CLOSE WINDOW

D4202
བོད་ཡིག

/[ ]#/ /li yul lung bstan pa bzhugs so// @##/ /li'i yul lung bstan pa/ dkon mchog gsum la phyag 'tshal lo/ /li yul byung nas li'i rgyal po rabs drug ni 'das/ rabs bdun gyi rgyal po bi dza ya kIrti zhes bya ba'i tshe na/sad ka ya pra ha Na ya'i gtsug lag khang dang nye ba'i lung pa sa ka ya byi ri zhes bya ba na/ sang g+ha bar+d+ha na zhes bya ba'i dgra bcom pa zhig bzhugs te/ /de'i slob ma ban de zhig 'dul ba la slob pa las ban des tsan+d+ra gar+b+ha dang / 'dul ba'i dar ma sangs rgyas kyi lung mthong nas dgra bcom pa la zhus pa/li yul dang / shu lig dang / an se 'di gsum na sangs rgyas mya ngan las 'das pa'i 'og tu dam pa'i chos kyi gzugs brnyan dang / mchod rten bzhugs pa rnams dus ji tsam zhig na nub/ sus ni bshig /mthar ji ltar 'chi ba bshad cing lung bstan par gsol pa las/dgra bcom pas bka' stsal pa/ 'di lta bu'i the tshom zhus pa ni dge'o/ /sangs rgyas shAkya thub pa mya ngan las 'das pa'i 'og tu chos kyi gzugs brnyan dang ring bsrel lo nyis stong du gnas nas nub par 'gyur ro/ /yul 'di gsum du rgya dang /gdong dmar dang / so byi dang / drug gu dang / hor la sogs pa dgra phal cher g.yos nas rtsod cing 'khrug par 'ong ste/ de bas na sangs rgyas kyis chos nyams shing mchod rten yang phal cher re'u rul du 'gyur ba bshig cing zhig ste/ dge 'dun gyi 'tsho ba'i yo byad kyang 'chad par 'ong ngo //yul 'di gsum la yang an se dang / shu lig ni chos mi byed pa'i dgra mang pos dkrugs te/ phal cher ni bsregs bshig ste stongs par 'gyur ro/ /gtsug lag khang 'di rnams kyi ban de yang phal cher li yul du 'ong ngo / /li yul gyi gtsug lag khang dang mchod rten la sogs pa na byang chub sems dpa' lnga brgya bzhugs te/nyis brgya lnga bcu ni rab tu byung ba'i tshul du bzhugs/ nyis brgya lnga bcu ni khyim pa'i nang du skye ba blangs te bzhugs/ 'ge'u to shan gyi gtsug lag khang mi bskal pa bzang po'i sangs rgyas stong rtsa lnga'i zhabs kyis bcags shing rgyun mi 'chad par gnas pa'i pho brang du 'gyur ro//'phags pa 'di rnams kyi che ba dang / thugs rje dang / byin gyi rlabs kyis li yul gyi mchod rten dang / dam pa'i chos spyod pa dang / yang yul gzhan las rgyas shing yun ring du gnas so//rgyal po phal po che li yul 'dod pa'i phyir rtsod cing 'thabs te/ gang gis thob pa'i rgyal po de yang li yul gyi yon bdag chen por 'gyur te/ mi bshig mi 'bri bar byed cing mchod par 'ong ngo / /de'i dus na gdong dmar gyi rgyal po zhes bya ba dbang thang dang mthu skyes nas yul khams gzhan mang du phrogs bzung ngo //de'i tshe na byang chub sems dpa' gcig gdong dmar gyi rgyal po'i skye ba blangs te/ bod khams su dam pa'i chos 'byung ngo / /yul khams gzhan nas kyang chos kyi mkhan po dang / gsung rab mdo sde la sogs pa spyan drangs so/ /gdong dmar gyi yul du gtsug lag khang dang /mchod rten mang du brtsigs/ dge 'dun sde gnyis btsugs/ rgyal po dang blon po la sogs pa dkor ril gyis dam pa'i chos la spyod/ rgyal po gdong dmar de'i tshe li yul yang rgyal po de'i rigs su dbang bar 'gyur ro/ /dam pa'i chos dang / mchod rten la sogs pa'i dkon mchog gsum gyi mnga' ris mi 'bri/rgyas par btsugs shing mchod do/ /rgyal po gdong dmar gyi rgyud rabs bdun du dam pa'i chos spyod par 'gyur ro/ /rgyal po 'di'i rabs bdun du yul khams gzhan na dkon mchog gsum gyi mchod rten bzhugs pa la ngan sems dang gnod pa mi byed do//de'i dus na li yul gyi dge 'dun yang tsan dra gar+b+ha'i lung bstan pa las 'byung ba bzhin du dad pa bri/ chos khrims dang mi ldan/ 'jig rten gyi khe dang grags pa tshol/ rgyal po dang blon po'i dku gtsang gi nang du 'jug cing dam pa'i chos dman par byed pa dag kyang mang du 'byung ste/de'i tshe zhang blon dang / zhang blon gyi bu tsha yang dad pa 'bri bar 'gyur ro/ /dkon mchog gsum gyi mnga' ris kyang ban des spyad pas li yul gyi mchod rten dang / dam pa'i chos la sogs pa dkon mchog gsum gyi mnga' ris kyang mngon pas 'brir 'ong ngo / /rgyal po dang /blon po yang ban de de la mi dga'o/ /de'i rjes la byang chub sems dpa' cig gdong dmar gyi rgyal po byas pa'i rgyud rabs bdun gyi tha ma la rgyal po de'i chung ma rgya yul nas rgya rje'i bu mo kong co byang chub sems dpa' yin pa zhig 'khor drug brgya dang gdong dmar gyi yul du 'ongs so/ / kong co de 'phags par chos la dad dbang thang che bas gdong dmar gyi rgyal po yang dad pa che ste/ sngon bas kyang dam pa'i chos rgyas par 'gyur ro/ /de'i dus na li yul gyi rgyal po gzhon zhing chos mi spyod pa zhig gis li yul gyi dge slong rnams la bsgo ba/ yang na ni skye bor bo pas shig / yang na ni gar dga' bar dengs shig ces bskrad nas dge 'dun ril gyis tsar ma zhes bya ba'i lha khang du 'dus nas gros byed pa'i tshe/ lha khang gi nang 'khor 'dus pa'i dkyil nas gser gyi zan dang gser gyi 'khur ba cha bdun byung nas dge slong lnga stong rgyal pos 'tsho ba bcad de/ mi 'byor ba'i zla ba gsum du 'tsho ba'i zong du 'gyur/de'i tshe de'i dus na la la ni skye por babs/ ma babs pa gung du 'gro ba rnams kyang pha ma dang / gnyen 'dun dang / yul sa dang 'bral ba mi dga' ste/ ngud mo chen po 'byung ngo / /dge 'dun phal mang po lam du zhugs te/ /song ba las 'bong zhes bya ba'i lha khang du phyin pa dang /de na mchod rten chen po zhig bzhugs pa rlung gi rgyal po dad pa can gyis dral te/ nang nas gser gyi phor pa mu tig gis bkang ba zhig byung nas dge 'dun spyi la phul lo/ /gzhan yon bdag dang pa can gyis 'tsho ba'i yo byad sna sna nas phul lo//de nas dge 'dun rnams mdo le me skar gyi yul du phyin te/ mu tig gis zla ba phyed kyi 'tsho ba'i yo byad sbyar ro/ /me skar nas song te/ rkong nya zhes bya ba'i lha khang na dge 'dun bzhugs pa'i tshe bai shra ma Na dang / dpal gyi lha mo mi khyo shug tu sprul nas yul de na 'dug ste/ dge 'dun thams cad la bdag cag bsod nams bgyid do zhes gsol nas/ /zla ba phyed kyi bar du dge 'dun la mchod ston gsol nas dpal gyi lha mos phu rung gang gi gser gyi dong rtse dge 'dun spyir phul te/ dge 'dun ril gyis gdong dmar gyi yul du kha bltas te song ba las/yul pha shan gyi rong du gcan pa dang phrad de ma bkye'o/ /lam gzhan yod na song zhig ces zer to/ /de'i tshe bai shra ma Na g.yag dkar po rgal ba can snal chu yod pa zhig tu sprul pa dge 'dun gyis mthong ste/ g.yag rgal can 'di ni mi'i phyugs yin pas 'di gar 'gro ba'i phyi bzhin du 'deng zhes zer ro//de'i tshe g.yag des nye lam du drangs te/ zhag bzhi lngas ban de ril gyis gdong dmar gyi yul tshal byi zhes bya bar phyin to/ /de'i tshe yul de'i dbang pos dge 'dun mang po zhig stod phyogs nas byon to zhes gdong dmar gyi rgyal po la sbran to//de'i tshe rgyal po'i btsun mos rgyal po la stong phyogs nas dge 'dun yul stor te 'khyams nas byon pa sun ma dang yo byad bdag sbyor na/ gdong dmar gyi yul du spyan drang bar ci gnang zhes gsol nas gnang ste/ dge 'dun rnams bzhon pa dang 'tsho bas bsu nas gdong dmar gyi yul du phyin to//de nas gdong dmar gyi rgyal po dang / kong co 'khor dang bcas pas mchod rten la phyag byas nas dge slong 'di'i nang na sde snod gsum la mkhas pa'i mkhan po rnams ma gtogs par gzhan 'di ltar mkhas pa bzhugs sam zhes dris pa dang / mkhan po na re an se dang / shu lig dang /bru sha dang / kha che zhes bya ba'i yul na 'di 'dra bar mkhas pa'i dge 'dun mang du yod do zhes smras pa dang / de'i mod la 'gugs pa'i pho nya btang ste/ dge 'dun ril gyis gdong dmar gyi yul du spyan drangs so/ /de'i tshe gdong dmar gyi yul du gtsug lag khang bdun brtsigs so/ / mchod pa'i yo byad dang / dkon mchog gsum gyi mnga' ris kyang sngon pas bskyed nas dge 'dun rnams kyang gtsug lag khang bdun gyi nang du so sor bzhugs so/ /de'i rjes la lo gsum mam bzhi na kong co'i snying gar 'brum chen byung nas na ba'i tshe kong cos rgyal po la gsol pa/ bdag ni nad 'di las mi 'tsho ste/nga 'gum na bdag gi bran dang / nor phyugs rnams dkon mchog gsum la ma gum par 'bul lo zhes gsol te phul lo/ /'khor drug brgya yang dge bsnyen gyi mtshan mas btab ste rab tu phyung ngo / /de'i rjes la kong co 'das so/ /kong co 'das pa'i 'og tu rgyal po gdong dmar gyi khams su 'brum nad 'byung ste blon po dang /zhang blon gyi bu tsha la sogs pa mang du 'chi'o/ /de'i tshe blon po rnams 'dus te rgyal po la gsol pa/ sngon rgyal khams 'di na 'di 'dra ba'i 'brum nad ma byung na/ nga ltar lho bal gyi dge slong 'khyams pa mang po 'ongs nas kong co yang 'das/blon po dang zhang blon las kyang mang du gum pas ban de 'di kun yang rgyal khams su mi gzhag par bskrad pa'i rigs zhes gsol ba las rgyal pos 'di bskrad pa'i rigs sam mi rigs da dung zhib tu dpyod cig ces bsgo ba las blon po rnams ban de bskrad par kha 'dus nas rgyal po la gsol te/rgyal khams su ban de ril gyis mi gnas par gros chad nas kun bskrad pa las gdong dmar gyi dge slong khros te/ dge slong 'di rnams bskrad nas bdag cag kyang 'di na mi 'dug go zhes byas pa dang / blon po rnams khros nas khyed rnams kyang gang dga' bar dengs shig ces bsgo'o//kong co gdong dmar gyi yul du 'ongs pa'i 'og tu rgyal pos te'u shi'i chos bzung nas rgya'i dge slong yang ril gyis gdong dmar gyi yul du 'ongs so/ /de'i dus na rgyal khams de'i dge slong gis gdong dmar gyi khams kyi ring bsrel dang /gsung rab dang / mchod pa'i yo byad dkon mchog gi mnga' ris gcig kyang ma lus par bkal nas nub phyogs su kha bltas te/ gan d+ha ra chen po'i yul du 'gro bar chas te song ngo / /de'i tshe rgya dang / gdong dmar dang / rgya gar dang / li la sogs pa gang+gA tshun chad na dam pa'i chos spyod pa yang nub par 'gyur ro//gang+gA'i pha rol na kau shAm+bI'i yul du ni zla ba gsum zhig gnas te nub bo/ /gan d+ha ra'i yul gyi 'dab na klu'i rgyal po e la pa tra'i gnas mtsho'i 'gram du dge 'dun rnams phyin pa dang / dkon mchog gsum gyi byin gyi rlabs kyis mtsho yang rnyogs shing 'khrugs par gyur nas/klu'i rgyal pos nga'i gnas ci ste rnyogs shing 'khrugs snyam ste/ 'phrul gyi mig gis bltas nas sangs rgyas shAkya thub pa'i gsung rab dang / dam pa'i chos nub tu nye ste/ dge 'dun phal mo che mthong ba'i dus 'di yin par shes nas rgan po zhig tu sprul nas/mtsho'i 'gram du byung nas dge 'dun la phyag byas te dris pa/ dge 'dun 'di snyed cig ga la byon/ gar gshegs/ dge 'dun gyis smras pa/ bdag cag rgyal po gdong dmar gyi yul na gnas pa las yon bdag dad pa bri/ dkon mchog gi rten bshig pas bdag cag gan d+ha ra chen po'i yul du 'gro'o zhes smras pa dang /rgan pa na re dge 'dun 'di snyed cig la 'tsho ba ci mnga'/ gan d+ha ra chen po'i yul du mtsho chen po 'di bskor nas 'gro na zhag bzhi bcu'i lam yod do/ /dge 'dun la zhag nyi shu'i 'tsho ba las med na phyin tam zhes smras pa dang /dge 'dun phal cher smre zhing ngu ba klu'i rgyal pos mthong ste/ klu'i rgyal po mi dga' nas gdung ba skyes te dge 'dun la smras pa/ thad ka 'di na nye lam sbrul kyi zam pa zhig yod de/ de'i steng du 'gro nus na myur du phyin zhes smras nas rgan po mi snang bar gyur to/ /de nas klu'i rgyal po des ri gar 'dzeg pa'i lam zhig snang bar byas/bdag dngos sbrul chen po zhig tu sprul te/ mtsho'i steng du zam par bcas nas dge 'dun phal cher bsgral nas sngon sdig pa byas pa'i las kyis da ltar byol song gi lus thob pa 'di yang thar ram snyam bsams te/ smon lam btab nas sbrul gyi zam pa btsugs so//de'i tshe nyin zhag bco lnga mi phyugs rnams rgal ba las mi phyugs kha cig ni sbrul gyi zam pa las lhung ste shi'o/ /mi phyugs mang po rgyu ba'i tshe sbrul gyi rgyab kyang la lar ni rdol/ la lar ni ral te rnag khrag gi thigs pa char bzhin du zags pas mtsho yang khrag can du byas so/ / dge 'dun mang po sbrul gyi zam pa rgal ba'i mjug kyang gdong dmar gyis bcad do/ /de'i rjes la sbrul mtshor lhung ste/ tshe 'das nas dga' ldan gyi gnas su skyes so/ /mtsho yang bskams so/ /de'i dus na dge 'dun rnams gan d+ha ra'i rgyal po'i yul du lo gnyis kyi bar du 'tsho ba'i yo byad sbyar/so sor ci bder gzhag go/ /lo gnyis lon pa dang rgyal po de tshe 'das so/ /rgyal po la bu gnyis yod pa gcig ni lha chos la dad/ gcig ni mu stegs kyi chos spyod pas rgyal thabs la rtsod par gyur nas lha chos spyod pa'i non ban des byas te/ de rgyal nas rgyal thabs kyang des gzung ngo //rgyal po de'i tshe dge 'dun yang sngar bas dbang thang bskyed de/ yo byad dang bde bar ldan par gyur nas lo phyed lon pa dang / ban de gcig gis rgyal po bsad nas rgyal srid ban des gzung bas gan d+ha ra'i rgyal 'bangs ril log ste/ ban de rgyal po byed pa de bsad do/ /ban de gzhan rnams kyang rgyal khams de na mi gnas par ril gyis bskrad nas gan d+ha ra'i yul du yang chos nub po//de nas dge 'dun rnams kyang yul khams gzhan du 'khyams shing 'dong ngo / /de'i tshe de'i dus na nub phyogs kyi rgyal po dang / byang phyogs kyi rgyal po yan pa la sogs pa sngar bas dbang thang bskyed de/rgyal po gsum mjal dum byas nas rgyal po 'di gsum gyis nub phyogs dang / byang phyogs kyi yul yang bzung / rgyal po de gsum gcig cing yang dmag 'bum dang chas te/ kau shAm+bI'i yul du drangs pas kau shAm+bI'i rgyal pos dam gsum 'bum rgyal po dang bcas te gcig kyang ma las par byas so//de nas kau shAm+b+hi'i rgyal pos dmag mang po bsad pa'i sdig sbyang ba'i phyir 'dzam bu'i gling gi dge slong ril spyan drangs nas kau shAm+bI'i yul du phyin pa'i rjes/ dge 'dun 'khrugs nas gcig gis gcig bsad de/ 'dzam bu'i gling gi spyi'i lha chos kun der nub po/sangs rgyas shAkya thub pa mya ngan las 'das nas lo bye ba phrag lnga bcu rtsa bdun dang / sa ya phrag drug na sangs rgyas byams pa mi mjed kyi 'jig rten du sems can gyi don la gshegs so/ /tsan dra gar b+ha'i lung bstan pa dang mthun no/ /'phags pa'i mchod rten go ma sa la gan d+ha dang /glang mgo ri'i steng na sangs rgyas shAkya thub pa'i sku gzugs chen po bzhugs pa'i yon tan mdo tsam btus pa'i gzhung la sangs rgyas shAkya thub pa bsod nams dang ye shes kyi tshogs rdzogs nas 'gro ba mang po'i don du bla na med pa'i sangs rgyas te bzhugs pa'i pho brang spyir nyi shu rtsa gcig bzhugs pa la/li yul 'di yang de bzhin gshegs pa'i pho brang nyi shu rtsa gcig pa lags te/ bzhugs pa'i pho brang gzhan pas yon tan lhag par che/ li yul ni gna' mtshor mchis pa'i dus na sangs rgyas shAkya thub pas yul du 'gyur bar lung bstan cing byin gyis brlab pa'i slad du byang chub sems dpa' dang /nyan thos dang / lha klu sde brgyad la sogs te 'khor khri phrag nyi shu dang / bya rgod phung po'i ri la bar snang las ldings te/ li yul mtshor gyur par gshegs nas da ltar chu bo shel chab mgo ma'i 'gram na chab kyi steng pad+ma'i gdan la bzhugs te/mtsho 'di yul du 'gyur bar lung bstan byin gyis brlabs te/ byang chub sems dpa' sems dpa' chen po brgyad 'khor nyi khri dang / mgon po srung ma brgyad 'khor sum khri lnga stong lnga brgya rtsa bdun rnams la 'phags pa'i mchod gnas 'di dang /yul srung bar bka' zhal gyis gtad de/ dam stsal ba'i rjes la/ shA ri'i bu dang / rnam thos kyi bus snag gi ri dril te chab pho nas dogs dga' pa dang / sangs rgyas sngar pad+ma'i gdan la bzhugs te/ ri glang ru'i steng da ltar shAkya thub pa'i sku gzugs chen po bzhugs pa'i sar gdugs mtshan bdun gyi bar du ting nge 'dzin gyis rnam par rol cing bzhugs nas slar rgya gar gyi yul yangs pa'i grong khyer du gshegs te/mya ngan las 'das nas dgung lo brgya lon pa dang / li yul yang yul du gyur nas sngar yang sangs rgyas rgya mtsho'i steng na pad+mo la bzhugs pa'i thad kar da ltar go mas la gan d+ha'i mchod rten bzhugs pa'i nang na shel ljang gu'i pho brang gi steng glang mgo tsan+dan las bgyis pa'i mchod rten gyi nang na gnas pa'i sangs rgyas rabs bzhi'i ring bsrel bzhugs te/la la gnas der phyin te mchod pa gces spras kyi mchod do cog thams cad lung bstan cing phyir mi ldog par rig par bya ste/gdugs tshan bdun gyi bar du bskor cing mchod pa bgyis na mtshams med pa lnga'i sdig pa 'byang bar 'gyur ro zhes 'byung ngo / /dngar ldan gyi grong khyer mkhar dge ba can gyi shar phyogs na 'phags pa'i mchod gnas sangs rgyas kyis lung bstan zhing byin gyis brlabs pa'i ad+ha ma'i mchod rten lcags thag can bzhugs pa yang mgon po sum cu rtsa gsum gyi gnas rten/lha klu sde brgyad la sogs te srung ma rnams dus bzhi'i rab la 'du ba'i 'dus pa chen po ste/dge 'dun sde gnyis dang / yul gyi dpon sna rnams kyis gna' mchod rten 'di srid pa tshun chad deng sang gi bar du dus bzhi'i rab la nar mar mchod pa che thang du bgyid/ gzhung las kyang li yul du mi ngas dang phyi dgra la sogs te ma legs pa byung ba'i dus su theg pa chen po'i mdo sde 'dus pa chen po dang /dam pa'i chos pad+ma dkar po'i mdo sde bklags na g.yul zhi bar 'gyur zhes 'byung bas gzhung la brten te lugs su stsal nas deng sang gi bar du dgung lo gcig bzhin dpyid dang / dbyar dang / ston 'u then gyi dge 'dun bzhugs so/ /'tshal gyi dgung bdun gyi bar gong du smos pa'i mdo sde la sogs pa klog cing thugs dam bskul ba dang /bsngo bcol rgya cher bgyid/ mchod rten chen po brgyad la yul ser skya'i grong khyer lum pa'i tshal du mchod rten chen po gcig /yul ma ga d+hA rgyal po'i khab chu bo nai ra ny+dza na'i 'gram rdo rje'i gdan la mngon par byang chub pa'i sar mchod rten chen po gcig yul ma ga d+d+hAr rgyal po'i khab tu bdud kyi dmag 'bum phrag bco brgyad btul ba'i sar mchod rten chen po gcig sangs rgyas mngon par byang chub nas gdugs tshan bdun gyi bar du cang mi gsung bar bzhugs pa dang /tshangs pas chos kyi 'khor lo bskor bar gsol ba btab pa'i sar mchod rten chen po gcig /yul kA shi bA rA Na sI'i grong khyer gyi drung na ri dgas kyi tshal du chos kyi 'khor lo bskor ba'i sar mchod rten chen po gcig /yul ko sa la mnyam du yod pa'i grong khyer du mar bdud sde dgu bcu rtsa drug pham par mdzad nas cho 'phrul chen po bstan pa'i sar mchod rten chen po gcig /yul ba sang sang ga sha'i grong khyer du sangs rgyas sum cu rtsa gsum gyi lha yul nas gshegs pa'i sar mchod rten chen po gcig /gyad yul rtsa mchog gi grong khyer shing sA la zung gi 'og tu mya ngan las 'das pa'i sar mchod rten chen po gcig /ring bsrel gyi mchod rten chen po brgyad la ra ma gra ma ka'i yul du mchod rten chen po gcig /pa pa'i yul du ring bsrel gyi mchod rten chen po gcig /gyad yul na ring bsrel gyi mchod rten chen po gcig /yangs pa'i yul na ring bsrel gyi mchod rten chen po gcig /tsany+tsA kalpa'i yul na ring bsrel gyi mchod rten chen po gcig /baiSh+NU dwI pa'i yul na ring bsrel gyi mchod rten chen po gcig /ser skya'i yul na ring bsrel gyi mchod rten chen po gcig /rgyal po'i khab na ring bsrel gyi mchod rten chen po gcig /li yul gyi lo rgyus dang / gtsug lag khang dang / dge 'dun sde gnyis kyi grangs ni gna' thog ma sangs rgyas 'od srungs 'jig rten du byung ba'i tshe li yul yang de tsam na yul du gyur te/ de na gnas pa'i mi rnams kyang chos bgyid/ slad kyi sangs rgyas 'od srungs kyi chos bstan pa gzhag pa nub pa'i tshe/li yul gyi chos kyang zhig nas drang srong khar shwa dang / kha re'u steng zhes bgyi ba la sogs pa drang srong mang po'i yul mi ring ba zhig tu li yul phyogs kyi ri rtsa dag na gnas te/ des na dge ba'i bshes gnyen bgyid bgyid pa las slad kyi drang srong de rnams la mi ngan kha cig gis gtses nas rngan can bgyis/bkur sti dang rim gro ma bgyis pas drang srong de rnams kyang mi dga' nas li yul spangs te/ nam mkha' la ldings nas yul gzhan du mchis/ de nas ni li yul gyi mi rnams kyang chos la ma dad de lta ba log par gyur te/ klu rnams mi dga' ste chab byung nas li yul yang mtshor gyur to//yun ring mo zhig tu mtshor mchis mchis pa las slad kyi yang sangs rgyas shAkya thub pa rgya gar yul du byung ste/ sems can gyi don mdzad cing chos kyi 'khor lo bskor ba la sogs pa sangs rgyas kyi phrin las su mdzad pa rnams mdzad nas mya ngan las 'da' bar bstan pa nye ba zhig gi dus na/sangs rgyas bcom ldan 'das shAkya thub pa rgyal po'i khab bya rgod phung po'i ri la bzhugs te zla ba'i snying po gsungs pa'i tshe yul khams so so'i mgon po dang / lha klu la sogs pa srung ma rnams la gtad pa'i dus na li yul yang lung bstan te/rnam thos kyi sras dang / gnod sbyin gyi sde dpon chen po la sogs yang dag shes dang / rgyal po ma skyes dgra'i bu mo dri ma med pa'i 'od dang / gzhon nu rdo rje sde dang / lha'i bu mo blo rab brtan dang / lha mo 'phrog ma la sogs pa 'khor dang bcas pa la gtad nas bcom ldan 'das nyid kyang 'khor rnam bzhi 'bum phrag du ma dang nam mkha' la ldings nas li yul du gshegs te/da ltar 'gum tir gyi mchod rten chen po bzhugs pa'i thad kar mtsho'i steng du ta la bdun srid tsam gyi gnam 'phang gi nam mkha' la pad+ma'i gdan la bzhugs nas phyogs bcu'i sangs rgyas kyi zhing so so nas de bzhin gshegs pa rnams kyis li yul byin gyis brlab pa'i slad du bskul ba'i 'od zer phyogs su khyab par btang /phyogs bcu na bzhugs pa'i de bzhin gshegs pa thams cad kyis kyang li yul byin gyis brlab pa'i slad du sangs rgyas kyi zhing so so nas sangs rgyas shAkya thub pa la mchod pa bgyid pa'i byang chub sems dpa'i 'khor dang yul 'khor bsrung zhing byin gyis brlab pa'i sngags kyi snying po dang /'od zer btang nas dus gcig tu sangs rgyas shAkya thub pa'i spyi gtsug tu 'dus par byin gyis brlabs nas dge'o zhes bya ba'i sgra chen po byung ngo //de nas bcom ldan 'das shAkya thub pas kyang li yul mtshor gyur pa 'od zer gyis khyab par mdzad nas 'od zer de dag las chu'i khar pad+ma sum brgya drug cu rtsa gsum byung / pad+ma re re'i khar yang me mar kha re re byung de nas 'od zer de dag gcig tu 'dus nas chab kyi steng du g.yas phyogs su lan gsum bskor nas chu'i dkyil du nub par 'gyur ro//de nas bcom ldan 'das kyis 'phags pa shA ri'i bu dang / rnam thos kyi sras la bka' stsal pa/ khyed kyis maM sa bar na barba ta zhes bya ba'i ri snag gi kha dog 'dra ba'i mtsho 'di drol zhig ces bka' stsal nas/'phags pa shA ri'i bu'i gseg shang gi rtsa ba dang / rnam thos sras kyi mdung rtses mtsho dral nas/ bcom ldan 'das kyang glang mgo'i ri steng na sku gzugs chen po bzhugs pa'i g.yon logs kyi lha khang gi nang na da ltar mchod rten chung ngu zhig bzhugs pa'i sar sems can gyi don mdzad pa'i slad du dgung bdun de na bzhugs so//de nas 'phags pa kun dga' bos bcom ldan 'das la zhus pa/ bcom ldan 'das ci'i rgyu/ ci'i rkyen gyis 'od zer dang / pad+mo dang / me mar 'di dag snang bar 'gyur/ci'i rgyu ci'i rkyen gyis 'od zer 'di rnams gcig tu 'dus nas g.yas logs su lan gsum bskor te chab kyi dkyil du nub/ de nas bcom ldan 'das kyis kun dga' bo la bka' stsal pa/ shA ri'i bus gseg shang gi rtsa ba dang / rnam thos sras kyi mdung rtses mtsho dral bas phyis 'tsho bskams nas nga mya ngan las 'das pa'i 'og tu yul li yul zhes bya ba 'di 'byung ste/'od zer lan gsum 'khor ba'i sar ni kho ra khor yug tu phyis 'u then gyis mkhar lnga ldan gyi grong khyer chen po brtsig par 'gyur ro/ /chu'i dkyil du 'od zer nub pa'i sar ni yul byin gyis rlob cing srung ba'i rA dza gra ma'i sangs rgyas kyi sku gzugs ngas tsan+dan gyi nang du sku'i grib ma nub par byin gyis brlabs te byas pa zhig rgya gar yul nas nam mkha' las gshegs te bzhugs par 'gyur ro//chu'i nang na pad+mo dang me mar byung ba'i sar ni phyis theg pa chen po spyod pa'i dge slong pho mo gnas pa'i gtsug lag khang chen po sum brgya drug cu rtsa gsum rgyal po la sogs pa yon bdag dad pa can rnams kyis brtsigs nas de bzhin gshegs pa'i sku gdung la mchod pa byed pa'i byang chub sems dpa' dge slong pho mo'i tshul du gnas pa nyis brgya lnga bcu dang khyim pa skye bo'i tshul du gnas pa nyis brgya lnga bcu ste lnga brgya rtag tu gnas so//gzhan yang phyir mi ldog pa'i sa la gnas pa'i byang chub sems dpa' theg pa chen po'i chos la rgyas par spyod pa phal cher gnas te/ 'di ni dus gsum du gshegs pa'i sangs rgyas kyi zhing khud pa yin no zhes byang chub sems dpa' 'jam dpal dang /spyan ras gzigs kyi dbang phyug la sogs pa byang chub sems dpa' brgyad dang / rnam thos kyi sras dang / gnod sbyin gyi sde dpon chen po yang dag shes dang / rigs kyi bu mo dri ma med pa'i 'od dang / gzhon nu rdo rje lcam dral dang /lha klu la sogs pa la dus thams cad du srungs shig par de bzhin gshegs pas gtad do/ /de nas bcom ldan 'das la byang chub sems dpa' 'jam dpal dang / byams pa dang / spyan ras gzigs kyi dbang phyug dang / nam mkha'i snying po dang / sa'i snying po dang / kun du bzang po dang / mthu chen dang / sman gyi rgyal po byang chub sems dpa' dang / rnam thos kyi sras 'khor gnod sbyin sum stong dang / gnod sbyin gyi sde dpon yang dag shes 'khor khri phrag bcu dang / lha gzhan gyis mi thub pa'i 'khor stong dang / nam mkha'i spyan 'khor brgyad stong dang /lha'i bu gser phreng 'khor lnga brgya dang / klu'i rgyal po gnas dros po 'khor stong dang / lha mo lcags kyu can 'khor stong phrag bcu dang / lha mo gnas ldan ma 'khor lnga stong dang / rigs kyi bu mo dri ma med pa'i 'od dang / gzhon nu rdo rje sde dang / lha'i bu blo rab brtan dang / lha mo 'phrog ma 'khor dang bcas pa la sogs pas bcom ldan 'das kyi spyan sngar dam tshig bcas nas li yul bsrung bar zhal gyis bzhes te/deng sang gi bar du yang 'phags pa byang chub sems dpa' 'di brgyad dang / rnam thos kyi sras la sogs pa'i mgon po dang / lha dang / klu dang / lha mo rnams thog ma sangs rgyas gau to shan du gshegs te 'khor mang pos bskor nas bzhugs pa'i tshe byang chub sems dpa' 'di rnams dang /mgon po dang lha klu rnams ga la bzhugs bzhugs pa'i gnas dang / dam tshig blangs pa'i sar da dung yang yul srung zhing byin gyis rlob/ mngon rtags dang mtshan ma dag kyang / 'byung / de nas sangs rgyas mya ngan las 'das nas dgung lo nyis brgya sum cu rtsa bzhi lon pa'i 'og tu rgya gar gyi rgyal po d+harma a sho ka zhes bgyi ba zhig gis sngon sems can mang po zhig bkum pa las slad kyi 'phags pa dgra bcom pa ya sho zhes bgyi ba zhig gis dge ba'i bshes gnyen bgyis nas/sngar sdig pa mi dge ba'i las ci bgyis pa mthol zhing bshags/ slad kyis mi bgyi bar yang yi dam bcas/ 'dzam bu'i gling na sangs rgyas shAkya thub pas byin gyis brlabs pa'i gtsug lag khang dang / mchod rten bzhugs pa rnams su mchod pa bgyid cing / dogs byin can gnyen po byin gyis brlabs pa mchis so 'tshal du gtsug lag khang dang /mchod rten brgyad khri bzhi stong brtsig tu mchis pa las mtsho bskams nas li yul yang stong du mchis pa'i tshe/ da ltar 'u then gyi sku mkhar mchis pa'i dog sar kus po yen du shul phyung nas dro dgongs shig btab pa'i nub mo rgyal po'i btsun mo dam pa las khye'u mtshan dang ldan pa bzang po zhig btsas nas/sngon rgyal po'i btsun mos de kun dga' ra ba'i skyed mos tshal du mchis pa las/ rdzing bu'i nang du khrus bgyid cing mchis pa'i dus na rnam thos sras 'khor dang bcas pa nam mkha' la gshegs pas kyang gzigs/rgyal po'i btsun mos kyang rnam thos sras kyi sras byad bzhin bzang po mthong bas sems kyi bur chags pas kus po yin du btsas nas/ rgyal po d+harma a sho kas ltas mkhan rnams bkug ste/ bu 'di'i tshe ring ngam thung / mtshan ma bzang ngan dang / dbang thang ci yod ces brtags na/ltas mkhan rnams kyi mchid nas bu 'di mtshan ma yang bzang / dbang thang yang rab tu che ste/ mi tha mal pa ma lags pas rgyal po yab sku tshe ma 'phos par rgyal po bgyid par 'gyur zhes bgyis pa dang / rgyal po d+harma a sho ka phrag dog skyes te khros nas/ kho de ltar dbang thang che na kho bdag 'tsho zhing srid 'dzin grang /'di nga la mi dgos kyis bor cig ces mchis nas/ mas kyang bu 'di mi bor du ni rgyal po khro zhing drag shul che bas bu bkum du dogs nas mas bu de bor ba las slad kyis sa las nu ma byung nas de 'tshal ba las ma gum nas ming yang phyis sa nur btags so/ /de'i rjes la rgya rje byang chub sems dpa' chen po bu stong dbang ba cig byung ste/de la bu dgu brgya dgu bcu rtsa dgu ni mchis na/ stong du bu gcig gis ma tshang bas rnam thos kyi sras la gsol ba btab ste bslangs pa las rnam thos kyi sras kyis bltas pa na khye'u sa nu bsod nams can por ba mthong nas blangs te rgya rje'i bu skal du stsal/de nas rgya rjes bu de gsos nas slad kyi khye'u chen por skyes nas rgya'i bu spun dang byis pa rtse rtse ba las 'thabs nas khyod rgya rje'i bu ma yin no zhes bgyis pa dang / khye'u de glo ba mi dga' nas mi gzhan dag la yang lo rgyus smras na yang de ltar gyur nas rgya rje la bdag thog ma skyes pa'i yul tshol/sa tshol du mchi bar ci gnang zhes gsol ba las/ rgya rje'i zhal nas khyod nga'i bu yin te/ yul sa yang 'di yin mi dga' ma byed cig ces lan du ma bsgo ba las ma nyan nas rgya rjes rgyal bu sa nu rgyal po'i thabs stsal te/ dmag stong phrag bcu dang bsgrags te nub phyogs su yul tshol/sa tshol du btang ba las li yul gyi me skar du phyin te/ de nas mchis pa la rgya gar yul nas kyang rgyal po d+harma a sho ka'i blon po ya sha zhes bgyi pa la dku dar nas/ blon po ya sha spad spun rje khol 'khor yan chad rgyal po la mi dga' ba bdun stong yul nas byung ste/ nub phyogs shar phyogs su yul tshol sa tshol du mchis mchis pa las/'u then gyi shel chab gong ma'i yul phyogs su mchis pa dang rgyal bu sa nu'i 'khor gyi tshong pa shel bgyi ba dang / zong bgyi ba gnyis la ba sbrum ma thun mong ba cig mchis pa las/ /ba bu nad langs nas me skar nas zhugs ngams thang kar brtol te to lar bros pa las/mi de gnyis kyis rjes bzhin du bdas pa las to lar slebs te/ ba be'u 'brangs pa las yul de'i ming yang be'u 'brangs pa'i sa 'bru so lo nya zhes btags/ to la'i zhugs ngams kyi ming yang li skad du sher bzang zhes btags te de nas mi gnyis kyis bltas nas/ yul ljongs stong pa bzang po zhig gda' nas 'di bdag cag gi rgyal bu sa nu'i yul sar rung ngo zhes mchid gros su 'tshal nas yul sa de lta zhig mchis mchis pa dang /'u then gyi shel chab gong mar mchis pa dang / blon po ya sha'i 'khor dang mjal nas khyed su'i mi/ ga las mchis zhes smras pa dang / mi de gnyis kyis kyang rgyal bu sa nu'i lo rgyus zhib tu bshad pa dang /ya shas kyang rgyal bu sa nu me skar na mchis pa'i steng du pho nyas 'phrin pa las khyod ni rgyal rigs/ bdag ni blon po'i rigs na/ chu srid cig tu 'tham ste/ khyod kyis ni rgyal po byas/ bdag gis blon po byas te'u then gyi ljongs 'dir yul sar btsugs na rung ngo zhes mchi na/de nas rgyal bu sa nu yang 'khor dang bcas te 'u then gyi shel chu gong mar mchis nas tshar 'di nya'i 'og yul hang gu dzo zhes bgyi bar mjal te/ rgyal bu dang blon po ya sha gnyis yul sa la ma dum ste/ dmag bkye ste 'thabs pa las nam mkha' las rnam thos kyi sras dang /dpal gyi lha mo byung nas bshug te/ 'thab tu ma stsal nas/ dog sa de nyid du rnam thos kyi sras dang / dpal gyi lha mo bzhugs pa'i steng khang re re zhig brtsigs pa yang deng sang gi bar du mchis te/ yul gyi srung mar gtso bo rnam thos kyi sras dang / dpal gyi lha mo mchod pa yang de lags/ de nas rgyal bu sa nu dang / blon po ya sha yang dum nas sa nus ni rgyal po bgyis/ ya shas ni blon po bgyis nas rgyal po sa nu'i 'khor rgya rnams ni'u than gyi shel chu 'og ma man chad mdo lo skor dang / skam sheng yan chad du bkod/ blon po ya sha'i 'khor rgya gar rnams ni shel chu gong ma yan chad rgya dang /kong sheng man chad du bkod/ shel chu dbus ni rgya gar dang / rgya'i blon po dang / 'bangs stod rims 'dres par bkod nas yul btsugs mkhar brtsigs te/ rgya gar dang rgya phrad pa'i yul ni li lags te/ 'phral skad ni rgya gar dang rgyar mi mthun pa/yi ge ni rgya gar dang bags kyis mthun/ 'jig rten pa'i lugs ni rgya dang phal cher mthun/ chos kyi lugs dang chos skad ni rgya gar dang phal cher mthun/ li'i 'phral skad ni thog ma byang chub sems dpa' 'jam dpal nyan thos kyi dge slong gi tshul du sprul te/ mtshan bai ro tsa na zhes bgyi bas byis pa phyugs rdzi khye'u 'jos dang / mu le 'ji zhes bgyi ba gnyis la sogs pa la yul tsar ma zhes bgyi bar li skad phyung ste/ kun la bslabs nas/ khye'u de gnyis kyang gar mchis pa'i cha su la yang ma mchis te/ 'di skad kyang thog ma 'phags pa rnams kyis bstan zhing bslabs pa las/thog ma li yul byung nas dgung lo du lon pa ni gau to shan gyi mkhan po mo rgu de shing la sogs pa mkhan po bgres rims rnams kyis mkhan po snga rabs rnams la bka' mchid thos pa dang / 'phags pa rnams kyis lung bstan pa dang / li rje'i rgyal rabs kyi yi ge dang zhib tu gtugs nas/gna' thog ma rgya gar yul du rgyal po ma skyes dgras rgyal po bgyis pa nas brtsis na rgyal po ma skyes dgras spyir dgung lo sum cu rtsa gnyis rgyal po bgyis pa las/ rgyal srid bzung ste dgung lo lnga lags pa las sangs rgyas mya ngan las 'das/de tshun chad dgung lo nyi shu rtsa bdun rgyal po bgyis te/ rgyal po ma skyes dgra nas rgyal po d+harma a sho ka'i bar du rgya gar gyi rgyal po rabs bcus rgyal srid bzung ste/ d+harma a sho kas spyir rgyal po dgung lo lnga bcu rtsa lnga bgyis pa las rgyal por zhugs nas dgung lo sum cu lags pa'i 'og tu rgyal bu sa nu btsas te/sa nu dgung lo bcu gnyis lon pa'i tshe rgyal rje rgyal thabs btsal nas/ thog ma skyes pa'i yul tshol sa tshol du mchis pa las rgyal po sa nu dgung lo bcu dgu lon pa'i tshe li yul btsugs te/ thog ma li rjer zhugs pa yan chad zhib tu brtsis nas sangs rgyas mya ngan las 'das nas dgung lo nyis brgya sum cu rtsa bzhi lags nas li yul yang gdod byung bar 'gyur/rgyal bu sa nu thog mar li rjer zhugs nas rgyal srid bzung tshun chad dang / li rje btsan bzang btsan la brtan thog mar li rjer bskos nas li rje'i rabs lnga bcu rtsa drug dang /chag tshab cig byung ngo / /gna' dang po mtsho bskams nas rgyal bu sa nu dang / blon po ya sha la sogs pas thog mar gzhi bzung ste yul btsugs/ rgyal bu sa nu'i bu rgyal po ye'u la zhes bgyi bas 'u then gyi dngar ldan gyi grong khyer brtsigs te/li yul byung nas dgung lo brgya drug cu rtsa lnga 'das pa'i 'og tu rgyal bu ye'u la'i bu rgyal po bi dza ya saM b+ha ba zhes bgyi bas rgyal por zhugs nas dgung lo lnga lags nas li yul du thog mar chos byung ste/ 'jam dpal dang byams pa gnyis kyis li yul 'di dus gsum gyi sangs rgyas kyi khud pa lags par thugs su chud nas byams pa ni mir skye ba blangs te/rgyal po bi dza ya saM b+ha ba zhes bya ba sprul/ 'jam dpal ni dge slong 'phags pa bai ro tsa na'i gzugs su sprul nas las dang nyon mongs pa mthar phyin pa'i gnas yul tsar ma tsu le'i tshal du gshegs te/li yul na mchis pa'i sems can rnams kyi dge ba'i bshes gnyen mdzad cing li skad kyang byis pa phyugs rdzi rnams la bcos shing bstan/ li'i yi ge yang bslabs nas de'i 'og tu chos byung ngo / /de nas rgyal po ye'u la'i rgyal po bi dza ya saM b+ha bas yon bdag bgyis nas dge ba'i bshes gnyen 'phags pa bai ro tsa na'i slad du thog mar li yul du tsar ma'i gtsug lag khang chen po brtsig par bgyid pa las li rje bi dza ya saM b+ha ba'i blon po dang /'bangs 'khor dang bcas pa kun gyis kyang tsar mar gtsug lag khang re re brtsig par gsol nas brtsigs pa mang po zhig byung ba las rgyal pos bsams pa/gtsug lag khang brtsig tu ma stsal na ni bdag la dngos sdig tu 'gyur/ /de snyed cig brtsigs na ni slad kyis zhig ral du gyur na yang mi slongs su glo ba chung nas dge ba'i bshes gnyen 'phags pa bai ro tsa na la zhus pa na/de bzhin gshegs pa'i sku gdung shA ri ram su la bzhugs pa rnams kyi gtsug lag khang dang / mchod rten rtsig shig ces bsgo na/ sdig tu mi 'gyur ro zhes byung nas/ rgyal pos kyang blon po dang 'bangs rnams la de bzhin du bsgo nas tsar mi'i gtsug lag khang chen po rgyal po bi dza ya saM b+ha bas brtsig pa'i tshe/rgyal po'i 'khor dang blon po dang 'bangs rnams kyi rtsar ma'i gtsug lag khang chung ngu dang / mchod rten brtsigs so 'tshal gyi nang na shA ri ram ma stsal ba cig kyang ma mchis te/ gtsug lag khang brtsigs pa lags nas/'phags pa bai ro tsa nas rgyal po bi dza ya saM b+ha ba la rgyal pos gaN+Di brdungs la 'phags pa rnams spyan drongs shig ces bgyis pa dang / rgyal po'i mchid nas de bzhin gshegs pa mngon sum du 'dir gshegs te bdag gi lag tu gaN+DI ma stsal gyi bar du bdag gaN+DI mi brdung ngo zhes smon lam btab pa dang /de ma thag tu 'jam dpal gyi sprul pa dge slong bai ro tsa nas nam mkha' la de bzhin gshegs par sprul te/ nyan thos chen po bcu drug dang thabs cig tu tsar mar de bzhin gshegs pa'i tshul bstan nas rgyal po bi dza ya saM b+ha ba'i lag tu gaN+DI stsal nas/rgyal pos gaN+DI brdungs pa dang dgung bdun gyi bar du gaN+DI de'i sgra ma chad par byung ste/ de bzhin gshegs pa'i sprul pa mngon sum du gshegs pa'i dan rtags su gor ma la zhabs kyis bcags pa'i rjes da dung gi bar du tsar ma na mchis/ 'phags pa nyan thos chen po bcu drug la mchod pa rin po che sna tshogs las bgyis pa'i bshos cha bcu drug rgyal pos phul ba yang tsar ma'i gtsug khang gi nang du 'phags pa rnams kyis gter du stsal te/phyir dus dmas shing dge 'dun la yon bdag ma mchis te 'tsho ba mi 'byor ba'i dus na rin po che'i bshos cha de rnams de'i tshe sa'i 'og nas 'byung zhes 'phags pa dge 'dun 'phel gyis lung bstan pa dag las kyang 'byung /dge slong 'phags pa bai ro tsa na'i mchod pa'i rkyen du klu'i rgyal po hu lor zhes bgyi bas kha che'i yul nas de bzhin gshegs pa bdun gyi sku gdung bzhugs pa'i mchod rten cig spyan drangs nas nam mkha' las gshegs pa da ltar tsar ma na bzhugs te/mchod rten 'di dri gtsang khang gi nang na bzhugs te/ grib ma slad rol du gsal bar 'byung / rgyal po bi dza ya sing ha zhes bgyi ba tsar ma'i gtsug lag khang du mchod pa bgyid du mchis pa las sku gzugs lder so bgyis pa cig 'chag cig gshegs par mthong nas mtshams med pa lnga byang ngo zhes mchi ba yang da ltar bzhugs/gtsug lag khang de'i srung mar zhal gyis bzhes pa yang / lha nam mkha'i spyan dang nor bu bzang po zhes bgyi ba lags te/ deng song gi bar du mngon rtags dang / mtshan ma dag kyang 'byung / 'phags pa'i lung bstan dag kyang sbyar na yang thog ma gtsug lag khang 'di rnams brtsigs pa yang dge ba'i bshes gnyen dang /yon bdag 'phags pa sha stag gis mdzad la gtsug lag khang dang mchod rten bzhugs so 'tshal gyi nang na yang de bzhin gshegs pa rnams kyi sku gdung dang byang chub sems dpa' dang / nyan thos dang / rang sangs rgyas kyi sku gdung bzhugs pas gnyan cing byin che rab ste/ thog ma li yul du gtsug lag khang byung ba yang 'di las snga ba ma mchis so/ /de nas tsar mar 'jam dpal gyi sprul pa dge slong 'phags pa bai ro tsa nas chos phyung rgyal po bi dza ya saM b+ha bas gtsug lag khang brtsigs tshun chad rgyal po li rje rabs bdun gyi bar du gtsug lag khang gzhan ma brtsigs/de nas de'i 'og tu rgya gar yul nas 'phags pa dgra bcom pa bud+d+ha du ta dang / kha gang ta dang / khag ro yang dang / khag drod dang bzhi byung ste/ gau to shan gyi Ar+ya sta nar bzhugs so/ /de'i tshe byang chub sems dpa' byams pa yang li rje bi dza ya bIr+ya bya bar gyur te/rgyal po de srog mkhar gyi steng nas bltas na mkhar gyi phyi rol na gser dang / dngul lta bur snang ba zhig mthong nas bsnyags pa dang / da ltar 'gum tir gyi mchod rten chen po bzhugs pa slebs nas bltas na/ sha ba ni gnod sbyin gyi sde dpon chen po yang dag shes su gyur te rgyal po la smras pa/kye rgyal po khyod sangs rgyas kyis lung bstan pa bzhin 'dir gtsug lag khang gcig brtsigs pa rigs so zhes bgyis pa dang / su'i phyir brtsigs zhes rgyal pos zhus pa dang / sangs rgyas kyi pho nya zhes bgyi ba 'phags pa dgra bcom pa bud+d+ha ta la sogs pa bzhi khyed kyi dge ba'i bshes gnyen du 'ongs pa 'di dag gi phyir brtsig ces bsgo ba dang /'phags pa dgra bcom pa de dag kyang rgyal po bi dza ya bIR+Ya'i drung du byon nas chos bshad pas rgyal po yang tshe snga ma'i smon lam dran nas de ma thag tu dogs brtag pa'i phur bu der btab ste/ gtsug lag khang 'gum tir brtsigs so//de nas rgyal po bi dza ya bIr+ya 'gum tir gyi gtsug lag khang du mchod pa bgyid du mchis pa'i tshe bu chung ngu zhig stor nas rjes bcang pa de btsal na/ gau to shan gyi lung bu'i nang nas sangs rgyas 'od srungs kyi sku gdung bzhugs pa'i mchod rten gyi drung nas bu rnyed de/ de nas rgyal pos mchod rten 'di gang gi dus na sus brtsigs zhes smras pa dang /dge ba'i bshes gnyen 'phags pa de dag gi zhal nas mchod rten 'di sangs rgyas 'od srungs mya ngan las 'das pa'i tshe brtsigs te sangs rgyas 'od srungs kyi sku gdung bzhugs so/ /li yul sngon mtshor gyur pa'i dus na mchod rten 'di ris g.yogs te chus ma zhig la/ phyis kyang yul 'di mtshor 'gyur te/ yang mchod rten 'di ris g.yogs nas chus mi 'jig ste/ sangs rgyas byams pa byung ba'i tshe yang mtsho bskams nas yul du gyur pa'i dus na mchod rten 'di 'byung ste/ gnas 'di ni dus gsum du gshegs pa'i de bzhin gshegs pa rnams kyi sangs rgyas kyi zhing khud pa'i nang na yang gau to shan 'di pho brang sa gcig yin te dus gsum gyi sangs rgyas rnams kyang kun 'dir gshegs shing lung ston/sems can gyi don mdzod do/ /phyogs bcu'i sangs rgyas kyi zhing so so nas byang chub sems dpa' stong phrag nyi shu yang dus gsum du glang mgo ri 'di la mchod pa mdzad du byon nas slar gshegs so zhes bstan/de nas rgyal po bi dza ya bIr+ya dad pa'i shugs chen pos glang mgo ri'i steng du gau to shan gyi gtsug lag khang brtsigs nas bu chung ngu de yang thar par btang ste phyis dgra bcom pa'i 'bras bu thob nas/ li yul du dgra bcom par gyur pa 'di las snga ba ma byung bas 'di ni lam ston pa'o zhes mo rgu bde shi bya bar btags te/thog ma mo rgu bde shi'i ming ni de nas byung ste deng sang gi bar du yang thub ldan dang / dka' thub kyi mchog las btus te/ mo rgu bde shir bsgo ba lags/ gau to shan dang / 'gum tir gyi gtsug lag khang 'di gnyis bzhugs pa'i dog sa yang dus gsum gyi de bzhin gshegs pa rim gyis 'byung ngo 'tshal gyi zhabs kyis bcags/byin gyis brlabs pa'i steng du 'phags pa'i lung bstan dag dang sbyar nas yang / thog mar gtsug lag khang 'di rnams brtsigs pa yang dge ba'i bshes gnyen dang / yon bdag 'phags pa sha stag gis mdzad la/gtsug lag khang dang / mchod rten bzhugs so 'tshal gyi nang na de bzhin gshegs pa'i sku gdung dang / byang chub sems dpa' dang / nyan thos dang / rang sangs rgyas kyi sku gdung bzhugs pas gnyan zhing byin che rab ste/ gtsug lag khang gi srung mar zhal gyis bzhes pa yang rnam thos kyi sras dang /gnod sbyin gyi sde dpon yang dag shes dang / klu'i rgyal po gnas dros po lags te deng song gi bar du yang mngon rtags dang mtshan ma dag kyang 'byung ba'i phyir/ li yul gyi gtsug lag khang bzhugs so 'tshal gyi nang na gtso bor bgyi ba lags/ rgyal po bi dza ya bIr+yas 'gum tir gyi gtsug lag khang brtsigs tshun chad rgyal po rabs gnyis kyi bar du gtsug lag khang gzhan ma brtsigs/de nas de'i 'og tu rgyal po bi dza ya dza ya zhes bgyi bas rgya rje'i bu mo pu nye shwa ra zhes bgyi ba mchis 'brang du blangs nas rgya rje'i bu mo des li yul du srin bu'i sa bon zhig 'tshal te mchis nas yul ma sha bgyi bar srin bu gsos pa dang /srin bu mtshar ba'i skabs su blon po rgyus ma 'tshal ba kha cig gis rgyal po bi dza ya dza ya rgya rje'i bu mo rgyal po'i btsun mo bgyid pa des sbrul gdug pa mang po ma zhar gso zhing mchis te chen por gyur pa dang /yul phyogs su gnod par glo ba chung na ji ltar bgyi zhes blon po dag gis zhus pa dang / sbrul gso ba'i khang par mes thong la kun sregs shig ces bsgo ba dang / rgyal mos de thos nas 'phral du ni rgyal po la rgyus kyis bshad pa'i rngo ma thogs nas/ srin bu shas shig bskus te gsang thabs su gsos te/slad kyis kha cher dar dang srin bal phyung nas dar dang men dri btags te/ rgyal po la bstan nas rgyus kyis zhib tu bshad pa dang /rgyal po yang 'gyod pa skyes te/ rgya gar yul nas dge slong 'phags pa sang g+ha g+ho Sha zhes bgyi ba li yul du byon nas dge ba'i bshes gnyen du spyan drangs te/srin bu phal cher bkum pa'i dngos sdig bshags sbyang bgyis nas po tar+ya dang /ma zhi'i mchod rten dang / gtsug lag khang chen po brtsigs te/ de bzhin gshegs pa'i sku gdung sha ri ram mang po tsam zhig stsal te/de'i slad du dpyid zla ra ba'i ngo thog thag bcom ldan 'das shAkya thub pa'i sku'i gzugs brnyan ma zho po tar+ya zhes bgyi ba'i gtsug lag khang na bzhugs so zhes 'phags pa dag gis lung bstan pas deng sang gi bar du yang / li yul gyi dge 'dun sde gnyis dang / rgyal po dang / blon po man chad 'bangs yan chad lo re zhing dpyid zla ra ba'i ngo la mchod par bgyid cing / ril gyis po tar+ya'i gtsug lag khang du mchis te/ gtsug lag khang 'di yang gnyen zhing byin che rab ste/ lha rat+na ba la dang / rat+na shU ra gnyis srung mar zhal gyis bzhes pa lags te/deng song gi bar du yang dngos rtags dang mtshan ma dag kyang 'byung ngo / /de nas rgyal po bi dza ya dza ya zhes bgyi ba la bu spun gsum mchis te/ phu bo rab 'dod 'dros zhes bgyi ba ni rgyal srid ma 'tshal te/ bsod nams bgyid cing rgya gar yul du mchis/ de'i nu bo bar ma yang rgyal srid ma 'tshal nas ban+der zhugs te ming d+harmA nan+da zhes btags nas rgya gar yul du chos slob tu mchis/ nu bo tha chungs rgyal sar zhugs te ming bi dza ya d+harmar btags rgyal po bi dza ya d+harma de dpa' zhing rtsal che bas gsod rkyen dag la dga' nas/ phu bo ban+de d+harmA nan+da rgya gar yul nas mchis pa chos mnyan zhing bslab nas bsgoms pas 'phags pa dgra bcom par gyur te/'phags pa d+harmA nan+das rgya gar yul nas bltas na/ nu bo rgyal po bi dza ya d+harma gsod rkyen bgyid cing sdig pa mi dge ba'i chos la zhen par mthong nas glo ba brjes te/dge ba'i bshes gnyen bgyi ba'i slad du rgya gar yul nas li yul du mchis te/ nyon bgyir gyi ri rtsa shel chab 'og ma dang / nye ba zhig tu spyil po bgyis te de na bsgom bzhugs pa las nyin gcig cig /'phags pa de sha ba gser gyi kha dog 'dra ba zhig tu sprul te/'u then gyi sku mkhar gyi slad rol shar phyogs logs na 'gus no zhes bgyi ba'i sgang bu zhig mchis pa'i khar byung ba dang / rgyal po bi dza ya d+harmas srog mkhar gyi steng nas mthong nas mda' gcig 'phangs pa dang / sha ba'i brlar phog nas sha ba ni bros/ rgyal po ni slad bzhin du bsnyegs pa dang /sha ba de 'phags pa d+harmA nan+da'i spyi la bu'i nang du mchis/ rgyal po slad bzhin du mchis pas bltas na spyil po'i nang na sha ba ni cang ma mchis/ dge slong gcig brla la mdas phog pa 'byin cing mchis pa mthong nas/ phu bo lags par ni ngo ma 'tshal te/ phu bo dge slong d+harmA nan+das byin gyis brlabs nas phu bo lags par gdong ngo 'tshal te/ rgyal pos btsun pa ci nongs zhes bgyis pa dang /khyod kyis bdag la mda' 'phangs te ci bya zhes bgyis pa dang / rgyal pos kyang sha ba ma lags par tshor nas bdag gis nongs na khri lan zhes bgyis pa dang /dge slong de'i mchid nas gcig tu na nga khyod kyi phu bo yin/gnyis su na nga 'phags pa dgra bcom par gyur pas/ rgyal po khyod kyi mtshar gyi sdig pa thob ste/ mtshams med pa dang 'dra ba'i las byas par gyur te/ bshags sbyangs dang / bsod nams cher ma byas na mi rung ngo zhes bgyis pa dang /rgyal po de yang 'gyod pa skyes te rab tu ma dga' nas/ 'phags pa dgra bcom pa de'i zhabs la 'jus te/ bzod gsol bshags sbyangs bgyis nas bdag gi sdig pa 'di ji ltar 'byang zhes zhus pa dang / 'phags pa d+harmA nan+da'i zhal nas da 'phral du gzhan byar med kyi yul 'bro tir zhes bya ba'i ljongs pha bi na sngon sangs rgyas bcom ldan 'das shAkya thub pa byang chub sems dpa'i spyad pa spyod pa'i tshe/rgyal po zla 'od ces bgyi ba'i dus na bram zes mgo blangs te/ rgyal po nyid kyis mgo bcad nas/bram ze la stsal ba'i phrin yig las dka' ba rnam pa gcig mdzad pa'i sa 'di yin/ gnyis su na bcom ldan 'das shAkya thub pa rgyal po'i khab bya rgod phung po nas li yul byin gyis rlob cing / gau to shan du gshegs pa'i tshe byang chub sems dpa'i 'khor mang pos bskor nas byang chub sems dpa' sa'i snying po dang /ri k+Sha ta a sho ka zhes bya ba 'di byin gyis brlabs te 'di na bzhugs bzhugs/ deng sang gi bar du yang gzugs brnyan 'di bzhugs/ rnam pa gsum du na 'bod b+ha long zhes bya ba'i tshal chung ngu pha ba'i na yang bcom ldan 'das kyi zhabs kyis bcags nas phyis 'phags pa 'byung ba rnams kyi sgom sar byin gyis brlabs te/gnas 'di rnams srung bar lha dzi na ri sha ba dang / lha mo a sho ka dang / klu'i rgyal po ta k+Sha ka dang gsum gyis dam tshig blangs te/ deng sang gi bar du yang gnas 'di srung zhing rgyal pos 'dir gtsug lag khang gcig brtsigs na snga phyi'i sdig pa mi dge ba'i las ci bgyis pa 'byong ngo zhes bgyis pa dang /rgyal po bi dza yad+ha rma dad pa skyes nas slan chad gsod rkyen mi bgyid par dam bcas/ rgyal po zla 'od kyis bram ze la mgo sbyin gtong du bgyis pa'i sar de ma thag tu dog sa brtags pa'i phur bu btab nas/dge ba'i bshes gnyen 'phags pa d+harmA nan+da'i slad du 'bro tir gyi mchod rten dang / gtsug lag khang chen po brtsigs/ sku mkhar gyi nang du yang lho sgo'i sge'u chung mchis pa'i nang logs na klu'i rgyal po chen po ba ru Na'i gnas kyi steng na pa ri tha zhes bgyi ba'i mchod rten gnyen po bzhugs pa'i drung na nang gi gtsug lag khang zhig dang /mchod rten chen po zhig brtsigs te/ mchod rten gyi nang du de bzhin gshegs pa bdun gyi sku gdung stsal/ sangs rgyas rin chen mang gi thog ma'i sku gdung ma zhig pa nyid spyan drangs te/da ltar gtsug lag khang 'di'i nang na bzhugs/ 'bro tir gyi gtsug lag khang 'di yang gnyan zhing byin che ba ste/ deng sang gi bar du yang mngon rtags dang mtshan ma 'byung ngo / /li yul du thog ma ma hA sa ma g+hi ka'i sde yang dge slong 'phags pa d+harmA nan+da byung nas/'u then na 'bro tir gtogs par gtsug lag khang brgyad dang / kam sheng gtsug lag khang kha brgyad kyi dge 'dun yang ma hA saM g+hi ka'i sder gtogs/ de nas de'i 'og tu rgyal po bi dza ya dza ya'i bu chen po rgyal bu 'don 'dros kyis sang tir gyi gtsug lag khang brtsig par dog sa 'jal te brtsams pa las yo byad rgyu rkyen gyis ma 'tshal nas rgyal bu 'don 'dros kyis bsams pa/gzhan nas ma phrogs pa/ma rkus pa/ dkon mchog gsum gyi dkor la ma 'bags par nor gtsang ma bdag nyid kyis rkang gis btsugs te/ btsal la gtsug lag khang brtsig go snyam na thog ma rgya gar yul du mchis te/mkhan po 'phags pa sa man+ta sid+d+hi mkhan por spyan drangs/ stod phyogs thog thog tu yang mchis nas nor gtsang ma btsal/ de nas slar log nas rgya yul du mchis pa dang rgya rje'i blon po gcig gyos la chags te/dgum par bgyis pa las/ 'don 'dros kyis rgya rje la blon po 'di'i skyin par bdag dgum par ci gnang gsol ba las rgya rjes kyang gnang ste/ gshed mas rgyal bu la ral gri btab pa na bcad 'phro nas 'o ma byung ste/ ma gum nas rgya rje la sogs pa ngo mtshar rmad du gyur te mchod pa bgyis/yon yang mang po tsam zhig phul/ blon po des kyang srog rin gyi yon phal cher phul ba blangs nas/ slar li yul gyi 'dab nye ba zhig tu 'khor mang po dang lhan cig tu mchis pa dang / rgyal po 'don 'dros kyis nu bo rgyal po bi dza ya d+ha rma rgyal srid 'dzin zhing mchis pa las/blon po kha cig gi mchid nas rgyal bu'i gcen rgyal bu 'don 'dros rgya rjes li yul gyi rgyal por bskos te/ rgyal po'i rgyal srid 'phrog tu 'ongs so zhes bgyis pa dang / rgyal po bi dza ya d+harma yang phu bo 'don 'dros la mi dga' nas sku mkhar gyi nang du yang ma btang /phrad du yang ma btub nas/ sang tir gyi gtsug lag khang brtsigs pa'i sa gzhir mchis shig ces bsgo nas/ phu bo rgyal bu 'don 'dros kyang sang tir du mchis te/ nu bos kyang chu dang rtswa shing la yang dbang ma bskur te/ kho bdag gi rin gyis 'jal te/ yo byad sbyor zhing mchis pa las/thog ma rgya gar yul du mkhan po 'phags pa sa man+ta sid+d+hi dge ba'i bshes gnyen gyi phyogs la bltas nas phyag 'tshal te mchod pa bgyis nas smon lam btab/ spyan drangs pa dang / mkhan po yang rgya gar yul nas nam mkha' la lding ste/ li yul du rgyal po 'don 'dros kyi drung du gshegs nas gtsug lag khang ji ltar brtsigs pa'i bshes gnyen yang bgyis/rgyal po spun gnyis kyi bar du ma 'jal ba'i sdum bgyi ba'i slad du sum cu rtsa gsum gnam du gshegs nas bcom ldan 'das shAkya thub pas byang chub sems dpa'i spyad pa spyod pa'i tshe lus kyi yan lag dang /bu smad la sogs pa'i sbyin gtong bgyis shing phrin las dka' ba ji ltar mdzad pa bzhin du no le zhes bgyi ba dang / zlos chos li yul du mi bgyir mi rung zhes lha rnams la gsol nas sum cu rtsa gsum gnam gyi lha dang / rgyal chen ris bzhi'i lha rnams li yul sad tir bgyi bar gshegs te/ sangs rgyas bcom ldan 'das sngon phrin las dka' ba ji ltar mdzad pa bzhin du lha rnams zlos chos bgyis pa'i tshe rgyal po bi dza ya d+harmas blon po dang / 'bangs rnams la gcig kyang der mchir mi rung ngo zhes bgyis pa las/lha'i rol mo bzang po snga na ma byung ba de thos nas mi gcig gis gcig sbran te ma bzod nas der mchis/slad kyis rgyal po'i 'khor kun gar mchis/ rgyal pos smras pa dang / blon po dag gis rgyus kyis zhib tu bshad pa dang / rgyal po bi dza ya d+ha rma yang ma bzod de/ sang tir gyi gtsug lag khang gi 'dabs su mchis pa dang /phu bo rgyal po 'don 'dros kyis bsu nas spun der mjal ba dang / nu bo rgyal po bi dza ya d+harmas phu bo la phyag bgyis nas/ pus mo sa la btsugs thal mo sbyar te/ 'phags pa bdag gis khyod kyi mthu stobs ma rig nas nga rgyal gyi dbang du gyur nas bdag gis rab tu nongs pa bzod par gsol zhing mchis na/bdag la dngos sdig tu mi 'gyur bar bzod pa bzhes par ci gnang zhes bgyid pa dang / phu bos kyang bzod pa blangs pa dang / des slar nu bo la bzod pa gsol nas lag sbrel te gtsug lag khang du mchis nas mchod pa bgyis/ lha klus no le bgyis pa dang /gtsug lag khang rtsig pa la rjes su yi rang nas yon phul/ gtsug lag khang rtsig pa'i dang rogs bgyis te rkyen ris bkum ste phul/ thog ma spun ma mjal te/ bzod pa gsol ba'i sar mjal mo ka ka rong zhes bgyi ba'i gtsug lag khang zhig brtsigs nas thog ma li yul du sarba ti bAng [(]kyi [,]gi [)]sde theg pa chung ngu pa yang mkhan po 'phags pa sa man+ta sid+d+hi las byung /gtsug lag khang gi srung ma yang lha ka bi la zhes bgyi bas zhal gyis bzhes gsungs/ deng sang gi bar du lo gcig cing yang rtag tu ston zla ra ba tshes bdun dang brgyad kyi gdugs la/ de bzhin gshegs pas phrin las dka' ba mdzad pa'i zlos chos no le bgyid de/yul mi ril gyis chos nyan cing der mchis te/gtsug lag khang 'di yang gnyen zhing byin che bar bgyid do/ /de'i 'og tu rgyal po ba dzi ya d+harma'i bu rgyal po bi dza ya sing has rgyal po bgyid pa'i tshe ga 'jag gi rgyal pos li yul du dmag mang po drangs te/rgyal po ba dzi ya sing ha dang 'thabs pa las ga 'jag gi dmag pham ste/ ga 'jag gi rgyal po yang li rjes zhags pas zin nas 'gum par bgyid pa las thar par gsol nas rgyal po ba dzi ya sing ha'i mchid nas/ rgyal po khyod bdag gis mi dgum par thar par btang gis/nam khyod dgra choms pa'i dus ni bdag gi dge ba'i bshes gnyen mdzad cing slar byon cig ces bgyis nas/ thar par stsal te ming yang A nan+da se nar btags te slar shu lig tu btang / de nas dge slong A nan+da se na slad kyis dgra bcom nas thog ma li rje dang dam bcas pa bzhin nam mkha' la lding ste/li yul gshegs nas/ rgyal po bi dza ya sing ha'i dge ba'i bshes gnyen bgyi ba'i slang du snying rje yang dad pa skyes nas 'phags pa dgra bcom pa A nan+da se na'i slad du sam nya'i gtsug lag khang dang / mchod rten brtsigs te/ gtsug lag khang gi srung ma ni rnam thos kyi sras dang / lha ka pi la bzhugs te/gtsug lag khang 'di yang gnyan zhing byin che bar bgyid do/ /de nas de'i 'og tu rgyal bo bi dza ya kIrtis 'phags pa 'jam dpal gyi sprul pa kam sheng du chos spel ba'i dgra bcom pa spyi bri zhes bgyi bas dge ba'i bshes gnyen bgyis nas dad pa skyes pa'i slad du sru nyo'i gtsug lag khang brtsigs te/thog ma ka ni ka'i rgyal po dang / gu zan gyi rgyal po dang / li rje rgyal po bi dza ya kIrti la sogs pas rgya gar yul du dmag drangs nas so ked ces bgyi ba'i grong khyer phab pa'i tshe/ rgyal po bi dza ya kIrtis shar rim mang po zhig rnyed pa yang sru nyo'i mchod rten de'i nang du stsal/thog ma dog sa rtog pa'i phur bu 'debs pa'i tshe/ rgyal po bi dza ya kIrti la dge ba'i bshes gnyen 'phags pa spyi pri'i zhal nas phur bu 'di la rgyal pos lag pa mas yar lan lngar bya bas na mngon rtags 'byung ngo zhes bgyid pa dang / rgyal pos kyang dogs brtag pa'i shug pa'i phur bu la lhag pas lan lngar byabs pa dang /phur bu de la shug pa'i yal kha khru gang pa lnga de ma thag tu de'i nyin par skyes nas slad kyis shug pa de'i drung du ban+de dag gis d+harma bklags pa dang shug pa de las chos bshad pa'i sgra dag byung nas slad kyis ban+de gzhon nu dag d+harma thogs te chos nyan pa mchis na yang /de bzhin du chos 'chad pa'i sgra dag byung ba las slad kyis ban+de gcig gis d+harma log par bklags nas de ltar ma yin no zhes lhas bsgo ba dang / mnyan nas de tshun chad chos bshad pa'i sgra yang ma byung slad kyis gtsug lag khang 'di'i chab ka chab kyis 'tshal te chab ma byin nas gtsug lag khang zhig tu nye ba las/dge slong btsun pa sum po na zhes bgyi ba dgra bcom du nye ba zhig gis gtsug lag khang de mi zhig par bgyi ba'i slad du dgra bcom par 'grub pa'i dge ba'i rtsa ba des klur skye bar smon lam btab nas de ma thag tu lus las chad byung nas mi'i lus la 'phos par shel chu chung ngu'i klur gyur na dog sa'i 'og tu nub nas deng sang gi bar du gtsug lag khang de'i chab shel chu chung ngu las drangs te/gtsug lag khang 'di yang deng sang gi bar du ma zhig ste/gnyan zhing byin che bar bgyid/ srung ma yang lha su dza ya dang /phyag brnyan sing ha mu kha dang / shel chab chung ngu'i klu sum pon gyis srung ngo // //de nas de'i 'og tu rgyal po bi dza ya kIrti'i bu rgyal po bi dza ya sang gra ma zhes bgyi ba dpa' zhing rtsal che ba zhig byung nas/ phyi dgra mang po zhig la bsdos nas sems can phal cher bkum/de'i 'og tu seng ge mi la rgol ba zhig byung ste/ dmag gis btab na yang 'khums te rgyal po gcig pus seng ge de la brgal te zin nas bkum/ de nas rgyal po de'i ming yang seng ger btags/ rgyal po de yang ri dgas shor du mchis pa las shel chab chung ngu'i 'gram du tshal zhig tu dgongs btab pas/de'i nub mo tshal de'i nang nas zhugs mar 'dra ba zhig rgyang nas gda' nas slad de nang bar bltas na/ dge slong 'phags pa dgra bcom pa dz+nyA na ya sho de na bzhugs pa las 'od byung bar mthong nas/ dad pa skyes te mchod pa bgyis nas 'phags pa 'di na ci mdzad ces zhus pa dang /dgra bcom pa dz+nyA na ya sho'i zhal nas sa 'di yang sngon gyi de bzhin gshegs pas byin gyis brlabs pa lags te/ rgyal pos 'dir gtsug lag khang cig brtsig par rigs so zhes bgyis pa dang / rgyal pos kyang 'phags pa de la dad pa skye ba'i slad du bsgo ba bzhin du mnyan nas sdig pa bshags/gtsug lag khang gi dogs brtag pa'i phur bu btab nas/ gser gyi gzhong pa cig spyi bo la bzung ste/ da bdag gis brtsigs pa gtsug lag khang 'di yun du tshugs shing brtan par 'gyur na phyogs bcu na bzhugs pa'i 'phags pa rnams kyis byin gyis brlabs shing de bzhin gshegs pa'i sku gdung bdag gi gzhong pa 'di'i nang du stsal bar ci gnang zhes smon lam btab pa dang /nam mkha' las sha ri ram mang po tsam zhig gzhong pa'i nang du gshegs nas rgyal po sngar bas lhag par dad pa skyes te/ dge ba'i bshes gnyen ya sho'i slad du d+harma kIrtis gtsug lag khang mchod rten chen po brtsigs te/nang du sha ri ram mang po tsam po zhig stsal bas gtsug lag khang 'di yang gnyan zhing byin che bas srung ma rnam thos kyi sras dang / lha ka pi las srung // //de nas rgyal po ba dzi ya d+harmas rgyal srid bzung ba man chad/bi dza ya kIrtis rgyal po bgyis pa yan chad/ rgyal po rabs bcu bzhi'i bar du res 'ga' ni/ yul du phyi dgra gzhan gyis dmag drangs te gtses/ res 'ga' ni li rje dag gis yul gzhan du dmag drangs nas 'bangs kyi tshigs gyur/de'i 'og tu dru gu a no shod kyis li yul du dmag drangs nas/ gau to shan man chad kyi gtsug lag khang phal cher mes bsregs te yul dmas/ 'bangs 'gribs nas gtsug lag khang gsar pa rtsig pa'i rngo ma thogs/ de nas de'i 'og tu rgyal po bi dza ya kIrti'i bu rgyal po bi dza ya sang gra ma zhes bgyi ba dgung lo bdun lon pa zhig /rgyal por zhugs nas slad kyis mi thur son pa dang /yul 'di sus bshig /ci'i slad du dmas zhes/ dge 'dun rgan rabs dang /blon po dag la smras pa las/ dge 'dun dang / blon po rnams kyang dru gu a mo no shod la sogs pas sngon yul ji ltar bshig pa'i lo rgyus zhib tu bshad pa dang /rgyal po bi dza ya sang gra mas blon po dag la dmag tshogs ci mchis pa sdus shig ces bsgo nas sngon gtses shing / yul bshig pa'i rgyal po rnams kyi yul du dmag drangs te/ lan glan nas yul bshig /sems can phal cher bkum/ de nas slar log nas shel chab 'og ma'i 'gram du mchis pa dang /dge slong bdun zhig chab kyi nang du khrus bgyid cing rtsed mo sna tshogs bgyid pa mthong nas/ dge slong gis tshul ma yin par byed ces byas pa dang / dge slong de bdun yang de ma thag tu nam mkha' la lding nas rgyal po de la rdzu 'phrul rnam pa bcu drug bstan pa dang /rgyal po de'i yid la bdag gis sngar yang sems can mang po zhig srog bcad de bkum/ da yang 'phags pa de rnams la ngan sems bskyed pa rab tu nyes so snyam pa'i 'gyod pa cher skyes/'phags pa de dag gis rdzu 'phrul rnam pa sna tshogs bstan pa mthong nas dad pa yang cher skyes te/ 'phags pa de dag ga la bzhugs pa'i drung du bsnyen nas mchod pa dang / bshags sbyangs bgyis/ bzod par gsol nas 'phags pa dgra bcom pa po nyan re ta la sogs pa 'phags pa bdun gyi phyir 'gu zhan gyi gtsug lag khang brtsigs te/'phags pa dgra bcom pa bdun gyis kyang dog sa de byin gyis brlabs nas/ zhi ba'i sa dgu zhan ta zhes bgyi bar gtsug lag khang gi mtshan ma yang brtags te/ gtsug lag khang 'di yang gnyan zhing byin che rab ste/lha dzi na ri sha ba dang / nor bu bzang po gnyis kyis srung ngo // //de nas de'i 'og tu rgyal po bi dza ya sang gra ma'i bu/ rgyal po bi dza ya sing ha zhes bgyi bas rgyal por zhugs nas/ dge ba'i bshes gnyen 'phags pa dgra bcom pa d+harma pa la la 'phags pa khyod la rdzu 'phrul ci mnga' ba bdag la bstan par ci gnang zhes gsol pa las/'phags pa de'i rdzu 'phrul gyis rgyal po bi dza ya sing ha dga' ldan du khrid de/ 'phags pa byams pa bzhugs pa'i gnas dang / zhal bstan nas slar mchis pa dang / rgyal po bi dza ya sing has bzha' ser ma'i gtsug lag khang rtsigs te/dga' ldan na byams pa 'khor dang bcas pa ji ltar bzhugs pa'i sku gzugs bgyis/ slad kyis byams pa la mchod pa'i slad du mgon po dang / lha klu gshegs pa rnams kyis tshul ci 'dra ba mgon po'i rten khang zhig brtsigs nas mgon po dang /lha klu'i gzugs bgyis pa da dung yang bzhugs te/ gtsug lag khang 'di yang gnyan zhing byin che bar bgyi/ lha gangs can dang / 'brog gnas zhes bgyi bas srung / deng sang gi bar du mngon rtags dang mtshan ma dag kyang 'byung ngo // //de nas de'i 'og tu yang rgyal po bi dza ya ba la man chad/ rgyal rabs drug gi bar du gtsug lag khang gzhan ma brtsigs so/ /de nas de'i 'og tu yang rgyal po bi dza ya ba la zhes bya ba'i bu rgyal po bi dza ya sang gra ma zhes bgyi ba rgyal por bgyid pa'i tshe/ cu gu pan nas tshe'u pa na'i sku gzugs nam mkha' las lding ste/ li yul du gshegs pa rgyal pos mthong nas dad pa'i shugs kyis sangs rgyas bzhugs pa'i dri gtsang khang brtsigs/ de nas slad kyis rgyal po de'u then gyi sku mkhar gyi steng gi /byang sgo'i sgo khang na mchis pa zhig gi tshe na bltas na sku mkhar gyi slad rol na dge slong cig khyim pa skye bo la phyag 'tshal te bka' mchid mchi ba mthong nas ngo mtshar du mthong ste/rgyal po des blon po zhig mngags nas zhib tu rtog tu btang ba las/ blon po des dge slong dang /skye bo la so sor rmas nas dge slong gi mchid nas khyim pa skye bo 'di ni 'phags pa 'jam dpal gyi sprul pa lags zhes mchi/ khyim pa skye ba de'i mchid nas dge slong 'di 'phags pa sa'i snying po'i sprul pa lags zhes mchi ba dang / blon po des kyang rgyal po la de bzhin du slar gsol ba dang /rgyal po bi dza ya sang gram yang de ma thag tu 'phags pa de dag gi drung du bsnyen nas phyag 'tshal mchod pa bgyis nas/ 'phags pa dag ga las gshegs zhes zhus pa dang / 'phags pa gnyis kyi zhal nas bdag cag gnyis kyang shar phyogs de bzhin gshegs pa mi 'khrugs pa'i sangs rgyas kyi zhing nas sems can gyi don la 'dir 'ongs so zhes 'byung ba dang /de nas rgyal po bi dza ya sang gra ma'i mchid nas 'phags pa thugs rje dang ldan pa gnyis kyis rdzu 'phrul gyi mthu stobs kyis/ de bzhin gshegs pa mi 'khrugs pa'i sangs rgyas kyi zhing bdag la bstan par ci gnang zhes gsol pa dang /de bzhin du gnang nas de bzhin gshags pa mi 'khrugs pa'i zhal nas/ sangs rgyas kyi zhing yang bstan pa dang / rgyal po des de bzhin gshegs pa'i sku dang / sangs rgyas kyi zhing yang mthong / nam mkha' las shing rta'i steng nas sangs rgyas mang po zhig gshegs nas/ de dag gis 'od zer btang ba rgyal po'i spyi bor rig par mthong ste/ dad pa'i shugs kyis sangs rgyas kyi gzugs ji ltar mthong ba bzhin du gzugs su yang bgyis te/ shing rta'i nang du byang srang du yang drangs nas mchod pa chen po bgyis te/deng sang gi bar du yang dpyid zlar ba yar gyi ngo la byang srang du sku gzugs chen po 'dren pa dang / dge 'dun sde gnyis spyan drangs nas byang chub 'byung gnas bkra shis bsil ba'i tshul du mchod rten gsol zhing / mo h+yo ra'i mchod pa chen po bgyis pa yang rgyal po des bgyis nas dge ba'i bshes gnyen 'phags pa dgra bcom pa mo dgu de shi a ba ya d+hang gi slad du bzha' sang gre re ma'i gtsug lag khang brtsigs te/rnam thos kyi sras dang / yang dag shes bgyi ba yang srung ngo // //de nas rgyal po bi dza ya sha sta man chad rgyal po rabs bzhi'i bar du gtsug lag khang gsar pa gzhan ma brtsigs/de nas de'i 'og tu rgyal po bi dza ya kIrti zhes bgyi ba 'gum tir du mchis pa las/ da ltar b+ha ba nya'i gtsug lag khang bzhugs pa'i sar mchis pa dang / klu'i rgyal po zhig der byung nas rgyal po bi dza ya kIrti la smras pa/sngon sangs rgyas 'od srungs kyi tshe dogs 'di byin gyis brlabs nas gtsug lag khang brtsigs pa'i sa 'di yin te/ de yang rgyal po khyod kyis gtsug lag khang gcig brtsig pa'i rigs so zhes bgyis pa dang / rgyal pos smon lam btab pa/da ltar 'dzam bu'i gling na 'phags pa dag gis byin gyis brlabs te 'dir gshegs par gnang na/ bdag gis gtsug lag khang brtsig par 'tshal lo zhes smon lam btab pa dang / de ma thag tu nam mkha' las 'phags pa dgra bcom pa bcu bdun gshegs nas rgyal po bi dza ya kIrti yang dad pa'i shugs chen po skyes te/rgyal po dang btsun mo lag dar te/ b+ha ba nya'i bsgom sa dang / gtsug lag khang brtsigs te/ gtsug lag khang 'di yang gnyan zhing byin che bar bgyid/ lha gzhan gyis mi thub pa dang nor bu bzang pos srung ngo / /gtsug lag khang 'di yang gna' bod kyi mnga' ris su gtogs pa'i tshe mgar blon btsan nyen gung ston li yul gyi dbang po bgyid pa'i tshe brtsigs pa lags/de nas de'i 'og tu rgyal po bi dza ya sang gra ma dang bu rgyal po bi dza ya sang gra ma spang rgya yul du mchis nas slar li yul du mchi ba'i bar du dru gu'i dmag gis shul khums pa las pha ni rgya yul du gum/bu chung ste slar mchi ba'i rngo ma thogs pa'i skabs su/ li'i blo na po a ma cha khe meg ces bgyi bas dgung lo bcu gnyis kyi bar du rgyal tshab bgyis nas rgyal srid bzung ba'i dge ba'i bshes gnyen dge slong 'phags pa ba ru na tsa zhes bgyi ba'i slad du ma na 'di'i mchod rten dang /gtsug lag khang brtsigs te/ de bzhin gshegs pa'i sku gdung sha ri ram mang du btsal te/ de ltar gtsug lag khang 'di lha nam mkha'i spyan dang gnod sbyin gyi sde dpon yang dag shes zhes bgyi bas srung ngo / /de nas rgyal bo bi dza ya sang gra ma'i bu rgyal po bi dza ya bi kra ma zhes pas slar li yul du mchis nas/dge ba'i bshes gnyen 'phags pa dgra bcom pa de ben+d+ra chen gyi slad du gtsug lag khang byi zha gre rma brtsigs te/ da ltar lha gzhan gyis mi thub pa dang / nor bu bzang pos srung ngo // //de nas de'i 'og tu rgya'i blon po ser the shi dang rgyal bo bi dza ya d+harma gnyis kyis dge ba'i bshes 'gum tir gyi bar mag 'dzin se na zhes bgyi ba'i slad du bong mkhar gyi byams pa mai tri'i gtsug lag khang brtsigs te/ da ltar gtsug lag khang 'di rnam thos sras kyis srung ngo //de nas de'i 'og tu rgyal po'i blon po ka the shi dang / rgyal po bi dza ya saM b+ha ba zhes bya ba gnyis kyis dge ba'i bshes gnyen u de na dra rod ci dang /d+harmA nan+nga gnyis kyi slad du khe gan rtse'i gtsug lag khang brtsigs te/ da ltar gtsug lag khang 'di rnam thos sras kyis srung ngo //thog ma dge slong 'phags pa bai ro tsa na tsar ma'i tshal du gshegs pa phyugs rdzi la sogs pa mi 'og ma dag gis mthong nas/rgyal po bi dza ya saM b+ha ba la bdag cag gis snga na ma mthong ba'i mi 'di lta bu zhig tsar ma'i tshal du mchis so zhes gsol ba dang /rgyal po bi dza ya saM b+ha ba yang de ma thag tu tsar mar mchis nas 'phags pa bai ro tsa na mthong ba dang /dad pa skyes nas phyag 'tshal mchod pa bgyis nas/ 'phags pa des kyang rgyal po bi dza ya saM b+ha ba'i dge ba'i bshes gnyen bgyis nas legs nyes gnyis kyi 'bras bu bstan to//chos bshad bshags sbyong bgyid du stsal ba las/ rgyal po de yang chos kyi mig bye nas lhag par yang dad pa skyes nas rgyal po slar sku mkhar du mchis nas thog ma 'phags pa bai ro tsa na gshegs so zhes bka' mchid snyan pa thos pa'i sar mchod rten chen po zhig brtsigs te/ ming yang su stong nyar btags/slad kyis mchod rten de yun rings pas zhig nas/ de nas de'i 'og tu rgyal po bi dza ya bo han chen po dang / rgya yul nas mchis pa'i dge slong 'ba' la shi zhes bgyi ba mchis pas tsar ma'i dge 'dun dge ba'i bshes gnyen du spyan drangs nas su stong nya'i gtsug lag khang brtsigs te/da ltar rnam thos kyi sras kyis srung ngo // //dge slong ma'i gtsug lag khang rnams kyi gtan tshigs dang / snga phyi'i go rims la rgyal bo bi dza ya sing ha zhes bgyi ba zhig chung ngu nas rgyal por zhugs te/ chungs pa'i skabs su blon po kha cig gis rngan can bgyis te/rgyal mo dang / mchis 'brang slas dang / nang 'khor ma rnams dag mi rigs pa bgyis nas slad kyis rgyal po de chen por gyur nas/ sngar blon po de dag gis rngan can bgyis shing brnyas pa de dran nas/ khon dran par gyur te/ slad kyis rgyal po des blon po rnams ri dgas shor ba ltar thabs kyis brid nas 'u then gyi shel chab gong ma'i yul pa ro gza' zhes bgyi blon po bdun cu rtsa lnga bkum nas/slad kyis rgyal po der gtsug lag khang zhig kyang brtsigs/ de nas sku mkhar du mchis nas rgyal po mchis pa'i gnas nas rgyal mo dang / slas dang / nang 'khor ma mchis pa'i khang pa phyi sgo bkum nas 'grul bcad/de bzhin du 'gum par bgyis pa las/ rgyal po de'i btsun mo 'khor dang bcas pa phongs te nyam thag nas phyogs bcu'i sangs rgyas dang byang chub sems dpa'i mtshan nas brjod/ mchod pa bgyis te/ lha khang bskor d+harma bklags/ bsod nams cher bgyis pa'i mthus rgya gar yul nas 'phags pa dgra bcom pa ma ya sha pradz+nyA dang /s+th+ya shu ta dang / sang han+da la sogs pa nam mkha' la lding ste/ rgyal mo mog sha ko sha dang / sa lu ca la sogs pa 'khor mchis pa'i drung du gshegs nas rgyal mo de dag la chos bshad de rab tu byung ba las dad pa'i shugs kyis de ma thag tu rgyal mo de dag gi 'khor las brgya rtsa bcu gnyis dgra bcom par gyur nas nam mkha' la lding ste/bsod snyoms len du gshegs pa rgyal po bi dza ya sing has mthong nas/ de ma thag tu gnas der mchis te bltas na rgyal mo mog sha ko sha dang /sa lu ca la sogs pa'i 'khor ril rab tu byung ste/ phal cher dgra bcom par gyur te/ rdzu 'phrul sna tshogs bstan pa mthong nas rgyal po yang rab tu dga' nas dad pa'i shugs kyis gnas de nyid du gtsug lag khang brtsigs te/ bran zhing dang / nor phyugs la sogs pa mchod pa'i yo byad mang po tsam zhig phul nas gtsug lag khang de'i ming yang nu'o nya zhes btags te/gtsug lag khang 'di yang gnyan zhing byin che bar bgyid/ da ltar lha phur pa'i lag pa zhes bgyi bas srung // //de nas de'i 'og tu rgyal po 'don 'dros kyi btsun mo rgya rje'i sras mo sho rgya zhes bgyi ba'i bu mo dge slong ma sho'i dza ya zhes bgyi ba dgra bcom nas nu mo yo sha rgya'i dge ba'i bshes gnyen bgyi ba'i slad du rgya yul nas 'u then du mchi ba'i phyir nu mo rgyal mo sho rgyas yo zo 'jo'i gtsug lag khang brtsigs te/da ltar klu'i rgyal po da ci dang / da ra gnyis srung // //de nas de'i 'og tu rgyal po bi dza ya sha ta'i nu bo a ma ca ze ro'i mchis 'brang du su ha tsho ha zhes bgyi ba khyim thab gums pa dang /bud med de la rgyal po'i mchid nas bdag dang mi phrad du mi rung ngo zhes bgyis pa dang / bud med de'i mchid nas bdag dgung bdun zhig khyim thab kyi 'dun bgyid cing slad rol du mi mchi bar ci gnang zhes gsol pa/rgyal pos kyang de bzhin du gnang nas de ma thag tu bud med de yang gsang ste rab tu byung nas dgung bdun gyi bar du sems rtse gcig tu sangs rgyas rjes su dran pa'i ting nge 'dzin bsgoms nas/ de bzhin gshegs pa'i zhal yang mngon sum du mthong nas dgra bcom ste ming yang bud+d+ha nan+dar btags/de nas dgung bdun lags pa dang /rgyal pos bud med de 'gugs pa zhig btang ba de'i mchid nas mo rab tu byung ste/'phags ma dgra bcom mar gyur nas/ da ltar 'od kyang 'byung zhing mchis so zhes bgyis pa dang /rgyal po der mchis nas 'phags ma de la 'od kyang 'byung / rdzu 'phrul sna tshogs bstan pa yang mthong nas dad pa skyes te/ de nas 'phags ma bud+he nan+da'i slad du zer ro/ /'dzo'i gtsug lag khang brtsigs te gnyan zhing byin che bar bgyid/ da ltar lha dga' ba'i dbang phyug ces bya bas srung // //de nas de'i 'og tu rgyal po bi dza ya nan+da skye ba nam gyi rgyal po hu mar bya ba'i mchis 'brang dang / mjal ba'i bu mo gcig cig mchis pa rab tu byung nas dgra bcom par gyur pas bltas na/ bdag ni li rje bi dza ya ma ti'i bu mo lags par thugs su chud nas 'phags pa d+harma ba la de dang /dge slong ma 'phags ma nyi shu shu lig nas nam mkha' las lding ste li yul du gshegs nas rgyal po yab la thog ma'i lo rgyus kyang bshad/ rdzu 'phrul rnam pa sna tshogs kyang bstan pas rgyal po yang dang pa skyes nas bu mo 'phags ma dgra bcom ma d+harma ba la'i slad du po yen do'i gtsug lag khang brtsigs te/da ltar rnam thos kyi sras dang / klu'i rgyal po hu lor bgyi bas srung / de nas de'i 'og tu rgyal po bi dza ya sang gra ma seng ge zhes bgyi ba'i ma rgyal mo d+harma zhes bgyi ba rab tu byung nas dgra bcom pa'i 'bras bu thob nas spyil po'i nang du bsgom zhing mchis pa las nub mo 'od phyung ste/rgyal pos mtshan ma gzugs pa'i phyir mda' cig 'phangs/ nang par mda' tshol du btang ba'i sa de na rgyal po'i ma d+harma de bzhugs pa mthong nas rgyal po yang dad pa skyes te/ ma 'phags ma dgra bcom ma d+harma zhes bgyi ba'i slad du rgyal pos dro mo mdza' zhes bgyi ba'i gtsug lag khang brtsigs te/da ltar lha ser skyas srung / de nas rgyal po bi dza ya sang gra ma'i nu bo bre s+ya stu lag ces bgyi ba zhig gis rgyal po gru gu mo zhig rab tu byung nas ming yang a shu ka su ma zhes bgyi bar btags te dgra bcom pa'i slad du dad pa skyes nas/tra ke 'dzo zhes bgyi ba'i gtsug lag khang brtsigs te/da ltar gnod sbyin gyi sde dpon yang dag shes kyis srung // //de nas gtsug lag khang 'gu zhan brtsigs pa'i rgyal po bi dza ya sang gra ma'i mchis 'brang rgyal po 'phrom ge sar gyi bu mo'u rong ga zhes bgyi ba'i bu mo gnyis rab tu byung nas dgra bcom ste 'phags ma de gnyis gcig gi mtshan ni shil ma ta zhes bgyi/gcig gi mtshan ni gau sha ra zhes bgyi ste/ 'phags ma de gnyis kha che yul nas nam mkha' la lding ste/ ma rgyal mo'u rong gi dge ba'i bshes gnyen du gshegs te/'phags ma de nyid gnyis kyi slad du rgyal mos ho ran 'dzo'i gtsug lag khang brtsigs te/ da ltar klu'i rgyal po hu lor bgyi ba dang / gser gyi skra zhes bgyi ba gnyis srung // //de nas rgyal po bi dza ya kIrti'i bu mo bi zha dza yas bu mo 'phags ma dgra bcom ma bi ta she ca'i slad du po lon jo'i gtsug lag khang brtsigs te/da ltar gnod sbyin gyi sde dpon yang dag shes kyis srung // //de nas rgyal po bi dza ya ba la'i bu mo gu zan gyi rgyal mo'i mchis 'brang bgyid pa'i zha phra ba zhes bgyi bas bu mo dge slong ma 'phags ma dgra bcom ma bi zha dza ya'i slad du en mo no'i gtsug lag khang brtsigs te/da ltar ser skyas srung // //de nas rgyal po bi dza ya ba la zhes bgyi bas snga slad du sems can mang po zhig bkum nas 'gyod pa skyes te/ bsod nams phal cher bgyis/ mchis 'brang yang thar par btang nas 'phags ma dgra bcom mar gyur pa'i slad du dad pa skyes nas kho mo no no'i gtsug lag khang brtsigs te/da ltar rnam thos kyi sras kyis srung ngo // //de nas li rje'i blon po a ma ca khe meg ces bgyi bas phu bo'o spun gsum gdugs gcig tu bkum nas/ ma yang thar bar zhugs nas de nyid du a ma ca khe meg gis gus sde re ma'i gtsug lag khang brtsigs te/de ltar lha nam mkha'i spyan dang / gnod sbyin gyi sde dpon yang dag shes kyis srung / de nas rgyal po bi dza ya dza ya zhes bgyi bas o sku'i rgyal po'i bu mo mchis 'brang du blangs te/ rgyal mo des dge ba'i bshes gnyen 'phags ma dgra bcom ma gzhe ma'i slad du o ska no'i gtsug lag khang brtsigs te/da ltar lha mo zhes bgyi bas srung // //de nas rgyal po bi dza ya sang gra mas kus pa'i or myong nag gi gtsug lag khang brtsigs te/ nang kor ma mang zhig thar par skyes nas da ltar rgyal po ku na'i srung ma'i lha mo gser gyi me tog dang /lha mo dung can gnyis srung // //de nas rgyal po bi dza ya ba las cu gun pan gyi rgyal po'i bu mo shu to ka zhes bgyi ba mchis 'brang du blangs pa'i bu mo dge slong ma dgra bcom ma a sho ka shI la'i slad du gtso'u no'i gtsug lag khang brtsigs te/ da ltar lha a ba lha dang / lha 'dzam b+ha ke ru ta zhes bgyi ba gnyis srung // //de nas rgyal po bi dza ya sing ha'i mchis 'brang ga 'jag gi rgyal mo a l+yong dza zhes bgyi ba'i dge ba'i bshes gnyen du shu lig nas dge slong ma 'phags ma dgra bcom ma bdun gshegs pa'i slad du rgyal po bi dza ya sing has khye sho no'i gtsug lag khang brtsigs te/da ltar lha ser skyas srung / rgyal po bi dza ya sang gra ma rgyal po bgyid pa'i tshe kha che'i yul nas dge slong ma 'phags ma dgra bcom ma shI la ta dang / gau shur+ya zhes bya ba gnyis nam mkha' las lding ste gshegs nas slad kyis khyim bdag na no bod bgyi ba'i khyim drung du bzhugs nas rgyal po bi dza ya sang gra ma la smras pa/rgyal po chen po dog sa 'di ni sngon sangs rgyas shAkya thub pa byang chub sems dpa'i spyad pa spyod pa'i tshe byang chub sems dpa' swa shang zhes bgyi bar gyur pa na/ bram ze la bu ming sring gnyis yon du phul te/ phrin las dka' ba rnam gcig mdzad pa'i sa 'dir lags pas 'dir gtsug lag khang cig brtsig par rigs so zhes bgyis pa dang /khyim bdag na mo bod ces bgyi ba de yang dad pa skyes nas/ khang khyim dang sa de yang yon du phul nas/ rgyal pos kyang gtsug lag khang zhig brtsigs/ yon bdag las kyang ming dras nas gtsug lag khang gi mtshan yang na mo 'bu gdong zhes bya bar btags/da ltar klu'i rgyal po hu lor dang / lha gser gyi skra zhes bgyi bas srung / de nas li rje'i blon po 'da' no ya zhes bgyi ba zhig gis tshong 'dus bar mar sku gzugs chen po bgyis pa las slad kyis yang li'i blon po a ma bi dad kyi sku gzugs chen po'i lha zhig ral du gyur pa yang gsos/kong sheng gi dge slong ma'i slad du 'da' no yo na'i gtsug lag khang brtsigs te/da ltar rnam thos sras kyis srung / 'u then na dge 'dun sde gnyis bzhugs pa'i gtsug lag khang chen por rtse ba ni sku mkhar gyi nang dang /slad rol na drug cu rtsa brgyad bzhugs/ gtsug lag khang 'bring du bgyi ba ni dgu bcu rtsa lnga lags/ gtsug lag khang chung ngur bgyi ba ni brgya bzhi bcu rtsa brgyad bzhugs/sgo sgo'i mchod pa'i lha khang chung ngu dang / yon bdag ma mchis pa'i lha khang dang /mchod rten gyi sku mkhar gyi nang dang / slad rol gyi tshar yan chad na sum stong drug brgya brgyad cu rtsa brgyad bzhugs/ 'u then na dge 'dun sgos 'tsho yan chad byi ba lo la brtsis na khri tsam zhig bzhugs/ mdo lo dang me skar phyogs na gtsug lag khang chen po ni bzhi zhig bzhugs/sgo sgo'i lha khang dang yon bdag ma mchis pa'i lha khang chung ngu ni brgya lhag tsam bzhugs/ dge 'dun nyi shu tsam bzhugs/ kam shed dang pho nya dang / be+e rga 'dra dang / o rgu yan chad ji la man chad sku mkhar gyi nang dang / slad rol gyi mtshar yan chad na gtsug lag khang chen po nyi shu rtsa gsum bzhugs/gtsug lag khang 'bring ni nyi shu rtsa gcig bzhugs/ gtsug lag khang chung ngu nyi shu rtsa gsum tsam bzhugs/ sgo sgo'i mchod pa'i lha khang chung ngu dang chod rten chung ngu ni spyir brgyad brgya sum cu rtsa dgu bzhugs/ dge 'dun sde gnyis las rkyen pa dang / sgo 'tsho yan chad spyir bzhi brgya sum cu rtsa brgyad bzhugs/gyil kyang man chad kong sheng dang / dur+ya yan chad sku mkhar gyi nang dang / slad rol gyi tshar yan chad na gtsug lag khang chen po bco lnga tsam bzhugs/ sgo sgo'i lha khang chung ngu dang / yon bdag ma mchis pa'i lha khang chung ngu dang / mchod rten yan chad bzhugs/dge 'dun sde gnyis las rkyen pa dang / sgo 'tsho yan chad spyir dgu brgya drug cu rtsa gsum bzhugs/ rgyal po sa nu'i tsha po rgyal po bi dza ya saM b+ha ba zhes bgyi ba'i tshe/ thog ma li yul du chos byung ste brtsis na khyi lo'i shol bor ba'i ston zla tha chungs yan chad dgung lo stong nyis brgya lnga bcu rtsa drug tsam lags/'phags pa zla ba'i snying pos zhus pa dang / lha mo dri ma med pa'i 'od kyis zhus pa dang / 'phags pa dgra bcom pa dge 'dun 'phel gyis lung bstan pa rnams dang mthun par li'i yul dang / der li rje'i rgyal po rnams kyis 'phags pa rnams spyan drangs nas/sangs rgyas kyi bstan pa dang / de'i gzhi gtsug lag khang dang / lha khang dang / mchod rten rnams ji ltar bzhengs pa dang / dge 'dun sde gnyis ji ltar spel ba'i tshul rgyas par bstan pa li yul lung bstan pa zhes bya ba rdzogs so// //