CLOSE WINDOW

D4223
བོད་ཡིག

@##/ /rgya gar skad du/ pra mA Na bar ti ka TI ka /bod skad du/ tshad ma rnam 'grel gyi 'grel bshad/ bam po dang po/ thams cad mkhyen pa la phyag 'tshal lo/ /srid gsum 'phen par byed pa yi//zag pa ma lus las rgyal ba/ /bde gshegs gang dag srid pa dang / /nges 'byung legs par rtogs pa dang / /de chos yang dag gzigs las byung / /mkhas pas so so rang rig bya//legs gsungs rims bral dang dge 'dun/ /'phags pa'i gang zag brgyad po rgyal/ /blo gros chen po'i bzhed pa gting rnyed ma yin zhing / /'bad byas pas kyang gsal bar rtogs pa med pa 'di//tshig don tsam gyi rang bzhin rab tu bstan pa yis/ /gna' rabs rnams kyis gsal ba nyid du byas gyur pa/ /des na 'dir ni de nyid rtogs phyir 'bad pas ni/ / gsal bar bya ste de bstan pa yang phan phyir yin/ /'gro ba ma rtogs pa ni rtogs par bya ba'i phyir/ /'di la 'bad pa byas pa ngal ba'i 'bras bu yin/ /rtog pa'i dra ba rnam bsal cing / /zhes bya ba la sogs pas ni rab tu byed pa la gus pa bskyed pa'i don du lha dang drang srong gi skye bos zhabs kyi pad+ma la phyag byas pa'i bcom ldan 'das de bzhin gshegs pa la phyag byed pa'o//'jig rten ni cher 'dod pa'i bya ba la 'jug pa na rang 'dod pa'i lha la phyag byed pa sngon du 'gro ba can nyid kyis yin no//de bzhin du slob dpon gyis kyang rab tu byed pa mdzad pa na don chen po nyid kyis dgos pa chen po dang ldan par bstan pa yin no/ / gal te 'jig rten gyi phyag byed pa'i 'jug pa 'di lta bu ni phun sum tshogs pa nyid kyis ma yin nam zhe na/ dgos pa chen po nyid kyis mngon par 'dod pa grub pa nyid kyis yin mod/ des na 'dir ni de nyid bstan par 'dod pa yin no//dgos pa chen po nyid kyang gtan du sdug bsngal dang bral ba yin te/ de ni gang zag dang chos la bdag med pa rtogs pa'i phyir 'di las 'grub po/ /yang ci ste 'di rang gi ngag gis mi brjod/ phyag byas pas ni gus par bya ba yin la de yang srid pa dang bral ba yin pa'i phyir mchod pas don ci yod ce na/'dir ni slob dpon gyi gus pa'i ro ston pa nyid kyis te/ don bstan par bya ba yin yang snying gi ro yongs su rgyas pa nyid kyis ston pa yang 'jal ba po'i chos yin no//gus pa yang 'dud pa'i 'bras bu can yin la/ de yang phyag byed pa yin no/ /gus pa la yang dgos pa ci yod ce na/ 'di bsgrub par bya ba ni ma yin te/ bral ba nye bar ston pas phan 'dogs pa la rang bzhin gyis grub pa yin pa'i phyir ro//rang bzhin gyis grub pa yang 'dod chags la sogs pa nyes pa'i 'bras bu can ni bzlog par bya la/ snying rje dang yid byung ba la sogs pa nyes pa med pa ni 'jug par bya ba yin no/ /de bzhin du bcom ldan 'das la phan 'dogs pa las byung ba'i sems kyi khyad par bya ba nyid yin te/bla na med pa'i 'bras bu 'phen par byed pa'i phyir brtse ba la sogs pa nyid bzhin no/ /'di ltar lam mi 'dzin pa dang / lam nor ba dang / lam la the tshom za ba ni 'gro ba po'i 'bras bu thob pa'i bar chad kyi rgyu yin pa'i phyir khams gsum pa las nges par 'byung bar 'dod pa ni the tshom med par lam la brten pa nyid du bya'o//le'u gnyis par bshad pa'i tshul gyis lam gzhan yang med de/ des na lam nyid 'dzin par 'dod pas de nye bar ston par mdzad pa bcom ldan 'das la gzhan yongs su spangs te gus pas bsgrub par bya zhing skye ba gzhan dag tu yang mu stegs pa gzhan gyis bstan pa'i don 'dzin par ma gyur cig ces de rjes su dran pa dang /mngon par dga' ba dang mchod pa dang rjes su 'jug pa la sogs pas the tshom bzlog pa'i phyir goms par yang bya'o/ /de'i phyir bya ba gzhan yang dag pas rab tu byed pa'i bya ba khyad du 'phags par bstan pa'i phyir bcom ldan 'das kyi yul la bsam pa'i khyad par gyis rab tu bcug pa bcom ldan 'das la phyag bya ba ni gdon mi za bar bya ba yin no zhes drug po yon tan brjod pa sngon du 'gro ba can phyag bya ba'i yul nye bar bstan pa na bstod pa yang rab tu sbyor ro//de la bcom ldan 'das la phyag bya ba la mdor bsdus nas rgyu dang 'bras bu phun sum tshogs pas yon tan rnam pa gnyis so//rgyu ni bsam pa dang sbyor ba yongs su rdzogs pa'o/ /bsam pa ni thugs rje'i bdag nyid yin la de dang rjes su mthun par 'jug pa ni sbyor ba'o/ /'bras bu yang rang dang gzhan gyi don phun sum tshogs pa yin no//gal te 'bras bu ni rgyu dang mthun par nges pa'i phyir ji skad brjod pa'i rgyu las 'bras bu rang gi don phun sum tshogs pa gang las she na/ ma yin te/ rang gi don phun sum tshogs pa ni gzhan gyi don grub pa la 'khrul pa med pa'i phyir mi 'dod kyang 'grub pa'i phyir ro//ji skad du/ gang phyir 'gro ba mya ngan ma 'das par khyod mya ngan 'das par mi bzhed pa/ /tshul 'di bde bar gshegs pa'i go 'phang ma thob par ni nus pa ma yin pa/ /de phyir khyod ni thams cad mkhyen pa yon tan gter gyur thob par nges 'gyur te//khyod la stobs bcu'i yon tan rnams kyis bya ba gzhan ni cung zad kyang mi mnga'/ /zhes gsungs pa bzhin no/ /'bras bu brjod na rgyu 'grub pa nyid ni/ des na phyed snga mas ni rang gi don phun sum tshogs pa brjod la phyi mas ni gzhan gyi don phun sum tshogs pa'o//rtog pa ni gang zag dang chos su rtog pa yin la chos su rtog pa yang gzung bar snang ba med na mi 'byung ba nyid yin te/ des na rtog pa'i dra ba rnam par bsal ba nyid kyis ni gnyis su med pa'i rang bzhin tsam gyi sku bdag dang mi 'dra bar brjod pa yin no/ / de nyid kyi phyir/ shes rab pha rol phyin gnyis med/ /ye shes de ni de bzhin gshegs/ /zhes gsungs so/ /zab pas ni gzhan gyis shes par byar med pa thams cad mkhyen pa nyid la sogs pa'i yon tan dpag tu med pa'i rten nyid du brjod do/ /bcom ldan 'das kyi yon tan ni dpag tu med de/ji skad du/ gal te de bzhin gshegs pa'i chos/ /'di dag bstan du yod gyur na/ /mkhar yang mi shong yon tan mtsho/ /khyod kyi yon tan mtha' las 'das/ /zhes gsungs pa dang / de bzhin du/ rnam grol mnyam pa thob rnams dang / /gang zag de las gzhan rnams dang //sangs rgyas chos kyi mnyam med khyod/ /bar na khyad par shin tu che/ /zhes so/ /rgya che bas ni gzhan dang mtshungs pa med pas bla na med pa nyid brjod do/ /lam gzhan med pa'i phyir re zhig nyon mongs pa dang bral ba la ni de la mi'am lha gang gis kyang bsgrun du de med pa nyid do//rang bzhin gyis grub pa'i nus pa yang med pas phyi rol pa rnams kyis gnon pa la sogs pa'i nus pa dang ldan pa yang bsod nams kyi mngon par 'du byed pa las skyes par brjod par bya'o/ /bsod nams kyi tshogs bsags pa yang de bzhin gshegs pa las gzhan ni mi srid de/sbyin pa dang tshul khrims la sogs pa yongs su rdzogs pa'i phyir ro/ /des na de la bla na med pa'i nus pa dang ldan par de dang der bshad do/ /rnam pa de lta bu'i sku'i rang bzhin gang la mnga' ba'i bcom ldan 'das de la phyag 'tshal ba'o/ / kun tu bzang po zhes bya bas ni gzhan gyi don grub pa brjod do/ /kun tu legs pa ni de las 'byung ba'i phyir te bcom ldan 'das kyi legs pa ni legs pa ma yin pa dang ma 'dres pa yin no zhes bya ba'i tha tshig go/ /gzhan la gnod pa snying por gyur pa'i phan 'dogs pa mngon par mi sgrub pa'i phyir te/thugs rjes 'jug pa'i phyir dang / de yang thams cad la khyad par mi mnga' ba'i phyir ro/ /gnod pa byed pa'i snying por gyur pa'i phan 'dogs pa ni 'dod chags las skyes pa nyid de/ 'ga' zhig lha ma yin bsad pas lha la sogs pa dag par byed pa bzhin no//gang la de lta bu'i rang bzhin mnga' ba de brjod pa ni/ 'od zer dag kun nas 'phro zhes bya ste/ 'dis ni don thams cad khyab pa'i gsal ba nyid brjod do/ /thams cad mkhyen pa zhes bya ba'i tha tshig go/ /rtsom pa'i khyad par gyis gtso bo'i dgos pa rtogs kyang gzhan gyi dbang du byas nas nye bar bstan pa ma yin par brtags te goms pa tsam gyis rab tu bcug pa nyid rtsom pa'i 'bras bu yin par bshad pa ni/skye bo phal po cher zhes bya ba la sogs pa yin no/ /bdag la rtsom par 'dod pa'i gzhung 'di ni gzhan la phan pa yin zhes bsam pa med pa yin yang /sems ni yun ring por skyes bu'i don gyi gtso bo'i yan lag tu gyur pa'i legs bshad gang yin pa de goms pas lhur len skyed phyir skabs su bab pa'i gzhung sbyar ba 'di la dga' ba skyes so/ /ci'i phyir gzhan la phan pa ma yin zhe na/ rgyu bshad pa/skye bo mang du ni 'jig rten pa'i tha snyad nye bar ston pa'i rang bzhin gyi gzhung la chags so/ /de ltar gyur kyang 'jig rten pa la snying po med par mthong bas 'jig rten las 'das pa'i lam la 'jug par 'gyur ro zhe na/ shes rab rtsal med pas na zhes smos te/blun po nyid kyi snying po dang snying po ma yin pa rnam par 'byed pa'i mthu med pas don 'dzin par mi nus so/ /gal te yang 'ga' zhig la rtsal med pa de lta na yang don du mi gnyer bas sdang bar gyur to/ /rang gi rigs kyi rgyun khas blangs pa 'ga' zhig la bdag gi ba nyid kyi dngos por zhen pa ni byams pas phan 'dogs pa tsam gyis rab tu sbyar ba'i bstan bcos gzhan la gzhan gyi yin pa'i blos yon tan mthong yang phrag dog gi dri ma skyes pa ni sdang ba skyed par byed do//de'i phyir rgyu 'dis ni 'di gzhan la phan pa nyid ma yin te de'i phyir gtso bor gyur pa'i dgos pa yan lag yin yang 'di goms pas 'jug pa yin no//'dir yang tshad mar gyur pa zhes bya ba la sogs pa'i gzhung gi 'grel par dmigs pa'i phyir tshad ma kun las btus pa'i 'grel pa yin yang de'i rim pa dor te phyogs chos zhes bya ba la sogs pas dang por rjes su dpag pa brjod pa gang yin pa de mi rigs par mi 'gyur bar bya ba'i phyir 'grel pas dgos pa bshad pa ni don dang zhes bya ba la sogs pa yin no//don ni don dam par yod pa'i ngo bo'o/ /don ma yin pa ni de las bzlog pa ste/ gzugs la sogs pa kun rdzob tu yod pa'am/gtso bo dang dbang phyug dang ri bong gi rwa la sogs pa med pa nyid do/ /de dag rnam par 'byed pa ni de'i yul can gyi dpyod pa ste ji ltar snang ba'am ji ltar khas blangs pa rtogs pa'i chos kyi bdag nyid du gyur pa'i chos don dam par yod pa'am yod pa ma yin pa gang yin pa de'i rjes su 'jug pa'o//gang zhig gang gi bdag nyid can du gyur pa'i chos de rnam par dpyad pa na de rtog par 'gyur te/ dper na sha pa nyid rnam par dpyad pas shing bzhin zhes 'brel pa bstan par ston par 'gyur ro/ /de ni rjes su dpag pa la brten pa yin no//rjes su dpag pa la de gnas pa ste/ de rtsa bar gyur pas rjes su dpag pa rang gi ngo bo thob pa'i phyir ro/ /rjes su dpag pa ni 'brel pa mngon du 'gro ba can yin pa'i phyir na rjes su dpag pa ni de lta bu'i spyod pa'i rtsa ba can yin no/ /chos gzhan gyi bdag nyid du rtogs pas rnam par brtags pa na chos gzhan rtogs par byed de/des na 'brel pa nyid rnam par dpyad pa na de ltar rtogs pa'i phyir de'i rtsa ba 'brel pa yin no/ /des na de ni rjes su dpag pa bstan pa nyid kyis bstan par 'gyur ro/ /de'i don ni 'di yin te/ slob dpon gyi bzhed pa 'chad par gzhal bya grub pa'i 'bras bu can nyid kyi tshad ma rnam par 'jog pa na gdon mi za bar thabs 'ga' la bsten par bya'o//de la gzhal bya grub pa'i thabs ni tshad ma yin no/ /dngos po rang nyid ni rig pa med pa'i rang bzhin nyid kyis mi 'grub pa'i phyir/de gsal na rang gi ngo bo 'grub par 'gyur ba'i phyir rtogs pas dngos po rnam par gzhag pa yin no/ /de lta na yang rtogs pa khyad par med par sgra las byung ba la sogs pa'i tshad ma las kyang / rdzas dang bya ba la sogs pa'i gzhal bya yin pa'i phyir/ 'jig rten par gyur pa'i rtog par byed pa dag gis gzhag par bya bas yongs su rtog pa'i ngal ba don med do/ /'di ltar rtogs pa rtogs pa nyid du grub pa rtogs pa ma yin no zhes rtogs pa gzhan gyi rnam par gzhag pa ma yin pa gang yin pa'am/ yang na the tshom gyi rang bzhin nyid kyis gang yang rung ba'i char gnas pa ma yin pa'i phyir rang nyid rnam par mi gnas par ma skyes pa sngon po la sogs pa'i rtogs pa de nyid kyis 'jig rten pa'i don rnam par 'jog par byed kyi/rmi lam la sogs pa'i shes pa ni ma yin no/ /dbang po'i shes pa bzhin du rnam par rtog pa'i shes pa las kyang yin zhing sgra dang nye bar 'jal ba la sogs pa dag las kyang yin no//'on te 'jig rten pa'i tshad mas grub pa 'jig rten pa'i don rnam par 'jog pa gang yin pa 'di ni rgyan nyid yin no zhe na bden te 'on kyang bstan bcos ni rtsis pas bris pa'i 'gro yig dang 'dra bar 'gyur ro/ /'on te 'jig rten pas grub pa nyid phyin ci log tu rtogs pa'i mi mkhas pa'i dbang du byas nas bstan bcos 'jug go zhe na/de yang 'jig rten pa'i dngos po bstan pa'i 'bras bu can nyid kyis sngar brjod pa'i rnam pa nyid do/ /don du gnyer ba yod na ni de 'jig rten nyid las rtog par 'gyur bas bstan bcos don med pa nyid la/de lta ma yin na bstan bcos las kyang de bzhin no/ /phyin ci log tu gyur pa ni mthong ba la yang rmongs par thal lo zhe na/ 'jig rten pa'i tshad mas rnyed pa'i mthong ba la rmongs pa ldog pa ni 'jig rten nyid las don du gnyer ba rtogs par 'gyur ro//gal te de la phyin ci log tu 'gyur bar rigs pas 'jig rten pa'i lam rtogs pa'i don du bstan bcos 'jug go zhe na/ gal te rigs pa de yang 'jig rten pa'i rtog pa'i rang bzhin yin na ni bstan bcos don med la/ gzhan du gyur pa yin na yang gang las rtogs/de'i bu nyid la sogs pa dag la rjes su dpag par 'khrul pa bzlog pa'i 'bras bu yin na/ gal te de dag gi de 'jig rten pa yin na bzlog par mi nus so/ /gzhan du yin na 'jig rten nyid las ldog go/ /de'i phyir dngos po ma yin pa mthong ba dang /mthong ba la mi mkhas pa'i 'jig rten nye bar dmigs pa na mkhas pa rtogs pa dang rtogs par bya ba brtag pa'i phyir bstan bcos sbyor la/ de la yang thabs dngos po'i 'jug pa rjes su rtogs pa yin no/ /de ni rjes su dpag pa bshad pas bshad par byas pa yin te/rang rgyud du tshad ma gzhan yin par dogs pa bzlog pa'i phyir ro/ /de'i phyir so sor nges pa'i tshad ma rnam par bzhag nas nges pa'i gzhal bya rtogs pa'i phyir dang po thabs bstan pa'i don du rjes su dpag pa bshad pa yin no/ /de lta ma yin na rnam par rtog pa'i yul yang gzhal bya dang /sgra la sogs pa tshad mar 'gyur ro/ /'on te mang du rjes su dpag pa dang / de'i rten rtogs so zhe na/ de yang ma yin no zhes bshad pa ni de la log par rtogs pas zhes bya ba'o/ /'jig rten dang 'jig rten pa'i lam gyi rjes su 'brang ba'i bstan bcos la dngos po gnas pa'i rjes su 'gro ba'i tshad ma med pas na de dag ni rjes su dpag pa la log par rtogs pa yin no//des na rjes su dpag pa rnam par gzhag pa'i phyir bshad pa/ phyogs chos zhes bya ba bsgrub bya'i chos can gyi chos dang / de chas khyab pa bsgrub bya'i chos kyis khyab pa ni gtan tshigs te/bsgrub par bya ba'i chos med na med pa'i phyir dang / de yod na ni bsgrub par bya ba'i chos yod pa'i phyir ro/ /ci 'di dngos po'i rang bzhin rjes su brjod pa tsam du zad dam/ 'on te de lta bu'i rang bzhin du grub pa nye bar bkod pa yin/ de la dngos po la de de lta bur gyur pa'i phyir ni de rtogs pa'i 'bras bu nyid ma yin pa'i phyir/de'i rang bzhin du rtogs pa brjod par bya ba yin no/ /des na de'i chas khyab par rtogs pa sgrub byed yin par brjod pa'i phyir gang du gtan tshigs kyi rang bzhin 'di grub pa der rang bzhin 'di nye bar bsdu ba'i phyir bshad pa/ji skad brjod pa'i rang bzhin can gyi gtan tshigs de ni rnam gsum nyid de rnam pa gsum kho na'o/ /ci'i phyir zhe na/ med na mi 'byung nges phyir ro/ /de'i chas khyab pa'i mtshan nyid med na mi 'byung ba nges pa ni rnam pa gsum nyid la yod pa'i phyir te/ de nyid rang gi bsgrub bya dang 'brel pa'i phyir ro//'brel pa'i rang bzhin can gyi gtan tshigs ni rnam pa gsum yin no/ /des na 'di skad du brjod pa yin te med na mi 'byung ba ni 'brel pa'i bdag nyid nges pa yin la/ de nges pa'i phyir yang rnam pa gsum nyid gtan tshigs yin no/ /med na mi 'byung ba nges pa ni rnam pa gsum la 'dod pa yin la de las ni de gtan tshigs nyid du nges pa yin no//de ltar rnam pa gsum la med na mi 'byung ba nges par sgrub pa na/ 'dir de'i chas khyab pa khas len pa dngos po rjes su brjod pa tsam ni ma yin gyi/ 'on kyang 'di ni de lta bu'i dngos por bsgrub par nus pa yin pas gang gis grub pa de nyid der de'i sgrub par byed pa yin no zhes brjod pa yin no//de lta na 'o na sgrub par mi nus pa bzhi pa la sogs pa dngos po la de'i chas khyab pa yod par 'gyur ro zhe na ma yin no zhes bshad pa ni gtan tshigs ltar snang ba rnam pa gsum las gzhan bzhi pa la sogs pa yin no/ / 'di'i de sred pa'i rgyu mtshan du brjod pa gang yin pa de ni gsum nyid la yod kyi gzhan dag la yang ma yin pas gtan tshigs ltar snang ba'o/ /'di nyid 'dir mtshan nyid du rigs te/ rtags ni bsgrub bya rtogs pa'i 'bras bu can yin pa'i phyir ro/ /gang gi tshe grub par byed pa yod na bsgrub par bya ba yod pa de'i tshe der de las bsgrub bya rtogs pa rigs pas na bsgrub bya rtogs par 'gyur ro//de las der rtogs pa ni phyogs kyi chos nyid las so/ /sgrub par byed pa yod na bsgrub bya rtogs pa de yod pa ni rjes su 'gro ba yin no/ gal te de ma nges pa ni rtogs par mi 'gyur ro//ma nges pa yang sgrub byed yod kyang res 'ga' bsgrub bya med pa'i phyir ro/ /gang gi tshe ldog pas bsgrub bya med na sgrub byed med pa la grub pa de'i tshe na sgrub byed yod na bsgrub bya rtogs pa la rtsod pa med do/ /de'i phyir bsgrub bya rtogs pa'i yan lag ni tshul gsum po kho na'o//gal te med na med pa rang bzhin ma yin te rtags dngos por gyur pa la dngos po med pa'i rang bzhin med pa'i phyir ro zhe na/ gang gis med pa de ltar mi 'gyur ba 'dir dngos po'i rang bzhin ni rtags kyi chos su bstan pa ma yin te/ rjes su 'gro ba yang dngos po'i chos nyid ma yin pa'i phyir ro//'di ltar me yod na du ba 'byung ba'i rang bzhin nyid ni dngos po'i chos su 'gyur gyi/ du ba yod na me yod do zhes bya ba 'di ni dngos po'i chos ma yin te/ skad cig so so la med pa'i phyir dang / rgyun gzhan yang ma grub pa'i phyir ro/ /des na skad cig la brten pa'i dngos po nges pa la brten nas rgyun du gyur pa 'di ni de yod na yod pa yin no//'brel pa rtsa bar gyur pa nyid kyis don so sor nges pa grub na rtogs pa'i rnam pa ci zhig ltar 'byung ba ni mi 'gal ba'i phyir ro/ /rang bzhin gyi gtan tshigs la ni chos tha dad pa nyid med pa'i phyir gzhan yod na gzhan 'gyur ba'i chos nyid yod par ga /la 'gyur te/ gzhan nyid med pa'i phyir ro/ /gal te de lta na dngos po'i chos 'brel pa nyid phyogs kyi chos dang lhan cig rang bzhin yin par 'gyur mod/ dngos po ma yin pa'i rjes su 'gro ba dang ldog pas ci bya zhe na/ de ltar 'gyur bar ni mi nus te/'brel pa yod kyang de ltar ma rtogs pa'i rjes su dpag pa mi 'grub pa'i phyir ro/ /gang gi phyir du ba me'i rgyu can yin zhing byas pa nyid kyang mi rtag pa'i bdag nyid can yin pa de'i phyir thams cad du du ba yod na me yod la byas pa yin na mi rtag pa yin no zhes chos can thams cad la nges pa rtogs nas skabs kyi chos can la rtogs pa'i phyir ro//de lta ma yin te ji srid du rgyu mtshan 'di las du ba yod na me yod la med na du ba mi 'byung ngo zhes ma rtogs na/ gang gi phyir me las du ba 'byung ba de'i phyir du ba mthong nas me rtogs par ji ltar 'gyur/chos can gcig la brten nas de ltar rtogs pa yang ma yin te 'on kyang thams cad du yin no/ /de lta bu'i ngo bor rtogs pa nyid kyis thams cad khongs su bsdus pas chos can la lkog tu gyur pa bsgrub par bya ba'i chos su rtogs pa yin no/ /des na rnam pa 'di lta bu rtogs pas chod nas rtogs pa'i phyir 'brel pa rtags kyi mtshan nyid du ma brjod kyi 'on kyang tshad ma nyid brjod pa yin no//de ni mdo 'di nyid don gyi sgo nas ston pa ni phyogs ni zhes bya ba la sogs pa'o/ /'dir phyogs chos zhes bya ba phan tshun 'brel pa 'gal ba'i phyir te/ phyogs zhes bya ba'i sgra ni bsgrub bya brjod pa'i phyir dang /chos ni chos can la bsgrub par bya ba yin pa'i phyir na chos la chos gang la 'thad/ des na bram ze'i khye'u la seng ge zhes bya ba ltar ma 'brel pas phyogs ni chos can no zhes smos so/ /chos can la phyogs su brjod pa yin gyi/ gang gi chos kyi sgra dang chos ma 'brel par 'gyur ba gnyi ga brjod pa ni ma yin no//sgra don gzhan la 'jug pa ni nye bar btags pa las 'jug pa yin no/ /de yang 'dod pa'i dbang gis der 'jug pa na dngos nyid du 'gyur te/ de la yang 'dod pa'i dbang gis zhugs pa'i phyir ro/ /de'i phyir don nyid don gzhan la nye bar 'dogs pa yin la der rang gi sgra ni rang gi don nyid kyis 'jug pa yin no zhes smos pa ni/yan lag la spyi nye bar btags pa'i phyir ro zhes bya ba'o/ /gal te yang chos chos can la bsgrub par bya ba yin gyi spyi ni ma yin te/ ji skad du/ de'i phyir chos nyid chos can la bsgrub par bya ba'am phyin ci log tu bya ba yin no zhes bshad pa/de lta na yang 'bras bur chos can chos de dang ma 'brel pa rnam par bcad pas bya ba 'grub pa'i phyir na gang las de la phyogs kyi sgra'i don nye bar btags pas de'i sgra 'jug pa 'grub pa spyi bsgrub byar brjod pa yin no/ / don gzhan nye bar btags pas don gzhan go bar byed pa'i tha snyad 'dogs par byed pa po ni mi 'dra bar bstan pas dgos pa nyid 'ga' zhig 'dod pa yin no zhes bshad pa ni gal te zhes bya ba la sogs pa'o/ /ma 'brel ba'i phyir nye bar gdags par bya ba yin par gnas pas na 'di nye bar btags pa yin pa 'gog pa ni ma yin gyi/'on kyang sgra'i don gzhan sgro btags pa'i sgo nas nye bar btags pa las gzhan nye bar gdags par mi bya ba rang gi sgras brjod pa de bya ba yin no/ /ci'i phyir zhe na dgos pa med pa'i phyir ro/ /'di skad brjod pa yin te/ chos can rang gi tshig gis brjod par bya ba yin gyi/tshig don gzhan nye bar btags pas ni ma yin te de ltar bstan pa la dgos pa med pa'i phyir ro/ /ji ltar lhas byin la seng ge'i don nye bar btags pas dpa' ba la sogs par sgrub pa de bzhin du 'dir 'ga' yang ma yin no/ /de nyid kyi phyir 'di lta bu'i brjod pa ni yon tan bstan pa'i 'bras bu can nyid kyis na sgra rang gi don la 'jug kyang phal bar brjod pa yin gyi/yon tan brjod pa'i phyir ni ma yin no/ /'di bzlog pa'i phyir bshad pa nye bar gdags par mi bya ba ma yin te/ ci'i phyir zhe na chos can gyi chos thams cad yin pa dgag pa'i phyir ro//de yang ci'i phyir zhe na/ bshad pa/ der nye bar gdags su rung ba'i chos can yin par rtogs par bya ba'i phyir ro/ /nye bar btags pa'i dgos pa can gyi chos thams cad yin pa dgag pa ni phyogs su nye bar gdags su rung ba'i chos can yin par bstan pa'i phyir ro zhes bya ba'i don to//nye bar ma btags pa ni chos can rang gi tshig gis brjod pa yin la/ de lta na yang chos can chos zhes bstan pa na bsgrub bya dang dpe dang gnyi ga ma yin pa'i rang bzhin gyi chos can yod pas chos can gyi sgra spyi brjod pa yin pa'i phyir bsgrub bya dang sgrub byed dang gnyi ga ma yin pa'i chos can gyi chos kyang brjod par 'gyur ro//de yang gtan tshigs su brjod par 'dod pa'i phyir rnam pa de lta bu dag gtan tshigs su 'gyur ro/ /des na de ltar nye bar ma btags na nyes pa gang du 'gyur ba de nye bar btags pas bkag pa yin no/ / nye bar btags pa de yang nges pa'i chos can rtogs par byed pa na nye bar ma btags na thal bar 'gyur ba chos can kun gyi chos nyid yin pas 'gog par byed do/ /'dir chos can thams cad kyi chos yin pa bkag pas nges pa'i chos can rtags par byed pa ni ma yin gyi 'on kyang nye bar btags pas der rung ba'i chos can du rtogs na chos can thams cad kyi chos yin par thal bar mi 'gyur ba yin no//de lta na yang chos can gyi chos thams cad yin pa bkag pa'i don nyid kyis der nye bar gdags su rung ba'i chos can rtogs par bya ba'i don yin par brjod pa gang yin pa de ni nye bar ma btags par chos can gyi chos thams cad yin par thal ba bstan pa'i phyir ro//nye bar ma btags na thal ba de ni nye bar btags pas bkag pa yin no/ /de lta na 'o na der nye bar gdags su rung ba'i chos can yin par rtogs pa'i don gyis chos can gyi chos thams cad yin pa bkag pa'i don gyis 'gyur te/nges pa rtogs na gzhan dgag pa shugs kyis rtogs pa'i phyir ro/ /bzlog pa ni ma yin no zhe na/ gal te der nye bar gdags su rung ba'i phyir chos can yin par rtogs pa'i don nyid gtso bo'i dgos pa ma yin na de ltar 'gyur ro/ / de lta na ni chos can gyi chos thams cad yin pa bkag pa'i don nyid gtso bo'i dgos par 'gyur ro/ /'o na gnyi ga dgos pa rang rgyud par 'gyur ro zhe na ma yin te bsdu ba med pa'i phyir ro/ /de'i phyir nye bar ma btags na thal ba'i skyon bsal ba'i 'bras bu can du gyur pa na/ nye bar btags pas nges pa'i chos can rtogs par byed pa yin no zhes brjod pa'i phyir de ltar nye bar bkod do//de dgos par gnas na ni bzlog par 'gyur te phyogs nye bar btags pas bstan pa'i chos can gang yin pa de rtogs na gzhan 'gog pa'i phyir ro/ /gang zhig der nye bar btags par rtogs par bya ba de yang gang yin zhe na/der nye bar gdags par 'os pa gang yin pa nyid do/ /de yang gang yin zhe na/ de'i phyogs gcig yin pa'i phyir zhes smos so/ /phyogs ni spyi yin la de ni phyogs gcig chos can la nye bar 'dogs pa yin no/ /des na gang zhig 'di'i phyogs gcig yin pa de nyid nye bar gdags par 'os pa yin pa'i phyir bsgrub bya'i chos can nges pa de nyid rtogs te de nyid de'i phyogs yin pa'i phyir ro//de'i phyir phyogs su gdags par 'os pa'i chos can rtogs par bya ba'i phyir nye bar gdags par byas la/ de lta yin dang sgra mi rtag ste mig gi gzung bar bya ba yin pa'i phyir bum pa bzhin no zhes bya ba de lta bu la sogs pa chos can gyi chos zhes smos na thal bar 'gyur ba dag 'dzin pa gsal ba yin te mig gi gzung bya nyid ni sgrub par byed pa'i chos can gyi chos yin pa'i phyir ro//sogs pa smos pas ni gzhi tha dad pa gnyi ga ma yin pa'i chos can la brten pa gsal ba'o//pha rol po nye bar mi gdags pa gzhung 'jug pa na ji skad brjod pa'i thal bar 'gyur ba med par ston pa ni gal te chos zhes brjod pas kyang zhes bya ba'o/ /chos can yang yin la gzhi yang yin pa de ni chos zhes brjod pas kyang 'grub bo//chos can gyi sgra ni chos can tsam brjod pa yin no/ /des ni chos can zhes bya bas chos can dang 'brel pa'i chos tsam zhig brjod par 'gyur gyi/ khyad par lhag pa ni ma yin la de ni chos kyi rang gi ngo bo nyid kyis 'grub bo/ /des na chos zhes brjod pas 'di'i rten chos can rtogs par 'gyur te de la brten pa ma yin na/chos can nyid du mi 'grub pa'i phyir ro/ /des na spyi tsam brjod pa chos can gyi sgra dgos pa bde bar 'gyur ro/ /khyad par brjod par 'dod na ni chos can smos pa don dang ldan par 'gyur te/ khyad par can gyi chos can la brten pa'i chos ni chos kyi rang bzhin nyid las mi 'grub pa'i phyir ro//de'i phyir chos can zhes smos pa'i shugs kyis bsgrub par bya ba'i chos can yin par 'grub po/ /bsgrub bya'i chos can khyad par can nyid kyi dbang du byas nas 'dir chos can sgra sbyar ba 'thad kyi chos tsam la ni ma yin no zhes bya ba'i tha tshig go//khyad par can gyi chos can yang chos can nyid yin pas spyi'i tshig gis kyang brjod par nus pa yin la sbyar ba la mi ltos kyang sbyar bas ni khyad par brjod par 'dod pa yin te don med pa ma yin pa'i phyir ro/ /de la yang ji sgrub par byed pa dang gnyi ga ma yin pa'i chos can yin par thal bar mi 'gyur ba de ston pa ni nye ba yin pa'i phyir zhes bya ba yin no//khyad par la brten par grub pa na khyad par nges par 'dzin pa ni sgra las mi 'grub pa'i phyir rgyu mtshan gzhan las yongs su gzung bar grub pa spang ba la tshad ma med do/ /des na 'dir chos can gyi tshig gis ni bsgrub bya'i chos rtogs pa'i don du gzung ba'i chos can nyid smos par 'thad pa yin no//des na bsgrub bya'i chos can gyi chos nyid du grub pa na nye bar btags pas don med de/ chos can chos zhes nye bar ma btags pa nyid du sbyar bar rigs so zhe na/ dgos pa ni dgag pa'i phyir smos pa ni ma yin te zhes bya ba'o//de ltar bsgrub bya'i chos can 'grub pa ni ma yin no/ /ci'i phyir zhe na thun mong ma yin pa'i phyir ro/ /de smras pa ni dpe'i chos can yang zhes bya ba'o/ /rgyu mtshan gzhan las grub pa 'dzin pas na nye bar gyur pa nyid chos can gyi tshig gis smos pas gnyi ga ma yin pa'i bdag nyid kyi chos can gsal bar grub tu chug mod bsgrub bya dang sgrub byed kyi chos can smos pa la ni khyad par du byed pa'i rgyu yod pa ma yin te/dpe'i chos can yang sgrub byed kyis 'dzin par khyad par med pa'i phyir ro/ /'dir de'i chas khyab pa zhes bya bas zhes smras te/ chos can zhes smos pa na gzung ba'i chos can la 'jug par nges par bya ba yin pas de la yod pa nyid du bstan par bya ba yin no//dpe'i chos can la ni chos yod par grub pa nyid yin te/ 'di ltar de'i chas khyab pa zhes bya ba ni rjes su 'gro ldog brjod pa yin la/ de nyid kyang gcig gi sgo nas dpes bstan par bya ba yin te/des na sgrub par byed pa'i chos de la yod pa ni grub pa nyid do/ /de'i phyir de ni nye ba yin yang chos can gyi tshig gis smos pa don med pas ngag la don yod par bstan pa bsgrub par bya ba'i chos can de nyid 'dir smos pa yin no zhe na/ 'di dgag pa'i phyir grub bzhin du zhes smos so//de'i chas khyab pa zhes bya bas gtan tshigs dpe'i chos can la yod par grub bzhin du yang yod par bstan pa ni/ de nyid kyi chos gang yin pa de kho na gtan tshigs yin no zhes brnan pa'i phyir yin par 'gyur te/ de lta na yang yang bsgrub pa 'bras bu dang bcas pa'i phyir ro//gal te bsgrub pa 'bras bu med pa nyid ma yin pa'i phyir brnan par dogs pa med pa ma yin nam/ 'di ltar de'i chas khyab pa zhes bya bas ni de dpe'i chos can gyi chos kyis khyab par brjod pa yin la dpe'i chos can gyi chos gtan tshigs so zhes bya ba 'dis ni gtan tshigs nyid du yin te/de na dpe'i chos can gyi chos dpe'i chos can gyi chos kyis khyab pa zhes bya ba 'di la sgrub pa don med pa ma yin pa'i phyir brnan pa'i phyir yin par dogs par mi 'gyur ro zhe na/ bden te khas blangs nas nye bar bkod pa yin no/ /rnam pa 'di lta bu'i yul la brnan pa khas len pa yod do zhes ston pa ni mthun pa kho na la zhes bya ba yin no//mthun pa kho na la yod pa zhes bya ba 'dis mthun pa'i phyogs la nges par yod pa nyid du bstan pas mthun pa'i phyogs ma yin pa las ldog pa grub mod kyi de med pa la med pa zhes mi mthun pa'i phyogs las ldog pa ston par byed pa gang yin pa 'dis ni/bsgrub par bya ba med pa la med pa smos pa de bzhin no/ /de ni 'chad pa po dag gis nges pa'i phyir yin par bshad do/ /mi mthun pa'i phyogs rnam pa gsum po de las gzhan pa dang de dang 'gal ba dang de med pa'i rang bzhin las de med pa la med pa nyid yin gyi gzhan la med pa la ni ma yin no zhe'o//des na de ltar bsgrub bya sgrub byed ma yin pa ni rang bzhin gyi chos can bsal kyang dpe'i chos can yin par yongs su 'dzin pa ni gsal bar mi nus pas chos can zhes smos pas bsgrub bya'i chos can mi rtogs pa'i phyir nye bar gdags par bya ba nyid pas phyogs zhes smos pa yin no//gal te spyi tsam brjod pa'i chos can gyi tshig sbyar ba don med pa'i phyir khyad par brjod par 'dod par grub pa ni dpe'i chos can nyid ni khyad par yin par mi 'gyur ba ma yin nam/ de la yod pa ni gzhan du rtogs pa'i yan lag tu nye bar bstan pa yin te de'i chas khyab pa nyid kyis gtan tshigs nyid du gyur pa'i phyir ro//dpe'i chos can la ni yongs su zin kyang gtan tshigs gtan tshigs nyid ma yin te dper ma rtogs pa rtogs par byed pa'i bdag nyid shes par byed pa'i chos med pa'i phyir ro/ /des na de'i chas khyab pa'i gtan tshigs gang la yod pas gtan tshigs kyi dngos po nyid du 'gyur ba de'i chas khyab pa nyid kyis nges par byed pa'i dngos po'i yan lag tu gyur pas rtogs par bya ba'i chos nyid kyi chos can shes par byed pa'i rten du gyur pa 'ga' zhig 'phangs pa nyid do//des na chos can gyi gtan tshigs zhes bya bas ma rtogs pa rtogs par byed pa'i yan lag de'i chas khyab pa la ltos pa chos can de la yod pa na gtan tshigs kyi dngos por brjod pa yin no//gzhi tha dad pa la yang thal ba ma yin te/ rtogs par bya ba'i chos nyid kyis chos can 'phangs pa'i phyir ro/ /dogs pa 'di la brjod pa ni shugs kyis zhes bya ba yin no//'bad pas thob par bya ba'i don nges pa'i tshig sbyar ba ni smra ba la bzo ba ma yin no/ /des na ji skad brjod pa'i shugs kyis bsgrub par bya ba'i chos can gyi don go na rtogs par dka' bar 'gyur te rigs pas go ba'i phyir ro/ /don gyi rjes su 'brang bas byas pa'i dka' ba spangs nas sgras rtogs par bya ba'i phyir bstan bcos yin no//des na rtogs par dka' ba yongs su spangs pa'i phyir yang phyogs zhes smos pa yin no/ /gal te phyogs bsgrub bya'i chos can gyi chos nyid yin na/ chos can gzhan la med pa'i chos thun mong ma yin pa nyid yin no//gtan tshigs smras pa ni de'i khyad par la ltos pa zhes bya ba yin no/ /gang gi tshe chos 'di phyogs kyi yin pa de'i tshe de med par mi srid pas gzhan la yang 'di yod pas chos can de dang ldan pa nyid du 'gyur ba yin no/ /chos can gzhan gyis rnam par bcad pa de ni chos can gzhan la 'jug par mi srid pas na thun mong ma yin pa nyid do//ci ste gang gi rnam pa de lta bu nyid gzhan la yod par dogs pa phyogs kyis rnam par bcad pa des rnam par bcad pa mi 'dor ro zhes bya ba 'di la rigs pa ci yod ce na/ chos nyid kyis chos can dang 'brel pa 'phangs pa'i chos nyid ni nges pa med par bsgrub bya'i chos can gyi yin pa'am/sgrub byed kyi chos can gyi yin par 'gyur ro/ /de gang gi tshe sgrub byed kyi chos can gyi chos yin pa de'i tshe bsgrub bya'i chos can gyi ma yin te/ des na mi 'gyur ba de nyid sel bas sgra 'di don dang bcas par 'gyur bas de la yod pa chos can gzhan la med pa'i phyir nges pa grub pas thun mong ma yin pa nyid do snyam na/dogs pa 'di slob dpon gzhan du nges pa srid pa ston pa ni ma yin te zhes bya ba yin no/ /nges pa rtogs kyang 'di ltar 'dir mi 'thad do/ /gal te sgrub byed kyi chos can la yod pa dang bsgrub bya'i chos can la yod pa 'gal na de'i tshe chos can gzhan la yod na bsgrub bya'i chos can la med par 'gyur ba'i phyir med pa de nyid la ltos nas sgra sbyar ba ni chos can gzhan la yod pa 'gal bas de la yod par brjod pa de nyid la yod pa zhes bya ba'i don 'dir 'gyur ba zhig na gang gi tshe chos thun mong gi rang bzhin yin pa'i phyir chos can mang po dag la gcig par yang yod par srid pa de'i tshe gang zhig sgras brjod par bya ba chos nyid kyis ma 'phangs pa'i chos can la yod pa ni yod pa ma yin no//chos ni chos can thams cad la yod par 'gyur ba'i nges pa med pa'i phyir te/ mig gis gzung bya nyid ni dpe nyid la yod pa'i phyir dang mnyan bya nyid ni bsgrub bya nyid la yod pa'i phyir dang /chos nyid kyis chos dang chos can 'brel pas ma bsal ba 'dod rgyal ba'i med pa la ltos nas sgra'i sbyor ba 'jug pa ni mi ldan pa rnam par gcod pa nyid kyis mthar thug par 'gyur ba yin gyi/ gzhan dang ldan pa rnam par gcod pa ni ma yin no/ /der 'dod rgyal ba'i med pa bsal ba ni chos can gzhan la yang yod pa mi 'gal ba'i phyir ro/ /yod pa la ni med pa 'gal ba'i phyir de rtogs pa na ma 'brel ba rnam par gcod pa nyid yin no zhes bshad pa ni mi ldan pa rnam par gcod pas khyad par du byas pa'i phyir yin gyi zhes bya ste/'dod rgyal ba'i med pa bzlog pas phyogs kyi chos kho na yin kyi chos ma yin pa ni ma yin no zhes chos phyogs dang ma 'brel ba rnam par bcad pas 'brel par byed pa'i phyir ro/ /mi ldan pa rnam par bcad pa'am gzhan dang ldan pa rnam par bcad pa yang ji lta bur gyur pa dag cig ce na/'jig rten pa'i dpes ston pa ni/ dper na nag pa zhes bya ba la sogs pa yin no/ /phyogs chos zhes bya ba rnam par bkral nas/ de chas khyab pa ni zhes bya ba rnam par 'brel pa ni de'i cha ni de'i chos yin gyi zhes bya ba ste/ nye bar btags pa'i phyir na cha'i sgra 'di na chos kyi don yin no zhes bya ba'i tha tshig go//de'i phyogs gcig ni ma yin te zhes bya ba ni dngos kyi don la 'jug pa nyid 'gog pa'o/ /don de la gnod pa brjod pa ni phyogs zhes bya ba'i sgra spyi la spyi bya ba'i phyir ro zhes bya ba yin no/ /de zhes bya ba 'dis ni phyogs bzung ba yin la de la ni phyogs gcig srid pa ma yin te spyi'i rang bzhin ma yin pa'i phyir ro//des na 'dir cha'i sgra ni phyogs gcig tu sgo btags nas chos la 'jug pa yin no/ /gang zhig nye bar gdags pa'i sbyor ba khas len pa de'i chos kyis khyab pa zhes ma brjod pa yang ci ste zhe na smra ba po'i bsam pa'i dbang gis zhes smos so//'dir smra ba po'i bsam pa ni yod pa yin no/ /de yang gang zhe na skabs su gyur pa nyid kyis na ma brjod pa gang yin pa'o/ /de lta yin dang / ji ltar 'dir spyir brjod pa nyid kyis 'dod pa rtogs par byed pa ma yin pa'i phyir chos can gyi tshig sbyor ba bkag pa de bzhin du chos kyi tshig kyang yin no//bsgrub par bya ba bzhin du bsgrub bya ma yin pa'i chos kyang chos nyid yin pa'i phyir des khyab pa yang gtan tshigs su rtogs par 'gyur te/ dper na 'di ni shing yin te byas pa'i phyir zhes bya ba lta bu'o/ /shing bsgrub par bya ba la byas pa nyid bsgrub par bya ba'i chos can gyi chos bsgrub par bya ba'i chos ma yin pa mi rtag pa nyid kyang khyab pa yin la/brjod par 'dod pa ni bsgrub bya'i chos yin pas na bsam pa de'i dbang gis phyogs gcig tu sgro btags nas chos bstan pa yin gyi rang gi sgras ni ma yin no/ /de ltar bsgrub bya'i chos rtogs par yang ji ltar 'gyur zhe na/'di skad brjod de/ 'dir spyir gang zhig sgro btags nas chos can bstan pa de'i phyogs gcig sgro btags pas chos bstan pa yin te/ phyogs gcig gzhan mi rtogs pa'i phyir ro/ /phyogs kyi phyogs gcig pa ni bsgrub bya'i chos sam bsgrub bya'i chos can yin te/des na bsgrub par bya ba'i chos can gyi chos phyogs kyi phyogs gcig gis khyab pa yin no zhes brjod pa na bsgrub bya'i chos kyis khyab pa rtogs par 'gyur ro/ /chos can yang de'i phyogs gcig ma yin nam zhe na/ bden mod kyi/ des khyab pa ni mi srid de/de ni khyad par gyi rang bzhin yin pa'i phyir ro/ /gal te khyad par la khyab pa mi rtogs pa yin gyi med pa ni ma yin no zhe na/ ma yin te khyab pa ni rjes su 'gro ldog gi rang bzhin yin pa'i phyir dang / de dag kyang thams cad na yod pa'i rang bzhin pa'i phyir dang / de yang khyad par mi srid pa'i phyir ro//des na bsgrub bya'i chos can gyi chos bsgrub bya'i chos kyis khyab pa ni gtan tshigs yin no zhes bya ba'i don 'di rtogs par 'gyur ro/ /phyogs chos de'i chas zhes bya ba bshad nas/ khyab pa bshad pa'i phyir khyab pa zhes bya ba smos so/ /khyab par byed pas khyab par bya ba khyab pa yin pa'i phyir khyab pa yin no//de brjod pa ni de dag gis so sor nges pa'i rang bzhin khyad par can brjod par bya ba yin no/ /des na khyab par byed pa'i khyad par ji lta bu yin pa de nyid de ltar brjod pa yin gyi/ bya ba zhes bya ba ni 'ga' yang yod pa ma yin no/ /'dir tshig gsum la nges par gzung bar bya ba ni de kho na la zhes bya ba dang /khyad par byed pa kho na la zhes bya ba dang / yod pa kho na zhes bya ba rnam pa gsum srid par 'gyur ro/ /de la khyab par byed pa go bar bya ba la khyad par bya ba go bar byed pa nyid du 'thad pas na/ de'i chas khyab pa gtan tshigs yin no zhes bstan to//khyad par byed pa nyid la khyab par bya ba rjes su 'gro ba dang ldog pa yod pa'i phyir dang / gtan tshigs go bar byed pa nyid du yang / de dag nyid sgrub par byed pa'i phyir ro zhes bstan pa yin no/ /des na sgrub par byed pa yod na bsgrub bya yod par so sor nges pas na gtan tshigs go bar byed pa yin no zhes go bar byed pa'i rang bzhin brjod pa na/de la khyab par byed pa yod pa kho na zhes brjod par bya ba yin no/ /de la khyab par byed pa kho na yod pa zhes nges par bzung na ni go bar byed pa'i chos bstan par mi 'gyur te/ khyab par bya ba nye bar gnas pa la khyab par byed pa ma yin pa yod kyang de yod pa la so sor nges par gyur pa'i khyab par byed pa'i rtogs pa mi 'gal ba'i phyir ro//de bzhin du de kho na la khyab par byed pa yod pa zhes gzhan dang ldan pa rnam par gcod pa yang yan lag ma yin te/ ji ltar brjod pa'i tshul nyid gtan tshigs su grub pa'i phyir na/gtan tshigs las gzhan la med pas sgrub par byed pa ma yin pa'i phyir ro/ /gang gi tshe de khyab bya med par yang yod pa de'i tshe mi rtogs pa zhes bya bar 'gyur ro/ /gtan tshigs kyi skyon ni de las rtogs pas na de med pa'i phyir bsgrub bya la 'khrul pa ma yin pas gzhan dang ldan pa rnam par bcad pa ni don med do//khyab par byed pa gzhan dang ldan pa can nyid yin yang go bar byed pa'i dngos por rigs pa'i go bar byed pa de'i dngos po yin pa yang bkag pa'i phyir 'gal ba yang yin no/ /khyad par bya ba med par yang 'gyur la/ khyab par bya ba la yang so sor nges pa'i phyir de las rtogs pa mi 'gal ba'i phyir te rtsol ba las byung ba nyid yin no//mi rtag pa nyid rtsol ba las byung ba nyid med par 'gyur yang rtsol ba las byung ba la nges par yod pa'i phyir de las mi rtogs par ji ltar 'gyur/ des na mi ldan pa rnam par gcod pa nyid 'thad pa yin te brjod bya ji lta bar rjod par byed pa sbyor ba'i phyir ro//khyab par bya ba'i rang bzhin du gyur pa'i khyab pa'i mtshan nyid kyang ston pa 'di yang na de kho na la zhes bya ba yin no/ /de kho na la khyab par bya ba yod pa ni khyab pa yin no/ /'dir yang snga ma bzhin nges par bzung ba rnam pa gsum srid pa las gzhan dang ldan pa rnam par gcod pa nyid 'dod pa yin te/de khyab par byed pa spangs nas gzhan na yod na de las rtogs pa mi brten pas rjes su dpog par mi 'gyur ba'i phyir dang / de kho na la yod na ni bzlog pa'i phyir ro/ / gzhan bzhin du der yang yod pa yin no zhe na/ yod mod/ de nyid kyi phyir de yod pa na de dang de ma yin pa dag yod par the tshom za bar thal lo/ /khyab par byed pa gnyi ga la yod pas kyang ji ltar the tshom mi za zhe na/ de yod na yod par so sor nges pa'i phyir ro zhes bshad zin to/ / gzhan du med pas go bar byed pa nyid du 'thad pa'i phyir khyab par bya ba ma yin pa yod pa mi 'gal bas na de la khyab par bya ba kho na yod pa zhes bya ba ni yan lag ma yin pa dang yang rtogs par byed pa ma yin pa yang ma yin no/ /khyab par byed pa yod pa la yod par nges pa de la khyab par bya ba yod pa kho na zhes bya ba yang don med pa yin te/de med par mi rtogs pa'i phyir dang / rtogs na 'khrul pa med pa'i phyir ro/ /nges pas med kyang rtogs par byed pa yod pa'i phyir gtan tshigs kyi dngos por 'thad pa yang 'gog par thal ba'i phyir te dper na rtsol ba las byung ba nyid bzhin no//mi rtag pa la ni de las bzlog pa yang yod pa'i phyir ro/ /yang ji ltar na 'dir mi ldan pa rnam par bcad na mthun pa'i phyogs kyi phyogs gcig la yod pa gtan tshigs ma yin par thal gyi/ khyab par byed pa yang ni ma yin/ der ni gzhan dang ldan pa rnam par bcad na 'gyur gyi/'di ni ma yin zhe na mtshungs pa nyid du 'gog pa yin pa ma yin pa'i phyir/ 'di gnyis mi 'thad pa ma yin pa'i phyir ro/ /khyab par bya ba yod pa la khyab par byed pa ma 'brel pa rnam par bcad na de de dang mi ldan par mi 'gyur ba nyid do/ /de ltar na khyab par byed pa mi ldan pa rnam par bcad na thal ba ma yin gyi khyab par bya ba ni ma yin no//de'i phyir de ltar khyab par byed pa khyab par bya ba yod na yod ces bya bas ni rjes su 'gro ba bshad nas khyab par bya ba khyab par byed pa kho na la yod pa zhes bya bas ni ldog pa ste des na tshul gsum nyid gtan tshigs su 'thad pa'i phyir/de'i chas khyab pa zhes bya ba rjes su 'gro ba dang ldog pa dag brjod pa yin no/ /dper na tshad ma rnam par nges par mthun pa'i phyogs dang mi mthun pa'i phyogs dag la yod pa dang med pa dag gis brjod pa bzhin no/ /'dir de'i chas khyab pa dang phyogs kyi chos nyid kyi dngos po la yod pa tsam gyi gtan tshigs kyi tshul gsum brjod pa ni ma yin te shes pa'i tshul gsum nyid rtags kyi chos yin pa'i phyir ro//'dir ni mtshan nyid la shes pa smos pa ma byas pas de ji ltar rtogs par 'gyur zhes dogs pa la/ 'dis ni zhes bshad pa tsam mo// // bam po gnyis pa/ phyogs kyi chos dang rjes su 'gro ldog brjod pa 'dis ni rjes su 'gro ba dang ldog pa nges pa dag kyang bshad la phyogs kyi chos nges pa yang bshad pa yin no/ /nges pa'i thabs mtshungs pa nyid kyi rjes su 'gro ldog dag phyogs kyi chos nyid las rnam par phye nas bstan to//'dir rjes su 'gro ba dang ldog pa dag kyang bshad do zhes bya ba'i don 'di ni ma yin no/ /gang du gzhan rtogs pa yang gzhan rtogs pa'i 'bras bu can du 'gyur ba der 'di ltar brjod par rigs kyi/ gang gis gang kho na brjod pa de bshad nas kyang / yang 'di ltar brjod pa ni don dang ldan par mi 'gyur ro//de'i chas khyab pa rtogs na yang de brjod pa'i don du yin no zhe na/ ma yin te khyab pa ni zhes bya ba la sogs pas ji ltar 'di'i rang bzhin brjod pa de ltar de dag rtogs pa'i phyir ro/ /phyogs kyi chos nyid la yang gzhan rtogs pa ci zhig yod na/ phyogs kyi chos kyang bshad pa yin no zhes gang brjod par 'gyur ro/ /de'i phyir nges pa smos pa ma byas par bstan kyang nges pa nyid brjod pa nyid do zhes bya ba'i don 'di nyid nye bar bkod pa yin no/ /'dir nges pa ji lta bu zhig yin zhe na gang la de yod pa der tshul gsum po de bsdu ba'i phyir de dag ni zhes smos te/phyogs kyi chos dang de'i chas khyab pa de dag ni 'bras bu dang rang bzhin dang mi dmigs pa'i mtshan nyid can gyi gtan tshigs gsum yin no/ /ji skad du brjod pa'i rtags gsum po dpes ston pa na 'bras bu la sogs pa gsum ni ji ltar 'di dang 'di'o zhes bshad pa ni dper na zhes bya ba nas bshad pa yin no zhes bya ba'i bar ro//des na ji skad brjod pa'i rim pa'i rjes su 'brang ste/ dang po 'bras bu nye bar bkod la gnyis pa ni rang bzhin no/ /tha mar ni mi dmigs pa'o/ /gtan tshigs dang bsgrub bya gnyis bkod pa ni rgyu dang 'bras bu'i rang bzhin nyid nye bar bstan pa'i phyir ro//rang bzhin gyi gtan tshigs ni/ shing sha pa yin pa'i phyir zhes bya ba'o/ /'dir yang gnyi ga nye bar bstan pa ni rang bzhin gyi gtan tshigs nyid du rab tu bstan pa'i phyir te/ de gnyis gcig gi bdag nyid du grub pa'i phyir ro/ /mi dmigs pa ni phyogs kyi khyad par zhes bya'o//phyogs kyi khyad par ni phyogs khyad par can yin gyi thams cad ni ma yin la de yang so sor nges pa yin no/ /de ci 'di nyid dam 'on te gzhan nyid ces mi shes pas na 'ga' zhig na zhes smos te/ 'di yang khyad par nges par nye bar bkod pa nyid do/ /des na snga mas ni thams cad du yin pa bkag la 'dis ni khyad par de'i ngo bo rnam par 'jog par byed pa'i gcod pa po rtog pa yin no//de yang sgrub byed nye bar ston pa na phyogs la sogs pa shes par 'dod pa'i bye brag can tshad mas rtogs pa yin par khong du chud pa nyid do/ /chos can de na bum pa med de zhes bya ba ni bum pa'i dngos po med pa nyid do//gtan tshigs brjod pa ni mi dmigs pa'i phyir ro zhes bya ba ste/ dmigs pa med pa'i phyir ro/ /gzhan mi dmigs pas ni gzhan med par mi sgrub pas na skabs kyi bum pa nyid mi dmigs pa yin no/ /gang mi dmigs so cog de med pa ni ma yin te/ snga na med pa dang 'jig rten gzhan la sogs pa mi dmigs kyang mi ldog pa'i phyir dang /yul dang dus la sogs pas bskal pa'i bum pa la sogs pa yang med par nges par mi nus pa'i phyir ro/ /des na dngos po tsam ni mi dmigs pa tsam gyis med par bsgrub par mi nus pas sgrub par byed pa yang nges pa dgos pa yin la/bsgrub par bya ba yang yin no/ /des na dmigs pa'i mtshan nyid kyir gyur pa zhes smos so/ /'dis mtshon cing gsal bar byed pas na mtshan nyid do/ /dmigs pa nyid mtshan nyid yin pas dmigs pa'i mtshan nyid de der gyur pa'am/ des gyur cing thob pa'i yul du byas pa'o//dngos po rtags la sogs pa mtshon pas de rnam par bcad pa'i phyir dmigs pa smos so/ /de dag gi rtogs par bya ba'i dngos po ni rtogs pa mi 'jug pas med par mi 'grub pa'i phyir ro/ /mngon du byed pa'i dmigs pa'i yul gyi dngos po ni rtogs pa med pas med pa nyid do/'dir mi dmigs pa ni skabs kyis bsgrub bya dang 'brel pa nyid bzung ba yin zhing de yang dmigs pa'i mtshan nyid kyir gyur pa dang 'brel pas khyad par du byas pa yin pa des na bum pa de yang dmigs pa'i mtshan nyid du gyur pa yin no/ /des na bum pa med do zhes bya ba ni gsal ba nyid kyi bum pa dgag par bya ba yin no//rgyu'i nang du rtogs pa tsam gyis ni dgag pa ma yin te/ zla ba gnyis su snang ba zla ba la yang thal ba'i phyir ro/ /mi dmigs pa yang rnam pa de lta bu dang 'brel pa yin gyi/ mi dmigs pa tsam ni ma yin no/ /de na 'di ni gtan tshigs kyi khyad par yin yang gnyi ga nye bar byed pa yin no//gal te 'di ni dmigs pa'i mtshan nyid kyir gyur pa'i bum pa med de ma dmigs pa'i phyir ro zhes bya bas kyang rtags khyad par du byas par 'gyur ba nyid de/ de dang 'brel pa nyid du nye bar bkod pa'i phyir ro/ /des na de ltar yang ci ste mi ston zhe na brjod pa sgrub par byed pa nye bar dgod pa la bsgrub bya bstan pa yan lag ma yin pa'i phyir na/de de la gnas par mi rtogs pas khyad par khong du chud par mi 'gyur ba'i phyir ro/ /'o na 'dir ci'i don du bsgrub par bya ba bstan zhe na/ sbyor ba gsal ba'i don nyid du'o/ / 'dir ni gtan tshigs kyi rang bzhin tsam brjod par 'dod pa yin gyi bsgrub bya grub pa ni ma yin no/ /des na rjes su 'gro ba la sogs pa ma bstan pas bsgrub bya mi rtogs pa'i phyir mi dmigs pa'i rang bzhin 'di ni gtan tshigs ma yin no snyam du rtogs par 'gyur ro/ /mi dmigs pa ni dngos po dngos po med par bsgrub pa la rtogs pa med pa yin no//de bzhin du bshad pa'i sbyor ba gnyis la yang rtogs par bya'o/ /yang ji ltar na gang zhig med pa de dmigs pa'i mtshan nyid kyir gyur pa yin/ de ltar yin na yang ji ltar med pa nyid du brjod ce na/ 'di ni rmongs pa'i yul can brtsad par bya ba ma yin pa rtsod pa yin te bum pa med do zhes bya ba 'dir bum pa yang de ltar thal bar 'gyur ba'i phyir ro//gang zhig med pa de ni bum pa ma yin la/ bum pa gang yin pa de yang med pa ma yin te/ de ltar ma yin na ji ltar bum pa med ces 'gog /de ni rigs pa ma yin te/gang gi phyir gang gis 'gal bar 'gyur ba bum pa rnam par gzhag nas dgag pa bsgrub pa ni ma yin gyi/ 'on kyang de ni bum pa med par rtogs pa nyid do/ /'on kyang der bum pa ni yul nyid kyis rtogs pa la nye bar mkho bar zad de/ des na rtogs pa 'jug pa tsam 'gal ba yin gyi rtogs par bya ba 'gal ba ni ma yin no//de ni/ de 'dra med par chos can de/ /de dag dang ni 'brel par snang / /zhes rnam par nges pa yang phyi rol la brten pa nyid bkag pa yin no/ /de'i phyir bum pa med do zhes bya ba dang / bltar rung ba'i bum pa med do zhes 'gog pa la ni khyad par med do//res 'ga' skyes bu med do zhe'am/ res 'ga' skyes bu dkar sham med do zhes khyad par stong phrag gis nye bar bsgyur ba 'gog kyang rung ste/ dngos po gang dang gang med pa de dang de med par sgrub pa na de ji lta bur gyur pa de lta bur gyur pa nyid khyad par dang bcas pa'am/khyad par med pa yin yang rung ste/ yul nyid du 'jog pa yin no/ /khyad par can sgrub pa na de'i khyad par thabs gzhan gyis grub pa ma yin te/ 'on kyang ji ltar tsan+dan gyi du ba rtogs na de nyid las de'i me grub pa de bzhin du/ bltar rung ba'i bum pa med pa grub par byed pa ni bltar rung ba mi dmigs pa yin no//'dir ni 'di tsam zhig brjod par bya bar zad de/ gtan tshigs ma grub pa ni sgrub byed kyi yan lag ma yin pas na de ji lta bu yin pa de lta bu ni rnam pa nyid du grub pa la ltos pa yin te/ tsan+dan gyi du ba bzhin no/ /des na 'dir bltar rung ba ji ltar grub ces dpyod pa ni rigs kyi bum pa bltar rung ba ji ltar yin zhes ni ma yin no//shes pa gcig gis bzung ba dag las gcig dmigs pa na gzhan mi dmigs pa ni bltar rung ba mi dmigs pa zhes bya bar grub pa kho na'o/ /ji skad bshad pa'i khyad par gyi khyad par can du gyur pa'i gtan tshigs nyid 'khrul pa med pa yin gyi/gzhan gyi ni ma yin no zhes ston pa na khyad par nye bar bkod pa'i 'bras bu 'chad pa ni/ gal te yod na zhes bya ba yin no/ /gal te bum pa yod par gyur gyi med pa ni ma yin no/ /de'i tshe dmigs pa'i mtshan nyid du gyur pa'i yod pa kho nar 'gyur te/ bltar rung ba kho nar 'gyur gyi/bltar mi rung ba ni ma yin no/ /gang gi phyir 'di dmigs pa'i mtshan nyid du gyur pa nyid dmigs pa yin pa des na 'dir rang gi bsgrub par bya ba dngos po med pa dngos po yod pa'i mtshan nyid la 'gyur ba ma yin no/ /dmigs pa'i mtshan nyid du gyur pa'i dngos po ni mngon sum pa la brjod do//gal te de yod na ni mngon sum kho nar 'gyur ba des na 'dir ni mi dmigs par mi 'gyur te/ rtogs pa yod pa'i phyir ro/ /des na khyad par dang bcas pa'i gtan tshigs ni 'khrul pa med do/ /de nyid kyi phyir des na zhes smos so/ /bsam pa 'di yin te/ dmigs pa'i mtshan nyid kyir gyur pa zhes bya bas ni 'dir dngos po'i rang bzhin nges pa can bzung ba yin no//dmigs pa'i mtshan nyid kyir gyur pa ni dmigs pas bzung ba'i rang bzhin khyad par can gyi dngos po bltar rung ba brjod pa yin te des na mthong bas bzung ba'i rang bzhin mthong ba'i rgyu mtshan du nges pa gang yin pa de mthong ba med par ji ltar 'gyur des gang la dmigs pa mi 'khrul bar 'gyur ba na khyad par gyi dngos po'i rang bzhin nges par byas pa yin no//de med na ni dngos po'i rang bzhin nges pa rjes su zhugs pa med pas yod pa'i dngos po la yang mi dmigs par 'gyur ro/ /gal te mi dmigs pa rnams kyi yang med pa ni dngos po med pa sgrub par byed pa ma yin te/des na 'dir yang dngos po nyid las dngos po 'grub pa'i phyir dang / de yang 'bras bu dang rang bzhin las mi 'da' ba'i phyir/ 'bras bu dang rang bzhin nyid rang gi bsgrub par bya ba la nye bar dgod par rigs kyi mi dmigs pa ni ma yin no//de las zhes smos so/ /ji skad nye bar bstan pa'i gtan tshigs gsum las 'bras bu dang / rang bzhin gnyis ni dngos po sgrub pa yin te/ 'di gnyis kyis ni 'di na me yod do/ /'di ni shing yin no/ /dngos po grub kyi/ 'ga' zhig dngos po med par rtogs par bya ba la ni 'di gnyis nye bar sbyor ba ma yin no//des na bum pa med pa la sogs pa'i gzhal bya dag la ni 'di gnyis sbyor ba mi srid pas na dgag pa'i gtan tshigs logs su bkod do/ de lta ma yin na ni de mi rtogs pa'i phyir ro/ /de yang mi dmigs pa yin no/ / 'on kyang de ni gang las 'di'i dgag pa rtogs par 'gyur ba nyid don gzhan gyi bdag nyid can 'jig rten pa'i rtog pa'i rjes su 'gro ba'i dgag pa nyid yin te/ des na dngos po'i sgrub par byed pa nyid las ma nyams so zhes ston par 'gyur ro/ /des na de ltar nges par 'gyur ba'i tshul gsum gyis zin pa bshad par rigs par bya ba yin pas phyogs kyi chos nyid ni mngon sum la sogs pas kyang shes par bla ba'i phyir rjes su 'gro ba dang ldog pa dag bstan pa'i phyir tshul gsum po gsum la nye bar bsdus te de gsum ston pa yin no//da ni gsum la ji ltar 'grub pa de bstan pa'i phyir rang bzhin 'brel pa yod na zhes smos so//gang gi phyir rang bzhin 'brel pa zhes bya ba rag las pa dang gzhan gyi dbang du gyur pa de yod na/ rtags kyi mtshan nyid kyi don gyis rtags can gyi don 'khrul pa med do/ /mi 'khrul ba yang rjes su 'gro ba dang ldog pa'i bdag nyid can/de la sgrub par byed pa yod na bsgrub par bya ba yod pa dang bsgrub par bya ba med na med par brjod do/ /des na gang gi tshe gang gi rang bzhin gang gi gzhan gyi dbang du gyur pa de nyid rjes su 'gro ba dang ldog pa dag tu 'thad pa de'i tshe gsum nyid la tshul gsum yod pa yin te/ gzhan la rjes su 'gro ba dang ldog pa med pa'i phyir ro//gsum la tshul gsum 'brel pas grub par ston pa na de dag nyid la rjes su 'gro ba dang ldog pa bsgrub par nus pa yin no zhes bstan pa yin no/ /des na de rnams la de gnyis kyi nges pa'i rgyu ni 'di nyid yin no zhes bshad pa yin no/ /'di ltar yod pa dang byas pa la sogs pa'i gtan tshigs rnams ni gsum po dag las gzhan ma yin la/gsum po rnams la yang rjes su 'gro ba dang ldog pa dag rang bzhin 'brel pas bsgrub par bya ba yin pa'i phyir ro/ /de dag kyang de'i rtsa ba can nyid kyis grub par brjod pa yin no/ /de ltar na yang 'bras bu dang rang bzhin dang mi dmigs pa gsum gtan tshigs yin pa ga las shes dogs na rang bzhin 'brel pa gsum la nges par bstan pa'i phyir rtsom pa ni de ni zhes bya ba'o//rtags rtags can la rang bzhin 'brel par bshad pa gang yin pa de ni de'i bdag nyid yin pa'i phyir ro//gang zhig gang la mi 'khrul pa de ni de'i rang bzhin yin pa'i phyir te/ sgrub par byed pa ni bsgrub par bya ba chos kyi rang bzhin yin pa'i phyir ro zhes bya ba'i don to/ /go bar byed pa'i dbang du byas nas de'i bdag nyid du bstan pa'i phyir/ /go bar byed pa ni chos nyid do/ /des na sgrub par byed pa nyid bsgrub par bya ba'i rang bzhin du brjod pa yin no//des na gang la khyab par bya ba dang khyab par byed pa'i rang bzhin nges par ma bsams pa'i blo can gzhan dag lan 'debs par sems/ /go bar bya ba dang go bar byed pa khyad par med par rtsod pa'i skabs ni yod pa ma yin no/ /gang zhig nyid gang gi rang bzhin ma yin pa de nyid rang gi ngo bo de go bar byed pa yin la/gang zhig de'i rang bzhin ma yin pa de ni de go bar byed pa ma yin te/ 'brel pa med pa'i phyir ro/ /gang gi phyir de 'di'i rang bzhin yin pa de'i phyir de 'dir rang bzhin 'brel pa yin te/ rang gi ngo bo rang gi bdag nyid kyi gzhan gyi dbang du gyur pa'i phyir//sha pa'i yal ga dang ldan pa nyid bzhin no/ /sha pa nyid ni lo ma la sogs pa dang ldan pa'i khyad par nyid yin te/ des na khyad par gzhan du gyur pa ma yin pa lo ma la sogs pa dang ldan pa'i bdag nyid du gyur pa'i sha pa'i rang bzhin ni shing nyid yin te des na de ni de'i gzhan gyi dbang nyid du gyur pa yin no//khyad par can du gyur pa'i lo ma la sogs pa dang ldan pa'i sha pa nyid gang yin pa de'i rang bzhin ni lo ma la sogs pa dang ldan pa yin te des na lo ma la sogs pa dang ldan pa yin no/ /khyad par du gyur pa de yang sha pa yin pa'i phyir de shing nyid la 'khrul pa med do//shing nyid kyi rang bzhin ni sha pa yin pa'i phyir de ni de'i go bar byed pa ma yin no/ /lo ma la sogs pa dang ldan pa tsam gyi rang bzhin yin pas khyad par nges pa la mi ltos pa'i phyir na khyad par gzhan dang gcig pa mi srid pa'i phyir ro/ /rtsol ba las byung ba nyid kyang mi rtag pa'i bdag nyid can yin gyi bzlog pa ni ma yin no//dngos po rnams ni 'jig pa la ltos pa med pa las byung ma thag tu nges pas 'jig pa yin la/ dngos po yang rtsol ba las byung ba yin pa'i phyir/ 'di'i 'jig pa ni nges pa nyid yin pas na/ 'di ni 'jig pa'i ngang can gyi bdag nyid yin no//mi rtag pa nyid ni rtsol ba las byung ba'i rang bzhin can nyid ma yin no/ /de bzhin du byas pa nyid la sogs pa yang ngo / /mi rtag pa nyid yod pa'i rang bzhin las ni mi 'da' ba'i phyir mi rtag pa nyid kyis yod pa zhes rtogs par 'gyur ba nyid de dper na yod pas mi rtag pa'o zhes bya ba bzhin no//de bzhin du bum pa nyid kyang yod pa'i bdag nyid can yin la yod pa ni bum pas stong pa nyid do/ /de bzhin du sa'i rang bzhin dang dngul dag kyang yin te/ gzhan yang de bzhin du rtogs par bya'o/ /gal te byas pa dang mi rtag pa la sogs pa'i rang bzhin dngos po dngos su tha mi dad pa nyid ma yin nam/des na dngos po'i gnas pa la sogs pa la mi ltos par rang gi bag chags kyi rjes su 'brang ba'i rnam par rtog pas tha dad pas rtogs pa yin no/ /des na de'i rang bzhin dang bzlog pa'i rnam par dbye ba 'di gal te dngos po'i rang bzhin la ltos pa yin na ni de'i tshe nus pa ma yin te de la byas pa dang mi rtag pa'i rnam par dbye ba med pa'i phyir ro//de med na mi rtag pa nyid 'di ni gzhan gyi rang bzhin yin la/ de ni 'di ma yin no zhes bya bar ga la 'gyur/ 'on te rnam par rtog pas kun brtags pa'i chos la ltos pa yin na/ 'o na ni rnams par rtog pas byas pa yin pa'i phyir de las dngos po rnam par gnas pa ma yin no//'dis gzhan gzhan gyi rang bzhin du ji ltar brtags pa gang yin pa de ni de kho na ltar yin no zhes bya ba'i nges pa ci zhig yod/ de lta na 'o na dngos po la khyad par med pa'i phyir dang / brtags pa la yang dngos po ma yin pa'i phyir de'i bdag nyid gtan tshigs can gyi bsgrub par bya ba dang sgrub par byed pa'i dngos po la bsgrub bya sgrub byed kyi nges pa med par 'gyur ro zhe na/ji ltar nges pa med pa gang gi phyir dngos po la tha dad pa med pa'i phyir mi 'khrul par nges pa nyid kyis so/ /de'i bdag nyid can ni med par mi 'byung ba'i phyir 'khrul pa med pas rang gi mtshan nyid kyi bdag nyid kyi rtsol ba las byung ba dang mi rtag pa gang yin pa de dag ni mi 'khrul pa nyid do//rtsol ba las byung ba'i rdzas kyi bdag nyid du gyur pa'i mi rtag pa nyid ni rtsol ba las byung ba nyid 'dor ba ma yin la/ de yang 'dis mi 'dor ro/ /de bzhin du bum pa dang rdul dag kyang rdzas gzhan la de lta ma yin par 'gyur yang rdzas gang la bdag gcig tu gyur pa'i rdzas de la 'khrul pa med pa nyid do//de dang de ma yin pa'i rdzas la yod pa'i chos gnyis po de ni gsal ba tha dad pa kho na'o/ /des na gzhan 'khrul pas gzhan de ltar mi 'gyur ba'i phyir de'i bdag nyid la 'khrul pa med do//'o na ji ltar go bar bya ba dang go bar byed pa'i dngos po ma yin zhe na/ 'dir brjod pa/ go bar bya ba dang go bar byed pa'i dngos po ni rnam par rtog pa la gnas pa la ltos pa yin te/ rnam par rtog pa la mi gnas pa'i dngos po ni rtog par byed pa ma yin pa'i phyir ro//rnam par rtog pa yang chos 'ga' zhig ni de dang de ma yin pa'i dngos por nges par byed de dper na rtsol ba las byung ba'i bdag nyid can gyi mi rtag pa nyid de la mi 'khrul pa yin yang / rtsol ba las byung ba dang rtsol ba ma yin pa'i rang bzhin du nges par byed pa'i phyir de'i zhen pas byas pa mi 'khrul pa de go bar byed pa ma yin no//de bzhin du shing nyid kyang sha pa dang sha pa ma yin pa'i rang bzhin yin la bum pa dang rdul nyid dag kyang de dang de ma yin pa'i rang bzhin yin no/ /sha pa nyid dang brtsal ma thag tu byung ba nyid ni shing dang mi rtag par 'gyur ba kho na'o/ / byas pa nyid la sogs pa yang de bzhin te go bar byed pa ni de'i ngo bo nyid du nges pa yin no/ /de'i phyir 'khrul pa med pa yin yang rnam par rtog pa'i nyes pas 'khrul pa dang mi 'khrul pa gcig tu nges pa'i phyir 'khrul pa dang bcas par 'gyur te/ de'i phyir gang la skur pa 'di med pa de ni 'brel pa'i dbang gis go bar byed pa nyid do zhes so//'di yang gcol med pa nyid de rang gi mtshan nyid kyi bdag nyid kyi chos de'i bdag nyid du gyur pa rnams ni mi 'khrul par sbyor bar byed pa ma yin pa'i phyir brjod par mi 'os pa nyid do/ /go bar bya ba dang go bar byed pa'i dngos po ni rang gi mtshan nyid gzhan gyi mthar thug pa nyid de/bsgrub par bya ba'i chos can rang gi mtshan nyid gzhan yin pa'i phyir ro/ /gal te de dag chos can gcig la bdag nyid du gcig tu zin kyang de ltar rang gi mtshan nyid gzhan la ma nges pa ma yin pa de'i tshe de mi 'khrul pa'i rgyu ma yin no//thams cad du de lta bur gyur pa'i mtshan nyid kyi mi 'khrul pa ni mthong ba dang ma mthong ba'i rgyu can nyid yin pa bsal nas 'brel pa'i rgyu mtshan can du rnam par 'jog par 'gyur ro/ /gal te de'i bdag nyid yin te bum pa rdul yin zhes nges pa med na de las mi 'khrul pa ma yin no/ / rang gi mtshan nyid gcig gi mthar thug pa'i nges pas ni thams cad du yin no zhes nus pa ma yin no/ /'on te rdul la brten pa nyid yin na/ de'i tshe rdul gang yin pa de ni rdul nyid yin no zhes lugs log par bstan to/ /de'i phyir bdag nyid gcig la mi 'khrul par brjod pa ni phongs pa sgrub par byed pa tsam du zad kyi/dngos po sgrub par byed pa ni ma yin no/ /gang zhig rnam par rtog pas bdag gcig tu rtogs par 'gyur ba sha pa'i bdag nyid can gyi shing gcig der nges pa yin yang gal te lo ma la sogs pa dang ldan pa de'i rang bzhin can ma yin pa gzhan nyid yod pa yin na/de'i tshe sha pa nyid kyang shing la 'khrul bar 'gyur te/ de'i phyir gzhan med do zhes ji ltar rtog /de'i bdag nyid ni gcig nyid la nges par byed pa yin te/ des na de'i rigs can gyi chos gzhan ni bcad par mi nus so/ /de'i phyir ji ltar byas pa nyid mi rtag pa'i bdag nyid can yin pa de bzhin du gzhan yang yod par 'gyur zhing de yang rnam par rtog pas gcig tu nges pa'i phyir/gzhan gyi rang bzhin gyi byas pa ma mthong yang 'khrul pa med par nges pa med do/ /gnod par byed pas gzhan la 'jug pa gcod do zhe na/ 'brel pa nye bar bkod pas ci yang byar med do//de gnyis kyis mi mthun pa'i phyogs la med pa rtogs pas na/ bsgrub bya sgrub byed kyi dngos por rnam par gnas pa'i phyir ro/ /dngos su na bsgrub bya sgrub byed dag tha mi dad pa'i phyir ro zhe na/ tha mi dad pa de ni yod kyang go bar byed pa'i yan lag ma yin te/ tha dad kyang gnod par byed pa nyid kyis mi mthun pa'i phyogs la 'jug pa rnam par bcad pa ni go bar byed pa kho na yin la de ni bsgrub par bya ba'i rtogs pa la yang grub pa'i phyir ro//tha dad pa med pa'i phyir chos rnams de'i bdag nyid du grub bo zhe na/ 'o na de tha dad pa bkag pa nyid kyis mthar phyin pa'i phyir 'brel pa bstan pas ci zhig bya/des na 'dir ni brjod par mi bya ba nyid du 'gyur ro/ /de'i phyir go bar byed pa go bar bya ba'i bdag nyid yin pa'i phyir de'i bdag nyid du brjod do/ /'di yang ji ltar 'grub ce na/ mi 'grub par ji ltar 'gyur/ gang gi phyir 'di la dngos po rnams rang bzhin phan tshun tha dad pa nyid kyi rjes su 'gro ba med pa'i phyir/gcig gi rang bzhin gang yin pa de gzhan la med pa de ni 'khrul pa dang mi 'khrul pa'i dpyod pa 'di'i rten ma yin no/ /de la yod pa'i rang bzhin med pa gzhan la yod na 'khrul pa yin te/ dper na sgra byas pa de la yod pa'i byas pa nyid sgra med par bum pa la yod pa na sgra la 'khrul pa bzhin no//'di ni yod pa ma yin te/ /gcig nyid du thal bas na sgra ni bum pa la med pa'i phyir ro/ /de'i ni 'ga' yang de la med pa'i phyir 'di ji ltar 'khrul pa yin/ des na gal te de'i rang bzhin gzhan la srid pa ma yin pa de lta na byas pa nyid ni de la yod pa yin te/'on kyang de la yod pa gang yin pa de nyid ni ma yin no/ /rjes su 'gro ba med kyang byas pa tsam yod pa la ltos te 'khrul pa yin no/ /'di ltar rgyu'i byed pa la grub pa gang yin pa de byas pa yin pa'i phyir sgra bzhin du bum pa yang de lta bu yin no/ /des na de ltar de'i rang bzhin gang yin pa de gzhan la med pa yin gyi byas pa nyid ni yod pa nyid do//des na rgyu'i de ma thag tu 'byung ba nyid kyis byas pa nyid yin yang nyan pas bzung ba'i bdag nyid bum pa la med pa'i phyir te/ dper na sgra'i rang bzhin nyid ma yin no/ /de bzhin du gal te sgra bzhin du bum pa yang byung ma thag tu 'jig pa ma yin no//byas pa mi rtag pa dang 'khrul par 'gyur te/ dper na sgra'am bum pa rtag par the tshom za ba na mi rtag pa nyid las de la bstan par mi 'gyur ro/ /des na ji ltar bum pa byas pa yin pa ltar sgra yang yin pas na byas pa nyid ma yin no zhes bya bar mi nus pa de bzhin du byas pa nyid mi rtag pa'i lus can yin pa'i phyir de yod na mi rtag pa nyid med pa ma yin pa'i phyir chos bdag nyid gcig pa de'i bdag nyid nye bar 'god pa yin no//dngos po tha mi dad pa la ni ji ltar bum pas stong yang sgra byas pa yin pa de bzhin du/ mi rtag pas stong par yang 'gyur ba'i phyir byas pa nyid las de mi rtag par 'gyur re skan/da ni ji ltar chos can tha mi dad ce na ji ltar zhes ci ste brjod/ chos ji lta ba bzhin du chos tha dad pa yang ma yin nam/ 'di ltar 'khrul pa dang mi 'khrul pa rnam par dpyod pa na gdon mi za bar byas pa nyid la sogs pa'i rang bzhin bstan par bya ba yin te/de lta ma yin na gang zhig gzhan la yod pa dang med pas 'khrul pa dang mi 'khrul pa dag tu 'gyur/ rang bzhin nges par brtags pa gnyis po de ni gcig la ji ltar yod pa ltar gal te gzhan la yang 'gyur ba yin na/ de'i tshe mi 'khrul pa min no//'on te gcig yod la gzhan ma yin na des na gcig gis gzhan la 'khrul pa ma yin no/ /de la byas pa zhes bya ba ni rgyu dang 'brel pa'i bdag nyid kyi rang bzhin yin pas rna bas gzung ba la sogs pa'i rang bzhin ma yin pa'i phyir sgra ma yin yang bum pa'am bum pa ma yin yang sgra byas par 'gyur ba yin gyi/'di mi rtag pa nyid las 'da' ba ma yin no/ /byas pa nyid ni dngos po'i chos rgyus byas pa zhes bya ba yin la rgyu rnams kyang 'jig pa'i ngang can skyes par byed pa yin pa'i phyir 'jig pa'i ngang can skyes par byed pa la skyes pa'i byas pa nyid 'jig pa'i ngang can ma yin par mi 'gyur ro/ /des na 'di gang dang gcig par gyur pa de byas pa bzhin du 'jig pa'i ngang can du 'gyur ro//de bzhin du sha pa nyid kyang lo ma la sogs pa dang ldan pa'i khyad par gyi rang bzhin yin pa'i phyir shing nyid kyi rang bzhin yin gyi shing nyid ni sha pa'i bdag nyid can ma yin no/ /gal te shing gcig nyid ma yin nam/ shing gang yin pa de sha pa'i bdag nyid can yin na sha pa'i bdag nyid ma yin pa'i shing nyid gzhan gang zhig yin/rang gi mtshan nyid la ni shing la sogs pa'i bdag nyid can 'ga' zhig ni gzhan gyi bdag nyid can ma yin la/ 'ga' zhig ni gzhan gyi rang bzhin ma yin pa yod pa ma yin te/ de la chos rnam par dbye ba med pa'i phyir ro//gal te de lta na thams cad bdag nyid gcig pa yin yang de yongs su spangs nas yod par 'gyur ba'i phyir de'i bdag nyid 'khrul par 'gyur te/ des na sha pa yang shing gi bdag nyid can yin par 'gyur ro/ /gal te dngos po la de'i chos rjes su 'gro ba'am chos rnam par dbye ba 'ga' yang med do zhes 'chad par 'gyur ba ma yin nam/rnam par dbye ba yod na shing gnyis su 'gyur ro/ /rnam par dbye ba med na yang de'i rang bzhin can ma yin pa'i chos can gzhan la yod pa'i phyir de'i bdag nyid la nges pa nyid do/ /don gzhan la yod pa'i shing nyid dang sha pa nyid ni gzhan nyid yin no//des na ji ltar shing yin yang seng ldeng du gyur pa de bzhin du sha pa yang shing ma yin par 'gyur ro/ /'di la brjod pa shing zhes bya ba ni lo ma la sogs pa dang ldan pa la brjod de/ des na 'di seng ldeng la yang 'gyur ro/ /sha pa zhes bya ba ni lo ma la sogs pa'i khyad par de ji ltar shing ma yin par 'gyur ro//de bzhin du byas pa zhes bya ba ni 'jig pa'i ngang can gyi rgyu'i dngos po'i chos yin pas de yang ji ltar 'jig pa'i ngang can ma yin par 'gyur/ de ltar yang ston par 'gyur ro/ /ring po nyid dang sha pa nyid dag ni phan tshun bdag nyid du gyur pa ma yin te/des na gang zhig gang gi bdag nyid can yin pa de de la mi 'khrul pa'i phyir chos kyi bdag nyid de'i bdag nyid yin par 'brel pa rigs pa dag sems so/ /yang ji ltar na 'ga' zhig gi rang bzhin yin zhes rtogs she na/ 'di ni mdun du 'chad par 'gyur ro/ /gal te go bar byed pa gcig gi bdag nyid yin na de'i tshe sgrub par byed pa gang yin pa de nyid bsgrub par bya bar 'gyur te/sha pa'i rang bzhin shing nyid yin pa'i phyir dang / de bzhin du byas pa mi rtag pa'i bdag nyid yin pa'i phyir de ltar ni rigs pa ma yin te/ sgrub par byed pa dang bsgrub par bya ba dag phan tshun 'gal ba'i phyir ro//sgrub par byed pa'i rang bzhin ni grub pa yin la bsgrub par bya ba ni de las bzlog pa yin te/ des na sgrub par byed pa dang bsgrub par bya ba dag bdag nyid gcig par 'thad pa ma yin no/ /'di nyid smras pa ni gal te de'i bdag nyid yin na zhes bya'o/ /de'i zhes bya ba ni go bar bya ba'o/ /gang la de'i bdag nyid yod pa de la de skad brjod de de yang go bar byed pa'o//de'i dngos po nyid de de yin na bsgrub par bya ba dang sgrub par byed pa bye brag med do zhe na/ dogs pa 'di bsal ba'i phyir ma yin te zhes smos te byas pa dang mi rtag pa la sogs pa'i chos kyi bye brag kun brtags pa'i phyir ro/ / rtogs pa ni rnam par rtog pa'i byed par rig pa ste/ gtan tshigs de'i phyir ro/ /rnam par rtog pas chos tha dad pa rig pa'i phyir ro zhes bya ba'i tha tshig go/ /gal te byas pa mi rtag pa'i bdag nyid yin pa de lta na/ rnam par rtog pas de dag tha dad par rig pa de'i phyir byas pa'i bdag nyid de zhes ma rtogs pa dag byas pa grub kyang mi rtag pa mi rigs pa'i phyir grub pa dang ma grub pa sgrub pa dang bsgrub bya'i bye brag rjes su mthun pa nyid do//'di yang phyis 'chad par 'gyur ro/ /'dir 'dod nyid ni ma yin te/ slob dpon gyis kyang de ltar zhal gyis bzhes pa'i phyir zhes bshad pa ni/de skad du yang zhes bya ba'o/ /rjes su dpag pa dang rjes su dpag pa'i tha snyad ni rtogs pa po'i de la brten pa'i byed pa ste/ rjes su dpag pas rjes su dpag par bya ba rjes su dpog pa 'di thams cad ni blo la yod pa'i chos dang chos can gyi bye brag kho nas yin no/ /chos can 'di'i chos ni 'di yin no zhes de lta bu'i rang bzhin gyi tshul gyis rjes su dpag pa 'jug la/de yang thams cad du blo la yod pa kho na yin no/ /sgra dang sa phyogs chos can nyid dang byas pa dang du ba dag gam/ mi rtag pa dang me'i chos nyid blos byas pa kho na'o/ /chos dang chos can gyi dngos po ni 'di 'di'i yin no zhes 'brel pa rtogs pa las yin no//de las tha dad pa rnams kyi ni 'brel pa nyid btags pa yin la tha mi dad pa la ni tha dad pa med par chos dang chos can gyi dngos po mi 'grub pa'i phyir/ de blo la yod pa zhes bya bas bye brag rtogs pas rtogs pa yin no zhes 'chad par 'gyur ba'i phyir shes par byed pa'i gzhung 'di'i yul ni chos tha dad par rtogs pa yin no//gal te byas pa mi rtag pa'i bdag nyid yin yang de las bzlog pa rtogs na/ 'o na ni de las tha dad pa'i phyir de lta bu bden pa'i rang bzhin ma yin pas zla ba gnyis bzhin du de sgrub par byed pa ma yin zhes bya ba'i dogs pa 'di bsu nas chos dang chos can nyid du zhes smos so//chos dang chos can nyid du tha dad pa blo'i rnam pas byas te/ rnam par rtog pa'i blos mi bden par rtog pa yin gyi mi rtag pa nyid la sogs pa'i mtshan nyid kyi don kyang ni ma yin te/ de ni phyi rol na yod pa'i phyir ro/ /rnam pa btags pa ni gtso bo la sogs pa bzhin dngos po la yod pa ma yin pa yin no//rnam pa de lta bu'i byas pa mi rtag pa las tha dad pa yin gyi/ ji ltar dngos po rnams kyis rtag pa bzhin du byas pa nyid kyang dngos po la med pa ni ma yin no/ /gal te ji skad brjod pa'i tshul gyis 'di'i phyi rol gyi byas pa nyid dang mi mthun pa ma yin nam/de ji ltar na de yang dngos po med par mi 'gyur zhe na/ blo'i bye brag ces smos so/ /'di brjod pa yin te gal te rnam par rtog pa don gyi gzhan gyi dbang yin pa'i phyir don gyi yul can du gyur pa yin na/ de'i tshe phyin ci log gi rang bzhin gyi don rtogs na dngos po'i yul nyid nyams par 'gyur ba'i phyir/des rtogs par bya ba dngos po ma yin par 'gyur te/ rnam pa thams cad du don gyi yul can nyid bkag pa'i phyir ro/ /gang gi tshe rang dbang du gyur pa'i phyir 'di dag don gyi yul can ma yin pa de'i tshe ni nyes pa med do/ /don gyi yul can gyi shes pa don de la de'i rang bzhin ma yin par rtogs pa ni nges pa kho nar don dam pa ma yin pa'i rang bzhin snang bar 'gyur ro//gang zhig dngos po la rten pa med pa rang gi ngo bo thob pa de ni nye bar len pa tsam gyi gzhan dbang yin pa'i phyir don gyi gzhan gyi dbang ma yin pas rang dbang du gyur pa ni mi srid pa rtogs pa gang yin pa de ni rnam par rtog pa'i nye bar len pa'i stobs kyis yin pa'i phyir chos tha dad pa ltar de ni med pa kho na yin la/gnod pa med pa'i rtogs pa gang yin pa de ni dngos po'i nye bar len pa'i las yin pa'i phyir rnam par rtog pa rnams dngos po la brten pa ma yin pa nyid kyis na/ byas pa'i bdag nyid kyi don kyang btags pa ni ma yin no//gal te dngos por yod pa ma yin pa chos kyis rnam par bcad pa ni byas pa nyid phyi rol ma yin pa nyid ma yin nam/ des na blo la yod pa'i nye bar len pa'i stobs las 'ongs pa yang mi bden pa nyid de/ des na zla ba gnyis la sogs pa bzhin du de rtags ma yin pa nyid do/ / 'di la bshad pa ni de dag gis brtags pa'i yul gyis zhes bya ba'o/ /de dag gis brtags pa'i yul blo de la rnam par gnas pa'i chos gang yin pa des don go na ste/ de rtags nyid yin na ni don mi thob pa kho nar 'gyur ro/ /'di brjod pa yin te blo la rnam par gnas pa'i chos nyid ni rtags ma yin te/de rtags yin na don thob pa med par 'gyur ba'i phyir ro/ /'on kyang dngos po nyid yin no/ /des na rnam par rtog pa'i snang ba mi bden pa nyid yin yang 'gal ba ci yod/ 'o na ji ltar chos tha dad par rtogs pa nye bar bkod ce na/ chos tha dad par brtags pa can gyi rnam par rtog pas de rtogs pa'i phyir ro//de lta bur rtogs na grub pa dang bsgrub par bya ba'i rnam par dbye ba 'thob pa'i phyir bsgrub bya dang sgrub pa'i dngos po 'thad pa des na de ltar rtogs pa'i dngos po nyid sgrub par byed pa yin no/ /de nyid kyi phyir 'brel pa'i rgyu mtshan can gyi mi 'khrul pa grub pa yin no/ /'o na ji ltar phyi rol dang mi 'dra ba'i byas pa rtogs pa'i rang bzhin gyi rnam par rtog pa de rtogs pa yin zhe na/rnam par rtog pa ni de rtogs pa ma yin gyi mngon sum nyid do/ /gal te mngon sum gyis rtogs pa'i byas pa nyid mi rtag pa las tha mi dad pa'i phyir ji ltar sgrub pa dang bsgrub par bya ba'i dngos por 'gyur zhe na/brjod pa byas pa las mi rtag pa tha mi dad pa yin yang mngon sum byas pa zhes bya bar rjes su 'jug gi/ mi rtag pa nyid ni ma yin pa'i phyir chos tha dad par rtogs par 'thad pa yin no/ /gal te mngon sum nyid kyis rtags rtogs pa yin na/ /'o na ji ltar blo la yod pa'i zhes bshad ce na/ 'di na bshad zin te/ blo la yod pa'i chos kyi bye brag gang yin pa 'di ni mngon sum gyi rjes su 'jug pa yin te/ des na mngon sum gyis grub pa las 'das pa yang ma yin/ chos tha dad pa nyams pa yang ma yin no/ /de ltar rang bzhin 'brel pas don go bar byed pa nyid du brjod nas/ de'i rnam pa gcig bshad pa yin no//rnam pa gzhan yang bshad pa ni/ 'bras bu yang zhes bya ba'o/ /de'i bdag nyid 'ba' zhig der rang bzhin 'brel par ni ma zad de/ 'bras bu ji srid pa yang rang bzhin 'brel pa yin no/ /'bras bu yang rag las pa'i rang bzhin yin no/ /'di la rang bzhin 'brel pa yod na don gyis don 'khrul pa med do zhes bya bas go bar byed pa go bar bya ba la rag las pa nyid kyis der mi 'khrul bar brjod la/de ni de'i bdag nyid yin pa'i phyir ro zhes bya bas ni go bar bya ba'i bdag nyid ces bya ba'i rgyu mtshan rnam pa gcig gis go bar byed pa'i/ /go bar bya ba las mi 'khrul par bkod pa yin no//rang bzhin 'brel pa'i phyir gang la 'khrul pa med pa de'i rang bzhin 'brel pa de 'bras bu yin no zhes bshad pa na yang don gang zhig don gang la 'khrul pa med pa de ni de la ltos nas 'bras bu yin no zhes brjod par 'gyur bas de rgyu nyid du rtogs par 'gyur ro/ /de'i don ni 'di yin te/ de'i bdag nyid kyi rang bzhin dang de las byung ba'i rang bzhin 'brel pas don gyis don 'khrul pa med pa yin no zhes so/ /de'i bdag nyid la ni bdag nyid gcig pa nyid rang bzhin 'brel pa yin pas de nyid las 'khrul pa med par 'gyur ba yin na 'bras bu go mi 'khrul ba'i yul la bdag nyid 'brel pa ji ltar 'gyur zhe na/de'i rang bzhin zhes smos so/ /dngos po rnams skyes pa las sngar ni yod pa ma yin te/ 'di ni yod pa nyid na skye ba las yin no/ /'bras bu dang 'brel pa'i rang bzhin gyi skye ba de yang gang la 'di'i 'khrul pa med pa de las yin te/ gtan tshigs de'i phyir 'bras bu rang bzhin 'brel pa yin no//gang gis de lta bu'i rang bzhin 'brel pa'i gtan tshigs las skyes pa'i rjes su dpag pa tshad mar 'gyur ba de ltar rang bzhin 'brel pa rnam pa gnyis ston pa'i rgyu ci yin zhe na/ rjes su dpag par bya ba shes pa zhes smos so/ /gang gis de lta bu'i go byed kyi shugs kyis rang bzhin thob pa'i rjes su dpag pa tshad mar gyur pa gtan tshigs kyi rjes su dpag par bya ba la mi 'khrul pa rjes su 'gro ba dang /ldog pa'i mtshan nyid med na mi 'byung ba'i don 'di bstan pa yin no/ /gtan tshigs nyid ni tshad ma ma yin te/ 'on kyang rjes su dpag pa'i shes pa yin no/ / des na de'i 'khrul pa med pas de lta bu'i dngos po grub pa na de'i rtsa ba can gyi shes pa don yod pa can du bstan pa yin no/ /de na rnam pa 'dis rjes su dpag par bya ba shes pa rnam pa gnyis tshad ma yin no/ /rjes su dpag par bya ba shes pa 'di gnyis ni zhes gang brjod pa rjes su dpag par bya ba'i shes pa gnyis kyang gang du brjod ce na/ji ltar ma brjod/ 'di ltar rjes su dpag par rnam par gzhag pa'i phyir bshad pa zhes skabs brtsams nas phyogs chos zhes bshad pa yin la/ de rnam par gzhag pa na yang rtags kyi mtshan nyid brjod pa yan lag yin te/ de rtags las skyes pa yin pa'i phyir ro//de'i mtshan nyid ni tshul gsum yin la/ de yang gsum la yod pa yin no/ /gsum po yang 'brel pa rnam pa gnyis las gnyis yin pa'i phyir/ de lta bur gyur pa'i gtan tshigs kyis bskyed pa rjes su dpag par bya ba shes pa ni gnyis yin la/ rjes su dpag par bya ba shes pa ni rjes su dpag par bya ba kho na'o//rang bzhin 'brel pa rnam pa gnyis dang ldan pa'i rtags kyis bskyed pa 'di gnyis tshad ma yin no/ /ci'i phyir zhe na/ de las skyes pa'i phyir ro/ /re zhig nges par gyur pa'i rtags las rjes su dpag pa skyes pa zhes bya ba ni rtogs pa nyid do//ji skad bshad pa'i rang bzhin 'brel pa'i rtags las skyes pa na yang rjes su dpag par bya ba shes pa rjes su dpag par bya ba las kyang skyes pa yin pa nyid do/ /'di ltar rjes su dpag par bya ba'i bdag nyid kyi rtags las skyes pa ni rjes su dpag par bya ba las kyang skyes pa kho na'o//rjes su dpag par bya ba'i 'bras bur gyur pa'i rtags las skyes pa gang yin pa de yang de bzhin nyid do/ /shes pa de rjes su dpag par bya ba'i don la skyes pa na yang des nges par yod pa'i phyir de nyid gsal ba'i rang bzhin yin pa'i phyir don gsal ba nyid kyis 'di gnyis tshad ma yin no/ / ji ltar gsal ba'i don med na ni don gsal bar mi 'gyur na de ni 'di ltar srid pa ma yin no/ /de smras pa ni/ der 'khrul pa med pa dag yin te zhes bya'o/ /de'i 'bras bu nyid kyi don dang ldan pa las mi 'da' ba'i phyir gsal bar nges pa yin no/ /mngon sum bzhin no zhes bya ba ni dpe ste/ dper na don las skyes pas don la 'khrul pa med pa'i phyir don gsal ba'i rang bzhin tshad ma yin pa de bzhin du 'di gnyis kyang ngo //de ni don las skyes pa'i phyir shes pa de gnyis kyang don la mngon sum nyid yin nam/ don nyid rnam par shes pa bskyed pa ni bdag gsal bar byed pa yin no/ /des na rjes su dpag par bya bas bskyed pa rjes su dpag par bya ba shes pa gnyis ni mngon sum bzhin dngos po nyid du na don gsal bar byed par 'gyur ro zhe na/de snang ba nyid ma yin yang zhes smos so/ /gang gis 'di gnyis dngos su na dngos po gsal ba'i phyir de la mngon sum du 'gyur ba rjes su dpag par bya ba shes pa 'di gnyis rjes su dpag par bya ba snang ba ni ma yin no//ji ltar na dngos po snang ba'i rgyu khyad par med pa las 'di gnyis ni dngos po snang ba ma yin par 'gyur la mngon sum ni ma yin zhe na dngos las ma skyes pa'i phyir zhes smos so/ /gang gis 'di gnyis mngon sum bzhin du dngos po gsal ba nyid du 'gyur ba rjes su dpag par bya ba shes pa rjes su dpag par bya ba dag las dngos su skyes pa ni ma yin gyi/'on kyang mi rtag pa byas pa'i rang bzhin du gyur pa yin yang byas pa nyams su myong bas bar chod pas rnam par rtog pa'i shes pa skyed par byed do/ /rtags sam rtags can gyi rnam par rtog pa dngos su don las skye ba 'ga' yang med do//de bzhin du me yang rang gi 'bras bu du ba myong bas bar chod pas rang gi shes pa'i rgyu yin no/ /des na don ni 'di yin te/ ji skad brjod pa'i 'brel pa dang ldan pa'i phyir rtags rjes su dpag par bya ba la 'khrul pa med pas na/ de yod na bsgrub bya yod par nges par rtogs nas rtogs pa po rjes su dpag par 'jug par byed pa ni tshad ma nyid 'jug par byed pa yin te de lta bur gyur pa'i don de nyid de ltar rtogs pa'i phyir ro//'di ltar rjes su dpag pa ni mngon sum bzhin du rgyu rkyen gyi nus pa tsam las skyes pa ni ma yin gyi/ 'on kyang ma rtogs pa'i don rtogs par bya ba'i phyir rjes su dpag pa'i rigs pa rtsol ba yin no//de yang 'di ltar 'thad pa yin te/ de don gzhan las rtogs pa na don gzhan de mi 'khrul par nges pas de las de rtogs par 'thad pa'i phyir ro/ /de ltar gyur pa'i don de lta bu nyid du rtog pa ni tshad ma yin no//don gzhan 'khrul pa med par nges par ma rtogs na ni brtag par mi bya ba'am/ the tshom du 'gyur ba'i phyir rtogs pa tshad ma ma yin no/ /'on te 'brel pa ma brtags pa 'khrul pa las nges pa nyid du 'gyur ba yin na de lta na yang nges pa tsam las ni rnam par rtog pa tshad ma ma yin te mngon sum bzhin du rang bzhin nyid kyis don gsal ba ma yin pa'i phyir ro//don gsal ba la ni don grub pa'i rtsa ba can yin pas don ma grub kyang nges pa tsam las ga la 'gyur/ de'i phyir don gyi 'bras bu nyid kyis don la so sor nges pas don ji ltar rtogs pa de bzhin du yod pa'i phyir rjes su dpag pa tshad ma yin pa de bas na rang bzhin 'brel pa rnam pa gnyis nye bar bkod do//des na de ltar 'brel pa nye bar bkod pa gzhung btsugs pa yin no/ /de nges pa nyid ni rgyu dang 'bras bu'i dngos po'am zhes bya ba la sogs pas gzhan med pa nyid kyis 'jog par 'gyur ro/ /gang gis de de dang mtshungs par rjes su dpag pa yang de ltar 'gyur ba mngon sum don la 'khrul pa med pas ni tshad ma ma yin gyi 'on kyang rang gi rgyu'i nus pa nyid las dngos po gsal ba'i rang bzhin gyis dngos po la tshad ma yin no//de nyid kyi phyir chod pa med par sngon po mthong nas sngon po'o zhes rtogs kyi rjes su dpag pa ltar sngon po la mi 'khrul pa'i rjes su 'jug pas ni ma yin no zhes dogs pa 'di bsu nas mngon sum gyi tshad ma nyid kyang zhes smos so//gang gi phyir rjes su dpag pa 'ba' zhig tu mi zad kyi/ mngon sum gyi tshad ma ji srid pa yang don 'khrul pa med pa yin na yin no/ /yang 'khrul pa med pa zhes bya ba 'di ci zhig tshad ma yin nam/'on te tshad ma'i rgyu yin nam/ de ste tshad ma rnam par 'jog par byed pa yin/ re zhig tshad ma ni ma yin te/ tshad ma slu ba med pa can gyi shes pa zhes don gsal ba'i rang bzhin tsam gyis rnam par 'jog pa'i phyir ro/ /rgyu yang ma yin te/ tshad ma'i rgyu nyid las tshad ma'i de nyid 'grub pa'i phyir ro//rnam par 'jog par byed pa yang ma yin te/ 'khrul pa med pa'i don dmigs pa nyid las don nges pas tshad ma rnam par 'jog pas don med pa'i phyir ro/ /de bzhin du don nges pa'i bdag nyid kyi mngon sum yang rang gi rgyu nyid las yin no/ / tshad ma nyid du rnam par gzhag pa yin yang don gsal ba'i rang bzhin gyis kyang gzhag par nus pa yin no/ /gal te don med na mi 'byung ba'i phyir don la mi bslu ba mngon sum dang rjes su dpag pa tshad mar 'jog pa yin la de yang don la 'khrul pa med pa'i rang bzhin nyid do zhes bya ba'i bsam pas de skad brjod do zhe na/de yang mi rigs te/ yul nyid ston par byed pa 'di gnyis ni don la mi bslu ba nyid la brten par 'gyur bas mi bslu ba de nyid rnam par 'jog pa'i yan lag tu 'gyur bas don la mi 'khrul bas ci bya ste/ de nyid kyi nang gi yan lag yin pa'i phyir ro/ /de ni 'di dag la bdag nyid ji lta bar khyad par can du grub pa yin no//de'i phyir 'dir bsam pa ni 'di yin te/ dngos po'i mthu la mi ltos pa 'di dag gis rab tu bstan pa nyid mthar phyin par mi 'gyur bas shes pa dang don dag tha dad pa'i phyir de'i bdag nyid med na ji ltar myong ba'i don med na mi 'byung ba nyid dngos po'i nus pa yin no//de'i phyir mngon sum mam rjes su dpag pas don rtogs par byed pas ni gdon mi za bar de'i don med na mi 'byung ba rtogs par bya'i/ gal te mngon sum gyis don bar ma chod pa nyid du rtogs so zhes brjod pa ma yin nam/ mngon sum 'ba' zhig tu ni ma zad de/ tshad ma med pa yang yul gzhan na khron pa'i chu la sogs so//rtogs pa tsam ni de lta ma yin par mi 'gyur ba'i phyir 'thad pa la ltos par bya ba yin no/ /dngos po ma brtags pa'i shes pa nyid ni don sgrub par byed pa ma yin no/ /'on te shes pas don dmigs pa'i phyir de las de 'grub po zhe na/de yang rnam par nges par mthong ba las don 'grub bo zhe na zhes bya ba la sogs pas gsal ba yin te/ de nyid du gtan la phab pa yin no/ /de lta na 'o na don gyi don 'khrul pa med kyi rjes su dpag pa'i don grub pas na de don la 'khrul pa med par bstan pas ci bya/ 'di ltar don de nyid kyis yod par grub pa'i don rtogs pa yin no zhe na/de ni bden mod kyi/ de'i tshad ma nyid kyang rnam par gzhag par bya ba yin no/ /de ni rang gi chos kyis gzhag par nus pa yin te/ gzhan gyi chos ni gzhan gyi rang bzhin rnam par 'jog par byed pa ma yin pa'i phyir ro/ /gal te tshad ma nyid don la 'khrul pa med pas nges pa yin na bdag thob pa'i rjes su dpag pa yang tshad mar gtan la ma phebs pa'i phyir the tshom du 'gyur ro zhe na/rjes su dpag pa ma skyes pa dngos po'i mthu nyid kyis skye ba ni ma yin gyi/ 'on kyang 'di ni tshad ma yin te don la mi 'khrul pa'i phyir don rtogs par nus pa yin no zhes bya bas skye ba yin no//mngon sum gyi tshad ma nyid 'khrul pa med pa kho na ji ltar yin zhes dogs na/ phyogs gzhan la tshad ma ma yin par bshad pa ni de med par zhes bya ba yin no/ /don med par 'byung ba ni don der 'khrul pa'i phyir te/ phyin ci log tu 'gyur ba'i phyir ro/ /phyin ci log ni ji ltar rtog pa'i don med pa yin te/de yod na shes pa phyin ci log tu 'gyur ba ma yin no/ /de'i phyir 'khrul pa med pa nyid tshad ma yin no/ /des na de ltar 'khrul na tshad ma ma yin pa'i phyir mngon sum gyi tshad ma nyid mi 'khrul pa'i rtsa ba can du bsgrubs nas de yang de las byung ba'i rtsa ba can du bstan pa'i phyir gzhan gyi zhes smos so//shes pa ni don las gzhan yin no/ /dngos po tha dad pa gzhan gyi mi 'khrul pa de yang de las skyes pa las gzhan ci zhig yod/ de las skyes pa'i rgyu mtshan can nyid yin pa'i phyir nye bar btags nas tha mi dad par bstan to/ / 'khrul pa med pa zhes bya ba ni gnyis kyi chos yin pa'i phyir gzhan la zhes rtogs pa nyid ma brjod do/ /'dir yang mi 'khrul pa'i rgyu mtshan de las skyes pa yin par sgrub pa na rgyu mtshan gzhan med par brjod par bsgrub pa ni rag ma las pa'i ngo bo rnams ni zhes bya ba yin no/ /gang dag gi ngo bo rag las pa med pa de rnams ni de las de thob pa'i phyir gang la ngo bo rag las pa de dang lhan cig 'byung bar nges pa rag las pa de yod na yod par 'gyur ro zhes bya ba de lta bu'i rang bzhin gyi mi 'khrul pa de med pa'i phyir ro//de las de'i rang gi ngo bo grub pa ma yin pa'i phyir de med kyang yod pas na de yod na de yod par mi 'gyur ba'i phyir lhan cig 'byung ba med pa yin no//des na de ltar med na mi 'byung ba'i rgyu mtshan de bzhin 'brel pa yin pa'i phyir gsum la tshul gsum srid pas gtan tshigs nyid bsgrubs nas da ni go rims bzhin du de dag la bsgrub bya sgrub byed kyi rang bzhin gyis khyad par bstan pa'i phyir gal te zhes rtsod pa slong bar byed do//gal te ji skad bshad pa de las skyes pa'i mtshan nyid kyi gtan tshigs kyi phyir 'bras bu rtogs pa'i rgyu mtshan go bar byed pa yin na/ de'i tshe rnam pa thams cad go bar bya ba dang go bar byed pa'i ngo bo yin par 'gyur ro// // bam po gsum pa/ ji ltar du ba de'i bdag nyid de las skyes pa'i phyir du ba zhes du ba'i bdag nyid du bstan pa go bar byed pa yin pa de bzhin du gzhan yang de'i bdag nyid kyis rang gi ngo bo nyid yin pa'i phyir bdag nyid ji lta bar gyur pas de dag kyang go bar byed pa nyid du 'gyur te/ 'di na me yod de/ dngos po'i phyir ro/ /thogs bcas kyi phyir dang / mi rtag pa'i phyir ro zhes bya ba'o/ /de bzhin du 'di na dngos po 'am thogs bcas sam mi rtag pa yod de du ba yod pa'i phyir ro/ /'gyur na de lta yang ma yin te/ de'i phyir 'bras bus rgyu rjes su dpag par mi nus so/ /dngos po las me rtogs pa'am/du ba las dngos po rtogs par nus pa ni ma yin te chu la sogs pa'i dngos po yod kyang me med pa'i phyir ro/ /des na de las skyes pa ni 'khrul pa med pa nyid kyis rjes su dpag par bya ba grub par bya ba'i phyir brjod par mi bya'o snyam du bsams pa'o/ /ci ste thams cad las bdag nyid thams cad kyis de la skyes pa nyid ma yin no zhes brjod na de ni mi rigs so zhes smras pa ni rnam pa thams cad du zhes bya ba'o//gang gi phyir me las dngos po la sogs pa'i bdag nyid rnams las kyang du ba dngos po la sogs pa'i rang bzhin can du skye ba yin gyi/ me tsam las du ba tsam du skye ba ni ma yin no zhe na/re zhig 'di go bar bya ba la ltos nas spang ba'i phyir mdo'i 'brel pa gzhi 'cha' bar byed pa ni ma yin te zhes bya ba'o/ /me'i chos gang yin pa de dag yod na du ba 'byung ba'am/ de med na du ba ldog pa ni ma yin no/ /re zhig ldog par mi nus pa'i chos dngos po dang mi rtag pa la sogs pa rnams ni rjes su 'gro ba bkag pa nyid kyi rgyu ma yin pa nyid do//'di ltar bud shing dang bcas pa'i dngos po gzhan nam mi rtag pa yod kyang du ba mi skye'o/ /gzhan 'bar ba can dang bud shing gi khyad par las skyes pa la sogs pa rnams ni med kyang bud shing sreg par nus pa tsam yod na 'byung ba'i phyir du ba tsam gyi rgyu can ma yin no//de'i phyir gang med par 'bras bu 'byung ba de las 'di skye ba'i mtshan nyid nges pa med pa'i phyir de las skyes pa'i phyir 'bras bu go bar byed pa yin pa la ji skad bshad pa'i skyon yod pa ma yin no/ /gang gi phyir de bas na 'bras bu ni gtan tshigs yin no//bsgrub par bya ba gang yin zhe na/ bshad pa gang dag rgyu la rang bzhin rgyu'i dngos po gang yin pa de dag ji snyed cig med na mi 'byung ste de dag gis ni yin no/ /'dis ni 'bras bu'i bsgrub par bya ba'i khyad par bstan to/ /rjes su 'gro ba dang ldog pa dag las rgyu'i dngos por rtogs pa'i rgyu'i chos gang yin pa de dag nyid 'bras bus go bar byed pa yin no//des na du ba las dngos po dang mi rtag pa'am rtswa las byung ba rtog pa ma yin gyi 'on kyang me zhes bya ba ste 'di ni sreg par byed pa brjod pa yin pa'i phyir ro/ /'di ni 'bras bu nyid kyis go bar byed pa yin la 'bras bu yang gang dag med na mi 'byung ba de dag kho na'i yin te/des na 'di ni de nyid kyi gtan tshigs kyi dngos por rigs so/ /de smras pa ni gang dag med na 'bras bu mi 'byung ba de dag gi 'bras bu nyid du 'di nges pa yin te/ de'i phyir ro/ /de ltar 'bras bu'i gtan tshigs kyi bsgrub bya bstan pas rnam pa thams cad du go bar bya ba nyid du thal ba spangs nas sgrub par byed pa'i khyad par bstan pas rnam pa thams cad du go bar byed pa nyid yin pa yang spang ba'i phyir/gang dag ces smos so/ /ci'i phyir mdor ma bstan zhe na ma bstan zhes sus smras/ 'dir rgyu yod pa la rang bzhin ji snyed cig med na mi 'byung ba'i 'bras bu ni gtan tshigs yin no zhes brjod par nus pa yin no//'di'i rang bzhin rgyu med na mi 'byung ba gang yin pa ma yin gyi/ gzhan du na yang yod pa ma yin te/ dngos po la sogs pa ni me med kyang yod pa'i phyir ro/ /de nyid kyi phyir de dag gi zhes bya ba dang / de dag kho na zhes mdor 'brel par 'grel pa byed pa nyid kyis brjod do//mdor na 'bras bu ni zhes bya ba 'di tsam zhig brjod do/ /de la go bar bya ba la ltos nas 'di dag gis zhes 'brel la/ go bar byed pa la ltos nas ni de kho na nas zhes 'brel to/ /de nyid kyi phyir gzhung 'di ltos pa dang bcas pa nyid du nye bar bkod de/'bras bu ni de dag kho nas gtan tshigs yin no/ /rang bzhin bya ba 'di bshad pa ni chos de dag bya ba yin la/ med na mi 'byung zhes bya ba'i bshad pa ni gang dag de dag med na mi 'byung ba zhes bya ba yin no/ /de bzhin du de med par 'byung ba ni de las skye bar nges pa med pa'i phyir ro zhes bya ba 'di yang bshad par bya'o//'dir pha rol po sngar bshad pa'i rang gi phyogs sgrub par byed par ston pa ni gal te gang dag rgyu la yod pa'i chos 'ga' zhig nyid med na mi 'byung ba 'bras bu la yod pa'i chos 'ga' zhig nyid go bar byed pa yin no zhe na/ cha shas kyis bskyed par bya ba dang skyed par byed pa yin par 'gyur ro//de nyid kyi phyir gang gi tshe rgyu'i chos de dag nyid kyis 'bras bu'i chos skyed pa de'i tshe/ dngos po nyid la sogs pa rgyu la gnas pa skyed par byed pa ma yin la/ 'bras bu la gnas pa yang bskyed par bya ba ma yin pa'i phyir rgyu med pa nyid du thal bar 'gyur ro/ /de lta yin dang 'gal ba'i chos gnas pa'i phyir rgyu la yod pa'i chos rnams tha dad par 'gyur la/'bras bu la yod pa 'ga' zhig rgyu med par 'gyur te/ de bas na skyon 'dir 'gyur ro/ /rnam pa thams cad du bskyed par bya ba dang skyed par byed pa yin na yang rnam pa thams cad du go bar bya ba dang go bar byed pa'i dngos por rnam par gnas pa nyid do zhe na/'di bzlog pa'i phyir ma yin te/ des bskyed par bya ba'i khyad par dang zhes smos so/ /'bras bu ni chos gang zhig rgyu la yod pa'i chos gang dag med na mi 'byung ba de dag kho nas de dag kho na'i gtan tshigs yin no zhes khas blangs pa na cha shas kyis bskyed par bya ba dang skyed par byed pa yin par thal bar 'gyur ro zhes brjod pa 'bras bu de dag gis bskyed par bya ba'i khyad par gang yin pa de bzung na yin par 'dod pa nyid do//rgyu'i chos ni rnam pa gnyis te dngos po nyid la sogs pa rjes su 'gro ba spyi'i chos dang / rtswa las byung ba la sogs pa rjes su 'gro ba med pa khyad par gyi chos so//de la spyi'i chos rnams rjes su dpog par thal ba ni shin tu 'gal ba ma yin te khas blang bar nus pa'i phyir ro/ /bye brag gi chos rnams ni khas blang bar mi nus pa nyid kyis de las skyes pa tsam la brten nas rjes su dpag par bya ba yin na 'gal bar 'gyur ro/ /de la brjod pa ni rtswa las byung ba la sogs pa'i khyad par tha dad pa yang du ba khyad par gzhan la yod pa'i phyir khyad par de las skyes pa ma yin pa de lta na yang rgyu la yod pa'i khyad par 'bras bu'i bdag nyid la byed pa med pa kho na'o zhes bya bar ni mi nus te cha shas kyis skyed par byed pa nyid du thal ba'i phyir ro//des na khyad par de 'bras bu'i bdag nyid la yang khyad par tsam mo zhes 'dod pa yin te/rgyu khyad par med par 'bras bu'i khyad par yod pa'i nyes par 'gyur bar bya ba'i phyir ro/ /rgyu'i khyad par de yang gang gi tshe rjes su 'gro ba rtogs par gyur pa de'i tshe rnam pa thams cad du go bar bya ba yin pa nyid do zhes bya ba'o/ / 'di la 'di'i dpyad pa bya ste/ de lta na yang cha shas kyis bskyed par bya ba dang / skyed par byed par 'gyur ba ldog pa ma yin no/ /me tsam gyi bdag nyid kyis yin gyi/ khyad par btang snyoms pa ston pa yin na der thal bar 'gyur gyi khyad par gyis kyang khyad par skyed pa la ni ma yin no zhe na/ ma yin te spyi nyid las spyi yin te khyad par ni ma yin no//de ni khyad par nyid ma yin no zhes khas blangs pa na 'di khyad par spyi'i bdag nyid la btang snyoms su gnas pa'i phyir ro/ /dngos po'i bdag nyid cha shas dang bcas par thal ba nyid ni 'di nyid skyon du 'gyur ba yin te/ de lta ma yin na khyad par gyi rang bzhin btang snyoms su gnas pa la yang skyon med par 'gyur ro/ /dngos po ni chos nges pa rnams bya ba'i yul tha dad pa nyid na ji ltar cha shas nyid du mi 'gyur/ 'on te rtswa las byung ba la sogs pa'i rang bzhin gcig tu gyur pa nyid kyi me ni me'i rnam pa yin la/ de bzhin du du ba'i rnam pa yang de las bskyed par bya ba'i khyad par rnam par dbyer med pa'i rang bzhin yin no//de lta bu'i rgyu de las de lta bur gyur pa de skye ba na rnam pa thams cad las rnam pa thams cad du skye bar 'gyur ro/ /'on kyang chos tha dad par nges pa'i rnam par rtog pas me'i cha las khyad par gyi cha tha dad par byed par zad do/ /des na gang gis khyad par gyi cha med kyang de ltar rjes su 'gro ba'i rang bzhin yod na yod pa'i du ba de med par 'byung ba ni zhes khyad par gyi rgyu can yin pa sel bar 'gyur ba 'ga' zhig ni chos can gzhan la yod pa nyid kyi de dang gcig tu byas nas nges pas rjes su 'gro bar brjod pa yin la gzhan ni ldog pa yin no// dngos po la ni rgyu dang 'bras bur gyur pa'i rang gi mtshan nyid gnyis po de rgyu dang 'bras bur gyur pa gzhan dag las gzhan nyid yin pa'i phyir mi 'dra ba'i mtshan nyid las skye bas na cha shas kyis bskyed par bya ba dang skyed par byed pa yod pa ma yin no/ /de bzhin du spyi dang khyad par gyi chos gzhan dag la yang brjod par bya'o zhe na/de yang mi rigs te/ ma yin te de med par 'byung ba ni zhes bya ba la sogs pa'i gzhung mi brjod par thal ba'i phyir ro/ /de bzhin du gtan tshigs thigs pa'i rdza mkhan las ni 'jim pa'i ngo bo nyid ma yin/ 'jim pa las ni dbyibs kyi khyad par ma yin zhes bya ba yang mi 'thad par 'gyur te 'jim pa dang rdza mkhan gnyis ka las 'jim pa dang dbyibs kyi khyad par cha med pa'i dngos po 'byung ba'i phyir ro//de la 'di ni bdag nyid thams cad kyis gcig las kyang 'byung la gzhan las kyang 'byung ba ma yin no/ /des na 'di ni rdza mkhan las kyang 'jim pa'i ngo bo nyid yin la/'jim pa las kyang dbyibs kyi khyad par yin no/ /rdza mkhan ma yin pa'i skyes bu dang 'jim pa dang bskyed par bya ba so phag la sogs pa gang yin pa de yang mi 'dra ba nyid mi 'dra ba'i tshogs pas bskyed pa yin gyi/ der 'jim pa yod kyang rdza mkhan med pa'i phyir bum pa'i dbyibs med pa ni ma yin pa'i phyir rdza mkhan de rgyu nyid do zhes bya bar nus par 'gyur ro//lhan cig byed pa mi 'dra ba dang ldan pa'i 'jim pa dang rdza mkhan dag 'bras bu mi 'dra bar byed pa'i phyir cha shas kyi rjes su 'gro ba dang ldog pa rtogs pa ma yin no/ /rnam par rtog pas nye bar btags pa'i chos rjes su 'gro ba la brten pa'i rjes su 'gro ba dang ldog pa la brten nas de skad bshad pa yin no zhe na ma yin te btags pa la brten pa ni ldog pa'i rten ma yin pa'i phyir ro//de bzhin du mig kyang mig la sogs pa'i tshogs pa khyad par can las skye la/ bde ba la sogs pa yang ma yin pa'i phyir/ de dang de min dngos rang bzhin/ /zhes mi brjod par 'gyur ro/ /mig la sogs pa yang shes pa'i rang bzhin du thal ba'i phyir ro/ /ji ltar rtogs bzhin pa'i rjes su 'gro ldog gi rjes su 'brangs na ni mig tshogs pa de med kyang sngar yang yod pa'i phyir tshogs pa de'i rgyu mtshan can ma yin pas bde ba la sogs pa dang rgyu mi mtshungs pa nyid kyis de dang 'dra bar shes pa nyid du thal bar mi 'gyur ro//gang gi tshe khyad par gyi rten pa nyid kyis rjes su 'gro ba dang ldog pa'i rjes su 'brang ba de'i tshe/ de phyis mi 'byung ba'i phyir du ba la sogs pa me la sogs pa'i tshogs pas bskyed par bya bar nges pa don med pa nyid do//'on te gcig du ba yin pa nyid na gzhan yang du ba yin pa'i phyir du ba la brten nas nges par brten pa yin zhe na/ da ni du ba gzhan me la yod pa'i khyad par las nges pa ma yin te de med kyang yod pa'i phyir ro/ /des na du ba khyad par gyi rgyu can du ji ltar 'gyur de bzhin du me las ni du ba gzhan 'byung la/brgya byin gyi spyi bo las du ba rnam pa gzhan 'byung ba yin no zhes bya bar yang 'gyur ro/ /de'i phyir rjes su 'gro ba dang ldog pa 'am cha shas kyis bskyed par bya ba dang skyed par byed pa ma yin pa 'di brjod par bya'o zhe na/ 'di la brjod pa 'di du ba la sogs pa'i bdag nyid kyi don lan cig kyang rgyu nye bar gnas pa rtsa bar gyur pa nyid kyis rang gi ngo bo thob par byed pa na du ba la sogs pa thams cad de lta bu'i rgyu can nyid du nges par byed do//gcig cig de med par 'byung na yang lan cig kyang de ltar gyur par mi 'grub pa'i phyir ro/ /des na 'chad par 'gyur ba'i rigs pa la ltos nas du ba'i rang gi mtshan nyid gcig cig kyang me'i khyad par med par 'byung ba yin na du ba me'i khyad par gyi rgyu can du mi 'gyur ro//'on te yang cha shas kyis skyed par byed pa nyid yin na/ de yang ma yin te/ gang gi phyir gang gis spyi'i cha ni der nus pa yin la khyad par gyi cha ma yin pa'i phyir 'gal ba'i chos gnas par 'gyur ba me'i spyi'i cha khyad par gyi cha las tha dad pa ni yod pa ma yin te/rtswa las byung ba nyid dang me nyid gnyis phan tshun khyad par med pa'i phyir te snang ba tha dad par ma grub pa'i phyir ro/ /des na rtswa las byung ba dang me cha med pa'i bdag nyid kyis rtswa las byung ba'i du ba cha med par skyed par byed do//de bzhin du lo ma las byung ba las kyang lo ma las byung ba'i phyir rang gi mtshan nyid kho na las rang gi mtshan nyid 'byung ba na gang gis 'dir cha rnams chos 'gal ba la gnas pa'i phyir tha dad par 'gyur ba cha shas kyis skyed par byed pa nyid du ga la 'gyur/bsam pa 'di nyid kyis na des bskyed par bya ba'i khyad par bzung na zhes bshad pa yin te rnam pa de lta bu'i dngos po yod na de lta bur gyur pa yod par 'gyur ro zhes bya ba'i don to/ /ji ltar rtswa'i bud shing du bskyed pa na sa bon la sogs pa tshogs pa myu gu skyed pa de bzhin du lo ma'i bud shing las kyang des bskyed pa'i du ba skyed pa ni ma yin te/'on kyang du ba de de las skye ba yin no/ /de ji lta ba nyid kyang ma yin gyi 'on kyang khyad par gzhan dang ldan pa'i tshogs pa las khyad par gzhan dang ldan pa'i du ba nyid skye ba yin no/ /des na 'dir khyad par du byed pa'i rang bzhin gang yin pa zhes brtsal bas na/bud shing khyad par du byed pa yin par brjod do/ /tshogs pa der bud shing nyid khyad par yin pa'i phyir ro/ /des na du ba tsam la ltos te bud shing gi khyad par sbyor bar byed pa ma yin te/ des med par 'byung ba ni de las skye bar nges pa med pa'i phyir ro zhes med kyang 'byung bar bshad do/ / de bzhin du 'bar ba la sogs pa'i khyad par dag kyang nges par bya'o/ /de tsam gyis skyed par byed pa ma yin pa yang ma yin te thams cad las khyad par thams cad 'byung ba'i phyir ro/ /gal te thams cad las khyad par thams cad skye na tshogs pa de dang de dag tu phan tshun tha dad pa'i rang bzhin cha med pa'i du ba nyid cha med pa'i me las skye ste des na khyad par de med kyang tshogs pa gzhan la du ba yod pas de med kyang yod pa'i phyir rgyu ma yin pa'i phyir dang /me yod kyang du ba bzhin du khyad par de mi skye ba'i phyir de des bskyed pa ma yin pa'i phyir/ sreg pa'i nus pa tsam las ni du ba tsam skye la/ khyad par las ni khyad par yin no zhes de ltar rnam par phye bas ji ltar 'gyur zhe na/brjod pa'i tshogs pa gzhan la ltos nas rnam par phye ba yin gyi dngos po de ni rnam par dbye ba'i rten ma yin no/ /khyad par med kyang tshogs pa gzhan la yod pa'i phyir khyad par de rgyu ma yin pa'i rtag pa yin gyi/ dngos po de nyid la ni chos 'ga' zhig chos 'ga' la btang snyoms par rten pa mi 'thad do//gal te de lta na rtswa las byung ba'i bdag nyid khyad par yin yang der du ba'i rgyu nyid du grub pas gzhan du ji ltar yod ce na/ 'di la bshad zin te dngos po la chos rnams phan tshun khyad par med pa'i phyir 'di ni 'di la'o zhes rnam par dbye ba ma grub pa'i phyir ro//'on kyang bsal ba tha dad pa dag la de'i rgyur gyur pa'i tshogs pa rnams kyi tha dad pa'i rgyu rjes su 'gro ba dang ldog pa dag las rtogs nas khyad par de dang ldan pa'i 'bras bu sgrub par byed pa'i don du gnyer ba de lta bu'i rgyu 'dzin pa'am khyad par can gyi 'bras bu dmigs pa las khyad par can gyi rgyu rjes su dpog pa la 'jug pa yin no//de'i phyir rang gi mtshan nyid tha dad pa'i rjes su song ba'i rnam par dbye ba la ltos nas ni ma yin te/ de med par 'gyur ba ni de las skye bar nges pa med pa'i phyir ro zhes brjod la/ cha med pa nyid cha med pa las skye ba las bsams nas ni bskyed par bya ba'i khyad par bzung nas bshad de/de bzhin du rdza mkhan las dbyibs kyi khyad par skye ba yang nges par bya'o/ /mig la sogs pa shes pa skyed pa'i tshogs pa tsam la brten nas 'byung ba ma yin no zhes ni gzhan du bstan zin to/ /da ni 'bras bu rgyu med na mi 'byung ba'i chos dag kho nas go bar byed par bshad pa gang yin pa der yang cha shas kyis skye bar thal ba spong ba'i phyir rtags kyi bye brag gi khyad par can gyi spyi rnams bzung na yin par 'dod pa'i phyir ro zhes smos so//go bar bya ba dang go bar byed pa'i dngos po'i skabs yin pas/ de nyid des bskyed par bya ba'i khyad par dang /ji skad bshad pa'i spyi rnams bzung na yin par 'dod pa'i phyir ro zhes bya ba'i don to/ /rtags kyi spyi dngos po nyid dang / skya bo nyid la sogs pa gang yin pa de dag kyang rtags kyi bye brag gi khyad par bzung nas te/ khyad par can gyi rtags kyi khyad par rnams rtogs na gtan tshigs kyi dngos por 'dod pa yin no//'di dag ni rtags kyi khyad par du gyur pa yin te/ rtags kyi bdag nyid kyis na rtags bzhin du de dag kyang khyad par yin pa'i phyir ro/ /du ba la yod pa'i dngos po nyid ni bum pa la yod pa'i dngos po nyid las tha dad pa yin te/ des na du ba la yod pa 'di bum pa la yod pa dang mi 'dra bar bzung na me bsgrub par rigs pa nyid do//gal te me med par yang 'byung ba'i dngos po nyid ji ltar me'i rgyu can du 'gyur ba ma yin te/ dngos po nyid gzhan yin pa'i phyir ro zhe na/ me ma yin pa las byung ba'i du ba yang gzhan nyid yin pa'i phyir mtshungs par thal bar 'gyur ro//mtshungs pa ma yin te/ gang gi phyir 'ga' zhig gis 'khrul pa dang / mi 'khrul bar 'gyur ba dngos po nyid ces bya ba ni 'bras bu ma yin gyi/ 'on kyang rang gi mtshan nyid kho na'o/ /de yang du ba yin zhes dbang phyug sel ba dag gis bstan to/ /khyad par la ltos par ni spyi tsam sgrub byed ma yin no zhes bshad pa ni/spyi khyad par du ma byas pa zhes bya ba la sogs pa yin no/ rgyu gang zhig bsgrub par bya ba des ni rang gi 'bras bu la spyi'i chos khyad par gyi bdag nyid du gyur pa rnams nyid kyi rang bzhin bsgrub par bya ba yin te/ des na de lta bur gyur pa de dag gi sgrub par byed pa yin pa nyid do//rgyus byas pa'i khyad par la ma brten par 'bras bu gzhan la yod pa'i rang bzhin la brten nas/ gtan tshigs su byas na ni 'khrul pa nyid kyi phyir na de dag gtan tshigs su 'dod do/ /des na de ltar de'i rang bzhin de las byung ba'i phyir ro zhes 'brel pa bstan pa nyid kyis rang bzhin rtogs pa'i 'bras bu'i gtan tshigs kyi bsgrub par bya ba'i khyad par bstan pa'i phyir/gal te de las skyes pa'i phyir zhes rgol ba bkod pa sngon du 'gro bas bshad nas/ da ni de ni de'i bdag nyid yin pa'i phyir ro zhes bya bas rang bzhin gyi gtan tshigs kyi rang bzhin nyid bshad kyang bsgrub par bya ba bstan pa'i phyir rang bzhin yod tsam dang zhes smos so//rang bzhin de rang gi ngo bo nyid la dngos po gtan tshigs yin no/ /rang bzhin de yang yod pa tsam dang rjes su 'brel ba yin te/ yod tsam nyid kyi rjes su 'jug pa yin no/ /gang zhig yod pa'i zhe na/ skabs kyi dngos po nyid yod pa'i zhes bya bar rtogs so/ /de'i don ni 'di yin te gang zhig dngos po yod pa tsam gyi rjes su 'jug pa de lta bu'i rang gi bdag nyid la dngos po gtan tshigs yin no//dngos po ni de'i bdag nyid yin pa'i phyir de yod pa ni rang gi bdag nyid med par mi 'gyur ba'i phyir te yod na gdon mi za bar de'i rang bzhin yod par 'gyur ro zhes nges pas na dngos po yod na rang bzhin yod pa yin no//gal te 'di lta bu'i don 'di ni rang bzhin 'brel pa brjod pa nyid kyis nges pa ma yin nam/ des na 'di nyid bsgrub par bya ba yin pa des na 'di brjod pas ci zhig bya zhe na/ de ni bden te/ de nyid kyi phyir gtan tshigs kyi de'i bdag nyid ni zhes smos so//'di'i rang bzhin 'brel pa ni rnam pa 'di lta bu'i dngos po la yin par rigs pa de'i phyir de nyid bsgrub par bya bar 'thad do zhes bya ba'i don to/ /gal te de lta na 'o na ci'i don du 'di bkod ce na/ gzhan la rag las pa'i ni ma yin te zhes smos so/ /de ltar rnam pa thams cad du go bar bya ba dang go bar byed pa nyid du 'gyur bar smra ba rgyu dang 'bras bu'i rang bzhin bstan pas bsal ba de bzhin du de'i bdag nyid bstan pas de dang 'gal ba go bar byed par brjod pa bkag pa yin no//des na gang dag gzhan la rag las pa'i phyir des stong yang ngo bo yod pas de'i bdag nyid du ma grub kyang go bar byed pa nyid du smra ba de dag 'di ltar bsal bar bya ba yin te 'jig pa rgyu dang ldan par smra ba rnams kyis byas pa nyid bzhin no//mi rtag pa nyid de phyis 'byung na yod kyang de'i rang bzhin ma yin par 'gyur ro/ /des na de'i bdag nyid ma yin pa'i phyir 'di byas pa nyid kyis bsgrub par bya ba ma yin no//des na gzhan la rag las pa yin na de'i bdag nyid med par 'gyur ba'i phyir gtan tshigs nyid du mi rigs pa na/ rang bzhin 'brel pa'i rten nyid bsgrub par bya ba yin no/ /de ltar smra ba ni de'i bdag nyid las byas pa go bar byed pa smra ba ni ma yin te/ de'i phyir de ji ltar de med pa nyid kyis 'di bsgrub par bya ba nyid yin pa dgag ces dogs na/byas pa nyid yod pa na 'di med na go bar byed pa nyid du mi rigs so zhes bstan pa'i phyir de yod na yod par ma gyur pa'i zhes smos so/ /byas pa nyid la sogs pa de la go bar byed pa nyid du 'dod pa'i ngo bo gang yin pa de yod na/gzhan la rag las pa'i phyir yod par ma gyur pa'i phyis 'byung ba la ni nges pa med do/ /gtan tshigs ni de yod na de gdon mi za bar yod pa'i phyir bsgrub par bya ba nges par byed pa yin no/ /de gang gi tshe gtan tshigs yod kyang yod par ma gyur na/ 'o na 'dis nges par gang la brten nas phyis 'byung bar 'gyur/de ni de re zhig de med par yod par 'gyur te de'i tshe bzhin no/ /des na de yang yod la phyis kyang sngar bzhin mi 'byung ba'i phyir 'di nges pa med pa kho na'o/ /'o na yod par 'gyur ba yang dgag pa med pa nyid do zhe na med mod/ nges pa med na rjes su dpag pa mi 'byung ba'i phyir the tshom nyid du 'gyur ro//gzhan yang gang la rag las nas 'di yod par 'gyur ba de nyid las yod pa 'byung bar 'gyur ba ma yin pa'i phyir/ de ji ltar phyis kyang yod par 'gyur zhes bshad pa ni rgyu rnams ni zhes bya ba yin no/ /rgyu rnams ni 'bras bu la 'khrul pa yin no/ /'bras bu med kyang 'byung ba yin te gdon mi za bar byed pa ma yin no zhes bya ba'i tha tshig go//da ni 'brel pa rtogs pa med pas rang bzhin gyi gtan tshigs las tha dad par byed pa med par mi dmigs pa'i rang bzhin brjod pa sngon du 'gro ba can gyi bsgrub par bya ba bstan pa/ tshad ma rnams ni zhes smos so//mngon sum dang rjes su dpag pa dang lung gi tshad ma rnams mi 'jug pa mi dmigs pa yin no/ /'di ni 'di'i rang bzhin gyi gtan tshigs las khyad par yin no zhes gtan tshigs kyi khyad par ston par byed pa/ ni'i sgras rnam par dbye ba yin no/ /tshad ma 'jug pa nyid kyis rtogs pa'i mi dmigs pa de ni mi dmigs pa yin no zhes 'grel par bshad do//tshad ma nyid dmigs pa yin pa'i phyir de ldog pa med pa ni mi dmigs pa yin no/ /rang gi ngo bo bstan nas bsgrub par bya ba bshad pa ni/ med la mi 'jug 'bras bu can/ /zhes bya ba yin no/ / gang du tshad ma 'di dag mi 'jug pa de nyid la de mi dmigs pa de'i byed pa 'jug par brjod par bya'o/ /de nyid kyi phyir mi dmigs par gyur pa de nyid med la zhes yul nyid du bstan to/ /de yang don yod pa ni dmigs pa yin pa'i phyir dmigs pa med na yod pa med pas med pa zhes brjod do/ /gang gi phyir de med pa yin pa des na med pa de la mi 'jug pa ni 'di'i 'bras bu yin te mi 'jug pa sgrub par byed pa yin no snyam du dgongs pa'o//'jug na ni don gdon mi za bar rnam par rtog pa 'byung ba mi ldog ste/ mthong ba don gyis bsgrub par bya ba'i 'bras bu 'dod pas 'byung ba'i g.yo ba brtsams pa la ni gdon mi za bar 'di 'di lta bu'o snyam pa'i rtog par 'gyur ba'i phyir ro//des na gal te 'jug pa zhes bya ba 'byung ba las gyur pa'i byed pa brjod pa de lta na yang 'jug pa bkag pa dang / de med na mi 'byung ba'i sgra bkag pa byas par 'gyur ro/ /'jug pa la ni don yod par dogs pa'i rtsa ba can yin te/des na 'jug pa bkag na de las 'jug pa bzhin du rnam par rtog pa de'i rtsa ba can gyi sgra yang bkag par 'gyur ba yin no/ /de nyid kyis na yod pa'i shes pa dang zhes bya ba la sogs pa'i 'grel pa bshad do/ /tha snyad ces bya ba ni don du gnyer bas 'byung ba bskyed pa'o/ / ci tshad ma med na yod pa'i shes pa la sogs pa 'gog ce na/ de dag ni dmigs pa sngon du 'gro ba can yin pa'i phyir ro zhes smos so/ /da ni 'tshe ba la sogs pa spong ba la sogs pa la yang 'jug par mi 'gyur ro zhe na de nyid kyi phyir tshad ma rnams zhes smos pa ste/ de la lung las dmigs pa yod pa'i phyir dang /de yang rnam pa 'di lta bu'i don la tshad ma yin pa dang / rjes su dpag pa las phyi rol du gyur pa ma yin pa'i yang phyir ro/ /gal te mdo las me la zhes don med pa tsam rgyu nyid du brjod pa ma yin nam/ de ji ltar na dmigs pa sngon du 'gro ba can yin pa'i phyir zhes bstan ce na/de ltar 'di ni zhes smos so/ /rnam pa 'dis yod pa'i shes pa la sogs pa dgag pa'i 'bras bu can 'di ni yod pa dang med pa dgag pa dang sgrub pa'i gtan tshigs dag gi 'dra ba khyad par med pa'i ngo bo nyid yin no/ /yod pa'i shes pa la sogs pa'i gtan tshigs ni ji skad bshad pa nyid la med pa'i shes pa la sogs pa sgrub pa'i gtan tshigs ni 'chad par 'gyur ro//'di skad brjod pa yin te/ ji skad bshad pa'i rgyu nyid sbyor byed du bya ste ji skad bshad pa'i shes pa la sogs pa 'gog pa'i 'bras bu can du bstan to/ /'di gcig pur ni ma zad de 'chad par 'gyur ba'i bar du yang yin no//'di nyid gzhung 'dzugs pa na rgyu nyid du bstan pa'i med pa ji skad bshad pa'i rgyu'i rtsa ba nyid du ston pa ni 'di ltar zhes bya ba'o/ /dmigs pa ni yod pa yin te/ dmigs pa de las yod pa'i shes pa dang sgra dang tha snyad 'jug pa'i phyir ro/ / yod pa'i don gyi rang bzhin nyid yin gyi dmigs pa ni ma yin te don dang dmigs pa tha dad pa nyid kyi phyir phan tshun yod pa ma yin no/ /de lta mod kyi dmigs pa yod par brjod pa yin no/ /des na tshig gi don gzhan gyis gzhan la brjod pa 'di ni nye bar btags pa las yin no/ /yod pa la gnas pa'i nye bar btags pa de yang mi dmigs pa la yin te de la dmigs pa nyid kyis yod do snyam du shes pa 'jug pa'i phyir dang /de ltar rtogs pa de'i dbang du byas te tha snyad 'jug pa'i phyir ro/ /dmigs pa de yang gang yin zhe na/ dngos po rung ba'i mtshan nyid ces smos so/ /rnam par shes pa'i yul gyi rang bzhin gyi dngos po'am/rnam par shes pa'i yul gyi rang bzhin gyi dngos po ni rnam par shes pa ma yin te/ rgyu dang 'bras bu'i dngos po ni tha dad pa la brten pa yin no/ /des na 'di yang khyad par can gyi yul yod pa dmigs pa la nye bar btags nas bstan pa yin no//des na dmigs pa yod pa nyid dang / yod pa nyid dmigs pa yin no zhes gnyi ga nye bar btags nas brjod do/ /de'i rten can gyi shes pa 'jug pa zhes bya ba ni dmigs pa'i don dngos nyid do/ /gang dag bya ba ni byed pa po dang las la gnas pa'i phyir dmigs pa gnyi gar bstan to zhes zer ba de dag ni dum bu nyid yin gyi rtog ge ni ma yin no//shes pa ni bya ba'am/ dngos po'i chos ma yin la yul las kyang ma yin te/ des na 'di ni gzhan gyi lugs kyi dri mas bsgyur ba tsam du zad do/ /gang gi phyir dmigs pa yod pa yin pa de'i phyir ma dmigs pa med pa zhes bya ba 'grub par 'gyur ro//gang dag de ltar gyur pa de dag kyang med pa yin no zhes bshad pa ni mi dmigs pa ni zhes smos so/ /mi dmigs pa ni med pa yin la de yang med pa rnams kyi med pa yin no/ /des na 'dir don 'di yin te/ gang dag ma dmigs pa de dag ni med pa yin la de yang dmigs pa nyid yod pa yin pa'i phyir ro//yod pa de yang yod pa'i shes pa la sogs pa de la brten pa'i phyir ro/ /des na 'di dang 'chad par 'gyur ba'i gtan tshigs su rang gi rgyu mtshan med pa'i phyir yod pa la sogs pa 'gog pa yin no/ /gal te de lta na yod pa'i shes pa la sogs pa rnams dmigs pa sngon du 'gro ba can yin pa'i phyir rgyu mtshan med pa tsam gyis dgag pa thob par 'gyur te/rang gi rgyu mtshan med pa nyid rgyu mtshan yod pa 'gog pa la rigs pa yin pa'i phyir ro/ /des na mi dmigs pa med pas ci zhig bya/ med pa nyid med pa yin mod/ de lta na yang rgyu med na 'bras bu med par 'grub pa kho na'o//de bzhin du gnyi ga ltar nye bar btags nas bstan pa yang med par 'gyur ro zhe na 'di la brjod pa/ ldog pa'i mtshan nyid kyi med pa gang yin pa de ni bsgrub par bya ba ma yin la/ sgrub par byed pa yang ma yin gyi/ 'chad par 'gyur ba'i tshul gyis dngos po gzhan nyid dngos po med pa yin pa'i phyir de bsgrub par bya ba dang sgrub par byed pa yin no//gang gi tshe shes pa nyid 'di shes pa gzhan med pa yin pa de'i tshe de dngos po med par yang yin par 'gyur te/ rigs pa khyad par med pa'i phyir ro/ /dngos po gzhan don dngos po med pa nyid na yang shes pa dngos po med pa yang de nyid yin par 'gyur te/des na shes pa dang shes bya'i mtshan nyid mi dmigs pa grub pa yin la shes pa med par grub pa'i phyir de logs su bsgrub par bya ba ma yin no/ /des na don dam pa 'di tsam zhig gnyi gar btags pa don dam pa ma yin pas bstan pa yin no/ /don dang shes pa dag tha dad pa med par btags na ni shes pa med pa yin pa bzhin du/shes pa med pa yang yin par 'grub ste des na shes pa dang shes bya'i mtshan nyid mi dmigs pa 'grub bo/ /don kyang shes pa nyid yin pas na shes pa med pa bzhin du don med pa yang shes pa med pa yin pa'i phyir ro//de bzhin du don med pa don yin pa ltar don med pa shes pa med pa yang yin pa'i phyir mi dmigs pa grub na grub pa'i phyir don med pa logs su bsgrub par bya ba grub bo/ /des na rigs pas grub pa'i dngos po 'di bstan pa'i phyir don shes pa yin la/ shes pa yang don yin no zhes dngos po ma yin pa bstan te/ji skad bshad pa'i tshul gyis de bstan pa'i thabs yin pa'i phyir ro/ /des na de ltar rang bzhin gyis bskal pa rnams la yang yod pa'i shes pa la sogs pa 'gog pa yin te/ rgyu mtshan med pa'i phyir ro/ /'di med pa ni dmigs pa yod pa yin pa'i phyir dang de yang 'dir med pa'i phyir gyi med pa nyid ni ma yin no//'chad par 'gyur ba'i gtan tshigs la ni mi dmigs pa med pa nyid kyi med pa yin no/ /'o na ji ltar 'di med pa nyid ma yin zhing mi dmigs pa med pa yin/ brjod pa/ yod pa'i shes pa la sogs pa dgag pa tsam sgrub pa la ni rgyu mtshan med pa tsam gyis de med par bstan pa'i phyir de'i rgyu mtshan tsam las dmigs pa yod pa'i rang bzhin du bstan gyi/de med na don med pa'i phyir ro/ /de yod pa dang mi 'khrul pas ni ma yin no/ /yod pa'i shes pa la sogs pa'i rgyu yin pa'i phyir ni de'i rang bzhin la/ de med pa yang med pa'i rang bzhin yin no//dngos po med pa ni ma yin gyi 'on kyang rgyu mtshan med pa nyid do/ /de ni mi dmigs pa gnyi ga la yang khyad par med pa'i phyir de bzhin du med pa'i 'bras bu yang khyad par med do/ /med pa sgrub pa'i gtan tshigs la ni rnam pa de lta bu'i dmigs pa yod pa dang 'khrul pa med pa'i phyir dang /yod pa'i shes pa la sogs pa'i rgyu yin pa'i phyir de med pa'i bdag nyid med pa'i rang bzhin nyid du brjod do/ /de nyid kyi phyir 'di gnyi ga sgrub par byed pa yin no/ /yang gang du yod pa shes pa la mi 'khrul pa'i phyir de yod par brjod ce na/ dngos po rung ba nye bar btags par ro//gzhan du ni dngos po tsam nye bar btags par 'gyur ro/ /shes pa la mi 'khrul pa de ltar bstan na ni de med na dngos po med par nges pa yin no/ /de'i phyir der mi dmigs pa med pa nyid do zhes bya ba 'di 'thad pa nyid do/ /bsgrub par bya ba'i bye brag gi mi dmigs pa snga ma las gzhan pa'i rang bzhin gyi mi dmigs pa yang bstan pa'i phyir bshad pa/tshad ma rnams mi 'jug pa las la la med pa'i shes pa 'bras bu can yin no/ /tshad ma rnams mi 'jug pa ni mi dmigs pa yin no zhes brjod zin to/ /'di dag las la la ni med pa'i shes pa grub par byed pa yin no//med pa'i shes pa ji lta bu sgrub par byed pa de ltar bstan pas gtan tshigs kyi bye brag la ltos nas khyad par can du ston par byed do/ /gtan tshigs kyi bye brag ni gtan tshigs gzhan la ldog pa ste/ de la ltos nas so/ /gtan tshigs ni 'di nyid de 'di nyid kyi skabs yin pa'i phyir ro//bye brag kyang tshad ma rnams mi 'jug pa nyid las so/ /des na tshad ma rnams mi 'jug pa gzhan las bye brag tu gyur pa la brten nas mi 'jug pa la la med pa shes pa sgrub par byed pa yin no/ /bye brag de yang de dag las khyad par dang ldan pa yin na 'gyur ro/ /de'i shugs kyis thob pa'i 'bras bu ni 'grel pa de'i bye brag ni khyad par te gzhan bstan to//khyad par yang dmigs pa'i mtshan nyid kyir gyur pa'i mtshan nyid yod pa can yin no/ /des na gal te tshad ma rnams mi 'jug pa la zhes bya bas nges pa'i tshad ma log pa mi rtogs kyi/ 'on kyang gcig pa 'ga' zhig mi 'jug pa yin no zhes thams cad la rtogs par 'gyur ba de lta na yang ji skad brjod pa'i khyad par dang ldan pa'i mngon sum gcig pu nyid 'ga' zhig mi 'jug pa yin par 'gyur gyi rjes su dpag pa dang lung gnyis ni ma yin pas de nyid de yang gtan tshigs yin no//la la zhes bya ba 'dir mi dmigs pa zhes bya bar ni 'brel pa rigs pa ma yin te/mdor ni mdos zin pa'i tshig nyid dang 'brel par rigs kyi gzhan dang ma yin pas ji skad brjod pa nyid bshad pa'i tshul yin no/ /mdo tshig go rims bzhin bkrol ba'i phyir/ gtan tshigs ni zhes smos so/ /skabs kyi gtan tshigs ni med pa'i shes pa la sogs pa sgrub pa'i tshad ma rnams ldog pa yin la/de yang mi dmigs pa yin la zhes sngar bkrol zin pa'i phyir mi dmigs pa'i zhes smos so/ /bye brag gi sgra'i don bshad pa ni/ bye brag ni zhes bya ba ste ji skad bshad ma thag pa bzhin no/ / des na gtan tshigs bye brag la ltos nas zhes bya ba'i don ni bdag nyid kyi khyad par la ltos nas zhes bya ba 'di yin no/ /gal te dmigs pa'i mtshan nyid kyir gyur pa dang 'brel pa nyid mi dmigs pa'i khyad par ma yin gyi 'on kyang don gyis yin no/ /mi dmigs pas ni de lta bu'i don dang 'brel pa yin te/de nyid kyi phyir dmigs pa'i mtshan nyid kyir gyur pa'i zhes bshad pa yin na/ dmigs pa'i mtshan nyid kyir gyur pa dang 'brel pa'i dmigs pa zhes brjod pa yin no zhe na/ de ni bden te/ mi dmigs pas ni dmigs pa'i mtshan nyid kyir gyur pa'i don khyad par can nyid med par bsgrub par nus kyi gzhan ni ma yin te/des na don nyid mi dmigs pa'i khyad par du bkod do/ /des na khyad par rab tu sbyar ba ni don la gnas pa nyid du yang bsgrub par nus pa yin te/ dper na phyogs kyi khyad par 'ga' zhig na dmigs pa'i mtshan nyid kyir gyur pa'i bum pa med pa de/ma dmigs pa'i phyir ro zhes bya ba lta bu'o/ /des na khyad par 'di ni don la brten pa nyid yin pa'i phyir don la brten pa nyid du bstan to/ /bsgrub par bya ba bstan pa ni yan lag ma yin pa'i phyir gtan tshigs la brten pa nyid du nye bar sbyar te/ de ltar brjod pas kyang de lta bur gyur pa nyid dang 'brel pa nyid kyis de ltar rtogs pa nyid de/des na skyon med do/ /da ni med ces bya ba la sogs pa gzhung gzugs pa'i phyir/ 'dir zhes bya ba la sogs pa smos so/ /med pa ni med par shes pa de/ gal te de grub pa 'di'i 'bras bu yin na 'dir de med pa sgrub par byed par 'gyur ro//'on te shes pa de rang gi ngo bos 'bras bu yin gyi yul grub pa'i sgo nas ma yin na/ 'dir de tsam zhig bsgrub bya yin par 'gyur te/ med pa ni ma yin no/ /des na tha snyad bsgrub par bya bar 'gyur ro/ /des na 'dir ji ltar shes pa zhes rang nyid kyis btags nas rang gi phyogs gzhag pa'i phyir 'di brjod do//shes pa med pas don med pa sgrub par byed na/ shes pa med pa de yang med pa nyid du khyad par med pa'i phyir shes pa med pa gzhan gyis bsgrub par 'gyur ram/ yang na de med kyang grub pa de don med pa bsgrub pa/ de la dang po khas len na shes pa med pa ma grub pa 'di nyid ni sgrub par byed pa ma yin pa'i phyir mi dmigs pa gzhan gyis bsgrub par bya'o//de la de ltar brgal zhing brtags pa na thug pa med par 'gyur ro/ /rtogs pa yang thug pa yod na 'gyur ba yin pa'i phyir mi rtogs par 'gyur ro/ /de smras pa ni dmigs pa med pa yang zhes bya ba yin no//mi dmigs pa rtogs na med pa rtogs par 'gyur ba yin la/ mi dmigs pa yang rang sgrub par byed pa'i mi dmigs pa rtogs na yin no/ /gzhan de yang de bzhin pas 'ga' yang rtogs pa mthar thug pa med pa'i phyir rtsa ba yang mi rtogs par 'gyur ro/ /'on te yang phyogs gnyis pa yin na ji ltar med par khyad par med kyang 'di grub pa de bzhin du don med pa yang yin pas mi dmigs pa don med do zhes bshad pa ni 'on te zhes bya ba yin no//gang gis thug pa med par 'gyur ba mi dmigs pa gzhan gyis bsgrub par bya ba ni ma yin gyi 'on kyang mngon sum gyis grub pa des dngos po ngo bo med par sgrub pa yin te du bas me bzhin no//'di smras pa ni ci ste zhes bya ba yin no/ /mi dmigs pa ni mngon sum gyis grub la/ dngos po bzhin du mngon sum gyis rang bzhin med pa ni rtogs par mi nus pas 'di mngon sum gyis grub pa'i tshul gang yin pa de brjod pa ni/bum pa la sogs pa de dang mi mthun pa las gzhan dmigs pas mi dmigs pa grub pas te/ de ltar rnam pa 'dis mi dmigs pa mngon sum gyis grub bo/ /'di skad brjod pa yin te/ bum pa dmigs pas stong pa'i phyogs dmigs pa med pa mngon sum gyi rnam par 'jog pa yin no zhes so//de 'gog pa ni de bzhin du ste rnam pa gnyis so/ /rnam pa de nyid brjod pa ni bum pa la sogs pa dgag par bya ba las gzhan shes par bya ba phyogs yod kyang med pa ci ste mi 'grub ji ltar dmigs pa gzhan myong ba las dmigs pa med par nges pa de bzhin du dngos po gzhan myong ba las kyang de las gzhan med par ji ltar 'grub par mi 'gyur/smras pa/ rgol ba dang lan 'di gnyis ka yang ma 'brel te/ dmigs pa yang gzhan myong yang / dmigs pa gzhan dag med par mi 'grub pa'i phyir ro/ /shes pa las yul du ma byas pa'i don gnas pa ni med de des na gal te phyogs dmigs pa myong ba na phyogs dmigs pa nyid myong bar 'gyur ba nyid mngon sum gyis grub mod/de las gzhan dmigs pa med pa gang gis grub shes pa dmigs pas na ma yin te/ rang gi bdag nyid mthar thug pa'i phyir ro//don bzhin du dmigs pa gzhan gyis kyang ma yin te/ don bzhin du rang bzhin yod pa ma yin pas dmigs pa'i yul nyid med pa'i phyir ro/ /nges pa'i shes pa gzhan myong na gzhan med pas 'grub po zhe na/ nges pa zhes bya ba 'di ci zhe na gal te rang gi ngo bo nyid tsam nyid yin te/de grub kyang med pa la ci phan/ dmigs pa gzhan med pa de nyid ngo bo yin no zhe na/ ma yin te/ de'i ngo bo dmigs pa log pa tsam yin pa'i phyir ro/ /dmigs pa gzhan ni dmigs pa log pa ma yin no/ /de ni ngo bo nyid med pa tsam yin la dmigs pa ni ngo bo nyid yin pas de ji ltar gzhan med pa yin 'on te de nges pa nyid ni med pa'i khyad par can yin no zhe na/de lta na yang khyad par la mngon sum gyi byed pa med pa nyid de/ de la yul du bya ba med pas de'i yul ma yin pa'i phyir ro/ /de'i phyir gang la brten nas dmigs pa 'jug pa de dngos po gzhan yod pa dang med pa'am the tshom za ba la mi ltos kho nar 'dir nges par byed do//yul ma yin pa la ni rdul tsam yang 'gro ba med pa'i phyir myong ba'i rang gi ngo bo nges pa na gzhan dmigs pa na mi dmigs pa'am gzhan yod pas med pa 'grub par yang ji ltar 'gyur/ shugs zhes bya ba yul du ma byas pa rnam par 'jog par byed pa'i tshad ma'i byed pa yang tshad ma dang ldan pas khas blang bar nus pa ma yin te/ des na 'di brjod dgos so zhe na/ 'dir smras pa/ 'di la dngos po med pa zhes bya ba ni dngos po gzhan ldog pa tsam yin pa'i phyir tshad ma'i yul ma yin te/bum pa med do zhes bya ba de med pa ni dngos po 'ga'i yang mthar thug pa ma yin no/ /des na ji ltar ngo bo med pas na de yod na 'ga' yang 'byung ba med pa'i phyir dang rgyu'i rang bzhin yang de lta bu yin pa'i phyir 'di la rgyu'i rang bzhin mi srid pa de bzhin du de las tshad ma yang ldog pa nyid do//don dam pa'am kun rdzob tu yang rung ste tshad ma zhes bya ba ni gsal bar byed pa la brjod do/ /gang la bdag nyid 'ga' zhig yod pa de/ de'i bdag nyid du gsal ba de ni gsal ba nyid du 'gyur gyi/ 'di la ni dngos po'i ngo bo med pas ci yang ma yin pa'i phyir 'di gang gis gsal ba yin des na 'di la gzhal bya nyid ci zhig yod/des na ji ltar 'di la rgyu med pa de bzhin du tshad ma yang med do/ /'o na ji ltar bum pa med do zhe'am/ dbang phyug dang gtso bo dang bdag med do zhes rnam par gzhag ce na/ de rnam par gzhag pas kyang cir yang byar med do//dgos pa'i yan lag nyid kyis rnam par 'jog pa'am de lta bu ni yan lag ma yin yang yod pa yin no zhes rang gi ngo bo yod pas rnam par 'jog grang na/ de ni dngos po med pa la med do/ /de'i phyir de ltar rnam par gzhag par 'os pa'i yod pa dgos pa'i yan lag tu gyur pa'am/rang gi ngo bo nyid kyis rang gi bdag nyid 'dzin pa'i tshad ma skyed par byed pa gang yin pa de dag nyid bum pa 'di la yod do/ /sems 'dod chags dang bral ba'am/ 'jig rten gzhan yod do zhes tshad mas yul du byed do/ /gang dag yod pa ma yin pa de dag ni ji ltar gnas bzhin pa'i ngo bo rtogs pa la mi gnas shing shes par 'dod par 'os pa ma yin pas de dag ji ltar yang rnam par gzhag par mi rung ngo //de'i phyir yod pa nyid rnam par gzhag par bya ba yin no/ /gzhan du ni 'jal bar byed pa las tshad ma btang snyoms pa nyid pas rang gi ngo bo can rnam par gnas pa yin no//dngos po med pa ni ngo bo med do zhes bya ba de nyid ji ltar rnam par gzhag ce na ci ngo bo med par rnam par gzhag pa na rnam par gnas pa cung zhig yod dam gal te de lta na ni ngo bo med pa nyid du rnam par gnas par mi 'gyur te/ bdag nyid de nyid ngo bo yin pa'i phyir ro/ /ci yang gnas pa med na yang ngo bo med pa nyid du ji ltar rnam par gzhag ces bya ba'i brgal ba ci zhig /'o na ji ltar rang gi ngo bo med pa nyid dngos po med pa yin zhes brjod ce na/ de skad brjod par zad kyi de tsam gyis tshad ma'i yul nyid ma yin te/dper na rtag pa ni ldog pa med pa'i rang bzhin can dus gsum dang 'brel pa yin no zhes bya ba bzhin no/ /de ni tshad ma'i yul ma yin la/ rnam par gzhag pa yang med de/ de lta bu mi srid pa'i phyir ro/ /brjod pa 'gal ba yang ma yin te rigs pa ston pa tsam gyi rang bzhin yin pa'i phyir ro//gang dag dngos po med pa rang bzhin gzhan dang ldan pa yin no snyam du rmongs pa de dag la rigs pa 'di brjod pa yin no/ /dngos po ldog par khas len na de nyid dngos po med pa yin te/ gzhan gyis ci zhig bya/ de ni don gzhan nyid du 'gyur gyi dngos po med pa ni ma yin te ldog pa ni gzhan yin pa'i phyir ro/ /de khas mi len na yang de nyid yod pa yin pa'i phyir dngos po med pa zhes bya ba 'di ci zhig /'di la yang ngo bo cung zad yod pa ma yin te/ de med do zhes bya ba de tsam du zad pa'i phyir ro//des na dmigs pa med pa zhes bya ba 'di ni gzhal bya ma yin la/ don dngos po med pa yang gzhal bya ma yin no/ /ngo bo nyid kyis 'byung ba'i tshad ma ni yod pa nyid las skyes pa yin la/ ngo bo nyid kyis 'byung ba ma yin pas kyang yod pa nyid yod do zhes 'jal bar byed do//med pa gang yin pa de'am de med pa ni tshad ma skyed pa'am yod do zhes gzhal bar bya ba ma yin no/ /de ni med do zhes gzhal bar bya ba yin no zhe na/ de 'am de med pa cung zad kyang med pa'i phyir gang zhig gzhal bar bya/ des na gang yang med pa de ni der dngos po'am dngos po med pa ji ltar yang gzhal bar bya ba ma yin no//des na bum pas stong pa'i phyogs su dmigs pa dang bcas pa'i bum pa yal bar dor te/ phyogs dang de'i dmigs pa nyid gzhal bar bya ba yin no/ /gal te bum pa med par the tshom za na des dben pa'i phyogs nyid nges par mi 'gyur ba ma yin nam zhe na/des dben pa zhes bya ba 'di ci zhig /gal te phyogs kyi rang bzhin yin no zhe na/ nges pa nyid do/ /'on te bum pas stong pa nyid do zhe na/ de ni nges pa ma yin pa'i phyir te/ ma nges pa ni nyes pa ma yin te yul ma yin pa'i phyir te/ 'o na ji ltar mi dmigs pa las dngos po med pa 'grub ce na/brjod pa/ gal te de lta yin pa de lta na yang 'di ni shes pa rnams kyi yod pa'i don nges na 'gyur ba yin no/ /gang gi tshe med pa med kyang 'bras bu dang ldan par dmigs par dran par gyur pa de'i 'bras bu la 'dod pa dang sdang ba dag gis 'di na bum pa yod dam zhes chu bcu ba dang dogs pa med par 'gro bar 'dod pas tshol ba de'i tshe bum pa dngos po med pa'i yul rtogs pa la ltos pa yin no//the tshom za ba dang phyin ci log la yang de bzhin no/ /des na rtogs pa la ltos pa 'di ni rtogs pa po rnams kyis byas pa yin no/ / bum pa med do zhes ma rtogs par dogs pa med par mi 'jug pa'i phyir dang / 'di ni rdul ma yin no zhes nya phyis mi nges pa'i phyir dang / mtho yor yin gyi skyes bu ni ma yin no zhes the tshom za ba med pa'i phyir de rtogs pa la ltos pa nyid kyis rnam par gzhag pa dang / de rtogs pas rnam par gzhag par bya bar brjod do//'di ltar 'di dag gi dngos po med par rtogs pa ni dngos po gzhan du rnam par gnas pa'i gzhi can yin gyi dngos po rtogs pa ltar rang dbang du rang gi yul la 'jug pa ni ma yin no/ /ji ltar rang gi rgyus bskyed pa'i rtogs pas bum pa rtogs pa de bzhin du dngos po med pa yang med pa'i rtogs pa rtogs pa ni ma yin no//gal te 'di na bltar rung ba'i bum pa yod na snang ba kho nar 'gyur na snang ba ni med do zhes rang dbang du mthong ba med par mi 'grub pa'i phyir ro/ /phyogs de'i shes pa dag dngos po med pa nyid du ma grub pa'i phyir te/de tsam gyi mthar thug pa de'i mngon sum gyis de ma rtogs pa'i phyir ro/ /de'i tha snyad kyi rten yin pa'i phyir de dag dngos po med pa nyid do zhes nye bar btags pa tsam las dngos po de nyid med pa'i phyir ro/ /gang gi phyogs dag pa dmigs pa bum pa dang bcas pa'i phyogs dmigs pa yin na bum pa dang bcas pa'i phyogs dmigs pa nyid du myong bar 'gyur ba zhig na phyogs tsam dmigs par myong ba yin no zhes dmigs pa gnyis gzhan nyid du nges pa de'i tshe/nye bar mkho ba'i snying po can dgag pa'i don rtogs pa bzhin du med pa'i tha snyad byed pa nyid kyis mthar phyin par 'gyur ba yin no//'di ni bum pa dang bcas pa dang cig shos kyi phyogs dmigs pa dag shes pa nyid yin te des na phyogs dmigs pa na shes pa cig shos dmigs pa dang las gzhan nyid du shes pa kho na'o/ /sngon ma mthong ba sha za la sogs pa gang la shes pa med pa de la yang mthong ba las bzlog pa shes par bla ba'i phyir te/des na mthong ba'i dmigs pa mthong ba las bzlog pa'i dmigs pa las gzhan nyid du shes pa kho na'o/ /gzhan du rtogs pa med pa rtogs pa la ltos pa dang bcas pa yang ma yin no//rang gi ngo bo kho nas bum pa snam bu las gzhan yin gyi/ 'di'i rang bzhin de dngos po med pas byas pa ni ma yin te/ de na rnam pa de lta bu'i rang bzhin rtogs pa gzhan nyid du rtogs pa ni dngos po med par rtogs pa la ltos pa ma yin no/ /de'i phyir mngon sum sgrub par byed pa nyid yin pas na dngos po tha dad par grub pa'i phyir byis pa gang dag de 'gog par byed pa ma yin na tha dad par mi 'grub par 'gyur ro snyam du sems pa de bsal ba yin no//gal te dag pa dmigs pa cig shos dmigs pa la ltos nas gzhan yin la rag mod/ gzhan nyid kyis na tha dad pa tsam du 'grub kyi gang gi tshe tha dad pa nyid kyis bum pa dmigs pa dngos po med par shes par bya ba de'i tshe ji ltar 'grub dmigs pa yod pa ni myong ba la mi 'khrul pa'i phyir dmigs pa gzhan med pa las med pa yin no zhe na/yod pa myong ba la 'khrul pa med pa med do zhes myong ba dmigs pa las 'gyur ba yin na/gang gis myong ba med pa las na med do zhes bya bar 'gyur ba/ myong ba med pa go ga las rtogs/ 'di de myong ba shes pa nyid yin pa des na de las bzlog pa myong ba yang shes pa nyid do zhe na bden te/ myong ba dmigs na de las bzlog pa de las gzhan nyid du rnam par 'jog pa na myong ba med pa yang gzhan nyid du rnam par 'jog pa yin na/gang gi tshe de nyid rtogs par bya ba de'i tshe rang 'dzin pa'i tshad ma med par ji ltar rtogs/ des na bum pa dmigs pa phyogs dmigs pa yod pa dang gzhan nyid du grub kyang dngos po med pa nyid ni mi 'grub po zhe na re zhig bum pa dang ldan pa'i phyogs su ni bum pa dmigs pa phyogs dmigs pa las tha dad pa nyid ma yin pa kho na ste/de gnyis shes pa gcig gi yul yin pa'i phyir ro/ /des na bum pa dang bcas pa'i phyogs dmigs pa phyogs dag pa dmigs pa las tha dad par grub na/de yod na de nyid de ltar gsal bar 'gyur ba zhig na rang bzhin gzhan du gsal ba yin no zhes bya bar 'gyur ba'i phyir dngos po med par grub pa las gzhan ci zhig yin/ 'o na myong ba tha dad pa gcig par mi nus pa gang yin pa de ji ltar med par shes par bya ste/gzugs rig pa na sgra rig pa yin no/ /'di la ni gzhan nyid du grub kyang der 'gyur ro/ /rig pa la 'khrul pa med pa las rig pa med pa'i phyir de med pa yang ma yin te/ de med par ma grub pa'i phyir ro zhe na/ brjod pa/ der yang smyo ba dang brgyal ba la sogs pa'i gnas skabs ma gtogs par sgra rig pa yod na dmigs pa'i yul las mi 'da' ste des na gnas skabs de ma yin par grub par bya ba'i phyir/rig pa gzhan dmigs pa la ltos par bya ba yin no/ /des na rig pa yod na ngas dmigs par 'gyur ro zhes rig pa gzhan rtogs par shes par bya ste/dmigs pa'i mtshan nyid du gyur pa dgag par bya ba'i rig pa gzhan med par nges pa yin no/ /de lta yin dang 'di ltar rtogs so/ /gzugs mthong ba'am rnam par rtog pa na sgra rtogs pa yod na gnyis dmigs pa nges pa yin la/ gcig dmigs pa ni de las gzhan yin no//des na rtogs pa cig shos yod na gnyis pa nges pa dang / dmigs pa gcig med pa yang nges par bya ste/ gal te 'di la dmigs pa gzhan yod na dmigs par 'gyur na gcig dmigs pa yang yin no zhes gzhan du rtogs par 'gyur ro/ / des na ji ltar dmigs pa gzhan dmigs pa myong ba med pa na de yod pa mi srid pa de bzhin du phyogs bum pa dang bcas pa dmigs pa las gzhan dmigs pa yod na yang de yod mi srid pa nyid do/ /ji ltar gal te yod na dmigs pa zhig na dmigs pa yang med do zhes med pa nyid du nges pa de bzhin du gal te yod na de'i bdag nyid du dmigs pa zhig rang gi bdag nyid du yang dmigs so zhes med pa nyid du 'grub pa kho na'o//'dir ni 'di bsam par bya ba yin te/ ci dmigs pa med pa nyid med pa nyid kyis rtogs pa'i rten yin nam 'on te dmigs pa gzhan nyid yin/de la dmigs pa gzhan las ni gzhan dmigs pa med pa nyid rtogs par mi 'thad de/ de de'i rang bzhin ma yin pa'i phyir dang / de bzhin du 'brel pa med pa'i phyir ro/ /'on te de yod na de'i bdag nyid du dmigs par thal ba zhig na rang gi bdag nyid du yang dmigs pas so zhes bya ba'i rig pa 'di nyid kyis med par sgrub po zhe na/de lta na yang yul bkag pas tshad ma nyid bkag pa na rtogs pa tsam grub pa nyid kyi mthar thug par 'gyur ro/ /des na rtogs pa tsam gyi mthar thug pa can sgrub par byed pa ni ji ltar ston par 'gyur ba bzhin du tha snyad sgrub par byed pa yin no//'o na de nyid yin la rag mod ce na de ltar yang mi nus te/ 'di ltar der yang rtogs pa de yod pa ni dngos po gzhan nyid rnam par gnas pa'i gzhi can kho na'o/ /gang gi tshe gzhan gzhan la sgro btags te de'i bdag nyid tsam dmigs pas rnam par phye nas ci zhes der rnam par rtog par byed pa de'i tshe med do snyam pa'i shes pa skye ba yin no//de'i phyir dngos po gzhan nyid med pa nyid du sgro btags pa'i tha snyad du bya ba yin pa'i phyir/ gzhan dmigs pa nyid mi dmigs par brjod do/ /des na bsam pa 'dis na ci ste gzhan dmigs pas mi dmigs pa 'grub pas mi dmigs pa mngon sum gyis 'grub po zhe na zhes bshad do//des na rigs pa khyad par med pa'i phyir don med pa yang ci ste mi 'grub ces bshad pa ni/ de bzhin du gzhan yod pas kyang zhes bya ba yin no/ /bum pa ni dmigs pa'i mtshan nyid du gyur pa yin te/des na phyogs bum pa dang bcas pa yin na bum pa dang bcas pa nyid du snang ba nges pa yin pa'i phyir phyogs tsam du snang ba na bum pa dang bcas pa dang / bum pa med pa gnyis bzhin du rnam par gnas pa na/ ji ltar bum pa dang bcas pa'i phyogs tsam las gzhan yin zhing phyogs tsam yang bum pa dang bcas pa las gzhan no zhes phan tshun rang bzhin bzlog pa phan tshun gyi rang bzhin las gzhan yin pa'i phyir rnam par gzhag pa de bzhin du de gnyis kyi dngos po med pa yang gzhan nyid kyi rnam par gnas pa yin no//de'i rang bzhin de'i rang bzhin las bzlog pa gzhan yin pa yang rang gi ldog pa tsam gyi rang bzhin nam rang bzhin gzhan dang ldan pa yin no//de'i rang bzhin ldog pa ni de'i rang bzhin las bzlog pa yin te/ rang bzhin gzhan bzhin no/ /des ni ji ltar phyogs tsam las bum pa dang bcas pa gzhan yin pa de bzhin du de'i dngos po med pa yang yin te/des na bum pa dang bcas pa la de'i ngo bo ldog pa de med par 'gyur ro/ /de bzhin du ji ltar phyogs tsam bum pa dang ldan pa las gzhan yin pa de bzhin du bum pa dang bcas pa ma yin par yang 'gyur ba'i phyir phyogs tsam la de med pa yin te/gnyi ga yang gzhan yin pa'i phyir ro/ /des na dngos po rtogs pa na gnyi ga gzhan du rnam par gzhag pa yin no/ /de'i rang bzhin las bzlog pa gzhan nyid du rnam par gnas pa na de'i rang bzhin bzlog pa dang / rang bzhin gzhan med pa yin no/ / gal te dngos po med pa de la rang bzhin rtogs pa ni yongs su gcod pa yin la/ gzhan nyid du rnam par 'jog pa rnam par gcod pa yin no/ /der yang gzhan rang bzhin dang ldan pa ni rang gi tshad mas kyang rtogs kyi dngos po med pa rtogs pa ni rang gi tshad ma la brten pa ma yin no//gal te dngos po med pa ma rtogs na rtogs pa 'di ji ltar yin zhe na 'di la bshad zin to/ /mthong ba las bzlog pa ni gnyi ga ltar yang rtogs pa'i phyir ro/ /rnam par bcad pa rang gi tshad mas bzung bas ni ci yang byar med do/ /rtogs pa nyid la de ltar 'gyur ba'i phyir ro//rjes su 'gro ba med pa dang 'jig pa rtogs pa na yang dngos po med pa rtogs pa yod pa nyid 'on kyang de gzhal bya'i mthar thug pa ma yin pa'i phyir tshad ma ni ma yin no/ /tha snyad ni med na mi 'byung ba'i phyir tha snyad bsgrub par bya ba nyid du bstan to/ / 'dir yang bdag nyid gcig rtogs pa na de gzhan gyi bdag nyid yin pa rnam par gcod pa la mngon sum nyid tshad ma yin no/ /de nyid kyi phyir gal te gcig yongs su bcad pa nyid kyis gzhan rnam par bcad pa 'grub na/ khyad par med pas de las gzhan thams cad med par 'grub par 'gyur gyi mtshungs par rung ba'i rang bzhin kho na ni ma yin no//khyad par brjod par bya ba ma yin no zhes bya ba la sogs pa rtsod pa bkod de de'i bdag nyid nges par snang ba'i shes pas gcig gi bdag nyid yongs su bcad pa las de de'i bdag nyid yin pa rnam par bcad par 'gyur ro zhes rnam gcod yongs gcod gnyis tshad ma gcig gis byed pa yin par bsgrub pa de'i phyir de ltar dmigs pas de de las gzhan gyi bdag nyid yin pa rnam par bcad par 'gyur ro zhes mjug bsdus pa yin no//de'i yul dang dus dag tu gzhan gyi dngos po thams cad bkag pa ni ma yin no zhes bya ba nas brtsams te de'i phyir 'ga' zhig tu 'ga' zhig gi tshe 'ga' zhig dgag pa ni ji skad bshad pa'i tshul gyis mi dmigs pa las yin no zhes de'i bdag nyid ma yin pa'i yul la ni mi snang ba mi dmigs pa'i byed pa bshad pa yin no//des na dngos po ni gcig gi rang bzhin du nges pa nyid du nyams su myong bas rtogs pa yin no//gang gi tshe bltar rung ba 'am mi rung ba'i rang bzhin gzhan gyis du ma'i rang bzhin du dogs pa na gcig du mar 'gyur ba ma yin no zhes rang bzhin gcig nyams su myong ba nyid kyis 'gog go/ / des na 'di ltar rung ba 'gog pa la bltar rung ba nyid ni yan lag ma yin na/ de ji ltar bltar mi rung ba ni bltar mi rung ba nyid kyi phyir bkag par mi 'gyur ro zhes bya bar 'gyur/ bltar rung ba la ni bltar mi rung ba'i bdag nyid med pa'i phyir bltar rung bar khas blangs nas 'gog go zhes bya ba gang yin pa de ni skra bregs zin nas skar ma rtogs pa dang mtshungs so//gal te 'di la yang 'ga' zhig rmongs nas 'gal ba gcig nyid bltar rung ba'i dmigs pas bltar mi rung ba de'i bdag nyid yin pa 'gog par byed pa'i phyir 'gal ba med do/ /de ni shes pa rang bzhin gzhan du dogs pa na yang 'gyur ba yin no//de bzhin du sa phyogs dmigs kyang bum pa med par the tshom za bar ma yin pa na mngon sum nyid kyis de med pa'i tha snyad du 'gyur te/ de lta ma yin na shes pa yang gzhan rmongs par mi 'gyur ro/ /des na de ltar dngos po gzhan nyid du rnam par gnas pa nyid du nye bar mkho ba'i dgos pa can dngos po med pa bsgrub pa'i phyir de dmigs pas dgag pa'i don rtogs pa ji skad bshad pa'i tshul gyis byas pa yang de tsam gyis yul gyi mthar thug pa de'i tha snyad kyi rang bzhin yin no//gal te de yang rtogs pa tsam gyi rang bzhin skye ba na yul dang mi ldan pa nyid kyis gzhan gyi mthar thug pa ma yin yang gdon mi za bar bya ba ni de lta bur 'gyur ba nyid byed pa yin no//des na gzhan dmigs pa na mi dmigs pa mngon sum gyis grub pa yin la gzhan yod pa na yang med pa mngon sum gyis grub pa yin no//de lta na dngos po med pa sgrub byed la ltos pa bsal nas rtogs pa'i mthar thug pa can nyid mi dmigs pa'i byed pa yin par bstan pa'i phyir gang gi tshe zhes smos so/ /'dir yang gnyis dag gnyis nyid du rnam par 'jog pa na mngon sum nyid kyis tha snyad byed pa'i phyir mi dmigs pa don med do//de bzhin du dngos po gzhan rnam par gnas pa'i gzhi can dngos po med par rtogs pa ni gzhan gyi dngos po'i mthar thug pa nyid yin te/ des na gal te rmongs pas de la de ltar mi 'jug pa la mi dmigs pa gtan tshigs yin pa de'i phyir gzhan yod pa'i bdag nyid can yod pa de nyid bsgrub par bya ba yin par 'gyur ro//de ni 'di ltar bzlog ste/ gang gi tshe med pa dag gi med pa mi dmigs pa kho na yin pa de'i tshe/ med pa'i mtshan nyid kyi yul grub pa kho na ste/ mi dmigs pa nyid med pa yin pa'i phyir ro/ /'on kyang med pa'i mtshan nyid kyi yul grub tu zin kyang med pa'i shes pa dang sgra dang tha snyad dag khong du ma chud pa 'jug par byed do//gang khong du ma chud pa de nyid rtogs pa la 'jug par byed pa yin no/ /gang gis she na yul rab tu bstan pas zhes smos so/ /yul ni mi dmigs pa'i bdag nyid can gyi dngos po med pa ste/de rab tu bstan pas med pa'i shes pa dang sgra dang tha snyad bsgrub par bya ba yin no/ /de bsgrub par bya ba'i phyir mi dmigs pa don med pa ma yin no/ /ji skad bshad pa'i dngos po med pa yang bsgrub par bya ba ma yin te/ de ni mi dmigs pa'i bdag nyid kyis grub zin pa'i phyir ro//gal te mngon sum gyis gzhan yod pas med pa grub na med pa'i shes pa dang sgra dang tha snyad khong du ma chud par ji ltar 'gyur zhe na/ rmongs pas zhes smos so/ /rgyu mtshan 'ga' zhig las gzhan yod pa la yang med par khong du ma chud pa de ltar khong du chud par byed do//gal te don gzhan yod pa dngos po'i ngo bo med par bsgrub par bya ba yin par 'gyur ro zhes brjod pa ma yin nam/ gang gis de grub na dngos po med pa grub par brjod pa de ni mi dmigs pa ma yin te/ dmigs pa dngos po med pa'i rang bzhin shes pa gzhan yod pa nyid mi dmigs pa'i ngo bo yin pa'i phyir ro//des na shes pa gzhan yod pa'i bdag nyid mi dmigs pas dngos po gzhan yod pa'i bdag nyid can gyi med pa bsgrub par bya ba ma yin no zhe na rnam pa de lta bu'i zhes smos te/ gzhan yod pa'i bdag nyid can no//gzhan yod pa yang mi dmigs pa nyid de/ de gzhan med pa yin pa bzhin du dmigs pa med pa'i rang bzhin yang yin pa'i phyir ro/ /des na don 'di yin te dngos po dngos po med pa ni mi dmigs pa'i tshad ma med pa can yin la dngos po dngos po med pa yang dngos po gzhan yod pa yin no//yod pa gang zhig dngos po dngos po med pa yin pa de ni dmigs pa dngos po med pa yang yin no/ /shes pa gzhan yod pa dmigs pa dngos po med pa gang yin pa de yang dngos po dngos po med pa yang yin no/ /de'i phyir dngos po dngos po med pa sgrub pa la mi dmigs pa grub pa la ltos pa'i shes pa dang shes bya'i mtshan nyid de grub pa nyid na grub pa'i dngos po med pa ni bsgrub par bya ba ma yin no//de bas na gzhan yod pa de rang bzhin ji lta ba bzhin du tha snyad du bya ba yin no/ /rmongs pas der tha snyad mi byed pa ni yod pa mi dmigs par mi srid pa'i phyir dmigs su rung ba med par nye bar bsdu ba'i sgo nas dngos po med par nges pa'i mi dmigs pas 'jug par byed do//gzhan gyi dngos po yod pa'i bdag nyid kyi dngos po med pa ni mi dmigs pa grub pa nyid na grub pa'i phyir med do zhes bya bar rtogs pa ni rtogs zin pa nyid rtogs pa yin no//des na dngos po lhag pa grub pa med pa'i phyir dang / rtogs pa 'di sngar gyi de rtogs pa dang mi 'dra ba'i phyir de tsam nyid grub par 'gyur bas tha snyad bsgrub par brjod pa yin gyi/ tha snyad dang med na mi 'byung ba gzhan ni yod pa ma yin no/ /tha snyad sgrub par byed pa'i gtan tshigs thams cad la khyab pa sgrub pa'i tshul ni 'di nyid yin no//gtan tshigs gang gis de sgrub pa de ni tha snyad du bya ba'i don dang / med na mi 'byung ba yin pa'i phyir de nyid des rtogs par bya ba yin no/ /rtogs par bya ba de yang lhag pa ma yin pa'i phyir dang /lhag pa yin yang grub zin pa'i phyir grub pa la ma ltos pas de'i rtogs pa tsam nyid 'grub par 'gyur ro/ /dper na rjes su 'gro ba dang ldog pa'i rjes su byed pa nyid las 'bras bu gzhan ma yin pa'i phyir de grub na grub pa nyid bzhin no/ /de yod pa nyid kyis de de ltar bsgrub par bya ba na dngos su tshul snga mas kyang rtogs zin pa'i rtogs pa po'i rtogs pa mi 'dra ba'i spyod yul gyi dngos por yang dag pa'i 'jog pa yin no//de bzhin du shing nyid sha pa las gzhan yin yang byas pa grub pas mi rtag pa grub pa ltar sha pa grub na grub pa las 'da' ba ma yin no//de'i phyir sha pa nyid ni shing gi bdag nyid yin pa'i phyir des de sgrub pa na de yang grub zin pa'i phyir shing ngo zhes bya ba rtogs pa'i mthar thug pa can grub par 'gyur ba yin no/ /de bzhin du 'dir yang gzhan yod pa nyid dngos po med pa sgro btags pa'i tha snyad du bya ba yin pa'i phyir de grub pa nyid na dngos po med par sgro 'dogs par byed pa'i rtogs pa 'jug pas rtogs pa nyid bsgrubs pa'i 'bras bu yin no//de nyid kyi phyir 'di rang bzhin gyi gtan tshigs yin te/ mi dmigs pa dang don med pa gnyis tha mi dad pa'i phyir ro/ /gal te gzhan yod pa ni gzhan dngos po med pa ma yin gyi 'on kyang bltar rung ba'i bum pas rnam par bcad pa'i phyogs las gzhan du grub pas phyogs dag pa yin no//gal te 'di ma dmigs pa yang yod par rtogs pa'i phyir bum pa dang bcas pa las gzhan du ma rtogs na de nyid rtogs par bya ba yin no//des na gzhan gyi tha snyad nyid bsgrub par bya bar 'gyur ro/ /'on te dngos po la de ltar yin yang dgag pa'i don sgro ma btags par gsal bar rtogs pa ma yin pa'i phyir med pa'i tha snyad bsgrub par bya ba yin no zhe na/ de lta na yang gzhan yod pa dngos po med pa yin no zhes rtogs pa dang ldan pa ma yin pa 'dis ci bya/bltar rung ba'i dngos po yod pa la shes pa 'khrul pa med pa las ma mthong ba'i phyir med do zhes bya bar rtogs pas 'jug pa nyid de tsam gyis mthar thug pa can gyi sgrub par byed par 'gyur ro zhe na/ brjod pa rtogs pa 'di ni rang gi dmigs pa mngon du byed pa'am/rang gi dmigs pa 'phen par byed pa'i don gzhan mthong bas bdag nyid la brten pa ni ma yin gyi/ 'on kyang dngos po gzhan nyid rnam par dpyod pa nyid kyis yin pa de'i phyir de nyid der sgro btags pa rtogs pa yin par bstan te/ tshad ma'i yul la dgag pa'i don ma zhugs pa'i phyir ro//de dang de'i yul gyi lhas byin la bya ba sgro btags pas rtogs pa bzhin tha mi dad pa la yang tha dad pa bzhin no/ /des na ji ltar lhas byin 'gro ba la bya ba gzhan ma rtogs kyang bya ba'i rtogs pa gnod pa med pa de bzhin du 'di na bum pa med do zhes dgag pa'i don la lkog tu gyur pa ma yin pa'i 'du shes can du ba las me rtogs pa bzhin du dgag pa'i don lhag par rtogs pa med kyang gnod pa med pa ni gzhan yod pa nyid kyis 'byor par 'gyur ba'i phyir tshad ma'i yul la brjod par 'dod pa'i dgag pa'i don ni gzhan yod pa'i mthar thug pa nyid do//des na rtogs pa po'i rtogs pa la ltos te gzhan yod pa dngos po dngos po med par brjod do/ /dngos po gzhan gyi bskyed pa dang / dngos po gzhan gyi mthar thug pa ni chos gzhan sgro 'dogs pa'i sgo nas de la dmigs pa nyid kyis 'jug pa yin no zhes bya bar 'thad do//de ltar 'di ni nges pa nyid do/ /'di brjod par bya ste/ shes pa gzhan yod pa nyid shes pa dngos po med pa yin pa ltar dngos po gzhan yod pa yang shes pa dngos po med pa yin par ji ltar 'gyur zhe na/ shes pa gzhan yod pa shes pa dngos po med pa yin pa ji lta ba de ltar dngos po gzhan yod pa yang ngo //mi mthun pa'i zla ba'i dngos po gzhan ni rang yod na gzhan yod pa sel bas dngos po gzhan dngos po med par brjod do/ /des na ji ltar phyogs 'ba' zhig gi shes pa bum pa dang bcas pa'i phyogs shes pa dang 'gal ba des na shes pa de la med par 'dod pa de bzhin du phyogs tsam yod pa yang bum pa dang bcas pa'i phyogs shes pa dang 'gal ba yin no//'khrul pa med pa ni phyogs tsam la yang bum pa dang bcas pa'i phyogs su snang ba mi 'thad do/ /des na phyogs tsam gyi shes pa bzhin phyogs tsam yang bum pa dang bcas pa'i phyogs kyi shes pa dngos po med pa yin no//des na ji ltar de tsam shes pa na gal te bum pa dang bcas pa'i phyogs shes pa yod na de bzhin du gsal bar 'gyur ba zhig na de tsam du gsal ba yang gsal ba yin no zhes dngos po med par rtogs pa de bzhin du 'di la yang yin no//gal te bum pa dang bcas pa'i phyogs shes pa yod na phyogs bum pa dang bcas pa nyid du snang bar 'gyur ba zhig na phyogs tsam yang snang ngo zhes so/ /des na shes pa dang shes bya'i mtshan nyid 'di ni mi dmigs pa yin no//ji ltar shes bya'i mtshan nyid mi dmigs na dngos po dngos po med par 'grub pa de bzhin du shes pa'i mtshan nyid la yang yin no/ /des na dngos po med pa yang shes pa dang shes bya'i mtshan nyid kho na'o/ /'di ltar phyogs tsam bum pa dang bcas pa dang 'gal ba de bzhin du phyogs tsam gyi shes pa yang ngo //gang gi phyir bum pa yod kyang phyogs tsam shes par 'gyur ba srid pa yod pa ma yin no/ /de'i phyir gal te phyogs 'di bum pa dang bcas pa yin na bum pa dang bcas pa'i phyogs shes pa gsal bar 'gyur ba zhig na phyogs tsam shes par gsal lo zhes bya bas kyang bum pa med par rtogs pa yin no//des na shes pa yod pa'i mtshan nyid mi dmigs pa na yang bum pa med par grub bo/ /de ltar rtogs par dka' ba'i mi dmigs pa de ni 'di kho na bzhin du rjes su rtogs par bya'o/ /de'i phyir med pa dag gi med pa rnam pa de lta bu'i mi dmigs pa kho na yin no zhes gsungs pa ni rigs par gsungs so//des na 'di ltar shes pa dang shes bya'i mtshan nyid mi dmigs pa/ dmigs pa dngos po med par rtogs pa de nyid ji skad bshad pa'i tshul gyis dngos po dngos po med pa nyid yin pas dngos po dngos po med pa nyid du rtogs pa yin no//de ltar dngos po med par lhag par rtogs pa ni ma yin gyi/ 'on kyang rtogs pa nyid skyes par zad do/ /des na tha snyad bsgrub par bya ba nyid do/ /rtogs par bya ba'i mthar thug pa can sgrub pa'i byed pa la 'bras bu de tsam du 'gyur mod/sgra dang tha snyad go ji ltar sgrub/ gang gis rtogs pa bzhin du 'di'i don sgrub pa med par rang gi yul nye bar gnas pa la 'grub par 'gyur ba rang gi rgyu nges pa'i phyir rtogs pa bzhin du sgra yang don la 'gyur ba ni ma yin no zhe na/ de'i phyir brda la zhes smos so//brda yod na 'jug pa ni brda ji lta ba bzhin du nges pa'i sgra'am/ don sgrub pa nges par sbyor ba khas blangs pa zhugs par 'gyur ba nyid do/ /'dod pa'i 'bras bu sgrub par byed pa'i don bdag gir byed pa'i mthar thug pa don la gzhol ba'i byed pa ni tha snyad do/ / de nyid kyi phyir sgra tsam don dam pa nyid du gyur pa'i dper/ dper na zhes smos so/ /ba lang dang lkog shal la sogs pa 'dus pa ni don gcig pas sgra tsam gyis tha dad kyi ji ltar ngo bo dang ngo bo med pa nyid kyis tha dad pa'i phyir don yod pa dang gzhan med pa ltar don ni sgro btags pa yang tha dad pa med do//de lta na yang 'thad pa 'di ni yul gyis yul can sgrub pa nyid la bstan pa yin no/ /ji skad brjod pa'i tshul gyis dgag pa'i don ni gzhan yod pa'i mthar thug pa yin pa'i phyir de la rtogs pa po rnams kyis bsgrub par bya ba'i don sgrub par de ltar khas len pa ni brdar brjod do//de la ni mi dmigs pa'i mtshan nyid gzhan dngos po med pa yul 'di bstan nas 'jug par byed de/ lkog shal la sogs pa'i 'dus pa bstan nas ba lang zhes bya ba la 'jug pa bzhin no/ /'dir ni ba lang ngo snyam pa'i shes pa gal te yul tha mi dad pa'i phyir lkog shal la sogs pa 'dus pa'i shes pa tha mi dad pa de lta na yang sgra tsam tha dad pa nyid kyis dpe yin te snga ma bzhin no//yang na gang gi phyir lkog shal la sogs pa 'dus pa la yang ba lang ngo zhes rtogs te ba lang gi bsgrub par bya ba'i don sgrub pa nyid du khong du chud nas 'jug gi lkog shal la sogs pa 'dus pa tsam rtogs pas ni ma yin te/dper na gzhan yod pa nyid la dngos po med pa zhes rtogs nas dben pa don du gnyer ba 'jug pa bzhin yin pa de'i phyir shes pa tha dad pa yod pa nyid do/ /tshul 'dis ni shes pa dngos po med pa dngos po dngos po med pa'i sgrub par byed pa yin pa spong ba gang dag dpe ma grub par brjod pa de dag gi dpe ma grub par rgol ba de yang bsal ba yin no//des smos pa ni de lta yin dang zhes bya ba yin no/ /gal te dngos po med pa mi dmigs pa gcig pu'i tshad ma can yin na gang gi der mi dmigs pa yod pa na dngos po med par rtogs pa nas gzhan du de ltar rtogs par byed pa/gang du yang 'di tshad ma gzhan gyi spyod yul gyi ngo bor gyur pa med do/ /de lta yin dang 'di ni tshad ma gzhan nyid do zhe na/ gal te mi dmigs pa bzhin du mngon sum gyis kyang dngos po med pa ma rtogs na de ltar 'gyur ro//de lta yin dang tshad ma gzhan gyi yul nyid du srid pa'i phyir dpe ma grub pa ma yin no/ /tshad ma gzhan gyi yul du smra bas kyang de'i yul can gyi rnam par shes pa ma bkag par ni rang dbang du dngos po dngos po med par rtogs par nus pa ma yin te/tshad mas grub pa smra rnams kyi/ don gyis bzlog pa nyid las ma grub pa yin zhes gang 'chad par 'gyur ro/ /shes pa yang de'i rnam par shes pa ma bkag par dgag par mi nus so/ /rnam par shes pa yod dam/ 'on te med ces shes par 'dod pa de'i gsal ba tshol ba nyid 'jug pa la rnam par shes pa snang ba med pa'i phyir med do zhes bya ba yin no//des na der yang mi dmigs pa tshol ba na thug pa med par 'gyur te/ ji skad bshad pa bzhin no/ /'on te shes pa med pa mngon sum gyis grub na tshad ma gzhan gyi yul nyid bsal ba'i phyir ji skad bshad pa'i yul nyid rjes su rtogs par bya'o//gal te mi dmigs pa bzhin du gzhan yod pas dngos po dngos po med par grub pa nyid yin pa de'i phyir tshad ma gzhan gyi yul ma yin pa dang rjes su 'brel pa can dpe ma grub pa yod na/ 'o na ni mi dmigs pa 'jug pa la mi ltos par 'gyur te mngon sum gyis grub pa'i phyir ro//des na nyes pa 'dir mi 'gyur bar bya ba'i phyir mi dmigs pa tsam sgrub par byed pa yin par brjod par bya'o/ /de lta yin dang dpe ma grub pa nyid de mngon sum gyi grub pa la yang ma rtogs pa mi 'thad pa'i phyir dang de med na yang gtan tshigs nye bar len pa mi 'thad pa'i phyir ro zhe na/yul rtogs su zin kyang zhes smos so/ /gal te gzhan yod pas dngos po med pa'i blor 'gyur ba de lta na yang gang dag de la yang dngos po med par ma rtogs pa 'ga' zhig yod pa yin te/ ji ltar 'di ni blon po rnams kyi gtso bo yod pa skye bar sems pas 'o ma la dmigs pa'i mtshan nyid du gyur pa'i mi dmigs pa'i zho med par ma rtogs pa bzhin no//de'i phyir mngon sum nyid yin yang mi dmigs pa la ltos pa yod pa'i phyir gang las dpe ma grub par 'gyur ba de gcig pu ni sgrub byed du brjod pa ma yin no/ /shes pa la sogs pa dag ni dmigs pa sngon du 'gro ba can yin pa'i phyir mi dmigs pa gnyis yod pa'i shes pa 'gog pa'i 'bras bu can nyid du khyad par med par brjod pa yin no//de 'dir gzhung gzugs pa'i phyir de ltar zhes smos so/ /tshul 'dis ni mi dmigs pa 'di gnyis ni yod pa'i tha snyad dgag pa'i 'bras bu can nyid du 'dra'o/ /myong ba'i rang bzhin ma yin pa'i rnam par shes pa ni 'ga' yang yod par mi srid do//des na 'ga' zhig myong bzhin pa'i rnam par shes pa mi dmigs pa gnyis su brjod pa 'thob bo/ /de ni rang gi yul las tha dad pa gzhan thams cad mi dmigs pa na de snang ba dang mi snang ba na rnam pa gnyis las mi 'da' ba'i phyir de dag der mi dmigs pa rnam pa gnyis su 'gyur ba yin no//de ltar gnyi ga yang yod pa'i tha snyad dgag pa sgrub par byed pa yin no/ /de ltar zhes bya bas ni rnam pa 'dir brjod pa yin no/ /rnam pa de yang gang zhe na rang dang bzlog pa'i rgyu med pa dang yod pa dag gi phyir zhes smos so/ /bltar mi rung ba mi dmigs pa gcig la ni yod pa'i tha snyad rang gi rgyu dmigs pa med la/bltar rung ba dmigs pa la ni bzlog pa med pa'i tha snyad kyi rgyu snang ba mi dmigs pa yod pa yin no/ /bzlog pa'i rgyu yang yod pa'i tha snyad kyi rgyu med par grub pa nyid de/ de lta ma yin na de las bzlog pa'i rgyu yod pa nyid du mi 'grub pa'i phyir ro//bzlog pa'i rgyu yod par bstan pa ni de'i rgyu med par bstan pa nyid kyi don te gzhan du na gnyi gar yang yod pa'i tha snyad 'gog par mtshungs pa nyid du brjod pa na yod pa'i tha snyad kyi rgyu med pa nyid brjod par bya bar 'gyur ba des na/ med pa'i tha snyad kyi rgyu yod par tha snyad par ci bya/de nyid kyi phyir bzlog pa'i sgra nye bar bkod do/ /rgyu med pa nyid du brjod par bya ba las 'di ltar brjod pa gang yin pa des ni snang ba mi dmigs pa gnyi ga'i sgrub par byed pa yin pa bsal ba'i phyir ro/ /'di med pa'i tha snyad de'i rgyu yod pa las byed pa dang / yod pa'i tha snyad de'i rgyu med pa las 'gog pa ni ma yin te/byed pa gnyis med pa'i phyir ro/ /'on kyang med pa'i tha snyad grub pa nyid yod pa'i tha snyad bkag pa yin te/ de grub na de 'jug par dogs pa med pa'i phyir ro/ /des na 'di'i yod pa'i tha snyad 'gog pa'i tshul mi 'dra ba yin te/ de las bzlog pa sgrub pa'i sgo nas rab tu sgrub pa'i phyir ro//gang gi phyir sa phyogs dmigs pa nyid bltar rung ba dang mi rung ba bum pa dang sha za la sogs pa de dmigs pa'i rang bzhin yin pa de'i phyir 'di ni mi dmigs pa gcig nyid yul gnyis la ltos nas bltar rung ba dang mi rung ba mi dmigs pa'i rang bzhin gyis rnam pa gnyis su gnas pa yin no//des na ji ltar 'di nyid snang ba mi dmigs pa'i ngo bo nyid yin pa na bsgrub par bya ba bum pa med pa'i rang bzhin yin pa de bzhin du/ 'di nyid sha za la sogs pa yod pa'i shes pa dang sgra la sogs pa med pa yin no/ /sgrub pa dang bsgrub par bya ba'i dngos po ni rnam par gnas pa'i rang bzhin gyi don gyi mthar thug pa yin no//des na yod pa'i tha snyad bkag pa ni dngos po med pa nyid kyis bsgrub par bya ba ma yin no/ /'jug pa med pa ni 'di'i 'bras bu ma yin te/ de ni shes par byed pa'i chos ma yin pa'i phyir ro/ /'jug par bya ba ma yin pa'o zhes bya ba yang tshad ma'i byed pa ma yin no//de'i tshe der bsgrub par bya ba gang zhig yin/ 'jug pa'am de med pa'am bya ba'i don yin no/ /'ga' yang srid pa ma yin te/ mi 'dod pa'i phyir dang bsgrub bya ma yin pa'i phyir dang brda las byung ba'i sgra la brten pa nyid kyi dngos po ma yin pa'i phyir ro/ /de'i phyir yod pa'i tha snyad bkag pa ni dngos po nyid yin la de yang gang yod na de mi srid pa de'i bzlog zlar gyur pa nyid do//de yang phyogs la sogs pa dmigs pa nyid do/ /shes pa dang shes bya'i rang bzhin ni mi snang ba ma dmigs pas ni yod pa'i tha snyad med pa yin te/ de la mi snang ba mi rtogs pa'i phyir dang yod pa'i tha snyad mi srid pa'i phyir ro//'o na de grub pa'i phyir bsgrub bya ma yin no zhe na/ de ltar yin mod 'o na sgrub pa'i byed pa rtogs pa'i mthar thug pa yin pa'i phyir shes pa la sogs pa med pa'i tha snyad nyid bsgrub byar 'gyur ro zhe na/ rigs pa brjod pa na gal te tshe dang ldan pas de ltar rtogs na de 'dod pa kho na'o//rang dang bzlog pa'i rgyu med pa dang yod pa nyid ston te/ bltar mi rung ba mi dmigs pa gcig la ni yod par the tshom yod pa'i phyir la/ mi dmigs pa gzhan la ni bzlog pa'i phyir de med do zhes rtogs pa'i phyir ro/ /gal te 'dir yod pa'i tha snyad kyi rgyu yod na ni the tshom yod par mi 'gyur ro//des na 'bras bu med pa'i phyir 'dir rang gi rgyu med par brjod pa yin no/ /phyi mar yang bzlog pa'i rtogs pa yod pa nyid kyis bzlog pa'i rgyu yod par bsgrub pa yin no/ /gal te mi snang ba mi dmigs pa la med pa'i tha snyad kyi rgyu med pa yod pa nyid de de la snang ba mi dmigs pa med pa'i phyir dang / de'i rgyu yang de nyid yin pa'i phyir ro//des na med pa'i tha snyad dgag pa'i 'bras bu can du yang brjod par bya ba yin no zhe na/ bden te bkod pa ni nye bar bstan pa'i don yin pa'i phyir brjod pa kho na'o/ /rigs pa brjod pa na de dang khyad par med pa ma brjod kyang mi rtogs pa ni ma yin no/ /mi dmigs pa gnyis po de la mi snang ba mi dmigs pa ni ji skad brjod pa'i don nyid la tshad ma yin gyi/gtan tshigs kyi ldog pa mthong ba dang / stsogs pa'i sgras sems 'dod chags dang bral ba la sogs pa med par bsgrub pa la nye bar sbyor ba ni ma yin no/ /ci'i phyir zhe na/ the tshom yod pa'i phyir ro/ /ma rtogs pa tsam gyis ni 'dod chags dang bral ba'i sems sam/bsgrub par bya ba med pa la gtan tshigs med do zhes nges pa yod pa ma yin no/ /gnyis pa ni gtan tshigs kyis ldog pa dang don gzhan med pa la sogs pa bsgrub pa de la tshad ma yin te/ nges pa'i 'bras bu can yin pa'i phyir ro/ /nges pa'i 'bras bu can nyid tshad ma yin no zhes bya bar bsam pa'o//gal te ldog pa ni rang bzhin mi dmigs pa las ma yin te/ 'on kyang rgyu dang khyab par byed pa mi dmigs pa dag las ma yin nam zhe na/ bden na 'on kyang de'i khongs su 'dus pa'i phyir de gnyis 'di ltar bstan pa yin te/ de'i rigs can de nyid kyi khongs su bsdus par bstan pa'i phyir ro/ /de yang zhes bya ba ni gnyis pa snang ba mi dmigs pa yin gyi dang po ni ma yin no snyam du bsam pa'o/ /rnam bzhi zhes bya ba ni dbye ba bzhi'o/ /'di'i dbye ba nyid du bstan pa gang yin pa de dag sgrub par byed pa gzhan nyid du ci ste mi gzhag / mi dmigs pa'i dbye ba nyid du ci'i phyir gzhag ce na/ sbyor ba'i bye brag gis zhes smos te 'dir sbyor ba kho na tha dad kyis sbyar bar bya ba ni ma yin pa'i phyir de tha dad med pas gcig nyid do/ /sbyor ba gzhan nyid kyis ni rnam pa du ma tsam nyid pas de ji ltar sgrub byed gzhan nyid yin/ rnam pa'i bye brag de nyid bshad pa ni 'gal dang 'bras bu dag ces bya'o//'gal ba nyid ni rang nyid 'chad par 'gyur ro/ /'bras bu zhes bya ba yang ltos pa'i rang bzhin te/ des na gang gis 'bras bu zhes ltos pa dang bcas pa ni skabs su bab pa'i 'gal ba nyid la ltos par bya ba yin no/ /des na 'gal ba dang 'bras bu dag grub ces bya ba ni 'gal ba dmigs pa dang 'gal ba'i 'bras bu dmigs pa yin no//rgyu dang ngo bo khyab par byed par ma grub pa'o/ /bltar rung ba'i bdag nyid ces bya ba ni khyad par ro/ /med don zhes bya ba ni bsgrub bya bstan pa'o/ /de ltar na tha snyad kyi don can nyid bsal ba yin no zhes bya bar ni mi nus te/rang bzhin mi dmigs pa nyams pa'i phyir te/ gcig nyid la sgrub pa dang dgag pa mi rung ba'i phyir ro/ /dngos po med pa grub pa ni de rtogs pa yod pa med na ni mi 'byung ba yin la/ tha snyad kyang de nyid yin no/ /des na dgag par mi nus pas bsdu ba nyid rigs so//mi dmigs pa nyid rjes su 'jug pa de'i rnam pa nyid gzhung gzugs pa'i phyir dgag pa gang ji snyed pa zhes smos so/ /med na mi 'byung ba'i rtags kyis ni dgag pa dang rjes su dpag par nus pa ma yin te/ ngo bo med pas yul gyi dngos por 'gal ba'i phyir ro/ /'on te gzhan gyi dngos pos bdag nyid kyang med pa rjes su dpag par bya ba yin no zhe na/dngos po gzhan rtogs pa nyid du 'gyur gyi/ dgag pa rtogs pa ni ma yin no/ /'on te gang rtogs pa na med do zhes rtogs par 'gyur ba'i gzhan gyi dngos po rjes su dpag par bya ba yin no zhe na/ 'o na de ni gang yod na med do zhes rtogs pa yod par mi 'thad pa de lta bu las rtogs pa yin no//de lta yin dang rtogs par bya ba bzhin du rtogs par byed pa de mi mthun pa'i zla bo nyid do/ /mi mthun pa'i zla ma yin pa gzhan yod par rtogs pas ni med do zhes bya bar 'gyur ba ma yin no/ /mi mthun pa'i zla bo yang de yod na de mi 'thad pa nyid yin pa'i de ni de rtogs par byed pa yang yod pa ma yin te/de lta ma yin na rtogs par byed pa nyid du mi 'grub pa'i phyir ro/ /gang yod na de yang mi srid pa de yod na de dmigs pa yod mi srid pa'i phyir de dmigs pa med pa yang de nyid yin no/ /de na dgag pa ji snyed pa de thams cad ni mi dmigs pa kho na yin no//da ni tha na shes pa med pa rtogs pa na mngon sum ji ltar mi dmigs pa yin/ 'di ni dgag pa ma yin pa ma yin na de ji ltar dgag pa gang ji snyed pa dmigs pa las yin zhes brjod ce na/ brjod pa gang gis mngon sum gyis kyang dgag par 'gyur ba la mngon sum dngos po med pa rtogs par byed pa ni ma yin gyi 'on kyang dngos po gzhan gyi mtshan nyid tha dad pa nyid do//dngos po med pa ni rtogs par nus pa ma yin no/ /gang gi don du 'di rtogs pa de ni de rtogs pa med kyang 'grub ste/ bum pa dang bcas pa'i phyogs las phyogs tsam gzhan du grub nas/dogs pa med par 'gro ba dang / chu bcu ba don du gnyer ba'i 'jug pa dang ldog pa dag 'thad pa'i phyir ro/ /des na med pa rtogs pas ni ci yang byar med de/ dngos po gzhan rtogs pa nyid kyis de'i 'bras bu grub pa'i phyir ro/ /de rtogs pa na med do snyam pa'i rtogs pa mthong ba las bzlog pa'i rang bzhin sgro 'dogs pa rnam par rtog pa'i rnam par skye ba de'i tha snyad kyi 'bras bu gang yin pa de yang gzhan nyid la the tshom mi za ba na mngon sum nyid las skye ba yin te/gang gi phyir gcig dmigs nyams su myong ba las zhes bya ba la sogs pas bshad pa yin no//de ltar ma yin na myong bas yul du ma byas pa rnam par rtog pas mi nus par 'gyur ro/ /des na mngon sum ni dgag pa grub pas mthar phyin pa ma yin gyi/ 'on kyang gzhan ni rab tu sgrub par byed pa nyid do/ /rjes su dpag pa nyid sgrub pa'i byed pa dgag pa'i mthar thug pa nyid de bya ba'i rtogs pas mthar 'byin pa'i phyir gzhan yod pa ni mngon sum nyid kyis grub pa nyid do//der dgag pa 'jug pa ni gzhan yod pa tshad ma'i yul du gyur pa nyid med na mi 'byung ba yin no/ /dngos po med pa sgrub pa'i phyir khyad par byed pa mi dmigs pa la sogs pa gang du gzhan yod pa bsgrub par bya ba yang dgag pa'i sgo nyid kyis de 'jug pa yin no//des na sgrub pa'i byed pa dgag pas mthar phyin pa can gang yin pa de ni mi dmigs pa kho na'o/ /de nyid kyi phyir rnam par nges pa'i/ 'di 'ga' zhig tu dgag par byed pa na mngon sum gyis ni bya bar 'os pa ma yin te zhes bya ba'i bar du de yang legs par drangs par 'gyur ro//ji skad bshad pa nyid kyi dngos po gzhung gzugs pa'i phyir 'di ltar zhes smos so/ /dgag pa de ni rnam pa gnyis kyis byed de dngos po 'ga' zhig bsgrub pas/ de yod par rtogs pas sam/ dgag pa ste med par rtogs pas te rnam pa gzhan med pa'i phyir ro//rnam pa gzhan med pa nyid kyis gzhan yod pas med pa rtogs pa na gzhan de 'gal ba'am mi 'gal ba zhig yin zhes bsgrubs na ni zhes smos so/ /re zhig phyogs phyi ma ni mi 'thad de/ gang gi phyir mi 'gal ba bsgrubs na ni bkag pa ma yin no//ci'i phyir zhe na/ lhan cig yod par 'gal ba med pa'i phyir ro/ /de gnyis lhan cig gnas par yod pa 'thad pa'i phyir ji ltar de dag las gcig gis gzhan 'gog par 'gyur/ 'gal ba sgrub pa yang mi dmigs pa med par 'gal ba mi rtogs so/ /'di skad brjod pa yin te/'gal ba bsgrub pa ni dgag pa'i gtan tshigs yin no/ /des na 'gal ba yod pa gzhan med pa rtogs pa'i gtan tshigs yin no/ /de yang 'gal ba nyid kyis de dang mi mthun pa'i zla bor ni de rtogs pa nyid de/ de yod na de med pa'i phyir ro/ /de nyid kyi phyir 'di dgag pa'i gtan tshigs su 'gyur ro//gang gi phyir dgag pa'i gtan tshigs yin pa de nyid kyi phyir de dang mi mthun pa'i zla nyid kyang yin no/ /ji ltar 'gal ba'i phyir de yod pa dang mi mthun pa de bzhin du/ de dmigs pa dang mi mthun pa dag kyang yin no/ /de yod na de med pa'i phyir de dang 'gal ba de de med par sgrub par byed pa yin la/de nyid kyi phyir de de dang mi mthun pa yin no/ /de yod na de dmigs pa yang med pa yin te/ de nye bar gnas na de bzhin du de dmigs pa yang med pa'i phyir ro/ /de ltar de dmigs pa 'ba' zhig tu ma zad kyi/ ji srid du de yod na de med do zhes rtogs par bya ba'i phyir de mi dmigs pa la yang ltos par bya ba yin no//de yod pa dmigs pa dang mi mthun pa de nyid bstan pa'i phyir gzhung gzugs pa ni 'di ltar zhes bya ba'o/ /rgyun chags par 'jug pa can 'byung ba'i dngos po med pa'i phyir 'gal bar rtogs so/ /rgyun chags par 'jug pa nyid bstan pa'i phyir de'i rgyu mtshan smos pa ni rgyu ma gtugs pa can zhes bya'o//gang gi phyir 'di'i rgyu nye bar len pa snga ma'i mtshan nyid grang ba'i skad cig gnyis pa la sogs pa'i rgyun 'phen par byed pa yod pa de'i phyir na 'di'i rgyun chad pa med pa yin no/ /'o na rgyu'i nus pas byas pa'i rgyun 'jug pa med pa gang las she na/gzhan yod na zhes smos so/ /dngos po gzhan me yod na de yod pa'i rgyu mtshan gyis so/ /des na rgyun chags par 'jug pa'i dngos po 'di ldog pa de las ni/ 'gal bar rtogs pa yin no zhes bya ba'i don to/ /gal te rang gi rgyu med na 'bras bu med pa'i phyir de nyid rang gi 'bras bu ldog par byed par 'gyur gyi/dngos po gzhan gyis go dngos po gzhan gyis bskyed pa'i dngos po ji ltar bzlog ce na/ dngos po gzhan gyis bskyed pa dngos po gzhan gyis kyang bskyed pa ji lta bar ro/ /gal te dngos po gzhan gyis phan 'dogs pa nyid kyis de dang lhan cig tshogs pa gcig tu gyur nas gzhan gyis skyed pa la gzhan nye bar sbyor ro zhe na/gal te de lta na phan pa sgrub pa nyid kyis tshogs pa gcig tu gyur pas gnyis pa la sogs pa bskyed par mi nus pa skyed pas gzhan bzlog pas gzhan yang zlog par byed par 'gyur ro//phan 'dogs pas ni skad cig mar 'jig par bsam par bya'o/ /drod chung ngu 'am snang ba chung ngu'i phyogs su grang ba dang mun pa dag lhan cig tu gnas pa yang yod pa ma yin nam/ der drod dam snang ba nyid chung ba yin no zhes bya bar ni mi nus te/ de dang mi mthun pa yang dmigs pa'i phyir ro zhe na/brjod pa chu dang 'o ma'am rigs mi mthun pa'i rdzas kyis dri'i rdul phra rab so sor byed pa dag kyang 'dres par gyur pa phan tshun bzlog par bya ba dang / zlog par byed pa'i dngos po med par yang yod pa yin no/ /de nyid ni lhan cig gnas pa zhes brjod do/ /dro ba'i reg pa dang me dag ni grang ba dang mun pa bzlog nas de'i yul du 'ong ba yin la de ma nus pa la ltos nas mi gnas par 'gyur ba yin no//des na rang gi rgyu nus pa shin tu chung ba dang ldan pas mang po 'byung ba'i phyir mi mthun pa'i phyogs cung zad tsam bzlog kyang nye ba yin yang gzhan ma bzlog pa gang yin pa de tsam gyis ni 'gal ba mi nyams te/phyis rang gi rgyu las 'phel bar 'gyur ba na rnam pa thams cad du sems pa'i phyir ro/ /des na de ltar gzhan yod na med pa rtogs pa'i rgyu mtshan yin no/ /des na de'i rang bzhin yang gzhan yod na de med pa kho na yin no/ /de nyid kyi phyir lhan cig mi gnas pa'i mtshan nyid du bstan to//gzhan yod na med pa 'gal bar rtogs pa'i rgyu yin mod/ med pa de nyid gang las rtogs she na/ de yang zhes smos so/ /med pa de yang mi dmigs pa las yin no/ /mngon sum las kyang 'gyur ba ma yin nam zhe na/bden te mngon sum las yod dam med ce na mi brjod kyi 'on kyang mngon sum gyis me yod pa na grang ba rtogs par bya ba na yang de na grang ba mi dmigs pa yod pa yin no/ /des na de de yod pa dang 'gal ba ltar de dmigs pa dang yang mi mthun pa nyid do/ /des na 'di skad brjod pa yin te/me yod pa na grang ba mi dmigs pa yod pa yin la/ de yang gzhan yod pa nyid yin no/ de lta yin dang khyim nang gi nam mkha'i cha dro bas khengs pa rtogs pa na dro ba de yod pas grang ba mi dmigs par rtogs pa bzhin no/ /des na de nyid dang de 'gal ba'i rang bzhin nyid kyis de med pa dang mi dmigs pa'i rang bzhin yin no//phyogs sam snang ba de nyid des na dben pa yin no/ /snang ba yang de las gzhan nyid kyis de ltar rnam par gzhag go/ /'di ni gzhan yang yin la/ zlog par byed pa yang yin pas med pa shin tu gsal ba kho na'o/ / de'i phyir ji ltar 'gal ba rtogs pa na de lta bu'i yul rtogs pas grang ba med pa khong du chud pa de bzhin du grub pa'i 'gal ba sgrub pa na yang gang rtogs pa na sngon med do zhes bya bar mi rtogs pa de nyid grub na 'gyur ba yin no/ /des na sngon bzhin du da ltar yang de mi dmigs pa nyid khyad par yod pa ma yin no//'di ni rigs pa yin te 'di ltar dgag pa'i don 'gal ba mthong bas rtogs par mi nus la gzhan rtogs na ni med do zhes mi rtogs par mi 'gyur ro/ /des na gang rtogs na med do snyam par 'gyur ba de rtogs par bya ba yin no/ /des na 'dir me 'am me'i 'bras bu'am/ gzhan yang rung ste rtogs pa na med do snyam par 'gyur ba'i phyir de nyid dmigs pa yin no/ /gal te dro ba ni reg pa gcig pu'i yul yin pa'i phyir de yod par rtogs na dmigs pa'i mtshan nyid kyir gyur pa nyid kyi grang ba med par sgrub par byed par 'gyur te/ thag ring por yang me mthong du rung ba'i phyir la grang ba'i reg pa ma yin pa ni ma yin no zhe na/bden te gzugs dmigs kyis reg pa ni ma yin no/ /de ltar gyur pa ni reg pa yin pas de mi dmigs par brjod pa yin gyi/ gzugs ni ma yin no zhe na/ de de bzhin kho na ste gzugs bzlog par bya ba ma yin pas 'gal ba med pa'i phyir me ni reg pa nyid kyis grang ba dang 'gal ba yin yang /'bar ba rtogs na reg pa la yod par the tshom za ba ni ma yin no/ /mngon sum mam tshogs pa gcig la rag las pa'i rjes su dpag pas kyang rung ste mngon par zhen pas kyang ci bya/ reg pa rtogs pa nyid kyis grang ba bzlog pa yin no/ /yang na 'gal ba dag gis phyogs dang phyogs can gyi zhen pas ci bya ste 'gal ba'i 'bras bu la sogs pa la de med pa'i phyir 'bar ba'i bdag nyid kyi me nyid grang ba med pa yin mod/ ji ltar phyogs nyid kyi phyogs bum pa med pa yin pa de bzhin du de'i rang bzhin ma yin yang phyogs dmigs par yang 'gyur ro//de ni de ltar yin no zhes mi mthun pa nyid las rnam par gzhag ste/ bum pa yod na phyogs tsam dmigs pa mi srid pa'i phyir ro/ /des na ji ltar phyogs dmigs pa rtogs pa na yang bum pa med pa rtogs pa de bzhin du me dang me'i 'bras bu gzhan la yang 'gyur ro//des na de thams cad med do snyam pa'i rtogs pa'i yul du 'gyur ba na 'di dag 'jug pa'i du bas me bzhin du gang yin dgag pa'i don nye bar bsgrub pa ma yin no/ /des na 'di thams cad mi dmigs pa kho na'o/ /'gal ba gzhan yang bshad pa ni phan tshun dmigs pa spangs te/gnas pa'i mtshan nyid kyang 'gal ba yin no/ /gang dag gi dmigs pa'i rang bzhin gang yin pa de ni de dag gi phan tshun spangs te gnas pa'i rang bzhin te/ de dmigs pa ni gzhan gyis spangs la gzhan dmigs pa yang de spangs pa de'i phyir bdag nyid gcig par mi srid pa 'gal ba zhes brjod do//de dang mi mthun pa nyid du gyur pa rang gi bdag nyid kyi mthar thug pa tsam gyis ngo bo nyid ni der dngos po'i rang bzhin no/ /snga ma la ni lhan cig mi srid pa la brten pa bzlog bya zlog byed kyi dngos po ma yin la/ mi srid pa ni mi 'thad pa tsam gyi rang bzhin nyid kyis dngos po'i rang bzhin nyid du ma grub pa'i phyir ro//'gal ba ni dper na ji lta bu zhig ce na/ rtag pa dang mi rtag pa bzhin no zhes smos so/ /gal te rtag pa la ni dmigs pa 'ga' yang mi srid do/ /de na gang na'ang med pa'i phyir ro//mi rtag pa la yang ma yin te/ mngon sum gyis mi rtog pa'i phyir ro/ /rjes su dpag pa la ni dngos po dmigs pa med pa nyid do/ /des na sngon po la sogs pa dmigs pa rtogs pa dag bzhag ste gang spangs pas 'di gnyis kyi rang bzhin gnas pa dang por bkod pa ji ltar 'di dag dmigs pa yin zhe na brjod pa dmigs pa nyid yod pa rnams kyis yod pa yin no zhes gnas pa'i tha snyad blo la bzhag nas 'di gnyis kyi rang bzhin nyid dmigs pa'i tha snyad du brjod do//des na phan tshun bdag nyid spangs te gnas pa'i rang bzhin nyid 'gal ba yin no zhes brjod pa yin no//'gal ba 'di tshad ma gang gis rtogs par bya/ rgyu yang gang zhig yin zhe na/ re zhig 'di la rgyu ni 'ga' yang rtogs pa med de/ sngon po ni sngon po'i bdag nyid yin la ser po ni ser po'i bdag nyid yin no zhes bya ba de dag tha dad pa'i bdag nyid ni rang gi rgyu nyid las byung ba'i phyir ro//de nyid kyi phyir sgro btags pa'i gcig dgag pa'i phyir gcig par 'gal lo zhes brjod do/ /phan tshun tha dad pa'i tshad ma ni bltar rung ba rnams la ni/ mthong ba nyid gcig 'gog pa'i sgrub byed yin la/ bltar mi rung ba rnams kyi rang bzhin tha dad pa'i 'gal ba ni the tshom za ba nyid do//rang gi ngo bo yod na tha dad pa yin la/ tha dad pa yang 'gal ba yin pa'i phyir rang gi ngo bo la the tshom za ba na the tshom mi za ba gzhan ci zhig yod/ bltar rung ba dang bltar mi rung ba dag ni bltar rung ba rang las bzlog pa las tha dad grub na bltar mi rung ba gzhan las tha dad par mngon sum gyis grub pa nyid de las 'gal ba ma yin no//bltar mi rung ba bltar rung ba dang 'gal ba ni bltar rung ba las gzhan nyid kyis rtogs par byed do/ /gzhan nyid kyang the tshom za ba ma yin nam zhe na/ bden mod kyi bltar mi rung ba gzhan nyid du the tshom za ba bltar rung ba dang bdag nyid gcig par the tshom za ba las sam/med pa gzhan nyid ma yin pa'i phyir rang gi ngo bo las the tshom za ba las 'gyur/ bltar rung ba yod pa the tshom za ba las gzhan du the tshom za bar 'gyur mod kyi/ de'i ngo bor the tshom za ba ni med de/ rang las bzlog pa thams cad las tha dad par grub pa'i phyir ro//de bzhin du mi rtag pa nyid rjes su dpag pa las grub na de rang las bzlog pa las tha dad pa nyid du sgrub par byed pa'i phyir gal te rtag pa zhes bya ba med pa de lta na yang dngos po dang dngos po med pa 'gal ba'am/ ji ltar brtags bzhin pa'i ldog pa med pa'i rang bzhin can nyid kyi mtshan nyid kyi bdag nyid dang 'gal ba nyid las rab tu grub po//de yang tha dad pa la brten pa yin te/ dper na sngon po la sogs pa dang ser po lta bu 'am/ de'i rang bzhin ma yin pa tsam la brten pa yin te/ dper na rtag pa dang mi rtag pa 'am/ dngos po dang dngos po med pa lta bu'o/ /tha dad par grub pa de ma thag pa can bltar rung ba bltar mi rung ba'i bdag nyid yin pa bkag pa ni blun po la yang mngon sum gyi gzhi las ma yin no/ /tha dad pa'i bltar mi rung ba ni dgag tu med do/ /de dang mtshan nyid mi mthun pa nyid kyis bltar rung ba ni rmongs pa la snang ba mi dmigs pa las yin la gzhan la ni mngon sum ma yin no zhes mang du bshad zin to//'di la gzhung lugs shes par rlom pa dag kyang gol ba'i phyir/ de gzhan du legs par bkag zin to/ /'gal ba 'di ni 'gal ba brjod pa'i skabs kyi 'dir bshad do//de ni rnam pa gcig nyid du zad do zhes shes par mi 'gyur bar bya ba'i phyir ro/ /mtshan nyid las gyur pa'i 'gal ba nye bar mkho bar lhan cig mi gnas pa bzhin no/ /mtshan nyid las gyur pa'i 'gal ba grub pas 'gal ba dmigs pa nyid du khas len na rang bzhin mi dmigs pa yang 'gal ba dmigs pa nyid du 'gyur te/der yang gzhan yod pa nyid kyis med par rtogs pa'i phyir ro/ /bdag nyid gcig pa dgag pa'i don du/ de dang 'gal ba'i rgyu sgrub pa 'gal ba dmigs pa nyid du zhe na/ da ni ji ltar du ma'i bdag nyid 'gog pa ltar rung ba ma mthong ba'i phyir ro zhe na/da de ma mthong ngo zhes bya ba ga las/ de las gzhan rtogs pa dmigs pa'i phyir ro zhe na/ de las gzhan rtogs pa yod kyang de med pa'i re zhig mi gsal ba ma yin nam/ phyogs dmigs pa na bum pa rtogs pa yod na rigs par 'gyur la/med na ni rigs pa med par 'gyur gyi/ rigs pa med do zhes bya bar mi 'grub bo/ /des na ji ltar shes pa gzhan yod na shes pa gzhan med par rtogs par 'gyur/ de'i phyir bum pa dang bcas pa dang bum pa med pa'i phyogs gnyis nyid gzhan yin pa na gzhan med pa la 'khrul pa med pa cig grub pa ni gzhan med pa rtogs pa'i rgyu yin no//de lta yin dang bum pa dang bcas pa dang bum pa med pa'i phyir bum pa dang bcas pa dang bum pa med pa'i phyogs dag la 'gal ba 'di yod pa'i phyir thams cad du 'gal ba dmigs pa nyid du thal bar 'gyur ro//dmigs pa las bltar rung ba bltar mi rung ba dang bdag nyid gcig pa 'gog pa na yang 'gal ba dmigs pa nyid du 'gyur ba'i phyir snang ba mi dmigs pa'i dbye ba nyams par 'gyur te 'dir 'gal ba'i dmigs pa bltar mi rung ba'i yul can yin pa'i phyir ro//de'i phyir gcig gi bdag nyid 'gog pa ni mngon sum nyid las yin la/ tha dad pa la ni 'gal ba de dang ldan pa yin yang rang bzhin mi dmigs pa nyid las dngos po med pa yin pa'i phyir 'gal ba 'di 'gal ba dmigs pa grub par bya ba'i don du bshad pa ni ma yin no//de yang zhes bya ba la sogs pa yang gal te 'di la gzhung gzugs par sbyor na/ snga ma la de ma sgrub par 'gyur ro/ /des na ji skad bshad pa nyid rigs so/ /des na de ltar gzhan bsgrubs pas gzhan 'gog pa la ni 'gal ba nyid 'gog par byed pa yin la 'gal ba nyid kyang mi dmigs pa las rtogs pa yin no zhes 'gal ba yang zhes bya ba nas bzung nas de yang mi dmigs pa la zhes pa'i mthar thug pas bsgrubs te/ji ltar bdag cag gis brjod pa bzhin du bsam pa gang gis de bshad pa de bstan pa'i phyir de la yang zhes smos so//skabs su bab pa'i 'gal ba sgrub pa de la yang me la sogs pa'i 'gal ba cig dmigs pas grang ba la sogs pa gzhan mi dmigs pa kho na ste/ rang bzhin mi dmigs pa'i mtshan nyid du brjod do/ /ji ltar 'di mi dmigs pa kho nar brjod do/ /bzlog par bya ba dang zlog par byed pa dag las gcig yod par bsgrubs pas gzhan med par bstan pa'i phyir rang bzhin mi dmigs pa rtogs pas ni ma yin no zhes dogs na/de lta ma yin na zhes smos so/ /bzlog par bya ba dang / zlog par byed pa'i dngos po yin du zin kyang zlog par byed pa nye ba las bzlog par bya ba med par gzhal bar mi nus te/sngar ji skad bshad pa bzhin no/ /de'i phyir gang dmigs pa med pa'i rtogs pa bskyed pa de dmigs pa'i mthong ba nyid med do zhes bya ba'i rtogs pa bskyed par bya ba'i don du bsgrub par bya ba yin no/ /dngos po med pa sgrub par byed pa nye bar dgod pa byas pas sgrub par mi nus la/de rtogs pa yang gdon mi za bar bya dgos pa na/ de'i yul bstan pa nyid kyis de bsgrub pa yin gyi rnam pa gzhan ni srid pa ma yin no/ /der yang dgag par bya ba'i don dang mi mthun pa'i dngos po nye bar bstan par bya ba yin te/ phyogs dben pa bzhin no/ /de ni dgag par bya ba'i yul can gyi dmigs pa dang yang mi mthun pa nyid do/ /des na gang nye bar bstan pas med do snyam pa'i rtogs pas 'grub pa de ni mi dmigs pa zhes brjod do/ /des na de lta bu bstan pas dmigs pa bkag par 'gyur ba yin no/ / de'i don ni 'di yin te dmigs pa ma bkag pa can de med par rtogs pa'i rten du 'gyur ba mi mthun pa'i zla bo rab tu ma bstan par mi 'grub pa'i phyir te/ med do snyam pa'i rtogs pa mi 'thad pa'i phyir ro/ /des na 'gal ba rab tu bstan pas kyang yul bstan pa nyid kyi sgo nas med do zhes bya bar rtogs par byed pa yin no zhes bya bar grub bo//des na de ltar 'ga' zhig bsgrubs pas 'gog pa mi dmigs pa nyid du bsgrubs nas/ dgag pa yang bshad pa ni gcig bkag pas zhes bya ba yin no/ /sngar bshad pa'i rigs pa'i stobs kyis grub pa kho na yin te/de la sgrub par byed pa gzhan ni mi dgos so zhes bya ba'i tha tshig go/ /gal te der ni 'gal ba'i don gzhan mi dmigs pa yin no zhes bstan pa ma yin nam/ 'dir gzhan med pa sgrub pa la mi dmigs pa de gang zhig yin zhe na/ dgag pa ni zhes smos so//skabs su bab pa gcig bkag pa gang yin pa de nyid gzhan med pa sgrub pa la mi dmigs pa yin pa'i phyir ro/ /gcig bkag pa gzhan med pa'i bdag nyid gang yin pa de nyid kyang dgag par bya ba mi dmigs pa gzhan yod pa'i rang bzhin nyid do/ /dgag pa ni thams cad du rang gi yul grub par brjod pa yin gyi/'di sgrub par byed pa gzhan las ni grub pa ma yin no/ /des na bzlog par bya ba dang zlog par byed pa'i dngos po las 'gal ba bzhin du rgyu la sogs pa med pa yang yod par srid pa bzlog pa tsam gyis ni sgrub pa ma yin pa nyid do//de'i phyir gzhan yod pa gcig bkag pa'i bkag pa gang yin pa de nyid bsgrub par bya ba'i med pa yang yin te/ de yod na de bzhin du gzhan yang med par mi 'khrul pa'i phyir ro/ /de la gzhan gang zhig med pa la nges pa'i phyir/ mi dmigs pa nyid du bstan pa gang yin pa de rang nyid ston pa ni don gzhan dgag pa zhes smos so//de la yang rgyu dang 'bras bu dag dgag pa rgyu dang 'bras bu dgag pa'i gtan tshigs yin pa'am/ rgyu dang 'bras bu gnyi ga ma yin pa zhig bkag pa gtan tshigs te/ ji skad bshad pa'i don gzhan bkag pas don gzhan med pa bsgrub par bya ba yin no zhes pa'i don te/tha dad pa 'gog pa la rnam pa 'di tsam las mi srid pa'i phyir ro/ /dgag par bya ba ste 'brel pa 'am ma 'brel pa yin la/ 'brel pa yang rnam pa gnyis yin pa'i phyir gsum bstan to/ /de la srid pa yongs su gzung ba'i phyir mi srid pa dgag pa bshad pa ni de la zhes bya ba yin no//de zhes bya ba ni gnyi ga ma yin te de med na dgag par bya ba'i dngos po gzhan med par 'gyur ro zhes bya ba der lta ga la 'gyur rgyu dang 'bras bu ma yin pa med na rgyu dang 'bras bu ma yin pa med par 'gyur ro zhes bya ba 'di la gtan tshigs med do snyam du dgongs pa'o//gtan tshigs med pa nyid bshad pa ni/ gnyi ga ma yin pa ni 'brel pa med pa'i phyir ro/ /de'i 'brel pa ni rnam pa gnyis su 'gyur ro/ /de dgag par bya ba 'brel pa'am dgag par bya ba de 'brel pa'i phyir ro//de la gal te dgag par bya ba la de 'brel pa yin no/ /de tsam gyis ni de med kyang med par mi 'grub bo/ /'brel pa bkag pas ni 'brel pa'i yul dgag pa mi 'grub ste khyab par bya ba med kyang khyab par byed pa med pa mi 'grub pa'i phyir ro/ /des na 'brel pa ni dgag par bya ba yin la 'brel pa'i yul ni 'gog par byed pa yin no//des na gnyi ga ma yin pa ni 'brel pa med pa'i phyir ro zhes bya ba ni de la dgag par bya ba ma 'brel pa'i phyir ro zhes bya bar mngon par 'dod pa'o/ /de lta na yang de dang 'brel pa'i 'brel pa dgag par nus pa nyid do/ / de'i don ni 'di yin te/ gal te gnyi ga ma yin pa la dgag par bya ba 'brel pa yin no/ de de la rag las pa'i phyir zhes bya ba'i gtan tshigs 'di nyid kyis de med na med do zhes bya bar sgrub par 'gyur ro/ /'brel pa med na ni de med na de med par 'gyur ro zhes bya ba de lta ga la 'gyur 'bras bu la ltos nas kyang bshad pa ni/'bras bu mi dmigs kyang zhes bya ba'o/ /rgyu ni gdon mi za bar 'bras bu dang ldan pa ma yin pas de gtan tshigs kyis so/ /gang gi phyir 'bras bu gor ma chag par rgyu nye bar gnas na 'gyur ba ma yin pa de'i phyir 'bras bu med kyang rgyu med pa sgrub pa ma yin no//'dir khyad par can brjod par 'dod pa gang yin pa de ni slob dpon gyis rnam par nges pa nyid du gtan la phab bo/ /gang gi phyir ji skad bshad pa'i gcig bkag pas gzhan med pa mi 'grub pa de'i phyir rgyu mi dmigs pa kho na skabs su bab pa'i med pa go bar byed pa yin gyi 'bras bu 'am gnyi ga ma yin pa ni ma yin no//gcig bkag pas gzhan med par rtogs par bya ba gang yin pa de ni rgyu mi dmigs pa kho nas go bar byed kyi gzhan gyis ni ma yin no/ /mi dmigs pa rnam pa bzhi po 'di la yang kha cig tu ni don gzhan sgrub pa dang 'gog pas dgag pa byed la kha cig tu ni dngos su'o//des na don sgrub pa dang dgag pa la brten pa'i dgag pa la mi dmigs pa nyid du gzhung btsugs pas sgrub pa yin te/ de'i dbye ba yin pa'i phyir ro/ /da ni dngos su 'gog pa'i dbang du byas nas rang bzhin zhes bya ba la sogs pa smos so//ni'i sgra dang nges par gzung ba gnyis dang / med pa ni rang bzhin mi dmigs pa kho na yin te zhes ji ltar bstan pa bzhin ma yin pa dang rjes su 'brel to/ /gang du gzhan gyi sgo nas med pa ma yin pa der 'di rang bzhin mi dmigs pa yin no zhes pa'i don no//'di ni rnam pa bzhi yin par bstan to/ /gal te yang gsum snang ba mi dmigs pa'i dbye ba yin la/ de dang ldan pa rang gi bye brag gi nang du bgrang ba ma yin pa de lta na yang mi dmigs pa tsam spyi'i dbang du byas nas rnam pa bzhi po 'di de'i yin par bstan to//'o na de mi snang ba mi dmigs par 'gyur ro zhe na ma yin te/ 'gal na de'i dbye ba can ma yin pa'i phyir te/ rta ngang pa la sogs pa ba lang nyid kyi bzhin no/ /des na dngos po la snang ba ma dmigs pa yin yang 'di ni nye bar dgod pa'i tshul yin no/ /gal te rang bzhin mi dmigs pa tha snyad sgrub par byed pa nyid du rtogs pa nyid yin pa de lta na yang 'dir 'di khongs su 'du ba'i sbyor ba gzhan nyid du bstan pa des na rnam par dpyod par 'gyur ba yin te/ci 'di rang gi ngo bo ji lta ba bzhin nang du 'dus par bsgrub bya nye bar sdud dam/ 'on te de'i bdag nyid 'dzin tam de ste bsgrub par bya ba'i don mtshungs pa'i phyir 'di dpyad par bya ba yin zhes dogs na khongs su 'du bar bstan pa yin yang thams cad kyis bsgrub par bya ba dang sgrub par byed pa rang gi rang bzhin ji lta ba nyid du ston to//de la ni zhes bya ba rang bzhin mi dmigs pas ni yul can tha snyad sgrub par byed pa yin no//'ba' zhig tu zad do zhes bya ba ni dngos po med pa'i mtshan nyid kyi yul ni ma yin no zhes bya ba'i don to/ /ji skad brjod pa yin te gal te yang 'dir bye brag 'ga' zhig nang du 'du ba yin pa de lta na yang / gang gis bsgrub bya tha mi dad par 'gyur ba de gnyis gcig nyid ni ma yin gyi/'on kyang mi 'dra ba yod kyang cung zad chos mthun pa tsam la brten nas khongs su 'du bar bstan to/ /brjod par bya ba yod pa yin yang de ltar nye bar bstan pa ni mdo zor yang bar bya ba'i don gyi phyir ro/ /da ni 'di'i khongs su 'dus pa'i bye brag 'di la yang zhes bya ba smras te/yul du gyur pa'i rang bzhin mi dmigs pa la'o/ /yul dang yul can gyi ngo bo yang khongs su 'du ba la ltos nas so/ /gang gi tshe khyab par byed pa'i chos mi dmigs pas khyab par bya ba med pa ston pa de'i tshe ni med pa yang bsgrub bya yin no//des na rang bzhin mi dmigs pa ni tha snyad sgrub pa yin la/ de'i khongs su 'du ba khyad par byed pa mi dmigs pa ni med pa sgrub par byed pa yin no/ /gal te gang zhig sgrub pa'am bkag pas don gzhan dngos po med par grub par bstan pa de med do zhes bya bar rtogs pa'i yul nyid yin pa des na phyogs bzhin du de yang dngos po med par 'gyur te/de lta ma yin na mi dmigs pa nyid du mi 'grub pa'i phyir ro/ /des na 'di yang rang bzhin mi dmigs pa yin zhing 'dir yul can bsgrub par bya bar 'gyur ro zhe na/ de ni bden mod kyi rten gzhan yod pa dang med pa dag gis tha dad pas bsgrub bya tha dad par 'gyur ro//dngos po med pa rtogs pa la don gzhan bsgrub pa la sogs pa ltar de las gzhan la ni gzhan pa'i gzhan yod pa ma yin gyi/ de la ni 'gal ba bzhin phyogs kyang yod pa yin no/ /de yang med pa nyid du rtogs pa yin pa'i phyir nyes pa 'ga' yang med do//gal te ma rtogs pa phyogs kyi bdag nyid du gyur pa'i med pa bsgrubs na sgrub pa sgrub par byed par 'gyur ba ma yin nam/ phyogs dang ni khyab par byed pa med pa la sogs pa med na mi 'byung ba 'ga' yang yod pa ma yin no zhe na/ brjod pa med do zhes bya ba nyid du rtogs pa 'gal ba'i yul can nyid du skye ba na gang las 'di dag de mi dmigs pa nyid du 'gal ba la sogs pa yang yul nyid du rtogs par byed pa yin no//des na dngos po la phyogs bzhin du de yul yin yang ji ltar rtogs bzhin pa'i phyogs nyid de stong par sems pa dgag par bya ba'i yul nyid dgag par bya bas stong par rtogs pa na sngar ma rtogs par mi mthun pa yul du gyur pa'i phyir dngos po med pa grub pa yin no//des na sngar rtogs pa'i 'gal ba la sogs pa la ltos nas grub pa de nyid tha snyad kyi rang bzhin du gyur pa yin te/yul grub pa zin pa'i phyir ro/ /de ltar 'gal ba dmigs pa la sogs pa la ni dngos po med pa dang dngos po med pa'i tha snyad gnyi ga bsgrub bya yin par brjod do/ /phyogs la yang rang gi ngo bo ji lta ba bzhin mi 'jug pa'i phyir ro/ /gang gi rtogs pa de la phyogs pa'i phyir byas pa nyid la sogs pa ltar dngos po sgrub par byed pas na 'dir yang gnyi ga sgrub par mi 'gyur ba tshad ma'i byed pa de'i mthar thug pa nyid ni ma yin gyi/'on kyang rtogs pa de 'di na med do snyam pas 'jug par byed cing mthar ni phyogs la thug par 'gyur ba yin no/ / phyogs tsam rtogs pas kyang med par rtogs pa'i phyir gnyi ga sgrub par byed pa nyid nyams pa med do/ /de ltar rnam pa 'dis dgag pa gang ji snyed pa zhes bya ba la sogs pa dgag pa'i yul can gyi mi dmigs pa 'di ni sbyor ba'i bye brag gis rnam pa bzhi yin no/ /sbyor ba'i bye brag ji lta bu zhe na/bshad pa/ 'gal ba grub pa'i sbyor ba'i bye brag gis ni dper na 'di na grang ba'i reg pa med de zhes bya ba la grang ba nyid kyi reg pa ni grang ba'i reg pa ste/ phyi rol gyi dngos po'o/ /de 'di na med de de dang 'gal ba'i me grub pa'i phyir ro/ /'gal ba dmigs pa'i sbyor ba 'dis ni khyab par bya ba med par bsgrub pa la de'i khyab par byed pa gang yin pa de dang 'gal ba dmigs pa yang bshad par rig par bya ste/'gal ba dmigs pa'i khongs su 'dus par gyur pa nyid du brjod pa yin no/ /de nyid ston pa ni dper na zhes bya ba'o/ / ba mo dang 'brel pa'i reg pa ni ba mo'i reg pa ste grang ba'i reg pa'o/ /grang bas khyab pa de ni grang ba dang 'gal ba'i mes grang ba bsal na khyab par byed pa med pa'i phyir med pa rtogs pa yin no/ /gnyis pa yang sbyor ba'i bye brag gis ston te dgag par bya ba grang ba'i reg pa dang 'gal ba me'i 'bras bur gyur pa du ba dmigs pas me nye bar 'jog pa na grang ba'i reg pa med par rtogs par byed do//rgyu ma grub pa ni zhes bya ba ni gsum pa'o/ /dper na 'di na zhes bya ba la/ mtsho chen po la sogs pa'i yul ni snga ma dag gis bstan pa yin no/ /bzhi pa yang rang bzhin ma grub pa ni zhes bya ba rang bzhin mi dmigs pas ni dper na 'di na du ba med de mi dmigs pa'i phyir ro zhes bya ba lta bu'o//'di'i nang du 'dus pa'i sbyor ba gzhan yang ston pa ni 'dis ni zhes bya ba'o/ /khyad par byed pa dang 'brel pa'i rang bzhin yin no/ /dper zhes bya ba la 'di na shing sha pa med do zhes bya ba ni khyab par bya ba med do bsgrub par bya ste/khyad par ni nye ba la sogs pa bsten nas 'dzin pas mngon sum gyis mi rtogs pa'i phyir ro/ /shing med pa'i phyir ro zhes bya ba ni khyab par bya ba med par sgrub par byed pa ste/ lo ma la sogs pa dang ldan pa'i ngo bo ni rgyang ring po nas kyang rtogs pas ma rtogs na med par khong du chud pa'i phyir ro//des na yul 'di tsam na shing yod na dmigs par 'gyur la khyad par ni ma yin no snyam pa'i shes pa khyad par dgag par 'dod pa ni spyi med pa nyid kyis khyab par byed pa mi dmigs pa las med par rtogs pa yin no//gal te gzhan du med pa grub pa mi srid pas snang ba mi dmigs pa las sbyor ba tha dad pa tsam zhig 'dir bstan par bya ba ma yin nam/ ji skad bstan pa'i sbyor ba dag la go ji ltar snang ba mi dmigs pa srid de gang gi phyir 'di la chod pa dang / bskal pa la sogs pa mi snang ba'i rgyu yod pa'i phyir ro//bltar mi rung ba la ni snang ba mi dmigs pa ma yin no/ /snang ba mi dmigs pa nyid na yang ma grub pa nyid de/ chod pas khyad par ma grub pa'i phyir ro zhe na/ 'di spangs pa'i phyir med pa dang tha snyad ces smos so/ /khongs su 'du ba dang bcas pa'i sbyor ba med pa dang /med pa dang / med pa'i tha snyad ni med pa dang tha snyad de de sgrub pa'i mi dmigs pa 'di thams cad la ma grub pa mi dmigs par yang rig par bya'o/ /'dir grub pa dang ma grub par bya ba la phan tshun sdud pa'i phyir ma grub pa grub pa la ltos nas sdud cing grub pa yang ma grub pa la ltos nas sdud par rig par bya'o//gang dag ce na de dag ces smos so/ /mi dmigs pa'i rnam pa'am mtha' dag gis dgag par bya ba dag go/ /gal te yang chod pa la sogs pas grang ba la sogs pa snang ba ma yin pa de lta yang snang ba nyid du rig par bya'o//des na grub par yang rig par bya'o/ /gtan tshigs grub pa nyid du nges par bya ba'i ma grub pa ni ma yin no/ /gtan tshigs de dag nyid grub pa'i yul nyid du ston pa ni de dag dang 'gal ba dag ces bya ba'o/ /'dir de dang 'gal ba la sogs pa snang ba mi dmigs pa'i rang bzhin gyi gtan tshigs brjod pa gang yin pa de dag ni snang ba mi dmigs pa nyid du grub pa'i phyir ma grub pa nyid ma yin no//gal te yang 'dir khyab par byed pa med pa la sogs pa 'gal ba ma yin pa de lta na yang 'dir dbyig thogs 'gro'o zhes bya ba bzhin du 'gal ba'i sgra 'jug pa yin te/dang po nyid kyi thams cad nye bar mtshon pa ni 'thad pa'i phyir ro/ /yang na khyab par byed pa med pa la sogs pa khyab par bya ba la sogs pa dang 'gal ba nyid de lhan cig mi srid pa'i phyir ro/ /sgrub pa khong du chud pa ma yin pas 'gal ba dmigs pa ma yin yang 'gal bar byed pa brjod pa gsal bar mi srid pa ni ma yin no//gang las gtan tshigs grub par 'gyur ba ji lta na 'di bltar rung ba'i bdag nyid dag kho na ma grub pa yin zhe na/ gzhan dag la ni zhes smos so/ /bltar mi rung ba dag la ni ji skad bshad pa'i med pa dang 'gal ba mi 'grub bo/ /med pa ni 'gal ba grub pa'i yan lag nyid du bstan pa yin no//de'i don ni 'di yin te/ gal te dngos po de de'i tshe bskal pa de lta na yang 'dir mi dmigs pa ni mi mthun pa'i zla dngos po gzhan yod pa yin no zhes brjod la/ de yang 'gal ba la sogs pa nyid do/ /de yang bltar rung ba'i dngos po'i mi mthun pa'i zla ba nyid kyis snang ba mi dmigs pa nyid du grub pa kho na ste/de lta ma yin na 'gal ba nyid du ma grub par thal ba'i phyir ro/ /mi 'dod pa gsal bas sbyor ba gzhan nang du bsdu ba'i phyir gal te zhes smos so/ /'gal ba'i 'bras bu bzhin du 'gal ba'i rgyus kyang 'gal ba kho na ste/de lta ma yin na 'gal ba nye bar 'jog pa na 'bras bu las rgyu bzhin du rgyu las kyang 'bras bu grub pa'i phyir grang ba yod par sgrub par 'gyur ro zhes bya bar bsam pa'o/ /rtsod pa 'di bsal ba'i phyir mdo de dang zhes bya ba'o/ /grang ba'i reg pa de dang 'gal ba ni me yin la/ de'i rgyu mtshan ni shing la sogs pa ste de dmigs par sbyor ba gang yin pa'o//'gal ba dang 'bras bu zhes bya ba la sogs pa'i med don can zhes bya bar 'brel to/ /med pa de yang de dang 'gal ba gang yin pa de nyid do/ /de ni 'khrul pa can yin no/ /grang ba med pa'i don du grang ba dang 'gal ba me'i rgyu mtshan dmigs pa ni de la 'khrul pa can yin no//ci thams cad kyi tshe 'am zhe na ma yin no zhes bshad pa ni/ rgyu mtshan dag ni 'gal ba nyid med na zhes bya ba'o/ /me dang grang ba gnyis kyi rgyu mtshan gnyis 'gal ba med na'o/ /des na de ltar 'gal ba'i rgyu mtshan dmigs pa gtan tshigs ma yin gyi 'gal ba ni ma yin no zhes brjod pa yin no//gang gis me'i rgyu'i nye ba tsam gyis 'grub pa'i phyir 'gal ba'i rgyu mi dmigs pa med pa'i don can du 'gyur ba 'bras bu'i rgyu bzhin du rgyus kyang 'bras bu nye bar 'jog pa ni ma yin no/ /'gal ba gang dag gi rgyu 'gal ba ni der 'gal ba'i rgyus rgyu bzlog pa na 'bras bu yang ldog par 'gyur ro//rgyu 'gal ba de med na ni 'khrul pa nyid do/ /'khrul pa nyid mdo 'grel pas ston pa ni/ dper na zhes bya ba'o/ /'di na grang ba'i reg pa med de zhes bya ba ni bsgrub par bya ba'o/ /shing yod pa'i phyir ro zhes bya ba ni sgrub par byed pa rgyu 'gal ba dmigs pa'o//shing yod pa tsam gyis ni grang ba med pa ma yin pa'i phyir me dang grang ba'i rgyu gnyis mi 'gal na 'khrul par 'gyur ro/ /rgyu mtshan 'gal ba med na gtan tshigs nyid med pa mdor bshad pa rgyu mtshan 'gal na gtan tshigs nyid du 'gyur ro zhes ston pa ni rgyu mtshan dag 'gal na ni zhes bya ba'o//dgag par bya ba'i rgyu mtshan gang yin pa dang de dang 'gal ba'i rgyu mtshan rgyu 'gal ba nyid du nye bar bkod pa de gnyis 'gal na ni go bar byed pa kho na yin no/ /gang du bzhin zhe na/ dper na zhes smos so/ /skyes bu 'di la grang ba skyed pa'i spu langs pa la sogs pa'i khyad par med do//ci'i phyir zhe na/ me'i khyad par te/ bzlog par nus pa 'di la zhes ji skad brjod pa la de yod na de'i phyir ro/ /'gal ba spu langs pa dang / mes gdungs pa de dag gi rgyu me dang grang ba de gnyis kyang 'gal ba yin pa des na/me las grang ba med pa de'i phyir de'i 'bras bu spu langs pa la sogs pa med pa yin no/ /gal te 'dir tshul 'di ltar bzlog pa yin na rgyu mtshan gnyis 'gal ba nye bar mkho ba med kyi/ 'on kyang spu ldang ba la sogs pa'i rgyu grang ba nyid dang mi 'gal ba nyid yin te de nyid las grang ba med pas de'i 'bras bu 'gog pa'i phyir ro//me'i rgyu mtshan nyid kyang don me de grang ba bsal ba nyid kyis spu langs pa la sogs pa zlog par byed kyi yongs su gdung ba 'jog pas ni ma yin pa'i phyir ro/ /de ltar bzlog na yang rgyu mtshan gnyis 'gal ba yan lag ma yin te yongs su gdung ba nyid kyis de dang 'gal ba spu langs pa la sogs pa bzlog pa'i phyir ro//me las yongs su gdung ba rtogs pas chod pas spu langs pa la sogs pa med par rtogs pa ni mi srid de rgyu tsam las mi rtogs pa'i phyir dang / mtha'i gnas skabs mi rtogs pa'i phyir dang /mthu dang ldan pas byin gyis brlabs pa srid pa'i phyir rgyu las 'bras bu mi 'grub pas 'gal ba'i rgyu dmigs pa ni go bar byed pa ma yin pa nyid do/ /rgyu 'gal na rgyu 'gal ba dmigs par 'gyur gyi 'gal ba'i rgyu mi dmigs pa ni ma yin no/ /der rgyu mtshan dag ces brjod pa ni mi rigs pa brjod pa yin no zhe na/brjod pa/ 'gal ba'i rgyu dmigs pa dang / rgyu 'gal ba dmigs pa gnyis po 'di tshig zur gnyis su bstan pas bstan pa yin te/ tha snyad ni gnyi ga ltar dmigs pa'i phyir ro/ /de dang 'gal ba'i rgyu mtshan ni zhes bya ba 'gal ba'i rgyu dmigs pa'i dbang du byas nas rgyu mtshan dag 'gal na ni zhes bya bas de nyid khas blangs pa yin pa'i phyir dang /de nyid khongs su bsdu ba'i phyir de dang 'gal ba grub pa 'di yang gong du rgyu ma grub pa kho nas zhes rgyu 'gal ba dmigs pa nyid du bstan pa'i phyir ro/ /de zhes bya bas ni rgyu ma grub pa nyid du smos pa'i rgyu gzung ba'i phyir de dang 'gal ba grub pa yin pas/rgyu 'gal ba dmigs pa nye bar bstan par 'gyur ro/ /de nyid kyi phyir 'gal ba'i rgyu dmigs pa nyid ston pas grang ba dang 'gal ba me'i rgyu brjod do/ /spu langs pa la sogs pa dang 'gal ba yongs su gdung ba'i rgyu nyid rtogs par bya ba'i phyir rgyu mtshan dag ces smos la/de dang 'gal ba ni rgyu 'gal ba dmigs pa nyid nye bar bstan pa'i bsam pas yin no/ /me las yongs su gdung ba skye ba'i gegs ni 'ga' yang rtogs pa med do/ /sreg pa'i nus pa nyid kyis yongs su gdung bar byed pa yin pa'i phyir ro//de nyid kyis du ba skyed pa'i phyir me de mi dmigs na yongs su gdung ba skyed pa'i nus pa thogs pa med pa rtogs pa na/ yongs su gdung ba rtogs pa yin no/ /rgyu las 'bras bu rtogs par thal te/ du ba las nus pa thogs pa med pa rtogs pa na yongs su gdung ba'i rtogs pa skye ba'i phyir ro zhe na/gal te thogs pa med pa nyid rjes su dpag pa kho nas yongs su gdung ba rtogs pa ma grub pa na 'gyur ro zhes pa tshogs pa gcig la rag las pa'i rjes su dpag par bshad par bya'o/ /'dis ni skyed par byed pa'i me nyid grang ba sel bar byed pa yin na skyed par byed pa yang skyed par byed pa kho na yin no zhes mi rtogs te/skyed par byed pa der nges pa'i khyad par mi rtogs pa'i phyir ro zhes 'gal ba dmigs pa la 'khrul par dogs pa yang bkag pa yin te/ du ba skye ba nyid kyis dro ba'i nus pa thogs pa med pa rtogs pa na grang ba med par grub pa'i phyir ro//'o na 'gal ba'i 'bras bu dmigs pa nyid go bar byed par 'gyur ro zhe na ma yin te/ me'i khyad par yongs su bcad pa'i don yin pas na des mthar thug pa ma yin pa'i phyir ro/ /tshul 'di grub pa la brten pa'i phyir ro/ /sbyor ba gzhan par grub po zhes ston pa ni/ 'dis ni zhes bya ba'o/ /de'i zhes bya ba 'gal ba'i rgyu me de'i 'bras bu de las kyang me de dang 'gal ba grang ba'i reg pa de'i 'bras bu spu langs pa de med par rtogs pa bshad pa yin no/ /dper na phyogs 'di na ba spu langs pa la sogs pa'i khyad par dang ldan pa yang yin la skyes bu yang yin pa de lta bu can ma yin te/du ba yod pa'i phyir ro zhes bya ba lta bu'o/ /des na 'di ni 'gal ba'i rgyu'i 'bras bu dmigs pa'am/ rgyu 'gal ba'i 'bras bu dmigs pa'o/ /'di nyid kyi khongs su bsdu ba bshad pa la/ 'di yang zhes bya ba ni skabs su bab pa'o//ci rgyu 'gal ba'i 'bras bu dmigs pa'am zhe na ma yin no zhes brjod pa ni de dang 'gal ba grub pa ste/ rgyu 'gal ba grub pa'o/ /rnam pa bzhir bltas par ni rgyu mi dmigs pa nyid du bstan pas/ rgyu 'gal ba'i 'bras bu dmigs pa ni 'di'i khongs su 'du la/ 'di ni rgyu mi dmigs pa'i khongs su 'du ba yin no//de ltar na gtso bo nye bar bstan pa de'i khongs su 'du ba tshul 'dis/ snang ba mi dmigs pa 'di ni ji ltar bstan pa nyid kyis rnam pa brgyad du bgrang bar bya'o/ /gal te ji ltar 'gal ba'i rgyu dmigs pa la rgyu tsam ni skyed par byed pa ma yin la tha ma'i gnas skabs kyang mi rtogs pa'i phyir 'khrul par dogs pas de tsam go bar byed pa ma yin pa brjod pa de bzhin du 'gal ba'i 'bras bu dmigs pa yang 'bras bu go bar byed pa ma yin par 'gyur ro//dus gzhan du byed pa'i phyir rgyu byed bzhin pa nyid ma yin pa ltar/ sngar nyid byas zin pa'i phyir 'bras bu yang bya bzhin pa ma yin par 'gyur te/des na gnas pa thob par 'gyur ro/ /gnas pa thob pas rgyu nye bar gnas pa med kyang srid pa'i phyir ro/ /'di ltar de'i tshe mi byed pa'i phyir rgyus 'bras bu nye bar 'jog pa ma yin pa de bzhin du 'bras bus kyang rgyu nye bar mi 'jog ste/ de'i tshe bya ba ma yin pa'i phyir ro/ /dogs pa 'di bsu nas bshad pa ni mi dmigs pa rnam pa brgyad po de la 'gal ba'i 'bras bu dmigs pa bshad pa gang yin pa de las te/ der 'gal 'bras bu la yang ste 'gal ba'i rgyu dmigs pa 'ba' zhig la ni ma yin gyi ji srid du 'di la yang khyab par 'dod pa yin no//de nyid brjod pa ni/ yul dang ni/ dus la sogs pa la ltos par 'dod gang du gang gi gang du ba skyed pa dang sogs pa smos pas ji ltar rtog par byed pa'i rang bzhin gyi khyad par ro/ /ji skad brjod pa yin te/ de las skyes pa gzhan gyi gzhan dbang du gyur pa ma yin pa'i phyir nges par mi 'grub pas skye bzhin pa'i du ba nyid go bar byed pa yin gyi/gnas pa'i gnas skabs ni ma yin te/ de ni du ba'i skad cig snga ma la brten pa'i phyir me'i rgyu can ma yin pas na me med kyang yod pa'i phyir skye bzhin pa nyid kyang rgyun mi 'chad par gyen du 'phyur ba mang du mched cing 'phel ba dang ma bral ba de ltar 'phel ba bsten pa mi bzod pa rtogs nas rtogs par byed do//da ni yul dang dus smos pas ci bya zhe na khyad par gzhan gyis kyang de de'i yul dang dus can du rtogs par byed pa'i phyir te/ yul dang dus kyi khyad par can de nyid sgrub par byed pa yin pa'i phyir des bar du bcad pa nyid kyis rtogs pa'i phyir ro//de lta ma yin na 'khrul par dogs par 'gyur ro zhes bshad pa ni/ gzhan du zhes bya ba'o/ /de la mi ltos pa ni 'gal ba'i 'bras bu 'khrul par 'gyur te thal ba bzhin no/ /de de las skye bzhin pa yin yang gnas pa'i gnas skabs na de la mi ltos pa dang /grub bzhin par rtogs par byed pa'i khyad par yang rtogs par mi nus pas grang ba med pa sgrub par byed pa ma yin no/ /des na 'di ltar gtan tshigs gsum tshul gsum dang ldan pa yin pa'i phyir/ de ni rnam gsum nyid ces brjod pa de rang gi ngo bos rnam pa gsum pa'i mthar thug pa bkral nas gtan tshigs gzhan srid pa dgag pa'i don du rnam gsum nyid ces nges par bzung ba 'khrul par dogs pa bzlog pa'i phyir ro//'o na zhes rtsod par byed do/ /rjes su dpog par byed pa gang yin pa'o/ /de gang zhe na/ 'bras bu skye bar ro//gang gis she na/ rgyu la sogs pa ste rgyu gzhan la ltos pa med pa la sogs pa 'bras bu skye ba de ji ltar gtan tshigs rnam pa gsum gyi nang du 'du zhe na/ thams cad du bsgrub bya rjes su dpog pa'i byed pa can gtan tshigs bstan pa nyid kyi gtan tshigs brjod pa yang bsgrub bya gtso bor bstan pa yin yang de'i rang gi ngo bo phal par byas pa yin te/'bras bu la sogs pa'i gtan tshigs ston pa ni/ 'di ni me yod de du ba yod pa'i phyir ro zhes bya ba la sogs pa bzhin no/ /des na rgyu tshogs pas 'bras bu skye bar rjes su dpog par byed pa gang yin pa de gang du 'du zhes bya bas ni gtan tshigs de nyid kyi khongs su 'du ba rtsod pa yin no//tshogs pa las 'bras bu skye bar rjes su dpog pa na ni de dmigs pa'i phyir ro/ /'bras bu skye ba yin no zhes rjes su dpag par bya ba yin pa'i phyir rjes su dpag par bya bar 'gyur ro/ /slob dpon gyis ni ji skad brjod pa'i bsgrub bya mi srid pa'i phyir dang /srid pa'i bsgrub bya la yang rang bzhin gyi gtan tshigs kyi mtshan nyid dang ldan pa'i phyir rang bzhin gyi gtan tshigs nyid du ston pas rgyu tshogs pa yis zhes bya ba la sogs pa smos so/ /rgyu tshogs pa'i 'bras bu skye bar rjes su dpog pa gang yin pa de ni rang bzhin yin par brjod do//skye ba ni rgyu yod pa'am 'bras bu nyid yin gyi bya ba'i bdag nyid can gzhan ni 'ga' yang med do/ /des na 'bras bu la gnas pa'i rang bzhin gyi khyad par ram/ rgyu la gnas pa'i rang bzhin gyi gtan tshigs khyad par yin no/ / de de la pha rol pos ni 'bras bu la gnas pa'i khyad par rjes su dpag par bya ba brjod pa na 'dir rgyu la gnas pa'i khyad par rjes su dpog pa na rang bzhin gyi gtan tshigs su bshad do/ /rang bzhin gyi gtan tshigs kyi mtshan nyid bshad pa ni/ don gzhan la ni mi ltos zhes bya'o/ / rgyu la gnas pa'i 'bras bu skye ba'i mtshan nyid ni rgyu tshogs pa yod pa tsam las gzhan la mi ltos pa yin no/ /des na rgyu tshogs pa'i rang bzhin ngo bo nyid de sha pa yod pa las gzhan la ltos pa'i shing nyid sha pa'i rang gi ngo bo yin pa bzhin no/ /rang gi ngo bo rjes su dpag par bya ba la ni ngo bo rang bzhin gyi gtan tshigs yin no//'di la lhan cig byed pa thams cad las dang po 'brel pa nyid kyi tshe/ 'bras bu mi skye bar dmigs nas phyis 'grub pa khyad par ma skyes pa ma yin pa dang / rigs kyis thob pa ma yin pa dang / mi mthun pa nyid las skye'o zhes nges par byed do/ / khyad par thob pa la mi ltos na ni dang po 'brel ba nyid na yod par thal ba'i phyir dang / de las khyad par mi skyon phyis kyang med par 'gyur ba'i phyir dang / khyad par rigs kyis thob par ma grub na skad cig gnyis pa nyid las yod par thal ba'i phyir dang / gcig gnas pa don med pa'i phyir ro/ /de'i phyir 'bras bu sgrub par byed pa ji srid bya ba byed pa la ltos pa de dag ni snga ma snga ma dang 'brel pa phyi ma phyi ma khyad par can dang ches khyad par can du sgrub par byed pa yin no//khyad par de ni 'bras bu bskyed pa'i ming can rung ba zhes bya ba yin no/ /de yang tshogs pa tsam dang rjes su 'brel pa yin te/ji skad bshad pa bzhin no/ /tshogs pa yod pa tsam dang rjes su 'brel pa de tshogs pa dag las rjes su dpog pa na rang bzhin gyi gtan tshigs yin la/ 'brel ba nges pa'i tshul ni ji skad brjod pa bzhin yin pas de bzhin can rjes su 'gro ba dang ldog pa dag gi tshul gsum yin no//don gzhan la ni mi ltos phyir/ /zhes bya ba 'di'i 'grel pa ni 'di yang zhes bya ba'o/ /'bras bu skye ba 'di yang lan cig byed pa ji ltar nye ba las gzhan la mi ltos te/ des na ngo bo'i zhes bya ba 'di ltar nye ba'i rgyu'i de tsam dang 'brel ba'i rang bzhin yin no/ /rgyu tshogs pa yis zhes bya ba bshad pa ni/de la ni zhes bya ba'o/ /rgyu tshogs pa las zhes bya ba ni gtan tshigs te/ gtan tshigs de'i phyir srid pa rjes su dpog pa yin no/ /yang 'di gang gi srid pa rjes su dpog /srid pa zhes bya ba 'di yang ci zhig ce na/ gtan tshigs rnams kyi zhes smos so/ / gang gi phyir chos can tshogs pa rnams kyi rung ba nyid rjes su dpog pa'i rgyu de'i phyir na rung ba rjes su dpog pa yin no/ /des na srid pa ni rung ba nyid yin no zhes brjod par 'gyur ro/ /tshogs pa nyid chos can yin te des na sa la sogs pa'i chos can dag la sogs pa nyid la 'bras bu skye bar rung ba nyid rjes su dpog pa yin no//de lta yin dang rang bzhin nyid du 'thad pa yin gyi 'bras bu'i chos su gyur pa'i skye ba dpog pa la ni ma yin no zhes smos pa ni rung ba nyid kyang zhes bya ba'o/ /rang bzhin du gyur pa kho na'o zhes bya ba ni tshogs pa'i zhes bya ba la ltos pa ste tha mi dad pa zhes bya ba'i don to//nus pa nus pa can las don gzhan ma yin yang de grub kyang ma grub pas gos dang tshon bzhin du rang bzhin ma yin par 'gyur na/ de ni med do zhes bshad pa ni/ tshogs pa tsam dang rjes su 'brel pa yin pas zhes bya ba'o/ /'di dag ji srid tshogs pas thob pa de srid du 'bras bu skye ba dang mthun pa bogs 'byung bas na khyad par skyed pa yin no//des na tha mi dad pa'i phyir dang / phyis 'byung ba ma yin pa'i phyir rang bzhin nyid du rigs so/ /'o na rung ba nyid rjes su dpog pa la rang bzhin nyid yin mod/ gang gis gtan tshigs gzhan du 'gyur ba 'bras bu skyed pa nyid go ci ste rjes su mi dpogs zhes smras pa ni/yang ci'i phyir zhes bya ba yin no/ /tshogs pa'i zhes bya ba la sogs pas ni lan 'debs so/ /'bras bu yul can du gyur pa las tshogs pa'i gtan tshigs ma nges pa nyid yin no zhes bsgyur nas 'brel to//ma nges pa nyid kyi rgyu bstan pa'i phyir 'bras bu khyad par du byed de/ myu gu la sogs pa bskyed par bya ba ni 'bras bu yin la de la dang 'bras bu skyed par byed pa'i mtshan nyid kyi nus pa ni 'bras bu la gnas pa'o/ /tshogs pa de ni de nyid kyi yin te/ de nyid skyed par byed pa yin pa'i phyir ro//de rnams 'gyur ba ni ji skad brjod pa'i bogs 'byung ba ste/ de dang 'brel pa'i 'bras bu la'o/ /gang gi phyir phyi ma phyi mar khyad par thob pa nyid kyi tshogs pa las 'bras bu skye ba de'i phyir 'di la tshogs pa rnams ma nges pa nyid de/ de yod kyang 'bras bu 'byung bar 'gyur ba las 'da' bas gtan med pa'i phyir ro//gang gi phyir 'gyur ba ltos na ma nges pa nyid bshad pa ni/ gags byed pa dag ces bya ba yin no/ /'di skad brjod pa yin te/ gang gi phyir gang gis skyed par byed pa'i rang bzhin skyed par nges pa'i phyir/ de nyid 'bras bu 'byung bar 'gyur ba nyid las mi 'da' bar 'gyur ba tshogs pa rnams nye ba tsam nyid las 'bras bu skye ba ma yin gyi/'on kyang phan tshun phul du byung ba'i khyad par bskyed pas chod pa yin no/ /des na tshogs pa de tsam nyid nye bar gnas pa las phyi ma phyi ma khyad par dang bcas pa skyed pa de bzhin du/ de nyid du dngos po gzhan nye bar gnas pa las de'i nus pa skye ba dang mi mthun pa'i phyir de mi skye bar yang 'gyur ro//de bas na 'gyur ba la ltos pa'i phyir gags byed pa srid pa yin no/ /rgyu'i rdzas zhes bya ba ni 'grel pa'o/ /'dis ni nges pa nyid brjod do/ /kho na'i sgra ni nges par gzung ba yin te/ kho nas zhes bya bas ni gtan tshigs 'phen pa yin te/des na tshogs pa zhes bya ba'i gtan tshigs de tsam kho na'i phyir ni rgyu rnams 'bras bu skyed par byed pa ma yin no zhes brjod pa yin no/ /des na de dag yod pas 'bras bu 'byung bar ma nges pa'i phyir 'bras bu mi skye yang de yod pas tshogs pa nyid 'bras bu skye ba la ma nges pa nyid do//ji ltar skyed par byed pa ma yin zhe na/ 'bras bu dang 'brel pa'i skye ba gang yin pa de ni tshogs pa las skye ba can gyi nus pa gang yin pa de rnams kyi 'gyur ba la ltos pa'i phyir ro/ /de de tsam las ni 'byung ba ma yin no snyam du bsams pa'o/ /bar 'dir te tshogs pa nye ba dang 'bras bu skye ba'i dbus yongs su 'gyur ba'i ming can 'dir gags byed pa srid pa'i phyir mi skye bar 'gyur ro//de'i phyir tshogs pa dag kho nas rang gi 'bras bu skye bar byed pa ma yin no/ /de bas na 'bras bu rjes su dpag pa ma yin no/ /rung ba nyid rjes su dpog na ni de ltar ma nges pa nyid ma yin no zhes bshad pa ni/rung ba nyid ni zhes bya ba yin no/ /'bras bu yang rdzas gzhan la mi ltos pa ma yin nam zhe na/ bden mod kyi 'di ltar bsams pa yin te ji ltar 'bras bu'i rgyu'i rdzas yongs su rdzogs pa yin yang 'gyur ba la ltos pas bar chod par 'gyur ba'i phyir gags byed pa'i rgyu 'jug pa de bzhin du gang gis bar chod srid pas gags byed par 'jug par 'gyur ba/'gyur ba yang 'gyur ba la ltos pa dag las skye ba ni ma yin te/ tshogs pa rnams 'gyur ba la mi sdod par byed pa yin pa'i phyir ro/ /de lta ma yin na rdzas gzhan la ltos par thar ba'i phyir ro//'di dag gi 'bras bu skyed pa'i tshogs pa ni 'di nyid yin te/ tshogs pa tsam nyid na 'bras bu dang mthun pa'i khyad par sgrub pa gang yin pa'o/ /de tsam 'brel pa tsam nyid las skyed par byed pa ma yin na khyad par med pa'i phyir phyis kyang skyed par byed par mi 'gyur ro//lhan cig byed pa la ltos na ni de ltar 'gyur te/ de'i ltos par bya ba ma tshang ba'i phyir de khyad par rtsom pa ma yin pa'i phyir ro/ /der yang 'brel pa tsam nyid las khyad par skye bar brjod par bya ba yin te/ de lta ma yin na thal ba de nyid du 'gyur ro/ /de'i phyir tshogs pa rnams rdzas gzhan la mi ltos pa kho nar rung ba skyed pa na/ltos pa dang bcas pas de byed pa nyid du grub bo/ /de nyid kyi phyir rung ba nyid du rjes su dpog pa la tshogs pa rnams mi 'khrul pa yin te/ rgyu nus pa 'bras bu la 'khrul pa med pa'i phyir ro//tshogs pa rnams rung ba nyid skyed pa la ni 'brel pa tsam nyid las nus pa yin no/ /nus pa de rtogs pa ni dang po 'brel pa nyid med na phyis kyang med par thal ba'i phyir dang / khyad par skye ba la mi ltos na chod nas byed pa mi srid pa'i phyir ro/ /'bras bu skye ba la ni chod pa med pa tha ma'i gnas skabs thob par nges par mi nus so zhes rnam par nges par bshad pa yin no//'o na 'di nyid du rgyu'i tshogs pa snga ma las phyi ma khyad par can du rung ba nyid dang ldan pa rjes su dpag par bya bar 'gyur ro/ /des na rgyu las 'bras bu 'grub bo zhe na/ de ni med de nus pa ni 'brel pa tsam la brten nas ji skad bshad pa'i rigs pa nyid kyis rtogs pa'i phyir te/mngon sum las ni ma yin no/ /'o na rigs pas rtogs pa'i nus pa dang ldan pa las rjes su dpog par 'gyur ro zhe na/ gal te tshogs pa'i skad cig snga ma rnams phyi ma'i skad cig las tha dad pa'i rang bzhin du rtogs pa'i phyir yin na 'gyur ba yin no/de lta na ni ma yin te skad cig gi dbye ba mi rtogs pa'i phyir ro/ /de'i phyir dang po 'brel pa nas brtsams te/ skad cig thams cad nus pa dang nus pa skyed par byed pa zhes bya bar gnas pas de dag gi rang bzhin de nyid tshogs pa'i mtshan nyid 'brel pa las rjes su dpog pa yin no//de dag tsam nye bar gyur pa'i tshogs pa nyid ni 'brel par brjod do/ /rung ba nyid de ji ltar rjes su dpog ce na/ bshad pa 'di zhes bya ba ni chos can no/ /tshogs pa zhes bya ba ni gtan tshigs so/ /nus pa phyi ma phyi ma 'gyur bas 'bras bu skyed par nus pa yin te zhes bya ba ni bsgrub par bya'o//nus pa 'gyur ba'i rkyen gzhan la ltos pa med pa'i phyir ro zhes bya ba ni khyab par nges pa'o/ /de ltar gtan tshigs ston pa yang mthong ste/ dper na byas pa 'di ni mi rtag pa yin te/ 'jig pa'i rgyu gzhan la mi ltos pa'i phyir ro zhes bya ba bzhin no//nus pa 'gyur ba'i rkyen la ltos par bya ba gzhan med pas khyad par phyi ma skyes pa la ltos pa med par bshad pa ni nus pa 'gyur ba'i rkyen gzhan la ltos par bya ba med pa'i phyir ro zhes bya ba'o/ /de nyid ji ltar zhe na nus pa skye na ni rigs snga ma tsam gyi rgyu can yin pa'i phyir ro zhes smos so//rigs mthun pa'i skad cig snga ma tsam las ltos pa'i tshogs pa las rung ba nyid skye ba'i phyir ltos pa med pa nyid yin no/ /rjes su dpog pa gzhan yang rnam pa gsum nyid kyi khongs su bsdu ba'i phyir 'o na zhes rtsod par byed do/ /rgyu dang 'bras bur ma gyur pa zhes bya ba ni 'bras bu'i rjes su dpog pa dang rung ba nyid rjes su dpog pa las phyi rol du gyur pa'o//gzhan zhes bya ba ni rang bzhin gyi gtan tshigs las tha dad pa'o/ /ro la sogs pas gzugs la sogs pa rtogs pa gang yin pa de ji ltar te/ rnam pa gang gis yin/ ji ltar bstan pa ltar ni mi srid do zhes bya ba'i don to/ /mun khung du mig gis byed pa med par ro'i khyad par myong ba las ma du lung ga la sogs pa la gnas pa'i gzugs rtogs pa'am/ yang na ro la gnas pa'i khyad par rtogs pas 'bras bu dag la smin pa dang ma smin pa la sogs pa rtogs pa na de'i gnas skabs na nges pa'i gzugs rtogs pa bzhin no//yang de ji ltar zhes bya ba gtan tshigs rnam pa gsum gyi nang du 'du zhes bya bar 'brel to/ /'di la lan 'debs pa ni de yang zhes bya ba'o/ /rtsod par byed pas ro la sogs pas gzugs la sogs pa rtogs par smras pa'i gzugs la sogs pa rtogs pa de yang zhes bya ba rjes su brjod nas tshogs pa gcig la zhes rang gi ngo bo ston par byed do//gzugs la sogs pa'i bsgrub par bya ba ro la sogs pa'i gtan tshigs las rtogs pa ni tshogs pa gcig la rag las pa yin no//'dis ni der mi 'khrul pa brjod do/ /de med par gzhan gyis gzhan rtogs par mi rung ba'i phyir dang / nges par brtags pa 'di nyid 'dir 'thad pa'i phyir ro/ /rgyu gang las ro skyes pa de nyid las gzugs skye ba'o/ /des na ji ltar 'di'i rgyu gzhan las mi 'byung ba'i phyir ldog pa nges pa de bzhin du rang gi rgyu las gdon mi za bar de 'byung ba'i phyir rjes su 'gro ba yang nges pa yin no//des na ji ltar ro'i rgyu de de skyed par nus pa'i phyir ro/ /'byung ba de bzhin ro'i rgyu nyid gzugs kyi rgyu yin pa'i phyir de gzugs skyed par yang nus pa kho na'o//des na de las gzugs 'byung bar yang nges pa nyid pas ro yod na gzugs yod par 'gyur ba'i phyir ro/ /gzugs dang ro dag med na ni mi 'byung bar grub bo/ /tshul 'dis med na mi 'byung ba yin du chug mod/ ro las gzugs rjes su dpog pa na de de la 'bras bu'i gtan tshigs ni ma yin te lhan cig 'byung bas de'i 'bras bu de ma yin pa'i phyir ro//rang bzhin yang ma yin te/ tha dad pa'i phyir ro/ /des na 'di dag gi med na mi 'byung ba'i bsgrub pa'i 'brel pa gsum par 'gyur ro/ /gal te rang gi rgyu nyid dang 'brel pa de gnyis de med na mi 'byung ba'i phyir shugs kyis lhan cig 'byung bar nges par yang rtogs pa na rtogs pa po gcig las gzhan rjes su dpog go zhe na/de lta yin du zad mod/ 'on kyang gtan tshigs 'di 'bras bu ma yin zhing rang bzhin yang ma yin no zhes bya bar 'gyur ro/ /dogs pa 'di bsu nas/ de lta yin dang yang 'bras bu'i gtan tshigs las ji ltar ma 'das pa de ston pa ni rgyu chos rjes su dpag pa ste zhes bya ba'o//don 'di yin te/ gang gis de rjes su dpog pa na gtan tshigs 'di gang yin zhes bsam pa 'dir ro las gzugs chod pa med par dngos su dpog pa ni ma yin gyi/ 'o na kyang ros ni rang gi rgyu'i chos byed pa gzugs skyed pa'i nus pa'i gegs byar med pa nyid ces bya ba gzugs kyi rgyu'i mtshan nyid rjes su dpog par byed do//de skyed pa'i nus pa gags byar med pa can gyi rgyu yin na ro dang dus mtshungs par 'gyur ba gzugs yod pa nyid du rtogs par 'gyur ba yin no//des na ji ltar ro yod pa na gzugs yod pa de lta bu nyid du ma rtogs na de las de ltar rtogs pa mi 'gyur ro/ /de ltar rtogs na ni 'di 'bras bu nyid las rgyu rtogs pa phyogs gcig tu rtogs pa yin no/ /'dir rtogs pa dang 'brel pa gnyi ga yang dper na du bas bud shing 'gyur ba bzhin zhes bya ba'o//du ba la bud shing [(]gyi [,]gi [)]'gyur ba bzhin du tshogs pa gcig la rag las pas rgyu'i chos rjes su dpag pas rtogs pa yin no/ /'grel pa ni/ de la ni zhes bya ba yin no/ /rgyu de lta bu kho na zhes bya bas ni rgyu'i chos rjes su dpag par brjod do/ /de ji lta bur gyur pa de ston pas tshogs pa gcig la rag las pa nyid 'chad pa ni nus pa zhugs pa gegs byar med pa gang la yod pa ste/de lta bur gyur pa gzugs kyi nye bar len pa'i rgyu'o/ /gzugs kyi skad cig gang las gzugs kyi skad cig phyi ma lhan cig byed pa nye bas bsgrub pa'i khyad par can du skye ba de ni nye bar len pa yin no//ro'i rgyu ni gzugs kyi nye bar len pa'i rgyu de'i lhan cig byed pa'i rkyen yin te/ de ltar ro'i nye bar len pa'i rgyu ro skyed par byed do/ /ni zhes bya ba ni gang gi phyir gyi don te gang gi phyir de lta yin pa de'i phyir 'dir gzugs skyed pa'i nus pa gegs byar med pa can gzugs kyi skad cig snga ma'i lhan cig byed par gyur pa gang yin pa de lta bu'i rgyu rjes su dpog par byed pa yin no//'di nyid la dper na bud shing gi 'gyur ba'i sol ba la sogs pa'i mtshan nyid kyi nye bar len pa de nyid yin no/ /de yang 'ba' zhig ni de'i rgyu ma yin gyi 'on kyang me lhan cig byed pa yin no//me yang du bskyed par byed pa yin te/ de ltar na de lta bu'i bud shing gi lhan cig byed pa'i rkyen du gyur pa'i me las du ba skye ba yin no/ /du ba las de lta bu'i me rjes su dpag pa na bud shing gi 'gyur ba yang rjes su dpag par 'gyur ba yin no/ /dper na ji skad brjod pa'i khyad par gyis khyad par du gyur pa'i me'i du ba skyed pa rjes su dpog pa de bzhin du rgyu de lta bu rjes su dpog pa yin no zhes bya ba'i don to//gal te de lta na gzugs kyi skyed par byed pa'i tshogs pa gzugs dang ro dag ro'i yin par brjod par mi 'gyur te/ ro skyed pa na ro gzugs la ltos par ma brjod pa'i phyir ro//des na gzugs dang ro dag tshogs pa gcig la rag las par ji ltar 'gyur/ ro las ni rgyur gyur pa'i ro rjes su dpog par 'thad pa yin te/ rgyu med par 'bras bu mi 'byung ba'i phyir ro/ /de rjes su dpag pa las gzugs kyi rgyur gyur pa'i gzugs rjes su dpag pa na/gal te khyad par rtogs pa med par khyad par can mi rtogs pa'i phyir 'bras bur gyur pa'i gzugs la rtogs pa tsam 'dod na/ der ni 'gyur la rag ste de tsam gyi tshad ma'i yul nyid ni ma yin no/ /'on te de ltar rtogs pa der yod par mi 'khrul pa'i phyir tshad ma'i yul nyid yin no//de ni mi nus te rgyu 'bras bu la nges pa med pa'i phyir dang yod kyang shes par mi nus pa'i phyir ro/ /des na ji ltar rgyu'i chos rjes su dpag pas gzugs rjes su dpag go/ /dogs pa 'di bsu nas re zhig gzugs la 'khrul pa med pa bshad pa ni/'di ltar zhes bya ba'o/ /rang gi 'bras bu skyed pa'i mtshan nyid ni nus pa ni gags byar med pa nyid de nus pa 'jug pa de'o/ /'grel pa ni rang gi rgyu'i zhes bya bas ni nus pa'i don bshad do/ /'bras bu skyed pa la mngon sum phyogs pa zhes bya bas ni 'jug pa'i rang bzhin gags byar med pa nyid yod par nges pa med par bshad do//nus pa 'jug pa de ci zhe na med par ni ro med ces brjod do/ /ji srid ro'i rgyu skyed pa la nus pa gags byar med pa ma yin pa de srid du ro mi 'byung ba'o/ /'di skad brjod de gal te rgyu 'bras bu la nges pa ma yin na ro nyid yod par nges pa med par 'gyur ro//'on te 'bras bu skyed pa la mngon du phyogs pa'i rgyu las 'bras bu skye ba yin no zhes bya ba 'di yod na/ gzugs kyi rgyu yang gzugs skyed par nges pa kho na bas gzugs kyang gdon mi za bar yod pa nyid do/ /gal te ro'i nye bar len pa ni nye bar len pa can gyi ro'i skad cig dmigs pa las nges par grub kyi/gzugs kyi ni ma yin te/ de'i nye bar len pa las byung ba ma grub pa'i phyir ro zhe na/ de nyid gzhan gyi rgyu zhes smos so/ /ro'i nye bar len pa'i rang gi nye bar len pa las byung ba'i skad cig bskyed par bya ba la nus pa 'jug pa gang yin pa de nyid gzhan gyis zhes bya ba gzugs kyi nye bar len pa'i rgyu'i nus pa 'jug pa yin no//'dir nus pa thogs pa med pa brjod par bya ba yin pa'i phyir gang gi nus pa 'jug pa'i phyir der rgyur nges par 'gyur ba rgyur gyur pa'i gzugs nyid gzhan gyi sgra'i don yin gyi 'bras bu'i ni ma yin no//de lta na 'o na nus pa 'jug pa 'di gzugs kyi nye bar len pa'i rang gi ngo bo'i rgyu ma yin te lhan cig 'byung ba'i phyir ro zhe na bden te 'dir nus pa 'jug pa zhes bya ba 'brel pa yin no/ /des na ro'i nye bar len pa'i rgyu dang 'brel pa'i nus pa 'jug pa ni gzugs kyi nye bar len pa'i rgyu'i nus pa 'jug pa'i rgyu yin no//lhan cig 'byung ba yin pa'i phyir de las 'di 'byung ba yang ma yin no/ /des na shugs kyis lhan cig byed pa'i rgyu ma yin no zhes brjod par 'gyur ro/ /des na don 'di yin te/ ro'i rgyu rang gi 'bras bu ro skyed pa na gzugs gzugs skyed par yang lhan cig byed pa nyid du rtogs pa yin no//des na ro'i rang gi 'bras bu skyed pa la mngon du phyogs pa gang yin pa de nyid gzugs gzugs skyed pa'i yang 'jug pa'i rgyu yin no/ /des na ji ltar mngon du phyogs pa las ro skye ba de bzhin du gzugs kyang yin te/des na ro rtogs pa nyid las de'i tshe ro'i nye bar len pa'i rang gi 'bras bu la mngon du phyogs pa rtogs na gzugs kyi rang gi 'bras bu skyed pa la bar chad byar med pa yang rtogs par byed pa'i phyir dus mtshungs par yod pa'i gzugs yod par rtogs par 'gyur ro//rang gi 'bras bu skyed par byed pa de rang gi 'bras bu'i skyed par byed pa yin pa bzhin du/ gzugs kyi lhan cig byed pa'i rkyen du gyur pa yin pa'i phyir ji ltar rang gi 'bras bu las ro nyid du rtogs pa de bzhin du de lta bur gyur pa'i gzugs kyi lhan cig byed par yang yin no//des na de'i 'bras bu dus mtshungs par yod pa'i gzugs med na de'i 'bras bu nyid med par ro/ /de de'i lhan cig byed pa yin na ni de'i yang rgyur 'gyur ba yin no/ /lhan cig byed pa'i rang gi ngo bo ni lhan cig tu byed pa nyid yin pa'i phyir ro/ /des na rgyu gcig nyid 'bras bu gnyis skyed nus pa khyad par med pas na de'i 'bras bu gcig yod pa bzhin du 'bras bu gzhan yang yod pa kho na'o//nus pa gcig 'bras bu gnyis kyi don du 'gyur ro zhes bya ba 'di ga las she na/ ma du lung ga la sogs pa la gzugs dang ro dag phan tshun gyi rang bzhin rjes su byed par mthong ba'i phyir dang smin pa la sogs pa'i gnas skabs su ro'i khyad par bzhin gzugs kyang mthong ba'i phyir ro//gang gis 'di'i rang gi bdag nyid kyi khyad par gang yin pa de ro la yang yod par 'gyur ba gzugs nyid ni ro ma yin no/ / des na de'i nye bar len pa dag phan tshun nye bar len pa las byung ba'i skad cig la brten pa'i khyad par gyi rgyu ma yin par gzugs dang ro dag gi khyad par phan tshun rjes su byed par nges pa 'di mi 'grub pa'o/ /nye bar len pa dag gi lhan cig byed pa yang de nyid yin la/ de yang tshogs pa gcig la rag las pa nyid do//mdo 'di nyid rnam par 'grel pa ni rang gi rgyu'i zhes bya ba yin no/ /'dir ji ltar gzugs kyi nye bar len pa rnams gzhan gyi sgra'i don yin pa dang / ji ltar 'jug pa'i rgyu nyid yin par rtogs pa de ni bshad zin to/ /tshogs pa gcig la rag las pa nyid grub par bya ba'i don du/gzugs kyang ro'i lhan cig byed pa nyid du bstan pa'i phyir brjod pa ni gzugs kyi nye bar len pa'i rgyu rang gi 'bras bu skyed pa la mngon du phyogs pa'i mtshan nyid kyi 'jug pa'i lhan cig byed pa gang la yod pa de ni de skad ces bya'o/ /de yang gang zhe na bshad pa sngar brjod pa'i gzugs kyis nye bar len pa'i lhan cig byed pa ro'i nye bar len pa'i rgyu 'jug pa gang yin pa de yang ngo //des na de ltar 'di gnyis phan tshun lhan cig byed pa nyid du bshad pa yin no/ /de ltar mi 'khrul pa bsgrubs nas ji ltar mi 'khrul pa de kho na ltar rjes su dpog pa yin no zhes bshad pa ni de'i phyir zhes bya ba yin no//gzugs skyed par byed pa'i mtshan nyid kyi rgyu ji lta bu las ro 'byung ba'i rgyu de lta bu'i ros rjes su dpog par byed pa na gzugs rjes su dpog par byed pa yin no/ /de nyid kyi phyir ro las gzugs bar chad med par rtogs par mi nus te/ro dmigs pa las gzugs kyi rgyu nus pa 'jug pa yod pa ma rtogs par gzugs yod pa mi rtogs pa'i phyir dang / ro'i rnam pa de lta bu las gzugs kyi rgyu nus pa zhugs pa yod par rtogs pa'i phyir ro/ /de na gzugs rtogs pa ni gzugs kyi rgyur gyur pa'i ro'i rgyu yod par rtogs par bya ba gzugs skyed pa la gegs byar med pa'i nus pa dang ldan pa rtogs pa'i nang du 'dus pa kho na'o//de nyid kyi phyir rgyu yod par rjes su dpag pa na rgyu las 'bras bu rjes su dpog pa yin no zhes nus pa ma yin te rgyu nyid rjes su dpag pa na 'bras bu yod par rtogs pa grub pa'i phyir yang rjes su dpog pa don med pa'i phyir ro//'jig rten de ltar ro las gzugs rtogs pa med do zhe na/ 'jig rten de ltar mi rtogs na ni mi 'khrul pa de ltar rtogs pa med pa nyid du brjod par 'gyur ro/ /de lta bu ni de rtogs pa yin yang tshad ma ma yin no//mi 'khrul ba rtogs na yang ji skad bshad pa'i tshul las mi 'da' bar 'grub bo/ /gal te gang las khyad par nyid kyi rtogs pa skyes pa de rjes su dpag par bya ba yin na tshogs pa las 'bras bu 'grub par rung ba rjes su dpog pa na yang 'bras bu rjes su dpag par bya bar 'gyur te/de yang der rtogs pa'i phyir ro zhe na ma yin no zhes bshad pa ni/ ji ltar zhes bya ba la sogs pa yin no/ /ji skad bshad pa'i rnam pa des na 'das pa rnams rtogs pa yin te/ dper na ro'i gzugs kyi lhan cig byed par rjes su dpog pa na gzugs dang ro dag bzhin no//gegs byar med pa'i nus pa rtogs pas 'phangs pa ni lhan cig 'byung bar rtogs so/ /de phan chad ni gzugs kyi rgyu gzugs skyed pa la nus pa chod pa med par 'gyur ba'i tshad ma med do/ /des na ma 'ongs pa rnams ni rtogs pa ma yin te/ji ltar ro 'bras bu dmigs pa las 'og rol du yang gzugs yod pa bzhin no/ /'khrul pa'i phyir ro zhes bya ba ni gtan tshigs so/ /de lta bas ni zhes bya ba ni mjug bsdu ba'o/ /de'i phyir zhes bya bas ni rnam gsum nyid ces bya ba'i don 'di grub par bstan pa yin no//rang bzhin ma 'brel ba ni zhes bya ba ni gtan tshigs so/ /rgyu'i chos rjes su dpog pa 'di ni grog ma 'pho ba la sogs pa las char pa bab pa la sogs pa rjes su dpog pa yang rgyu'i chos rjes su dpag pa'i rang bzhin du bshad pa yin no/ /de la yang 'byung bar 'gyur ba'i char pa'i rgyu kho na grog ma la sogs pa 'khrul pa'i rgyu yin no//'byung bar 'gyur ba gang las char pa skyed pa de nyid las grog ma la sogs pa 'khrul pa yin te/ char gyi rgyu'i 'byung ba rnams nyid 'gyur ba na grog ma la sogs pa cung zad 'khrul par byed pa de 'phel bar 'gyur ba na ji srid char 'bab pa de srid du de yang 'phel bar 'gyur ro//de yang char mi mthong ba la ni de'i rgyu rung ba nyid rjes su dpag par bya ba yin la/ phyis ni char pa mngon du 'gyur la 'khrul pa la sogs pa yang khyad par du gyur na ni da ltar ba'i char rjes su dpog go/ /'di la 'di ni mngon par zhen pa'i yul ma gyi/'on kyang rgyu dang 'bras bu'i dngos po ma yin pa tshogs pa gcig la rag las pa med par de ltar mi 'thad do zhes bya ba 'di tsam zhig brjod do/ /rnam pa 'di lta bu la sogs pa dag tu ni rigs pa tsam zhig bstan par bya ba yin te rnam pa la mngon par zhen pas ci bya/des na de ltar tshul gsum dang ldan pa'i gtan tshigs rnam pa gsum yin pa'i phyir de ni rnam gsum nyid ces bya ba'i mthar thug pa bshad nas gtan tshigs ltar snang de las gzhan zhes bya ba bshad pa'i phyir/ rgyu ma tshogs pas zhes smos so/ /ma tshogs pa ni ma tshang ba'o//lhan cig byed pa ji snyed pas 'bras bu bsgrub par bya ba de snyed pa de ni rgyu tshogs pa yin no/ /de la gang gi tshe lhan cig byed pa ma tshang ba de'i rgyu ma tshogs pa yin no/ /de lta bur gyur pas rjes su dpog pa'i rjes su dpog pa gang yin pa de ni lhag ma dang ldan pa yin te/ ma mthong ba tsam gyis ldog par grub pa gtan tshigs su sbyar ba yin no zhes bya ba'i tha tshig go//de ltar yang / gang zhig ma mthong ba tsam gyis/ /ldog pa rab tu ston byed pa/ /zhes lhag ma dang ldan pa'i mtshan nyid 'chad par 'gyur ro/ /des na rjes su dpag pa 'di lhag ma dang ldan par brjod pas ldog pa ma mthong ba tsam gyis grub pa nyid du brjod pa yin no//de'i don ni 'di yin te/ 'brel pas bsgrub par bya ba'i med na mi 'byung ba 'grub par bya ba'i phyir tshul gsum las bsdu ba byas pa des na de las gzhan gtan tshigs su brjod pa ni ma mthong bas 'grub pa'i ldog pa la brten nas yin pas der ni med na mi 'byung ba de'i tshad ma can du brjod par bya ba yin no//de yang gtan tshigs ltar snang ba yin te/ ma mthong ba ldog pa 'grub na mang po ma nges pa nyid mi ldog pa'i phyir ro/ /lhag ma dang ldan pa de nyid ston pa ni lus las zhes bya ba yin no/ /ji ltar 'dod chags dang bral bar 'dod pa'i skyes bu'i khyad par la khyad par du gyur pa 'ga' zhig lus las 'dod chags dang ldan pa yin no zhes kha cig zer ba ni 'dod chags med pa rdo la sogs pa la ma mthong ba'i phyir dang /so so'i skye bo bdag nyid la lus yod na 'dod chags yod par mthong ba'i phyir ma mthong ba las ldog pa grub pa'i phyir nyid kyis lhag ma dang ldan pa yin pa bzhin no//ji ltar 'di lhag ma dang ldan pa yin gyi rnam pa gsum nyid du ji ltar mi 'du zhe na/ nus med phyir zhes smos so/ /gal te lus la sogs pa 'dod chags skyed par nus na ni de snyed pa de dag nyid las 'dod chags skye ba'i phyir 'bras bu yal bar dor nas rung ba nyid rjes su dpog pas rang bzhin gyi nang du bsdus te rang bzhin gyi gtan tshigs su brjod pa zhig na/gang gi phyir de dag nus pa med pa nyid yin pa de'i phyir rgyu 'bras bu nyid yod kyang sbyor bar byed pa ma yin par byas te/mthong ba dang ma mthong ba tsam la brten pa'i rjes su 'gro ba dang ldog pa la brten nas gtan tshigs nyid du brjod par bya ba yin no/ /de lta yin dang ma nges pa nyid mi ldog go/ /rung ba nyid kyang zhes bya ba ni 'grel pa'o/ /rung ba nyid kyang tshogs pa dag kho nas rjes su dpog par byed de/ma tshogs pas ni ma yin no zhes bya bas ni nges par bzung ba'i don to/ /ci'i phyir ma tshogs pas ma yin zhe na ma tshogs pa rnams la ni zhes smos so/ /'bras bu rtsom par byed pa'i khyad par yang mi 'grub pa'i phyir shin tu nus pa med pa'i phyir ro/ /'di skad brjod pa yin te 'dir 'bras bu rung ba nyid rjes su dpog pa ni 'bras bu rjes su dpag pa nyid yin par brjod de de ltar na rjes su dpag par bya ba nyid ma yin yang khyad par du gyur pa'i 'bras bu rtogs pa'i phyir ro//'di ni med do/ /nus pa yod na mchod pa'i phyir de rung ba'i zhes bya bar 'gyur na ma tshogs pa la ni med do//des na 'dis ni gtan tshigs gsum las phyi rol tu gyur par brjod do/ /lus las 'dod chags rjes dpog bzhin/ /zhes bya ba rnam par 'grel pas/ dper na zhes smos so/ /bzhin gyi don ni dper na'i sgra'i don yin la lus kyi sgra yang dbang po la sogs pa'i mtshan nyid la yin pas/lus la 'dod chags rjes dpog bzhin/ /zhes bya ba ni dper na lus dang dbang po dang blo dag las 'dod chags la sogs pa rjes su dpog pa bzhin no zhes bya bar 'gyur ro/ /'di ni rgyu ma tshogs pa las rjes su dpog pa yin no zhes gang brjod pa de sgrub pas 'dod chags kyi rgyu bshad pa ni 'dod chags la sogs pa ni zhes bya ba yin no//'dod chags la sogs pa khong khro ba dang nga rgyal la sogs pa gang dag yin pa ste/ de dag ni bdag dang bdag gir mngon par zhen pa sngon du 'gro ba can yin no//'o zhes bya bar rtogs pa ni rnam par shes pa la sogs pa phung po mang po las tha dad pa yin te/ nga'i rnam par shes pa zhes rtogs pa'i phyir ro/ /de ni rnam par ma brtags pa yin pa'i phyir bdag go snyam du 'du shes pa yin no/ /de la yang rtogs pa gzhan gyi yul yin pa dgag pa'i don du rtogs pa de nyid rtogs pa'i rang bzhin gyis mngon par zhen pa zhes brjod pa yin te/de nges pa'i rang bzhin yin pa'i phyir dang / de'i tshul nyid kyang de yin pa'i phyir ro/ /bdag ni med pa'i phyir de ni 'ga'i yang sngon du 'gro ba ma yin gyi 'on kyang de rtogs pa yin pa des na de ltar bkod do//de la phan 'dogs pa la de'i yin par rtogs pa ni bdag gir mngon par zhen pa'o/ /de yang 'ga' zhig gis cung zhig skyed pa med par 'gas kyang cung zad kyang phan 'dogs pa med pa'i phyir bdag gi ba med pas de sngon du 'gro ba ci yang med pa'i phyir rtogs pa nyid sngon du 'gro ba yin no//gal te yang 'dod chags la sogs pa dang bdag tu lta ba 'jug pa 'di'o zhes thog ma med pa can yin pa'i phyir rjes su 'gro ba dang ldog pa dag gis 'di rtogs par nus pa ma yin pa de lta na yang rigs pas rtogs par nus pa yin no zhes bshad pa ni nyes pa thams cad ces bya ba yin no//bdag tu lta ba dang des skyed pa'i bdag gir lta ba ni phyin ci log pa'i yid la byed pa yin la de gnyis las ni 'dod chags la sogs pa skyed pa yin no/ /'di ni le'u gnyis par bstan pa yin te/ 'di ni rigs pa tsam gyis grub par brjod pa'i phyir rgyur bstan pa yin no//de lta na ni 'o na de tsam las skye ba'i phyir 'dod chags la sogs pa'i rgyu ma yin pa kho na'o/ /ma tshang ba yang ma yin te nam mkha' mtha' yas skye mched la sogs pa dag na de med kyang yod pa'i phyir ro zhe na/ lus la sogs pa zhes smos so/ /sngar brjod pa ni zhes bya ba ni gang gi phyir gyi don te/ des na de'i phyir zhes bya ba 'phen pa yin no/ /des na 'di ltar 'brel te gang gi phyir ni 'dod chags la sogs pa bdag dang bdag gir mngon par zhen pa sngon du 'gro ba can yin pa de'i phyir lus la sogs pa rgyu'i dngos por mi 'thad pa dag kyang rgyu nyid du khas blangs nas rgyu nyid yin du zin kyang bdag dang bdag gir mngon par zhen pas stong pa 'ba' zhig pa rnams la ni nus pa med do//kyang gi sgra ni sdud pa'i don yin la/ pas kyi sgra ni gtan tshigs yin no/ /des na don 'di yin te/'di ltar bshad pa las 'ba' zhig pa rnams rgyu ma yin pa'i phyir dang / rjes su dpag pa lhag ma dang ldan pa'i phyir the tshom za ba yin no/ /de tsam nyid du rgyu yin na ni rung ba nyid du nges par 'gyur ro/ /des na 'dod chags dang bral bar 'dod pa la lus la sogs pa las 'dod chags rjes su dpag gam 'dod chags skyed par rung ba rjes su dpog kyang rung khyad par 'ga' yang med de gnyis ka ltar yang skyon yod pa'i phyir ro//rgyu ma tshang ba las ni mi rtogs par 'gyur gyi 'bras bu la the tshom za ba ni ma yin te/ sbyang na gnas pa'i sa bon las myu gu bzhin no//rtogs pa yod na yang rjes su dpag pa lhag ma dang ldan pa'i phyir the tshom za ba yin no/ /mi mthun pa'i phyogs la 'jug pa ma mthong bas ni rjes su dpag pa lhag ma dang ldan pa yin la de lta na yang the tshom za ba yin no/ /'dod chags la sogs pas stong pa'i rdo ba la sogs pa ni mi mthun pa'i phyogs yin la//de dag la yang lus la sogs pa ma mthong ba des na gang gi tshe mi mthun pa'i phyogs la 'jug pa ma mthong ba la brten nas 'dod chags sgrub pa'i phyir lus la sogs pa 'god pa de'i tshe mi mthun pa'i phyogs las ldog pa'i nges par byed pa ma yin pa'i phyir the tshom za bar 'gyur ro//de dag 'dod chags med pa la ma mthong yang de tsam gyis de med pa la med pa kho na ni ma yin te/ bdag la sogs par mngon par zhen pa yang de la med pa'i phyir de med pas 'dod chags med dam lus med pas med pa yin zhes ldog pa mi nges pa'i phyir ro//gal te gang gis bdag la sogs par mngon par zhen pa la yang rgyu yin pa'i phyir lus la sogs pa ma tshogs pa yin par brjod pa lus la sogs pa rgyu nyid kyis ni rjes su dpog par byed pa ma yin gyi/ 'on kyang rjes su 'gro ldog grub pa'i phyir ro//de lta na yang 'di dag mthun pa'i phyogs mi mthun pa'i phyogs la yod pa dang med pa grub pa yin no zhe na ma yin te/ de la yang ldog pa nges pa med pa'i phyir te sems med pa dag lus med pa bzhin du bdag la sogs par mngon par zhen pa yang ma grub pa'i phyir ro//des na bdag la sogs pa mngon par zhen pa med pas sems med pa rnams la 'dod chags la sogs pa med pa yin nam 'on te lus med pa yin zhes nges pa med pa kho na'o/ /gsum du ma 'dus pa'i gtan tshigs ltar snang gzhan yang bstan pa'i phyir de bzhin du zhes smos so//'di gnyi ga lhag ma dang ldan pa nyid brjod pas rtogs pa'i phyir ji ltar rgyu ma tshogs pa mi mthun pa'i phyogs la ma mthong ba tsam gyis 'bras bu rjes su dpog pa tshad ma ltar snang ba yin pa de bzhin du 'bras bu tsam la ma mthong ba thun mong gi 'bras bu dmigs pa las gtan tshigs shes pa yang tshad ma ltar snang ba yin no//dpe ji lta bu zhe na/ tshig las zhes smos so/ /don 'di yin te/ /gzhan dag tshig las la lar 'dod chags rjes su dpog pa de ni gtan tshigs gsum du gtogs pa ma yin no/ /gal te yang sems med pa dag la 'dod chags med na tshig ma mthong ba'i phyir 'di la 'bras bu'i gtan tshigs 'khrul pa yin pa de lta na yang tshig thun mong gi 'bras bu yin pas 'di mi mthun pa'i phyogs la ma mthong ba yin no//tshig ni/ brjod par 'dod pa tsam khyad par med pas bskyed pa yin te/ 'dod chags dang bcas pa 'am 'dod chags kyis stong pa yang blangs te/ 'di ni des skyed pa'i phyir ro/ /des na mi mthun pa'i phyogs la brjod par 'dod pa tsam med pas tshig ma mthong ba yin nam 'dod chags med pas yin zhe na/ 'bras bu'i gtan tshigs srid pa ma yin no/ / de'i phyir 'bras bu ma yin pa nyid las rgyu ma yin pa rjes su dpog pa bzhin du ldog pa ma nges pas na ma nges pa'i gtan tshigs ltar snang ba yin te thun mong dang thun mong ma yin pa dag bzhin du nges pa med pa las kyang ma nges pa nyid du gyur pa'i phyir ro/ /'bras bu'i spyi nyid gzhung gzugs pa'i phyir g.yo ba dang zhes smos so//gang gi phyir bya ba dang tshig la sogs pa ni 'dod chags kho na'i 'bras bu ma yin no/ /sogs pa smos pas ni khong khro ba la sogs pa bzung ngo / /'dod chags la sogs pa yod pa nyid na tshig gi rang bzhin sngon med mthong ba ni ma yin te/'dod chags med par yang yod pa srid pa'i phyir ro/ /gal te tshig 'dod chags kyi 'bras bu ma yin na/ 'o na de lan cig kyang 'byung bar mi 'gyur te/ rgyu ma yin pa las lan cig kyang mi 'byung ba'i phyir ro zhe na/ brjod par 'dod pa spyi'i zhes smos so/ /'dod chags ni brjod par 'dod pa tsam gyi rgyu rkyen yin la/brjod par 'dod pa de yang rnam par shes pa yin no/ /de yang skad cig so sor 'dod chags la sogs pa yod pa dang med pa'i bdag nyid khyad par du ma'i rang bzhin yin no/ /de nas rang bzhin 'dod chags dang bcas pa'i rnam par shes pa las 'byung zhing res 'ga' ni zhe sdang dang ldan pa las res 'ga' de gnyi ga dang bral ba las yin pas khyad par las tshig 'khrul pa yin yang 'khrul pa med pa'i phyir 'dod pa tsam rgyu yin par rtogs par 'gyur te/du ba las me tsam nyid bzhin no/ /'dod chags tsam ni ma yin no//des na ji ltar du ba mthong ba las lo ma las byung ba'i me nyid rjes su dpog pa ma yin pa de bzhin du tshig las kyang 'dod chags nyid ni ma yin gyi 'on kyang brjod par 'dod pa tsam yin no/ /ci ste yang 'dod chags brjod par 'dod pa'i khyad par ni ma yin gyi 'on kyang brjod par 'dod pa nyid 'dod chags yin no//des na 'dod chags rjes su dpog pa nyid las 'dod chags rjes su dpog par 'grub bo zhe na/ dogs pa 'di gal te de nyid ces bya bas bsu nas 'dod pa yin pa'i phyir zhes bya bas dogs pa sel bar byed do/ / brjod par 'dod pa tsam yin na 'dod chags yin/ don dam par 'dod chags de'i rang bzhin can yin pa'am brjod par 'dod pa don dam par 'dod chags kyi rang bzhin can yin par 'gyur/ rtogs pa snga ma ni re zhig mi 'thad do zhes brjod pa ni 'dod pa yin pa'i phyir zhes bya ba yin no//brjod par 'dod pa tsam tshig las rjes su dpog pa na 'dod chags dang bral ba la de dang 'gal ba'i rang bzhin sdud pas ni cung zad kyang gnod par mi 'gyur ro/ /mi 'dod pa grub na ni gnod par 'gyur gyi 'dod pa thob kyang gnod pa'i don du 'gyur ba ni 'ga' yang med do/ /'on te yang 'dod chags kyi rang bzhin gang yin pa de tsam gyi rang gi ngo bo brjod par 'dod pa yin par 'dod na/de bsal ba'i phyir 'dod chags kyi rang bzhin bstan nas 'dod pa'i rang bzhin de las bzlog par brjod pa ni 'dod chags ni zhes bya ba nas snying rje la sogs pa ni zhes bya ba'i mthar thug pa'o//zag pa dang bcas pa'i chos ni nyon mongs pa dang bcas pa ste/ nye bar len pa'i phung po lnga brjod do/ /de dag kyang 'chad par 'gyur ba'i sdug bsngal nyid kyi sdug bsngal gcig pu'i rang bzhin nyid do/ /de dag la sems kyi mngon par zhen pa chags pa ni 'dod chags yin par smra'o//de la sems kyi chags pa bral bar mi 'dod pa de dang gcig tu mi 'bral bar dga' ba de ni chags par 'gyur ro/ /gal te sdug bsngal ba'i len pa'i phung po rnams la chags par mi 'gyur ba ma yin nam/ sdug bsngal ni mngon par dga' ba'i gnas ma yin pa'i phyir ro zhes dogs na/rgyu'i khyad par ston par byed do/ /lta ba'i sgra ni rtag pa la sogs pa so sor 'brel to/ /zag pa dang bcas pa'i phung po rnams la yang bde bar lta bas 'phangs pa mi 'bral bar 'dod pa nyid do/ /des na sdug bsngal ji lta ba bzhin rtogs pa nyid kyis ni mngon par chags pa ma yin te/'on kyang bde ba nyid du phyin ci log pa las yin no zhes brjod pa yin no/ /'di ni rtag par lta bas 'phangs pa yang yin te mthong ba'i dngos po 'brel par rtogs pa med par bde ba nyid med pa'i phyir de srid gcig pa nyid du rtogs pas mngon par zhen pa yin no//de bzhin du rang gi bdag nyid la 'bras bu rtsom pa po dang 'bras bu'i longs spyod pa po'i gnas skabs gnyis gcig pa nyid du mi bzung bar 'bras bu sgrub byed la mngon par zhen pa med la/ de lta bu yang bdag ces brjod de byed pa po dang za ba po'i mtshan nyid yin pa'i phyir ro/ / de yang nga'o zhes phung po lnga las tha dad par rtogs pa yin no/ /mdo las phung po lnga po dag las bdag dang bdag gir mngon par zhen pa zhes tha snyad du byed pa ni sgro btags pa'i yul yin pa'i phyir te nya phyis la dngul du sgro btags so zhes bya ba la sogs pa bzhin no/ /'dod chags ni bdag gir lta bas zhugs pa yang yin te nga'o zhes bya bas de 'jug pa'i phyir ro//bdag la brten pa'i phan pa sgrub par byed pa bdag gi don gyi dngos po gzhan nyid bdag gi yin par brjod kyi bdag po'i dbang du gyur pa nyid ni ma yin te/ des na bdag po gzhan dang ldan pa yin no//des na de ltar don mi rtag pa dang bdag kyang stong pa nyid dang / phung po rnams kyang rgyu dang 'bras bu'i rgyun tsam gyi rang bzhin yin pas na rang gi bdag nyid la gnas pa rtogs pa med pa ni 'bras bu sgrub pa la btang snyoms nyid du 'gyur ba yin no/ /des na 'dod chags ni bdag gir mngon par zhen pa la sogs pa sngon du 'gro ba can nyid do//gal te ma rig pas 'phangs pa ma yin pa'i yon tan la mngon par zhen pa yin gyi bdag tu lta bas 'jug pa ni ma yin no zhe na/ de lta na yang 'o na zla ba gnyis la sogs pa shes pa yang 'dod chags su 'gyur ba ste/ de ma rig pa la brten pa'i phyir dang /gnod par byed pa skyes pa'i snga rol du bden pa'i mtshan nyid kyis yang dag pa ma yin pa'i yon tan la mngon par zhen pa'i phyir ro/ /rang gi bdag nyid la gnas pa'i 'bras bu longs spyod pa'i bsam pas ni zag pa dang bcas pa'i dngos po la 'jug pa bzhin du gang du yang 'dod chags kyi rgyu mtshan nyid las mi 'da'o//de nas de ltar 'dod chags kyi rang gi ngo bo bstan nas brjod par 'dod pa nyid de las bzlog par brjod pa ni/ snying rje la sogs pa ni zhes bya ba yin no/ /snying rje la sogs pa ni bdag la sogs par mngon par zhen pa sngon du 'gro ba can ma yin no//sogs pa'i sgras ni byams pa la sogs pa'o/ /gal te brjod par 'dod pa ni de lta bu yin no zhes ji skad brjod pa'i tshul gyis brjod par bya ba ma yin nam snying rje la sogs pa ci ste brjod ce na/ bden te 'on kyang 'dod chags dang bral ba la smra ba'i rgyu mtshan nyid ni med pa ma yin la smra ba gzhan gyi don yin pa'i phyir de'i don 'grub pa'i bsam pas de brjod par 'thad pa'i phyir ro//des na 'di brjod par 'dod pa nyid ni snying rje'i bdag nyid kho na yin pa des na snying rje'i rang bzhin nyid kyis bstan to/ /de lta na 'o na gzhan la phan par sems pa'i rang bzhin nyid kyis snying rje nyid tshig gi rgyu yin gyi byams pa la sogs pa ni ma yin te/de dag ni bsam pa'i khyad par tsam gyi rang bzhin yin pa'i phyir ro/ /des na sogs pa'i sgras ci bya zhe na/ bden mod kyi 'dod chags dang bral ba la yod pa'i byams pa la sogs pa'i sems kyi chos kyang 'dod chags kyi bdag nyid ma yin no zhes brjod pa'i don du de skad brjod do//de nyid kyi phyir rim pa las brgal te snying rje smos so/ /ci'i phyir de lta bu ma yin zhe na gzhan du yang zhes smos so/ /byams pa dang snying rje dang dga' ba dang btang snyoms rnams ni bdag dang bdag gir lta ba la mi ltos par goms pa tsam las 'byung ba'i phyir ro zhes le'u gnyis par bstan par bya'o//goms pa'i rtsa ba can yin yang bdag la sogs par lta bas ma 'phangs pa ji ltar zhe na/ de'i rtsa ba can yin yang 'dod chags la sogs pa bzhin du rang gi ngang gis 'jug pa'i phyir 'bad pas sgrub pa la mi ltos par thal ba'i phyir ro//de ltar gnas pa ji ltar chags pa smra ba ltar 'dod chags dang bral ba yang de dang 'dra ste/ 'di gnyis ka brjod par 'dod pa 'dod pa nyid du rtogs pas na brjod par 'dod pa chags pa dang chags pa dang bral ba'i khyad par du gnas pa ni ma yin no//des na khyad par ni 'bras bu'i spyi las mi rtogs zhes 'chad pa ni tshig tsam las ni ste tshig gi spyi las ni mi rtogs so/ /'on te 'dod chags kyi rang bzhin gyi brjod par 'dod pas 'khrul pa'i phyir ro/ /gang las 'chol bar 'gyur ba ci'i ched du de lta bu ma yin pa de ltar tha snyad byed ce na/bsam pa ni zhes smos so/ /'dod chags dang bral ba chags pa can lta bu'am/ chags pa can 'dod chags dang bral ba lta bur tha snyad byed pa'i bsam pa mi shes so/ /de ltar na sgra 'chol ba'i rgyu ni 'dod pa tsam gyi rgyu can nyid yin par brjod pa yin no//de yang mi shes pas de lta bu'i 'dod pa rtogs pa sngon du 'gro ba can gyis rtogs pa bsal ba yin no/ /gal te yang 'dod pa tsam rgyu yin pa'i phyir sgra'i khyad par sems kyi khyad par la nges pa med pa de lta na yang 'dod chags dang bral ba la smra ba med pa tshad ma gzhan gyis rtogs nas tshig gis 'dod chags rjes su dpog par byed pa kho na'o//gang gi phyir 'di la rtag par rtogs pa med pa'i phyir sgrub par byed pa dang de'i 'bras bu mtshams mi sbyor bas na smra ba la dgos pa med do/ /mtshams sbyor na yang rtag pa nyid du rtogs pa yin no zhe na/dogs pa 'di gal te dgos pa med pa'i phyir zhes bya bas bsu na ma yin te zhes smos so/ /dgos pa med pa ma yin te 'dod chags dang bral ba ni gzhan gyi don du smra ba la 'jug pa'i phyir ro/ /rang gi dgos pa don du gnyer na ni rtag pa nyid du rtogs par 'gyur zhing 'bras bu'i don du gzung ba'i sgrub pa la 'jug pas na byed pa po dang spyod pa po dang de sdom par yang nges pa yin no//bdag tha dad pa mthong ba med pa ni ngar 'dzin pa dang bral zhing don dam par gyur pa'i phung po rnams kyang rten cing 'brel par 'byung ba tsam gyi rang bzhin yin pas na 'bras bu'i rgyu phung po'i tshogs rgyu gzhan gyis nye bar bsgrubs pa gang yin pa 'di skad cig ma nyid kyis 'bras bu bdag gir byed par nus pa ma yin pa'i phyir na 'phags pa'i bden pa bzhi mthong ba rang gi don du 'jug pa med do// gzhan dag kyang bdag bzhin du sngar 'bras bu dang 'brel pas stong pa phyis 'bras bu'i bdag nyid du bya bar mi nus so zhe na ma yin te dngos po la de ltar yin yang gzhan dag yod pa nyid du rtogs pa'i phyir brtsams shing rdzogs/ bdag gir yang byas so snyam du rtogs pa'i phyir dang / snying rje can yang de'i don nyid 'jug pa'i phyir ro/ /thar pa'i don la ni gzhan yang bdag nyid bzhin du 'jug par byed do/ /gal te gzhan la phan btags pas kyang bdag gi don du 'gyur bar mi sems pa ni dgos pa med par 'jug pa rigs pa ma yin la/ sems na yang bdag tu rtogs pa 'jug pa'i phyir rigs pa ma yin no zhes dogs na ma yin no zhes smos so//rnam pa thams cad du bdag gi 'bras bu sems pas stong pa gzhan la gnas pa nyid kyi dgos pa 'dod pa'i snying rje can 'jug par 'thad pa'i phyir ro/ /gal te phan gdags par bya ba nyid kyis gzhan dag chags pa'i gnas su gyur pas na 'di'i snying rje gang yin pa de nyid 'dod chags su 'gyur ba ma yin nam/'dod chags ni chags pa yin la/ bcom ldan 'das gzhan gyi don gtso bor mdzad pas thar pa zhal gyis bzhes pa yang chags pa yin te/ des na rang gi gnyen la chags pa dang sems can thams cad la phan 'dogs pa'i chags pa la khyad par ci yod ces dogs pa la 'dod pa yin te zhes smos so//snying rje la 'dod chags zhes zer na 'dod pa nyid do/ /gal te 'dod na 'o na rtsod pa med do zhe na/ rtsod pa med pa ma yin te rang bzhin mi 'dra ba'i phyir ro/ /'di ltar snying rje ni nyes pa med pa yin te/'dod chags bzhin du 'khor ba'i sdug bsngal 'phen pas sems kyi rgyun nyes par byed pa ma yin no/ /gtan tshigs smras pa ni phyin ci ma log pa las byung ba'i phyir ro/ /phyin ci log ni bdag tu 'dzin pa ste de las byung ba ma yin pa'i phyir ro/ /des na de ltar snying rje 'dod chags dang rang bzhin mi 'dra bar brjod pa na snying rje ni 'dod chags yin no zhes snying rje la 'dod chags kyi sgra 'jug pa tsam zhig lus pa yin no//de la yang 'di 'dod par brjod pa yin no/ /de nyid kyi phyir rnam par nges par ming ni mi dgag go zhes bshad do/ /de'i don ni 'di yin te/bdag tu mngon par zhen pa'i rtsa ba can ma yin pa'i phyir snying rje ni 'khor ba 'phen pa'i rgyu ma yin no/ /'chad par 'gyur ba'i tshul gyis rang dbang nyid du 'jug pa'i las kyi rnam par smin pa skye ba na srid pa dang las srid pa 'phen pa'i rgyu yin no/ /bdag tu lta ba zad na ni 'bras bu sems pa med pa'i phyir mi 'jug pa'i las rnam par smin pa'i rgyu ma yin no//des na 'dod chags bzhin du snying rje nyes pa byed pa ma yin pas nyes pa byed pa med do/ /ji ltar snying rje phyin ci log las ma byung / gang gi phyir gzhan gyi sdug bsngal mi bzod pa'i rnam pa can gyis sems kyi khyad par de gsal bar 'dod pa'i rnam pa'i bdag nyid ni snying rjer 'dod do//des na bdag gis 'di dag sdug bsngal las bsgral bar bya'o zhes 'di la bdag tu mngon par zhen par 'gyur ba yin no/ /sdug bsngal ba'i sems can la dmigs pa'i rnam pa can gyi snying rje nyid kyis ni sdug bsngal bzlog pa nyid ma yin te/'on kyang 'di 'jug pa gang yin pa'o/ /de yang nga'o snyam par rtogs pa yin no/ /des na 'dod pa dang bcas pa bar du zhugs shing mthar 'bras bu dmigs pa gcig tu rtogs shing sdug bsngal bzlog pa la 'jug pa yin te/ gzhan du mi 'thad pa'i phyir ro//dmigs pa 'jug pa'am 'jug pa 'bras bu dang ma 'brel par ma yin no/ /des na gsum po 'di gcig tu rtogs par 'gyur ba yin no/ /des na gal te 'di mi rtag pa yin yang rtag pa gzhan dang 'brel pas rtag par rtogs pa na bdag gzhan rtogs par 'gyur ba yin no//bdag tu rtogs pa dang bral ba la yang gnas skabs 'di gsum rtogs pas gcig tu mtshams sbyor ba ni 'di bdag tu rtogs pa nyid gzhan du brjod par 'gyur ro/ /rnam pa thams cad du gcig tu sems pa med par ni snying rje can 'jug par mi 'thad do zhe na/ dogs pa 'di bsu nas snying rje zhes smos so//bdag tu 'dzin pa med kyang sems can sdug bsngal ba mthong bas de mi bzod pa'i rnam pa can sdug bsngal de bsal ba'i bsam pa skye ba yin no/ /'di ltar sems dang po bskyed pa nas brtsams te snying rje bzhin du bdag med pa yang goms par byed pa de gnyi ga'i bdag tu gyur pa na rgyu 'bras kyi rgyun tsam gyi rang bzhin du gzugs la sogs pa'i phung po lnga po mthong ba la brtse ba'i bdag nyid kyi rigs yang 'jug ste/gnyi ga yang sgom pa'i phyir ro/ /des na goms pa las bdag med pa mthong ba la brtse ba'i rang bzhin nyid kyang yod pa kho na'o//des na sems can gyi sdug bsngal yin pa'i phyir sdug bsngal gyi khyad par sems can mthong ba tsam gyis snying rje 'jug pa yin no/ /sems can mthong ba nyid goms pa las sdug bsngal dang bral bar 'dod pa'i rnam pa yin no/ /gang las dmigs pa tsam gyi rang bzhin snying rje 'jug pa na rtag par rtogs par 'gyur ba bdag nyid gzhan gyi sdug bsngal bzlog pa'i byed pa por rtogs pa ni ma yin gyi/'on kyang sdug bsngal bzlog pa'i bsam pas de zlog par byed pa'i rgyu skyed par byed pa yin no/ /de yang chos kyi de kho na 'chad pa'i rang bzhin 'phags pa'i bden pa bzhi ston pa yin no//rgyu dang 'bras bu'i sems kyi skad cig de nyid la rtogs pa yin te/ de ni 'das pa dang ma 'ongs pa'i dngos po'i yul can yin pa'i phyir ro/ /sngon ma byung ba gzhan dag gzhan nye bar gnas na gsal ba'i phyir ro/ /des na 'dod pa'i bdag nyid kyi sems de nyid rgyu dang 'bras bu'i rtogs pa'i rang bzhin yin pa'am shes nas rgyu rtogs te skad cig gsum pa la brjod par 'dod par 'gyur yang rung ste rnam pa thams cad du gang gis 'di mthong ba'i des rgyu btsal te de rtogs par bya'o snyam du sems pa ni med kyi 'on kyang mthong ba las rgyu rtogs pa skye la/de las ni brjod par 'dod pa nyid yin no/ /rgyu rtogs pa mthong ba byed pa mtshams sbyor ba'am/ brjod par 'dod pa la rgyu rtogs pa mtshams sbyor ba yod pa ni ma yin no/ /don thams cad dmigs pa la dbang 'byor pa rtogs pa don du gnyer yang rtogs pa mi skye na/de la dbang 'byor pa nyams par 'gyur ba'i phyir dran par bya ba 'das pa la mthong ba nyid sngon du byed pa'i bdag nyid ni thams cad mkhyen pa yin no/ /de bas brjod par 'dod pa nyid yin yang gnyen po dang bcas pa'i sdug bsngal rig pa'i bdag nyid yin no/ /'dis ni kha cig na re bcom ldan 'das gsung bar khas len na rnam par rtog pa khas blangs par 'gyur la/de yang log pa'i shes pa yin no zhes 'dzer ba de spangs pa yin no/ /de skad du yang snyan dngags pa gang dag bde bar gshegs pa gsung bar rtogs pa zhes rgyas par brjod pa yin no/ / gang gi phyir rtogs par mi nus pa ni sngar rtogs pa'i 'du byed sad pa las rtogs pa don du gnyer ba'i rnam par brtag par bya bar 'gyur bar bya ba yin na/ thams cad mkhyen pa dmigs pa la dbang 'byor pa ni de ltar 'gyur bar nus pa ma yin no/ /des na dran par bya ba 'das pa dang brtag par bya ba ma 'ongs pa la mngon sum nyid 'jug pa yin te/des na 'di la rnam par rtog pa'i cha 'ga' yang yod pa ma yin no/ /mi bden pa rtogs pa yang yod pa ma yin te thams cad mkhyen pa yin pa'i phyir ro/ /rnam par rtog pa med par sgra mi sbyor ro zhe na ma yin te/ brjod bya rjod byed kyi rtog pa med kyang 'di la sgra 'dis rnam par rtog pa 'di skyed do zhes gzhan gyi rgyud la brten pa'i rgyu dang 'bras bu'i dngos po mngon du byed pa ni gzhan gyi bsam pa nyid kyis 'jug pa'i phyir ro//log pa'i shes pa mngon du byed kyang log pa'i shes pa nyid ni ma yin no/ /gang gis 'di nyid mi 'grub par 'gyur ba ji ltar kha cig sems pa ltar don dmigs pa rtogs pa la ltos pa yang ma yin te/phyir la rnam par rtog pa nyid don dmigs pa la ltos pa yin te de'i 'du byed pa la brten pa'i phyir dang / de'i byed pa ma rdzogs par mi 'grub pa'i phyir ro/ /'o na ji ltar 'bras bu nyid dang skad cig ma nyid la sogs pa rtogs she na/de yod na gzhan yod par dmigs pa nyid rgyu dang 'bras bu'i dngos po rtogs pa yin te skad cig gcig rtogs par bya ba nyid na 'das pa dang ma 'ongs pa rig pa'i phyir ro/ /de bzhin du skad cig gcig sdod pa dang skad cig gzhan skye ba yang de kho na bzhin gsal ba yin te/der rnam par rtog pas ni dgos pa ci yang med do/ /rnam par rtog pa med na 'di ni sngon po zhes rang bzhin nges par ma brtags par 'gyur ro zhe na/ nges par brtags kyang myong ba'i khyad par 'ga' yang med pa'i phyir myong ba'i rang bzhin la nges par brtags pas ci bya/gzhan yang lhag par zhen pa 'khrul pa'i phyir rnam par rtog pa 'khrul par brjod de/ rang gi snang ba don med pa la don du lhag par zhen nas 'jug pa'i phyir ro/ /don mi snang ba yang tshu rol mthong ba rnams la dbang po byed pa med par don snang ba med pa'i phyir ro//de lta bu'i rang bzhin ma yin pa la de lta bu'i lhag par zhen pa yang don nyams su myong ba'i bag chags kyi dbang gis 'byung ba yin no/ /mngon par rlom pa'i rang bzhin lhag par zhen pa zhes bya ba yang bde ba la sogs pa bzhin du rnam par shes pa'i rang gi ngo bo yin no zhes bstan par bya'o//des na dbang po la sogs pa'i byed pa med par don rtogs par nus pa don snang ba la don du lhag par zhen pa ni don nyid la yin gyi 'khrul pa'i rgyu ni ma yin no/ /don las bzlog pa'i rnam pa ni mi snang ba'i phyir gsal ba'i don la don du lhag par zhen pa ni don la brten pa nyid yin par 'gyur gyi tshu rol mthong ba'i ltar snang ba la brten pa ni ma yin no//des na bcom ldan 'das kyis sngon po la sngon por lhag par zhen pa ni phyin ci ma log pa'i yul can yin te/ de sngon po nyid yin pa'i phyir dang / rtag pa la sogs par phyin ci log med pa'i phyir ro/ / des na rnam par rtog pa'i chos 'di tsam zhig dang 'dod pa'i rang bzhin ni rnam par mi rtog pa la yang mi 'gal lo/ /'di nyid lung gis zin pa yin no zhes ston pa ni 'di ltar zhes bya ba yin no/ /sogs pa'i sgra gcig gis ni snying rje dang dga' ba dang btang snyoms bzung la/ sogs pa'i sgra phyi mas ni dmigs pa med pa bzung ba yin no/ /de la sems can la dmigs pa ni sems dang po bskyed pa nas bzung ste ji srid slob pa'i gnas skabs yongs su rdzogs pa'i bar ro/ /chos la dmigs pa ni dgra bcom pa yin no/ /chos ni gzugs la sogs pa phung po lnga ste de dag la nga'i gzugs zhes bya ba la sogs par tha dad par bdag gi chos nyid du zhen pa'i phyir ro//des na bdag med na chos kho na lus par 'gyur ro/ /des na bdag med pa rig pa'i byams pa la sogs pa ni chos la dmigs pa'o/ /dmigs pa med pa ni chos bdag med pa mkhyen pa sangs rgyas bcom ldan 'das nyid dang byang chub sems dpa' rnams kyi yin no//'di ltar shes rab dang thugs rje gnyi ga goms pas na shes rab kyi stobs kyis ni zhugs kyang med pa'i gzung ba mi snang la/ thugs rje'i stobs kyis ni bdag nyid du gyur pa mi ldog go//sdug bsngal mthong ba med par snying rje med do zhe na/ gnyis kyi bag chags dang bral bas gnyis med pa mngon du byas pa na log pa'i shes pa dang bral ba bag chags la brten pa rang dbang mi bden pa sngon po la sogs pa dang bral ba yin yang / thams cad mkhyen pa thob pa'i phyir yod pa'i don mngon du byed pa la dbang 'byor pa ni ldog pa ma yin no//gzhan gyi rgyud kyang mi bden pa nyid ma yin pa'i phyir don dam par yod pa mngon du byed par nus pa'i nyams su myong ba skyed pa'i nye bar len pa'i dbang gis de 'byung ba mi ldog go/ /de nyid kyi phyir phyi'i don med par grub pa yin no//de bden na gnyis med par goms kyang dngos po'i rang bzhin gyis grub pa mig la sogs pa las don snang ba ji ltar ldog par 'gyur/ des na yod pa'i don mngon du byed pa nyams par byed pa dang 'gal ba thams cad mkhyen pa'i sa bon thob pa na phyi'i don du snang ba bzhin gzhan gyi rgyud du snang ba skye ba ni dgag par mi nus so//rnam par shes pa rang bzhin gnyis su mi 'gyur ram/ byams pa la sogs pa dmigs pa med pa nyid 'di ni rnam par shes pa gnyis med pa'i phyogs la nye bar bkod pa yin no zhe na/ 'gyur mod/ 'gal ba 'ga' yang med do//de kho na mthong ba log pa'i shes pa dang 'gal ba yin no/ /sngon po la sogs pa phra mo dang rags pa'i rnam par rtog pa mi bzod pa nyid kyi rang dbang du yod pas mi srid pas don de lta bu ma yin la shes pa yang de tsam gyi rang bzhin ma yin no/ /des na 'gal ba'i rang bzhin gzhan dang mi ldan pa'i rnam par shes pa de lta bu'i rang bzhin log par shes pa nyid ni bag chags kyi rgyu can du nye bar bstan to de lta bur gyur pa'i dngos po ni gnyis su med pa'i ye shes la med kyi rnam pa de lta bu'i rgyud gzhan gyi shes pa mngon du byed pa nyid ni mi 'gal te/de lta bur gyur pa'i shes pa yod par mi 'gal ba'i phyir ro/ /log pa'i shes pa 'dzin pa ni log pa'i rang gi bdag nyid yod pa'i phyir dang ji ltar snang bzhin pa'i dngos po ma bkag pa log pa'i shes pa nyid mi 'thad pa'i phyir ro/ /de lta bur gyur pa'i rnam pa dang ldan pa'i phyir gzhan gyi rgyud la yod pa'i shes pa de lta bur gyur pa'i don gsal bar 'gyur ba ni de lta bur gyur pa'i don med pa'i phyir log pa'i shes pa nyid yin gyi/bcom ldan 'das kyi mkhyen pa ni ma yin te/ de lta bur gyur pa'i shes pa yod par mi 'gal ba'i phyir dang /de yang de'i yul yin pa'i phyir ro/ /de nyid kyi phyir log pa'i shes pa bdag rig pa la sogs pa'i shes pa ma yin te/ 'khrul pa'i phyir rig pa mngon sum ma yin par thal ba'i phyir ro/ /de lta na 'o na phyi'i don khas blangs pa dang 'dra bar don dam par yod pa'i gzhan gyi rgyud snang ba yin na gnyis su med pa gzigs pa nyid du mi 'gyur ro zhe na/ji ltar mi 'gyur gang gi phyir gnyi ga la rang dbang brnyes pas na don thams cad gzigs pa la yang gnas pas ni thams cad gzigs pa nyid yin la gnyis su med pa'i gzigs pa la yang gnas pas ni gnyis su med pa'i gzigs pa yin no//de nyid kyi phyir chos kyi dbyings kyi ye shes kyi gzugs brnyan gyis shes bya mtha' dag la spyi bor 'dzin pa zhes bya ba nas bzung ste gnyis su med pa'i ting nge 'dzin la mnga' brnyes pa zhes bya bas bstod pa yin no/ /de ji ltar dmigs pa med pa'i thugs rjer brjod ce na/rgyu dang 'bras bu bzhin du shes pa dang shes bya dag 'brel pa med pa'i phyir ro/ /gnyi ga yang rang gi mthar thug pa'i phyir rnam par rtog pa 'ba' zhig gi spyod yul du gyur pa'i shes pa dang shes bya bcom ldan 'das la mi mnga' bas na gzhan gyi sems dmigs pa ma yin la de shes pa yang 'gal ba yang ma yin no//ji ltar tshad ma dang bya ba phan tshun 'brel par mi 'thad pa zhes bya ba de ltar yang rjes su dpag pa tshad ma nyid yin par bstan par bya'o/ /gal te snying rje goms pa'i stobs las skyes pa ma yin nam/ des na 'dir ci zhig goms par byed snying rje nyid dam 'on te gzhan nyid gzhan goms pas gzhan skye ba yang yod pa kho na ste/bdag med pa goms pas 'dod chags dang bral bar 'gyur ba bzhin no zhe na/ de dag kyang zhes so/ /byams pa dang snying rje la sogs pa dag kyang rigs mthun pa goms pa las byung ba yin te/byams pa la sogs pa'i sems yang nas yang du bskyed pa las byung ba yin gyi 'dod chags la ltos pa can ni ma yin no/ /rang gi ngang gis 'jug pa ni ma yin gyi 'on kyang rtsol bas bsgrub par bya ba yin no zhes bya ba'i don to/ /'dod chags ni bdag tu lta ba yin te/ bdag tu zhen pa'i rang bzhin yin pa'i phyir ro/ /de la ltos pa yin na ni 'dod chags la sogs pa bzhin du rang gi ngang gis 'jug pa'i phyir rigs mthun pa goms pa la mi ltos par thal bar 'gyur ba'i phyir ro/ /ci ste yang 'dod chags la sogs pa yang sems can dang chos dang dmigs pa med pa can du ci ste mi 'dod/des na de dag kyang snying rje la sogs pa ltar 'gyur ro/ /'di ltar 'dod chags nyid goms pa las bdag med par 'gyur la/ stong pa nyid goms pas kyang der 'gyur bas bdag tu 'dzin pa dang / gzung ba dang 'dzin pa'i rnam par rtog pa med kyang 'gyur ro zhe na mi 'gyur zhes brjod pa ni 'dod chags la sogs pa ni zhes bya ba yin no//'dod chags la sogs pa ni snying rje la sogs pa ltar chos la dmigs pa'am dmigs pa med pa ma yin te bdag la sogs par 'dzin pa phyin ci log med na med pa'i phyir ro/ /rgyu dang 'bras bu'i rgyun gyi rang bzhin tshor ba la sogs pa rnams la bdag tu mthong ba med par gang gis de bsgrub pa chags par 'gyur ba'am de dang mi mthun pa la sdang bar 'gyur ba rang gi bdag nyid la gnas pa'i 'bras bu nye bar spyod par ji ltar 'gyur/de'i 'bras bu spyod pa po nyid med na ni yul de la btang snyoms nyid kun du spyod par rigs kyi 'dod chags la sogs pa ni ma yin no//gal te 'dod chags dang bral bas don thams cad la mi sdug pa'i 'du shes can btang snyoms 'ba' zhig gi chos can yin pa'i phyir snying rje can yang rtsom pa med pa nyid ma yin nam/ rtsom na ni mi sdug pa la sogs pa las bzlog par thal ba'i phyir dang / de yang de la med pa'i phyir dang / ji skad du/ blang dang dor ba bcom pa'i phyir/ /zhes bya ba la sogs pa 'chad par 'gyur ba yin no zhe na/ gal te snying rje can gyi zhes bya bas dogs pa de bsu nas ma yin no zhes bya ba la sogs pas lan 'debs so//'di skad brjod pa yin te 'dod chags dang bral ba'i phyir bcom ldan 'das rang gi don la btang snyoms pa yin gyi/ gzhan gyi don la ni ma yin te/ thugs rje can yin pa'i phyir ro/ /de la ni blang bar bya ba 'ga' yang mi mnga'o/ /re zhig chos ni ma yin te/btang snyoms don dam par 'gyur ba yin pa'i phyir ro/ /sems can ma yin te de dag kyang spang bya yin pa'i phyir ro/ /'on kyang de dag kyang rang gi bdag nyid kyi mthar thug pa'i dngos po mtha' dag la btang snyoms skyed pa'i phyir rtsol ba yin no/ /de dag la phan pa yang de nyid yin no//de nyid kyi phyir snying rje chags pa'i rang bzhin ma yin pa'i phyir dang / de nyid 'bras bu yin pa'i phyir btang snyoms pa 'bras bu la mi ltos pa'i phyir 'bras bu med pa'i rtsom pa 'dor ba yod pa ma yin pa nyid do/ /gzhan gyi don 'bras bu ma yin pa yang ma yin te 'bras bu'i mtshan nyid ni 'dod pa yin pa'i phyir ro//gang la 'dod pa yod pa de ni 'bras bu yin no zhes 'bras bu 'dod pas mtshon pa yin na de lta na yang brjod par 'dod pa dang / dgos pa 'dod pa dang / rtsom pa yang rung ste rnam pa thams cad kyi sgo nas yang dag pa ma yin pa'i sgro 'dogs pa 'ga' yang grub pa med pa'i phyir smra ba ni nyes pa med pa yin no zhes bshad pa yin no//rnam pa thams cad du zhes bya ba yin no/ /nyes pa ni nyon mongs pa ste/ nyes par byed pa'i rang bzhin yin pa'i phyir de ltar rnam pa 'gas kyang nyes pa dang 'brel pa ma yin no/ / de las gzhan pas zhes bya ba ni gal te yang dag pa ma yin par sgro 'dogs pa las gzhan brjod par 'dod pa nyid la sogs pa nyes pa dang ldan pa nyid du brjod na ni des na mi 'dod pa cung zad med do/ /nyes par byed pa'i rang bzhin ma yin pa yang srid pa 'phen pa'i nus pas stong pas nyes pa dang ldan pa nyid du bsgrubs na ni mi 'dod pa cung zad kyang med do//nyes pa ma yin pa la yang nyes pa'o zhes ming du 'dogs pa nyes pa can du mi 'gyur ba'i phyir ro zhes bya ba ni mjug bsdu ba'o/ /de'i phyir de ltar tshad ma gzhan gyis brjod par 'dod pa nyid khyad par gyi mthar thug pa yin par bsgrub pa gsal ba yin no//da ni rgyu dang 'bras bus dngos po la brten nas brjod par 'dod pa tsam rgyu yin par grub pa'i phyir tshig las 'dod chags rjes su dpog pa mi 'thad pa zhes bya ba yin mod/ smra ba po la 'dod chags mthong bas khyab pa'i phyir rgyu dang 'bras bu spangs te tshig las 'dod chags rjes su dpog go zhes gzhan 'dod pa'i dogs pa bsu nas lan 'debs pa ni smra ba po bdag la zhes bya ba yin no//gang gi phyir smra ba po bdag la 'dod chags la sogs pa mthong ba de'i phyir tshig yod na 'dod chags la sogs pa yod pas gzhan la tshig mthong bas 'dod chags la sogs pa rjes su dpog na ni ha cang thal bar 'gyur ro//sngo bsangs nyid la sogs pa bdag nyid la tshig yod na mthong zhing sems med pa dag la tshig med na ma mthong ba'i chos mtha' dag smra ba po mtha' dag la rjes su dpog par 'gyur ro//'khrul pa'i phyir zhes bya ba ni gzhan gyi tshig las gzhan rjes su mi dpogs te gang gi phyir de de la 'khrul pa yin pa'i phyir ro/ /'di la zhes bya ba ni lan 'debs pa'o/ /rigs pa mtshungs pa las gal te der 'khrul na 'di la de med do zhes bya ba'i nges pa ci zhig yod/ 'on te chos gzhan rjes su dpog pa la ni 'khrul pa mthong la 'di la ni ma mthong ngo zhes brjod na/ de yang mi 'thad de/ ma mthong yang the tshom mi ldog pas the tshom za ba'i ma nges pa nyid du 'gyur gyi thun mong nyid ni ma yin no/ /nges pa med pa nyid bstan par bya ba'i phyir tshig gis ni zhes smos so//ni zhes bya ba ni gang gi phyir te/ tshig gis byed pa'i yon tan bya ba las su rung ba dang / brjod par 'dod pa nyid dag rjes su dpog par byed do/ /rgyu dang 'bras bu'i dngos po'i phyir der mi 'khrul pa yod pa'i phyir ro/ /'dod chags la ni de las bzlog pa'i phyir mi 'khrul par nges pa med do//gal te gang la brjod par 'dod pa nyid spyir rjes su dpog par 'gyur ba shes par 'dod pa rjes su dpag par bya ba yin na yang 'di'i rang bzhin 'di 'dod chags la sogs pa'i thun mong ba rjes su dpag par bya ba ma yin nam/gal te 'dod chags med kyang khyad par gzhan dang ldan pa'i brjod par 'dod pa'i tshig gi rgyu dmigs na de'i phyir 'dir 'gyur ba yin no/ /des na gal te yang 'dod chags la sogs pas stong pa'i sems kyi gnas skabs kyis bskyed pa'i tshig yod pa de lta na yang de tsam gyi sems 'dod chags dang bral ba ni ma yin te/'dod chags la sogs pa ma skyes kyang skye bo'i sems can thams cad nyon mongs pa can du khas blangs pa'i phyir ro/ /des na de ni nyon mongs pa skyed par rung ba nyid kyis nyon mongs pa can du brjod do/ /des na ji ltar brjod par 'dod pa tsam rgyu yin te nyon mongs pa can ma yin pa'i sems kyi gnas skabs ma dmigs pa'i phyir ro zhe na/'dod chags skyed par rung ba nyid dang bral ba la zhes smos so/ /tshig ni mthong na 'dod chags skyed par rung ba nyid dang bral ba la ni ma yin te/ des na tshig 'dod chags skyed par rung ba nyid kyi rjes su 'gro ba dang ldog pa'i rjes su byed par brjod do//des na tshig las 'dod chags rjes su dpog na ha cang thal bar 'gyur ro/ /'di skad brjod pa yin te/ gal te don ji snyed nye bar gnas pa na 'bras bu sngar med pa dmigs pa de snyed rgyu yin par brjod na/sngo bsangs la sogs pa yang rgyu yin pa'i phyir nyon mongs pa bzhin du sngo bsangs la sogs pa yang smra ba po la rjes su dpog la rag na/ 'on kyang du ba la yang yul de na nye bar gnas pa gcig la sogs pa rgyu yin par 'gyur ro/ /'on te de las gcig med na yang ma dmigs pa zhes bya ba'i tshul 'dis rgyu de tsam nyid yin par nges par bya ba'i phyir yang ldog pa tshol ba yin no zhe na/rung ba nyid dang ldog pa ma grub ste rdo ba la sogs pa dag la rung ba bzhin du sems kyang med pa'i phyir ro/ /gal te sems yod kyang rung ba med na tshig med par grub na de'i phyir der 'gyur ba yin te/dper na bud shing med na shing yod kyang du ba med pa'i phyir bud shing dang bcas pa'i me rgyu yin par rtogs pa bzhin no/ /des na gal te ldog pa tshol na 'di rjes su dpag pa ma yin no/ /'on te snga ma bzhin du yod pa tsam la rtogs na ni des na ha cang thal bar 'gyur ro//des na 'dir ni ha cang thal bar 'gyur bar brjod la/ rnam par nges pa ni rgyu nyid ma grub par 'gyur ro zhes bya ba ni khyad par ro/ /der rung ba dang bral ba'i sems kyi gnas skabs ma dmigs par brjod par 'dod pa tsam rgyu yin par yang ji ltar rtogs she na/'dod chags kyis zhes smos so/ /rung ba nyid rgyu yin no zhes smra ba ni tshig nyon mongs pa can gyi sems kyi rgyun can yin no zhes bya ba brjod par bya ba yin te/ nyon mongs pa can gyi sems ma gtogs par rung ba nyid ces bya ba gzhan ni 'ga' yang med do//sems ni nyon mongs pa rnam pa gnyis kyis nyon mongs pa yin te/ bag la nyal dang kun nas ldang bas so/ /de la ma sad pa'i nyon mongs pa ni bag la nyal yin la sad pa'i ni kun nas ldang ba yin no zhes bya bar khas blangs pa'i phyir rung ba nyid ni bag la nyal gyi dngos po la brjod do//de skyes na ni de kun nas ldang ba yin no/ /des na gal te 'dir 'dod chags nyid kyis phan 'dogs par grub na de'i tshe rnam pa gnyis kyis nye bar sbyor ba yin par 'gyur ba na/ des na phan 'dogs pa nyid ni bkag pa yin te/ gnyen po bsgoms pas sems kyi rgyun nyon mongs pa med par byas kyang snying rjes kyang 'jug pa'i phyir ro//byed pa nges par sbyor ba na 'dod pa la brten pa yin no/ /des na 'dod chags med kyang snying rje can gyi 'dod pa la ni 'gal ba med do/ /des na nyon mongs pas phan mi 'dogs na nyon mongs pa'i nus pas phan 'dogs pa ma yin no//gal te nus pa las nyon mongs pa gzhan nyid ma yin nam/ de ji ltar nyon mongs pa nus pa'i phyir nus pa nus par brjod ce na/ nus pas phan 'dogs na ni zhes smos so/ /gal te nus pa nye bar sbyor ba yin na ni 'dod chags nyid kyis nye bar sbyor bar 'gyur ba zhig na/'dod chags ni nye bar sbyor ba ma yin pa des na nus pas phan 'dogs pa nyid ma yin no/ /gal te nus pa rang gi ngo bos phan 'dogs par 'gyur ba ma yin nam zhe na ma yin te snying rjes kyang 'jug par brjod pa'i phyir ro//'o na ci'i phyir 'di nye bar bkod ce na 'dod chags kyis phan 'dogs pa yod pa'i rgyu khyad par med par bstan pa'i phyir ro/ /de lta na yang 'dod chags med kyang 'dod chags dang ldan pa'i tha snyad du grub pa des na/ gnas skabs de nyid bag la nyal yin gyi/ ma sad pa'i don gzhan ni 'ga' yang med do zhes bsgrubs pa yin no/ /de lta bas na zhes bya ba ni mjug sdud pa'o/ /gal te yang 'bras bu med na mi 'byung ba ma yin pa mi srid pa de lta na yang 'bras bu'i spyi rgyu'i khyad par dag dang med na mi 'byung ba ma yin pa'i phyir ro/ / khyad par de dag rgyu yin no zhes de la ltos nas 'bras bu nyid du brjod pa yin na khyad par med na mi 'byung ba ni ma yin te/ de med kyang yod pa'i phyir ro/ /des na med na mi 'byung ba kho nas rgyu rjes su dpog par byed kyi/ med na mi 'byung ba ma yin pas ni ma yin te tshig gi 'dod chags bzhin no//ci'i phyir zhe na/ de la rag las pa yin pa'i phyir ro zhes smos so/ /'di gang med na mi 'byung ba de nyid la 'brel pa yin te/ 'bras bu'i spyi rgyu'i spyi nyid la bzhin no/ /khyad par la ni ma yin te/ de med kyang yod pa'i phyir ro/ /de bshad pa ni gzhan ni ma yin te zhes bya ba'o//khyad par dang med na mi 'byung ba ma yin pa'i phyir ro/ /gal te phyogs kyi chos dang rjes su 'gro ba dang ldog pa dag gis gtan tshigs tshul gsum par brjod pa ma yin nam tshul gsum po de yang tshad mas grub par 'gyur ba yin te/ gzhal bya grub pa ni tshad ma la rag las pa'i phyir ro//gtan tshigs kyi tshul rnams la ni mthar yang mngon sum gdon mi za bar tshad mar 'gyur ba yin te/ gzhan du na thug pa med par thal ba'i phyir ro/ /des na tshig gi mtshan nyid kyi gtan tshigs kyi khyab pa mngon sum nyid kyis rtogs pas na ji ltar gtan tshigs ma yin pa nyid yin/de ltar yang bdag rang nyid la tshig don yod na 'dod chags dmigs la sems med pa dag la 'dod chags med na tshig med pa yin no/ /ji ste de lta na ha cang thal bar brjod na de ni du ba las me rjes su dpog pa la yang ha cang thal bar ji ltar mi 'gyur tshang bang gi chos rnams ri la yang 'gyur ba'i phyir ro//des na rjes su dpag pa tshad ma ma yin pa'am/ yang na smra ba po 'dod chags can du thal ba yang spang dka'o zhes bya ba'i dogs pa bsu nas khyab pa mngon sum gyis grub kyang gtan tshigs nyid ma yin par brjod pa ni/mi mthun pa'i phyogs la ma mthong yang ma yin no zhes bya ba'o/ /gal te yang 'di mi mthun pa'i phyogs la 'jug pa ma mthong ba yin pa de lta na yang tshig ni brjod par 'dod pa tsam gyi rgyu can yin pa'i phyir de yal bar dor nas ma mthong bas grub pa'i ldog pa la brten te brjod par 'dod pa'i khyad par rjes su dpog par byed par mi nus so//ji ltar mi nus gang gi phyir gtan tshigs mi mthun pa'i phyogs la med pa ni ldog pa yin la/ de yang ma mthong ba'i mtshan nyid kyi tshad mas grub pa yin no zhe na thams cad gzigs pa'i zhes smos so//'di skad brjod pa yin te gal te ma mthong bas mi mthun pa'i phyogs la med pa rtogs par byed na su zhig de la ma mthong yang gtan tshigs nyid yin pa spong / de ltar ni ma yin te/ gang gi phyir gang 'ga' zhig la bsgrub par bya ba med pa de mtha' dag mi mthun pa'i phyogs yin pa la de med pa'i chos can nges pa 'ga' zhig ni yin par mi 'thad do//de la yang thams cad nyid la med par rtogs par bya ba yin gyi 'ga' zhig kho na la ni ma yin no/ /gal te bsgrub par bya ba med pa dang ldan pa mtha' dag pa nyid mi mthun pa'i phyogs yin par ma gyur ram/de la gtan tshigs med par nges par bya ba ma yin na/ de'i tshe la lar med pa grub kyang thams cad la de med par the tshom za bas na yul la sogs pas chod pa'i chos can sngar ma myong ba bzhin du bsgrub bya yod pa dang med par ma mthong ba nyams su myong ba'i chos can dag la yang de med na gtan tshigs med par the tshom za bar 'gyur ba kho na'o//des na me yod pa dang med par the tshom za ba bsgrub par bya ba'i chos can nyid la du ba dmigs pa na 'dir me med kyang yod dam yod pa na yod pa yin zhes the tshom mi za zhes su smra mthun pa'i phyogs dang mi mthun pa'i phyogs dag la mthong ba dang ma mthong bas ni bsgrub par bya ba'i chos can la the tshom za ba'i bsgrub bya nges par byed do zhe na/ji ltar byed gang gi phyir de ltar bsgrub bya med na med pa nyid kyis bsgrub bya'i chos can la yang med par 'gyur ro zhes nges par mi nus so//chos can gzhan la 'di bsgrub bya med na med par 'dzin pa'i tshad ma gang yin pa de nyid kyis de gzhan du yang de lta yin par 'dzin pa ni ma yin te/ tshad ma rnams ni yul nges pa can yin pa'i phyir ro/ /gang la de dag zhugs pa de nyid du de ltar nges par byed pa yin no/ /zhugs pa des gzhan du de ltar rnam par 'jog par byed par mi 'thad do//du ba 'am chos can gcig tu ji lta ba de bzhin du gzhan du yang yin no zhes ni nges par nus pa ma yin no/ /de la gnas pa de lta bu'i rang bzhin gyi khyad par 'ga' zhin ma grub pa'i phyir ro/ /de'i phyir thams cad du bsgrub par bya ba med na med do zhes nges na du ba mi dmigs pa las me nges par nus pa yin no//de'i phyir gang la lar bsgrub par bya ba med pa de mtha' dag mi mthun pa'i phyogs yin la de la med par nges par bya ba yang yin no/ /thams cad gzigs pa ma yin pa'i mthong ba log pas ni mi mthun pa'i phyogs thams cad la med pa go bar byed pa ma yin gyi 'on kyang thams cad gzigs pa nyid kyi'o//tshu rol mthong bas ni yul dang dus kyis chod pa'i chos can bsgrub byas stong pa rtogs pa'i spyod yul du byed par nus pa ma yin no/ /des na ji ltar de dag la gtan tshigs med par nges par byed/ji ltar gcig la yod pa de bzhin du 'di thams cad du yod par ni mi 'gyur ro zhes bstan pa'i phyir/ la la na zhes smos so/ /de ltar rang bzhin 'ga' zhig gis mthong ba rnams kyang yul la sogs pa'i khyad par las gzhan du snang ba'i phyir te/ dper na 'bras bu skyur po can skyu ru ra'i shing dag kyang 'du byed pa'i khyad par las 'bras bu mngar po chags par 'gyur la/lan mang du de ltar ma mthong yang yin pa bzhin no/ /gal te 'ga' zhig tu de ltar mthong ba ni rnam pa der nges pa ma yin nam du ba du ba'i rnam par nges pa bzhin no zhe na/ rang bzhin nges pa med par ni su yang mi smra'o//bsgrub bya med na du ba med pa ni du ba nyid bzhin du rang bzhin ma yin no/ /du ba'i rang bzhin de med na med pa'i chos nyid mthong bas nges par byas pa yin no zhe na/ de med na med pa tsam las ni med pa'i chos rang bzhin yin par ni mi 'gyur te/ bum pa la sogs pa med pa 'ga' zhig tu yang lan du mar yang med pa'i phyir ro//de nyid kyi phyir 'brel pa khas blang bar bya ba yin no zhes ston par 'gyur ro/ /de bas na 'brel pa bzhag nas ma mthong bas grub pa'i khyab pa la tshig gis 'dod chags dpog par byed nus pa ni ma yin no/ / des na zhes bya ba ni gtan tshigs des na'o/ /'di skad du bdag lta bu'i smra ba po ni 'dod chags can yin no zhes brjod par rigs par 'gyur te/ bdag lta bu yin pa'i phyir chos can smra ba po la 'dod chags bsgrub par bya ba des na de ltar 'thad pa yin no/ /ji skad bshad pa'i rnam pa can gyi 'dod chags la bdag lta bu nyid 'brel pa'i phyir ro//'brel pa nyid ston pa ni 'dod chags skye ba'i rkyen gyi khyad par zhes bya ba'o/ /bdag tu lta ba'i mtshan nyid tshul bzhin ma yin pa yid la byed pa log pa'i shes pa yin la/ de yang 'dod chags skye ba'i rkyen khyad par can yin no//rkyen gzhan yod kyang 'di rgyu khyad par can yin te gzhan rnams 'di'i rjes su 'gro ba'i phyir ro/ /de dang ldan pa'i phyir te/ gtan tshigs de'i phyir na bdag dang 'dra ba nyid kyis tshul bzhin ma yin pa dang ldan pa ni/ 'dod chags can yin no/ /bdag lta bu nyid ni tshul bzhin ma yin pa yid la byed pa'i bdag nyid can yin pa des na 'dod chags dang lhan cig de'i bdag nyid du bsgrub po//de'i tshe yang smra ba dper brjod pa ni don med de/ smra ba po smos pa ni don dang mi ldan no zhes bya ba'i tha tshig ste/ bdag lta bu gang yin pa de 'dod chags can yin no zhes bya ba nyid kyis bsgrub pa'i phyir ro//des na de ltar lus dang tshig dag gtan tshigs rnam pa gsum las gzhan yin pa na 'brel pa dang mi ldan pa'i phyir gtan tshigs ltar snang ba nyid du bsgrubs nas/ de'i phyir zhes mjug sdud par byed do/ /mi mthun pa'i phyogs la ma mthong ba gang yin pa de gtan tshigs ma yin pa de bas na gtan tshigs rnam pa gsum kho na'o zhes gzhung btsugs pa yin no//yang ci'i phyir mngon sum gyis grub pa'i khyab pa nyid gzhan nas 'brel pa la brten pa nyid gtan tshigs yin pa na/ gtan tshigs rnam pa gsum kho nar bstan gyi rnam pa 'di lta bu dag kyang gtan tshigs min par mi 'gyur zhes bya bar dogs pa bsu nas sun dbyung zhing 'brel pa bsgrub pa'i phyir/mi mthun pa'i phyogs la zhes smos so/ /mi mthun pa'i phyogs la ma mthong ba tsam gyis mthun pa'i phyogs la mthong ba la ni 'khrul pa med pa rjes su 'gro ba dang ldog pa dang ldan pa nyid ma yin no//gtan tshigs mthong la mi mthun pa'i phyogs la ma mthong ba'i phyir mthun pa'i phyogs la mthong bar yang brjod do/ /de nyid kyi phyir mang po zhig tshogs par mthong du zin kyang zhes 'chad par 'gyur ro/ /ji ltar tshad mas de ltar rtogs kyang mi 'thad ce na/ bshad pa/ gal te yang 'dir mi mthun pa'i phyogs la mthong ba med pa de lta na yang 'khrul pa srid pa can nyid do/ /mi mthun pa'i phyogs la mthong na ni grub pa kho nar 'gyur ro/ /ma mthong na ni grub pa ma yin la bsal ba yang ma yin pa'i phyir 'khrul pa srid pa yin no/ /gal te yang rtag pa la 'gar yang byas pa nyid ma mthong ba de lta na yang rnam pa de lta bu'i byas pa 'ga' zhig rtag par yang 'gyur ba gang yin pa de ni yod srid do zhes bya bar 'gyur ro//mi mthun phyogs la 'jug pa ma mthong yang 'khrul pa mthong ba yang yod pa yin no zhes bshad pa ni phru ba'i 'bras ni tshos pa bzhin zhes bya'o//ji ltar phru ba'i nang du chud pa'i gtan tshigs kyis 'bras tshos par sgrub pa de bzhin du 'di la yang 'gyur ro/ /phru ba'i nang du chud pa nyid ni ma tshos pa la mthong ba med de/ phyi rol na gnas pa'i ma tshos pa rnams phru bar tshud pa med pa'i phyir dang / phru ba na gnas pa 'ga' zhig kyang tshos par mthong ba'i phyir ro//de lta mod kyi de'i nang du chud pa mtha' dag bsal na/ de la 'ga' zhig ma tshos par yang de nyid kyi tshe mthong ba yin no/ /de nyid kyi phyir de mthong ba tsam gyis tshos pa po mi ldog go/ /de'i don ni 'di yin te/ rang gi yul tsam gyi mthar thug pa'i tshad mas mthong ba las tha dad pa gzhan du 'byung ba mi spong ba'i phyir ma mthong du zin kyang the tshom du 'gyur bar rigs pa 'ba' zhig tu ni ma zad de rnam pa 'di lta bu la ni 'khrul pa dmigs pa yang yod pa nyid do zhes bya ba yin no//mang po zhig ces bya ba la sogs pa ni rnam par 'grel pa'o//'dis ni mthun pa'i phyogs la yod par dmigs pa nyid brjod do/ /mdor smos kyang mi mthun pa'i phyogs la ma mthong ba ni ma bshad de/ 'dis de 'phangs par bstan pa'i don du'o/ /'phen par byed pa dang 'phang bar bya ba'i dngos pos na mdo'i mi mthun pa'i phyogs la ma mthong bas mthun pa'i phyogs la yod pa 'phangs pa ci nas kyang rtogs par bya ba'i phyir ro//phru ba'i nang na 'dug pa rnams las mang po zhig tshos par mthong bas na phru ba'i nang du tshud pa zhes bya ba kho nas ni tshos par mi 'grub ste/ tshos pa med na phru ba'i nang du chud pa nyid du mi 'gyur ba'i phyir de yod na tshos par 'gyur ba yin no zhes mi 'grub bo//ji ltar mi 'grub ce na/ 'khrul pa mthong ba'i phyir ro zhes smos so/ /gal te phru ba'i nang du chud pa nyid kyang tshos pa skyed pa'i tshogs pa tshang bar rtogs par byed pa na tshos pa sgrub par byed pa ma yin nam/ gal te 'di rgyu tshang ba ma yin na 'ga' yang tshos par mi 'gyur te/de dag tshos pa yang rgyu med par mi 'grub pa'i phyir ro/ /de rgyu tshogs pa yin na ji ltar gzhan yang ma tshogs des na 'di la 'khrul pa mthong ba ji ltar 'thad ce na/ dogs pa 'di bsu nas smras pa ni 'di ltar 'di lta bu'i zhes bya ba yin no/ / bsam pa 'di yin te/ phru ba la sogs pa'i tshogs pa yongs su 'gyur ba la ltos nas 'bras rnams 'bras can du 'gyur ba yin la/ de yang dus gnas pa nyid do/ /de la 'bras 'ga' zhig ni dus cung zad gnas pa la ltos nas de ltar 'gyur la gzhan dag la ni gzhan du'o//des na de lta bu'i dngos por mthong ba dag dang mtshungs par gnas pa la ltos pa dag ni tshos pa kho nar 'gyur la gzhan ni ma yin no/ /de bzhin du gang dag drod dang nye bar 'brel pa de dag ni myur bar tshos par 'gyur la gzhan ni ma yin pa des na 'khrul pa dmigs par 'thad pa yin no//des na 'di bstan pa'i phyir de ltar 'brel pa rjes su dpyod pas rtogs par ston to/ /'di lta bu'i rang bzhin can yin la zhes bya ba ni gnas pa la ltos pa yin no/ /'di dang tshos pa'i rgyu 'dra ba can zhes bya ba ni drod nye ring ngo / /des na de ltar 'di dag tshogs pa gcig la rag las par 'gyur ro//gang gi tshe rnam pa 'di lta bu'i rigs pa la mi ltos par de ltar dmigs pa tsam la brten pa de'i tshe 'di rjes su dpag pa ma yin pa kho na'o zhes bshad pa ni de lta ma yin na ni zhes bya ba yin no/ /ma mthong ba tsam la brten na ni rjes su dpag pa 'di lhag ma dang ldan pa yin la des na 'khrul pa can yin no//lhag ma dang ldan pa'i rang gi ngo bo ni/ yang lhag ma dang ldan pa zhes bya ba 'di ci zhig ces dri ba sngon du btang ba can gyis ston par byed pa ni gang zhig ces bya ba la sogs pa'o/ /ma mthong ba tsam gyis gang zhig ma mthong ba kho nas ldog pa rab tu ston par byed pa/de ni lhag ma dang ldan pa yin no zhes 'dri ba dang ngag gcig nyid bstan to/ /ji skad bshad ma thag pa de'i ldog pa de ni mi mthun pa'i phyogs la ma mthong ba tsam gyis ma nges pa'i gtan tshigs kyis na mi mthun pa'i phyogs la 'jug par the tshom za bar 'gyur ro//slob dpon phyogs kyi glang pos mi mthun pa'i phyogs la 'jug pa dang ldan pa nyid kyi phyir lhag ma dang ldan pa nyid du bshad do/ /de yang 'di la yod pa'i phyir 'di yang rnam pa de lta bu kho na'o/ /phyogs dang mthun pa'i phyogs dang mi mthun pa'i phyogs kyi chos can rnam pa gsum las/gcig ni gtan tshigs yod pa yin pas de las mi mthun pa'i phyogs gcig tu lhag ma yin no/ /gnyis pa de ni gtan tshigs dang 'brel pa yin te/ de dag las ldog pa ma yin pa'i phyir ro/ /lhag ma ni ldog mtshams yin pa'i phyir 'brel pa'i yul ma yin no//de las mi ldog pa'i phyir 'di la ni de yang yod pas na lhag ma dang ldan pa zhes brjod do/ /yang ji ltar gang zhig ma mthong ba tsam gyis ldog pa brjod pa de de ltar brjod ce na/ bshad pa ldog pa sgrub pa ma mthong ba tsam ni the tshom gyi rgyu yin pa'i phyir ro/ /gal te ma mthong ba ni snang ba mi dmigs pa ma yin nam/bsgrub par bya ba med pa la med pa'i ldog pa yang des rtogs pa yin pa des na ji ltar 'di the tshom gyi rgyu yin zhe na/ 'di la bshad pa ni mi dmigs pa thams cad ni zhes bya ba'o/ /'di la lan mang du ma mthong yang dngos po nyung zad la bsgrub par bya ba med na sgrub par byed pa ma mthong ba bsgrub par bya ba'i chos can nyid la/bsgrub bya med na gtan tshigs yod pa ma yin no zhes mngon sum gyis ni nges par mi nus te/ rang gi yul tsam gyis mthar thug pa'i byed pa can nyid kyi yul du ma byas pa'i dngos po'i rang bzhin nges par byed pa ma yin pa'i phyir ro//snang ba mi dmigs pa ni mi dmigs pa las gzhan ni ma yin no/ /des na 'di bsgrub par bya ba med na med pa nyid yin la de yod na yang bsgrub par bya ba yod pa nyid do zhes nges pa skyes pa bsgrub par bya ba'i chos can la sgrub par byed pa rtogs pas bsgrub par bya ba'i chos rtogs par 'gyur ro//chos can thams cad kyang dmigs pa'i mtshan nyid du gyur pa ma yin pa des 'di de la mi snang ba mi dmigs pa nyid du 'gyur ro/ /de yang dngos po med pa rtogs par byed pa ma yin no/ /des na mi dmigs pa thams cad ni med pa sgrub par byed pa ma yin no zhes bshad do//gal te bsgrub par bya ba'i chos can la bsgrub par bya ba med pa'i chos yod par dogs pa/ mthun pa'i phyogs dang mi mthun pa'i phyogs la mthong ba dang ma mthong ba dag kho nas bzlog par bya ba ma yin nam/ ma mthong ba de yang tshad ma kho na yin pa des na bsgrub par bya ba med pa la med pa mngon sum gyis grub pas ji ltar chos can la de ltar nges par mi 'gyur zhe na 'di la bshad zin te/mngon sum ni rang gi rten nyid la de lta bu'i ngo bor gcod par byed kyi chos can gzhan la ni ma yin no//de'i yul 'di ji lta ba bzhin du gzhan yang de ltar 'gyur ro zhes bya ba'i nges pa yang med do/ /des na gang gi phyir 'dir 'di bsgrub par bya ba med na med par mngon sum gyis mthong ba de'i phyir bsgrub par bya ba'i chos can la yang de lta yin no zhes bya ba'i nges pa ci zhig yod/ gal te mthun pa'i phyogs dang mi mthun pa'i phyogs dag la de ltar mthong ba'i phyir de dang mthun pa'i bsgrub par bya ba'i chos can la rtogs pa'i rjes su dpag pa nyid nges pa nyid ma yin nam/ des na bsgrub bya'i chos can la de ltar 'gyur bar bya ba'i phyir nges pa gzhan dgos pa ma yin no//rjes su dpag pa la zhugs pa'i sngon rol du bsgrub par bya ba'i chos can la bsgrub pa'i chos yod pa dang med par the tshom 'jug kyang skyon yod pa ma yin te khyab pa ma dran pa na the tshom 'jug kyang de rjes su dpyod pas chos mthun pa dang mi mthun pa'i dpe dag la mthong ba dang ma mthong ba dran pa las bsgrub par bya ba'i chos dang ldan par nges pa'i mtshan nyid can gyi rjes su dpag pa skye ba'i phyir ro zhe na/de ni mi rung ste de bzhin du mthong ba'i 'du byed skyes pa bsgrub par bya ba'i chos can la sgrub par byed pa'i rtogs pa skyes pa kho na las dngos po'i ngo bos bsgrub par bya ba'i rtogs pa dbang med du 'jug pa'i phyir der rjes su dpag pa nyid nges pa yin par brjod dam/yang rgyu'i tshogs pa la rag las pa med par 'jug pa rang dbang du gyur pa'i rtogs pa po gnyis la de ltar dmigs pa'i phyir bsgrub par bya ba'i chos can la yang de de ltar 'gyur ba yin no zhes rigs pa la ltos nas rtogs pa yin no//de la re zhig rtogs pa snga ma ni mi 'thad de sgrub par byed pa yin no/ /bsgrub par bya ba'i chos can la bsgrub par bya ba'i chos yod par so sor nges pa ma yin na dngos po'i mthu la rtogs pa skyes kyang dngos po'i rten dang ldan pa nyid du 'gyur ba ma yin pa'i phyir tshad ma ma yin pa kho na'o//du ba dang bcas pa'i chos can gcig me dang ldan pa yin pas gzhan yang de ltar 'gyur ba yin no zhes bya ba'i dngos po yod pa'i nges pa ni ma grub bo/ /mngon sum bzhin du rjes su dpag pa'i shes pa skyes pa yang gang gi tshe don yod pa de'i tshe ni tshad ma yin no zhes de ltar rjes su dpag pa tshad ma med par nus pa ma yin no//dper na 'dir yang dngos po yod pa'i nges pa bsgrub pa la ltos par bya ba yin no/ /de yang de ltar yod pa ma yin no/ /de nyid kyi phyir rigs pa las kyang rtogs pa ma yin no/ /don yang nas yang mthong ba'i phyir don nges pa rtogs so zhe na gal te nges pa nyid rang bzhin gyi khyad par gyi bdag nyid yin na lan cig mthong bas kyang rtogs par 'gyur ro//de lta ma yin na ni yang nas yang dmigs pa yang sgrub par byed pa ma yin no/ /med na mi 'byung ba ni lhan cig yod par nges pa yin la de yang lan mang por lhan cig mthong bas rtogs pa yin no zhe na/gal te 'di yang rgyu dang bcas pa yin na lan cig nyid rtogs pas rtogs par 'gyur ro/ /gzhan du na ni mang du de ltar yin yang ji snyed dmigs pa de lta bu'i ngo bor dmigs par gyur gyi ma dmigs pa gzhan la ni de ltar 'gyur ba ma yin pa'i phyir nges pa ma 'grub bo//'bras bu la sogs pa bzhin du gang nges pas rjes su dpag par bya ba rtogs par 'gyur ba mi 'khrul pa nyid kyang dngos po'i chos yin no zhe na/ mi 'khrul ba de ci zhig de yod na gzhan yod la gzhan med na ni med pa'o zhe na/ gal te de nyi tshe ba yin na ni res 'ga' 'khrul par yang 'gyur ro//'on te thams cad pa yin na de ltar na de ltar 'thad pa yin na 'di rtogs pa go ji ltar yin gal te thams cad du de ltar rtogs pa'i phyir na/ de ni de ltar 'thad mod kyi 'on kyang thams cad du de ltar rtogs pa thams cad gzigs pa ma yin pa'i mthong ba med pa'i nges pa ni ma yin no//'on te nyi tshe ba'i rtogs pas yin na de lta na la lar 'gyur ba 'khrul par yang mi 'gal te/ lan mang du de ltar gyur pa gang yin pa gzhan gyi tshe de ltar ma yin par mi 'gyur ro zhes nges par mi nus pa'i phyir dang / de ltar ma yin na 'bras bu ma yin pa nyid du mi 'grub pa'i phyir ro/ / 'bras bu ma yin pa nyid na de med kyang yod pas mi 'khrul ba nyid med pa'i phyir ro/ /mi 'khrul na yang 'bras bu nyid do/ /tha dad pa med pa byas pa dang / mi rtogs pa dag ni gcig la ltos nas gzhan gyi ngo bo rnam par 'jig pa ma yin pa'i phyir gang zhig gang dang mi 'khrul ba'i rang bzhin yin/des na mi 'khrul ba ni ma mthong ba rtogs par bya ba ma yin no/ /de ltar na de ni the tshom sgrub par byed pa kho na'o/ /gang gi phyir de lta yin pa de'i phyir gcig ces bya ba bsgrub par bya ba log pas de med pas gzhan zhes bya ba sgrub par byed pa ldog par 'dod pas ni bsgrub par bya ba dang sgrub par byed pa de gnyis rang bzhin 'brel pa yang 'dod par bya dgos so//sgrub par byed pa bsgrub par bya bar 'brel pa zhes bya ba de lta bu'i bdag nyid can yin gyi gnyis ka yang phan tshun rag las pa'i rang bzhin ni ma yin no/ /de ltar khas mi len na gtan tshigs go bar byed pa ma yin par 'gyur ro//gzhan log pas gzhan ldog par khas blangs nas de yod na bsgrub bya yod pa yang grub pa nyid pas logs su ma bstan te/ 'phen par byed pa dang 'phang bar bya ba'i dngos pos na 'di gnyis tha mi dad par bsnyad pa'i phyir ro/ /de bas na sgrub par byed pa yod pas bsgrub par bya ba yod par 'dod pas rang bzhin 'brel bar 'gyur dgos so zhes bya ba yang brjod pa nyid du nges par bya'o//ma mthong ba tsam gyis grub pa nyid bsal ba 'di ni 'di las phyi rol pa dag bzhin du 'di pa de ltar smra ba dag la yang mtshungs pa yin no/ /'di pa nyid kyi dbang du byas nas bshad pa ni de yis te rgyu des na gtan tshigs kyi ni tshul gsum la'ang phyogs kyi chos tsam la ni ma yin gyi 'on kyang rjes su 'gro ldog gnyis la'ang nges pa brjod par mdzad pa yin no zhes bya ba ni 'ang gi sgra'i don to//nye bar gnas pa'i chos can tsam la brten pa phyogs kyi chos nyid ni mngon sum kho nas nges par nus pa de la nges par brjod par rigs kyi/rjes su 'gro ldog ni mngon sum dang mngon sum ma yin pa la brten pa nyid du shes par bya ba yin pa'i phyir mthong ba dang ma mthong ba dag las ga la nges/ des na 'di de'i yul can nyid du brjod par bya ba ma yin par 'gyur ro//des na ji ltar gang dag gi phyogs bstan pa yan lag tu 'dod pa ni ma nges pa nyid yan lag yin pa de bzhin du rjes su 'gro ldog dag kyang yin pas tshul gsum ka la nges pa mi brjod par 'gyur ro/ /gang gi phyir rang bzhin gyi 'brel par bzhed pa de'i nges pa brjod pa mdzad do/ / 'di yang brjod par mi bya'am/ don gzhan gyis bstan pa ni ma yin no zhes brjod pa'i phyir slob dpon bzhed pa de nye bar bstan pa'i dgos pa ston to/ /ma grub ces bya ba ni bsgrub par bya ba'i chos can dang 'brel par ma shes pa'o/ /ldog don ni 'gal ba'o/ /'khrul pa can ni ma nges pa'o//de dag gi gnyen por te/ de dag bsal ba'i don du tshul gsum la nges pa gsungs pa yin no/ /'di ltar 'dir nges pa khas mi len na/ 'di dag kyang ma bsal ba'i phyir gtan tshigs nyid du 'gyur ro/ /des na nges par gdon mi za bar 'dod par bya'o/ /de yang 'brel ba'i rtsa ba can nyid kyis de khas ma blangs par brjod par mi nus pas na 'brel pa yang grub bo//'brel pa med pa zhes bya ba ni rnam par 'grel pa'o/ /gang gi phyir 'brel pa med na rjes su 'gro ba dang ldog pa nges pa ma yin gyi 'on kyang ji skad sngar brjod pa bzhin the tshom nyid du 'gyur ba des na ma mthong bas grub pa nyid du khas len na de'i 'bras bu nyid khas blang bar rigs kyi gzhan gyi 'bras bu gzhan ston pa ni ma yin no//des 'brel pa'i 'bras bu zhal gyis bzhes pas na 'brel pa nyid ston par mdzad pa na nges par bshad pa yin no/ /gzugs rtogs pa'i 'bras bur gyur pa la brten nas nyan pa'i rnam par shes pa bsgrub par khas blang bar ni mi nus/ma grub ces bya ba la sogs pa rnam par 'grel pa ni de la zhes bya ba'o/ /rjes su 'gro ba nges pas ni 'gal ba bsal te byas pa nyid rtag par rjes su 'gro ba med pa'i phyir ro/ /des na rjes su 'gro ba nges pa go bar byed par ston par mdzad pas byas pa nyid rtag pa'i sgrub par byed pa ma yin no zhes brjod pa yin no//gal te rjes su 'gro ba la the tshom za ba yin yang 'gal ba gtan tshigs ma yin pa nyid ma yin nam/ des na 'gal ba ni nges par brjod pa spang bar bya ba ma yin te/ byas pa nyid ni bzlog pas khyab par nges pa'i phyir ro//gal te 'di mi rtag pa la the tshom za ba ma yin na/ de'i tshe rtag pa'am 'on te mi rtag pa la yod pa yin zhes de rtag pa la yang 'gyur ba yin no/ /des na rjes su 'gro ba nges pa gtan tshigs yin na byas pa nyid rtag pa la the tshom za ba gtan tshigs ma yin pa nyid du 'gyur ro//gang gi tshe 'di bzlog par nus pa de'i tshe 'di rtag pa la yang the tshom med do/ /des na the tshom za ba gtan tshigs yin yang 'gal ba gtan tshigs ma yin no/ /des na ji ltar 'di nges pa brjod pas gsal bar bya ba yin/ 'gal ba la rjes su 'gro ba med pa'i phyir rjes su 'gro ba nges pas spong ba yin no zhe na/der yang nges pa smos pa don med de the tshom za ba la yang rjes su 'gro ba med pas rjes su 'gro ba smos pa nyid kyis gsal bar grub pa'i phyir ro/ /brjod pa bzlog pas khyab pa yang mang du mthong ba la brten nas nges par mi nus pa kho na ste/des na byas pa mi rtag pa la yang ma nges pa kho na'o/ /des na the tshom za ba gtan tshigs yin na 'di gtan tshigs su 'gyur ba kho na'o/ /de ltar na nges par brjod par bzlog par bya ba rigs pa nyid do/ /'gal ba'i phyogs dang mthun pa ni rjes su 'gro ba ma nges pa ste/bzlog pa rjes su 'gro ba nges pa med pa'i phyir 'gal ba nyid ma yin nam/ rjes su 'gro ba ma nges pas bsal bar bya ba yin pa'i phyir ni 'gal ba'i phyogs dang mthun pa zhes brjod do/ /ldog pa nges pas ni ma nges pa mi mthun pa'i phyogs la 'jug pa bsal te/de ni mi mthun pa'i phyogs la 'jug pa med par nges par bsal bar bya ba yin pa'i phyir ro/ /des na de ltar gnyi ga la 'jug par nges pa nyid bsal gyi thun mong ma yin pa ni ma yin no/ /de'i phyogs dang mthun pa lhag ma dang ldan pa la sogs pa yang spangs te/ldog pa nges pas dgag par bya ba nyid kyis de'i phyogs dang mthun pa'i phyir dang mi mthun pa'i phyogs dang 'jug par the tshom za ba yang lhag ma dang ldan pa yin pa'i phyir ro/ /gnyi ga la yang rab tu grub pa ni zhes bya bas gang yang rung ba la ma grub pa bsal ba yin no zhes brjod pa ni gnyi ga la zhes bya ba'o//de ltar rjes su 'gro ba dang ldog par rtogs pa nges par brjod pas gsal bar bya ba gang yin pa de bstan nas rab tu grub pa smos pa'i bsal bar bya ba yang bshad pa ni/ rab tu grub pa zhes smos pas ni the tshom za ba dag kyang bsal to/ / de dag kyang gang zhe na lhag ma dang ldan pa dang thun mong ma yin pa zhes smos so/ /gang la the tshom za zhe na mthun pa'i phyogs dang mi mthun pa'i phyogs dag la zhes bya bas ston to/ /lhag ma dang ldan pa ni mi mthun pa'i phyogs la the tshom za la thun mong ma yin pa mnyan bya nyid la sogs pa ni mthun pa'i phyogs dang mi mthun pa'i phyogs gnyis ka la yang ngo //yang na gnyi ga yang gnyi ga la the tshom za ba yin te phru ba'i nang na 'dug pa nyid ni mthun pa'i phyogs la yang the tshom za ba'i phyir ro/ /de ni mthong ba'i tshos pa 'ga' dag la mthun pa'i phyogs la mthong ba ltar mi mthun pa'i phyogs la yang ma mthong ba nyid do//de ji ltar ma nges par byed pa ma yin pa de bzhin du mthun pa'i phyogs la mthong ba yang yin no/ /de bzhin du thun mong ma yin pa la yang mi mthun pa'i phyogs la yang ma mthong ba yang yod pa yin no/ /des na gnyi ga gnyi ga la yang yin par rigs so//de'i phyir ji skad bshad pa'i sel ba'i 'bras bu can nyid kyi nges par brjod pa ni 'brel pa rtog par byed pa'i 'bras bu can nyid rtogs pa yin no/ /slob dpon 'brel pa zhal gyis bzhes par bsgrub par bya ba'i phyir shes par byed pa gzhan yang bshad pa ni de ltar ma yin te zhes bya ba'o//'brel pa ston par byed pa na nges pa bshad pa yin no zhes bshad pa gang yin pa de ltar ma gyur na zhes bya ba'i tha tshig go/ /de'i tshe ni 'brel pa med par yang ma mthong ba tsam gyis ldog par grub pa yin par 'gyur ro/ /de brjod pa ni 'brel pa med kyang zhes bya ba'o//de lta yin yang nyes pa gang yod pa de bshad pa ni 'khrul pa can gyi gnyen por ni zhes bya ba'o/ /ma mthong ba tsam gyi ldog pa yin na 'dis gang yin pa zhes bya bas mi mthun pa'i chos brjod pa bzung nas gal te zhes bya bas de'i dgos pa rtogs par bya ste/de zhes bya bas bstan pa de ma smos kyang rtogs par 'gyur zhes dogs pa bkag pa'i mthar thug pa nyid kyis ngag mthar phyin par nye bar bstan par 'gyur ro/ /'brel pa yang mdo'i mdo sbyor bzhin kho nar 'brel to/ /'khrul pa can ma nges pa spong bar mi mthun chos brjod pa gang yin pa'o//'di nyid rnam par 'grel pa ni re zhig ces bya ba'o/ /chos mthun pa dang mi mthun pa gnyi ga brjod par bya ba gang yin pa'i de ni rigs so/ /rigs pa nyid ston pas gnyi ga sgrub pa la nye bar mkho ba ston pa ni 'gal ba dang ma nges pa'i gnyen por zhes bya ba yin no//brjod pa 'di ni 'gal ba dang ma nges pa'i gnyen por gyur pa yin no/ /chos mthun pas rjes su 'gro ba bstan pas na 'gal ba sel bar byed do/ /bsgrub bya nyid dang rjes su 'gro ba yin gyi bsgrub bya las bzlog pa dang ni ma yin pa'i phyir ro/ /chos mi mthun pas ni ldog pa rtog pa'i phyir mi mthun phyogs la 'jug pa'i mtshan nyid ma nges pa sel ba yin no//chos mi mthun pa smos pas ni ma nges pa'i gnyen por ro zhes bya ba ni tshig le'u byas pa'i don ston pa'o/ /sngar ni don 'di khas blangs pa'i rang bzhin slob dpon gyi tshig brjod do/ /gang yin pa zhes bya bas bzung ba mi mthun pa'i chos brjod pa de zhes 'brel par 'gyur ba yin no//gal te zhes bya bas ni de'i dgos pa dgos par byed do/ /gal te mi mthun pa'i chos brjod pa des ma mthong ba'i 'bras bu can yin na'o/ /'di nyid gal te mi mthun pa'i chos brjod pa gang yin pa des mi mthun pa'i phyogs la ma mthong ba ston par byed na zhes bya bas rnam par bkral nas de med kyang dgos pa de grub par mdos rjod par byed pa ni de ma smos kyang rtogs par 'gyur zhes bya ba'o//ma mthong ba de ni mi mthun pa'i chos brjod bya rtogs pa kho na'o/ /'di skad brjod pa yin te ji srid du mi mthun pa'i phyogs la med pa rab tu ston par byed pa'i tshad ma bstan pa ma byas kyi bar du mi mthun pa'i phyogs la med pa tsam la bstan pas ni mi mthun pa'i phyogs la med par mi rtogs so//des na chos mi mthun pa bstan pa ni de 'dzin par byed pa'i tshad ma'i yul can gyi dran pa sad par byed pa nyid do//dran pa'i tshad ma des kyang tshad ma dang ldan pa'i chos mi mthun pa la yang dag pa kho nar ma nges pa bsal bar 'gyur ro/ /ldog pa nges par byed pa'i tshad ma yang mthong ba kho na yin la de ni chos mi mthun pa ma brjod kyang rtogs pa kho na'o/ /'di ltar chos mthun pa nyid brjod par bya ba yin te bsgrub par bya ba rtogs pa'i dus na de la rjes su 'gro ba 'dzin pa'i mthong ba ni med do//de med par rjes su 'gro ba ma mthong ba gtan tshigs las don rtogs pa med do/ /de brjod na ni yul de la sngon zhugs pa khyab pa 'dzin pa'i dus na yod pa mthong ba'i yul can gyi dran pa skye'o//chos mi mthun pa brjod pas rtogs par bya ba mthong ba med pa ni de nyid kyi tshe yod pa nyid de des na chos mi mthun pa bstan pas don ci yod/ 'di ltar bsgrub bya rtogs pa'i dus na yang 'dis me med pa 'ga' zhig tu du ba mthong ba ni med la/sngar gyi ma mthong ba yang rang bzhin 'di nyid du zad do/ /du ba yod na me yod pa ni de'i tshe ma dmigs te/ de'i phyir chos mthun pa brjod par rigs te/ de de'i tshe ma rtogs pa'i phyir ro/ /ldog pa ni de nyid kyi tshe rtogs pa kho na'o/ /'di nyid bshad pa ni de la ldog pa brjod pa'i sngon rol na brjod pas ldog par 'gyur ba mi mthun pa'i phyogs la mthong ba'i rang bzhin du 'khrul pa gang yin pa de ni med do//de'i tshe yang ma mthong ba yod pa kho na bas brjod pa don med do/ /gal te de'i tshe mi mthun pa'i phyogs la mthong ba'i rang bzhin 'khrul par gyur na ni de'i tshe sngon rtogs pa'i ma mthong ba nye bar ston pa'i tshig de gsal ba'i phyir brjod par yang 'gyur ba zhig na gang gi tshe 'khrul pa yang med pa de'i tshe yod bzhin pa nyid kyi ma mthong ba khyad du bsad de 'bras bu'i med pa'i tshig tsam nye bar bkod pa 'dis ci zhig bya/'di nyid rgya cher rnam par phye nas bstan pa'i phyir gal te tshig gis ma mthong ba las zhes dogs pa bsu nas/mthong ba ma rtogs pa ni zhes bya bas lan 'debs so/ /mthong ba ni mthun pa'i phyogs la gtan tshigs yod pa'i yan lag yin na de bsgrub par bya ba rtogs pa'i dus na med do zhes sngon zhugs pa'i mthong ba dran pa la gnas pas rtogs par gyur na yan lag yin no//gal te bsgrub par bya ba rtogs pa'i dus na mthong ba bzhin du ma mthong ba yang med do zhes bya bar 'dod na ni/ de'i tshe mi mthun pa'i phyogs la mthong ba med pas mthong bar 'gyur ro//de med do zhe na ni ma mthong ba grub pa'i phyogs brjod pas ci bya de bshad pa ni mthong ba ni zhes bya ba'o/ /gal te ma mthong ba yod kyang 'di ma brtags pa'i phyir ma 'phrigs pas na de'i don du brjod do zhe na ma yin te/ sgrub par byed pa'i skabs nyid kyis yongs su rtogs pa yod pa'i phyir ro//gang gi tshe 'di rang nyid rjes su dpag pa la 'jug gam gzhan gyis bcug pa de'i tshe ji ltar phyogs kyi chos mthong ba na bzung ba'i rjes su 'gro ba dran pa la ltos pa de bzhin du mi mthun pa'i phyogs la ma mthong ba la ni ma yin no/ /de'i mthun pa'i phyogs la yod dam med ces the tshom za ba ni rang nyid de ltar dmigs pa dran pa'am chos mthun pa brjod pas bcug pa las ldog pa yin gyi/mi mthun pa'i phyogs la yod pa dang med par the tshom za ba de la ma mthong bas bzlog par bya ba ni de'i dus dus nges pa'i ma mthong ba nyid kyis bzlog pa yin no/ /de la ni dran pa'am de sad par byed pa'i tshig gis ci yang byar med do//de'i tshe ma dmigs kyang sngar yang dmigs par dogs pa bsal ba'i phyir ma dmigs pa dran pa'i don du brjod do zhe na/ 'di la sngon brjod pas ldog par 'gyur ba mthong ba'i 'khrul pa gang yin pa ni med do zhes bshad zin to/ /gal te da ltar yod na sngon gyi ma mthong ba dran pa la ltos pa yin te/zla ba gnyis la sogs par shes bzhin du 'khrul pa la 'khrul par rtogs kyang mi ldog pa'i chos can nyid kyis de'i tshe ma mthong bas ma nges pa yin yang sngon gyi ma mthong ba la ltos nas nges pa'i phyir ro/ /sngar ma mthong ba la 'khrul par yang da ltar gyi la ltos nas yin no//'on te sngar mthong bar the tshom za ba nyid 'khrul par brjod do zhe na/ de yang mi rigs te de yang med pa'i phyir ro/ /sgrub par byed pa mi mthun pa'i phyogs sam mthun pa'i phyogs la mthong ngam ma mthong snyam du the tshom za ba ni ma yin gyi 'on kyang bsgrub par bya ba rtogs pa'i dus na the tshom med pa nyid kyis mthong ba dang /ma mthong ba gnyis ma rtogs pas kho na ste/ de sngon brjod pa ldog par 'gyur ba mthong ba'i 'khrul pa gang yin pa ni med do zhes brjod pa yin no/ /de la 'dir brjod pa mthong ba ni de'i dus na med pa'i phyir dran par bya ba nyid kyis ltos par bya ba nyid du rigs pa yin no//ma mthong ba ni de'i tshe yang yod pa kho na bas de la dran pas ci zhig bya/ ci ste yang sngon gyi mi mthun pa'i phyogs la ma mthong ba la the tshom za na de lta na 'o na ni brjod kyang de mi ldog ste tshad ma ma yin pa'i phyir ro/ /tshig ni ma mthong ba nges par rtogs pa'i 'du byed sad par byed pa nyid kyis dran par byed pa na ldog par byed pa yin no zhe na/ma yin te 'bad pa med par dran bzhin du the tshom yang med pa'i phyir ro/ /'bad rtsol las ni dran pa'i sa bon yod na dran pa nyid kyis the tshom med par 'gyur ro/ /'bad rtsol las kyang mi dran pa'i the tshom za ba gang yin pa de la ni tshig gis phan pa ma yin no//des na de'i dus kyi the tshom med pa'i ma mthong ba nyid la brten nas mi mthun pa'i phyogs la med pa nges par bya ba kho na yin no/ /yang nas yang du ma mthong bas khyab pa rtogs par bya ba yin pa'i phyir de yang nas yang du yin par sgrub pa'i rgyur sngon ma mthong ba yang dran par bya ba yin no zhe na/ma mthong ba la ni yang nas yang gi rang bzhin yod pa ma yin te/ dngos po med pa'i phyir ro/ /rten de dang de dag la des dben par dmigs pa de yang nas yang nyid do zhe na/ 'di la yang yod pa nyid de de'i tshe yang rten dpag tu med pa la ma dmigs pa'i phyir ro//smras pa gal te 'dis de'i tshe yang mi mthun pa'i phyogs la yod pa ma dmigs pa de lta na yang ma dmigs pa'i mi dmigs pa tsam gyis med do zhes bya ba ma yin pa nyid pas de'i don du brjod do/ /des ni 'di'i 'di ni rnam pa 'ga' zhig ltar ma dmigs pa yin no snyam du 'di ni thams cad du mi mthun pa'i phyogs la ma dmigs pa yin no zhes bya ba la log par rtog pa ldog go zhe na/gal te ma dmigs pa'i zhes bya bas dogs pa de bsu nas/ med ces bya ba'i zhes bya bas sel bar byed do/ /bsgrub par bya ba med pa la med ces bya ba'i tshig gang gis bsgrub bya med na med par brjod pa ste/de ni chos mi mthun pa'i ngag nyid do/ /chos mi mthun pa'i ngag gis kyang de med pa kho na yin no/ /'o na ji ltar med par 'gyur zhe na/ bshad pa gal te ji ltar de rnam pa gang gis med rigs brjod na/ de tshe med ces bya bar rtogs/ /rnam pa gang gis med pa'i rigs pa zhes bya ba ni rnam pa nyid rigs pa'i rang bzhin du bshad pa yin no/ /tshig gis ni mi mthun pa'i phyogs la med par ston pa yin no/ /mi mthun pa'i phyogs kyang gang la bsgrub par bya ba med pa de yin no/ / bsgrub par bya bas stong pa'i rten gyi khyad par ni de'i tshe yang dmigs pa kho na yin no/ de dag la yang sgrub par byed pa mi dmigs pa ni ma yin no/ /des na gang du ma dmigs pa la yang yid mi ches pa der tshig kyang de ston pa nyid kyi 'bras bu dang ldan pa yin gyi med pa ston pa ni ma yin no//de ltar des na de'i tshe tshad mas grub pa nyid ston pa'i phyir ro/ /de'i phyir chos mi mthun pa brjod pa ni tshad ma ston pa gtsor byed pa nyid do/ /tshad ma da ni de'i tshe na yod pa ma yin yang yid brtan du nus pa med pa'i phyir/ brjod kyang don med pa kho na'o/ /de'i phyir tshig gis kyang med do zhes mi rtogs so//'di nyid rnam par 'grel pas bshad pa ni gal te zhes bya ba'o/ /'dis ni mi dmigs pa la yid mi ches pa nyid do zhes bshad do/ /de bzhin du chos mi mthun pa brjod pa yang yin no zhes bya ba ni brjod pas kyang zhes bya ba'o/ /de yang mi dmigs pa rjod par byed pa nyid do//gal te bsgrub par bya bas gtan tshigs la khyab pas khyab par byed pa med pa la khyab par bya ba med pa yin nam/ 'di dag gis bsgrub par bya ba dang / sgrub par byed pa'i dngos po de yang sgrub par byed pa rtogs pa'i dus nyid na rtogs par bya ba ma yin gyi/ 'on kyang khyab pa 'dzin pa'i dus su rtogs pa yin no/ /khyab pa yang dang yang zhugs pa'i mthong ba dang ma mthong ba dag gis rtogs pa yin no/ /des na 'di dag gis nges pa'i bdag nyid kyi khyad par khyab pa 'dzin pa'i dus na rtogs pa gang yin pa de bsgrub bya rtogs pa'i dus na tshig gis dran pa'i rten du nye bar bsgrub pa'i phyir bsgrub bya rtogs pa'i dus na ma mthong ba yod kyang der yan lag ma yin no//de'i bsgrub bya med na sgrub par byed pa med pa'i mtshan nyid can gyi khyad par ni chos mthun pa brjod pas rtogs par byed pa yin no zhes bya ba 'di ni rigs so zhes bya ba'i dogs pa 'di bsu nas bshad pa ni/bsgrub par bya ba gcig mi dmigs pas gzhan med pa sgrub par byed pa ma yin te ha cang thal bar 'gyur ba'i phyir ro/ /gzhan nyid du khyad par med pa'i phyir bum pa log pas kyang snam bu ldog par 'gyur ro/ /bsgrub par bya ba dang sgrub par byed pa dag 'brel pa med par ni gang las dngos po'i mthu nyid kyis gcig yod na gzhan yod par 'grub pa khyab pa dang khyab par byed pa'i dngos po yang mi 'grub bo//gal te 'brel pa med kyang gcig med pa'i phyir gzhan med do zhes bya bar 'dod pa ni ha cang thal bar 'gyur ro/ /tshig ni mi dmigs par rjod par byed pa nyid spangs nas tshig gi rang bzhin nyid kyis yan lag ma yin no zhes bshad pa ni med do zhes brjod pas kyang zhes bya ba yin no//tshig gi rang bzhin tsam nyid kyis ni tshig gis med par go bar byed pa ma yin gyi 'on kyang sngon zhugs pa'i tshad ma ston par byed pa nyid kyis so//des na ji ltar zhes ji ltar yang chos mi mthun pa brjod pas/ ma nges pa spangs pa ma yin te/ tshig tsam gyi rang bzhin gyis ma yin/ gzhan med na gzhan med pa go bar byed pa nyid kyis ma yin/ sngar zhugs pa'i tshad ma ston par byed pa nyid kyis ma yin te ma mthong ba tsam gyis lus can de ni de'i tshe yang yod pa'i phyir ro//de lta bas na bsgrub par bya ba med pa la sgrub par byed pa ldog par te/ med par 'dod pas ma mthong ba tsam gyis grub pa spangs te/ gang gis na rtogs pa po de la ldog pa zhes bya bar rtogs par 'gyur ba'i rigs pa brjod dgos so//nyes pa gzhan yang bstan pa'i phyir spangs zin pa nyid yin yang rtsod par byed pa des med pa la zhes bya ba'o/ /bsgrub par bya ba de med pa la sgrub par byed pa de mi dmigs pas na bsgrub par bya ba la med pa'i mtshan nyid kyis ldog pa grub bo zhe na/'di dgag pa'i phyir gal te zhes smos so/ /gal te bsgrub par bya ba med pa la gtan tshigs ma mthong ba'i phyir bsgrub par bya ba med pa las ldog par 'gyur na ji ltar lhag ma dang ldan pa'i rjes su dpag pa 'khrul pa can yin/ de la yang mi mthun pa'i phyogs la ma mthong ba yod pa'i phyir ro//'khrul pa can du yang slob dpon gyis gsungs so/ /des na gtan tshigs thams cad de dang mtshungs pa'i 'khrul pa can du brjod par 'gyur ro/ /lhag ma dang ldan pa de yang gang yin zhe na de'i rang bzhin ngo bo bshad pa ni/dper na zhes bya ba'o/ /'bras bu 'di dag ni chos can smin pa'am ro bro ba yin te zhes bya ba ni bsgrub par bya ba gzugs khyad par med pa'i phyir ram/ gcig las skyes pa'i phyir zhes bya ba'i gtan tshigs zos pa dang 'dra'o zhes bya ba ni dpe'o/ /da ni 'di ji ltar mi mthun pa'i phyogs la ma mthong ba de 'chad do//lhag ma dang ldan pa 'di la yang bsgrub par bya ba med pa la gtan tshigs mi dmigs pa yod pa yin te/ de bas na ji ltar 'khrul pa yin 'khrul pa can ni ldog pa ma nges pa nyid yin la/ ldog pa nges par byed pa mi dmigs pa tsam yang yod pa nyid des na 'khrul pa dang ldan par 'gyur/yal ga de las skyes pa nyid ni ro de med pa la dmigs pa med do/ /'on te yang gal te zos pa'i 'bras bu la yal ga de las skyes pa nyid yod na de'i rang bzhin du dmigs pa de lta na yang 'bras bu gzhan la de las skyes pa nyid de med par yang 'gyur ro//gang gis de la ro der rtogs par 'gyur ba 'bras bu gzhan yang zos pa ni ma yin te/ des na ldog pa la the tshom za'o/ /'bras bu gzhan dag la ni de las skyes pa nyid bsgrub par bya ba'i ro dang ldan pa nyid la 'jug gam ro gzhan dang ldan pa la 'jug pa yin zhes de rtogs par byed mi nus so//de nyid kyi phyir 'di lhag ma dang ldan pa zhes brjod de/ bsgrub par bya ba yod pa dang med par the tshom za ba 'khrul pa'i yul nges pa med pa'i 'bras bu gzhan yod pa'i phyir ro zhe na/ dogs pa 'di bsu nas bshad pa ni/ brjod par 'dod pa ma lus pa phyogs su byas na zhes bya ba'o//'dir gtan la ma phebs pas gcig zos kyang lhag ma 'khrul pa'i yul nyid du brjod par 'dod pa gang yin pa'i brjod par 'dod pa de dag ma lus par phyogs su byas par gyur na'o/ /'di skad brjod pa yin te/ 'khrul pa'i yul nyid du dogs pa thams cad phyogs su byas pa la ni ro de dang de ma yin par the tshom za ba rjes su dpag pa nyid kyis bzlog par bya ba yin gyi phyogs las bsgrub par bya ba'i chos the tshom za bas ni gtan tshigs kyi ldog pa ma nges pa nyid kyis 'khrul par 'gyur ba ma yin no// phyogs nyid ni 'khrul pa'i yul ma yin te de'i phyir zos pa'i 'bras bu la de las skyes pa nyid yod na ro de mthong ba'i phyir rjes su 'gro ba rtogs la ro de med par ni 'gar yang de las skyes pa nyid ma mthong bas bsgrub par bya ba med pa la de ma dmigs pa'i phyir ldog par rtogs so//gal te khyab pa 'dzin pa'i dus na mthun pa'i phyogs dang cig shos la yod pa dang med par rtogs pa'i gtan tshigs bsgrub par bya ba rtogs pa'i dus na yan lag ma yin nam/ 'bras bu de zos pa'i dus nyid khyab pa 'dzin pa'i dus yin no zhe na/ de'i tshe yang bsgrub par bya ba med pa la gtan tshigs med pa mi mthun pa phyogs la bltar rung ba mthong bas rtogs par bya ba yin na lce'i dbang po byed pa med pa ni ro bltar rung ba ma yin no//yal ga la sogs pa 'bras bu de tsam zhig skyed pa yin pa'i phyir de las skyed pa nyid gzhan la med pa yin nam/ 'on te ro de med pas yin zhes ma mthong yang ldog pa la the tshom za ba nyid do zhe na/ brjod pa ro gzhan nyams su myong ba la yang ro de med par de las skyes pa dmigs pa ni med do/ /de la ni de las skyes pa nyid dmigs pa'i mtshan nyid du gyur pa kho na yin te/ 'bras bu gzhan las skye bar dmigs pa'i phyir ro//ro gzhan dmigs pa'i phyir yang dmigs par rung ba'i ro de med pa yin no/ /de ltar smra ba la ni bsgrub par bya ba dang sgrub par byed pa snang ba mi dmigs pas ci yang byar med de mthong ba'i rten tsam dngos po med par sgrub pa'i yan lag ma yin pa'i phyir ro/ /thams cad du de ltar med pa ni ldog pa yin no zhes bshad zin te/des na 'ga' zhig tu khas blangs nas dmigs par rung ba mi dmigs pa nyid yin yang / thams cad du de lta bu yin pa la ni dmigs pa log pa tsam nyid tshad mar bya ba yin no/ /des na ro gzhan dang skye ba gzhan ma dmigs kyang ro de med pa nyid la de las skyes pa nyid dmigs pa med pa ni grub pa kho na'o//slob dpon gyi gzhung 'chad par byed pa kha cig na re ni 'di lta ste mngon sum gyis gnod par dogs pa'i 'khrul pa yin no zhes zer ro/ /gtan tshigs kyis yul la zhugs su zin kyang 'di la mngon sum gyis gnod par dogs pa yin no//'di ltar de las rjes su dpag pa'i don la zhugs pa res 'ga' de la ro gzhan dmigs pa srid pa yin no/ /de ltar yin yang de'i 'bras bu nyid kyi gtan tshigs kyis sngo bsangs zhes rjes su dpag pa na de sngo bsangs ma yin par yang mngon sum gyis mthong ba de bzhin du 'di la yang 'gyur ro//de nyid kyi phyir gtan tshigs la tshul gsum yod kyang gnod pa med pa'i yul can nyid kyang mtshan nyid du bstan par bya ba yin no zhe na/ ma yin te zhes pas de 'gog par byed do/ /rjes su dpog pa'i dus na phyogs lkog tu gyur pa yin pa'i phyir phyogs su byas pa'i yul la mngon sum gyis gnod pa med pa kho na'o//de'i phyir rjes su dpag par bya ba'i chos ni rjes su dpag pas grub pa nyid do/ /bden te rjes su dpag pa 'jug pa'i gnas skabs na phyogs lkog tu gyur pa yin pa'i phyir de la chos mngon sum gyis gnod pa med pa de lta na yang 'dir yod pa nyid kyis gnod pa ni ma yin te 'on kyang gnod par dogs pa nyid do zhen ci ste zhes bya bas dogs pa 'di bsu nas de lta bur dogs na zhes bya bas zlog par byed do//gal te yongs su dag pa'i tshul gsum pa can gyi rjes su dpag pa yod kyang gnod par dogs pa 'khrul pa nyid yin na/khyed kyi phyogs la rjes su dpag pa mtha' dag de bzhin du 'gyur te rjes su dpag pa mngon sum gyi rtsa ba can yin pa'i phyir gyi dngos po'i rtsa ba can ni ma yin pa'i phyir dang 'byung bar 'gyur ba'i gnod pa yang de'i tshe nyid rtogs par mi nus pa'i phyir ro//de'i phyir rjes su dpag pa 'ga' yang tshad mar mi 'gyur ro/ /de bshad pa ni me la sogs pa'i yul can gyi rjes su dpag pa gzhan la yang gnod pa med par nges pa'i phyir ro/ /de'i phyir tshul gsum pa las skyes pa'i rjes su dpag pa yang gnod pa med par gtan la phab pa la brten nas ltos pa nyid yin na rjes su dpag pa 'jig pa nyid du 'gyur ro//des na gnod pa med pa'i yul can nyid du smra ba'i gzhung la tshad ma zhugs pa gnod par byed pa yin te de nyid gnod byed du 'thad pa'i phyir ro/ /ma zhugs pa the tshom za ba dang 'brel pa'i byed pa'i khyad par gnod pa khas len na ni de yod pas rjes su dpag pa mi 'jug par yang brjod pa'i phyir rjes su dpag pa thams cad la yid brtan du med de/gnod par byed pa med pa shes par mi nus pa'i phyir ro/ /nged kyi rjes su dpag pa la ni thal ba 'di med de dngos po'i rtsa ba can yin pa'i phyir ro//mngon sum la ni 'gyur ba yin na de la yang dngos po'i gnas thabs rjes su rtogs pa phyi mas sel ba yin no/ /phyi rol gyi don la mi srid na ni/ gang la de mi srid pa'i rang rig pa de nyid rnam par dpyod pa la mkhas pa rnams kyi tshad ma yin no/ /des na de ltar 'dir phyogs su byas pa'i yul la med par brjod pa yin te/lkog tu gyur pas gnod pa 'jug pa med pa'i phyir ro/ /gnod pa nyid du dogs pas skyon can du 'gyur na ni/ rjes su dpag pa chad par 'gyur ro/ /de'i phyir ma bsal ba nyid kyis phyogs phyogs kyi bdag nyid thob pa dang gtan tshigs dang dpe'i nyes pa rnams med pa yin yang sngon gyi 'chad pa po rnams kyis gnod pa med pa med pa'i yul can nyid bla lhag pa nye bar bkod de de'i phyir de med par rjes su dpag pa 'di 'khrul pa can yin no zhes dogs pa bsu nas slob dpon gyis 'dir gnod pa med pa'i yul can nyid kyang gzhung gzugs pa'i phyir dogs pa'i gnod pas gnod pa ni ma yin gyi/'on kyang zhugs pa'i gnod pa dag kho nas yin no zhes de ltar nye bar bkod do/ /gnod pa ma byas pa'i yul can nyid med pas na nye bar bstan pa'i 'jig rten rgyas par mdzad pas 'di rjes su dpag par mi bzhed pa yin gyi/ ldog pa sgrub par byed pa ma mthong ba the tshom gyi rgyu yin pa'i phyir ni ma yin no zhes 'chad pa po rnams kyis 'di rnam pa gzhan du bsal to//da ltar ni gtan tshigs kyi chos thams cad yod kyang gtan tshigs ma yin pa nyid du gsungs pa gang yin pa de ni ma mthong bas rtogs pa'i ldog pa can nyid kyis yin no zhes bya bar khong du chud do zhes grub par 'gyur ro//de ltar ma mthong bas ldog pa grub pa yin na lhag ma dang ldan pa 'khrul pa can nyid du mi 'gyur ro zhes bsgrubs nas 'brel pa khas lan na 'khrul pa can nyid ji ltar yin pa de ston pa ni/ ldog pa med pa ni ste ldog pa dang mi ldan pa ni lhag ma dang ldan pa yin no//ji ltar zhe na the tshom za ba'i phyir ro/ /bsgrub bya med pa las gtan tshigs med par the tshom za ba de'i phyir 'di ldog pa med pa yin no/ /gang the tshom za ba de ldog pa med pa nyid yin no zhes bya ba de nyid gang las she na/ bshad pa ni'i sgra ni gtan tshigs te/gang gi phyir ldog pa ni sgrub pa yin la de la de yang grub pa kho na yin no/ /de'i don 'di yin te the tshom za ba ldog pa med pa nyid du ni mi 'grub kyi 'on kyang the tshom du gyur pa nyid yin pa des na ji ltar ldog pa med par brjod ces brtsad par 'gyur ba gang yin pa med pa tsam ni ldog par mi brjod kyi 'on kyang 'dir sgrub par byed pa'i chos su gyur pa'i ldog pa brjod pa yin no//de yang grub pa nyid de ltar 'gyur ba yin no/ /gang gi phyir 'di grub pa nyid de ltar 'gyur ba de'i phyir de lta bu'i ngo bo sgrub par byed pa nyid ni nges pa la ltos so/ /'di grub pa ni nges pa nyid yin la/grub pa yang sgrub par byed pa yin no/ /des na nges pa la ltos pa'i phyir the tshom za na ldog pa med par brjod do/ /the tshom za na ldog pa med pa la rag mod/ 'dir de nyid ga las she na/ bshad pa de der snang ba mi dmigs pa yin pa'i phyir mi dmigs pa'i sgo nas bltar rung ba'i yul 'ga' zhig la med par grub tu zin kyang bsgrub par bya ba med pa la sgrub par byed pa med pa'i mtshan nyid kyis med pa ni snang ba mi dmigs pas kyang grub pa yin te/'on kyang rgyu dang khyab par byed pa mi dmigs pa dag las yin no zhes dogs nas kyang gi sgra srid pa la yin no/ /'brel pa med pa ni thams cad la med pa mi 'grub pa'i phyir ro//bltar rung ba'i yul 'ga' zhig la med pa grub tu zin kyang snang ba mi dmigs pa yin yang thams cad du rnam par 'jog na ni/ de nyid las thams cad la med par rtogs pa'i phyir/ bltar mi rung ba mi dmigs par 'gyur ro/ / des na med pa sgrub par byed pa ma yin no/ /'brel pa yod na ni de ltar 'gyur ba yin no/ /de ni yod pa ma yin no/ /ldog pa ma mthong bas sgrub pa ma yin pa la gtan tshigs gzhan yang bstan pa'i phyir gal te ma mthong bas ldog par 'gyur zhes bya ba'i skabs la gtan tshigs gzhan snon 'di bstan pa ni/gzhan yang zhes bya ba yin no/ /gal te ma mthong ba tsam gyis mi mthun pa'i phyogs las ldog na de'i rjes su 'gro ba dang bral ba ldog pa tsam dang ldan pa yang go bar byed pa'i gtan tshigs su 'gyur ro/ /de nyid ston pa ni gson po'i lus 'di ni zhes bya ba yin no//bdag med pa yin na zhes bya ba ni bdag gis stong na'o/ /srog la sogs pa dang ldan pa ma yin pa nyid du thal bar 'gyur ba'i phyir ro/ /gal te gson po'i lus bdag med pa yin na de'i tshe'i srog la sogs pa dang mi ldan pas khyab pa'i phyir de yang de la khyab par 'gyur ro//de ltar rnam pa 'dis de zhes bya ba srog la sogs pa dang mi ldan pa ste de log pas khyab par bya ba bdag med pa ldog pa'i phyir bdag yod pa rtogs par 'gyur ro/ /srog la sogs pa dang mi ldan pa log pa ni srog la sogs pa nyid yin la bdag med pa la sogs pa yang bdag nyid do//des na srog la sogs pa las bdag rtogs par 'gyur ro zhes brjod par 'gyur ro/ /de ltar ldog pa can nye bar bkod nas ji ltar bdag med pa srog la sogs pa med pa'i khyab bya yin pa de bstan pa'i phyir de khyab par byed pa nyid du tshad mas grub par ston pa ni bdag med pa'i bum pa la sogs pa mthong ba dang /ma mthong ba yin la de dag la ni srog la sogs pa med pa yang mthong ba de bas na srog la sogs pa med pa bdag med pas khyab pa yin no/ /de lta yin na gang gi phyir bdag med pa la srog la sogs pa med pas khyab pa grub pa de'i phyir khyab par byed pa srog la sogs pa gson po'i lus la med par mngon sum nyid kyis grub pa'i phyir bdag med pa yang med par rtogs pa de bas na/srog la sogs pa dag las bdag rtogs par 'gyur ro/ /de lta yin dang srog la sogs pa bdag med pa la med pa zhes grub pa yin te/srog la sogs pa med pas bdag med pa la khyab pa'i phyir dang / khyab par bya ba yod na khyab par byed pa gdon mi za bar yod pa'i phyir ro/ /de'i phyir bdag med pa yod na srog la sogs pa med pa yod pa'i phyir 'dir bsgrub par bya ba med pa la sgrub par byed pa med pa ldog pa grub bo//srog la sogs pa yod pa na bdag yod pa ni grub pa med pa'i phyir ldog pa 'ba' zhig dang ldan pa yin no/ /des na 'di de ltar gtan tshigs su bstan pa yin no/ /'grel pa'i rim pa ni 'di ni bdag med pa ma yin te/ srog la sogs pa dang ldan pa ma yin par thal ba'i phyir ro zhes bya ba srog la sogs pa dang mi ldan pa bdag med pa dang rjes su 'gro ba nyid brjod par 'gyur ba'i phyir ldog pa can du gsal bar bstan par mi 'gyur ro//de'i phyir 'di ni bdag med pa ma yin na zhes ldog pa nye bar bstan nas de log pas bdag yod par rtogs pa zhes bya ba 'dis 'di la gtan tshigs su bstan pa'i phyir/'di ldog pa can yin par shin tu gsal bar bstan to/ /des na ma mthong bas ldog pa grub pa yin na 'di yang gtan tshigs nyid du 'gyur ro/ /ji ltar ma mthong bas thams cad du bsgrub par bya ba med pa la med par 'jog par byed pas don de la tshad mar brten pa de bzhin du bum pa la sogs pa las bdag med pa yang yin no//des na bdag dmigs pa'i mtshan nyid du gyur pa ma yin yang bum pa la sogs pa bdag med par grub pa'i phyir 'di khyab par bya ba dang / khyab par byed pa'i dngos po grub pa'i phyir rjes su 'gro ba med pa'i gtan tshigs las kyang bsgrub par bya ba rtogs par 'gyur ro//gang gi tshe ma mthong ba tsam tshad ma yin pa de'i tshe ni nyes pa 'di med do zhes bshad pa ni bltar mi rung ba mi dmigs pas med par ma grub na/ bum pa la sogs pa bdag med par ma grub pa'o/ /de'i phyir bdag med pa la srog la sogs pa med pas khyab pa ma grub pas bdag med pa yod pas srog la sogs pa ldog pa'i ldog pa med de sngar bshad pa bzhin no//ji skad bshad pa'i khyab pa grub pas de ltar 'gyur ba yin na de ni ma grub pa de 'ga' yang bdag med par ma grub pa'i phyir ro/ /de ltar na bdag med pa med na srog la sogs pa ldog pa med do//gal te de ltar na srog la sogs pa dang ldan pa nyid bdag med pa la ma mthong ba tsam gyis khyab pa ma grub par brjod par mi 'gyur ro zhe na/ 'dir 'di bstan par 'dod pa ni ma yin gyi 'on kyang srog la sogs pa dang ldan pa'i ldog pa sgrub par byed pa'i tshad ma mthong ba tsam mi byed na bdag med pa dang srog med pa khyab pa ma grub par 'gyur ro zhes bya ba yin no//gal te yang bdag dmigs pa'i mtshan nyid du gyur pa ma yin pa'i phyir bum pa la sogs pa bdag med par ma grub pa de lta na yang bdag med par smras pa la bum pa la sogs pa bdag med par grub pa yin la de dag la srog la sogs pa med par grub pa yin pa des na/ji ltar khyab pa ma yin zhes smras pa ni gal te khas blangs pa'i phyir zhes bya ba yin no/ /dogs pa 'di sel bar byed pa ni da ni ji ltar zhes bya ba'o/ /'di skad brjod pa yin te gal te tshad mas grub pa la mi ltos par nged kyis khas blangs pa las bum pa la sogs pa bdag med pa yin no/gson po'i lus la yang khas blangs pa khyad par med pa'i phyir bdag dang bcas pa nyid du mi 'gyur ro/ /gzhan yang gang gis de khas blangs pas grub par 'dod pa bdag med par smra ba la yang bum pa la sogs pa la dmigs pa'i mtshan nyid kyi ma grub pa'i bdag med pa'i tshad ma ma yin pa ji ltar 'grub par 'gyur/'di skad brjod pa yin te/ sangs rgyas pa la yang mi dmigs pa las bdag med par grub pa ma yin la/ tshad ma gang gis 'dod pa de ni gson po'i lus la yang nyams pa med do//re zhig bdag med par smra bas bum pa la sogs pa bdag med par khas blangs pa yin pa la ni 'u bu cag rtsod pa med do/ /gson po'i lus ni bdag cag bdag dang bcas pas 'dod pa des na de la rtsod pa yin na/ des na khas blangs pa'i bdag med pa la srog la sogs pa med pa'i phyir go bar byed pa nyid du brjod pas ni bdag lung las grub pa khas blangs par 'gyur te/lung gis grub pa'i don la brten nas byas pa'i khyab pa grub pa can yin pa'i phyir ro/ /lung tsam las khas blangs pa ni tshad mas stong par 'gyur ro//de bshad pa ni khas blangs pa zhes bya ba la sogs pa yin no/ /gang gi phyir de lta bas na srog la sogs pa ni rtogs par byed pa ma yin pa nyid de srog la sogs pa dang ldan pa ma yin pa nyid bdag med pa ma grub pa'i phyir te bdag dang ldan par ma mthong bas bdag med pa ma mthong ba'i phyir ro//la lar bdag med par grub pa yin pa de lta na yang 'ga' zhig la bdag de log ste/ srog la sogs pa log kyang bdag med pa thams cad la skabs kyis srog la sogs pa ldog pa mi 'grub bo/ /des na bdag med pa la srog la sogs pa med pa'i phyir/bdag med pa dang srog la sogs pa ldan pa ma yin pa dag khyab pa ma grub bo/ /thams cad la ldog pa mi grub pa'i gtan tshigs ni 'brel pa med pa'i phyir zhes bya ba yin no/ /gal te ma mthong bas ldog par 'gyur na de'i tshe/ ma grub sbyar ba brjod bya min/ /de yang zhes bya ba'i yang gi sgras ni gtan tshigs gzhan sdud pa'o//gang yang zhes bya ba ni ma mthong ba tsam gyis ldog na gzhung gzhan mi 'thad pa'i bsam pas yin no/ /ma grub sbyar ba de yang gang zhe na bshad pa de bzhin du mthun pa'i phyogs la yod pa dang / med pa zhes bya ba la sogs pa la yang ci rigs pa brjod par bya'o zhes bya ba la sogs pa'i rang bzhin can gyis ma grub pa sbyar ba gang yin pa'o//slob dpon gyis phyogs kyi chos nyid la/ gnyi ga la yang rung ba dang the tshom za ba dang gzhi ma grub pa'i mtshan nyid ma grub pa rnam pa bzhi bstan nas mthun pa'i phyogs dang mi mthun pa'i phyogs gnyis la yod pa dang med pa dang gnyi gas gtan tshigs rnam pa dgu la bsgres pa phyogs kyi chos la ji lta ba de bzhin du mthun pa'i phyogs la yod pa zhes bya ba la sogs pa la yang brjod par bya'o zhes bya ba 'di ni ma grub par sbyar ba yin no//ma grub pa sbyar ba de yang brjod par bya ba ma yin par 'gyur te/gtan tshigs rnam pa dgu la ji ltar bshad pa'i ma grub pa mi brjod par 'gyur ro/ /the tshom za ba'i ma grub pa bzhag ste mthun pa'i phyogs dang mi mthun pa'i phyogs gnyis la ma grub pa gsum brjod par bya'o zhes dgongs pa yin no/ /mdor ma grub pa sbyar ba spyir bkag pa khyad par gnas par nges par bya'o zhes 'brel pa ston pa ni the tshom du gyur yang ma bzlog par 'gyur ro zhes bya ba'o//the tshom za ba'i ma grub pa bzlog par bya ba ma yin par 'gyur ro/ /phyogs kyi chos nyid du nye bar bstan pa'i ma grub pa sbyar bas ni the tshom du 'gyur ba bzlog par 'gyur ro//mi dmigs pa kho nar zad na the tshom za la ldog pa yang mi dmigs pa las yin pa'i gtan tshigs kyi phyir ma dmigs pa tsam gyi sgrub par byed pa ni the tshom za ba yin no/ /ldog pa ni mi dmigs pas rtogs par bya ba yin pa'i phyir mthun pa'i phyogs la yod pa'i mi mthun pa'i phyogs la med pa ni the tshom za ba'i rang bzhin nyid yin pa des na ji ltar khyab par med par ma grub par sbyor bar 'gyur mi dmigs pa nyid la the tshom nges par ston pas dmigs pa la de med par bshad pa ni dmigs na zhes bya ba yin no//the tshom ni yod pa ma yin pa'i phyir de ni mi dmigs pa kho na la yin par rigs so//rtogs bzhin pa nyid kyi chos la the tshom med pa'i phyir te nyams su myong ba ni ji ltar myong ba bzhin rtogs pa 'phel bar byed pa yin pa'i phyir ro/ /gal te ci rigs par zhes bya ba ni 'di skad brjod pa yin te/ khyad par med par ma grub pa sbyor ba ma yin te/ci rigs par zhes smos pa'i phyir ro/ /'dir the tshom za ba ma grub pa ni dgag par nus pa ma yin te/ mi dmigs pa'i rtsa ba can nyid kyis na ldog pa can the tshom za ba'i rang bzhin yin pa'i phyir ro zhe na de ni ma yin te/ brjod pa gang zhig gnyi ga la yang nges pa de kho na zhes bya ba la sogs pa gsungs pa'i phyir ro//rgol ba dang phyir rgol ba la nges pa sgrub par byed pa yin pa nyid kyis ldog pa la the tshom za ba sgrub par byed pa ma yin no/ /ci rigs par zhes gsungs pa ni gzhi ma grub pa nyid ldog pa la skyon du 'gyur ba ma yin no zhes bstan pa'i phyir yin no zhes smra ba'o//des ni de ltar ma grub pa sbyar bas na slob dpon the tshom du gyur pa bzlog par bya ba bzhed pa yin no/ /des mi dmigs pa ldog pa sgrub par byed pa dgag par bshad pa yin no zhes smos pa ni de'i phyir mi dmigs pa yin du zin kyang mi mthun pa'i phyogs las ldog pa med par dgongs te/mi dmigs pa de dgag par bshad pa yin no/ /ci'i phyir ldog pa med ce na the tshom za bas so/ /ma mthong bas ldog pa med pa la gtan tshigs gzhan ston pa ni gzhan yang zhes bya ba yin no/ /rjes su 'gro ba dang ldog pa dang ldan pa ni go bar byed pa yin par bshad do//des na de med na go bar byed pa med pa yin no/ /ma nges pa la ni ldog pa yod pa ma yin no/ /de yang rnam pa gnyis te thun mong dang thun mong ma yin pa'o/ /de la thun mong pa gcig tu rjes su 'gro ba dang ldan pa nyid kyis ldog pa med pa ste gzhal bya nyid do//thun mong ma yin pa ni mnyan bya nyid de/ thams cad la med pa'i phyir bsgrub par bya ba med pa bzhin du bsgrub par bya ba las bzlog pa med pa la yang de med pa nyid do/ /des na ldog pas thob par bya ba'i go bar byed pa'i bdag nyid bdag gir byed pa ma yin no//gang zhig gang med pa la med pa de ni yod pa na de med pa bzlog pa na de go bar byed pa yin te/ du bas me med pa bzhin no/ /me med pa la du ba med la de na ni yod pa yin pa des na me med pa zlog par byed pa'i phyir ro/ /des na mnyan bya nyid kyang gal te mi rtag pa bum pa la sogs pa med pas rtag pa nyid kyi sgrub byed du 'god na de la med pas rang yod pas de med pa'i go bar byed pa yin pa'i phyir mi rtag pa nyid grub par 'gyur ro//des na nam mkha' la sogs pa rtag pa la yang ma mthong ba'i phyir rang yod pas rtag pa yang med par ston pa yin te/des na gcig tu nges pa'i ldog pa med pas go bar byed pa ma yin no/ /de ltar na thun mong ma yin pa la ldog pas thob par bya ba'i rnam par gcod pa rtog par byed pa ma yin par brjod pa gang yin pa de ma mthong ba la brten nas ldog par brjod na mi 'grub bo//gang gis phyir mnyan bya nyid la sogs pa thun mong ma yin pa rtag pa dang mi rtag pa dag la ma mthong ba'i phyir rtag pa dang mi rtag pa rnam par gcod pa'i gtan tshigs nyid du ci ste mi 'gyur/ gang zhig gang med pa la ma mthong ba de ni de med pa la med pa kho na yin no/ / des na mnyan bya nyid rtag pa med pa la ma mthong ba'i phyir rtag pa med pa la med pa kho na'o/ /de lta ma yin na byas pa nyid kyang mi rtag pa med pa la med par ji ltar 'grub/ des na mnyan bya nyid sgra la yod la de yang rtag pa med pa la med pa yin pa'i phyir ji ltar rtag pa med pa rnam par bcad pa go bar mi byed/de bzhin du mi rtag pa med pa la ma mthong ba'i phyir de med pa la med pa nyid yin pa'i phyir de rnam par gcod par byed pa nyid do/ /'grel pa ni mnyan par bya ba nyid kyang zhes bya ba'o/ /gang gi phyir de rtag pa dang mi rtag pa dag la ma mthong ba'i phyir de dag las ldog pa yin no//pas zhes bya ba ni gtan tshigs de bas na de dag rnam par gcod pa'i gtan tshigs nyid du 'grub ste sngar ji skad bshad pa bzhin no/ /de med pa la med par yang grub la/ rang yod pas de rnam par gcod pa yang ma yin no zhes bya ba 'di mi srid do/ / des na de rnam par gcod pa ni de las ldog pa las gzhan ma yin no/ /gang med na med pa'i phyir gang las gang zhig ldog pa de las ni de rnam par bcad pa gzhan ma yin te/ de tsam gyis grub pa'i phyir ro/ /ci de ltar na mnyan bya nyid go byed du bkod dam zhe na ma yin zhes smras te rjes su 'gro ba med pa'i phyir ro//ma mthong ba tsam gyis ldog pa gtan tshigs kyi ldog pa ma yin no zhes bstan pa'i phyir 'di nye bar bkod de de ltar yin na mnyan par bya ba nyid kyang rtag pa dang mi rtag pa med pa la ma mthong ba'i phyir dang de dag med pa la med par go bar byed par thal ba'i phyir ro//des na rang yod pas de med pa ston par byed pa nyid do/ /ma mthong yang med pa mi 'grub pa'i phyir de med pa la ma mthong ba las kyang ldog pa mi 'grub na ni rnam par gcod pa ma yin par 'gyur ba yin no/ /gang gi tshe gang med pa la ma mthong ba de med pa la med pa nyid do zhes nges pa yin na ni/de'i tshe gang na 'di yod pa der de med par ji ltar 'gyur/ de med pa yin na ni 'di nyid med par 'gyur ro/ /yod pa yang yin te des na ji ltar de med pa med par mi 'grub/ de bshad pa ni rnam par gcod pa ma yin pa de ni zhes bya ba nas rtog par mi byed ces bya ba'i mthar thug par ro//ldog pa nyid du ma nges pa'i phyir rnam par gcod pa ma yin par 'gyur gyi/ des na ni rnam par gcod pa kho na'o/ /'di khyed kyis rang gi gzhung la yang mnyan par bya ba nyid ji ltar rnam par gcod par byed pa ma yin zhes dogs pa bsu nas de la rigs pa brjod pa ni ma yin te/rang gi gzhung la tshul gsum med pa nyid kyis 'di go bar byed pa ma yin par grub pas rnam par gcod par byed pa nyid du the tshom mi za ba'i phyir ro/ /gal te gzhan la yang de nyid kyis go bar byed pa ma yin pa'i phyir the tshom za bar mi 'gyur ro zhe na/bden te go bar byed pa ma yin pa ma mthong ba tshad mar byed na gnyi ga rnam par gcod pa ci ste mi 'grub ces bya bar bstan to/ /nged kyi ltar na ni gang gis thal ba 'dir 'gyur ba ma mthong ba tshad ma ma yin no/ /des na 'di ldog pa med par gzhung gzugs pa'i phyir ma mthong ba tshad ma yin pa dgag par byed pa yin te/de lta ma yin na rnam par gcod par byed pa nyid du thal bar 'gyur ro/ /skyed par byed pa thams cad ngang gis 'jig pa skyed par byed pa yin pa'i phyir mnyan par bya ba nyid kyis kyang ngang gis 'jig pa'i rang bzhin mi rtag pa nyid sgrub par byed pa ma yin nam zhe na ma yin te/rjes su 'gro ba med par go bar byed pa nyid du mi srid do zhes rnam par nges pa'i rjes su 'brang bar bshad zin to/ /'dir pha rol pos smras pa gal te yang de med pa la med par rtogs pa de lta na yang gang gis 'dis gcig rnam par gcod pa na ma mthong ba khyad par med pa'i phyir gzhan yang rnam par gcod par 'gyur ba 'di ldog pa'i 'bras bu rnam par gcod pa dang ldan pa ma yin no//de ni 'thad pa ma yin te/ 'di ltar tshad ma gzhan gyis gnod pa yin no/ /dogs pa 'di nyid rnam par 'grel pa ni ci ste zhes bya ba yin no//gal te zhes bya ba ni ci ste zhes bya ba yin no/ /gnyi ga rnam par gcod pa zhes bya bas ni tshad ma gzhan zhes bya ba'i yul bshad pa yin no/ /tshad ma gzhan gyis gnod pa ci ste zhe na yod do zhes brjod do/ /gnod par byed pa'i tshad ma gzhan de yang gang zhe na bshad pa phan tshun rnam par gcod pa'i ngo bo can rnams ni zhes smos so//gang dag la phan tshun rnam par gcod pa'i ngo bo yod pa ste rtag pa nyid ni mi rtag pa nyid rnam par bcad pa'i rang bzhin can yin la/ mi rtag pa yang de rnam par bcad pa'i rang bzhin can yin no//gal te yang 'di dag la ldog pa dang rjes su 'jug pa'i chos kyi bdag nyid kyi rang bzhin gyi ngo bo yang yod mod kyi de lta na yang phan tshun rnam par gcod pa'i ngo bo nyid kyis sngon po dang ser po la sogs pa dang mi 'dra bar brjod pa yin no/ /sngon po ni ser po las ldog pa yin yang /sngon po bkag pa tsam gyis ngo bo ni ser po mi 'gyur te/ de bkag pas dkar po yang 'gyur ba'i phyir ro/ /gang zhig bkag pa gang gzung ba med pa ma yin pa de dag kho na'o/ /rnam pa de lta bu'i khyad par bstan pa'i phyir phan tshun bkag pa'i ngo bo can du nye bar bkod do//de la dngos po ldog pa'i chos dang bral na gdon mi za bar rjes su 'jug pa'i chos nyid do/ /de ni yod pa'i rang bzhin yin la/ byung ma thag tu 'jig pa ma yin pa'i phyir 'di de lta bu'i ngo bor gnas par khas blangs pa yin no/ /de bzhin du rang gi rang bzhin du gnas pa ma yin pa'i phyir ldog pa'i chos nyid du khas blangs par 'gyur ro//de bas na rnam pa de lta bu'i don rnams ni gcig rnam par bcad pas gzhan sgrub pa yin no/ /'di med par dgag pa tsam yang ma yin te/ sngon po rtag gam mi rtag ces bya ba ni dngos po gzhan ma bsgrubs par mthar phyin par mi 'gyur te de bkag nas rtag pa 'am mi rtag pa rtogs pa'i phyir ji skad sngar bshad pa bzhin no//dgag pa ma yin te zhes bya ba skabs kyis gzhan nyid do/ /'di skad brjod pa yin te/ 'di mi rtag pa yin nam zhes mi rtag pa bkag pas rtag pa bsgrub par 'gyur ba yin te/des na 'di la de yang dgag par nus pa ni ma yin no/ /de bzhin du mnyan par bya ba nyid la sogs pa'i chos kyang ma mthong ba'i phyir mi rtag pa med pa las ldog kyang rang yod pas mi rtag pa med pa rtag pa'i bdag nyid sel ba na mi rtag pa nyid rtogs par byed kyi de yang med par shes par byed nus pa ni ma yin no//mi rtag pa nyid med pa la med pa'i phyir yod pa nyid las mi rtag pa nyid rtag pa yin te/ de nyid kyi tshe dgag pa mi rung ba'i phyir ro/ /des na mnyan bya nyid mi rtag pa med pa la med pa'i phyir rang yod pas rtag pa 'gog pa na mi rtag pa nyid sgrub pa yin te de ni dngos po'i chos yin pa'i phyir ro//rtag pa med pa la med pa'i phyir ni rang yod pas mi rtag pa sel ba na rtag pa sgrub pa yin pa'i phyir chos gcig gi yul yod pa dang med par rtogs par 'gyur ro/ /de smras pa ni bsgrub pa dang dgag pa dag ni 'gal ba'i phyir ro zhes bya ba'o//des na 'di med pa la med pa yin yang rtag pa dang mi rtag pa dag gcig la med pa mi rung ba'i phyir gang gis rang yod pas rnam par gcod par yang byed par 'gyur ba de med pa rtogs par byed pa ni ma yin no zhe na/ 'di bzlog pa'i phyir da ni zhes smos so/ /gal te mnyan par bya ba nyid rtag pa dang mi rtag pa la ma mthong ba yin yang rnam par gcod par byed pa nyid du thal bar 'gyur ba'i phyir de med pa la med pa ma yin no//de ltar yin na gnyi ga las phyi rol du gyur pa mi sred pa gnod par byed pa yod pa'i phyir ro zhes bya ba yin na/ 'o na ni ma mthong ba la gnod pa'i phyir ma mthong ba las med pa yin no//'di skad brjod pa yin te/ ma mthong ba med pa'i sgrub par byed pa yin pa ma bkag par ni gnyi ga las phyi rol du gyur pa mi srid pa nyid rnam par gcod par byed pa la gnod par byed pa ma yin gyi 'on kyang ma mthong ba med pa'i sgrub par byed pa nyid la gnod pa yin no//de la mi gnod par ni ji skad bshad pa'i tshul gyis des nye bar bzhag pa'i gnyi ga rnam par gcod par byed pa nyid dgag par mi nus pa'i phyir ro/ /de'i phyir gnod par byed pa'i tshad mas ni ma mthong ba nyid rig par bya ba yin te/ des na 'di las med par mi 'grub bo/ /'grel pa ni de ltar na zhes bya ba yin no/ /de ltar rnam pa 'dis ma mthong ba ni tshad ma ma yin te/ rang gi yul med par sgrub par byed pa ma yin no zhes bya ba'i don to/ /skabs su bab pa'i rnam pa de nyid gsal bar byed pa ni gnod pa srid pa'i phyir ro zhes bya ba yin no//gang la gnod pa yod pa der tshad ma ma yin mod/ de tsam gyis ni ma mthong ba tsam spang ba ma yin te/ zla ba gnyis pa'i shes pa tshad ma ma yin pas dbang po'i shes pa thams cad tshad ma ma yin par thal ba'i phyir ro zhe na/ de bzhin du zhes smos so//gnod pa ma mthong ba gzhan la yang tshad ma gzhan gyis gnod pa srid pa 'di ltar gal te gang zhig gang med pa la ma mthong ba de med pa la med par nges pa yin na 'di yang rtag pa dang mi rtag pa dag med pas na de med pa la med do zhes rtogs par 'gyur ro/ /gnod par byed pa mthong ba las ni de med pa la ma mthong ba yin yang de lta na yang de yod pa yin no zhes rtogs par 'gyur ro//rnam pa de lta bu'i khyad par dang ldan pa gnod pa na gzhan gnod pa ma yin par rtogs par 'gyur ba gang yin pa ma mthong ba de las ma mthong ba gzhan khyad par ni med do//khyad par med pas ni de bzhin du gzhan yang de'i rang bzhin can yin pa'i phyir na ji ltar ma gnod ces bya bar 'gyur/ dbang po'i shes pa la ni tshogs pa mi 'dra bas bskyed par bya ba nyid kyi mngon sum dang mngon sum ma yin pa dang khyad par yod pa kho na'o/ /des na mngon sum ma yin pas gnod kyang mngon sum tshad ma ma yin par 'gyur ro//'grel pa ni mtshan nyid dang ldan pa zhes bya ba'o snyam par bya ba gang yin pa dang byas pa nyid la sogs pa gang yin pa'i ma mthong ba 'di ni tha dad pa yod pa ma yin la de yang bsgrub par bya ba med pa la sgrub par byed pa med pa'i sgrub par byed pa yin pa la gnod pa yin no des na 'di yang de bzhin du dogs so//'di ltar mnyan bya nyid ni sgra gcig pu'i chos yin pas bum pa dang nam mkha' dag la med pa yin gyi rtag pa dang mi rtag pa dag las tha dad pa ni ma yin pa de bzhin du byas pa nyid kyang bum pa la sogs pa nyid kyi chos yin pas nam mkha' la med pa nyid kyis mi rtag pa med pa ni ma yin te/des na sgra la de dmigs pas rtag pa bzlog par mi rigs so/ /byas pa ma mthong ba gang yin pa de las 'di gzhan pa nyid ni ma yin no/ /bltar rung ba ma mthong ba la sogs pa'i khyad par dang /ma mthong ba tsam ni 'di la yang sbyar bar sla ba'i phyir ro/ /des na ldog par sgrub par byed pa'i ma mthong ba la yod pa ma mthong ba'i mtshan nyid kyis 'dir rigs pa ma yin no/ /des na de la gnod na de'i mtshan nyid sun phyung ba kho nar 'gyur te/ma dmigs pa nyid la gnod par byas par gyur pas thams cad la yid brtan du mi rung ngo / /rab rib la sogs pa las skyes pa la gnod pas ni mngon sum la gnod pa ma yin te/ gzhan gnod pas gzhan la 'gal ba ma yin pa'i phyir ro/ /byis pa ma yin pa su yang gnod pa med pa nyid kyis ni mngon sum tshad mar mi smra'o//'on kyang mi slu ba dang ldan pa'i phyir ro/ /des ni de'i yul de nyid yin par grub pas mngon sum tshad mar 'gyur ba yin no zhes gzhan du bshad zin to/ /gal te rjes su dpag pa'i yul la yang mngon sum dang rjes su dpag pa dang 'gal ba mthong ste de dag gi yul las bzlog pa'i don rtogs par byed pa'i bdag nyid yin pa'i phyir ro//de bas na yid brtan du mi rung bar mthong bar thal bar 'gyur ro/ /'di ltar sngo bsangs yin te/ de'i bu yin pa'i phyir zhes bya ba'i rjes su dpag pa ni mngon sum gyis gnod pa yin la byas pa'i phyir mi rtag go zhes bya ba ni rtag ste mnyan bya yin pa'i phyir sgra nyid bzhin no zhes bya ba'i rjes su dpag pa gnod pa yin no//des na rjes su dpag pa yang tshad ma ma yin par 'gyur ro/ /de'i phyir de yang gnod pa med pa tsam gyis tshad ma ma yin pa de yod pa ni tshad ma yin par 'dod par bya ba yin pa des na mthong ba la yang khyad par med do zhe na/'di dgag pa'i phyir ma yin te zhes smos so/ /rjes su dpag pa'i yul la mngon sum dang rjes su dpag pa dang 'gal ba yod pa ni ma yin no/ /ji skad bshad pa bum pa lta bu la zhes bya ba ni 'brel pa la brten pa dngos po'i rang bzhin rnam par dpyod pas bskyed pa la'o//de dag gis gnod pa gang yin pa de ni rnam pa de lta bu ma yin pas bskyed pa yin pa'i phyir rjes su dpag pa ma yin pa nyid gnod pa yin no/ /de bshad pa ni srid na ni zhes bya ba'o srid pa gang la yod pa ni srid pa can de yang skabs kyis mngon sum dang rjes su dpag pa dang 'gal ba kho na yin pa des na mngon sum dang rjes su dpag pa dang 'gal ba srid pa dang ldan pa zhes brjod par 'gyur ro//de ni rjes su dpag pa'i mtshan nyid las phyi rol du gyur pa'i phyir ro//rjes su dpag pa ni dngos po'i mthus bskyed pa'i rtogs pa ma yin gyi 'on kyang rtogs pa'i don du rtogs pa 'di ni dngos po yod pa'i rigs pa la brten pas yin no/ /de dang khyad par med pa'i rang bzhin gyi rjes su dpog pa la gnod pa srid pa'i phyir de lta bu'i rigs pas yod pa'i phyir don gzhan gyi rjes su dpog par 'gyur ba gang yin pa 'di la dngos po yod pa'i rigs pa yod pa ma yin no//don gyi rang bzhin gyis bskyed pa'i rtogs pa la ni srid par 'gyur ro/ /der yang gnod par byed pa med pa'i ni tshad ma ma yin no zhes gzhan du bshad zin to//gal te rjes su dpag pa'i yul la gnod pa mi srid na slob dpon phyogs kyi glang pos 'gal ba 'khrul pa med pa can mi brjod par 'gyur ro zhe na/ dogs pa 'di spong ba ni 'gal ba 'khrul pa med pa can ma brjod pa ni 'dod pa yin te/ de ni slob dpon gyis rjes su dpag pa'i yul la ma brjod pa'i phyir ro//'o na gang la brjod ce na 'di'i yul ni bstan par bya'o zhes smos so/ /skabs su bab pa nyid kyis bsgrub par bya ba la gtan tshigs gzhan yang bsnan pa'i phyir gzhan yang zhes smos so/ /ma mthong ba'i gtan tshigs kyi phyir grang ba yang ma yin dro ba yang ma yin pa'i reg pa mthong ba dang mi ldan te ldan pa 'gog pa 'khrul pa med pa can du 'gyur ro//ma mthong ba'i mtshan nyid kyi tshad ma ni grang ba yang ma yin dro ba yang ma yin pa reg pa rtogs par gyur pa dang mi ldan pa 'gal ba med par 'gyur ro zhes bya ba'i don to/ / de de ltar na 'di bshad pa'i gzhung dang 'brel par 'gyur ro/ /mdo 'di nyid dgrol ba'i phyir slob dpon gyis gzhung gang bstan pa'i don du gzhung 'di yin pa de ston pa ni gal te zhes bya ba yin no/ /dgag par rigs pa ma yin no zhes slob dpon gyis gang bshad pa'o//dgag pa'i rang gi ngo bo nyid ston pas slob dpon gyi gzhung gzhan yang ston pa ni gal te ma mthong ba tsam gyis ma mthong ba la sogs pa dag la 'gog par byed na ma mthong ba tsam gyis 'gog pa de yang rigs pa ma yin no zhes bya ba'o/ /dgag pa de ji ltar rigs pa ma yin te rigs pa kho na'o zhes bya ba'i don to//ji ltar zhe na mi dmigs pa zhes smos so/ /pha rol po dag grang ba dang dro ba'i reg pa dag gi rten sa la sogs par grub pa yin pas na de las gzhan du gyur pa'i rdzas bsgrub par bya ba'i don du yon tan nyid kyis yon tan can la ltos pa grang ba yang ma yin dro ba yang ma yin pa'i reg pa'i rten sa la sogs pa las gzhan du gyur pa'i rlung la rten pa yin no zhes sgrub pa'i phyir mthong ba dang ma mthong ba'i sa la sogs pa rten yin pa nyid 'gog pas de dag la ma mthong ba'i phyir med pa brjod do//de la slob dpon gyi reg pa sa la sogs pa mthong ba dag la ma mthong yang ma mthong ba la 'gyur ro//'on te de dag la ma mthong ba nyid kyis mthong ba ma yin no zhes brjod na/ de la slob dpon gyis ma mthong ba tsam gyis ma mthong ba dag la 'gog pa bsal ba yin no/ /'di ni ma mthong ba ldog pa bsgrub par bya ba smra ba la mi 'thad do//gang gi tshe ma mthong bas ldog pa grub pa de'i tshe sa la sogs pa la yang grang ba dang dro ba ma yin pa'i reg pa dgag pa ci ste mi 'grub/ des na ji ltar slob dpon ma mthong ba tsam gyis dgag pa rigs pa ma yin zhes gsung / chos can mi snang ba la chos dgag pa mi rigs so zhe na/ldog pa la yang chos can thams cad snang ba ma yin te 'ga' zhig la med pa tsam gyis ldog pa mi 'grub pa'i phyir ro/ /de ltar 'di'i bar gyis ni ma mthong bas mthong ba dang mi ldan pa slob dpon gyis 'gal ba nyid du gsungs pa yang mi 'gal ba nyid du 'gyur ro zhes bsgrubs te/da ni slob dpon gyis bzhed gzhung gzugs pa'i don du/ gzhan gyi 'dod pa sun 'byin pa ston par byed pa ni reg pa zhes bya ba yin no/ /grang ba yang ma yin dro ba yang ma yin pa'i reg pa dmigs pa'i mtshan nyid kyir gyur pa yin pas de ma mthong bas 'gog pa yin gyi ma mthong ba tsam gyis ni ma yin nam des na ji ltar mi rigs she na ji ltar mi rigs pa ma yin gang gi phyir snang ba dang snang ba'i rang bzhin snang ba dang rigs mtshungs pa'i yul gang yin pa de tsam gyis reg pa 'gog pa ma yin pa'i phyir ro//'di skad brjod pa yin te/'di mthong bas gzung ba'i yul gyur pa tsam ni 'gog pa ma yin no/ /de byed pa ni mi snang ba'i chos can la brten pa nyid la byed par 'gyur ro/ /des na 'di bum pa la sogs pa la snang ba'i reg pa de 'gog pa ma yin la snang ba dang rigs gcig pa'i yul la 'gog pa yang ma yin no//mthong ba'i rang bzhin du gyur pa 'gog pa ni 'di na grang ba yang ma yin dro ba yang ma yin pa'i reg pa med la 'di dang rigs gcig pa gzhan yang med do zhes byed pa yin no/ /'di de dang rigs gcig pa nyid kyang chos can rnam pa de lta bu'i rang bzhin yin pa nyid kyis 'gyur te 'di nyid dang rigs gcig pa la yang med do zhes bya ba yin no//des na de ltar snang ba la ni snang ba mi dmigs pa kho nas 'gyur la/ de'i rigs can la ni de dang rigs gcig pa nyid kyis rigs pa kho na las yin no/ /'di ltar de ni des stong pa nyid kyis de dang rigs gcig pa yin gyi chos gzhan gyis ni ma yin no//des stong pa nyid du rigs mtshungs pa gang yin pa de la ni grang ba yang ma yin dro ba yang ma yin pa'i reg pa dgag pa grub pa kho na'o/ /gzhan dag ni de ltar dgag pa byed pa ma yin gyi 'on kyang des ni sa la sogs pa'i spyi bzung nas te/bltar rung ba dang de dang mtshungs pa'i rnam pa spangs te/ sa la sogs pa thams cad la dgag pa smras so/ /de la yang sa la sogs pa thams cad snang ba ma yin la thams cad mthong ba dang rigs gcig par 'gyur ro zhes bya bar yang nges par bya nus pa ma yin no//de'i rigs can gang yin pa de ni de lta yin no zhes bya bar 'gyur ro/ /ma mthong ba dag la ni 'di'am thams cad de'i rigs can yin no zhes bya ba'i nges pa yod pa ma yin no/ /gal te ji ltar sngon po'i rang bzhin ser po las ldog pa'i phyir/de ma mthong yang gzhan du srid pa ma yin pa de bzhin du sa la sogs pa thams cad grang ba dang dro ba ma yin pa'i reg pa las ldog par 'gyur ba'i phyir ji ltar dgag par mi rigs she na/ de ltar ni mi nus te snang ba la ni mthong ba nyid kyis grub pa'i phyir sngon po dang ser po'i rang bzhin las ldog pa yin no zhes bya bar 'gyur ro//mi snang ba dag la ni mthong ba la brten nas de ltar gyur pa ma yin te/ de de'i yul ma yin pa'i phyir dang tshad ma rnams yul ma yin pa la brten pa rnam par 'jug pa'i nus pas stong pa'i phyir ro/ /de'i phyir ma mthong ba la ni rigs pa'i rtsa ba las de ltar khas len pa yin no//gang gi phyir sngon po zhes bya bar mthong ba'i sngon po dang rigs gcig pa ni ser po las gzhan nyid yin pa'i phyir de las ldog pa yin no/ /'on te rigs gcig la gzhan pa yang ma yin na/ de nyid la de ltar ming btags pas ji ltar ldog par 'gyur/de bzhin du sa gzhan yang gal te de'i rigs can yin na ni der grub bo/ /'on te rigs mi gcig pa yin na de lta bu ma yin pa su zhig 'gog /rigs mi mthun pa nyid kyang ji ltar dgag ste spros pas chog go/ /ma mthong bas snang ba ma yin pa la dgag pa med pa 'ba' zhig tu ma zad kyi cha 'di ni srid par 'gyur ba yang yin no zhes bshad pa ni sa la sogs pa de la yang grang ba yang ma yin dro ba yang ma yin pa la sogs pa'i khyad par 'ga' zhig la dogs par 'gyur ba yin no//rig pa'i khyad par de lta bu sa la sogs pa brten par dogs par rigs pa yin no//'di yang zhes bya ba 'di des ni zhes brjod pa dang 'brel te/ 'gog par smras pas kyang dogs par bya ba yin no zhes pa'i tha tshig go/ /shing bal dang rdo ba dang lo ma la sogs pa dag sa la sogs pa'i rang bzhin de yod kyang 'jam pa dang rtsub pa la sogs pa reg pa'i rnam pa mang po mthong ba'i phyir tsha grang ma yin pa'i bdag nyid kyis reg par yang 'gyur ro//'jam pa nyid la sogs pa ni reg pa'i khyad par ma yin pa ma yin te/ de'i mtshan nyid ni lus kyi dbang pos bzung ba tsam yin pa'i phyir ro/ /de'i phyir thams cad du ma mthong ba tsam gyis dgag par mi rigs so//'di la gal te yang ma mthong bas ldog pa grub na chos mi mthun pa mi smos par thal ba dang / mnyan par bya ba nyid rnam par gcod par byed pa nyid dang bstan pa gzhan dag kyang mu stegs pa gzhan dag la yang thal ba yin pa de lta na yang phal cher thun mong ma yin par sun 'byin pa yin pa'i phyir 'di rang gi sde pa'i dbang du byas nas nye bar bkod pa yin no zhes bshad pa ni de ltar slob dpon la zhes smos so//gang yang rigs pas grub pa'i khyab pa rtogs pa gzhan med pa'i phyir slob dpon pa mtha' dag de ltar rtogs pa yin pa de lta na yang 'ga' zhig ces bya ba ni bdag nyid slob dpon pa yin pa la ltos nas yin no//da ni mu stegs pa gzhan dang thun mong du sun 'byin pa yang bshad pa ni gzhan yang zhes bya ba yin no/ /yul dang dus dang 'du byed pa'i khyad par gyis nus pa tha dad ces bya ba ngo bo nyid gzhan du gyur pa snang ngo / /yul gang la snang zhe na rdzas la smos so//de ltar snang ba'i yul ni de yin no/ /gal te de ltar yin mod de las cir 'gyur zhe na/ de la zhes smos te/ de ltar yin dang ngo / /gcig mthong bas gcig ces bya ba ni nye bar mtshon pa ste mang po rnams mthong bas kyang ma mthong ba gzhan de yod par nges pa rigs ma yin/'di skad brjod pa yin te/ khyad par can gyis rang bzhin du gyur pa'i rdzas kyi khyad par lan cig gam lan cig ma yin par dmigs te de'i phyir rang bzhin du dmigs pa na gzhan du gyur pa'i rang bzhin can du ma dmigs pa'i phyir rang bzhin de med na rdzas de ma dmigs pa las shing med na sha pa med pa bzhin du de med na ldog pas na/khyed kyi 'dod pas rdzas de mthong bas de'i rang bzhin du nges par thal bar 'gyur na de ltar mi 'thad do/ /'ga' zhig rnam pa de lta bu rang bzhin dang ldan pa ma yin yang rgyu'i khyad par las de lta bu nyid du gyur pa gzhan la rang bzhin khyad par srid pa'i phyir ro//'grel pa ni gal te zhes bya ba la sogs pa yin no/ /ci zhig ltar te rgyu mtshan 'ga' zhig las so/ /rgyu mtshan de yang yod pa'i yin gyi thams cad la yod par ni ma nges so/ /des na mi mthun pa'i phyogs bsgrub par bya ba med pa la ma mthong ba gang yin pa de tsam gyis 'brel pa med pa yang der 'khrul pa med do zhes bya ba gang med na 'di ma mthong ba de med na med pa'o//mi mthun pa'i phyogs la ma mthong ba smos pa ni bsgrub par bya ba med pa la ma mthong bar brjod par 'gyur ba des na 'khrul pa med pa ni bsgrub par bya ba med na med pa yin no//des na de ltar gal te zhes bya bas gzhan gyis 'dod pa yin no zhes bya bar bstan nas dgag pa'i phyir yul 'ga' zhig na zhes bya ba la sogs pa smos so/ /gal te gang med na ma mthong ba de yod na de yod par 'gyur ro zhes bya ba de lta bu rjes su 'gro ba dang ldog pa'i bdag nyid can gyi mi 'khrul pa ma mthong ba tsam la brten pa yin na/de'i phyir gang du don gang dag rnam pa ji ltar mthong ba de dag la rnam pa de lta bu med par mthong ba yod par mi 'gyur ba'i phyir de'i rang bzhin can mtha' dag rnam pa de lta bu nyid du gyur na/ de ltar yang ma yin te gzhan na gzhan du yang snang ba'i phyir ro//de de ltar gal te zhes bya ba la sogs pas mi 'khrul pa ma mthong bas 'grub par gzhan gyi brjod pa bstan nas/ yul 'ga' zhig na zhes bya bas de yod kyang de lta bu nyid ma yin par bshad pa'i phyir de ni rigs pa ma yin te zhes bya bas dgag pa sngon du 'gro ba'i sgo nas brjod kyang dngos su na 'dis phyogs bkag pa yin no//gang zhig gang du ji ltar snang ba lta bu zhe na/ dper na zhes smos so/ /'bras bu smin nas zad par 'gyur ba'i phyir sman kha cig zhing 'ga' zhig las ro dang nus pa dang smin par byed pa khyad par can du 'gyur la de dag nyid zhing gzhan las ni rnam pa de lta bu ma yin pa lta bu ste dbyar la sogs pa'i dus dang lus la sogs pa'i mtshan nyid kyis legs par bya ba'i khyad par las kyang de dang 'dra'o//yul gang du zhing de las dus der ro la sogs pa de dag dmigs pa'i yul der skyes pa de rnams kyis de ltar mthong zhes te/thams cad de nyid kyi sman de yin pa nyid kyis ro dang nus pa dang smin par byed pa khyad par can de lta bu yin par ni 'grub par mi 'gyur ro/ /de la ni rnam pa de lta bu'i sman ro la sogs pa de med pa la mi dmigs pa yod pa yin te yul de pa rnams kyis de lta bu ma yin pa'i ro la sogs pa dang ldan pa'i sman de ma mthong ba'i phyir ro//thams cad du de lta bu nyid kyang ma yin te gzhan ni gzhan du 'gyur ba'i phyir ro/ /gang las 'khrul par 'gyur ba de de ltar dmigs kyang gzhan du de lta ma yin par 'gyur ba'i rgyu ci yin/ gal te de ltar snang ba de yang de lta ma yin par 'gyur na ni/gang gis sha pa la sogs pa dag kyang de lta ma yin par 'gyur ba'i phyir shing la sogs pa la 'khrul par 'gyur ba sha pa la sogs pa dag kyang ji ste de lta ma yin par mi 'gyur ram zhe na/ dogs pa 'di bsu na/ yon tan gyi khyad par rnams ni zhes smos so//yon tan de spangs nas yon tan gzhan du 'gyur ba ni rgyu'i khyad par la ltos pa yin no/ /de'i phyir rgyu khyad par yod na de lta ma yin par 'gyur bas de lta ma yin par ma dmigs pa'i phyir de'i rang bzhin can ni de lta bu nyid du nges pa 'khrul par byed do/ / khyad par gzhan dang ldan pa las rgyu de nyid kyis dngos po de nyid sngar mthong ba'i khyad par dang bral bar khyad par gzhan skyed pa gang yin pa la 'gal ba ci yod/ de lta na 'o na sha pa la sogs pa la yang yon tan gyi khyad par rgyu'i khyad par la rag las pa'i phyir shing ma yin pa la sogs pa'i rang bzhin du yang 'gyur ro//de dag la yang khyad par gyi rgyu mi srid pa ma yin pa'i phyir ro/ /gal te gzhan la de ltar dmigs pa dang / ma dmigs pa ni rang nyid kyis 'khrul par byas pa'i phyir ro/ /'di la ni khyad par gyi rgyu yod pa yin la/ gzhan la ni ma yin no zhes mi rtogs pa'i phyir ro zhe na/smras pa chos gang zhig gang gis rang gi ngo bo yin pa de la ni yon tan gzhan gyi rgyu las kyang ngo bo de spangs nas yon tan gzhan du 'gyur ba ma yin gyi/ 'on kyang rgyu mtshan de dang 'brel pa las de'i bdag nyid kyis chos dang mi 'gal bar dngos po'i chos gzhan dang gzhan 'byung ba yin no//des na rgyu'i khyad par dang ldan pa las sha pa sha pa ma yin par 'gyur ro zhes ni nus pa ma yin te/ sa la sogs pa'i khyad par dang ldan pa las ni ring po dang thung ngu'i tshad la sogs par 'gyur ba yin no/ /gang gi phyir shing nyid ni sha pa'i rjes su zhugs pa nyid yin pa de'i phyir bdag nyid bzhin du rgyu stong gis kyang 'di spong ba ma yin no//des na chos gang zhig don gyi bdag nyid du gyur pa ma yin pa'i chos de spangs nas rgyu gzhan las chos gzhan 'byung bar 'gyur ba des na yon tan gyi khyad par rgyu'i khyad par la ltos par bshad pa yin no//de'i phyir sku ru ra nyid ro la sogs pa dang gcig tu mi 'gyur ro/ /de bas na rgyu gzhan gyi byed pa ni de la brten par 'gyur ro/ /gal te chos thams cad kyi bdag nyid tha mi dad pa'i don la 'ga' zhig ni chos 'ga' zhig dang gcig tu gyur pa yin la/ gzhan ni de ltar ma yin na zhes bya ba gang las she na/ de'i bdag nyid la ji ltar rnam par dbyer med pa de ni bstan zin to/ /de bas na chos de dang ldan pa'i rang gi rgyu'i nang du gtogs pa'i khyad par dang ldan pas 'bras bu de'i bdag nyid ma yin pa'i chos khyad par du 'gyur gyi/gzhan ni ma yin no zhes bya ba 'di ni 'thad par 'grub pa yin gyi dmigs pa dang mi dmigs pa la ltos pa ni ma yin no/ /de'i phyir de ltar thams cad de nyid kyis de lta bur zhes bya ba 'dis dngos po gang zhig rgyu ji lta bus bskyed pa de de las byung ba yin yang rgyu khyad par dang ldan pa las khyad par dang ldan par 'gyur ba'i phyir rigs mthun pa'i rgyus bskyed pa nyid kyis ni thams cad du khyad par med par mi 'gyur ro zhes bya ba'i rigs pa 'di rtsa bar gyur pas khyad par gzhan dang ldan pa'i de'i rang bzhin can ma mthong yang de'i rang bzhin las khyad par dang ldan par rtogs par mi nus so zhes bsgrubs nas sman de'i rgyu ma yin pa las de'i rang bzhin gyi sman ma mthong ba'i phyir sman de nyid ni rgyu de med na ldog pa'i phyir de'i rang bzhin las de'i rgyu can du rtogs pas thams cad de nyid kyis de ltar mi 'gyur ba ma yin pa'i phyir ci ste mi dgag ces dogs pa la rigs pas grub pa'i ldog pa nyid rgyu khyad par med na ni zhes bya bas 'chad do//rgyu ni rnam pa gnyis te/ rang gi ngo bo'i rgyu zhing la sogs pa'i mtshan nyid khyad par med pa can 'bras bu khyad par med pa nyid kyi skyed par byed pa tsam du gyur pa dang rang gi ngo bo'i khyad par gyi rgyu ste rgyu'i khyad par las 'bras bu'i khyad par mngon par grub pa'i phyir ro//de la khyad par gyi rgyu bkag na rang gi ngo bo'i rgyu lus pa yin no/ /des na rgyu khyad par med pa rang gi ngo bo'i rgyu de de la rjes su dpag par 'gyur ba yin no/ /de'i don ni khyad par gyi rgyu ni rjes su dpag par bya ba ni ma yin gyi 'on kyang rang gi ngo bo'i rgyu dpog go zhes bya ba 'di yin no//ma mthong ba tsam las ni khyad par gyi rgyu yang rjes su dpog par 'gyur te/ zhing la sogs pa'i khyad par can med na 'bras bu de ma dmigs pa lan 'ga' zhugs pa'i phyir ro/ /sman de mthong bas de'i 'bras bu rjes su dpog go/ /de lta yin dang zhing la sogs pa la gnas pa mthong ba'i khyad par rjes su dpog pa na thams cad khyad par med par nges pa yin pa'i phyir khyad par gyi rgyu rjes su dpag pa ni skabs su gyur pa pha rol po'i phyogs sgrub par 'gyur ro//de la rgyu khyad par med na ni zhes bya ba'i ngag 'di 'jug pa na 'dir dogs pa'i khyad par 'di yang yod de yul de pa rnams kyi zhes bya ba la sogs pas khyad par med pa bkag pa na pha rol po dag 'brel pa khas blangs kyang khyad par med na thal bar ston pas smras pa/'bras bu de'i rgyu la nges pa'i phyir khyad par can gyi zhing la sogs pa'i 'bras bur dmigs pa'i sman rnams ni ji ltar mthong ba'i zhing la sogs pa'i rgyu can nyid du re zhig thams cad du khyad par med par rjes su dpag par bya ba yin no//des na de'i rgyu can du khyad par med pas na bdag nyid thams cad kyi de'i rang bzhin du 'gyur te/ rgyu khyad par med na 'bras bu khyad par med pa'i phyir ro/ /des na de la gcig ma mthong bas gzhan la de yod par nges pa med do zhes ci ste brjod ce na/de bsal ba'i phyir rgyu khyad par med na ni zhes brjod do/ /rgyu khyad par med pa ni khyad par med pa'i rgyu nyid do/ /rang gi ngo bo'i rgyu ni spyi tsam yin pa'i phyir ro/ /des na khyad par med pa'i rgyu nyid spyi tsam rjes su dpag par nus kyi chos gzhan ni ma yin no zhes brjod par 'gyur ro//gzhan gyi 'dod pa dgag pa'i phyir skabs su dpe bzhag ste/ dpe gzhan ston pa ni byed pa po ma mthong ba can gyi tshig kyang zhes bya ba'o/ /gzhon nu 'byung ba dang rig byed la sogs pa bdag cag gis byed pa po ma mthong ba'i tshig kyang skyes bu'i 'du byed pa sngon du 'gro ba can yin te zhes bya ba ste/de ltar 'di ni rgyu khyad par med pa'i yul can gyi rjes su dpag pa yin no/ /la lar gzhan las 'grub par khyad par sgrub par byed pa yin pa'i phyir 'di dag thams cad kyi sgrub par byed pa ma yin par rnam par bzhag pa'am/de rtag par rang nyid kyis grub pa nyid kyi khyad par gyi rgyur 'gyur ba gang yin pa skyes bu'i ngag gi khyad par gyi rgyu ni ma yin no/ /rang gi grub pa la khyad par bsgrub pa mi srid kyang khas blangs nas brjod pa yin no/ /gang gi tshe skyes bu ngag gi rang gi ngo bo nyid kyi rgyu yin pa de'i tshe ni ngag las skyes bu rjes su dpog par rigs te du ba las me rjes su dpog pa bzhin no//des na byed pa ma mthong ba yin yang skyes bu'i 'du byed pa sngon du 'gro ba can yin no/ /tshig de dang de dag skyes bus bsdebs pa'am brjod pa ni 'du byed pa yin la de yang de'i sngon du 'gro ba yin no//yang ji ltar na skyes bu ngag gi rang gi ngo bo'i rgyu yin gyi khyad par gyi ni ma yin no zhe na tshig la zhes smos so/ /gang zhig skyes bu dag gis byed pa'i ngag gi khyad par de ni yod pa ma yin te de'i bdag nyid thams cad skyes bu las mngon par 'grub pa'i phyir ro//de bshad pa ni rnam pa yang yin la thams cad kyang yin pa de dag ni skyes bu dag gis byed par mthong ba'i phyir ro/ /rtag pa yang de nyid la skyes bu nye bar sbyor ba'i phyir thams cad skyes bus byas par rtogs pa nyams par 'gyur ba rjes su 'gro ba dang ldog pa dag las nye bar sbyor ba khyad par la brten par rtogs pa ni ma yin no//des gzhung 'di 'di ltar bshad par bya ba yin no/ /gal te sgra rnams la ni khyad par med pa nyid la/ skyu ru ra la sogs pa ni yod pa yin no zhes bya ba 'di tsam zhig brjod pa yin na de 'di ltar ci ltar nges par bya/de ltar dmigs pa dang mi dmigs pa dag las so zhe na ma yin te ma dmigs pa tsam gyis med pa mi rtogs pa'i phyir ro/ /gsal ba 'ga' zhig la khyad par gyi rgyu ma yin pas gsal ba gzhan la yang med par mi nges pa'i phyir ro/ /rgyu khyad par med pa nyid las kyang rgyu gzhan rnam par gcod par 'gyur gyi rtag pa nyid ni ma yin no//des na ne tso dang ri skegs la sogs pa'i rgyu mtshan can du mi 'gyur ro/ /gang zhig de med pas rtag pa nyid du mi 'gyur ba khyad par gyi rgyus rtag par byas pa ni ma yin no/ /khyad par dgag pa'i phyir rgyu'i khyad par bkag pa ni khyad par med na med pa yin pas skyes bus ma byas pa dgag pa'i don du yin no zhe na/de ltar mtshon pas mtshon pa la yang skabs dang 'brel bar mi 'gyur ro/ /de'i phyir tshogs ji srid kyis bskyed par bya ba'i 'bras bu de de las bskyed par bya ba las mi 'da' yang thams cad khyab par spang bar ni mi nus so zhes dper na sman kha cig ces bya bar brjod la/de lta yin yang skye ba'i rgyu mtshan spangs pa'am thams cad du khyad par gyi rgyu khyad med pas khyad par med pa nyid ma yin no zhes 'di nye bar bkod pa yin no/ /gzhan du na rgyud mang dang gling bu la sogs pa sgra'i khyad par gyi rgyu yin pa'i phyir de med par bshad pa 'gal bar 'gyur ro//de ni yod kyang rgyu'i byed pa tsam las skyes pa nyid mi ldog pa'i phyir rig byed la sogs pa ni skyes bus byas pa nyid do/ /gzhan gyi rmongs pa spang ba'i phyir rab tu grags pa'i sman la sogs pa dang mtshungs pa'i dpe gzhan ston pa ni/de lta bur zhes bya ba'o/ /ji ltar ngag rnams las rgyu'i khyad par bkag nas rang gi ngo bo'i rgyu rjes su dpog pa gzhan gyis 'dod pa'i rtag pa 'gog pa'i rgyu yin pa de bzhin du/ nged kyis 'dod pa thams cad mkhyen pa nyid la sogs pa dgag pa'i phyir pha rol pos rang gi ngo bo tsam gyi rgyu rjes su dpog pas so so'i skye bo dang 'phags pa'i chos mtshungs par bsgrub mi nus so zhes bya ba'i don to//'di ltar skyes bu dag la rgyu'i khyad par yod kyi ngag la ni ma yin no/ /gal te ngag las yang ne tso dang sha ri ka la sogs pa khyad par gyi rgyu yod kyi brjod pa ma yin nam zhe na bden mod kyi khyad par mthong ba las rjes su dpag kyang gzhan 'dod pa'i brtag pa nyid mi 'grub bo//'dir ni khyad par gyi rgyu yod na nged kyi 'dod pa grub pa nyid do/ /des na de ltar rgyu khyad par med par brjod do//skyes bu smos pas ni kha cig lha rnams kho na shes pa dang 'dod chags dang bral ba dang ldan pa yin no zhes 'dod pa dang 'gal bar 'dod pa dang gzugs dang gzugs med pa'i khams na spyod pa rnams la cung zad 'dod chags dang bral ba yod kyang gzhan du der spyod pa nyid mi 'grub pas gtan 'dod chags dang bral ba med pa'i phyir dang lha rnams kyis de lta bu'i nus pa dang ldan pa yang rigs pa yin pas bya rgod bzhin du thams cad mkhyen pa ma yin pa'i phyir rang bzhin gyis grub pa'i dbang phyug la sogs pa bkag pa na skyes bu'i rtsol bas thob par bya ba yin no zhes bstan pa'i phyir ro//khyad par gyi rgyu med na ni rang gi ngo bo tsam gyis rgyu las thams cad khyad par med pa nyid yin pa'i phyir khyad par med pa dang khyad par grub pas tshig la sogs pa las de rjes su dpog par 'gyur ro/ /de bshad pa ni gang gis tshig la sogs pa zhes bya ba'o//khyad par gyi rgyu ni yod pa yin te de'i phyir rang gi rgyu las rigs mthun pa'i phyir 'bras bu dmigs pa'i phyir mi'am gzhan du dmigs pa skye la rgyu gzhan las ni skyu ru ra la sogs pa bzhin ji skad bshad pa'i khyad par 'grub bo/ /gal te skyu ru ra la sogs pa dag skyed par byed pa'i tshogs par gtogs pa'i khyad par lhag pa dang ldan pas khyad par can du 'gyur gyi skyes ma thag tu ni ma yin no zhe na 'gyur mod/de lta na yang skyes bu zhes bya ba sems kyi khyad par brtag pa ma yin pa des na 'di skye ba nyid na rgyu'i khyad par la brten nas khyad par du 'gyur ro//da ni khyad par de nyid dang khyad par gyi rgyu yang bstan pa'i phyir/ legs par bya ba'i bye brag las/ /zhes smos so/ /'dis ni khyad par gyi rgyu bshad do/ /yon tan thams cad la zhes bya bas ni yon tan gyi khyad par dang khyad par du 'phel ba nyid bshad do//rang gi rgyu las skye ba nyid la sogs pa brjod pa'i sems kyi rgyun sems gzhan du gtogs pa skyed par byed pa'i rgyu tha mi dad pa yin yang mtshungs pa nyid ni ma yin pa kho na ste/ rgyu so so la bzo dang sgyu rtsal la mkhas pa la sogs pa thun mong ma yin par dmigs pa'i phyir ro//khyad par med pa'i rgyu tsam las skyes pa'i 'bras bu ni khyad par dang ldan par 'gyur ba ma yin no/ /de'i phyir rjes su mthun pa'i rgyus bskyed par khyad par med kyang de'i khyad par la brten te khyad par du 'gyur ba yin no/ /mkhas pa de yang mtha' med pa nyid de/ de la yang rim gyis skye ba na khyad par du 'phel ba mthong ba'i phyir ro//de thams cad kyang 'du byed pa'i khyad par nyid las khyad par du 'gyur ba yin no/ /bzo dang sgyu rtsal la sogs pa goms pas ni gang las de dag mi shes pa'i rtogs pa po dag tshul mtha' dag la mkhas par 'gyur ba sems kyi rgyun khyad par du 'phags pa sgrub par byed pa yin no//de'i phyir rang gi rgyu las grub pa'i sems la rgyu'i khyad par gzhan yod pa kho na'o/ /ci ltar 'di yod pa de bzhin du nyon mongs pa dang bral ba dang gnyis su med par rtogs pa dang / thams cad shes pa nyid la sogs pa gzhan la yang srid pa'i phyir ro//rang gi tshad mas rtogs pa de thob pa'i thabs goms pas de'i bdag tu 'gyur ro zhes le'u gnyis par sgrub par 'gyur ro/ /mi srid par smra ba gang yin pa de la ni mi srid par rjes su dpag pa la yang rgyu mtshan gnod par byed pa'i tshad ma med do//mi srid pa la rang bzhin nam 'bras bu'i rjes su dpag pa yod grang na re zhig rang bzhin ni med de/ de ni gnod par byed pas de'i bdag nyid du grub pa nyid ni 'gyur ba'i phyir ro/ /thams cad mkhyen pa ni thams cad mkhyen pa ma yin pa sgrub pas gnod pa'i phyir de nyid de'i gnod par byed pa yin no//des na gal te sma ba la sogs pa 'ga' zhig thams cad mkhyen pa ma yin pa dang de'i bdag nyid du gyur pa yin na de'i tshe 'dir 'gyur ba zhig na de ni 'di la med do/ /ji ltar zhe na 'dod chags dang bral ba zhes smos so/ / 'di skad bshad pa yin te ji ltar rtag pa la mi srid pa'i rim dang cig car nyid dang ldan pas yod pa mi rtag pa'i rang bzhin du gyur pa nyid do/ /zhes rtog pa de bzhin du gang gis 'thad pa las byung ba nyid kyis gnod par 'gyur ba smra ba la sogs pa ni thams cad mkhyen pa ma yin pa dang 'dod chags dang bral ba la sogs pa dang de'i bdag nyid ma yin no//de'i phyir gang gi phyir de las bzlog pa dgag pa'i phyir gnod par byed pa 'di thams cad mkhyen pa ma yin pa'i rang bzhin gyi gtan tshigs su 'gyur ba/ smra ba nyid dam gzhan thams cad mkhyen pa dang 'dod chags dang bral ba nyid dang 'gal ba ni mngon sum gyis grub pa nyid du brjod par bya ba yin no//de'i phyir 'dod chags dang bral ba la sogs pa ma mthong na chos 'ga' dang yang 'gal bar mi 'gyur ro/ /ma mthong ba dang ni chos 'ga' yang gnod par bya ba dang gnod par byed pa'i dngos por mi 'grub pa'i phyir rang bzhin gyi gtan tshigs de gnod pa ma yin no//gal te rtag pa don byed pa bzhin du rim dang cig car dag gis don thams cad rtogs par mi srid pa ma yin nam/ des na don byed pa las skad cig ma bzhin du reg par bya ba mngon sum du gyur pa nyid las thams cad ma yin par rjes su dpog go//'gro ba'i yul dang dus kyi dbye bas mtha' yas so/ /de thams cad rim gyis 'dzin na mtha' yas pas 'dzin pa mtha' thug pa med pa de'i phyir rim gyis 'dzin pa ma yin no//cig car yang ma yin te mtha' yas pa nyid kyis 'di tsam zhes mi nges pa'i phyir thams cad rtogs sam/ phyogs gcig rtogs zhes mi 'grub pa'i phyir ro/ /'di ni 'di tsam kho nar zad de 'di las gzhan ni med la/ de yang rtogs so zhes thams cad rtogs pa 'grub pa'i phyir ro//'di tsam zhes ma rtogs na ni 'di thams cad rtogs pa yin nam/ phyogs gcig rtogs pa yin zhes ji ltar nges/ 'gro ba mtha' med pa la 'di tsam du rtogs pa med pa'i phyir ji ltar 'di thams cad 'dzin par 'gyur zhe na de ni mi 'thad de/ gnyi ga ltar yang 'dzin pa bkag pa med pa'i phyir ro//skyes shing skyes pa 'dzin pas gzhan dang gzhan bzung ba thug pa med pa'i phyir thams cad 'dzin par mi 'gyur ba gang yin pa de rim gyis 'jug kyang don yod pa'i dus las ldog pa ma yin no/ /'das pa bzung nas ma 'ongs pa 'dzin la de nas ni da ltar 'dzin pa 'am rim pa gzhan gyis kyang rung ste de'i tshe skyon ci zhig yod/mtha' yas pa'i phyir mi 'dzin to zhe na/ rim gyis rtogs pa ni re zhig ma 'brel pa yin te/ de ltar 'dzin pa nyid mi srid pa'i phyir ro/ /mtha' med pa rnams la 'dzin pa mi 'thad pa yang ma yin te de yod pa dang med pa la mi ltos pa'i phyir ro//thams cad mkhyen pa'i mkhyen pa ni dngos po gzhan gyi dbang du gyur pa ma yin par gang zhig ji ltar bden pa de de kho na bzhin du rtogs pa yin no/ /de dngos po yod pa la ltos pa yin na ni de dag mtha' yas pa'i phyir de'i yul can gyi 'dzin pa mthar phyin par mi 'gyur ro//de nyid kyi phyir 'das pa dang ma 'ongs pa yul nyid do/ /rnam par rtog pa dus kyi khyad par can du 'dzin pa nyid de'i dus bar 'dzin pa ni ma yin gyi 'on kyang lhan cig tu snang ba yin te/ da ltar ba'i dus bzhin no/ /dus kyang nyi ma 'char ba la sogs pa yin gyi gzhan 'dod pa ni ma yin no//des na ngo bo can mtha' yas kyang rang nyid nges pa'i yul dang dus kyi dngos po la mi ltos par snang ba'i spyod yul du mi 'gal lo/ /dngos po gcig nyid mtha' yas pa'i dngos po rnams la ltos pa 'am ltos par bya ba mi 'thad do/ /des na byis pa las kyang legs bshad blang ba yin pas 'di blangs so//tshad nges par ma chad pa mtha' yas pa'i 'gro ba mtha' dag byed pa po'i dbang phyug gcig ni mi srid do/ /bya ba mtha' med pa'i phyir dbang phyug gis 'gro ba na gnas pa'i dngos po rnams byed pa na thams cad byed pa nyid du mi 'thad de/'gro ba mtha' yod pa nyid yin na thams cad bya bar 'grub pa'i phyir ro/ /me long lta bu'i ye shes ni de'i gzugs brnyan tsam dang ldan pa yin pa'i phyir ltos pa dang ltos par bya ba ma yin pa rang bzhin dang ldan pa'i dngos po dang rjes su 'brel pa'i rang bzhin tha dad pa dang mtha' yas pa yin yang tha mi dad cing mtha' yod pa'i 'dzin pa ni mi 'gal lo//mtha' yas pa ni tshad chad pa med pa'i phyir thams cad dang phyogs gcig rtogs pa khyad par med pas thams cad rtogs so zhes rnam par gzhag par mi nus so zhes bya ba 'di tsam zhig byis pa'i tshig snying po yin par 'gyur gyi byed pa bzhin du 'dzin pa mi srid par grub pa ni ma yin no//mtha' yas pa 'dzin par byed pa la ni 'gal ba 'ga' yang med de/ gzung ba'i chos 'dzin pa'am de'i chos gzung ba las thal bar 'gyur ba med pa'i phyir glang po'i gzugs brnyan la glang po'i chos sam/glang po la glang po'i gzugs brnyan gyi chos bzhin no/ /tshad nges par chad pa med pas thams cad 'dzin pa med pa yang ma yin no/ /dper na khyim nang na gnas par rtogs pa'i bum pa lnga la gzhan yod dam med ces tshad nges pa ma brtags par phyir song ba bum pa yod do zhes rtogs par 'gyur gyi grangs nges pa'am 'di tsam nyid mthong ngo zhes ni ma yin pa bzhin no//de yang brtsal bas ni grangs dang ma dmigs pa'i phyir gzhan med pas 'di tsam nyid dang de thams cad la yang rtogs pa zhugs pas na thams cad rtogs pa nyid du rtogs so//de nyid kyi phyir thams cad ces bya ba ni grangs dang 'dra bar dngos po'i chos ma yin te/ gzhan la ltos pa'i phyir ro/ /grub pa dag la ni ltos pa yod pa ma yin no/ /des na thams cad mkhyen pa nyid du rtogs pa med kyang dngos po ma rtogs pa ma yin no//tshad nges par chad pa nyid ni thams cad mkhyen pa nyid dam/ mi dmigs pa tsam gyis rtogs par bya bar mi nus so/ /sgra la sogs pa ni rtag pa dang khyab pa nyid kyis yul dang dus rnam par chad pa med pa'i phyir tshad nges pa med pas kyang glen pa zhig ste/ mi snang ba mi dmigs pa tsam gyis tshad ma yin pa bkag nas rgyu mi dmigs pa khas blangs pa'i phyir rgyu med pa la yang de nyid rtogs par byed pa shes rab phul du phyin pas rtogs par bya ba'i thibs po la kha ngan zer bas ngan song la gzhol ba'i snying rje ba nyid do//rgyu 'di yin no zhes bstan du med pas ni med par smra mi nus te/de nyid kyis the tshom za ba'i phyir ro/ /gal te don thams cad rig pa rnam par shes pa nyid yin pas de la yid la sogs pa nyid rgyur 'gyur ba ma yin nam/ de dag las kyang de srid pa ma yin pa de'i phyir med pa kho na'o zhe na/ gal te de lta na don gyi yul can gyi yid mi srid pa'i phyir dbang po'i shes pa yang med par 'gyur ro//ma yin te dbang po lhan cig byed pa can las de 'byung ba'i phyir ro zhe na/ 'o na lhan cig byed pa gzhan dang ldan pas don thams cad pa'i yul can du 'gyur ro/ /ma yin te de med pa'i phyir ro zhe na/ blo gros med pa'i sgrin shas chog go//sgom pa tshad ma'i yul can nyid kyis ni/ mkho ba yod pa ma yin te mi gsal ba'i rnam pa gsal bar byed pas mthar phyin pa nyid yin pa'i phyir ro zhes bshad par bya'o/ /de'i phyir mi snang ba mi dmigs pa nyid kyis de med par brjod par bya ba yin na de ni tshad ma yin pa'i phyir spang bar bya ba ma yin no//de'i phyir rgyu mtshungs pa yod kyang khyad par gyi rgyu spang du med pa'i phyir rigs gcig pa yin yang skyes bu dag khyad par med pa ma yin la rigs mthun pa'i rgyu las ni 'da' bar dka' ba'i phyir skyes bus ma byas pa ni med la/ don thams cad 'dzin par rung ba'i sems ni yod pa kho na'o//gal te rgyu rigs mi mthun na 'bras bu rigs mi mthun pa nyid du 'gyur mod/ /des na skyes bus byas pa gang yin pa de ni skyes bus ma byas pa las gzhan kho na yin mod kyi de la yang skyes bus khyad par bzhin du tha dad pa byed pa'i khyad par bltar mi rung ba nyid kyis tha dad par mi mngon pa yin no zhe na/tshig rnams ni zhes smos so/ /skyes bu'i khyad par bzhin du tshig rnams ni khyad par spang bar 'os pa ma yin pa ma yin no/ /ci'i phyir zhe na khyad par bltar rung ba'i phyir ro/ /bltar rung ba mi snang na ni med do zhes nges pa kho na'o/ / tshig gi khyad par dag kyang de lta bur gyur pa yin no/ /khyad par bltar mi rung ba yin pa de lta na yang 'di dag skyes bus ma byas pa yin no zhes rnam par 'jog pa mi 'thad do/ /de bshad pa ni bltar mi rung ba nyid gcig ces smos so/ /rgyal ba sgrogs pa la sogs pa ni skyes bus byas pa yin la/rig byed ni skyes bus ma byas pa ma yin no zhes rigs mi mthun pa nyid mi 'thad do/ /ci ste yang mngon sum la sogs pa'i tshad ma'i spyod yul ma yin pa'i yul can nyid rigs mi mthun pa yod pa yin no/ /skyes bus byas pa ni grub pa'i rang bzhin gyi don ston pa yin la/bya'o zhes bya ba nyid ni rig byed kyis rtogs par byed do zhe na/ de ni ma yin no zhes bshad pa ni de'i khyad par rnams ni zhes bya ba yin no/ /der khyad par du 'dod pa gang yin pa de ni zhi ba sa la sogs pa'i rgyud gzhan la yang srid pa yin no/ /'di dag ni 'di las 'dir 'gyur ro zhes bya ba 'di ltar bya ba rtogs par byed pa dag la yang byed pa yod pa yin la/gzhan dag gi dgos pa ni bya ba ston par byed pa kho na yin no zhes bya ba la sogs pa yang gzhan las skyes bus byas pa dang ma byas pa'i khyad par grub na srid pa yin no/ /des na de ltar rtogs par byed pa nyid ni skyes bus kyang phyogs gcig dmigs pa khyad par dang ldan pa nyid du rnam par 'jog pa na/ci 'di sgra mtha' dag rtogs sam sgra'i phyogs gcig ces 'dri ba la thams cad rtogs so zhes lan 'debs pas sgra'i rang bzhin tshad nges par rnam par bzhag nas de la dmigs par ni brjod par mi nus kyis/'on kyang gcig yin pa'i phyir cha med pa nyid kyis thams cad rtogs so zhes bya ba yin no/ /des na 'gro ba mtha' yas pa yang tshad nges par rnam par gzhag nas thams cad rtogs par ni mi smra'i/ 'on kyang mtha' yas kyang ngo bo dang ldan pa de'i yul can gyi rnam par shes pa'i yul ma yin pa mi srid pas dus gsum dang ldan pa mkhyen to zhes brjod do//blun po'i brtag pa la lan btab pas chog gi srid pa 'gog pa'i 'bras bu'i gtan tshigs kyang med par bshad pa ni 'dod chags la sogs pa'i 'bras bu zhes bya ba'o/ / 'bras bu'i gtan tshigs kyis ni 'dod chags rjes su dpag pa nyid kyis 'dod chags dang bral ba 'gog pa'i phyir 'dod chags la sogs pa'i 'bras bu 'khrul pa med pa can med par brjod de/ tshig la sogs pa ni de lta ma yin pas yang srid pa'i phyir ro/ /rang bzhin mi dmigs pas med par sgrub pa yang sel ba ni srid kyang thams cad mkhyen pa dang 'dod chags dang bral ba la sogs pa'i khyad par rnam pa bltar mi nus pa'i phyir ro//bltar rung ba dag la mthong ba med pa ni rang bzhin mi dmigs pa yin na/ 'di ni bltar rung ba ma yin no/ /mi snang ba mi dmigs pa tshad ma yin pa nyid do zhes bshad pa ni/de lta bu dag ni zhes bya ba'o/ /yul dang dus dang rang bzhin gyis bskal pas bltar mi nus pa dag la ni spang ba srid pa ma yin no/ /gal te 'jal ba tshad ma'i rgyu can ma yin nam/ don thams cad rab tu grub pa la ni rgyu tshad ma yod pa ma yin te/mig la sogs pa nges pa'i yul can yin pa'i phyir dang yid kyang thams cad kyi tshe phyi rol gyi gzhan gyi dbang du gyur pas de la ma ltos par mi 'jug pa'i phyir dang sgom pa yang thos pa dang dpag pa'i yul can nyid kyis don thams cad kyi yul can du ma grub pa'i phyir ro//de'i phyir don thams cad 'jal ba 'gog pa'i tshad ma ni rgyu mi dmigs pa nyid yin no zhe na/ de ni ma yin te ji ltar yongs su mthong ba'i shes pa'i rgyu dag kho na don thams cad gcod pa'i rgyu yin no/ /ji ltar yongs su mthong ba thams cad don thams cad 'jal bar 'gyur ro//rgyu ma yin na yang de dag de la nus pa med pas 'jal ba de rgyu med par ji ltar 'gyur/ sgom pa rgyu ma yin no zhe na/ gal te sgom pa rgyu'i dngos por rtogs na de med na don thams cad 'jal ba med do zhes bya bar 'gyur ro/ /de ltar na yang gang du de med pa der med par 'grub kyi de yod par ni ma yin no//'on te de yang rgyu nyid du mi 'thad do zhe na/ da ni rgyu ma yin pa rgyur 'gyur ba bkag nas de'i rgyu can ma yin pa'i 'bras bu ci 'gal/ gal te pha rol pos sgom pa de'i rgyur khas blangs pa'i phyir ro zhe na/ da ni khas blangs pa de yang dag pa ma yin par 'gyur gyi zhes khas len mi shes pa'i spobs pa nyams pas don yang nyams par 'gyur ba ni ma yin no//rmongs pas du ba'i rgyu sa bon yin par khas blangs pa la gnod pas me las du ba yod par 'gyur ba yang bkag pa ma yin no/ /'o na rgyu gzhan gang yin zhe na/gam na gnas pa tsam rig pa'i phyugs kyang stong pa nyid la 'khrul pa ni ma yin na 'di ni phyugs ma byas pa ma yin no/ /'jig rten mthong ba ji lta ba bzhin snang ba nyid sgra'i don yin no zhes ston par 'gyur ro/ /bya ba'am de'i yul can gyi bya ba sgrub pa ni med de/bstan bcos kyi sgra rnams mdor bsdus nas bye brag tu rtogs par 'dod pa rnams kyis rang bzhin dang rkyen la sogs pa de'i don can ma yin pa dag kyang de'i don can du brtags pa'i phyir dang / byed pa po mi dran pa la sogs pa yang 'gog par 'gyur ba'i phyir ro/ /des na de ltar khyad par bltar mi rung ba nyid du khas blangs nas tha dad par byed pa'i khyad par yod pa nyid bsal ba yin no//khyad par bltar mi rung ba nyid kyang srid pa ma yin no zhes 'chad pa ni sgra mngon sum pa rnams la zhes bya ba yin no/ /mngon sum du gyur pa'i dngos po gang yin pa de la rang gi ngo bo nyid du gyur pa'i mngon sum ma yin pa'i ngo bo mi srid do//de nyid la rang gi rnam pa gtad pa nyid kyis bdag nyid la rtogs pa bskyed pa dang / gzhan gnyis ni mi 'thad do/ /de de tsam gyi rang bzhin nyid yin na/ rang bzhin de gcig pu nyid do/ /de ltar na yang bltar mi rung ba 'gal lo//rang bzhin gzhan nyid na yang de'i rang bzhin ma yin te/ des na mngon sum ma yin pa ni mngon sum gyi rang bzhin ma yin no/ /'o na ji ltar skad cig ma nyid la sogs pa snang ba dang rang bzhin gcig pa yin yang mngon sum ma yin na/ skad cig ma nyid la sogs pa mngon sum ma yin pa ni cung zad kyang med kyi 'on kyang mdun du gsal ba'i rang bzhin gyi rang bzhin nyid do//de snang ba na cha med pa de nyid mngon sum nyid dang ldan pa yin no/ /rang bzhin de mtha' dag rtogs shing de kho na bzhin rjes su brtags pa yin yang ji ltar don skad cig nyid la sogs pa'i chos su gyur pa de bzhin du rtogs pa po dag gis rtogs par ni mi nus te/des na 'khrul pa'i rgyu mtshan dang ldan pa de la rtogs pa po'i 'du byed med pa'i phyir dngos su na mngon sum yin yang rtogs pa po de ltar rtogs pa med pa'i phyir/ de las rnam par mi gnas pas mngon sum ma yin pa nyid do zhes bstan par 'gyur ro//tshig rnams khyad par dang ldan pa nyid la ni rigs pa 'di mi srid do zhes bstan pa'i phyir 'khrul pa'i rgyu mtshan med pa'i phyir te zhes smos so/ /gang gis na snang ba de shes pa gzhan gyis rjes su rtogs pa nyid du 'gyur ba skyes bus ma byas pa'i ngag rnams la khyad par yod kyang skad cig ma nyid bzhin du mngon sum ma yin par ni mi srid de/de dang rang bzhin gcig pa yin yang 'khrul pa'i rgyu mtshan dang ldan pas mngon sum ma yin no zhes bya bar ni mi srid de/ 'khrul pa'i rgyu mtshan med pa'i phyir te 'di'o zhes bya ba nyid du snang ba 'di la ni 'khrul pa'i rgyu mtshan med do re zhig khyad par med par sgro 'dogs pa'i mtshan nyid 'khrul pa ni yod pa nyid do//de nyid las rgyu mtshan brtag par bya ba yin no zhe na 'khrul pa mi 'gyur ba'i phyir ro zhes smos so/ /khyad par med par ni 'khrul pa yin no zhes ma grub bo//ci'i phyir zhe na gnod par byed pa med pas so/ /ji ltar bum pa la sogs pa rtag pa las khyad par med pa ni don bya ba med pa nyid skad cig ma'i bdag nyid yin pa'i phyir 'khrul pa yin no zhes rtogs pa de bzhin du ngag gi khyad par sgrub pa'i tshad ma ni med do//'di skad brjod pa yin te/ gang du mngon sum gyis grub pa'i don la mngon sum de dang mi 'gal bar tshad ma gzhan gyis chos gzhan sgrub par srid pa der khyad par med par rtogs pa 'khrul pa yin no zhes bya bar 'thad kyi mngon sum gyis khyad par med pa'i rang bzhin du grub pa'i ngag dag la ni de ltar khyad par sgrub par byed pa'i tshad ma gzhan yod pa ma yin no//de'i phyir 'dir mngon sum gyis grub pa'i don la de dang mi 'gal bar tshad ma gzhan gyis khyad par sgrub par nus pa ma yin no/ /khyad par rtogs pa med par myong ba de la byed pa med pa'i phyir khyad par rtog pa nyid ma spangs par grub pa de la tshad ma gzhan gyis khyad par grub na rnam par rtog pa khyad par med par rtogs pa 'khrul par 'gyur ba yin no zhes bya ba'i don 'di 'dir bzhed pa yin gyi gnod par byed pa med pas na 'khrul pa med pa nyid do zhes bya ba ni ma yin no//'on kyang mngon sum gyis khyad par med par grub pa la khyad par bsgrub pa'i tshad ma med pa nyid do/ /gnod par byed pa med pa ni nges par mi nus te/ da ltar gyi dus na de med par rtogs kyi dus gzhan du ni ma yin pa'i phyir ro/ / dus gzhan du gnod pa byed pa ni gnod par byed pa ma yin pa ma yin te lan cig gnod pa mthong bas phyis gnod pa mthong ba don ji lta ba bzhin ma yin par 'gyur ba'i phyir ro/ /shes par byed pa tsam med pas shes bya med pa ni ma yin no/ /gnod par byed pa yang tshad ma ma yin pa'i shes par byed pa yin gyi skyed par byed pa ni ma yin no//de lta yin na ni rjes su dpag pa gnod pa med pa'i yul can nyid du nges pa kho nar 'gyur bas de la slob dpon sun 'byin pa brjod pa mi 'thad par 'gyur ro/ /des na ji skad bshad pa nyid rigs so/ /skyes bu dag la ni khyad par mthong ba nyid khyad par med par rtogs pa'i gnod par byed pa yin te gang gi phyir skyes bu dag gi yon tan thams cad la khyad par mthong ba de'i phyir rig byed kyi tshad ma dang thams cad mkhyen pa'i sgrub byed mtshungs pa ma yin no//gal te mngon sum gyi dngos po las tha mi dad pa'i mngon sum ma yin pa'i rang bzhin med mod/tha dad pa gang yin pa de go mngon sum ma yin par ji ltar mi 'gyur zhe na/ tshig gi khyad par gzhan gyi ngo bor gyur pa zhes smras so/ /tshig gi khyad par tha dad pa ni tshig gi khyad par ma yin gyi/ 'on kyang dngos po gzhan nyid du zad do//des na gal te 'di dag de'i phyir 'brel par gyur pa de lta na yang dngos po dngos po gzhan dang 'brel pa zhes pa tsam gyis ni de dang 'brel pa las ma rtogs par 'di'i rang bzhin rang bzhin gzhan las khyad par 'gyur ba ma yin no/ /de'i phyir mdun na gnas pa'i me la mchod do zhes bya ba la sogs pa khyad par med pa'i rang bzhin gyi ngag thams cad skyes bus byed do//yang na ni 'ga' yang ma yin te/ byang phyogs yul na zhes bya ba la sogs pa de lta bu yang ma yin no/ /des na de ltar gang zhig rnam pa ji lta bu'i rgyus bskyed pa de ni rnam pa de lta bu'i rgyu las skyes pa las mi 'da' la/de'i khyad par ni tshogs pa'i khyad par las 'gyur ba yin no/ /des na skyu ru ra la sogs pa dang skyes bu dag la khyad par yang ma yin la/ ngag ni mthong ba'i rgyu can las 'da' ba ma yin no/ /des na de ltar gcig la mthong ba'i rang bzhin thams cad du de ltar nges pa bsal nas skyon gzhan yang ston pas pha rol po rang gi khas blangs pa dang 'gal ba bstan pa'i phyir/bdag dang zhes bya ba la sogs pa smos so/ /bdag tu smra ba dag gis 'dod pa'i bdag kyang mi dmigs pa yin la/ ma dmigs kyang med par rtogs pa ni ma yin no//de bzhin du gzhan dag ni 'jig rten pha rol yod pa dgag pa'i don du khu ba dang khrag la sogs pa 'byung ba rnams nyid sems pa yod pa'i bdag nyid kyi rnam par 'gyur ba mngon par grub pa yin par rtogs so/ /lus zhes bya bar mngon par brjod pa'i 'byung ba rnams nyid ni sems pa'i bdag nyid kyi ngo bor snang ba yang ma yin pa de'i phyir de mi dmigs pa yod pa yin na med pa ni ma yin no//sa zhes bya ba ni 'byung ba nye bar mtshon pa'o/ /stsogs pa'i sgra'i don ni rang nyid ston par 'gyur ro/ /mi dmigs pa gang yin pa de kho na'o/ /gtan tshigs med sgrub yin nam ci/ci'i phyir yin/ rang gi ngo bo khyad par med pa'i phyir de tshad ma yin na/ thams cad tshad ma ma yin pa'am/ yin na yang thams cad tshad ma yin par 'gyur ro/ /des na mi dmigs pa'i phyir gtan tshigs mi mthun pa'i phyogs la med par rtogs so zhes bya ba la sogs pa yang 'dod par mi bya'o//de dag la mi dmigs kyang med par ma grub na mi mthun pa'i phyogs la yang mi 'grub bo/ /'grel pa ni mi dmigs pa tshad mar zhes bya ba'o/ /mi dmigs pa smra ba 'brel ba mi 'dod par mi dmigs pa tshad mar byed pa 'di'i bdag tu smra ba yang gzhi med par 'gyur te/rten yod pa ma yin par 'gyur ro/ /de'i rten bdag mi dmigs pas med par grub pas na yod pa ma yin pa'i phyir ro/ /rten med pa nyid kyis gtan tshigs ston pas bdag tu smra ba'i rten la dmigs pa med par 'chad pa ni/bdag mngon sum ma yin pa'i phyir zhes bya'o/ /bdag dang gzhan gyi lus las ma gtogs pa bdag rang nyid myong ba ni med de de las ma gtogs pa 'ga' yang gsal ba med pa'i phyir ro/ /gzugs la sogs pa'i phung po las ma gtogs pa rtogs pa ni med do//gal te nga'o snyam du rtogs pas rig par bya ba bdag ma yin nam/ rig bya tha dad pa la rig par byed pa 'di'o zhes tha dad par rtogs par 'gyur te rig par bya ba tha dad pa kho na la de ltar rtogs pa'i phyir ro/ /gang gi tshe rig par bya ba rig par byed pa'i rang gi bdag nyid du gyur pa kho na yin pa de'i tshe 'di 'jal bar byed pa gzhan dang ldan pa ma yin pa'i phyir 'jal ba po'i rang gi bdag nyid tha dad pa med par nga'o zhes tha dad pa med par gsal ba yin no//de nyid kyi phyir 'di'o zhes rtogs pa dang ma 'dres pa nga'o snyam pa'i bzung ba ni bdag go zhes rtogs pa yin no//lus la sogs pa ni nga skyem mo snyam du nga'o snyam pa'i rtogs pa dang ldan pa yin yang 'di ni nga'i lus so snyam du 'di'o snyam pa'i rtogs pa dang yang ldan pa'i phyir ro/ /de bzhin du shes pa la sogs pa yang rtogs par bya'o zhe na/ 'di la brjod pa gal te 'jal bar byed pa po nyid grub na tha dad pa med pa'i 'jal ba po la ni nga'o snyam du rtogs la/de las tha dad pa'i phyir ni 'di'o zhes bya bar 'gyur ro/ /yul gsal ba ni yul mngon du byed pa'i bdag nyid can yin no/ /des na gal te de las bdag gzhan nyid yin na de'i yul mngon du byed pa'i ngo bo ma yin pa'i phyir ji ltar yul lkog tu gyur pa na rang nyid 'ba' zhig 'jal ba por 'gyur te 'on te yul mngon du byed pa'i bdag nyid gsal ba de nyid 'jal ba po yin na de ltar rang gis rig pa'i rang bzhin la ltos te nga'o snyam du rtogs par 'gyur mod/'on kyang de la yang 'di'o snyam du rtogs par yod pas na gang la nga'o snyam pa nyid du 'gyur ba de kho na bdag yin no zhes bya bar 'gyur ro/ /gang la rnam pa 'dir 'gyur ba gsal bar bya ba la sogs su gsal ba snang ba ni med do zhes bstan par bya'o/ /mngon du byed pa de dang 'brel pa'i phyir don de'i mngon sum nyid do zhe na ma yin te 'brel kyang tha dad pa mi ldog pa'i phyir yul ni gsal ba nyid kyi mngon sum yin gyi de dang 'brel pa ni ma yin no//'brel par ni gzhal bya yang khyad par yod pa ma yin no/ /yul mngon du byed pa po nyid kyis 'jal bar byed pa yin gyi/yul mngon sum du byed pa'i rang bzhin nyid kyis ni ma yin no zhe na/ mngon sum ma yin pa'i byed pa po la yang don lkog tu gyur pa kho nar 'gyur te/ don mngon sum gyi rgyu'i mngon sum du 'gyur ba ni ma yin no/ /byed pa po yang rgyu las khyad par yod pa ma yin te/bya ba dang ldan yang khyad par mi 'grub pa'i phyir ro/ /bdag kho na 'jal bar byed pa po yin no zhes bya ba yang ga las 'jal ba'i bya ba dang ldan pa'i phyir ro zhe na/ 'di la yang tshad ma ci yod ngas shes so snyam du rtogs pa'i phyir ro zhe na/ 'di la brjod pa/ gal te rtogs pa'i ngo bo'i rang bzhin nga'o snyam du rtogs pa 'di bdag nyid kyi yin na/ bya ba de ni rang gi ngo bo las tha dad pa yin pa'i phyir rang dang 'brel pa'i bya ba ma rtogs pa'i phyir ro/ /des na byed pa po nyid du ga la rtogs te bya ba rtogs pa med par der mi 'gyur ba'i phyir ro//bdag dang yid 'brel pa las de'i yul can gyi mngon sum gyi bde ba la sogs pa bzhin 'jal ba dang ldan par 'dzin to zhe na ma yin te yid dang 'brel kyang bdag la gsal bzhin pa nyid ma skyes na yin gyi mngon sum yin par mi 'grub pa'i phyir ro/ /'di la gsal bzhin pa yang gzhan yod pa ma yin te rang nyid rtogs pa'i rang bzhin yin pa'i phyir ro//gsal bzhin pa nyid la ni gsal bzhin pa gzhan dang gzhan 'grub pa ma yin no/ /min na yang snga na med pa'i bya ba skyed pas mi rtag pa nyid du thal bar 'gyur ro/ /bya ba dang byed pa po ni 'ga' yang yod pa yin pa'i phyir 'di ni 'brel pa ma yin no//de'i phyir gzugs la sogs pa las ma rtogs par gzugs la sogs pa ltar snang na bdag gsal bar 'gyur ba yin no/ /gal te re zhig nga'o snyam du rtogs pa nyams su myong bas grub pa ni yod pa nyid la gzugs la sogs pa las tha dad pa'i bdag gsal ba yang de nyid yin no//de ni rnam par rtog pa yin no zhe'am/ de lta bu'i myong ba nyid rtsa ba yin par 'gyur ro zhe na/ 'dir yang brjod de de ltar rtogs par 'gyur ba rang nyid gsal ba yin na/ bya ba la sogs pa dang ldan par ma rtogs pa'i phyir bdag ma yin pa kho na'o/ /gsal ba gzhan gyi yul yin na ni ngo bo zhes bya bar mi 'grub bo/ /bdag nyid kyis nga'o zhes bya ba de lta bu'i rang bzhin du 'gyur ba ma yin te/ rnal 'byor pas gzhan gyi bdag mngon sum du byas pa na yang de ltar rtogs par thal ba'i phyir ro//rang nyid gsal ba'i rang bzhin la yang gsal bar bya ba med par ni gsal ba mi 'grub bo/ /de ltar yin par gyur na gsal bar bya ba las gsal bar byed pa tha dad par grub pa'i phyir mi 'dra bar rtogs pa ma yin no/ /de'i phyir bya ba la sogs pa 'brel pa med par de ltar snang bzhin pa nyid la nga'o snyam par rtogs pa yin no//de ltar rnam par rtog pa'i rang bzhin las 'da' ba ma yin pa'i phyir na bdag mngon sum ma yin pa kho na'o/ /yang na khas blangs pa'i bdag ma dmigs kyang rjes su dpag par bya ba yin pa'i phyir med par mi 'dod pa gang yin pa de'i khas blangs pa nyid kyis mi dmigs pa'i tshad ma ma yin pas na gtan tshigs med par yang mi 'grub po zhes brjod pa na/gzhan gyis khas blangs pa'i mngon sum yin pa nyid 'bras bu grub pa'i yan lag tu nye bar bkod pa yin no//gang dag mngon sum du smra ba de la ni mngon sum ma yin par yang sgrub pas de med pa kho nar 'gyur ro/ /rjes su dpag par bya ba ma yin pa nyid kyang 'dis grub pas yang rjes su dpag par bya ba yin pa nyid du brjod pa don ci yod/ci ste yang mi mthun pa'i phyogs la gtan tshigs kyi dmigs pa mtha' dag ldog pa'i phyir de la de med pa ni 'thad pa kho na'o/ /bdag ni de ltar ma yin te/ des na de med pa ma yin no/ /'di ltar gtan tshigs ni mi mthun pa'i phyogs la rjes su dpag par yang nus pa yin te/gzhan du dmigs na rjes su dpag pa 'byung ba'i phyir ro/ /'di ni nam yang mi mthun pa'i phyogs la rtogs par ma gyur te/ des na rjes su dpog pa yin no/ /bdag la ni rjes su dpog pa yod pa de'i phyir de ni mngon sum ma yin yang med par ni mi 'thad do zhe na/de ni mi rung ste/ bdag rjes su dpag par bya bar 'dod pas kyang rjes su dpag pa med par de khas mi len pa'i phyir ro/ /rjes su dpag pa med kyang gal te yod na skyon ci yod ces de ltar ni bdag tu smra ba rnams kyis bdag 'dod pa ma yin te/ tshad ma med par khas mi len pa'i phyir ro/ /de tshad ma ltar snang ba zhes bya bar go 'gyur mod/ 'ga' zhig lung gis grub pa nyid du yang 'dod pa'i phyir ro/ /des na rjes su dpag pa bsal ba ni don med do/ /bsal du zin kyang bdag yod par khas len pa'i phyir ro//ma bsal ba na yang mi mthun pa'i phyogs la gtan tshigs yod pa dang mi 'dra ba'i phyir rjes su dpag pa nyid kyis grub bo/ /de'i phyir 'di brjod par bya'o zhe na brjod par bya ba bden pas de brjod do/ /mi dmigs pa tshad mar byed pa 'di'i bdag tu smra ba yang gzhi dmigs pa med pas 'gyur te zhes gsungs pa 'di'i dgos pa ni 'di yin te/mi dmigs pa tshad ma yin na bdag tu smra ba pha rol po dbang du byas nas bdag sgrub par byed pa'i rjes su dpag pa sbyor ba de rten med par 'gyur te/ gzhi ma grub par 'gyur ro/ / bdag tu smra ba'i bdag sgrub par byed pa tshul gsum brjod pa las gzhan ngag tsam gyis rang bzhin ni 'ga' yang med de/ /gang gi tshe gang ma dmigs pa de med do zhes khas len pa de'i tshe bdag ri bong gi rwa bzhin du med pa'i phyir de nyid ni chos can du bya bar mi nus so//chos can lus bdag dang bcas par sgrub pa gang yin pa de yang bsgrub par bya ba'i chos tshad mas gnod pas na phyogs kyi skyon bsal bar 'gyur ro/ /des na gal te mi dmigs pa mngon sum gyi tshad ma yin la mngon sum gyis bsal ba yin la/ de ste rjes su dpag pa yin na ni rjes su dpag pas bsal ba yin no//des na bdag tu smra ba rten med pa nyid de/ de sgrub pa la phyogs med pa'i phyir ro/ /gal te de lta na me la sogs pa rjes su dpag pa la yang skyon du 'gyur ro zhe na mi 'gyur ro zhes zer/ de nyid kyi phyir mdor stsogs kyi sgra smos so//'grel pa'i 'o ma la sogs pa la zho la sogs pa rjes su dpog pa ni nye bar mtshon pa yin no/ /gtan tshigs med pa'i phyir yang dam bca' ba 'di sgrub par nus pa ma yin te/ des na 'di las kyang bdag tu smra ba rten med do zhes bshad pa ni/ 'bras bu ma grub pa'i phyir zhes bya ba'o//gang gi phyir 'di mngon sum ma yin pa de'i phyir 'bras bu ma grub ste/ des na 'bras bu la rjes su dpag par mi bya'o/ /de ni pha rol po dag srog la sogs pa'i 'bras bu nyid las rjes su dpag par 'dod pas de bkag pa yin no/ /gang gi phyir de las rjes su dpag par 'gyur ba de yod na sngon ma byung ba'i srog la sogs pa'am gzhan 'ga' zhig yod par rtogs pa ni med do//gal te gang yod par dmigs na sngon ma rtogs pa gang zhig yod par dmigs pa de de'i 'bras bu yin pa'i phyir bdag gi 'bras bu ma grub na 'o na ji ltar mig dang gzugs dang snang ba dang yid la byed pa rnams las shes pa skye bar brjod/mig mngon sum ma yin pa'i phyir ro/ /gzugs dang snang ba dag ni dbang po'i mngon sum gyis gzung bar bya ba yin yang de dmigs pas shes pa dmigs pa ma yin te/ de dag ni de shes pa nyid kyis dmigs par bya ba nyid kyis de skyes pa'i sngar de ma grub pa'i phyir ro/ /de yod pa las mngon sum nyid yin yang de las shes pa de skyes so zhes bya ba go ga las yid la byed pa yang rang rig pa'i mngon sum gyis grub pa yin yang de las shes pa skyes so zhes bya bar ni ma grub bo//des na 'di dag mngon sum nyid yin yang de 'bras bu grub pa'i yan lag ni ma yin pa kho na'o zhes de ltar dogs pa bsu nas/ dbang po la sogs pa ni zhes smos so/ /sogs pa smos pas ni gzugs dang snang ba la sogs pa gzung ngo / /rnam par shes pa nyid 'bras bu yin pas na 'bras bu rnam par shes pa'o//ltos pa dang bcas pa grub pa ni ltos pa dang bcas pa'i grub pa'o/ /des na 'di ltar 'brel te/ dbang po la sogs pa ltos pa dang bcas par grub pas zhes bya bar te dbang po la ltos nas grub pa zhes bya ba'i don to/ / dbang po la sogs pa ni ltos pa dang bcas pa ma yin gyi/ 'on kyang de dang 'brel pa de yin no zhes bya bar dgongs pa'o/ /des na 'di chos can la ltos pa na 'bras bu rnam par shes pa zhes 'brel to/ /de'i don 'di yin te gal te 'bras bu rnam par shes pa dbang po la sogs pa la ltos pa dang bcas pa nyid du grub pas rab tu grub pa brjod na/rnam par shes pa dbang po la sogs pa'i 'bras bu yin no zhes rnam par shes pa de la ltos pas grub po/ /ji ltar na ji srid de yod na yod par ma rtogs par rnam par shes pa dbang po la sogs pa la ltos par rtogs she na/res 'ga' yin pa'i phyir zhes smos so/ /'di skad brjod pa yin te/ rnam par shes pa ni res 'ga' ba'i ngo bo yin no/ /res 'ga' ba ma yin na ni gtan du yod pa'i phyir gzugs med kyang 'gyur bas na gzugs rgyu yin par mi 'gyur ro/ /gzugs med na med pa'i phyir na gzugs dang rjes su 'gro ba ma mthong yang gzugs la ltos pa ni gzugs kyi 'bras bu nyid do//de bzhin du yid la byed pa la yang rtogs par bya ste/ don gzhan la chags pas mi mthun par byas nas rnam par shes pa mi skye ba'i phyir ro/ /mig med na med pa ni ma grub ste de mngon sum ma yin pa'i phyir ro//gzugs dang snang ba dang yid la byed pa rnams yod na yod pa ma grub kyang med na med pa grub pa kho na'o/ /dbang po la ni gnyi ga yang ma grub po/ /'on kyang gzugs dang snang ba dang yid la byed pa yod kyang rnam par shes pa res 'ga' ba nyid kyis gzhan la ltos pa dang ldan par rtogs la de yang dbang po zhes brjod do//de bstan pa ni 'di las rgyu ci zhig yod do zhes bya ba yin no/ /de ltar rab tu grub pa'i rang bzhin gyi khyad par ni lung las rtogs pa yin gyi der yang rjes su dpag pa nus pa ma yin no//mig 'bras phye na rnam par shes pa skye ba'i phyir de yod na yod pa yang rtogs pa po rang nyid kyi mngon sum ji ltar ma yin zhe na/ gal te nang gi rig pa tsam gyis rang bzhin cha shas gzhan las dbang po'i 'bras bu khyad par can du rtogs na mngon sum du 'gyur te/me dang du ba bzhin du dngos po gzhan las log pa'i dngos po yod na yod par khyad par nyid kyis rtogs pa yin no/ /de bzhin du 'bras bu ni reg bya gzhan las khyad par du rtogs pa ma yin par yul tha dad pas tha dad par sgrub pa'am reg bya gcig gi bdag nyid lus kyi phyogs gcig nyid kyis rgyu nyid du rtogs so zhe na ma yin te de yang rgyu mtshan gzhan las rgyu ma yin par 'gyur ba rgyu dang mi 'dra ba rtogs pa med pa'i phyir ro//des na mngon sum gyis rgyu dang rgyu ma yin par mi rtogs te/ de ni rtag tu rnam par shes pa yod pa dang med pa dag gis rtogs pa yin pa'i phyir ro//de lta na 'o na sngags la sogs pas nus pa'i gegs byas pa'i 'bar ba'i rang bzhin nus pa gegs ma byas pa las mi mthun par mi rtogs pa'i phyir de yang mngon sum gyis rgyu dang 'bras bu'i dngos po mi rtogs par 'gyur ro zhe na/ de ni med de 'bras bu sgrub pa'i yan lag tu gyur pa/gzhan du gyur pa nyid gnas bya ba yin pa'i phyir ro/ /me'i sreg par nus pa ni dro ba'i nus pa nyid yin la/ de med na ni mngon sum nyid kyis mi 'dra bar grub pa yin no/ /dro ba'i nus pa yod kyang sreg par byed pa ma yin na ni rgyu ma yin pa nyid du 'gyur ba kho na'o//gal te 'bras bu las dbang po don gzhan yin na/ de la mi ltos pa kho nar rnam par shes pa skyed par thal ba ma yin nam/ gnyis ka yang rgyu yin na yang ltos pa'i khyad par bstan par bya ba yin no/ /tha dad pa med na yang 'bras bu shes pa skyed par byed pa nyid dbang po yin no zhes bya bar 'gyur ro zhe na/brjod pa lam 'di srid du ni rjes su dpag pa 'gro bar nus pa ma yin te/ de 'bras bu ldog pa las 'bras bu gcig gam rang nyid rdul phra rab kyi tshogs yin pa'i phyir dbang po dang lhan cig tu gyur pas du ma yang rung ste ltos par bya ba lhag par gyur pa nyid do//tha dad pa dang tha mi dad pa ni gcig dang du ma las mi ldog go/ /ci zhig cig ces bya ba la sogs pa ni/ sogs pa'i sgra'i don nyid kyis gzugs la sogs pa la yang 'gyur mod kyi dbang po'i yul can nyid do//de nyid kyi 'bras bu rnam par shes pa res 'ga' ba grub pas rab tu grub par zhes bya ba yang dbang po'i yul can kho na'o/ /gzugs la sogs pa ni rnam par shes pa'i 'bras bu can tsam kho nar brjod do/ /shes pa gzugs la sogs pa'i 'bras bur grub pa na mngon sum du gyur pa nyid yin gyis sgrub byed gzhan la ltos pa ni ma yin no//rnam par shes pa de ni de tsam gyi rgyu can ma yin pa'i phyir de yod pa las dbang po rjes su dpog pa yin no/ /des na de ltar 'di la mngon sum sgrub par byed pa ma yin yang rgyu dang 'bras bu'i dngos po dang rjes su dpag pa yod pa kho na'i/bdag la ni ma yin no zhes bshad pa yin no/ /ci ste bdag mngon sum ma yin pa la yang rigs pa 'dir 'gyur ro zhe na/ ma yin no zhes bshad pa ni/ bde ba la sogs pa'i 'bras bu can rab tu bsgrub pas ni zhes smos so//bde ba la sogs pa'i 'bras bu gang la yod pa de rab tu bsgrub pas ni de ltar de dbang po bzhin du'o/ /'di ltar shes pa res 'ga' bas dbang po bsgrub pa de bzhin du bde ba la sogs res 'ga' ba nyid kyis 'bras bu dang ldan pa bdag gi mtshan nyid kyi dngos po bsgrub pas ni don cung zad kyang rgyas par mi byed do//'di skad brjod pa yin te/ dbang po bzhin du 'bras bu'i khyad par sgrub par nus pa tsam gyis khyad par du byas pa'i dngos po tsam ni pha rol po bdag gi dngos po khas ma blangs kyi/ 'on kyang longs spyod pa po la sogs pa'i chos kyi khyad par du byas pa nyid do//rnam pa de lta bu ni de ltar grub pa ma yin no/ /tshad ma gzhan las de'i rang bzhin rab tu sgrub po zhe na/ gang yang rung ba zhes smos so/ /de ni 'di dang lhan cig gzhi gcig par mi 'grub ste/ bde ba la sogs pa'i rgyu byed pa po la sogs par ma grub pa'i phyir ro//de nyid kyi phyir bde ba la sogs pa'i rgyu de gzhan du grub par bya nus so zhes bshad pa ni gang yang rung bas zhes bya ba yin no/ /de lta yin dang bdag mi dmigs pa med pa'i sgrub byed du sngar brjod pa gang yin pa de nyid lus pa yin no//khas blangs nas kyang rjes su dpag pa sgrub par mi nus so zhes bstan pa ni de lta yin dang zhes bya ba la sogs pa'o/ /mi dmigs pa yang tshad ma ma yin no/ /de'i phyir mi dmigs pa des bdag de sel ba na mi dmigs pa bsgrub pa yin no zhes rnam pa 'di ci ste bsal te bsal bar mi bya ba nyid do//mi dmigs pa sgrub pa ma yin na 'dir 'gyur ba yin no/ /gal te de sgrub pa ma yin na ni ldog pa ji ltar sgrub par byed pa zhes bya ba ni 'byung ba nye bar mtshon pa'o/ /lus zhes brjod pa 'byung ba chen po'i tshogs pa la shes pa yod par te/sems pa nyid du lus kyi rang gi ngo bo nyid rnam par shes par ma dmigs kyang 'dod bzhin du'o/ /lus kyi rang gi ngo bo nyid ni rig par dmigs pa med de/ gzhan gyi lus rig kyang gzhan gyi lus bzhin du gzhan gyi rig pa gsal bar byed pa'i phyir ro//'di ltar dkar sham la sogs pa'i rnam pa gzhan gyi lus dmigs pa de'i tshe gzhan gyi mal dang stan dang gos la sogs pa'i 'jam pa dang rtsub pa la sogs pa'i reg pa'i khyad par dmigs pa'i phyir de'i dmigs pa'i de'i lus dang tha mi dad pa yin na ni dmigs pa de gsal bar 'gyur ro//gsal bzhin pa ni gsal ba las tha dad pa ma yin pa'i phyir gsal bar bya ba mi gsal na rig pa ma yin pa'i phyir yul gyi rnam pa can gsal bar byed pa rig pa nyid yul rig pa yin pa'i phyir reg pa dmigs pa rig na mig gis reg pa dmigs par 'gyur ro//de bzhin du dbang po gzhan dang gzhan gyi don dang 'brel pas 'chol bar 'gyur ro/ /de'i phyir 'byung ba'i rnam par shes pa yod pa nyid du dmigs pa ma yin no/ /de ma dmigs kyang de ltar 'dod pa na mi dmigs pa tshad ma ma yin par byas bzhin du ma mthong bas thams cad mkhyen pa la sogs pa 'gog pa ni tshig la sogs pa gtan tshigs dang mi mthun pa'i phyogs la ldog par smra'o//gzhan ni zhes bya ba la sogs pa la mi dmigs kyang 'dod bzhin du zhes bya ba dang / smra'o zhes rjes su 'jug go/ / gang gi tshe 'o ma la zho ma dmigs kyang yod pa de'i tshe mi dmigs pa tshad ma ma yin pa'i phyir ji ltar gtan tshigs 'dus pa nyid gzhan gyi don ma yin pa las ldog /de nyid kyi phyir nges pa ci yod ces gsungs so/ /'di la ni mi dmigs pa nyid nges pa yin na de yang tshad ma ma yin pa'i phyir nges pa med do//da ni zho la sogs pa la 'o ma la sogs pa rjes su dpog pa dang rnam pa gzhan gyis rjes su dpog pa yang bzlog pa'i phyir 'o ma la sogs pa zhes smos so/ /'o ma la sogs pa la zho la sogs pa dmigs pa rjes su dpag pa yin te/ des na ma dmigs kyang med pa ma yin no//rjes su dpag pa de gang zhe na mi nus pa las zhes bya bas ston to/ /nus pa zhes bya ba ni 'bras bu rgyu'i bdag nyid la mi gsal ba'i rang bzhin du gnas pa'o/ /des na mi nus pa las zhes bya ba ni 'bras bu'i bdag nyid nus pa'i ngo bor rang gi bdag nyid la mi gnas pa las zhes brjod pa yin no//rgyu'i bdag nyid la mngon par gsal ba'i gsal bar gyur pa ni skye ba zhes brjod do/ /des na gang la gang zhig mi gsal ba'i rang bzhin med pas de mngon par gsal ba'i rang bzhin skye ba yod par ga la 'gyur/ de ltar gyur na ni gseg ma las kyang 'byung bar 'gyur ro//de ltar 'di mi dmigs pa tshad ma yin na rjes su dpag pa mi srid pa nyid kyis sun phyung ba yin yang rnam pa gzhan gyi sgo nas kyang 'gog pa ni yang nus pa 'di zhes bya ba yin no/ /rang bzhin gang gis 'bras bu rgyu la gnas par 'gyur ba nus pa zhes bya ba 'di ci zhig yin/ci 'bras bu'i mtshan nyid kyi yod pa de yin nam zho nyid 'o ma'i bdag nyid la gnas pa'i nus pa'i ngo bor gnas pa yin par 'gyur ram/ 'on te rang bzhin gzhan nyid la 'o ma'i bdag nyid la 'gal ba med par zho skyed par byed pa nyid yin/ rnam pa dang po ni re zhig mi rung ngo zhes de nyid dogs par byas nas bzlog pa ni de kho na bzhin du zhes bya ba'o/ /zho nyid 'o ma'i bdag nyid la yod na ni/ 'o ma la yang de kho na bzhin du dmigs par 'gyur te de'i bdag nyid du khyad par med pa'i phyir ro/ /mngon par mi gsal ba'i phyir ma dmigs so zhe na/mngon par mi gsal ba 'di ci zhig ma rtogs pa'am/ rnam pa de lta bu'i bdag nyid las rang bzhin gzhan yin pas zho'i bdag nyid las ngo bo gzhan du grub pa'o/ /gal te ma rtogs pa yin na 'o ma'i bdag nyid ma rtogs par mi rung ste rtogs pa'i phyir ro//mngon par ma grub pa yin na yang mi gsal ba de'i bdag nyid las rang bzhin gzhan yin pas zho'i bdag nyid las ngo bo gzhan du 'grub bo/ /de ste 'o ma dang rang bzhin gcig pa nyid kyi 'o ma'i bdag nyid du dmigs pa yin no zhe na/ 'o na 'o ma'i bdag nyid las rang bzhin gzhan ma yin par grub po zhes bshad pa ni ci ste gzhan zhig yin no zhe na zhes bya ba'o//'di skad brjod pa yin te/ zho yod par 'dod pas 'o ma tsam gyi rang bzhin la gus par bya ba ni ma yin no/ /dmigs par khas len pas ni zho'i bdag nyid nyams pa'i phyir 'chol ba ma grub po//des na 'di skad smra ba'i 'di nye bar btags pa tsam du 'gyur ro zhes gsungs pa ni nye bar btags pa tsam du ni zhes bya ba yin no/ /de ltar 'di ni ma mthong bas ldog pa grub par smra ba 'di dag ni phan tshun 'gal ba ste/ phan tshun gnod pa zhes khas blangs pa yin no/ /des na de ltar med na mi 'byung ba'i 'brel pa'i rgyu mtshan nyid kyis nges par bya ste/ de khas mi len na smra ba nyid 'dod chags dang ldan pa la sogs pa'i go bar byed pa ma yin par brjod nas mi mthun pa'i phyogs la ma mthong ba tsam gyis zhes bya ba la sogs pas rang dang gzhan gyi khas blangs pa ma mthong ba tsam gyis ldog pa grub pa bkag pa yin no//gal te mi mthun pa'i phyogs la ma mthong ba tsam gyis mi 'khrul pa ma yin na 'o na ji ltar ldog pa grub ce na/ bshad pa de'i phyir rang gi ngo bos ngo bo nyid bzlog par 'gyur ro//rang gi ngo bos zhes bya ba de ci zhig yin zhe na/ ji ltar bstan pa bzhin de'i rang gi ngo bo khyad par du ston pa ni de tsam dang 'brel pa zhes bya ba'o/ /gal te mi rtag pa nyid rtsol ba las byung ba tsam dang 'brel pa ni ma yin te/ rtsol ba las byung ba la yang yod pa'i phyir ro//des na de tsam dang 'brel pa zhes ji ltar brjod ce na bden te/ 'on kyang 'dir 'brel pa'i don rnam pa de ltar ni mi 'dod do/ /de tsam yod na rgyu mtshan gzhan la mi ltos par grub pa'i phyir de tsam nyid na yod pa nyid ni de tsam dang 'brel par brjod pa yin no//des na sgrub par byed pa'i rang gi ngo bo nyid de yin pa'i phyir de dag yod na yod pa las mi 'da' ba/ sgrub par byed pa'i chos yod pa tsam ni yod pa'i rang gi ngo bo gang yin pa de nyid sgrub par byed pa zlog par byed pa yin no/ /ji ltar zlog par byed ce na gal te ma brjod pa de lta na yang de tsam la yod pa'i shugs kyis log pas ldog pa nyid du nges pa yin no//de yod pas zlog par byed pa'am med pas yin/ de yod pas zlog par byed pa yin na ni de tsam dang 'brel pa 'gal lo/ /des na med pa nyid kyis zlog par byed pa yin no//des na de yod pa tsam la yod pa gang yin pa de log pa na yod pa ldog par byed de/ de de'i rang gi ngo bo yin pas na de med par mi 'grub pa'i phyir ro/ /'di la rtog pa ni rnam pa gnyis te/ rang gi ngo bo med na ngo bo med par 'gyur ro zhes 'brel pa tsam las ldog par 'grub pa'am yang na de lta bu'i rang gi ngo bo ngo bo'i khyab par byed pa yin pa'i phyir khyab par byed pa med na khyab par bya ba med pa'o//'am smos pa ni ldog pa tsam gyi phyogs la ltos nas sam nges pa'i yul can nyid kyis so/ /ldog pa'i rnam pa 'di gtan tshigs gang gi yin zhe na dper na shing gis shing sha pa lta bu ste zhes smos so//shing sha pa nyid kyis shing nyid sgrub pa na bsgrub par bya ba shing log pa na shing sha pa ldog par byed pa bzhin no/ /'dir yang ji ltar zlog par byed pa yin pa de bstan pa'i phyir de tsam dang 'brel pa nyid ston te/yal ga la sogs pa dang ldan pa'i khyad par 'ga' kho na zhig la de skad du shing zhes grags pa'i phyir ro/ /gtan tshigs de'i phyir na shing de na sha pa de'i rang gi ngo bo yin te sngar ji skad bshad pa bzhin no/ /rang gi ngo bo yongs su bor nas kyang ji ltar ngo bo yod par 'gyur te gang gi phyir rang bzhin 'brel pa'i phyir de med na med pa'i mtshan nyid 'khrul pa med pa yin no//de ltar rang bzhin gyi gtan tshigs kyi ldog pa bstan nas 'bras bu'i gtan tshigs kyi yang bshad pa ni/ rgyus ni 'bras bu bzlog par 'gyur zhes sbrel bar bya'o//'dir yang snga ma bzhin rnam pa gnyis so/ /'di la ji ltar rgyu zlog par byed pa yin pa de ston pa ni 'khrul pa med pa'i phyir zhes bya ba'o/ /rgyu med na mi 'byung ba ni 'bras bu'i rang bzhin de nyid ni rjes su 'gro ba dang ldog pa tsam gyi rang bzhin yin pa'i phyir ro//rgyu yang ldog pa nyid kyis 'bras bu ldog par byed pa yin no zhes rgyu nyid kyis nges pa yin te/ yod pa nyid ni ldog par byed pa ma yin te rgyu nyid ma yin pa'i phyir ro/ /rgyu log pa na zhes bya ba ni snga ma'i cha rnam par 'grel pa'o/ /gzhan du na phyi ma yin no//de ltar na gzhan phyogs pa dag gis 'dod pa'i rnam pa bkag pa na rang bzhin 'brel pa yod pa na don gyis don 'khrul pa med do zhes bya ba 'di nyid grub pa yin no zhes lhag dang bcas te ston pa ni rgyu dang 'bras bu'i dngos po grub pa ni zhes bya ba yin no/ /ni'i sgra ni sdud pa'i don to//des na don 'di yin te/ rgyu dang 'bras bu'i ngo bo grub pa yang ngo bo nyid/ nges par byed de med na mi 'byung bar byed do/ /des na de'i bdag nyid grub pa ni zhes bya bar yang rtogs pa nyid do/ /de bas na zhes pa de'i phyir de tsam dang 'brel pa'i zhes bya ba la sogs pa'i rnam pa 'dis na rang bzhin 'brel pa kho na ldog go//de ltar khas mi le na na ni bsgrub par bya ba med na sgrub par byed pa med pa zhes bya ba nyid mi 'grub bo zhes gsungs pa ni/ de lta min na zhes bya ba yin no/ /rang bzhin 'brel pa khas mi len na bsgrub par bya ba gcig log pas ji ltar gzhan ni zhes bya ba sgrub par byed pa ldog par 'gyur/gal te 'gyur na ni de'i tshe bram ze'i khye'u la rta dang ldan pa log na/ phyugs dang ldan pa yang ldog par 'gyur te rta lag na gzhan nyid du khyad par med pas phyugs kyang ldog pa'i phyir ro//'brel pa med pa log na ldog par 'dod pas de de ltar ci ste mi 'dod ces 'dri ba'i sgo nas de ston pa ni mi la rta mi bdog ces te zhes bya ba yin no/ /de ltar ma 'brel pa la ldog pa med par bstan nas rjes su 'gro ba yang med par brjod pa ni de bzhin gcig cig ces bya ba yin no//gcig nye bas gzhan nye ba ni nges pa ma yin te/ gzhan du na rta nye na yang ba lang nye bar 'gyur ro/ /chos can gcig gam du mas 'ga' zhig ji ltar gyur pa de ltar gzhan du yang 'gyur ba yin no zhes bya ba'i nges pa yang yod pa ma yin no//de'i phyir zhes bya ba ni mjug sdud pa'o/ /rang bzhin 'brel pa kho nas gtan tshigs kyis bsgrub bya go bar byed do/ /de rtogs pa'i rgyu mtshan la brten par 'gyur ro/ /go bar byed pa nyid ni rjes su 'gro ba dang ldog pa bdag nyid las yin no/ /de dag kyang gang zhig gang la rag las pa'i rang bzhin yin pa de la de yin par 'gyur te/des na rang bzhin 'brel pa nyid kyis go bar byed pa yin no/ /de yang rnam pa gnyis te de'i ngo bo'i mtshan nyid dam de las byung ba'i mtshan nyid yin no/ /gal te de'i bdag nyid dang de las byung ba'i dbang kho nas gtan tshigs kyis bsgrub par bya ba go bar byed pa yin na/da ni dpe la dgos pa ci yod de yang rang nyid kyis de dang de dag tu bstan pa la slob dpon gyis kyang tshad ma kun las btus pa la sogs pa bstan pa yin no/ /'di ni rnam pa ji ltar yang nye bar sbyor ba ni med do//re zhig rang bzhin gyi gtan tshigs la ni bsgrub par bya ba rtogs pa gtan tshigs kyi rang bzhin rnam par dpyad pas 'grub pa yin te/ de ltar yang byas pa nyid la sogs pa dag tu 'jug par 'gyur ro/ /sha pa nyid la sogs pa yang sha pa nyid shing gi khyad par yin pa'i phyir shing nyid rtogs so//thams cad du de lta bu nyid yin pa'i rgyu mtshan 'brel pa de nyid kyis rjes su 'gro ba'i rang bzhin mthun pa'i phyogs la yod pa gang las chod pa med par don rtogs par 'gyur ba yang 'phen pa yin no/ /ldog pa'i bdag nyid mi mthun pa'i phyogs la med pa yang de bzhin no//gang gis rjes su 'gro ba bsgrub pa'i chos can mthong ba'i yul du nye bar sbyor ba chos mthun pa nyid can gyi dper 'gyur ba dang / ldog pa bsgrub pa mthong ba'i yul du sbyar ba chos mi mthun pa nyid can gyi dper 'gyur ba de gnyis chos can nges pa'i yul can nyid du 'jug pa grub pa'i phyir/de gnyis bsgrub par ston pas rtogs par 'gyur ba'i chos can de nyid bsgrub bya rtogs pa'i skabs su dran par byed pa gang yin pa mngon sum dang mi dmigs pas bsgrub pa'i rjes su 'gro ba dang ldog pa ni go bar byed pa'i yan lag tu gyur pa ma yin gyi 'on kyang 'brel pas grub pa dag nyid yin no//de la ni chos can nges pa nye bar blangs pas cung zad kyang byar med do/ /sgrub par byed pa'i rang bzhin rnam par dpyad pa tsam nyid kyis rnam pa 'di lta bu mtha' dag ni 'di lta bu yin no zhes rnam par gzhag pa grub pas ni dper na 'di bzhin no zhes par bkod pa don med pa'i phyir ro//gang gi dper na 'di bzhin no zhes nye bar bkod pa don dang ldan par 'gyur ba ji ltar gcig las de yod pa de bzhin du 'gyur ro zhes bya ba'i nges pa ni yod pa ma yin no/ /'bras bu'i gtan tshigs la yang tshang bang la sogs par mthong ba rgyu dang 'bras bu'i dngos por 'dzin pa la nye bar mkho ba yin gyi/der mthong ba'i phyir ri'i spo la de dmigs pa me sgrub par byed pa ni ma yin no/ /tshang bang du du ba yod na me mthong ba zhes bya ba tsam gyis ni ri'i spo la yang de ltar 'gyur ba ni ma yin te phyugs dang ldan pa yin pa'i phyir rta dang ldan par nges pa ni ma yin no zhes 'di ni bstan zin to//du ba ni me'i 'bras bu yin la rgyu med par yang 'bras bu mi srid pa'i phyir du ba las ri la yang me rtogs pa yin no zhe na/ 'o na ni 'bras bu nyid kyi rgyu mtshan gyis thams cad du de ltar 'gyur ba 'di gzhan nyid yin gyis/tshang bang du de de ltar mthong ba'i rgyu mtshan can ni ma yin no/ /der dmigs pas ni rgyu dang 'bras bu'i dngos por 'grub la/ de las ni thams cad du de ltar 'gyur bar rtogs pa'i phyir 'dir ji skad brjod pa'i tshul gyis chos can bstan pa nye bar mkho ba yod pa ma yin no//des na phyogs 'di la dpe dgos pa ci yod ces rang gi 'dod pa las ltos te dpe 'gal bar dogs pa bsu nas med na mi 'byung ba de nyid ces smos so/ /bstan zin pa'i 'brel pa'i rgyu mtshan can rjes su 'gro ba dang ldog pa'i bdag nyid can gyi med na mi 'byung ba gang yin pa de nyid dpe dag gis rab tu ston to//de yang 'brel pa ma bstan par bstan par nus pa ma yin no/ /rgyu ma bstan pa yang 'bras bu bstan par 'gyur ba gang yin pa rgyu tsam gyis ni 'brel par rjes su 'gro ba dang ldog pa dag gis rgyu mtshan ma yin gyi 'on kyang tshad ma nyid kyis so//des na thams cad du 'di yod na yod pa yin la 'di log na 'di ldog go zhes bstan kyang de skad brjod pa tsam gyis ni de ltar mi 'grub kyi/ 'on kyang gang las de de ltar 'gyur ba de rtogs pa nyid kyis de rtogs pa yin no//de'i phyir de'i bdag nyid dang de las byung ba'i rgyu mtshan can gyi rjes su 'gro ba dang ldog pa dag ston pa ni chos mthun pa dang mi mthun pa'i dpe dag gi bya ba yin no/ /slob dpon phyogs kyi glang po'i dgongs pa yang 'di nyid yin no zhes ston pa ni de'i zhes bya ba'o//gang gi phyir dpe dag gis 'brel pa la brten pa'i rjes su 'gro ba dang ldog pa brjod pa de'i phyir chos mi mthun pa'i dpe 'di la nges par gzhi mi 'dod de/ res 'ga' chos mi mthun pa'i dpe dngos por gyur pa ma yin yang bsgrub bya sgrub par byed pa slob dpon bzhed pa yin no//de yang dpe'i dgos pa 'di ltar yin na 'thad par 'gyur gyi der de ltar grub pa'i rgyu mtshan gyis bsgrub bya sgrub par byed pa yin na ni ma yin no/ /ji ltar zhe na de dag med na 'ang zhes smos so/ /bsgrub par bya ba med na sgrub par byed par mi 'gyur ro zhes brjod pa las kyang 'brel pa de rtogs pa'i phyir ro//dpe ni 'bras bu bstan pa'i don du 'jug pa yin na de ni dpe med par brjod pas kyang 'grub pa kho na'o/ /des na med pa'i dpe la brten pa'i ngag dang dpe med pa'i ngag khyad par 'ga' yang med do//de'i phyir brjod pa las kyang de rtogs phyir gsungs so/ /da ni gang gis chos mi mthun pa'i dpe la gzhi mi bzhed pa dper ji ltar 'brel pa nye bar ston pa de ston pas 'di ltar zhes bya ba la sogs pa gsungs so/ /dpe ni de'i ngo bo zhes bya ba de'i bdag nyid dang rgyu'i dngos po skyed par byed pa nyid ston te/de'i bdag nyid dang de las byung ba dag de mi shes pa la rab tu ston pa yin no/ /bsgrub par bya ba nyid sgrub par byed pa'i rang gi ngo bo yin pa'i phyir de'i bdag nyid ni bsgrub par bya ba la gnas pa'i chos yin no//de bzhin du rgyu'i dngos po yang de nyid kyi phyir 'grel par bsgrub par bya ba'i chos ni zhes 'chad par 'gyur ro/ /'grel pa ni dpe la ni zhes bya ba'o/ /bsgrub par bya ba'i chos ni de'i ngo bor de'i bdag nyid du sgrub par byed pa'i rang gi ngo bor ston to/ /ji ltar zhe na de'i rang gi ngo bo rgyur gyur pa nyid kyis de tsam dang 'brel pas te des so//chos mthun pa'i dpe la sgrub par byed pa yod na bsgrub bya'i chos yod par brjod pa yin la de tsam dang rjes su 'brel pa de nyid ni rjes su 'gro ba yin te chos mthun pa'i dpe ni rjes su 'gro ba rab tu ston pa tsam gyi rang bzhin yin pa'i phyir ro//rjes su 'gro ba de yang de'i rang bzhin ngo bo nyid kyis 'gyur ba yin pa des na rjes su 'gro ba bstan pas de'i bdag nyid du rtogs pa yin no/ /rjes su 'gro ba bstan pas de'i bdag nyid brjod par 'gyur ro zhes bya ba gang yin pa 'di la rigs pa ci yod ce na/brjod pa cung zad byas pa de thams cad mi rtag go zhes chos mthun pa'i dper rjes su 'gro ba bstan pa na 'bras bu byas pa'i ngo bo nyid skyed par byed pa'i rgyu gang yin pa de ni mi rtag pa'i ngo bo skyed par byed do zhes skad cig gi 'jig par ston par 'gyur ba'i tshad ma brjod par 'gyur ba yin no//de ltar ma yin na ni byas pa'i mtshan nyid kyi chos gcig yod pa na gzhan mi rtag pa yang yod par 'gyur ro zhes bya ba'i nges pa med pa'i phyir 'khrul bar dogs par 'gyur ro/ /de ltar yin dang 'di 'khrul pa med par bstan pa nyid du mi 'grub bo//des na 'di ji lta mi 'khrul par brjod pa de gang las de lta bu nyid du 'grub pa de mtshon par byed pa nyid yin na de ltar rtogs pa'i rigs pa de nyid kyis bstan par byas pa ji ltar rtogs pa de kho na bzhin du 'gyur ro/ /de bshad pa ni tshad ma des kyang zhes bya ba nas bkag pa'i phyir ro zhes bya ba'i mthar thug pa'o//gal te gang byas pa de thams cad mi rtag pa ste dper na bum pa bzhin no zhes bstan pa nyid kyis de ltar 'grub na gzhan mtshon par byed pa la mi ltos par 'gyur ro/ /ci ste yang rang nyid ma grub cing nus pa gzhan yang mtshon par mi byed pa ni the tsom za ba yang nges pa dang ldan pa nyid du bstan par 'gyur ba'i phyir de ji lta ba bzhin ma yin pa kho nar bstan par 'gyur ro//nus pa'i rigs pa mtshon par byed pas ni de'i rtsa ba can gyi bstan pa de lta bu kho na'o zhes bya bar grub pa kho na'o//'di ltar dpes ni 'di na ji lta bar thams cad du de bzhin no zhes mngon sum gyi byed pa nye bar sdud pa yin no/ /mngon sum tsam ni nus pa ma yin te/ gcig tu ci zhig ltar nyams su myong bas thams cad du de lta bu nyid du mi 'grub pa'i phyir ro//des na ji ltar dpe med pa'i sgra nyid kyis brjod na sgra nus pa med pa'i phyir ji lta ba bzhin rtogs pa med pa de bzhin du/ dpes kyang phyogs gcig pa'i mngon sum nye bar len na mi rtogs pa kho na'o/ /des na ngag bzhin du mngon sum yang 'di la nus pa med pa des na nus pa mtshon pa nyid de'i byed pa yin no//dpe ni 'brel pa mtshon par byed pa nyid yin gyi ston par byed pa ni ma yin te/ de bzhin du nges pa dang ldan par rtogs pa de med na med pa'i phyir ro/ /bstan pa ni 'dir ji lta ba bzhin no zhes bya ba 'di tsam zhig rtogs pa yin gyi 'brel pa ni ma yin no//der de'i bdag nyid 'dzin pa'i tshad ma 'jug pa yang ma yin te/ 'dir chos gzhan gzhan gyi bdag nyid kyi chos nyid rtogs kyi/ chos can nges pa la brten pa nyid du ni ma yin pa'i phyir ro/ / nges pa'i chos can yang dper brjod pa ma yin no/ /'bras bu'i gtan tshigs la yang gang na du ba yod pa de na me yod de/ dper na tshang bang bzhin no zhes bya ba 'di ni 'brel pa ma yin no/ /du ba yod na me yod na ni 'bral pa ma yin te/ 'on kyang me yod na du ba yod pa'o/ / gal te 'brel pa 'dzin pa'i tshad ma'i yul nyid kyis tshang bang nye bar len pa yin na ni 'brel pa ji lta ba bzhin 'gyur gyi bzlog par ni ma yin no/ /de na 'dir yang chos mthun pa nyid can gyi dpes rjes su 'gro ba nyid ston pa na de dag gzhan du mi 'thad pas 'phangs pa 'brel pa nye bar ston par byed pa yin no//de yang gal te chos can de nyid la mthong ba yin na de nyid de 'dzin pa'i tshad ma'i yul du 'gyur ro/ /ci ste gzhan du rgyu dang 'bras bu'i dngos po bzung la de yang shes bzhin pa nyid gang na du ba yod na me yod par dmigs par 'gyur ba de dper byed na ni de'i tshe 'brel pa 'dzin pa'i tshad ma'i yul gzhan nyid yin la/dpe yang gzhan nyid yin par gsal te/ gal te 'di dpe med pa'i ngag gis kyang mtshon par nus pa'i phyir dpes don med do zhe na ma yin te/ dpe yod na ngag der mthar thug par 'gyur ba'i phyir ro//dpes stong pa ni nye bar dgod pa ma yin te 'gal ba med pa'i phyir dang rtogs par byed pa'i tshul mi 'dra ba'i phyir ro/ /de'i phyir de ston pa'i ngag las chos mthun pa'i dpe gzhan ma yin no/ /de nyid kyi phyir dam bca' ba la sogs pa ltar sbyor bar byed pa ma yin pas mi brjod pa gsal ba yin te rjes su 'gro ldog gi ngag gi rang bzhin yin pa'i phyir ro//de bzhin du rang bzhin gyi gtan tshigs cha de'i ngo bor ston pa dpe'i byed pa yin par bstan nas/ 'bras bu'i gtan tshigs la bshad pa/ yang na dpe la bsgrub par bya ba'i chos ni dngos po tha dad pa la 'bras bu'i mtshan nyid don gzhan gyi rgyu dngos por ston to//gang gi tshe dpes du ba yod na me yod par bstan nas sngar bshad pa'i tshul du du ba la sogs pa don gzhan du gyur pa la rgyu'i dngos po nyid du bstan par gyur pa yin te/ de ltar bshad pa ni de yod pa nyid na yod pa'i phyir ro ste/ de yod na yod pa nyid kyi phyir zhes bya ba'i don to/ /de ltar rjes su 'gro ba bstan pas me du ba'i rgyu yin no zhes bya bar rtogs pa yin te/ de ltar rtogs pa med par rjes su 'gro ba nyid mi 'grub pa'i phyir ro/ /da ni chos mi mthun pa'i dpes kyang 'brel pa grub pa nyid du ston pa ni/de ltar zhes bya ba'o/ /de'i ngo bo de'i bdag nyid dang rgyu dang 'bras bu'i ngo bo de dag rab tu grub pa yin na chos mi mthun pa'i dpe la ldog pa rab tu grub po/ /chos mi mthun pa'i dpe ni ldog pa bstan pa'i don yin la/de yang 'brel ba grub na 'grub bo/ /des na de ni de nyid mtshon pa na ldog pa ston pa yin no/ /gtan tshigs gnyi gar yang ldog pa'i rang gi ngo bo nyid bshad pa ni/ mi rtag pa nyid med na zhes bya ba yin no/ /de yang 'brel pa'i rtsa ba can nyid du ston pa ni 'di ltar zhes bya ba yin no//gal te chos mthun pa dang mi mthun pa can gyi ngag dag las de dag gi dpe tha mi dad na rang gi don gyi rjes su dpag pa la med par 'gyur ro zhe na/ 'di la bshad pa/ ji ltar sbyor ba mthong ba goms pa las rang gi don gyi rjes su dpag par sgra med kyang sgra'i rtogs pa'i tshul du 'phen par byed pa dang 'phang bar bya ba'i ngo bor chos mthun pa'am mi mthun par khyab pa rtogs pa de bzhin du dpe steng thogs su nges pa ji ltar bstan pa'i med na mi 'byung ba'i ngo bor gyur pa yin no//de'i phyir dpe la khyab pa brjod pa las lhag pa'i nye bar sbyor ba ni med do//de nyid kyi phyir/ gtan tshigs mtshan nyid gsum nyid las/ dpe ni logs su brjod ma yin/ /zhes bshad do/ /rnam pa 'ga' zhig ltar yang nye bar sbyor na ni mtshan nyid gsum brjod pa yang logs su brjod par 'gyur ro//'brel pa grub pas ldog pa grub pa'i phyir gzhi med kyang gtan tshigs kyi ldog pa rab tu 'grub par 'gyur ro/ /gang gi tshe dpe la de ltar dmigs pa dang ma dmigs pa dag gis khyab pa 'grub pa de'i tshe ni gzhi med par ldog par mi 'gyur te/ mi rtag pa med pa'i phyir rta'i rwa la sogs pa la byas pa med pa yin nam 'on te rta'i rwa nyid med pa'i phyir dngos po'i chos nyid kyis byas pa nyid dang mi ldan pa yin no zhes so/ /des na de med pa'i phyir de la med pa'i phyir 'di cir yang mi rung ngo / /de med pa nyid kyis mi 'jug pa yin gyi mi rtag pa med pa'i phyir ni ma yin no zhes mi 'jug pa gzhan du grub pas na ldog pa ma nges pa nyid du 'gyur ro//gang gi tshe gzhi yod kyang de tsam la bsgrub bya med na med pa nges pa'i rten ma yin pa'i phyir dpe la gnas pa'i nges pas don 'ga' yang med pa de'i tshe der yang gnyi ga 'dod rgyal bar med pa yin no zhes dogs la 'dir yang dngos po'i chos yin pa'i phyir med pa ri bong gi rwa la sogs pa la byed pa yin no zhes dogs pas gzhi med kyang khyad par med la/sgra bzhin du mngon sum yang rang nyid nges pa'i rang bzhin yin pa yal bar dor te nges pa'i rgyal mtshan mtshon par byed pa nyid kyis nges par byed pa yin pa na gzhi yod pa dang med pa dag la khyad par yod pa ma yin no//gal te dpe dang bcas pa'i khyab par brjod pa yang don ma nges pa nyid kyis 'brel pa nyid mtshon pa na nges par 'gyur ba yin pa na 'o na 'brel pa de nyid mtshon par bya ba'i khyab pa brjod pas ci bya zhe na/ji ltar 'brel pa yod kyang rjes su 'gro ba dang ldog pas chod pas bsgrub par bya ba rtogs pa 'di ni gtan la phab zin to/ /des na de'i yan lag dang mi 'bral ba'i phyir rang dbang ma yin no/ /de ltar na phyogs la sogs pa'i rnam par dbye ba ni ngag tsam gyi rang bzhin nyid ma yin no//dngos po'i yan lag tu ma gyur pa brda tsam gyis ni bstan bcos byed pa dag mtshan nyid ston pa ma yin no/ /'di ltar mthun pa'i phyogs dang mi mthun pa'i phyogs la yod pa dang med pas ni rjes su 'gro ldog gnyis brjod la/rtogs par bya ba'i chos kyi rten gyis ni de dag las phyogs gzhan kho na'o/ /khyab pa ston pa'i skabs su ni nges pa'i chos can 'dzin pa yan lag ma yin pa'i phyir rjes su dpag par bya ba nyid dam dpe nyid la khyab par brjod par bya'i zhes bya ba 'di gnyi ga yang ma 'brel pa yin te/gang dang gang byas pa de dang de mi rtag pa yin no zhes nges pa yongs su 'dzin pa med pas na 'di gang gi khyab pa ma yin rjes su dpag par bya ba tsam la mi brten pa'i phyir ro/ /phyi'i khyab pa yang ma yin te/ dpe tsam la mi gnas pa'i phyir ro/ / de ltar spros pas chog go/ /de ltar na 'o na rjes su 'gro ldog bzhin du 'brel pa yang gzhan gyi don gyi rjes su dpag par brjod par bya ba yin pa'i phyir tshig yan lag gsum par mi 'gyur ro zhe na ma yin te khyab pa'i tshig rtogs na 'brel pa don gyis go ba'i phyir ro/ / de ma rtogs na ni brjod pa'i khyab pa yang mi rtogs pas de brjod pa don med par 'gyur ba'i phyir ro/ /'brel pa ni gtan tshigs kyi mtshan nyid ma yin gyi 'on kyang tshul gsum nyid yin pas 'di tshul gzhan du mi 'gyur ro/ /des na de ltar de dag med na'ang de med ces bya ba gzhung gzugs pa'i phyir mi mkhas pa'i dbang du byas te gzhi med par yang zhes bya ba 'di'i mthar thug par dpe'i dgos pa 'brel pa tsam yin par brjod pa yin no//mkhas pa'i dbang du byas nas kyang gzhung gzugs pa'i phyir gang dag la zhes bya ba smos so/ /gang dag la de'i ngo bo dang rgyu'i dngos po de'i bdag nyid dang de las byung ba rab tu grub pa la'o//mkhas pa'i dbang du byas nas tshul gzhan du bstan pa'i phyir ro zhes smos so/ /'brel pa rig pa'i mkhas pa de rnams la ni 'brel pa rab tu ston pa'i thabs dang 'brel ba gtan tshigs 'ba' zhig brjod par zad do//gtan tshigs ni brjod la 'brel pa rab tu ston pa'i thabs dang bral ba zhes bya bas ni phyogs kyi chos tsam 'ba' zhig brjod par bya'o zhes bshad par 'gyur ro/ /tshul gsum med na rtags nyid du mi 'gyur ba'i phyir ro/ /'di skad brjod pa yin te/mkhas pa'i dbang du byas nas ni gtan tshigs tsam brjod pa nyid rigs pa'i phyir dpe nyid kyis cung zad kyang byar med pa'i phyir gzhis ni gsal bar yang byar med do/ /'di ltar me dud kyi 'brel pa rig pa'i me don du gnyer ba dmigs nas gang na du ba 'di yod pa der song shig ces brjod pa yin no//des na mi mkhas pa 'brel pa mi rtogs pa la de dag med na de med ces brjod pa tsam gyis 'gyur ba'i chos mi mthun pa'i dpe dang / chos mthun pa'i dpe'i gzhi don med do/ /mkhas pa la ni brjod pa dang dpe'am de'i gzhi yang rung ste/'di thams cad dgos pa med do zhes gang gi don du zhes bya ba la sogs pas 'chad do/ /ldog pa ni 'brel pa rab tu bstan pa'i don yin na de ni grub pa des na de grub pa de'i tshe dpe brjod pas ci zhig bya/ de lta yin dang skabs kyi don grub pa nyid do zhes bshad pa ni de rab tu bstan na yang zhes bya ba yin no//dpe brjod pa nyid dgos pa med na de rab tu bstan pa yin na 'gyur ba'i chos mi mthun pa'i dpe gzhi gang yin pa de yang don med pa kho na'o/ /dpe brjod na de'i tshe gzhi'i yul can gyis dpyod pa 'jug pa zhig na de brjod pa yang med na ni gzhi nye bar mkho ba med par gdon mi za ba kho na'o//slob dpon yang 'di bzhed pa yin no zhes bshad pa ni snyam du dgongs shing bya ba'o/ /'o na gang gi tshe phyir rgol ba nam mkha' la sogs pa'i rtag pa khas mi len pa'i tshe ji ltar rtag pa la byas pa nyid ldog ce na zhes dogs pa bsu nas de'i the tshom nyid med de/de med pas de la mi 'jug pa'i phyir ro zhes slob dpon phyogs kyi glang po gzhi spong bar mdzad do/ /des na de ltar dpe med pa gzhi spong bar gsungs pas 'brel pa bzhed pa kho na'o zhes bstan nas tshul gzhan gyis kyang slob dpon 'brel pa zhal gyis bzhes par ston pa ni de nyid kyi phyir zhes bya ba'o//dpe la de'i ngo bo dang / rgyu'i dngos po ston pa'i mtshan nyid gang gis gzhi spong bar bshad pa'i gtan tshigs de nyid kyi phyir gang gis 'brel pa shes pa'i rtogs pa po de la gnyis las zhes bya ba skabs su babs pa'i dpe gnyis kyi nang nas gang yang rung ba zhig smras pas don gyis go bas shugs kyis thob pa de rgyur gyur pas dran pa yang dag skye bar 'gyur ro//'di skad brjod pa yin te gang gi tshe dpe 'brel pa rab tu ston par byed pa de'i tshe de rnam pa gnyis yin yang gang yang rung ba zhig brjod pas 'brel ba shes pa na dpe gnyis pa las dran pa nye bar skye bar 'gyur ro//'di nyid ston pa ni yang na zhes bya ba'o/ /yang na don gyis go bas gang yang rung bas gnyi ga rab tu bstan pa'i phyir ro zhes bshad pa gang yin pa ste sngar bshad pa 'ba' zhig tu ma zad kyi der yang slob dpon dpes de'i ngo bo dang rgyu'i dngos po ston par dgongs te/don gyis go bas gcig brjod pas dpe cig shos 'grub par bshad do/ /yang ji ltar na dpe de'i ngo bo dang rgyu'i dngos po ston pa yin la/don gyis go bas gzhan dran par yang ji ltar 'gyur zhe na 'di ltar zhes smos so/ /'brel pa nye bar ston pa mdor bsdus nas bshad kyang rgyas par 'chad do/ /gang byas pa de ni mi rtag pa'o zhes smras na zhes bya bas ni chos mthun pa bstan to//dpe'i skabs yin yang chos mthun pa tsam brjod pa ni ji skad brjod pa'i tshul du dpe tha dad pa ma yin par bstan pa'i don du'o/ /gsal bar te gdon mi za bar mi rtag pa gang yin pa 'di ni byas pa 'di'i ngo bo nyid do/ /ngo bo zhes bya ba 'di ci zhig ce na bshad pa de tsam dang 'brel pa'o//gang zhig gang yod pa tsam dang 'brel pa de ni de'i ngo bo yin la/ mi rtag pa nyid kyang byas pa yod pa tsam dang 'brel pa yin no/ /gal te gang byas pa de ni mi rtag pa'o zhes smras na ni 'di'i ngo bo nyid do zhes rtogs par ji ltar 'gyur zhe na/ de yod par nges pa'i phyir ro zhes smos so//mi rtag pa de yod par nges pa'i phyir 'di de'i ngo bo yin no zhes shes so/ /gang byas pa de mi rtag pa'o zhes bya ba la mi rtag pa nyid yod pa nges par rtogs te/ gang byas pa zhes byas pa mtha' dag yongs su bzung nas bstan pa'i phyir ro/ /'di skad brjod pa yin te/byas pa las mi ldog pa nges par bstan pas mi rtag pa de tsam dang 'brel pa'i rang bzhin ngo bo yin par rtogs pa yin no/ /de'i bdag nyid du mi shas na de ltar nye bar ston pa ma yin pa des na yod pa bzhin du de'i ngo bor tshad mas mthong ba nyid du de nyid las rtogs so//de bshad pa ni tshad mas mthong ba yin no zhes bya ba'o/ /gal te de'i bdag nyid ma yin yang de yod par nges pa yod pa ma yin nam des na ji ltar de las de tsam dang 'brel pa'i rang gi ngo bor rtogs she na don tha dad pa med na zhes smos so/ /re zhig mi rtag pa ni byas pa las gzhan ma yin no//gzhan ma yin pa de yod par nges pa gang yin pa de ni chos gcig gi bdag nyid du go bar byed do/ /gzhan ma yin yang byas pa rtsol ba las byung ba la nges pa ma yin pa'i phyir ro/ /des na ji skad bstan pa'i rjes su 'gro ba brjod na de'i bdag nyid du rtogs par 'gyur ro//de bas na de'i ngo bo yin no zhes de'i bdag nyid du shes pas na don gyi rang bzhin rnam par dpyod pa'i don gyis go bas mi rtag pa nyid med na byas pa nyid med do zhes bya bar 'gyur ro/ /mi rtag pa nyid med na byas pa med do zhes rtogs pa'i byed pa yang yod la/rnam pa 'di lta bu'i ngag gi don gyi rnam pa'i don kyang yod pa yin no/ /des na zhes bya ba'i sgra don 'dzin pa'i bdag nyid yin na ni de'i ngo bor shes pa la de lta bu'i don du 'gyur bar brjod par 'gyur na/ de ni de'i ci yang ma yin no/ /des na rtogs pa'i byed pa nyid kyis rnam pa de lta bu'i ngo bo'i rtogs pa bstan pa yin te rtogs pa med pa la de med pa'i phyir ro//'dis ni rjes su 'gro ba brjod pa nyid kyis ldog pa 'phangs pa yin no/ /des na de'i ngo bor shes pa zhes brjod par bya ba kho na'o/ /'di ltar gal te mi rtag pa med par yang byas pa yod na ni gang byas pa de mi rtag pa'o zhes bya ba nyid du mi 'gyur te/byas pa rtag pa yod pa'i phyir ro/ /des na rjes su 'gro ba nyid kyis ldog pa 'phangs pas 'brel pa mdun du 'gro ba la mi ltos so/ /de bzhin du rjes thogs su ston par 'gyur ba'i ldog pa yang ngo zhes de'i dgongs pa 'di yin te gal te yang 'ga' zhig tu byas pa yod par mi rtag pa yod par 'gyur bas byas pa de mi rtag pa zhes bya ba yin mod kyi/de lta na yang gang byas pa zhes de ltar khyab pa mi 'grub po/ /gal te de ltar brjod pa tsam gyis de lta yin par 'gyur na khyab pa brjod pas ldog pa 'phen par 'gyur ro 'brel pa nyid las de ltar 'gyur ba yin te des na gcig gis gzhan 'brel ba'i sgo kho na nas 'phen to//de lta na ni 'brel pa las rjes su 'gro ba yin la rjes su 'gro ba nyid kyis kyang ldog pa 'phen par 'gyur gyis rjes su 'gro bas ni 'brel pa rtogs la de la ldog pa 'phen pa ni ma yin no//'di ltar byas pa thams cad mi rtag ces 'brel pa la don grub na/ gang gi phyir byas pa thams cad mi rtag pa yin pa de nyid kyi phyir mi rtag pa med na byas pa med do zhes 'grub bo zhe na 'di la brjod pa/'dir gcig ni brjod pa'i sgo nas 'phen la gzhan ni tshad ma'i sgo nas so/ /des na gal te byas pa thams cad mi rtag ces bya bas ldog pa 'phen pa de lta na yang thabs gang gi gzhi las rjes su 'gro ba grub pa thabs de'i gzhir gyur pa nyid kyis ldog pa yin no//des na de nyid kyi de 'phen to/ /de nyid kyi phyir rang gi ngo bor med par yod par 'gyur na ni ma yin te zhes smos so/ /mi rtag pa byas pa'i rang gi ngo bo yin pa'i phyir de'i bdag nyid du rtogs na gang gi phyir de'i rang gi ngo bo yin pa de'i phyir de med na med par rtogs pa'i phyir don gyi go bas ldog pa rtogs so//de de'i rang gi ngo bo nyid yin na de dang tha dad pa med pa nyid kyi rang bzhin yin no/ /des na mi rtag pa nyid med pa gang yin pa de nyid byas pa med pa yin no/ /gang gi tshe de'i bdag nyid rab tu ston pa'i rjes su 'gro bas 'bras bu ldog pa 'phen par mi byed pa de'i tshe ni rjes su 'gro ba nyid mi 'grub po zhes bshad pa ni de lta ma yin na zhes bya ba yin no//tha dad pa med pa ma yin na byas pa yod na mi rtag pa nyid yod do zhes bya ba nyid du mi 'gyur ro/ /des na de ltar rjes su 'gro bas 'brel pa rtogs par byed pa na ldog pa 'phen te/de lta ma yin na rjes su 'gro ba nyid ma grub par thal ba'i phyir ro zhes bsgrubs nas tshul 'di nyid chos mi mthun pa brjod pa la yang yod do zhes bshad pa ni/ de bzhin du zhes bya ba yin no//der ji lta ba bzhin du 'dir yang de med na de med do zhes smras na ldog pa brjod pa nyid kyis de rtogs pa'i phyir de'i ngo bo nyid du rtogs pas de'i ngo bo nyid du rig pa la rjes su 'gro ba dran pa 'byung ngo / /chos mi mthun pa brjod pa las de'i bdag nyid du rtogs pa de'i ngo bo nyid du rig pa 'thob po//re zhig thabs gzhan gyis rjes su 'gro ba rtogs pa ni ma yin gyi/ 'on kyang de'i bdag nyid kho nas yin no zhes bstan pa'i phyir de'i ngo bo nyid du rig ces bya ba dang de'i ngo bo nyid du rtogs pas zhes bshad do/ /de ltar brjod pas ji ltar de'i ngo bo nyid du rtogs pa de bshad pa ni 'di ltar mi rtag pa zhes bya ba'i chos 'di ni 'di'i ngo bo nyid yin te/des na mi rtag pa nyid med na byas pa nyid med pa yin no/ /de lta ma yin te de'i bdag nyid ma yin na ni don gzhan de med na med par mi rung ba'i phyir ro/ /de ltar rnam pa 'dis de'i ngo bo nyid du rtogs pa yin no//ji skad bshad pa'i rnam pa nyid 'bras bu'i gtan tshigs la yang bstan pa'i phyir de bzhin du zhes smos so/ /gang na du ba yod pa de na me yod do zhes smras na/ du ba ni me'i 'bras bu yin no zhes ji skad brjod pa'i rjes su 'gro bas de'i 'bras bu nyid du shes pa don gyis go bas ldog pa rtogs par 'gyur ro zhes shin tu ring bar 'brel to//ji ltar du ba me'i 'bras bu yin no zhes rjes su 'gro bas shes she na bshad pa/ des na du ba yod na gdon mi za bar me yod do/ /de lta ma yin te 'bras bu nyid ma yin na du ba de dang 'brel pa de yod na yod pa'i mtshan nyid der nges pa med pa'i phyir me'i mtshan nyid kyi ngo bor rang dbang can du 'gyur ro//du ba yod na gdon mi za bar yod pa spangs te de yod kyang med par 'gyur ro snyam par dogs pa'o/ /'bras bu ma yin pa byas pa yod na yang mi rtag pa yod pa ma yin nam zhe na/don gzhan zhes smos so/ /dngos po tha dad 'brel pa nges pa mi 'thad do/ /me yang du ba las tha dad pa yin no/ /da lta yin dang me med kyang du ba yod par 'gyur ro zhes bshad pa ni/ des na zhes bya ba'o/ gang gi phyir me rang dbang du 'gyur te du ba yod pa yin yang med pa des na du ba yod kyang me med pa'i phyir du ba 'ba' zhig tu gyur pas na me med kyang du ba med par mi 'gyur ro//ci'i phyir zhe na/ rang gi ngo bo ma tshang ba med pa'i phyir ro/ /gang gi tshe me las du ba'i rang gi ngo bo mthong bas du ba me'i gzhan gyi dbang du gyur pa de'i tshe ji skad bstan pa'i gtan tshigs kyi rjes su 'gro ba'i rigs pas du ba yod pa na yang me yod pa yin no//gang gi phyir tshul gsum pa gtan tshigs su sngar bstan pa des na gdon mi za bar yod par nges pa khas blangs pa'i phyir gzhan gyi dbang du gyur pa kho na'o//des na me las gdon mi za bar 'byung ba dor na du ba yang de'i 'bras bu ma yin te/ des na 'di me med kyang rang gi ngo bo 'ga' yang nyams pa med pas ldog pa mi 'grub po/ /des na thams cad du du ba yod na me yod do zhes rjes su 'gro ba smras pas kyang ldog pa 'phen pa ma yin no//des na 'di ltar rgyu dang 'bras bu'i dngos po nye bar bstan pa med na rjes su 'gro ba med la/ ldog pa don gyi 'phen pa yang nyams pa med do zhes bsgrubs nas rgyu dang 'bras bu'i dngos po yin na 'thad do zhes bshad pa ni 'bras bu yin na ni zhes bya ba'o//'bras bu yod na ni gdon mi za bar rgyu yod do/ /gang gi phyir rgyu rgyu nyid yin pa ni 'di kho na ste/ 'bras bu zhes bya ba'i don yod na rang gi ngo bo nye bar 'jog pa ste nye bar gnas pa gang yin pa'o/ /ci'i phyir de ltar yin zhe na/ 'bras bu yang zhes smos so//'bras bu nyid ni de yod pa nyid na yod pa yin no/ /des na 'bras bu yod pa rgyu med na med pas gdon mi za bar rgyu yod par 'gyur ro/ /des na de'i rtsa ba can don gzhan yod na rang gi ngo bo nye bar gnas pa ni rgyu'i rgyu nyid yin no/ /'bras bur bstan na ni 'di 'thad pa yin na du ba la 'di yod ces bya ba ga las she na/de yang du ba la yod do zhes smos so/ /de yod pa nyid ni yod pa'i rang bzhin 'bras bu nyid du ba la yod pa de lta bas na du ba ni me'i 'bras bu yin no/ /des na rnam pa 'dis ldog pas kyang rjes su 'gro ba grub par bshad pa ni de bzhin du zhes bya ba'o//me med na du ba med do zhes ldog pa smras na gor ma chag par me las du ba 'byung ngo zhes rtogs pa nye bar skye'o/ /des na ldog pa brjod pas me las du ba 'byung bar rtogs te/ shugs kyis rjes su 'gro ba rtogs par 'gyur ro//gtan tshigs bshad pa de lta ma yin na zhes bya ba ste/ me las du ba 'byung ba ma yin na ldog pa nyid mi 'grub po/ /de grub pas ni de las byung ba nyid du rtogs par byed la/ de las kyang shugs kyis rjes su 'gro ba rtogs so/ /pha rol po dag gang zhig gang med na med do zhes rtogs pa des na de tsam gyis 'brel pa rtogs pa ma yin no zhes bstan pa'i phyir/rtag pa dang zhes smos so/ /nyan pa'i shes pa med pa las rtag pa'i don yod na mthong ba ni med de nam mkha' la med pa'i phyir ro/ /des na 'di rtag pa'i 'bras bu ma yin no/ / mi rtag pa la yang ma yin te bum pa la med pa'i phyir ro/ /des na mi rtag pa'i 'bras bu ma yin no/ /des na nyan pa'i shes pa gnyi ga'i 'bras bu ma yin yang gnyi ga med na yang med pa yin no/ /des na gang zhig gang med na med pa de tsam gyis gal te don gzhan yin na de de'i 'bras bu yin na nyan pa nyid rtag pa med pa bum pa la med pas na rtag pa'i 'bras bur 'gyur ro//de bzhin du mi rtag pa med na nam mkha' la med pas mi rtag pa'i 'bras bur 'gyur ro/ /'di ni rtag pa dang mi rtag pa'i 'bras bu ma yin mod kyi de lta na yang de med na med pa yin no//des na don gzhan de med na med pa tsam gyis ni de'i 'bras bur rtogs pa ma yin pas na de bzhin du me med na du ba med do zhes smras na zhes bya ba la sogs pa mi 'thad par brjod pa yin no zhes de de ltar slob dpon phyogs kyi glang pos mnyan bya nyid ldog pa can du gsungs pa'i phyir 'dir ldog pa 'brel pa mtshon par byed pa nyid du brjod pa la/slob dpon gyi lugs kyi rjes su 'brangs nas gal te ldog pas 'brel pa go bar byed na 'di yang de bzhin du rtogs par 'gyur ro zhes brtsad pa yin no/ /'di bzlog pa'i phyir med pa nyid ma yin te zhes gsungs so//rtag pa dang mi rtag pa'i don med na nyan pa nyid med pa ma yin no/ /'di skad brjod pa yin te/ 'di la ni ldog pa grub pa ma yin no/ /gal te yin na ni don gzhan nyid yin pa 'bras bur mi 'gyur ba ma yin no/ /ldog pa med do zhes ji ltar rtogs she na/ de las de dag nyid la zhes smos so//slob dpon gyis mnyan par bya ba nyid thun mong ma yin pa'i phyir the tshom sgrub par byed pa ma nges pa nyid du nye bar bkod do/ /des na gal te 'di rtag pa dang mi rtag pa med na med pa yin la nyan pa'i shes pa de las rtag pa dang mi rtag pa dag la the tshom za bar mi 'gyur ro/ / de bshad pa ni de lta bu ma yin na zhes bya ba'o/ /gang zhig gang med na zhes nges pa de yod pa ni de yod pa mtshon par byed pa yin pa'i phyir nges pa yin gyi the tshom gyi rgyur ni mi 'gyur ro/ /gal te gnyi ga med par yang med pa na de mtshon par byed pa nyid du thal bar 'gyur la/ gnyi ga gcig srid pa yang ma yin pa nges na the tshom za ba yin no zhes de lta na ni 'o na gnyi ga med na med pa nyid ces bya bar ma grub pas ldog pa med do//'o na 'di ji ltar slob dpon gyis ldog pa dang ldan par gsungs she na/ yod par nges pa zhes bya ba la sogs pa gsungs so/ /'di rtag pa dang mi rtag pa las ldog par nges pa med par bstan pa'i phyir med do zhes brjod kyi de med na med pa kho na'o zhes brjod pa'i don du ma yin no//gal te nam mkha' dang bum pa dag la mnyan pa med pa ma yin nam/ ji ltar de med pa la med pa nyid du ma nges she na/ nam mkha' la sogs pa la med pa nyid du nges pa ni bden mod kyi rtag pa dang mi rtag pa la ni ma yin no//gal te rtag pa dang mi rtag pa dag kyang de la med par nges pa ma yin nam/ de yang bden mod kyi rtag pa dang mi rtag pa med pa'i phyir de la med pa yin nam 'on te sgra gcig pu'i chos ma yin pas thun mong ma yin pa'i phyir zhes the tshom mi za'o//des na sgra rtag pa'am mi rtag pa yin zhes thun mong ma yin pa go bar byed pa ma yin pa nyid do/ /yod pa bzhin du mnyan bya go bar byed pa ma yin nam zhes rnam par nges pa'i rjes su 'brang bar gtan la phab pa'o//des na de ltar de'i 'bras bu nyid ma yin yang nyan pa'i shes pa de'i ldog pa'i rjes su byed pa'i phyir ldog pas 'bras bu nyid du mtshon pa ma yin no zhes brjod la de la ldog pa nyid med par bshad do/ /de med pa yang the tshom sgrub par byed pa'i phyir ro/ /de med pa la mi dmigs pa yod kyang ldog pa med cing de las ji ltar the tshom sgrub par byed pa yin zhes dogs pa la rtag pa 'am mi rtag pa dang rgyu dang 'bras bu'i dngos po nyid du ma grub pa'i phyir ro zhes bstan pa'i phyir gang gi tshe zhes bya ba la sogs pa smos so//dpe'i bdag nyid gnyis yod pa las chos mi mthun pas zhes rjes thogs nyid du khyad par du ston pa'i phyir 'dir khyad par med kyang chos mthun pa'i dpe nyid yin par 'gyur ro//gang gi tshe chos mthun pa'i dpes me dang du ba dag rgyu dang 'bras bu'i dngos por mi ston pa de'i tshe rjes su 'gro ba nyid mi 'grub pa'i phyir dngos po nyid ma grub na shugs 'grub par ga la 'gyur/gang gi shugs kyis 'phangs pa gang yin pa de ni de ma grub par mi grub po/ /de bzhin du chos mi mthun pa'i dpes me dang du ba dag rgyu dang 'bras bu'i dngos por mi ston pa de'i tshe med pa mi 'grub pa'i phyir rjes su 'gro ba dran par lta ga la 'gyur/yang ci'i phyir 'di la brten nas bstan/ gang gi phyir 'di la 'bras bu ma yin na rjes su 'gro ba med pa ni de lta ma yin na don gzhan de dang 'brel pa nges pa med pa'i phyir bshad zin la de bzhin du ldog pa med pa yang de lta ma yin na de med na ci ste yod par mi 'gyur zhes bshad zin pa ma yin no zhe na/lha rnams dga' bas skabs mi shes so/ /nyan pa'i shes pa nyid la 'bras bu nyid med pa kho nas ldog pa med par brjod par bya ba yin no/ /gal te de de la brten pa nyid kyis ci'i phyir ma brjod/ gzhi gzhan la gnas par brjod pa ci bya zhes rtsod na/de la 'dir brjod pa rjes su 'gro ldog dang ldan par rtogs pa'i gtan tshigs la yang rgyu dang 'bras bu'i dngos po med na de med par bstan pas rjes su 'gro ba dang ldog pa nges pa de 'ba' zhig gi thabs can de med na mi 'byung ba yin pa'i phyir nyan pa'i shes pa nyid don gzhan yin pa na 'bras bu nyid du ma nges pa kho nas ldog pa med pa yin par 'gyur ro//des na de ltar gtan tshigs rnam pa gsum nyid tshul gsum dang ldan pa yin no zhes gzhung gzugs par bya ba 'brel pa rnam pa gnyis kyis gnyis bsgrubs nas gsum pa yang de'i rtsa ba can nyid du bstan pa'i phyir/gang gi phyir zhes bya ba la sogs pa gsungs so/ /da ni de'i phyir rgyu dang rang bzhin dag ces mdor smos pa de'i phyir gyi sgra'i 'brel pa sgrub pa'i phyir ro/ /dpes rang bzhin 'brel pa 'di kho na rab tu ston pa yin gyi bya ba gzhan ni med do zhes bya ba rgyu gzhan med par brjod pa yin no//rang bzhin 'brel pa yang de ltar mthong ba'i phyir de med na mi 'byung ba tsam ni ma yin no zhes bstan pa'i phyir/ ji skad bshad pa'i zhes smos so/ /de gang gi don du bstan pa gang gis 'dir brjod ma thag pa de rgyu nyid du bstan pa'i phyir/gcig yod na zhes smos te sgrub par byed pa yod na gzhan zhes bya ba bsgrub bya rab tu grub par bya ba'i phyir ro/ /de lta na yang don 'di skabs su babs pa'i don gyi rgyur mi 'gyur ba'i phyir de rab tu grub pa la gtan tshigs bshad pa ni de med na zhes bya ba ste bsgrub bya med na sgrub byed mi srid pa'i phyir ro//gtan tshigs de'i phyir rgyu dang rang bzhin dag med pa ste/ skyed par byed pa dang khyab par byed pa mi dmigs pa na/ 'ga' zhig dgag pa bsgrub par bya ba'i yang gtan tshigs yin te bsgrub par bya ba yin no//dgongs pa 'di yin te gang gi phyir rang bzhin 'brel pa yod na de med na ldog pa'i phyir gzhan yod na gzhan yod pa yin pa des na 'di ji ltar bsgrub pa'i yan lag yin pa de bzhin dgag pa la yang yin te ldog na ldog pa'i phyir ro//rang bzhin 'brel pa'i rtsa bas med par 'gyur na yod par yang mi 'gyur ro/ /des na ldog na ldog par byed pa rang bzhin 'brel pa yin pa des na dpes nye bar bstan pa na gtan tshigs kyi yan lag ma yin yang gang zhig dgag par 'dod pa de bkag pa yang rang bzhin 'brel pa la brten pa kho nas rtogs pa yin no//ji ltar gang zhig gang du rang bzhin 'brel pa ldog na 'brel pa'i yul gyi don nye bar gnas pa las mi 'da' bas na de sgrub pa'i gtan tshigs 'brel pa'i rtsa ba can yin pa de bzhin du 'brel pa'i rten log na yang 'brel pa log pa'i phyir de log pas 'brel pa ldog pa rtogs pa kho na'o//'brel pa de yang rnam pa gnyis te/ de'i bdag nyid dang / de las byung ba'i rang bzhin no/ /des na ji ltar gtan tshigs gnyis yin pa de bzhin du de'i rtsa ba can gyi dgag pa yang rnam pa gnyis kho na ste/khyab par byed pa dang / rgyu mi dmigs pa'i rang bzhin gyis so/ /des na de ltar gnyis 'brel pa'i rtsa ba can du bshad pa de bzhin du gsum pa yang yin no/ /'di nyid 'chad pa ni 'brel pa'i yul rgyu dang khyab par byed pa de dag kho na ldog pa na rang dang 'brel pa 'bras bu dang khyab bya zlog par byed pas gtan tshigs de'i phyir ro//'dis ni skabs su bab pa ji ltar gtan tshigs nyid du nye bar sbyor ba de bstan nas de nyid dgag pa'i gtan tshigs la yang ston pa ni don 'ga' zhig dgag pa la yang bsgrub par 'dod pas rgyu 'am khyab par byed pa dang 'brel pa ni rang bzhin ldog pa gtan tshigs su brjod par bya'o//'di ltar 'bras bu khyab par bya ba dag der rang bzhin 'brel pa'i phyir gal te yang ldog pa dag la 'brel pa med pa de lta na yang 'di 'brel pa'i rtsa bas go bar bya ba dang go bar byed pa'i dngos pos mi 'khrul par grub pa kho na'o//'brel pa med na ni ji ltar gcig log pas gzhan ldog pa sgrub par byed/ des na de ltar 'brel pa rnam pa gnyis kyis sgrub pa'i gtan tshigs bzhin du dgag pa'i gtan tshigs kyang rnam pa gnyis su 'gyur ro//des na gtso bo'i sbyor ba la ltos nas mi dmigs pa rnam pa gnyis nyid du 'gyur ro/ /de ltar yang nus pa ma yin te 'di gnyis phan tshun rjes su mi 'gro ba'i phyir gcig nyid du ma grub pas gtan tshigs rnam pa bzhir thal ba'i phyir ro//sngar bshad pa'i tshul gyis rang bzhin mi dmigs par ni 'di gnyi ga yang bstan par nus pa des na/ de yang gtso bo nyid du bstan pa'i phyir bshad pa/ dmigs par ni rigs ldan de dmigs pa'i mtshan nyid du gyur pa'i dgag par bya ba de mi dmigs pa yang dgag pa'i gtan tshigs so zhes 'brel pa brjod pa'o//gnyi ga bsdus pa'i don du gnyi gar yang / yang gi sgra sbyar te/ yang ji ltar rang bzhin mi dmigs par yang dag pa'i gtan tshigs zhes 'brel par 'gyur zhe na/ de ston pa ni dgag pa'i yul can gyis zhes bya ba la sogs pa smos te/mi dmigs pa nyid kyis dgag pa 'grub pa'i phyir ro/ /de lta na 'o na dgag pa'i gtan tshigs kyi sgra'i don de'i yul can gyis tha snyad kyi don yin pa des na rgyu dang rang bzhin mi dmigs pa zhes bya ba der rjes su 'gro ba 'gal lo zhe na/de'i phyir bshad pa rgyu dang khyab par byed pa mi dmigs pa ni dgag pa dang dgag pa'i tha snyad gnyi ga'i gtan tshigs yin no/ /'di skad brjod pa yin te gang zhig snga ma dang 'brel par mi 'gyur ba 'dir dgag pa'i sgras tha snyad brjod pa'am gang gis phyi ma dang 'brel par mi 'gyur ba med pa nyid brjod pa yang ma yin gyi 'on kyang med pa'i yul can gyi rtogs pa yin no//des na rang bzhin mi dmigs par med pa sgrub par byed pa bkag pa'i phyir rtogs pa tsam gyi mthar thug par 'gyur ba yin no//de ltar ji skad bshad pa'i tshul gyis dngos su na mi dmigs pa rnam pa gsum ste/ 'brel pa rnam pa gnyis kyis lkog tu gyur pa med pa ni mi dmigs pa rnam pa gnyis kho nas rtogs pa'i phyir gnyis gtso bo yin no/ /rang bzhin mi dmigs pa la ni med pa mngon sum nyid yin no//'on kyang der de gnyis kyang khongs su bsdu ba'i gzhi yin pas gtso bor bgrang ba kho na ste des na mi dmigs pa'i sbyor ba rnam pa gsum kho na'o/ /gal te rnam pa gsum kho na yin na sngar dbye ba gzhan du yang bstan ce na/bshad pa rnam pa gsum yin yang rnam pa du mar bshad do/ /gal te rnam pa gsum nyid rnam pa du ma yin pa'i phyir rnam pa gsum nyid bshad par 'gyur ba ma yin nam/ rnam pa gsum rnam pa du mar zhes brjod pa na de nyid brjod par 'gyur ba bden mod kyi/rnam pa gsum yin yang mi dmigs pa rnam pa du ma yin no zhes brjod pa na/ de las gzhan pa'i rnam pa rtogs par 'gyur ba kho na'o/ /de bshad pa ni de dang de 'gal la sogs pa zhes bya ba yin no/ /de ma rtogs pa'i sbyor ba'i bye brag dang de dang 'gal ba rtogs pa'i sbyor ba'i bye brag gis so//gang dag ma dmigs pas med par 'grub par brjod pa rgyu mi dmigs pa la sogs pa de dag ni 'dir de ma rtogs pa'i sgras bstan la 'gal ba dmigs pa la sogs pa ni rtogs pa la sogs pa'o//gang rtogs pas med par rtogs pa de dag las gcig bstan pas gzhan yongs su bzung ba'i don du 'dis sogs pa'i sgra yin no/ /gang ma rtogs pas med par rtogs pa de ni 'ga' zhig brjod pa ma yin pa'i phyir 'dir sogs pa'i sgras ci yang byar med do//'di nyid rnam par 'grel pa ni dgag pa'i gtan tshigs ni gtso bor rnam pa gsum kho na ste/ ji skad bshad pa yin no/ /de ltar gyi sgra 'chad pas de dag nyid rang gi ngo bos ston te/ rgyu dang khyab par byed pa dang rang gi bdag nyid mi dmigs pa'o/ / de dag kyang so sor dmigs su yod pa ste gzhan du na dngos po med pa mi 'grub pa'i phyir ro/ /de ltar nges pa zhes bya ba ni shes pa gcig la 'dren pa can rtogs pas dmigs pa'i mtshan nyid kyir gyur par rtogs pa 'o/ /tshig le 'ur byas pa'i phyed 'og ma bshad pa'i phyir de ni zhes smos te de dang de 'gal la sogs pa rtogs pa dang ma rtogs pa dbye ba'i sgo nas zhes bya bas ni 'dir ji ltar gang zhig gang dang 'brel pa de ston to//de ma rtogs pa ni rgyu la sogs pa mi dmigs pa'o/ /de dang 'gal ba rtogs pa ni 'gal ba dmigs pa'o//sogs pa'i sgra'i don brjod pa ni 'gal ba'i 'bras bu rtogs zhes bya ba la sogs pa'i zhes bya ba yin no/ /'dir sbyor ba rnam pa gsum du gang zhig gang gi khongs su 'du bar bstan pa de ni sngar bstan zin to/ /des sbyor ba rnam pa gsum po 'di nyid rnam pa du mar brjod pa yin no//gal te sngar ni rang bzhin 'gal ba dmigs pa rang rgyud du bstan gyi ji ltar nye bar bstan pa dbye ba rnam pa gsum las gang rung zhig gis rnam par dbye ba ni ma yin no/ /khyab par byed pa mi dmigs pa ni sngar rang rgyud du ma yin par bstan la/ 'dir ni rang rgyud du bstan te/des na ji ltar mi 'gal zhe na/ brjod pa dbye ba mtha' dag rang bzhin mi dmigs pa nyid kyi nang du 'du ba'i phyir 'dir 'brel pa bstan pa'i don du nye bar bstan pa na 'brel pa la rang dbang du bstan pas de ltar bstan pa mi 'gal lo/ /des na/ /'gal dang 'bras bu dag grub dang //zhes bya ba la sogs pa sbyor ba'i dbye ba rnam pa bzhi bshad pa ni de dag khongs su bsdu ba'i gzhi yin pa'i phyir ro/ /sbyor ba gzhan khongs su 'du ba can de dag kyang rang bzhin mi dmigs pa'i khongs su 'du'o/ /'dir ni 'brel pa bstan pa'i phyir gnyis bkod la dngos po med pa mngon sum du byas pa ni gsum pa yin te/thams cad khongs su 'du ba'i gzhi yin pa'i phyir gtan tshigs rnam pa gsum du 'grub pa'i rgyu'i phyir ro/ /'gal ba dmigs pa yang rgyu dang 'bras bu'i 'brel pa'i rtsa bar gyur pa can kho na'o/ / de nyid kyi phyir de dang 'gal bar grub pa 'di yang khongs su rgyu ma grub pa zhes rgyu 'gal ba'i 'bras bu dmigs pa rgyu mi dmigs pa khongs su 'dus par bshad do/ /de ltar ma yin na 'gal ba dmigs pa nyid du 'chad par 'gyur ro/ /des na de ltar rang gi don gyi rjes su dpag par rtags kyi sbyor ba rnam pa 'di gsum kho na yin pas rang gi don gyi rjes su dpag pa'i mtshan nyid ni de nyid du nye bar bsdu bar rigs pa yin no//des na de ltar gtan tshigs kyi mtshan nyid du gyur pa'i tshul gsum du 'dus pa'i phyir der 'du ba'i rgyu rang bzhin 'brel pa yin par bstan pa yin no//de la yang mi dmigs pa rang bzhin gyi gtan tshigs kyi nang du 'du ba'i phyir gnyis nyid du lus par 'gyur ro/ /des na tshul gsum don dam par gnyis su gyur pa'i gsum du bsdus pa'i phyir 'brel pa rnam pa gnyis kho nar brjod do/ /'on te tshul gsum tsam gtan tshigs kyi mtshan nyid yin na de gsum du nye bar bsdu bas ci dgos/gsal ba gsum du bstan pa'o zhe na/ gal te gsal ba gsum kho na de lta bur gyur pa yin na/ mtshan nyid de dang ldan pa kho nas de ltar rtogs pas na grangs kyis ci bya/ 'on te gzhan la yang mtshan nyid de yod pa nyid na bgrangs kyang de mi spongs so zhes dogs pa la rgyu dang 'bras bu'i dngos po'am zhes bya ba la sogs pa smos so//nges pa ni nges par byed pa las yin par 'thad do/ /nges pa yang med na mi 'byung ba yin te/ med na mi 'byung nges pa ste zhes gang bshad pa'o//med na mi 'byung ba yang yin la/ nges pa yang yin no zhes bya ba'i don to/ /gzhan yang nges pa med na mi 'byung ba yin te/ med na bshad do/ /med na mi 'byung ba yang rjes su 'gro ldog nyid de/ ji skad du med na mi 'byung ba ni ji skad bshad pa'i khyab pa yin no zhes bshad do/ / rjes su 'gro ba ni nges pa'i bdag nyid kho na ste de lta ma yin na sgrub byed yod na bsgrub bya yod pa'i nges pa ma grub pas bsgrub bya rtogs par mi 'gyur ba kho na'o/ /de bzhin du ldog pa yang nges pa kho na ste/ de nyid la khyab par bya ba yod pa yin pa'i phyir ro/ /des na nges pa'i bdag nyid kyi med na mi 'byung ba ni rjes su 'gro ba dang ldog pa kho na'o//de ni nges par byed pa kho na las 'gyur ro/ /nges par byed pa yang rgyu dang 'bras bu'i dngos po yin te me'i rgyun du ba'i rgyun 'phen par byed pa nyid kyis na/ du ba yod na yod par mi 'khrul ba'i phyir dang / gzhan las lan cig kyang mi 'byung ba'i phyir de med na med pa'i phyir ro//rang bzhin yang nges par byed pa yin te/ chos de chos gzhan gyi bdag nyid yin pas de yod pa na yod pa'i phyir dang / med na med pa'i phyir de ltar rjes su 'gro ba dang ldog pa grub pa'i phyir ro/ /des na nges par byed pa la brtan nas nges pa yin pa des na de'i bdag nyid dang de las byung ba dag kho na las rjes su 'gro ba dang ldog pa dag tu 'gyur ba yin no//nges par byed pa'i rgyu mtshan gyis nges pa yin mod/ 'di rtogs pa ni rang 'dzin pa'i rtogs pa la brten par 'gyur ro/ /ji ltar 'bras bu'i rang bzhin rgyu'i rgyu mtshan can ni gang gi tshe rang gi ngo bos rtogs pa de'i tshe rang 'dzin pa'i rtogs pa la yin no//de'i 'bras bu nyid kyis du ba me la nges pa ni mngon sum kho na ste/ de yod na me yod par rtogs pa'i phyir dang de bzhin du me med na yod par rtogs pa med pa'i phyir ro//'bras bu nyid kyis 'di yod na de yod pa dang / de med na 'di ldog pa yin la de ni mngon sum kho nas rtogs pa yin no/ /de bzhin du sha pa yang de'i bdag nyid kho nas shing la nges pa yin la nges par yang mngon sum kho nas rtogs so/ /des na gang zhig gang gi 'bras bu yin pa dang gang gang gi rang bzhin yin pa de ni yod pa dang med pa'i rjes su byed pa las mi 'da' ba'i phyir/gnas pa'i dngos po rtogs par byed pa'i tshad ma gzhan kho na yin no zhes dogs pa la de'i yul can gyi tshad ma gzhan sel ba ni ma mthong ba las min zhes bya bas ni ldog pa'i rtogs pa bsal te/mthong las min zhes bya bas ni rjes su 'gro ba'i rtogs pa'o/ /'di skad bshad pa yin te 'dir go bar byed pa'i yan lag tu gyur pa'i rjes su 'gro ba dang ldog pa'i skabs yin no/ /de dag gtan tshigs shes pa'i yan lag ma yin na ni dngos por gnas pa tsam du bstan pa don med pa kho na'o//de dag rang gi rgyu'i dbang gi bdag nyid grub pa yin yang de ltar rtogs par byed pa'i tshad ma gang yin pa de nyid bstan par bya ba yin te/ rnam pa 'di lta bu'i dngos po 'di'i rgyu mtshan ni 'di yin no zhes rnam par gzhag pa'i yan lag ma yin pa'i don bstan pas ci bya dngos po dpyod pa ni de bstan par bya ba yin gyi rjes su dpag pa'i yan lag tu ni ma yin no//des na 'brel pa'i rgyu mtshan can gyi med na mi 'byung ba ni 'brel pa'i tshad ma can kho na yin na 'brel pa nye bar bkod pa yin no//'di ltar du ba dang me yod pa dang med par rtogs par byed pa'i mngon sum tsam gyis ni med na mi 'byung ba nges pa ma yin gyi 'on kyang 'bras bu nyid kyis te/ thams cad du de ltar yin par mngon sum gyis mi rtogs pa'i phyir dang / de med par skabs kyis sgrub par byed pa nyid kyang med pa'i phyir ro//de bzhin sha pa zhes de ltar rtogs pa 'di ci yod zhes rnam par dpyod pa na gang gi tshe khyad par can gyi dbyibs rtogs pa de'i tshe/ sha pa 'di ni shing gi rang bzhin nyid do zhes rtogs pa nyid do/ /ji ltar rtags rtogs pa bzung ba dag la chos rnams kyi rang bzhin ni rnam par dpyad par nus pa kho na ste/dper na skad cig ma zhes bya bar ldog pa'i bdag nyid du rtogs pa dang / nus pa zhes bya ba dbyibs dang / dkar po zhes bya ba gzugs su rtogs pa bzhin no/ /des na ji ltar dkar po'i dkar po nyid yin pas der 'khrul pa med pa de bzhin du sha pa nyid kyang shing la mi 'khrul te sha pa nyid bzhin no zhes 'di gnyi ga yang 'chad par 'gyur ro//des na gang las gsum la tshul gsum yod pa dang / rtogs pa'i rgyu mtshan yod pa'i phyir rtogs par 'gyur ba de nyid bshad pa'i phyir gsum nyid la de nye bar bsdus so//de la yang de yod pa dang rtogs pa dag gi rgyu mtshan yod pa'i phyir gsum la tshul gsum yod mod/ gzhan yang yod par 'gyur ba des na de ni rnam pa gsum nyid ces bya ba'i nges pa mi rigs so zhe na/ gzhan du zhes smos so/ /ji ltar bshad pa'i nges par byed pa med na/tha dad pa gzhan don tha dad pa gzhan dag dang / nges par yod pa'i nges pa gang yin pa ste de las rang gi ngo bo thob pa ma yin pa'i phyir de med na ci ste med/ des na ji ltar yod pa nges pa yin/ don gzhan rgyu mtshan can gyi chos zhes bya bas ni/ de yod pa tsam dang rjes su 'brel pa nyid med par brjod do//des na 'di tha dad par gyur pas de'i bdag nyid med do/ /gos la tshon bzhin no zhes bya ba ni de'i bdag nyid med na gdon mi za bar yod par nges pa med pa'o/ /'dir gzhan du zhes bya ba 'brel pa'i bdag nyid las kyang gzhan du gyur pa yin pas na rgyu dang 'bras bu'i dngos po med na gzhan dag dang nges par yod pa'i nges pa med par bstan pas tha dad pa'i dngos po la de'i bdag nyid kyang med pa'i phyir de'i bdag nyid med pa yang brjod par nus mod kyi/de lta na yang tha dad pa med pa tsam ni de'i bdag nyid ma yin gyi 'on kyang chos gcig gi bdag nyid yin no//des na de med par bstan pa'i phyir de nyid de ltar brjod de/ de yod tsam dang rjes su 'brel pa 'phen par byed pa yin pa'i phyir ro/ /yang na gzhan du zhes bya bas ni rgyu dang 'bras bu'i dngos po nyid las tha dad par brjod pa yin te/rgyu dang 'bras bu'i dngos po las med na mi 'byung ba nges pa yin te/ gzhan du gzhan ni gzhan dag dang / /nges par yod pa'i nges pa gang / /zhes 'brel pa'i phyir ro/ /don gzhan rgyu mtshan can gyi chos zhes bya bas ni de tsam dang rjes su 'brel pa'i mtshan nyid las tha dad pa'o//gos la ni tshon don gzhan gyi rgyu mtshan can gyi chos yin te/ des na gos de la gdon mi za bar 'gyur ba yin no/ /gos yin pa tsam gyis ni sgrub par brjod mi nus so/ /des na gos ni tshon don gzhan las 'gyur ba'i phyir de la gos mi 'khrul pa ma yin te//'brel pa med pa'i phyir ro/ /bar skabs kyi tshigs su bcad pa zhes bya ba ni mdo ma yin par brjod pa'o/ /des na de ltar 'brel pa nyid las gtan tshigs go bar byed pa yin par bsgrubs te/ gang dag don gzhan gyi rgyu can yang dngos po'i rang bzhin du khas blangs nas mi rtag pa la sogs pa'i rang bzhin gyi chos gcig gi bdag nyid kyis 'thob pa de tsam dang rjes su 'brel pa nyid spong ba de dag la 'brel pa bsgrub pa'i don nyid dgag pa'i phyir/gzhan yang zhes smos so/ /gang gi phyir mi rtag pa nyid kyi mtshan nyid kyi chos don gzhan gyi rgyu mtshan can yin na de'i phyir gzhan nyid yin par 'gyur ro//dngos po bdag nyid thob pa'i mi rtag pa nyid 'jig pa zhes bya ba de ni 'jig pa'i rgyu las 'byung ba yin no/ /des na 'di dngos po de'i rang bzhin du mi 'gyur ro/ /gzhan de skad smra bas ni rgyu mtha' dag 'jig pa'i bdag nyid skyed pa nyid kyis byas pa nyid 'jig pa las tha dad pa ma yin te/rgyu dang 'brel pas byas pa yin la rgyu dang 'brel pas/ mi rtag pa nyid kyang yin no zhes bya ba de'i bdag nyid spang bar 'gyur ba de bzhin du mi rtag pa nyid kyang spang bar 'gyur ro//'di ltar 'di mi rtag pa'i bdag nyid du skye ba ni ma yin te/ de ltar khas blangs na de'i bdag nyid du grub pa'i phyir ro/ /des na mi rtag pa phyis 'byung na byas pa las mi rtag pa nyid gzhan kho nar 'gyur ro/ /gzhan ni gzhan gyi rang bzhin can du 'gyur ba ma yin na des na dngos po mi rtag par mi 'gyur te/dper na bum pa snam bur mi 'gyur ba bzhin no/ /'grel pa ni de grub na zhes bya ba'o/ /don gzhan gyi rgyu mtshan las gnyis 'gyur ba yin te/ rgyu don gzhan yin pa nyid kyis dngos po grub kyang mi rtag pa nyid ma skyes pa dang /de bzhin du rgyu tha dad pa'i phyir de'i rgyu gzhan yin par 'gyur ba des na rgyu gzhan yin pas skyes pa dang ma skyes pa'i mtshan nyid chos 'gal ba gnas par 'gyur ro/ /rgyu yod pa nyid na 'bras bu 'grub pa'i phyir gzhan gyi rgyu can de grub kyang rang gi rgyu med pas ma grub pa ni phyis nyid yod pa'i phyir ro//de bzhin du rgyu tha dad pa spang ngo / /des na gang skyes kyang ma skyes pa gang yin pa de de'i rang bzhin ma yin pa'i phyir dngos po mi rtag par mi 'gyur te/ mi rtag pa stong pa nyid du bdag nyid la rang gi rgyu las mi rtag pa nyid med pa'i phyir ro/ / gal te de dang 'brel pa'i phyir de de'i rang bzhin yin pa des na de'i rang bzhin du rigs pa ma yin na zhes bya ba gang yin pa'i tshig gi tshul ni gsog tu 'gyur ro/ /'on te 'brel par rigs pa ma yin no zhes brjod na/ de ni cir yang mi rung ste/ tha dad pa la ltos nas sun 'byin pa brjod pa'i skabs yin pa'i phyir dang /tha dad kyang de'i rang bzhin du 'thad pa'i phyir ro/ /brjod pa de'i rang bzhin du rigs pa ma yin no zhes bya ba ni 'dir tha mi dad pa 'gog pa yin no/ /rang bzhin zhes bya ba ni dngos po'i rang gi ngo bo tha mi dad pa la brjod kyi/ 'brel kyang dngos po dngos po gzhan gyi rang bzhin du 'gyur ba ni ma yin no//ser po dang sngon po bzhin du 'brel zhes bya bar 'gyur gyi rang bzhin du ni ma yin no/ /grub pa dang ma grub pa dag dang rgyu tha dad pa'i phyir tha dad pa yin no zhes bya ba gang yin pa 'di nyid ga las she na/ dngos po rnams kyi tha dad pa'am rgyu tha dad pa ni 'di kho na yin te zhes smos so//gang ni tha dad pa yin la rgyu tha dad pa yang gang yin zhe na chos 'gal bar gnas pa'am rgyu tha dad pa gang yin pa'o zhes bshad do/ /chos 'gal ba gnas pa ni tha dad pa yin la rgyu tha dad pa ni rgyu tha dad pa yin no/ /gang dag gi chos phan tshun 'gal ba dang gcig tu gyur pa chos 'gal ba gnas pa de nyid de dag gi tha dad pa yin no//de bzhin du gang zhig tshogs pa gzhan la skye ba na gang zhig gzhan las skye ba rgyu tha dad pa de ni de dag gi rgyu tha dad pa yin no/ /tha dad pa ni rnam pa gnyis te gsal ba tha dad pa dang / skal ba mnyam pa dang mi mnyam pa tha dad pa'o/ /de la gang gi rgyu byed pa na gang gi rgyu byed pa med pa de ni rigs pa mtshungs pa'am de lta ma yin yang bla ste/ gsal ba tha dad par nges pa yin no/ /'dir ni 'di nyid skabs su bab pa yin no/ /rigs mi mthun pa ni rigs mi mthun pa las skyes pa yin no zhes 'di ni 'chad par 'gyur ro//de la grub pa nyid ni ma grub par mi 'gyur ba'i phyir grub pa dang ma grub pa dag tha dad pa yin no/ /gang zhig rgyu'i mthu las bdag nyid thob pa na rgyu gzhan las 'gyur ba gang yin pa de yang tha dad pa kho na'o/ /de dag tha dad do zhes bya ba 'di nyid ji ltar rtogs/tshad mas de ltar rtogs so zhe na/ gang zhig don thams cad nges par nus pa'i tshad ma ni med de ji srid rig pa tsam rnam par 'jog pa yin pa'i phyir dang / rig pa ma yin pa rnams kyang rig pa dang 'dra ba'i nges pa yang mi rtogs pa'i phyir thams cad mkhyen pa ma yin pa la thams cad rig pa med pa'i phyir ro//des na la lar grub pa dang ma grub pa tha dad par rig kyang gzhan du de lta ma yin par yang 'gyur te/ des na tshad ma ji lta ba bzhin kho nar rtogs pa'i phyir chos 'gal bar gnas pa tha dad par byed pa ma yin no zhe na 'dir brjod pa/'di ni dngos po'i gnas thabs yin gyi/ 'di tshad ma'i byed pa ni ma yin no/ /yod pa dang khyad par rtogs pa dag la ni mngon sum dang rjes su dpag pa'i byed pa 'jug gi /rnam pa 'di lta bu ni 'di ltar yin no zhes bya ba gang yin pa 'di ni dngos po'i gnas thabs yin te/dper na gang byas pa de mi rtag go zhes bya ba bzhin no/ /gal te dngos po'i gnas lugs kyang rang nyid gsal ba ni ma yin la/ de gsal ba gang yin pa de yang tshad ma yin pa des na 'di ni gang ji ltar dmigs pa de de kho na ltar blang bar bya zhes bya ba de nyid du 'gyur ro//rnam pa 'di lta bu'i dngos po yod do zhes bya ba 'di yang shes pa yul du ma byas par rang nyid gsal bar ni mi 'thad do/ /tshad ma med par dngos po'i gnas pa grub pa ni 'ga' yang med do zhe na/ 'dir nges par gzung bar gyis shig /dus der grub pa dang / dus gzhan du grub pa dag rtogs pa de nyid kyis rtogs sam ma rtogs/ gal te ma rtogs na ni tshad ma nyid med par thal lo/ /rnam par rtog pa rnams dngos po'i yul can ma yin pa nyid kyis ma rtogs pa kho na'o zhe na ma yin te der ltag par zhen pa'i phyir dang /de lta bu nyams su myong ba la brten pa'i phyir don dam par rtogs pa ma yin yang rtogs par sgrub par 'gyur ba'i phyir ro/ /'on te rtogs pa yin na de lta na rtogs pa de la gnas pa 'di nges par brtag nus so/ /rnam par rtog pa ni 'dod pa tsam la rag las nas 'jug pa'i phyir ji srid 'dod pa rjes su 'jug pa na yul 'di ni rnam pa 'di lta bu'i zhes des rtogs pa nges par brtag par bya ba kho na'o//de nyid kyi phyir brjod pa dang 'drer rung ba nyid rnam par rtog pa nyid du bshad do/ /des na ji ltar 'di'i rjod par byed pa 'di yin no zhes rang gi ngo bor ma gyur pa'i chos dag tu nges par rtogs pa de bzhin du rang gi ngo bor gyur bas kyang ngo //gal te bdag nyid gang du 'di nges par brtag pa de gal te 'di'i bdag nyid yin na ni de rig pas rig pa nyid pas 'di la nges par rtogs pa gzhan gyis ci bya/ bdag nyid ma yin na yang sgro 'dogs pa tsam du 'gyur gyi de'i bdag nyid rnam par dpyod pa na ma yin no zhe na/brjod pa char lhag par zhen pa nyid kyis rnam par rtog pa chos tsam la brten pas kyang chos gang zhig chos gzhan gang gi bdag nyid yin pa de/ de rtogs pa na ma rtogs kyang de lta bu'i rang bzhin gyi chos de rtogs pa la gnas pa na/yod pa nyid do zhes rtogs pa des ma rtogs kyang rtogs pa gzhan gyi yul du bya bar nus so/ /ji ltar dngos po cha med par yul du byed pa'i bdag nyid mngon sum gyis sngon po myong ba na/ de ji ltar myong ba bzhin du rtogs pa po'i gzhan dbang du gyur pa'i rtogs pa la gnas pa'i phyir nges par brtag par bya ba'i rang bzhin yin pa na rnam par rtog pa rnams phyi'i yul can yin pa'i phyir gal te yang spyis dben pa'i rang bzhin nges pa ma yin pa de lta na yang snang ba'i sngon po rang bzhin gcig tu snang ba 'di rang gi ngo bo'am ngo bo gzhan gyi rjes su song bar mi snang ba'i phyir spyi'i bdag nyid ma yin pas bdag nyid de la spyis stong pa nyid yod do zhes de'i rang bzhin rnam par 'byed pa nyid la nges pa bzhin no//de'i phyir chos gzhan gyi bdag nyid can snang ba'i chos kyi rnam par dbye mi nus pa'i rang bzhin ni mi snang yang rnam par dpyad pa las nges par 'gyur ro/ /de bas na rang gi rgyu mtshan gyis bskyed pa'i rtogs pas rtogs pa'i rang bzhin de'i dus su grub pa'am/dus gzhan du grub pa las tha dad pa'i bdag nyid rtogs pa des ma rtogs kyang chos de dang bdag nyid gcig pas yod do zhes rtogs pa gzhan dag gis rtogs pa yin no/ /gal te rnam par rtog pa rnams don gyi ngo bo yod pa la mi ltos pa'i phyir de rtogs pa'i rang bzhin la ji ltar rtogs bzhin pa'i rang bzhin nyid med na de'i bdag nyid can gyi rang bzhin gzhan yod par lta ga la 'gyur/rang bzhin yod na rtogs par 'gyur ba yin te/ dper na logs gcig rtogs pa'i bum pa la logs gzhan yod pa'i phyir yang rtogs par 'dod na de yang rtogs par 'gyur ba bzhin no//de bzhin du 'di ni mngon sum la mi brten pa de'i dus su grub par rtogs pa la gang gis bdag nyid du gyur pa'i rang bzhin ma rtogs kyang rtogs par 'gyur ba de yod pa ma yin no zhe na/bden mod kyi 'on kyang phyi rol ji ltar rtogs bzhin pa'i don yod pas de'i rang gi ngo bos nye ba'i rang bzhin gzhan rtogs par mi smra'i/ 'on kyang rtogs pa la de ltar yod pa'i phyir ro/ /ji ltar sngon por rtogs pa skyes pa na de'i yul du gyur pa sngon po'i rnam par rtog pa gzhan gyis nges par rtogs pa de bzhin du/de'i dus su grub pa rtogs pa na yang ji ltar rtogs pa'i rang bzhin de nges par brtags pa de bzhin du de nyid kyi rang bzhin du gyur pa'i rang bzhin gzhan yang yin te/ rtogs pa dang / ma rtogs pas tha dad kyang rang gi ngo bos khyad par med pa'i phyir ro//rtogs pa'i bdag nyid nges par rtogs pa ni dran par 'gyur gyi/ ma rtogs pa la ni dngos po'i gnas thabs khongs su chud pa yin no/ /'o na de'i rang gi ngo bos de rtogs pa na rtogs pa la rnam par gnas pa glo na nye bar gnas pa ltar rtogs sam/yang na rtogs bzhin pa de'i rang gi ngo bo las rtogs/ rnam par rtog pa snga ma la ni rtog pa rnam par dpyod pa don med do/ /phyi ma la yang gang gis de rtogs pa dang ma rtogs pa dag gi 'brel par rtogs par brjod dgos so/ /des na tshad ma ji lta ba bzhin dngos po rtogs pa'i tshul gzhan gyis ma yin pa'i phyir 'gal ba'i chos gnas pa zhes bya ba 'di ci zhig ce na rnam par rtog pa ni mngon sum bzhin du rtogs pa nye bar gnas pa'i don gyi rang bzhin rtogs pa ni ma yin te sgra la sogs pa'i rgyu mtshan med par 'dod pa tsam gyis nye bar gnas par mi rtogs pa'i phyir ro//des na mthong ba'i cha sngon ma mthong ba mthong ba ltar rang gi rgyu mtshan nyid la ni rtogs bzhin pa'i chos kyi bdag nyid du gyur pa ma rtogs pa'i chos rtogs pa ma yin no/ /'o na ci ltar rtogs she na/ rtogs pa'i chos nyid las so/ /'brel pa rtogs pa la ltos pa yang ma yin te tha dad pa med pa'i phyir ro//'o na ci ltar de rtogs pa na ma rtogs she na/ chos tha mi dad kyang ltos pa'i dbang gis tha dad par brtags pa'i phyir ro/ /dper na lo ma la sogs pa dang ldan pa'i khyad par kho na sha pa'i phyir sha pa zhes bya bas shing nyid kyi nang du 'dug pa yin yang seng ldeng la yang yod pa'i phyir rnam par rtog pas tha dad par byed pa de bzhin du de'i dus su grub pa dus gzhan du grub pa las rang bzhin tha dad pa yin yang tha dad pa tsam gyi khyad par du gyur pa zhes bya bar mi 'grub po//khyad par du gyur pa'i chos de'i bdag nyid can yongs su dor bar mi nus pa yang rtogs bzhin pa'i rang bzhin nyid yin pa des na de rtogs na rtogs par 'gyur ro//tha dad pa med kyang ma rtogs pa'i phyir ji ltar rtogs she na/ de'i rnam par nges par brtags pa las so zhes brjod do/ /nges par rtogs pa zhes bya ba 'di ci zhig /smras pa gal te de'i dus su grub pa rang bzhin gcig tu gyur na dus gzhan du grub pa bzhin dus der grub pa dus der mi 'gyur ba'am/ dus gzhan du grub pa yang dus de nyid du 'gyur te tha dad pa med pa'i phyir ro/ /gcig nyid ni bdag nyid gzhan med pa yin la de yang tha dad pa med pa yin no//bdag nyid gzhan dang ldan pa ni du ma nyid do/ /des na de ltar des de dang dus gzhan du grub pa dag dus tha dad pa dang gcig nyid bdag nyid gzhan dang bral ba'i rang bzhin yin par rnam par phye nas de dag tha dad par nges pa yin no/ / rnam par 'byed pa zhes bya ba 'di ci zhig ce na/ mngon sum la sogs pa dag las shes pa'am/ sgra la sogs pas rtogs pa rmongs pa med pa'i rtogs pas rnam par phye nas nges par sems pa'o/ /'di ltar 'ga' zhig shing nyid la skyes bu zhes rtogs te des na des shing la rnam par phye nas nges par rtogs pa na/skyes bu'i bdag nyid ma yin par nges pa ji ltar shing ni lo ma la sogs pa dang ldan pa yin la/ skyes bu ni rkang lag la sogs pa dang ldan pa yin no/ /lo ma la sogs pa nyid kyang rkang lag la sogs pa ma yin pas na/ skyes bu las shing gzhan yin no//shing nyid kyang lo ma la sogs pa las gzhan ma yin pa des na/ de ltar shing nyid rnam par phye ba nyid kyis skyes bu las gzhan nyid du rtogs pa de bzhin du de dang de ma yin pa'i dus su grub pa dag dang / dus tha dad pa nyid kyang gzhan ma yin no/ / bdag nyid gcig pa las kyang gcig nyid gzhan ma yin no/ /lo ma la sogs pa dang ldan pa nyid shing yin no zhes ni mngon sum las nges na gcig nyid rnam pa gcig pa yin no zhes bya ba go ba las mngon sum nyid las so zhe na 'o na gzhan de'i bdag nyid ma yin pa zhes bya bar 'gyur ro zhe na/ gal te de lta na shing lo ma la sogs pa dang mi ldan par 'gyur ro//de ltar ni mi nus te lo ma la sogs pa dang mi ldan pa gzhan dag yod kyang lo ma la sogs pa dang ldan pa la shing zhes tha snyad 'dogs so/ /des na lo ma la sogs pa dang ldan pa gang yin pa de nyid de lta ma yin no zhes ni mi nus so//gzhan lo ma la sogs pa dang mi ldan pa yang 'gog pa ni ma yin no/ /'on kyang de la yang shing zhes rtogs na ming tsam gzhan du 'gyur ba'i phyir dngos po la 'gal ba med do zhe na de ltar na ro gcig ni bdag nyid gcig pa can dang / tha mi dad pa yin la gzhan du ni ma yin no zhes mngon sum la rtogs sam/srid pa rnam par gzhag kyang rung ste phung po gnyis su nges pa'i phyir te/ des na khyad par 'ga' yang med do/ /des na gang zhig gang gi bdag nyid du gyur pa'i chos de rtogs pa na/ yongs su ma btang ba'i bdag nyid kho nar rtogs pa'i phyir de'i rang bzhin rnam par phye ba nyid la de rtogs pa yin no//des na chos 'gal ba gnas pa tha dad par byed pa la tshad ma tshol bar byed pa gang yin pa 'di'i de'i bdag nyid la tshad mas rtogs pa la ltos pa ni ma yin pa ma yin no/ /chos 'gal ba gnas pa tha dad par byed pa nyid la grub pa dang /ma grub pa dag tha dad pa'i bdag nyid dang 'brel bar tshad ma 'ga' zhig gi rtogs pa ltos par bya ba 'gyur ba ni ma yin gyi/ 'on kyang de tshad ma'am tshad ma yin pas rtogs pa na grub pa nyid kyis rang bzhin ma grub pa dang / tha dad pa ni rang gi ngo bo rnam par 'byed pa nyid las rtogs pa yin no//de nyid kyi phyir gal te don bdag 'di 'dod na de las bdag gis ci zhig bya zhes bshad do/ /des na gsal ba med par ni dngos po'i rang bzhin rang nyid mi 'grub la gsal ba yang tshad ma yin pa'i phyir tshad ma ji lta ba bzhin don grub po zhes smras pa de mi rigs te tshad mas rtogs pa'i rang bzhin ma rtogs pa yang rtogs pa'i bdag nyid las rtogs pa yin no//rtogs pa dang ma rtogs pa 'brel pa 'dzin pa'i tshad ma la ltos pa yang ma yin no/ /rang gi ngo bo nyid kyis de ltar 'gyur ba de de lta ma yin par srid pa yang ma yin te/ sngon po'i sngon po nyid bzhin no//de nyid kyi phyir rang gi ngo bo nyid kyis de ltar 'gyur ba la gal te tshad ma de ltar ma yin par 'gyur na phyin ci log kho nar 'gyur ro/ /de lta na 'o na 'di rtags nyid las rtags can rtogs pa zhes bya bar 'gyur ro/ /khyad par ni 'di yin te/ 'brel pa tshad ma gzhan gyis nges pa ma yin no zhes bya ba'o zhe na/bden te nges pa'i chos can la gnas par rtogs na rjes su dpag pa nyid du 'gyur ro/ /tshad ma ni dngos po la brten pa yin la/ dngos po yang yul dang dus dang rnam par nges pa yin no/ /shes rab phul du byung bas thob par bya ba dngos po rnam par dpyod pa'i rtsa ba can 'ga' zhig la de ltar 'gyur ba gang yin pa de ni yul nges pa sgrub pa ma yin pa'i phyir tshad ma ma yin no zhes rnam par gzhag go//de'i phyir grub pa ma yin pa de ma grub pa las tha dad pa yin no zhes bya ba 'di ni dngos po rtogs pa tsam yin te grub pa tsam du rtogs pa bzhin no//don gang dag gis gcig par mi srid pa'i chos dang / gcig pa 'gal ba'i chos dang gcig gi rang bzhin du gyur pa'i bdag nyid de nyid de dag gi tha dad pa chos 'gal bar gnas pa yin no/ /don de skyes kyang ma skyes pa'i mi rtag pa nyid gang yin pa de ni de dang gcig pa ma yin pa'i phyir dngos po mi rtag par mi 'gyur ro//de bzhin du rgyu tha dad pa yang skyed par byed pa tha dad pa yin no zhes bstan pa yin no/ /'di tha dad pa byed pa nyid kyi rigs pa gzhan bstan pa'i phyir gal te de dag kyang zhes smos te/chos 'gal bar gnas pa dang rgyu tha dad pa dag kyang tha dad par byed pa ma yin na ril rdzas gcig tu 'gyur ro/ /'gal ba'i dngos po gzhan dang gcig tu gyur pa la ltos nas de gnas pa dang ldan pa'i dngos po'i tha dad pa yang chos 'gal bar gnas pa yin no zhes bya bar nus la/'gal ba'i chos de logs shig tu gyur pa la ltos nas ni tha dad par byed pa yang yin pas gnyi ga ltar bstan to/ /gang zhig gang la ltos nas rang bzhin nges pa gal te tha dad dang tha mi dad pa dang / rgyu tha dad pas kyang tha dad pa ma yin na ni dngos po mtha' dag bdag nyid gcig tu 'gyur te/gcig gi rang bzhin ni de yin pa'i phyir ro/ /gang gi tshe chos 'gal ba dang 'brel kyang tha mi dad pa de'i tshe/ de dag gcig nyid de/ tha dad pa med na dngos po rnams la tha mi dad pa nyid nges pa'i phyir ro/ /tha mi dad pa de yang 'gro ba mtha' dag gis thob par 'gyur te chos 'gal bar gnas pa'i bdag nyid kyi tha dad pa de la yod pa'i phyir dang de yang tha dad pa ma yin pas gcig tu 'gyur ba'i phyir ro//'gro ba gcig nyid du khas blang bar nus pa ma yin no zhes bshad pa ni ril gcig yin pa des na lhan cig skye ba dang 'jig pa dag ste/gcig gang yin pa de nyid gzhan yin pas ji ltar de skyes pa na skyes pa nyid yin pa dang zhig pa na yang zhig pa nyid yin pa de bzhin du don gzhan dag kyang de kho na ltar 'gyur te/ de dang tha mi dad pa'i phyir ro/ /de bzhin du thams cad la thams cad nye bar sbyor bar 'gyur ro/ /me yang gsher bar byed nus par 'gyur te/de chu las tha dad pa ma yin pa'i phyir chu nyid bzhin no/ /chu yang 'bar bar nus par 'gyur te/ me nyid bzhin no/ /de bzhin du rang bzhin gcig par 'gyur ba la sogs pa yang rtogs par bya'o/ /rnam pa de lta bu'i rang bzhin med na ni gcig nyid du mi 'gyur ro//so sor skye ba dang 'jig pa dang nye bar sbyor ba dang ldan pa dang / rang bzhin tha dad na ni rang bzhin ji lta ba bzhin rnam par gnas pas gcig ces bya bar mi 'grub pa'i phyir ro/ /de bshad pa ni de lta ma yin na zhes bya ba yin no/ /ming tha dad par zad de rnam pa tha dad pa la sogs pa'i don khas blangs nas de skad brjod pa'i phyir ro//chos 'gal ba dang ldan pa tha dad par byed pa yin na/ de dang ldan pa'i don rnams tha dad pa med pa'i phyir gcig tu thal bar 'gyur ro/ /gal te rnam pa de lta bu'i rang bzhin de tha dad pa ma yin na 'gal ba dang ldan pa gzhan yang mi 'gyur ro//gcig pa nyid ma yin na yang lhan cig skye ba la sogs par 'gyur ro zhes bya ba 'di'i mthar thug pa 'di ni dngos po gnas pa'i 'gal ba'i chos dang 'brel pa tha dad par byed pa nyid du sgrub pa'i phyir nye bar bkod pa yin gyi 'gal ba'i chos 'du ba tha dad par byed pa ma yin na 'di yang rigs pa gzhan gyi rang bzhin ma yin par 'gyur bas nye bar mi 'god par 'gyur ba gang yin pa 'gal ba'i chos 'dus pa tha dad pa ma yin pa'i phyir de bzhag ste gal te de dag kyang zhes bya ba la sogs pa 'di nye bar bkod pa ni ma yin no//de ltar mi rtag pa nyid don gzhan gyi rgyu can du mi rigs par bstan pa la gzhan dag gi rgyu don tha dad pa nyid med kyang zhes smras so//don gzhan gyi rgyu mtshan can yin na gzhan nyid du brjod do/ /de ltar gyur na 'bras bu'i bdag nyid la grub pa dang ma grub pa'i mtshan nyid chos 'gal bar thal ba dang /rgyu rgyu gzhan nyid du 'gyur bas tha dad pa byed pa yin no zhes bya ba de ni mi rtag pa nyid gzhan gyi rgyu mtshan can ma yin yang 'gyur ro/ /yod pa nyid las 'jig pa'i ngang can du skye ba'i phyir/ rgyu tha dad pa tha dad pa'i rgyu med mod 'bras bu'i rang gi ngo bo la ltos te/ grub pa dang ma grub pa'i mtshan nyid kyi chos 'gal ba go ji med/de nyid ston pa ni dngos po'i dus na mi rtag pa nyid ma grub pa'i phyir zhes bya ba yin no/ /mi rtag pa nyid ni dngos po zhig pa yin no/ /'jig pa'i ngang can nyid kyang zhig pa nyid rab tu sbyor bar byed pa byas te mi rtag pa nyid du brjod do/ / de lta ma yin na 'jig pa'i ngang can yang dngos po'i ngo bor gyur pa'i rang bzhin yin pas ji ltar sngon po la sogs pa mi rtag pa ma yin pa de bzhin du 'jig pa'i ngang can nyid kyang 'gyur ro/ /de bas na don gyi mi rtag pa nyid na zhig pa yin no/ /de yang yod pa'i dus na yod pa ma yin te/ dngos po med pa'i rang bzhin yin pa'i phyir dang / med pa yang dngos po'i dus na med pa'i phyir ro/ /des na tha dad pa ni 'gal ba'i chos gnas pa yin la/ de yang dngos po dang mi rtag pa la yod pa'i phyir rgyu don tha dad pa nyid med kyang de'i rang bzhin ma yin par mtshungs so zhe na/dngos po zhig pa las dngos po mi rtag pa zhes bya ba'i don de yin yang / mi rtag pa nyid ni dngos po'i rang bzhin la brjod par bya ba yin no/ /des na zhig pa ni mi rtag pa nyid ma yin te de la dngos po'i rang bzhin nyid med pa'i phyir ro/ /'on kyang 'jig par 'gyur ba gang yin pa de nyid mi rtag pa yin no//des na 'jig pa'i ngang can nyid mi rtag pa yin gyi med pa tsam ni ma yin no snyam du dgongs nas mi rtag pa nyid ces bya ba zhes gsungs so/ /gang zhig de lta bur gyur pa'i mi rtag pa nyid ces bya ba phyis 'grub par 'gyur ba ni 'ga' yang med do zhes bya ba'i don to//don gzhan gyi rgyu can nyid ma yin na ni mi rtag pa nyid dngos po'i dus na grub pas dngos po med par brjod mi nus te phyis 'grub par 'gyur ba yin na rgyu gzhan 'jug pa la brten par bya ba yin pa'i phyir ro/ /des na rgyu tha dad pa med na grub pa dang ma grub pa'i mtshan nyid kyi chos 'gal ba dang 'brel pa yang med do//des na rgyu don tha dad pa nyid med na mi rtag pa nyid ces bya ba gang phyis 'grub par 'gyur ba ni 'ga' yang med pa nyid de/ 'on kyang dngos po skad cig mar gnas pa'i chos can de kho na phyi ma la ltos nas rang gi ngo bo med pa yin pa'i phyir 'jig pa'i ngang can yin no zhes brjod par 'gyur te/byung ma thag tu med par 'gyur ba la de skad brjod pa'i phyir ro/ /de'i phyir 'jig pa'i ngang can nyid mi rtag pa yin no/ /'jig pa'i ngang can nyid kyi byung ma thag tu med pa'i 'jig par 'gyur ba la mi rtag pa zhes brjod do/ / 'jig pa don gzhan gyi rgyu can la yang gal te tha dad par brjod pa de lta na yang dngos po mi rtag pa nyid ni nyams pa ma yin te/ byas pa'i bdag nyid kyi mi rtag pa nyid yod pa yin yang 'jig pa med pa'i phyir ro/ /ma byung ba las skyes pa gang yin pa de nyid mi rtag pa yin te/ sngar med pa'i phyir ro//phyis med pas ni 'jig pas mi rtag par 'gyur ro/ /des na sngar med pa thob pa la phyis 'byung ba de'i rang bzhin nyid yin yang de'i mtshan nyid kyi mi rtag pa nyid yod pa kho na'o zhe na/ de lta bu'i mi rtag pa nyid byas pa grub pa nyid na grub mod/ phyis kyang med pa gang yin pa de ni byas pa grub kyang ma grub pa'i phyir tha dad de'i rang bzhin ma yin pa de 'dir sgrub par mi nus so//gal te mi rtag pa nyid dngos po'i zhig pa'am de dang 'brel pa can gyi spyi de lta bu'i rtogs pa'i rten du gyur pa ma yin nam/ des na dngos po de kho na mi rtag pa nyid do zhes ci ste brjod/ gal te dngos po nyid mi rtag pa yin na ni dngos po mi rtag pa snyam du don gzhan du rtogs par mi 'gyur te/dngos po mi rtag pa zhes tha dad pa med par rtogs par thal ba'i phyir ro zhe na/ 'di la bshad pa chos dang chos can gyi tshig tha dad pa la ste/ tshig tha dad pa'i yul la yang rgyu mtshan bshad par bya'o//yul du gyur pa'i dngos po gcig nyid la 'di ji ltar tha dad pa de ltar tha dad pa de ltar ni 'og tu ston par 'gyur ro/ /de de ltar mi rtag pa nyid phyis 'grub pa spangs te/ mi rtag pa dngos po nyid yin na yang mi rtag pa nyid rtogs pa'i dus ni phyi nas yin no zhes bstan pa'i phyir bshad pa/phyis 'di nges pa'i dus yin pa des na de'i tshe rtag pa nyid du rnam par gzhag go/ /gang gis dngos po'i dus na ma rtogs pa'i phyir ma grub pas na gzhan du rnam par gzhag pa/ gang gi tshe rtogs pa de nyid kyi tshe skyes pa ni ma yin no zhes so sor grub pa dgag pa'i phyir rtogs pa tsam nyid dus tha dad par bshad pa yin no//yang ci'i phyir phyis nges pa'i dus yin zhe na/ bshad pa/ mi dmigs pas mi gnas par rtogs pa'i phyir ro/ /gang gi tshe 'di gyo mo'i gnas skabs su bum par ma dmigs pa de'i tshe 'di mi gnas par rtogs pa skye'o//gal te mi rtag pa nyid dngos po'i rang gi ngo bo nyid ma yin nam/ des na 'dir mi dmigs pa'i rtsa ba las mi gnas par rtogs pa la ltos kyi/ sngon po nyid la sogs pa'i chos ltar dngos po rang gi ngo bo rtogs pa nyid kyis 'dir ji ltar nges par ma gyur ce na/ bshad pa/ skad cig mar gnas pa'i chos nyid de ni dngos po 'di'i rang bzhin te/ rang gi rgyu kho na las de ltar skyes pa'i phyir de skad cig mar gnas pa'i chos nyid du yod pa'i phyir ro zhes bya ba ni rang bzhin gyi rgyu mtshan no/ /de ni mthong bzhin du yang yod pa dmigs pas mi rtogs so//'di skad brjod pa yin te/ gal te yang 'bras bu la sogs pa dang khyad par med pa'i mi rtag pa nyid gang yin pa rang bzhin gcig tu gsal ba yin la rnam pa khyad par can gyi gsal bas stong pa'i mngon sum yang nges pa tha dad par byed pa ma yin pa de ltar na yang 'bras bu nyid kyis rjes su 'gro ba dang ldog pa ltar mi rtog pa nyid rtogs pa'i rgyu mtshan rang bzhin khyad par can dmigs pa'i mtshan nyid de'i rang bzhin mi dmigs pa yod pa nyid de/des dben par rtogs pas de med par rtogs pa'i phyir ro/ /des na gal te rgyun mi 'chad par mig bgrad nas lta ba na de la yang bum pa'i rgyun dmigs pa bar dang bcas pa nyid du gyur na ni de'i tshe 'di 'byung zhing med par 'gyur ro zhes mi rtag pa nyid du rtogs par 'gyur ro//des na gang gi phyir rang bzhin kho na mi rtag pa nyid yin pa de lta na yang 'jigs pa nyid lhur gyur pas de ltar 'gyur ba'i phyir de rtogs pa'i rgyu mtshan ni de med par dmigs pa kho na yin no//'di la ni yod pa dmigs pa nyid yod kyi med pa ni ma yin no/ /gal te med pa dmigs pa zhes bya ba dngos po med pa dmigs pa ni ma yin te/ de'i rang bzhin dang bral bas dmigs pa'i rten ma yin pa'i phyir ro//'on kyang dngos po des dben pa'i dngos po gzhan dmigs pa nyid de/ de ni skad cig ma la yang yod pa yin te/ de la yang skad cig snga mas dben pa skad cig gnyis pa la yod pa'i phyir ro/ /skad cig ma skad cig ma snga mas dben par rtogs pa ma yin zhes kyang brjod par mi nus te/mi rtogs pa'i rgyu nyid brjod par bya ba yin pa'i phyir ro zhe na/ gal te sngon po rtogs nas ma rtogs pa las yang rtogs pa na de'i tshe skad cig ma rtogs par 'gyur ba kho na ste/ skyes pa tsam nyid na mi mngon par 'gyur ba'i glog 'gyu ba'i snga ma bzhin no//de ltar ni ma yin te rgyun bar mtshams med pa'i phyir ro/ /dngos po skad cig bar chod na ni de'i rgyun la brten nas 'byung ba'i dngos po gzhan skye bar 'gyur te rgyu med pa can du thal ba'i phyir ro/ /'on kyang rgyu nus pa yod pa nyid yin te des na/dngos po skye ba yin no/ /de yang rgyu'i dngos po yod pa dang bar ma chod par skye ba'i phyir/ de ni skad cig ma gnyis tsam du zad kyi 'di la dngos po med pa'i skad cig ma gsum pa med pa des na rgyu dang 'bras bu bar ma chod pa yin no/ /des na gal te dngos po la skad cig ma gzhan dag gis dben pa yin mod kyi/de lta na yang gal te yod pa bar dang bcas par dmigs par gyur na skad cig mar 'jig pa nyid rtogs pa nyid do/ /bar med pa yin na ni ldog pa med pa'i rang bzhin gcig kho na yin no/ /dngos po gzhan bar ma chod par yod pa yin zhes ma nges pa'i phyir mi rtogs so//yod par bar ma chad pa'i phyir na skad cig ma nyid ma rtogs pa tsam du yang ma zad kyi/ 'on kyang phyin ci log tu yang rtogs par 'gyur ro zhes ston pa ni dngos po de rtag tu de ltar yod par gnas la dogs pas bslus pa'o/ /rtag par rtogs pa nges pa'i rang bzhin yin yang tshad ma med pa'i phyir dogs zhes brjod do//'di skad bshad pa yin te/ dngos po yod pa kho na rtag tu dmigs pa'i phyir 'di ni yod pa kho na'o zhes phyin ci log tu gyur la skad cig ma nyid du nges pa'i rgyu med pa dmigs pa med pas ni mi rtag pa yin no/ /gal te skad cig so sor bar du rtogs pa med pa med pa'i phyir ldog pa ma rtogs pas skad cig ma nyid du mi nges na bum pa la sogs pa la mtha'i gnas skabs su mi 'gyur te/de yang gyo mo la sogs pa yod pa bar ma chod par byung ba dmigs pa'i phyir ro/ /de ste der des dben pa de dag nyid dmigs pa'i phyir ldog pa ma rtogs na de ltar na 'di ni snga ma la ltos te skad cig phyi ma phyi ma rnams la yang khyad par med do zhe na/'di zlog pa'i phyir 'dra ba gzhan dang gzhan 'byung bas bslus pa zhes gsungs so/ /gyo mo'i gnas skabs su mi 'dra ba'i skad cig skye ba dmigs pa'i phyir 'khrul pa ldog go//bum pa'i rgyun dmigs par ni bum pa'i skad cig gnyis pa 'dra ba kho na dmigs so/ /des na skad cig gnyis pa la sogs par bum pa'i skad cig nyid dmigs pas rtag tu de yod par dgos pa yin te/ mi 'dra ba dmigs pa'i bdag nyid de mi dmigs pa skad cig ma nyid du nges pa'i rgyu de med par rtogs pa med pa'i phyir ro//gal te gyo mo la sogs pa dag la yod pa dmigs pa yod kyang bum pa la gnas par rtogs pa med pa ma yin nam/ 'gyur mod/ gnas par rtogs pa'i rgyu tsam nyid kyis ni yod pa dmigs pa bstan pa ma yin gyi/ 'on kyang 'di ni mi rtag pa nyid mi nges pa'i rgyur bstan pa yin no/ /de la yang med par mi dmigs pa mi rtag pa nyid du nges pa'i rgyur 'khrul pa med do/ /des na yod pa dmigs na de ltar yod par dogs pa 'khrul pa yin no/ /yod pa dmigs pa yod kyang mi 'dra ba gzhan byung na mi gnas par rtogs pa'i rgyu yin pa'i phyir 'jig pa rtogs pa la 'di gnyi ga rgyu rang dbang du gyur pa yin no//gang gi tshe rtogs pa nang du mngon du phyogs pa na de'i bdag nyid dam rnam par 'gyur ba 'ga' yang ma dmigs pa'i phyir rtogs pa ma rtogs te slar yang de lta bur gyur pa nyid dmigs pa de'i tshe 'thad pas grub pa nyid kyi skad cig mar nges pa 'byung ba yin no//de bzhin du mi 'dra ba gzhan 'byung ba na bar chad pa med par yod pa nyid gsal yang 'jigs pa nyid du rtogs so/ /des na 'di gnyis na phan tshun ltos pa ma yin no/ /'di gnyis gnas par rtogs pa brjod pa na de las bzlog pas ni mi gnas par rtogs par brjod par 'gyur ba des na de la ltos te 'am zhes smos so//gnas par rtogs pa la ni yod pa de dmigs pa gzhan 'byung ba la ltos te/ rgyu mtshan ma yin te mtha'i gnas skabs na yod pa dmigs pa yod kyang rtogs pa med pa'i phyir ro//gal te yang skyes bu dag la byis pa dang gzhon nu la sogs pa mi 'dra ba yod la/ bum pa la sogs pa la yang gyo mo la sogs pa'i gnas skabs su 'dra ba yod pa de ltar na yang snga ma las gcig gi rgyu mtshan gyi 'dra ba rjes su 'jug la gzhan du ni ma yin no//'dra ba thams cad de ltar rtogs pa'i rgyu ma yin pa'i phyir ro/ /gang ji lta bu'i rgyu yin pa de ni rtogs pa nges pa nyid las nges par bya ba yin no/ /gal te bar dang bcas pa'i yod pa ma dmigs pa'i phyir dang bar med par gsal ba la yang mi 'dra bar dmigs pa med pa'i phyir skad cig ma nyid mi nges na rnal 'byor pa rnams la yang mi rtag par rtogs pa med par 'gyur ro zhe na/blo zhan pa zhes smos so/ /blo zhan pa ni rang nyid don rtogs pa'i mthu med do/ /tshu rol mthong ba'i don gyi phan pa la ltos pa nyid kyi don rtogs pa'i phyir ro//don rnams la rang dbang du dpyod pa rnal 'byor pa rnams ni don gyi rgyu mtha' dag la snga ma dang phyi mar 'byung ba'i skad cig rnams cig car rtogs pa na tshu rol mthong ba'i yul du gyur pa la sogs pa dus gcig tu yod pa dag phan tshun tha dad par rtogs pa'i phyir ji ltar skad cig nyid du mi rtogs/yang na phyi rol gyi rgyu mtshan de ltar bstan pa yin no/ /yid kyi 'khrul pa ni nges par phyi rol gyi rgyu mtshan las skyes pa ma yin te/ zla ba gnyis la sogs pa bzhin no/ /des na yid nyams pa med par thag pa la yang sbrul du 'khrul pa mi 'thad pa'i phyir ro//de na blo zhan pa zhes bya ba ni nang gi rgyu mtshan bstan pa'i phyir bshad pa yin no/ /'khor ba nyid kyis bdag dang bdag gir lta ba'i phyir rtag pa'i bag chags kyis nyams par byas pa zhes bya ba'i don to/ 'o na phyi rol gyi rgyu mtshan bstan pas don ci yod ce na/nyams su myong ba de ltar rig par byed pa yin na de yang med par thal bar 'gyur ba'i phyir ro/ /skad cig ma tha ma ni gang gi de ma thag pa kho nar dngos po'i rang bzhin mi dmigs par 'gyur ba ste de mthong ba rnams kyis nges pa'i phyir ro/ /de'i tshe ni mi 'dra ba nyid kyi dngos po gzhan med pa dmigs pa yin te/thams cad nye bar len pa can med pa'i 'jig pa grub pa'i phyir ro/ /dngos po'i rang bzhin du gyur pa de mthong yang nges pa med pa gang yin pa 'di ni mi rtag pa nyid kyi rnam pa yin par ma zad kyi 'on kyang gzhan la yang yod do zhes bstan pa'i phyir 'bras bu skyed pa'i nus pa zhes smos so//rgyu mthong yang ma mthong bar gyur pa gang yin pa 'bras bu skyed pa'i nus pa ni rgyu las gzhan ma yin pa kho na'o/ /'di ni de ltar mthong yang rgyu'i rang gi ngo bo bzhin nges pa ma yin gyi/ 'on kyang de yod na 'bras bu dmigs pa kho na las so//des na 'bras bu sgrub par byed pa'i nus pa'i rgyu'i dngos po nyid yin yang 'bras bu ma dmigs na rgyu rtogs su zin kyang rtogs pa po'i rgyur rtogs par mi 'gyur gyi 'on kyang 'bras bu mthong ba kho nas yin no/ /de bzhin du mi rtag pa nyid dngos po'i rang bzhin yin yang mtha'i skad cig mthong ba nyid na rtogs par 'gyur ba yin no//des na mi rtag pa nyid de rtogs pa ma rtogs kyang don gyi rang bzhin du gyur pa kho nar rigs so/ /de ltar ma yin te gal te dngos po nyid mi rtag pa yin par ma gyur na de'i tshe mi rtag pa nyid las tha dad pa kho nar 'gyur ro//rgyu mtshan gang rtsa bar gyur pas dngos po 'di de'i ngo bo ma yin par 'gyur ba'i rgyu mtshan de ston te/ gzhan gyi rgyu mtshan can yin nam zhes bya ba ni 'jig pa rgyu dang ldan par smra ba'i 'dod pas so/ /rgyu mtshan med pa can nyid yin yang rung ste zhes bya bas ni 'jig pa 'byung ba po nyid du dmigs te rgyu med par 'dod pa nyid la yin gyi dngos po ma yin te/dngos po ni 'ga' yang med do zhes bya ba 'di la ni brgal ba 'di med pa kho na'o/ /dngos po med pa dang dngos po gzhan du gyur pa ma yin mod/ 'on kyang de ni dngos po'i nges pa nyid yin par bstan to//dngos po ni khyad par nyid kyi sgo nas bstan par 'gyur ba yin te/ dper na de yod pa nyid kyis ba glang ngo snyam du rtogs pa'i rten du gyur pa'i phyir de'i rang bzhin ba lang nyid la sogs pas bstan pa de bzhin du phan tshun med pa'i bdag nyid kyis nges pa yang gcig la gcig med pas bsnyad pa yin la dus nges pa ni snga na med pa dang zhig nas med pa yin te/des na don gzhan nyid yin mod/ ci 'gal zhe na/ de lta na ni zhes smos so/ /mi rtag pa nyid gzhan yin na dngos po de dang ldan par te mi rtag par mi 'gyur ro//ci'i phyir zhe na mi dgos pa'i phyir ro/ /nges pa zhes bya ba'i dngos po med pa yod pa'i phyir don de nges par mi 'gyur ro/ /dngos po med pa'i bdag nyid kyi nges pa khyad par yin yang / de'i dngos po gzhan dang 'brel pa'am/ dus gzhan khyab pa'i rang bzhin de ni gzhan du 'gyur ba ma yin no//de dang ldan pa nyid kyis nges pa yin no zhe na/ bshad zin to/ /de lta bu'i rang bzhin ni gzhan yod kyang de lta ma yin par mi 'gyur ba'i phyir ro/ /'on te dngos po gzhan la sogs pa dang ma 'brel ba 'di'i rang bzhin nyid yin na dngos po med pa gzhan gyis ci yang byar med do//'di'i de la nye bar sbyor ba na ni 'di kho na ste/ de yod na dngos po nges pa nyid gang yin pa'o zhe na/ de lta na yang de'i rang gi ngo bo nyid yod na de ltar 'gyur ba'i phyir ngo bo nyid kyis ni dngos po med pa dngos po med pa la nye bar sbyor ba ma yin gyi/'on kyang nus pa nyid kyis yin no/ /des na de'i rgyu nyid de lta bu sgrub par nus par brtags te khyad par gzhan dor ba kho nar rigs so/ /de bshad pa ni/ 'on te dgos na ni dngos po de'i nges pa'i mtshan nyid la 'di phan 'dogs na ni rang gi ngo bo nyid kyis nges pa yin pa'i phyir de nyid 'di'i bdag nyid du gyur pa'i mi rtag pa yin pas mi rtag pa gzhan gyis ci zhig bya/zhig pa'i mtshan nyid kyi don gzhan dang ldan pas dngos po nges pa 'dir grub pa gang yin pa 'di ni rigs pa yang ma yin no/ /khyad par nyid kyis de de lta bur 'grub pa la nye bar mkho na dus mtshungs pa'i don la brten nas nye bar sbyor bar brjod par bya ba yin no//des na 'dir rang gi rgyu las de lta bu'i dngos por ma grub pa nyid do/ /des na rang yod pa'i dus bzhin du dus gzhan dang 'brel par rung ba'i phyir rang gi ngo bos 'jig pa'i ngang can ma yin pa'i phyir na rang bzhin gyis mi g.yo ba yin no//de lta yin dang don gzhan dang ldan yang g.yo ba nyid du mi 'thad pa'i phyir ro/ /des na de ltar don gzhan gyi rgyu mtshan can yin na chos 'gal ba gnas pas gzhan nyid du bsgrubs te/ rgyud don tha dad pa nyid med kyang zhes bya ba la sogs pas rang gi phyogs la yang phyis 'grub par 'gyur ba nyid kyis gzhan nyid du mtshungs par thal bar rtog pa bsal nas de lta ma yin na zhes bya ba la sogs pas de nyid skabs su byas te/de lta na ni zhes bya bas mi 'thad do zhes bstan to//de ni rnam pa de lta bu'i mi rtag pa la rjes su dpag pa yang mi srid do zhes bshad pa ni/ mi rtag pa nyid kyi chos sam/ gzhan de yang gzhan las 'byung ba ni byas pa nyid la sogs pa sgrub par byed pa'i rgyu nyid yin par 'gyur te de las byas pa skyes pa des na 'dir rjes su dpog pa'am/yang na byas pas skyed pa'i phyir 'bras bu yin pa gcig tu 'gyur grang / 'di skad brjod pa yin te re zhig sngar bshad pa'i tshul gyis mi rtag pa nyid don gzhan las 'byung nas gzhan nyid du ni gnas pa yin no/ /rjes su dpog par byed pa'i gtan tshigs kyi 'brel pa ni lhag par gyur pas 'di ltar 'gyur ba yin no//rgyu dang 'bras bu gnyi ga ma yin pa nyid kyang ji ltar dogs par ma byas zhes bya ba ni rang nyid sel bar byed de/ gang zhig rgyu yang ma yin la 'bras bu yang ma yin pa de ni 'brel pa med pa'i phyir ji skad brjod pa'i rnam par rtog pa nyid 'thad pa yin no//'brel pa med na skabs kyi don dang 'gal ba ci zhig rgyu dang 'bras bu ma yin pa de la 'brel pa med pa las yod par rjes su dpag pa rtags mthong ba las de yod pa nyid du rtog pa mi srid pa'i phyir ro/ /de'i phyir phyogs gnyis nyid dogs par bya ba yin no/ / rgyu dang 'bras bu nyid srid pa de la re zhig rgyu ni ma yin te/ phyis 'byung ba'i phyir ro/ /byas pa nyid du 'dod pa'i dngos po gang yin pa'i phyis rgyu gzhan las 'byung ba'i mi rtag pa nyid de ni/ de'i rgyu ma yin te phyis 'byung ba'i phyir ro/ /grub pa'i don yod pa la ltos te phyis yod par 'gyur ba yin no//grub zin pa'i rang bzhin gyis dngos po la ni rgyu 'ga' zhig yod pa ma yin no/ /des na phyis 'byung ba ni rgyu ma yin no/ /ci ste yang grub pa dang rjes su 'brel pa rjes su 'brel pas 'bras bu nyid du 'dod de/ rgyu grub pa nyid las 'bras bu bdag nyid thob pa'i phyir ro zhe na/de la yang ga las nges 'bras bu ni gdon mi za bar rgyu yod na 'gyur ba yin no zhes bya ba de lta bu'i bdag nyid kyi nges pa 'di yod pa ma yin no/ /des na 'bras bu yin pa'i phyir nges pa med pa 'di la rjes su dpag pa srid pa ma yin no/ /mi rtag pa nyid la sogs pa'i chos de byas pa nyid la sogs pa'i dngos po grub nas phyis grub pa'i dngos po de gang las 'gyur ba de las tha dad pa'i don gzhan de las 'byung na'o//'dis ni sngar grub par bstan pas mdo'i phyis kyi sgras rnam par bkrol te/ ji ltar grub zin pa'i dngos po de'i rgyu yin/ 'bras bu na yang ga la nges zhes bya ba bshad pa ni 'bras bu yang rgyu la gdon mi za ba ma yin pas te rgyu yod na 'bras bu gdon mi za bar yod pa ni ma yin no zhes brjod zin to//gal te ltos pa dang bcas pa'i 'bras bu rgyu la gdon mi za ba ma yin mod/ de las cir 'gyur zhe na/ bshad pa/ 'bras bu de yod par te bdog par go bar byed pa'i gtan tshigs ma nges pa nyid yin no/ /gang gi tshe de yod pa go bar byed pa'i gtan tshigs ma nges pa zhes gdon pa de'i tshe yang rgyu go bar byed pa ma yin pa nyid du brjod par 'gyur ba kho na'o/ /'bras bu'i yul can nyid ni de zhes skabs su bab pa nyid do//rjes su dpag pas ni yod pa'i rjes su dpag par bya ba rtogs pa yin no/ /gang gi tshe 'di nges par rgyu yod na yod pa ma yin pa de'i tshe 'bras bu rjes su dpag par bya ba la rgyu ma nges pa nyid do/ /gang gi phyir de ltar ma yin pa de'i phyir don gzhan gyi rgyu mtshan can gyi chos ni gdon mi za bar yod pa ma yin pas yod par rjes su dpag tu med de rtags yod pa ma yin no zhes bya ba ni mjug bsdu ba'o//de ltar 'di yan chad kyis ni de nyid la rang bzhin 'brel pas med na mi 'byung ba yin pa'i phyir tshul gsum nyid la 'dus pa yin no zhes bsgrubs te rgyu la rang bzhin ji snyed cig ces bya ba la sogs pas gsum po de'i bsgrub bya brjod do//des rgyu ma tshogs pas zhes bya ba dang mi mthun phyogs la ma mthong ba zhes bya ba la sogs pas de las gzhan dag gtan tshigs ltar snang bar bstan pa'i sgo nas mthong ba dang ma mthong ba'i rtsa ba can ldog pa sngon du 'gro ba can 'brel ba'i rtsa ba can du bstan to//'bras bu ni rgyu'i bdag nyid la 'brel la ngo bo ni rang bzhin la yin no zhes 'brel pa nye bar bkod pa nyid kyis bsgrubs so/ /de ni mi 'khrul pa 'brel pa'i rtsa ba can yin yang tshad ma gang gis grub pa de brjod do//de re zhig bsgrub bya bstan pa'i rim pas dang po 'bras bu'i gtan tshigs kyi dbang du byas te brjod pa ni 'o na gal te zhes bya ba yin no/ /mthong ba dang ma mthong ba dag gis rjes su 'gro ba dang ldog pa grub pa ni bsal ba yin no//gal te du ba me'i 'bras bu yin pa de lta na yang de yod na me yod la me med na de med do zhes bya ba de lta bu'i bdag nyid 'bras bur gyur pa 'di'i mi 'khrul pa ni de lta bu 'dzin par byed pa'i mngon sum dang mi dmigs pa dag kho nas rtogs pa yin no/ /don gzhan ni 'bras bu nyid rgyu la mi 'khrul lo zhes bya bar 'gyur mod/mi 'khrul pa de ni rjes su 'gro ba dang ldog pa'i yul can yin pa'i phyir/ mthong ba dang ma mthong ba ma rtogs pa'i tshad ma gzhan gang gis 'grub/ 'bras bu rgyu la mi 'khrul pa ma rtogs par ni de ltar rnam par gzhag par mi 'thad la/tshad ma med par rtogs pa yang med do/ /tshad ma yang der ci ji ltar bstan pa las gzhan med de/ des na mthong ba dang ma mthong ba dag bkag pa'i phyir rang dang gzhan gyi bdag nyid gang gis rtogs pa'i thabs bkag pas ji ltar 'bras bu rgyu la mi 'khrul to zhes gzhan gyi don du ston par byed de/des na mthong ba dang ma mthong ba dag rjes su 'gro ba dang ldog pa'i rten ma yin na du ba me la mi 'khrul pa 'grub po zhe na/ 'di dgag pa'i phyir slob dpon de rtogs na de'i rang bzhin las mi 'khrul par rtogs par bya ba yin gyi tshad ma la ltos pa ni ma yin snyam du dgongs pas tshad mas rtogs pa'i rang bzhin gyi 'bras bu nyid ston pa ni/'di ltar zhes ston pa yin no/ /me yi 'bras bu du ba ste/ /'bras bu'i chos kyi rjes 'jug phyir te/ me'i 'bras bu'i ngo bo nyid kyi rjes su byed pa'i phyir ro/ /gang gi 'bras bu'i chos kyi rjes su 'jug /ces bya ba la ltos pa na gang gi 'bras bu yin pa de'i 'bras bu'i chos kyi rjes su 'jug pa nyid rtogs pa kho na'o/ /'bras bu'i rang bzhin gang yin pa de ni me la ltos nas du ba la yod do/ /des na du ba me'i 'bras bu yin no/ /de lta bu yin pa nyid ni tshad ma med par de ltar gzhag par mi nus pa'i phyir de'i rang bzhin du rnam par gnas par nye bar bkod pa kho nas 'brel pa ston pa'i tshad ma don gyis smos pa yin no//'bras bu'i chos de yang gang zhe na 'bras bu'i bdag nyid la byed pa ni ma yin te/ ngo bo med pa'i don la de mi rung ba'i phyir ro//'jim gong la sogs pa'i ngo bo nyid do zhe na/ de [(]ngi [,]ji [)]ltar ngo bo yin pa dang / ji ltar byed pa'i yul yin pa de ltar ni 'bras bu ma yin la ji ltar 'bras bu yin pa de ltar ni ngo bo dang byed pa'i yul ma yin no/ /des na 'bras bu la byed pa ma yin no/ /byed pa dang ma 'brel pa ni 'bras bu byed pa'i yul du yang mi 'gyur la byed pa po ma yin yang dngos po byed pa gzhan dang 'brel par mi 'gyur ro//des na 'bras bu byed pa po nyid yin pas 'bras bu dang rgyu dag la bya ba 'grub bo zhes bya bar 'gyur gyi/ rgyus ni 'bras bu la ma yin no/ /'brel pa med par ni yul dang yul can 'ga' yang med do//de yang rgyu dang 'bras bu'i dngos po'am 'phrod pa 'du ba yin pas de dang 'brel pa nyid kyis byed pa po rnams byed pa po nyid yin pas 'bras bu yang byed pa po nyid dam/ yang na ni byed pa po'i yul yang ma yin pa'i phyir rgyu 'bras bu la byed pa ma yin no//byed pa nyid las de skye ba'i phyir de la de byed pa yin no zhe na/ gal te byed pas ma reg pa'i lus can nyid yin na ni/ byed pa yod na 'byung ba nyid yin pas de las skyes par brjod pa rgyu yod na 'byung ba zhes bya bar 'gyur ro/ /de ste reg na reg pa ji lta bu 'brel pa'o//byed pa po yang de nyid yin pa'i phyir 'bras bu byed pa po ma yin pa ma yin no/ /des na bya ba nyid yin gyi 'bras bu ni ma yin no/ /des na sa mtha' dag pa rtogs pa'i yan lag tu nye bar brtag pa bya ba dang byed pa po la sogs pa'i rjes su 'gro bas rgyus 'bras bu byed do zhes bya ba'i sgras yid bslus pa ni dngos po'i chos yongs su ma shes pas lhung tshabs chen por 'gyur ro//byed pa yang 'bras bu ma yin pa rgyu dang 'brel pa yin te mi rtag pa'i phyir ro/ /byed pa'i yul ma yin par yang 'bras bu ma yin te des na snga mas thug pa med pa nyid brjod pa yin no//de'i phyir 'bras bu'i chos ni sngon med pa phyis rang gi ngo bo yod pa'i skye ba nyid yin no/ /de ni rtag tu grub pa'i rang bzhin la med de/ gtan du yod pa'i phyir ro/ /rtag par med pa nyid la yang ma yin te/ dngos po med pa nyid du ro gcig pa'i phyir ro//de'i phyir ngo bo med pa'i phyir med pa nyid phyis yod pa ni de las skyes so zhes brjod do/ /'chad par 'gyur ba'i tshul gyis 'dis rgyu med par ni mi 'thad pa des na dngos po nus pa yod pa las skyes pa'i ngo bor 'dod par bya'o/ /des na nus pa'i rang bzhin gyi dngos po de yod pa'i phyir sngar med pa'i 'bras bu yang yin pas na rgyu dang 'bras bu'i dngos po yin no//des na nus pa yang don gyis go ba la sogs pas rtogs par bya ba ni ma yin gyi 'on kyang ngo bo 'di nyid yin no/ /skye ba yang de bzhin no/ /des na bde bar gshegs pa dag gi rgyu dang 'bras bu'i dngos po ni mu stegs gzhan dag las khyad par med de/'on kyang 'dir nye bar mkho ba med cing tshad ma dang mi ldan pa'i lhag pa brtags pa gang yin pa de bsal nas khas blangs pas yongs su dag par byed pa yin no/ /phyi rol gyi don smra ba'i khas blangs pa de ni de tsam nyid do//rnam par rtog pa med pa'i yul du 'gyur bar nus pa zhes bya ba gang yin pa de ni gnyi ga ltar yang khas blang bar nus te bden pa gnyis kyi nang du 'du bar rung ba'i phyir ro/ /gal te rnam pa de lta bu gnod pa med na ni phyi'i dngos po don dam pa kho na'o//de ste gnod pa yod pa nyid de 'on kyang rang gi ngo bor med pa'i phyir gzhan gyi ngo bor yod pas kun rdzob yin no/ /rnam par rtog pas yul du byas pas ni don dam pa dang kun rdzob tu yang yod pa ma yin gyi 'on kyang med pa kho na ste brtags pa ni gtan med pa yin pa'i phyir ro//med pa snang ba ni sel bar 'gyur ro/ yod pa de yang sngon yod pa dang sngon med pa gnyis las ma gtogs pa gzhan rnam par rtog pa med pa la snang bar mi nus pa'i phyir ji skad bshad pa nyid rgyu dang 'bras bu'i dngos po yin no/ /de ltar 'bras bu skyes pa'i sngon rol du med pa yod pa'i rang bzhin thob pas dngos por gyur pa yang ma yin te/gang gi phyir 'bras bu sngar dngos po med pa'i rang bzhin du gyur pa'i phyis dngos po nyid du gyur pa ni ma yin no/ /'bras bu ni sngar dngos po yod pa ma yin gyi gang zhig yod par 'gyur ba dngos po med pa zhes bya ba gzhan ni yod pa ma yin no//des na 'ga' yang ma yin pa'i phyir 'dir gang zhig gzhan du 'gyur/ dngos po med par grub na ni 'gyur ro/ /de'i dus nyid na yod pa'i dngos po la sngar yang yod par the tshom za ba na 'di yod pa bkag pa kho nar zad kyi de'i gnas skabs na med pas sgrub pa ni ma yin te/des na ji ltar dngos po med pa'i bdag nyid yin te/ dngos po'i bdag nyid med do zhes bya ba 'di ni 'dod pa kho na'o/ /ji skad du dus gsum brtag pa las/ rten med pa'i don la ni rgyu ni gom pa 'dor ba med//de ltar na yang rgyu yod na/ /sngon med dngos po yod par mthong / /sngar de'i gnas skabs gang yin zhes/ /'di ni dngos la brten pa yin/ /sngar de'i gnas skabs zhes bya 'dir/ /gnyi ga 'ang med pa srid ma yin/ /gang zhig cha med rim med pa/ /dngos po sngon ma byung rnams kyi//bdag gis de nyid gsal ba gang / /'di ni shin tu ya mtshan no/ /zhes gsungs pa bzhin no/ /'bras bu ltos pa sngar yod pa'i dngos po de yod pa'i phyir de la byed pa med bzhin pas skad cig gnyis pa na yod pa bdag nyid yod pa'i dus na rgyu yod mi dgos pa'i phyir shin tu bstan pa'i tshad mas de'i dus na yod pa dang med par rtogs pas rtag pa'am mi rtag kyang rung ste/rgyu dang 'bras bu dngos por ni gnyi ga la yang khyad par med do/ /dngos po'i rang bzhin rnam pa 'di ltar khas len pa la ni gnod pa yod pa ma yin la/mthong ba yang yin no/ /phyi rol gyi don du smra ba la dngos po nyid du khas blangs pa'i phyir dang / de yang rgyu'i byed pa las ma skyes par mi 'thad pa'i phyir ro/ /rnam par shes pa smra ba las yang rig bzhin pa nyid rig pa'i rang bzhin ma yin pa rig pa'i dbang gis mi 'thad pa'i phyir ro//kun rdzob tu de'i ngo bor gyur nas snang ba'i phyir de rtag pa yang ma yin te/ de lta ma yin na ri bong gi rwa dang mtshungs par 'gyur bas na rnam par 'gyur ba nyid du nges pa'i phyir ro/ /don dam par ni skye ba'am 'gag pa 'ga' yang yod pa ma yin te rnam par shes pa tsam yang med pa'i phyir 'di ni kun rdzob kho na'o zhes bya ba yang las dang de'i 'bras bu dang yang srid pa la sogs pa la skur ba'i phyir tshu rol mdzes pa dag pas kyang thub pa yin te mthong ba yang spong ba'i phyir ro//thams cad kyang med par ni mi 'thad de rnam par shes pa yod par khas blangs pa rigs pas grub pa yin pa'i phyir ro//de bas na gzhan la skye ba dang rang bzhin 'jig pa zhes khas blangs pa 'di la re zhig rang gi ngo bos ni spyi khas blangs pa bzhin 'gal ba yod pa ma yin la rtag pa dang gtan med pa mi 'thad pa'i phyir rigs pas 'thad pa yang yin no zhes gnas so//des na yod pa nyid skye bar ni mi 'thad la dngos po rnams la bya ba la sogs pa yang yod pa ma yin te/ des na sngar med pa yod pa nyid skye ba yin no/ /de yang rgyu yod pa ma yin pas dngos po gzhan yod na 'byung ba'i dngos po rang gi ngo bo nyid 'bras bu yin no//des na 'bras bu'i chos 'di nyid rang gi ngo bo rnam pa ji lta bu yin pa de lta bu'i tshad ma 'phen pa yin no/ /sngon med pa'i bdag nyid dngos po gzhan gyi nus pa la brten pa'i phyir de yod na yod pa nyid kyang 'bras bu yin no/ /des na gal te rgyu yod pa'i sngar med par rtogs pa de de yod par rtogs na de'i tshe de'i 'bras bu'o zhes bya bar rtogs par 'gyur ba yin no//de med par yang rang bzhin mi dmigs pa nyid kyis rtogs pa yin te phyis yod pa'i phyir ro/ /'gal ba dmigs pa la sogs pa yin na ni de'i tshe yang med pa'i phyir ro/ /des na rang bzhin mi dmigs pa las sngar med par rtogs pa rgyu yod na yod par rtogs pas na tshad mas rtogs pa'i rgyu dang 'bras bu'i dngos po yongs su rtogs par 'gyur ba yin no zhes bshad pa ni/de'i mtshan nyid kyir kyur pa zhes bya ba yin no/ /de'i zhes bya ba ni dmigs pa ste mtshan nyid der gyur pa gang yin pa'o//dmigs pa'i mtshan nyid kyir gyur pa zhes bya ba'i tha tshig go/ /de lta bur gyur pa de mi dmigs pa las me la sogs pa gang dag dmigs na dmigs pa gang yin pa de ni de'i 'bras bu yin no/ /dmigs pa'i mtshan nyid du gyur pa ma dmigs pa las gang dag dmigs na dmigs pa de ni dag pa'i 'bras bu yin no//'dir 'bras bu'i chos tshad mas dpag par bya ba'i rang bzhin du bstan gyi rang gi ngo bor ni ma yin no/ /dmigs pa'i mtshan nyid du gyur pa mi dmigs pas ni yod pa nyid ma yin par rtogs so/ / med pa ni gzhan dmigs na dmigs pa'i phyir yod pa yin no/ /'bras bu'i ngo bo yang de yin no zhes bstan zin to/ /ji srid rnam pa 'di lta bu'i rang bzhin ma brjod pa de srid du rnam pa de lta bu'i tshad ma tshad ma nyid du bsgrub par mi nus so/ /'o na ci'i phyir 'di bkod ce na/ mdor tshad ma brjod pas stong pa'i 'bras bu chos kyi tshad ma 'phen par byed par bstan pa'i phyir ro/ /'di ltar gzhan bstan pa'i 'bras bur rnam par 'jog pa na/ ji ltar tshad mas gzhal bya 'phen pa de bzhin du gzhal byas kyang tshad ma 'phen to/ /'gro ba mtha' dag de la ltos nas sngar yod pa yin pa'i phyir khyad par med par 'gyur ba gang yin pa 'dir sngar yod pa tsam nyid ni rgyu ma yin no//'on kyang sngar med par rtogs pa nyid kyis sngon ma byung ba'i dngos po de yod na yod pa gang yin pa de nyid de las 'byung ba yin la de yang de'i rgyu nyid do/ / 'di ni 'dod rgyal ba yang ma yin te/ grub pa'i dngos po ni 'ga' zhig dang ldan pa dang gzhan dang bral ba 'dod rgyal bar 'gyur gyi/ med pa nyid gang yin pa ni rang nyid 'dod rgyal bar 'byung ba zhes bya ba mi srid do/ /gal te dngos po gzhan gyis bsgrub pa yin no zhe na ni/ de lta na yang yod na mthong ba de nyid 'di'i sgrub par byed par 'gyur ro/ /'di ni sngar med pa dang de yod na yod par nges pa yin te/ des na 'di nyid gcig ni skyed par byed pa yin la/ gzhan bskyed par bya ba yin pa'i phyir 'di la 'dod rgyal ba'i don ci zhig yod/gal te bltar rung ba mi snang ba las 'gro ba mtha' dag mthong ba na snang ba'i phyir khyad par med pa kho na'o/ /ma yin te me las gzhan pa'i 'gro ba thog ma nyid nas yod kyang yul de na yod pa'i du ba ma mthong ba'i phyir ro zhe na/ ma yin te gang las ma chod par du ba 'byung ba'i skad cig de la yod pa'i 'gro ba sngon nam phyis med pa'i phyir te/'du byed skad cig ma rnams la dus gzhan du yod pa'i brgal ba med pa'i phyir ro zhe na/ lha rnams dga' bas skabs ma shes so/ /'di la dngos po rnams kyi rang gi rgyun gyi rjes su 'jug pa'i 'bras bu skad cig gnyis pa la sogs pa skad cig snga ma snga ma dang bskyed par bya ba dang skyed par byed pa'i dngos po ni skad cig ma nyid kyis grub pa yin gyi/rjes su 'gro ba dang ldog pa dag las ni ma yin no/ /bum pa la sogs pa dag dus gsum dang 'brel pa snga ma rang gi ngang gis 'gags te phyis ma skyes pa'i phyir yin nam 'on te mi 'jig pa'i ngang can nyid las yin/de la skad cig mar sgrub par byed pa'i tshad ma bstan pas na phyi ma phyi ma skye ba'i phyir rjes su 'jug pa grub pa yin gyi/ mi 'jig pa'i phyir ni ma yin gyi phyi ma phyi ma skye ba de yang rgyu med pa'am rjes su 'gro bzhin pa la mi 'khrul ba'i rgyu gzhan dang ldan par mi 'thad pa'i phyir de lta bu'i dngos po nye bar len pa snga ma las skyes pa yin no//rnam par dpyod pa 'di ni rgyun gzhan rtsom pa gang yin pa der yin no/ /gal te rgyun gyis ni gcig po 'ga' yang rtsom pa ma yin te/cig car med pa'i phyir/ gcig gis brtsam par bya ba yang ma yin te/ rim gyis du ma yin pa'i phyir ro zhe na/ bden te rdza mkhan la sogs pa'i rgyun rang gi rgyun gyi skad cig gang dang gang nye bar 'jig pa de las bum pa la sogs pa de bzhin du mngon par 'grub pa de'i phyir 'jim pa dang 'khor lo dang dbyu gu dang rdza mkhan la sogs pa'i rgyun rnams rgyu nyid du brjod do//bum pa'i mtshan nyid kyi rgyun 'phen par byed pa brtson par byed pa ni rdza mkhan la sogs pa nyid yin pa'i phyir de dag ni rgyun de'i rgyu mtshan yin no/ /'ga' zhig ni rgyun 'phen par byed pa'i 'bras bu sgrub par byed nus pa ma yin pa dag ste dbang po'i rnam par shes pa dang 'bar ba la sogs pa la dbang po dang bud shing la sogs pa bzhin te/rgyu de'i byed pa rgyun chad kyang 'bras bu rjes su 'jug pas bum pa la sogs pa ltar 'jig pa'i rgyu dang phrad kyi bar du gnas par thal ba'i phyir ro//des na ji ltar me la sogs pa dag nye bar gyur na gdon mi za bar 'byung ba'i phyir skad cig so sor nges pa la mi ltos par du ba rtsom par nges pa yin pa de bzhin du gal te de las gzhan pa'i 'gro ba dag kyang yin na ni me yod pa'i sngon rol du yang 'gyur ba'i phyir mi mtshungs so//skad cig gis bya ba ni mngon sum dang mi dmigs pas mi 'grub pas na de 'dir dbang du byas pa ma yin pa'i phyir ro/ /ji ltar dbang du byas pa la ni khyad par yod pa kho na'o/ /'dis ni dngos po gzhan gyi rgyu las skyes pa nyid kyang spangs pa yin te/me nye ba'i sngon rol du yang dmigs par thal bar 'gyur ba'i phyir ro/ /me la sogs pa dang dus mtshungs pa na yod pa'i dngos po gzhan rgyu yin na ni lhan cig byed pa bzhin du de dag mtshungs par rgyu yin pa nyid du 'gyur gyi dngos po gzhan nyid ni ma yin no//'dis ni me dang dus mtshungs par yod pa'i mi snang ba'i don rgyu yin pa nyid kyang bsal ba yin te/ de yod na yod par khyad par med pa'i phyir ro/ /ci dus mtshungs par yod pa rnams bsdoms te rgyu yin nam/ 'on te gcig 'ga' zhig ces bya ba'i don 'di la nges par byed pa ston pa ni de las gcig med na yang zhes bya ba yin no//'on te yul gzhan nas 'ongs pa'am/ yod kyang sgrib pa la sogs pa'i rgyu mtshan gzhan gyi dbang gis ma dmigs pa yang dmigs pa yin no zhes brjod na/ de ni ma yin te/yul gzhan nas rim gyis 'ongs pa yul de dang 'brel par 'gyur ba yul de dang 'brel pa'i sngon rol du de'i thon kor gyi yul gzhan dag dang 'brel pa ni dmigs pa'i mtshan nyid du gyur pa'i yod pa nyid ma dmigs pa ma yin no/ /yod pa nyid rgyu mtshan gzhan gyi dbang gis ma dmigs pa gang yin pa de la ni rgyu 'ga' yang yod pa ma yin no//med pa nyid yod pa skyes par brjod pa ma yin la/ de yang bltar rung ba mi dmigs pa kho nas yin no/ /de 'dra ba las ni 'dir grub pa ma yin no zhes bstan zin to/ /gal te du ba yod kyang mthu dang ldan pas byin gyis brlabs pa'i phyir ma mthong ba las de'i dus su byin gyis brlabs pa dang bral bas dmigs pa yin no zhe na/brjod pa 'di ni shin tu chung ste der me yang mthu dang ldan pas rnam par 'gyur ba skyed pa'i dbang pos dmigs pa yin gyi me nyid ni ma yin par 'gyur ba des na rgyu yin par ga la 'gyur/gnod par byed pa med pa'i phyir ma yin no zhe na/ mi dmigs pa la yang gnod par byed pa yod pa ma yin no/ /ma yin te rjes su dpag pa gnod par byed pa la mi ltos pa'i phyir ro zhe na/ rjes su dpag par bya ba la ltos pa med pa'i phyir ro//'di ni mi dmigs pa nyid la the tshom za ba yin pa'i phyir mngon sum nyid 'phangs par 'gyur ro/ /'di skad brjod pa'i rnam par 'byed pas mi dmigs pa la de rtogs pa med pa'i phyir ro/ /'di nyid la ni de'i skyon 'di yod pa ma yin gyi/ 'on kyang dngos po rnams la yang ngo //gal te de la gnod pa med pa rjes su mi sgrub na de 'dir yang rtogs pa ma yin gyi/ 'on kyang dngos po rnams la yang ngo / /gal te de la gnod pa med pa rjes su sgrub na de 'dir yang rtogs par bya ba'am yang na mngon sum nyid spang bar bya bar 'gyur te spros pas chog go/ / de'i phyir med par rtogs pa'i dngos po gang yin pas rang gi ngo bo dmigs pa de ni de'i 'bras bu las gzhan ma yin no/ /gal te me med na ma byung ba me yod na yod pa tshad ma du ma'i yul ma yin nam/ des na ji ltar mi dmigs pa'i gnas skabs na tshad ma'i yul du ma gyur pa'i phyir phyis kyi dmigs pas gzung ba'i bdag nyid ma grub pa de bzhin du dmigs pa'i gnas skabs na yang byung ba nas med pa'i phyir sngar yod pa'i chos ma grub pa des na rim gyis 'gyur ba gnyis tshad ma gcig gi yul ma yin pas na med pa gang yin pa de gzhan yod na yod do zhes bya ba 'di ga las yin zhe na/gal te tshad ma nyid yod pa'i dus tsam gyis mthar thug pa yin na ni 'di de ltar 'gyur ba zhig na skad cig tsam yod pa yin yang ji srid 'jal ba rtogs pa po nyid du bsgrubs te/ da ltar nyams su myong ba bzhin gsal ba de srid du de tshad ma gcig yin no zhes gzhan du rnam par spros zin to//rang gi yul la de ltar 'gyur mod/ yul gzhan la ni tshad ma gzhan kho na'o/ /des na me med par du ba mi 'byung bar rtogs pa gang yin pa de nyid ni de yod na du ba yod pa nyid ma yin no zhe na/ de bden te/ tshad ma yod pa tsam gyis mthar thug pa ni ma yin gyi/ 'on kyang de dang ldan pas byas pa shes pa po'i dngos po khyad par yin no//de ni tshad ma gzhan gyis bskyed pa yang srid pas tshad ma gnyi gas rig pa'i yul gyi rang gi ngo bo shes pas rgyu dang 'bras bu'i dngos po rtogs so/ /de bzhin du 'di ni rnam par shes pa la yang nus te/ de yang de bzhin du shes pa gzhan gyi rgyu dang 'bras bu nyid du rtogs par nus pa'i phyir ro//gal te tshad ma log kyang de'i yul shes par byed pa'i dngos po zhes bya ba 'di ni ci zhig yin/ des byas pa'i 'du byed rjes su 'jug pa'o zhe na/ de lta na 'o na don ji lta ba bzhin myong ba grub kyang myong ba ji lta ba bzhin 'du byed pa can du ma grub pas rtogs pa po de'i gnas skabs su de lta bu'i ngo bo shes par byed pa'i dngos por sgrub par byed pa ma yin te/sngar 'di na don gzhan yod kyang du ba yod par ma gyur pa las me yod na yod do zhes mi nges so/ /du ba mthong bzhin pa nyid na sngar de med par myong bar snang ba ni med do//des na 'di yod par ma gyur pa las de nye bas da ltar yod do zhes bya ba 'dir ga la 'gyur/ 'dis ni dran pa nyams su myong ba'i 'bras bur grub pa yang bsal ba yin no/ /myong ba 'das kyang myong ba'i rang bzhin du shes pa nyid don ji lta ba bzhin rigs par grub na dran pa'i shes pa de'i 'bras bu nyid du 'grub par 'gyur ba zhig na de nyid ni ma grub pa zhes brjod pa yin no zhe na/brjod pa/ ci 'di mi 'thad kho na'am/ /'on te 'di nyid du mi 'thad/ 'dir mi 'thad do zhe na/ de ga las 'du byed rnams skad cig ma yin pa'i phyir dang /dran pa'i rtogs pa yang dngos po'i yul can ma yin pa'i phyir de'i mthus 'du byed rab tu gzhag pa mi 'grub pa'i phyir ro zhe na/ de la myong ba yod bzhin pa nyid na dran pa'am 'du byed ma yin no zhes ni rtag par smras pas kyang khas blang bar bya ba ma yin pa'i phyir myong ba rtag pa nyid ni yan lag ma yin no//log na ni 'jal ba po rtag kyang yul lkog tu gyur pa nyid yin pa'i phyir don gyi bdag nyid kyang ngo / /yul la gnas pa'i gsal ba med cing sngar skyes pa yang zhig pa na yul nyid dam 'jal ba po nyid du mi 'grub pa'i phyir ro/ / de'i rang bzhin mthong ba med bzhin du 'ga' yang lta ba po'i dngos po ma yin no/ /myong ba yang mthong ba las gzhan ma yin te des ni myong ba dang bral na 'jal ba po'i 'jal ba po med pa kho na'o/ /des na 'dir ni myong ba las dran pa'am/ de'i 'du byed pa yin no zhes ga las myong ba gnas bzhin pa na de ltar rnam par 'jog pa zhes bya ba yang mtshungs pa nyid de skad cig ma'i phyogs la yang rgyun gyis 'jug pa nyid kyis rnam par gnas pa'i phyir ro//des na myong bas dran pa'am/ dran pas myong ba dmigs pa ni ma yin la/ gnyi ga la dmigs pa'i shes pa gzhan yang med pa'i phyir der yang rgyu dang 'bras bu'i rang bzhin du 'dzin pa ma grub po//dran pa yang gal te dngos po'i yul can nyid du 'dod pa yin mod kyi/ de lta na yang gal te 'di nyams su myong ba gsal ba nyid dam/ 'on te de'i yan lag can gyi don yang rung ste rnam pa thams cad du de dran pa nyid nyams par 'gyur ro//des na don nam myong ba'i dran pa'i lkog tu gyur pa nyid du brjod par bya ba yin no/ /des na mngon sum bzhin du dran pa'i shes pa de ltar rtogs pas de lta bu'i dngos por sgrub pa ni ma yin te/ de lta ma yin na rtogs pa thams cad dngos po yod pa'i yul can du smra bas rjes su dpag pa la sogs pa la 'brel pa btsal bar mi bya bar 'gyur ro//des na dran pa dngos po'i yul can yin yang / myong ba ji lta ba bzhin du skyes par grub pas dngos po'i yul can nyid yin gyi/ mngon sum ltar rtogs pa nyid sbyor ba por gyur pas ni ma yin no//myong ba ji lta ba bzhin skyes pa ni 'dir yang ma grub pas na 'di la brgal zhing brtag pa'i yul nyid du bde bar gshegs pa rnams mi rtag par 'dod pa dang / de las gzhan dag mtshungs so/ /gal te lta ba po ma zhig pas sngar mthong ba rjes su rtogs par byed par rigs pa ma yin nam ma zhig kyang mthong ba bzhin skyed pa'i 'du byed med par rjes su 'brel pa mi rigs pa des na ma zhig pa ni yan lag ma yin no//'du byed yod na ni zhig kyang skyon med do/ /myong ba ji lta ba bzhin 'du byed pa yod pas ni de lta bu nyid 'grub pa ma yin no zhes gtan la phab zin to/ / dran pa'i shes pa las de lta bu'i dngos por 'gyur ba yang bsal zin to/ /mthong ba ma zhig na ni dran pas ci yang byar med pa'am/ ma zhig pa yang rgyun rjes su 'jug pas kyang grub pa yin no/ /des na 'dir ni brjod par bya ba yin te/ 'ga' zhig tu ni rjes su 'gro ba dang ldog pa dag gis rgyu dang 'bras bu'i dngos por 'grub pa yin te//dper na du ba dang / myu gu dang 'bras chan la sogs pa bzhin no/ /'ga' zhig tu ni de ltar grub pa med kyang rigs pas de ltar 'grub ste/ dper na khyad par dang dngos po la sogs pa la lhan cig byed pa dag bzhin no/ / des na 'bras bu gzhan dang mi 'dra ba'i rtogs pa 'dis rang gi rgyu khyad par can rjes su dpog par byed kyi rgyu nus pa tsam ni ma yin no/ /'di ltar dran pa 'khrul bar gyur pas kyang de lta bu'i ngo bor nges pa de lta bu'i myong ba rjes su dpog par byed do/ /'khrul pa nyid du khyad par med kyang so sor nges pa 'ga' zhig tu sngon med pa rtogs pa skye la gzhan du ni sngar myong ba nyid du yang ma yin no//dmigs pa med pa nyid kyis na 'khrul pa yul sgrub par byed pa ma yin mod/ rgyu med par mi srid pa'i phyir rgyu nges pa ni gsal bar byed pa kho na'o/ /des na rgyu khyad par med na 'khrul pa mi 'dra bar ji ltar 'gyur/de bzhin du la la ni sngon po'i shes pa nyid nges pa yin la/ gzhan la ni ser po shes pa zhes bya ba la sogs pa rjes su rtogs par bya'o/ /de bas na nyams su myong ba de lta bu las skyes pa'i dran pa'i 'du byed las skyes pa na de ltar gyur pa yin no//de lta na yang rgyu tsam rtogs par 'gyur gyi khyad par ni rtogs pa ma yin no zhe na/ brjod pa khyad par nyid dang 'brel pa mthong ba'i phyir ro/ /'di ltar de dag gi 'brel pa myong ba med par ni du ba la me rtogs par rigs pa ma yin no/ /des na rjes su dpag pa'i dus na du ba tsam nyid mthong gi me dang 'brel pa myong ba ni med do//des na sngon nyams su myong ba'i gzhi las dran pas nyams su myong ba rjes su rtogs pas nyams su myong ba'i bya ba byed pa yin no/ /gal te du ba me la myong ba med na de de ltar dran pa na me brtags te 'jug pas me 'thob par mi 'gyur ro//des na dran pa'i sgo nas rnam par gnas pa'i myong ba ni rjes su dpag pa'i rgyu nyid kyis ltos par bya ba dang don ji lta ba yin te thob pa'i phyir ro/ /bden te myong ba ni ltos par bya ba kho na'o/ /sbyor ba'i dus na ni de gyur du zin kyang sngon byung bar gyur to zhes grub pa ma yin no//dran pa ni myong bar 'khrul pas rjes su dpag pa 'jug par byed pa yin no/ /ji ltar rjes su dpag pa lta bu'i don thob pa ni 'dod rgyal ba'i mi slu ba yin no/ /ma yin te lan cig ma yin par yod pa'i phyir ro zhe na/ don de lta ma yin par ma grub nas lan cig ma yin par yod par yang yan lag ma yin no//rang nyid 'dod pa yang yin te khyab pa sgrub pa la sogs pa dag tu lan cig ma yin par myong ba yan lag ma yin par byas pa'i phyir ro zhe na/ 'di la brjod pa rnam par rtog pa nyams su myong ba'i rtsa ba can ma yin te/ de'i dus can gyi rgyu mtshan nye ba tsam las skye ba yin na rnam par rtog pa nyid ma yin par thal ba'i phyir te/ rab rib dang dbang po la sogs pas bskyed pa'i log pa'i shes pa dang / bzlog pa dag bzhin no/ /des na rnam par rtog pa'i rang bzhin brtag pas ji lta bu'i rgyu mtshan med par 'di mi srid pa'i rgyu mtshan de nyid rtogs par 'gyur ro//'dir rjes su 'gro ba dang ldog pa dag med pa'i phyir 'di ltar yang ci ste mi 'gyur ba zhes bya bar ni brtag par mi nus te srid pa dang / thar pa dag pa dag tu lta ba dang de med pa'i rgyu can las gzhan du brtag par mi nus pa bzhin no//'di ltar nyams su myong bas 'du byed bskyed pas shes pa po shes par byed pa nyid kyis dngos por grub pa na rang 'dod tsam gyis de sad pas de lta bu'i rtogs pa rang dbang du gyur pa'i phyir shes pa gang dag skye ba de dag de lta bu'i 'du byed kyi gzhi can nyid kyis snga ma dang phyi mar 'dzin par 'gyur ba ni/rnam par rtog pa dang bcas par grub par 'gyur ba yin no/ /de'i dus pa'i rung ba tsam las skyes pa'i gsal ba ni dmigs pa yod dam med kyang rung ste/ snga phyi rnam par 'byed par mi nus pas rnam par mi rtog pa kho na'o/ / 'khrul ba'i rgyu mtshan 'ga' zhig nyid de lta bu'i rtogs pa skyed par byed pa yin no zhe na ma yin te mi shes pa las med pas shes pa la ltos pa nyid du rtogs pa'i phyir ro/ /mi shes pa la med par ji ltar rtogs she na/ rnam par rtog pa thams cad mi 'jig pa'i phyir dang / nges pa med pas dran par thal ba'i phyir ro//de lta bu nyams su myong ba yod na ni de nges pa nyid las nges pa yin no/ /gzhan yang sa bon la sogs pa'i don rnams kyi 'bras sA lu la sogs pa'i dbye ba'i nus pa sna tshogs srid pa ni rgyu so sor nges pas bskyed pas de lta bu'i ngo bor 'thad pa yin la sngon po dang ser po la sogs pas dbang po las skyes pa'i blo sna tshogs pa yang phyi'i don yod na de byas pa kho na yin na/rnam par rtog pa yod pa dang med pa dang bum pa dang chu dang rtsig pa la sogs pa'i rang bzhin gyis rigs mi mthun par snang ba go nus pa'i gzhi rtsa gang las de lta ba gyur bum pa'i rnam par rtog pa skyed par byed pa'i rtogs pa'i rang bzhin ni dngos po dang dngos po med pa la sogs pa'i rgyur ma yin te/rtogs pa de yod kyang bum pa rtogs pa med na/ de de'i rgyu ma yin par thal ba'i phyir ro/ /'bad rtsol gyis byas pa'i nus pa sad pa la brten pas de ltar 'gyur ba yang mi rigs te de lta bu'i nus pa can gyi rgyu yod pa nyid brtsal bar bya ba yin pa'i phyir ro//de'i phyir dngos po sna tshogs pa bzhin du de nyams su myong ba sna tshogs pa yin pa'i phyir sna tshogs par gyur pa'i nyams su myong ba'i bag chags sna tshogs can gyi rnam par rtog par byed pa'i phyir te/spros pas chog go/ /des na yul gsal bar byed pa'i nus pa dang ldan pa rang nyid kyis gsal ba mthong ba 'di ni sngon po'o snyam pa la sogs pa'i rnam par rtog pa dus kyi bye brag mi gsal ba nyid kyis dran pa'i dngos por rtogs pa la mi gnas pa ni nyams su myong ba'i 'du byed bar chad med pa rtogs par byed pa des na don ji lta ba nyams su myong ba de lta bu yin la de ltar ni 'du byed pa yin no//de'i phyir rgyu dang 'bras bu'i dngos po dang de 'dzin pa rigs pa yin no/ /'di la stong pa nyid du smra ba dag gis bzod pa bzhin du don rnams ma skyes pa dang mi 'gag par ni ma yin te/rnam par rig pa tsam ni skye ba dang 'gag pa'i rang bzhin yin pa'i phyir ro/ /de nyid kyi phyir gal te thams cad nus pa med na zhes bkod de/ /sa bon sogs ni myug sogs la/ /nus mthong gal te de kun rdzob/ / 'dod na zhes bya bas phyi rol gyi don la brten nas de ltar mthong bar bstan pa la/ mthong ba de kun rdzob pa'i don gyi yul can du rnam par gzhag ste/ kun rdzob med par mi 'thad pa'i phyir kun rdzob kyi ngo bor yang rgyu dang 'bras bu'i dngos po yod pa nyid do snyam du dgongs nas ji ltar de ltar 'gyur zhes phyis khas blangs pa yin no//de'i phyir ma byung ba'i rang bzhin las yod pa tsam ni skye ba yin la de rtogs pa las de yod pas yod par dmigs pa gang yin pa de ni rtogs pa yin te/ des na rgyu dang 'bras bu dang de'i rtogs pa ma tshang ba med pa yin pas/ mngon sum dang mi dmigs pa sgrub par byed pa yin no//'o na de la gcig med na yang zhes bya ba 'di ci ste mi brjod ce na rgyu 'di tsam nyid do zhes nges pa gzung ba'i don du brjod do/ /'di ltar du ma cig car nye ba las 'bras bu skye bar dmigs pa'am/ yang na rim gyis nye ba las yin te/ sngar nye bar gnas pa yod kyang med pa'i 'bras bu phyis nye bar 'ong bas ltos pa yongs su rdzogs par byas pa'i phyir de nye ba nyid kyis skyed pa yin no//des na gcig gam du ma ji ltar nye ba nyid kyis 'bras bu bskyed dam/ de sngar nye bar gnas pa dag la de nye bar ltos pa yongs su rdzogs par byed pas yin zhes the tshom za ba phyis kyi mi dmigs pas bzlog pa yin no//dmigs pa de dag las gcig med na yang mi dmigs pa yin no/ /'di ltar me yod pa na bud shing med na me yod par mthong yang du ba med pa/ de bzhin du bud shing la yang me med na med par 'gyur ro/ /de gnyis gnas na ni gzhan med kyang mi ldog go//des na de ltar de dag yod na sngar ma byung ba'i du ba yod pa las de de dag gi rgyu can du rtogs pa na/ rgyu'i tshogs pa gang zhig nye ba na de yod pa de ci nye bar gnas pa rnams kyi kha skong yin nam 'on te de dag las don 'ga' zhig rgyu ma yin pa yang yin zhes nges pa na 'di ltar rtogs pa yin no//'bras bu nyid de yang du ba la yod do/ /des na ji ltar du bas me mi 'khrul lo zhes rtogs zhes gang brjod pa de 'dis spangs pa yin no/ /des na de ltar re zhig 'bras bu'i 'bras bu nyid 'khrul pa med do zhes bstan pa'i phyir tshad mas rtogs pa'i 'bras bu nyid bshad pa yin no//de ni 'di las ji ltar 'khrul pa med pa de bstan pa'i de med par yang zhes smos so/ /med par yang du ba de yod na de la 'khrul nas de med kyang yod na rgyu dang ldan pa las 'das par 'gyur te de'i 'bras bu nyid du mi 'gyur ro zhes bya ba'i don to//de'i don 'di yin te/ du ba ni 'bras bu yin te me'i 'bras bu'i chos mthong ba'i phyir ro/ /'bras bu yang mi 'khrul ba dang de'i bdag nyid kyi mtshan nyid kyis 'brel te/ des na ji ltar du bas me la mi 'khrul lo zhes bya bar rtogs zhes gang brjod pa spangs pa yin te rnam pa 'dis rgyu dang 'bras bu'i rang bzhin rnam par dpyad pa kho na las khong du chud pa'i phyir ro//ma byung ba nyid las yod pas yod pa'i dngos po ni skye ba zhes brjod do/ /de yang gdon mi za bar nus pa'i dngos po gzhan la ltos par bya ba yin te/ des na 'di gang gi tshe gzhan gyi tshe yang yod na ni de'i tshe skye ba'i don nyid med de/ji ltar lhas byin khyim du byung nas phyir 'byung bar 'gyur la/ der byung nas kyang yul gzhan du 'byung bas de dang de'i rgyun mngon par skye bar mi brjod pa bzhin no/ /dngos po med pa'i sngon du 'gro ba can nyid yod pa ni skye ba yin no//des na gang gi tshe 'di med par 'byung ba de'i tshe skye ba'i don nyid med pa de las 'byung ba ga las 'gyur/ me med par yang du ba yod de/ des na 'di me yod na snga na med pa yod pa thob pa ma yin pas de yod pas skye ba ma yin no/ /des na du ba me'i rgyu can ma yin no//de'i phyir rgyu med par thal lo/ /ci zhig ltar du ba me yod na dmigs pa de tsam gyis ni de'i 'bras bur mi 'gyur ro/ /gal te thams cad du du ba dang thams cad kyi tshe 'di me yod na 'byung ba yin no zhes nges na/ de'i tshe ni 'bras bu nyid du rtogs par 'gyur te/de la nges par rtogs pa'i phyir ro/ /'di ni thams cad mthong ba ma yin pas rtogs par nus pa ma yin no/ /des na ji ltar sngar ma dmigs pa dmigs pa tsam gyis 'bras bu nyid du rtogs des na 'bras bu nyid la rtsod pa dang bcas pa na/ ji ltar me med par yang yod pa'i phyir rgyu dang ldan pa las 'das par 'gyur ro zhe na/bshad pa/ lan cig de lta bu'i ngo bor nges pa'i du ba me yod pa la mthong bas kyang me de'i 'bras bur 'grub bo/ /re zhig du ba de med pa nyid las de'i tshe yod pas skyes par ni rtogs pa yin no/ /'di ni nus pa gzhan med par rang nyid kyis 'byung ba ma yin te/rang bzhin med pa'i phyir ro/ /nus pa yang rgyu yod pa kho na yin no/ /de las gzhan dag yod kyang med pa'i phyir dang / me yod na yod pa'i phyir de de'i 'bras bu de rtogs so/ /gang gi tshe de dag yod pa nyid na rgyu gzhan la mi ltog par dus gzhan nyid du 'byung ba de'i tshe ni yongs su 'gyur ba la ltos pa rnams skyed par byed pa yin par rtogs te/'bras chan skye ba la phru ba la sogs pa bzhin no/ /des na sngar med pa 'ga' zhig ltar 'ga' zhig yod na 'gyur ba zhes bya ba ni rgyu med par 'thad pa ma yin te/ de skyed pa'i nus pa med par de ji ltar yang yod mi srid pa'i phyir ro//de bshad pa ni/ 'bras bu nyid ma yin na rgyu ma yin pa las lan cig kyang mi 'byung ba'i phyir ro zhes bya ba'o/ /gang zhig rang gi rgyu'i mthu las grub pa de ni glo bur du rgyu ma yin pa nye ba na yang yod pa yin te/ dper na lhas byin yod pa na bum pa bzhin no//des na 'di la mthong ba gzhan la ltos pa med do/ /rgyu dang 'bras bu dag rang bzhin khyad par can gyi bdag nyid yin pas na lan cig zhugs pa'i mngon sum nyid kyis de ltar 'dzin pa'i phyir sngon po la sogs pa'i rang bzhin lta bu'o/ /thams cad du sngon po sngon po nyid du rtogs pa la ltos pa lan cig dmigs pa zhugs pas de lta bu'i ngo bor mi rtogs pa ni ma yin no//des na rgyu dang 'bras bu'i dngos po la ni lan cig dmigs pas rtogs par bya ba ma yin no/ /des na snga na med pa'i rang bzhin thob pa ni rgyu la brten pa yin pas rgyu med par 'di'i rang gi ngo bo 'grub pa med do//de'i phyir gang zhig gang med na rang gi ngo bo nyid med pa de ji ltar de la 'khrul par 'gyur te/ des na 'bras bu rgyu la 'khrul pa med do/ /des na de ltar rgyu dang 'bras bu'i dngos po grub pa'i lhag ma nye bar bsgrubs te skabs kyi mdo 'grel par byed pa ni/ 'bras bu yang zhes bya ba yin no//'bras bu rgyu med par yod na ni rgyu dang ni ldan pa kho na ste/ 'bras bu ma yin pa nyid du 'gyur ro/ /gtan tshigs bshad pa gang zhig ces bya ba ste/ gang gi phyir gang zhig gang med par yod pa de ni de'i rgyu ma yin pa'i phyir te/ sngar ma byung ba las yod pa nyid med pa'i phyir zhes bshad zin to//me med par yang du ba yod de/ de'i phyir 'di me yod pa sngon med pa yod pas thob pa ma yin pas na de yod pas skyes pa ma yin no/ /de bas na me du ba'i rgyu ma yin par 'gyur ro/ /de med kyang yod pa'i phyir me de'i rgyu ma yin mod/ rgyu med pa nyid ni ma yin te/ gzhan gyi rgyu can yin pa'i phyir ro zhes dgos pa smras pa ni gal te zhes bya ba'o//ma yin te gzhan de la yang mtshungs pa'i phyir te/ 'di ltar de med na yang me yod na yod pas so/ /ji ltar gzhan yod na yang yod pa'i phyir mi ldog pa'i chos can nyid kyis dngos po de yod pa'i rang bzhin yin pa'i phyir me'i 'bras bu las 'das par 'gyur ba de bzhin du gzhan gyi 'bras bu nyid las kyang ngo //me yod na yang de yod pa'i phyir 'di la snga na med pa'i yod pa thob pa'i skye ba'i don med pa'i phyir gzhan las kyang yod par mi 'thad do/ /don rnams kyi rgyu nyid ni 'ga' yang rang gi ngo bo las tha dad pa ma yin te/des na gal te me'i rnam pa nyid rgyu yin na/ 'o na ni gzhan gyi rnam pa nyid rgyu ma yin pa nyid do/ /de ste rnam pa gzhan rgyu yin na ni de lta na me'i rnam pa nyid du ba'i rgyu ma yin no/ /des na gzhan skyed par byed pa yin na de'am/ de de ltar gyur pa yin na/gzhan de skyed pa'i rang bzhin ma yin pa las ji ltar 'byung bar 'gyur/ gtan tshigs bshad pa gang zhig rang gis skyed par byed pa'i rang bzhin ma yin pas de mi skyed pa'i phyir skye ba de rgyu med pa nyid du 'gyur ro/ /gang gi tshe gcig skyed pa'i rang bzhin dang ldan pa las gzhan de skyed pa'i rang bzhin ma yin pa des na/der 'di yod pa rgyu med pa can du 'gyur ro/ /de las bdag thob pa ni ma yin la/ de yod pa yang ma yin te/ des na rgyu med pa nyid do/ /'di de rgyu med pa can yod na gcig tu yang 'dir rgyu med pa can kho na'o/ / des na de yang rgyur ma grub pas rgyu med pa can nyid do/ /de la smras pa gang gis du ba ni yod pa nyid yin te/ gang gi phyir gzhan yod pa na yang yod pa'i phyir khyim na yang yod la phyi rol na yang yod pa'i lhas byin bzhin du 'di der skyes pa ma yin par brjod pa gang zhig me yod pa na sngar med pa nyid las yod pas sngon med pa'i yod pa thob pa'i phyir skyes pa'i du ba de nyid ni ma yin te/'on kyang de dang 'dra ba de dang mtshungs pa gzhan der 'byung ba yin no/ /du ba gcig po de sngon ma byung ba las mes yod par bsgrub pa yin pa des na de la skye ba'i don 'thad pa/ rgyu yang skyed par byed pa yin no//des na du ba de la rang bzhin de nyid skyed par byed pa yin la/ du ba gzhan skyed pa ni gzhan kho na'o/ /de'i phyir rgyu dang 'bras bu'i dngos po 'thad pas rgyu med pa nyid du thal ba ma yin no/ /'bras bu yin pa'i phyir 'khrul pa med pa yin no zhes bya ba gang yin pa de ni gsal ba yin no//gang gi phyir 'di rang gi mtshan nyid gcig la ltos nas mi 'khrul par 'jog pa ni ma yin no/ /gcig kho na las rjes su dpag pa mi 'jug pa'i phyir te/ de ni mthun pa'i phyogs la yod pa ma yin pa'i phyir ro zhe na/ lan du mi 'dra ba las te/mi mtshungs pa me ma yin pa'i rang bzhin las 'byung ba ji ltar de dang 'dra ba yin te 'di ltar/ de ni de dang 'dra ba las 'byung ba'i phyir/ ci 'dra ba zhig las lan cig du ba dmigs pa de dang mtshungs pa las 'byung ba'i phyir de dang 'dra bar 'gyur te/ du ba nyid mtshungs par 'gyur ro//don gcig rgyu ji lta bu las skyes pa'i gzhan kho na de dang 'dra bar 'gyur ro/ /'dra ba zhes bya ba 'di ci zhig ce na/ gcig po 'di ni du ba yin la/ gzhan 'di yang du ba yin gyi bum pa ma yin pa gang yin pa de bstan par bya'o/ /de 'dra ba las de 'dra ba nyid du 'gyur gyi gzhan 'dra ba ni ma yin no zhes bya ba 'di la rigs pa ci yod ce na/'bras bu gzhan rigs mi mthun pa na rigs mthun pa'i rigs mthun pa dang mi mthun pa dag rgyu mtshan med par ni mi 'thad pa ma yin nam/ dngos po ni de tsam gyi ngo bo yin pa'i phyir dngos po'i rgyu nyid de'i rgyu yin no zhes rigs so des na rgyu tha dad pas sA lu dang nas kyi myu gu'i ngo bo nyid tha dad pa ni rgyu tha dad pa las yin la/rgyu mtshungs pa can sA lu'i myu gu dag gi gcig pa yang rgyu gcig pa las yin no/ /tha dad pas bskyed pa dag kyang ngo bo mtshungs na ni tha dad pa de'i rgyu med par 'gyur bas dngos po nyid rgyu med par 'gyur ro//'dir smras pa 'dra ba dang mi 'dra ba dag rgyu mtshan dang bcas pa yin yang rigs mthun pa'i rgyu ni ma yin te/ rigs mi mthun pa las skye yang rgyu med par thal ba ma yin pa'i phyir ro/ /me las du ba ma yin pa las tha dad pa'i du ba skye bas na tha dad pa de nyid las skye ba yin no//des na gal te me ma yin pa las kyang du ba ma yin pa las tha dad pa'i du bar 'gyur na/ tha dad pa'i rgyu de yang spangs nas rgyu gzhan las kyang 'byung ba'i phyir rgyu 'khrul pas rgyu med pa nyid du 'gyur ro zhe na/ ma yin te mi 'khrul pa spangs na de'i rgyu can ma yin par mi 'khrul pa'i phyir ro//de'i rgyu can ni de la 'khrul pa med par 'gyur ro zhes bya ba gang yin pa de ni da dung yang mi 'grub bo/ /des na 'khrul pa yin yang tha dad pa rgyu med pa can ma yin no/ /des na mes bskyed pa'i du ba'i du ba ma yin pa las tha dad pa ni mes bskyed pa yin la/de las gzhan gyis bskyed pa'i ni gzhan de las gzhan gyis bskyed pa kho na'o/ /du ba'i rang gi ngo bo las ma gtogs pa'i tha dad pa zhes bya ba de nyid 'ga' yang med do/ /de yang mes bskyed pa las me ma yin pas bskyed pa tha dad pa kho na'o/ /me gzhan gyis bskyed pa gzhan yin pa bzhin no//des na ldog pa nyams pa'i phyir rgyu ma yin par 'gyur ba gang yin pa de nyid gzhan las 'byung ba ni ma yin no zhe na/ de lta na 'o na 'dir mdo sde pa la khar chad pa ci yang med do/ /'di ltar re zhig skye ba med par smra ba ni gsal ba yin no//'di phyi rol gyi don la dpyod pa 'gyod pa ni 'jig rten gyi blo 'ba' zhig gis yin no/ /de la gal te 'bras bu'i gtan tshigs mi 'khrul par ma grub na ma grub la rag mod/ don dam pa'i tshul gyis dbang du byas na ni rang bzhin gyi gtan tshigs gcig pur zad do/ /rang rig pa nyid mngon sum yin gyi dbang po las skyes pa ni ma yin pa bzhin no//de gal te de lta na ci lan 'di kho nar bas sam zhe na/ 'di kho nar bas so zhes ni mi smra'i/ 'di ni gzu bo'i tshig yin te/ gus par bya ba ni ma yin no/ bdag cag gi ltar na ni nges par zung shig / mi 'dra ba las ni de 'dra ba 'byung ba ma yin gyi de ni 'dra ba kho na las de dang 'dra bar 'gyur bar rigs so/ /sngon ma byung ba'i dngos po gzhan yod na rang gi ngo bo yod pa ni skye bar brjod do/ /de la gang gi tshe du ba'i rang gi ngo bo me med kyang yod na ni de'i tshe 'di sngon ma byung ba ma yin no zhes sngar bstan zin to//de la 'di ni du ba gzhan skyes pa yin no zhes gang brjod pa de la gal te 'di las skyes par grub na de'i tshe 'di gzhan skyes pa zhes bya bar 'gyur ba zhig na/ gang gi tshe 'di yod pas skyes pa de nyid ma grub pa de'i tshe ji ltar gzhan nyid yin/ gal te de yod pa nyid na yod pa'i phyir med pa nyid de las 'byung ba yin na de'i tshe de'i rgyu can du 'gyur ba yin na ni gzhan las kyang 'byung ba'i phyir 'di de'i tshe snga na med pa nyid ma yin pa des na skye ba don med do zhes lhas byin gyi dpes bstan zin to//gal te sngar dmigs pa'i mtshan nyid du gyur pa ma yin pa'i phyir 'di me la sogs pa nye ba'i sngon rol du de na med par rtogs pa med pa ma yin nam zhe na/rtogs pa bden mod kyi 'on kyang gzhan gyi tshe yang me med kyang yod par khas blangs pa'i phyir 'khrul par 'gyur ro/ /gang gis 'khrul par 'gyur ba de nyid 'byung bar ni khas ma blangs kyi 'on kyang gzhan nyid do zhe na/yul dang dus tha dad pa las kyang dngos po tha dad par grub pa'i phyir gzhan ma yin pa'i rang bzhin 'ga' yang med pa ma yin nam/ des na byed pa gzhan tsam gyis mthar thug par brjod pa na/ rgyu'i don du mi gsal bar 'gyur ro/ / 'di ltar rnam par gnas pa'i dngos po yang rgyu'i byed pa'i spyod yul du gyur par srid pa yin no/ /de skad cig gi dbye bas tha dad pa'i phyir ro/ /des na 'di skad cig de sngar med par 'thad pa'i phyir de la yang rgyu'i byed pa srid pas na yod pa'i dngos po yang rgyu'i rjes su 'gro bar 'gyur ba kho na ste/skad cig gi dbye bas tha dad pa'i phyir ro/ /de'i phyir du ba mtha' dag me yod pa nyid na yod pa yin na de nyid las sngon med pa yod pa 'thob par gzhung gzugs par 'thad kyi/ gzhan dag gzhan las kyang 'byung na ni sngar med pa nyid du mi 'gyur ro/ / des na mi 'dra ba las de dang 'dra ba 'byung ba spangs pa yin no/ /skad cig sngon med pa nyid kyis sngon med pa'i phyir rgyus byed par nus pa yang ma yin te/ rigs mthun pa'i skad cig dang po la brten pa skye ba yang 'grub pa'i phyir ro/ /gzhan las rnam pa thams cad du du ba mi 'byung ba ni de'i rgyun 'jug pa yang ma grub pa'i phyir de skye bar thal ba kho na'o//du ba tsam la ltos pa'i yod pa snga na med par brjod pa'i phyir ro/ /'on te 'di ltar ma brten par nges pa'i du ba la ltos na sngon med pa nyid du brjod na/ de ni skad cig la yang thal bar 'gyur ro/ / gsal ba tsam la brten nas nges pa mthar phyin pa ni ma yin te/ 'di ni skad cig mthar thug pa yang yin pa'i phyir ro/ /skad cig ni rang bzhin nye bar len pa tsam las skye bar grub pas na rgyu gzhan don med do zhe na/ ma yin te/ rigs mthun pa dang mi mthun pa gnyi ga yod pa ni sngon med pa'i skad cig de yod pa na skal ba mnyam pa'i skad cig snga ma nyid rgyu yin gyi dngos po gzhan ni ma yin no zhes nges pa ma grub pa'i phyir ro//rgyu la rgyu'i ngo bo gzhan ni 'ga' yang yod pa ma yin na gang gi skal ba mnyam pa 'di nyid las nges par 'gyur gyi gzhan la ni ma yin no zhes bya bar 'gyur/de yod na sngon med pa'i don yod pa nyid nus pa yin gyi skad cig ma nyid la sogs pa ltar rang bzhin gzhan ni ma yin no/ /des na 'di ni du ba gnyis la yang yod pa na du ba so sor khyad par du 'gyur ba ma yin te/ des na 'di ji ltar skad cig snga ma'i rgyu can du 'gyur/des na gal te du ba tsam la ltos te snga na med pa nyid yin na mi 'dra ba las de dang 'dra ba mi 'byung ngo / /de ste khyad par la brten pa yin na rgyu gzhan gyi rjes su 'jug pa dang bral na skad cig snga ma skad cig gnyis pa tsam gyi rgyur nus pa ma yin no/ /'o na rigs pa gang yin zhe na/du ba tsam la ltos te rnam par 'jog pa'o/ /gzhan de ji ltar du ba yin pa de bzhin du de'i 'bras bur yang ci ste mi 'gyur/ 'on te du ba nyid las khyad par med par mi 'dod na/ de'i rigs pa brjod dgos te/ rgyu mtshan med par ni khas blangs pa rnam par gzhag par mi nus so//'di la yang nges pa ci yod ce na/ 'di ni 'og tu bshad par bya'o/ /de nyid kyi phyir mes skyed pa'i du ba gang yin pa de ni skad cig nyid kyis log pa des na de me med pas med par 'gyur bar mi nus pa'i phyir de las gcig med na yang med pa zhes ji skad brjod pa de ni de med pas med pa mi 'thad pa'i phyir ro zhes gang smras pa de yang gsal te/gal te du ba me las gzhan pa dag las kyang 'byung ba me med par yod par gzhan yang du ba nyid yin pas du ba snga ma bzhin gzhan las kyang 'gyur ba yin no/ /des na tha dad pa yan lag tu ma byas par du ba tsam yod pa yang me med par yod na/de'i yod pa snga na med pa nyid du mi 'gyur ro/ /des na me gcig nyid las sngar ma mthong ba'i du ba dmigs pa na me med na med do zhes du ba thams cad nges par byed do/ /de'i phyir mi 'dra ba las de dang 'dra ba skye bar mi 'thad do/ /de dang 'dra ba nyid las de dang 'dra ba 'byung ba yin no//des na de ltar du ba gzhan me ma yin pa las 'byung bar smras pa la/ mi 'dra ba las 'byung ba ji ltar de dang 'dra ba yin zhes skye ba'i rang gi ngo bo nges par gzung ba nyid lan du btab pa yin no/ /sun dbyung ba gzhan dag kyang bshad pa ni mi 'dra ba las kyang zhes bya ba yin no//me ma yin pa las kyang du ba 'byung na me de dag gis du ba skyed par byed pa'i nus pa de'i nges pa gzhan la med pa'i snying po can gyis de la yod pa de med pa'i phyir te/ me ma yin pa las kyang du ba skye bas de la yang nus pa grub pa'i phyir ro//gang gi phyir nus pa ma nges pa de nyid kyi phyir mi 'dra ba las de dang 'dra ba 'byung ba zhes 'di'i gtan tshigs su bstan pa yin te/ nges pa med pa'i phyir de dang 'dra ba 'byung na zhes bya ba yin no/ /de lta yin na ni rgyu'i tha dad pa tha dad par byed pa ma yin pas zhes bya ba'i gtan tshigs kyis na mtha' dag gi sna tshogs rgyu med pa can du 'gyur ro//'gro ba rnam pa sna tshogs pa ni rgyu med par 'gyur te/ tha dad pa'i rgyu med pa'i phyir ro/ /du ba'i rang bzhin ni du ba ma yin pa las log pa yin no/ /'di'i tha dad pa de mes ni byas pa ma yin te/me ma yin pa las kyang ldog pa de yod pa'i phyir ro/ /des na 'di'i du ba ma yin pa las tha dad pa 'di me'i rgyu mtshan can ma yin no/ /des na 'thad pa rgyu med par 'gyur ro/ /gal te du ba de'i tha dad pa ni me ma yin pa'i rgyu mtshan can yin la mes skyed pa'i tha dad pa ni me'i rgyu mtshan can ma yin nam/des na ji ltar rgyu med pa can nyid yin zhe na/ 'di la du ba gzhan la yang so sor du ba nyid khyad par yod pa ma yin no zhes bshad zin to/ /'dir 'thad pa'i khyad par ci zhig yod ce na/ sngon med pa yod pa'i mtshan nyid kyi skye ba'i rang bzhin la brten nas de dang 'dra ba las de dang 'dra bar skye bar bshad la/tha dad pa ni rjes su 'gro ba dang ldog pa med par bshad do/ /gal te du bas bskyed pa'i du ba yang du ba kho na yin la/ mes bskyed pa yang yin na tha dad pa rgyu med pa ni ma yin no//des na me ma yin pa las skyes pa la yang ci ste 'gyur zhe na/ ma yin te rgyun nyid kyi rgyu la ltos nas ji skad bshad pa'i rnam pa bstan pa'i phyir ro/ /du ba tsam gyi rgyu ni du ba'i rgyun gyi rgyur 'gyur ro/ /de lta bu'i du ba'i rgyun gyi rgyu la ni 'bras bu'i chos ji skad bshad pa las 'da' ba med do//skad cig ni skad cig gzhan gyi rgyur mi 'gyur ro/ /du bas bskyed pa'i du ba ji lta bur gyur pa de lta bu'i skyed par byed pa nyid ni me las mi ldog go/ /'di ltar re zhig du ba'i rnam pa ni mes skyed par byed pa kho na'o/ /gal te de'i dus dang yul dag tu yang 'gyur ba yin pa de lta na yang skyed par byed pa yin no//du bas du ba skyed par byed pa na mes kyang du ba skyed par byed pa kho na'o/ /des na yul de dang dus der yang skyed par byed pa'i nus pa dang bral ba ma yin no/ /gal te skad cig des bskyed par mes ma bskyed pa ma yin nam bden te/me gzhan gyis bskyed pa yang skyed par byed pa ma yin pa kho na'o/ /'on kyang rgyun gyi rgyu du ba'i rnam pa'i rgyu las mi 'da' ba des na du ba me la mi 'khrul par brjod do/ /rgyun yun ring du gnas kyang de dang ldan pa 'phen par byed pa'i 'bras bu skyed par byed pa gang yin pa de'i rgyu can las 'da' ba ni ma yin no//nyes pa gzhan yang bshad pa ni thams cad las dngos po thams cad skye bar 'gyur ro/ /'di skad brjod pa yin te/ du ba nyid kyis kyang khyad par med pa'i du ba ma yin pa las kyang 'byung na ni de'i tshe bum pa la sogs pa me las tha dad do cog du ba skyed par byed pa la chu 'dzin pa la sogs pa me ma yin pas bsgrub par bya ba yang mes byed par 'gyur ro//gal te gang gis gdon mi za bar byed par 'gyur ba me ma yin pa'i bsgrub bya sgrub par byed pa 'am me ma yin pa me'i bsgrub bya sgrub par byed pa nges pa ni med do zhe na/med mod nges par med pa 'ga' zhig ni byed par 'gyur ro/ /'on te 'ga' yang mi byed na ni 'o na rang gi bsgrub bya la nges pa'i dngos po rnams gzhan gyi bsgrub bya mi byed par 'grub bo/ /'on te 'di rang gi bsgrub bya la yang rang bzhin 'di kho na'o zhe na/des rgyu med pa can du 'gyur ro/ /des na 'di rang gi bsgrub bya sgrub pa ltar gzhan gyi bsgrub bya yang sgrub par thal bas na thams cad las thams cad skye bar 'gyur ro/ /de lta yin dang mi 'dod pa spong bar 'dod pa dag 'dod pa nyid thob pa'i 'bras bus tha snyad byed par mi 'gyur ro//yang na thams cad las thams cad skye ba ma yin no/ /de lta na yang 'bras bu 'khrul pa'i rgyu rnams las gzhan las mi skye bar ma nges pas na gang gis 'di 'dor ba dang / len pa nges pa'i yul can du nges par 'gyur ba mi 'dod pa 'dod pa'i 'bras bu can du mi 'gyur ba'am/'dod pa mi 'dod pa'i 'bras bu can du mi 'gyur ro zhes ga las yin/ de lta bas na rgyu tha dad pa las ni 'bras bu tha dad pa yin la/ rgyu tha dad pa ma yin pa las ni 'bras bu tha dad pa ma yin pa yin no/ /de ltar zhar la byung ba nye bar bsdus te/de bas na zhes skabs nyid du mjug sdud do/ /du ba ni mthong ba'i rnam pa dang rigs mi mthun pa'i don las mi 'byung ste/ rgyu med pa nyid du thal bar 'gyur ba'i phyir ro/ /'ga' zhig yod pa dang ldan pa na sngon ma byung ba yod pa ni rgyu dang ldan pa ma yin no//gang gi tshe 'di don yod pa na yang yod par 'gyur na ni de'i tshe 'di'i yod pa de sngon ma byung ba ma yin no/ /gzhan las du ba gzhan 'byung ba yin yang gzhan nyid ni yan lag ma yin te/ gdon mi za bar yod pa yin pa'i phyir ro/ /du ba nyid yod pa'i phyir na sngon med pa'i rang bzhin nyid nyams pa des na/skye ba'i don 'jig par rgyu med pa nyid do/ /me la sogs pa'i sngon rol du rtogs pa med pa'i du ba de sngon du 'gro bas rang gi ngo bo thob par rtogs pas ni don gzhan las 'byung ba sel ba'i phyir mthong ba'i rnam pa dang rigs mi mthun pa las mi 'byung bar grub pas 'khrul pa med par grub bo//gal te mthong ba'i rnam pa dang rigs mi mthun pa las mi 'byung ba zhes bya ba'i rnam pa 'di lta bur grub na/ mi 'khrul par rtogs pa zhig na/ 'di ni me ma yin pa'i rang gi mtshan nyid mtha' dag ma mthong ba srid pa ma yin no//ci ste lan cig nyid sngon ma byung ba yod par dmigs pas 'bras bu nyid du rtogs na de ni med de/ me ma yin pa la yang de bzhin du mthong ba'i phyir ro/ /'on te de ltar na rgyu med par thal bar 'gyur te/ de gnyi gar yang du ba sngon med pa ma yin pa'i phyir ro zhe na/shin tu gsal bar lan cig mthong ba'i 'bras bur mi 'grub ste/ rgyu med pa yin yang de'i rjes thogs su yod pa'i phyir ro/ /des na ci 'di gang las de'i rgyu can du 'gyur ba de nyid las rjes thogs su byung ba yin nam/de ste gang gis rgyu med kyang 'di'i de ma thag tu yod par 'gyur ba gzhan yang 'di ltar 'gyur ba yin zhes the tshom za ba na/ gsal ba gzhan la med par dmigs pa la/ ltos par bya ba yin no/ /des na thams cad mkhyen pa ma yin pas 'bras bu nyid du gtan la phebs pa ma yin no zhes dogs na/de lta ma yin na zhes smos te/ rgyu med pa nyid yin na/ rtag tu yod pa 'am med par 'gyur/ rgyu med pa'i don dang 'bral ba'i yod pa'am/ med pa gang yin pa de ni rtag pa nyid du 'gyur gyi res 'ga' bar ni ma yin no/ / me ma yin pa las 'byung ba rgyu med par 'gyur ba nyid do/ /gang gis lan cig de ltar mthong ba yang de ltar 'gyur srid pa'i phyir me'i rgyu can du mi nges par 'gyur ba de lta na ni srid pa yang ma yin no/ /gang gis 'di 'ga' zhig gi rjes thogs su 'gyur ba rgyu med par yod pa ni sngon med par 'thad pa ma yin no//gal te 'di'i der 'gyur na ni rtag pa kho nar 'gyur ba'am/ yang na ni nam yang ma yin par 'gyur gyi 'di sngon med pa las me yod na 'gyur ba ni ma yin no/ /des na gang zhig de ltar dmigs pa de ni me'i 'bras bu yin pa'i phyir kho bo cag gi ltar na mthong ba gzhan la ltos pa'i go skabs med do//yang ji ltar na rgyu med pa yin na yod pa dang med pa dag rtag pa kho nar 'gyur zhe na bshad pa/ rgyu med pa'i don ni gzhan la mi ltos pa'i phyir ro/ /ltos pa med pa'i yod pa dang med pa res 'ga' ba ma yin par ston pas/res 'ga' ba nyid ltos pas byas par ston pa'i phyir dngos po rnams ni zhes bya ba yin no/ /du ba de zhes bya ba la sogs pa ni 'grel pa'o/ /du ba rgyu la ltos pa med pa yin na ni nam yang mi 'byung bar mi 'gyur te gtan du 'byung bar 'gyur ro//rgyu med pa tsam kho nas ni gtan du 'byung ba ma yin pas na ni zhes smos so/ /gal te rgyu med par yod pa yin na ni gtan du yod par 'gyur ro zhes bya ba'i don to/ /gtan tshigs bshad pa/ dngos po de 'byung ba la thams cad du ma tshang ba med pa'i phyir ro/ /des na ji ltar yod par 'dod pa'i dus bzhin du gtan du de ltar 'gyur ro//dus gzhan du yang 'di yod pa'i yul can gyi ma tshang ba ni med do/ /gal te gang las de'i tshe med par 'gyur ba 'di'i ma tshang ba 'ga' zhig yod na ni de'i tshe yod pa'i dus bzhin du 'byung bar mi 'gyur ro/ / ji ltar ma tshang ba med ce na ltos pa med pa'i phyir ro/ /'di yod pa ni yin la ltos pa yang yod pa ma yin pa des na gang gis gzhan gyi tshe ma tshang bas mi 'byung bar 'gyur ba 'di ma tshang ba nam yang yod pa ma yin no/ /gang zhig gzhan la ltos pa zhes bya bar 'gyur ba de'i ni/ ltos par bya ba yod pa ni tshang ba yin la de las bzlog pa ni bzlog par 'gyur gyi ltos pa med pa ni ma yin no/ /des na de ltar rgyu med pa ltos pa med pa'i phyir ro/ /rtag tu yod par brjod nas rtag tu med par bshad pa ni yang na ni 'dod pa'i dus de'i tshe yang 'byung bar mi 'gyur ro/ / dus gzhan du na re zhig 'byung ba ma yin pa kho na'o/ /'dod pa'i dus su yang med par thal ba'i phyir ni rtag tu med par 'gyur ro/ /med pa'i gtan tshigs bshad pa ni med pa'i dus dang khyad par med pa'i phyir ro zhes bya ba yin no/ /dus gang du dngos po'i rgyu yod pa der de 'gyur ba'i phyir dus gzhan du mi 'byung ba yin na rgyu med pa la ni yod pa'i dus su rgyu med la med pa'i dus su yang med pa'i phyir na thams cad med pa'i phyir ro//des na 'di ji ltar med pa'i dus su mi 'byung ba de bzhin du yod pa'i dus su yang mi 'gyur ba'am/ de dang 'dra bar gzhan gyi tshe yang 'byung bar 'gyur ro/ /des na rtag tu yod pa'am med par 'gyur ro/ /gal te rgyu dang ldan par thal ba'i phyir rgyu med pa dus la yang ltos pa med pa ma yin nam/ de ji ltar dngos po dang dngos po med pa dag dus kyi khyad par gyis khyad par med pas rtag tu yod pa'am med par brjod ce na/dus chos dang ldan pas rang nyid kyis bstan pa ni ma yin te/ de ni nye bar mtshon pa yin pa'i phyir ro/ /des na des nye bar mtshon pa'i dngos po dang dngos po med pa nyid khyad par med pa yin no/ /rgyu med pa 'di la ni ltos par bya ba'i rgyu med pa des na/da ltar bzhin thams cad du 'gyur ba'am/ yang na sngon bzhin nam yang ma yin no/ /gal te rgyu dang ldan pa dag ni de yod na rang gi ngo bo 'thob la/ de med na ma yin pa'i phyir res 'ga' ba nyid de/ res 'ga' kho na rgyu byed pa yod pa'i phyir ro/ / de lta ma yin na ni ltos pa med pa res 'ga' ba ma yin pa'i sgrub byed du mi 'gyur ro/ /des na rgyu med pa rgyu res 'ga' ba nyid kyis de ltar 'gyur ba ma yin te/ de ltar na ji ltar rang gi ngo bo rgyu med pa yin pa de bzhin du res 'ga' ba yang 'gyur ro/ /'di res 'ga' ba nyid kyi rigs pa ci yod ce na/rang gi ngo bo la yang brgal zhing rtag pa mtshungs so/ /de ltar rnam par 'jog par byed pa med pa zhes bya ba nyid kyis ni mi 'thad pa nyid ma yin no/ /de ltar na rtog ge'i spyod yul du mi 'gyur gyi/ de tsam gyis med pa nyid du mi 'gyur ro/ /ltos pa res 'ga' ba'i sgrub byed du smras pa 'di res 'ga' ba'i khyab byar 'gyur na/khyab par bya ba med pas ni khyab par byed pa med pa ma yin no zhe na brjod pa/ dgongs pa 'di yin te/ dngos po ltos pa'i de yod na rang gi ngo bo yod pa la ltos pa'i don lhag pa gzhan ni med do//des na rgyu med pa'i phyir 'di mi ltos so zhes bya ba ni gal te sngar rang nyid ma byung ba 'ga' zhig yod na/ rang gi ngo bo byung ba ma yin na de lta na 'di ltos pa med par 'thad pa yin no/ /de yang gal te rtag tu yod pa nyid dam/ yang na nam yang ma yin pa de ltar 'thad par 'gyur ro//gang gi tshe res 'ga' 'byung ba de'i tshe gal te sngon med pa dngos po gzhan gyis 'gyur bar byas pas dngos po de nyid 'di'i rgyu yin pa'i phyir rgyu med par mi 'gyur ro/ /des na de tsam gyi rang bzhin yin pa'i phyir rgyu yin pas de rgyur gyur pas dngos po gzhan las yod par srid pa sel to//de las grub pas yod pa de gal te gzhan las kyang 'byung ba'i ni rgyu med pa kho nar 'gyur ro/ /des na mi 'byung ba kho na 'am/ yang na gtan du 'gyur te/ de lta yin na 'di de lta bu yin par gsal bar 'gyur ro/ /gang gi tshe dngos po gzhan nye ba na 'byung ba ma yin pa de'i tshe yang yul dang dus gang du 'byung ba'i yul dang dus de rgyu can du 'gyur ro//rgyu med pa'i res 'ga' ba'i dngos po yang rgyu med pa yin no zhes smras pas ni/ rgyu med par rgyu dang ldan pa yin na zhes brjod par 'gyur ro/ /'di ltar sngon med pa de gang yod na 'byung ba de nyid 'di sgrub par byed pa yin te/don gyi nus pa ni de las gzhan ma yin no zhes bstan zin to/ /gal te don de med par sngar yang yod na de lta na de na de'i rgyu can ma yin par 'gyur ba yin no/ /sngar gyi dngos po'am sngar gyi dus kyang 'di'i rgyu ma yin pa'i phyir ches snga bar 'gyur bas rtag tu yod par 'gyur ro//de bzhin du gal te yod na yang ma byung na de bzhin du snga ma snga ma'i don kyang / 'di'i rgyu ma yin pa'i phyir/ rtag tu med pa kho na'o/ /gal te nus pa dang bral ba na gang gi tshe de yod pa na yod pa de'i tshe ji ltar de tsam kho na sa de'i rgyu can yin/de'i nus pa ni 'di kho na ste/ 'di dang po med pa nyid las de nye bas yod pa gang yin pa'o zhes bshad zin to/ /rgyu med pa yang yod na yod pa ma bkag pas nus pa ni 'di kho na'o zhes brjod par mi nus ma yin nam zhe na/ ji ltar yod pa ma bkag /'di ltar de yod pa sngar yang yod pa'am/ de yod kyang med na ni de'i rgyu can ma yin par 'gyur ro/ /sngar yang yod pa na yod pas sam/ med pa nyid kyis dngos po thams cad las 'das pa'i yod pa dang med pa ni rtag pa nyid du thal bar 'gyur ro/ /de'i phyir dngos po ltos pa med pa ni rtag tu yod pa'am med pa kho nar 'gyur ro//ltos pa dang bcas pa nyid kyis de dag res 'ga' bar 'thad pa yin no zhes bshad pa ni/ dngos po ltos pa rnams ni zhes bya ba'o/ /rgyu med pa'i phyir ltos pa med pas thams cad las 'da' bar bya ba yin pa'i phyir 'di res 'ga' yod pa dang med pa dag tu 'gyur ba ma yin no//res 'ga' bar ni ltos pa nyid kyis 'gyur bar rigs so/ /gang zhig dngos po gzhan yod na ni yod pa'i phyir ltos pa yod pa de ni res 'ga' bar 'gyur ba yin no/ /gang zhig dngos po gang yod pa'i dus dang med pa'i dus gang yin pa de dag na dngos po de 'byung ba yod pa de'i yul can gyi rung ba dang mi rung ba dang ldan pa'i phyir ro//gang gi tshe dngos po de'i 'byung bar rung ba dang ldan pa ni de yod pa'i dus yin la de las zlog pa dang ldan pa ni mi rung ba'i dus yin pa de'i tshe 'di ni yod pa'i dus yin la gzhan du ni ma yin no zhes res 'ga' bar 'gyur ro//dngos po rang nyid ni ltos pa 'ga' yang yod pa ma yin te/ med pa'i phyir ro/ /'on kyang de skyed par byed pa'i rgyu nye bar na 'di rang gi rgyus mgul nas drangs pa nyid kyis yod par byed par zad do/ /des na 'di gang gi tshe rgyu yod pa de'i tshe 'byung la gang gi tshe med pa de'i tshe ni mi 'byung ba'i phyir res 'ga' ba nyid do//rung ba'i dngos po dang ldan pa dang mi ldan pa dag gis ni dus kyi rung ba dang mi rung ba nyid bstan to/ /yang na dus nyid rang gi chos kyis de skad bstan te rigs pa bstan pa'i phyir ro/ / gal te de yod pa dang med pa'i dus dag ni de'i yul can gyi rung ba dang ldan pa ma yin na de'i tshe yod pa dang med pa'i yul dang dus dag na de dang ldan pa dang mi ldan pa dag tu nges pa mi 'thad do/ /gtan tshigs brjod pas khyad par bshad pa ni rung ba dang mi rung ba nyid 'dra ba can dag la ni zhes bya ba'o//rung ba dang mi rung ba'i dngos po ni rung ba dang mi rung ba nyid kyis khyad par du gyur pa'i phyir ro snyam du dgongs so/ /dngos po rung ba nyid de yang don de la rgyu nyid do/ /des na de ltar dngos po ltos pa rnams res 'ga' bar 'gyur te zhes skabs brtsams te/ rgyur mngon par 'dod pa'i rung ba nyid yod pa dang med pa dag gis dus nges pa dang ldan par brjod do//de lta na yang res 'ga' ba nyid ltos pas byas par brjod par ji ltar 'gyur zhe na/ de'i phyir zhes smos te/ rung ba dang mi rung ba nyid ji skad bshad pa'i gtan tshigs kyi phyir/ de yod pa na med pa'i phyir yul dang dus 'ga' zhig spangs nas de yod pa na yod pa'i phyir yul dang dus gzhan dag na yod pa'i dngos po ni de dag la ltos pa dang bcas pa zhes bya ba yin no//'di skad bshad pa yin te gzhan na med pa'i don 'ga' zhig yod na yod pa gang yin pa de nyid ltos par brjod do//'ga' zhig yod na yod pa de yang yod par 'dod pa tsam la ni ma yin gyi/ 'on kyang yod pa dang med pa'i dus dag na rung ba dang mi rung ba dag las so/ /des na de'i dbang gis de ltar 'gyur ba'i dngos po ni de la ltos pa dang bcas par brjod do//des na ltos pa dang bcas pa res 'ga' gnas pa'i phyir res 'ga' ba yin no/ /de ltar gang gis ltos par 'gyur ba de bstan nas 'di'i rang bzhin ji lta bur gyur pa res 'ga' ba'i bdag nyid yin pa de nye bar 'god pa ni/ 'di ltar zhes bya ba yin no/ /'ga' zhig spangs nas gzhan na yod pa zhes bya ba gang yin pa de nyid ltos pa yin par brjod do//thams cad du gtan yod pa'am med pa la ni ltos pa'i don mi rung ba'i phyir ro/ /gang zhig gang spangs pa gang na yod pa de ni de la mi ltos na der nges pa mi srid do zhes bshad pa ni de dag gis byas pa'i zhes bya ba'o//gang zhig gang gis byas pa'i phan pa la mi ltos pa de ni gzhan na med pa sngon du 'gro ba can der yod pa'i nges pa mi rung ba'i phyir de ltar yod pa nyid ltos pa yin no zhes rigs so/ /de la ltos pa dang res 'ga' ba zhes bya ba ni don gzhan ma yin no//de nyid kyi phyir 'di khyab par bya ba nyid du nye bar bkod pa ni ma yin gyi/ 'on kyang de nyid res 'ga' ba yin no/ /de bas na rgyu med pa nyid kyis ltos pa med pa de ltos pa dang bral ba nyid kyis res 'ga' ba ma yin pa'i phyir rtag tu yod pa'am med par 'gyur ro//'o na ci'i phyir dgongs pa brjod pa na rgyu med pa nyid kyis 'di gzhan yod pa las 'da' bas rtag tu yod pa dang med par bstan par bya ba yin zhes brjod ce na/ dgongs pa 'di ma brjod na gang gis de ltar yod pa nyid ltos par brjod pa rung ba nyid kyi dbang gis de yul dang dus gzhan spangs nas gzhan na yod pa zhes bya ba de nyid mi 'grub bo//des na skabs 'dir dgongs pa 'di nyid yin te/ yul dang dus gzhan spangs nas gzhan yod pa ni de la brten nas yod pa thob pa yin te/ gzhan du na bzlog par 'gyur ba'i phyir zhes bya ba gang yin pa'o//bstan zin pa'i rigs pa 'di nyid gnyug ma'i don la nye bar sdud pa ni/ gtan tshigs de bas na yul dang dus gzhan na med par yul dang dus de dag na yod pa ni yul dang dus nges pa nyid do/ /gtan tshigs de'i phyir ro/ /yul dang dus de'i rjes su 'gro ba dang ldog pa rjes su byed pa'i phyir ro zhes bya ba'i tha tshig go//gang du lan cig mthong la zhes bya ba ni de'i rjes su 'gro ba dang ldog pa'i rjes su byed pa de la mthong ba yin no/ /des na de lta bur gyur pa'i der mthong ba ni yul dang dus der nges par dmigs pa'i rang bzhin yin te/ de ltar na sgrub par byed pa dang bcas pa'i rjes su 'gro ba dag nye bar bkod pa yin no//ma tshang na ma mthong ba ni zhes bya bas ni rgyu nges par 'dzin pa'i phyir des zhes bya ba ni gang du mthong ba de bzung ngo / /sngon med pa yod pa thob pa 'di ni du ba 'di des bskyed pa yin no zhes bya bar nges par 'gyur ro/ /yul dang dus dag gis ni dngos po mtshon pa yin no zhes bshad zin to//'di yang bskyed par bya ba kho na la yod pa yin gyi/ rgyu med pa la ma yin la/ bya rog dang ta la la sogs pa'i tshul du yang ma yin no zhes bshad pa ni/ gzhan du na zhes bya ba'o/ /dngos po skyed par byed pa'i cha 'dir lan cig zhugs pas kyang gzhan du srid pa mtha' dag 'gog par 'gyur ro//'di ltar skye ba ni 'di nyid yin pas na skye ba nyid bya rog dang ta la'i tshul du'am/ rgyu med pa can du ni mi 'gyur ro/ /des na rgyu dang 'bras bu'i dngos po ni lan cig mthong bas rtogs par bya ba yin no//lan cig rtogs pa des 'khrul pa med par yang sgrub par byed do zhes bshad pa ni/ de der nges pa yin na zhes bya ba'o/ /de la brten nas yod pa thob pa nyid kyis der nges pa yin no/ /des na 'di 'am de'i rigs can gzhan las kyang 'byung na ni de las yod pa thob pa ma yin no/ / de tsam gyis chog pa yang ma yin te/ 'on kyang rtag tu yod pa dang med par yang 'gyur te des na 'khrul pa med par 'grub bo/ /de ste gzhan las byung na de'i phyir 'byung ba ni de du ba ma yin par 'gyur ro/ /de bzhin du de dang rigs mi mthun pa'i dngos po yang dngos po gzhan la yod pa 'grub pa dang 'brel pa ni ma yin no//des na du ba'i rang gi ngo bo gcig las thob par rtogs pa na/ rigs pas dngos po gzhan las srid pa ma yin par 'gyur ro/ /ci ste mthong ba yin na des de du ba las gzhan nyid yin par 'gyur ro/ /rigs pa ni skye ba'i rang bzhin dpyad pa nyid du bstan zin to//rigs pa gzhan yang bshad pa ni du ba ni des bskyed pa'i zhes bya ba'o/ /du ba ni me des bskyed pa de yod na 'byung ba'i rang bzhin gyi khyad par yin no/ /ji ltar du ba de yod na yod pas nye bar mtshon pa'i rang bzhin yin pa de bzhin du rgyu med kyang 'bras bu du ba'i mtshan nyid bskyed pa'i rang bzhin yin no//gang yod na du ba'i rang gi ngo bo yod par 'gyur ba de ni me yin no/ /'di skad brjod pa yin te/ don rnams kyi bskyed bya skyed byed kyi dngos po dang / nus pa dang / skye ba ni rjes su 'gro ba dang ldog pa'i rang bzhin yin no/ /rjes su 'gro ba dang ldog pa yang dngos po'i rang gi ngo bo las dngos po gzhan du gyur pa ma yin te/des na me yod na du ba yod pa zhes bya ba ni me'i rnam pa'i rang gi ngo bo yod na du ba'i rnam pa'i rang gi ngo bo yod pa yin no/ /de bas na du ba skyed par byed pa zhes bya ba ni du ba rjes su 'gro ba dang ldog pa'i rjes su byed pa yin la/du ba'i mes skyed par byed pa zhes bya ba yang de'i rjes su byed pa kho na'o/ /de dag kyang de dag nyid kyi rang bzhin yin pa'i phyir du ba'i rnam pa nyid ni mes bskyed par bya ba yin la/ me'i rnam pa nyid kyang du ba'i skyed par byed pa yang me yin no/ /des na 'dir du ba nyid mes bskyed par bya ba nyid dang /me nyid du ba skyed par byed pa yin pas na mi 'khrul pa sgrub par byed pa gzhan mi dgos te/ byas pa las mi rtag pa nyid bzhin no/ /mes bskyed par bya ba ni du ba nyid yin la/ du ba skyed par byed pa yang me nyid yin no/ /des na ji ltar du ba gzhan du ba nyid yin pa de bzhin du/du ba nyid me'i 'bras bu nyid yin pas me'i 'bras bu yang yin no/ /gang gi phyir de lta yin pa des na cir 'gyur zhe na/ bshad pa du ba de gzhan las kyang 'byung na ste gzhan gyi yang rjes su 'gro ba dang ldog pa'i rjes su byed na/ de me'i rang bzhin ma yin no//de dngos po gzhan gyi rang bzhin du gyur pa'i rjes su 'gro ba dang ldog pa de dag ni dngos po gzhan kho na yin gyi me ni ma yin no/ /des na ji ltar dngos po de me'i rang bzhin ma yin pa de bzhin du/ rjes su 'gro ba dang ldog pa de dag kyang ngo / /de bas na du ba skyed par byed pa nyid kyang de'i rang bzhin ma yin par 'gyur/des na ji ltar me me ma yin par mi 'gyur ba de bzhin du/ du ba skyed par byed par yang mi 'gyur bas lan 'ga' yang skyed par mi 'gyur ro/ /'di ni lan cig kyang me ma yin par mi 'gyur ro/ /'on te rjes su 'gro ba dang ldog pa de dag me'i rang bzhin nyid yin pas na me yang du ba skyed par byed pa kho na'o zhe na/de'i tshe ni gzhan las 'byung ba gang yin pa de du ba nyid yin par mi 'gyur ro/ /yang na gzhan las 'byung ba de du ba ma yin te du ba skyed pa'i rang bzhin ma yin pa las byung ba'i phyir ro/ /du ba'i rjes su 'gro ldog gi rten du gyur pa du ba bskyed pa zhes bya ba gang yin pa de ni me nyid kho na yin pas du ba ni du ba skyed par byed pa'i rang bzhin las gzhan las mi 'byung ngo //ci ste yang du ba skyed par byed pa'i rang bzhin de ni yod pa nyid la sogs pa'i chos bzhin du/ de dang gzhan la yang yod pa yin pa des na de las kyang du ba 'byung ba yin no zhe na/bshad pa/ de'i rang bzhin yin na ni ste du ba skyed pa'i rang bzhin yin na ni/ de nyid me yin pas du ba me la 'khrul pa med do/ /me yod na du ba yod pa'i phyir me'i rang gi ngo bo nyid ji ltar du ba skyed par byed pa yin pa 'di ni bstan zin to//des na gzhan yang du ba skyed par byed pa nyid yin no zhes bya bas ni me'i rnam pa nyid du brjod par 'gyur ro/ /de bas na skyed par byed pa gzhan gang yin pa de nyid 'bar zhing mdangs gsal ba'i rnam pa can gyi me nyid yin pa'i phyir me ma yin pa la du ba mi 'byung ngo //gal te brgya byin spyi bo zhes bya ba la sogs pa 'di nyid sdud par byed do/ /brgya byin zhes bya ba dbang po'i mchod sdong gi spyi bo gal te me'i rang bzhin te gang yod na du ba 'byung ba de nyid las de 'byung ba yin na/ de'i phyir de nyid me yin no/ /'on te me'i rang bzhin min no zhe na/ 'o na ni de yod na du ba skye ba ma yin pas na/ ji ltar de las du ba 'byung / 'di ga las she na 'di ltar du ba'i rgyu'i rang bzhin me du ba'i rjes su 'gro ba dang / ldog pa rjes su byed pa'i yul zhes bya ba ni me nyid do zhes bya ba'i don to/ /de yang me'i rnam pa zhes bya ba de'i nus pa nyid kyis dngos po gzhan las bye brag tu gyur pa yin no//gal te ji ltar nus pa me'i rang gi ngo bo yin pa'i phyir me ma yin pa la yang nus pa de yod na/ de yang me nyid yin par brjod pa de bzhin du skad cig ma nyid la sogs pa yang me'i rang gi ngo bo nyid do/ /des na brgya byin gyi co do skad cig ma nyid yin pa'i phyir yang mer 'gyur ro zhe na/ma yin te/ skad cig ma nyid la sogs pa ni me'i rnam pa'i khyad par bye brag tu gyur pa'i phyir ro/ /de ni 'jig par 'gyur ba'i phyir de la skad cig mar bstan to/ /de las gzhan yang 'jig par 'gyur ba yin na de yang skad cig mar 'gyur ro//des na skad cig ma'i phyir ni dbang po'i co do mer 'gyur ba ma yin no/ /rgyu 'di nyid ni 'di'i de ltar rtogs pa'i rang bzhin de nyid las ma gtogs par khyad par bye brag tu gyur pa'i rang bzhin ma yin te/ ji ltar de yod na du ba yod pa'i phyir de rgyu nyid yin la/ de yod pa yang rang bzhin de nyid yin pa ni bstan zin to/ /'o na ji ltar du ba mi skyed pa'i me me nyid dam/ du bas bskyed pa'i du ba du ba nyid du 'gyur zhe na/ nyes pa 'di med de me dang du ba'i khyad par de ltar khas blangs kyi/ me tsam ni ma yin pa'i phyir ro//me ma yin pa rgyu yin pa 'gog gi /me thams cad rgyur 'dod pa ni ma yin no/ /yang na ma yin te me du ba skyed par rung ba nyid dang ma bral ba'i phyir skye ba nas brtsams te phan gdags bya 'dogs byed nyid las mi 'da'o zhes gzhan du bstan zin to/ /gal te du ba skyed par byed pa ma yin pa'i me yang yod pas na/me tsam nyid du ba skyed par byed pa ma yin pa ma yin nam/ des na 'di ni skad cig ma nyid la sogs pa bzhin khyad par gyi bye brag yin no zhes pa 'di nyid du 'gyur bas na me nyid dang bral du zin kyang khyad par 'gyur ba 'am/ yang na rnam pa gzhan gyis du ba rgyu me la mi 'khrul bar brjod par bya'o zhe na/smras pa me nyid khyad par dang ldan pa yin du zin kyang rang gi ngo bor gyur pa'i khyad par yang yod pa kho na'o/ /de lta ma yin na ni me nyid tha mi dad par khyad par tha dad pa'i phyir spyi khas blangs pa nyid du 'gyur ro/ /des na ji ltar me nyid kyis tha dad pa de bzhin du du ba skyed par byed pa dang /du ba skyed par byed pa ma yin pa dag gis kyang yin pas skyon 'ga' yang med do/ /gang gi tshe brgya byin gyi spyi bo me ma yin pa'i rang bzhin nyid yin pa de'i tshe/ du ba du ba'i rgyu ma yin pa brgya byin gyi spyi bo las 'byung na/ de ni rgyu mer 'gyur ro//gal te mi 'dra ba las mi 'byung ba'i phyir dang / rgyu tha dad pa tha dad par byed pa yin pa'i phyir dang / du ba skyed par byed pa me'i rnam pa nyid yin pa'i phyir du ba me ma yin pa las mi 'byung bas na/ me las mi 'khrul bar brjod na/ ji ltar lhan cig byed pa mi 'dra ba tha dad pa dang /me ma yin pa las du ba skye/ de nyid smras pa ni 'o na da ni lhan cig byed pa tha dad pa dag las zhes bya ba'o/ /de dag ni tha dad pa nyid kyis mi 'dra ba dang / me ma yin pa'i rang bzhin yin no/ /des ni ji skad bshad pa'i tshul gyis 'bras bu skye bar sgrub pa na 'di lhan cig byed pa dag las 'byung bar mi 'gyur ro//ci 'dra ba zhe na dper na zhes smos so/ /mig dang gzugs dang snang ba dang yid la byed pa dag las rnam par shes pa gcig skye ba lta bu'o/ /de la ni brgya byin gyi spyi bo'i rigs pa'am rgyu tha dad pas 'bras bu tha dad par 'gyur ba gang yin pa 'dra ba med pa lhan cig nyid kyang med do//ci'i phyir dkyus ma nyid bzhag ste/ mig dang gzugs la sogs pa dper bkod ce na/ de la lhan cig byed pa rnams kyi byed pa tha dad par bstan par nus pa'i phyir ro/ /me dang bud shing la sogs pa la ni 'di brtag par bya ba yin gyi/bstan par bya ba ni mi nus so/ /gcig tu skyed pa'am zhes bya ba la sogs pas lan 'debs so/ /gcig pus skyed pa srid pa na mi 'dra ba las de dang 'dra ba 'byung ba 'gog pa'am/ rgyu tha dad pa las 'bras bu tha mi dad par thal bar 'gyur ba ni ma yin no//don gyi rang bzhin nyid rgyu'i nus pa yin pa'i phyir ro zhes de'i rang gi ngo bo brjod pa gang yin pa de yang gang gis na ji srid brgya byin gyi spyi bo du ba skyed na mer 'gyur bar brjod pa de bzhin du/ bud shing yang 'gyur la mig la sogs pa yang shes pa'i rang bzhin du 'gyur ba brjod par 'gyur ba gcig la ltos nas brjod pa ni ma yin no zhes bshad pa ni/de'i rang bzhin gcig pus skyed par byed pa ni cung zad kyang med do/ /'on kyang tshogs pas skyed par byed pa ni de'i rang bzhin yin te zhes smos so/ /des na mi 'dra ba dang 'dra ba'i rnam par dbye ba 'di ni tshogs pa la ltos pa yin no//de lta bu'i tshogs pa la skye ba'i dngos po de ni de lta bu nyid las skye ba'i don mi 'dra ba 'byung na ni zhes bshad pa yin no/ /'di ni rigs pa yin te/ 'di ltar mi 'dra ba las skye na ni rgyu'i nus pa nyams par bshad de/ de bzhin du yang yod par 'gyur na de las skye ba'i don mi 'grub pa'i phyir ro//lhan cig byed pa dag ni tha dad kyang de 'bras bu yod pa'i ngo bo nyid yin pa mi ldog pa des na skye ba'i don dang mi 'bral lo/ /'dis ni rgyu tha dad pa tha dad par byed pa nyid kyis rigs pa gang yin pa de yang 'di nyid la yin par nges par bya'o//de ma yin pa'i rang bzhin las ldog pa'i don skye ba'i rgyu ni de tsam yin pa'i phyir te/ re re dang bral na gzhan las mi 'byung ba'i phyir ro/ /tshogs pa de de'i rang bzhin yin te/ des na mig dang gzugs dang snang ba dang yid la byed pa rnams ji snyed pa dang /rnam pa ji lta bu'i rang bzhin yin pa de shes pa skyed pa'i nus pa yin pa des na/ gal te brgya byin spyi bo me'i zhes bya ba la sogs pas gzhan rnam pa de lta bu ma yin pa las de skye na de'i rang bzhin du thal bar brjod pa de bzhin du me dang bud shing dag kyang du ba skyed pa'i rang bzhin yin pa'i phyir me nyid dam bud shing nyid du mi 'gyur ro//brgya byin gyi spyi bo ni gnyi ga'i bdag nyid du yang 'gyur ro/ /de las byung ba'i mtshan nyid kyi 'brel pa 'di ni tshogs pa la ltos pa nyid yin te 'di ltar de kho na rjes su dpag par bya ba yin no/ /des ni 'di thams cad ni de la bsam pa nyid yin par rigs so//gal te yang tshogs pa nyid yod na 'bras bu bskyed par mthong la re res mi nus na yang 'ga' yang nus par mi 'thad pa re res nus kyang 'ga' yang don med pa ma yin te thams cad nye bar gnas nas 'bras bu mthong bas ngo bo nyid kyis thams cad nye bar sbyor ba'i phyir dang gcig byed pa na gzhan gyi bya ba mi 'gal ba'i phyir tshogs pa nyid skyed par byed pa yin pas rgyu tha dad pa las tha mi dad par 'gyur bar thal ba yang spangs pa de lta na yang tshogs pa nyid skyed par byed pa yin pa bstan par bya ba yin pa'i phyir dang /bstan par smras pa tshogs pa'i yan lag rnams kyi nye bar sbyor ba'i khyad par bstan pa'i phyir rtsom pa ni tshogs de nyid yul gyi rnam pa la sogs pa'i 'bras bu'i rang gi ngo bo gang yin pa de dag gi rten yin no/ /de ltar yang yid la byed pa las ni dbang po'i byed pa gsal ba'i rang bzhin yul las ni rnam pa dang 'brel pa ste gang gi phyir 'di yul gsal ba yin pa'i phyir zhes bya ba la sogs pas rjes su 'brang bar bya'o//'di ji lta ba de ltar ni gzhan du bsgrubs zin pas 'dir mi brjod do/ /lhan cig byed pa dag gi nye bar sbyor ba'i rnam par dbye ba bstan par ma rtogs pa gang yin pa de dag kyang de lta bu nyid du yod do zhes pas brtag par rigs pa yin no//gal te tshogs pa'i nang du 'dus pa'i rgyu rnams 'bras bu'i khyad par sgrub par byed pa la phyogs par 'dod na 'o na de dag so sor yang de lta bu'i 'bras bu skyed par 'gyur ro zhe na/bshad pa gang gi phyir gcig pu skyed par byed pa'am zhes bya bas tshogs pa nyid rang gi ngo bo gnas pa'i rten du 'dod pa de nyid kyi phyir lhan cig byed pa rnams kyang rnam grangs med par skyed par byed pa yin no/ /'dir rigs smos pa nye bar mtshon pa rim gyis byed na gdon mi za bar 'gyur ba'i tha dad pa nyid 'gog pa yin te lhan cig pa rnams so sor skyed par mi byed do zhes bya ba'i don to//phan tshun phan 'dogs pa'i phyir tshogs par gyur pa de dag 'bras bu gcig byed pa'i rang bzhin nyid ni 'bras bu gcig dmigs pa nyid las rtogs par bya'o//de ltar rigs pas rigs mi mthun pa las skye ba bsal te/ de ni gang du de ltar mthong ba yod pa der ci gang 'di lta bu'i dngos po'i rjes su 'brang ba'i gnod pa'i rtsa ba las don gzhan du gyur pa'i phyir rtogs pas 'khrul pa yin nam/ 'on te de lta ma yin zhes dogs pa la de ston pa ni gang yang cung zad rigs mi mthun pa las 'byung bar mthong ba de la yang rang gi sa bon las rab tu 'byung ba can gyi don la ltos te/rang gi ngo bo tha dad pa yod pa kho na'o/ /ji ltar yod ce na bshad pa rgyu'i rang gi ngo bo tha dad pa'i phyir ro/ /rgyu tha dad pas bskyed pa'i dngos po ni tha dad pa las mi 'da'o//rigs mi mthun pa gang las de gang zhig 'byung bar mthong zhe na/ de bstan pa'i phyir bshad pa lci ba la sogs pa las ut+pa la la sogs pa'o/ /ut+pa la las kyang ut+pa la 'byung la ut+pa la dang rigs mi mthun pa lci ba las kyang 'byung bar mthong /gal te ut+pa la dang rigs mi mthun pa lci ba las 'byung ba'i ut+pa la ut+pa la las skyes pa'i ut+pa la las tha dad pa yin na 'o na de de ut+pa la nyid ma yin pa des na tha dad pa'i phyir ji lta na de ltar dmigs she na 'di la bshad pa/ de skad du brjod kyang zhes bya ba ste/ut+pa la'i rnam pa yin yang zhes bya ba'i tha tshig go/ /'di skad brjod pa yin te/ gal te yang de la ut+pa la'i rnam pa yod pa de lta na yang lci ba la sogs pa'i rgyu mtshan can de ni gang gi bye brag gis byas pa'i tha dad pa kho na'o/ /des na rang bzhin de lci ba'i 'bras bu yin gyi/gang gis brgya byin gyi spyi bo'i tshul du lci ba la sogs pa'i rgyu yang ut+pa lar thal bar 'gyur ba ut+pa la tsam ni ma yin no/ /dper na bum pa'i rnam pa'i dngos po nyid rdza mkhan las 'byung ba'i phyir de snam bu'i bdag nyid tha ga pa las 'byung ba ni rgyu tha dad par mi 'gyur ba bzhin no//yul dang dus kyi dbye bas rang gi mtshan nyid dam skad cig gis tha dad gang yin pa de ni tha dad pa ma yin pa nyid de de tha dad pa'i sgrub par byed pa ni rang bzhin gyi khyad par nyid yin pa'i phyir ro/ /de yang gal te mngon sum gyis ma grub kyang rgyu tha dad pa nyid kyis rtogs pas na spang bar 'os pa'am tha dad par byed pa ma yin no//ut+pa la nyid rigs mi mthun pa las skye ba la dper brjod pa ni dper na/ chu shing sa bon dang sdong bu las skye ba rigs mi mthun pa yin par mthong ba bzhin no/ /des na der yang de bzhin du rigs mi mthun pa yin par dgongs pa'o//ut+pa la la sogs pa'i khyad par 'di rjes su dpag par bya ba nyid ni ma yin gyi 'on kyang dbye ba de lta bu ni 'jig rten na gsal ba kho nar rnam par 'byed do/ /'o na ji ltar rgyu'i rang gi ngo bo tha dad pa'i phyir zhes brjod ce na/ 'di sgrub byed nyid du bstan pa ni ma yin gyi/'on kyang de lta bur gyur pa'i khyad par gyi rgyu nyid du'o/ /khyad par mi 'dra ba de ni rgyu tha dad pa las skyes pa yin no zhes bya ba'i tha tshig go/ /gang gi phyir ba lang gi lci ba'i ut+pa la sogs pa rnams rnam pa yang tha dad pa de'i phyir de dag ni 'jig rten yang rtogs pa yin no//de lta bas na 'bras bu'i khyad par thams cad ma rtogs par rgyu tha dad par dmigs pas 'khrul pa nor ba'i phyir na/ ji skad bshad pa'i khyad par nges pa bye brag tu mthong bar rtogs pa shin tu rnam par phye ba'i 'bras bu ni rgyu la 'khrul pa med do/ /gal te yang rnam par phye ba med kyang dngos su na 'bras bu 'khrul pa med pa yin pa de lta na yang rtags la ltos pa nyid kyis de skad brjod do//da ni ji skad bshad pa'i don bsdus nas ston to/ rjes su 'gro dang ldog pa las/ /gang zhig rang bzhin gang rjes 'jug /byed mthong de ni de yi rgyu/ /de phyir mi mthun las mi 'byung //zhes bya ba la 'dir rab tu byed pa'i yan lag gi don bar ma chod pa yang sdud la/ 'di gang gi yan lag yin pa rab tu byed pa'i don gtso bor gyur pa de yang sdud do/ /de la dang po bshad pa ni de ni de'i rgyu yin te skyed par byed pa yin no/ /gang gi gang zhe na bshad pa gang zhig rang bzhin gang rjes su 'jug byed de gang gis rang bzhin gang rjes su 'jug par byed cing gzhan gyi dbang nyid du 'gyur bar byed do//de ni bskyed par bya ba'i rang bzhin gyis na rang ngam gzhan las mi 'byung ba'i phyir ro/ /de ji ltar rjes su 'jug par byed pa yin zhe na/de las skye bar bshad pa ni/ rjes su 'gro ba dang ldog pa las zhes bya ba'o/ /ldog pas ni rgyu dang 'brel pa'i sngon rol du yod pa med par brjod do/ /rjes su 'gro bas ni rgyu yod pa na yod pa nyid do/ /des na de ltar yod pa res 'ga' 'byung ba'i mtshan nyid kyi skye ba de gang yod na 'gyur ba de rgyu yin no zhes brjod pa yin no//des na skye ba'i don rnam par dpyad pa nyid las tha dad pa las mi 'byung ba yin no/ /de ltar na rgyu dang 'bras bu'i dngos po nges pa dang lhan cig bstan pa yin no/ /da ni sngar gal te mthong ba dang ma mthong ba dag rjes su 'gro ba dang ldog pa rtogs pa'i rten ma yin no//'o na de ji ltar du bas me mi 'khrul lo zhes rtogs zhes brtsad pa gang yin pa de'i lan mjug sdud pa ni de bas zhes bya ba'o/ /rgyu dang 'bras bu'i dngos po des de rtogs te mi 'khrul pa rtogs so/ /'o na de gang las she na/ mthong ba dang ma mthong ba dag gis zhes smos so//mi 'khrul pa bzhin du der yang mthong ba dang ma mthong ba dag ji ltar sgrub par byed pa las mi nyams she na/ lan cig ces smos so/ /'di dag mi 'khrul pa la ni lan cig ma yin par 'jug pa la ltos pas skyon du 'gyur gyi 'dir ni ma yin te/lan cig zhugs pa nyid kyis de ltar rtogs pa'i phyir ro/ /rgyu dang 'bras bu ma gtogs pa rnam pa gzhan gyis ni de rtogs pa ma yin no zhes bshad pa ni gzhan du ni ma yin te zhes bya ba yin no/ /gtan tshigs bshad pa/ rjes su 'gro ba dang zhes bya ba'o//ma lus pa'i mthong ba dang ma mthong ba ni ma lus par mthong ba dang ma mthong ba'o/ /des na gang gi zhes bya ba la ltos pa na rjes su 'gro ba dang ldog pa dag go zhes bya bar 'brel to/ /rtogs pa ni de la rag las pa'i phyir ro zhes 'brel to/ /de'i don ni 'di yin te/ rnam pa gzhan gyis mi 'khrul pa la rtogs pa ni mthong ba dang ma mthong ba dag nyid las yin par 'gyur na/ de yang rjes su 'gro ba dang ldog pa ma lus par mthong ba la rag las pa'i phyir thams cad mthong ba ma yin pa la mi srid do/ /de'i phyir rnam pa gzhan gyis ni rtogs pa ma yin no//yang ci'i phyir 'di ma lus par mthong ba dang ma mthong ba la brten pa yin gyi lan mang du mthong ba las 'dir mi 'gyur zhe na/ 'ga' zhig tu lus can ma yin pa nyid la rtag pa nyid mthong yang zhes smos te/ gal te nam mkha' la sogs pa 'ga' zhig tu lus can ma yin pa nyid la rtag pa nyid mthong ba de lta na yang lus can ma yin pa tsam gyis rtag pa dang rjes su 'gro ba ni ma yin te/blo la sogs pa gzhan la lus can ma yin pa nyid la yang rtag pa nyid med par mthong ba'i phyir ro/ /des rjes su 'gro ba mtha' dag mthong ba med pa rjes su 'gro ba mi rtogs so/ / de bzhin du ldog pa ma lus par ma mthong na yang ldog pa nges pa ma yin no zhes bshad pa ni bum pa la sogs pa 'ga' zhig la lus can ma yin pa nyid rtag pa nyid med par ma mthong ba yang bya ba la sogs pa la yang mthong ba'i phyir ro/ /des na gal te 'bras bu'i 'bras bu nyid dor nas mi 'khrul pa nges pa ni mthong ba dang ma mthong ba dag las yin par 'gyur na/de ni yod pa ma yin te/ 'ga' zhig tu de ltar dmigs kyang thams cad du de lta bu'i ngo bor nges pa mi 'grub pa'i phyir ro/ /des na de ltar 'bras bu'i gtan tshigs kyi mi 'khrul pa'i tshad ma brjod nas/ rang bzhin gyi gtan tshigs kyi yang brjod pa'i phyir ro/ /'bras bu ni zhes rtsod par byed do/ /'bras bu de las skye ba'i mtshan nyid kyi phyir rgyu dang mi 'khrul pa yin la rag na rang bzhin gyi gtan tshigs ji ltar rnam pa gang gis tshad ma gang gzhir gyur pas med na mi 'byung ba yin/ da zhes bya ba ni med na mi 'byung ba mngon sum la sogs pa'i yul ma yin na'o//de ltar dogs pa la rang bzhin gyi gtan tshigs rang gi ngo bo sngar bshad zin pa nyid tshad ma brjod pa'i yan lag tu ston pa ni/ rang bzhin la yang zhes bya'o/ /rang bzhin la ni med na mi 'byung ba mi 'khrul pa yod pa tsam dang 'brel pa la dngos po tsam la ltos pa yin no//med na mi 'byung ba ni gtan tshigs kyi chos yin pas des gtan tshigs 'phangs pa'i phyir ma bstan to/ /des na 'di skad brjod pa yin te/ rang bzhin gyi gtan tshigs kyi med na mi 'byung ba ni ji skad bshad pa'i yod pa tsam dang rjes su 'brel pa la yin no/ /de nyid kyi phyir gang zhig ces smos so//rang bzhin gang zhig yod pa tsam dang rjes su 'brel pa'i rang bzhin de la ni yod pa med na mi 'byung bar 'dod do/ /rang bzhin ni skabs kyis yod pa nyid kyi yin no/ /des na de ltar rang bzhin gyi rang gi ngo bo bstan nas/ de las med na mi 'byung ba rigs pa kho na'o zhes bshad pa ni de med na ni yod pa bdag med par 'gyur te gtan tshigs kyi mi 'khrul ba ni rnam pa de lta bu'i don la yin no//de med na med pa nyid na med na 'byung ba kho na'o/ /des na don 'di yin te/ gang gi phyir yod pa tsam dang rjes su 'brel pa'i rang bzhin la med na mi 'byung ba yin pa de'i phyir 'di 'dir rigs pa kho na'o//gtan tshigs bshad pa tha dad med phyir ro/ /tha dad pa med pa nyid kyi phyir yod pa dang rjes su 'brel par brjod do/ /des na ji ltar med na mi 'byung bar mi 'gyur/ ci ste tha dad pa med par ji ltar rtogs she na/ chos gang zhig cig shos gang gi bdag nyid du gyur pa de ni rnam par dpyad pa las de lta bu rtogs pa kho na ste/tha dad pa nges pa rtag par ji skad bshad pa bzhin no/ /byas pa la sogs mi rtag pa la sogs pa'i rang bzhin du ni rang nyid nye bar bkod de ston par 'gyur ro/ /gang kho na yod pa'i rang bzhin zhes brjod pa yod pa tsam dang rjes su 'brel pa de kho na 'di gang yod pa tsam dang rjes su 'brel pa'i yod pa yin no//des na 'dir rnam pa 'di lta bu'i rigs pas med na mi 'byung ba 'grub pa yin no/ /tha mi dad pa de'i rigs pa khong du chud pa ni gtan tshigs de dang de dag la tha dad pa yin no//'di ltar byas pa gang yin pa de nyid mi rtag pa yin pa'i phyir dngos su tha dad pa med pa'i phyir rang bzhin gyi gtan tshigs kyi med na mi 'byung ba yin no/ /rang gi mtshan nyid tha mi dad pa ni ma nges pa kho na ste/ de gcig la 'khrul pa med kyang rang gi mtshan nyid gzhan la yang de ltar 'gyur bar nges pa med pa'i phyir ro//ji ltar mi rtag pa gcig rtsol ba las byung ba yin yang gzhan rtsol ba las byung ba ma yin par 'gyur ba bzhin te/ des na rtsol ba las byung ba yang 'ga' zhig mi rtag pa ma yin par 'gyur ro zhes the tshom 'jug par 'gyur ro//ma yin te de'i bdag nyid ni mi mthun pa'i phyogs la gnod pa'i tshad mas 'jug pas bsgrub par bya ba yin pa'i phyir/ gang la yod pa de kho nar 'di 'gyur gyi/ gzhan du ni ma yin no zhe na/ de lta na ni 'o na tha mi dad pa tsam de'i bdag nyid ma yin no zhes gzhan du gtan la phab zin to//mi mthun pa'i phyogs la gnod pa'i tshad ma nyid kyis ldog pa grub na rjes su 'gro ba yang de'i shugs kyis 'phangs pas grub pa'i phyir gtan tshigs kyi dngos por grub pas na de'i bdag nyid khas blangs pas ci bya des na rgyu dang 'bras bu dang khyab par bya ba dang khyab par byed pa'i dngos po grub na bltar rung ba'i yul can gyi rgyu dang khyab par byed pa mi dmigs pa dag gis 'bras bu dang rang bzhin gyi gtan tshigs kyi ldog pa nges so zhes bya ba yang mi 'thad par 'gyur ro//'di ltar rang bzhin gyi gtan tshigs la khyab par bya ba dang khyab par byed pa'i dngos po grub pa nyid mi mthun pa'i phyogs la gnod par byed pa'i tshad ma'i dbang gis yin na mi mthun pa'i phyogs la gtan tshigs gnod pa'i tshad mas go ldog pa ji ltar mi nges/des khyab par bya ba dang khyab par byed pa'i dngos po nges pa'i sngon rol du nges par 'gyur ba'i ldog pa gang yin pa de grub pa na khyab par byed pa mi dmigs pa gzhan gyi don ci yod/gal te rjes su 'gro ba nyid 'brel pa yin la de yang mi mthun pa'i phyogs la gnod pa'i tshad mas ldog pa sgrub pas bsgrub par bya ba yin pa'i phyir gnod par byed pa'i tshad mas 'brel pa nges par brjod pa yin no zhe na/de ni mi rung ste/ de lta na yang ji skad bshad pa'i skyon mi ldog pa'i phyir ro/ /rjes su 'gro ba 'brel pa las gzhan nyid do zhes ni sngar bshad zin to/ /de'i phyir chos gcig gi bdag nyid kho na 'brel pa yin la/de yang de dang chos gcig gi bdag nyid kho na las de rtogs pa na de'i rang gi ngo bo rnam par dpyad pas grub pa nyid do zhes rigs so/ /da ni 'dir don tha mi dad kyang chos tha dad par rtogs par bsgrub pa'i phyir/ 'o na da ni zhes rgol bar byed do/ /gal te ji skad bshad pa'i tshul gyis de tsam dang rjes su 'brel pa'i rang bzhin nyid yod pa yin pa'i phyir byas pa gang yin pa de nyid mi rtag pa yin na/de'i tshe byas pa dang mi rtag pa dag tha dad pa med pa'i phyir bsgrub bya'i chos can dang chos kyi spyi'i mtshan nyid dam bcas pa'i don gyi phyogs gcig bsgrub par bya ba'i chos byas pas mi rtag pa sgrub pa na gtan tshigs su brjod par 'gyur ro//byas pa dang mi rtag pa gcig pa'i phyir byas pa mi rtag go zhes byas na mi rtag pa'i phyir mi rtag go zhes brjod par 'gyur la/ des na gtan tshigs ma grub par 'gyur te/ bsgrub par bya ba'i chos bzhin du de yang ma rtogs pa'i phyir ro zhe na/ 'di spangs pa'i phyir nyes pa de ni med de zhes bya ba la sogs pa'o/ /gang phyir dngos kun te/ gsal ba 'ba' zhig tu ni ma zad de/ spyi yang yin no zhes bya ba'i don to/ /ldog pa la ni rten pa can de ldog pa dang ldan pa yin no//gang las she na/ mthun pa'i dngos po gzhan gyi dngos dag las so/ /rang gi dngos po ni mthun dngos te/ bdag gi ba'i dngos po'o/ /bdag gi ba yang 'brel pa las yin la/ de yang rigs 'dra ba nyid las yin no/ /de bzhin du gzhan rigs mi mthun pa ni gzhan gyi dngos po yin no//rigs mthun dang rigs mi mthun pa las ldog pa yin no zhes bya ba'i tha tshig go/ /gtan tshigs bshad pa ni rang bzhin gyis rang rang ngo bo la gnas phyir/ des na don 'di yin te dngos po rang gi rang bzhin gyis gang gi phyir rang gi rang bzhin gyi mthar thug pa yin gyi gzhan gyi bdag nyid la mi 'gro ba de'i phyir de las 'di'i rang bzhin de ldog pa yin no//gang gi phyir 'di rang gi bdag nyid du yod pa de'i phyir gzhan gyi bdag nyid la med pas ldog pa yin no/ /des na shing shing gi bdag nyid kyi rang bzhin gyis rang gi ngo bo la gnas pa des na ba lang la sogs pa shing ma yin pa la med pa de'i phyir shing ma yin pa las ldog pa la brten pa yin no//de bzhin du de nyid sha pa'i rang bzhin gyis seng ldeng la sogs pa la med pas seng ldeng la sogs pa las ldog pas na rigs mthun pa las kyang ldog pa yin no//gsal ba ni gsal ba'i bdag nyid kho nas ldog pa yin gyi/ spyi'i bdag nyid kyis ni 'dre bar 'gyur ro zhes bya ba'i dogs pa bzlog pa'i phyir/ kun zhes smos so/ /de ltar yang 'brel bar ston par 'gyur ro/ /des na de ltar dngos po la dngos po gzhan med pa'i phyir ldog pa yod par bsgrubs nas da ni de'i rgyu mtshan can gyi rtag pa tha dad pa bstan pa'i phyir de phyir zhes smos so//gang gi phyir ldog pa la brten pa can yin pa de'i phyir gang dang gang las don ldog pa don la don gang dang gang med pa'i phyir ldog pa rnams mang ba nyid du brjod do//de'i rgyu can gyis te de'i rgyu mtshan can gyis rigs dbye/ rnam par rtog pa'i shes pas rigs tha dad par rab tu brtags pa yin no/ /'di skad brjod de/ gang dang gang don la med pa de dang de'i gnyen por gyur pa'i chos don la snang ba yin no/ / mang po'i tshig gis ni chos mang por bstan to/ /de dag kyang rjes su 'gro ba'i rang bzhin du snang ngo zhes rigs kyi tshig sbyar bas bstan to/ /byas pa dang mi rtag pa la sogs par brtags pa'i chos de dag ni nya phyis la sogs pa la dngul la sogs pa ltar gtan med pa ni ma yin no zhes bshad pa ni/de'i khyad par ni rtogs 'gyur ba dag rab tu byed ces bya ba yin no/ /ldog pa'i mtshams su gyur pa'i dngos po gzhan dag las khyad par du gyur pa'i phyir khyad par te/ dngos po'i rang bzhin du gyur pa tha dad pa dang 'dre ba dang bral ba'i byas pa dang mi rtag pa la sogs pa'o//tha dad pa dang rjes su 'gro ba'i mi rtag pa la sogs pa rang bzhin gyi rten la med kyi rang gi ngo bo ni ma yin te des na brtags pa rtogs pa'i sgo nas de rtogs par rung ba yin no/ /'di bstan pa na skabs kyi nyes par thal ba med do zhes bshad pa ni de'i phyir zhes bya ba'o//don gyi rang bzhin mi rtag pa nyid kyi mtshan nyid kyi khyad par gang zhig brtags pa'i rigs kyi dbye ba'i chos gang gis go bar 'gyur ba'i khyad par de chos de las gzhan gyis go bar nus pa ma yin te/ dngos po'i mi rtag pa gang zhig mi rtag pa zhes brtags pa'i chos kyis chod nas khyad par gyis rtogs pa de ni byas pa zhes bya ba'i rnam pa 'dis rtogs par nus pa ma yin la/de bzhin du byas pa zhes bya bas rtogs pa yang mi rtag pas rtogs pa ma yin no/ /des na don 'di yin te/ gang gi phyir dngos su byas pa nyid la sogs pa bdag nyid gcig pa yin yang rnam pa de lta bu'i tshul gyis ni rtogs pa tha dad pa yod pa yin te/gang gis mi rtag pa ma grub pa'i phyir byas pa zhes bya bar brjod pa yang ma grub par 'gyur ba'am/ de grub na yang mi rtag pa yang grub pas don med par 'gyur ba byas par rtogs pa mi rtag pa nyid kyi yul can ni ma yin no//dngos po la gcig yin yang dngos su rtogs pa ma yin pa'i phyir rtogs pa gcig gzung ba ma yin no/ /gzhan sel ba'i yul can nyid kyis rtogs pa tha dad par snang ba'i phyir gcig rtogs kyang gzhan rtogs pa ma yin no/ / de lta mod kyi rnam pa thams cad du dngos po yongs su dor ba ma yin pa'i phyir rnam pa ci zhig ltar yang rtogs pa grub pa des na ji skad bshad pa'i nyes pa'i go skabs med do/ /'grel pa ni dngos po thams cad ni zhes bya ba la sogs pa yin no/ /gang gi phyir dngos po thams cad ni rang gi ngo bo la gnas pa can kho na yin te/'di dag la rang gi ngo bo la gnas pa yod pa yin no/ /don gyi rang gi ngo bo gang yin pa de nyid 'di'i ngo bo yin no/ /de tsam gyi ngo bo ni rang gi bdag nyid kho na la gnas pa yin gyi gzhan gyi bdag nyid la ni ma yin no//de ltar/ rang rang ngo bo la gnas phyir/ /zhes bya ba'i gtan tshigs bshad nas/ bsgrub bya 'chad pa ni de phyir de dag ni rang gzhan du 'dre bar mi byed do/ /gzhan la yod pa ma yin no/ /rigs mthun pa dang rigs mi mthun pa gzhan las ldog go zhes bya ba'i don to/ / de dag rang gi ngo bo la gnas pa'i phyir gzhan gyi ngo bo las ldog pa yin no zhes bya ba gang yin pa 'di la rigs pa ci yod ce na/ de gzhan ma yin pa nyid du thal bar gyur pa'i phyir ro zhes smos so/ /gal te gzhan de de nyid yin na/ de lta na 'di gzhan gyi ngo bo dang 'dres par 'gyur ba yin no//gang gi tshe 'di gang yin pa ni de kho na yin la gzhan ni gzhan kho na yin pa de'i tshe 'dres pa'i don ci zhig yod/ de lta na ni rang rang gi ngo bo la gnas pa nyid du gsal bar 'gyur ro/ /'dres par gyur pas byas te 'di dag gcig tu gyur na yang de gzhan ma yin pa pha rol por ma gyur pa nyid du 'gyur bas de lta na yang gzhan gyi bdag nyid la 'dre ba ma grub kyi/'on kyang rang rang gi ngo bo nyid la rnam par gnas pa kho nar 'gyur ro/ /ci ste yang rang bzhin tha dad pa yod kyang rang bzhin 'ga' zhig gis gcig par 'gyur ba'i phyir gzhan gyi bdag nyid dang 'dres kyang gzhan ma yin par thal bar mi 'gyur te/dper na bum pa snam bu las rang gi ngo bo tha dad kyang yon tan gsum gyi bdag nyid kyis gcig tu 'gyur ro zhes kha cig sems pa bzhin no/ /'di ltar bum pa yang snying stobs dang rdul dang mun pa'i bdag nyid yin la snam bu yang yin no//yon tan gsum ni bum pa las tha mi dad la snam bu las kyang tha mi dad do/ /des na gzhan yin yang 'dre bar 'thad pa yin no zhes dogs pa thams cad smos pa'i 'bras bu bstan pa'i phyir gang yang zhes smos so/ /gang yang bum pa la sogs pa 'di dag gi rang gi bdag nyid du gyur pa zhes bya ba gsal ba las tha mi dad pa dang ngo bo tha mi dad pa zhes bya ba rjes su 'gro ba ste/gzhung lugs ji lta ba bzhin khas blangs pa'o/ /de ni bum pa la sogs pa tha dad pa'i bdag nyid de dag gi ma yin te/ rang bzhin de dag gi ma yin no zhes bya ba'i tha tshig go//ji ltar zhe na bshad pa bdag nyid du gyur pa tha dad pa med pa'i rang bzhin yod par gyur pa de'i tshe bum pa la sogs pa dag med par 'gyur ro/ /'di ltar bum pa yon tan gsum las tha mi dad na/ bum pa nyid yon tan gsum yin pa'am/ yang na yon tan gsum nyid bum pa yin par 'gyur gyi/bum pa nyid dang yon tan gsum gyi bdag nyid du yang 'gyur ba ni ma yin no/ /de lta na 'o na sngon po skad cig ma nyid las tha mi dad na sngon po nyid skad cig ma yin pa'i phyir 'jig pa tsam mam gzugs tsam du 'gyur gyi gzugs dang 'jig par ni mi 'gyur ro//des na tha mi dad kyang gzugs dang 'jig pa yin pa de bzhin du bum pa yang yon tan gsum gyi bdag nyid du 'gyur ro zhe na mi mthun pa nye bar bkod pa ste gzugs nyid 'jig pa yin pa'i phyir sngon po dang skad cig ma dag tha dad med kyang 'di rnam par rtog pas tha dad par rtogs pa yin no//de bzhin du gal te bum pa nyid yon tan gsum gyi bdag nyid can yin pas na 'di rang bzhin gcig yin na snam bu la yang yon tan gsum gyi bdag nyid yod pa'i phyir de yang bum pa'i rang bzhin du 'gyur ro/ /bum pa'i rang bzhin yang yin la yon tan gsum yang yin pa'i phyir sngon po dang skad cig ma la sogs pa ltar tha mi dad pa'i rang bzhin yin pa'i phyir bum pa'i rang bzhin dang bral ba'i yon tan gsum snam bu la yod par ga la 'gyur te/de yon tan gsum nyid ma yin par 'gyur ro//de lta na 'o na sngon po dang 'jig pa zhes bya ba rang bzhin gcig yin pa'i phyir sngon po nyid spangs nas ser po 'jig pa yin par mi 'gyur ba'am/ 'jig pa yin na ni sngon po nyid du thal bar 'gyur ro zhe na/ de ltar ni mi nus te/ sngon po'i bdag nyid du gyur pa'i 'jig pa nyid ser po la khas ma blangs pa'i phyir ro//de yod na ni thal ba 'dir 'gyur ba kho na ste/ de sngon po dang dbyer med pa na sngon po spangs nas rjes su 'jug pa mi srid pa'i phyir ro/ /yon tan gsum ni snam bu las gzhan du khas ma blangs so//bum pa la yod pa ni bum pa dang tha mi dad pas na snam bu bum par thal lo/ /des na yon tan gsum tsam rjes su 'jug pa de bum pa las gzhan yin par 'gyur ro/ /des na bum pa nyid yon tan gsum yin no zhes khas mi blang ngo / /des na rnam par rtog pa snga ma la/bum pa nyid yon tan gsum yin par 'gyur ba'i phyir snam bu bum pa nyid du thal lo/ /'on te yon tan gsum gyi bdag nyid kho na bum pa yin no/ /de'i tshe de dag med pa kho nar 'gyur ro/ /de bshad pa ni de kho na yin par 'gyur te zhes bya ba'o/ / gang gi phyir tha mi dad pa gsal ba la rjes su 'gro ba yod pa yin pa de'i phyir de kho na yin par 'gyur ro/ /gal te ji ltar tha mi dad pa yod pa de bzhin du gsal ba'i rang bzhin du tha dad pa yang yod pa ma yin nam zhe na ma yin no zhes bshad pa ni tha dad pa yang med pa'i phyir ro zhes bya ba'o//bum pa la sogs pa gsal ba'i bdag nyid tha dad pa ni yod pa ma yin no/ /de yod na de las ma rtogs pa zhes gzhi mthun pas gtan tshigs yin no/ /'di skad bshad pa yin te gal te bum pa la sogs pa tha dad pa yod la yon tan gsum yang tha mi dad pa yin na/ de'i tshe de dang tha dad par 'gyur ba'i phyir 'di khas blang bar nus pa ma yin no/ /ji skad brjod pa'i bsam pa tha mi dad pa las nyes pa bshad pa ni de nyid tha dad par ni zhes bya ba'o/ /gal te yon tan gsum gyi bdag nyid las bum pa nyid tha dad pa ma yin na/ de'i tshe 'di snam bu la sogs pa las tha mi dad pas ji ltar yang bum pa la sogs pa tha dad par 'gyur/bum pa dang tha mi dad pa'i yon tan gsum snam bu las tha dad pa med bzhin du yang snam bu la sogs pa'i rang bzhin gyis tha dad do zhes ni mi 'thad do/ /de'i phyir yon tan gsum tsam nyid yod pa lus pa yin la de lta na yang dngos po thams cad rang rang gi ngo bo la gnas so zhes grub bo zhes ston pa ni/de yang zhes bya ba yin no/ /gang gi tshe tha mi dad par khas blangs pa gang yin pa de kho na yod do zhes lus par gyur pa de'i tshe/ gzhan 'ga' yang med pas na 'di gang du 'dre bar 'gyur te des na rang gi bdag nyid la rnam par gnas pa grub pa'i phyir gzhan la ldog pa yin no//'o na don tha dad pa yang yod par 'gyur la tha dad pa rnams kyi rang bzhin tha mi dad pa yang yod pa yin no/ /gang gis ji skad bshad pa'i skyon du 'gyur ba tha dad pa dag dang tha mi dad par dbyer med pa ni ma yin te/'on kyang tha dad pa kho na'o/ /tha mi dad pa de ni tha dad pa de dag la 'brel pa rnam par gnas pa yin no/ /de bas na tha dad par rang gi bdag nyid kyis rang rang gi ngo bo la rnam par gnas pa'i phyir ma 'dres kyang 'di dag la tha mi dad pa'i rang bzhin yod pa gang yin pa de dang 'brel pa'i phyir 'di dag de'i bdag nyid kyis 'dre ba yin no//des na bum pa la sogs pa dag bum pa la sogs pa bdag nyid kyis rang rang gi ngo bo la gnas kyang yod pa'i bdag nyid kyis 'dre bar 'gyur te/ yod pa'i mtshan nyid kyi de'i bdag nyid ni de dag dang 'brel ba'i phyir te/ thams cad la yod pa'i phyir ro/ /des na bdag nyid 'ga' zhig 'dre bar 'gyur bas na/ gang phyir dngos kun rang bzhin gyis/ /zhes ji ltar brjod ce na zhes dogs pa la/ don gzhan yang zhes smos so/ /don gzhan nyid kyis sngar gyi skyon med par bstan to/ /de lta yin na de dag gi rang bzhin yin pa'i phyir 'dre bar mi 'gyur ro zhes bya ba bzlog pa'i phyir/du ma dang 'brel kyang zhes smos so/ /de lta bur gyur pas kyang de dag 'dre ba ma yin no zhes bshad pa ni/ de ni de dag gi spyi ma yin te zhes smos so/ /du ma gang dag dang 'di 'brel pa de dag gi spyi de ma yin no//gal te 'di dag gis spyir grub na ni de'i tshe 'di dag gi mtshungs pa yin pa'i phyir de'i bdag nyid kyis 'dre bar 'gyur ba zhig na de lta na ni ma yin no/ /ma yin par ji ltar rtogs she na/ de'i ngo bo ma yin pa'i phyir ro zhes brjod do/ /gal te 'di de dag dang 'brel par khas blangs pa'i phyir 'di dag gi ngo bo nyid ma yin nam zhe na bden te 'di sgra de ltar brjod kyi de 'di ltar brjod par 'dod pa ni ma yin no//de de dag gi tha mi dad pa'i ngo bo ma yin no snyam du bsams pa'i phyir ro/ /de'i bsam pa ni 'di yin te/ gang gi tshe rang bzhin gcig re re la yongs su rdzogs pas mang po rnams kyi tha dad pa med pa nyid kyi rang bzhin yin na de'i tshe/'di mang po rnams kyi mtshungs pa yin par 'gyur ro/ /ba lang du rtogs pa'i yul gyi rang bzhin gang yin pa de dag gang gi tshe khra bo la sogs pa re re la/ la la tha dad pa med par yod pa de'i tshe de dag thams cad de lta bur mtshungs par grub pa'i phyir tha mi dad par de nyid de dag gi spyi yin par 'gyur ro//tha dad pa gcig ni yod kyang de dag gi rang bzhin gang mtshungs pa ma yin pa'i phyir ji ltar 'di spyi'i ngo bo nyid yin no/ /gal te tha mi dad na tha mi dad pa yod pas de las tha dad pa med par thal ba ma yin nam/bden na 'dir 'dre ba 'gog par 'dod pa yin gyi/ spyi gzhung gzugs pa'i don du ni ma yin no/ /des na tha mi dad pa khyad par rnam pa med pa'i phyir dang / tha dad na yang spyi'i ngo bo ma yin pa'i phyir 'dre ba med do//gal te gcig pu du ma dang 'brel pas mtshungs par 'gyur na rigs mi mthun pa dag kyang gnyis la sogs pa dang ldan pa'i phyir ram yan lag rnams la yang yan lag can gcig yod pa'i phyir mtshungs pa'i rang bzhin du gyur pa'i phyir gnyis nyid la sogs pa yang spyi'i rang bzhin du 'gyur ro//de bshad pa ni gnyis nyid la sogs pa dang zhes bya ba'o/ /de dag la yang spyi'i rang bzhin nyid thal bar 'gyur ba'i phyir ro/ /don gzhan de'i ngo bo ma yin yang 'brel pa'i phyir de dag gi spyir 'gyur ba ma yin nam zhe na/ma yin no zhes bshad pa ni 'brel pa can zhes bya ba'o/ /'brel pa can gzhan tha dad pas kyang gzhan dag mtshungs par ni mi 'gyur ro/ /'di ltar gcig tha mi dad pa ma yin na 'di dag gi rang bzhin mi 'dra ba nyid do/ /des na rang bzhin mi 'dra ba rnams kyang tha dad gcig dang 'brel pas mtshungs pa zhes bya bar ji ltar 'gyur/'o na ji ltar 'gyur zhe na/ de dang ldan pa dag tu ni 'gyur te zhes smos so/ /gcig po des de dang ldan pa zhes bya bar 'gyur gyi/ mtshungs pa ni ma yin no/ /rigs mi mthun pa'i 'byung po dag mgul chings kyis de dang ldan pa yin pa bzhin no//dngos po'i de'i ngo bo nyid ni de dang rang bzhin gcig pa'am de dang 'brel pa las 'gyur la/ mgul chings kyi tshul du 'gyur ba gang yin pa 'brel lo cog gis ni rang bzhin du 'gyur ba ma yin no/ /des na ji ltar 'brel pa can gcig pas de'i rang bzhin ma yin yang 'brel pa can rnams mtshungs par mi 'gyur zhe na/shes pa tha mi dad pa'i yul yang ma yin te zhes smos so/ /'brel pa can gzhan gyis kyang zhes 'brel to/ /'brel ba yang tha dad pa dang 'brel ba ni ma yin no/ /des na rang gi ngo bo mi 'dra ba rnams de kho na bzhin rtogs par 'gyur ro//des na 'brel pas ni de dang ldan pa nyid du 'gyur ro/ /'byung po bzhin no zhes bya ba ni chos mthun pa'i dpe'o/ /tha mi dad pa'i don nyid de'i rang bzhin nyid kyis ni tha dad pa rnams mtshungs pa ma yin gyi 'on kyang tha mi dad pa dang 'brel pas yin no zhe na ma yin te re zhig dngos po ni bshad zin to//rtogs pa 'di kho na ltar yin te gang gi phyir 'brel pa can de dag gis bdag nyid kho na sre zhing spyi rtogs par snang gi /ji ltar 'byung po dag bzhin du 'brel pa can gcig dang / 'brel pa can dag go zhes bya bar ni ma yin no/ /'di ltar ji ltar khyad par gcig ba lang ngo zhes bya bar snang ba de bzhin du gzhan yang yin pa'i phyir gcig snang ba gang yin pa de nyid gzhan snang ba yin pa des na 'dres par brjod do//gzhan du ni 'dres pa'i don yod pa ma yin no zhes ston par 'gyur ro/ /rang bzhin gcig po des gcig gi bdag nyid myong ba med par ni rang bzhin de nyid kyis gcig la gcig tu 'dzin par byed pa mi 'thad do//tha dad pa de dag de'i rang bzhin ma yin pa'i phyir 'brel par rtogs pa nyid du thal ba'i phyir ro/ /de'i phyir tha mi dad pa dang bdag nyid gcig pa nyid kyis mtshungs pa yin gyi/ 'brel pas ni ma yin no/ /gal te 'dir 'phrod pa 'du bas sbrel ba yin la 'byung po'i mgul chings la sogs pa ltar 'du ba can dag las tha dad par 'dzin pa yang yod pa ma yin pa des na tha dad pa dang rjes su 'gro ba spyi dang khyad par dag don gcig la 'gal bas de'i rang bzhin ma yin pa yang tha dad par ma rtogs pa'i phyir de'i ngo bo rtogs pa yin no zhe na/tha dad pa ma rtogs kyang gzhan gzhan du rtogs pa ni ma yin te/ 'khrul par thal bar 'gyur ba'i phyir ro/ /'khrul par 'dod pa kho na ste/ 'on kyang de spyis mthong ba'i rgyu mtshan gyis yin pa'i phyir don gcig med pa'i phyir don tha dad pa dag la yang tha mi dad par rtogs pa yang 'thad pa yin no zhe na/dogs pa 'di smras pa ni/ gal te de ni de mthong ba'i 'khrul pa yin no zhe na zhes bya ba'o/ /lan btab pa ni spyi de mthong ngo zhes bya ba ga las de dang ldan par rtogs nas spyi'i rang gi tshad mas grub par 'gyur ba zhig na/rten tha mi dad par rtogs pa na spyi mthong ngo zhes ga las yin/ 'on te ji skad bshad pa'i tshul gyis rang rang gi tshad mas grub pa med kyang rten tha mi dad pa rtogs pa grub par bya ba'i phyir 'di ltar bkod pa yin no/ / gal te 'khrul pas sa bon med pa can/ /zhes bya bas dogs pa de bsu nas 'bras bu de zhes bya bas lan 'debs so/ /'di skad bshad pa yin te de dang ldan par rtogs pa med pa'i phyir tshad mas grub pa ma yin pas na/ gal te rtogs pa grub par bya ba nyid kyi phyir nye bar rtogs na/de ni rnam pa gzhan du yang 'grub par 'gyur te/ gsal ba dag nyid la de ltar rtogs pa'i phyir ro/ /khyed kyis tha mi dad pas tha dad pa med par rtogs pa 'khrul par khas blangs pa yin te/ des don rnams tha mi dad pa ma yin pa'i phyir ro/ /'di ni tha dad pa rnams la tha mi dad par rtogs pa 'khrul pa yin la de yang gsal ba'i bdag nyid ma yin te/ngo shes pa'i ngo bo nyid med pa'i phyir ro zhes bstan par bya'o/ /'di ltar khra bo yang ba lang gi rang bzhin yin la/ ser skya yang yin no/ /'on kyang der tha mi dad pa'i tha snyad tsam 'khrul pa yin no//de'i ba lang nyid kyi rang bzhin ni gzhan gyi ma yin no zhes bshad par bya'o/ /'di nyid 'bras bu gcig pa can nyid kyis bstan to/ /ji ltar mang po rnams 'bras bu gcig byed pa na so sor de'i rgyu nyid phan tshun tha dad pa yin pa de bzhin du ba lang nyid kyang yin no zhes so//'phrod pas 'du ba'i phyir tha dad par ma mthong ba'i gcig pos du ma tha mi dad par rtogs pa yang mthong ba med do/ /ji ltar grangs dang bcas pa la sogs pa'i rdzas dag la bzhin no/ /'brel pa can gzhan gyis kyang ma yin te/ dper na 'byung po la sogs pa dag la bzhin no zhes bshad pa ni grangs dang bcas pa la sogs pa'o//des na de de ltar tha mi dad pa don gyis don rnams kyi bdag nyid dam rtogs pa 'dre ba la ma yin no zhes de ltar de'i bdag nyid kyis 'dre ba nyid bkag pa'am mjug sdud pa ni de lta bas na gzhan gyi spyi ni gzhan ma yin no//de ltar zhes bya ba ni spyi'i rang bzhin rten tha mi dad pa las tha dad pa'i phyir ro/ /blo la zhen pa med pa'i phyir zhes bya ba ni blo la mi snang ba'i phyir ro/ /yang na 'di dag gi spyi gzhan yin du zad do/ /de lta na yang 'dres par gyur pa ni ma grub ste/ des na gang gi phyir dngos kun zhes bya ba la sogs pa rigs pa kho na'o zhes bshad pa ni/yod du chug na yang zhes bya ba yin no/ /de 'brel pa'i phyir gcig gi rang bzhin du gyur pa de ltar gzhan yang yin no zhes bya ba'i 'brel par 'gyur ba nyon mongs pa'i rnam par rtog pa yin te/ 'brel kyang rang gi bdag nyid kho na la rnam par gnas pa'i phyir gzhan gyi ngo bo med pas de'i bdag nyid dang 'dre ba ma grub pa'i phyir ro/ /'byung po rnams kyang mgul chings kyi rang bzhin du thal bar 'gyur ba'i phyir ro/ /'phrod pas 'du bas kyang tha dad pa sel ba ni ma yin no/ /des na de ltar de dag ni rang dang gzhan du 'dre bar mi byed de zhes bya ba gal te bsgrub bya brjod pa yin na/de'i tshe de lta bas na dngos po 'di dag ni zhes bya ba mjug bsdu ba yin la/ der yang rigs mi mthun par 'dod pa dang zhes bya ba ni bshad pa yin no/ /yang na de dag ni rang dang gzhan du 'dre bar mi byed de zhes bya ba ni rang gi ngo bo la gnas pa can kho na'i phyir ro zhes bya ba'i gtan tshigs kyi byed pa bstan pa yin te/des na de lta bas na zhes bya ba la sogs pa ni gtan tshigs sgrub pa na bsgrub bya brjod pa yin no/ /gang gi phyir rang gi bdag nyid la gnas pa'i phyir ma 'dres pa de bas na/rigs mthun par 'dod pa dang / rigs mi mthun pa la sogs pa yin te ldog pa yin no/ /'dod pas smos pa ni rigs mthun pa nyid gzhan gyi 'dod pas yin par bstan pa'i phyir ro/ /dngos po ni du ma'i ngo bo yin gyi thams cad kyi ngo bo ma yin te/des na de lta bu'i bdag nyid la gnas pa'i phyir bdag nyid gang la mi gnas pa de las ldog pa yin no zhes kyang dogs par bya ba ma yin no zhes gtan tshigs gzhan gyis ston pa ni/ rang gi ngo bos ngo bo gcig pa'i phyir ro zhes bya ba yin no/ / tshigs su bcad pa gnyis pa'i don bshad pa ni dngos po rnams gang dang gang las tha dad pa de dang de las tha dad pa rgyu mtshan du nye bar brten nas ngo bo nyid tha mi dad kyang chos du ma shes par byed do/ /gang gis shes par byed ce na bshad pa/ sgra dag gis so/ /de dag gi shes pa gang yin pa de ni rnam par rtog pas kyang rtogs par 'gyur bas chos de dag rnam par brtags par 'gyur ba yin te/des na sgra rnams kyang ldog pa'i yul can du bstan pa'i phyir rigs dbye zhes bya ba brjod par 'gyur ba yin no/ /gal te ldog pa tha dad pa'i phyir de'i rgyu mtshan gyis tha dad par rtogs na/'o na rang bzhin tha mi dad pas de'i rgyu mtshan gyis tha mi dad par rtogs par 'gyur ro/ /des na de'i rgyu can gyi rigs dbye zhes ci ste brjod ce na zhes dogs pa la/ mdo'i ldog pa'i rgyu can gyi rigs dbye ba brtags par bshad pa ni rnam par rtog pa rnams ldog pa'i yul can yin pa las nges par bya'o zhes bstan pa'i phyir de'i zhes smos so//dbye ba shes par bya ba'i phyir sgra brdar btags pa yin no/ /des na de nyid ston pa na de'i rgyu mtshan gyis 'khrul pas dngos po rnams la chos tha dad par shes par byed do//rnam par rtog pas yul du byas pa'i don nyid la sgra sbyor ro/ /des na gal te 'di tha dad pa'i yul can yin na de'i phyir de bstan pa'i don du sgra dgos pa yin no/ /des na de ltar sgras bcad pas de lta bu'i rnam par rtog pa'i rang bzhin brjod par 'gyur ba yin no/ / dngos po gnas pa'i bya ba yod na/ rigs pa dngos po'i yul du 'gyur ba yin no/ /dngos po yang sngon po la sogs pa'i rang bzhin du nges pa yin no/ /des na de ni gsal ba'i rang bzhin gyi myong bas rtogs pa yin no/ /de ltar gsal ba na don la ni cung zad kyang ma yin gyi/'on kyang dngos po ji lta ba de lta bu'i gsal ba skyes na rtogs pa po de rig pa dang ldan pa'i ngo bor mngon par grub pa'i phyir 'jal ba po don rig pa la nye bar mkho ba yin gyi/ des don la ni cir yang mi 'gyur ro/ /de bzhin du rig pa 'ga' zhig ni rtogs pa po don phyin ci log tu rtogs par byed do//des kyang rtogs pa po la don phyin ci log tu byas pa yin te/ dung ser por shes pas dung ser por byas pa bzhin no/ /gal te 'di ni dung ser po tsam gyi yul can dung la ma reg par de ltar snang ba ma yin nam/ rtogs pa po la don phyin ci log tu byed do zhes ji ltar brjod ce na/brjod pa de'i rang bzhin gyi yul non pa dang de'i thon kor na gnas pa bral ba dang don dam pa ma yin pa'i de'i rang bzhin rtogs pa lta bur snang ba de der rjes su zhugs pa nyid kyis de'i rang bzhin ma yin yang de'i rang bzhin du gyur pas ser po'i rnam par snang ba'i phyir ro//snang bar gyur pa'i rang bzhin mtha' dag spangs nas snang bar bzod pa ni ma yin no/ /des na de lta bur gyur pa ma yin yang gang kho na snang ba zhugs nas gsal ba de kho na 'dis rtogs pa po la de ltar bstan pa yin no/ / des na dngos po de lta bu ma yin pa dag kyang de dang tha mi dad par 'gyur bar byed pa'i rtogs pa 'di ni dngos po la gzhol ba nyid do/ /'dir nye bar sbyor bar 'grub pa ni ma yin no/ /de shes pa nyid kyi dgos pa yin pa'i phyir ro/ /de'i phyir dngos po rang gi ngo bos de'i rang bzhin ma yin pa yang dngul la sogs pa'i rtogs pas de ltar don gzhan dang tha mi dad par byed pa de'i rtogs pa bsal bas tha mi dad par zlog par byed pas na tha mi dad pa'i don can nyid kyis don 'jal ba po la nye bar mkho ba yin no//tha dad par byed pa nyid kyis cig shos dang 'dra bar rtogs par byed pa yin pas na 'di la yang don la phyogs pa'i byed pa'i yod pa nyid do//des na de ltar rnam pa gnyis yod pa las/ gal te rnam par rtog pa nyams su myong ba bzhin don rtogs pa'i rang bzhin yin no/ /gal te 'dir 'gal ba mi brjod na 'gyur ba kho na'o//dngos po'i rang bzhin rtogs pa med kyang tha dad par byed pa nyid kyis dngos po'i mthar thug par byed pa ni mi nyams so/ /de ltar yang bstan par bya'o/ /des na 'di'i rtogs pa dang sgrun bzod par don dam par don la bya ba ni 'di yin te/ des na rnam par rtog pa tha dad pa'i yul can yin pa'i phyir de nyid la sgra brdar 'dogs pa yin no//de yang tha dad pa'i don can yin pa'i phyir du ma'i bzlog phyogs su gyur pa'i dngos po gcig la yang bzlog zla'i dngos po gzhan re re sgro 'dogs par byed pa re re'i gnyen por gyur pas re re zhing skye ba na de sel ba'i yan lag tu gyur pa de'i gnyen po'i dngos po'i rnam pa 'dzin pa dang /rang las bzlog pas bskal pa'i rnam pa gzhan yal bar dor bas chos gzhan las tha dad par rang gi rten gyi chos rtogs par byed pa yin no/ /'di ltar ma byas par sgro 'dogs pa bzlog pa'i phyir ma byas pa'i gnyen por gyur pa/dngos po'i bdag nyid du gyur pa'i byas pa la brten nas skye ba na/ rtag par sgro btags pas bskal pas mi rtag pa nyid ma rtogs pas mi rtag pa las byas pa nyid gzhan bzhin du rtogs par 'gyur ro/ /dngos su na tha dad par byed pa kho nar gyur pa de'i sgo nas don rtogs par byed pa dag ni tha dad pa rtogs par brjod de/'di sngon po ma yin zhes bya ba la sogs par rtogs pa bzhin no/ /de dag kyang ji skad bshad pa'i tshul kho nas tha dad pa'i don can nyid du rnam pa gzhan gsal bas bstan par bya'o/ /tha dad pa'i rtogs pa gzhan ni yod pa ma yin no//tha dad pa zhes bya ba gal te rang gi rang bzhin la gnas pa yin na/ thams cad tha dad par rtogs par 'gyur ro/ /'on te dngos po med pa yin na bum pa med do snyam pa tha dad pa rtogs pa yin par 'gyur ro/ /ci ste dngos po la dngos po gzhan med pa yin na/ de gal te dngos po la dngos po gzhan yod pa ma yin no zhes dngos po gzhan bkag pa tsam yin na ni de'i tshe dngos po dngos po gzhan la cung zad kyang ma yin pa'i phyir tha dad pa dngos po'i rang bzhin las lhag par gyur pa de gang zhig yin na gang gis tha dad par rtogs pa rang gi ngo bo rtogs pa las bya ba gzhan dang ldan par 'gyur/'on te dngos po la dngos po gzhan med pa nyid do zhe na/ dngos po gzhan bsal ba na dngos po la brtan pa'i sgrub pa'i spyod yul du 'gyur ba dngos po med pa zhes bya ba de gang yin/ de'i phyir dngos po la dngos po gzhan med do zhes bya ba 'di tsam kho na ldog pa brjod pas na tha dad pa'i rtogs pa dag la rtogs pa'i byed pa mi 'dra ba med kyang ji skad bshad pa'i tshul nyid khas blang bar bya ba yin no//da ni de'i khyad par ni rtogs par 'gyur ba dag rab tu byed ces bya ba de 'chad do/ /sgra de dag kyang de'i rang bzhin mtshan nyid spyi'i phyin pa kho nar 'gyur ro//sgra bems po yin pa'i phyir de dag 'gyur ba 'ga' yang med do/ /des na des skyed pa'i rtogs pa de'i rang bzhin yin pas de skad brjod do/ /'di la rang bzhin ji lta bur brtag pa de lta bu de la yod pa'i phyir de'i yul can ma yin yang de'i mthar thug pa 'gyur ba yin no//gal te rang gi mtshan nyid ni mi rtag pa la sogs pa'i rang bzhin yin la/ rnam par rtog pa ni chos gcig tsam gyi yul can yin pas/ ji ltar de'i yul can yin zhe na/ bshad pa/ gal te yang 'dir mi rtag pa la sogs pa tha dad pa thams cad mi 'phen pa de lta na yang byas pa nyid la sogs pa de'i tha dad pa gcig sgras brjod pa yin no//de gcig las kyang de tha dad pa byas pa nyid la sogs pa'i mtshan nyid de yod pa kho na'o/ /de tha dad pa zhes tha dad par bsnyad pa ni rang bzhin gzhan dang mi mthun pa rang gi bdag nyid la gnas pa'i rang bzhin brjod pa yin gyi tha dad pa zhes bya ba gzhan ni 'ga' yang med do//ji skad bshad pa bzhin no/ /de lta bas na zhes bya ba la sogs pas ni bshad pa'i tshig le'ur byas pa gnyis la gnas pa'i dngos po nye bar 'god pa'o//dngos po gcig la gzhan gyi ngo bo de'i ngo bos stong pa'i ngo bo ji snyed pa de gzhan de la ltos nas ldog pa'i de snyed yod do/ /ngo bo de snyed la de med pa'i phyir de la yang ngo bo de snyed med do zhes bya ba'i don to/ /gtan tshigs bshad pa ni dngos po gcig po de la med pa'i rgyu dang 'bras bu gang la yod pa gzhan gyi ngo bo'o//rgyu dang 'bras bu smos pas ni sngon po la sogs pa rang bzhin yang mtshon pa yin no/ /de lta bu dag las dngos po de tha dad pa'i phyir ro/ /gcig la med pa'i rgyu dang 'bras bu can de nyid kyis ni gzhan de'i rang bzhin gyis stong par brjod pa yin no//tha dad pas na 'di gzhan la med pa'i phyir gzhan yang 'di la med pa yin la de yang ldog pa yin no/ /ldog pa'i snyed pa zhes bya ba ni de la ngo bo ji snyed med pa sgra dag kyang de snyed du 'gyur ro/ /'di dag rang bzhin ngo bo nyid kyis yul tha dad pas tha dad pa ni ma yin no/ /zhes bshad pa ni tha snyad kyi don can gyi zhes bya ba'o//dgos pa yod na yin gyi med na ni ma yin no/ /rang nyid 'gyur ba yin na ni dgos pa la ltos par mi 'gyur te/ mngon sum bzhin no/ /tha dad pa'i mthar thug pa rnams ji ltar tha snyad la nye bar sbyor ba de bshad pa ni/ de'i rgyu dang zhes bya ba'o//brtsal ma thag tu byung ba can zhes bya ba ni de'i rgyu can ma yin pa de spong ba'o/ /nyan pa can zhes bya ba ni de'i 'bras bu can ma yin pa ni yongs su spong ba'o/ /tshig le'ur byas pa gsum pa'i don bshad pa ni/ de'i phyir zhes bya ba'o/ /ming zhes bya ba ni sgra'o/ /chos zhes bya ba ni brtags pa'i rang bzhin no//grong rta mi phyugs zhes bya ba la sogs pa bzhin du dang zhes bsdu ba yin no/ /yang na chos zhes bya ba 'di bshad pa ming zhes bya ba yin no/ /chos kyi sgra ni dngos po tsam brjod pa yin te/ chos thams cad bdag med pa zhes bya ba lta bu'o/ /rtogs pa'i sgrub byed du nye bar blang na sgra la 'jug go//sgra dang rnam par rtog pa rnams tha dad pa'i don can nyid kyis de'i yan lag yin pas de dang mthun par brtags pa'i rang bzhin gyis na yul 'chol ba med pa'i phyir dam bcas pa'i don gyi phyogs gcig gtan tshigs ma yin no zhes bshad pa ni de bas na zhes bya ba'o//de de ltar tha dad pa'i don can nyid grub pa bzhin du nye bar ston to/ /da ni gzhung gzugs pa'i phyir yang sgra dang zhes rgol ba 'god do/ /rang gi ngo bo la gnas pa'i phyir rang gi ngang gis dngos po gzhan las tha dad pa yin yang 'khrul pa'i mthus dngos po gzhan gyi ngo bo dang tha dad pa med par gyur pa gang yin pa de sel ba na de'i rang gi ngo bo rtogs pa gang yin pa'i rnam par gcad pa de sgra dang rtags dag gis rtogs par byed do zhes bya ba ci ltar shes/sgrub pas dngos po'i rang gi ngo bo kho na ni ma yin no zhes bya ba ni bsal zin pa'i sgo nyid spang ste/rang bzhin rtogs pa tsam gyi sgrub pas dngos po rtog pa nyid do/ /'di sngon po yin no zhes bya ba ni dngos po'i rang bzhin tsam rtogs pa yin la/ 'di sngon po ma yin no zhes bya ba ni sngon po bsal ba'i sgo nas de rtogs pa yin pas byed pa gnyis 'grub tha dad par rtogs pa yin no//khyed kyis ni thams cad du rnam par gcad pa yul can nyid du smras pas na 'di sngon pa'o snyam pa yang de'i yul can nyid du brjod par 'gyur ro/ /des na 'di lta bu'i bdag nyid kyi rnam par shes pa rnams rang bzhin rtogs pa tsam ni ma yin gyi 'on kyang tha dad pa'i yul can yin no zhes bya ba 'di la rigs pa ci yod ce na/dogs pa 'di bzlog pa ni/ tshad ma gzhan dang zhes bya ba ni la sogs pa'o/ /tshad ma ni rtags yin la/ sgra ni rang nyid brjod pa yin no/ /des na sgra dang rtags dag gis rnam par gcod par rtogs par byed do zhes ji ltar shes zhes smras pa gang yin pa de rtags la brten nas spangs pa yin no//des na gang gi phyir rtags tshad ma gzhan dang sgra gzhan du gyur pas 'jug pa de'i tshe/ sgra dang rtags dag rnam par gcod pa'i yul can nyid do/ /rtags ni thams cad du chos can grub pa la ltos pa'i phyir mngon sum gyis yul du byas pa'i don la 'jug pa yin no//des na 'di ni tshad ma gzhan du gyur pas 'jug pa yin no/ /de bzhin du mngon sum gyis yul du byas pa'i chos can la brten te sgra 'jug pa na/ rjes su dpag pa 'jug pa'i sgra gang yin pa de sgra gzhan yin te/des na sgra gzhan 'jug pa yin no/ /des na don gyi rang gi ngo bo gcig ces bya ba'i gzhung 'di dang mthun pa 'di gtan tshigs su bkod pa yin no/ /rjes su dpag pa las kyang dngos po zhes bya ba dang / gzhan du dngos po gcig nyid la/ sgra'am blo gcig gis khyab na zhes bya ba la ltos te/ brgal zhing brtags pa'i sgra dang rtags dag ni/ sgra dang tshad ma gzhan 'jug pa nyid kyis gzhan sel ba'i yul can du bsgrub pa yin no/ /sgra dang rtags de dag gis ni gzhan sel ba rtogs pa yin te/ rang gi phyir de yod pa la sgra dang tshad ma gzhan 'jug pa'i phyir ro//dang po dag gzhan sel ba'i yul can du 'gyur mod sgra dang tshad ma gzhan dag go/ /ji ltar zhe na/ de nyid kyi phyir snga ma'i bshad pa dgod pa yin no/ /'o na snga mar dang po dag ji ltar gzhan sel ba'i yul can yin zhe na/ de nyid kyi phyir phyi ma'i bshad pa nye bar dgod do/ /'di ltar snga ma yang dngos po mtha' dag khyab pa ma yin te/ gang gi phyir de zhugs pa la yang phyis 'jug pa'i phyir ro/ /de bzhin du phyi ma dag kyang sngar zhugs pa la dngos po'i phyogs gcig la dmigs pa yin no/ / 'chad par 'gyur ba'i tshul gyis 'di na gzhan sel ba'i yul can ma yin par mi 'thad do/ /des na rim pa gnyi ga ltar yang sgra dang rtags 'jug pa'i phyir gzhan sel ba'i yul can gyi rang bzhin nyid do/ /de ltar ni 'di ni gzhan sel ba'i yul can nyid la rang bzhin gyi gtan tshigs yin la/sgrub pas dngos po'i rang gi ngo bo rtogs pa 'gog pa la ni 'gal bas khyab pa dmigs pa'o/ /gang zhig tshad ma gzhan du gyur pas 'jug pa'am gang la tshad ma gzhan 'jug pa'i don gcig la 'jug pa de ni gzhan sel ba'i yul can yin la/sgrub pas dngos po 'dzin pa ni ma yin te/ 'di ni sngon po ma yin no zhe'am skad cig ma ma yin pa ma yin no zhes bya ba la sogs pa'i shes pa bzhin no/ /sgra mi rtag go snyam du shes pa yang tshad ma gzhan du gyur pas 'jug pa'am/ tshad ma gzhan gyi yul la 'jug pa yin no//rjes su 'gro ba dang ldog pa dag ni 'brel pa las yin la/ de yang tshad ma gzhan 'jug pa'i rang bzhin rnam par dpyad pas rnyed do/ /zhes brjod pa ni/ 'di ltar zhes bya ba yin no/ /don gyi rang bzhin ngo bo tshad ma rnams kyis brtag par bya ba gang yin pa'i cha gzhan ci zhig yod/brtag pa don du gnyer bas tshad ma 'jug pa ni rang dbang ma yin te/ de la rag las pa nas 'jug pa'i phyir ro/ /de yang rjes su dpag pa yin no/ /de ni so so rang nyid kyi dmigs pa ma rnyed par grub pa ma yin na/ de lta bur gyur pa'i don gyi cha de yang gang zhig yin/don de nyid brtag par bya ba ma yin nam de'i cha gzhan gyis ci zhig bya zhe na/ ma yin no zhes bshad pa ni mngon sum yin pa la zhes bya ba'o/ /mngon sum ma yin pa'i don ni brtag par nus pa ma yin no/ /des na de mngon sum du gyur pa ni brtags pa'i rten du gyur pa gzhan brjod par bya dgos so//mngon sum la mngon sum yin pa'i cha yod pa brtag par bya ba yin no zhe na/ ma yin no zhes bshad pa ni gcig ces bya ba'o/ /gcig la yang cha gzhan mi srid do zhes bya ba'i don to/ /gal te don bdag nyid gsal ba ni ma yin gyi 'on kyang de dang 'dra ba'i rnam pa can gyi shes pa gsal ba yin no//de yang phyogs gcig gis 'dra ba na de'i phyogs gcig mngon sum du 'gyur ro zhe na/ ma yin no zhes bshad pa ni bdag nyid ces bya ba yin no/ /gzhan gnas lugs kyi snang ba na don rang nyid gsal bar 'gyur ba yin te/rang gi gnas lugs kyis don byed pa po yin pas na byed pa po nyid yin pa bzhin no/ /des na phyogs gcig gis gsal ba ma yin te/ byed pa po bzhin no/ /'o na mthong ba'i yul nyid brtags pa yin pas so so rang gi yul gzhan rnyed pas ni don med do zhe na ma mthong zhes smos so//mthong bas yul du byas pa ni rtogs zin pa nyid kyis brtag pa don med pa'i phyir ma mthong ba'i yul nyid brtags par rigs pa yin no/ /'di ni tshad ma gzhan sgrub pas dngos po'i ngo bo rtogs par byed pa nyid bsal to//de 'jug pa ni nges par mngon sum gyis chos can grub pa la ltos pa yin no/ /des na chos can gyi chos mngon sum ma yin pa mi srid pas thams cad rtogs pa kho na yin pa'i phyir tshad ma gzhan bsgrubs pas ci zhig rtogs par byed/ don gyi zhes bya ba la sogs pa ni 'grel par byed pa'o//de ni mngon sum ma yin no/ /gang la tshad ma gzhan 'jug pa'i don de ni gcig pa dang mngon sum gyis grub pa yin no/ /grub pa la nges pa bshad pa ni chos can ma grub na zhes bya ba'o/ /dper na mi rtag pa bsgrub par bya ba la sgra gcig pa dang mngon sum gyis grub pa lta bu'o//des cir 'gyur zhe na/ de bshad pa/ des na gcig po de ni mngon sum kho nas grub pas rnam pa thams cad grub pa 'dir 'gyur ro/ /de nyid gzhung 'dzugs pa ni de la zhes bya ba'o/ /grub pa de las gzhan ni ma grub pa ste skabs kyis gcig po de'i rnam pa med pa'i phyir ro//'on te ma grub pa'i rnam pa yod na ni gcig po de'i ngo bo nyid ma yin no/ /ma grub pa'i rnam pa gang yin pa de ni gcig gi rang bzhin du mi 'gyur ro/ /ci'i phyir zhe na/ gang zhig ces smos so/ /de grub na grub pa nyid kyis gang zhig gang dang grub pa dang bde ba gcig pa can ma yin pa de ni de dang rnam pa gcig pa ma yin pas de'i ngo bo nyid ma yin no//chos 'gal ba gnas pa nyid kyis tha dad par grub pa'i phyir ro/ /de bshad pa ni tha dad pa'i tha snyad ces bya ba'o/ /de mngon sum gyis grub na rnam pa thams cad grub mod/de las kyang cir 'gyur zhe na/ de'i phyir zhes bshad do/ /de'i ngo bo nyid mtha' dag ma tshang ba med par yongs su bcad pa'i phyir de rnam par rtog pa med pas myong ba'i phyir tshad ma gzhan 'jug pa mi 'thad do/ /des na de ltar sgrub pa'i phyogs la tshad ma gzhan 'jug pa ma yin par bsgrubs nas gzhan sel ba'i phyogs la 'thad par ston pa ni gzugs chos zhes bya ba'o//gal te 'khrul pa'i rgyu mtshan gyis/ /yon tan gzhan sbyor mi byed na/ /don gyi rang gi ngo bo gcig /bdag nyid mngon sum yin pa la//tshad ma rnams kyis brtag bya gang / /ma mthong cha gzhan ci zhig yod/ /ces bya ba'o/ /de'i don 'di yin te/ gang gi phyir 'khrul pa'i rgyu mtshan gyis dngos po mthong ba la yang dngos po gzhan sgro 'dogs pa des na/ de tshad ma rnams kyis brtag par bya ba yin no//de bas na rang bzhin gzhan sgro btags pas bskal pa'i dngos po'i bdag nyid rtogs par bya ba'i phyir tshad ma gzhan 'jug ste/ des na de sgro 'dogs pa bsal bas rtogs pa na tha dad pa'i don can gzhan sel ba'i yul can du 'grub pa yin no/ /gal te nyams su myong bas rtogs pa'i dngos po nyid la ma mthong ba cung zad yod na/de la tshad ma gzhan 'jug par 'gyur ba yin na/ cha med pa de la ma mthong ba 'ga' yang med na tshad ma gzhan 'jug pa med pa'i phyir sgrub pa'i tshad ma gzhan 'jug pa dgag pa ni rnam par gcod pa'i yul can la yang mtshungs so//'di ltar dngos po'i de kho na nyid mtha' dag mthong ba la ni 'khrul pa'i rgyu mtshan gyis yon tan gzhan sbyor ba nyid re zhig mi srid de/ rtag tu yod par thal ba'i phyir ro/ /srid na yang mthong ba'i nus pa ma nyams pas yon tan gzhan sbyor ba khyad du bsad de/rang gi yul yongs su rdzogs par bya ba tshad ma gzhan la ltos pa zlog par byed do/ /dper na bram ze'i khye'u la seng ge zhes dngos po mtha' dag mthong bzhin du yang sgro 'dogs pa tsam gyis skyes bu seng ge dang sbyor ba rang gi ngo bo 'dzin pa'i shes pa gzhan la ltos nas 'grub pa ma yin pa bzhin no//des na gal te 'khrul pa'i rgyu mtshan gyis zhes ci ste brjod/ 'di ltar 'khrul pa'i rgyu mtshan yod kyang de kho na nyid ma nyams na/ tshad ma gzhan gyis rtogs pa srid pa ma yin no zhe na/ brjod pa/'di la dngos po med par smra ba'i lta ba la ji ltar mthong bzhin pa'i rang bzhin tsam nyid 'jig pa dang skye ba dang skyed par byed pa yin par rigs pa las/ de nyid skad cig ma la sogs par grub pa'i phyir nyams su myong ba'i dbang gis gzugs de mdun na gnas pa'i rang bzhin du snang ba nas gzugs nyid gsal ba yin gyi/skad cig ma la sogs pa ni ma yin no zhes brjod par mi nus so/ /skad cig ma nyid kyang gzugs kyi bdag nyid du gsal ba yin la/ gzugs kyang skad cig ma'i bdag nyid du yin no zhes bsnyad pa yod pa'i phyir ro//des na don ji lta ba de kho na ltar don nyams su myong ba don rigs pa 'jug pas don ngo bo mtha' dag gis snang bar grub kyang nyams su myong ba rang yod pa tsam gyis ni mthar phyin pa ma yin gyi/ 'on kyang 'du byed sgrub pas rjes su 'jug pa yin no//'du byed las skyes pa'i rtogs pa yang rnam par rtog pa yin no/ /des na gal te rnam par rtog pa yang nyams su myong ba bzhin du sgrub pa'i ngo bos don 'dzin na/ sngon po la sogs pa dang dbyer med pa'i skad cig ma la sogs pa'i rnam pa sngon po'i bdag nyid du gyur pa de'i rang gi ngo bo tsam 'dzin par 'gyur na de ltar yang ma yin te/sngon po myong na sngon po'i rnam par rtog pa skyes pa na/ skad cig ma la sogs pa la the tshom za bas tshad ma gzhan la ltos pa'i phyir ro/ /des na 'dis ni bdag nyid thams cad kyis nyams su myong zhing 'du byed pa las rtogs par gyur pa chos gcig tu byas nas nges pa byed do/'di lta ste gzugs nyid du'o/ /des na 'di ltar dngos po'i rang bzhin nyams su myong ba'i bdag nyid kyi rtogs pa med kyang 'dir rang bzhin gzhan gyis kyang dngos po la 'jug pa'i byed pa med par gyur na/dngos po la sogs par rtogs pa bzhin du/ dngos po la brten pa ma yin pa kho nar 'gyur ro/ /gang gi tshe tha dad par byed pa nyid kyis don gyi ngo bo sngon po ma yin pa tsam las dbye ba'i phyir de'i gnyen por gyur pa dngos po'i bdag nyid kyi sngon po tsam rtogs pas 'jug pa de'i tshe 'di 'jug pa tshad ma gzhan gyis go skabs dang ldan par 'thad pa kho na'o//de'i phyir nyams su myong ba dang 'brel ba'i mthong ba sngon po ma yin pa tsam spangs par grub pa na skad cig ma yin pa la sogs pa dang / tha mi dad pa ldog pa'i tshad mas gzhan la ltos pa med pa nyid ma yin no//blo ni rnam pa gnyis te/ gcig ni don gyi dbang gi don snang bas don ji lta ba bzhin kho nar 'jug pa yin la/ gzhan ni rtogs pa po'i gzhan gyi dbang yin pa'i phyir don la mi ltos te/ gal te don gyi yul can ma yin pa nyid kyi don la don ji lta ba bzhin ma rtogs pa yin na/'dis don la brten pa'i tha snyad du mi 'gyur ro/ /des na 'di ni gzhan sel ba'i don can nyid kyis dngos po'i yul can yin pa'i phyir nyes pa 'ga' yang med do/ /de lta na 'o na rnam par rtog pa ni 'khrul pa nyid kyi phyir na/dngos po'i bdag nyid sngon po dang skad cig ma la sogs pa'i rang bzhin gyis tha dad par rtogs pa des na don gyi ngo bo'i chos mtha' dag gis bdag nyid yin yang rnam pa gcig tu snang ba'i phyir nyams su myong ba'i rjes su 'brang ba'i rtogs pas chos gcig gi bdag nyid du rtogs so//des na nyams su myong ba skad cig ma la sogs pa rnams rnam pa gzhan du rtogs par byed pa ma yin pa'i phyir de'i rgyu mtshan gyis skad cig ma'i rnam par rtog pa ma skyes pas na tshad ma gzhan la ltos pa'i phyir gzhan sel ba'i yul can gyis ci bya/sgro 'dogs pa med kyang rgyu mtshan med pa nyid kyis ma rtogs par grub pa na tshad ma gzhan 'jug pa 'grub pa'i phyir ro/ /de bas na sgrub pa'i ngo bo kho nas rtogs pa chos tsam la brten par 'gyur ro/ /'khrul pa'i phyir de ma rtogs so zhe na ma yin te/zhen pa la ltos te khas blangs pa'i phyir ro/ /de lta ma yin na rnam par gcod pa'i sgo nas kyang rtogs pa mi 'grub pa'i phyir ro zhe na/ de ltar ni mi nus te/ dngos po la brten pa yin na dngos po la yod pa'i skad cig ma la sogs pa'i bdag nyid kyis tha dad par bslad par mi 'gyur ba'i phyir ro//de'i yul gyi nyams su myong ba la brten pa'i phyir de la brten pa yin na yang tha dad pa ma yin pa bzhin du rang bzhin la phyin ci log par 'gyur te/ dngul la sogs pa'i rnam par rtog pa bzhin no//sngon po ma yin pa la yang skad cig ma nyid rtogs pa'i phyir tha dad pa la 'khrul pa yin no zhe na ma yin te sngon po dang sngon po ma yin pa dag gis skad cig ma gcig nyid du 'khrul pa yang gzhan sel ba ma yin par dngos po la brten pa nyid yin na/ tha dad pa bslad pa bzhin mi 'grub par 'chad par 'gyur ba'i phyir ro//de'i phyir tha dad pa tsam la byed pa dang ldan pa'i rnam par rtog pa ni bzlog par bya ba mang po dag las sgra'o zhes de'i gnyen por gyur pa'i dngos po'i bdag nyid 'dzin pas gcig bzlog ste/ mi rtag pa'o zhes de bzhin du gzhan sel ba na tha dad pa la bslad pa med kyang rang bzhin la bslad par 'gyur ro//de ltar yang 'og nas bshad par bya'o/ /de'i phyir dngos po rtogs pa'i bdag nyid can gyi rnam par shes pa'i yul can grub pa la yang tha dad pa'i don gyi rtogs pa la brten nas sgro 'dogs srid pa dang tshad ma gzhan la ltos par 'thad pa yin no//des na rgyu mtshan nges pa nyid las ma rtogs par grub pa na 'di mi brjod par 'gyur ba gang yin pa 'dir ma mthong ba sgrub pa'i phyir 'di bkod pa ni ma yin gyi 'on kyang sgrub pa'i ngo bos rtogs pa bsal ba na sgro 'dogs yod na/ de zlog par byed pa nyid kyis tshad ma dag gis brtag pa srid par brjod pa yin te/ji skad bshad pa'i tshul gyis srid par bstan pa'i phyir ro/ /gang zhig dngos po gang las tha dad pa de ni de las yon tan gzhan yin no/ /nges pa'i rang bzhin gyi dngos po ltos nas kyang de ma yin pa'i rang bzhin de las tha dad pa yin no//des na sngon po'i rang bzhin gyis dngos po las ser po gzhan la/ de bzhin du skad cig mar 'jig pa la ni mi 'jig pa nges pa'i 'bras bu byed pa las ni 'bras bu med pa gzhan yin no/ /'khrul pa'i rgyu mtshan yod pa las ni dngos po rang gi ngo bos ji ltar gnas pa las phyin ci log tu rtogs par 'gyur ba yin no//des na don gyi ngo bo gcig yin pa'i phyir de'i rtogs pa rang bzhin gcig kho nar 'gyur ro/ /'di la phyin ci log tu sgro 'dogs pa ni mang ba yin te/ de'i rang bzhin ma yin pa'i don rnams mang ba'i phyir ro//des na de la phyin ci log tu dang tha mi dad pa sel bar byed pa'i 'bras bu can gyi tshad ma dag kyang mang po kho na'o/ /ji ltar rang gi ngo bos gzhan gyi rang bzhin gyis stong pa gzhan la gzhan sbyor/ gzhan gyi ngo bos rtogs pa'i phyir ro zhe na ma yin te/ de ma rtogs pas de gzhan gyi ngo bor rtogs pa mi 'grub pa'i phyir te/gzhan tsam rtogs pa'i phyir ro/ /de rtogs na ni gnyi ga yang rtogs pa'i phyir khyad par dang khyad par can gyi dngos po nyid sbyor ba yin par 'gyur te/ des na rtogs pa nyid tshad ma gzhan la ji ltar ltos par 'gyur/ de bas na yon tan gzhan sbyor yang tshad ma gzhan la ltos pa ma yin no zhes dogs na/nya phyis la dngul gyi rnam pa ltar zhes smos so/ /dper na nya phyis la 'khrul pa'i rgyu mtshan gyis dngul gyi rnam par sbyar ba bzhin no/ /khyad par dang khyad par can bzhin du nya phyis rtogs bzhin pa'i rang bzhin dngul gyi rnam pa dang sbyor ba ni ma yin la/ma rtogs pas dngul gyi rang bzhin du ma rtogs pa yang ma yin no/ /rtogs pa de rdul tsam gyi yul yin yang nya phyis kyi rang bzhin du rjes su zhugs par snang ba'i phyir nya phyis su gyur pa'i dngul gyi rnam par rtog pa nyid do//gal te skad cig ma nyid la sogs pa'i rnam pa mang po gcig nyid ngo bo gzhan 'byed pa lhur len pa'i rtogs pas rang bzhin du byas te/ skad cig ma nyid la sogs pa'i spyod yul can nyams su myong ba'i byed pa nyams par byas pa na sgro 'dogs par 'thad kyi gzhan du ni mdun na gnas pa'i rang bzhin du gsal ba'i ngo bo la rang bzhin gzhan sgro 'dogs pa ma yin te/rtag tu de yod par thal ba'i phyir ro/ /nya phyis nyams su myong ba la dngul gyi rnam par sgro 'dogs pa la ni rnam pa 'di srid pa ma yin te/ rang gi rnam pa 'gal bas snang ba la 'gal ba rtogs pa med pa'i phyir ro//de lta ma yin na gnod par byed pa skye ba nyid mi 'grub par 'gyur ro/ /skad cig ma ma yin pa'i rnam pa ni dngos su 'gal ba yin yang dngos po'i rang bzhin tsam du rtogs pas na 'gal ba med pa'i phyir 'thad pa kho na'o//des na ji ltar nya phyis la dngul du sgro 'dogs zhes dogs na/ gzugs chos mthun pa mthong ba las zhes smos so/ /rtogs pa po'i bsam pa la ltos te/ dngul gyi rang bzhin ji lta bu nyid de lta bu nya phyis la yang yod pas na chos mthun par brjod de/ba lang dang ba men bzhin no/ /de mthong ba'i phyir ro/ /'di skad brjod pa yin te/ dkar ba la sogs pa chos mthun pa dag gis nya phyis kyi rang bzhin gang yin pa de dngul la yod pa yin te/ bum pa gnyis la lto ba yangs pa la sogs pa'i rnam pa yod pa bzhin nam/mtho yor dang mi dag la gyen du 'greng ba'i rnam pa yod pa bzhin no/ /de tsam gyi rnam pa'i rjes su byed pa'i mngon sum skyes pas dngul gyi rnam pa dang tha dad par byed pa'i rnam pa ma bzung ba'i phyir dngul du sgro 'dogs par 'thad pa nyid do//mtho yor gyi thun mong ma yin pa'i chos ma bzung bas skyes bur sgro 'dogs pa bzhin no/ /tha dad par byed pa'i rnam pa gzung na ni sgro 'dogs mi srid pa kho na'o/ /'khrul pa'i rgyu mtshan med na ni gnyi ga la yang yod pa'i ngo bo tsam bzung ba la the tshom du 'gyur te dper na gyen du 'greng ba nyid bzung ba na mtho yor dang skyes bur the tshom za ba bzhin no//nya phyis la yang srid pa'i ngo bo gcig la nges par gzung ba nyid 'khrul pa bzhin no/ /tha dad par byed pa'i rnam pa ma bzung bar ji ltar rtogs she na/ ma rtogs pa'i phyir ro/ /de ltar snang ba ni de rtogs par thal ba'i phyir ro//'o na ji ltar don gyi rang gi ngo bo gcig ces bya ba la sogs pa bshad ce na/ chos gang zhig rang bzhin gang la brten nas tshad ma dag gis brtag pa de ni de bzung ba na ma bzung ba mi srid de/ sgra la sogs pa bzung ba skad cig ma nyid la sogs pa bzhin no zhes bstan pa'i phyir de skad bshad do//cha shas kyis 'dra ba mi srid pa ni ma yin no/ /de gsal ba yang 'dra ba nyid yin no/ /'grel pa ni gal te zhes bya ba yin no/ /mdo bzhin du gzhung snga ma dang 'brel to/ /dngos po'i de bzhin nyid thams cad mthong ba can la yang yon tan gzhan sbyor bar mi byed na'o//ngo bo gzhan dang 'gal ba nyid kyis rnam pa gzhan mdun na gnas pa'i rang bzhin du gsal ba'i rang bzhin du de nye bar ji ltar sbyor zhe na/ 'khrul pa'i rgyu mtshan gyis zhes smos so/ /de'i nus pa bstan pa'i phyir khyad par blangs pa ni/de ltar nges pa'i gags su gyur pa zhes bya ba yin no/ /snang bzhin pa'i rang bzhin nyid ni phyin ci log tu rtogs par srid pa ma yin no/ /des na 'khrul pa'i rgyu rnams 'khrul pa'i rgyur mi 'gyur ba nyid do/ /nges pa'i gags su gyur pa'i 'khrul pa'i rgyu mtshan gyis ni snang ba'i chos gcig gi mthar thug par byed pa des na chos gzhan la dogs pa'am 'khrul par 'gyur ba kho na'o//rgyu mtshan de dag gang yin zhe na/ chos tha mi dad pa zhes brjod do/ /des na de ltar mngon sum gyis 'khrul pa'i go skabs phye ba na/ 'khrul pa la sogs pa'i rgyu rnams bdag nyid ji lta bur rgyur 'gyur ba'i phyir de nyid gtsor 'khrul pa'i rgyu yin par brjod do/ /ji ltar gnyi ga mi snang bar gzhan gzhan du sbyor te gzhan tsam rtogs pa'i phyir ro zhe na zhes snga ma bzhin du dogs pa bsu nas lan 'debs pa ni de ltar nya phyis la zhes bya ba yin no//der nya phyis snang ba yang ma yin pa dngul gyi rnam par mi sbyor ba yang ma yin no/ /de nyid bshad pa ni nya phyis la ni zhes bya ba'o/ /de ltar dngul gyi rnam pa sbyar ba'i nya phyis la ngo bo gnyis yod pa ni ma yin no/ /rang bzhin gnyis po de yang mtshungs pa dang ste/gang bzung na dngul du sgro 'dogs par 'gyur ba nya phyis dang dngul la yang srid pa gang yin pa de ni gcig yin la/ khyad par can dang dngul gyi ngo bo nyid ni gnyis pa'o/ /'di skad brjod pa yin te/ 'dir gnyis snang ba na sbyor ba ni ma yin gyi/ 'on kyang dngul gyi rnam pa tsam du snang ba yod pa yin no/ /gtan tshigs bshad pa ni de ltar zhes bya ba'o/ /spyi'i ngo bo dang dngul gyi rnam pa gsal bar 'gyur na/ dngul tsam zhig gsal ba yin no/ /de ltar ma yin na gnyis snang bar mi 'grub bo zhes bshad pa ni/bye brag tu ma rtogs na ni zhes bya ba'o/ /'o na nya phyis la dngul gyi rnam par sbyor zhe na/ lta bas na zhes smos so/ /rtogs pa po nya phyis kyi gzugs mthong bas khyad par kho na mthong ngo / /khyad par ma yin pa'i nya phyis kyi gzugs med pas na khyad par gyi ci zhig bya zhe na/'dir dogs pa yod pa yin te/ dngul gyi ngo bo la mi srid pa'i nya phyis kyi rnam pa bzung na dngul du sgro 'dogs par mi 'gyur ro/ /dngul la yod pa bzung yang de'i phyi ni ma yin no zhes dogs par bya ba yod pa'i phyir khyad par zhes smos so/ / gal te yang de lta bu dngul yang srid mod kyi/ de lta na nya phyis la yod pa gang yin pa de ni dngul la yod pa ma yin la dngul la yod pa ma yin pa de yang nya phyis la med do/ /de ltar na yang dkar zhing 'tsher ba'i rnam pa ni nya phyis la yod cing dngul la yang yod pa kho na'o/ / des na khyad par zhes de'i rang bzhin brjod pa yin no/ /gnyi ga srid pa'i ngo bo ni tha dad par byed pa thun mong ma yin pa'i ngo bo bzung ba med par gsal ba nges pa la rtogs pa ma yin te/ ji skad bshad pa gyen du 'greng ba nyid bzhin no/ /de la ni 'khyor ba dang khong gseng can la sogs pa'am/rkang lag la sogs pa bzung bas gyen du 'greng ba de nges par rtogs pa yin no/ /de 'dir de lta bu'i rnam pa 'dzin pa ni khyad par gyi ngo bor nges pa'i rtogs pa yin no/ /des na gal te khyad par gyi ngo bo kho na mthong mod kyi de lta na yang khyad par gyi rnam pa 'dzin pa'i nges pa'i rkyen ma tshang ba'i phyir khyad par gyi ngo bo gtan la ma phebs pas de dngul la yod do//des na de'i spyi mthong ngo snyam du rlom par byed do zhes bshad do/ /'di skad brjod pa yin te khyad par gyi rnam pa dang 'bral ba'i phyir der de lta bu'i rang bzhin du snang ba dngul la yang srid pa gang yin pa de rgyu mtshan 'ga' zhig las nges pa thob ste/'gal ba med pa snang ba la dngul du sgro 'dogs pa yin no zhes bshad pa yin no/ /de'i phyir dngul du sgro 'dogs so zhes bya ba ni ji ltar snang bzhin pa 'gal ba'i phyir ro zhes bya ba'i don to/ /dngul du sgro 'dogs pa ni nya phyis kyi yul gyis rnam par bcad nas dngul du snang ba'o//des na de ltar sgro 'dogs pa'i skabs phye bas na de myong ba de'i rang bzhin gyi yul non pas der snang ba'i phyir mi snang ba bzhin du yon tan gzhan sgro 'dogs par 'thad pa yin no zhes bsgrubs te/ skabs su bab pa'i yul gyi dbang du byas nas kyang bstan pa'i phyir de bzhin du zhes smos so/ /nya phyis bzhin du gzhan bum pa la sogs pa la yang gnas par 'khrul lo/ /nges pa'i gags su gyur pa 'khrul pa'i rgyu bshad pa ni tha dad pa nyid du ma 'phrigs pa zhes bya ba'o//chos kyi rang bzhin ni re zhig tha dad pa med pa nyid kyi phyir tha dad par ma rtogs pa yin no/ /skad cig gi dbye bas byas pa'i tha dad pa ni tshu rol mthong bas mi rtogs te/ 'das pa dang ma 'ongs pa dag dang da ltar gyi skad cig snang bar mi 'dzin pa'i phyir ro/ / da ltar gyi rang bzhin 'dzin pa las ni tshu rol mthong ba dang rnal 'byor pa 'dzin pa mtshungs pa kho na'o/ /mthong ba'i khyad par ma brjod par ni rnam par rtog pa skyed pa dang ma skyed pa brjod par mi nus so/ /de ltar yang gal te til mar la sogs pa zad pa'i mar me bzhin du ngo bo ma dmigs na de gnas par 'khrul par mi 'gyur ba zhig na 'dra ba gzhan skyes pas gnas par 'khrul pa yin no zhes bshad pa ni 'dra ba gzhan dang gzhan skye bas zhes bya ba'o//gnas par 'khrul pa de yang de'i ngo bor sgro 'dogs pa las 'gyur ba yin te/ de'i ngo bor sgro 'dogs pa'i rang bzhin yin pa'i phyir ro/ /mdun du gnas pa'i don dmigs par rnam par rtog pa na/ skad cig ma nyid kyis med par gyur kyang de'i ngo bo yang de nyid kyis gcig pa nyid du 'dra ba gzhan skyes pa la yang sgro 'dogs par byed do/ /gnas par 'khrul pa yang de nyid yin te/tha snyad la ltos nas ni rgyu dang 'bras bu'i dngos po nyid do/ /de ltar byas na sgrub pa'i phyogs bsal te/ gzhan sel ba'i phyogs la tshad ma gzhan gyis brtag pa/ ji ltar 'grub pa de bshad pa ni/ 'di la gzhan gyi dngos po zhes bya ba ste/'di ni bshad zin to/ /gal te rnam par gcod par byed pa'i rtogs pa yang sgro 'dogs pa bsal bas nang gi don nyid rtogs par 'gyur ba ma yin nam/ des na sgro 'dogs zlog par byed pa yang sgrub pa'i ngo bo rtogs pa nyid las mi 'da' ste/ nya phyis rtogs pa bzhin no//'di nya phyis la brten nas dngul du rtogs pa skyes pa na/ gang gi tshe yul nye bar phyin pa la sogs pas nya phyis kyi rtogs pa skyes pa de'i tshe/ 'di dngul gyi rtogs pa zlog par byed pa yin yang sgrub pa'i yul can nyid yin gyi/ rnam par gcod pa'i yul can ni ma yin no//'di dngul ma yin no zhes bya bar gyur na ni rnam par gcod pa'i yul can yin no zhe na/ de ma yin no zhes bshad pa ni/ rnam par gcod pa'i zhes smos so/ /phyin ci log dang bcas pa'i shes pa dag ni sgro 'dogs kyi dbang gis ma rtogs pa'i don sgro 'dogs bzlog nas rtogs par byed pa ni ma yin te/des na gang gis rtogs pa 'di dag sgrub pa'i yul can nyid du 'gyur ba sgro 'dogs zlog par byed pa'i rtogs pa dag ni dngos po'i cha ma rtogs pa rtogs par bya ba'i phyir 'jug pa ma yin no//ji ltar ma yin zhe na/ de ni mthong zin pa'i phyir ro zhes smos so/ /sgro 'dogs bsal nas rtogs pas dmigs pa'i rang bzhin de ni sngar nyid rtogs zin te/ chos can grub pa nyid na sgra la sogs pa'i rnam pa gsal ba'i phyir ro/ /gal te 'di yang sgra'i chos dmigs pa nyid kyis 'jug na ni sngar gyi de gsal ba ji lta ba de lta bu kho nar 'di yang 'gyur ro//rtogs pa snga mas rtogs pa las mi rtogs pa nyid rnam pa lhag pa ni med do/ /des na 'di yang mi rtag pa nyid rtogs na sgra la 'jug pa chos can rtogs pa dang snang ba mtshungs par 'gyur ro//rtogs pa de yang sngar skyes zin pa'i phyir 'dis ci zhig bya/ ci ste yang sngar de'i rang gi ngo bor gyur pa'i don dmigs pa de lta na yang gang las 'di mi rtag pa nyid nges pas tshim par 'gyur ba/ da ltar mi rtag pa dmigs pa bkar te rtogs par byed pa yin no zhe na/de ma yin no zhes bshad pa ni/ cha shas med pa la zhes smos so/ /'di skad brjod pa yin te/ gal te mi rtag pa nyid sgra'i rnam pa las logs shig tu yod na ni dmigs kyis bkar te rtogs pa zhig na/ sgra'i mi rtag pa nyid kyi rang bzhin ni sgra nyid yin pa'i phyir sgra'i mi rtag pa nyid rtogs pa na sgra'i rnam pa gsal ba kho nar 'os kyi sgra'i cha shas kyi rang bzhin mi rtag pa nyid rtogs pa na ma rtogs pa'i rang bzhin rtogs pa'i don du yin par ni mi 'byor to//'o na dgag pa smra ba la yang ji ltar rtogs she na/'di ni mdun du brtag par bya'o/ /'on kyang dngos po'i rang bzhin rtogs pa'i don du 'jug na 'dir dngos su ni rtogs zin pa'i chos can la gang yin pa de rtogs pa yin te/ des na 'di yang de kho na bzhin du 'gyur ba don med do/ / rtogs pa'i don med kyang 'jug pa ni nyams pa med de/ sbyor ba'i rtogs pa sel ba nyid kyis 'jug pa'i phyir dngos po'i yul can yang srid par bshad zin pa'i phyir ro/ /rtogs pa dang rnam par gcod pa gnyis don rtogs pa'i byed pa khyad med pa'i phyir ro/ /mi rtag pa la sogs pa'i rtogs pa rnams dngos po tsam rtogs pa ma yin yang sgro 'dogs rnam par gcod par byed pa nyid kyis gzhan sel ba'i yul can nyid du 'gyur ba gang yin pa sgro 'dogs rnam par gcod pa tsam gyis rnam par gcod pa'i yul can nyid du su smra/rtag pa ma yin no zhes bya ba ni rnam par gcod pa rtogs pa yin no/ /shes pa rnam pa gsum phan tshun mi 'dra bar rtogs pa yin te 'di sngon po'o snyam pa ni ngo bo tsam rtogs par rtogs so/ /sngon po med do snyam pa ni de med par rtogs pa dgag pa rtogs pa yin no/ / 'di sngon po ma yin pa ma yin no snyam pa ni dngos po la brten nas dngos po gzhan med par rtogs pa ni de la de'i ngo bo rnam par gcod pa'i phyir rnam par gcod pa'i rtogs pa yin no/ /des na gal te dngos po rtogs par bya ba la rtogs pa'i byed pa rnam pa gnyis yin pa de lta na yang rnam par gcad par bya ba'i yul can dgag pas rnam par bcad pa nyid rnam par gcod pa'i yul la rnam par gcod pa yin par brjod kyi sgro 'dogs sel ba tsam ni ma yin no//des na ji ltar 'di sngon po yin no/ /sgra mi rtag pa yin no zhes bya ba la sogs par shes pa rigs mi mthun pa la brten pa'i dgag pa'i don gyi stong pa dag de'i yul can du 'gyur/des na sgra dang shes pa sel ba'i yul can yin no zhes bya ba 'di ci zhig yin/ de nyid kyi phyir sangs rgyas pa rnams gzhan sel bas mdongs pa yin no zhes rab tu brjod do zhe na/ de la 'dir lan btab ste/'di sngon po ma yin no snyam pa rnam par gcod pa rtogs pa yang sgro 'dogs rnam par gcod pa nyid kyi rnam par gcod pa'i yul la byed pa yin gyi/ rnam par gcad par bya ba med par rtogs pa ni ma yin no/ /'di ltar 'di sngon po ma yin no zhes bya ba'i dgag pa ni dgag par bya bar sngon po ma yin pa nyid dang 'brel pa yin la/'di zhes bya ba ni mdun na snang ba'i sngon po nyid yin no/ /des na 'dir rnam par gcod pa'i rtogs pa 'di zhes bya ba rtogs bzhin pa la gzhom par 'gyur ba gang yin pa la brten pa'i dgag pa zhugs pa na sngon po ma yin par rtogs pa'i sngon po la khyad par ci zhig rtogs par 'gyur/'di zhes bya bar rtogs bzhin pa nyid kyis ni rtogs pa 'di dag brten par 'gyur ba ma yin gyi/ 'on kyang sngon po ma yin pa bkag pa de la brten pa nyid kyis so/ /de bkag pa de la brten pa zhes bya ba 'di yang ci zhig yin/'di ltar dgag pa ni dgag par bya ba sngon po ma yin pa kho na dang 'brel gyi/ 'di'o snyam par rtogs pa'i rten sngon po dang ni ma yin no/ /de dang 'brel pa la rtogs pa'i chos nyid de la rtogs par 'gyur ba ni ma yin te/ ba lang khra bo zhes rtogs pa na khra bo nyid lhas byin la bzhin no//ji ltar ba lang khra bo dang ldan pas lhas byin la de ltar khyad par rtogs pa ma yin pa de bzhin du/ dgag pa'i khyad par sngon po ma yin pa'i chos nyid ni sngon po'i khyad par ma yin te/ sngon po ma yin pa'i chos nyid dgag par bya ba yin pa'i phyir dang / bkag pa nyid kyis de'i chos su mi 'thad pa'i phyir ro/ /de la brten pa'i sngon po ma yin pa bkag pa na de bkag pa'i chos sngon po'i khyad par yin no zhe na/ 'di sngon po ma yin no zhes rtogs pa'i phyir sngon po ma yin pa sngon po la brten pa zhes bya ba yin mod/ dgag pa'i don ni sngon po ma yin pa la brten pa'i phyir/'di sngon po'i ci yin par 'gyur/ khra bo'i yon tan ni lhas byin gyi ci yang ma yin no/ /kye dgag pa'i don gyi chos gzhan dang mi 'dra ba ni 'di yin te/ de rtogs kyang gang du yang chos dang chos can gyi dngos por mi rtogs pa gang yin pa'o//'di ltar gal te sngon po la sngon po ma yin pa med pa zhes bya ba'i chos 'ga' zhig rtogs na/ 'di la rtogs pa'i sngon po ma yin pa gang yin pa de dang 'di lhan cig par yang rtogs par 'gyur ro/ /de mi 'gog pa'i dngos po gzhan dang 'brel kyang des dben par 'gyur ba ma yin no//'on te sngon po ma yin pa ldog pa tsam nyid dngos po med pa yin no zhe na/ de lta na yang dngos po med pa'i rang bzhin ni 'di nyid yin la/ rtogs pa 'di tsam gyis mthar phyin pa yin te/ sngon po ma yin pa ma yin no zhes bya ba gang yin pa ste/gzhan gyi chos nyid du rtogs par 'gyur ba 'di'i rang bzhin gzhan ci zhig yod/ des na ji ltar dngos po 'jig pa na de med pa yin gyi/ de med par 'byung ba ni ma yin pa'i phyir dngos po med pa de bzhin du dngos po med par rtogs pa la 'ang sngon po ma yin pa ma yin no zhes bya ba 'di tsam nyid dngos po med pa dang de rtogs pa yin no//des na sngon po ma yin pa ma yin no zhes de med par rtogs pa na gang gis 'di khyad par du 'gyur ba med pa yod par rtogs pa ni ma yin no/ /sngon po ma yin pa ni yod pa ma yin pa'i phyir dang sngon po ma yin pa med pa yang 'byung bar rtogs pa med pa'i phyir sngon po la cung zad kyang ma rtogs par 'gyur ro//ji ltar rtogs pa'i rang bzhin ngo bo med pa nyid khyad par yin pa'i phyir nyes pa med do zhe na/ ma yin te/ de'i rang bzhin rtogs pa med pa'i phyir ro//sngon po ma yin pa med do zhes rtogs pa na de med do zhes rtogs kyi gzhan 'ga' zhig rtogs pa ni ma yin no/ /gal te sngon po ma yin pa las khyad par du rtogs pa yin gyi/ sngon po ma yin pa tsam ni ma yin pas na/ de nyid khyad par du 'gyur ro zhe na/ sngon po ma yin pa tsam rtogs pa ni ma yin la/ khyad par du rtogs pa yang ma yin gyi 'on kyang sngon po ma yin pa med pa yin pa'i phyir 'dir gang zhig khyad par nyid yin/ 'di sngon po dang 'brel pa ma yin no zhes ni bshad zin to/ /gal te sngon po ma yin pa la phyogs pa'i dgag pa'i don rtogs pa na/de la sngon po ma yin pa med par 'gyur bas sngon po ma yin pa nyid du rtogs pa'i sngon po des dben pa'i sngon por rtogs par 'gyur ba ma yin nam zhe na/ dben pa dang log pa dang stong pa zhes bya ba 'di yang ci zhig dben pa dang log pa dang stong pa nyid kyi khyad par can yin no//des na 'di dag kyang dngos po gzhan gyi rang bzhin nam ldog pa tsam yin yang rung ste/ ji skad bshad pa'i tshul gyis don med pa kho nar rtogs par bya'o/ /'dis ni dben pa la sogs pa'i rtogs pa rnams rnam par gcod pa rtogs pa yin pa yang gsal bar rtogs par bya'o//sngon po ma yin pa la phyogs pa'i dgag pa'i don rtogs pas sngon po sngon po ma yin pas dben par rtogs par nus pa ni ma yin gyi/ 'on kyang sngon po tsam rtogs pa'i phyir dang / sngon po ma yin pa ma rtogs pa'i phyir sngon po ma yin pa la phyogs pa'i dgag pa'i don sngon po la ji ltar 'jug /des na ji skad brjod pa'i skyon mi spobs so/ /de'i phyir 'di sngon po ma yin no zhes rtogs te/ sngon po dang 'brel pa'i sngon po ma yin pa la brten pa'i med pa rtogs pa na sngon po la brten nas rtogs par bya ba'i rnam pa'i khyad par med kyang sngon po la brten pa'i sngon po ma yin par rtogs pa bzlog par 'gyur ba'i phyir de'i don gyis 'di der rnam par gcod pa rtogs par brjod do//des na sngon po ma yin par rtogs pa nyid 'dir sgro 'dogs yin la de zlog par byed pas ni rtogs pa 'di rnam par gcod par byed pa yin no//des na ji ltar 'di dngul ma yin no snyam pas nya phyis la dngul du sgro 'dogs pa bzlog pa de bzhin du nya phyis su rtogs pas kyang yin pas de yang rnam par gcod pa'i yul can nyid do/ /de bzhin du 'di sngon po yin no snyam pa la sogs pa yang rtogs par byed do//de nyid kyi phyir slob dpon phyogs kyi glang pos sgras ni sgra dang don gzhan sel bas rang gi don sgrub par byed pa zhes gsungs pas sgro 'dogs pa'i sgo nas sgra dang don gzhan du thal la/ de bzlog pa nyid kyis ni sgra rang gi don la gzhan sel bar brjod pas slob dpon rnam 'grel mdzad pas dgongs pa brjod do//des na de ltar 'chad pa po gzhan dag gi shes rab kyi rten du ma gyur cing / rnam pa gnyis kyis bshad du zin kyang ma rtogs pa bdag cag gis 'bad du bkral kyang shes med dad pa dang mi ldan pa dag gis ji ltar rtogs par 'gyur/tshul 'di la ma brten par ni gzhung 'di 'am dngos po la bde bar gshegs pa rnams kyi gzhan sel ba la/ mdongs pa yun ring po nas 'khras pa phyir bcos par mi nus so/ /kha cig med par dgag pa'i yul can du smra ba ni byis pa rang gi lag pas me mdag 'dren pa bzhin du yongs su nyon mongs pas gdung bar 'gyur ro zhes gzhan du rgyas par bstan zin to//gzhan yang sngon po'o snyam pa'i shes pa ni sngon po ma yin pa med par dgag pa'i yul can du rtogs pa med do/ /rjes su dpag pa las de'i yul can nyid yin no zhe na/gang zhig gang gi rnam pa tsam yin pa de ni de rtogs kyang ma rtogs na de'i ngo bo dpog pa yin te/ dper na sgra'i rnam pa tsam gyi mi rtag pa nyid sgras rtogs kyang ma rtogs pa byas pa nyid las rtogs pa bzhin no/ /sngon po sngon po ma yin pa med par dgag pa'i ngo bo ma yin no//sngon po ma yin par bkag pa de ni de ldog pa tsam yin na sngon po ni ldog pa ma yin no/ /ji ltar sgra nyid 'jig pa'i phyir mi rtag pa nyid sgra'i rang gi ngo bo yin pa de bzhin du sngon po ni ldog pa tsam ma yin no/ / de'i ngo bo yin na ni mngon sum yang med par dgag pa dmigs par 'gyur ro/ /des na zla ba gnyis kyi shes pa zla ba'i rnam pa 'dzin pa nyid gnod par byas pa yang rnam par rtog pa bzhin du zla ba ma yin pa las ldog pa tsam gyi yul can du 'gyur ro/ /rnam par rtog pa ldog pa'i yul can du rjes su dpog go zhe na/rig pa 'di'i byed pa ni mngon sum la gzhol bar rtogs kyi gzhan ni ma yin no/ /des na sngon po de lta bur gyur pa ma yin par byed pa gzhan gyis ni med par dgag pa la dmigs par nus pa ma yin no/ /ci ste ji ltar phyi rol gyi dngos po la sngon po ma yin pa med pa de bzhin du sgro 'dogs pa la yang med pa des na ngo bo phyi rol dang mi mthun pa'i phyir ldog pa tsam sgro 'dogs par brjod do zhe na/'di la bshad zin to/ /sngon po la sngon po ma yin pa med kyi sngon po ma yin pa'i dngos po med pa ni med pa'i phyir ji ltar ngo bo tsam yin pa de bzhin du sgro 'dogs pa yang yin pa'i phyir 'dir med par dgag pa ga la yod/gzhan yang gal te yang brtag pa gzhan med pa de lta na yang gzhan yang med par rnam par rtog pa des rig pa ma yin te/ /dper na de nyid kyi phyi rol ma yin pa bzhin no/ /sgro 'dogs kyi dngos po don dam par phyi rol nyid ma yin yang phyi rol ma yin pa zhes ma rig pa'i dngos po la phyi rol ma yin pa yang rig pa ma yin no//des na phyi rol la don gzhan bkag pa yod kyang yod pas rig pa ni ma yin te/ mngon sum gyis kyang rig par thal ba'i phyir ro/ /'on kyang de ltar rig pas yul du byas pa las yin no//'di ni phyi rol ma yin pa rig pa bzhin dgag pa'i don yang rig pa med do/ /sngon po rig pa ni sngon po ma yin pa rig pa ma yin no/ /spyi ni spyi'o snyam par rtogs pa med kyang rjes su 'gro ba'i rnam par rig pa yod pa yin pas sngon po rig pa ni sngon po ma yin pa rig pa yin pas der ni sgra tsam ma grub par zad do//de bzhin du sngon po rig pa la ni ldog pa 'ga' yang rtogs pa med do/ /des na gzhan sel ba'i yul nyid rtogs pas gnod par smra ba dag bye brag pa la sogs pas brtags pa dang 'dra ba'i rjes su dpag pa tsam dpung gnyen du gyur pa dag gis ji ltar spangs/rtogs pa nyid ngo ma shes par brjod pa kho bo cag gis ni de bsal ba yin no/ /'di ltar phyir ldang ba med pa'i rnam pa nyid kyis ji ltar legs par bsal bar ni gsal ba kho na yin no/ /de'i phyir zhes bya ba ni ji skad bshad pa'i don sdud pa'o//sgra la sogs pa dngos po mthong ba'i yon tan mtha' dag ste mi rtag pa nyid la sogs pa'i chos ma lus par mthong ba nyid do/ /de dag ngo bo gang yin pa dag ni de nyid rtogs par byed pa'i shes pas rtogs pa yin no/ /sgra dang sngon po la sogs pa dag gi ngo bo de dag kyang sgra dang sngon po la sogs pa nyid kyi ngo bo can yin no//de yang mthong zin pa'i phyir 'dir rig par bya ba gzhan med do/ /des na rig pa'i don du rnam par rtog pa 'jug pa ma yin te/ de tsam nyid rig par bya ba yin pa'i phyir mthong ba kho na bzhin 'jug par thal ba'i phyir ro//mthong du zin kyang tha dad pa gcig mthar thug pa rang bzhin gyis tha dad par 'khrul pa srid pas nges par mi byed de/ des na dngos por na 'khrul pa nyid bsal bar bya ba yin gyi/ ngo bo rtogs par bya ba ni ma yin te/ rtogs zin pa'i phyir ro/ /de lta bas na ma mthong bas gzung bar bya ba'i phyir zhes bya bas ni mngon sum zhugs pa'i rten can gyis 'jug pa'i skabs kyi mjug sdud pa'o//des ni de ltar gcig zhugs pa la 'jug pa gzhan gang yin pa de gzhan sel ba'i yul can nyid du gzhung btsugs pa yin no/ /da ni gang zhugs pa la tshad ma gzhan 'jug par 'gyur ba de yang gzhan sel ba'i yul can nyid do zhes bsgrub pa'i phyir rjes su dpag pa las kyang zhes smos so//'di la du ba las me rtogs pa na me tsam gyi rang bzhin du rtogs kyi/ rtswa las byung ba dang mi rtag pa nyid la sogs pa'i chos su ni ma yin no/ /des na 'di la tshad ma gzhan 'jug pa na snga ma tha dad pa'i don nyid du go bar byed do//gang gi phyir rjes su dpag pa las me'i mtshan nyid kyi chos nges par 'gyur bas rtswa las byung ba la sogs pa'i chos kun nges par 'gyur ro/ /phyogs gang la skyon 'dir 'gyur ba de bshad pa ni dngos po 'dzin na'o//rjes su dpag pas dngos po 'dzin na chos gcig nges pas chos thams cad nges par 'gyur ro/ /'di skad brjod pa yin te gal te du bas me rtogs pa na/ me myong ba yin na de'i tshe me ji lta bar gyur pa de lta bu nyid du myong ba yin la/de yang mi rtag pa la sogs pa'i ngo bo yin pas de dag kyang 'dir myong bar 'gyur ro/ /gang zhig gang gi rang bzhin tsam yin pa de ni de myong ba na myong ba ma yin no zhes bya bar nus pa ma yin te/ dper na rang bzhin de nyid bzhin no/ /mi rtag pa la sogs pa yang me'i rnam pa tsam gyi rang bzhin yin pa des na ji ltar me'i rnam pa myong ba na ma myong bar 'gyur ro//gya gyu dang khong stong la sogs pa ni dbyibs yin la/ de yang rdul phra rab du mar gyur pa yin pa'i phyir chod pa dang ma chod pa'i ngos gnyis bzhin du 'dzin pa dang mi 'dzin par 'gyur gyi/de tsam gyi rang bzhin gang yin pa de la ni rtogs pa 'di med do/ /ji ltar me nyid 'bar ba nyid yin pa de bzhin du/ me nyid kyis ni mi rtag pa'i bdag nyid ma yin gyi 'on kyang me 'jig par 'gyur ba'i phyir mi rtag pa nyid ni 'di'i khyad par yin gyi me tsam gyi rang bzhin ma yin no//des na me nyid du rig gi mi rtag pa nyid du ma yin pas 'gal ba ci yod ce na/ ji ltar 'gal ba med/ 'di ltar rnam grangs la brten pa'i tshul gyis rang bzhin med kyang / me gang yin pa de nyid 'jig par 'gyur ba'i phyir me mi rtag pa nyid dang bral ba ni rig pa'i yul du 'gyur bar mi nus so//de lta na 'o na me gang yin pa de nyid mi rtag pa yin pa'i phyir rjes su dpag pa la yang me rig pa nyid kyis mi rtag pa nyid rig par 'gyur te mngon sum bzhin no zhe na/ de ltar ni mi nus te/ mi rtag pa nyid ni mi rtag pa nyid do zhes rnam par rtog pas rig pa'i phyir ro//rnam par rtog pa ni chos tha dad pa las ni brten pa yin pas de logs shig nyid du rig pa'i rang bzhin yin gyi/ de bzhin du mngon sum la ni chos tha dad par mi gsal ba'i phyir de dag ni don ji lta ba bzhin myong gi rnam par rtog pa ni ma yin no/ /des na rjes su dpag pa la ni dngos po rig pa'i byed pa yod pa ma yin te/ji skad bshad pa'i nyes par 'gyur ba'i phyir ro/ /dngos po sel bar byed pa la ni nyes pa 'di med do zhes bshad pa ni sel ba la zhes bya ba'o/ /'dis ni sgro btags kyi sgo nas byung ba'i me ma yin par sgro btags pa tsam zhig 'dir gsal ba yin gyi/rtswa las byung ba ma yin pa la sogs pa ni ma yin no/ /des na gang la tshad ma gzhan 'jug pa'i go skabs yod pa de la ni tha dad par byed pa las gzhan pa'i byed pa med do/ /gal te rjes su dpag pa bzhin mngon sum yang gzhan sel ba'i yul can du mi 'gyur ram/de la yang chos can 'dzin pas zhugs pas na tshad ma gzhan gyi go skabs yod pa'i phyir ro/ /de ni med de mngon sum dngos po myong ba'i bdag nyid yin yang rnam par rtog pa'i sgo nas tha dad pa la phyogs pa nyid du gyur pa na tshad ma gzhan gyi go skabs yod pa yin pa'i phyir ro//mngon sum ni dngos po snang ba nyid kyis dngos po 'dzin par byed pa nyid du grub po/ /de nyid kyi phyir mngon sum tshad ma gzhan gyis 'jug kyang tha dad pa'i yul can ma yin te/ rjes su dpag pa la rtswa la sogs pa las byung bar myong ba bzhin no//rtswa las byung ba tsam spangs nas don mtha' dag myong ba'i rang bzhin yin pa'i phyir ro/ /'grel pa ni 'ga' zhig ces bya ba ste/ chos can 'ga' zhig mngon sum gyis mthong ba la tshad ma gzhan mi 'jug pa 'ba' zhig tu zad do/ /'dis ni kyang gi don brjod do//dngos po 'dzin na zhes bya ba bshad pa ni gang gi tshe rjes su dpag pas kyang zhes bya ba'o/ /'dis ni chos can la mngon sum gyi bye brag bstan nas/ don sngar ma rtogs par brjod pa yin te/ mngon sum dang 'dra bar nye bar dgod pa mtshungs par bstan pa'i phyir ro//yang na sgro btags yod par sgrub pa'i phyir sa bon btab pa'o/ /chos gcig nges par 'gyur bas zhes bya ba bshad pa ni de'i tshe zhes bya ba'o/ /mdor bstan pa'i don gzhung gzugs pa'i phyir/ gtan tshigs de dang tha mi dad pa'i phyir zhes bya ba'o//de nges na zhes bya ba ni de nyid gzhung 'dzugs pa'o/ /tshad ma gzhan mi 'jug ste zhes bya ba ni skabs su babs pa'i rnam pa dang 'brel to/ /gzhan sel ba la nyes pa 'di med do zhes bya ba ni gang gi tshe zhes bya ba'o/ /dngos po'i ngo bo ma 'dres pa dag kyang rtog pa'i mthus dngos po gzhan dang 'dres pa zlog par byed pa nyid gzhan sel ba'i yul can nyid do//thams cad du rjes su dpag pa gzhan dang 'dre ba sngon du 'gro bas 'jug pa ma yin pa'i phyir ji ltar der 'thad pa'i don can yin zhes bsams nas gzhan dag rtsod par byed pa ni/ ma rtogs pa nges pa zhes bya ba'o//glo bur ba las zhes bya ba ni bab col du 'am/ yang na khyab pa'i rjes su 'brang ba'i rgyu mtshan med par 'brel pa goms pa ni du ba mthong ma thag kho nar rtogs kyi me ma yin du sgro 'dogs pa sngon du 'gro ba can ni ma yin no/ /de spang ba'i phyir 'di la zhes bya ba'o//'di skad brjod de rtogs pa'i yul yang ma rtogs pa ni sgro 'dogs pa yod pas byas pa yin no/ /bsgrub par bya ba'i chos kyang rtogs pa'i yul te/ chos can dang dbye ba med pas chos can bzung ba yin pa'i phyir ro/ /'on te 'bras bu'i gtan tshigs la bsgrub par bya ba gzhan nyid yin pas na tshul 'dis yul du byed pa ma yin no zhe na/de la yang bshad pa ni/ 'on te tha dad na zhes bya ba'o/ /chos can las rtogs pa'i yul tha dad par khas len na bsgrub par bya ba'i chos can dang ma 'brel pa ni chos can de la rtogs pa med par 'gyur ro//'di skad brjod pa yin te/ gal te yang 'bras bu'i gtan tshigs la chos can las bsgrub par bya ba'i chos tha dad pas rtogs na de rtogs pa ma yin pa de lta na yang de gdon mi za bar bsgrub par bya ba'i chos can dang 'brel par 'gyur te/ de lta ma yin na de de'i chos can nyid du mi 'gyur ba'i phyir de de ltar rtogs pa ma yin gyi/'brel ba yang me dang sa phyogs rten dang brten pa gnyis rgyu dang 'bras bu'i dngos po nyid do/ /de ltar yin dang chos can me'i rgyu nyid du bzung ba na ma bzung ba srid pa ma yin no/ /gal te 'dir me'i rgyu nyid du rtogs pa'i yul du gyur kyang ma rtogs pa yin gyi/me ni ma yin no zhe na/ bden mod kyi/ de rtogs na me mi rtogs mi srid pa'i phyir/ de la mi rtogs pa'i sgro 'dogs pa rtogs par byed pa ni me la yang rtogs par byed pa kho na'o/ /de bshad pa ni de'i phyir zhes bya'o//de'i rang gi ngo bo ma nges pa ni phyin ci log pas yin no zhes ngag yongs su rdzogs par bya ba las phyin ci log las zhes de'i rang bzhin ngo bo mi nges pa'i rgyur nye bar bkod pa nye ba dang 'brel pa yin pas de nyid rgyu yin pa la ltos nas rang nyid ga las she na zhes gsal bar byas nas phyin ci log las zhes bshad pa yin no//'dir sgro 'dogs yod par rtogs pa med pa ma yin nam ma rtogs kyang rig par brtag par 'os pa yang ma yin te/ ji skad du gang gis yod kyang mi rtogs par 'gyur ba rtogs pa 'di dag skye ba 'am 'gag pa ni ma rig pa ma yin no zhes bshad pa bzhin no//sgro 'dogs pa yang rtogs pa nyid yin no zhes dogs pa la gtan tshigs gzhan bshad pa ni de yang zhes bya ba'o/ /bsam pa 'di yin te/ dbang po dag las mig gi rnam par shes pa la sogs pa ltar dngos po'i dbang nyid kyis glo bur du du ba las me rtogs pa ni yod pa ma yin te rtags dang rtags can gyi rtogs pa nyid ma yin pa'i phyir ro//des me don du gnyer ba de rtogs par 'dod pa la de rtogs pa yod pa yin no/ /des na 'brel pa goms pa gang yin pa de yang rtags kyi de dang 'brel ba 'dzin pa dang /rjes su 'gro ba dang ldog pa dran pa la ltos par bya ba yin no/ /des na de la sgro 'dogs pa nyid do/ /'di ltar rjes su dpag par 'jug pa ni 'dod pa sngon du 'gro ba can yin pa'i phyir me don du gnyer ba de la rjes su dpag pa 'jug par byed pa na tshad ma gzhan ma zhugs pa tshol te/de lta ma yin na mngon sum nyid kyis rtogs na rjes su dpag pa don med pa'i phyir ro/ /des na chos can 'dzin pa'i mngon sum gyis ma rtogs par nges par byed do/ /gang du dmigs pa'i mtshan nyid du gyur pa'i me ma dmigs pa der ni mes dben par nges par 'gyur ba kho na'o//des na phyogs de blo me dang ldan par 'dzin pa dang bral bas zhes bya ba ni mi dmigs pa nges pa'i rgyu bstan to/ /des na phyogs mes stong par shes pa nyid me ma yin par sgro 'dogs pa'i phyin ci log yin no//de lta na 'o na der me rjes su dpog pa na dam bcas pa'i don mngon sum dang 'gal bar 'gyur ro zhe na/ ma yin te/ gang du mi dmigs pa'i mtshan nyid du mi 'gyur ba der rjes su dpog pa'i phyir ro/ /de ni de la me med par sgro 'dogs pa med do zhe na/ma yin te/ chos can ma grub par thal ba'i phyir chos can gcig tu brjod par 'dod par mngon sum gyi byed pa khyad par med pa'i phyir ro/ /des na de ltar re zhig sgro 'dogs pa yod par bshad pa yin no/ /'di la ni the tshom yang gdon mi za bar yod pa yin no//tshad ma med pa la 'bad rtsol med pas the tshom med pa zhes bya bar 'gyur yang gang zhig rtogs par 'dod pas gang dpyod pa la brtson pa de ni der tshad ma zhugs pa'i sngon rol du the tshom du ji ltar mi 'gyur/ de bshad pa ni/ de'i rnam par sgro 'dogs pa dang zhes bya ba'o/ / de'i rnam par sgro 'dogs par log par rtog pa dang / me yod dam med snyam pa'i the tshom ste de dang bral ba de rtogs par bya ba la rtags kyi rjes su 'brang bar mi byed do/ /the tshom dang phyin ci log bzhin du ma rtogs pas kyang rtags kyi rjes su 'brang ba ma yin nam zhe na ma yin te/de'i don du rtags kyis rtogs pa la gnas pa'i don la the tshom yod par nges pa'i phyir ro/ /yang na phyi ma de rnam par gcod pa'i yul can nyid phyin ci log gi shes pa yod pas byas pa yin no zhes bya ba'i mngon par zhen pas ci zhig bya/ dngul la sogs pa'i yul can du sgro 'dogs kyi shes pa yang rnam par rtog pa yin pa'i phyir rnam par gcod pa'i yul can yin pas de las bzlog pa'i yul can gyi shes pa snga ma yod pa la ltos par thal ba'i phyir ro//des na de yang rnam pa de lta bu nyid yin pa'i phyir de las gzhan la ltos nas thug pa med par thal bar 'gyur ro//des na sgro 'dogs pa med kyang gzhan sel ba'i yul can du 'jog par 'gyur ro/ /gal te yang tshul gsum tshol ba nyid rtags kyi rjes su 'brang ba yin pa de lta na yang de'i rjes su 'gro ba dang zhes ston pa'i phyir rtags kyi rjes su 'brang ba ni phyogs kyi chos nyid yin par rtogs so//ma rtogs pa nges par zhes bya ba la sogs pa mdor ma gyur pa'i don de'i phyir zhes bya ba la sogs pa'i bsdu ba'i tshigs su bcad pas ston to/ /de ltar zhes bya ba ni rnam pa 'di zhes gtan tshigs sdud pa'o/ /rtags sel ba'i yul can yin par rab tu bsgrags zhes bya bas ni/de yang phyogs de zhes bya ba la sogs pa skabs kyi don gyi dbang du byas pa'o/ /'di la zhes bya ba la sogs pa sdud pa ni gzhan du chos can zhes bya ba'o/ /de ltar na rjes su dpag pa ni sgro 'dogs med pa la mi srid do zhes brjod pa yin no/ / da ni sgro 'dogs med kyang sel ba'i yul can du bsgrub pa'i phyir bshad pa/ 'ga' zhig la shes pa gang zhig rnam par rtog pa'o/ /gang 'ga' zhig la zhe na/ gzhan gyi cha sgro ma btags pa'o/ /gang du phyin ci log gi char sgro ma btags pa la'o/ /des na 'di skad bshad pa yin te/dngos po gzhan sgro ma btags pa dngos po gzhan dang tha mi dad par ma byas pa'i yul can rnam par rtog pa'i shes pa gang yin pa de ni de tsam sel ba'i spyod yul can yin no/ /don de las gzhan gang yin pa de gal te yang sgro 'dogs kyi shes pas byas na don de dang tha mi dad par gyur pa ma yin par gyur pa de lta na yang shes pa de ni de sel ba'i yul can nyid do//gang gi sgra ni 'di nyid du 'brel to/ /ci 'di rnam pa de lta ba'i rjes su dpag pa nyid 'ga' zhig yin nam zhe na/ ma yin no zhes bshad pa ni/ spyi'i don can zhes bya ba ste/ spyi'i yul can no/ /rjes su dpag pa yang spyi'i yul can yin pas/mthong ba zhes khyad par du byed do/ /mthong ba'i yul gyi spyi gang yin pa de'i yul can no zhes bya ba'o/ /sngon po la sogs pa mngon sum gyis mthong ba la gang gi tshe sngon po la sogs par rtogs pa'i shes pa skye ba de'i tshe/ de rnam par rtog pas yul du byas pa na sngon po la sogs pa spyir 'gyur ba yin no//des na 'dir rnam par rtog pa med pas yul du byas pa'i rnam pa nyid kyis sgro 'dogs mi srid kyang 'di sngon po'o snyam pa'i shes pa 'jug pa gang yin pa de ni spyi'i yul can ma yin no/ /de dang tha mi dad par ma gyur pas de la sel ba'i 'bras bu can yin no zhes brjod pa yin no//'di de dang tha mi dad par gyur pa ma yin pa de lta na yang / 'di de sel ba'i 'bras bu can las nyams pa ma yin no/ /gal te de yod kyang zlog pa med pa kho nar 'gyur na ni de'i tshe 'di de'i 'bras bu can du mi 'gyur ro/ / gzhan nyid kyis bzlog zin pas med pa na ni 'di de zlog par byed pa ma yin par mi 'gyur te/ grang ba med kyang me la grang ba zlog pa'i nus pa med pa ma yin pa'i phyir ro/ /rtogs par byed pa'i phyogs la rtogs zin pa'i don la rtogs par byed pa'i 'bras bu can nyid mi ldog pa bzhin du mngon sum dang rjes su dpag pa dag gi 'og rol du 'jug pa'i rnam par rtog pa 'jug pa yang sgro 'dogs de bsal ba la 'jug pa yin no//sgro 'dogs kyi shes pa dang yid kyi rgyal srid la sogs pa'i rtogs pa sgro 'dogs zhugs pa la 'jug pa yang de bzhin du der nus pa dang ldan pa yin no//'di dag ji srid 'byung gi bar du de dang rgyu mthun pa de las bzlog pa'i shes pa mi 'jug go/ /de bzhin du dngul du shes pa yod pa'i skabs na nya phyis kyi shes pa mi 'jug go/ /'di yang tshig gsum gyis bzlog par bya ba rjes su brjod pa dang / de tsam sel ba'i spyod yul can zhes ngag gcig tu lan brjod do//'grel par ni gzugs la sogs pa'i zhes bya ba bzlog par bya ba nyid du bstan pa'i phyir de nyid 'dri bar bkod de brjod do/ /gzugs la sogs pa mthong ba'i mjug thogs su zhes bya bas ni mthong ba zhes bya ba bshad do/ / rtags can ma yin pa'i nges pa'i shes pa zhes bya bas ni spyi'i don can zhes bya ba'o/ /des na rnam par gcad par bya ba med pa'i phyir ji ltar rnam par gcod pa'i yul can yin zhes brjod pa ni de zhes bya ba yin no/ /de la lan ni sgro ma btags pa'i zhes bya ba'o/ /sgro btags med pa'i yul la yod pa'i phyir ro//rnam par gcod pa'i yul can nyid du ni rtogs pa kho na bas 'brel par bya ba ma yin no/ /rnam par gcod pa'i yul can nyid du gnas pa na gang zhig sgro gdags par 'os pa las sgro ma btags pa de nyid rnam par gcad par bya ba yin no/ /des na de tsam sel ba'i spyod yul can zhes bya ba ma bshad pa kho nar rnam par gcod pa'i yul can gyi gtan tshigs nyid bshad do//'di skad brjod pa yin te/ gal te sgro 'dogs yod bzhin du 'gyur na ni rnam par gcod pa'i yul can du mi 'gyur ba yin na/ med pa nyid la 'gyur ba ma yin pa'i phyir na/de bzlog pa'i 'bras bu can du shin tu gsal bar rtogs so/ /de med pa la nges par 'jug pa ni de dang 'gal bar rtogs pa'i phyir de zlog par nges par byed pa'i phyir ro/ /ji ltar na 'di sgro ma btags pa'i yul la yod par rtogs she na/ gang la zhes smos so//dngos po'i chos gang la sgro 'dogs pa yod pa de la nges pa med par 'gyur ro/ /ji ltar mi 'gyur zhe na/ nges pa dang ni zhes bya ba la sogs pa smos so/ /gang gi phyir/ nges pa dang ni sgro 'dogs yid/ /gnod bya gnod byed ngo bo'i phyir/ /sgro 'dogs kyis nges pa skye ba'i gags byed la/stobs dang ldan pa'i rgyu las byung ba'i nges pas ni sgro 'dogs zlog par byed pa des na/ 'di nyid gnod bya gnod byed kyi ngo bo yin no/ /gal te skad cig ma nyid kyis rnam par shes pa ldog par grub pa ni/ gang las sgro 'dogs dang nges pa'i shes pa dag gnon bya gnon byed kyi ngo bor gyur pa gzhan gyis bzlog par byar ci yod ce na/bshad pa rang gi yul la bden par lhag par zhen pas na skad cig ma nyid yin yang rnam par rtog pa'i shes pa thams cad rgyun gnas par 'gyur ba yin no/ /sems g.yengs pas 'gags su zin kyang de bzhin du bden par nges pas 'bad rtsol yod na de kho na bzhin du 'jug pa'i phyir ro//nya phyis la dngul lo snyam du rtogs pa na gnod par byed pa skyes pa'i sngon rol du don gzhan la chags pas bar du rnam par mi rtogs kyang yang mngon du phyogs pa na de kho na ltar rtogs pa'i phyir ro//des na rnam par shes pa gang zhig de'i yul rtogs nas mi bden par rtogs par nus pa de kho na de zlog par byed pa yin no/ /des na 'di ni nya phyis yin gyi dngul ni ma yin no zhes dngul mi bden pa nyid du rtogs pa na dngul du rtogs pa ldog pa yin gyi/nya phyis rtogs pa tsam gyis ni ma yin te/ don gzhan la rtogs pa na der phyogs pa med kyang phyis skye ba'i phyir ro/ /'di ni nya phyis yin gyi dngul ni ma yin par rtogs na ni de ltar 'gyur mi srid do/ /de'i yul nyid du nya phyis rtogs pa'i phyir rtogs pa de ldog pa yin no zhe na/ma skyes pas ni ldog pa ma yin no/ /'di ni bshad zin te/ ma byung ba yang bden pa nyid du mngon par zhen pa yin na slar skye ba'i phyir ro/ /yang na 'dir dngul yod par gyur to zhes yod pa nyid du thal bar 'gyur ba'i phyir ro/ /des na gang zhig gang gi yul dpyod par nus pa nyid de zlog par byed pa yin no//de nyid kyi phyir rnam par rtog pa nyid sgro 'dogs zlog par byed pa yin gyi/ rnam par rtog pa med pa ni ma yin no/ /der ni de'i rgyu mtshan yod pa dang med pa dag las 'bras bur gyur pa'i shes pa yod pa dang med pa tsam du zad do/ / sgro 'dogs kyi shes pa yang ji srid rang gi yul la bden par mngon par 'du byed pa de srid zlog pa'i shes pa skyed pa'i gegs byed do/ /'grel pa ni dngos po thams cad las zhes bya ba yin no/ /nya phyis la sgro 'dogs pa yod pa'i phyir nya phyis nyid du nges pa yod pa ma yin la/sgro 'dogs pa med na ni nges par 'gyur ro zhes bshad pa ni gang la rtogs pa po'i zhes bya'o/ /des ni de ltar sngar bstan kyi gnas skabs na sgro 'dogs yod na rnam par rtog pa zlog par byed pa ni ma yin gyi/ 'on kyang gnod par bya ba dang gnod par byed pa'i dngos po las yin no zhes gzhung btsugs te/rnam par gcod pa'i yul can nyid bshad pa ni sgro 'dogs dben pa la zhes bya ba'o/ /'di ni zhes brjod pa gang yin pa de'i yul bshad pa ni/ /nges pa zhes bya ba yin no/ /ji skad bsgrub pa'i don gyi gtan tshigs ni/ / nges pa dang ni sgro 'dogs yid/ /ces bya ba yin no/ /'grel pa ni des zhes bya ba'o/ /sngar ji skad bshad pa bzhin te/ 'di ba lang ma yin pa ma yin no snyam pa la sogs pa'i shes pa dag ni sre ba'i rtogs pa dang bral ba nyid kyis gzhan sel ba yin no/ /gtan tshigs bsgrubs nas de tsam sel ba'i spyod yul can zhes gang bshad pa de mjug sdud pa ni de lta bas na de yang zhes bya'o//gzhan sel ba'i don can nyid du mi 'gyur ba gang yin pa 'di sgrub pa'i tshul gyis ni go bar byed pa srid pa ma yin no zhes bshad pa ni dngos po'i zhes bya ba nas mi rung ba'i phyir ro zhes bya ba'i bar du'o//de ltar na sgro 'dogs med kyang gzhan sel ba'i yul can du grub pa yin no/ /sgro 'dogs zlog par byed pa nyid na 'dis ji lta bu'i rang bzhin de dang rigs mi mthun pa'i sgro 'dogs pa de bzlog pa'i don nyid kyis de'i gnyen po tsam gyis dngos po bdag nyid la brten nas de zlog par byed pa yin pa'i phyir don tha mi dad pa yang bzlog par bya ba sgro 'dogs pa'i grangs snyed du zlog par byed pa'i rnam par rtog pa tha dad par snang ba yin no zhes bstan pa'i don du bshad pa ni/cha shas sgro 'dogs ji snyed pa//zhes bya ba la sogs pa'o/ /ngo bo rtogs pa yin na ni ngo bo gcig yin pa'i phyir thams cad don gcig la brten pa nyid do zhes ston pa ni gzhan du zhes bya ba'o/ /'di ni gal te 'khrul pa'i rgyu mtshan gyis zhes bya ba 'di nyid kyi 'grel par mdor med kyang gzhan gyi dngos po ji snyed pa zhes bya ba la sogs pa bshad pa la 'dir ni tshigs su bcad par bya ste brjod do//tshigs su bcad par bshad pa de bzhin du 'grel par ni 'grel pa nyid du 'gyur la/ mdor med pa 'grel par bshad pa de ma thag tu mdor brjod pa yang bsdu ba nyid du 'gyur te/dper na ma rtogs pa nges pa ni zhes bya ba la sogs pa brgal te/ nye bar bkod pa'i dngos po de phyir de ltar rtags sel ba'i tshigs su bcad pa bzhin no/ /chod pa la de'i don can gyi mdor byas pa ni bsdu ba ma yin la bshad pa yang ma yin te/'jug pa zhugs zin pa'i phyir bar skabs kyi tshigs su bcad pa zhes bya ba'o/ /bar skabs kyi tshigs su bcad pa dag go zhes bya ba ni mdo gzhan gyi nang du brjod pa bshad pa med pa'i tshigs su bshad pa'o/ /'grel pa bshad zin na mdor brjod pas ci bya zhe na/mdo'i bstan bcos ma tshang ba med par bya ba'i phyir te/ gzhan du brjod par bya ba'i don yang mdor mi snyed par 'gyur ro/ /des na de ltar rang gi phyogs la rigs pas don gyi rang bzhin ji lta bur gyur pa de la brten te/ don gyi rang gi ngo bo gcig ces bya ba la sogs pas sgrub pas rtogs par byed pa nyid bsal nas rnam par gcod pa'i yul can du gzhung btsugs pa yin no//da ni gzhan gyi khas blangs par rab tu grub pa'i don la brten nas kyang sgrub pa'i ngo bos rtogs par byed pa mi srid do zhes bstan pa'i phyir/ rtsom pa ni gang gi ltar na blo zhes bya ba la sogs pa'o//rgol ba gang gi ltar na ba lang nyid dang mi rtag pa nyid la sogs pa'i khyad par sna tshogs su gyur pa gang la yod pa de lta bu'i don blos 'dzin pa'o/ /khyad par de dag las kyang don de tha dad pa nyid do zhes brjod na ni tha dad pa zhes bya ba'o/ / yang na khyad par sna tshogs pa gyur pa nyid khyad par sna tshogs can te don de nyid 'dzin pa'o/ /'di yang sna tshogs pa nyid kyis tha dad pa yin no zhes brjod pa ni tha mi dad ces bya ba'o/ /sna tshogs pa nyid kyis rtogs pa tha dad pa na tha dad pa med pa'i phyogs la 'gyur ba'i skyon med do zhes bstan pa'i don du tha dad pa nyid brjod pa yin no//de'i don ni 'di yin te/ gal te yang sgra dang rtags dag gis bsgrub pas dngos po nyid rtogs pa de lta na yang sgra dang tshad ma gzhan mi 'jug pa'i nyes pa ni med do/ /mngon sum gyis rtogs zin pa'i phyir tshad ma gzhan gyis kyang 'di de kho na ltar rtogs pa yin na des ci bya/de lta ma yin na yang ma rtogs pa nyid du 'gyur ro zhes bya ba gang yin pa don bdag nyid gcig tu gyur pa nyid ni ma yin gyi/ 'on kyang rang bzhin gyis gcig yin yang du ma dang ldan pa yin no/ /des na sgra'o zhes khyad par 'ga' zhig gis rnam par bcad de rtogs kyang mi rtag pa'o zhes khyad par gzhan gyis rnam par bcad de rtogs pa med pa'i phyir rjes su dpag pas rtogs par bya ba yin no//sgras kyang de dang 'dra'o/ /yang na bshad pa gnyis pa ltar sgra gzhan la sogs pa ni khyad par 'ba' zhig la gzhol ba yin pas skyon 'ga' yang med do//'grel pa ni/ gang zhig ces bya ste/ gang gi ltar zhes bya ba bshad pa'o/ /khyad par rnams phan tshun tha dad pa kho na yin la zhes bya bas ni khyad par ni sna tshogs can zhes bya ba bshad do/ /rten las zhes bya ba tha dad pa'i ldog mtshams nyid kyis tha dad ces bya ba bshad pa yin te/rten nyid kyi khyad par sna tshogs can don gzhan nyid do/ /de'i rgyu can gyi ma nyan pa dag ni de dag gi rten la 'jug pa zhes bya bas ni khyad par gyis te/ khyad par dag dang blos 'dzin par byed pa yin no/ /de dag kho na la 'jug go zhes bya bas ni don gzhan ston par byed pa'o//de bas na don gyi rang gi ngo bo gcig ces bya ba la sogs pas brjod pa'i thal ba 'dir mi 'gyur ro snyam du sems pa gang yin pa de'i ltar na yang khyad par sna tshogs la phan pa'o/ /yan lag tu gyur pa'i nus pa las mi gzhan pa'i bdag nyid thams cad bzung na phan par bya ba'i khyad par gang zhig ma nges pa zhes bya bar 'gyur/khyad par tha dad pa dag kho na zhes bya ba la sogs pa ni 'grel pa'o/ /gang gi phyir tha dad pa de'i phyir sgra dang shes pa gcig gis yul du byas pa'i don de la sgra gzhan dang shes pa gzhan 'jug pa yin no//des na 'di dag don la sgra dang shes pa gzhan dag gi rgyu mtshan yin no/ /de lta na yang khyad par de dang ldan pa gcig pu nyid de ni sgra dang shes pa de dag gis nye bar len to/ /de bdag nyid thams cad bzung na khyad par thams cad nges par 'gyur ro//'di skad brjod pa yin te/ gal te yang khyad par rnams tha dad pa'i phyir tha dad pa kho nas sgra dang shes pa gzhan dag gi rgyu mtshan nyid yin gyi/ gcig nyid kyis thams cad rtogs pa ma yin pa de lta na yang khyad par dang ldan pa ni rang gi ngo bos gcig kho na'o//gcig yin pa'i phyir na thams cad bzung bas bdag nyid thams cad 'dzin pa na khyad par gyi byed pa la mi ltos pa kho nar khyad par thams cad 'dzin par byed pa'o/ /gcig por rang gi ngo bo tsam gyis bdag nyid thams cad bzung na yang khyad par thams cad bzung bar ji ltar 'gyur zhe na/khyad par sna tshogs la zhes smos te/ khyad par sna tshogs phan pa'i rten nus pa'i mtshan nyid kyi ngo bo nyid gang yin pa de ni khyad par dang ldan pa'i rang gi bdag nyid la tha dad pa med pa'i phyir ro/ /khyad par dang ldan pa'i khyad par sna tshogs la phan 'dogs pa zhes bya ba gang yin pa de ni de las tha mi dad pa yin no//des na 'di'i de lta bu'i bdag nyid char bzung ba med pas khyad par sna tshogs la phan 'dogs pa nyid du bzung na/ ji ltar khyad par ma bzung bar 'gyur te/ dbyug pa ma bzung bar dbyug pa can mi 'dzin pa bzhin no//'dir phan par bya ba dang phan par byed pa ni gal che ba ma yin gyi/ 'on kyang de dag de'i khyad par yin pa'i phyir kho bo cag la grags pa'i dbang du byas nas phan gdags bya 'dogs byed kyi rtsa ba can yin no/ /gzhan dag gi ltar ni 'brel pa'i rtsa ba can nyid do//de'i phyir 'brel pa can yang khyad par dang ldan pa'i rang gi ngo bo las tha mi dad pa kho na'o/ /'di 'dod par mi bya ba yang ma yin te/ 'brel pa khas len na 'brel pa can gdon mi za bar khas blang bar bya ba'i phyir te 'brel pa can med par 'brel pa mi 'grub pa'i phyir ro//des na don la khyad par thams cad dang 'brel pa can du bzung na ji ltar khyad par thams cad ma bzung bar 'gyur/ de bshad pa ni khyad par thams cad la phan 'dogs par byed pa nyid du zhes bya'o/ /'brel pa can tha dad na ma rtogs par 'gyur gyi tha mi dad na ni ma yin no zhes bshad pa ni rang gi ngo bor zhes bya ba'o//gzhan ma yin pa nyid kyis na phan par byed pa nyid du bzung ba'i rang bzhin yin no/ /'on te yang sgra dang tshad ma thams cad zhugs na khyad par thams cad rtogs par 'gyur mod ce na/ de dag ces smos so//khyad par sna tshogs pa dang de la phan 'dogs pa'i nus pa'i bdag nyid gnyis kyi nang nas gcig shes na ni gnyis ka bzung / re zhig gcig ni shes pa kho na'o/ /de shes na cig shes kyang shes pa'i phyir gnyi ga 'dzin par 'gyur ro/ /de ci'i phyir zhe na/ bdag nyid la 'brel pa'i phyir de dag gi 'brel pa ni 'du ba'i mtshan nyid yin la/de yang de'i bdag nyid la yod pa yin gyi bdag nyid gzhan la ni ma yin no/ /des na de dag nyid 'brel pa can yin pa'i phyir 'brel pa can ni 'di gnyis las tha mi dad pa kho na'o/ /bdag nyid gzhan la 'brel pa yod pa ni de nyid 'brel pa can du 'gyur gyi de gnyis ni ma yin no//de'i don ni 'di yin te/ ji ltar khyed cag khyad par gyi sgo nas khyad par can rtogs par 'dod pa de bzhin du bdag cag gis khyad par dang ldan par khyad par dang 'brel pa'i bdag nyid las khyad par rnams la rtogs par 'gyur ba yang bsgrub pa yin no//'brel pa can gyi bdag nyid yin pa'i phyir khyad par dang ldan pa phyogs gcig gis rtogs par mi srid pa ni khyad par dang ldan par rtogs par byed pa yin no/ /de bzhin du khyad par dag 'ba' zhig shes pa na yang khyad par can dang 'brel pa'i bdag nyid yin pa'i phyir cha med par rtogs pa las khyad par dang ldan pa'i rtogs pa 'phen pa yin no//des na khyad par gcig gi sgo nas de'i don shes pa na yang khyad par thams cad rtogs par thal lo/ /pha rol pos khyad par sna tshogs can gyi don blos 'dzin par brjod pa de'i ltar na zhes bya ba la sogs pas khyad par bzung ba na khyad par mtha' dag gzung bar thal bar brjod do//des na khyad par bzung bas stong pa'i khyad par dang ldan pa 'dzin pa med pa'i phyir ji ltar de bzung na thams cad bzung bar 'gyur ro/ /khyad par thams cad bzung ba las de bzung ba na ni mi 'dod pa cung zad kyang med do zhes dogs pa bsu nas/de dag bdag nyid la 'brel phyir/ /zhes bya ba la sogs pa bshad do/ /bdag nyid la 'brel par rnam par gnas pa nyid kyis gnyi ga yang 'brel pa can yin pa'i phyir de ltar na bzung na cig shos kyi yul can gyi rtogs pa 'phen no//des na thabs gang yang rung ba zhig gis khyad par dang ldan par gyur pa rtogs pa khyad par 'dzin par byed do zhes bya ba yin te/ khyad par thams cad bzung bas de bzung na ni rtsod pa med do//des na khyad par gcig gi sgo nas kyang de las rtogs pas reg pa na ma rtogs pa'i khyad par mtha' dag rtogs par thal bar 'gyur ro zhes bstan pa'i don du'o/ /des na zlos par dogs par mi bya'o/ /phan 'dogs par byed pa tha mi dad par bzung mod/ tha dad pa'i khyad par ni ma yin no zhes kyang dogs par byas nas slar yang 'brel pa tha dad pa med pa tsam ston pa ni 'thad pa ma yin te/sngar nyid brjod zin pa'i phyir ro/ /'di las lhag pa ni cung zad kyang mi brjod do/ /des na don 'di sngar nyid grub pa'am yang na da lta yang ma yin no/ /khyad par dang zhes bya ba la sogs pa ni 'grel pa'o//gang gi don du 'di bkod pa bshad pa ni de khyad par gcig gis zhes bya ba'o/ /khyad par la phan 'dogs pa nyid du khyad par dang ldan pa rtogs pa na/ mdo gnyi gar yang snying por byas pa'i khyad par dang khyad par can gyi tshul gang yin pa de gsal bar byed pa ni/khyad par dang ldan par 'dzin pa ni de 'dzin pa med na med pa'i phyir ro zhes bya ba'o/ /khyad par thams cad 'dzin pa med na med pa gang yin pa ste/ khyad par dang ldan par 'dzin pa ni de lta bu yin no/ /thams cad la phan 'dogs par byed pa nyid du bzung ba na/thams cad bzung ba kho na'o/ /du ba'i rgyu nyid du rnam par rtog pas me bzung ba na/ du ba mi 'dzin pa ni ma yin no/ /'dzin pa med na med pa yin pa na phan gdags par bya ba ma bzung bar khyad par dang ldan pa phan 'dogs par byed pa nyid du 'dzin par mi 'gyur ro zhes bshad pa ni gzhan du na zhes bya ba'o//de ltar yang zhes bya ba ni khyad par dang ldan pa nyid du yang ngo / /mi 'dzin par yang 'thad pa ma yin no zhes bya ba bshad pa ni gzhan la phan par byed pa nyid ces bya ba'o/ /gzhan yin na ni 'dir 'gyur gyi gzhan ma yin na ni ma yin no zhes bya ba'i tha tshig go//nges par phan 'dogs par byed pa bzung ba na de la phan 'dogs par byed pa nyid du bzung bas na phan gdags par bya ba mi 'dzin pa ma yin no/ /de bshad pa ni phan par byed pa de ltar zhes bya ba'o/ /phan gdags par bya ba ma bzung na phan 'dogs par byed pa de yang ma bzung bar thal bar 'gyur ba'i phyir te dper na rje khol bzhin no//khol po khol po nyid du 'dzin pa na rje bo mi 'dzin pa ma yin no/ /'dir khyad par dang khyad par can gyi dngos po med mod kyi/ de lta na yang rje bor 'dzin pa ni/ khol po 'dzin pa la ltos pa ni ma yin la/khol po'i shes pa la rje bo mi snang yang / khol por 'dzin pa yang rje bo 'dzin pa la ltos pa yin pas dpe nyid do/ /snga ma las phyi ma bzhin du de las de rtogs par nus pa nyid yin gyi khyad par dang khyad par can bzhin du tha dad par rtogs pa ni ma yin no/ /phan par bya ba dang phan par byed pa dag 'dzin pa ni ni khyad par dang khyad par can gyi ngo bo yod pa yin te/rgyu dang 'bras bu bzhin no/ /gal te khyad par gyi sgo nas khyad par dang ldan pa rtogs pa na/ 'di ba lang ngo zhe 'am mi rtag pa'o zhes pa ltar des nye bar bsgyur ba de dang tha mi dad par rtogs la khyad par gzhan gyi sgo nas rtogs na ni gang gi sgo nas der rtogs pa ma yin pa'i khyad par de 'brel par rtogs par 'gyur te/sgra'i mi rtag pa nyid do zhes so/ /des na 'dir sgra mi rtag pa nyid dang 'brel to zhes rtogs par 'gyur gyi/ de'i tshe mi rtag pa nyid khyad par ram 'brel pa can nyid ni ma yin no//de de la thim pa nyid du rtogs na de khyad par du 'gyur ba yin gyi 'brel par rtogs pas ni ma yin no/ /'di ni de'i rang bzhin gyi rtogs pa'i thabs su brjod de/ khyod kyis bshad pa'i tshul gyis ni 'di ltar thal ba ma yin no/ /des na khyad par sna tshogs la phan pa'i zhes bya ba la sogs pa ci ste brjod ce na/brjod pa der thim pa'am de'i rang bzhin du snang ba sgra tsam snying por gyur pa mdun du sel bar 'gyur ba zhog ste 'di bsam mo/ /sgra zhes khyad par gcig gi sgo nas rtogs pa po mi rtag pa zhes khyad par gzhan gyi sgo nas rtogs pa na/ci khyad par nyid lhag par rtogs pa yin nam/ 'on te khyad par dang ldan pa'i khyad par 'ga' zhig rtogs/ de la 'dir rang gi bdag nyid tha dad pa med pa'i phyir sgra'i sgo kho na nas bdag nyid thams cad rtogs pas mi rtag pa nyid kyi sgo nas de la tha mi dad pa'i khyad par gang zhig rtogs par 'gyur/'di'i khyad par nyid char 'gyur ba yin no/ /des na sgra zhes bya bas 'di'i rang bzhin thams cad rtogs la khyad par ni gcig yin no/ /des na mi rtag pa zhes rtogs pa na khyad par lhag pa rtogs par 'gyur ro/ /de ni sgra mi rtag pa dang 'brel pa zhes bya bar yang rtogs pa kho na'o//de ltar ni khyad par ma yin te tha mi dad par rtogs pa med pa'i phyir ro zhe na/ 'di sus lan gal te nye bar sgyur bar byed pa ltar rnam par gnas pa'i khyad par ni nye bar sbyor bas tha mi dad par rtogs par bzod pa yin na gdon mi za bar rtogs par bya ba gang yin pa de 'brel par rtogs pa na/ji ltar gzhan du rtogs par 'gyur te/ rang gi ngo bo ji lta ba kho nar rtogs par 'gyur ro/ /zla ba la sogs pa dag ni rtogs pa po yul tha dad pa can grangs med pa mang po dag gi rtogs pas rtogs pa na rang bzhin gzhan du 'dzin pa ma yin no//des na gdon mi za bar rtogs par bya ba'i khyad par rang gi ngo bo ji lta ba bzhin rtogs par 'gyur mod/ gzhan gyi sgo nas rtogs pa'i phyir gzhan gyis de ltar rtogs par mi 'thad do zhe na/ 'di yang ji ltar 'thad/ gal te sgra zhes bya bas don de ltar rtogs na ji ltar khyad par thams cad kyis de ltar rtogs par mi 'gyur/des na rnam pa thams cad du mi 'thad pa'i phyir smra ba gzhan dag kyang mi 'thad pas ji ltar gzhan la khro/ de'i phyir zhes bya ba la sogs pa ni mjug sdud pa'o/ /don gyi rang gi ngo bo gcig ces bya ba la sogs pa khyad par don gzhan ma yin pa la brjod pa'i thal ba gang yin pa de ni mtshungs pa kho na'o//gang dag chos dang chos can dag phan tshun 'brel pa med par tha dad pa dang tha mi dad pa nyid du khas len pa de'i ltar na yang chos thams cad chos can las gzhan ma yin pa'i phyir chos gcig gi sgo nas rtogs pa na chos mtha' dag rtogs par 'gyur te/de dag de las tha mi dad pa'i phyir ro/ /chos kyi rang gi ngo bos tha dad pa'i phyir ma yin no zhe na/ ma yin te/ ji ltar tha mi dad pa de'i bdag nyid la de dag de'i rang bzhin du yod pa'i phyir ro/ /de lta ma yin na gzhan tha mi dad pa la gzhan tha dad pa yin pa'i phyir chos dang chos can tha dad pa dang tha dad pa ma yin par smra bar mi 'gyur ro//des na tha mi dad pa'i rang bzhin rtogs pa na de ma rtogs par ji ltar 'gyur/ des na de ltar thams cad 'brel pa can gyi bdag nyid khyad par dang ldan pa bzung ba na/khyad par thams cad 'dzin pa nyid du bsgrubs nas pha rol po dag khyad par bzhin du khyad par dang 'brel pa can nyid kyang tha dad pa'i phyir ji skad brjod pa'i tha dad par 'gyur ba med par dogs pa byed pa ni/ 'on te zhes bya ba'o/ /lan 'debs pa'i phyir bshad pa na/chos phan zhes bya ba la sogs pa'o/ /chos rnams la phan pa de nyid nus pa yin te/ chos la phan 'dogs pa'i nus pa nyid phan pa yin te/ bya ba gzhan ni med do/ /de nyid kyi phyir gal te khyad par re re la phan par byed pa nyid dag yin na zhes 'chad par 'gyur ro//de rnams tha dad na 'o na 'di dag gang las tha dad de ni skabs kyi khyad par sna tshogs la phan pa'i zhes bya ba la sogs pas nus pa dang tha mi dad pa nyid du bstan pa nyid yin no/ /nus pa de dag de'i ci yin te/ de'i zhes bya ba ni 'brel pa las 'gyur ba yin no/ / gal te khyad par dang ldan pa de las de dag la phan mod/ de khyad par dang ldan pa 'brel pa can nyid ma yin na de'i tshe dngos po tha dad pa dag de'i nus pa zhes bya bar mi 'thad do/ /gal te de lta yin mod/ de las cir 'gyur zhe na bshad pa/ de lta yin na thug med 'gyur/ / 'di skad brjod pa yin te/ gal te yang khyad par dang 'brel pa can khyad par dang ldan pa las tha dad pa de ltar na yang de dag khyad par dang ldan pa dang ma 'brel pa kho na ni ma yin te/ de lta ma yin na 'brel pa can des khyad par can dang 'brel par mi 'gyur ro/ / nus pa'i phyogs la nus pa'o/ /des na 'brel pa can dang 'brel pa can nyid dam/ nus pa la phan 'dogs pa nyid ni nus pa dang ldan pa las tha dad pa ma yin no/ /des na tha dad pa med na cha med par bzung ba'i phyir khyad par thams cad 'dzin par 'gyur ba spang ba'i don du tha dad par khas len pa la thug pa med par 'gyur ro//ji skad bshad pa'i tshul yang tha mi dad par thal bar 'gyur ba'i phyir der tha dad par rtogs pas na thug pa med do/ /gal te zhes bya ba la sogs pas ni chos phan nus pa rnams zhes bya ba 'chad do/ /nus pa rnams rang gi bdag nyid du gyur na 'brel pa mi dgos pa zhig na/khyad par thams cad rtogs par 'gyur gyi 'jigs pas de ni khas ma blangs so zhes bshad pa ni/ de'i rang gi bdag nyid du gyur pa dag ma yin pa kho na ste zhes bya ba'o/ /de ma yin na yang 'brel pa grub par bya ba'i phyir phan gdags par bya ba yin te/de med na ni 'brel pa med par thal bar 'gyur ba'i phyir ro/ /de bshad pa ni/ de las phan pa zhes bya ba'o/ /de lta yin na thug med 'gyur/ /zhes bya ba bshad pa'i phyir/ 'on te phan na ni zhes smos so/ /mdor don 'di thug pa med par brjod pa bstan pas/'dis rnam par 'byed pa yin no/ /gang gi phyir phan pa med na 'brel pa can nyid mi rung ba de'i phyir phan pa khas len na/ 'di khyad par gcig gis bzung na yang bdag nyid thams cad de'i khyad par thams cad kyi rang bzhin du bzung ba kho na yin no//ji ltar de bzung na khyad par thams cad bzung ba yin zhe na/ bshad pa/ rang gi bdag nyid du gyur pa'i zhes smos so/ /de dag ni de las tha dad pa'i phyir de'i bdag nyid kho na yin pa'i phyir te/ de lta bur gyur pa'i nus pa dag gis khyad par la phan 'dogs pa'i rang bzhin gyi nus pa la phan par byed pa yin no//de lta na yang phyogs gcig gis 'dzin par 'dod pa'i phyir ji ltar khyad par thams cad 'dzin zhe na/ gcig pus zhes smos so/ /gcig la ni phyogs gcig srid pa ma yin no/ /de'i don ni 'di yin te/ khyad par dang 'brel pa can nyid dam/ phan 'dogs par byed pa nyid khyad par dang ldan pa las tha dad pa ma yin pa de lta na yang 'di'i tha dad pa de dag dang 'brel pa can nyid dam de dag la phan 'dogs par byed pa nyid ni tha mi dad pa kho na'o/ /des na khyad par gcig gi sgo nas 'di cha med par bzung ba na yang khyad par tha dad pa la phan 'dogs pa nyid du bzung ba'i phyir khyad par la phan 'dogs pa'i nus pa bzung ba yin la de las kyang khyad par 'dzin pa yin no//yang na rang gi bdag nyid du gyur pa khyad par la phan 'dogs pa'i nus pa la phan 'dogs pa bzung ba nyid na khyad par la phan 'dogs par byed pa'i nus pa dang bcas par gzung bar 'gyur ro//de dag bdag nyid la 'brel phyir/ /gcig shes na ni gnyi ga bzung / /zhes bya bas 'dir khyad par dang ldan pa gzung ba'i sgo nas khyad par 'dzin pa'i tshul de ni sngar nyid brjod zin pa des na de ma brjod par khyad par 'ba' zhig bzung ba'i sgo nas khyad par dang ldan par bzung bar ston pa ni/'di ltar zhes bya ba la sogs pa'o/ /khyad par ni des nus pas phan gdags par bya ba'i rang bzhin no/ /des na ji ltar phan 'dogs par byed pa bzung na phan gdags par bya ba 'dzin pa de bzhin du des phan gdags par bya ba bzung ba na yang de la phan 'dogs par byed pa 'dzin to//des na khyad par bzung na de la phan 'dogs pa'i nus pa bzung ba yin no/ /tshul 'di nyid kyis nus pa bzung ba na nus pa la phan par byed par dngos po bzung ba yin la khyad par thams cad la phan 'dogs par byed pa'i nus pa la phan pa'i bdag nyid de bzung ba na yang ji ltar phan gdags par bya ba gzung ba'i sgo nas phan 'dogs par byed pa 'dzin pa de bzhin du phan 'dogs par byed pa bzung bas kyang phan gdags par bya ba 'dzin pa'i phyir nus pa thams cad la phan 'dogs par byed pa rang gi bdag nyid du gyur pa bzung bas nus pa thams cad 'dzin pa de lta na yang khyad par thams cad gzung bar 'gyur ro zhes bshad pa ni de bzung na zhes bya ba la sogs pa'o//chos la phan 'dogs par byed pa tha dad pas sngar bshad pa'i thal ba spong ba la thug pa med par 'gyur ba bstan pa'i phyir bshad pa/chos la phan 'dogs pa tha dad pas na khyad par thams cad bzung bar thal bar 'gyur ba spangs kyang nus pa la phan 'dogs par byed pa tha mi dad pas slar thal ba po na 'dug go//'on te der yang phan pa tha dad par brtags pa de nyid kyis spong bar byed na/ de'i tshe mthar thug pa med do/ /'di ltar nus pa las phan 'dogs par byed pa'i nus pa tha dad na phan 'dogs par byed pa'i nus pa la phan 'dogs par byed pa'i nus pa de yang rang gi bdag nyid kho nas phan gdags par bya ba yin pa des na thal ba de nyid du 'gyur bas de ltar na der yang tha dad par rtogs pa'i phyir khyad par dang de'i nus pa rnams mi 'byor ba'i phyir te/mi 'thad pa'i phyir de la phan pa'i bdag nyid khyad par la phan 'dogs par byed par gyur pa khyad par dang ldan pa de gcig pu nam yang khyad par dang nus pa de dag gis mi 'dzin pas/de dang ldan pa nyid du 'dzin par mi 'gyur ro/ /'di skad brjod pa yin te/ gang gi phyir khyad par dang de'i nus pa dag mi 'thad pa des na nam yang khyad par dang nus pa dag gis khyad par dang ldan pa mi 'dzin par 'gyur ro//khyad par med par 'dzin par byed pa nyid du brjod pa yang khyad par nye bar sgyur bar byed pa nyid kyis 'dzin pa la nye bar sbyor la/ nus pa dag ni nye bar sgyur ba'i rgyu nyid dam/ 'brel par byed pa nyid kyi phyir 'brel pa can nyid do/ /de nyid kyi phyir gnyi ga'i rang bzhin med pa de nyid kyis 'dzin pa med par gsal bar byas pa yin no/ /des na phan 'dogs pa'i bdag nyid ma bzung ba ni nus par mi 'thad pa'i phyir dang / 'brel pa med pas khyad par du yang mi 'thad pa'i phyir de dang ldan par 'dzin pa med pa yin no//yang ji ltar khyad par dang de'i nus pa dag mi 'byor zhe na gtan tshigs bshad pa nus pa gzhan dang gzhan dag kho na la mtha' thug pa med pas so/ /'brel pa can tha dad pa dang 'brel pa can nyid tha mi dad na yang thal ba de nyid du 'gyur bas der yang de kho na bzhin tha dad pa rtogs par thal bas na thug pa med pa'i phyir mi 'thad do//gal te de lta na nus pa mi 'thad par 'gyur gyi/ khyad par bdag ni ma yin no zhe na ma yin te/ 'brel pa med na khyad par dag mi 'thad pa'i phyir ro//de nyid kyi phyir de dang ldan pa nyid du 'dzin par mi 'gyur ro zhes bshad do/ /des na de ltar gang gi ltar blo khyad par can ni don ces bya ba/ khyad par sna tshogs gang la yod/ /ces bya ba'i phyogs la sun 'byin pa brjod nas/ khyad par sna tshogs nyid don yin pas khyad par sna tshogs can don zhes bya ba'i phyogs 'di dgag pa'i phyir re zhig 'di la sngar brjod pa'i skyon med par bshad pa ni yang gal te zhes bya ba'o//sgra dang shes pa rnams kyi khyad par dag nyi tshe la nye bar sbyor te/ yul du byas par 'gyur gyi de'i sgo nas khyad par dang ldan pa yang yul du byed pa ni ma yin na de'i tshe gcig po de khyad par 'ba' zhig la ma 'brel pa'i phyir te/med pa'i phyir khyad par dang ldan pa de rtogs pa'i sgo nas khyad par thams cad rtogs par 'gyur ba brjod pa gang yin pa der mi 'gyur ro//des na ba lang zhes khyad par gcig rtogs pa na mi rtag pa nyid la sogs pa'i khyad par gzhan rtogs par bya ba'i phyir mi rtag pa la sogs pa'i sgra 'jug go/ /gang gis de rtogs pa'i sgo nas thams cad rtogs par 'gyur ba khyad par dang ldan pa ni rtogs pa ma yin no zhe na/'on kyang nyes pa gzhan du thal bar 'gyur ro zhes bshad pa ni/ de'i tshe yang zhes bya ba yin no/ /gal te de dag bdag nyid la 'brel pa'i phyir zhes bya ba bstan pa'i tshul gyis na/ 'brel pa gnyi ga la brten pa'i phyir khyad par 'ba' zhig rtogs pa na yang khyad par dang ldan par 'gyur ba nyid de/gcig shes na ni gnyi ga gzung / /zhes bstan pa'i phyir ro zhe na/ bden mod kyang 'di ni de nyid du bstan zin pa'i phyir sun 'byin pa gzhan nye bar bkod pa yin no/ /sgra dag gis khyad par dang ldan pa de ma brjod pa'i phyir rtogs pa po mi 'jug pas sgra sbyor ba don med par 'gyur ro//gal te khyad par rtogs pa sgra'i don yin gyi 'jug pa ni ma yin pas na ji ltar don med pa yin zhe na bshad pa/ bsgrub pa dang dgag pa zhes bya ba la sogs pa'o/ /sgrub pa ni sgrub par byed pa'i sgra bum pa yod do zhes bya ba lta bu yin la dgag pa ni med ces dgag par byed pa'o//de dag gi tha snyad gdags pa bum pa yod do med do zhes de lta bu'i don rtogs pa gang yin pa'i tha snyad de thams cad ni don med pa'i rten te/ rgyu mtshan gang la yod pa'o/ /bsgrubs pa'am bkag pa'i don bya ba sgrub par byed pa yin pa'i phyir sgrub pa dang dgag pa dag don byed pa'i rgyu mtshan can yin no//'di skad brjod pa yin te ji lta bu'i don yul du gyur pas sgras brjod par bya ba dang rjod par byed pa'i dngos por rtogs pa de nyid 'di'i brjod par bya ba yin te/ dper na bzhos shig 'bras bus mchod cig ces bya ba lta bu'o//khyad par rnams kyis ni don bya bar mi nus te/ ba lang nyid bzho ba'am/ 'bras bu'i rigs nyid mchod par byar yod pa ma yin te/ brngo btags bya ba la sogs pa'i dngos pos dum bur gtubs pa'i mthar thug pa ma grub pa'i phyir ro//sgra'i don 'brel pa med par yang 'gyur te/ mes spongs shig ces bya ba bzhin no/ /de'i phyir 'jug pa srid pa'i don la sgra 'jug pas na/ thams cad khyad par dang ldan pa'i yul can nyid du rtogs so/ /de gzhan du gyur pa la 'jug na ni de dgos pa can du mi 'gyur ro//de bshad pa ni nus pa mi brjod pas sgra sbyor ba dag gis ci zhig bya/ de'i dgos pa can ma yin yang rtogs pa ma yin pa des na khyad par nyi tshe'i yul can ma yin no/ /de ltar na yang khyad par ma yin par 'gyur ro/ /rang gis nye bar bsgrub pas gzhan rtogs par byed pa kho na khyad par yin te/gzhan du na bum pa la sogs pa dag kyang phan tshun khyad par du 'gyur ro/ /'phrod pa 'du bas de ltar 'gyur na ni de khyad par de dang ldan pa dag la khyad par med pas na khyad par med pa kho na khyad par dang khyad par can gyi dngos por 'gyur ro//khyad par 'ba' zhig rtogs na ni khyad par gyi chos med pas na khyad par nyid ma yin no/ /de bshad pa ni 'ga' zhig la zhes bya ba ste/ de las gzhan pa'i dngos po 'ga' zhig la sgra dang shes pa dag zhugs na ni'o/ /gang gi tshe khyad par las ma rtogs pa'i dngos po la sgra dang shes pa zhugs na 'gyur ro//de las tha dad pa la zhugs pa na/ ji ltar de dag la nye bar sbyor zhe na/ bshad pa/ rang gi ngo bo tha dad par gyur pa'i gtso bo 'ga' yan lag tu gyur pa'i phyir/ gtso bo de'i yan lag yin pa la ltos nas khyad par zhes brjod do//khyad par dang ldan pa ni/ rang gi ngo bos nges par mi rtogs par khyad par dag nyid kyis bstan par bya ba yin par des smra ba rnams kyis khas blang bar bya ste/ de lta ma yin na chos can chos kyis rnam par bcad kyang so sor rang gi ngo bor rtogs par 'gyur te dbyug pa rnam par bcad pa'i dbyug pa can bzhin no//ba lang ngo zhes rtogs pa na ni dbyug pa'i rang bzhin las skyes bu bzhin du de'i rang bzhin ma yin pa'i ba lang nyid dang ldan pa 'ga' yang rtogs pa med do/ /des na 'di'i rang gi ngo bos mi rtogs pas khyad par gyi rang bzhin nyid kyi rang bzhin dang ldan par snang ba yin no//des na khyad par la gnas pa'i sgra dang rtogs pa dag de'i ngo bo nyid du khyad par dang ldan pa rtogs pa las khyad par dang ldan pa la 'jug pa'i phyir 'di dag ni gtso bo de'i yan lag tu 'gyur ro/ /de nyid kyi phyir 'ga' zhig la dang 'ga' zhes khyad par dang ldan pa nges par rtogs pa med pa'i ngo bor bstan to//khyad par dang ldan pa sgra'i yul ma yin na ni tshul 'di yod pa ma yin no zhes bshad pa ni/ sgra dag gis de zhes bya ba'o/ /gal te de la 'jug par ma grub pa'i phyir khyad par dang ldan pa sgra'i yul ma yin mod/'on kyang rnam par rtog pa dang bcas pa'i mngon sum la sogs pas de ltar rtogs pa'i phyir ji ltar khyad par dag tu mi 'gyur zhe na/ gal te rnam par rtog pa dang bcas pa la de ltar snang na 'o na der khyad par can rtogs pa dang 'brel pa'i skyon du ji ltar mi 'gyur/de la sgra srid pa'i phyir sgra de ltar 'jug pa yang sus 'gog /sgra sbyar ba don med par 'gyur ro zhes gang brjod pa'i nyes pa de ni med de shes par byas pas mtshon pa'i phyir ro/ /sgras ni khyad par mtshon par byed cing rtogs par byed la shes par byed pa'i khyad par des ni sgra de'i brjod bya ma yin yang khyad par dang ldan pa mtshon par byed de gang gA'i sgra'i zhes bya ba'i gang gA'i don gyis 'gram bzhin no//gang gA 'bod do zhes bya ba ni rgyun la mi srid pas na des mtshon pa'i 'gram du yin par rtogs pa yin no//mtshon pa'i sgra'i byed pa'am don gyis byed pa yin pa ni pha rol po rang ji ltar khas blangs pa bzhin rtogs par bya'o/ /de bas na ba lang la sogs pa'i rigs rjod par byed pa dag gis kyang mtshon pa'i stobs kyis dogs bzhin du 'brel pa'i khyad par dang ldan pa nyid rtogs par 'gyur ro zhe na/der slob dpon skabs rnyed nas langs pa ni/ thal bar 'gyur bar mtshungs te zhes bya ba'o/ /khyad par dang ldan par brjod pa la bshad pa'i thal ba gang yin pa de ni khyad par 'ba' zhig brjod pa la yang mtshungs so/ /ji ltar mtshungs pa de bshad pa ni re zhig ces bya ba'o//re zhig khyad par gyis nye bar mtshon pa gang yin pa de ni 'dis bdag nyid thams cad dpyis phyin par rtogs pa yin no/ /des na de khyad par dag gis nye bar mtshon pa ni zhes 'thad par 'gyur ba so na 'dug par brjod par bya ba yin no//khyad par rnams kyi nye bar mtshon pa'i byed pa de'i mthar thug pa yin na/ gcig gis nye bar mtshon pa yang bdag nyid thams cad nye bar mtshon pa yin no/ /gang gi tshe sgras khyad par gcig gi sgo nas nye bar mtshon pa de'i tshe 'di la khyad par gzhan dag gi sgo nas mtshon par bya ba'i rang bzhin gzhan ma lus kyi/'on kyang sgra gcig kho nas khyad par gcig gi sgo nas nye bar mtshon par byed pa na/ bdag nyid thams cad kyis nye bar mtshon par 'gyur ro/ /ji ltar zhe na/ med na med pa'i phyir zhes smos so/ /mtshan nyid ni 'brel pa med pa brten nas 'jug ste/des na khyad par rnams ni med na med pa nyid kyis 'di'i mtshon par byed par 'gyur ro/ /'di'i med na med par yang gcig gis yin gyi 'dir 'ga' zhig cha 'ga' zhig gis ma yin no/ /med na med pas mtshon par 'gyur ba na 'dir khyad par gcig gi sgo nas kyang bdag nyid thams cad 'gyur ro//gtan tshigs de bas na thal bar 'gyur ba so na 'dug pa yin no/ /blo la gnas pa'i khyad par dang ldan pa'i rang gi ngo bo ji lta ba bzhin rtogs na yang khyad par gcig gi sgo nas khyad par mtha' dag 'dzin par 'gyur ro//blo la gnas pa de yang sgras rjod par byed pas byed kyang rung mtshan nyid 'jug pas kyang rung ste khyad par 'ga' yang med do/ /de brjod pa ni 'di sgras nye bar mtshon kyang rung zhes bya ba'o/ /'dis ni rjod par byed pa'i khyad par brjod do/ /des nye bar mtshon pa'i khyad par ngag gis nye bar mtshon kyang rung zhes bya bas ni mtshan nyid do//gnyi ga ltar yang de la rtogs pa khyad par med pa'i phyir ro zhes bshad pa ni/ re zhig de'i tshe zhes bya ba'o/ /'dir mtshon pa la mngon par zhen pa med de rnam pa gang yang rung bas kyang khyad par dang ldan pa rtogs par khas blangs pa na khyad par thams cad 'dzin par thal bar 'gyur ba yin no//re zhig khyad par dag par rtogs par smra ba thams cad kyis kyang gsal bar rtogs pa la ltos par bya ba yin te/ gzhan du na sgras don rtogs par mthar phyin par mi 'gyur ba'i phyir ro//des na rnam pa gang gis de ltar 'dod de/ thams cad du nyes pa 'di khyad par med do/ /de'i phyir zhes bya ba la sogs pa ni mjug sdud pa'o/ /de yang skabs kyi don nye bar sdud pa ni bsdu ba'i tshigs su bcad pa yin no/ /khyad par gcig pa la phan par byed pa gang yin pa shes pa'i yul du gyur pa'i phyir bzung na ni/mthong ba de gzhi de la ltos te/ khyad par gzhan gyi yul can gyis ma mthong ba'i phan pa de dag ni gzhan min no/ /gal te de ltar yin mod/ des cir 'gyur zhe na/ bshad pa gtan tshigs de'i phyir phan par byed pa mthong ba der ma mthong ba'i phan pa med do zhes 'brel to//de las kyang cir 'gyur zhe na/ de bzung na ni thams cad bzung / /zhes smos so/ /rang gi ngo bo khyad par dang ldan pa la thams cad ma yin pa mi srid de cha med pa'i phyir ro/ /des na khyad par thams cad kyis thams cad du 'gyur ro//des na de ltar tshad ma gzhan 'jug pa'i stobs kyis rnam par rtog pa rnams sgrub pa'i yul can yin pa bzlog pa na pha rol po dag 'dir yang mngon sum bzhin du 'dzin par dogs par byed pas de'i dogs pa bsu ba ni gal te zhes bya ba'o//ji ltar khyod kyi phyogs la mngon sum gyis chos thams cad kyi bdag nyid du gyur pa'i don bzung yang 'khrul pas rnam pa bskal pas na tshad ma gzhan la ltos pa de bzhin du rnam par rtog pas kyang thams cad la phan 'dogs pa'i bdag nyid kyi dngos po bzung ba 'khrul pa'i dbang gis rang bzhin mtha' dag ma nges pa na tshad ma gzhan 'jug pa'i phyir nyes pa 'ga' zhig med do//'di ltar gang gi tshe khyad par gcig gi sgo nas kyang khyad par can bzung ba de'i tshe/ gal te yang khyad par thams cad la phan 'dogs par byed pa de gzung ba'i phyir khyad par thams cad 'dzin pa 'thob pa de lta na yang khyad par gzhan la phan 'dogs par byed pa'am khyad par gzhan la 'khrul pa yod pas de nges par mi 'dzin pa'i phyir tshad ma gzhan la ltos so//des na khyad par gzhan de rtogs par byed pas de la 'jug pa na de la 'khrul pa zlog par byed pas go bar byed pa yin/des na khyad par de dang de'i sgo nas don rtogs par byed pa'i tshad mas gzhan rnams de srid tsam gyi yul can gyi 'khrul pa zlog par byed pa nyid kyis tshad ma gzhan gyi yul rtogs par byed pa ma yin no zhes bya ba'o/ /gal te 'di snyam du zhes bya bas ni rnam par 'grel to//gal te de lta na yang zhes bya ba la sogs pas lan 'debs so/ /rnam par rtog pa gcig gis bzung ba la yang 'khrul pas gzhan bzlog pa'i don du zhugs pa'i shes pa gang yin pa de ni rnam par gcod pa'i yul can du grub bo/ /'di ltar 'khrul pa de bzlog pa ni des sgro btags pa'i don dang tha mi dad par bzlog pa'i sgo nas don rtogs par byed la/'di la sngon po ma yin no zhes bya ba la sogs pa'i shes pa rnams kyi sel ba'i yul can gyi dngos po yang 'di kho nar zad do/ /khyad par ni 'di yin te/ kho bo cag gis rtogs pa'i ngo bos yul can du mi 'dod pa gang yin pa'o//khyed de ltar 'dod pas ni dngos po yul can nyid kyang sel ba'i sgo nas yin par brjod par 'gyur te/ rang gi gzhung gis 'di sngon po ma yin pa ma yin no zhes bya bar rtogs pa bzhin no/ /de 'khrul pa bzlog pa na don rtogs par byed pa sel ba'i yul can du 'gyur mod/gang gi yul la 'khrul pas bskal pa na de 'jug pa de go ji ltar gzhan sel ba'i yul can yin zhe na/ de las gzhan pa'am zhes smos so/ /ji ltar de rnam par gcod pa'i yul can yin pa de bzhin du de las gzhan yang grub pa yin no/ /ji ltar zhe na sgro 'dogs pa med pa'i zhes smos so//sngar zhugs pa sel bar byed pa nyid ma yin yang sgro 'dogs yod na 'di med pa nyid kyis sel ba'i yul can nyid do/ /mthong ba 'ga' la shes pa gang zhes bya ba la sogs pa sngar ji skad bshad pa bzhin no/ /'grel pa ni 'khrul pa bzlog pa'i zhes bya ba ste/'dis ni de rnam par gcod pa'i yul can grub ces bya ba bshad pa yin no/ /de las gzhan pa'am/ de dang 'dra ba zhes bshad pa ni/ gzhan yang de dang 'dra ste zhes bya ba ste gzhan sel ba'i yul can du grub ces 'brel to/ /sgro 'dogs med pa'i yul la ni zhes bya ba bshad pa ni/sgro 'dogs pa med pa'i zhes bya ba'o/ /sgro 'dogs pa med pa'i yul la 'jug pa nyid rjes su 'gro ba dang ldog pa dag gis ston pa ni gang la zhes bya ba la sogs pa'o/ /de'i phyir zhes bya ba ni mjug sdud pa'o/ /des na de ltar gzhan gyis brjod pa'i lan gyis tshul khas blangs nas gzhan sel ba'i yul can du thal ba brjod pa yin no//de ni 'di la mngon sum dang mtshungs pa nyid srid pa ma yin no zhes bstan pa'i phyir gzhan yang ngo bo gang zhes smos so/ /rnam par rtog pas khyad par gyi sgo nas don la 'jug pa na don bdag nyid thams cad kyis rtogs pa yin no//de 'khrul pas de ltar nges par ma zin pa'i phyir zhes bya ba mngon sum dang 'dra ba'i tshul 'di ni rnam par rtog pa la mi srid do/ /rnam par rtog pas khyad par thams cad kyi yul la phan pa sgrub par byed pa'i don bdag nyid thams cad bzung ngo zhes bya ba ni mi srid de rnam par rtog pa rnams kyi yul rnam par ma btags pa ni mi srid pa'i phyir ro//myong ba myong bzhin par gyur pa rnam pa ji zhig ltar nges pa ni rnam par rtog par brjod do/ /nges pa'i rang bzhin ma yin pa'i rnam par rtog pa ni mi srid do//des na khyad par so so'i rang gi ngo bo dang de la phan 'dogs par byed pa nyid du nges pa med par khyad par thams cad la phan 'dogs par byed pa'i khyad par dang ldan pa rnam par rtog pas bzung ba yin no zhes ji ltar brjod/ 'di ltar bum pa la sogs pa'i myong ba nas dngos po la snang ba skad cig ma nyid la sogs pa'i rang bzhin rang gi ngo bor gyur pa yin yang bum pa la sogs pa rnam par rtog pa la rig pa na/skad cig ma nyid du ma nges pa des na skad cig ma nyid kyis rtogs pa logs su btsal bar bya ba yin no/ /des na gang rtogs pa na ji ltar rnam par rtog par 'gyur ba de ni de ltar de'i yul du brjod pa na ma nges pa ni rnam par rtog pa'i yul nyid ma yin na/de ji ltar rnam par rtog pas ma rtogs pa yang rnam par rtog pa'i yul du 'gyur/ nges pa rnams kyis zhes bya ba la sogs pa ni 'grel pa'o/ / rnam par rtog pa rnams kyi rang gi don rtogs pa ni 'di kho na yin te/ de la rnam par rtog pa der nges pa gang yin pa'o/ /rnam par rtog pa ni nges pa tsam gyi bdag nyid yin pa'i phyir ro/ /des na gang zhig nges pa ma yin pa de ni rnam par rtog pa ma yin pa'i phyir 'di ni 'di lta bu'o zhes nges par ma byas pa de ni rnam par brtags pa ma yin no zhes brjod do//de bshad pa ni gal te de zhes bya ba'o/ /ji ltar rnam pa gzhan ma yin pa de bzhin du ma nges na des na de bzhin du gzhan yang ma nges pa yin no/ /'on te ma nges kyang bzung ba yin na/ rnam pa gzhan yang ci ste ma bzung /des na ha cang thal bar 'gyur te/ ma nges pa yang yul yin na/ rnam par rtog pa gcig gi yul yang don thams cad yin par 'gyur ba'i phyir ro/ /ma nges pa yang bzung bar pha rol po dag gis khas blangs pa'i phyir ro/ /'di kho na zhes bya ba 'di rnam pa gzhan bzlog pa'i phyir nges par bzung ba'i dngos po khyad par can gcig gi sgo nas 'dzin pa na gal te khyad par mtha' dag 'phen par byed pa'i bdag nyid du bzung mod kyi/de lta yang 'khrul pas nges par mi zin to zhes brjod pa gang yin pa de ni mi 'thad de/ gal te rnam par rtog pas thams cad la phan 'dogs pa'i bdag nyid de bzung ba ni/'di ltar na bzung bar 'gyur ba yin te/ gal te thams cad la phan 'dogs par byed pa nyid du nges na'o/ /rnam par rtog pa ni nges pa tsam gyi yul can yin pa'i phyir ro/ /khyad par thams cad ma nges par ni khyad par thams cad la phan 'dogs par byed pa nyid du 'dzin pa med pa'i phyir ro//sgra dang tshad ma gzhan 'jug pa don med pa 'thad pa kho na'o/ /gal te mngon sum gyis sgrub pa'i ngo bos don 'dzin pa zhes bya ba la re zhig brtsad pa med do/ /des na 'dir yang khyad par tha dad pa'i phyogs thams cad la phan 'dogs pa'i don du bzung na khyad par thams cad bzung ba ci ste mi rtsod ce na/de ltar ni brtsad par mi nus te/ don khyad par bral bar smra ba rang gi phyogs la yang cha shas kyi 'dzin pa med pa'i phyir don gyi chos su gyur pa'i rgyu nyid mngon sum gyis rtogs par khas blangs par bya bas des rgyu bzung ba na 'bras bu 'dzin par thal bar ji ltar mi 'gyur/'bras bu 'dzin pa na yang rgyu bzung bar thal bar 'gyur ro/ /gal te der 'bras bu la phan 'dogs pa'i bdag nyid du rgyu bzung ba na 'bras bu mi 'dzin na ni khyad par la phan 'dogs par byed pa bzung ba na khyad par 'dzin par ji ltar 'gyur zhe na/nyes pa 'di med do/ /de nas 'brel pa can 'dzin pa de'i yan lag nyid la 'khrul pa med pa zhes bya ba ni/ rnam par rtog pa'i chos yin gyi/ nyams su myong ba'i ngo bo ni ma yin te/de ni rang gi ngo bo ji lta ba bzhin 'dzin pa'i phyir ro/ /dngos po'i rang gi ngo bo nyid ni rang gi ngo bo nyid gzhan la ltos pa ma yin no/ /des ni ji ltar rgyu nyid ni dngos po tsam gyis mthar phyin pa yin pa'i phyir rgyu'i rang gi ngo bo nyid 'bras bu la mi ltos pa de bzhin du de'i 'dzin pa yang rgyu'i rang gi ngo bo rig pa kho na'i 'bras bu'i khyad par la ltos pa ni ma yin no//rnam par rtog pa ni me la sogs pa so so rang gi rnam pa gzhan gyis rgyu nyid du ma grub pa na me la sogs pa'i rnam par rtog pas rtogs pa me la sogs pa'i rnam pa dag la 'bras bu'i khyad par gyis khyad par du gyur pa rtogs par byed do//des na 'di ni rnam par rtog pa nyid kyis nyes pa yin gyi/ mngon sum gyis ni ma yin no/ /'di pha rol po dag rnam par rtog pa dang nyams su myong ba gnyis kyi rtogs pa'i byed pa mi 'dra ba ma rtogs pas ni ji ltar zhes rtsod par byed do//rnam par rtog pas ma nges pa 'dzin par khas len na/ da ni rnam par rtog pa 'ba' zhig tu ma zad kyi mngon sum ji snyed pas kyang ma nges pa ji ltar bzung ba yin/ de la yang nges pa las gzhan pa'i byed pa ni 'ga' yang med do/ /des na khyod kyi don gyi rang gi ngo bo gcig ces bya ba la sogs pa yang ji ltar mi 'gal/de skad cig ma nyid la sogs pa don gyi ngo bo nyid mtha' dag ni nges pa yod pa ma yin la ma nges pa yang gzung bar ji ltar 'gyur zhe na/ de bzlog pa'i phyir bshad pa/ mngon sum ni gang gi yang nges par byed pa ma yin te/rnam par rtog par byed pa ma yin no/ /mngon sum ni 'ga' yang rnam par rtog par byed pa ma yin pas mngon sum la ni rnam par rtog pa dang bcas pa'i rig pa'i byed pa med do/ /'o na ji ltar rig par byed pa yin zhe na des zhes smos te mngon sum des gang zhig 'dzin pa de yang nges pa ni ma yin no//'o na ci zhe na/ des 'dzin par brjod pa gang yin pa de ni snang bas so/ /'di skad brjod pa yin te dngos po rig pa ni dngos po gsal ba yin pa'i phyir te/ 'di las gzhan pa'i byed pa ni 'ga' yang med do/ /gsal ba'i chos kyis ma zin par yang gsal bar 'gyur ba ma yin te/de ni shes pa kho na'i mtshan nyid yin pa'i phyir ro/ /shes pa'i chos kyis zin pa'i yang shes pa nyid yin pa'i phyir sngon po'o/ /rnam pa gsal bzhin du shes par gyur pas na sngon po gsal ba yin no/ /gsal bzhin pa nyid ni gzhan gyi skabs yin pa'i phyir te/nus pa bzhin du rang gi gnas lugs yin par 'gal ba'i phyir ro/ /de yang gsal ba zhes bya ba brjod pa gang yin pas te/ des de lta bur gyur pas 'di don rig pa yin pa'i phyir 'di ni snang bas dngos po 'dzin pa yin no/ /mngon sum ni gang gi yang nges par byed pa ma yin no zhes brjod zin pa ma yin nam/de ji ltar na nges pa ni ma yin no zhes yang brjod ce na brjod pa mngon sum ni gang gis yang nges par byed pa ma yin no zhes brjod na gzhan dag mngon sum rig pa'i byed pa dang bral bar go bar 'gyur te/ des na des gang zhig 'dzin pa zhes bya bas rig pa'i bdag nyid du sgrub pa nyid bstan te nges pas ni ma yin no zhes bya bas mi 'dod pa bkag nas der snang ba las so zhes bya bas ji ltar mngon par 'dod pa nyid bstan pa yin no//des na ji ltar ma nges pa mngon sum gyis kyang bzung zhes smras pa gang yin pa de mi rigs par brjod pa yin no zhes bstan pa ni/de bas na nges pa dang zhes bya ba'o/ /gang zhig nges pa de ni bzung ba yin la/ ma nges pa gang yin pa/ de ni bzung ba ma yin no zhes bya ba 'di ni yod pa ma yin no/ /gal te ji skad bshad pa'i tshul dang sbyar nas rnam par rtog pa sngon po la sogs pa rig pa nyid kyang sngon po la sogs pa'i rnam pa med par mi srid pa yin te/de la yang sngon po la sogs pa yul du gyur pa rnams gzhan du gsal bar mi srid pa'i phyir ro/ /srid na ni mngon sum yang snang ba med par rig par ci ste mi 'gyur zhe na/dogs pa 'di bsu nas bshad pa ni nges pa rnams kyis ni de ltar ma yin te zhes bya ba ste/ rnam par rtog pa ni snang ba'i dbang gis 'dzin pa dang mi 'dzin pa ma yin no/ /'dir ni snang ba yod pa bkag pa ma byas te/ ji ltar sngar mngon sum ni gang gi yang nges par byed pa ma yin no zhes nges par byed pa nyid bkag pa ltar ro//'on kyang 'di ni 'dzin pa de'i bdag nyid yin pa bkag pa yin no/ /des na snang ba yod kyang 'di 'dzin pa dang mi 'dzin pa de bdag nyid kyis ni ma yin no zhes brjod pa yin no/ /gtan tshigs bshad pa/gang zhig nges kyang zhes bya ba'o/ /bum pa la sogs pa'i rnam pa ji lta ba zhig mngon sum gyis mthong ba lto ba yangs pa la sogs pa'i rnam pa de nyid bum pa'i rnam par rtog pa mi gsal ba nyid du de'i yul can dang 'gal bar khyad par du 'gyur bas snang ba yin no//skad cig ma la sogs pa'i rnam pa yang de lta bur gyur pa de nyid yin te/ des na gal te 'di snang bas 'dzin par byed pa yin na/ skad cig ma la sogs pa yang 'dzin par yang 'gyur na de lta yang ma yin te/ bum pa la sogs pa'i ngo bo 'ga' zhig nges kyang skad cig ma nyid la sogs pa'i ngo bo gzhan la ma nges par 'jug pa tha dad pa'i phyir ro//ji ltar de'i ngo bo nges pa de ltar rtogs pa po 'jug gi ji ltar nges pa ma yin pa de ltar ni ma yin no/ /'di ltar chu ldugs pa'i don du gnyer ba bum pa zhes de ltar nges pa la 'jug gi /mi rtag pa'o zhes ni ma yin no//ci ste yang rnam par rtog pa yang mngon sum dang 'dra bar ma nges kyang de lta bu'i rnam pa 'dzin par byed pa yin mod ce na/ de ltar ni ma yin te/ snang ba tha dad pas dngos su 'dzin par byed pa nyid du ma grub pa'i phyir ro/ /mngon sum 'dra bar te snang ba nyid kyis dngos po la gzhol bar mi grub pa'i phyir ro//nges pa nyid la ltos te 'ga' zhig la 'dzin pa nyid du rnam par gzhag pa na nges pa ji ltar ba kho nar rigs so/ /nges pa yang myong ba'i rang bzhin ma yin pa myong ba'i chos yin no zhes ston par 'gyur ro/ /de'i phyir zhes bya ba ni mjug sdud pa ste nges pa nyid 'dzin par byed pa ni yin gyi yod kyang snang ba ni ma yin no zhes nges par bya ba'i don du'o//gal te de ltar mi 'dod na ni de'i tshe dngos su 'dzin par byed pa nyid mi srid pas ni rnam par rtog pa'i shes pa gang gi mthar thug pa nyid kyis gang la yang 'dzin par byed pa nyid du mi 'gyur ro//'di ni zhen pa'i dbang nyid kyis phyi rol tu phyogs pa yin na/ de lta bu'i phyi rol na med pa'i phyir don dam par na yul med pa kho na'o/ /rtogs pa'i ngo bor ni don la gzhol bar brjod do/ /de bshad pa ni de lta ma yin na zhes bya ba'o/ /des ni de ltar mngon sum gyi yul du byas pa 'khrul pas nges par mi zin pa bzhin du/rnam par rtog pas yul du byas pa las yang tshad ma gzhan 'jug pa yin no zhes bya ba/ nges pa rnams kyis ma nges gang / /zhes bya ba la sogs pas bsal ba na mngon sum yang nges pa'i ngo bo yin par mgo mnyam pa de las bzlog par bstan pas bsal ba yin no//da ni mngon sum nges pa'i bdag nyid ma yin mod/ de lta yang shes pa gcig gi yul du byas pa la de'i rjes su 'brang ba'i rnam par shes pa gzhan dag 'jug par rang bzhin gyis grub pa yin te/ rjes su dpag pas yul du byas pa'i don bzhin no//des na mngon sum gyis kyang sgrub pa'i ngo bos don yul du byed na rnam pa thams cad la nges pa skyed pa'i phyir tshad ma gzhan 'jug pa'i skabs med do/ /de la srid na ni rnam par rtog pa yang 'gyur ro zhes rnam pa gzhan gyi sgo nas mgo mtshungs par ston pas pha rol po dag spang ba'i phyir zhes smra bar byed do//thams cad las tha dad pa'i dngos po'i ngo bo la de kho na bzhin du nyams su myong ba skyed kyang ji ltar nyams su myong ba thams cad las tha dad pa'i dngos po las skye ba de kho na bzhin du ci ste nges pa mi 'byung /dngos po gzhan las khyad par du gyur pa'i rang bzhin dang ldan pa nyid kyis dngos po dngos po gzhan las tha dad pa yin te/ de lta ma yin na rang bzhin med pa tha dad par mi rung ba'i phyir ro/ /des na 'di bum pa zhes khyad par can gyi ngo bo'i dbyibs dang ldan pa'i phyir de'i ngo bo dbyibs can ma yin pa bum pa ma yin pa las ldog pa yin la rgyu'i byed pas bsgrub pa'i phyir ni byas pa ma yin pa las 'jig pa'i ngang can gyis ni mi 'jig pa las so//des na 'di de lta bu la sogs pa'i bdag nyid kho na la ma nges pa skyes pa'i phyir tshad ma gzhan la ga la ltos/ji ltar nyams su myong tsam gyis nges par 'gyur na gang gis 'di skad rtsod par byed ce na/ dran pa'i zhes smos so/ /de ni nyams su myong ba'i 'du byed tsam gyis bsgrub pa yin te/ rgyu mtshan gzhan med pa'i phyir ro/ /de lta bu'i rnam pa can gyi don myong ba na/de'i rnam pa mtha' dag nges par ci ste mi skye/ de lta ma yin na nam yang mi 'gyur ro zhe na/ de bzlog pa'i phyir/ lhan cig byed pa ma tshang ba'i phyir ro zhes smos so/ /'dir mi skye ba'i rgyu ci yin zhes 'dri ba'i ngag yin na ni/ lhan cig byed pa ma tshang ba'o zhes lan du 'gyur na/rgyu ci'i phyir mi 'byung zhes bya ba'i ngag yin na ni/ lhan cig byed pa ma tshang ba'i phyir mi 'byung ba yin no zhes bya bar rigs so/ /gal te dran pa'i rnam par rtog pa ni don dang dbang po la sogs pa'i tshogs pa la ltos pa med kyang sngon po la sogs pa'i rten nges pa nyid du skye ba yin te sngon po nyams su myong ba nyid las des 'du byed so sor nges pa skyes pa ni de ltar 'gyur ba'i phyir ro//don gzhan la chags pa la sogs pas ma nyams pa'i nyams su myong ba'i de ma thag tu 'das pa na dran pa skye ba la ni lhan cig byed pa la ltos pa med do/ /nyams su myong ba tsam las 'byung ba'i phyir ro//des na lhan cig byed pa ma tshang ba'i phyir ro zhes ci ste brjod ce na/ brjod pa nges pa tsam skye ba 'dri ba ni ma yin gyi/ 'on kyang khyad par thams cad la nges pa skye ba 'dri ba yin no/ /des na 'di ni de nyid la lan btab pa yin te de nyid kyi phyir thams cad las tha dad pa cha shas dang bral ba'i ngo bo nyid nyams su myong mod kyi zhes 'chad par 'gyur ro//'di nyid brjod pa'i phyir skabs su bab pa ji ltar brjod pa yin no/ /de la ni lhan cig byed pa gzhan la ltos pa yod pa yin te/ nyams su myong ba tsam las mi 'byung ba'i phyir ro//'di ltar bum pa la sogs pa'i dngos po mdun na gsal ba'i bdag nyid kyi ngo bo gang yin pa de ni mi rtag pa la sogs pa'i rang gi ngo bo nyid do zhes re zhig ston par 'gyur ro/ /des na ngo bo nyid skad cig ma nyid dang / yod pa nyid dang rgyu dang 'bras bu nyid la sogs pa yin no/ / de yang de ltar snang ba na nges pa'i shes pa la gnas pa nyid do/ /de lta bu'i ngo bo'i dbyibs kyis rnam par bcad pa dbang po'i shes pa la snang ba'i phyir dang / de lta bur gyur pa nyid bum pa la sogs pa'i rnam par rtog pa'i phyir ro/ /des na mthong ba'i cha gang zhig rnam par rtog pa la mi snang ba ni 'ga' yang med do//don gyi ngo bo nyid ni skad cig ma la sogs pa'i rang bzhin rnam par rtog pas yul du ma byas mod kyi/ 'on kyang chos thams cad kyi bdag nyid can yang chos gcig tu nges par byas pa yin no/ /des na de ltar mthong ba'i 'du byed tsam la rag las nas skye ba'i dran pa'i rnam par rtog pa ni cha shas kyi skye ba yang ma yin la de tsam gyis tshad ma gzhan la ltos pa med pa yang ma yin te chos gcig gi bdag nyid du nges par byas pa'i phyir chos gzhan dag la tshad ma gzhan bsgrub pas rnam par gzhag pa la ltos pa'i phyir ro//gang gi phyir lhan cig byed pa ma tshang bas thams cad las tha dad pa'i don la nges pa ma skyes pa'i gtan tshigs de bas na rang gi mtshan nyid cha med pa'i bdag nyid mngon sum gyis ni bzung ba la ste/ bdag nyid thams cad kyis bzung ba la zhes bya ba'i don to//cha shas rnams spangs pa ni cha shas dang bral ba ste/ de lta bu ni tshad ma med pa kho nar 'dzin to zhes brjod pa yin no/ /de'i khyad par skad cig ma nyid dang / bdag med pa nyid la sogs pa gang yin pa de dag gi nang nas khyad par gang zhig nges pa la rtogs pa'i rgyu mtshan lhan cig byed pa'i rkyen yod pa de ni rtogs par 'gyur ro//gang gi phyir lhan cig byed pa med pas tha dad pa thams cad ma nges pa'i phyir khyad par gang zhig nges par byed pa'i lhan cig byed pa'i rkyen yod pa'i khyad par de nges par 'gyur gyi/ gzhan ni ma yin no zhes brjod pa yin no//gang zhig mngon sum gyi stobs kyis 'phangs pa ji ltar nyams su myong ba bzhin rnam par rtog pas rtogs pa dag la yang nges par ji lta ba bzhin thams cad kyi yan lag yin gyi snang ba ji lta ba bzhin ma yin pa de ni rang bzhin gyis sgrub pa'i phyir brjod par bya ba ma yin te/rjes su dpag pa'i shugs kyis byung ba'i rnam par rtog pa gzhan bzhin no/ /'grel pa ni thams cad las zhes bya ba yin no/ /nyams su myong mod kyi 'on kyang khyad par thams cad nges par ni mi 'gyur ro/ /ji ltar mi 'gyur zhe na/ rgyu gzhan la ltos pa'i phyir ro//nyams su myong ba tsam gyis ni khyad par thams cad la nges pa 'byung ba ma yin te/ 'on te rgyu gzhan las yin no/ /des na khyad par gang nges pa la rgyu yod pa de ni nges pa yin no zhes 'thad pa brjod pa sngon du 'gro ba can mdo'i don bshad pa yin no/ /rgyu gzhan de yang gang zhig yin la de la ltos pa'i rnam par rtog pa de yang gang yin zhe na gnyi ga ston pa ni nyams su myong ba ni zhes bya ba yin no//rnam par rtog pa goms pa las ma 'das par nyams su myong ba rnam par rtog pa skyed par byed de/ de nas 'dir lhan cig byed pa ni de yin no/ / goms pa 'di gang gi yul can yin pa de ni ma brjod do/ /de la ltos pa'i rnam par rtog pa bstan pa nyid kyis go ba'i phyir ro/ /des na rnam par rtog pa gang zhig goms par byed/ de la ltos na skye ba yang gang yin zhes gnyi ga brjod par bya ba las de la ltos pa nyid brjod pas goms pa gang yin pa de nyid skye ba yin no zhes brjod par 'gyur ro//de nyid bstan pa'i phyir/ dper na zhes smos so/ /ro myags pa dang / nyal po bya ba dang bza' bar bya ba'i rnam par rtog pa'i rnam pa rnams de dag nyid ltos pa yin no/ /so sor rtogs pa la gnas pa bud med la sogs pa la mi mthun par goms par byed pa bud med dag gson po'i lus shi ro dang khyad par med pa de lta bu nyid du sgom par byed pa ni de'i rnam par rtog pa goms pas nyams su myong bas rnam par rtog pa de nyid skyed par byed do//'dod pa can ni bde ba'i sgrub byed du goms pas nyal po bya ba'i rnam par rtog par 'gyur la/khyi dang ce spyang la sogs pa dag ni 'grangs pa'i rgyu nyid du goms pas bza' bar bya ba'i rnam par rtog par 'gyur ro/ /'di skad brjod pa yin te gang gi tshe cha shas dang bral ba'i don gcig la nyams su myong ba'i mthus rang gi ngo bo ji lta ba bzhin du rnam par rtog par 'gyur ba na/dper na de yod pa na bde ba dmigs pa'i phyir bde ba'i sgrub par byed pa nyid dam/ me la sogs pa du ba'i sgrub par byed pa nyid mngon sum gyis rtogs pa ltar de chos gcig po gang gis bdag nyid du nges par byas pa de las gzhan pa'i chos rnams de la yod par tshad ma gzhan gyi dbang las rtogs par bya ste/dngos po gcig dang rang bzhin nyid/ de bzhin du chos gzhan gyi bdag nyid do zhes de lta bur gyur pa rnam pa de lta bu'i tshad mas rtogs pa de lta bu'i ngo bo nyid du yang nas yang du goms par byed pa de'i tshe de dmigs pa na rang bzhin de bzhin du 'di yang nges par 'gyur ba kho na'o//rnam pa'i khyad par mi gsal bar ni nyams su myong bas nges par sgrub par nus pa ma yin no/ /des na goms pa la yod kyang des yul du byas pa'i don gyi rnam pa'i khyad par gsal ba med par skye ba'i rnam par rtog pa ni mngon sum gyi yul du byas pa'i don gyi mthar thug par mi 'gyur te/dran pa bzhin du dngos po gzhan mthong ba las dngos po gzhan la gzhol ba'am sgro 'dogs par 'gyur ro//rnam pa'i gsal ba'i khyad par gsal bar gyur na yang goms pa la ltos par mi 'gyur te/ sngon po nyid la sogs pa rnam par rtog pa bzhin du mthong ba tsam las 'gyur ba'i phyir ro zhe na/ 'di las nges pa 'di yin te/ gcig gi bdag nyid du gyur pa'i dngos po gcig gi bdag nyid du nges par byas pa dmigs shing dngos su na rang bzhin de nyid chos gzhan gyi bdag nyid yin pa'i phyir/de'i rang bzhin du tshad mas lan gcig dmigs nas der goms pa'i dbang gis rang bzhin de nyid chos gzhan gyi rnam par yang 'jog pa yin no//dper na me'i rnam pa nyid du bskyed pa'i rang bzhin yin pa'i phyir de du ba dang 'brel par myong ba med na/ me zhes bya ba nyid du nges par mi 'gyur la/ de la gang zhig snang ba nyid kyis nges par 'gyur ba rwa can bzhin du du ba skyed par byed pa nyid gzhan ni snang bar byed pa des na du ba dmigs pa'i phyir me'i rnam pa de nyid du ba'i rgyu yang yin no zhes thun mong ba nyid du bya ste yang nas yang de lta bu nyid du dmigs pa las rnam pa de dmigs na ji ltar me'o zhes nges pa de bzhin du/du ba'i rgyu'o zhes kyang nges par byed do/ / de nas de ltar goms pa yang dgos pa yin la me'i rnam pa nyid kyang yin no/ /de lta ma yin na/ rnam par rtog pa'i rtog pa myong bas yul du byas pa'i khyad par gyi rjes su 'brang bar ji ltar 'gyur/ de bzhin du rnal 'byor pa la yang sngon po'i rnam pa nyid skad cig ma nyid kyi snang bar 'gyur ro//des na nyams su myong ba ni ji ltar gzugs dang dbyibs dag la 'gyur ba bzhin rtogs pa tsam las rnam par rtog pa skyed par byed pa'am/ yang chos gzhan gyi rnam pa gzhan gyi bdag nyid du gyur par goms pa'i dbang gis yin te/ rnam pa gzhan ni mi srid do/ /gang du rang bzhin khyad par can mngon sum gyi tshad mas rtogs pa yod pa der ni rnam par rtog pa tsam skye ba mngon sum gyi tshad ma'i byed pa khyad par du gyur pa ma yin te/ 'on kyang mngon sum nyid de/ dper na nor bu'i gzugs la sogs pa dag la bzhin no zhes gzhan du gtan la phab zin to//goms par bya bar gyur pa nyid la ltos par bya ba gzhan dag kyang yod par bshad pa ni/ de la zhes bya ba ste goms pa yin par 'gyur ba de la'o/ /blo gsal ba ni yid la byed pa mi mthun pa ma yin no/ /yid la byed pa mi mthun par gyur na nyams su myong ba nyid kyang mi skye ba de lta na yang nyams su myong ba'i dngos po'i mthu las skye ba yin pa'i phyir mi mthun pa khyad par du 'phags pa kho nas mngon sum du skye ba'i gags byed la/rnam par rtog pa ni cung zad mi mthun na yang mi skye ste dpyod pa'i rang bzhin yin pa'i phyir ro//dpyod pa ni shin tu 'tsham pa med par yod pa ma yin no/ /de la yang mi mthun pa dang chos mi mthun pa la ltos pa yod pa ma yin te/ rnam par dpyod pa phra mo ni cung zad shed dmas kyang ldog la gzhan ni ma yin no zhes bya ba la sogs pas rjes su rtogs par bya'o//gal te goms pa yod pa nyid la de'i bag chags goms pa zhes bya ba 'di ji zhig yin/ de yod pa la blo gsal ba nyid bzhin du 'di ni tha dad par gyur pa ma yin no zhe na/ bden mod kyi 'on kyang sngar rnam par rtog pa goms par bshad pa gang yin pa de nyid 'di ltar khyad par du byas pa yin te/rnam par rtog pa goms pa na bag chags goms par 'gyur gyi bag chags goms pa'i rnam pa gzhan ni med la rnam par rtog pa goms pa yang gzhan du nye bar sbyor ba ma yin no/ /dngos po de ltar tshad mas de'i chos nyid du rtogs pa na bag chags skye la/de yang nas yang du de ltar rtogs pa las ni/ bag chags de goms par 'gyur ba yin no/ /des na de ltar rnam par rtog pa goms pa'i myong ba las rnam par rtog pa skye ba yin no/ /gal te bag chags goms pa las rnam par rtog pa skye na bag chags rgyu yin par 'gyur gyi/nyams su myong ba ni rgyur mi 'gyur ro/ /des na dang po'i skad cig pa mi mthong la/ gnyis pa la du ba'i 'bras bu can gyi bag chags sad pa/ gsum pa rnam par rtog pa yin no zhes bya bar 'gyur ro zhe na/ 'bras bu'i rnam par rtog pa skad cig ma gsum pa la 'gyur ro zhes bya ba'i brjod pa 'di ni shin tu chung ste me'i rnam par rtog pa yang de bzhin kho nar 'gyur ro//'di ltar me'i rnam par rtog pa ni me nyams su myong ba'i 'du byed las yin te/ gzhan du na ni shes pas shes pa gzhan skyed pa ma yin no/ /des na dngos po nyams su myong ba'i 'du byed rnam par rtog pa yin pa'i phyir 'di yang de bzhin kho nar thal bar 'gyur ro//'di la brjod pa ni/ blo gzhi tshugs pa'i 'du byed ces brjod do/ /gzhi tshugs pa nyid ni rgyu mtshan gzhan la brten nas lan gcig blo ji lta bu nyid du skyes pa de kho na bzhin du rgyu mtshan gzhan la mi ltos par myong ba gsal ba'i mtshan nyid rang gi bdag nyid phul du byung ba kho na las skye ba yin pa'i phyir ro//des na 'di ni yid gtad pa la/ de lta bu'i ngo bo las de ma thag pa kho nar de ltar 'grub ste/ don gzhan la 'gro bar mi 'dod kyang de lta bus bskyed pa'i nus pa skyes pa yin pa sad pas dus gzhan du de lta bu'i rnam par shes pa dran pa zhes bya ba skyed par byed pa'i phyir skad cig ma gsum pa la 'byung bar thal ba ma yin no//'bras bu la sogs pa'i rnam par rtog pa dag kyang de bzhin no//me'i rnam pa nyid du ba'i 'bras bu can yin no zhes bsgos pa'i blo can ni ji ltar me'i rnam par nyams su myong ba na nyams su myong ba des me'o snyam pa skyed pa de bzhin du du ba'i rgyu'o zhes bya bar yang yin no/ /de skabs ji ltar rnam par rtog pa'i rgyu yin zhe na/ sman pa'i skabs su gnas par 'gyur ba'i skyes bu la sman par nges pa yin no//gal te mngon sum gyis ma nges pa'i chos de dang ldan pa rgyu mtshan gzhan gyis de ltar nges par tshad ma gzhan gyi rtsa ba las yin gyi mngon sum la brten pa ni ma yin te/ skad cig ma nyid la sogs pa bzhin no zhe na/brjod pa/ bzo'i sbyor ba du ma shes pa'i khyad par can gyi skabs dang 'brel pa las khyad par can gyi chos dang ldan par nges kyi gzhan ma yin pas de'i lhan cig byed pa dang ldan pa mngon sum de'i rgyu mtshan yin no/ /de la chos gzhan gyi 'du byed yod kyang skabs tha dad pa'i phyir mi nges pa'i phyir ro//de bzhin du gzhan yang nyams su myong ba ji lta ba bzhin rtogs par bya'o zhes bya ba ni sogs pa'i tshig gi don to/ /'di ltar nye ba la yang ltos te nges pa skye ba yin te/ nor bsrung ba la nges par sbyor ba dmigs nas rang gi chung ma khyo'i rnam par rtog pa skye'i gzhan ni ma yin pa bzhin no//des ni de ltar rnam par rtog pa lhan cig byed pa la ltos te yod pa dang med par bstan nas skye ba rnams la yang snga phyir skye ba so sor nges par rgyu bshad pa ni de kho na zhes bya ba ste nges pa dag snga phyi nyid du 'gyur te/rnam par rtog pa la la ni sngar skye la la la ni phyis so/ /ji ltar byas te zhe na/ bshad pa/ nye ba dang ches shin tu nye ba la sogs pa'i bye brag gis so/ /lhan cig byed pa rnams kyi khyad par gyi rim pa las so/ /dper na blo gsal ba dang ches shin tu gsal ba la ltos nas chos rnams las 'ga' zhig yod pa dang med par rnam par rtog pa de bzhin du snga phyir yang ma yin no//de bzhin du goms pa dang ches shin tu goms pas kyang snga phyir 'gyur ro/ /sogs pa smos pas bzung ba'i lhan cig byed pa rnams nye bar mtshon pa'i don du 'dir nye ba nye bar bkod do//pha nyid nye ba yin gyi mkhan po nyid ni ma yin no/ /de ni goms pa las nye ba nges pa yin yang pha'i 'og tu 'dir nges pa yin no/ /goms pa la yang dpe 'di yin no/ /'di ltar gcig nyid skyed par byed pa dang / 'don du 'jug par byed pa nyid du khyad par med kyang pha nyid ni yun ring du goms pa la mkhan po ni ma yin no//pha bu'i skyed par byed pa nyid du mngon sum ma yin pa de lta na yang 'dir ni dpe tsam du zad do/ /gal te lhan cig byed pa rnams yod kyang khyad par nges pa yod pa ma yin te/ dper na smig rgyu dag la bzhin no/ /des na ji ltar lhan cig byed pa rnams lhan cig byed pa yin zhe na/de ma yin no zhes bshad pa ni/ nges pa de yang zhes smos so/ /'khrul pa'i rgyu med na 'gyur ro/ /rgyu mtshan de yod tsam gyis ni 'gyur ba ma yin no zhes bya ba'i tha tshig go/ /de'i phyir zhes bya ba ni mjug sdud pa'o/ / des na de ltar gang phyir dngos kun zhes bya ba la sogs pas gzhan sel ba'i yul can nyid du khas blangs pas dam bcas pa'i don gyi phyogs gcig nyid du 'gyur ba spangs par brjod pa'i gzhan sel ba'i yul can nyid kyi sgra dang tshad ma gzhan 'jug pa ni 'di yan chad kyis bsgrub pa yin no//da ni gzhon nu ma len la sogs pa gang dag slob dpon phyogs kyi glang pos gzhan sel ba zhes bya ba dngos po las tha dad pa dngos med kyi mtshan nyid sgra'i don du gsungs par rtogs nas sun 'byin pa brjod pa de dag gi 'dod pa bsal ba'i phyir de la zhes bya ba la sogs pa'i rab tu byed pas rang gi gzhung ston par byed do//rnam par gcod pa'i yul can de la yang gzhan la sogs par gyur pas na gzhan las log pa dang ldog par byed pas na gzhan las ldog pa zhes bya ba'i sgra dang de bzhin du nges pa rnam par rtog pa nyid gang yin pa de dag ni brda'i rjes su byed pa yin gyi don la ltos pa ni ma yin no//'di skad brjod pa yin te/ gzhan las log pas na log pa zhes bya ba ni dngos po'i ngo bo nyid rtogs pa yin la/ 'di'i gzhan las log par byed pa'i ldog pa yang gzhan med pa nyid do/ / des na de ltar sgra dang shes pa dag rang gi bdag nyid kho nas yul tha dad par rtogs pa yin no zhes bya ba ni zhes bya bas brjod pa yin te/ de ltar sgra dang shes pa dag yul tha dad kyang zhes bya ba'i tha tshig go/ /de lta bu de dag la yang ji ltar rtogs pa'i yul tha dad pa dang rjes su 'brel pa ni yod pa ma yin no//gang zhig byed pa por gyur pas 'di log pa'am/ ldog par byed pa med par byed pa nyid du 'gyur bas ldog par 'gyur ba bzlog pa zhes bya ba ni 'ga' yang yod pa ma yin te/ gang zhig 'ga' yang med ce na/ brjod pa 'di la re zhig sgra ni rtogs pa'i rjes su 'gro ba yin te/rnam par shes pa bzhin du rang nyid yul dang ldan pa ma yin pa'i phyir du ba bzhin no/ /rtogs pas dmigs pa'i yul bstan par bya ba'i don du rab tu sbyar ba'i phyir ro/ /de yang rnam par rtog pa kho na'o/ /rnam par rtog pa yang rang nyid dbang po la brten pa'am/ de la brten pa'i rnam par shes pa rjes su 'jug pa yang ma yin no/ /dbang po byed pa dang bcas pa las bzlog par bya ba'i bdag nyid dam dngos po med pa'i rang bzhin snang ba med pa la rtags kyi rjes su dpag pa de lta bu 'ga' yang yod pa ma yin no/ /tha snyad 'di tha dad pa'i rjes su 'gro ba yin yang dngul la sogs pa'i tha snyad ltar mngon sum nyid gzhan du dmigs pas ldog pa yang ma yin no//de'i phyir rang gi ngo bo tsam la gnas pa'i don gyi rang bzhin gcig nyid 'di ni log pa'o/ /'di'i ldog pa'o zhes 'brel pa can gyi dngos po gzhan du sgro 'dogs pa'am/rang gi bdag nyid la brten pa yang dag pa ma yin pa'i chos sgro 'dogs pas rtogs pa yin no/ /'di'i ldog pa zhes bya ba'i rtogs pa ni ldog pa'i mthar thug pa yin yang rten tha dad pa ma grub pa'i phyir dang / gnod pa med pa'i phyir des sgo 'dogs pa dngos po de'i mthar thug pa kho nar rtogs pa yin no//gang gis de ltar rtogs pa'i yul ma grub pa ni bag chags tsam la brten par 'gyur ba 'di ngo bo nyid kyis 'byung ba yang ma yin te/ rtag pa dang rdzas gcig pa la sogs pa'i rnam par rtog pa lta bu ma yin pa'i phyir ro/ /'on kyang sa thams cad pa'i brdar rnam par gzhag pa'i yan lag nyid kyis don ston par byed pa rnams kyis thams cad de tsam nyid yin pa'i phyir ram/mi shes pa'i phyir de ltar rnam par gzhag pa'i bya ba dang byed pa la sogs pa tha dad pa'i rjes su 'gro ba'i phyir na brda kho na'o/ /nges pa ni rnam pa gnyis te/yul so sor rnam par gnas pa'i yul gyi skad la brten pa de ni rtogs pa po rnams kyi thog ma med pa can yin te/ tha snyad snga ma snga ma mthong nas phyi ma phyi ma zhugs pa'i phyir ro/ /des ni yul gcig pa rnams nyid tha snyad byed pa yin no/ /gzhung sdeb pa sgrub pa lhur len pa rnams bye brag tu sgrub par byed pa dang bsgrub par bya ba'i dngos po ni yul gyi skad kyi sgra la brten pa ma yin te/sa thams cad pa'i rtogs pa po la bstan par bsams nas zhugs pa'i phyir ro/ /de la nye bar mkho ba la ltos pa'i phyir yang b+ha ba ta la sogs pa'i sgra dag 'ga' zhig gis bye brag tu bshad pa yin te/de bas na dngos po don dam pa rig kyang thabs gzhan med pa'i phyir de ltar btags pas chod pas dngos po la 'jug pa 'di dag gi tha snyad byed pa na nyes pa dang bcas pa brjod pa lta bur mngon te/ dper na slob dpon phyogs kyi glang pos ldog pa'i yul can du gsung ba na sgra tsam gyi rjes su 'brang ba dag gis log pa las tha dad pa'i ldog pa'i yul can du rtogs pa la de ltar ni ma yin pa bzhin no//de bas na tha dad pa ni brda tsam la brten pa yin gyi/ dngos po'i yul can ni ma yin no/ /gal te yang rang gi bdag nyid tsam la rnam par gnas pas na dngos po la dngos po gzhan med pa de lta na yang ji ltar mi dmigs pa phyogs bum pa med pa yin par bstan pa de bzhin du 'dir yang dngos po nyid ldog par brjod pa yin te/yul nyid la ltos pa na dngos po nyid yul yin pa'i phyir ro//phan tshun du tha dad pa 'di'i sa bon yin zhes med pa tsam ni sa bon du mdun du 'chad par 'gyur ro/ /'grel pa ni de la yang zhes mdo rjes su brjod do/ gzhan sel ba zhes yul bstan pa yin no/ /ldog par byed cing sel bar byed pa'i rnam pa ldog pa gzhan la log pa yang gzhan pa yang med do//gzhan 'ga' zhig la ltos pa ma yin pa'i phyir dang / 'di gnyi ga la gzhan nyid du brjod pa'i phyir na skabs kyi gzhan nyid phan tshun ltos pa nyid yin no/ /ldog pa ni log pa las gzhan ma yin la log pa yang ldog pa las gzhan ma yin no zhes bya ba'i tha tshig go/ /ji ltar gzhan ma yin no zhe na/rigs pa bshad pa ni/ de las ldog pa las zhes bya ba'o/ /ldog mtshams nyid du ltos pa'i don gzhan ni de zhes bya bar 'brel pa yin te/ rigs mi mthun pa de las ldog pa las ldog pa bzlog par 'gyur ba rigs mi mthun pa'i dngos po nyid du thal bar 'gyur ba'i phyir ro//ba lang la ni rta med la rta la yang ba lang med pas na rta ba lang las ldog pa/ ba lang yang rta las log par 'gyur ba yin no/ /ldog pa log pa las gzhan yin pa'i phyir ni ba lang ma yin pa'i phyir ldog pa las log pa/ ba lang ma yin pa las log pa yang ba lang las log pa'i phyir ba lang la ba lang ma yin pa las ldog pa med par 'gyur ro//ba lang la ba lang ma yin pa las ldog pa yod do zhes brjod pas ni ba lang la ba lang ma yin pa med pa yin na/ /gal te 'di la de med na ni ba lang la ba lang ma yin pa yod do zhes bya bar 'gyur ro//tha dad pa ni 'ga' yang 'ga' la yod pa ma yin pas ni ba lang ma yin par thal bar 'gyur ro/ /de lta na ni 'ga' yang gang las kyang mi ldog par 'gyur ro zhes bshad pa ni/ de lta na zhes bya ba'o/ /des na gang dag chos tha dad pa nyid kyis dngos po med pa dngos po nyid du 'dod pa de dag bsal ba yin no//gzhan la gzhan med pa'i med par ni de las tha dad do zhes 'thad pa ma yin no/ /de la gzhan med pa med na ni gsal bar gzhan nyid do/ /gal te gzhan ma yin na ni mi gzhan pa zhes bya bar 'gyur ro/ /phyi 'di'i yang rnam par phye nas lung bstan par bya ba yin te/dngos po'i gnas thabs la ltos nas ni gzhan yang ma yin la/ gzhan ma yin pa yang ma yin no/ /gal te de de lta na ldog pa ldog pa med do zhes bya ba nyid du 'gyur ro zhe na/ ldog pa zhes bya ba yod do zhes sus smras/ dngos po la dngos po gzhan med do zhes bya ba yin gyi/dngos po la dngos po gzhan med pa yod pa ni ma yin no/ /de lta na yang dngos po gzhan med pa med do zhes bya ba 'di nyid brjod pa yin pa'i phyir 'thad pa kho na'o/ /ji ltar phyogs la bum pa med pa zhes bstan pa de la ltos nas ni ldog pa gzhan ma yin pa kho na'o//da ni brda'i rjes su byed pa nyid bstan pa'i phyir/ de'i phyir zhes bya ba la sogs pas dngos po tha mi dad par bshad do/ /brda'i rjes su byed pa nyid la ni/ sgra dang zhes bya ba la sogs pa'o/ /brjod par bya ba la ni tha dad pa med do zhes bya bas brda'i bye brag la brten pa'i gtan tshigs so//'dir yang ldog pa ni gzhan zlog par byed pa'i rang bzhin yin la/ des ldog pa ldog pa ni byed pa po yin no/ /'di'i ldog pa zhes bya ba ni 'brel pa nges pa yin no/ /des na 'di tsam gyis ni 'dir mi bden pa nyid sgro btags nas rang gi ngo bo la gnas pa'i dngos po'i bdag nyid kho na rtogs so zhes brjod pa yin no//gzhan dag de mi bzod pas brjod par bya ba la tha dad pa med pa'i zhes smra'o/ /log pa dang ldog pa'i tshig gnyis kyis brjod par bya ba gang yin pa de la khyad par med pa'i phyir brda'i bye brag kyang mi rung ngo / /brjod par bya ba tha dad pa med pa'i gtan tshigs smras pa ni gnyi gas gcig brjod pa'i phyir ro zhes bya ba ste/tshig gnyis kyis gcig kho na brjod pa'i phyir ro/ /brda ni brjod par bya ba rtogs pa'i 'bras bu can yin no/ /gal te khyad par med na de ltar rtogs pa'i 'bras bu can gyi brdas ci zhig bya/der 'brel pa sgro btags pa la dgos pa ji srid cig srid pa bstan pa'i phyir de nyid du rtsod pa mthar thug par ston pa ni de ltar na zhes bya ba'o/ /de bzlog pa'i phyir bshad pa ni/ gnyi gas zhes bya ba'o/ /gzhan las ldog pa dang gzhan las log pa'i sgra gnyi gas gcig brjod pa yin mod kyi/de dag gis brjod par bya ba la gnas pa'i shan khyad par dang ldan pas na de dag las gcig la gnas pa'i tha dad pa'i dbye ba gang la yod pa brjod par bya ba tha dad pa de dang ldan pas de tha dad pa'i don bzhin du rtogs par byed do//rang gi bdag nyid la rnam par gnas pa tsam gyi rang bzhin gyi don gcig kho nas gnyi gas brjod pa yin no/ /de ldog pa'i sgras ni 'di'i ba lang ma yin pa las ldog pa zhes drug pas brjod pa'i tha dad pa bsgrubs pas don de rjod par byed do/ /de yang log pa'i sgras brjod par bya ba'i don ston pa na don tha dad pa la brten par snang bas na rang bzhin gyi sgras byas so//'di don tha dad pa'i mthar thug pa nyid ni ma yin no/ /'on kyang bstan pa na don tha dad pa la brten pa lta bur mngon pa yin no/ /des na ldog pa dang de'i 'brel pa sgro btags nas log pa'i dngos po nyid kyi mthar thug par 'gyur ba yin no//de'i don 'di yin te/ brda tha dad pa zhes bya ba gal te sgra tha dad pa tsam las brjod na de ni brjod par bya ba la gnas pa'i khyad par med kyang shing dang rkang 'thung la sogs pa'i tshig dag la de lta bu'i khyad par yod par mthong ba kho na'o//'on te don tha dad pa nyid yin na de ni ma grub ste/ gcig brjod pa'i phyir ro/ /gcig brjod pa nyid ni ldog pa dang ldog pa'i sgra dag tha dad pa dmigs pa med kyang 'gyur ba yin te/ 'di ni ba lang ma yin pa las log pa'o/ /'di'i ba lang ma yin pa las ldog pa zhes 'jug pa gnod pa med pa'i phyir ro//don gzhan dang ldan pa gzhan la 'jug na ni gnod pa'am/ btags par 'gyur na 'dir ni don tha dad pa mi dmigs kyang de ltar srid pa ma yin pas ji ltar don gcig pa nyid ma yin/ 'on te 'dir ni 'di'i ldog pa zhes de las bkol ba tha dad pa nyid rten du snang ba gzhan du ni de nyid do zhes brjod na de ni mi rung ste/de'i mthar thug pa nyid na de tha dad pa mi dmigs pa'i phyir dang / gnod pa nyid du thal bar 'gyur ba'i phyir te/ bum pa ma yin pa las bum pa'i sgra bzhin no/ /de gnod pa med pa'i phyir yul gcig po nyid yin yang rtogs pa tha dad pa'i phyir don tha dad pa lta bur mngon pa yin no zhes bya ba bstan to//de'i rgyu mtshan yang brjod par bya ba la brten pa'i shan gyi khyad par yin no/ /'di de dang don gcig nyid yin yang 'di'i ldog pa zhes don de nyid de ltar byas nas rtogs par byed do/ / ji ltar de'i mthar thug pa yin yang don lta bur snang bar 'gyur ba yin no/ /'grel pa ni sgra rnams kyi zhes bya ba'o/ /gal te 'di dag yul gyi rang gi ngo bo la rag las nas 'jug pa yin na tha dad pa med pa la tha dad pa med pa kho nar go bar byed par 'gyur gyi/ de rtogs par byed kyang don tha dad pa bzhin du mi 'gyur ba zhig na de ltar yang ma yin te 'dod pas kyang 'jug pa'i phyir ro//de lta na yang rtogs pa tha dad pa'i mtshan nyid kyis brda'i bye brag 'di ga las she na de dag ces smos so/ /gang gi phyir dngos po la brten pa ma yin pa de'i phyir na gal te don tha dad pa'am tha dad pa ma yin pa la sbyor yang rung ste/de lta na yang de nyid rtogs par byed pa kho na'o/ /gal te don tha dad pa la sbyar na de nyid rtogs par byed la/ gal te tha dad pa med pa la sbyar na ni de nyid rtogs par byed do/ /dper na ak+Sha'i sgra ba ru ra dang cho lo la 'jug pa bzhin no//gang gi phyir de ltar yin pa'i rgyu de'i phyir ba lang dang ba lang nyid ces bya bas dngos po gcig brjod mod kyi tha dad pa'i don can gyi rnam par dbye bas don tha dad pa lta bur ston par snang ste de ltar sbyor ba mthong ba goms pa'i phyir ro/ /'di'i ba lang nyid ces bya ba tha dad pa'i don can gyi rnam par dbye ba dang ldan pa'i sgra 'di ni ba lang la 'jug pa yin no//rnam par dbye ba de yang gnyi gar yang brdar byas pa yin te/ 'di'i ba lang nyid ces bya ba ni tha mi dad pa la yin la/ bram ze'i ril ba spyi blugs zhes bya ba ni tha dad pa la'o/ / des na tha dad pa la sbyor ba mthong ba goms pas na 'dir don bzhin du ston par byed par snang ngo / /des khyad par 'ga' zhig shes par bya ba'i phyir tha dad pa'i don can bzhin du sbyar ba'i phyir ro/ /des na de ltar don gcig kyang brda tha dad pa yin no/ /de srid tsam gyi rtogs pa mi 'dra ba dang ldan pas ni thams cad la tha dad pa ma yin te/tha dad pa med pa la yang skyes bu'i 'dod pa'i dbang gis 'jug pa gegs med pa'i phyir ro/ /de bshad pa ni gzhan la yang zhes bya ba'o/ /sgra rnams kyi skyes bu 'dod pa la gegs byed pa med pa de nyid du ston pa ni/dper na zhes bya ba'o/ /dngos po gcig gi sgra thams cad kyis gcig gi tshig gi mtha' can gyis ston to/ /lhas byin dkar sham mo/ /spom mo zhes bya ba bzhin no/ /de nyid dkar sham la sogs pa brjod par bya ba ma byas par gus pa'i sgras brjod pa na mang po'i tshig gi mtha' can gyis ston te/de kho na la dmigs nas bla ma 'di dag ces bya ba lta bur ro/ /des na de la mang po nyid med kyang ston par byed pa de ni gegs med do/ /'on te 'dir mang po nyid brjod kyang mang po'i tshig mtha' can brjod pa ni legs pa tsam gyis yin no//gcig po de la ni mang po'i tshig bstan pa nyid legs par brjod do zhe na/ de bzhin du tha mi dad pa la tha dad par brjod pa'i drug pa yang de bzhin du 'gyur ro/ /da ni brjod bya'i shan gyi khyad par gyis zhes tshig le'ur byas par brjod pa dang 'grel pa yang khyad par 'ga' zhig shes par bya ba'i phyir zhes gang brjod pa der ni khyad par dang bcas te ma bstan pas na/de bstan pa'i phyir dgos pa med pa'i phyir zhes smos so/ /brjod par bya ba khyad par med kyang dgos pa'i khyad par gyis/ bla ma dag ces bya ba la sogs pa'i sgra de bzhin du/'dir gal te dgos pa'i khyad par med na ni brda'i bye brag med par 'gyur ba zhig na dgos pa de ni yod pa kho na yin no/ /gal te brjod bya'i cha'i khyad par sngar bshad zin pa ma yin nam/ ji ltar de nyid da ltar dgos pa'i khyad par du brjod ce na/ brjod par bya ba la brten pa'i dgos pa'i khyad par de nyid brjod pa'i shan gyi khyad par du brjod pa de nyid 'di ltar zhes bya ba la sogs pas ston par byed do//khyad par gzhan zhes bya ba ni/ khyad par gzhan dag go/ /log pa zhes bya ba ni ma log pa las tha dad pa la ltos nas don la sgra 'jug pa yin te/sngar ji skad bshad pa bzhin no/ /don de nyid ni ldog pa'i tshig gis kyang rjod par byed do/ /khyad par ni 'di yod de/ 'di'i ldog pa zhes bya ba'i sgra gang yin pa 'di ni dngos po de'i dkar po ma yin pa la sogs pa dag las tha dad pa gang yin pa de dag spang bas 'jug pa yin te/'di'i ba lang ma yin pa las ldog pa zhes rtogs pa'i don la yod pa'i dkar po ma yin pa la sogs pa las tha dad pa gang yin pa de dag de ltar spang bar 'gyur ba yin no/ /de la rgyab kyis phyogs pa ji ltar rtogs pa tsam gyis rtogs pa don du gnyer ba ni de ltar rtogs pa'i phyir ro//'di la ba lang ma yin pa las log pa zhes bya bas ni de la brten pa'i tha dad pa gzhan spong ba ma yin no/ /de bzhin du 'di ni ba lang ngo / /'di'i ba lang nyid do zhes bya ba la sogs pa la yang rtogs par bya'o/ /'di dag nyid ldog pa'i dang log pa'i sgra de gnyis kyis ji skad brjod pa'i sgra bye brag gi gzhi zhes bya ba rten yin te/dgos pa de la brten pa nyid kyis 'jug pa'i phyir ro/ /de ltar rtogs pas dgos pa ci zhig 'grub ce na/ rtogs pa po'i 'dod pa'i rjes su byed pa'i zhes smos so/ /brda'i bye brag 'di ni rtogs pa po'i 'dod pa tsam gyi rjes su byed pa yin gyi/dngos po la ni ltos pa ci yang med do/ /ji ltar mang po'i tshig gis dkar sham la sogs pa'i dngos po la yod pa nyid rjod par byed pa de bzhin du/ brda'i bye brag 'di ni dngos po gnas pa'i khyad par bstan pa'i don ma yin no/ /'on kyang rtogs pa po 'ga' zhig ci zhig ltar rtogs par 'dod pa yin te/des na 'di de ltar rtogs par byed pa yin no/ /de nyid kyi phyir 'di rtogs pa mi 'dra ba yin gyi/ 'di la dngos po'i don khyad par ni yod pa ma yin no/ /'grel pa ni gang gi tshe zhes bya ba yin no/ /'dis ni khyad par gzhan spong ba rnam par 'grel to//gang gi tshe zhes bya bas ni mi spong ba'o/ /yang ji ltar 'dir ni khyad par spong ba der ni ma yin no zhe na/ de nyid kyi phyir zhes smos so/ /gang du khyad par gzhan dang 'brel par 'gal ba'i rang bzhin du rtogs pa der ni/ khyad par gzhan spangs pa kho na yin la gang du 'gal ba med pa der ni ma spangs pa yin no//'gal ba'i phyir ni chos gzhan dang rang bzhin gcig par ma rtogs pas ni gzhi mthun pa nyid dam/ khyad par dang khyad par gyi gzhi'i dngos po ma yin no/ /chos gzhan dang gcig pa nyid ni chos gnyis kyi gzhi mthun pa yin te dper na ut+pa la nyid sngon po'i rang bzhin du rtogs pa'i phyir ut+pa la dang sngon po gzhi mthun pa bzhin no//gzhi mtshungs pas de dag gzhi mthun pa ni ma yin no/ /gal te rdzas gcig la rigs dang yon tan gnyis yod pa zhes bya bar 'gyur na ni de'i tshe chos nyid dang de ston par byed pa'i sgra gzhi mthun par 'gyur na de ni yod pa ma yin te/des na chos gnyis 'brel par rtogs pa nyid gzhi mthun pa dang / khyad par dang khyad par gyi gzhi'i dngos po yin no/ /de ni ba lang nyid las yod pa ma yin te/ chos gzhan dang rang bzhin gcig par 'gal ba nyid kyis rnam par rtog pa'i phyir dper na 'di'i ba lang nyid dkar po zhes bya ba lta bu'o//gzhi mthun pa med pa nyid ston pa ni dkar po nyid kyi mtshan nyid de tsam gyi khyad par dang ba lang nyid de la brten par gyur pa'i blo gcig pa nyid du mi snang ba'i phyir ro/ /ba lang nyid dang dkar po gcig tu snang na blo gcig tu snang bar 'gyur ba yin no//des na gal te ut+pa la dang sngon po bzhin du dkar po nyid ba lang nyid dang rang bzhin gcig par snang na/ de ltar na ba lang nyid la brten pa'i blo dkar po nyid mtshan nyid kyi khyad par dang gcig pa nyid du 'gyur ro//de lta ma yin te/ 'di'i 'o zhes gzung ba'i phyir/ dngos po las ba lang nyid dkar te snang ba'i phyir ro/ /dkar po zhes bya ba ni dkar ba'i mtshams su gyur pa nyid du rtogs pa'i phyir ro/ /gal te ba lang nyid 'di'i yin la 'di ni dkar po yin no zhes dkar po'i ngo bo nyid de'i dngos po nyid du rtogs pa'i phyir ji ltar khyad par gzhan spang zhe na/lha rnams dga' bas bsam pa ma shes so/ /dngos po la ni khyad par gzhan ma rtogs par mi brjod de/ tha na 'di zhes bya ba la 'di zhes bya bar bzung bas ba lang nyid las gzhan pa'i chos rtogs pa'i phyir ro/ / 'on kyang gang la brda'i bye brag yod pa dkar nas rtogs pas de'i rang gi bdag nyid bcad nas rtogs pa'i phyir de la khyad par gzhan de 'brel pa ma yin te/ sngar ji skad bshad pa bzhin no/ /de lta na ni der yang 'brel pa yod pa yin te/ 'di'i ba lang nyid ni rtag pa'o zhes ba lang nyid rtag par rtogs pa'i phyir ro zhe na/bsam pa'i khyad par yang mi shes pa nyid do/ /'di ltar 'di logs shig tu rang bzhin khyad par 'ga' zhig tu 'gyur ba dkar bar gyur pa'i ba lang nyid ni dngos po ma yin gyi/ 'on kyang 'di ni gang las dkar ba'i dngos po de'i rang bzhin kho na ste/ de lta mod kyi 'di'i ba lang nyid ces logs su dkar te/ rtogs pa tsam du zad do/ /des na gang zhig ba lang nyid rten par rtogs pa'i rang bzhin de dag ni dkar mtshams kyi dngos po'i chos yin par rtogs par bya ba yin no/ /'di'i ba lang nyid rtag pa'o zhes de ltar ni nus pa ma yin te/ba lang nyid rtag par rtogs pa na de'i mtshams rtogs pa med pa'i phyir ro/ /'di ltar de ni mi rtag pa yin la 'di'i ba lang nyid ni rtag pa yin no zhes rtogs par 'gyur na de ltar ni ma yin te/ de nyid rtag pa dang mi rtag pa nyid kyi mtshan nyid 'gal ba'i chos dang ldan par rtogs par 'gyur ba'i chos dang ldan par rten de ltar rtogs par 'gyur na de lta na/'di ltar rtogs par 'gyur ba yin no/ /de bas na de ltar rtogs pa'i ba lang nyid kyi rang bzhin don dam pa gang yin pa'i rang bzhin des ni 'di khyad par gzhan dang 'brel par 'gyur ba ma yin no zhes nges par bya'o/ / des na 'dir re ba med pa ji ltar snang bzhin pa nyid yin par nges par bya'o/ /ci ste don gyi rang bzhin yin pa de ltar ni ltos pa 'ga' yang med la/ ji ltar ltos pa de ltar ni don gyi rang bzhin ma yin no/ /gnyis pa la ni gzhi mthun pa nyid dam khyad par dang khyad par gyi gzhi'i dngos po yod de zhes snga ma dang 'brel to//de nyid kyi phyir zhes brjod pa'i snga ma la ni zhes brjod pa'i phyir na/ gzhan gnyis pa la yang ni zhes brjod pa yin no/ /ba lang 'di mi rtag go zhe'am/ de bzhin du log pa dang skad cig ma yang yin no zhes bya ba yin no//de bzhin du ut+pa la sngon po la sogs pa'i blo yang rtogs par bya'o/ /gzhi mthun pa de nyid ston par ni 'di ston pas na bstan pa ste ngag go/ /des rnam par dbye ba dang ldan pa yang gcig pa lta bur snang ba'i phyir ro/ /rnam par dbye ba dang ldan pa gang yin pa de bshad mod kyi de lta na yang gang zhig ston pas bstan pa de yin pas rtogs pa kho na'o//de lta na yang ba lang dkar po zhes bya ba la sogs pa'i ngag la rnam par dbye ba dang ldan yang der gcig pa nyid du snang ba yin no/ /gcig pa nyid bshad pa ni/ bsdus pa zhes bya ba'o/ /phan tshun 'brel par rnam par gnas pa ste/ba lang dkar po'i rang bzhin du rtogs pa'i phyir gnyi ga yang phan tshun 'brel pa yin pa'i phyir ro/ /de dag ni rnam pa de lta bu yang yin la/ rnam par gcod pa'i chos mtha' dag kyang yin te/ gzhan sel ngo bo'i tshig gi don to/ /chos kyi ngo bo nyid kyis ni tshig gi don 'di dag tha dad pa yin la/'brel pa rtogs pa'i phyir ni gcig dngos po yin pas na/ rnam par gcod pa'i chos mtha' dag bsdus pas rnam par dbye ba dang ldan pa gcig pa lta bur ston par snang ba yin no/ /ji ltar na 'di rnam par dbye ba dang ldan pa'i chos rnams kyang phan tshun 'du ba yin zhe na/de lta bu'i brda'i rjes su 'brang ba'i phyir zhes smos so/ /ngo bo 'dod pa ldan pa rtogs pa ni ngo bor rtogs pa ni rung bar nye bar gnas pa ngo bo nyid du rtogs par bya'o zhes bya ba ni brda nyid do/ /ji ltar tshig gi don rtogs pa brda las byung ba nyid yin pa de bzhin du tshig gi don gyi mthar thug pa'i ngag gi don rtogs par byed pa yang brda las byung ba yin no//des na ngag gi don kyang brda las byung ba kho na'o/ /'di ni 'di ltar khyad par gzhan ma spangs pa las 'gyur ba yin no zhes bshad pa ni/rnam par gcod pa gzhan 'dod pa dang bcas pa'i phyir ro zhes bya ba'o/ /de ltar 'brel pa sgro btags pa'i dgos pa bstan nas/ ldog pa dang ldog pa'i tshig gnyis kyis rang gi mtshan nyid dag la sgro btags pa gang yin pa der yang dgos pa de nyid nye bar bsdu ba'i phyir/kun la zhes smos te/ skabs su bab pa'i don 'ba' zhig tu ma zad kyi/ 'on kyang gzhan du yang yin no zhes pa'o/ /rdzas brjod pa ni log pa'i sgra ste de yang byed pa po nyid du brjod par 'dod pa yin te/ dngos po'i tshig dang 'brel pa'i phyir ro/ /'gyur bas na dngos pos te bya ba nyid do//de nyid ji skad bshad pa'i ldog pa nyid do/ /log pa dang / ldog pa'i tshig dag gi khyad par ni 'di nyid do/ /dngos po'i bdag nyid bya ba'i rang bzhin du rtogs par byed pa dag ni bya bar gyur pa'i dngos po'i bdag nyid la khyad par ma 'brel pa zhes bya ba de ltar gyur pas ston par byed do//'di ltar lhas byin 'tshed do zhes bya ba gang gi tshe rten 'dzugs pa la sogs pa'i byed pa dang ldan pas de ltar ston pa de'i tshe 'gro ba la sogs pa brjod pa de dang de'i yul can dang mi 'dra ba'i de dang de'i yul can 'ga' zhig rten 'dzugs pa la sogs par brjod pa des na 'di'i rang gi ngo bor gyur pa nyid de ltar brjod pa na/khyad par gzhan dang 'brel pa ma yin no/ /gal te yang dal bus 'tshod do zhes 'di khyad par gzhan dang 'brel pa yod pa de lta na yang de nyid ji lta bar ni 'brel pa ma yin no zhes bya ba la sogs pa ni snga ma bzhin du rtogs par bya'o//de bzhin du lhas byin gyi byed pa po nyid sgro 'dogs pa yang 'di lta bu'i don nyid de/ de'i ngo bo nyid kyis de'i bdag nyid la chos gzhan dang ma 'brel bar bya ba'i phyir ro/ /gang gi tshe lhas byin shing gis phru bar 'bras chan 'tshed do zhes 'tshed pa po byed pa po du ma'i ngo bor ston pa de'i tshe yang lhas byin la sogs pa rnams rgyu nyid dang /'bras chan 'bras bu nyid de lta bu'i bya ba dang 'brel par khyad par gzhan la rgyab kyis phyogs pa'i sgo nas bstan pa yin no/ /'dis lhas byin la sogs pa'i rang bzhin khyad par du gyur pa dag yod na 'bras chan gyi mtshan nyid kyi dngos po ma dmigs pa las dmigs pa yin gyi 'bras chan gyi mthar thug pa de dag nye bar gnas pa na/'tshed pa'i don 'ga' zhig snang ba ni med do/ /ngag gi sbyor ba 'di gnod par gyur pa yang ma yin te/lan cig ma yin par sbyor ba'i phyir ro/ /de'i phyir lhas byin la sogs pa nyid kyis de skyed par nges pa'i khyad par phul du byung ba dang / de ltar grub pa'i 'bras chan gyi rnam pa de ltar bya bar byas pa na/ de bzhin du de dang 'brel par rtogs pa yin no/ / des na 'di dag gi rgyu dang 'bras bu nyid de ltar rtogs pa na khyad par gzhan dang 'brel pa med pa nyid yin gyi/ 'di la don tha dad pa ni 'ga' yang med do/ /yul gyi skad so sor dngos po 'jig pa'i sbyor ba la ni bya ba'am byed pa po'am gzhan yang rung cung zad ci ltar brtags pa bzhin snang ba ni 'ga' yang med do//gzhan du shing rta la sogs pa dag las bum pa la sogs pa bye brag tu rtogs pa bzhin du sgra pa rnams kyis gtsug lag 'di bye brag tu rtogs par grub par 'gyur ro/ /yul nges pa 'di dag gi rang bzhin thams cad pa'i sgra'i rjes su 'gro bar rtogs pa na zur chag pa legs pa'i rtsa ba can du sems pas de ltar 'khrul pa 'ba' zhig tu zad do//bya ba brjod pa dang mtshungs par rtogs pa gang yin pa de la ni bya ba brjod pa 'khrul pa yin te gzhan du yang de bzhin no/ /des na 'jig rten pa'i sgras ni ci tsam mngon sum gyis rtogs par de tsam kho na rtogs par byed pa la phra ba la sogs pa ni de ltar ma yin pas ji ltar 'di dag 'jig pa'i sbyor ba la gnas par 'gyur/mngon sum gyi gzhi tsam gyi tha snyad la yang 'gyur ba gang zhig yin pa/ rdzas gcig la sogs pa ltar thog ma med pa'i bag chags la brten pa ni ma yin no//'di ni bshad zin to/ /de ltar rtogs pa ma grub pa'i phyir ro/ /bum pa gcig ces bya bar ni rtogs pa kho na'o/ /'di ni gtsug lag gi khyad par dag la rag las nas 'khrul pa yin te/ 'gro ba sred med kyi bu las byung bar 'khrul pa bzhin no//'di nyid bshad pa ni/ de lta bas na zhes bya ba la sogs pa'o/ /ldog pa ni chos yin la ldog pa zhes bya ba ni chos can yin pa de bzhin du gzhan du yang chos dang chos can brjod pa'i brjod par bya ba'i don la khyad par 'ga' yang med de/ de skad brjod pa na chos brjod pa'i brjod bya ni chos yin la/chos can brjod pa'i yang chos can yin no zhes bya ba ni de dag gi brjod par bya ba la brjod par bya ba nyid med do zhes shes par mi 'gyur bar bya ba'i phyir nges pa'i shes pa'i yul nyid du zhes khyad par du byas so/ /ji ltar chos brjod pa'i brjod par bya ba'i don nges pa'i shes pas yul du byed pa de bzhin du chos can brjod pa yang ngo //chos brjod pa'i don ni chos nyid du nges pas yul du byed la chos can brjod pa ni chos can nyid du yin par 'gyur ro zhes dogs pa la/ gcig gis ni zhes smos so/ /chos brjod pa'i sgras brjod pa'i don gang yin pa de nyid chos can gyi sgras kyang yin no zhes tha dad pa med pa'i don nyid mdor/de phyir de dag brjod bya las/ /khyad par 'ga' yang yod ma yin/ /zhes bstan to/ /dngos po las tha dad pa med pa'i gnas skabs kyi khyad par nyid dngos po las bkar te de ltar bstan pas bya ba rtogs pas na ji ltar 'di rang nyid zhugs pa na de'i gnas skabs rjes su 'jug par 'gyur ba'i gnas skabs kyi khyad par de bya ba'i khyad par du sgras bstan pa nas bsgrub par brjod pa yin te/lhas byin gyi shing zhes bya ba lta bu'o/ /de bzhin du sgra las byung ba'i dngos po ma bskal par gyur pa gzhan dag kyang rjes su rtogs par bya'o//des ni ji ltar skabs su bab pa la ji snyed sgro btags pa de'i de nyid bstan nas/ zhar la gzhan dag kyang bstan pa'i phyir bshad pa/ don de shes par byed 'dod pas/ /zhes bya ba'o/ /ji skad bshad pa'i don de nyid shes par 'dod pas 'chad par 'gyur ba'i de la phan pa'am byed pa dang ldan pa'am/gal te sgra'i gtsug lag la grags pa gzhan gyis brjod kyang rung / de'i tshe yang de las khyad par gzhan ni med do/ /rang gi mtshan nyid kho na bstan pa'i phyir de la phan pa la sogs pa don mi 'dra ba lta bur rtogs par byed pa dag bstan pa na rang gi mtshan nyid kho na khyad par gzhan spong ba dang mi spong ba tsam du rtogs par byed pa yin no//'di nyid bshad pa ni/ khyad par de tsam kho na zhes bya ba yin no/ /'tshed pa po'i dngos po'i 'tshed pa po nyid do zhes yon tan gang dang 'brel pas 'tshed pa po la 'tshed pa po'i sgra 'jug par 'gyur ba de brjod pa yin no zhes ni dogs par mi bya ste/'tshed pa po'i tshig gis brjod par bya ba'i ngo bo nyid kyi dngos po'i khyad par brjod pa'i phyir ro/ /'tshed pa'i sgra yang khyad par gzhan spong bas 'tshed pa po'i sgra dang don mtshungs pa yin te/sngar ji skad bshad pa bzhin no/ /rgyu mtshan gzhan la brten nas gzhan la sgra 'jug pa ni ma yin te/ brjod par bya ba ma yin na rgyu mtshan ma yin pa'i phyir ro/ /brjod na yang gnyis su snang bar thal bar 'gyur ba'i phyir ro zhes bya ba la sogs pa dpyad par bya'o//ji ltar de skad du brjod pa tsam gyis don gzhan pa nyid du mi 'gyur te/ gang gi phyir don gzhan pa nyid rtogs pa yin no zhe na/ de lta bu kho na zhes smos so/ /'di'i brda yin gyi gang gi nyes pa 'dir 'gyur ba dngos su rtogs pa'i rang bzhin ma yin no zhes bya ba'i don to//de 'tshed pa po nyid ces bya ba 'brel pa brjod pa ma yin nam zhes bya ba la sogs pas ni don gzhan brjod pa nyid du dogs par byed pa'o/ /'tshed pa'i bya ba dang 'brel pas de'i byed pa po la 'tshed pa po'i sgra yin pa'i phyir 'tshed pa po nyid kyi sgras ni 'jug pa'i rgyu mtshan du gyur pa de nyid brjod pa yin no zhe na/'di 'gog pa ni ji skad du brjod pa lta bur zhes bya ba ste/ sgra dag gis ji skad brjod pa ltar 'tshed pa rgyur gyur pas 'tshed pa po gang yin pa de skabs kyis 'tshed pa nyid las gzhan 'ga' kho na zhig brjod pa ni ma yin no//'tshed pa po zhes bya bas ni byed pa po rtogs la/ de la yang 'tshed pa 'di rgyu yin par 'tshed pa'i bya ba byed pa nyid kyis 'gyur ba yin no/ /gal te 'tshed pa po zhes bya ba nyid kyis 'tshed pa'i bya ba byed par rtogs pa ma yin nam/ des 'tshed pas zhes bya ba 'dis ci bya zhe na/bden te 'on kyang 'tshed pa tha dad pa ma yin pas kyang byed pa por 'gyur ro zhes dogs pa bzlog pa'i phyir 'tshed pa rgyu nyid du bstan te/ rgyu nyid ni gcig par 'gal ba'i phyir ro/ /de nyid kyi phyir gzhan zhes bya ba 'dir 'tshed pa mtshams su gyur pa yin te/gzhan du 'tshed pa zhes bya ba 'tshed pa po nyid la ltos nas yin par 'gyur ro/ /gal te gzhan brjod pa ma yin na/ 'o na ci zhig brjod pa yin zhe na/ 'di'i zhes smos so/ /'di skad brjod pa yin te/ gal te 'tshed pa gzhan du gyur pa'i rgyu mtshan can kyi byed pa po nyid dang ldan pa'i dngos po 'tshed pa'i sgras brjod par 'gyur na ni 'tshed pa po nyid kyi sgras 'brel ba brjod par 'gyur ba zhig na gang gi tshe 'tshed pa'am/'tshed pa po nyid ces bya bas dngos po de tsam nyid brjod pa de'i tshe/ 'jug pa'i rgyu mtshan du gyur pa gzhan ci zhig yod/de'i phyir 'tshed pa dang 'tshed pa po'i sgra dag gis brjod pa'i dngos po'i rang bzhin gang yin pa de nyid 'tshed pa po nyid kyi sgras kyang yin no zhes bstan pa'i phyir/ de nyid 'tshed pa po nyid kyis kyang brjod do zhes smos so/ /'tshed pa po nyid kyis kyang zhes bya ba ni 'tshed pa po nyid brjod par 'dod pa'o//gal te 'di thams cad ni bya ba la sogs pa don gzhan med na 'thad pa yin na/ de nyid ga las she na/ ji ltar zhes bya ba la sogs pa smos so/ /des na de ltar ldog pa dang log pa dag gzhan ma yin par bsgrubs te/gang gi don du sgra'i don rtag pa'i rab tu byed pa 'di nye bar bkod pa de ston pa ni/ de phyir zhes bya ba'o/ /ji skad bshad pa'i gtan tshigs de'i phyir ro/ /gzhan sel ba yang yin la yul yang yin pas gzhan sel yul lo/ /yul can la ma ltos par yang yul ma yin par des na sgra'i yul gzhan sel ba zhes bya bar rtogs so//de brjod pa la de lta na phyogs la brjod pa gang yin pa mgo snyams par bstan pa'i tshul gyis brjod pa de bsal ba yin no/ /slob dpon phyogs kyi glang pos gzhan sel ba sgra'i don yin no zhes gsungs pa la gzhan sel ba dang ldan par brjod par thal ba'i phyir na 'dir yang slob dpon rang nyid kyis/rang dbang med phyir de ldan min/ /zhes gsal ba gang yin pa de dang ldan pa'i phyogs su 'gyur ro zhes pha rol po dag brjod do//'di ltar sel bar byed pa na sel ba ste/ zlog par byed pa gzhan gyi bdag nyid med pa dngos po med pa nyid brjod pa yin no/ /gal te de sgra'i don yin na bum pa la sogs pa'i sgra rnams don kho nar 'gyur te/ med par dgag pa la tha dad pa med pa'i phyir ro/ /thams cad du dgag par bya ba kho na tha dad par zad kyi bkag pa ni ma yin te/dngos po med pa ni khyad par med pa'i phyir ro/ /bsal bar bya ba tha dad pas tha dad pa yang ma yin te/ khra bo la ba lang ma yin pa med la ngang pa la rta ma yin pa med pa'i phyir ba lang dang rta tha dad kyang dgag pa'i don thams cad du khyad par med pa'i phyir ro//des na ba lang ma yin pa las tha dad pa la brten nas ba lang gi sgra ba lang la 'jug par brjod pa yin te/ dper na gzhan dag gis ba lang nyid la brten nas ba lang la sgra 'jug go zhes brjod pa bzhin no/ /des na gzhan sel ba'i yul la de dang ldan pa'i phyir phyogs su thal bar 'gyur ro zhe'o//'di ni slob dpon gyis bstan bcos kyi sgras tha snyad mdzad pas na de dag la don 'di lta bur snang ba yin te/ mi shes pas sgra 'chad par byed pa dag gis de ltar bshad pa'i phyir ro/ /sel ba zhes bya ba sel ba'i sgra'i don du gyur pa ni med kyi/'on kyang don gyi rang gi ngo bo kho na'o/ /des na nyes pa ni med pa kho na'o/ /bum pa'i rnam pa nyid du bum pa'i sgras brjod pa yin gyi sgra thams cad don gcig pa nyid du 'gyur ba gang yin pa bum pa med par bkag pa ni ma yin no//rigs dang de dang ldan pa dag ni tha dad pa'i phyir de la skyon 'dir 'gyur ro/ /'grel pa'i sgra'i don gzhan sel ba gzhan la yang zhes bya bas de nye bar brjod pa'i rang bzhin nyid bshad pa'o/ /des khyad par du bya ba brjod pa ma yin par ni sel ba'i yul can nyid du mi 'thad pas ni/des khyad par du byas pa brjod pa'i phyir de dang ldan pa'i phyogs la brjod pa thams cad mtshungs par 'gyur ro zhes smras pa gang yin pa ste/ skyon chags pa'i phyir de dang ldan pa'i phyogs nye bar brjod pa'o zhes mdo'i dgongs pa bshad pa'o/ / khyad par can nyid kyang dbyig pa la sogs pa bzhin du khyad par du bya ba dang / khyad par du bya ba'i dngos pos ni ma yin gyi 'on kyang der sgro btags pa nyid kyis 'jug pa'i phyir ro/ /de dang ldan pa'i phyogs la yang spyi dang ldan pa'i rdzas snang ba ni med kyi/ 'on kyang der sgro btags pa nyid kyis so//ji ltar bsal zhe na de la ni zhes smos so/ /don gzhan la brten nas gzhan la 'jug pa la gzhan gyi dbang du 'gyur gyi/ ldog pa la ni tha dad pa yod pa ma yin no/ /'di ltar gal te spyi nyid 'di yul yin na/ rang gi mtshan nyid la bstan pa med pa'i phyir de'i tshe der sgro btags nas rang gi mtshan nyid la 'jug pa zhes bya ba mi 'grub ste sgro btags kyang spyi de tsam yul yin pa'i phyir de'i gzhan dbang du gyur pas gzhan yul du mi 'gyur ba'i phyir ro//des na sgro btags pa'i don kyang mi 'thad do//stsogs pa'i sgras ni slob dpon gyis gsungs pa gzhan dag rtogs par bya'o/ /ji ltar log pa don gzhan ma yin zhe na/ gnyis gas zhes smos so/ /ldog pa dang log pa'i sgra gnyi gas rang gi mtshan nyid kyi rang gi ngo bo gcig kho na brjod pa'i phyir ro/ /da ni bsgrub pa'i yul can gyi phyogs las khyad ci yod ce na/gzhan sel ba'i yul can nyid do/ /gzhan sel ba zhes bya ba 'di ci zhig yin/ gal te ldog pa'i khyad can gyi don yin na/ gang zhig khyad par du 'gyur ba'i ldog pa de ci zhig /de la ni dngos po gzhan med kyi/gang zhig khyad par du 'gyur ba ni 'ga' yang med do/ /'on te rang gi rang bzhin la gnas pa'i don tsam yin no/ /de ltar na sgrub pa'i yul can gyis kyang de nyid yul du bya ba yin gyi/ gzhan ni 'ga' yang ma yin no/ /des na mngon sum yang de lta bur gyur pa'i yul can nyid do//de'i yul can nyid kyis sel ba'i yul can yin na ni de yang sel ba'i yul can du 'gyur ro/ /de bas na rig pa'i byed pa don gyi yul can du khas blangs nas sgrub pa'i yul can las 'da' ba ma yin no/ /'dir smras pa/'di sngon po ma yin snyam pa'i rnam par shes pa 'di ji lta ba bzhin sngon po la sogs pa'i shes pa rnams rnam par gcod pa'i yul can nyid do/ /'di ltar 'dir dgag pa'i don yan lag tu gyur pas de ltar rtogs pa'i rang bzhin nyid ni bsal ba yin no/ / des na shes pa 'di ni sgro btags pa'i sngon po ma yin pa dang 'dre ldog par byed pa'i sgo nas ngo bo nyid rtogs pas rnam par gcod pa'i yul can nyid yin par brjod do/ /de bzhin du sngon po la sogs pa'i shes pa sngon po la sogs pa dag la sngon po ma yin par sgro 'dogs pa/zlog par byed pa nyid kyis dngos su na don gyi yul can du gyur pa rtogs pa po'i zhen pa la ltos nas rnam par gcod par byed pa nyid du rtogs pa dag kyang gzhan bzlog pa'i sgo nas rtogs pa'i phyir sel ba'i yul can du brjod do/ /de ltar ni don de yang sel bar 'gyur ba yin te/phyogs nyid bum pa med pa yin pa bzhin no/ /rang gi ngo bo las log pa yin na yang sgro 'dogs kyi dbang gis 'dres par gyur pas de'i dus na sngon po med pa'i log par rtogs pa'i phyir ro/ /des na 'di gzhan las log pa yul du 'gyur ba'i phyir rnam par rtog pa log pa'i yul can du brjod kyi/mngon sum ni ma yin te rang gi ngo bo tsam la rnam par gnas pa'i dngos po'i rang bzhin nyid kyis rtogs pa'i phyir ro/ /des na ngo bo'i yul can gyi rnam par rtog pa nyid gzhan sel ba'i yul can gyi/ ji ltar med pa dgag pa'i yul can du blo ngan dag 'dod pa ltar ni ma yin no//ngo bo yul can nyid kyis rnam par gcod pa'i rtog pa rnams kyi rnam par gcod pa'i yul can nyid 'thad pa'i phyir ro/ /gal te ngo bo nyid gzhan bsal ba'i sgo nas rtogs pa sel ba yin na/ 'o na slob dpon phyogs kyi glang pos gzhan sel ba pa spyi'i mtshan nyid du zhal gyis bzhes pa mi 'thad par 'gyur ro//de smras pa da ni zhes bya ba'o/ /log pa gcig gzhan gyi rjes su mi 'gro ba'i phyir gcig gi sgra sbyor bas na de la ltos nas gnyis pa gzhan yin no/ /de bas na gcig gnyis pa dang rjes su 'gro ba med pa'i phyir ji ltar gzhan las ldog pa spyi yin zhes brjod pa yin no//gzhan sel ba ni log pa'i don gyi rang gi ngo bo nyid yin na/ log pa yang log pa gzhan la rjes su mi 'gro'o/ /rjes su 'gro ba med par yang spyi'i ngo bo nyid ma yin pa de'i phyir ji ltar gzhan sel ba'i spyi yin na/gang gis spyi bsal nas 'di brjod par bya ba nyid du brtag /'di ni khyad par gyi ngo bor mi 'thad do/ /sgra'i don khyad par brjod bya dang / rjod byed du ni 'dod pa ma yin no zhes bya ba la sogs pas sun phyung ba'i phyir ro zhe na/ 'di spang pa'i phyir de'i blo la zhes smos so//gzhan las ldog pa'i blo la de ltar spyi'i ngo bo nyid du snang ba'i phyir ro/ /gang zhig ce na/ de'i blo la zhes bya ba la de zhes brjod pa gang yin pa de dang 'brel te de'i blo la de de ltar snang ba'i phyir ro zhes bya ba'i don to/ /ji skad bshad pa'i tshul du rnam par gnas pa gzhan las ldog pa'i yul nyid kyis rnam par rtog pa rnams gzhan sel ba'i blo nyid du bsgrubs pa yin no//de la yang gzhan sel ba spyi'i ngo bor snang ste/ des na 'di spyi zhes brjod do/ /'di nyid gzhung gzugs pa'i phyir spyi zhes bya ba ni 'ga' yang med kyi zhes smos so//ji ltar gzhan dag gis brtags pa lta bu dngos por 'gyur ba'am/ gzhan sel ba'i ngo bo de ltar dogs pa gang yin pa ni thams cad med pa'i phyir 'ga' yang zhes bshad do/ /dngos por gyur pa'am ldog pa yang bla ste/ spyi thams cad ni yod pa ma yin no//ldog pa rjes su 'gro ba dang ldan pa ni 'thad pa ma yin no/ /gcig la yod pa ni gzhan la yod pa ma yin te/ gcig la yang 'di yod pa po nyid du ma grub pa'i phyir ro/ /ba lang ma yin pa khra bo bzhin du ser skya la yang med par zad kyi de ltar gnyi ga la yod pa 'ga' zhig ni khas blang bar 'gyur ba ma yin pas na/'dir rjes su 'gro ba ci zhig yin/ dngos por gyur pa med pa ni mdun na 'chad par 'gyur ro/ /des na dngos po'i gnas pas gzhan sel ba spyir bshad pa ni ma yin no//de dngos po la med pa'i phyir spyi'i blo gang yin pa 'di ni gzhan sel ba'i yul can yin pas na/ gzhan sel ba spyi'i ngo bor khas blangs pa yin no/ /gal te spyi 'ga' yang med na ji ltar de blo la yang med na de ltar snang bar 'gyur zhe na/ sgra'i rten can gyi blo zhes smos so//brjod pa dang 'drer rung bar snang ba rnam par rtog pa dang bcas pa la zhes bya ba'i tha tshig go/ /bum pa la sogs pa'i dngos po rigs mthun pa dang mi mthun pa las log pa chos ma 'dres pa dag kyang sre zhing skye'o/ /'di dag gi 'dre ba yang gcig dang rtogs pa gzhan dag ngo shes par byed pa ltar gcig tu byed pa ni ma yin no//ji ltar de nyid 'di yin no zhes snga phyi mthong ba gcig tu byed pa'i rang bzhin gyis na/ ngo shes pa mtshams sbyor bar byed pa'i rang bzhin yin pa de bzhin du 'dir ni khyad par khyad par gzhan dang mtshams sbyor ba yod pa ma yin no//de nyid kyi phyir rnam par rtog pa'i rtog pa yang spyi yod par rig par byed pa ma yin no zhes spyi sel ba'i rab tu byed pa ston par 'gyur ro/ /'o na ji ltar khra bo gang yin pa nyid ser skya yin no zhes ma rtogs par chos sre bar 'gyur zhe na/ rig pa'i byed pas de lta bu'i dngos por ma grub kyang gcig bzhin du rtogs pa'i phyir gcig la dmigs pa'i sgra dang don bya ba la sogs pa dang 'brel ba de dag gzhan la ma dmigs pa yin yang de nyid bzhin du 'jug pa'i phyir don du zhen pa bzhin tha mi dad par zhen pa 'di yang brjod par bya ba ma yin no zhes 'og nas rgya cher ston par 'gyur ro//ji ltar ma 'dres pa dag la 'dres par zhen ce na/ thog ma med pa'i bag chags kyi mthu zhes smos so/ /'di skad brjod pa yin te/ ma 'dres pa dag la ma 'dres pa nyid rtogs par 'gyur ba gang yin pa rnam par rtog pa 'di dngos po nyams su myong ba bzhin du dngos po nyid kyis dngos po snang ba can du bskyed pa ni ma yin gyi rang gi nye bar len pa'i stobs las de ltar skye ba yin no//de la yang rnam par rtog pa rnam par shes pa snga ma'i rjes su byed par rtogs te/ dran pa'i shes pa bzhin no//dran pa don las skye ba ma yin te med pa'i phyir ro/ /'di'i de ltar snang ba ni shes pa snga ma'i 'du byed kyi gzhi las yin no/ /de bzhin du rnam par rtog pa 'di yang rnam par rtog pa gzhan gyi 'du byed kyi rjes su 'jug par 'gyur bas 'brel par snang ba na de ltar skye ba yin no//rnam par rtog pa gzhan de yang rnam par rtog pa gzhan gyi 'du byed kyi rjes su 'jug pa'i phyir bag chags 'di thog ma med pa can yin no/ /de la dran pa ni rnam par shes pa snga ma'i 'du byed kyi gzhi las de ltar snang ba yin la/ rtogs pa de yang shes pa snga ma'i yul la phyin ci log gis stong pa'i phyir dran pa nyid du snang ba yin no//rnam par rtog pa 'di ni rang dbang du dngos por zhen pa'i bdag nyid du skye yang dngos pos byas pa'i rig pa'i byed pas stong pa'i phyir na phyin ci log de nyid las shes pa gzhan gyi 'du byed pas byas te de ltar snang yang de ltar rtogs pa ma yin pa'i phyir dran pa nyid du gsal ba ma yin no//dngos pos byas pa'i dngos po rig pa'i byed pas stong yang rnam pa de lta bu'i bag chags la brten pa zhes bya ba 'di gang las she na/ dngos pos nye bar sbyor ba med kyang shes pa gzhan gyi 'du byed kyi rtsa ba can nyid ni dran pa la dmigs pa'i phyir dang /spyi rtogs pa nyid kyis rtogs pa snga ma'i 'du byed kyi rjes su 'jug par grub pa'i phyir dang 'di'i myong ba ma yin pa'i byed pas ni des gzung ba'i yul dang mtshams sbyor bar rtogs pa'i phyir ro/ / des na don gyi yul can gyi spyi'i shes pa gang yin pa da dag gi rgyu mtshan ni gnyis yin te/ don dmigs par byed pa'i rtogs pa gzhan dang 'du byed de'o/ /don gyi nye bar sbyor ba med na/ 'du byed pa 'ba' zhig lus pa yin no/ /de yang spyi smra ba rnams kyi ltar na thog ma dang bcas pa nyid do//spyi rtogs pa mngon sum nyid yin pa'i phyir dang / mngon sum gyi rtsa ba can yin pa'i phyir ro/ /'dir ni rnam par rtog pa phyi ma'i dngos po'i sbyor bas stong pa'i rnam par rtog pa'i rtsa ba can yin pas na de yang rnam par rtog pa yang snga ma'i rtsa ba can yin pa'i phyir thog ma med pa kho na'o//des na spyi'i blo 'di ni de ltar skye ba yin no/ /des na de'i snang ba la brten nas ba lang gi tshig gi don spyi dang / ut+pa la nyid sngon po nyid dang gzhi mthun pa nyid do zhes rnam par gzhag par byed do//phan tshun rjes su 'brel bar rtogs pa'i phyir gyi/ /'dir gzhir gyur pa'i chos can gsum pa ni 'ga' yang snang ba med do/ /'o na ji ltar gzhi mthun pa'i tshig tha dad par 'gyur zhe na/ mu stegs gzhan la grags pa yin par rtogs par bya'o/ /dngos po'i dbang gis ni ma yin no zhes bshad pa ni/don med bzhin du yang zhes smos so/ /med pa yang yin la don yang yin pa don med pa ste/ spyi dang gzhi mthun pa dag kyang de lta bu yin no/ /ji ltar zhe na don rnams la zhes smos so/ /spyi dang gzhi mthun pa'i rtogs pa'i rgyu mtshan ni 'brel pa dang tha dad pa kho na yin na/de gnyis ni don rnams la mi srid do/ /khra bo la sogs pa tha dad pa las ba lang nyid gzhan ma yin par ji ltar khyad par gzhan dang 'dre bar 'gyur/ de ltar yang srid pa ma yin te/ khra bo las gzhan pa'i ba lang nyid dam ser skya de nyid yin pa ni mi srid do//de bzhin du gzhi mthun pa yang tha dad pa la brten pa 'dre ba'i mthar thug pa can yin no/ /de rtogs pa na ma rtogs pa'i phyir sngon po'i mtshan nyid kyi chos ut+pa la'i mtshan nyid las tha dad par rtogs pa las/ yang de ltar rtogs pa na/ de ltar rjes su 'gro ba la brten pas de dang rang bzhin gcig nyid du/ut+pa la sngon po la sogs pa'i rtogs pa rnams la snang bar 'gyur ro/ /des na 'di gnyi ga yang don rnam par 'grel pa dang tha dad pa'i rtsa ba can yin la/ de gnyis kyang don la srid pa ma yin no zhes bsgrub par 'gyur bar ro/ / de ltar spyi med kyang blo la de ltar snang ngo zhes bstan nas blo de gzhan sel ba'i blo nyid du bstan pa ni de thams cad kyi zhes bya ba'o/ /spyi dang gzhi mthun pa dang khyad par gyi gzhi'i dngos po la sogs pa de thams cad kyi rten ni gzhan dag las tha dad pa'i don rnams yin no/ /ji ltar gzhan dag las tha dad pa de ston pa ni/de'i 'bras bu dang rgyu can nyid kyis zhes smos so/ /rnam par nges pa can nyid kyis don rnams de'i rang bzhin ma yin pas na de las gzhan pa las ldog pa yin no/ /rnam par nges pa nyid kyang khyad par can gyi rgyu can nyid dam/ khyad par can gyi 'bras bu can nyid dam/ sngon po dang ser po la sogs pa khyad par can gyi rang bzhin gyis yin no/ /de'i 'bras bu dang rgyu can smos pa ni nye bar mtshon pa yin no/ /dbye bar bya ba'i don la brten pa nyid kyis spyi la sogs pa'i sa bon ni tha dad pa yin par brjod do//des na blo 'di ni sa bon las rang gi ngo bo thob pa'i phyir 'di ldog pa'i blo yin no/ /'di yang phan tshun du tha dad pa 'di'i sa bon yin zhes bya ba der ston par 'gyur ro/ /des na 'di ldog pa'i blo yin pa'i phyir de la snang bzhin pa dang / ngo bo gang gis snang ba de bzhin ldog pa zhes bya'o//dngos po la dngos po gzhan med pa'i rang bzhin gyi ldog pa gang yin pa de ni shes pa 'di'i sa bon du 'gyur ba yin pas na 'di ni ldog pa rtogs pa yin no/ /de ni sngar bshad pa'i tshul gyis dmigs pa la ltos nas ji ltar rtogs pa'i blo yin pa de bstan pa'i phyir sgras kyang zhes smos so//sgras kyang sgro 'dogs pa'i sgro nas mi 'dod pa sbyor ba spangs te zhes bya ba'i sgro 'dogs pa rnam par gcod pas rtogs pa po 'jug par byed do/ /'jug pa de yang de ltar rtogs pa yin pa'i phyir sgro 'dogs pa rnams gcad pas rtogs par byed pas zhes brjod pa yin no//de ltar rtogs pa de yang rnam par gcod pa rtogs pa yin pas gzhan sel ba'i yul can du 'di ji ltar rtogs she na zhes rgol ba bkod pa sngon du 'gro ba can gyis sngar bstan zin to/ /med do zhes kyang khas len pa de ltar na yang blo la snang ba yin no zhes bya ba gang yin pa spyi la sogs pa don med pa de gang zhig ce na/de rang gi ngo bo nyid bstan pa'i phyir/ de la zhes smos te/ don gyi phan 'dogs pa la mi ltos par/ thog ma med pa'i bag chags kyi dbang gis de lta bu'i blo skye ba zhes rnam par gnas pa la'o//gcig po zhes bya ba ni spyi'i rang bzhin no/ /du ma las ldog pa zhes bya ba ni gzhi mthun pa'i rten gyi don to/ /sgra rnams kyi yul du byed cing de yang blo la snang ba'i dbang gis te blo la snang bar gyur pa'i mthus yin no/ /gang gi phyir blo la rnam pa de lta bu'i rang bzhin du snang ba des na sgra rnams kyi yul du byed pa'i phyir blo la snang ba'i dbang gis yul du byed par brjod do//blo la snang ba yang blo'i rnam pa kho na yin pas de lta bur gyur pa'i don ni blo'i rnam pa nyid yin par brjod pa yin no/ /gal te de lta bu'i don blo'i rnam pa nyid yin na/da ji ltar spyi 'ga' yang med ces brjod ce na/ phyi rol gyi don gyi de kho na nyid la mi ltos pa zhes smos so/ /gal te phyi'i don de lta bu 'ga' zhig yod na ni/ de bzhin du blo yang de ltar snang ba'i phyir sngon po la sogs pa bzhin du spyi dngos po yod par 'gyur ba zhig na/de ni ma yin pas na spyi med par brjod pa 'thad pa yin no/ /gal te phyi rol de lta bu yod pa blos rjes su byed na phyi rol gyi de lta bu nyid blos mthong ba zhes bya bar 'gyur ba ma yin no/ /phyi rol med kyang de lta bu'i blo nyid spyir 'gyur mod ce na/ de'i dngos por nges pa zhes smos so/ /de'i zhes bya ba ni phyi rol gyi don gyi de kho na nyid ces brjod pa bzung ba yin no/ /blo'i snang ba ni phyi rol gyi de kho na nyid du nges pa yin te/ 'di shes pa'i rnam pa yang don gyi de kho na nyid du lhag par zhen par byas pa yin no zhes bya ba'i tha tshig go//'di skad brjod pa yin te/ gal te gzhan dang gcig tu gyur pa'i phyir phyi'i rang bzhin du gyur pa'am/ du ma la sogs pa 'di rtogs pa'i rang bzhin ltar rang gi bdag nyid la rnam par gnas pa yin na/ de'i tshe spyi yin par 'gyur ba zhig na/ de ltar ni ma yin no//de ni don 'di nyid du nges pa'i phyir 'di don rnams kyi rang bzhin gcig yin par nges pa yin na/ blo'i snang bas ni de rnams de lta bur gyur pa ma yin no/ /de'i phyir spyi ni don med pa yin no/ /'di thams cad ni ldog pa'i spyi'i ngo bo nyid yin pas na mdor bsdus te brjod pa yin no//de la ji ltar spyi med pa dang dngos po tha dad pa spyi'i rgyu mtshan yin pa dang blo'i snang ba sgra'i don dang spyi'i rang bzhin nyid dang don med pa nyid ni 'og nas de dang der rgyas par sgrub par 'gyur ro/ /ji ltar 'di sgra rnams kyi yul yin pa de bzhin du rnam par rtog pa rnams kyi yang yin no zhes bshad pa ni/de nyams su myong ba'i zhes bya ba la sogs pa'o/ /yang na sgra rnams kyi sgo nas rnam par rtog pa rnams kyi yul du byed cing zhes 'brel to/ /de zhes bya ba ni phyi rol gyi de kho na nyid 'dzin pa'o/ /des na phyi rol nyams su myong ba'i bag chags las skye ba can gyi rnam par rtog pa zhes bya ba'i don 'di yin no//sngar ni thog ma med pa'i bag chags la rten par byed la/ nyams su myong ba'i bag chags ni thog ma dang bcas pa yin pa des na rnam par rtog pa rnams bag chags nyid las byung bar brjod par 'gyur ro/ /de la rnam par rtog pa'i bag chags kyis ni rnam par rtog pa tsam la snang ba spyi la sogs pa rtogs pa yin la/gzhan dang gzhan tha dad par rtogs pa ni nyams su myong ba'i bag chags kyis yin no/ /nyams su myong ba yang sngon po med pa'i don rtogs pa tsam gyi rang bzhin yin pas na rnam par rtog pas sngon po med pa'i don rtogs pa'i rgyu yin no//de bas na 'dir mngon sum bzhin du mngon sum ma yin pa yang bag chags kyi rten nyid yin par 'gyur te/ zla ba gnyis su rnam par rtog pa la zla ba gnyis su shes pa'am/ rmi lam du mthong ba'i don rnam par rtog pa la rmi lam gyi shes pa bzhin no//de ltar na gal te rgyu mtshan gzhan las kyang snga na med pa'i rang bzhin rtogs par 'gyur na/ de'i tshe de yang bag chags 'jog par byed pa yin par 'gyur te/ dper na de ltar yongs su rtogs par byed pa rnams kyi gtsug lag gtso bo dang dbang phyug la sogs pa'i rnam par rtog pa rnams kyi yin pa bzhin no//de dag gis bag chags de 'dra ba de yang ga las she na/ log par brtags pa'i rtags kyi rtsa ba can gyi rjes su 'brang ba las so zhes brjod do//rnam par rtog pa ni sngon po la sogs pa'i shes pa bzhin nam/ zla ba gnyis la sogs pa'i shes pa bzhin du snga na med pa'i rtogs par bya ba rtogs par byed pa nyid ma yin te/ ji ltar snga na med pa'i don snang ba can gyis mngon sum mam/ der snang bas bskyed pa bzhin du de lta bu'i dngos po'i chos kyi rjes su 'brang ba rtags kyis rtogs pa las kyang skye ba yin no//de lta mod kyi de lta bu'i dngos po'i chos kyi rjes su 'brang ba na/ mi shes pa ni rjes su dpag pa ltar snang bas snga na med pa'i don rtogs te/ gtso bo la sogs pa yang rtogs pa bzhin no//mkhas pa dag la ni yang dag pa'i rjes su dpag pa ste mi rtag pa dang bdag med pa la sogs pa'i rtogs pa bzhin no/ /de'i phyir nyams su myong ba'i sgra thos pa las nyams su myong ba tsam kho nar ni mkhas pa rnams kyis mngon par zhen par bya ba ma yin gyi/'on kyang ji ltar nyams su myong ba'am der snang ba rang gi mthus dngos po 'am/ de las gzhan rtogs par byed pa na rang gi mthus rtogs par mi nus pa'i rtogs pa skyed par byed pa de bzhin du/ rtags kyi rjes su 'brang bas kyang rnam par rtog pa skye la/de ltar de rang dbang du rtogs pa yang ma yin no/ /nyams su myong ba'i bag chags yod pa tsam gyis rnam par rtog pa skye ba yang ma yin gyi 'on kyang de sad pa las yin te/ de lta ma yin na/ rtag tu skye bar thal ba'i phyir ro/ /de'i dngos po nges pa'i don ces don dam par yang de'i dngos po nges pa zhes bya ba la ji ltar dogs pa bsus te sbyar ba de bzhin du/don dang lhan cig pa'i sgras sbyar bar bya'o/ /de bzhin du de'i dngos po nges pa'i don can rnams kyis zhes 'dogs pa gzhan du yang rtogs par bya'o/ /'dir 'don pa gnyis ka las yang gcig pu du ma la sogs pa sgra rnams kyis yul du byed cing zhes de nyid yul du brjod par 'gyur ro//de yang blo la snang ba'i dbang gis zhes bya bas blo la snang bar grub pa na/ phyi rol gyi de kho na nyid la mi ltos pa zhes bya ba ni phyi rol de lta bu nyid bkag na/blo la snang ba tsam du grub pa kho na'o/ /de bzhin du don gyi sgra yang logs su 'brel par rtogs par bya'o/ /chos dang chos can gyi dngos po brjod pa gang yin pa de la phyi rol gyi de kho na nyid la mi ltos par blo la snang ba'i dbang gis yul du byas pa gang yin pa de nyid yin na zhes brjod par bstan pa'i phyir de nyid la zhes smos so//'di'i ba lang nyid ces ba lang nyid dang de dang ldan pa'i chos can gyi tha snyad gang yin pa de ni de nyid du yin pa'i phyir de chos dang chos can gyi ngo bo nyid yin pas na de la tha snyad du 'gyur ba yin pa'i phyir 'dis ni 'di'i chos dang chos can gyi rang bzhin nyid brjod do//des na chos kyi tha snyad dang chos can gyi tha snyad 'di ni de nyid la yin la de yang de nyid dang gzhan dag tu brjod par bya ba ma yin no/ /de nyid ni de'i rang bzhin yin la de las tha dad pa ni gzhan nyid do/ /gang la ltos nas brjod par bya ba ma yin pa de bshad pa ni/phan tshun zhes bya ba'o/ /chos kyi tha snyad gang yin pa de nyid chos can gyi tha snyad yin la/ de nyid gang yin pa de kho na gzhan yin no zhes 'di gnyis phan tshun de'i rang bzhin ni med pa kho na'o/ /gzhan nyid kyang de bzhin no/ /gal te de nyid kyi chos yin la de nyid chos can yin na/de'i tshe 'di gnyis phan tshun gcig pa nyid na de dag gi tha snyad kyang gcig nyid du 'gyur te/ chos kyi tha snyad dang / chos can gyi tha snyad ces bya ba'i tha dad pa rnam grangs tsam gyis byas par thal ba'i phyir ro/ / tha dad na yang tha snyad tha dad pa'i phyir chos dang chos can dag phan tshun de nyid dang gzhan dag tu brjod par bya ba ma yin na tha snyad kyang brjod par bya ba ma yin pa nyid du brjod do/ /de nyid kyi phyir chos ni zhes bya ba la sogs pa smos so/ /chos ni chos bkar ba'i gzhir gyur pa 'di zhes bstan pa'i chos can las gzhan pa yang ma yin te/de ni de las bkar ba bzhin pa nyid na de dang 'brel bas de las gzhan nyid du snang ba gzhan pa yang ma yin no/ /ji ltar rtogs she na/ tha dad pa'i rang bzhin gyi don gzhan gang yin pa de ni mi brjod pa'i phyir ro//'di'i ba lang nyid ces rtogs pa'i don la tha dad pa'i rjod pa ni ci yang med de/ de ltar rtogs bzhin pa ni de las gzhan ma yin pa'i phyir ro/ /des na de ltar gzhan du brjod par bya ba ma yin no/ /de nyid du yang brjod par bya ba ma yin par bshad pa ni/ de nyid kyang ma yin te zhes bya ba'o//de brjod pa dag ces bya ba ni chos can rjod pa dag go/ /chos can rjod pa ni rnam par gcod pa gzhan 'phen pa yin te/ des na gal te chos brjod pa yin na de ltar 'gyur ro/ /de ltar ni mi 'thad do zhes bshad pa ni de ltar na ni zhes bya ba'o/ /brjod par bya ba ma yin pa 'di gang la yin zhe na bshad pa/brjod par bya ba ma yin pa nyid 'di ni sgra'i don la yin gyi/ gzhan du ni ma yin no/ /dngos po la ni chos can las gzhan ma yin la/ chos can yang chos las gzhan ma yin no/ /sgra'i don la ni gzhan dang gzhan ma yin pa dag ma yin no//chos dang chos can nyid sgra'i don la de ltar yin gyi/ spyi dang gzhi mthun pa dag ni ma yin no/ /de nyid bstan pa ni dngos po la ni zhes bya ba'o/ /ni'i sgra ni gang gi phyir gyi don te/ gang gi phyir dngos po la rang gi mtshan nyid las spyi'i mtshan nyid de nyid dang gzhan dag tu brjod par bya ba ma yin gyi sgra'i don la ni ma yin no//'di ltar gang zhig med pa de ni yod pa dang lhan cig rang bzhin gcig tu mi 'gyur la/ de las gzhan par yang ma yin te med pa nyid kyi phyir ro/ /'di ltar bsam pa yin te/ sgra'i don la chos kyi sgras rang bzhin de nyid khyad par gzhan spangs pa'i sgo nas tha dad par bstan pas na/de nyid dang gzhan dag tu brjod par bya ba ma yin pa nyid do/ /spyi rnams ni sgra'i don la gzhan pa nyid de/ ba lang dkar po zhes ba lang nyid dang dkar po nyid gnyis tha dad pa'i phyir ro/ /de nyid kyi phyir gzhi mthun pa la chos rnams tha dad pa yod pa kho na'o//ji ltar rnam par rtog pas bzung ba'i spyi'i rang bzhin la ltos nas de dngos su na rang gi mtshan nyid du med pa'i phyir dngos po la brjod par bya ba ma yin par brjod pa de bzhin du/ chos dang chos can dag kyang brjod par bya ba ma yin pa kho na'o//ji ltar kun brtags pa'i rang bzhin nyams su myong bas chod pas rnam pa 'ga' zhig gis phyin ci log tu gyur pa rnam par rtog pa yod pa la ltos nas ni ji ltar nges pa bzhin phyi rol na yod pa'i spyi rnams dang chos dang chos can rnams gzhan ma yin pa kho na'o//de la yang 'di gnyis su 'gyur te/ chos can nyid du rtogs pa gang yin pa de nyid chos nyid du rtogs pas na 'dir gzhan ma yin pa yin la/ spyi rnams ni dngos po'i rang bzhin gang zhig ba lang zhes rtogs pa de nyid dkar po'o zhes rtogs pa ma yin gyi 'on kyang de las de khyad par gzhan kho na'o//de dag yod kyang de la tha dad pa mi bden pa'i phyir spyir/ gzhan ma yin no zhes rnam par spros par 'gyur ro/ /'di la chos dang chos can dag /ces smos te/ chos dang chos can dag tha dad pa ma yin na/ drug pa la sogs pa mi rung zhes 'chad par 'gyur ba dang bsgyur nas 'brel to//ji ltar mi rung zhe na/ tha dad pa la mthong ba zhes smos so/ /'di skad brjod pa yin te/ chos dang chos can dag gzhan nyid du brjod pa'i phyir brjod par bya ba ma yin pa nyid ni ma yin no/ /chos ni chos can las gzhan pa yang ma yin te zhes gang bshad pa de ni ma yin te/'di'i ba lang nyid ces bya ba'i drug pa med par thal ba'i phyir ro/ /stsogs pa'i sgras ni ba lang la ba lang nyid do zhes bya ba la sogs pa bzung ngo / /nyes pa gzhan yang bsags pa'i phyir bshad pa/ chos dang chos can dag tha dad pa ma yin na/mang po'i tshig gi bye brag chos can gcig la mi rung ngo / /chos can gcig la gcig gis bstan pas ni tshig gi bye brag ni de la ltos pa nyid kyis ni mang po'i tshig la sogs pa'i rang bzhin no/ /ji ltar chos can gcig la tshig gi bye brag mi rung zhe na/chos mang ba'i phyir ro zhes smos so/ /gang gi tshe ba lang nyid dang dngos po nyid dang mi rtag pa nyid la sogs pa rnams ni ba lang gi chos yin no zhes chos can ba lang gcig gi chos mang ba'i phyir mang po'i tshig 'jug pa de'i tshe khyed kyi lta ba la 'di mi rung ngo //gal te tshig gi bye brag 'di chos can la ni ma yin gyi 'on kyang chos rnams nyid la yin pa des na ji ltar chos can gcig la mi rung zhes brjod/ 'on te chos can gcig la chos mang po mi rung ngo zhes bya bar brjod pa 'dod pa yin na de'i tshe de nyid brjod par rigs so zhe na/brjod pa 'di la bsam pa ni 'di yin te/ gang gi tshe chos dang chos can dag tha mi dad pa yin te/ de'i chos mang ba'i phyir mang po'i tshig gi bye brag tu 'gyur ba gang yin pa de chos can nyid la yin par thal bar 'gyur na/ de ltar yang ma yin te/chos can gcig la de 'gal ba'i phyir ro/ /gal te chos mang mod/ de tsam gyis mang po'i tshig gi bye brag tu ji ltar 'gyur zhe na/ bshad pa/ de la zhes bya ba mang po la mthong ba'o/ /'di bzlog pa'i phyir bshad zin to zhes smos so/ /ci zhig bshad zin/gal te khyad par gzhan spong ba dang / mi spong ba yin na drug pa tsam gzhung btsugs par 'gyur gyi/ tshig gi bye brag la ji ltar lan du 'gyur zhes dogs pa la/ 'dir lan du che ba'i bshad zin pa gang yin pa de ston pa ni/ sgra rnams la zhes bya ba'o//'di skad bstan pa yin te/ khyad par gzhan spong ba dang mi spong bas nus tshad kyi rnam pa tsam zhig bstan mod kyi/ gcig tu 'chol ba'i rang bzhin gyi sgra'i tha snyad ni sgrub par nus pas na 'dir dngos po'i yul can ma yin pa nyid lan du rigs pa yin no zhes bya ba'o//'di ni bdag cag la skyon du 'gyur ba ma yin gyi/ 'on kyang pha rol po rnams nyid la yin no zhes bshad pa ni gzhan yang zhes bya ba'o/ /rgol ba gang dag gi ltar na tshig ste sgra'i dngos po'i gzhan gyi dbang yin gyi/ lhur gtso cher brjod par 'dod pa la mi brten pa brjod par 'dod pa'i gzhan gyi dbang ma yin pa de dag la ni ji skad du brjod pa'i brtsad par rigs pa kho na'o//'dir yang brjod par 'dod pa la lhur mi brten pa ni dngos po'i dbang gi gtan tshigs yin no/ /brjod par 'dod pa ni ston par byed pa'i 'dod pa yin la/ de yang dngos po las gzhan du gyur par yang 'gyur ba'i phyir dngos po'i dbang dang brjod par 'dod pa la brten pa nyid 'gal ba yin no/ /des na dngos po la brten par 'grub pa nyid ni dngos po la brten pa dang / 'gal ba brjod par 'dod pa'i gzhan gyi dbang ma yin na 'gyur ba yin no//sgra dag gi don gyi yul rtogs par dmigs pas na gnyis srid pa yin te/ dngos po'i dbang gis rtogs pa'am/ ston pa po rnams kyis de ltar 'god pa la'o/ /des na ston pa po rnams kyis ma bkod na dngos po gzhan dbang nyid do/ /'di nyid bshad pa'i phyir dngos po dang 'brel pa la nyes pa de 'jug la/dngos po dang 'brel pa brjod par 'dod pa'i gzhan gyi dbang ma yin par gal te zhes bya ba la sogs pas ston to/ /gal te gzhan la rab tu grags pa'i sgra gzhan la dgod par 'dod pa yin yang dgod par bya mi nus na de'i tshe dngos po dang gzhan gyi dbang nyid du nges par 'gyur ba yin no//de bshad pa ni skyes bu rnams kyis rab tu grags pa las gzhan ma grags pa'i yul 'ga' zhig la bya bar 'dod du zin kyang byas pa don med pas na bya bar mi nus na'o/ /'di yang ji ltar 'gyur zhe na/dngos po dang 'brel pa'i phyir te/ de nyid der mi mthun par 'gyur ba ma yin pa'i phyir ro/ /de'i tshe ji ltar drug pa la sogs par 'gyur zhes bya ba'i klan ka 'dir 'gyur ro/ /gang zhig gang la mthong ba de gal te/ de dang 'brel pa las der de ltar dmigs pa yin na/de'i tshe 'di gzhan la mi 'gyur ba'i phyir na/ tha dad pa la mthong ba'i drug pa la sogs pa tha dad pa med pa la ji ltar zhes bya ba la sogs pa'i skyon 'dir 'gyur ba yin no/ /'di ltar skyes bu brgyar 'dod kyang du ba chu la med pa'i phyir me la mthong ba'i du ba de ni der dngos po'i 'brel pas 'brel pa yin pa des na de gzhan la yod do zhes smra ba'i rgol ba ni sun dbyung bar 'gyur gyi de ltar ni ma yin no//des na gzhan dag la nye bar 'gyur yang 'dir nyes pa 'di ji ltar med pa de bstan pa'i phyir/ gang gi tshe zhes smos so/gang gi tshe tshig gang zhig smra ba pos ji lta bur rjod par byed pa nyid du nges par sbyar ba de de bzhin du rjod byed yin no/ /de'i tshe phyi rol don la mi ltos par brjod pa yin no zhes gang gi tshe zhes bya bas 'phangs pa de'i tshe nye bar byas te tha dad pa nyid kyis sbrel bar bya ste/de lta ma yin na gang 'di mthar phyin par mi 'gyur ro/ /'dis ni ji ltar 'dod pa bzhin bstan par mi nus pa dngos po'i gzhan gyi dbang rtsa bar gyur pa nyid yin par bstan nas/ bstan pas nus pa nyid kyis dngos po la mi ltos par bshad pa yin no/ /des na dngos po'i gzhan gyi dbang ma yin pa'i phyir du ba la sogs pa dang mi 'dra ba ji ltar 'dod pa bzhin dgod par nus pa nyid kyis drug pa la sogs pa tha dad pa la grags pa yang tha mi dad pa la mi ldog gi /'dod pa'i gzhan gyi dbang nyid kyis 'jug pa kho na'o/ /'di nyid bshad pa ni/tha dad pa la ni zhes bya'o/ /tha dad pa la ni drug pa'o/ /mang po la ni rdzas la sogs pa'o zhes bya ba de yang rang nyid zhugs pa ni ma yin no/ /gal te tha dad pa la drug pa dang / mang po la rdzas la sogs pa rang nyid zhugs pa yin na de ltar na tha dad pa la drug pa zhes bya ba rang nyid zhugs par 'gyur ro//de lta ma yin na tha dad pa la drug pa 'jug par mthong nas tha dad pa la ni drug pa'i zhes bya ba 'di skyes bu rnams kho nas bcug pa yin no zhes bya ba 'di la rtsod pa med do/ /dper na sngon po la mngon sum rang nyid zhugs pa la sngon po la mngon sum 'jug go zhes bya ba ni skyes bus bcug pa nyid yin pa bzhin no//des na don 'di yin te/ 'di dag yod na de lta bu'i don rtogs par gcig tu nges par 'gyur ba gang yin pa tha dad pa dang mang po dag skyes bus 'dod pa la mi ltos par rang nyid drug pa dang rdzas la sogs pa sgrigs par byed pa ni ma yin no//'on kyang skyes bus de dag tha dad pa la sogs pa de la de ltar drug pa la sogs pa sbyor bas tha dad pa la ni drug pa'o/ /mang po la ni byed pa po rnams so zhes de ltar go bar 'gyur ro/ /'di skad brjod pa yin te/don gyi khyad par la skyes bu rnams kyis sbyar ba'i sgra rnams dmigs nas gzhan dag de ltar rtogs par 'gyur te/ de lta bur gyur pa'i don rang nyid de ltar mi brjod pa'i phyir ro/ /des na sbyor ba 'di dag gi rang dbang yin pa'i phyir dang don rtogs pa yang de'i sbyor ba la ltos pa yin pa'i phyir na yul gzhan la yang sbyor ba las don de ji ltar mi rtogs/de bshad pa ni/ de bzhin du zhes bya ba'o/ /ci'i phyir don de la nges pa the tshom med pa'i rgyus brjod par srid bzhin du don gzhan la grags pa'i phyir nges par byed pa ma yin pa sbyor zhe na/ji ltar yang rung zhes gsungs te rgyu mtshan 'ga' zhig las so/ /rgyu mtshan de yang chos tha dad pa dang mi ldan pa mi shes pa'o/ /des na dngos po'i gzhan dbang ma yin pa'i phyir sbyor ba tsam gyi gzhan dbang du gyur pa rnams rmongs pas kyang sbyor ba srid pa na nges par byed pa ma yin pa nyid lhas byin la mchod sbyin du tha snyad byed pa ltar/de dang bral na ldog pa'i chos su 'gyur ba rmongs pa 'di la mtha' yod pa yang ma yin no/ /des na grags pa'i sbyor ba nges pa'i rgyu yin gyi gzhan ni ma yin no zhes brjod par mi nus te/rmongs pa gting tshugs pa las kyang grags pa srid pa'i phyir ro/ /des na sgra rnams ni 'di ltar 'jug srid pa'i phyir na sgra'i sbyor ba tsam las ni dngos po'i rang bzhin rtsad ma bcad par nges par bya ba ma yin no zhes bshad pa ni/ de la ni zhes smos so//de ltar gnas pa de la sgra rnams kyi 'jug pa sems pa gang du mang po 'jug pa'i bya ba de lta bu'i bdag nyid can dang / 'jug pa de'i dbang gis dngos po rnam par 'jog pa gang du 'jug ces dpyad nas pa Ni ni la sogs pa'i brda'i rjes su 'brangs te/ tha dad pa la sogs pa dag la 'jug pa nges par byas nas dngos po rnam par 'jog pa ni blun par ston pa 'ba' zhig tu zad do//de la re zhig 'jug pa sems pa mi 'thad pa nyid bshad pa ni brjod par bya ba'i yul can la skyes bu la rag las te/ 'jug pa rnams kyang gang du 'jug ces sems pa ni gang du skyes bu dag gis bcug par ro zhes bya bas phyir bya bar nus pa des na 'di'i 'jug pa ci zhig bya/dngos po rnam par 'jog pa bsal ba'i phyir bshad pa/ dngos po yang dag par mi ston pa zhes de skad brjod do/ /dngos po yang dag par mi ston pa gang yin pa de las ji ltar sems dang ldan pa/don rnam par 'jog par byed/ gal te dngos po yang dag par mi ston na 'di dag las tha snyad byed pa ji ltar mi ldog /dngos po yang dag par mi ston pas ni tha snyad gting tshugs par 'gyur ba ma yin te/nya phyis la dngul du brjod pa bzhin no zhe na/ ji ltar goms pa bzhin zhes smos te/ 'di dag ni rnam par rtog pa ji ltar goms pa bzhin te/ gang gis rnam par rtog pa gang 'jug par goms pa des de 'jug par byed do/ /rnam par rtog pa mi 'chad pa nyid kyis ni 'chad par 'gyur ba ma yin no//de la chos dang zhes bya ba smras te/ chos dang chos can la sogs pa sgra dag de ltar zhes bya ba gzhan la rab tu grags pa de dag ci zhig ltar gzhan du 'gyur ro zhes rnam par gzhag par byas kyi chos can la sogs pa la ldog pa dang / dngos po tha dad pa'i sgo nas rnam par gzhag pa ni ma yin no zhes bya ba 'di ga las ldog pa la grub pa dang /mang po las grub pa'i rdzas la sogs pa de dag ni der skyes bu la rag las pas na chos dang chos can la sogs pa la de dag gis ji ltar yang rung med bzhin du rab tu sbyar ba yin gyi/ dngos po nyid de lta bur gyur pa ma yin no zhes ga las shes/ stsogs pa'i sgras ni gang du chos dang chos can gyi dngos por rtogs pa med pa de lta na yang grags pa'i sgra don las phyin ci log pa yod pa dper na da ta'i zhes bya ba la sogs pa'i tshig rnams te de bzung ngo / /de bzlog pa'i phyir de lta na zhes smos so//dngos po tha dad pa'i sgo nas rnam par gzhag par byas nas tha snyad mi rung ngo / /ji ltar tha snyad mi rung zhe na/ chos dang zhes smos te chos dang chos can dag tha dad pa yin na spyi mi rung ngo / /gang gi tshe 'di'i ba lang nyid ces ba lang nyid chos can las gzhan ma yin pa de'i tshe/'di 'di'i spyi'i ngo bor brjod par bya ba yin na/ tha dad pa yin na ni spyir 'thad pa ma yin la/ de dag gi 'brel pa dang / 'di ba lang zhes gzhi mthun pa dang / ba lang dkar po zhes khyad par dang khyad par gyi gzhi'i dngos po dag mi rung ngo //tha snyad mtha' dag kyang spyi la sogs pa'i yul can yin pa'i phyir na/ chos dang chos can dag tha dad nas/ tha snyad mi sgrub cing mi dad pa la 'gyur ba gang yin pa de tha dad par mi rung mod/ tha mi dad pa la 'thad par ma mthong bar go/ /ji ltar tha dad pa la mi rung zhe na/de nyid kyi ngo bo 'am zhes smos so/ /'di skad brjod pa yin te/ tha mi dad pa la yang mi rung ba kho na'o/ /'di la 'thad pas tha dad pa la mi 'thad par ni mi smra'o/ /'o na gnyi ga la mi rung bar ji ltar 'gyur zhe na/ 'chad par 'gyur ro zhes smos so/ / rnam pa de lta bu'i dngos po la ni mi 'thad pa 'ba' zhig tu ni ma zad do/ /sgra rnams dngos po ji lta ba bzhin du 'jug pa yin na/ dngos po tha dad pa la de ltar rnam par gzhag par byas par 'gyur ro/ /sgra rnams dngos po ji lta ba bzhin 'jug na ni spyi la sogs pa la yang mi rung ngo //dngos po ji lta ba bzhin 'jug na ni de'i blo mngon sum dang 'dra bar thal bas 'khrul pas gzhag pa'i spyi la sogs pa med pa'i phyir ro zhes bya ba 'di yang 'chad par 'gyur ro/ /des ni de ltar chos dang chos can dag tha mi dad pa dgag pa'i phyir drug pa la sogs pa mi rung bar sgrub par byed pa nyid yin pa de dag brjod par 'dod pa gzhan dbang yin pas bsal te/da ni gtan tshigs 'di ma nges pa nyid du bshad pa ni gal te sgra rnams dngos po ji lta ba bzhin 'jug pa yin na/ de ltar na drug pa dang tshig tha dad pa la sogs pa tha dad pa'i sgrub byed du 'gyur ba zhig na/'di yang gal te thams cad du mi 'dod na sgrub par byed pa ma yin pa kho na'o/ /de ltar khas blang bar yang mi nus so zhes smras pa ni/ gang yang zhes bya ba'o/ /dngos po tha dad na tha dad pa'i phyir sgra 'jug pa'i khyad par dngos pos byas pa kho nar 'dod pa gang yin pa de'i btsun mo rnams zhes tha dad rnam par gzhag pa'am/grong drug ces tha mi dad par rnam par gzhag pa 'di la rgyu ci yod/ 'di skad brjod pa yin te/ sgra 'jug pa'i khyad par dngos pos byas nas btsun mo rnams grong drug ces bya ba 'di la dngos po tha dad pa dang tha mi dad par gzhung btsugs par brjod dgos so//'di ltar bud med gcig la yang btsun mo rnams zhes mang po'i tshig gi mtha' can gyis bstan pa yin no/ /des na bud med gcig la tha dad par ma bsgrubs par ni sgra 'jug pa'i khyad par 'di dngos po tha dad pas byas par mi 'thad do//de bzhin du grong drug ces grong khyer drug po dag gcig gi tshig mtha' can gyis brjod par yang tha mi dad pa med par ji ltar 'gyur/ 'dir ni zad pa ma yin gyi nam mkha'i rang bzhin zhes tha dad par rnam par gzhag pa'am/mkha' nyid ces tha mi dad par rnam par gzhag pa la rgyu ci yod/ /nam mkha'i rang bzhin zhes bya ba'i drug pas nam mkha' las tha dad pa'i rang bzhin bstan pa yin na/ gang zhig 'di lta bu drug pas bstan par 'gyur ba tha dad pa de la rgyu ci zhig yod//rang bzhin de yang mkha' nyid ces bstan pa na/ mkha'i sgra 'jug pa'i rgyur gyur pa spyi yin par 'gyur te/ yon tan gang yod pas rdzas la sgra dgod par 'gyur ba de brjod pa na twa dang tal gyi rkyen nyid ces bya bar 'gyur ro zhes 'jug pa'i rgyu mtshan brjod pa la nyid kyi rkyen khas blangs pa'i phyir ro//khyad par dag la sgra 'jug pa'i rgyu mtshan yang spyi kho na yin te/ des na 'dir mkha' nyid ces bya ba du ma'i spyi nyid rtogs par bya ba yin no/ /spyi yang tha dad pa dag la yod par brjod pas na/ gang la sdud par byed pa'i mkha' nyid yod par 'gyur ba nam mkha' zhes bya ba tha dad pa gang zhig yod//des na gang gis tha mi dad par brjod pa'i sgra 'dir 'gyur ba mkha' nyid ces bya ba tha mi dad pa'i rgyu mtshan brjod dgos so/ /don 'di nyid ni gang gi tshe zhes bya bas 'chad do/ /stsogs pa'i sgra'i don ni bye ma gcig la yang zhes bya ba'o//bud med de la gang gis na btsun mo rnams zhes sgra 'jug pa'i khyad par de lta bur 'gyur ba'i mang po nyid ci zhig yod/ 'di la smras pa/ gal te nus pa tha dad pa yin no zhe na/ nus pa tha dad pas de lta bur 'gyur ba yin no zhes 'brel to//dogs pa 'di la da ni zhes bya ba'o/ /'di skad brjod pa yin te gal te bud med la nus pa tha dad pas 'dir 'di tha dad pa'i rgyu yin la tha dad pa de las kyang sgra 'jug pa tha dad pa yin na/ de'i tshe shing zhes gcig gi tshig tu mi 'gyur te/ de las yang nus pa'i dbye ba mang po nyid yod pa'i phyir ro//gang la gcig gi tshig tu 'gyur ba nus pa gcig pa ni 'ga' yang med do/ /mang po nyid kyis rtag tu mang po'i tshig grub bzhin du legs par bstan pa'i phyir btsun mo zhes bya ba la sogs pa'i tsheg rnams mang po'i tshig gi mtha' can du ston pa'i 'bad pa yang don med do zhes ston pa ni/'bad pa yang zhes bya ba yin no/ /gal te dngos po tha dad pa la brten nas shing zhes bya ba la sogs pa dag la gcig gi tshig tu 'gyur ro zhe na/ btsun mo rnams zhes bya ba 'di la yang 'gyur ro/ /'di skad brjod pa yin te/tha mi dad pa dang nus pa tha dad pa yin pa na/ gal te nus pa tha dad pa la brten nas ni mang po'i tshig dngos po'i tha mi dad pa la brten nas ni gcig gi tshig yin no/ /des na 'dir res 'ga' ba'i brjod par 'dod pa la brten nas de lta bu'i dngos por 'gyur gyi/ de'i tshe rtag tu mang po'i tshig gi mtha' can du ni mi 'gyur ro//yang na gang gi shing rnams zhes tshig tha dad par mi 'gyur ro/ /dngos po tha mi dad pa mang po'i tshig dang 'gal lo zhe na/ btsun mo rnams zhes bya ba 'dir yang mi 'gyur ro/ /gang gi phyir de lta yin na de'i phyir sgra'i legs pa nyid kyi nges pa dngos po tha dad pa med kyang tshig tha dad pa 'di byed pa na sgra rnams kyi sbyor ba la de ltar nges par byed pa'i 'dod pa rang dbang can du ston pa yin no//dngos po de lta bu ma yin pa gzhan du gyur pa yin yang 'dir nges par bya ji ltar nus/de'i brda la brten nas deng song ba rnams kyang tha snyad byed pa yin te/ gzhan du brda brtags na ni gzhan du yang 'gyur ro/ /gal te gcig la yang mang po'i tshig mtha' can legs pa nyid du nges pa byed pa ma yin nam zhe na/ bden mod kyi de lta na yang tha dad par ston par byed pa yang 'gyur ba ni ma yin te/ de tha mi dad par ston pa nyid ni brjod par 'dod pa'i gzhan dbang ma yin par mi 'gyur ro//des ni de ltar gang las tshig tha dad par 'gyur ba nus pa tha dad pa ni 'dir tha dad pa'i rgyu mtshan ma yin no zhes bsgrub pas tshig tha mi dad pa'i yul la yang tha mi dad pa'i rgyu mtshan med par bshad pa rnam par dgrol ba'i phyir/grong khyer drug ces bya ba yang zhes smos so/ /gcig gi tshig nyid bsdu ba'i khyad par la brten par dogs pa sel ba ni/ grong khyer nyid kyang zhes bya ba'o/ /'di skad brjod pa yin te/ bsdu ba'i khyad par la brten nas/ gcig gi tshig yod pa yin na/de nyid ni gal te gcig por 'ga' zhig med na brda tsam du 'gyur te/ sgra rnams skyes bu'i 'dod pa'i gzhan gyi dbang du 'gyur ba'i phyir ro zhes bya ba kho bo cag gi 'dod pa nyid gsal bar 'gyur ro/ /dngos po gcig yod na ni sgra don ji lta ba bzhin 'jug par 'gyur ba zhig na de ni yod pa ma yin no//'di ltar re zhig grong khyer nyid 'ga' zhig brjod par bya ste des na gang la gcig gi tshig tu 'gyur ba de dang 'brel pa can sdud pa zhes bya ba gzhan yod par 'gyur ba yin te/ de nyid de las rtogs pa'i phyir ro/ / rtogs pa ma yin na ni gcig yan lag ma yin no/ /gang gis sdud pa gcig tu 'gyur ba grong khyer zhes bya ba ni 'ga' yang med do/ /ji ltar grong khyer zhes bya ba cung zad med ce na/ khang bzangs dang zhes bya ba la sogs pa smos so/ /grong khyer nyid kyang cung zad kyang med na zhes bya bas med pa nyid brjod pa ni ma yin gyi/'on kyang rdzas ma yin la 'di dag la ldan pa yang med do zhes bya ba yin no/ /grong khyer rnams kyi ldan pa sdud pa yin par 'gyur na/ de ni grong khyer rnams rdzas kyi rang bzhin ma yin pas ldan pa yang med pa'i phyir sdud pa ga la yod/khang bzangs dang skyes bu la sogs pa rigs mi mthun pa rnams tshogs pa la grong khyer du rtogs pa 'byung ba yin te/ tshogs pa'i sngon rol du ni 'di dag la grong khyer rtogs pa yod pa ma yin no/ /de dag tshogs pa dag gis rdzas skyes pa zhes bya bar 'gyur na/rigs mi mthun pa rnams ni rdzas rtsom par smra ba rnams kyis khas mi len te/ des na gang las grong khyer rdzas yin par 'gyur ba khang bzangs la sogs pa ni rdzas rtsom par byed pa ma yin no/ /da ni 'di dag la ldan pa med do zhes bstan pa'i phyir bshad pa/gang gi phyir khang bzangs ni so phag la sogs pa tshogs pa'i rang bzhin yin pa des na tshogs pa dang ldan pa'i rang bzhin la khang bzangs kyi blor 'gyur ba yin no/ /de ni rang nyid ldan pa'i bdag nyid yin pas/ grong khyer gyi rang bzhin khang bzangs la sogs pa gzhan dang mi ldan pa'i yang phyir ldan pa med do zhes 'brel to//de'i bsam pa ni 'di yin te/ gal te grong khyer rdzas yin na ni de'i tshe/ de dag gi ldan pa bsdus pa yin par 'gyur te ldan pa ni yon tan yin pa'i phyir dang / de 'ang rdzas la brten pa'i phyir ro/ /gang gi tshe grong khyer zhes bya ba rdzas ma yin gyi/'on kyang so phag rnams kyi khang bzangs la sogs pa'i bdag nyid dang / skyes bu rnams kyi 'dus pa'i mtshan nyid kyi ldan pa nyid yin pa de'i tshe/ ldan pa'i bdag nyid kyi grong khyer rnams kyi sdud pa ldan pa yin par ga la 'gyur te/ yon tan rnams la ni yon tan yod pa ma yin no//de skad du yang yon tan la yon tan brten par ni ma bshad do zhes smras pa yin no/ /bya ba'i bdag nyid sdud pa yin yang ldan pa med pa nyid kyis bsal ba logs su bsal bar bya ba ma yin no/ /sdud par byed pa de ni sbyor bar byed pa yin na 'di dag ni sbyor bar mi nus pa'i phyir ji ltar 'di dag la sdud pa yod par 'gyur/gal te rdzas ma yin pa'i phyir grong khyer rnams la yon tan gyi bdag nyid kyi ldan pa med na/ grangs drug kyang med par 'gyur te/ de yang yon tan gyi bdag nyid yin pa'i phyir ro zhe na/de khas blangs pa'i phyir de nyid kyi phyir zhes smos so/ /grangs shes pa med mod/ 'di ni 'gal ba gzhan yin no/ /'di ni gzhan la yang rang gi 'dod pa mi 'thad par bstan pa'i phyir brjod pa yin no/ /dngos su na ni grong khyer zhes bya ba gcig po 'ga' yang yod pa ma yin te/'di ltar skyes bu la sogs pa nyid don dam par yod pa yin la de dag kyang rdul phra rab kyi rang bzhin yin pa'i phyir du ma'i bdag nyid can yin no/ /rdul phra rab gcig gi rang bzhin gang yin pa de yang tha snyad kyi yul du mi 'gyur ba'i phyir dngos por na 'ga' la yang gcig gi tshig yod pa ma yin no//skyes bu dang khang bzangs la sogs pa dang / sa la sogs pa las ma gtogs pa'i grong khyer zhes bya ba yang 'ga' yang snang ba med pas drug pa 'di rnams la dngos po gcig yod par gsal ba ga la zhig /des na grong khyer drug ces bya ba'i sgra 'di ni dngos po'i yul can ma yin pa kho na'o//des na de ltar ldan pa grong khyer yin na tha mi dad pa blo 'di med par bsgrubs te/ yod pa yang grong khyer nyid du mi rung bar bstan pa'i phyir/ gal te zhes smos so/ /grong khyer ni yod pa yin no/ /gal te de yang thams cad yin na ni kun dga' ra ba la sogs pa yang grong khyer yin par 'gyur ro//des na de yang yin la ldan pa yang yin pa khang bzangs kyi mtshan nyid kyi ldan pa de dang skyes bu de gnyis kyi khyad par byas pa grong khyer yin te/ khang bzangs dang skyes bu'i yod pa grong khyer yin no zhes bya ba'i don to//dogs pa 'di zhe na zhes bya bas bsu nas/ bzlog pa'i phyir bogs dbyung du med pa zhes smos so/ /'di skad brjod pa yin te/ gang zhig gzhan las tha dad pa'i ngo bo gang yin pa de ni tha dad par byed pa'i khyad par nye bar blangs pas de las tha dad par ston par byed do//dper na ba lang dkar po khyer shog ces bya ba bzhin no/ /gang la tha dad pa nyid med pa de dag khyad par ldan pas khyad par bstan par bya ba ji ltar yin/ gang gis khyad par nye bar blangs pas bstan par bya ba kun dga' ra ba'i yod pa dang skyes bu la sogs pa'i yod pa tha dad pas ni ma yin pas na/des khyad par byed pa'i yod pa grong khyer yin no zhes bya bar mi 'thad do/ /des na grong khyer gyi bye brag kyang mi rung bas na grong khyer drug ces bya bar ga la 'gyur/ de nyid kyi phyir yod pa yang zhes ston par byed do/ /yod pa ni gcig yod pa'i phyir na dbye ba med pas 'phags pa'i grong khyer ro//kla klo'i grong khyer ro zhes khyad par blangs kyang tha dad par mi 'grub pas grong khyer mang po nyid grub pa'i phyir grong khyer rnams shes pa mang po'i tshig tu mi 'gyur ro/ /de ltar yod pa la khyad par med pa'i phyir grong khyer nyid yin pa bsal ba na/yod pa dang skyes bu la sogs pa lhan cig pa nyid grong khyer yin par 'gyur te/ yod pa la khyad par med cing yod pa 'thob pa dang skyes bu dang ldan pa la sogs pa yang grong khyer ma yin pas de las khyad par du gyur pa 'ga' zhig de ltar brjod par bya ba'i phyir skyes bu la sogs pa de dag dang yod pa lhan cig pa'i dngos po grong khyer yin no//khang bzangs la sogs pa de nyid lhan cig pa'i dngos po grong khyer yin mod/ yod pas ci bya zhe na de ltar brjod par nus pa bden mod kyi 'on kyang skyes bu la sogs pas khyad par du byas pa'i yod pa'i grong khyer yin no zhes brjod pas gang gi tshe khyad par dang khyad par can gyi dngos po bsal ba de'i tshe/de gnyis khyad par du bya ba dang khyad par du byed pa yin pas na ldan ba'i dngos po tsam de ltar yin no zhes bya bar 'gyur ro//der gyur pa de grong khyer ma yin pa bsal na gzhan yang bzlog pa grub pa kho na'o/ /des na 'di bzlog pa'i phyir phan par bya ba dang / phan par byed pa ma yin pa zhes smos so/ /'di skad brjod pa yin te/ gang gis 'di ltar 'gyur ba grogs byed pa yang dngos po cung zad gcig tu brjod dgos so//de yang ldan pa la sogs pa'i mtshan nyid du ni mi nus te/ de ni rdzas la yod pa nyid kyis khang bzangs la yang mi 'grub pa'i phyir ro/ /de lta na yang 'di dngos po khyad par can du 'gyur ba'i rang bzhin 'ga' zhig yin pas phan gdags bya 'dogs byed kyi dngos por 'gyur na de ni 'dir med de/yod pa rtag pa'i phyir ro/ /phan gdags bya 'dogs byed kyi dngos po yin yang rtogs pa gcig gi rten du gyur pa'i dngos po tha dad pa 'ga' yang ma grub pas na skyes bu dang khang bzangs dang yod pa tsam 'dir lus pa yin na/de ltar na yang grong khyer zhes gcig gi tshig 'dir ga la 'gyur zhes bshad pa ni/ skyes bu dang zhes bya ba la sogs pa yin no/ /'on te de dag 'ga' zhig tu nus pa tha mi dad pa la brten nas gcig gi tshig gzhung 'dzugs na de'i tshe nus pa tha mi dad pa'i phyogs la dngos po bzhin du tha dad pa'i phyir mang po'i tshig tu 'gyur ro//tha dad pa'i phyogs la yang nus pa la phan 'dogs pa'i nus pa yang tha dad par thug pa med do/ /de de las tha mi dad na ni phan gdags par bya ba'i nus pa yang tha mi dad pas na gcig gi tshig tu mi 'gyur ro//'di nyid ni gal te 'di lta bu rnams zhes bya ba nas gyi na'o zhes bya ba'i bar gyis bshad do/ /phyed phyi ma bshad pa'i phyir nam mkha'i zhes smos so/ /de ltar tha dad pa de yang spyi tha mi dad pa nyid du 'gyur ba yin na/ de la ni tha mi dad pa mi 'thad do zhes bshad pa ni/de la zhes bya ba'o/ /gal te de la spyi la yod na de'i tshe 'di tha dad par yang 'gyur ba zhig na de ni med pa'i phyir nam mkha'i rang bzhin nyid nam mkha'i rang bzhin zhes brjod par 'gyur na de yang mi rung ngo / /des ni de ltar tha dad pa'i rgyu mtshan nyid bsal ba yin no//spyi'i rang bzhin nyid bsal bas ni tha mi dad pa'i rgyu mtshan yang spangs par 'gyur bas ngag gcig tu nye bar bkod do/ /nam mkha' rnams mang po yin na ni de la spyi yod par 'gyur na/ de ni ma yin pas ji ltar de la spyi yod par 'gyur/ gal te khyab pa nyid la sogs pa spyi'i ngo bor 'thad pa ma yin nam/ bdag la sogs pa bsal ba gzhan la yang yod pa'i phyir ro/ /des na de dag nyid de ltar tha mi dad par bstan par 'gyur ro zhe na/ ma yin no zhes bshad pa ni khyad pa nyid la sogs pa zhes bya ba'o/ / de dag la ni mkha' nyid ces brjod pa ma yin no/ /don gzhan la ni zhes smos te/ gang zhig yod pas gsal ba de la nam mkha'o snyam par rtogs par 'gyur ba de ni nam mkha' nyid ces bya bar brjod pa yin te/ ba lang nyid yod pas khra bo la sogs pa la ba lang ngo snyam pa bzhin no/ /des na gal te khyab pa nyid dang ldan pas nam mkha' nam mkhar 'gyur na/bdag la sogs pa'i gzhan dag kyang khyab pa nyid dang ldan pas nam mkha'i ngo bo nyid du thal bar 'gyur ba'i phyir ro/ /de ltar ni rigs pa ma yin te/ de dag ni de'i rang bzhin yin pa nyid du mi rung ba'i phyir ro//gzhan yang khyab pa nyid ces bya ba ni thams cad ni yod pa nyid la bya ba'o/ /gal te de mkha' nyid yin na ni khyab pa nyid la sogs pa rang bzhin med pa nyid du thal bar 'gyur ro zhes bshad pa ni/ de dag kyang zhes bya ba yin no/ /dper na rdzas rang gi ngo bos ni ba lang dang ba lang ma yin par rnam par gzhag par mi nus te/ba lang nyid dang ldan pas ba lang du rnam par 'jog pa de bzhin du/ nam mkha' rang bzhin med pa yang de lta bu'i ngo bo khyad par du gyur pa'i nam mkha' dang ldan pa las yin no/ /de yang khyad par nyid la sogs pa yin pas de dag kyang rang bzhin med pa nyid du thal bar 'gyur ro//khyad par rnams kyi khyad par nyid ni rang gi ngo bor rten nye bar sgyur ba nyid yin no/ /des na nam mkha' ji lta ba bzhin nam mkha' nyid kyang de lta bu'i rang bzhin du rtogs par bya ba'i phyir ni 'di rang bzhin med pa nyid yin no//'on te khyab pa nyid la sogs pa nam mkhar rtogs pa'i rten du gyur pa'i khyad par rnams rang bzhin med pa ma yin yang nam mkha' nyid rang bzhin med pa yin na/ de'i tshe ha cang thal bar 'gyur te/ ba lang nyid dang ldan yang khra bo la sogs pa ba lang ma yin par 'gyur ro//de bshad pa ni de yang zhes smos te/ yang gi sgra ni sdud pa'o/ /de zhes bya bas ni nam mkha' bzung ba yin no/ /de ltar na yang rtogs pa med do/ /rtogs pa'i yul ma yin par thal ba'o/ /gal te de lta bu ma yin pa'i khyad par du gyur pa'i spyi dang ldan yang rang bzhin med pa yin na ni ba lang nyid dang ldan yang ba lang la ba lang ngo zhes rtogs par mi 'gyur te/de dang ldan yang ba lang ma yin pa'i rang bzhin nyid srid pa'i phyir ro/ /gal te khyad par nyid la sogs pa ni nam mkha' la yod pa nyid yin no//de yang rang bzhin med pa yin pa'i phyir nam mkha' nyid gzhan dang ldan yang de dag rang bzhin med pa ma yin par ji ltar 'gyur zhe na brjod pa/ nam mkha'i rang bzhin ni rang bzhin med pa yin la/ de'i khyad par yang nam mkha' nyid yin no/ / khyab par byed pa nyid ni khyab par byed pa yin no/ /des na khyab par byed pa nyid kyis ni rang bzhin med pa ma yin no/ /dper na rdzas gcig nyid ba lang nyid las ni ba lang nyid du 'gyur zhing khra bo nyid las ni khra bo nyid yin gyi/ ba lang nyid khra bo ni ma yin pa bzhin no/ /de bzhin du dngos po drug gi tshogs zhes bya ba la sogs pa'i sgra rnams kyang dngos po drug gi ngo bo rnams kyi tshogs gzhan med pas dngos po ji lta ba bzhin du 'jug par ji ltar 'gyur/de ni spyi ma yin te/ drug po dag la spyi yod pa'i phyir dang / spyi la yang spyi med pa'i phyir ro/ /grangs dang ldan pa yang ma yin te/de rnams la yon tan yod pa'i phyir dang / de yang yon tan ma yin pa'i phyir ro/ /de bzhin du gzhan dag kyang rtogs par bya'o/ /de bshad pa ni/ de bzhin du zhes bya ba la sogs pa'o/ /des na de ltar gang phyir dngos kun zhes bya ba la sogs pas de'i rang bzhin brjod par sngon du 'gro ba na/gzhan sel ba'i yul can nyid kyi tshad ma brjod de/ de la 'ang gzhan las ldog pa dang zhes bya ba la sogs pas slob dpon gyi sems gzhan du brjod par dogs pa brjod par rnam par gzhag pa drungs phyung ba nyid kyis lan btab nas/da ni gzhan sel ba'i sgo nas yul du byed pa'i rnam par rtog pa rnams kyi byed pa gang yin pa de'i skabs dbye ba'i phyir da ni zhes bya ba la sogs pa spangs zin pa'i rgol ba nyid bkod do/ /nam mkha'i zhes bya bas bshad zin pa'i lan nyid 'debs so/ /'di skad bshad pa yin te/gal te yang mkha' las tha dad pa'i mkha' nyid ces bya ba yod pa ma yin pa de lta na yang mkha' zhes mi brjod kyi/ 'on kyang mkha' nyid ces brjod pa gang yin pa de ni nam mkha'i don gzhan las log pa'i ngo bo nges par bzung bas khyad par gzhan spangs pa byas te/nam mkha' tsam gyi ngo bo khyad par gzhan spangs nas shes par 'dod pa la/ mkha' nyid ces brjod pa yin no/ /de de ltar de'i ngo bo brjod pa bshad pa thob nas/ glags rnyed de rtsod pa ni thams cad las zhes bya'o/ /'di skad brjod pa yin te/ sgro 'dogs rnam par gcod par byed pa nyid kyis tha dad pa'i yul can gyi dngos por 'gyur ba ngo bo rtogs par byed par yang rnam par gcod pa'i sgo kho nas byed pa'i phyir 'di sngon po ma yin no zhes brjod pa dang mtshungs par 'gyur ba'i sgra rnams kyang gal te dngos po rjod par byed na cha med pa'i don thams cad las log pa nyid shes pas 'dzin par 'gyur te/mig la sogs pa bzhin no/ /des na bsgrub pa'i yul can kho nar 'gyur bas gzhan sel ba la brten pa'i sgra dang tshad ma gzhan 'jug pa nyid nyams par 'gyur ro/ /des na dngos po'i yul can yin na thams cad las log pa brjod par 'gyur na de ni mi srid do//de nyid kyi phyir gtan tshigs brjod pa'i bsam pas thams cad las log pa nyid kyis rang gi ngo bo khyad par du byas pa'o/ /gang gi phyir thams cad las log pa de'i phyir/ rang gi ngo bo brjod par mi srid de brjod na de lta bur gyur pa nyid du brjod par thal ba'i phyir na/rang gi ngo bo rig pa'i 'bras bu can nyid du 'thad pas tha dad par byed pa nyid ma yin par 'gyur ba'i phyir ro/ /'di dgag pa'i phyir/ slob dpon gyis ngo bo nyid ces gsungs so/ /gang gis na der snang ba'i blo skyed par byed pas de nyid brjod par bya bar 'gyur ba ngo bo de nyid de/thams cad las log pa'i ngo bo gang yin pa de nyid de/ sgras blo la 'jog par ni ma yin no/ /de nyid 'jog pa ma yin no zhes smras pas de ni mi 'jog gi gzhan ni 'jog go zhes brjod pa yin na/de la re zhig de mi 'jog go zhes bya ba de gzhung gzugs pa'i phyir dbang pos mi sod pa nyid ma yin par thal bar 'gyur ba'i phyir ro zhes bshad do/ /gal te dngos po de'i ngo bo nyid gang yin pa de nyid 'dir brjod pas 'jog par 'gyur na ni dbang po'i mngon sum dang 'dra bar gsal bar 'gyur ro//sgras de'i ngo bo 'jog pa ni don gyi rnam pa can gyi blo skyed pa yin te/ de'i blo nyid kyi don dam pa ni de'i rnam pa tsam yin pa'i phyir ro/ /sgras kyang don gsal bar byed pa na/ don gyi rnam pa can gyi rnam par shes pa nyid bskyed par bya ba yin no zhes bya ba ni rnam par gnas pa'i grub pa'i mtha' la ltos nas bshad pa yin no//'di mngon par zhen pa'i yul ni ma yin no/ /rnam pa med pa'i don gyi yul can gyi rig pa byed na yang don rig pa'i rang gi ngo bo ji lta bur gyur pa nyid du rtogs pa de lta bu'i rang bzhin nyid don gyi ngo bo de ltar rig par byed pas/sgra don rig pa byed pa kho nar 'gyur ba kho na'o/ /dper na rdza mkhan bum pa mngon par sgrub pa'am/ so phag bskyed pa na/ bum pa'i rang gi ngo bo ji lta bur gyur pa nyid du/ dmigs pa de lta bu nyid byed pa gang gi de ma thag tu dmigs pa'i byed pa des 'dis bum pa byas so zhes brjod la/ji lta bur gyur pas gzhan du gyur pa de ni/ gzhan byas par 'gyur ba yin gyi/ rdza mkhan yin zhes te de la 'gyur ba gang yin pa de thams cad rdza ma nyid du 'gyur ba ni ma yin no//de bzhin du rnam par rtog pa don rtogs par byed pa'am/ sgra don rtogs pa'i rgyu yin no zhes khas blangs par gyur kyang don rtogs pa'i rang bzhin dpyad par bya ba yin no/ /gal te 'di don rtogs pa ji lta bu yin par dmigs pa de lta bu nyid yin na ni des na 'di don rtogs pa dang sgra don rtogs pa'i rgyu yin pa nyid do//dbang po byed pa dang ldan pas don rig pa na don rtogs pa dmigs pa yin no/ /gang la don gsal bar gyur pa'i ngo bo de nyid don rig pa yin la/ mngon sum la don gsal ba ni rtsod pa med do/ /des na gal te rnam par rtog pa yang don rig pa yin na ni 'dir yang don gsal bar 'gyur bas sgra dang rjes su dpag pa'i yul dbang po las 'das par ji ltar 'gyur/dbang po las ma skyes pa'i shes pa yin pa'i phyir ro zhe na/ gsal bzhin pa'i dngos po ni dbang po las ma 'das pa'am/ mngon sum du brjod pa yin gyi/dbang po 'brel pa tsam gyis ni ma yin no/ /'on kyang 'di'i de lta bur gyur pa nyid ni dbang po dang 'brel pa las yin pa'i phyir dbang po las ma 'das par brjod pa yin no/ /des na rig pas yul du byas pa'i dngos po nyid gsal ba dang / mngon du byas par 'gyur ba yin no//des na gal te rnam par rtog pa'i rig pa zhugs kyang yul gsal bar 'gyur ba'am mngon sum du byas pa ma yin na/ 'o na rig pas yul du byas kyang mi 'gyur ba gang yin pa gsal bar 'gyur ba'am/ mngon sum du byas pa gzhan gang zhig yin/des na don gyi yul can nyid yin na don gsal ba la 'khrul pa med pa'i phyir don gyi yul can gyi rtogs pa thams cad ni mngon sum nyid dang / sgra la sogs pa yang dbang po dang mtshungs par 'gyur ro/ /gal te ngo bo de blo la mi 'jog na/ 'o na gang 'jog ce na/'di de lta bu zhes smos so/ /snga mas ni don gyi rang bzhin 'jog pa bkag la/ 'dis ni rang bzhin gzhan 'jog par bshad pa yin no/ /smra ba po 'di skabs su bab pa'i ngo bo gang yin pa de lta bu de shes par bya'o snyam nas te/ rtogs pa'i yul du bya'o snyam du bsams kyang rnam par rtog pa'i gzugs brnyan gtod par byed pa 'ba' zhig tu zad do//dbang po'i shes pas rtogs pa'i don ni 'di'i gzugs brnyan ji lta bur gyur pa de lta bu nyid do/ /bdag nyid kyi rnam pa de dang 'dra ba yin te/ me long gi gzugs brnyan bzhin no//rnam pa de lta bu'i rnam pa med par de rig pa med pa'i phyir ro/ /rnam par rtog pas ni don ji ltar 'gyur ba de ltar rig pa ma yin te/ dbang pos mi sod pa ma yin par thal ba'i phyir ro/ /des na 'di ni gzhan du 'gyur ba rig pa'i rang bzhin nyid do//ji lta ba bzhin du rig pa'am/ de lta bur gyur pa'i rnam pa dang ldan pa nyid ni de rig par grub par nges pa yin pa'i phyir na rnam par rtog pa'i snang ba'i gzugs brnyan don dang mi mthun par brjod do/ /des na don 'dis na/ rnam par rtog pas gzugs brnyan khyad par du byas so//gal te 'dir sngon po la sogs pa'i rang bzhin du rtogs pa de lta na yang phyi rol gyi sngon po la sogs pa'i rang bzhin ji lta bur gyur pa de lta bu nyid 'di la mi snang ste/ mngon sum nyid du thal ba'i phyir ro/ /des na rnam par rtog pa'i rnam pa ni phyi rol gyi sngon po dang mi 'dra ba yin na /'di la mi 'dra ba ci zhig yod ce na/ ci mi 'dra ba ni mi shes te/ gang dag mig byed pa med pa na yang rnam par rtog pas gzugs rtogs pa na bdag gis gzugs ma mthong zhes bya bar 'gyur ba'i rtogs pa po nyid la dri bar bya ba yin no//des na gzugs rnam par btags pa la yang ma mthong bar rtogs par 'gyur ba gang yin pa rig pa'i yul las gzhan pa'i dmigs pa nyid ci zhig yin/ de'i phyir des na mthong ba'i yul du gyur pa'i rang bzhin gang yin pa de ni 'dir mi snang gi 'on kyang gzhan nyid snang ba yin pa'i phyir de ltar rtogs pa yin te/des na mi 'dra ba ni de nyid yin no/ /blo gros blun po gang dag 'dir yang rang gi ngo bo mi 'dra bar bstan par ma nus pas don bya bar mi nus par byas pas mi mthun par ston pa de dag ni kho bos gzhan du rgyas par bkag zin to//brtags pa'i don kyang rig bya'i phyir/ /gzhan rtogs med phyir 'bral dbyer med/ /de ltar las byed med pa las/ /bzlog na sgro 'dogs la shes nyid/ /ces bshad zin to/ /gal te don gyi rnam pa dang mi 'dra ba'i gzugs brnyan nyid/ rnam par rtog pa'i gzugs brnyan yin na/dung ser por shes pa la sogs pa dag gi rnam pa yang rnam par rtog pa'i gzugs brnyan du 'gyur te/ dkar po la sogs pa dang mi 'dra ba'i gzugs brnyan yin pa'i phyir ro/ /'di dag rnam par rtog pa'i rnam pa yang ma yin te/ de'i shes pa rnam par rtog pa med pa'i phyir ro//des na don dang mi 'dra ba'i gzugs brnyan nyid ni/ rnam par rtog pa'i gzugs brnyan ma yin no/ /brjod pa ser po la sogs pa'i rnam pa dag ni de'i yul dang dus nges pa'i don dang mi 'dra ba nyid kyis mi 'dra bar brjod de/ de'i yul gyi rnam par bcad par gsal ba'i dung ser po de na med pa'i phyir te/de ni dkar po'i ngo bo yin pa'i phyir ro/ /de ltar don de gtan mi srid pa'i phyir ni ma yin no/ /ser po'i rnam pa'i dung gtan mi srid pa ni ma yin te/ 'on kyang de na med pa'i phyir du dung ser por rtogs pa dngos po'i yul can ma yin pa nyid do//rnam par rtog pa la ji ltar snang ba'i rnam pa de dang 'dra ba ni/ ye mi srid pa kho na ste/ des na rnam par rtog pa'i rnam pa dngos po dang mi mthun pa yin no/ /de nyid kyi phyir rnam par rtog pa dngos po snang ba ma yin pas mngon sum ltar snang bar bshad de/dngos po yod kyang rnam par rtog pa de ltar rtog pa med pa'i phyir la/ zla ba gnyis la sogs pa ni dngos po rtog pa srid kyang de na rnam pa de lta bu med pa'i phyir ro/ /rnam rtog dngos mi snang phyir dang / /nye bar bslad pa slu ba'i phyir//mngon sum ltar snang zhes bshad do/ /de lta bu'i dngos po ye mi srid do zhes bya bar ji ltar rtogs she na/ de skyes bzhin pa tsam na mngon sum nyid du thal ba'i phyir ro/ /zla ba gnyis la sogs pa'i blo rnams ni skyes bzhin pa na mngon sum nyid du srid pa yin yang /gnod par byed pas sel ba yin no/ /'dir ni srid pa nyid mi 'thob bo/ /rnam par rtog pa dngos po'i yul can du smra ba rnams kyang de la tshad ma gzhan du 'khrul pa 'jug pa'i phyir ro/ /des na 'dir dngos po mi gsal ba nyid kyis dngos po mngon sum du byed pa mi srid pa yin no//des na 'khrul ba yin yang zla ba gnyis la sogs pa las rnam par rtog pa tha dad pa yin no/ /de dag ni don rtogs pa'i bdag nyid can yin te/ de na med kyang de rtogs pa'i phyir 'khrul pa brjod kyi rnam par rtog pa ni ji skad bshad pa'i rigs pas de ltar 'khrul nas kyang don rig pa'i rang bzhin srid pa ma yin no//des na 'di gzugs brnyan ji lta bur gyur pa de rig pa'i bdag nyid kyis ni 'khrul pa ma yin te/ blo'i zla ba rig pas zla ba gnyis su shes pa 'khrul pa ma yin pa bzhin no//'on kyang der nges pa phyin ci log pa las yin no zhes brjod par bya'o/ /gal te 'di cung zad kyang nges par byed pa ma yin na ni 'khrul pa nyid du mi 'gyur te/ gzhan yul yin pa'i phyir ro/ /ji ltar 'di'i gzugs brnyan don de lta bu dang mi mthun par rtogs she na/de'i rang gi ngo bo dang ma 'brel pa zhes smos so/ /ji lta bur gyur pa zhig bstan par bsams nas 'di nyan pa po la bzhag pa de'i ngo bo dang 'di 'brel pa de'i rgyu can gyi mtshan nyid med do/ /gal te 'di don gyis skyes pa yin na/ mi 'dra bar mi 'gyur ba zhig na/rang gi nye bar len pa'i rtsa ba can nyid kyis mi 'dra ba nyid do/ /ji skad du slob dpon phyogs kyi glang pos don kyang yin la ma mthong ba yang yin pas don ma mthong ba ste/ lkog tu gyur pa'i dngos po la brjod do/ /de la ni don gyi rnam par rtog pa tsam yin gyi gzhan ni 'ga' yang ma yin no zhes bshad pa lta bu'o//rnam par rtog pa la ni rnam pa gnyis srid de/ rnam par rtog pa dang / de'i ngo bo las don gyi yul can no/ /de la 'dir don de'i yul nyid bkag pas rnam par rtog pa tsam zhig lus pa yin no/ /de lta na ngo bo nyid brjod na thams cad las log pa brjod par 'gyur la/de yang sred pa ma yin no zhes brjod pa gang yin pa de bsal ba yin no zhes bshad pa ni/ de lta na zhes bya'o/ /de ltar de rnam pa 'dis rtogs par bya ba dang rtogs par byed pa dag gis rang gi mtshan nyid rtogs pa dang bstan pa ni ma yin no//gal te rtogs pa'am bstan pa yin na de thams cad la log pa yin pa'i phyir thams cad las log pa brjod par 'gyur la/ de yang 'gal ba yin no/ /de yul du ma byas na ni nyes pa 'di ga la yod de yul du mi byed pa yang de las gzhan kho na yul du byed pa'i phyir ro//de yul du byed na dbang pos mi sod pa ma yin pa nyid du thal bar 'gyur ro zhes bshad pa gang yin pa de/ khyad par can gyi yul de nyid kyis gsal bar ston par byed pa ni mtho ris la sogs pa thos pa la yang zhes bya ba'o//gal te mtho ris kyi sgras mtho ris brjod na mtho ris nyams su myong ba dang 'dra bar rtogs par thal bar 'gyur ro/ /don gyi yul can du grub na rgyu tha dad pa ni yan lag ma yin pa'i phyir ro/ /'bras chan gyis 'grangs pa'am/ zan dron gyis 'grangs kyang bla ste/khyad par yod pa ma yin no/ /de lta na ni sgra dang rnam par rtog pa rnams de'i yul can ma yin pa'i phyir rang gi mtshan nyid brjod par bya ba ma yin pa des na gzhan sel ba'i sgo nas kyang mi brjod par thal bar 'gyur ro/ /des na nam mkha' zhes sgra 'jug pa'i rgyu ni ngo bo nyid brjod do zhes ji ltar brjod/de bzhin du gzhan sel ba'i yul can du yang brjod par mi bya ste/ rnam pa thams cad du rang gi mtshan nyid la rig pa med pa'i phyir/ zla ba gnyis la sogs pa'i shes pa bzhin no/ /'on te ji skad bshad pa'i don dam pa'i gzhan sel ba brjod pas gzhan sel ba'i yul can yin na/de ltar na da rjes su dpag pa'i rnam par rtog pa rtag par sgro 'dogs pa sel ba'i 'bras bu can yin yang mi rtag pa nyid rtogs par byed pa ma yin pa'i phyir don med par thal lo/ /des na rnam par rtog pa gzhan sel ba'i rig pa de ji ltar rang gi mtshan nyid la rig pa med par 'gyur ba brjod dgos so zhes dgos pa la/rang gi 'dod pas sgra rnams ji ltar don brjod par 'dod pa de bstan pa'i phyir/ de'i phyir zhes smos so/ /rtogs par byed pas dngos po'i rang gi ngo bo ma rtogs su zin kyang rnam par rtog pa'i gzugs brnyan dngos po'i rang gi ngo bo dang ma 'brel pa de lta bu kho na la ste/dngos po'i rang gi ji lta ba bzhin ma rtogs pa la yang rnam par rtog pa'i gzugs brnyan 'byung ba yin te/ de la der lhag par zhen pa ste/ dngos po'i rang gi ngo bor lhag par zhen pas rtogs par bya ba'am rtog par byed pa 'di mgu bar 'gyur ro/ /dngos po'i rang gi ngo bo ma rtogs pa dngos po'i rang gi ngo bor lhag par zhen pa zhes bya ba 'di ci zhig yin zhe na/ smras pa dngos po'i ngo bo rtogs pa nyid ni ma yin te/ rnam par rtog pa ni 'khrul nas kyang don rtogs pa'i bdag nyid ma yin no zhes sngar bsgrubs zin pa'i phyir ro//des na 'di ni med pa yul du smra ba la mngon par zhen pa ngan pa rtsa ba med pa can bsal ba mkhas pa rnams kyi rang snang ba'i phyogs yin no/ /gang gi phyir blo gros ngan pa can rnams kyi phyi rol gyi don snang ba med na/phyi rol don du mngon par zhen pa nyams su myong bas grub pa gang zhig yin par 'dod gal te phyi rol gyi don rig pa yin no/ /de lta na 'dir med pa yul du smra ba 'di 'thad par 'gyur ro/ /gang gi phyir rig par bya ba gang yin pa de nyid yul yin te/des na don rig pa ni don gyi yul can nyid du 'gyur ro/ /des na rnam par rtog pa gzugs brnyan de lta bu kho na la der lhag par zhen pas zhes bya ba 'di mi 'thad par 'gyur ro/ /'dis bdag nyid rig pa ni ma yin na/ de ji ltar dngos po med pa bdag nyid la rig par 'gyur/dngos po med pa'i rig pas rig par 'gyur ba gang yin pa dngos po med pa gang yin pa de ni ji ltar yang dngos po nyid ma yin no/ /de bas na dngos po'i yul can nyid dngos po rig pa yin pa'i phyir dngos po ma yin pa la dngos po nyid du rig par mi rung ngo / /dngos po ma yin pa dang dngos po'i khyad par dang khyad par can gyi ngo bo yang ma yin no//'o na nya phyis la sogs pa la dngul du shes pa ji ltar zhe na der yang nya phyis nyid la dngul du rig pa ni ma yin te/ gzhan la gzhan du rig pa mi srid pa'i phyir te/ de ni de'i rang bzhin ma yin pa'i phyir ro//rig par gyur pa'i chos las lhag pa med pa rig pa yin pa'i phyir/ don ji lta ba bzhin ma yin pa ni don ji lta ba ma yin no/ /de nyid kyi phyir/ nges pa rnams kyis ma nges gang / /de ni ji ltar de dag yul/ /zhes bshad do/ /nya phyis la sogs pa la ni sgro btags nas de ltar bsnyad pa yin te/mngon sum gyis nya phyis kyi ngo bo myong nas de ltar rnam par rtog pa'i phyir ro/ /de lta mod kyi yul bsam pa na ni dngul du rtogs pa'i yul dngul kho na yin gyi nya phyis la ni reg pa med do/ /gang gis 'di don nyid du rig par 'gyur ba 'di ni bdag nyid la sred pa ma yin no//sred na yang rang rig pa'i yul la don nyid du nges par 'di'i yul gang yin zhes yul bsam pa nas/ don nyid yin par brjod kyi shes pa ni ma yin te/ de ltar rtogs pa med pa'i phyir ro/ /don rig pa nyid shes pa rig par 'gyur ba gang yin pa shes pa nyid ni don ma yin no//des na don nyid yul yin gyi shes pa ni ma yin la/ de yang mi 'dod pa gang yin pa ni rig pa kho na'o/ /de'i phyir shes pa ma yin te rig pa med pa'i phyir ro/ /don ma yin te rnam pa de lta bu med pa'i phyir ro/ /des na rnam par rtog pa'i yul ni med pa sgro btags pa kho na yin no zhes zer ba de ni rang gi phyogs mtshar po'i snga phyi brtags pa kho na'o//de ltar na 'di don du nges pa nyid la brten nas bdag snang ba spang ba yin no/ /de la gal te don du lhag par nges pa 'di don rig pa yin na/ des na de nyid don rig par rtogs pas/ 'di la yod dam med kyang don snang ba yin te/ dper na sngon por myong bzhin pa de nyid sngon por snang ba bzhin no/ /sngon po myong ba gzhan la snang bzhin pa de lta bu nyid kyi rnam pa nyid du rtogs pa'i phyir don de yang bdag cag gis mngon sum rtogs pa'i phyir gang la de lta bur gyur pa nyid du gsal ba de nyid don rig pa yin no//gal te de ltar gyur pa de med na ni med pa nyid rig par 'gyur ba yin te/ rmi lam du dmigs pa'i sngon po bzhin no/ /de lta ma yin na yod pa kho na'o/ /rmi lam du yul med kyang sngon po ma yin pa rig pa nyid sngon por rig par 'gyur ba ni ma yin no//des na 'di gal te don rig pa nyid yin na ni don yod dam med kyang bla ste/ sngon po dang zla ba gnyis la sogs pa'i shes pa ltar de don snang ba ji ltar 'gyur ba de lta bu nyid du 'gyur ba zhig na rnam par rtog pa'i gnas skabs na ni dbang po'i shes pa bzhin don snang ba med pa'i phyir don du lhag par zhen pa nyams su myong bas grub pa de gang yin/gal te 'dir don rig pa yod na/ dngos po de lta bu yod pa na/ rjes su dpag pa'i rnam pa rtog pa'i yul gyi don mngon sum pa kho nar 'gyur ro//sgro btags pa'i don med pa nyid yul yin pa de'i ltar na ni 'di don las bye brag med pa na/ de don kho nar 'gyur gyi sgro btags ni ma yin no/ /bye brag yod na yang 'di sgro btags pa yin gyi shes pa ni ma yin no zhes mna' chu btung bas bsgrub par bya ba yin no//don dang shes pa nyid ni 'gal bas gal te der don nyid dor na shes pa nyid du yang rigs la ma yin na ni sgro btags pa nyid du yang ngo / /des na 'di don rig pa la brten nas bdag snang ba las kyang 'byung ste/ rtogs pa de'i yul don dang mi 'dra ba smra ba na de nyid du rjes su song ba yin no//gal te sgro btags pa la don rig pa mi 'dor ba des na 'di don med pa rig pa brjod de/ shes pa la ni don nyid 'gal lo zhe na/ 'di ni ma brtags par smras pa yin te/ 'di ltar don rig pa gang yin pa de nyid gal te sgro btags pa rig pa yin na/gsal ba kho nar mi 'du bas na don rig pa gzhan lus pa med pa'i phyir 'di shes pa nyid du mi 'gal lo/ /gang las don rig par 'gyur ba de la don dang mi 'dra ba med pa ni cung zad kyang yod pa ma yin no/ /brtags pa mtha' dag ni/don dang 'gal ba tha dad pa dang tha mi dad pa dag gis sel ba yin no/ /mi 'dra ba med pa yod pa kho na'o zhe na/ 'o na don dang sgro btags pa gnyis kyis rig pa gcig gam mi gcig kyang bla ste/ de'i don to zhes rtogs pa gang yin pa de ni don nyid yin par 'gyur bas don gyi yul can du thal bar 'gyur ro//sgro btags pa la don nyid du rtogs pa yin no zhe na re zhig sgro btags kyi bdag nyid ni shes pa dang mi 'gal bas shes pa nyid de ltar rtogs pa yin mod/ 'dzin pa tha dad pa yang sgrub byed ma yin te med pa'i phyir ro//rnam par rtog pa med pa la yang yod pas ma nges pa'i phyir ro/ /don gyi ngo bo rig na sgro btags pa gzhan srid pa ni tshad ma can ma yin no/ /don de nyid 'das pa'i ngo bo sngon gyi mthong ba'i yul nyid du lhag par nges pa'i phyir med pa yin no zhe na ma yin te/ don ji ltar mthong ba med pas med pa'i yul can yin pa'i phyir gyi shes pa'i dus su med pas ni ma yin te/thams cad mkhyen pa'i don ji lta ba bzhin gzigs kyang med pa'i yul can du thal ba'i phyir ro/ /gzhan yang 'das pa'i dus rtogs pa gal te 'das pa'i dus kyi yul nyid la de'i dus nyid du 'dzin pa na don med pa nyid du 'gyur na/de lta na yang mi 'dod pa dngos po'i yul can nyid du 'gyur ro/ /yul ma yin pa ni 'das pa'i don rtogs pa med pa'i phyir 'das pa nyid kyi phyir med par ji ltar 'gyur/ de bas na gang zhig don gyi yul can nyid kyis bdag nyid yul ma yin par 'gyur ba de la don ni 'ga' yang rtogs pa med do//gzhan yang don snang bzhin pa na yang de ltar snang ba de yul gyi gzugs brnyan rtogs par yang cis mi 'thad na gang gis rnam par shes pa'i rnam pa nyid du mi 'dod/ don ji lta bu de lta bur gyur pa rtogs pa'i rang bzhin srid pa ni bden mod kyi/de lta na yang shes pa'i gzugs brnyan de ni shes pa kho na yin te/ de las don nyid rtogs pa yang 'gal ba yin no/ /des na chos mi mthun pa'i rnam pa mtha' dag brtags kyang don gyi rang bzhin yod par 'dod pa ma yin gyi/sdang bas ni ma yin no zhe na/ des na sgro btags pa nyid du khas len to zhe na/ yun ring por brtags shing brtags pa'i cha so sor rnam par phye yang dngos po gsal ba'i zhad tsam yang mi 'bag pa ni don rtogs par smra ba'i rjod byed kyis ma btang bas 'di la ci byar yod/gang gi tshe don la gsal ba yang shes pa nyid du 'thad pa de'i tshe/ gang gis gzugs brnyan sgro btags pa nyid du khas len par byed pa 'di rgyu mtshan ci zhig khas blangs nas gzugs brnyan nyid sel bar byed/ don rtogs pa zhes bya ba ni tshig tsam ma yin te/'on kyang gsal ba kho na'o/ /de yang 'ga' zhig gsal bar ma gyur par mi 'thad pas na gang zhig 'di la gsal ba de don gyi rang bzhin thun mong ma yin pa nyid yin na de'i tshe 'di don kho na yin gyi shes pa ni ma yin no/ /gang gi tshe de ltar gsal ba'i rang bzhin de shes pa'i gzugs brnyan gyi chos su 'thad pa de'i tshe ni rnam par shes pa las tha dad par don nyid du nges par byed pa gang yin pa rang bzhin tha dad par rnam par 'byed pa gang zhig yin/don bya ba byed pa nyid do zhe na/ de ni don bya ba dang 'brel pa las nges par bya ba yin no//des na gang gi tshe 'di rgyu dang 'bras bu gnyis kyi gzugs brnyan gyi ngo bor me long la shing dang 'bar ba dag bzhin du rnam par gnas par bzod pa de'i tshe/ 'di dag ni rgyu dang 'bras bu nyid yin gyi/ rgyu dang 'bras bu'i gzugs brnyan ni ma yin no zhes ga las rtogs pa la/des na rnam par rtog pa snang ba'i rang bzhin gsal bzhin pa las tha dad pa 'am/ gzhan shes pa'i rang bzhin las tha dad par don du nges par ni mi nus so/ /gsal ba'i rang bzhin las tha dad pas de ltar nges pa de shes pa'o snyam pa dang bral bas don to snyam pa 'jug pa'i phyir ro zhe na don to zhes shes pa dang thun mong ma yin par rtogs pa de rtogs bzhin du yang thun mong ma yin par ji ltar mi ston/der ni gzugs brnyan nyid la yang srid pa ma yin par de bzhin du rtogs pa gang yin pa de ni yod pa ma yin no//gal te thun mong ma yin yang thun mong ma yin par rtogs pa ni thun mong ma yin pa kho nar gyur pa ma yin nam zhe na/ bden te thun mong ma yin par rtogs pa ni thun mong ma yin pa'i rang bzhin du rtogs pa ma yin no/ /de la rnam par shes pa dngos por mi srid pa'i de ltar rtogs pa gang zhig ces de nyid 'dir brgal zhing brtag par bya ba yin no//des na de ltar rig pa'i rang bzhin rtogs pa med pa'i phyir na ni/ rig pa med pa kho na'o/ /don rtogs pa nyams su myong bas grub pa ma yin nam/ bden te rtogs par bya ba thun mong ma yin pa'i rang bzhin gsal ba med pa'i phyir dang rig par bya ba khyad par med par rig pa'i khyad par mi 'grub pa'i phyir 'di ni de rig pa'i bdag nyid ma yin pa lhag par zhen pa 'ba' zhig go zhes brjod do//de nyid kyi med pa'i yul can nyid bkag pa yin no zhes zhar la brjod do//'o na ji ltar dngos po'i rang bzhin ma rtogs par dngos por lhag par zhen pa'i rang bzhin zhes bya bar 'gyur zhe na/ 'di skad brjod do/ /'di la dngos po'i rang gi ngo bo ma rtogs pa rnam par rtog pa'i gzugs brnyan la dngos po'i ngo bor lhag par zhen pa dngos po'i rang gi ngo bor mngon par zhen pa mngon par rlom pa shes pa'i chos so//'di ltar ji ltar lhag par zhen pa de lta bur gyur pa'i yul yang gsal na ni 'dod chags la sogs pa bzhin shes pa'i rang bzhin des khyad par du byas pa nyid du 'gyur te/dper na bye brag pas khas blangs pa bzhin no/ /de bzhin du ji ltar 'di'i yul gsal ba de kho na bzhin mngon par rlom par 'gyur ro/ /gang gi tshe mngon sum gyis mthong ba'i rang bzhin dang mi 'dra ba'i phyir dang / shes pa mi 'dra ba'i thun mong ma yin pa'i rang bzhin snang ba med pa'i phyir yul gsal ba'i cha bzlog par byas pa de'i tshe mngon par rlom pa tsam kho na lus pa yin no//de yang 'ga' zhig gsal ba med par mi 'thad pa'i phyir na shes pa'i rang gi ngo bor gyur pa sngon po'i rnam pa snang ba nyid ni 'jug pa yin no/ /des na rang gi rnam pa phyi rol ma yin pa las yang phyi rol du mngon par rlom pas phyin ci log tu brjod do//des na 'di ltar dngul la sogs par phyin ci log pa rnams kyi yul gyi rang gi ngo bo rnam par dpyad pa dngul nyid yul yin pa de bzhin du phyin ci log 'di'i yul ni don nyid ma yin no//'di ni der mngon par rlom pa dag 'ba' zhig tu zad kyi/ de gsal ba ni ma yin la/ de gsal ba med par yang de'i rig pa nyid ma yin no/ /dper na rmi lam la sogs pa'i bslad pa rnams la mngon par 'dod pa'i yul dmigs pa ni de lta bu'i kun dga' ba de nyid yin gyi yul dang bcas pa'i phyin ci log las ni ma yin pa bzhin no//de bzhin du 'dir rang gi bdag nyid snang bzhin pa na yang don du nges pa yin gyi/ bdag nyid snang ba ni ldog pa ma yin te/ zla ba gnyis snang ba na zla ba snang ba bzhin no//ji ltar de nyid du zla ba gnyis bzhin du don rig pa yang ma yin la/ ma 'khrul pa ma yin te/ lhag par zhen pa phyin ci log pas 'khrul pa nyid du brjod pa'i phyir te/ rig pa phyin ci log pa las ni ma yin no/ /gal te bzung ba'i rnam pa rang rig pa'i yul yin gyi rnam par rtog pa'i yul ma yin pa bzhin no//rig pa gzhan yang khas mi len la/ rang gis rig pa yang rtogs pa'i yul ma yin te/ rang rig la yang rtogs mi 'dod/ /gzhan la rnam par rtog phyir ro/ /zhes gang bshad pa bzhin no/ /rig pa gzhan khas ma blangs par rtogs pa yang 'dir gang zhig yin par 'gyur/brtags pa yang rjes su yod pa ma yin par slob dpon rnams kyis bstan te/ des na 'dir lan ci yod ce na/ 'di skad brjod de/ sngon po'i rnam pa gsal ba bdag nyid kyi ngo bo la don nyid du mngon par rlom pa ni rnam par rtog pa zhes brjod do//de'i sngon po'i rnam pa nyid gsal ba gang yin pa de ni rang gis rig pa yin pa'i phyir rang gi ngo bo la rnam par mi rtog pa yin no/ /rnam pa de lta bu de ni rang gi ngo bo tsam gyi mthar thug pa ni ma yin gyi/ 'on kyang de ltar lhag par zhen pa'i dbang gis don la brten pa nyid yin pa'i phyir 'di dag la rnam par rtog pa yin te/dbang po'i shes pa nyid mngon sum ma yin pa bzhin no/ /lhag par zhen pa'i rang bzhin de ni rnam par rtog pa las yin pa'i phyir te/ des na de nyid 'di rnam par rtog pa nyid do//sngon po tsam gsal ba ni dbang po'i shes pa la yang yod pa'i phyir ro/ /gang gi phyir 'di snga ma dang phyi ma'i myong ba'i 'du byed pa sad pa'i rtsa ba can yin pa de nyid kyi phyir don to snyam du shes pa yin no/ /de nyid kyis na rnam par rtog pa lhag par zhen pa med pa'i rang bzhin yin no//de'i phyir rnam par rtog pa ni lhag par zhen pa yin pa de yang sngon po'i rnam pa rang gi bdag nyid la snga ma dang phyi mar mthong ba'i rang bzhin du lhag par zhen pa ji lta bur gyur pa nyid du lhag par zhen pa de lta bu'i rnam pa brtags pa yin par brjod do//snga phyir mthong ba'i don gyi rang bzhin shes pa'i bdag nyid du 'gyur ba ni yod pa ma yin pas na/ kun brtags pa rdzas su med par brjod do/ /de med kyang med pa snang ba ni ma yin te/ zhen pa ni snang ba med pa'i bdag nyid yin pa'i phyir te ji skad bshad zin pa bzhin no//'ga' zhig snang ba med par yang lhag par zhen pa mi 'jug pa'i phyir rnam par rtog pa'i gzugs brnyan de lta bu kho na la don du lhag par zhen pas zhes de lta bu nyid kyis rang gi bdag nyid kho na yul du brjod pa yin no/ /mgu ba yang shes pa'i chos kho na ste/shes pa des rang gi mtshan nyid ma rtogs kyang de'i gzugs brnyan la rang gi mtshan nyid du lhag par zhen pa'i phyir de rtogs pa'i don du thabs gzhan tshol ba la rgyab kyis phyogs pa'o/ /des na rnam pa de lta bu'i rang gi mtshan nyid ni de ltar lhag par zhen pa tsam gyis brjod par bya ba yin gyi/gang gi phyir thams cad las log pa'i rang gi ngo bo brjod par bya bar 'gyur ba 'am/ de ltar ma yin na ni brjod pa don med pa nyid du 'gyur ba/ don dam par de'i yul yin pa'i phyir ni ma yin no/ /des na zhes bya ba ni gtan tshigs des na'o//de ltar zhes bya ba ni/ rang gi gzugs brnyan la rang gi mtshan nyid du lhag par zhen pa'i mtshan nyid kyi rnam pa 'dis ni rang gi mtshan nyid bstan to zhes brjod do/ /gang gi phyir rang gi mtshan nyid du lhag par zhen pa'i rang bzhin gyi rtogs pa skyed pa de'i phyir rang gi mtshan nyid brjod kyi/rnam pa gzhan gyis ni ma yin no/ /ci'i phyir rnam pa 'di kho nar zad kyi/ gzhan med ce na bshad pa/ sgra'i don rtogs pa ni de lta bu kho na yin pa'i phyir ro/ /gang gi phyir sgra las don rtogs pa gang yin pa ni rang gi bdag nyid de'i rang bzhin ma yin pa la yang de ltar lhag par zhen pas 'jug pa de lta bu kho na yin pa de'i phyir rnam pa 'di kho na yin no//rnam pa gzhan med pa nyid bshad pa ni rang gi ngo bos snang ba ni zhes bya ba'o/ /'dir da ni zhes bya ba smras te/ don dam par thams cad las log pa'i ngo bo yul du ma byas pa'i phyir gcig brjod pas kyang chos thams cad brjod par thal ba'i nyes pa rjes su 'brel pa med mod/de ltar lhag par zhen pa la ltos nas ni rang gi mtshan nyid kho na brjod par smras la de yang gcig tu ldog pa'i ngo bo nyid kyis na spyi'i rnam pa nyid ga la yod/de lta na yang de brjod pa spangs te spyi'i yul can du khas len pa ji ltar mi 'gal snyam du bsams pa'o/ /'di nyid ston pa ni gcig tu log pa'i ngo bo can rnams la zhes bya ba'o/ /gtan tshigs smras pa ni de dag la 'brel pa'i phyir dang zhes bya ba'o//rang gi ngo bo ma 'brel pas ni ldog pa nyid du grub bo/ /gcig tu zhes bya ba'i tshig gi don smras pa ni/ gzhan yang med pa'i phyir ro zhes bya ba'o/ /gal te 'di dag la gzhan yod na ni rang gi ngo bos log pa rnams kyang de'i bdag nyid kyis 'brel par 'gyur ba yin na/de med pas na gcig tu log pa nyid do/ /'di bzlog pa'i phyir bshad pa spyi ji lta bu yin pa ni bshad zin te zhes smos te/ de'i blo la de ltar snang ba'i phyir ro zhes bya ba la sogs pas so/ /der yang rnam pa gnyis bshad de/ /de'i blo'i dbang gis de spyir brjod la de yang gzhan sel ba'i yul can nyid kyis de gzhan sel ba'i ngo bo yin pa'o//de la blo'i bsam pa'i dbang gis spyi yin no zhes bya ba 'di ni tha dad dngos rnams zhes bya ba la sogs pas 'dir rgyas par 'chad par 'gyur ba'i phyir bshad zin pa rnams kyis bstan pa ma yin gyi/'on kyang gzhan sel ba'i yul can nyid do zhes ston par byed do/ /ma 'dres pa rnams kyi zhes bya ba ni khra bo la sogs pa ngang pa la sogs pa'i gsal ba rnams dang ma 'dres pa'o/ /de la gcig kyang thams cad dang ma 'brel pa yin no//thams cad kyang gcig dang ngo / /de la thams cad gcig dang ma 'brel pa la ltos nas ni spyi rnam par 'jog go/ /'di ltar khra bo la sogs pa'i khyad par mtha' dag rta dang ma 'dres pa yin no/ /des na khra bo la yang rta med la/ ser skya la yang med cing de bzhin du gsal ba gzhan dag la yang ngo //rta ma yin pa'i gsal ba so so la rta zhes so so re re la med pa'i phyir ro/ /ba lang rnams kyi rta dang ma 'brel ba ni spyir 'gyur te/ re re la de med pa'i phyir ro/ /de bshad pa ni ma 'dres pa rnams kyi zhes bya ba'o/ /gcig po de dang tha dad pa rnams la ni ji skad bshad pa'i tshul gyis ni gcig dang ma 'brel pa spyi'i chos yin pa'i phyir ro//de lta na yang ldog pa spyir 'gyur ba ni ma yin te/ khra bo la sogs pa la so sor ba lang ma yin pa la med pas spyir brjod kyi 'ga' zhig yod pa'i phyir ni ma yin no//ba lang ma yin pa zhes re re la med pa yin gyi/ 'ga' zhig bdog pa ni ma yin no/ /de nyid kyi phyir de lta bu'i ldog pa spyir rtogs pa'i sa bon yin no zhes sngar bstan pa mdun du sgrub par 'gyur ro/ /de las tha dad pa rnams gcig dang ma 'brel par mtshungs pa ni spyi yin no zhes bya ba'i don to//ma 'brel pa ni 'brel pa med pa tsam yin pas ji ltar dngos su spyi yin par 'gyur/ des na rtogs pa po'i bsam pa la ltos nas de de ltar brjod pa yin no/ /bshad zin pa nyid rgyas par sgrub pa'i phyir gzhan yang zhes smos so//blo gang gis rang gi ngo bos gzhan gyi ngo bo sgrib par byed pa de'i lhag par zhen pa la brten nas spyi yod par ni rab tu bsgrags so/ /rang gi mtshan nyid kyang zhen pa la ltos nas sgra'i don nyid dang de bzhin du rjes su dpag pa'i yul nyid yin pa na/ spyi sgra'i don nyid dang rjes su dpag par bya ba nyid la sogs par brjod pa gang yin pa de ni spyi yod par bsgrags pa yin la de yang rang gi ngo bos gzhan gyi ngo bo sgrib par byed pa'i blo'i bsam pa'i dbang gis yin no//don gzhan du gyur pa yin yang gang gis rang gi rang bzhin dang rjes su mthun par rang gi ngo bo sgro btags nas ston par byed pa'i blo des rang gi ngo bos gzhan gyi ngo bo bsgribs par brjod pa yin no//blo la ltos pa'i gzhan gyi ngo bo ni phyi'i don nyid do/ /de yang rang gi ngo bo bsgrib pa nyid kyi phyir gzhan du gyur pa de la de lta bur gyur pa'i rang gi ngo bo sgro 'dogs par brjod pa yin no//don gzhan nyid du gyur pa la sgro btags pa gang yin pa 'di'i rang gi ngo bo ji ltar gyur pa yin zhe na/ don gcig tu ni snang ba zhes gsungs so/ /'dis ni blo'i ngo bo tha mi dad pa nyid du brjod pa yin no/ /dngos rnams la zhes bya ba mang po'i tshig gis ni 'di dag phan tshun tha dad pa nyid brjod do//tha dad ces bya bas ni rigs mi mthun pa la ldog pa nyid do/ /'di'i de dag la brten pa ni ji ltar sngar bshad pa'i tshul gyis de ltar lhag par zhen pa nyid kyi phyir ro/ /de'i don 'di yin te/ba lang gi ngo bo phan tshun tha dad pa ba lang gi gsal ba tha dad pa dag kho na la ba lang snyam pa'i rnam par rtog pa ba lang gi rang bzhin tha mi dad par snang ba'i rnam pa can skyes la/ de yang don gyi ngo bor lhag par zhen pa'i phyir na des don bsgribs par 'gyur ro//da ni de'i bsam pa'i dbang gis spyir ji ltar khas blangs pa de ston te/ rang gi ngo bos gzhan gyi ngo bo sgrib pa'i ngo bo kun rdzob des dngos po rnams bdag nyid tha dad kyang tha dad pa nyid bsgribs pa'i dngos po rnams ba lang nyid la sogs pa'i ngo bos tha dad pa min pa lta bur snang ngo //blo'i ngo bos gzhan gyi ngo bo bsgribs pa'i ngo bo nyid kyis na/ dngos po rnams tha dad pa yin yang tha dad pa med par bsal ba na/ blo de la ltos nas spyir tha snyad byed do zhes bya ba'i don to/ /'khrul pa'i dbang gis tha dad pa rnams kyang tha dad par snang ba'i phyir de la ltos nas spyi yul du bstan pa yin no zhes bya ba nyid brjod par bya ba ma yin nam/rang gi ngo bor gzhan gyi ngo bo bsgribs par brjod pa don ci yod/ ji ltar don med/ gang gi phyir 'khrul pa'i ngo bo yang brjod par bya ba nyid de/ ji ltar 'di tha dad pa tha mi dad par rtogs par byed/tha mi dad pa'i rang bzhin de gal te phyi rol na med na 'o na bsal ba de gang zhig ces brjod par bya ba na/ don gcig tu ni snang ba'i blo/ /zhes bya bas de blo'i ngo bor bshad pa yin no/ /blo nyid rnam pa de lta bur gyur pa na don tha dad pa med par snang ngo zhes bya ba 'di ga las she na/blo'i rang gi ngo bo nyid don du mngon par zhen pa'i phyir te/ de tha dad pa med par gsal ba na/ don tha dad pa med par snang ngo zhes rtogs pa'i phyir ro/ /spyi de yang don nyid mtshungs pa yin no zhes rang bzhin 'dis blos ji ltar kun brtags pa de ltar de dam pa'i don du med/de dag ni rang bzhin tha dad pa'i phyir ro/ /re zhig tshigs su bcad pa dang po rnam par 'grel pa bshad pa ni/ rnam par rtog pa can gyi blo ni zhes bya ba'o/ /khra bo la sogs pa de dag las gzhan pa rta la sogs pa de las ldog pa can te/khra bo la sogs pa nyid do/ /'dis ni log pa nyid brjod do/ /rnam par rtog pa ni de lta bur gyur pa'i dngos po rnams la brten nas skye ba yin no/ /brten pa yang ji skad brjod pa bzhin lhag par zhen pa'i dbang gis sam yang na nyams su myong bas chos pas rgyu nyid du 'dzin pa'i rnam pa rtog pa ni dngos po nyams su myong ba'i 'du byed kyi rjes su 'brangs nas skye ba'i phyir dngos po la brten pa yin no//dngos po de dag gi ngo bo tha dad pa mi snang bar byas nas dngos po de rnams kun du ston to/ /ji ltar tha dad par mi snang bar byed ce na/ 'dres par byed pa ste dngos po rnams sre bar byed pas na'o/ /de yang ji ltar zhe na/ bdag nyid kyi rnam pa tha mi dad pa zhen par byas te'o/ /de don nyid du lhag par zhen par byas pa na don bzhin du byas par 'gyur ba'i phyir na/ don de nyid du lhag par zhen pa nyid don la lhag par zhen pa yin no//des na don 'di yin te bdag nyid kyi tha mi dad pa la don du lhag par zhen pas don tha mi dad par zhen par byas par 'gyur ba des na 'di dag 'dres par byas pa yin no/ /gal te rnam par rtog pa rnams don nyams su myong ba'i 'du byed la rtogs pa nyid kyis don la brten pa yin na/nyams su myong ba ji lta ba bzhin du don du snang ba'i bdag nyid du 'gyur ro/ /rang gi bag chags kyi rang bzhin rjes su 'gro ba yin na yang don la brten pa nyid nyams par 'gyur te/ phan tshun 'gal ba'i phyir ro//cha dang rjes su 'brel pa ma yin pa'i phyir na nyams su myong ba las ni don du snang ba nyid yin la rang gi bag chags las ni phyin ci log tu yin no zhes kyang brjod par mi nus so zhes dogs pa la/ bsgrub par bya ba dang zhes smos so/ /bsgrub par bya ba gcig pa nyid kyis zhes bya ba ni bzho ba dang dgal ba la sogs pa'i bsgrub par bya'o//gal te gsal ba so so'i bzho ba tha dad pa ma yin nam zhe na/ bden te/ 'di ni bzho ba nyid du gyur pa na tha dad pa yin gyi chu 'chu ba nyid yin pas ni ma yin pas tha mi dad par brjod do/ /de bzhin du ba lang gi mtshan nyid kyi dngos po gcig gis sgrub pa'i phyir sgrub pa gcig pa yin te/ba lang thams cad ba lang gis sgrub pa yin pa'i phyir sgrub pa gcig pa can nyid nges so/ /ba lang gi gsal ba re re zhing skyed par byed pa'i ba lang tha dad pa yin yang ba lang nyid du gyur pas tha dad pa'i phyir tha mi dad par brjod de snga ma bzhin no//des na don 'di yin te bzho ba dang bkal ba'i nus pa re re la phan tshun rjes su 'gro ba med pa yod pa'i phyir ro/ /'di ni nye bar mtshon pa yin te/ ji ltar mdun nas 'chad pa bzhin du/ 'di dag la rjes su 'gro ba med pa'i ba lang nyid kyang yod pa ma yin no//de'i phyir ba lang ngo snyam pa'i rtogs pa byed pa nyid yin la/ de lta yin na yang mi 'dra bar ma rtogs pa'i phyir rtogs pa tha mi dad pa'i yin no/ /des na rnam par rtog pa'i sa bon dang ldan pa'i rnam par rtog pa med pa la/don gyi rang bzhin gnas pa na rnam par rtog pa de lta bu'i rnam pa skye ba'i phyir dngos po las skye ba 'di tha dad pa med par snang ba gang yin par snang ba 'di ni dngos po rnams kyi rang bzhin yin no/ /tshigs su bcad pa gnyis pa'i don nye bar 'god pas kun rdzob ces bya ba rnam par 'grel to//ci'i phyir 'di rnam par 'grel zhe na/ kun rdzob ces bya ba 'di blo zhes bya ba 'di dang 'brel par brten pa'i phyir te/ gzhan du na kun rdzob tu tha dad pa med pa nyid du snang ngo zhes rtogs par 'gyur ro/ /tha mi dad pa ni kun rdzob kyang ma yin te/yod par thal ba'i phyir ro/ /brtags pa 'di med pa nyid do zhes de phyir don la gcig bdag tu 'dzin pa'i rnam rtog 'di 'khrul pa zhes 'chad par 'gyur ro/ /rnam par rtog pa'i rnam pa ni yod kyang kun rdzob ma yin te mi 'thad pa med pa'i phyir mngon sum gyi rnam pa bzhin no//rnam par shes par smra ba la ni mngon sum gyi rnam pa yang kun rdzob kho na'o/ /blo ni 'khrul pa'i yul bzhin du mi 'thad pa nyid kyis kun rdzob tu mi brjod de/ des na ji ltar grags pa'i kun rdzob kyi don spangs te 'di bstan pa yin no zhes ston pa ni tha mi dad pa bzhin du snang ngo zhes bya ba'o//de bzhin du zhes bya ba'i sgra smos pa ni/ dngos su tha mi dad pa rig pa med pa'i phyir ro/ /de ltar yang ston par 'gyur ro/ /de ni de'i bsam pa'i dbang gis na zhes bya ba 'chad do/ /de bas na zhes bya ba ni de'i phyir ro/ /rjes su byed pa rnams kyis blo'i snang ba la tha mi dad par snang ba'i dngos po de dag kho na'i spyi yin par brjod do//tha mi dad par snang ba na yang blo la gnas pa thob par 'gyur ro zhes bshad pa ni/ blo la snang ba'i zhes bya bas so/ /de blo la snang ba rnams kho na'i spyi yin pa na ji ltar gzhan gyi ngo bos rang gi ngo bo sgrib par brjod pa de ston pa ni phyi rol lta bur kun du 'phro ba zhes bya ste/phyi rol nyid du zhen par byas pa rnams kyi zhes bya ba'i don to/ de nyid ji ltar zhe na/ rnam pa'i khyad par yongs su 'dzin pa'i phyir zhes smos so/ /phyi'i don gyi rnam pa'i khyad par gyi myong ba'i phyir de rnam pa de lta bur shes pa la rnam pa'i khyad par gsal ba don du lhag par zhen pa'i rang bzhin skye bar 'gyur ro//gal te blo'i bsam pa la ltos nas spyi yin na/ gzhan sel ba spyi'i rang bzhin du brjod pa 'gal lo zhes brtan pa'i phyir pha rol po dag ni zhes brjod do//lan bshad pa de nyid ces bya ba ste/ blo'i snang ba nyid gzhan sel ba yin no/ /ji ltar blo'i snang ba nyid gzhan sel ba yin/ gang gi phyir rtogs pa po sgro btags kyang rang bzhin dang gcig tu 'gyur ba'i don gzhan las log par 'gyur ba des na de nyid gzhan sel ba yin no//des na ji ltar rnam par rtog pa'i snang ba gzhan sel ba nyid yin/ de la ni sgro btags pa bsal ba sngon du 'gro ba can gyi gzhan las log pa nyid yod pa ma yin no/ /sgro 'dogs ni don nyid la 'jug pa'i phyir te/blo'i snang ba la ni ma yin no/ /de bzlog pa'i phyir/ de ni de kho na zhes smos so/ /rang gi snang ba nyid rtogs pa na blo 'khrul pa'i dbang gis dngos po 'dzin pa lta bur snang ste/ rang gi bdag nyid kho na la dngos por lhag par zhen nas 'jug pa'i phyir ro//de'i phyir rang gi bdag nyid kyi snang ba 'dzin pa na dngos po 'dzin pa bzhin du snang ba'i phyir de la ltos nas de dngos po yin la/ dngos po la sgro 'dogs pa'i phyir ni gzhan gyis dben pa yin pas de bas na de 'dzin pa na gzhan sel ba'i yul can nyid do//des na snang ba dngos po lta bur snang ba'i phyir de dngos po nyid yin pas na/ dngos po gzhan sel ba nyid de/ gzhan gyis dben pa'i phyir ro/ /des na blo gzhan sel ba'i blo nyid yin pas na gzhan sel ba spyi'i ngo bo nyid du rigs pa kho na'o/ /de bshad pa ni/de ni zhes bya ba yin no/ /des ni de ltar rtogs pa'i bsam pa la ltos nas blo'i snang ba nyid spyi'i rang bzhin du bshad pa yin te/ de dag gis spyir rtogs pa de ltar khas blangs pa'i phyir ro/ /rang gi snang ba nyid de ltar snang ba'i phyir de nyid spyi yin no/ /de yang gzhan sel ba'i rang bzhin yin te/sgro 'dogs dang bral bar gyur pa gzhan gyis dben pa gang yin pa de'i yul can nyid kyis na blo 'di gzhan sel ba'i yul can yin pa'i phyir ro/ /de yang don kho na la rang gi snang ba yang don bzhin du snang ba'i phyir ro/ /de la dngos po bzhin du snang ba'i phyir de 'dzin pa'i blo dngos po 'dzin pa nyid du rtogs pa'i phyir dngos po nyid ma rtogs pa na/gzhan dag rtsod par byed pa ni phyi rol zhes bya ba'o/ /de la gzhan gyis dben pa'i dngos po rnams la rang snang ba'i yul can gyi blo yod par ma grub ste/ gang gi phyir phyi rol gyi don nyid sgro 'dogs dang bral ba las dben par gyur pa yin na de dag la ni rnam par rtog pa rnams mi 'jug ste/des na gang gi tha dad pa'i yul can du gyur pa tha dad pa rnams la blo 'di ji ltar 'jug par 'gyur zhe na/ 'di bsal ba'i phyir bshad pa/ 'chad par byed pa rnams zhes smos so//gang dag dngos po'i rang bzhin dngos po nyid las rtogs nas 'chad par byed pa de dag de ltar rnam pa 'byed de/ 'di lta ste phyi rol dag la rnam par rtog pa mi 'jug go zhes bya bar ro/ /tha snyad 'dogs par byed pa rnams ni ma yin te de dag la ni dngos po'i rang bzhin rnam par dpyad pas bskyed pa'i rnam par 'byed pa'i gnas skabs 'ga' yang med do//de dag la ni gang la ji ltar rtogs pa de la de ltar rtogs pa las ma rtogs pa'i rnam par dpyod pa 'ga' yang med do/ /de dag la yang dpyod pa 'ga' zhig yod pa yang yin te/'di ltar 'dir ba lang yod pa'i rang bzhin yang yin la med pa'i rang bzhin yang yin no zhes smras pa na/ dmun po yang gal te yod pa kho na yin na/ ji ltar med pa yin zhes rnam par rtog par byed do/ /'di dag shes rab phul du byung bas thob par byed pa de ltar ni rnam par dpyod par mi byed do//tha snyad 'dogs par byed pa de dag ni snang ba dag rnam par rtog par bya ba'i don dag gcig tu byas nas 'jug go zhes bya ba tha snyad du byed do/ /de dag gcig tu byed pa gang zhe na/ rang gi dmigs pa kho na zhes smos te/bdag nyid kyi dmigs pa bdag nyid kyi rnam par rtog pas rtogs pa'i rang bzhin te/ de yang bdag nyid kyi snang ba ste 'dis ni rnam par brtag par bya bar brjod do/ /de la don byed par rung bar sems shing ste/ 'dis ni mthong ba dang gcig tu byed par brjod do//dngos su snang ba las rnam par brtag par bya ba gzhan yin yang 'di la snang ba nyid du nges pa gang yin pa de nyid snang ba dang rnam par brtag par bya ba'i don dag gcig tu byas pa yin gyi/ de ltar rnam par brtag par bya ba mthong ba nyid du byas pas gcig tu byas par ni mi brjod do//'on kyang snang ba nyid du nges pas snang ba lta bur bsgrub pa la brjod do/ /de'i de yang 'jug pa nyid las shes pas ni 'jug go zhes brjod do/ /'di ltar don mi snang bzhin du yang don gyis bsgrub par bya'i dgos pa don du gnyer bar 'jug pa ni/don las bzlog pa de la don du lhag par zhen pa med par mi srid do/ /de lta na yang phyi rol rnam pa tha dad pa la zhes brtsad pa ji ltar spang bar 'gyur ba de bstan pa'i phyir de dag gi zhes smos so/ /tha snyad pa'i bsam pa'i dbang gis de skad ces brjod do//ji skad brjod pa ston par byed pa ni/ de bzhin du zhes bya ba de byed pa nyid kyi de byed pa ma yin pa las tha dad pa'i rnam pa de nyid kyis te rgyur gyur pa gang dag de byed pa ma yin pa de dag las tha dad pa rnams te/ de byed pa ma yin pa'i sgro 'dogs pa dang bral ba de dag ston par byed do//'di skad brjod pa yin te dngos su na rang gi mtshan nyid kho na de byed pa ma yin pa las tha dad pa yin pa de lta na yang rtogs pa po de dag gis de nyid rnam par rtog pa'i yul yin par zhen pa'i phyir ro/ /yongs su rtogs par byed pa rnams la yang tha snyad byed pa'i cha yod pas na de dag gi yongs su rtogs pa las langs te/rnam par rtog pa nyid kyi don la 'jug pa'i phyir/ sgra rnams kyi don gyi yul can gyi tha snyad mi ldog go/ de bas na rnam par rtog pa'i snang ba don nyid dang /don yang rnam par rtog pa'i yul yin pa'i phyir gzhan sel ba'i spyi'i ngo bo nyid du 'thad pa yin no/ /dngos su ni snang ba dang rnam par brtag par bya ba dag tha dad pa kho na ste/ 'di ltar ji ltar snang ba nyid dmigs pa de ltar 'di gsal ba ma yin la gzhi mthun pa la sogs pa yang mi rung ngo //de nyid ston par byed pa ni/ de kho na nyid sems par byed pa rnams ni zhes bya ba la sogs pa'o/ /des na de ltar lhag par zhen pa la ltos nas don gyi yul can nyid yin pa na/ spyi'i rang bzhin nyid kyang zhen pa las yin par nges par bya'o//gang gi tshe zhen pa'i dbang gis don 'brel par 'gyur ba de'i tshe de la ltos nas blo'i snang ba spyi'i ngo bor 'thad pa yin no/ /de nyid kyi phyir don gyi ngo bo nyid kyis spyi zhes 'chad par 'gyur ro/ /'dir gal te zhes smras te/ de kho na nyid bsam pa na ni rnam par rtog pa rang gi snang ba tsam gyi yul can du bshad do//gal te lhag par zhen pa la ltos nas spyir brjod na ni/ des na rtogs pa po'i bsam pa'i rjes su yang byed pa yin no/ /khyod ni rtogs pa po'i rtogs pa la mi ltos pa kho na yin no/ /de dag kyang gal te de rtogs pa'i bsam pa'i rjes su yang 'jug na ni gzhan sel ba'i spyi yin par mi 'gyur te/gang gi phyir de ltar rtogs pa ni med do/ /don la log pa nyid du zhen pa ni med do/ /sgro 'dogs kyi dben pa la ni 'jug pa yin no zhes bya ba la sogs pa'i tshul khas blangs pa med par dgag pa tsam gyi rang bzhin khas ma blangs pa'i phyir gzhan sel ba ma rtogs pa'i nyes pa spangs kyang rtogs pa'i bsam pa khas len pa la ltos par thal ba yin no zhe na/'di bsal ba'i phyir/ de ltar mi rtogs pa 'ba' zhig tu ma zad kyi zhes smos so/ / 'di skad brjod pa yin te rtogs bzhin pa'i rang bzhin thams cad rtogs pas grub par 'gyur ba ni ma yin te/ rtogs pa'i rang bzhin gzhan du mi srid pa'i dbang gis 'di'i rigs rnam par gzhag pa gang yin pa de rtogs bzhin pa'i rang bzhin las phyi rol du gyur pas mi srid par brjod pa ni ma yin no//gal te de ltar gyur na ni gzhan sel ba'i yul can gyi phyogs la ji ltar log par rtogs pa med pa'i phyir de spyi'i ngo bo ma yin par brjod pa de bzhin du/ spyi khas len pa'i phyogs la yang tha dad pa la sogs par rtogs pa med do//des na gzhan sel ba'i rang bzhin ltar de yang 'dod par mi bya'o/ /des na 'di ltar 'brel pa yin te/ gzhan sel ba'i rang bzhin du mi rtogs pa 'ba' zhig tu ma zad kyi ji srid du tha dad pa dang tha mi dad pa la sogs par yang mi rtogs pa nyid do/ /des na gal te ma rtogs pa'i phyir gzhan sel ba mi 'gyur zhes zer na/tha dad pa la sogs pa'i ngo bor yang mi 'gyur ro/ /de ltar mtshungs pa nyid bsgrubs nas lan 'debs pa ni blo rnam pa tha mi dad pa can zhes smos te tha mi dad pa can du snang ba'o/ /de skye ba la gcig gis ni de'i yul tha mi dad pa'i bdag nyid can dngos por yod pa'i spyi yin par brjod do//de ltar de yang tha mi dad par rtogs pa'i rten du 'gyur ba kho na'o/ /de'i rang bzhin tha mi dad par rtogs pa tsam gyis grub pa la brten nas de'i rang bzhin gzhan du mi 'thad pa'i dbang gis tha dad pa la sogs pa'i chos ji ltar brtags pa de bzhin du/kho bo cag kyang rtogs pas grub pa tha mi dad pa tsam gyi rang bzhin la brten nas gzhan du mi srid pa'i dbang kho nas de snang ba tsam gyi rang bzhin du brjod cing de bzhin du sgro 'dogs rnam par gcod par grub pa'i rang bzhin nyid kyi gzhan sel ba'i rang bzhin nyid do//des na rgol ba gnyi ga yang rtogs pa la bye brag med do/ /rtogs pas grub pa 'dis ma gtogs pa'i ngo bo khas blangs par grub pa bsgrubs pa bzhin du nged kyis kyang brtags so/ /'on kyang nged kyis brtags pa'i tshul khas ma blangs par ni tha dad pa la sogs pas kyang spyi 'grub pa legs par bsgrub par mi 'gyur ba des ni de skad brjod par zad do//spyi zhes bya ba ni bsgrub pa ma yin gyi 'on kyang thams cad du rtogs pa nyid bsgrub par bya ba yin no/ /des na 'di gal te rang grub par bya ba'i don du rtogs pa'i rang bzhin grub pa 'phen na ni dngos po 'grub po//de ste grub pa de nyid rang 'gal na ni yul med pa'i rtogs pa tsam zhig grub pa la 'chel bar bya ba yin te/ dngul la sogs pa shes pa bzhin no/ /de'i phyir nged kyi gzhung kho na la mi rtogs pa de ltar grub pa'i rang bzhin du bsgrubs par 'grub pa'i phyir blo la snang ba'i spyi gzhan sel bar brjod do//de nyid bshad pa de ni zhes bya ba'o/ /dngos po gzhan las log pa yin pa'i phyir de la gzhan sel ba yod do/ /spyi'i yul can la 'gog par byed pa'i 'gal ba yod pa ltar gzhan sel ba'i yul can la ni med do//sgra'i rten can gyi tha snyad kyang de ltar snang ba yin te/ dngos po'i yul can du dmigs pa'i phyir dang de yang gzhan sel ba'i ngo bo yin pa'i phyir ro/ /de ltar bsam pa'i dbang gis na spyi yod pa yin no zhes bstan nas/ da ni dam pa'i don du med ces bya ba bshad pa'i phyir blo 'di zhes smos so//bsam pa'i dbang gis tha dad pa med pa'i rnam pa can gyi blo'i gzung ba gzhan sel bar brjod kyi/ spyi zhes bya ba ni med do/ /ji ltar blo rnams tha mi dad pa can skye ba de'i rten zhes bya bas ni snang ba brjod pa yin gyi/de de'i rten nyid ma yin no zhes bya ba'i don to/ /da ni de'i gzhung gzugs pa'i phyir/ 'di ltar zhes smos so/ /khra bo la sogs pa'i gsal ba rnams ni rjes su mi 'gro zhing phan tshun rjes su 'jug pa ma yin te/ khra bo ser skya ma yin la ser skya yang khra bo ma yin no//rjes su mi 'gro bar ji ltar rtogs she na/ gsal ba nyid kyi phyir ro/ /spyi ni gsal ba yod na 'gyur te/ de la brten pa'i phyir dang de yang phan tshun tha dad pa'i phyir ro/ /rjes su 'gro na ni khra bo la ser skya yod pa'i phyir khra bo gang yin pa de nyid ser skyar 'gyur ro//da ltar gsal ba rnams gcig pa yin na spyi nyid du ga la 'gyur/ mtshungs pa rnams kyi de ltar 'gyur ba'i rgyu mtshan du gyur pa'i rang bzhin ni spyi yin na gcig tu gyur na ni mtshungs pa zhes bya ba cung zad kyang med pa'i phyir dngos po gang gi spyir 'gyur/ de'i phyir gsal ba nyid kyis gsal ba rnams rjes su mi 'gro ba'i phyir 'dir rigs pa gzhan ma bshad do//gsal ba rnams rjes su mi 'gro mod/ de dag la rjes su 'brel pa mtshungs pa'i rgyu mtshan gyi spyi gzhan yod par 'gyur ro zhe na/ med do zhes bshad pa ni rjes 'gro gzhan ni zhes bya ba'o//gsal ba dag las 'brel to/ /des na de lta bu'i rjes su 'gro ba can gsal ba gcig la yod pa gsal ba gzhan la yang gnas par ni snang ba med do/ /gsal ba la rjes su 'gro ba can tha dad pa ni 'ga' yang mngon sum la snang ba med do zhes pa'i don to//'dir ni mngon sum du mi snang bar sgrub pa yin te/ ji ltar brtags pa ltar ni rnam par rtog pas kyang rtogs pa med pa ni 'og nas 'chad par 'gyur ro/ /rjes su 'gro ba gzhan mngon sum gyis ma rtogs so zhes bya ba ji ltar rtogs/'di ltar gsal ba tha dad pa dag la gsal ba de dang de mtshams sbyor bas stong pa'i rnam pa gcig tu rtogs pa ni yod pa yin te/ khra bo ba lang yin la ser skya yang ba lang ngo zhes bya ba yin gyi/ khra bo gang yin pa de nyid ser skya yin no zhes ni ma yin no/ /de'i phyir tha dad pa dang rjes su 'brel pa ni yod pa yin te/tha mi dad na gsal ba mtshams sbyor bar thal ba'i phyir dang / mtshams sbyor ba med na yang rtogs pa gcig pa mi 'grub pa'i phyir ro/ /de ni rang gi ngo bo ji lta ba bzhin du 'di'i ba lang nyid dam mi rtag pa nyid ces tha dad par 'dzin pa kho na'o//des na/ rjes 'gro gzhan ni snang ba med/ /ces ji ltar brjod/ mngon sum gyis snang ba med pa'i phyir ro zhe na 'di nyid mngon sum ma yin no zhes ga las rtogs/ mngon sum ma yin na ni long ba la yang ba lang ngo snyam du rtogs pa yod par 'gyur ro//rnam par rtog pa'i phyir mngon sum ma yin no zhe na ma yin te 'gal ba med pa'i phyir ro/ /de med na ni rtog pa dang bral ba nyid mngon sum gyi mtshan nyid du ma grub pa'i phyir ro/ /des na rjes su 'gro ba gzhan mi snang bar ma grub bo zhe na/ 'di la brjod pa tha dad pa dang rjes su 'gro ba dag ni mngon sum gyi chos su ma grub pa'i phyir ro//tha dad pa dang rjes su 'gro ba'i rtog pa mngon sum dang lhan cig 'byung ba yin yang 'di mngon sum du snang ba nyid dam/ rtog pa dang bcas pa dang / rtog pa med pa'i yid gnyis cig car 'jug pa'i phyir na rnam par rtog pa nyid yin zhes rnam par dpyad pa na mngon sum gyi snang ba dang mi 'dra ba nyid kyis rnam par rtog pa mngon sum nyid yin pa bsal bas na 'di ni rnam par rtog pa yin gyi nyams su myong ba ni ma yin no zhes brjod do//'di ltar gang gis sngon po rig pa med kyang mig byed pa med pa sngon po mngon du byas par rtogs pa med la/mig byed pa dang ldan pa la ni yod par 'gyur ba mngon sum dang / rnam par rtog pa'i snang ba gnyis kyi dbang po'i byed pa yod pa dang med pa dag gi rnam pa'i khyad par ni nye bar mtshon par gyur pa'i sngon po rtogs pa yod pa na gtan la phebs pa kho na'o//de'i phyir dngos po snang ba'i nyams su myong ba yang gzhan du gyur pa yin la/ de mi snang ba'i rnam par rtog pa yang gzhan du gyur pa yin no/ /de bzhin du tha dad pa snang ba yang rnam par rtog pa dang nyams su myong ba dag la rang bzhin tha dad par rtogs pa kho na'o//rnam par rtog pa la snang ba'i ba lang gang yin pa ni/ rang gi ngo bo bzhin du tha dad pa yang mi gsal ba yin te de ni rang gi ngo bo las tha mi dad pa'i phyir ro/ /nyams su myong ba la ni rang gi ngo bo bzhin du gsal ba kho na snang ba dang rnam par brtag par bya ba dag gsal ba dang mi gsal ba dag las snang ba tha dad pa zhes bya ba gang yin pa de ni thag ring pos bskal pa ma yin par rtogs pa yin no//de nyid kyi phyir thag ring po nas nyams su myong ba'i mi gsal ba nyid ni rnam par rtog pa'i snang ba dang mi mthun pa nyid yin te/gang gis der ni mthong ba nyid rtogs pa yin la/ rnam par rtog pa ni ma yin pa'o/ /des na 'dir sngon po rtogs pa na 'di ni sngon po nyid ces tha dad par rtogs pa'i sngon po nyid kyang gsal bar snang ba ma yin te/de nyid du tha dad pa'i dngos po gzhan yin no/ /'di dag gi tha dad pa ni mi gsal ba kho na'o zhe na/ dngos po ni mi gsal ba zhes bya bar mi srid do/ /thag ring po nas mi gsal ba nyid kyi rang bzhin ni bstan zin to/ /gsal ba'i dngos po la mi gsal ba'i tha dad pa zhes bya ba gang zhig yin/tha dad pa ni gnyis kyi rang gi ngo bo mthar thug par 'gyur ba yin no/ /de'i phyir sngon po'i bdag nyid kho na la/ ser po la sogs pa 'ga' zhig las tha dad par rang bzhin gzhan dang ma 'dres pa'i rang gi ngo bo dang ldan pa 'ga' zhig gsal ba yin te/des na tha dad par rtogs pa nyams su myong ba ma yin no/ /rjes su 'gro ba yang nyams su myong ba ma yin pa nyid do/ /khra bo dang ser skya dag bdag nyid thams cad kyis rang gi bdag nyid dang rang gi yul las gzhan pa'i bdag nyid dang /yul dag na snang ba med pa'i phyir ro/ /gsal ba ni mi gsal ba'i rnam pas rjes su 'gro ba ma yin no/ /gal te rang gi bdag nyid dang rang gi yul las gzhan du snang ba yod pa yin la/ khra bo ni ma yin gyi 'on kyang de la yod pa'i ba lang nyid do//'di ltar khra bo ba lang yin la/ ser skya ba lang nyid du snang ba yin te/ ba lang ma yin na ma he la sogs pa'i rang bzhin du snang bar thal bar 'gyur ro/ /de'i phyir gcig la yod pa gang yin pa de gzhan na yang yod pa'i phyir ji ltar rang bzhin rjes su 'gro ba med ce na/'di la brjod pa/ bden te/ ma he la sogs pa dang mi 'dra ba'i rang bzhin du khra bo dang ser skya snang ba yin mod kyi khra bo la yod pa gang yin pa de nyid ser skya la yang yod pa ni ma yin te/ yul la sogs pa tha dad pa'i phyir des na ba lang ma yin na/gnyi ga yang ba lang ma yin pa las ldog par mi rung ba'i phyir ro/ /khra bo ba lang yin pa na/ ser skya yang ba lang nyid yin pa de lta na yang gcig la yod pa'i ba lang nyid gang yin pa des ni gzhan la yod pa ma yin te/ lhan cig skye ba la sogs par thal ba'i phyir ro/ /de'i phyir khra bo la sogs ba lang gi gsal ba dag ni ba lang kho na ste/ ba lang nyid ma yin na/ ma he la sogs pa bzhin ba lang ma yin pa las ldog pa mi rung ba'i phyir ro/ /'on kyang gcig gi ba lang nyid gang yin pa de ni gzhan la med pas na rjes su 'gro ba med kyang ba lang nyid du snang bar grub po//'grel pa ni gsal ba 'di dag ni zhes bya ba la sogs pa'o/ /phan tshun rjes su mi 'jug pa'i phyir tha dad par 'gyur ro zhes bshad zin to/ /rjes 'gro gzhan yang zhes bshad pa'i phyir de rnams la zhes smos so//gang la ltos nas gzhan yin pa de bstan pa ni/ de rnams las zhes bya ba'o/ /tha dad pa zhes bya ba ni don gzhan du gyur pa'o/ /de ltar zhes bya ba ni tha dad pa nyid du'o/ /de lta na yang tha dad pa ma mthong bas med par brjod pa yin no//gang gi mthong ba la rtogs pa'i 'du byed yod pa de med par 'grub pa yin te/ bum pa la sogs pa lta bu mthong ba ni dmigs pa ga la brtan par gyur pa de la rnam par 'jig pa'i yan lag yin na/ de ltar bltar mi rung ba'i spyi ni nges par nus pa ma yin te/rnam par rtog pa nyid nges pa'i rang bzhin yin pa'i phyir ro zhe na/ brjod pa snang ba rang gi ngang gis ji ltar mi rtogs pa de ltar rtogs pa ma yin yang 'di ni 'di ltar yin no zhes nges par brtag par nus pa yin no/ /dper na rnam par rtog pa'i myong bar bya ba'i rang bzhin snang ba nyid du rtogs pa yin yang myong bar bya ba'i rang bzhin du nges par brtag par nus pas yongs su rtogs par byed pas snang ba dang mi mthun par 'jog pa bzhin no//de bzhin du ba lang la sogs pa snang ba yang gal te tha mi dad pa'i rnam par snang ba rtogs pa'i mthar thug par 'gyur ba de lta na yang nges par brtag par nus pa tha dad pa dang rjes su 'gro ba'i ngo bos stong pa nyid rnam par 'jog pa yin no//de ltar rnam par gnas pa yang mngon sum gyi snang ba la brten nas rnam par gzhag par 'gyur ba'i phyir na/'dir mngon sum nyid tshad mar byas par 'gyur ba yin no/ /de bzhin du snang ba dang rnam par brtag pa dag snang ba tha dad pa yang mngon sum nyid kyis rnam par gzhag par 'gyur ba yin no/ /gang du rang gi ngang gis 'du byed pa can gyi mngon sum der yang de lta bu'i yul snang ba tsam las 'di'i byed pa gzhan ni 'ga' yang med do//'on kyang de ltar snang na yang ji ltar de'i rang bzhin shes par nus pa de ltar 'du byed pa rab tu chags pa 'bad pa la mi ltos pa tsam du zad do/ /ji ltar nus pa ma yin pa'i phyir 'du byed pa med pa de ltar nges par brtag par nus pa la ni de sngon du 'gro ba can gyi rtogs pa de nyid las yin te/ji skad bshad pa bzhin no/ /ji ltar nges par brtag par mi nus par de ltar rtogs pa ni/ de'i rtsa ba can ma yin pa kho na ste/ skad cig ma'i rang bzhin ni snang ba ma yin la/ snang ba nyid las nges par brtag par nus pa ma yin pa'i snang ba la brten nas rnam par gnas pa ma yin pas rtags nyid kyi rnam par gzhag pa yin no//de'i phyir med pa la sogs pa ni yongs su rtogs par byed pa rnams kyi mngon sum yin gyi/ tha snyad pa rnams kyi ni ma yin no//gang las 'di mi snang yang med par mi 'gyur ba 'di ni mi snang bar khas blangs par nus pa ni ma yin no zhes bshad pa ni/ mi snang na zhes bya ba'o/ /'di la ji ltar rang gis skye ba'i rnam par shes pa la mig la sogs pa bzhin du/ de lta bur gyur pa nyid khyad par kho nar rtogs pa'am/rjes su dpag pa yang der 'gyur ba gang yin pa spyi tha dad pa yang don dang 'brel pa tsam gyi rang bzhin ni ma yin no/ /des na rang bzhin tha dad pa yin yang rang gi rten tha mi dad par gsal ba yin no/ /'di ba lang zhes gzhi mthun par rtogs pa'i phyir ro//des na gsal ba gzhan la yang rang bzhin de nyid rtogs pa yin pa'i phyir der yang de kho na bzhin rtogs pas na tha mi dad par rtogs pa yin no/ /des na 'di ni de ltar bdag nyid du gzhan 'dzin pa'am tha snyad 'dogs par byed pa yin no/ / rnam pa de lta bu ni mi snang bar 'gyur ba ma yin te/ des na snang ba nyid du 'gyur ba las de med pa'i phyir med pa kho na'o/ /spyi khas blangs kyang dngos po rnams rigs mthun pa dang / mi mthun pa las ldog pa brjod pa yin pas nyes pa de'i stobs kyis kyang spyi dngos por gyur pa yod pa ma yin no zhes bshad pa ni/de dag dang 'brel pa zhes bya ba yin no/ /gal te gcig po de dang 'brel pa'i phyir 'di dang mtshungs par 'gyur na ni de'i tshe de dag dang 'brel pa gcig yod pa yin pa'i phyir spyir 'gyur ba zhig na/ de ltar yang ma yin pas spyi'i ngo bo ma yin te/grangs la sogs pa la yang thal bar 'gyur ba'i phyir ro zhes bya ba'i don to/ /'di bzlog pa'i phyir pha rol po dag /gal te zhes bya ba la sogs pas grangs la sogs pa dag las spyi khyad par du brjod do/ /gang du tha mi dad pa'i brjod pa dang /blo'i rgyu yin pa mi brjod pa des na/ de dag dang 'brel pa gcig yod pa zhes bya ba der de dang zhes brjod pa dang / de dag la zhes rnam par 'byed pa bsgyur te 'brel to/ /de dag dang 'brel pa gcig spyi'i rang bzhin du brjod pa na/de nyid du brjod pa dang rtogs pa 'jug pa'i rgyu mtshan du rigs pa'i phyir ro/ /de nyid kyi phyir ji ltar gzhan gyi sgo nas gzhan la zhes bya ba'i lan yang rung ba yin te/ de lta ma yin na/ 'di ma brtsad bzhin du brgal zhing brtag par ji ltar 'gyur/rang gi mtshan nyid de dag la shes brjod tha mi dad pa'i rgyu mtshan gcig po gang yin pa de ni spyi yin no/ /grangs la sogs pa ni de lta ma yin te/ gnyis nyid kyi grangs brten pa yin yang rigs mi mthun pa dag la tha mi dad pa'i brjod pa dang rtogs pa med pa'i phyir ro/ /'di la ji ltar zhes gsungs te/dngos po tha dad pa gzhan gyi sgo nas don gzhan la shes pa 'jug pa ji ltar 'gyur/ de skad dris pa na gzhan dag gal te log na gnas pa'i spyi'i ngo bo las mig las gzugs shes pa ltar de dag la de ltar rtogs pa skyed na ni/ de'i tshe de dag la rnam pa de lta bu'i rang bzhin med pa'i phyir na/dmigs pa med pas 'khrul par thal te rang gi nye bar len pa'am gzhan las kyang rung te/ rnam pa de lta bur rtogs pa khyad par ci yod snyam du bsams nas/ de dang 'brel pa'i phyir ro zhes smos so/ /'di skad brjod pa yin te/gang gi tshe tha mi dad pa'i dngos po 'di tha dad pa de dag la gnas pa de'i tshe bdag la dmigs pa tha mi dad pa'i shes pa de dag la 'jug par byed pa yin te/ de dag de dang tha mi dad par rtogs pa'i phyir de dag la tha mi dad par rtogs pa'i rgyur 'gyur ba yin la de la dmigs pa'i rtogs pas de dag kyang rtogs pa yin pa de'i tshe 'gal ba 'ga' yang med do zhes bya ba yin no//de lta na 'o na grangs la sogs pa yang rang bzhin de nyid du thal lo zhes bshad pa ni/ grangs dang zhes bya ba la sogs pa'o/ /de la bsam pa ma rtogs par sngar brjod pa'i bsam pas rtsod pa ni/gal te spyi'i bdag nyid ma yin pa'i phyir zhes bya ba'o/ /ji skad bshad pa bzhin du 'di dag ni tha mi dad pa'i rjod pa dang rtogs pa'i rgyu ma yin pas na grangs la sogs pa ni de'i rang bzhin ma yin pa nyid do//ji ltar zhes bya ba la sogs pa de bsam pa gang gis brjod pa de gsal bar byed pa'i sgo nas de bzlog pa ni spyi'i bdag nyid 'di gang yin zhes dpyod pa ma yin nam zhes bya ba'o/ /shes pa dang brjod pa dang tha mi dad pa'i rgyu mtshan gcig ni spyi yin no zhes spyi'i lus brjod pa yin te/spyi'i bdag nyid ma yin pa grangs la sogs pa thal bar mi 'gyur ro zhes gang brjod pa yin no/ /de spyi'i bdag nyid ma yin gyi gzhan du 'gyur ro zhes bya ba ji ltar zhes dpyod pa yin no/ /dpyod pa de la skabs su bab pa'i spyi dang 'brel pa yod na/'brel pa can gzhan la shes pa 'jug ste/ des na spyi yin no zhes spyi'i bdag nyid yin no/ /de lta na yang 'brel pa'i phyir ro zhes brjod pa yin no/ /spyi'i bdag nyid de lta bu yin pa de la bshad pa/ du ma dang 'brel pa can dag las kyang ste/rdzas ni yan lag du ma dang 'brel pa gcig de dag la yod pa yin la/ grangs kyang grangs dang ldan pa la/ bya ba byed pa po rnams la yin pas gcig du ma las yod pa'i mtshan nyid rtogs pa tha mi dad pa'i rgyu nyid yod pas na/ de dag las du ma la shes pa 'jug ste/gtan tshigs de'i phyir du ma dang 'brel pa can gyi rdzas la sogs pa rnams spyi'i bdag nyid yin no/ /'di skad brjod pa yin te/ rang gi nye bar bsgyur ba'i sgo nas shes pa skyed pa na/ shes pa 'khrul pa med pa'i rgyu nyid dang / spyi nyid du yang 'gyur ba yin no//de dang 'brel pas byas pa yin te/ de lta ma yin na/ gcig po gang yin pa de nyid gcig nyid du rtogs par 'gyur ba'i phyir na gsal ba rnams la gcig tu shes pa'i rten du mi 'gyur ro/ /des na de dag la 'brel pas na de dag nyid du 'dzin par byed pa yin pas spyi nyid yin par rnam par gnas pa na grangs la sogs pa dang khyad par ci yod/'di ltar de dag kyang bdag nyid gcig du ma la gnas pa yin no/ /des na rdzas dang grangs dang las kyang gcig du ma dang 'brel pa yin pas na/ ji ltar rang gi nye bar bsgyur bas gsal ba 'dzin par byed pa ma yin/gal te spyi ba lang nyid kyi rang bzhin yin pa'i phyir des ba lang ngo zhes gsal ba 'dzin par byed par 'gyur na/ grangs kyang gnyis nyid kyi rang bzhin yin pa'i phyir re re la yang gnyis gnyis so zhes rtogs pa skyed par byed par 'gyur la/de bzhin yan lag can yang yan lag rnams su las yan lag so so la yan lag can no snyam pa dang bya ba yang shing la sogs pa la tshos pa tshos pa snyam pa'i rtogs pa skyed par 'gyur ro/ /'on te yang rtogs pa skyed pa'i nus pa 'di ni spyi kho na'i yin gyi/grangs la sogs pa la ni yod pa ma yin no snyam na/ de ni ma 'brel te/ de ltar brtags pa la de lta bu'i rtogs pa mthong ba'i phyir gcig du ma dang 'brel pa la de ltar rtogs pa 'jug pa'i phyir la/ de yang de ltar ma nges par byas pa yin te/gal te gcig du ma dang 'brel pa 'dir rang la brten pa'i shes pa nye bar sdud na grangs la sogs pas kyang sdud par 'gyur ro/ /gal te 'brel kyang de tsam gyi mthar thug pa'i phyir de de la brten pa'i shes pa yul gzhan la thob par byed pa ma yin na/spyi yang de kho na bzhin du 'gyur ro/ /'di ltar gal te nus pa la yang rnam pa de lta bu'i shes pa dmigs pa dang bcas pa nyid yin na/ 'o na 'di dmigs pa'i chos nyid yin pa'i phyir grangs la sogs pa la yang 'gyur ro/ /sngon po gcig la sngon po'o snyam du shes pa nus pa de la brten par 'gyur ba'i phyir shes par 'gyur ba gzhan dag la yang mi 'gyur ba ni ma yin no//'on te 'di dmigs pa dang bcas pa dang / ma 'khrul ba ma yin na nus pa la yang 'gyur ro/ /de bshad pa ni de ltar na ni zhes bya ba yin no/ /de ltar ngo bo 'chol ba yin no//gal te gnyis kho na la gnyis su 'gyur ba yin gyi/ gcig la ni ma yin pa'i phyir ji ltar gnyi ga la gnyis gnyis zhes rtogs par 'gyur/ des na ji ltar shes pa tha mi dad pa'i yul nyid yin/ de bzhin du rdzas kyang yan lag rnams la yan lag re re la yan lag tu 'dzin pa 'jug pa'i rgyu ma yin te spyi bzhin no//brjod pa gnyis nyid la gnas pa na/ gal te re re la gnas pa ma yin na ni 'ga' la yang gnas par mi 'gyur ro/ /'on te gnas na ji ltar re re la de ltar mi rtogs 'di ltar gal te gnyis re re la yongs su rdzogs par ni mi gnas pa de ltar ni yang gnas pa yin pa'i phyir de ltar rtogs par 'gyur ro//cha med pa ni du ma la gnas pa na/ re re la yongs su ma rdzogs par mi 'gyur te cha dang bcas pa nyid du thal bar 'gyur ba'i phyir ro/ /des na de ltar de ni dam pa'i don du med//ces bya ba bsgrubs pa na/ /gang gis rang gi ngo bo yis/ /zhes bya ba la sogs pas spyi tha dad pa bkag pa'i sgo nas blo'i snang ba spyi'i ngo bor bshad pa la brten nas/ de ni dam pa'i don du med/ /ces bya ba bzlog pa'i phyir/ gzhan dag de lta 'o na zhes smra'o//ji skad bshad pa'i tshul gyis/ phyi rol gyi spyi med kyang / blo'i bsam pa'i dbang gis spyi khas blangs pas/ blo'i snang ba kho na spyi yin par 'gyur ro/ /'di ltar blo'i bsam pas spyir bstan pa na/ bdag nyid kyi tha mi dad par snang ba sgro btags nas 'dres par bshad pa yin te/des na tha mi dad pa 'di nyid spyi yin no/ /de yang yod pa nyid yin pas de ni dam pa'i don du med ces bya ba mi rigs so/ /de ji ltar yod ce na/ smras pa shes pa'i ngo bo yin pa'i phyir ro zhe na/ de bzlog pa'i don du med pa nyid gzhung gzugs pa'i phyir de ni ma yin no zhes smras so//gal te yang shes pa'i snang ba tha mi dad pa yin pa de lta na yang / 'di dag gi phyir 'gyur ba gang yin pa des don mtshungs par 'gyur ba ni ma yin no/ /des de dag rnams mtshungs pa med par ni de dag gi spyir 'gyur ba ma yin no//de yang yod pa ma yin te/ 'di ltar blo'i snang ba ni shes pa dang tha dad pa ma yin no/ /phyi'i don gyi dngos po nyid ni de las tha dad pa kho na yin no zhes ston pa ni/ don gzhan zhes bya ba'o/ /don tha dad pa ni don gzhan te shes pa la ltos pa nyid kyis so//de lta bur gyur pa der 'di ji ltar 'brang bar 'gyur te gang gis 'di de'i spyir 'gyur ba ji ltar de dang 'dre bar 'gyur/ 'di nyid bshad pa ni/ shes pa'i ngo bor zhes bya ba'o/ /'di ni shes pa yin la 'di dag ni don yin no zhes tha dad pa bshad pa yin no/ / da ni gang gis rang gi ngo bo yis/ /zhes bya ba la sogs pa'i gzhung du shes pa'i snang ba ji ltar spyi'i rang bzhin du bshad pa de bstan pas rtsod par byed pa ni gal te de'i ngo bo zhes bya ba la sogs pa'o/ /don nyid du zhen pa'i phyir de skabs kyi blo'i snang ba la'o/ /de ltar zhes bya ba ni shes pa'i ngo bo don rnams kyi phyir 'khrul pas tha snyad 'dogs so zhe na/'di skad brjod pa yin te/ ba lang ngo zhes tha mi dad par snang ba shes pa'i rang gi ngo bo yin yang don nyid du nges pa yin no/ /des na ba lang zhes bya ba'i rnam pa 'di don yin par 'gyur la/ de yang blo'i snang ba nyid yin pas des don mtshungs par brjod pa yin no//'dir de la zhes gsungs te/ 'dis ni ji ltar brtsad pa ma bkag pas brtan pa nyid du bstan to/ /'on kyang brgal zhing brtag pa gzhan gyis/ rtsod pa pos bsgrub par bya ba'i dngos po gzhan 'phangs par byas pa yin no//blo'i snang ba de la de ltar de'i ngo bor zhen pa'i rang bzhin gyi shes pa skye ba'i rgyu gang zhig yin na/ gang gis 'di don rnams kyi spyir 'gyur/ rgyu mtshan med bzhin du 'khrul pa skye na yang ha cang thal bar 'gyur ro zhes bstan pa ni/rten med par zhes bya ba'o/ /des na de ltar blo'i snang ba tha mi dad kyang de don rnams kyi spyi ma yin no zhes bsgrubs pa yin te/ des na spyi tha dad pa'i tshul 'di la yod pa ma yin no zhes bstan pa yin no/ /da ni blo'i snang ba'i snang ba tha mi dad pa nyid gsal ba'i phyir mdo 'di nyid sbyor bar byed pa ni/rnam pa gcig tu na zhes bya ba'o/ /thams cad rang gi bdag nyid la ni tha dad pa ma yin no/ /gal te shes pa'i snang ba blo gzhan la yod pa shes pa'i snang ba gzhan dang tha mi dad pa ni spyi tha dad par smra ba'i phyogs su 'gyur ro//shes pa gcig pa tha dad pa ma yin pa blo'i snang ba'i bdag nyid kyi spyi ji ltar shes pa gzhan gyi ngo bo yin/ don gzhan zhes bya bas ni shes pa gzhan brjod pa yin no zhes bya ba'i don to/ /ba lang ngo zhes zhes bya ba shes pa'i snang ba rta'i shes pa'i rang bzhin ma yin mod/gzhan la yang ba lang ngo snyam pa nyid kyi shes pa gnyis pa'i ni yin no zhe na/ de dgag pa'i phyir gsal ba gzhan la 'byung ba'i zhes smras so/ /ba lang nyid ces bya ba'i spyi dang 'brel pa can ba lang gi gsal ba gzhan las gzhan gang yin pa de las 'byung ba ba lang ngo snyam par shes pa gzhan gyi ngo bo ma yin no zhes bya ba'i don to//gzhan ni gzhan gyi ngo bo ma yin no/ /de ltar rnam par shes pa ni gnyi ga ltar yang spyi'i ngo bor srid pa ma yin no zhes bshad pa bsdus te ston pa ni/ de'i phyir zhes bya ba yin no/ / de lta ma yin na de med par nye bar bkod pa 'di ni rnam par brtags pa yin no zhes dogs pa yin no/ /shes pa gzhan zhes bya ba ni bshad pa phyi ma'i phyogs la yin la/ gsal ba gzhan zhes bya ba ni snga ma la'o/ /'di ltar gang gi tshe shes pa de snga ma'i rang bzhin gyis gsal ba la rjes su mi 'gro ba de'i tshe/ji ltar de'i gsal ba'i rang bzhin de'i gsal ba gzhan la rjes su 'brang bar 'gyur/ de lta bu nyid kyi phyir na 'di ni spyi ma yin no/ /gal te snang bzhin pa'i ngo bo ni don du 'gyur ro/ /don med na ni shes pa kho na ste/ de lta bu'i rnam par shes pa yod pa nyid kyis de snang ba'i phyir ro//gnod par byed pa dang ldan pa las de med kyang snang bzhin pa'i ngo bo la mi gnod pa'i phyir shes pa'i ngo bo'i mthar thug par 'gyur ro/ /shes pa'i rang bzhin du yang yod pa srid pa ma yin na ni spyi snang ba nyid du mi 'gyur ba'i phyir bsam pa'i dbang gis na/spyi yod par ni rab tu bsgrags/ /zhes ci ste brjod/ 'di ltar spyi ni mi snang ba yin la/ mi snang na yang blo'i bsam pa'i spyi gang zhig yin zhes de ltar dogs na de bshad pa ni/ de phyir zhes bya ba'o/ /'di ni don rnams la gcig gi bdag tu 'dzin pa mngon par zhen pa lhag par rlom pa yin gyi gsal ba ni ma yin no zhes bya ba'i tha tshig go//gal te spyi 'di gsal ba yin na ni de'i rnam pa can gyi shes pa la de de ltar gsal ba'i phyir shes pa nyid spyi'i bdag nyid du 'gyur ba yin te/zla ba gnyis la sogs pa'i ngo bo bzhin no/ /gang gi tshe shes pa yang spyi'i ngo bor 'gal ba de'i tshe 'di la gsal ba nyid med pa'i phyir 'di spyir zhen pa tsam mo/ /dper na rnam par rtog pa dngos po rig pa ma yin yang dngos por lhag par zhen pa nyid dngos po rtogs pa'i rang bzhin du brjod kyi dngos po gsal ba'i ngo bos ni ma yin pa bzhin no//de'i phyir rang gi mtshan nyid gcig rtogs pa na ba lang la sogs pa'i rnam pa de lta bu rtogs pa gang yin pa de lta bu rang gi mtshan nyid gzhan rtogs na/ de rnam pa gcig tu zhen pa'i phyir spyir bshad do//gal te ji ltar rags pa'i rang bzhin nyid gcig mi srid kyang rnam par rig pa tsam la shes pa'i rang bzhin du mi 'gal ba de bzhin du spyi'i ngo bo phyi rol la mi srid pa yang phyi'i smra ba la rnam par shes par 'gyur ro zhe na/ de ltar ni mi nus te/ shes pa gzhan gyi bdag nyid ma yin na de lta bu'i ngo bor mi 'grub pa'i phyir te yang mi rung ba'i phyir te/ gcig yod na gzhan nges par nye ba ma yin pa'i phyir dang / de med par yang de de'i rang bzhin du mi 'thad pa'i phyir ro/ /de nyid kyi phyir spyi ni rags pa'i rnam pa bzhin du kun rdzob tu yang yod pa ma yin no//'on kyang ri bong gi rwa bzhin med pa kho na'o/ /des na shes pa'i bdag nyid dang / thun mong ma yin pa dang skad cig ma'i sngon po la sogs pa'i rnam pa 'di phyi rol dang thun mong pa nyid dang sngon mthong ba nyid du rtogs pa ni lhag par zhen pa kho na yin gyi/ rig pa ni ma yin te/ shes pa'i bdag nyid la ji skad brjod pa las gzhan du ni mi 'thad pa'i phyir dang / de lta bu'i rnam pa ma yin pa de dang de rig pa nyid med pa'i phyir ro/ /'di nyid bshad pa ni/ don rnams ni zhes bya ba'o/ /gzhan gyi khas blangs pa'am shes pa'i bdag nyid ni tha dad pa ste/shes pa'i bdag nyid dngos por yod pa'i gcig pa nyid ma grub pas spyi'i ngo bo ma yin pa'i phyir ro/ /don rnams la de ltar spyi nyid du 'dzin pa ste lhag par zhen pa'i rnam par rtog pa ni log pa nyid yin no/ /spyi bzhin du sngon po la sogs pa'i rang bzhin la yang 'di log pa'i rnam par rtog pa kho na ma yin nam/bden mod kyi 'on kyang phyi rol nyid kyis yin gyi/ sngon po'i ngo bos ni ma yin te/ de ni shes pa'i bdag nyid kyis rang rig pa'i yul yin pas log pa nyid ma grub pa'i phyir ro/ /'di ji ltar mi bden pa de ltar rtog pa ni log pa'i rnam par rtog pa yin na shes pa nyid du mi bden pa ma yin te phyi rol gyi don du smra ba'i phyi rol bzhin du shes pa nyid du yang sngon po 'gal ba med pa'i phyir ro//de nyid kyi phyir lhag par zhen pa'i bdag nyid kho nas rnam par rtog pa log pa'i ngo bo yin pa'i phyir na rnam par rtog pa 'khrul zhes bya bas ni phyin ci log tu lhag par zhen pa nyid brjod pa yin no//gal te yang mdo'i 'dzin pa zhes bya ba nyid kyis bshad pa de ltar na yang de ltar 'dzin pa ni lhag par zhen pa'i rang bzhin no zhes rnam par rtog pa ni 'khrul pa kho na yin no zhes bya ba 'dis brjod pa'i phyir mchog tu legs pa yin no//da ni de'i ngo bor zhen pa'i phyir zhes smras pa'i phyogs khas len pas/ de la de ltar shes pa skye ba'i rten gang yin zhes bya bas brjod par bya ba gzhan la 'phangs pa gang yin pa de bstan pa'i phyir/ ming don gang ldan zhes smos so/ /'di la ji ltar chos tha dad par rnam par rtog pa'i rten gzhan sel ba yin par sngar bshad pa de bzhin du chos rjes su 'gro bar rtogs pa'i yang yin par 'dis brjod pa yin no//de la dngos po gang dang gang las tha dad pa de dang tha mi dad par thal ba sel ba na byed pa tha dad pa'i yul gyis rang bzhin yang tha dad par rnam par brtags pa yin no zhes bshad pa yin te/des na chos tha dad pa 'di'i sa bon ldog pa yin no/ /de bzhin du de lta bu ma yin pa'i dngos po rnams la spyir rtogs pa yang rgyu mtshan med pa can ma yin te/ tha dad pa rgyu mtshan yin pa'i phyir ro//'di ltar khra bo la sogs pa ba lang gi rang bzhin rnams ni so sor ba lang ma yin pa las tha dad pa yin no/ /des na ji ltar khra bo ba lang ma yin pa las tha dad pa de bzhin du/ ser skya yang yin zhing gsal ba'i dbye ba gzhan yang de dang 'dra'o/ /des na 'di dag rigs mi mthun pa dang /tha mi dad par thal ba na gcig la sgro btags pa'i ba lang ma yin pa gang yin pa de nyid gzhan du yin pa'i phyir de dang tha mi dad pa bzlog pa'i 'bras bu can nyid kyis ba lang gi khyad par mtha' dag la ba lang gi rnam par rtog pa gcig 'jug pa mi mthun pa med do/ /'di dag gi rang bzhin ni gcig tu mi 'thad pa'i phyir na/de dag la rang bzhin rtogs pa'i 'bras bu can gyi rnam par rtog pa ni mi 'jug go/ /de dag las tha dad pa'i rang bzhin ni gcig yin la/ de yang de rnams la log pa'i shes pas re re la sgro btags pa yin no/ /yang dag pa'i shes pa ni tha dad pa rnams la tha mi dad par dmigs pa 'gal gyi/gzhan ni ma yin te/ log pa ni phyin ci log sgro 'dogs pa nyid kyis log pa yin pa'i phyir ro/ /ba lang gi khyad par mtha' dag las gzhan pa'i gcig po yang ba lang ma yin pa yin la/ gcig po de ni 'khrul pa des de thams cad la sgro btags te/des na 'di de ltar 'jug pa 'thad pa'i phyir rang bzhin la yang gcig tu rtogs pa'i 'khrul pa 'dir 'gyur ba gang yin pa de dang dbye bar bya ba'i don du de dag la gcig tu rtogs pa zhugs pa las bzlog pa yang 'thad pa yin no/ /rang bzhin gcig tu ma rtogs par ni rnam par rtog pa gcig 'jug pa ma yin no//'di gcig 'jug par 'gyur ba'i phyir spyir nor ba ni 'jug pa'i mthus byas pa yin no/ /'jug pa yang sgro 'dogs la brten pa yin la de yang tha dad pa las yin pa'i phyir rtogs pa 'di ni tha dad pa'i sa bon can yin no/ /gal te tha dad pa ni spyir rnam par rtog pa'i dmigs pa yin gyi sa bon ni ma yin pa ma yin nam/bden te/ 'on kyang de ni de la'ang gzhan las log pa dang zhes bshad pa khyad par dag las tha mi dad pa'i rang bzhin nyid yin no/ /ldog pa'i ngo bo nyid med phyir/ /zhes 'chad par 'gyur ba dngos po gzhan ldog pa tsam gang yin pa de ni dmigs pa ma yin gyi/'on kyang sa bon kho na yin te/ ji skad bshad pa yin no/ /de nyid ni sa bon du 'thad pa nyid do zhes bshad pa ni ming don gang ldan zhes bya ba yin no/ /sgra ni gzhan sel ba'i yul can yin te/ des na gzhan sel ba nyid spyir shes pa'i sa bon yin no/ /rnam par rtog pa'i yul nyid sgra'i don yin pa'i phyir ro//ming ni phan tshun tha dad pa'i don can yin no zhes bstan pa yin no/ /'dir ming don gang ldan zhes bshad pa'i phan tshun tha dad pa nges pa nyid sa bon yin par brjod pa'i don du'o/ /'di ltar dngos po gzhan la med pa yang tha dad pa kho na yin na/ de ni rnam par rtog pa dang rtogs 'brel 'ga' yang med do//sgro 'dogs rnam par gcad pa'i mtshan nyid kyi tha dad pa gang yin pa de ni sa bon yin no zhes bya bar rigs te/ sgra yang de'i don du yin par sngar bstan zin to/ /des na tha dad pa de'i sa bon yin no zhes brjod pa'i ched du ming don gang ldan zhes bshad pa yin no//gal te de de la med pa'i phyir te sgro 'dogs par byed par 'khrul pa yin la/ de ltar na yang de zlog par byed pa'i rnam par rtog pa 'jug pa'i phyir de yang sa bon nyid du srid pa ma yin nam/ bden mod kyi dngos kyis sa bon gyi ngo bo gang yin pa de nyid brjod pa'i phyir de ltar nye bar bkod do/ / de nyid kyi phyir rnam par 'grel pa yang phan tshun tha dad pa de ni sa bon yin no zhes so/ /de gang yin zhe na/ gang zhig shes par bya ba'i phyir zhes smos so/ /sgro 'dogs rnam par bcad pa'o/ /zhes bya ba'i don to/ /gal te ji ltar khra bo bum pa las tha dad pa de bzhin du ser skya las kyang yin pas khra bo dang bum pa dag bzhin du khra bo dang ser skya gnyis kyang yin te tha dad pa'am tha mi dad pa'i chos 'ga' zhig gis stong pa'i phyir ro//des na khra bo ba lang nyid yin pas na de las gzhan gang yin pa de ba lang ma yin pas bum pa ba lang ma yin pa nyid yin na/ ser skya yang ba lang ma yin pa nyid du 'gyur ro/ / 'on te tha dad pa de nyid ma yin pa'i yan lag ma yin na ni bum pa la yang ba lang kho nar 'gyur ro/ /des na gang gis 'dir spyi'i blor 'gyur ba khra bo dang ser skya gnyis ba lang ma yin pa las log pa'i phyir ba lang ma yin par sgro 'dogs rnam par bcad pa'i rten du ji ltar 'gyur/ des na phan tshun tha dad pa ni sa bon ma yin te med pa nyid kyi phyir ro zhe na/de ltar dogs pa 'di bsu nas ji ltar khra bo dang ser skya gnyis ba lang ma yin pa las ldog pa grub kyi khra bo dang bum pa gnyis la ni ma yin pa de bstan pa'i phyir/ bsgrub par bya ba tha mi dad pa can gyi zhes smos so/ /bzho ba dang dgal ba la sogs pa bsgrub par bya ba tha mi dad pa gang la yod pa rnams ni bum pa la sogs pa de'i bsgrub par bya ba can ma yin pa de dag las tha dad pas te gzhan nyid du shes par byas te/sgro 'dogs kyi sgo nas rab tu 'brel pa de dag yongs su spangs nas te rnam par bcad nas 'jug par 'gyur ba'i gtan tshigs kyis na tha dad pa gang zhig shes par bya ba'i phyir brda byed pa ste de lta bu de yang sgro 'dogs pa rnam par bcad pa kho na yin no//de'i don ni 'di yin te khra bo dang ser skya gnyis rang bzhin gcig dang ldan pa ma yin pa de lta na yang gang las tha dad kyang thams cad khyad par med par mi 'gyur ba don rnams la mi 'dra ba yod pa kho na'o//'di ltar rang bzhin gcig med kyang ji ltar khra bo bzho ba dang dgal ba la sogs pa la nus pa de bzhin du tha dad pa'i rang bzhin gyi bum pa ni ma yin la ser skya ni tha dad pa'i rang bzhin yang nus pa yin no/ /des na tha dad pa zhes bya ba tsam gyis ni tha dad pa rnams khyad par med pa ma yin te/'ga' zhig kho na don bya ba de byed pa'i phyir dang / thams cad dam tshig nyid ni ma yin pa'i phyir ro/ /'di yang khyad par rnams so so rang gi rang bzhin kho nas byed pa yin pa'i phyir mi 'dra ba 'di ni khyad par gyi bdag nyid kho na'o/ /de las tha dad par khyad par med kyang de ni mi 'dra ba'i bdag nyid kho na ste/ji ltar 'di rnams kyi mi 'dra ba yin pa de bzhin du 'ga' zhig kho na'i yin no/ /phan tshun ma 'brel pa ba lang gi ngo bo yin gyi tha dad kyang gzhan ni ma yin pas nyes pa 'ga' yang med do/ /'di ltar shes brjod tha mi dad pa'i dngos po nyid kyi phyir 'di dag la spyi dgos pa yin gyi rang gi ngo bo'am/ rang gi ngo bos bsgrub par bya ba'i 'bras bu la ni ma yin no/ /'di dag gi rang gi ngo bo ni spyi la ltos pa 'ga' yang med de de ni rang gi rgyu kho na las grub pa'i phyir ro/ /spyi'i stobs kyis ni der shes pa tha mi dad par 'gyur ba 'ba' zhig tu zad do/ /de bzhin du 'bras bu yang de'i rang gi ngo bo yod pa nyid tsam la ltos pa yin gyi/spyis ni de la cung zad kyang mi dgos te nus pa yod pa tsam nyid las 'byung ba'i phyir ro/ /des na tha dad kyang 'di lta bu'i bdag nyid can gyi rang bzhin mi 'dra ba yod pa dang med pa dag ni khyad par 'ga' zhig kho nar grub pa yin no/ /des na ldog pa la 'gal ba med pa'i phyir de spyi'i rtogs pa'i sa bon du 'thad pa yin no//de nyid sa bon du gzhung gzugs pa'i phyir rnam par rtog pa 'di ni de kho na 'dzin pa na zhes smos so/ /'dzin pa'i tshig gi tshul gyis ni 'di'i tha mi dad pa'i rang bzhin nyid brjod do/ /de kho na zhes spyi la sogs pa mi 'dzin pa'i bsam pas ji skad brjod pa'i khyad par gyi bdag nyid kho na mi 'dra ba yin pa mi bzod pas yang ji ltar na zhes smras so//tha dad pa gang dag yin pa de rnams kyi 'bras bu tha mi dad pa ji ltar yin te/ tha dad par khyad par med pa'i phyir/ tha dad pa thams cad thal bar 'gyur ro snyam du sems pa'o/ /des na khyad par rnams la rnam pa de lta bu'i mi 'dra ba med pa'i phyir 'ga' zhig dang tha dad par ga la 'gyur zhes ston pa ni gang gis zhes bya ba'o//de la bshad pa ni dngos po rnams kyi zhes bya ba'o/ /ji ltar 'bras bu tha mi dad/ /ces pha rol pos dris pa gang yin pa 'di ni dngos po rnams kyi rang bzhin yin no/ /'di nyid gzhung gzugs pa'i phyir bshad pa/'di ltar gcig gi rtogs pa ni gcig rtogs te spyi'i shes pa'o/ /don shes pa ni nyams su myong ba'o/ /sogs pa'i sgras ni ba lang la sogs pa rnams kyi bzho ba dang dgal ba la sogs pa ste/ 'di lta bu'i bdag nyid don te/ dgos pa gcig sgrub la tha dad pa yin yang kha cig rang bzhin gyis nges pa yin gyi thams cad ni ma yin no//'di skad brjod pa yin te/ dngos po thams cad tha dad par khyad par med kyang khra bo la sogs pa nyid ba lang ba lang snyam du spyir shes pa gcig dang / de bzhin du ba lang gi rnam par snang ba'i mngon sum dang / bzho ba dang dgal ba la sogs pa skyed par byed pa yin gyi ngang pa la sogs pa ni ma yin no//'di ltar de dag nyid de lta bu'i mi 'dra ba dang ldan pa la ni spyi nyid rgyu mtshan yin no/ /skyed par byed pa'i rang bzhin du rang gi rgyu las skyes pa yin la rgyu de dag kyang de lta bu skyed par byed nus par rang gi rgyu kho na las yin pa'i phyir thog ma med do/ /'di ltar spyi yod kyang 'bras bu sgrub pa'i nus pa nges pa 'di ni khyad par gyi bdag nyid yin no//des na 'di mi 'dod pa'i khyad par gzhan la brten par thal gyi 'di bdag nyid kyi rang bzhin ma yin no zhes bya ba khas ma blangs par yang bsgrub par 'gyur ba yin no/ /spyi de'i rten du 'gyur ba'i khyad par rnams kho na nus pa yin gyi gzhan rnams ni ma yin no zhe na/spyi zhes bya ba na tha mi dad par tha snyad byed pa yin gyi/ shes pa tha mi dad pa la sogs pa ltar de dag gi nus pa yang rgyu mtshan la brten pa ni ma yin no/ /rang gi bdag nyid kyi don rnams nye bar bsgyur bar rtogs par byed pas na rang gi rten tha mi dad pa'i shes pa'i dmigs par 'gyur bar byed pa yin no//nus pa ni spyi'i rang bzhin ma yin te de ni gsal ba kho na'i chos yin pa'i phyir ro/ /ci ste yang rang bzhin yin pa de lta na spyi nyid byed pa por 'gyur gyi gsal ba ni ma yin no/ /'on te gsal ba'i bdag nyid tha dad par khyad par med kyang nus pa mi 'dra ba 'di yang grub pa yin na/des ci med kyang 'gyur ro/ /nus pa 'di ni ba lang gi yin gyi rta'i ma yin la ba lang yang khra bo la sogs pa ba lang nyid dang ldan pa'i phyir yin te des na nus pa med kyang rnam pa de lta bu'i mi 'dra ba dang ldan pa la ni spyi nyid rgyu mtshan yin no zhe na/ gal te spyi rang dang 'brel pas khyad par rnams kyi bdag nyid khyad par gzhan dag las mi 'dra bar byed na/'o na ni khra bo la sogs pa rnams kyi ngang pa la sogs pa las mi mthun pa nyid phan tshun mi mthun pa khyad par gyi bdag nyid du rjes su zhugs pa'i phyir spyi tha dad par rtogs pas chog ste/ rnam pa de 'dra ba'i mi 'dra ba dang ldan pa 'di dag rang gi rgyu dag kho na las skye bar 'gyur mod//'di ltar spyi dang 'brel pas byas pa'i 'di dag gi mi mtshungs pa'i bdag nyid gal te spyi nyid yin na/ 'o na ni nang gi bdag nyid la ngang pa la sogs pa dang mi 'dra ba yod pa'i phyir de la mi srid pa ni nus pa dang ldan pa ma yin pa'i phyir ji ltar 'di ba lang rnams kyi nus pa yin zhes bstan/gal te ba lang zhes khyad par nyid de bstan pa yin na/ khyad par can gyi bdag nyid thun mong ma yin pas na/ de dag rta zhes brjod pa'i khyad par gzhan dag la de dag khyad par du gyur pa med pa'i phyir ji ltar 'di dag kho na'i nus pa yin gyi gzhan dag ni ma yin/'on te spyi nyid yin na khyad par nus pa med pa kho na'o/ /'on te khyad par gyi bdag nyid thun mong ma yin yang / gcig po de dang 'brel pa la khyad par du 'gyur na/ de gzhan la med pa de'i bdag nyid rjes su zhugs pas khyad par phan tshun mtshan nyid mi 'dra ba khyad par thams cad la srid pa ma yin pa gsal ba nyung zad la brten pa yin pa'i phyir de dag de ltar sgrub par nus pa'i rang gi rgyu dag kho na la de ltar skye la rag mod/de dag la spyis ci bya/ des na gsal ba rnams so so'i bdag nyid kho na gsal ba gzhan dag dang mi 'dra ba yin no zhes gnas so/ /de bzhin du rnam pa mtshungs pa nyid ma yin yang mig la sogs pa phan tshun med pa'i rang bzhin rnams la mig gi rnam par shes pa gcig byed pa nyid yod pa kho na tha dad par khyad par med kyang rna ba la sogs pa ni ma yin no//gal te gcig tu rtogs pa yang 'dir ci'i ched du bgrang zhe na/ don rnams rang gi ngo bos kyang de ltar 'khrul pa skyed par gyur par bstan pa'i don du'o//mig la sogs pa la mi srid par log par rtogs pa med pas na dper bstan to/ /ji ltar zhes bya ba la sogs pa ni 'grel pa'o/ /dbang po dang yul dang snang ba dang yid la byed pa rnams sam/ bdag dang dbang po dang yid dang don dang / de rnams phrad pa la ni mtshungs pa yod pa ma yin na/bdag dang zhes bya ba la sogs pa ni gzhan du grags pa la ltos pa yin no/ /dbang la sogs pa bzhin zhes bya ba bshad nas/ gcig rtogs pa zhes bya ba la sogs pa bshad pa'i phyir/ de bzhin du zhes bya ba la sogs pa smos so/ /gzhan zhes bya bas ni sogs pa'i sgra'i don bshad do//kha cig ces brjod pa 'chad pa ni/ tha dad par khyad par med kyang zhes bya ba'o/ /dper na shing sha pa dang seng ldeng la sogs pa rjes su 'gro ba med kyang tshos pa la sogs pa'i don bya ba gcig skyed par byed kyi/ chu la sogs pa ni ma yin pa bzhin no//de dag kyang shing sha pa la sogs pa dang rjes su 'gro ba'i phyir ro/ /de bshad pa ni tha dad par zhes bya ba la sogs pa yin no/ /dper na gzugs la sogs pa rnam par shes pa'i rgyu mtshan du rna ba la sogs pa ni skyed par byed pa ma yin pa lta bu'o/ /gzugs la sogs pa'i rnam par shes pa 'byung ba la ni rna ba la sogs pa rnams kyi skyed par byed pa'i bya ba med pa ji lta bar ro//tha dad kyang mig la sogs pas gzugs kyi rnam par shes pa skyed par byed kyi/ rna ba la sogs pas ma yin no/ /dper na sman kha cig ces bya ba ni dpe gzhan dgod pa'o/ / dper na sman kha cig tha dad kyang lhan cig pa zhes bya ba sman gzhan dang lhan cig pas sam/ so so yis zhes bya ba phan tshun ltos pa med par rims la sogs pa zhi bar byed par mthong gi spyis ni ma yin pa bzhin no/ /sha ri ba dang kha ra ba la sogs pa ni lhan cig pas kyang rims sel bar byed la/re res kyang ngo / /'di dag spyi ni yod pa ma yin no/ /spyi med kyang gzhan ni de ltar 'gyur ba ma yin no/ /yang ci'i phyir dpe gzhan bstan zhe na/ smras pa mig la sogs pa la spyi srid pa ni sa bon med pa can kho na'o/ /'di dag la ni sman nyid spyir 'gyur te/ des na de ltar phyogs snga ma'i skabs dbye ba'i phyir 'di ltar bkod de/spyi gcig dang ldan pas 'di dag la 'bras bu gcig yod pa ma yin par bstan pa'i don du'o/ /yang na dper zhes bya ba la sogs pa ni 'grel pa'o/ /gal te 'di snyam du zhes bya ba 'di ni skabs rnyed de rtsod par byed pa'o/ / 'bras bu gcig byed pa de lta bu de dag las gang las de'i 'bras bu yin pa'i phyir gsal ba rnams la 'bras bu gcig mi srid pa gang yin/ sngar bshad pa'i skyon du 'gyur ba sman nyid la sogs pa'i spyi cung zad cig yod do zhe na/ dgag pa'i phyir de ni rigs pa ma yin te zhes smos so/ /khyad par med pa'i phyir zhes brjod pa la/gang zhes bya ba la ltos pa na spyi yis ma yin zhes brjod pa dang 'grel pa ston par byed pa na 'grel pa las spyi zhes smos te/ spyi'i ma yin no zhes bya ba tshig le'ur byas pa snga ma'i cha dang 'brel pas ston pa'o/ /'bras bu de byed pa zhes bya ba ni rims la sogs pa zhi bar byed pa'i sman mthong ba'i phyir de dag 'bras bu de brjod pa yin no//de la khyad par med pa'i phyir spyis rims la sogs pa zhi bar mthong ba zhes bya ba dang 'brel pas na/ spyis 'bras bu byed pa ma yin no zhes brjod do/ /ji ltar zhe na/ de dag zhing sogs tha dad kyang / /khyad par med par thal 'gyur phyir//zhes smras so/ /'di skad brjod pa yin te/ gang zhig yod na gang 'byung ba de ni 'bras bu yin no/ /rims la sogs zhi ba yang sman rnams yod na 'byung ba'i chos can yin pa na/ gal te yang 'di gsal ba yod pa 'byung ba yin nam/ spyis yin zhes khyad par du rjes su 'gro ldog rtogs pa med pa de lta na yang rnam pa gzhan gyis spyi'i 'bras bu nyid bsal nas de gsal ba'i 'bras bu kho nar nges par byed do//'di ltar rgyu khyad par med kyang 'bras bu khyad par du 'gyur ba na/ ji ltar 'bras bu yod pa na rgyu med pa de bzhin du/ rjes su 'gro ba dang ldog pa'i rjes su byed pa med pa de nyid yin no//spyi la ni khyad par 'ga' yang srid pa ma yin pa des na/ de'i 'bras bu yin na sman rnams zhing la sogs pa tha dad pas tha dad pa la/ rims la sogs pa zhi ba de khyad par med par 'gyur ro/ /khyad par yang yod de/ zhing 'ga' zhig las sle tres la sogs pa rnams nus pa gang na nyid kyis myur du byed pa ma yin pa'i phyir la/gzhan las ni ma yin no/ /gal te zhes bya ba la sogs pa ni 'chad pa'o/ /'on te zhing la sogs pa tha dad pas spyi khyad par du mi 'gyur ro zhes smos so/ /gal te zhing tha dad pas kyang spyi khyad par du 'gyur na der gsal ba tha dad pa rnams la tha dad pa'i rgyu mtshan gyis rtogs pa tha mi dad par mi 'gyur te/de tha dad pa'i phyir ro/ /des na rang gi ngo bo nyams par thal ba yin no/ /sun dbyung ba gzhan yang bshad pa ni/ bstan pa zhes bya ba'o/ /gang zhig ces bya ba ltos pa na skabs su bab pa'i spyi nyid dang 'brel pa yin no zhes ston pa ni/spyi zhes bya ba yin no/ /gtan tshigs de bas na phan 'dogs med phyir yang spyi ni rtag pa yin pa des na 'gyur yang phan 'dogs pa ma yin no/ /des na gsal ba rnams bzhin du spyi yod na yang 'bras bu 'byung ba yin no zhes ni brjod par mi nus te/spyi 'bras bu med pa nyid gnod pa'i phyir ro/ /phan 'dogs pa med pa nyid ni gal te 'di zhes bya ba la sogs pas gzhung 'dzugs par byed do/ /gal te spyis 'bras bu byed na lhan cig byed pa la mi ltos pa'i phyir cig car thams cad mngon par sgrub par 'gyur ro//'di yang mngon du ston par 'gyur ro/ /gal te spyi bzhin du gsal ba yang skad cig ma nyid ma yin pas na/ 'ga' la yang phan 'dogs pa med pa'i phyir/ de ltar spyi la bton pas khyad par du 'phags pa zhig brjod ce na/ ji ltar khyad par du 'phags pa med/ 'di ltar gsal ba skad cig ma ma yin pas nye bar mi sbyor na skad cig nyid kyis phan 'dogs par 'gyur ro//spyi ni skad cig ma nyid ma yin na/ rang gi ngo bo nyid med par 'gyur ro/ /dpe ni de ltar spyi khyad par med pa'i phyir dang phan 'dogs pa med pa'i phyir 'bras bu'i khyad par gyi rgyu ma yin no zhes bsgrubs nas gsal ba khyad par dang ldan pa yin pa'i phyir de'i khyad par gyi rjes su byed pa nyid du bstan pa'i phyir/gsal ba dus dang yul zhes bya ba'o/ /rgyu'i khyad par las khyad par sgrub pas 'bras bu'i khyad par byed par 'gyur ro/ /'di yang skad cig ma nyid du yang mdun nas ston par 'gyur ro//des na de ltar/ dper na sman kha cig ces bya ba la sogs pa gcig rtogs don shes la sogs pa/ /zhes bya ba gzhung 'dzugs pa brjod nas/ gcig rtogs zhes bya ba la sogs pa grub par ston pa ni de bzhin du zhes bya ba yin no/ / des na de dag de'i 'bras bu can ma yin pa dag las kyang khyad par med par tha dad par grub po zhes ston pa ni/ de dag byed pa na de mi byed pa can dag las tha dad pa'i phyir tha mi dad pa zhes bya ba'o/ /de rgyu can ma yin pa dag las kyang tha dad pa'i phyir de dag tha mi dad par bshad pa ni/ gcig gi zhes bya ba'o//de de ltar bsam pa la ltos na spyi khas blangs pa dang / rnam par rtog pa dngos po'i yul can ma yin pa dang / spyi zhes bya ba 'ga' yang med do zhes gnas pa na/ ji ltar rnam par rtog pa dngos po'i yul can ma yin pa dag gis kyang blo la ltos pa'i spyi la don rnam par gnas pa 'grub pa de bstan pa'i phyir rtsod pa slong bar byed pa ni yang ci zhes bya ba'o//gnyi ga ltar yang nyes pa ci yod ces rtsod par byed pa la 'dri ba ni/ de la cir 'gyur zhes bya ba'o/ /rang gi mtshan nyid rnam par rtog pa'i yul du mi srid pa'i phyir/ gzhan sel ba'i mtshan nyid kyi spyi rang gi mtshan nyid phyi rol gyi dngos po mtshungs pa zhes bya bar rtogs pa yin no//yang na gzhan phyi rol gyi dngos po ma yin pas ji ltar don byed/ 'di skad brjod pa yin te rnam par rtog pa rnams dngos po'i yul can ma yin pa'i phyir gal te 'di lta bu'i bdag nyid kyi spyis rang gi mtshan nyid mtshungs so zhes rtogs par bya ba ma yin gyi 'on kyang dngos po'i rang bzhin gzhan kho na yin no//'o na ji ltar du bas me rjes su dpog pas 'jug pa mes bsgrub par bya ba 'thob par 'gyur/ rnam par rtog pa de me'i yul can yin no zhes me ma yin pa rig pas zhugs pas mes bsgrub par bya ba'i don grub pa ni ma yin no//de ltar ma yin na/ smig rgyu la chur shes pa na yang chus bsgrub par bya ba 'grub par 'gyur ro/ /des na rnam par rtog pa'i yul la de mi byed pa las tha dad pa yang rnyed par dka'o/ /des na ji ltar 'di de byed pa nyid kyi de mi byed pa dag las tha dad pa'i mtshan nyid kyi spyi mtshungs so zhes bya bar nges par bya/nyes pa gzhan yang brjod pa ni/ rang gi mtshan nyid la yang zhes bya ba'o/ /mi rtag pa nyid kyi bdag nyid kyi spyis rnam par rtog pa rnams rang gi mtshan nyid kyi yul can ma yin pa'i phyir gal te byas pa nyid las sgra mi rtag par rjes su dpog pa na/sgra mi rtogs na ni don mi rtag pa nyid du mi 'gyur ro/ /de bzhin du bdag med pa nyid la sogs par rjes su dpag pa gzhan yang med par 'gyur ro/ /gzhan yang rjes su dpag pa'i dngos po'i yul can yin pa nyid kyis mi rtag pa dang bdag med pa la sogs pa rjes su dpag pa de lta bur gyur pa dngos po'i rang bzhin yin no zhes grub na/cha med pa'i don mngon sum gyis bzung ba na de dag bzung bar 'gyur ba zhig na/ rjes su dpag pa dngos po'i yul can ma yin na ni 'di dag rnam par rtog pa'i snang ba kho na yin gyi/ dngos po'i ngo bo ni ma yin no//de bshad pa ni/ de dag kyang zhes bya ba ste mi rtag pa nyid la sogs pa dag go/ /de dag ni dngos po'i ngo bo ma yin te/ brtags pa'i bdag nyid la gnas pa'i phyir ro zhes bya ba'i don to/ /lhag par zhen pa la ltos nas don gyi yul can du brjod pa ma yin nam zhe na bden mod kyi/'on kyang gal te mi rtag pa nyid rig pa ma yin pa nyid yin na de lhag par zhen pa'i dbang gis/ mi rtag pa nyid kyi yul can du mi 'thad do/ /rig pa las ma gtogs par ni yul gyi don 'ga' yang med do/ /des na mi rtag pa nyid mi shes pa bzhin du rnam par shes pa mi rtag pa'i yul can du 'gyur ba ni ma yin no//de ste mi rtag pa nyid rig pa kho na yin na ni rig pa nyid kyis mi rtag pa'i yul can yin gyi zhen pas ni ma yin no/ /des na rnam par rtog pa rnams dngos po'i yul can ma yin par ji ltar 'gyur zhe na 'di bsal ba'i phyir nyes pa de ni med de zhes smos so/ / de ltar mtshungs so zhes rtogs par bya ba ni gzhan yin gyi rang gi mtshan nyid ni ma yin no zhes ston pa ni/ shes pa la snang ba zhes bya ba yin no/ /gzhi mthun pa la sogs pa yang 'di kho nar yin no/ /rnam par shes pa de ji lta bur gyur pa dang / don yang ji lta bur gyur pa dang / de la spyi la sogs pa'i tha snyad ji ltar yin pa de ston te/shes pa skye ba gang yin pa 'di ni de la yod pa'i don kyang rnam pa gang yin pa'i don de dag mtshungs so zhes 'dzin to zhes bya bar 'brel to/ /shes pa'i rang gi ngo bo rgyu dang rang gi ngo bo'i sgo nas ston pa ni/ dngos po'i rang gi ngo bo 'dzin pas zhes bya ba'o//de'i yul can ma yin yang de'i yul can gyi rgyu mtshan ni de nyams su myong ba gzhan pa'i bag chags la brten nas skye ba yin la/ 'bras bu tha mi dad pa'i dngos po las skye ba ni don tha mi dad par 'dzin pa'i rgyu mtshan yin no/ /gang gi phyir 'di nyams su myong ba'i dngos po las de'i 'du byed pa'i dbang gis skye ba de'i phyir dngos su ni de'i yul can ma yin pa de ltar lhag par zhen pa yin no//de bas na de'i yul can ma yin yang de'i yul can lta bu zhes bya bas ni de ma yin pa la der lhag par zhen pa nyid brjod pa yin no/ /don tha mi dad pa 'dzin pa zhes bya ba 'dir yang lta bu'i sgra byas pa ni spyi lhag par zhen pa'i rtsa ba can yin pa'i phyir ro//dmigs pa ma yin yang rang bzhin nyid kyis mtshungs par rtogs pa de'i sa bon ni gzhan las tha dad pa kho na yin no zhes ston pa ni/ don dam par zhes smos so/ /de nyid kyi phyir tha dad pa ni de dang 'brel pa yin no//shes pa'i rang bzhin brjod nas de dang rjes su mthun par de'i yul kyi rang bzhin bshad pa ni/ de la zhes smos so/ /don de nyams su myong ba'i bag chags las skyes pa'i phyir 'di phyi rol lta bu dang rnam pa tha mi dad pa 'dzin pa nyid kyis gcig pa lta bu dang / de'i yul can ma yin yang de'i yul can lta bu nyid kyis ni don mi byed kyang de byed pa lta bu'o//'di nyid gzhung gzugs pa'i phyir/ tha snyad 'dogs pa rnams zhes smos so/ /don bya ba byed pa nyid du lhag par zhen pa'i phyir de'i yul can lta bu zhes brjod la/ lhag par zhen pa de yang tha snyad 'dogs pa rnams la yod pa yin te/gal te med na ni 'jug pa nyid du mi 'gyur ro/ /'di ltar rig par ma gyur pa'i don la gal te der zhen pa yang med na ni gzhan las tha dad pa la mi 'jug pa kho nar 'gyur ro/ /rigs mi mthun pa tha dad pa'i yul can nyid kyis kyang de mi byed pa dag las kyang tha dad pa lta bu'o//gal te 'dir ldog par snang ba med pa'i phyir ji ltar tha dad pa lta bu zhes brjod ce na/ de ni don bya ba byed pa nyid du zhes smos so/ /de ltar snang ba nyid de ma yin pa las tha dad par snang ba yin te/ ji skad bshad zin pa bzhin no/ /rnam pa de nyid kyang rnam par rtog pa'i gzugs brnyan yin pa'i phyir/tha dad pa zhes brjod do/ /de yang dngos po'i ngo bo ma yin no zhes bshad pa ni/ de yang brtag pa'i zhes bya ba'o/ /de ni spyi'i tha snyad de la brten pa nyid du bshad pa na ni blo la gnas pa'i don de dag ni zhes bya ba yin no/ /gal te yang don rnam pa gcig nyid kyi skabs yin pa de lta na yang spyi nyid gzhan la ltos pa'i phyir mang po'i tshig tu brjod do//de zhes bya ba'i tha dad pa'i mtshan nyid spyis mtshungs so zhes bya bar 'dzin to/ /gang gi phyir 'dir log pa'i bdag nyid de dag snang ba yin no/ /rang gi mtshan nyid ni ma yin te/ ji skad brjod pa'i shes pa de la mi snang ba nyid do//gzhi mthun pa yang de nyid la yin par bshad pa ni/ de dag nyid ces bya ba'o/ /ba lang ma yin pa las log par snang ba ni dkar po ma yin pa las kyang log par snang ngo / /des na ba lang zhes bya ba snang ba gang yin pa de la rten nyid du dkar po zhes snang ba na de dang tha mi dad par snang ba yin te/de nyid dkar po yin pa'i phyir ro/ /des na rnam pa 'di gnyis rnam par rtog pa la so sor tha dad par snang ba yin yang phan tshun 'brel pas byas pas gcig tu snang ba 'di nyid gzhi mthun pa yin gyi/ gang gis 'di gnyis gzhi mtshungs pa yin pa'i phyir gzhi mthun par 'gyur ba chos can gsum pa ni 'dir yang snang ba med do//ba lang ngo snyam pa 'di nyid dus can rtogs pa yin la de nyid kyang dkar po'i bdag nyid du gyur pa yin no/ /'di la ji ltar shes dang tha dad ma yin pa zhes bya ba'i tshul 'dis blo'i don rnams log pa'i rnam par rtog pa las byung ba'i bdag nyid du bshad pa de bzhin du/tha dad pa rnams 'brel par rtogs pa yang ma grub pa'i phyir gzhi mthun gcig pa nyid kyang lhag par zhen pa tsam gyi rang bzhin log pa'i don kho na yin no zhes bstan pa'i phyir/ bdag nyid kyi med kyang zhes smos so//don de rnams bdag nyid kyis med kyang lhag par zhen pa'i rang bzhin gyi blos spyi dang gzhi mthun pa'i rang bzhin de ltar ston pa'i phyir tha snyad 'di ni de kho na ma yin no/ /des ni de ltar mtshungs pa nyid du rtogs par bya ba gang yin pa de bstan nas/yang na ni gzhan gyis ji ltar don byed ces dngos po med pa'i yul can nyid la/ sun 'byin pa brjod pa gang yin pa de spang ba'i phyir/ 'di thams cad ni zhes bya ba'o/ /'di ltar bsam pa yin te/ nyams su myong ba'i bag chags kyi rtsa ba can nyid kyis na rnam par rtog pa ni gdon mi za bar mthong ba'i don gyi rjes su 'brang ba yin no//des yul du byas pa las gzhan 'dzin na ni/ nyams su myong ba'i bag chags la brten pa nyid du mi 'gyur ro/ /de la gang la nyams su myong bar gyur pa'i rang gi ngo bo ji lta bur gyur pa kho na de'i 'du byed pas bskyed pa'i blo la snang ba yin na ni/rnam par rtog pa 'khrul par mi 'gyur ro/ /gang gi tshe rnam par rtog pa de'i 'du byed pas bskyed pa nyid yin yang de'i 'du byed pas bskyed pa nyid kyis de yongs su spangs te gzhan rjes su rtogs par mi nus la rnam par rtog pa'i rang bzhin gyis ni ji ltar nyams su myong ba bzhin rtogs par nus pa dang bral bas snang ba tha dad pas nye bar mtshon pa de'i rang bzhin gzhan du gyur pa la don du lhag par zhen pa'i rnam par rtog pa skye ba de'i tshe 'di 'khrul pa zhes brjod pa yin no//mi 'dra ba tsam gyi ni gzhan nyid du 'gyur gyi/ 'khrul par ni ma yin no/ /'khrul pa nyid ni mi 'dra ba la yang de nyid du zhen pas byas pa yin no//de'i 'du byed pa'i rtsa ba can nyid kyis 'brel pa'i snang ba dang rnam par brtag pa nyid kyi snang ba las rnam par brtag par bya ba mi 'dra ba nyid ni khra bo las ser skya mi 'dra ba lta bu yin gyi/ khra bo dang bum pa mi 'dra ba lta bu ni ma yin no/ / des na rang gi mtshan nyid kyi mthong ba'i 'du byed pa las skyes pa'i bag chags kyis byas pas na 'khrul pa 'di dngos po ji lta ba bzhin pa'i bslad pa yin par brjod do/ /'khrul pa gnyis ni dngos po'i khyad par srid pa dang mi srid pa dang ldan pa'i rang bzhin gyi dbye ba ste/ dper na zla ba la zla ba gnyis su snang ba'am/nor bu'i 'od la nor bur snang ba bzhin no/ /zla ba gnyis dang nor bu'i rnam pa dag ni zla ba dang sgron ma la med pa'i phyir ro/ /rang gi 'od 'khyims pa la nor bu'i 'od chen por nges pas nor bu'i 'od la nor bur nges pa ni srid pa'i bdag nyid kyis 'khrul pa yin no/ /'khyims pa'i tshad kyis nor bu chen por nges kyang der nor bu yod pa ma bkag pa'i phyir ro//mig mi gsal bas gsal ba'i dkyil 'khor gyis yongs su bskor ba'i sgron ma rtogs pa la de lta bu'i nor bu chen por nges pa ni dngos po dang mi ldan pa kho na'o/ /de'i phyir don ji lta ba bzhin du 'khrul pa'i rnam par rtog pa ni don de dang 'brel pas/der mi 'khrul pas na rtogs pa de las 'jug pa de dmigs pa nyid med kyang / de thob pa'i rtsa ba can des bsgrub pa'i don bya ba grub pa med pa ma yin te/ du ba las me rtogs pa na de dang mi mthun pa'i rang bzhin rtogs pa yin yang mi rtogs pa nyid ma spangs pas na/zhugs pas me thob pa na bsregs pa la sogs pa grub pa bzhin no/ /tshul 'di rnam par rtog pa thams cad la ni yod pa ma yin te/ rtag pa la sogs pa'i rnam par rtog pa rnams gtan med pa'i don rnam par rtog pa yin pa'i phyir ro/ /dngul la sogs pa'i rnam par rtog pa rnams ni de'i yul dang dus na med pa rtog pa yin no//dngos po'i yul la mi slu ste/ de'i don byed pa gnas par gyur pa'o/ /ji ltar mthong ba'i khyad par gyi rjes su 'brang ba ni/ mthong ba ji ltar rtogs pa'o/ /'dra ba cung zad tsam bzung ba ni nya phyis la sogs pa la dngul la sogs pa dang ji skad bshad pa bzhin no//mi rtag pa nyid rtag pa dang 'dra ba ni sngon po tsam gyi rang bzhin gyis/ dus gsum khyab pa ste/ gcig ni mi 'jog pa'i phyir la/ gzhan ni rgyun 'dra ba skyed par byed pa yin pa'i phyir ro/ /'dir dpe ni/ mar me'i 'od la nor bur rtogs pa yin no//des na yang na ni ji ltar gzhan gyi don byed ces gang brjod pa'i skyon med do zhes bshad pa ni/ de'i phyir zhes bya ba yin no/ /gal te 'di me ma yin par rig pa yin na mes bsgrub par bya ba 'khrul par mi 'gyur ro/ /yang na me rig pa tsam gyi rang bzhin las me'i yul can yin na ni dngos po med pa'i yul can me rig pa nyid du mi 'gyur ro//de lta na 'o na smig rgyu la chur rig pa yang chur rig pa nyid du 'gyur ro zhe na bden mod kyi chu ni med do/ /de ltar rjes su dpag pa'i rigs pa ni don med par mi 'gyur te/ don la mi 'khrul pa'i phyir ro//de'i phyir rnam par rtog pa'i yul ni don gyi bya ba med kyang don bya ba 'grub pa 'thad pa yin no/ /gzhan du na don yul du ma byas pa'i phyir dang / don grub par 'gyur ba des na rnam par rtog pa'i yul nyid las yin no zhes bya bar 'gyur ro/ /don nyid las yin na ni rnam par rtog pa'i yul de ltar thal ba med do//rnam par rtog pa'i yul ni rang gi mtshan nyid las gzhan pa yin pa'i phyir de mi byed pa las tha dad par mi 'gyur ro zhes smos pa gang yin pa de ni phyi rol pa rnam pa tha dad pa la rnam par rtog pa mi 'jug pa ma yin nam zhes bya ba de nyid du bsal zin to//sgra mi rtag pa nyid du ma rtogs pa'i phyir 'di lta bu'i bdag nyid spyi rang gi mtshan nyid mtshungs pa ma yin pa'i phyir sgra mi rtag pa nyid du mi 'gyur ro zhes smras pa gang yin pa de yang spang ba'i phyir rang gi mtshan nyid la zhes smos so/ /rang gi mtshan nyid kyis rang gi bdag nyid la mi rtag pa yod pa kho na ste/'di ltar dngos po g.yo ba nyid 'jig pa zhes bya ba'i mi rtag pa nyid yin gyi mi rtag pa nyid ces bya ba'i spyi dang ldan pa ni ma yin no/ /des na gal te rnam par rtog pa la snang ba'i mi rtag pa nyid kyi rang bzhin gyi spyis rang gi mtshan nyid mtshungs par rnam par mi rtog mod/de tsam gyis ni de la mi rtag pa nyid med pa ma yin te/ gang gi phyir dngos po sngon ma byung ba byung nas med par 'gyur ba de mi rtag pa ji ltar ma yin/ 'di ltar mi rtag par rtogs pas kyang dngos po de lta bur gyur pa nyid rnam par 'jog pa yin no/ /de bshad pa ni/ de de lta bu la skad cig mar gnas pa'i zhes bya ba'o//des na skad cig mar gnas pa'i chos nyid du gnas pa'i phyir dngos po skad cig mar gnas pa'i chos nyid du 'dzin pa na 'di ni mi rtag pa'o/ /'di ni mi rtag pa nyid do snyam du sems par 'gyur gyi/ gang gis na sel ba'i bdag nyid 'di gzhan gyi mthar thug pa'i phyir dngos po de lta bu mi 'gyur ba spyi 'ga' zhig dang ldan pa la ltos pa ni ma yin pa des na blo yang de yod pa la mi ltos so snyam du bsams pa'o//des na dngos po dang rtogs pa yang 'jig pa nyid mi rtag pa nyid yin pa'i phyir dngos po la mi rtag pa nyid la sogs pa yod pa yin no zhes bsgrubs te de dang 'gal ba'i rang bzhin gzhan dang ldan pa yin yang rnam par rtog pa la yang de lta bu'i rang bzhin du snang ba ni yod pa nyid du ston pa de'i chos nyid kho na la 'jug pa ste/gzugs brnyan dang ldan pas rang gi mtshan nyid kyi ngo bo nyid rtogs par byed pa na'o//rnam par rtog pa ni mi rtag pa nyid du snang bar gyur pa na/ khra bo dang ba lang dang chen po zhes du ma nyid du ston par byed par 'gyur la ba lang zhes gcig bstan pa ni chos can bstan par 'gyur la/ tha dad par bstan na ni chos bstan par 'gyur ba yin no/ /des na don la mi srid pa'i chos kyis rnam par bcad pa'i mi rtag pa nyid snang ba yang phyi rol snang ba na ni ma yin mod kyi/de lta na yang mi rtag par snang ba ma spangs pa'i phyir mi rtag pa rtogs pa med pa ni ma yin no/ /dngos po med pa la brten pa nyid kyis 'di dag ji ltar dngos po'i gzugs brnyan dang ldan pa nyid yin zhe na/dgos pa 'di la bshad pa ni/ de rnams rten med pa yang ma yin te zhes bya ba'o/ /rang gi mtshan nyid kyi rgyu ma yin yang de rnams rten med pa ni ma yin te/ de'i chos nyid la 'jug pa na mthong ba'i bag chags kyis de lta bu'i gzugs brnyan nyid skye ba'i phyir ro//de nyid kyi phyir 'di dag dngos po med par 'gyur ba'i nyes pa med do zhes ston pa ni/ dngos po med pa'i chos nyid kyang ma yin te zhes bya ba'o/ /gal te 'di dag dngos po'i rang bzhin gyi rjes su 'gro ba spangs nas snang ba yin na ni/ dngos po'i chos nyid ma yin par 'gyur ba zhig na/gang gi tshe nyams su myong ba'i sgo nas nye bar 'ongs pa dngos po'i chos su gyur pa dag kho na snang ba de'i tshe ji ltar dngos po'i chos nyid ma yin par 'gyur/ gal te dngos po'i rang bzhin pa yin na/ 'o na ji ltar rnam par rtog pa 'khrul pa nyid yin zhe na/ dngos po la zhes smos so//nyams su myong ba'i bag chags kyi sgo nas de ltar nye bar rtogs pa'i dngos po la tha dad pa la sogs par rtogs pa nyid 'khrul pa yin te/ dngos po snang ba ni de'i sgo nas 'khrul pa yin no zhes bya ba'i tha tshig go/ /gal te dngos por snang ba 'khrul pa yin na//de ji ltar mi rtag pa nyid rtog pa yin zhe na/ bden te dngos su ni ma yin gyi 'on kyang zhen pa las so/ /'on te rtag pa nyid mi snang na/ lhag par zhen pas kyang dngos po yul du byed par ni mi nus so/ /mi rtag pa'i rnam pa snang ba las ni de phyi rol dang mi mtshungs pas na dngos su de rig pa dang bral ba yin yang de'i dngos por lhag par zhen pa las rig pa de rig pa ma yin par brjod do//'di ltar de ni mi rtag pa yin la mi rtag pa rig pa 'di yang de ltar zhen pa yin pa'i phyir 'gal ba med pas na de las de rnam par gnas par 'gyur ba khas len pa yin gyi/ de ltar rnam par gnas par grub pa la mngon par zhen pas mi 'thad kyang dngos po'i yul can nyid du 'gyur ba ni ma yin no//rnam par 'jog par byed pa ni dngos po'i yul can ma yin par yang rung ba kho na'o/ /de ltar rig pa ni de'i yul can ma yin pa'i dngos por ma rtogs pa yin la de yang rnam pa de ltar rig par bya ba yin pa'i phyir dngos su dngos po rig pa dang khyad par yod pa ma yin no//dngos su de lta bu la de ltar rtogs pa yang dngos po las mi 'khrul pa las rnam pa de lta bu'i dngos po yod pa'i phyogs gzhan la yang bye brag med do/ /rtogs pa dang rjes su mthun pa tsam las de'i yul can ma yin yang de rnam par 'jog par byed pa yin na/dung ser por shes pa la sogs pa dag gis kyang rnam par 'jog par 'gyur ro zhe na/ ma yin te/ mngon sum 'jug pa med pas mngon sum gyi chos dang bral ba'i phyir dang / de'i yul can ma yin par rtogs pas ni tshad ma gzhan dang bral ba yin no//'khrul pa nyid gzhung gzugs pa'i phyir/ don gcig dang zhes smos so/ /'bras bu gcig dang du ma byed pa las 'bras bu gcig dang du ma shes par 'dod na ngo bo de nyid bstan pa'i ched du gcig dang du ma nyid du byed pa nyid du gzhag pa byas pa'i gcig dang du mar 'dzin gyi/dngos po gcig dang du ma'i rang bzhin yin pa'i phyir ni ma yin no/ /gal te dngos po la tha dad pa yod na 'di du ma'i rang bzhin du 'gyur ba yin zhing tha dad pa rjes su 'gro ba dang ldan pas kyang dngos po gzhan dang gcig tu 'gyur la/ de lta na yang 'di ma 'khrul par 'gyur ro//rgol ba'i yan lag gis 'di 'di ltar rnam par gzhag pa ni ma yin te/ rang gi rgyu kho na las yod pa'i phyir ro zhe na/ de ni bden te/ rang gi rgyu nyid las da ltar 'gyur ba na dgos pa 'di 'grub pa'i phyir de ltar brjod pa yin no/ /dngos po de tha dad pa ma yin na ni chos tha dad pa la brten pa'i du ma nyid srid pa ma yin la/gang las spyi'i bdag nyid kyis gsal ba gzhan dang / gcig tu 'gyur ba spyi dang khyad par gyi bdag nyid kyang ma yin te/ des na gcig dang du mar 'dzin pa ni 'khrul pa kho na'o/ /gang las chos tha dad pa'am/ spyi dang khyad par gyi bdag nyid med par 'gyur ba dngos po tha mi dad pa nyid ji ltar zhe na/ gcig po de la zhes smos so/ /re zhig cig nyid kyi phyir dngos po'i bdag nyid la du ma mi rung ba'i phyir dngos po chos tha mi dad pa'i rang bzhin ni ma yin no/ /don de dag ni du ma nyid du 'gyur gyi/du ma'i bdag nyid gcig ni ma yin no/ /don gzhan dang gcig pa nyid kyang mi rung ste/ du ma la yang gcig med pa'i phyir ro/ /de'i phyir dngos po ni chos tha dad pa'i bdag nyid can ma yin la/ de'i bdag nyid don gzhan dang gcig tu 'gyur ba yang ma yin pa'i phyir spyi dang khyad par gyi rang bzhin nyid med do//'gal ba'i phyir rang gi bdag nyid la tha dad pa dang khyad par gzhan dang gcig tu gyur pa yang med mod/ /dngos po tha mi dad pa'i bdag nyid kyi chos nyid tha dad par 'gyur ro/ /des na gcig du ma nyid ni ma yin la phan tshun tha dad pa rnams kyi ba lang nyid la sogs pa'i chos gzhan nyid tha mi dad pa'i phyir du ma gcig pa yin no zhes dogs pa la tha dad pa yang bkag pa'i phyir ro zhes smos so//rjes 'gro gzhan yang snang ba med ces tha dad pa ni bkag zin to/ /des na gcig dang du mar 'dzin pa ni 'khrul pa nyid du 'thad do/ /tha dad pa la nyes pa gzhan yang bshad pa ni/de rnams kyi zhes bya ba ste/ tha dad pa rnams kyi gzhi mthun pa nyid mi rung ba'i phyir ro/ /ba lang nyid kyi mtshan nyid ni rigs dang dkar po la sogs pa yon tan rnams ni rdzas las gzhan nyid yin pa des na/ 'di gnyis gzhi mthun pa nyid du mi rung ngo //de bshad pa ni/ rang bzhin tha dad pa'i phyir zhes bya ba'o/ /'di skad brjod pa yin te ba lang zhes bya bar btags pa ni dkar po'i rnam pa ma yin te/ de las gzhan yin pa'i phyir ro/ /des na ji ltar de de'i rnam par rtog pa'i bdag nyid gzhi mthun par 'gyur/ 'khrul pa la ltos nas 'gyur ro zhe na/ ma yin no zhes bshad pa ni/ sgra'i don don dngos po ji lta ba bzhin zhes smos so/ /don gyi rang bzhin ji lta ba de kho na ltar sgrar brjod do zhes khas len na dkar po zhes rtogs pa ba lang gi tshig gi don gyi rang bzhin ma yin pa'i phyir ji ltar na de rtogs/de lta ma yin na snam bu dang bum pa zhes bya ba yang gzhi mthun par 'gyur ro/ /gang zhig rang gi rang bzhin no zhes bya bar rtogs pa de rang gi tshig gi gzugs dang bral bas gzugs la re ba na/ de'i ngo bor rung ba nye bar gnas pa de'i rang bzhin du rtogs pa yin na tha dad pa'i phyogs la ni/'ga' yang 'ga' zhig gi rang bzhin du rtogs pa med pa'i phyir 'ga' la yang re ba med pas na 'ga' dang yang 'brel pa ma yin no/ /'o na gang zhig gang gi rang bzhin du rtogs pa de rang gi tshig gis des stong par rtogs par mi nus pa'i phyir der yang de rtogs par ji ltar 'gyur zhe na/ji ltar yang mi 'gyur te/ tha dad pa dang tha mi dad pa'i phyogs gnyis ka la yang sgra'i don dngos po ji lta ba bzhin du mi rung ba'i phyir te/ de lta yin na dngos don rnams/ /zhes bya ba la sogs pa bshad pa bzhin no/ /sgra'i don dngos po ji lta ba bzhin du khas blangs kyang / tha dad pa la gzhi mthun par ji ltar 'gyur/'di ltar dngos po gcig rigs la sogs pa'i khyad par du ma dang ldan pa yin no/ /des na 'di khyad par du ma dang ldan par dmigs pa yin pa'i phyir ba lang zhes khyad par gcig gis bstan pas ni de dang ldan par rtogs par 'gyur ba rnam pa gzhan la re ba dang bcas pa dkar po zhes de ltar bstan pas ni de dang ldan pa nyid du rtogs par 'gyur ro//de smras pa ni/ gal te khyad par de dang zhes bya ba'o/ /de dag ces bya bas ni skabs su bab pa'i tha snyad pa rnams bzung ngo / /de zlog pa ni phan mi 'dogs pa rnams la zhes bya ba'o/ /khyad par zhes bya ba ni bdag la brten pa'i brjod pa dang rtogs pa dag gis don la tha snyad du byed par byed pa yin no//gang gi tshe khyad par rnams de tsam gyi gzhan gyi dbang ma yin pa de'i tshe med kyang yod pa'i phyir ji ltar des de ltar tha snyad byed pa'am/ de nye bar sgyur bar byed par 'gyur ro/ /khyad par ni gdon mi za bar de'i gzhan gyi dbang du 'gyur dogs na/'di ni de'i gzhan gyi dbang du 'thad pa ma yin te/ phan 'dogs par byed pa ma yin pa'i phyir ro/ /khyad par dang ldan pa ni khyad par la phan 'dogs par byed pa ma yin no/ /de dang ldan pa ni/ bdag nyid nye bar bsgyur ba'am/ nye bar bsgyur ba'i shes pa de la ltos pa'i phyir ro//khyad par la ni khyad par dang ldan pas bya ba yod pa ma yin no/ /des na khyad par dang ldan pa ni phan 'dogs par byed pa yin no/ /phan 'dogs pa yod na ni/ de nyid la bdag nyid thob pa'i phyir de'i gzhan gyi dbang du 'gyur ro/ /'o na nye bar sgyur bar byed pa yin gyi phyir khyad par gyis de dang ldan pa la phan gdags par bya bar 'gyur ro zhe na/de ltar ni mi nus te/ de phan 'dogs par byed pa yin pas gzhan gyi dbang ma yin pa'i phyir de med kyang yod pas na de la brten pa'i tha snyad kyis khyad par 'grub pa'i yan lag ma yin par thal ba'i phyir ro//des na khyad par nyid gzhan gyi dbang du 'thad pa yin no/ /de ltar yang rung ba ma yin te/ ltos par bya ba ma yin pa'i phyir ro/ /gal te rdzas dang khyad par 'du ba'i mtshan nyid kyi 'brel pa yod pa ma yin nam/ /de ni rdzas la brten pa'i phyir ro/ /des na ji ltar gzhan gyi dbang ma yin zhe na/de dang rten dang brten pa'i dngos po las gzhan gyi dbang du 'du bas byas pa ni/ 'chad par 'du ba'i tshul gyis bskyed par bya ba dang skyed par byed pa'i dngos po las 'da' ba ma yin no zhes bshad pa ni gzhan gyi dbang nyid yin na zhes bya ba'o/ /bskyed bya skyed byed kyi dngos po yin na tha dad pas lhan cig mi gnas pa'i phyir ba lang zhes bya ba'i sgras gnyis brjod pa ma yin pa'i phyir/ba lang nyid kyis nye bar bsgyur ba'i rdzas brjod par mi 'gyur ro/ /khyad par gyis ni rnam par gnas pa kho na la rang la brten pa'i shes pa nye bar sdud pa yin no//rgyu dang 'bras bu'i dngos po nyid yin na ni khyad par gyi dus na khyad par can med pa nyid kyi phyir 'di gang zhig la shes pa nye bar sdud par byed par 'gyur/ rtogs pa'i byed pa'i dus na med pa'i don nyid ni byed pas yul du byas pa'i khyad par gyis de'i ngo bor 'dzin pa ma yin no/ /khyad par dang ldan pa log pa yang blo la snang ba yin te/rnam par rtog pa rnams nye ba nyid 'dzin par ma nges pa'i phyir te/ dran pa la sogs pa 'das pa yang rtogs pa'i phyir ro zhes dogs pa la blos gcig ces bya ba smos so/ /blos sgro 'dogs pa'i yul du byed pa nyid kyis da lta bar byed pa nyid do//'di skad brjod pa yin te/ gang gi tshe 'di log pa blos yul du byed pa de'i tshe rang gi bdag nyid du gyur par snang bas de snang ba ma yin no/ /des na de'i yul can gyi blo dngos po'i yul can ma yin te/ de mi snang ba'i phyir ro/ /'on te bdag gi rang bzhin ni ma yin gyi/ 'on kyang don gyi shes pa snang bar brjod na/de lta na blo'i snang bar khas blang bar bya ba ma yin te/ gzhan du na de de'i snang bar mi 'gyur ro/ /de lta na yang de nyid khyad par gyi gzugs kyi ngo bo nyid du rtogs pas khyad par de dang ldan pa bdag de ltar rtogs par khas blang bar bya'o/ /des na khyad par dang de dang ldan bdag gis zhes bya ste/blo la snang ba'i yul can nyid yin mod/ de ni gdon mi za bar khas blang bar bya ba nyid yin no/ /de bshad pa ni/ blo la snang ba'i yul can nyid gcig yin na ni zhes bya ba'o/ /de nyid de ltar snang ba'i phyir ro zhes ston pa ni/ de lta bu yis zhes bya ba yin/ 'brel pa tsam yod kyang dus tha dad na rang bzhin dang rang bzhin can nyid ma yin pas na/bskyed bya skyed byed kyi dngos po skad cig 'jig pa la mi brten pas na/ rgyu sngar byung ba 'bras bu'i dus na yang mi 'dzin pa'i phyir lhan cig pa nyid yod pa kho na'o/ /sa brjod pa ni/ gal te khyad par dang de dang ldan pa dag ces bya ba'o//des na de las skyes pa'i phyir ni de'i gzhan gyi dbang yin la/ de dang lhan cig gnas pas ni de nye bar sgyur bar byed pa nyid 'thad pa yin no zhes 'dogs pa la bskyed bya skyed byed kyi dngos po yin kyang gzhan gyi dbang nyid bzlog pa'i phyir ma yin te zhes gsungs so/ /grub pa yod pa ni rang gi ngo bo thob zin pas gzhan gyi dbang med la/ma grub pa yang ma yin te/ rang gi ngo bor ma reg pa'i phyir ro/ /des na yod pa dang med pa'i gnas skabs na gzhan gyi dbang med pa'i phyir/ rnam pa thams cad gzhan gyi dbang nyid med pa nyid do/ /gnyi ga yang yod par khyad par med pas gang gis gzhan gyi dbang nyid du brjod cing gang zhig gzhan gyi dbang du brjod du med na yang cung zad med pa gang yin pa de ni 'ga' zhig yang gzhan gyi dbang du 'gyur ba ma yin no//gal te rang gi ngo bo gzhan las grub pa nyid de la rag las pa de gzhan gyi dbang du 'gyur ba de 'bras bu nyid rgyu dang 'brel pa yin no zhe na/der yang skye ba nyid rag las par brjod kyi/ mi 'khrul pa'i sa bon du gyur pa gzhan ni 'ga' yang med do/ /'o na 'di khyad par la 'gyur ba yin no zhe na de ltar ni mi nus te/ ngo bo gzhan gyi dbang du khas blangs pa med par khyad par ma yin pa'i phyir ro/ / 'di ltar yod pa'i dus nyid na de de'i rang bzhin yin pa'i phyir khyad par nyid do/ /des na gzhan gyi rang bzhin ma yin no zhes bya ba de lta bu'i bdag nyid can gyi gzhan gyi dbang gang yin pa de mi srid pa nyid do/ /des na 'di 'dir rnam pa thams cad du med par brjod do/ /gal te 'di'i rang bzhin ni 'di'i zhes gzhan gyi dbang nyid rtogs pa ma yin nam zhe na/rtog pas sgro btags na zhes smos so/ /des na dngos po la mi 'thad pas rnam pa thams cad du gzhan gyi dbang med pas rtogs pa la snang ba yin pa'i phyir dngos po rnam pa de lta bu'i rjes su byed pa spangs te/ de lta bu'i tha snyad du blo kho na ci khas mi len/ 'di skad brjod pa yin te/ cig khyad par du ma brjod na/ gzhi mthun par mi 'gyur te khyad par nyid mi rung ba'i phyir ro/ /dngos po la mi 'thad pa na/ gal te rtogs pa las yod do zhes 'dod na/ rtogs pa nyid kyi rjes su byed par 'gyur te/dngos po'i ni ma yin no/ /dngos po'i yul can yin na ni/ don gyi rang gi ngo bo gcig ces bya ba la sogs pas skyon du mi 'gyur ba gang yin pa de yang de ltar ni mi 'gyur ro/ /des na blo nyid de ltar khas blangs par rigs so/ /de ston pa ni sgra dang tshad ma gcig gis zhes bya ba la sogs pa'o//blos dngos po rtogs na ni/ sngar ji skad bshad pa'i dngos po'i dbang gis byung ba'i nye bar 'gyur ba nyid do/ /gang gi tshe dngos po'i rjes su byed pa spangs nas blo nyid la brten pa de'i tshe ni dngos po med pa'i blo'i snang ba la/ gang gi ltar blo khyad par ni//sna tshogs can don tha dad 'dzin/ /zhes bya ba la sogs pa'i skyon du mi 'gyur ro/ /de bshad pa ni blo la snang ba ni dngos po med pa'i phyir zhes bya ba'o/ /blo'i rjes su byed pa la/ don gyi rang gi ngo bo gcig /ces bya ba la sogs pa'i nyes par thal ba med mod/ skabs kyi gzhi mthun pa med pa'i nyes par ni ji ltar mi 'gyur zhe na/de tha mi dad pa dang zhes bya ba la sogs smos so/ /gzhi mthun pa la sogs ji ltar shes pa bzhin mi 'gal lo/ /gcig po de la zhes bya ba la sogs pas ni spyi med pa'i nyes pa brjod pa yin no/ /gzhi mthun pa med pas na khyad par dang khyad par gyi gzhi'i dngos po med pa yang ngo //spyi la sogs pa de dag rtogs pa las ma 'das pa ni mi 'gal lo/ /dngos po la ni 'gal ba bshad zin to/ /ba lang zhes bya ba la sogs pa'i spyi tha mi dad pa blo la snang ba'i phyir spyi mi 'gal/ ba lang zhes rnam pa gcig yul du byas kyang ci 'dir dkar ram 'on te gnag ces dkar po la sogs pa'i rnam pa gzhan la ma nges pa dkar po la sogs pa'i rnam pa gzhan la re ba dang bcas pa'i blos gzung bar bya ba dang /dkar po la sogs pa sgra'i don tha dad pa sgrub pa dag kyang ba lang dkar po zhes dkar po la sogs tha mi dad par blo la snang bas khyad par dang khyad par gyi gzhi'i dngos po dang gzhi mthun pa mi 'gal lo//gang gi tshe gzung ba nyid la re ba na rung ba nye bar gnas pa gang yin pa de dang 'brel pa rtogs pa'i phyir brda'i dbang gis ba lang dkar po'i rang bzhin du nges pa ma yin te/des na de'i yon tan des yon tan gzhan rnam par bcad pa gang yin pa de ni yon tan dang yon tan dag gi khyad par dang khyad par gyi gzhi'i dngos po yin la/ gzhan dang 'brel pa gang yin pa de ni gzhi mthun pa yin te/ des na de ltar gnyi ga nye bar bkod do/ /de ltar blo la snang ba gang yin pa 'di'i chos dang chos can gyi khyad par dag kyang rab tu ston te/ji ltar zhe na/ bshad pa/ de ltar snang ba'i dngos po de kho na chos zhes bya ba'i sgra khyad par gzhan spangs pas brjod nas de nyid las tha dad pa lta bu'i 'di'i ngo bo nyid chos nyid du rnam par bzhag nas te/ 'dis ni chos su rab tu ston pa brjod do/ /chos can rab tu ston pa yang bshad pa/ ji skad bshad pa'i khyad par gzhan spang ba'i mtshan nyid kyis bye brag tu ma phye bar te/ khyad par gzhan ma spangs par zhes bya ba'i don to/ /dper na khra bo'i ba lang nyid ces bya ba bzhin du/ 'di'i ngo bo nyid gzhan chos can nyid du rab tu bzhag nas so//ci'i phyir de ltar rnam par bzhag nas ston ce na/ don du ma las tha dad pa zhes smos te/ don du ma las tha dad pa yin yang don gcig las tha dad pa de yod dang med pa shes par 'dod pa la de nyid chos nyid du rnam par gzhag ste/'di'i ngo bo nyid 'ga' zhig chos can nyid du rnam par bzhag nas dgag pa'am/ sgrub par byed pa yin te/ dper na khra bo la ni ba lang nyid yod kyi/ rta nyid shes par 'dod pa na blo la de ltar ni ma yin no zhes bya ba lta bur ro/ /ci dngos po de la de bzhin du rnam par gzhag pa dngos su de lta nyid yin pa'i phyir ram zhe na/ma yin no zhes bshad pa ni/ blo la de ltar snang ba'i phyir zhes bya ba'o/ /dngos po ci zhig ltar shes pa 'dod pa na blo la de ltar snang ba'i snang ba de bzhin du rtogs par byed do/ /khyad par gzhan spong ba dang mi spong ba nyid kyis chos dang chos can tha dad pa yin gyi/dngos po tha dad pa ni ma yin no/ /blo la brten pa'i chos tha dad pa nyid kyis na/ tshig tha dad pa dang bcas pa ni sgrub par byed pa yin la mi rtag pa nyid bsgrub par bya ba yin no zhes bsgrub bya dang sgrub byed tha dad pa dngos po'i mthar thug pa nyid yin no zhes ston pa ni byed do zhes bya ba'i mthar thug pa'o//des ni de ltar shes pa la snang ba'i don la zhes bya ba la sogs pa dam bcas pas dngos po 'dzin pas zhes bya ba la sogs pas thams cad kyi yul can ma yin par nye bar bkod kyang / dngos po la du ma dang gcig dang tha dad par 'dzin pa ni zhes bya ba la sogs pa gzhung btsugs pa mjug sdud pas thams cad kyi yul can du byas pa yin no//yang spyi zhes bya ba la sogs pa spangs pa de nyid tshigs su bcad pa rnams kyis ston par byed do/ /ci'i phyir zhe na don 'di mdo la med pa'i phyir mdor ma tshang bar mi 'gyur bar bya ba'i phyir ro//dngos po rang gi ngo bo 'dzin pas zhes bya ba nas nor ba'i don kho na la spyi dang gzhi mthun pa'i tha snyad 'dogs so zhes bya ba'i mthar thug par bshad pa'i don gang yin pa de brjod pa ni/ rang bzhin zhes bya ba la sogs pa nas nor don rgyas byed ces bya ba'i bar gyis so/ /rnam rtog blo skye ba gang yin pa de la ngo bo snang ba'i ngo bo/de la spyi dang gzhi mthun pa'i spyod yul can gyi shes pa dang sgra dag gis tha snyad med pa'i don can rgyas par byed do/ /de'i 'bras bu can yin pa'i don gang yin pa de las tha dad pa de'i mthar thug pa ste/ 'dis ni 'di'i yul brjod do/ / nyams su myong ba'i bag chags zhes bya ba'i rgyu mtshan bshad pa'i phyir rang bzhin de 'dzin ces smos te/ de zhes bya ba ni de'i 'bras bu can ma yin pa las tha dad pa'o/ /tha dad pa can las tha dad pa gzhan ma yin pa'i phyir tha dad pa can nyid brjod pa yin no/ /de 'dzin pa ni nyams su myong ba ste de'i bag chags kyis bskyed pa'i phyir de las skye ba yin no//ngo bo de ni phyi rol lta bu dang / gcig pa lta bu dang / gzhan las log pa lta bu ste/ de lta bu ma yin yang de lta bur zhen pa'i yul yin pa'i phyir ro/ /de nyid bshad pa ni/ de nyid min zhes bya ste/ phyi rol la sogs pa de nyid las 'das pa nyid do//des na de skad brjod do/ /ji ltar zhe na/ brtag pa'i yan lag med pa'i phyir ro/ /brtag pa ni dgos pas rab tu sbyar ba yin na/ 'di ni dgos pa sgrub par byed pa ma yin te/ de sgrub pa dang mi mthun pa nyid du rig pa'i phyir ro/ / des na brtag pa'i yan lag ma yin pa nyid do/ /gang gi phyir ldog pa'i ngo bo can yin pa de'i phyir tha dad pa yin te des na ldog pa'i ngo bo can nyid kyis tha mi dad pa nyid du brjod pa yin no/ /des na de ltar de dag gi spyi'i tha snyad bshad do/ /gzhi mthun pa'i tha snyad bshad pa ni/ de nyid gzhan las log par yang zhes bya ba'o//da ni dngos po'i yul can ma yin pa nyid la skyon spong ba'i gzhung sdud pa/ dngos po rnams kyi zhes bya bas 'chad do/ /de kun zhes bya ba spyi la sogs pa'i yul can gyi tha snyad ni don tha dad pa la brten pa yin te/ de nyams su myong ba'i rtsa ba can yin pa'i phyir ro//des na rjes su dpag pa rnam pa gnyis po la dngos po'i yul ma yin yang dngos po rnyed pa'i rgyu mtshan yin gyi gzhan du ni ma yin no/ /'dir bsam pa ni/ 'di thams cad ni zhes bya ba la sogs pas gzhung du bshad zin to/ /tha snyad 'di'i phan tshun med pa la brten pa nyid brten pa'i phyir de la zhes bya ba smos so//khra bo la sogs pa du ma'ang 'bras bu gcig pa can dag /gang dag de'i 'bras bu can min pa de las gzhan la brten pa'i brjod pa dang / shes pas tha snyad gcig tu nye bar byed la/ gcig kyang du ma byed pa la de'i rang bzhin bstan pa'i 'bras bu can ma yin pa'i don las tha dad par sna tshogs su ston to//des ni de ltar gyur pa na/ de'i yul can nyid kyis tha snyad nyams su myong ba la brten pa yin yang nor ba'i don can nyid du gzhung btsugs pa yin no/ /da ni rang gi mtshan nyid la mi rtag pa la sogs pa med pa yang ma yin te zhes bya ba la sogs pa brjod pa'i phyir/sgra don 'di dang zhes smos so/ /sgra don 'di ni yod pa ma yin yang ji ltar grags pa bzhin du brjod pa yin la/ de la de bzhin kho nar brten nas ni bsgrub bya sgrub pa kun du gzhag pa dam pa'i don la 'jug par bya ba'i phyir rnam par gzhag pa yin no//'di skad brjod pa yin te/ byas pa nyid dang mi rtag pa nyid la sogs pa dngos po nyid du rtogs kyang dngos por yang yod pa ma yin te/ shes pa nyid du yod pa'i phyir ro/ /des na de lta bur gyur pa'i sgras brjod par bya ba'i don la brten nas byas pa nyid ni sgrub byed la mi rtag pa nyid ni bsgrub par bya ba zhes phyi rol nyid rtogs pa'i spyod yul du byed de sngar ji skad bshad pa bzhin no//des na don la mi rtag pa nyid la sogs pa med pa ma yin te/ de lta ma yin na don dam pa la 'jug pa nyid mi 'grub pa'am rtogs pa med par 'gyur ro//gzhi mthun pa yang sgra mi rtag ces bya ba lta bur bsgrub bya dang sgrub pa gnas pa'i yan lag tu gyur la ji ltar grags pa bzhin nyid bshad pa ni/ dngos la 'di ni mi srid do/ /zhes bya ba yin no/ /'dir res 'ga' ni gzhi tha dad par yang chos dang chos can gyi dngos po'i yan lag tu 'gyur te/dper na 'di na me'o zhes bya ba bzhin no/ /de'i chos dang chos can gyi dngos po'i rang bzhin nyid du bshad pa ni chos dang chos can rnams gzhag pa zhes bya ba'o/ /de bzhin nyid don ma brtags pa de ni de bzhin kho nar zhes 'brel to/ /de bzhin du tha dad tha dad min pa ci 'dra ba zhig ldog pa'i sa bon yin pa de de bzhin kho nar zhes dngos po la gcig dang du mar 'dzin pa ni 'khrul pa yin te zhes bya ba la sogs brjod pa ni dam pa'i don gyi zhes bya ba yin no//khra bo dang ser skya dag ni ba lang nyid kyis 'dre ba yin la/ don gcig la yang khra bo dang ba lang ngo zhes bya ba ni tha dad pa yin te/de dag ni don rnams kyi rang gi bdag nyid la med do/ /ji lta zhe na/ gtan tshigs kyi don la dang gi sgra'o/ /da ni thams cad du blo de kho na ci ste mi sbyor zhes bya ba 'chad pa ni/ des spyi zhes bya ba'o/ /spyi dang khyad par zhes bya ba'i bye brag ste/ bye ba 'di ni blo'i don la yin no//ji lta zhe na/ de nyid la zhes smos so/ /gang gi phyir de nyid la chos kyi dbye ba kun brtags pa de'i phyir chos kyi bye brag 'ga' zhig ni rjes su 'jug la 'ga' zhig ni ldog pa'i phyir spyi dang khyad par sna tshogs par 'gyur ba yin no/ /ji ltar blo nyid yin gyi don ma yin zhe na/bsgrub bya sgrub par rtog pa la zhes smos so/ /gang gi phyir chos kyi dbye ba ni bsgrub bya sgrub byed du rtogs pa la yod pa yin no/ /gal te de don la yod pa nyid yin na ni de'i tshe bsgrub bya sgrub par rtogs pa la dngos po mthong ba yod par 'gyur ba'i phyir bsgrub bya sgrub par rtogs pa nyid du mi 'gyur ro//des na dngos po mthong ba nyams pa'i phyir 'di ni blo'i yul nyid do/ /ji ltar bya ba 'di blo nyid la mngon par brjod do/ /gang gi phyir slob dpon phyogs kyi glang pos ba lang gi ldog pa'i khyad par can rang gi mtshan nyid bzung bar zhal gyis bzhes pa'i phyir ro zhe na/de ni ma yin no zhes bshad pa ni/ khyad par ni rang gi mtshan nyid la/ spyi dang 'dres zhes bya ba ni ldog pa khyad par du byas pa'i rang gi mtshan nyid gzung bar bya ba ma yin no/ /ji ltar zhe na/ bshad pa/ de ni spyi dang khyad par la sogs pa'i rang bzhin du gzung bar bya ba ma yin pa'i phyir ro//de yang ci'i phyir zhe na zhes ston pa ni gcig la khyad par rnam pa mang po dag mi rung ba'i phyir ro/ /de'i phyir rang gi mtshan nyid ni sgra'i yul ma yin la rnam par rtog pa'i yang ma yin no zhes bshad pa ni/ de'i ngo bo zhes bya ba'o/ /des na de ltar don gyi rang gi ngo bo gcig ces bya ba la sogs pa'i rab tu dbye ba 'di'i mthar thug pas ni dngos po la bsgrub bya'i yul can gyi gnyen por gyur pa tha dad pa'i don can nyid bshad la/de yang sgro 'dogs rnam par gcod pa'i rang bzhin kho na'o/ /don de la yang ldog pa nyid kyi rang bzhin gyi yul yang dngos su ni ma yin gyi/'on kyang lhag par zhen pa la ltos nas yin no/ /dngos po'i yul can ma yin na yang rnam par gzhag pa mi 'gal ba'i phyir ltos pa mtha' dag sel ba gzhan sel ba'i yul can nyid yongs su rdzogs pa rnam par gzhag pa yin no/ /da ni rnam pa gzhan gyis kyang rnam par gzhag pa'i phyir skabs dang 'brel pa nyid du brjod pa ni yang ci'i phyir zhes bya bas/de de bzhin du rtogs byed pa'i/ /sgra yod ma yin rtogs pa yang / /zhes bshad pa la rtsod par byed do/ /'dir ni des spyi khyad par du zhes bya ba'i bye brag 'di ni blo don la zhes bya bas de nyid sgra dang rnam par rtog pa dag gi yul yin gyi/rang gi mtshan nyid ni ma yin no zhes gnas pa na/ de'i yul la brgal zhing brtag par byed do/ /mi sbyor ba'i gtan tshigs bshad pa ni/ gang gi phyir zhes bya ba'o/ /brdar btags pa'i khyad par can sgra'i brjod par bya bar bstan to//de ston pa ni de la rab tu sbyor ro zhes bya ba'i tha tshig ste/ de rtogs par byed pa yin pa'i phyir ro/ /'di skad brjod pa yin te/ gal te dngos po'i rang bzhin nyid kyis sgra rnams don la 'jug par 'gyur na ni/ de dag gi de rang gi mtshan nyid las 'gyur te/dper na mig la sogs pa de bzhin no/ /gang gi tshe de dag der mthong ba la ltos nas 'jug pa de'i tshe rang gi mtshan nyid la mi 'jug go/ /dngos po la 'brel pa yod kyang tha snyad la de dag gi 'jug pa ni mthong ba la ltos pa yin la/ 'brel pa med na ni tha snyad la mthong ba de nyid brdar 'gyur ba yin gyi mthong ba la ltos pa la ni rtsod pa med pa kho na'o//gal te rang gi mtshan nyid kho na la brdar byas pa rang gi mtshan nyid kho na la sbyor bar 'gyur ba ma yin nam/ ji ltar de la mi sbyor zhe na/ dogs pa 'di bsu nas brda'i dgos pa ston pas de la med par bshad pa ni/de ni tha snyad ched du byas/ /zhes bya ba'o/ /gang gi tshe 'di dgos pa de dag de'i tshe sgra 'di las rig par bya ste/ blang ba'am spang bar bya'o zhes bya ba 'di'i don du sgra dgod pa yin gyi/ de la sgra bkod pas de nyid kyi tshe rtogs pa la ni don 'ga' yang med do//lan cig rtogs pas ni dgod pa'i gzhir gyur kyang ji skad brjod pa'i bsam pas de la sbyor bar 'gyur ba gang yin pa 'gal yang slar 'gyur ba yod pa ma yin no/ /des na rang gi mtshan nyid la brda ma yin pa'i phyir de la sgra sbyor ba med do/ /de nyid bshad pa ni/ sgra rnams kyis ni zhes bya ba yin no//'dir mdo bzhin dgos pa sbyar bar bya'o/ /tha snyad kyi don du 'dogs na zhes brjod pas ni ci nas kyang zhes bya ba ni tha snyad yin la/ de la yang de nye bar mkho bar bshad pa yin no/ /sgra de ni yul la sogs pa tha dad la mi 'jug pa'i phyir phyis mi 'jug go/ / rang gi mtshan nyid ni yul dang dus dang rnam pa nges pa yin te/ de bas na gang gis de las gzhan la 'jug par 'gyur ba de la nges par sbyar bas yul dang dus dang rnam pa spong bar ji ltar 'gyur/ rang gi mtshan nyid la mi sbyor mod/ 'on kyang spyi la 'gyur ba'i phyir blo'i don gyi yul can nyid rtsod pa dang bcas pa yin no zhes rtsod pa ni/'o na spyi zhes bya ba'o/ /sgra ni mthong ba la ltos pa yin no/ /rang gi mtshan nyid yul yin na mthong ba'i rang gi mtshan nyid rjes su mi 'jug pa dang / rang gi mtshan nyid gzhan du yang ma mthong bas na sbyor bar 'gyur ro/ /spyi yul yin na ni skyon 'di med de/khyab pa'i phyir yang dang yang nye bar gnas pa der nye bar mkho ba yod na sbyor ba'i rten nyid du mi 'gal ba'i phyir ro zhe na/ 'di zlog par byed pa de ni ma yin te zhes bya ba'o/ /'di ltar don byed par nus pa shes nas don byed pa bsgrub pa'i phyir 'jug par 'gyur ro zhes don rnams la rjod par byed pa sbyor bar byed do//sngar ni gang gis rang gi mtshan nyid kyi yul can spangs par 'gyur ba lan cig bkod pa yang rtogs pa'i 'bras bu can tha snyad kyi don du bstan pa yin la/ da lta ni tha snyad de nyid kyi dgos pa ji lta bur gyur pa de brtags pas tha snyad du byas pa'i don spyi'i rang bzhin du nye bar ston pas spyi'i yul can nyid gsal ba'i phyir 'di brjod do//'di ltar gal te sgra nges par sbyar ba'i yul ji ltar rtogs bzhin pa'i rang bzhin de lta bu'i spyi srid na ni/ spyi yul du 'gyur gyi/ gzhan du ni ma yin no/ /de la rang ngam gzhan don bya ba don du gnyer bas don bya ba nus pa'i rang bzhin rtogs par bya ba'i phyir sgra sbyor ba yin no//des na spyi don bya bar nus pa nyid yin na rigs sbyor ba'i yul du 'gyur gyi/ don bya ba nus pa'i yul ma yin na ni/ sgra nges par sbyar ba rigs kyi yul can du mi 'gyur ro/ /des na 'dis ni nges par sbyor ba ni don bya bar nus pa'i yul can yin no zhes gzhung btsugs pa yin no//'di nyid bshad pa ni 'jig rten na zhes bya ba yin no/ /re zhig 'jig rten pa'i 'jug pa dang ldog pa'i mtshan nyid kyi tha snyad thams cad ni 'bras bu 'dod pa sngon du 'gro ba can kho na'o/ /des na brda sbyar ba las 'bras bu 'dod pa'am de sbyar ba'i yul las 'bras bu 'dod par 'gyur grang na/de la re zhig rnam par rtog pa dang po ni ma yin te/ 'jig rten gyi rtogs pa ni don la brten pa'i 'bras bu 'dod pa'i rnam pa can yin pa'i phyir yin gyi/ nges par sbyar ba nyid las 'bras bu grub par rtogs pa ma yin no//'jig rten pa'i 'dod pa las bzlog nas nges par sbyor ba la 'bras bu 'dod pa ni nyam nga ba zhes brjod do/ /rigs pa ni 'dir 'thad pas grub pa nyid kyis brjod pa ni ma yin gyi/ 'on kyang 'jig rten pa'i rtogs pa dpyad pa nyid kyis bshad pa yin no//'bras bu'i rang bzhin bshad pa ni/ /de ni thams cad kyang zhes bya ba ste/ 'bras bu ni thams cad nyid ni 'dod pa dang mi 'dod pa bde ba dang sdug bsngal dag bdag nyid la 'brel pa dang bzlog pa yin te/ 'di ltar 'di bdag nyid bde ba dang 'brel par 'gyur ba dang sdug bsngal dang bye bar byas pa ni 'bras bur sems pa yin no//des na 'di rang gi bdag nyid dam gzhan la 'bras bu de bskyed pa'i don du de'i sgrub par byed pa dang sgrub par byed pa ma yin pa shes pa sngon du 'gro ba can gyi 'jug pa dang ldog pa dag ni sbyar ba'i 'bras bu yin pa'i phyir nges par sbyar ba ni don bya bar nus pa'i yul can du rtogs pa yin no zhes bya bar grub bo//de de ltar gnas pa na rigs de ni byed par nus pa ma yin no zhes bstan pa'i phyir bshad pa ni/ de la rigs don byed rung min/ /zhes bya ba'o/ /'bras bu sgrub par byed pa ni bya ba dang ldan pa yin la/ /bya ba dang ldan pa yang rdzas kho na yin te/des na rigs don byed pa ma yin no/ /don bya ba byed par rtogs pa la bkod pa'i sgra dag ni don bya ba mi nus pa'i yul du rtogs par nus pa yang ma yin no/ /de la 'khrul pa yin no zhe na/ 'o na ni tha snyad rjes su 'gro ba'i spyod yul nyid du rtogs pa yang 'khrul ba yin pa'i phyir rang gi mtshan nyid kyi yul can du 'gyur ba'am/rtogs pa 'ga' zhig 'khrul par mi 'thad pa yin na ni/ rang gi kho nar 'gyur ro/ /dper na/ sgra rnams kyis ni brdar btags ston/ /zhes bya bas rjes su 'gro ba la rtogs pa ni rang gi mtshan nyid kyi yul can ma yin no zhe na/ bshad pa/de bzhin du don bya bar nus pa'i yul can du rtogs pa'i phyir don bya ba mi nus pa'i yul can ma yin no/ /don du nus par rtogs pa 'khrul pa yin no zhe na/ 'o na ni tha snyad rjes su 'gro ba'i spyod yul nyid du rtogs pa yang 'khrul pa des na rtogs pa de rang gi mtshan nyid kyi yul can du 'gyur ba'am rtogs pa 'ga' zhig 'khrul par mi 'thad na ni/rang nyid gnod pa med pa'i dmigs pa ji ltar rtogs pa bzhin rtogs pa na/ don bya ba nus pa'i blo spyi la dmigs pa ma yin no/ /des na rigs kyi yul can nyid kyi sgra 'god pa ni ma yin no/ /rigs ni don byed par mi nus kyang don byed par nus pa rtogs par bya ba nyid kyi phyir brjod pa yin no//rang gi mtshan nyid ni tha snyad la brjod par mi nus pa yin gyi med pa ni ma yin pas na/ rjes su 'gro ba ni don byed par mi nus kyang brjod par bya ba yin te/ de rtogs par 'gyur ba'i phyir la/ de yang don bya ba byed pa nyid do zhes bstan pa'i phyir gal te gsal ba bstan par mi nus pa'i phyir zhes smos so//'di bzlog pa'i phyir bshad pa ni 'brel pa yod du zin kyang zhes bya ba'o/ /tha snyad la bstan par mi nus pa'i gsal ba mtshon pa'i phyir gyis brjod pa yin na mtshon pa de'i sgra'i byed pa'am rigs kyi byed pa yin par 'gyur/gang gis na sgrogs so zhes bya bar rgyun ston par byed pa gang gi sgra ni de la sgrogs pa mi srid pas na/ tshig gi don gzhan dang 'brel pa 'gal ba'i phyir gal te rang gi don bstan pa la don gzhan dang 'brel par go bar byed pa de ltar bstan pa yin pa'i phyir sgra'i brjod bya nyid du 'gyur ba des na/mtshon pa zhes bya ba de ci zhig /de ltar rtogs pa gzhung btsugs par yang mi 'gyur ro/ /ji ltar 'dir dngos kyi don mtshon pa'i yul las gzhan nyid du nges pa de bzhin du ba lang khyer la shog ces bya ba la ba lang gi tshig gi don khyer te 'ong ba'i bya ba dang 'brel pa med pa'i phyir gsal ba la phyogs par rtogs pa ni ma yin gyi/'on kyang de nyid de ltar rtogs pa yin pa des na rigs kyi don nyams so/ /slob dpon gyis khas blangs nas kyang rigs sgra'i don yin na/ rnam pa thams cad du gsal ba rtogs pa med par bsgrub par bya ba'i phyir 'di skad gsungs so//mtshon pa'i yul ni sgra'i don ma yin pa'i phyir 'brel pa yod du zin kyang sgras ma brjod pa de la 'jug par mi 'thad do/ /gsal ba'i sgra'i don yin mi srid pa'i phyir de sgras ma brjod pa na/ rigs de dang 'brel pa'i phyir de'i ci zhig ltar rtogs pa na/sgra las rtogs pa ma yin pa'i phyir dang / de nyid tshad ma yin pa'i phyir ram brjod par 'dod pa ston par byed pa yin pa'i phyir tshad mas grub pa'am/ smra ba po'i mngon par 'dod pa de ltar rtogs pa na ji ltar rtogs pa yin/ 'brel du zin kyang sgra rtogs par byed pa ma yin na/ don gyis rtogs pa ma yin no zhes bshad pa ni/ 'ga' zhig la khar ba chod cig ces smras na zhes bya ba'o/ /khar ba chod cig ces smras na khar ba la gnas pa'i gcod pa nags sgras ma brjod pa'i don gyis rtogs pa ni med do/ /gal te khar ba gcod pa ni srid pa yin gyi/rigs ni blang ba la sogs par srid pa ma yin te/ des na de ni mtshon pa ma yin gyi 'on kyang 'di nyid du yin no zhe na/ mi srid pa'i phyir zhes smos so/ /mi srid na ni sgra'i don rnar mi 'ong bar 'gyur gyi de khyad du bsad nas sgra'i don ma yin yang gzhan la 'jug pa ni ma yin te/glang bzho bar brjod pa na de la mi srid pa'i phyir glang gi sgra des bskyed pa ba lang bzho ba'i spyod yul can du nges pa ni ma yin gyi 'on kyang ma 'brel pa nyid du zad do/ /de bzhin du gang na 'bod do zhes bya ba la sogs pa dag tu yang rtogs par bya'o/ /ci ste yang rang gi don la phyogs pa spang nas tshig gi don gzhan gtsor byed pa'i phyir ma 'brel pa na de brjod pa yin yang de ltar sgra nyid brjod pa yin no zhe na/de bzlog pa'i phyir bshad pa ni/ don gzhan brjod na zhes bya ba'o/ /sngar ni don gyi byed pa bkag pa yin la da ltar ni sgra'i byed pa 'gog pa'o//de nyid kyang phyir 'brel pa yod du zin kyang khar ba zhes bya bas zhes 'chad par 'gyur ro/ /rang gi don brjod pas don gzhan mtshon pa ni ma yin no/ /sgra nyid la der rtogs pa skye ba ni sgra'i don nyid du thal ba'i phyir te/ sgra'i don gyi mtshan nyid gzhan med pa'i phyir ro/ / rang gi don rtogs pas bar du chod nas rtogs par byed pa nyid na mi 'dra ba tsam du 'gyur la/ dngos su brjod pa ni gtso bo nyid du 'gyur te de las de la rtogs pa skye na de de la phyogs par ma yin par ma grub pa'i phyir ro/ /gal te rang gi don ston par byed pa yin yang brjod par bya ba ma yin pa mtshan nyid pa'i don la gzhol ba'i tshig gi rigs brjod pa yin yang gsal ba la brten pa'i tshig nyid do zhe na/rjod par byed pa las ma rtogs pa'i gzhol ba zhes bya ba 'di ji zhig de rtogs par byed pa'i nus pa dang ldan na ni brjod bya las mi 'da' la/ de lta ma yin na yang ma rtogs pa nyid kyi phyir gzhol ba yang med do//ston par byed pa'i nus pa dang ldan pa nyid kyi phyir rtags mi 'dra ba tsam byas pa mtshon pa nyid yin na yang mtshon pas rtogs pa yang 'brel pa bstan pa la ltos par 'gyur ro/ /ma yin te brjod pa la 'brel pa yod na 'jug pa'i phyir mtshon pa nyid kyis 'jug pa yin no zhe na/de dang ldan par 'gyur ba'i phyogs las khyad par med pa thal bar 'gyur ro/ /mtshon pa la sogs pa'i yul la ni ngo bo'i don yan lag ma yin pa kho na ste/ lha sbyin khrid de shog ces bya ba la ba lang khyer te mi 'ong ba'i phyir ro//des na phyugs kyi mchod sbyin gyis shig ces bya ba la phyugs yan lag ma yin pa na de dang 'brel pa'i gsal ba 'ga' zhig rtogs par 'gyur ro/ /gsal ba yang yul dang dus nges par mi 'khrul pa'i phyir gcig 'ga' zhig brjod do zhes rtogs par 'gyur la/ de yang 'di'i zhes ma shes pa'i mi 'jug pa kho na'o//thams cad brjod kyang mtha' yas pas rjes su 'grub pa mi srid pa na tshad ma med par 'gyur ro/ /gang la mtshon pa yod par 'gyur ba rigs dang 'brel pa tsam gyi spyi ni med do/ /gsal ba la yod pa ni 'di'i zhes bya bar brgal zhing brtag pa med par mthar phyin pa ma yin pa'i phyir mi srid pa kho na'o//sgra'i byed pa 'di ni yod pa ma yin no zhes ston pas/ 'brel pa yod du zin kyang zhes smos so/ /lha sbyin khar ba thogs par bzung ba na de khar ba dang 'brel pa'i phyir khar ba zhes bya ba'i sgra las khar ba thogs par rtogs par thal ba'i phyir ro//ma rtogs par ni 'di'i ngo bo nyid las gyur pa'i sgra'i byed pa ma yin pa'i phyir sgra'i don gtso bo dang phal ba yang ma yin par 'gyur ro/ /tshig don gzhan mi 'grigs na rtogs par byed pa nyid do zhe na/ 'di la gtso bo dang khyad par med par thal lo zhes bshad zin to//des na sgra don gyi 'brel pa ngo bo nyid du gyur pa'am/ brda las byung ba yin yang bla/ gal te nyid phal pa la sogs pa la 'jug na gtso bo kho nar 'gyur ba'i phyir de lta bu la sogs pa dag tu ni brjod bya nye bar btags pa nyid du brjod par bya ste/ji skad du yan lag la spyi nye bar btags pa'i phyir ro zhes bshad zin pa bzhin no/ /'brel pa ma nges pa'i phyir khar ba thogs pa la sogs pa dag la mi rtogs na rigs la yang mtshungs pa nyid de/ gal te 'brel pa ma nges pa can zhes bya ba la sogs pa bshad do//gsal bas stong pa'i rigs ni 'ga' yang med do zhe na/ thams cad la ltos nas ni bden na/ re re la brten nas ni de med par yod pa kho na ste de mi rtag pa'i phyir ro/ /mtshan nyid ni nges pa gcig gi yul can du brjod par bya ba yin te/ de nyid gsal ba'i chos yin pa'i phyir ro zhes bshad zin to//'brel pa can nyid kyi rigs kyi sgras gsal ba rtogs par 'gyur ba ma yin nam/ de la mtshon par byed pas ci bya zhe na/ spun drung zhes bya ba la sogs pa smos so/ /'brel pa can gyi sgra dag kho nas de ltar rtogs kyi/ 'brel pa yod kyang gzhan gyi ni ma yin la/ba lang la sogs pa'i sgra yang 'brel pa can gyi sgra ma yin no/ /bdag nyid gang gi rang bzhin gzhan la ltos pa nyid yin pa de nyid kyis brjod bya yin na gzhan du rtogs pa 'phen par byed de/ dper na spun gyi sgra bzhin no/ /de nyid rang bzhin tsam du gyur pas ni ma yin te/dper na lha sbyin gyi sgra bzhin no/ /ba lang la sogs pa'i sgra yang rang bzhin rjod par byed pa yin te/ des na 'brel pa can gyi sgra ma yin no/ /gal te 'di dag 'brel pa can gyi sgra yin na/ gsal ba bral ba dag la yang rigs kyi tshig dag las rtogs par thal te/ spun drung la sogs pa'i sgra bzhin te/des na dgos pa'i yan lag la nyams par 'gyur ro/ /de bshad pa ni rigs gsal ba dang bral ba can dag gis kyang zhes bya ba'o/ /'brel par rung ba tsam rtogs na ni gsal ba mi rtogs pa kho nar 'gyur ro zhes bshad pa ni/ gal te dus thams cad du zhes bya ba ste/gsal ba yod pa ma yin na ni rung ba nyid du rtogs la yod na ni gsal ba nyid du yin no zhes bya ba'i bye brag ma grub pa'i phyir ro/ /'o na ni rigs gsal ba dang 'brel pa nyid kyi brjod bya yin pa'i phyir/ 'brel pa can gyi sgra ma yin yang gsal bar rtogs so zhes bya bar dgos pa gal te gsal ba dang 'brel pa can gyi zhes bya bas bsu nas bzlog pa'i phyir 'o na ni zhes bya ba smos so//gsal ba dang 'brel pa can nyid du rtogs na gsal ba khyad par nyid du 'phangs pa'i phyir de dang ldan pa'i phyogs las khyad par med par thal lo/ /de dang ldan pa'i phyogs zhes brjod pa ni dgag pa byas pa yin te/gang la rigs khyad par nyid du 'gyur ba de ni gzhan nyid do/ /'brel pa can gyi sgra nyid dam/ mtshan pa ni srid pa ma yin te/ 'brel pa nyid 'chad par 'gyur ba'i shugs kyis med pa'i phyir ro zhes bshad pa ni rigs dang gsal ba dag ces bya ba'o//gal te rigs rang gi mtshan nyid kyi rang bzhin ma yin nam des na de brjod pa na rang gi mtshan nyid yul ma yin par ji ltar 'gyur zhe na/ rang bzhin dang rang bzhin can dag grub ste gcig pa nyid yin na ni tha mi dad la tha dad pa dang rjes su 'brel pa med par 'gyur ram/de tha dad na ni khyad par tsam brjod pa na gsal ba ma 'phangs pa kho na'o/ /de lta bas na zhes bya ba ni mjug bsdu ba'o/ /sgra ni 'bras bu dang ldan pa'i yul can nyid du rtogs la de ni sgra'i don yin no/ /'bras bu dang ldan pa'i yul can nyid du rtogs pa'i phyir 'bras bu med pa'i rigs sgra'i don ma yin no//gal te 'bras bu dang ldan par rtogs pa'i phyir 'bras bu dang ldan pa'i yul can yin na rigs dang ldan pa sgra'i don du 'gyur mod ces de lta na ni 'o na zhes bya bas tshig le'ur byas pa'i 'grel pa byed do/ /de nyid ston pa ni de ldan nus pa zhes bya ba yin no//gang du zhes bya ba ma thos pa'i phyir don byed pa zhes 'brel pa brjod do/ /des na de ltar 'bras bu dang ldan pa'i yul nyid rtogs pa rjes su gzung bar 'gyur la rigs de dang ldan pa la bkod pa'i phyir 'di tha snyad kyi dus na mi gnas pa'i nyes pa yang med pa yin no snyam du bsams pa'o//slob dpon gyis ni 'di srid par/ /bsams lan gyi cha de yang na/ /ci'i phyir dngos su sbyar mi byed/ /ces 'dogs par mdzad do/ /sgra rnams rnam pa ji lta bur gyur pa'i rang gi yul can du rtogs pa de lta bur gyur pa ni rang gi mtshan nyid la yod pa yin pa'i phyir/de la sgra 'jug pas na rigs pas bkod ces bya ste/ dngos su rang gi mtshan nyid la ji ste mi sbyor/ gal te zhes bya ba ni rnam par 'grel pa'o/ /'dir mi sbyor ba'i rgyu bshad pa ni/ gal te mtha' yas phyir zhes bya ba'o/ /gsal ba gang la sgra bkod pa de nyid rtogs par byed kyi gzhan ni ma yin te/de rtogs par byed pa'i nus pa ni de ltar mthong ba la ltos pa'i phyir te/ ma mthong ba rtogs pa med pa'i phyir ro/ /thams cad kyi tshe tha snyad rnams gsal ba gcig gis bsgrub pa ni ma yin no zhes gsal ba gzhan yang nye bar mkho bar mthong bas yul dang dus gzhan dang der yang sgra mthong ba la ltos par bya ba yin te des na gsal ba mtha' yas pa nges par dgod pa'am mthong ba mtha' yas par 'gyur ro zhe na/'di spong bar byed pa ni mtha' yas pa 'di ni de dang ldan pa'i phyogs la yang mtshungs so//gal te 'di snyam du zhes bya ba rtsod pa'i 'brel pa yin la de lta yin na zhes bya ba ni lan gyi 'grel pa yin zhing rigs kyi zhes bya ba ni mtshungs pa nyid gzhung 'dzugs pa'o/ /de dang ldan pa sgra'i don yin pa'i phyogs la ni rigs kyi khyad par can gyi gsal ba nyid sgra'i don yin gyi gang gis de la yang brda byed pa la mi ltos par 'gyur ba rigs ni ba lang nyid dang ldan pa'i gsal ba 'di ba lang gi sgras rjod par byed pa yin yang ston pa na rigs de'i khyad par can gyi gsal ba gzhan la de'i sgras brjod par bya ba nyid du ma bstan pa'i phyir der yang bstan par bya ba nyid du 'gyur ro//de ltar ni nus pa ma yin te mtha' yas pa'i phyir ro/ /de bshad pa ni 'brel ba ma byas pa can gyi sgra ni rjod par byed pa ma yin pa'i phyir ro/ /gal te de dang 'brel pa can la zhes bya bas ni mi mtshungs par dogs pa bsu ba'o/ /de dang ldan pa 'di ni ba lang gi sgra'i don yin no zhes bstan pa ni mtha' yas par 'gyur ba zhig na/sgra 'di brjod par bya ba ni 'dis khyad par can du gyur pa yin no zhes bstan pas na de'i khyad par can mtha' dag de'i don rtogs par ro zhe na/ 'di bshad zin to zhes bya bas lan 'debs so/ /gal te yang gsal ba dang rigs 'brel pa'i phyir rigs kyi khyad par can yin pa de lta na yang rigs kyi khyad par can de'i sgras brjod par bya bar ston pa na de dang 'brel pa can khyad par ram 'brel pa can la rtogs par 'gyur grang na/de lta na yang khyad par can la sogs pa spyi nyid yin par 'gyur ba'i phyir rtsod pa sngar bshad pa nyid du 'gyur ro//rigs des rnam par gcad pa'i gsal ba rtogs na ni gsal ba gzhan rtogs par ga la 'gyur/ de bzhin du gsal ba tsam yang spyi'i rang bzhin ma yin pa nyid kyis yul ma yin pa nyid do zhes gzhung gzung bar bya'o/ /ba lang nyid kyi khyad par can gyi ba lang mtha' dag ba lang gi tshig gi don yin no zhes ston pa yin na yang gsal ba rnams la gsal ba'o zhes mtshungs pa'i rang bzhin du rtogs pa'i phyir thun mong ma yin pa'i yul can nyid ma yin no//so so rang gi rang bzhin thun mong ma yin na ni thun mong bas rnam par gcad pa la bkod kyang gzhan la byas pas gzhan la nus par mi 'gyur ro//'di ltar 'di ni spyi dang ldan pa'i gsal ba yin no zhes de rtogs pa na/ ji ltar spyi gsal ba rnams kyis rang bzhin gcig pa nyid yin pa de bzhin du spyi de dang ldan pa yang yin te des na de ltar gcig tu byas pa'i gsal ba rnams la de ltar dmigs pa'i sgra dgod pa yin te/spyi dang ldan pa de ni re re la yang yod pa'i phyir ro/ /des na sbyor ba'i nus pa ni spyi de dang ldan pa'i spyi nyid la bkod par 'gyur ro/ /rjes su 'gro ba zhes bya ba de las bzlog pa la tha mi dad pa yin mod/ de dag gi 'brel pa gang yin pa de dag gi gang las rjes su song bar 'gyur te/des na de dang ldan pa'i sgra'i don yin na gsal ba rnams sgra gcig gi rten du 'gyur ba ma yin no/ /de'i spyi tha mi dad pa'i phyir ba lang ba lang zhes gsal ba rnams tha mi dad pa brten pa yin gyi/ de spyi logs su byas pas ni so so rang gi bdag nyid du yul du byas pa'i gsal ba tha mi dad par yul du ji ltar byed na gang gis de dang ldan pa gcig nyid la bkod pa'i sgras gzhan thams cad brjod par 'gyur/des na mtha' yas pa ji ltar ma yin/ brjod pa 'khrul pa yang yin te/de gcig ma rtogs pa'i phyir gsal ba sgra'i don gyi phyogs bzhin no/ /'brel pa yang med pa'i phyir 'brel pa can la bkod pa ma yin no/ /des na de ltar rang gi mtshan nyid dang spyi dang de dang ldan pa sgra'i don ma yin par bstan nas/ gzhan sel ba sgra'i don du brjod pa'i phyir nyes pa spang ba srid pa'i phyogs 'di pha rol po'i ci ste khas mi len zhes 'dri ba ni gzhan yang zhes bya ba yin no//dbye ba'i don rnams de byed pa ma yin pa las log pa'i phyir mtshungs par gyur pa la/ /de ni tha snyad ched du byas/ /zhes bya ba'i skabs su bab pa brda ci ste ma byas/ /'di skad brjod pa yin te/spyi sgra'i don nyid ni rang gi mtshan nyid dang mtshan ma'i chos rtogs pa dang mi mthun la/ rang gi mtshan nyid ni rjes su 'gro ba'i rtogs pa'i mi mthun pa'i phyogs yin no/ /de ni rang gi mtshan nyid kho na la 'jug pas de'i chos rtogs pa'i 'thad pa yin la tha dad pa yang mtshungs pa yin pa'i phyir rjes su 'gro ba med pa spangs pa la ji ltar gzhan sel ba sgra'i don ma yin/don byed pa gang gi dbang du byas nas zhes bya ba'i 'grel pa yang ji skad brjod pa'i gsal bas sbyar bar bya'o/ /rang gi mtshan nyid dang spyi'i sgra'i don du khas blangs pa'i nyes pa spangs su chug mod/de dang ldan pa sgra'i don yin pa'i phyogs kyi nyes par go ji ltar mi 'gyur zhes brjod pa ni/ gal te de ldan nyes mtshungs phyir/ /zhes bya ba'o/ /'dir mtha' yas pa dang 'khrul pa'i nyes pa mtshungs par thal bar byed pa'o/ /'di ltar de byed pa'i rang bzhin gyis rang gi mtshan nyid rjes su 'gro ba ma yin pa ni tha dad pa nyid rjes su 'gro bas na de ltar sgras yul du byed pa yin no//des na tha mi dad pa'i tha dad pas rnam par gcad pa'i khyad par rnams la de'i rang bzhin rtogs pa dang rjes su 'gro ba gnyis las ldog pa khyad par du byas par rtogs pa na sgra'i don nyid du 'thad pa'i phyir 'di de dang ldan pa sgra'i don yin pa'i phyogs nyid khas blangs par 'gyur te/ldog pa des rnam par gcad pa gcig la sgra de bkod kyang gzhan la mi rtogs so zhe na/ dgos pa 'di spong ba ni bla ste zhes bya ba'o/ /de dang ldan pa'i phyogs kyi nyes pa mtshungs par gyur kyang bla ste/de lta na yang ldog pa dang ldan pa don nyid du rigs kyi rigs dang ldan pa ni don du rigs pa ma yin no/ /mtshungs pa'i phyir de dang ldan pa'i phyogs kyi nyes pa spang bar mi nus mod/ rigs ni don med do/ /yang ji ltar na nyes pa yod kyang gal te ldog pa dang ldan pa don du 'thad pa rigs dang ldan pa'i don nyid ma yin zhe na de'i phyir/rigs khas len pas kyang zhes smos so/ /rigs khas len kyang rigs mthun pa rnams rigs mi mthun pa dag ldog par brten par bya dgos te/ de lta ma yin na 'di'i khyad par la rjes su 'gro ba'i rang bzhin nyid dang khyad par can gyi khyad par la brten pa nyid du mi 'gyur ro//des na rigs de brten pas byas pa mtshungs par 'gyur ba'i dngos po 'ga' zhig po 'di thams cad la re re la yang de brten pa ma yin pa dag las re re las tha dad pa yod pa kho na'o/ /des na de nyid de dag gi tha mi dad pa yin la rag mod/de las kyang rang gi mtshan nyid kyi rang bzhin rtogs pa'i phyir rang gi mtshan nyid kyi yul can nyid do/ /de dag kyang rigs mi mthun pa las tha dad pa'i rang bzhin gcig dang ldan pa'i phyir rjes su 'gro ba'i rtogs pa'i yul du grub pas ji ltar khas blangs pa'i rtogs pa'i yul yin pa na/rigs khas blangs par dgos pa med do/ /de'i nyes pa spang bar mi nus pa nyid dang / rigs kyi don ni rjes su 'gro ba'i tha dad pa nyid las grub pas rigs khas blangs pas ci bya ste/ rigs mi mthun gcig las tha dad pa dang /de las log pa rnams kyi tha dad pa de nyid de las log pa rnams la tha mi dad par rtogs pa'i rgyu yin no/ /spyi khas blang du ni dgos pa med pa'i phyir ro/ /spyi'i dgos pa ni tha dad pas kyang sgrub pa'i phyir ro/ /tha dad pa khas blang ba yang gdon mi za bar bya dgos pa'i phyir ro//ci ste yang tha dad pa'i don rnams kyi tha mi dad pa yin du zad mod/ 'on kyang des spyi bzhin du tha mi dad par bsgrub par bya ba rtogs pa'i rjes su 'gro ba sgrub par ni mi nus te/ rtogs pa de ni tha dad pa la mi dmigs pa ma yin pa'i phyir ro zhe na/ de dgag pa'i phyir gzhan yang zhes smos so//gang la 'jug pa de las gzhan pa gang yin pa de yongs su spangs nas 'jug par 'gyur ro zhes bya bas sgra sbyor ba yin no/ /des na de las gzhan pa rnams las 'jug pa'i yul rnam par mi gcod na sgra mi sbyor bar 'gyur ro/ /'di skad brjod pa yin te/sgras ni nges pa'i don 'ga' zhig bstan par bya ba yin gyi rang bzhin dang 'dres pa ni ma yin te/ dper na ba lang khyer shog cig ces bya bas ba lang ni rang bzhin nges pa'i ba lang ma yin pa'i rang bzhin dang 'dres pa dang / khyer nas 'ong ba yang khyer nas mi 'ong ba dang 'dres pas stong pa nyid bzhin te de lta ma yin na de skad smras pa na gang yang rung ba khyer te 'ongs pa'am ji yang rung ba byed par 'gyur ro//des na so so nges pa'i rang bzhin gyi don sgras brjod par bya ba yin no/ /gal te nges pa nyid kyang rang gi bdag nyid la rnam par gnas pa yin na dngos po med pa yul rtogs pa 'ga' yang rtogs par mi 'gyur ba'i phyir pha rol po dag gis dngos po med pa'i yul can gyi tshad ma brjod par mi bya'o//dper na ba lang zhes bya bar rtogs bzhin pa'i dngos po ba lang nyid kyi khyad par can yin pa de bzhin du nges pa nyid ni dngos po gzhan med pa yin pa'i phyir ldog pas khyad par du ma byas pa ni nges par rtogs pa yod pa ma yin no//de'i phyir tha mi dad pa gzhan tha dad pa dang ldan pa'i dngos po rnams la yin pa de bzhin du tha mi dad pa de ni tha mi dad pa'i rnam par rtog pas kyang yul du bya ba yin no/ /rang gi phyogs la ji ltar rnam par gcod pa'i yul can yin pa de ltar ni bshad zin to//'dir ni de dang ldan pa'i phyogs kyi gzugs brnyan nyid kyis de'i nyes pa mtshungs pa nyid yin yang gzhan nges pa'i yul can nyid du 'thad do zhes brjod pa'i don du 'di skad ces nges pa'i don la 'jug pas na gdon mi za bar sgra rnam par gcod pa'i yul can du brjod dgos so zhes bshad pa 'ba' zhig tu zad do//'grel pa ni 'di don rnams la zhes bya ba'o/ /mi 'dod pa yongs su spangs pa ni so sor nges pa yul du byed pa'o/ /de'i phyir gzhan las ldog pa'i mtshan nyid kyi rnam par gcod pa ni sgras yul du bya dgos so//rnam par gcod pa'i mtshan nyid shes par byed pa'i yul yin pa'i phyir na/ rnam par gcod par brjod dgos so/ /zhes rnam par gcod pa'i tshig gis ldog pa brjod do/ /ldog pa de yang ldog mtshams las gzhag pa ldog pa'i yul dag la tha mi dad pa yin te ba lang so so la rta med pa yin no//de'i phyir tha mi dad pa'i gdon mi za bar khas blang bar bya ba dang / /gnod mi za bar yul du bya dgos pa dang / khyad par rnams kyi rjes su 'gro ba'i rgyu mtshan nyid kyis don bsgrub pa yin te/ de bas na de'i rjes su 'gro ba'i rtogs pa'i rten nyid du 'gyur ba yongs su dor nas rigs khas len pa ni don med pa kho na'o zhes brjod pa ni de nges par khas blangs pa can dang zhes bya ba ste/rigs ni tha dad pa dang tha mi dad pa'i phyogs dag tu mi 'grub pa'i phyir ro/ /tha dad pa dang de rtogs pa yang yod mod 'on kyang des spyi yod pas bsgrub par bya'i dgos pa ni sgrub par mi byed pa ma yin nam 'di ltar rjes su 'gro ba ma yin pa rnams kyi rjes su 'gro ba ni rang bzhin yin par rtogs te ba lang zhes bya bar ro//sgra yang de nyid la 'jug pa na gsal ba rtogs par byed pa yin no/ /tha dad pa ni rjes su 'gro ba yin yang rang bzhin rtogs pa mi srid pa des ji ltar tha dad pa rigs kyi don bsgrub/des na tha mi dad pa gdon mi za bar khas blangs pa gdon mi za bar brjod pa yin yang rigs khas blangs par rigs pa yin no zhes smras pa ni rnam par gcod pa mi byed pa ni ma yin gyi zhes bya ba yin no//'jug pa'i yul zhes bya ba ni gang la sgras tha mi dad pa'i rnam pa 'jug par byed pa'o/ /'di bzlog pa'i phyir bshad pa ni/ gal te 'di la rnam gcod yod/ /ces bya'o/ /rnam par gcod pa blo gzhan gyis bsgrub par bya ba yin na ni ba lang la sogs pa'i blo rnams sgrub pa tsam la brten pa'i phyir khas blangs pas dgos pa yod par 'gyur ba zhig na/gang gi tshe 'di la rnam par gcod pa yod pa yin te/ bsgrub pa 'ba' zhig rtogs pa nyid ma yin pa de'i tshe spyi la yang sgra rnams kyi dgos pa ni ji srid rnam par gcod pa brjod pa tsam du zad pa de bzhin du rnam par gcod pa dang ldan pa'i phyir don rnams mtshungs pas na spyi la yang mtshungs pa kho na'o//des na rnam pa de lta bu'i dgos pa gzhan gyis ci zhig bya/ yang na gzhan gyis ci zhig bya zhes bya ba spyi zhes yang 'brel par bya'o/ /des na don 'di yin te/so so rang gi rang bzhin du so sor nges pa'i don brjod pa na ldog pa gdon mi za bar rtogs pa na las zhes bya bar rtogs pa ni rtogs bzhin pa'i khra bo la sogs pa rnams kyi rang gi ngo bo'i yul can nyid de rang gi mtshan nyid kyi chos kyis rnam par gcad pa'i phyir ro zhes sngar ji skad bshad pa bzhin no//des na tha dad pa'i don rnams la ba lang gi tha dad pa med par rtogs pa 'byung ba 'di ni/ gcig kyang ba lang ma yin pa la sogs pa gzhan yang ldog pa zhes bya ba'i rgyu mtshan la brten pa yin no/ /gang la de med pa de la ni tha mi dad par rtogs pa ma yin te/ dper na gzhan ba lang ma yin pa'i rdzas la bzhin no/ /des na so so rang gi rang bzhin du rtogs pa'i ba lang thams cad gcig las ldog pa'i phyir tha mi dad par nges pa yin no/ /ldog pa tha mi dad pas rang bzhin tha mi dad pa la ji zhig 'byung zhe na/ spyi tha mi dad pas kyang rang bzhin tha mi dad pa la ci zhig 'byung bar 'gyur te/des na ba lang zhes rtogs par mi 'gyur ro/ /'di ni rjes su song ba dang / rjes su song ba ma yin pa rtogs pa ni ma yin gyi 'on kyang ba lang zhes rjes su song ba'i rang bzhin nyid du snang ngo / /des na gal te 'di spyi kho na yin na rang gi mtshan nyid kyi chos su rtogs par mi 'gyur ro//'on te 'di de dang ldan pa rtogs pa yin na de lta bu'i rjes su 'gro ba dang 'brel pa'i phyir de las bzlog pa yang rjes su 'gro ba nyid du snang ba de bzhin du/ gal te ldog pa dang 'brel pa las kyang snang bar 'gyur na 'gal ba ci yod/de bas na tha dad kyang rang bzhin rjes su 'gro bar rtogs pa'i rgyu mtshan ni spyi bzhin du ldog pa la yang khyad par med do zhes bya bar rigs so/ /dogs pa gang bsu nas 'di nye bar bkod pa de 'dir dgag pa'i phyir/ 'jug pa'i yul rab tu ston te zhes bya bas rjes su 'brel par byed do//gal te 'di tha mi dad pa rnam par gcod pa yod pa de lta na yang ba lang ba lang zhes rang bzhin tha mi dad pa'i yul can du rtogs pa'i dmigs pa ni rang bzhin tha mi dad pa nyid yin gyi/ rang bzhin med pa'i rnam par gcod pa ni ma yin no zhe na/ de ma yin no zhes bshad pa ni/skad ni smras na zhes bya ba'o/ /tha mi dad par bya ba 'di ni rang gi mtshan nyid yin te/ ba lang bzho ba dang dgal bar nus pa yin no zhes rang gi mtshan nyid kyi chos dang ma 'brel par thal ba'i phyir ro/ /des na rigs nyid ni rnam pa 'di lta bu'i rnam par shes pa 'jug pa'i yul du rung ba ma yin no//mtshon par byed pa snang bas kyang de la 'jug pa ma yin no zhes bshad pa ni/ de'i sgo nas zhes bya ba yin no/ /ngag gi don ma 'brel bar yang 'gyur te/ chu'i byed pa can gyi snang ba brjod pa bzhin te/ sngar ji skad bshad pa bzhin no/ /de dang ldan pa brjod na rab tu gcod pa yod pa yang bsal zin to zhes 'brel to//mtha' yas pa mtshungs pas na dngos kyi yul nyid du bsgrub pa'i phyir ro/ /de ste rang gi mtshan nyid de'i tha mi dad pa spyi'i dbang gis rjes su 'gro bar snang ngo zhes brjod na/ de'i tha mi dad pa rnam par gcod pa'i dbang gis 'gyur mod ces thams cad du mtshungs par ston pa ni rigs dang de dang ldan pa zhes bya ba nas de ni ldog pa dang ldan pa la yang mtshungs so zhes bya ba'i mthar thug pa yin no//des ni de ltar gzugs brnyan nyid kyi nyes pa mtshungs kyang bdag nyid yon tan khyad par du gyur pa bstan pas slob dpon phyogs kyi glang po'i gzhung ji ltar thos bzhin pa'i rjes su 'brangs nas gzhan sel ba'i yul can du gzhung btsugs te/rang gis rtogs pa dang rjes su mtshungs par rnam pa thams cad du nyes pa yongs su spang bar bzhed pas sngar bshad pa'i tshul la ltos te/ bshad pa ni ldog pa smra ba rnams ji ltar na zhes bya ba'o/ /re zhig mtha' yas par thal ba ni ldog pa dang ldan pa sgra'i don yin pa la mtshungs so zhes brjod pa gang yin pa de ni ma yin te/ 'di ltar ldog pa smra ba rnams kyi ltar na ni sgra'i rtogs pas dngos po las tha dad pa'i dngos po med pa 'dzin pa yin la de yang log pa'i rnam par rtog pa'i bdag nyid gcig tu 'dzin pa'i rang bzhin yin pa des na lkog shal la sogs pa dang ldan pa zhen pa gcig gis yul du byas pa rnams las gcig la brda byas kyang de ltar zhen pas yul du byas pa gzhan la de ltar rtogs pa'i phyir ro//des na mtha' yas pa thal ba med do/ /de nyid kyi phyir rang bzhin rjes su 'gro ba yang 'thad do/ /ldog pa dang ldan pa ni 'ga' yang med do zhes bya ba dang ldog pa ni sgro 'dogs rnam par bcad pa yin no zhes bya ba dang / rnam par 'khrul pa de ji ltar log pa'i rgyu mtshan yin pa zhes bya ba ni sngar nyid nas bstan zin to//ldog mtshams gcig pas ni rang bzhin rjes su 'gro ba'i shes pa yang dag pa'i shes par mi 'thad do/ /dngos po med pa la rang gi mtshan nyid dam spyi'i chos ma rtogs pa'i phyir mi 'jug pa yang ma yin no zhes bshad pa de ni 'khrul pa'i dbang gis zhes bya ba yin no//rang gi mtshan nyid ma yin pa la yang 'khrul pa'i dbang gis de ltar zhen to/ /gal te yang de la sgra ma bkod kyang gcig tu mngon par zhen pa las de ltar rtogs nas rang gi mtshan nyid gzhan dmigs pa la yang 'di na ba lang 'dug gi zhes rtogs pa'am gzhan la ston par byed par 'gyur mod/de lta na yang ba lang rnyed par ji ltar 'gyur zhe na/ dngos po mi bslu ba zer ba ni zhes smras so/ /ba lang nyid las rjes su spong ba'i ba lang gi rtogs pa nyams su myong ba'i bag chags la brten nas rjes su 'gro ba can du skye ba'i phyir rtogs pa de las de thob pa yin no//gal te sgra tshad ma ma yin pa'i phyir/ ji ltar de la mi bslu ba'i tshig rigs she na/ de ni bden te gal te ba lang gi shes pa dngos po med pa nyid rjes su 'brel pa'i rang bzhin rtogs pa yin na/ ci'i phyir 'di na ba lang 'dug go zhes brjod pa na ba lang brten pa'i mi bslu bar nges par 'gyur gyi bum pa la ma yin na shes pa de de'i yul ma yin pas na bum pa rnyed pa na ji ste mi bslu ba ma yin la gzhan du bzlog par 'gyur zhes bya ba'i rtsod par 'gyur ro//de la brjod pa ba lang nyid las ba lang du rnam par rtog pa rjes su 'gro ba'i rnam pa can du 'gyur ba'i phyir de la mi bslu bar 'chad kyi bum pa la ni ma yin no//ji skad bshad pa'i rnam pas 'di mi bslu ba yin gyi gzhan gyis ni ma yin no/ /sngar bshad pa'i rnam pa 'dir sbyar ba de la rtsod pas dngos po las skye na ni 'khrul pa nyid du mi 'gyur te/ yang dag par thal ba'i phyir ro//de ste 'khrul pa yin na ni mi bslu bar ga las 'gyur zhe na/ de re zhig 'khrul pa nyid du bshad pa ni ma yin te zhes bya bas 'khrul pa dang 'gal ba'i chos spangs te/ der lhag par zhen pa'i phyir zhes bya bas 'khrul pa nyid du gzhung btsugs pa yin no/ /dngos po las skyes pa de snang ba nyid yin na yang dag par 'gyur ba yin na/de ni med la de lta na yang der lhag par zhen pa yod pa'i phyir 'khrul pa yin no/ /dngos po las skyes pa la yang 'khrul pa'i yod pa nyid do zhes bshad pa ni/ 'od la nor bu nor bur zhes bya ba yin no/ /de ni 'khrul pa slu ba yin par 'gyur ro zhes dogs na dgag pa'i phyir ma yin te zhes bshad do//nor bu'i 'od mthong bas 'khrul par brjod do/ /rigs pa yang bshad pa ni/ 'khrul pa'i mtshan nyid ni zhes bya ba'o/ /'khrul pa ni log par snang ba yin la/ med na mi 'byung bas ni mi bslu ba yin pa'i phyir der snang ba ma yin yang med na mi 'byung ba nyid kyis mi bslu ba yin pa la 'gal ba ji yod/snang ba med par mi bslu bar med pa ni ma yin te/ med na mi 'byung ba nyid kyis der 'gyur ba'i phyir ro/ /des na snang ba ma yin par bshad do/ /dngos po mi 'dzin pa nyid rigs pa yin gyi/dngos po 'dzin na ni ji skad bshad pa'i nyes par 'gyur ba de ston pas dngos po la zhes smos so/ /byed pa po ma yin pa la yang byed pa por lhag par zhen pas 'jug pa spangs nas ngo bo ji lta ba bzhin sgras sems gtod pas 'jug par 'dod na ni mi 'jug pa kho nar 'gyur te/ de la rang gi mtshan nyid kyi chos med pa'i phyir ro/ /'on te rang gi mtshan nyid kho na la sgras sems gtod par byed de/ rang gi mtshan nyid dang mthun pa'i chos kyis rnam par gcad pa'i dngos po rtogs pa'i phyir ro zhe na/ de'i tshe gang la sgra mthong ba de nyid la 'jug par 'gyur gyi/gzhan la ni ma yin te/ ha cang thal ba'i phyir ro zhes bshad pa ni gzhan la yang 'jug na ni zhes bya ba ste/ rta la yang 'jug par thal ba'i phyir ro/ /'on te de ldan pa sgras 'dzin to zhes brjod na de'i tshe mtha' yas pa skyon du 'gyur ba ma yin na spyis ci zhig bya ba la sogs pa bshad zin pa yin no//sgras ni rigs nyid 'dzin pa yin la/ gzung bar bya ba spyi'i don byed pa dang mi ldan pa'i phyir 'jug par mi 'gyur ro zhes brtsad par bya ba yang ma yin no zhes bstan pa'i phyir/ gal te rigs gzung na yang zhes smos so/ /gang gis na rjes su 'gro ba 'di la ni sgra 'jug par 'gyur la/de las bzlog pa 'di la ni ma yin no zhes rjes su 'gro ba med pa 'di las ni don byed pa la de las bzlog pa 'di las ni ma yin no zhes rtogs par 'gyur ba/ rigs dang gsal ba dag mngon sum gyis rtogs pa la bum pa dang snam bu ltar phan tshun ma 'dres pa'i rang bzhin nyid du ni rtogs pa med do//gang gis ni spyi rtogs byed pa'i sgra las don du gnyer ba mi 'jug par 'gyur te/ de dag 'phrod pa 'du ba'i phyir 'dres pa'i rang bzhin du rtogs pa'i phyir ro/ /gang las ni don byed la gang las ni mi byed ces tha dad par rtogs pa ni med do//des na rang gi mtshan nyid kyis rang bzhin la log pa zhig tu gyur pa gzhan rtogs pa med kyi/ 'on kyang 'khrul pa rnams mi rtogs par 'gyur ro/ /dper na ba khra mo la sogs pa bzhin te/ de spangs nas kyang spyi'i rtogs pa yod pa'i phyir ro//gang zhig med na rigs kyi rtogs pa med pa'i gsal ba'i bdag nyid de dang ni rigs kyi rtogs pa 'dres par snang ba las 'da' ba ma yin te dper na don bya ba 'am/ gsal ba'i rang bzhin tsam bzhin no/ /de'i phyir rigs kyi rtogs pa gsal ba 'di ni kha dog gi rnam pa gsal ba yin no//de'i phyir rigs pa na yang mi 'khrul ba'i rang gi mtshan nyid kyi chos spangs nas rtogs pa med pa'i phyir don bya ba don du gnyer bar 'jug par 'thad pa kho na'o zhe na/ de ni ma yin no zhes bya ba ni/ de'i tshe zhes bya ba'o/ /blo la 'dres par snang na ni rigs pa ma yin la/de nyid kyi phyir de dang ldan pa yang ma yin te/ rigs sam de dang ldan pa'i rang gi ngo bo rnam par gnas pa ma bzung ba'i phyir ro/ /'di ltar rigs ni rang gi mtshan nyid kyi rang bzhin gyis stong pa rjes su 'gro ba'i rigs nyid yin la/ rigs dang 'brel par mi 'khrul pa la rang gi mtshan nyid kyi chos kyang rjes su 'gro ba med pa kho na'o//des na 'dres par snang na rjes su 'gro ba stong pa'i gsal ba'i rang bzhin yang rjes su song bar rtogs par 'gyur la rigs gsal ba'i chos kyis stong pa yang de'i rang bzhin yin pa'i phyir gsal ba nyid du 'khrul pa yin la des na sangs rgyas pa'i smra ba la brten par 'gyur ro//'di ltar spyi dang spyi de yang don bya ba byed pa zhes bya ba rtogs par ji ltar 'khrul pa ma yin/ spyi rtogs pas yul du byas pa la don bya ba byed pa'o zhes bya bar ma rtogs par ni de don du gnyer ba mi 'jug pas de ji ltar 'khrul pa ma yin/des na de ltar rnam pa gzhan gyis kyang spyi'i yul can ma yin pa dang / gzhan sel ba'i yul can yin par bstan nas/ tshul gzhan yang bshad pa'i don du spyi'i rnam par shes pa'i rang bzhin bstan pa'i phyir/ de lta na ni 'o na zhes rtsod pa slong bar byed do//rtsod pa 'di ni gzhung gi 'brel pa tsam byed par zad do/ /spyi tha dad pa khas blangs kyang de nyid 'di yin no zhes 'dod pa ni ma yin gyi 'on kyang 'dir ni ngo shes pa'i rnam pa can gyi spyi gzhung gzugs par bya ba yin pas de nyid la de ltar brgal bar bya ste/ nyes pa de ni med de tha dad kyang ni zhes bya ba la sogs pa'i mdo brjod pa yin no//tha dad pa yin yang shes pa la sogs pa don bya ba gcig byed pa'i don mthong nas de dag gzhan mthong ba na yang ngo shes par byed do/ /gal te sngar mthong ba dag las tha dad pa kho na'i don mthong ba gang yin pa de lta na yang de nyid 'di'o zhes de dag la ngo shes par byed pa kho na ste/'di ltar snga ma dag las de dag tha dad kyang don de byed pa kho na'o/ /ngo shes par byed pa yang lta bar byed pa gang yin pa de nyid 'di yin no zhes bshad par rig par bya la lta bar byed pa yang mthong ba nyid yin te/ des na ngo shes pa ni de nyid las skye zhing de yang don dag las yin pa'i phyir don nyid rgyu yin no//de nyid kyi phyir 'grel pa dang yang rjes su mthun no/ /de de ltar don nyid las ngo shes pa skye ba ni spyi med par bshad nas de gzhan sel ba'i yul can nyid du bshad pa ni de las gzhan dang 'brel ba'i zhes bya ba yin no//gang dag shes pa la de lta bur gyur pa'i don bya ba mi byed pa de dang bral ba ste sgro 'dogs kyi sgo nas sbyar ba dag gsal ba de'i yul can gyi sgra rnams kyi don nam ngo bo shes pa lhan cig tu sbyar nas te/ gnyi ga ltar yang gzhan sel ba'i yul can yin no/ /de'i don ni 'di yin te/gang gi phyir 'dis sngar ba lang nyid dmigs la/ da ltar yang ba lang nyid dmigs pa yin no/ /ba lang de nyid 'di ma yin pa de lta na yang ba lang ma yin pa las tha dad pa'i 'bras bu rnam par rtog pa gcig 'jug pa tsam yin gyi ngo shes pa rnam pa gcig pa can ni de'i stobs nyid las nyams su myong bas chod nas skye ba yin no//ji ltar ngo shes pa 'di 'thad par 'gyur te/ gang gi phyir 'dir ni ba lang gi rnam pa tha mi dad pa yin no/ /de ni ba lang khra bo ba lang ser skya zhes khyad par rnams dang tha dad med par gyur pa yin te/ des na ba lang gi rnam pa ngo shes pas de nyid 'di yin no zhes rtogs pa na khyad par yang khyad par gzhan dang gcig tu byas par 'gyur na khra bo gang yin pa de nyid ni ser skya ma yin no//yang na khra bo ser skya zhes bya ba lta zhog gi ba lang gi rnam pa tsam gyis kyang khyad par bzung ba na ngo shes pa mi srid par 'gyur te ba lang gang yin pa de 'di nyid do zhes rtogs pa na de nyid 'di'o zhes khyad par yang khyad par gzhan dang bsres par 'gyur te tha dad pa la brten pa ni tha mi dad pa rtogs par mi rung ba'i phyir ro//des na ji ltar 'di ngo shes pa yin zhe na khyed bden te rnam par rtog pa'i rtogs pas spyi rnam par 'jog mi nus so zhes brjod do//spyi ni mi bslu ba'i shes pa'i yul ma yin nam/ 'di la ni de mi srid do/ /spyi ni tha dad kyang khyad par dag dang tha mi dad par rtogs pa'i spyod yul du gyur pa yin pas de ji ltar tha dad pa ma bzung bar tha dad pa dag la mtshams sbyor ba'i rtogs pa'i yul du 'gyur/ yul dang dus kyi tha dad kyang tha mi dad pa ni de nyid 'di'o zhes rtogs par 'gyur te/ dper na bum pa rtag pa nyid la sngar dmigs pa gang yin pa de nyid 'di yin no zhes bya ba bzhin no/ /khyad par rnams ni de ltar tha mi dad pa ma yin no/ /gzhi tha dad pa yin na yang de dag la spyi yod par rtogs par 'gyur ro//de ni gzhi tha dad par ma rtogs pa'i phyir dang / gzhi mthun pa ma yin na yang mtshams sbyor ba mi 'grub pa'i phyir tha dad pa med pa gsal bar byed pa spyi'i sgrub byed ni 'ga' yang med do/ /gang du tha dad par snang ba la gcig tu rtogs par 'gyur ba rnam pa 'di lta bu 'khrul pa yang mi srid pa ni ma yin no//'o na ji ltar ngo shes pa yin zhe na/ brjod pa tha dad 'dzin pa'i rang bzhin gyi rtogs pa 'jug pas tha mi dad par shes pa ni ngo shes pa ni ma yin gyi 'on kyang 'di ni brtag par mi nus pa tha mi dad par zhen pa kho na'o/ /ji ltar don du zhen pa brtag par mi nus pa bzhin te/don du zhen pa ni rnam par rtog pa med pas yul du byas pa'i don bzhin du snang ba ma grub pa'i phyir don gsal ba med pa'i phyir na/ yul du ma byas pa'i don la yang don gyi yul can gyi 'jug pa'i shugs kyis dpag par bya ba yin no/ /de bzhin du don bya ba nus pa'i rtogs pa ni don bya ba dang 'brel pa rtogs pa la ltos pa yin te/de yod na 'bras bu skye bar dmigs pas 'brel pa ma rtogs par ni de ltar rtogs pa sngon du 'gro ba can gyi de don du gnyer bas 'jug pa ma grub pa'i phyir ro/ /des na 'di ni de ltar rtogs la ltos pa dang bcas pa yin no//gcig la mthong ba ni 'brel pa ma mthong ba gzhan la 'jug pa ma yin te/ ba lang la don mthong ba dang ldan pa'i don du gnyer ba de la 'jug pa yin yang rta la mi 'jug pa'i phyir ro/ /des na ba lang gi gsal ba gcig la ba lang gis bya ba'i don mthong ba dang ldan pa ni gzhan yin pa'i phyir de don sgrub nyams su mi gsal ba gzhan la 'jug par mi rigs te/'brel pa mthong ba la ltos pa'i phyir dang / gzhan mthong bas gzhan la mi 'grub pa'i phyir ro/ /de lta yin mod kyi ba lang gi gsal ba gzhan la don nyams su myong ba'i don du gnyer ba de nyid la gzhan du ma mthong ba'i gsal ba gzhan la yang phyis mthong ba la ltos pa med par 'jug pa ni mthong ngo //rigs mthun par 'dod pa'i gsal ba gzhan nyid la yang mthong ba la ltos pa med pa yin gyi/ don de byed pa yin yang rigs mi mthun pa'i gsal ba gzhan la ni ma yin te/dper na sha ri ba la rims zhi ba'i nus pa nyams su myong ba sha ri ba gzhan la 'khrul pa med par len gyi don de sgrub par khyad par med kyang pa ru sha ka la ni ma yin pa bzhin no/ /de'i phyir ba lang gi gsal ba gzhan dag la gsal ba der zhen pa yod mod kyi/de ni de nyid 'di'o zhe 'am de la 'di'o zhes brtag par ni mi nus so/ /des na de ltar tha dad par sbyor bar byed pa'i ngo shes pa 'di lhag par zhen pa tsam gyis snying po can nyid kyis log pa'i rnam par rtog pa nyid nye bar bstan te/ de ltas don la gcig bdag tu//'dzin pa'i rnam rtog 'di 'khrul ba/ /zhes te/ ji ltar don du lhag par zhen pa bzhin no/ /rtogs pa la ni ba lang gi rnam pa tha dad pa kho na ste/ 'di ni ba lang yin la 'di ni ba lang gzhan yin no zhes rtogs pa'i phyir/ gcig ba lang yin yang gzhan bum pa bzhin du ba lang du mi 'gyur ba ni ma yin te/gnyi ga ba lang yin pa'i phyir ro/ /'on kyang de ba lang nyid gang yin pa de gzhan la med pa de'i ba lang gang yin pa de gzhan ma yin par zad kyi gzhan ni ba lang yin pa kho na'o/ /ba lang de nyid ba lang de yin no zhes rigs pa ni ma yin te/des na spyi ngo bo la rigs pa'i byed pa 'gal ba med do/ /ba lang nyid dang ldan pas ba lang zhes khas len na gzhan la de med par mi 'gyur bas 'gal bar 'gyur gyi/ rang gi ngo bor de ltar 'gyur ba la ni ma yin te khra bo la sogs pa'i ba lang mang po rnams nyid ba lang nyid du rtogs kyi rta ngang pa la sogs pa gzhan la ni ma yin pa'i phyir ro//khyad par sre ba'i ngo shes pa 'di'i rgyu mtshan yang dngos po nyid yin no/ /'brel pa ni 'di la bshad zin to zhes bya'o/ /dngos po de dag la shes pa la sogs pa'i don byed pa gcig mthong ba la dngos po rnams kyi chos nyid kho nas de nyid 'di yin no snyam pa'i log pa'i shes pa skyed par byed do//de nyid 'di'o zhes snyam pa ni rgyang mi ring zhing ma bskal bar lhag par zhan pa'i rang bzhin brjod pa'o/ /dngos po rnams la dngos su rnam par rtog pa skyed pa'i nus pa ni yod pa ma yin no zhes bshad pa ni rang nyams su myong ba ni de dag gi bdag nyid kyi yul can gyi rnam par shes pa de'i bag chags te/der rgyur gyur pas so/ /de la 'dir re zhig log pa nyid gzhung gzugs pa'i phyir bshad pa ni/ de lta ma yin na zhes bya ba ste log pa nyid ma yin na'o//'dis ni 'di skad bstan pa yin te/ rjes su 'gro ba 'ga' zhig med pas ngo shes pa mi 'thad pa na ni ma yin gyi/ phyir la rjes su 'gro ba yod na mi 'thad do zhes so/ /blo khyad par sre ba can zhes bya ba ni/ ngo shes pa'i rnam pa can spyi'i shes pa bstan pa ste/ de ni khyad par sre ba'i rang bzhin yin pa'i phyir ro//'di ltar spyi smra ba rnams kyi spyi mtshams sbyor ba'i shes pa'i spyod yul du gyur pa yin du zin kyang khra bo la mthong ba gang yin pa de nyid ni ser skya la yang mthong ngo zhes tha dad pa nying mtshams sbyor ba ni ma yin te/ 'di ba lang zhes spyi dang gsal ba tha mi dad pa snang gi 'di ba lang zhes bya bar ni ma yin pa'i phyir ro//khra bo ba lang ser skya la/ /zhes gzhi mthun pa ni de'i rang bzhin med par rtogs pa mthar phyin pa ma yin no/ /'brel pa'i phyir gzhan de la yod pa yin na ni/ lha sbyin gyi ba lang zhes bya ba bzhin du rtogs par 'gyur te/de yang ba lang dang ldan pa'i phyir ro/ /des na tha dad pa dang 'brel pa yin na ba lang dang ldan pa zhes rtogs par rigs kyi ba lang ngo zhes bya bar ni ma yin no/ /ba lang nyid kyi nye bar gzhag pa las ba lang zhes tha mi dad par rdzas kyi mthar phyin par rtogs so zhe na/ re zhig tha dad pa med par rtogs pa ni grub ste/de nyid kyi phyir tha dad pa'i don dang logs su thob pa med pa'i phyir ro zhes bshad do/ /des na tha dad pa tha mi dad pa sbyor ba'i bdag gi shes pa ni tha dad pa med pa sre ba'i rang bzhin du mi 'gyur te/ de dang tha mi dad par rtogs pa ni de spangs nas rjes su sbyar bar nus pa ma yin no//gang zhig gang dang lhan cig 'brel pa de la de ma 'dres par ji ltar 'gyur/ de'i phyir spyi'i shes pa ni khyad par sre ba'i rnam pa can yin la/ de ni 'khrul pa med par mi 'gyur ro/ /de spyi tha dad pa'am tha mi dad la dmigs pa yin na ni 'khrul par mi 'gyur ro//de la tha mi dad yin na tha dad pa nyid du mi 'gyur mod/ 'di dag 'dres par go ji ltar 'gyur/ tha dad na yang tha mi dad pa de tha dad pa rnams la rtogs par 'gyur mod/ 'di dag 'dres par ga la 'gyur te/ /dper na khar ba thogs pa dag bzhin no/ / khar ba thogs pa rnams khar ba tha mi dad pa dang ldan du zin kyang rang gi ngo bo 'dres par snang ba ni ma yin gyi/ 'on kyang ma 'dres pa de dag la khar ba gcig 'brel par ro/ /des na de 'di la'o zhes rtogs par rigs so/ /khyad par sre ba ni rnam pa de lta bu ma yin gyi 'on kyang de nyid 'di yin no/ / gal te tha mi dad pa rnams las tha dad par rtogs na ngo shes par mi 'gyur te/ dbyig pa thogs pa bzhin no/ /tha mi dad par rtogs na go ji ltar gzhan du rtogs par 'gyur zhe na/ de ni ma yin te/ spyi dang de dang ldan pa dag tha dad na/ tha mi dad par rtogs pa 'khrul pa med pa nyid mi 'grub pa'i phyir ro//der sgro btags nas rtogs pa'i phyir tha mi dad par rtogs so zhe na/ ji ltar ma 'khrul par gzhan la gzhan sgro 'dogs par byed/ 'khrul pa nyid yin na de ltar 'thad de/ 'di ni rdul yin no zhes bya ba bzhin no/ /dbyug pa gcig du ma dang 'brel pas kyang de dang ldan pa'i dbyug pa can ji ltar 'brel par mi 'gyur zhe na/de ni dbyug pa gcig dang ldan pa'i phyir sgro btags pa'i de dang ldan pa rang gi bdag nyid du gyur pa kho nas de dag 'dres pa yin gyi/ dbyug pa ni ma yin no/ /des na tha dad pa rnams dngos po gcig dang ldan pas ni 'dre ba srid pa ma yin no//de nyid kyi phyir tha dad pa dang tha mi dad pa'i rang bzhin spyi ma yin te/ 'di ba lang ngo zhes bya ba la tha dad pa dang tha mi dad pa gnyi ga snang ba nyid du thal bar 'gyur gyi tha mi dad par ro gcig pa ni ma yin par 'gyur ba'i phyir ro/ /ba lang dang 'di'o zhes bya ba'i cha tha mi dad na gzhi mthun pa nyid du yang mi 'gyur te/ba lang ba lang zhes bya ba bzhin no/ /des na de nyid tha dad pa'i shes pa yin no zhe na/ 'di tha dad pa dang tha mi dad pa'i rtog par 'gyur ba gang yin pa 'dir tha dad pa snang ba sngon du 'gro ba can gyi tha mi dad pa'i rtogs pa ni med kyi 'on kyang ba lang zhes rtogs pa ni 'di'i zhes bya ba'i cha ma rtogs pa rtogs par 'gyur ba yid la de yang tha mi dad pa kho na yin te/des na 'dir tha dad par rtogs pa ni 'ga' yang med kyi 'on kyang tha mi dad par ro gcig pa kho na'o/ /des na ji ltar tha dad pa dang / tha mi dad pa tha dad par snang ste/ de'i tshe 'dis tha dad pa spangs pa ni ma yin no//yod kyang sgras ma brjod do zhe na/ ma yin te/ tha dad pa med na 'jug pa dang mi 'jug pa mi rung ba'i phyir ro/ /gal te tha mi dad pa las tha dad pa gzhan yin na ni 'jug pa dang ldog pa'i myong ba yod par 'gyur gyi/ tha mi dad pa gang yin pa de nyid tha dad pa yin pa'i phyir ji ltar na 'dir 'ga' zhig blang ba dang gzhan ni dor bar 'gyur/tha dad pa'am tha mi dad pa zhes bya ba'i chos ni 'ga' yang rtogs par byar yod pa ma yin gyi/ 'on kyang ba lang gi dkar po rang bzhin nyid du tha mi dad par rtogs pa gang yin pa de nyid tha dad pa las rang bzhin ma yin pa'i phyir de'i gnas skabs su rtogs zhes drug pa'am chos can gyi phyogs gcig tu 'gyur ro//'di ba lang ngo zhes 'di'i ba lang nyid ces bya ba 'dren par rtogs pa ni med do/ /rtogs pas stong yang tha dad pa dang tha mi dad pa'i phyogs khas blang bar yang ci 'gyur/des na rtogs pa 'di ni rnam par dpyad na ma 'khrul par mi 'thad kyi 'khrul pa nyid yin na 'thad do/ /de bshad pa ni 'khrul pa'i dbang gis zhes bya ba'o/ /'khrul pa ni gsal ba'i cha la ni mi 'thad kyi 'on kyang zhen pa kho na la yin no/ /gsal ba'i cha yang 'khrul pa ni ma yin te/gzhan yang ba lang nyid yin pas na de lta bu kho nar rtogs pa'i phyir ro/ /tha dad pa med par rtogs pa ma grub pa'i phyir ro/ /ba lang zhes bya bar rtogs pa'i phyir ro/ /des de ltar log pa nyid du bsgrubs nas dngos po rnams kyis dngos po'i chos nyid kho nas skyed par byed do zhes bya ba'i gzhung gzugs pa'i phyir bshad pa ni/gal te rgyu mtshan med pa'i phyir/ /zhes bya ba'o/ /dngos po de dag nyid 'khrul pa'i rgyu mtshan yin pa de yang thams cad ni ma yin no zhes bshad pa ni de dag gi don bya ba de byed pa ste/ dper na khra bo la sogs pas ba lang gi rnam par rtog pa bzhin no//don ni bag chags kyi rgyu ma yin gyi 'on kyang shes pa nyid yin no zhes bshad pa ni nyams su myong ba'i sgo nas zhes bya ba'o/ /rnam par rtog pa'i shes pa nyid las rnam par rtog pa'i bag chags yin la de dag kyang dngos po nyams su myong bas sad pa na de'i gnas skabs su nges pa skyed par byed pa yin gyi/des na nyams su myong ba'i sgo nas don rnams rgyu yin no/ /rnam par rtog pa'i bag chags kyang rnam par rtog pa'i rgyu yin no zhes bshad pa'i don 'khrul pa'i 'bras bu can gyi zhes smos so/ /gtan tshigs des na dngos po rnams rgyu nyid do//des na de ltar rigs mthun par 'dod pa rnams kyi spyi'i shes pa'i rgyu ni gsal ba dag kho na yin gyi spyi ni ma yin no zhes gzhung btsugs nas/ rigs mi mthun pa rnams la yang rang bzhin gzhan du mtshon pa'i 'khrul pas de'i rigs su gtogs pa nyi tshe'i spyi'i rgyu can yin no zhes gzhan gyi khas blangs pa dgag pa'i don du yang dag pa dang /log pa'i shes pa gnyi ga yang spyi'i rgyu mtshan can nyid bsal ba'i phyir/ smig rgyu la sogs pa yang zhes smos so/ /chu dang rigs mi mthun pa smig rgyu dag la chu'i rtogs pa 'jug pa na chu dang rigs mthun par rtogs pa ni 'khrul pa yin pa'i phyir gal te chu'i spyi'i rgyu mtshan can ma yin pa de lta na yang rnam pa thams cad du spyi la mi ltos par ni mi 'thad do//bum pa yang de ltar rtogs pa'i dbang gis de lta bu'i dngos por khas blangs par thal ba'i phyir ro//des na smig rgyu dag kho na la chur shes pa dang / thag pa la sbrul du 'khrul pa dang / nya phyis la dngul du phyin ci log pa zhes bya ba 'di nges pa yin na de ni rang bzhin 'ga' zhig kho nas spyi la brten pa yin no zhes bya ba de ni gal te spyi med par don rnams rnam pa de lta bu'i shes pa skyed par byed par mi grub na 'gyur ro//des na rnam pa 'di lta bu'i 'khrul pa nges pa'i rten du 'gyur ba gang yin pa 'di ni chu dang smig rgyu dag gam thag pa dang sbrul dag kho na'i rang bzhin yin te 'di la spyi gzhan gyis ci bya/ 'di nyid gzhung gzugs pa'i phyir re zhig spyi ji ltar rtogs bzhin pa med par bshad pa ni de la gang zhes bya ba yin no//smig rgyu dag la chu nyid yod na ni phyin ci log ma yin pa nyid du thal ba'i phyir ro/ /'khrul pa nyid yin na yang de spyi 'dzin par mi grub po zhes bshad pa ni/ gal te yang dag pa ma yin pa'i rnam par zhes brgal ba dang lan dag gis bstan te/rnam pa gzhan med pa'i phyir ro/ /sgro 'dogs pa ni gzhan la gzhan du 'dogs pa yin no/ /de'i dmigs pa ni de nyid yin te/ rig pa ni rig par 'gyur ba'i chos las lhag pa rig par byed pa ma yin pa'i phyir ro/ /des na chu'i shes pas smig rgyu dag la yang dag pa ma yin pa'i chur sgro 'dogs pa ni chu nyid yul yin pa'i phyir 'di spyi'i rgyu mtshan can ma yin te/de la med pa'i phyir ro/ /med pa'i phyir chu nyid smig rgyu la chur shes pa'i rgyu mtshan ma yin mod/ 'on kyang chu dang smig rgyu la sogs pa'i gsal ba'i rten can g.yo zhing gsal ba nyid la sogs pa'i spyi gzhan gang yin pa de las chur sgro 'dogs pa'i mtshan nyid kyi 'khrul par 'gyur ba yin te/de lta ma yin na ni ha cang thal bar 'gyur ro zhe na/ gal te spyi 'dzin pa yod na/ /zhes bya ba la sogs pas dogs pa de bsu nas bzlog pa'i phyir 'bras bu gcig pa can zhes smos so//ji ltar chu'i gsal ba don nges par byed pa rnams chu'i rtogs pa gcig byed pa de bzhin du chu dang smig rgyu dag la yang gang gi dbang gis rtogs pa gcig gi rten gyi dngos por gyur pa na/ rmongs par gsal ba gzhan la de dang 'brel ba'i rnam pa la ltos nas rigs gzhan gyi gsal ba sgro 'dogs par 'gyur ba don gcig la nges pa 'ga' zhig yod pa ma yin no//gal te dngos po rang bzhin gyis smig rgyu rnams chur 'khrul pa'i rgyu mtshan nyid yin na/ gtan du 'khrul par 'gyur ba ma yin nam zhe na/brjod pa/ 'di ni te por chu ste/ khra bo la sogs pa rnams kyang ngo bo nyid kyis spyi'i rtogs pa skyed pa yin na/ rnal 'byor pa la yang de'i rtogs pa yod par 'gyur ro/ /'o na ji ltar yin zhe na/ brjod pa 'khrul pa rang gi rgyu las 'byung ba na/ yul nges par 'gyur ba de ni yul gyis 'khrul par brjod de/ rab rib can gyis zla ba gnyis su 'khrul pa zla bas bskyed par bya ba rab rib med dam/ zla ba med na mi 'gyur ba bzhin no/ /'dir yang rnam par rtog pa'i bag chags las 'gyur ba yid kyi nyes pa las smig rgyu la sogs pa dag la 'gyur ba na rnam par rtog pa don nye bar sbyor ba yin gyi don gyi rnam par rtog pa'i bag chags 'jog par nus pa ni ma yin te/rnam par rtog pa'i rgyu yin pa nyid kyi phyir ro/ /des na de ltar smig rgyu la chur 'khrul pa dngos po'i rgyu can nyid du bsgrubs te skabs nyid kyi dbang du byas nas spyi'i 'dod pas kyang zhes smos so//'dis ni log pa'i rnam par rtog pa nyid dang / dngos po'i rgyu can nyid du bsgrubs pa na shes pa la sogs pa'i don bya ba gcig po de zhes bya ba gzhung btsugs pa yin no/ /don gcig byed pa ni pha rol pos kyang 'dod pa yin la de nyid las spyi'i shes pa skye bas na spyi gzhan gyis ci bya/gal te log pa'i shes pa yod pa de'i so sor nges pa'i yul la brten nas skye ba'i rgyu nyid yin par 'gyur na/ 'di log pa'i shes pa nyid du nges pa ni ji ltar yin te dngos po rang bzhin ji lta ba nyid du ngo bo shes pa'i rnam pa can ma yin pa'i rnam par rtog pas rang gi mtshan nyid rtogs la rag mod ces rtsod par byed pa ni gal te dngos po ji lta ba bzhin zhes bya ba'o//rtogs pa kho na ste gcig pa nyid yin pa na gzhan yang ba lang nyid ba lang kho na rtogs pa'i phyir ro zhe na/ khyad par ma 'dres pa can zhes smos te/ngo shes pa'i bdag nyid spangs nas so/ /ma rig pa'i mthu las zhes bya ba ni lan no/ /ma rig pa ni rnam par rtog pa'i bag chags te de'i mthu las 'byung ba'i phyir ro/ /de med na rnam par rtog pa nyid du mi 'gyur ba'i phyir rnam par rtog pa med pa'i shes pa nyid yin pa des na spyir zhen par ga la 'gyur/rnam par rtog pa'i bag chags la brten pa yin na de ji lta ba bzhin rnam par rtog par 'gyur ro/ /gal te gang gis rig pa las rnam par rtog par 'gyur ba dmigs pa med kyang rnam par rtog pa snga ma 'jug pa'i rjes su byed pa'i rnam par shes pa thog ma med pa nas rgyu 'jug pa yin no zhes bya ba 'di gang du rtogs/shes pa thams cad ni dmigs pa la brten pa kho na yin mod kyi 'on kyang de la chos mthun pa la sogs pas 'khrul par 'gyur ba yin te/ chu la sogs par shes pa bzhin no zhes dogs pa la/ phyi rol gyi don kho na la zhes smos so//dper na sgra la sogs par bslad pa rnams dmigs pa la brten pa'i khyad par med kyang nang gi rab rib la skye ba de bzhin du 'di dag mi rig pa'i mtshan nyid nang gi khyad par kho na las skye bar 'gyur na ci 'gal sgrub par byed pa med pa ma yin nam zhe na/ji ltar med de bden pa'i dmigs pa bkag pa na rnam par rtog pa sngar gyi shes pa'i rjes su byed pa nyid kyis skye ba 'grub pa'i phyir ro/ /dmigs pa med kyang rnam par shes pa shes pa snga ma'i rjes su byed par skye ba srid na/ mig la sogs pa'i shes pa yang rnam pa 'di nyid du 'gyur mod/yul dang dbang po dang yid la byed pa las skyes pas ci bya zhes ston pa ni/ ma rig pa las byung ba'i phyir zhes bya ba yin no/ /de spong ba ni ma yin te zhes bya ba'o/ /rnam par rtog pa rnams kyi dmigs pa bkag pa rnam par rtog pa'i bag chags rgyu nyid du rtog pa'i phyir rnam par rtog pa'i bag chags nyid ma rig par rtogs pa yin no//des na dbang po'i shes pa rnam par rtog pa'i bag chags las skye ba yin na/ de rnam par rtog par 'gyur ba kho na zhig na/ rnam par rtog pa med pa'i phyir 'di dag ma rig pa las byung ba ma yin pa des na bslad pa nyid do//rnam par rtog pa nyid ma rig pa yin te zhes bya ba ni rnam par rtog pa'i bag chags nyid la rnam par rtog par brjod pa yin no/ /'o na ni dbang po'i rnam par shes pa rnams kyang rdul phra mo dang rags pa'i rnam par rtog pa mi zad pas dmigs pa med pas na bag chags la brten par 'gyur ro zhes dogs pa bsu nas yang na zhes smos so//gal te dbang po'i shes pa rnams ma bslad pa'i bdag nyid yin na de'i tshe de dag la thal ba 'di skyon du 'gyur ba zhig na khas blangs na ni 'di thal ba ma yin pas skyon med do/ /skyon med pa nyid bshad pa ni/gnyis med pa la zhes bya ba'o/ /dngos su na ni 'di shes pa tsam yin mod kyi 'khrul pa'i dbang gis sngon po shes pa'i rang bzhin du snang ngo / /sngon po dang sngon po ma yin pa dag la sogs pa dag srid pa yin na ni dngos po kho na la 'di dag sngon po shes pa'i rang bzhin du 'gyur bas gnyis med pa ma yin te sngon po'i rnam pa yang de la don dam yin pa'i phyir ro//de med na ni gnyis med pa nyid do/ /gal te mig la sogs pa'i shes pa rnams bslad pa nyid ni ji ltar tshad ma'i nang du bgrang bar byed ce na/ thams cad bslad pa nyid yin yang zhes smos so//gal te rnam par shes pa thams cad rnam par bslad pa kho na yin pa de lta na yang tshad ma dang der snang ba'i rnam par gzhag pa yod pa kho na ste/ des na 'di dag tshad ma'i nang du bgrang bar rigs pa yin no/ /ji ltar rnam par bslad pa nyid la tshad ma dang der snang ba rnam par gzhag ce na/bshad pa ji srid gnas te bag chags zhes bya ba gnyis su snang ba'i rgyur gyur pa log pa'i mthar thug par don bya bar rung bar mngon par 'dod pa la mi slu ba'i phyir te/ don bya ba gnas pa'i phyir ro/ /'di ltar gal te rnam par shes pa thams cad bslad pa nyid yin pa de lta na yang ji srid gnyis kyi bag chags las ma 'das pa de srid du rung bar mngon par 'dod pa me'i don bya ba btso ba dang /sreg pa dang / zas zos pas skyed pa bru bas gdungs pa nye bar zhi ba yod pa yin no/ /des na rnam pa 'di lta bu'i rnam par shes pa ni tshad ma yin no//'di ltar me la sogs pa'i shes pa rgyun du 'byung ba na bkres pa'i sdug bsngal log pa'i bdag nyid kyi rnam par rig pa 'byung ba yin no/ /tshad ma las gzhan ni tshad ma yin pa'i phyir 'di lta bu'i mtshan nyid can tshad ma yin pa na/ gang du me la sogs pa'i shes pa rnams kyi rgyun rnam pa 'di ltar kun du spyod pa med pa de las gzhan ni bzlog pa tshad ma ma yin no//des na 'di na 'jig rten pa'i mngon sum dang mngon sum ma yin pa'i thun mong gi mtshan nyid yin no/ /yang ci'i don du 'di rnam par gzhag ce na/ log pa nyid yin yang zhes smos so//log pas byas pa yang 'ga' zhig tu yan lag nyid du 'gyur ba yin te/ dper na bud med kyi khyad par mar 'du shes pa'i yul can rab tu zhi ba'i yan lag bzhin no/ /de bzhin du tshad ma dang der snang ba rnam par gzhag pa 'di dmigs pa med pa yin yang tshad ma dang tshad ma ma yin pa bsgrub pa'i dgos pa'i yan lag tu 'gyur ba yin no//ma la ngo bo nyid kyi sgrub pa'i rab tu zhi ba gang yin pa de ni de ltar mngon par zhen pa byas pas gzhan la yang 'grub pa de kho na'o/ /de bzhin du tshad ma ma yin yang de ltar rnam par gzhag pa ni tshad mas byas pa'i yan lag nyid du 'gyur ba yin te/gcig la ni bag chags brtan pa'i phyir dang / gzhan la ni de med pa'i phyir ro/ /rnam par rig par smra ba ni 'jig rten pa'i tshad ma dang / tshad ma ma yin pa'i rang bzhin dpyad pa na/ bag chags brtan pa dang mi brtan pa tsam rgyu mtshan du nye bar len to//rang nyid rnam par rig pa tsam dang bdag med pa la sogs pa'i dngos po rnam par 'jog pa ni dngos po yul can rjes su dpag pa'i tshad mas 'jog la/ chos can ni rang rig pa'i mngon sum gyis so/ /smig rgyu la chur zhen pa 'khrul par khyad par med kyang mi 'dra bar bstan pa'i phyir/smig rgyu dang zhes smos so/ /smig rgyu chu las log pa yin na/ chu chu gzhan las log pa yin no/ /des smig rgyu dang chu la chur zhen pa ni chu las tha dad pa'i dngos po la 'byung ba yin pa des na dngos po tha dad pa las skyes pa yin no/ /de nyid kyi phyir 'di ni 'khrul par khyad par med pa yin no//de lta mod kyi chu las skyes pa'i chur shes pa ni mi bslu la gzhan ni ma yin no/ /chu nyid la chur shes pa skyes pa na ji ltar 'khrul pa nyid yin zhe na/ gzhan yin yang chu nyid du nges pa'i phyir ro/ /gal te chu'i rnam par rtog pa chu'i 'bras bur rung bas bskyed bya yin na mi rung ba las ji ltar 'gyur/de ste mi rung bas bskyed par bya ba yin na rung ba la mi 'gyur ro/ /gcig nyid rigs mthun pa dag las skye ba nges par khas blang ba ni mi rung ngo zhes bya ba de smos pa ni/ gal te mi rung ba las zhes bya ba'o//rung ba las skye ba la ltos nas mi rung ba las skye ba la brtsad pa ni nye bar mtshon pa ste/ de bzhin du mi rung ba la brten nas kyang rtogs par bya'o/ /dogs pa 'di bsu nas bshad pa ni rnam par rtog pa rnams ni zhes bya ba yin no/ /'di skad brjod pa yin te/gal te 'di dag rung ba'am mi rung ba las skye ba yin na 'di gnyi ga ltar nges pa ma yin no zhes bya ba ni bden pa zhig na 'di dag ni don las skye ba med pa nyid do/ /ji lta zhe na rnam par rtog pa rnams ni don ji lta ba bzhin zhes smos te/ gal te 'di dag don dang 'brel pa yin na don ji lta ba bzhin kho nar 'gyur te mngon sum bzhin no//de ni don gsal ba'i rang bzhin gyis na don dang 'brel pa yin no/ /rnam par rtog pa ni de lta ma yin te/ des na 'di ni don dang 'brel pa nges pa yod pa ma yin no/ /'o na ji ltar rung ba dang mi rung ba las skye zhes bshad ce na/phyir bshad pa ni smig rgyu mthong ba yod na zhes bya ba'o/ /smig rgyu mthong ba las chur 'khrul pa'i phyir smig rgyu las skyes zhes bya ba'i don dang 'brel pa'i phyir ni ma yin no zhes bshad pa ni chu ma yin pa dang bral ba'i don ces bya'o/ /don dang 'brel pa yin na don gsal ba'i rang bzhin du don las skye bar 'gyur ba de lta na yang chu ma yin pa las log pa'i don gyis rang gi rnam par gzhag pas don gsal bar 'gyur ba don gyis bskyed par 'gyur na de ni yod pa ma yin no//gal te 'khrul pa nyid kyis chu las ma skyes par grub pa ma yin nam zhe na/gal te de lta na don gsal ba nyid med par shin tu gsal lo/ /'o na ni dbang po'i shes pa yang don dang 'brel par mi 'gyur te/ zla ba gnyis kyi rnam par shes pa zla ba gnyis kyi rang gi rnam par gzhag pas ma skyes pa'i phyir ro zhe na/ zla ba gnyis kyi shes pa de ltar ma skyes pa'i phyir ma 'khrul pa yang ma skyes pa ni ma yin te/gzhan yin pa'i phyir ro/ /du ba sa bon las ma skyes pas myu gu mi skye bar thal ba'i phyir ro/ /de lta na 'o na rnam par rtog pa yang don dang 'brel pa ni ma 'khrul pa kho na'o zhe na/ de lta bu ni nus pa ma yin te/sngon po dang ser po la sogs pa'i shes pa yul gyi khyad par myong ba'i rang bzhin nyid kyi khyad par du byas pa rnams shes pa tsam gyi rang bzhin du khyad par med kyang rgyu'i khyad par so sor nges pa yod pa'i phyir sngon po nyid la ni sngon po'i rnam par shes pa yin la/ de las gzhan las ni gzhan yin no//chu'i rnam par rtog pa la ni 'di yod pa ma yin no/ /'di thams cad ni chu gcig rig pa nyid kyis spyi'i yul can yin pas phan tshun khyad par ma grub pa'i phyir grub pa dang bde ba tha mi dad pa nyid kyi gcig 'brel pa ma yin na thams cad kyang ma 'brel ba yin no/ /rang gi mtshan nyid kyi yul can gyi rnam par shes pa ni rmi lam na sngon po shes pa yod pas sad pa'i sngon po shes pa 'khrul par 'gyur ba gang yin pa gcig 'khrul pas gzhan 'khrul par 'gyur ba ma yin no//smig rgyu mthong na shes pa nyams su myong bas yin gyi don las ma yin mod/'khrul pa go ji ltar zhe na/ de'i zhes smos te/ 'khrul pa de ni chu'i bag chags sad pas skyed pa yin no/ /gal te smig rgyu mthong yang chu'i bag chags sad na/ chu'i rnam par rtog pa kho nar 'gyur gyi nam yang smig rgyu'i rnam par rtog par ni mi 'gyur ro zhe na/ khyad par mtshon pa la mi gsal ba'i phyir zhes smos te/ mngon sum gyis chu dang smig rgyu gnyis kyi 'byed par byed pa'i khyad par 'dzin par mi nus pa'i phyir ro/ /gang gi mthus smig rgyu'i rnam par rtog par 'gyur ba gnyi ga la srid pa'i rnam pa'i rjes su byed pa can gyi mngon sum ni 'byed par byed pa'i khyad par gsal ba ma yin no//de lta na yang chu kho na'i bag chags sad pa ga las yin te/ de tsam gyi bag chags sad par 'gyur ba ma yin nam zhes skyon la ltos pas zhes bshad do//chu don du gnyer bas chu'i rnam pa las tha dad par byed pa smig rgyu'i khyad par ma bzung ba na/ chu la srid pa'i rang bzhin la chur zhen pa yin no/ /de bzhin du thag pa'i yul la sbrul du rtogs pa dang / tho yor la skyes bur rtogs pa la sogs pa la yang rig par bya'o/ /de lta bas na zhes bya ba nas rjes su 'gro ba med pa'i phyir ro zhes bya ba'i mthar thug pas ni skabs des na de ltar ngo shes pa la sogs pa'i rnam pa can spyi'i rnam par shes pa 'khrul pa na gsal ba kho na las skyes pa yin no zhes rang gi phyogs la bsgrubs nas/gzhan gyis kyang 'di khas blangs par 'gyur ro zhes bsgrub pa'i phyir gzhan yang zhes smos so//spyi smra ba'i ltar na 'ang mi ngo shes pa'i bdag nyid kyi blo ni spyi 'ba' zhig la dmigs pa ma yin no/ /des na de spyi kho na las 'byung ba ma yin no/ /spyi'i blo ni khyad par sre ba'i rnam pa can yin gyi tha dad pa dag la tha mi dad pa mtshams sbyor ba'i rnam pa ni ma yin te/de 'di la'o snyam du rtogs pa med pa'i phyir ro/ /des na spyi'i blos rang gi mtshan nyid rnams las spyi logs su byas te ma dmigs pas gsal ba tha mi dad par rtogs pa na gsal ba yang rnam pa tha mi dad par 'dzin pa'i spyod yul du 'gyur ba kho na'i spyi 'ba' zhig ni ma yin no//gcig las so sor nges par byed/ mi snang la gnyis kyi chos snang gang yin pa de ni gcig kho na la gzhag par nus pa ma yin no/ /des na ba lang ngo zhes bya ba ni spyi bzhin du bsal ba'i blor 'gyur te dbyug pa thogs pa bzhin du rang gi rten ma rtogs pa na spyi dang de dang ldan pa dag tha dad par ma rtogs pa'i phyir ro//ji ltar na spyi kho nar rjes su song bar rtogs pa gsal ba zhes bya bar 'gyur/ des na 'di khyad par rnams tha mi dad par 'dzin pa dang / de la rten pa grub pa'o/ / 'grel pa ni gzhan gyis kyang zhes bya ba'o/ /gal te ba lang snyam pa'i shes pa de dang ldan pa'i blo yin la khar ba thogs pa bzhin rnam par gcad par bya ba dang / rnam par gcod par byed pa'i dngos po yang med pa yin na ni tha mi dad pa'i blo khyad par la dmigs pa zhig na/ 'di spyi tsam la brten pa nyid yin na ni 'gal ba med de zhe na/rtag tu de tsam zhes smos so/ /rtag pa kho nar sgra las byung ba'i shes pa dang mngon sum la yang ngo / /sgra las byung ba spyi'i yul can yin na mngon sum gyis gsal ba rtogs par 'gyur ro/ /gang gi tshe gnyi gas kyang spyi kho na rtogs pa de'i tshe gsal ba mi shes pa kho nar thal bar 'gyur ro//gsal ba so so rang gi rang bzhin shes pa gzhan ni med de khyad par dang bral ba'i khyad par can gyi rang bzhin ma rtogs pa'i phyir ro/ /'di ltar ba lang 'di ni khra bo'o zhes bya ba la de kho na rtar 'gyur te de la yang khra bo nyid kyi spyi'i sgo nas gsal ba rtogs pa yin no//'di zhes bya ba yang rtag tu rjes su 'gro ba kho na'o/ /des na gal te khyad par gyi blo khyad par gyi mthar thug pa yin na/ 'gal ba mi shes pa kho na'o/ /de ste khyad par dang ldan pa'i mthar thug pa yin na/ khyad par rnams tha mi dad pa'i rten du 'gyur ba kho na ste/ba lang ngo zhes bya ba 'di la gsal ba'i rnam pa gzhan rtogs pa med pa'i phyir ro/ /mdo nyid bshad pa ni/ gal te blo 'di zhes bya ba yin no/ /gal te shes na skyon 'dir 'gyur gyi/ ma shes na skyon ci yod ce na/ de'i tshe na zhes smos so//ba lang zhes bya bar shes pa spyi la dmigs pas gsal ba ma shes na nam yang spyi dang ldan pa skabs kyis spyi dang 'brel pa nges par mi 'gyur ro/ /'di rang gi phyogs la spyi dang ldan pa'i gsal ba rnam par 'jog pa gang yin pa de'i tshe/ tshad ma can ma yin par thal lo zhes bya ba'i tha tshig go//gsal ba shes pa med par ni gsal ba'i chos rtogs par mi 'gyur ro zhes bya ba'i tha snyad med par brjod pas ston par byed de/ gsal ba mi shes pa'i rgyu de las na tha snyad med par 'gyur ro/ /'grel pa ni gang gi tshe zhes bya ba yin no//khyad par rnams zhes bya ba 'di rang gi mtshan nyid dag go/ /gal te spyi 'dzin pas khyad par rnams so so'i rang gi rang bzhin du dmigs pa de'i tshe nyes pa ci yod/ sngon po dang ser po bzhin du gnyi ga shes pa gcig gis 'dzin par mi 'gal ba'i phyir ro/ / des na gzhan gyi ltar na 'ang zhes bya ba la sogs pa brjod par bya ba ma yin par 'gyur ro/ /spyi'i blo la ni gsal ba yang so sor rang gi rang bzhin du snang ba la 'gal ba ci yang med pa'i phyir 'di brjod pas ci zhig bya/ 'on te gsal ba'i yul can tu 'gyur dogs na 'thad pa yang ma yin pa des na mi 'dzin par brjod pa yin no zhe na/rtsod pa 'di ni gzhan du mthar thug par 'gyur te/ des na/ gal te dngos cig grogs byed pa'i/ /zhes bya ba la sogs pa brjod par bya ba ma yin par 'gyur/ des na 'di ni khyad par rnams kyang tha mi dad pa'i shes pa'i rten nyid du bsgrub pa la nges pa yin pas gal te dgos pa so so rang gi ngo bos dmigs pa nyid yin na nyes pa med do//de lta ma yin na ni dmigs pa don ci yin zhing de dag 'brel par gzung ngo zhes bya ba'i tshig kyang ji ltar rigs te rang gi bdag nyid kyis ma rtogs na 'brel par mi 'grub pa'i phyir ro zhe na/ 'di la brjod pa/re zhig tha mi dad pa'i rtogs pa 'di ni grub pa yin no/ /'di nyid ni gzhan gyis kyang khyad par la dmigs par khas blang dgos na/ 'di la khyad par rnams rang bzhin du snang ba yang med do/ /des na khyad par rnams kho na tha mi dad par dmigs pa yin no zhes bsgrub pa'i phyir 'di brjod pa yin no//'o na 'khrul pa yin no zhe na/ 'bad pa 'di'i don 'di nyid yin no/ /tshig tha ma bshad pa ni des na de ltar gzhan gyi khas blangs pa la yang gsal ba rnams spyi'i shes pa'i dmigs pa nyid yod pa des na spyi'i don med do zhes gzhung gzugs pa na gzhan dag spyi yod na de dmigs pa nyid du 'gyur gyi gzhan du ni ma yin pa des na des khas len to zhes gzhung gzugs pa'i phyir/gal te dngos gcig grogs byed pa'i/ /zhes smos so/ /khyad par rnams kho na tha mi dad par dmigs so/ /de yang 'di dag las spyi med par ni mi 'gyur ro//des na de'i don nyid du spyi khas len pa yin no zhes bya ba ni bsam pa'o/ /'di nyid bshad pa ni gal te 'di snyam du zhes bya ba yin no/ /gsal ba rnams rgyu 'ba' zhig yin par ni ma zad kyang 'on kyang dmigs pa yin no zhes dmigs pa'i dngos pos rgyu yin la zhes bya bas brjod do//de lta yin dang spyi rnam par shes pa de byed pa la lhan cig byed pa nyid yin no/ /des na dmigs pa yang lhan cig tu 'gyur bar brjod pa yin no/ /gal te dngos gcig grogs byed pa'i/ /zhes bya ba'i gang yin pa bstan pa ni gang gi tshe zhes bya ba yin no/ /'di bzlog pa'i phyir brjod pa ni dngos po cig des de rnams kyi zhes bya ba'o//'dis ni re zhig dmigs pa'i dngos po nyid gsal to/ /gal te spyi yod du zin kyang gsal ba rnams gcig tu gyur pa yin na spyis ci bya/ de ste ma yin na de lta na ni 'o na rang gi bdag nyid gcig tu gyur pa yin pa'i phyir gcig pa'i yul du 'gyur gyi/gsal ba rnams ni ma yin no/ /de nyid dang 'phrod pa 'du ba las ngo bo nyid du 'gyur ba'i tha mi dad pas de dag tha mi dad pa'i rnam par shes pa'i yul nyid du 'gyur ro zhe na/ 'brel pa yin yang gzhan gzhan gyi ngo bor 'gyur ba ni ma yin gyi 'on kyang 'brel pa can nyid du 'gyur ro//rang gi ngo bo nyid ni bdag nyid du gyur pa yin la/ spyi ni bdag nyid ma yin te tha dad pa'i phyir ro/ /de lta ma yin na ni tha mi dad par thal ba'i phyir ro/ /tha dad par gyur pa'i tha mi dad pa rang bzhin du gyur pa ma yin pas ni tha dad par gyur pa rnams tha mi dad par rtogs par nus pa ma yin te/de dang ldan pa tsam du rtogs par thal ba'i phyir ro zhes bshad zin to/ /rtogs pa ji lta bur gyur pa gang gis gang gi rang bzhin de yin par rtogs par 'thad pa de nyid de ltar de lta bu nyid du de'i rang bzhin nyid du 'gyur ro/ /tha dad par gyur pa dang ni 'brel du zin kyang gzhan de'i rang bzhin du rtogs pa ma yin no//de'i phyir tha dad pa 'brel pa las ni rang gi ngo bor gyur pa tha mi dad par mi 'gyur te/ des na tha mi dad par gyur pa'i rang bzhin ni mi srid do/ /de bas na gcig gis tha dad pa nyid mi sel bas na/ dngos po gcig gis grogs byed pa'i gsal ba rnams tha mi dad pa la brten pa'i rnam par shes pa'i dmigs pa nyid ma yin no//de nyid du gzhung gzugs pa'i phyir tha dad pa nyid la ni rnam par shes pa gcig 'gal lo zhes ston pa ni/ tha dad phyir na de dag la/ /zhes bya ba'o//rgyur zhes bya ba ni dmigs par ro/ /de nyid bshad pa ni gcig pu des zhes bya ba la sogs pa'o/ /de de ltar 'di dag dmigs pa'i dngos pos gcig gi rnam par shes pa'i rgyu yin par smra ba la/ dmigs pa nyid bsal nas rgyu'i dngos po bsal ba'i phyir te du ma'ang gcig ltos nas zhes smos so//dngos po du ma rnams kyang gal te gcig la ltos nas tha mi dad par shes par byed pa des na dngos po gcig grogs byed pa can gyi gsal ba rnams shes pa'i rgyur brjod do/ /rtsod pa byed pa'i dogs pa 'di nyid ston pa ni/ tha dad pa'i phyir zhes bya ba smos so//gang gi phyir tha dad pa de'i phyir du mas mi skyed do zhes ni mi smra'o/ /ji ltar khra bo dang bum pa gnyis tha dad pa'i phyir ba lang gi shes pa'i rgyu ma yin pa de bzhin du khra bo dang ser skya dag kyang 'gyur ro zhes gang gis brjod par 'gyur ba tha dad pas 'bras bu skyed pa la 'gal ba med do//'on kyang snga ma dag la ni rnam par shes pa de skyed pa'i lhan cig byed pa med pa la 'di gnyis la ni yod pa 'ba' zhig tu zad do/ /des na lhan cig byed pa dang bral bas 'gal ba nyid do/ /'di la ni spyi gcig lhan cig byed pa yod pa yin no zhe na de bsal ba'i phyir/ de lta na ni 'o na ni zhes smos so//'dis spyi lhan cig byed pa yin na gsal ba rnams rgyu yin par brjod pa rjes su 'gro ba dang ldog pa med par bstan pa'i sgo nas sel bar byed do/ /de'i 'bras bu nyid de gcig pu'i tshad ma can yin pa'i phyir te/ de med na de mi rtogs pa'i phyir ro/ / 'ga' zhig yod pa na 'bras bu snga na med pa 'byung ba gang zhig med na log la gzhan dag ni log kyang mi ldog pa ni lhan cig byed pa'i rkyen de tsam tshogs pas skyed par rtogs pa yin no/ /de la spyi dang rang gi mtshan nyid nye bar gnas na 'byung ba'i 'bras bu gal te gsal ba yod kyang spyi med par mi 'byung ba'am/spyi yod kyang gsal ba med par 'byung ba yin no/ /de'i tshe gnyi gas bskyed par bya ba yin par rtogs par 'gyur ba zhig na/ ldog pa bsgrub pa de ni 'di la mi srid de/ gsal ba med par spyi yod pa'am/ spyi yod pa na gsal ba med pa bstan par mi nus pa'i phyir ro//de nyid kyi phyir spyi 'ba' zhig las shes pa de 'byung ngo zhes brjod par mi nus te/ gsal ba med par de tsam yod par bstan par mi nus pa'i phyir ro/ /des na slob dpon spyi dang lhan cig pa'i gsal ba rgyu nyid du rtogs pa na de med kyang 'byung ba nyid bshad pa ni/gsal ba de dag re re med par yang spyi de gcig pus bskyed par bya ba'i blo la gsal ba de rnams kyi nus pa med pa yin no/ /re zhig ba lang ngo snyam pa'i rnam par shes pa ni spyi med na med pa yin te/ rta la med pa'i phyir ro/ /gal te yang spyi yod na gsal ba med kyang 'byung ngo zhes bya bar mi nus pa de lta na yang gsal ba re re med par ci yod na 'byung ba kho na'o//'di ltar khra bo med par ser skya'i gsal ba la ba lang ngo snyam pa'i shes pa 'byung ba kho na'o/ /des na gal te dmigs pa nyid rgyu'i rtsa ba can yin pa de lta na yang de ni spyi dang lhan cig pa'i gsal ba rnams la med do zhes bshad pa ni de phyir/blo yis de rnams 'dzin pa med pa yin/ /zhes 'brel to/ /'grel pa ni/ da ni ji ltar zhes bya ba'o/ /spyi med na rta la ba lang gi shes pa med pa'i phyir la/ spyi yod na khra bo la sogs pa yod pa'i phyir ro/ /'dir ni nyes pa med de zhes smras te/sngon po dang ser po la sogs pa'i tshogs pa ni rgyu nyid de/ tshogs pa de ni mig gi rnam par shes pa'i rgyu nyid yin no/ /lhan cig par gyur pa de rnams las re re bsal kyang mig gi rnam par shes pa med pa ni ma yin yang re re bsal ba yang 'byung ba de la ltos nas tshogs pa mig gi rnam par shes pa'i rgyu ma yin par nus pa ma yin no//de bzhin du khra bo la sogs par ba lang zhes tha dad pa med par shes pa skyed pa la spyi'i lhan cig byed pa can dag las re re med kyang rnam par shes pa de yod pa'i phyir nus pa nyams par mi 'gyur ro zhes bya ba ni rtsod pa po'i bsam pa yin te/de ltar na de dag gi tshogs pa la yang nus pa med pa ma yin pa zhes bya ba 'dir shin tu 'brel par 'gyur ba yin no/ /'di bsal ba'i phyir/ mi mthun pa nye bar bkod pa ste zhes smos te sngon po la sogs pa nye bar bkod pa ni skabs dang mthun pa ma yin no//de ston pa ni 'di ltar zhes bya ba'o/ /sngon po la sogs pa ni so so rang gi rang bzhin gyis mig gi rnam par shes pa skyed pa la rgyu nyid du rtogs pa'i rgyu de nyid kyis de dag tshogs pa rgyu yin no/ /de nyid kyi phyir de dag las gcig med kyang mig gi rnam par shes pa 'byung ste/sngon po bzhin du ser po yang rgyu yin pa'i phyir ro/ /sngon po med kyang rang gi rgyu ser po las 'byung ba'i phyir dang / de bzhin du ser po med kyang sngon po las 'byung ba'i phyir ro/ /de rnams tshogs pa na yang yin pa'i phyir 'gal ba ci yang med do/ /gang zhig med na shes pa med pa dngos su brjod par mi nus pa'i phyir re re med na shes pa med pa las de rgyu ma yin pa nyid du 'gyur ba tshogs pa zhes bya ba ni gzhan 'ga' yang yod pa ma yin no//de la yod pa'i phyir spyi las shes pa de nyid yin nam 'on te gnyi ga las yin zhes the tshom za ba'i phyir gsal ba rnams ni tshogs pa na ba lang rnams so zhes rtogs pa'am/so sor 'di la ba lang zhes rtogs pa'i shes pa de'i rgyu nyid du grub pa ma yin pa de bas na mi mtshungs so/ /'grel pa ni sngon po la sogs pa la zhes bya ba yin no/ /sngon po la sogs pa dang gsal ba rnams mi mtshungs par ston pa ni/gsal ba rnams ni zhes bya ba yin no/ /bsam pa ni 'di yin te gal te spyis stong pa'i gsal ba rnams rjes su 'gro ba'i rnam par shes pa byed na ni de'i tshe sngon po la sogs pa bzhin du 'di dag rnam par shes pa de'i rgyur 'gyur ba zhig na/ gsal ba rnams ni spyi la ma ltos par shes pa skyed pa ma yin gyi 'on kyang spyi dang lhan cig pa kho nas yin no//de lta yin dang rnam par shes pa 'di spyi las 'byung ba yin nam yang na spyi dang rang gi mtshan nyid gnyi ga las yin zhes the tshom za ba kho na'o/ /de lta bas na zhes bya ba ni gang gi phyir gsal ba so sor med kyang spyi'i shes pa 'byung ba dang sngon po la sogs pa tshogs pa'i rigs pa yang ma grub pa de bas bsal ba rnams kyis mi nus pa kho na'o//pha rol po de dag re re med par rnam par shes pa de 'byung bas de'i 'bras bu ma yin par mi 'gyur ro zhes bstan pa'i phyir/ gal te de dag 'ga' zhig la//zhes smos so/ /gsal ba lhan cig byed pa can gyi spyi rjes su 'gro ba'i rnam par shes pa skyed par byed do/ /des na gal te de dag so sor med kyang skyed par byed pa de lta na yang gsal ba la ma ltos par ni byed pa po ma yin te/ gsal ba mtha' dag med par de byed na de ltar thal ba'i phyir ro//gsal ba gcig med par skyed pa ni lhan cig byed pa'i gsal ba gzhan yod pa yin pas de dang lhan cig byed pa'i skyed par byed pa yin no/ /des na gsal ba spyi'i lhan cig byed pa can yin dang / spyi yang gsal ba'i lhan cig byed pa can gyi rnam par shes pa de skyed pa'i phyir gsal ba med do//'di nyid bshad pa ni 'on te zhes bya ba yin no/ /tha ga pa thag zangs med par ras yug mi 'thag ste/ 'ba' zhig gis mi 'thag pa'i phyir ro/ /de lta mod kyi thag zangs gcig med kyang thag zangs gzhan gyis 'thag la/ de med kyang gzhan gyis yin no//des na de dag re re med kyang 'thag pa'i phyir thag zangs rgyu ma yin pa nyid ni ma yin te thag zangs gcig med kyang thag zangs gzhan gyis 'thag pa'i phyir ro/ /de kho na las zhes bya ba ni thag zangs dang bral ba'i tha ga pa 'ba' zhig las so/ /de bzhin du spyi 'ba' zhig ni rnam par shes pa de'i rgyu ma yin no//de ltar pha rol pos rjes su 'gro ba dang ldog pa med pa bstan par mi nus par brjod pa yin no/ /de lta na yang rjes su 'gro ba dag la the tshom za ba yin te/ 'dir thag zangs la sogs pa'i tshul yod kyang ma nges pa'i phyir ro/ /ji ltar thag zangs med par tha ga pa 'ba' zhig las mi 'byung bar rtogs pa de bzhin du gsal ba med par spyi 'ba' zhig las mi 'byung bar rtogs pa ni ma yin te/gsal ba thams cad la song bar smra ba'i lta ba la gsal bas stong pa'i yul na de med pa'i phyir ro/ /thams cad kyi thams cad ma song ba la yang gsal ba med na gsal bar ma gyur pa'i phyir rnam par shes pa de grub par byed pa ma yin nam/yang na lhan cig byed pa med pa'i phyir yin zhes nges pa med do/ /lhan cig byed pa nyid yin na ni de gnyi ga las skye la/ gsal bas mngon par gsal bar gyur pa las yin na ni spyi 'ba' zhig las so//snang ba'i de ma thag pa can gyi de skyed pa ni ma grub ste/ tha mi dad pa'i shes pa la gsal ba na ma grub pa'i gsal ba dag kho na rnam pa gcig tu snang ba 'khrul pa spyi'i shes pa'i rgyu mtshan yin no zhes bsgrub pa na spyi dang lhan cig pa'i gsal ba kho na rten gyi dngos por 'thad pa yin no zhes gzhan 'dod pa bsal ba yin no//de ni rgyu nyid du ma grub kyang khas blangs nas nyes pa gzhan bshad pa ni/ de lta yin na zhes bya ba'o/ /tha ga pa'i tshul yod pa yin yang gsal ba dag spyi la phan 'dogs na ji lta blo gcig nyid la phan 'dogs pa ma yin 'di skad brjod pa yin te/gsal ba dang lhan cig byed pa can gyi spyi shes pa byed pa yin no/ /gsal ba de dag gis phan btags pa'i spyi shes pa skyed par byed pa yin pas gsal ba tha dad pa rnams la yang don gcig la phan 'dogs pa nyid kyi rang bzhin de khyad par med pa yin na/ gal te 'di dag gis spyi la phan 'dogs pa'i rang bzhin so so rang gi rang bzhin la khyad par med pa yod na/rnam pa de lta bu'i rang bzhin de nyid kyi shes pa gcig skyed par 'gyur ba dang / de'i dmigs pa nyid du 'gro la rag mod don bya ba gcig byed pa mi 'gal bas na rang bzhin gcig las mi nyams pa'i phyir ro//blo nyid la phan 'dogs la rag mod spyi la ni ma yin no zhes bya ba'i don 'di nyid la gtan tshigs gzhan bshad pa ni/ phan pa gang yin pa 'di ni gsal ba rnams kyi 'bras bur 'gyur te/ de'i phyir yang blo la phan 'dogs par 'gyur gyi de la ni ma yin no/ /gal te phan pa 'bras bu yin mod/ji ltar blo la 'dogs kyi spyi la ni ma yin zhe na/ gtan tshigs gzhan yang bshad pa ni/ /phan 'dogs pa ni skyed pa yin/ /zhes bya ba'o/ /'dir ni 'di ltar 'brel pa brjod par 'dod pa yin te de lta ma yin na 'di'i zhes bya ba mi 'thad de/ de'i sgra yang sbyor ba srid pa'i phyir ro//cha snga ma bshad pa'i phyir sngon bzhin du zhes smos so/ /spyi'i rnam par shes pa de skyed pa'i nus pa gsal ba las ma skyes na de'i bdag nyid la bogs 'byung ba med par 'gyur ro/ /des na gsal ba dang 'brel pa'i snga rol na 'di dag nyid ji lta ba nyid du gyur pa de kho na ltar gal te gsal ba dang 'brel kyang yin na ni/de las shes pa skyed pa'i nus pa ma skyes pa'i phyir de'i tshe ji ltar gsal ba rnams phan pas ni 'di'i lhan cig byed par 'gyur/ phan pa 'bras bu ma yin yang gal te 'ga' zhig phan 'dogs par byed pa yin na ni ha cang thal bar 'gyur ro//gal te phan pa lhan cig byed pa dag gis byad pa'i phyir phan pa 'bras bu yin mod/ gang gi spyi rtag pa'i phyir de med pas na blo nyid la der 'gyur ba phan 'dogs pa phan gdags par bya ba'i skyed byed yin no zhes bya ba ga las zhes 'dogs na/ bskyed par bya ba'i phan pa don gzhan yin pa yang sel ba ni phan gdags par bya ba la sogs pa don gzhan zhig byed na ni/phan pas phan pa bya ba la ci zhig byed/ bogs gzhan zhig yin na/ de'i bogs med pa kho na'i bdag nyid yin pa'i phyir de la phan pa des ci yang byar med do/ /gal te bogs gzhan yin yang bdag nyid de la skyes pa des na bogs des 'di bogs dang bcas pa kho nar 'gyur ba ma yin nam/de ji ltar na des de la ci zhig byed ces brjod ce na zhes dogs pa la de de'i rten nyid yin na zhes smos te/ spyi de de'i rten nyid yin na phan pa'i rten nyid yin na zhes gzhan gyi gzhung rjes su brjod nas phan 'dogs pa med pa la zhes bya bas sel bar byed do//phan 'dogs pa med pa gang yin pa de ni rten ma yin la brten pa yang ma yin no zhes bya ba'i tha tshig go/ /brten pas kyang phan btags nas rten rten nyid du 'gyur ba yin la rten gyis kyang phan btags pas brten pa nyid yin no zhes khar gzhong dang rgya shug rnam 'grel du bshad par 'gyur ro//des na phan 'dogs pa ma yin pa gang yin pa de ni rten yang ma yin brten pa yang ma yin pa'i phyir na phan 'dogs pa med pa la rten dang brten pa'i dngos po ci yang med do/ /phan 'dogs pa med pa la rten dang brten pa'i dngos po ji ltar med pa ni mdun nas ston par 'gyur ro//phan pa byas pa'i rang bzhin gyi khyad par med kyang rten dang brten pa'i dngos po yin na ni ha cang thal bar 'gyur ro/ /de ste phan 'dogs pa yod do zhe na de'i tshe rten las kyang brten pa skye ba yin pa'i phyir de nyid las phan pa 'byung ba'am/gsal bas de byed pa'i phyir phan 'dogs pas ci zhig bya/ 'brel pa ni skye ba'o/ /spyi 'ba' zhig gis bdag nyid la brten pa'i phan pa skyed par mi nus te/ des na gsal ba la ltos nas de skyed pa'i phyir gsal bas phan 'dogs par byed pa yin no zhes 'dogs na/de las skye ba'i chos can ni zhes smos so/ /ltos pa zhes bya ba ni ci zhig yin/ spyi la ni de mi 'thad de gang gi phyir ltos par bya ba de las skye ba'i chos can ni ltos pa yin no/ /ci'i phyir zhe na rang bzhin 'brel pa'i phyir ro/ /des na bsgrub par bya ba'i rang bzhin ni de nyid las skye ba'i phyir de la ltos par rig pa'i phyir ro zhes kyang ston par 'gyur ro//'di yang ji ltar zhes dogs na rnam pa gzhan med pa 'chad pa ni/ bogs dbyung du med pa can gyi bdag can zhes smos te/ de las de'i rang bzhin skyes pa med pas ni de la ltos par 'gal ba'i phyir ro//de lta bas na zhes bya bas ni/ bsgrub par bya ba mjug sdud pa'o/ /gang cung zad ces bya ba ni de nyid khyad par byed par bya ba ste/ gnyug ma ni rten dang brten pa'i dngos po ltos par bya ba nyid yin la/ gang cung zad gsal ba byed pa la sogs pa gzhan gang yin pa de thams cad kyang bskyed par bya ba'i bdag nyid do//gzhan gyi dngos po zhes bya ba'i gtan tshigs mjug sdud pa'o/ /des na de ltar bsgrub bya dang sgrub byed kyi mjug bsdus nas skabs nyid mjug sdud pa ni/ de'i phyir gsal bas zhes bya ba yin te/ 'di de rnams kyi 'bras bur 'gyur zhes bya bar grub po//gsal ba la mi ltos na yang gsal ba rnams rnam par shes pa de'i gzung ba ma yin par 'gyur ro zhes bshad pa ni/ 'ba' zhig gis zhes bya ba yin no/ /de ltar ni mi 'thad do zhes bya ba ni bstan zin to/ /de ltar rjes su 'gro ba dang ldog pa'i rjes su byed pa'o//mi 'gyur ba'i phyir dang spyi la phan 'dogs par byed pa nyid mi srid pa'i phyir dang / gsal ba rnams nus pa med par bsgrubs pa na pha rol po dag ji skad du brjod pa'i tshul dor nas nus par smras pa ni gal te rnam par shes pa la snang ba'i phyir zhes bya ba'o/ /dngos po gcig dang lhan cig pa'i gsal ba rnams tha mi dad pa'i shes pa'i gzhir 'gyur ba zhes bya ba 'di tsam nyid/de la 'di rnams kyi nus pa yin gyi gang gis na de mi srid pa'am/ mi srid pas na nus pa med par 'gyur ba de yod na yod pa las ni ma yin no/ /yul gyi rnam par shes pa la nus pa ni yul du 'gyur ba kho na yin gyi/gzhan 'ga' yang ma yin no zhes bya ba ni bsam pa'o/ /de ma yin no zhes 'chad pa ni/ phan 'dogs par ma grub pa can rnams zhes bya ba'o/ /gang gis yul nyid nus pa yin par 'gyur ba rnam par shes pa mi skyed pa ni don shes pa'i yul du 'gyur ba ma yin no//ji ltar zhe na 'di ltar zhes smos te gal te don skyed par byed pa ma yin bzhin du/ shes pa nyid grub pa'i yul 'dzin pa'i nus pas 'dzin par byed pa yin na ni/ thams cad 'dzin pa nyid du 'gyur ba'i phyir thams cad kyis thams cad shes par 'gyur te/des na ha cang thal bar 'gyur ro/ /des na phan par byed pa ma yin pa ni yul ma yin no/ /gal te yul ma yin no zhe na ni mi snang bas na de ji ltar snang ba'i phyir nus so zhes ji ltar brjod/ gal te yul ni rig par bya ba yin la/ de yang phan 'dogs par byed pa kho na yin pa'i phyir dran pa dang 'das pa dang ma 'ongs pa'i rtogs pa dang /ri bong gi rwa la sogs pa'i shes pa rnams la rig pa ji lta ba bzhin gyi yul 'ga' yang med par 'gyur ro zhes smras pa ni/ gal te phan pa med pa zhes bya ba yin no/ /de la shes pa de ni yul med pa kho na'o zhes bshad pa ni/ de dag gi shes pa rnams yul med du zad mod ces bya ba yin no//yul gyis byas pa'i yul gsal ba nyid dang ldan pa yin na ni/ yul gyis phan ma btags pa'i rnam par shes pa rnams yul gsal ba ma yin pa'i phyir ro/ /rang nyid kyis grub pa'i de la gsal ba yod pa'i rnam par shes pa rnams ni de'i phan pa la ltos pa med pa ste/dper na thams cad mkhyen pa'i mkhyen pa bzhin no/ /gal te yul med pa can yin na 'on te de dag gis ci rig ce na/ yul med du zin kyang zhes smos so/ /de lta bu'i rgyu mtshan gyis bskyed pa rang gi bdag nyid du gyur pa'i snang ba dang ldan pa na 'dir 'ga' zhig snang ba bzhin du rtogs pa yin no//'di la phyi rol gyi rig par bya ba ni yod pa ma yin gyi/ 'on kyang rang gi rig pa rang bzhin du gyur pa na'o/ /shes pa'i snang ba de ni de'i dus nyid yin mod kyi lhag par zhen pa'i dbang gis 'das pa dang ma 'ongs pa dang ri bong gi rwa la sogs pa yul du nges pa yin no//gang gis na snang ba'i phyir gsal ba rnams kyi nus pa yin no zhes brjod pa snang ba zhes bya ba nus pa'i rgyu mtshan ma yin no zhes bshad pa ni/ yod pa dang med pa'i zhes bya ba'o/ /gang zhig gang yod na yod pa dang /gang med na ni med pa der nus pa yin no zhes nus pa'i de kho na nyid yin gyi/ snang ba zhes bya ba ni nus pa ma yin no/ /nus pa nyid rgyu nyid yin par brjod pa yin no/ /de la de snang ba tsam gyis mi nus pa yin no/ /gal te yul rgyu yin na/ snang ba yod pa dang med pa'i rjes su byed pa kho na'o//rgyu ma yin pa nyid yin na yang snang ba tsam kho nar zad kyi nus pa ni ma yin no/ /de nyid gzhung 'dzugs pa'i phyir/ mi snang yang nus pa dang snang yang mi nus pa ston pa ni gsal ba las ma rtogs pa zhes bya ba la sogs pa yin no/ /spyi'i blo khra bor snang bar khas blangs pa'i phyir spyi rang bzhin gzhan gyis dben par mi snang ba kho na'o//de lta na yang de ni yod pa kho na yin te/ yod pa nyid ni nus pa'i khyad par can yin pa'i phyir/ yod pa'i phyir zhes 'chad pas ni de shes pa de la nus pa nyid do zhes brjod pa yin te/ shes pa 'di ni de las 'byung ba'i phyir ro//gal te khra bo'i snang ba'i shes pa la mi snang bar ma grub ste/ tha dad par mi snang ba tsam du zad pa'i phyir ro zhes dogs pa bsu nas/ snang yang nus pa med par ston par byed pa ni/ skra shad la sogs pa zhes bya ba'o/ /skra shad la sogs pa nyams pa ni snang ba yin na/ de dag yod pa ni ma yin te des na mi nus so//des na rnam par shes pa la snang ba'i phyir gsal ba rnams nus pa yin no zhes bya ba mi rigs so/ /ngo shes pa ni 'khrul pa kho na don las skye ba yin no zhes gzhan gyis kyang khas blang dgos te spyi'i shes pa khyad par gyi yul can du yang khas len pa'i phyir ro zhes rnam par gzhag pa na/dngos po gcig dang lhan cig pa nyid yin na/ gsal ba rnams shes pa gcig gi yul nyid du 'thad do zhes bya ba gzhan gyi phyir zlog pa mi 'thad pas lan btab pa yin no/ /de ni de'i stobs kyis spyi kun du rtogs pa'i don du ngo shes pa de nyid ji lta bur gyur pa gang yin pa de bstan pa'i phyir rtsod par byed pa slong bar byed pa ni/gal te tha dad min snang blo/ /zhes bya bas so/ /gsal ba rnams 'bras bu shes pa cig byed du chug mod/ 'on kyang rang bzhin gcig pa 'di la shes pa 'di ji ltar snang ba de lta bur gyur pa ni rang gi mtshan nyid rnams la med pa des na ji ltar de yul yin na blo 'di tha dad pa med par snang ba zhes bya ba gal te 'dod na'o//'di nyid bshad pa ni du mas zhes bya ba yin te 'di la da ltar bdag cag log par rtogs pa med do zhes bya ba'i tha tshig go/ /rtsod pa'i yul smras pa na/ 'o na ci zhe na zhes bya'o/ /de dag gi rnam par gzhag pa can zhes bya ba ni tha dad pa'i rnam par gzhag pa ste/de lta ma yin na yul nyid mi srid pa'i phyir ro/ /des na ji ltar tha mi dad par snang bar gyur/ des ni shes pa 'di gsal ba rnams las skye ba yin yang dmigs pa'i rang bzhin rnam par dpyad na spyi yul yin par 'gyur ro zhe na/'di la re zhig blo'i rnam pa tha dad pa de zhes rtogs pa ni rang gi ngo bo rnam par dpyad pa'am brtsams pa kho nar rnam par gzhag pa'i lugs la ltos nas rtsod pa mi 'jug pa nyid du ston pa ni/ spyi 'dzin pa rnams la ni zhes bya ba ste/ dngos su tha dad pa rnams la tha mi dad par snang ba'i blo med de des na 'di ni brtsad par mi bya ba nyid do//de ltar yod na ni thal ba 'di spyi kun du spyod pa'i rgyu mtshan du 'gyur ba kho na'o/ /'di ltar tha mi dad par snang ba'i blo ni rang gi mtshan nyid kyi yul can ma yin te/ de la rang gi mtshan nyid rig pa med pa'i phyir ro/ / de ji ltar zhe na bshad pa rang gi mtshan nyid med kyang spyi'i blo dag yod pa'i phyir ro/ /de dag rjes su 'gro ba dang ldog pa'i rjes su byed pa med pa kho nar de 'dzin pa yang ma yin no zhes 'chad pa ni/ rang gi rnam par shes pa la zhes bya ba'o/ /gal te rgyu'i khyad par gyis cig la yang snang ba tha dad par 'gyur ba'i phyir dngos po gcig kho na sgras rnam pa gzhan du rtogs par byed la/dbang pos kyang rnam pa gzhan du ste/ ring ba dang nye ba'i yul na gnas pa'i 'jal ba pos yul du byas pa'i dngos po gcig bzhin no zhe na/ 'di ni byis pa'i gtam ste/ dngos po gcig kho na rig par bya ba yin na/ rgyu tha dad kyang dngos po de tha mi dad pa'i phyir snang ba tha dad mi srid pa'i phyir ro/ /tha dad na yang dngos po de snang ngo zhes bya bar mi 'gyur ro/ /'o na ji ltar ring ba dag la gsal ba dang mi gsal ba'i rnam par dbye bar 'gyur zhe na/ ji skad brjod pa'i myong bas rig par bya ba'i rang bzhin rnam par dpyad na 'thad pa ji lta ba de kho na ltar nges par bya'o//gcig tu rnam par rtog pas shes par bya ba'i rang bzhin yang rang gi mtshan nyid la yod pa ma yin no zhes 'chad pa ni gcig la rnam pa du ma la sogs pa'o/ /rnam pa du ma gcig yin na ni sna tshogs bdag nyid gcig tu 'gyur ro zhes bya ba ni ha cang thal bar 'gyur ro//des na dngos su na tha mi dad par snang ba 'di ni rang gi mtshan nyid kyi yul can ma yin no zhes bshad pa ni de'i phyir zhes bya ba'o/ /'o na ji ltar ngo shes pa 'di gsal ba'i yul can nyid du brjod de/ gang gis na gzhan gyi ltar na zhes bya bas/spyi smra ba sgrub par byed pa na de mi snang yang lhag par zhen pa'i 'khrul pas zhes smos so/ /tha mi dad pa'i blo la don tha dad mi snang yang ngo / /lhag par zhen pa'i 'khrul pa nyid bstan par bya ba'i phyir de la snang ba'i rnam pa ni zhes smos so/ /tha mi dad pa'i blo la snang ba'i rnam pa ni tha mi dad pa kho na yin pa'i phyir ro//de ni don rnams la yod pa ma yin te/ tha dad pa'i tha mi dad pa nyid ni ma gtogs so/ /'o na ni tha mi dad pa'i rang bzhin de dngos po rnams la yod par 'gyur ro zhe na/ bshad pa/ tha dad pa de med pa'i ngo bo yin te/ de srid pa tsam gyis ni tha mi dad pa'i rnam pa khas blangs pa ma yin no//de kho na zhes bya ba ni tha dad pa tha dad pa nyid do/ /'dzin pa'i tshig sbyar ba ni rnam pa de lta bu'i rang bzhin du kun du rtogs pas sgro btags pas dngos po rnams tha dad pa nyid du gyur pas lhag par zhen pa la ltos te rnam pa de lta bu'i yul du gyur pa'i phyir zhes 'di thams cad ni sngar bshad zin no//spyi don kyang gzhan gyi ltar na 'ang blo de ni zhes bya ba la sogs pa'i tshul gyis nyes pa 'di mtshungs so zhes ston pa ni gzhan yang zhes smos te/ de'i ltar yang tha mi dad par snang ba'i blos gsal ba yul du byed pa yin no/ /lan du mtshungs pa ma yin te zhes smos so//de la ni zhes bya ba la ni de dag la spyi tha mi dad pa yang yod pa yin te/ des na gsal ba rnams la tha mi dad pa'i blo mi 'thad pa ma yin no zhe na/ de dgag pa'i phyir de la yod kyang smos so/ /sngar gyi gzhan gyi ltar na 'ang blo de ni zhes bya bas ni tha mi dad par ro gcig pa can du snang ba'i rig pa gnyis mtshon pa med pa can ni gsal ba'i yul can du khas blang bar bya ba yin no zhes nyes pa bkal ba yin na rnam pa de yang spyi'i rang bzhin nam gsal ba'i rang bzhin zhes gtan la ma phebs pa yin no//de 'dir ni 'di ltar nges pa yin te tha mi dad par snang ba'i blo de la ni yod par khas blang kyang spyi de la snang bar rtogs pa med do//gang gi phyir tha mi dad par snang ba'i blo ni gzugs dang dbyibs su snang ba dang ldan par rtogs pa yin no/ /tha dad par snang ba dbang po'i 'am 'on te gzhan yin par 'gyur/ gnyi ga la yang gzugs dang dbyibs las ma gtogs pa gzhan ni snang ba med do//gang du tha mi dad par rtogs pa de ni gzugs la sogs pa de nyid tha dad par snang ngo / /spyi ni de lta bu ma yin te/ /gzugs la sogs pa dag ni yon tan du khas blangs pa'i phyir ro/ /gang zhig spyir 'gyur ba de las ma gtogs pa'i tha mi dad pa gzhan ni snang ba med do//de la spyir tha mi dad par snang bas kyang spyi gzhan mi 'grub po/ /'o na ni rnam pa spyir khas blangs na tha mi dad par snang ba de lta bur gyur pa de nyid spyi yin pa la rag mod ce na rnam pa spyi yin par smra ba la sogs pa smos so/ / spyi khyad par las tha mi dad pa'i phyir khyad par bzhin du spyi yang khyad par gzhan la mi 'jug pas na rjes su song ba'i rang bzhin gcig gis stong pa'i gsal ba rnams tha dad pa'i phyir tha mi dad pa'i blo mi srid par 'gyur ro/ /de ltar/ gal te tha dad mi snang blo/ /zhes rtsod pa 'di rnam par gzhag pa'i grub mtha' la ltos te 'jug pa med pa nyid du bstan nas/gang gis 'di nye bar bkod pa de nyid nye bar ston pas tha mi dad par snang ba nyid snang ba spangs pa'i phyir yang na zhes smos so/ /tha mi dad par snang ba'i blo tha dad pa rnams la mi 'thad do zhes smras pa na tha mi dad par snang ba'i blo ni tha dad pa rnams la med pa kho na ste/de ni rang gi mtshan nyid kyi yul can ma yin pa'i phyir ro zhes mdos ma zin pa nyid kyis lan btab po/ /de khas blangs kyang mdos lan 'debs pa ni blo de'i tha dad pa rnams yin du zad de tha dad par snang ba nyid 'ga' yang med do/ /ji ltar snang ba tha dad ce na/ bshad pa/ tha dad pa de dag mtshungs zhes 'dzin phyir ro/ /tha mi dad par snang ba gcig tu snang ba yin gcig nyid snang ba ni mtshungs so zhes bya bar snang ba ma yin te/ phan tshun tha dad pa gnyis snang ba na 'dir ni 'di dang mtshungs so zhes rtogs par grub pa'i phyir ro/ /tha mi dad pa la ni de ltar rtogs pa ma yin no//nang par dmigs pa'i bum pa dgongs ka dmigs pa na/ de dang mtshungs so zhes rtogs pa ni med kyi 'on kyang de nyid do zhes bya bar ro/ /des na mtshungs so snyam pas 'jug pa'i blo la ni tha dad par snang ba nyid med pa'i phyir tha dad pa'i yul can nyid du mi 'gal lo//gal te 'di ba lang yin la 'di yang ba lang yin no snyam du rtogs pa skye ba yin gyi/ mtshungs so zhes bya bar ni ma yin par ma yin nam zhe na/ bden te/ 'on kyang 'di nyid spyi'i rtogs par brjod pa yin te/ pha rol pos spyi gzhan dang ldan pa las mtshungs par byas pa'i dngos po rnams kho na la rnam pa 'di lta bu'i shes pa khas blangs pa'i phyir ro//der yang tha mi dad par snang ba nyid yod pa ma yin te/ 'di ba lang 'di 'dra ba la de zhes rtogs pa'i phyir ro/ /tha mi dad par snang na ni ba lang de nyid 'di'o zhes bya bar 'gyur ro/ /des 'di tha mi dad par snang ba ma yin pas tha dad pa'i yul can nyid dang mi 'gal lo//'di nyid bshad pa ni de dag la tha mi dad par snang ba ni med pa kho na ste zhes bya ba'o/ /'dir pha rol po dag tha mi dad par snang ba nyid gzhung 'dzugs pa'i don du phyir zlog pa ni/ gal te gnyi ga zhes bya ba ste/ bsam pa ni 'di yin no/ /gang du dngos po gcig snang ba der ni bum pa de nyid 'di yin no zhes rtogs par 'gyur ro//gang du tha dad pa dag kho na gnyi ga rnam pa 'ga' zhig gis stong par snang ba der ni ba lang rta dang skyes bu dang glang po zhes mi 'dra ba nyid du rtogs so/ /gang zhig tha mi dad kyang rang bzhin gcig dang ldan pa der gsal ba so so la yongs su rdzogs pa'i spyi'i dbang gis mtshungs par gyur pa rnams la 'di ba lang 'di 'ang ba lang ngo zhes rtogs pa yin te/des na mtshungs so zhes 'dzin pa'i phyir tha dad par snang ba yin no zhes ji ltar brjod ce na de ma yin no zhes 'chad pa ni 'on kyang zhes bya ba'o/ /gsal ba rnams la spyi yod pa dang /rtogs pa de gnyi ga 'dzin pa yin pas gsal ba mi 'dra ba rnams ni tha dad pa'i dngos po gcig yod kyang rang rang gi ngo bor mtshungs par mi 'gyur ro/ /de gnyi ga bzung yang mtshungs so zhes bya bar ga la 'gyur te/ 'on kyang gsal ba 'di la yod pa gang yin pa de ni 'di la yang yod do zhes rtogs par 'gyur ro//'di ba lang 'di'ang ba lang snyam du rtogs pa ni gnyi ga 'dzin pa la srid pa ma yin te/ 'on kyang 'di la ba lang nyid 'di la yang ba lang nyid ces bya bar 'gyur ro/ /ba lang ngo zhes rang gi rten las tha mi dad par rtogs pa ni spyi de dang ldan pa gnyis rtogs par mi 'thad de/sngar ji skad bshad pa bzhin no/ /gal te mtshungs pa'i rang bzhin nyid kyi dngos po mtshungs par 'gyur ba ma yin nam/ mtshungs pa'i rang bzhin yang ji ltar tha mi dad pa yin pa de bzhin no/ /tha dad pa yang 'brel pa las gyur pa yin no/ /gal te 'dir mtshungs par tha mi dad pa'i rang bzhin yin na ni rdzas gcig tu thal ba'i phyir gsal ba'i dbye ba med par 'gyur na/de ni tshad mas rtogs pa yin no/ /tha dad yin na yang 'di dag la mtshungs pa ni yod/ de'i phyir gsal ba rnams kyi mtshungs pa'i rang bzhin de ni tha dad pa kho na yin la/de yang spyi yin no/ /de ltar dogs pa de gal te de nyid ces bya ba la sogs pas bsu nas ji ltar zhes gsungs so/ /don gzhan ni mtshungs pa zhes bya bar mi 'thad do/ /gcig can gzhan la yod kyang de ni de dag gi mtshungs pa ma yin no/ /rang gi ngo bos mi 'dra ba gang yin pa de ni tha dad pa gzhan du ldan yang mtshungs par 'gyur ba ma yin te rang gi ngo bo mi 'dra ba dag tha dad pa gcig dang ldan pas kyang mtshungs na ni gcig po de nyid mtshungs pa dang mi mtshungs pa gnyis su thal ba'i phyir ro//des na tha dad pa'i ba lang nyid gcig yod kyang gcig ba lang yin pa na gzhan yang ba lang du 'gyur ba ni ma yin te/rang gi bdag nyid ba lang ma yin na gzhan yod kyang ba lang ma yin pa'i phyir ro/ /ba lang nyid yin na yang gzhan don med pa'i phyir ro/ /des na ba lang nyid gzhan yod kyang ba lang ma yin pa la ba lang ngo snyam du shes pa ma yin gyi/ ba lang nyid dang ldan pa zhes bya bar ni 'gyur ro//'brel pa byas pas gzhan mtshungs pa'i rang bzhin yin pa gsal ba'i phyir gal te de dang mtshungs pa'i phyir ro zhe na zhes bya ba dogs pa de nyid bsu nas bzlog pa'i phyir ma yin te zhes gsungs so/ /rag las pas nyid ni 'thad kyi/ 'brel pa ni ma yin no//ha cang thal ba yang grangs la sogs pa dang zhes bya ba la sogs pa bstan zin to/ /mtshungs so zhes bya bar rtogs pa'i phyir gsal ba rnams las blo tha mi dad pa ni med pa'i phyir ro zhes bshad pa ni pha rol po dag phyin ci log tu sgrub par bsams nas slar zlog pa ni/gal te de dag mtshungs na ni/ /zhes bya ba yin no/ /gal te gsal ba rnams mtshungs na ji ltar tha dad pa'i blos gzung ba yin te gsal ba dag ni mtshungs pa dang / tha dad pa'i blos gzung bar brjod de/ des na mtshungs pa'i blo nyid 'di dag ni tha mi dad pa'i blo yin no zhes smras par 'gyur ro//de'i don ni 'di yin te/ gal te gsal ba rnams mtshungs pa'i blos gzung ba yin na ji ltar 'di dag tha mi dad pa'i blos gzung ba yin no/ /de nyid smras pa ni mtshungs pa'o zhes bya ba ni 'di kho na ste/ 'di lta ste mtshungs pa nyid du rnam par shes pa gal te de tha dad pa'i shes pa yin na ni ba lang dang rta dag la yang 'gyur ro//des na 'di tha dad dag nyid las ldog pa na tha mi dad par shes pa yin no/ /'di tha mi dad pa'i shes pa nyid bzlog pa'i phyir 'chad pa ni/ de mthong ba la zhes bya ba'o/ /gal te tha dad la brten pa ni tha mi dad pa'i rang bzhin snang ba na mtshungs so zhes bya bar rtogs pa yin na ni 'di tha dad pa rnams la tha mi dad par shes par 'gyur ba zhig na de ni yod pa ma yin no zhes bstan zin to//tha dad pa rnams la tha mi dad pa yod kyang mtshungs pa med pas de ltar rtogs pa ma yin pa'i phyir ro/ /da ni gang rtogs na mtshungs pa nyid du rtogs pa'i mtshungs pa nyid gang yin pa de bstan pa'i phyir/'o na ci zhe na zhes smos so/ /de de ltar 'grel pa nyid du byas nas mdos 'bras bu gcig 'dra zhes bya ba'o/ /'di skad brjod pa yin te tha dad pa rnams kyis mtshungs pa nyid ma yin gyi 'on kyang de dag gi rang gi ngo bo kho nas mtshungs pa yin no/ /'di ltar khra bo yang bzho ba dang dgal bar nus pa yin pa de bzhin du/ser skya yang yin no/ /'bras bu gcig pa nyid ni nye bar mtshon pa ste khra bo yang ba lang yin la/ ser skya yang ba lang yin no/ /gal te de lta na ni spyi tha mi dad par khas blang bar 'gyur ba ma yin nam zhe na/ 'di'i 'di ltar brtsad pa 'di ni byis pa'i yin gyi/gang gi spyi tha mi dad par 'gyur ba khra bo'i bzho ba dang dgal ba nus pa gang yin pa de nyid ser skya la yang yod pa ni ma yin no/ /rang bzhin gcig nyid yin na ni mtshungs pa nyid du mi 'thad la/ tha dad pa gzhan dang ldan pas ni ma yin gyi 'on kyang rang gi ngo bo kho nas 'ga' zhig ba lang yin la/de las tha dad pa yin yang gzhan ba lang nyid yin pa'i phyir rang gi ngo bo nyid kyis mtshungs pa yin gyi/ gzhan gyi ngo bos ni ma yin la/ tha dad pa kho na yin gyi tha mi dad pa ni ma yin no/ /des na spyi med pa bzhin du mtshungs pa nyid dang ba lang ba lang zhes bya bar rtogs pa 'thad pa ma yin no//des na ba lang zhes rtogs pas tha dad pa'am tha mi dad par dpag pa ni ma yin gyi/ 'on kyang tha dad du zin kyang 'di yang ba lang yin 'di yang yin no zhes bya ba'i rtogs pa de'i dmigs pa ni so so rang gi rang bzhin gyi mthar thug pa de tsam zhig yin no/ /des na 'di ba lang zhes bya bar rtogs pa'i rang bzhin gyis ni khra bo la sogs pa la rtogs pa 'khrul pa ma yin gyi/'on kyang de mthong ba la ltos pa la sgra la sogs pa rtogs pa na gcig la de ltar gyur pas mthong ba bzhin du rtogs pa na tha dad pa 'khrul par gyur pa'i rgyu brjod du med pa'i rtogs pa 'ga' zhig rjes su dpog par byed pa ni des na 'dir spyi smra ba'am de med par mngon par zhen pa gang rtogs pa la mkhas pa yin zhes ltos/rtogs pa'i rjes su rtog ge 'brang ba dang / rtog ge'i rjes su yang rtogs pa 'brang ba yin no zhes bya ba 'di khyed kyis ma brjod cig /'brel pa ni kho bos ni zhes bya ba'o//don gyi shes pa la zhes bya ba ni spyi'i shes pa la'o/ /'dis 'khrul pas de ltar sre bar byed do zhes bya ba ni ji skad bshad pa'i rtogs pa tha mi dad pa'i dbang gis brjod pa yin gyi ba lang ngo ba lang ngo snyam pa 'di la ni 'dres par 'gyur ba ci yang med de/ phyi la de yod na de ltar rtogs pa mi rung ngo zhes bshad zin to//'bras bu gcig 'bras zhes brjod pa la/ gzhan dag de nyid kyis mi srid par bsams nas phyir bzlog pa ni/ de dag gi 'bras blo zhes bya ba'o/ /blo zhes bya ba ni 'bras bu tsam nye bar mtshon pa'o/ /de nyid kyi phyir bum pa la sogs pa'o zhes 'chad par 'gyur ro//'ga' zhig la tha mi dad pa yang 'ga' zhig las tha dad par pha rol po dag gis khas blangs pa nyid de/ ba lang nyid khra bo la sogs pa dang rta las bzhin no/ /de bzhin du tha dad pa'i blo khra bo la sogs pa la tha mi dad par 'gyur zhes dogs pa bsu nas dngos po re re la zhes gong nas byung ba dang bcas pa'i mdo sbyor ro//blo gang zhig gang las skye ba de ni dngos po gzhan las tha dad pa dang 'dra bar de 'dzin pa'i blo las tha dad pa'i phyir khra bo la sogs pa dag blo gcig gi 'bras bu can ma yin no/ /tshogs pa la ni de dag 'dzin pa gcig par 'gyur ro//shes pa gang la snang ba de ni de la snang ba gang yin pa de dang 'dra bar tha dad pa'i phyir ji ltar de dag 'bras bu gcig pa can yin/ snang bzhin pa ltar de yang sdang ba'i shes pa yang tha dad pa'i phyir ji ltar shes pa don rnams kyis tha mi dad pa yin gyi/ ci'i phyir zhe na/ de dag gi 'bras bu ni de yin na zhes smras so//gang gi phyir de dag gi 'bras bu ni shes pa yin la 'bras bu yang rgyu tha dad na tha dad pa zhes nges par bya ba dang / shes pa bzhin du 'bras bu chu 'chu ba la sogs pa yang tha dad pa de'i phyir tha dad rnams la 'bras bu'i gcig pa med do zhe na de gsal ba'i phyir de ni nyes pa med ces smos so//don gcig tu rtogs pa spyi la dmigs pa'i rnam par rtogs de'i rgyu yin pa'i phyir blo tha dad pa med pa yin no/ /'di skad brjod pa yin te/ gang la ltos nas 'bras bu gcig pa nyid kyis 'dra bar brjod pa don dam par blo zhes bya ba'i dngos po gcig gsal ba tha dad pa rnams la yod pa ni ma yin la/'di srid pa yang ma yin te/ mig la sogs pa rnams 'bras bu gcig pa nyid yin yang tha dad pa'i phyir ro/ /'on kyang khra bo la sogs pa de dag la nyams su myong blos gcig tu rtogs pa skyed na/ bdag la ni ba lang mthong ba skyes so zhes tha mi dad par snang bar zhen pa la ltos nas de tha mi dad par brjod do//de nyid kyi phyir gcig tu rtogs pa tha mi dad par nges pa'i rgyur gyur pa na tha mi dad par snang ngo zhes 'chad par 'gyur ro/ /nyams su myong ba rnams 'bras bu rnam par rtog pa gcig dang ba'i phyir tha mi dad pa yin no zhes bya ba 'di ni 'dir don ma yin te rtogs pa la yang gcig nyid med pa'i phyir te/nyams su myong ba tha mi dad pa'i rgyu can gyi rnam par rtog pa rnams tha mi dad pa'i phyir ro/ /de dag kyang yul tha mi dad pa'i phyir tha mi dad pa yin no zhe na/ gal te rtag tu tha mi dad pa'i yul de yod pa yin na spyi nyid du 'gyur/ 'on te med pa kho na yin na/da ni ji ltar de la don gyi chos tha dad pa dang tha mi dad pa srid par 'gyur/ slob dpon rtogs pa tha mi dad pa'i rgyu mi ston par yang ji ltar 'gyur/ des na tha mi dad pa 'di ni bsams pa las gyur pa yin gyi dngos po ni ma yin no/ /des na de ltar lhag par zhen pas/gcig pa nyid kyi blo gcig la ltos nas 'bras bu gcig po de dang ldan pa'i gsal ba rnams gcig nyid du rnam par gzhag pa yin no/ /de bshad pa ni/ blo gcig rgyu yi dngos po yis/ /zhes bya ba'o/ /des ni gang gi 'bras bu gcig pa nyid kyi 'dra bar 'gyur ba blo tha dad pa 'bras bu gcig ji ltar yin zhes gang smras pa'i rtsod pa spangs pa yin te/gcig tu lhag par zhen pa la ltos nas blo gcig tu brjod pa/ de las ni gsal ba rnams tha mi dad pa yin pa'i phyir ro/ /da bzhin du chu 'chu ba la sogs pa la yang zhen par byas pa'i gcig nyid khas blangs pa na 'dra ba'i rgyu mtshan du 'gyur ba yin no//da ni gang gis gcig tu zhen par 'gyur ba blo'i 'dra ba gang gis byas/ 'bras bu gzhan gyis byas so zhe na/ de lta na ni thug pa med par 'gyur ba'am/ mthar de 'di na yang 'bras bu gcig pas byas pa'i 'bras bu cis she na/'di la bshad zin te/ 'bras bu gcig pa nyid ni 'dra ba ma yin gyi/ 'on kyang rang gi bdag nyid tsam gyi mthar thug pa'i rang bzhin las tha mi dad pa gsal ba gzhan la rjes su 'gro ba dang bral ba'i ba lang nyid khra bo la sogs pa phan tshun tha dad pa rnams kyi 'dra ba yin no zhes so//de yang 'bras bu gcig byed pa nyid kyis nye bar mtshon pa yin te/ de rnam pa 'di lta bu'i chos dang ldan pa'i phyir ro/ /'di ltar chu 'dzin pa'i nus pa ni bum pa'i rang bzhin nyid yin la/ gcig gi gang yin pa de nyid ni gzhan gyi yang ni ma yin no/ /gcig tshul 'dzin par nus pa na/de'i tshul 'dzin pa'i nus pas stong pa'i nus pa gzhan chu 'dzin par mi nus pa yang ma yin no/ /des na 'bras bu gcig 'dra zhes bya ba'i don ni 'di yin te don rnams kyi rnam pa 'di lta bu'i rang bzhin 'dra ba gang yin pa de ni des byas pa yin no zhes bya ba'o/ / de la rtags ni 'di yin te/ blo gcig pa nyid la brgal zhing brtags pas 'bras bu tha mi dad pa gzhan ma brjod pa gang yin pa'o/ /'on te de la yang rnam par rtog pa 'bras bu nyid du mngon par 'dod pa yin na/ de'i tshe 'di la yang 'bras bu gzhan ci ste ma bstan/ med pa yin yang mngon par zhen pa'i yul ma yin par nges par bya'o//de nyid gzhung 'dzugs pa'i phyir bshad pa ni/ ji ltar dngos po rnams zhes bya ba la sogs pa'o/ /'di skad brjod pa yin te/ gang gi blo yang gcig tu 'gyur ba ngo bo nyid du na gcig pa 'ga' yang med do zhes bya ba'o/ / de ni 'khrul pa'i rgyu mtshan rten du gyur pa'i don rim gyis zhes bya ba sngar nyams su myong ba byas nas rnam par rtog pa'i rgyur gyur pa rnams kyis skyed par byed pa'o/ /rang bzhin gyis ni 'brel pa med kyi 'on kyang sre ba'i rnam pa can gyi blo 'khrul pa nyid do zhes brjod pa/ de byed pa'i sgrub pa can gzhan sel ba gang yin pa de ni de dag gi tha mi dad pa brjod do zhes bshad pa ni/'di dag gi zhes bya ba yin no/ /des ni thams cad du tha mi dad pa'i rnam pa 'di lta bu yin no zhes gzhung btsugs nas/ tshul 'di nyid kyis 'bras bu tha mi dad pa yin no zhes bstan pa'i phyir bshad pa ni shes pa la sogs pa de yang gcig tu rtogs pa'i rgyur gyur pa na tha mi dad par snang ngo //de lta bur gyur pa'i lhag pa zhes bya ba'i dbang kho nas shes pa la sogs pa tha mi dad par rjod pa'o zhes bya ba'i tha tshig go/ /tha mi dad par snyems pa ni tha mi dad pa'i yul can yin pa'i phyir gcig tu rtogs pa'i don brjod pa yin no//gcig tu rtogs pa yin gyi rtogs pa yang yin la/ gcig kyang yin no zhes bya ba'i don to/ /des ni 'di ltar gcig ji ltar blo gcig nyid yin pa de ltar phyed snga ma rnam par bkrol nas/ blo gcig rgyu yi dngos po yis/ /zhes bya ba 'grel pas rtogs pa de lta bu'i rgyu zhes bya ba la sogs pa smos so//gcig tu snyems pa'i rtogs pa'i tha mi dad par snang ba'i shes pa la sogs pa'i zhes bya ba 'di ni/ /blo gcig rgyu yi dngos po yis/ /zhes bya ba de ltar gcig pa de bshad pa yin te/ gcig pa nyid ni lhag par zhen pa tsam gyis byas pa'i phyir ro//gsal ba rnams kyang ji ltar tha mi dad pa de gsungs pa ni/ gsal ba rnams kyis kyang zhes bya ba gsungs pa yin no/ /rnam pa 'di lta bu gcig gi rgyu'i dngos pos rnam pa 'di lta bu'i gsal ba rnams kyi tha mi dad pa nyid ni de lta bur gyur pa'i shes pa'i yul nyid do/ /'di 'ang 'bras bu gcig pa nyid mi srid par rtogs pas sngar bshad pa nyid brjod pa yin no zhes gsungs pa ni lan gcig ma yin par 'di thams cad bshad zin to zhes bya ba'o//da ni mnyan pa ni sgra dang don gzhan sel ba na/ rang gi don rjod par byed do zhes bya bas byed pa dang brjod pa rtogs pa'i phyir dngos su na de sgro 'dogs rnam par gcod par lhag par zhen pa la ltos te gzhan ldog pa'i yul can nyid dang rjod par byed pa nyid du bshad kyang byed pa gnyi ga ston pa'i tshul gyis gsal bar ma bshad pa des na/de ltar brjod pa'i phyir rab tu byed pa zlos par byed pa ni de de'i 'bras bu can mi bal ba zhes bya ba yin no//'di dag gi tha dad pa de byed pa ma yin pa'i ngo bo nyid pas zhes bya ba la sogs pas de'i 'bras bu can yang sel ba yin no zhes bshad zin pa nyid nges par bya'i/ don du mdo ston pa yin no zhes khong nas dbyung ba'i nges pa brjod pa yin no//nges par gzung ba'i don nyid sgrub pa ni/ 'dir phyi ma'i cha de dag las gzhan rjes su 'gro ba'i zhes bya ba yin no/ /dngos ma mthong phyir zhes bya bas ni spyi rtogs par byed pa'i tshad ma med pa nyid brjod pa yin no/ /bkag pa'i phyir zhes bya bas ni/ ji ltar kun brtags pa la gnod pa nyid bstan to//snang ba mi dmigs pas dgag pa ni bshad zin la/ dngos po'i ngo bo gcig nyid phyir zhes bya ba la sogs pa'i nyes pas 'chad par yang 'gyur ro/ /de lta na de'i 'bras bu can nyid ni de'i 'bras bu can ma yin pa dang bral ba nyid yin la de yang blo'i yul yin no zhes bshad pa yin no//sgra'i yul yang de nyid yin no zhes bshad pa ni gzhan med pa'i phyir de'i 'bras bu can ma yin pa dang bral bar rig pa yang de yin te dgos pa yin pa'i phyir ro/ /de rig don gang la yod pa ni de rig don can de/ brda ni de lta bur gyur par rigs so/ /'di yang bshad zin pa nyid nges par gzung ba'i don du brjod pa yin no zhes nges par gzung bas bstan to//brda de rig don can yin pa nyid kyang lhag par zhen pa la ltos pa yin no/ /'grel pa ni brda zhig tu byas nas yang dngos po rnams kyi phan tshun tha dad pa gang yin pa de kho na shes par bya ba'i phyir byed na mdzes te zhes bya ba'o/ /de nyid kyi phyir gtan tshigs bshad pa de mi byed pa las tha dad par 'jug pa'i don can nyid kyis so zhes bya ba'o//de byed pa'i don la byed pa ma yin pa'i sgro 'dogs rgyab tu btags pas tha dad pa ni/ de sel bar byed pas bsal ba ste/ des 'jug pa'i don rgyur gyur pas rnam par gcod pa'i 'bras bu can nyid kyis gzhan sel ba'i yul can du 'thad pa kho na'o//de nyid bshad pa ni gal te zhes bya ba ste/ 'dis ni ji skad bshad pa'i don la gtan tshigs nyid du bsgrub pa yin no/ /brda de'i 'bras bu can ma yin pa dang bral ba'i don can ma yin na ni/ tha snyad la de'i 'bras bu can ma yin pa dang ma bral ba kho na la 'jug par 'gyur ro//de lta yin dang nya phyis don du gnyer ba dngul lo zhes rtogs pa na/ nya phyis la 'jug par 'gyur ro/ /de'i phyir sgro 'dogs sel bas 'jug pa'i phyir de las tha dad pa nyid sgras brjod pa yin no/ /gang gi phyir brda de rig don can nyid yin pa de bas na/de ltar brdar btags pa'i sgra'i don rtogs pa 'khrul pa med pa yin yang don la mi slu ba dang byed pa gnyis kyis gzhan sel ba'i yul can yin no zhes bstan pa'i phyir mnyan pa de ni zhes 'grel par byas nas de med min las zhes bya ba brjod do/ /rang gi rnam par rtog pa ma yin pa 'bras bu mi byed pa las dngos po'i rang bzhin du lhag par zhen pa'i bdag nyid can no zhes bshad pa ni 'bras bu byed pa dang 'dra ba'i ngo bor snang ba can gyi blo skyed par byed pa yin na 'ang mnyan pa don la mi slu ba yin no//gtan tshigs bshad pa ni de mi byed/ yongs spong yan lag ngo bo'i phyir te/sgro 'dogs pa rnam par gcod pa'i rgyu yin pa'i phyir te/ zhen pa la ltos nas rigs mi 'dra ba dang / 'dres pa dang bral ba las gyur pa tha dad pa'i rang bzhin gyi don gyi yul can yin pa'i phyir ro/ /des na de rig pa ji lta ba de ltar don yod pas slu ba med pa nyid yin pas na rnam pa gnyis kyi gzhan sel ba'i yul can du 'gyur te/don 'byed par byed pa nyid kyis gzhan sel ba byed pa po yin pa'i phyir dang rang nyid kyi bral ba ma yin yang sgro 'dogs kyi dbang gis don gzhan dang 'dres par gyur pa de dang bral ba las gyur pa snga na med pa'i bral ba'i rang bzhin gyi don rig par byed pa'i phyir ro//de bshad pa ni/ de'i phyir gzhan sel yul can de/ /de byed ston pa'i ngo bo'i phyir/ /zhes bya ba ste/ mnyan pas ni sgra dang don sel ba na 'jug pa yin no zhes bya ba de bshad pa yin no/ /'grel pa ni ngo bo nyid gcig dang bral ba'i don rnams la zhes bya ba ste/'dis ni de byed min la zhes bya ba bshad pa yin no/ /de byed dang zhes bya la sogs pa bshad pa ni/ phyin ci log tu snang ba'i phyir zhes bya ba'o/ /don med ces bya ba brjod pa ni/ mtshungs pa nyid du lhag par zhen pa zhes bya ba'o//de mi byed na/ yongs spong yan lag ngo bo'i phyir/ /zhes bshad pa ni/ de las gzhan pa yongs su spong ba zhes bya ba la sogs pa'o/ /rnam pa de lta bu'i dngos po yod pa'i sgo nas mi slu ba nyid bshad pa ni/ 'di ltar zhes bya ba'o/ /de lta ma yin na mi slu ba ma yin no zhes bshad pa ni/tha dad pa'am zhes bya ba'o/ /des na gzhan sel yul can de/ /zhes bya ba bshad pa'i phyir/ de nyid kyi phyir zhes bya ba'o/ /gzhan las log pa'i don rnams la bye brag med par ldog pa'i khyad par la brten nas zhes bya ba ni des brten pa nyid du brjod pa yin la tha snyad la yang zhes bya bas ni de byed pa nyid du bshad do//'dir gzhon nu ma len la sogs pa don gyi de kho na ma rtogs pa rnams gzhan sel ba sgra'i don du brjod pa la phan tshun bsten pa'i skyon 'god pa yang spang ba'i phyir shing ma yin las log par te/ shing ma yin las tha dad par shing gi don 'dzin na/ gang zhig ldog pa dang gang las ldog pa gnyis po de phan tshun bsten pa yin pas na shing ngam/shing ma yin pa gcig 'dzin pa'i phyir gzhan sel ba la brdar btags pa mi srid do/ /shing ma yin pa rtogs pas yul du ma byas par ni de las log pa'i shing nges par nus pa ma yin no/ /shing gi shing ma yin pa las ldog pa dang /shing ma yin pa las kyang tha dad pa ni shing ma yin pas stong pa nyid yin no/ /des na shing ma yin pa rtogs pas yul du ma byas pa na/ gang rnam par gcad pas shing bzung ba shing ma yin pa las ldog pa 'dzin par 'gyur ba 'di gang zhig med pa yin/ shing ma yin pa las ldog par nges na shing ma yin pa yin pa kho na'o zhe na/ bzung mod kyi shing ma yin pa bzung bas de shing las ldog par 'dzin par 'gyur ro/ /gal te shing ma yin pa ldog par mi 'dzin na rnam par rtog pa'i yul yin yang gzhan sel ba ma yin pa'i phyir gzhan sel ba'i yul can nyid nyams so//gal te de las ldog pa kho nas 'dzin to zhe na/ des na da ni shing ma yin pa ni shing las log par gzung bar bya la/ shing yang shing ma yin las ldog pa yin pa'i phyir shing ma yin par 'dzin pa ni shing 'dzin pa la ltos pa yin la shing yang shing ma yin pa 'dzin pa la ltos par 'gyur ba des na gnyis phan tshun bsten par 'gyur ro//des na de ltar rang dbang du gcig kyang 'dzin par mi srid pas na/ 'dzin pa phan tshun ltos pas gnyi ga 'dzin par mi nus pa'i phyir de la brda mi srid pas na brda yang de rig don can yin pa kho na zhes ci ste brjod/ 'on te shing ma yin pa ni gzhan la ldog par 'dzin la shing ni shing ma yin pa las phan tshun bsten pa ma yin no zhe na/de'i tshe thug pa med par thal te/ gzhan de 'dzin pa yang gdon mi za ba dang / ldog pa'i yul can yin pas na gzhan dang gzhan 'dzin par rtogs pa la mthar thug pa med pa'i phyir ro/ /'di nyid bshad pa ni/ kha cig na re zhes bya ba'o/ /da ni gang du rnam par gcad par bya ba med pas/ rnam par gcad nas rnam par gcod pa'i yul 'dzin pa'i phyir rnam par gcad par bya ba 'dzin par thal ba na/ ji skad brjod pa'i nyes pa dang rjes su 'brel par 'gyur ba rnam pa de lta bu ni rnam par gcod pa ma yin no zhes gzhan du yang rnam par gcod pa khas blang ba'i phyir pha rol po la 'dri ba ni de dag gi ni brdar 'dogs la zhes bya ba'o//gang gi tshe gzhan sel ba sgra'i don ma yin gyi/ 'on kyang shing nyid kyi mtshan nyid kyi spyi nyid la brdar 'dogs pa de'i tshe yang brdar 'dogs pa de la 'am sgra'i don 'chad pa la shing ma yin pa rnam par gcod dam 'on te ma yin/'grel pa ni gang dag de ltar zhes bya ba'o/ /rnam par gcod pa khas len pa'i phyogs la rang gis brjod pa'i skyon du thal bar 'gyur ba de'i phyir bshad pa ni/ gal te rnam gcod ces bya'o/ /rnam par gcod pa khas len na ni shing gi rnam par gcod pa shing ma yin pa rtogs pa sngon du 'gro ba can yin la shing ma yin pa yang shing rnam par gcad pa med pa can ni rtogs par mi nus te/des na gal te shing ma yin pa rnam par gcad par 'gyur na de dag shing 'dzin pa med par gzung mi nus pa'i phyir phan tshun bsten pa nyid do/ / de nyid bshad pa ni de'i tshe zhes bya ba ste/ rnam par gcad pa'i tshe'o/ /shing dang shing ma yin pa shes par bya ba'i phyir shing dang shing ma yin pa don du gnyer bar nye bar 'gro ba'i phyir ro/ /gang zhig shing ngam shing ma yin pa so so rang gis rang bzhin la rnam par rtog pa don du gnyer ba byed pa des de dag gi thun mong ma yin pa'i rang bzhin shes pa ni rnam par gcod pas bsgrub par bya ba yin pa nyid kyis rnam par gcad pa khas blangs pa yin te/de ni de'i tshad ma can yin pa'i phyir ro/ /des na rnam par gcod pa med na 'di gnyis kyi shes pa yod pa yin no/ / rnam par gcod na yang phan tshun bsten pa'i phyir mi shes par 'gyur ro zhes ston pa ni/ de mi shes pa ni des zhes bya ba'o/ /de ltar rnam par gcod pa khas len na nyes pa mtshungs pa nyid brjod nas rnam par gcod pa ma yin pa'i phyogs kyang spang ba'i phyir bshad pa/ rnam par gcod pa mi rtogs na yang shing de las gzhan shing ma yin pa la dgod pa ni de las gzhan dgod pa'o//de las gzhan pa la 'god pa'ang de nyid la yongs su ma spangs pa yang yin pa de gang la yod pa ste/ sgra de las tha snyad 'dogs par byed pa rnams shing ma yin pa yongs su spangs nas 'jug par mi 'gyur ro//shing ma yin pa la dgod pa na de rtogs pa'i 'bras bu can nyid du rjod par byed pa la sbyor ba'o/ /shing gi sgra de ni shing ma yin pa dag la ma bkag pa'i phyir de las tha snyad 'dogs par byed pa rnams de yongs su spangs nas 'jug par mi 'gyur ro/ /'di la yang rgyu mtshan bshad pa ni brda la shing ma yin de dag la ma gsal ba'i phyir ro//'di skad brjod pa yin te/ rnam par gcod pa ma gtogs na shing ma yin pa gsal ba can gyi shing gi bdag nyid thun mong ma yin pa la sgra ma bkod pa des na shing khyer shog ces bya bas shing ma yin pa spangs nas shing nges par rtogs par ji ltar 'gyur/gang zhig gang yongs su spangs nas ma bkod pa de las de yongs su dor ba mi 'thad de/ dper na 'di nyid la shing sha pa la sogs pa'i khyad par bzhin no/ /de bas na rnam par mi gcod pa ni mi 'thad do/ /'di nyid bshad pa ni/ brda'i tshe zhes bya ba'o//'dir pha rol po dag rnam par gcod pas stong pa'i sgrub pa khas len pa nyid la nyes pa 'dir 'gyur gyi gang las sgrub pa dang rnam par gcod pa yang yod pa de la ni ma yin te/ de'i ltar na ni bsgrub pa'i don la phyis rnam par gcod pa yin no/ /des na rang la brten pa'i sgrub pas nges pa'i shing dang shing ma yin pa gnyis shes pa 'di ni shing ma yin zhe'am/'di ni shing ngo zhes shing la shing ma yin pa rnam par gcod la shing ma yin pa la yang rnam par gcod pa'i phyir te/ des na 'dir rnam par gcod pa yin yang phan tshun bsten pa'i nyes par mi 'gyur ro zhes smra ba ni/ 'on te zhes bya ba'o//'dir/ gal te mi sgrub gzhan mi dgag /ces 'don/ gna' rabs dag gis rmongs pas 'dor ro/ /'di mi 'thad pa ni ma yin te/ rnam par gcod pa'i bdag nyid kyi sgrub pa sel bar smra ba rnams kyis de ltar 'dod pa nyid gzhan gyis spangs pa'i phyir ro/ /rnam par gcod pa la ni gnyis rtogs pa yin te/dgag pa dang sgrub pa'i phyir ro/ /de nyid kyi phyir 'ba' zhig gi dgag pa sgrub pa las gzhan pa'i byed pa can ni rnam par gcod pa yin no zhes brjod de 'di ni shing ma yin pa ma yin no zhes shing ma yin pa bkag nas shing sgrub pa ni rnam par gcod pa'i rang bzhin yin pa'i phyir ro//des na dgag pa gnyis kyis rnam par gcod pa bkag par 'gyur ba'i phyir/ gal te mi sgrub gzhan mi dgag /ces brjod pa yin no/ /rnam par gcod pas ni/ /cig car gnyis med pa yin te/ des na de ltar gyur pa'i 'di gnyis bkag pa yin no/ / de ltar gnyi ga sgrub pa bsal nas rang gi bsam pas sgrub pa dag pa nyid ston pa ni/ mdun gnas gcig cig rab bstan nas/ /zhes pa'o/ /rnam par gcod pa ma byas shing sgrub pa 'ba' zhig byas te/ brdar byed do zhes bya ba'i tha tshig go/ /des na/ brda la de dag mi sel na/ /zhes bya bas rnam par mi gcod pa la brjod pa'i skyon gang yin pa de med do zhes smras pas ni gang kho na la brdar byas pa ni tha snyad 'dogs pa'i tshe na yang de kho na rtogs par 'gyur te/de'i phyir rnam par gcod pa dang rnam par mi gcod pa gnyis la yod pa'i nyes pa'o/ /gang gi tshe gal te gzhan bkag mi sgrub par byed ces 'don pa de'i tshe yang 'di rnam par gcod pa 'gog pa nyid do//dgag pa sgrub pa'i rang bzhin ni rnam par gcod pa yin pas de spangs te zhes bya ba'i don te/ de nyid kyi phyir 'grel pa spyi dngos por smra ba'i ltar na 'ga' zhig rnam par gcad pas cung zad gcig brjod pa ni ma yin no zhes rnam par gcod pa 'gog pa ni 'dod pa gnyi gar yang rjes su mthun no//tha snyad 'dogs pa'i tshe na yang de rtogs par 'gyur te zhes bya ba bshad pa ni/ 'dis brda'i dus na de ltar mthong ba'i zhes bya ba'o/ /'di dgag pa'i phyir bshad pa mi mtshungs pa ma yin te/'di ltar sgrub pa la 'ba' zhig pa de la yang mdun du nye bar bstan pa gang yin/ 'di yang shing yin la gzhan yang yin pa'am/ 'on te 'di kho na yin gyi gzhan ma yin zhes bya ba de ltar thal ba yod pa nyid de de la gal te 'di yang zhes sgrub par byed na shing tsam la gzhol bas 'jug par mi 'gyur ro//'on te 'di kho na zhes bya ba yin na/ de'i tshe shing sgrub pa na nges par gzung ba'i don la ltos pas 'jug pa'i phyir dang / de yang shing ma yin bzlog pa'i rang bzhin yin pa'i phyir dang / de ma bzung bar bzlog par mi nus pas ni 'dzin pa phan tshun ltos par 'gyur ro//des na thal ba mi mtshungs par ji ltar 'gyur/ gal te shing rtogs pa ni cig shos 'dzin pa la ltos pa med par mthar phyin par 'gyur ba ma yin nam/ des na 'di yang shing yin nam/ 'di kho na yin zhes bya ba ltos kyang shing ma yin par 'dzin pa la shing 'dzin pa ltos pa ni ma yin te/des na phan tshun bsten pa nyid ma yin no/ /'ga' zhig tu ni 'di yang zhes sgra'i don rtogs par 'gyur te/ dper na don du ma can ak+Sha la sogs pa'i sgra bzhin no/ /don gcig pa can nyid kyi sgra gang yin par ni 'di kho na zhes bya ba'o/ /'on te rnam par gcod pa shing rtogs pa shing yin na/'o na ji ltar mthong ba las bzlog pa ni shes par bla ba'i phyir zhes 'chad par 'gyur te/ mthong ba'i don nyid mthar phyin pa med pa'i phyir gzhan zlog par ji ltar 'gyur te/ des na ji ltar thal ba 'di mtshungs she na/ brjod pa/ ji ltar ldog pa'i sgra la dngos po dngos po gzhan la med pa'i rtog pa de lta bu rnam par rtog pa'i yul yin na gzhan sel bar smra ba tshangs pa yin yang phan tshun bsten pa'i nyes pa las ldog pa med do//gzhan sel ba'i yul rtogs pas grub par khas ma blangs na/ rjes su dpag pa nyid las de lta bu'i ngo bor grub par brjod pa'i phyir phan tshun bsten pa'i nyes pa med do zhe na/rtogs pa'i yul rjes su dpag pas grub po zhes bya ba 'di ni gzu lums lta bu yin no/ /gal te de rang gi rtogs pas ldog pa zhes bya ba tsam du rtogs na/ 'di la rjes su dpag pas ci bya/ de ste rang bzhin ni zhes bya bar yin na rtogs pa las gzhan rang bzhin nyid rtogs pa'i yul yin pas rjes su dpag pas ldog pa'i yul can nyid rjes su dpog par ji ltar byed/yang na ni me yang dro ba ma yin par rjes su dpag par bya bar 'gyur ro/ /'o na ji ltar spyi smra ba'i ltar na yang shing la sogs pa'i rtogs pa'i spyi'i yul can nyid du ma rtogs kyang spyi'i yul can yin zhe na/spyi'i zhes sgra tsam gyis ma rtogs par 'thad de shing gi rnam pa'i rang bzhin ni spyi la yang yod pa'i phyir ro/ /shing ma yin pa las ldog pa ni shing gi rnam pa dang ldan pa ma yin no/ /rtogs pa gnyi gas kyang ma grub pa dang /nges pas yul du ma byas pa ma nges so zhes bya ba ni mi 'thad do/ /shing ngo zhes sgro 'dogs pa'i shing gi rnam pa shing ma yin pa las ldog pa'i phyir shing ma yin pas stong pa de 'di'i yul yin no zhe na/ ma yin te dngos po'i chos rnams ni de ltar 'gyur gyi/ rtogs pa la yod pa rtogs pa yul la ni ma yin pa'i phyir ro//des na shing rtogs pa zhes bya ba shing rtogs pa ma yin pa las tha dad kyi de'i yul ni shing ma yin pa'i phyir shing ma yin pa las ldog pa ma yin no/ /de lta ma yin na skad cig ma yang yin pa'i phyir skad cig ma rtogs pa yang grub pa'o/ / des na 'di ni shing tsam du rtogs pa yin gyi/ 'di la gzhan nam shing ma yin pa las ldog pa ni 'ga' yang med do/ /des na rtogs bzhin pa'i ldog pa ni ldog mtshams ma rtogs na rtogs par mi 'gyur ba des na phan tshun bsten pa med par ji ltar 'gyur/ ji skad bshad pa'i phyogs la ni nyes pa 'di med de 'di ltar log pa las ldog pa gzhan ma yin de'i phyir so so rang gi rang bzhin la rnam par gnas pa'i sngon po nyid sgro 'dogs kyi dbang gis dngos po gzhan dang gcig par gyur pa de sel bar byed pas dang por gyur pa tha dad pa de rtogs pa'i blo sel ba'i yul can yin gyi gang la yul med pa'i dgag pa mi sbyor ba gsal bya 'dzin par gdon mi za bas na der yang dag pa'i don gyis rnam par gcad pa na phan tshun bsten pa la sogs pa'i nyes par 'gyur ba dgag pa'i don gyis rnam par gcad pa'i don rtogs pa'i rang bzhin ni ma yin no//'o na ji ltar gzhan rtsod ce na/smras pa/ slob dpon gyi bzhed pa'i de kho na nyid ma rig bzhin du gzhon nu ma len la sogs pa rnams sun 'byin pa brjod pa yin te/ des na rtogs par mi nus pa'i dngos po nye bar bstan pas spangs pa'i phyir ji ltar grags pa'i lugs la brten nas slob dpon gyi gzhung dgrol bas kyang 'di spangs pa yin mod kyi ma spangs pa dang 'dra bar de dag gis brtsad par byas pa yin no//da ji ltar thal ba mtshungs she na/ bsam pa 'di yin te/ shing sgrub pa mthar phyin pa yin yang / de med na shing la sogs pa'i sgra rnams yul nges pa nyid kyis 'jug pa mi 'grub pa'i phyir dang /ak+Sha la sogs pa'i sgra'i don du ma can rnams kyang thams cad kyi don ma yin pa'i phyir nges par bzung ba don la brten par bya ba nyid yin pa'i phyir la nges par gzung bas kyang gzhan bzlog pas na ji ltar phan tshun bsten par mi 'gyur/ rang gi sgrub pas gzung ba'i bdag nyid shing dang shing ma yin pa gnyis las gcig la gzhan bzlog pa 'dzin pa phan tshun mi ltos pa'i phyir ro zhe na/shing dang shing ma yin pa dag rnam par rtog pa tsam gyis shes par bya ba ni ma yin te/ des na de dag mngon sum gyi yul nyid yin pa na/ ji ltar rang sgrub pas ma bzung ba'i bdag nyid yin/des na mdun na snang ba'i shing gi rang bzhin nyid mngon sum gyi stobs kyis shing ma yin pa las ldog na phan tshun bsten pa zhes bya bar ji ltar 'gyur/ de ltar yang 'grel par gsal bar bya'o/ /gcig rang du bstan nas zhes bya ba ni nges pa bzung ba khas len pa dang mi len pa dag rnam par gcod pa la brjod pa'i nyes par thal ba bshad pa'o//da ni 'dir pha rol po dag rnam par gcod kyang nyes pa med par ston pas mthong ba las bzlog pa ni zhes smras so/ /gal te rnam par gcad pa yin na ji ltar shes te/ 'di kho na shing yin no zhes shing shes pa ni shing ma yin shes pa la ltos pa yin la shing ma yin shes pa yang shing shes pa la ltos pa des na/ji ltar shing ma yin rnam par gcad pas bsgrub ces bya ba ni rnam par gcod pa la brjod pa'i nyes pa yin no/ /nyes pa 'di ni yod pa ma yin te gang gi phyir shing la brten pas rtogs pa mthar phyin pa na de las bzlog pa shes par bla ba'i phyir rnam par gcod pas shing mi sgrub par ji ltar 'gyur/yang ji ltar snang ba las bzlog pa shes par bla zhe na/ smras pa/ 'di ltar gcig 'ga' zhig mthong zhing gzhan la des gzhan ni zhes de dag dang chos mi mthun par nges pa de las 'byed pa rnam par phye nas rnam par 'jog pa skye'o zhes 'brel to//skye ba'i rgyu smras pa gzhan la de'i rnam pas dben pa'i blo nyams su myong ba las so/ /'di skad brjod pa yin te nges pa'i rnam pa can gyi rtogs pas bzung ba 'ga' zhig dmigs pa na de'i rnam pa can gyi blos bzung ba ma yin pa de las bzlog pa yin pa'i phyir/gzhan nyid du shes pa rnyed par bla ste/ gzhan nyid ma yin na de'i rnam pa can gyi shes pas gzung bar thal ba'i phyir ro/ /de ltar mthong ba las bzlog pa shes par bla bar bsgrubs nas/ de ni nyes pa med pa nyid bsgrub pa'i phyir smras pa/gang gi phyir 'di kho na shing yin zhes bye brag tu shes pa de de las bzlog pa spangs nas 'di ni shing ngo zhes rtogs pa na de las bzlog pa na shing du rtogs pa spangs nas de'i rnam pa dang ldan pa dang mi ldan pa kho na 'jug par byed do/ /de la de ltar shing la rang gi rtogs pa'i yul dang /shing ma yin pa la des bzlog par shes pa des na 'di kho na'am/ 'di yang rtogs kyang rung te sngar bshad pa nyes pa med do/ /rnam par gcod pa'i yul can du smras pa la ni rnam pa 'di mi srid do zhes smras pa ni rnam par gcod pa smras pa la ni zhes bya ba'o/ /'dir ni 'ba' zhig tu shing ma yin pa dag sgrub pas kyang rtogs pas na shing dang shing ma yin pa rang gis rtogs pa dang /de las bzlog pas yul du byed pa'i shing dang shing ma yin pa'i rnam par dbye ba shes pa gcig la gzhan rnam par gcod pa zhes bya bar srid pa yin te rang gi ngo bo rtogs na rnam par gcod pa srid pa'i phyir ro//gzhan sel bar smra ba la ni 'ba' zhig pa'i shing dang shing ma yin pa rtogs pa'i rnam par rtog pa yod pa ma yin no/ /'on te mthong bas shing rtogs nas de nyid rnam par rtog pas rang las bzlog pa rnam par gcod pas rtogs par byed do zhe na/ de ma yin no zhes smras pa ni mthong bas shing rtogs pa'i gsal ba gzhan la yang rtogs par mi 'gyur ba'i phyir/gtan tshigs smras pa ni/ gcig la mthong ba'i zhes bya ba'o/ /de ltar rnam par gcod pa yod kyang sgrub pa smras pas phan tshun bsten pa med par bstan pa na slob dpon rang gi lugs la yang spangs pa'i phyir de 'o na zhes gsungs so//shing gi rnam pa gcig rtogs pa la rnam par gnas pa'i rtogs par mi rtogs pa de'i rgyu dang rgyu ma yin pa rtogs pa de'i yul dang yul ma yin par gyur pa shing dang shing ma yin par gyur pa bdag nyid rnam par dbye ba byed do/ / 'di skad brjod pa yin te/ 'di mthong bas rtogs pa ni ma yin no/ /'on kyang rnam par rtog pa'i shes pa la snang ba nyid kyi shing dang / de las bzlog pa'i rang bzhin shing ma yin/ rang nyid kho nas rtogs so zhes bya ba 'di ni nged kyis kyang smra bar mi bzod pa ma yin no/ /ji ltar bzod de gang gi phyir mngon sum gyi yul du byas pa'i shing dang shing ma yin pa tsam gyi bdag nyid/gal te rnam par rtog pas kyang de tsam gyis rang bzhin du rtogs par nus pa yin na ni/ 'o na ni sgrub pa'i yul can du 'gyur ro zhe na/ lta ngan 'di ni bslab par dka' ste/ gang gi phyir shing zhes bya ba rtogs pa shing ma yin pa rnam par gcad pa'i sgo nas rang gi rten lus pas mthar phyin pa yin na/nyes pa 'dir 'gyur ba zhig na/ rnam par gcod pa kho na rtogs bzhin pa'i cha shas su gyur pa/ shing ma yin pa zhes bya bas rnam par gcad pa rtogs pa nyid ni ma yin te/ de lta ma yin na/ khar ba can zhes bya ba khyad par gyis rtogs par mi 'gyur te/ der yang khar ba ni 'ba' zhig pa'i rang bzhin yin pa'i phyir ro/ /'on te 'di dang ldan pa'i mthar thug par 'gyur bas 'ba' zhig pa ma yin no zhe na/ shing yang shing ma yin pa rnam par gcad pa yin pas 'ba' zhig pa ma yin pa'i phyir ji ltar sgrub pa'i yul can nyid yin/'di ltar 'di ni shing ma yin no zhes bya ba 'di ni pha rol pos kyang rnam par gcod pa rtogs par 'dod pas bya ba yin na/ de la shing gi don rtogs pa med pa ni ma yin no/ /de'i phyir shing dang shing ma yin pa'i rnam par dbye ba rtogs pa shing ma yin rnam par gcad pas shing rtogs pa yin no//'o na shing ma yin rnam par gcad pa ma yin par 'gyur ro zhe na/ ji ltar rnam par ma bcad de/ gang gi phyir de las bzlog pa kho nar rtogs pa kho na'o/ /yang na 'dir shing ma yin pa'i rnam par gcad pa ma rtogs mod/ji 'di tsam gyis rnam par gcod pa ma rtogs par 'gyur ram/ gal te de ltar na ni 'di shing ma yin no zhes bya ba yang rnam par gcod par rtogs par mi 'gyur te/ shing ma yin pa'i rnam par gcod pa med pa'i phyir ro/ /rnam par gcod pa'i rtogs pa na thams cad rnam par gcad par bya ba ni ma yin te/khyad par rtogs pa na khyad par gyi khyad par bzhin no/ /de lta na 'o na shing zhes bya ba rtogs par 'gyur te/ thams cad du 'di ni shing ma yin pa ma yin no zhes rtogs par thal ba'i phyir ro zhe na/ 'di rnam par gcod pa la ji ltar 'gal ba bshad zin te khas blangs nas kyang de ltar rtogs pa la phan tshun bstan pa med par brjod kyi/'di ni rnam par gcod pa'i rtogs pa ma yin gyi de ni rnam pa gzhan du bstan pa'i phyir ro/ /de nyid kyi phyir gcig rtogs zhes bya ba'i shes pa ni zhes bya bas shing dang shing ma yin bsgrubs nas de'i zhes bya ba la sogs pas tha dad pa'i yul can du bshad pa ni/de dang de ma yin pa'i gyur pa'i don rnams rnam par 'byed par byed pa'i rtogs pa po gang yin pa de ni blo don gcig tu 'dzin pa zhes bya ba gang la gnas te rnam par 'byed par byed pa de la yod pa'i dngos po ldog pa'i mtshan nyid kyi khyad par gyis tha dad par shes par 'gyur bar bya ba'i phyir tha dad pa la skad sbyor te/shing dang shing ma yin gyi rnam par dbye ba rtogs pa de la snang ba shing ma yin las ldog pa'i shing la sgra dgod pa yin no zhes bya ba'i don to/ /de nyid kyi phyir bshad pa blo'i rgyu nyid du snang ba dang /de'i rgyu rnam par 'byed pa'i mthu las dang de'i rgyu ma yin pa'i rnam par 'byed pa'i dbang gis rgyu ma yin pa'i ngo bo dang bral ba dang / gcig tu rtogs pa zhes bya ba'i shes pa la gnas pa'i snang ba'i dbang gis rang nyid kyis ngo bo gcig pa 'dra bar ro/ /dngos su na ni sgra las blo la yod pa'i tha snyad rtogs par 'gyur ba yin yang rtogs pa 'khrul pa'i dbang gis dngos po ltar rtogs so//'grel pa ni de rnams ni zhes bya ba yin no/ /de la 'grel pa ni 'di ltar yin te/ rnam par rtog pa'i shes pa la rnam par gnas pa/ rnam par shes pa de'i yul du gyur pa tha dad par 'gyur snyam pa de'i rgyu ma yin pa dag las tha dad pa la sgra sbyor ro//sbyor ba'i rang gi ngo bo nyid bshad pa ni/ 'di dag ni shing yin no zhes kun du bstan nas zhes bya ba ste/ ji ltar nye bar bstan pa ni der sbyar ba yin par 'gyur ro/ /rtogs par bya ba dang rtogs par byed pa dag gis rtogs pa'i don kho na las sgra sbyor gyi gzhan du ni ma yin no//des na rtogs byed pa'i rtogs pa'i yul nyid du bstan pa ni/ rang gi rtogs pa'i rjes 'brangs te/ /zhes bya ba'o/ /gzhan gyi rtogs pa'i rjes su 'brangs pa ni blo de la yod pa'i dngos zhes mdo nyid du bshad pa yin no/ / de nyid kyi phyir khyad par rang dang gzhan gyi rnam par rtog pa la gcig tu snang ba zhes bya ba'o/ /gal te rnam par rtog pa la rnam par gnas pa zhes bshad zin pa la yang rang gi rtogs pa'i rjes su 'brangs te zhes bya ba 'dis ci bya zhe na/ brjod pa gang zhig rang dang gzhan gyi rnam par rtog pa'i rjes su 'brangs pas rnam par shes pa la rnam par gnas par 'gyur ba de 'di ltar brjod pa yin te/ji ltar 'di dag rang bzhin gyi rnam par rtog pa gcig tu snang ba de ni sngar bshad pa nyid rjes su brjod pa yin no/ /shing de rnams di gcig tu rtogs pa'i dbang gis rjes su 'gro ba'i phyir rang bzhin kho nas de lta bu'i rnam par rtog pa'i rgyu yin te/de dag ni rang gi ngo bos rnam pa de lta bu'i rnam par rtog pa'i rgyu yin no/ /de yang rjes su song bar snang ba yin pa'i phyir gcig tu snang ba yin no/ /da ni de ji ltar rang dang gzhan gyi rnam par rtog pa la snang ba de ston pa ni/ de'i mthong ba'i zhes bya ba'o//gang gis shing de dag mthong ba de'i rnam par rtog pa'i blo la de dag gnas pa des na rang dang gzhan gyi lus yin pa'i phyir ro/ /shing de dag kyang phyi dang shes pa'i rang bzhin gyi gang yin pa dang dag pa khyad par rnam par ma phye ba ste/ de dag ni phyi dang nang gi dbye ba rtogs pa med pa'i phyir ro//de ji ltar zhe na/ de lta bu ma yin yang zhes smos te/ phyi rol ma yin yang phyi rol du zhen pa byas pa'o/ /de la yang rgyu mtshan bshad pa ni/ shes pa de yi rgyu nyid dang / de las gzhan pa las ldog pa/ /zhes bya ba'o/ /'di skad brjod pa yin te/ gang gi phyir de nyid nyams su myong ba'i sgo nas bag chags skyes pas na snang bar 'gyur ba dang /de dag nyid la ldog pa'i 'bras bu can gyi blo 'jug pa de'i phyir spyi snang ba yin yang phyi nang gi bdag nyid dbye ba bsgribs par 'gyur ba yin no/ /ji lta bur gyur pa'i snang ba de dag la sbyor ba'i sgras ni de kho na ltar rtogs par byed do zhes ston pas de las de rtogs par 'gyur ba'i blo zhes bya ba 'chad pa ni/de las de rtogs blo zhes bya ba yin no/ /de ni 'khrul pa'i dbang gis dngos po gcig tu snang ba yin gyi/ dngos po ni ma yin no zhes ji skad bshad pa ston pa ni/ de la tha dad pa mthong yang / / zhes bya ba'o/ /dngos po tha dad pa zhes bya ba ni mthong ba las gzhan pa'i gsal ba'o/ /spyi gang zhig mthong ba dang ma mthong ba las ni shing nyid yin la/ ma mthong bas ni shing ma yin pa'o zhes shing ma yin pa rnam par 'byed par byed pa'o/ /ji ltar med ce na/ de ni zhes bya ba la sogs pa smos so//rnam par phye bar ma mthong ba ni shing dang shing ma yin pa'i rnam par dbye bar nye bar mtshon par byed par mi rung ngo zhes bshad pa ni/ gzhan las tha dad par ma bzung yang zhes bya ba'o/ /spyi tha mi dad pa dang de dang ldan pas gsal ba nyid yin na yang gsal ba gcig kho na yin par 'gyur ro zhes bshad pa ni/rnam pa gcig pa mthong ba gang yin pa de gzhan las lta bar mi nus pa'i phyir zhes smos so/ /de dang de ma yin pa dang ldan pa dag ces bya ba ni rnam pa dang rnam pa med pa dang ldan pa dag go/ /gzhan sel ba'i phyogs la gzhan gyis brjod pa'i rtsod pa gzhan yang gsal ba'i phyir ston par byed pa ni/bum pa la sogs pa'i zhes bya ba'o/ /bum pa dang bum pa ma yin pa dag phan tshun 'gal ba'i phyir bum pa'i sgra bum pa ma yin pa rnam par gcad pa las rang gi don ston pas na/ rnam par gcod pa'i don can du srid na/ shes bya dang gzhal bya la sogs pa'i tshig dag gis ni rnam par gcod pa brjod pa mi srid do/ /gang gis de lta bu rab nyid du brjod par 'gyur ba de shes bya ma yin pa las ldog pa'i shes bya zhes bya ba ni 'ga' yang 'thad pa ma yin te/ thams cad mkhyen pa'i shes bya nyid kyis shes bya ma yin pa mi srid pa'i phyir ro//gang gis don mtha' dag khyab par byed pa yin yang med pa la yod pa mi srid pas na/ yod pa nyid bzhin du rnam par gcod pa nyid kyis brjod par 'gyur ba shes bya zhes bya ba dngos po'i chos ni ma yin gyi/ 'on kyang tha snyad du bya ba'i rang bzhin shes pa'i yul nyid yin no//des na gal te zhes bya ba yin pa srid pa dang / shes bya yang de las tha dad pa yin pas na de de las tha dad pa nyid du yul du byed pa yin na/ rnam par shes pa'i yul gyi ngo bo thob pa shes byar 'gyur ba'i phyir de de las tha dad par mi 'gyur ro/ /de smras pa ni de las tha dad pa yul du byed pa nyid kyis zhes bya ba'o//'di bzlog pa'i phyir bshad pa ni/ de ni nyes pa med de zhes bya ba'o/ /ci'i phyir zhe na 'dir blo don 'ga' las rnam pa zlog nas/ don 'ga' zhig la 'jug bya'i phyir/ /sgra ni rab tu sbyor byed do/ /yang ji ltar 'ga' zhig la 'jug par byed ce na/bshad pa de'i don nges par gzung phyir ro/ /brda'i dbang gis sgra de'i don du 'gyur ba gang yin pa de des blo la 'dzin pa'i phyir te/ des na sgra blo de la gzhag pa de'i nges par bzung bas na 'ga' zhig las ldog te/ dper na 'di kho na shing yin no zhes bya bas shing gi blo gzhan las ldog pa bzhin no//'di kho na yin gyi gzhan ni ma yin no zhes rtogs pa'i phyir ro/ /de bzhin du 'di shing kho na zhes bya bas 'di ni shing kho na yin gyi shing ma yin pa ni ma yin no zhes rang gi yul la rab tu grub pa de shing ma yin pa las ldog pa'i phyir de las shing ma yin pa'i blo bzlog pas gzhan la 'jug pa yin no//'di la don gzhan las ldog pa la 'khrul pa med pa ni dngos po'i rnam pa dngos po'i chos yin te/ rigs mi 'dra ba dag bzhin du rigs 'dra ba dag las kyang tha dad pa'i phyir na shes bya ma yin pa med kyang shes bya rnam pa nyid tha dad pas na/bum pa'i shes bya zhes bya bas snam bu'i shes bya las tha dad par rtogs pa'i phyir ro/ /'on kyang gzhan gyi rtsod pa 'di ni shes pa tsam dregs pas byas pa dngos po'i ngo bor gyur pa ma yin pa'i shes bya nyid dngos po med pa la yang srid pa la brten pa yin pa'i phyir slob dpon gyis dngos po rnams kyi ldog pa med na mi 'byung ba sgrub pa'i rigs pa/gang phyir dngos kun rang bzhin zhes bya ba gzhag nas sgra sbyor ba ni nges par gzung ba med na med pa yin no zhes 'dir rigs pa gzhan dngos po med pa khyad par byed pa yang bstan pa yin na dngos po med pa yang sgra'i brjod par bya ba las ma 'das pa'i phyir/tha dad pa med kyang tha dad par brjod par bya bas 'da' ba ni ma yin no/ /sgra sbyor ba ni nges par gzung ba med na med pa zhes bya ba gang yin pa 'di nyid gang las she na/ bshad pa/ gzhan du sbyor ba don med 'gyur/ /zhes bya ba'o//don de'i don nges par gzung ba med na sgra sbyor ba 'bras bu med par 'gyur ro/ /rang gi tshul tsam snang ba'i rang bzhin gyi tshad ma ni de ji ltar yod pa de ltar rtogs pa na rang gi yul rtogs rang gi yul gyi nges par gzung ba'am rnam par gcod pa la ltos pa ma yin te/dper na mngon sum bzhin no/ /gang gis na de bsgrubs pa kho nas sbyor ba'i dgos pa grub pa 'di mig la sogs pa yang dag par ldan bzhin du 'bras bu gzhan tshol ba 'phen par mi 'gyur ba sgras ni de ltar rang gi yul rtogs par bya ba ma yin no/ /'di ltar gal te sgras shing rtogs pa sngon ma byung ba byed na de tsam gyis dgos pa mthar phyin pa'i sgra la ltos pa gzhan skyes na nges par gzung ba tshol ba yin yang de med pas sbyor ba don med par 'gyur ba ni cung zad kyang med de/dper na shing gi rnam pa rtogs par byed pa'i mngon sum la tshad ma gzhan gyi byed pa 'di kho nas shing yin gyi gzhan ni ma yin no zhes bya ba'am/'di shing yin pa kho na'o zhes bya ba snang ba nges pas byed la nyams su myong ba'i dgos pa ni shing gi rnam par rtog pa kho na yin pa bzhin no/ /des na/ gzhan du sbyor ba don med 'gyur/ /zhes ji ltar brjod/ 'di ni shing yin no zhes shing gi sgras shing rtogs par byed pa na nges par gzung bas ni cir yang byar med de/ blo 'ga' zhig las ma bzlog kyang 'ga' zhig las 'jug pa nyid kyi 'bras bu dang bcas pa'i phyir ji lta ba bzhin du snang bar ma grub pas na 'bras bu med pa ma yin pa'i phyir ro/ / de'i phyir rnam par rtog pa ni 'dod pa tsam la rag las pas 'jug pa yin la/ de yang lcags kyu med pa'i phyir thams cad la yod pa yin no/ /'gags kyang ma byas pa byar yod pa ni ma yin te/ rnyed par sla ba'i rgyu mtshan gyis na ma byas kyang byas pa dang bye brag med pa'i phyir ro/ /des na 'di 'dod pas byas pa'i 'jug pa dang bral bas 'ga' zhig las bzlog nas 'ga' zhig la 'jug pa na snga na med pa'i rgyus bsgrub par 'gyur ro//de lta ma yin na ni ji lta ba bzhin snang bar 'gyur te/ 'dod pa ji lta ba bzhin du gyur pa de lta bu kho nar 'grub pa'i phyir ro/ /de nges par gzung ba med na ni de ltar mi srid pa'i phyir sgra'i don nges par gzung bar bya ba kho na'o//gal te 'dod pas byas kyang 'di kho na shing yin no zhes rtogs pa ma yin nam zhe na/ ma yin te 'dod pa nyid ni rang dang 'gal bar sgrub mi srid pa'i phyir dang / gzhan la yang shing zhes bya ba'i 'dod pa yod na 'di kho nar zhes bya ba mi grub pa'i phyir dang /med na yang de rgyu nyid du 'gal ba'i phyir ro/ /de la yang shing shing ma yin pa las tha dad na shing ma yin yang shing las tha dad par gyur pa yin no/ /des na shing zhes bya ba tha dad pa rnam pa gcig tu gyur pa ni shing gi sgra'i don yin la/nges par gzung bas ni 'di kho na shing yin gyi gzhan ni ma yin no zhes de las gzhan des stong par ston pa yin no zhes bya ba'i don to/ /'di shing kho na zhes bya ba ni log pa las ldog pa logs su byas nas brjod pa yin no/ /gang gi phyir de lta yin pa des na/ shes bya la sogs pa'i tshig dag kyang tha snyad du 'gyur dgos so//'grel pa ni sgra rab tu sbyor bar byed pa zhes bya ba'o/ /rjes su 'gro ba dang ldog pa dag ces bya ba ni 'jug pa dang ldog pa'o/ /de bstan pa ni/ de ni zhes bya ba'o/ /byed pa gnyis po nyid gzhung 'dzugs pa ni gal te 'dis zhes bya ba'o/ /de med na ni sgra med pa la blo'i rang bzhin ji ltar gyur pa de kho na ltar sgras byas pa yang yin pas ji lta ba bzhin snang bar 'gyur ro//nges par gzung ba med na med pa nyid bshad pa ni/ dper na zhes bya ba'o/ /'dir bum pas chu 'on cig ces bya ba'i tshig gsum nges par gzung ba med na med par gzhung 'dzugs te/gal te bum pa dang snyim pas kyang rung ste chu blang bar brjod par 'dod na ni bum pas zhes bya ba don med par 'gyur ro/ /de bzhin du las dang bya ba la yang rtogs par bya'o/ /gang du bum pa zhes bya ba nye bar mtshon pa'i don du blangs pa der ni nye bar mtshon pas mtshon par bya ba mtha' dag bdag nyid kyi nang du bsdus te/nges par gzung ba'i don du 'gyur ba yin te/ dper na gzhi bya rog las srungs shig ces bya bar nye bar gnod pa las yin pa bzhin no/ /sbyor ba rgyas pa la bya rog kho na las srungs shig ces nges par gzung yang dbyug pa brdegs pa las kyang mi rung bar brjod pa ni ma yin no//de bzhin du gzhan du yang rtogs par bya'o/ /gal te byed pa po khyad par can gyis bsgrub par bya ba'i khyad par mi shes pa la de brtan pa nyid kyi ngag 'bras bu dang bcas par 'gyur ba ma yin nam/ de la nges par gzung ba med pas don med pa 'ga' yang med de//gal te ji ltar snyim pas kyang khyer te mi 'ong la gzhan nam bya ba med pa la mi brtan zhe na ma brjod pa nyid kyi phyir ro/ /ji ltar brjod pa'i rjes su sgrub pa ni gzhan gyis gzhan du byed pa mi srid pa'i phyir de la nges par gzung bar bya ba don ci yod sgrub pa nyid kyi sbyor ba don dang ldan pa sgrub pas na nges pa don med pa'i phyir ro//sgrub byed nyid kyi khyad par gyis bsgrub par bya ba'i khyad par shes pa la ni ngag nges pa'i don can yin par 'gyur te dper na ltor kun du spyod pas bas nye bar spyod cig ces bya ba lta bu'o zhe na/ 'di la bshad zin te sgra nye bar bkod pa nyid ni nges par gzung ba'i snying por ma byas par nye bar dgod par mi nus te/sgra'i bya ba gzhan rtogs pa la grub pa med pa'i phyir dang / ji ltar yang nye bar sbyor 'dod pa srid pa'i phyir ro/ /des na 'dod pas byas pa'i rang bzhin dang bral ba ni nges pa med na mi srid pa'i phyir nges pa gcig pu nyid sgra'i don yin gyi sgrub pa ni ma yin no//nges pa dang ldan pa nyid don de lta bu yod pa'i rgyu mtshan du nye bar 'jog pa na rjes su dpag pa rjes su zhugs nas don la tshad mar srid pa yin te/ de lta ma yin na snyam du sems pa yang tshad mar 'gyur ro/ /'dod pa tsam gyis bskyed pa'i don rtogs pa rgyu mtshan gzhan gyis byas pa'i don grub pa can ni tshad ma yin pas sgra'i don rtogs pa'i tshad ma nyid khyad par med pa'i phyir ro//des na don 'di yin te/ gal te nges par gzung ba snying por ma byas pa kho nar bum pa'i tshig gis rang gi don rtogs par byed par 'gyur zhes snyim pa la sogs pa nye bar blangs pas nges pa nye bar bstan nas bum pa'i tshig sbyor bar bshad pa yin no//de bzhin du phyag dar ram zhes bya ba la sogs pa dag la yang de bzhin du rtogs par bya'o/ /de ltar gdon mi za bar nges par gzung ba la brten par bya ba na/ brjod par 'dod pa las ngag la nges par gzung ba nges pa yin gyi/ tshig so so la nges par gzung ba dgod pa ni ma yin te/de lta ma yin na phyogs chos zhes bya ba la phyogs kho na'i chos kho na zhes bya bar 'gyur ro/ /des na shes bya la sogs tshig /ces bya ba rnam par dgrol ba'i phyir bshad pa ni/ de bzhin du zhes bya ba'o/ /tha snyad du gtogs pa rnams zhes bya ba ni gzhan rtogs pa'i don du sbyar ba ste/sgra tha dad du btags pa ni gzhan rtogs par bya ba'i don kho na yin pa'i phyir ro/ /'dis ni rnam par gcod par bya ba med pa'i nyes pa spong ba yin no/ /'di ltar gal te gzhan gyis kyang 'ga' zhig la shes bya nyid rtogs pa kho na yin na dar de rtogs pa'i don du sbyar ba ni don med pa kho na'o/ /'on te ma rtogs na de'i tshe the tshom gyi yul gyi dngos por gyur pa ni gzhan du rtogs pa kho na yin pa'i phyir te/des sgro btags pa'i shes bya ma yin pa de nyid rnam par gcad par bya ba yin no/ /ji ltar chos 'di sgra las byung ba yin pa de bzhin du rnam par gcad par bya ba yang de'i blos byas pa nyid yin gyi phyi rol na ni med do/ / de bshad pa ni gzhan du dogs pa med na zhes bya ba la sogs pa brdar byas pa'i phyi rol zhes bya ba'i mthar thug pa'o/ /'o na gzhan rtogs pa'i don ma yin pa'i shes bya'i sgra gang yin pa de'i rnam par gcad par bya ba ci yin te/ gzhan sgro btags pa'i shes bya ma yin pa med pa'i phyir ro zhe na/ de ni ma yin no zhes bshad pa ni shes bya la sogs pa'i ngag ces bya ba'o//ngag sbyar ba ni gzhan rtogs pa'i don nyid du yin pa de la gnas pa'i shes bya'i sgra'i don brjod pa yin no/ /des na tha snyad las phyi rol du gyur pa shes bya'i sgra ni med do/ /gzhan nyid rtogs par byed pa na/ sgras spyi ston par byed ces bya ba la gzhan sel ba sbyor ba'i yul du brjod do//ston par 'dod pa med na ni/ sgra don med pa kho na ste/ ngo bo nyid kyis don dang ldan pa ma yin pa'i phyir ro zhes bya ba ni/ sgra sbyor ba zhes bya ba'i mthar thug pas bshad pa yin no/ /gal te 'dod pa med kyang tshig tsam las don rtogs pa yod pa ma yin nam/ des na brjod par 'dod pa yod na don dang ldan pa'i phyir de med na don med pa yin no zhes ji ste brjod ce na smras pa/brjod par 'dod pa yod pa na don goms pa las de lta ma yin par yang rtogs pa ni nye bar bslad pa kho na'o/ /de bshad pa ni yod pa nyid do zhes bya ba'i mthar thug pa'o/ /de'i phyir zhes bya ba ni mjug sdud pa'o//de ni nges par gzung ba la gdon mi za bar brtan pa nyid gzhung 'dzugs pa'i lam gyis ji ltar nye bar bstan pa'i sgra'i don gzhan sel ba'i phyogs la mi 'grig pa'i slob dpon gyi gzhung gi cha gang yin pa de dag bshad pa'i phyir gang zhig gang las zhes smos so/ /ni'i sgra ni gang phyir zhes bya ba'i don 'dir 'gyur te gang gi phyir gang zhing gang las tha dad pa de bzlog nas de'i tha dad pa la 'god pa yin no//tha dad pa de yang shing gi khyad par rnams kyi mtshungs pa'i ngo bo yin no zhes ston pa ni shing ma yin pa las khyad par du gyur pa sha pa la sogs pa rnams kyi rnam pa mtshungs par snang ba can te/tha dad pa zhes bya bar 'brel to/ /gang gi phyir de lta yin pa de'i phyir tha dad pa de nyid slob dpon phyogs kyi glang pos zlog pa gzhan gyis ni dngos po de'i cha 'ga' zhig rtogs 'gyur zhes kyang rab tu bshad pa yin no/ /kyang gi sgra ma bshad pa'i don bsdu ba'i phyir te/ de yang 'grel par ston par 'gyur ro/ /'dir ldog pa gzhan dngos po'i cha 'ga' zhig rtogs so zhes bya bas ni dngos po las gzhan ldog pa tha dad par rtogs pa yin la/ des kyang dngos po'i cha rtogs pa'i phyir ldog pa'i khyad par gyi khyad par dang ldan pa'i rdzas la sgra 'jug go zhes brjod par 'gyur te/des na ji ltar spyi'i khyad par dang ldan pa'i don la sgra 'jug pa de bzhin du ldog pa'i khyad par can la yin pas khyad par 'ga' yang med do/ /sgras ni ldog pa don gzhan gyis khyad par du byas pa'i dngos po dag kho na brjod do zhes bya ba la sogs par yang don de bzhin du 'gyur ro/ /de yang rnam 'grel byed rtogs pa'i rjes su 'gro ba ldog pa gzhan ma yin par smra ba sgro 'dogs rnam par gcad pa'i gzhan sel ba la 'gal ba'i phyir de slob dpon gyis de ltar bshad pa mdzad do//gang gi phyir sgras tha dad pa la blo sbyar ba de'i phyir tha dad pa de nyid dngos po'i cha 'ga' zhig rtogs so zhes bshad par zad kyi tha dad pa las dngos po'i rang bzhin gzhan pa ni med do//ldog pa gzhan gyis rtogs par 'gyur ro zhes bshad pa gang yin pa de la de yang gang la sgra 'jug pa der ldog pa gzhan 'ga' zhig khyad par du gyur pa ni ma yin te/ 'on kyang gang gi phyir 'di kho na shing yin gyi gzhan ni ma yin no zhes nges par gzung ba'i don la brten pa'i phyir sgras blo 'ga' zhig las bzlog nas 'ga' zhig la 'jug par byed la/de ltar na yang shing ma yin las log pa nges pa ni ma yin gyi 'on kyang gzhan gyi shing log pa nyid yin pa de'i phyir shing ma yin pa las tha dad pa'i shing nges pa na/ sgra sbyor ba'i shugs kyis nges par 'gyur ba nges par bzung ba'i stobs kyis shing ma yin pa shing ldog par nges pa gang yin pa de ni shing gi sgra'i shing ma yin pa las ldog pa tsam nyid ston pa na/bla lhag tu gyur pa'i ldog pa yin no/ /des na sgra ni ldog pa tsam gyi mthar thug pa rjod par byed pa can gyi/ ldog pa'i khyad par can gyi rdzas ni 'ga' yang brjod pa med de ldog pa ni de dang ldan pa las gzhan ma yin pa'i phyir ro//de lta yin na yang gzhan ldog pas dngos po de'i cha 'ga' zhig rtogs so zhes gsungs pa gang yin pa der cha ni ldog pa de nyid yin no/ /gang yang ldog pa gzhan gyis rtogs/ /zhes ldog pa gzhan zhig brjod pa de ni shing ma yin las ldog pa shing gi bdag nyid brjod par bya ba ni nges par gzung bas byas pa shing ma yin la shing ldog pa yin no//log pa las gzhan ma yin ldog pa ni shing gi don la nges par gzung ba na shing ma yin pa nges par gzung ba'i don du thal bar 'gyur ro zhe na/ de ltar ni mi nus te/shing nyid shing ma yin pa las ldog go zhes bya ba ni dngos po la de de ltar sgro 'dogs rnam par gcod pa nges pas brtags pas brjod par bya ba yin la nges par gzung ba las shing ma yin la shing ldog pa ni rtogs pa las gyur pa nyid yin te/ des na/ shing ma yin pa kho na la shing ldog pa ni ma yin no/ / des na ldog pa gzhan gyis dngos po de'i cha 'ga' zhig rtogs so zhes bya bas ni nges par gzung bas byas pa shing ma yin la shing ldog pas shing ma yin las ldog pa rtogs so zhes bshad pa yin no/ /des na gzhung 'di rnam pa de lta bu'i don la de ltar rjod par byed par bsgrubs pa yin no/ /gang zhig gang las tha dad pas te/dper na shing shing ma yin las tha dad pa bzhin no/ /tha dad par gyur pa'i shing de nges par gzung bas bzlog nas zhes tha dad par gyur pa skabs yin pas na de nyid de'i sgras gzung ba yin no/ /de bzlog na gang la 'god ce na bshad pa tha dad par gyur pa'i khyad par rnams kyi de las tha dad pa rnam pa mtshungs par snang ba la 'god do//tha dad par gyur pas ni gzung ba yin te/ gang zhig gang las tha dad pa zhes bya ba'o/ /'on kyang de mang po'i tshig gis bstan pa ni de la tha dad pa mtshungs pa nyid du rtogs par bya ba'i phyir ro/ /tha dad par gyur pa de gang las tha dad de nyid ni de las tha dad ces de'i sgras gzung ba yin no//des na don 'di yin te gang las tha dad par gyur pa tha dad pa de las tha dad pa la 'god pa yin no zhes bya ba'o/ /'di skad brjod pa yin te/ shing ma yin pa las tha dad pa'i shing shing ma yin pa las bzlog nas de'i shing ma yin pa las tha dad pa la shing gi sgra dgod do zhes pa yin no/ /'dir sngon gyi 'grel pa byed pa dgod pa mi shes pa kho nar drang po mang por rlom pa dag ldog pa nyid dngos po'i cha 'ga' zhig rtogs pa la byed pa ci ste ma yin na gang gis 'di ltar 'chad par byed ces bya bar sems pa la/'di la'ang ngo bo cung zad med ces smos so/ /shing la shing ma yin med par zad kyi 'ga' zhig yod pa ni ma yin no//des na gang zhig shing rtogs pa'i khyad par du 'gyur ba'i tha dad pa de ci zhig yin/ gal te gang tha dad pa de tha dad pa'i mtshams las ma bzlog pa kho nas de las tha dad pa la sgra ci ste mi 'god ce na/ bshad pa/ sgra rnams las de rtogs nyid na/ /gzhan bzlog rtogs 'gyur zhes bya ba ste/ sgra rnams kyis tha dad pa rtogs pa nyid na tha dad par gyur pa gzhan las ldog pa rtogs par 'gyur ro/ /de ni gnyi ga la brten pa'i phyir te/ de 'di la med do zhes bya ba'i don nyid ni 'di de la med do zhes ma grub par mi rtogs pa'i phyir ro/ /'o na gzhan bzlog pa'i shugs kyis rtogs pa de yang khyad par du 'gyur mod gang gi phyir ldog pa'i don gzhan gyis khyad par du byas pa zhes bya ba ni sgra ji lta ba bzhin no zhe na/bshad pa phan tshun med pa de la ni dngos po med pa 'ga' zhig khyad par du byas pa shes par 'gyur ba gzhan zhes bya ba tha dad par gyur pa 'ga' yang med de/ rang gi bdag nyid la shing ma yin med pa dang / gzhan gyis bdag nyid la shing med pas shing dang shing ma yin pa dag phan tshun med pa na shing khyad par du byas pa rtogs pa ma yin no zhes bya ba'i don to//bdag nyid med pa nyid bdag nyid kyi khyad par du ma grub pa'i phyir dang / gzhan med pa yang bdag la yod par ma grub pa'i phyir dang / dgag pa bkag pa'i 'gog pa sgrub pa ma yin pa'i phyir ro//gal te tha dad par rtogs pa nyid na gzhan la ldog pa rtogs pa'i phyir de 'dir ldog pa la 'di yang der ldog go zhes sgras ldog pa gnyi ga brjod par 'gyur ro zhe na/ ma yin no zhes bshad pa ni/ sgra gnyis byed pa'ang ma yin te/ /zhes bya ba'o/ /shing ma yin par sgro 'dogs pa bsal bas shing ma yin pa las tha dad par 'gyur ba'i shing brjod pa tsam gyi sgra la ni 'di shugs kyis nges par bya ba yin la/de gsal bar byed pa'i nges par gzung bar sbyar ba la ni sgra las byung bar 'gyur ro/ /de ltar gang zhig gang las zhes bya ba nas brtsams te 'di'i mthar thug par ci ltar nye bar bkod pa'i rang bzhin gyi tha dad pa de ni dngos po med pa yin la/ngo bo dang ldan pa nyid du rtogs pa ni 'khrul pa yin no/ /gal te tha dad pa'i ngo bo dang ldan par ma rtogs pa ma yin nam/ de ltar yang / 'di la'ang ngo bo cung zad med/ /ces bshad pa yin no zhe na/ smras pa tha dad par gyur pa rnams kyi mtshungs par snang ba'i rnam pa ni tha dad pa yin par brjod do//mtshungs pa'i rnam pa yang ngo bo nyid yin pa'i phyir tha dad par gyur pa de tha dad par gyur pa rnams las gzhan ma yin par bshad do/ /de la ni ngo bo nyid du rtogs pa yod pa des na ngo bo med par bshad pa yin no/ /de nyid kyi phyir de ltar zhes bya bas ji ltar nye bar bkod pa nye bar bstan nas dngos po med par bshad do//'di la'ang ngo bo cung zad med/ /ces bya bas ni dngos po gzhan med pa tsam gyi rang bzhin nyid kyis na ldog pa'i ngo bo tha dad pa ngo bo med par bshad do/ /gang zhig gang la zhes bya ba tshig le'ur byas pa dang po'i don bshad pa ni dgod par bya ba'i sgra zhes bya ba ste sdeb sbyor yang de nyid yin no//gzhan nyid du gyur pa bzlog pa'i phyir sgra rnams las de zhes bya ba'i tshigs su bcad pa phyed bshad pa ni ldog pa gzhan 'phen pa zhes bya ba'o/ /de nyid ldog pa gzhan gyis ni/ /zhes bya ba bshad pa ni de nyid ces bya ba'o/ /kyang gi sgras bsdus pa ston pa ni sgras ni ldog pa gzhan gyi zhes bya ba'o/ /ji ltar ldog pa nyid don yin pa na 'di gzhan la ldog par brjod ces bya ba gzhung gzugs pas bshad pa ni de ni tha dad pa de zhes bya ba ste/brjod byar gyur pa'i tha dad par brjod pa na/ brjod par bya ba las gzhan pa'i don la brjod par bya ba rnam par gcod pa 'phen pa lta bur 'jug go/ /gtan tshigs bshad pa/ gcig la yod pa'i zhes bya ba la sogs pa'o//brjod par bya ba tha dad pa de nyid ni/ ldog pa des zhes bya ba bla lhag tu gyur pa'i ldog pa des rtogs so zhes brjod pa yin no/ /khyad par can ma yin pa de khyad par du byas par ji ltar 'gyur zhe na/ de rtogs pa ni zhes smos te khyad par dang 'dra bar nges pa rtogs pa nyid rtogs par bya ba'i phyir ro//'di la khyad par dang khyad par can ni med do zhes ston pas de la ni 'ga' yis khyad par du byas zhes bya ba 'chad pa ni/ don 'ga' zhig la zhes bya ba'o/ /'di ltar 'dir ldog pa khong du chud pa ni rtogs pa tsam yin gyi khyad par gyi dngos po ni ma yin no/ /de brjod pa ni dbye ba bya ba gnyis kyi zhes bya ba'o//slob dpon gyis de ltar gsungs pa ni don 'ga' zhig la 'jug pa'i phyir zhes bya bas ji ltar sbyor ba 'bras bu dang bcas par bshad pa de ltar bstan pa'i don du yin no zhes brjod pa ni/ tha dad pa gcig brjod na yang zhes bya ba la sogs pa'o/ / sgra gnyis byed pa'ang ma yin te/ /zhes bya ba bshad pa ni/ de nyid kyi phyir zhes bya ba ste/ med na med pa nyid kyis na rtogs pa yin pa'i phyir ro/ /tha dad pa gnyi ga la yod pa tsam 'ba' zhig gi phyir 'di ltar yin par ni ma zad kyi/ sngar bshad pa'i rnam pas kyang yin no zhes bshad pa ni/ ldog pa med pa can gyi zhes bya ba'o/ /ldog pa med pa can gyi rjes su 'gro ba yang med la zhes bya ba ni/ blo 'ga' zhig la 'jug pa na/ ji ltar nye bar bstan pa gzhan las ldog pa'i ldog pas stong pa'o/ /rjes su 'gro ba med pa can gyi ldog pa zhes bya ba ni 'ga' zhig las ldog pa yang 'ga' zhig la 'jug pa stong pa'o//gtan tshigs bshad pa ni/ gcig ni rjes su 'gro ba la/ /zhes bya ba ste rtogs pa skye ba tsam ni sgra sbyor ba dngos po ma yin pa'i phyir ro/ /'ga' zhig tu 'jug pas stong pa'i blo ldog pa tsam yang med par bshad pa ni de bzhin du zhes bya ba ste/ gcig yongs su spang ba la 'ga' zhig la gnas pa srid pa nyid med pa'i rgyu mtshan gyis na rjes su 'gro ba med pa'i ldog pa med do//'di skad du 'ga' zhig la 'jug pa med par ni blo 'ga' las kyang ldog par 'gyur ba ma yin pa de las ldog pa rjes su 'gro bas stong par ga la 'gyur zhes brjod pa yin no/ /des na gzhung 'di ni de ltar bshad par bya ba yin te/'di la tshig gi don tsam 'chad par byed pa rnams kyis yang dag pa ma yin pa ni rnam 'grel shes pa rnams kyis shes par zad do/ /gang yang ma yin par 'jug pas shing gi sgra'i brjod par bya ba shing gi don ni tha dad pa gcig yin la/ de rtogs pas shugs kyis nges par bya ba shing la med par bkag pa'i dngos med ni tha dad pa gzhan yin no zhes brjod par bya ba yin/'phang bar bya ba'i tha dad pa'i rnam par dbye ba gnyis ston pa gang yin pa de ni mu stegs pa'i lugs kyi rjes su 'jug pa 'dra bas snying po med do/ /de dag gis kyang sgrub pa'i shugs kyis 'phangs pa'i ldog pa khas len pa'i phyir ro//shing gi tshig gi don ni ma yin pa ma yin te/ bram ze ma yin pa zhes bya ba ltar dgag pa'i don gyis rnam par gcad pa ma rtogs pa'i phyir ro/ /ldog pa zhes bya ba tsam nyid ni ma yin par mi 'gyur te/ mngon sum yang tha dad pa'i yul can du thal ba'i phyir ro/ /shing rtogs pa yin yang med par dgag pa go ba yin na de nyid sgra'i don du 'gyur la rag mod/sgrub pa dang khyad par med pa gzhan gyis ci bya/ nges par gzung ba las blo 'ga' zhig la 'jug pa dang 'ga' zhig las ldog pa ni rjes su 'gro ba dang ldog pa yin la/ de ji ltar shing la shing ma yin tsam gyi bdag nyid rjes su 'gro ba dang ldog pa dag tu 'gyur/'di kho na shing ngo zhes bya bas ni shing ma yin las ldog pa nges pa ma yin gyi/ 'on kyang gzhan ma yin no zhes bya bar ro/ /des na gal te 'dir 'di lta bu brjod par mi 'dod na/ gcig la yod pa'i tha dad pa brjod na yang zhes ci ste gsungs/ tha dad pa gcig brjod na yang zhes brjod par bya bar 'gyur ro//de bzhin du dbye bar bya ba gnyis kyi zhes dbye bar bya ba gzhan brjod pa gang du nye bar mkho/ yang gang dag shing zhes bya rigs pa las ldog pa'i rang bzhin la gnas pa yin yang nges par gzung bas ldog pa gzhan sgrub pa'i phyir dang shing gi don gyi ldog pa'i rang bzhin ni tha snyad byed pa po dag gis ma rtogs pas na gcig tu rjes su dpag par bya ba'i rang bzhin yin pa'i phyir rtogs bzhin pa'i nges par gzung bas go ba'i ldog pa ni gzhan kho na yin pa des na sel ba yang bsal ba gzhan dang ldan pa yin no//de lta na shing zhes bya bas rigs pa de ltar grub pa med par dgag pa kho na brjod nas sgras nges par brjod par bya ba yin pa'i phyir nges par gzung ba la brten pa na gzhan sel ba gzhan dang bral ba la sgra 'jug par smra ba de'i nges par gzung ba'i don rtogs pa chad par 'gyur te/de la ldog pa rtogs pa med pa'i phyir sngar ji skad bshad pa bzhin no/ /brda 'god pa'i dus na 'di kho na shing yin no zhes nges par ma byas par ni nges pa'i don la sgra bkod par mi 'gyur ro//'di shing kho na'o zhes nges par byed na gzhan la 'jug pa ma bkag pa'i phyir te/ 'di yang shing yin 'di kho na zhes bya ba la sogs pa gang bshad pa yin no/ /de ltar lung gi rjes su 'brang bar rlom pa dang mkhas pa'i nga rgyal gyis don med pa'i 'dzin pa la 'chel bas chog go//de ni de ltar de zhes bya ba bshad pa ni/ tha dad pa de yang zhes bya ba'o/ /ha cang spros par thal ba'i phyir 'dir de dang der tshig gi don dgrol ba la ni ma bsgribs te/ don ma nyams pa nyid mchog yin pa'i phyir ro/ /'bad pa chen por thob par bya ba'i tshig gi don rnam par dgrol ba dag gi phyogs phye ba ni dang po kho nar yin no//yang ci'i phyir 'di ltar 'chad kyi/ gang gis 'di ji ltar thos pa bzhin 'chad par 'gyur ba ldog pa tha dad pa nyid ma yin pa ji ltar zhe na/ bshad pa/ de la 'ang ngo bo cung zad med/ /ces bya ba'i gtan tshigs de'i phyir ro/ /de nyid phyir 'grel pa nas don dam pa ni ngo bo yin no zhes ngo bo nyid kyis don dam par 'chad par 'gyur gyi/ngo bo nyid du mthong ba'i blos bslad pa nyid kyis ni ma yin no/ /gang gi phyir tha dad pa la ngo bo cung zad med pa de nyid kyi phyir don dam min te/ des na ji ltar 'di khyad par du 'gyur/ gang la ngo bo med pa de ni yod do zhes brjod par mi nus te/ ci yang ma yin pa'i phyir ro//gang zhig ci yang ma yin pa'i phyir yod pa ma yin pa de go ji ltar dngos po'i cha rtogs pa la rnam pa 'ga' zhig ltar thabs su 'gyur/ dngos po med do zhes bya bar ni 'thad kyi dngos po med pa yod do zhes bya bar ni ma yin no/ /des na 'di don dam pa ma yin te/ dngos po med pa zhes bya ba'i tha dad pa ni 'ga' yang med do zhes bya ba'i tha tshig go//gal te tha dad pa med na thams cad gcig nyid du 'gyur ba ma yin nam zhe na/ ma yin te khas blangs pa nyid rtogs pa ma yin pa'i phyir ro/ /shing ma yin la shing med do/ /zhes bya ba ni tha dad pa yin pas de de ltar khas len pa na ji ltar dngos po rnams tha mi dad par 'gyur/ de yod do zhes bya bar ni mi nus te/shing ma yin la shing med do/ /zhes khas blangs pa na/ med pa zhes bya ba cung zhig khas blangs pa ni ma yin no/ /'on te rang rang gi ngo bo la gnas pa'i dngos po rnams nyid tha dad pa yin na/ de'i tshe de dag yod pa kho na yin na/ rnam pa de lta bu de dag yod pas na/ gang zhig khyad par du 'gyur ba'i ldog pa gzhan ni mi 'grub po//des na tha dad pa'i dngos po ma yin no/ /don dam pa yin na skyon ci yod ce na/ gzhan du zhes smos te/ gang gi phyir tha dad pa don dam pa yin na/ dngos po las ldog pa dngos por 'gyur na/ de ltar yang ma yin no/ /ci'i phyir zhe na/ 'di 'di la zhes smos so/ /bsam pa ni 'di yin te/gang gis na dngos po rnam pa sna tshogs la bsnyon du med pa'i phyir bum pa la sogs pa bzhin/ 'di yang 'gyur ba tha dad pa zhes pa rang rgyud can ni 'ga' yang yod pa ma yin no/ /tha dad pa dang ldan pa las ni dngos po dngos po gzhan las tha dad par gyur par brjod par bya ba yin te/ des na 'di cung zad kyang dngos por yod pa ma yin no zhes smra'o//dngos por yod pa yin na/ dngos po gzhan la bsnyad par bya ba 'di tha dad pa dang tha mi dad pa las mi 'da' ba'i phyir 'di 'di las tha dad ces bya bar mi 'gyur ro/ /tha mi dad pa yin na ni/ de gcig gi bdag tu gyur pa'i phyir 'di 'di las zhes bya bar 'thad pa ma yin no/ /gal te 'di gnyis kyis tha dad pa yin na/de lta na 'di 'di las zhes bya bar 'gyur gyi/ gcig gi bdag nyid yin na ni de gzhan gyi ma yin pa'i phyir 'di 'di las zhes bya bar mi rung ngo / /tha dad pa yin na yang dngos po de las ldog pa'i phyir tha dad pa med pas na 'di 'di la zhes bya ba de nyid du mi 'gyur ro/ /gnyis ka ltar yang de de ltar 'grel pa nyid du gsal bar 'gyur ro//bshad pa'i phyir/ don dam pa zhes smos te/ de nyid phyir zhes bya bas ngo bo nyid med pa nyid don dam pa ma yin pa nyid kyi gtan tshigs su bshad pa de 'di ltar sgrub pa yin no/ /don dam pa gang yin pa ni bdag nyid 'ga' zhig dang ldan pa yin te/ dngos po nyid kyi ni ngo bo 'ga' zhig tu gyur pa kho na yin no//'on kyang de ni/ don dam don byed nus pa gang / /zhes don byed pa nyid kyis nye bar mtshon par zad de/ de nyid ni der mi 'khrul pa'i phyir ro/ /don dam pa nyid ni ngo bo nyid yin na yin la/ de la yang tha dad pa dang tha mi dad pa nyid nges pa yin zhing de dag kyang mi 'thad pa des na ngo bo med pa'i phyir don dam pa ma yin no zhes gzhan du zhes bya bas bsgrubs nas don dam pa ma yin pa nyid du nye bar sdud par 'gyur ro//de rnam pa gzhan mi srid pa'i phyir ro zhes bya ba ni/ de zhes bya ba'o/ /don dam par yod pa ni/ tha dad par gyur pa kho na yin te/ tha dad pa ni rang rgyud du dngos por khas ma blangs pa'i phyir ro//des na don 'di yin te/ gal te tha dad pa rang gi bdag nyid kyis ngo bo 'ga' zhig yod pa yin na tha dad par gyur pa las de nyid dang / gzhan nyid las mi 'da'o zhes bya ba'o/ /de nyid sel bar byed pa ni de'i ngo bo yin no zhes bya ba'o/ /gang gi tshe don dam par yod pa'i tha dad par gyur pa'i ngo bo tha dad pa yin na/de'i tshe de nyid tha dad pa yin pas tha dad pa de las gzhan tha dad par mi 'gyur ro/ /tha dad pa ni gnyi ga la brten pa yin te phan tshun ltos pas rnam par gzhag pa'i phyir de las shing dang shing ma yin pa dag phan tshun tha dad pa yin pa'i phyir ro/ /gang gi tshe tha dad pa de shing gi bdag nyid yin pa de'i tshe shing ma yin pa'i ci yang ma yin pa'i phyir ji ltar de gnyis tha dad pa med pa ni dngos po rnams kyi tha dad pa yin no//gang gi tshe de gcig gi yin na/ de'i tshe zla bo ma yin pas ji ltar de nyid tha dad sngon po ma yin pa med pa ni sngon po'i rang bzhin yin la/ sngon po med pa ni sngon po ma yin pa'i rang bzhin yin no zhe na/ ma yin te sngon po ma yin pa med pa sngon po'i ngo bo yin na/de sngon po ma yin pa la ltos nas tha dad par 'jog pa mi srid pa'i phyir ro/ /de ni sngon po'i rang bzhin yin pa'i phyir sngon po ma yin pa dang cir 'ong na gang gis 'di de la ltos nas tha dad par 'gyur/ sngon po ma yin pa med do zhe na/ sngon po ma yin pa ni sngon po ma yin pa kho nar zad la/med pa ni de las gzhan yin pa'i phyir de med ces bya bar mi 'thad do/ /de bzhin du sngon po ma yin pa la sngon po med par yang rtogs par bya'o/ /de lta na yang gal te med pa gnyis tha dad par 'dod na de phan tshun med pa yin par mi 'gyur te/ gnyis kyi med pa gcig yin na ni phan tshun med par 'gyur ro//sngon po dang sngon po ma yin pa dag gi med pa gnyis ni ma yin te/ rang gi ngo bo la khyad par med pa'i phyir ro/ /de'i phyir phan tshun ltos pa'i tha dad pa gal te gcig gi bdag nyid yin na gzhan gyir mi 'gyur ro/ /gcig gi rang gi ngo bo gang yin pa de ni gzhan gyi ma yin pa'i phyir de la ltos nas de de'i med pa zhes bya bar mi 'thad de/gal te gzhan gyi ngo bo yin pa'i phyir 'di de'i ma yin na de la ltos nas zhes bya bar brjod pa 'di'i don ci yin par 'gyur/ 'di ltar de ni tha dad par bya ba nyid kyi ngo bo yin gyi zla bo ni ma yin te/ de ni de las gzhan yin pa'i phyir dang / de'i rang gi ngo bo gzhan gyi dngos po yin par mi srid pa'i phyir ro//de bshad pa ni/ de'i zhes bya ba ste/ sngon po de'i ngo bo sngon po ma yin pa las tha dad pa ni gzhan sngon po ma yin pa'i yin par mi 'gyur ro/ /'o na ni gcig la gcig med pa tha dad par gyur pa kho na tha dad par gyur pa gnyis kyi tha dad pa yin no zhe na/ tha dad pa'i ngo bo nyid ma yin la zhes smos te/tha dad par gyur pa de nyid ni tha dad pa'i ngo bo ma yin la/ tha dad pa'i ngo bo yang yin te/ de bas na tha dad pa ngo bo gzhan nyid du 'gyur ro/ /tha dad par gyur pa dag las tha dad par gyur pa kho nar 'gyur ro zhes bya ba'i don to/ /de ltar gyur na skyon ci yod ce na/ des na zhes smos te dngos po tha dad pa de las ldog par 'gyur ro//gal te shing shing ma yin las ldog pa las ma log na ni/ de las tha dad par gyur pa nyid ma yin par 'gyur ro/ /de la yang skyon ci yod ce na/ de'i phyir zhes smos te/ 'di las zhes bya ba shing ma yin las shing 'di tha dad do zhes bya bar mi 'gyur te/ shing ma yin nyid du thal ba'i phyir ro//de bstan pa ni/ gang zhig ces bya ba ste/ gang zhig gang las tha dad pa las ldog pa ste/ gang med pa las log pa de la med pa'i phyir de ni de nyid du 'gyur ro/ /shing ni shing ma yin med pas stong pa'i phyir shing ma yin pa kho nar 'gyur ro/ /shing ma yin med pa med pa ni/ de med pas stong pa yin pa'i phyir shing ni shing ma yin pa kho nar 'gyur ba des na ji ltar shing ma yin nyid shing ma yin las tha dad par 'gyur ro//rnam pa gzhan gyi sgo nas kyang 'di 'di las tha dad ces bya ba tha dad pa'i phyogs la sbyor ba ni ldog pa dngos po yin na/ 'di 'di las tha dad do zhes bya bar mi 'thad de/ 'brel pa med pa'i phyir ro//shing gi shing ma yin pa las tha dad pa zhes bya bar tha dad pa rtogs pa yin na/ tha dad pa de ni de ltar shing gi yin par mi 'gyur ro/ /'brel pa yin na yang gzhan mi srid pa'i phyir rgyu dang 'bras bu'i dngos po nyid yin no/ /de lta na yang 'bras bu nyid kho nar 'gyur gyi tha dad par ni ma yin te/ ha cang thal ba'i phyir ro zhes bshad pa ni/'brel pa yod pa yin na yang zhes bya ba'o/ /tha dad pa tha dad du gyur pa de nyid la nyes pa gzhan yang ston pas 'di nyid las/ tha dad ce na brjod phyir ro/ /zhes bya ba sbyor bar byed pa ni tha dad pa zhes bya ba'o/ /tha dad pa tha dad par gyur pa las gzhan nyid yin na/ tha dad pa 'di gang la ltos nas 'di rang bzhin gzhan nyid yin pa de las kyang ngo //de yang tha dad par gyur pa kho na yin pas tha dad par gyur pa las tha dad do/ /des na tha dad pa de tha dad par mi 'gyur ro/ /gang gi tshe tha dad par gyur pa las tha dad pa tha dad par gyur na/ de'i tshe tha dad par gyur pa la yang tha dad pa las tha dad pa yod pa kho na ste/ des na tha dad pa'i tha dad pa nyid nyams so/ /ci'i phyir zhe na/ tha dad pa'i khyad par yin pa'i phyir zla bo'i gzhan bzhin no/ /'di ltar shing shing ma yin las tha dad pa zhes bya ba 'di la tha dad pa'i khyad par nyid du gyur pa'i shing ma yin ni shing gi tha dad pa ma yin pa de bzhin du shing ma yin las tha dad pa yang de'i tha dad pa yin par mi 'gyur te/shing ma yin pa las bzhin du de las kyang 'di tha dad pa'i phyir ro/ /tha dad pa las tha dad pa la tha dad pa yang khyad par yin pa des na tha dad pa ma yin pa nyid do/ /de bshad pa ni 'di 'di las zhes bya ba'o/ /tha dad par gyur pa 'di tha dad pa 'di las tha dad pa yin no zhes bstan par bya ba yin na khyad par du byed pa ma yin pa nyid kyang khyad par ma yin pa'i phyir khyad par bstan pa 'di la khyad par nyid du khyad par du byed pa yin te/dper na shing ma yin las tha dad par bstan pa la shing ma yin pa bzhin no/ /gal te yang tha dad pa tha dad pa'i khyad par de tha dad pa'i 'byed mtshams ma yin na/ de'i tshe 'ga' zhig gang las kyang tha dad par mi 'gyur ba'i phyir 'gro ba tha mi dad pa kho nar 'gyur ro//tha dad pa ni tha dad pa'i dbye mtshams la ltos pa yin te/ des na de nyid tha dad pa na de'i dbye mtshams med pa'i phyir/ tha dad pa mi srid par thal ba'i phyir ro/ /de bshad pa ni/ de'i phyir zhes bya ba'o//'di 'di las/ tha dad ces ni brjod phyir ro/ /zhes mdos kyang don 'di brjod pa yin no/ /des na gal te ldog pa dngos po yin na/ de'i tshe tha dad pa'i phyogs la tha dad par gyur pa 'di ldog pa'i mtshan nyid kyis dngos po las zhes brjod pa'i phyir ro/ /des na tha mi dad pa nyid dang tha dad pa mi srid par thal bar 'gyur ro//de'i phyir tha dad pa gzhan yang med do/ /rnam pa gzhan du yang 'di dngos po yod par mi srid pa des na tha dad pa zhes bya ba ni ngo bo 'ga' yang yod pa ma yin gyi/ 'on kyang dngos po dngos po gzhan la med par zad do/ /de bshad pa ni/de bas na zhes bya ba'o/ /rang gi lugs kyi ldog pa'i tha dad pa 'gog pa'i 'bras bu can gyi sun 'byin pa 'dis ni gzhan gyi lugs kyang gsal ba kho na yin te/ des gang dag gcig la gcig med pa dngos por gyur pa nyid du smra ba des kyang bzlog pa yin no// //