CLOSE WINDOW

D4175
བོད་ཡིག

/mi rtag pa'i don gyi gtam zhes bya ba snyan dngags mkhan chen po dga' ba'i dbang pos mdzad pa rdzogs so// /kha che'i paN+Di ta bi na ya dang / lo tsA ba grags 'byor shes rab kyis bsgyur ba'o//[ ]@##/ /rgya gar skad du/ su par+tha de sha pa ri ka thA/bod skad du/ legs pa'i lam bstan pa'i gtam/ dkon mchog gsum la phyag 'tshal lo/ /byang chub sems dpa' sems dpa' chen po 'jam dpal gzhon nur gyur pa la phyag 'tshal lo/ /bdud ni mtha' yas sde dang bcas pa bstan pas 'bad pas 'bad pa med par rgyal mdzad la//rmad du byung ba'i gnas mchog brnyes nas drang srong 'jig rten pa la brtson par mdzad/ /gang phyir thugs rje chen po dang ldan mchog tu gzhan la phan par brtson pa'i mdzad pa can/ /yon tan kun gyi gter du gyur pa sangs rgyas de la rtag tu phyag 'tshal lo/ /gang zhig rnyed na sdug pa dang bral las byung mya ngan rnams kyis nyon mongs med//mi sdug pa dang phrad las byung ba'i sdug bsngal rnyed sla 'byung bar 'gyur ma yin/ /'chi dang na dang rga dang rgud pa'i sdug bsngal slar yang 'byung mi 'gyur/ /sdug bsngal rnams ni mthar thug phung po lhag med lam bcas chos la phyag 'tshal lo//gang zhig dad sogs stobs kyis stobs chen bdud ni rnam par 'byer mdzad la/ /blo ni dge sbyong 'bras bu'i don gyi rgyan gyur 'jig rten 'das pa nyid du gyur/ /gang la sbyin na 'bras bu dpag med skye 'gyur thub pa'i slob ma dge 'dun ni/ /tshangs dang dbang po sogs kyis phyag byas blo sbyangs yon tan rgya mtsho de la 'dud//'gro ba rnal 'byor spyod pa byams pa'i sems ldan 'dod pa'i don ni rdzogs phyir dang / /dam chos gsal bya'i phyir dang chos ston skye bo rnams la brtse bar bya ba nyid dang ni/ /dam pa rnams ni rab tu mgu bar bya dang bdag nyid kyis ni chos rnyed phyir//legs pa'i gtam ni thub dbang gsungs dang sbyar te bdag gis bshad par bya/ /bden la dga' zhing tshig re'ang nyams su len gyur rnams/ /rgyal ba'i legs bshad rab tu dga' bar gyur pa rnams/ /nyid kyi sku yis bsdus nas nye bar bsags pa ni//gang yin de dag dang pa'i yid kyis mnyan par bya ba'i rigs/ /de la legs pa'i lam ni tshul khrims dang / ting nge 'dzin dang / shes rab yin te/ legs par gyur pa'i lam yin pas na legs pa'i lam mo/ /legs pa'i zhes bya ba ni mchog tu bsngags pa ste/de ni gcig tu phan pa nyid yin pa'i phyir las dang nyon mongs pa'i gtsub shing las byung ba'i sdug bsngal nyid kyi me gsum rab tu zhi bar byed pas mya ngan las 'das pa yin no/ /lam zhes bya ba ni des mngon par 'dod pa'i don thob par bya ba'i phyir 'dis tshol bas tshol bar byed pa'i don gyis na lam mo//de yang rtogs pa'i thabs kyi rim pa'i cho ga yin no/ /yang na nges par 'byung ba la phan pa nyid yin pa'i phyir bsten par bya ba yin la/ de yang tshul khrims dang / ting nge 'dzin dang / shes rab yin pas na tshul khrims dang / ting nge 'dzin dang / shes rab ni legs pa yin no//de yang bcom ldan 'das kyis/ tshul khrims ting nge 'dzin 'byung ba la phan pa nyid yin pa'i phyir bstan par bya ba yin la/ chos rtogs phyir ni bsgoms pa yis/ /byang chub mchog ni thob gyur nas/ /khyod ni nges par bcom gyur pa/ /sdig can gyis ni shes par gyis//zhes gsungs pa yin no/ /de la tshul khrims zhes bya ba 'di ni kha na ma thob nyid kyis bde ba nyams su myong ba dang ldan pas na tshul khrims so/ /yang na 'dis 'gyod pa med pa'i bde ba bsten cing yon tan gcig nas gcig tu brgyud pa'i bsngags pa len pa'i phyir tshul khrims de la ni len pa'o//yang na tshul khrims dang ting nge 'dzin la skad kyi byings las tshul khrims su 'gyur te/ lus dang ngag dang yid kyi las yang dag par sdom pa zhes bya ba'i tha tshig go/ /de yang bram ze lus kyis legs par spyad pa rnam pa gsum gyis chos la spyod par 'gyur ro/ / ngag gis ni bzhi'o zhes bya ba la sogs pa ji skad gsungs pa lta bu'o/ /yang na bsil bar gyur pas tshul khrims te/ de yang 'chi ba'i mthar thug pa'i bar gyi sems kyi gdung ba rab tu zhi bar byed pa'i don gyis so/ /de yang / tsan dan shing gis gdungs pa sel min gyi/ /tsan dan sa mchog gis byugs phreng bas min//chu yi legs byas sprin dang rlung gis min/ /ku mu ta rgyas rma med rdzing bus min/ /pad+mo ut+pal sna tshogs kyis khyab pa/ /spos chus khyab pa'i nor bu'i sa 'am ni/ /sdug pa'i lag pa'i rtse mos 'dren pa'am/ / me tog phreng ba thig phan 'jigs pa yis/ /srog mthar gyur pa 'byung ba'i dus su ni/ /dus de'i me 'dra 'jigs pa'i gdungs mi sel/ /gang phyir tshul khrims dran na'ang sel byed de/ /de phyir de ni tshim byed rnams kyi mchog /yang na nyes par spyod pa'i mi shes pa med pa'i phyir/ bde ba'i rnam par smin pa gnod pa med pa dang ldan pas na zhi ba yin pa'i phyir tshul khrims so/ /yang na/ /'di ni mgo bor gyur pa na/ /de'i phyir tshul khrims zhes bshad la/ /tshul khrims nyams pas 'chir 'gyur ba/ /dper na mgo bo bcad dang mtshungs/ /de yang dge slong gang dag bslab pa btang nas nyam chung ston cing dman pa shas che bar 'dod pa'i gnas su lhung ba 'di 'phags pa'i chos 'dul ba 'di la 'chi ba zhes bya'o zhes gsungs pa lta bu'i 'o//yang na bde 'gro ste/ thar pa dang / 'jig rten la phan par 'dod pa'i dam pa rnams kyis bsten par bya ba yin pas na tshul khrims zhes bya'o zhes bya ba'i tha tshig go//yang na dge ba'i lus dang ngag gi las rnams ni tshul khrims zhes bya ste/ de yang sangs rgyas gsungs pa'i lus dang ngag gi las bya ba dang bya ba ma yin ba rnams la de bzhin du 'jug pa'o/ /yang na 'tshe ba med pa'i bsam ba las nges par 'byung ba'i lus dang ngag gi rang bzhin gyi legs par spyod pa las byung ba dang /mi dge ba'i las kyi tshul las ldog pa'i mtshan nyid ni tshul khrims/ yang na lus dang ngag gis gzhan la phan pa dang 'tshe ba med pa rnam par 'phel ba ni tshul khrims yin no/ /yang na yang dag pa'i lus dang ngag dang 'tsho ba yin la/de yang lus dang ngag gi nyes par spyod pa las ldog pa'i mtshan nyid de/ 'gyod pa med pa la rab tu 'jug pa ste/ de dbang po sdom pa'i gnas la gnas pa'o/ /yang na de'i lus dang ngag gi sdom pa'i mtshan nyid de/ sdom pa med pa la nye bar gnas pa yin/de ni dge ba'i rtsa ba'i gnas la gnas pa yin no/ /yang na lus dang ngag gtsang ba nyid kyi mtshan nyid tshul khrims te/ zag pa med pa'i bde ba la nye bar 'jog pa yin la/ de ni dad pa dang ldan pa'i gnas yin no/ /de ni rnam pa gnyis te/ bcas pa'i tshul khrims dang /ma bcas pa'i tshul khrims so/ /bcas pa'i tshul khrims ni mig dang rna bas bcas pa'i lus dang ngag gi dge ba'i las so/ /ma bcas pa'i tshul khrims ni yid kyi shes par bya ba'i lus dang ngag sdom pa'o/ /yang rnam pa gnyis te/ sbyor ba las byung ba dang /sbyor ba las byung ba ma yin pa'o/ /sbyor ba las byung ba ni gang lus dang ngag gi sbyor bas bsags pa'o/ /sbyor ba las byung ba ma yin pa ni gang yid gzhan du gyur pa las kyang nye bar bsags pa'i grangs su 'gro ba'o//yang gnyis te/ dam bcas pa sngon du 'gro ba dang / chos nyid kyis thob pa'o/ /rab tu byung ba dang dus mnyam du 'am/ khyim pa bslab pa len par khas len pa'am/ nor gtong ba ste 'di ni sdom pa yang dag par len pa sngon du 'gro ba'i tshul khrims so/ /yang brgyad pa la sogs pas lam bskyed nas zag pa med pa thob pa de ni chos nyid kyis thob pa'o//yang na 'jug pa dang ldog pa zhes bya ba rnam pa gnyis te/ de bzhin gshegs pas rjes su gnang ba'i lus dang ngag gis las la spyod pa de ni 'jug pa'i tshul khrims so/ /gang bkag pa de mi byed pa ni ldog pa'i tshul khrims so/ /yang na spangs pa'i tshul khrims dang /ma spangs pa'i tshul khrims so/ /de la gang lus dang ngag gi nyes par spyod pa mi byed pa de ni spangs pa'i tshul khrims so/ /lus dang ngag gis legs par spyod pa la rjes su 'jug pa ni ma spangs pa'i tshul khrims so/ /yang dag pa dang / ma dag pa'i dbye bas rnam pa gnyis te/sred pa dang / lta ba ngan pa dang / nga rgyal dang / yang dag pa ma yin pa'i rtog pa dang / ma 'dres pa dang / yongs su tshang ba ni dag pa'i tshul khrims so/ /de las go bzlog pa ni ma dag pa'o/ /dag pa la gnyis yod pas rnam pa gnyis te/gang 'da' ba med par rnam par byang ba de ni ltung ba med pa'i rnam par dag pa'i tshul khrims so/ /gang ltung ba slar bcos pas rnam par dag pa de ni ldang ba'i rnam par dag pa'i tshul khrims so/ /yang rnam pa gnyis te/ ltung ba med pas mchog tu gyur pa dang /rnam par dag pas mchog tu gyur pa'o/ /gang rgyun du zhugs pa la sogs pa ni bsams bzhin du 'da' ba med pas de ni ltung ba med pa mchog tu gyur pa'i tshul khrims so/ /dgra bcom pa dang / sangs rgyas dang / yang dag par rdzogs pa'i sangs rgyas kyi gang yin pa de ni rnam par dag pa'i tshul khrims so//yang na slob pa dang mi slob pa dang so so'i skye bo la brten pas tshul khrims rnam pa gsum ste/ slob pa dang mi slob pa dang / slob pa yang ma yin mi slob pa yang ma yin pa'o/ /yang na sems kyi dbang las dge ba dang mi dge ba dang lung du ma bstan pa nyid kyis rnam pa gsum ste/mi mnyam par yongs su smin pa dang / ma smin par ro/ /mi mnyam pa yongs su gyur pa ni gang gzhan la 'tshe ba'i phyir brten pa'o/ /mnyam par yongs su gyur pa ni sdug pa dang dbang po dang yul nyams su myong ba'i don du gang la brten pa'o/ / yongs su gyur pa ma yin pa'i don du gang la brten pa dang 'gyod pa med pa gang yin ba'o/ /yang dman pa dang / 'bring dang / mchog ste rnam pa gsum ste/nye ba'i nyon mongs pa drag pos nyen pa dang cho ga mi shes pas gzi byin nyams pa ni dman pa'o/ /nyon mongs pa srab pa dang chog shes dang pa ldan pa ni 'bring ngo //nyon mongs pa med pas gsal la chog shes pas rab tu phye ba'i rnam par dag pa'i tshul khrims ni mchog go/ /yang dbang du bya ba rnam pa gsum gyis gsum ste/ 'jig rten gtso bo byed pa'i gang zag ni khrel yod pa can te/ 'jig rten gyi dbang du byas nas sdig pa spong ba ste/de ni 'jig rten pa'i dbang du byas pa'i tshul khrims so/ /chos la gus pa ni chos gtso bor byas nas sdig pa spong ba de ni chos kyi dbang du byas nas tshul khrims so/ /bdag gtso bor byas pa de ni bdag nyid ngo tsha bas bdag nyid rjes su srung zhing sdig pa spong ba de ni bdag nyid kyi dbang du byas pa'i tshul khrims so//yang 'jig rten pa dang 'jig rten las 'das pa dang / 'jig rten las 'das pa las kyang 'das pa ste rnam pa gsum yin la/ so so'i skye bo rnams kyi ni 'jig rten pa'o/ /'phags pa'i lam dang 'bras bu la gnas pa rnams kyi ni 'jig rten las 'das pa'o//sangs rgyas bcom ldan 'das rnams kyi ni 'jig rten las 'das pa las kyang 'das pa'o/ /yang tshul khrims ni sred pa la gnas pa dang / lta ba la gnas pa dang / nga rgyal la gnas pa dang / gnas pa med pa ste rnam pa bzhi'o/ /de la sred pa la ni srid pa dang longs spyod kyi don du byed pa'o//lta ba la gnas pa ni tshul khrims dang / brtul zhugs mchog tu 'dzin pas bcom pa'o/ /nga rgyal la brten pa bdag la stod pa dang gzhan la smod pas bcom pa'o/ /gnas pa med pa ni gnas pa'i nyes pa las grol ba'i tshogs su gyur pa dang zag pa med pa'o//yang tshul khrims ni nyams pa dang / gnas pa dang / khyad par dang / nges par 'byed pa'i cha gnyis kyi ste rnam pa bzhi'o/ /mi mthun pa'i phyogs ma spangs pa dang / tshul khrims dang ldan pa yang dag par mi bsten pa dang / skye bo tshul khrims 'chal ba dang 'grogs pa dang /rtog pa ngan pa'i go skabs 'byed pa dang / shes bzhin du 'da' bar byed pa dang / ltung ba 'chab pas tshul khrims las nyams pa'i skal ba can du 'gyur ro/ /tshul khrims la bag yod pa dang / bslab pa la mang du gces par byed pa dang / zhi gnas dang lhag mthong la mngon par brtson pa ni tshul khrims gnas pa'i skal ba can du 'gyur ro//tshul khrims ting nge 'dzin gyi bya ba rnams la bag yod pa dang / lhag mthong gi rim pa la shas cher brtson pa'i tshul khrims ni khyad par can gyi skal ba can du 'gyur ro/ /tshul khrims dang ting nge 'dzin phun sum tshogs pa dang /shes rab la mngon par brtson pa'i tshul khrims ni nges par 'byed pa'i cha'i skal ba can du 'gyur ro/ /yang dge slong dang dge slong ma dang / bsnyen par ma rdzogs pa dang / khyim pa las bcas pa'i khyad par gyi rnam pa bzhi'o/ /dge slong gi tshul khrims de ni so sor thar pa'i sdom pa'o//dge slong ma'i tshul khrims ni dge slong ma'i so sor thar pa'i sdom pa'o/ /dge sbyong gi dbang du byas pa'i sdom pa bslab pa'i gnas kyi sdom pa ni dgu ste/ bya rog skrod nus pa'i bslab pa'i gnas kyi sdom pa ni brgyad de/ de dag ni bsnyen par ma rdzogs pa'i tshul khrims so//bslab pa'i gzhi la dang /gso sbyong gi zhag bslab pa'i gnas brgyad ni khyim pa'i tshul khrims so/ /yang rang bzhin dang / chos nyid dang / sdom pa dang / spong ba zhes bya ba ni rnam pa bzhi'o/ /byang gi sgra mi snyan rnams kyi ni rang bzhin gyi tshul khrims so/ / srid pa tha ma pa'i byang chub sems dpa'i yum gyi ni chos nyid kyi tshul khrims so/ /lus dang ngag gi sdom pa brtan zhing rnam par dag pa ni sdom pa'i tshul khrims so/ /tshul khrims dang brtul zhugs mchog tu 'dzin pa'i gnyen por gyur pa dang / nyon mongs pa 'grib par byed pa ni spong ba'i tshul khrims so//de ltar mang du'ang rnam dbye nus mod kyi/ /shin tu rgyas pas skyo ba skyed par byed/ /de yi rnam dag thabs ni bshad bya ste/ /mnyam par 'jog las tshul khrims rnam dag 'gyur/ /de la rnal 'byor gyi spyod pa yongs su sbyang bar bya ba dang / so sor thar pa'i sdom pa'i phyir 'dun pa drag po skyed pa dang /lus dang ngag gi las kyi mthas bsdus pa la yang 'tsho ba gzhan la rag las pas 'jug pa sbyang bar dka' ba las tha dad par gnas su zin na yang de rnam par sbyang bar bya ba'i phyir mchog tu 'bad pas sdom pa la brtson pa dang / gso ba'i longs spyod la yang bag yod par bya ba'o/ /de yang so sor thar pa'i sdom pas bsdams te gnas so zhes ji skad gsungs pa lta bu'o/ /de la so sor thar pa zhes bya ba ni so sor thar pas na so sor thar pa ste/ lam 'di ni so sor thar par 'gro bas so sor thar pa ste/ dper na grong khyer du 'gro ba'i lam la grong khyer gyi lam zhes bya ba dang 'dra'o/ /yang na sdig pa las so sor thar pas na so sor thar pa'am sdom pa zhes bya ba la slob par byed pas na dag cing grol bar byed pa yin pa'am/ bsod nams phun sum tshogs pa la lhag par mos pa mi gtong bar byed pa zhes bya ba'i tha tshig go//yang na bsrung zhing thar par byed pa na bsrung thar ces bya ste/ nyes par spyod pa dang / kun nas nyon mongs pa rnams dang / ngan 'gro rnams las srung bar byed pa'i phyir ro/ /ji skad du chos spyod pa rnams ni chos kyis srung bar byed cing rim gyis thar par 'gyur ba yin zhes ji skad du bshad pa dang /dge slong dag tshul khrims dang ldan pa ni 'gyod pa dang ldan pa'i sems su mi 'gyur ro/ /gzhan yang dge slong dag 'di ni chos nyid yin te/ tshul khrims 'di ni rim gyis 'bras bu mchog skyed par byed do zhes gsungs pas de'i phyir bsrung zhing thar pa zhes bya bar bshad do//yang na sdom pa med pas ltung ba'i ngang tshul can thar par byed pa 'di ni yang dag par zhugs par 'gyur ba ste nye ba'i nyon mongs pa las thar par byed pas na ltung ba las thar pa'o/ /yang na so so'i skye bo yin pas ltung ba'i chos can yin pa'i phyir ltung ba yin la/las dang nyon mongs pa dag gis yongs su 'khor bar gyur cing shis pa ma yin pa'i ngan 'gro rnams su 'khyams pa sdug bsngal de las srung zhing thar par byed pas na ltung ba las srung ba ste/ sdug bsngal de las thar pa zhes bya ba'i tha tshig ste/ rgyu las 'bras bu btags pa yin te/ de yang / 'jug ngogs bde ba'i chu klung bde/ /zhes bya ba lta bu'o/ /yang ltung ba las legs par byed cing 'gro ba la mngon par brtson pa rnams rang la phan pa'i don byed do zhes pa'i tha tshig ste/ yang dag par zhugs pa rnams thar par byed pas na ltung ba las thar pa'o//yang na thog mar gyur pa ste/ thar pa sgrub pa la dang por gyur pa yin pa'i phyir dang por theg pa'o/ /de yang ltung ba'i tshogs rnam pa bdun te/ phas pham pa dang / dge 'dun gyi lhag ma dang / de gnyis ka'i nyes byas sbom po dang /ltung byed dang / so sor bshags pa dang / bshags par bya ba dang / bsdom par bya ba'i nyes byas zhes bya ba'o/ /de la ltung ba 'dis phas pham par 'gyur bar spyod pas na phas pham pa'o/ /ltung ba 'di byung bar gyur na mal stan dang kha zas la sogs pa dge 'dun rgan po dang bar ma dang gzhon nu'i rjes la lhag mar spyod pas na dge 'dun lhag ma'o//bshags par bya ba'i nyes pa thams cad kyi nang nas 'di ches rags pas na nyes pa sbom po'o/ /mang ba'i phyir dang rang bzhin dang bcas pa'i spang bar bya ba sna tshogs pa nyid yin pa'i phyir spang ba la 'bad pas gnas pa yin pas ltung ba'o//nges par bshags par bya ba yin pas so sor bshags par bya ba yin pa 'am/ so sor bshags par bya bar 'os pa yin pas so sor bshags par bya'o/ /bshags pas slar bcos par bya ba'i nyes byas yin pas bshags par bya ba'i nyes byas so//slar de ltar mi bgyid do zhes yang dag par sdom par byed pas slar gso ba yin pas na bsdam par bya'o/ /'di dag ni ltung ba'i tshogs bdun yin no/ /de la sdom pas bsdams pa zhes bya ba ni 'di man chad shes par bya ste/de la sdom pas bsdams pa ni bsngags par bya ba'i sdom pa sba bar bya ba'i cho gas yang dag par kun nas g.yogs shing sbas la bsrungs pa zhes bya ba'i tha tshig go/ /gnas pa zhes bya ba ni gnas shing bzhes la dus ji lta ba bzhin du sdod pa'o/ / cho ga dang spyod yul phun sum tshogs pa zhes bya ba ni cho ga bya ba dang spyod yul du bya ba dag yin la/ phun sum tshogs pa zhes bya ba ni ldan pa'o/ /de la kun du spyod pas na cho ga ste rang gi gzhung lugs su spyod pa zhes bya ba'i tha tshig go/ /yang na de la spyod pa yin pas na spyod pa ste/de la rten cing rang gi phan pa thob par bya ba'i phyir de la spyod cing rtogs pa zhes bya ba'i tha tshig go/ /de yang spyod pa ngan pa'i gnyen por gyur pa dang / skye bo dam pa rnams kyis bsngags pa dang thar pa 'dod pa rnams kyis bslabs shing goms par byas pa dang /bslab pa 'dod pa'i rab tu zhi ba la blo byang ba rnams kyis ma smad pa spyod pa'i rim pa kha na ma tho ba med pa'o/ /cho ga ma yin pa ni dge slong me tog thu ba dang / phreng rgyud mkhan byed pa dang / rna rgyan byed pa dang / de dag byas nas khyim pa la ster ba dang / bud med rnams dang lhan cig /stan dang khri gcig la 'dug pa dang / snod gcig tu za ba dang / de'i lus dang 'brel pa len pa dang / de'i steng du lhung ba dang / gar dang / glu dang / rol mo dang / sgeg pa dang / byug pa dang / dri dang / phreng ba dang / gos dkar po dang / kha tshar dang bcas pa'i gos 'chang ba dang /khyim pa'i bya ba la sogs pa 'jug pa ste/ de lta bu la sogs pa byed pa yin no/ /ji skad du/ ki ta'i rim zhes bya ba'i 'dul ba las ji skad bshad pa lta bu'i/ gzhan dag gis bshad pa ni spyod pa ma yin pa ni rnam pa gnyis te/ lus dang / ngag gi'o/ /de la lus kyi ni 'di na dge 'dun gyir gtogs pa yin na yang gnas brtan rnams dang / dge slong rnams la mang du bsnyen bkur mi byed pa dang / sdug pa dang gud pa dang bral ba'i sems dang ldan zhing rgyud dang ba ma yin pas zil gyis mnan pa dang / rgyud shin tu rtsub pa rnyed pa dang bkur stis dregs pas myos pa na dge slong rgan po rnams la 'dzer zhing 'gro ba dang 'dug pa de lta bu'i bya ba med kyang mdun du 'gro ba stan mtho ba la 'dug pa de dag mthong zhing nyen kor du phyin na yang mdun bsu ba dang /stan nas ldang ba dang / phyag 'tshal bar mi byed/de dag mchil lham med par 'chag pa dang / bdag nyid mchil lham dang bcas par 'chag pa dang / de dag sa phyogs dma' ba na 'chag pa na yang bdag nyid mtho ba gding ba dang bcas par 'chag pa dang / stan gyis de dag la gnod par byed pa dang / gzhon rims dag la brnyas pa dang bcas pas gnas par byed pa dang /khrus byed pa'i tshe chu ngogs dag tu dge slong rgan rims dag la 'dzer zhing 'dzug pa dang / mdun du zhugs pa dang / 'dzer zhing khrus byed pa dang / 'dzer zhing 'gro ba dang / sngon du 'byung ba dang / gzhan gyi khyim du 'jug pa na yang dge slong rgan rims la 'dzer zhing 'gro ba dang /de lta bu'i bya ba med du zin na yang de dag la brnyas thabs su sngon du 'gro ba dang / dben pa'i khyim dang gnas gang yin pa de dag tu gang na rigs kyi bud med dam bzhon nu ma brtags par 'jug par byed pa dang / khye'u gzhon nu dag la mgo bo nyug par byed pa ste/de lta bu dag ni lus kyi spyod pa ma yin pa'o/ /ngag gi ni 'di na la la zhig dge slong rgan rims la gus pa med pas de la ma dris par chos smra rtsom zhing lan 'debs par byed pa dang / so sor thar pa ston pa dang / de g.yeng ba mang po yod kyang ston pa dang /gtam sna tshogs byed pa dang / gzhan gyi khyim du 'jug pa na rigs kyi bud med dang / rigs kyi gzhon nu ma dag gus pa med par 'di skad smra ste/ mi che ge mo zhes bya ba rigs che ge mo zhes bya ba khyod la kho bo cag gis bzar rung ba bza' 'am/bca' bar bya ba khyed kyis deng ci zhig stobs par byed/ ci zhig za bar bya/ ci zhig btung bar bya/ khyod de ring ci zhig ster bar byed ces smra zhing / yongs su rgod par byed la sun 'byin par byed ces bya ba de lta bu la sogs pa ni ngag gis spyod pa ma yin pa'o/ / mdor na tshul khrims 'chal pa dang 'brel pa'i spyod pa dang smra ba thams cad ni cho ga ma yin no/ /de ni gnyen por gyur pa'i spyod pa ni tshig yin par shes par bya'o/ /cho ga zhes bya ba dge slong rgan po dang / bar ma dang gsar bu rnams la gces shing gus pa mang du byed pa dang / byams pa'i lus dang / ngag gi las dang / rab tu zhi ba la dga' ba dang / gzhan dad par byed pa dang / ngo tsha dang khrel yod pas brgyan pa dang / gya gyu med pa dang / rnyed pa dang bkur sti ma bcom pa dang / 'dul ba'i gzhung lugs rjes su 'jug pa dang / dran pa dang / shes bzhin gyis yongs su zin pa dang / 'gro ba dang / log par lta ba dang / rnam par lta ba dang / snam sbyar dang / lhung bzed dang / chos gos legs par 'chang ba dang / 'gro ba dang sdod pa dang / 'dug pa dang / nyal ba la sogs par ram/ thams cad du kun du spyod pa las bshad pa las gus par byed pa 'di ni cho ga zhes bya'o//yang spyod yul ni phyogs ba lang 'tsho ba yin pas na de la spyod yul zhes bya la/ 'dir ni ba lang gi spyod yul dang 'dra bas na spyod yul zhes bya ste/ 'di lta ste/ ba lang rnams mdog dang / nad med pa dang /bde ba dang / srog rnams la phan par 'gyur ba phun sum tshogs pa dang / sbrang bu dang / sha sbrang dang / sdig sbrul dang / gcan gzan gdug pa'i 'tshe ba med pa/ rtswa sngon po rnam pa sna tshogs pa phun sum tshogs pa dang / chu gtsang ba dang ldan pa dus ran pa dang / shing gi grib ma'i tshogs phun sum tshogs pa dang ldan pa ni ba lang gi spyod yul yin la de bzhin du dge slong tshul khrims dang /dad pa dang / brtson 'grus dang / dran pa dang / ting nge 'dzin dang / shes rab la sogs pa gang zhig nges par bsten na phan pa byed par 'gyur ba de ni spyod yul zhes bya'o/ / yang spyod yul ma yin pa ni/ smad 'tshong dang / ma ning dang / gzhon nu ma chen po dang / yugs sa dang / kun du rgyu la sogs pa gnas pa'i sgrib pa'i 'os yod pa dang / rjes su mthun pa ma yin pa'i rgyal po dang / rgyal bo'i blon po dang / bram ze dang / khyim bdag dang / mu stegs byed sna tshogs dang / nyan thos lam dad pa'i khyim dang 'dres pa dang / dge sbyong dang dge sbyong gi 'jigs pa la phyogs pa dang / 'dod pa'i yon tan rnam pa lngas rnam par gtses pa med pa/ dge ba'i bshes gnyen la brten pa'i bde ba dang ldan pa/ bas mtha'i gnas mal dang ldan pa/de lta bu'i bcom ldan 'das kyi dge slong rnams kyis bde ba 'phel bar byed pa yin te/ dge slong dag ji tsam na dgon pa dang / nags 'dab dang / bas mtha'i gnas mal la legs par spyod par gyur pa ni dge slong ngam/ dge slong ma mngon par 'dod pa'i dge ba 'phel bar 'gyur gyi nyams par mi 'gyur ro zhes gsungs pa yin no//der gnas nas kyang dran pa nye bar gzhag pa bzhi ni rang gi pha'i spyod yul dang / yul yin no snyam nas cho ga dang spyod yul de dag phun sum tshogs pa dang ldan pa ni cho ga dang spyod yul phun sum tshogs pa yin no//mi dge ba'i sems bskyed pa tsam la yang 'jigs par lta zhing spongs pa zhes bya ba ni 'di dag phra rab tsam la spang bar bya ba phra mo tsam de dag kyang spang bar 'os pa yin zhing dam pa rnams kyis smad pa'i nyes byas phra mo tsam de yang yang dag par sdom pa'am/ mi dge ba'i sems bskyed pa tsam la yang 'jigs par lta zhing 'jigs par lta ba'i ngang tshul can te/las kyi rnam par smin pa la yid ches pa'i bya ba'i lung las/sdig pa chung ngu'ang 'di dang ni/ /phrad mi 'gyur zhes bsam mi bya/ /zhes ji skad gsungs pa lta bu'o/ / lus kyi las kyi mtha' dang / ngag gi las kyi mtha' yongs su dag pa zhes bya ba ni las rnam pa gsum po kha na ma tho ba med pa so sor thar pa'i sdom pa'i spong ba goms pa'i ngang tshul dang / sbyor ba can gyi cho ga dang spyod yul phun sum tshogs pa dang ldan pa dang ldan pas lus dang ngag dang yid kyi las yongs su dag pa yin no//yid kyi las yongs su dag pa ni kha na ma tho ba phra rab tsam yang 'jigs par lta bas sdig pa mi dge ba dang / log par spyod pa dang / rtog pa ngan pa yid la mi byed pas yid kyi las yongs su dag par 'gyur ba yin no/ /'tsho ba yongs su dag pa zhes bya ba ni 'di la 'tsho ba rnam par dag pa ste/log par 'tsho ba yongs su spangs pa yin pa'i phyir yongs su dag pa ste/ nyes pa des kun nas ma gos pa'o/ /'tsho ba zhes bya ba ni 'di la brten te kun du 'tsho bas 'tsho ba yin pa'am/ legs par gnas te 'tsho ba yin pas na 'tsho ba'o/ / log par 'tsho ba ni gso ba byed pa dang / ltas la sogs shes pa dang / zhi ba la sogs pa'i las kyi tshogs sngags kyi sbyor ba dang / mtshan ma lta ba dang / skar rtsis dang / ltas mkhan dang / tshul 'chos la sogs pas 'tsho bar byed pa ni log par 'tsho ba yin te/ log par 'tsho ba'i 'grel pa las ji skad bshad pa lta bu'o//gzhan dag ni gang mi dge ba'i las kyis 'tsho ba'am/ bzo dang / mngag gzhug dang / me tog dang / 'bras bu dang / rtsa ba dang / 'dab ma dang / so shing la sogs pa ster ba'i rgyus 'tsho ba 'di ni logs par 'tsho ba yin no zhes bshad do//gzhan dag ni gang 'tsho ba'i don du nyon mongs pa dang bcas pa'i sems kyis sbyor bar byed cing des 'tsho bar rtogs pa gang yin pa 'di ni log par 'tsho ba zhes bya'o/ /gzhan yang rnyed pa'i don du nyo tshong byas nas 'tsho bar byed pa dang / chos 'chad pas 'tsho bar byed pa de yang log par 'tsho ba yin te/de dag ni dug dang 'dra ba dang dri ma dang bcas pa dang 'dra bar de yongs su song zhing nyes pa des ma gos par kun du rgyu 'tsho ba gang yin pa de ni 'tsho ba yongs su dag pa yin no/ /de yang ji lta bur 'grub par 'gyur zhe na/ brjod par bya ste/ lus kyi rma dkri ba la sogs pa/ sdug bsngal bsal ba'i don du sten byed cing / /rig pas rnyed la sems ni chog shes pa/ /'tsho ba min pa'i nyes pas gnod mi 'gyur/ /yang rigs pa ni bdag nyid snod du rang bar byas pa dang / rnyed pa'i bsam pas ma bcom pa dang / 'jig rten gyi chos rnams kyis ma gos pa dang /gzhan dag la 'dud cing gcam gsag gis bsgrub pa ma yin pa dang / bdag nyid kyi yon tan yang dag pa ma yin pa ston par byed pa dang / yang dag pa'i yon tan yang sbed par byed pa dang / ngo tsha shes pa dang / khrel yod pa dang / slong mos spyod pa'i 'tsho bas 'tsho bsgrub pa la spyod pa 'di ni rigs pa zhes bya'o//de bzhin du de ltar zhugs pa las ma rnyed du zin kyang ma rnyed pa de la bdag gi 'tsho ba ni gzhan la rag las pa yin pa dang / gzhan la re ba mi skyed pa dang / bdag la stod par mi byed pa dang / bcom ldan 'das kyis kyang ma rnyed pa rjes su dran pa dang las bdag gir bya ba'i rjes su 'brang ba dang /rnyed pa'i nyes dmigs mthong bas kye ma'o rnyed pa'i sems las bdag ring du gyur pa ni legs so snyam te de la yid gdung bar mi byed do/ /dka' thub nags tshal gnas la rnyed bkur te/ /mdza' ba'i sgo nas dgra bo 'ongs pa yin//zla ba'i zer gyis pad+ma ji bzhin du/ /legs pa rab 'joms brtul zhugs lhod par byed/ /yang gal te rigs pas bcas pas rab tu rnyed par gyur na cung zad rnyed pa des dga' zhing dregs par mi byed cing len pa na yang tshod shes pa yin te/ lhag ma yod pa tsam du len la dregs pa'i nyes par ltung bar mi byed cing chung ngu zhig byin pa la yang sbyin pa po la brnyas par mi byed la sbyin pa po yang byams pa'i sems nye bar 'jog ste/re zhig sbyin bdag 'di'i sbyin pa las byung ba'i bsod nams bya ba'i dngos po rdzogs par bya ba dang / 'di'i ser sna dang phrag dog gi dri ma bsrabs par byas par 'gyur ba dang /'di'i dge ba'i bya ba la spro bar khas blangs pa las nyams par mi 'gyur ba dang / gang 'di la rjes su yi rang ba'am grogs byed pa de dag kyang dge ba la sbyor bar 'gyur ba dang / gal te 'di dag gis bla na med pa yang dag par rdzogs pa'i byang chub tu bsngos na 'jig rten la phan par zhugs pa dag gi grogs su 'gyur ro//'on te thar pa'i tshogs sam srid pa'i phun sum tshogs pa yongs su sngo bar byed na de lta na yang 'di'i grogs byas par gyur bas phan btags pa yin no snyam du rnam par ma bsams nas yongs su len par byed do//yongs su blangs nas kyang sbyin pa pos ji ltar yongs su bsngos pa bzhin du yongs su longs spyod par byed kyi gsog 'jog tu mi byed cing brlag par yang mi byed do/ /snod ma yin pa la yang sbyin par mi byed do/ /de ltar yongs su tshol ba dang / len par byed pa dang / yongs su longs spyod pas kun nas yongs su dag par byed pa ni 'tsho ba yongs su dag pa yin no/ /'tsho ba sgrub pa yongs su tshol ba dang / len pa dang de ni phan pa la sbyor ba dang / rigs pas 'jug pa dag pas mdzes pa ni/ dam pas 'tsho ba yongs su dag par bshad/ sdom pa yang dag par blangs pa'i bslab pa'i gzhi la slob pa zhes bya ba ni yang dag par slangs nas slob pa'i tshul khrims kyi bslab pa'i gnas la gnas pa yin la/de yang de bzhin gshegs pa'i bka' la gus pas bslab pa'i gzhi don yod pa nyid yang dag par rjes su mthong ba dang / thams cad du phan yon rnam pa bcu las dam pa'i chos kyi phun sum tshogs pa bcu bcu zhing phan yon re re la yang dag par brtags te bslab pa 'dod pa nyid dam/kha na ma tho ba la 'jigs pa ni ltung ba lci ba dang / yang bar rtog par mi byed cing sbom po dang / phra ba rnams sdom par byed pa dang / bslab pa la gus pa 'am de la bde bar 'du shes pas yang dag par blangs pa'i bslab pa'i gzhi la slob pa yin no//gang zhig bde gshegs bstan pa la/ /bslab gzhi bcas par gyur pa ni/ /'di dag bsdams la sdug bsngal la/ /'di dag ldog las bde ba skye/ /so sor thar pa'i sdom pas legs bsdams shing //rang gi cho ga spyod yul phun sum tshogs/ /kha na ma tho chung la'ang nyes chen lta/ /lus ngag yid kyi sbyor ba rnam par dag /ma smad 'tsho ba 'tsho ba rnam dag yin/ /bslab pa'i gzhi la sogs pas slob par dga'/ /bslab pa'i gnas su gyur pa gang cung zad/ /mi mthun de de gsal bar rnam par spong //mdo las tshul khrims kyi gags su gyur pa ni mi dge ba'i bshes gnyen yin par gsungs la/ de ni phung khrol thams cad kyi 'byung gnas yin te/ 'di ltar dad pa med pa dang / ngo tsha med pa dang / khrel med pa dang / le lo dang / shes rab 'chal ba nyid dang /dbang po'i sgo ma bsdams pa nyid dang / lto 'gengs pa nyid dang / zas kyi tshod mi shes pa nyid dang / nam gyi cha stod dang / nam gyi cha smad la mi nyal ba la mngon par mi brtson pa dang / sngon nyams su myong ba'i dgod pa dang / smra ba dang / dga' zhing rtse ba rjes su dran pa dang /dge ba'i chos mngon par mi brtson pa dang / dge slong rgan rabs rnams la ma gus shing brtse bar mi sems pa dang / tshul bzhin ma yin pa'i yid la byed pa dang / tshig ngan par smra ba dang / bzod pa med pa dang / las dang smra dang 'du 'dzin la mngon bar dga' ba dang /khyim pa'i skye bo dang 'dre ba dang / bud med la yang dang yang du lta ba dang / khro ba dang khon du 'dzin pa la sogs pa'i nyon mongs pa rnams kyang tshul khrims kyi gags su gyur pa yin te/ tshul khrims kyi gags su gyur pa la gnas pa ni tshul khrims yongs su ma rdzogs pa rtogs par mi 'gyur ba'am yongs su nyams pa 'gyur ro//de bas na tshul khrims yongs su bsrung bar bya ba'i phyir de'i gnyen po'i phyogs su gyur pa dge ba'i bshes gnyen la sogs pa la brten par bya'o/ /tshul khrims rgyu ni dbang po sdom pa yin par bshad/ /phun sum tshogs des tshul khrims dri med dang ldan 'gyur//de bas thos pa'i rang bzhin lta la nges dmigs te/ /rang gi dbang po'i yul la 'phyan las bsrung bar bya/ /de bas na de bsrung bar bya ste/ sdig pa'i rgyur gyur pa nyid dang / de la mtshan mar 'dzin pa dang / de'i tshul dran pa dang / de'i rnam pa yid la byed pa dang / rjes su rtog pa spang ba dang / yul gyi nyes dmigs mthong ba dang / nyes dmigs mthong ba nas kyang de la lus kyis rgyang bsrings la sdug ba yid la byed pa spang bar bya zhing yul la chags pa'i gzhi shing dang 'bag la reg pa snyam pa dang /gzan lta bur gyur pa'i 'tsho ba rkyen rnams zil gyis mnan la shin tu zhen pa las bzlog pa tshul bzhin yid la byed pa spong ba dang / 'jig rten sna tshogs la mngon par ma chags par bya'o/ /cho ga gang gis bya zhe na/ gnyen por gyur pa la yang dag par brten pas spang bar bya zhing /sems kun nas dran pa dang ldan pas phyogs kun du rnam par lta zhing gzugs la sogs pa la rnam par 'jug pa na de ltar sdig pa mi dge ba'i chos kyis dge ba'i sems gtugs nas gnas par 'gyur ro zhes dran pa brtan pos yang dag par srung bar byed pa yin no/ / ba ltar nag po'i phyogs la mngon par zhen pa'i sems yang dag par tshar gcad pa dang / gzugs sdug pa dang bde ba la tsher ma lta bur lta ba dang / yul rang bzhin shes par bya ba dang / 'dod pa'i nyes dmigs tshol ba dang / nges par 'byung ba la lhag par mos pa dang / ting nge 'dzin gyi rgyu mtshan la sems dga' ba dang /ting nge 'dzin gyi rgyu mtshan la sems gtong ba dang / dge ba'i chos la 'grus par bya ba dang / rgyun tu bya bas mngon par brtson par bya ba dang / dbang po yongs su ma bsdams pa'i gang zag rnams yongs su spang ba dang / dbang po bsdams pa'i gang zag rnams la brten pa dang /sdom pa ma yin pa la 'jigs par lta bas spang bar bya'o/ /lcags kyi thur ma rab tu 'bar ba yis/ /mig la byug par gyur pa ches bla yi/ /rang gi ngan 'gro'i lam ni stsol byed pa/ /gzugs la chags dang sdang bas lta mi bya/ /lcags khu 'bar bas rna ba bkang bla yi//bag med chags dang dregs pa 'phel byed pa/ rngon pa'i khong glu dag pas lhag pa'i sgra/ /nyan pa bdag la phan pas thos mi rung / /sna la bltas te spu gri rnon por ni/ /bdar ba gtsangs pa'i nad ni brnag bla yi/ /bdag nyid sdug bsngal sna tshogs 'phel byed pa'i//dri chags dgra ba rnam par 'phel mi rung / /me lce 'bar ba'i mtshon ni rnon po yis/ /lce ni mngon du gcad par gyur bla yi/ /skye ba'i sdug bsngal lam ni skyed byed pa/ /ro la chags pa'i sdig byed de lta min/ /mkhas pas rang lus dgra sta rnon po yis/ / rnam par gtubs pas 'jig par gyur bla yi/ /reg pa sna tshogs sred pas gdungs gyur pas/ /yun rings dmyal bar skye bar 'gyur mi rung / /gang phyir ci dga' spyod las yid ma bsrungs/ /sdug bsngal mtha' yas bskyed pa'i sdig pa sogs/ /dbang po lhag ma sdom pa'ang yod ma yin//de phyir mkhas pas de nyid bsrung ba'i rigs/ /mkhas pas 'dod chags nyes la mi sdug bsten/ /sdang la byams dang rtse goms yon tan gyis/ /rmongs la mi rtag 'du shes 'chi ba ni/ /rjes su dran dang bag yod bsten pas bsrungs/ /de ltar sdom pa ma yin pa las 'jigs pa mthong nas dbang po bsdam pa'i phyir 'bad pa dang bcas par gyur pa dang /sred pa skye ba'i dngos po yin pas yongs su longs spyod pa'i rkyen la bag yod pa nyid du bya'o/ /gzhan gyi kha zas dang rnyong dang shing gi gzugs brnyan dang mchil pa ltar 'tsho ba'i rkyen gyi yo byad rnams ni 'jigs pa bskyed pa yin no//de bas na so sor brtags pa'i stobs kyis tshul bzhin du yongs su brtags te longs spyad par bya zhing 'dod chags dang zhe sdang dang gti mug gis kun nas ldang ba dang bral zhing lhag par zhen pa dang / mdud pa med pa dang / lhag par ma chags pa dang /nyes dmigs mthong ba dang / nges par 'byung ba'i shes rab dang ldan zhing rtse ba'i don du ma yin/ rgyags pa'i don du ma yin/ cha rgyan pa'i don du ma yin/ kha dog sdug par bya ba'i don du ma yin/ brgyan par bya ba'i phyir ma yin gyi/ gzhan du na dgos pa'i dbang gis der re zhig gos la longs spyod pa ni/sbrang bu dang / sha sbrang dang / tsha ba dang / grang ba dang / sdig sbrul gyi reg pa las bsrung bar bya ba'i phyir/ ngo tsha bas gsang ba dgab pa'i phyir ma yin/ rab tu byung ba'i cha lugs dang rjes su mthun par bsod snyoms la yongs su longs spyod par bya'o//ji srid du lus 'di gnas shing 'tsho bar bya ba'i phyir srog bsrung ba shing rta'i mig bsku ba dang 'dra bar shin tu ma chags par rma'i tshor ba bsal ba'i don du bsku ba dang 'dra bar bru ba tsha ba zhi bar bya ba'i don du rjes su chags pa med par srog bsrung ba'i phyir dang /tshangs par spyod pa la yun ring du gnas par bya ba'i phyir dgon pa las thar pa'i don du bu'i sha za ba dang 'dra bar zhen pa med pas de ltar tshor ba rnying pa so sor gzhom par bya ba dang / tshor ba gsar pa mi bskyed par bya'o zhes zas la tshod rig pa nyid du sman dang 'dra bar tshad yod par byas la lus 'di kha zas chad tsam bstan pas yun ring du gnas par bya ba'i phyir dang /'di nyid nad yin pas kha na ma tho ba med pa dang / rnal 'byor la rjes su mthun pa dang / lus bde blag tu rjes su gnas pa dang / sred pa'i zhags pas ma bcings pa'i bde ba la reg par gnas par bya zhing tshod zin par zos pas mi dga' ba dang /skom pa dang / glal ba dang / zas kyis lus lci ba dang / gnyid dang rmugs pa kun du mi spyod pa yin zhing spyod lam la legs par gnas pa dang / rnal 'byor la phan pa nyid kyis bde ba la reg par gnas par bya ba'i don du yin gyi rnam par rtog pa'i phyir ma yin/rgyags pa'i phyir ma yin/ brgyan pa'i phyir ma yin zhes spang bar bya ba la so sor rtog cing 'di lta ste/ lus 'di gnas par bya ba dang / 'tsho bar bya ba dang / bkres pa bsal bar bya ba dang / tshangs par spyod pa la phan par bya ba'i phyir yin no zhes bya ba la so sor rtog cing tshor ba rnying pa rnams spang bar bya ba dang / gsar pa rnams mi skyed pa'i phyir ro snyam du sems shing de ltar tshad tsam za ba so sor rtog cing kha na ma tho ba med par 'tsho bas 'tsho ba dang / bde ba la reg par gnas pa yin no zhes tshad tsam za ba la so sor brtag par bya'o//spang bar bya ba la so sor brtag cing 'dod pa'i bde ba la ma zhen pas de la rten par mi byed kyi bkres pa bsal bar bya ba dang / tshor ba rnyed pa rnams spang bar bya ba'i phyir 'jug pa dang / gsar pa rnams mi skye bar bya ba'i phyir bdag nyid dang zhing dub pa la mi rten pa yin la tshig lhag ma rnams kyis ni go 'phang bar ma dang /rjes su mthun pa yin no/ /de ltar na mal stan la yang tshul bzhin yid la byed pas so sor brtags te yongs su longs spyad par bya ste/ 'di ltar mal stan rnams la yang tshul bzhin ma yin pa'i yid kyis so sor brtags la yongs su longs spyad par bya ste/ci nas 'di ltar sbrang bu dang / rlung dang / tsha ba dang / sdig sbrul dang / char dang / ba mo'i reg pa bsal bar bya ba'i phyir mngon du gnod pa phyung ba bsal bar bya ba'i phyir dang / nang du yang dag 'jog dang / rjes su mthun par bya ba dang / sgra la sogs pa'i g.yeng ba chung bar bya ba'i phyir longs spyad par bya'o/ /nad kyi rkyen sman ni ji srid gnod pa skyed par byed pa'i tshor ba rnams bsal bar bya ba'i phyir dang / bde ba dam pa thob par bya ba'i phyir lus nyes dmigs mang po dang ldan par yid la bya ste spyad par bya'o//de ltar srog bsgrub pa la dgos pa dag /so sor rtog pa'i stobs kyis 'jug pa na ci nas nyes pa sngon du mi 'byung zhing / 'di'i tshul khrims yongs su dag par 'gyur/ /yang so sor rtog pa'i dus gang zhig yin zhe na/ brjod par bya ste/ bsod snyoms dang nad kyi rkyen sman len pa'i dus nyid na 'am/ khams dang po dang / chos gos dang / mal stan dang por rnyed pa'i dus su'o/ /gzhan dag ni longs spyod pa yongs su longs spyod pa'i dus su bya'o zhes zer ro/ /kha cig na re nyin re zhing dus gcig gi tshe na bya'o zhes 'dod do//la la ni nyin re zhing dus gcig gi tshe bdag nyid ni rkyen gyis 'tsho'o zhes so sor rtog pa na thams cad so sor brtags par gyur pa yin no zhes zer ro/ /yo byad bzhi po de dag kyang gang zag gi dbye bas longs spyod rnam pa ltar gyur te/ tshul khrims 'chal ba rnams kyi ni rku bas longs spyod pa'o//tshul khrims dang ldan pa yin zhing yid la byed pa la mngon par mi brtson pa rnams kyi ni ngo tsha ba med par longs spyod pa'o/ /tshul khrims dang ldan zhing lhag pa'i sems la mngon par brtson pa rnams kyi ni rjes su gnang ba la longs spyod pa'o//slob ma rnams kyi ni skal ba la longs spyod pa'o/ /dgra bcom pa rnams kyi ni dbang phyug la longs spyod pa yin no/ /de la 'tsho ba rnam par dag pa ni so sor thar pa'i sdom pa'i 'khor yin te/ nyon mongs pas 'tsho ba'i thabs kyi rtsol ba las ldog pa ni lus dang ngag gi sdom pa sla ba yin no//dbang po sdom pa ni gnyi ga'i yin te/sems bsrungs nas lus dang ngag gi las bsrungs pa nyid du 'gyur ro/ /kha na ma tho ba'i yo byad ni dbang po sdom pa'i 'khor yin te/ nyon mongs pa'i dngos po'i rkyen rnams la rig pas tshad tsam du so sor brtags te rjes su skyong ba yin pa'i phyir ro//so sor thar pa'i sdom pa yang dad pa'i stobs te yongs su rdzogs par bya ste/ de ni de dang bral bar gyur na bsams bzhin du bslab pa las 'da' bas nyon mongs par 'gyur ro/ /de yang mdo las dge slong dag ji tsam du dge ba'i chos rnams la dad pa nye bar gyur pa de srid so sor thar pa'i sdom pa dang /'tsho ba yongs su dag pa dang / brtson pa'i stobs la ston par 'gyur ba yin no zhes ji skad gsungs pa lta bu'o/ /de yang le lo can dang mi mthun pa tshol ba la zhugs pas nyon mongs par 'gyur ro/ /dbang po sdom pa'i ni khrel yod pa dang /dran pa'i stobs la gnas pas yongs su rdzogs par bya'o/ /de yang de dang bral na skye mched gang yang rung ba'i nyon mongs pas dri ma can du 'gyur ro/ /rkyen gyi yo byad longs spyod pa yang shes rab kyi stobs la gnas pas yongs su rdzogs par 'gyur te/de yang yang dag par so sor rtog pa la zhugs pa rnams kyi ni rnam par byang bar 'gyur ba yin no/ /de bas blo ldan bslab pa'i stobs gnas pa/ /tshul khrims rnam par dag pa nyid du 'gyur/ /de rnams dag pas yid kyi sdug bsngal ni/ /zhi bar byed pa'i ting 'dzin ma lus 'dren//tshul khrims 'chal las nyes mang 'byung 'gyur bar/ /yang dag bsams la tshul khrims ma brten par/ /gnas pa'i cho ga la ni 'bad bya ste/ /tshul khrims las byung yon tan mang po mthong / /de la tshul khrims 'chal ba la ni 'gyod pa'i me rnam par 'bar bar 'gyur la/'gyod pa ni tshul bzhin ma yin pa'i yid la byed pa dang mya ngan dang zhum pa'i dri mas sbags pa'i 'byung gnas yin zhing / ngan 'gro'i las gnyis med pa yin pa dang / sman par bya ba'i dngos po dang / grags pa ma yin pa'i skye gnas dang / 'tshe ba rnams kyi gzhi dang /legs par spyod pa rnams kyi sgrib pa dang / skye bo ngan pa dang 'dres pa'i 'obs dang / yon tan brjed pa dang / sems sun 'byin par byed pa dang / yon tan gyi phyogs 'dzin pa'i de'i bla ma dang / slob ma dang / grogs rnams kyi ngo tsha ba'i gzhi dang / sdug bsngal brgya stong dpag tu med pa'i gzhir gyur pa dang / de yongs su 'dzin pa'i gang zag chos kyi mdangs nyams par byed pa dang / so ma btang ba'i chu snod ltar yon tan rin po che'i snod ma yin par 'gyur ba yin no/ /nyes pa rnams kyi snod du 'gyur ba dang / phongs pa rnams kyi dben nyid dang /dam pa ma yin pa'i phyogs su gyur pa dang / dam pa rnams kyis bgrod par bya ba ma yin pa dang / sdig pa'i dri ma can gyi las byed pa rnams dang / skal ba mnyam pa dang / yongs su dag pa'i las can gyi skyes bu dam pa dang / skal ba mi 'dra ba yin/ khyad par rtogs pa yin/skal ba med pa yin/ dge sbyong gi 'bras bu thob pa'i re ba med pa yin te/ lus dang ngag dang yid kyi las kha na ma tho ba dang bcas pa yin pa'i phyir ro/ /gos nag nog can dang 'dra bar mdog mi sdug pa yin te/ de nyes par spyad pa'i rjes su byed pa la brten pa rnams yun ring por sdug bsngal ba thob par 'gyur ba'i phyir sdug bsngal nyams su myong bar byed pa yin no//sbyin gnas rnams las 'bras bu chung ngun du byed pa nyid kyis rin thang chung ba yin no/ /mi gtsang bar byed pa'i chos dang ldan pas na dur khrod kyi gnas ltar mi gtsang ba yin/snyan pa ma yin pa'i dris kun tu khyab pas na de dang 'dra ba yin/ tshul khrims dang ldan pa rnams kyis spang bar bya ba yin pas na de dang 'dra bar spang bar bya ba yin/ gang zag skal ba mnyam pa rnams dang gcig tu gnas par rung bas na de dang 'dra bar skyes bu sbrul lta bu yin/tshangs pa mtshungs par spyod pa mkhas pa rnams kyis chos nyid blta bar bya ba ma yin pa'i phyir dur khrod kyi gnas ltar skye ba'i tshogs chen pos cho nges 'debs par bya ba yin/ dud 'gro 'dra bar mnog chung zhing nag nog dang bcas pa'i bud med dang / reg pas me'i phung por ring por mi thogs par 'jug pa'i rgyur gyur cing gnas mal 'bar ba la gnas shing 'khyud pa dang /yi dgas kyi sdug bsngal du 'jug par 'gyur ba yin/ skra'i thag pas byin par bsrung zhing mdung thung 'bar ba snying gar drag tu yang dang yang du bsnun pas sdug bsngal tsha zhing rno ba yin/ rigs kyi bu dang rigs kyi bu mo'i skye bo'i dmod pa nye bar gnas pas nyin re zhing nye bar gtses pa yin/ lcags kyi leb ma 'bar bas bsreg pas shin tu sdug bsngal ba'i chos gos gyon pa nyid yin/ lcags kyi thu lum shin tu 'bar ba'i zas za bas shin tu tsha bar rnam par smin pa'i bsod nams la spyod pa yin/lcags kyi bum pa shin tu 'bar ba'i nang du gnas pa'i sdug bsngal mi bzad par rnam par smin pa'i mal stan la yongs su longs spyod pas nyin re zhing rnam par bcom pa yin pas skyes bu dam pa rnams kyis mchog tu snying rje bar bya ba'i dngos por gyur ba yin/ ro bsregs pa'i mgal dum ltar dgos pa med cing gnyi ga'i don las nyams pa yin/ skye bo dam pa 'dus pa'i nang du 'jigs pa dang bcas shing / 'jig rten gyis yid brtan du mi rung ba yin/ rjes su brtan par mi nus pa yin/ lha rnams kyi yang yid du mi 'ong ba yin/ tshul khrims nyams pa'i gtam thos nas sdug bsngal bar 'gyur ba yin/tshul khrims phun sum tshogs pa'i gtam thos nas rjes su 'gyod par gyur pa yin/ 'di thos pa dang spobs pa la sogs pa'i yon tan gzung bar 'os par mi 'gyur te/ dur khrod kyi me dang 'dra ba yin/ de rmongs bzhin 'chi ba'i dus byed par 'gyur zhing shi ba'i 'og tu yang dmyal ba dang yi dgas kyi skye ba len par 'gyur ba yin/lo grangs brgya phrag mang po shin tu 'das pa na de las thar na yang de'i rnam par smin pa'i lhag ma lus pas 'di na tshe thung ba nyid yin/ longs spyod chung ba yin/ 'gran zla dang bcas pa gnas pas zil gyis gnon pa yin/ skur ba mang ba yin/ yid du mi 'ong ba'i sgra thos par gyur pa yin/ mdza' bo dang nye dus phongs par 'gyur ba yin/ 'khor mi 'dum pa nyid yin/ tshig gzung bar mi 'os pa yin/ tshul khrims dang lta bas phongs pa'i rnam par smin pa sdug bsngal len pa yin no//tshul khrims 'chal pas bsod nams chung ngu sogs/ /rnam smin de yang mthar ni gtugs par 'gyur/ /rigs ni dma' bar skye ba 'thob 'gyur zhing / /de rtogs sdug bsngal mang po'ang nyams myong 'gyur/ /las ni ngan pas de ru 'phangs nas ni//dman pa'i rigs su gyur pa'i las de yis/ /tshul khrims ma bslabs dam pa min la 'jug /dmyal ba'i me ni mtha' med par ltung 'gyur/ /tshul khrims brtan par gnas pa bskyed par bya ba'i phyir de la sogs pa tshul khrims 'chal ba'i nyes pa yang dag par bsam par bya'o//tshul khrims gnas pa'i yon tan ni de las go bzlog pa yin par yongs su brtag par bya'o/ /tshul khrims yang dag bsrung bar gyur na ni/ /'gyod pa'i me ni zhi bar 'gyur ba yin/ /dga' dang rab gus sad par byed pa'i rgyus/ /lus dang ngag gi dge ba skyed par byed//thar pa'i grong du 'jug pa'i lam nyid dang / /mi dang lha dbang grub lam gnyis pa med/ /grags dang snyan dang bde ba skyed pa'i rgyus/ /tshe dang smad pas tshugs pa med pa yin/ /bla ma slob ma mdza' bshes ngo mi 'gyur/ /ma smad bde ba'i sgor ni gyur pa yin//skye bo dam pa dang 'dre 'dren par byed/ /yon tan skyed pa'i cho gar gyur pa yin/ /'di dang ldan na mkhas pa'i yon tan ni/ /chen po rnams kyi snod du gyur pa yin/ /tshul khrims 'chal ba'i phongs pa ci yod pa/ /nyes pa de dang de ni rnam par spong / /dam pa'i chos kyis bgrang bar 'gyur ba dang //yon tan la dga' bar yang go bar byed/ /khyad par rtogs pa'i skal bar ldan pa dang / /bdag nyid yon tan dag gis bsngags 'os 'gyur/ /skye bo dam pa rnams dang skal mnyam gyi/ /rang gi yon tan rgya chen dman dang na/ / tshul khrims 'chal ba'i nyes pas mi gos shing / /de las byung ba'i sdug bsngal thob mi 'gyur/ /mi yi bdag po sum cu rtsa gsum bdag /gal te 'dod na srid pa zad pa nyid/ /tshul khrims rnam dag des ni thob 'gyur la/ /smon lam grub pa'i rtsa ba 'ang tshul khrims yin//de ltar tshul khrims dang ldan pa dang / tshul khrims 'chal ba 'di'i yon tan dang skyon yang dag par bltas la/ tshul khrims 'chal ba las/ sems shin tu 'khums shing de la 'jug par mi 'gyur gyi/ tshul khrims la yang sems kyi spro ba 'phel ba dang /dga' zhing mang du gces par byed de de la dga' zhing gces par sems pa mngon par 'phel zhing gus pas srung bar byed do/ /yid bzhin nor ltar bsam pa'i dbang gis don ster cing / /rigs pa lta bur mngon par 'dod pa'i rdzas sgrub byed/ /dbul pos lha las bum pa bzang po rnyed 'dra zhing //bsngags 'os rang lus mi gcig lta bur bsrung bya yin/ /nus shing phan la rjes brtson mthun pa'i grogs 'dra zhing / /shes ldan yon tan la dga' sdug pa'i bu gcig mtshungs/ /khyim du gter ni rgya chen byung ba dang mtshungs shing / nad dang rga ba'i sdug bsngal dang bral srog dang mtshungs//grong khyer mi dbang lta bur yon tan phun sum tshogs/ /nang gshin 'bru ni phun sum tshogs pa'i zhing sa 'dra/ /nad rnams ma lus sel ba'i sman gyi mchog 'dra ste/ /tshul khrims de las lhag pa'i gus pas de bsrung bya/ /legs pa'i lam bstan pa las tshul khrims rnams par dag pa zhes bya ba phun sum tshogs pa dang po'o// //de ltar rnal 'byor spyod pa 'dis tshul khrims yongs su dag pas ting nge 'dzin phun sum tshogs pa'i yan lag gi gtso bo sbyangs pa'i yon yang dag par blang bar bya ste/ rnal 'byor spyod pas sbyangs pa'i yon tan yang dag par blangs pas ni 'dod pa chung ba nyid dang /chog shes pa nyid dang / rab tu dben pa nyid dang / nyon mongs pa spong ba dang / brtson 'grus rtsom pa dang / gso sla ba dang / dgang sla ba dang / bde ba la reg par gnas pa la gnas par 'gyur ro/ / bya ba nyung bas ni tshul khrims bsrung bar 'gyur ba ni ting nge 'dzin 'grub pa'i tshogs yin zhing sngon gyi 'phags pa'i rigs kyi lus su mthun pa dang / rab tu dad par byed pa yin no/ /de las sbyangs pa'i yon tan bcu gnyis ni 'di dag yin te/ dgon pa pa nyid dang / phyag dar khrod pa nyid dang / bsod snyoms pa nyid dang / stan gcig pa nyid dang / cog pu ba nyid dang / zas phyis mi len pa nyid dang / chos gos gsum pa pa nyid dang / phying pa ba nyid dang / gzhi ji bzhin pa nyid dang / dur khrod pa nyid dang / shing drung pa nyid dang / bla gab med pa nyid dang ngo / /de la dam bca' ba dang rjes su mthun par 'di dgon par gnas pa yin bas na dgon pa pa'o//de'i dngos po nyid ni dgon pa pa nyid do/ /dam bca' ba yang de nas brtsams te grong gi mthar gnas pa spang bar bgyi zhing dgon par gnas par bgyi'o zhes bya'o/ /sbyangs pa'i yon tan lhag ma rnams la rim pa bzhin nyid kyis de'i mi mthun pa'i phyogs spong ba'o//de la dgon pa pa nyid kyi yon tan ni 'di yin te/ /dgon par gnas la mngon dga' ting nge 'dzin/ /thob pa'am yongs su bsrung bar nus pa yin/ /grong nang gnas rnams g.yeng ba'i nyes pa yis/ /sems ni rnam bcom nyer zhi thob mi 'gyur//de ru gnas pa nyid la phyag dar khrod/ /spyod pa lhag ma sbyangs pas rnam mdzes te/ /g.yul du mda' skyob phub bcas go bgos shing / /mtshon cha phun tshogs ldan pas 'thab dang mtshungs/ /dgon par gnyid log gyur kyang dben par ni/ /gnas pas bde gshegs thugs mnyes byed nyid yin//grong gnas shin tu mnyam par gzhag gyur kyang / /der ni ting 'dzin bde bar bsrung mi 'gyur/ /mdza' dang phrad dang rang gi srog dang ni/ /sdug pa'i lus la 'ang ltos pa med par ni/ /bas mtha' dgon par gnas te brtson 'grus rtsom//yon tan khyad par gang zhig thob mi 'gyur/ /rol mo sna tshogs sgra dang glu yi sgra/ /g.yeng bar byed pa'i khyad par de dang de/ /dgon par med de gang phyir de yid 'ang / /rnal 'byor la phan sbyor la spyod pa rnams ni de la brten par bya ba'i rigs so/ /de bzhin du phyag dar khrod pa nyid kyang de bzhin du dam bca' sngon du 'gro bas phyag dar khrod pa 'chang ba'i ngang tshul 'di la yod pas phyag dar khrod pa ste/de'i ngo bo nyid ni phyag dar khrod pa nyid do/ /phyag dar khrod pa yang yul dang dur khrod dang / de'i gnyen 'khor dang / bar dag gi khrod na ngogs ltar gnas pa de las mnyam pa dang /mtho ba nyid yin pa'i phyir phyag dar khrod pa yin pa'am/ phyag dar 'jig rten pa rnams smod pa yon pas na phyag dar khrod yin la/ dam bcas pa'i cho gas khyim pas byin pa'i gos spangs pa phyag dar khrod bsags shing rab tu zhi zhing chog shes pa'i dpal dang ldan pa ni phyag dar khrod pa'o//de yang / dgon par gnas shing chog shes sems kyis ni/ /gos ni dman las rab dman gyon byed la/ /'di la ltos pa drag pa mi 'byung zhing / /'jigs dang 'khrugs pas rmongs par 'gyur ma yin/ /gzhan la chog shes yon tan go byed cing / /yid kyang shin tu dang ba kho nar byed//sems ni gya nom sred las zlog byed la/ /de thob phyir na sdug bsngal skyed mi byed/ /brlag na'ang rjes su gdung bar 'gyur min te/ /phyag dar khrod ni rnyed par dka' ma yin/ /gos phyir khyim pa dang ni 'dris pa yis/ /rang gi chos kyi las las nyams mi 'gyur//de ni rkun ma dag gis dogs mi skyed/ /bsrung ba'i 'bad pas de la bcom mi 'gyur/ /'di las phyogs kyi gnod pa'ang skye mi 'gyur/ /de ni log par 'tsho bas nyams mi 'gyur/ /sbyangs pa 'di ni sngon chad byung ba yi/ /thub pa rnams kyang rjes su 'jug pa yin/ / bdud kyi stobs las rgyal bar brtson pa la/ /dpa' bo go bgos lta bur gyur pa yin/ /gser gyi 'od 'bar ngang pas mtshan cing dkar/ /mdangs ldan spangs na rgyal bas gang bcas pa/ /de phyir lha dang mi yis phyag byas pa'i/ /phyag dar khrod la dam bca' su mi byed/ /dman pa gyon zhing zla 'dra'i mdangs ldan pa//yid du 'ong zhing mdzes pa'i gos dag kyang / /gang zhig phyag dar khrod ni 'chang byed ltar/ /zhi ba'i phun tshogs de ni skyod mi byed/ /dgra bcom stong phrag mang pos 'chang byed pa/ /rnyed bla 'di ni kha na ma tho med/ /nyer zhi dpal ldan bsngags 'os rnams kyis brten//phyag dar khrod la dga' bar su mi byed/ /rab tu byung nas gang zhig la gnas pa/ /ji skad smras bzhin byed pa de nyid mdzes/ /'dis ni gang zhig dam bcas byas gyur pa/ /de ni de bzhin 'dzin pas sdug pa yin/ /chog shes 'phel ba nor chen pa yi phyir/ / de yis chos ni phun sum tshogs par 'gyur/ /chog shes gtam gyis chog shes rab dgar 'gyur/ /dman las dman rnams gos kyis mgu ba yin/ /slob dpon gzhan dag ni rang bzhin gyi chos gos dang ldan pa la gnas nas phyag dar khrod pa nyid du dam bca' ba yin no zhes zer mod kyi/de ni khyim pa las blangs pa'i gos ma spangs pa'i phyir tshig tsam gyis dngos po sgrub par byed do/ /khyim pa las blangs pa'i gos lo mang zhig yongs su longs spyod cing 'jog pa de phyag dar khrod pa yin no zhes bya ba 'di yang mos pa tsam du zad do/ /de las bsod snyoms pa nyid ces bya ba ni dam bca' bas mgron du bos pa spangs te bsod snyoms la rgyu ba yin pas na bsod snyoms pa'o//bsod snyoms ni kham gyi zas slong ba zhes bya ba'i don yin te de rnyed pa zhes bya ba'i tha tshig go/ /bsod snyoms de yang dman pa dang / bar ma dang / mchog gi khyim du slong mo rgyu ba zhes bya ba'i don yin pa'am/bsod snyoms kyi phyir rgyu ba'i brtul zhugs kyi ngang tshul 'di la yod pas na bsod snyoms pa'o/ /de'i dngos po nyid ni bsod snyoms pa nyid do/ /de yang dam bca' ba 'dis byed pa yin no/ /nga rgyal spong zhing brnyas pa bzod byed la/ /rang gi lus ni skyo ba bzod byed cing //mgron bos pa yi bsdams pa'i sdug bsngal ni/ /slong mos spyod la zhugs la yod ma yin/ /sbyin pa'i gter chen bde ba rgya che la/ /mi smra bzhin du skye bo 'dzud par byed/ /khyim nang 'jug pa'i nges pa'i bslab pa ni/ /de spyod pa yis dge slong shin tu mdzes//dge slong tshul ni rang dbang gis 'tsho zhing / /rang gi brtson pas thob la bde bar spyod/ /log 'tsho'i nyes pas zil gyis mi gnon zhing / /'di yi phyogs 'di gang du 'ang dgag pa med/ /gang la gnas te rab tu byung gyur pa/ de ni de bzhin sgrub pas rnam par mdzes/ /zas kyi phyir ni sdug bsngal mi 'gyur zhing //dam pa rnams kyi tshul la rjes 'jug yin/ /nor dang nye du'i skye bo sdug dang khyim/ /kha zas ro zhim de dang de spangs nas/ /zas kyi sred pa las ni ldog gyur pa/ /mgu bas dge slong dngos po gsal byed yin/ /dam bca' ba'i dbang las stan gnyis pa la gnas pa'i kha zas spangs/stan gcig la zas kyi rigs la spyod pa'i ngang tshul 'di la yod pas na stan gcig pa'o/ /kha cig ni de ni stan la 'dug pa'i mthar thug pa yin par 'dod la/ gzhan dag ni khrus byas pa'i mthar thug pa yin no zhes zer te/ gang zhig zos nas stan de las ma langs kyang lhung bzed khru ba'i chu blangs nas slar za bar mi byed pa dang /kha zas so sor thob nas kham gyi tha ma zos nas yang slar mi za ba de ni zas kyi mtha' yin no zhes bshad do/ /de yang 'di ltar dam bca' ba goms par byed do/ /yang dang yang du za ba'i nyes pa yis//stan gcig rang gi bya ba spong mi byed/ /nad nyung gnod pa chung zhing lus srab 'gyur/ /rnal 'byor ldang ba yang bar 'dis 'gyur ro/ /cho ga bzhin gnas bde bar 'chag pa dang / /thub dbang tshul gyis rjes su 'jug pa dang / /chog shes gso sla'i yon tan rjes mthun zhing //zas kyi bde ba'i 'dam gyis gos mi 'gyur/ /'di yi sems ni ro la mi gdung zhing / /bsam gtan rjes sbyor dag la dga' ba yin/ /de la dga' bas rab zhi bya dgos gcig /nyon mongs phyogs ni bde blag nyid du spong / /dam bca' ba sngon du 'gro bas glos phab spangs te 'dug pa'i ngang tshul 'di la yod pas na cog pu pa'o//sems can dge ba la dam bca' ba'i yang dag par sgrub pa yin no/ /gnyid kyi mun pa stug pos mi non cing / /sems ni mal stan bde ba'i dbang mi 'gro/ /'di yi lus su 'dzin pa srab pa dang / /'di las mnyam par 'jog pa bder gnas 'gyur//le lo dngos po spong ba'i stobs skyed la/ /rang gi chos kyi las bsgrub la mi g.yel/ /yang ba'i rim gyis slar la brten pa na/ /ngal ba'i nyes pa shas cher nyams mi myong / /skyil krung dang bcas lus ni drang por gnas/ /bsam gtan la rtsol lus kyis gang 'dzin pa//dge slong 'chag gnas nyal ba'am 'dug pa yis/ /zhi ba'i dpal ni de 'dra 'dzin mi 'gyur/ /zas phyis mi len pa nyid ces bya ba ni phyis kha zas mi za ba'i ngang tshul can gang yin pa ni phyis mi len pa ste/ bca' ba sngon du 'gro bas lhag pa'i kha zas za ba las ldog cing de 'dor ba yin bas na zas phyis mi len pa'o//de'i dngos po nyid ni zas phyis mi len pa nyid do/ /phyis nas za ba spangs pa yin/ /dam bca' blangs par gyur pa yis/ /brkam chags med cing chog shes dang / /dad pa'i tshul dang rjes mthun yin/ /slar yang kha zas tshol ba yi//ngal ba rnam par spangs nas ni/ /de tsam gyis cho ga ngo mtshar bcas/ /'dod mtshungs nyid ni yon tan dpal/ /spangs te za ba'i cho ga bral/ /ltos la gdung ba'i tshul spangs pa/ /de ni gso slar gyur pa ste/ /bde zhing lus yang 'gyur ba nyid/ /chos gos gsum pa yod pas chos gos gsum ste/snam sbyar dang / bla gos dang / mthang gos dang / bca' ba sngon du 'gro bas rtag pa spangs te chos gos gsum 'chang ba'i ngang tshul 'di la yod pas na chos gos gsum pa'o/ /de'i dngos po nyid ni chos gos gsum pa nyid do/ /chos gos gsum po tsam gyis ni//chog shes yang ba la 'jug cing / /mang po la sred nyer bcas pas/ /gos sogs pa ni spangs pa yin/ /'dab chags lta bur blangs nas ni/ /gang du dga' bar 'gro bar byed/ /spang ba'i gnang ba dang bral zhing / /de las dge slong nyon mongs med//zhag bcu las 'das ltung ba ni/ /chos gos 'chang 'di la mi 'byung / /gos brtag pa yi bya ba ni/ /'di la yod pa ma yin no/ /dam pa'i tshul 'jug la 'khur zhing / /'dod chung yon tan rnams kyis brgyan/ /chos gos kyi ni bya ba yis/ /shin tu ngal bar 'gyur ma yin//dad pa dag pa 'di yis ni/ /ston pa lta bur mchod par byed/ /de bas 'di ni chos gos sogs/ /gus par rnam par 'phel bar 'gyur/ /phying pa nyid ces bya ba ni bal gyi rgyu la thags su ma btags pa la phying pa zhes 'jig rten na grags so/ /dam bca' ba sngon gyi 'gro bas phying ba 'chang ba'i ngang tshul 'di la yin pas na phying pa pa'o//de'i dngos po nyid ni phying pa pa nyid do/ /de yang / dag par spangs pa'i yon tan ni/ /bal bsdus pa las byas pa'i gos/ /snal ma med pas chog shes pas/ /bzang po sred las byung ba yi//de tshol ba yis nyon mongs med/ /gos ni bzang po spangs ba yi/ /cha lugs 'chang bas 'bar zhing mdzes/ /dge slong rab zhi dga' ba ni/ /ston pa lta bur mdzes pa yin/ /dur khrod bla gab med pa dang / /shing drung dag tu gnas pa na/ /de la brten pas char dang ni//tsha dang grang ba la sogs sel/ /'dis ni bzang po la chags pa'i/ /reg pa yis ni gnod mi 'gyur/ /bya ba mang nyung rang don dang / /chog shes pa las nyams mi 'gyur/ /gzhi ji bzhin pa nyid ces bya ba ni dam bca' ba sngon du 'gro bas gzhi ji bzhin pa la gnas pa'i ngang tshul 'di la yod pas na gzhi ji bzhin pa'o//de yang gang du ji ltar rnyed pa'i mal stan gyis mgu bar gyur cing gsar bus yongs su bzung ba'i mal stan bzang po la chags pas des bslang ba yongs su spangs pa yin pa'i phyir ro/ /ji bzhin bting bas mgu ba'i phyir/ /sdom brtson shin tu mdzes pa yin//dge slong gsar bu mal stan na/ /bde la gnas pa rjes su bsrung / /dman pa'i mal stan la 'dug kyang / /bzang po la ni nye ba med/ /chags dang sdang ba'i phyogs kyi ni/ /gnod pa'i gzhi ru 'gyur ma yin/ /mal stan la ni chags pa yis/ /phan tshun du ni drangs pa yis//rang gi bya ba mi nyams shing / /bral bar gyur kyang gnam mi g.yo/ /rtswa bting ba 'am sa la nyal ba na/ /ji bzhin gzhi las gyur pa'i bde ba ni/ /nor bu 'bar ba'i gzhal yas khang stengs na'ang / /chog shes med pa'i sems la ji yod min/ /dur khrod pa nyid ces bya ba ni dam bca' ba sngon du 'gro bas dur khrod du gnas pa'i ngang tshul 'di la yod pas na dur khrod pa'o//de'i ngo bo nyid yin pas na dur khrod pa nyid do/ /de'i yon tan ni/ dur khrod du ni rgyun du 'chi dran pas/ /skyo 'gyur de las bag med 'gyur ma yin/ /mi gtsang sna tshogs mtshan ma rnams mthong nas/'di yi 'dod pa'i 'dod chags 'phel mi 'gyur/ /'dir ni mi ma yin pa gus 'gyur zhing / /'di yi srog la ltos pa chung 'gyur zhing / /de la brten pas dregs pa spong 'gyur la/ /de bas de ni chos 'ga' mang dag 'thob/ /sems ni zhi la phyogs phyir rang srog dang /bde dang lus la ltos pa med 'gyur la/ /sdig sbrul mi ma yin pa'i 'jigs pa las/ /der gnas pas kyang sngar bas skrag pa med/ /shing drung pa nyid ces bya ba ni dam bca' ba'i tshogs g.yogs pa'i gnas spangs la shing drung du gnas pa'i ngang tshul 'di la yod pas shing drung pa'o//de'i dngos po ni shing drung pa nyid do/ /der dam bcas pa'i yon tan ni/ gang zhig shing drung bzang po dag tu ni/ /mal stan dag gis sems mgu'i 'byor par ldan/ /phyogs rnams kun du thogs pa med par 'gro/ /de ni dam chos phun sum tshogs pa'i lam//de ni chos kyang rnam par 'phel 'gyur zhing / /bdud kyi stobs kyi dregs pa zlog par byed/ /de yi yid ni mnyam 'jog sgrub rgyu yi/ /bde ba dag las dge slong nyams mi 'gyur/ /rnyed par sla zhing yo byad nyung ba dang / /'du 'dzi sdug bsngal sgrib pa dang mtshungs shing / / rang gi gnas la yon tan rgya chen sten/ /dga' bas shing drung dag tu su mi gnas/ /lo 'dab gsar du byung bar gyur nas ni/ /mdog 'gyur bas bcom lo ma lhags pas shing / /rang gi rtsa bar gnas pa'i sdom brtson la/ /mi rtag 'du shes ston pa lta bu yin/ /bla gab med pa nyid ces bya ba ni dam bca' ba'i tshogs g.yogs pa'i cho gas shing drung spangs pa'i gnas kun nas go skabs yod bla gab med pa la gnas pa'i ngang tshul 'di la yod pas na bla gab med pa pa'o//bla gab med pa'i ngo bo nyid ni bla gab pa nyid do/ /de yang dag par blangs pa'i yon tan ni//mal stan tshol dang bsrung dang sbrug pa yis/ /yongs su nyal ba'i gzhir gyur ma yin zhing / /bla gab med la sgrub par khas blangs la/ /'du 'dzi med pas shin tu mdzes pa yin/ /phyogs rnams kun du dgag pa med par ni/ /ri dgas lta bur rang dgar 'gro ba yin//chog shes yon tan mchog dang ldan 'gyur zhing / /sems ni gnas khang 'du 'dzi las rnams grol/ /gnyid chung nyid dang yid la byed pa'i rjes mthun zhing / /dam pa'i tshul la brten pas yon tan phyogs 'dzin cing / lus kyi bde ba cung zad la chags rnam spong ba//yon tan de de bla gab med la gnas pas 'thob/ /skar tshogs rin chen 'od zer 'bar ba yis/ /nam mkha'i bla re nyi zla'i mar mer ldan/ /'jig rten du ma de snyed ri dang bcas/ /khang bzangs dang ldan gtsug lag khang chen yin/ /de dag la sogs pa'i yon tan gyi tshogs yang dag par 'byor bas na sbyangs pa'i yon tan zhes bya ba dang /nyes pa rnams sbyong bar byed pas na sbyangs pa'i yon tan zhes bya ba ste/ 'di lta ste/ glang po che chu 'thung ba la 'thung ba la zhes brjod pa'am/ zas za ba la za ba zhes smra ba dang 'dra bar tshig gong ma phyis te chog mi shes pa dang /'du 'dzi dang shas cher 'dre ba nyid dang / le lo nyid dang / gnyid dang / 'du 'dzi'i nyes pa sbyong bar byed pa yin pas sbyangs pa zhes bya'o/ /dam bca' ba 'di dag ni nyes pa rnams kyi mi mthun ba'i phyogs yin bas sbyangs pa zhes bya la/ 'di dag ni dam bca' ba'i rten gyi bye brag tu phye ba yin no/ /de ni nyan thos mchog rnams kyis bsngags shing bzung ba yin te/ dgos pa byed pa'i mchog yin pas 'di dag yang dag par blang bar bya'o/ /de bzhin du 'di dag yongs su bzung ba'i sdig pa 'dod pa dang / sems rnam par g.yeng ba dang /dman pa dang / kun du rmongs pa rnams kyi thun mong ma yin pa nyid yin pa'i phyir dang / chog mi shes pa dang / chags pa la sogs pa'i sdig pa so sor spong ba yin la/ thams cad kyi thun mong pa yin pa nyid dang / mthar thug par bya ba nyid yin no/ /yang sangs rgyas dang /chos dang / dge 'dun la mchod pa dang 'dra bar/ 'dod pa'i 'dod chags dang gti mug med pa dag sbyong ba'i chos yin pa'i phyir dge ba yin no/ /de la dge slong dgon pas ma 'ongs pa'i 'jigs pa dran nas bag yod pa nyid dang / brtson 'grus brtul ba dang /mchog tu bdag la phan pas gnas par bya'o/ /chos kyi dad dpon gyis dge slong sgra ngan las brtsams te bshad pa'i dgon pa pa'i tshul skyo bas g.yengs pa bsal bar bya ba'i phyir bsam par bya zhing de bzhin du bslab par bya'o/ /bag med gnyid dang le lo'i rjes 'jug dang //khyim pa'i bde ba dran pas skyo bar 'gyur/ /log par brtson pas nags la mngon dga' dang / /dga' zhing dgod sogs kyis ni dgon par g.yengs/ /sdig 'dod bsam pas dgon par gnas pa yin/ /dman zhing mi mkhas skyo ba nyid du 'gyur/ /rnam g.yengs bdag nyid shin tu g.yengs byed cing //sbyor ba bzang ldan nyes de'i skal can min/ /nyes la mngon dgas kun du zhum 'gyur zhing / /khyad par chung ngus shin tu dag pas g.yengs/ /nyes la dgra bo lta bur yid rtsub cing / /zhi la mngon brtson brtan pa rnams ni mdzes/ /de bzhin phyag dar khrod la sogs pa la skyes bu dam pa rnams kyi chos dang /dam pa ma yin pa'i chos la yang dag par bsams nas/ sbyangs pa'i yon tan yang dag par blangs nas bdag la stod pa dang / gzhan la smod pa dang / dam pa ma yin pa'i lam gyi rjes su 'brang bar mi bya'o/ /'di dag ni gtso bo'i yo byad yin gyi dregs pa'i tshogs ma yin no//de rnams kyis bsgrubs pa'i rnyed pa dang / bkur sti dang / tshigs su bcad pa'i ro myang bar mi bya ste/ rnyed pa dang / bskur sti dang / tshigs su bcad pas lha sbyin rnam par ltung bar gyur pa yang dran par bya'o/ /dge slong phyag dar khrod pas kyang phyag dar khrod 'chang ba dang /rjes su mthun par rab tu zhi bar bya'o/ /'di las gzhan du na/ dge slong khengs shing mi brtan pa/ /phyag dar khrod ni gon gyur na/ /spre'u stag lpags gon mtshungs te/ /'di ni de yis mdzes ma yin/ /khengs pa med cing rang bzhin brtan//sdig med dbang po bsdams pa ni/ /phyag dar khrod kyis rnams mdzes te/ /ri sul gyi ni seng ger mtshungs/ /dad pa med pa'am dad pa chung ba rnams kyis 'di smad par 'gyur na yang / gang smod par 'gyur ba 'di ni 'jig rten gyi chos yin pas dam bca' ba rjes su dor bar mi bya zhing 'di la bzod pa'i bsam pas zil gyis mnan par bya ba nyid yin no//bsod snyoms pa nyid kyis kyang grong khyer ram ljongs su bsod snyoms la zhugs pa na bslab pa yongs su dag pa dang / dge ba yid la byed pas bdag nyid snod du byas pa bla ma'am/ de dang 'dra ba'i tshangs pa mtshungs pa rnams la dri ba byas nas gos gyon te/ ska rags bcings la shes bzhin dang ldan pas chos gos dang lhung bzed blangs la mdud pa bcings te/ mchil lham bgos nas dus la bab par grong du 'jug pa na yang nyi ma dang dus shes par byas la 'jug par bya'o//'di lta ste slong mo spyod pas 'tsho ba 'di ni 'tsho ba'i tha chad yin zhing 'jig rten 'di ltar skra brags pa lag na thod pa thogs shing gos tha dad pa gyon nas gzhan gyi grong du slong mo rgyu bar gyur cig ces bya ba yin mod kyi/ de bzhin gshegs pa'i gdams ngag rjes su dran zhing lus kyi don du 'di ltar tshol ba la zhugs pa yin no zhes lus kyi nyes dmigs mthong ba dang /grong khyer du 'jug pa'i bslab pa'i gzhi la rjes su slob bzhin pa dang / chos gos dang sham thabs zlum por bgos pa dang / mig gzhan du ma yengs pa dang / lkugs pa ma yin bzhin du lkug pa lta bur byed cing bsdams pa lus shin tu bsdams par 'jug par bya'o//grong gi nang du zhugs shing rgyu ba dang / rnyed pa dang / ma rnyed pa dang / bstod dang ma smad pa na dga' bar gyur pa med pa dang bsod snyoms ster ba rtsom pa'i bud med mtshan ma dang / yan lag la rtog pa ltar spang zhing yongs su tshol ba med pa dang /'dod pa'i 'dod chags dang / zhe sdang dang / gti mug dang / dregs pa skye ba'i dngos po rnams la dran pa brtan pas bsrung ba dang / yongs su len pa'i tshod shes pa dang / snyoms shing dus la rtog pa dang / bag yod pas rgyu bar bya'o/ /'dris pa med cing mdza' bshes min khyim du//gyo mo'i snod thogs slong mo'i phyir rgyu la/ /mgo bregs brtsams pa'i gos ngan gyon pa la/ /bag med gyur na ngan pa rnams dang snyam/ /stan gcig pa dag gis kyang bza' ba dang / bca' ba dang / btung bar bya ba la longs spyod dam bca' ba ni 'gal ba med na yang chog shes pa dang /brkam chags med pa dang / ro la zhen pa med pa dang / rang gi bya ba las nyams par ma gyur pa las yang dag par bltas te stan gcig pa nyid la gnas nas longs spyod par rigs pa yin te/ /de tsam gyis 'tsho ba dang / bde ba la reg par gnas par 'gyur bar bya'o//cog bur 'dug ste gnyid log pa la 'jug par mchog tu gzhol bas 'gyel zhing mgo bo 'dud pa dang / kha chu 'dzags pas nyal ba dang mtshungs par mi bya zhing / /'di ni brtson 'grus rtsom pa'i phyir sgrub pa yin pas mal stan gyi bde ba spang bar bya'o//cog pu ma yin na yang sna sman btang ba'i don du dus nyung zad cig lus phab tu zin kyang dam bca' ba las nyams par mi 'gyur ro/ /zas phyis mi len pas kyang bstabs pa las lhag par longs spyad par mi bya zhing / ma bstabs pa yang zos zin nas longs spyad par mi bya ste/brkam chags med pa dang / chog shes pa'i rjes su mthun par bya'o/ /chos gos gsum pa bas kyang ci nas kyang yo byad bskyungs pas gnas par bya ste/ dbyar gyi ras chen la sogs pa yang dam bca' ba dang mi 'gal bar 'jug par bya'o/ /phying pa pas kyang phying pa'i rgyu las byas pa'i chos gos ma rnyed par gyur na bal las byas pa snal ma btags pa yang bcang bar bya ste/de dang rjes su mthun pa ma yin pa'i phyir ro/ /gzhi ji bzhin pas kyang rkyen de lta bu byung na gzhan las rjes su gnang ngo / /mnos la de'i mal stan la gnas par bya ste/ 'di lta bus de'i dam bcas pa nyams par mi 'gyur ro/ /dur khrod pas kyang bu ram til dang sbyar tshod dang sha'i tshod ma la longs spyad par mi bya zhing dge ba yid la byed pas gnas pa dang / sangs rgyas dang chos dang dge 'dun mang du rjes su dran pa dang / byams pa'i sems dang gal te smra na chos ston pas gnas par bya'o//gzhan dag na re dur khrod pas dur khrod du spyil po'am/ mal stan la sogs pa mi bya zhing dur khrod kyi gong gi cha'am 'og gi char gnas par mi bya'o/ /glos phab ste nyal bar mi bya'o/ /nya dang sha dang 'o ma dang til dang / bag zan dang / ma sha'i sran chen bza' bar mi bya/khyim du zhugs par mi bya/ lhung bzed gtang bar mi bya'o/ /skye bo'i 'dus pa chen po longs ba slar song nas gos kyi gnas dang stan blangs la ro sregs dang shin tu mi ring bar bor ba 'phangs pas nod pa tsam gyi gnas kyi nang du 'dug pa la nam langs nas gos dang stan blangs la 'gro bar bya'o zhes zer ro//shing drung pas kyang rnyings pa dang / khang stong dang / dbyar gyi dus ma gtogs pa gzhan du ljan ljin bcas pa'i shing gi rtsa ba spang bar bya'o/ /bla gab med pas kyang sbrang bu dang chu sbrang nyung ba/ sdig sprul dang / srog chags gdug pa dang / grog sbur me dang / tsher ma dang bral ba'i gnas bstan par bya ba dbyar gnas pa'i dus su ni g.yogs pa'i gnas su 'dug par bya'o/ /dur khrod pas kyang gnas g.yogs pa yod na dbyar gnas kyi bar du 'dug pa la 'gal ba med la/ dbyar gyi gnas med na steng g.yogs yod par 'gro bar bya'o//de la dgon pa nyid kyang bar gyi nyes pas grong nang du dus cung zad cig 'dug na yang dam bca' ba mi gtong ba yin pa'i phyir nyams par mi 'gyur ro/ /de bzhin du chos nyan pa dang / gso sbyong dang / dgag dbye'i don dang / kun la mngon par grags pa'i mdo sde 'dzin pa dang /yongs su dag par bya ba'i phyir dang / bsnyen par rdzogs par bya ba dang / ltung ba las ldang ba dang /ldang ba byed du gzhug pa dang / nad gso ba dang / nad g.yog bya ba la sogs pa'i rkyen gyis 'gro ba la nyes pa med do/ /de bzhin du shing drung pas kyang de dag lta bu'i bya ba'i gtsug lag khang du zhugs pa dang /char 'bab pa na skya rengs shar bar gyur kyang shing drung ba nyid las nyams par mi 'gyur ro/ /shing drung pa dang / bla gab med pa dang / dur khrod pa'i nyes par 'byung ba yang dgon pa pa dang 'dra'o/ /phyag dar khrod pa nyid kyis kyang kha tshar bcad pa dang /mtha' ma bcad pa dang / ba lang gis zos pa dang / byi bas zos pa dang / mes tshig pa dang / bkra shis par bya ba'i phyir lam du 'dor ba dang / dur khrod du gtogs pa dang / smres te bor ba dang / 'jug sogs kyi rgyal mtshan dang / dge sbyong gis byin pa'i gos rnams gyon pa la 'gal ba med do zhes kha cig 'dod de/de rnams ni phyag dar khrod pa dang 'dra bar 'dod pa yin pa'i phyir ro/ /phyag dar khrod gnyug mtshol ba'i phyir zhugs pa la gal te khyim bdag gis sra zhing gsar pa'i dar la sogs pa byin pa na de blangs kyang phyag dar khrod las nyams par mi 'gyur ro zhes grag go//de bzhin du ched du bya ba'i kha zas dang / tshul shing gis bab pa'i kha zas dang / zla ba phyed pa dang / gso sbyong pa dang / dge 'dun gyi zas dang / gtsug lag khang gi kha zas rnams ni mgron du bos pa ma yin pa'i phyir bsod snyoms pa nyid las nyams par mi 'gyur ro zhes zer ro/ / stan gcig pa nyid du zab yang glang po che gtum po dang / rta dang / khyu mchog mi srun pa dang / sprul la sogs pa'i 'jigs pa dang / mkhan po dang / slob dpon dang / tshangs pa mtshungs par spyod pa rnams la gus pas 'phral du langs nas zas la spyod kyang stan gcig pa nyid las nyams par mi 'gyur ro//de la sbyangs pa'i yon tan 'di rnams las dgon pa pa nyid dang / cog pu pa nyid dang / gzhi ji bzhin pa nyid dang / dur khrod pa nyid dang / shing drung pa nyid dang / bla gab med pa nyid de drug na mal stan dang rab tu ldan pa yin no/ /phyag dar khrod pa nyid dang / chos gos gsum pa nyid dang phying pa pa nyid de gsum ni chos gos dang rab tu ldan pa yin no//bsod snyoms pa nyid dang / stan gcig pa nyid dang / zas phyis mi len pa nyid de gsum po nyid ni bsod snyoms dang rab tu ldan pa yin no/ /de dag las kyang bsod snyoms dang / chos gos dang / mal stan la sred pa nye bar skyed pa'i rgyur gyur pa rab tu zhi bar bya ba'i phyir dang /'phags pa'i rigs dang rjes su mthun par bya ba'i phyir yang dag par blang bar bya ste/ de la gnas na spang ba la mngon par dga' ba nyid kyis srid par 'byung bar 'gyur ba'i rgyu can gyi srid pa rnam par gcod pa yin pas bde ba dang ldan pa yin no//kha cig na re sbyangs pa'i yon tan dang po gsum ni gtso bor gyur pa yin la lhag ma rnams ni khor du gyur pa yin no zhes 'dod de/ 'phags pa mdzes dga' la mngon par dgyes pa ston pa yin pa'i phyir ro/ /de yang bcom ldan 'das kyis dga' bo khyod nam ngas mthong bar 'gyur zhes bya ba'i tshigs su bcad pa ji skad gsungs pa lta bu'o//la la na re gang gis gnas brtan rnams mchog nyid du bstan cing grags pa'i lnga po 'di dag gis gtso bor gyur pa yin la de las gzhan pa bdun ni 'khor du 'gyur ba yin no/ /'di dag thams cad kyang dad pa rnam par dag pa nyid yin pa'i phyir dang /yon tan du mas phul du byung ba yin pa'i phyir dang / de bzhin gshegs pa dang 'dra bar smad par bya ba ma yin pa'i phyir dang / de rab tu zhi ba yin pa'i phyir dang / rab tu zhi ba 'phel bar byed pa nyid yin pa'i phyir bkra shis pa'i mchog yin no//legs pa'i lam bstan pa'i gtam las sbyangs pa'i yon tan gyis mdzes pa zhes bya ba phun sum tshogs pa gnyis pa'o// //sbyangs pa'i yon tan yang dag blangs/ /don dran pa la yang dag gnas/ /shes bzhin ldan pa'i rnal 'byor pa/ /spyod pa thams cad don yod 'gyur//ji skad du bshad pa'i ldang ba dang 'dug pa na shes bzhin dang ldan pa kho na bya'o/ /de la lus dang / ngag dang / yid kyi las thams cad shes bzhin nyid kyis so sor legs par brtags nas bya ste/ 'di ni 'di'i rgyur bsgrub par bya'o/ /'di ni 'di'i rgyur spyad par bya'o snyam pas don med pa ci yang bsgrub par mi bya na dge ba rnams lta ci smos/'di ni shes bzhin don dang ldan pa yin no/ /ji skad du 'phags pa sgra gcan 'dzin la gdams pa las/ sgra gcan 'dzin de bas na lus kyi las byed par 'dod pas lus 'di ni rus pa sum brgya 'dus pa/ rgyus pas sbrel ba/ sha'i ris brgya phrag du mas zhal zhal byas pa/ pags pas g.yogs par blta bar bya'o/ /sems kyi dbang gis 'jug par byed pa/ me dang rlung gis rgyu bar byed pa/ sa dang chu dag shas che bar gyur pa na mal dang stan la sogs pa la 'jug pa/ rkyen la rag las pas mi brtan pa nyid kyis na sdug bsngal ba de nyid kyi phyir bdag dang bdag gi ba med pa zhes gsungs pa dang /ji skad du dge slong dag lus 'di ni khyod gcig gi yang ma yin/ gzhan gyi yang ma yin pa 'di ni/ rang gi mtshan nyid yang dag par shes pa yin no zhes gsungs pa dang / nges par bya ba yongs su rdzogs nas kyang 'dug ste/ gang gis goms pa dang rjes su mthun par mngon par 'dod pa'i bya ba 'jug pas bya ba ni nges par 'byung ba yin la byed pa la mngon par phyogs pa dran pa nye bar gzhag pa dang / rjes su mthun pa la mngon par phyogs pa 'dis yid la bya ste/ 'di ni rang gi spyod yul shes pa nyid yin no/ /shes bzhin du bya ba 'di dag las gang zhig gang gi dus su bsgrub par bya ba de dus ji lta ba bzhin du bsgrub par bya ste/ 'di ni ma rmongs pa'i yang dag pa shes pa nyid yin te/ ji skad du dge slong gis dus shes par 'gyur ba ji lta ba yin zhe na zhes bya ba la sogs pa gsungs pa yin no//de ltar yang dag pa'i shes bzhin nyid la sogs lus dang ngag dang yid kyi las shin tu rnam par dag pa ni ting nge 'dzin gyi sbyor ba tsam bsgrub par 'gyur ba yin no/ /lus dang ngag gi nyes pa 'bring dang ni/ /sems byung ba yi phra mo zhi gyur na/ /sa rdul bkrus pa'i gser ni phra mo bzhin//dge ba'i rnam rtog lhag ma lus par 'gyur/ /de ni ting nge 'dzin mngon par 'dus byas pa las thob pa sems bsdus nas 'jog pa zhes bya ba yin no/ /ji skad du phyag dar 'khrud par byed pa'i mdo las/ /yang dag mtshan ma la ni legs gnas la/ /mnyam zhing rgod dang zhum pa'i sems nyid ni//btang snyoms zhi dang 'dzin par gyur nyid du/ /sems de la ni mngon brtson mnyam par gzhag /gser gyi phye ma sa rdul sbyangs pa ni/ /se'u'i khang gzhag 'ju bar 'dod pa na/ /me stobs mnyam zhing rno dang chung ba ni/ /btang snyoms gzhag dang dbal bsad sbar mtshungs dang //rnal 'byor spyod pa'i rnam g.yengs 'dis mnyam par gzhag pa'i phan yon la bsam par bya'o/ /rnal 'byor spyod pa'i ting nge 'dzin thob pa ni kha na ma tho ba med pa dang / gzhan gyi kha na ma las pa'i ting nge 'dzin las byung ba'i dga' ba dang bde ba'i ro sten par byed pa na mi las 'das pa'i dga' ba yid du 'ong ba nyams su myong bar 'gyur te/ji skad du dge slong khyim stong par zhugs pa ni mi'i las 'das pa'i dga' ba thob po zhes gsungs pa yin no/ /de bzhin du lus 'di nyid la dben pa las skyes pa'i dga' ba bde ba dang / ting nge 'dzin yongs su sbyang ba byas pa'i sems 'jam zhing las su rung ba sgrib pa'i rnyog pa dang bral ba ni phung po dang khams dang skye mched kyi rang bzhin gyi bde blag tu mthong bar 'gyur ro//de bas na bcom ldan 'das kyis dge slong dag ting nge 'dzin bsgoms shing ting nge 'dzin mang du bya zhing bag yod pa dang /sdig pa dang bral ba dang / nang du yang dag par 'jog pas rnal 'byor la mnyam par gzhag par bya zhing sems nang du zhi bar bya'o/ /ting nge 'dzin la brten nas mngon par shes pa lnga dang / khyad par de dang de thob par 'gyur te/ ji skad du/ de de ltar mnyam par gzhag pa'i sems kyi cho 'phrul gyi cho ga mngon sum du bya bas sems la dbang sgyur zhing de rdzu 'phrul gyi bya ba dpag tu med pa nyams su myong bar byed do zhes gsungs pa yin pas/ting nge 'dzin thob pa mi slob pa'i sa ma thob par ma nyams par dus byas nas ting nge 'dzin ji lta ba bzhin du gzugs dang / gzugs med pa'i ting nge 'dzin phun sum tshogs pa thob par 'gyur ro/ /ji skad du skye ba rnam par 'byed pa las ting nge 'dzin gyi nye bar spyod pas nye bar bsags pa'i las kyi lha'i bdag po dang / 'khor los sgyur ba la sogs pa'i phun sum tshogs par 'gyur ro zhes gsungs pa dang / ji skad du/ dge slong dag nga len sum cu rtsa drug gi bar du lha rnams kyi dbang po brgya byin du gyur na/ rgyal po rgyal rigs spyi bo nas dbang skur bar gyur pa lta smos kyang ci dgos/ de lta na/ ting 'dzin grub phyir yid ni brtson gyur pa/ /de yi yang dag yon tan la lta ba/ /yon tan la dgas bya ba 'grub pa dang //sems ni spro ba brten pa nyid du 'gyur/ /de la ting nge 'dzin zhes bya ba ni bying ba dang / zhum pa dang / rnam par g.yengs pa dang /mi mnyam pa spang ba'i phyir sems dang sems las byung ba dmigs pa gcig la gtod pas ting nge 'dzin zhes bya ba'am/ sems dang sems las byung ba dmigs pa gcig yang dag par sdud pas na ting nge 'dzin yin pa'am/phyin ci ma log pa yin pas ting nge 'dzin 'di la gtod cing 'jog pa na phun sum tshogs pa'i khyad par ye shes dang mthong ba de dang de skyed pa'i phyir ting nge 'dzin to/ /de yang gang rnam par dag pa'i sems dmigs pa gcig la nye bar zhi ba'i yon tan gyis yang dag par brtson 'grus 'jug cing mi g.yeng bar gnas pa'am//nye ba'i nyon mongs pa'i rlung gis ma bskyod par khang pa'i nang gi mar me dang 'dra bar sems rtse gcig par 'jug pa ni ting nge 'dzin zhes bya ste/ sems gnas pa dang yang dag par gnas pa zhes bya ba la sogs pa ji skad gsungs pa lta bu'o//yang na rnam pa gcig pa dang / sbyor ba gcig pa dang / sgo gcig pa dang / dmigs pa gcig pa la sems yang dag par 'jog pa'o/ /de yang sems rtse gcig pa'i mtshan nyid de/ nyon mongs pa'i yongs su gdung ba rab tu zhi ba'i phyir nye bar gnas pa'o//de ni 'gyod pa med pa dang / rab tu dga' ba dang / mgu ba dang / shin tu sbyangs pas kun nas bslang ba'i gzhi'i gnas yin no/ /de ni sems rtse gcig pa'i mtshan nyid kyis rnam pa gcig yin no/ /'jig rten dang 'jig rten las 'das pa'i dbye bas ni rnam pa gnyis yin te/byang chub kyi yan lag dang rab tu ldan pa ni 'jig rten las 'das pa'o/ /de las gzhan pa ni 'jig rten pa rnams so/ /yang / yang dag pa'i ting nge 'dzin ni rnam pa gnyis te/ /dge ba la sems rtse gcig pa ni yang dag pa'i ting nge 'dzin to/ /mi dge ba la sems rtse gcig pa ni log pa'i ting nge 'dzin to//gzhan yang lung du bstan pa dang / lung du ma bstan pa gnyis te/ lung du bstan pa ni dge ba dang / ma bstan pa ni mi dge ba dag go/ /de gnyi ga las go bzlog pa ni lung du ma bstan pa'o/ /gzhan dag ni ting nge 'dzin rnam pa gnyis su 'chad de/nye bar gdags pa'i ting nge 'dzin dang / gtod pa'i ting nge 'dzin to/ /ting nge 'dzin de dang de dag las snga ma'i cha dang nye ba ni gdags pa'i ting nge 'dzin to/ /rigs su gyur pa'i chos kyi rjes thogs la ni gtod pa'i ting nge 'dzin yin no/ /gzhan yang rnam pa gnyis te/dga' ba dang bcas pa dang / dga' ba med pa'o/ /dga' ba dang bcas pa ni bsam gtan dang po dang / gnyis pa dang / de'i nyer bsdogs dang / de'i mthus gnas pa'i snyoms par 'jug pa rnams so/ /dga' ba med pa ni de yan chad kyi bsam gtan dang / nyer bsdogs dang /de'i mthus gnas pa rnams so/ /yang gnyis te/ gzugs la spyod pa dang / gzugs med pa la spyod pa'o/ /gzugs la spyod pa ni slob pa dang / so so'i skye bo rnams bsam gtan bzhi dang / de'i nyer bsdogs dang / de'i mthus snyoms par 'jug pa rnams so//gzugs med pa ni gzugs med pa la spyod pa rnams so/ /gzhan yang rnam pa gnyis te/ smon pa dang bcas pa dang / smon pa med pa'o/ /byang chub kyi yan lag can ma yin pa srid pa mngon par 'grub par byed pa ni smon pa'o/ /byang chub kyi yan lag dang bcas srid pa spong bar byed pa ni smin pa med pa'o//yang rnam pa gsum te/ /rtog pa dang dpyod pa dang bcas pa tsam dang / rtog pa med cing dpyod pa tsam dang / rtog pa yang med dpyod pa yang med pa'o/ /de la rtog pa dang dpyod pa dang bcas pa ni bsam gtan dang po dang de'i mthus snyoms par 'jug pa'o//rtog pa med la dpyod pa tsam ni bsam gtan dang po'i bsam gtan khyad par can dang / de'i mthus snyoms par 'jug pa'o/ /rtog pa med la dpyod pa med pa ni bsam gtan gnyis pa la sogs pa dang / de'i nyer bsdogs dang / de'i mthus snyoms par 'jug pa rnams so/ / yang ting nge 'dzin rnam pa bzhi ste/ nyams pa dang / gnas pa dang / khyad par dang / nges par 'byed pa'i skal ba can no/ /gzhan yang 'dun pa dang / brtson 'grus dang / sems dang / dpyod pa'i dbang du byas pa bzhi'o/ /de nyid dmigs pa dang / rnam pa dang / chung ngu dang / 'bring dang chen po'i dbye bas ting nge 'dzin rnam pa mang po yod do//de yang shin tu bsdus pa dang / rgyas pa ma yin par rim pa rab ma la gnas nas 'di dag tsam zhig rnam par gzhag pa yin te/ 'di lta ste bsam gtan bzhi dang / de'i nye bsngogs gsum dang / gzugs med pa rnam pa bzhi dang /rjes su dran pa drug dang / tshad med pa rnam pa bzhi dang / dbugs dbyung ba dang rngub pa rjes su dran pa dang / 'du shes bcu dang / zad par gyi skye mched bcu dang / zil gyis non pa'i skye mched brgyad dang / rnam par thar pa brgyad dang / zil gyis gnon pa dang / 'du shes med pa'i snyoms par 'jug pa dang /stong pa nyid dang smon pa med pa la sogs pa'i ting nge 'dzin gsum dang / rjes su mthun pa la rjes su mthun par 'du shes la sogs pa snyoms par 'jug pa dang / stong pa nyid gsum dang / yan lag lnga dang / shes pa lnga dang ldan pa'i ting nge 'dzin rnams so//de ltar ting nge 'dzin gyi tshogs 'di dag rnal 'byor pas gzhung dang don gyi sgo nas yang dag par rtogs par byas nas kyang de rdzogs par bya ba'i don du gtam bcu bzhi'i yon tan phun sum tshogs pa'i dge ba'i bshes gnyen nam/ mkhan po'am/ slob dpon nam/ tshangs pa mtshungs par spyod pa de lta bu bsten par bya ba'am/gang zhig la brten nam thos pa thos pa dang / thos pa rnams yongs su dag par byed pa dang / the tshom spong bar 'gyur ba dang / lta ba drang por byed pa dang / tshig zab mo'i don so sor shes rab kyis rtogs pa dang / gang zhig la bslab pa na tshul khrims dang /thos pa dang / shes rab la sogs pa'i yon tan gyi khyad par 'phel bar 'gyur ba la brten par bya'o/ /gang yang sdug dang bla ma dang / /dang bya smra mkhas tshig smra nus/ /zab mo'i gtam ni ston byed pa/ /gnas min pa ni mi sbyar ro/ /gal te rnyed na sdig med shes rab can//zhes bya ba la sogs dang / kun dga' bo 'di ni tshangs par spyod pa yongs su dag pa nyid yin no zhes bya ba la sogs pa ji skad du gsungs pa lta bu'o/ /de la sdug pa ni tshul khrims dang thos pa phun sum tshogs pa'i byams pa'i lus dang ngag dang yid kyis sam/sbyin pa dang / snyan par smra ba dang / don mthun pa dang / don spyod pas ni sdug par 'gyur ba yin no/ /nye bar zhi ba la goms pa dang / tshig ma 'chal ba dang ldan pa nyid dang / chog shes pa nyid kyis na bla ma yin no/ /shes pa dang / yon tan phun sum tshogs pa dang /khyad par rtogs par 'os pa'i spyod lam dang ldan pa'i phyir dang bar bya'o/ /chos la gus pa dang / gzhan la phan pa la brtson pa'i blo can nyid dang / yang dag par dang / dus dang / 'jam pa dang / don dang ldan par tshig smra ba la mkhas pa dang / bdag nyid gzhal ba shes pas na smra ba la mkhas pa'o//rang bzhin bzang ba nyid dang / rang dang gzhan gyi gzhung lugs shes pa dang / gtam gyi bya ba la mkhas pas na tshig smra ba nus pa'o/ /'jug pa dang ldog pa'i rim pa shes pa dang / nges par 'byung ba'i bsam pa dang ldan pas zab mo'i gtam ston par byed pa'o//legs par brtags nas byed/ spyod pa'i mtshan nyid dang / bslab pa dang / mi mthun pa'i phyogs shes pas gnas ma yin par mi sbyor ba'o/ /yang na dge ba'i phyogs nyams par byed pa'i tshig dang las la mi sbyor ba yin pa'i phyir ro/ / sems can rnams ni phal cher nyes pa de dang de la spyod pa yin pa dang / dad pa dang / blo dang / rtog dpyod pa yin pa'i phyir 'dod chags la spyod pa dang / zhe sdang la spyod pa dang / gti mug la spyod pa zhes de dang de ltar ston te/ dad pa la sogs pa la spyod pa yang gsum po 'di dag gi nang du 'dus pa yin te/'dod chags dang / zhe sdang dang / gti mug ni nyon mongs pa'i gtso bo yin pa'i phyir dang / dad pa dang / blo dang / rnam par rtog pa ni de'i rigs kyi skal ba can yin pa'i phyir ro/ /'dod chags ni kun du sbyor ba'i bdag nyid can te/ de ni da lta byung ba'i don la tshul bzhin ma yin pas zhen pas na 'dod chags zhes bya la/ma 'ongs pa'i nyon mongs pa can la don du gnyer ba'i sgo nas zhes pa ni sred pa zhes bya bar bshad do/ /de'i bdag nyid can gyi gang zag ni dge bar 'gyur ba'i don la tshul bzhin sbyor bas na dad pa la spyod pa zhes bya'o//de bas na 'dod chags dang / sred pa dang / dad pa la spyod pa gcig tu rab tu skyes pa yin pa'i phyir dang / 'byar ba'i bdag nyid can yin pa'i phyir gcig pa nyid ces bya'o/ /de bzhin du bral ba'i bdag nyid can ni zhe sdang ste/ de zhe sdang ba'i sgo nas 'bral bar 'gyur bas na zhe sdang zhes bya'o//bdag la bstod pa'i sgo nas 'bral bar byed pas nga rgyal zhes bya'o/ /de'i bdag nyid can gyi gang zag ni skye ba mang ba yin/ khams gsum po dang bral bar byed pas na shes rab kyi sgo nas blo zhes bshad do/ /de bas na 'di dag kyang gcig pa nyid yin no//de bzhin du rtog pa med pa'i bdag nyid can ni gti mug ste/ de ni rnam pa thams cad du rtog pa med pas na rmongs pa zhes bya ba'o/ /log par rtog pas na lta ba zhes bya'o/ /de'i bdag nyid can gyi gang zag ni tshul bzhin yid la byed pas 'jug pa yin du zin kyang rnam par rtog pa mang bar 'gyur zhing ma nges pa'i blo can yin te/de bas na 'di dag kyang gcig pa nyid yin no/ /yang na 'dod chags dang / sred pa dang / dad pa ni rtse zhing yon tan tshol la yongs su mi spong ba'i rang bzhin can yin pas 'dod pa la chags pa ni sred pa zhes bya la/ dge ba dang dga' ba ni dad pa zhes bya'o//'dod chags dang srid pa'i yon tan tshol ba'i bdag nyid can ni 'dod chags dang / sred pa zhes bya la/ dge ba tshol ba'i bdag nyid can ni dad pa yin no/ /phan pa ma yin pa yongs su mi 'dor ba'i mtshan nyid ni 'dod chags dang sred pa yin la phan pa yongs su mi 'dor ba'i mtshan nyid ni dad pa yin te/de ltar na 'di dag kyang gcig pa nyid yin no/ /de las go bzlog pa'i spyi'i mtshan nyid kyi zhe sdang dang / nga rgyal dang blo'i spyod pa rnams kyang cig pa nyid yin te/ brtse ba nyid dang / nyes pa tshol ba dang / yongs su 'dor ba'i rang bzhin can nyid yin pa'i phyir zhe sdang dang /nga rgyal can gyi gang zag brtse ba med pa'i rang bzhin can yin la/ 'dus byas zhes pa ni blo yin no/ /zhe sdang dang / nga rgyal ni gang zag nyes pa tshol ba'i bdag nyid can no/ /blo ni 'dus byas kyi nyes pa tshol ba'i bdag nyid can no/ /zhe sdang dang / nga rgyal ni gang zag yongs su 'dor ba yin no//blo ni 'dus byas yongs su 'dor ba shes pa'o/ /de bas na mtshan nyid mtshan pas zhe sdang dang nga rgyal dang blo la spyod pa rnams ni mtshan nyid gcig pa nyid yin no/ /de bzhin du gti mug dang /lta ba dang / rnam par rtog pa la spyod pa rnams ni mi brtan zhing rnam par g.yo ba'i bdag nyid can yin pa'i phyir gti mug gi rnam par 'gyur ba'i bdag nyid can yin bas na mi brtan pa yin la/lta ba ni log pa'i bdag nyid can yin pa'i phyir mi brtan pa yin no/ /rnam par rtog pa ni rnam par rtog par bya ba'i dngos po mang po la rgyugs pas na mi brtan pa yin no/ / gti mug gi chos kyi mtshan nyid ma rtogs pas g.yo ba yin la/ lta ba ni log pa'i chos la rnam par g.yengs pas g.yo ba yin zhing rnam par rtog pa ni yang ba yin pas g.yo ba yin no/ /des na mi brten zhing g.yo ba yin pa'i gti mug dang lta ba dang / rnam par rtog pa la spyod pa rnams spyi'i mtshan nyid kyi gcig pa yin no//'di dag ni las kyis phan tshun du tha dad par gyur pa yin te/ dge slong las kyi mtshan nyid kyis byis pa yin zhing las kyi mtshan nyid kyis mkhas pa yin no zhes ji skad gsungs pa lta bu ste/ des na tshul de ltar shes par bya'o/ / 'gro dang lta dang spyod dang smra ba dang / /nyal dang zas dang gos gyon 'dod pa las/ /'jam dang rtsub dang kun nas g.yo ba'i mi/ /'dod dang khro dang gti mug la spyod bshad/ /nyes pa'i rang bzhin rjes 'jug byed pa rnams/ /'di dang pha rol dag tu de'i dbang gis/ /spyod pa sna tshogs 'gyur ba de yi phyir//de las go bzlog tshul gyis 'di la sbyar/ /de lta sbyor ba dang ni mtshan nyid dang ldang bar bya ba'i mi mthun pa'i phyogs shes pas gnas pa ma yin pa la sbyor bar ma byed do/ /gang gi phyir rnal 'byor spyod pa/ 'di nyid 'phel bar 'dod pas 'di lta bu'i bla ma la yang dag par brten te gnas par bya ba'am/slob dpon nam mkhan po yon tan de lta bu dang mi ldan bar gyur na gang na yon tan de lta bu'i bla ma yod pa der 'gro bar bya'o/ /dam pa rang gi yon tan gyis//mtho ba ring po nas kyang snang / /dri med sa phyogs mdzes pa yi/ /ston ka yi ni ring por mtshungs/ /der 'gro ba ni nyon mongs pa dang bar chad mang bar 'gyur ba'am/mi nus pa'am de lta bu dang ldan pa gang na yang yod par thos par ma gyur na/ de bzhin gshegs pas gsungs pa'i chos 'dul ba nyid slob dpon gyi mchog yin pa la brten par bya ste/ de'i dbang gis rang la phan pa 'byung bar 'gyur ba'i phyir te/mdo sde las ji skad gsungs pa ston pa ni de skad gsungs pa yin la/ ji skad gsungs pa mdo sde las de skad ston pa yin te/ slob dpon yang rjes su ston pas 'di dag nyid rjes su ston pa nyid yin pa'i phyir ro/ /bcom ldan 'das kyis kyang / gal te sdig bral shes rab can lhan cig /spyod pa brtan pa'i legs gnas ma rnyed na/ /rgyal po rnam rgyal grol khror spangs pa ltar/ /dgon pa'i glang chen lta bur gcig pur spyod/ /ces gsungs pa dang / de yang rang sangs rgyas kyis/ /dam pa shes rab can la yang dag brten/ /grogs kyi phun tshogs rab tu bsngags yin gyi//gal te nyes med de ni ma rnyed na/ /bse ru lta bur gcig pur spyod par bya/ /zhes ji skad bshad pa lta bu'o/ /gcig pu gnas pa ni ting nge 'dzin gyi bya ba ji skad thos pa bag yod pa nyid du yang dag par sgrub par 'gyur ro/ /ting nge 'dzin gyi mtshan ma'i nus pa la yid sbyar bar mi bya ste/de la brten pa'i sems ni legs pa phul du byung bar mi 'gyur ro/ /de'i phyir phul du byung ba'i chos la nges par sbyar bar bya'o/ /dal 'byor gyi chos 'di ni lha'i bu'i 'gro ba'i snying po bas kyang shin tu mgyogs par 'gro ba yin no/ /de bas na yang dang yang du nyon mongs pa spong bar 'os pa'i kun du spyod pa dang /nus pa che ba zag pa zad pa'i rten du gyur pa'am/ de ni lam gyi ting nge 'dzin gcig gi dbang du byas nas/ de las gzhan pa'i ting nge 'dzin gyi rgyu mtshan skyes pa dang / /ma skyes pa'i nyes pa rnams zhi bar byed pa rnams kyang yid la bya'o//'dod chags la spyod pa yin na yang zhe sdang dang gti mug gi nyon mongs pa rnams la kun du spyod par 'gyur ba yin la/ zhe sdang la spyod pa la yang 'dod chags dang gti mug la sogs pa zil gyis gnon par 'gyur zhing gti mug la spyod pa rnams la yang 'dod chags dang zhe sdang la sogs pa 'byung bar 'gyur ro//de bas na bcom ldan 'das kyis dge slong dag gal te 'dod pa la 'dun pa skyes par gyur na mi sdug pa'i mtshan ma tshul bzhin du yid la gyis shig ces bya ba la sogs pa nges par gsungs pa yin no/ /dge slong ma lhag pa'i sems la mngon par brtson pas gnas lnga yang dang yang du yid la bya zhing mtshan ma gsum pa yang dang yang du yid la bya'o//thams cad bag yod pa dang ldan par bya ste/ de ltar na ting nge 'dzin yongs su rdzogs par 'gyur ro/ /ji skad du/ bag yod pa'i rgyu dang / brtson 'grus kyi rgyu dang /rtag tu bya ba'i rgyu dang / rjes su sbyor ba'i rgyu dang / yang dag par yid la byed pa'i rgyus de lta bu'i ting nge 'dzin la reg par 'gyur ro zhes gsungs pa dang / sems kyi yang snyoms par 'jug pa dang / gnas pa dang ldang ba la mkhas pa nyid du bya'o/ / gus par bya ba dang / rjes su mthun par bya bas dmigs pa gang zhig gam/ rnam pa dang mtshan ma gang gis sems kyi nyon mongs pa nye bar zhi bar 'gyur ba de nyid yang dag par shes par bya'o/ /ji skad du/ /g.yos mkhan lta bu'i mdo las mtshan ma legs par gzung ba ni sems bskyed pa la mkhas par 'gyur ro zhes gsungs pa dang /yang ji skad du/ mtshan ma legs par gzung ba'i phyir gom pa 'dor ba yang ting nge 'dzin la snyoms par 'jug par byed do zhes 'dren pa'i tshig dang nyes par bzung ba'i rjes su nyams par 'gyur ro zhes gnas brtan gyis bshad pa lta bu'o//mtshan ma brjod pas ni myur du snyoms par 'jug pa la gnas par 'gyur te/ mtshan ma legs par gzung ba yin pa'i phyir snyoms par 'jug pa bstan pa yin no/ /dran pa yang rnal 'byor spyod pa rnams kyi nus pa che ba'i chos yin te/ de ni thams cad du 'gro ba yin pa'i phyir de'i dbang gis 'das pa dang /ma 'ongs pa dang / mtshan ma rnams las nyams par mi 'gyur ro/ /de bas na thams cad du legs par smras pa'i dran pa dang ldan par bya'o/ /de ltar yang mdo las/ mnyam par gzhag pa 'di ni dran pa la nye bar gnas pa rnams kyi yin gyi/ chos 'di ni dran pa nyams pa rnams kyi ma yin no zhes gsungs pa dang /ting nge 'dzin las g.yeng ba'i nyes dmigs rnam pa du mas shin tu bsam par bya zhing / /snga ma bzhin du ting nge 'dzin gyi yon tan mthong ba la 'bad par bya ste/ de ltar na ting nge 'dzin la sems yang dag par dga' bar 'gyur ro//ji skad du/ khyim bdag ga gon gyi dbang du mdzad de/ ting nge 'dzin thob nas de dbang du byas la/ dregs bar gyur pa med pa dang / mi smra bar de'i gong ma'i khyad par thob pa'i phyir sems rab tu gzhug par bya'o/ /ji skad du ri bo'i chu dper mdzad de/ rnal 'byor spyod pa la gces par byed pa'i chos smra ba nyung ba la sogs pa spang bar mi bya'o//dus su chos nyan pa la brten par bya'o/ /rang gi sems la so sor brtag pa mang du bya'o zhes ji skad bshad pa dang / de ltar ting nge 'dzin gyi yan lag rnam par dag pa dang ldan na yid gang la nye bar sbyar ba yang dag pa'i sbyor ba dang ldan pa de thogs ma med pa nyid du ting nge 'dzin dang rdzu 'phrul la sogs pa'i gter thob par 'gyur ro//bag med nyes dang yan lag nyams pa ni/ /sngar ni rab tu 'grub par 'gyur ma yin/ /ting 'dzin de 'dras de phyir de rnams kyi/ /yan lag la ni 'bad pa nyid du gyur/ /legs pa'i lam bstan pa'i gtam las ting nge 'dzin gyi yan lag rnam par dag pa zhes bya ba phun sum tshogs pa gsum po//slob dpon dpa' bos mdzad pa'i legs pa'i lam bstan pa'i gtam rdzogs so// //rgya gar gyi mkhan po chen po dI paM ka ra shrI dz+nyA na dang / /lo tsA ba chen po dge slong rin chen bzang pos bsgyur cing zhus te gtan la phab pa'o/