CLOSE WINDOW

D4172
བོད་ཡིག

@##/ /rgya gar skad du/ sa t+ya kr-i t+ya ng+har+m+ma pa tsa na sad ng+ha r+m+ma shrA ba ka thA/ bod skad du/ chos smra ba dang dam pa'i chos nyan pa la gus par bya ba'i gtam/ 'jam dpal gzhon nur gyur pa la phyag 'tshal lo//sangs rgyas bcom ldan 'das gang zhig gser btso ma dang ka r+Ni ka dang nyi ma shar ma thag gi 'od 'bar zhing gsal bar byed pa dang / rgya cher mi phyed pa'i 'od dang / bco lnga'i zla ba'i dkyil 'khor thams cad du dri ma med cing rnam par dag pa dang / tsam pa ka dang / a sho ka rab tu rgyas pa dang / bai DUr+ya dang / in+d+ra nI la dang / rdo rje dang / ldong ros dang / pad+ma dang /glog gi 'od pas lhag pa dang / gser bzang po'i 'od dang ldan pa'i bcom ldan 'das 'jig rten gsum gyi bla ma/ dpag tu med pa'i yon tan gyi tshogs kyis brgyan pa/ rin po che'i gter bsdus pa sangs rgyas bcom ldan 'das de dag ni mgon du gyur pa/bla mar gyur pa/ chos kyi rje/ spyod pa dang ldan pa/ sku dang gsung dang thugs kyis gnod pa med par kun du spyod pa/ stobs bcu mnga' ba/ mi 'jigs pa bzhis bsnyengs pa mi mnga' ba/ khyu mchog gi mchog /seng ge'i sgra sgrogs pa/ dbang po dang / nye dbang dang / drag po dang /khyab 'jug dang / gshin rje dang /chu lha dang / lus srul po dang / nyi ma dang / lha ma yin dang / nam mkha' lding dang / dri za dang / mi'am ci dang / lto 'phye chen po dang / gnod sbyin dang / srin po dang / sha za dang / grul bum dang / rig pa 'dzin pa rnams kyis mngon par bstod pa/byams pa dang / snying rje dang / dga' ba dang btang snyoms kyis bsam gtan mchog gi dran pa brnyes pa/ dran pa nye bar gzhag pa dang / rdzu 'phrul gyi rkang pa dang / yang dag par spong ba rnams la lhag par mos pa/zil gyis gnon pa'i skye mched dang / zad par gyi skye mched dang / stong pa nyid dang 'phags pa'i lam yan lag brgyad pa ston pa dang / thugs rje chen pos yang dag par bskul ba/ gser dang / dngul dang / shel dang / nor bu dang / be+e DUr+ya dang / rdo rje dang / in+d+ra nI la dang / zla ba'i 'od rnams las lhag pa'i 'od mnga' ba/ rnam par gzigs dang / gtsug tor can dang / thams cad skyob dang / 'khor ba 'jig dang /gser thub dang / 'od srungs dang / dgra bcom pa yang dag par rdzogs pa'i sangs rgyas shAkya thub pa la sogs pas gsungs shing rjes su bstan pa 'di la/ kye dge slong 'di lta ste/ chos bshad pa dang / chos kyi gtam la 'ga' zhig tu tshogs shing 'dug ste/ 'dug nas bya ba gnyis pa gang yang rung ba gcig gi rjes su gnas par bya ste/ chos kyi gtam bya ba'am yang na 'phags pa'i mi smra bas rjes su gnas par bya'o/ /de la 'phags pa'i chos dang ldan pa'i gtam du gyur pa dang / 'phags pa'i mi smra bar gyur pa de gnyis ni nges par legs pa'i rgyur 'gyur ba yin te/phyis mi rtog pa'i phyir dang / the tshom gcod pa'i phyir nges par stobs kyis gzung ba'i phyir de skad du/ bcom ldan 'das kyis bka' stsal zhing 'di skad du gsungs so/ /dge slong dag gang zag gnyis po 'dis bsod nams mang po bskyed de sdig pa'i rtsa ba 'byin zhing bdud dang g.yul 'gyed par byed/bdud kyi rgyal mtshan snyol bar byed/ chos kyi rgyal mtshan sgreng bar byed/ de bzhin gshegs pa'i chos kyi 'khor lo skor bar byed do/ /gnyis gang zhe na/ gang gus par byas te chos 'chad pa dang / gang 'di na gus par byas te chos nyan pa'o//de bas na khyed kyis gus pas chos bshad par bya zhing bla ma rnams la gus par bya ste chos mnyan par bya'o/ /de bzhin gshegs pa rnams ni 'byung ba dkon no/ /mir skye ba ni rab tu dkon no/ /dal 'byor phun sum tshogs pa ni dkon no/ /de bzhin gshegs pa'i bstan pa la dad pa ni dkon no//de bas na 'khor ba'i nyes pa la kun du brtags pa la gus par byas te chos mnyan par bya'o/ /de ci'i phyir zhe na/ 'dir brjod par bya ste/ nges par dam pa'i chos nub par 'gyur zhing chos kyi snang ba dang bral bar 'gyur/ ye shes kyi snang ba rab tu nub par 'gyur la/dge ba'i bshes gnyen dang phrad par mi 'gyur te/ rab tu 'jig pa dang bcas pa'i dus nye bar gnas shing / chos dang mi ldan pa'i sems can rnams dang lhan cig 'grogs par 'gyur bar shes par byas nas gus par byes te chos mnyan par bya'o/ /cung zad na chos kyi gru ni zhig par 'gyur/ye shes kyi ri ni rdib par 'gyur/ chos kyi nyi ma ni nub par 'gyur/ chos kyi chu bo ni skam par 'gyur/ chos kyi gtam gyis ni dben par 'gyur/ dbang po'i rtod thag ni chad par 'gyur/ byang chub kyi yan lag bdun gyi me tog ni skam par 'gyur/gsung rab kyi rgya mtsho ni bo bar 'gyur/ dran pa'i lcag ni chag par 'gyur/ rnal 'byor gyi dbang phyug ni yongs su mya ngan las 'das/ nyon mongs pa'i chom rkun ni stobs dang ldan par 'gyur la/ ring por mi thogs par yang dag pa'i spang leb bshig pas bcos legs byas pa/dran pa'i gru skya bas yongs su bsrung ba/ gdugs dang / rgyal mtshan dang ba dan legs par btsugs pa/ ting nge 'dzin gyi zhal ce pas rtsod pa yongs su sbyong ba/ dad pa'i lam brgyags dang ldan pa/ brtse ba'i btung chu'i tshogs dang bcas pa/ dbang po dang stobs dang byang chub kyi lam gyi rin po ches yongs su bkang ba dang /slob pa dang mi slob pa'i tshogs yongs su rgyu ba/ chos smra ba'i bya bas rab tu sad par byed pa thams cad mkhyen pa'i 'bad pas rab tu 'phel zhing spogs phyin pa/ dam pa'i chos kyi gtam gyis bcos pa'i rgya mtsho dba' rlabs kyi shugs kyis bskyod pa/dam pa'i chos kyi gru thams cad kyi thams cad du nub par 'gyur ro zhes shes par byas la/ sems can rnams kyi khong du chud par bya ba la 'bad pas dam pa'i chos kyi tshogs nub pas phyis yid la gcags pa med par bya ste/ 'jig rten ma rig pas mig long ba/ ser sna'i dgab pas g.yogs pa/phyogs dang mtshams la rtag pa dang / chad par rnam par lta ba/ skye ba dang rga ba dang na ba dang 'chi ba dang / sdug bsngal gyis kun du gdungs pa/ 'chi ba'i g.yang sar lhung ba/ 'khor ba'i rtod thag gis kun du brtod pa/ gshin rje'i pho nyas skrag pa/ bya ba ngan pa la chags pa'i blo dang ldan pa/ phan tshun rtsod pas g.yengs pa'i sems can rnams phyin chad yid la gcags par mi 'gyur ro/ /de bas na 'khor ba'i nyes pa spang bar 'dod pa dang / bdud kyi spyod yul spang bar 'dod pa dang / phung po'i khur dor bar 'dod pa dang / nyon mongs pa'i shing gcad par 'dod pa dang / ye shes kyi rdo rje 'chang bar 'dod pa dang / 'khor ba'i 'khor lo phye mar brlag par 'dod pa dang / ser sna'i rgya mtsho skam par 'dod pa dang / sdug bsngal gyi rgya mtsho dbo bar 'dod pa dang / khams gsum gyi tsher ma rim gyis shin tu dkrugs par 'dod pa dang /nyon mongs spangs pa'i 'phags pa'i gang zag gi tshogs thob par 'dod pa dang / ye shes kyi mig yongs su sbyong bar 'dod pa dang / mchod pa'i gnas su 'gyur bar 'dod pa dang / 'khor ba'i 'brog las rgal bar 'dod pa dang / 'phags pa'i lam nas 'gro bar 'dod pa dang /mya ngan las 'das pa'i grong khyer du 'jug par 'dod pa dang / nyon mongs pa'i tsha bas gdungs pa'i yid tshim par byed par 'dod pa rnams kyis gus par bya ba dang / dam pa'i chos kyi chus dbang bskur ba la 'bad par bya'o/ /de ci'i phyir zhe na/ brjod par bya ste/dam pa'i chos thob pas sor mo'i phreng ba ma gsod pa las log par gyur pa dang / gnod sbyin 'brog gnas mi rnams gsod pa las log par gyur pa dang / klu'i rgyal po sog ma med lo tog 'joms par byed pa dang / gnod sbyin mo 'phrog ma srog chags brgya phrag du ma gsod pa las log par gyur pa dang /gnod sbyin ba spu khab dug gis rdeg par byed cing gsod pa dang / rgya mtsho na gnas pa'i nya ti ming gi la tshong pa stong phrag du ma gsod par byed pa dang / sbal pa dud 'gro log par ltung ba'i 'jigs pa dang / zla ba sgra gcan gyi 'jigs pa dang / nyi ma lha ma yin gyi 'jigs pa dang / brgya byin ngan song gi 'jigs pa dang / tshangs pa rtag par lta ba las dang / rtag tu 'tsho ba rtag tu lta ba las kyang / gcer bu pa'i bu log par bya ba la mngon par sbyor ba'i las dang / bram ze grags pa'i rigs mngon par zhen pa dam pa'i chos thos pa las log go//de dag la sogs pa gzhan dag tu ma thar pa'i skom gyis gdungs shing srid pa'i yal ga gcod par 'dod pa dang /ma rig pa'i sbubs dral bar 'dod pa dang / shes rab kyi snang bas lta bar 'dod pa dang / 'khor ba'i chu bo rgal bar 'dod pa dang / de dag gi dam pa'i chos thos pas 'gro ba lnga'i 'khor bar 'gro ba las rab tu 'grol bar 'gyur ro//de lta bas na gus par byas te dam pa'i chos 'bad pas mnyan par bya'o/ /yang 'di skad du/ mkhas pas nad la sman pa bzhin/ /thog mar dam pa bsten par bya/ / nad sos bya phyir 'bad pa yis/ /sman ni sman pa la nyan ltar/ /dam pa'i chos ni mnyan par bya/ /blo dang ldan pa'i skyes bu yis/ /sman de rnams ni thos nas su/ /gus pas sten par byed pa ltar/ /de bzhin byas pas 'chi med 'grub/ /bdud rtsi de ni 'thung ba yis/ / mchog ni thob par byed pa yin/ chos smra ba dang dam pa'i chos mnyan pa la gus par bya ba'i gtam slob dpon sa 'tsho byin gyis mdzad pa rdzogs so// //rgya gar gyi mkhan po gnas brtan a dzi ta shrI b+ha dra dang / lo tsA ba dge slong shAkya 'od kyis bsgyur ba'o// //