CLOSE WINDOW

D4182
བོད་ཡིག

dge slong rab gsal gzhon nu la springs pa'i phrin yig rdzogs so// //rgya gar gyi mkhan po sarba dz+nyA de ba dang / /lo tsA ba ban de dpal brtsegs kyis bsgyur cing zhus te gtan la phab pa'o/ / @##/ /rgya gar skad du/ su hr-i da le kha/ bod skad du/bshes pa'i spring yig /'jam dpal gzhon nur gyur pa la phyag 'tshal lo/ /yon tan rang bzhin dge 'os bdag gis ni/ /bde bar gshegs pa'i gsung bsnyad las byung ba'i/ /bsod nams 'dun slad 'phags pa'i dbyangs 'di dag /cung zad cig bsdebs khyod kyis gsan pa'i rigs//ji ltar bde gshegs sku gzugs shing las kyang / /bgyis pa ci 'dra'ang rung ste mkhas pas mchod/ /de bzhin bdag gi snyan ngag 'di ngan yang / /dam chos brjod la brten slad smad mi bgyi / /thub pa chen po'i bka' ni sman dgu zhig /khyod kyi thugs su lta yang chud mod kyi/ /rdo thal las bgyis dgung zla'i 'od kyis ni/ /ches dkar nyid du ci ste mi bgyid lags/ /rgyal bas sangs rgyas chos dang dge 'dun dang / /gtong dang tshul khrims lha rjes dran pa drug /rab tu bka' stsal de dag so so yi/ / yon tan tshogs kyis rjes su dran par bgyi/ /dge ba'i las lam bcu po lus dang ni/ /ngag dang yid kyis rtag tu bsten bgyi zhing / /chang rnams las ldog de bzhin dge ba yi/ /'tsho ba la yang mngon par dgyes par mdzod/ /longs spyod g.yo ba snying po med mkhyen nas//dge slong bram ze bkren dang bshes rnams la/ /sbyin pa tshul bzhin stsal bgyi pha rol du/ /sbyin las gzhan pa'i gnyen mchog ma mchis so/ /khyod kyi tshul khrims ma nyams mod mi dma'/ /ma 'dres ma sbags pa dag bsten par mdzod/ /khrims ni rgyu dang mi rgyu'i sa bzhin du//yon tan kun gyi gzhi rten lags par gsungs/ /sbyin dang tshul khrims bzod brtson bsam gtan dang / /de bzhin shes rab gzhal med pha rol phyin/ /'di dag rgyas mdzod srid pa'i rgya mtsho yi/ /pha rol phyin pa rgyal ba'i dbang po mdzod/ /gang la pha dang ma dag mchod byed pa'i//rigs de tshangs bcas slob dpon bcas pa'ang lags/ /de dag la mchod grags par 'gyur ba dang / /slad ma la yang mtho ris 'gyur ba lags/ /'tshe dang chom rkun 'khrig pa brdzun dang ni/ /chang dang dus min zas la chags pa dang / /mal stan mtho la dga' dang glu dag dang //gar dang phreng ba'i khyad par rnams spong zhing / /dgra bcom tshul khrims rjes su byed pa yi/ /yan lag brgyad po 'di dag dang ldan na/ /gso sbyong 'dod spyod lha lus yid 'ong ba/ /skyes pa bud med dag la stsol bar bgyid/ /ser sna g.yo sgyu chags dang snyom las dang //mngon pa'i nga rgyal 'dod chags zhe sdang dang / /rigs dang gzugs dang thos pa lang tsho dang / /dbang thang che bas rgyags pa dgra bzhin gzigs/ /bag yod bdud rtsi'i gnas te bag med pa/ /'chi ba'i gnas su thub pas bka' stsal to//de bas khyod kyi dge chos spel slad du/ /gus pas rtag tu bag dang bcas par mdzod/ /gang zhig sngon chad bag med gyur pa la/ /phyi nas bag dang ldan par gyur te yang / /zla ba sprin bral lta bur rnam mdzes te/ /dga' bo sor phreng mthong ldan bde byed bzhin/ / 'di ltar bzod mtshungs dka' thub ma mchis pas/ /khyod kyis khro ba'i go skabs dbye mi bgyi/ /khro ba spangs pas phyir mi ldog pa nyid/ /'thob par 'gyur bar sangs rgyas zhal gyis bzhes/ /bdag ni 'dis spyos 'dis gtag pham par byas/ /'di yis bdag gi nor phrogs gyur te zhes//khon du 'dzin pas 'khrug long rnam bskyed de/ /khon 'dzin rnam spangs bde bar gnyid kyis log /sems can chu dang sa dang rdo ba la/ /ri mo bris pa de 'drar rig par bgyi / /de'i nang nyon mongs can la dang po ni/ /mchog ste chos 'dod rnams la tha ma lags/ /rgyal bas snying la 'bab dang bden pa dang //log par smra ldan skyes bu rnams kyi ni/ /sbrang rtsi me tog mi gtsang lta bu'i tshig /rnam gsum bka' stsal de las tha ma spang / /snang nas snang ba'i mthar thug mun pa nas/ /mun pa'i mthar thug snang nas mun mthar thug /mun nas snang ba'i mthar thug gang zag ni//gzhi ste de dag rnams kyi dang por mdzod/ /mi ni a mra'i 'bras bzhin ma smin la/ /smin pa dang 'dra smin la ma smin 'dra/ /ma smin ma smin par snang smin la ni/ /smin par snang zhes bgyi ba 'drar rtogs mdzod/ /gzhan gyi chung ma mi lta mthong na yang / /na tshod mthun par ma dang bu mo dang //sring mo'i 'du shes bskyed bgyi chags gyur na/ /mi gtsang nyid du yang dag bsam par bgyi/ /g.yo ba'i sems ni thos mtshungs bu lta bur/ /gter bzhin srog dang 'dra bar bsrung bgyi ste/ /gdug pa dug dang mtshon dang dgra bo dang / /me bzhin 'dod pa'i bde la yid 'byung mdzod//'dod pa rnams ni phung khrol bskyed pa ste/ /rgyal ba'i dbang pos kim+pa'i 'bras 'drar gsungs/ /de dag spang bgyi de yi lcags sgrog gis/ /'khor ba'i btson rar 'jig rten 'di dag bcings/ /gang dag dbang po drug yul rnams la ni/ /rtag tu mi brten g.yo dang gang dag cig /g.yul ngor dgra tshogs las rgyal de dag las/ /mkhas rnams dang po dpa' rab lags par 'tshal/ /bud med gzhon nu'i lus ni logs shig tu/ /dri nga ba dang sgo dgu dod pa dang / /mi gtsang kun snod 'dra ba dgang dka' dang / /pags pas g.yogs dang rgyan yang logs shig gzigs//ji ltar mdze can srin bus nyen pa ni/ /bde ba'i don du me la kun bstan kyang / /zhi bar mi 'gyur de dang 'dra bar ni/ /'dod pa rnams la chags pa'ang mkhyen par mdzod/ /don dam gzigs par bgyi slad dngos rnams la/ /tshul bzhin yid la bgyid pa de goms mdzod//de dang 'dra bar yon tan ldan pa yi / /chos gzhan 'ga' yang mchis pa ma lags so/ /skyes bu rigs gzugs thos dang ldan rnams kyang / /shes rab tshul khrims bral ba bkur ma lags/ /de ltas gang la yon tan 'di gnyis ldan//de ni yon tan gzhan dang bral yang mchod/ /'jig rten mkhyen pa rnyed dang ma rnyed dang / /bde dang mi bde snyan dang mi snyan dang / /bstod smad ces bgyi 'jig rten chos brgyad po/ /bdag gi yid yul min par mgo snyoms mdzod/ /khyod kyis bram ze dge slong lha dang ni/ / mgron dang yab yum dag dang btsun mo dang / /'khor gyi slad du'ang sdig pa mi bgyi ste/ /dmyal ba'i rnam smin skal nod 'ga' ma mchis/ /sdig pa'i las rnams spyad pa 'ga' yang ni/ /de yi mod la mtshon bzhin mi gcod kyang / /'chi ba'i dus la bab na sdig pa yi/ /las kyi 'bras bu gang lags mngon par 'gyur//dad dang tshul khrims thos dang gtong ba dang / /dri med ngo tsha shes dang khrel yod dang / /shes rab nor bdun lags par thub pas gsungs/ /nor gzhan phal pa don ma mchis rtogs mdzod/ /rgyan po 'gyed dang 'dus la lta ba dang / /le lo sdig pa'i grogs la brten pa dang //chang dang mtshan mo rgyu ba ngan song ba/ /grags pa nyams par 'gyur ba de drug spang / /nor rnams kun gyi nang na chog shes pa/ /rab mchog lags par lha mi'i ston pas gsungs/ /kun tu chog shes mdzod cig chog mkhyen na/ /nor mi bdog kyang yang dag 'byor pa lags//des pa bdog mang ji ltar sdug bsngal ba/ /'dod pa chung rnams de lta ma lags te/ /klu mchog rnams la mgo bo ji snyed pa/ /de las byung ba'i sdug bsngal de snyed do/ /rang bzhin dgrar 'brel gshed ma lta bu dang / /khyim thab brnyas bgyid rje mo lta bu dang //chung ngu'ang rku ba chom rkun lta bu yi/ /chung ma gsum po de dag rnam par spang / /sring mo lta bur rjes mthun gang yin dang / /mdza' mo bzhin du snying la 'bab pa dang / /ma bzhin phan par 'dod dang bran mo bzhin/ /dbang gyur gang yin rigs kyi lha bzhin bkur//kha zas sman dang 'dra bar rigs pa yis/ /'dod chags zhe sdang med par bsten bgyi ste/ /rgyags phyir ma lags bsnyems pa'i phyir ma lags/ /'tshag phyir ma lags lus gnas 'ba' zhig phyir/ /rig pa'i bdag nyid nyin par mtha' dag dang / /mtshan mo thun gyi stod smad bzlas nas ni//mnal tshe'ang 'bras bu med par mi 'gyur bar/ /dran dang ldan par de dag bar du mnol/ /byams dang snying rje dag dang dga' ba dang / /btang snyoms rtag tu yang dag bsgom mdzod cig /gong ma brnyes par ma gyur de lta na'ang / /tshangs pa'i 'jig rten bde ba thob par 'gyur//'dod spyod dga' dang bde dang sdug bsngal dag /rnam par spangs pa'i bsam gtan bzhi po yis/ /tshangs dang 'od gsal dag dang dge rgyas dang / /'bras bu che lha rnams dang skal mnyam thob / /rtag dang mngon par zhen dang gnyen po med/ /yon tan gtso ldan bzhi las byung ba'i las//dge dang mi dge rnam lnga chen po ste/ /de bas dge ba spyod la brtson par bgyi/ /lan tshwa srang 'gas chu ni nyung ngu zhig /ro bskyur bgyid kyi gang+gA'i klung min ltar/ /de bzhin sdig pa'i las ni chung ngu yang / /dge ba'i rtsa ba yang la mkhyen par bgyi/ /rgod dang 'gyod dang gnod sems rmugs pa dang //gnyid dang 'dod la 'dun dang the tshom ste/ /sgrib pa lnga po 'di dag dge ba'i nor/ /'phrog pa'i chom rkun lags par mkhyen par mdzod/ /dad dang brtson 'grus dag dang dran pa dang / /ting 'dzin shes rab chos mchog lnga nyid de/ / 'di la mngon brtson mdzod cig 'di dag ni/ /stobs dbang zhes bgyi rtse mor gyur pa'ang lags/ /na rga 'chi sdug bral dang de bzhin du/ /las ni bdag gir byas las ma 'das zhes/ /de ltar yang dang yang du sems pa ni/ /de yi gnyen po'i sgo nas rgyags mi 'gyur/ / gal te mtho ris thar pa mngon bzhed na/ /yang dag lta la goms pa nyid du mdzod/ /gang zag log par lta bas legs spyad kyang / /thams cad rnam par smin pa mi bzad ldan/ /mi ni yang dag nyid du mi bde zhing / /mi rtag bdag med mi gtsang rig par bgyi/ /dran pa nye bar ma bzhag rnams kyis ni//phyin ci log bzhir lta ba phung khrol ba/ /gzugs ni bdag ma yin zhes gsungs te bdag /gzugs dang mi ldan gzugs la bdag gnas min/ /bdag la gzugs mi gnas te de bzhin du/ /phung po lhag ma bzhi yang stong rtogs bgyi/ /phung po 'dod rgyal las min dus las min//rang bzhin las min ngo bo nyid las min/ /dbang phyug las min rgyu med can min te/ /mi shes las dang sred las byung rig mdzod/ /tshul khrims brtul zhugs mchog 'dzin rang lus la/ /phyin ci log par lta dang the tshom ste/ /kun du sbyor ba 'di gsum thar pa yi/ / grong khyer sgo 'gegs lags par mkhyen par gyis/ /thar pa bdag la rag las 'di la ni/ /gzhan gyis grogs bgyir ci yang ma mchis pas/ /thos dang tshul khrims bsam gtan ldan pa yis / /bden pa rnam pa bzhi la 'bad par mdzod/ /lhag pa'i tshul khrims lhag pa'i shes rab dang //lhag pa'i sems la rtag tu bslab par bgyi/ /bslab pa brgya rtsa lnga bcu lhag cig ni/ /gsum po 'di nang yang dag 'du bar 'gyur/ /dbang phyug lus rtog dran pa bde gshegs kyis/ /bgrod pa gcig pa'i lam du nye bar bstan/ /de ni bsgrims nas mngon par bsrung bgyi ste/ / dran pa nyams pas chos kun 'jig par 'gyur/ /tshe ni gnod mang rlung gis btab pa yi/ /chu yi chu bur bas kyang mi rtag na/ /dbugs rngub dbugs 'byung gnyid kyis log pa las/ /sad khom gang lags de ni ngo mtshar che/ /lus mtha' thal ba mthar skam mthar 'drul zhing / /tha mar mi gtsang snying po ma mchis pa//rnam par 'jig dengs myags par 'gyur ba ste/ /so sor 'gyes chos can du mkhyen par mdzod/ /sa dang lhun po rgya mtsho nyi ma bdun/ /'bar bas bsregs pa'i lus can 'di dag kyang / /thal ba yang ni lus par mi 'gyur na/ /shin tu nyam chung mi lta smos ci 'tshal//de ltar 'di kun mi rtag bdag med de/ /skyabs med mgon med gnas med de slad du/ /'khor ba chu shing snying po med pa las / /mi mchog khyod kyi thugs ni dbyung bar mdzod/ /rgya mtsho gcig gnas gnya' shing bu ga dang / /rus sbal phrad pa bas kyang dud 'gro las/ /mi nyid ches thob dka' bas mi dbang gis//dam chos spyod pas de 'bras mchis par mdzod/ /gang zhig gser snod rin chen spras pa yis/ /ngan skyugs 'phyags par bgyid pa de bas ni/ /gang zhig mi ru skyes nas sdig pa dag /bgyid pa de ni ches rab blun pa lags/ /mthun par gyur pa'i yul du gnas pa dang //skyes bu dam pa la ni brten pa dang / /bdag nyid legs smon sngon yang bsod nams bgyis / /'khor lo chen po bzhi ni khyod la mnga'/ /dge ba'i bshes gnyen bsten pa tshangs par spyod/ /yongs su rdzogs pa thub pas gsungs de'i phyir/ /skyes bu dam pa bstan bgyi rgyal ba la//brten nas rab tu mang pos zhi ba thob/ /log par lta ba 'dzin dang dud 'gro dang / /yi dwags nyid dang dmyal bar skye ba dang / /rgyal ba'i bka' med pa dang mtha' 'khob tu / /kla klor skye dang glen zhing lkugs pa nyid/ /tshe ring lha nyid gang yang rung bar ni/ /skye ba zhes bgyi mi khom skyon brgyad po//de dag dang bral khom pa rnyed nas ni/ /skye ba bzlog pa'i slad du 'bad par mdzod/ /des pa 'dod pas phongs dang 'chi ba dang / /na dang rga sogs sdug bsngal du ma yi/ /'byung gnas 'khor ba la ni skyo mdzad cing / /'di yi nyes pa'i shas kyang gsan par mdzod//pha ni bu nyid ma ni chung ma nyid/ /skye bo dgrar gyur pa dag bshes nyid dang / /bzlog pa nyid du mchi bas de slad du/ /'khor ba dag na nges pa 'ga' ma mchis/ /re res rgya mtsho bzhi bas lhag pa yi/ /'o ma 'thungs te da dung so so yi/ /skye bo'i rjes su 'brang ba'i 'khor ba pas/ / de bas chos mang nyid cig btung 'tshal lo/ /re re'i bdag nyid rus pa'i phung po ni/ /lhun po mnyam pa snyed cig 'das gyur te/ /ma yi thug mtha' rgya shug tshi gu tsam/ /ri lur bgrangs kyang sa yis lang mi 'gyur/ /brgya byin 'jig rten mchod 'os gyur nas ni / /las kyi dbang gis phyir yang sa steng lhung //'khor los sgyur ba nyid du gyur nas kyang / /'khor ba dag tu yang bran nyid du 'gyur/ /mtho ris bu mo'i nu ma rked pa la/ /reg pa'i bde ba yun ring myong nas slar/ /dmyal bar 'thag gcod dbang ba'i 'khrul 'khor gyis / /reg pa shin tu mi bzad bsten 'tshal lo//rkang pa'i reg pas nem par bde bzod pa/ /lhun po'i spo la yun ring gnas nas ni/ /slar yang me mur ro myag rgyu ba yi/ /sdug bsngal mi bzad phog snyam bgyid 'tshal lo/ /mtho ris bu mos 'brongs shing dga' ba dang / /rnam par mdzes 'tshal son par rtses nas slar/ / 'dab ma ral gri 'dra tshal nags rnams kyis/ /rkang lag rna ba sna gcod 'thob par 'gyur/ /dal gyis 'bab pa lha yi bu mo ni/ /gdong mdzes gser gyi pad+ma lhan bzhugs nas/ /slar yang dmyal ba'i chu bo rab med par/ /tsha sgo bzod brlag chu tshan 'jug 'tshal lo/ /lha yul 'dod bde shin tu chen po dang //tshangs nyid chags bral bde ba thob nas slar/ /mnar med me yi bud shing gyur pa yi / /sdug bsngal rgyun mi 'chad pa bstan 'tshal lo/ /nyi ma zla ba nyid thob rang lus kyi/ /'od kyis 'jig rten mtha' dag snang byas te/ /slar yang mun nag smag tu phyin gyur nas//rang gi lag pa brkyang ba'ang mi mthong 'gyur/ /de ltar nongs par 'gyur 'tshal bsod nams ni/ /rnam gsum mar me'i snang ba rab bzhes shig /gcig pu nyi ma zla bas mi brdzi ba'i/ /mun nag mtha' yas nang du 'jug 'tshal lo/ /sems can nyes par spyad pa spyod rnams la//yang sos thig nag rab tu tsha ba dang / /bsdus 'joms ngu 'bod mnar med la sogs pa'i/ /dmyal ba rnams su rtag tu sdug bsngal 'gyur/ /kha cig til bzhin 'tshir te de bzhin gzhan/ /phye ma zhib mo bzhin du phye mar rlog /kha cig sog les 'dra ste de bzhin gzhan//sta re mi bzad so rnon rnams kyis gshags/ /de bzhin gzhan dag khro chu bzhu ba yi/ /khu ba 'bar ba 'khrigs pa ldud par bgyid/ /kha cig lcags kyi gsal shing rab 'bar ba / /tsher ma can la kun du rgyud par bgyid/ /kha cig lcags kyi mche ba ldan pa'i khyi/ / gtum pos dbad cing lag pa gnam du bsgreng / /dbang med gzhan dag lcags mchu rnon po dang / /sen mo mi bzad ldan pa'i khwa rnams 'thog /kha cig srin bu sbur ba sna tshogs dang / /sha sbrang sbrang bu mchu rings khri phrag dag /reg na mi bzad rma srol cher 'byin pas/ /za bar bgyid cing 'gre ldog smre sngags 'don//kha cig mdag me 'bar ba'i tshogs su ni/ /rgyun mi 'chad par rab bsreg kha yang bgrad / /kha cig lcags las byas pa'i zangs chen du/ /spyi'u tshugs 'bras kyi cung 'phed bzhin du 'tshed/ /sdig can dbugs 'byung 'gags pa tsam zhig gi /dus kyis bar du chod rnams dmyal ba yi/ /sdug bsngal gzhal yas thos nas rnam stong du/ /mi 'jig gang lags rdo rje'i rang bzhin no/ /dmyal ba bris pa mthong dang thos pa dang / /dran dang bklags dang gzugs su bgyis rnams kyang / /'jigs pa skye bar 'gyur na mi bzad pa'i//rnam smin nyams su myong na smos ci 'tshal/ /bde ba kun gyi nang na sred zad pa/ /bde ba'i bdag por bgyid pa ji lta bar/ /de bzhin sdug bsngal kun gyi nang na ni/ /mnar med dmyal ba'i sdug bsngal rab mi bzad/ /'di na nyin gcig mdung thung sum brgya yis/ /rab tu drag btab sdug bsngal gang lags pa//des ni dmyal ba'i sdug bsngal chung ngu la'ang / /'ol yang mi bgyid char yang mi phod do/ /de ltar sdug bsngal shin tu mi bzad lo/ /bye ba phrag brgyar nyams su myong yang ni/ /ji srid mi dge de zad ma gyur pa/ /de srid srog dang 'bral bar mi 'gyur ro//mi dge'i 'bras 'di rnams kyi sa bon ni/ /lus ngag yid kyi nyes spyad khyod kyis ni/ /ci nas de rdul tsam yang ma mchis pa/ /de ltar nyid kyi rtsal gyis 'bad par mdzod/ /dud 'gro'i skye gnas na yang gsod pa dang / /bcings dang brdeg sogs sdug bsngal sna tshogs pa//zhi 'gyur dge ba spangs pa rnams la ni/ /gcig la gcig za shin tu mi bzad pa/ /kha cig mu tig bal dang rus pa dang / /sha dang pags pa'i ched du 'chi bar 'gyur/ /dbang med gzhan dag rdog pa lag pa dang / /lcags dang lcags kyu 'debs pas btab ste bkol/ / yi dwags na yang 'dod pas phongs pa yis / /bskyed pa'i sdug bsngal rgyun chags mi 'chos pa/ /bkres skom grang dro ngal dang 'jigs pa yis/ /bskyed pa shin tu mi bzad bsten 'tshal lo/ /kha cig kha ni khab kyi mig tsam la/ /lto ba ri yi gtos tsam bkres pas nyen//mi gtsang gyi nar bor ba cung zad kyang / /'tshal ba'i mthu dang ldan pa ma lags so/ /kha cig pags rus lus shing gcer bu ste / /ta la'i yang tog bskams pa lta bu lags/ /kha cig mtshan zhing kha nas 'bar ba ste/ /zas su 'bar ba'i khar babs bye ma 'tshal//smad rigs 'ga' ni rnag dang phyi sa dang / /khrag sogs mi gtsang ba yang mi rnyed de/ /phan tshun gdong du 'tshog cing mgrin pa nas/ /lba ba byung ba smin pa'i rnag 'tshal lo/ /yi dwags rnams la sos ka'i dus su ni/ /zla ba'ang tsha la dgun ni nyi ma'ang grang / / ljon shing 'bras bu med 'gyur 'di dag gis/ /bltas pa tsam gyis klung yang bskam par 'gyur/ /bar chad med par sdug bsngal rten gyur pa/ /nyes par spyad pa'i las kyi zhags pa ni/ /sra bas bcings pa'i lus can kha cig lo/ /lnga stong dag dang khrir yang 'chi mi 'gyur/ / de ltar yi dwags rnams kyis sna tshogs pa'i/ /sdug bsngal ro gcig thob pa gang lags pa/ /de yi rgyu ni skye bo 'jungs dga' ba/ /ser sna 'phags min lags par sangs rgyas gsungs / /mtho ris na yang bde chen de dag gi /'chi 'pho'i sdug bsngal nyid ni de bas che/ /de ltar bsams nas ya rabs rnams kyis ni//zad 'gyur mtho ris slad du sred mi bgyi/ /lus kyi kha dog mi sdug 'gyur ba dang / /stan la mi dga' me tog phreng rnying dang / /gos la dri ma chags dang lus las ni/ /sngon chad med pa'i rngul 'byung zhes bgyi ba/ /mtho ris 'chi 'pho sbron bgyid 'chi ltas lnga//lha yul gnas pa'i lha rnams la 'byung ste/ /sa steng mi rnams 'chi bar 'gyur ba dag /sbron par byed pa'i 'chi ltas rnams dang 'dra/ /lha yi 'jig rten dag nas 'phos pa la/ /gal te dge ba'i lhag ma 'ga' med na/ /de nas dbang med dud 'gro yi dwags dang //dmyal bar gnas pa gang yang rung bar 'gyur/ /lha min dag na'ang rang bzhin gyis lha yi/ /dpal la sdang phyir yid kyi sdug bsngal che/ /de dag blo dang ldan yang 'gro ba yi/ /sgrib pas bden pa mthong ba ma mchis so/ /'khor ba de 'dra lags pas lha mi dang //dmyal ba yi dwags dud 'gro rnams dag tu/ /skye ba bzang po ma lags skye ba ni/ /gnod pa du ma'i snod gyur lags mkhyen mdzod/ /mgo 'am gos la glo bur me shor na/ /de dag bzlog phyir bgyi ba btang nas kyang / /yang srid med par bgyi slad 'bad 'tshal te/ /de bas ches mchog dgos pa gzhan ma mchis//tshul khrims dag dang bsam gtan shes rab kyis / /mya ngan 'das zhi dul ba dri med pa'i/ /go 'phang mi rga mi 'chi zad mi 'tshal/ /sa chu me rlung nyi zla bral thob mdzod/ /dran dang chos rab 'byed dang brtson 'grus dang / /dga' dang shin tu sbyangs dang ting 'dzin dang //btang snyoms 'di bdun byang chub yan lag ste/ /mya ngan 'das thob bgyid pa'i dge tshogs lags/ /shes rab med par bsam gtan yod min te/ /bsam gtan med par yang ni shes rab med/ /gang la de nyid yod pas srid pa yi/ /rgya mtsho gnag rjes lta bur 'tshal bar bgyi//lung ma bstan pa bcu bzhi 'jig rten na/ /nyi ma'i gnyen gyis rab gsungs gang dag lags/ /de dag rnams la bsam par mi bgyi ste/ /de yis blo ni zhi bar bgyid ma lags/ /ma rig pa las las te de las ni/ /rnam shes de las ming dang gzugs rab 'byung //de las skye mched drug ste de las ni / /reg pa kun du 'byung bar thub pas gsungs/ /reg pa las ni tshor ba kun 'byung ste/ /tshor ba'i gzhi las sred pa 'byung bar 'gyur/ /sred pas len pa bskyed par 'gyur ba ste/ /de las srid pa srid las skye ba lags//skye ba yod na mya ngan na rga dang / /'dod pas phongs dang 'chi dang 'jigs sogs kyi/ /sdug bsngal phung po shin tu che 'byung ste/ /skye ba 'gags pas 'di kun 'gag par 'gyur/ /rten cing 'brel par 'byung 'di rgyal ba yi/ /gsung gi mdzod kyi gces pa zab mo ste//gang gis 'di ni yang dag mthong ba des / /sangs rgyas de nyid rig pas rnam mchog mthong / /yang dag lta dang 'tsho dang rtsol ba dang / /dran dang ting 'dzin dag dang las mtha' dag /yang dag rtog nyid lam gyi yan lag brgyad/ /'di ni zhi bar bgyi slad bsgom par bgyi //skye 'di sdug bsngal sred pa zhes bgyi ba/ /de ni de yi kun 'byung rgya chen te/ /'di 'gog pa ni thar pa lags te de/ /'thob bgyid 'phags lam yan lag de brgyad lags/ /de ltar 'phags pa'i bden pa bzhi po dag /mthong bar bgyi slad rtag tu brtson par bgyi//pang na dpal gnas khyim pa rnams kyis kyang / /shes pas nyon mongs chu bo las brgal gyi/ /gang dag chos mngon bgyis pa de dag kyang / /gnam las babs pa ma lags lo tog bzhin/ /sa rum las 'thon ma lags de dag sngon/ /nyon mongs rag las so so'i skye bor bas//bsnyengs dang bral la mang du gsol ci 'tshal/ /phan pa'i gdams ngag don po 'di lags te/ /khyod kyis thugs dul mdzod cig bcom ldan gyis/ /sems ni chos kyi rtsa ba lags par gsungs/ /khyod la de skad gdams pa gang lags de/ /bas par dge slong gis kyang bgyi bar dka'//'di la gang zhig spyod pa'i ngo bo de'i/ /yon tan bstan pas sku tshe don yod mdzod/ /kun gyi dge ba kun la yi rang zhing / /nyid kyi legs par spyad pa rnam gsum yang / /sangs rgyas nyid thob bgyi slad yongs bsngos nas/ /de nas dge ba'i phung po 'di yis khyod//skye ba dpag tu med par lha mi yi/ /'jig rten kun gyi rnal 'byor dbang mdzad nas/ /'phags pa spyan ras gzigs dbang spyod pa yis/ /'gro ba nyam thag mang po rjes bzung ste/ /'khrungs nas na rga 'dod chags zhe sdang rnams/ /bsal te sangs rgyas zhing du bcom ldan 'das//'od dpag med dang 'dra bar 'jig rten gyi/ /mgon po sku tshe dpag tu med par mdzod/ /shes rab tshul khrims gtong 'byung grags chen dri ma med/ /lha yul nam mkha' dang ni sa steng rgyas mdzad nas/ /sa la mi dang mtho ris lha ni na chung mchog /bde dgas dga' ba nges par rab tu zhi mdzad de/ /nyon mongs nyam thag sems can tshogs kyi 'jigs skye dang / /'chi ba zhi mdzad rgyal ba'i dbang po nyid brnyes nas/ /'jig rten las 'das ming tsam zhi la mi bsnyengs pa/ /mi bgres nongs pa mi mnga'i go 'phang brnyes par mdzod//bshes pa'i spring yig slob dpon 'phags pa klu sgrub kyis/ /mdza' bo rgyal po bde spyod la bskur ba rdzogs so// //rgya gar gyi mkhan po sarba dz+nya de ba dang / zhu chen gyi lo tsA ba ban de dpal brtsegs kyis bsgyur cing zhus te gtan la phab pa'o/