i tshe rim gyis kyang don du ma 'dzin par mi 'gyur te/ yid kyi blo de la khyad par med pa'i phyir ro/ /'di'i dgongs pa ni gzugs la sogs pa'i rnam pa las ma gtogs pa'i yid gzhan med de/me long dri ma med pa ltar yid gcig nyid yin no/ /de yang don gyi gzugs brnyan dang sbyor ba'o zhe na/ gal te de lta na ni de la ma gtogs pa shes pa nyid snang ba thob nas don gyi gzugs brnyan 'byung ste/ don rnams la nye ba dang shin tu skal ba med pa'i phyir thams cad cig car rig par 'gyur ro//'on te goms pa'i khyad par shin tu lhag pa las yid rim gyis don rig pa'o zhe na/ de lta na ni goms pa nyid don gyi rnam pa 'dzin pa'i rgyur 'gyur gyi srog la sogs pa ni ma yin no/ /shes pa me long bzhin gnas pa la 'gal ba med pas cig car don du ma 'dzin par 'gyur ro//'on te de la cig car don 'dzin pa'i nus pa med na ni de lta na rim gyis kyang don du ma 'dzin par mi 'gyur te khyad par med pa'i phyir ro/ /gal te srog ni mang skad cig /rang rigs min pa'i dus can dag /sems ni de 'dra ba dag gi/ /rgyu nyid yin par rtogs pa na//zhes bya ba la/ 'on te yang srog ni gcig ma yin te/ 'on kyang mang po dang rim gyis 'byung ba'o/ /rang gi rigs kyi dus gcig la yod pa ma yin pa de de ltar 'gyur te/ rim pa can yin zhes bya ba'i tha tshig go/ /srog de dag de 'dra ba 'jig pa can te/ rim pa dang ldan pa rnams sems kyi rgyur rtogs pa ste/des ni rim pa dang ldan pa'i don du 'dzin to zhe na/ lan smras pa/ go rims ldan pa'i rgyu med na/ /de dag rim ldan ji ltar 'gyur/ /rang rigs snga ma rgyu nyid na/ /dang po srog 'byung mi 'gyur te/ /de rgyu de 'dra yod ma yin/ /yod na'ang du ma nyid du nges/ /srog ni tha dad yul can phyir//de phyir blo ni cig car skye/ /zhes bya ba la/ srog ni mang po dang 'jig pa can du nges pa yin na/ de dag khyod kyi gzhung la grub pa ma yin no/ /tshad mas khong du chud pa'i phyir kho bo la ni de dag grub pa ste/ rtag pa'i don gcig la rim pa mi rigs pa'i phyir ro/ /de bas na rgyu la rim pa yod pas 'bras bu la yang rim pa yod pa'i phyir/sems rim pa can nyid yin na ni de lta na yang rim pa dang ldan pa'i rgyu med pas de nyid ji ltar rim gyis 'byung ba yin/ 'on te sngar gyi srog la sogs pa'i rgyu'i rim pas srog la sogs pa'i rim pa dang ldan par 'dod na/ de lta na yang rang gi rigs snga ma'i rgyu can yin na/dang po'i srog la sogs pa 'byung bar mi 'gyur te/ de'i rigs can gyi srog sngar med pa'i phyir ro/ /skye ba gzhan khas blangs na ni mngal du 'byung ba'i rgyu 'jig rten gzhan gyi srog yin no/ /ma la sogs pa'i 'byung rngub rgyu yin no zhe na/ 'di ni mi rung ste/pha ma'i 'byung rngub kyi rang bzhin las bu'i 'byung rngub skye bar thal ba'i phyir ro/ /gzhan yang blo yang pha ma'i rjes su byed par 'gyur ba de bas na/ skye ba dang po'i srog gi rgyu de lta bu'i srog med par 'gyur ro/ /khas blangs nas kyang brjod pa gang gi rgyu yod na yang srog chags kyi 'byung rngub rnams du ma nyid du 'gyur te/yul can tha dad pa'i phyir ro/ /yul tha dad pa dang ldan pas/ 'gal ba'i chos rten pa ste/ de yang tha dad pa'i sgrub byed do/ /de'i phyir te srog rnams du ma yin pa'i phyir yid kyi blo cig car skye bar 'gyur ba las sems ni rim gyis skye bar mthong ba de bas ni shes pa kho na rgyu yin no//'on te srog du mas sems gcig skyed pa tshogs pas skyed pa'i phyir ro zhe na/ 'dir smras pa/ gal te du ma'ang gcig dus can/ /yin la sems gcig rgyu yin na/ /dal bar rgyu ba la sogs na/ /gcig ma tshang na'ang skye ba min/ /'on te ji lta'i dngos rgyu na//shes pa'ang khyad par nyid du 'gyur/ /gang dang gang gi khyad par las/ /khyad par med de de 'bras min/ /zhes bya ba la/ srog du ma yin yang sems gcig gi rgyu yin te/ dus gcig pa can yin pa'i phyir/ dper na sa la sogs pa myu gu gcig skyed pa bzhin no zhe na/ gal te de ltar srog du ma yin yang /tshogs pa'i ngo bo nyid kyis 'bras bu gcig kho na skyed na ni de'i tshe dal bar rgyu ba dang mi rgyu ba la sogs pa na srog gcig ma tshang bas shes pa mi skye bar 'gyur te/ tshogs pa dang bral ba'i phyir ro/ /tshogs pas bskyed pa'i 'bras bu'i chos ni 'di yin te/ gang tshogs pa'i rgyu ma tshang na med pa'o//de med kyang yod na de'i 'bras bur mi 'gyur ro/ /srog la sogs pa'i rgyu nye bar gyur pa ji lta ba yin gyi/ tshogs pa kho na ma yin pa ma yin nam/ des na ji lta ba'i dngos po ste/ ji ltar nye bar gyur pa'i srog ni sems kyi rgyu yin no zhe na/ de lta na 'o na ni srog rnams tshogs pa dang ma tshogs pa'i dus su shes pa yang khyad par can du 'gyur ro//gang gi phyir de'i 'bras bu shes pa la sogs pa srog la sogs pa'i shes pa gang zhig srog la sogs pa gang gi khyad par tha dad pa'i khyad par can du mi 'gyur ba de bas na srog tshogs pa'i 'bras bu shes pa skye zhing / ma tshogs pa'i las ni ma tshogs par 'gyur la/med pa las na med par 'gyur te/ de lta ma yin na srog la sogs pa'i 'bras bu grub par mi 'gyur ro/ /khyad par can du byed pas srog la sogs pa shes pa'i rgyu nyid ni ma yin te/ 'on kyang de yod na yod pa'i phyir ro zhe na/ de lta na 'o na ni sems kyi 'dod chags la sogs pa'i mtshan nyid can gyi khyad par gang yin pa de rgyu med pa nyid du 'gyur ro//'dod chags la sogs pa'i 'gyur ba rgyu med pa can du 'gyur na shes pa gzhan gang zhig rgyu dang bcas par 'gyur/ 'on te srog la sogs pa las 'dod chags la sogs pa 'gyur ba nyid yin no zhe na/'o na ni snga ma nyid du 'dod chags la sogs pa khyad par can du 'gyur te/ rgyu srog yod na 'bras bu mi skye ba mi srid pa'i phyir ro/ /de bas na ji ltar na khyad par rgyu med pa can yin pa de bzhin du shes pa yang yin pa'i phyir shes pa srog gi rjes su 'gro ba dang ldog pa'i rjes su 'brang ba can du ji ltar 'gyur/gang yang rim gyis 'gyur ba la ltos pa'i lus las shes pa rim gyis skye bar 'gyur ro zhes zer ba de gsal ba yin te/ 'di ltar gyur pa'i rim pa yang lus tsam las 'byung ba ma yin te/ lus las khyad par med na gyur pa'i khyad par du ji ltar 'gyur/ dper na lus dang srog la sogs pa la khyad par med na shes pa la khyad par med pa de bzhin du/lus la khyad par med na gyur pa la yang khyad par med do/ /'o ma la sogs pa la khyad par med na yang / 'o ma gyur pa'i zho dus kyi dbang kho nas khyad par can du 'gyur ba ma yin nam/ de bzhin du lus kyang yun lon nas rnam par shes pa khyad par can du 'gyur ro zhe na/de ni mi bden te/ mnyam pa'i 'o ma la sogs pa nye bar gyur pa dang / drod la sogs pa mtshungs par yod na/ mtshungs pa nyid du zho la sogs par 'gyur ba yin gyi mtshungs pa'i gnas skabs dang / mi mtshungs pa'i gnas skabs na sngon mngon par 'dus byas pa rjes su mthun pa'i rnam par rtog pa'i shes pa'i tha dad pa dang tha dad pa ma yin pa'i rgyu yin pa de bas na/gyur pa'i rim pas shes pa rim par 'gyur ba ni ma yin no/ /'o na ni sems kho na las sems skye bar 'dod pa gang yin pa de'i shes pa cig car skye bar ji ste mi 'gyur te/rim pas kyang sems de las shes pa skye bar 'gyur ba'i phyir yin gyi/ skad cig ma tha dad pas 'bras bu tha dad pa'i shes pa du ma yin nam zhe na/ 'dir smras pa/ rnam shes nus pa nges pa'i phyir/ /gcig ni gcig gi rgyu yin no/ /don gzhan chags bral shes pa ni//don gzhan 'dzin pa med phyir ro/ /zhes bya ba la/ mtshungs pa de ma thag pa'i rkyen gyi ngo bo nyid gcig ni sems gcig kho na'i rgyu yin te/ sngar goms pas sbyangs pas mthun pa'i 'du byed dam/ yul kha cig la chags pa'i khyad par gyi nus pa nges pa'i phyir ro/ /de bas na sngar goms pa'i bag chags kyi rjes su mthun par shes pa skye ba'am/chags pa'i bye brag las kha cig kho nar shes pa skye ste/ de la mtshungs pa de ma thag pa'i rkyen gyis shes pa sems phyi ma'i rgyu yin zhing / goms pa'i shes pa ni sems kyi bag chags bzhag pa la g.yer bag can la sogs pa'i rgyu yin no//de dag ji ltar shes she na/ mngon par 'dod pa'i don gzhan la chags pa de dang bral ba'i sems ni yul gzhan nye bar gyur kyang 'dzin pa med pa'i phyir ro/ /rjes su 'gro ba dang ldog pa'i rjes su 'brang bas kyang rgyu nyid du nges pa yin no/ /'dir ni sngar goms pa'i rjes su mthun pa'i yid kyi rnam par shes pa g.yer bag can du snang ba dang /yul gzhan la chags pa dang bral bar byed pa'i sems ni yul gzhan la shes pa skye ba ma yin pa'i phyir/ sems thams cad ni sems kho na sngon du 'gro ba yin no/ /de ltar ni 'gyur mod kyi dang po'i lus nyid las shes pa skye zhing /dus phyis ni shes pa nyid las shes pa skye ste/ dper na dang po me las du ba 'byung la/ de nas du ba nyid las du ba'i rgyun 'byung ba yin no/ /ji ltar dus gzhan du du ba'i rgyun 'gags pa de bzhin du dus gzhan gyi tshe sems kyi rgyun 'gag par 'gyur ro//ji ltar yang dang po'i shes pa yul du ma las skye ba yang chags pa las kha cig tu shes pa gcig skye ba de bzhin du/ dang po skyes pa'i tshe lus las shes pa du ma skye na yang dus gzhan du shes pa kho na las shes pa skye ste/ des na lus dang srog la sogs pa rgyu nyid yin yang shes pa du ma skye ba ni ma yin no zhe na/'dir smras pa/ gal te lus las lan cig blo/ /skye zhing phyis ni rang rig las/ /nges na lus kyi nus pa ni/ /ci yi phyir na ldog pa yin/ /zhes bya ba la/ gal te lus las skyes pa'i shes pa dus phyis rang gi rigs kho na'i sems las nges pa yin pa de lta na lus kyi nus pas rnam par shes pa skyed pa ci'i phyir ldog pa yin te/'di ltar gal te lus las shes pa gcig gi rgyu yin na/ lus kyang nus pa nyid du gnas pa de bas na sems gzhan dang gzhan skyed par 'gyur ba'i phyir cig car mang po 'byung ba 'di gnas pa yin no//'on te lus las skyes pa'i shes pas lus las shes pa du ma skye ba'i gags byed pa de'i phyir lus las shes pa gzhan dang gzhan 'byung ba ma yin no zhe na/ de ni mi bden te/ gang gi phyir de las byung ba'i 'bras bus de nyid kyi rgyun gyi nus pa las gegs byed pa ma yin te/ mes bskyed pa'i du ba skyed par nus pa'i me la gegs mi byed pa de'i phyir ro//de bas na gal te shes pa lus las skye ba de'i tshe shes pa skyes pas kyang shes pa skyed pa la gegs mi byed pa'i phyir cig car mang po 'byung bar 'gyur ro/ /dbang po'i shes pa du ma 'byung yang chags pa'i yul las shes pa gcig skye bar smras pa ma yin nam zhe na/smras pa de ni mi bden te/ gang gi phyir goms pa med pa'i sems kyis shes pa gzhan skyed par byed pa ma yin te/ sngar goms pa med na yul gzhan la chags pa med pa'i phyir ro/ /ji ltar sngar sems la goms pa skye ba de nyid la slar yang chags par 'gyur ba de'i phyir sems gzhan skye ba ni sngar goms pa kho na las yin gyi/'jig rten pha rol med par smra ba de la ni skye ba gzhan du goms pa med pa'i phyir las skye ba'i shes pa rnams la slar yang 'khor lo bzhin du skyon snga ma nyid du 'gyur ro/ /'on te shes pa'i rgyu lus kyi skad cig ma dang po yin gyi dus phyi ma'i lus kyi skad cig ni rgyu ma yin no zhe na/gal te de ltar lus dang po kho na shes pa skyed na/ 'o na ni lus phyi ma sems kyi rten med par 'gyur te/ sems yan gar bar 'gyur ro/ /'on te lus phyi ma'i grogs can gyi shes pas shes pa gzhan bskyed pa'i phyir/ sems yan gar bar mi 'gyur ro zhe na/ de lta na ni sems kho nas sems bskyed par 'gyur gyi/ lus ni grogs yin pa'i phyir sangs rgyas pa'i lugs nyid bsgrub par 'gyur ro/ /dang po'i lus kho na nye bar len pa'i rgyu ma yin nam/ dper na lci ba las sA lu skye ba bzhin no/ /sA lu phyi ma ni sA lu nyid las skyes pa yin no zhe na/de lta na ni ba lang gi lci ba med par dus phyis sA lu nyid las sA lu skye ba de bzhin du/ sems nyid las sems skye ba'i phyir sems yan gar ba sems kyi gnas su 'gyur ro/ /lus kyang sems kyi rgyu ma yin nam/ de bas na lus dang sems dag lhan cig gnas pa yin no zhe na/bden te/ lus ni sems la phan 'dogs pa'i rgyu yin gyi/ nye bar len pa ni ma yin no/ /'dir lus dang po ni nye bar len pa yin la/ phyi ma grogs byed pa zhes ma smras sam zhe na/ snga ma ni nye bar len pa yin la/ phyi ma grogs byed pa ma yin no/ /'on te sngar lus sam nye bar len pa can gyi sems yin la/phyis ni sems sngon du 'gro ba'i sems su snang ngo zhe na/ de ni mi bden te g.yer bag can la sogs pa dang ldan pa'i shes pa/ shes pa sngon du 'gro ba can ji lta ba bzhin du mthong ba de kho na ltar sems dang po la g.yer bag can du myong bar 'gyur ba'i phyir rtag tu shes pa kho na las shes pa skye'o zhes bya bar gnas so//'di dag gis ni du ba'i rgyun 'gags pa bzhin rnam par shes pa 'gag go zhes zer ba de bsal ba yin te/ de la me la sogs pa'i tshogs pa nye na du ba'i rgyun 'phel ba can du 'gyur gyi/ du bas skyed pa'i du ba'i rgyun ni 'dzad pa can yin pa'i phyir ro//'dir ni goms pa sngon du 'gro ba'i yid g.yer bag can gyi shes pa snang ngo / /gal te yang dang po'i lus nyid las skye na goms pa phul du byung ba las de bogs 'byung bar snang bar mi 'gyur te du ba las skyes pa'i du ba 'phel bar mi snang ba lta bu'o/ /gal te sangs rgyas pa'i yang shes pa lus la mi brten na lus 'gags kyang shes pa gnas par 'gyur te/rgyu mtshan med par lhan cig pa'i dngos por nges pa ste/ gal te rten min pa yi lus/ /log par gyur kyang sems 'ba' zhig /gnas 'gyur zhe na de yi ni/ /rgyu 'jug thob phyir sems rgyud gnas/ / rgyu ni yan lag min gyur na/ /tshe 'di nyid kyi skye mched lnga/ /lus gzhan skye ba'i rgyu yin no/ /zhes bya ba smras te/ lus log par gyur na yang sems 'ba' zhig gnas par 'gyur te/ lus dang sems la rten dang brten pa'i dngos po nges pa med pa'i phyir ro zhe na/ las zhes bya ba dang / sred pa dang ma rig pa ni sems gnas pa'i rgyu yin te skye ba gzhan du gyur pa'i lus de'i rgyu lus gzhan pa yin la/ de las lus gzhan skyed pa'i 'jug pa thob pa'i phyir ro/ /gal te yan lag ste rgyu nyid du ma gyur na ni de'i tshe sems yan gar ba gnas par 'gyur ro zhes bya ba tshig lhag ma'o//dper na gzugs med par skyes pa'i srog chags kyi shes pa yan gar ba nyid du gnas pa bzhin no/ /gang gi tshe yang 'jig rten pha rol gyi lus gzhan skye ba'i rgyu tshe 'di nyid kyi skye mched lnga yin pa de'i tshe ci'i phyir sems yan gar ba gnas pa yin/ gzugs med pa'i khams nas shi 'phos pa'i lus can rnams kyi lus skye ba yang de nyid kyi lus skye mched lngas 'dus byas pa'i bag chags rgyur 'gyur ro//de ltar ni 'gyur mod kyi/ sems lus gzhan gyi rgyur 'gyur bar mi dmigs te/ shi ba'i 'og tu lus gzhan skye ba mthong ba'i phyir ro/ /gzugs med pa'i khams la ni shin tu yang ma mthong ba'i phyir med do zhe na/'dir smras pa/ de yi yan lag rgyu nyid ni/ /'gegs pa yis ni mi dmigs pa/ /nges byed min par rab tu bshad/ /dbang sogs kyang ni lhag ldan yin/ /zhes bya ba la gal te 'chi ba'i sems kyis lus gzhan skyed pa'i yan lag gi dngos po rgyu nyid de/grogs byed pa'i rgyu mi dmigs pa de lta na yang / sems la lus gzhan skyed pa'i nus pa med pa ni ma yin te/ gnod pa byed pa med pa'i phyir ro/ /'on te mi dmigs pa nyid gnod pa byed pa yin no zhe na/ ma yin te/ gang gi phyir lus gzhan gyi lhan cig byed pa'i rgyu sems yin pa 'gegs pa ni mi dmigs pa nges par byed pa ma yin no zhes bstan zin to//'dir ma mthong ba tsam gyis smra ba ma yin gyi/ 'on kyang 'brel pa sngon du song ba'i rjes su dpag pas gnod pa yod pa ma yin nam/ dbang po gang yin pa de lus gzhan gyi dbang po dang mtshams sbyor ba ni ma yin te/dper na lha sbyin gyi mig la sogs pa mchod sbyin gyi mig la sogs pas bskyed pa ma yin pa de bzhin du/ dbang po yang skye ba 'di'i lus la gnas pa yin no zhe na/ 'dir smras pa/ dbang po la sogs pa sgrub byed du bkod pa gang yin pa de yang / lhag ma dang ldan pa ste nges par byed pa ma yin te/'di ltar dbang po yang yin la/ 'jig rten gzhan gyi dbang po dang / nying mtshams sbyor ba la 'gal ba ci zhig yod/ ma mthong ba tsam gyis mi mthun pa'i phyogs las ldog par nges pa ni ma yin no/ /'on te tshe 'di'i lus la yod pa'i dbang po dang mtshams sbyor ba'i mig la sogs pa ni rgyu gzhan la yod pa'i mig la sogs pa skyed par byed pa ni ma yin no zhe na/'di ni grub pa la sgrub pa ste/ de'i tshe lus gzhan yang rgyud de nyid yin pa'i phyir ro/ /'o na khrag dang khu ba la sogs pa las byung ba'i 'jig rten gzhan gyi lus de ji ltar rgyud de nyid du 'gyur zhe na/khrag dang khu ba gzhan du gyur pa nyid kyis rgyud khyad par du 'gyur ba ma yin te/ dper na me'i khyad par can gyi du ba dang bum pa'i khyad par can gyi byas pa'i sgra dang du ba yin par ci yang byed pa ma yin no/ /'on te me med na mi 'byung ba'i du ba spyir nges pa yin gyi/ mig la sogs pa la ni de ma thag pa mthong ste/dbang po las 'das pa'i phyir ro zhe na/ 'dir smras pa/ dbang po snga ma'i rang rigs la/ /nus pa dag ni mthong ba ste/ /'gyur ba mthong phyir gzhan gzhan gyi/ /skye ba dag kyang grub pa yin/ /zhes bya ba yin te/ sngar byung ba'i mig la sogs pa rnams kyi rang gi rigs dbang po la sogs pa la nus pa mthong ste/'di ltar sngar gyi dbang po la brten par dbang po gzhan dag mthong ba yin no/ /ma shi ba'i bar du dbang po tshul gcig pa nyid ma yin nam zhe na de ni ma yin te/ shes pa'am/ mig la sogs pa rab rib la sogs pa'i dri ma dang bcas pa'am/ dri ma med pa la sogs pa'i 'gyur ba mthong ba'i phyir dbang po rnams gzhan dang gzhan du skye ba grub pa yin no//'dis ni gsal ba'i khyad par la ma ltos pa nyid du 'brel pa bzung bar bstan pa yin no/ /gzhan du na sus kyang gang du yang tha snyad 'dogs par mi 'gyur te/ tha snyad 'dogs pa ni don byed par rung ba sngon du 'gro ba can yin pa'i phyir dang /rung bar nges pa ni spyi las yin pa'i phyir dang / mig la sogs pa mig la sogs pas bskyed par rung bar nges pa ste/ sgrin pa nyid la sogs pa mthong ba'i phyir zhes bstan zin to/ /mig la sogs pa dang po skye ba ni lus las skye la/ dus phyis ni mig la sogs pa nyid las mig la sogs pa skye ba ma yin nam zhe na/'dir smras pa/ gal te lus las de skye na/ /snga ma bzhin du thal bar 'gyur/ /sems las yin na de nyid las/ /lus gzhan dag kyang skye bar 'gyur/ zhes bya ba yin te/ gal te dang po'i mig la sogs pa lus las skye na/de'i tshe dbang po dang bcas pa las yin nam/ dbang po med pa las yin grang na/ de la dbang po dang bcas pa las skye na ni/ skye ba snga mar yang mig la sogs pa dbang po dang bcas pa nyid las skyes pa'i phyir/ 'jig rten pha rol grub par 'gyur ro/ /dbang po med pa las skye na ni/ ro'i lus las kyang sen mo la sogs pa skye bar 'gyur ba'i phyir snga ma bzhin du thal bar 'gyur ba'am yang na lus kyi nus pa ldog par ji ltar 'gyur zhes pa'i thal ba bstan pa yin no/ /'on te ro'i lus la sems med pas sen mo la sogs pa mi skye'o zhe na/ 'o na ni sems las skye bar 'gyur ba de bas na sems de nyid las 'jig rten pha rol du gyur pa'i sems dang lus gzhan skye bar 'gyur ba de bas na sems de nyid las 'jig rten pha rol du gyur pa'i sems dang lus gzhan skye bar 'gyur ro//nye bar bsdu ba smras pa/ /de phyir rgyu dang bral ba'i phyir/ /tha ma'i sems nyid thams cad kyi//mtshams sbyor min min de 'dra yi/ /sgrub byed lha ldan yin par 'dod/ /ces bya ba la/ sred pa dang / ma rig pa dang ldan pa'i las kyis mngon par 'dus byas pa'i sems 'di ni 'jig rten pha rol gyi rgyu yin te de dang bral na 'chi ka'i sems thams cad skye ba gzhan dang nying mtshams sbyor ba'i mtshams sbyor med pa ste/rgyud nyid ma grub pa'i phyir ro/ /de bas na 'chi ka ma'i sems yin pa'i phyir zhes bya ba 'di rtags dam pa'o zer ba de 'dra ba ni lhag ma dang ldan pa yin par 'dod de/ mi dmigs pa tsam gyis ldog pa nges pa med pa'i phyir zhes bstan zin to// // tshad ma rnam 'grel gyi 'grel pa las/ bam po bdun pa/ gal te yang 'jig rten 'di'i sems ni 'jig rten gzhan gyi sems skyed pa yin te/ lus tha dad pa la brten pa can yin pa'i phyir/ lha sbyin gyi sems bzhin no zhes zer ba de yang mi bden te/ 'di ltar shes pa ni lus la brten pa ma yin no zhes bstan zin to//gzhan yang rnam par shes pa ni lus gnas pa ma yin te/ gang du yang 'jug pa dang ldan pa ma yin no/ /des na lus ni phyi 'am nang yang rung ste/ shes pa'i yul yin pa'i phyir/ de 'di'i lus med kyang sems gzhan la 'pho ba dang ldan pa yin te/ dper na 'ga' zhig gi tshe/gzugs la dmigs pa'i sems ni de med kyang rang gi lus sam/ gzhan gyi lus la dmigs pa'i phyir phan tshun du dmigs pa bzhin du sems ni lus gzhan la 'pho ba dang ldan pa yin no/ /yang na ji ltar byis pa'i lus la goms pa'i sems ni/ rgan po'i lus las sems g.yer bag can du 'gyur/de la nye bar len pa gcig yod la skye ba gzhan gyi lus la ni khu ba dang khrag gzhan nye bar len pa yin no zhe na ma yin te byis pa dang rgan po'i lus dag tha dad pa tsam du sgrub pa'i phyir lus tha dad pa la 'jug pa'i 'du byed de tsam zhig dper na byed pa yin no/ /yang na ji ltar sad pa'i dus kyi 'du byed ni rmi lam gyi lus rjes su mthun pa'i shes pa'i rgyu yin pa dang /rmi lam gyi khyad par mthong ba'i lus skrag pa la sogs pa'i 'du byed ni sad pa'i tshe sems sngang ba la sogs pa'i rgyu yin pa de bzhin du/ tshe 'di la dge ba la sogs pa'i 'du byed dang ldan pa'i sems kyang 'jig rten pha rol gyi lus la gnas pa'i sems de dang rjes su mthun pa'i 'dod chags la sogs pa'i rgyu yin pa'i phyir skye ba snga ma goms pa'i stobs kyis 'jig rten 'di'i 'dod chags la sogs pa 'byung ba yin no//de bas na thog ma med pa'i sems kyi rgyun la skye ba dang 'chi ba la sogs pa gcig nas gcig tu brgyud pa grub pa'i phyir goms pa grub pas shes rab dang yid gzhungs pa la sogs pa'i yon tan thams cad goms pa las yin no//de'i phyir thams cad mkhyen pa 'byung du rung ba yin no/ /'dir rtsod par byed pas/ gal te goms pas khyad yin yang / / mchongs dang chu yi drod bzhin du/ /rang bzhin las 'das min zhe na/ /zhes bya ba smras te/ de ltar ni 'gyur mod kyi skye zhing skye bar goms pa yin mod kyi de lta na yang shes rab la sogs pa rab kyi mthar phyin pa phul du byung bar mi 'gyur te/ so sor nges pa'i khyad par mthong ba'i phyir mchongs pa dang chu tshan bzhin no//de bas na goms pas so sor nges pa'i khyad par yod kyang rang bzhin las 'das pa thams cad myong bar mi 'gyur ro zhe na 'dir lan btab pa/ de byas gyur na yang gal te/ /'bad rtsol la ni ltos pa dang / /brten min rten can du gyur na//khyad par nyid ni mi 'phel te/ /rang bzhin dag ni de lta min/ /gang phyir nus can sgrub byed rnams/ /khyad par phyi ma dag la ni/ /nus pa med pa nyid phyir dang / /rtag tu rten gnas med phyir ro/ /zhes bya ba la/ khyad par zhes bya ba rab kyi mthar phyin med par gnas pa'i char gyur pa ni ma yin te/'di ltar de'i khyad par mchongs pa bzhin goms par byas pa ni/ gal te slar yang dus phyis rang gnas pa 'bad pa la ltos par byed pa ma yin te/ 'di ltar 'bad pas bogs phyung ba'i mchongs pa ni slar 'bad pa la ltos pa dang / gzhan ni brtan pa ma yin pa'i rten can du gyur pa chu tshan bzhin no zhe na/de lta na ni shes rab kyi khyad par yang rab kyi mthar phyin par mi 'gyur ba ni/ 'di ltar rab kyi mthar ma phyin par gnas pa'i cha nyid slar 'bad pa la ltos pa dang / mi brten pa la brten pas khyab kyi/ thugs rje la sogs pa yid kyi yon tan rnams brtan pa la brten pa nyid dang / slar 'bad pa la ltos pa med pa'i phyir mthar phyin pa nyid du 'gyur ro//slar yang 'bad pa la ltos pa can gang yin pa de ni ngo bo nyid du mi 'gyur ba de bas na gtan tshigs 'di ni khyad par dang bcas pa ste/ gang brtan pa la brten pa dang / ngo bo nyid yin pa de ni mthar phyin pa can te/ dper na gtsang sbra can dang /thod pa can la mi gtsang ba bzhin no/ /slar 'bad pa yod kyang mchongs pa ci'i phyir mthar phyin par mi 'gyur zhe na/ mchongs pa la sogs pa sngar bogs phyung ba de nyid la phan 'dogs par nus pa gang yin pa de dag sgrub par byed pa rnams te/ khyad par phyi ma dag la ni mchongs pa rab kyi mthar phyin par mi 'gyur te nus pa med pa nyid kyi phyir ro//chu'i rten yang rtag tu mi gnas pa'i phyir ro/ /'bad pa las kyang chu'i tsha ba'i ngo bo nyid dang / mchongs pa so sor nges pa 'phel bar mi 'gyur ram zhe na/ de'i phyir/ khyad par 'phel ba yin na yang //rang bzhin min phyir gang gi tshe/ /bogs phyung slar 'bad la mi ltos/ /rtsol gzhan khyad par byed par 'gyur/ /zhes bya ba la/ slar 'bad pa la ltos pa'i khyad par gang yin pa de/ gal te 'phel bar 'gyur ba de lta na yang mchongs pa la sogs pa de'i ngo bo nyid du mi 'gyur te/ rgyu gzhan la ltos pa'i ngo bo nyid yin pa'i phyir/rang gi ngo bo nyid ni rang gi ngang gis 'jug pa la tha snyad 'dogs pa'i phyir ro/ /de bas na mchongs pa la sogs pa'i khyad par ngo bo nyid ma yin pa'i phyir 'phel bar 'gyur yang phul du byung ba'i 'phel ba ma yin no zhes bya ba lhag ma'o/ /gang gi tshe yang lan cig bogs phyung ba'i yid kyi yon tan ni brtse ba la sogs pa'i 'bad pa la mi ltos par rang nyid gnas pa de'i tshe rtsol ba gzhan thugs rje la sogs pa la gnas pa'i khyad par gyi byed pa por mi 'gyur ro//de ltar 'gyur mod kyi snying rje la sogs pa ni slar yang 'bad pa la ltos pas yin gyi/ngang gis 'jug pa ma yin te/ dper na mchongs pa slar 'bad pa la ltos pa bzhin no zhe na/ 'dir smras pa/ sems la brtse sogs goms skyes pa/ /rang gi ngang gis 'jug 'gyur te/ /me la sogs la shing dag dang / /dngul chu gser la sogs pa bzhin/ /zhes bya ba la/dper na me yis byas pa'i shing gi bye brag tshig pa la sogs pa'i mtshan nyid ni slar yang rtsol ba la mi ltos par rang gi ngang gis 'jug pa dang / dngul chu sbyangs pa dang / gzung ba la sogs pa'i mtshan nyid dang / gser sreg pa la sogs par byas pa ni/ slar rtsol ba la ltos pa de bzhin du sems snga ma snga mar goms pa las skyes pa'i snying rje la sogs pa yang rang gi ngang kho nas 'jug gi ldog pa'i cha can ni ma yin no//de dag gis ni brtse ba rang gi ngang gis 'jug par brjod do/ /'on te brtse ba la sogs pa chu tshan bzhin rang gi ngo bo nyid ma yin pa'i phyir rab kyi mthar 'byung ba ma yin no zhe na/smras pa/ de'i phyir de rnams skyes yon tan/ /de ni ngo bo nyid skyer 'gyur/ /de las 'bad rtsol phyi ma rnams/ /khyad par bogs 'byin byed pa yin/ /zhes bya ba la/ de'i phyir te rang gi ngang gis 'jug pa'i phyir brtse ba la sogs pa de rnams skyes pa'i yon tan g.yer bag can la sogs pa ni ngo bo nyid kho nar 'gyur te/sngar gyi rtsol bas brtse ba bskyed pa de las 'bad rtsol phyi ma'i phyi ma goms pa khyad par du bogs 'byin pa'i byed pa por 'gyur ba de bas na/ brtse ba la sogs pa ni mthar phyin pa med pa'i bdag nyid ma yin no/ /brtse ba la sogs pa ni/lan du phan 'dogs pa la ltos pa dang bcas pa ma yin nam/ goms pa sngon du 'gro ba can tsam ni ma yin pa'i phyir/ gnod pa byed pa'i zhe sdang la sogs pa bzlog pa'i ched yin te/ sngar goms par byas pa'i snying rje 'bad rtsol gzhan gyis bstan pa'i phyir ro zhe na/ gang phyir brtse ba la sogs blo//rigs mtshungs sa bon snga ma las/ /'phel ba can gyur de dag gi/ /goms pa yod na ci phyir gnas/ /zhes bya ba la/ gang gi phyir rigs mtshungs pa la sogs pas bogs phyung ba'i sa bon snga ma brtse ba la sogs pa goms pa de las/ 'phel ba ste rab kyi mthar phyin pa gang la yod pa de ni brtse ba la sogs pa'i blo yin pa de'i phyir de dag gi goms pa yod na ci'i phyir gnas te mi gnas zhes bya ba'i tha tshig go//'di'i dgongs pa ni 'di yin te/ brtse ba la sogs pa nyid ni brtse ba la sogs pa goms pa las skyes pa yin gyi/ lan du phan 'dogs pa la sogs pa la ltos pa ni ma yin no//de lta na yang dran pa dang thos pas kyang brtse ba la sogs pa 'jug ste/ brtse ba la sogs pas zhing du byas pa'i rgyud rnams mi gsar du gnod pa byed pa'i srog chags la brtse ba chung bar mi 'gyur ro/ /de'i phyir goms pa dang ldan pa sems la ci'i phyir brtse ba la sogs pa dman par ci ste 'gyur/mchongs pa'i yang goms pa rab kyi mthar phyin pa'i rgyu yod pa ma yin nam/ des na de yang rab kyi mthar phyin par shes rab la sogs pa bzhin du 'gyur ro zhe na/ smas pa/ de ltar mchongs nyid las mchongs min/ /de rgyu stobs dang 'bad rtsol gyi//nus pa nges pa nyid kyi phyir/ /mchongs pa nges pa'i bdag nyid yin/ /zhes bya ba la/ snying rje la sogs pa rigs pa mtshungs pa las brtse ba la sogs pa skye ba bzhin/ mchongs pa nyid las mchongs pa 'byung ba ma yin gyi/ 'on kyang stobs dang rtsol ba dag las mchongs pa 'byung ste/ 'di ltar mchongs pa legs par byang yang stobs dang rtsol ba med par mchongs nus pa ma yin no/ /des mchongs pa'i rgyu stobs dang / rtsol ba dag ni nus pa nges pa'i phyir mchongs pa yang gnas pa nges pa'i rang bzhin nyid yin no/ /mchongs pa'i yul can gyi goms pa nyid las mchongs pa 'byung ba ma yin nam gzhan du na stobs dang rtsol ba ni sngar yod pa'i phyir dang po nyid du mchongs par 'gyur ro//'on te stobs nyid sngar med la/ goms pa nyid las stobs 'grub pa'i phyir/ sngar mchongs pa ma yin na ni de lta na/ rang gi rigs kyi mchongs pa bskyed kyang mchongs pa rab kyi mthar phyin par mi 'gyur ba bzhin du/snying rje la sogs pa yang mthar phyin par mi 'gyur ro zhe na/ 'dir smras pa/ phyi nas bzhin du de dang por/ /mchongs min lus ni nus med phyir/ /rtsol bas rim gyis mi nus pa/ /bsal na rang stobs nges pa yin/ /zhes bya ba la/ 'di'i don ni 'di yin te/goms pa las stobs skye ba ma yin gyi/ 'on kyang stobs yod par gyur kyang bad kan la sogs pas bcom nas mchongs pa mi nus pa yin no zhe na/ de bas na skyes bu de bad kan la sogs pas lus nus pa med par bskyed pa'i phyir mchongs par mi 'gyur la phyis goms pa ji lta ba bzhin du mchongs par 'gyur ro//'on te bcud kyis len dang nye bar sbyor bas stobs dang ldan par 'gyur ba de lta na yang 'on te bcud kyis len mi nus pa nges pa las stobs nges par gdon mi za bar 'gyur te/ 'di ltar mi dang spre'u dag mtshungs par mchongs pa yang mchongs pa mtshungs pa ni ma yin no//de'i phyir goms pa yod kyang mngal dang rigs kyi stobs la ltos pa kho na las mchongs pa 'byung gi /goms pa tsam la ltos pa ni ma yin no/ /snying rje la sogs pa rnams ni rang gi rigs goms pa kho na la ltos pa nyid do/ /gal te de ltar sngar rang gi rigs kyi bag chags tsam la ltos nas brtse ba la sogs pa 'byung ba de lta na ni 'khor ba yang thog ma med pa'i phyir brtse ba la sogs pa'i rang bzhin phul du byung bar 'gyur na/thams cad snying rje dang ldan pa ma yin pa'i phyir/ snying rje rang gi rigs kyi sa bon las byung ba ma yin no zhe na/'dir smras pa/ brtse ba rang sa bon las byung / /gal te rang sa bon 'byung can/ /mi mthun phyogs kyis gnod med na/ sems la de dag nyid thob 'gyur/ /zhes bya ba la/ gal te brtse ba rang gi sa bon snying rje goms pa bogs byung ba las byung ba gang la yod pa'i brtse ba de dus thog ma med pa yin pa de lta na brtse ba'i bdag nyid du mi 'gyur te/rang gi rgyud la skyes pa'i sdang ba la sogs pas gnod pa'i phyir ro/ /gal te yang rang gi sa bon las byung ba'i mi mthun phyogs sdang ba la sogs pas gnod pa med cing rgyun mi 'chad par snying rje goms pa de'i tshe/bstan par 'gyur ba'i sems la rgyun mi 'chad par goms pas zhe sdang la sogs pa bkag par gyur na/ de'i bdag nyid phul du byung bar 'gyur ro zhes khas blangs pa 'di dag rigs pa yin te/ 'di ltar goms pa snga ma rnams/ /brtse ba dang chags bral la sogs/ /sems kyi chos nyid gzhan dag ni//g.yer bag can gyi rtsa ba yin/ /zhes bya ba la/ brtse ba la goms pa snga ma snga ma ni brtse ba la sogs pa phyi ma phyi ma'i sems kyi chos gsal bar byed pa'i rgyu'i rtsa ba yin gyi/ skyed par byed pa'i rgyu ni ma yin te/ brtse ba la sogs pa grub pa la ni g.yer bag can kho nar goms pas byed pa yin gyi/skyed par byed pa ma yin te/ snga nas yod pa'i phyir ro/ /de bas na rang gi don 'dod pa med cing / gzhan gyi don khas blangs pa'i brtse ba'i bdag nyid goms pa kho na las yin no zhes bstan pa'i phyir/ goms nas brtse ba'i bdag nyid can/ /mi gtsang chags dang chags bral bzhin//zhes bya ba smos te/ rtag pa brtse ba la goms par 'dod pas goms pa phul du byung ba las brtse ba'i bdag nyid can skye ste/ dper na skyes bu la la skye ba'i las goms pa las mi gtsang ba bskyed pa bzhin dang / mi mthun pa'i phyogs kyis gnod par ma gyur pa'i mi gtsang ba de'i bdag nyid du 'gyur te/'di ltar mi gtsang ba med pa nyid yod par gyur na/ nye bar blang bar bya ba ma yin pa cung zad kyang mi snang ba bzhin dang / de bzhin du chags pa dang bral ba dang / chags pa nyid kyang goms pa nyid las de'i bdag nyid du 'gyur ba bzhin no/ /brtse ba dang ldan pa gzhan gyi sdug bsngal dbral bar 'dod pas/rang gi sdug bsngal spang bar bya ba'i don du brtson par 'gyur ro zhes bstan pa'i phyir/ brtse ldan sdug bsngal gzhom pa'i phyir/ /thabs rnams la ni mngon sbyor mdzad/ /ces bya ba smos te/ brtse ba dang ldan pas bdag dang gzhan gyi sdug bsngal dbral bar bya ba'i phyir 'bad par bya bar 'os te/brtse ba dang ldan pa rang gi sdug bsngal bral ba med par gzhan gyi sdug bsngal bzlog par mi nus pa'i phyir ro/ /de'i phyir rang gi sdug bsngal bral bar mngon du byed pa dang / shes bya thams cad mngon du byed pas brtse ba dang ldan pas thabs la mngon par sbyor bar byed do//de ci'i phyir zhe na/ rang dang gzhan gyi sdug bsngal gzhom pa'i phyir ro/ /gang gi phyir/ thabs byung lkog gyur de'i rgyu can/ /de bshad par ni dka' ba'i phyir/ /zhes bya ba la lkog tu gyur pa'i thabs las byung ba ni mtho ris dang thar pa'i mtshan nyid do//de dag rgyu ni sbyin pa la sogs pa dang bdag med par mthong ba gang yin pa'i skyes bu de'i mtho ris dang thar pa gzhan la bstan par dka' ba ste/ de la de'i nus pa med pa'i phyir ro/ /'phags pa'i bden pa bzhi tshad mas 'thad pa nyid las 'jug par 'gyur ba ma yin nam/ mngon sum du byed pas ci zhig bya zhe na/ gal te 'phags pa'i bden pa bzhi rjes su dpag pas nges pa de lta na yang dmyal ba la sogs pa skyed pa'i las kyi 'bras bu 'jig rten gyi khams gzhan ston par mi nus pa nyid de/ de'i phyir thams cad rig pa mngon sum du bya'o/ /rang dang gzhan gyi sdug bsngal bral bar byed pa des sdug bsngal gyi rgyu brtag par bya ste/de bstan pa'i phyir/ lung dang rigs pas rnam dpyod pa/ /sdug bsngal nyid kyi khyad par gyis/ /mi rtag la sogs sdug bsngal rgyu'i/ /ngo bo de yang brtag pa mdzad/ /ces bya ba smos te/ rigs pas ni rjes su dpag pa'o//lung ni rjes su dpag pa'i spyod yul ma yin pa ste/ dbang po las 'das pa'i don can gyi shes pa'i rgyu yin no/ /yang na lung ni shes pa dang po'i rgyu ste/ de nas don nges par bya ba'i don du rigs pa 'jug pa yin gyi/ lung tsam las nges pa ni ma yin no/ /des na dang por lung gis don mthong bar 'gyur la/de nas rigs pas don de bstan par byed cing / bstan par byas pa'i don la bsgoms pas mngon sum du byed do/ /de la lung dang rigs pa dag gis dpyod pa ni rgyu dang ldan pa'i sdug bsngal bral bar bya ba'i don du dang po re zhig sdug bsngal gyi rgyu nyid rtog par byed do//sdug bsngal gyi rgyu dpyad nas yang zlog par nus pa nyid dpyad pa'i don du/ sdug bsngal gyi rgyu de nyid mi rtag pa la sogs par dpyad par bya'o/ /mi rtag pa la sogs pa'i rang bzhin gyis rgyu ma dpyad na sdug bsngal spang ba'i phyir 'bad pa nyid du mi 'gyur te rgyu med pa'am/rgyu rtag pa can du gyur pa ni sdug bsngal gyi rgyu zlog pa'i don du 'bad pa 'bras bu med par 'gyur te/ 'di ltar sdug bsngal dang / sdug bsngal gyi rgyu dag rgyu med la zad par mi 'gyur la/ rtag na yang ji ltar zad par 'gyur/ rgyu ma zad par sdug bsngal zad par mi nus pa'i phyir/sdug bsngal gyi rgyu mi rtag pa la sogs pa'i rnam pas brtag par bya'o/ /ji ste sdug bsngal gyi rgyu mi rtag pa'o zhes ji ltar nges par byed ce na/ 'dir smras pa/ sdug bsngal nyid kyi khyad par gyis te/ mi rtag pa la sogs pa rnams kyis sdug bsngal gyi rgyu mi rtag par bya ste/ji ltar sdug bsngal mi rtag pa yin pa de ltar phyis bshad par bya'o/ /de ltar ni 'gyur mod kyi gal te sdug bsngal mi rtag pa yin na/ mi rtag pa sdug bsngal gyi rgyur ji ltar 'gyur te/ 'di ltar rtag pa'i rgyu can nyid kyi sdug bsngal mi rtag par 'gyur ro zhe na/ 'dir smras pa/gang phyir de ltar rgyu gnas pa/ /'bras ldog mthong ba med pa ste/ /de rgyu gzhom phyir de yi ni/ /mi mthun phyogs la brtag par byed/ /ces bya ba la/ gal te dbang phyug la sogs pa rtag pa nyid sdug bsngal gyis skyed par byed par 'gyur ba de lta na ni/ rgyu dbang phyug la sogs pa de ltar gnas pa ste sdug bsngal skyed par byed pa nyid du gnas pa ni/'bras bu sdug bsngal 'jig par mi 'gyur ba'i phyir mi 'jig pa'i nges pa yin no/ /de'i phyir sdug bsngal mi rtag pa nyid yin no/ /rgyu yang mi rtag pa nyid du nges so/ /de ltar 'dod na gal te rgyu zad pa nyid kyis sdug bsngal 'dzad na/'o na ni rgyu ji ltar zad par 'gyur te/ rang gi rgyu zad pas rgyu 'dzad par 'gyur na ni de lta na rang gi rgyu zad pa nyid kyis sdug bsngal 'dzad pa'i phyir sdug bsngal 'dzad pa'i thabs la 'jug par bya ba ma yin no zhe na/ de ni ma yin te/ sdug bsngal gyi rgyu gzhom pa'i phyir sdug bsngal gyi rgyu de'i gnyen po gang yin pa de brtag par bya ba'i phyir ro//rgyu mi mthun pa'i phyogs nye ba med par ldog pa ma yin pas de brtag par bya'o/ /rgyu med pa nyid kyis ldog par 'gyur ro zhe na rgyu gang zhig yin/ las yin no zhe na ma rig pa las gzhan dang gzhan pa'i las 'byung ba'i phyir/las zad pa las grol bar mi 'gyur ba ma yin nam/ ma rig pa ni las dang / sdug bsngal ba'i rgyu ma yin no zhes bshad par bya'o/ /de'i phyir ma rig pa'i gnyen po bdag med pa la 'bad par bya'o/ /de ltar ni 'gyur mod kyi/ sdug bsngal la so sor nges pa'i rgyu yod pa ma yin te/sdug pa dang bral ba la sogs pa'i rang bzhin du ma rgyur 'gyur ba'i phyir ro/ /de bas na rgyu bzlog par mi nus so zhe na/ 'dir lan smras pa/ bdag dang bdag gir 'dzin byas pa'i/ /'dus byas spyod yul can chags pa/ /rgyu de gnod pa can nyid ni/bdag med mthong na 'gal ba yin/ zhes bya ba ste/ bdag dang bdag gir 'dzin pa ni/ nga dang nga yir mngon par zhen pas byas pa'i chags pa sdug bsngal gyi rgyu ste/ chags pa log na/ bdag dang bdag gi ba yang spang bar 'gyur bas sdug bsngal med par 'gyur ro/ /de ltar ni 'gyur mod kyi/gal te bdag dang bdag gi bcom nas chags pa med par gyur pa na/ yid la sdug bsngal mi 'byung yang lus kyi sdug bsngal bdag nyid la yod pa nyid do zhe na/ 'dir smras pa/ gzhan la phan par brtson pa dang ldan pa ni bdag nyid sdug bsngal bar mi 'gyur te/ bdag dang bdag gir mngon par zhen pa'i phyir/bu la chags pa dang / lhag par rang la zhen pa las lus la ral gri la sogs pas bsnun pa'i sdug bsngal dmigs par 'gyur ro/ /bdag dang bdag gir mngon par zhen pa yang 'jig tshogs la lta ba yin pa de bas na/ sdug bsngal gyi rgyud ni 'jig tshogs la lta ba yin no//'dus byas ni zag pa dang bcas pa'i dngos po ste/ de'i spyod yul can 'jig tshogs la lta ba'o/ /sdug bsngal gyi rgyur gyur pa'i 'jig tshogs la lta ba la gnod pa can bdag med pa mthong ba ni/ de dang 'gal ba yin te/ bdag med pa'i rnam pa ni chags pa'i rnam pa dang 'gal ba can yin pa'i phyir/de'i gnod pa can yin te/ dper na/ snum la sogs pa ni rlung dang 'gal ba yin no/ /de bas na bdag med pa mngon du byas pa las mi rtag pa'i rgyu 'jig tshogs la lta ba ldog par 'gyur te/ bdag dang bdag gir mngon par zhen pa log na sdug bsngal thams cad ldog par 'gyur ba yin no//ci ste lus bcad pa dang / bsregs pa la sogs pas nyen na/ ji ltar 'chi ba la sogs pa'i sdug bsngal med par mi 'gyur zhe na/ de ni bden pa ma yin te/ 'chi ba zhes bya ba ni/ lus gcig dang bral ba yin zhing /lus gzhan du 'byung ba ni skye ba yin te/ snga phyi'i gnas skabs dag goms pas bskyed pa'i blo g.yer bag can dran pa yod pa'i phyir ro/ /de'i tshe byis pa dang lang tsho'i dus spong ba dang / len pa bzhin dang / gos 'dor ba dang spyod pa bzhin de'i lus kyi skye ba yang yin no/ / ji ltar goms pa de bzhin du 'dod pa'i rgyu yin pa dang / btang snyoms pa la goms na yang sdug bsngal dang / bde ba goms par mi 'gyur ba bzhin te/ de bas na bdag med pa goms na 'khrul pa'i rgyu thams cad kyis 'khrug pa ma yin no/ /rgyu 'dod chags la sogs pa las log pa dang /shes rab rgyas par gyur na rnam pa du ma dang ldan pa'i thabs mang po mthong ba las skyon dang yon tan rnams gsal bar 'gyur ba yin pa'i phyir/ thams cad rig pa srid pa yin no/ /gal te bdag med pa mthong ba las sdug bsngal zhi bar 'gyur ba de lta na yang thams cad mkhyen pa yod pa ma yin te/gal te bdag med pa mthong ba las thams cad mkhyen par 'gyur na/ 'dod chags dang bral ba dang rang sangs rgyas kyang thams cad mkhyen par 'gyur ba ma yin nam zhe na/ 'dir smras pa/ dus ring por yang rnam mang pos/ /rnam pa du mar thabs goms pa//de lta skyon dang yon tan rnams/ /rab tu gsal ba nyid 'gyur te/ /thugs kyang gsal ba de yi phyir/ /rgyu yi bag chags spangs pa ni/ /thub chen gzhan don 'jug can gyi/ /bse ru sogs las khyad 'di yin/ /zhes bya ba la/ gang 'di blo gsal ba'i skyes bu yang dang yang du thabs mang po la dus yun ring por goms par byas na/de ni lam de dang de'i mi mthun pa'i phyogs skyon dang yon tan bsal bar 'gyur ro/ /de ltar goms par byed pa'i skyes bu goms pa las/ blo gsal ba las rgyu ste/ sdug bsngal gyi rgyu'i bag chags nyon mongs pas byas pa'i lus dang ngag dang blo'i nus pa nyams pa'i mtshan nyid can gyi spangs pa ni/bcom ldan 'das gzhan gyi don du 'jug pa can bse ru la sogs pa las khyad par 'di nyid yin te/ nyon mongs pa dang shes bya'i sgrib pa spangs pa'i mtshan nyid can no/ /nyan thos la sogs pa rnams la ni nyon mongs pa'i bag chags yod pa yin no//thabs ni spros na rnam pa mang po yod la/ de la dus yun ring por goms pa las 'khor ba'i skyon dang yon tan ma lus pa bsal ba yin no/ /phyogs snga ma skye ba gzhan dran pa ma mthong ba ma yin nam/ de med par las dang 'bras bur 'brel par ji ltar shes pa yin/goms pa yang mthong ba dang dran pa'i dngos po la 'jug gi /las dang 'bras bu ni mngon sum pa yin te/ dus yun ring pos chod pa'i phyir ro/ /mngon sum med na rjes su dpag pas kyang las dang 'bras bu so sor nges pa ma yin pa de bas na/de la goms par ji ltar 'gyur/ de med par yang las dang 'bras bu spros pa mngon sum du byed pa yin no/ /'phags pa'i bden pa bzhi ni tshad mas yongs su bcad pa'i phyir bsgoms pas mngon sum du bya bar nus mod kyi/ 'on kyang thams cad rig pa ni ma yin te/ 'dod chags dang bral ba la yang bden pa bzhi rig pa yod kyang thams cad mkhyen pa ma yin pa'i phyir ro//de ltar 'gyur mod kyi shes pa la gegs byed pa'i nyon mongs pa de rnams dang bral na gegs byed pa med pa'i phyir shes bya thams cad mngon du byed par grub par 'dod na/ de ni mi bden te/ gal te so sor nges pa'i dngos po rnams la phyin ci log tu rtog pa'i rgyu 'dod chags la sogs pa rnams dang bral ba las/rus pa'i lu gu rgyud lta bu de la yang dag pa'i shes pa skye bar 'gyur na shes bya thams cad du ji ltar mthong bar 'gyur/ 'on kyang so sor nges pa'i dngos po bdag med par mthong ba na bdag med par khyad par med pas thams cad mthong bar 'grub pa yin na ni/de lta na 'o na ni bdag la sogs pas sngon po mthong ba na dngos po yin pa'i phyir/ shes bya thams cad mngon sum du 'gyur ro/ /de bas na gang du mthong ba'i rkyen 'jug pa de nyid mthong bar nus kyi/'dir ni bdag med pa gang du goms pa de yis phung po lnga rnams kyi phyogs 'ga' la bdag med pa mthong bar 'gyur te/ las dang 'bras bu'i spros pa shes pa ni ma yin no/ /de ni mtha' yas pas goms pa nyid mi 'jug pa'i phyir ro/ /de bas na las dang 'bras bu 'brel pa de la rig byed nyid tshad mar 'gyur ro snyam du sems na/de ni bden pa ma yin te/ gang gi phyir re zhig bar ma do'i 'jig rten grub pas so/ /ji ste bar ma do'i 'jig rten yod kyang skye ba gzhan dran pa med pa'o zhes smras so zhe na/ smras pa de mi 'thad de/ 'di ltar gal te skye ba gzhan yod la sbyin pa la sogs pa sngar nyams su myong ba dran pa goms pa nyi ma re rer 'phel bar gyur pa de'i tshe ji ltar mi dran pa yin/de ma thag tu nyams su myong ba la goms pa med na ni dran pa med par mthong ba'i phyir ro/ /gang la dran pa goms pa las blo gsal ba yod pa de la yun ring du 'das pa yang dran pa'i yul du 'gyur te/'di ltar rgas pa'i gnas skabs na bus pa'i tshe myong ba skad cig la dran pa de bzhin du goms pa phul du byung ba las skye ba gzhan du myong ba yang dran pa'i yul du 'gyur ba'i phyir dran pa goms pa la 'bad par bya'o/ /de la yang dper na yul gzhan nas 'ongs pa rig pa des yul gzhan dang 'brel pas bskyed pa'i khyad par mthong ba na/de nas 'ongs par nges par byed de/ lha sbyin bzhin yul gzhan pa yang rnam par gcod pa can du shes pa yin no/ /de bzhin du dran pa gsal ba yod na 'jig rten gzhan nas 'ongs pa'i skyes bu'i yul can gyi shes pa yod na skya ba gzhan khyad par du gyur pa yang shes pa yin te/'di ni las 'di dang yul 'di 'brel par sngon nas yod pa de lta bu'i rnam pa'i ngo bo nyid dang ldan pa las so sor nges pa'i las dang 'bras bur 'brel ba rigs pa skye ste/ dper na du ba'i ngo bo nyid phra ba nges na rgyu rtswa dang lo ma la sogs pa'i rang bzhin yang shes par 'gyur ba lta bu'o//de bzhin du las dang 'bras bu dag gi khyad par can gyi rang bzhin yang nges na rnam pa thams cad rjes su dpog go/ /rgyu'i ngo bo nyid shes na yang de'i 'bras bu'i ngo bo nyid brgyud nas shes pa'i phyir las dang 'bras bu'i 'brel pa thams cad shes par 'gyur ro//mtho ris dang thar pa'i lam yang dag par shes na ni/ bcom ldan 'das thams cad mkhyen pa nyid du 'gyur te/ phan tshun rgyu dang 'bras bu las 'das par shes bya thams cad skye ba ma yin pa'i phyir/ rnam pa du mar rgyu dang 'bras bu'i rang bzhin shes pa des ni shes bya thams cad rig pa la kha na ma tho ba med pa yin no//'o na na ni gal te 'bras bu'i rang bzhin shes pas rgyu'i rang bzhin shes pa de lta na ni/ rjes su dpag pa'i rig pas ji ltar thams cad mkhyen par 'gyur te/ bcom ldan 'das mngon du mkhyen pa can du khas blangs so zhe na/'dis ni cir yang mi 'gyur ba nyid de rnam pa thams cad dpog pa ni mngon sum las tha dad pa ma yin no/ /'di ltar don mngon du byed pa can gyi shes pa la mngon sum zhes brjod de/ gang gi tshe goms pa phul du byung ba las shes bya ma lus pa nyid dang / rnam pa thams cad gsal bar snang ba de'i tshe de nyid mngon sum bzhin no//gang yang thams cad la goms pa mi srid pas de ji ltar thams cad mngon du byed par 'gyur zhes smras pa de yang mi 'thad de/ gang goms pa tsam de nyid shes pa ma yin pa'i phyir ro/ /'di ltar sgra yongs su shes na tshad ma shes pa la tshegs med pa bzhin kha cig thos pa med par shes pa dang /bshad pa'i dus su goms par byas pa nyid rgol ba dang lan gyi tshe 'jug pa yang yod do/ /de dang 'dra ba'i rigs kyi bstan bcos la goms par byas na/ de'i rigs nyid kyi gzhung shes pa ma yin nam zhe na/ 'khor ba la rigs mtshungs pa nyid kyang yod pa ma yin nam 'di ltar sa la sogs pa'i 'byung ba srog chags rnams mtshungs pa dang /las dang 'bras bu'i spros pa dang / skye ba dang 'jig pa'i rnam par gzhag pa la rtag tu rang bzhin gcig pa nyid yin la/ khyad par can gyi bye brag ni bstan bcos la sogs pa la yang mtshungs so//de bas na nyi ma re re'i lto ba 'gyur ba de bzhin du/ 'khor ba 'gyur ba yang yod pa'i phyir/ dus yun ring por goms pas thams cad rig pa yang srid do/ /rtsod pa lhag ma ni thams cad mkhyen pa grub par gsal ba yin no/ /slob dpon gyis bstan bcos sdug bsngal zhi ba'i rgyur bstan pa ma yin nam/de ltar yang / /'gro la ston phyir bstan bcos so/ /zhes gsungs pa'i phyir ji ltar thabs la goms pas yin zhe na/ 'dir smras pa/ de yi don phyir thabs goms pa/ /'di nyid bstan pa yin par 'dod/ /grub pa'i sngon du yod pa'i phyir/ /gnyis po 'di ni rgyu ru bshad//ces bya ba la/ bstan pa dngos su tshigs su bcad pas 'dod pa ni ma yin gyi/ 'on kyang thabs la goms pa nyid bstan par 'dod do/ /ji ltar thabs la goms pa bstan pa yin zhe na/ de'i don gyi phyir te/ de'i don gyis de'i sgrar 'gyur ba'i phyir te/ dper na mar ni srog yin no zhes bya ba lta bu'o//bstan pa'i don thabs goms par ji ltar 'gyur zhe na/ thabs goms pa dang / blo gsal ba dag gis bstan par grub pa'i phyir ro/ /'di dag kyang ji ltar shes she na/ 'dir smras pa/ gnyis po 'di ni rgyu ru bshad/ /ces bya ba la goms pa dang bstan pa 'di gnyis ni thams cad rig pa'i rgyur gsungs so//ji ste rgyur bshad pas kyang 'di dag ji ltar shes she na/ sngon du yod pa'i phyir te/ ji ltar bstan bcos nyid dngos su bde bar gshegs pa'i rgyu ma yin te/ thabs gang zhig goms pa las bcom ldan 'das bde bar gshegs par 'gyur ba'i phyir ro//bde bar gshegs pa nyid ces bya ba yang ji lta bu zhe na smras pa/ rgyu spangs yon tan gsum bde gshegs/ /nyid yin sdug bsngal rten min phyir/ /bsngags pa'o de ni bdag med pa/ /mthong ba'am rigs pa nyid phyir ro/ /zhes bya ba la/ sdug bsngal gyi rgyu bdag dang bdag gir 'dzin pas byas pa'i zhen pa'i rgyu de spangs pa'i yon tan gsum ste/rab tu mdzes pa nyid dang phyir mi ldog pa dang lhag ma med par bcom pa'i phyir zhes bya ba'o/ /bcom pa ni med pa ste/ bdag dang bdag gir 'dzin pa de med na ni/ sdug bsngal gyi rten ma yin pa'i phyir/ rab tu bsngags pa nyid do//spangs pa de nyid gang las 'byung zhe na/ bdag med pa mthong ba nyid las ste/ mthong bas spang bar bya ba'i nyon mongs pa ni mthong ba nyid las sam/ rigs pa las te/ rigs pa ni goms pa ste/ bsgom pas spang ba'i nyon mongs pa'i tshogs zlog pa'i rgyu yin no/ /yang na rigs pa ni rnal 'byor te/phan tshun ldan pa nyid de/ gnyis su med par mthong ba zhes bya ba'i tha tshig go/ /de la kha cig ni gang zag gi bdag med pas spangs la gzhan ni chos kyi bdag med pas so/ /de ltar rab tu bsngags pa nyid kyi yon tan bstan nas/ phyir mi ldog pa'i yon tan yang brjod par bya ste/ phyir mi ldog pa zhes bya ba gang yin zhe na/smras pa/ skye ba dang skyon kun 'byung dag /slar yang ldog ces bshad pa yin/ /bdag lta'i sa bon spangs pa'i phyir/ /slar mi gshegs pa nyid yin no/ /zhes bya ba la/ skyon rnams dang skye ba kun 'byung ba dag slar mi ldog ste/ skyon med pa'i gnas skabs dang /phyir mi skye ba ni slar mi ldog pa yin no/ /de nyid ji ltar 'gyur zhe na/ bdag tu lta ba nyid sa bon te rgyu'o/ /de ston pas nyon mongs pa rnams mi skye la/ nyon mongs pa med pas skye ba slar mi len pa'i phyir slar mi ldog pa yin no/ /ji ste bdag med pa mthong bas/ bdag tu 'dzin pa zlog par ji ltar 'gyur/rnam pa tha dad pas 'jug pa'i phyir yin na ni/ de ltar na 'o na bdag tu lta ba yang bdag med pa las bzlog pa yin pa'i phyir de bzlog par byed par 'gyur ro/ /de log na ni skyon dang skye ba kun 'byung bar 'gyur ba'i phyir/ slar ldog par thal bar 'gyur ro snyam du sems na/'dir smras pa/ de bden tha dad bdag nyid kyis/ /lus ngag sems kyi gnas ngan len/ /nyon mongs med nyid nad med pa'am/ /lam bshad mi gsal nyid lus pa'o/ /zhes bya ba la/ bdag med pa mthong ba de ni bden par 'gyur ba nyid dang / tha dad pa dang / ngo bo nyid kyis slar mi ldog pa yin gyi/bdag tu lta ba ni bdag med pa las phyin ci log yin pa de lta na yang bden pa ma yin pa'i phyir ldog par byed pa ma yin te/ bdag med pa'i phyir ro/ /'o na lus pa zhes bya ba slar ldog pa med pa las gzhan ci zhig yin zhe na/ smras pa/ lus dang ngag dang sems kyi gnas ngan len ni lus pa'o//lus la sogs pa'i gnas ngan len ji lta bu zhe na/ yod pa ma yin pa'i nyon mongs pa can te/ de nyid kyi phyir nad med cing skyon med pa ste/ 'khor ba'i sdug bsngal spangs pa'i phyir ro/ /de la nyon mongs pa med pa'i lus kyi gnas ngan len ni dgra bcom par gyur kyang goms pa'i dbang gis mchongs shing 'gro ba la sogs pa 'byung ba yin no//ngag gi gnas ngan len ni/ nga rgyal med kyang brnyas par smra ba la sogs pa brjod pa'o/ /yid kyi gnas ngan len ni thams cad du mi shes pa ste/ 'di gsum ni lus pa'o/ /lam bshad pa la mi gsal ba yang lus pa ste/yun ring por goms par ma byas pa'i phyir blo gsal ba med na tshig la mkhas par mi 'gyur ro/ /gal te bdag med pa mthong bas ma lus pa spong ba ma yin na/ 'o na lus pa de ci yis spong bar 'gyur te/ bdag med pa mthong ba las spong ba'i rgyu gzhan med pa'i phyir ro/ /yang ji srid brjod pa de srid skyon spangs pa ma yin te/smra ba ni dpyod pa sngon du 'gro ba'i phyir dang / dpyod pa yang 'khrul pa'o snyam du sems na smras pa/ goms las ma lus spangs par 'gyur/ /kha cig sgra sogs phyir na skyon/ /zad min zhe na 'di ldog par/ /the tshom za ba de phyir 'khrul/ /zhes bya ba la/blo gsal bar bogs phyung ba la sogs pa goms pa'i phyir bag chags ldog par 'gyur ba'o zhes bshad par bya'o/ /de bas na goms pa las ma lus pa spong bar 'gyur ro/ /de ltar ni 'gyur mod kyi/ smra ba la sogs pa'i phyir 'dod chags la sogs pa lus kyi skyon rnams zad par mi 'gyur te/sogs pa'i sgras ni lus la sogs pa gzung ngo zhe na/ de ni ma yin te/ gang gi phyir smras pa la sogs pa de'i ldog pa la the tshom za ba'i phyir te/ 'dir smras pa la sogs pa yang yod la skyon yang zad par 'gyur ba 'di la 'gal ba ci yod/ de nyid kyi phyir ldog pa la the tshom za ba'i phyir/gtan tshigs ma nges pa'o zhes le'u dang por bstan to/ /skyon rnams shin tu zad pa med pa ma yin nam/ de'i phyir ji ltar skyon med pa yin te/ skyon zad pa med pa'i rgyu ma mthong ba'i phyir skyon zad par byed pa med pa nyid ma yin pa'i phyir ro/ /'dir smas pa/ rtag nyid phyir ram thabs med phyir//thabs mi shes pa'i phyir na yang / /skyon rnams mi zad pa nyid du/ /rtog par byed pa yin na yang / /zhes bya ba la/ skyon zad pa med par rtag pa'i ni rgyu mtshan med par mi 'jug ste/ 'on kyang gal te skyon de dag rtag par gyur na de'i tshe skyon rnams zad par mi srid de/rtag pa'i phyir rtag pa la bogs dbyung bar mi nus so/ /'on te zad pa'i thabs med pa'am/ mi shes pa de lta na yang mi zad do/ /gsum char mi srid ces bstan pa'i phyir/ rgyu ldan nyid phyir mi mthun phyogs/ /goms pas rgyu ni zad pa'i phyir/ /rgyu yi rang bzhin shes pa yis/ / de shes pa yang sgrub pa yin/ /zhes bya ba la/ de la skyon rnams rtag pa nyid ma yin te rgyu dang ldan pa can yin pa'i phyir/ rgyu dang ldan pa ni snga na med pas rtag pa nyid ma yin no/ /skyon zad pa'i thabs med pa yang ma yin te/ skyon gyi rgyu bdag tu lta ba'i gnyen po bdag med par mthong ba gang yin pa de goms pas skyon rnams zad par 'gyur ba'i phyir bdag med par mthong ba ni zad pa'i thabs nyid do//rgyu'i rang bzhin bdag dang / bdag gi rnam pa can gyi shes pa yod na de'i gnyen po'i shes pa yang sgrub pa yin te/ gang gang las phyin ci log tu gyur pa de'i gnyen po ste/ dper na rlung la til mar bzhin du bdag tu 'dzin pa las bzlog pa ni bdag med pa mthong ba yin no// //tshad ma rnam 'grel gyi 'grel pa las/ bam po brgyad pa/ gal te bcom ldan 'das bde bar gshegs pa nyid yin pa de ltar na yang rang gi don phun sum tshogs pa tsam las gzhan la ji ltar tshad mar 'gyur te/'di ltar bden pa'i dngos po ston pas tshad ma yin gyi/ phyin ci log dag mi ston pas ni ma yin no zhe na/ de ni mi bden te/ brtse ba la goms pa dang / thabs la goms pas skyob pa nyid bcom ldan 'das yin no/ /yang ji ltar skyob pa yin zhe na/smras pa/ skyob pa nyid gzigs lam gsungs pa/ /'bras bu med phyir brdzun mi gsung / /thugs rje ldan phyir gzhan don yang / /brtson pa kun la goms phyir ro/ /zhes bya ba la/ mtho ris dang thar pa'i lam nyid kyis gzigs nas gzhan la gsungs pa ni skyob pa ste/gang la bde bar gshegs pa nyid yod pa de la 'dod pa ci yang med pa'i phyir ro/ /'di ni brdzun mi gsung ste/ 'bras bu med pa'i phyir 'bras bu ma mthong bar su yang phyin ci log tu smra ba ma yin no/ /thugs rje dang ldan pa'i phyir thabs la goms pas gzhan gyi don byed pa de bas na bcom ldan 'das phyin ci log tu gsung ba ma yin no//de bas na dgos pa med pa dang rgyu med pa'i phyir phyin ci log tu gsung ba ma yin la/ brtse ba dang ldan pa dang / 'phen pa las mi gsung ba yang ma yin no/ /de'i phyir bde bar gshegs pa skyob pa nyid tshad ma yin no/ /'o na mu stegs byed pa yang rang gi lam ston par byed pa yod pa ma yin nam/de yod tshad mar 'gyur ro/ /'on te de dag lam ston pa nyid med de/ de lam ma yin pa'i phyir zer na/ lam 'di la yang yid rton par byed ce na/ 'di dag ni bdag med par mthong ba'am/ de'i rigs pa ni rigs pas 'thad pa'i lam yin pa'i phyir bcom ldan 'das nyid tshad ma yin gyi/mu stegs byed rnams ni bdag med pa ma mthong zhing rigs pa med pa yin pa'i phyir de dag tshad ma ma yin no zhes bstan to/ /bcom ldan 'das ni de las bzlog pa'i phyir tshad ma yin no zhes bstan pa'i phyir/ de phyir bcom ldan 'das tshad ma yin zhes bstan to//skyob pa yang / bden pa bzhi ni ston mdzad yin/ /zhes bya ba la/ yang na bden pa bzhi ston pa ni skyob pa yin gyi/ gzhan ni ma yin no/ /gal te stong pa de nyid rig byed la sogs pa rnams la ston pa yod pa de lta na yang bdag la sogs pa yod pas de dag gi lam ma yin pa nyid kyi phyir bden pa bzhi ston pa nyid skyob pa yin no//de bas na thun mong ma yin pa'i don ston pa'i tshig can bcom ldan 'das yin te bden pa nyid yod pa'i phyir ro/ /'phags pa'i bden pa bzhi gang zhe na/ sdug bsngal dang / kun 'byung dang / 'gog pa dang lam mo/ /las dang 'bras bu 'brel ba'i 'phags pa'i bden pa bzhi ston pa nyid kyis bcom ldan 'das slu ba med par nges pa nyid yin no//de bas na bden pa bzhi ston pa ni gtsor skyob pa yin no/ /'dod chags la sogs pa bud med la 'khyud pa'i rgyu yis bde ba'i rgyu yin pa'i phyir bde ba nyid yin la/ zhe sdang yang dgra bcom pa'i rgyu yin pas bde ba'i rgyu yin no//gti mug kyang 'jig tshogs la lta ba'i mtshan nyid can bdag tu 'dzin pa dang / bdag tu nga rgyal ba dang / dregs pa dang / rgyags pa'i rgyu yin pa'i phyir bde ba'i rgyu yin pas na bde ba yin no/ /'dod chags dang zhe sdang la sogs pa'i gzhir gyur pa'i phyir lus la sogs pa yang bde ba nyid yin te/bde ba'i rten yin pa'i phyir/ sdug bsngal zhes bya ba med kyi bde ba nyid do/ /gal te skom pa la sogs pa sdug bsngal yin na yang rab tu tshim par byed pa'i rgyur che ba'i phyir sdug bsngal gyi bden pa zhes bya ba yod pa ma yin no/ /de bas na bcom ldan 'das kyis bstan pa mi bden pa nyid pas skyob pa ma yin no zhe na/'dir smras pa/ sdug bsngal 'khor ba can phung po/ /goms las 'dod chags sogs bsal ba/ /mthong phyir 'dod rgyal nyid ma yin/ /rgyu med skye ba 'gal phyir ro/ /zhes bya ba la/ 'khor ba'i chos dang 'dres pa las dbugs ma phyin pa'i sdug bsngal gyis byas pa'i phung po rnams nyid ni sdug bsngal la mi shes pas bde ba'i rang bzhin du mthong nas/'dod chags sogs pa bde ba'i tshul can gyi bde ba'o zhes smra ba de la goms pa las skye ba'i 'dod chags la sogs pa'i rjes thogs su bde ba 'byung ngo zhes bshad do//de ni goms pa la ma ltos pa'i dngos po'i ngo bo nyid las 'dod chags la sogs pa 'byung bas 'dod chags la sogs pa de yang 'dod rgyal ba nyid du skye na ni rtag par yang 'gyur na/ de ni rigs pa ma yin no/ /gang gi tshe 'dod chags goms pa nyid las de gsal ba mthong ba yin pa de'i tshe 'dod chags la sogs pa ni yang dag pa ma yin pa'i kun du rtog pa tsam yin pa'i phyir 'dod chags la sogs pa goms pa spang bar rigs te/byis pa'i rtsed mo la goms pa bzhin no/ /de bas na dngos po bde ba med kyi/ sems kyi mngon par 'dod pa'i mtshan nyid la bde bar zhen pa ni de kho na nyid la goms pas sems ldog par 'gyur ba'i phyir de kho na nyid la goms pa nyid du rung gi bde ba la sogs pa goms pa las skye bas sdug bsngal gyi gdung ba thams cad bde bar snang bar 'gyur ro//de bas na 'dod chags la sogs pa spang bar 'os kyi/'dod chags la sogs pa ni rang bzhin gyi chos bud med la 'khyud par bya ba ni ma yin no/ /de bas na de kho na nyid la mngon par dga' ba'i blor bya ba 'di ni rigs pa yin te/ de kho na nyid gang gis kyang 'gyur ba med pa'i phyir ro/ /gang yang 'dod chags la sogs pa bde ba'i rgyu yin pa'i phyir bde ba'o zhes zer ba de la smras pa/gal te 'dod chags bde ba'i rgyu nyid kyis bde bar 'dod na/ de bzhin du bde ba yang sdug bsngal gyi rgyu yin pa'i phyir/ sdug bsngal du 'gyur te/ 'di ltar bde ba yongs su gyur nas sdug bsngal phul du byung ba'i rgyur 'gyur ba'i phyir/bde ba ni sdug bsngal nyid pas sdug bsngal 'khor ba can phung po zhes bya ba 'di grub pa yin no/ /'dod chags la sogs pa gsal bar goms pa las 'dod chags la sogs pa gsal ba dang ldan par 'gyur ba'i phyir sna tshogs pa 'di ni rang gi rigs snga ma'i rgyu can yin pas 'khor ba can nyid du grub po//de ltar ni 'gyur mod kyi/ 'dod chags la sogs pa ni goms pa kho na las ni ma yin gyi/ ji zhig ltar ram/ rgyu gzhan dag las 'dod chags la sogs pa skye ba de bas na bde ba la sogs pa don dam pa nyid yin no/ /yang na ji ltar bde ba la sogs pa goms pa de ltar sdug bsngal la sogs pa yang goms pa las 'byung ba ma yin pa'i phyir/bde ba nyid 'khor ba can gyi phung por 'gyur ro zhe na/ 'dir smras pa/ 'dod rgyal ba'i phyir rgyu med pa'i skye bar mi rung ste/ dus la sogs pa'i zhing 'dod chags la sogs pa rgyu gzhan las kyang ma yin te goms pa las 'dod chags la sogs pa gsal bar mthong ba'i phyir ro//gang gis sdug bsngal bsgom par 'gyur ba su yang sdug bsngal goms par byed pa ni med de/ 'on kyang gang gi tshe bde ba la sogs pas gsal bar rung gi /bde ba de rnams med na sdug bsngal ni su yang goms par mi byed de/bde ba 'dod na thams cad 'jug pa'i phyir ro/ /de bas na 'bad pas bde ba bsgrub par bya ba'i sdug bsngal ni bde ba med kyang ngo bo nyid kyis yod pa'i phyir dngos po la ni sdug bsngal med pa kho na ste/ sdug bsngal de yang 'jig pa goms pa nyid las yin no/ /de bas na sdug bsngal 'jig pa goms pa las 'byung gi /sdug bsngal thams cad la bde bar brjod pa ma yin no/ /yang na 'dir sdug bsngal ni 'du byed kyi sdug bsngal gyi mtshan nyid can yin la/ bde ba ni don dam par med kyi/ 'on kyang goms pa la sogs pa las sdug bsngal nyid 'byung ngo / /'dod chags la sogs pa goms pa las skyes pa ma yin gyi/'on kyang bad kan la sogs pa'i chos ma yin nam/ 'di ltar 'dod chags ni bad kan gyi ngo bo nyid yin la/ gti mug ni rlung gi ngo bo nyid yin zhing / zhe sdang mkhris pa'i ngo bo nyid can yin pa'i phyir ro/ /'dod chags la sogs pa'i skyon bzhin du/ser sna la sogs pa'i skyon gzhan yang mkhris pa la sogs pa'i chos nyid do/ /mkhris pa la sogs pa'i ngo bo nyid kyis yod pas rgyu de las skyes pa'i phyir 'dod chags la sogs pa don dam pa yin pa'i phyir ro zhe na/ 'dir smras pa/ 'khrul phyir rlung sogs chos ma yin/ /gal te rang bzhin 'dres pa'i phyir//skyon med ce na de las gzhan/ /chos kyang ci phyir de mi mthong / /zhes bya ba la/ gang zhig gang gi chos yin pa de ni de la mi 'khrul ba yin te/ dper na mar me'i gsal ba bzhin no/ /gal te rlung la sogs pa'i chos gti mug la sogs pa yin na de la 'khrul par mi 'gyur ba las/'khrul par yang mthong ste/ 'di ltar rlung gi ngo bo nyid can gyi 'dod chags can dang / bad kan gyi ngo bo nyid can gyi gti mug can mthong ba'i phyir ro/ /'on te bad kan gyi ngo bo nyid yin yang gzhan gti mug gi ngo bo nyid can yin te/ de bas na rmongs shing sdang bar 'gyur ba de lta na yang ngo bo nyid phan tshun 'dres pa'i phyir 'khrul pa'i skyon med do zhe na/de ltar na ni ji ltar rlung gi ngo bo nyid can la mkhris pa yod pa'i phyir/ zhe sdang yod pas khas blangs pa de bzhin du/ bad kan gyi rang bzhin can la zhe sdang las gzhan pa'i mkhris pa las skyes pa'i rdul la sogs pa'i chos ci'i phyir dmigs par ma gyur/'on te zhe sdang nyid mkhris pa'i chos yin gyi/ rdul la sogs pa ni ma yin no zhe na/ 'o na ni grogs dag mkhris pa can gyi rdul ci las skye bar 'gyur/ mkhris pa nyid las skyes so zhe na/ rlung gi ngo bo nyid can la yang zhe sdang bzhin/mkhris pa nyid las rdul la sogs pa 'byung bar 'gyur ro/ /de ltar ni 'gyur mod kyi/ gang ji ltar mthong ba de 'dod chags kyi chos yin no/ /mkhris pa la sogs pa thams cad la 'dod chags mthong ba ma yin nam/ de ji ltar thams cad kyi chos ma yin zer na/ de ni de bzhin te/ chos thams cad la mthong ba'i phyir 'dod chags la sogs pa thams cad kyi chos yin no zhe na/ 'dir smras pa/ thams cad kyi chos thams cad min/ /'dod chags mtshungs par thal phyir ro/ /gzugs la sogs bzhin skyon med na/ /de la'ang brtsad pa mtshungs pa yin//gal te de la khyad par can/ /las rnams bdag po min na'o/ /zhes bya ba la/ rlung la sogs pa thams cad kyi chos su 'dod chags la sogs pa mi 'gyur te/ thams cad kyi chos nyid du 'dod chags la sogs pa 'gyur na/ srog chags thams cad 'dod chags mtshungs par thal bar 'gyur te/'di ltar srog chags gang dag rlung la sogs pa gang cung zad yod pa de nyid srog chags kyi 'dod chags la sogs pa'i rten yin pa'i phyir 'dod chags la sogs pa mtshungs par 'gyur ro/ /de ltar 'dod mod gzugs la sogs pa 'byung ba'i chos su khas blangs na yang 'byung ba'i khyad par gyis khyad par du 'gyur ro//de bzhin du 'dod chags la sogs pa rlung la sogs pa'i chos yin yang de'i khyad par gyis khyad par du byed do zhe na/ ci ste khyed la yang gzugs la sogs pa de la brtsad pa mtshungs pa nyid de/ gal te khyad par can gyi las rnams bdag po med pa de bas na/'byung ba'i chos nyid la gzugs la sogs pa khyad par yod par mi 'gyur ro zhes pa'i brtsad pa 'di khyed la yod pa kho na yin gyi/ sangs rgyas pa la ni brtsad pa yod pa ma yin te/ las la sogs pa'i khyad par ni/ gzugs la sogs pa'i khyad par gyi rgyu yin pa'i phyir ro/ / 'dod chags la sogs pa bad kan la sogs pa kho na'i chos ma yin te/ 'on kyang rlung la sogs pa'i rgyu can ma yin nam zhe na/ 'dir smras pa/ skyon rnams khyad par yod na yang / /khyad par med phyir ma grub pa/ /nyid min thams cad 'gyur ba yis/ /'gyur ba'i phyir kun la skye'ang min//rgyu ni 'phel bar gyur na yang / /'bras bu 'grib par mi rung ste/ /tsha ba sogs bzhin 'dod chags sogs/ /'gyur ba na yang bde sogs skye/ /zhes bya ba la/ gal te 'dod chags la sogs pa rlung la sogs pa las skye na ni/ de'i tshe bad kan 'phel na 'dod chags 'phel bar 'gyur na/ji srid rlung la sogs pa'i skyon rnams khyad par du 'phel ba yod na yang gti mug la sogs pa khyad par med pa de'i phyir/ rlung la sogs pa'i 'bras bu 'dod chags la sogs pa ma yin no/ /'on te khyad par med pa'i phyir zhes bya ba ma grub pa'i gtan tshigs yin te/ 'di ltar mkhris pa 'phel bar gyur na/mkhris pa'i sdug bsngal gyis mnar bas zhe sdang phul du 'byung ngo zhe na/ ma grub pa nyid ma yin te/ rlung la sogs pa thams cad 'gyur ba ste/ 'phel bar 'gyur bas zhe sdang la sogs pa 'phel ba mthong ba'i phyir ro/ /zhe sdang chung ba ni rlung 'phel bar gyur kyang zhe sdang mi skye'o zhe na/'di dag mkhris pa 'phel ba la yang brtsad pa mtshungs pa yin no/ /'dod chags la sogs pa thams cad las skye ba ma yin nam/ thams cad gyur na 'gyur bar snang ba'i phyir ro zhe na/ 'dod chags la sogs pa thams cad las skye ba ma yin te/ 'dod chags mtshungs par thal bar 'gyur ba'i phyir ro zhes bstan to//gzhan yang rgyu bad kan la sogs pa 'phel bar gyur na/ 'bras bu 'dod chags la sogs pa 'grib par mi 'gyur te/ dper na tsha ba la sogs pa 'phel bar 'gyur na mkhris pa 'phel ba dang ldan pa bzhin no/ / 'on te 'dod chags phul du byung ba ni khu ba'i rdzas dang nye bar ldan pa'i bad kan can la mthong ba nyid do zhe na/ de ni bden pa ma yin te/ gang gi phyir 'dod chags la sogs pa'i 'gyur ba bde ba la sogs pa las skyes pa yin gyi/ bad kan la sogs pa las skyes pa ni ma yin no/ /bde ba yang la la la ci zhig ltar snang ste/nang gi bag chags sad pa las skye ba'i phyir ro/ /de bas na 'dod chags la sogs pa skyon las skyes pa ni ma yin no zhes bya bar gnas so/ /'o na gal te yang bad kan 'phel ba las 'dod chags mi skye ba de lta na yang de tsam gyis bad kan rgyu ma yin pa ma yin te/cha ma snyoms pa las skyes pa'i sdug bsngal gyis gegs byas pa'i nus pa can yin pa'i phyir ro/ /gegs byed pas mi skye ba gang yin pa de rgyu ma yin pa ni ma yin te/ thams cad rgyu med pa can du thal bar 'gyur ba'i phyir ro zhe na/ 'dir smras pa/ma snyoms las skyes sdug bsngal gyis/ /gal te 'dod chags mi skyed na/ /ci skyed smros shig cha mnyam las/ /myos 'phel de las 'dod pa na/ /skyon mi mnyam la'ang chags can dang / /cha mnyam la yang gzhan du snang / /gzhan dag zad nas khrag 'dzag cing / /bud med gcig la khu nges med//des gcig la chags bdo mi 'gyur/ /gal te gzugs sogs yan lag ni/ /min te kun ma nges phyir ro/ /nges pa med par yang mi 'gyur/ /yon tan mi 'dzin can gyi'ang 'gyur/ /gal te yon tan 'dzin de yang / /yan lag yin na thams cad dag /yon tan 'dzin pa can 'gyur te//rgyu la khyad par med phyir ro/ /gnas skabs can gang chags can 'dod/ /de 'dra 'ang zhe sdang can mi 'gyur/ /de yi ngo bo mtshungs med phyir/ /'di la nges pa mthong mi 'gyur/ /zhes bya ba la/ gal te bad kan la sogs pa cha ma snyoms pa las skyes pa'i sdug bsngal gyis bad kan 'phel ba'i dus su 'dod chags mi skye na ni 'o na 'dod chags rgyu gang las skye ba yang smros shig /'on te bad kan la sogs pa mnyam pa las nad med pa na rgyas pa de khu ba 'phel ba de las 'dod pa zhes bya ba'i 'dod chags skye ba yin no zhe na/ de yang ma yin te/ gang gi phyir bad kan la sogs pa'i skyon ma snyoms pa las kyang kha cig 'dod chags can du snang la/bad kan la sogs pa cha mnyam pa gzhan la yang 'dod chags chung bar snang ba'i phyir skyon mnyam par gyur pa'i tshe 'dod chags dang mi mnyam pa'i tshe zhe sdang yin no zhes bya ba'i nges pa yod pa ma yin no//gzhan yang bud med la mchog tu brten pa'i khu ba zad nas khrag kyang 'bab pa dang gzhan dag shin tu 'dod pa che ba de dag kyang khu ba zad nas 'dod pa med par thal bar 'gyur ro/ /khu ba yang bud med thams cad la thun mong ba can yin pa'i phyir bud med mdzes ma cig la chags par 'gyur ba'i nges pa med pa de bas na khu ba mtshungs par yod pa'i phyir btsun mo cig la chags pa bdo bar mi 'gyur ro//khyad par can gyi bud med kyang rgyu ma yin nam/ bud med kyi gzugs la sogs pa'i khyad par las kyang 'dod chags la sogs pa khyad par can du 'gyur te/ gzugs la sogs pa yang rgyu nyid yin pa'i phyir ro//'di ltar gzugs mtshar ba dang / lang tsho phul du byung bas yid dbang du gyur pa can gyi 'dod pa can ni rang gi chung ma bor nas bud med gzhan gyi drung du 'gro'o/ /res 'gar chags pa can gyi rjes su mthun par 'jug pa'i rgyu las kyang yin gyi khu ba 'ba' zhig ni 'dod chags kyi rgyu ma yin pas grogs byed pa yod pa'i phyir gcig la bdo bar 'gyur zhing /gzhan la dman par 'gyur ba 'di la skyon yod pa ma yin no zhe na de smras pa ma yin te/ gzugs la sogs pa rnams thams cad la 'khrul bar mthong ba'i phyir te/ 'di ltar gzugs ngan pa la yang 'dod chags 'jug pa yin no//nye bar spyod pa'i cha la mkhas pas de la chags par 'gyur ro zhe na/ 'o na gzugs rgyu ma yin par 'gyur ro/ /gzhan yang nye bar spyod pa mi shes pa'i gzugs las kyang 'dod chags skye ba de bas na nye ba'i spyod pa yang 'dod pa'i rgyur mi rung ngo / / gzugs dang rjes su spyod pa dang mi ldan pa la yang kha cig 'dod pa skye bar snang ba'i phyir/ gnyi ga yang rgyu ma yin no/ /'on te gzugs ma nges pa'i rgyu can du 'dod chags 'dod na ni gzugs la sogs pa nges pa med pa las de mi skye bar bstan zin to/ /gzugs mdzes par nges pa'i btsun mo gcig yod na/ma brtags par glo bur du 'ongs pa'i gzugs ngan pa la 'dod pa mi 'jug par 'gyur ro/ /gzhan yang yon tan ma yin par 'dzin pa mi sdug pa'i 'du shes can so sor rtogs pa la sogs pa ldan pa yang chags par 'gyur ro/ /'on te 'dod chags kyi rgyu yon tan 'dzin pa yin na/de lta na yang thams cad yon tan 'dzin par 'gyur te/ thams cad la yon tan 'dzin pa'i rgyur bye brag med pa'i phyir ro/ /'di ltar phyi rol gyi gzugs la sogs pa'i yon tan 'dzin pa'i rgyu de yang thams cad la khyad par med pa'i phyir thams cad la yon tan 'dzin par thal bar 'gyur ro//'on te gzugs la sogs pa'i yod pa las yon tan 'dzin pa ma yin na/ 'o na yon tan ci yis 'dzin ce na/ gal te thog ma med pa'i bag chags las dmigs pa med par yon tan rig na ni 'dod chags la sogs pa yang goms pa nyid las 'thob par 'gyur ro//gzhan yang gnas skabs gang la gnas pa'i chags pa de'i gnas skabs la sdang bar mi 'gyur te/ 'dod chags dang zhe sdang de dag la mtshungs pa med pa yin te/ 'gal ba'i phyir ro/ /'gal ba la gnas pa'i tshe 'gal ba gzhan mi 'byung ngo / /'on te gnas skabs mtshungs pa'i 'dod chags la sogs pa 'gal bar mi 'gyur ro zhe na/de ni ma yin te/ 'dir nges pa mthong bar mi 'gyur te/ 'di ltar gang gi tshe zhe sdang skye ba de'i tshe res 'ga' yang 'dod chags skye ba ma yin no/ /yang na gal te 'dod chags dang zhe sdang la sogs pa gnyi ga yang ngo bo nyid 'gal ba med pa dang /de'i tshe gnyi ga dus mtshungs pa nyid du thal bar 'gyur ro/ /de ni de bzhin no zhe na/ ma yin te nges pa ma mthong ba'i phyir ro/ /'dir dus mtshungs pa nyid du nges par ma mthong ba'o/ /'dod chags la sogs pa goms pa'i khyad par las skye ba gang yin pa de'i yang bag chags yod pa'i phyir 'dod chags dang zhe sdang dus mtshungs pa nyid du ji ltar mi 'gyur te/yon tan 'dzin pa nyid kyi skyon ni thams cad la yod pa ma yin nam zhe na smras pa/ rigs mthun bag chags khyad par ni/ /'brel pa nges par 'jug pa can/ /'dod chags la sogs gang yin de//skyon de dag tu thal ba med/ /ces bya ba la sngar rigs mthun pa'i 'dod chags la sogs pa goms pas bzhag pa'i bag chags de las khyad par de/ bye brag de dang 'brel pa nges par 'jug pa can gang yin pa'i 'dod chags la sogs pa de 'dod pa gang yin pa'i rgol ba de la skyon dag tu thal bar 'gyur ba med de/'di ltar 'dod chags la sogs pa bag chags kyi stobs nyid las skye ba ste/ gang zhig gang du 'jig rten gzhan du goms pa de nyid der sad par 'gyur ba'i phyir goms pa nges pa'i 'dod chags la sogs pa rnams yul gzugs la sogs pa la rag las pa med pa'i phyir sngar gyi skyon gyi glags yod pa ma yin no//rlung la sogs pa'i chos 'dod chags la sogs pa ma yin yang 'byung ba'i chos su ni 'gyur ba ma yin nam zhe na/ smras pa/ des ni 'byung ba'i chos nyid dang / /rten yang bkag pa nyid kyi phyir/ /dkar po la sogs sa sogs la//brten pa dag ni ma yin no/ /zhes bya ba la/ gang dag 'dod chags la sogs pa rnams sa la sogs pa'i chos yin par smra ste/ 'di ltar sa dang chu lhag par gyur na chags par 'gyur la/ me dang rlung lhag par gyur na sdang bar 'gyur zhing / chu dang rlung lhag na rmongs par 'gyur ro zhes zer ba de dag gi gzhung gis 'dod chags la sogs pa 'byung ba'i chos nyid du 'dod pa de yang bkag pa yin te/thams cad du ma nges pa des ni/ gnas skabs gang la chags can 'dod/ /ces bya ba la sogs pa nyid kyis bstan to/ /rten dang brten pa'i dngos po yang / /yod med dag la rten med phyir//zhes bya ba la sogs pas sun phyung ba yin no/ /'on te ji ltar dkar po la sogs pa 'byung ba chen po la brten pa de bzhin du/ 'dod chags la sogs pa yang yin no zhe na de ni ma yin te/ dkar po la sogs pa sa la sogs pa la brten pa med pa'i phyir ro/ /gal te dkar po la sogs pa sa la sogs pa la brten na ni 'byung ba bzhir khas blangs pa la gnod par 'gyur te/'byung ba la sogs pa'i gzugs khas blangs pa'i phyir de dag la rten dang brten pa'i dngos po med do/ /'on te 'byung ba rgyur byas nas gzugs la sogs pa gnas so zhes brjod pa'i phyir rten dang brten pa'i dngos po khas blangs pa nyid du grub pa'i mtha' yin na/de ji ltar 'gal bar mi 'gyur zhe na/ 'dir smras pa/ de rgyur byas pa'i sgra dag kyang / /rgyu yi don yin rang rten dang / /gzugs sogs tha dad med par ni/ /gnas can phyir ro rten nyid kyang / /zhes bya ba la/ rgyur byas pa'i don rten gyi don ni ma yin no//'on kyang rgyu'i rang bzhin kho na la rgyur byas pa'i sgrar brjod pa de bas na 'byung ba dang gzugs ni brten pa'i dngos po ma yin no/ /dus mtshungs par rten dang brten pa'i dngos po yod du chug na yang / de lta na yang rang gi rten dang tha dad pa med par 'jug pa'i phyir gzugs la sogs pa'i rten 'byung ba yin pa bzhin 'dod chags la sogs pa 'byung ba dang tha mi dad par 'jug pa yin na ni de'i tshe 'byung ba la brten par 'gyur ba yin na/gzugs la sogs pa bzhin lus kyi 'byung ba chen po dang tha mi dad par 'jug pa ma yin pa'i phyir 'dod chags la sogs pa ni lus la brten pa ma yin te/res 'ga' mi 'byung ba'i phyir ro/ /gal te myos sogs nus pa bzhin/ /tha dad yin na dngos po las/ /nus pa don gzhan dag ma yin/ /dngos 'jig 'gyur gyi rten tshang bar/ /gnas na brten pa 'jig mi 'gyur/ /gal te de mtshungs zhe na min/ /'byung sems tha dad nyid yin te//snang ba tha dad can rtogs phyir/ /zhes bya ba la/ chang la sogs pa'i rdzas la brten pa'i myos pa'i nus pa tha dad par gnas pa ste rdzas gnas kyang phyir ldog pa dang phyis mi skye ba'i phyir ro/ /sogs pa'i sgras ni dug la sogs pa'i 'chi bar byed pa'i nus pa bzung ngo / / 'di ltar bu ram la sogs pa'i rdzas yod na/ nus pa gsal bar 'gyur zhing yang 'jig par 'gyur ba'i phyir/ myos pa la sogs pa'i nus pa bzhin/ 'dod chags la sogs pa rnams rten dang tha dad pa yin mod kyi/ 'on kyang 'dod chags la sogs pa lus la brten pa'o zhe na/ de ni mi bden te nus pa don gzhan du gyur pa med pa'i phyir ro//bu ram la sogs pa'i dngos po las nus pa don gzhan du gyur par khas mi len kyang brdar btags pa bzhin dngos po las dngos po'i nus pa bzhin te gang zhes tha dad pa'i rnam par dbye ste/ dper na mchi gu'i lus bzhin no/ / 'o na gal te me la sogs pa la nus pa tha dad med pa de'i tshe sngags la sogs pas ci zhig 'joms par byed/ re zhig me ni ma yin te/ gzhan du mthong ba'i phyir ro/ /nus pa bkag kyang me ma bkag pa'i phyir tha dad par rigs so zhe na de ni ma yin te/ dngos po nyid der 'jig par 'gyur ba'i phyir ro//rten me la sogs pa ma tshang ba med par gnas na brten pa me'i nus pa 'gag par mi 'gyur te/ rten zhig pa nyid na brten pa 'jig par rig pa'i phyir ro/ /gzhan du na rten dang brten pa'i dngos por mi rung ba'i phyir ro/ /'on te 'dir yang 'byung ba dang sems dag tha mi dad par myos pa la sogs pa'i nus pa bzhin du khas len no zhe na ma yin te/'byung ba dang sems dag tha dad pa'i phyir sems ni nus pa bzhin 'byung ba las tha mi dad pa ma yin no/ /de nyid kyang cis shes she na/ snang ba tha dad pa can rtogs pa'i phyir te/ thams cad tha dad par sgrub par byed pa ni snang ba tha dad pa yin pa'i phyir dang /gzhan tha dad pa'i rgyu med pa'i phyir ro/ /gal te dbang po tha dad pa'i yul nyid kyis so zhe na/ snang ba tha dad pa ma yin na de gcig pa nyid de/ tha dad par byed pa ni tha dad par snang ba'i shes pa yin pa'i phyir te/ shes pa'i rgyud tha dad pa yis tha dad pa ni ma yin no/ /mig la sogs pa rgyud tha dad pas snang ba tha dad pa ma yin nam zhe na/de lta na ni de nyid snang ba tha dad pas tha dad par byed pas na gzhan don med do/ /'dir yang tha dad pa snang ba na nang gi bde ba la sogs pa'i ngo bo nyid shes pa'i rig pa yin la sems pa la sogs pa'i ngo bo nyid du gzung bar bya ba ni don rig pa'o//nang gi reg bya'i khyad par gyi ngo bo nyid bde la sogs pa ma yin nam/ des na rang rig pa'i rang bzhin te gang zhig gang na gnas pa'i dngos po da ni de nyid du nyams su myong bar 'gyur ba ste/ dper na ljon shing la sogs pa ring po dang nye ba nas rig pa de bzhin du nang gi reg bya'i khyad par gyi ngo bo nyid kyang nang gi lus la gnas pas nang du myong ba yin no zhe na/'dir smras pa/ gal te 'di reg bya nyid yin na de'i tshe reg bya de gang gis rig pa yin gzhan gyis rig na ni tha dad par 'dzin par grub po/ /'on te reg bya'i khyad par de dang rig pa yin na/ de'i tshe nyams su myong ba'i rang bzhin te/shes pa nyid rang rig pa yin pa'i phyir ro/ /gal te yang rang gis rig pa'i ngo bo nyid yin na gzhan dag gis kyang de bzhin du ci'i phyir mi rig /snying ga'i nang du son pa'i phyir mi rig go zhe na/ nang gi reg pas rig par 'gyur te/ nang gi yan lag la reg pa can des gzung bar 'gyur ba'i phyir ro//phyi rol la 'khyud pa'i reg pa yang bde ba la sogs pa nyid du 'gyur te gnyi ga phan tshun reg pas gnyi gas kyang bde ba myong bar 'gyur ro/ /lus kyang rdul phra rab kyi ngo bo nyid kyis tha dad par byed pa yin pa'i phyir bde ba du ma rig par 'gyur ro zhes bshad do//gal te yang reg par gyur pa nyid bde ba yin no zhe na/ ci'i phyir mdza' bo yid du 'ong bas reg par gyur na bde'i gzhan gyis ma yin/ mdza' bo yin pa'i phyir de kho na bde ba'i rgyur 'gyur ro zhe na/ mdza' bo gcugs pa nyid du ji ltar gyur pa yin te/ rang gi skal ba nyid las kha cig la la'i snying du sdug par 'gyur la/de yang sngon gyi las nyid la rang gi skal ba zhes brjod kyi/ tshe 'di la ni des phan btags pa'i khyad par ma mthong ngo / /de lta bus kyang sems dang lus dag tha dad pa med na yang 'jig rten pha rol gnas so/ /gal te yang de'i mdza' bo nyid du gzhan gyis kyang shes par 'gyur ba las/mdza' bor de dag gis mi shes pa'i phyir mdza' bo nyid med pa yin no/ /mdza' bo ni lus kyi nang du chud pa yin pas gzhan gyis ji ltar shes par 'gyur zhe na/ phyi rol du rtogs par 'gyur ba ji ltar lus kyi nang du chud par 'gyur te/ gzugs la sogs pa'i snang ba gzhan gyis rtogs pa'i phyir dang /rang rig pa'i ngo bo nyid ni phyi rol las tha dad pa'i phyir ro/ /'on te gzugs la sogs pa yin yang gzhan gyi lus yin pa'i phyir rig par ni snang ngo zhe na/ 'o na gzhan gyi lus kyang mi rig par 'gyur ro/ /lus gzhan dang lhan cig par nges na shes pa yan gar ba ji ltar rtogs par 'gyur te/'di ltar mun khung na gnas pa'i lus ma shes kyang mdza' bo dran zhing lus gzhan mi rtogs pa na yang / lus yan gar ba myong ba yin pa'i phyir lus dang sems dag lhan cig dmigs par nges pa ni med do/ /lus las sems tha dad pa yin du chug na yang lus nyid de'i rgyu'i yin nam/de bas na bde ba la sogs pa goms pa las skyes pa ma yin pa'i phyir don dam pa'i lus khu ba dang khrag la sogs pa las byung ba'i phyir/ 'jig rten pha rol med de/ 'jig rten 'di brgyud pa kho nas rdzogs shing 'khor ba nyid ma yin no zhe na/smras pa/ lus 'gyur ba yi bar du yang / /gzugs sogs bzhin du yid ngo bo/ /mtshungs 'gyur rnam par rtog pa ni/ /don gyi gzhan dbang can nyid gang / /zhes bya ba la/ gang gi tshe 'dod chags la sogs pa'i rgyu lus yin pa'am/ rang bzhin yin pa de'i tshe lus kyi 'gyur ba'i sngon du yid tshul gcig pa can du 'gyur te/rgyu dang ngo bo nyid kyis rten du 'gyur ba'i lus mtshungs pa'i phyir ro/ /gzhan du ni ma yin te/ rten dang brten pa'i dngos po 'am rgyu dang 'bras bu'i dngos po de'i bdag nyid med pa'i phyir ro/ /lus kyi ngo bo nyid gcig yin pa'i phyir gzugs la sogs pa tha dad par snang ba ma yin no//yul gzhan dang gzhan nye ba las 'dod chags la sogs pa'i dngos po gzhan dang gzhan du 'gyur ba ma yin nam zhe na/ 'dir smras pa/ rnam par rtog pa'i shes pa dang bde ba la sogs pa gang gi don gyi gzhan dbang can du 'gyur te/ goms pa'i bag chags sad pa tsam dang 'brel pa'i phyir ro zhes bstan to//'dod chags la sogs pa rnam par shes pa dang 'brel pa yin yang ji ltar mtshungs pa nyid du mi 'gyur zhe na/ 'dir smras pa/ gang tshe lus la ltos med par/ /cung zad la lar res 'ga' zhig /bag chags sad pa'i rgyu can gyis/ / shes pa 'ga' skye de phyir ro/ /zhes bya ba la/ gang gi phyir lus rgyu nyid du gyur na skyon snga ma yod kyi/ gang gi tshe lus la ltos pa med par bag chags sad pa'i rgyu gang la yod pa'i shes pa de de'i phyir la lar res 'ga'i tshe yid kyi rnam shes 'ga' zhig bag chags sad pa las skye bar khas len par byed na lus ngo bo nyid gcig pa can yin yang 'dod chags la sogs pa bag chags sad pa'i rgyu can yin pa'i phyir ro//gtan tshigs gzhan yang smras pa/ rnam shes min pa'ang rnam shes kyi/ /nyer len min phyir grub pa yin/ /gal te dngos po thams cad ni/ /rnam shes nus ldan phyir 'dod na//rtswa mchog rtse na glang chen brgya/ /sngon chad ma mthong yod do zhes/ /de skad grangs can phyugs las gzhan/ /ngo tsha can su smra bar rtsol/ /rang bzhin gang zhig snang gyur pa/ /rang bzhin de ni sngar mi snang / /rgyu ni lan brgyar rnam phye yang / /ji ltar de ni yod par 'gyur/ / zhes bya ba la/ sems 'gyur ba can dang / 'gyur ba med pa dag gis phyi ma'i yid 'gyur ba dang mi 'gyur bar mthong ba'i phyir/ gdon mi za bar sems snga ma gyur pa'i rjes su 'jug pas shes pa dang bral ba'i lus la shes pa nye bar mi len pa'i phyir dang / 'dod chags la sogs pa cig car skye bar thal bar 'gyur ba'i phyir yang 'jig rten pha rol grub pa yin no//gal te shes pa nyid las shes pa 'byung ba de lta na yang 'jig rten pha rol mi 'grub ste/ dngos po thams cad shes pa'i nus pa dang ldan pa'i phyir shes pa skyed par byed pa'i shes pa 'dod pa ma yin nam/'jig rten pha rol gyi 'bras bu rtsom pa can mi shes pa'i nus pa ma yin no zhe na/ grangs can pa'i lugs 'di khyed la gang nas 'ongs te/ grangs can phyugs nyid bstan bcos gcig pu la brten pa khrel med pa gang yin pa 'di skad smra bar rtsol ba las ngo tsha dang bcas pa ni de skad mi smra'o//ci zhig ce na/ sngon chad ma mthong ba ste/ mthong ba las 'das pa'i glang po che brgya rtswa'i rtse mo na yod ces smra ba ni/ khrel med pa'i grangs can las ngo tsha dang bcas pa su zhig smra bar byed do/ /gang gi phyir zho la sogs pa'i rang bzhin gang zhig snang du rung ba de sngar snang du rung ba las dmigs pas yod pa ma yin te/lan brgyar g.yengs te btsal yang rgyu la ma mthong ba'i phyir/ de la zho la sogs pa'i rang bzhin yod par ci ltar 'gyur/ gal te rang bzhin gyis yod na ni de nyid yod do zhes brjod par bya ba'o/ /shes pa las gzhan pa'i rang bzhin du yod na sems de 'byung ba de rnams la ji ltar yod pa yin/'on te ma la sogs pa'i shes pa las skye bar 'dod na ma yin te/ ma la sogs pa'i 'du byed pa bzhin 'jug par thal lo zhes bstan to/ /de bas na sems las rang gi rgyud la gnas pa'i sems skye ba'i phyir 'jig rten pha rol gzhan grub pa yin no//gzhan yang snga na med pa 'byung ba na/ chags sogs nges med thal bar 'gyur/ /'byung ba'i bdag nyid ma 'das phyir/ /thams cad chags sogs dang ldan na/ /thams cad 'dod chags mtshungs can 'gyur/ /'byung ba phul du 'byung phyir min/ /'byung rnams srog chags khyad med na'ang //khyad par 'di yi rten can gang / /de ni phul byung 'grib par ldan/ /de yod pa las de nyams 'gyur/ /zhes bya ba la/ gal te yang 'jig rten gzhan med na de'i tshe snga na med pa'i sems can 'byung bar 'gyur na/ de lta na yang 'dod chags la sogs pa ni nges pa med par 'gyur te/thams cad 'dod chags can du mi 'gyur zhing / la la 'dod chags bral bar ngang gis 'gyur ro/ /gang gi tshe 'jig rten pha rol du 'gro ba de'i tshe sred pa nyid srog chags rnams skye ba'i rgyu yin pa'i phyir skye ba dang ldan pa ni 'dod chags dang bral ba ma yin te/ 'dod chags la sogs pa med na skye ba med pa'i phyir ro//'on te 'byung ba'i bdag nyid 'dod chags la sogs pa'i rgyu yin te/ de thams cad kyis mi 'dor ba'i phyir skye ba dang ldan pa thams cad 'dod chags dang ldan par grub po zhe na/ gal te de ltar 'byung ba'i bdag nyid las mi 'da' ba de nyid kyi phyir na 'jig rten pa thams cad 'dod chags mtshungs par 'gyur ro//gal te 'byung ba rnams thams cad phan tshun phul du byung ba med na/ thams cad 'dod chags mtshungs par srid pa ma yin nam/ 'byung ba las phul du byung ba rtogs pa'i phyir thams cad 'dod chags mtshungs pa ma yin no/ /'dod chags la sogs pa ma nges par thal lo zhes gang smras pa ni 'dir grub pa la sgrub pa nyid de/sa la sogs pa kha cig 'dod chags dang bral bar 'gyur ba nyid do/ /srog chags rnams 'dod chags dang bral bar brjod pa ma yin nam/ gang yang rung ba la smras pa ma yin no zer na/ srog chags srog chags ma yin par mi 'gyur ba de bzhin du 'dod chags dang bral ba yang yin pa'i phyir rtsod pa med do//de lta na 'o na ni ji ltar srog chags nyid du khyad par med pa de bzhin du/ 'dod chags can nyid kyang yin pa'i phyir/ thams cad 'dod chags mtshungs par 'gyur te srog chags bzhin no//yang na kha cig srog chags yin la/ kha cig srog chags ma yin pa ji lta ba de bzhin du chags pa can dang / chags pa dang bral bar yang 'gyur ro zer na legs so/ /srog chags nyid du tha mi dad la 'dod chags can du bye brag yod pa ma yin nam/ de'i tshe sa la sogs pa'i 'byung ba rnams srog chags nyid du bye brag med kyang 'dod chags 'phel ba dang /'grib pa'i mtshan nyid kyi khyad par 'di yang 'byung ba phul du byung bas byas pa snga ma'o zhe na/ de lta na 'phel ba dang 'grib pa dang ldan pa las 'byung ba de nyams par 'gyur ro/ /ci'i phyir zhe na 'dod chags la sogs pa rgyu la nyams pa yod pa'i phyir ro//gal te yang 'dod chags la 'phel ba dang 'grib pa yin pa de lta na yang 'dod chags la sogs pa'i rgyu mtshungs pa nyid nyams par mi 'gyur ba ma yin nam zhe na/ 'dir smras pa/ gal te tha dad kyang chags sogs/ /rgyu mtshungs bdag nyid mi zad na//rgyu mtshungs pa yi bdag nyid can/ /kun la 'dod chags mtshungs par 'gyur/ /zhes bya ba la/ gal te rgyu phul du byung bar gyur kyang 'dod chags la sogs pa'i rgyu mtshungs pa nyid gang yin pa de'i phyir 'dod chags la sogs pa'i rgyu mtshungs pa yin no/ /de ltar mtshungs pa'i rgyu can yin na/srog chags thams cad la 'dod chags mtshungs par 'gyur te/ rgyu mtshungs pa'i phyir ro/ /gal te rgyu mtshungs kyang 'dod chags mtshungs pa ma yin na/ de'i tshe 'byung ba'i 'bras bu nyid du yang mi 'gyur te/ rjes su 'gro ba dang ldog pa nges pa med pa'i phyir ro//de bas na gang la ches shin tu ba yod pa de la gtan nas bral ba yang yod de bral ba gong nas gong du bogs 'byung ba'i phyir/ dkar po la sogs pa'i yon tan bzhin no/ /rgyu mtshungs pas kyang 'dod chags mtshungs par 'gyur ro/ /ci'i phyir zhe na/ la lar bdag nyid mtshungs pa las//'byung can ba lang shes pa ches/ /shin tu ba min 'di la yang / /sa sogs srog chags sogs kyang ngo / /zhes bya ba la/ gang gi phyir ba lang gi shes pa mtshungs pa'i bdag nyid las 'byung ba'i phyir rigs mi mthun pa las log pa'i ba lang yin pa'i phyir/ ches shin tu ba dang ldan pa ni ma yin te/ba lang dang lhag pa'i ba lang dang / ches shin tu lhag pa zhes bya ba med pa'i phyir ro/ /'jig rten rgyang phan pa'i lta ba 'di yang sa la sogs pa la srog chags dang / srog chags shin tu ba dang / ches shin tu ba'i srog chags kyang yod pa ma yin no//de bas na rgyu mtshungs na 'dod chags mtshungs la 'grib pas rtsad nas med par yang 'gyur ro// //tshad ma rnam 'grel gyi 'grel pa las/ /bam po dgu pa/ /dro ba'i ches shin tu ba yang / /nam yang me dro ma yin min/ /de ltar 'di yin na min de/ /me las dro gzhan bkag phyir ro//zhes bya ba la/ dro ba las ches shin tu ba yod pa ma yin nam/ dro ba gtan med pa ni ma yin te/ de bas na ji ltar dro ba'i ches shin tu ba yod kyang me dro ba dang bral ba ni ma yin pa de bzhin du 'dod chags la sogs pa la ches shin tu ba yod kyang shin tu chad par gyur pa ni ma yin no zhe na/de ni ma yin te/ 'dod chags la sogs pa lus las tha dad pa'i phyir ro/ /me ni dro ba las tha dad pa ma yin te/ dro ba nyid la me zhes 'dogs pa'i phyir ro/ /dro bar ma gyur pa gang yin pa de ni me ru yang mi 'gyur gyi/ 'dod chags la sogs pa med kyang 'byung ba nyid du mi 'gyur ba yin no//gal te yang chos can me yang gzhan yin la/ de'i chos dro ba yang gzhan yin na de'i tshe de'i dro ba 'chad par 'gyur ba kho na'o/ /gsal ba la me ru btags shing / dro ba la chos su btags pa ma yin nam/ de la ches shin tu ba yod kyang me gtan med par 'gyur ba ni ma yin no zhe na/de ni rigs pa ma yin te/ gang gi phyir sngags la sogs pa'i stobs kyis gsal ba yod kyang dro ba nyid du mi 'gyur ba dang / nor bu la gsal ba yod kyang dro ba med pa'i phyir/ gsal ba'i chos nyid ma yin zhing / me med na yang dro ba mi snang la/ dro ba dang bral ba'i me yang ma mthong ba'i phyir dang /gsal dang dro ba dag la med na mi 'byung ba nges pa yod pa ma yin pa'i phyir/ chos dang chos can gyi dngos po med do/ /de bas na rtags khyad par dang bcas pa ste/ gzhan gang la yod yon tan rnams/ /shin tu ba myong ldan pa can/ /de dag de las tha dad dang //la lar chad 'gyur dkar sogs bzhin/ /zhes bya ba la/ gang la yon tan gzhan yod pa ches shin tu ba nyams su myong ba dang ldan pa de dag 'byung ba'i khyad par gyi chos can la lar ldog par 'gyur te/ dper na snam bu la sogs pa rnams la dkar po la sogs pa bzhin no//'on te dkar po las tha dad pa'i snam bu la sogs pa yang yin te/ snam bu las dkar po la sogs pa tha dad par gang gis 'gyur zhe na/ de ni de bzhin te/ snam bu la sogs pa ni reg bya'i ngo bo nyid yin gyi/ dkar po la sogs pa yon tan gyi ngo bo nyid ni ma yin te/dkar po la sogs pa med kyang snam bu yod pa'i phyir ro/ /'di'i don ni 'di yin te/ rgyud gzhan la gnas pas 'gag pa'i chos can dang / skye ba'i chos can rnams de dag ni shin tu chad pa'i chos can te/ dper na dkar po la sogs pa bzhin zhes bya ba ni bsdus pa'i don to/ /'o na ji ltar gzugs la sogs pa dang bral ba'i sa la sogs pa ma yin pa de bzhin du dkar po la sogs pa rnams kyi ches shin tu ba yang yin pa de ltar 'dod chags la sogs pa ches shin tu ba yod kyang /srog chags rnams 'dod chags la sogs pa dang bral ba ni ma yin no zhe na smras pa/de dag 'byung ba las tha dad/ /med phyir gzugs sogs bzhin nges med/ /gal te de mtshungs zhe na min/ /chags sogs cig car skye thal phyir/ /zhes bya ba la/ gzugs dang ro la sogs pa bzhin 'dod chags la sogs pa de dag 'byung ba med na mi 'byung ba ma yin te ci'i phyir zhe na 'byung ba rnams las tha dad par snang ba'i phyir ro//'di ltar 'dod chags la sogs pa med kyang 'byung ba rnams mthong bar 'gyur gyi/ gzugs la sogs pa med na ma yin no/ /'dod chags la sogs pa la yang lus kyi 'byung ba chen po dang tha dad pa med pa nyid mtshungs te/gzugs la sogs pa bzhin nyid ma yin nam zhe na/ de ni ma yin te/ 'dod chags la sogs pa dang lus lhan cig dmigs par thal bar 'gyur ba'i phyir ro/ /rtag tu lus dang 'dod chags lhan cig pa ni ma yin no/ /gzhan yang 'byung ba chen por smra ba'i gzugs la sogs pa 'byung ba rnams las tha dad par mi rung ste/de kho na nyid mang por thal bar 'gyur ba'i phyir ro/ /'dod chags la sogs pa yul las skye ba ma yin nam/ des na yul med na/ lus yod kyang res 'ga' 'dod chags med par 'gyur ro zhe na de ni bden pa ma yin te/ rnam rtog yul nyid yin pa'i phyir//yul ni nges byed ma yin no/ /skal ba mnyam rgyu med pa'i phyir/ /chags sogs nges pa med pa'am/ /rgyu nye phyir na blo rnams kun/ /thams cad du ni skye bar 'gyur/ /zhes bya ba la/ 'dod chags la sogs pa yul gyi rjes su 'gro ba dang / ldog par 'gyur ba ma yin te/de med kyang bag chags las yod pa'i phyir ro/ /des na gzugs la sogs pa yul ni nges par byed pa ma yin te/ bdag dang bdag gir rtog pas bstan pa'i yul can yin pa'i phyir ro/ /de bzhin du bdag dang bdag gi ba yod na 'dod chags 'phel bar 'gyur ro/ / 'jig rten rgyang pan pa la ni skal ba mnyam pa'i rgyu yod pa ma yin pa'i phyir/ rigs mthun pa'i rgyu med par 'dod chags la sogs pa nam yang skye ba ma yin no/ /de'i phyir gdon mi za bar 'dod chags la sogs pa'i grogs tsam byed par 'gyur ro/ /yang na 'dod chags la sogs pa'i blo thams cad cig car skye bar 'gyur te/'dod chags la sogs pa rnams kyi rgyu lus nye bar mtshungs pa'i phyir ro/ /'o na gal te da ltar ba'i tshe 'dod chags la sogs pa goms pa las skye ba yin na/ de lta na yang dang po skyes pa'i sems ma'i mngal du goms pa las skyes par cis shes she na/de lta na 'o na ni du ba thams cad kyang me las skyes par gang du mthong / 'on te du ba de la yang me med na mi 'byung bar nges pa med de/ me'i rjes thogs su mthong ba'i du ba gang yin pa de nyid de ltar yin no zhe na/ de lta na yang 'jig rten pa'i tha snyad thams cad chad par thal bar 'gyur te/rgyu dang 'bras bu 'brel pa khas blangs nas su yang tha snyad 'dogs pa med pa'i phyir dang / mngon sum ni tha snyad ci yang byed pa med pa'i phyir ro/ /mngon sum gyis na rtswa mchog la glang po che yod par rtogs par mi nus pa de bas na tha mi dad par mthong ba nyid rgyu dang 'bras bu'i tha snyad nyams par 'gyur ro//'on te brdar btags pa spong bar mi nus pa'i phyir de'i rigs dpags pa las btags so zhe na/ de lta na yang 'jig rten pha rol yang de'i rigs dpags pa las tha snyad du 'jig rten pha rol yod par 'gyur te/ 'jig rten 'di bzhin no//de bas na 'dod chags la sogs pa'i 'bras bu 'dod chags la sogs pa goms pa las 'byung zhing / goms pa de yang 'dod chags gzhan goms pa las skyes pa'i phyir/ bde ba la sogs pa thog ma med pa'i bag chags las skyes pa ste/ don dam par ma yin no//de'i phyir dngos su ni thams cad sdug bsngal kho na yin te/ res 'ga' zhig ni dmigs phyir te/ /mi brtan nyes la brten phyir dang / /rgyu yi dbang nyid phyir sdug bsngal/ /bdag min byin gyis brlabs pa'ang min/ /rgyu min byin gyis rlob pa min/ /rtag na'ang ji ltar rgyu ru 'gyur//de phyir du ma de gcig la/ /dus tha dad par skye mi 'gyur/ /zhes bya ba la/ de la sdug bsngal gyi bden pa ni/ mi rtag pa dang / sdug bsngal ba dang / stong pa dang / bdag med pa las rnam pa bzhir bstan to/ /de la sdug bsngal te dus res 'ga' dmigs pa'i phyir mi rtag pa ste/rtag pa ni gtan du ba bltar rung ba'i ngo bo yin pas res 'ga' dmigs par rigs pa ma yin te/ bltar rung ba dang / mi rung ba'i ngo bo dag phan tshun spangs te gnas pa'i phyir 'gal bar 'gyur ba'i phyir ro/ /rgyu'i dbang nyid kyi phyir yang sdug bsngal ba ste/ gzhan gyi dbang du gyur pa thams cad sdug bsngal ba'o zhes bya ba'i rigs pas so//dang gi sgras ni goms pa'i dbang du gyur pa nyid kyang brjod par bya'o/ /bdag gi ngo bo nyid kyang ma yin la/ bdag gis byin gyis brlabs pa yang ma yin pa'i phyir bdag ni rgyu ma yin zhing byin gyis rlob pa yang ma yin te/byin gyis rlob pas ni byed pa dang bcas par 'gyur ba'o/ /byed pa dang bcas na ni rgyu yin no/ /'o na yang bdag ni rgyu yin no zhe na/ de ni ma yin te/ gang gi phyir bdag la sogs pa rtag pa skyed byed du mi rung la/ mi skyed na ni ri bong gi rwa bzhin med par 'gyur ro//de bas na 'bras bu du ma dus tha dad par bdag la sogs pa rtag pa las skye bar mi 'gyur ro/ /'o na bdag gis byin gyis ma brlabs pa'i mig la sogs pas ji ltar shes pa skyed par byed/ des na 'bras bu shes pa gzhan du mi 'thad pa'i phyir/ bdag byed pa por dpag go zhe na/'dir smras pa/ rgyu gzhan dag ni nye ba na'ang / /'bras bu dag ni mi skyed phyir/ /rgyu gzhan rjes su dpog 'gyur na/ /de ni rtag rnams la yod min/ /zhes bya ba la/ gal te mig las gzhan rnams tshogs kyang mig gi rnam par shes pa mi skyed cing / mig gi rnam par shes pa bskyed pa yang yin pa'i phyir ro/ /rgyu gzhan pa rjes su dpag par bya ste/ gang zhig med par 'bras bu mi skyed pas/ mtshungs pa de ma thag pa'i rkyen gyis byin gyis brlabs pa'i mig la sogs pa tsam las shes pa skye ba'i phyir ro/ /gang gis bdag med na shes pa med par 'gyur ba'i bdag rtag pa dang /khyab pa la ni/ nam yang gang du yang bral ba med pa'i phyir ro/ /'on te ldog pa med par yang bdag yod pa tsam gyis bdag gis skyed do zhe na/ 'o na nam mkha' la sogs pa dag kyang mig la sogs pa byin gyis rlob par byed par 'gyur te/de dag kyang rtag pa dang khyab pas shes pa skye ba'i tshe yod pa'i phyir ro/ /de bas na yod pa tsam gyis bdag rgyur 'gyur ba ma yin no/ /res 'ga' 'byung ba dag gis ni/ /sdug bsngal 'di rgyu can nyid grub/ /rgyu med gzhan la mi ltos phyir/ /rtag tu yod pa'am med par 'gyur//zhes bya ba la/ kun 'byung gi bden pa yang rnam pa bzhi ste/ rgyu dang / kun 'byung ba dang / rab tu skye ba dang / rkyen gyi rnam pa las yin te/ de la rgyu ni rgyu ma yin pa dgag pa'i phyir ro/ /rab tu skye ba ni nus pa med pa dgag pa'i phyir te/ de las skyes pa'i phyir rab tu skye ba yin no//rkyen ni gtso bo dgag pa'i phyir ro/ /de la re zhig sdug bsngal gyi rgyu yod do zhes bstan par bya ste/ dus nges pa can yin pa'i phyir/ sdug bsngal 'di ni rgyu dang bcas par nges te/ rgyu dang bcas pa nyid du 'jug pa'i phyir ro/ /de'i dngos po ni rgyu dang bcas pa nyid do/ /'o na gal te sdug bsngal ni res 'ga' ba ni yin pa de lta na yang rgyu dang bcas par ji ltar 'gyur zhe na/gang gi phyir rgyu med na dngos po ni rtag tu yod pa'am med par 'gyur te/ rgyu gzhan la mi ltos pa'i phyir ro/ /ltos pa med na rgyu dang bcas pa nyid du bstan par 'gyur ro/ /ji ltar tshad ma la sogs kyi//rno ba la sogs rgyu med pa/ /de ltar de dag rgyu med 'gyur/ /zhes ni kha cig smra bar byed/ /ces bya ba la/ rgyu med par smra ba rnams ni ngo bo nyid kyis 'byung ba chen po'i rang bzhin yod de/ 'byung ba'i khyad par nyid dus dang yul dang / gnas skabs dang ldan par skye'o//de la khyad par rnams kyang rgyu med pa nyid du snang ste/ mdung dang / lcags mdung dang / khab la sogs pa rnams mgar bas lcags kyi ngo bo nyid du byed pa ni ma yin gyi/ rno ba nyid du khyad par du byed la/ lcags byed na yang sa la sogs pa ni byed pa ni ma yin pa'i phyir lcags la sogs pa'i ngo bo nyid byed pa'i mgar ba med kyang tsher ma la sogs pa la rno ba yod pa'i phyir rno ba nyid mgar bas byas pa ni ma yin no//de bzhin du skyer pa med kyang / lugs mdung la sogs pa la rno ba mthong ba'i phyir/ rno ba'i rgyu skyer pa ni ma yin no/ /rgyu ma nges pa ni rgyu med pa nyid do//de bzhin du 'gro ba 'di dag rgyu nges pa med pa'i phyir/ rgyu med pa can yin no zhe na/ de ni bden pa ma yin te/ gang yod na ni gang skye ba'am/ /'gyur ba yod na'ang 'gyur ba ni/ /de ni de'i rgyur rab tu bstan/ /de dag de rnams la yang yod/ /ces bya ba la/'di'i dgongs pa ni 'di yin te/ gal te khyad par gyi ngo bo nyid bskyed par bya ba yin pa de'i tshe rgyu med pa ma yin no/ /skyer pa'i tsher ma la sogs pa yang / skyer pa'i sa bon med par mang po dang rnon po nyid du 'gyur na ma yin te/ skyer pa'i sa bon yod na yod la de med na med pa'i phyir/rgyu med pa nyid du 'thad pa ma yin no/ /'di ltar rjes su 'gro ba dang ldog pa'i rjes su byed pa dang / de gyur na 'gyur ba ni rgyu dang ldan pa'i mtshan nyid du bstan to/ /de yang yod pa dang med pa'i rjes su byed pa dang / de gyur na 'gyur ba'i rno ba la sogs pa la yod pa'i phyir 'bras bu nyid du rigs so//mgar ba la sogs pas kyang rnon po la bskyed pa ma yin nam/ de las skyer tsher me skye'o zhe na/ de yang ma yin te/ gang gi phyir ji ltar skyer tsher gyi rno ba skyes pa de bzhin du ngo bo nyid mgar bas bskyed pa ni ma yin te/ khyad par gzhan du mthong ba'i phyir ro/ /'on te gang nas gang yod pa de ni de'i rgyur 'gyur ba nyid yin na/reg bya yang mthong ba'i rgyu nyid du thal bar 'gyur te/ reg bya med na mthong ba yang med pa'i phyir ro zhe na/ gzugs rgyu nyid phyir reg bya ni/ /mthong ba yi yang rgyu mtshan nyid/ /ces bya ba la/ 'di'i dgongs pa ni 'di yin te/ tshogs pa gcig la rag las pa'i phyir gzugs dang reg bya nyid med na mi 'byung ba nyid yin no//de bas na reg bya med na mthong ba mi 'byung ste/ reg bya med na gzugs mi 'byung ba'i phyir dang / gal te gzugs yod na ni mthong bar yang 'gyur ba nyid do/ /yang na phan tshun med na mi 'byung bar 'gyur na dus mtshungs pa'i reg bya ni gzugs kyi rgyu nyid yin pa'i phyir/gang gi tshe reg bya gzugs kyi rgyu yin pa de'i tshe brgyud nas gzugs kyang reg bya'i rgyu nyid yin par 'gyur ro/ /de ltar rgyu ma yin pa bkag nas rgyu nyid do zhes bya ba gcig pu rnam par gnas pa yin no/ /kun 'byung zhes bya ba rnam pa gnyis pa bstan pa'i phyir/rtag pa rnams ni bkag pa'i phyir/ /dbang phyug sogs las 'byung ba min/ /zhes bya ba la/ sdug bsngal rgyu dang bcas pa yin na yang / rgyu rtag pa gcig pu bkag pas kun 'byung ba'i rnam pa nyid rgyur nges par byed do/ /gal te rtag pa gcig pu rgyu yin pa de'i tshe 'bras bu du ma cig car skye bar 'gyur ro//rtag pa dang gtso bo de dag ni sngar bkag par byas pa nyid yin no/ /de bas na rtag pa'i phyir dbang phyug la sogs pa las sdug bsngal 'byung ba ni ma yin te/ dbang phyug ni rim dang cig car dag gis don byed pa dang bral ba'i phyir ro//rab tu skye ba ni rnam pa gsum pa ste/ de yang sred pa yin gyi las la sogs pa ni ma yin no zhes bstan pa'i phyir/ nus pa med phyir de yi rgyu/ /srid la 'dod pa 'dzin pa yin/ /gang phyir yul gyi khyad par len/ /mi rnams de thob bsam pas byas//zhes bya ba la/ rgyu gzhan las sam ma rig pa la nus pa med pa'i phyir/ las dang lus dang ma rig pa las gzhan la rab tu skye ba'i nus pa yod par brjod par bya ba ma yin te/ sred pa med na skye bar mi 'gyur ba'i phyir ro/ /de'i phyir las la sogs pa gzhan la nus pa med pa'i phyir/srid pa la 'dod pa nyid skye ba'i rgyu yin te/ 'dod pa la las rab tu skye ba mthong ba'i phyir ro/ /ji ltar mthong zhe na len pa'i phyir te/ len pa ni yul gyi khyad par 'dod pa ste/ brjod par 'dod pa'i yul thob par sred pas byed pa'i phyir ro//len pa ni skye ba la sbyor ba yin pa de bas na/ skye ba la sred pa ni rab tu skye ba'o/ /srid pa 'dod pa ni ma 'ongs pa'i skye ba la 'dun par byed pa'i rnam pa'o/ /'on te kun 'byung gi bden pa ni bcom ldan 'das kyis yul gyi khyad par la 'dun par gsungs pa ma yin te/ de la kun 'byung gi bden pa gang zhe na/yang srid pa la srid pa gang yin pa ste/ dga' ba'i 'dod chags dang bcas pa de dang de la mngon par dga' ba'o/ /gang 'di 'dod pa'i sred pa dang srid pa'i sred pa dang bral ba'i sred pa zhes bya'o zhes gsungs so zhe na/ /'gal ba med de gang gi phyir/ /de ni sred 'dod gang yin yang //srog chags bde sdug thob pa dang / /'dor 'dod 'jug pa de dag ni/ /'dod dang bral ba la sred 'dod/ /ces bya ba la/ gang 'di yang sred pa la dga' ba'i 'dod chags dang bcas pa'i srog chags rnams ni de dang de la mngon par dga' ba can gyi sred pa ste/ de dag thams cad ni rnam pa gsum ste/'dod pa'i sred pa dang srid pa'i sred pa dang bral ba'i sred pa zhes bya'o/ /de la gang gnas dang yo byad la sogs pa 'dod pa yod pa de ni srid pa'i sred pa'o/ /gang bde ba la sbyor ba de ni 'dod pa'i sred pa'o/ /gang sdug bsngal dang bral bar 'dod pa de ni bral ba'i sred pa'o//gang las srog chags rnams 'jug pa ste ji lta bu zhe na/ thob pa dang 'dor bar 'dod pa'o/ /ci zhe na bde ba dang / sdug bsngal dag ste/ bde ba thob pa dang / sdug bsngal dor ba don du gnyer ba zhes bya ba'i tha tshig go/ /bde ba blang ba dang / sdug bsngal dor bar 'dod pa de dag ni 'dod pa dang bral ba dang /sred pa'i 'dod pa yin par 'dod pa'i phyir kun 'byung bar bstan pa la 'gal ba ci yang med do/ /rkyen gyi rnam pa bzhi pa bstan pa'i phyir/ bde min la bder 'du shes pa'i/ /kun la rab tu 'jug pa la/ /bdag la chags pa rgyu nyid phyir//de phyir sred pa srid rten yin/ /zhes bya ba la/ bdag tu 'dzin pa dang ldan pa gcig tu sgro 'dogs pa nyid kyi sems ni bdag tu zhen pa ste/ bdag de la chags pa gang yin pa de ni gnas thams cad du 'jug pa'i rgyu'o/ /gang gi zhe na don dam par bde ba dang bral ba la/bde bar phyin ci log pas bslad pa yis te/ de'i phyir sred pa ni sred pa'i rten yin gyi/ sred pa med na gang gang du yang mi 'jug pa'i phyir ro/ /snying rjes ni sred pa med par yang skye ba len par byed par 'gyur te/ de nyid kyi phyir rab tu 'jug pa na sred pa ni lhan cig byed pa'i rgyu yin pa'i phyir rkyen tsam ste/nye bar len pa nyid ni ma yin te sems nyid skye ba nye bar len pa yin te/ de'i rkyen ni sred pa yin zhing / res 'ga' snying rje yang yin no/ /de dag gis ni rkyen gyi rnam pa zhes bya ba bstan to/ /de ltar ni 'gyur mod kyi/ rkyen gyi rnam pa nyid ni yod kyang / srid pa ni rkyen ma yin gyi/ 'on kyang lus yin pa'i phyir lus dang ldan pa dag 'dod chags dang bral bar mi 'gyur ro zhes bstan pa'i phyir/ chags bral skye ba ma mthong phyir/ /zhes ni slob dpon rnams kyis bshad/ /lus med chags pa ma mthong phyir/ /lus las 'dod chags 'byung bar 'gyur//zhes bya ba smos te/ ji ltar 'dod chags dang bral ba skye ba ma mthong ba'i phyir 'dod chags ni skye ba'i rgyu yin no zhes slob dpon gyis bshad pa bzhin du/ lus med pa la chags pa ma mthong ba'i phyir lus las 'dod chags 'byung ngo zhes kho bo yang smra'o/ /'dir smras pa 'dod chags med kyang snying rje'i stobs kyis skye ba 'byung bas/skye ba gzhan mngon par 'dod pa'i yul ni sred pas byas pa yin no/ /dga' ba'i khyad par gyi rgyu yin pa'i phyir/ sred pa ni rab tu skye ba tsam yin no/ /de bzhin du gal te lus kyang 'dod chags la sogs pa lhan cig byed pa'i grogs tsam yin la/'jig tshogs la lta ba kho na nye bar len pa yin no zhe na/ de nyid 'dod pa nyid du bstan pa'i phyir/ rgyu mtshan khas blangs 'dod pa na/ /nyer len dag ni bsal ba yin/ /rigs ni rjes su 'dod pa na/ /rang gzhung rang gis 'gegs pa yin/ /zhes bya ba smos te/tshul bzhin ma yin pa yid la byed pa'i lus ni 'dod chags kyi rgyu yin pa'i phyir lus 'dod chags kyi rgyu mtshan du khas blangs pa'i phyir rgyu nyid 'dod pa kho na'o/ /res 'ga' yul bzhin du lus kyang bag chags sad pa'i rgyur 'gyur ba'i rigs pa 'dis 'dod chags kyang lus kyi rgyu nyid du grub par 'gyur te/'dod chags med na lus ma mthong ba'i phyir ro/ /des na lus dang 'dod chags phan tshun rgyu yin pa'i phyir/ de ltar gyur pa thog ma med pa'i rgyu mtshan yin pa'i phyir/ 'jig rten pha rol grub par 'gyur ro/ /'dis ni tshu rol mdzes pa'i gzhung sun bton pa yin no//rdzas dang yon tan lhan cig skye ba ma yin nam/ de'i phyir lus dang / 'dod chags phan tshun rgyur 'gyur ba ma yin no/ /'dir smras pa/ gal te skye la chags mthong phyir/ skye dang lhan cig 'byung na ni/ /skal mnyam skye bar sngar grub 'gyur/ /zhes bya ba la/gal te 'dod chags la sogs pa skye ba dang lhan cig 'byung ba'i phyir 'dod chags la sogs pa lus kyi rgyu ma yin no zhe na/ de lta na ni lus kyang 'dod chags la sogs pa'i rgyur mi 'gyur te lhan cig 'byung ba'i phyir ro/ /rgyu med pa nyid kyang ma yin te/ de bas na rigs mthun pa'i rgyu lus las sngon du grub pa'i phyir 'jig rten gzhan grub pa yin no//de ltar ni 'gyur mod kyi sred pa nyid gcig pu rgyu ma yin te/ ma rig pa dang / sred pa dang / las zhes bya ba gsum skye ba'i rgyu yin pa'i phyir ro/ /des na ji ltar sred pa nyid de dang de la mngon par dga' ba'i phyir rgyur brjod par bya zhe na/'dir smras pa/ srid la mi shes rgyu yin yang / /ma brjod sred pa nyid bshad pa/ /rgyun ni 'phen par byed phyir dang / /de ma thag phyir las las kyang / /de yod na yang mi 'byung phyir/ /zhes bya ba la/ srid pa'i rgyur ma rig pa dang / las dag 'gyur yang ma chod pa'i rgyu nyid ma yin te/sred pa nyid de ma thag pa'i rgyur 'gyur te/ 'khor ba'i rgyun 'phen par byed pa'i phyir ro/ /gti mug dang las dag yod kyang sred pa med par gang du yang 'phen par byed pa ma yin te/ dngul du 'khrul na yang sred pa med na 'jug par mi 'gyur ba'i phyir ro//de bas na rgyu yin yang mi shes pa ste/ ma rig pa ma brjod kyi/ 'on kyang sred pa nyid brjod do/ /ma chod par skye ba'i rgyu las kyang ma yin te/ las de yod kyang sred pa med na skye ba mi srid pa'i phyir ro/ /'di ltar las las skyes pa'i nor la sred pa med na yongs su spong bar byed do//de ltar re zhig kun 'byung gi bden pa rnam pa bzhir bstan nas/ da ni 'gog pa'i bden pa rnam pa bzhir bstan pa'i phyir/ de ni gtan du ba min te/ /rgyu la gags ni srid phyir ro/ /'khor ba nyid phyir thar pa med/ /'dod dang ma grub phyir ma yi/ /zhes bya ba la/ 'gog pa dang /zhi ba dang / gya nom pa dang / nges par 'byung ba las 'gog pa'i bden pa rnam pa bzhi ste 'gog pa nyid med do zhes smras pa dang / 'gog pa'i rnam par brjod do/ /grol ba rnams la yang 'dod chags la sogs pa 'byung ngo zhes gzhan gyis khas blangs pa de dgag pa'i phyir zhi ba'i rnam pa'o//'di las gzhan pa'i thar pa yod do zhes bya ba de'i gnyen por gya nom pa'i rnam pa'o/ /grol ba yang ma grol bar 'gyur ro zhes zer ba de dag bsal ba'i phyir/ nges par 'byung ba zhes bya ba rnam pa bzhi yin no/ /de la rnam pa dang po bstan pa'i phyir sdug bsngal de gtan du bar yod pa ma yin gyi 'on kyang 'gog par 'gyur ro//de ci'i phyir zhe na/ sdug bsngal gyi rgyu la gegs byed pa la sogs pa srid pa'i phyir te/ sogs pa'i sgras ni rgyu ma tshang ba la sogs pa gzung ngo / /sdug bsngal gyi rgyu dang bral na sdug bsngal nyid kyang ldog par 'gyur ba'i phyir 'gog par srid pa yin no//'o na gal te shes pa'i rgyun chad pa nyid thar pa ste me bzhin du mya ngan las 'da' bar 'dod na/ 'o na ni tha ma'i sems yod pa nyid du mi 'gyur te/ don byed pa dang bral ba'i phyir ro/ /'on te thams cad mkhyen pa'i ye shes skyed par nus pa tha ma'i sems la yod na ni/'o na tha ma nyid du yang mi 'gyur ro/ /'on te thams cad mkhyen pa'i ye shes la tha mi'i sems grogs byed pa tsam yin te/ shes pa gzhan gyi nye bar len par mi 'gyur bas tha ma nyid yin no/ /'o na nye bar len pa'i rgyu ci yin/ rigs mthun pa'o zhe na/ 'dod chags bral ba dang / thams cad mkhyen pa'i ye shes dag la rigs mthun pa yod pa ma yin nam/ ji ltar tha ma'i sems nye bar len pa ma yin/ gal te yang de la nus pa gang du yang med do zhe na/ de'i tshe dngos po med pa nyid du 'gyur la/ de med na yang de'i gong ma yang med pas snga ma snga ma med par 'gyur te/don byed pa med pa'i phyir ma yin nam zhe na/ de ni ma yin te/ sdug bsngal 'gog pa tsam nyid thar pa ste/ de dag snga phyir rtogs na rigs pa med par brtsad pa yin no/ /gal te tha ma'i sems la tha dad pa'i don byed pa med pa de lta na yang rang rig pa'i phyir ji ltar med pa yin 'di ltar dmigs pa la yod par brjod do//'o na zla ba gnyis su snang ba yang yod par 'gyur ro zhe na/ de ltar yang 'di shes pa'i ngo bo nyid kyis yod pa'o zhes bshad par bya'o/ /don byed pa'i mtshan nyid yod pa yang 'dir dmigs pa'i mtshan nyid kyi don 'di nyid yin no//gzhan yang ji ltar don byed pa ni rgyu yod pa de ltar bskyed par bya ba'i 'bras bu yang yod de/ yang gang rgyu'i mtshan nyid can yin pas dngos po'i zhes gsungs so/ /de bas na tha mas don byed pa med na rgyu dang 'bras bur 'brel pa'i yod pa yin/ gal te yang thams cad mkhyen pa'i ye shes skyed par tha ma'i sems la nus pa yod na de'i tshe tha ma'i nyid du 'gyur ba ma yin no zhes brjod pa de ni shin tu 'brel pa med pa ste/'di ltar tha ma'i sems thams cad mkhyen pa'i ye shes kyi grogs byed pa ste/ dper na myu gu la sa bzhin no/ /sa myu gu'i rgyu ni ma yin gyi/myu gu gnas na sa'i rgyun 'chad pa ma yin te/ sa bon ni myu gu dang rgyud gcig pa'o/ /de bzhin du 'dod chags dang ma bral ba'i rgyun chad kyang thams cad mkhyen pa'i rgyun 'jug pa yin no/ /gang yang shes pa yin pa'i phyir tha ma'i shes pa ni thams cad mkhyen pa'i ye shes kyi nye bar len par 'gyur ro zhes zer ba 'di la smras pa ni/spyir mthun pa tsam nye bar len pa nyid du 'dod na/ sa yang sa'i ngo bo dang ldan pa'i phyir myu gu'i nye bar len par 'gyur ro/ /yang na dper na rgyud gzhan gyi shes pa la dmigs nas/ rjes su dpag pa'i shes pa skye ba de ni rgyud tha dad pa yin pa de bzhin du/thams cad mkhyen pa'i ye shes kyang 'dod chags dang ma bral ba'i sems la dmigs pa yin gyi/ de'i nye bar len pa ni ma yin pa'i phyir/ sdug bsngal log pa'i ngo bo nyid thar pa yin no/ /gzhan yang 'dod chags la sogs pas dben pa'i sems ni thar pa ste/rgyun chad pa ni ma yin no/ /'dod chags la sogs pa nyid glo bur ba yin pa'i phyir/ rnam par thar pa'i rigs kyi sems ni shes pa snga ma dang 'brel ba'i phyir 'gag par mi 'gyur ro/ /des na yongs su dag pa'i sems 'dod chags dang bral ba rtag tu yod pa'o/ / 'khor ba ni srog chags kyi chos ma yin nam/ chos can yod pa la chos zad par mi rung ste/ de bas na 'khor ba las thar pa mi 'grub po zhe na/ de ni 'dod pas nyes pa ma yin te/ 'khor ba pa su la yang thar pa yod pa ma yin te/ gang 'khor ba de ni mya ngan las 'das pa ma yin pa'i phyir/'khor ba nyid kyi phyir ro/ /grol ba ni 'khor ba pa ma yin te/ rtag tu de grol ba'i phyir ro/ /gcig tu sems rgyud nas ma dag pa ni 'khor ba ste/ de tshogs pa'i rkyen gyi bye brag las brgyud nas sems dag pa'i rgyud skye bar 'gyur gyi/ sems gzhan gyi rgyud ni 'khor ba nyid du grub pa ma yin la/don dam par 'khor ba ci yang med do/ /skad cig ma rnams mi 'khor ba'i phyir dang / rgyun yang don dam par med pa'i phyir ro/ /de bas na 'khor ba'i phyir zhes pa'i gtan tshigs ma grub pa yin pa'i phyir thar pa med do zhes zer ba 'di mi rigs te/grol ba gang yin pa'i grol ba po yang yod pa ma yin no/ /'o na gal te 'khor ba pa grol ba nyid ma yin/ de'i tshe grol ba gzhan yin la/ bcing ba yang gzhan yin par 'gyur te/ gzhan bkres shing gzhan 'grangs pa'i phyir/ ji ltar dpyod pa dang ldan pa dag rgyu la mngon par rtsol bar 'gyur zhe na/lan smras pa/ ji srid bag chags ma bcom zhing / /de ni yongs su gdung gyur pa/ /de srid sdug bsngal sgro btags nas/ /rang bzhin du ni gnas pa med/ /grol ba po ni med na yang / /log par sgro 'dogs gzhom phyir brtson/ /'dod chags bral ba'i gnas pa ni//brtse ba yis bsam las kyi yin/ /zhes bya ba la 'di'i dgongs pa ni 'di yin te/ gal te mngon sum mthong ba la 'jug par mi 'gyur ro zhes brjod pa de ni 'dod pa kho na ste/ de kho na nyid mthong ba ni bdag ni blos gang du yang 'jug pa med pas 'bad par byed pa med de blang pa dang /dor ba la btang snyoms pa'i phyir ro/ /'on te bdag cag la sogs pa 'jug par mi 'gyur ro zhes rtsod na ni de'i tshe bdag cag la sogs pa gcig tu zhen nas de nyid bcings shing grol lo zhes gcig pa nyid du zhen pa yod pas 'jug par rigs te/ 'di ltar ji srid bdag dang /bdag gi ba la chags pa log par ma gyur pa de srid 'khor bar yongs su gdung bar 'gyur la/ sdug bsngal ba nyid du sgro btags nas rnal du gnas pa ma yin no/ /de bas na gcig tu sgro btags nas tha snyad 'dogs kyi/ don dam par dngos po'i stobs las ni tha snyad 'dogs pa ma yin te/tha snyad rtogs pa dang 'brel pa'i phyir ro/ /'di ltar thag pa'i rdzas la sbrul du sgro 'dogs pa las spang ba'i don du 'bad pa yod pa nyid kyi phyir/ bdag gi ngo bo nyid grol ba po med kyang log par sgro 'dogs pa gzhom pa'i phyir sgro 'dogs pa gzhom pa'i don du brtson pa 'byung ngo //'o na gal te log par sgro 'dogs pa las 'jug na ni de kho na nyid mthong ba la log par sgro 'dogs pa med pa'i phyir gnas pa dang chos ston pa la sogs pa la mi 'jug par 'gyur ba de bas na/ bcom ldan 'das tshad mar ji ltar 'gyur zhe na/ 'dod chags dang bral ba ni 'khor ba'i mur snying rje gnas pa dang /chos ston par 'gyur te/ dper na 'bangs kyi don du rgyal po rang gi rgyud la nan tan byed pa bzhin no/ /yang na 'dod chags dang bral ba rnams las sngon du byed pa'i dus cung zad gnas pa yin no/ /'di ni 'gog pa'i rnam pa'o/ /'o na gal te 'dod chags dang bral ba'i las kyis gnas par byed na de'i tshe 'jig rten gzhan du byas pa'i las yod pa'i phyir/'jig rten pha rol dang mtshams sbyor bar 'gyur ba ma yin nam/ 'on te las te nus pa med na ni 'dod chags dang bral ba'i gnas pa de med par 'gyur ro zhe na/ 'dir smras pa/'phangs la ldog pa med 'dod phyir/ /srid pa'i sred las rnam rgal ba'i/ /las gzhan 'phen nus yod min te/ /lhan cig byed pa zad phyir ro/ /zhes bya ba la/ sngon gyi las kyis 'phangs pa'i sems kyi rgyud ldog pa la 'bad pa med par gnas te/ 'phangs pa ni rtsol ba med par bzlog par nus pa ma yin te/'dod chags dang bral ba'i 'bad pa dang bral bas btang snyoms kyis de gar yang gnas pa yin no/ /de bas na 'bad pa med pa'i las 'jig rten gzhan skyed pa'i ma yin te/ lhan cig byed pa sred pa'i mtshan nyid med pa'i phyir/ de nyid sred pa dang bral na sngon gyi las kyis skye ba gzhan 'phen par byed mi nus so//snying rje zhes bya ba ni sems can gyi sdug bsngal bar 'dod pa ma yin nam/ sems can gang med pa'i phyir/ sems can du 'dzin pa 'khrul par gyur na/ ji ltar 'dod chags dang bral ba rnams la yod de/ sems can du 'dzin pa yod na ni/bdag med pa mthong bar mi 'gyur ro zhe na/ 'dir smras pa/ sdug bsngal shes la 'gal med pa'i/ /'du byed snga ma 'jug pa can/ /dngos chos brtse ba skye ba de/ /sems can rjes 'brel can ma yin/ /zhes bya ba la gang gi tshe sdug bsngal gsum dang ldan pa'i sdug bsngal ma lus pa mngon sum du byed pa de'i tshe/sdug bsngal mi rtag pa nyid la sogs pa'i ngo bo nyid du bzung ba na skyon thams cad spangs pa 'gal ba med pa'i snying rje goms pa las 'byung ba'i brtse ba skye ba ni/ dngos po'i chos te/ dngos po'i ngo bo nyid la dmigs pa'i phyir ro/ /brtse ba de sems can dang rjes su 'brel pa can ma yin te/sems can la 'dzin pa yongs su spong ba'i phyir/ sems pa gang yin pa de ni brtse ba ste/ de yang 'dod chags dang bral ba'i yin gyi/ gzhan gyi ni ma yin no/ /'dod chags dang bcas pa ni sems can du 'dzin pa spangs nas srog chags rnams la ji ltar brtse bar 'gyur/de ltar ni 'gyur mod kyi 'dod chags dang snying rje la khyad par ci zhig yod/ des na brtse ba dang ldan pa'i gdon mi za bar 'dod chags can no zhe na/ de la khyad par smras pa/ de bdag med can chos la ni/ /bdag gzhan sgro btags phyir 'dod chags/ / sdug bsngal rgyun gyi 'dus reg tsam/ /nyid las brtse ba skye ba yin/ /zhes bya ba la/ brtse ba dang / 'dod chags dag la khyad par che ste/ rgyu dang yul tha dad pa'i phyir ro/ /'di ltar mi rtag pa dang sdug bsngal ba la sogs pa'i rnam pa can gyi chos la bdag gzhan te/ngo bo nyid gzhan rtag pa dang bde ba la sogs pa'i rnam par sgro btags pa'i phyir ro/ /brtse ba ni sdug bsngal gyi rgyun tsam mngon sum du byas pa nyid ni log pa'i shes pa las bzlog pa'i phyir ro/ /des na sdug bsngal gyi rgyun mthong ba tsam gyis brtse ba skye ba'i phyir/ 'dod chags las tha dad pa kho na yin no//'o na 'dod chags kyi ngo bo nyid du brtse ba ma gyur mod kyi zhe sdang gi ngo bo nyid du 'gyur te/ mi sdug pa la sogs pa mthong ba las ldog pa'i blo skye ba'i phyir ro zhe na 'dir smras pa/ skyon rnams gti mug rtsa ba ste/ /de yang sems can 'dzin pa de/ /med na khro rgyu zhe sdang min//de phyir brtse ba skyon yin no/ /zhes bya ba la/ gal te bdag la 'tshe ba mthong ba de'i tshe/ zhe sdang skye ste/ bdag gang yang med kyi/ 'on kyang yod pa ma yin yang bdag tu 'dzin pa 'ba' zhig yod pa de nyid gti mug ste/ 'dod chags la sogs pa nyes pa'i rgyu ste de yang yod par 'dzin pa'o//yod par 'dzin pa de med na khro rgyu de bdag la 'tshe bar byed pa zhe sdang ma yin te sems can mthong ba med pa'i phyir ro/ /de'i phyir brtse ba ni skyon thams cad dang bral ba yin gyi/ 'dod chags la sogs pa nyes pa ngo bo nyid ni ma yin no/ /de ltar ni 'gyur mod kyi/gal te 'dod chags dang bral ba lus dang bcas par yod na/ de'i tshe grol bar mi 'gyur ro zhe na/ grol med ma yin sngon 'du byed/ /zad na gzhan mtshams sbyor mi byed/ /gang 'du byed nus zad med can/ /yin na skyon med can de gnas/ /zhes bya ba la/'di dag ni 'dod chags la sogs pa dang bral ba'i sems gnas pa ni thar pa ste/ bdag nyid thams cad kyi shes pa ldog pa ni ma yin no zhes bya bas bstan to/ /gzhan yang skye ba snga ma'i nying mtshams sbyor ba sngon gyi las kyis byas pa'i 'du byed zad na skye ba gzhan dang mtshams mi sbyor bas mi grol ba ma yin no//slar yang nus pa zad par mi 'gyur ba sngar byas pa'i 'du byed yod pa gang yin pa de dag gi sdig pa dang bral nas ji srid 'khor ba'i mthar thug gi bar du gnas par 'gyur ro/ /'on te 'dod chags dang bral ba dus cung zad gnas la de bzhin du 'khor ba'i mur ci ste mi gnas pa yin zhe na/smras pa/ snying rje dman pa nyid phyir yang / /gnas pa'i 'bad rtsol chen po med/ /gang dag brtse ba chen po pa/ /gzhan gyi ngor ni bzhugs pa yin/ /zhes bya ba la/ sngar gyi 'du byed zad pa dang snying rje dman pa'i phyir 'bad rtsol chen pos gnas par 'dod pa med pa'i phyir rtag tu gnas pa ma yin no//gang dag dus yun ring por goms pa byas pa'i snying rje chen po can de dag sems can la phan pa'i ngor 'khor ba ma stongs kyi bar du gnas par 'gyur ro/ /gal te 'jig tshogs lta bral phyir/ /dang pos srid med 'gyur ba na/ /lhan cig skyes spangs med phyir ram//yang na srid pa gang las yin/ /zhes bya ba la/ gal te lam la nyon mongs pa dang bral bar byed pa'i nus pa yod na/ de'i tshe dang po mthong ba'i lam nyid kyis rgyun du zhugs pa'i spang bya spangs par 'gyur te/ de ci'i phyir zhe na/ 'jig tshogs la lta ba dang bral ba'i phyir ro//ji ltar 'jig tshogs la lta ba rgyun du zhugs pa la mi 'byung ste/ lam mngon du byas pa'i phyir ro/ /skyon gyi rtsa ba gti mug yin/ /de yang sems can 'dzin pa'o/ /zhes bstan to/ /de bas na bsgom pa'i lam don med par 'gyur ro zhe na/ de ni ma yin te/ lhan cig skyes pa'i 'jig tshogs la lta ba ma spangs pa'i phyir dang mngon par 'du byed pa nyid spangs pa'i phyir ro//lhan cig skyes pa'i 'jig tshogs la lta ba ni yod pa yin no/ /mthong ba'i lam ni bden pa mthong ba tsam yin pa'i phyir mngon par 'dus byas pa'i nyon mongs pa rtsa ba ma yin pa'i bdag 'dzin tsam spangs pa ste/mngon par 'dus byas pa'i 'jig tshogs la lta ba nye bar brten pa las skyes pa ni mthong ba'i lam nyid kyis bzlog pa yin gyi lhan cig skyes pa'i 'jig tshogs la lta ba ni brten pa'i phyir dus yun ring por goms par byas pa'i bsgom pa'i lam gyi gnyen po nyid kyis spong ba yin no//gang dag lhan cig skyes pa'i yang spong bar 'dod pa de'i lus kyis lhan cig skyes pa'i 'jig tshogs la lta ba mthong ba'i lam nyid kyis spong na yang srid pa gang las 'byung ba yin/ shes rab phul du byung bar gsal ba lam dang po nyid skyon ma lus pa zad par byed pa'i phyir mthong ba'i lam de nyid lam thams cad kyi ngo bo nyid yin no// //tshad ma rnam 'grel gyi 'grel pa las/ bam po bcu pa/ lhan cig skyes pa'i 'jig tshogs la lta ba gang dag bdag gi rnam par gyur pa de'i bdag nyid ni de la nye bar bstan pa nyid kyi blo yin gyi/dngos pos skyed par byed pa med pas de'i blo ni ma yin pa'i phyir/ nye bar bstan pa nyid rgyu ma yin nam zhe na/ bde bar gyur pa'am sdug bsngal bar/ /ma gyur cig ces 'dod pa yis/ /'di na nga zhes blo gang de/ /'jig tshogs lta ba lhan cig skyes/ /'ga' zhig nga zhes mthong med pa//de lta bdag la chags pa med/ /bdag la chags pa med par yang / /bde ba 'dod pas mthong rgyug min/ /zhes bya ba la/ nga'o snyam pa'i shes pa thog ma med pa'i bag chags las skyes pa gang yin pa de ni lhan cig skyes pa'i 'jig tshogs la lta ba ste/ bdag bde bar gyur cig snyam pa'am/sdug bsngal bar ma gyur cig snyam pa'i rnam pa de lta bu gang yin pa de ni nga'o snyam pa'i blo yin no/ /gang gi yin zhe na/ sred pa po'i ste bde ba 'dod pa'o/ /'di nyid kyi blo ni 'jig tshogs la lta ba'i lhan cig skyes pa zhes brjod do/ /'jig tshogs la lta ba lhan cig skyes pa de ma spangs pas med par mi 'gyur ro//'ga' zhig nga zhes ma mthong ba de ni bdag la chags par mi byed cing / bdag la chags pa med na bde ba 'dod pas mngon par rgyug par mi 'gyur ro/ /gang zhig lhan cig skyes pa'i 'jig tshogs la lta ba de'i chags pa yod bzhin du/ ji ltar yang srid pa med par 'gyur/de bas na lhan cig skyes pa'i 'jig tshogs la lta ba yod pas/ lam dang po nyid kyis 'khor ba med par byed pa ma yin gyi 'on kyang lhan cig skyes pa'i 'jig tshogs la lta ba nyid bsgom pa'i lam gyis spang bar bya bar gnas pa'o/ /'dis ni zhi ba zhes bya ba'i rnam pa bstan to//bdag yod na 'ching zhing de nyid ni grol ba ma yin nam/ des na bdag yongs su dga' ba'i khyad par las bdag nyid ma rig pa dang bral nas dga' ba'i ngo bo nyid ni gya nom pa'i thar pa'o/ /bdag med na 'khor ba dang / pha rol nyid grol ba yang gzhan kho na ste/ gang yang grol ba'i tshe yongs su dga' bar 'gyur ba na su zhig dga' bar 'gyur/bdag tu 'dzin pa yod na skyon dang bcas par mi 'gyur ba'i thar pa rung ngo zhe na/ 'dir lan smras pa/ sdug bsngal skye ba'i rgyu nyid ni/ /'ching ba'i rtag pa de gang las/ /sdug bsngal mi skye'i rgyu nyid kyang / /thar yin rtag pa de gang las//zhes bya ba la/ gal te bdag dang khyab pa yin na de bas rjes su 'gro ba dang ldog pa med pa'i phyir 'di ni bdag nyid rang gi sdug bsngal skyed mi nus te/ nam mkha' bzhin no/ /gal te yang rang rgyud pa nus pa can yin na/ ji ltar bdag gi sdug bsngal skyed par byed de/ rang rlag par byed pa la 'god par dpyod pa dang ldan pa mi rigs so//'di ni rmongs pas sdug bsngal bar byed de/ gang gi tshe rmongs pa ldog pa na bdag mthong bar gyur na ste/ de'i tshe grol ba ma yin nam/ de lta bas na ma rig pa las 'khor bar 'gyur la/ rig na thar par 'gyur zhes smra bar byed na 'khor ba'i dus na gal te bdag gi ngo bo nyid ma mthong na ji ltar yod pa yin te/mi dmigs pa'i phyir 'di med par 'gyur ba ma yin nam/ des na ma rig pa nyid 'khor ba pa ste/ bdag ni ma yin no/ /'on te bdag gi ngo bo nyid ma rig pa yin te/ tha dad pa ma yin na gang gis na bdag 'khor ba par mi 'gyur zhe na/de lta na 'o na ni rtag tu bdag ma rig pa'i rang bzhin nyid yin pa'i phyir grol bar mi 'gyur te/ de gnas na de'i rang bzhin yang zad par bya bar mi nus pa'i phyir ro/ /gal te yang ma rig pa ldog na skyes bu dag pa nyid yod ce na/ de'i tshe 'khor ba nyid gzhan kho na yin zhing /grol ba yang gzhan kho na yin pa'i phyir sangs rgyas pa'i lta ba nyid la brten par 'gyur ro/ /'on te ma rig pa ni tshangs pa las tha dad pa ma yin zhing tha mi dad pa yang ma yin la/ rnam pa thams cad du med pa yang ma yin gyi/ 'on kyang log par snang ba dang /sgyu mar snang ba ma rig pa'o zhe na/ ci ste de lta na ni ma rig pa tshangs pa las tha mi dad pa ma yin par 'gyur te/ de yod pa ma yin pa'i phyir dang / tshangs pa ni don dam pa yin pa'i phyir ro/ /des na ma rig pa tshangs pa las tha mi dad pa med na/ gzhan nyid grol bar 'gyur ba'i phyir/ji ltar thar ba'i sgrub thabs la 'jug /tshangs pa de yang rtag tu grol bar gnas na ci'i phyir 'jug par byed/ 'o na ji ltar me long la sogs par bzhin phyin ci log tu snang ba de bzhin du/ ma rig pa tshangs pa nyid gzhan du snang ngo / /gang gi tshe ma rig pa zad pa de'i tshe phyin ci ma log par snang bas tshangs pa zhes bya ba'i thar pa 'grub po zhe na ma rig pa'i tshe tshangs pa mi snang ba ma yin nam/de ji ltar ma rig pa tshangs pa'i bdag nyid yin/ 'on te rig byed las shes pa tshangs par brjod pa yin no zhe na/ rig byed las shes par gyur pa'i tshangs pa ni log pa'i ngo bo nyid kyis snang ba yin te/rang gi ngo bo nyid snang bar gyur na de'i tshe nyid grol bar 'gyur ro/ /grol ba'i dus su ni tshangs pa'i ngo bo nyid rig pa thar pa yin te/ des na ji srid tshangs pa mi shes pa de srid du rna ba'i 'du shes pa la mi bden pa'i rang bzhin nyid snang ba'i phyir 'khor ba'o/ / ma rig pa thams cad las thar na ni/ dus gang gi tshe tshangs pa nyams su myong ba de'i tshe/ 'khor ba rig pa ma yin na de ji ltar grol ba dang / ma grol ba dag gcig tu gzhan yang ma rig pa ni tshangs pa'i rgyu can yin pa'i phyir/ tshangs pa 'gags na ma rig pa rgyun chad par ji ltar 'gyur/ 'o na ma rig pa 'khrul pa nyid de rgyu med pa can yin no zhe na/ 'khrul pa yang rgyu med par mi skye ba ma yin nam/ rab rib kyi nad med na skra shad la sogs par snang ba mi skye ba'i phyir dang / skye ba thams cad snang bar thal bar 'gyur ba'i phyir ro/ /ji ltar ma rig pa ma shes pa'i ngo bo nyid ma yin pa de ltar bshad par bya'o//'on te ma rig pa ni ma rig pa nyid las yin la/ rig pa las ma rig pa ldog par byed do zhe na/ 'o na ni rig pa thar par 'gyur la/ ma rig pa 'khor bar 'gyur ba'i phyir ci'i phyir bdag rtogs pa ma yin pa rtogs par byed/ gang ma rig pa las tshangs pa gzugs brnyan bzhin skye'o zhes smras pa de yang rigs pa ma yin te/gzugs brnyan dang bzhin gcig pa ma yin pa'i phyir ro/ /gzugs brnyan las bzhin rjes su dpog pa ni 'brel pa las yin gyi/ bzhin gnyug ma gzugs brnyan du snang ba ni ma yin te/ de bzhin du gal te 'gro ba tshangs pa'i gzugs brnyan du khas len na/de'i tshe 'khor ba dang grol ba tha dad pa'i phyir 'jug par mi 'gyur ro/ /'on te mi shes pas chos ma yin pa sdug bsngal skyed la de las 'khor ba yin no zhe na/ de lta na ni rtag pa'i yang rang sdug bsngal bar skyed par byed pa'i rgyu nyid 'ching ba yin par 'gyur na/de'i tshe sdug bsngal gyi rgyu dag rtag tu yod pa'i phyir rtag tu bcing ba nyid du 'gyur ro/ /lhan cig byed pa'i grogs la ltos nas kyang rtag pas 'bras bu skyed par byed pa bkag pa yin no/ /sdug bsngal med pa skyed par byed cing sdug bsngal dang bral bar gnas la/ dga' ba'i ngo bo nyid du gnas pa ni thar pa ste/ de lta bur rtag pa la yod pa ma yin no/ /bdag ni rtag pa ma yin te/ 'das ma thag pa'i skyon yod pa'i phyir ro/ /mi rtag pa yang ma yin te/ rtog pa sngon du mi gtong ba'i skyon yod pa'i phyir ro/ /de bas na rtag pa dang mi rtag pa dag tu brjod par mi bya ba ma yin nam zhe na smras pa/mi rtag brjod bya min gang yin/ /de ni 'ga' zhig gi rgyu min/ /brjod bya min na nam yang ni/ /bcing dang grol bar mi 'gyur ro/ /zhes bya ba yin te/ mi rtag pa brjod par bya ba ma yin zhes bya ba 'dis ni 'di la rtag pa med do zhes bya ba'i don to/ / mi rtag pa med na ni rtag pa ste/ 'ga' zhig gi yang rgyu ma yin te/ rgyu nyid la mi rtag pa nyid kyis khyab par bshad do/ /de bas khyab byed mi rtag pa med na don byed pa med pa'i phyir brjod par bya ba ma yin na/ bcing ba thar par mi rung ngo / /yang gi sgras brtag pa gcig pu'i skyes bur ma zad pa'o//'on te gnyis ga'i ngo bo nyid can gyi skyes bu yin yang de lta bu'i skyon du 'gyur te gang gi phyir/ gang gi rang bzhin 'jig med pa/ /de la mkhas rnams rtag ces brjod/ /khrel ba spangs pa'i lta ba 'di/ /de phyir de ni rtag ces bshad/ ces bya ba la/ rtag pa dang / 'jig pa ni 'gal ba ste/gang gi rang bzhin 'jig pa med pa de ni mkhas pa rnams kyis rtag pa zhes brjod do/ /'jig pa dang / mi dmigs pa dang / med pa zhes bya ba ni don gcig go/ /mi 'jig pa dang rtag pa dang dmigs pa zhes bya ba ni rnam grangs par bshad par bya'o/ /'gal bar 'gyur ba de'i phyir rtag pa dang mi rtag pa'i lta ba can khrel spangs pa de ni rtag pa zhes rjod par byed do//'di dag gis ni gzhan gyi rtag pa'i thar pa bkag nas 'gog pa'i bden pa gya nom pa'i rnam pa bstan to/ /de ni lam gyi zhar la 'gog pa'i rnam pa bzhi pa bstan pa'i phyir smras pa/ bshad zin lam de goms pa las/ /rten ni gnas gyur pa yin te/ /goms kyang lam bzhin skyon 'byung na/ /ma yin nus pa med pa'i phyir/ /zhes bya ba yin te/ lam gyi bden pa'i rnam pa bzhi ste/ lam dang / rigs pa dang / sgrub pa dang / nges pa 'byin pa'o/ /lam nyid med do zhes rgol ba de la lam yin no zhes bstan to//lam 'di ni tshad ma dang ldan pa ma yin no zhe na gzhan dag smra bar de bsal ba'i phyir rigs pa zhes brjod do/ /mngon sum du byed pa'i lam nyid 'gog pa'i rgyu yin pa'i phyir sgrub pa zhes brjod do/ /de las gzhan pa'i lam bdag tu lta ba yin no zhes smras pa bsal ba'i phyir nges par 'byin pa zhes bya ba rnam pa bzhi pa yin no//de la mngon sum du byed pa'i lam ni grol ba'i rgyu yin pa'i phyir/ rnam pa gsum brjod do/ /ji ltar sngar bstan pa'i lam de goms pa las sems kyi rgyud dam/ kun gzhi pa yongs su dga' ba'i ngo bo nyid gnas gyur par 'gyur te/bdag tu 'dzin pa'i gnyen por gyur pa/ bdag med pa goms par gyur na yang nyes pa 'byung ba srid de dper na/ skyon dang ldan pa la yon tan 'byung ba bzhin no/ /de'i phyir 'khor ba las nges par 'byung ba ma yin no zhe na/ nyes pa rnams slar 'byung ba ma yin te/ yon tan rnams dngos po'i ngo bo nyid yin pa'i phyir dang /skyon rnams dngos po'i ngo bo nyid ma yin pa'i phyir ro/ /de ci'i phyir zhe na/ smras pa/ rnam shes yul 'dzin pa yi chos/ /ji ltar de ni yod pa bzhin/ /'dzin gyur yod pa'i bdag nyid de/ /de yis skyed par byed pa'ang yin/ /zhes bya ba la/ srog chags rnams lam la 'jug par byed pa rnam par shes pa yin te/de'i chos kyi ngo bo nyid ni yul 'dzin pa'o/ /yul nyams su myong ba rnam par shes par 'gyur gyi/ myong ba med na ni rnam par shes pa ma yin no/ /yul ji ltar yod pa bzhin du 'dzin la/ rnam pa gzhan du 'dzin pa ni ma yin te 'khrul par thal bar 'gyur ba'i phyir ro//yul de yang yod par 'gyur ba'i bdag nyid kyis rnam par shes pa ni skyed par byed pa yin te/ rnam pa gtod par byed nus pa'i rgyu ni rnam par shes pa'i yul yin no/ /de bas na rang gi ngo bo rig pa ni rnam par shes pa'i chos te/ yod par gyur pa'i ngo bo nyid du shes pa nyid yul yin no//de'i phyir mi rtag pa dang / bdag med pa la sogs pa'i ngo bo nyid can yul te/ rnam par shes pa ni yul de 'dzin pa nyid yin no/ /gal te mi rtag pa dang bdag med pa la sogs pa'i 'dzin pa shes pa'i chos yin na/ de'i tshe rtag pa dang / bdag tu 'dzin par mi 'gyur ba ma yin nam/ de bas na de'i rtsa ba can gyi 'dod chags la sogs pa dang bral na 'khor bar mi 'gyur ro zhe na/ 'dir smras pa/ de yi ngo bo nyid 'di las/ /rgyu gzhan gyis ni 'khrul par 'gyur/ /ldog pa nyid ni rkyen la ltos/ /mi brtan sbrul gyi blo bzhin no/ / zhes bya ba la/ bdag med pa nyid la sogs pa rig pa de'i ngo bo nyid de/ rang bzhin rnam par shes pa 'di las te/ bdag med pa'i ngo bo nyid 'dzin pa 'di las sems de 'khrul par byed pa'i rgyu gzhan 'dra ba gzhan 'byung ba'i phyir ro/ /'o na gal te bdag med pa 'dzin pa las sems 'khrul par byed pa de'i tshe dus gzhan du yang sems 'khrul par 'gyur ba'i phyir rtag tu 'khor bar 'gyur gyi thar pa ni ma yin no zhe na/de ni ma yin te/ gang gi phyir 'khrul pa slar ldog pa rkyen gcig la ltos pas rtsa ba med pa can yin pa'i phyir dus thams cad du gnas pa ni ma yin te/ sbrul gyi blo bzhin no//ji ltar rtag pa nyid dang / bdag dang bcas pa med pa de ltar sngar bstan zhing 'og kyang bshad par bya'o/ /de bas na nang gi ma rig pas bslad pa las byung ba'i dri ma ni glo bur ba yin no/ /de smras pa/ sems 'di'i rang bzhin 'od gsal te/ /zhes bya ba la/ shes pas rtag pa dang bral bar 'dzin pa'i phyir sems ni ngo bo nyid kyis yongs su dag pa yin te/dri ma rnams ni glo bur ba/ /zhes bya ba la/ yod pa ma yin pa'i sgro 'dogs pa'i rtsa ba med pa can gyi dngos po med pa'i phyir/ dngos po la rtag pa ni gang du yang snang ba ma yin no/ /brtags pas stong pa de'i phyir dri ma rnams ni glo bur ba yin no//de phyir sngar nus med pa yang / /phyis de rang bzhin la ci nus/ /zhes bya ba la/ de'i phyir sngar thos pa dang / bsams pa'i dus su de kho na nyid mthong ba la gags byed pa'i nus pa med na phyis lam mngon du byed pa'i tshe/ sems kyi rgyud lam gyi ngo bo nyid du gyur na/nyes pa rnams la skye ba'i nus pa lta ga la yod/ dad pa la sogs pa dman pa dgra bcom par gyur pa yang 'dod chags dang bral ba las nyams par gyur nas lam mngon du byed par 'gyur ba dang / yul nye bar gyur pa las nyon mongs pa rnams 'jug par 'gyur te/ de bas na ji ltar nyon mongs pa slar mi skye ba yin zhe na/smras pa/ nus pa yod na'ang gnod pa can/ /skyes nus snying po can dngos la/ /ldog par skyed nus yod min te/ /'dam gyi nang gi me bzhin no/ /zhes bya ba la/ gal te yang dad pa dman pa la sogs pa'i dgra bcom pa la skyon rnams skye na yang nang du gyur pa'i gnod pa can skyed nus pa can gyi rgyud la skyon gyi tshogs rnams shin tu skyed par nus pa ma yin te/dper na sa gzhi 'dam bur gyur pa la me skyed pa'i nus pa med pa bzhin no/ /'di ltar/ 'tshe ba med la yang dag don/ /ngo bo nyid la phyin log gis/ /brtson dang ldan yang gnod med de//blo ni de phyogs 'dzin phyir ro/ /zhes bya ba la/ ngo bo nyid ni brtson pa med par bzlog par nus pa ma yin te/ gang zhig gis skyon mthong nas yon tan la 'jug par byed cing yon tan mthong nas skyon la 'jug par mi byed de/ lam la goms pa can ni yon tan mthong nas skyon la mi 'jug cing /skyon mthong nas yon tan la ldog par mi byed de/ lam gyi yon tan rnams ni 'tshe ba med pa can yin pa'i phyir te/ skyon thams cad dang bral pa'i phyir dang / rab tu zhi ba'i bde ba las mi 'gyur ba'i phyir/ 'tshe ba med pa'i lam ye shes kyi ngo bo nyid yin no/ / ngo bo nyid ni bzlog par mi nus te/ shes pa nyid kyang med par thal bar 'gyur ba'i phyir/ lam ni bden pa'i yul can de bas na/ yul gnas bzhin du ji ltar lam ldog par 'gyur/ de'i 'tshe ba med pa ni yang dag pa'i don dang ngo bo nyid yin te/ de ni phyin ci ldog gi skyon gyis bzlog par nus pa ma yin no//gzhan yang sems de'i phyogs 'dzin pa ni skyon la 'jug pa ma yin te de bas na skyon gyi don du brtson pa la 'jug pa ni ma yin te/ dngos po ma lus pa'i ngo bo nyid yongs su 'jal bar nus pa can ni yon tan de'i phyogs 'dzin pa'i phyir/ 'bad par byas kyang lam la gnod pa ni ma yin no//'di dag gis ni lam zhes bya ba'i ngo bo nyid bstan to/ /'o na 'dod chags kyang zhe sdang dag 'gal ba'i rnam pa can du gyur pa yang gcig kho na la gnod pa ma yin te/ gnod par byed pa'i 'dod chags la yang zhe sdang gis gnod par byed pa mthong ba'i phyir dang / de bzhin du 'dod chags kyang zhe sdang la slar gnod pa mthong ba'i phyir ro//de ltar bdag dang / bdag med pa mthong ba dag kyang phan tshun gnod pa byed pa ma yin nam/ de bas na lam ni nyon mongs pa dang bral ba thob par byed pa ma yin no zhe na/ smras pa ni/ bdag 'dzin rgyu gcig can nyid dang / /rgyu dang 'bras bu'i ngo bo'i phyir//'dod chags khong khro dag phan tshun/ /tha dad na yang gnod pa med/ /ces bya ba yin te/ 'dod chags dang zhe sdang dag bdag tu 'dzin pa'i rgyu can yin pa'i phyir/ bdag tu 'dzin pa yod na gcig kyang gtan du chags par mi 'gyur gyi/ phan tshun 'gal bar gyur pa yin yang rim par skye ba nyid du 'gyur ro//gzhan yang 'dod chags dang / zhe sdang dag phan tshun rgyu dang 'bras bu'i dngos po yin pa'i phyir/ 'gal ba yin yang gnod par mi byed do/ /'di ltar gang dag la khro ba dang 'brel pa'i sdug bsngal gyi rgyu de ni gdon mi za bar bde bar 'dod de/ de bas na de dag rgyu dang 'brel ba yin gyi bde ba'i rgyu nye bar blangs pa na gdon mi za bar gzhan la gnod pa dang /khro ba dang / 'brel pa can yin te/ de bas na 'dod chags ni khro ba skyed pa nyid yin no/ /bdag med pa mthong ba ni thams cad du bdag tu 'dzin pa dang 'gal ba'i phyir/ 'gog pa thob par byed pa yin no//byams pa la sogs pa zhe sdang la sogs pa'i gnyen por dam pa'i chos nas gsungs pa ma yin nam/ de'i phyir/ ji ltar bdag med pa mthong ba kho na lam du 'gyur zhe na/ 'dir smras pa/ byams pa sogs dang 'gal med phyir/ /shin tu nyes pa tshar gcod phyir//nyes kun de yi rtsa ba can/ /de yang 'jig tshogs lta ba yin/ zhes bya ba yin te/ gal te yang zhe sdang gi gnyen po byams pa dang / 'dod chags kyi gnyen po mi sdug pa dang / 'tshe ba'i gnyen po snying rje dang / phrag dog gi gnyen po dga' ba dang / thams cad kyi gnyen po btang snyoms yin pa de lta na yang byams pa la sogs pa las shin tu nyes pa rnams tshar gcod pa ma yin te/gti mug dang 'gal ba med pa'i phyir ro/ /gti mug yod kyang nga rgyal med pa las nyes pa thams cad spong ba ma yin nam zhe na/ de ni ma yin te/ gang gi phyir 'dod chags la sogs pa'i nyon mongs pa thams cad gti mug gi rtsa ba can yin pa'i phyir ro//gti mug de yang 'jig tshogs la lta ba ste/ nyon mongs pa can gyi gti mug ni 'jig tshogs la lta ba yin pa'i phyir ro/ /dgra bcom pa'i mi shes pa gang yin pa de ni nyon mongs pa can ma yin pa'i phyir/de dag gti mug las kyang grol ba ste/ 'jig tshogs la lta ba dang bral ba'i phyir ro/ /de lta na ni 'gyur mod kyi/ shes par ma gyur pa'i ngo bo nyid can ma rig pa yin la/ 'jig tshogs la lta ba ni shes pa'i ngo bo nyid can yin na/ de ji ltar 'jig tshogs la lta ba nyid ma yin zhe na/smras pa ni/ rig pa'i mi mthun phyogs nyid dang / sems byung nyid du dmigs pa'i phyir/ /log par dmigs pa mi shes pa'o/ /gsungs phyir gzhan ni rigs ldan min/ /zhes bya ba la/ gal te mi gsal ba'i ngo bo nyid ma rig pa yin na/ gzugs la sogs pa log pa yang ma rig par 'gyur te/gzugs la sogs pa las de las lhag pa ci zhig yod/ de bas mya ngan las 'das pa dang / 'gog pa'i snyoms par 'jug pa yang ma rig par 'gyur ro/ /'on te mya ngan las 'das pa ni nyon mongs pa'i rgyu ma yin pa'i phyir/ ma rig pa ma yin no zhe na/de ni ma yin te/ ma rig pa mi gsal ba'i mtshan nyid kyi ngo bo nyid can ma yin te/ 'jig tshogs la lta ba nyon mongs pa'i rgyu yin pa'i phyir ma rig pa ste/ rig pa dang 'gal ba'i phyir ro/ /ji ltar yang chos gzhan rjes su 'dzin pa'i mtshan nyid can yin gyi/ de med pa tsam ni chos ma yin pa ma yin zhing /de las gzhan pa tsam yang ma yin te/ 'on kyang rjes su mthun pa dang 'gal ba la gnod pa ni chos ma yin pa'o/ /de bzhin du bden pa'i don gsal bar med pa tsam ni brdzun pa ma yin gyi/ 'on kyang med pa ston pa ni brdzun gyi tshig yin no//de lta na ni dngos po yod pa nyid du gyur kyang gang gi tshe 'khrul nas med pa nyid du rtogs par gyur pas med pa'o zhes ston par byed pa de'i tshe bden pa nyid ma yin pa dang / dngos po med pa yang yod pa nyid du rtogs nas yod ces ston par byed pa de'i tshe brdzun du 'gyur ba ma yin nam zhe na/de ni ma yin te smra ba ni rnam par rtog pa'i spyod yul can te/ phyi rol ston pa ni ma yin no/ /des na dngos po gang zhig ji ltar shes pa de de bzhin du ston pa ni brdzun ma yin te/ phyin ci log gi tshig ni brdzun yin no/ /de bzhin du rig pa dang 'gal ba gzhan ni ma rig pa ste/ de nyid nyon mongs pa'i rgyu yin pa'i phyir ro//mi snang bar 'gyur ba'i stong pa nyid ji ltar gang zhig gi rgyur 'gyur/ ma rig pa gtan med pa ma yin zhing / yod pa yang ma yin te/ 'on kyang log pa dang sgyu mar snang ba ste nyon mongs pa yang log pa dang sgyu mar snang ba nyid yin nam/ des na skyon 'di med do zhe na/'dir smras pa/ ma rig pa yod pa ma yin/ /zhes bya ba ci gsal ba med pa la brjod dam/ phyin ci log tu dmigs pa yin de la gal te phyogs dang po yin na de'i tshe su la yang rtogs pa med pa'i phyir/ 'gro ba long ba nyid du 'gyur ro/ /'on te phyogs gnyis pa len na/ de lta na yang phyin ci log tu dmigs pa'i mi shes pa yin pa'i phyir/ji ltar ma rig pa dngos po med par 'gyur/ rig pa yod par myong ba ma yin nam/ de lta ma yin na/ de gtan med na ni dbu ma'i lta ba khas blangs par 'gyur ro/ /'on te ma rig pa las snang ba gang yin pa'i gzung ba de ni brdzun pa'i phyir de med pa'o zhe na/'o na gzung ba'i rnam par snang ba ji ltar med pa yin/ de ltar na 'o na ni log pa'i shes pa snang ba gang yin pa'i gzung ba de yod na ji ltar ma rig par 'gyur zhe na/ rtag pa la sogs par rtogs pa shes pa las log pa gzung bar snang ba ma yin te/'on kyang gang snang ba de thams cad dang rig pa'o/ /de la 'khrul pa ni ma yin te/ tshangs pa yang 'khrul pa nyid du thal bar 'gyur ba'i phyir ro/ /de bas na ma rig pa shes pa'i ngo bo nyid de/ nyon mongs pa'i rgyu yin pa'i phyir de skad ces tha snyad btags so/ /ji ltar yang rig pa 'khrul par tha snyad 'dogs pa la ltos nas yin gyi/rang gi ngo bo nyid kyis ni ma yin no zhes bstan to/ /sems las byung ba nyid kyi yang phyir dmigs pa ste/ ma rig pa ni log par dmigs pa dag yin no/ /rten dang dmigs pa dang / rnam pa dang / rdzas dang / dus rnams mtshungs pas mtshungs par ldan pa'i phyir mtshungs par ldan pa'o zhes gsungs pa'i phyir dang /shes rab kyi rnam pa las phyin ci log tu ba rtogs pa'i ngo bo nyid ni ma rig pa'o/ /zhes mdo las gsungs pa'i phyir dang / de la mi shes pa dang bral ba gang zhe na/ ji ltar gyur pa'i chos rnams la sgro 'dogs pa dang bral ba gang yin pa'o//de bzhin du gang su dag 'jig rten pas nye bar btags pa'i rig pa de dag thams cad bdag tu mngon par zhen pa las 'gyur te/ bdag tu mngon par zhen pa dang bral ba ni ma yin no zhes kyang gsungs pa'i phyir log par dmigs pa ni mi shes pa'o/ / 'jig tshogs la lta ba ma rig pa'i phyogs gcig ma yin nam/ ma rig pa yang nyon mongs pa thams cad kyi rjes su 'gro ba mi gsal ba'i ngo bo nyid can yin na/ de ji ltar 'jig tshogs la lta bar brjod de/ khyad par gyi sgra'i yul spyi ma yin pa'i phyir ro/ /de bzhin du gal te ma rig pa lta ba nyid yin na/de'i tshe ma rig pa ni lta ba dang mtshungs pa dang ldan pa'o zhes bya ba mtshungs par ldan pa'i don du mi 'gyur te/ ldan pa ni tha dad pa'i rgyu yin pa'i phyir ro zhe na/ 'dir smras pa ni/ 'gal ba gang yin 'dir bshad bya/ /stong nyid mthong dang de 'gal phyir/ /de yi bdag nyid skyon kun dang //'gal bar rab tu grub pa yin/ /zhes bya ba yin te/ mtshungs par ldan pa nyid ni spyi dang khyad par tha dad par brtags pa ma yin te/ dper na nags pa la sha dang ldan pa bzhin te/ dngos su na ba la sha'i ngo bo nyid kho nar brjod do/ /de bzhin du khyad par gyi sgras kyang de'i ngo bo nyid ma rig pa gleng gzhir gyur pa'i gtso bor bstan pa'i phyir/lta ba dang ldan pa'i ma rig pa'i zhes bya ba la 'gal ba med do/ /gang gi phyir bdag tu lta ba ma rig pa yin pas/ nyon mongs pa thams cad de'i rtsa ba can te/ des na bdag med pa mthong ba de dang / bdag tu 'dzin pa 'gal ba'i phyir/ de'i bdag nyid de/bdag tu 'dzin pa'i rgyu can nyon mongs pa dang / stong pa nyid mthong ba 'gal ba grub pa yin no/ /de bas na gti mug 'gags na 'khor ba ma lus pa 'gag pa'i phyir/ nges par 'byung ba'i rnam pa nyid du brjod do/ /'dod chags la sogs pa rnams srog chags kyi chos yin pa'i phyir zad par mi rigs te/gzugs la sogs pa bzhin ma yin nam zhe na smras pa/ zad min srog chags chos nyid phyir/ /gzugs sogs bzhin no ma grub phyir/ /gnyen po'i phyogs dang 'brel yod na/ /spong ba dag kyang mthong phyir ro/ /zhes bya ba la/ gzugs la sogs pa bzhin du 'dod chags la sogs pa rnams srog chags kyi ngo bo nyid kyi chos yin pa'i phyir zad par mi 'gyur ba gang yin pa de ni ma yin te/srog chags kyi chos su de nyid ma grub pa'i phyir ro/ /srog chags 'ba' zhig kyang yod pa ma yin te/ 'on kyang skad cig ma brgyud pa'o zhes bstan to//gzhan yang 'dod chags la sogs pa'i gnyen po mi sdug pa bsgom pa la sogs pa dang 'brel pa yod na/ 'dod chags la sogs pa spong ba mthong ba yod de/ de'i phyir mi zad pa ma yin no/ /de dag gis ni 'gog pa'i bshad pa bsdus nas bstan to/ /'o na gser zhu bar gyur pa yang brtas na sra bar gyur pa de bzhin du bdag med par mthong ba skyes kyang slar 'dod chags la sogs pa 'byung bar 'gyur ro zhe na/smras pa/ sra ba bzhin du'ang skye min te/ /nyes pa dag ni 'gal can gyi/ /de yi bdag nyid ldog med dang / /ma nges phyir na thal ba bzhin/ / zhes bya ba la lam mngon du byed pa dang 'gal ba can gyi nyes pa rnams gser gyi sra ba bzhin du slar skye ba ma yin te/ bdag med pa mthong ba'i las la goms pa mi 'jigs pa'i phyir ro/ /gnyen po yod par gyur na nyes pa 'byung ba ma yin no zhes bstan to/ /'di thal ba yis kyang ma nges pa yin te/'di ltar me'i stobs kyis thal bar gyur pa slar shin tu ldog pa ni ma yin no/ /de bzhin du lam gyi nyon mongs pa log pa ni slar nye bar skye ba ma yin no/ /de dag gis ni lam bshad pa bsdus te bstan to/ /bdag bsgoms pas kyang thar par 'gyur ba ma yin nam/bdag med pa mthong ba de yis ci zhig bya/ de ltar lung las kyang bdag tu bsam par bya'o zhes 'byung ngo / /de bas na lam ni nges par 'byin pa ma yin no zhe na/ 'dir smras pa/ gang zhig nga zhes bdag lta ba/ /de la rtag pa nyid du chags/ /chags pas de la sred 'gyur zhing //sred pa skyon rnams sel bar byed/ /ces bya ba la/ bdag tu lta ba can ni gdon mi za bar bdag rtag par chags pas bcing bar 'gyur to/ chags pas bde ba la sred pa dang ldan par 'gyur ro/ /gang gis gang la chags pa de ni bde ba la 'dod pa dang ldan par 'gyur ro/ /bdag tu lta ba can yin yang chags pa yod do zhes zer ba de ni rigs pa ma yin nam/shing mthong yang shing la chags pa med pa dang / bud med mthong ba tsam gyis kyang de la chags par mi 'gyur ba'i phyir ro/ /gang gis bdag mthong ba de la chags pa yod do zhes zer ba de ni rigs pa ma yin no zhe na/'o na gal te bdag tu lta ba la chags pa med pa na gang la yang chags pa nyid med par 'gyur te/ rgyu gzhan med pa'i phyir ro/ /shing la yang bdag la phan 'dogs par ma mthong ba'i phyir chags par mi 'gyur ro/ /gang la bdag la phan 'dogs pa can du chags pa de ji ltar bdag la chags pa med par 'gyur na/'on te chags pa'i khyad par las bdag la chags pa med la gzhan la chags pa yon tan che ba las snying rjes chags so zhe na/ gang gzhan la chags pa yod pa de la bdag la yang chags par ci ste mi 'gyur/'di ltar bdag la chags par snang ba nyid ma yin nam/ bdag la chags pa med na gzhan la chags par mi 'thad do/ /gzhan yang yon tan can zhes bya ba la/ gal te gzhan dag la phan 'dogs pa yin na de'i tshe rtog pa sngon du ma btang ba ste/ bdag yongs su btang nas gzhan la phan par byed pa ni shin tu dgos pa med par ston pa'o//gzhan don byed pa nyid bde ba ma yin nam/ thar par bdag gi don du 'bad rtsol byed pa ni ma yin no zhe na/ de lta na ni bdag gi bde bar 'khrul pas 'khrul pa dag gzhan gyi bde bas ji ltar grol bar 'gyur/ ji ltar yang 'khrul pas gzhan gyi bde ba skyed pa de bzhin du/bud med la 'khyud par byed par yang 'gyur te/ khrel dang bral ba'i spyod pa yin no/ /chags pa'i dga' ba 'dod pa dag rang la phan pa don du gnyer ba'i phyir khrel yod pa ma yin no/ /ji ltar bdag la bsam gtan byed pa'i bde ba 'dod pa de bzhin du/ chags pa'i bde ba yang yin te/bde ba de gnyis la cung zad kyang khyad par med pa'i phyir ro/ /chags pa'i bde ba mi bden pas khyad par yod do zhe na mi bden pa ma yin te/ bde ba thams cad la khyad par med pa'i phyir ro/ /chags pa'i bde bas dmyal bar 'dren pas mi bya ba'i cha ma yin nam zhe na/ yon tan chen po dang ldan pas gzhan gyi don du dmyal bar 'gro bar khas len pa'i phyir ma yin no/ /de bas na bdag yod na sred pa skyon dang / skyon med pa mnyam par byed pa yin te/ de'i phyir de'i skyon bsal nas/ yon tan mthong ba yongs su sred/ /nga'i snyam de yi sgrub byed len/ /des na ji ltar bdag mngon chags//de srid de ni 'khor ba yin/ /zhes bya ba la/ bdag don dam par yod pa na/ gang zhig bdag la phan 'dogs pa de yang dngos po nyid yin pa'i phyir don dam par phan 'dogs pa gang yin pa de nyid yon tan can du rtogs par bya'o/ /de bas na yon tan mthong ba ni 'di nga'i snyam nas bde ba'i sgrub thabs nye bar len to//des na bdag tu mngon par zhen pas 'khor ba yin pa'i phyir bde ba'i sgrub thabs su phag mo dang sbyor ba yang 'gyur ro/ /de bas na/ bdag yod na ni gzhan 'du shes/ /bdag gzhan cha la 'dzin cing sdang / /'di dag dang ni yongs 'brel pas/ / nyes pa thams cad 'byung bar 'gyur/ /zhes bya ba la/ bdag tu 'dzin pa yod na ni gzhan gyi blo skye ste/ bdag dang gzhan gyi cha la chags pa dang sdang ba rtogs pa'i phyir ro/ /chags pa dang sdang ba dag dang 'brel pa'i ser sna la sogs pa'i nyes pa thams cad 'byung bar 'gyur ro zhes bya ba la/bdag la chags par 'gyur gyi/ bdag gir mi chags pa ma yin nam/ des na bdag gi ba la chags pa med pa'i phyir chags pa'i bde ba'i tha snyad med par 'gyur ro zhe na/ 'dir smras pa/ bdag la chags par gyur na ni/ /nges par de la chags bral min/ /skyon med bdag la chags pa dang / /bral ba'i rgyu ni yod ma yin//zhes bya ba la/ bdag la chags pa zhugs par gyur na skyon mthong ba ldog pa ma yin te/ bdag la chags pa de yang bdag gi ba'i chags par 'gyur ro/ /bdag la skyon med par 'gyur na chags pa dang bral ba'i rgyu ni yod pa ma yin no/ /de bas na bdag dang bdag gi ba la chags pa dang ldan pa ni skyon thams cad bsal nas thams cad du 'jug pa'i phyir 'khor ba las ldog pa ni ma yin no//chags pa skyon dang bcas she na/ /de las ci 'gyur de spangs na/ /zhes bya ba la/ de ltar ni 'gyur mod kyi/ bdag dang bdag gir chags pa ni 'khor ba'i rgyu yin pa'i phyir dang / bdag gi ba la chags pa dang ldan pa ni skyon can yin pa'i phyir/de la chags pa ma yin no/ /gzhan gyi nyes pas kyang chags pa skyon can du byed na chags pa rang nyid gang du skyon can yin pa de'i tshe ci'i phyir chags par byed/ de'i phyir chags pa skyon dang lhan cig 'jug pas chags par mi byed do zhe na/ gal te chags pa skyon can de las cir 'gyur/de skyon can yin pa'i phyir spang bar rigs so zhe na ma yin te/ gzhan gyi skyon gyis chags pa skyon can yin na yul gyi skyon gyis chags pa spang bar rigs pa'i phyir ro/ /'di yi yul sun ma phyung bar/ /de spong nus pa ma yin no/ /zhes bya ba la/ yul sun ma phyung ba ni bdag la chags pa skyon can yin pa ma yin te/bde ba'i rgyu las yon tan yod pa'i phyir ro/ /'on te chags pa nyid skyon can yin no zhe na/ yin mod de ci nyes/ skyon can yin pa'i phyir chags pa spang bar bya ba yin no zhe na/ ma yin te yul gyi skyon ma gtogs par chags pa spang bar mi nus pa'i phyir ro//'on te phyi rol gyi dngos po yon tan dang ldan pa yin yang spang bar bya ba de bzhin du/ chags pa yon tan dang ldan pa yang spang bar bya ba yin no zhe na/ 'dir smras pa/ yon tan skyon dang rjes 'brel pa'i/ /'dod sdang la sogs spang ba ni/ /de dag yul la mthong min pa/ /go rims gang yin phyi la med//ces bya ba la/ 'dod pa dang sdang ba la sogs pa'i yon tan dang skyon mthong ba las yod pa ni de med par 'gyur bar rigs so/ /bdag la phan par bsgrub pa nyid kyi yon tan dang / sdug bsngal bsgrub pa nyid kyi skyon de yang bdag yod na yod par 'gyur ro/ /de bas na 'dod pa dang / sdang ba la sogs pa spong ba ni yod pa ma yin no/ /phyi rol gyi dngos po rang gi rgyu la rag las pa ni de med na spong ba yin te/ de'i phyir gal te skyon dang yon tan de dag rang gi yul la mthong na ni 'dod pa dang sdang ba la sogs pa skyon dang yon tan gyis bskyed pa 'di spong ba yin te/ skyon dang skyon mthong ba ni spong ba'i rgyu yin pa'i phyir ro//phyi rol gyi dngos po la 'jug pa'i go rims gang yin pa de ni chags pa la sogs pa 'di la yang blta bar bya'o// //tshad ma rnam 'grel gyi 'grel pa las/ /bam po bcu gcig pa/ chags pa'i yul la skyon med kyang chags pa la yon tan ma mthong ba'i phyir chags pa spong bar byed pa ma yin nam/yon tan med pa gang la yang 'bad rtsol byed pa ma yin no zhe na/ de ni mi bden te/ chags yon tan las chags pa min/ /'on kyang don yon tan mthong las/ /yin te rgyu tshang de la ni/ /de yi 'bras bu gang gis bzlog /ces bya ba la/ chags pa'i yon tan mthong ba las chags pa ma yin te/ 'on kyang bde ba'i sgrub thabs mthong ba las chags pa skye ba'am/ chags pa'i rgyu bde ba'i sgrub thabs tshang ba dang / de la bdag yod par gyur na 'bras bu chags pa gang gis zlog par byed/ de bas na bdag yod na 'khor ba chad par 'gyur ba ma yin no//gzhan yang / chags las skyon dang bcas mthong gang / /rtag tu sdug bsngal rten yin te/ de ltar yang 'di chags bral min/ /rang gir mthong phyir dper bdag bzhin/ /zhes bya ba la/ rang gi skyon mthong nas chags pa spong bar 'gyur ba'i chags pa la skyon dang bcas par mthong ba gang zhig yin/'on te sdug bsngal gyi rten chags pa ma yin pa'i phyir spong ngo zhe na/ sdug bsngal rten yin pa de lta na yang 'dir chags pa spong bar mi rigs te/ bdag gi ba'i blo yod pa'i phyir/ dper na bdag mi spong ba bzhin no/ /dang po sdug bsngal gyi rten bdag yin pa'i phyir de yod na phyis chags pa sdug bsngal gyi rgyu yin no//bdag gi ba'i don med na gang zhig sdug bsngal ba yin/ de bas na rnam pa gnyi ga yang sdug bsngal gyi rgyu yin pa'i phyir spang bar bya zhing chags par yang mi bya'o/ /de rnams med na bdag sdug bsngal/ /rgyu min de yang de dang 'dra//de ltar gnyi ga'ang skyon med pa/ /de phyir gnyi ga chags bral min/ /zhes bya ba la/ 'on te bdag sdug bsngal gyi rgyu gzhan dang sbyor bar 'gyur gyi/ de rang nyid la skyon 'di yod pa ma yin te/ chags pa dang / chos dang / chos ma yin pa dang / 'du byed pa'i grogs byed pa can gyi bdag ni sdug bsngal gyi rgyu yin/chos la sogs pa de rnams dang bral na bdag sdug bsngal gyi rgyu ma yin te/ de bas na spang bar bya ba ma yin no zhe na/ chags pa la sogs pa de yang skyes bu med na sdug bsngal gyi rgyu ma yin te/ des na de dag kyang bdag gzhan skyon dang bcas pa ste de ltar gyur na chags pa la sogs pa dang bdag gnyi ga skyon med pa'i phyir de dag dang bral ba mi srid do//gal te sdug bsngal bsgoms pa yis/ /sbrul gyis yan lag gzung bzhin 'gyur/ /bdag gi blo ni bcom pas 'dir/ /dor ba yin gyi bzlog la min/ /dbang po la sogs longs spyod pa'i/ /rten nyid du ni bzung ba las//bdag gi blo ni gang gis bzlog /de la chags bral de gang las/ /zhes bya ba la/ chags pa'i rgyu bde ba'i rgyu nyid ma yin nam/ sdug bsngal gyi rgyu yod pa las chags pa dang bral bar 'gyur ro/ /gnod par byed pa la chags pa med pa'i phyir/ sdug bsngal bsgoms pas chags pa la sogs pa 'joms pa yin te/ dper na sbrul gyis zos pa'i yan lag 'dor ba de bzhin no zhe na/ bdag gi ba'i blo'i yul ni sdug bsngal gyi rgyu yin yang spong ba 'jig rten na ma mthong ngo / /de bas na bdag gi ba'i blo dor ba nyid kyis 'dod par 'gyur gyi/bdag yod pa la chags pa dang bral bar mi 'gyur ro/ /'on te bdag gi blo med pa nyid las mig la sogs pa spong bar 'gyur ba de bas na mig la sogs pa'i dbang po dang bral bar 'gyur ro zhe na ma yin te/ mig la sogs pa longs spyod pa'i rten nyid du bzung ba la bdag gi ba'i blo gang gis zlog par byed de/'di ltar lha thob par gyur cig /klu thob par gyur cig ces khyad par can gyi lus su smon par byed do/ /smon pa'i blo de lus la sogs pa la chags pa dang bral bar ci yis 'gyur te mi 'gyur ro/ /'di ltar/ lus la skra sogs bog pa las/ /btsog bcas blo ni skye 'gyur zhing / / gzhan la chags dang bcas 'gyur ltar/ /thams cad kyis ni mngon sum yin/ /zhes bya ba la/ gang gi tshe skra la sogs la longs spyod pa'i yul du gyur pa de'i tshe chags pa dang bcas pa'i yul du 'gyur zhing bdag gi ba'i blo skyed par byed do/ /gang gi tshe yang lus la lhung ba na longs spyod pa'i yul dang bral ba de'i tshe btsog pa dang bcas pa kho na'i blo skye bar 'gyur ro//gzhan yang / rig pa can la sogs pa rnams/ /de la rang blo 'phrod 'du ba/ /la sogs 'brel pa skyed pa yin/ /de bzhin 'brel pa de nyid ni/ /de ltar mthong yang bcom pa min/ /zhes smras te/ bde ba la sogs pa dang 'phrod pa 'du ba'i 'brel pa dang /lus dang ldan pa dang / lus la brten pa'i gzugs la sogs pa ldan par 'du ba dang / rna ba'i dbang po dang ldan pa'i bdag yin te/ 'phrod pa 'du ba la sogs pa'i 'brel pa las lus la sogs pa de la bdag gi ba'i blo skye'o/ /'phrod pa 'du ba la sogs pa'i 'brel pa de yang /de ltar skyon mthong bar gyur kyang de bzhin du gnas pa'i phyir bdag gi bar 'joms pa yin pas chags pa las 'khor bar 'gyur ro/ /'on te lus la sogs pa la ldan pa la sogs pa'i 'brel pa khas mi len no zhes/ 'dir lan smras pa/ 'phrod pa 'du sogs med pa yang //thams cad la ni phan 'dogs yod/ /ces bya ba la/ phan 'dogs par mthong ba thams cad la chags par 'gyur ba de bas na bdag lus la sogs pa dang 'phrod pa 'du ba la sogs pa'i 'brel pa khas mi len mod kyi/ de lta na yang lus la sogs pa thams cad la phan 'dogs pa nyid du yod pa'i phyir 'dod chags dang bral ba nyid du mi 'gyur ro//gal te sdug bsngal rten yin phyir/ /rang blor mi 'gyur sor mo bzhin/ /gcig tu de ni sdug bsngal min/ /phal cher dug bcas zas bzhin no/ /zhes bya ba la/ 'on te sdug bsngal la phan 'dogs pa'i lus la sogs pa rnams ni bdag gi ba'i blor mi 'gyur te/dper na sbrul gyis zos pa'i sor mo sdug bsngal skyed par byed pas bdag gi ba'i blo med pa bzhin no zhe na/ de ni bden pa ma yin te/ de'i lus ni gcig tu sdug bsngal bar mi 'gyur te/ ji ltar sdug bsngal ba de ltar bde bar yang 'gyur te/zas dug can bzhin no/ /dug dang bcas pa'i kha zas ni sdug bsngal kho na ma yin te/ 'grangs pas bde bar yang byed pa'i phyir ro/ /de bzhin du phag la sogs pa'i lus sdug bsngal gyi ngo bo nyid yin yang res 'ga' bde bar yang 'gyur te/ de'i phyir lus la sogs pa spang bar bya ba'i yul can ma yin no//'on te phag la sogs pa'i lus sdug bsngal dang 'dres pa'i phyir sdug bsngal nyid yin no zhe na/ 'o na ni bde ba dang res 'ga' ldan pa'i phyir bde ba nyid du yang 'gyur ro/ /'on te ji ltar dug dang bcas pa'i kha zas res 'ga' bde ba'i rgyur 'gyur yang /phal cher sdug bsngal gyi rgyu yin pa'i phyir sel ba de bzhin du/ lus la sogs pa yang bde ba'i rgyur 'gyur yang phal cher sdug bsngal skyed par byed pa'i phyir sel to zhe na/ 'dir smras pa/ khyad par can gyi bde chags las/ /de 'gal na ni chags par 'gyur/ /khyad par bde ba la sred pa'i//bde ba cung zad yongs su spangs/ /bsam pa med par bdag cag las/ /ji ltar rnyed pa bzhin la 'jug /bud med dag ni ma rnyed pa/ /dud 'gro la 'dod spyod mthong bzhin/ /zhes bya ba la/ gal te sdug bsngal gyis ma dkrugs pa gang yin pa'i khyad par can gyi bde ba rnyed pa de'i tshe/bde ba khyad par can thob pa'i phyir bde ba khyad par can dang 'gal ba'i zas dug can dang / phag pa la sogs pa'i lus la chags pa dang bral bar 'gyur ro/ /gang gi tshe khyad par can gyi bde ba'i yul ma rnyed pa de'i tshe/ rnam pa gzhan dag med pa'i phyir ji ltar rnyed pa'i yul ma bor bar yul bdag la chags pa las 'jug par 'gyur te/dper na shin tu chags pa can 'dod pas myos pa'i skyes bu bud med med na/ dud 'gro la 'dod pa spyod pa mthong ba de bzhin du/ khyad par can gyi lus med na phag pa la sogs pa'i lus su smon par 'gyur ro/ /de bas na bdag yod pa la 'khor ba 'chad par 'gyur ba ni ma yin no//gzhan yang spyod pa dang bral ba dag khyad par can ma yin pa'i bde ba la sred pas rtog pa med pa nyid du skye'o/ /'on te spyod pa nyid las sred pa dang bral ba yin no zhe na/ 'o na ni spyod pa nyid sdug bsngal gyi rgyur 'gyur ba'i phyir/ de kho na las chags pa dang bral bar rigs so//'on te spyod pa nges par rgyu'i stobs las 'byung ngo / /de ltar na bdag med par rtogs pa la yang / spyod pa mi ldog pa'i phyir/ bdag med pa mthong ba la thar par mi 'gyur ro zhe na/ de lta na bdag goms pa yang mi srid de/ bde ba dang / sdug bsngal dang / 'dod pa'i rten bdag bsgoms par gyur pa ji lta ba de dang 'dra bar gyur na/ gang las yongs su dag par 'gyur/ 'on te skyes bu'i byed pas nyes pa bral ba 'di byed do zhe na/ de ni ma yin te/ ji ltar sol ba bdar ba byas kyang dkar por mi 'gyur ba de bzhin du/ gnyug ma'i 'dod chags la sogs pa'i nyes pas skyon can du gyur pa'i skyes bu ji ltar skyes bu'i rtsol bas dag par byed de/rang nyid skyon can de bzlog par ni mi nus te/ skyon can skyon med par ji ltar 'gyur/ de ltar dag par gyur na skyon can las tha dad par 'gyur ro/ /de nyid smras pa/ bdag nyid la zhen gang yin te/ /ji ltar de ni 'jig par 'dod//ces bya ba la/ gal te bdag ngo bo nyid kyis skyon can ma yin na/ 'dod chags la sogs pa dang ldan yang ji ltar skyon can du 'gyur/ dbyug pa dang ldan pas lha byin dbyug par 'gyur ba ma yin pa'i phyir ro/ /'dod chags la sogs pa'i rigs pa med pa'i skyes bu 'dod chags can nyid du mi srid do//'on te tha dad pa'i 'dod chags la sogs pa rig pas 'dod chags can nyid yin no zhe na/ grogs dag 'o na ni bud med rig pa las bud med dang ldan par 'gyur ro/ /de bas na 'dod chags la sogs pa dang 'brel pas 'dod chags can gyi 'dod chags la sogs pa rig pa ni ma yin no//'dod chags la sogs pa 'dzin pas 'dod chags can du 'gyur na ni/ gzhan gyis 'dod chags 'dzin pa yang 'dod chags can du 'gyur ro/ /'on te bdag dang 'du bas 'brel pa'i chags pa des 'dod chags can yin no zhe na/'phrod pa 'du ba yang tha dad pa ma yin nam/ des na ji ltar phrad pa tsam la bud med dang ldan par mi brjod pa de bzhin du 'phrod pa 'du bas kyang 'dod chags can du mi 'gyur ro/ /'on te 'dod chags bdag dang 'du ba gcig pas tha dad pa mi rig cing ldan pa can la ni tha dad pa'i blo skye'o zhe na/de lta na 'o na ni 'dod chags las bdag tha dad par ci yis shes/ gang gi tshe bdag gi ngo bo tha dad par mi rig par de'i tshe bdag rig par ji ltar mi 'gyur te/ rang rig pa las 'khrul pa med do zhes bstan to/ /'on te bdag rig par byed pa ma yin la rig par bya ba ste/ phyi rol bzhin no zhe na/'o na ni gzung bya yin pa'i phyir rig par byed pa med pas longs spyod pa por mi 'gyur te/ gzugs la sogs pa rnams spyad par bya ba nyid la spyod pa po med pa'i phyir ro/ /de bas na bdag la longs spyod pa po tha dad par 'gyur ro/ /de la gzhan dgos pas thug pa med par 'gyur ro/ /'on te longs spyod pa der 'du bas 'brel pa'i phyir longs spyod pa por 'gyur ro zhe na/longs spyod pa ni nyams su myong ba las tha dad pa ci yang med pa ma yin nam/ longs spyod pa ni spyad par bya ba la gnas pa nyid de/ ji ltar bdag longs spyod pa'o zhes bya ba'i blo skye ba de bzhin du/ 'di ni bdag gi longs spyod do zhes bya ba 'jig rten na snang ngo //de bas na rten dang brten pa'i dngos po gnyis ka la yod do/ /'on te dpog par byed pa las 'di longs spyod pa por brjod do zhe na/ mngon sum med par de la rjes su dpag pa ji ltar 'gyur 'on te bdag phra ba'i phyir rnal 'byor pa rnams kho nas yul du 'gyur gyi/da ltar bdag cag la sogs pa rnams kyis mi mthong zhe na/ rnal 'byor pas mthong bar yang nges pa 'di na ci yang med do/ /gzhan yang bdag cag la sogs pa med par rig pa yod pa'i phyir/ bdag ni rang rig pa'i ngo bo nyid kho nar khas blang bar bya ste/de lta ma yin na de med par thal bar 'gyur ba'i phyir ro/ /de yang bde ba la sogs pa rig pa'i ngo bo nyid du 'gyur na ni de 'jig pa nyid du 'gyur ro/ /gang zhig bdag la zhen pa de'i bdag de ji ltar 'jig par 'dod par 'gyur/ bdag de ni sdug bsngal med pa'i ngo bo nyid du khas blang bar bya'o//gal te sdug bsngal ba can yin te/ bde ba can ma yin na ni sdug bsngal gyi skabs na bdag rang nyid med par 'gyur ro/ /'on te bde ba dang sdug bsngal gyi gnas skabs nyid 'jig la bdag ma yin no zhe na/ ma yin te/ bde ba la sogs pa ma gtogs par de mi dmigs pa'i phyir te/bde ba dang sdug bsngal la sogs pa'i ngo bo nyid bor na/ rig pa'i rang bzhin gzhan du bdag snang ba ni ma yin no/ /de bas na ji ltar bde ba dang / sdug bsngal tha dad pa de bzhin du de'i ngo bo nyid kyi bdag kyang tha dad par 'gyur ro/ /'on te rig pa dang / rig pa po zhes 'dzin pas bdag tha dad pa yin no zhe na/'o na ni myong ba dang myong ba po zhes bya ba'i rtog pa las bdag tha dad na bdag gzhan las kyang tha dad pa nyid du 'gyur ro/ /'on te rang rig pas gzhan gyis bdag mi rig pa'i phyir tha dad do/ /bde ba rig pas kyang sdug bsngal mi rig pa'i phyir de rig pa tha dad pa nyid yin no zhe na/ des na snga phyi dag gcig pa ma yin pa'i phyir sdug bsngal gyi bdag nyid 'jig par thal bar 'gyur na/bdag la zhen pa gang yin pa de ji ltar 'jig par 'dod par 'gyur ther zug pa'i rtag pa yin pas sdug bsngal gyi ngo bo nyid du gnas par 'gyur ro/ /rtag pa ther zug pa yang phyi ma phyi ma'i gnas skabs rig pa ni ma yin pa ma yin nam/de ji ltar de nyid du gnas pa'i rtag pa nyid yin te/ 'gyur ba dang rim gyis 'byung bar dmigs pa'i phyir ro/ /gal te de rim gyis dmigs pa yin ni de'i tshe 'jig pa nyid thob par 'gyur ro/ /de ltar gyur na rim gyis dmigs par 'dod na 'jig pa yang 'dod par 'gyur ro//de lta na yang gang la bdag la zhen pa yod pa de la 'jig par 'dod par ji ltar 'gyur/ 'on te mtshungs pa ngo bo nyid du dmigs pas snga phyi gcig pa nyid yin te/ tha dad pa'i ngo bo nyid mthong na tha dad pa nyid du gsal ba'i phyir ro zhe na/ de ltar gyur na snga ma 'jig pa de bzhin du bdag la zhen pa gang yin pa de 'jig par 'dod pa ji ltar 'gyur/'on te rtog pa'i ngo bo nyid kyi bdag la thams cad gcig pa nyid de/ de yang khyad par can tha dad pas tha dad par snang ba ste/ dper na nam mkha' tha dad pa med kyang bum pa'i nam mkha' dang / snam bu'i nam mkha' zhes tha dad par 'gyur ba bzhin no//de bas na bdag tha dad par ma rig pas byas pa'o zhe na/ 'dir smras pa/ gal te/ ji ltar bum pa med na ni/ /bum pa'i nam mkha' ma yin na/ /'o na ni bum pa med na nam mkha' gzhan dang lhan cig tu 'gyur ba'i phyir nam mkha' la tha dad pa med pa bzhin du bdag kyang tha dad pa med pas rang dang gzhan gyi cha tha mi dad par 'gyur ba'i phyir bdag nyams pa nyid du 'gyur ro//nga'o snyam pa ni gzhan rnam par gcod pa'i bdag nyid yin pa'i phyir nam mkha' nyid kyi bdag nyid du gyur pa la bya ba dang / longs spyod pa la sogs pa med pas nam mkha' bzhin tha dad pa yin no/ /de lta na ni gang bdag tu zhen pa de'i bdag de ni ji ltar 'jig par 'dod/'on te dngos po'i stobs las 'ongs pa ji ltar brjod na ni bdag med pa nyid du thal bar 'gyur te/ rang gi ngo bo nyid rig pa tsam yod pa'i phyir ro/ /'on te rig pa nyid bdag yin te/ rtag pa dang khyab pa'o zhe na/ rig pa'i khyab pa nyid 'di gang zhig yin/ phyogs thams cad mnan pa ni khyab pa nyid yin zhing / dus du ma la khyab pa ni rtag par brjod pa ma yin nam/ rang rig pas kyang yul dang dus kyi khyad par 'dzin pa'i phyir ji ltar bdag khyab pa dang rtag par 'gyur/ 'on te bum pa la sogs pa gzhan gyi ngo bo nyid du bdag gnas pa'o zhe na/ de lta na yang 'khor ba par 'gyur te/lha sbyin la sogs pa'i ngo bo nyid du yang gnas pa'i phyir ro/ /de bas na grol bar 'gyur na srog chags kyang med par 'gyur te/ de lta bu'i thar pas ni dgos pa ci yang med pa'i phyir rtog pa sngon du btang ba'i rnal 'byor pa rnams ngo mtshar skyed pa yin no/ /don dam par bdag bya ba dang longs spyod pa la sogs pa la brten pa ma yin nam/de ltar yang de ma rig pa'i bag chags kho na las 'gyur ro/ /de bzhin du chags pa la sogs pa yang yin no zhe na/ 'dir smras pa/ myong ba'i tha snyad yon tan bdag /kun gyi rten ni ldog pa can/ /chags pa ru ni ji ltar 'dod//chags pa'i rang bzhin de 'dra min/ /zhes bya ba la/ gang la nam mkha' bzhin myong ba'i rjes su 'brang ba'i tha snyad thams cad log pa yin pa dang / shes rab la sogs pa'i yon tan rnams log pa yod pa de ni de lta bu'i bdag gi rten gang yin pa'i chags pa de ji ltar 'dod pa yin te/ chags pa'i ngo bo nyid de 'dra bar med pa'i phyir ram/ yod du chug na yang rtog pa sngon du mi gtong ba nyid du ston par byed de/ de bas na 'khor ba don du gnyer ba rung ba yin no/ /'khor ba'i bde ba yongs su dga' ba med pa'i phyir mi rigs so zhe na/ mya ngan las 'das pa la yang bde ba nyid yongs su dga' bar byed pa ma yin pa ma yin nam/gal te mya ngan las 'das pa'i bde ba don du gnyer bar byed pa yin na/ de'i tshe bde ba thams cad phun sum tshogs par gyur kyang / de las mchog tu gyur pa'i bde ba 'dod pa nyid dang / sngar gyi bde ba nyid slar yang dang yang du 'dod par 'gyur ba de bas na de mi 'dod pa ni ma yin no//'dod cing don du gnyer ba yang sred pa ste/ bdag nyid chen po rnams la sdug bsngal ba nyid yin no/ /bde ba de thams cad yongs su dga' ba skyed pa kho na ste/ de'i phyir bde ba can mya ngan las 'da' bar mi 'gyur ro/ /gang gi phyir rnam grangs par bde ba thams cad 'dod pa 'dis ni/ des na bde ba don du gnyer ba'i sred pa la sogs pa'i phyir 'dir 'khor ba nyid du gnas par byed do//'on te 'dod chags dang bral ba yang mthong ba yin no zhe na/ mthong ba ma yin te/ de yang bde ba'i bsam pa nyid kyis yin te/ bde ba'i thabs tshol bas ngal bar gyur pa'i phyir/ sdug bsngal nyid sems par 'gyur bas/bde ba la mngon par phyogs nas rnam pa gzhan 'dod pas chags pa dang bral ba la phyogs par byed kyi/ bdag la chags pa med pa ma yin no/ /'on te bdag tu lta ba yod kyang bdag gi ba la sogs pa la chags pa ma yin no zhe na/ 'dir smras pa/ rnam pa kun du bdag 'dzin pa/ / bdag la chags pa shin tu brten/ /bdag gi bar chags sa bon te/ /de skabs can du rnam par gzhag /ces bya ba la/ 'dir 'di'i don ni ji srid bdag tu mngon par zhen pa de srid du/ bdag la chags pa'i phyir grol bar mi 'gyur te/ bdag gi ba la chags pa yang phan 'dogs pa la brten nas yod par 'gyur ro//'on te bdag tu 'dzin pa ni spang bar bya ba ste/ skyon spang bar bya ba yin pa'i phyir/ de spangs nas 'jug par bya ste/ de bas na bdag gi ba la chags pa la sogs par ji ltar 'gyur zhe na/ gal te bdag tu 'dzin pa spangs na med do/ /ci'i phyir skyon zlog par byed/don du mi gnyer ba ni cung zad kyang byed pa la 'jug pa ma yin te/ de'i phyir rnam pa thams cad du bdag la chags na bdag gi ba la chags pa phul du brten par byed do/ /bdag tu lta ba de yang de bdag gi ba la chags pa'i sa bon te/ thar pa 'dod pa rnams de'i gnas skabs can du gnas so//de bas na slar yang 'khor ba yin no/ /'on te ji ltar bdag tu 'dzin pa de chags pa'i sa bon yin te/ bdag gi ba yang sa bon bdag tu lta ba yin pa de lta na yang skyon mthong bar 'gyur ro/ /bdag gi bde la yang skyon mthong ba yod pa'i phyir chags pa dang bral bar 'gyur ro zhe na/ 'dir smras pa/ bdag gi ba la chags bral bar/ /brtson yang yon tan cha rten phyir/ /'jug dang ldan pa gags byed dang / /de skyon la ni sgrib byed yin/ /zhes bya ba la/ gang la bdag tu 'dzin pa yod pa de ni bdag la phan 'dogs par byed pa'i yon tan gyi cha cung zad tsam la brten nas/ bdag gi bde la chags pa dang ldan pa ni/ chags pa dang bral ba la mngon du phyogs par 'bad pas bskyed pa la gags byed pa nyid do/ /nyes pa mthong na 'jug pa dang ldan pa'i chags pa dang bral bar 'gyur ro zhe na/ ma yin te/ bdag gi bde la chags pa de nyid yon tan cung zad tsam gyi cha la brten pas skyon rnams sgrib par byed do//de bas na bdag la mngon par zhen pa nyid yod na bdag gi ba la yang chags par 'gyur ba kho na'o/ /bdag la 'ang chags pa bral na ni/ /'di na chags pa bral ba gang / /'di spong ma yin dper bdag bzhin/ /de phyir sdug bsngal bsgom don med//ces bya ba la/ 'on te bdag spong bar byed do zhe na/ /spang bar mi nus te/ de yis de nyid spang bar mi byed pa'i phyir ro/ /'di ltar ji ltar yod pa de ltar mi spong la/ ji ltar med pa de ltar na yang ma yin pa'i phyir/ bdag spong ba ma yin gyi/ 'on kyang 'dod chags la sogs pa spong ba yin no//de bas na 'dod chags spangs pas rtag tu bde ba yin no/ /bde ba rnams la 'jog par brtson pa 'dod chags pa nyid 'dzin pa'i mtshan nyid can ma yin nam/ de yang bdag tu 'dzin pa sngon du 'gro bar brtag go/ /'on te de bdag la yang chags pa dang bral ba ste/ dper na bdag gi ba bzhin no zhe na/da ni bdag la chags pa dang bral ba gang yin pa med la/ lugs kyis gzhan la gzhan dag chags pa dang bral bar 'dod pa'i phyir ro/ /bdag chags pa dang bral ba'i ngo bo nyid chags pa dang bral bar 'gyur ba ma yin nam zhe na/ 'dir smras pa/ bdag ni bdag la chags pa dang bral ba ma yin te/'di ltar 'jig rten bdag yod pa ji lta ba de bzhin du de la chags pa dang bral bar 'gyur ram 'on te/ ji ltar med pa de ltar chags pa dang bral bar 'gyur bar brtag grang na/ de la gal te phyogs dang po yin na de'i tshe ji ltar yod pa de ltar chags pa dang mi bral bar rigs te/ de bzhin du bya bar mi nus pa'i phyir ro//ji ltar med pa de lta na yang chags pa de bral bar mi 'gyur te/ de med pa nyid kyi phyir ro/ /gnyi ga ltar na yang chags pa dang bral ba'i bdag spong ba ma yin pa'i phyir bdag med par mi 'gyur ro/ /de yang ji ltar bdag spangs pa de lta na yang sdug bsngal bsgom pa don med pa yin te/rnam pa gang zhig gis mi spong ba de lta na yang sdug bsngal bsgoms pa don med pa yin no/ /yang na da ltar gang zhig gang du mi spong ba de ni de yis de ru spong bar mi byed de dper na bdag bzhin no/ /de'i phyir dngos po spong ba'i sdug bsngal bsgoms pa don med pa ste/ sdug bsngal bsgoms pa las spong bar nus pa ma yin te/chags pa dang bral ba ni spong ba'i rgyu ma yin pa'i phyir dper na bdag bzhin du bdag gi ba yang yin no/ /de'i phyir chags pa dang bral ba de 'dra bas ni grol bar mi 'gyur ba de'i phyir 'dis kyang sdug bsngal bsgoms pa don med par 'gyur ro/ /sdug bsngal bsgoms pas kyang de dag /sdug bsngal ba nyid rnam bsgom 'gyur/ /de ni sngar yang mngon sum nyid/ /de lta 'ang chags bral ldan ma yin/ /zhes bya ba la/ gal te sdug bsngal bsgoms pa de chags pa dang bral bar gyur na/ sdug bsngal bsgom par rigs na de ni sdug bsngal dang bral ba'i don ma yin no//rnal 'byor pa sdug bsngal bsgoms pas sdug bsngal nyid rnams par bsgom par 'gyur ro/ /sdug bsngal de yang sngar 'khor ba'i gnas skabs na mngon sum nyid de/ sdug bsngal mngon du byed pa de lta na yang chags pa dang bral bar gnas pa ni ma yin no/ / gal te sdug bsngal mngon sum ma yin na de'i tshe thar pa 'dod pa rnams kyis sdug bsngal spong zhing thar pa don du gnyer bar mi 'gyur te/ sdug bsngal mngon du ma gyur na rnal mar mi 'gyur zhing / sdug pa dang bral ba la sogs pa'i sdug bsngal ni 'jig rten thams cad kyi mngon sum yin pa'i phyir ro//gal te yang de'i tshe chags pa dang bral ba ma yin na/ sdug bsngal bsgoms pas ji ltar chags pa dang bral bar 'gyur/ 'on te sdug bsngal bsgoms pas dran pa thams cad bsres nas sdug bsngal gyi rgyun chen po goms pa la zhugs pa'i phyir chags pa dang bral ba nyid du 'gyur ro zhe na/de ni mi bden te/ ji ltar sdug bsngal gyi rgyun dran pas bsgom pa de bzhin du/ bde ba gcig nas gcig tu brgyud pa des chags pa can du 'gyur ro/ /'on te zhi ba'i bde ba'i ro las mi g.yo ba'i rnal 'byor pa 'khor ba'i bde ba 'dod pa ma yin no zhe na/ de ni ma yin te/ bdag tu lta ba dang ldan pa ni mya ngan las 'das pa kho na la skye ba'i rgyu yin no/ /dur khrod na gnas pa'i bya rog gi skye ba'i rgyu ci ste/ de nyid ma yin te 'di ltar bya rog ni mi gtsang ba'i gnas la dga' ba skye ba ji lta ba de bzhin du pad+ma'i tshogs la dga' ba skye ba ma yin no/ /des na sdug bsngal bsgoms pas sdug bsngal mngon sum du byas kyang 'dod chags dang bral ba dang ldan par mi 'gyur ba'i phyir/sdug bsngal sgom pa don med par 'gyur ro/ /sdug bsngal gyi rgyu skyon mthong ba las chags pa dang bral bar mthong ba ma yin nam/ de ji ltar skyon mthong yang sdug bsngal bsgoms pas chags pa dang bral bar mi 'gyur zhe na/smras pa/ gal te gcig la'ang nyes pa yis/ /skad cig de la blo ldog kyang / /'dod ldan bud med gzhan la bzhin/ /de la'ang chags bral nyid ma yin/ /zhes bya ba la/ gal te yang 'gro ba bzang mo gcig log par byed pa'i nyes pa mthong nas skad cig tsam chags pa dang bral bar 'gyur ba de lta na yang bud med de la thams cad du chags pa dang bral ba ma yin te/dper na 'dod pa dang ldan pa dag 'dod pa kha cig bu mo kha cig la chags pa log kyang bu mo gzhan la chags pa mi ldog pa ste/ rim gyis thams cad la chags pa yod pa'i phyir ro//'o na gal te blo la lar rnam par g.yo na yul kun la chags pa ci ste skye bar 'gyur zhe na/ smras pa/ blang dang dor ba'i khyad yod na/ /gcig tu gyur pa'i chags gang nyid/ /de ni rnam grangs kyis bskyed tshe/ /chags pa rnams kyi sa bon yin/ /zhes bya ba la/ gang la blang ba dang dor ba'i khyad par yod pa de la 'dod pa dang sdang bar 'gyur gyi thams cad la len pa dang /'dor ba ma yin te/ rnam grangs pas 'dod pa dang / sdang ba phan tshun rgyu can gyi rnam grangs par 'gyur ba kho na'i phyir/ /bdag tu smra ba ji ltar grol bar 'gyur de bas na blang ba dang dor ba dag mi mthun pa dang dngos po gcig la skye ba'i ngang tshul can gyi 'dod chags zhes bya ba'i zhen pa gang yin pa de nyid dngos po thams cad kyi sa bon te/chags pa ste 'dod chags la sogs pa'i ngo bo nyid rnams rim gyis skye'o/ /bdag med par mthong ba can gyis ni thams cad du btang snyoms te/ blang ba dang /dor ba'i khyad par yod pa ni ma yin no/ /de bas na 'dod chags la sogs pa 'byung ba ma yin te/ chags pa'i rtsa ba med pa'i phyir ro/ /gzhan yang chags pa dang bral ba nyid du ni dngos po ngan pa la 'gyur gyi/ /bdag tu lta ba ni gang du rang bzhin dman pa ma yin par bstan pa'i phyir ro/ / chags pa skyon med yul can te/ /sgrub byed kyang ni skyon med yin/ /'gro ba de tsam kho na na/ /da ni gang las chags bral 'gyur/ /zhes bya ba smos te/ de la bdag skyon dang bcas pa ma yin te/ de dben pa'i phyir ro/ /de'i yul can chags pa yang skyon med pa'i yul can yin pa'i phyir skyon med pa'o//longs spyod pa'i sgrub byed mig la sogs pa yang de bzhin te/ 'gro ba thams cad de tsam kho na yin na/ da ni gang la de chags pa dang bral bar 'gyur/ 'on te skyon bcas yin na'ang de/ /der ni bdag dang de mtshungs la/ /de skyon de la chags bral min/ /de dag gang la chags bral 'gyur//zhes bya ba la/ 'on te gzugs la sogs pa yul dang lus la sogs pa de la chags pa skyon dang bcas par snang na ni/ bde ba'i rgyu de dag skyon dang bcas pa nyid du ci ste 'gyur/ sdug bsngal gyi rgyu nyid yin pas so zhe na chags pa ni bde ba dang / sdug bsngal gyi rgyu nyid du rnam grangs kyis 'gyur ba yin no//res 'ga' de dag sdug bsngal gyi yang rgyur 'gyur ba ma yin nam zhe na/ grol bar 'dod pa'i bdag de la yang skyon dang bcas pa nyid du mtshungs pa ma yin nam/ chags pa la sogs pa dang ldan pa'i bdag de la chags pa dang ma bral na/ da ni gang la chags pa dang bral bar 'gyur/'on te bdag spang bar mi nus na zhe na/ 'o na ni bdag gi ba yang spong ba ma yin no/ /'on te bdag gi ba skyon yod pas spong ngo zhe na/ 'o na gang gi tshe bdag gi ba de'i skyon mthong ba de'i tshe spong bar 'gyur gyi/ gang gi tshe bde ba'i rgyu nyid du rtogs pa de'i tshe ji ltar spong ba yin/'o na gal te bde ba'i rgyu ma spangs par bral bar gyur kyang de'i tshe bde ba yang sdug bsngal bar 'gyur ba'i phyir/ bde ba'i rgyu yang spang bar rigs so zhe na/ de lta na sdug bsngal gyi rjes la bde ba chen po skye ba'i phyir sdug bsngal blang bar bya ba nyid ma yin nam/ de bas na bdag tu lta ba 'di gang du yang chags pa dang bral bar mi 'gyur ro//gzhan yang / yon tan mthong las chags pa 'byung / /skyon mthong bas ni 'gegs 'gyur na/ /de ltar de dbang sogs la min/ /bus pa sogs la'ang yod phyir dang / /skyon dang ldan la'ang yod phyir dang / /yon tan ldan pa gzhan dag la'ang //med phyir bdag gi ba yod na'ang / /'das sogs la ni med phyir ro/ /zhes bya ba la/ yon tan mthong ba las chags pa skye zhing skyon mthong bas 'gegs par 'gyur ro zhe na/ chags pa de nyid kyang mig la sogs pa las mi 'byung ste/ 'on kyang bdag gi bar mthong ba las yin no//de bzhin du bus pa dang phyugs la sogs pa skyon dang yon tan mi spyod pa can rnams la chags pa yod pa'i phyir dang / rab rib la sogs pa dang ldan pa'i mig la sogs pa skyon dang ldan pa la bdag gi bar yongs su 'dzin pa'i dga' ba yod pa'i phyir dang / gzhan gyi mig la sogs pa yon tan dang ldan pa yin yang bdag gi yin par ma mthong ba la su yang chags pa med pa'i phyir dang /'das pa la sogs pa zhig pa la bdag gi bar chags pa med pa'i phyir ro/ /sogs pa'i sgras ni ma thob pa bsdu'o/ /de bas na skyon mthong ba las chags pa ldog pa ma yin no//'on te skyon mthong ba las bdag gi ba'i blo nyid ldog par 'dod cing / de dang bral na yon tan las skyes pa'i chags pa yang mi 'byung ste/ de'i tshe bdag gi bar lta ba ni skyon mthong bas gsal ba'i phyir ro snyam sems na/ smras pa/ de nyid phyir ni bdag gi blo/ /yon tan mthong ba'i rgyu ma yin//de phyir yon tan mi mthong phyir/ /de yang nyams pa ma yin no/ /zhes bya ba la/ de nyid kyi phyir skyon dang ldan pa yin yang 'ga' zhig tu bdag gi ba'i blo yod pa nyid kyi phyir dang / yon tan ldan pa gzhan dag la med pa'i phyir dang / 'das pa la sogs pa la yang med pa'i phyir bdag gi ba'i blo ni yon tan mthong ba'i rgyu ma yin no//de'i phyir bdag gi ba'i blo de yang nyams par mi 'gyur te/ yon tan ma yin pa'i skyon mthong yang ngo / /gzhan yang yon tan med sgro 'dogs/ /chags las de ni snang ba yin/ /de phyir de rgyu la gnod med/ /sgrub pa de la ji ltar gnod/ /ces bya ba la/gal te skyon mthong bar nus na ni skyon mthong ba na chags pa ldog par 'gyur te/ gang gi phyir chags pa'i stobs kyis skyon mthong ba nyid du mi byed pa'i phyir/ yod pa ma yin pa'i yon tan nye bar len pa bdag gi bar chags pa de las mthong bar 'gyur ro/ /gang gi phyir de ltar yin pa de'i phyir/chags pa'i rgyu bdag tu 'dzin pa na/ mi gnod pa'i sgrub pa gang yin pa sdug bsngal bsgom pa la sogs pa'i ngo bo nyid de yis ji ltar chags pa de 'gegs par 'gyur/ de bas na bdag tu lta ba ni grol ba ma yin no/ /'di la grangs can gyis smras pa/ bdag tu lta ba ni sdug bsngal bsgom par 'gyur ba ma yin gyi/'on kyang ngo bo nyid kyis skyes bu tha dad pa shes pas grol bar 'gyur te/ 'di ltar skyes bu ni mi 'gyur ba'i ngo bo nyid can no/ /rang bzhin ni bde ba la sogs pa gzhan dang / gzhan du 'gyur ba'i ngo bo nyid do/ /de bas na de dag dpyod pa med pas bzung ba'i phyir//bdag grol ba ma yin gyi/ skyes bu 'ba' zhig shes pas grol bar 'gyur ro zhe na/ smras pa/ mchog gzhan don du gnyer phyir dang / /skye 'jig blo can nyid kyi phyir/ /skye bo 'di yis dbang sogs las/ /bdag ni tha dad gyur par shes//de phyir gcig nyid mthong bas kyang / /chags min chags gyur de bdag dang / /dmigs pa'i nang gi yan lag la/ /ngo bo nyid kyis rjes chags 'gyur/ /zhes bya ba la/ /skye ba dang 'jig pa mthong ba nyid tha dad par 'jig pa ste/ rjes su 'gro ba dang ldog pa las tha dad pa'i phyir ro//bdag ni rjes su 'gro ba can te/ bde ba la sogs pa'i rjes su 'gro ba ma yin pa can no/ /de bas na 'gal ba'i chos gnas pa'i phyir tha dad pa yin no/ /'on te tha dad pa nyid 'khor ba pas ma dpyad pa'o zhe na/ de lta na 'o na ni dpyod pas zhen pa med pa'i phyir grol ba ma yin te/bde ba don du gnyer bas bde ba spong bar 'bad pa ni ma yin pa'i phyir bde ba dang bral ba'i bdag la su yang don du gnyer ba med pa'i phyir ro/ /bdag 'ba' zhig skye ba'i sngon nas yod na ni/ 'khor ba med par 'gyur ba'i phyir ro/ /gang gi tshe gtso bo dang lhan cig par bdag ma mthong ba de'i tshe grol bar 'dod la/gang gi tshe rang bzhin dang lhan cig tu mthong ba de'i tshe 'khor ba'o zhe na/ de la bdag rtog pa'i ngo bo nyid yin na/ ji ltar gcig pa nyid du 'khrul bar 'gyur/ 'on te yul la zhen pa ni grol bar mi 'gyur te/ 'khor bar skye ba'i phyir ro zhe na/ rang bzhin la 'khrul pa med de bems po yin pa'i phyir ro//de bas na ci'i phyir bdag nyid chen po dang gcig par 'gyur/ ji ltar bdag la 'khrul pa med pa de ltar bstan zin to/ /'on te rang bzhin yul nyid du mthong na ni/ 'o na tha dad par 'dzin pa med par mi 'gyur ro/ /de bas na rtog pa'i ngo bo nyid dang rang bzhin la tha dad par shes te/ji ltar mig la sogs pa bzhin dang gzhan don du gnyer ba'i phyir dang / mig la sogs pa skye ba dang / 'jig pa 'dzin pa'i phyir dbang po la sogs pa las bdag tha dad par skye bo thams cad kyis 'di shes par 'gyur ro/ /gang gi phyir de lta yin pa'i phyir/rang bzhin dang skyes bu dag gcig pa mthong ba las kyang bdag la chags par mi 'gyur ro/ /gal te bdag la chags pa yod na de yang 'khor ba pa'o zhe na/ de lta na ni dmigs pa'i nang gi yan lag mig la sogs pa rnams la ngo bo nyid de rang bzhin nyid du rjes su chags pa dang ldan par 'gyur gyi re 'ga' grol ba la ni ma yin no//'on te sdug bsngal myong ba las dmigs pa kho nas tha dad par shes na/ de ji ltar sdug bsngal mthong ba na chags pa dang bral ba ma yin zhe na/ 'dir smras pa/ sdug bsngal da ltar 'byung gang las/ /yid 'byung de 'dra sdang yin gyi/ / chags bral ma yin de tshe'ang 'di/ /chags yod skabs gzhan tshol phyir ro/ /de'i phyir/ zhe sdang sdug bsngal rgyu nyid phyir/ /de ni de tsam nyid du gnas/ /de log na ni rang nyid kyi/ /rang bzhin yang ni bstan par 'gyur/ /zhes bya ba smos te/ gang zhig de ltar ba'i sdug bsngal las yid 'byung ba de 'dra ba ni zhe sdang yin gyi/chags pa dang bral ba ni ma yin te/ gang gi phyir da ltar byung ba'i sdug bsngal nyams su myong bar gyur pas yid 'byung ba de'i tshe/ skyes bu 'di la chags pa yod pa nyid do/ /de ci'i phyir zhe na/ bde ba'i ngo bo nyid kyis gnas skabs gzhan don du gnyer ba'i phyir ro//'on te zhe sdang nyid rtag tu yod pas chags pa dang bral bar 'gyur te/ des kyang yul spang ba'i phyir thar pa yod do zhe na/ de ni ma yin te zhe sdang sdug bsngal gyi rgyu nyid yin pa'i phyir ro/ /zhe sdang de ni dus ji srid du sdug bsngal de de srid de tsam nyid du gnas pa dang ldan pa yin no/ /sdug bsngal de log na ni zhe sdang yang ldog pa'i phyir/rang nyid dus yun ring por bde ba don du gnyer ba'i rang bzhin la brten par 'gyur ro/ /de bas na sdug bsngal ni zhe sdang dang ldan pas grol bar mi 'gyur ro/ /'on te yid 'byung ba med par grol bar mi 'gyur te/ yid ma byung ba 'ga' zhig kyang 'khor ba las grol bar don du gnyer ba ni rang bzhin la brten pa yod pa ma yin pa'i phyir ro//sdug bsngal gyis ma gzir bar su yang yid 'byung bar mi 'gyur ro zhe na/ de ni ma yin te/ blang dang dor ba bcom pa'i phyir/ /kun la mnyam par gnas pa la/ /chags bral zhes ni brjod pa yin//tsan+dan dang ni ste'u bzhin/ /zhes bya ba la/ chos nyid tsam zhig mngon du byas pa'i phyir chos thams cad la mnyam pa nyid thob nas blang ba dang / dor bar bya ba'i dngos po kun la go rims bzhin du len pa dang / spong ba dag bcom pa'i mnyam pa gang yin pa thams cad la mnyam pa nyid de ni 'dod chags dang bral bar brjod de/gang rnams kyi yin zhe na/ ste'us 'jog pa la yang tsan+dan gyis byug pa lta bur sems pa de rnams kyi yin no/ /'o na gal te sdug bsngal bsgom pa 'dod chags dang bral ba'i rgyu ma yin na ni/ de lta ni 'o na ci'i phyir bcom ldan 'das kyis sdug bsngal bsgom par gsungs te/sdug bsngal ni sdug bsngal nyid du rig par bya'o zhes gsungs pa ma yin nam zhe na/ 'dir smras pa/ 'du byed sdug bsngal nyid mkhyen nas/ /sdug bsngal bsgom par gsungs pa yin/ /kho bo'i de yang rkyen las byung / /de bdag med lta'i rten can yin//stong nyid lta bas grol 'gyur gyi/ /bsgom pa lhag ma de'i don can/ /de phyir mi rtag las sdug bsngal/ /sdug bsngal las ni bdag med gsungs/ /zhes bya ba la/ /sdug bsngal gyi sdug bsngal la brten nas sdug bsngal bsgom par gsungs pa ma yin gyi/ 'on kyang 'du byed kyi sdug bsngal nyid rgyu dang 'brel ba nyid du mkhyen nas sdug bsngal bsgom par gsungs pa yin te/'du byed kyi sdug bsngal de yang rgyu dang rkyen las skyes pa'i ngo bo nyid de/ don dam par bdag med par lta ba la brten pa can yin no/ /de bas na gang zag dang chos spong ba nyid du lta bas grol ba nyid du 'gyur gyi/sdug bsngal la sogs pa bsgom pa lhag ma ni bdag med par lta ba de'i don can yin no/ /bcom ldan 'das kyis chos bstan pa thams cad ni bdag med par lta ba'i rtsa ba can yin no/ /gang gi phyir de ltar bdag med par mthong ba de nyid kyis grol bar 'gyur ba de'i phyir mi rtag pa las bcom ldan 'das kyis sdug bsngal bar gsungs pa yin te/sdug bsngal las kyang bdag med pa nyid du 'gyur ro/ /dge slong dag gzugs gang ci yang rung ste/ thams cad mi rtag pa nyid yin no/ /btsun pa dag gang mi rtag pa de ni sdug bsngal ba'am bde ba ste/ btsun pa dag gang sdug bsngal ba de mi rtag pa'o//gang mi rtag pa sdug bsngal ba de ni yongs su 'gyur ba'i chos can no zhes de ltar blta'o zhes gsungs so/ /'di ni bdag go/ /'di dag ni bdag gi'o/ /bdag ni 'di na yod pa'o/ /'di ni bdag yin no zhes bya ba la/ de lta bur rgyu dang / 'bras bu'i dngos por bdag med pa lta ba nyid grol ba'i thabs yin no zhes bstan par 'gyur ro// //tshad ma rnam 'grel gyi 'grel pa las/ /bam po bcu gnyis pa/ bdag tu lta ba gang yin pa de ni 'khor ba pa yin no zhes bstan pa'i phyir smras pa/ chags bral min dang sred ldan dang / /rtsom pa kun la brten pa ste//nyon mongs las las grol ma yin/ /de 'dra 'khor ba pa yin no/ /zhes bya ba la/ bdag tu lta ba'i sa bon gnas na ni/ bdag gir 'dzin pa 'gyur ba med pa nyid 'khor ba'i rgyu yin no/ /de'i phyir bdag dang bdag gir 'dzin pa ni chags pa dang bral ba ma yin te/ gdon mi za bar sred pa dang ldan par 'gyur ro//de bas na las rtsom pa thams cad la brten pa yin te/ nyon mongs pa dang las grol ba ma yin gyi/ de 'dra ba 'khor ba pa yin na/ ci'i phyir bdag tu lta ba grol bar 'gyur/ 'on te bdag gi ba nyid dngos su med pa'i phyir/ gang las chags pa 'byung bar 'gyur/chags pa 'byung ba ni yul la yin pa'i yul yang don dam par med pa'i phyir ci ste chags par 'gyur zhe na/ de ni mi bden te/ bdag gi ba nyid mi 'dod gang / 'di yi za ba po yod min/ /de tshe de yi bya longs spyod/ /mtshan nyid can gyi bdag kyang med/ ces bya ba la/ rtog par 'gyur ba'i bdag gi ba nyid med pa'o zhes nges par bya ba ji ltar nus/'khrul pa'i rgyu can yin pa'i phyir bdag gi ba brdzun pa nyid yin no zhe na ma rig pa skyes bu las gzhan pa ma yin pa ma yin nam/ skyes bu nyid 'di yin no zhes brjod pa'i phyir ro/ /de bas na bdag ni ma rig pa'i ngo bo nyid yin pa'i phyir 'khrul pa nyid de nam yang zhig par 'gyur ba ma yin te/'khrul pa bdag nyid du gyur pa 'jig pa mi rung ba'i phyir de nyid med par thal bar 'gyur ba'i phyir ro/ /gzhan yang bdag gi ba yod na las rnams dang bya ba bde ba la sogs pa'i longs spyod de dag kyang nyams par 'gyur ro/ /'on te don dam par bya ba dang longs spyod mi 'dod na 'o na bdag kyang don dam par gang gis ston par byed/'on te bdag gir nyams su myong bas bcad pa'i phyir yod pa nyid do zhe na/ bdag gi bar yongs su gcod pa'i phyir yod par 'gyur ro/ /'on te ma rig pa goms pa las rmi lam la sogs pa bzhin du bdag gi ba med pa yin no zhe na/'o na ni don dam par bdag kyang med par 'gyur te/ rmi lam la sogs pa bzhin no/ /'on te gnyis su med pa'o zhe na/ de'i tshe nyams su myong ba las gnyis su med par 'thad kyi rtag pa ma yin te/ da ltar byung ba'i dngos po tsam 'dzin pa'i phyir dang / nyams su myong ba las tha dad pa'i snga phyi med par mi 'dzin pa'i phyir ro//snga phyi med par 'dzin pa med na ni rtag pa nyid 'dzin pa ma yin no/ /dran pas kyang gcig tu 'dzin pa ma yin te/ de tshad ma ma yin pa'i phyir ro/ /rjes su dpag pa nyid kyang mngon sum med par rtag pa sgrub par byed pa ma yin no//de bas na bdag gi ba thams cad brdzun pa'o snyam du gang sems pa'i rgol ba de'i bde ba la sogs pa'i za ba po yang med pa nyid de/ bza' bar bya ba med na za ba po yang med pa'i phyir/ de bas na longs spyad par bya ba med na bdag kyang med pa kho nar 'gyur te/ yongs su dag pa'i bdag de nam yang mi snang ba'i phyir ram/snang na yang de brdzun par thal bar 'gyur te/ sngon po la sogs pa bzhin no/ /de phyir grol 'dod thog med pa'i/ /rgyud ni rigs mtshungs sa bon can/ /'jig tshogs su ni lta ba dag /rtsa ba nyid nas gzhom par gyis/ /zhes bya ba la/ rgyud gang zhig la thog ma yod pa ma yin pa can de ni bdag tu 'dzin pa'i rigs mtshungs pa gang la yod pa'i sa bon can te/de ni 'jig tshogs su lta ba bdag tu 'dzin pa'i blo can de rtsa ba nas bag la nyal gzhom par thal bar 'dod pa rnams kyis gyis shig pa'o/ /bdag med par mthong ba nyid kyis grol bar 'gyur gyi/bdag tu lta bas ni ma yin no/ /'di dag thams cad kyis ni nges par 'byin pa zhes bya ba lam gyi rnam pa bzhi pa bstan pa ma yin no/ /'o na gal te bdag mngon sum dang / rjes su dpag pa dag gis go bar bya ba ma yin pa de lta na yang de yod par lung gis rtogs par bya ste de ni ma grol ba'o//thar pa ni gcig tu bde ba'i ngo bo nyid de/ de med pa ma yin no/ /'khor ba'i bde ni 'jig pa ste/ /de yis mgu bar mi bya'o/ /thar pa ni dbang po la sogs pa'i cho gas thob par bya ba ma yin no/ /de skad du yang / dbang po las 'das myong min pa/ /'phags pa'i mig gis gzigs par 'gyur//gang gi dngos po de rnams ni/ /tshig gam rigs pas ji ltar dgag /ces bya ba la sogs pa brjod do zhe na smras pa/ lung ni de lta'i ngo bo yis/ /rgyu mtshan ma mthong rnams la ni/ /lung tsam zhig gis grol bar yang / /smra ste yongs su mgu byed min/ /zhes bya ba la/dbang po las 'das pa mthong ba'i tshig la rjes su dpag pas mi gnod pa de ni bden te/ 'on kyang dbang po las 'das pas/ brjod pa'i lus dang ldan pa'i rgyu mtshan ni tshad mas ma mthong ba'i skyes bu rnams la mngon sum med pas lung tsam gyis grol bar smra yang / yongs su mgu bar byed pa ni ma yin te/smra ba tsam ni lung thams cad kyi thun mong yin pa'i phyir ro/ /lung gi mtshan nyid skyes bu'i rtsol ba las byung ba ma yin pa'o zhes zer ba ni sngar bkag zin to/ /'on te sa bon las sa bon la sogs pa skye ba med pa'i chos nyid can du dbang gi cho gas mthong bas skyes bu de rnams la yang slar mi skye ba yin no zhe na/de ni ma yin te/ gang gi phyir/ sa bon sogs grags cho ga ni/ /skyes bu mi skyed phyir nus med/ /til mar bskus sogs bsregs pa la/ /sogs pa'ang grol bar thal phyir ro/ /zhes bya ba la/ sa bon la sogs pa dbang bskur ba'i cho ga yis skye ba med pa'i chos nyid can du grags pa de bzhin du skyes bu rnams slar skye ba nyams pa'i phyir/nus pa med pa ste mi nus pa yin no/ /'di ltar til mar bskus pa'i me yis bsregs pa la sogs pas bsgyur ba'i sa bon mi skye bar mthong ba'i phyir srog chags rnams kyang til mar bskus pa'i rgyus grol bar thal bar 'gyur ro//'o na gal te dbang la sogs pa'i cho ga las zad par byed pa ma yin pa de lta na ni sngar lci bar snang ba las dbang bskur ba'i rjes thogs su lus yang bar snang bar mi 'gyur ro zhe na/ 'dir smras pa/ sngar ni lci dang phyis yang phyir//sdig pa bcom par byas pa min/ /'di yi lci ba nyid med kyang / /lus can min phyir sdig ljid min/ /zhes bya ba la/ gal te sngar lci ba las phyis yang bar dbang gis bskyed pa de lta na yang de yis sdig pa bcom par rig pa ma yin te/ dbang 'di yis lci ba nyid med par 'gyur ba yin mod kyi/sdig pa ni lci ba ma yin pa'i phyir 'di gzhom par 'thad pa ni ma yin te lus can ma yin pa'i phyir ro/ /'di ltar lci ba dang yang ba 'gal ba can du mthong ba las lci ba nyid med par shes par bya'i sdig pa med par ni ma yin te/ de la lcid nyid med pa'i phyir ro//'on te khyod kyi phyogs la yang stong pa nyid bsgom pa las sred pa 'chad par 'gyur mod kyi/ thar pa ji ltar 'gyur zhe na/ 'di ni bsam par mi rigs pa kho na ste/ log shes dang ni de las byung / /sred dang sems pa'i dbang dag gis/ /dman nas 'gro ba skye ba min/ /de phyir de bcad skye mi 'gyur//de dag tsam las 'byung ba'i phyir/ /skye la de dag nus nyid phyir/ /sems pa de dag yang nyid las/ /min phyir tshang ba skye rgyu yin/ /zhes bya ba la/ log pa'i shes pa ni sdug bsngal ba la bde ba'i blo ste/ log pa'i shes pa de las 'byung ba ni sred pa'o/ / de dag sems pa'i dbang gis dman pa'i gnas su 'gro bar skye ba yin no/ /gang gi phyir sred pa dang log pa'i shes pa de gcod pa gang yin pa da ni chags pa dang bral bar gyur nas slar skye ba ma yin no/ /gang phyir log pa'i shes pa dang sred pa dang sems pa de dag nyid la skye ba'i nus pa yod pa yin te/de dag kho na las skye ba srid par 'gyur ba'i phyir ro/ /'di ltar srid pa'i dbang gis yul gzhan thob par snang ba yin no/ /skye ba'i rgyu'i lus kyang ma yin nam/ des ji ltar sred pa tsam las skye bar 'gyur ba yin zhe na/ de ni bden pa ma yin te/ /gang gi phyir log pa'i shes pa dang /de las byung ba'i sred pa'i ngo bo nyid kyis sems pa de dag kho na las yin pa'i phyir te/ sngon gyi sems sbyin pa la sogs pa'i mtshan nyid can ni las yin pa'i phyir des 'du byed nye bar len par byed do/ /skye ba gzhan len par byed pa'i sems pa ni/ dngos su rgyu ma yin te/ de'i de ma thag tu skye ba 'byung bar mi 'gyur ba'i phyir ro//dbang bskur ba la yang de dag gnyis yod pa'i phyir/ skye ba'i rgyu yongs su tshang bas grol ba ma yin no/ /sngon gyi las ni rgyu'i rgyu yin pa'i phyir/ nye bar btags nas rgyu yin gyi/ dngos kyi rgyu ni ma yin te/ 'on te yang / 'gro dang rtog pa'i byed brten ni//de dag ma mthong ba las yin/ /ma mthong 'jig phyir 'gro ba med/ /de 'du byed pa'i sems pa min/ /zhes bya ba la/ 'gro ba ste 'jug pa dang rtog pa de shes pa'i byed pa ni lag pa la sogs pa dang / mig la sogs pa rim pa bzhin du brten pa yin no/ /byed pa de dag ma mthong ba'i las las 'byung ba ste/dbang bskur ba yang ma mthong ba 'jig pa'i phyir/ skye ba gzhan du 'gro ba ma yin no/ /de bas na de'i 'du byed de/ las kyi 'du byed dge ba bcu dang mi dge ba rnam pa bcu kho na sems pa'i ngo bo nyid de med par 'gyur ro/ /dge ba dang mi dge ba'i las de dag kyang dbang bskur bas 'jig pa'i phyir yang srid par 'jug pa ma yin no zhe na/de ni mi bden te/ 'di'i don ma grub pa'i phyir ro/ /byed pa skyed phyir yod med kyi/ /rjes su 'jug pas bla'i nus pa/ /mthong ba yin gyi gzhan gyis min/ /de yod de dag ci ste 'gro/ /zhes bya ba la/ rjes su 'gro ba dang ldog pa'i rjes su 'jug pa'i blos/mig la sogs pa'i byed pa rnams skyed par nus pa nges pa yin gyi/ blo dang bral ba'i las sngon du byas pa'i nus pa gzhan ni ma yin no/ /'chi ba'i dus kyi blo de ni dbang bskur ba la yang yod do/ /mig la sogs pa de dag las kyi rjes su 'gro bar ci ste mi 'gyur te/'di ltar mig la sogs pa sems pas byin gyis brlabs nas/ rigs mthun pa can gyi byed pa rnams mthong ba yid la dbang bskur ba la yang / ma rig pa dang sred pa dang ldan pa'i blo yod pa'i phyir skye ba gzhan chad pa ni ma yin no/ /'on te dbang gis nye bar bcom pa'i mig la sogs pa'i blo yin pa'i phyir skye ba gzhan du 'byung ba ma yin no zhe na/de lta na ni/ de rnams nus med dbang la sogs/ /de ma thag tu de dag gi /'dzin bskul 'khrul dang 'gog pa dang / /sems pa'i dbang gis 'gyur ma yin/ /zhes bya ba la gal te blo la sogs pa dbang gis bcom pa yin na/skye bar nus pa ma yin te/ de'i tshe dbang bskur ba de'i de ma thag pa nyid du blo bcom pa'i phyir/ yul la rang gi 'dod pas 'jug pa'i sems 'dzin pa dang / mngon par 'dod pa'i yul la nges par 'jug pas bskul ba dang 'khrul pa ste/ 'khrul par gyur pa nyid dang /'gog pa ste 'jig pa de dag med par 'gyur te/ /de dag sems dang 'brel pa'i phyir dang / sems la sogs pa de rnams dbang bskur ba'i mthus gsal bar 'gyur ro/ /de ltar gyur na ni dbang gis de ma thag tu chad par 'gyur ro/ /'on te mig la sogs pa rnams shi ba'i rjes la nus pa med par 'gyur te/de dag yongs su gyur pa'i khyad par la ltos pa'i phyir ro zhe na/ de ni ma yin te/ gal te dbang gis de ma thag par dbang gi mthus chad par mi 'gyur na ni yongs su gyur pa las phyis nus pa med par 'gyur ro zhes bya ba 'di la tshad ma med do//'on te de tshe blo med phyir/ /mi 'gyur dri ma rnams kyi blo/ /mtshams sbyor de rnams nus med na/ /gson pa nyid kyi'ang nus med 'gyur/ /zhes bya ba la/ de'i tshe ste 'chi ba'i dus na blo nyid med pa'i phyir byed pa rnams yod par mi 'gyur te/ 'di ltar de'i tshe mtshams sbyor ba dang / blo dang bral bar byed pa dang sems pa med pas slar skye ba med par 'gyur ba ma yin nam zhe na/blo de 'dod chags la sogs pa'i dri ma rnams kyis mtshams sbyor ba ma yin nam/ dbang bskur ba la dri ma yod pa'i blo bcom pa ni ma yin no/ /'on te dbang bskur bas 'dod chags la sogs pa bcom pa'i phyir blo skyed par mi nus so zhe na ma yin te de'i tshe 'dod chags la sogs pa de rnams nus pa med na ni/gson pa nyid kyi dri ma rnams kyang nus pa med par 'gyur ba de'i phyir dbang bskur ba'i rjes thogs kho nar grol bar 'gyur ro/ /'on te dbang bskur bas 'dod chags la sogs pa'i dri ma med kyi/ 'on kyang yongs su dag pa'i ye shes pa yod do zhe na/ de ni ma yin te/ 'grib dang phul byung phyir gnyen po/ /dang ni rang phyogs 'phel ba na/ /rang gi sa bon rgyu can skyon/ /dbang bskur ba yang bzlog pa med/ /ces bya ba la/ rang gi sa bon las byung ba can gyi/ skyon rnams dbang bskur ba'i skye bo la yang skye bar 'gyur ro//rang gi sa bon las byung ba'i skyon du ji ltar shes she na/ 'grib pa dang phul du byung ba'i phyir te/ gnyen po'i phyogs bdag med pa 'phel ba na 'grib pa'i phyir dang / rang gi phyogs tshul bzhin ma yin pa yid la byed pa 'phel na/ phul du byung ba'i phyir/ de lta bur gyur pa'i skyon rnams dbang bskur ba la yang bkag pa med pa nyid yin na/ji ltar tshe 'di nyid dang gzhan la 'di dag grol bar 'gyur/ gal te bdag med pa mthong ba na/ gang zhig grol bar 'gyur te/ skyes bu 'dod chags la sogs pa'i skyon gyis bcom pa gang gi tshe gang yang rung bas dag par 'gyur ba ma yin nam/de'i tshe grol bar 'gyur ro/ /'di ltar 'ching ba zhig pa ni grol ba ste/ bdag med pa la ni gang zhig bcings pa nyid de de grol bar mi 'gyur zhing / mi rtag pa nyid kyis gzhan grol ba thob pa yin no zhe na/ de ni ma yin te/ gang zhig dag pa de las gzhan pa'i mya ngan las 'das pa med do//'o na sgron ma'i gsal ba zhes tha snyad 'dogs pa ma yin nam zhe na/ de ni ma yin te/ sangs rgyas pa'i phyogs la tshig tu sbyar ba tsam nyid 'di 'thad pa ma yin te/ gang ma bcings pa de grol bar 'gyur la/ de yang dpes sgrub pa yin no//bdag tu smra ba la ni bcing ba dang / grol ba nyid du mi 'thad de/ tshig tu sbyar ba tsam gyis bsgrubs pa ni ci yang ma yin zhing / gtso bo'i dngos po mi 'thad pa'i phyir ro/ /bdag mya ngan las 'das pa'i dpe ni yod pa ma yin te/ de nyid kyi phyir smras pa/ rtag pa ltos pa med pa'i phyir//rim gyis skye ba 'gal ba min/ /byed dang byed min dus dag tu/ /'dra ba yi ni bdag nyid yin/ /zhes bya ba la/ gnas skabs tha dad na ni bdag gi grol ba nyid ma dag pa'i dus su yod pa dag par 'gyur te/ rim gyis skye ba'i bde ba la sogs pa rtag pa la 'gal bar 'gyur ro//bdag rtag pa ni ltos pa med pa'i phyir bde ba la sogs pa'i gnas skabs cig car yod par thal bar 'gyur ro zhes bstan zin to/ /gzhan yang bya ba byed pa dang yang 'gal te/ gang zhe na/ byed pa dang mi byed pa'i gnas skabs dag 'dra ba'i bdag nyid yin pa'i phyir ro zhes bstan to//rgyu dang 'bras bu gcig nyid kyang / /de las de dag log na ni/ /byed pa za ba po nyams shing / nus pa nyid ni 'grub mi 'gyur/ /zhes bya ba la/ gnas skabs dang skyes bu dag de'i bdag nyid du gyur na/ rgyu sngon gyi las dang / 'bras bu bde ba la sogs pa de dag gcig pa thob par 'gyur te/bdag gcig pa'i ngo bo nyid yin pa'i phyir bdag gi rang bzhin no/ /de yang 'gal ba yin no/ /'on te tha dad na ni/ de'i tshe bdag de la rgyu dang 'bras bu de dag gi 'di byed pa po ma yin zhing / za ba po yang ma yin te/ byed pa dang za bar 'brel pa med pa'i phyir/gzhan gyi bdag bzhin no/ /nyams su myong ba las kyang 'brel ba ma yin te/ bdag gzhan bzhin no/ /'di ltar rnal 'byor pas byed pa dang / longs spyod 'dzin pa'i phyir/ byed pa po dang za ba po thal bar 'gyur ro/ /'on te 'phrod pa 'du ba'i 'brel pa nyid za ba po nyid dang /byed pa po nyid de byed pa dang / longs spyod rgyu dang / 'bras bu'i dngos po yin pas bdag byed pa po dang za ba por 'gyur ro zhe na/ de ni ma yin te/ bdag de'i nus pa ma grub po zhes bstan to/ /'o na skad cig ma yang dran pa dang longs spyod pa la sogs pa med par 'gyur te/gcig tu nyams su myong ba med pa'i phyir ro zhe na/ de ni bden pa ma yin te/ gzhan pa dran dang longs spyod sogs/ /thal ba'ang gnod pa can yin te/ /de yis gang la dran med phyir/ /nyams su myong las dran pa 'byung / /zhes bya ba la/ bdag med pa dang 'brel pa'i skyon gang yin pa nyams su myong ba'i shes pa yang gzhan la dran pa yang gzhan yin na/de ji ltar nyams su myong ba las/ gzhan gyis dran pa dang / 'di ltar gang gis dge ba la sogs pa'i las byas pa de de nyid kyi tshe zhig pa'i phyir byas pa nyams par 'gyur ba dang gang gis 'bras bu la nye bar spyod pa de gzhan yin pa'i phyir/ma byas pa dang phrad pas skyon de rnams dang gang la yang gnod pa can ma yin no/ /gang gis nyams su myong bar gyur pa de nyid kyi dran pa med pa'i phyir/ dran pa po gang gis kyang dran pa ma yin te med pa nyid kyi phyir ro/ /longs spyod pa med de longs spyod pa po med pa'i phyir ro//'on kyang dran pa nyid la dran pa po dang / dran pa po'i yul zhes bya ba ste/ de bzhin du bde ba nyid la longs spyod par bya ba dang longs spyod pa po dang / longs spyod ces bya'o/ /de'i phyir longs spyod pa po rtag pa ma yin la/ dran par bya ba de las dran pa 'byung ba ni nyams su myang ba'i dbang gis so//'on te gzhan gyi rgyud la 'jug pa'i nyams su myong bas dran pa ci ste mi skye zhing / gzhan gyi las las kyang longs spyod par ji ltar mi 'gyur zhe na/ rgyu dang 'bras bu'i dngos por nges pa'i phyir ro/ /'di ltar rgya skyegs kyis bsgyur ba'i sa bon de nyid ras bal gyi me tog la sogs pa dang / rgyu dang 'bras bur nges pas dmar por snang bar 'gyur gyi/ de la gcig pa nyid ma yin te/ mngon sum dang rjes su dpag pas tha dad par grub pa'i phyir ro/ /de bzhin du rgyu dang 'bras bu'i dngos por nges pas dran pa dang las dang 'bras bur 'brel pa rgyud de nyid la yin no/ /bdag tu smras pa gzhan gyis nyams su myong ba gzhan gyis dran par ci'i phyir mi 'gyur/bdag tha dad pa'i phyir ro/ /tha dad pa de nyid kyang cis shes/ dran pa la sogs pa med pa'i phyir ro zhe na/ ma yin te/ phan tshun brten par thal bar 'gyur ba'i phyir ro/ /gzhan yang ji ltar bdag khyad par med kyang gzhan las kyang dran pa skye ba ma yin pa de bzhin du shes pa khyad par med kyang rgyud gzhan gyis shes pas dran pa ni ma yin no//gzhan yang sems pa'i rgyu tha dad pas tha dad pa'ang srid de bdag la ni rgyu med pa'i phyir ci yis tha dad par 'gyur/ 'o na bdag med na bdag gis mthong ba dang dran pa'o zhes bya ba'i blo gcig par ji ltar 'gyur zhe na/ bdag la yang skyon ni 'di mtshungs pa ma yin nam/ bdag ni dran pa dang mthong ba'i bya ba gcig byed par tshad ma gang gis shes/ mngon sum gyis shes so zhe na/ de ni snga ma dang phyi mar mi 'jug go zhes bstan to/ /mngon sum med pa nyid rjes su dpag pa 'jug pa ni ma yin no/ /gal te sngar nyams su myong ba'i ngo bo nyid kyi bdag nyid kyis bdag rig na ni sngar nyams su myong ba nyid myong bar mi 'gyur te/snga ma nyid rig pa de la med par 'gyur ro/ /myong bar gyur pa ni snga ma nyid du mi rung ba'i phyir dang / dran pa las kyang snga ma zhes bya bar mi rung ste/ de tshad ma ma yin pa'i phyir ro/ /'on te sngar yul du byas pa dran no zhe na/'o na ni grogs dag nyams su myong ba snga ma thams cad dran par 'gyur zhing / bdag gis ni snga ma dang phyi ma dpyod par byed pa ma yin te/ des na thog ma med pa'i bag chags kyi dbang gis de bdag yin no snyam pa'i shes pa skye'i bdag yod pa ni ma yin no/ /'o na ji ltar bdag med par 'khor bar 'jug ste/bdag med na bdag tu lta ba med pa'i phyir dran pa yang snga ma dang phyi ma'i rang bzhin dang bral ba'i phyir/ gcig pa nyid dang rtag pa nyid du 'dzin par mi nus na/ de ji ltar 'khor ba yin zhe na/ 'dir smras pa/ don dam par na 'khor ba yod pa ma yin te/ rang las rang gi ngo bo rtogs//zhes bstan to/ /de lta na yang tha snyad tsam du 'khor ba yin te/ 'di ltar/ bden pa bzhi la brten pa dang / /bde dang nga dang bdag gi zhes/ /bya sogs yang dag min bcu drug /sgro btags nas ni yongs su sred/ /de nyid la ni de 'gal don/ /de nyid rnam pa rjes rtogs can/ /legs bsgoms yang dag lta ba yis//sred pa rjes 'brang bcas 'joms byed/ /ces bya ba la/ yod pa ma yin par gzhag pa nyid 'khor ba ste/ rang gi mtshan nyid ni ma yin no/ /yang dag pa ma yin pa yang rnam pa bcu drug ste/ sgro btags pa de las sred pa dang ldan pa'i las las 'khor bar mngon par zhen par 'gyur te/ gzhan du na 'khor ba yod pa ma yin no/ /mngon pa'i nga rgyal zhen pa yang rig pa las tha dad pa 'ga' yang yod pa ma yin no/ /gcig tu 'byung ba'i phyag rgya tsam yin pa'i phyir brten pa dang bde ba dang / nga dang bdag gi'o snyam pa ni sdug bsngal gyi bden pa la yang dag pa ma yin pa'i rnam pa'o/ /kun 'byung gi bden pa la rgyu med pa dang kun 'byung ba med pa dang rab tu skye ba dang rkyen med pa zhes bya ba yin no//'gog pa la ni 'gog pa med pa dang zhi ba med pa dang gya nom pa med pa dang / nges par 'byung ba med pa'o/ /lam la ni lam med pa dang rigs pa med pa dang sgrub pa med pa dang nges par mi 'byung ba zhes bya ba yin no//rnam pa bcu drug po de dag ni yang dag pa ma yin pa ste/ de dag tu sgro btags nas bden pa bzhi la sred pa dang ldan par 'gyur ro/ /bden pa bzhi po de nyid la dag pa ma yin pa'i rnam pa dang 'gal ba don dam par rnam pa rjes su rtogs pa can gyi lta ba legs par goms par byas na ni sred pa rjes su 'brang ba dang bcas pa 'joms te/sred pa zad pa de las grol bar 'gyur ro/ /las dang lus gnas pa ma yin no/ /sred pa med pas ji ltar thar bar 'gyur zhe na smras pa/ las dang lus dag gnas na yang / /gcig med phyir na rgyu gsum can/ /skye ba dag ni mi 'byung ste/ /sa bon med par myu gu bzhin/ / zhes bya ba la/ ma rig pa dang / las dang / lus kyi rgyu can gyi skye ba ni mi 'byung ste/ las dang lus gnas na yang sred pa zhes bya ba'i rgyu gcig med pa'i phyir/ dper na sa bon med na sa la sogs pa yod kyang myu gu skye ba ma yin pa bzhin no/ /'on te las dang lus dag las gcig 'gags nas thar bar 'gyur ba nyid de/gang zhig las zad na thar bar 'gyur ro zhes smras so/ /las dang lus dag spong min te/ /gnyen po phyogs ni med phyir dang / /nus med phyir ro sred pa ni/ /yod na yang ni 'byung phyir ro/ /zhes bya ba la/ sred pa dang bral ba ma yin pa'i gnyen po gzhan las rang lus zad par byed pa ma yin te/ dbang po la sogs pa'i cho ga ni sun phyung zin to//de bas na las kyi gnyen po med pa'i phyir las dang lus dag spong bar byed mi nus te/ gnyen po yod na yang las mi shes pa'i phyir de'i gnyen po la 'dris par mi rung zhing las zad par yang mi nus pa'i phyir spong bar rigs pa ma yin no/ /las byed pa ni sred pa yin te/de las 'dod chags la sogs pa tshegs med pa nyid du 'byung ngo / /des na sred pa yod na slar yang 'khor ba 'byung ngo / /'on te las dang sred pa gnyi ga zad par 'gyur ro zhe na/ de ni ma yin te/ gnyis zad don du 'bad na yang / /las zad ngal ba don med 'gyur/ /zhes bya ba la/ sred pa dang las gnyis zad pa'i don du 'bad na yang /las zad par bya ba'i phyir ngal ba ni don med par 'gyur te/ sred pa nyid bzlog par bya ba bla'i/ /las kyang dgag par bya ba kho na'o zhe na ma yin te/ gnyen po'i phyogs mi srid pa'i phyir ro zhes bstan pas so/ /gzhan yang / 'bras bu sna tshogs mthong ba'i phyir/ / las nus sna tshogs rjes su dpog /de phyir gdung ba'i nyon mongs ni/ /gcig gi rang bzhin zad pa min/ /zhes bya ba la/ bde ba la sogs pa'i 'bras bu rnam pa du ma can sna tshogs pa mthong ba'i phyir/ las la sogs pa'i nus pa sna tshogs par nges par byed do/ /de'i phyir 'bras bu gcig gi rnam pa can gdung ba la sogs pa'i ngo bo longs spyod pas las zad par ci ltar 'gyur/gang gi phyir/ rnam 'gas de bskyed 'bras bu ni/ /chung gyur rigs mi mthun ldan min/ /zhes bya ba la las gang zhig gis de'i rigs kyi 'bras bu bya ba de ni 'bras bu'i cha shas tsam nyams su myong ba'i phyir las de las skyes pa'i phyir/'bras bu nyid 'bras bu nyams su myong bas zlog par byed kyi/ de dang mi mthun pa'i 'bras bu skye ba ni ma yin no/ /'on te yang / dka' thub kyi ni nus pa yis/ /nus pa 'dre zhing zad pa'i phyir/ /nyon mongs cha ni gang zhig gis/ /nyon mongs ma lus spong bar 'gyur//zhes bya ba ni/ dka' thub la nus pa yod pa ma yin nam/ de'i las kyis nus pa rnams 'dre ba ste/ 'bras bu mtshungs par ster ba'o/ /zad pa ni bdag nyid thams cad kyis 'jig pa'o/ /des na nyon mongs pa'i cha 'ga' zhig gis las ma lus pa spong bar 'gyur ro zhe na/ de la yang smras pa/ gal te nyon mongs las dka' thub/ /de gzhan nyon mongs nyid yin na/ /de yi las 'bras phyir 'di las/ /nus pa'i 'dre ba la sogs min/ /zhes bya ba la/ gal te yongs su gdung ba las gzhan yin na ni de'i tshe nyon mongs pa'i cha las ma lus pa'i las spong bar 'gyur te/nus pa 'dres pa'i phyogs la'o/ /zad pa'i phyogs la ni nyon mongs pa'i med pa nyid du spong ba yin no/ /'on te nyon mongs pa'i ngo bo nyid dka' thub yin na/ 'o na ni nyon mongs pa'i ngo bo nyid can dka' thub las kyi 'bras bu yin pa'i phyir dka' thub 'di las kyi nus pa ma 'dre ba ma yin pa dang / zad par yang mi 'gyur te/grang ba nyi ma bsten pa can gyi phyugs la sogs pa rnams kyang las zad par thal bar 'gyur ba'i phyir ro/ /'on te de ni las kyi 'bras bu ma yin te/ 'dod pas 'jug pa'i phyir ro/ /las kyi 'bras bu de ni 'dod pa dang bral bar skye ba'o zhe na/ de ni mi bden te/ 'dod pas rgyal po thob pa la sogs pa las kyi 'bras bur mi 'gyur ro//'on te rgyal po la sogs pa la zhen pa med par spong bar 'gyur la dmyal ba la sogs pa dbang med du 'bab pa'i phyir de nyams su myong bar 'gyur ba kho na'o/ /de bas na gdung ba nyid la dka' thub tu 'dod do zhe na/ de lta na ni dmyal ba'i sdug bsngal yang nyams su myong bar 'gyur ba kho na byed pa ji ltar dka' thub kyis de zad par 'gyur/'on te dka' thub kyi sdug bsngal yin pa'i phyir/ skra 'bal ba la sogs pa'i dka' thub kyi sdug bsngal ba nyid kyis dmyal ba la sogs pa'i sdug bsngal spong bar byed de/ skra 'bal ba ni las byed par 'gyur ba'i rgyu yin no zhes bya ba la tshad ma med pa'i phyir te/sdug bsngal yin pa'i phyir sdug bsngal gzhan bzhin no/ /'on te 'di ni ma nges pa'o zhe na/ khyod kyis smras pa'i tshad ma de la mtshungs pa nyid do/ /'on te las spong bar byed pa'i don du 'jug pa yod pa'i phyir dang / khyed la yang las zad par yod pa'i phyir khas blangs pa la/ji ltar gnod par mi 'gyur zhe na/ 'dir smras pa/ skye 'dod skyon ni bcom pa'i phyir/ /gang yang skyon ni 'gal ba can/ /de skyes las kyis nus 'gyur gyi/ /ji ltar byas pa spong bar 'gyur/ /zhes bya ba la/ las ni spong ba ma yin te/ byas pa 'jig pa med pa'i phyir ro/ /'o na ji ltar las zad par brjod ce na//'dir smras pa/ las de ni rgyu gzhan yod pa gang gis 'bras bu ster ba de 'dra ba la de 'gal ba can nye ba ni ma yin no/ /gang yang gdon mi za bar 'bras bu ster nus pa de ni nges pa kho nar 'bras bu skyed par byed de/ de'i don du thub pa'i skye bo 'bad pa ni ma yin te/ de ni stobs kho nas skye ba'i phyir ro//gang yang 'dod chags la sogs pa dang 'gal ba can bdag med par mthong ba la sogs pa de ni de las skyes pa ste/ 'dod chags la sogs pa'i nyes pa las skyed pa'i ma 'ongs pa'i las zlog par byed nus par 'gyur gyi/ byas zin pa ni bdag med par mthong bas kyang spong ba ni ma yin no/ /'o na ji ltar byas zin pa'i nyes pa dang las ji ltar 'jig ce na/skyon rnams skyes par 'gyur ba la ni ldog pa med kyi/ 'on kyang 'byung bar 'gyur ba'i skyon rnams las 'gog pa yin te/ de yang rgyu zad pas mi skye ba yin no/ /de nas de yis byas pa'i las mi skye ba'i phyir/ byas pa rnams spang bar rigs pa ma yin no/ /lhan cig byed pa ma tshang bas kyang 'dod chags dang bral ba las ni 'bras bu ster ba ma yin no//'o na ji ltar sred pa brten par gyur na/ las slar skye bar 'gyur ba de bzhin du/ las la brten na yang sred pa 'byung bar mi 'gyur ba'i phyir grol bar mi 'gyur ro zhe na/ 'di ni rigs pa ma yin no/ /zhes smras pa/ las las skyon byung ma yin gyi//skyon ldan byed 'gyur ldog las min/ /log pa'i rnam rtog med la min/ /bde ba las kyang 'dod ma yin/ zhes bya ba la/ sred pa yod na 'bras bu don du gnyer ba rnams las byed par 'gyur gyi/ 'dod chags la sogs pa'i skyon med pa las 'byung ba ni ma yin no/ /gang chags pa dang bral ba de ni sred pa med pas las byed pa ma yin no//'on te dge ba'i las bde bar byed nus pa'i phyir bde ba la rjes su chags pa can gdon mi za bar 'gyur ro zhe na/ bdag dang bdag gir mngon par zhen pa log pa'i rnam par rtog pa med par ni bde ba las kyang 'dod pa ma yin pa ma yin nam/ de'i phyir 'jig tshogs la lta ba zad pa kho nas thar bar 'gyur gyi/gzhan du ni ma yin no/ /'phags pa'i bden pa bzhi ston pa nyid skyob pa yin pa de'i phyir 'phags pa'i bden pa bzhi ston pa'i mtshan nyid kyi skyob pa las bde bar gshegs pa nyid nges pa yin no/ /'dir smras pa/ skyob las de nyid dang brtan dang / /ma lus khyad par mkhyen bsgrub dang //rtogs pa'i don phyir gshegs pa ste/ /phyi rol slob ma'i slob lhag phyir/ /zhes bya ba la/ skyob pa las bcom ldan 'das bde bar gshegs pa nyid du shes par bya ste/ bde bar gshegs pa de yang de nyid dang / brtan pa dang / ma lus pa'i khyad par mkhyen pa ste/rab tu mdzes pa mkhyen pa ni de kho na nyid mkhyen pa'o/ /mkhyen pas slar mi ldog pa mkhyen pa ni brtan par mkhyen pa ste/ brtan pa ni phyir mi ldog pa'i phyir ro/ /khyad par ma lus par mkhyen pa ni rnam pa thams cad mkhyen pa nyid kyi mkhyen pa ste/ lhag ma ma lus par mkhyen pa'i phyir ro//rtogs pa'i don gyis/ ga'i skad kyi dbyings las gshegs par bshad de/ mkhyen pa de bcom ldan 'das la yod pa'i phyir ro/ /'o na rjes su dpag pa brgyud pas 'di shes pa yin na/ bcom ldan 'das ji ltar mngon sum du gzigs par 'gyur zhe na/ de lta na ni gzhan dag gis kyang yongs su shes par 'gyur ba ma yin nam/rjes su dpag pa ni la la yod kyi/ la la med pa'i cha yod pa ma yin pa'i phyir ro/ /bcom ldan 'das kyis nye bar bstan pa med na gcig la yod pa ma yin no/ /de bas na dngos po thams cad rnam pa thams cad mkhyen pa ni bcom ldan 'das nyid yin no zhes shes par bya ste/ don thams cad rnam pa thams cad kyi mngon sum du bya ba ma gtogs par dngos po thams cad mi rtag par zhes bya ba la sogs pa ni yod pa ma yin te/ma mthong ba gang yin pa de nyid ma nges par 'gyur ba'i phyir ro/ /'on te bdag cag la sogs pa bstan pa las yongs su shes pa de bzhin du/ de'i yang 'byung bar 'gyur ba yin no/ / zhe na/ bdag cag gis kyang de yis nye bar bstan pa med na/ yongs su shes pa 'byung bar mi 'gyur ro/ /de bas na gang mngon sum du gzigs pa dang gzhan la yang ston pa gang yin pa de la ni 'di nges par 'gyur gyi/ gzhan ni ma yin no/ /de'i phyir skyob pa las de kho na nyid dang / brtan pa dang / ma lus pa'i khyad par mkhyen pa 'grub par 'gyur ro//de kho na mkhyen pas ni phyi rol mu stegs pa las lhag par yin no/ /brtan par mkhyen pas ni rgyun du zhugs pa las lhag par yin no/ /khyad par ma lus par mkhyen pas ni 'dod chags dang bral ba dang / nyan thos dang / rang sangs rgyas dang / byang chub sems dpa' las lhag pa yin te/bde bar gshegs pa yin pa'i phyir ro/ /de'i phyir/ gzhan don mkhyen sbyor brtson pa yis/ /bstan pa de ni brtse ba yin/ /zhes bya ba la/ bde bar gshegs pa'i phyir gzhan gyi don mkhyen par brtson pas/ bstan bcos zhes bya ba'i ming can bstan pa rgyur dpog par byed do/ /bstan pa de las kyang brtse bar rtogs pa yin te/gzhan du na gzhan gyi don mkhyen par brtson pa ni ma yin no zhes bstan to/ /bde bar gshegs pa nyid tsam gyis tshad ma ma yin nam/ brtse ba ldan pa la sogs pa bsgrub pa 'di dag gis ci zhig bya zhe na/ de ni bden pa ma yin te/ de las gzhan don la ltos pa/ /grub pa'i don du ngal med phyir/ / zhes bya ba la/ ye shes tsam gyis bcom ldan 'das tshad ma ma yin te/ 'on kyang slu ba med pa'i phyir yin no/ /brtse ba de las gzhan gyi don la rag las pa nyid kyi bcom ldan 'das grub pas na gzhan gyi don gyi ngal ba med par 'gyur ba'i phyir ro/ /brtse ba las gzhan gyi don thams cad byed pa yin gyi/ yongs su mya ngan las 'das pa ni ma yin no//gzhan yang brtse bas legs par mdzad/ /ye shes las bden sgrub byed bcas/ /gang phyir de gsung bar mngon brtson/ /ldan pa de phyir tshad ma yin/ /zhes bya ba la/ brtse ba dang ldan pas legs par ston par mdzad la/ ye shes las bden pa ste/ yang dag par ston par mdzad do//ye shes dang / sgrub pa dang lhan cig 'jug pa'i phyir sgrub byed bcas pa ste/ gang gi phyir gsung bar mngon par brtson pa dang ldan pa'i rgyu bzhi yod pa'i phyir bcom ldan 'das tshad ma nyid do/ /'o na nye bar bstan pa bden pas bstod pa la dgos pa ci yod ce na/ smras pa/ de yis bstan pa nyid la ni/ /ston pa de lta'i dngos bstod pa//tshad ma'i de nyid grub don du/ /rjes su dpag pa'ang zlog med phyir/ /cung zad skye ba'i bdag nyid can/ /gang de thams cad 'gog chos can/ /zhes sogs rnam pa du mar yang / /'di yi sbyor ba mthong phyir ro/ /zhes bya ba la/ nye bar bstan pa de lta bu'i dngos po tshad ma'i mtshan nyid can gyi bstod pa bcom ldan 'das kyis nye bar bstan pa las ni tshad ma nyid grub pa yin no zhes bstan pa'i phyir ro//bcom ldan 'das kyis nye bar bstan pa mngon sum nyid ma yin nam/ sngon po'i shes pa can gyi skyes bus sngon po shes kyi sngon po'o zhes ni ma yin no zhes gsungs so zhe na/ rjes su dpag pa yang bzlog pa med pa ste/de phyir mngon par bzhed pa nyid yin no/ /sgra la sogs pa ni bzlog pa nyid yin te/ gzhan gyis brtags pa thams cad ni stong pa yin gyi/ nga nyid gcig pu de kho na nyid gsungs pa'o/ /zhes gsungs pa'i phyir ro/ /yang na gzhan gyi don gyi rjes su dpag pa'i sbyor ba gang cung zad skye ba'i chos can de thams cad ni 'gog pa'i chos can zhes bya ba mthong ba'i phyir ro//de smras pa/ med na mi 'byung mtshan nyid can/ /rtags ni rjes dpag rten yin no/ /bsgrub byas gtan tshigs khyab par ni/ /bstan phyir de yang gsal bar bshad/ /ces bya ba la rjes su dpag pa la brten pa'i gtan tshigs kyi mtshan nyid ni med na mi 'byung ba dang ldan pa ste khyab pa du mar bcom ldan 'das kyis bstan pa'i phyir/gtan tshigs de rtags dang / bsgrub bya lhan cig med na mi 'byung ba gsal bar bshad pa yin pa'i phyir/ bcom ldan 'das kyis gsungs pa kho na tshad ma nyid yin no/ /bcom ldan 'das de yang tshad ma nyid yin pa'i phyir ji ltar mi rigs par 'gyur/ de bas na bcom ldan 'das kyis yon tan gyi mchog tshad ma yin par dang por bstan pa yin no//bla ma dam pa dge ba'i bshes gnyen shes rab 'byung gnas kyi zhabs la btud de bsten nas nyi ma sbas pas sbyar ba tshad ma rnam 'grel gyi 'grel pa las/ tshad ma'i mtshan nyid kyi le'u ste gnyis pa'o// //