CLOSE WINDOW

D4185
བོད་ཡིག

A tsAr+ya dpal brtsegs kyis zhus te gtan la phab pa'o//[ ]@##/ /rgya gar skad du/ tsi t+ta rat+na bi sho d+ha na kra ma nA ma le kha/ /bod skad du/ sems rin po che rnam par sbyang ba'i rim pa zhes bya ba'i spring yig /sangs rgyas dang byang chub sems dpa' thams cad la phyag 'tshal lo//sa gsum dbang phyug skye dgu chos kyis skyong mdzad pa/ /lha mi'i bla ma 'phags pa'i gang zag rnams kyi yab/ /rgol ba tshar gcod rang gi 'khor gyi dga' skyed pa/ /chos kyi rgyal po gcig pu de ni rgyal gyur cig /blo zhan bdag 'dras gzhan la skul bar mi nus shing //bskul bas phan par 'gyur ba'ang deng sang nyung mod kyi/ /'on kyang sa yi bdag po khyod kyis nongs pa yal bor nas/ /'gro mang de 'drar 'gyur 'di ma bzod khyod la bskul/ /mi skyong khyod kyi dbang phyug 'di ni sngon chad nyid kyi thugs//gdul dka' legs par btul las brnyes kyi gzhan gyis byin pa dang / /sa yi rum nas 'thon dang gnam babs lta zhig ga la lags/ /sa bdag dpal 'di mi nyams bzhed na da dung thugs thul 'tshal/ /gang zhig phan na de ni brtags te dka' yang mdzad rigs la//gang zhig mi phan de ni bsgrub par sla yang gtang ba'i rigs/ /de phyir sngon tshe thub chen rgyal bu zla bar gyur pa yis/ /rgyal po su ta sa yi bu la gdams pa smras pas kyang / /rgyal po gcig pus g.yul ngor dmag gi dpung las rgyal/ /sems tsam tshar gcad phyir ni sngar ma ma mdzad cig /mi yi bdag po 'jig rten phyi ma'ang gzigs par rigs/ /de bas dgyes kyang phan pa ma yin bsten mi rigs/ /zhes so/ /de phyir gang gis dman pa'i rigs su ltung byed pa/ /nga rgyal dgra spangs bdag gi tshig 'di sad phyir yang / /ci nas mi bdag khyod kyis gus pas gsan rigs te//legs smras byis las blangs zhes thub chen gsal bar gsungs/ /sa bdag tsher ma'i shing las sbrang rtsi bzhin/ /dgra bo las kyang legs smras gzung bar bya/ /gser gyi ri las dug gi chu rgyun bzhin/ /yid 'ong skye bo'i tshig ngan spang 'tshal lo//zhes so/ /gang zhig ma btul mnar med sogs/ /sdug bsngal bzod dkar skyed byed cing / /de nyid btul bas lha mi dang / /'jig rten min pa'i bde ba'ang 'thob/ /rab tu mthu ldan sems 'di ni/ /mkhas pa su zhig 'dul mi byed/ /'dir sems ni rang bzhin gyis 'od gsal ba rtag tu rnam par mi rtog pa'i rang bzhin yin mod kyi/lus dang ngag bran lta bu dang bcas pa glo bur gyi nyon mongs pa dang nye ba'i nyon mongs pa dag gis dkrugs pa ste/ de'i phyir 'di dag rnam par sbyangs te nor bu chu shel gyi 'od ltar rab tu 'od gsal ba'i rang bzhin dkrug ma dang bral ba bskyed de//'di tsam ni mi gnas pa'i mya ngan las 'das pa'o/ /de la 'dir bsdu na sems de dkrugs pas rtog pa can du byed cing / /lus dang ngag bran ltar 'khol ba ni rnam pa bzhi ste/ thams cad kyi rgyu rnam par rtog pa mang ba dang /'dod chags dang / zhe sdang dang / /gti mug shas che ba'o/ /de la gang rnam par rtog pa mang pa des ni rlung gi ting nge 'dzin la dmigs pas de spang bar bya ste/ bgrang dang rjes 'gro 'jog pa dang / rtog pa dang ni bsgyur pa dang / /yongs dag rnam pa drug tu 'dod/ /de ni bgrang ba dang //rjes su 'gro ba dang / 'jog pa dang / nye bar rtog pa dang / sgyur ba dang / yongs su dag pa ste rgyu drug dang ldan na yongs su rdzogs pa yin no/ /de la bgrang ba zhes bya ba ni/ /dbugs rngub pa dang dbugs 'byung ba dag la sems gtad nas mngon par 'du bya ba med par lus dang sems rnal du bzhag ste dran pa tsam gyis gcig dang gnyis nas bcu'i bar du bgrang bar byed pa'o//sems mngon par bsdus pa dang rnam par g.yeng bar dogs pas ha cang mang ba dang nyung ngur ni ma yin no/ /de la skyon ni gsum yod de/ gal te gcig la gnyis su brtsis na lhag par bgrang ba'i skyon yod do//gal te gnyis la gcig tu 'dzin na ma tshang bar bgrang ba'i skyon no/ /gal te dbugs rngub pa la dbugs 'byin par 'dzin tam dbugs 'byin pa la dbugs rngub par 'dzin na 'chol bar 'dzin pa'i skyon no/ /de las gzhan pa ni yang dag par bgrang ba yin no//bar skabs su sems rnam par g.yengs na/ /yang mgo nas ji srid du ting nge 'dzin ma thob kyi bar du bgrang bar bya'o/ /rjes su 'gro ba zhes bya ba ni 'di dag ji srid cig tu 'byung ngam 'jug /ci 'di dag lus thams cad la khyab bdag gcig gam phyogs 'ga' zhig nas rgyu ba dag yin zhes mngon par 'du bya ba med par dbugs rngub pa dang //dbugs 'byung ba'i rjes su 'gro ba ste/ de 'jug pa na lkog ma dang / snying ga dang / lte ba dang / rked pa dang / brla dang / byin par 'jug pa'i rim gyis rkang pa gnyis kyi bar du rjes su 'gro la/'byung ba na mtho gang dang 'dom gang gi bar du 'byung ngo / /gzhan dag na re rlung gi dkyil 'khor dang rnam par 'thor byed kyi rlung gi bar du'o zhes zer te/ 'di ni de kho na nyid yid la byed pa'i phyir rigs pa yin no/ / 'jog pa zhes bya ba ni nor bu'i thag pa bzhin du sna'i rtse mo nas rkang pa'i mthe bo'i bar du gnas par lta zhing ci 'di dag phan 'dogs par byed pa zhig gam/ gnod par byed pa zhig gam/ grang ngam dro ba zhig ces rtog pa'o/ /nye bar rtog pa zhes bya ba ni 'di dag ni rlung 'ba' zhig ma yin gyi 'byung ba chen po bzhi po dag dang 'byung ba dag las mngon par grub pa'i rgyur byas pa'i gzugs dang /de dag la brten pa'i sems dang sems las byung ba rnams kyang yod do zhes phung po lnga nye bar rtog pa'o/ /sgyur ba zhes bya ba ni rlung la dmigs pa'i blo bsgyur te chos kyi mchog gi bar du blo gong nas gong du dge ba'i rtsa ba rnams la yang dag par sbyor ba'o//yongs su dag pa ni mthong ba'i lam la sogs pa la 'jug pa'o/ /gzhan dag na re sgyur ba ni dran pa nye bar gzhag pa nas rdo rje lta bu'i ting nge 'dzin gyi bar yin la/ rnam par dag pa ni zad pa shes pa la sogs pa yin no zhes zer ro//'di lta bu ni slob dpon dbyig gnyen gyi zhal snga nas ji ltar bris pa kho bos 'dir yang bris par shes par bya'o/ /de ltar rim pa drug po de dag gi las ni/ ji skad du 'phags pa sa'i snying po 'khor lo bcu pa'i mdo las gsungs pa bzhin te/ de las ni ji ltar dran pa'i dbang gis yang dag pa ji lta ba bzhin du dbugs phyi nang du rgyu ba la rtog ce na//yang dag pa ji lta ba bzhin du bgrang ba dang / rjes su 'gro ba dang / zhi gnas dang / lhag mthong dang / 'jug pa dang / yongs su dag pa la rtog go/ /de la bgrang bas ni bya ba'i las kyi dngos po rnam pa gnyis byed par 'gyur te//rten du gyur pas rnam par rtog pa dang rnam par dpyod pa gnyis thul bas/ /dbugs phyi nang du rgyu ba'i mtshan nyid 'dzin par nus pa'o/ /rjes su 'gro bas kyang bya ba'i las kyi dngos po rnam pa gnyis byed par 'gyur te/ yang dag par 'byung ba la brten cing /rnam par rtog pa dang rnam par dpyod pa dang bral ba dang / dbugs phyi nang du rgyu ba'i 'jug pa'i mtshan nyid la mkhas par 'gyur ba'o/ /zhi gnas kyis ni bya ba'i las kyi dngos po rnam pa gnyis byed par 'gyur te/ dbugs phyi nang du rgyu ba 'bri bar mngon du ston pa dang / ting nge 'dzin gyi mchog la gnas par nus pa'o//lhag mthong gis kyang bya ba'i las kyi dngos po rnam pa gnyis byed par 'gyur te/ dbugs phyi nang du rgyu ba zad par mngon du ston pa dang / sems dang sems las byung ba'i chos so sor rtog pa la gnas pa'o/ /'jug pas kyang bya ba'i las kyi dngos po rnam pa gnyis byed par 'gyur te/nye bar len pa'i phung po spong ba'i sbyor ba la mkhas pa dang / 'phags pa'i sar 'jug pa la sbyor ba'o/ /yongs su dag pas kyang bya ba'i las kyi dngos po rnam pa gnyis byed par 'gyur te/ kun nas nyon mongs pa spong ba dang / lta ba yongs su dag pa'o zhes so//de ltar dbugs thung ngu rngubs na yang dbugs thung ngu rngubs so snyam du yang dag pa ji lta ba bzhin du rab tu shes so zhes bya ba la sogs pa bcu drug kyang legs par rtogs par 'gyur ro/ /'dir rnam par rtog pa mang ba la bstan pa ni gtsor byas kyi yon tan ma lus pa 'di la brten pas na thar pa'i grong khyer gyi sgo 'byed pa ni dbugs rngub pa dang 'byung ba dran pa yin te zhes gsungs so//ji ltar zhe na rab tu gdul dga' ba'i sems zhes brjod pa de ni rlung las gud du ma dmigs pa'i phyir te/ de bas na sems zhes bya ba de ni rlung du brjod do zhes gsungs so//de ltar mi bdag khyod kyis rlung gi phra dang zab mkhyen nas/ /yun ring dus nas rnam rtog dgra yis rab tu gtses pas shin tu yang / /mnyel zhing skyo ba'i thugs ni deng nas ngal bsos rtog dgra bzlog pa dang / /lo yis ma yin gus par sbyor bas zhag gi rim pas rtog bral mdzod//de nas rim gyis yongs su dag pa'i mthar yang khyod kyi thugs gzhol na/ /sa bdag khyod gyi skye ba 'bras bcas de nas chos kyi rgyal por 'gyur/ /de yi bar du lha mi'i bde ba tshad med rnams la dgyes bzhin du/ /thugs btul mthu yis spyod pa 'di la the tshom med par mngon sum gnas//rnam par rtog pa'i gnyen po bshad zin te/ /sems kyi rtog pa sbyang ba'i rim pa'o/ /mi skyong khyod kyi thugs ni gal te bud med kyis phrogs na/ /'di ni sa yi bdag po'i mthu rtsal rab tu dman pa ste/ /gang gi g.yul chen 'jigs su rung ba gzhom pa'i thabs mkhyen na//mi gtsang kun snod mngon gyur bud med mtshan nyid mi mkhyen 'di mtshar che/ /shin tu yid 'ong tsher ma'i gnod pa'ang mi bzod lus 'di ni/ /bud med bsten pa'i rgyu las 'di dang slad pa mgo gcod sogs/ /rab tu bzod dka'i sdug bsngal 'byung 'di nyid kyis mngon sum na//'on kyang bla ma'i bka' yis 'dod chags zhi bar byed pa mdor brjod bgyi/ /chags pa can rnams kyi gnyen po ni rus gong yid la bya ba yin te/ keng rus chags can thams cad la zhes bshad pas so/ /ji ltar zhe na/ /rus pa rgya mtsho'i bar du ni//spro zhing sdud pas las dang po/ /rkang rus dang ni thod phyed bar/ /btang bas sbyang ba byas par bshad/ /smin ma'i bar du sems 'dzin pas/ /yid la byed pa rdzogs pa yin/ /zhes bshad pa'i rim pas so/ /gzhan yang byis pa rnams ni phal cher kha dog dang / dbyibs dang / reg pa 'jam pa dang / bsnyen bkur la chags te/ de dag gi gnyen por ni rnam par bsngos pa dang / rnam par dmar ba dang / rnam par tshig pa dag yid la byed pas kha dog la chags pa dag sel to/ /rnam par rnags pa dang / rnam par zos pa dang / rnam par 'thor bdag yid la byed pas ni dbyibs la chags pa sel bar byed do//rnam par dbus gzhig pa dang rus gong rgyus pas 'brel ba dag yid la byed pas ni reg bya 'jam pa la chags pa sel to/ /rnam par bam pa'i ro mi g.yo ba rkyal ba stong pa bus pa lta bu/ rdo ltar bsnyen bkur byed pa dang bral ba yid la byed pas ni rkang pa bkru ba la sogs pa'i bsnyen bkur la chags pa sel bar byed do//gzhan yang rnam par phye ste brjod na/ sngo bsangs la sogs pa'i kha dog la chags pa zhig na rnam par bsngos par yid la bya'o/ /tsan+dan dang ga bur la sogs pa'i dris byugs pa'i lus la chags pa lta na rnam par rnags par yid la bya'o//mtshan sprad pa'i reg bya la chags pa zhig na rnam par 'bus gzhig par yid la bya'o/ /dbyibs phun sum tshogs pa la chags pa lta na rnam par bam par yid la bya'o/ /rgyan gyis mdzes pa'i lus la chags pa zhig na rnam par dmar bar yid la bya'o//sha rgyas pa'i lus la chags pa zhig na rnam par zos par yid la bya'o/ /'khyud pa dang 'o byas pa la sogs pa'i rtse 'jo la chags pa'i dus na rnam par 'thor bar yid la bya'o/ /kha dog dang dbyibs phun sum tshogs pa la chags par gyur na rnam par tshig par yid la bya'o//so rnams dkar ba la chags pa'i tshe na rus gong gi yid la byed pas zhi bar 'gyur ro/ /rab tu mi bzad nags bsregs me lce'i tshogs/ /char rgyun drag pos skad cig zhi byed ltar/ /byis pa'i nags tshal thal bar byed pa yi/ /'dod chags me chen mi sdug char gyis 'joms//'jig rten gnod pa'i rtsa ba ji snyed pa/ /kun gyi phul byung 'khrig pa'i 'dod chags te/ /sa bdag 'di mkhyen 'dod las phyir ltos dang / /rab tu dgyes pa byis pas ma myong ba/ /bsam gtan bde bas lus la phan 'dogs shing / /kha na ma tho med pa myong ba'i rigs//'dod chags dang bcas pa'i sems sbyang ba'i rim pa ste/ 'dod chags kyi gnyen po bshad zin to// //lha mi'i bla mas gang du 'bad pas bkag gyur pa/ /de ni 'gro la byams dang snying rje med pa ste/ /de phyir mi dbang khyod kyis thub la gus pa dang / nyid kyi thugs kyang dam pa'i grangs su 'gyur ba'i phyir//gang la skra rtses gzung bya'i skye bo de la yang / /nyid kyi sras bzhin gces shing byams pas bskyang bar rigs/ /bshes gnyen dam pa'i lung gis goms par byas pa las/ /srin po sha za seng ge sogs kyang 'gro la byams/ / de phyir mi dbang khyod kyis thugs ni 'jam pa dang / /'gro ba bskyang las nam yang phyir ldog ma mdzad cig /legs pa'i lam ni ji snyed bstan pa dag las kyang / /gtso bor gyur pa byams dang snying rjer dam pas gsungs/ /'di ji ltar bsgom par bya zhe na/ dang por rang gi ma'am pha'am bu 'am bu mo 'am/'brel pa gnyis sam/ gang yang rung ba cig bde ba ma lus pa dang phrad par gyur cig snyam pa dang / /bdag gis de dang phrad par bya'o zhes pa dang / nus pa lta na dngos su de bsgrub pa dang / phrad pa la phrag dog med pa nyi ma 'ga' zhig gus par bsgom mo//de nas ni de bas cung zad mi gcugs pa la'o/ /rim gyis par ma la'o/ /de nas dgra bo dman pa la'o/ /de nas de'i bar ma la'o/ /de nas de dgra bo rab tu ma rungs pa la'o/ /de la ma la sogs pa dang mnyam pa thob pa na grong dang grong khyer pa la'o//de nas ni yul dang ljongs dang gling gcig dang gnyis la sogs pa nas stong spyi phud dang / stong gnyis bar ma dang / stong gsum gyi stong chen po dang / phyogs bcu'i 'jig rten gyi khams gang+gA klung gi bye ma snyed la sogs par byams pas khyab par byas te/ de nas gzhung de bzhin du sdug bsngal dang bral bar gyur cig ces pa dang /sdug bsngal dang bral ba la dga' ba dang / de dag 'jig rten las 'das pa'i lam la dgod par bya'o zhes bya ba'i rim pas snying rje dang dga' ba dang btang snyoms rnams bsgom mo/ /dang po nyid du sdug cing yid du 'ong ba'i mtshan nyid can gyi byams pa yid la ma byas par ni sdug bsngal dang bral ba'i snying rje ga la 'jug ste/de ltar rim pa gzhan yang ngo / /gnod par sems pa'i yid tsam bor bas kyang / /'khor los sgyur nyid thob par thub pas gsungs/ /byams sogs goms las 'chi med ma brnyes kyang / / tshangs pa'i 'jig rten bde ba rgya chen thob/ /de phyir mi rje khyod kyis gang spyod pa/ /tshangs pa'i gnas bzhi yis ni gnas par rigs/ /khyod kyis 'byor pa dug can zas bzhin du/ /bor nas gcig pu gzhan du gshegs 'tshal na/ /grogs bzang 'dod med dge ba de bkri'i phyir/ / thugs ni rnam par sbyang bar cis mi mdzad/ /zhe sdang dang bcas pa'i sems sbyang ba'i rim pa ste/ zhe sdang gi gnyen po bshad zin to// //rang dang gzhan dang gnyis ka las skye dang / /rgyu med 'byung zhes smra ba gang lags pa/ /'di dag log par smra ba phung khrol ba/ / legs par spyad kyang 'bras bu mi 'dod 'byin/ /de phyir khyod kyis rten cing 'brel 'byung ba/ /lta ngan sel 'joms thub pa'i man ngag mchog /bdud rtsi'i mchog 'di myur du gsol ba yis/ /dkar phyogs ma lus rgyas shing brtan por mdzod/ /rten cing 'brel par 'byung ba ji lta bu zhe na/'di lta ste ma rig pa'i rkyen gyis 'du byed/ 'du byed kyi rkyen gyis rnam par shes pa/ rnam par shes pa'i rkyen gyis ming dang gzugs/ ming dang gzugs kyi rkyen gyis skye mched drug /de'i rkyen gyis reg pa/ de'i rkyen gyis tshor ba/ de'i rkyen gyis sred pa/ de'i rkyen gyis len pa/de'i rkyen gyis srid pa/ de'i rkyen gyis skye ba/ de'i rkyen gyis rga shi dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams 'byung bar 'gyur te/ /de ltar na sdug bsngal gyi phung po chen po 'di 'ba' zhig 'byung bar 'gyur ro zhes shes rab kyi mig gis lta bar byas te rgyu med pa la sogs pa bsal lo//don 'di ni 'phags pa byang chub sems dpa'i sde snod las/ gang du ma rig skye 'gyur ba/ /nyon mongs rgyu ni tshul bzhin min/ /de yi rkyen ni 'du byed de/ /sdug bsngal bar du skye bar 'gyur//zhes pa dang / gang gis sems can dag 'gyur ba/ /rgyu gnyis dang ni rkyen gnyis te/ /gzhan las rjes su mthun sgra dang / /nang du tshul bzhin lta ba'o/ /de bzhin rgyu ni zhi gnas te/ /lhag mthong yang ni rkyen yin no/ /zhes gsungs so/ /de ltar srid pa 'byung ba'i rim pa la yid ches par byas nas/yang ma rig pa 'gags pas 'du byed 'gag pa nas sdug bsngal gyi phung po chen po 'di 'ba' zhig 'gag par 'gyur ro zhes bya ba'i bar du yid la bya'o/ /de nas rtag par ma yin pa dang / chad par ma yin pa dang / 'pho bar ma yin pa dang / de dang 'dra ba'i rgyud du 'jug pa dang /rgyu chung ngu las 'bras bu chen po 'byung ba zhes nges par bzung ste/ phyi rol yang sa bon las myu gu dang de las 'dab ma dang / /de las sdong bu dang / de las me tog dang / de las 'bras bu 'byung zhing rgyu de dag dang rkyen 'brel bar 'byung ba khams bzhi dang nam mkha' dang dus kyi khams te/rnam pa bcu gnyis po 'di dag tsam mo zhes 'byung ba dang / 'gag pa las rgyu med pa dang / mi mthun pa'i rgyu spangs te 'dir ni mdor bsdus nas rten cing 'brel bar 'byung ba yid la byas pas rig pa bskyed pa dang / ma rig pa'i ngo bo'am de las 'byung ba'i log par lta ba spang ba'o//gal te rgyas par yid la byed pa lta zhig na rang rang gi mtshan nyid dang / ming gi don dang / las tha dad pa dang / yan lag lngas yang dag par bsdus pa dang / yan lag gsum gyis yang dag par bsdus pa dang / gsum las gnyis 'byung ba dang /gnyis las bdun 'byung ba dang / bdun las gsum 'byung ba dang / dus gsum pa'i ngo bor gzhag pa dang / rkyen dang 'brel ba dag yid la bya'o/ /sa bdag rten cing 'brel 'byung mkhyen na snang bas mun pa bzhin/ /khyod kyi thugs la gnas pa'i gti mug go skabs ga la mchis//'di mkhyen srid pa'i 'khor lo phra zhing zab pa gzigs pa'i phyir/ /shes rab ye shes spyan gnyis dri med lung gi sman byugs gzigs/ /ji skad du 'phags pa klu sgrub kyi zhal snga nas kyang / /rten cing 'brel bar 'byung 'di rgyal ba yi/ /gsung gi mdzod gyi gces pa zab mo ste//gang gis 'di ni yang dag mthong ba des/ /sangs rgyas de nyid rig pa rnam mchog mthong / /zhes bstan to/ /gti mug dang bcas pa'i sems sbyang ba'i rim pa ste/ rten cing 'brel bar 'byung ba yid la byed pa bshad zin to// //mi yi bdag po gal te phra ba'i thugs kyi go skabs su//thog ma'i rtsom med dus can sdig pa'i rtsa ba'i rtog dgra 'di/ /zhen pa gnas snyam zhum pa'i rtog pa mi bzad zhugs gyur na/ /de yi gnyen por brten cing skyes pa'i dngos pos rang bzhin gzigs/ /dri med me long ngos la skyes pa'i bzhin gyi gzugs brnyan gang / /gal te yang dag gnas na rkyen la rag las mi 'gyur zhing //slar 'di rnam par 'jig 'gyur go skabs can du ga la 'gyur/ /de phyir dngos med rkyen la rag las gcig pu rnam par spang / /ji ltar gnas pa'i rang bzhin 'di yang legs par rnam dpyad na/ /rab tu phra rdul bar du 'gyur zhes dam pas dang por gsungs//gal te dngos yod de dag shes rab cis mi 'bab/ /de phyir de yang phyogs cha'i bye brag dag gis ga la gnas/ /rin chen sems kyi khyad par 'ga' zhig sna tshogs snang zhe na/ /de bzhin 'di la'ang skad cig ces bya rab phra dam pas gsungs/ /skad cig skad cig ces bya'i gang dag phra la rnam par rmongs//de yang ji ltar thog ma dbus mtha' dag tu blta mi nus/ /de'i phyir rin po che'i phreng ba las/ /skad cig ji ltar mtha' yod ltar/ /thog ma dang dbus de ltar brtag /skad cig rang bzhin gsum gyi phyir/ /'jig rten skad cig la mi gnas//zhes bstan to/ /de ltar 'di dag phyi dang nang du bcas pa gcig min zhing / /de nyid phyir na de yi rang bzhin rnam bsags du ma'ang min/ /'di dag las dben dngos po shes rab mig gis 'ga' ma dmigs/ /des na 'di dag mtha' gnyis grol bar dam pas gsal bar gsungs/ / de bzhin gcig gis gcig nyid skyes pa mngon sum 'gal mthong ste/ /rab tu phra ba'i 'bras bu rgyu ni gcig min la ltos par/ /'gro ba'i mngon sum nyid du ston pa bzhin du nges par gnas/ /de bzhin gcig gis gcig min skyed sogs thams cad gnod par bcas/ /dngos rnams thug med ma lus slar skyed 'gyur 'di bzlog dka'i phyir//yod pa 'ga' zhig skye zhes 'di ni sus kyang smra mi nus/ /gang med 'ga' zhig skye na med pa'i tha snyad su zhig 'jog /de phyir bdag las skye sogs 'di dag mkhas pas rtsa nas bton/ de ltar khyod kyi shes rab spyan gsal dri med rnam rgyas pas//rten cing 'brel 'byung mtshan nyid 'di la yun ring gzigs pa na/ /thog med sring rgyud bsags pa'i bsnyengs gnas rab tu phra ba yang / /gang na'ang gnas par 'gyur 'di gzigs min mi bdag gang gis zhum/ /de ltar ni 'phags pa mi pham pa'i zhal snga nas/ 'di la bsal bya ci yang med//bsnan par bya ba cung zad med/ /yang dag nyid la yang dag lta/ /yang dag mthong na rnam par grol/ /zhes gsungs shing / 'phags pa klu sgrub kyi zhal snga nas kyang / mthong ba'i chos la mya ngan 'das/ /bya ba byas pa'ang de nyid yin//zhes gsungs so/ /des na gang la dga' ba'am yang dag skrag nas 'di ci zhig /bskal pa bye bar bsgrubs kyang brtan gnas de ni su yis nus/ /gang zhig nam mkha' gzhom zhes 'bad pa'ang blun te rnam par ngal/ /ci'i phyir zhe na gdod nas ma skyes de la su yis dgag /de 'dra'i gnas med 'dir gnas ye shes can te rtag bde ldan//gang la rnam rtog med 'di bde zhes thub pas gsal bar gsungs/ /'di spangs lha yul 'dod pas rab tu yid 'phrog byed pa dang / /'khor los sgyur ba'i 'byor ba'ang dam pas tsher ma'i gnod 'drar gsungs/ sa bdag 'on kyang gnas 'dir shin tu dgyes par ma gyur cig /ci phyir zhe na bdag gzhan phan pa mi bzod 'byor las khyod/ /rnam par ltung ba'i sgo mo mi mkhas rnams la 'di rab spang / /kha cig sgo 'dir rab dga' 'jug la snying brtse ring du spangs/ /gzhan dag gnas 'dir 'khrul phyir las 'bras thal ba bzhin du byed//gzhan dag shin tu med las sangs rgyas yon tan bsam yas 'dod/ /'di 'dra 'di dag sgo 'dir zhugs nas rang gzhan de las nyams/ /de phyir 'di ni yan lag ldan par bags kyis bsten par bgyi/ /de ltar ni 'phags pa dri ma med par grags pas bstan pa zhes bya ba theg pa chen po'i mdo las kyang /ming yang yod dang yod ma yin par tshig gis gsungs/ /rgyu la brten te byung ba'i chos ni 'di kun te/ /'di la bdag med tshor ba po dang byed med kyang / /dge dang mi dge'i las rnams cung zad med mi 'gyur/ /zhes gsungs so//rten cing 'brel bar 'byung ba'i de bzhin nyid bsam gyis mi khyab par yid la bya'o/ /mi dbang yan lag bzhi po 'di tsam gyis/ /khyod kyi thugs kyi dri ma rags pa rnams/ /nges par bsal 'gyur 'di la dgos pa mdzad/ /de las gong du khyad par rnam bzhed na/ /dkyil 'khor byug pa sngon du 'gro ba yis//skye ba gzhan du 'byor pa mi zad pa/ /da lta'i bzhed pa nyid kyi phyag gnas ltar/ /slu ba med par bdag gis brjod par bgyi/ /oM badzra re khe hUM/ gtsang spyod pa yi lci ba ni/ /chu dang 'o ma zho dang mar/ /thams cad de las byung ba dag /snod gtsang bskol te chu rnams dbo//tshigs ma dor te dbus kyi chas/ /dbyibs ci dga' ba'i maN+Dal ni/ /sa bdag khru gang yan chad par/ /gsang sngags don la gzhol bar byug /de nas de ni gus pa yis/ rgyal ba sras gsum bcas la 'bul/ /mjug tu thub pas gsungs pa yi/ /tshigs bcad 'di dag brjod par bya//ba yi lci ba chur bcas sbyin pa ste/ /legs par byug par byed pa tshul khrims so/ /srin bu grog sbur bsal ba bzod pa yin/ /bya ba la ni nyer zhugs brtson 'grus te/ /de yi skad cig sems ni gcig byed pa/ /bsam gtan shes rab ri mo gsal ba'o//thub pa'i maN+Dal byas pa yis/ /pha rol phyin pa 'di drug 'thob/ /gser gyi mdog tu 'gyur ba ste/ /nad rnams kun dang bral bar 'gyur/ /zla ba ltar mdzes gsal ba yi/ /lha dang mi ni dam par skye/ /nor dang gser ni 'byor ba yi/ /rgyal po'i rigs su skye bar 'gyur//bde bar gshegs pa'i pho brang mchog /maN+Dal gang zhig byed pa dang / /sdig pa thams cad mi byed cing / /dge ba phun sum tshogs pa dang / /rang gi sems ni yongs 'dul ba/ /'di dag sangs rgyas rnams kyis bsngags/ /zhes so/ /de nas dge ba de nyid rgyu mtshan du byas la/dkon mchog gsum la phyag 'tshal zhing / /dkon mchog gsum la skyabs su mchi/ /bdag ni khyed la rnams kun dbul/ /sdig pa thams cad bshags par bgyi/ /'gro ba'i dge la rjes yi rang / /dam chos 'khor lo mchog bskor dang / /yongs su mya ngan 'das spang phyir//bdag ni khyod la gsol ba 'debs/ /'di sogs dge ba'i las rnams ni/ /byang chub bla na med par bsngo/ /'gro ba sdug bsngal khur chen bor ba'i phyir/ /bdag gi sems ni byang chub phyir bskyed de/ /ma bsgral bsgral dang ma grol dgrol ba dang / / dbugs ma phyin pa bdag gis dbugs dbyung ste/ /mya ngan ma 'das bdag gis mya ngan bzla/ /de ltar byang chub kyi sems rab tu brtan par bskyed la ji ltar 'dod pa'i bya ba dge ba la 'jug par bya'o/ /mi dbang khyod thugs sbyangs pas dge ba rgya chen dag la dgyes bskyed na/ / sbyin dang tshul khrims bzod pa brtson 'grus bsam gtan shes rab pha rol phyin/ /rgya chen spel mdzad der yang khyod kyi thugs ni rma med 'bad 'tshal te/ /sems ma bsrungs pa'i skyes bu'i dge la 'jug pa bu chu'i rgyun khrus ltar/ /phan dang 'brel ba'i gnod pa'ang rab tu ma rungs gyur pa'i gnas skabs mchis//gnas 'di mkhas pas gzigs nas mthu ldan nyid kyi thugs ni bsrung 'tshal lo/ /de ltar bsnyengs dang bral na mang du gsol ci 'tshal/ /phan pa'i man ngag don po 'di lags te/ /khyod kyi thugs thul mdzod cig bcom ldan gyis//sems ni chos kyi rtsa ba lags zhes gsungs/ /tshigs su bcad pa gcig pu 'di 'phags pa klu sgrub kyi zhal snga nas mkhar gyi rgyal po bde spyod la gdams pa bshes pa'i spring yig las bdag gis drangs pa'o/ /mi skyong khyod ni gal te gsang ba'i lam la dgyes pa na/ / lam der rab tu rtogs dka' sems la rma 'byin tshig 'phros te/ /bud med 'khyud sogs tshul khrims ma yin yid la byed par ldan/ /kha cig mngon sum 'khrig dang drag shul spyod la 'jug pa ste/ /mi dbang thugs la gnod na thub pa'i bka' yang dug dang 'dra/ /de phyir khyod kyis gsang ba'i lam du zhugs pa'i rgyu mtshan las//khyod thugs 'dod chags la sogs dri mas gos pa 'di ni spangs/ /gang gzhan skye bo de 'dra bzlog par khyod kyis rnam bsgrub rigs/ /don 'di ni/ zhu ba'i 'og tu za ba la/ /mar gyi nying khu ka ra dang / /sbrang rtsi dag ni bdud rtsi bzhin//ma zhu za ba dug tu 'gyur/ /de bzhin rab rgyas bdud rtsi mchog /dgongs pa'i tshig la mi mkhas shing / /byis pa'i blo dang ldan rnams la/ /mi bzad pa yi dug tu 'gyur/ /zhes gsungs te/ 'di ni 'phags pa yongs su mya ngan las 'das pa chen po zhes bya ba theg pa chen po'i mdo las gsungs pa bdag gis 'dir bris pa'o//rin chen sems 'di rnam par sbyang ba'i phyir/ /thub pa'i bka' lung cung zad 'dir bris pas/ /sa yi bdag po thugs ni dri med pa/ /ston ka'i zla rgyas lta bur gsal gyur cig /'gro ba'ang rim gyis sems ni rnam sbyangs te/ /mu tig dri med 'bru ltar rnam dag shog /sems rin po che rnam par sbyang ba'i rim pa zhes bya ba'i spring yig slob dpon byang chub sems dpa' chen po dgra las rgyal ba gsang bas mdzad pa rdzogs so// //rgya gar gyi mkhan po A tsAr+ya du lo pa dang / lo tsA ba dge slong chos kyi shes rab kyis bsgyur cing zhus te gtan la phab pa'o/