CLOSE WINDOW

D4184
བོད་ཡིག

/ //rgya gar gyi mkhan po sarba dz+nya de ba dang / /zhu chen gyi lo tsA ba ban de dpal brtsegs rak+Shi tas bsgyur cing zhus te gtan la phab pa'o//[ ]@##/ /rgya gar skad du/ ma hA rA dza ka ni ska le kha/ /bod skad du/rgyal po chen po ka nis ka la springs pa'i spring yig /de bzhin gshegs pa thams cad la phyag 'tshal lo/ /bgrod par bgyi 'os khyod lags na/ /bkug kyang ma mchis gang lags de/ /ma gus ma lags brnyas ma lags/ /rga dang nad kyi bar chad bgyis//bdag ni sems can thams cad dang / /'dra bar khyod la brtse mod kyis/ /khyod kyi yon tan gyis khyod la/ /lhag par nye mgon khyad par bgyid/ /gdams bgyi phal cher mchis mod kyi/ /thams cad gdams par sus rngo thogs/ /khyod kyi yon tan gang lags des//bdag ni spyi brtol skyes par gyur/ /bzlog pa med pa'i yon tan gyis/ /phyogs rnams kun du bsgos pas ni/ /mi mchog rnams kyang thugs thub par/ /mdza' bshes bzhin du 'dzem pa med/ /de ltas snyan bstod nyid kyi ched/ /bdag gis gsol ba 'di gson te//bsgrub dang btang ba'i phyogs gnyis las/ /gang rigs de ni nyams su bzhes/ /dga' bar bgyid pa'i yul rnams dang / /rgya gas par bgyid pa'i lang tsho dang / /bdag nyid rang dgar spyod pa de/ /kun du don med bgyid pa'i sgo/ /phung bar byed pa de gsum spang //mkhas pas dam pa bsten pa dang / /dbang po dul dang shes rab kyi/ /stobs mthus nyams ni smad nas spyad/ /khyod gyi nyos pa'i gzhir gyur pa'i/ /cha ni gsum po de dag rnams/ /chos lugs dag dang 'dul ba yis/ /bcos nas yon tan nyid du mdzod/ / ci ste rgyal po blon po dag /dkyel che snying rje'i bdag nyid ni/ /rtag tu nyon mongs med pa yi/ /las kyis rgyal srid bya bar rung / /'jig rten 'di na blo gros kyis/ /nyam chung gyur dang mgon med pa/ /bya ba ma yin byed pa la/ /gdon mi za bar 'jug par 'gyur/ /de bas ji srid sa de las//myur du ma brgal bar du ni/ /blo mthu bskyed phyir mkhas pa dag /bsdu bar dgyes pa'i nan tan mdzod/ /chos kyi bstan bcos gdon bgyi zhing / /de yi don gyi tshul gson la/ /gsan pa'i chos rnams rnam dpyad de/ /dpyad pa la ni mkhas par mdzod/ /mya ngan gyis ni ma gdungs shing //na gzhon nad med longs pa yi/ /dngos po da ltar byung ba yi/ /blo gros la ni mi nus med/ /'dir ni skyes bu dam pa las/ /dus dus su yang nyung zad gson/ /nyung ngu bsags na'ang nges par ni/ /ring por mi thogs mang por 'gyur/ / rtag tu chu thigs re re'i rgyun/ /bar chad med par 'bab pa yis/ /gang zhig gang bar mi 'gyur ba'i/ /snod de ji lta bu zhig mchis/ /de ltar dpe gsal de lta bu/ /rgyal po tshad mar mdzad nas ni/ /dam pa'i chos ni gsan pa la/ /rtag tu dges pa nyid du mdzod//yon tan nor ni gnyer la gnyen/ /mkhas shing snying rje'i bdag nyid can/ /byas gzo phongs chos mi bgyid pa/ /bzang po khyod kyi slad du zhog /khyod kyi blun dang phongs chos can/ /skams shing byas pa mi gzo dang / /kha gsag gtum po mi bzad pa/ /yul na rang gnas su ma stsal cig /rtag tu so so'i skye bo yi/ /khyad par mkhyen par mdzod cig dang / /de yi khyad par mkhyen tsam la/ /phun sum tshogs pa rag las so/ /mi gang dka' ba spyod byed dang / /dor bar bya dka' 'dor ba dang / /bzod par dka' ba bzod byed dang / /bkur dka' nyams su len pa dang //gnas min las ni zlog byed dang / /gnas su 'jog par brtson pa dang / /de yi bsam pa mthun gus dang / /bde bar 'dod cing 'o byams pa/ /de dag rnams ni mdza' bshes te/ /gnyen 'dun grogs po'ang de dag lags/ /rang don tsam phyir 'brang ba'i mi//gzhan dag skye bo phal par bas/ /grogs po phan par 'dod pa'i tshig /mi snyan yang ni phan pa dang / /'jam dang bde ba lags pa dag /thugs la bzhag par mdzad du gsol/ /tshig snyan phan pa ma lags dang / /'jam yang bden pa ma lags pa//dam pa ma yin rnams kyi tshig /khyod kyi thugs la ma bzung shig /phan par smra ba khro yang ni/ /khyod kyis gnang chen dag tu mdzod/ /mi phan smra ba bstod bgyis kyang / /dgyes pa dag tu ma mdzad cig /rab dngas mtsho la dang pa yi/ /rgyal po dang ni chus 'jigs bzhin//dam pa rnams kyis bsnyen sla dang / /dam pa min pas bsnyen dka' mdzod/ /khyod kyis mkhas rnams tshim bgyis pas/ /'byor ba don du gnyer mi bgyi/ /yon tan dgyes phyir khyod kyis ni/ /yon tan rnams kyis mi ngoms mdzod/ /longs spyod byed dam bde ba dang //sdug bsngal phrad pa'am spyod pa'am/ /spyod lam kun du spyod pa na/ /khyod kyis dam pa bsten pa dang / /dran pa'i grogs kyis bskor ba na/ /bag yod par ni gnas 'gyur te/ /sA la'i shing la 'khri shing bzhin/ /bzang po dpal gyis 'khyud par 'gyur//khyod kyis gzhom pa bden pa dang / /khyad par zhing la sbyin pa dang / /dran dang bral bas 'dod pa dbye/ /chad pas gang du'ang gcad mi bgyid/ /log pas 'thab gcugs byed pa dang / /bkren la dman par lta ba dang / /tshul khrims ldan rnams mi dga' dang //dka' thub sdom pa 'khrul byed pa/ /bzhi po 'di dag 'dod min te/ /rtsa ba 'joms par bgyid pa lags/ /rab brtson khyod kyi yul na ni/ /de dag gtan ma mchis par mdzod/ /stobs dang ldan pas stobs chung ba/ /gnang chen gyis ni mi gnang dang //mchod 'os rnams kyis mi mchod dang / /smos 'drin kyis ni mi shes pa/ /gang yang rung la gang gis kyang / /brnyas pa med par khyod kyis mdzod/ /tha snyad rnams ni dag pa yis/ /kun la 'dra bar gzigs su gsol/ /kun gyis rang gi chos thob cing //chos kyis thams cad 'tsho bar mdzod/ /mi sdug kyang ni nyes med na/ /thams cad bde bar mdzad du gsol/ /pha yis bu la ji lta bar/ /khyod kyis 'khor la byams bgyis na/ /bu yis pha la ji lta bar/ /khyod kyis zhabs 'bring dga' bar bgyid/ /phal rnams rang bzhin bzang na ni//khyod kyi dgongs pa bzhin du 'gyur/ /phal rnams rang bzhin ngan na ni/ /khyod kyi dgongs pa bzhin mi 'gyur/ /gal te gzhung lugs bzang bzhes na/ /gong nas gong du 'phang bar 'gyur/ /ci ste ngan pa'i spyod mdzad na/ /'og nas 'og tu ltung bar 'gyur//dam pa'i las la gnas na ni/ /khyu mchog dang ni khyu lta bur/ /rjes su 'tsho ba'i skye bo'i tshogs/ /'di kun rjes su 'brang bar 'gyur/ /khyod ni gya gyu la zhugs na/ /gya gyu kho na'i rjes 'brangs pas/ /skyes dgu khyod mdzad rjes 'brang pa'i/ / skye dgu de ni nyams par 'gyur/ /de bas bdag gzhan bsrung slad du/ /thugs kyis rab tu bsgrims nas ni/ /gna' rgyal drang srong rnams kyi lugs/ /nyams pa sar par bcos su gsol/ /gna' yi rgyal po'i spyod pa las/ /gang dag bzang ba de mdzod la//mi rigs pa ni gang lags de/ /smad par mdzod la spang du gsol/ /sngon gyi bka' khrims skyon chags pa/ /gna' nas mchis kyang rgyun chod la/ /rgyal po ka ni skas mtshan pa'i/ /khrims su bca' ba gsar pa mdzod/ /lha khyod yon tan don gnyer bas/ / yon tan lha bzhin kho nar mdzod/ /lha khyod skyon rnams mkhyen pa yis/ /lha bzhin nyes med kho nar mdzod/ /zla ba mar gyi ngo bzhin du/ /nyes pa'i tshogs rnams 'grib pa dang / /zla ba yar gyi ngo bzhin du/ /rtag tu yon tan gyis brgyan mdzod/ /yab mes bzhin du bdag nyid kyis//chos kyis sa steng bskyang ba dang / /yab mes bzhin du lha gang gi /dus ston 'phel bar mdzad du gsol/ /khyod kyis mtho ris byang grol gyi/ /them skas ma mnyam mnyam pa'i phyir/ /bsod nams las byung bzo rig che/ /rtag tu lha khang dag tu sogs/ /rga dang 'chi bas bsnyengs mdzod de//chos bzhin rgyal srid dpal spyad nas/ /bgres kar dgon par gshegs su gsol/ /dam chos bstan pas 'bras mchis mdzod/ /rang byung rnams kyi rjes bslabs pas/ /ku sha'i rigs su 'khrungs khyod kyis/ /yab mes 'phags rigs nyi ma yi//gdung rgyud chos lugs ma nyams mdzod/ /skye ba can la nges par ni/ /rga dang 'chi dang na mchis na/ /ma bgres ma bsnyungs ma 'grongs zhes/ /legs smon gsol yang ci la sman/ /srid pa dag ni gang yang rung / /de nyid rgas dang 'chi ba lags/ / yongs su bsgyur bas rga ba ste/ /skad cig 'jig pa 'chi ba yi/ /ma rgas ma na ma 'chi zhes/ /smra ba dag ni smra ba na/ /de ltar 'jig rten kun 'bar na/ /yang srid med las gzhan ci yod/ /gang na mi mthun yod ma yin/ /gang du 'du byed 'jig mi 'gyur/ /gang na gcig tu bde bar gnas//gang du song na 'chi mi 'gyur/ /srid pa kun nas nyon mongs dang / /sdug bsngal 'byung ba phyir mi mkho/ /de slad des pa srid pa rnams/ /med par bsgom pa rgyas par mdzod/ /'dir ni bgyi ba 'di nyid de/ /de las gzhan pa'i bgyi mi 'tshal/ / bgyi ba de ni bgyis pa yis/ /mi bgyi ba yi tshar phyin to/ /bgrang phreng bzhin du 'khor ba ru/ /lan mang yongs su 'khor ba ni/ /lan brgya 'am yang na stong dag tu/ /'jig rten dag tu ci ma bgyis/ /'di ma bgyis slad byis pa yi/ /yang dang yang du bgyi 'tshal bas/ / thog ma med pa'i dus can 'di/ /da dung bar du ma log go/ /'chi bdag su dang mi bshes pa/ /glo bur dag tu 'bab 'gyur bas/ /sang dag bya zhes ma bzhes par/ /dam pa'i chos la bsnyur te mdzod/ /'di sang deng 'di mi bya zhes/ /bya ba mi la bzang po min/ /nam zhig khyod ni med 'gyur ba'i//sang de gdon mi za bar 'ong / /'chi bdag brtse ba med pa can/ /skyes rtsal don med gsod 'gyur ba/ /gsod pa sngon du 'ong bzhin du/ /mkhas pa su zhig bag rkyong spyod/ /de las dpag chen bzod med des/ /mda' ni mi bzad 'chor med par//de ni ji srid ma 'phangs pa/ /de srid rang gi don la 'bod/ /rnam smin 'byin pa sngon las kyis/ /khyod ni yongs su btang gyur pa/ /gsar pa'i las dang rjes 'brel zhing / /'chi bdag gis ni drangs pa na/ /dge dang sdig pa ma gtogs par/ /'gro ba thams cad phyir log nas//'ga' yang khyod rjes mi 'brang bar/ /mkhyen par mdzod la legs par spyod/ /bdag ni snying rjes zil gnon cing / /yid mi dga' ba'i rlan gyis ni/ /shin tu brlan pa'i smre sngags 'di/ /re zhig gsan par mdzad du gsol/ /'gro ba dman pa log ltung ba//mgon med nyes med phal cher ni/ /rtswa dang chu dang 'bras bu ni/ /phal pas 'tsho ba sgrub bgyid pa/ /bya dang ri dgas phyugs dag la/ /rgyal pos gsod dam gsod 'jug pa/ /ci ga rigs sam mi rigs pa/ /bde la gnas pa khyod nyid gsungs//khyod ni chen por mi khro zhing / /gnod pa bgyid la'ang bzod ces gda'/ /khyod kyi thugs rje dud 'gro la/ /kye ma su yis dgag par bgyis/ /gnod pa bgyid la bzod mdzad cing / /gnod mi bgyid pa 'gums mdzad pas//khyod la brtse dang mi brtse ba'i/ /rgyu mthun pa ni gnyis ka gda'/ /sngon chad bgyis pa'i sug las kyis/ /'di ltar 'ben du gyur pa la/ /khyod nyid gnod pa mdzad na go/ /su la skyabs su mchi ba gsungs/ /gzhan gyis gnod pa bgyis na yang / /nyid kyi phyag gis bshug 'tshal na//khyod bzhengs mngon du gnod mdzad na/ /phyogs kun mun par ma gyur tam/ /kun la srog ni phangs pa ste/ /kun la gson pa sdug pa lags/ /thams cad 'chi ba'i chos can te/ /thams cad sdug bsngal rnams kyis gdungs/ /'di ltar gang zhig mi 'tshal ba//de nyid kyis ni sdug bsngal te/ /mkhas pa su zhig mgar ba ltar/ /tshig pa la ni yang sreg bzhin/ /khyod ni srog gcod mi dgyis shing / /srog gcod dgyes las phyir log na/ /rgyal srid nyams par 'gyur ram ci/ /lugs 'di ci zhig lags pa gsungs//mtshon cha'i thabs la mkhas khyod kyis/ /g.yul ngor srol btod mthong lags na/ /gzhan du khyod la ri dgas la/ /ci slad gnod pa'i las rnams mdzad/ /ri dgas gzhon nu'i spyan mnga' khyod/ /spyan dang 'dra ba'i ri dgas rnams/ /rtabs nas rig rig lta ba las//ci yi slad du thugs mi rje/ /khyod kyi spyan dang mig 'dra'i phyir/ /khyod la dga' ba gang lags de/ /ri dgas la yang dga' bgyid na/ /khyod ni ji ltar dgyes mi mdzad/ /log par ltung dang spyan 'dra dang / /mgon med yul na gnas pa nyid/ /re re yang ni ri dgas dag /mi 'gums pa yi rgyur rung ngo / /mi rnams la ni mdzad pa bas/ /sdug bsngal lhag par brtags pa yi/ /dud 'gro rnams la ches lhag par/ /khyod kyi thugs rjes mdzad du gsol/ /khyod nyid bsrung ba'i don 'di la/ /bdag gis thal mo sbyar mi 'tshal//rgyud gzhan gsal bas gus bgyis par/ /legs par thugs tshod mnga' lags grang / /co nas bzung ste bslab sbyang ba/ /dam pa rnams kyi lugs su grags/ /de ltar lags pas rgyal po la/ /bu sdug bzhin du gsol ba lags/ /gal te bdag gis mi phan pa//gsol na bdag la chad pas khum/ /ci ste gcig tu phan gsol na/ /bdag gis gsol ba bzhin du mdzod/ /gal te mi dgyes mdzad par ma gyur na/ /bdag gis yang dang yang du gsol bar 'tshal/ /ci ste bdag tshig khyad du 'gums mdzad na/ /bka' mchid 'di ni nges par btang bar bgyi//dgyes par gyur na slar rjes mi 'gums te/ /mi dgyes gyur na dog sa gzung bar 'tshal/ /gnod bgyid nyi ma ltar rngo mi thogs pas/ /sa bdag zla ba nya ba bzhin du mdzod/ /sa bdag tsher ma'i shing las sbrang rtsi ltar/ /dgra bo las kyang legs par smras pa gzung //gser gyi ri la dug rgyu na ji bzhin du/ /yid 'ong skye bo'i tshig ngan spang 'tshal lo/ /mi mchog gal te legs par mdzad pa'i sbyor bas bsgrubs gyur te/ /pha rol gnod pa sel ba'i dpal 'di yon tan rgyan rnams kyis/ /phyug par bgyid na legs spyad brgya la chags phyir g.yo ba'i snying //mi brten pa yang rang dbang med par yun ring khyod la chags/ /slob dpon ma ti tsi tras rgyal po chen po ka nis ka la springs pa'i spring yig rdzogs so// //rgya gar gyi mkhan po bid+yA ka ra pra b+hA dang / /zhu chen gyi lo tsA ba ban de rin chen mchog gis bsgyur/