CLOSE WINDOW

D4219
བོད་ཡིག

/[ ]@##/ /rgya gar skad du/ san+ta nA n+ya ta ra sid+d+hi nA ma pra ka ra Na/ bod skad du/ rgyud gzhan grub pa zhes bya ba'i rab tu byed pa/ 'jam dpal gzhon nur gyur pa la phyag 'tshal lo/ /rang lus blo sngon 'gro pa yi/ /bya ba mthong nas gzhan la de//'dzin phyir gal te blo shes 'gyur/ /sems tsam la yang tshul 'di mtshungs/ /gal te bdag nyid la bya ba dang / brjod pa sems kyi g.yo ba sngon du 'gro ba can dag mthong nas/ gzhan la de dag mthong bas g.yo ba rjes su dpog par byed na/tshul 'di ni sems tsam la yang mtshungs pas/ sems tsam du smra bas kyang gzhan gyi sems rjes su dpag par bya nus te/ de yang shes pa gzhan gyis g.yo ba'i khyad par med par lus ngag gi rnam par rig byed du snang pa'i shes pa de lta bu dag yod par mi 'dod do//gal te gzhan gyi shes pa'i byed pa ma dmigs pa'i phyir gzhan gyi rjes su dpag par mi rung ngo zhe na/ 'dra ba'i phyir ma yin te/ pha rol pos kyang gzhan gyi shes pa sngon du 'gro ba can de dag nam yang ma mthong pas des kyang de shes par mi 'gyur ro//gal te bdag nyid kyi sems gzhan la yod pa dag gi rgyu mtshan nyid du mi rung ba'i phyir ro/ /gzhan gyi sems shes par 'gyur ro zhe na/ ji ltar mi rung / rang gi kun nas slong ba'i sems so sor yang dag par myong ba med pa'i phyir dang /bdag nyid kyi sems kyi rten can yang bdag nyid la mthong ba'i phyir te/ de dag kyang de lta bu yin na ni de dang 'dra bar dmigs par 'gyur ba zhig na/ de lta ma yin par mthong bas/ rgyu mtshan gzhan grub pa yin no zhe na/ gzhan la yang rang gi kun nas slong bar byed pa'i sems yang dag par myong ba med pas 'dra la/rnam par rig byed du snang ba'i shes pa rang gi sems kyi g.yo ba'i rgyu mtshan can dag kyang kha nang du bltas pa'i snang bas yin par rtogs pa'i phyir kha phyir pa ltas pa'i snang ba dag rgyu mtshan gzhan las skye bar 'gyur ro//kha phyir bltas pa'i snang ba dag rgyu mtshan med pa kho nar ci ste mi 'dod ce na/ rgyu mtshan med pa nyid yin na thams cad rgyu mtshan nyid du thal bar 'gyur ro/ /rnam par chad pa dang rnam par ma chad par snang bas byas pa'i khyad par ni shes pa dag pa'i rgyu mtshan g.yo ba nyid tha dad par rnam par 'byed pa ma yin no//des na rnam par ma chad par snang ba dag kyang rgyu mtshan med pa nyid du 'gyur te/ khyad par med pa'i phyir ro/ /de lta bas na snang ba'i khyad par rnam par ma chad pa'i khyad par can ni g.yo ba sngon du 'gro ba can ma yin no//'o na ci zhe na/ rnam par chad pa la/ yang bya ba'i khyad par du snang ba kho na yin no/ /mda' dang rdo 'phangs pa dang / sgyogs dang sprul pa dang / gzhan gyis rab tu bskyod pa la sogs pa'i bya ba'i khyad par du snang ba can rnams/yul chad par snang yang g.yo ba sngon du 'gro ba can yin pa'i phyir la/ gzhan gyis byas pa'i g.yo ba la sogs pa rnam par ma chad pa yin yang de sngon du 'gro ba can ma yin pa'i phyir ro/ /de lta bas na 'dir bya ba'i khyad par tsam gyis g.yo ba rtogs pa yin par rigs so//de la 'ga' zhig sngon du 'gro ba can ma yin pa nyid yin na/ 'ga' yang de sngon du 'gro ba can du mi 'gyur te/ khyad par med pa'i phyir ro/ /de lta bas na bya ba'i khyad par gyi spyi ni g.yo ba'i spyi rtogs par byed pa yin no//de la ji ltar bya ba dmigs la bdag nyid la g.yo ba mi dmigs pa'i phyir/ gzhan la g.yo ba rtogs pa ltar/ bya bar snang ba dmigs pa la yang de dang 'dra'o/ /pha rol po yang gzhan gyi brjod pa dang bya ba dag rgyu mtshan med par ci ste mi 'dod de 'di ni mtshungs so//des na gdon mi za bar de gnyis ni g.yo ba'i rgyu mtshan can yin pa'i phyir de med na mi 'byung ngo zhes bya ba 'di brjod dgos so/ /pha rol po yang der snang ba dag la de dang 'dra par smra bar 'gyur bas 'di dag ni phan tshun khyad par med do//gal te der snang ba dag g.yo ba'i rgyu mtshan can nyid yin par smra ba na/ rmi lam gyi la yang ci'i phyir mi smra zhe na/ thams cad mtshungs te/ pha rol po yang rmi lam na gzhan gyi bya ba dang tshig dmigs pa dag g.yo ba'i rgyu mtshan can yin par ci ste mi smra/gal te de dag med pa'i phyir ro zhe na/ de bzhin du dmigs pa mtshungs na ci ste med/ gal te mi gnyid kyis zil gyis non pa'i phyir/ don gyis stong pa'i rnam par shes pa 'byung ngo zhe na/ pha rol po'i ltar na yang / de kho na'i phyir gzhan gyi dbang gis stong pa'i rnam par shes pa 'byung bar 'gyur ro//gal te rmi lam na yang shes pa don dang ldan pa yin la/ de'i tshe dmigs pa rnams kyang rgyud gzhan nyid yin no zhe na/ gal te pha rol po la bsngo ba'i phyir/ lung dang rigs pa dang bral ba'i phyir rgol ba dam pa ma yin pa de lta bu la rten par byed na ni/pha rol po yang de gzhan gyi dbang can du 'dod pa la su yang zlog par mi byed do/ /'di 'ba' zhig gi ltar na de lta bu'i shes pa thams cad rgyud gzhan dbang can yod pa kho na yin te/khyad par ni mngon sum dang brgyud pa 'di yod do/ /res 'ga' ni rmi lam na yang yod pa mngon sum de rgyud gzhan gyi dbang can du 'dod pa kho na ste/ lha la sogs pa'i byin gyi rlabs kyis rmi lam mthong ba'i phyir ro/ /de bas na 'di'i 'di ni rgol ba dam pa ma yin pa la brten pa ma yin no//re zhig bya ba de nyid kyis kyang sems de ci ste rtogs par byed/ sems kyi 'bras bu yin pa'i phyir ro/ /de'i 'bras bu yin pa ni sems gzhan la yang 'dra bas ci ste rtogs par mi byed/ gzhan yang gal te bya ba de rang yod pa tsam gyis rang gi rgyud rtogs par byed na ni/mi dmigs pas kyang de lta bu rtogs par 'gyur ro/ /gal te rtags ni shes pa la ltos pa'i phyir mi 'gyur ro zhe na/ de la de'i tshe gzhan gyi sems las ni bya ba'o/ /bya ba las ni shes pa'o/ /shes pa las ni de rtogs pa'o zhes bya ba brgyud pa 'dis ci zhig bya/bya bar snang ba gzhan gyi sems las rab tu skye ba'i chos can gyi shes pa kho na 'di rtogs par byed pa yin par 'gyur te/ de rtogs pa ni tha mar yang de la brten pa'i phyir ro/ /g.yo ba tsam gyis spyi ni bya ba dang brjod pa'i shes pa spyi'i rgyu yin pas 'bras bu'i rgyu rtogs pa yin no//de la bdag nyid kyi g.yo ba'i rgyu mtshan can ni kha nang du bltas par 'jug la/ gzhan ni gzhan du yin te/ khyad par 'di ni phal che ba'i dbang du byas pa yin no//'di dag gi rgyu dang 'bras bu'i ngo bo de ni gnyid log pa la sogs pa'i gnas skabs dang gzhan na yang mtshungs so/ /'khrul pa'i gnas skabs na ni bdag nyid ji lta ba bzhin gyi rkyen gyi khyad par la nye bar brten pa'i phyir gzhan gyi g.yo ba la sogs pa'i rgyu mtshan gyis 'byung ba'i rnam par shes pa'i bag chags de dag kho na res 'ga' gzhan gyis nye bar sbyor ba la sogs pas bar du chod kyang 'jug pa rnyed par 'gyur gyi/nye bar sbyor ba gtan med pa ni ma yin no/ /de'i phyir na gnas skabs thams cad du bya ba la sogs pa'i rnam par rig byed kyis sems kyi g.yo ba rjes su dpag par bya ba kho na yin no//bya bas g.yo ba rtogs na ni/ gnyid log pa dang / gzhan na rtogs par 'gyur ro/ /yang na ni nam yang mi 'gyur te/ gzhan gyi g.yo ba med par yang bya ba dmigs pa 'byung ba'i phyir ro/ /dmigs pa 'byung bar 'gyur gyi bya ba ni ma yin no/ /bya bas ni g.yo ba rtogs par byed na 'khrul ba'i gnas skabs na ni bya ba yang med do / /don gyis stong pa'i shes pa 'byung ba'i phyir nyes pa med do//rnam pa thams cad du tha snyad gdags pa mtshungs pa las res 'ga' ni shes pa don gyis stong ngo / /gzhan ni gzhan du yin no zhes bya ba'i dbang 'di ga las thob/ gal te gnyid la sogs pas gnas skabs 'gyur ba yin no zhe na/gal te 'di lta bu srid pa yod na ma rig pas dkrugs pa'i phyir de ltar 'byung du zad mod/ de lta na ni don gzhan du smra ba nyams par 'gyur bas glags / du ma snga bar mi nus pa can tshegs chen po can 'di lan gdab pa gcig gis nges par choms par 'gyur ro//ci ga de dag mthong bas lus dang ngag gi rnam par rig byed dag las rab kun nas slong bar byed pa'i rjes su dpag par rigs pa ma yin nam/ rgyud gzhan dang 'brel ba'i rnam par rig byed du snang ba'i shes pa dag ni gzhan gyi rnam par rig byed dag yin par 'os pa ma yin te/de dag ni nye bar len pa dang nye bar len pa las byung ba ma yin pa'i phyir ro zhe na/ gzhan gyi sems kyis kun nas bslang ba'i rnam par rig byed kyi ngo bo can nyid yin pa'i phyir/ der snang ba'i shes pas kun nas slong bar byed pa'i sems rtogs par byed do zhes ni mi zer ro//'o na ci zhe na/ de'i 'bras bu yin pa'i phyir ro/ /rnam par rig byed dag ni bya ba dang tshig gi rnam pa can gyi shes pa/ kun nas slong bar byed pa'i sems kyi rgyud las skyes pa dag kho na yin no//kun nas slong bar byed pa'i sems kyang de dag gi ni nye bar len pa'i rgyu kho na yin la/ rgyud gzhan gyi shes pa dag ni bdag po'i rkyen yin no/ /rnam par rig byed kyi nye bar len pas bskyed pa de dag la 'brel ba des kyang nye bar gdags pas rnam par rig byed dag yin par 'gyur ro//bdag dang gzhan la rang rang gi snang ba nyams su myong mod kyi/ rab rib can nyid kyis zla ba gnyis mthong ba bzhin du rnam par shes pa de lta bu'i rgyu'i bag chags skye ba'i rang bzhin gyi khyad par thog ma med pa'i dus las don gcig 'dzin par nges pa'i phyir ro//rgyu gcig las skyes pas rang dang gzhan gyi rnam par rig byed kyi shes pa dag la rnam par rig byed du nye bar 'dogs so/ /ci ste bya ba la sogs par snang ba'i rnam par shes pa 'bras bu'i rtags las skyes pa gzhan gyi sems shes pa de dag gzhan gyi sems yul du byed dam/'on te ma yin te/ yul du byed na ni don gzhan yin par 'gyur ro/ /yul du mi byed na ni shes pas pha rol gyi sems yod pa ji ltar shes te/ de'i ngo bo nyid ma shes par de 'grub pa mi srid pa'i phyir ro zhe na/ 'di yang thal bar 'gyur bar mtshungs te/bya ba dang tshig dag gis gzhan gyi sems rtogs pa ltar na yang de'i ngo bo nyid yul du byed na ni/ de'i tshe rang gi sems shes pa bzhin du de'i rnam pa yang shes par thal bar 'gyur ro/ /de mi shes na ni des de'i ngo bo nyid ji ltar 'dzin/ gal te rtags kyis ni spyi rtogs pa'i phyir rnam par rtogs pa ma yin no zhe na/spyi de ci gzhan gyi sems nyid yin nam/ 'on te gzhan zhig gam/ 'on te brjod du mi rung ba zhig yin/ gzhan nyid dang brjod du mi rung ba nyid dag cig yin na ni 'dis spyi de kho na gzung gi /gzhan gyi sems ni ma yin na/ ji ltar 'dis de rtogs par 'gyur/spyi gzhan gyi sems nyid kyang ma yin te/ de yod na de'i rnam pa yang shes par thal bar 'gyur ro zhes bshad zin te / 'di ni rjes su dpag pa'i tshul yang ma yin no/ /rjes su dpag pa ni don gyi rang gi ngo bo 'dzin par byed pa ma yin te/ mngon sum dang 'dra bar snang khyad par med pa la sogs par thal bar 'gyur ba'i phyir ro//de'i phyir 'di ni tshad ma nyid ma yin no/ /de'i rang gi ngo bo mi 'dzin kyang mngon par 'dod pa'i don la mi slu bas tshad ma nyid yin pa'i phyir ro/ /du ba la sogs pa'i rtags las skyes pa yang me la sogs pa'i rang gi ngo bo'i yul can ma yin te/mthong ba dang khyad par med par thal bar 'gyur ba'i phyir ro/ /rjes su dpag pa 'das pa la sogs pa dang / ngo bo nyid med pa dag la yang 'jug par mi 'gyur ba'i phyir dang / don byed par thal bar 'gyur ba'i yang phyir ro/ /gzhan gyi sems rjes su dpag pa la yang mngon par 'dod pa'i don la mi slu ba yod pa kho na ste/'jug par byed pa de'i sgo nas srog chags gzhan yod par rtogs nas yang nas yang du tha snyad dag la 'jug na/ de'i dbang gis 'byung ba'i don thob pa'i phyir ro/ /'jig rten ni 'bras bu de tsam la sems shing srog chags gzhan rjes su dpag pa la 'jug pa'i yang phyir te/skyes bu don phyi ma'i khyad par du snang ba'i shes pa myong ba tsam gyis re ba med pa nyid kyi phyir ro/ /shes pa snga mas tha snyad rdzogs pas don byas pa nyid tshad ma nyid du grub pa'i phyir ro/ /rmi lam na yang shes pa snga ma las don phyi mar snang ba'i shes pa skye ba ma yin na ma/de tsam gyis ni shes pa snga ma tshad ma yin par 'os pa ma yin te/ de'i tshe shes pa thams cad 'khrul ba yin pa'i phyir ro zhe na/ 'dir rnam par rig byed kyi shes pa ni nam yang sems kyi g.yo ba'i dbang med par mi 'byung bas/de dag gis kyang de dag rjes su dpog par byed do/ /'khrul pa'i dbang gis ni res 'ga' bar du chod kyang 'byung ste/ de dag gi dbang gis stong pa ni ma yin gyi mngon sum dang brgyud pa zhes pa'i khyad par 'di ni yod do zhes bshad zin to/ /de la ji ltar rnam par rig byed kyi shes pa snga ma rnams brgyud de g.yo ba'i dbang gis skye ba ltar/de'i 'og rol gyi gnas skabs na yod pa dag kyang de dang 'dra'o/ /rnam par rig byed kyi shes pa'i rten g.yo ba'i gnas skabs phyi ma'i sems kyi rgyud kho na las brgyud de skye'o/ /de yang rjes su dpag pa ci 'dra ba de lta bu'i mi slu ba dang /tha snyad kyang yod pa kho na yin pas cis kyang mi gzung ngo / /gzhan gyi sems kyi rjes su dpag pa ni de'i rang gi ngo bo mi 'dzin kyang mi slu ba'i phyir de ltar tshad ma nyid yin du chug na gzhan gyi sems mngon sum du shes pa rnams kyis go/ /ji ltar/ gal te gzhan gyi sems kyis rang gi ngo bo mngon sum du shes par gyur na ni de'i gzung ba don gzhan yin par 'gyur ro//mi shes na ni de dag ji ltar mngon sum du shes pa yin/ ji ltar mngon sum gyi don gyi rang gi ngo bo mi 'dzin par yang 'gyur/ 'on te mi 'dzin na ni ji ltar tshad ma yin zhe na/ gnas ma gyur ba'i phyir rnal 'byor pa gzung ba dang 'dzin pa'i rnam par rtog pa ma spangs pa rnams kyis gzhan gyi sems shes pa yang /tha snyad la mi slu ba nyid kyis gzugs la sogs pa mthong ba bzhin du tshad ma nyid yin no/ /rnal 'byor kyi stobs kyis ni de dag la shes pa gzhan gyi sems kyi rnam pa'i bye brag gi /rjes su byed pa gsal bar snang ba 'byung bar 'gyur te/las dang lha la sogs pa'i byin gyi rlabs kyi stobs kyis rmi lam bden pa mthong ba bzhin no/ /de dag la yang gzhan gyi sems kyi yul can nyid kyi shes pa 'byung ba ni ma yin te/ de dag kyang rang gi sems snang ba de dang / rnam pa mtshungs pa kho na nyid shes pa las/gzhan gyi sems shes pa zhes bya ba nges par gzungs bas tha snyad 'dogs so/ /mngon sum du ni de'i rnam pa'i rjes su byed pa gsal bar snang ba'i phyir dang / mi slu pa'i tshad ma zhes bya bar 'dod do/ /bcom ldan 'das kyis don thams cad thugs su chud pa ni bsam gyis mi khyab ste/ rnam pa thams cad du shes pa dang brjod pa'i yul las 'das pa'i phyir ro//rgyud gzhan grub pa zhes bya ba'i rab tu byed pa slob dpon d+harmA kI rtis mdzad pa rdzogs so// //rgya gar gyi mkhan po bi shud+d+ha siM ha dang / zhu chen gyi lo tsA ba dge slong dpal brtsegs kyis bsgyur cing zhus te gtan la phab ba'o// //