CLOSE WINDOW

D4211
བོད་ཡིག

@#/ /tshad ma rnam par nges pa bzhugs so/ / @##/ /rgya gar skad du/ pra mA Na bi ni sh+tsa ya/ bod skad du/ tshad ma rnam par nges pa/ 'jam dpal gzhon nur gyur pa la phyag 'tshal lo/ /gang la 'phags pa nyid byon rjes gzung de ni dpal ldan dri med blo mnga' ste/ / 'jig rten blo gros blun po 'dis ni de tshig brling ba gsal bar mi shes pas/ /nyer bsten 'jig rten rgyal mdzad de la rmongs pas cung zad smad byas na'ang / /don min skye bar 'gyur ba yin pas brtse bas de yi lugs ni gsal bar bya/ /phan pa dang mi phan pa thob pa dang spong ba ni nges par yang dag pa'i shes pa mngon du 'gro ba can yin pas na de mi mkhas pa rnams la bstan pa'i don du 'di brtsam mo//yang dag pa'i shes pa de ni rnam pa gnyis te/ mngon sum dang ni rjes su dpag / ces bya ba'o / /'di dag gis don yongs su bcad nas 'jug pa na don bya ba la bslu ba med pa'i phyir ro/ /gal te sgra las byung ba dang nye bar 'jal ba la sogs pa tshad ma gzhan yang yod pa ma yin nam zhe na/ tshad ma yin na ni 'di gnyis kho nar 'dus pa'i phyir//tshad ma rnam gnyis kho na ste/ /'brel ba ni/ gzhan las mngon sum ma yin pa/ /'dra ba'i bdag tu rtogs phyir ro/ /don ni rnam pa gnyis nyid de mngon sum dang / lkog tu gyur pa'o/ /de la gang zhig shes pa'i snang ba bdag nyid kyi rjes su 'gro ba dang ldog pa'i rjes su mthun par byed pa de ni mngon sum ste/de ni thun mong ma yin pa'i dngos po'i rang bzhin te rang gi mtshan nyid do/ /gzhan ni blo la dngos su rang gi ngo bo 'jog pa'i nus pas stong pa'i phyir rtogs par mi 'thad pa nyid do/ /gzhan mthong ba na gzhan rtogs pa ni rigs pa ma yin te/ha cang thal bar 'gyur ba'i phyir ro/ /de yang med na mi 'byung ba nyid yin na ni 'gyur ro/ /de ni ji lta bu'i rnam pa dang rang bzhin 'brel ba grub pa de lta bu'i rnam pa nye ba nyid du go bar byed la 'brel ba las spyi'i tshul du rtogs pa yang rjes su dpag pa yin pa'i phyir tshad ma gnyis kho na ste/gzhan du na rtogs par mi 'thad pa'i phyir ro / /de'i 'brel ba kho na ni rtags kyi mtshan nyid ma yin gyi/ /'on kyang gzung ba'i chos dang ldan pa'i chos can la mthong ba yang yin la/ de ni sgra la yod pa ma yin pa'i phyir ji ltar tshad ma gzhan ma yin zhe na/de dag de la mthong na 'o na don ci zhig sgrub pa'am 'gog par byed/ gang sngar mthong ba de la dran par byed do zhe na/ sgra dang rtags med par de rang nyid ji zhig ltar yang dran par mi 'gyur ram ci/ gnas skabs 'di nyid la bye brag kyang yod dam/ de'i phyir 'di dag 'ga' zhig tu ma grub pa 'ga' zhig tu sgrub pa'am 'gog par mi byed pa'i phyir/ji ltar 'ga' zhig sgrub par byed pa yin/ de dag las don 'grub pa yang ma yin te/ de dag der 'brel pa ma grub pa'i phyir ro/ /smra ba po'i mngon par 'dod pa'i don go bar rung ba'i phyir te/ de ltar rtogs par bya ba'i gzhi ni de nyid yin no//'o na de yod na yod pa dang / mi dmigs pa las rab tu skye ba dang med pa sgrub pa la rjes su dpag pa ma yin te/ rjes su 'gro ba med pa'i phyir ro/ /'di la dpe yod pa ma yin te/ sgrub par byed pa gzhan med pa'i phyir dang / de nyid sgrub par byed pa yin na yang thug pa med par thal bar 'gyur ba'i phyir ro//zhe na ma yin te/ de la yul bstan pas zhugs pa'i yul can gyi 'brel ba dran pa'i phyir te / rgyu dang 'bras bu dag gi ngo bo nyid ni rjes su 'gro ba dang ldog pa dag las gzhan ma yin no/ /de bzhin du dmigs par rigs pa mi dmigs na yang med do zhes brjod de/de'i phyir mi dmigs na med do zhes rgyu mtshan nye bar bstan pas rmongs pa la tha snyad sgrub par byed do / skyed par byed pa brjod pa la pha nyid bzhin no/ /mi snang ba mi dmigs pa yang rgyu mtshan gzhan med pa'i phyir yod pa'i tha snyad 'gog pa yin te/ skyed par byed pa ma yin par brjod pa la pha nyid ma yin pa bzhin no//de'i phyir rang gi grub pa ma yin pa thams cad ni bdag nyid dang 'brel ba'i grub par byed pa mi 'khrul ba gzhan la ltos pa'i phyir mngon sum ma yin pa'i tshad ma ni rjes su dpag pa las gzhan yod pa ma yin no/ /gzhan dag mngon sum ma yin pa'i tshad ma ni med do//zhes zer ba de ni rigs pa ma yin te/ gang gi phyir tshad dang cig shos spyi gzhag dang / /gzhan blo rtogs par byed phyir dang / /'ga' zhig 'gog par byed phyir yang / /tshad ma gzhan ni srid pa nyid/ /de shes pa'i gsal ba 'ga' zhig gi 'jug pa la slu ba dang mi slu ba dag dmigs nas ji ltar nye bar bstan pa la 'jug pa mi 'khrul bar bya ba'i phyir mngon sum kho na tshad ma yin gyi rjes su dpag pa ni ma yin no zhes de'i mtshan nyid la khyad par smra ba na chos mthong ba las ci lta ba de ltar rab tu bsgrub pa de ni rjes su dpag par bya ba las ma 'das so//de yang ma grub pa'i phyir yul nyams su myong ba bstan du med pa'i shes pa'i gsal ba rnams las ma gtogs par cung zad kyang tshad ma'am tshad ma ma yin par mi 'gyur la/ rang gi rgyud la yod pa mtshon par bya ba ma yin pa de dag gis kyang 'di gzhan la tha snyad du byed par mi dbang ba'i phyir bstan bcos bya ba ma yin pa nyid do//byed na yang rang gi 'jug pa la rang gi tshig gis co 'dri bar byed pa yin no/ /gzhan khong du chud par bya ba'i don du bstan bcos kyang byed la/ rjes su dpag pa yang 'dor ro zhes bya ba ni mi rigs te/ rjes su dpag pa de spangs na 'jug pa 'bras bu med par 'gyur ba'i phyir ro//lus nyid ni blo ma yin te/ de grub kyang blo'i rnam par brtags pa la the tshom za ba'i phyir ro/ /de gzhan dang 'brel ba ni skyes bu tsam gyis mngon sum du mi rtogs so/ /'di 'ga' zhig tu dgag pa byed pa yang mngon sum gyis ni bya bar 'os pa ma yin te/don gyis nus pa la ltos pa med pas de'i yul nyid du 'gal ba'i phyir ro/ /mi ltos na ni chos pa la sogs pa'i dngos po la yang skye bar thal ba'i phyir ro/ /log pa las mngon sum nyid kyis dngos po med par nges pa yin no zhe na/de med pa yang yin la des rtogs so/ /zhes kyang bya ba 'di ni nyams so/ /de log na ni gang las med do zhes bya bar 'gyur te/ nges pa med pa'i phyir ro/ /yod na yang de nyid mi 'khrul ba'i dmigs pa yin pa'i phyir/ de ni des dngos po med pa'i rtags nyid do/ / 'ga' zhig mi slu yang de'i rang bzhin can la 'khrul pa mthong ba'i phyir yid brtan du med do zhe na ma yin te de'i rang bzhin ma mtshon pa'i phyir te/ rang bzhin 'brel ba ni rtags kyi mtshan nyid yin la/ de la ni 'khrul pa yod pa ma yin te de med na rang gi ngo bo med par 'gyur ba'i phyir ro/ / 'di ltar mngon sum yang ni don med na/ mi 'byung ba las tshad ma nyid/ /'brel ba yi ni rang bzhin de'i/ /rgyu yin pas na gnyis ka mtshungs/ /mngon sum yang don la mi slu ba nyid las tshad ma yin no/ /mi slu ba yang de las bdag nyid thob pa'i phyir te/ gzhan las byung ba'am ma byung ba'i yod pa de ni de la nges par mi slu ba mi rigs pa'i phyir ro//gal te mngon sum gyi don la mi slu ba ni don med na mi 'byung ba las ma yin gyi/ 'on kyang don mthong ba las yin no zhe na/ don mthong ba de yang don yin nam shes pa yin/ don yin no zhe na don thams cad mngon sum yin pa'i phyir thams cad kyis mthong bar 'gyur ro//shes pa yin no zhe na ji ltar gzhan yod na 'brel ba med pa gzhan nges par yod par 'gyur ba mthong ba'i phyir yod par 'grub bo zhe na/ mthong ba zhes bya ba 'di ci zhig ces de nyid brgal zhing brtag pa byed pa ma yin nam/ de'i phyir shes pa yod pa las don yod par 'dod pas shes pa de dang 'brel bar brjod par bya ba yin la/ de ni 'bras bu dang rang bzhin gyi rtags dag las rjes su dpag pa la yang mtshungs pa'i phyir rjes su dpag pa tshad ma'i mtshan nyid dang mi ldan pa ma yin no/ /de la mngon sum rtog bral ma 'khrul ba//rab rib dang myur du bskor ba dang / grur zhugs pa'i 'khrug pa la sogs pas 'khrul pa ma bskyed cing rnam par rtog pa med pa'i shes pa ni mngon sum mo/ /rtog pa de yang gang zhe na/ rtog pa mngon par brjod can gyi / /shes pa rtog pa ni brjod pa dang 'drer rung ba snang ba'i shes pa ste/de dang bral ba'o/ /dbang po'i shes pa la ni de srid pa ma yin te/ don gyi mthu yis ni/ yang dag skye ba yin phyir ro/ /gang gi phyir de don gyi nus pa las skyes pa na de'i rang bzhin kho na'i rjes su byed pa'i phyir ro/ /gang gis de snang ba na de yang snang bar 'gyur ba don la sgra yod pa'am/de'i bdag nyid ni ma yin no/ /rig pa'i chos 'di ni don la reg pa dang mi ldan pa yang ma yin te/ de don rtag tu sbyor ba'i phyir dang / de las kyang don rnams mi rtogs par thal ba'i phyir ro/ /de'i phyir 'di nye bar gyur pas rnam par shes pa bskyed pa na bdag nyid ma yin pa med na mi 'byung ba ni mdun du byed par rig pa ma yin te/ro la sogs pa phan tshun bzhin no/ /de'i stobs kyis skyes pa'i rnam par shes pa yang don gzhan gyi rjes su 'brang ba ma yin te/ ro la sogs pa'i shes pa bzhin no/ /de'i bdag nyid yin du chug kyang dbang po gzhan gyi shes pa bskyed par mi nus pa'i phyir dang /ha cang thal bar 'gyur ba'i yang phyir ro/ /rnam par rtog pa can ni yid kyi rnam par shes pa ste/ don gyi nus pa nye ba la ltos pa med par rnam par rtog pa'i bag chags kyis kun nas bslangs pa las/ dbang po'i don ma nges par 'dzin pa can/nyams su myong ba 'ga' zhig dang 'brel ba las lhan cig gam/ so sor 'dzin par byed do/ /gzhan yang / don ni nye bar sbyor ba na'ang / /gzhan yang sgra sbyor dran pa la/ /gal te dbang po'i blo ltos na/ /don de chod par 'gyur ba yin/ / gang gi phyir brda'i dus na goms pa'i brjod pa'i spyi ma dran pa ni de sbyor ba mi srid de sgra gzhan bzhin no/ /don gyis nye bar sbyor bas byas pa'i nang gi 'du byed sad pa med par yang sgra'i khyad par dran par mi rigs te/ de des ma byas na de'i ming mi 'dzin par thal ba'i phyir ro/ /des na dran pas bar du chod pa'i phyir don gyi nye bar sbyor ba'i de ma thag pa'i byed pa'i 'bras bur mi 'gyur ro//de'i phyir gang sngon blo yi skyed byed min/ /nyer sbyor khyad par byed pa'i phyir/ /de ni phyis kyang 'gyur/ bdag nyid tha dad pa med pas nus pa khyad par med pa'i phyir gcig nyid gcig la byed pa dang mi byed par ni mi 'gyur ro//des na/ don med na yang mig blor 'gyur/ /don blo la dngos su mi sbyor ba'i phyir dang / dran pas sad par byed pa la sbyor ba'i phyir blo ni phan pa med pa de yod pa la mi ltos pa nyid do/ /don gyi nye bar sbyor bas blo skyed par byed na ni brjod pa dran pa'i bar chad med pa'i phyir mngon sum rtogs pa med par grub pa yin no//gzhan yang / khyad par dang ni khyad par can/ /'brel dang 'jig rten chos lugs ni/ /gzung ste de ltar bsdoms byas na / /de ltar rtogs kyis gzhan du min//khyad par dang khyad par can dang de'i 'brel ba dang 'jig rten pa'i rnam par gzhag pa shes na ni de bsdoms nas 'dzin pas 'ga' zhig gis khyad par can du 'dzin pa yin te/ dbyig pa can la sogs pa bzhin no/ /don dang 'brel ba dang rjod par byed pa'i gtsug lag rnams mi shes na mi 'gyur ba'i phyir gzhan du ni ma yin no//rigs dang yon tan dang bya ba dang ldan pa dag ni 'di la mi srid pa nyid ni / rang bzhin tha dad pa dang 'brel pa dag mi snang bas sbyor ba mi rigs pa'i phyir dang / de ltar rtogs pa med pa'i phyir chu dang 'o ma dag bzhin no/ / gang la tha dad par rtogs pa yod pa de la yang 'dzin pa ni/ brda dran pa yi rgyu can gyi/ /mthong ba sdud pa'i bdag can de/ /snga phyi 'dzin pas stong pa yi/ /mig shes la ni ji ltar 'gyur/ /gang gi phyir 'di la 'di tsam byed pa'i nus pa yod pa ma yin te/ yul gyi don nye ba'i stobs las skyes pas dpyod pa med pa'i phyir ro//dpyod par byed pa nyid yin na ni yid kyi shes pa dang dbang po'i shes pa dag tha dad pa med par thal ba'i phyir ro/ /tha dad pa med pa nyid yin na ni 'das pa dang ma 'ongs pa dang dngos po'i rab tu dbye ba 'dzin pa dang mi 'dzin pa dang dpog pa dang mi dpog pa dang don yod pa la ltos pa dang mi ltos pa la sogs par thal bar 'gyur ro//yid kyi rnam par shes pas mngon par 'dus byas pa la dbang po'i shes par 'dzin par byed do zhe na ma yin te/ ji skad bshad pa mi 'dzin pas de ltar rtogs pa mi rigs pa'i phyir ro/ /yul ma yin pa la mi 'jug pa'i phyir te/rigs la sogs pa dang / 'brel ba dang / 'das pa dang / sgra'i tha snyad la sogs pa rnams ni dbang po'i shes pa'i yul ma yin pa'i phyir ro/ /de'i phyir dbang po'i shes pa ni don sbyor bar byed pa'i rtog pa rnams kyi nang du gtogs pa ma yin no/ / de ni rtogs pas blangs na yang / /'dod pas ldog dang nye ba yi/ /don la blo ni ltos med 'gyur/ /gzhan yang 'di khyad par la sogs pa'i rtogs pas bslang ba yin na tshogs pa tshang ba can gyi 'jug pa yang 'dod pas ldog par 'gyur te/ de las gzhan pa'i rnam par rtog pa bzhin no//rnam par rtog pa rnams ni so sor brtags pas bzlog par nus pa yin gyi/ dbang po'i blo ni ma yin te/ tshogs pa tshang ba la ba lang gi blo bzlog cing rtar rnam par brtags kyang ba lang du mthong ba'i phyir ro/ /'di don nye ba las mi ltos par yang 'gyur te/ gang gi phyir ba lang la sogs pa'i rnam par rtog pa ni don nye ba nyid las 'gyur ba ma yin no//'di nyid kyis gzhan min zhe na/ gang gi phyir 'di ba lang ngo zhes bya ba ni nye ba ma yin pa la mi 'gyur la/ kho bo cag gi mngon sum yang 'di nyid yin te/ don nye ba nges pa'i mtshan nyid can yin pa'i phyir ro zhe na/de ni yod pa ma yin te gang gi phyir/ de dbang spyod yul ma yin phyir/ /med dang tha dad med pa la'ang / /rig pa las kyang blo der 'gyur/ /dbang po'i spyod yul ma yin pa'i don yin pa'i phyir de dbang po'i shes pa skyed par byed pa la med pa las tha dad pa ci yod/de'i nus pa ni de las dngos su thams cad du logs pa yin la/ brgyud pa nye bar sbyor na ni 'das pa las kyang mthong ba'i phyir ro/ /de'i phyir yul ma yin pa nyid kyis med pa dang khyad par med pa la yang reg pa las 'di bum pa zhes rtogs pas ni 'di mngon sum dang ldan par rigs pa ma yin no//gal te reg de rdzas yin na/ de ni ma yin te/ rdzas ni reg pa yang yin pas reg nas 'dzin to zhe na/ ma yin 'di ni bum pa zhes/ /shes la kha dog snang phyir ro/ /'di bum pa'o snyam pa'i shes pa ni reg pa'i dbang po las skyes par mi rigs te/de ltar sems pa na kha dog snang ba'i phyir ro / /des na dran pa'i rnam par rtog pa 'di ni gzugs dang reg pa'i rnam par shes pa dag gi rgyu can gyi yid yin no/ /gzhan yang / gang zhig yod la gang mthong ba/ /de mthong ba las de yi sgra/ /dran rigs de rtogs med na ni//sgra yi khyad par ji ltar dran/ /de ma dran na de dang don/ /bsres nas rig pa de ji ltar/ /gal te rang gi rjod par byed pa'i khyad par la ltos pa'i don nyid shes pas nges par bya ba yin no zhes bya ba de ltar nges pa yin na/ da ni dbang po'i shes pa'i brjod pa yang rtogs par 'gyur te/rjod par byed pa'i khyad par dran par mi rigs pa'i phyir ro/ /gang gi phyir don mthong ba yod na ni de las don gyi khyad par nye ba la/ mthong ba'i sgra dran par 'gyur ba yin te me dang du ba bzhin no/ /'dis sgra med par don mi mthong zhing ma mthong na yang sgra'i khyad par mi dran la ma dran na sbyor bar mi byed do//ma sbyar na rtogs par mi 'gyur ba'i phyir 'gro ba ma lus pa long ba nyid du 'gyur ro/ /don nye ba nyid kyi nang gi 'du byed sad par byas pa des dran par 'gyur gyi don mthong bas ni ma yin no zhe na/ ma yin te/ brda ma mthong ba la med pas de'i 'brel pa ni rang gi ngo bo med pa'i phyir ro//skyes bu'i 'dod pas ni don rnams yongs su 'gyur ba ma yin pa'i phyir/ brda'i dus su skyes pa'i rang gi ngo bo ni yod pa ma yin no/ /yongs su 'gyur na ni de de'i bdag nyid yin pa'i phyir gzhan brda ma mthong ba rnams la yang 'gyur ro//skyes bu so so la don rnams bdag nyid tha dad pa ni ma yin te/ bdag nyid med par thal bar 'gyur ba'i phyir te/ bdag nyid gnas pa med pa'i phyir ro/ /de'i phyir mthong bas na 'di sgra ma sbyar ba'i don nyid mthong ba yin no/ /yang na dbang po'i blo rtog pa dang bral bar sgrub par byed pa ni mngon sum nyid do //gang gi phyir/ thams cad las ni sems bsdus nas/ /nang gi bdag nyid g.yo med par / /gnas na'ang mig gis gzugs dag ni/ /mthong ba'i blo de dbang skyes yin/ /brjod pa'i snang ba med pa'i snang ba ni srog chags thams cad kyi mngon sum nyid yin pa'i phyir 'di la sgrub par byed pa gzhan gyis ci zhig bya/gang gis yod kyang mi rtogs par 'gyur ba rnam par rtog pa 'di dag gi skye ba dang 'gag par rig par mi 'gyur ba yang ma yin te/ 'di ltar slar yang cung zad rnam rtog na//kho bo'i rnam rtog 'di 'drar 'gyur/ /zhes rig sngar bshad rang bzhin gyis / /dbang po las rtogs la min no/ /yang de bsdus pa las sems langs te/ /cung zad rnam par rtog pa na/ /kho bo'i rnam par rtog pa 'di dang 'di 'dra bar gyur to zhes rang gi sems kyi rgyun sdom par byed do//de'i phyir rnam par rtog pa 'di dag mngon sum yin na ji ltar rnam par rtog pa bsdus pa'i mthong ba la rtogs par mi 'gyur zhes bya/ des na mthong ba'i bdag nyid rtog pa dang ma 'dres pa ni mngon sum yin pa'am/ mthong ba la snang ba'i bdag nyid kyi rnam par rtog pa mi snang bas ni dbang po'i shes pa la rnam par rtog pa spangs pa yin no/ /gang gis dbang po'i shes pa rnam par rtog par khas blangs pa la gnod par 'gyur ba'i blo mngon sum du gyur pa ni ma yin no zhe na/ de ltar na re zhig skye ba dang 'gag par rig pa'i rnam par rtog pa 'di don nam/blo gang gi nang du 'du/ don ni ma yin te/ nang du yongs su gsal ba'i phyir dang / 'dod pa'i dbang gis skye ba dang 'gag par rigs pa ma yin pa'i phyir ro/ /blo ni 'dir 'gyur ba yin na mngon sum ma yin pa de ni 'jug tu zin kyang gsal ba ma yin la/gsal ba'i don kyang de ltar 'gyur ba ma yin zhing / 'di gzhan 'ga' zhig dang rjes su 'brel ba yang ma yin pa'i phyir don dang brjod pa'i rjes su byed pa nyams su myong ba'i bdag nyid kyi rnam par rtog pa ni med par 'gyur ro//bde ba la sogs pa myong ba yang blo yin la/ de yang lkog tu 'gyur ba'i phyir de las phan pa dang gnod par mi 'gyur te/ skyes bu gzhan gyis myong ba bzhin no/ /'di dag mngon sum gyis shes pa ma yin na bdag nyid la rtogs par yang ji ltar 'gyur/don ma shes par blo mi 'grub pas na de shes pa ni rjes su dpag pa las khong du chud pa yin no zhe na/ gang gis 'di skad smra ba'i tshig la yang 'jig rten na rna gtod par byed pa ni rgyal ba'i sgra bsgrags pas blun po rgyal ba yin no/ / don shes pa zhes bya ba blo'i sgrub par byed pa ni rtogs pa yin la blo ni ma yin no zhes zer ba ni bsngags par 'os pa'i shes rab can lha rnams dga' bar byed pa yin pa'i phyir ro/ /don shes pa ni blo'i rtags ma yin gyi 'on kyang dbang po dang don dag yin no zhe na/ mi 'khrul na gtan tshigs yin no//yid yin no zhe na/ de yang bar du ma chod pa'i shes pa'i rgyur gyur pa rnam par shes pa snga ma nyid yin par rig ste/ de yul gzhan la sems gtad cing nus pa nyams par gyur na gzhan la shes pa mi skye ba'i phyir ro/ /de yang ma grub bo/ / yul gsal ba yin no zhe na/gsal ba de nyid blo ma yin nam/ de'i khyad par can de yang ma grub bo/ /gsal ba ni blo ma yin te/ don gyi bdag nyid yin no zhe na/ blos ma bskyed na ji ltar blo'i go par byed pa yin te/ 'brel ba med pa'i phyir ro/ /don gyi bdag nyid kyang thun mong ba yin pa'i phyir gzhan gyi blo yang rjes su dpag par thal lo//rtags grub kyang ma grub pas ni blo dang 'brel pa med pa'i phyir rjes su dpag pa ma yin no/ /de'i phyir 'di'i brjod pa med pa yang mngon sum du snang ba yin no/ /dbang po'i bya ba med pa la/ /sgra yis don ni mthong ba bzhin//blo la snang ba med pa'i phyir/ /de ni brjod med rtogs byed yin/ /yang mngon sum de ni rjod du med pa'i yul can yin te/ dbang po'i bya ba med pa la mthong ba bzhin du sgras blo la snang ba med pa'i phyir ro/ /gang gi phyir sgra las byung ba'i shes pa la mi snang ba gang yin pa de ni sgra'i don ma yin no//sgra'i yul nyid ni dngos po ma yin te/ mthong ba la rnam pa gzhan du snang ba'i phyir ro/ /de nyid ma yin pa'i rgyu mtshan 'di tsam du zad pa'i phyir ro/ /dngos po med kyang sgra las byung ba'i snang ba mi nyams pas med pa'i don snang ba dang khyad par med pa'i phyir/yod kyang shes pa de ni de'i bdag nyid 'dzin pa ma yin te/ de yod pa dang med pa'i rjes su mi byed pa'i phyir/ dri la ro'i blo bzhin dang / gzugs la mig gi blo bzhin no/ /rnam par gtod par nus pa'i phyir shes pa'i yul ni rgyu yin na rjes su 'gro ba dang ldog pa'i rjes su mi byed pa ni rgyu ma yin no// rgyu ma yin pa ni yul ma yin no/ /de'i phyir sgra las byung ba'i rnam par rtog pa ni dngos po'i yul can ma yin no/ /sgra sbyar ba yang don rtogs par bya ba'i phyir yin na/ gang la sgra dang 'brel bar mthong ba tha snyad kyi tshe rtogs par 'gyur ba dbang po'i don ni rjes su 'gro ba dang ldan pa yang ma yin te/'di ltar gcig tu mthong ba'i khyad par ni/ gzhan 'ga' zhig tu ma mthong ba'i phyir/ gang gi phyir gsal ba'i bdag nyid rnams ni phan tshun rjes su 'gro ba ma yin te/nus pa dang snang ba la sogs pa tha dad pa'i phyir ro/ /de las spyi gzhan tha dad ni/ /yod min tha dad blo med phyir/ /gang las sgra 'jug par 'gyur ba gsal ba'i bdag nyid rnams las tha dad pa'i rjes su 'gro ba'i don ni ma mthong ba'i phyir ro/ /don tha dad pa nyid la ni blo tha dad pa mthong ste/'byung po dang mgul chings bzhin no/ /de la tha dad pa med kyang don tha dad par rtogs na ni ha cang thal bar 'gyur te/ thams cad kyi bdag nyid la gcig nges pa med pa'i phyir tha dad pa ma rtogs pas 'gro ba gcig dang du mar mi 'gyur ro/ / de lta mod kyi spyi snang du zin kyang ma rtogs pa'i phyir tha dad par nges par mi 'gyur ro zhe na/ de ni mi rigs te/ gang gi phyir/ de la gzhan la blo dang ni/ /sgra 'jug phyir na mi rtogs min / /blo dang sgra rjes su 'gro ba'i mi rten pa'i khyad par 'di spyi mthong ba'i stobs kyis rjes su 'gro ba ni ci ltar mi rtogs zhes bya/gang las gang la sgra dang blo 'jug pa de ma rtogs par ni de de ltar rtogs par mi 'gyur te/ dbyug pa can la sogs pa bzhin no/ /de phyir dbang po las skyes blo/ /thams cad khyad par yul can nyid//de la spyi mi snang ba'i phyir dang / gsal ba rnams kyang rjes su mi 'gro ba'i phyir dbang po'i blo ni brjod du med pa'i dngos po'i rang bzhin khyad par can nyid mngon sum du byed pa yin no/ /'o na da ni mngon sum ma yin ma nges pa'i bdag nyid las ji ltar tha snyad du 'gyur/ 'di'o zhes bya bar nges na ni bde ba dang sdug bsngal gyi sgrub par byed pa dag thob pa dang spong ba'i don du 'jug pa'i phyir ro zhe na/ skyon ni med de/ gang gi phyir/ don mthong ba nyid mthong rnams la/ /myong ba'i mthu las byung ba yi/ /dran pas mngon par 'dod pa yis/ /tha snyad rab tu 'jug pa yin//mngon sum don la lta ba tsam yin yang nyams su myong ba'i mthu las byung ba myong ba mtshams sbyor ba'i dran pa las/ de mthong ba nyid na mthong ba rnams la mngon par 'dod pa dang cig shos dag gis tha snyad du 'gyur ba yin no/ /gsal bar nyams su myong ba las dran pa'i sa bon 'jog pa gang yin pa 'di ni dngos po'i chos nyid yin la/de dang 'dra ba mthong ba las 'di sad pas mngon par 'dod pa'i bag chags 'jug cing de las kyang 'jug pa yin no/ /dbang shes de ma thag rkyen las/ /byung zhing de don de ma thag /'dzin par byed pa'i yid kyang ngo //mngon sum zhes bya bar sbyar ro/ /rang gi yul gyi de ma thag pa'i skad cig ma lhan cig byed pa tsam gyi dbang po'i rnam par shes pa mtshungs pa de ma thag pa'i rkyen gyis bskyed pa'i yid kyang mngon sum yin no/ /de nyid kyi phyir dbang po med par mthong ba ma yin zhing / yul gzhan pa nyid kyang ma yin no/ /rang gi shes pa'i dus na yod pa de dang byed pa'i dus mtshungs pa yin pa'i don ni lhan cig byed pa ma yin no zhe na ma yin te/ gnyis ka yang dus mtshungs pa'i phyir ro/ /med pas lngar nus pa med pa'i phyir dang / nus pa'i dus na yang 'bras bu rdzogs zin pas nye bar sbyor ba med pa'i phyir shes pa'i rgyu yul ni lhan cig 'byung bar 'gal lo//dus tha dad pa ji ltar gzung / /zhe na shes la rnam pa ni/ /'jog par nus pa'i rgyu nyid la/ /gzung bar 'thad pa shes pas rig /ces bya ba ni bar skabs kyi tshigs su bcad pa'o//'di tshad ma snga ma'i yul 'dzin pa yang ma yin te/ tshad ma ni ma rtogs pa'i yul can yin pa nyid kyi phyir te/ gzhan du na ha cang thal ba'i phyir ro/ /mthong ba'i 'du byed ma nyams pa'i gzung ba 'dzin pa ni dran pa las khyad par med pa'i phyir ro//bya ba rdzogs pa'i las la khyad par du byed pa ma yin pa sgrub par byed pa yin no/ /zhes bya ba yang sgrub par byed pa'i tshul las 'das pa yin no/ /don de rgyur gyur pa can gyi blo rnams rim gyis 'byung ba 'gal ba yang yin no/ /gzhan gyi khyad par du bya ba med pa ni ltos par mi 'thad pa'i phyir dang /mi ltos na yang rim gyis skye ba mi 'thad pa'i phyir ro/ /khyad par du bya ba nyid yin na ni gzhan nyid yin no/ /don rnams skad cig ma nyid kyis 'das pa'i phyir med pa ni 'dzin pa ma yin no/ /de'i phyir rkyen gyis bskyed pa'i phyir don gzhan nyid yid kyis rtogs pa yin no//bde ba la sogs rang rig rnams/ /bde ba la sogs pa rang rig pa rnams kyang mngon sum mo/ /bde ba la sogs pa smos pa ni nyams su myong ba gsal ba bstan pa'i don te/ shes pa thams cad kyi bdag nyid rig pa ni mngon sum yin pa'i phyir ro//bde ba la sogs pa rnams kyi bdag nyid rig pa la ni rnam par rtog pa srid pa ma yin te/ gang gi phyir/ gzhan la brten min bdag nyid phyir/ /bde sogs rnams la brda nus min/ /bde ba la sogs pa so sor nges pa'i bdag nyid ma skyes pa rnams ma rig pas yul du byed pa ma yin te/de ni de'i bdag nyid kyi rang bzhin yin pa'i phyir ro/ /'di dag la 'di rjod par byed pa sbyor ba ni ma yin te/ bdag nyid la de ltar 'jug pa 'gal ba'i phyir ro/ /de'i rang bzhin sngon ma mthong ba'i phyir dang / brjod par gzo ba na yul dang de tha dad pa med pas na rig pa yang 'gags pa'i phyir gzung ba dang 'dzin pa med pa'i brda med pa'i yang phyir ro//gzhan gyis kyang 'das pa'i rang bzhin rig pa ma yin pa'i phyir ro/ /yang 'byung ba ma yin pa ni brda don med pa'i yang phyir ro/ /de phyir de dag rang rig ni//brjod dang rjes 'brel can ma yin/ /brda mi nus pa'i phyir na bde ba la sogs pa rnams kyi bdag nyid rig pa brjod pa dang ma 'brel ba de ni mngon sum gyi tshad ma yin no/ /kha cig na re/ bde ba la sogs pa rnams ni rig pa'i rang bzhin nyid ma yin gyi / 'on kyang don gcig la 'du ba can gyi shes pas rig par bya ba yin no//zhes zer ba de dag gi yang / /de dang de min rang bzhin can/ /de de min dngos rgyu las skyes/ /des shes tha dad med rgyus bskyed/ /bde sogs ci phyir shes ma yin/ /de dag kyang de dang de ma yin pa'i rang gi ngo bo can gyi dngos po rnams kyi de'i rang bzhin can dang de ma yin pa'i rang bzhin can la brgal zhing brtags pa na/de'i rang bzhin gyi rgyu las skyes pa ni de'i rang bzhin dang de'i rang bzhin ma yin pa'i rgyu las skyes pa ni de'i rang bzhin ma yin pa zhes rgyu'i rang bzhin la brten te/ dper na sA lu'i sa bon la sogs pa dag las ni de bskyed pa yin la/de las gzhan pa dag las ni gzhan yin no zhes bya ba de lta bu'o/ /glo bur ba nyid la ni yul dang dus dang rang bzhin nges pa mi 'thad pa'i phyir ro/ /de la bde ba la sogs pa yul med par ni skye ba ma yin te/ bdag nyid ji lta ba'i yul dang rjes su 'brel ba'i bde ba la sogs pa rnams de tshogs pa med par mi 'byung ba'i phyir ro//dbang po med par yang ma yin te/ gzugs la sogs pa dang rjes su 'brel ba can rnams de'i yul can gyi dbang po dang bral ba la ma mthong ba'i phyir la/ dbang po nyams pa med pa nye bar gnas pa na yang 'byung ba'i phyir ro//yid la byed pa med par yang ma yin te/ gnyis ka tshogs kyang gnyid la sogs pas bslad pa'i blo can la med pa'i phyir ro/ /rnam par shes pa skye ba la yang rgyu'i tshogs pa 'di dag tsam kho nar zad do/ / des na rang gi ngo bos de'i 'bras bu'i rang gi ngo bo nges pa na bde ba la sogs pa dmigs pa med pa'i bdag nyid ma yin no/ /'dus byas pa la nges pa yin no zhe na ma yin te/ de'i nus pa ma mthong ba'i phyir ro/ /de tsam las byung ba la gzhan rgyur brtags na ni ha cang thal bar 'gyur ro//'dus byas pa zhes bya ba yang rnam par shes pa'i rgyur rung ba'i rnam par shes pa snga ma nyid yin par kho bos rtogs te/ nang gi byed pa nyid las byung ba'i bde ba la sogs pa rnams rnam par shes pa goms pa g.yer ba dang gzhan pa nyid la sogs pa'i khyad par gyi rjes su byed pa'i phyir ro//rgyu mtshungs pa'i phyir bde ba la sogs pa'i khyad par med par thal bar 'gyur ro zhe na ma yin te/ de'i tshogs pa nyid kyi nang gi khyad par gyis byas pa nyid kyi phyir the tshom dang gtan la phebs pa la sogs pa bzhin no//gzhan dag bde ba la sogs pa ni nang ma yin la/ sems pa can yang ma yin gyi/ de'i bdag nyid du gyur pa'i sgra la sogs pa nyams su myong ba las de nyams su myong bar rtogs pa yin no/ /zhes zer ba de'i ltar na yang //phyi rol khyad par med na yang / /dga' dang yongs su gdung ba dang / /goms pas khyad par 'gyur ba'i phyir/ /bde sogs don gyi rang bzhin min/ /gang gi phyir gal te bde ba la sogs pa sgra la sogs pa'i bdag nyid yin na khyad par med pa la goms pa'i khyad par las dga' ba dang yongs su gdung ba'i khyad par du mi 'gyur te/sngon po la sogs pa'i snang ba'i khyad par bzhin no/ /de'i khyad par la mi ltos par goms pa'i khyad par dang rjes su 'brel ba de dag ni blo nyid yin te/ shes rab la sogs pa bzhin no//myong phyir sems pa de'i rang bzhin/ /ma yin myong ba min phyir ro/ /bde ba la sogs pa 'di dag ni sems pa can yang yin te/ myong bar bya ba yang yin pa'i phyir ro/ /gang gi phyir gang zhig yul gang gi rnam pa myong ba ma yin pa de ni de'i myong bar byed pa ma yin te/phan tshun rang bzhin med pa'i bde ba la sogs pa myong ba med pa bzhin no/ /'di 'di'i myong bar byed pa yin no zhes bya ba'i 'brel pa'i rgyu mtshan ni mngon par gsal ba yin pa'i phyir ro/ / dbang po la sogs pa yang thal bar 'gyur bas de myong ba'i mtshan nyid ni 'dra ba nyid yin no/ /sngar de'i bdag nyid ma yin na ni de phyis kyang de'i bdag nyid nyams pa med pa'i phyir de dang 'dra ba yang sems la ci ltar 'gyur zhe na/ 'di ni 'di'i nyes pa gzhan yin te/ 'dra ba med par ni myong ba ma yin no/ /gang gi phyir rig pa yod pa nyid ni de'i myong bar rigs pa ma yin te/ thams cad la khyad par med pas na thams cad rig par thal bar 'gyur ba'i phyir ro/ /de la 'dra ba yod na ni 'dra bar byed pa la sbyor ba yin no/ / sim par myong ba gang yin pa 'di nyid kyang kho bo cag gi bde ba yin pa'i phyir bde ba la sogs pa ni sems pa can yin par grub bo/ /yul dang 'dra ba yin pa'i phyir myong ba de'i bdag nyid yin na bde ba la sogs pa myong ba ma yin par 'gyur ro zhe na/ ma yin te/khyed kyi phyogs la yang bde ba la sogs pa myong ba ni yod pa de yin no zhes bstan pa'i don du bkod pa yin no/ /de la yang dga' ba dang yongs su gdung bar gcig tu nang na nyams su myong ba nyid du mthong ngo / /'di'i bdag nyid 'di 'jog par byed pa gzhan yin par ni rigs pa ma yin te/de khyad par med kyang rang bzhin dang goms pa'i khyad par las de'i bdag nyid khyad par du grub pa'i phyir ro/ /khyad par dang ldan pa ni blo yin gyi myong ba ni ma yin no zhe na/ blo zhes bya ba 'di ci zhig /zhen pa'o//myong ba zhes bya ba 'di ci zhig /nyams su myong ba'o/ /'di gnyis la khyad par ci zhig yod/ yul gyi rnam pa can gyi don ni myong ba med pa yin la/ gzhan ni myong ba yin no/ /myong ba med pa'i 'dra ba blo'i mtshan nyid yin na ni 'dra ba gzhan yang der 'gyur ro//khyad par yod na yang brjod dgos so/ /nang gi byed pa nyid la sogs pa yang de'i rgyu mtshan can yin pa'am/ rtogs pa'i yan lag ma yin pa'i phyir bsgrags par bya ba ma yin te/ rnam pa de lta bu'i shin tu dang ba la sogs pa'i khyad par gzhan la yod pa'i phyir ro//yul rnam par 'jog pa yang myong bar mthar thug pa'i phyir sems pa med pa des don rnam par 'jog par ji ltar 'gyur te/ ha cang thal bar 'gyur ba'i phyir ro/ /sgra la sogs pa'i bde ba khyad par med kyang /blo'i bde ba khyad par can yin no zhes bya ba yang tshig tsam yin te/ 'di dag gcig la cig car 'gal ba'i phyir ro/ /de'i phyir sems pa yod pa las gzhan khyad par can gyi blo ni yod pa ma yin no/ /de yi rang bzhin las ldog pa'i/ / blo ni rtogs pa med phyir ro/ /'di ni dga' ba dang zhum pa la sogs pa rnam par 'gyur / rnam pa du mar gcig tu myong ba nyid yin par mthong ste/ de la ming ni ji ltar 'dod par byed la rag go/ /myong ba ni mngon sum ma yin la blo'i rnam par 'gyur ba ni mngon sum yin no zhe na/yul la longs spyod pa ni mngon sum yin te/ de mngon sum ma yin na gzhan gyi mngon sum bzhin du thams cad mngon sum yin par thal bar 'gyur ro/ /yul yod pa las yul la longs spyod par yang 'gyur ro/ /de'i longs spyod pa ni mngon sum ma yin pas khyad par ma grub pa'i phyir/yod kyang med pa dang khyad par med pa'i phyir ro/ /rtags can gyi nye bar longs spyod pa yang nye bar longs spyod pa ma yin pa'i phyir te/ gzhan gyis longs spyod pa bzhin no/ /rtags ma grub pa'i phyir de las kyang mi 'grub pa nyid de/sngar ji skad bshad pa bzhin no/ /de lta na yang yul dmigs pa mngon sum yin pa na tha snyad rdzogs pa'i phyir zhes pa yod pa gzhan ni don med do/ /de yang rang bzhin gcig nyid du mthong ba'i phyir blo gzhan la nyams su myong ba yang gzhan pa ni ma yin no //lcags gong dang ni me bzhin du/ /'dres pas rnam dbyer med ce na/ /sems pa dang ni zhen pa dag tha dad kyang 'dres pas rnam par bslad pa la bye brag tu rtogs par mi 'gyur te/lcags kyi gong bu dang me bzhin te/ de'i gzugs dang reg pa ni nges pa'i phyir ro zhe na/ de ltar yin na dngos kun la/ /tha dad tha dad med gzhag nyams/ /don dmigs pa thams cad la 'dres par dogs par gcig tu nges pa med pa'i phyir dang / bde ba dang sngon po la sogs pa rnam pa tha dad par dmigs pa dag kyang tha dad pa ma yin pa'i phyir/e ma'o tha dad pa dang tha dad pa ma yin pa de dag rgyu ci la brten nas rnam par 'jog /tha dad med rig gcig yin na/ /de ltar gang yin de tha dad/ /'grub par 'gyur de sgrub byed min //tha dad sgrub byed 'grub mi 'gyur/ /dkar sdug la sogs tha dad snang / /tha dad ma yin blo myong ni/ /tha dad med snang tha dad na/ /tha dad tha dad med rten cing / /zhes bya ba ni bsdu ba'i tshigs su bcad pa dag go/ /lcags kyi gong bu la yang me dang 'brel ba las de ltar skyes pa'i don gcig nyid mthong ba yin gyi/rang bzhin tha dad pa'i rdzas dag 'dres pa'i phyir rnam par ma phyed pa ni ma yin no/ /yang rdzas de'i rgyun rnam par gnas pa'i rgyu rgyun chad pa'i phyir de ldog cing de'i nye bar len pa la ltos pa can gyi grang ba'i reg pa la sogs pa rnams las kyang rdzas gzhan skye ba yin te/de'i phyir bde ba la sogs pa nang yin zhing myong ba yang yin no/ /'jigs sogs bzhin du bsgoms pa yi / /stobs kyis gsal bar snang gyur pa'i/ /shes gang slu ba can min pa//rtog med de ni mngon sum mo/ /thos pa las byung ba'i shes pas gzung ba nges pa'i don rigs pa sems las byung bas rnam par gzhag nas sgom par byed pa'i rnal 'byor pa rnams kyis de rdzogs pa na/ 'jigs pa la sogs pa bzhin du gsal bar snang zhing rnam par rtog pa med pa phyin ci ma log pa'i yul can gang yin pa de yang mngon sum gyi tshad ma yin no//'phags pa'i bden pa mthong ba bzhin te/ ji ltar kho bos tshad ma rnam 'grel du gtan la phab pa bzhin no/ /'dod 'jigs mya ngan gyis brlams dang //chom rkun rmi sogs kyis bslad pas/ /yang dag min pa'ang mdun na ni/ /gnas pa bzhin du mthong 'gyur te/ /bslad pa ji bzhin gus pa ni/ /sgrub pa rab tu mthong phyir ro/ /lkog gyur rtogs pa'i 'du shes la//de lta'i 'jug pa ma mthong phyir/ /de phyir yang dag yang dag min/ /gang gang shin tu bsgoms gyur pa/ /sgom pa yongs su rdzogs pa na/ /de gsal mi rtogs blo 'bras bu/ /zhes bya ba ni bar skabs kyi tshigs su bcad pa'o//'di ltar mi sdug pa dang zad par sa la sogs pa yang dag pa ma yin pa'i yul can la yang bsgoms pa'i stobs kyis gsal bar snang ba dang rnam par rtog pa med par grub par 'dod pa yin no/ /bsgoms pa'i stobs kyis gsal bar snang ba yin du zin kyang rtog pa med par ji ltar 'gyur zhe na/gang gi phyir/ rnam rtog rjes su 'brel ba la/ /don gsal snang ba yod ma yin/ /rnam par bslad pa'i blo yang rung ste brjod pa dang 'dres pa'i shes pa thams cad la ni don gsal ba nyid ldog pa'i phyir ro//des na rnam par rtog pa can 'di ni gsal bar snang bar 'os pa ma yin no/ /'di ltar/ rmi lam na yang dran pa ste / /de 'dra'i don ldan mi dran par / /gnyid kyis bslad pa rnams la yang nyams su myong ba dran pa'i rnam pa can gyi rnam par rtog pa ni 'byung la/de dag de ltar snang ba can du ni dran pa med do/ /de'i phyir bslad pa'am gzhan gyis kyang rnam par rtog pa ni gsal bar byed pa ma yin gyi/ gsal bar snang ba ni rnam par rtog pa med pa nyid yin no//'o na ni rnam par rtog pa med pa'i phyir gsal bar snang ba'i rmi lam gyi shes pa mngon sum du 'gyur ro zhe na ma yin te/ ma 'khrul pa zhes bstan pa'i phyir ro/ /de nyid kyi phyir/rnam rtog dngos mi snang phyir dang / /nye bar bslad pa slu ba'i phyir/ mngon sum ltar snang / rnam pa gnyis su brjod do/ /gang gi phyir mngon sum ni dngos po snang ba yin te/ de med na de'i snang ba nyams pa'i phyir ro/ / zhes kyang brjod zin to/ /rnam par rtog pa ni de lta ma yin te/ de'i snang ba dngos po dang mthun pa ma yin pa'i phyir ro/ /de'i phyir mngon sum ltar snang ba'o/ /nye bar bslad pa yang ste/ dbang skyes kyang / gzhan las des khyad med phyir ro//nye bar bslad pa gang yin pa 'ga' zhig ni dbang po las skyes pa yang yin te/ de las gzhan pa'i dbang po las skyes pa dang khyad par med pa'i phyir ro/ /'di yang slu ba'i phyir dngos po dang mthun par snang ba ma yin pas mngon sum ltar snang ba'o//'dis ni yid kyi rnam par bslad pa yang bshad pa yin no/ /kha cig zla ba gnyis la sogs par 'khrul pa ni dbang po las skyes pa ma yin pa nyid do zhes zer ro/ /de ni ma yin te/ dbang po las byung ba ni yod pa dang med pa'i rjes su byed pa de nyid kyi mtshan nyid du gnas pa'i phyir la/de ni 'di la yang mtshungs pa'i phyir dang / dbang po gyur na 'gyur ba'i yang phyir te/ rten du 'jog pa'i rgyu mtshan ni 'di tsam yin pa'i phyir ro/ /yid las skyes pa'i 'khrul pa yin na sbrul sogs pa'i 'khrul pa ltar dbang po'i rnam par 'gyur ba yod kyang ldog par thal ba'i phyir dang /de bzhin du dbang po'i rnam par 'gyur ba yod kyang ldog par thal ba'i phyir ro/ /de'i phyir 'khrul pa 'di ni dbang po las skyes kyang mngon sum ma yin no//de nyid kyi phyir dmigs kyis bsal ba dang bcas par bstan pa'i don du'o zhes bya bas rnam par rtog pa'i sde tshan las logs shig tu rnam par bcad de/ rab rib kyis mtshon pa'i bslad pa mngon sum ltar snang bar gsungs so//gzhan du yang mig la sogs pa'i rdul phra rab rnams zla ba gnyis dang sngon po la sogs par snang ba'i rnam par shes pa'i rgyu nyid du gsungs pa'i phyir ro/ /yang tshad ma 'di'i 'bras bu gang yin/ gzhal bya rtogs pa'o/ /de ni shes pa yin pa de yang 'bras bu yin pa'i phyir/da ni tshad ma gang zhig yin/ /gang las bar chad med par gzhal bya rtogs pa 'di'i de nyid 'grub pa'o/ /de la 'di'i don dang 'brel byed pa/ /don gyi rang bzhin min pa med/ /de phyir gzhal bya rtogs pa yis //tshad ma gzhal bya'i rang bzhin nyid/ /gang gi phyir bsgrub par bya ba sgrub par byed pa yin pa'i phyir thams cad bya ba thams cad kyi sgrub par byed pa ni ma yin gyi/ 'on kyang gang las gang 'grub pa'o/ /de la nyams su myong ba tsam du las thams cad la 'dra ba'i bdag nyid kyi shes pa ni gang gis 'di ni 'di'o zhes las so so las rnam par 'byed pa'i de'i bdag nyid du 'gyur bar bya dgos so//de'i bdag nyid ma yin pa yang dbang po dang don dang phrad pa la sogs pa rgyu rnams la bye brag yod du zin kyang las kyi bye brag la bdag nyid tha dad pa med pa'i shes pa bye brag tu nges par byed pa po ni ma yin te/byed pa'i de nyid ni bsgrub par bya ba'i rgyu mtshan can yin pa'i phyir ro/ /de khyad par med na yang de'i khyad par yang mi 'grub bo//yod kyang de'i yan lag ma yin pas de'i byed pa ma yin pa'i phyir ro/ /de'i phyir 'di'i bdag nyid kyi bye brag gang las 'di'i rtogs pa ni 'di yin no zhes 'di'i las la nges pa 'dir 'gyur ba de ni sgrub par byed pa yin no//shes pa'i don dang 'brel ba 'di don dang 'dra ba las gzhan la ni srid pa ma yin no/ /dbang po la sogs pa gsal ba dang mi gsal ba nyid la sogs pa'i rang gi bye brag gis bye brag tu byed pa po yin yang de ltar don dang 'brel bar byed pa ni ma yin pa'i phyir te/de la nye ba'i rgyu med pa'i phyir ro/ /don gyis byas pa'i nyams su myang ba'i bye brag gang las rtogs pa 'dir 'gyur ba yin gyi/ don dang 'dra ba las ni ma yin no zhe na/ da ni yod pa'i rang bzhin ji ltar mi ston/de ni 'di'o zhes bstan par nus pa ma yin no zhe na/ 'di'i bdag nyid nges par rtogs pa med pas 'di ni 'di'i yin gyi 'di'i ma yin no zhes dngos po rnam par 'jog par byed pa ni legs par rnam par gzhag pa yin no//de'i phyir gzhal bya rtogs pa yi/ /sgrub byed gzhal bya'i rang bzhin nyid/ /sgrub par byed pa gzhan yin na/ /de yi las dang 'brel mi 'grub/ /de yang de yi bdag nyid yin/ /des na 'bras bu don gzhan min/ / de yi bdag nyid 'dzin de ni/ /don rtogs pa yi bdag nyid kyi/ /byed pas rang gi las la ni/ /byed dang bcas pa lta bur snang / /rang nyid byed po min na yang / /de yi dbang gis der gzhag phyir/ /zhes bya ba ni bar skabs kyi tshigs su bcad pa'o//'dis ni dbang po dang phrad pa dang / don la lta ba dang / khyad par gyi shes pa yang spangs pa yin no/ /de las las dang 'brel ba mi 'grub pa'i phyir ro/ /bar du ma chod pa ma yin pa'i phyir/ byed pa po khyad par can du ma grub pa'i phyir ro//byed pa po thams cad bsgrub par bya ba la nye bar sbyor yang tha ma'i bye brag tu byed pa po 'di nyid sgrub par byed pa dam pa yin pa'i phyir ro/ /dbang po la sogs pa yod kyang yul so so la bye brag med pa na 'di'i bye brag tu byed pa po ni byed pa po yin no//dbang po ni bye brag tu byed pa yin te/ rnam par shes pa thams cad kyi rgyu yin pa'i phyir ro/ /don la lta ba yang ma yin te/ de'i rang bzhin ma yin te de'i don la lta de nyid ma grub pa'i phyir ro/ /de bzhin du khyad par gyi shes pa yang yul gyi khyad par du ma byas na khyad par gyi shes pa dang khyad par med pa'i phyir rnam par gzhag pa mi 'grub pa'i phyir dang /bsgrub par bya ba dang sgrub par byed pa dag yul tha dad pa 'gal ba'i yang phyir ro/ /yul tha dad pa med pa nyid yin na ni gnyis dag don med do//rgyu tha dad pa med pa dag ni rim gyis 'byung ba bkag pa yang yin no/ /cig car 'byung ba la ni/ bsgrub par bya ba dang sgrub par byed pa nyid yod pa ma yin no/ /shes pa'i cha dag ni rnam par gzhag pa la brten pa'i phyir bsgrub par bya ba dang sgrub par byed pa'i dngos po yin no//dngos po tha dad pa med pa'i phyir bsgrub par bya ba dang sgrub par byed pa dag gcig pas 'gal lo zhe na/ ma yin te chos tha dad pa khas blangs pa'i phyir ro//tha snyad 'di dngos po la gnas pa ma yin te/ dngos po tha dad pa med kyang nus pa'i bye brag gis rnam par gzhag pa tha dad mthong ba'i phyir ro/ /phrad pa yang tshad ma yin te/ bdag nyid thams cad kyi phrad kyang chos 'ga' zhig kho na rtogs pa'i phyir ro//de khyad par med na yang khyad par 'di ni blo'i snang bas byas pa'i phyir de kho na tshad mar rigs so/ /de nas gang tshad ma'i 'bras bu don rig pa 'di gang zhig /mngon sum du gyur pa'i rig pa gang yin pa 'di nyid do/ /myong ba yod pa 'di'i don de rig pa yin par gang gis skyes pa dang 'dra ba dag gis so//'o na ni yul mtshungs pa'i shes pa de ma thag yul du 'gyur ro/ /'o na da 'dis gang zhig nyams su myong / kho bo cag kyang tshul 'di nyid rjes su rtogs par 'dod pa ma yin nam/'di bltas pa'am mnyan no zhes mthong ba'am thos pa dag las gang la nges pa'i shes par 'gyur ba de dag ni de'i nyams su myong ba yin no zhe na/ ji ltar de de'i mthong ba yin zhes de dag gi nye ba de nyid dpyod pa ma yin nam/lta ba po'i nges pa 'di ni de dag gi 'brel ba la brten nas 'gyur ba yin te/ de med na ni der mi 'gyur ro/ /rnam par shes pa yul dang 'dra ba yang ma yin te/ de la snang ba rags pa'i rnam pa ni rdul phra rab so so ba rnams la med pa'i phyir ro//shes pa la gnas pa 'di yang gcig yin pa'i phyir/ rang bzhin mang po'i tshogs pa rnams la yang de ltar snang ba yin no zhes bya bar yang rigs pa ma yin te/ rang bzhin gcig ni du ma dang 'gal ba'i phyir ro/ /mang po rnams la yang rnam pa de lta bu yod pa ma yin pa'i phyir de dag 'dra ba ma yin no//yul rags pa gcig de ltar snang ba yang ma yin te/ lag pa la sogs pa gcig g.yo na thams cad g.yo bar 'gyur ro/ /mi g.yo na yang g.yo ba dang mi g.yo ba dag so sor grub par thal bar 'gyur te/ras dang chu bzhin no/ /gcig bsgribs na yang thams cad bsgribs par thal te/ tha dad med pa'i phyir ro/ /yang na ni 'ga' yang ma bsgribs pa'i phyir ma tshang ba med par mthong bar 'gyur ro/ /yan lag bsgribs kyi yan lag can ni ma yin no zhe na/phyed bsgribs kyang ma bsgribs pa'i phyir 'di snga ma kho na bzhin du mthong bar thal lo/ /yan lag gi sgo nas de mthong ba'i phyir yan lag ma mthong ba la de rtogs par mi 'gyur ro zhe na/ ma yin te/ tha dad pa med pas rnam pa thams cad du mi rtogs par thal ba'i phyir ro//yan lag thams cad kyang cig car mthong bar mi nus pa'i phyir thams cad kyi tshe 'di mi mthong bar thal lo/ /yan lag cung zad gcig mthong ba yin na ni yan lag cung zad gcig mthong ba yang de bzhin du rangs pa mthong bar 'gyur ro//gcig kha bsgyur na yang thams cad kha bsgyur ba'am ma bsgyur bar rtogs par 'gyur ro/ /yan lag kha bsgyur na yang yan lag can kha ma bsgyur ba'i phyir/ bsgyur ba dang ma bsgyur bar snang bar 'gyur ro//de'i phyir gang zhig shes pa la 'dra bar byed pa'i don gcig pu ni 'ga' yang yod pa ma yin no/ /de nyid kyi phyir/ blo yis nyams myong bya gzhan med/ /de yi myong ba gzhan yod min/ /gzung dang 'dzin pa med pa'i phyir//de ni de ltar rang nyid bsal/ /yul gyi mtshan nyid bkag pa'i phyir/ /'ga' zhig kyang nyams su myong ba ma yin la/ 'di'i yang 'ga' zhig ma yin te/ de la yang gzung ba dang 'dzin pa'i mtshan nyid med pa'i phyir ro/ / de'i phyir nyams su myong ba ni blo'i bdag nyid kho na yin la/ de yang gzhan 'ga' zhig ni ma yin no/ /'di'i mngon sum du so sor rig par bya ba nyid kyang de'i bdag nyid kho na'o/ /de ni de'i bdag nyid yin pa'i phyir/ rang nyid rab tu gsal ba yin pa des na bdag nyid gsal bar byed pa zhes kyang brjod de/gsal ba bzhin no/ /sngon po la sogs pa nyams su myong ba zhes bya ba yang de'i rang gi ngo bo nyid nyams su myong ba nyid yin no/ /rig bya rig byed rnam pa med/ /skra sogs shes pa'i tha dad bzhin//gang tshe gzung 'dzin rnam phye ba'i/ /mtshan nyid rnam par bslad pa can/ /ji ltar 'khrul pas mthong gyur pa/ /de ltar 'di ni gzhag byas pa/ /de tshe gzung dang 'dzin pa yi/ /mtshan nyid can la brtsad bya min/ / zhes bya ba ni bar skabs kyi tshigs su bcad pa'o/ /de tshe gzhan rig med pa'i phyir/ /rang nyid rig pa 'bras bur 'dod / /gang dag gi blo nyid gzung ba dang 'dzin pa'i rnam pa nye bar ston par skye ba de dag la ni rig par bya ba gzhan med pa'i phyir/ rang rig pa 'bras bu yin te/de'i rtogs pa ni de'i ngo bo yin pa'i phyir ro/ /gang gi phyir gal te nyams su myong ba de 'dod pa'i rnam pa'am mi 'dod pa'i rnam par gyur na / 'dod pa dang mi 'dod pa'i yul so sor rig par 'gyur ba yin no//phyi rol gyi don yod kyang rang rig pa ji lta ba bzhin don 'grub pa'i phyir de nyid 'bras bur rigs so/ /don gyi ngo bo nyid ji lta ba bzhin du rnam par 'jog pa ni ma yin te/ shes pa thams cad rnam pa gcig tu thal ba'i phyir ro/ /rnam pa ni du mar rnam par rig pa ste/gang gi phyir rang bzhin gcig nyid gcig gi yid du 'ong la gzhan gyi ni yid du mi 'ong bar mthong ba'i phyir ro/ /'dod pa dang mi 'dod par snang ba ni rtog pa yin gyi dbang po'i blo ni ma yin no zhe na/ ma yin te/ de la yang 'chi ltas la sogs tshe mtshams sbyor ba med par mthong ba'i phyir dang /gzhan la yang tha dad pa med pa'i sgra dang dri dang ro la sogs pa'i khyad par gyis srog chags kyi bye brag rnams kyis dbang po nyid kyi bde ba dang mi bde ba bskyed pa'i phyir ro/ /de'i phyir don rtogs pa ni rang rig pa kho na'i rang bzhin no//'di'i sgrub par byed pa ni yul gyi rnam pa nyid yin te/ rnam pa ji lta ba bzhin du 'di snang ba'i phyir ro/ /don gnas pa ni rang rig pa'i rang bzhin yin pa nyid kyi phyir rang rig pa yin yang 'bras bu las 'di ni don rig pa yin par blta'o//de nyid kyi phyir tshad ma dang 'bras bu dang / yul tha dad pa yang ma yin no/ /rang bzhin sems pa yin na ni/ /don rig de yi bdag nyid phyir/ /rang nyid rig pa 'bras bur bshad/ /de dang 'dra ba'am gzhan 'dra'ang rung //shes pa de ltar snang ba yi/ /rgyu ni don yang yin pas na/ /don ni gzhal bya nyid du 'dod/ /ji ltar rnam pa 'ga' zhig ltar/ /don dngos med par snang can de / /ji ltar don 'dzin zhe na bden/ /ngas kyang de 'dra mi shes so//zhes bya ba ni bar skabs kyi tshigs su bcad pa'o/ /phyi rol gyi don med na 'o na ji ltar tshad ma dang gzhal bya dang 'bras bu rnam par gnas she na/ 'di la rnam par gzhag pa 'di ni ji ltar snang ba bzhin yin gyi de kho na nyid ji lta ba bzhin du ni ma yin no//zhes bshad zin to/ /yul gyi rnam pa 'ga' zhig dang nang du yongs su gcod pa ni rang rig pa'i rang bzhin du skye ba na mtshon par 'gyur ro/ /de la tshad ma dang gzhal bya dang 'bras bu rnam par gzhag pa 'di ni ji ltar mtshon pa kho na ltar yin no//blo bdag rnam par dbyer med kyang / /mthong ba phyin ci log rnams kyis/ /gzung ba 'dzin pa rig pa rnams/ /tha dad bcas bzhin rtogs 'gyur te/ /dper na dbang po sngags sogs kyis/ /bslad pa rnams la 'jim dum sogs/ / de yi gzugs dang bral na yang / /rnam pa gzhan du snang ba bzhin/ /mig ma bslad pa rnams kyis ni/ /de dag de ltar ma mthong phyir/ /ji ltar thag ring mya ngam na/ /chung ngu chen por snang ba bzhin/ /gzung ba 'dzin pa rig pa rnams/ /yod pa min yang gzhal bya dang //'jal byed 'bras bur gnas pa 'di/ /ji ltar snang ba bzhin du byas/ /gzhan du gcig gi ngo bo la/ /rang bzhin du mar snang ba yi/ /rnam pa ji ltar bden 'gyur te/ /gcig pa nyid de nyams phyir dang / /gzhan gyis gzhan nyid nyams phyir ro//dngos mthong med phyir gcig ma yin/ /blo dngos tha dad mi mthong bas/ /tha dad med par nges par 'gyur/ /gang gis dngos po rnam dpyad na/ /de nyid du ni de dngos med/ /gang gi phyir na de dag la/ /gcig dang du ma'i rang bzhin med//chos mthun pa ni mthong ba las/ /de bdag min la de bdag tu/ /zhen pa yis ni 'jig rten na/ /'khrul skye 'dir ni de med de/ /'gro ba 'di la de'i bdag nyid/ /gcig kyang mthong ba med phyir ro/ /de yang yod na nang gi ni/ /bslad pa las byung gang yin de//nyes pas bskyed phyir rang bzhin gyis / /phyin ci log tu snang 'gyur te/ /chos mthun mthong sogs can nyid la/ /ltos med rab rib la sogs bzhin/ /zhes bya ba ni bar skabs kyi tshigs su bcad pa'o/ /'di rnam par rig pa tsam nyid yin na ni tshad ma la sogs pa'i rnam par gzhag pa ci ltar snang ba bzhin du 'gyur na de nyid ci ltar grub ce na/'di la gzung ba dang 'dzin pa'i mtshan nyid dang mi ldan pa'i phyir ro zhes bshad zin to/ /gzhan yang / lhan cig dmigs pa nges pa'i phyir/ /sngo dang de blo gzhan ma yin//gang gi phyir tha dad par snang ba nyid yin yang sngon po ni nyams su myong ba las don gzhan pa'i rang bzhin nyid ma yin te/ de dag lhan cig dmigs pa nges pa'i phyir/ zla ba gnyis la sogs pa bzhin no/ /'di dag las rnam pa gcig ma dmigs na gzhan dmigs pa med do//rang bzhin tha dad pa la ni 'di 'thad pa ma yin te/ 'brel ba'i rgyu mtshan med pa'i phyir ro/ /gzugs dang snang ba dag la ni de'i shes pa bskyed par rung ba'i mtshan nyid dam/ dbang po rung bar bskyed pa'i mtshan nyid kyi 'brel ba yod pa'i phyir snang ba med par gzugs dmigs par mi 'gyur te/'bras bu rgyu las 'khrul pa med pa'i phyir ro/ /snang ba bar chad med pa'i gzugs dang lhan cig gzung ba'i mtshan nyid yin pa'i phyir gzung bar 'gyur ro/ /yang na snang ba 'ga' zhig kyang mthong ba'i phyir dang / snang ba med pa'i gzugs kyang srog chags kyi bye brag 'ga' zhig gis mthong ba yin pa'i phyir de dag la ni lhan cig dmigs pa nges pa yod pa ma yin gyi sngon po'i rnam pa dang rig pa dag nges pa nyid do//tha dad pa la ni de rig pa ma yin te/ sngon po dang ser po bzhin no/ /yul ni rnam par shes pa'i rgyur nye bar gnas pa'i phyir/ sngar dmigs la rig pa ni phyis yin no zhe na/dmigs pa mngon sum ma yin na/ /de mthong rab tu 'grub mi 'gyur/ /yul yod pas ni yul dmigs pa ma yin gyi/ 'on kyang de'i dmigs pa yod pas so/ /de yang tshad ma dang mi ldan pas yod pa'i rgyu mtshan can gyi tha snyad 'jug par mi 'gyur ro//de rab tu ma grub na don rab tu mi 'grub pa'i phyir/ thams cad nub par 'gyur ro/ /yod kyang ma grub pa la yod pa'i tha snyad mi dmigs pa'i phyir ro/ /de'i phyir rig pa 'ga' yang mi dmigs na rig par byed pa zhes bya ba cung zad yod pa ma yin no/ /rig pa gzhan gyi dmigs so zhe na/re zhig yul de rang dmigs pa'i tshe na ni sgrub par ma grub pas ma grub la/ gzhan dmigs pa'i dus su ni grub pa'i phyir dmigs kyang de'i tshe ni ma grub la/ phyin ci log tu gzhan gyi tshe na ni grub po zhes legs par tha snyad du byas so/ /rig pa yang gzhan gyis dmigs la de yang ma grub na ni rig pa'i sgrub par byed pa ma yin pa'i phyir dmigs pa gzhan gyi rjes su 'brang ngo //de'i phyir re zhig dmigs pa mthar thug pa la sdod pa ni skyes bu 'dis don 'ga' yang rtogs par mi 'gyur te/ gcig ma grub na thams cad mi 'grub pa'i phyir ro//dmigs pa thams cad kyi skye ba la yang mthar thug pa med pa'i phyir 'gro ba long ba dang lkugs par 'gyur ro/ /'ga' zhig tu mthar thug pa yin na ni de rang gi bdag nyid dang yul gyi rnam pa cig car dmigs pa'i phyir gzhan yang de bzhin du 'gyur te/bye brag gi rgyu med pa'i phyir ro/ /de'i phyir lhan cig dmigs pa nges pa 'grub ste/ gcig gi bya ba la rig pa mi rigs pa'i phyir te/ de ni khyad par med pa'i phyir ro/ /rig pa zhes bya ba yang de'i bdag nyid yin pa'i phyir de ltar gsal ba'o/ /de gzhan 'ga' zhig ni ma yin te/bdag nyid rig pa bzhin no/ /de'i phyir yang de ni don gzhan du rig pa ma yin te / sngon po la sogs pa myong ba las don gzhan ma yin na ni de'i bdag nyid du gyur pa de ltar gsal ba'i phyir sngon po la sogs pa myong bar 'gyur ro/ /de'i bdag nyid yin pa'i phyir de ltar snang ba na yang rang dang gzhan gsal bar byed par 'gyur te/gsal ba bzhin no/ /de'i phyir 'dzin pa'i rnam pa rang rig pa'i sgrub par byed pa 'dod de/ de las de'i dngos po rnam par 'jog pa'i phyir ro/ /dper na 'dod chags sogs tshor bzhin/ /der bdag yul du bzhag pa na//gzhal bya 'jal byed 'bras gnas pa/ /'di ni kun la sbyar bar bya/ /de la'ang nyams myong bdag nyid phyir/ /de dag rang bdag myong bar rung / /de phyir rung nyid de tshad bdag /gzhal bya rang rig 'bras bu yin/ /'dzin pa yi ni rnam pa dang //bdag la rung bar brjod pa yis/ /yongs su gcod pa'i bdag nyid de/ /tshang ma rang bdag rig par brjod/ /ces bya ba ni bar skabs kyi tshigs su bcad pa'o/ /de phyir snang don blo de dag /phyi don yod kyang tha dad min/ /lhan cig dmigs pa dang rig pa dag gis phyi rol gyi don yod kyang sngon po la sogs pa snang ba dang de rig pa dag tha dad med par grub po//des na blo ni tshul gnyis pa/ de'i phyir yul dang shes pa'i rang bzhin dag gis blo tshul gnyis su grub pa yin no/ /gal te snang ba'i yul gyis rnam pa blo la tha mi dad na/de las tha dad pa yod do zhes bya ba gang las shes she na/ phyi rol ldog pa las grub 'gyur/ /nus pa'i rgyu gzhan yod kyang 'bras bu shes pa mi skye na rgyu gzhan ma tshang bar ston pa yin la de yang phyi'i don yin no/ /gal te 'dir 'ga' zhig nye bar len pa'i khyad par med pas 'bras bu ldog par mi smra na ni 'gyur ro//de yang shes pa thams cad kyi yul bzlog pa na bslad pa dang cig shos su ji ltar smra ste/ khyad par med pa'i phyir ro zhe na/ nye bar bslad pa'i bag chags mtshams sbyor ba med pa'i skyon gyis mi mkhas pas kyang tha snyad la yid brtan du med par mthong bas gcig ni tshad ma ma yin par brjod la/gzhan ni bag chags brtan pa'i phyir 'khor ba ji srid par mi 'bral bar rjes su 'brel pa ni tha snyad la mi slu ba la ltos nas 'dir tshad ma yin no/ /'di ni kun tu tha snyad pa'i tshad ma'i rang bzhin brjod pa yin no //'di la yang pha rol rmongs pas 'jig rten slu bar byed pa'i phyir ro/ /bsams pa las byung ba nyid kyi shes rab goms par byas pas rnam par 'khrul pas dben zhing dri ma med la ldog pa med pa'i don dam pa'i tshad ma mngon sum du byed do/ / de yang cha tsam bstan pa yin no/ /mngon sum gtan la dbab pa la 'jug pa ste le'u dang po'o// //rjes dpag rnam gnyis te/ rang gi don dang gzhan gyi don no/ /shes pa dang brjod pa'i rang bzhin yin pa'i phyir gzhan ma yin pa'i rtogs pa'i rgyu ma yin no//khyad par med pa'i phyir sgra logs shig tu mi brjod do zhe na/ ma yin te 'jug pa tha dad pa'i phyir ro/ /don ni rtags can go bar byed pa yin la/ de'i rtags 'di sgras yin no/ /ma yin te mtshan nyid gzhan brjod par byar med pa'i phyir te/gang 'ga' zhig tu mthong ba de gang dang 'brel ba de shes pa la de des de nyid du go bar byed pa yin no/ /zhes dngos po rtogs pa yin no/ /de ltar go bar byed pa'i mtshan nyid brjod pas rtogs par 'dod pa'i ngag gi tshul bstan par byas pa nyid de/gzhan du brjod na go bar byed pa'i chos ma bstan par 'gyur ba'i phyir ro/ /don gang ji ltar shes pa'i tshig shes pa de dag ni rtogs par bya ba'i phyir yang nye bar bstan pa gzhan la ltos pa ni ma yin no zhe na/ de ltar bden mod kyi 'on kyang 'di ni byis pas rtogs pa'i rgyur brtsams pa yin no//dngos po ji lta ba bzhin rtogs kyang chos ma khyab pa dang ldog pa dag gis smra ba mthong ste/ med na mi 'byung ba mi brjod pa'i phyir dang / nye bar rtogs pa dang / bsgrub par bya ba dang / de zlos pa'i tshig dag sbyor ba'i phyir ro//de la/ rang don ni/ tshul gsum rtags las don mthong yin/ mtshan nyid gsum pa'i rtags las rjes su dpag par bya ba rtogs pa gang yin pa de ni rang gi don gyi rjes su dpag pa yin no/ /'di'i 'bras ba'i rnam par rtog pa ni mngon sum bzhin du shes par bya'o//de ni de ma yin la der 'dzin phyir/ /'khrul kyang 'brel phyir tshad ma nyid/ /rang gi snang ba don med pa la don du mngon par zhen nas 'jug pa'i phyir 'khrul pa yin yang don dang 'brel ba de la mi 'khrul ba'i phyir tshad ma yin no//'dir ltar rang bzhin nam 'bras bu ni ngo bo rgyu med na med pa yin te/ tha mi dad pa'i phyir dang / bdag nyid grub pa yin pa'i phyir ro/ /de bzhin du de dag med na de las skyes pa'i shes pa'am/ de las byung ba'i ngo bo dang rgyu rtogs pa med do//de bzhin du snang ba'i dngos po yod na/ de las gzhan pa'i rgyu ma tshang ba med pa can gyi mthong ba ldog pa mi srid do/ /snang ba de nyid ni don dang ldan pa ma yin te/ de ni mngon sum gyis gzhan du mthong ba'i phyir ro//'di ltar dngos gang ji lta ba/ /de ni de 'dra'i rtags sems kyis/ /rgyu yin de las de lta yi/ /dngos las nges bskyed rtags can blo/ /de ltar rtags dang rtags can blo/ /brgyud pa yis ni dngos po dang / /'brel phyir der snang ba yis ni/ / stong yang slu byed nyid ma yin/ /de dngos slu byed nyid min yang / /de yi ngo bos stong de la/ /de yi ngo bo zhen pa'i phyir / /'khrul par rnam gzhag byas pa yin/ /nor bu sgron me'i 'od dag la/ /nor bu blo yis mngon rgyug pa/ /log pa'i shes par khyad med kyang / ji ltar don byed la khyad yod/ /de bzhin rjes dpag der snang dag /ji bzhin don can ma yin yang / /don byed pa dang rjes 'brel pas/ /tshad ma nyid du rnam par gzhag /ces bya ba ni bar skabs kyi tshigs su bcad pa'o/ /de nyid kyi phyir/ mngon sum dang rjes su dpag pa'i//tshad ma gnyi ga dngos po yi/ /yul can yin te/ dpyod pa ni don byed par rung ba'i yul can yin pa'i phyir ro / /rtog pa sngon du gtong ba cung zad yongs su rtog pa ni bde ba dang sdug bsngal gyi sgrub par byed pa shes nas ji ltar 'os pa sgrub par 'dod pas yin gyi zhen pas ni ma yin no//rjes su dpag pa'i snang ba de nyid ni don sgrub par byed pa ni ma yin no/ / don sgrub par byed pa'i dngos po 'gags kyang de ma 'gags pa'i phyir dang / de las kyang don cung zad 'grub pa med pa'i phyir ro/ /de nyid kyi phyir yod kyang spyi ni don ma yin no//de las dngos po'i rang bzhin la mi slu ba nyid ni 'di'i yang tshad ma yin no/ /de dang 'brel ba'i dngos po'i rtags la ltos pa'i yang phyir ro/ /slob dpon gyi ni snang ba tha dad pas/ /gcig la de mi 'thad pa'i phyir/ /don gyi dbye ba bshad pa yin/ /phan tshun rnam pa mi mthun pa de dag ni gcig par 'thad pa yin no//de'i phyir dmigs pa'i yul tha dad par tshad ma'i yul tha dad du bshad kyi tshad ma'i bya ba'i yul tha dad pa las ni ma yin no/ /tha dad ces bya ba yang 'dir tha mi dad pa yin pa bkag pa nyid du blta'i/ yul du ma nyid ni ma yin te/ mngon sum bzhin du de'i snang ba rang gi yul du 'dod pa'i rjes su 'gro ba dang ldog pa'i rjes su mi byed pa'i phyir dang /spyi yang dngos po las gzhan du brjod du med pa nyid kyi phyir rjes su dpag pa'i rnam par rtog pa ni yul med pa can yin pa'i phyir ro/ /gal te gnyis ka'i tshad ma'i yul dngos po yin na/da ni ji ltar rtags las spyi rtogs la/ /gzhan las ni rang gi mtshan nyid yin zhe na/ bshad pa/ de bzhin rang bzhin la ldog pa'i/ /dngos po tsam zhig rab sgrub phyir/ /rtags spyi'i yul can du bshad de/ /khyad par gnas pa med phyir ro/ /dgos pa gang dang ldan pa'i don shes par 'dod pas de las ldog pa las tha dad pa'i don tsam rtags kyis nye bar 'jog pa'i phyir spyi'i yul can du bshad de/de las tha dad pa gnas pa med pa'i phyir yin gyi/ dngos po yod pa bskal pa'i phyir ni ma yin no / /rtags rtogs pa yang de lta bu yin pa'i phyir dang /rjes su 'gro ba la ltos pa'i phyir ro/ /cig shos ni khyad par gzhan 'dzin pas dben pas na so sor gnas pa'i rang bzhin gyi rnam pa can yin pa'i phyir rang gi mtshan nyid kyi yul can yin te/ rang las don rtogs pa yin pa'i phyir ro/ /yan lag gzhan la rtogs pa ni de lta ma yin te/de la nus pa med pa'i phyir ro/ /don la mi slu bar ni gnyi ga yang mtshungs pa'i phyir tshad ma ni dngos po'i yul can nyid do/ /tshul gsum pa ni/ rjes dpag bya dang de mtshungs pa/ /yod dang med la med par ni/ /nges pa/ rjes su dbab par bya ba ni 'dir shes par 'dod pa'i bye brag dang ldan pa'i chos can de/ de la mngon sum mam rjes su dpag pas mthong ba'o/ /de bzhin du de dang mthun pa nyid la yang ngo / /chos can gyis khyad par du byas pa gzhan na yod par 'gal la/ khyad par du mi byed na yang rjes su dpag par bya ba'i chos ma yin no zhe na/ma yin te mi ldan pa rnam par gcod pas khyad par du byas pa'i phyir ro/ /chos kyi tshig phrad tha dad par/ /byed pas mi ldan pa dang ni/ /gzhan pa dag dang ldan pa dang / /gtam mi ldan nyid rnam gcod byed/ /khyad par khyad par can dag dang / / bya ba dang ni lhan cig brjod/ /de sbyar med kyang brjod 'dod las/ /de yi don ni rtogs par 'gyur/ /gang phyir ngag 'bras rnam gcod phyir/ /dper na nag pa 'phong skyen pa'am/ /srid sgrub 'phong skyen zhes bya'am/ /sngon po mtsho skyes 'gyur nyid bzhin/ /der yang zla po rnam gcod pa'i//don rnams la ni rtogs 'gyur te/ /de ltar grags dang nus pa dang / /sgra ni brjod 'dod rjes 'brang phyir/ /des na mi ldan rnam gcod pa / /chos can chos kyi khyad par yin/ /de yi khyad par can gyi chos/ /rjes 'gro med pa'i skyon rten min//zhes bya ba ni bar skabs kyi tshigs su bcad pa dag go/ /gzhan yang ldan pa rnam par gcod pas khyad par yin na gcig der 'gyur na/ gzhan de nyid ma yin par 'gyur la/ khyad par dang khyad par can dang 'brel pa'i tshig phrad dang yang khyad par med par 'gyur ro//'dis ni bsgrub par bya ba'i chos la yang khyad par dang khyad par can gyi dngos po nges par bya'o/ /des na khyad par yod kyang rjes su 'gro ba med pa ma yin no/ /de bzhin du spyi bsgrub par bya ba yin yang grub pa la sgrub pa nyid ni ma yin te/ de dang mi ldan pa rnam par bcad pa grub pa'i phyir ro//de dang mtshungs pa nyid la zhes nges gzung ba'i phyir chos can la med par 'gyur ro zhe na ma yin te/ gzhan dgag pa'i don gyi phyir ro/ /de la yod par grub pa sdud pa'i nges par gzung bas ni gzhan rnam par gcod pa yin te/ dper na/ dang po rang la bu gnyis skyes 'gyur te/ na ra dang ni sred med bu nyid do/ /zhes bya ba lta bu'o/ /bsgrub par bya ba dang rigs mthun pa la yod pa'i gtan tshigs de'i med pa la med pa la med pa nyid ni tshul gsum pa ste/ de yang nges pa yin no/tha mar smos pa'i nges pa nyid ni tshul gsum ga la blta'o //don gzhan dang rang bzhin dag rab tu skye ba dang de tsam dang rjes su 'brel ba grub na bltar rung ba'i yul can rgyu dang khyab par byed pa'i ngo bo mi dmigs pas 'grub par 'gyur gyi/ gzhan gyis ni ma yin no zhes bya ba'i don no//mi dmigs pa yang bzlog pa la mngon sum 'jug pa ldog pa nges pa yin no/ /de dang mthun pa nyid la yod pa zhes bya bas ldog pa 'grub mod kyi / med pa la med pa nyid brjod pa ni med pa kho na la med pa nyid yin gyi/ gzhan pa la yang ma yin la/ 'gal ba la yang ma yin no zhes nges par bya ba'i phyir yin no zhes zer ro/ /de la mi srid pa nyid kyi phyir chos gzhan la yod pa 'gog par dogs pa ni med do/ /'gal ba la 'gog pa yang de kho na la 'gog na ni skyon du 'gyur na/ gang gis de kho na las ldog pa'i phyir mes dro ba rtogs par mi 'gyur ba de dang mthun pa kho na la yod pa zhes bya bas 'gal ba kho na de dang mthun pa ma yin par ni mi 'gyur te/'on kyang de dang mthun pa las ldog pa yin no/ /des na 'di la skyon med pa'i phyir tshul gsum pa 'di mi brjod pa nyid du 'gyur ro//rjes su 'gro ba dang ldog pa dag las khyab pa nges pa dang ldan pa'i tshul gyis sbyar bas kyang don gyis go ba gnyis pa rtogs par byed pa yin no zhes sbyor ba bstan pa'i don du yin pa'i phyir na skyon med do/ /de'i phyir gcig kyang sbyor bar 'gyur ba yin no/ /gal te mnyan par byed pa nyid ldog pa yin yang go bar byed pa nyid ma yin no zhe na/ma yin te ldog pa med pa'i phyir ro/ /mnyan par bya ba nyid ni 'ga' las kyang ldog pa ma yin te/ the tshom sgrub par byed pa'i phyir ro/ /ldog pa dang ldan pa la ni the tshom med pa'i phyir te/byas pa nyid las mi rtag pa nyid bzhin no/ /dngos po'i chos dang dngos po thams cad las ldog pa ni 'gal ba'i phyir ro/ /des na yod par dogs pa nyid kyis the tshom du 'gyur ro/ /rjes su 'gro ba ma mthong ba'i phyir ldog pa dang ldan par bshad pa yin no//ldog pa'i rnam pa 'di lta bu ni go bar byed pa ma yin te/ go bar byed pa gang yin pa de ni brjod zin to / /de yang rjes su 'gro ba med pa bstan par mi nus te/ de'i ngo bo dang rgyu'i dngos po mthong ba sgrub par byed pa yin pa'i phyir ro/ /'o na rtags tshul gnyis par 'gyur ro zhe na ma yin te/rjes su 'gro ba dang ldog pa dag tshul tha dad pa'i phyir ro/ /de dag ni ngag gcig gis kyang bstan par nus pa'i phyir sbyor ba bsdus te brjod kyi/ tshul bsdus pa ni ma yin no/ /de skad du/ yang na don gyis go bas gang yang rung bas gnyis ka rab tu bstan pa'i phyir ro zhes bshad do//gzhan dag med pa la med pa nyid ni mi 'grub ste / med pa ni gzhi la sogs par mi 'thad pa'i phyir ro/ /zhe'o/ / re zhig phyugs dag kyang gang mi rig pa mthong ba de'i tshe de la mi spyod na 'di ni phyugs pas kyang phyugs yin no//chen po'i chen po la smod pa'i phyir na bdag nyid mi shes pa gzhan ci yod/ 'di ldog pa'i don ston par byed pa'i tshig 'di nyid kyis med pa la tha snyad mi 'thad par ston cing gzhan dag 'gog par byed pa'i phyir 'di ni gsal bar rgyal po'i chos lugs yin no//bdag nyid mi smra na ni gzhan rtogs par mi nus la/ smra na yang skyon 'di spang bar mi nus so/ /med pa la gtan tshigs mi 'gog na sgrub pa thob par 'gyur te/ de'i mtshan nyid ni dngos po med pa las ldog pa nyid yin pa'i phyir ro/ /med pa las ldog pa med do zhes ldog pa de nyid re zhig ji ltar 'dod/dngos yod med la'ang yod yin la/ /dngos po med pa yod min zhes/ /blun po yi ni spyod la ltos/ /gal te de las ldog med na/ /gtan tshigs 'jug par 'dod dam ci/ /de yang min na 'di nyid ni/ /dgag yin ldog pa ci ste 'gog /sgrub dang dgag pa ma gtogs pa//sgra las byung ba'i tha snyad gzhan/ /yod min de yang med pa la/ /med phyir 'di la mi smra 'thob/ /yod pa rnams la dgag pa med/ /de ni med pa la'ang yod pa min/ /rigs pa 'di yis 'gro ba la/ /dgag pa'i don ni med par 'gyur//gal te yul dus 'gog ce na/ /ji ltar de yod de ltar ni/ /mi 'gog ji ltar de med pa/ /de ltar yang ni 'gog mi 'gyur/ /de phyir dngos dngos med brten pa/ /phyi rol rten min sgra don la/ /brten nas 'dir ni sgrub pa dang / /dgag pa thams cad 'dod pa yin//de 'dra med kyang chos can de/ /de dag dang ni 'brel bar snang / /de yang sgra 'jug pa nyid phyir/ /yod ces tha snyad brten par 'dod/ /de lta min na don rnams kyis/ /chos gcig sgrub dang 'gog pa na/ /bdag nyid thams cad bsgrubs pa dang / / bkag 'gyur bdag tha dad med phyir/ /tha dad min na gzhan dang gzhan/ /bkag pa dang ni bsgrubs pa bzhin/ /bsgrubs pa dang ni bkag pa dag /chos can gcig la 'du mi 'gyur/ /sna tshogs chos kyi gzhir gyur pa/ /chos can gcig gis dbang byas te/ /gcig bsgrub pa na de rten dang //gzhan rnams btang snyoms lta bu dang / /'gog na de yid dben pa dang / /de las gzhan la ltos lta bur/ /med pa yi ni don can gyi/ /tha snyad ji ltar blos bstan pa/ /de bzhin nyid de ma brtags par/ /tha dad don brten khas len pas/ /thog med bag chags las byung ba//'jig rten don la gnod pa med/ /de 'bras can dang de 'bras med/ /de de las tha dad don gcig /tha dad rten can 'phel ba dang / /'grib pa lta bur byed pa yi/ /bslad pa de dang de dag gi/ /'brel pa 'ga' las de ldan nyid/ / min yang mthong bar sbyor des na/ /de dag bslad pa'ang shes ma yin/ /zhes bya ba ni bar skabs kyi tshigs su bcad pa dag go/ /mtshan nyid de dang ldan pa pa'i/ /gtan tshigs de ni mi dmigs dang / /bdag dang 'bras bu zhes bya gsum/ /kho na'o/ /rtags ni gsum ste//mi dmigs pa dang rang bzhin dang 'bras bu'o/ /dper na/ phyogs kyi khyad par 'ga' zhig na bum pa med de/ dmigs pa'i mtshan nyid kyi gyur pa mi dmigs pa'i phyir ro/ /gal te yod na dmigs pa'i yod pa can nyid du 'gyur gyis gzhan du ni ma yin no//shing sha pa yin pa'i phyir 'di ni shing ngo / /du ba las ni 'di na me yod do zhes bya ba lta bu'o/ /de la gnyis ni dngos po sgrub pa yin la gcig ni dgag pa'i gtan tshigs so/ /rang bzhin 'brel pa yod na ni don gyi 'khrul pa med de / de ni de'i bdag nyid yin pa'i phyir ro/ /de'i bdag nyid yin na bsgrub par bya ba dang /sgrub par byed pa khyad par med par 'gyur ro zhe na ma yin te/ chos kyi bye brag kun brtags pa'i phyir ro/ /de skad du yang rjes su dpag pa dang / rjes su dpag par bya ba'i tha snyad 'di thams cad ni blo la yod pa'i chos dang chos can gyi bye brag kho nas yin no zhes bshad do//chos dang chos can nyid du tha dad pa blos kun brtags pa yin gyi don kyang ni ma yin te/ blo'i bye brag rang dga' ba rnams ni don gyi rten ma yin pa'i phyir ro/ /de dag gis brtags pa'i yul gyi don go na ni mi 'thob pa kho nar 'gyur ro//gang phyir dngos kun rang bzhin gyis/ /rang rang ngo bo la gnas phyir/ /mthun phyogs gzhan gyi dngos dag las/ /ldog pa la ni brten pa can/ /de phyir gang dang gang las don/ /ldog pa de yi rgyu can gyi/ /rigs dbye de yi khyad par ni/ /rtogs gyur pa dag rab tu dbye//des na khyad par gang zhig chos/ /gang gis go bar gyur pa de/ /de las gzhan gyis nus ma yin/ /des na tha dad rnam par gnas/ /zhes bya ba ni bar skabs kyi tshigs su bcad pa dag go/ /'bras bu yang rang bzhin 'brel ba yin te/ de'i rang bzhin de las byung ba yin pa'i phyir ro/ /rjes su dpag par bya ba shes pa 'di gnyis ni dngos las ma skyes pa'i phyir der snang ba nyid ma yin yang de las skyes pa'i phyir der 'khrul pa med pa dag yin te/ des na tshad ma yin te mngon sum bzhin no/ /med par nges pa'i 'bras bu can ma dmigs med pa'i tha snyad 'jug pa'i 'bras bu can gyi mi dmigs pa ni de la mi 'khrul pa yin te/tha snyad grub pa la yul yod pa 'khrul pa med pa'i phyir ro/ /mi dmigs pa'i rtags kyis med pa bsgrub par bya ba yin na/ dmigs pa med pa yang mi dmigs pa gzhan gyis bsgrub par bya dgos pas thug pa med par 'gyur ba'i phyir/mi rtogs par 'gyur ro/ /ci ste dmigs pa med pa mi dmigs pa med par 'gyur na ni/ de bzhin du yod pa med par yang 'gyur bas mi dmigs pa don med do//ci ste gzhan dmigs pas mi dmigs pa 'grub pa'i phyir/ mngon sum gyis grub pa yin gyis mi dmigs pa ma yin no zhe na/ de bzhin du gzhan yod pas med pa ci ste mi 'grub/ gang gi tshe rnam pa 'di lta bu mi dmigs pa nyid med pa rnams kyi med pa yin pa de'i tshe yul grub pas yul can shes pa dang /sgra dang tha snyad dag rtogs pa'am sgrub par byed pa yin te/ yul rab tu bstan pas brda la 'jug pa'i phyir ro/ /dper na 'di ni ba lang yin te/ lkog shal la sogs pa 'dus pa'i bdag nyid yin pa'i phyir zhes bya ba lta bu'o//de lta yin dang dpe ma grub par rgol ba yang bsal ba yin te/ yul rtogs kyang yul can ma rtogs pa dag snang ba'i phyir ro/ /gal te dngos po log pa ni dngos po med pa yin la/ mi dmigs pa ni dmigs pa log pa yin na ji ltar dngos po med pa yin dmigs pa log pas dngos po med par yang ji ltar 'gyur te/'bras bu log kyang rgyu med par mi 'grub pa'i phyir ro zhe na/ de 'dra ba'i yod pa rnam par gzhag pa ni dmigs pa'i rgyu mtshan can yin pa dang / rgyu gzhan tshang ba na dmigs par rung ba'i rang bzhin yod pa ni de la mi 'khrul ba'i phyir dmigs pa ni yod pa yin par brjod do//tshogs pa yongs su 'gyur ba la ltos pa'i phyir khrul par 'gyur zhe na/ ma yin te/ 'bras bu'i dus na med par rtogs pa'i phyir te/ gzhan dmigs pa na de mi dmigs par grub pa'i phyir ro//mthu dang ldan pas byin gyis brlabs pa'i phyir yod kyang dmigs par mi 'gyur ro zhe na/ /ma yin te/ yul dang dbang po dag las gang yang rung ba zhig gam/ gnyi ga gzhan du 'gyur ba med par byin gyis brlabs pa nyid mi 'thad pa'i phyir ro//de 'dus byas na ni mi dmigs par 'gyur te/ de'i tshe yang rnam pa de lta bu'i dbang pos gzung bar bya ba'i med pa ni yod pa nyid do/ /de'i phyir shes pa dang 'drer rung ba nyid ni 'di'i yod pa yin la/ de las bzlog pa'i mi dmigs pa ni med pa yin te//des kyang yul can sgrub par byed do/ /'dis ni 'dir rgyu 'bras bu la 'khrul pa yang bsal ba yin no/ /de la yang tha snyad de'i mtshan can yin par grub kyang de'i rgyu yod pa'i sgo nas kyang mi dmigs pas bsgrub par bya ba yin te/rgyu mtshan can gzhan bzhin no/ /re zhig mi dmigs pa de nyid ji ltar 'grub ce na/ 'di ni 'og tu 'chad par 'gyur ro/ /mi dmigs pa de yang / 'jug pa'i bye brag gis rnam bzhi dgag pa gang ji snyed pa de thams cad ni mi dmigs pa las yin no/ /de ltar de ni rnam pa gnyis kyis byed de/'ga' zhig bsgrub pas sam 'gag pas so/ /sgrub na yang 'gal ba'am mi 'gal ba zhig sgrub grang na/ mi 'gal ba ni lhan cig yod par 'gal ba med pas 'gog pa ma yin no/ /'gal ba yang mi dmigs pa med par 'gal ba mi rtogs te/'di ltar rgyu ma gtugs pa can 'byung ba la gzhan yod na med pa'i phyir 'gal bar rtogs la/ de yang mi dmigs pa las yin no/ /phan tshun spangs te gnas pa'i mtshan nyid kyang 'gal ba yin te/ rtag pa dang mi rtag pa nyid bzhin no/ /de la yang gcig dmigs pas gzhan mi dmigs par brjod pa yin te/de lta ma yin dmigs pa ma bkag pa can med par mi 'grub pa'i phyir ro/ /gcig bkag pas gzhan med par bsgrub pa la mi dmigs pa grub nyid de dgag pa ni mi dmigs pa'i ngo bo yin pa'i phyir ro//don gzhan dgag pa bsgrub par bya ba de la yang rgyu dang 'bras bu dag gam/ gnyi ga ma yin pa bkag pa gtan tshigs yin grang na/ de la gnyi ga ma yin pa ni 'brel ba med pa'i phyir de med pa'i phyir med pas gzhan med par mi rigs so/ /'bras bu mi dmigs kyang rgyu ni gdon mi za bar de dang ldan pa yin pa'i phyir de med par ga la 'gyur/nus pa rgyu yin gyi mi nus pa ni rgyu ma yin no/ /nus pa las ni gegs bya bar yang mi gnas te/ tha ma'i gnas skabs na yongs su 'gyur ba med pa'i phyir te/ skad cig la cha shas med pa'i phyir ro/ /'bras bu skye ba dang mi mthun pa bskyed pa ni gegs kyi mtshan nyid yin pa'i phyir ro/ /de lta ma yin na cung zad mi byed pa ni gegs ma yin pa'i phyir ro/ /de 'dra ba'i rgyu ni 'bras bu med pa las med par rtogs par 'gyur ba nyid de/dper na 'di na du ba'i rgyu nus pa thogs pa med pa dag med de/ du ba med pa'i phyir ro zhes bya ba lta bu'o/ /'bras bu de ni rgyu las khyab pa dang ldog pa med pa yin pa'i phyir de'i rang bzhin gyi ngo bo dang khyad par med pas de mi dmigs pa ni rang bzhin mi dmigs par bshad do//de bzhin du de dang 'gal ba dmigs pa ni dper na 'di na grang ba'i rgyu nus pa thogs pa med pa dag med de/ me yod pa'i phyir ro zhes bya ba lta bu'o/ /rgyu'i rdzas spyi la bsams nas 'bras bu mi dmigs pa go bar byed pa ma yin par brjod de/ dper na 'di na me med de/du ba med pa'i phyir ro zhes bya ba lta bu'o/ /rgyu mi dmigs pa ni dngos po med pa go bar byed pa yin la/ rang bzhin mi dmigs pa ni rang nyid med pa kho na yin te/ de la ni yul can sgrub pa 'ba' zhig tu zad do/ /de'i ngo bo khyab pa'i 'bras bu med pas ni med par yang yin no//gang gi tshe khyab par byed pa'i chos mi dmigs pas khyab par bya ba'i med par smra ba de'i tshe yang dngos po med par yang yin pa nyid do/ /des na de ltar sgrub pa dang dgag pa'i sgo nas 'ga' zhig 'gog pa la ni go bar byed pa thams cad mi dmigs pa'i rang bzhin yin gyi/dgag pa'i gtan tshigs gzhan ni med do / /dgag pa'i yul can gyi mi dmigs pa de ni sbyor ba'i bye brag gi rnam pa bzhir 'gyur te/ 'gal ba grub pa ni dper na 'di na grang ba'i reg pa med de/me yod pa'i phyir ro zhes bya ba lta bu'o/ /'dis ni khyab par byed pa 'gal ba grub pa yang bshad par rig par bya ste/ dper na 'di na ba mo'i reg pa med de me yod pa'i phyir ro zhes bya ba lta bu'o/ /'gal ba'i 'bras bu grub pa ni dper na 'di na grang ba'i reg pa med de/du ba yod pa'i phyir ro zhes bya ba lta bu'o/ /rgyu ma grub pa ni dper na 'di na du ba med de/ me med pa'i phyir ro zhes bya ba lta bu'o/ /rang bzhin ma grub pa ni dper na 'di na du ba med de/ dmigs pa'i rig byar gyur pa las ma dmigs pa'i phyir ro zhes bya ba lta bu'o//'dis ni khyab par byed pa'i rang bzhin ma grub par yang bshad pa yin te/ dper na 'di na shing sha pa med de shing med pa'i phyir ro/ /zhes bya ba lta bu'o/ /med pa dang tha snyad sgrub pa'i ma dmigs pa 'di thams cad la yang bltar rung ba'i bdag nyid kho na'i de dag dang de 'gal ba dag dmigs pa'i rgyu gzhan nye ba las ma grub pa dang grub pa yin par rig par bya ste/gzhan dag la ni rgyu dang 'bras bu yod pa dang med pa dang 'gal ba dag mi 'grub pa'i phyir ro/ /snang ba mthong ba med pa dang //dngos po mi dmigs pa la ni/ /rgyu mi srid par gyur pa na / /dngos po med par rtogs par 'gyur/ /zhes bya ba ni bsdu ba'i tshigs su bcad pa'o/ /gal te 'gal ba'i 'bras bu dmigs pas kyang med par grub na/ de'i rgyu dmigs pas ci ste mi 'grub ce na/ma yin te/ de ni 'khrul pa'i phyir te/ dper na 'di na grang ba'i reg pa med de/ shing yod pa'i phyir ro zhes bya ba lta bu'o/ /gang las de med par go bar 'gyur ba rgyu rnams ni 'bras bu rtsom par ma nges pas na grang ba bzlog pa'i me gdon mi za bar 'gyur ba ni ma yin no//tha ma'i gnas skabs kyi khyad par la 'khrul pa med do zhe na ma yin te/ de las 'bras bu skye ba ni/ gdod ma med pa'i phyir ro/ /mtha'i skad cig gi bar du ni skye ba la gegs srid kyi/ mtha'i skad cig la gegs med pas rtags de mthong ba las 'bras bu dran pa la ltos te/rjes su dpag par bya ba rtogs pa na mtha'i skad cig bar chad med pa'i phyir/ de'i sngon rol du 'bras bu skyes pa nyid mngon sum du 'gyur ro/ /gang gis rgyu las de rtogs par 'gyur ba 'bras bu mngon sum ma yin pa la ni rgyu'i dngos po rtogs pa med de/de'i phyir rgyu las 'bras bu mi 'grub bo/ /rgyu mtshan dag 'gal na ni go bar byed pa kho na yin te/ dper na 'di na spu long zhes byed pa la sogs pa'i bye brag med de/ gdung bar byed pa'i bye brag nye ba'i phyir ro/ /zhes bya ba lta bu'o/ /spu long zhes byed pa la sogs pa'i bye brag dang 'gal ba yongs su gdung ba'i rgyu me ni grang ba dang 'gal ba'i phyir grang ba rgyun chad na de'i 'bras bu yang med pa'i phyir ro// 'dis ni de'i 'bras bu las kyang de dang 'gal ba'i 'bras bu med par rtogs par bshad par rig par bya ste/ dper na phyogs kyi bye brag 'di ni spu long zhes byed pa la sogs pa'i bye brag dang ldan pa'i me dang ldan pa ma yin te/ du ba yod pa'i phyir ro zhes bya ba lta bu'o/ /de dang 'gal ba grub pa 'di yang sngar bstan pa'i rgyu ma grub pa nyid yin no/ /de ltar na mi dmigs pa 'di ni sbyor ba'i bye brag gis rnam pa bcu yin no//'gal 'bras la yang yul dang ni/ /dus la sogs pa ltos par 'dod/ /gzhan du 'khrul 'gyur mi grang ba/ /sgrub pa la ni thal ba bzhin/ /zhes bya ba ni bar skabs kyi tshigs su bcad pa'o/ /bskal pa rnams la ni/med par nges pa yod ma yin/ /yul dang dus dang rang bzhin gyis bskal pas na bskal pa ni rnam pa gsum ste/ de dag la ni mi dmigs pa'i go bar byed pa ma yin no/ /gal te yod pa ni gdon mi za bar 'ga' zhig gis dmigs pa'am/ 'das pa'am 'ongs pa ni dmigs pa yin na/ de ji ltar ma dmigs pa'i phyir med pa la ma yin zhe na/ ma yin te/ thams cad kyi dmigs pa log pa ni 'di rtags ma yin pa'i phyir te/ bdag dang gzhan la ma grub pa'i phyir ro// de'i phyir 'di dag nyid kyi dmigs pa log pa nyid tshad mar byed pa na spong ba yin no/ /de ni bskal pa bdag las yang yod na de dag med pa nyid ni ma yin no/ /de yang yod na ni mngon sum dang rjes su dpag pa dang lung rnams las gcig tu 'jug pa'i phyir ro zhe na/ ma yin te/ 'ga' zhig la bstan bcos kyi dbang du byas pa med pa'i phyir ro/ /bstan bcos 'jug pa ni skyes bu'i don sgrub par byed pa'i thabs 'ga' zhig la brten nas 'jug pa yin te/ de lta ma yin na 'brel ba med pa brjod pa ni tshad mar mi 'gyur ba'i phyir ro/ / skabs der yang don mang po dag gdon mi za bar bstan par bya ba ma yin te/ dper na bdag nyid so so la nges pa skyes bu rnams kyis sems kyi 'jug pa rgyu mtshan nges pa las byung ba ma yin can 'ga' zhig gam/ yul dang dus kyis chod pa skabs su nye bar mkho ba med pa'i rdzas kyi khyad par lta bu ste/de dag ni bstan bcos kyi yul du byed pa ma yin no/ /de ltar bskal pa dag la ni rang gi mthus nye bar gnas pa'i shes pa bskyed pa'i nus pa yang yod pa ma yin la/ gang gis rjes su dpag par bya bar 'gyur ba de dag gi 'bras bu gdon mi za bar dmigs pa yang ma yin no//de dag ni tshad ma gsum log tu zin kyang med do zhes nges par nus pa ma yin no/ /gang yang shes par byed pa med pa'i phyir dbang po las 'das pa'i don nam/ rang bzhin gyi khyad par dag spong bar byed pa dper na sems 'dod chags dang bral ba'am/lha'i khyad par dag med pa'am/ sbyin pa dang 'tshe ba la sogs pa spong ba'i sems ni mngon par mtho ba'i rgyu ma yin no zhes bya ba lta bu'o/ /mngon sum gyi don la yang 'bras bu de ma thag pa nyid med pa'i phyir 'bras bu de dang ldan pa ma yin pa dang chos mtshungs pas na de phyin ci log pa yin no//rgyu las 'bras bu chod pa dag kyang skye ba mthong ba'i phyir te/ byi ba dang khyi smyon pa'i dug gi 'gyur ba bzhin no/ /de 'byung ba la 'gal ba med pa'i phyir 'di la mi dmigs pa tsam ni tshad ma ma yin no/ /de 'byung ba la tshad ma ci yod ce na/de nyid kyi phyir the tshom za bar 'gyur ba'am/ yang na tshad ma srid pas mi spong ngo / /de'i phyir 'di la rang bzhin nam don 'ga' zhig mthong ba gsal ba med pa'i phyir dang / rgyu rnams ni 'bras bu bskyed pa'i nges pa med pa'i phyir shes par byed pa ma grub pa yin yang de tsam gyis de med par nges pa ni ma yin te/yang rim gyis 'ga' zhig gsal bar 'gyur ba'i phyir ro/ /gang gi phyir de dag las don gyi rang bzhin nges par 'gyur ba sgra rnams dngos po ji lta ba bzhin du 'jug pa yang ma yin te/ de dag ni smra ba po'i brjod par 'dod pas 'jug pa'i phyir de la 'khrul pa med pas de nyid kyis go bar byed pa yin no//skyes bu'i 'dod pa thams cad ni dngos po ji lta ba nyid ma yin no/ /de dang 'brel ba'i rang bzhin gyi dngos pos ni gzhan go bar byed pa yang ma yin no/ /gal te don ji lta ba bzhin du mthong ba la sogs pa'i yon tan dang ldan pa'i skyes bu ni yid ches pa yin la //des bstan pa'i lung ni mi slu ba yin no zhe na/ gal te khyad par can de nyid/ /shes par nus na don 'di 'dod/ /rtog pa sngon du gtong ba can lung ngam lung ma yin pa tshol ba thams cad ni 'jug par 'dod pas yin gyi zhen pas ni ma yin no//de skyes bu brtags nas 'jug na ni 'jug par mi 'gyur te/ de lta bu ni shes par mi nus pa'i phyir/ mi 'dod pa ni ma yin te/ de 'dra ba ni phyin ci ma log pa nyid brjod pa'i phyir ro/ /'di ltar gzhan gyi skyon dang yon tan nges pa'i rtags ni med de de dag ni sems kyi chos yin pas dbang po las 'das pa'i phyir rang las skyes pa'i lus dang ngag gi tha snyad las rjes su dpog grang na/tha snyad kyang phal cher blo sngon du btang nas gzhan du bya bar nus te/ /skyes bu'i 'dod pas 'jug pa'i phyir dang /de dag kyang bsam pa sna tshogs pa can yin pa'i phyir ro/ /des na 'di rtags 'tshol ba'i phyir ji ltar nges pa med par rtogs par byed/ gal te byed pa po shes par dka' ba'i phyir skyes bu la brten pa'i tshig ni lung ma yin gyi/ skyes bus ma byas pa ni phyin ci ma log pa yin no zhe na/ma yin te/ de ni mi 'thad pa'i phyir dang / don brjod pa ni skyes bu'i nye bar bstan pa la ltos pa'i yang phyir ro/ /dmigs par rung ba dang mi rung ba'i bdag nyid thob pa dang gtong ba dag ni rang bzhin skye ba dang nyams pa med na med pa'i phyir ro/ / rtag tu de'i bdag yin ni res 'ga' dmigs pa dang mi dmigs pa med par thal ba'i phyir ro/ /gzhan la ltos pa yang ma yin te/ des de la cung zad kyang ma byas pa'i phyir ro/ gzhan byed na ni de'i zhes 'brel ba mi 'thad pa'i phyir ro/ /phan pa de dang 'brel ba yin na phan gdags bya 'dogs byed ma yin pa dag ci zhig 'brel/gal te rten dang brten pa'i dngos po yin no zhe na/ de'i bdag nyid kyis phan pa med na de yang mi 'grub bo/ /bdag nyid gzhan yin na ni brgal zhing brtags pa mtshungs pa dang thug pa med par yang 'gyur ro/ /bskyed bya skyed byed kyi dngos po yin na ni ltos pa med pa'i phyir de rtag tu 'gyur ro//ltos na ni thal snga mar 'gyur ro/ /de'i phyir sgra dang dmigs su rung ba'i bdag nyid res 'ga' ba skyes bu'i byed pa'i rjes su 'gro ba dang ldog pa'i rjes su byed pa can de ni skyes bus byas pa yin no/ /de lta ma yin na med na mi 'byung ba med pa'i phyir don gzhan rtogs par yang mi 'gyur ro//sgra'i yod pa nyid ni don gyi khyad par rang 'brel pa ma yin te/ de ni thams cad la khyad par med pa'i phyir ro/ /gal te dbang dang yul bzhin du phan tshun rung ba nyid nges par byed pa yin no zhe na/ ma yin te de la yang gcig la so sor nges pa ni des bskyed pa'i mtshan nyid yin pa'i phyir te/des phan btags pa'i dbang pos rnam par shes pa bskyed pa'i phyir ro/ /de lta ma yin na phan mi 'dogs pa ni ltos par bya bar mi 'gyur te/ yul gzhan bzhin no/ /gal te ci'i phyir de kho nas phan 'dogs par byed ce na/de la gang de lta bur gyur pa'i dngos po'i rang bzhin nyid lan 'debs par byed pa yin no/ /'di ltar sA lu'i sa bon las ni nas kyi myu gu mi 'byung gi /'on kyang nas sa bon la yin no/ /de bzhin du gal te sgra rnams kyang don las skye ba yin na ni rung ba nges par 'gyur ba yin no//de med na 'di'o zhes bya ba'i 'brel ba mi 'grub bo/ /don dang ldan par yang mi 'gyur te/ don las ni shes par 'dod pa yin la/ des ni don shes pa'i phyir rab tu sbyar bas na des de dang ldan par 'gyur ba yin te/ lus kyi rig byed la sogs pa bzhin no//de las byung ba yin pas ni de rtogs par byed pa ma yin te/ nam mkhas bum pa la sogs pa bzhin no/ /gal te gang gi phyir de las skye bar 'gyur ba sgra'i rang bzhin ni don rnams la nges pa ni ma yin no/ /'on kyang 'di ni 'di kho na rtogs par byed pa yin no zhes shes byed nus pa'i nges pa yin no zhe na/yod pa dang med pa dag gis der 'brel ba yang 'bras bu nyid las ma 'das te/ gzhan dag la yang de'i mtshan nyid ni de tsam du zad pa'i phyir ro/ /de las 'das nas ni nges pa nyid mi 'thad pa'i phyir ro//nus pa yang don gzhan ma yin pa'i phyir de nyid rang gi ngo bos nges pa yin no/ /don gzhan nyid yin na ni de las don rnams la shes pa skye ba'i phyir sgra ni rjod par byed pa ma yin par 'gyur te/ de'i zhes 'brel ba yang mi 'grub pa'i phyir ro//de'i phyir rnam pa thams cad du 'ga' zhig tu nges pa'i rang bzhin de thams cad ni rang gi rgyu'i ngo bo nyid las byung ba yin pas nges par byed pa bskyed pa nyid du gsal bar byed do/ /gal te med na mi 'byung ba nyid kyis sgra las don rtogs pa ni ma yin gyi/'on kyang sgron mas gzugs bzhin du rung ba nyid kyis yin te/ des na 'brel pa med pa'i phyir rtogs par mi 'gyur ro/ /zhes bya ba'i skyon 'di med do zhe na/ ma yin te/ gzugs la sgron ma bzhin du rang gi ngo bo rtogs par byed pa ma yin pa'i phyir ro//sgra dang rtags dag ni de yod pa dang med pa la mthong ba dang ma mthong ba dran pa la ltos nas rang gi yul rtogs par byed pa yin te/ ma mthong ba dang rjed pa dag gis rtogs pa med pa'i phyir dang / the tshom za ba dang mang po dag la mthong ba la ni the tshom du 'gyur ba'i phyir dang /gcig la mthong ba la med pa'i phyir dang / yang mthong na 'gyur ba'i phyir ro/ /khyad par gzhan la mthong na rnam pa gzhan du sbyar yang log par 'gyur ba'i phyir dang / mthong ba gzhan du gyur na don gzhan yongs su 'dzin pa'i phyir na mthong ba ji lta ba bzhin du rtogs pa'i phyir te/ka li dang ma ri zhes bya ba la sogs pa'i sgra dag la 'gro lding ba dang / yul dbus pa dag gis bsnyo ba dang / dus kyi khyad par dang / char 'bab pa dang / gsod pa la sogs dag tu rtogs pa bzhin no//de'i phyir 'di dag mthong ba dang ma mthong ba la ltos pa na/ rtags bzhin du de'i sgrub par byed pa can mi 'khrul ba nyid rtogs pa la brten pa yin no/ /nye bar bstan pa med na ni mi rtogs pa'i phyir dang / nye bar bstan na ni sgra rnams don la bkag pa med pa'i phyir ro//de'i phyir de ltar skyes bu'i 'dod pa'i rang dbang nyid kyis rnam par gnas pa sel ba yin no/ /rtsod pa 'di rgyas par ni kho bos tshad ma rnam 'grel du bkag pa'i phyir 'dir mi spro'o/ /bdag nyid chags sogs ldan pa'am//gzhan las rig byed don rig min/ /rig byed rig par byed min na/ /rig byed don ni gang las rtogs/ /des na mtho ris 'dod me la/ /sbyin sreg sbyin zhes thos pa na/ /khyi sha zo zhes bya ba 'di/ /don min zhes 'dir tshad ma gang / /'jig rten tshig grags zhe na 'dir//dbang po las 'das don mthong gang / /sna tshogs don can sgra rnams la/ /gang gis don 'di rnam 'byed nus/ /mtho ris lha mo la sogs sgra/ /grags pa ma yin don brjod mthong / /de 'dra'i sgra gzhan dag la ni/ /de 'dra'i rnam rtog nyid du 'gyur//don dang ldan par ma grub pa/ /de rab 'grub pa'i sgrub byed la/ /rang don ma grub nus med de/ /brgal zhing brtags pa mtshungs phyir ro/ /grags pa'ang mi yi brjod pa yin / /de ni tshad mar mi 'dod dang / /de las don yang rtogs byed pa'i/ /sdang 'dod 'di ni ci zhig yin//gal te grags pa las brgal bar/ /rtog la rgyu ci yod ce na/ /rab grags tshad ma nyid min phyir/ /der 'dzin pa la rgyu ci yod/ /grags pa nyid kyi sgra don ni/ /nges la dogs skyed byed pa de/ /gang phyir de la sna tshogs kyi/ /don la sgra 'jug mthong phyir ro/ / gal te 'jig rten pa gang la/ /rigs pas gnod med de bzung na/ /rigs las gnod pa yod min pa'i/ /rlung gi bu de cis mi 'dzin/ /dbang po 'das la lung don gyi/ /rten can las gzhan rigs pa med/ /de yi don yang gnas med phyir/ /'di la rigs pa srid ma yin/ / rnam gzhan mi srid med pa'i phyir/ /rang nyid sna tshogs nus can sgras/ /nges byed mthong ba med pa rnams/ /gdon mi za bar the tshom 'gyur/ /'ga' zhig lam ni 'di yin zhes/ /sdom dum 'di smra zhes zer dang / /gzhan dag bdag nyid smra de ltar/ /de gnyis bye brag brtags par gyis //thams cad la rung don gcig gi/ /gsal byed nges pa gang la yin/ /brjod 'dod rjod byed ma gtogs pas/ /gang gis dbang po las 'das shes / /brjod 'dod nges pa'i rgyu yin zhing / /brda ni de yi gsal byed yin/ /de ni skye min la med na/ /de don gcig can de gang las//ngo bo nyid kyis nges na des/ /gzhan du sbyor ba'ang med 'gyur zhing / /brda yang don med 'gyur ba yin/ /gsal na'ang nges pa gang las yin/ /gang la 'dod pas rang rgyud pa/ /de las nges pa zhes bya gang / /des na 'di la mi 'dod pa'i/ /rung ba nyid kyang gsal byed 'gyur//zhes bya ba ni bar skabs kyi tshigs su bcad pa dag go/ /phyogs gcig la mi slu bas kyang lung gi mtshan nyid smra'o/ /mi mthun pa'i phyogs la ma mthong ba tsam gyis mi 'khrul ba mi 'grub pa'i phyir de'i don ni ma nges pa nyid do/ /gal te sbyong ba'i shugs nyid sgra thams cad ni don dang 'brel par grub pa yin te/yul med na mi sbyor ba'i phyir ro zhe na/ de ltar rigs mod kyi/ 'on kyang de lta bu nyid rab tu 'grub kyang 'dod pa 'dogs pa med pas 'jig rten na gzhan du tha snyad byed pa mthong ba'i phyir the tshom za ba nyid do//de'i phyir lung log kyang don med par rtogs pa ma yin no/ /mngon sum log pa'i mi dmigs pa nyid dngos po med pa sgrub par byed pa yin te/ don yod na rgyu ma tshang ba med pa de med pa mi srid pa'i phyir ro / /de la tshu rol mthong ba bdag nyid kyi mngon sum log pa tshad mar byed pa ni/des gzung bar 'os pa nyid dgag par rigs kyi thams cad ni de lta ma yin pa'i phyir thams cad 'gog pa ma yin no/ /'jug pa blo sngon can nyid phyir/ /de ni mi 'jug 'bras can 'dod/ /bskal ba'i yul la mngon sum dang rjes su dpag pa med pa de ni yod pa'i shes pa dang /sgra dang / tha snyad 'gog pa'i 'bras bu can yin te/ de dag ni dmigs pa sngon du 'gro ba can yin pa'i phyir ro/ /gzhan ni 'jug pa'i 'bras can te/ /de ni rgyu mtshan mthong phyir ro/ /mi dmigs pa snga ma ni med pa'i shes pa dang sgra dang tha snyad 'jug pa'i 'bras bu can yang yin te/yul rab tu bstan pas rab tu grub pa'i tha snyad bsgrub pa'i phyir ro/ /mi dmigs pa 'di gnyis ni/ rang ldog pa'i rgyu med pa dang / yod pa dag gis yod pa'i tha snyad dgag pa'i 'bras bu can nyid du ni 'dra ste/gcig la the tshom za ba'i phyir la/ gzhan la ni log pa'i phyir ro/ /de la gnyis pa ni yod pa'i tha snyad dgag pa la nye bar mkho ba'i phyir tshad mar bshad kyi/ ldog pa mthong ba la sogs pa la nye bar sbyor ba ni ma yin te//the tshom za ba'i phyir te/ shes par byed pa'i yan lag ma nges pa las ni ma rtogs pa'i phyir ro/ /dang po ni de la tshad ma yin te/ nges pa'i 'bras bu can yin pa'i phyir ro/ /de yod tsam dang rjes 'brel can/ /bdag nyid gtan tshigs rang bzhin yin// 'di ltar don gyi de'i bdag nyid ni de tsam dang rjes su 'brel ba can kho na yin gyi/ gzhan la rag las pa ni ma yin te/ de yod na yod par ma gyur pa phyis 'byung ba ni de'i bdag nyid du 'gal ba'i phyir ro/ /rgyu rnams kyang 'bras bu la 'khrul pa'i phyir ro/ /de'i phyir de yod pa tsam dang rjes su 'brel ba nyid kyi rang bzhin ni dro bar byed pa yin no//de yang gtan tshigs nyid du nye bar 'god pa na/ khyad par ltos dang dag pa ste/ /'jig la 'bras dang yod nyid bzhin/ /nye bar 'god pa yin no/ /rang gi ngo bo 'grub par bya ba'i phyir gzhan gyi byed pa la nye bar ltos pa'i dngos po ni byas pa yin no//des na byas pa'i sgra 'di ni rang gi ngo bo brjod pa yin yang khyad par gzhan de dag 'phen par byed pa yin no/ /'dis ni rkyen gyi bye brag gis tha dad pa nyid can la sogs pa yang bshad pa yin no//de ltar kha cig tu ni khyad par la ltos nas rang bzhin gyi gtan tshigs brjod la/ kha cig tu ni ma ltos par te/ dper na mi rtag pa nyid la yod pa bzhin no/ /kha cig tu ni rang bzhin du gyur pa'i chos yongs su bzung nas te/ dper na de nyid las skyes pa bzhin no//phyogs 'dis gzhan du yang rang bzhin gyi gtan tshigs kyi dbye ba blta bar bya'o/ /rang bzhin de yang gal te rang gi bsgrub par bya ba'i chos kyis khyab pa tshad mas nges pa ni de'i tshe go bar byed pa yin no/ /khyab pa'am chos can la brten pa ma nges na de'i rang bzhin gyis go bar bya ba/go bar byed pa ma yin par 'gyur te/ gsal ba nyid kyis gsal bar byed pa'i sgron ma ni de'i rang bzhin ma rtogs na rang gi don bya ba mi byed do/ /de'i phyir nges pa nyid kyis khyab par bya ba ni go bar byed pa yin la/khyab par byed pa ni go bar bya ba yin no/ /khyab par byed pa'i chos de ni rang log pa na khyab par bya ba de ldog par byed pa yin no/ /gal te 'di med na byed pa yin na de lta na 'di de'i khyab par byed pa grub pa yin no/ /de'i phyir 'dis ni gtan tshigs rnam pa gnyis kyis go bar bya ba dang /go bar byed pa nyid kyi mtshan nyid kyang bshad par rig par bya'o/ /sbyor ba'i dbang gis gtan tshigs ni rnam pa gnyis te/ chos mthun pa nyid can dang / chos mi mthun pa nyid can no/ /sbyor ba'i bye brag ma gtogs par 'di gnyis don du ni bye brag ci yang med do//de mthong ba las rang nyid rtogs pa na yang de ltar 'gyur ba'i phyir/ rang gi don gyi rjes su dpag pa la yang dbye ba bstan to/ /chos mthun pa nyid can gyi sbyor ba la yang don gyis chos mi mthun pa nyid rtogs te/de med na bsgrub par bya bas gtan tshigs kyi rjes su 'gro ba med pa'i phyir ro/ /de bzhin du chos mi mthun pa la yang rjes su 'gro ba rtogs te/ de med na bsgrub par bya ba med pa la gtan tshigs med par the tshom za ba'i phyir ro zhes 'chad par 'gyur ro/ / gtan tshigs de dag kyang gang cung zad byas pa de thams cad ni mi rtag pa ste/ dper na bum pa la sogs pa bzhin no/ /sgra yang byas pa yin no zhes bya ba ni rjes su 'gro ba can no/ /'dir shugs kyis sgra mi rtag pa'o zhes 'gyur ba yin te/ des na phyogs ni gdon mi za bar bstan par mi bya'o//ldog pa can yang mi rtag pa nyid med na byas pa nyid du 'gyur ba yin na sgra ni byas pa yin no zhes bya'o/ /de'i ngo bor gyur pa nyid kyis na byas pa de med na med pa nyid dang / sgra la yang yod par bstan pa na dngos po de'i bdag nyid du yod pa yin no zhes shugs kyis 'grub pa'i phyir rjes su dpag par bya ba ma brjod do//rjes su 'gro ba yang don gyis go bas 'grub ste/ 'di ltar de'i bdag nyid du ma nges pa ni de log pas ldog par mi 'gyur ro/ /des na nges pa rab tu bsgrubs nas ldog pa brjod par bya'o//da ni gang gis de skad du brjod par 'gyur ba byas pa gdon mi za bar mi rtag pa'o zhes ji ltar bshad par bya zhe na/ 'di ltar rgyu med phyir na 'jig pa ni/ rang gi ngo bos rjes dngos po 'jig pa de'i ngo bo rgyu las ltos pa ma yin te/ rang gi rgyu kho na las 'jig pa'i ngang can du 'byung ba'i phyir ro//de bas na gang cung zad byas pa de ni rang bzhin gyis 'jig pa'i ngang can yin no/ /ji ltar/ ltos dang bcas pa'i chos rnams ni/ /nges par 'gyur ba med par mthong / /dngos po 'jig pa ni ltos pa med pa yin te/ltos pa dang bcas pa nyid yin na bum pa la sogs pa 'ga' zhig rtag par yang 'gyur ro/ /gal te 'jig pa rgyu mang po yod kyang de dag kyang rang gi rkyen la rag las nas nye ba yin pa'i phyir/ gdon mi za bar nye ba ma yin pas 'ga' zhig mi 'jig par yang 'gyur ro//rgyu rnams ni gdon mi za bar 'bras bu dang ldan pa ma yin te/ ma tshang ba dang gegs byed pa srid pa'i phyir ro/ /des na 'bras bu gnas med phyir/ /'jig pa rgyu ldan smra rnams kyi/ /'jig pa'i rgyu ni thams cad dag /'khrul pa nyid du bshad pa yin//zhes bya ba ni bar skabs kyi tshigs su bcad pa'o/ /de'i phyir dngos po de'i ngo bor 'gyur ba gzhan la ltos pa med pa de ni de'i ngo bor nges pa yin te/ rgyu tshogs pa tha mas rang gi 'bras bu bskyed pa la gegs byed pa mi srid pa bzhin no/ /gal te 'ga' zhig 'ga' zhig tu 'gyur ba la ltos pa med du zin kyang /de'i ngo bor ma nges pa ma yin nam/ sa dang sa bon dang chu'i tshogs pa dag kyang res 'ga' myu gu bskyed pa'i phyir ro zhe na ma yin te/ der yang rgyu yongs su 'gyur ba la ltos pa'i phyir ro/ /de ltar dngos po ni 'ga' la yang ltos pa ma yin no//de la yang rgyu tshogs pa tha mas 'bras bu bskyed pa la bar du chod pa med pa gang yin pa de ni 'bras bu dang ldan pa nyid do/ /de la myu gu'i rgyu ni de nyid yin la/ yongs su 'gyur ba snga ma dag ni de'i don du yin no/ /der ni de la gegs byed par nus pa 'ga' yang yod pa ma yin no//zhes mang du bshad zin to/ /gal te nas kyi sa bon la sogs pa yang sA lu'i myu gu bskyed par bya ba la ltos pa med pa ma yin nam/ de skyed pa'i rkyen dag ni res 'ga' de la yang nye ba'i phyir ro zhe na/ ji ltar ltos pa med pa yin te/ gang gi phyir de dag la ni sA lu'i sa bon gyi de skyed par byed pa'i rang gi ngo bo gang yin pa de nyid med pa'i rang gi ngo bo la ltos pa yin no/ /de lta na ni 'o na byas pa'am yod pa 'ga' zhig la yang 'jig pa'i rang gi ngo bo gang yin pa de nyid med pas de'i rang gi ngo bo la ltos pa'i phyir na/'jig pa ma yin no zhe na/ sA lu'i sa bon la sogs pa'i rang gi ngo bo yang rang rang gi rgyu las yin pa'i phyir/ gang zhig de'i rgyu can ma yin pa de ni de'i rang bzhin du mi 'gyur ro/ /rgyu'i nus pa nges pa de yang rang gi ngo bos rtog pa nyid do//don rnams kyi rang bzhin nges pa yang glo bur bar ni mi rigs te/ ltos pa med pa ni yul dang dus dang rdzas nges par mi 'thad pa'i phyir ro/ /de bzhin du 'di la yang gang gis 'di dag 'ga' zhig 'jig pa'i bdag nyid du skye bar 'gyur ba nges pa'i rgyu 'ga' zhig brjod dgos so//'dir nges par byed pa'i rang bzhin ni 'ga' yang med do/ /skye ba can thams cad ni 'jig pa dang ldan par grub pa'i phyir ro/ /gal te skye ba can gyi rang bzhin 'jig pa dang ldan pa yin no zhe na/ de'i skye ba ni 'jig pa dang ldan pa'i rang bzhin gyi rgyu ma yin la/rgyu med pa la yang rang bzhin nges pa yod pa ma yin no/ /de'i phyir 'di la rgyu'i rang bzhin gyi rnam par dbye ba 'ga' yang med la de med pa'i phyir 'bras bu la yang med pas mi mtshungs so/ /gal te tshogs pa las skye ba thams cad ni 'jig pa yin no zhes bya ba 'di yang nges pa med pa yin te/de dag la ni ma lus par mthong ba med pa'i phyir ro/ /'di ltar dngos po rnams kyi tshogs pa ni nus pa sna tshogs par mthong ste/ de la 'ga' zhig mi 'jig pa'i bdag nyid du bskyed pa gang yin par yang 'gyur ro zhe na/ ma yin te/ dngos po'i mtshan nyid ni don byed nus pa yin pa'i phyir te/ nus pa brjod pa thams cad dang bral ba ni nye bar brjod pa med pa'i mtshan nyid yin no/ /'o na ni mtha'i skad cig nye bar brjod pa med par thal lo zhe na/ ma yin te/ sems can du bgrang ba'i skad cig gzhan nye bar len pa med pa ni mtha'i mtshan nyid yin pa'i phyir ro//de yang tha na shes bya la khyab pa'i ye shes la ni gzugs med pa'i khams su yang nus pa nyid yin no/ /khams gzhan du ni du ma la phan 'dogs par 'gyur ro/ /sgrim pa med na mi nus par 'gyur ro zhe na/ ma yin te/ sgrim pa med pa mi srid pa'i phyir ro//chos gcig yongs su ma shes na gzhan gyi don la 'jug pa na bya ba dang bya ba ma yin pa mi rtogs par 'gyur ba'i phyir ro/ /thams cad du the tshom skye ba'i phyir te/ 'ga' zhig tu ji zhig ltar nye bar mkho ba'i phyir ro/ /de ma shes na de'i yan lag ma tshang bas na sgrub par byed pa ma tshang ba med pa mi 'thad pa'i phyir ro//tha ma nus pa med pa nyid kyang ma yin te/ 'ga' zhig byed pa'i phyir ro/ /mi byed kyang rkyen dang bral bas yin gyi/ ma bral na ni byed pa nyid do/ /skad cig ma ma yin pa ni de ltar ma yin te/ rnam pa thams cad du mi srid pa'i phyir ro//skad cig ma ma yin pa de ni don byed par srid pa ma yin te/ rim dang cig car 'gal ba'i phyir ro/ /rim gyis ni ma yin te/ ltos pa med par rang yod tsam gyis byed pa por gyur pa ni sdod par mi rigs pa'i phyir ro/ /sngar byed pa po ma yin pa ni phyis kyang mi 'gyur te/ rang gi ngo bo 'gyur ba med pa'i phyir ro//ltos pa yin na yang bshad zin to/ /cig car byed pa yang ma yin te/ de'i rang gi ngo bo ni phyis kyang mi byed par mi 'thad pa'i phyir ro/ /des na nus pa thams cad ldog pa de ni yod pa'i mtshan nyid las 'das pa yin no/ /don byed nus pa gang yin pa de 'dir don dam yod pa yin/de la rim dang rim ma yin/ /'gal phyir skad cig ma yin med/ /ces bya ba ni bsdu ba'i tshigs su bcad pa'o/ /yang na phung po dang khams dang skye mched kyi mtshan nyid kyi byas pa mi rtag pa nyid du sgrub pa'i phyir skyon med do/ /de'i rang bzhin ma yin pa la ni tshad ma med pas mi 'grub pa'i phyir rjes su 'gro ba sgrub pa mi 'thad pa'i phyir ro//kho bo cag gis byas pa ni de nyid yin te/ ji skad du chos mngon pa las 'dus byas gang zhe na/ phung po lnga'o zhes gsungs pa yin no/ /de la dbang po lnga ni 'pho ba'i rang bzhin can yin te/ de'i 'bras bu rnam par shes pa rnam par chad pa dang rnam par 'gyur ba mthong ba'i phyir ro//de dag gi rang bzhin de nyid yin na ni de mi 'thad pa'i phyir dang / ltos pa yang 'gal ba'i phyir ro/ /de bzhin du yul dang / bde ba dang sdug bsngal ba dang / mtshan ma nye bar rtogs pa dang / 'dod chags la sogs pa dang / yul la nye bar dmigs pa ni skye ba dang 'gag par so sor rig pa nyid yin pa'i phyir mi rtag pa yin no/ /de lta bu'i rang bzhin can de dag ni rang gi rgyu'i rang bzhin de lta bu'i ngo bor sgrub par byed pa yin la/ rnam pa de lta bu'i skye ba can gzhan dag kyang rang gi ngo bo de la sbyor ba byed pa yin no/ /'dis ni khams dang skye mched kyang bshad pa yin te/chos kyi skye mched dang / khams kyang phung po gsum gyi rang bzhin yin pa'i phyir 'gal ba med do/ /'dis ni yod pa yang bshad pa yin no/ /'o na da ni 'jig pa ltos pa med pa la nus pa ci zhig yod de/ gang gi phyir phung po la sogs pa dag ni gtan tshigs pa gzhan kho nas mi rtag par grub pa'i phyir ro zhe na/'ga' zhig mi rtag par grub kyang rnam pa de lta bu dag des khyab pa ni ltos pa med pa las yin no/ /'jig pa la rgyu yod pa nyid yin na ni 'ga' zhig de ltar yin yang gzhan la rgyu ma tshang bas mi 'jig par yang 'gyur ba'i phyir mi khyab par 'gyur ro/ /rgyu la ltos pa med pa nyid 'dis ni 'jig pa 'ga' zhig la 'ga' zhig gi tshe 'gyur ba 'gal bas na de med pa'i rang gi ngo bo nyid du sgrub par byed do//ltos pa med pa'i rang bzhin gang yin pa de ni gal te res 'ga'am 'ga' zhig la 'gyur na ni dus dang rdzas de la ltos pa'i phyir ltos pa med pa nyid du mi 'gyur ro//'o na ni 'jig pa'i rang gi ngo bo de ltos pa med pa'i phyir rgyu med pa can du 'gyur ro zhe na/ rgyu med pa can du mi 'gyur ro/ /yod pa'i rgyu'i dngos po nyid las de ltar skye ba'i phyir te/ yod pa 'byung na ni de 'dra ba nyid du 'gyur ba'i phyir ro/ /gal te yod pa ni gdon mi za bar 'ga' zhig las 'byung ba ma yin no zhe na/'o na ni yod pa glo bur ba yin pa'i phyir 'di 'ga' zhig gi tshe ldog par mi 'gyur ro/ /gang 'ga' zhig la nye bar brten pa'am ma yin pa de gang la cung zad 'brel ba'am ma yin te/ gal te yod pa 'di 'brel ba ma yin na ni/ nges pa dang ldan par mi 'gyur ro/ /de'i phyir 'di ni 'ga' yang glo bur ba ma yin no//'o na da ni 'jig pa rgyu med par ji ltar 'gyur zhe na/ skyes pa de'i ngo bo gzhan la mi ltos pa'i phyir ro/ /gzhan yang 'jig pa zhes bya ba dngos po las gzhan du gyur pa ni 'ga' yang med kyi/ dngos po nyid 'jig pa yin te/ de nyid skad cig mar gnas par skyes pa'i phyir ro/ /gzhan pa rnams kyis 'di'i rang bzhin de phyis nges par 'gyur gyi sngar ni ma yin te/mthong yang gsal ba med pa'i phyir ro/ /des na phyis de'i dbang gis rnam par 'jog ste/ mi shes pa rnam par 'gyur ba mthong bas dug tu rnam par 'jog pa bzhin no/ /de bas na 'jig pa 'di ni yod pa ma gtogs par gzhan 'ga' zhig la ltos pa med pa'i phyir de la khyab pa yin no//yang ji ltar na 'jig pa ltos pa med pa zhes bya ba 'di rtogs par bya zhe na/ de rgyu nus pa med pa'i phyir yang / yang gi sgras ni dngos po med pa byed pa'i bya ba bkag pa'i yang phyir ro zhes bya ba'o/ /ji ltar nus pa med ce na/ dngos po grub na ni de rgyus byed pa ma yin no//gzhan byed na de la cung zad kyang byas pa med do/ /des na 'jig par byed pas gzhan byed pa ni ma yin no/ /des na 'di de dang de ma yin pa'i rang bzhin mi byed pas na cung zad kyang mi byed pa ni ltos par bya ba ma yin no/ /ji ltar bya ba 'gog ce na/ 'di ltar 'jig pa zhes bya ba ni dngos po med par gyur pa yin par sems te/des na 'jig pa'i rgyu 'di ni med par byed do / /zhes bya bar 'gyur ro/ /de la gal te med pa zhes bya ba'i ngo bo 'ga' zhig 'bras bur 'gyur na ni de nyid dngos po yin pas dngos po med pa ma yin no/ /de bas na med pa byed do zhes pa ni dngos po mi byed do zhes bya ba yin pas bya ba dgag par byas par 'gyur ro//de lta na yang cung zad mi byed pa 'di ltos par bya bar ji ltar 'gyur te/ des na dngos po 'jig pa ni gzhan la ltos pa med par grub bo/ /de'i phyir/ gang la 'gyur ba grub pa de/ /ngo bo nyid kyis 'gyur de las/ /gzhan la'ang ngo bo nyid kyis 'gyur//'ga' zhig la 'gyur ba mthong ba 'di ni ngo bo nyid kyis 'gyur ba yin te/ ltos pa med pa'i phyir ro/ /de bzhin du gzhan la yang ngo bo nyid kyis 'gyur ba yin te/ khyad par med pa'i phyir ro/ /de bzhin du rang bzhin gyi gtan tshigs gzhan dag kyang bdag nyid ji lta ba'i tshad ma dag gis de tsam dang rjes su 'brel ba grub pa kho na'i bsgrub bya go bar byed pa yin par rig par bya'o//dngos po'i de tsam dang rjes su 'brel ba'i rang bzhin gang yin pa ni de nyid la med na mi 'byung ba nges pa yin te/ dngos po tsam dang rjes su 'brel pa'i rang bzhin zhes bya ba ni de nyid rang gi dngos su yod pa yin na/des yang bdag nyid bor nas ji ltar yod par 'gyur/ don gzhan rtogs par bya ba la ni 'bras bu gtan tshigs yin te/ 'khrul pa med pa'i phyir ro/ /de las skyes pa ma yin pa ni mi 'khrul pa ma yin te/ rag ma las pa'i ngo bo rnams ni lhan cig 'byung bar nges pa med pa'i phyir ro//gal te don gzhan gtan tshigs yin na 'o na de de'i chos su ji ltar 'gyur zhe na/ de la brten pa'i phyir ro/ /ji ltar rgyu dang 'bras bu'i dngos po yin zhe na/ de nyid kyi phyir te/ de lta ma yin na rten mi 'grub pa'i phyir ro/ /gal te du ba'i rten ni sa phyogs yin la/ rgyu ni me ma yin nam zhe na/de yang du ba'am/ de'i rgyu rnams kyi gzhi yin pa'i phyir rgyu nyid do/ /gal te de las skyes pa'i phyir 'bras bu go bar byed pa yin na rnam pa thams cad du go bar byed pa'i dngos po yin te/ rnam pa thams cad du bskyed par bya ba dang skyed par byed pa yod pa'i phyir ro zhe na/ ma yin te/ de med par 'byung ba ni de las skye bar nges pa med pa'i phyir ro/ /de'i phyir rgyu la rang bzhin ji snyed cig /med na mi 'byung 'bras bu ni/ /de dag ni/ gtan tshigs yin te/ de dag gi 'bras bu nyid du nges pa'i phyir ro/ /gang dag de dag med na mi 'byung ba'i chos de dag kho nas yin no/ /gal te cha shas kyis bskyed par bya ba dang skyed par byed pa nyid thal bar 'gyur ro zhe na ma yin te/des bskyed par bya ba'i khyad par dang rtags kyi bye brag gi khyad par can gyi spyi rnams bzung na 'dod pa'i phyir ro/ /spyi khyad par du ma byas pa rjod par 'dod na ni 'khrul pa'i phyir mi 'dod do/ /gal te du ba me la mi 'khrul lo//zhes bya ba 'di ji ltar rtogs par bya zhe na/ de la 'khrul na 'di / rgyu dang ldan pa las 'das 'gyur/ /de'i mtshan nyid du gyur pa'i mi dmigs pa las gang zhig gang dag dmigs na dmigs la/ de las gcig ma tshang na mi dmigs pa de ni de'i 'bras bu yin te/ de yang du ba la yod do/ / lan cig de ltar mthong ba las kyang de de'i 'bras bur 'grub ste/ 'bras bu ma yin pa ni rgyu ma yin pa las lan cig kyang mi 'byung ba'i phyir ro/ /gal te gtsub shing gtsubs pa la sogs pa dag la me med kyang 'byung bas 'bras bu ma yin no zhe na/ ma yin te bud shing 'gyur ba'i rgyu dro ba'i reg pa'i khyad par ni me yin pa'i phyir ro//'bras bu yang rgyu med par 'byung na ni rgyu med pa can du 'gyur ro/ /gang zhig gang med par 'byung ba de ni de'i rgyu can ma yin no/ /du ba yang me med par 'byung ste / des ni de'i rgyu can du mi 'gyur ro/ /gal te gzhan gyi rgyu can yin pa'i phyir rgyu med pa can ma yin no zhe na/ma yin te/ de la yang mtshungs pa'i phyir te/ de med kyang me yod na 'byung ba'i phyir ro/ /yang na de'am gzhan yang rung ste/ de skyed pa'i rang bzhin ma yin pa las ji ltar 'byung bar 'gyur te/ rang gis de'i rang bzhin ma yin pa ni de bskyed pa ma yin pa'i phyir rgyu med pa can du 'gyur ro//gal te de nyid 'byung ba ni ma yin gyi/ de dang 'dra ba 'byung ba'i phyir ro zhe na/ mi 'dra ba las 'byung ba ji ltar de dang 'dra ba yin no / /de dang 'dra ba las byung ba'i phyir de dang 'dra bar 'gyur ba'i phyir ro/ /gal te mi 'dra ba las kyang de dang 'dra ba 'byung na ni de dag gi nus pa ma nges pas rgyu'i tha dad pa tha dad par byed pa ma yin pa'i phyir mtha' dag gi sna tshogs kyi rang bzhin rgyu med par 'gyur ro//de la yang nyes pa bshad zin to/ /thams cad thams cad las skye bar yang 'gyur ro/ /de'i phyir rgyu tha dad pa dang / tha dad pa min pa las 'bras bu tha dad pa dang / tha dad pa ma yin par 'gyur ro//de'i phyir du ba ni mthong ba'i rnam pa dang rigs mi mthun pa'i don las mi 'byung ste/ rgyu med pa nyid du thal ba'i phyir ro/ /de lta na yang / rgyu med gzhan la mi ltos phyir/ /rtag tu yod pa'am med par 'gyur/ /dngos po rnams ni res 'ga' zhig /'byung ba ltos pa las yin no//du ba de rgyu med pa las 'byung na ni/ ltos pa med pa'i phyir nam yang mi 'byung bar mi 'gyur te/ de 'byung ba la ma tshang ba med pa'i phyir 'dod pa'i dus bzhin no/ /yang na ni de'i tshe yang 'byung bar mi 'gyur te/ med pa'i dus dang khyad par med pa'i phyir ro/ /dngos po ltos pa dang bcas pa rnams ni res 'ga' bar 'gyur te/yod pa dang med pa'i dus dag na de 'byung ba rung ba nyid dang ldan pa'i phyir ro/ /yul dang dus rung ba dang mi rung ba nyid 'dra ba can dag ni de dang ldan pa dang yang cig shos dag tu nges pa mi rung ba'i phyir ro/ /rung ba nyid de yang rgyu'i dngos po las gzhan nam ci/de'i phyir yul dang dus 'ga' zhig spangs nas yul dang dus gzhan dag na yod pa'i dngos po ni de dag la ltos pa dang bcas pa zhes bya ba yin te/ 'di ltar de ltar yod pa nyid ltos pa yin no/ /de dag gis byas pa'i phan pa la mi ltos pa ni der nges par mi rung ba'i phyir ro/ / de bas na yul dang dus nges pa'i phyir gang na du ba de lan cig mthong la/ ma tshang na ma mthong ba ni 'di'i des bskyed par bya ba'i ngo bo nyid yin te/ gzhan du na lan 'ga' yang med pa'i phyir ro/ /de der nges pa yin na ji ltar gzhan las 'byung bar 'gyur/ 'byung na ni du ba ma yin par 'gyur te/du ba ni des bskyed pa'i rang bzhin gyi khyad par yin pa'i phyir ro/ /de bzhin du rgyu yang 'bras bu de lta bu bskyed pa'i rang bzhin yin no/ /de gzhan las kyang 'byung na ni de de'i rang bzhin ma yin pas lan 'ga' yang bskyed par mi 'gyur ro/ /yang na de du ba ma yin te du ba bskyed pa'i rang bzhin ma yin pa las byung ba'i phyir ro//de'i rang bzhin nyid yin na ni de nyid me yin pas 'khrul pa med do/ /gal te brgya byin spyi bo me'i/ /rang bzhin yin na de nyid me/ /'on te de me'i rang bzhin min/ /ji ltar de las du ba 'byung / /du ba'i rgyu yi rang bzhin me/ /de yi nus pa'i bye brag ldan/ /du ba du ba'i rgyu min las/ /'byung na de ni rgyu med 'gyur//zhes bya ba ni bsdu ba'i tshigs su bcad pa dag go/ /'o na da ni ji ltar lhan cig byed pa tha dad pa las 'bras bu 'byung ste/ dper na mig dang gzugs la sogs pa las rnam par shes pa lta bu'o zhe na/ gcig pu skyed par byed pa'am/ de'i rang bzhin yin pa ni 'ga' yang med do/ /'on kyang tshogs skyed par byed pa dang de'i rang bzhin yin te/de kho na rjes su dpag go/ /tshogs pa de nyid 'bras bu'i rang gi ngo bo gnas pa'i rten yin no/ /de nyid kyi phyir lhan cig byed pa rnams kyang rnam grangs med par skyed par byed pa yin no/ /gang yang cung zad lci ba la sogs pa'i rigs mi mthun pa las ut+pal la sogs pa 'byung bar mthong ba la de la yang de skad du brjod kyang rang gi sa bon las rab tu skye ba can las rang gi ngo bo tha dad pa yod pa kho na ste/rgyu'i rang bzhin tha dad pa'i phyir dper na sa bon dang sdong bu las skye ba'i chu shing lta bu'o/ /de lta bu ni 'jig rten na gsal ba kho nar rnam pa tha dad pa'i sgo nas rnam par 'byed do/ /'bras bu rjes su dpog par byed pa'i rgyu yang de ma thag pa yin no//de ni 'bras bu'i rdzas rang bzhin mtshungs pa rnams la 'dra ba yin te/ dper na rjes su 'brel ba'i chu shing sdong bu las skye ba dag bzhin no/ /gang la dngos kyi rgyu tha dad pa de la ni rang bzhin tha dad pa yang yod pa yin te/ dper na sa bon dang sdong bu las skye ba can de dag nyid bzhin no//des na gang la ci 'dra ba mthong ba de las ni de 'dra ba rjes su dpog pa yin no/ /bar du chud pa'i rgyu brgyud pa dag ni rjes su dpog pa ma yin pa nyid pas 'khrul pa med do/ /rnam pa tha dad pa 'ba' zhig ni de dang de ma yin pa'i rgyu mtshan yang ma yin no/ /'on kyang rang bzhin gzhan yang yin te/ bcos ma dang bcos ma ma yin pa'i nor bu dang mu tig dang byi ru la sogs pa bzhin no//kha cig tu ni me tog tha dad pa ste/ sngon po dang cig shos kyi me tog can gyi shur ba ka bzhin no/ /kha cig tu ni 'bras bu ste/ /'bras bu med pa dang cig shos kyi kar go ta bzhin no/ /kha cig tu ni ro las te/ /nags dang cig shos kyi rgyal mo ga gon bzhin no//kha cig tu ni nus pa ste/ /reg pa dang myangs pas 'khru ba'i a ru ra bzhin no/ /de'i phyir shin tu rnam par phye ba'i 'bras bu ni rgyu la 'khrul pa med do/ /rgyu khyad par yod kyang 'bras bu khyad par med na skyon du 'gyur ba'i phyir ro/ /rjes su 'gro dang ldog pa las/ /gang zhig gang gi rjes 'gror mthong //de yi rang bzhin du rgyu can/ /de phyir mi mthun las mi 'byung / /rgyu dang 'bras bu dngos po'am/ /rang bzhin nges par byed pa las/ /med na mi 'byung nges pa ste/ /ma mthong las min mthong las min/ /gzhan du gzhan ni gzhan dag dang / /nges par yod pa'i nges pa gang / /don gzhan rgyu mtshan can gyi chos/ / yin na gos la tshon bzhin no/ /zhes bya ba ni bsdu ba'i tshigs su bcad pa'o/ /gzhan yang / chos don gzhan gyi rgyu mtshan can/ /yin par gyur na de gzhan nyid/ /de grub na ma grub pa'am rgyu tha dad pa ni de'i rang bzhin du rigs pa ma yin no/ /dngos po rnams kyi tha dad pa'am/ rgyu tha dad pa ni 'di kho na yin te/ chos 'gal bar /gnas pa'am rgyu tha dad pa'o/ /des kyang tha dad par mi 'grub na ni 'ga' yang gang las kyang tha dad pa med pas ril rdzas gcig tu 'gyur ro/ /des na lhan cig skye ba dang 'jig pa dag dang / /thams cad thams cad la nye bar sbyor bar 'gyur ro/ / de ltar ma yin na cig ces bya ba nyid du mi 'gyur ba'am/ ming tha dad par zad de/ don khas blangs nas de skad du brjod pa'i phyir ro/ /rgyu don tha dad pa nyid med kyang dngos po'i dus na mi rtag nyid ma grub pa'i phyir de'i rang bzhin ma yin par mtshungs pa ma yin nam zhe na/mi rtag pa nyid ces bya ba gang phyis 'grub par 'gyur ba gzhan ni 'ga' yang med de/ dngos po skad cig mar gnas pa'i chos can de kho na mi rtag pa yin no zhes mang du bshad zin to/ /chos dang chos can gyi tshig tha dad pa la yang rgyu mtshan khyad par gzhan spong ba dang mi spong ba zhes bya ba la sogs pa'i skabs ni tshad ma rnam 'grel du bstan zin to//'di'i rang bzhin de ni mthong bzhin du yang blo zhan pa yod pa dmigs pas rtag tu de ltar yod par dogs pas bslus pa'am/ 'dra ba gzhan 'byung bas bslus pas mi rtogs so//skad cig ma tha ma mthong ba rnams la nges pa'i phyir 'di mi dmigs pas mi gnas par rtogs pa'i phyir de'i tshe nges pa'i dus yin pas mi rtag pa nyid du rnam par gzhag go zhes kyang bshad zin to/ /de lta ma yin na gzhan gyi rgyu mtshan can yin nam/rgyu mtshan med pa can nyid yin yang rung ste mi rtag pa nyid don gzhan kho nar 'gyur ro/ /de lta yin na ni dngos po de dang ldan par mi 'gyur te/ de la mi dgos pa'i phyir ro/ /dgos na ni de nyid 'di'i rang gi bdag nyid du gyur pa'i mi rtag pa yin pas gzhan gyis ci zhig bya/rang bzhin gyis mi g.yo na ni don gzhan dang ldan yang de'i ngo bor mi 'thad pa'i phyir ro/ /mi rtag pa nyid dam chos gzhan de yang don gzhan las byung ba na rgyu yin pa'am 'bras bu yin pa zhig tu 'gyur grang / rgyu dang 'bras bu ma yin pa ni 'brel ba med pa'i phyir / de la yod par rjes su dpag pa mi srid pa'i phyir ro//de la phyis 'byung phyir na rgyu nyid min/ /'bras bu na yang ga la nges/ /de dngos po grub nas phyis don gzhan las 'byung na ji ltar de'i rgyu yin/ gzhan gyi phan pa la ltos pa'i 'bras bu yang rgyu la gdon mi za bar yod pa ma yin pa'i phyir de yod pa'i gtan tshigs ma nges pa nyid do//dngos po tsam las byung ba yin na yang gzhan la ltos pa med pa'i phyir rgyu med pa dang de tsam gyis rjes su 'brel bar grub po/ de las 'ga' zhig byung yang de la mi dgos pas nyams pa med pa'i phyir thal ba snga ma bzhin no//des na mi 'jigs pa'i rang bzhin gyi dngos po la rjes su dpog pa ma yin no/ /ji ltar rjes su mi dpog /'di ltar mi rtag pa ma yin pa'i dngos po la ni 'gar yang skye ba ma mthong la/ ma mthong ba las ni mi mthun pa'i phyogs las ldog pa des na 'khrul pa med pa yin no zhe na/mi mthun phyogs la ma mthong ba/ /tsam gyis 'khrul pa med pa min/ /'khrul pa srid pa tsam nyid phyir/ /phru ba'i 'bras ni tshos pa bzhin/ /mang po zhig tshos par mthong / yang phru ba'i nang du chud pa tsam gyis ni tshos par mi 'grub ste/'khrul pa mthong ba'i phyir ro/ /'di ltar 'di lta bu'i rang bzhin yin la 'di dang tshos pa'i rgyu 'dra ba dag tshos so zhes bya bar mi 'gyur ro/ /de lta ma yin na rjes su dpag pa de lhag ma dang ldan pa'i 'khrul pa can yin no/ /yang lhag ma dang ldan pa zhes bya ba 'di ci zhig yin zhe na/gang zhig ma mthong ba tsam gyis/ /ldog pa rab tu ston byed pa/ /de'i ldog pa de ni ma nges pa mi mthun pa'i phyogs la 'jug par the tshom za bar 'gyur te/ ldog pa sgrub pa ma mthong tsam/ /de ni the tshom rgyu yin phyir/ / de la lhag ma ldan zhes brjod/ /mi dmigs pa thams cad ni med pa rtogs par byed pa ma yin no/ /de'i phyir gcig log pas gzhan ldog par 'dod pas ni de gnyis rang bzhin 'brel pa 'ga' zhig kyang 'dod par bya dgos so/ /de lta ma yin na gtan tshigs go bar byed pa ma yin par 'gyur ro//gtan tshigs kyi ni tshul gsum la'ang / /de yis ma grub ldog don dang / /'khrul pa can gyi gnyen por ni/ /nges pa brjod par mdzad pa yin/ /'brel ba med par ni rjes su 'gro ba dang ldog pa nges pa med de/des na de nyid ston par mdzad pa ni gnyis ka la rab tu grub pa ni sgrub pa yin no zhes nges pa bshad pa yin no/ /de la rjes su 'gro ba nges pas ni 'gal ba dang de'i phyogs dang mthun pa rnams bsal lo/ /ldog pa nges pas ni ma nges pa'o/ /gnyis ka la zhes bya bas ni gcig la grub pa 'gog pa'o//rab tu grub pa zhes bya bas ni mthun pa'i phyogs dang mi mthun pa'i phyogs dag la the tshom za ba lhag ma dang ldan pa dang / thun mong ma yin pa dag go /'brel pa med par ma mthong ba tsam gyis ldog na ni re zhig 'gal ba dang ma nges pa'i gnyen por gnyi ga brjod par bya ba gang yin pa 'di ni rigs so zhes bshad pa gang yin pa ste /chos mi mthun pa smos pa ni ma nges pa'i gnyen por ro/ /gal te des mi mthun pa'i phyogs la ma mthong ba ston par byed na ni de ma smos kyang rtogs par 'gyur ro//de la sngar brjod pas ldog par 'gyur ba mthong ba'i 'khrul pa gang yin pa ni med do/ /gal te tshig gis ma mthong ba la dran par byed do zhe na / mthong ba ma rtogs par ni yan lag ma yin pas de la ni dran pa'i don du brjod par rigs na/ ma mthong ba ni mthong ba med pa yin te/de la ni mthong bas gnod par 'gyur ro/ /de med na grub pa kho na yin pas de grub par bya ba'i phyir brjod pa don med do/ /gal te ma dmigs pa de tsam gyis med do zhes bya ba ma yin pa nyid pas de'i don du brjod do zhe na/ gal te ma dmigs kyang med do zhes bya bar mi rtogs na brjod pas kyang mi rtogs par 'gyur te/de yang mi dmigs pa kho na rjod par byed pa'i phyir ro/ /gcig mi dmigs pa ni gzhan med pa sgrub par byed pa yang ma yin te/ ha cang thal bar 'gyur ba'i phyir ro/ /des sgrub pa ni ma yin te/'on kyang rang nyid ma dmigs pas yin no zhe na/ snang ba ma mthong na ni med par rigs kyi/ de med na ni de mi rigs te/ la lar 'dod rgyal du de ltar gyur kyang de dag 'brel pa med pas khyab pa mi 'grub pa'i phyir ro/ /des med do zhes brjod pas kyang de ltar 'gyur ba ma yin te/ha cang thal bar 'gyur ba'i phyir ro/ /de bas na ldog par 'dod pas de la gang gis na 'di ldog pa zhes bya bar 'gyur ba'i rigs pa brjod dgos so/ /med ces bya ba'i tshig gis kyang / /de med kho na min gal te/ /ji ltar med rigs de brjod na//de tshe med ces bya bar rtogs/ /zhes bya ba ni bsdu ba'i tshigs su bcad pa'o/ /de med pa la mi dmigs pas ldog pa grub pa ma yin nam zhe na/ 'di la cung zad brjod zin to/ /gzhan yang / gal te ma mthong bas ldog 'gyur/ /ji ltar lhag ldan 'khrul can yin//dper na 'bras bu 'di dag ni smin pa'am ro 'di bro ba yin te/ gzugs khyad par med pa'i phyir dang / gcig las skyes pa'i phyir zos pa dang 'dra ba'o zhes bya ba lta bu'o/ /'di la yang zos pas las gzhan phyogs su byas nas bsgrub par bya ba med pa las gtan tshigs mi dmigs pa yod pa'i phyir ji ltar 'khrul pa yin/kha cig na re mngon sum gyi gnod par dogs pa'i 'khrul pa yin no zhes zer ro/ /ma yin te/ phyogs su byas pa'i yul la med pa'i phyir ro/ /gal te na 'gyur ro zhe na/ de lta bur dogs med na ni ha cang thal bar 'gyur te/gzhan la yang med par nges pa med pa'i phyir ro/ /tshad ma zhugs pas gnod par byed pa yin gyi/ ma zhugs par gnod na ni thams cad la yid brtan du med do/ /ldog pa ni grub pa kho na sgrub par byed pa yin te/ de'i phyir de lta bu'i ngo bo ni nges pa la ltos so//mi dmigs pas 'ga' zhig la med par grub kyang 'brel ba med pa ni de med pa thams cad la med par mi 'grub pas the tshom za ba'i phyir ldog pa med pa ni lhag ma dang ldan pa'i 'khrul pa yin no/ /gzhan yang / ldog pa can yang gtan tshigs 'gyur//gson pa'i lus 'di ni bdag med pa ma yin te/ srog la sogs pa dang ldan pa ma yin pa nyid du thal bar 'gyur ba'i phyir ro/ /bdag med pa bum pa la sogs pa mthong ba dang ma mthong ba dag la sogs pa med pas khyab pa'i phyir te/ de log na khyab par bya ba ldog pas/bdag yod par rtogs par 'gyur ro/ /bltar mi rung ba mi dmigs pas med pa ma grub na bum pa la sogs pa bdag med par grub pa'i phyir srog la sogs ldog pa med do/ /gal te khas blangs pa'i phyir 'grub po zhe na/ de ni ji ltar bdag 'grub gzhan bdag med pa tshad ma can ma yin pa yang ji ltar 'grub pa yin/khas blangs pas bdag dang bcas pa dang bdag med pa dag rnam par phye nas de la med pas rtogs par byed pa nyid du rjod par byed pas ni/ bdag lung las grub par khas blang bar 'gyur gyi/rjes su dpag par bya ba ni ma yin no/ /gang yang / ma grub sbyar ba/ de bzhin du mthun pa'i phyogs la yod pa dang med pa zhes bya ba la sogs pa la yang ci rigs par brjod par bya'o zhes bya ba de yang / brjod bya ma yin / mi dmigs pa kho nar zad na the tshom za ba'i phyir te/dmigs na de med pa'i phyir ro/ /ldog pa yang mi dmigs pa nyid las yin te/ des na the tshom du gyur pa yang ma bzlog par 'gyur ro/ /gal te ci rigs par zhes smos pa'i phyir ma bzlog pa kho na'o zhe na/ ma yin te/ gang zhig gnyis ka la nges pa brjod pa de kho na zhes bya ba la sogs pa gsungs pa'i phyir ro//de'i phyir mi dmigs kyang the tshom za bas ldog pa med par dgongs te/ de dgag par bshad pa yin no/ /mnyan par bya ba nyid kyang rtag pa dang mi rtag pa dag la ma mthong ba'i phyir de las zlog pas de dag rnam par gcod pa'i gtan tshigs su 'gyur ro//de rnam par gcod pa ni de dag las zlog pa las gzhan ma yin no/ /rnam par gcod pa ma yin pa ni gang las kyang ldog pa nyid du ma nges pa'i phyir ro/ /gang zhig gang la med do zhes bya bar nges pa de yod na ji ltar de med par rtogs par mi byed/gal te gnyi ga rnam par gcod pa ni ma yin te/ tshad ma gzhan gyis gnod pa'i phyir ro/ /phan tshun rnam par gcod pa'i ngo bo can rnams ni gcig rnam par bcad pas gzhan sgrub pa'i phyir dgag pa ma yin te/ sgrub pa dang dgag pa dag ni 'gal ba'i phyir ro zhe na/da ni ma mthong ba tshad ma ma yin te/ gnod pa srid pa'i phyir ro/ /de bzhin du gzhan la yang tshad ma gzhan gyis gnod pa srid de/ mtshan nyid dang ldan pa la gnod pa srid na de'i mtshan nyid sun phyung ba kho nar 'gyur bas thams cad la yid brtan du med do//rjes su dpag pa'i yul la yang mngon sum dang rjes su dpag pa dang 'gal ba mthong bas yid brtan du med par thal lo zhe na/ ma yin te/ ji skad bshad pa lta bu la mi srid pa'i phyir ro/ /'gal ba 'khrul pa med pa can mi brjod par 'gyur ro zhe na/ rjes su dpag pa'i yul la ma brjod pa'i phyir 'dod pa yin no//'di'i yul ni bstan par bya'o/ /gang yang gal te ma mthong ba tsam gyis snang ba dag la 'gog par byed na de yang rigs pa ma yin no zhes bshad pa ji ltar rigs pa ma yin te/ mi dmigs pas med par grub pa'i phyir ro//reg pa dmigs pa'i mtshan nyid kyir gyur pa'i phyir dgag par rigs pa kho na ma yin nam zhe na/ rigs pa ma yin te/ snang ba dang de'i rang bzhin gyi yul la yod pa tsam ni 'gog pa ma yin pa'i phyir ro/ /des na sa la sogs pa spyir bzung nas dgag pa smras so//de la yang shing bal dang rdo ba dang lo ma la sogs pa la de yod kyang reg pa tha dad pa mthong ba'i phyir ro/ /khyad par 'ga' zhig la srid par dogs par 'gyur ba'i phyir thams cad la ma mthong ba tsam gyis dgag par rigs pa ma yin no/ /gzhan yang gal te ci zhig ltar mi mthun pa'i phyogs la ma mthong ba tsam gyis 'brel pa med pa yang de 'khrul pa med do zhe na/yul 'ga' zhig na rdzas kha cig ji ltar mthong ba gzhan na gzhan du yang snang ngo / /dper na sman kha cig zhing khyad par can las ni ro dang nus pa dang smin par byed pa khyad par can du 'gyur la/gzhan las ni ma yin pa lta bu'o/ /dus dang legs par bya ba'i khyad par las kyang de dang 'dra'o/ /yul de pa rnams kyis de ltar mthong zhes te/ de nyid kyis de lta bu yin par ni mi 'gyur te/ rgyu khyad par srid pa rnams la yon tan gzhan du srid pa'i phyir ro//rgyu khyad par med na ni rjes su dpag tu rung ste/ dper na byed pa po mthong ba can gyi tshig kyang skyes bu'i 'du byed pa sngon du 'gro ba can yin no zhes bya ba lta bu'o/ /tshig la khyad par med pa'i phyir te/ rnam pa thams cad skyes bu dag gis byed par mthong ba'i phyir ro//gang gis na tshig la sogs pa cung zad tsam chos mthun pas rnam pa thams cad mthun par rjes su dpog par 'gyur ba de ltar skyes bu dag ni rgyu khyad par med pa can ma yin te/ yon tan thams cad la khyad par mthong ba'i phyir ro//legs par bya ba'i bye brag las khyad par rtogs pa'i phyir ro/ /de bzhin du gzhan du yang srid pa'i phyir ro/ /mi srid pa rjes su dpag pa las yang gnod par byed pa'i gtan tshigs med pa'i phyir te/ 'dod chags dang bral ba ma mthong ba'i phyir la/ma mthong ba dang ni gnod par bya ba dang / gnod par byed pa mi byed 'grub pa'i phyir ro/ /'dod chags la sogs pa'i 'bras bu 'khrul pa med pa can med pa'i phyir ro/ /srid kyang khyab pa rnams bltar mi rung ba'i phyir ro/ /de lta bu dag ni spang bar 'os pa yang ma yin no//tshig rnams ni de lta bu ma yin te/ khyad par ba ltar rung ba'i phyir ro/ /bltar mi rung ba nyid gcig yin na yang khyad par ma mthong ba rnams rigs mi mthun pa nyid du khas len pa 'gal ba'i phyir ro/ /de'i khyad par rnams ni gzhan la yang bya bar nus pa'i phyir ro//sgra mngon sum pa rnams la mngon sum ma yin pa'i ngo bo med pa'i phyir ro/ /'khrul pa'i rgyu mtshan med pa'i phyir te/ gnod par byed pa med pas 'khrul pa mi 'grub pa'i phyir ro/ /skyes bu dag la ni khyad par mthong ba gnod par byed pa yin pa'i phyir/mtshungs pa ma yin no/ /tshig gi khyad par gzhan gyi ngo bor gyur pa ni de'i ngo bo ma yin no/ /de'i phyir khyad par med pa'i rang bzhin thams cad skyes bus byed do/ /yang na ni 'ga' yang ma yin no/ /de'i phyir de tsam dang 'brel ba'i/ /ngo bo nyid kyis ngo bo nyid//ldog par byed pa'am/ dper na shing gis shing sha ba lta bu'o/ /yal ga la sogs pa dang ldan pa'i khyad par 'ga' zhig kho na la de skad du grags pa'i phyir / de ni de'i rang gi ngo bo yin na rang gi ngo bo yongs su bor nas kyang ji ltar yod par 'gyur ro //rang bzhin 'brel ba'i phyir de la ni 'khrul pa med do/ /rgyu yis kyang / 'bras bu ldog par byed pa yin te/ 'khrul pa med pa'i phyir ro/ /rgyu log pa na yang 'bras bu ldog par byed do/ /gzhan du na de de'i 'bras bu nyid du mi 'gyur ro/ / des na rgyu dang 'bras bu'i dngos po yang rang bzhin nges par byed pa yin no/ /de'i phyir gnyi gar yang rang bzhin 'brel ba kho nas ldog go/ /de lta min na gcig log pas/ /ji ltar gzhan ni ldog par 'gyur/ /mi la rta mi bdog ces te/ /phyugs kyang bdog pa min nam ci//de bzhin gcig gcig nye ba'i phyir/ /ji ltar gzhan ni nye bar 'gyur/ /mi la phyugs ni bdog ces te/ /de bzhin rta yang bdog gam ci/ /zhes bya ba ni bar skabs kyi tshigs su bcad pa dag go/ /de'i phyir rang bzhin 'brel ba kho nas gtan tshigs bsgrub par bya ba go bar byed pa yin no//de yang de'i tshe ngo bo'i mtshan nyid dam de las byung ba'i mtshan nyid yin no/ /med na mi 'byung ba de nyid dpe dag gis rab tu ston to/ /de'i phyir chos mi mthun dpe la/ /nges par 'di las gzhi mi 'dod//dpe la ni bsgrub par bya ba'i chos de'i ngo bor de tsam dang 'brel bas ston te/ byas pa'i ngo bo nyid skyed par byed pa gang yin pa de ni mi rtag pa'i ngo bor gyur par bskyed pa yin no/ /zhes bya ba'i tshad ma dpes rab tu ston to/ /tshad ma des kyang bsgrub par bya ba'i chos de tsam dang rjes su 'brel bar rtogs par 'gyur ro//yang na rgyu yi dngos por te/ /de yod pa nyid na yod pa'i phyir ro zhes don gzhan rab tu ston to/ /de ltar de'i ngo bo dang rgyu'i dngos po rab tu grub na mi rtag pa nyid med na byas pa nyid med la/me med na yang du ba ste/ 'di ltar de ni rang gi ngo bo dang rgyu yin na ji ltar rang gi ngo bo rgyu med par yod par 'gyur zhes gzhi med par yang chos mi mthun pa'i dpe la ldog pa rab tu 'grub bo/ /de'i phyir rgyu dang rang bzhin dang / /med pa 'ga' zhig dgag pa'i yang //gtan tshigs yin te/ de dag kho na ldog pa na rang dang 'brel ba ldog par byed do/ /de'i phyir don 'ga' zhig dgag pa sgrub par 'dod pas kyang rgyu'am rang bzhin khyab par byed pa ldog pa gtan tshigs nyid du brjod par bya'o/ /de lta ma yin na 'brel ba med pa log pas gzhan log par mi 'grub pa'i phyir ro//dmigs par ni rigs ldan de mi dmigs par yang dgag pa'i gtan tshigs yin no/ /dgag pa'i yul can tha snyad kyi gtan tshigs la de'i gtan tshigs zhes bshad de/ de lta bu'i mi dmigs pa ni rang nyid dgag pa'i ngo bo yin pa'i phyir ro//rgyu dang khyad par byed pa mi dmigs pa ni gnyi ga'i yang gtan tshigs yin no/ /dgag pa'i gtan tshigs 'di ni rnam pa gsum kho na ste/ dmigs su yod pa'i rgyu dang / khyab par byed pa dang rang gi bdag nyid de ltar nges par mi dmigs pa'i de ni 'gal ba la sogs pa ma rtogs pa dang rtogs pa'i sbyor ba dbye ba de dang de dag gis rnam pa du mar bshad do//rang gi don gyi rjes su dpag pa rnam par nges pa ste le'u gnyis pa'o// //gzhan don rjes su dpag pa ni//rang gis mthong don rab gsal byed/ /ji ltar rang nyid tshul gsum pa'i rtags las rtags can la shes pa skyes pa kho na ltar gzhan la rtags can gyi shes pa bskyed par 'dod pas tshul gsum pa'i rtags ston par byed pa ni gzhan gyi don gyi rjes su dpag pa ste/rgyu la 'bras bu btags pa'i phyir ro/ /'dir rang gis mthong don/ zhes smos pa ni/ lung las gzhan gyis mthong ba ni / /sgrub min don med las kyang 'grub pa min/ /zhes shes par byed pa'i phyir/ ji ltar kha cig na re/ gzhan gyis rtogs par bya ba yin pa'i phyir/rang gis mthong ba ma yin yang / /gzhan gyis mthong ba sgrub par byed pa yin te/ dper na blo dang bde ba la sogs pa ni sems pa med pa yin te/ skye ba can nam mi rtag pa yin pa'i phyir gzugs la sogs pa bzhin no zhes bya ba'o zhes zer ba de ni mi rigs te/rjes su dpag pa'i yul la tshig gi tshad ma ma yin pa'i phyir ro/ /tshad ma yin na ni rjes su dpag pa mi 'jug par 'gyur te/ tshig tsam gyis don grub pas gtan tshigs la sogs pa don med pa'i phyir ro//tshig gi khyad par tshad ma yin pa'i phyir nyes pa med do zhe na/ 'di la lung gi tshad ma bsam par bshad zin to/ /'di la mi slu ba'i tshad ma med na khyad par 'ga' zhig yod par yang mi 'gyur ro/ /mi slu ba yod na ni des grub pa pha rol 'ga' zhig la grub pa ma yin no//des na khas blangs nas brtag pa 'jug pa ni ma yin gyi/ 'on kyang brtags nas khas len pa yin te/ de'i phyir gzhan gyis khas blangs pas ni 'grub pa yin no/ /lung de la gnod par bya ba'i phyir gzhan la sgrub par byed pa brjod pa'i phyir de'i tshe 'di tshad ma ma yin pas de grub pa ni grub pa ma yin pa'i phyir de las 'grub pa ji ltar 'gyur/lung de dang ldan pa la des 'grub pa yin no zhe na/ gang gi lung gang yin/ tshad mas gnod pa lung nyid du yang ji ltar 'gyur/ skye bo reng bur skyes gyur cing //yon tan nyes pa ma mthong la/ /kye ma grub mtha' mi bzad pa'i/ /gdon de su yis dgos pa yin/ /zhes bya ba ni bar skabs kyi tshigs su bcad pa'o/ /lung de nyid kyis de dang 'gal ba khas len par yang ji ltar 'gyur te/ de khas blangs nas spang ba'i yan lag gi lung tshad ma ma yin pas na rtogs par mi rung ba'i phyir ro//des khas blangs pa lung yin la/ de las kyang sgrub par byed pa'i chos yin zhing / de las ni dngos po 'jog pa'i phyir na/ dngos po legs par rnam par gnas pa yin no//skyes bus 'dod pas gtan tshigs dang der snang ba dag gis de nyid rnam par 'jog pa na/ da ni dngos po la gtan tshigs dang gtan tshigs ma yin pa yang ci yod de/ de ni dngos po la 'jug par yang ma nges pa'i phyir ro/ /yod pa'i don ni rtogs pa la ltos nas sgrub par byed par 'gyur ba yin gyi/gang las gzhan gyis khas blangs pa tsam gyis 'grub par 'gyur ba med par rtogs pa tsam gyis ni ma yin no/ /yod kyang dngos pos ma byas pa'i rtogs pa ni med par rtogs pa dang khyad par yod pa ma yin no //yid ches pa med pa'i phyir ro/ /'bras bu dang rang bzhin dang mi dmigs pa'i khyad par dag las rtogs pa'i yan lag gzhan ni med do zhes bshad zin to/ /de dngos po la grub pa'i mtshan nyid yin na ji ltar bdag nyid lam grub par 'gyur/ gzhan gyis ni pha rol yang rtogs par mi 'thad pa nyid do/ /gzhan gyis kun brtags pas thal ba bsgrub pa dper na du ma la yod pa'i gcig po ni yul la sogs pa'i khyad par gzhan dang ldan pa ma yin te/ yul dang dus dang gnas skabs kyi khyad par nges pa'i gsal ba gcig dang 'dres pas rnam par ma bcad pa rang bzhin gzhan gyis stong pa'i phyir te/de lta bu'i rang bzhin ni yul la sogs pa tha dad pa can dang ldan par 'gal ba'i phyir ro/ /zhes bya ba lta bu gang yin pa de ni chos gcig khas blangs na chos gzhan khas blangs par bstan pa'i phyir yin te/de khas mi len na ni chos gnyi ga ldog par 'gyur ro/ /rnam par dbye bar bya ba mi nus pa'i phyir te/ de ni gzhan du de lta yang dngos su 'brel pa'i phyir ro/ /da ni ji ltar mi srid pa'i don grub par 'gyur zhe na/ gang zhig mi srid pas khyab pa de yang de la mi srid pa'i phyir ro//de khas len na gzhan gdon mi za bar 'gyur ba'i phyir bzlog par dka'o/ /de lta na yang rang gis khas blangs pa gzhan du gnas pa'i phyir gtan tshigs ma grub pa dang / dam bcas pa la khas blangs pa la sogs pas gnod pa ma yin nam zhe na ma yin te/brtag pa'i dus na 'ga' yang khas blangs pa med pa'i phyir ro/ /don gang rtogs par byed pa des ni de rtogs pa'i shugs kyis 'ongs pa'i don gzhan yang khas blangs pa yin te/ 'od khas blangs na sgron ma khas blangs pa bzhin no//de'i phyir de ni rtogs pa nyid yin gyi/ lta ba gzhan du gnas pas skyon brjod pa ni ma yin no/ /de ni de'i khas len pa'i dus yin pas der don ji snyed rigs pa'i stobs kyis nye bar gnas pa de mtha' dag khas blang bar bya ba'am/ yang na ni 'ga' yang ma yin no//de ma grub pa la sogs par 'gyur ba yang ma yin te/ gal te de ltar yin na 'di yang 'gyur ba'am/ ma yin na ni gnyi ga yang mi 'gyur ro zhes chos gnyis 'brel ba nye bar ston pa yin pa'i phyir ro/ /nges pa nyid du yongs su 'dzin pa skyon 'dir 'gyur ba'am/gtan tshigs yod na ni ma yin no/ /rigs pas thob pa ni gdon mi za bar khas blang bar 'os pa'i phyir ro/ /khas blangs pas rigs pa la gnod par mi nus so zhes bshad par bya'o/ /chos gcig khas len pas gdon mi za bar gzhan khas blangs pa ni rigs pas byas pa'i phyir ro//gtan tshigs med kyang 'di ni rtsa ba'i gtan tshigs kyi khyab par bya ba dang khyab par byed pa'i dngos po sgrub par byed pa'i rnam pa yin gyi/ bzlog pa sgrub par byed pa ni ma yin te/ gtan tshigs la tshad ma med pa'i phyir ro//gal te 'dir yang bzlog pa nyid kyis mi rtag pa nyid dang skye ba dang ldan pa 'gog par byed pa yin no zhe na/ de ltar byed pa ni su yang med do/ /de ltar byed par nus pa nyid kyang ma yin te/ sems pa can dang de gnyis 'gal ba ma grub pas thal ba dang bzlog pa'i sgrub par byed pa dag go bar byed pa ma yin pa'i phyir ro//sngar rgyu ma tshang ba med pa can 'byung ba las gcig yod pas med pa'i phyir ram phan tshun spangs te gnas pa'i mtshan nyid kyis 'gal bar rtogs pa yin na/ skye ba can dang mi rtag pa dag dang sems pa yod pa la ni de grub pa ma yin no/ /gcig la ni ji skad bshad pa'i rang bzhin gzhan dang bral bar khas blangs pa kho na'i phyir yul la sogs pa tha dad pa can dang ldan pa yod pa ma yin te/ de med pa dang de yod pa ni phan tshun spangs te gnas pa'i mtshan nyid kyis 'gal ba'i phyir ro//slob dpon dag gis kyang yan lag can dgag pa la sogs pa rnams su don 'di nyid rnam pa du ma'i sgo nas nye bar bkod pas rnam pa de lta bu'i rang bzhin 'gog par mdzad pa yin te/ gcig nyid dang du ma yod pa ni 'gal ba'i phyir ro//gzhan dag ni gcig khas blangs pa btang ba med na med pa'i phyir chos gnyis ka yod pa ma yin pa'i phyir ro/ /grub pa'i mtha' khas len pa'i rgyu mtshan dpyad pa'i skabs su bab pa'i tshe yin te/ de lta ma yin na ni khas blangs nas rnam par dpyod pa mi 'thad pa'i phyir ro//don med par rtog pa sgro btags pa yang rtag pa ma yin te/ dper na sgra ni rtag pa'am mi rtag pa yin te/ phyogs dang mthun pa'i phyogs dag las gang yang rung ba yin pa'i phyir ro zhes bya ba lta bu'o/ / 'dir dngos po la ni sgra dang bum pa gnyis sam/ sgra dang nam mkha' gnyis nye bar yod pa ma yin gyi/ 'on kyang smra ba po'i brjod par 'dod pas byas pa yin te/ de med na brjod par 'dod pa dang cig shos dag gis nye ba dang bskal pa nyid med pa'i phyir ro/ / dngos po'i rang bzhin yin na ni yang gzhan du brjod par 'dod pas/ gzhan du 'gyur ba mi rigs pa'i phyir dang / gcig la cig car yon tan 'gal ba bsdu ba mi rigs pa'i phyir ro/ /de'i phyir chos 'di dag ni byed pa po'i 'dod pa'i rjes su byed pa yin gyi/dngos po'i rang bzhin gyi rjes su byed pa ni ma yin te/ de ni de ltar mi 'jug pa'i phyir ro/ /de'i phyir de las ni don mi 'grub ste/ dngos po'i rang bzhin dag nye ba dang bskal par ma grub pa'i phyir ro/ /grub na ni 'gyur te/ dper na 'ga' zhig tu de 'dra ba'i rang bzhin gyi chos mthun pa mthong nas gong bu 'di ni rwa can yin te/ba lang dang ba min gang yang rung ba zhig yin pa'i phyir ro zhes brjod pa bzhin no/ /ci ste yang ngas de ltar brjod par 'dod pa yin pa'i phyir ro/ /zhes smras pa de'i tshe don gyis stong pa'i brjod par 'dod pa tsam zhig 'grub kyi/de las don 'grub pa ni ma yin no/ /de'i 'dod pa ni dngos po la 'jug par nges pa med pa'i phyir ro/ /'di ltar gang la de'i 'dod pa yod pa der dngos po yod pa yin no zhes de ltar ni blta bar nus pa ma yin pas khyab pa ma grub pa'i phyir 'khrul par 'gyur ro//'dis ni ngas blangs pa'i phyir/ zhes bya ba la sogs pa'i gtan tshigs kyi sbyor ba dang / lung las grub pa yang bshad pa yin no/ /tshig ni smra ba po'i 'dod pa tsam gyis 'jug pa'i phyir ro/ /rtog dang lung dag byed pa po'i//'dod pa tsam dang rjes 'brel dang / /dngos po la yang srid pa'i phyir/ /des byas pa ni 'khrul pa yin/ /zhes bya ba ni bsdu ba'i tshigs su bcad pa'o/ / tshul gsum pa'i rtags bstan par byed pa gzhan gyi don gyi rjes su dpag pa yin pa'i phyir/don gyis na phyogs kyi tshig ni sgrub par byed pa ma yin no zhes bshad par rig par bya'o/ /ji ltar sgrub par byed pa ma yin no/ /zhe na/ dngos sam brgyud pas de la grub pa mi skye ba'i phyir ro/ /re zhig dngos su ni don gyi don rtog phyir don la//phyogs dang gtan tshigs brjod nus med/ /des na de dag rang nyid las/ /sgrub par byed pa gnas ma yin/ /don nyid kyis don go bar byed de/ 'khrul pa med pa'i phyir ro/ /brjod pa ni ma yin no / /'brel ba nges pa med phyir ro/ / des na phyogs dang gtan tshigs kyi tshig rang nyid kyis don grub pa'i phyir ni sgrub par byed pa ma yin no/ /phyogs kyi tshig las ni don la the tshom za bar mthong gi/ nges pa ni ma yin pa'i phyir ro/ / dngos su sgrub par byed pa ma yin no/ / bsgrub bya brjod phyir phyogs kyi tshig /brgyud pa yis kyang nus pa med/ /gtan tshigs brjod pa rang nyid la/ /nus pa med kyang nus ston byed/ /brgyud pas kyang ma yin te/ bsgrub par bya ba brjod pa'i phyir ro/ /gtan tshigs kyis tshig ni rang nyid nus pa med kyang nus pa brjod par bya ba yin phyir nye bar btags nas sgrub par byed pa 'dod pa yin no//de las gtan tshigs kyi tshigs su 'jug pa'i phyir/ /de yang nus pa nyid do zhe na/ the tshom las shes par 'dod pa dang / skabs 'jug pa'i phyir de dag las thal bar 'gyur ro/ / mi mthun pa'i tshig tsam las kyang the tshom za bas gnyen po gtan tshigs kyi tshig 'jug pas srid pa'i phyir de yang de dang lhan cig sgrub par byed par 'gyur ro/ /de'i phyir nang gi yan lag gi don 'grub pa'i nus pa ni tshul gsum nyid la gnas pa yin la/de la dran pa 'jog par byed pa ni de'i tshig la gnas pa'i phyir/ de nyid sgrub par byed pa yin no/ /yul ma bstan na gtan tshigs 'jug pa mi srid pas yul ston pa nyid kyis nus pa yin no zhe na/ 'di la bshad zin to/ /gzhan yang de med kyang gang cung zad byas pa de thams cad ni mi rtag pa yin la/sgra yang byas pa yin no zhes brjod pas kyang sgra mi rtag pa'o zhes don gyis go ba nyid do/ /de'i phyir 'di ni gdon mi za bar bstan par bya ba yin no/ /des na phyogs ni ma brjod kyang 'grub pa la gegs med pa'i phyir/gsum las tshul gang yang rung ba zhig ma smras na sgrub pa ma tshang ba'i skyon du 'gyur ro zhes bshad par rig par bya'o/ /'o na da ni sgrub par byed pa de bstan pa med na med pa ma yin pa'i phyir phyogs kyi mtshan nyid brjod par mi bya'o zhe na/ brjod par bya ba yin te/ bsgrub par bya ba dang bsgrub par bya ba ma yin pa la phyin ci log tu log par rtogs pa mthong ba'i phyir/ de bzlog pa'i don du yin no/ /rjes su dpag par bya ba de yang / ngo bo kho nar bstan par bya/ /rang nyid 'dod dang ma bsal ba'o//'dir rang gi ngo bo dang / tshig phrad dang / 'dod pa dang / rang nyid kyi tshig bzhis/ ma grub sgrub byed min don brjod/ /rgol bas khas blangs pa bzung ngo / /zhes rig par bya'o/ /des na grub pa dper na sgra ni mnyan par bya ba'o zhes bya ba lta bu dang /ma grub kyang sgrub par byed pa nyid du 'dod pa dper na ma grub pa'i gtan tshigs dang / dpe dag dang / skabs kyi rten ma yin pa dang / bstan bcos khas blangs kyang med na mi 'byung ba ma yin pa rgol ba'i khas blangs pa ma yin pa bsal ba yin no//da ni ji ltar ma thos na bsgrub par bya ba nyid du 'dod pa yin no zhes rtogs she na/ skabs kyis so/ /dper na 'dus pa rnams gzhan gyi don yin par grub pa na bdag gi don nyid bzhin no/ /de ni ma smras su zin kyang 'dod pas khyab pa'i bsgrub par bya ba yin no zhes bstan pa'i phyir 'dod pa smos so//de nyid ltos pa las chos dang chos can gyi khyad par du bshad pa yin te/ 'di dag ni 'dus pa ma yin pa'i yul can gzhan gyi don yin no zhes brjod pas na/ chos kyi khyad par du nye bar gzung ba'i phyir de de'i khyad par yin no// mig la sogs pa 'dus pa ma yin pa'i don dag ni/ /gzhan gyi don du 'gyur ba yin no zhes bya ba ni chos can gyi khyad par yin no/ /de ltar rnam par gzhag pa tsam zhig tha dad par zad kyi don ni ma yin no/ /khyad par du gyur pa'i bsgrub par bya ba skabs su bab pa las don gzhan yin /gang gis de ltar smras pa'i bsgrub bya'i chos kyis phan par 'gyur ba 'brel ba ci zhig yod de/ ha cang thal bar 'gyur ba'i phyir ro/ /de lta yin dang gtan tshigs 'gal ba dang dpe sgrub par byed pas stong par 'gyur te/chos kyi tshogs de nyid ni 'gar yang rjes su 'gro ba med pa'i phyir ro/ /de'i phyir gang las kyang rtogs par mi 'gyur ro/ /smras pa'i chos rjes su 'gro ba med na skyon 'dir 'gyur gyi/ gzhan la ni ma yin no zhe na/ ma yin te/ bsgrub par bya ba nyid du khyab par med pa'i phyir ro/ /skyon med na ni 'dod pa la gnod pa byed par yang mi 'gyur te/ de ni bsgrub par bya ba'i mi mthun pa'i phyogs nyid la 'jug pas de las bzlog pa bsgrub pa mtshan nyid yin pa'i phyir ro/ /ji skad bshad pa'i chos dang chos can gyi khyad par la ni rjes su 'gro ba med pa'i skyon 'dod pa nyid de/ji skad du bdag gzhan yin no zhe na ni de ma grub po zhes bshad pa yin no/ /'gal ba'i chos kyang 'dod pa de nyid la gnod par byas pa yin no/ /ma brjod pa'i phyir de yang bsgrub par bya ba ma yin no zhe na/gal te gang la rtsod pas sgrub par byed pa bkod pa de bsgrub par bya ba ma yin na bsgrub par bya ba ci yin/ de lta yin na phyin ci log tu grub pa'am don med par 'gyur te/ dper na sgra'i ngo bo ni ming can dang 'brel ba'i sngon rol nas don dang ldan pa yin te/rnam par dbye ba dang ldan par mthong ba'i phyir ro zhes bya ba la rang gi ngo bo tsam gyis don dang ldan par ni bsgrub par bya ba ma yin la/ don dang ldan par yang mthong ba de'i phyir phyi rol gyi don dang ldan pa nyid mi 'dod pa grub par 'gyur ba'am/ de bzhin du mig la sogs pa ni gzhan gyi don yin te/'dus pa yin pa'i phyir zhes bya ba la/ gzhan gyi don tsam khyad par med par grub kyang bdag gi don ni ma yin pa bzhin no/ /de dag 'dus pa gzhan gyi don byed par ni khas blangs pa'i phyir/ sgrub par byed pa 'bras bu med pa yin no//de phyir ma smras kyang 'dod pas khyab pa ni bsgrub par bya ba yin zhing / de ma tshang ba la sogs pa yang dpe bsgrub par bya bas stong pa la sogs pa'i nyes pa yin no/ /'dis ni gnyis pa dang bcas pa'i sbyor ba rnams la yang rjes su 'gro ba med pa'i nyes pa bshad pa yin te/dper na bum pa ni mngon par gsal ba'i sems pa can lus kyi mtshan nyid kyi skyes bu dang bum pa gang yang rung bas/ gnyis pa dang bcas pas yin te/ ut+pal ma yin pa'i phyir rtsig pa bzhin no zhes bya ba la/rtsig pa ni de lta bur gyur pa'i skyes bus gnyis pa dang bcas pa ma grub pa bzhin no/ /'on te spyi bsgrub par bya ba 'dod pa'i phyir khyad par 'phen pa ma yin no zhe na/ 'di la ni de mi 'phen na sgrub par byed pa'i 'bras bu ci yin/ yang na ni mi 'dod par 'gyur ro zhes bshad zin to//gal te sgrub par byed pas yul du byas pa ma yin na ji ltar des de 'grub/ 'grub na yang ji ltar yul ma yin/ yul yin no zhe na ni rang la brten pa'i nyes pa'i rnam pas ji ltar ma reg par 'gyur/ des de la brten pa'i sgrub par byed pa las rnyed par 'gyur zhing /gzhan sun 'byin pa ni ma yin no zhes bya ba 'di ni gsal bar rgyal po'i gra sa'i rnam par gzhag pa yin no/ /des na grub pa 'phen pa'i phyir sgrub par byed pa'i nus pas khyab pa'i don gyis rnam pa ji snyed pa de thams cad ni sun 'byin pas kyang yin no//rnam pa de lta bu'i lus bum pa las don gzhan gyi ngo bor khas mi len na spyi sgrub pa yang mi srid de/ gang yang rung ba'i don gzhan gyi ngo bo med pa'i phyir ro/ /gnyi ga de lta bu'i dngos por srid na gang yang rung ba brjod par nus pa yin te/dper na lha sbyin dang mchod sbyin gang yang rung ba zhig pa'o zhes bya ba lta bu yin gyi/ /gang yang rung ba gcig za mi srid pa'am 'dod pa med na ma yin no/ /'di las kyang gang yang rung ba don gzhan gyi ngo bo med pa yin te bum pa rang nyid kyis don gzhan gyi ngo bor khas ma blangs pa'i phyir dang 'gal ba'i phyir ro //shugs kyis lus nyid kyi don gzhan du gyur pa yin no zhes ngag gi don du rnam par gnas pa'i phyir gang yang rung ba zhes smos pa ni don med do/ /de lta ma yin na tshig 'di 'gal par 'gyur te/bum pa bdag nyid ni de ma yin pa don gzhan gyi ngo bor 'gal ba'i phyir ro/ /gal te lus nyid kyis don gzhan gyi ngo bo yin na ni de nyid de skad du brjod par 'gyur na/ gang yang rung ba smos pa'i shugs kyis bum pa yang de ltar 'gyur ba'i phyir 'gal ba yin no//'di'i phyir yang spyi la brten pa ma yin te/ gsal ba thams cad yod par mi srid na de'i spyi mi 'thad pa'i phyir ro/ /dper na bram ze la sogs pa ma yin pa nyid la rig nyid dam/ rtog pa'i shes pa la dbang po la brten pa nyid bzhin no//'di ltar de mig la brten pa ni ma yin te/ de'i shes pa bzhin du de'i don rtogs pa med pa'i phyir dang / de 'gyur ba'i rjes su mi byed pa'i phyir dang / de med kyang yod pa'i phyir ro/ /de bzhin du snang ba la sogs pa la log pa las byung ba yang ma yin pa'i dbang po la brten pa nyid ma yin no//de bzhin du de gnyis de ltar khas len na bum pa dang lus dag las gang yang rung ba'i don gzhan du gyur pa zhes spyir gang yang rung ba'i don gzhan gyi ngo bo 'gyur ba yin na/ de lta ma yin te/lus rjes su 'gro ba med par dogs pa bum pa dang yang 'gal ba'i phyir ro/ /de'i phyir yang spyi srid pa ma yin no/ /lha sbyin dang mchod sbyin dag las gang yang rung ba gcig la zas sbyin par bya ba yin te/ lha sbyin la ma yin zhing mchod sbyin la ma yin no zhes bya ba 'di lta bu yod pa srid dam/lha sbyin 'ba' zhig la ma yin no snyam du bsams pa'i phyir skyon med do zhe na/ ma yin te/ gang yang rung ba smos pa nyid kyis thal ba med pa'i phyir ro/ /de'i phyir gcig yongs su gzung yang mi 'gal ba yin na gang yang rung ba smos pa 'di nus par 'gyur te/dper na gcig za yang gang yang rung ba za'o zhes brjod pa bzhin no/ /'di'i yul ni rnam par brtag pa yin pa'i phyir ro/ /de la bum pa kho na'am lus kho nas gnyis pa dang bcas par ni mi 'dod do//sgrub pa mi 'thad pa'i yang phyir te/ gnyis gcig la bsgrub pa la yang rnam par brtag pa dang bsdu ba yang mi 'thad pa yin na da ci zhig sgrub par nus te/ de'i phyir tshig gi tshul ni gsog yin no/ /'dis ni phyogs dang mthun pa'i phyogs dag las gang yang rung ba nyid kyang gsal ba yin no//gzhan yang gnyi gar yang srid pa mi 'gal na de de ltar 'gyur gyi/ de lta ma yin na ni de sgra la ma grub pa nyid do/ /'di ltar rnam pa de lta bu'i sgra de ni phyogs nyid yin te / phyogs dang mthun pa'i phyogs dag las gang yang rung ba ni ma yin no //rnam par brtag pa dang gcig tu so sor nges pa 'gal ba'i phyir ro/ /don rnams la yang spyir brjod kyang shugs kyi khyad par gnas pa'i phyir yang lus nyid rtogs par 'gyur gyi bum pa ni ma yin no/ / dper na 'ga' zhig 'ongs so zhes bya bas ri'am shing la ni dogs par 'gyur ba ma yin pa bzhin no/ /khyad par gyi sgra nye bar byas pa nyid ni spyi'i sgra rnams kyi khyad par rnam par 'jog pa'i rgyu ma yin gyi/ 'on kyang skabs dang shugs la sogs pa gang yang yin no//de'i phyir gang yang rung ba'i spyi don gzhan du gyur pa ni ma yin te/ don gzhan du gyur pa gnyi ga'i mi 'thad pa'i phyir ro/ /don gzhan du gyur pa 'ga' zhig yod pa yang ma yin te/ gnyis las gcig kyang khas ma blangs pa'i phyir ro/ /sgra dang bum pa'i khyad par gyis rtogs na ni mi rtag pa la yang mtshungs so zhe na/ma yin te/ mi rtag pa nyid grub pas na sgra de dang ldan par sgrub pa'i phyir ro/ /de bzhin du 'ga' zhig don gzhan du gyur pas khas len na gang yang rung ba don gzhan gyi ngo bor 'gyur ba yin no/ /'dod pa bsgrub byar brjod pa 'dis ni chos dang chos can dag gis khyad par du byas pa'i chos dang chos can dag 'gog pa yang bsal ba yin te/dper na sgra ni mi rtag pa'i sgra dang ldan pa ma yin pa'am sgra'i mi rtag pa dang ldan pa ma yin no zhes bya ba lta bu ste/ chos can la spyi bkag pa ni 'gal ba med pa'i phyir ro//sgra de mi rtag pa yin gyi/ sgra mi rtag pa'i sgra dang ldan pa ma yin no de ltar gyur par 'dod na ni sgra la mi rtag pa'i sgra sgrub pa'i phyir sgra mi rtag par mi 'gyur gyi/ sgra mi rtag pa'i sgra dang ldan par 'gyur ro//de yang 'dod pa ma yin te/ de'i phyir 'dod pa la gnod pa 'ga' yang med do/ /de'i phyir chos 'ba' zhig kho na chos can la sgrub pa'am/ phyin ci log tu bya ba yin te/ de ltar na 'dod pa'i spyi grub bam gnod par byas pa yin no/ /'gal ba ni thams cad du spyi de phyin ci log tu byed pa kho na'i phyir ro//de ni res 'ga' chos kyi sgo nas sam/ chos can gyi sgo nas sam/ de'i khyad par gyi sgo nas byed pa'i phyir des tha snyad du byed do/ /rang nyid kyi sgra ni chos can gcig la bstan bcos las chos du ma rnam par gzhag kyang rang nyid bdag nyid 'dod pa kho na bsgrub par bya ba yin gyi/bstan bcos khas blangs su zin kyang gzhan ni ma yin no zhes bstan pa'i phyir/ der gzhan gyi 'dod pa thams cad bzlog tu zin kyang mdo mdzad pas rang gi 'brel bar rang nyid ces bya ba ni bstan bcos la ma ltos par khas blangs pas ston par byed pa'o zhes rang nyid kyi sgras dgos pa'i gnas bzlog par bshad do//bstan bcos khas blangs pa'i phyir de la mthong ba thams cad bsgrub par bya ba yin no zhes dogs pa srid par 'gyur ro/ / log par rtogs pa yang mthong ba nyid de/ kha cig na re bstan bcos las mthong ba ni bsgrub par bya ba kho na yin la/ de gnod na yang gtan tshigs dang dam bca' ba dag gi skyon yin no zhes zer ro/ /de dag gi ltar na byas pa nyid kyi / sgra mi rtag par sgrub pa dri la sogs pa'i yon tan bzlog pa'i phyir gtan tshigs 'gal bar 'gyur ro//skabs ma yin pa'i phyir ma yin no zhe na de ni gzhan la yang mtshungs so/ /mi mtshungs te 'dir chos can gyi skabs yin pa'i phyir ro zhe na/ ma yin te chos can gyi skabs su bab pa yin yang dngos po la 'brel ba med pa'i phyir ro//'on kyang 'di dag ni bstan bcos khas blangs pa'i sgo kho na nas 'brel ba yin na de ni thams cad la mtshungs pa yin pa'i phyir 'di gnyis la bye brag med do / /'on te rgol bas kyang 'dod pas sgrub par byed do//bsgrub par bya ba spyi'i phyogs gcig tu gyur pa'i khyad par yin pa'i phyir bsgrub par bya ba'i chos bzhin no zhe na/ spyi'i phyogs gcig tu gyur pa'i khyad par yin pa zhes bya ba tsam gyis ni skabs ma yin pa 'dod par mi 'gyur te/ don ni de'i ngo bo mi 'dor ba'i phyir 'dod pa dang 'jug pa dag ldog pa med par thal ba'i phyir ro//de'i phyir na 'di ni skabs 'ga' zhig las 'gyur ba dang de nyid kyis shes par bya ba yin no/ /bzlog pa nyams su myong bas dgag pa 'jug kyang bla ste/ skabs dang mi ldan pa de nan gyis yod do zhes bsgrub pa mngon sum dang 'gal bar spyod do//gnas skabs 'ga' yi 'dod 'gyur zhing / /de rtogs pa yang de dag gis/ /nan gyis khyod 'di 'dod ces pa/ /gsal bar dbang phyug spyod pa yin/ /'bras bu'i rtags can ming brjod de//'khrul pa yis ni gnod par 'gyur/ /med na mi 'byung min don la/ /gnod kyang gzhan la ci zhig gnod/ /rjes dpag rang gi spyod yul la/ /lung la ltos pa med par bshad/ /des grub de ni legs par grub/ /de tshe bstan bcos ltos ma yin//de tshe gcod dor 'gyur zhe na/ /de tshe khas blangs med phyir min/ /'di ni khas len thabs yin pas/ /de tshe yod kyang de rgyu min/ /de ltar yul gnyis rnam dag na/ / de tshe bstan bcos yongs 'dzin par/ /'dod pa'i dus min de yi tshe/ /bstan bcos kyis ni gnod par 'gyur//des grub don la de dang ni/ /'gal bar sems pa mi rung phyir/ /gnas gsum par ni 'pho ba na/ /bstan bcos len pa rigs ldan yin/ /der yang bsgrub bya'i chos dang ni/ /med na mi 'byung la gnod nyid/ /spang bar bya yi gzhan min te/ / thug pa med par thal phyir ro/ /dpyod pa kun la bstan bcos dag /gzung zhes lugs 'di gang gis byas/ /da ni grub mtha' med rnams kyis/ /du bas me ni 'dzin mi 'gyur/ /gal te dpe la bstan bcos kun/ /sgrub par byed pa gcig nyid la//bstan pa sgrub byed 'gyur zhe na/ /'di ni 'jig rten 'das lugs yin/ /'brel med chos ni ma grub pas/ /ma grub par ni ji ltar 'gyur/ /de sgrub yin na de sgrub brjod/ /gtan tshigs skyon ldan ji ltar yin/ /chos can chos ni ma lus pa/ /dper bstan med pa kho nar ni//'gro ba sogs dang dus sogs las/ /sems ldan mi sogs rjes dpog byed/ /mi 'khrul bas na ngo bo dang / /rgyu dag sgrub par byed pa'i don/ /'ga' yis smra ba la gnod kyang / /ngo bo nyid la ldog mi 'gyur/ /de ni 'dod pa'i bsgrub bya yi//don dang med na mi 'byung bar/ /rtogs pa gzhan dag gtan tshigs des/ /ci ste rtogs par 'gyur ma yin/ /gal te bstan bcos la lar 'ga'/ /rigs min pas na rigs smra ba/ /gzhan pa dag kyang dgag bya zhes/ /bya ba rgyal rigs lugs yin no//don rnams thams cad mtshungs byas nas / /sgrub byed brjod pa nus ma yin/ /des na kun la bsgrub bya dang / /sgrub byed gzhag pa 'di nyams 'gyur/ /zhes bya ba ni bar skabs kyi tshigs su bcad pa dag go/ /de'i phyir bsgrub par bya ba la gnod par byed pa kho na 'gal ba yin no//gnod bya gnod byed ma yin pa dag gcig las grub pa 'gal ba med kyang / gal te bstan bcos la gnod pas 'gal bar 'dod na/ de ni yul gzhan la yang mtshungs pa'i phyir 'gal bar 'gyur ro/ /des na de nyid la gnod 'gyur gyi/de lta ma yin na ni 'gyur ro zhe na/ ma yin te/ gtan tshigs thams cad kyis skyon dang yon tan ni rang gi bsgrub par bya ba la ltos nas bsam par bya ba yin pa'i phyir ro/ /de ni rang gi sgrub par bya ba 'gog pa ma yin yang bstan bcos la gnod pa'i phyir 'gal ba yin na/ de ni gzhan gyis byas na yang mtshungs pa'i phyir 'gal bar 'gyur ro/ /gzhan gyis byas na yang dam bca' ba'i skyon du 'gyur ba kho na'o zhe na/ 'gyur mod yul la de ci ste mi 'gyur/ gnod par bya ba'i chos dang ldan pa'i chos can gyi rjod pa'i phyir 'di nyid la gzhan gyi gzhan la ni ma yin no zhe na/ma yin te/ gnod par bya ba'i don can gyi bstan bcos khas blangs pas na gzhan du yang 'gyur ro/ /des na 'di ni dam bca' ba'i skyon gyi mtshan nyid du mi rigs te/ ha cang thal bar 'gyur ba'i phyir ro/ /gzhan yang gal te bstan bcos khas blangs pa'i phyir bstan bcos la mthong ba thams cad bsgrub bya nyid du 'dod pa yin nam grub pa'i gtan tshigs rjod pa yang dam bca' bar 'gyur ro//tshig phrad smos pas sgrub byed du 'dod pa spangs pa'i phyir skyon med do zhe na/ ma yin te/rigs pas thob pa ni tshig gis bzlog par mi nus pa'i phyir ro/ /phyogs kyi mtshan nyid las phyi rol du gyur pa'i don can rang nyid kyi sgras kyang don cung zad rgyas par mi byed do/ /gal te bstan bcos la 'jug pas 'dod du yin no/ / gang gis de'i don du 'bad par byed par dgos pas 'di ga las yin/gal te tshad mas ma bzlog na de 'jug pa sus bzlog cing / tshad mas bzlog na yang sus tshig gis 'jug par byed nus/ gzhan dag ni rang nyid kyi sgra gzhung lugs kyi mtshan nyid kyis bskyed pa'i khyad par gyi chos can yongs su spangs nas rab tu grags pa'i chos can yongs su gzung ba'i phyir ro zhes 'dzer to//de la yang rnam par dpyod pa'i skabs nyid kyis gzhi rab tu grags pa yin par grub pa'i phyir 'di ni ci yang ma yin no/ /rang gi 'dod pas brtags pa khyad par can don la gtsor nye bar sbyor ba med pa'i don dag la nye bar bkod pa'i rnam par gzhag pa ni 'ga' yang bzlog par bya ba ma yin no//de ltar rab tu bkod pa'i ngo bo mtshungs par ma grub can dag ni khyad par gyi rten can gyi tha snyad rten ma yin pa'i phyir ro//'on te rab tu grags pa nye bar bstan pa'i sgo nas grub pa'i chos can bsgrub par bya ba ma yin bshad pa yin no zhe na/ ma yin te/ rang gi ngo bo kho nar bstan pa zhes bya ba 'di nyid kyis rtogs pa'i phyir ro/ /grub pa dang sgrub par byed pa'i ngo bor bstan pa yin par dgos na bsgrub par bya ba kho nar bstan par bya ba zhes bya ba 'di 'bras bu bcas par 'gyur ro//rang nyid grub pa'i chos can yongs su bzung bar ma brjod na chos can nyid du sgrub byar byed par 'gyur ro zhe na/ ma yin te/ rjes su dpag pa spyi'i yul can yin pa nyid kyis don rtogs pa'i phyir ro//chos can yod par 'gyur / bsgrub par bya ba yin na rang gi mtshan nyid bsgrub byar 'gyur na de yang spangs zin to/ /de'i phyir 'dir de skad ma brjod kyang phyogs la 'gal ba cung zad kyang med do/ /ci ste chos can nyid bsgrub byar byas na de las cir 'gyur/de ni mi nus so/ /ci'i phyir zhe na/ gtan tshigs ni khyad par dang rjes su 'gro ba med pa'i phyir ro zhe na/ 'di ni gtan tshigs dang dpe dag gi skyon yin gyi/ phyogs kyi ni ma yin te/ yan lag phyi ma la ltos pa'i phyir ro//de lta ma yin na gtan tshigs la sogs pa'i skyon mtha' dag phyogs kyi skyon yin par 'gyur te/ thams cad du phyogs nyid la gnod pa'i phyir ro/ /de'i phyir de tsam dang rjes su 'brel ba kho na phyogs kyi skyon yin te/ mngon sum la sogs pa dang 'gal ba bzhin no//rgyu sogs mtshan nyid gsal bya la/ /ltos pa med par ma khyab dang / /ldog pa dag ni spang ba'i phyir/ /phyogs kyi mtshan nyid rjod pa yin/ /bdag nyid tshig phrad ngo bo'i sgra/ /ma gsal ba dang bcas pa rnams//ldog pa sel bar byed pa yin/ /'dod sgras ma khyab sel bar byed/ /bsgrub bya khas blangs phyogs mtshan nyid/ /de rnams la ni phyogs nyid med/ /bsal ba gnod dang lhag ma la/ /mtshan nyid 'jug pa med phyir ro/ /log par rtogs pa mthong ba'i phyir //'dir ni bdag nyid sgra mdzad pa/ /'dod gnod med dang bsgrub bya min/ /thug pa med pa stan pa yin/ /zhes bya ba dag ni bar skabs kyi tshigs su bcad pa dag go/ /'dir rang nyid dang 'dod pa'i sgra dag gi nges par gzung ba'i don rtogs kyang /byed pa dang ldan pa'i mtha' can dang 'brel ba'i phyir ston par 'gyur ba la yang thal bar 'gyur bas de bcad pa'i phyir bshad pa yin no/ /'dir ni 'dod pa'i skad kyi dbyings la naSh+Te yan lag ma yin no/ /'dod pa'i tshig la yan lag nyid yin pas des gtan tshigs ma grub pa la sogs pa 'gog par byed do//rgol ba bdag nyid kyis 'dod pa rjes su dpag par bya ba nyid du rjod pa 'dis ni mi 'dod pa dang 'dres pa'i 'dod pa yang bsgrub par bya ba ma yin zhing / de la gnod na yang phyogs dang gtan tshigs kyi skyon du 'gyur ba med par rig par bya ste/ji ltar bsgrub par bya ba yin pa bkag pa med pa'i phyir ro/ /dper na nam mkha'i yon tan nyid dang don gcig la 'du ba can mi rtag pa nyid med par yang sgrub par byed pa bzhin no/ / rjes su dpag pa'i dus su bstan bcos la mi brten par rjod pa 'di nyid kyis skabs su gtogs pa ma yin pa phyogs su byed pa yang gsal ba yin la / dper na sgra mi rtag pa'am rtag pa yin zhes bya ba'i skabs su tha dad pa dbang pos gzung bar bya ba'i spyi dang don gcig la 'du ba can gyi mi rtag pa nyid dang /sgra ldan pa yin no zhes bya ba lta bu'o/ /bstan bcos la brten pa'am phyir rgol ba de rtogs pa don du gnyer ba yin na ni don te phyogs su byed par 'gyur gyi/ de lta ma yin na 'di ma 'brel ba brjod pa nyid yin pas rna gtad par mi bya bar 'gyur ro//gnyi ga bstan bcos la mi brten par 'ga' zhig yongs su rtog pa na skabs ma yin pa phyogs su byed pa'i skabs ci zhig yod/ gal te khyad par gyi spyi 'phen pa'i phyir de grub na 'dod pa nyid 'grub pa ma yin nam zhe na/ma yin te/ rtogs pa po 'dod pa ni skabs su bab pa nyid yin pa'i phyir ro/ /de nyid kyi phyir skabs kyis bsgrub bya'i chos su 'dod pa ldog pa yin no zhes brjod do/ /spyi don du gnyer ba ni gdon mi za bar so sor nges pa'i khyad par don du gnyer bar 'gyur ba ma yin no//khyad par gzhan la rtsod pa med pa yang srid pa'i phyir ro / /bstan bcos kyi sgo nas ni rtsod pa yang ma yin te/ de'i tshe de med na med pa ma yin pa'i phyir ro/ /rnam pa de lta bu'i chos ni 'gar yang gzhung lugs las mi gnas pa la rjes su 'gro ba grub pa ma yin zhing mi 'khrul pa can gyi gtan tshigs kyang yod pa ma yin no//gnyis pa dang bcas pa'i sbyor ba dag kyang bsal zin to/ /bstan bcos la brten kyang skabs las 'das na ha cang thal ba bshad zin to//de'i phyir skabs su rtogs pa khyad med pa'i chos tsam nyid bsgrub par bya ba dang sna bstad par 'os pa yin te/ de lta ma yin na don gzhan du 'gro ba'i phyir tshar gcad par 'gyur ro/ /khas blangs pa de yang / mngon sum don dang rjes dpag dang //yid ches grags pas ma bsal ba/ /bstan par bya ba yin no/ /gal te bstan par bya ba yin du chug na mngon sum gyi don dang / rjes su dpag pa dang / yid ches pa dag dang / grags pas ma bsal ba'i khas blangs pa gtan tshigs la ltos pa yin no//mngon sum la don smos pa ni dbang po'i shes pa kha cig don phyin ci log yin pa'i phyir de spangs nas tshad ma'i yul yongs su dag pa gzung ba'i phyir ro/ /yang ci'i phyir gsal ba phyogs ma yin zhe na/ gtan tshigs the tshom la rjod phyir//gsal ba gtan tshigs rten ma yin/ /gsal ba ni tshad ma dag gis bzlog pa yin pas zla bo'i tshad ma'i rten ma yin te/ bzlog pa la tshad ma zhugs pa'i phyir ro/ /'gal ba dag ni gcig la yang dag pa'i shes par mi 'thad pa'i phyir ro//yul rab tu bstan pa'i phyir phyogs rjod pa yin na gsal ba la ni yul can mi srid pa'i phyir de phyogs ma yin pa nyid do/ /de'i phyir the tshom gyi yul ni gtan tshigs kyi byed pa'i yul yin no / /rjes su dpag pa'i dbye ba yis/ /gnod pa de ni rnams bzhir bshad//rjes su dpag pa rnam pa gsum du phye bas na phyogs kyi gnod pa de bzhir bstan to/ /de la khas blangs 'bras rtags te/ /'gro la grags pa rang bzhin rang rtags yid ches pa'i tshig ni 'bras bu'i mtshan nyid can gyi rtags yin la/grags pa ni rang bzhin gyi mtshan nyid yin no/ /bdag gam gzhan don ji lta ba bzhin du mthong ba'i sgo nas ngag 'jug par 'dod pa ni yid ches pa yin te/ de'i tshig ni de lta bu'i don gyi dngos po med na mi 'jug pa'i phyir de'i 'bras bu yin no//rang gi 'bras bu yang dag par bstan pa de ni rang las phyin ci log tu khas blangs pa'i gegs byed do/ /de'i phyir de lta mtshungs pas na rang gi tshig dang bstan bcos bsdus te gcig tu brjod do/ / stobs kyi rten nyid la bstan bcos gnod par byed pa yin no zhes bya ba'i don 'di brjod pa'i don du ji ltar bdag nyid tshad ma ma yin na tshig mi 'jug pa de bzhin du bstan bcos la ma brten par des grags pas la dpyod pa mi 'jug go zhes mtshungs par bstan pa'i phyir 'di rang gi tshig dang lhan cig tu brjod par mdzad do//de nyid kyi phyir gzhal bya'i don can gyi tshad ma dag med do zhes 'di la dper brjod pa yang 'dra bar mdzad de/ tshad ma rnams med na bstan bcos dang tshig dag mi rung ba'i phyir ro//rang gi tshig dang 'gal ba la gsal ba'i dper brjod pa yin la/ lung la ni 'di phyogs tsam zhig bstan pa yin no/ /'di la dper brjod pa ni chos 'phos nas bde ba ster bar byed pa ma yin no zhes bya ba yin no/ /chos can rnam par gzhag pa de la brten pa'i phyir/de la gnod na gzhi med pas khyad par la dpyod pa mi 'jug pa'i phyir rnam pa de lta bu'i yul la ni gdon mi za bar bstan bcos tshad mar 'gyur dgos so/ /da ni ji ltar 'jug ngogs su khrus byas pa la sogs pa chos ma yin pa dag par byed pa ma yin no zhes bya ba khas blangs pa'i gnod pa ma yin nam zhe na/ma mthong ba rtogs par byed pa'i bstan bcos thams cad de skad ma brjod pa'i phyir bkag pa la skyon yod pa ma yin no//rang gi khas len pa'i rten gyis bstan bcos dang 'gal ba gnod par 'gyur gyi / gzhan ni ma yin te/ khas ma blangs pa'i phyir ro/ /khrus kyi dag par smra ba'i bstan bcos de'i rang gi tshig gis kyang don de la gnod pa'i phyir ro/ / chos ma yin pa ni bstan bcos thams cad las chags pa la sogs pa'i rtsa ba can du rnam par gzhag pa yin te/ ma chags pa dang / sdang ba med pa dang / ma rmongs pa rnams la ni sdig par khas mi len pa'i phyir ro/ /rnam par gzhag pa des ni khrus la sogs pa sdig pa dag par byed par smra ba la gnod pa yin no//rgyu ma zad na 'bras bu mi zlog pa'i phyir te/ mngar ba dang / bsil ba dang / snum pa dag gis bad kan las gyur pa'i nad bzhin no/ /de nyid kyi phyir lung gis mthong ba'i don dag la ni 'gal ba brjod pa phal cher sems pa yin te/bstan bcos gang zhig mthong ba dang ma mthong ba'i yul dag la dngos po'i stobs kyis zhugs pa'i tshad ma dang / rang gi tshig gis mi gnod pa de gzung bar bya ba yin no//de la mi brten pa'i dngos po la ni bstan bcos dang ldan pas 'gal ba rjod kyang gnod pa ma yin te/ gegs byed par 'gyur ro/ /gnyi ga stobs mtshungs pa'i phyir te/ dper na rang gi tshig bzhin no/ /de'i tshe ni de'i rang gi tshig dang 'gal ba yin gyi/bstan bcos dang ni ma yin no/ /de dag las gang la tshad ma yod pa de ni gzhan la gnod par byed pa yin te/ de lta ma yin na dam bca' ba stobs mtshungs pa'am/ rjes su dpag pa dang ldan pa don ji lta ba bzhin du 'jug pa la rigs pa med pa'i dam bcas pas ji ltar gnod par 'gyur/lung rnams tshad ma yin pa yang bkag zin to/ /de'i phyir khas blangs nas gcod pa dag la skyon 'dir 'gyur ro/ /de nyid kyi phyir gnod pas byed pas /khas blangs pas na rjes su dpag pa las phyi rol tu gyur pa ma yin yang khas blangs pa logs shig tu byas pa ni yul gyi dbye ba bstan pa'i phyir te/ de lta ma yin na ha cang thal ba'am logs shig tu byas pa don med par 'gyur te/ rang gi tshig logs shig tu byed pa'i rgyu mtshan yang tshig tsam rjod pa la gegs byed pa yin no/ /tshad ma ma yin pa nyid ni bstan bcos la yang mtshungs pa'i phyir der yang gegs byed par 'gyur ro zhe na/ gzhi yod na gegs su 'gyur ba yin te/ dper na grub pa'i tshig la tshad ma dang cig shos dag phan tshun dang / grub pa'i bud med la chos la brten pa bu skyed pa dang cig shos kyi chos dag bzhin no/ /gang du chos can nyid ma grub pa der gang la gang gis gegs bya ste/ skabs nyid med pa'i phyir ro//des na chos can rnam par 'jog pas ni bstan bcos tshad mar byed pa yin la/ des na de ni gnod par byed pa yin no/ /bstan bcos de tshad ma ma yin na 'o na ni ji ltar chos can rnam par 'jog par byed pa yin zhe na/ tshad mar khas blangs pa'i phyir ro//'o na ni tshad mar byed pa'i phyir khas blangs pa nyid chos can rnam par 'jog par byed pa yin la/ chos gzhan yang de nyid kyis 'jog pa'i phyir/ bstan bcos dang 'gal ba rang gi tshig dang 'gal ba las tha mi dad pa des na gegs byed pa yin gyi gnod par byed pa ni ma yin no//'o na da 'di la dbye ba ci yod/ cung zad kyang med do/ /'o na ji ltar so sor rjod ce na/ /dag gi dbye bas de ltar 'gyur ro/ /snga mas bzhag pa phyi mas nyams par byed pa'i phyir khas blangs pa dang 'gal ba yin no//de nyid kyi phyir sngar khas blangs pa dang zhes bshad do/ /ngag de nyid kyis rang gi don dang 'gal ba ni rang gi tshig dang 'gal ba yin te/ dper na rjes su dpog pa tshad ma ma yin no zhes bya ba bzhin no//tshad ma ma yin na gegs byed par yang ji ltar 'gyur zhe na/ de nyid kyi phyir stobs mtshungs pas so/ /gal te de la gcig tshad ma ma yin na grub pa kho nar 'gyur gyi gegs byed par ni mi 'gyur te / tshad mas tshad ma ma yin pa la gnod pa'i phyir ro//de khas blangs pa'i phyir dngos po thams cad la bstan bcos tshad ma yin pas gnod par byed pa kho na'o zhe na/ khas blangs par khyad par med kyang ji ltar gcig ni tshad ma dang gnod par byed pa yin la/ gzhan ni ma yin te/des ni 'di na gyi na'o/ /'di ni tshad ma nyid skyes bu'i 'dod pas byas pa yang yongs su rdzogs pa yin no/ /gal te rang gi tshig dang bstan bcos dang 'gal ba la gegs byed pa'i skyon yod pa de lta na yang de las don la the tshom du 'gyur ba kho nar zad la/de ni phyogs kha na ma tho ba med par bstan pa la yang mtshungs pa'i phyir ji ltar phyogs kyi skyon yin zhe na/ de'i tshig las nges pa mi skye ba'i phyir tshig skyon yon chags pa ni ma yin no/ /'o na ji ltar zhe na/ gang zhig tshig ji tsam gyis bsgrub par bya ba de mi 'grub pa'i phyir ro//dam bca' ba'i tshig gis ni rang gis bsam pa srid par bstan par bya ba yin na/ de ni ji ltar tshad mas gnod na mi srid pa bzhin du gcig la 'gal ba nye bar sdud na yang srid pa ma yin no/ / gzhan gyi don gyi rjes su dpag par ni tshig gi skyon gtsor byed pa yin gyi don gyi ni ma yin te/ don ji lta ba bzhin ma yin par rjod pas smra ba po la klan kar 'gyur ba'i phyir ro/ /gal te rang gi tshig dang khas blangs pa dang 'gal ba dag la bye brag ci yang med na/'o na sngar khas blangs pa dang 'gal ba'i yul la bye brag ci zhig yod ce na/ gzhung lugs 'ga' zhig la ma brten par gang la spyod pa mi 'jug pa de ni med na mi 'byung ba yin pa'i phyir gdon mi za bar brten par bya ba yin no/ / des na 'di'i gegs byed pa'i yul ni de nyid yin la/ rang gi tshig dang 'gal ba'i thams cad du brjod pa yin no/ /'di la yang gzhan la gdon mi za bar brten pa ci zhig yod de/ de nyid kyis don de gzhan gyi kha nas rnam par gzhag nas yang 'gog par byed pa'i phyir ro/grags pa yang 'gal ba'i don gyi dam bca' ba la gnod par byed pa yin te/ skyes bu'i 'dod pa 'dod pa tsam dang rjes su 'brel pas 'dod pa'i sgras brjod par bya ba nyid ni don rnams la dgag par mi nus pa'i phyir ro//tha snyad las skyes pa'i chos de ni grags pa'i sgras brjod do/ /'dod pa tsam gyis 'jug pa'i phyir thams cad ngo bo nyid kyis byas pa dang ma byas pa'i sgrar rung ba yin la/ byung ba'am 'byung bar 'gyur ba'i sgra'i rung ba nyid don tsam dang rjes su 'brel ba des ni de 'gog pa la gnod pa yin no//de rung ba'i stobs nyid kyis dngos su na sgra thams cad de la 'brel pa yin pa'i phyir de la grags pa med kyang de grub par bshad de/ gang la thun mong ma yin pa'i phyir rjes su dpag pa med la/sgra las byung ba'i grags pa dang 'gal ba'i don gyis na bsal ba de yang phyogs ma yin no zhes so/ /de nyid kyi phyir gnod pa'i gtan tshigs ni thun mong ma yin pa yin te/ gang la yang zla bo ma yin pa ma grub pa'i phyir ro/ /de skad du rjod pa ni 'di dgag par mi nus pa nyid dam/zla bo'i tshad ma med pas nges par bstan pa'i phyir ro/ /de 'gog pa ni rjes su dpag pa las 'gyur te/ mngon sum gyis ni rung ba nyid mi nges pa'i phyir ro/ / gang la yod pa nyid rjes su 'gro ba med pa de la ni gtan tshigs thams cad thun mong ma yin pa yin no/ /zhes bya ba 'di ni dper brjod pa'i 'bras bu yin no / /sgra ni brda la brten pa yin la de yang 'dod pa tsam la brten pa yin te/ des na sgras grub pa dag ni ma grub pa ma yin no zhes bstan pa'i phyir sgra las byung ba'i grags pa dang zhes gsungs so//gegs yod par dogs pa rnams ni the tshom za bas mi 'grub pa'i phyir te/ yun ring por ma mthong ba rnams la yang phyis snang ba skye ba mthong ba'i phyir srid pa yin na skyes bu tsam gyis de med pa mi nges pa'i phyir ro//des na tshad mas nges par brjod pa'i phyir/ don gyis go bas rjes su dpag pa'i yul la 'gal ba la mi 'khrul ba can med par ston pa yin no/ / 'dis ni mngon sum dang rjes su dpag pa dag bshad pa yin te/ gnyi ga yang tshad mar khyad par med pa'i phyir ro/ /mtshan nyid dang ldan pa gcig la 'gran zla mthong ba'i phyir mngon sum yang de ltar 'gyur ro/ /gang zhig nges par sgrub par byed par 'jog pa tshad ma'i mtshan nyid las tha dad pa'i khyad par ni yod pa ma yin te/gang gi phyir khyad par de las phyi rol du gyur pa yin pa'i phyir rjes su dpag pa tshad ma yin par 'gyur ro/ /rjod pa ra 'dod pa'i grangs gcig pa can nyid kyis 'gran zla ma bstan pa tshad ma yin pa'i phyir nyes pa med do zhe na/'di la 'gran zla med do zhes 'di 'dra ba'i nges pa srid pa yod dam/ mtshan nyid khyad par med pa la mthong ba ni gzhan la ldog pa nges par byed mi nus pa'i phyir ro//zhes bshad zin to/ /skyes bu'i spobs pa'i dbang gis tshad ma dag gi mtshan nyid rjod pa yang ma yin no/ /'o na ci zhe na/ dngos po gnas pas yin no/ /de yang de ltar nges par nus pa ma yin no/ /des na mtshan nyid la the tshom za ba de ni tha snyad du mi rung ste/phyogs kyi chos la sogs pa la the tshom za ba bzhin no/ /mtshan nyid la shes pa smos pa'i yang phyir ro/ /ji skad bshad pa'i mtshan nyid can gyis rjes su dpag pa la ni de'i mtshan nyid can gyi 'gran zla mi srid pa'i phyir rjes su dpag pa la 'gal ba mi 'khrul ba can med pa yin no//de'i phyir rjod par 'dod pa'i grangs gcig pa can nyid kyang yul 'di la mi 'dod pa nyid do/ /'di'i yul ni bshad par bya'o/ /de'i phyir de ltar tshad ma dag gnod par byed par rjod pa ni de las nges par rjod pa yin no//des na gnyen po bcas pa srid pa sel bar byed do/ /de'i phyir rjes su dpag pa'i yul la 'gal ba mi 'khrul ba can med par ston pa yin no/ /yang na 'jig rten gyi rjod pa la rjes su dpag pa med par rjod pa yin no//des ni grags pa rjes su dpag pa las yul tha dad pa yin no zhes rjod par 'gyur ro/ /des na dngos po yod pa dang med pa'i rjes su byed pa'i rjes su dpag pa las grags pa yul tha dad pa can nyid yin pa'i phyir/de dngos po'i dbang gis 'jug pa ma yin no zhes bstan pa yin no/ /ri bong can zla bar mi 'dod pa de grags pa gzhan gang zhig 'dod par 'gyur te/ de'i phyir de la rjes su dpag pa'i dpe med pa yin no/ /des na thun mong ma yin par bshad do//gang gi phyir dpe gcig po de nyid kyi dbang du byas nas de skad bshad pa ni ma yin te/ mtshan nyid yin pa'i phyir ro/ /'di ltar shing sha pa shing ma yin no zhes bya ba la yang gnod pa'i phyir ro//'jig rten na ga pur dang dngul la sogs pa la mthong ba'i phyir 'dir yang thun mong ma yin pa nyid du mi 'gyur ro/ /brda la 'jug pa la ni thun mong ma yin pa 'ga' yang med do/ / gal te de la 'ga' zhig tu grub na dngos po'i dbang gis grub pa yin te/ grags pas grub par khas len na ni ri bong can la yang mi bzlog pa'i phyir ro/ /dngos po la de grub na ri bong can la yang bzlog tu med pa yin la/ dngos po la de med na ri bong can la bzlog kyang skyon 'ga' yang med do//de'i phyir dngos po la nges pa ma yin pa'i brda dang ldan pa'i sgra las byung ba'i chos rnams kyi rung ba ni don thams cad yin te/ 'dod pa la gegs byed pa med pa'i phyir ro//'dis ni sgra rnams ni brda'i rjes su byed pas don la nges pa 'ga' yang med la/ 'di dag de la 'gog na yang 'gal ba yin no zhes bshad pa yin no/ /des ni rgyu mtshan can sgra yi/ /don nam sgra rnams kyi ni don/ / don dam pa nyid 'gog pa la/ /gnod pa med par rjod pa yin/ /des na yul gyi khyad par ni/ /bstan phyir grags pa rjes dpag las/ /phyi rol gyur pa ma yin yang / /tha dad byas yin snga ma yin / /zhes bya ba ni bar skabs kyi tshigs su bcad pa dag go//mngon sum dang 'gal ba yang rang bzhin sna tshogs can gyis rang bzhin gang zhig 'dres par snang ba'i blo mthong ba med pa'i phyir 'brel pa can gzhan med pas nyan pa la gnyis med par snang ba de nyid spong na 'gal ba yin te /dper na sgra ni mnyan par mi bya ba ma yin no zhes bya ba lta bu'o/ /de'i phyir yang don zhes bshad pa yin no/ /rang bzhin de nyid de la don/ /lhag ma ldog pa'i mtshan nyid can/ /spyi ni dngos med ngo bo yin//de'i phyir de dbang spyod yul min/ /des na spyi yi chos rnams ni/ /mngon sum min par grub pa'i phyir/ /spong yang gnod pa med do zhes/ /mnyan bya smos pas bstan pa yin/ /rnam kun brjod bya'i dngos min phyir//de la brten nas grub pas na/ /de yi stobs kyis gnod pa'i phyir/ /mnyan byas dbang po'i yul du bshad/ /ces bya ba ni bar skabs kyi tshigs su bcad pa dag go/ /rjes su dpag pa dang 'gal ba yang dper na bum pa rtag go zhes bya ba lta bu'o//brdegs pa bzod par mthong ba dag las 'khrul pas de ltar 'gyur ro/ /de yang mthong bas 'gags pa'i bum pa bzhin du skye ba dang ldan pa la sogs pa'i phyir mi srid do/ / gal te mi rtag pa'i bum pa ni 'ga' yang med do/ / der yang gsal ba bskal pa yin pa'i phyir ro zhe na/ de'i gnas skabs ma yin pa ni mi rtag pa yin par smra la/ de'i gnas skabs ni de nyid yin no/ /de ni 'gags pa la yod pa ma yin pas zhig pa'i phyir ram/bskal pa'i phyir zhes bya ba la ni mngon par zhen pa ma yin no/ /'di'i dmigs par bya ba dbus kyi rang bzhin de yang sngon dang phyi ma'i mthar yang yod do zhes bya bas ni tshig gi don rnam par bzhag pa la gnod do//de lta na ni snying stobs dang rdul dang mun pa dang sems pa yod pa dag phan tshun rang bzhin tha dad pa rnam par gzhag pa mi nus pa'i phyir ro/ /de la yang mi dmigs pa las ma gtogs pa rnam par gzhag pa'i rten gzhan ni 'ga' yang med do//de'i phyir don ltar dmigs pa'i mtshan nyid du gyur pa'i zho la sogs pa 'o ma la sogs pa dag la ma dmigs pa ni med la/ 'o ma yang de la med do zhes bya ba 'di ni rigs pa yin no//zho la sogs pa 'o ma la sogs pa dag la dmigs pa'i rjes su dpag pa yod pa nyid de/ mi nus pa las mi 'byung ba'i phyir ro zhe na/ de 'dra ba'i dngos po ni rjes su dpag pa'i yul ma yin no//de ni yod na bltar rung ba nyid yin te/ gal te yod na dbus kyi gnas skabs bzhin du dmigs par 'gyur ro/ /de'i mtshan nyid btang ba nyid de'i 'jig pa yin la/ mtshan nyid mi mthun pa yang gzhan yin te/tha dad pa ni 'gal ba'i rang bzhin gyi mtshan nyid can yin pa'i phyir ro zhes mang du bshad zin to/ /de las skyes pas ni rgyu de de skyed pa'i rang bzhin yin par 'grub kyi/ de'i ngo bor ni ma yin no/ /gal te med pa las skye na//ci'i phyir 'o ma las ri bong gi rwa ma yin te/ med par khyad par med pa la khyad par ci zhig yod ce na/ ma yin te/ rgyu'i rang bzhin tha dad pa'i phyir ro/ /'o ma de'i bdag nyid ma yin yang zho skyed par byed la ri bong gi rwa skyed par mi byed pa gang yin pa de ni de'i rang bzhin no//de'i de gang las she na/ rang gi rgyus skyed pa yin te/ de ltar rgyu'i rang bzhin thog ma med pa brgyud pa yin no/ /de'i phyir skyed par byed pa'i rang bzhin gyi rgyu nyid med pa'i phyir ri bong gi rwa mi skye la/gzhan la ni de yod pa'i phyir ro/ /ci ste yang nus pa zhes bya ba 'di ci zhig /dngos po de nyid yin nam/ 'on te gzhan cung zad cig yin/ de nyid do zhe na/de kho na ltar dmigs par 'gyur te/ khyad par med pa'i phyir ro/ /khyad par yod na yang brjod zin to/ /gzhan yin no zhe na/ ji ltar gzhan yod na de yod par 'gyur te/ nye bar btags pa tsam du mi 'gyur ro//'dis ni phyi ma la yod pa yang bsal ba yin no/ /bde blag tu gzung ba'i phyogs kyi chos kyi rab tu dbye bas gtan tshigs kyi skabs kyi mdor bsdus nas brjod pa/ phyogs chos mthun phyogs yod med dang //rnam gnyis re re dag la yang / /rnam gsum mi mthun phyogs la yang / /yod med rnam pa gnyis phyir ro/ /phyogs ni chos can no/ /dgos pa med pa'i phyir nye bar gdags par mi bya'o zhe na/ma yin te/ chos can thams cad kyi chos dgag pa'i phyir te/ de'i phyogs gcig pas der gcig yin pas der nye bar gdags su rung ba'i chos can rtogs par bya ba'i phyir ro/ /de lta yin dang mig gi gzung ba'i phyir//zhes bya ba la sogs pa spangs pa yin no/ /gal te chos zhes rjod pas kyang chos can yin par gzhi lta 'grub ste/ chos can zhes smos pa'i shugs kyis nye ba yin pa'i phyir bsgrub par bya ba'i chos can yin par 'grub po zhe na/ma yin te/ dpe'i chos can yang nye ba'i phyir ro/ /mthun pa'i phyogs la yod par brjod pas dpe'i chos can la yod par grub pa'i phyir/ chos can gyi chos zhes brjod pas bsgrub bya'i chos can yin par yongs su bzung ngo zhe na/de ltar bshad par bya ba la 'bad pa de ni phyogs zhes brjod pas spangs pa yin no/ /shugs kyis don go na rtogs par dka' ba yongs su spang ba'i yang phyir ro//gal te phyogs kyi chos nyid yin na de'i khyad par la ltos pa gzhan la mi 'jug pa'i phyir thun mong ma yin pa nyid do zhe na yin te/ dper na nag pa 'phong skyen no zhes bya ba lta bur ma 'brel pa rnam par gcod pas khyad par du byas pa'i phyir te/dper na srid sgrub 'phong skyen no zhes bya ba lta bur gzhan dang ldan pa rnam par gcod pas ni ma yin no zhes mang du bshad zin to/ /phyogs kyi chos de ni rnam pa gsum du dbye ste/ mthun pa'i phyogs la yod pa dang / med pa dang rnam pa gnyi ga'o//rnam pa gsum po de ni re re yang rnam pa gsum du 'gyur te/ /'di ltar mi mthun pa'i phyogs la yod pa dang med pa dang rnam pa gnyi ga'o/ /mthun pa'i phyogs ni bsgrub par bya ba'i chos kyi spyis don mthun pa'o/ /de med pa ni mi mthun pa'i phyogs so//da ni ji ltar med pa la yod do zhes brjod ce na/ de bkag pa tsam ni mi mthun pa'i phyogs ma yin no/ /'o na ci zhe na/ bzlog pa med pa dang ma yin pa thams cad de/ mi mthun pa'i phyogs kyi mtshan nyid ma yin pa'i mtshan nyid yin pa'i phyir ro/ /de ni brjod par 'dod pa'i bzlog pa thams cad la mtshungs pa yin te/dngos sam shugs kyis ldog par rtogs pa thams cad la mtshungs pa'i phyir ro/ /phyogs kyi chos 'di'i de kho na nyid dang mthun pa'i phyogs dang mi mthun pa'i phyogs la yod pa dang med pa ni gtan tshigs la sogs pa dag la ji ltar rigs par rang nyid rtogs par byed pa'i sgrub par byed pa ji lta ba dag gis nges par gzung ste/the tshom dang phyin ci log gi rang bzhin 'dod pa dang mi 'dod pa gsal bar byed pa dag ni rtogs pa sgrub par byed pa ma yin pa'i phyir te/ phyin ci log dang the tshom gyi rtogs pa can gyi sgra bzhin no//ma nges pa ni phyogs kyi chos nyid de/ ma 'brel ba las rtogs par mi rung ba'i phyir ro/ /mthun pa'i phyogs dang mi mthun pa'i phyogs la yod pa'am med pa nyid du nges pa la ltos pa ni ma yin te/ nges pa la the tshom za ba nyid kyi sgo nas skyon du 'gyur la/de ni ma nges pa la yang mtshungs pa'i phyir ro/ /rnam pa de lta bu brjod pa yang 'dir sun 'byin pa yin no/ /gzhan du ni gnyi ga'am gcig la the tshom za ba'am/ gcig phyin ci log tu gyur pa ni sgrub pa ma yin zhing / sun 'byin pa yang ma yin te/ sgrub pa'i yan lag de lta bu ni nus pa med pa yin pa'i phyir ro//thun mong ma yin pa yang gnyi ga las phyi rol du gyur pa'i mi srid pas gnyi ga las ldog pa des mi 'thad pa'i phyir dang / gnyis las gcig la yang yod par rtogs pa'i sgrub par byed pa med pa'i phyir na 'jug pa dang ldog pa dag la the tshom gyi rgyu nyid de/skyes bu rnams las gzhan las ma byung bar nges shing yon tan mtshungs pa'i skyes bu dag las srid pa'i bud med kyi mngal bzhin no/ /ji skad bsgrub par bya ba'i chos thun mong ma yin pa gang yin pa de ni khyad par ji snyed kyis thams cad bsdus pa de la the tshom za ba'i rgyu yin te/de dang ldan pa des bsdus pa'i phyir dang / gcig tu nges pa ldog pa'i phyir ro zhes bshad pa lta bu'o/ /de dang ldan pa des bsdus pa'i phyir zhes bya bas ni gsum pa gang la dngos po chos 'di gnas par 'gyur ba rnam pa'i khyad par las phyi rol du gyur pa med par bshad pa yin la/gcig tu nges pa ldog pas ni gcig gi dngos por rtogs pa'i sgrub par byed pa med par bshad pa yin no/ /gtan tshigs gnyis po 'di gcig las bsdus pas ni rnam pa'i khyad par thams cad la the tshom za ba yin no/ / ldog pa nges na khyad par gcod pa'i gtan tshigs nyid yin pa gang gis bzlog ces bshad zin to / /nges pa'i gtan tshigs la yang spobs pa med pa'i phyir the tshom du 'gyur na/ de yang gcig tu nges par ma nges pa nyid ni ma yin no/ /de'i phyir de'i ngo bo nges pa ni bstan pa'i yon tan nges pa nyid las yin pa'i phyir nges pa med pa ni ma nges pa nyid yin no zhe na/gzhan gyi don gyi rjes su dpag par dngos po'i chos nyid la brten nas sgrub pa'i skyon brjod par ni ma zad de/ 'on kyang smra ba po'i skyon yang yin te/ ma tshang ba dang rjes su 'gro ba med pa dang rjes su 'gro ba phyin ci log pa bzhin no//des nges par brjod par bya ba'i yon tan gzhan du brjod pa'i phyir na skyon nyid do/ /'o na phyogs kyi chos la the tshom za ba dang / gang yang rung ba la ma grub pa yang sun 'byin par 'gyur ro zhe na/ de ni de lta yin te/ 'dod pa ma grub pa'i phyir ro//phyin ci log tu grub pa yang med pa ma yin nam zhe na/ phyin ci log tu grub pas ni sun 'byin pa ma yin no/ /'o na ci zhe na/ sgrub par byed pa'i nus pa bcom pa'i phyir ro/ /'di ltar gzhal bya nyid la sogs pa dag la yang phyin ci log tu grub pa yod pa ma yin la/mig gis gzung ba nyid la yang phyin ci log tu grub pa ci zhig yod/ gnyi ga la grub par bstan par bya ba gnyi ga la ma grub pa ni phyin ci log yin no zhe na/ 'o na ni 'dir yang nges par bstan par bya ba ma nges pa phyin ci log yin no//de'i phyir gtan tshigs dang 'gal ba kho na nges pa las sgrub pa dang sun 'byin par 'gyur ba yin no/ /phyogs kyi chos dgu bstan pa de dag ni gzhal bya yin pa'i phyir rtag go/ /byas pa'i phyir mi rtag go/ / mi rtag pa'i phyir rtsol ba las byung ba'o/ /byas pa'i phyir rtag go /gson pa'i lus ni bdag dang bcas pa yin te/ srog la sogs pa dang ldan pa'i phyir ro/ /rtsol ba las byung ba'i phyir rtag go /mi rtag pa'i phyir rtsol ba las ma byung ba'o/ /mi rtag ste rtsol ba las byung ba'i phyir ro/ /rtag ste lus can ma yin pa'i phyir ro zhes bya ba lta bu'o//dbye ba la ni mi mthun pa'i phyogs la ltos nas yod pa'am med par ji ltar 'gyur te/ med pa ni gzhi ma yin pa'i phyir ro zhe na/ 'di la med pa la ji ltar 'gog pa dang / mi mthun pa'i phyogs ni de ma yin pa'i mtshan nyid yin no zhes bshad zin to//gal te 'di mi mthun pa'i phyogs yin na gtan tshigs med par thal bar 'gyur te/ thams cad chos gzhan dang ldan pa'i phyir ro zhe na/ mi 'gyur te/ bram ze ma yin pa zhes bya ba bzhin no/ /de'i rigs dang ldan pa'i phyir de nyid bram ze yin la/ chos gzhan dang 'brel pa'i phyir de nyid bram ze ma yin pa yang yin par ni 'jig rten na rtogs pa med do//'o na ci zhe na/ brjod par 'dod pa'i chos mi rten pa'i dngos po yin no/ /dgag pa'i yul gzhan yin yang sbyor ba ni rnam par phye nas 'jug pa'i phyir ro/ /mthun pa'i phyogs kyi mtshan nyid 'gal ba'i phyir yang de ltar rtogs pa ma yin te/bsgrub par bya ba'i chos kyi spyis mtshungs pa zhes bya ba 'di la/ gal te bsgrub par bya ba'i chos kyi spyi kho nas zhes bya ba yin na mthun pa'i phyogs 'ga' yang med par 'gyur te/ rnam pa de lta bu ni mi srid pa'i phyir ro//de'i phyir chos gzhan ma spangs pa bsgrub bya'i chos kyi spyi dang 'brel pa'i bum pa la sogs pa ni mthun pa'i phyogs su byed do/ /des mi mthun pa'i phyogs zhes bya bas ni chos gzhan dang ldan pa thams cad rtogs pa ni ma yin no/ /'o na ci zhe na/ chos des stong pa yin pa'i phyir gzhan gzung yang skyon med do//yang rgyu ci'i phyir de ltar phyogs kyi chos rnams dgur phye zhe na/ rang bzhin 'bras bu bsgrub don du/ /gtan tshigs gnyis gnyis bzlog pa gnyis/ /rtsod phyir khyad par spyi dag ste/ /lhag ma ldog pa'i sgrub byed yin/ / rang bzhin dang 'bras bu dag kho na bdag nyid 'brel ba'i phyir go bar byed pa dang / bzlog na phyin ci log tu byed pa yin no zhes bstan pa'i phyir/ mi rtag ste byas pa'i phyir dang / brtsal ma thag tu byung ba'i phyir ro zhes bya ba'i gtan tshigs gnyis dang / rtag ste byas pa'i phyir dang brtsal ma thag tu 'byung ba'i phyir ro zhes 'gal ba gnyis bstan to//rang bzhin las gzhan ni mthun pa'i phyogs thams cad la yod pa mi srid de/ rgyu ni 'bras bu la 'khrul pa'i phyir ro/ /de'i phyir 'bras bu ni mthun pa'i phyogs la rnam pa gnyis su 'jug pa yin no/ /mi rtag pa yin tsam gyis ni thams cad 'bras bu brtsal ma thag tu 'byung ba can gyi shes pa rtsom pa ma yin te/des na de ni mthun pa'i phyogs la rnam pa gnyis su gnas so/ /brtsal ma thag tu 'byung ba'i shes pa sgra mi rtag pa'i 'bras bu yin no/ /zhes bya ba 'di ji ltar rtogs she na/ sngar yod pa'i shes pa ni nges par brtsal ma thag tu 'byung bar rigs pa ma yin pa'i phyir te/sgrib byed dang dbang po dang sgra dag la rtsol ba nye bar sbyor ba med pa'i phyir ro/ /de la dmigs pa'i sgrib pa ni srid pa ma yin no/ /'ga' zhig yod du chug kyang de'i bdag nyid nyams par ma byas par nus pa bzlog par mi rung ba'i phyir ro//de la khyad par skye ba med par ni cung zad byed pa zhes bya ba ma yin no/ /cung zad mi byed pa yang ji ltar gang gi sgrib par byed pa'am gzhan yin/ gang gis sgrib par byed par 'dod pa rtsig pa la sogs pas bum pa la sogs pa dag la khyad par ci zhig bskyed pa'am nyams par byas she na/de dag khyad par cung zad byed par ni mi smra'i/ 'on kyang bum pa'i skad cig thams cad ni thams cad kyi dbang po'i shes pa'i rgyu ma yin no/ /phan tshun lhan cig tu gyur pa'i yul dang dbang po dang snang ba dag phan tshun khyad par can gyi skad cig gzhan skyed par byed pa'i phyir rnam par shes pa'i rgyu yin te/phan gdags par bya ba ma yin pa ltos par mi rung ba'i phyir ro/ /de lta ma yin te nus pa'i rang bzhin rtag tu skyed pa'am mi skyed par 'gyur ro/ de dag kyang thogs pa byed pa gzhan gyis bar du ma chod na phan tshun phan 'dogs pa yin te/bar du ma chod pa'i yul rung ba de dag gi lhan cig byed pa yin pa'i phyir ro/ /bar chad yod na rgyu med pas nus pa'i skad cig gzhan mi skye ba'i phyir yul de'i rnam par shes pa mi skye ba'i phyir ram/ bar chod zhugs na sngar skyes pa'i nus pa 'gags pa'i phyir dang /rgyu med pas skye bar 'dod pa gzhan yang ma skyes pa'i phyir na rgyu ma tshang bas shes pa mi skye ba'i phyir rtsig pa la sogs pa sgrib par brjod kyi/ rung ba'i gegs byed pa'i phyir ni ma yin te/ de ni rang gi ngo bo las mi 'pho ba'i phyir ro//yang na dngos po skad cig ma rnams ni phan tshun 'dogs pa srid pa yang yin te/ rgyu dang rkyen gyi nus pa ni thams cad mkhyen pa ma yin pas bsam gyis mi khyab pa'i phyir ro/ /des na gal te dbang po dang yul gyi bar na gnas pa'i sgrib pas de gnyis la rnam par shes pa bskyed pa dang mi mthun pa'i khyad par ches cher byed pa yang yin te/sgrib pa'i bye brag gi sgra la sogs pa gsal ba dang mi gsal bar thos pa'i phyir ro/ /de lta ma yin na gang la yang cung zad kyang mi byed pa ni yod kyang med pa dang mtshungs pa'i phyir / 'di'i 'di zhes nye bar bsdu ba ni rnam par rtog pas sprul pa nyid du 'gyur gyi/dngos po la brten pa ni ma yin no/ /sgro btags pa'i rjes su byed pa can gyi don byed pa yang yod pa ma yin no/ /mer nye bar btags pas ni bram ze'i khye'u mtshed pa sgrub par byed par mi 'gyur ro/ / de'i phyir rtog pa de yod kyang des dngos po 'gyur ba ma yin gyi rang gi ngo bo ji lta ba bzhin gnas pa nyid do/ /des na sgrib pa yod kyang dbang po la sogs pa shes pa bskyed par 'gyur na de ltar yang ma yin no/ /de'i phyir des khyad par byas par rtogs pa yin no/ /de ltar sgra rtag pa rnams ni 'ga' zhig yod na khyad par nyams pa'am skye ba ma yin no//des na gal te de dag skyed pa'i rang bzhin yin na thams cad la thams cad kyi tshe rang gi yul can shes pa thams cad skyed pa'am/ de lta ma yin na nam yang gang la yang 'ga' yang ma yin no zhes bya ba 'di ni gcig tu nges pa yin no//'di snyam du sgrib pas rtag tu sgra thams cad ma thos pa ni ma yin gyi/ 'on kyang de dag rtogs pa la dbang po la phan 'dogs pa'am gzhan yang rung lhan cig byed pa so sor nges pa cung zad yod pa yin la/ de res 'ga' 'ga' zhig la 'gyur pa'i phyir/'di dag gi res 'ga' 'ga' zhig tu thos pa ni des byas pa yin no snyam na / kho bo cag rgyu rnams kyi lhan cig byed pa spong ba ni ma yin te/ 'on kyang rgyu rnams ni de'i gnas skabs kyi phan 'dogs pa'i don la ltos pa nyid de/ de las khyad par thob pa dag 'bras bu la nye bar sbyor ba'i phyir ro//de bzhin du gal te sgra yang 'ga' zhig la ltos nas 'bras bu byed na ni byed la rag ste/ sngar gyi rang bzhin la nges pa zhes bya ba de ltar ni mi 'gyur ro/ /de ni nyams pa'i phyir te / ltos par bya ba'i rtsol ba'am/ rtsol ba'i legs par byas pa'i dbang po'am /gzhan las rang bzhin gzhan thob pa'i phyir ro/ /phan 'dogs pa ma yin pa ni ltos par bya ba ma yin no zhes bya ba dang / de'i phan pa don gzhan nyid yin na de'i zhes 'brel pa med pa la sogs pa yang bshad zin to/ /de shes bya ma yin par yang 'gyur te/phan pa nyid las shes pa skye ba'i phyir ro/ /de'i phyir sgra 'di ni dbang po'am phrad pa'am bdag gam gzhan yang rung ste rang gi shes pa bskyed pa la shes pa bskyed pa'i rkyen 'ga' zhig la ltos pa ni ma yin te/ thams cad de la cung zad kyang mi byed pa'i phyir ro//'dis ni dbang po dang sgra la nye bar sbyor ba'i phyir rtsol ba dang 'bras bu dang bcas pa yang bsal ba yin no/ /dbang po la phan btags pas kyang sgra'i lhan cig byed par 'gyur na ltos pa med pa'i phyir de yang bsal ba yin no/ /de'i phyir dmigs par bya ba'i rang bzhin de rang gi rang bzhin las ma 'phos pa'i phyir rtag tu dmigs par 'gyur ro//gal te 'ga' zhig la nus pa 'thob pa'am nyams par mi 'gyur ba de lta na de rtag par 'gyur ba yin te/ shes pa skyed pa'i nus pa de las don gzhan ma yin pa'i phyir ro/ /don gzhan yin na yang skyon du 'gyur ba'i phyir ro//'di rtsol ba ma brtsams pa dang chad pa na ni nam yang ma dmigs te/ des na de'i bdag nyid la 'di cung zad byed par rtogs pa yin te/ byed pa po'i chos mthong ba'i phyir ro/ /de'i phyir brtsal ma thag tu 'byung ba'i shes pa rgyu mi rtag pa'i rang bzhin can gyi 'bras bur 'grub bo//sngar yod pa yi shes pa ni/ /brtsal ma thag 'byung nges min te/ /sgrib byed dbang po sgra la de / /rnam kun nyer sbyor med phyir ro/ /ltos pa med pa res 'ga'i tshe/ /'bras bu mi byed 'gal ba'i phyir/ /shes pa 'di 'dra res 'ga' ba'i//'bras bur grub pas de rtags yin/ /zhes bya ba ni bsdu ba'i tshigs su bcad pa dag go/ /dper brjod pa 'di nyid kyis gtan tshigs kyi mtshan nyid kyi yul bstan pa yin yang 'bras bu'i dper brjod pa las rang bzhin logs shig tu byas pa ni thams cad de'i bdag nyid du rtogs par mi 'gyur bar byas pa'i phyir ro//don bshad kyang rjes su dpag par gtan tshigs brjod pa'i dbang du bya ba ni bye brag tu rtogs par bya ba'i phyir ro/ /des na 'dir dbye ba tsam zhig bshad de/ mtshan nyid ni 'di nyid yin no/ /'bras bu'i gtan tshigs kyi dper brjod pa 'dis ni phyogs gcig la brtan pa'i rang bzhin yang bshad par rig par bya'o//de nyid kyis ni dper brjod pa 'dra bar gsungs te/ brtsal ma thag tu byung ba'i gsal ba dang skye ba dag la de ltar brjod pa'i phyir ro/ /yod pa gang med mi 'byung ba'am/ /rang bdag rnam dbyer med can gang //des ni de dang 'khrul mi 'gyur/ /zhes bya'i don du de rab phye/ /ldan pa can sogs gang dag la/ /de 'dra'i 'brel ba yod min pa/ /de dag 'khrul pa srid pa'i phyir/ /gtan tshigs min zhes bshad pa yin/ /'brel ba yod pa yin na yang //de nyid rtogs pa'i sgrub byed yin/ /nges pa med na mi 'byung yin/ /nges pa med na sgrub byed min/ /zhes bya ba ni bar skabs kyi tshigs su bcad pa dag go/ /gal te ji skad bshad pa'i mtshan nyid can gyi mi dmigs pa 'ga' zhig kyang gtan tshigs gsum pa ma yin nam de ci'i phyir dper ma brjod ce na/de yang rang bzhin gyis gtan tshigs kyi khongs su 'dus pa'i phyir dper brjod pa kho na ste/ 'di ltar/ dmigs rung med pa dag la ni/ /mi dmigs pa las gzhan med nyid/ /des na de yod pa las de'i/ /rgyu mtshan can gyi sgra shes bsgrub //bltar rung ba'i rang bzhin med pa ni mi dmigs pa las gzhan ma yin la/ de grub pas ni de'i rgyu mtshan can med pa'i shes pa dang sgra bsgrub par bya ba yin no zhes bya ba 'di ni bshad zin to/ /rgyu mtshan yod kyang rgyu mtshan can yod par nges pa med pa'i phyir/de ltar rtogs par ji ltar 'gyur zhe na/ bltar rung ma mthong la med ces/ /bya ba'i tha snyad 'di grub pas/ /de 'bras yin yang de las ni/ /blo sgra the tshom med par 'gyur/ /gang gis nges pa med par 'gyur ba tha snyad la gdod gzhug par bya ba ni ma yin no //'on kyang bltar rung ba'i dngos po ma mthong ba la med do zhes bya bar grub zin pa nyid do/ /nye bar brjod pa med par grub pa dag la tha snyad de rtogs kyang rnam pa ji zhig ltar yul yod na yang yul can mi brtan par byed do/ /med pa'i tha snyad la gang du yang rgyu mtshan gzhan ni 'ga' yang yod pa ma yin no//de yang 'dis sngar lan cig ma yin par spyad zin pa'i phyir ro / /'di dag gi 'brel pa bsgrub par bya ba ni ma yin no/ /de'i phyir bltar rung ba ma mthong bar grub na de'i rgyu mtshan can med pa'i shes pa dang sgra dag gi rung ba de nyid la yang the tshom med pa nyid de/lkog shal la sogs pa grub na ba lang gi tha snyad bzhin no/ /yul yod na yang rmongs pas 'dir/ /gzhan dag rjes su mi brjod pa/ /grub pa dang ni chos mthun pas/ /brda bstan byed pa 'ba' zhig go/ /ji ltar mthong dang ma mthong las//rgyu dang 'bras nyid sgrub pa bzhin/ /de gnyis la ni 'bras sogs sgra/ /tha snyad don du bkod pa yin/ /rgyu las 'bras bu rab bsgrub pa/ /'di ni rang bzhin nang 'dus phyir/ /gtan tshigs rab dbye bshad pa las/ /tha dad par ni dper ma brjod/ /ces bya ba ni bar skabs kyi tshigs su bcad pa dag go /mi dmigs pa las ni khyad par byed pa'i rang bzhin med pa'i tha snyad du rung ba nyid bsgrub bo/ /khyab pa yang gzhan du tha snyad de tsam las grub pa ste khyad par med pa'i phyir ro/ /mi dmigs pa'i bdag nyid du gyur pa'i med pa grub pas med pa'i tha snyad du bsgrub pa yin no zhes bshad zin to//mi dmigs pa de nyid ji lta bu grub cing med de 'ga' zhig gi rgyud yang ji ltar 'gyur zhe na/ nyes pa de ni med de 'di ltar/ gcig dmigs nyams su myong ba las/ /'di ni dmigs so zhes bya'am / /mi dmigs so zhes rtog can gyi//blo ni skye bar 'gyur ba yin/ /gang las med pa'i tha snyad du 'gyur ba dngos po rnams kyi rang gi yul can gyi shes pa med pa tsam gyis ni 'di mi dmigs so zhes bya ba de ltar 'gyur ba ma yin no/ /'o na ci zhe na/ rang las khyad par can gyi shes pa yod pa las te/ 'ga' zhig tu thams cad ma rtogs na dngos po med par mi rtogs pa'i phyir ro/ /de'i phyir 'ga' zhig mngon sum du gyur na de'i tshad ma'i stobs kyis 'di ni dmigs so zhe'am/ gzhan dmigs so zhes bya ba'i rnam par rtog pa gnyis 'byung bar 'gyur ro/ /gang gi phyir don gyi khyad par rtogs pa ni myong ba'i khyad par las yin la/myong ba'i khyad par rtogs pa ni rnam pa de lta bu'i bdag nyid nyams su myong ba las yin no/ /des na rang nyid grub pa'i khyad par ni don gyi don khyad par du byed pa yin no/ /de lta ma yin na ni myong ba'i khyad par yang myong ba gzhan gyi khyad par las yin /de'i yang gzhan las yin pa'i phyir/ thug pa med par 'gyur bas khyad par 'ga' yang 'grub par mi 'gyur ro/ /don ni rang gi yod pa dang khyad par dag gi de bsgrub pa ma yin no/ /'o na ci zhe na/ rang gi shes pa'i yod pa dang khyad par dag gis te/des na rang dbang du grub pa ma yin no/ /de bzhin du myong ba na myong ba gzhan gyi yod pa dang khyad par dag las de grub pa ma yin te/ thams cad mi rtogs par thal bar 'gyur ba'i phyir ro/ /de'i phyir/ rang bzhin khyad par can myong las/ /gzhan gsal ba ni gzhan ma yin//de phyir de mi dmigs pa yang / /de las khyad par can dmigs nyid/ /des na mi dmigs pa 'di ni/ /mngon sum nyid kyis grub pa yin/ /gang gi phyir ma 'brel pa nyams su myong ba rnam pa gcig tu so sor nges pa las gzhan gsal ba ni gzhan ma yin no//de nyid ni nges pa yin pa'i phyir de nyid yod do/ /zhes nges par byed pa shugs kyis gzhan nam gzhan myong ba med do zhes nges par byed do/ /de'i phyir gcig tu nges pa dmigs pa ni gzhan mi dmigs pa dang de med pa'i tha snyad 'grub pa'i rgyu yin la/ de yang rang rig pa'i mngon sum gyis grub pa yin no//gal te rang las khyad par can gyi shes pa med kyang med pa'i blor 'gyur ba ma yin nam/ dper na mun khung du lag pa byug pa bzhin no zhe na ma yin te/ der yang de ltar byug pa'i lag pa'i nang gi reg pa'i khyad par dmigs pa las gzhan med par rtogs pa'i phyir ro//nang gi reg pa'i khyad par dmigs pa gang las rtsol ba yod dam med kyang bla ste/ nga'i lag pa byugs so zhes bya bar 'gyur ba de nyid las med par rtogs pa yin te/ de med na med par mi rtogs pa'i phyir ro/ /gal te dmigs pa'i rkyen rnams yod pa na dmigs su rung ba ma dmigs pas med par 'grub bo//de'i phyir gnyid log pa la sogs pa'i gnas skabs su 'ga' zhig med par rtogs par mi 'gyur te/ de na dbang po nus pa ma nyams pa la sogs pa dmigs pa'i rkyen nyid med pa'i phyir ro//des na khyad par can gyi dmigs pa med pa'i phyir na der 'ga' yang med par rtogs pa ni ma yin no/ /'o na ci zhe na/ de 'dra ba'i mi dmigs pa nyid med pa'i phyir ro zhe na/ 'dir yang dmigs pa'i rgyu yod pa na/ zhes bya bas dbang po la sogs pa de dag shes pa la nus pa nyams pa med pas dmigs pa'i 'jug pa bstan par byed pa yin te/gang gi tshe de dag gi 'bras bu 'jug pa de'i tshe de dag nus pa nyams par 'gyur ba'i phyir ro/ /de yang dmigs pa nyid yin no/ /dmigs su rung ba ma dmigs pas kyang khyad par can dmigs pa de nyid kyi rnam pa gcig tu nges pa yin te/de'i phyir khyad par can dmigs pa de nyid gzhan mi dmigs pa yin no/ /gzhan du don med pa nyid ni/ /mi dmigs pa las rtogs par 'gyur/ /gzhan gyis dmigs pa med pa nyid/ /yin pa'i phyir na thug med 'gyur//de lta ma yin te/ gal te rang gi yul can gyi shes pa med pas dngos po med par 'grub na de med par yang mi dmigs pa gzhan gyis bsgrub dgos pa'i phyir thug pa med par 'gyur bas dngos po med pa mi rtogs pa nyid du 'gyur ro/ /myong ba med pa ni rang nyid 'grub pa ma yin te/de dang khyad par med pas yul la yang thal bar 'gyur ba'i phyir ro/ /myong ba ni bdag nyid kyi khyad par la sgrub par byed pa gzhan med pa yin gyi/ med pa ni de lta ma yin no/ /gal te gang las skyon 'dir 'gyur ba rang gi yul can gyi shes pa med pas dngos po med pa grub pa yin la/rang las khyad par can gyi shes pa yod pa las kyang ma yin no/ /'o na ci zhe na/ bum pa dmigs pa med pa zhes bya ba dngos po med pa la dmigs pa gang yin pa de nyid las yin la de yang tshad ma rang rgyud pa yin no zhe na/de lta na 'o na dngos po med pa rtogs pa de gang las 'gyur te dngos po med pa 'ga'i yang rgyu ma yin no/ /nus pa med pa'i phyir te/ /nus pa ni dngos po'i mtshan nyid yin pa'i phyir dang / de nyams pa med pas de de las skye ba rtag tu 'byung bar thal ba'i phyir ro/ / ltos pa med pa'i phyir te/ ltos pa ni khyad par thob pa'i mtshan nyid yin pa'i phyir dang / de yang dngos po'i mtshan nyid yin pa'i phyir dngos po med par mi 'gyur ro/ /dngos po med pa zhes bya ba yang dngos po bkag pa yin te/ des na dngos po med pa las skye'o zhes bya bas ni dngos po las mi skye'o zhes rgyu bkag pa byas par 'gyur ro//de lta ma yin na ni dngos po med pa zhes dngos po nyid 'ga' zhig ming gzhan gyis brjod par 'gyur ro/ /de'i phyir rtogs pa de ni srid pa ma yin no/ /mthong ba'i de ma thag pa yang rang rgyud par mi 'gyur ro/ /de'i stobs las skyes pa yin na ni de nyid de la nub pa yin pa'i phyir de nyid tshad mar 'gyur ro//de'i rnam pa nges pa'i shugs kyis gzhan spong ba'i phyir te rnam pa gzhan dang 'dres na de med pa'i phyir ro/ /de'i phyir tshad ma gzhan gyi stobs las skyes pa dbang po dang rtags la mi brten pa'i mi dmigs pa'i rnam par rtog pa 'di ni tshad ma ma yin no//gang gi de ma thag par sgrub pa dang / dgag pa rnam par rtog par 'gyur ba de ltar skyes pa de ni mthong ba nyid yin no/ /dper na sngon po mthong ba ni 'di ni sngon po yin gyi ser po ni ma yin no zhes bya ba lta bu'o/ /de'i phyir de dag ni tshad ma ma yin no//mi snang nges pa mi rung phyir/ /gzhan du gzhag pa 'gog 'gyur dper/ /sems can gzhan la rtags med kyi/ /rnam rtog la sogs mi 'grub bzhin/ /'bras bu nges med can de dag /ldog pa sgrub par nus ma yin/ /nges pa bsgrub phyir gtan tshigs la//dang po dbang du byas pa yin/ /zhes bya ba ni bar skabs kyi tshigs su bcad pa dag go /rang gi sbyor ba dag la de'i/ /rang gi ngo bo sbyor ba'am/ /don la gnod byed ngo bo ste/ /yod na yod las med phyir ram/ /gang gi tshe med par nges pa'i 'bras bu can ldog pa bsgrub pa'i mi dmigs pa de rang nyid med pa bsgrub pa'i phyir rab tu sbyor ba de'i tshe rang gi ngo bos sbyor te/dper na 'di na du ba med de ma dmigs pa'i phyir ro/ /'di na shing sha pa med de shing med pa'i phyir ro/ /'di na du ba med de me med pa'i phyir ro zhes bya ba lta bu'am/yang na dgag par bya ba'i don la gnod par byed pa'i ngo bo nye bar bkod pa'i sgo nas rab tu sbyor te/ dper na 'di na grang ba'i reg pa med de/ me yod pa'i phyir ro zhes bya ba lta bu ste/ sngar dper brjod pa bzhin no/ /'gal ba de yang ji ltar rtogs she na/'ga' zhig tu rgyu ma tshang ba med par 'byung ba las gzhan yod na med pa'i phyir 'gal bar rtogs te/ dper na grang ba dang dro ba'i reg pa bzhin no/ /phan tshun tha dad grub phyir te/ /brtan dngos dang ni 'jig pa bzhin/ /yang na phan tshun spangs te gnas pa'i mtshan nyid kyis 'gal ba yin te/rtag pa dang mi rtag pa bzhin no/ /tshad mas gnod pa'i phyir yang ste/ /ltos bcas dang ni nges dngos bzhin/ /yang na gal te de nyid la tshad mas gnod par byed pa yin na de'i rtags dang 'gal bar 'gyur te/ dper na ltos pa dang nges pa'i dngos po bzhin no/ /tshad ma yang de'i rgyu smra ba rnams kyi skye ba dang ldan par khas blangs pa dag ni 'jig par nges pa med do / /de'i ngo bor 'gyur ba gzhan la ltos par khas blangs pa'i phyir ro/ /gang zhig gang ngo bor 'gyur ba gzhan la ltos par khas blangs pa de ni de'i ngo bor nges par 'gyur ba ma yin te/dper na gos la tshon bzhin no/ /de'i rgyu rnams kyang der nges pa'i phyir skyon med do zhe na ma yin te/ de dag tshang ba dang gegs med par ma nges pa'i phyir / de yod na rang gi rgyu'i tshogs pa la rag las pa de la mngon du phyogs pa gzhan dag kyang yod par 'gyur ba ni ma yin te/rag ma las pa'i phyir ro/ /de'i chos ma yin na yang de nyid las de skad cig ma nyid du 'dod par 'gyur ro/ /de nyid du khyad par med pa'i phyir sngar med pa ni phyis kyang med par thal ba'i phyir ro/ /de'am de'i rgyu mi rtag pa nyid kyi rgyu nges par byed pa'i rang bzhin yin na de'i ngo bo'am de skyed par byed par ci ste mi 'dod/brgyud pas ci zhig bya ste/ mthar de'i rang gi ngo bo nyid de'i ngo bor nus pa'i phyir ro/ /'dis ni res 'ga' ba'i ngo bo nyid ltos pa med pa dang 'gal ba yang bshad pa yin no/ / gal te 'gal ba de lta bu dag kyang phan tshun spangs te gnas pa'i mtshan nyid kho nas 'gal ba yin te/ nges pa med pas nges pa la gnod pa'i phyir ro/ /tshad mas ni 'gal zla sgrub par byed pa yin la/ gnod pa ni de nyid kyis yin te/ de'i phyir tshad mas gnod pas 'gal ba ni ma yin no zhe na bden te/'gal bas khyab pa'i rang bzhin gyis kyang don du 'gal ba yin pa'i phyir/ de nye bar bkod pas mi dmigs pa'i sbyor bar 'gyur ro zhes bstan pa'i phyir de skad brjod de / dper na dper brjod ma thag pa'i sbyor ba de nyid bzhin no/ /ci ste gtso bo la sogs pa de dag ni yod pa ma yin te/mi dmigs pa'i phyir ro zhes bya ba de la ji ltar med pa'i tha snyad bsgrub pa'am yod pa'i tha snyad bkag par 'gyur/ ji ltar mi 'gyur zhe na/ don de dgag pa la chos can brjod pa'i tshig sbyar ba med pa'i phyir te/ de ma bkag pa'i phyir yul med pa'i bkag pa mi rung ba'i phyir ro zhe na/skyon 'di ni med de/ 'di ltar/ thog med bag chags las byung ba'i/ /rnam par rtog pas yongs bsgrub pa / /yod med gnyi ga la brten pa/ /sgra don chos ni rnam pa gsum/ /de dngos nyer len can min par//sgrub la de ni de lta bur / /mi dmigs gtan tshigs de nyid ni/ /med pa ma yin sgra sbyor phyir/ /sgra 'di dag rang gi mtshan nyid kyi yul can ni ma yin te/ thog ma med pa'i dus can gyi bag chags las byung ba'i rnam par rtog pa la snang ba'i don nyid du bdag gir byed do//de ni 'chad pa po dang nyan pa po'i rnam par rtog pa bstan pa yin te/ ji ltar snang ba'i dngos po bstan par 'dod pas sbyor ba'i phyir dang / de'i rnam pa can gyi rnam par rtog pa bskyed pa'i phyir ro/ /nye bar len pa dang 'bras bu'i shes pa la snang ba ma yin pa'i rang bzhin ni de'i yul nyid du nges par nus pa ma yin no//rnam par rtog pa de ni yod pa dang med pa dang gnyi ga'i shes pas bskyed pa'i bag chags las byung ba'i phyir de la snang ba'i rnam par zhen pa'i dbang gis dngos po dang dngos po med pa dang gnyi ga'i chos zhes brjod do//de'i phyir chos can de la gnas pa rnams kyi gtso bo'i sgra las snang ba'i don 'di dngos po'i nye bar len pa can yin nam/ 'on te ma yin zhes yod pa dang med pa nyid du sems par byed do/ /de dngos po'i nye bar len pa can ma yin par sgrub pa la so so rang gis rig pa yin pa'i phyir spang bar 'os pa ma yin pa'i don de ni chos can yin no//don de ni rang gi mtshan nyid yin no zhes ni brjod par mi nus te/ ma thob pa dang 'gags pa'i don dag la yang de mi ldog pa'i phyir dang / dngos po la phyin ci log gi rnam par mngon par zhen pa mu stegs byed gzhan gyi shes pa la yang snang ba'i phyir ro//gcig tu don dam la 'jug na/ /lta ba'i bye brag gzhan dag gi/ /don rnams la ni sgra rnams dag /rgyu med can 'jug mi 'gyur zhing / /'das dang ma skyes pa la yang / /tshig 'ga' zhig kyang brdzun pa yi//don can nyid du mi 'gyur phyir/ /'di dag blo don yul can 'dod/ /ces bya ba ni bsdu ba'i tshigs su bcad pa dag go/ /de la ji ltar 'dod pa'i rang bzhin gyi nye bar len pa can ma yin par bsgrub par bya ba la de ltar mi dmigs pa'i chos yod pa'i phyir sgrub par byed pa'i chos ma grub pa ma yin no//'dir sgra'i rnam par rtog pa la snang ba'i don de nyid la bsnyen pa yang ma yin te/ de blo la bzhag pa'i don du sgra sbyar ba'i phyir dang / de med na de mi rung ba'i phyir ro/ /gzhan yang / sgra don bsnyon pa med rnams kyis/ /yod med phyogs kyi bye brag gis//dngos po nyid ni dpyad bya ste/ /de la 'bras 'byung rag las phyir/ /sgra'i don ni yod dam med kyang rung skyes bu'i don cung zad nyams pa'am 'grub pa ma yin te/ ji ltar mngon par zhen pa bzhin de kho na nyid ma yin pa'i phyir dang / de kho na nyid ji lta ba bzhin 'dod pa med pa'i phyir ro//de'i phyir thams cad kyi tshe 'di yod pa dang med par spyod pa 'jug pa na rnam par rtog pa'i snang ba spangs te gang la skyes bu'i don 'di 'brel pa dngos po nyid la gnas par byed de/ ji ltar grang ba sel ba la sogs pa la me bzhin no//de la sgra'i don ni nus pa ma yin te/ de nyams su myong bar gyur kyang de med pa'i phyir ro/ /de'i phyir don bya ba don du gnyer ba 'di de mi nus pa la ched du gnyer bar rigs pa ma yin te/ 'dod pa dang ldan pa dag ma ning gzugs bzang ba dang ngan pa brtags pa la lhur gnyer ba ni ma yin no//gang yang de skad du brtags pa'i chos mi dmigs pa zhes bshad pa'i don ci yin zhe na/ rtog pa'i shes pa'i yul nyid kyis sgra'i don nyid brtags pa yin la/ dngos po la brten par mi dmigs pa nyid ni de'i chos yin no zhes dgongs pa ni 'di yin no//rang bzhin mi dmigs pa rang bzhin gyi gtan tshigs kyi nang du 'dus pa yin no zhes bya ba 'di ni gnas pa yin te/ de'i phyir de ni dper brjod pa nyid kyi dper brjod pa yin no/ /de yang 'jigs pa la byas pa dang yod pa nyid bzhin du khyad par gyi bye brag la ltos pa'am 'ba' zhig bstan par bya ba yin no zhes brjod zin to//de la/ gal te gtan tshigs yod rang bzhin/ /yod pa ji ltar bsgrub bya min/ /bye brag rjes 'gro med pa ni/ /gtan tshigs bsgrub bya dag 'gal nyid/ /gal te yod pa'i mi rtag pa nyid dam gzhan la gtan tshigs yin na bsgrub par bya bar yang ci ste mi 'dod/de de ltar bsgrub par bya ba yin na khyad par can du 'gyur na/ khyad par ni bsgrub par nus pa ma yin te/ rjes su 'gro ba med pa'i phyir ro/ /zhes grags te/ ji skad du tshad ma'i yul mi shes pa'i phyir ro zhes bshad pa yin no//khyad par de bsgrub par bya ba nyid du 'gal bar ni ma zad do/ /'o na ci zhe na/ gtan tshigs su yang skyon mtshungs pa'i phyir ro/ /gtan tshigs rjes su 'gro ba med pa ni grub pa'i yan lag ma yin te/ de las the tshom za ba'i phyir ro zhe na skyon 'di med de/'di ltar/ dngos po'i khyad par tsam zhig ni/ spyi yi chos can la bsgrubs na/ don 'ga' zhig kyang 'grub mi 'gyur/ de 'dra ba ni bkag pa med/ thams cad du yod pa bsgrubs na khyad par bsgrub par 'gyur ba ni ma yin no/chos 'ga' zhig yod do zhes dngos po tsam gyi khyad par ma bstan par 'ga' zhig yod pa tsam la 'gal ba med pa'i phyir/ 'dir re zhig yod pa'i sgrub byed 'gog pa ni ma yin gyi/ 'on kyang de ltar 'ga' zhig yod do zhes 'di'i khyad par 'gal ba yang ma reg par smra bas rang gi don ci zhig rgyas par 'gyur/de'i phyir khyad par gyis zin pa nyid 'dis bsgrub par bya ba yin no/ /khyad par gyis zin bsgrub bya 'dir/ /gtan tshigs rjes 'gro med par 'gyur/ /des na yod pa bsgrub bya na//khyad par bsgrub byar 'gyur ba yin/ /chos can gtso bo'i mtshan nyid de gcig pu dang rtag pa dang bde ba la sogs pa'i bdag nyid dam gzhan yang rung ste/ de'i rang gi ngo bo nyid rnam pa ji ltar yang rung bas khyad par du gyur pa bsgrub par 'gyur na de ni [(]da [,]de [) ltar rjes su 'gro ba med do//gang yang yod pa tsam rjes su 'gro ba grub pas ni cung zad kyang byar med do/ /gal te de bzhin du me la sogs pa yang thal bar 'gyur ba ma yin nam/ de la yang me yod pa la ni rtsod pa 'ga' yang med de/ mngon par 'dod pa'i khyad par can gyi gzhi'i khyad par dang ldan pa ni rjes su 'gro ba med pa'i phyir mi 'grub bo zhe na/gzhi des de khyad par du byed pa ni ma yin te/ mi ldan pa rnam par gcod pas khyad par du byas pa'i phyir ro/ /zhes bshad zin to/ /de'i phyir der ni de dang mi ldan pa rnam par gcad pas spyi nyid bsgrub par bya ba yin no//de bzhin du 'dir yang 'ga' zhig la yod pa bsgrub pa ni ma yin te/ gtso bo la sogs pa'i sgras brjod par bya ba'i don nyid 'ga' yang med pa'i phyir/ de ni khyad par med pa kho na yin no/ /ji ltar med de de yang shes bya dang gzhal bya dang brjod bya nyid du grub pa kho na yin no zhe na/ci da ni shes bya yod do zhes te de bsgrub par 'gyur ram/ de lta na yang ci zhig 'grub par 'gyur/ gal te blos bskyed pa rnam par rtog pa la snang ba ni sgra'i don yin la/ de ni rang gi mtshan nyid kyi nye bar len pa can nyid du bsgrub par bya ba yin no zhe na/bsgrub par bya ba yin du zad mod/ 'on kyang gtso bo la sogs pa'i mtshan nyid kyi khyad par gyi rten ma yin pas na de yang sgra'i don tsam du rnam par gnas pa yin no/ /de lta yin dang snga ma bzhin du brjod par bya ba 'ga' zhig yod do zhes bsgrub par bya bar 'gyur ro//sgra'i don rang nyid ni yon tan gyi khyad par 'ga' zhig la brten pa ma yin te/ nye bar len pa'i chos de dag la 'dogs pa yin no / /de'i phyir nye bar len pa ma grub pa dag la mi srid do/ /des na 'di dag ni khyad par med pa yin pas de dag la don gyi nye bar len pa can nyid sgrub pa ni don yod pa tsam nyid bsgrub pa yin /khyad par sgrub pa ni ma yin pa'i phyir don med do/ /gzhan du ni me'i spyi de nyid der ma grub pa'i phyir bsgrub par bya ba yin no/ /gal te der yang de dang mi ldan pa ma yin pa'i spyi dang rjes su 'gro ba ma grub pa nyid ma yin nam zhe na/de lta bus ni 'ga' yang rjes su 'gro ba byed pa med do/ /gzhan la sgrub par byed pas ni gang na du ba yod pa de na me yod do zhes du ba me med na mi 'byung bar bstan par bya ba yin la/ de ltar me tsam gyis khyab pa grub pa de ni gang du rang nyid snang ba de nyid du me'i blo skyed par byed do//de la bsgrub par bya ba bstan pas ni ci yang mi dgos te/ de la mthong ba dang 'brel ba bstan pa tsam gyis 'dod pa 'grub pa'i phyir ro/ /de la ma bstan na yang ji ltar de'i khyad par can gyi rjes su 'gro ba yin/ de'i phyir 'di me med na mi 'byung bar grub pa'i shugs nyid kyi me phyogs de dang mi ldan pa rnam par gcod pa'i phyir de de ltar bsgrub bya yin par brjod do//'di'i khyab pa ni de ltar nye bar bkod pa sngon du 'gro ba can ma yin te/ bsgrub bya brjod pa 'di la yan lag ma yin pa'i phyir ro/ /de sngon du 'gro ba can yin na yang dam bca' ba sgrub par byed pa las sus zlog par byed/de skad du yang / rtags ni chos dang mi 'khrul bar/ /gzhan du bstan par bya ba ste/ /de la rab grub de ldan par/ /chos can rtogs par 'gyur ba yin/ / zhes bshad do/ /de'i phyir me la sogs pa bsgrub pa bzhin du yod pa bsgrub pa yang kha na ma tho ba med pa ni ma yin no/ /de yi khyad par gzung med par / /dngos po tsam zhig sgrub byed la/ /de tsam khyab byed bsgrub bya yi/ /rjes su 'gro ba nyams pa med/ /rang bzhin gyi khyab par yongs su ma gzung bar dngos po tsam khyab pa bsgrub par bya ba'i chos la yod pa sgrub par byed pa nyid la ni rjes su 'gro ba nyams pa med do//de la gdon mi za bar yongs su gzung bar bya ba ni ma yin te/ yod pa tsam la brten na yang sgrub par byed pa'i nus pa yod pa'i phyir ro//bsgrub par bya ba nyid ni ma yin te/ 'bras bu med pa'i phyir ro/ /gzhan yang / ma grub pa la yod chos med/ /gnyi ga la brten 'khrul pa dang / /med pa'i chos ni 'gal 'gyur na/ /yod de ji ltar bsgrub bya yin/ /yod pa bsgrub par bya ba la de'i gtan tshigs thams cad skyon gyi rigs gsum las mi 'da' ste/ma grub pa dang / 'khrul pa dang / 'gal ba'o/ /de la gal te dngos po'i chos gtan tshigs su 'dod pa de de ji ltar dang dngos por mi 'dod de/ 'ga' zhig la ltos nas rang gi ngo bo nyid chos shes can las tha dad pa lta bur bstan pa yin no//chos dang chos can brjod pa'i sgra dag gis brjod par bya ba la ni khyad par 'ga' yang yod pa ma yin no zhes 'di ni tshad ma rnam 'grel du bstan zin to/ /ci ste gnyi ga'i chos brjod do zhe na yang ma yin pa ma yin pas na dngos po la mi brten pa'i ldog pa tsam ni med pa la yang mi 'gal ba'i phyir te/dper na lus can ma yin pa zhes bya ba'i lus med pa nyid ni nye bar brjod pa med pa la yang 'gyur ba bzhin no/ /nye bar brjod pa med pa ni med pa'i phyir dgag pa'i yul ma yin no zhe na/ ci da ni de sgrub pa'i yul yin nam/de yang ma yin no zhe na/ da ni ji ltar dgag pa'i yul ma yin te/ dgag pa ni sgrub pa log pa'i rang bzhin yin pa'i phyir ro/ /gal te dgag pa ni yongs su chad pa kho na la gnas par 'dod pa de'i phyir nye bar brjod pa med pa la ni lus can nyid ma yin pa la sogs pa ma yin no zhe na/kye ma brda las byung ba 'dod pa tsam gyi rjes su byed pa'i don nges par 'dod pa'i nyon mongs pa 'di ni dka' bas 'tsho ste/ de'i brang brdungs shing cho nges btab kyang 'jig rten mi ldog pa'i phyir ro/ /brda ji lta ba bzhin rtogs pa'i phyir dang /sgra sbyar ba'i dgongs pa yang de tsam du zad pa'i phyir ro/ /'dod pa dang khyad par med pa'i phyir gnyi gar yang mi rtogs par thal bar 'gyur ba'i phyir ro/ /de las rtogs pa yang brda la brten pa'i phyir yin la/ de ni gzhan du yang mtshungs pa'i phyir ro/ / des na de rnam par bcad pa tsam de ni gnyi ga la yang yod/ srid pas mi mthun pa'i phyogs la 'jug pa srid pa'i dgos pa rnam par chad pas thob pa'i go bar byed pa nyid bdag gir byed par ji ltar 'gyur/ shes bya nyid la sogs pa'i chos rnam par bcad pa'i rang bzhin ma yin pa dag kyang ci zhig ltar dngos po med pa dag la yang blos rnam par 'jog pa'i phyir thun mong ma yin pas de dag kyang 'dis bshad pa yin no//de rang gi tshig gis gnyi ga'i chos su smras pas 'di yod pa las gzhan la yang 'jug pa dang / yod pa la yang mi 'khrul pa'i phyir ji ltar bsnyon pa ma yin/'khrul pa ni mi mthun pa'i phyogs la 'jug pas yin te/ des na phyogs dang mthun pa'i phyogs gang yang rung ba la sogs pa dag ni mi mthun pa'i phyogs la mi 'jug pa'i phyir gnyi ga'i chos yin yang skyon med do/ /phyogs nyid ni 'khrul pa'i yul ma yin no zhe na/'dir gang zhig mi mthun pa'i phyogs su gtogs/ bsgrub par bya ba med pa'o/ /'o na da ji ltar gtan tshigs mi mthun pa'i phyogs la mi 'jug pa gnyi ga'i chos su 'gyur / gtan tshigs kyi mi 'khrul pa phyogs dang mthun pa'i phyogs kyi rnam par dbye ba la ltos pa ni ma yin te/dngos por gnas pa yin pa'i phyir ro/ /phyogs ma gtogs pa'i byas pa mi rtag pa yin no zhes gtan tshigs kyi med na mi 'byung ba rnam par gzhag pas bstan par bya ba ni ma yin gyi/ 'o na ci zhe na/ byas pa thams cad mi rtag pa yin no zhes dngos po'i stobs kyis 'ongs pa'i khyab pa nyid tshad mas bstan par bya ba yin no/ /de ltar grub na chos de'i go bar byed par 'gyur gyi gzhan du ni ma yin no/ /gang zhig skyes bus bsgrub par 'dod pa de phyogs yin pas na gang 'khrul pa'i yul du mthong ba de nyid nges phyogs su byed par 'gyur te/skyes bu'i 'jug pa ni dngos po gzhan gyi dbang ma yin pa'i phyir ro/ /rjes su dpag pa'i yul la ni mngon sum la sogs pas gnod pa yod pa ma yin te/ tshad ma la tshad ma gzhan gyis gnod na de tshad ma ma yin par thal ba'i phyir ro//mtshan nyid dang ldan pa la gnod na de'i mtshan nyid sun phyung bar 'gyur ro/ /zhes bshad zin to/ /gnod pa med pa yang mtshan nyid yin na de'i mtshan nyid mi nges pa can nyid yin la/ de lta na yang go bar byed pa ma yin pa'i phyir gang gi don du mi 'khrul /bsam pa gang zhig gang gis sgrub par byed pa yin/ de'i phyir dngos po la gang zhig gang gis khyab pa'am ma khyab pa de'i go bar bya ba'am go bar byed pa ma yin pa'i phyir skyes bu'i 'dod pas dngos po'i chos rnam par gnas pa ma yin no/ /gang gi tshe 'di phyogs su byed pa de'i tshe mi 'khrul la gzhan gyi tshe des 'khrul pa'i phyir shin tu rnam par dag pa'i tshad ma yin no//dngos po tsam khyab pa'i don rnam par bcad pa med pa'i chos yod pa la gtan tshigs su brjod na ni de'i gtan tshigs 'gal bar 'gyur te/ rnam par bcad pa de ni dngos po 'ga' la yang mi srid pa'i phyir dang /dngos po med pa mtha' dag la yod pa'i phyir ro/ /de'i phyir chos rnam pa 'di gsum ka yang yod pa bsgrub pa la gtan tshigs kyi mtshan nyid bsten pa ma yin la rnam pa gzhan yang mi srid do/ /des na yod na bsgrub par bya ba ma yin no//de tsam khyab pa'i dngos po'i chos la 'di sgrub par byed pa nyid yin pa la ni yod par grub pa'i chos can la spyi ma grub pa ma yin la/ gal te rnam pa ji zhig ltar bsgrub par bya ba'i chos des khyab pa des na 'gal ba dang ma nges pa yang ma yin pa'i phyir thal ba der mi 'gyur ro//de ltar rang bzhin gyi mtshan nyid rnam pa 'di gnyis ni gtan tshigs yin la/ de nyid rang gi khyab par byed pa las bzlog pa bsgrub par bya ba la 'gal ba yin no zhes bstan pa'i phyir phyogs kyi chos rnam pa bzhi bshad do/ /khyad par dad sbyin ma nges pa dag kyang nges par smra ba bsal ba'i ba'i phyir gnyis te/de yang gtan tshigs ltar snang ba'i skabs su bab pa na bshad par bya'o/ /gtan tshigs kyis ldog pa gtsor bsgrub pa'i phyir phyogs kyi chos rnam pa gsum bshad do/ /'di ltar rjes su 'gro ba'i sgo nas ni gtan tshigs go bar byed pa ma yin te/mi rtag pa nyid las rtsol ba las byung ba ma yin pa nyid mi rtogs pa'i phyir ro/ /'di las ni rtogs par mi 'gyur te ldog pa med pas rjes su 'gro ba 'ba' zhig yin pa'i phyir ro zhe na/ 'o na reg par bya ba ma yin pa'i phyir rtag go zhes bya ba 'di la 'gyur ro//ma yin te de la yang rjes su 'gro ba gtso bo ma yin pa'i phyir ro zhe na/ mthun pa'i phyogs la khyab pa'i phyir dang / mi mthun pa'i phyogs 'ga' la med pa'i phyir na 'dir rjes su 'gro ba stobs dang ldan zhing ldog pa stobs chung ba yin te/ dper na brtsal ma thag tu 'byung ba yin te/ mi rtag pa'i phyir ro zhes bya ba lta bu'o/ /mi mthun pa'i phyogs mtha' dag las ma log pa'i phyir mi 'gyur ro zhe na/ de lta na 'o na ni gang bas bde ni mi rtag pa nyid do zhes rtag pa rnam par bcad pas go bar byed pa yin par 'dod par 'gyur te/de lta ma yin na mi mthun pa'i phyogs mtha' dag las ldog par bstan par mi nus pa'i phyir ro/ /des na 'di yod pa tsam dang mnyam pa dang gtso che bas rtogs pa ma yin no/ /rjes su 'gro ba gtso bo ma yin yang bzlog pas khyab na yod pa yin te dper na sgra mi rtag ste/rtsol ba las byung ba'i phyir ro zhes bya ba lta bu'o/ /de'i phyir gang rtsol ba las byung ba de ni mi rtag pa nyid do zhes de ltar rtag pa rnam par bcad pa nyid kyis gtan tshigs go bar byed pa yin te/ sgra dang sa phyogs la sogs par rtogs pa dang me med la sogs pa rnam par bcad pas ldog pa rtogs na ngag 'di'i nus pa yongs su rdzogs pa'i phyir ro//de dag las tha dad pa tsam ni go bar bya ba ma yin te/ 'on kyang 'di la 'di nyid yin gyi gzhan ni ma yin no zhes spyi de nyid mi mthun pa dang ma 'dres par go bar bya ba yin no zhe na/gal te de dag gdon mi za bar gzhan dang ma 'dres par go bar bya ba yin na de tsam gyis 'bras bu yongs su rdzogs pa'i phyir de dag gi gzhan dang ma 'dres pa de nyid go bar bya bar 'gyur mod/ bar gyi spyis ci zhig bya zhes ldog pa bsgrubs pas ston par byed do//'o na rgyu nus pas 'bras bu skye bar rjes su dpog par byed pa gang yin pa de ji ltar gtan tshigs rnam pa gsum gyi nang du 'du zhe na/ nus pa'i rgyu yis 'bras skye bar/ /rjes su dpog pa gang yin pa/ /don gzhan la ni mi ltos phyir/ /de ni rang bzhin yin par brjod/ / 'di yang ji ltar nye ba las gzhan la mi ltos pas ni ngo bo de tsam dang 'brel pa'i rang bzhin yin no/ /de la ni rgyu tshogs pa rnams kyi 'bras bu bskyed par rung ba nyid 'ga' zhig rjes su dpog la / rung ba nyid kyang tshogs pa tsam dang rjes su 'brel ba yin pas na rang bzhin du gyur pa kho na yin no//yang ci'i phyir rgyu tshogs pa las 'bras bu kho na rjes su dpog par mi byed ce na/ gang gi phyir rgyu'i rdzas tshogs pa dag kho nas rang gi 'bras bu skyed par byed pa ni ma yin te/ 'bras bu skye ba ni tshogs pa las skye ba can gyi nus pa rnams kyi 'gyur ba la ltos pa'i phyir ro//bar 'dir gegs byed pa srid pa'i phyir 'bras bu rjes su dpog pa ma yin no/ /rung ba nyid ni rdzas gzhan la mi ltos pa'i phyir rjes su dpog pa la 'gal ba med do/ /rgyu tshogs pa 'di nus pa phyi ma phyi mar 'gyur bas 'bras bu skyed par nus pa yin te/ nus pa 'gyur ba'i rkyen ltos par bya ba gzhan med pa'i phyir ro//nus pa skye ba ni rang gi rigs snga ma tsam gyi rgyu can nyid yin pa'i phyir tshogs pa'i rung ba nyid ni gzhan la mi ltos pa zhes bya'o/ /rung ba nyid kyang rgyu tshogs pa dag kho nas rjes su dpog par byed de/ ma tshogs pa la ni shin tu nus pa med pa'i phyir de las 'bras bu dpog pa ma yin no//mi mthun pa'i phyogs la 'jug pa ma mthong yang lhag ma dang ldan pa yin te/ dper na lus dang dbang po dang blo dag las 'dod chags la sogs pa rjes su dpog pa bzhin no/ /'dod chags la sogs pa ni bdag dang bdag gir mngon par zhen pa sngon du 'gro ba can yin te/nga dang nga'i zhes ma mthong ba la rjes su chags pa dang khong khro ba med pa'i phyir ro/ /tshul bzhin ma yin pa yid la byed pa med par nyes pa rnams mi skye ba'i phyir ro/ /lus la sogs pa rgyu nyid yin yang 'ba' zhig pa rnams la nus pa med pas mi mthun pa'i phyogs la 'jug pa ma mthong du zin kyang rtags 'di lhag ma dang ldan pa'i 'khrul pa yin no//'o na rgyu dang 'bras bur ma gyur pa gzhan ro la sogs pas gzugs la sogs pa rtogs pa gang yin pa de ji ltar zhe na/de yang / tshogs pa gcig la rag las pa'i/ /gzugs la sogs pa ros rtogs pa/ /rgyu chos rjes su dpag pa ste/ /du bas bud shing 'gyur ba bzhin/ /de yang rgyu de lta bu kho na rjes su dpog par byed do/ /ro'i rgyu ni gzugs kyi nye bar len pa'i nus pa zhugs pa'i lhan cig byed pa'i rkyen yin zhing ro skyed par byed de/me bud shing 'gyur ba'i khyad par gyi nye bar len pa'i rgyu lhan cig byed pa'i rkyen yin zhing du ba bskyed pa bzhin no/ /'di ltar rang gi rgyu 'bras bu bskyed par bya ba la mngon du phyogs pa med na ro med pa nyid gzugs kyi nye bar len pa rnams kyi 'jug pa'i rgyu yin no//ro'i nye bar len pa'i rgyu 'jug pa de yang gzugs kyi nye bar len pa'i rgyu 'jug pa'i lhan cig byed pa can yin te/ de'i phyir rgyu ji lta bu las byung ba'i ros de lta bu rjes su dpog par byed pa na gzugs rjes su dpog par byed pa yin no/ /de la yang 'das pa dang dus gcig pa rnams rtogs kyi/ma 'ongs pa rnams ni ma yin te 'khrul pa'i phyir ro/ /de'i phyir de yang 'bras bu'i rtags las skyes pa yin no/ /'dis ni grog ma mthong ba dang nya 'phar ba la sogs pa las char pa la sogs pa rjes su dpog pa yang bshad pa yin te/de la yang char pa'i rgyu 'byung ba 'ga' zhig gi ni grog ma la sogs 'khrug pa la sogs pa'i rgyu yin no/ /gzugs las reg pa rjes su dpog pa ni 'bras bu'i rtags las skyes pa yin te/ gzugs la sogs pa ni 'byung ba la brten pa'i phyir ro/ / 'o na ba lang yin pa'i phyir rwa can yin no/ /zhes bya ba gang yin pa de ji ltar zhe na/ de la yang / tshogs pa rnam par gzhag pa yi/ /rgyu ni tshogs pa can yin pas/ /de dag med na de med phyir/ /ba lang nyid las rwa can yin/ /lkog shal dang rwa la sogs pa'i tshogs pa ni ba lang yin no//de'i phyir tshogs pa rnam par gzhag pa 'di ni tshogs pa can gyi rgyu mtshan can yin pa'i phyir de med na mi 'byung la/ yod na rang gi rgyu mtshan nye bar ston par byed pa'i phyir ba lang nyid las rwa can la sogs pa rtogs pa ni 'bras bu'i rtags las skyes pa yin no//chu yi bdag nyid de 'dra ba/ /gzhi las mngon par grub pa'i phyir/ /de'i 'bras yin/ chu brtan pa mthong nas gting ma mthong yang gzhi yod par rjes su dpog par byed pa gang yin pa de yang 'bras bu'i rtags las skyes pa nyid de/ chu'i bdag nyid de 'dra ba ni gzhi de las grub pa'i phyir ro// de las phan pa nyams su myong ba med par ni de las gnas skabs kyi khyad par thob par mi 'thad pa'i phyir ro/ /phan pa don gzhan nyid yin pa la yang bshad zin to/ /gal te de las bdag nyid kyi khyad par skyes pa'i phyir chu de ltar gnas pa ni ma yin no//'o na ci zhe na/ ldan pa las yin no zhe na/ ji ltar de de dag gi ldan pa yin / de dag las skyes pa'am 'phrod pa 'du ba'i phyir yin grang na/ de ji ltar gcig nyid la 'phrod pa 'du'am skye bar mi 'gyur/ de la nus pa med pa'i phyir ro zhe na/ de la so sor nus pa med pa de ni tshogs kyang de 'dra ba kho na yin pa'i phyir ldan pas de dang ldan par mi 'gyur te/phan 'dogs par byed pa ma yin pa'i phyir ro/ /lhan cig pa ni de las gzhan pa'i phan 'dogs par byed pa las khyad par skye ba'i phyir nus pa yin no / /bskyed par bya ba dang skyed par byed pa ma yin pa rnams kyi phan pa de gang zhig yin te/gang gi ngo bo grub zin pas bya ba ma yin pa'i phyir ro/ /gzhan gyi ngo bo byed na yang de la phan btags pa med pa'i phyir ro/ /gnyi ga ltar byed pa po ma yin pa ni cung zad mi byed pa nyid kyis phan 'dogs par byed pa ma yin pa'i phyir ro zhes mang du bshad zin to //de'i phyir dngos po'i 'brel ba thams cad ni skyed par byed pa nyid kyi nye bar sbyor ba'i khyad par gyi dbang gis rnam par dbye bas rgyu dang 'bras bu'i dngos po las rnam par gzhag pa yin no/ /des na mkhar gzhong dang sa gzhi la sogs pa rnams kyi gzhi'i dngos po 'di yang rgya shug da nga chu la sogs pa skyed par byed pa'i nus pa nyid do//de'i phyir 'di dag la de'i bdag nyid kyis tha snyad la sogs pa ni bskyed par bya ba dang skyed par byed pa'i dngos po nyid kyis byas pa yin te/ ldan pa yod kyang de dag med na mi 'byung ba can yin pa'i phyir dang / brgyud pas rtog pa don med pa'i phyir ro/ /gnas par byed pa'i phyir gzhi yin gyi skyed par byed pa'i phyir ni ma yin no/ /gnas pa don gzhan dang gzhan ma yin pa nyid ni phan pas bshad pa yin no/ /ltung ba'i gegs byed pa'i phyir gnas par byed pa yin no zhe na/gegs zhes bya ba ci zhig gnas par byed pa pos de'i ltung ba'i gegs byas pa gang yin pa de ni don gzhan ma yin pa nyid do/ /don gzhan nyid yin na ni de nyid la nye bar sbyor ba'i phyir ji ltar ltung ba'i gegs yin no/ / gegs kyi mi ltung ba la yang des gegs shes bya ba'i dngos po byas su zin kyang dngos po 'gro ba'i chos can bdag nyid du gyur pa'i khyad par nyams pa dang skyes pa med pa de go ci ste mi ltung zhes brgal zhing brtag pa mtshungs so/ /gegs las khyad par grub na de yang bdag nyid gzhan yin pa'i phyir dngos po de'i kho na yin pas ltung ba'am thug pa med par 'gyur ro//gzhan dag de lta bur gyur pa'i bdag nyid byas pa la ni gegs su khas mi len to/ /de'i phyir ltung ba med pa gegs yin na de ji ltar 'ga' zhig gis byed / de rnam pa 'ga' zhig ltar bya ba yin na dngos po med par mi 'thad pa'i phyir dang /snga ma bzhin du thal bar 'gyur ba'i phyir med pa zhes bya ba 'ga' zhig yod pa ni ma yin no/ /de'i phyir med pa byed do zhes bya ba 'di ni dngos po'i bya ba 'gog pa yin te/ dngos po mi byed do zhes bya ba'i don to//des na de ltung bar byed pa ma yin no zhes de ltar brjod par bya bar 'gyur la/ de yang 'dod pa nyid do/ /de'i ltung ba des byas pa ni ma yin te/ ltung ba'i chos can nyid yin pas rang nyid ltung ba'i phyir te/ gnam du 'phangs pa bzhin no/ /de lta yin dang de la cung zad mi byed pa de ji ltar de'i gnas par byed pa yin/de'i phyir 'di gang gis kyang gegs byas pa med pa'i phyir nam yang gnas par mi 'gyur ro/ /de'i phyir ltung ba'i gegs zhes bya bas kyang dngos po skad cig ma rnams kyi nye bar len pa dang yul mtshungs par skye bar brjod pa yin no//de'i phyir chu'i de 'dra ba ni gzhi las skye bar grub bo/ /chu skyar yang gnas pa chu la brten pa'i phyir ro/ /de'i 'bras bu zhes rjes su 'jug go/ /chu skyar gyi gnas pa ni chu la brten pa yin te/ de las lus gnas pa thob pas de'i 'bras bu nyid du 'brel ba'i phyir ro //yul la sogs pa la ltos nas chu go bar byed pa yin no/ /phyogs 'dis go bar byed pa gzhan la yang 'brel pa bsgrub par bya'o/ /de'i phyir gtan tshigs rnam pa gsum las gzhan pa'i go bar byed pa ni med de/ 'brel pa med pa'i rang bzhin ni med na mi 'byung bar nges pa med pa'i phyir ro//shes byed yan lag ma grub la/ /shes byed nus pa yod min phyir/ /tshul gsum ma grub the tshom za/ /rtogs pa po yi sgrub byed min/ /shes par byed pa'i gtan tshigs bdag nyid gang gis shes par byed pa yin pa de ma grub pa'am the tshom za na shes par byed pa ma yin te sgra bzhin no//gtan tshigs ni tshul gsum gyi don go bar byed pa yin te/ tshang bang du mthong ba'i du ba las rgya mtshor me bzhin du ma 'brel ba las mi rtogs pa'i phyir dang / thams cad las thams cad rtogs par thal bar 'gyur ba'i phyir na 'brel ba med pa las kyang ma yin pa'i phyir ro//de'i phyir chos can dang 'brel pa dang rjes su 'gro ba dang ldog pa dang bsgrub par bya ba dang sgrub par byed pa dag la ma grub pa'am the tshom za ba'i chos ni gtan tshigs ltar snang ba yin no/ /de la/ gcig rab ma grub the tshom na//ma grub pa dang 'khrul pa can/ /gnyis ma grub bam the tshom na/ /'gal ba dang ni 'khrul pa can/ /tshul re re ma grub pa'am the tshom za na ma grub pa dang ma nges pa'i gtan tshigs ltar snang bar 'gyur ro/ /chos can dang 'brel pa ma grub nam grub pa yin te/dper na sgra mi rtag ste/ mig gis gzung bya yin pa'i phyir ro/ /zhes bya ba lta bu'o/ /shing rnams ni sems pa can yin te/ shun pa thams cad bshus na 'chi ba'i phyir ro/ /zhes bya ba ni phyir rgol bas khas ma blangs te/ rnam par shes pa dang dbang po dang tshe 'gags pa 'chi ba'i mtshan nyid yin pa'i phyir ro//'chi ba khas len na sems pa can du ji ltar khas mi len/ 'chi ba'i sgra 'jug pa grub pa nyid do zhe na/ sgra ni 'dod pas 'jug pas de'i dbang gis dngos po rnam par gnas pa ma yin te/ ha cang thal bar 'gyur ba'i phyir ro//de'i phyir 'di skam sa la 'chi bar brjod pa bzhin no/ /srog chags kyi 'chi ba ni de lta bu ma yin te/ des na 'di ni shing dag la ma grub bo/ /dngos po la ltos pa med pa 'dod pas 'jug pa'i sgra tsam yod pa'i phyir dngos pos go bar bya ba'i dngos po 'grub pa ni ma yin no//'dis ni blo dang gnas la sogs pa rnams sems pa med pa dang khyad par du 'phags pa'i blo sngon du 'gro ba can nyid la sogs par sgrub par byed pa mi rtag pa nyid dang / dbyibs kyi khyad par la sogs pa dag kyang bshad pa yin no/ /der yang sgra tsam 'ba' zhig grub kyi don ni ma yin no//nyams pa med pa'i bdag nyid nye bar zhi ba ni mi rtag pa nyid du gzhan dag mi 'dod do/ /gal te khyad par brjod par 'dod pa med pa'i spyi grub pa nyid ma yin nam/ de grub na khyad par rnam par rtog pa'i sgo nas ma grub par rtsod pa ni lan log pa nyid yin no zhe na/gal te byas pa nyid la sogs pa ltar mi rtag pa'i sgra 'di gang dang 'brel ba'i dngos po cung zad gcig gnyi gas kyang spyir 'dod pa yin na lan log par 'gyur ba nyid do/ /bskal ba nyid yod pa ma yin nam zhe na/ de la ni gzhan dag mi rtag par mi brjod do//'o na ci zhe na/ 'jig pa la'o/ /gal te zhig pa dang bskal ba dag mi gsal ba nyid du 'dra ba'i phyir gnyi ga la yang spyi yod pa nyid ma yin nam zhe na/ ci ste mi gsal ba zhes bya ba 'di ci zhig /mi mthong ba'i bdag nyid do zhe na/ mtshan nyid 'dis gtso bo dang skyes bu la sogs pa yang mi rtag par yang thal bar 'gyur ro//sngar chos gzhan yin pa mi gsal ba mi rtag pa yin no zhe na/ sngar chos gzhan yang yin la nyams pa med pa'i bdag nyid kyang yin no/ /zhes legs par tha snyad byas so/ /'dis ni de'i gnas skabs ldog pa yang bshad pa yin no//gang zhig gnas skabs ldog pa bskal pa dang 'dra ba sgra'i don du smra ba de la yang yin la nyams pa med pa yang yin/ gnas skabs ldog gi gnas skabs can ni ma yin no zhe na/ gnas skabs zhes bya ba 'di ci zhig /chu 'dzin pa la sogs don byed pa nye bar bsgrub pa gang yin pa ste/'di bum pa'o zhes 'jig rten pa 'di gang la mngon sum du lhag par zhen pa 'di yin te/ de log na gzhan ma log kyang 'di thams cad med pa'i phyir ro zhe na/ de lta na ni 'o na gnas skabs de nyid bum pa yin te / de ni ji skad bshad pa'i mtshan nyid yin pa'i phyir ro//de yang log pa'i phyir gnas skabs can ma log par gnas pa ni brgal zhing brtag par bya ba yin no/ /yod kyang bum pa'i dngos por ni mi 'gyur te/ de'i mtshan nyid med pa'i phyir ro/ /dngos po gcig nyid gnas skabs gzhan dang 'brel pa'i phyir/tha dad par mngon pa yin no zhe na/ gnas skabs tha dad pa de nyid dngos po tha dad pa'i mtshan nyid du ci ste mi 'dod/ de lta yin dang bde ba la sogs pa rnam pa tha dad par 'gyur bar gdon mi za'o/ /rang bzhin 'ga' zhig rjes su byed pa'i phyir/ gnas skabs tha dad kyang tha mi dad do zhe na/'di ni bde ba la sogs pa rnams dang skyes bu rnams la yang mtshungs pa ma yin nam/ tha dad na rim gyis mngon par gsal ba 'gal ba'i phyir gcig yin no zhe na/ de ci da ni rim ma yin par mngon par gsal bas bum pa dang zho la sogs pa du ma yin nam ci /rim gyis mngon par gsal ba la tha mi dad pas khyab pa ma grub na 'gal ba yang ci yin/ rim pa de ni de'i 'bras bu yin pas de ma grub par de mi 'grub pa'i phyir ro/ /tha dad pa med pa nyid ni cher rim pa med par thal ba yin te/ gcig gi bdag nyid bzhin no//'bras bu nyid kyi phyir tha mi dad pa bzhin no zhe na/ gal te 'brel pa grub na rigs pa yin na de ni rjes su 'gro ba med pa la mi 'grub pa zhes bshad par bya'o/ /ji ltar 'brel pa'i khyad par spangs kyang rgyu dag las skyes pa la byas pa'i sgra yin pa ltar gang la mi rtag pa'i sgra 'di 'jug par 'gyur ba tha dad par rtog pa med kyang zhig pa dang cig shos dag la thun mong gi chos ni rnam pa thams cad du yod pa ma yin no//shing dang skyes bu dag la 'chi ba'i spyi yang de bzhin te/ gal te gang zhig mthong bas srog chags gzhan las shi bar rtog pa de 'dra bar shing dag la dmigs nas de ltar 'gyur ro//ci ste skam pa la sogs pa nyid 'chi ba'i sgrar brjod na de la yang gang las 'grub par 'gyur ba sems pa can la sogs pa med par brtag par 'gyur ro / /de bzhin du dbyibs kyang gal te ci 'dra ba zhig blo sngon du 'gro ba can du mthong ba khang bzangs la sogs pa'i bye brag tu 'jug pa can gang zhig mthong na byed pa po ma mthong ba rnams la yang byas pa'i blor 'gyur ba de 'dra ba yin na yang gtan tshigs thams cad de ltar 'gyur ro//gzhan yang / dbyibs sogs ci 'dra byin rlob bo/ /yod med rjes 'jug can grub pa//de las rjes su dpog gang yin/ /de ni rig pa can yin no/ /dngos tha dad las rab grub pa/ /sgra tha dad las ma grub bo / /rjes dpog rigs pa ma yin te/ /skye bo'i rdzas la me bzhin no/ /de ltar min na rdza mkhan gyis//bum pa la sogs 'jim pa yi/ /rnam 'gyur gzhan zhig byed pa'i phyir/ /grog mkhar yang des byas grub bo / /bsgrub bya rjes 'gro phyir 'bras bu / /spyis kyang bsgrub par byas yin na/ /'brel ba can ni tha dad phyir/ /tha dad skyon brjod 'bras mtshungs 'dod//rigs gzhan la ni rab grub pa/ /sgra yi spyi ni mthong ba las/ /sgrub byed mi rigs dag la sogs/ /go nyid nyid na rwa can bzhin/ /brjod par 'dod pa'i gzhan dbang phyir/ /sgra rnams gang la'ang med ma yin/ /de yod pas ni don grub na/ / thams cad kyis ni thams cad 'grub/ /dngos po'i rang bzhin ma grub na/ /tshul 'di grub na ma grub kyang / /khyad par gnod byed ma yin te/ /sgra yi nam mkha' la brten bzhin/ /sgra ma grub kyang dngos po ni/ /grub na grub par 'gyur te dper/ /'ug pa pa la sangs rgyas pa //lus sogs sgrub byed bshad pa bzhin/ /zhes bya ba ni bar skabs kyi tshigs su bcad pa dag go/ /dper na mngon par gsal bar smra ba la byas pa nyid ma grub bo/ /zhes bstan bcos la brten nas gang yang rung ba la ma grub par brjod pa gang yin pa de ni rjes su dpag pa thams cad la ma yin te/tshad mas mthong ba la khas blangs pas ma grub par rtsod pa mi 'thad pa'i phyir dang rjes su dpag pa la bstan bcos skabs ma yin pa'i phyir ro/ /tshad ma nyid kyis gnod pa'am de'i ngo bo tshad mas ma rtogs na mngon par gsal bar smra ba ci zhig bya/de'i phyir bstan bcos la brten pa'i rjes su dpag pa nyid la bstan bcos kyi sgo nas gang yang rung ba la ma grub par 'gyur ro/ /gzhan la ni ma shes pa'i phyir te/ des na dper brjod pa ma smras so/ /slob dpon gyis ni dper brjod pa'i phyogs tsam zhig bshad do/ / gang yang dper na sgras mi rtag ste/ sgra yin pa'i phyir ro zhes bya ba lta bu dam bca' ba'i don gyi phyogs gcig ma grub pa yin par brjod pa de yang bsgrub par bya ba dang sgrub par byed pa dag ni tha dad pa yin pa'i phyir ro/ /bsgrub par bya ba'i chos can rang nyid bsgrub pa la sgrub par byed pa nyid du ma grub pa'i phyir gtan tshigs kyi ngo bor ma grub par brjod do//de nyid de'i sgrub par byed pa ni ma yin te/ de'i ngo bo tsam dang rjes su 'brel ba yin na yang de bstan pa don med pa'i phyir ro/ /de la khyad par gzhan bsten pa ni med do/ /de sgra nyid kyis de ltar 'gyur na phyogs bstan pa nyid na de ltar 'grub par 'gyur te/phyis kyang rang nyid kho nas de ltar 'gyur ba'i phyir ro / /de'i phyir de rang nyid kyi gtan tshigs su ma grub bo/ /sgra ci ltar ma grub ce na sgra grub ste de bdag nyid kyi gtan tshigs kyi rang bzhin du ma grub pa'i phyir ma grub par brjod do//sgra de ni phyogs su byas pa gang zhig gtan tshigs su 'gyur ba'i sgra gzhan yang yod pa ma yin no/ /de nyid gtan tshigs yin na yang bstan par mi bya'o zhes brjod zin to/ /rtag tu de'i ngo bo grub pa'i phyir rtsod pa med par yang 'gyur ro/ /rjes su 'gro ba ma mthong ba'i phyir mi 'grub po zhe na de da ci chos can gzhan la rjes su 'gro'am /sgron ma la sogs pa ni rang gi ngo bor rung ba nyid kyis bdag nyid kyi rnam par shes pa bskyed na de ltar gsal bas rang gi bdag nyid gsal bar byed pas zhes brjod do/ /rtags dang rtags can ni de ltar ma yin te/de'i dngos po la tha dad pa brten pa'i phyir ro/ /rtags rang nyid rnam par shes pa'i yul du gyur pas ni rtags can rtog par byed pa yin no/ /chos can gyi rang gi sgrub par byed pa yin na ni thal ba 'dir 'gyur ro/ /dngos po thams cad la chos dang chos can gyi dbye ba ma grub pa'i phyir skyon 'di thams cad la mtshungs so zhe na/'di la dngos po rnams kyi ldog pa la brten pa'i tha snyad tha dad pa'i bsgrub par bya ba dang sgrub par byed pa tha dad de bshad zin to/ /don dam pa rnam par dpyad na ni de lta bur gyur pa ma grub pa'i phyir/ kun rdzob pa'i don rnams la de nyid dang gzhan nyid 'gog pa yin no//rjes su dpag pa dang rjes su dpag par bya ba'i tha snyad ni shes pa la grub pa'i tha dad pa la brten nas 'jog pa yin no/ /bdag nyid ji lta'i tha dad kyi/ /mthar thug shes la tha dad par/ /chos dang chos can snang gyur pa//de ni tha snyad rten yin no/ /'di ni tha snyad kyis gzhag pa/ /tha dad blo dang 'brel med can/ /bsgrub bya de nyid sgrub byed du/ /gzhag pa des na ma grub bstan/ /zhes bya ba ni bsdu ba'i tshigs su bcad pa dag go /de'i phyir chos can ni gtan tshigs su gnyi ga la ma grub bo//'dis ni chos kyang bshad pa yin no/ /de yang gal te de nyid las grub na/ de ni snga ma kho nar bstan pa'i phyir snga ma bzhin du thal bar 'gyur bar brjod do/ /rjes su 'gro ba ma grub par brjod pa yang 'brel pa med do/ /de nyid bdag nyid la rjes su 'gro ba med pa'i phyir ro//'o na gang gi tshe mi mthun pa'i phyogs las gzhan pa gtan tshigs su brjod pa de'i tshe ji ltar zhe na/ de la yang bsgrub par bya ba med pa ni mi mthun pa'i phyogs yin pas de las gzhan pa ni bsgrub bya nyid yin pa'i phyir ma grub bo/ /gal te phyogs la sogs pa rnams phan tshun tha dad pa'i phyir mi mthun pa'i phyogs ma yin pa nyid phyogs la yod pa kho na ma yin zhe na/phyogs gang zhig yin la mi mthun pa'i phyogs kyang gang zhig bsgrub par 'dod pa de ni phyogs yin la de med pa ni mi mthun pa'i phyogs so/ /'o na ni de 'dod pas gzhag pa'i mtshan nyid yin pas dngos po'i dbang gi rnam par gnas pa'i mi mthun pa'i phyogs sel ba ji ltar 'gyur/de lta na ni gtan tshigs 'ga' yang ma nges par mi 'gyur ro/ /mi mthun pa'i phyogs kyang 'dod pas byas pa'i phyir ro zhes mang du bshad zin to/ / gal te bsgrub par bya ba ma yin pa ni mthun pa'i phyogs yin la de las gzhan pa yang chos can la grub na gang gi don du gtan tshigs brjod pa ma grub pa ci zhig yod/ bsgrub par bya ba ma grub tsam gyis ni thams cad du ma yin no/ /'o na ci zhe na/ de med par gnyi ga la nges pa yin no//ma nges pa'i chos can la ni mi mthun pa'i phyogs ma yin pa nyid grub bo zhe na/ de lta na bsgrub par bya ba'i chos la the tshom za ba yang mi mthun pa'i phyogs ma yin par 'gyur te/ des na mi mthun pa'i phyogs ma yin pa nyid bsgrub par bya ba med pa las ldog par ma nges pa'i rang bzhin 'di ji ltar sgrub par byed par 'gyur te/de'i mtshan nyid ma nges pa'i phyir ro/ /de nyid kyi nges par byed do zhe na ji ltar ma nges pa la nges par 'gyur / mi mthun pa'i phyogs la yin pa'i sgra ni ldog pa ma nges par brjod pa'i phyir/ ji ltar de nyid kyis bsgrub bya med pa la ldog par nges gang gi phyir 'di 'dir the tshom za ba'i phyir 'di na med do//zhes bya ba yang legs par brjod pa yin no/ /de'i phyir chos rnams kyi 'jug pa dang ldog par phyogs rnam par gzhag pa la mi ltos pa de dag ni phan tshun spangs te gnas pa'i mtshan nyid yin pas phung po ldog par byed pa ma yin no//de dag las gcig ldog pa ni gzhan 'jug pa yin pa'i phyir ji ltar mi rtag pa med pa la ldog mi rtag par bsgrub par bya ba'i chos can la grub/ de ci da ni phyogs kyang mi mthun pa'i phyogs su 'gyur ram zhe na rnam grangs kyis ni 'gyur ba yang yin no//mtshan nyid kyi dbye ba ni brjod zin pa nyid do/ /mi mthun pa'i phyogs su the tshom mi za na ni bsgrub bya med pa rnam par gcad pa'i don du gtan tshigs brjod pa ma yin no/ /gang las skyon 'dir 'gyur ba gtan tshigs kyis 'brel ba ston pa'i dus na phyogs la sogs pa'i rnam par gzhag pa yod pa ma yin no//'di 'ba' zhig nyid 'ga' zhig yod pa dang med pa dag tu 'jug pa dang ldog pa dag tu bstan na rang nyid yod pa dang shugs kyis de de lta bur sgrub par byed do/ /de'i phyir de'i shugs kyi yul rjes thogs pa de ni phyogs zhes brjod do/ / des na de'i mtshan nyid kyi sgo nas 'ongs pa'i chos ni ston par byed pa'i dus na med pa'i phyir yan lag ma yin no/ /'o na de las bzlog pa gzhan las rnam par grol ba'i phyir zhes bya ba gang yin pa de 'di yin no/ /de la ni skyon 'di med de / gzhan smos pa'i phyir ro/ /de las bzlog pa dang bral ba 'ba' zhig ni bsgrub par bya ba'i chos su 'gyur gyi med pa 'ba' zhig dang bral ba ni ma yin no//des na bsgrub par bya ba dang sgrub par byed pa dag khyad par yod do zhe na/ 'di la yang khyad par nye bar gzung ba ni 'dod pa nyid la gnod par byed do//de med par khas len na ni gzhan smos par nus pa ma yin te / dper na ma tha ra'i bu las gzhan pa'i bram ze la zan byin cig ces bya ba lta bu'o/ /ma tha ra'i bu bram ze ma yin na ni bram ze la zan byin cig ces bya ba nyid brjod par 'gyur ro/ /med pa ces bya ba 'di ni pha rol po'i bsam pa yin te/de'i bsam pa'i dbang gis de skad brjod do/ /des na med pa gzhan dang bral bar khyod kyis khas blangs pa'i phyir ro zhes bya ba'i don to/ /zhe na/ de la yang don dam par med pa la phan tshun rnam par dbye ba ci zhig yod/ gcig gi rang bzhin gzhan la ma mthong bas 'di la tha dad pa yin no zhes blos rtogs pa yin na dngos po med pa de dag la yod yod na yang med par mi 'gyur te de ni yod pa'i mtshan nyid yin pa'i phyir ro//rnam par rtog pas bkod pa 'di dag bdag nyid med pa yin yang smra ba po dag brjod pa gzhan dang gzhan gyi rnam par dbye ba dang ldan pa lta bur ston par byed pa 'ba' zhig tu zad do//des byas pa'i rnam par dbye ba ni dngos po rnam par 'jog pa'i rten ma yin te/ ha cang thal bar 'gyur ba'i phyir ro zhes bshad zin to/ /gcig la gcig tha dad pa yod pa dang rjes su 'brel par ston pa 'dis ni thams cad med pa 'jig par 'gyur ro//de lta na yang med pa gzhan dang bral ba'i phyir zhes bya ba 'di ma grub pa nyid dam 'khrul par 'gyur ro/ /ci ste yang de'i mngon par 'dod pa 'ga' zhig la tha dad pa yin na de ltar 'gyur na'o na ni de las tha dad pa yin pa'i phyir de nyid 'dod pa las yin te/yang 'dod pa gzhan du 'gyur na gzhan la yang de lta bu yin par 'dod pa'i phyir ro/ /de'i phyir 'dir 'dod pa nyid la nus pa rnam par gnas pa'i phyir de nyid 'dod pa'i dngos po'i rang bzhin gyi sgrub byed du brjod par 'gyur ro//de'i phyir 'di dag gi phan tshun dben pas ci zhig bya ste/ de nyid gtan tshigs su brjod par 'gyur ro/ /de la dngos po dang 'brel ba brjod par bya ste/ de lta ma yin na mi 'grub pa'i phyir ro/ /'dis ni bdag dang gzhan gyis khas blangs pa la sogs pa dang /skyes bus rnam par gzhag pa la brten pa'i gtan tshigs thams cad brjod pa yin te/ dper na mi mthun pa'i phyogs yin pa'i phyir ro/ /spyi de'i phyogs gcig yin pa'i phyir ro zhes bya ba la sogs pa lta bu'o/ /phyogs de'i 'dis sbyor ba thams cad la brjod pa yongs su 'gyur bas byas pa'i 'khrul pa spangs te/don rnam par gnas pa'i tshul gyi rjes su 'brang bar bya'o/ /rtsol ba las byung ba'i sgra ni mi rtag ste/ rtsol ba las byung ba'i phyir ro zhes bya ba 'di ltar dam bcas pa'i don gyi phyogs gcig ma yin zhe na/ldog pa las tha dad pa brten pa'i phyir blo tha mi dad pa'i yul tha snyad kyis nye bar gzhag pa'i bsgrub par bya ba'i chos can de nyid sgrub par byed pa yin na dam bcas pa'i don gyis phyogs gcig nyid yin par brjod do/ /khyad par bsgrub par bya ba'i chos can du byas te gtan tshigs su brjod pa la ni chos tha dad pa'i phyir rtags dang rtags can mi 'gal lo//khyad par spyi chos tha dad phyir/ /rtags dang rtags can yin par 'dod/ /dper na rtsol ba las byung sgra/ /rtsol byung nyid phyir mi rtag bzhin/ /phyogs yan lag na'ang gnod med phyir//chos can tha dad ma grub min/ /dper na gong bu rwa can bzhin / /rwa can nyid phyir rta min bzhin/ /yang na des mtshon nas ldog phyir/ /bsgrub bya'i dus su yan lag min/ /de phyir khyad par dam bca' yi/ /don min chos tha dad phyir ro//zhes bya ba ni bar skabs kyi tshigs su bcad pa'o / /de bzhin du rang nyid dam de'i gzhi las the tshom za na gtan tshigs ma grub pa yin te/ dper na me bsgrub pa la rlangs pa la sogs pa'i dngos por the tshom za ba'i 'byung ba 'dus pa lta bu dang / yang dper na ri sul 'di na rma bya'i sgra grag pa'i phyir ro zhes bya ba la de grag pa'i yul can mi rtog pa lta bu'o//chos can ma grub na yang ste/ /dper na bdag ni khyab pa yin te/ /bde ba la sogs pa'i yon tan thams cad dmigs pa'i phyir ro/ /zhes bya ba lta bu'o/ /de ltar gtan tshigs kyi tshul gcig phyogs kyi chos nyid ma grub pa'am the tshom za na ma grub pa'i gtan tshigs ltar snang ba yin no//de bzhin du gcig ma grub pa'am the tshom za na ma nges pa yin no/ /gcig po gang zhe na ldog pa'o/ /ma grub pa ni dper na phyogs chos kyi rab tu dbye bar bstan pa thun mong gi ma nges pa rnam pa bzhi lta bu'o//de bzhin du the tshom za ba ni dper na brjod par 'dod pa'i skyes bu 'ga' zhig thams cad mkhyen pa ma yin nam / 'dod chags la sogs pa dang ldan pa yin te smra ba la sogs pa'i phyir ro zhes bya ba lta bu'o/ / 'dir ldog pa la the tshom za ba yin te/ thams cad mkhyen pa smra ba ma dmigs so zhes bya ba mi dmigs pa'i rnam pa 'di lta bu ni yul bltar mi rung ba'i bdag nyid kyis the tshom gyi rgyu yin pa'i phyir ro zhes bshad zin to/ /gal te smra ba'ang yin la thams cad mkhyen pa yang 'gyur mod/'di la 'gal ba ci zhig yod/ gal te 'dir blo dang mi gzhan pa khyed kyis ma dmigs pa'i don spang na 'o na pha'i tha snyad kyi rgyu mtshan ldog par thal ba'i phyir khyod nyams par 'gyur ro/ /smra ba dang thams cad mkhyen pa gnyis la 'gal ba rnam pa gnyi ga gang yang med pa'i phyir ro//ma mthong du zin kyang thams cad mkhyen pa gang yin pa de smra ba ma yin no zhes bya ba'i ldog pa ni mi 'grub ste the tshom za ba'i phyir ro/ /gnod par byed pa yod na ni gzhan med par nges par byed do/ /mtshan nyid mi 'gal ba dbang po las 'das pa'i rnam pa ni shes par sla ba ma yin te/de'i phyir smra ba thams cad thams cad mkhyen pa ma yin no zhes khyab pa ma grub bo/ /smra ba po thams cad kyi chos nyid dang yongs su bcad par yang mi nus pa'i phyir ro/ /de lta na ni thams cad mkhyen par 'gyur bas dgag pa ma yin no//bdag nyid la rang gis rig pa des gzhan la yongs su bcad do zhe na/ gal te de ltar bdag la mthong ba gzhan la bsgrubs na ha cang thal bar 'gyur ba ma yin nam/ mthong ba dang 'gal ba ni mi bsgrub bo zhe na/ rigs pa mtshungs na ci ste mi sgrub//yang na de rigs pa ma yin te / mtshan nyid dang ldan pa la gnod pa srid pa'i phyir ro/ /mthong ba tsam gyis ni ma yin no/ /'o na ci zhe na ldog pa las kyang yin te/ de med pa'i phyir gzhan mi bsgrub bo zhe na/ zhugs pa dang der the tshom za ba dag gis med par ma grub pa'i phyir sgrub pa ma yin no//de dag ni bdag nyid bltar rung ba nyid kyis 'gal bar dmigs pa'i phyir bsgrub par bya ba ma yin gyi/ gang gi mi mthun pa'i phyogs bsal nas gcig tu nges par byed pa bltar mi rung ba rnams ni rang gi mi mthun pa'i phyogs dag dang yang 'gal bar yang mi 'gyur ro//bdag nyid nang gi chos gzhan gyis rig par bya ba ma yin no/ / 'ga' zhig dang ldan par rigs pas thams cad du de nye bar bsgrubs pas tha snyad byed pa'i bum pa 'di/ bud med dang dmangs rigs rnams dang thun mong ba'i khyad par yang mi rtogs pa ni rig pa ngal pa'i 'bras bu yongs su rdzogs pa grub bo//de'i phyir bdag la mthong ba tsam gyis ni nye bar 'grub pa ma yin te/ de tsam gyis khyab pa ma grub pa'i phyir ro/ /de'i phyir ldog pa la the tshom za ba yin no/ /sngar bshad pa'i mi dmigs pa'i mtshan nyid las kyang 'di 'dra ba'i spyod pa rnams the tshom gyi rgyu yin par rtogs par bya'o//rjes su dpag pa'i mtshan nyid kyi 'dod chags dang ldan pa yang don gzhan yin pa'i phyir/ tshig las mi rtogs pa rtogs par bya ste/ 'brel ba med pa'i phyir ro/ /'dod chags med na tshig med do zhes ldog pa nges pa ni med do//g.yo ba dang tshig la sogs pa ni 'dod chags la sogs pa nyid kyi 'bras bu ma yin te/ brjod par 'dod pa spyi'i rgyu can yin pa'i phyir ro/ /de 'dod chags yin no zhe na/ 'dod pa'i phyir skyon med do/ /rtag pa dang bde ba dang bdag dang bdag gir lta bas 'phangs pa zag pa dang bcas pa'i chos kyi yul can yang dag pa ma yin pa'i yon tan la mngon par dga' ba ni 'dod chags zhes brjod do//dga' ba de'i yul can mi mthun pa la des byas pa'i sems kyis 'khrug pa ni zhe sdang ngo //gnyi ga'i sngon du 'gro ba can gyi rten phyin ci log de nyid ni gti mug go/ /snying rje la sogs de lta bu ni ma yin te/ gzhan du srid pa'i phyir ro zhes rnam 'grel bshad zin to/ /de la ji ltar 'dod chags dang bcas pa smra ba ltar zhes 'dod chags dang bral ba yang smra bas tshig tsam las ni mi rtogs so//khyad par las kyang ma yin te/ bsam pa rtogs par dka' ba'i phyir tha snyad 'chol bas thams cad 'khrul pa'i phyir ro/ /dogs pa med pa'i phyir mi smra'o zhe na ma yin te/ gzhan gyi don yin pa'i phyir ro/ /'dod chags dang bral ba'i phyir mi 'thad do zhe na ma yin te/snying rjes kyang 'jug pa'i phyir ro/ /de nyid 'dod chags yin no zhe na/ ming du 'dod pa mi dgag go/ /rang bzhin ni tha mi dad do / /mi sdug pa la mngon par dga' ba nyid mtshams 'brel bar byed pa'i phyir ro/ /de nyid kyi phyir phyin ci ma log pa las byung ba de ni skyon med do//snying rje ni bdag tu 'dzin pa med kyang sdug bsngal gyi khyad par mthong ba tsam gyi goms pa'i stobs las skye ba yin te/ 'di ltar mdo las/ byams pa la sogs pa ni sems can la dmigs pa la sogs pa bstan to//de dag kyang rigs mthun pa goms pa las 'jug pa can yin no/ /'dod chags la sogs pa ni de lta ma yin te/ phyin ci log med na med pa'i phyir ro/ /snying rje can gyi rtsom pa 'bras bu med pa yang phyin ci log las yin no zhe na ma yin te/ gzhan gyi don nyid 'bras bu nyid du 'dod pa'i phyir te 'bras bu'i mtshan nyid ni de yin pa'i phyir ro//smra ba po bdag nyid la 'dod chags la sogs pa mthong bas gzhan la de rjes su dpog na ha cang thal bar 'gyur ba bshad zin to/ /'khrul pa'i phyir gzhan rjes su mi dpog na 'di la mi 'khrul lo zhes bya ba'i nges pa ci zhig yod/ma mthong ba la ni brjod zin to/ /tshu rol mthong ba 'di ltar rung ba'i bdag nyid ni lhan cig tu 'gyur ba'am de lta ma yin par mthong gi gcig tu nges par lkog tu gyur pa'i don ni med par nges pa ma yin no/ /de'i phyir tshig gis ni byed pa'i yon tan dang rjes su dpog par byed do//'dir yang bdag las mthong bas rjes su dpog pa ma yin pa zhes bya ba'i thal ba 'di mtshungs so zhe na ma yin te/ de dag 'dir rjes su 'gro ba dang ldog pa dag las rgyu dang 'bras bu'i dngos po nyid du grub pas gzhan la rjes su dpog pa'i phyir ro//mi sdug pa la mngon par dga' ba dang / phyin ci log dang tshig ni de ltar de grub pa ma yin te/ bdag nyid la gzhan du mthong ba'i phyir ro/ /'dod chags skyes par rung ba nyid dang bral ba la tshig ma mthong ba'i phyir de rjes su dpog na ldog pa ma grub pa'i phyir rgyu dang 'bras bu nyid du ma grub bo//sems pa med pa ldog pa'i yul yin no zhe na/ rnam pa 'di lta bu'i ldog pas ni rgyu'i nus pa mi grub bo/ /de las gzhan pa'i nus pa dag yod pa na 'bras bu mi skye bas rgyu gzhan rjes su dpog par byed do//rnam pa de lta bu'i ldog pa ni sems pa med pa dag la mi srid de/ de dag la ni sems pa dang byed pa'i yon tan la sogs pa nus pa mthong ba'i rgyu nyid med pa'i phyir the tshom za'o/ /'dod chags kyis phan mi 'dogs na ji ltar de'i nus pas phan 'dogs par 'gyur te/rang gi ngo bo'i yon tan nus pa la nye bar btags pa'i phyir ro/ /gang la des mi nus pa de la nus pas nus pa ma yin no/ /de med na de mi 'byung ba'i 'bras bu kho nas rgyu rjes su dpog par byed de der 'brel pa'i phyir ro//gzhan ni mi mthun pa'i phyogs la ma mthong yang ma yin no/ /thams cad gzigs pa'i gzigs pa log pas ni thams cad na med pa go bar byed do/ /la la na de ltar mthong ba rnams kyang yul dang dus dang 'du bya ba'i khyad par las gzhan du snang ba'i phyir te/dper na skyu ru ra'i shing dag 'o mas bcus na 'bras bu mngar po chags la phal cher ni de ltar mi snang ba lta bu'o/ /des na 'di skad du bdag lta bu'i smra ba po ni 'dod chags can yin no zhes brjod par rigs pa yin te/'dod chags skye ba'i rkyen gyi khyad par bdag tu lta ba dang / tshul bzhin ma yin pa'i yid la byed pa dang ldan pa'i phyir ro/ /de'i tshe yang smra ba po dper brjod pa ni med do/ /de'i phyir 'di yang mi mthun pa'i phyogs la yod pa'i phyir tshul gnyis ma grub pa yin te/phyin ci log tu grub pa yin no zhes bya ba'i don to/ /des na 'di dag phyin ci log tu sgrub par byed pa'i phyir 'gal ba yin no/ /'dod pa la gnod par byed pa 'gal ba gsum pa yang yod pa ma yin nam/ dper na mig la sogs pa ni gzhan gyi don yin te/'dus pa yin pa'i phyir mal cha dang stan la sogs pa'i yan lag bzhin no zhes bya ba lta bu'o/ /de ni 'dod pa 'dus pa ma yin pa gzhan gyi don byed pa phyin ci log tu bsgrub pa'i phyir 'gal ba yin no/ /de ci'i phyir ma smos she na/ bsgrub par bya ba nyid du khyad par med pa'i phyir ro//de dag las 'di bsgrub par bya ba'i chos phyin ci log tu bsgrub pa nyid du ni bye brag yod pa ma yin no/ /'dod pa dang smras pa dag bsgrub par bya ba nyid du ni khyad par 'ga' yang med do zhes bshad zin to/ /khyad par yod na ni 'gal ba bzhin du 'dod pa bsgrub pa'i phyir gtan tshigs su brjod par 'gyur ro//gcig nyid kyi tshig gis bsgrub par bya ba nyid du khyad par med par bstan to/ /de nyid kyi phyir de phyin ci log tu bsgrub pa yang gcig nyid do/ /de'i tha dad pa ni sbyor ba'i bye brag las te la lar ni brjod pa dang shugs dag gis/la lar ni brjod par 'dod pas chos dang chos can gyi khyad par du nye bar gzhag pas yin la / 'gal ba bzhin du gtan tshigs kyang ci ste tha mi dad ce na/ rnam par 'byed pa la su 'gog /don gyis 'phangs pa'i 'dod pa ma brjod pa pha rol po'i 'dod pa yin pa'i phyir de'i bsam pa'i dbang gis 'dod pa la gnod par byed pa zhes brjod kyi/mtshan nyid tha dad pa'i phyir ni ma yin no/ /de nyid kyi phyir logs shig tu bstan par bya ba ma yin par bshad do/ /gal te 'dus pa rnams 'dus pa ma yin par gzhan la phan 'dogs par nges pa med pa'i phyir 'gal ba ma yin nam/'dus pa gzhan la phan 'dogs par byed pa yin no zhes bya ba 'di la nges pa ci zhig yod/ gal te yang 'bras bu 'ga' zhig la mngon du phyogs pa'i don rnams tshogs pa 'dus pa yin pa de lta na yang gags byed pa logs pa srid pa'i phyir/rgyu rnams gdon mi za bar 'bras bu dang ldan pa ma yin pas 'khrul pa nyid do/ /thogs pa med pa'i phan 'dogs pa'i mig la sogs pa gzhan la phan 'dogs pa yin no zhe na/de la yang 'dus pa gzhan la phan 'dogs pa nyid do zhes 'brel ba nges pa ci zhig yod ce na/ de dag las nye bar sbyor ba rnams rang bzhin du ma'i phan pa sgrub par byed pa 'di yin gyi/ dus gcig tu du ma'i rang bzhin ma yin no/ /phan pa don gzhan nyid yin na de'i phan pa ma yin pa zhes bya ba la sogs pa yang bshad zin to//gnyi ga ma yin pa'i byed pa ni don med pa yin pa'i phyir/ de'i don du sgrub par byed pa 'gal ba yin no/ /de'i phyir mig la sogs pa phan 'dogs pa ni khyad par skyed pa nyid kyi phan 'dogs pa yin no//de bas na de rang bzhin gcig tu mi 'gyur ba'i phyir 'gal ba yin no/ /ngang gi sgras ni gnyis las gcig ma grub na gzhan la the tshom za na 'khrul pa can yin no/ /zhes bstan pa'i phyir te/ dper na 'dod chags dang bral ba'am/thams cad mkhyen pa yin te/ smra ba'i phyir ro zhes bya ba lta bu'o/ /'di la ldog pa ma grub pa la rjes su 'gro ba la ni the tshom za ba yin te/ thams cad mkhyen pa 'dod chags dang bral ba dag bskal pa'i phyir de la tshig la sogs pa yod pa'am med pa nyid du the tshom za'o//the tshom za na 'khrul pa can gnyis zhes snyegs so/ /gang la rjes su 'gro ba dang ldog pa la the tshom za ba ste/ dper na gson pa'i dus na bdag dang bcas pa yin te/ srog la sogs pa dang ldan pa'i phyir ro zhes bya ba lta bu'o/ /gang la srog la sogs pa gnas par 'gyur ba bdag dang bcas pa dang / bdag med pa las phung po bzhin ni med de bdag rnam par gnas pa dang / rnam par gcod pa dag gis thams cad bsdus pa'i phyir ro//'di gnyis las gcig la rnam par gnas pa nges pa med de de'i bdag nyid las ma grub pa'i phyir ro/ /de bas na gson po'i lus dang 'brel ba can gyi srog la sogs pa ni gnyis kyi bdag nyid las phyi rol du gyur pa med pa'i phyir de dag las ldog pa ma yin no//de la rjes su 'gro ba dang ldog pa dag las the tshom za ba'i phyir ma nges pa yin te/ de las bsgrub par bya ba dang cig shos dag tu nges pa med pa'i phyir ro/ /mi rtogs pa yang ma yin te/ 'ga' zhig dang 'brel ba'i phyir ro//ma 'brel ba las ni dpyod pa mi skye ste/ dper na sgra la mig gis gzung bya bzhin no/ /'brel ba las ni 'di ci zhig dang 'brel zhes ci zhig dpyod/ dper na ma 'brel bar mi rung ba'i phyir/ 'brel ba yongs su shes pa med par mngal chags pa las skyes bu'i khyad par dang 'brel par the tshom za ba de bzhin du 'dir yang thams cad nang du 'dus par mi rung ba'i phyir the tshom za'o//mi rtogs pa gnyi gar rtogs pa dang the tshom med pa'i rang bzhin de ni gnyis las phyi rol du 'gyur ba yod na 'gyur gyi/nang du 'dus na ji ltar mi rtogs par 'gyur/ de lta ni kho na mig gis gzung ba nyid las kyang 'gyur ro zhe na ma yin te/ ma 'brel pa'i phyir ro zhes bshad zin to/ /de'i phyir thun mong ma yin pa ni the tshom gyi rgyu yin no/ /srog la sogs pa ni khyad par du yin te/bdag bskal pas 'jug pa dang ldog pa mi 'grub pa'i phyir srog la sogs pa yang de la 'jug pa dang ldog pa ma grub pa'i phyir ro/ /don gzhan 'bras bu ma yin pa las mi 'grub pa'i yang phyir ro/ /srog la sogs pa dang bdag ni rgyu dang 'bras bu'i dngos por mi 'grub ste/de ni dmigs pa dang mi dmigs pa la brten pa'i phyir ro/ /'brel ba med pa yod na yod pa yang ma yin pa'i phyir the tshom za'o/ /gzhan dag srog la sogs pa ni bdag go bar byed pa nyid yin te/de'i ldog pa ni gcig tu nges pa'i phyir ro/ /srog la sogs pa ni mi mthun pa'i phyogs kho na ldog pa yin gyi/ mthun pa'i phyogs las ni ma yin te/ med pa las ldog par mi rung ba'i phyir ro/ /de bas na rjes su 'gro ba gcig tu nges pa ltar ldog pa gcig tu nges pa yang go bar byed do //mnyan bya nyid ni de lta ma yin te/ gnyi ga las ldog pa'i phyir ro zhe'o / /ldog pa'i rnam pa de lta bu'i smra ba des ni med na mi 'byung ba nyid brjod par 'gyur ro/ /'di ltar bdag med pa nyid la med pa nyid do zhes don gyis bdag la gnas pa gzhan dang ma 'brel bar bstan par 'gyur ro//de nyid kyis ni rjes su 'gro ba grub pa'i phyir ldog pa can zhes brjod pa can yang ma yin no/ /med na mi 'byung ba yang 'brel ba yin na yang de'i bdag nyid dang de las byung ba las gzhan med do zhes bshad zin to//de dag kyang mthong ba med par mi 'grub pa'i phyir srog la sogs pa med na mi 'byung ba ma yin no/ /de nyid kyis gang las ldog pa can zhes brjod pa yang bdag ma logs kyang 'brel bar ldog pa yang ma yin no/ /de bas na khyad par ni ldog pa med pa dang rjes su 'gro ba med pa yin no//ma mthong ba tsam la brten nas slob dpon gyis mnyan par bya ba nyid ldog pa can du bshad do/ /de tsam gyis med par rtogs pa ni ma yin no zhes bshad zin to/ /de lta ma yin na the tshom gyi rgyu nyid du mi 'gyur te/ gang zhig gang la mi srid pa de dmigs pas de la the tshom za bar ni mi rigs so//srog la sogs pa med pas bdag med pa la khyab pa'i phyir bdag log na srog la sogs pa ldog par 'gyur ro zhe na ma yin te ma 'brel ba med pas nye bar mi sbyor ba med pa la khyab pa ma grub pa'i phyir ro//gal te srog la sogs pa de'i bdag nyid dam / de las byung ba bdag dang 'brel ba yin na/ de dag de log na ldog par 'gyur bas de'i tshe srog la sogs pa med pas bdag med pa las khyab par 'gyur ro/ /de med na med par grub pas khyab pa grub pa'i phyir de yang mi 'grub ste/bzlog pa la 'brel ba med pa'i phyir ro/ /de dag gi 'brel ba ni dmigs pa dang mi dmigs pa dag las shes pa yin na de dag ni shin tu lkog tu gyur pa la mi 'grub bo/ /srog la sogs pa med pas khyab pa'i bdag med pa yang gang yin/bum pa la sogs pa'o zhe na/ gzhan du mthong ba med pas bum pa la sogs pa la med do zhes gang las yin/ des na ldog pa shes pa med pa'i ldog pas khyab pa yang mi 'grub bo/ /srog la sogs pa yang mthong ba nyid las la lar yod pa dang med par rtogs pa yin no//bdag ni de lta ma yin pa'i phyir de yod pa dang med par mi rtogs so/ /gang yang gal te gson po'i lus bdag dang bcas pa ma yin na srog la sogs pa dang mi ldan par thal bar 'gyur te bdag med pa'i phyir bum pa la sogs pa bzhin no zhes brjod pa de yang rgyu dang 'bras bu'i dngos po med par mi 'grub bo//rgyu dang 'bras bu ma yin pa bkag pa ni go bar byed pa ma yin no zhes mi dmigs par bshad zin to/ /rgyu yi dngos po de yang bdag mthong ba med pa'i phyir mi 'grub po zhes lan cig ma yin par bshad zin to//mthong yang ldog pa ma 'grub pa'i phyir mi 'grub bo/ /bum pa la sogs pa ldog pa'i yul yin no zhe na/ rnam pa de lta bu'i ldog pa las ni rgyu yi nus pa mi 'grub kyi nus pa gzhan dag yod kyang 'bras bu mi skye bas rgyu gzhan yod par rtogs par byed do//zhes lan cig ma yin par bshad zin to/ /srog la sogs par rgyu blo la sogs pa yang bum pa la sogs par mi srid do/ /de bas na bdag ldog pa ni nus par the tshom za ba yin no//blo la sogs pa de dag kyang bdag med pa la mi 'gyur ro zhe na ma yin te/ de la gzhan nyid kyi nus pa mthong ba'i phyir ro/ /re zhig mig la sogs pa'i rgyu blo la sogs pa bdag nyid ji lta ba'i dbang po dang yul dang / nus pa nyams pa med pa'i bdag nyid snga ma yang yin te/yul gzhan la yengs sam 'khrug pa la sogs par gyur na rnam par shes pa phyi ma mi skye ba dang / 'chol ba la sogs pa mthong ba'i phyir ro/ /yid kyi rnam par shes pa'i rgyu ni nus pa nyams pa med pa'i rnam par shes pa snga ma yin no//dbang po la sogs pa'i nye bar len pa'i rgyu yang skal ba mnyam pa'i gnas skabs kyi khyad par snga ma snga ma yin la blo ni rkyen yin no/ /de ltar 'di'i bdag nyid 'grub pa ni de tsam dang rjes su 'gro ba ldog pa la brten pa yin pa'i phyir de nyid rgyu yin pa'i phyir gzhan rtag na thug pa med par 'gyur ro//gang zhig yod na gang 'gyur nyid/ /de las gzhan pa de yi rgyur/ /rtogs pa yin na thams cad la/ /rgyu rnams thug pa med par 'gyur/ /zhes bya ba ni bsdu ba'i tshigs su bcad pa'o/ /srog la sogs pa mnyan bya nyid dang 'khrul par yang mtshungs so//ma yin te de ni ldog pa 'khrul pa'i phyir ro zhe na ji ltar 'khrul/ de ni mi mthun pa'i phyogs ma yin pa kho na las ldog pa ma yin pa'i phyir ro zhe na/ des ni 'di mthun pa'i phyogs la 'jug pa med par brjod pa ma yin nam/de ni gzhan la yang mtshungs pa'i phyir/ ji ltar srog la sogs pa dang mi mtshungs/ mthun pa'i phyogs ma yin pa nyid la med do zhes bya bas 'di mthun pa'i phyogs la yod par brjod pa yin te/ dgag pa gnyis kyi rnal ma go ba'i phyir ro/ / de lta ma yin na rnam par gcad par bya ba ma yin pa'i phyir nges par gzung ba'i 'bras bu cir 'gyur / gcig la nges par gzung ba med na ni/ ldog pa mi 'khrul pa'i phyir ro/ /de nyid kyi phyir mthun pa'i phyogs nyid la yod pa dang mthun pa'i phyogs ma yin pa nyid la med pa zhes don go bas dpe gnyis las gang yang rung ba gnyi ga bstan par brjod do//de'i phyir ldog pa mi 'khrul pa 'di 'dra ba ni rjes su 'gro ba med par mi 'grub bo/ /grub na ni nan gyis rjes su 'gro ba 'gug par byed do/ / de dgag pa bkag pa'i ngo bo ni sgrub pa'i rang bzhin yin pa'i phyir ro//mthun pa'i phyogs med pa las ldog pa'i phyir mthun pa'i phyogs ma yin pa nyid la med pa yin no zhe na/ med ces ldog pa de nyid med pa las ldog pa ji ltar 'dod/ med pa bkag pa dngos po ni med pa yang yod la dngos po bkag pa ni mi srid do zhes bya ba ni lha rnams dga' ba shes rab 'khrul pa med pa yin te/yul de la dgag pa mi 'dod pa dang yod pa ma yin pa dang dngos po med pa zhes bya ba de lta bu la sogs pa tha snyad byed pa gang yin pa'o/ /don 'di ni med pa la med ces bya ba de'i nang du bsal zin pa des na 'dir mi spro'o//yod pa'i sgrub byed 'jug pa'i phyir bdag med pa ni ma yin gyi the tshom du 'gyur ro/ /gzhan gyi de ltar khas blangs pa'i phyir ro zhe na/ khas blangs pa tshad ma ma yin pa las de ltar 'byung ba yang ma yin te/ ha cang thal bar 'gyur ba'i phyir ro/ /khas blangs pa'i stobs kyis mthun pa'i phyogs dang mi mthun pa'i phyogs rnam par gzhag nas tshad ma 'jug par ni mi rigs te/de lta na ni bdag lung gis grub par 'gyur gyi/ rjes su dpag pas grub pa ni ma yin no/ /de'i phyir bdag the tshom za bas mthun pa'i phyogs med pa las ldog pa med kyang srog la sogs pa ldog par the tshom za bar 'gyur ro//de nyid kyi phyir mi mthun pa'i phyogs kyang ldog pa the tshom za ste/ gcig la nges par grub na gzhan la ldog par 'grub pa'i phyir ro/ /de lta ma yin na mthong ba 'ga' zhig la med par grub kyang ma mthong ba rnams la the tshom du 'gyur ro//'di ltar gsal ba'i bye brag mtha' dag la khyab pa ma yin pa'i don yang de'i rigs pa can 'ga' zhig la srid pa mthong ste/ /dper na sra ba la mtshon gyis mi chod pa bzhin no/ /'gal ba mthong ba med pa'i phyir yang the tshom nyid do/ / bdag med pa dang srog la sogs pa bshad zin pa'i mtshan nyid kyi 'gal ba ma grub pa'i phyir bdag med pa las ldog par the tshom za'o/ /srog la sogs pa de'i 'bras bu'am bdag nyid kyis bdag la nges pa yin na bdag med pa dang lhan cig 'gal bar 'gyur na de ni ma grub po zhes bshad zin to//srog la sogs pa bdag med pa las ldog pa dang / de yod pa bdag med par ldog tu chug pa de lta na yang bdag med pa med pas gson po'i lus bdag dang bcas par mi 'grub po/ /gang gis na bdag med pa med pas bdag yod par 'gyur bas 'di ldog pa med pa dngos por 'dod pa ni ma yin te/dper na ldog pa med kyang mthun pa'i phyogs la srog la sogs pa mi 'dod pa bzhin no/ /gal te gtan tshigs mthun phyogs las/ /ldog med de phyir rjes 'gro can/ /gal te ldog med rjes 'gro min//bdag med ma yin bdag bcas min/ /zhes bya ba ni bsdu ba'i tshigs su bcad pa'o/ /gal te srog la sogs pa yod pas bdag med pas ldog pa'i phyir bdag rtogs pa ni ma yin no/ /'o na ci zhe na/ srog la sogs pa ni bsgrub pa'i sgo kho na nas bdag rtogs par byed pa yin no zhe na/de ni bdag med pa las ldog pa la 'bras bu ci yod/ de de la mi srid pas rang yod na de med par sgrub par byed pa'i phyir de las ldog pa can du brjod pa yin te/ de lta ma yin na bdag med pa las ldog pa bdag 'grub pa la ci phan/yang na bdag nyid nges par ma grub pa'i srog la sogs pas bdag ji ltar sgrub ces brjod par bya'o/ /de lta na ni ha cang thal bar 'gyur ro/ /de bas na srog la sogs pa ni thun mong ma yin pa'i ma nges pa nyid do/ /gzhal bya nyid thun mong ba yang 'dus ma byas la skur pa'i med pa la rjes su 'gro ba mi rung ba'i phyir rjes su 'gro ba 'khrul pa med pa mthun pa'i phyogs nyid la yod pa yin pas rjes su 'gro ba dang ldan pa nyid kyis gtan tshigs su smra'o//de la yang ji ltar mi mthun pa'i phyogs las ldog pa med pa'am/ji ltar mthun pa'i phyogs nyid la yod pa yin/ gal te mi mthun pa'i phyogs la yod pa nyid rnam par bcad pa ma yin na nges par gzung ba 'di'i 'bras bu ci yin/ rnam par gcod na yang ji ltar mi ldog ste/ ldog pa ni yod pa rnam par bcad pa las gzhan ma yin pa'i phyir ro/ /rjes su 'gro ba yang ma yin la ldog pa yang ma yin no zhes bya ba 'di ni 'gal ba yang yin te/ med do zhes rjes su 'gro ba dgag pa gang yin pa de nyid ldog pa yin pa'i phyir ro/ /de ni med pa las ldog pa mi rung ba'i phyir zhes bya ba 'di nyid yang 'ongs pa yin pas ji ltar med pa la rjes su 'gro ba dgag ces 'dir yang de nyid brjod par bya ba yin no//dngos po'i rang bzhin 'phen pa'i dgag pa med pa la mi srid kyang ma yin par dgag pa gcig pu ni dgag pa'i yul ma yin no//'o na ci zhe na/ med par dgag pa yang yin la de ni med pa la'ang mi 'gal lo/ /gzhi la sogs pa'i don can dgag pa'i yul ston pa'i rnam par dbye ba rnams dang mi ldan pa'i phyir de yang mi srid do zhe na/ 'di la len btab zin to//de'i phyir rjes su 'gro ba can zhes bya ba'i gtan tshigs ni 'ga' yang med do/ /gzhal bya nyid ni mi mthun pa'i phyogs la rjes su 'gro ba dang ldan pa yang ma yin te/ dngos po dang dngos po med pa dang gnyi ga la brten pa'i chos rnam pa gsum zhes bshad zin to//med pa la ni chos 'ga' yang med do zhe na/ chos dang bral ba de nyid de'i chos ma yin na/ dngos po'i rang bzhin nyid ni chos ma yin te/ med du zin kyang rnam pa 'ga' zhig gis de'i tha snyad du byed pa yin no/ /de lta ma yin na ni de la tha snyad med pa nyid du 'gyur ro//don dam par ni yod pa la yang chos dang chos can gyi dngos po 'ga' yang yod pa ma yin te/ 'brel pa 'di dag ni blos bkod pa 'ba' zhig tu zad do zhes rnam 'grel du bshad zin to/ /'brel pa blos byas pa ni med pa la yang gang gis bzlog /de dang de ma yin pa'i brda can rnams kyis yod pa dang med pa dang gnyi ga ma yin pa'i rnam par gnas pa sgrub par byed pa ma nges pas gcig tu nges par 'dzin par yang mi 'gyur ro/ /de'i phyir med pa nges par byed pa des de ji ltar yang rung ste/gzhal byar brjod par bya ba yin no/ /dngos po'i yul can nyid ni tshad ma ma yin te/ tshad ma'i mtshan nyid ni mi slu ba yin pa'i phyir ro/ /de ni gal te rang gi yul la gnod pa med na yod pa dang med pa de'i ngo bor 'jog pa yin no//de bas na 'di la tshad ma'i mtshan nyid yod pas med pa gzhal bya yin no/ /gal te thams cad rnam pa 'ga' zhig ltar yod pa'i phyir 'ga' yang dngos po med pa ma yin no zhe na/ de dag gis ji ltar med pa'i rnam pa de dngos po med pa yin no//ri bong dang rwa dag yod pa'i phyir ri bong gi rwa med par smra ba la bzhad gad byed pa de ni bdag nyid la bzhad gad byed pa yin no/ /ri bong gi yan lag tu gyur pa'i rwa med do zhes brjod pa la ri bong dang rwa yang yod do zhes bya ba'i lan gyi skabs ci zhig yod/gang gis gnod par 'gyur ba de rwa tsam la bsnyon pa ni ma yin no/ /'o na ci zhe na/ ri bong dang 'brel ba can no/ /gal te de lta na 'brel pa med ces brjod par bya ba'i rwa ni ma yin no zhe na/ ci rwa can rnams kyis rwa la 'brel ba tsam khyad par yod kyi rdzas kyi rang bzhin ma yin nam/ rang bzhin yang tha dad de 'bras bu so so la rgyu'i rang bzhin tha dad pa'i phyir ro/ /de'i phyir 'brel ba med ces brjod par bya'o zhes bya ba'i klan ka 'di ga la yod/gal te rwa can rnams kyi rwa rang bzhin tha dad pa de bzhin du ri bong gi rwa rang bzhin tha dad pa ni med do zhe na/ kho bo yang de nyid smra'o/ /yang na med pa'i phyir dgag par bya ba'i 'brel ba gang yin pa de nyid dngos po med pa yin no//'brel ba can yod pa la 'brel ba med do zhes bya ba'i tshig gi tshul yang brtags pa yin no/ /khas blangs pa'i 'brel ba can gyi rdzas kyang med do zhe na/ 'dod pa bsgrubs te/ gal te 'di nyid dang por brjod na nyon mongs par mi bya ba zhig go//'gal ba mi 'khrul ba can yang the tshom gyi rgyur bshad na de 'dir ma bshad de rjes su dpag pa'i yul mi srid pa'i phyir ro/ /ji skad bshad pa'i mtshan nyid can rang bzhin dang 'bras bu dag gam/ mi dmigs pa la ni 'gal ba mi 'khrul ba can mi srid la/mi 'khrul ba can gzhan ni med do/ /de'i phyir dngos po ma mthong ba'i stobs kyis zhugs pa lung la brten pa'i rjes su dpag pa la brten te de'i don dpyod pa na 'gal ba mi 'khrul ba can bsgrub pa'i skyon du bshad de/bstan bcos byed pa rnams ni 'khrul bas don rnams la rang bzhin log par ston pa srid pa'i phyir ro/ /dngos po ji ltar gnas pa bzhin du 'dug pa bdag dang 'bras bu dang mi dmigs pa rnams la mi srid do/ /'di la dper brjod pa ni spyi ni thams cad na yod pa yin te/yul thams cad na gnas pa rang dang 'brel pa can dag dang cig car mngon par 'brel ba'i phyir nam mkha' bzhin no zhes bya ba 'di dang 'brel pa can gyi rang bzhin tsam dang rjes su 'brel ba de'i yul na 'dug pa'i rang bzhin nyid do//gang zhig gang na med pa de ni de'i yul can bdag nyid khyab par byed pa ma yin no/ /gal te gzugs la sogs pa nam mkha' la med kyang de'i yul can gyi bum pa la sogs pa khyab par byed pa ma yin nam zhe na/ ldan pa dang 'du ba dag las yul dang yul can gyi dngos po gang yin pa de ni re zhig gzhag ste/rnam par chad pa dang rnam par ma chad par snang ba'i rnam par shes pa bskyed par rung ba'i mtshan nyid 'jig rten pa'i yul la brten nas brjod do/ /so so ba dang so so ba ma yin par grub pa dag la ni ldan pa dang 'du ba'i 'brel ba dag go zhes bya ba ni bstan bcos kyi yang rnam par gzhag pa yin no//de'i phyir rang yod pa tsam dang 'brel ba can de'i yul la gnas pa bsgrub par bya ba la/ de dang 'brel ba nyid 'di ni gtan tshigs yin no//gal te rang gi rten la khyab par smra bas kyang de'i yul la gnas par 'dod pa nyid ma yin nam/ de'i phyir mi 'dod pa ci yod ce na/ bya ba med pa gcig dang 'brel pa can sngon de na med pa na / yul gzhan du snga na med pa ni gsal ba skyes pa na de dang 'brel bar mi rung ba de'i phyir/yul tha dad pa dag dang cig car 'brel ba ni thams cad du khyab pa ma yin par mi 'grub bo/ /des na gcig dang 'brel ba gcig gi yul gzhan du ma song bar de'i yul can ma yin pa snga ma ni med pa dag dang mngon par 'brel ba ni de'i bar khyab pa med na med pa yin te/bum pa la sogs pa dag dang nyi ma la sogs pa bzhin no/ /sbyor ba gnyis pa yang spyi ni thams cad du song ba ma yin te/ dmigs pa'i mtshan nyid du gyur pa las gsal ba'i bar dag tu ma dmigs pa'i phyir ro//dmigs pa'i mtshan nyid du gyur pa ni mngon par gsal ba ste/ tha dad pa med pa'i phyir gcig la gsal bas thams cad gsal ba'i phyir/ mi gsal ba'i rang bzhin dang bral ba'o/ /mchod pa dang /thag ring por gnas pa ma yin pa dang / bltar rung ba'i bdag nyid dang / rang gi rten dang dbang po 'brel ba dang / rten dang 'du ba med pa'i rang bzhin dang bral ba yang tha dad pa med pa nyid kyi phyir ro/ /yul mtshungs pa'i rten dbang po dang sbyor ba la ltos pa yin na ni rten dang yul mtshungs pa dang /mtshungs pa ma yin pa'i rang bzhin ni tha dad med par 'gal lo/ /bltar rung ba dang mi rung ba'i bdag nyid la sogs pa'i 'gal ba yang brjod par bya'o/ / de bas na mi dmigs pa 'di dang rang bzhin ni phan tshun 'gal ba'i don bsgrubs pas gcig la the tshom skyed par byed do/ /bstan bcos byed pas ni gnyis po dag gi 'gal ba'i chos med na mi 'byung ba ma mthong bas/ de dag mi 'gal bar mthong nas bshad pa'i phyir/'gal ba mi 'khrul ba can srid pa yin no/ /dngos po dang rjes su 'brel ba'i rjes su dpag pa la ni ji ltar 'gal ba dag gcig la mi srid pa de bzhin du/ des khyab pa dag kyang yin pa'i phyir/ de dag gcig la yod pa ma yin te/des na de la 'gal ba mi 'khrul pa can mi srid do/ /de bas na 'di ni khas blangs pa'i stobs kyis 'jug pa yin no/ /slob dpon gyis ni phyogs tsam bstan pa'i phyir/ dper brjod pa 'di gsungs te/ sgra mi rtag ste byas pa'i phyir ro//rtag ste mnyan bya yin pa'i phyir ro/ /zhes bya ba'o / /'di la ni tshad ma can ma yin pa gsum khas blang bar bya ba yin te/ sgra'i spyi nyid tha dad pa dang / dbang pos rtogs par bya ba dang / rtag pa ste de la tshad ma 'di la 'jug pa yin no//de bas na 'di ni dngos po'i stobs kyis 'ongs pa'i byas pa nyid kyi gegs byed pa ma yin no/ /byas pa nyid kyi skabs su ni lung nye bar dgod pa ma yin te/ lung la brten pa med pa nyid kyi phyir ro/ /gang na mnyan bya de ni rtag pa yin no//zhes bsgrub bya dang 'brel ba mi 'khrul pa yang ma grub bo/ /gtan tshigs mtshan nyid gsum yin phyir/ /dpe ni logs shig brjod bya min/ /gtan tshigs kyi mtshan nyid ni gsum bshad pa de tsam gyis don rtogs pas dpe zhes bya ba sgrub pa'i yan lag gzhan ni yod pa ma yin no//des na 'di'i mtshan nyid logs shig tu ma bshad de/ des don go ba'i phyir ro/ /gtan tshigs ni mthun pa'i phyogs la yod pa dang / mi mthun pa'i phyogs las ldog pa'i tshul du bye brag med par bshad la/yang bye brag tu ni 'bras bu dang / rang bzhin dag skye ba dang / de tsam gyis rjes su 'brel bar bshad do/ /de yang ston par byed pas gang na du ba yod pa de ni me yod la/ me med na ni gang na yang du ba yod pa ma yin te/dper na tshang bang dang gzhan pa dag bzhin no/ /gang byas pa de ni mi rtag pa nyid la mi rtog pa nyid med na ni byas pa mi srid de/ dper na bum pa dang nam mkha' bzhin no/ /zhes bstan par bya ba yin no/ / de lta ma yin na ni mthun pa'i phyogs dang mi mthun pa'i phyogs dag la yod pa dang med pa ji skad bshad pa'i rnam pa dag gam/ de'i 'bras bu nyid du nges pa dang / rang gi ngo bo'i khyab pa bstan par mi nus so/ /don 'di bstan na yang dpe bstan pa nyid du 'gyur ba yin te/de'i tshul ni de tsam du zad pa'i phyir ro/ /'dis ni dpe'i nyes pa rnams kyang bsal ba yin te/ dper na sgra rtag ste/ lus can ma yin pa'i phyir las bzhin dang / rdul phra rab bzhin dang / bum pa bzhin no/ / zhes bya ba ni bsgrub par bya ba la sogs pas stong pa yin no/ /'dod chags la sogs pa dang ldan pa'i yin te/ smra ba'i phyir lam po che'i mi bzhin no/ /zhes bya ba la sogs pa ni the tshom za ba yin no/ /rjes su 'gro ba med pa dang / rjes su 'gro ba rab tu ma bstan pa ni dper na/gang smra ba de ni 'dod chags la sogs pa dang ldan pa ste/ 'dod pa'i mi bzhin no/ /zhes bya ba dang / sgra mi rtag ste byas pa'i phyir/ /bum pa bzhin no zhes bya ba lta bu'o/ /de bzhin du rjes su 'gro ba phyin ci log ni gang mi rtag pa de ni byas pa ste/bum pa bzhin no/ /zhes bya ba lta bu ste/ chos mthun pas yin no/ /chos mi mthun pas kyang rdul phra rab bzhin dang / las bzhin dang / nam mkha' bzhin no zhes bya ba ni bsgrub par bya ba la sogs pa ldog pa med pa'o//de bzhin du ldog pa la the tshom za ba dang / ldog pa rab tu ma bstan pa la sogs pa yang brjod par bya'o/ /'di dag gis ni gtan tshigs kyi spyi'i mtshan nyid dam/ bye brag gi mtshan nyid bstan par mi nus te/de'i phyir don gyi go bas 'di dag gsal bar rig par bya'o/ /gal te gtan tshigs kyi tshul la ma rig par rang rgyud nyid du dpe sgrub par byed pa'i yan lag yin na ni de'i tshe/ de'i tshul la ma reg na'ang / /ma 'brel phyir na don med 'gyur//gal te dpes gtan tshigs kyi mi 'khrul pa nyid ston pa ma yin na bsgrub bya grub pa la de nye bar mkho ba ci zhig yod de/ 'brel ba med pa'i phyir ro/ /gang gis na nye bar 'jal ba las sgrub byed du 'gyur ba don 'ga' zhig dang rnam pa 'gas 'dra ba tsam gyis ni/bdag nyid gzhan du nges pa ma yin no/ /'ga' zhig dang rnam pa 'gas mi mtshungs pa'i don ni med de/ des na de'i bdag nyid yin na thams cad kyi bdag nyid du 'gyur na de ltar ni mi rigs so/ /de'i phyir des khyab pa'i chos dang ldan pa nyid la dngos po dang /de dang ldan par 'gyur ba'i phyir/ 'di'i khyab pa des bstan par bya ba yin no/ /des na 'di rang rgyud pa ma yin no/ /de dang ma 'brel ba'i phyir/ don med pa ni de nyid kyis don yongs su rdzogs pa'i phyir ro//ma tshang sogs brjod sun 'byin yin/ /ma tshang nyid la sogs pa sgrub par byed pa'i nyes pa sngar bshad pa gang yin pa de dag brjod pa ni sun 'byin pa ste/ des pha rol po'i 'dod pa'i don grub pa'i gegs byed pa'i phyir ro/ /gal te skyon ma brjod kyang don nyid nus pa med pas 'grub par mi 'gyur ba ma yin nam zhe na/de ni de ltar yin mod kyi/ /'on kyang don rnams kyi grub pa dang ma grub pa bsgrub pa dang / sun 'byin pa dag gis byed pa ni ma yin te/ de dag ni thams cad du de'i rang bzhin nyid yin pa'i phyir ro//'o na ci zhe na/ skyes bu'i nus pa bsgrub pa yin no/ /de ni tshig med par mi 'grub pa'i phyir/ de lta bu nyid du gyur pa de rnam par 'jog pa na/ de'i byed pa por brjod do/ /gal te nyes pa brjod pa na yang ma tshang ba med pa la sogs pa'i tshig gis yang lan [(]bteb [,]btab[)] pa de ni 'dod pa'i gegs ma yin pas/sun 'byin par mi 'gyur ro zhe na/ ma yin te/ de ni sgrub par byed pa gzhan yin pa'i phyir ro/ /gal te ngag ma rdzogs pa nyid kyis phyogs snga ma smras pa ltos pa dang bcas pa yin na/sun 'byin pa'i skabs ma yin no/ /rdzogs pa na de la skyon rjod par byed pa ni sgrub par byed pa de sun 'byin par byed pa nyid do/ /der snang ba ni ltag chod do/ /sun 'byin par snang ba ni ltag chod do/ / log pa'i lan la mtha' med phyir/ /de dag 'dir ni spro bya min/ /lan log pa ni ltag chod yin la/ de dag ni mtha' med de/ tshul bzhin ma yin pa'i rnam par rtog pa rnams gnas pa med pa'i phyir ro/ /dper na bdag med do zhes bya ba ni/ dam bcas pa dang 'gal ba zhes bya ba dam bca' ba'i skyon yin te/don la skur pa 'debs pa na sgra sbyor mi srid pa'i phyir/ sbyor bas ni don nye bar 'jog pa yin la/ skur pa yang yin pa'i phyir dam bcas pa'i tshig dag 'gal bas/ dam bca' ba'i skyon yin no zhes brjod pa dang /dper na rtsol ba las byung ba'i sgra ni mi rtag ste/ rtsol ba las byung ba'i phyir/ zhes bya ba ni dam bca'i don gyi phyogs gcig yin te/ chos can gyi khyad par nyid du nye bar bkod pa'i phyir ro/ /zhes zer ba lta bu'o/ /de lta bu la la sogs pa rnams ni/ji skad brjod pa'i mtshan nyid kyi ltag chod kyi nang du 'du ba ma yin no/ /sun 'byin pa yang ma yin te/ sgra'i don la mi bsnyon par rang gi mtshan nyid 'gog pa'i phyir dang / bsgrub bya'i chos can las phyi rol du gyur pa yin pa'i phyir ro//zhes bshad zin to/ /gal te de dag kyang cha 'gas 'di dag nyid kyi nang du 'du'o zhe na/ 'di dag kyang phan tshun de ltar thal bar 'gyur ro/ /de'i phyir spyi'i mtshan nyid gcig nyid cung zad brjod par bya ba yin te/ khyad par yin na nang du mi 'du ba'i phyir ro//spyi'i mtshan nyid de ni sun 'byin par snang ba ni ltag chod do/ /zhes brjod zin pa nyid do/ /de ni sgrub pa dang sun 'byin pa'i mtshan nyid shes pa nyid las 'gyur te/ yul ma yin pa la mi 'jug pa'i phyir dang / rtogs pa'i gegs ma yin pa dang /gegs kyi mtshan nyid dang mi ldan pa'i phyir/ lan ltar snang ba bde blag tu shes so/ /rab tu dbye ba ni bstan par mi nus pa'i phyir ma bstan to/ /don yod lugs gzigs mdo don 'di rigs shes/ /lung yang dor nas ngas bshad nges par ni//rnam dag thugs de'i dgongs pa'ang 'di nyid de/ /mi gsal blo can skye bos rtogs ma yin/ /gzhan gyi don gyi rjes su dpag pa ste/ le'u gsum pa'o// //tshad ma rnam par nges pa zhes bya ba/ yul lho phyogs kyi rgyud du byung ba/gzhung lugs ngan pa thams cad ches shin tu 'khrul par 'jug pa/ snyan pa'i grags pas sa'i steng ma lus par khyab pa/ 'gran zla med pa'i mkhas pa chen po/ dpal chos kyi grags pas mdzad pa rdzogs so// // rgya gar gyi kha che'i paN+Di ta gzhan la phan pa bzang po la sogs pa dang / lo tsA ba blo ldan shes rab kyis/ kha che'i grong khyer dpe med du bsgyur ba'o/ /