CLOSE WINDOW

D4179
བོད་ཡིག

/[ ]@##/ /rgya gar skad du/ sad+harma smr-i ti u pas+thA na kA ri kA/ bod skad du/ dam pa'i chos dran pa nye bar gzhag pa'i tshig le'ur byas pa/dkon mchog gsum la phyag 'tshal lo/ /yon tan ldan zhing dbab bya phebs//yang dag ye shes snang ba ldan/ /rtag tu gzhan gyi don mdzad pa/ /'jig rten gsum gtso phyag 'tshal lo/ /gang la byed po gzhan med pa/ /lus dang ngag dang yid kyi las/ /dge dang mi dge rang byas gang / /'di yi 'bras bu 'jig rten spyod/ /de ltar/ 'jig rten mkhyen pa thugs brtses non//'jig rten gsum gtso gcig po nyid/ /'gro ba'i don du las gang dang / /'bras bu gang dag yin gsung ba/ /de ni bdag gis mdor bshad kyi/ /khyod kyis nyon la dam pa dang / /dam pa min pa'i rgyu yi las/ /bya ba dang ni spangs pa'i rigs/ / chags sdang gti mug 'jigs dang khro/ /mi gang mi ni gsod pa dang / /gzhan yang bskyed nas gsod byed pa/ /de dag nges par yang sos 'gro/ /gang gi phyir na lo stong phrag /mang por yang ni de dag tu/ /btags shing btags shing yang 'tsho bas/ /de phyir yang sos yin par bshad//pha ma dang ni grogs dang gnyen/ /bshes gnyen dang ni 'khu byed dang / /phra ma brdzun ni smra ba'i mi/ /thig nag tu ni 'gro bar 'gyur/ /gang phyir de la shing bzhin du/ /thig nag btab nas sog le dang / /'bar ba yis ni gshog byed de/ /de phyir thig nag yin par bshad//ra dang lug dang wa dag dang / /ri bong byi ba ri dgas phag /gzhan yang bskyed nas gsod byas na/ /lus can bsdus 'joms 'gro bar 'gyur/ /gang phyir bsdus nas der 'dor nas/ /yang dag sreg par byed pas na/ /de yi phyir ni bsdus 'joms te/ / de ltar ming ni don mthun drag /'dir ni lus can gang dag gis/ /lus dang ngag yid nyon mongs byed/ /gang dag lhang 'jug gzhan g.yo byed/ /mi de dag ni ngu 'bod 'gro/ /da ni drag po'i me dag gis/ /rgyun mi 'chad par sreg pas na/ /gang phyir skad ni drag 'byin pas/ /de phyir de dag ngu 'bod yin//gang gi lha dang bram ze dang / /bla ma'i rdzas 'phrog sdug bsngal byas/ /gang ngag gtams pa 'phrog byed pa/ /de dag ngu 'bod chen por 'gro/ /mes sreg pa ni drag phyir dang / /ngu 'bod pa yang che phyir dang / /lci zhing che ba nyid kyi phyir/ /de ni ngu 'bod chen po yin/ / yon tan dag gis che ba la/ /gnod pa drag po byas pa las/ /pha ma bla ma bsad byas pa/ /nges par bskal bar mnar med 'tshed/ /me drag der ni lus dag gi /rus pa dag kyang lhags par 'gyur/ /gang phyir bde ba'i skabs med pa/ /de phyir mnar med yin par bshad/ /lus can gang dag gcig la gcig /gnod par dga' bas g.yul ngor gsod/ /sdig can de dag sdug bsngal dang / /ldan pa'i ral gri'i sems can skye/ /gang phyir de yi sen mo ni/ /lcags byas 'bar rno de dag gis/ /gcig gis gcig gsod gang yin des/ /ral gri rtse mo can du bshad//byi bo byed pa shal ma ri/ /lcags kyi rtse mo rtse mo 'bar/ /sor ni bcu drug yod pa la/ /ngu zhing stobs kyis 'dzegs par 'gyur/ /bud med shin tu 'jigs 'jigs lta/ /mchu rno lus chen 'bar ba yis/ /gzhan gyi lus med 'phrog pa la/ /'jus nas za ba kho nar 'gyur//bag phab pa la gnod byed mi/ /nags tshal ral gri 'dab can du/ /gtubs byas ngu zhing bya rgod khyi/ /'ug pa bya rog za bar 'gyur/ /gang dag gzhan gyi nor 'phrog pa/ /de dag lcags kyi thu lum ni/ /tsha ba dag kyang za ba dang / /yang dang yang du zangs bskol 'thung //rtag tu rngon la dga' ba gang / /lo ni bye bar du zhing yang / /khyi ni lcags kyi mche ba can/ /mi srun shin tu dbang med za/ /chu skyes nya la sogs bsad na/ /chu bo rab med 'bar ba yi/ /zangs kyi chu bo'i chur 'gro zhing / /mi de mes kyang bsreg par 'gyur/ / gang zhig rang don tsam rmongs nas/ /chos dang mi ldan shags 'gyed nas/ /sems can dmyal bar de ngu zhing / /'khor los mngon par gzir bar 'gyur/ /'di la gang gis gzugs can la/ /gnod pa rnam pa mang byas pa/ /de dag yun ring 'khor lo dang / /ri dang tho ba 'bar bas gzir//gang zhig chos kyi stegs 'jig cing / /yang dag ma yin lam smra ba'i/ /mi de dag ni spu gri'i sos/ /gtams pa'i lam du 'gro bar 'gyur/ /son mos shig la sogs bcom na/ /de dag lus ni cher 'gyur la/ /ston brgyar yang dang yang du ni/ /brag sgor po yis 'joms par 'gyur//gang zhig brtul zhugs bzang mnos nas/ /legs par srung bar mi byed na/ /de ni nges par sha dang rus/ /'jigs pa'i me mar mur du bsreg /gang du 'tsho ba log pa ni/ /cung zad kyis kyang 'tsho byed pa/ /de ni rkyag 'jim nub gyur nas/ /srin po rnams kyis za bar 'gyur//'bru yi nang du 'khod pa yi/ /srog mthong nas ni 'joms pa gang / /de ni lcags kyi gtun shing gis/ /yang dang yang du brdung bar 'gyur/ /shin tu khro zhing gtum pa dang / /g.yo byed brdzun du smra ba dang / /gzhan la gnod byed dga' ba ni/ /gshin rje'i srin por skye bar 'gyur//sdug bsngal kun gyi sa bon ni/ /chung ngu la sogs dbye ba yis/ /lus ngag yid kyi sdig pa ste/ /de ni pha yang spang bar bya/ /sems can dmyal ba'i rabs rdzogs so// //'dod chags kyis ni rmongs pa dag /ngang pa phug ron la sogs dang / /bong bu 'dod chags can rnams kyi//skye gnas srin sogs skye gnas te/ /khong khro 'dzin pas sprul du skye/ /nga rgyal khengs sems seng ger 'gyur/ /che ba yi ni nga rgyal gyis/ /khyi dang bong bu'i skye gnas te/ /ser sna phrag dog la sogs pa'i/ /skyon gyis lus can shi nas spre'u/ / mu cor smra dang spyi brtol che/ /rang bzhin mi brtan khrar skye'o/ /gsod dang 'ching dang ser sna yis//lus can ba lang khyi la sogs/ /'gyur ro mi srun las kyis ni/ /sdom dang sdig pa mi sdug skye/ /khro dang ser sna can gyi mi/ /shi nas sha ni za byed pa/ /stag dang spre'u wa dang dom//bya rgod spyang ki la sogs skye/ /mi srun khro gnyer sbyin byed mi/ /rdzu 'phrul chen po'i klur skye'o/ /gtong zhing khro dang dregs pa yis/ /nam mkha' lding gi dbang phyug che/ /rang gi lus dang ngag yid kyis/ /sdig pa'i las ni gang byas pa/ /de ni dud 'gror skye bas na/ / de ni chung yang ma byed cig /dud 'gro'i rabs rdzogs so// //rtse log can gang sbyin pa spangs/ /bza' dang bca' ba spong byed pa/ /de dag yi dgas lus srul po/ /ro rnams za bar byed par skye/ /gang zhig byis pa rnams la 'tshe/ /sred pas 'drid par byed pa de/ /khong gi dri ma za byed pa'i//lus srul por ni skye bar 'gyur/ /mi gang spyod pa dman pa gang / /shin tu zhum dang ser sna dang / /rtag tu 'dod byed de shi nas/ /yi dgas wa ba can du skye/ /gang zhig ci yang mi ster la/ /sbyin pa zlog par byed pa de/ /yi dgas bkres pas rnyongs pa zhes/ / gsus che kha ni khab tsam 'gyur/ /gang zhig spyod dang sbyin mi byed/ /rigs kyi don du nor srung na/ /de ni yi dgas mtshan gtor spyod/ /shin tu bsngos sa der skye'o/ /gang zhig gzhan gyi nor 'phrog 'dod/ /byin nas 'gyod par byed pa de/ /shi nas mchil ma skyugs pa la/ /za bar byed pa'i yi dgas skye//gang zhig khros pas mi snyan smra/ /mtshang 'bru ba ni smra byed pa/ /las des shin tu yun ring bar/ /yi dgas kha 'bar skye bar 'gyur/ /gang zhig 'thab mo byed pa dang / /ma chags sems ni khro byed pa/ /de ni yi dgas me 'bar ma/ /srin dang sdig sbrul phye leb za//gang zhig grong bcas 'bebs shing ster/ /byin zhing gnod par byed pa de/ /grul bum byad ni mi sdug pa/ /mchod par 'os par skye bar 'gyur/ /zas kyi ched du brtse med pas/ /srog chags bsad cing sbyin med gang / /de dag shi nas nges par ni/ / srin po'i bza' dang bca' bar 'gyur/ /rtag tu dri dang phreng la dga'/ /sbyin byed khro ba chung ba ni/ /lha rnams dga' ba'i rgyur 'gyur ba/ /dri za rnams su skye bar 'gyur/ /gang zhig kha cig phra ma che/ /khro zhing dgos pa'i ched sbyin na/ /de ni sha za ma rungs nyid/ /bzhin mi sdug par skye bar 'gyur//rtag tu rab sngang rtabs bag can/ /gzhan la gnod pa byed pa dang / /rtag tu sbyin la dga' ba ni/ /de dag shi nas 'byung por skye/ /ma rungs khro zhing sbyin byed la/ /chang zhim dag la dga' ba'i mi/ /shi nas gnod sbyin ma rungs pa/ /chang la dga' ba rnams su skye/ / gang dag pha ma bla ma rnams/ /ji ltar 'dod pa'i bzhon par 'degs/ /de dag gzhal med khang rgyu ba'i/ /gnod sbyin bde ba ldan par skye/ /sred dang ser sna'i skyon gyis ni/ /shi nas yi dgas skye bar 'gyur/ /nyon mongs can dges gnod sbyin sogs/ /de phyir de ni spab bar bya/ /yi dgas kyi rabs rdzogs so// //mi 'tshe ba yi lha dang mi/ /lha min rnams su tshe ring 'gyur/ /'tshe bas thung ngur skye bar 'gyur/ /de phyir 'tshe ba rnam par spungs/ /mdze dang smon pa zad byed mi/ /mi nad gzhan yang gang dag yin/ /'byung po rnams la bsad dang bcings//brdeg par byas pa rnams kyis 'byung / /gang zhig gzhan gyi nor 'phrog cing / /ci yang sbyin par mi byed pa/ /de ni 'bad pa chen pos kyang / /rdzas ni rnyed par mi nus so/ /gang zhig rdzas ni ma byin par/ /len pa sbyin pa sbyin byed pa/ /de ni rdzas dang ldan gyur la//phyis nas de ni med par 'gyur/ /mi gang mi 'phrogs sbyin mi byed/ /ha cang 'jungs pa ma yin pa/ /de dag tshogs ni chen po yis/ /nges par rdzas ni brten pa thob/ /gang zhig gzhan gyi nor mi 'phrogs/ /gtong dang ldan zhing ser sna spangs/ /mi de rdzas ni mi 'phrogs pa/rgya chen yid du 'ong ba thob/ /gang zhig 'di la rdzas sbyin pa/ /tshe dang mdog dang stobs ldan zhing / /dpal dang ldan zhing nad spangs pa/ /rtag par bde dang ldan par 'gyur/ /gang zhig gos ni sbyin byed pa/ /'dzem bcas gzugs bzang longs spyod ldan/ /byin can srog chags rnams la sdug /gos rnams kyang ni rnyed par 'gyur/ /gang zhig 'di la rab dga' ba'i/ /sems kyi gnas ni sbyin par byed/ /lus can de la khang bzangs ni/ /'dod pa kun dang ldan par 'gyur/ /mi gang lham dang zam pa la/ /sogs pa sbyin par byed pa de//rtag tu bde dang ldan pa dang //bzhon pa dag kyang rnyed par 'gyur/ /bstis khron pa mtshe 'u la sogs/ /rten rnams byed du bcug na ni/ /de dag bde dang ldan pa dang / /gdung bral skom nad med par 'gyur/ /gang zhig kun dga' rab 'bul/ /de ni dbus bkur dpal dang ldan//lus can kun gyi skyabs su 'gyur/ /rtag par 'byor pa ldan par 'gyur/ /rigs pa sbyin dang shes rab la/ /goms pa mkhas pa nyid du 'gyur/ /sman dang mi 'jigs sbyin pa yi/ /nad med par ni skye bar 'gyur/ /mar me sbyin pas mig ldan 'gyur/ / sil snyan byin pas dbyangs snyan 'gyur/ /mal stan dag ni byin pa yis/ /mi de bde dang ldan par 'gyur/ /gang zhig 'di la ba lang sogs/ /spyad bya'i 'o ma yon tan ldan//sbyin byed mi de stobs ldan zhing / /mdog ldan tshe ring longs spyod ldan/ /bu mo byin pas 'dod rnams rnyed/ / 'khor rnams dang yang ldan par 'gyur/ /sa gzhi byin pas nor ldan zhing / /'bru rnams 'byor par skye bar 'gyur/ /lo ma me tog 'bras bu dang / /chu dang mi 'jigs tshig snyan dang / /de 'dod pa la gus pa sbyin/ /'di la bskol nas sbyin byed dam/ /mtho ris ched du 'am 'jigs pas sam//snyen pa'i bde ba 'dod phyir na/ /de ni 'bras bu nyon mongs thob/ /rang gi don la mi ltos shing / /snying rjes non pa'i sems kyis ni/ /gzhan gyi don du 'dir byin na/ /de yi 'bras bu mthar thug yin/ /dus dang tshul ni ji bzhin du/ /gang spyi gzhan la sbyin byed na//rnam pa de dang de lta bur/ /de kun nye bar gnas par 'gyur/ /gzhan la gnod pa med pa nyid/ /rang gi don du ci dod pa/ /chos dang mi 'gal gang phan pa/ /mi bskol bar ni sbyin par bya/ /de ltar sbyin pa sbyin byed na/ /de lta bu yi 'bras bu 'byung / /bde ba dag ni thams cad kyis//rgyu ba'i gtso bo sbyin pa nyid/ /gzhan gyi bud med rnams spangs na/ /bud med sdu gu rnyed par 'gyur/ /yul dang dus min rang gi yang / /spangs na skyes pa nyid thob 'gyur/ /gang zhig gzhan gyi chung ma la/ /chags pa'i sems ni mi sel dang / /yan lag min la chags byed pa//skyes na de ni bud med 'gyur/ /gang zhig bud med smod byed cing / /khrims btsun 'dod chags chung byed la/ /rtag tu skyes par 'gyur 'dod pa/ /mi mo de ni skyes par 'gyur/ /gang zhig yang dag skyon med par/ /tshangs par spyod la brten pa de/ /gzi ldan yang dag don dang ldan//dpal ldan lha rnams kyis kyang bkur/ /chang 'thung ba ni mi bsten pas/ /mi de dran pa brten pa dang / /rmongs med bden par smra ba dang / /snyan pa'i bde dang ldan par skye/ /gang zhig sems dang 'byed par yang / /byed pa 'di ni mi byed pa/ /de yi 'khor rnams mi byed cing //bstan pa'i bde dang ldan par skye/ /gang zhig rtag pas yid dga' bas/ /phan dang mi phan ston pa'i mi/ /de yi tshig ni btsun par 'gyur/ /bzlog pa yis ni mthon por 'gyur/ /bde ba byin pas bde dang ldan/ /sdug bsngal byin pas sdug bsngal 'gyur/ / gzhan la 'drid par dga' ba dang / /g.yo byed brdzun ni smra ba dang / /gang dag gzugs kyi nga rgyal can/ /sgur la lus ni thung bar 'gyur/ /skye bo bshes gnyen ser sna byed/ /lkugs gyur kun la mi sdug 'gyur/ /rmongs pa'i rang bzhin phan pa'i tshig /mi bzod pa ni 'on par 'gyur//sdig pa'i sdug bsngal bsod nams kyis/ /bde'o 'dren pa'i 'dren ma ste/ /las rnams kyi ni 'bras bu kun/ /'dra ba rgyu mthun yin par brtags/ /mi'i rabs rdzogs so// //rtag tu g.yo dang sgyu spyod cing //sdig pa dag ni ma byas la/ /'thab la dga' zhing sbyin byed pa//de ni lha min dbang phyug 'gyur/ /lha ma yin gyi rabs rdzogs so// //gang zhig bdag med mi 'dod cing / /yongs su gzung la mi dga' ba/ /de ni bza' rnams dag gi mchog /rgyal chen bzhi pa dag tu 'gyur/ /pham pha tshan gtso bo la/ / bkur byed stong ldan bzod par byed/ /'thab mo la ni dga' ba dang / /de ni sum cu rtsa gsum skye/ /rtsod la mi dga' 'thab mo la/ /yid ni dga' bar mi byed la/ /gcig tu dge la brtson pa gang / /de dag 'thab bral nyid du 'gro/ /thos pa mang dang chos 'dzin dang //shes rab ldan zhing thar pa 'dod/ /yon tan rnams la dga' ba'i mi/ /de dag dga' ldan nye bar 'gro/ /mi gang rang nyid dul ba la/ /zhugs shing tshul khrims 'bogs pa la/ /spro ba che dang ldan pa de/ /gdon mi za bar 'phrul dgar 'gro/ /sems can gang zhig sman min mchog /sbyin dang dul dang yang dag bsdoms/ /phul byung yon tan lhag gyur te/ /nges par gzhan 'phrul dbang byed do/ /tshul khrims kyis ni mtho ris thob/ /bsam gtan gyis ni khyad par 'gyur/ /yang dag ji bzhin yongs shes pas/ /mthar ni yang srid med par 'gyur//mi dge bas ni bde mi thob/ /dge ba yis ni bde ba 'thob/ /de ltar dge dang mi dge ba'i/ /las kyi 'bras bu gsal bar bstan/ /sdug pa dang ni bral ba dang / /mi sdug pa dang phrad pa dang / /las rnams rang gi 'bras bur bcas/ /'chi dang rga dang na ba nyid//gsum po 'di dag bsam par bya/ /de lta na ni chags bral thob/ /chags dang bral na bsod nams 'dod/ /de bzhin sdig pa spong bar byed/ /de dag nyid kyang mdor nyon cig /bdag dang gzhan gyi don byed dang / /gzhan la gnod byed spong ba ni/ /bsod nams bzlog pa sdig yin par//bdag nyid chen pos de skad gsungs/ /lha'i rabs rdzogs so// //dam pa'i chos dran pa nye bar gzhag pa'i 'gro ba drug gi tshig le'ur byas pa/ slob dpon btsun pa chos ldan rab 'byor dbyangs kyis mdzad pa rdzogs so// //