CLOSE WINDOW

D4212
བོད་ཡིག

#/ /rgya gar skad du/ n+yA ya bin du na nA ma pra ka ra Na/ bod skad du/ rigs pa'i thigs pa zhes bya ba'i rab tu byed pa/ 'jam dpal gzhon nur gyur pa la phyag 'tshal lo/ /yang dag pa'i shes pa ni/ skyes bu'i don thams cad 'grub pa'i sngon du 'gro ba can yin pas na de bstan to//yang dag pa'i shes pa ni rnam pa gnyis te/ mngon sum dang rjes su dpag pa'o/ /de la mngon sum ni rtog pa dang bral zhing ma 'khrul pa'o/ /rtog pa ni/ shes pa la brjod pa dang 'drer rung ba snang ba ste de dang bral ba'o/ /rab rib dang / myur du bskor ba dang / grur zhugs pa dang / 'khrug pa la sogs pas 'khrul pa ma skyes pa'i shes pa ni mngon sum mo/ /de ni rnam pa bzhi ste/dbang po'i shes pa dang / rang gi yul gyi de ma thag pa yul lhan cig byed pa can/ dbang po'i shes pa mtshungs pa de ma thag pa'i rkyen gyis bskyed pa'i yid kyi rnam par shes pa dang /sems dang sems las byung ba thams cad kyi rang rig pa dang / yang dag pa'i don bsgom pa'i rab kyi mtha' las byung ba rnal 'byor pa'i shes pa'o/ /de'i yul ni rang gi mtshan nyid de/ don gang nye ba dang mi nye ba dag las shes pa la snang ba tha dad pa de ni rang gi mtshan nyid do//de nyid don dam par yod pa ste dngos po'i mtshan nyid ni don byed mtshan nyid kho na yin pa'i phyir ro/ /gzhan ni spyi'i mtshan nyid de/ de ni rjes su dpag pa'i yul yin no/ /mngon sum gyi shes pa de nyid tshad ma'i 'bras bu ste/ don rtogs pa'i ngo bo kho na yin pa'i phyir ro//don dang 'dra ba nyid de'i tshad ma ste/ de'i dbang gis don rtogs pa 'grub pa'i phyir ro/ /rigs pa'i thigs pa zhes bya ba'i rab tu byed pa las/ mngon sum gyi le'u ste dang po'o// //rjes su dpag pa ni rnam pa gnyis te/ rang gi don dang gzhan gyi don no//de la rang gi don gyi rjes su dpag par bya ba la tshul gsum pa'i rtags las shes pa gang yin pa'o/ /'dir yang tshad ma'i 'bras bu rnam par gzhag pa ni mngon sum dang 'dra'o/ /tshul gsum pa nyid kyi rtags ni rjes su dpag par bya ba la yod pa nyid dang / mthun pa'i phyogs nyid la yod pa dang / mi mthun pa'i phyogs la med pa nyid du nges pa'o/ /rjes su dpag par bya ba ni 'dir shes par 'dod pa'i bye brag dang ldan pa'i chos can no/ /mthun pa'i phyogs ni bsgrub par bya ba'i chos kyi spyi dang don mthun pa'o/ /mi mthun pa'i phyogs ni mthun pa'i phyogs ma yin pa ste /de las gzhan pa dang / de dang 'gal ba dang / de med pa'o/ /tshul gsum po dag ni rtags gsum kho na dang ldan pa ste/ mi dmigs pa dang / rang bzhin dang / 'bras bu'o/ /de la mi dmigs pa ni dper na phyogs kyi bye brag 'ga' zhig na bum pa med de/dmigs pa'i rig byar gyur pa las mi dmigs pa'i phyir ro zhes bya ba lta bu'o/ /dmigs pa'i rig byar gyur pa ni dmigs pa'i rkyen gzhan tshang ba nyid dang rang bzhin khyad par can te/ rang bzhin gang yod la dmigs pa'i rkyen gzhan dag kyang yod na mngon sum kho nar 'gyur ba'o//rang bzhin ni rang yod pa tsam du gyur pa/ bsgrub par bya ba'i chos kyi gtan tshigs te/ dper na shing sha pa yin pa'i phyir/ 'di ni shing ngo zhes bya ba lta bu'o/ /'bras bu ni dper na du ba yod pa'i phyir/ de na me yod do zhes bya ba lta bu'o/ / 'di la gnyis ni dngos po sgrub pa'o/ /gcig ni dgag pa'i gtan tshigs so/ /rang bzhin 'brel ba yod na/ don gyis don go bar byed de/ de dang ma 'brel na der mi 'khrul bar nges pa med pa'i phyir ro/ /bsgrub par bya ba'i don la rtags 'brel ba de yang / dngos su na bsgrub par bya ba'i don gyi rang bzhin yin pa'i phyir dang /bsgrub par bya ba'i don las 'byung ba'i phyir te / de'i rang bzhin ma yin pa dang / de las byung ba ma yin pa ni de dang 'brel ba med pa'i rang bzhin yin pa'i phyir ro/ /de'i bdag nyid dang de las byung ba de gnyis kyang / rang bzhin dang 'bras bu kho na yin te/de gnyis kho nas dngos po grub bo/ /dgag pa sgrub kyang mi dmigs pa ji skad smos pa kho na las 'gyur te/ dngos po yod na ni de mi srid pa'i phyir ro/ /gzhan du ni yul dang / dus dang / rang bzhin gyis bskal pa'i don dmigs pa'i rig byar ma gyur pa rnams la/rang gi mngon sum log kyang dngos po med par nges pa med pa'i phyir ro/ /mi rmongs par dran pa'i 'du byed sgrub pa po'i mngon sum 'das pa dang / da ltar kyi log na dngos po med pa'i tha snyad 'jug ste/ de nyid kyi dngos po med par nges pa'i phyir ro/ /de ni sbyor ba'i bye brag gis rnam pa bcu gcig ste/rang bzhin mi dmigs pa ni dper na 'di na du ba med de dmigs pa'i rig byar gyur pa las mi dmigs pa'i phyir ro/ /zhes bya ba lta bu'o/ /'bras bu mi dmigs pa ni/ dper na 'di na du ba'i rgyu nus pa thogs pa med pa dag med de/ du ba med pa'i phyir ro zhes bya ba lta bu'o//khyab par byed pa mi dmigs pa ni/ dper na 'di na shing med pa'i phyir shing sha pa med do/ /zhes bya ba lta bu'o/ /rang bzhin 'gal ba dmigs pa ni dper na 'di na me yod pa'i phyir grang ba'i reg pa med do zhes pa lta bu'o/ /'gal ba'i 'bras bu dmigs pa ni dper na 'di na du ba yod pa'i phyir/grang ba'i reg pa med do zhes bya ba lta bu'o/ /'gal ba khyab pa dmigs pa ni dper na dngos po byung ba yang 'jig par nges par 'gyur ba med de/ rgyu gzhan la ltos pa'i phyir ro zhes bya ba lta bu'o/ /'bras bu 'gal ba dmigs pa ni dper na 'di na me yod pa'i phyir grang ba'i rgyu'i nus pa thogs pa med pa dag med do zhes bya ba lta bu'o//khyab par byed pa 'gal ba dmigs pa ni dper na 'di na me yod pa'i phyir ba mo'i reg pa med do zhes bya ba lta bu'o/ /rgyu mi dmigs pa ni dper na 'di na me med pa'i phyir du ba med do zhes bya ba lta bu'o//rgyu 'gal ba dmigs pa ni dper na 'di na spu long zhes bya ba la sogs pa'i bye brag med de/ gdung bar byed pa'i bye brag nye ba nyid kyi phyir ro zhes bya ba lta bu'o/ /rgyu 'gal ba'i 'bras bu dmigs pa ni dper na phyogs 'di na du ba yod pa'i phyir/ spu long zhes byed pa la sogs pa'i bye brag dang ldan pa'i mi dang ldan pa ma yin no zhes bya ba lta bu'o//don gzhan yod pa dang dgag pa dag gis sbyor ba tha dad kyang / brgyud pa'i sgo nas 'bras bu mi dmigs pa la sogs pa mi dmigs pa'i sbyor ba bcu po de dag thams cad ni rang bzhin mi dmigs pa'i nang du bsdu bar 'gyur ro//sbyor ba mthong ba goms pa las bdag nyid kyang de bzhin du rnam par gcod pa rtogs par 'gyur bas/ bdag gi don gyi rjes su dpag pa la yang bye brag bstan to/ /med pa'i tha snyad sgrub pa'i mi dmigs pa de dag thams cad la yang rang bzhin 'gal ba la sogs pa dmigs pa dang /rgyu la sogs pa mi dmigs pas/ dgag pa bshad pa gang yin pa de dag ni dmigs pa'i rig byar gyur pa kho na dag las dmigs pa dang / mi dmigs par yang rig par bya'o/ /gzhan dag la ni 'gal ba dang //rgyu dang 'bras bu yod pa dang / med pa mi 'grub pa'i phyir ro/ /bskal pa'i yul mi dmigs pa'i mngon sum dang rjes su dpag pa'i mtshan nyid ni the tshom gyi rgyu yin te/ tshad ma log kyang don med par mi 'grub pa'i phyir ro/ /rigs pa'i thig pa zhes bya ba'i rab tu byed pa las/bdag gi don rjes su dpag pa'i le'u ste gnyis pa'o// //gzhan gyi don gyi rjes su dpag pa ni tshul gsum pa'i rtags brjod pa ste/ rgyu la 'bras bu btags pa'i phyir ro/ /sbyor ba'i bye brag gis de ni rnam pa gnyis te/ chos mthun pa nyid can dang /chos mi mthun pa nyid can no/ /sbyor ba'i bye brag ma gtogs par 'di gnyis don du ni bye brag ci yang med do/ /de la chos mthun pa nyid can ni dmigs pa'i rig byar gyur pa gang ma dmigs pa de ni med pa'i tha snyad kyi yul du grub ste/ dper na ri bong gi rwa la sogs pa gzhan 'ga' zhig mthong ba bzhin te/phyogs kyi bye brag gang na dmigs pa'i rig byar gyur pa bum pa mi dmigs so zhes bya ba lta bu'o/ /de bzhin du rang bzhin gyi gtan tshigs kyi sbyor ba ni gang yod pa de thams cad ni mi rtag ste/ dper na bum pa la sogs pa lta bu'o zhes bya ba ni rang bzhin dag pa'i sbyor ba'o//gang skye ba dang ldan pa de ni mi rtag pa'o zhes bya ba ni rang bzhin du gyur pa'i chos kyi bye brag gis rang bzhin gyi sbyor ba'o/ /gang byas pa de ni mi rtag pa'o zhes bya ba de ni khyad par gyi bye brag gis te/ rang gi ngo bo 'grub par bya ba'i phyir gzhan gyi byed pa la ltos pa'i ngo bo ni byas pa'o zhes bya'o//brtsal ma thag tu byung ba dang / rkyen gyi bye brag gis tha dad pa can nyid la sogs pa la yang de bzhin du blta bar bya'o/ /yod pa'am skye ba dang ldan pa'am byas pa zhes bya ba'i sgra ni phyogs kyi chos nye bar ston pa'o/ /sgrub pa'i chos de dag thams cad ni rang gi ngo bo sgrub pa ci lta bu dag gis sgrub pa'i chos tsam dang bsgrub par bya ba'i chos rjes su 'brel par grub pa kho nar khong du chud par bya ste/dngos su na de nyid de'i rang bzhin yin pa'i phyir dang / rang bzhin yang gtan tshigs yin pa'i phyir te/ de grub la de ma grub na ni de'i rang bzhin nyid med pa'i phyir dang /'khrul pa yang srid pa'i phyir ro/ /'bras bu'i gtan tshigs kyi sbyor ba ni gang na du ba yod pa de na me yod de/ dper na tshang bang la sogs pa bzhin te/ 'di na yang du ba yod do zhes bya ba lta bu'o/ /'dir yang rgyu dang 'bras bu'i dngos por grub pa kho na la rgyu bsgrub par bya ba la 'bras bu'i gtan tshigs su brjod par bya'o//chos mi mthun pa nyid can gyi sbyor ba ni gang yod la dmigs pa'i rig byar gyur pa de ni dmigs pa kho nar 'gyur te/ dper na sngon po la sogs pa'i bye brag lta bu yin na 'di na ni dmigs pa'i rig byar gyur pa bum pa de ltar mi dmigs so zhes bya ba ni mi dmigs pa'i sbyor ba'o//mi rtag pa nyid med na yod pa'am skye ba dang ldan pa'am byas pa med pa nyid yin na/ sgra ni yod pa'am skye ba dang ldan pa'am/ byas pa'o/ /zhes bya ba ni rang bzhin gyis sbyor ba'o/ /me med na du ba mi 'byung ba nyid la/'di na ni du ba yod do zhes bya ba ni 'bras bu'i gtan tshigs kyi sbyor ba'o/ /don gyis na chos mthun pas kyang sbyor ba la chos mi mthun pa nyid rtogs te/ de med na ni bsgrub par bya ba gtan tshigs kyi rjes su 'gro ba med pa'i phyir ro/ /de bzhin du chos mi mthun pas kyang rjes su 'gro ba rtogs te/de med na ni bsgrub par bya ba med na gtan tshigs med par mi 'grub pa'i phyir ro/ /rang bzhin 'brel ba med na ni cig log pas gzhan nges par ldog pa ma yin no/ /de yang thams cad kyi rnam pa gnyis te/ de'i bdag nyid dang de las byung ba zhes smos pa yin no//des na ldog pa brjod pas 'brel ba bstan par bya'o/ /de lta bas na ldog pa'i tshig gis ni 'brel ba bsdus pa kho na yin la/ 'brel ba bstan pa gang yin pa de yang rjes su 'gro ba zhes bya ste/ de lta bas na rjes su 'gro ba'i sgo yang rung ldog pa'i sgo yang rung ste/tshig gcig brjod pas kyang / mthun pa'i phyogs dang mi mthun pa'i phyogs la rtags yod pa dang med pa bstan par 'gyur bas de ltar na tshig gnyis kyis sbyor ba bstan par nges pa med do/ /mi dmigs pa la yang gang yod la dmigs pa'i rig byar gyur pa de ni/ dmigs pa kho nar 'gyur ro zhes bstan par mi dmigs na/de lta bu med do zhes bya bar rtogs pa'i phyir rjes su 'gro ba grub bo/ /sbyor ba 'di gnyi ga la yang phyogs bstan par nges pa med de/ 'dir chos mthun pa nyid can gyi sbyor ba la yang dmigs pa'i rig byar gyur pa gang dmigs pa de ni med pa'i tha snyad kyi yul yin la/'di na yang dmigs pa'i rig byar gyur pa bum pa mi dmigs so zhes bstan par shugs kyis 'di na bum pa med do zhes bya bar 'gyur ro/ /de bzhin du chos mi mthun pa nyid can gyi sbyor ba la yang yod pa'i tha snyad kyi yul gang yod la/ dmigs pa'i rig byar gyur pa de ni dmigs pa kho nar 'gyur na/'di na de 'dra ba'i bum pa de ni mi dmigs so zhes bstan pas shugs nyid kyis 'dir yod pa'i tha snyad kyi yul med do zhes bya bar 'gyur ro/ /phyogs ji lta bu zhig bstan par bya zhe na/ rang gi ngo bo kho na dang / bdag nyid dang / 'dod pa dang / ma bstsal bar bstan par bya ba ni phyogs so zhes bstan par bya ba yin te/ rang gi ngo bo zhes bya ba ni bsgrub par bya ba kho nar 'dod pa'o/ /rang gi ngo bo kho na zhes bya ba ni bsgrub par bya ba kho na 'dod pa yin gyi sgrub pa nyid yin yang rung ba ma yin te/ dper na sgra mi rtag pa nyid du bsgrub par bya ba la gtan tshigs mig gis gzung ba nyid ni sgra la ma grub pa'i phyir bsgrub par bya ba yin na/'dir ni sgrub pa kho nar brjod pa'i phyir bsgrub par bya ba nyid kho nar ni mi 'dod do/ /bdag nyid ces bya ba ni de'i tshe rgol bas bsgrub pa smras pa gang yin pa'o/ / des na gal te bstan bcos 'ga' zhig la brten te sgrub pa smras na yang / bstan bcos de byed pas chos can de la chos mang zhig khas len du zin kyang de'i tshe rgol ba des chos gang sgrub par 'dod pa de nyid bsgrub par bya ba yin gyi/ cig shos na ma yin no zhes bstan par 'gyur ro/ /'dod pa zhes bya ba don gang la rtsod pas sgrub pa bkod pa de sgrub par 'dod pa'o//de ni tshig tu ma smras kyang bsgrub par bya ba yin te/ de ni rtsod pa'i gzhi yin pa'i phyir ro/ /dper na 'dus pa yin pa'i phyir/ mig la sogs pa ni gzhan gyi don byed de/ mal cha dang stan la sogs pa'i yan lag bzhin no zhes bya ba lta bu'o//'dir bdag gi don zhes ma brjod kyang bdag gi don nyid du bsgrub par bya ba yin te/ des na smras pa tsam kho na ni bsgrub par bya ba ma yin no zhes bstan par 'gyur ro/ /ma bsal ba zhes bya ba ni mtshan nyid de dag dang ldan du zin kyang sgrub par 'dod pa'i don gang zhig la mngon sum dang /rjes su dpag pa dang / grags pa dang / rang gi tshig rnams kyis bsal ba gang yin pa de ni phyogs ma yin no zhes bstan pa'i phyir te/ de la mngon sum gyis bsal ba ni/ dper na sgra ni mnyan du mi rung ngo zhes bya ba lta bu'o/ /rjes su dpag pas bsal ba ni dper na bum pa ni rtag pa'o zhes bya ba lta bu'o//grags pas bsal ba ni/ dper na ri bong can ni zla ba ma yin no zhes bya ba lta bu'o/ /rang gi tshig gis bsal ba ni/ dper na rjes su dpag pa ni tshad ma ma yin no zhes bya ba lta bu ste / phyogs ltar snang ba bzhi bsal ba yin no//de ltar na grub pa dang ma grub kyang sgrub pa nyid du 'dod pa dang / de'i tshe rgol ba bdag nyid kyis sgrub par mi 'dod pa dang / smras pa tsam dang bsal ba las bzlog pa ni bsgrub par bya ba yin no/ /de nyid kyi ngo bo dang / rgol ba'i 'dod pa dang / ma bsal ba ni phyogs yin te/de ltar na phyogs kyi mtshan nyid kha na ma tho ba med par bstan pa yin no/ /gzhan gyi don gyi rjes su dpag pa ni tshul gsum pa'i rtags brjod pa ste zhes smras pa de las / tshul gsum las gcig ma smras na yang sgrub pa ltar snang ba yin no/ /smras kyang go bar bya ba dang go bar byed pa gnyis las ma grub pa'am/the tshom za na yang ngo / chos can dang 'brel ba'i tshul gcig ma grub pa'am / the tshom za na ma grub pa'i gtan tshigs ltar snang ba yin te/ dper na sgra mi rtag pa'o zhes sgrub pa la/ mig gis gzung ba nyid ni gnyi ga la ma grub pa lta bu'o//shing rnams la sems yod par sgrub pa la/ shun pa thams cad bshus nas 'chi ba ni phyir rgol ba la ma grub ste/ de ni rnam par shes pa dang / dbang po dang / tshe 'gags pa'i mtshan nyid la 'chi ba yin par khas len pa'i phyir ro/ /de yang shing dag la mi srid pa'i phyir ro//bde ba la sogs pa sems pa med par sgrub pa la skye ba can nam/ mi rtag pa nyid ni grangs can rgol ba bdag nyid la ma grub pa'o/ /de bzhin du bdag nyid dang de'i gzhi la the tshom za na yang ma grub pa yin te/ dper na me bsgrub par bya ba la rlangs pa la sogs pa'i dngos por the tshom za ba'i 'byung ba 'dus pa lta bu dang /dper na rma bya'i sgra grag pa'i phyir ri sul 'di na rma bya yod do zhes bya ba la/ de grag pa'i yul mi rtogs pa lta bu'o/ /chos can ma grub na yang ma grub pa yin te/ dper na bdag thams cad na gnas par sgrub pa la thams cad na dmigs pa'i yon tan nyid lta bu'o//de bzhin du mi mthun pa'i phyogs la med pa'i tshul gcig ma grub na yang ma nges pa'i gtan tshigs ltar snang ba yin te/ dper na sgra rtag pa nyid la sogs pa'i chos su sgrub pa la/ gzhal bya nyid la sogs pa'i chos ni mthun pa'i phyogs dang mi mthun pa'i phyogs thams cad la'am/phyogs gcig la yod pa lta bu'o/ /de bzhin du tshul de nyid la the tshom za na yang ma nges pa kho na ste/ dper na brjod par 'dod pa'i mi la la zhig thams cad mkhyen pa ma yin pa'am/ 'dod chags la sogs pa dang ldan pa sgrub pa la smra ba la sogs pa'i chos lta bu ste /mi mthun pa'i phyogs las ldog pa la the tshom za ba yin no/ /thams cad mkhyen pa la smra ba ma dmigs so zhes bya ba'i mi dmigs pa'i rnam pa de lta bu ni yul ltar mi snang ba nyid kyis the tshom gyi rgyu yin pa'i phyir ro//de bas na thams cad mkhyen pa ma yin pa las ldog pa la smra ba la sogs pa ldog pa ni the tshom du 'gyur ba yin te/ smra ba nyid dang / thams cad mkhyen pa nyid gnyis la 'gal ba med pa'i phyir ro/ /ma mthong du zin kyang thams cad mkhyen pa gang yin pa de smra ba ma yin no zhes bya ba'i ldog pa ni mi 'grub ste/the tshom za ba'i phyir ro/ /dngos po rnams kyi 'gal ba ni rnam pa gnyis te/ rgyu ma tshang ba med par 'byung ba la gzhan yod na med pa'i phyir 'gal ba ste/ grang ba dang tsha ba'i reg pa lta bu'o/ /gcig gis gcig spangs te gnas pa'i mtshan nyid kho na ste yod pa dang med pa lta bu'o//'gal ba rnam pa de gnyi ga yang smra ba nyid dang thams cad mkhyen pa nyid la mi srid pa'i phyir mi 'gal ba yod pa'i phyir dmigs kyang med par rtogs pa ma yin no/ /'dod chags la sogs pa dang tshigs la sogs pa yang rgyu dang 'bras bu'i dngos por ma grub pa'i phyir/don gzhan rgyu ma yin pa log pas tshig la sogs pa ldog pa ni ma yin te/ de ltar tshig la sogs pa ldog pa la the tshom za ba dang ldan pa'i ma nges pa yin no/ /tshul gnyis kyi phyin ci log tu grub pa ni 'gal ba yin no/ /gnyis po gang zhe na/ mthun pa'i phyogs la yod pa dang /mi mthun pa'i phyogs la med pa'o/ /byas pa nyid dang brtsal ma thag tu 'byung ba nyid ni rtag pa nyid sgrub pa la 'gal ba'i gtan tshigs ltar snang ba yin te / 'di gnyis kyi mthun pa'i phyogs la med pa dang / mi mthun pa'i phyogs la yod pas phyin ci log tu grub pa yin la/de gnyis ni bsgrub par bya ba phyin ci log tu sgrub pa'i phyir 'gal ba dag yin no/ /'dod pa la gnod pa byed pa'i phyir 'gal ba gsum pa yang ba ma yin nam/ dper na 'dus pa yin pa'i phyir mig la sogs pa ni gzhan gyi don byed pa nyid de mal cha dang stan la sogs pa'i yan lag bzhin no zhes pa lta bu'o//de ni 'dus pa ma yin pa gzhan gyi don byed par 'dod de/ phyin ci log tu sgrub pa'i phyir 'gal ba'o/ /de ci'i phyir ma smras she na/ 'di gnyis kho na'i nang du 'dus pa'i phyir / de ni bsgrub par bya ba log par bsgrubs pas 'di gnyis dang tha dad pa ma yin no//'dod pa dang smras pa gnyis la bsgrub par bya ba nyid du ni bye brag ci yang med do/ /tshul gnyis las gcig ni ma grub la/ cig shos la ni the tshom za ba yang ma nges pa yin te / dper na smra ba'i phyir 'dod chags dang bral ba'am/thams cad mkhyen pa yin no zhes bya ba lta bu ste / 'di la ldog pa ni ma grub la/ rjes su 'gro ba la ni the tshom za ba yin te/ thams cad mkhyen pa dang 'dod chags dang bral ba ni bskal pa yin pa'i phyir/ de la tshig la sogs pa yod dam med par the tshom za ba'i phyir ro//tshul de nyid la the tshom za na ma nges pa yin te/ dper na srog la sogs pa dang ldan pa'i phyir/ gson po'i lus ni bdag dang bcas pa yin no zhes bya ba lta bu ste / bdag dang bcas pa dang bdag med pa las gang la srog la sogs pa gnas par 'gyur ba'i phung po gzhan ni med de/bdag gnas pa dang rnam par gcod pa dag gis thams cad bsdus pa'i phyir ro/ /'di gnyis las gcig la gnas par yang nges pa med de/ bdag dang bcas pa'am bdag med par sgrub pa la srog la sogs pa ma grub pa'i phyir ro / /de bas na gson po'i lus dang 'brel ba can gyi srog la sogs pa ni bdag dang bcas pa dang bdag med pa thams cad las ldog pa nyid du ma grub pa'i phyir de gnyis dang ma bral ba'o//bdag gcig la yang ma grub pa'i phyir de la rjes su 'gro ba med do/ /bdag dang bcas pa dang bdag med pa de'i rjes su 'gro ba dang /ldog pa gnyis med par nges pa med de/ rjes su 'gro ba dang ldog pa gnyis ni phan tshun gcod pa'i ngo bo kho na yin pa'i phyir ro/ /gcig med par nges pa ni cig shos yod par gdon mi za ba'i phyir ro/ /de nyid kyi phyir rjes su 'gro ba dang ldog pa gnyis la the tshom za ba'i ma nges pa yin te/bsgrub par bya ba dang cig shos la nges pa med pa'i phyir ro/ /de ltar na tshul gsum po de dag las tshul re re yang gnyis gnyis la ma grub pa'am/ the tshom za ba yin te/ ci rigs par gtan tshigs ltar snang ba gsum po ma grub pa dang 'gal ba dang /ma nges pa dag yin no/ /'gal ba mi 'khrul pa can yang the tshom gyi rgyur bshad na/ de 'dir ma smos te/ rjes su dpag pa'i yul la mi srid pa'i phyir ro/ /'bras bu'am rang bzhin nam mi dmigs pa'i mtshan nyid smos pa la 'gal ba mi 'khrul pa can mi srid la/mi 'khrul pa can gzhan ni med do/ /de lta bas na dngos po ma mthong ba'i stobs kyis zhugs pa yin pas na lung la brten pa'i rjes su dpag pa la brten te/ de'i don dpyad pa dag la 'gal ba mi 'khrul pa can ni sgrub pa'i skyon du bshad do/ /bstan bcos byed pa rnams ni don rnams la 'khrul pas rang bzhin log par ston pa srid pa'i phyir ro//dngos po ci lta ba bzhin du gnas par 'dug pa bdag dang 'bras bu dang mi dmigs pa dag la mi srid pa'i phyir ro/ /'dir dpe ni gang zhig yul thams cad na gnas pa rang dang 'brel ba can dag dang /gcig pur mngon par 'brel ba de ni thams cad la gnas pa yin te/ dper na nam mkha' la sogs pa bzhin no/ /spyi yang yul thams cad pa rang dang 'brel ba can dag dang cig car du mngon par 'brel to/ /de dang 'brel ba can gyi rang bzhin tsam gyi rjes su 'jug pa'i rang bzhin can de'i yul na 'dug pa'i rang bzhin nyid yin no//gang na gang med pa de ni de'i yul bdag nyid khyab par byed pa ma yin no zhes bya ba ni rang bzhin gyi gtan tshigs kyi sbyor ba yin no/ /sbyor ba gnyis pa yang dmigs pa'i rig byar gyur pa gang zhig gang na mi dmigs pa de ni de na med de/dper na 'ga' zhig na bum pa med do zhes bya ba lta bu yin la gsal ba'i bar rnams la yang dmigs pa'i rig byar gyur pa spyi mi dmigs so zhes bya ba'o / /mi dmigs pa 'di dang rang bzhin de ni phan tshun 'gal ba'i don du bsgrubs pa yin pas gcig la the tshom skyed par byed do//gtan tshigs kyi mtshan nyid gsum smos pa de tsam gyis don rtogs pas dpe zhes bya ba sgrub pa'i yan lag ni logs shig tu ci yang med do/ /des na de'i mtshan nyid logs shig tu ma brjod de don go ba'i phyir ro / /gtan tshigs ni mthun pa'i phyogs nyid la yod pa dang /mi mthun pa'i phyogs thams cad las ldog pa'i tshul du bye brag med par bshad pa la/ yang bye brag tu ni 'bras bu dang rang bzhin gnyis kyi skye ba dang de tsam gyi rjes su 'jug pa yin par bstan pa shes par bya bar bshad de/ de yang ston par byed pas gang na du ba yod pa de na me yod la/me med na du ba yang med de/ dper na tshang bang dang gzhan pa lta bu'o/ /gang na byas pa nyid yod pa de na mi rtag pa nyid yod la/ mi rtag pa nyid med na byas pa yang mi srid de/ dper na bum pa dang nam mkha' dag lta bu'o zhes bshad par bya'o//gzhan du na mthun pa'i phyogs dang mi mthun pa'i phyogs dag la yod pa dang med pa ji skad smos pa'i rnam pa dag bstan par mi nus so/ /'bras bu'i rtags ni de'i 'bras bu nyid du nges pa'am rang bzhin gyi rtags ni rang bzhin gyis khyab pa yin la/ de'i tshul ni de tsam du zad pa'i phyir ro//'dis ni dpe'i nyes pa rnams kyang bsal ba yin te/ dper na sgra ni rtag pa yin te lus can ma yin pa'i phyir/ las dang rdul phra rab dang / bum pa bzhin no zhes bya ba ni/ bsgrub par bya ba dang / sgrub par byed pa'i chos dag gnyis ka med pa yin no//de bzhin du bsgrub par bya ba'i chos la the tshom za ba la sogs pa yang / dper na smra ba'i phyir na/ 'dod chags la sogs pa dang ldan pa yin te/ lam po che'i mi bzhin no zhes bya ba dang / mi 'di ni 'dod chags la sogs pa dang ldan pa'i phyir/ 'chi ba'i chos can yin te lam po che'i mi bzhin no zhes bya ba dang /'dod chags la sogs pa dang ldan pa'i phyir thams cad mkhyen pa ma yin te / lam po che'i mi bzhin no/ /zhes bya ba lta bu'o/ /rjes su 'gro ba med pa dang / rjes su 'gro ba rab tu ma bstan pa ni dper na gang smra ba de ni 'dod chags la sogs pa dang ldan pa ste/'dod pa'i mi bzhin no zhes bya ba dang / byas pa'i phyir sgra ni mi rtag pa ste/ bum pa bzhin no zhes bya ba lta bu'o/ /de bzhin du rjes su 'gro ba phyin ci log ni gang mi rtag pa de ni byas pa'o zhes bya ba lta bu ste / chos mthun pas yin no//chos mi mthun pas kyang rdul phra rab dang las dang nam mkha' bzhin no zhes bya ba ni/ bsgrub par bya ba la sogs pa las mi ldog pa can dag yin no/ /de bzhin du bsgrub par bya ba las/ ldog pa la the tshom za ba la sogs pa ni/ dper na ser skya la sogs pa ni thams cad mkhyen pa'am yid ches pa ma yin te/thams cad mkhyen pa dang 'dod chags dang bral ba'i rtags su gyur pa tshad ma phul du phyin pa bstan pa med pa nyid kyi phyir ro zhes bya ba lta bu'o/ /'dir chos mi mthun pa'i dpe ni gang zhig thams cad mkhyen pa'am/'dod chags dang bral ba yin pa des ni skar ma'i shes pa la sogs pa bstan te/ dper na khyu mchog dang sdong ris la sogs pa lta bu'o / /chos mi mthun pa'i dpe las bsgrub par bya ba'i chos thams cad mkhyen pa nyid ma yin pa dang / yid ches pa ma yin pa gnyis ldog pa la the tshom za ba yin no//sgrub pa las ldog pa la the tshom za ba ni/ dper na gsum rig pa'i bram zes ni mi 'ga' zhig gi brjod par 'dod pa'i tshig gzung bar mi bya ste/ 'dod chags la sogs pa dang ldan pa'i phyir ro zhes bya ba lta bu'o/ /'dir chos mi mthun pa'i dpe ni tshig gzung bar bya ba gang dag yin pa de ni 'dod chags la sogs pa dang mi ldan pa ste/dper na go ta ma la sogs pa chos kyi bstan bcos rnams byed pa lta bu ste/ go ta ma la sogs pa las sgrub pa'i chos 'dod chags la sogs pa dang ldan pa ldog pa la the tshom za ba yin no//gnyis ka las ldog pa la the tshom za ba ni/ dper na ser skya la sogs pa ni yongs su 'dzin pa dang kun tu 'dzin pa dang ldan pa'i phyir 'dod chags dang bral ba ma yin no zhes bya ba lta bu'o/ /'dir chos mi mthun pa'i dpe ni/ gang zhig 'dod chags dang bral ba de la ni/yongs su 'dzin pa dang / kun du 'dzin pa med de/ dper na khyu mchog la sogs pa lta bu ste/ bsgrub par bya ba dang sgrub pa'i chos 'dod chags dang bral ba nyid dang / yongs su 'dzin pa dang kun du 'dzin pa khyu mchog la sogs pa las ldog pa la the tshom za ba yin no//ldog pa med pa ni dper na smra ba'i phyir 'dod chags dang bral ba ma yin no zhes bya ba lta bu'o/ /gang la 'dod chags dang ma bral ba nyid med pa de ni smra ba ma yin te/ dper na rdo'i dum bu bzhin no zhes bya ba lta bu ste / gal te rdo'i dum bu las gnyi ga ldog pa yod mod kyi/'on kyang 'dod chags dang bral ba thams cad smra ba ma yin no zhes bya bar khyab par ldog pa ma grub pa'i phyir ldog pa med pa yin no/ /ldog pa rab tu ma bstan pa ni/ chos mi mthun pa dper na sgra ni byas pa'i mi rtag pa ste/ dper na nam mkha' bzhin no zhes bya ba lta bu'o//ldog pa phyin ci log ni/ dper na gang ma byas pa de ni rtag pa yin no zhes bya ba lta bu'o/ /dpe ltar snang ba de dag gis ni gtan tshigs kyi spyi'i mtshan nyid mthun pa'i phyogs nyid la yod pa dang / mi mthun pa'i phyogs thams cad la med pa nyid dam/bye brag gi mtshan nyid bstan par mi nus te/ de'i phyir don gyi dbang gis de dag bsal bar rig par bya'o/ /ma tshang ba nyid la sogs pa smras pa ni/ sun 'byin pa dag yin no/ /sngar sgrub pa'i rkyen ma tshang ba la sogs pa smos pa gang yin pa de dag brjod pa ni sun 'byin pa yin te/des pha rol po 'dod pa'i don 'grub pa la gegs byed pa'i phyir ro/ /sun 'byin pa ltar snang ba dag ni ltag chod rnams te/ yang dag pa ma yin pa'i skyon brjod pa dag ni ltag chod rnams yin no/ /gzhan gyi don gyi rjes su dpag pa'i le'u ste gsum pa'o// //rigs pa'i thigs pa zhes bya ba'i rab tu byed pa rdzogs so// //paN+Di ta gzhan la phan pa bzang po la sogs pa dang / bod kyi lo tsA ba blo ldan shes rab kyis bsgyur cing zhus te gtan la phab pa'o//