CLOSE WINDOW

D4199
བོད་ཡིག

/[ ]@##/ /rgya gar skad du/ s+tha bI ro pa ni man+t+ra NaM/ bod skad du/ gnas brtan spyan drang ba/ thams cad mkhyen pa la phyag 'tshal lo/ /btsun pa rnams dgongs su gsol/dgongs nas kyang / shel dang / nor bu dang / dngul dang / ku mu ta dang / kha ba'i phung po dang / zla ba'i 'od zer dang / ston gyi chu dang / nam thang ba dang / pad+ma'i rtsa lag ltar dri ma med par mdzod la/ rlung gi stobs kyis shing gi lcug phran bskyod pa dang / smig rgyu dang / sgyu ma dang / rmi lam dang / glog dang / rta'i shing rta'i rdul dang / ba glang gi phru gu'i rna mchog dang / sbrul gyi lce dang / zil pa dang / rgya mtsho bskyod pa'i rlabs ltar g.yo ba'i yid/ skad cig re re la yang mi sdod par 'gro ba rtse gcig pa'i ting nge 'dzin gyi stobs kyis yud tsam zhig rgyu ba nang du dgag tu gsol/smras pa/ ri gzar 'bab pa'i dba' rlabs gyur pas kyang / /gang gi dba' rlabs 'gyur la bsgrun med par/ /'jig pa thogs med g.yo ba'i yid de ni/ /yud tsam rtse gcig mdzod cig btsun pa rnams/ /lha yi bu mo yi chad shugs phyung skad cig zim mar byas pa'i mig /ring zhing rdzir ldan bkra la 'od 'tsher mig chags lta ba'i g.yo ba yis/ /gang gi thugs ni skye rgyun gcod pa las 'khrungs g.yos par ma gyur pa/ bdud kyi dpung 'joms mkhas gcig thams cad mkhyen pa de la phyag mdzod cig /skye ldan gang zhig bsten na dud 'gro'i skye gnas sems can dmyal zhi dang //yi dgas 'jig rten gnas su 'gro bar mi 'gyur sdug bsngal 'jig byed pa/ /'khor bdag na 'gro ba chen po rnams kyi grogs gyur 'phags gcig po/ /zhi bde 'gro de'i sgor gzhol chos de la ni gus pas brten par mdzod/ /zhi ba'i bdag nyid gang zhig bde gshegs gsung rab mthar phyin 'byung smra zhing //gang la gus par cung zad tsam zhig byin yang sbyin pa 'phel 'gyur la/ ye shes snang bas mun pa zad byas dge slong dge 'dun de la ni/ /nyon mongs gcad pa'i ched du thams cad kyis kyang gus par phyag mdzod cig /lcang lo chun po'i skra mang mgo la thogs shing dpung mgo gnyis g.yogs la/ /rang gi 'od zer phyogs mthar 'phro ba rnams kyis 'jig rten kun 'gengs pa/ lha dbang brgya byin cod pan btud de tshangs la phyag byas gang yin de/ /byin nas dga' byas sems kyi ting 'dzin shin tu chen po'i 'bras bu yin//rdo rje 'od 'phro'i phreng bas dpung rgyan 'dres nas mdzes gyur cing / /lha la bka' stsol dbang po mtho ris skyong ba gang yin pa/ /de dag dge ba dag 'byung rnam smin 'gyur dus nyams dga' zhing / /mngon par 'dod pa'i 'bras bu phun sum tshogs pa'i rgyu rnams yin/ /kha nas rgyags 'gyur dri zhim 'byung zhing mig gi mtha' dmar la//dbugs 'byung do shal g.yos pas nu ma 'bur la 'drud byed pa/ /sdu gu lhan cig nor bdag dga' tshal 'dug pa gang yin pa/ /de yang 'gro ba nyams dga' sbyin pa'i bdag nyid chen po yin/ /'brug sgra sgrogs shing sprin rnams chu ni kun du len byed pa/ / rlabs 'byung dus na nor bu byi ru dung dang nya phyis 'byung / /rin chen gnas nang chu lha nyid kyi 'byor pas gang bsrung ba/ /der yang rgyu ni sbyin pa mchog ces thub pas bka' stsal to/ /gang yang 'od zer rnams kyis mkha' la skar ma'i 'khor lo zil mnan cing / /ku mu ta yi rdzing yangs rnams su dpal ni rab tu rnam phye nas//glang po'i mche ba'i dpal dang ldan zhing mtshan mo shin tu rab mdzes pa/ /de yang nges par sbyin pa nyid kyi 'bras bu ro bro mang po yin/ /ri rab rtse la shing rtas lam kha 'dug pa'i rin chen rdo gcog cing / /rta yi rkang lag rnams kyis dgu tshigs chu bo'i rlabs ni gcod byed la/ / mun pa bsal phyir nyi mas skar ma zil mnan lham me gang yin pa/ /de rgyu yid kyi ting nge 'dzin gyis bskyed pa'i sbyin par thub pas gsungs/ /rgyal mtshan rtse btags rin chen 'od zer snang bas nam mkha' dmar gyur cing / /rta rmig 'dor bas mkha' la sprin gyi phreng ba dag kyang 'dral byed la//rnga yab dkar pos g.yabs shing 'khor los sgyur ba song ba gang yin pa/ /'dod pa'i 'bras bu de yang sbyin pas bsgrubs zhes thub pas bka' stsal to/ /gser gyi pad+ma'i rdul gyi bye mas dmar bris mtshor ni khrus byas te/ /de ni nags 'dab bung ba sgra 'byin rnams su nyal ba'i bde rnyed nas//rig 'dzin chung ma lhan cig 'jigs med mkha' las 'gro ba gang yin pa/ /de yang ser sna 'jil zhing skyon med dga' ba'i sbyin pa'i gzi brjid yin/ /ma la ya yi ri rtser tsan+dan grib mas bsil ba yangs pa dang / /'bigs byed ri dang gangs dang lhun po'i ri dang man da ra ba'i ri bo la//grub pa'i tshogs chen chung ma lhan cig 'jigs bral dga' ba gang yin pa/ /'dod pa'i 'bras bu tshe 'di'i snying po 'byor pa de yang gtong bas yin/ /bud med rkang gdub 'khrol bas 'grogs nas 'phur ba'i [(]phu [,]phug [)]ron gnas pa yin/ /khang pa mthon po rnams dang 'bigs byed ri rtse 'gran pa'i ban glang dang //gdugs dang rnga yab bud med g.yog 'khor rin chen gser dang rta rnams dang / bzang mdzes de dag kun kyang sngon gyi sbyin pa'i dge ba'i rnam smin yin/ ban+du ka ltar rtsa dmar rgun chang gser snod bzang por legs blugs pa/ yongs dag a mra smin gas lta bur dri zhim ut+pal 'gying zhing ldem//na chung gshin ma nam dgos dus kyis stobs shing yams grangs mang 'drim pa/ /mchog tu dge ba de rgyu sbyin pa yin zhes blo gros dag pas gsungs/ /gser gyi phag skas rked bcings snyan smra 'jam zhing smin ma ya gcig bskyod/ /mig yangs rnar thug dkar nag 'byes la skra bkab me tog phreng dkris pa'i//na chung bzang mo brla rgyas bdag nyid legs byas rnams kyi bran ltar byed/ /tshogs bsags 'bras de sbyin pa'i che ba nyid ces zas gtsang sras pos gsungs/ /de lta lags pas bde bar gshegs pa'i gsung rab mtha' dag thugs su chud pa shin tu rgyas pa'i chu ltar gyur pa snying po dri ma med pa dang /lha'i skye bo dang klu'i gnas su gyur pa/ tshul khrims 'dren ma ma yin zhing rgya che ba'i chu dang ldan pa/ dge ba la rnam par rtog pa'i zla ba shar ba'i dbang gis/ /ting nge 'dzin sna tshogs rgyas pa'i dus kyi rlabs gyis byang chub kyi yan lag skyon med pa'i nor bu mang po kun du g.yengs pa/sems kyi 'og gzhi la 'phags pa'i lam yan lag brgyad pa'i ri bo chen po brtan pa/ 'bras bu'i bye brag thob pa gang zag chen po'i chu srin rgyu ba/ 'phags pa'i bden pa dang / yang dag par spong ba dang / rdzu 'phrul gyi rkang pa'i shing ljon pas mdzes par byas pa/dran pa nye bar gzhag pa'i ngogs dang ldan pa/ sgrib pa'i ro mi gnas pa/ sbyangs pa'i yon tan goms pa dag pa'i mu tig gi nya phyis kyi khog lus dang ldan pa/ mngon par rtogs pa'i chos nyid gting mi dpogs shing zab pa/ rgyun mi 'chad par klog pa dang kha ton byed pa'i sgra rgya cher 'byung ba/'phags pa'i dge slong gi dge 'dun gyi rgya mtsho chen po la bdag gsol ba 'tshal lo/ /'di lta ste/ srid pa'i 'gro ba gcig nas gcig tu brgyud pa dum nas dge ba'i sa bon btab pa/ bde bar gshegs pa'i bstan pa gzhal med khang gis gzhi gcig pur gyur pa/bzod pa dang des pa dang byams pa dang / tshul khrims dang thos pa dang zhi ba'i gnas/ bdag dang gzhan gyi gzhung gi don gyi de kho na ma lus par rtogs pa/ yongs su shes pas bsgoms pas dran pa nye bar gnas pa yang dag pa'i ye shes mthong bas log par lta ba'i rab rib bsal ba/legs par brjod cing shis la rgya che ba'i mig dang ldan pa skye bo bla ma la bsnyen bkur byed pa dang mngon du smra ba dang / phyag 'tshal ba la sogs pa'i tshul bzang po dang ldan zhing mdongs gsol che bas snyan pa rnams bskyed pa ston gyi zla ba nya ba'i 'od zer dag pa lta bu'i yid 'byung ba/sbyin bdag chen po che ba'i bdag nyid can ming 'di zhes bya ba 'di ni khyim bdag legs sbyin dang / bzang ldan dang / btsun mo'i 'khor gyi bla dang / mu shi la dang / tra du sa dang / go shi la dang / ta pa kar+Ni ka dang / mgon med zas sbyin dang / drag po dang / nag pa dang / nam gru la sogs pa dang / gzhan yang bcom ldan 'das la yid mngon par dad pas/ rgyal po gsal rgyal dang / tshangs pas byin dang / rgyal po 'char ka'i bu dang / gtum po rab snang la sogs pa sa'i steng la dbang ba'i sbyin pa las byung ba'i legs par spyad pa'i rjes su slob ste/lus dang / longs spyod dang / srog la sgyu ma dang / smig rgyu dang / dri za'i grong khyer dang / mgal me skor ba dang / rmi lam dang / ri'i 'bab chu ltar g.yo bar ri gnas/ stobs bcu mnga' bas gsungs pa'i tshigs su bcad pa dang / chos dang mngon pa dang / 'dul ba dang / mdo sde 'dzin cing dge ba'i las kyi 'bras bu rnam par smin pa yod do zhes bsod nams kyi sa bon skyed pa'i rgyu 'khor ba'i bde ba phun sum tshogs pa'i gzhi/skye bo ngan pas rnyed par dka' ba ser sna can gyi yid 'joms pa sgrub pa ni ston ka'i zla ba dri ma med pa ltar dang ba'i thugs mnga' ba/ srid pa'i sa bon nyon mongs pa gcod pa/sems can thams cad kyi bsam pa mkhyen pa/ grags pa 'jig rten gsum du khyab pas bdud kyi bu mo steg pa rgyun gcod pa'i rgyu/ skyabs su 'os pa/ chos ston pa/ 'gro ba la dge ba'i phyir bya dka' ba'i phrin las rnams kyis/ chos thams cad thugs su chud pas rnam par sangs rgyas pa'i sangs rgyas nyi ma'i 'od zer gyi snang ba gsal bas reg nas/pad+ma'i 'dab ma rgyas pa ltar ring zhing rdzi ma legs pa'i spyan dang ldan pa/ gnod sbyin gye bdag po'i gtsug gi nor bu chen pos zhabs kyi sor mo kun du bskor ba gser gyi mchod sdong ltar gsal ba/ sku la rdo rje dang /lcags kyu dang / pad+ma dang / nya dang / rgyal mtshan dang / gdugs dang / 'khor lo la sogs pa'i mtshan rnams kyi mtshan mnga' ba/ pad+ma'i 'byung gnas rnams la snang ba mdzad pa'i 'od kyi phreng ba bye brag med par khyab pa rgyas par 'gengs pa/ bung ba'i tshogs ltar sngo ba'i gtsug tor gyi nang nas kun du 'byung ba'i 'od kyi dra bas phyogs kyi dkyil 'khor ma lus par bkra bar byas pa/kha na ma tho ba med par zhugs pa/ 'phags pa'i bden pa ston pa/ zhi bar gzhol ba'i lam du 'dren pa/ 'jig rten sgrol ba/ mnyes gshin pa'i gnyen gcig pu/ mu stegs can ngan pa'i rgol ba rnams kyis gsung dang thugs dang dpal dang /mthu la mi gnod pa/ zas gtsang ma'i sras/ yul rnams kun la sred pa 'byung ba'i rgyun rnams skems pa'i rgyu/ /skye bo mkhas pa rnams ni sad par bya phyir shar gyur pa/ /bag la nyal gyi rab rib sel ba ye shes snang ba'i mchog /sa rnams mtha' dag snang bas phyogs rnams thams cad snang mdzad pa/ /phyag dang zhabs dang dbu ni rab tu byin zhing tshul khrims dang / /smon lam dag gis byang chub lam bzang yang dag bsgrubs gyur pa/ /srid pa'i 'gro ba'i dug gi snye ma'i steng du lhung ba'o/ /skye dgu rnams la kha na ma tho ba med pa ston par mdzad pa/srid pa rnam pa gsum 'jig pa/ bcom ldan 'das stobs bcu'i stobs dang ldan pa/ mi 'jigs pa bzhi mnga' ba/ dpa' ba dang mthu kha na ma tho ba med pa/ mtshan dang dpe byad bzang pos brgyan pas sku brjid pa/ pha rol tu phyin pa drug dang dka' ba brgya phrag du mas dam pa'i chos dkon mchog bsgrubs pa/brtsal ba tsam gyis sems can mtha' dag gi bsam pa thugs su chud pa/ thams cad mkhyen pa'i 'phags pa nyan thos kyi dge 'dun rab tu zhi ba dang / tshul khrims dang / thos pa dang / ting nge 'dzin dang / bzod pa dang /byams pa dang / sbyangs pa'i yon tan dang ldan pa/ nyon mongs pa'i rab rib dang ling tog ma lus par bsal ba/ 'khor ba'i rang bzhin rig pa dang phyogs dang phyogs kyi gtsug lag khang dang / kun dga' ra ba dang / ri dang / nags 'dab dang / khrad khrod dang / chu dang / ri sul dang /gsher sa dang / ne'u gseng dang / shing gi grib ma rnam pa sna tshogs la dgyes pa/ yul dang ljongs du ma la phan gdags par rtsol ba mdzad pa/ yang dag pa'i dran pa dang / ting nge 'dzin dang / dga' ba thob pa las ma nyams pa/ phung po lnga'i phyir skad cig yang dag par so sor rtog pa'i yid la byed pa bskyed pa/mdo dang / 'dul ba dang / chos mngon pa dang / skyes pa'i rabs dang / gleng gzhi dang / tshigs su bcad pa dang / rtogs pa brjod pa dang / de lta bu byung ba dang / gtan la dbab pa'i gtam gyis sems sbyangs pa/ rang gi lus dang / ngag dang / yid kyi 'jug pa dran pa nye bar gnas par rgyu ba/ /dbang po dang / stobs dang / byang chub kyi yan lag dang / bden pa dang / 'phags pa'i lam dang / dran pa nye bar gzhag pa sgom pa goms pas dad pa thob pa la tshe rabs gzhan dang gzhan nas bsags pa'i dge ba'i rnam par smin pas grub pa/ji ltar 'byor pas nus pa dang mthun pa'i rtsom pas tshogs bsags pa/ phan yon lnga'i rgyu sems can thams cad gnas par byed pa/ 'jig rten pha rol du bde ba thob par byed pa/ kha dog dang dri dang ro dang reg pa dang ldan pa yid du 'ong ba/ gya nom pa'i bza' ba dang / bca' ba dang / ldag pa dang / rngub pa dang / gzhibs pa la sogs pa zhal zas bsham par bya ba rnam pa sna tshogs zhal zas khyad par can gyis spyan 'dren to/ /de la thog mar bcom ldan 'das shAkya thub pa yongs su mya ngan las ma 'das pa'i tshe/ gang dag ye shes kyi mes nyon mongs pa'i bud shing thams cad ma lus par bsregs pa/gtong ba'i ngang tshul can gyis sbyin pa'i sa bon 'phel ba'i rgyur gyur pa/ phra ba gzigs pa/ mkhas pa/ de kho na la bsgoms pa 'di lta ste/ gnas brtan b+ha ra d+h+wa dza bsod snyoms len dang / 'phags pa sgra gcan zin dang / sbyin byed dang / lam bsten dang / skyed byed dang gser be'u dang /rtogs byed dang / rdo rje can gyi bu dang / 'phags pa bsrung ba'i klu dang / klu sde la sogs pa slob ma bstan pa gnas par bya ba'i phyir gnod par gyur kyang lus kyi khur khyer ba rnams dang / gzhan yang gang dag sum cu rtsa gsum pa'i skye bo la phan pa'i phyir/ gser gyi rdo leb chen po'i steng na 'dug pa'i rig sngags 'chang du ma glu len pas glang po che yur ba/bung ba'i mchus pad+ma la 'jib cing 'khod pa'i man+da ka'i rdzing gi chu dang ldan zhing yal ga gsal ba'i steng na rin po che'i me tog gi phreng ba bres pa'i shing yongs 'dus kun du mdzes par byas pa'i ri'i lhun po 'bab chu 'bab pa'i sa gzhi la 'khod pa rnams dang /yang na gang dag /gser ri'i dkyil nas bsil ba'i chu 'bab la/ /chu la zla ba'i gzugs brnyan 'byung 'gyur zhing / /zla ba'i 'od kyis ku mud kha phye ste/ /ku mud tshal na skad snyan dang pa gnas/ /ngang mo mtshe'u na sgra skad snyan pa 'byin/ /mtshe ngogs rma bya dgar bcas rgyags par gnas//rma bya rgyags sgras ri sul snyan par grags/ /ri sul yal ga lhags pas ri rtse 'khrigs/ /ri rtse stod rnams na ni sprin chags la/ /lang ling sprin gyi sman ljongs khra khro snang / /sman ljongs skyes pa'i nor bu ldum bu gsal/ /ldum bu las brul lhung ba'i me tog ldan//me tog rgyas pa'i dpag bsam shing tshal mdzes/ /mdzes pa'i lha mo gser gyi phag skad drung / /gser gyi phag skad sgras ni bya 'drogs shing / /byas 'chos shing thog rtsa las chad cing brul/ /rtsa 'phyang khu ba zags pa spos kyi dri/ /spos glang dbang po dregs brag dri rab zhim//dri rab zhim pa'i li shi ri 'khor mang / /ban glang mo rgyags drag 'gro lang long gyur/ /bung ba'i khyu yis me tog zegs gyur cing / /yal ga me tog rgyas pas gad pa dkar/ /gad pa chad pas nor bu'i ldum bu snad/ /me tog mgo lcogs bral bas rnam par bkra/ /nor bu sil ma mod pos ri gzhol spras//me tog zegs pa'i shing gi yal gar gnas pa'i bung ba dga' bas 'phur rnams dang / /zla ba'i 'od zer dkar po ngang pa lta bus nye 'khor rdo ba chag chag btab/ /lhun po mtho ba'i ri la thub pa gang dag rab tu zhi ba'i thugs kyis bzhugs/ /de dag dri med zla 'dra'i grags ldan 'di yi sbyin pa'i gnas la brten du gsol//rgya mtsho'i nye ba'i chu 'gram ri bo ma la ya'i/ /ri ngos ta mal sbal mig 'thon pa'i phreng ba can/ /sbrul mang 'khris pa'i tsan+dan shing gi nags tshal na/ /brten pa gang dag bzhugs par gyur pa de dag dang / /nyi ma'i rta yi rmig pas rdo bcag cing //mi'am ci yi bu mo phrugs kyis nyams dga' la/ /ri sul mthon po dpag bsam nags mang dang / /ri 'gab rnams na gang dag bzhugs pa dang / /shing gi me tog 'phrul pas dri zhim byas pa'i ser bu dad ldang zhing / /nags na glang po dregs pa zag pas bsgos pa'i rin chen 'khri shing khyim//khyim la chags pa med pa'i lha yis bstan pa'i bsod nams chu gling gi /gnya' shing 'dzin khri bya rgyal khyung gnas pa na gang dag bzhugs pa dang / /bal glang mos bsnyogs snang ba rtsub 'gyur tshal/ /me tog ldan zhing ser bu dad ldan pa/ /sa h+ya ri bo ngos rab yangs pa la//yang dag thugs mnga' thub pa bzhugs dgu dang / /pad+ma ut+pal rgyas pa 'byung ba'i gnas/ /nyin re nyi ma'i shing rtas rdo snad can/ /srid pa'i 'jigs bral rab tu yid 'ong ba/ /'char ba'i ri stengs gang dag bzhugs pa dang / /ri yi rtse mos sngo bsangs sprin thal sman ljongs can//ngogs ldan chu bo man da ras ni ri sul bkrus/ /glang chen myos pas bsnyogs pas sa phyogs rlog pa'i ri/ /'bigs byed rma bya rgyags gnas pa na bzhugs dgu dang / /sna tshogs 'byung khung tshon gyis kha bsgyur phug dang ldan zhing sprin kyang chags gyur la/ /ko lpags ldan pa gtsang ma'i chu yis ngogs kyi rdo ba mang po bkrus gyur cing //ngos la ba lang mjug ma mong po dag gis 'phyang zhing glog 'gyus snang byas pa/ /yongs 'dus ri rtse phrag na gcig pu sred dang bral ba gang dag bzhugs pa dang / yang / gang dag shing dang 'khri shing rnam pa mang po 'dab chags par gnas pa/ ne'u gseng 'jam la sngo ba'i steng na rma bya'i khyu gar byed cing sgra snyan pa 'byin pa/ ri dgas kyi tshogs bag yangs gnas pa'i sos bcad pa'i rtswa'i myu gu yod pa/ me tog dri zhim pos bsgom pa'i ser bu 'jam zhing bsil ba'i ngad ldang ba'i nags 'dab rnams su gnas bcas te bzhugs pa rnams dang / yang / gang dag dus su rlabs 'byung ba'i chu'i dba' rlabs kyis g.yengs pa'i na le sham dang li shi dang la ba kha'i 'bras bu sngon po mang po 'khrigs pa'i tshal dang / a ka ru'i shing khrod na gnas pa'i sbrul mgo'i gdengs ka gdengs shing 'jigs su rung ba yod pa/ glang po che dregs pa dang bcas pa'i gnas byu ru'i sdong bu bsgyel ba dang ldan zhing /nyi ma'i 'od zer gyis reg pa'i dbang gis mu tig yod pa'i nya phyis kha bye ba'i khog pas rnam par spras pa nye bar 'bul ba dang ldan pa/ nor bu mchog gi rdo las grub pa'i chung ma'i skye bo gnas shing bya'i khyu dga' ste sgra 'byin pas glu len pa lta bu yod pa'i rgya mtsho'i gling dag na/klu'i bdag po'i lus chen pos sku dkris te/ gdengs ka'i gdugs kyis nyi ma'i 'od zer bsgribs shing bsam gtan mdzad pa rnams dang / sman ljongs dag na phyogs kyi glang chen brang gis rdo ba khebs pa'i khyu 'khod cing / khyor bcas lan cig ma yin ra ror gyur pa'i gnod sbyin mo dag gnas gyur la//klu yi rgyal po mgo bo stong de kha nas me 'bar 'byung bas shing sreg cing / /gangs ri ti se la ni blo gtsang gang dag zhal ton mdzad cing bzhugs pa dang / /rgya mtsho'i rlabs kyis bshal ba'i ri bo 'gab ldan ma smad pa/ /ri bo man da ra la nyin phyed tshun chad bzhugs bzhugs shing //nyi ma phyed par gyur nas gang dag gzhan du bzhugs pa'i phyir/ /nor bu'i rtse mo bkram pa'i 'khor yug ri la brten pa dang / /gang dag 'khri shing gzhon nus rdo ba khebs gyur pa'i/ /dbang chen rtse mo yid du 'ong bar bder gnas te/ /mkha' lding shugs kyis nang du klu rnams dkrugs pa yi//rgya mtsho rin chen gnas la rnam par gzigs pa dang / /ngang pa'i tshogs can shin tu gtsang ba drag 'bab char gyi chu yis ri 'gab bkrus gyur cing / /phyogs kyi glang pos bsgyel ba'i sa la ki yis rdo ba chen po mang po khebs gyur la/ /gcan gzan dbang po ral pa 'khyil zhing gsal bas dpung pa'i phyogs 'bar nyal bas gang gyur cing //sbal mig mthon pa'i lcug mas 'khor bas grub pa ngal sos ri bo kron dzar gang gshegs dang / /gang dag mun bsal khyad par can gyi blos/ /shing ljon sna tshogs me tog rgyas gyur cing / /ri dgas rgyu bas ne'u gseng gzhon snang ba//gzi rdo nags rnams mi spong bzhugs pa dang / /yang gang dag nub kyi ba lang spyod dang / shar gyi lus 'phags po dang / byang gi sgra mi snyan dang gling gzhan dag na skyes pa'i lcug phran mdog snum zhing sngo la 'jam pa mang pos sa gzhi kun du khebs pa/ shing gi grib ma'i dkyil 'khor bsil ba dang /khri shing gis 'khor zhing ri dgas mang po gnas pa'i nags tshal de dang de dag na bzhugs pa rnams dang / yang gang dag da ra dang /gan d+ha ra dang / gu zan dang / li dang / shi ring dang / ba le dang / bri sha dang / kha che'i yul dang / rgya yul dang / grong khyer zas 'dra dang / rdo 'jog zas 'dra dang / skyes pa'i grong khyer dang / phyogs mtshams dang / kun ti ma la ba dang / srung byed dang / grong khyer dang / tsha du ka dang / tsha ta dang / b+ha ru kad tsha dang / kau shAm+bI dang / ser skya'i gnas dang / mnyan yod dang / mi thub pa dang / grong khyer me tog dang / ti ra dang / bcom rlag dang /grong khyer longs spyod dang / tsam pa ka dang rgyal po'i khab dang / dbang po'i brag phug dang / 'brog dang / ko na'i grong dang / kun dga'i grong dang / mchod rten gyi grong dang / 'khrur bcug gi grong dang / rnam par rgyal ba'i grong dang / yangs pa can dang / li khar shing 'phel ba dang /'phel byed dang / zangs kyis g.yogs pa dang / rdo snyigs 'dzin dang / ko sa la dang / an dra dang / ka ling ga dang /ba rba dang / ya ba na'i gling dang / sing ga la'i gling dang / ka la sha'i grong khyer dang / gser gyi sa dang / ha ri ke la dang / ba ro sha ka ta ha dang / na ri ke la dang / pa na sa'i gling dang / shu sa ra dang / nim+ba'i grong khyer dang / dpal gyi zhing dang / dngul chu'i gnas la sogs pa yul dang / cha byad dang / skad dang / gnas pa dang / cho ga dang /rigs dang / rus dang / tshul khrims dang / tshul khrims can du ma'i yul/ mi gnas pa'i yul gzhan dag na bzhugs pa rnams dang //gang dag sngon chad nyi zla'i 'od kyis ma phog cing / /she sha sbrul gyi lus kyi 'obs gnas ri yi drung / /de yi gtsug gi rin chen 'od kyis mun bsal ba'i/ /sa 'og tu ni ring por ma thogs gshegs gyur dang / /gang dag chu ltar sa la thogs med bye'u 'dzul mdzad pa dang / /gang dag sar gnas phyag gi rtse mos zla ba reg mdzad dang //gang dag bya ltar nam mkha' la ni shugs kyis rgyu mdzad cing / /na bza'i tha mas sprin mthar reg pas sprin ling 'jig mdzad dang / /gang dag lha dang / klu dang / grub pa dang / 'khor ba dang / tshogs rnams kyis rtag tu mchod pa'i ri 'jigs med dang bung ba'i ri dang /rgyal bu rgyal byed kyi tshal dang / shar gyi ri bo dang / nub kyi ri bo dang / shi ri kun pa ta dang / kun du so ma dang / ta ma sa'i tshal dang / bsil ba'i tshal dang / lhas sprul dang / 'jigs med pa ri dang / nags tshal chen po dang / tsher ma can gyi tshal dang / byams pa'i ri dang / chu srin byis pa bsod kyi ri dang / ri nag po dang / gnas kyi ri dang / ser skya'i ri dang / me tog gi ri dang / klu'i ri bo dang / tsan+dan gyi ri bo dang /tsher ma'i ri bo dang / lha yul babs pa dang / a sa sim+ba dang / kun dga' ston ldan dang / ri bo'i rgyal mtshan dang / gzhi bkrus dang / rang gi mchod rten dang / sA lu spungs ldan dang / pho brang 'khor dpal yon can dang / bya rgod kyi phung po dang / ri dgas kyi nags dang / ka sho dang / gtsug lag khang gser ka ni Sh+ka sha hi/ la sogs pa cho 'phrul rmad du byung ba sna tshogs dang ldan pa rnams dang / d+harma rA dzi ka mchod rten du ma dang / sangs rgyas bzhi'i gdan khri yod pa bsod nams su gyur pa'i sa phyogs rgyun mi 'chad par klog pa dang / kha ton dang / bsam gtan dang / ting nge 'dzin dang / snyoms par zhugs pa dang / tshul bzhin yid la byed pas 'jug pa dag pa'i sgra bcom pa rnams bzhugs bzhugs pa/ chos gos dang bsod snyoms dang mal cha dang /na ba'i gso sman dang / yo byad dang 'tshog chas rnams kyis legs par byas pas mtha' mtha' na chu'i gnas yod pa la nye bar spyod pas nyams dga' ba/ bde bar gshegs pa'i zhabs kyis bcags pas gtsang bar gyur pa'i sa gzhi can/ zhi ba thub pa'i skye bo gnas pa rnams na/de kho na bsgoms pa'i yid kyis ting nge 'dzin bskyed pa/ tshe'i lhag ma gnas par mdzad pa rnams dang / gang dag glog 'gyu bya gag dag gis sku lus bkra byas sprin snum 'dra gyur nas/ /bkres pa'i sdug bsngal snod gyur mda' rtse rnon po lta bu'i spu yis rab gang zhing / /bsgoms pas mig zha me stag bcas pa'i me rnams kyis ni kun nas lus bskor ba'i//yi dgas gnam du lta ba rnams la thugs rjes steng nas char gyi rgyun 'bebs dang / /rin chen bye ma'i phreng bas gya gyur dkrigs mtho la/ /dang khyu bag yangs gnas shing lang long nyal gyur cing / /chu dang nye bas chu yi zer mas bsil gyur pa//ma na ya yi mtsho gling bsam gtan mdzad dgu dang / /gang dag mi ro mang po'i sha dang khrag gi ro bro bas dga' bar gyur pa'i bya khwa'i tshogs kyis gang bar gyur pa'i sa phyogs mgo'i thod pa gas nas tshil thigs zags pa'i snum gyis mched pa'i mes tshig cing / rang gi me lces shing bcer ba bskams shing rnyings pa'i lag pa dang /rkang pa dang / so dang / skra'i dum grugs kyis gang zhing / zla ba dri ma med pa'i 'od lta bu'i keng rus kyi phung po yod la/ skabs shig tu ro langs byung nas/ a la la a la la zhes sgra 'byin cing / me stag dang bcas pa'i gad mo drag pos 'byung ba 'khrugs shing skrag par gyur pa ce spyang mi bzad pa'i kha nas du ba dang bcas pa'i me lce 'byung ba'i dur khrod chen po dag na bud med kyi ro sbos shing lto sgang nger gyur pa'i steng na 'dug cing /dga' ba'i bya rgod kyi mchu dang / sder mos lto 'brang cing lto'i nang na srin bu'i rigs rnams gnas pa/ce spyang gi stobs kyi shugs kyis drangs pa'i nang grol dri mi zhim pa'i dum bus 'khor la/ bya khwa bkres pas mig gi sha brus pa dag la gzigs shing / rtag tu mi sdug pa bsgoms te/ gang dag kha cig ro'i gnas mal dong nas ni/ /khrag dang sa chags dmar zhing rtsub pa'i skra 'khyil dang //bya yi mchu dang sder mos mig rkong brus pa yang / /mi ro bor ba'i lus la gzigs par gyur pa dang / /sgo dang srang bar la lar me 'bar me lce'i rtse mo mang pos mgo rmongs shing / /ral gri gtun dang rdo bas bsnun cing brdungs nas skye bo ku co 'don gyur la/ /gshin rje'i pho nya snying rje med pa sdod cig zer ba'i bzod glag sgras gang ba'i//sems can dmyal ba rnams su'ang srogs chags don phyir gang dag skad cig 'jug pa dang / /gzhan yang sha ri'i mi'i dug mangs glang po che 'khrug pa'i mdun logs na yal ga bregs pa'i sdong bu yod pa phyogs kyi bar nas rlung chen po langs pas 'od ma'i tshal bskyod nas 'khri shing gi dra ba dang drud pa las me byung ba'i me lces shing mchog sna tshogs tshig nas/ri dgas dang / phag rgod mchog mgyogs pa brgya phrag dag skrag cing mgo rmongs pa yod pa/ shing lo mang po lhags la shing rnyings pa can bsil ba'i grib ma sang sid med pa/nyams dga' ba'i longs spyod yod pa/ nags kyi ma he dang phag rgod kyis me tog ut+pal dang / pad+ma dang / sa ha ka ra bskyod pas chu dri zhim por gyur pa'i mtshe'u 'gram na shing la spre'u 'i khyu gnas pa nye 'khor gyi ri las chu rlabs mi drag par 'bab pas 'khor nas ne'u gseng mong pa'i sa gzhi yod pa'i 'brog dag na zhi ba'i bdag nyid can 'chag pa dang klog pa dang kha ton dang /bsam gtan la mngon par brtson pa/ gang dag bag med pa'i gnas dar la bab pa yol bar mdzad pa rnams dang / ri bo rdo leb che zhing yangs la rab tu snum pa 'dra gyur cing / /glog gi phreng bar me tog yod la 'ja' yis bkra ba'i bdag nyid can//chu bsil sprin chags rnams la chu 'bab zer phran chags pa'i rdzing ldan can/ /ser bus na bza' g.yo ba gang dag nyi ma'i gung la bzhugs pa dang / /de bzhin du rtag tu goms pa'i lam nas 'dong ba'i glang po'i khyu'i rmig rjes yod la/ /nags kyi ma he 'khrugs pa'i rwas grog mkhar chen po bshig pa'i shul gyi khung bu nas sbrul gyi lus phyed phyung ste/nags kyi rlung 'gam pa yod pa/ sa tshal stug po dang 'dam bu dang / shing ka sha stug po'i khrod na stag zung du gnas pa can/ phag rgod kyi snas rlog pa'i gla sgong gi rtsa ba 'dzings pa ral pa ltar 'dug pa yod pa shing ni tsu la'i me tog brul bas rdo ba rtsa dmar bar gyur pa yod pa/shing gi phyogs su ri dgas kyi khyu 'dam rdzab la thogs pa yod pa/ shing lo sngon po stug por skyes pa'i dri bsung mang po yod pa'i gsher ba'i chu rgyun dag tu mngon par dgyes shing dge ba'i phyogs ston pa rnams dang /rin po che'i 'od zer gyis chu'i rtsa dmar bar gyur la/ thugs bsam gtan la zhen pas dpag bsam gyi shing gi lcug ma'i rtse mos reg pa'i ri spos kyi ngad ldang gi sul na rtsol ba med pa gang dag bzhugs pa dang / gang dag seng ge bsgyings pa yod pa ri dgas rgyu ba dang ldan pa/ chu 'dus te 'bab pa yod pa g.yos pas steng gi rtse mo ldem pa'i sngags kyis skar ma'i tshogs 'phangs pa/sa'i steng na lci ba lhun po yang lcug phran la bya ba bzhin du sgrim mi dgos par zhabs kyi sor mos sa'i 'og gi rmang dang bcas pa gsal bar 'phen pa dag dang / ting nge 'dzin thob pa gang dag char pa'i chus rdol ba'i bu ga du ma nas nyi ma'i 'od zer byung ba zla ba lta bu yod cing /rmang rdo dang rtsig ngos shag shig tu gyur pa'i mtshams su ba rgya chags pa/ sbrul gsob rlung gis gang ste sgang der 'dug pa'i phreng ba rtag tu yod cing / nags kyi ri dgas kyi lces tsha sgo rdul can rtsub po bldags pas/ shing rtsa sed sed por gyur pa yod pa/rtsig rmang du srin bu go da'i tshogs ring nas gnas par gyur cing / sre mo mgo bstod de phyogs su blta bas byi ba skrag pa yod la/ nang du rtsa sngon po stug po skyes pa'i 'jag ma'i drung gi gseb na phye ma leb rgyu ba yod cing / 'ug pa mang po sgra 'byin cing glu len pa lta bu yod pa'i grong stong sus kyang ting nge 'dzin ma byas pa rnams na/ston pa'i bka' nan tan gyis bsgrub pa rnams dang / gzhan yang / gang dag g.yag gi rmig pas rdo bcag yod cing sprin ldings ldan gyur la/ /mtha' mar sA la thang shing skyes la chu bsil mi khebs 'bab yod cing / /bsam gtan zhen pa'i blos ni kha ba bab pas chos gos lci zhing zag gyur kyang //gangs ri dag gi ltong na 'gro ba shing gi drung du bzhugs par dgyes pa dang / /nang na chu srin 'khrugs te g.yos pas nya rnams kun 'byer zhing / /skam pas nyam chung gyur pa'i sprin btung kha yis chu 'thungs la/ /gshong du 'khyil bar sbrul dbugs phyung bas rba rlabs rgyun 'chad pa'i//rgya mtsho la yang mtshan mo brtan pa gang dag 'chag mdzad pa/ /snod gyur bdag nyid thugs ldan gtsang ma'i lhung bzed phyag bsnams shing / /bsod nams ldan pa'i sku lus na bza' chos gos rab g.yo ba/ /de dag sang gi gdugs ni nam gyi gung du phyin pa na//gaN+DI brdungs pa'i sgra snyan skad gsang grags par gyur pa'i tshe/ /bstan bcos sna tshogs kyi de kho na goms pa'i chu blugs pas mi shes pa'i sems kyi dri ma bkrus pa'i mkhas pa'i tshogs 'dus pa/ nyi ma shin tu mang po nas 'dris pa'i srid pa'i spros pa bcad pa/ bde bar gshegs pa'i gsung rab rin po che'i sgrom du gyur pa/dge ba'i tshogs bdud rtsi'i btung ba'i gzhi bro ba/ ye shes kyi gser ma gtogs pa brdar ba'i brdar rdo sngon por gyur pa/ legs par spyad pa stong gi tshogs bsags pas grags pa rgya che ba dang ldan pa/ sbyin bdag chen po bdag nyid can ston gyi nam thang lta bu'i yid dang ldan pa ming 'di zhes bya ba 'di'i gan du/ma he'i rwa ltar sngo zhing dri med mkha' las 'phur/ /gzi brjid kyis ni nyi ma'i 'od zer stong 'thor zhing / /mngon du phyogs nas 'ong ba'i sprin ni dral nas su/ /skye bo phan phyir thub rnams song 'dir gshegs su gsol/ /rgyun mi 'chad par ting nge 'dzin dang /klog pa dang / 'chag pa dang / skye bo bla ma la brten par mngon du dga' ba'i blo gros dang ldan pa/mya ngan las 'das pa'i lam gyi rjes su mthun pa/ kha na ma thob med pa'i rig pa gsum rab tu sgrub pa/ nyon mongs pa las grol bar 'dod pa'i dge slong gang dag 'di na gnas pa 'dul ba'i cho ga la goms pa/lus dang ngag dang yid kyi 'jug pa zhi ba dang ldan pa de dag kyang ma lus par ci bder do mod kyi mtshan mo zad par mdzod la/ 'di nyid du gnas par mdzod cig /thub pa'i sras mo shes rab zhi dang dul bas brgyan pa'i dge slong ma/ tha dad gling dang klu dang nags dang ri dgas spros pa'i bsam bral zhing / /'dod chags zhe sdang gti mug dri bral zhi 'os 'gro ba'i ma lta bu/ /de dag dgyes par mdzod la sbyin bdag phan par bzhed pas sang 'dir spyon/ /phyag na rdo rje la sogs pa dang gnod sbyin gtso bo dang / /grub pa rnams dang gang dag lha ma yin dang klu rnams dang //sangs rgyas la ni rab tu dad pa'i lha mchog gang yin pa/ /de dag rnams kyang sbyin bdag 'di la phan phyir sang 'dir spyon/ /lha dang / klu dang / gnod sbyin dang / rig sngags 'chang dang / grub pa dang / mi 'am ci dang / nam mkha' lding la sogs pa 'byung po rnams dang /stobs bcu mnga' ba'i bstan pa'i yon tan bsgrub pa dang ldan pa rnams kyis kyang / dam pa'i chos gnas par bya ba dang / sbyin bdag chen po bdag nyid che ba 'di/ snod bzang po la sbyar ba dang / sbyin bdag chen po 'di la grogs bgyi bas nyid kyis dge ba'i yon tan skyed pa la dge 'dun nan tan mdzod cig /rgyun mi 'chad par bsrung ba dang / bskyab pa dang / bskyang ba la brtson par mdzod cig /yang dul ba dang / tshul khrims dang / thos pas shin tu che ba'i 'phags pa'i dge slong gi dge 'dun 'dus pa la gsol ba 'tshal lo/ /lhun po las byung sbrul mgo lnga 'dra rdo rje ka na ka /nya dang gdugs dang 'khor lo dag dang lcags kyu'i mtshan mnga' ba/ /pad+ma gser gyi dpal ldan phyag sor dra ba srab mos 'brel/ /sen mo'i 'od kyis khyab pa rgyal ba'i phyag gis bskyab par shog /srid pa'i 'dod chags nyon mongs zhags pa bsal zhing sred med pa//chu yi chu gter lta bur yon tan rnams kyi gnas gcig pu/ /thub pa'i sras mchog dge 'dun bdag gis gus par spyan drangs pas/ /de ring dge ba gang bsags de ni byang chub thob gyur cig /ji srid mkha' la 'od 'phro 'od kyis gsal bas rnam par snang byed cing / /ri dgas rtags can 'od kyi ral pa'i dkyil 'khor ldan la 'char ba dang //rgya mtsho rgyas par gnas pa de srid lha dang lha min phyag byas pa'i/ /bde bar gshegs kyi bstan pa thogs pa med par gnas par shog /gnas brtan spyan drang ba slob dpon b+hA ba skan+da pa zhes bya bas mdzad pa rdzogs so/