CLOSE WINDOW

D4156
བོད་ཡིག

@##/ /rgya gar skad du/ bud+d+ha tsa ri ta ma hA kA bya nA ma/ bod skad du/ sangs rgyas kyi spyod pa zhes bya ba'i snyan dngags chen po/ sangs rgyas dang byang chub sems dpa' thams cad la phyag 'tshal lo//dpal ldan yon tan tshogs kyis gang / /bdag nyid chen po sems can gyi/ /don mdzad yang dag sangs rgyas dang / /chos dang dge 'dun la phyag 'tshal//bu ram shing par mthu mnyam bu ram shing ba'i rgyud/ /thub dka' shAkya rnams la spyod pa rnam dag pa/ /'phrog byed zla ba lta bur skye dgu rnams la sdug /rgyal po zas gtsang zhes bya'i ming can byung bar gyur//dbang po dang mtshungs de yi bdag po ldan ma yin/ /nus mthu rjes mtshungs gzi brjid lha mo bde sogs dang / /pad+mo can 'dra phun sum tshogs pa sa bzhin brtan//sgyu ma chen mo zhes bya dpe med sgyu 'dra byung / /mi skyong rgyal po 'di ni de dang thabs cig tu/ /dga' ba nyer ldan rnam thos sras kyi dpal bzhin rol/ /de nas yang dag ting 'dzin ldan pa'i rig ma bzhin//sdig bral ma de mngal ni rnam par gzung bar gyur/ /mngal dang nye bar ldan pa nyid kyi sngon rol du/ /de ni gnyid song glang po'i dbang po dkar po zhig /rang nyid la ni rab tu zhugs sogs mthong gyur la//de yi mtshan ma nyam thag pa nas thob ma yin/ /lha dang rab tu mtshungs pa de yi lha mo de/ /mngal gyis rigs kyi dpal ni rab tu 'dren byed cing / /sgyu ma ngal ba dang ni mya ngan sgyu med par//gtsang la nyon mongs med pa'i dgon par blo gros mdzad/ /de ni lum bi zhes bya'i nags mthar gyur pa'i sa/ /sna tshogs ljon shing sna tshogs shing rta mngon dga' bar/ /bsam gtan la bzod dben pa'i nags kyi mtha' bzhed ma//'gro ba'i chad dang gnas phyir mi skyong la zhus so/ /de yi chos dang ldan la 'phags pa'i zhes 'dod dag /rnam par shes nas ya mtshan dga' ba yis gang ste/ /zhi ba'i grong nas sa yi bdag po gshegs gyur te//de yi dga' ba'i rgyu yin rnam par rgyu phyir min/ /dpal dang ldan pa'i nags der rgyal po'i bdag ldan ma/ /rab tu bltam pa'i dus ni yang dag mngon gzigs shing / /bla re nye bar phul ba'i gzims mal rab thob ste//mi mo stong phrag dag gis mngon par dga' bar byed/ /de nas skar ma rgyal rab ldan par gyur pa'i tshe/ /brtul zhugs legs par 'dus byas lha mo de yi ni/ /rtsib logs dag nas 'jig rten phan phyir sras bltams te/ /tshor ba dang ni bral zhing nad dang bral ba nyid//ji ltar brla skyes brla nas rgya chen lag pa nas/ /dbang po dang mtshungs nga la nu ni spyi bo nas/ /mtshan ldan nyid kyang lag pa'i cha shas gsang ba nas/ /rnam pa de ltar de yi skye ba byung bar gyur/ /mngal nas mngon par nges par byung ba gzugs mdzes te/ /nam mkha' dag las 'phros 'dra skye gnas las ma skyes//bskal ba gcig min rnams su bsgoms pa'i bdag nyid ni/ /gang zhig yang dag rab tu shes na skyes gyur blun po min/ /nyi ma gzhon nu sa lam mngon par babs pa bzhin/ /gsal ba dang ni brtan pas gang zhig mdzes pa ste/ /de ltar shin tu gsal yang nges par rtog pa na//ri bong gis mtshan ji ltar mig dag 'phrogs par gyur/ /de ni rang gi lus kyi 'od rab 'bar ba yis/ /sgron ma'i 'od kyang gsal bar byed pa ltar bcom ste/ /rin thang chen po 'dzam bu chu gser mdzes pa'i mdog /phyogs rnams thams cad rnam par snang zhing gsal bar mdzad//'khrugs pa ma yin yon po'i skyon dag rab bsal zhing / /shin tu brtan pa dang ldan rnam par yangs pa'i 'gros/ /de ltar mi g.yo rab tu brtan pa'i gom pa bdun/ /drang srong skar ma bdun dang rab mnyam gshegs par gyur/ /byang chub phyir dang 'gro la phan pa'i phyir skyes shing //'di ni bdag gi srid pa'i skye ba tha ma zhes/ /seng ge'i 'gros 'dra phyogs bzhi dag tu rnam gzigs nas/ /snod ldan rnams kyi don byed dag kyang smras par gyur/ /nam mkha' dag las rab babs zla ba'i 'od zer dkar/ /grang dang dro ba'i chu rgyun rnam pa gnyis kyi shugs//lus la yang dag reg pas bde ba bskyed pa'i phyir/ /mdzes shing yid 'ong de yi spyi bor babs par gyur/ /dpal ldan bla re bres par gser gyis 'bar zhing mtshan/ /bai DUR+Ya yi rkang pa'i gzims mal la gzims pa/ /de la gus phyir gser gyi pad+ma'i phyag mnga' ba'i/ / gnod sbyin bdag rnams kun nas yongs su bskor nas gnas/ /mi mngon gyur pa'i lha rnams kyis kyang nam mkha' la/ /gang gi mthu las mgo bo yis ni rab btud cing / /kun nas gdung ba skyob pa'i gdugs dkar rnams bzung ste/ /byang chub ched du mchog gi bsngags pa dag kyang smras//'das pa'i sangs rgyas rnams la lhag par mchod byas pa'i/ /lto 'phye che rnams khyad 'phags chos la sred pa'i phyir/ /gang la rlung g.yab kyis g.yab gus pa'i mig gzir cing / /man dA ra ba'i me tog rnams kyis yang dag 'thor/ /de bzhin gshegs pa bltams pa'i yon tan gyis tshim pa'i//gtsang mar lhag par gnas pa'i rnam dag sems can rnams/ /sdug bsngal nyid du bying ba'i 'gro la phan pa'i phyir/ /lha rnams 'dod chags bral ba na yang dga' bar gyur/ /gang gis rab tu bltams tshe ri rgyal phur pu nyid/ /rlung gis bsnun pa'i gru ltar sa gzhi g.yos gyur zhing //tsan+dan dang bcas ut+pal pad+ma'i snying po yi/ /char pa dag ni nam mkha'i sprin dang bral las babs/ /yid 'ong reg na bde ba'i rlung dag byung gyur te/ /lha yi na bza' dag ni mngon par 'bebs byed cing / /nyi ma de nyid lhag par mngon par gsal ba ste//zhi ba'i 'od zer 'dus ma byas pa'i me 'bar ro/ /shar dang byang gi mtshams kyi khang pa'i phyogs gcig na/ /bsil ba'i chu yi khron pa rang byung gyur pa ste/ /pho brang btsun mo'i 'khor rnams ya mtshan gyur rnams kyis/ /gang la bya ba rnams ni stegs bzhin rab tu byas/ / chos dang ldan pa'i lha dang 'byung po'i tshogs rnams kyis/ /de ni lta ba'i don du nags tshal rab gang ste/ /rmad byung ngo mtshar gyur pa nyid kyi shing las kyang / /me tog rnams ni dus ma yin par nges par brul/ /'tshe bar byed pa'i sems can rnams kyang de yi tshe/ /phan tshun dag tu phyin te gnod pa mi byed la//'tsho ba'i 'jig rten dag na nad gang ji snyed pa/ /de dag rnams kyang 'bad pa med par de tshe bcom/ /mkha' 'gro'i bya ni mtho min sgra sgrogs ri dwags kyang / /chu klung dag ni chu yang zhi bar bab gyur la/ /phyogs rnams rab snang dge ba'i nam mkha' rab mdzes shing / /lha yi rnga rnams mkha' la rab tu grags par gyur//rgud par gyur la mgon ni nye bar thob nas bzhin/ /'jig rten dag kyang mchog tu rab zhi thob gyur la/ /'jig rten rnams kyi thar pa'i bla ma rab bltams tshe/ /'dod pa'i lha nyid kho na dga' ba med par gyur/ /shin tu ngo mtshar sras kyi skye ba mthong gyur nas/ /mi bdag brtan pa yin yang rnam par 'gyur nas song //rab dga' skyes pa nyid dang yid mi bde skyes te/ /brtse ba las ni mchi ma rnam pa gnyis byung ngo / /mi ma yin pa'i sras po nyid kyi nus pa dang / /ma yi rang bzhin kyang ni stobs chung nyid kyi phyir/ /grang dang dro ba'i chu dag 'dres pa'i chu klung bzhin/ /lha mo 'jigs pa dang ni dga' bas gang bar 'gyur//lhag ma spangs te 'jigs pa nyid ni shes byas nas/ /yid 'ong 'dod pa'i ched du rtogs pa ma yin pa'i/ /bud med rgan mo rnams kyis bde legs gyur byas shing / /gtsang mar byas te lha rnams dag la phyag 'tshal lo/ /de yi mtshan nyid dag kyang shes shing thos gyur nas//spyod dang thos dang tshig la grags thob bram ze rnams/ /rnam rgyas zhal ni ya mtshan dga' ba yis gang ste/ /dga' dang 'jigs par gyur pa'i mi yi lha la smras/ /mi dag sa la bu ma gtogs pa'i khyad 'phags pa/ /gzhan gang cung zad 'dod min zhi ba de yi phyir/ /khyod kyi sgron ma 'di ni rigs kyi sgron ma ste//khyod nyid dga' bar mdzod cig dga' ston da ltar bgyi/ /de phyir brtan par rnam dpyod med par dgar mdzod dang / /rigs ni nges pa nyid du mchog tu 'phel bar 'gyur/ /'di ni khyod kyi bu zhes skyes par gyur pa ste/ /'jig rten sdug bsngal dag gis mngon par bcom pa'i mgon//mchog gyur 'di la mchog gyur gser gyi 'od mnga' zhing / /sgron ma'i 'od zer dag gis mtshan rnams gang gyur pas/ /de nyid rtogs par gyur pa'i thub par 'gyur ba'am/ /yang na mi bdag sa stengs 'khor los sgyur bar 'gyur/ /sa yi bdag po nyid la gal te dga' 'gyur na//stobs dang chos dag gis ni de'i tshe sa stengs su/ /rgyal po kun gyi thog tu 'di ni gnas 'gyur te/ /skar ma'i 'od rnams la ni nyi ma'i 'od bzhin no/ /de ni gal te thar bzhed nags su gshegs gyur na/ /mkhyen dang de nyid kyis ni de tshe sa stengs su/ /lugs kun zil gyis mnan nas 'di ni gnas 'gyur te//mtho ba kun la ri rab ri yi rgyal po bzhin/ /ji ltar lcags rnams la ni gser dag mchog yin la/ /ri rnams la ni ri rab chu bo rnams la mtsho/ /gza' rnams la ni zla ba gdung byed rnams la nyi/ /de ltar khyod kyi sras ni rkang gnyis rnams kyi mchog /gang gi spyan dag mi 'dzums mig gzir rnam par spangs pa ste/ /brtan zhing shin tu ring la dkar min rdzi ma dang / /gzi brjid ldan pa yin yang 'on kyang zhi ba nyid/ /'di ni kun nas gzigs pa'i spyan mnga' ci la min/ /de nas gnyis skyes rnams la mi bdag gis smras pa//bdag nyid chen po mi skyong snga mas ma mthong ba/ /mthong zhes khyad 'di gang yin 'di la rgyu mtshan ci/ /de nas bram ze rnams kyis de nyid la smras pa/ /blo dang thos pa las dang grags pa rnams la ni/ /mi skyong sngon dang phyi ma nyid ni tshad ma yin/ /dngos po'i lugs la 'dir ni bya ba rgyu yin la//'dir yang bdag gi dper brjod dag ni mkhyen par mdzod/ /gang zhig rgyal po'i bstan bcos shes ldan ngan spong dag /rig byed drang srong de gnyis kyis ni ma byas pa/ /de dag gi sras zhi ba pa wa sangs dang ni/ /phur bu yis ni dus kyis de nyid bskyed par gyur//nyams gyur snga ma rnams kyis ma mthong rig byed gang / /dbyangs can ma yi bu yis kyang ni slar smras pa/ /nus med gnas 'jog gis ni ma byas gyur pa gang / /rgyas pa yis ni de ltar rnam pa mang por brjod/ /'pho byed drang srong chen pos ma bsdebs gyur pa gang / /tshig gi rkang pa grog mkhar gyis ni dang por bskyed//gso ba gang yang rgyun shes kyis ni ma mthong ba/ /phyi nas de ni drang srong rgyun shes bu yis byas/ /gang yang gnyis skyes nyid ni kun shas ma rnyed pa/ /de ni gting dpogs bu yis rgyal po la thob bo/ /bu ram shing pas dang por ma bsdams gyur pa gang / / rgya mtsho la ni dug bcas kyis kyang mtshams bzung ngo / /slob dpon nyid du bram ze'i rnal 'byor cho ga la/ /gzhan rnams kyis ma thob pa skyed byed gshegs par gyur/ /khyab 'jug gi ni grags pa'i las rnams gang yin pa/ /de rnams la ni dpa' bo la sogs stobs med gyur/ /de phyir lang tsho dang ni rigs dag tshad ma yin//la la la lar mchog nyid nyer thob 'jig rten na/ /rgyal dang drang srong rnams kyis snga mas ma byas pa/ /de dang de dag rnams ni bu rnams dag gis byas/ /de ltar gnyis skyes de rnams kyis ni yid ches te/ /mi skyong dbugs 'byin dang yang mngon par dga' gyur la/ / mi 'dod the tshom dag ni yid las rnam bstsal te/ /rab tu dga' ba nyid la lhag par 'dzegs par gyur/ /dga' ba yis ni gnyis skyes dam pa de rnams la/ /bkur sti sngon du 'gro ba'i nor rnams rab phul te/ /ji skad smras bzhin 'di ni sa yi bdag por gyur/ /rgas pa thos nas nags rnams su ni 'gro bar shog /de nas mtshan ma rnams dang dka' thub stobs las ni/ /skye ba mthar mdzad bltams pa de ni rtogs gyur nas/ /dam pa'i chos la gus pa'i shAkya'i dbang phyug gi /gnas su dkar min drang srong chen por gshegs par gyur/ /tshangs pa'i dpal nyid kyis kyang dka' thub dpal gyis ni//'bar ba'i tshang rig rnams kyi tshang rig de la ni/ /rgyal po'i bla mas gus pa dang ni bkur sti'i phyir/ /mi dbang pho brang du ni rab tu spyan drangs so/ /de ni sa bdag btsun mo'i 'khor gyi nye logs su/ /gzhon nu bltams pa la ni dga' ba'i shugs kyis 'ongs/ /dka' thub mchog las dang ni rgas pa la brten nas//brtan pa nags kyi 'du shes kyis ltar rnam par zhugs/ /de nas thub pa gdan la gnas pa de la mi skyong gis/ /zhabs bsil mchod yon sngon 'gro yang dag rab mchod nas/ /sngon tshe gnas mchog la ni mtha' can lhas bzhin des/ /ji ltar nye bar spyod la snyan gsan phab pa'o//bdag gi rigs ni rjes su bzung phyir nor ldan des/ /gang zhig bdag la gzigs phyir bcom ldan nyer gshegs la/ /bka' drin gnang bar mdzod cig zhi ba ci bgyi bgyi/ /kho bo slob ma lags so thugs rjes mdzad par rigs/ /de ltar mi skyong gis ni dngos po thams cad kyis/ / nye bar gsol btab gyur pa'i thub pa ji lta bzhin/ /rab rgyas yangs pa'i spyan ni ya mtshan dang bcas pas/ /zab ba dang ni brtan pa'i chig rnams smras pa'o/ /chos 'dod gtong ba dang ldan 'gron la sdug cing phangs/ /bdag nyid chen po khyed la 'thad pa 'di yin la/ /sems pa rjes 'gro ye shes lang tsho rjes mthun pa//khyod kyi blo gros gnyen gang de ltar bdag la yin/ /de dang de ni gang gis mi skyong drang srong des/ /phra mo'i chos kyi nor rnams rab tu thob byas nas/ /rtag par cho ga bzhin du mchod sbyin byas gyur pa/ /dka' thub rnams kyis phyug cing nor rnams dag gis dbul//bdag gi nye bar 'ongs la dgos pa gang yin pa/ /bdag gi de ni gson mdzod dga' bar nyer song khyed/ /byang chub rtogs pa'i ched du khyod kyi sras bltams zhes/ /lha yi ngag dag bdag gi nyi ma'i lam du thos/ /ngag de thos nas dang ni yid la bsgoms nas dang //mtshan ma rnams kyis shes nas de nas nye bar 'ongs/ /brgya byin gyi ni rgyal mtshan yang dag bsgreng ba bzhin/ /shAkya'i rigs kyi rgyal mtshan blta bar 'dod pa yis/ /zhes pa'i tshig 'di de ltar thos par gyur nas ni/ /mi dbang rab tu dga' bas kun nas g.yos gyur te//yum gyi pang du son las gzhon nu blangs nas ni/ /dka' thub nor can la ni yang dag bstan par gyur/ /de nas drang srong che des zhabs la 'khor los mtshan/ /phyag dang zhabs kyi sor mo dra bas 'brel ba dang / /glang po bzhin du mdoms nub smin ma mdzod spur bcas/ / ya mtshan dang bcas rgyal po'i sras ni mthong bar gyur/ /lha mo'i pang na zhugs pa me yi bu bzhin du/ /ma ma'i pang du bzhugs pa mngon par mthong nas ni/ /byung gyur rdzi ma'i mtha' ru mchi ma rnams byung ste/ /dbugs med gyur nas gyen du lta la zhal phyogs gyur/ /mig dag mchi mas yongs gang dkar min mthong nas ni//bu la brtse ba'i phyir ni mi skyong 'dar gyur te/ /mchi ma dang ni gre ba kha zhing ldab ldib bcas/ /thal mo sbyar zhing yan lag btud de dris par gyur/ /gang gi lus ni lha las bar na cung zad cig /rang gi skye ba ngo mtshar mang po'i sgron ma ste/ /gang gi don ni mchog tu 'gyur bar smra ba ste//rab tu mthong nas brtan pa gang phyir mchi ma 'ong / /bcom ldan gzhon nu brtan pa'i tshe can yin snyam mam/ /bdag gi mya ngan ched du skyes pa min nam ci/ /bdag la chu yi snyim pa ci zhig ltar rnyed de/ /'di ni dus kyis 'thung phyir nye bar 'ongs ma yin/ / bdag gi snyan grags gter ni mi zad yin snyam mam/ /nges par bdag gi rigs kyi lag nor yin snyam ci/ /bde bar pha rol du ni rab tu 'gro snyam mam/ /gnyid par gyur kyang bu ni phye ba'i mig gcig yod/ /bdag gi rigs kyi myu gu skyes pa ma rgyas par/ /yongs su skams pa'i skal ba can zhig min snyam mam//khyab bdag myur bar gsungs shig bdag la zhi ba med/ /gnyen 'dun rnams kyis bu la brtse ba khyed kyis rig /de ltar mi 'dod blo yis 'khrul ba byung gyur pa/ /rig nas mi dbang rgyal la thub pa des smras pa/ /bdag gis smras pa gang de the tshom med pa de//mi skyong khyed kyi blo gros gzhan gang ma gyur cig /'di yi gzhan gyur mtshon min bdag gi rnam 'gyur te/ /'on kyang rang la slu bar rab mtshon rnam par 'khrugs/ /skye ba zad pa'i rnyed par bla min rtogs pa po/ /'di skyes bdag gi 'gro ba la ni dus yin no/ /rgyal srid rnam par spangs nas yul rnams la mi gnas//'bad pa drag po rnams kyis de nyid thob byas nas/ /'di ni 'gro la gti mug mun pa rnam 'joms phyir/ /ye shes rang bzhin nyi ma rab tu 'bar bar 'gyur/ /sdug bsngal rgya mtsho nad rnams bkram pa'i dbu ba can/ /rga ba'i dba' rlabs 'chi ba'i shugs ni drag po las//'gro ba nyam thag bying bar gyur rnams 'di yis ni/ /ye shes gru bo chen po yis ni sgrol bar byed/ /shes rab chu yi shugs la brten pa'i tshul khrims ngogs/ /ting nge 'dzin ni bsil ba'i brtul zhugs ngang pa 'phyo/ /'di yi mchog gi chos kyi chu bos rab bskor la//sred pas nyam thag gson pa'i 'jig rten 'thung bar byed/ /sdug bsngal gyis nyam thag dang yul gyis bsgribs rnams dang / /'khor ba'i 'brog dgon 'jigs par gnas pa rnams la ni/ /lam rab chud zos rnams la lam 'gro rnams bzhin du/ / 'dis ni rnam par dag pa'i lam dag 'chad par 'gyur/ /yul gyi bud shing can gyi 'dod chags me yis ni/ /'jig rten skye bo rnam par bsregs par gyur pa la/ /sos ka'i tha mar sprin chen gyis ni char bzhin du/ /'di yi chos kyi char gyis rab tu sim byed 'gyur/ /sred pa'i sgo gtan ma rig mun pa'i sgo glegs can//sgo la skye dgu rnams kyi 'thon pa'i rgyu las ni/ /'di yis mchog rab kun nas rnyed par dka' ba yi/ /dam pa'i chos kyi sgras ni rnam par 'byed par 'gyur/ /rang gi las kyi zhags pa rnams kyis yongs dkris shing / / sdug bsngal dag gis mngon par zil non rten med pa'i/ /'jig rten rnams kyi rdzogs pa'i byang chub brnyes nas kyang / /chos kyi rgyal po 'dis ni 'ching ba mthar mdzad 'gyur/ /rmongs sam 'dod pa'i bde ba yis sam rgyags las rung / /'di yi mthar thug chos gang thos par mi byed pa//mi yi 'jig rten 'dir de mya ngan bya ba'i gnas/ /de phyir khyed nyid 'di la mya ngan ma byed cig /yon tan rgya mtsho 'di las 'khrul gyur bdag gi ni/ /bsam gtan rnams ni thob kyang don byas med nyid de/ /de yi dam chos ma thos pa la kho bo ni/ /mtho ris dag na gnas kyang phun tshogs med pa snyam//de ltar don thos bshes dang bcas shing btsun mor bcas/ /yid mi bde ba dor nas mi dbang dgar gyur la/ /rnam pa de ltar bdag gi bu ni 'di'o zhes/ /des ni bdag nyid la ni snying bo ldan par bsams/ /'phags pa'i chos rnams kyis kyang 'gro bar 'gyur ro zhes//bsam pa'i rnam par gzung bya snying la byas gyur te/ /nges par 'di ni mi sdug chos kyi phyogs min la/ /rigs rgyud nyams pa las ni 'on kyang 'jigs pa mthong / /de nas bu la rnam par 'khrugs pa'i rgyal po la/ /bu yi nges pa'i de nyid rig par byas nas su//gus bcas gyen du gzugs mthong dkar min thub pa ni/ /rlung gi lam gyis ji ltar 'ongs par gshegs par gyur/ /blo gros byas pa'i sring mo'i bu yang mthong nas ni/ /thub pa'i gsung mnyan pa dang de yi lugs la ni/ /rnam mang rjes su brtse ba yis ni legs pa des/ / sdug pa'i bu bzhin du ni sbyor ba byed du bcug /sras po skyes pas tshim pa'i mi yi bdag po yang / /yul la song ba'i 'ching ba rnams ni rnam spangs te/ /sras kyi yid 'ong sras po bltams pa'i las dag ni/ /rigs dang 'dra bar ji lta ba bzhin byed du bcug /zhag bcu yongs su 'das par gyur ba nyid kyi tshe//mchog gi dga' ba rab ldan snyoms par gyur pa'i yid/ /sras las mchog tu 'gyur phyir lha yi mchod pa ni/ /bzlas brjod dang ni sbyin sreg bkra shis la sogs byas/ /gzhan yang brgya dang stong phrag yongs su gang ba'i grangs/ /brtan dang stobs ldan bu rnams gser gyi rwar bcas shing //rgas pa nye bar 'ongs min swa ma ldan pa'i ba/ /rang gi sras 'phel phyir na gnyis skyes rnams la byin/ /de nas snyoms pa'i bdag nyid kyis ni rnam mang yul/ /rang sems tshim bar byed pa'i bya ba rnams byas nas/ /yon tan ldan zhing dge ba'i yud tsam nges pa na/ / grong khyer rab tu 'jug la dga' bas blo gros mdzad/ /de nas mche gnyis mche ba las byung rin thang che/ /dkar po'i me tog gis spras nor bu'i sgron/ /khri la dge ba'i phyir ni lha mo sras ldan ma/ /lha rnams la ni rab tu btud nas bsnyen par gyur/ /de nas gnas brtan skye mo rjes 'brang sras mgon ma//bdag po ldan ma grong la mdun du rab zhugs nas/ /mchod ldan lha na lha rnams kyis ni brgya byin bzhin/ /mi bdag nyid kyang grong ba'i tshogs kyis gshegs par gyur/ /de nas gdong drug skyes pas yid ches dbang phyug bzhin/ /shAkya'i rgyal pos grong khyer rnam par khyab mdzad de//zhal ni dga' bas rab gang 'di dang 'di zhes pa'i/ /srid 'phel rgyas pa dang ni grags dang snyan pa mdzad/ /de nas mi yi bdag po'i sras bltams cher skyes pas/ /ser skya zhes pa'i grong khyer ljongs dang bcas pa de/ /gnod sbyin grong na phun tshogs 'dod ba skyes pa na//lha yi bu mo rnams kyis bkram bzhin dga' bar gyur/ /sangs rgyas kyi spyod pa zhes bya ba'i snyan dngags chen po las/ gzhon nu sku bltams pa'i le'u ste dang po'o// //skye dang rga ba mthong song bdag skyes bdag pham de'i/ /skyes pa nas brtsams mi nyid nyi mas rgyal po de//chu yi shugs rnams kyis ni chu bo sin d+hu bzhin/ /nor dang glang po rta dang bshes rnams 'phel bar gyur/ /nor rnams dang ni rin po che dang bzang po'i gser/ /de dang de ni byas dang ma byas pa nyid kyang / /yid la re ba yi rang bzhin du khur gyur pa/ / de la gcig tu phan pa'i cha shas gter rnyed gyur/ /gang zhig pad+ma dang mtshungs gnyis 'thung rnams kyis kyang / /dkyil 'khor 'di la nye bar 'ong bar mi nus pa'i/ /gangs dang ldan pa'i glang chen chang gis dregs de rnams/ /'bad pa las kyang gzhan du de la nye bar gnas//sna tshogs mtshan mas mtshan zhing gsar ba'i gser sga dang / /de bzhin gzhan rnams dag gis brgyan byas rngog ma 'phyang / /stobs dang byams pa dang ni nor gyis thob pa yi/ /'di yi mgyogs 'gro rnams kyis grong khyer phye mar byas/ /de bzhin 'di yi yul 'khor du ni tshim dang rgyas//legs la rdul ldan yon tan ldan pa 'o mar ldan/ /rab mchog be'u rnams dang bcas pa'i ba rnams ni/ /'o ma mang po 'jo ba mang po byung bar gyur/ /'di yi dgra bo dbus gnas nyid du song gyur pa/ /dbus gnas gyur pa mdza' bshes nyid du rab tu song / / khyad par du ni bshes gnyen brtan por song ba ste/ /'di yi phyogs dag gnyis te dgra yang yod ma yin/ /de bzhin du ni 'di yi 'jam rlung 'brug gi sgra/ /glog gi phreng ba 'khyil ba yis ni brgyan pa'i sprin/ /rdo char dang ni thog lhung nyes pa rnams kyis gzhan/ /yul du dus la lha yis char pa phab par gyur//zhing gi las kyis ngal dub byed pa nyung ngus kyang / /'bru ni 'bras bu ldan pa dus sbyor bzhin skyes te/ /de rnams nyid kyang 'di yi sman du byung gyur la/ /bcud dang snying po yis kyang mngon par lhags pa nyid/ /g.yul du rab tu zhugs la kun du 'joms pa bzhin//lus la the tshom za bar byed pa'i dus na yang / /rang bzhin gnas shing bde ba nyid du nad med par/ /dus kyi dbang gis mi mo rnams ni rab tu btsas/ /brtul zhugs ldan rnams ma gtogs nor rdzas dman na yang / /mi rnams pha rol rnams las don du gnyer mi byed/ / mngon par don du gnyer la 'phags pa nor 'phra yang / /de tshe 'ga' zhig dag ni rgyab kyis phyogs ma gyur/ /de tshe rgyal po de yi rgyal srid la ni dga'/ /gnyen la zhe sa med min mi ster ba yang med/ /brtul zhugs med pa nyid min brdzun med 'tshe med pa/ /sgra mi bsgrags kyi sras po lta bu byung bar gyur//der yang skyed mos tshal dang lha gnas dka' thub gnas/ /khron pa rdzing dang dge bcu 'du ba'i gnas rnams kyi/ /bya ba rnams ni mtho ris bzhin du nyer thob nas/ /chos 'dod rnams kyis mngon sum du ni rab tu mdzad/ /mu ge dang ni 'jigs dang nad rnams las grol zhing //dgar gyur skye bo mtho ris gzhan du mngon par dga'/ /bdag mos bdag po la 'am mo yis bdag por rung / /phan tshun log par mngon par spyod pa dag kyang med/ /dga' ba'i ched du 'dod la 'ga' zhig gis ma bsnyen/ /'dod pa'i don du nor ni 'ga' zhig gis ma bsrungs//nor gyi don du chos la 'ga' zhig gis ma spyad/ /chos kyi don du 'tshe ba 'ga' zhig gis ma byas/ /rkun po sogs dang dgra yang nyams par rang gnas med/ /pha rol mya ngan med pa ji lta ba nyid bzhin/ /rang gi 'khor lo pha rol 'khor lo las grol te/ /rgyal po de la bde dang lo legs byung bar gyur//de yi tshe na rgyal po de yi rgyal srid la/ /de skyes pa na nyi ma'i sras po'i yid shes bzhin/ /dga' bar spyad par gyur la sdig pa rab nyams shing / /chos rnams 'bar zhing nyon mongs rnams ni zhi bar gyur/ /gang phyir rnam pa de ltar don kun grub pa dang //rgyal po'i rigs kyi phun sum tshogs pa byung gyur te/ /de phyir mi skyong gis ni sras po de yi mtshan/ /don kun grub pa zhes bya 'di ni rab tu mdzad/ /lha mo sgyu ma yang ni lha yi drang srong mtshungs/ /bu yi nus mthu rnam par spangs pa mthong nas ni/ /bltams la rab tu dga' mas bzod par ma nus te//de nas gnas pa'i ched du ltar ni gshegs par gyur/ /de nas lha yi mngal dang mtshungs pa'i gzhon nu la/ /byams pa'i rang bzhin gyis kyang khyad par med pa yi/ /ma yi nu mo mdangs mnyam pa yi rang bzhin la/ /yang dag skyed btsud bdag las skyes pa lta bur gyur//de nas nyi ma gzhon nu 'char rir gnas 'dra dang / /rlung gis rab tu bus par gyur pa'i me bzhin dang / /skar ma'i bdag po mun min phyogs la gnas pa ltar/ /gzhon nu de ni rim gyis yang dag 'phel bar gyur/ /de nas rin thang chen po'i tsan+dan rnams dang ni//rin chen phreng ba sman gyi snying por bcas rnams dang / /ri dwags rab tu sbyar ba'i gser gyi shing rta rnams/ /'di yi ched du gshegs kyi khyim rnams dag nas blangs/ /lang tsho nyid dang rjes su mthun pa'i rgyan rnams dang / /gser gyi rang bzhin ri dgas glang chen rta rnams dang //gser dang dngul gyis bris pa'i mi chung gzugs rnams dang / /shing rta ba glang byung dus yang dag sbyar rnams blangs/ /de ni lang tsho rjes mthun yul la nye spyod pa/ /de rnams kyis ni yul la nyer spyad la/ /dpa' dang brtan pa yis dang blo dang dpal gyis kyang //byis pa yin yang byis min rab mtshungs byung bar gyur/ /lang tsho gzhon nu shin tu 'das nas yang dag par/ /'du byed las ni rab tu thob nas dus su ni/ /lo mang dag gis rtogs bya nyin zhag nyung ngu yis/ /rang dang rjes su mthun pa'i rigs pa rnams ni blangs//drang srong chen po dkar min las ni sngon rol du/ /de yi nyes legs don gyi skal ba thob nas ni/ /nags su gshegs par 'gyur zhes shAkya'i rgyal po yis/ /'dod pa rnams la chags pa skyed du bcug par gyur/ /brtan pa'i tshul khrims spyod pa can gyi rigs de la//ngo tsha dang ni dul ba nyer ldan legs ldan ma/ /grags 'dzin ma zhes grags pa rnam par yangs pa ma/ /btsun mor mngon par brjod pa'i dpal mo 'di la blangs/ /kun 'gyed gzhon nu dang ni rab tu mtshungs pa yis/ /mchog gi lus kyis snang zhing gsal ba de nyid ni//shAkya'i rgyal po'i mna' ma de dang thabs cig tu/ /bde sogs ma dang mig stong ldan bzhin mngon par dga'/ /yid kyang dpyod par byed la cung zhig rab log pa/ /gang gis mthong mi 'gyur zhes rjes su bsams byas nas/ /sa la rab tu spyod min lding khang lto nyid du//gnas dag mi skyong gis ni de la rnam par bstan/ /de nas gzhal med nam mkhar sa la spyod pa bzhin/ /ston kha'i dus kyi chu gter sprin ni dkar po yi/ /dus sbyor kun du bde ba'i gzhi yi lding khang la/ /bud med rnams kyi sil snyan rgya chen rnams kyis rnam par gshegs//gser gyis gdams pa'i rnga shing can gyi rdza rnga'i skad/ /mi mo'i lag pa'i rtse mos mngon par brdungs pa yi/ /lha mchog ma yi gar dang mnyam pa'i gar rnams kyis/ /ti se'i gangs ltar de yi pho brang mdzes par gyur/ /ngag dang gzo dang rol dang rnam 'gyur rnams kyis kyang //rgyags dang rtse dang dgod pa dngar mo rnams kyis dang / /smin ma bskyod pa yis dang phyed mig lta rnams kyis/ /de la der ni mi mo rnams ni dga' bar gyur/ /de nas de ni 'dod pa bsten par mkhas pa yi/ /dga' bas dregs pa'i bud med rnams kyis bzung gyur la//gzhal med khang ni rgyab nas bsod nams las can bzhin/ /gzhal med khang ni rgyab nas sa la ma gshegs so/ /mi skyong gis kyang de nyid bskyed pa'i ched las ni/ /de yi 'byung bar 'gyur ba'i don gyis bskul gyur te/ /sdig pa las ni dga' bral zhi la mngon dga' zhing //legs la skal bar bgos shing dul la bsnyen par gyur/ /brtan min bzhin du 'dod pa'i bde la ma zhen la/ /ma rungs skyed ma la ni yang dag chags ma gyur/ /brtan pas dbang po'i rta ni stobs las rnam thul zhing / /gnyen dang grong khyer pa rnams yon tan rnams kyis rgyal//gzhan gyi sdug bsngal phyir ni rig pa ma brjod la/ /ye shes dge ba gang yang de la lhag par brjod/ /des ni rang gi skye dgu rnams la ji lta bar/ /de ltar skye dgu rnams la dge ba'i bsngags pa mdzad/ /skar ma rgyal snang shes ldan sras po lhag pa'i lha/ /ji lta bar ni de yi tshe ring phyir mchod des/ /chung min me la bsreg bya rnams ni bsregs gyur la//gnyis skyes rnams la gser dang ba lang rnams kyang byin/ /'gram stegs chab rnams kyis dang yon tan chab rnams kyis/ /gtsang sbra'i ched du lus dang yid la khrus byas te/ /rig byed du ni nye bar bstan pa'i chang rnams dang / /zhi ba bdag skyes snying la zhi ba'i bde la 'thung //gang zhig don dang mi ldan zhi ba ma smras la/ /gang zhig dga' ba dang bral de nyid ma brjod de/ /zhi ba de nyid med dang rtsub pa'i de nyid phyir/ /ngo tsha ba yis bdag nyid kho na brjod ma nus/ /don ldan 'dod pa rnams dang mi 'dod pa rnams la/ /chags pa'i skyon la brten nas rab tu 'thob min te//dge ba'i tha snyad gtsang ma la ni bsnyen gyur la/ /mchod sbyin la yang ma mos de ltar ji lta bzhin/ /sred pa dang ldan mngon par 'ongs pa de ma thag /sbyin bya chu 'dra rnams kyis skom pa bcad gyur la/ / g.yul las ma gtogs ye shes kyi ni sta ri yis/ /dgra bo rnams kyi nga rgyal chen po bcom par gyur/ /gcig ni rnam par dul la des ni mdun bsrungs shing / /bdun po nyid ni don la lnga po dag ni bsrungs/ /sde tshan gsum po thob la sde tshan gsum rtogs shing //sde tshan gnyis po shes la sde tshan gnyis po spangs/ /nyes pa byas kyang rab tu bskyangs nas gzhom bya la/ /'tshe bar mi byed khro bas kyang ni gzigs ma yin/ /de rnams dag la 'bras bu zhi bas bcings gyur la/ /de rnams dag ni 'dor ba tshul ma yin phyir mthong / / drang srong rnams kyis mchog gi brtul zhugs spyad gyur la/ /yun rings yang dag bzung ba'i sha khon zhugs rnams dor/ /yon tan dri ldan snyan dngags rnams ni thob gyur la/ /dri ma can du byed pa'i rdul rnams rnam par dor/ /rab tu mi gnas gtor ma'i dpya ni ma blangs la//pha rol dngos po rnams la mngon par rlom ma byas/ /dgra rnams la ni chos ma yin pa ma smras la/ /khro ba rnams ni snying gis gzung ba ma yin no/ /zhi ba'i bdag nyid sems ni rnam par rab dang la/ /rnal 'byor rab tu ldan pa'i dbang po rnams ci ltar/ /der ni de ltar sa bdag rab tu sgyur ba can//'bangs dang grong khyer ba rnams de lta nyid du byas/ /de nas mdzes pa'i 'o ma 'dzin pa dang ldan ma/ /grags 'dzin ma ni rang gi grags pa 'dzin ma la/ /zas gtsang sras po'i sras po sgra gcan sgra yi zhal/ /sgra gcan 'dzin zhes bya ba dus su skyes par gyur//de nas 'dod pa'i bu mnga' mchog gi yid ches te/ /rigs rgyud 'phel ba rab mtshon sa skyong rgyal po ni/ /ji lta nyid du sras po rab tu skyes la dga'/ /de lta nyid du sras po'i sras po skyes la dga'/ /bdag gi bu yi bur gyur pa la brtse ba ni/ /bdag bzhin gang las yin zhes dga' ba skyes gyur te//dus su des ni cho ga de dang de dmigs shing / /bu la dga' ba mtho ris bzhin du 'dzegs par gyur/ /rgyal po'i khyu mchog grags dang snyan pas mtshan rnams kyis/ /dang po'i skal ba rnams kyi lam la gnas nas ni/ / dkar po ma dor dka' thub rnams la dka' thub dang / /'tshe ba dor ba'i mchod sbyin rnams kyis mchod par gyur/ /rgyal po'i dpal gyis dang ni dka' thub dpal gyis kyang / /bsod nams las can de ni de nas 'bar gyur la/ /rigs dang blo dang mdzad spyod kyis kyang gsal ba ste/ / gzi brjid stong gi 'od zer bzhin du rab tu 'phro/ /rang byung las byung mchod byed sngags ni mchod byas nas/ /sras gnas ched du brtan pa'i dpal gyis bzlas byas shing / /dka' thub byed pa'i las rnams byas gyur skye dgu rnams/ /skyed 'dod skye dgu'i bdag bzhin dang po'i dus su'o/ / mtshon cha spangs shing bstan bcos rnam par shes gyur la/ /nye bar zhi la bsnyen zhing nges la rnam par bzod/ /dbang ldan bzhin du yul rnams gang la ma bsnyen la/ /yab mes bzhin du yul rnams kun la gzigs par gyur/ /des kyang bu yi ched du rgyal srid bzung gyur la/ /bu ni rigs kyi don du rigs ni grags pa'i phyir//grags pa mtho ris ched du mtho ris bdag nyid phyir/ /chos kyi don du bdag nyid gnas la 'dod par 'gyur/ /de ltar des ni dam pa rnams kyis nges thob pa'i/ /thos pa las grub chos ni rnam pa sna tshogs byas/ /gang las bdag gi bus ni bu yi ngo mthong nas//nags tshal nyid du 'gro mi 'gyur zhes mgon bslangs so/ /bdag la yang dag blangs pa'i dpal ni srung 'dod pa'i/ /sa skyong rnams kyis sa la bu ni bsrung ba ste/ /chos ni 'dod pa'i ma yi dbang po de yis kyang / /yul rnams 'dor ba med par bu ni chos las bsrungs//byang chub sems dpa' yul la bde ba'i ro shes thams cad kyang / /sras skyed pa na dpe med sems pa nags su gshegs gyur te/ /de phyir nye bar bsags pa'i las ni rtsa nas skyed pa'i phyir/ /de ni zhi ba ma thob de srid dga' ba bsnyen par gyur/ / sangs rgyas kyi spyod pa zhes bya ba'i snyan dngags chen po las/ btsun mo'i 'khor na gnas pa'i le'u ste gnyis pa'o// //de nas re zhig dus na 'jam po'i rtswa rnams dang / /khu byug pho ni gyen du skad 'don rkang 'thung rnams/ /glu rnams dang ni nges ldan skyed mos tshal rnams ni//pad+ma'i 'byung gnas kyis brgyan des ni thos par gyur/ /de nas bud med skye bo rnams ni dga' ba yi/ /grong khyer skyed mos tshal gyi yid 'ong dngos thos te/ /khyim gyi nang du mngon par bkag pa'i glu bzhin du/ /phyi rol rab tu 'gro ba'i ched du blo mdzad do//de nas sras su mngon brjod yid 'ong de yi ni/ /dgongs pa mi skyong gis ni nges par thos gyur nas/ /brtse ba'i phun sum tshogs pas lang tshor 'ongs pa ru/ /ltad mo dag la rnam par gshegs par bka' stsal to/ /gzhon nu shin tu gzhon nu'i sems dang ldan pa ni//yang dag skyo ba'i sems su ma gyur zhes sems zhing / /nyam thag tha dad skye bo kun nas 'dus pa ni/ /rgyal po'i lam du phyir la rnam par zlog pa ste/ /nying lag dman pa rnams dang dbang po ma tshang rnams/ /'khogs pa nad pa la sogs bkren rnams phyogs rnams su//de nas mchog tu zhi bas yang dag rab ston nas/ /rgyal po'i lam rnams dag ni mchog tu mdzes par byas/ /de nas dpal ldan rgyal po'i lam ni byas pa na/ /dpal ldan rnam par dul ba rjes 'brangs gzhon nu ni/ /gzhal yas khang pa'i logs nas dus su mngon babs nas/ / mngon par rjes gnang byas pa mi skyong la mngon gshegs/ /de nas mi dbang bu la mchi ma byung gyur te/ /mgo la nye bar bsnams te yun rings rnam gzigs nas/ /song cig ces ni tshig gi bka' dag stsal gyur la/ /brtse ba dag las de ni yid kyis ma btang ngo / /de nas de ni 'dzam bu chu gser sga 'dzin pa'i//legs par bslabs pa'i mgyogs 'gro bzhi yis sbyar ba yi/ /dbang po ma nyams mkhas shing gtsang la 'od zer 'chang / /gser gyi rang bzhin shing rta la ni yang dag 'dzegs/ /de nas 'bras spos me tog 'bar ba rab bkram zhing / /phreng ba rnam dpyangs rab tu g.yo ba'i ba dan can//zla ba skar ma dang bcas bar snang la bzhin du/ /'dra ba rjes 'brang lam ni rab tu thob par gyur/ /ya mtshan gyur las rab tu rgyas pa'i mig rnams ni/ /ut+pal sngon po'i phyed 'dra rnams kyis bkram pa ni/ /rgyal po'i lam la dal bu dal bus gshegs gyur te//grong khyer skye bo rnams kyis kun nas mngon par dga'/ /kha cig de la zhi ba'i yon tan gyis bstod la/ /de bzhin gzhan rnams gsal ba nyid kyis phyag 'tshal zhing / /kha cig dag ni 'di la mngon du phyogs nas kyang / /dpal dang tshe yi rnam par rgyas la shis pa brjod//zhar ba sgur po nad pa mi'u thung rnams kyis/ /tshogs pa rnams ni rigs chen rnams la nges dral nas/ /mi mo rnams ni nges par zhugs gnas phra rnams las/ /lha yi rjes 'gro rgyal mtshan bzhin du rab tu btud/ /de nas gzhon nu nges par gshegs zhes gtam dag ni//bsgo bya skyes las bud med rnams kyis thob gyur na/ /bkur 'os skye bos mngon par rjes gnang byas pa rnams/ /blta bar 'dod pas lding khang shod du song bar gyur/ /yon tan ska rags brul zhing gegs byas de rnams ni/ /gnyid log rab tu sad pas lta byed 'khrugs pa rnams//gnas lugs gtam gyis rnam par brgyan rnams rnam gzhag ste/ /ya mtshan gyur pas dogs med par ni yongs su song / /gzhal yas khang gi skas kyi 'og gi sgra rab dang / /dril chung sgra rnams dang ni gdu bu'i sgra rnams kyis/ /rnam par skrag gyur khyim gyi bya yi tshogs rnams ni//phan tshun shugs rnams las kyang yang dag kun nas gtor/ /gang zhig 'dir ni yan lag rab mchog ma rnams ni/ /myur ba rab tu skyes gyur tsam tsam skyes rnams kyis/ /lo ma 'dzin rnams rgyas shing skyed smad shing rta ni/ /yangs pa rnams kyis lci ba nyid phyir 'gro ba bzung //mtha' gcig legs par rab tu sbyar ba'i rgyan rnams ni/ /rnam par sbas pa rnam par gsal bas ngo tsha bas/ /skyen por 'gro bar nus pa yin yang gzhan ma yin/ /'gro ba nges par bzung ste myur min song bar gyur/ /phan tshun rab tu bcer bas ril por gyur pa rnams//yang dag drud las bskyod gyur rna lung 'khyil ba can/ /de dag rnams kyi de tshe sgra bcas rgyan rnams ni/ /rlung bgrod skar khung rnams su rab tu zhi bar gyur/ /rlung bgrod skar khung rnams las rnam par 'thon pa rnams/ /phan tshun thang chen gyur pa'i rna lung 'khyil ba rnams//bud med rnams kyi 'dam skyes 'dra ba'i 'dam skyes zhal/ /lding khang rnams su bkod pa rnams ni rnam par mdzes/ /de nas khang bzangs lang tsho ma rnams kyis khyab cing / /ya mtshan la ni rab phye skar khung rnams kyis ni/ /lha mo dang bcas gzhal med rnams kyi nam mkha' bzhin//dpal dang ldan pa'i grong khyer kun nas mdzes par gyur/ /skar khung rnams kyis rnam par yangs pa ma yin las/ /phan tshun 'gram par bkod pa'i rna lung can rnams kyis/ /'dam skyes pad+ma rnams kyi tshogs rnams bcings pa bzhin/ /rab myos mchog ma rnams kyi zhal ni mdzes par gyur//gzhon nu de la lam du rnam par blta ba yi/ /bud med de rnams sa la 'gro 'dod ltar mdzes shing / /gyen du gdong phyogs de la rab tu lta ba yi/ /mi rnams gnam la 'gro bar 'dod bzhin mdzes par gyur/ /lus dad dpal gyis mchog tu 'bar bar gyur pa yi//rgyal po'i sras de mthong nas bud med de rnams ni/ /nges par dgongs pa gzhan min bsam pa dag pa yis/ /'di yi chung ma skal ba bzang zhes dal bus smra/ /gzugs kyi dngos su me tog tog can dang mtshungs shing / /rnam par ring zhing rgyas pa'i dpung pa can 'di ni//dpal nyid dor nas chos la nye bar gshegs zhes te/ /de la de dag rnams kyis zhe sa kho na byas/ /rnam par dul la gtsang zhing brtan pa'i cha lugs can/ /grong pa rnams kyis de ltar rgyal po'i lam khyab pa/ /de ni sngon du gzhon nus mthong nas dga' bas te//bdag gi srid pa gzhan ma cung zhig brtags pa 'dra/ /grong khyer de yang mtho ris bzhin du rab dga' ba/ /mngon par gzigs nas gtsang mar gnas pa'i lha rnams kyis/ /sa gzhi skyong ba'i sras po yang dag bskul don du/ /'khogs pa'i mi rgan rab tu 'gro bar sprul gyur to//de nas gzhon nu yis ni rga bas zil non zhing / /mi rnams las ni tha dad dbyibs can de gzigs nas/ /g.yo ba med cing de nyid du ni zhugs pa'i spyan/ /chags par gyur cing kha lo 'dzin pa la smras so/ /mngon par nyer 'ongs mi de su yin 'dren pa kye/ /skra rnams dkar zhing dbyug pa la ni lag pas brten//smin mas kun nas mig g.yogs 'khogs shing yan lag drud/ /rnam 'gyur 'di ni tha mal gang 'dod yin nam ci/ /de skad ces smra shing rta rab tu 'dren pa po/ /lha mchog de rnams nyid kyi blo ni rmongs byas shing / /don ni bsrung bya yin yang skyon med mthong gyur te//de yis sa skyong bdag nyid skyes la nges par gsol/ /gzugs kyi gnod byed stobs kyi rnam par za ba po/ /rgan pa rnams kyi 'joms byed mya ngan rnams kyi sa/ /dran pa rnams kyi nyams byed dbang po rnams kyi dgra/ /'di ni rgas pa zhes bya gang gis 'di bcom mo//'dis kyang byis pa nyid dang 'o ma 'thung gyur cing / /dus kyi sa la yongs su gnyid log gyur pa ste/ /rim gyis lus rab ldan pa'i lang tshor gyur nas kyang / /rim gyis de nyid kho nas rga bar nye bar song / /de skad ces smras rgyal po'i bdag nyid skyes pa ste/ /cung zhig 'dar la kha lo sgyur la 'di skad smras//skyon 'di kho bo la yang 'byung ba min nam ci/ /de bzhin 'di la kha lo sgyur ba yis gsol to/ /'di ni na tshod rab mchog tshe dang ldan pa'i yang / /gdon mi za bar dus kyi dbang gis 'byung bar 'gyur/ /de bzhin rgas pa gzugs kyi rnam par nyams pa bor//'jig rten pa yi shes pa nyid dang mthong ba nyid/ /de nas sngon gyi bsam pa dag pa'i blo mnga' ba/ /rnam rgyas bskal par bsags pa'i bsod nams las can de/ /rdo rje chen po'i sgra la nye bar ba lang bzhin/ /rgas pa thos nas gzhon nu kun nas yi mug gyur/ /dbugs ni ring du brgyus nas rang gi mgo bsgul zhing //'khogs pa de la spyan ni rnam par zhugs nas su/ /rga ba dang bcas skye ba de rnams gzigs gyur nas/ /sems ni khong du chud pa de yis tshig 'di smras/ /dran pa dang ni gzugs dang pha rol gnon pa yang / /de ltar rgas pas rnam dpyod med par 'joms pas te//'di lta bur ni mngon sum nyid du song na yang / /'jig rten pa dag skyo med nyer 'gro kho na'o/ /de ltar song la 'dren pa rta rnams phyir zlog la/ /khyod ni khyim nyid du ni skyes par rab tu song / /rgas pa'i 'jigs pa'i sems su gnas pa kho bo la//skyed mos tshal gyi sa la bde ba ga la yod/ /de nas rgyal po'i sras po de yi bka' lung gis/ /kha lo sgyur bas shing rta phyir la bzlog par gyur/ /de nas gzhon nus pho brang de nyid kho nar ni/ /bsam pa'i dbang gis stong pa bzhin du rab tu thob/ /gang gi tshe na de yang bde ba ma yin te/ / rgas pa rgas pa zhes ni rab tu yongs su rtog /de nas mi dbang gis ni rjes gnang de ni slar/ /rim gyis de nyid kho nas phyi rol gshegs par gyur/ /de nas gzhan yang lus la nad dang yongs ldan pa/ /lha mchog de rnams nyid kyis bskyed cing sprul pa'i mi/ /zas gtsang rgyal po'i sras po can der song nyid kyis//gzigs nas kha lo sgyur ba de nyid la smras pa/ /gsus pa sbom zhing dbugs dag skyod pa'i lus po can/ /lag pa cha shas zha zhing rid la skya bseng lus/ /a ma zhes ni snying rje'i ngag dag smra ba po/ /gzhan la brten nas gnas pa'i mi de su zhig yin/ / de nas kha lo sgyur bas smras pa zhi ba kye/ /'di yi khams ni rab 'khrugs rab stobs rab tu 'phel/ /nad ces bya ba mngon brjod shin tu don med chen po ste/ /nus kyang gang gis de ni rab dbang med par byas/ /rjes su brtse bcas mi de la ni gzigs bzhin du/ /rgyal po'i sras des slar yang 'di skad ces smras pa//skyes gyur skyon de so sor 'di nyid kho na'i 'am/ /nad kyi 'jigs la skye dgu rnams kyi spyi la yin/ /de nas shing rta rab tu 'dren pa des smras pa/ /gzhon nu nyes pa de ni thun mong gyur pa ste/ /de ltar nad rnams dag ni yongs su gtser ba ni//nad mthar phyin na 'jig rten dga' bar nye bar gshegs/ /de ltar don thos sems ni khong du chud pa de/ /chu rlabs nang song ri bong can bzhin rab 'dar zhing / /brtse ba thugs rje mnga' bas gsung ngag tshig 'di ni/ /cung zhig dngar ba'i dbyangs kyis rab tu smras pa'o//skye dgu rnams la rnam par zhen pa'i nad 'di ni/ /'jig rten pa dag rang bzhin gnas shing blo gtad byed/ /mi shes rnam par rgya chen e ma mi rnams kyis/ /gang zhig nad las rnam par grol rnams bzhad gad byed/ /'dren pa phyi rol rab tu 'gro las phyir log la/ / mi dbang pho brang nyid du shing rta rab tu song / /bdag gi nad kyi 'jigs pa thos nas dga' ba las/ /sems ni 'khums pa bzhin du rab tu bcom par gyur/ /de ltar lan gnyis phyir log de ni rab gzigs nas/ /sa yi bdag po yis kyang yongs su gros byas so/ /de yi phyir log nges pa'i mtshan ma thos gyur nas//bdag cag rnams ni 'di yis yang dag 'dor snyam ste/ /lam rnams gtsang mar lhag par byed pa po rnams la/ /khros shing 'khrugs kyang chad pa drag pos gcod pa med/ /slar yang sras po de la khyad par 'phags pa dang / /ldan pa'i yul la rab tu dpyod pa rnams mdzad cing //dbang po g.yo ba nyid kyi phyir yang chags snyam ste/ /bdag cag rnam par mi 'dor zhes ni mgon blangs so/ /gang gi tshe na sgra sgrogs dbang po'i don rnams kyis/ /sras po 'di la pho brang 'khor na dga' ba med/ /de nas ro gzhan ro la gyur cig zhes sems shing //phyi rol ltad mo la ni rnam par bka' stsal to/ /brtse ba las ni sras po'i dgongs ba rtogs nas su/ /de la chags pa'i skyon rnams 'ga' zhig ma bsams nas/ /sgyu rtsal rnams la mngon par shes zhes res ma'i gtso/ /mdzangs ma rnams la des ni yang dag bka' stsal to//de nas khyad par du yang mi yi dbang po'i lam/ /legs par brgyan byas nyid dang yongs su brtags pa la/ /'dren pa dang ni shing rta brjes nas rgyal po yis/ /gzhon nu phyi rol du ni rab tu gshegs su gzhug /de nas de ltar rgyal po'i bu ni gshegs pa na/ /lha mchog de rnams nyid kyis rnam par sprul pa yi//srog song shi ba'i ro de lam du bteg pa ni/ /'dren pa dang ni gzhon nus mthong ste gzhan gyis min/ /de nas 'dren pa rgyal po'i sras po des smras pa/ /zhan zhing stug pa'i mi rnams dag ni rjes 'brang zhing / /rgyan gyis brgyan pa yin yang kun nas ngu ba ste//mi bzhi rnams kyis bteg pa pha gi su zhig yin/ /de nas gtsang ba'i bdag nyid gtsang mar gnas pa yi/ /lha rnams dag gis sems ni zil non 'dren pa po/ /nges ni brjod par bya ba min kyang don 'di ni/ /don ldan dbang phyug la ni rab tu rnam par gsol/ / blo dang dbang po srog gi yon tan dang bral zhing / /gnyid log ming bral rtswa dang shing du gyur pa ste/ /brtson 'grus ldan pa rnams kyis bskyed nas bsrungs nas kyang / /sdug pa sdug pa rnams kyis spangs pa de ni su yin nam/ /de ltar tshig ni rab tu 'dren pa las thos nas/ /cung zhig kun nas bskyod cing de nyid la smras pa//chos 'di nyid ni skye ba 'di nyid kyang gi'am/ /mthar gyur 'di 'dra skye dgu kun gyi yin nam ci/ /de nas rab tu 'dren pas 'di nyid la gsol pa/ /mthar gyur las 'di skye dgu rnams ni kun gyi ste/ /dman dang 'bring dang bdag nyid chen po thams cad kyi//'jig rten dag ni rnam par nges par rnam par nyams par 'gyur/ /de nas mi dbang sras po de ni bstan na yang / /'chi ba thos nas de ma thag tu yi mug cing / /dpung pas shing rta'i shing gi rtse la rab 'khyud nas/ /gdangs snyan dang ldan dbyangs kyis rab tu smras pa'o//'di ni nges par skye dgu rnams kyi mthar thug ste/ /'jig rten pa dag 'jigs pa spangs shing bag med la/ /mi rnams dag gi sems rnams sra ba snyam pa ste/ /lam la gnas rnams de ltar rang bzhin nyid du gnas/ /de phyir 'dren pa shing rta'i kha ni phyir bzlog dang / / bdag cag sa la rnam par rgyu ba'i yul dus min/ /nyam thag dus su rnam par nyams pa shes nas ni/ /sems dang bcas pa gang 'dra 'di na bag med yin/ /mi bdag bdag skyes kyis ni de skad smras na yang / /de yis shing rta de ni phyir la ma bzlog ste/ /khyab par ldan pa yin yang mi dbang brten pa la//pad+ma'i tshogs bcas nags nyid du ni gshegs par gyur/ /de nas me tog rgyas ldan gzhon nu'i rkang 'thung zhing / /yongs su bskor zhing rab dga' myos pa'i khu byug can/ /gzhal med khang ldan pad+ma dang bcas mdzes pa'i rdzing / /dga' ba'i tshal 'dra dge ba'i nags de gzigs par gyur//lha mchog mas bskor grong khyer brgyan byed bdag po'i gzhir/ /brtul zhugs gsal ldan thub pa bgegs kyis 'jigs pa bzhin/ /yan lag mchog ma'i tshogs khyab mi skyong bdag skyes sras/ /de nas stobs las nags der spyan drangs so//sangs rgyas kyi spyod pa zhes bya ba'i snyan dngags chen po las/ thugs skyo ba skyes pa'i le'u ste gsum pa'o// //de nas skyed mos tshal de nas/ /ya mtshan gyis ni mig g.yos rnams/ /bud med rnams ni khyo thob bzhin/ /mi skyong sras la mdun du 'ongs//'ongs nas de la de rnams kyis/ /ya mtshan rab rgyas spyan ma drangs/ /pad+ma'i mdzod 'dra'i phyag rnams kyis/ /phrin las yang dag spyod pa byas/ /g.yo med dga' ba rnam gsal ba'i/ /spyan mig rnams kyis 'thung ba bzhin/ /yid dkrugs 'dod pas sems g.yengs rnams//de la yongs su bskor nas gnas/ /lhan skyes rgyan rnams kyis bzhin du/ /mtshan ni mdzes rnams kyis brgyan pa/ /'dod lha lus dang ldan no zhes/ /de la mi mo de rnams snyam/ /zhi ba nyid phyir brtan nyid phyir/ /gsang ba'i 'od zer zla ba ni/ /sa la dngos su babs pa bzhin//de la kha cig rnams kyis shes/ /de yi lus kyis g.yengs de rnams/ /nges bzung lus ni rnam 'gyur zhing / /phan tshun mig rnams kyis bsnun nas/ /dal bus dbugs ni rnam par brgyus/ /de ltar mi mo de rnams kyis/ /de ni mig tsam gyis mthong nyid/ / smra ba med cing dga' med par/ /'di yi mthu yis non par gyur/ /de ltar de rnams rtsom bral zhing / /snying rjes rnam par 'khrugs mthong nas/ /bram ze mdun na 'don gyi sras/ /blo ldan 'char kas tshig smras so/ /kun gyi sgyu rtsal kun shes shing / /dgongs pa len la mkhas ma rnams//gzugs dang mdzangs dang ldan pa ste/ /rang gi yon tan gtsor phyin no/ /lus ngan gyi yang skyed tshal dang / /byang gi sgra mi snyan na yang / /yon tan 'di rnams kyis mdzes te/ /nor 'dzin 'di na sngon nyid do/ /chags bral rnams dang drang srong yang / /khyed cag rnams kyis g.yo nus shing //lha mo rnams kyis shes pa yis/ /lha rnams la yang len par ro/ /dgongs pa shes dang rtsed 'jo dang / /mdzangs dang gzugs ni phun tshogs pas/ /bud med rnams kyis chags nus na/ /skyes pa rnams kyis smos ci dgos/ /rnam pa de ltar rab sbyar ba/ /de yi rang gi spyod yul las/ /rnam pa de ltar spyod pa 'di//khyod kyi drang po'i tshig ma gyur/ /khyod kyi 'di ni ngo tsha bas/ /mig 'khums bag ma gsar pa yi/ /spyod pa dang mtshungs yang na ni/ /ba glang skyong gi chung ma'i 'os/ /gang yang 'di ni dpa' ba ste/ /dpal gyi mthu las chen po yin/ /bud med kyi yang gzi che ste/ /de phyir 'di yang nges par bya//sngon yang ka shi'i mdzes ma ni/ /smad 'tshong ma yi drang srong che/ /lha yis thub par dka' ba yang / /drang srong rgyas pas rkang pas brdungs/ /mAn thal gau tam dge slong ni/ /smad 'tshong gtso mo byin ma yin/ /dga' 'dod de yi don ched du/ /sngon gyi tshe na ro rnams bton//gau ta ma mun rings ming / /drang srong chen po tshe rings po/ /kha dog dbyibs mchog ma yin pa'i/ /bud med kyis ni tshim par byas/ /drang srong rwa skyes thub pa mchog /bud med yul la mi mkhas pa/ /rnam pa sna tshogs thabs rnams kyis/ /zhi mas de ltar blangs shing pham/ / sna tshogs bshes gnyen drang srong che/ /brtul zhugs chen po brtan pa yang / /lha mo mar srung mas phrogs te/ /lo bcu rnams la nyi mar shes/ /drang srong de rnams de rnams sogs/ /bud med kyis sgyur blangs gyur na/ /rol zhing lang tsho snga ma yis/ /mi bdag sras po smos ci dgos/ / de ltar gyur na yid ches shing / /'di ni mi skyong rigs kyi dpal/ /'di las phyir phyogs ma yin pa/ /ji ltar de ltar nan tan mdzod/ /lang tsho ldan ma 'ga' zhig rnams/ /mtshungs pa'i skye bo 'phrog pa ste/ /mchog dang mchog min dag gi sems/ /len pa gang de bud med rnams/ / de ltar 'char ka'i tshig thos nas/ /bud med de rnams phug pa bzhin/ /gzhon nu len par rab mtshon te/ /bdag nyid yang dag kun nas 'dzegs/ /'jigs las 'jigs bzhin yan lag ma/ /de rnams smin dang lta dang sgeg /dgod dang rol dang 'gro ba yis/ /kun nas bskyod pa'i spyod pa byas//rgyal po'i bka' lung sbyar phyir dang / /gzhon nu nyid kyang 'jam phyir dang / /rgyags pa yis ni myos pa'i phyir/ /yid mi ches ba myur bar dor/ /glang mo'i tshogs dang thabs cig tu/ /glang po gangs can nags na ltar/ /de nas mi mo'i skye bo yis//gzhon nu bskor zhing nags na spyad/ /rnam par mdzes pa'i skyed tshal na/ /lha mos bskor ba'i nyi ma bzhin/ /yid 'ong nags der gzhon nu de/ /bud med rnams ni mdun 'gro bar/ /rnam par sgeg bcas gzhon nu ma/ /rgyags pas ma spangs de rnams dga'/ /sra zhing zlum rgyas lhan cig pa'i//nu ma rnams kyis de la reg /dpung pa las brul 'jam ring mnyen/ /lag pa'i ljon shing stobs med ma/ /kha cig bden min 'khrul pa ru/ /byas nas de la stobs las 'khyud/ /kha cig zangs mchu ma mchu can/ /kha cig chang gi dri ngag gis/ /gcig pu dben par sdod cig ces//'di yi rna bar shab shib byed/ /kha cig bka' lung stsol ba bzhin/ /byug pa gsher mas rab smras te/ /'dir ni gus par gyis shig ces/ /dgod dang 'khyud dang 'dod pas so/ /kha cig gser gyi ska rags kyi/ /cal col rnams kyis tsam tsom dang / / phra mo'i dar gyi gos gyon zhing / /'di la ro smad ston cing bskor/ /yang dang yang du myos ma'i rgyus/ /gzhan ma dar sngon nyil ba ste/ /ska rags phan tshun sdud pa ni/ /mtshan mo glog phreng bzhin du mdzes/ /tsU ta'i me tog yal ga rgyas/ /bzung nas gzhan ni 'phyang gyur la/ /gser gyi bum par mtshungs pa yi//lo ma 'dzin pa ston par byed/ /kha cig pad+ma'i nags tshal nas/ /'ongs nas pad bcas pad+ma'i spyan/ /pad+ma'i zhal gyi logs gnas shing / /pad+ma'i dpal bzhin bsdad par gyur/ /rang gnas de la bskul ba bzhin/ /bslus par gyur zhes mig rnams kyis//kha cig mngon par 'dren bcas lag /don ldan dngar ba'i glu len no/ /dge ba'i gdong gis gzhan mas ni/ /smin pa'i gzhu ni rnam bkang ste/ /bskor gnas brtan dang rol pa yis/ /'di yi spyod la rjes zlos byas/ /rgyas zlum nu ldan kha cig ni/ /dgod pas rna lung g.yos gyur cing //khyod ni thob par gyur cig ces/ /mthon po rnams kyis bzhad cing smras/ /gzhan ni de bzhin 'gro 'dod pa/ /me tog phreng ba'i tshal gyis bcings/ /kha cig cod bcas dngar mo yis/ /ngag gi zhags pa rnams kyis bzung / /so sor 'bral ba don gnyer 'ga'//tsU ta'i snye ma bzung nas ni/ /me tog 'di ni gang gi zhes/ /rgyags pas rnam par 'khrugs shing dris/ /kha cig 'gros dang cha lugs ni/ /skyes pa bzhin du byas nas ni/ /sa 'dir rgyal bar gyur cig kye/ /bud med kyis 'pham de la smras/ /de nas g.yo ba'i mig can 'gas//ut+pal sngon po snom byed cing / /cung zhig rgyags skad tshig rnams kyis/ /mi skyong bdag skyes la smras so/ /gzigs shing jo bo tsU ta'i shing / /me tog sbrang rtsi'i dris khyab la/ /khu byug 'dir ni skad 'don pa/ /gser gyi bu na bkag pa 'dra/ /mya ngan med pa'i shing 'di gzigs//'dod pa can gyi mya ngan 'phel/ /bung ba 'dir ni sgra bsgrags pa/ /me yis tshig pa yin pa 'dra/ /tsU ta'i shing gis yang dag 'khyud/ /gzigs shing ti la ka yi shing / /bud med lus ser chags pa yis/ /skyes pa gos dkar gon pa 'dra/ / rab rgyas ku ra ba ka gzigs/ /ma zos pa yi smug rtsi'i 'od/ /bud med rnams kyi sen 'od kyis/ /sma phab gyur te dud pa 'dra/ /gzhon nu mya ngan med 'di gzigs/ /'dab ma rnams kyis spras pa gang / /kho mo'i lag pa mdzes pa yis/ /ngo mtshar gyur te gnas pa 'dra/ /rdzing bu gzigs shing 'gram skyes pa'i//lcang ma rnams kyis rab tu bskor/ /dkar po'i dar gyi gos gon pa'i/ /rab myos ma rnams nyal ba 'dra/ /bud med rnams la bdag nyid che/ /gzigs shig ngang pa chu 'di la/ /rgyab na bsgo bya'i bran bzhin du/ /ngang mo rjes 'jug rjes su 'gro//rab tu myos pa'i khu byug ni/ /skad grag sgra ni gson mdzod cig /khu byug gzhan ni mngon sum du/ /kus 'debs brag ca'i sgra brnyan 'dra/ /mkha' la rgyu ba rnams kyi yang / /rgyags pa dpyid kyis khyer te 'ongs/ /bsam bya min sems skye bo ni/ /shes rab can du rlom pa med//de ltar dar la bab pa rnams/ /yid dkrugs 'dod pas sems dregs shing / /sna tshogs tshul ni de dang des/ /gzhon nu la ni nye bar brtsams/ /de ltar kun nas g.yengs na yang / /brten pas dbang po dkris pa de/ /'chi bar bya zhes skyo byas shing / / dga' dang 'jigs pa med par 'gyur/ /de rnams kyi ni gnas skabs de/ /gzigs nas skyes mchog dam pa des/ /mnyam la skyo dang brtan pa yi/ /thugs kyis bsams par gyur pa'o/ /ci zhig bud med 'di rnams ni/ /lang tsho g.yo bar rtogs pa min/ /gang phyir gzugs kyi myos pa ni//gang zhig dga' bas nyams par 'gyur/ /gang gi nang du bying ba ru/ /nges par de rnams kyis mi mthong / /'gro ba nad kyi chos can la/ /'jigs pa spangs te de ltar dga'/ /thams cad 'phrog byed 'chi ba yi/ /nges par mngon par shes min zhing //de ltar rang gnas skyo med par/ /rtsed mo dang ni bzhad gad byed/ /rga dang na dang 'chi ba yang / /shes ldan yin na sems ldan su/ /rang gnas langs dang 'dug pa 'am/ /nyal byed rgod pa smos ci dgos/ /nad dang 'chi ba nyid dang ni/ /mchog tu 'khogs gang de mthong nas//rang gnas gyur zhing skyo med pa/ /ji ltar sems med de ltar de/ /me tog rnams dang 'bras bu yis/ /rnam par spangs par gyur pa'i shing / /'gyel lam yang na bcad pa ste/ /shing gzhan mdzes par byed ma yin/ /de ltar bsam gtan mchog mthong nas//yul rnams la ni 'dod pa thal/ /'char ka tshul lugs bstan bcos shes/ /mdza' bo nyid kyis de la smras/ /kho bo mi skyong gis byin te/ /khyod la grogs su nus pa lo/ /gang phyir khyed la smra 'dod pa/ /rab dga' ldan pa de phyir ro/ /phan pa min las rab 'gegs shing / /phan pa la yang rjes rab 'jug /sdug pa na yang yongs mi gtong / /yongs rdzogs shes kyi mtshan nyid do/ /bdag de byams par dam bcas nas/ /skyes bu'i don la phyir phyogs pa/ /gal te khyod la btang snyoms byed/ /grogs po nyid kyang ma yin no/ /de phyir mdza' bor gyur nas smras/ / gzhon nu'i lus dang ldan pa ni/ /khyod kyis 'di 'dra bud med kyis/ /yul la mkhas pa'i gzugs brnyan min/ /de yi ngo tsha'i rgod don dang / /bdag nyid dga' ba'i don nyid du/ /bden min gyis kyang mi mo yi/ /rjes su 'jug pa rigs pa yin/ /yang dag 'dud dang rjes 'jug gi//bud med rnams kyis sems 'ching ste/ /brtse ba'i yon tan skye gnas phyir/ /yid la 'dod pa bud med yin/ /de phyir rnam par spangs pa'i spyan/ /snying la gzhan du phyir bltas kyang / /'di yi yul dang rjes mthun par/ /mkhas pa rnam par dpyad par 'os/ /mkhas pa sman yin bud med la//mkhas pa rab mchog rgyan yin no/ /mkhas pa dang bral gzugs dag ni/ /me tog med pa'i nags dang 'dra/ /yang na mkhas pa'i rang bzhin gyi/ /bsam pa rang bzhin khas len mdzod/ /yul rnams nyes par dka' thob nas/ /phyi shol byed pa 'os ma yin/ / sngon tshe lha yi dbang pos kyang / /'dod pa mchog ces shes byas nas/ /gau tam thub pa'i dga' ldan ma/ /bshol med ma la 'dod pa byas/ /zla ba'i chung ma snar ma ni/ /drang srong ri byis don du gnyer/ /de nas de dang 'dra ba yi/ /brkam bya ma ni rnyed ces thos/ /u b+ha th+ya yi chung ma ni/ /rlung gi bu mo mthun ma la//dka' thub chen po'i phur bu yis/ /ba ra dwa dza bskyed par gyur/ /drang srong phur bu'i chung ma ni/ /sbyin sreg ma la sbyin sreg mchog /zla ba yis ni lag pa yi/ /lha yi las byed bskyed par gyur/ /sngon tshe bu mo nag mo ni/ /chur skyes ma las skyes ma la/ /rtsib logs skyes ni chags skyes shing //ya nu ni yi gling du phyin/ /gnod sbyin phreng ma rigs ngan ma/ /snod ma la ni dga' 'dod pas/ /gong ma sreg ni za ba'i bu/ /thub pa gnas mchog gis bskyed do/ /'gro mgyogs rgyal po drang srong nyid/ /na tshod rnam par song ba yi/ /lha mo sna tshogs mchod mar bcas//sna tshogs shing rta'i nags su dga'/ /bud med 'grogs min zhi ba ni/ /skya bseng gis ni shes nas kyang / /dga' ma'i gzugs yon gyis bkug ste/ /'dod las skyes pa'i bde ba bsten/ /skyed mdzad rgyal po dmar ser yang / /bram ze'i bu mo phrogs nas ni/ / na babs thob pa nyid yin kyang / /yid dkrugs 'dod pa ma bsten min/ /de la sogs pa bdag nyid ches/ /yul rnams smad pa yin na yang / /dga' ba'i ched du longs spyad de/ /yon tan ldan la sngon nyid do/ /khyod kyang rigs pa las 'thob cing / /stobs ldan gzugs ldan dar la bab//gang du skye 'gro 'di 'chags na/ /yul rnams la ni phyi shol byed/ /de ltar 'jam zhing lung dang bcas/ /de yis tshig ni gsan gyur nas/ /'brug gi sgra skad dbyangs kyis ni/ /gzhon nu yis ni lan smras so/ /ngag tshig 'di ni 'thad pa ste/ /khyod la mdza' bo nyid du gsal/ / gang du bdag la ngan par sems/ /'dir ni khyod la rjes zhi bgyi/ /yul rnams la ni phyi shol byed/ /'jig rten de'i bdag nyid du shes/ /'gro ba mi rtag par shes nas/ /'dir ni bdag yid dga' ba min/ /rga dang na dang 'chi ba ste/ /gal te 'di gsum ma yin na/ /yid du 'ong ba'i yul rnams la//kho bo yang ni dga' bar 'gyur/ /gal te bud med rnams kyi lus/ /de nyid rtag par 'gyur na ni/ /skyon ldan 'dod pa rnams la yang / /kho bo'i sems ni 'dod la phyogs/ /gang tshe 'di dag rnams kyi gzugs/ /rgas pas 'thung ba 'byung 'gyur zhing / /bdag nyid kyi yang 'dod med na//rmongs las der ni dga' bar 'gyur/ /rga dang na dang 'chi ba'i tshes/ /rga na 'chi ba'i bdag nyid kyis/ /skyo ba med par rol pa ni/ /ri dgas dang ni bya dang mtshungs/ /bdag nyid chen po 'di rnams kyang / /'dod pa'i bdag nyid ces smras gang / /'dir ni skyo bar bya ba ste/ /gang tshe de rnams kyi yang tshad//gang du phyi las zad pa ste/ /bdag nyid chen por mi sems te/ /yul rnams la ni chags pa 'am/ /sbyor min bdag nyid ldan nyid kyis/ /mkhas pa yis kyang dpe brjod cing / /bden min gyis kyang bud med kyi/ /skye la zhugs zhes smras pa gang / /bden min bdag gis shes ma yin//gang du drang min rjes 'jug pa/ /de la bdag gis sred pa med/ /dngos po kun gyi tshogs ba de/ /gal te smon na med par shog/ /mi brtan pa yi dad pa dang / /skyon du mthong ba'i nus pa yis/ /chags pa skyes par gyur pa'i sems/ /slu bar bya ba ci zhig yin/ /bud med skyes pa'i chags skyes shing //bud med skyes pa phan tshun du/ /gal te de ltar slu na ni/ /lta bar nus pa nyid ma yin/ /de ltar gyur na sdug bsngal gyis/ /nyam thag rga 'chi'i skal ba can/ /bdag ni 'phags min 'dod pa la/ /slu bar 'os pa ma yin no/ /e ma shin tu brtan la stobs ldan khyod kyi sems//'dod pa g.yo ba rnams su snying po mthong gyur la/ /shin tu rno zhing 'jigs pa'i yul la zon mdzad cing / /rga dang rgud pa nad kyi 'jigs pa rnam sems shing / /'gro ba rnams ni me yis tshig pa bzhin thos na/ /zhi ba 'thob min brtan min dga' ba ga la zhig /the tshom med par 'chi zhes rab tu shes pa yi/ /mi rnams gang gi snying la chags pa rab skyed pa/ /de yi sems ni lcags las gyur par shes pa ste/ /'jigs pa che la chags pa gang zhig du ba med/ /de nas gzhon nu yis ni 'dod pa rnams kyis bsten/ /'joms byed gtam ni rnam par nges pa'i bdag nyid mdzad//skye bo rnams kyi mig gi 'gro bya gsal byed kyi/ /dkyil 'khor sa 'dzin ri bo la ni nub par gyur/ /de nas rgyan dang me tog phreng ba 'bras med 'dzin/ /sgyu rtsal yon tan gyis dang rab dgas 'bras med rnams/ /rang gi sems la yid dkrugs 'dod pa rnams smad nas//yid la re nyams bud med rnams ni grong du thal/ /de nas grong khyer skyed mos tshal song skye bo'i dpal/ /legs par brtags nas spyod la so sor brtul te yang / /thams cad mi rtag par gyur rnam par sems bzhin du/ /slar yang mi skyong bdag skyes grong du rnam par zhugs//de nas de yi yid ni yul la rnam par phyir phyogs rgyal pos thos gyur nas/ /snying la song ba'i zug la glang chen bzhin du mtshan mo de la gnyid ma log /de nas sngags mang rnam pa sna tshogs lam rnams dag gis thang chad blon por bcas/ /des ni 'dod pa las gzhan sras kyi blo yi nges pa gzigs ma gyur//sangs rgyas kyi spyod pa zhes bya ba'i snyan dngags chen po las/ bud med kyis gegs byas pa'i le'u ste bzhi pa'o// //de ltar yul rnams dam pa'i mchod pa rnams kyis ni/ /sred du bcug kyang shAkya'i rgyal po'i sras po de/ /dug bsgos mda' yis snying la phug pa'i seng ge bzhin//bde ba rnyed pa ma yin brtan par gshegs ma gyur/ /de nas res 'ga' zhig na blon po'i bu mkhas shing / /grogs gyur sna tshogs gtam gyis rjes su 'brangs byas pa/ /nags kyi sa la 'gro 'dod lta bar 'dod pa yis/ /mi yi lha yis rjes gnang phyi rol rab tu gshegs//gsar ba'i gser gyi srab dang dril bu chung ngu dang / /rab tu g.yo ba'i rnga yab mdzes pa'i gser sga dang / /stan bcas dam pa'i rta la mngon par zhon nas ni/ /tog la ljon dang chu skyes tog can bzhin du gshegs/ /de ni mchog tu rnam par rgyang ring nags mtha'i sa//nags tshal 'dod dang sa yi yon tan las gshegs te/ /chu gnyer bzhin du rnam par bkram pa'i gshol lam can/ /nor 'dzin sa la zhing dag rmo ba gzigs par gyur/ /gshol gyi phya las rnam bkram rtswa myug ku sha dang / /shi gyur 'bu srin srog chags phra mos khyab pa ste//rnam pa de 'dra'i sa de yang dag mngon gzigs nas/ /rang gi skye bo bsad pa la bzhin mya ngan gyur/ /zhing dag rmo ba'i skyes bu rnams ni rnam gzigs pa/ /rlung gis gtor ba'i rdul gyis rnam 'gyur kha dog can/ /khur bas thang chad rnam par 'khrugs pa'i glang rnams la//'phags pa mchog gis mchog tu brtse ba'i snying rje mdzad/ /de nas mgyogs 'gro'i rgyab nas dal bus babs nas ni/ /sa la rnam par rgyu zhing mya ngan dang ldan pa/ /skye bo dag gi skye dang 'god pa rnam sems zhing / /nges par bkren pa 'di zhes smras shing nyam thag gyur/ /bsam pa yis kyang rnam par dben pa mngon bzhed cing //rjes su 'ongs pa'i mdza' bshes de rnams phyir bzlog nas/ /kun nas mngon par g.yo zhing mdzes pa'i lo 'dab can/ /'dzam bu'i rtsa ba skye bo med par de gshegs so/ /rin chen bai DUr+ya dang mtshungs pa'i rtswa 'jam can/ /gtsang mar ldan pa'i sa gzhi der ni de zhugs te//'gro ba'i skye ba dang ni 'god pa rnams sems shing / /yid ni brtan pa'i lam la dmigs pa'o/ /yul la 'dod sogs sems kyi nad las rnam grol ba'i/ /sems gnas pa ni de ma thag tu thob gyur la/ /bsam gtan dang po zag pa med pa'i rab spyod pa/ /rtog pa dpyod pa dang bcas zhi ba thob par gyur//rnam par dben pa las skyes thob nas de nas ni/ /mchog tu dga' ba'i bde ba sems kyi ting nge 'dzin/ /yid kyis 'jig rten 'gro ba yang dag rab brtags nas/ /'di nyid de nas gzhan ni rab tu rtogs par gyur/ /kye ma skye bo bkren pa gang zhig rang dbang ni//yod min rga dang na dang rnam par nyams pa'i chos/ /nad pa dang ni shi dang rga bas nyam thag gam/ /gzhan la rgyags pas long zhing shes pa med pas smod/ /'dir ni gal te bdag gis rang dang mtshungs gyur pa/ /gzhan gyi rang bzhin dag la de ltar smod ba ni/ /mchog gi chos 'di rnam par rtog pa kho bo yi//mtshungs par gyur pa ma yin nus pa'ang gzhan med do/ /'gro ba'i rga dang na dang rgud pa'i nyes pa rnams/ /de ltar ji lta ba bzhin rnam par gzigs de yi/ /stobs dang lang tsho dang ni srog la rab zhugs pa'i/ /bdag tu gyur pa'i rgyags pa skad cig gis med gyur/ / de ni dga' ba med cing rjes su gdung med la/ /the tshom som nyir ma gyur gnyid dang rmugs pa med/ /'dod pa'i yon tan rnams la yang dag ma chags shing / /gzhan la rnam par sdang bar ma gyur phyi shol med/ /de ltar bdag nyid chen po de yi rdul med cing / /rnam par dag pa'i blo gros 'di ni 'phel gyur la//skyes bu gzhan dag rnams kyis mthong bar ma gyur pa'i/ /dge slong cha lugs ldan pa'i skyes bu nye bar 'ongs/ /su zhig yin pa smros zhes mi yi lha sras kyis/ /de la mngon par dris gyur de la des smras pa/ /mi yi skyes mchog skye dang 'chi bas 'jigs pa yi/ /thar pa'i phyir ni rab tu zhugs pa'i dge sbyong yin//bdag ni 'gro ba zad pa'i chos ni thar 'dod cing / /dge zhing 'gyur ba med pa'i gnas de tshol ba ste/ /rang gi skye bo dang ni skye bor mnyam pa'i blo/ /yul rnams la ni chags pa'i nyes pa phyir log pa'o/ /skye bo med pa'i gnas khang dang ni ri 'am nags/ /shing gi rtsa ba 'ga' zhig tu ni gnas pa yi//don dam phyir ni ji ltar nyer ldan slong mo ba/ /sred bral yongs su 'dzin pa med par rnam par rgyu/ /de ltar gzigs pa'i rgyal po'i sras po de nyid la/ /'di skad smras nas nam mkha' la ni gshegs par gyur/ /de ni de yi lus kyis sangs rgyas gzhan gzigs shing //lha na gnas pa de yi dran pa'i ched du 'ongs/ /mkha' la mkha' 'gro bzhin du gshegs pa de la ni/ /mi mchog yang dag dga' bar gyur zhing ya mtshan gyur/ /de nas chos kyi 'du shes nye bar thob gyur nas/ /mngon par nges 'byung cho ga la ni blo gros mdzad/ /de nas dbang po dang mnyam dbang po'i rta thul ba//grong la rab tu 'jug 'dod rta la rab 'dzegs shing / /'khor gyi skye bo dag kyang mngon par 'dod pa ste/ /de nyid phyir na mngon 'dod nags ni ma bsnyen to/ /de ni rga dang 'chi ba zad par byed 'dod pa/ /nags su gnas phyir blo gros dran pa la bzung nas/ gnyis 'thung dbang po nags kyi sa nas grong du ltar/ /'dod pa las min grong la slar yang rab tu zhugs/ /de ni yang dag mthong nas shAkya'i bu mo zhig /rab zhugs lam la thal mo sbyar ba dang bcas shing / /kye ma spyan dbang gang gi bdag po 'di 'dra 'dir/ /mo de bde ma mya ngan 'das ma zhes smras so//de nas dbyangs 'di sprin chen dbyangs dang ldan pa yis/ /yongs su thos nas mchog tu zhi ba rnyed gyur la/ /mya ngan 'das zhes sgra skad thos pa dang ldan des/ /yongs su mya ngan 'da' ba'i chos gar blo gros mdzad/ /de nas gser gyi ri bo'i rtse mo'i sku mnga' zhing / /glang chen phyag dang 'brug gi sgra dbyangs khyu mchog spyan//seng ge'i stobs dang ri bong can gyi zhal mnga' bas/ /mi zad chos la chags skyes pho brang rab tu 'thob/ /de nas mtho ris dag na lha yi 'dun sa ru/ /lha dbang 'bar ba la ni bkug 'gyed gzhon nu bzhin/ /blon po'i tshogs kyis nye bar bsnyen pa'i mi bdag la//ri dgas dbang po'i 'gros dang ldan pa mngon par gshegs/ /rab tu btud nas thal mo dang bcas smras gyur pa/ /mi dbang bdag la legs par rjes su gnang ba byin/ /nges par skye bo 'di ni rnam par 'bral ba ste/ /thar pa'i ched du yongs su rnam par gshegs par bgyi/ /de ltar de'i tshig nges par thob nas rgyal po ni//lag ldan gyis ni mngon snun ljon pa ltar g.yos shing / /ka ma la dang rab mtshungs thal mo dag bzung nas/ /mchi ma dang ni gre ba kha zhing tshig 'di smras/ /brtse ba'i blo gros 'di ni rab tu thong mdzod cig /khyed kyi chos la bsnyen pa'i dus ni ma yin te/ /na tshod dang po dang ni blo gros g.yo ba na//chos kyi spyod pa gsungs pa rnams ni skyon mang ngo / /yul rnams su ni dbang po ya mtshan glo bur zhing / /brtul zhugs g.yo ba rnams su nges par nus med la/ /khyad par du ni dben par mngon par mi shes pa/ /dar la bab pa'i yid ni dgon pa nas g.yo'o//mtshon gyur khyod la phun sum tshogs pa gtad nas ni/ /kho bo yi yang chos dga' chos kyi dus yin te/ /rnam par gnon pa bstan pa rnam par gnon pa yis/ /bla ma spangs nas khyod kyi chos kyis chos ma yin/ /de phyir khyod kyis nan tan nges pa 'di dor la/ / khyod ni re zhig khyim gnas chos la dga' bar gyis/ /dar la bab pas bde ba rnams ni longs spyad nas/ /skyes bu'i dka' thub nags su 'jug pa nyams dga'o/ /de ltar rgyal po'i tshig 'di rnam par gsan nas ni/ /ka la ping ka'i dbyangs kyis lan ni smras pa ste/ /rgyal po gal te bdag gi khas len bzhi rnams su//khyed kyis 'gyur na dka' thub nags ni mi bsnyen to/ /bdag gi srog ni 'chi ba nyid du mi 'gyur zhing / /bdag gi rang gnas gyur 'di nad kyis mi 'phrogs la/ /bdag gi lang tsho rgas pa yis ni mi g.yeng zhing / /phun sum tshogs pa 'di ni rgud pas ma gtor na'o//de ltar rnyed par dka' ba'i don smras gyur pa yi/ /sras po la ni shAkya'i rgyal pos tshig smras pa/ /shin tu rab tu zhugs pa'i blo 'di thong mdzod cig /shin tu yid la re ba 'phya zhing sha thang 'chad/ /de nas lhun po ltar lcis bla ma la smras pa/ /gal te rim pa de dag med de shol mi thebs//'bar ba'i me yis tshig pa'i khang pa nas/ /phyi rol 'byung bar 'dod pa 'dzin par nus ma yin/ /gang gi tshe na 'gro ba nges par 'bral ba ste/ /chos phyir ma yin 'di ni rnam par 'bral ba mchog /'o na bdag la 'chi bas dbang med 'bral byed cing / /rang gi don ma byas shing tshim pa ma yin nyid//de ltar mthar bzhed sras po de yis nges pa ni/ /sa yi bdag po yis ni nges par thos nas ni/ /'gro bar mi bya zhes ni mngon par brjod nas su/ /slar yang bsrung ba dag ni 'dod pa mchog rnams mdzad/ /dga' zhi zhi ba sngon 'gro bskur sti mang po las/ / blon po rnams kyis ji lta ba bzhin dpe bstan zhing / /bla mas mchi ma lhung ba rnams kyis shol btab ste/ /de nas de ni mya ngan bzhin du khyim la zhugs/ /rna lung 'khyil ba g.yo bas 'o byas gdong ldan ma/ /dbugs rlung stug pos rnam par bskyod pa'i nu ma can/ /bstan pa min pa'i mig ldan bud med rnams kyis ni//ri dgas mo rnams kyis bzhin mngon par gyen du lta/ /gser gyi ri bo dang 'dra dkar ser mdog de ni/ /yan lag mchog ma rnams kyi snying ni myos mdzad cing / /ngag dang reg bya dang ni lus dang yon tan gyis/ /thos byed lus dang lta byed bdag gi dngos rnams phrogs//nyin mo rnam par thal tshe de nas khang bzangs la/ /lus kyis nyi ma bzhin du mngon par gsal ba ni/ /rab rib rnam par 'joms 'dod bdag nyid snang ba yis/ /nyi ma shar ba lhun po la bzhin kun nas 'dzegs/ /gser gyis 'bar zhing gsal ba'i sgron ma'i shing dang ni/ /a ga ru mchog nag po'i bdug pas gang ba'i ltor//mngon par 'dzegs nas rdo rjes spras shing sna tshogs pa/ /rab mchog gser gyi bzhugs gdan la ni bsnyen pa'o/ /zla ba ltar dkar gangs dang ldan pa'i rtse mo na/ /nor dbang bdag nyid skyes la lha mo'i tshogs 'dus bzhin/ /de nas lus mchog ma rnams dbang po dang mtshungs mchog /de la mtshan mor sil snyan rnams kyis nye bar gnas/ /mchog rab lha yi sil snyan 'dra ba rnams kyis kyang / /de yang de yis bskyed par ma gyur dga' ba med/ /dam pa'i don gyi bde phyir legs pa de yi ni/ /mngon par nges par 'byung 'dod gang la dga' ma gyur//de nas der ni brtul zhugs mchog gyur 'og min gyi/ /lha rnams kyis ni 'di yi nges pa rtogs nas ni/ /lus kyi rnam 'gyur rnam par 'gyur byas dus gcig la/ /myos ma'i skye bo rnams ni gnyid du 'gro bar byas/ /de la kha cig dga' ba yin yang khros pa bzhin/ /pang du son pa'i gser gyi snod ni sna tshogs pa'i//pi wang rnam par spangs nas lag pa g.yo ba la/ /'gram pa rnam par bkod nas nyal bar gyur pa'o/ /'khyog min bung ba'i phreng ba sgra sgrogs pad+ma dang / /chu bo'i ngogs na chu sbur rab tu rgod pa bzhin/ /gzhan rnams nu mar rnam nyil dkar po'i dar gon zhing / / gling bu lag par sbyar zhing gnyid log rnam par mdzes/ /de bzhin gzhan rnams pad+ma gsar pa'i snying po ltar/ /'jam zhing gdung bya gser gyis 'bar ba'i dbu brgyan ni/ /'dus pa'i lag pa dag gis dga' ba bzhin du ni/ /rdza rnga nyid ni yongs su 'khyud nas gnyid log gyur//de bzhin gzhan ni gsar ba'i gser gyis rnam brgyan zhing / /bgo ba'i gos ni ser po mchog dag gon pa ste/ /kar ni ka ra'i yal ga glang pos bsgyel ba bzhin/ /dbang med par ni sdug ma gnyid kyis 'gyel bar gyur/ /de bzhin gzhan ni skar khung logs la sngas nas ni//nyal bar gyur pa'i lus kyi mchod sdong rnams 'khyog pa/ /rta babs la ni sha la b+hany+dza ka bzhin du/ /mdzes pa'i do shal rnam par 'phyang ba rnam par mdzes/ /de bzhin gzhan gyi zhal gyi pad+ma rnam rgyas shing / /'gram pa'i logs la nor bu'i rna lung gis dmugs pa//'dab ma brgya pa'i sdong bu'i phyed ni 'khyog pa la/ /gnas pa'i kar Ni Da bas bskyod bzhin g.yos par gyur/ /gzhan ni ji ltar rnam par zhugs bzhin gnyid log cing / /nu ma'i khur gyis mngon par dud pa'i lus po rnams/ /lag pa'i zhags pa gser gyi gdu bu can rnams kyis/ / phan tshun nye bar 'khyud nas rnam par gnas te mdzes pa'o/ /rnam par g.yo zhing bskyod pa'i gser gyi skud pa can/ /rna ba'i shog dril kun nas 'khrugs pa'i gdong gis ni/ /yongs su smra ldan pi wang chen po 'khyud nas ni/ /bud med kha cig grogs mo bzhin du gnyid log go/ /lang tsho ma gzhan lag pa'i dpung pa'i yul las ni//kun nas rnam 'phyang mdzes pa'i logs can pa Na wa/ /sgyeg bcas dga' ba'i mthar ni thang chad sdug pa bzhin/ /brla gnyis dag ni dbus su blangs nas nyal ba'o/ /rab tu yang dag 'khums gyur pad+ma dmar po'i mdzod/ /nyi ma nub par gyur tshe rdzing bu rnams ji ltar//rnam rgyas mig dang mdzes pa'i smin ma yod na yang / /gzhan rnams mig rnams btsums shing mdzes par ma gyur to/ /de bzhin gzhan ni mgo skyes lhod pa las 'khrugs shing / /rgyan dang dar rnams dpyi la rnam nyil de rnams ni/ /yan lag ma yi gzugs brnyan glang pos bcom pa bzhin//mgrin pa'i skud pa'i do shal rnam par bkram zhing nyal/ /brtan ldan lus ni yon tan rnams dang ldan na yang / /gzhan rnams kyang ni dbang med ngo tshas rnam spangs shing / /rnam par 'gyur zhing bskyod pa'i yan lag gya gyu dang / /dbugs ni rnam par rgyu zhing lus po gsal bar gnyid//gzhan gyi rgyan dang me tog phreng ba rnam brul zhing / /mdud pa'i gos rnams rnam par nyil gyur 'du shes med/ /btsums pa ma yin dkar po g.yo ba dang bral mig /srog song ro ltar nyal ba rnam par mdzes ma gyur/ /kha sbyar rnam par gdangs te lus po rab brkyang zhing //kha yi chu ni rab 'dzags gsang ba rnam rab gsal/ /gzhan ma dag ni chang gis 'khrul par gyur pa nyid/ /lus rgyas rnam par 'gyur bar gnyid log mdzes ma gyur/ /de ltar sems pa dang ni rigs kyi rjes 'gro'i gzugs/ /rnam pa sna tshogs rab myos skye bo de nyal ba//rlung gis kun nas bskyod gyur gser gyi pad+ma yi/ /rdzing bu dang ni mtshungs pa'i gzugs ni mdzes par gyur/ /de ltar rnam par 'gyur la brtan min spyod pa can/ /de ltar nyal ba'i lang tsho ldan ma de mthong nas/ /lus kyi yon tan ldan zhing smra ba'i yid 'ong yang / /mi skyong sras po des ni rnam par smad par gyur//mi gtsang rnam par 'gyur ba gson pa'i 'jig rten te/ /bud med rnams kyi rang gi ngo bo 'di 'dra ba/ /bgo ba rnams dang rgyan rnams kyis kyang slu ba ste/ /bud med rnams kyi yul la skyes pa chags par 'gro/ /gal te skyes pas bud med rnams kyi rang bzhin ni/ /rmi lam rnam par 'gyur ba bzhin du rnam dpyad na//nges par 'dir ni bag med 'phel ba ma yin la/ /'on kyang yon tan rtog pa bcom ste chags par 'gro/ /de ltar de yi go skabs rnam par rig nas ni/ /mtshan mor phyi ru 'gro 'dod yang dag skyes par gyur/ /'di yi sems ni kun nas rtog nas de nas ni/ / lha rnams dag gis khang pa'i sgo ni phye bar gyur/ /de nas lang tsho ldan ma nyal ba de rnams ni/ /smad cing de ni lding khang logs nas babs pa ste/ /mngon par babs nas de nas som nyi rnam bral bar/ /khang pa'i rim pa dang por phyi ru rnam par gshegs/ /de ni mgyogs 'gro bsrungs la go bar byas nas ni//skyen par 'dun pa la ni 'di skad ces smras so/ /bsngags ldan rta ni khyer shog myur ba dang ldan pas/ /bdud rtsi thob phyir 'di las di ring bdag skom mo/ /bdag gi snying la de ring tshim pa skyes gyur zhing / /nges pa yang ste ji ltar blo gros la zhugs pa//skye bo med pa la yang mgon dang ldan pa ste/ /nges par 'dod pa'i don ni mngon du phyogs par 'du/ /ngo tsha nyid dang yang dag 'dud pa spangs nas ni/ /long tsho ma rnams bdag gi gdong du ji bzhin nyal/ /sgo ni rang bzhin ji ltar rnam par dbye ba la/ /nges par bdag ni 'di nas di ring 'gro ba'i dus//mi dbang brtan pa'i don ni rnam par rig na yang / /jo bo bka' lung des ni de nas rab bzung nas/ /yid la pha rol po yis yang dag bskul ba bzhin/ /mgyogs 'gro khyer te 'ong ba la ni blo gros byas/ /de nas gdong gi gser gyi srab kyis gang ba ste/ / rgyab na yang ba'i stan g.yogs dag gis nye bar g.yogs/ /stobs dang sems pa mgyogs dang rjes 'gro nyer ldan pa/ /de yis rta mchog de la der ni nye bar 'ongs/ /snga ma'i rtsa ba rtsib logs gsum ga rab rgyas shing / /rgyab dang rna ba lus skyes spu ni thung zhing dul/ /rgyab kyi rtsib ma dag ni dud cing rnam rgyal la//mchu dang dpral ba brang dang dpyi ni rab rgyas pa'o/ /zhi zhing ka ma la dang mtshungs pa'i phyag gis kyang / /sku stong rnam par spangs des de la nyer 'khyud nas/ /rgyal mtshan sde la dmag dpon rab tu 'jug pa bzhin/ /mngar mo'i yi ge'i tshig gis zhal ta mdzad pa'o/ /g.yul du khyod la mngon par zhon nas sa skyong gis//dgra bo rnams ni lan grangs mang por nges par gtor/ /bdag kyang 'chi med go 'phang ji lta ba bzhin du/ /mgyogs 'gro'i gtso bo nye bar thob pa de ltar mdzod/ /yul thob bde ba la dang nor bsgrub pa la rung / /g.yul 'gyed pa na 'khor ni nges par rnyed bla ste/ /brgyud par lhung ba la ngang chos la brten par rung //skyes bu yi yang 'khor ni rnyed par dka' ba'o/ /'di nyid du yang gang zhig 'khor du gyur pa ni/ /sdig pa'i las la dang ni chos dang ldan la rung / /ji ltar bdag gi nang gi bdag nyid kyis rtogs pa/ /mi de rnams kyang de yi cha shas skal ba yi/ /de phyir chos dang ldan pa 'di ni yongs shes nas//bdag ni 'di las nges 'byung 'gro la phan pa'i phyir/ /mgyogs 'gro mchog skye shugs dang rnam par gnon pa yis/ /bdag phan la dang 'gro phan la ni 'bad par gyis/ /de ltar mdza' bshes bzhin du rjes su bslabs nas ni/ /mgyogs 'gro mchog la mi mchog 'gro 'dod de//dkar la dkar min 'gros kyi 'od zer lung ldan pa/ /nyi ma ston ka'i sprin la bzhin du yang dag 'dzegs/ /de nas 'khor gyi skye bos go bar byed pa'i skad/ /mtshan mor gtum pa dam pa'i rta des yongs bkag cing / /'gram pa'i sgra med 'tsher ba'i skad ni rab zhi bar/ / 'jigs pa'i sgra ni dor ba'i gom pa'i 'gros kyis gshegs/ /gser gyi gdu bu'i rgyan ni lag pa'i mkhrig ma la/ /ka ma la 'dras ka ma la rnams rnam byas nas/ /lus 'dud gnod sbyin rnams ni de nas 'di yis ni/ /tshim gyur lag pa'i rtse mos rmig pa rnams bzung ngo / /lci mo'i sgo gtan sgo glegs yang dag bcad pa gang //bde bar gnyis 'thung gis kyang phyed pa ma yin pa/ /mi skyong sras po gshegs tshe skad med grong khyer dang / /sgo khang de rnams rang nyid rnam par bye bar gyur/ /mngon par gdong phyogs yab dang sras po byis pa dang / /skye bo rjes su chags dang phun tshogs mchog dag ni//blo gros byas shing ltos pa med par dor nas ni/ /yab kyi grong nas de ni de nas rnam par gshegs/ /de nas de ni rnam rgyal 'dam skyes yangs pa'i spyan/ /grong khyer kun nas gzigs nas seng ge'i sgra bsgrags pa/ /skye dang 'chi ba dag gi pha rol ma mthong bar/ / grong khyer ser skya zhes byar rab tu mi 'jug go/ /de ltar de yi gsung ni nges par thos nas ni/ /nor gyi bdag po'i 'khor rnams dag ni dga' bar gyur/ /rab tu dga' ba'i yid can lha yi tshogs rnams ni/ /nan tan pha rol song ba de la bsngags pa byas/ /me yi lus can mtho ris gnas pa gzhan rnams ni//'di yis nges pa shin tu dka' ba rnams rig nas/ /sprin stug gseb nas zla ba'i 'od zer 'thon pa bzhin/ /mtshan mo'i mun pa'i lam ni rab tu gsal bar byas/ /nyi ma'i mgyogs 'gro lta bu'i mgyogs 'gro de/ /yid kyis sprul pa bzhin du rnam par rgyu bzhin du/ /shing rta 'dren pas gzi nyams skar ldan bar snang la//de ni shin tu mang po'i dpag tshad rnams su gshegs/ /sangs rgyas kyi spyod pa zhes bya ba'i snyan dngags chen po las/ phyi rol du mngon par byung ba'i le'u ste lnga pa'o// //de nas 'gro mig nyi ma ni//mngon par shes pa'i yud tsam na/ /ngan spong bu yi dka' thub gnas/ /mi mchog des ni gzigs par gyur/ /blo phab gnyid log ri dgas dang / /rang gnas gnas par bya gang zhig /gzigs nas ngal sos bzhin du dang / /don ni byas pa bzhin du gyur/ /de ni rgyags pa med don dang //dka' thub mchod pa'i don nyid dang / /rang gi rjes su srung ba la/ /rta yi rgyab nas babs par gyur/ /mngon par babs nas kyang reg cing / /dga' zhing mig gis 'khru ba bzhin/ /nges par 'khor zhes rta dang ni/ /'dun pa la ni smras pa'o/ /'di ni mkha' lding dper mgyogs la/ / mgyogs 'gro la ni rjes su 'ongs/ /'dis ni bdag gi stobs dang ni/ /zhi ba bdag la gus pa bstan/ /thams cad nas don gzhan yin kyang / /khyod kyi snying la bzung ba ste/ /gang gi jo bo dag la dga'/ /'di ni de 'dra dag la nyid/ /gus pa med la nus pa yod/ /nus pa med la gus pa ldan//gus pa ldan dang nus pa ste/ /khyod 'dra sa stengs rnyed par dka'/ /de phyir skal ba chen po'i las/ /khyod kyi 'dis ni bdag dga'o/ /gang zhig khyod kyis bsams pa 'di/ /'bras bu las kyang gzhan du phyogs/ /skye bo 'bras bu la gnas pa'i/ /mthun phyogs skye bo gang gis min//zlog la rang gi skye bo yang / /phal cher pha rol skye bor gyur/ /rigs kyi don du bu bzung zhing / /gsos pa'i don du pha bskyed la/ /sred pa'i bsam pas chags skye ste/ /byed pa med par rang nyid med/ /mang po brjod cing mdor bsdus nas/ /bdag gi dga' chen legs byas te/ / rta blangs nas ni phyir log dang / /bdag ni 'dod pa'i gnas rab thob/ /de skad smras nas phyag chen te/ /rjes su bsngags par byed 'dod pas/ /rgyan rnams kun nas btogs nas ni/ /gdung sems ldan pa 'di la byin/ /dbu rgyan dag nas nor bu gsal/ /sgron ma'i las la blangs nas ni/ /nyi ma 'bigs byed la bzhin des//tshig 'di smras bzhin bzhugs par gyur/ /'dun pa nor bu 'di long la/ /lan mang btud nas mi skyong ni/ /kun nas gdung ba zlog pa'i phyir/ /blo phebs par ni gsol bar bya/ /skye dang 'chi ba nyams don du/ /dka' thub nags tshal rab thob ste/ /mtho ris skom pas nges min zhing //brtse ba med min khros pa min/ /de phyir de ltar mngon byung ba/ /bdag la mya ngan 'os ma yin/ /yun rings 'dus par gyur nas kyang / /dus kyis 'gyur ba ma yin no/ /gang phyir nges par 'bral ba ste/ /de phyir thar phyir bdag gi blo/ /slar yang rang gi skye bo las/ / rnam par 'bral ba gang las min/ /mya ngan spong phyir nges 'byung ba/ /bdag la mya ngan 'os ma yin/ /mya ngan rgyud ni 'dod la chags/ /chags pa can la mya ngan bya/ /'di yang snga ma rnams la grags/ /kho bo cag la nges par gnas/ /de ltar ster byar gyur pa las/ /mya ngan 'os min lam gyis 'gro//skyes bu rnams la phyin log tu/ /nor gyis ster byar gyur pa ste/ /sa la chos kyi bdag po yang / /rnyed dka' yang ni ma yin no/ /gang yang 'di ni dus min par/ /nags su song ba yin zhe na/ /srog kyang g.yo bar gyur pa na/ /chos la dus yod ma yin no/ /de phyir da lta nyid du bdag//dge ba bsag ces nges pa ste/ /'chi ba'i dgra ni gnas pa na/ /gson pa la ni blo gtad cing / /zhi ba khyod kyis de la sogs/ /sa 'dzin bdag la zhu bya ste/ /ji ltar bdag ni mi dran pa/ /de ltar nyid du 'bad pa gyis/ /gzhan yang bdag la yon tan med/ /khyod kyis mi bdag la smra bya//yon tan med las brtse ba 'dor/ /brtse ba dor las mya ngan med/ /de ltar tshig 'di thos gyur nas/ /'dun pa gdung bas rnam 'khrugs shing / /mchi mas 'dud pa'i tshig nyid kyis/ /thal mo sbyar te lan gsol ba/ /jo bo khyod kyis dgongs pa ni/ /gnyen la ngal ba ster ba 'dis//chu bo'i 'gram na gnyis 'thung bzhin/ /bdag gi sems 'di sgyur ba'o/ /khyod kyis nges pa 'di lta bus/ /su yis mchi ma 'byung ba med/ /lcags las gyur pa'i snying la'ang ste/ /brtse bas 'khrug la smos ci dgos/ /gzhal med khang gi mal 'os pa'i/ /shin tu gzhon nu 'di gang na/ / ku sha'i myu gu rno ba can/ /dka' thub nags kyi sa gang na/ /khyod kyi 'bad pa thos nas kyang / /rta gang bdag gis blangs pa 'di/ /mgon po de ni stobs kyis ni/ /lha yis byed du bcug pa 'dra/ /khyed kyi nan tan nges pa 'di/ /rang dbang shes na gang gi phyir/ /nye bar len te mgyogs 'gro'i rta//ser skya'i gzhi yi mya ngan gnas/ /med pa po yis dam chos bzhin/ /rgyal po brtse ba bgres pa dang / /sras po sdug go 'dor ba ni/ /phyag chen de ni 'os ma yin/ /dam pa'i bya ba byed bcom yin/ /yang dag bskyed pas yongs su ni/ /thang chad gnyis pa'i ma de dang //lha mo brjod par 'os ma yin/ /ma ning gis ni dpal thob bzhin/ /sras po byis pa yon tan ldan/ /rigs btsun bdag po'i brtul zhugs ma/ /lha mo 'dor bar 'os ma yin/ /bsngags 'os sras po grags pa 'dzin/ /snyan grags chos ni 'dzin pa'i mchog/ /zhen pa ldan pas grogs mchog bzhin//byis pa 'dor bar 'os ma yin/ /ci ste gnyen dang rgyal srid dag/ /'dor ba nyid du blo gros mdzad/ /bdag gi 'gros ni khyod zhabs la/ /khyab bdag bdag 'dor 'os ma yin/ /ma g+hu'i bu ni bshes bzang bzhin/ /khyod ni dgon par dor nas su/ /me yis tshig pa'i sems kyis ni//grong du 'gro bar nus pa med/ /khyod 'dir grong du 'gro ba can/ /rgyal pos bdag la ci zhig gsung / /khyed kyi btsun mo'i 'khor du 'am/ /'os pa mi thong na ci zhig smra/ /gang yang yon tan med pa yang / /mi bdag la smos gsung ba yang / /skyon med thub pa'i bzhin khyod kyi//ma gyur pa de ci zhig smra/ /ngo tsha dang bcas sems kyis ni/ /lce ni thogs par gyur pa yi/ /bdag ni gal te yang smra ba/ /de la dad par 'os pa su/ /gang zhig zla ba'i 'od rno bar/ /smra bar dad par 'dzin pa'am/ /khyed kyis skyon shes des skyon ni/ /smra ba dad par 'dzin pa'am//rtag tu rjes su brtse bcas dang / /rtag par snying rje shes pa yi/ brtse ba spong ba tshul min te/ /phyir log bdag la bka' drin mdzod/ /de ltar mya ngan gyis non pa'i/ /'dun pa'i tshig 'di gsan gyur nas/ /rang gnas mchog tu brtan pa yis/ /smra ba'i mchog gis bka' stsal to//'dun pa bdag dang bral ba la/ /kun nas gdung ba 'di thong cig /lus can 'gro ba tha dad la/ /dgongs pa sna tshogs nges pa yin/ /gang yang brtse las rang gi skye/ /bdag gis rang ni mi 'dor te/ /'chi bas phan tshun dbang med par/ /bdag cag rnams ni 'dor bar 'gyur//sred pa chen po'i sdug bsngal gyi/ /mngal gang gis ni bdag bzung ste/ /'bras med 'bad pa med de yis/ /bdag su bdag gi de su yin/ /ji ltar sgong skyes gnas shing la/ /yang dag 'dus nas rnam par bral/ /de ltar 'byung po 'dus pa ni/ / nges par 'bral ba'i mtha' yin no/ /ji ltar sprin rnams 'dus nas ni/ /slar yang rnam par 'byed pa'o/ /de ltar 'du dang 'bral ba ni/ /bdag dang srog chags rnams kyi lugs/ /gang gi phyir na 'jig rten 'di/ /slus nas rnam par 'bral ba de/ /de phyir rmi lam 'dus gyur la/ / bdag gi ba nyid bzod ma yin/ /shing rnams 'dab ma dmar po dang / /lhan cig skyes te rnam par 'bral/ /gzhan dang gzhan gyi 'bral ba ni/ /'gyur ba ma yin smos ci dgos/ /de phyir de ltar gyur na ni/ /zhi ba gdung ba ma byed song / /gal te yang ni brtse ba 'bebs/ /song nas kyang ni slar yang shog /kho bo cag la ltos byas pa'i/ /ser skya'i gzhi na skye bo la/ /der song brtse ba thong cig dang / /'di yi nges la nyon cig smos/ /rga dang 'chi ba zad byas nas/ /yang na myur du 'ong ba'i gtam/ /rtsom pa nyams shing don ma byas/ /yang na nyams par 'gyur ba smros/ / de ltar 'di yi tshig thos nas/ /bsngags ldan mgyogs 'gro'i mchog gis ni/ /lce yis zhabs la rab ldags te/ /mchi ma dron mo phyung bar gyur/ /dra ba dang ni bkra shis rtags/ /'khor lo dbus ldan phyag gis ni/ /gzhon nus de la reg gyur cing / /na tshod bzhin du rnam par smras/ / bsngags ldan mchi ma ma 'don cing / /dam pa'i rta nyid 'di bstan to/ /sron mdzod khyod kyi ngal ba 'dis/ /myur du 'bras bu bcas bar 'gyur/ /de nas ral gri rnon po nor bu'i yu ba can/ /gser gyi phra ni sna tshogs dang ldan 'dun pa yi/ /lag na yang dag gnas pa brtan pa des bsnams nas//khung bu dag nas sbrul bzhin zhugs nas rab tu drungs/ /ut+pa la yi 'dab ma sngon po de drangs nas/ /sna tshogs dbu rgyan dbu skrar bcas pa rab bcad cing / /rdzing bu dag na ngang pa bzhin du rnam bkram pa/ /'od zer dang ldan bar snang dag la de gtor ro/ / mchod pa mngon par 'dod phyir rnam mang bkur sti'i phyir/ /lha ni gnas pas rab tu bkram pa de bzung ste/ /ji lta ba bzhin de ni lha ni lha tshogs rnams/ /lha yi khyad par 'phags pa rnams kyis mchod pa byas/ /rgyan ni bud med ldan pa rnam par spangs nas kyang / /dbu las dpal ni rnam par rgyang ring byas nas ni//nags su gser gyi ngang pa'i mtshan ma gos gzigs nas/ /brtan pa des ni gos dag mngon par 'dod par gyur/ /de nas lha ni gnas par ri dgas sngon po'i lus/ /dgongs pa rnam dag 'di yi dgongs pa rnams rig nas/ /kha bsgyur ngur smrig gos can nye logs mngon par 'ongs//de la shAkya'i rgyal po skyes kyis mngon par smras/ /khyod kyi dge yi ngur smrig drang srong rgyal mtshan dang / /'tshe ba byed pa'i gzhu 'di rigs pa ma yin te/ /de phyir zhi ba gal te 'dir ni chags med na/ /bdag la rab tu byin la 'di dang 'di snoms mdzod/ /rngon pas smras pa 'dod sbyin 'dod pa snying po las//'di yis blo ni phab nas ri dgas rnams gsod do/ /brgya byin mtshungs pa gang de 'dis ni don 'gyur na/ /e ma rab tu bzhes la dkar po de gsol mdzod/ /de nas de ni mchog tu rab tu dga' ba yis/ /nags su byung ba'i na bza' blangs shing gos dor la/ / rngon pa nyid kyang lha yi lus nyid rnam bzung ste/ /dkar po de nyid blangs nas lha ni gshegs par gyur/ /de nas gzhon nu dang ni rta mchog skyong ba des/ /de ltar gshegs pa de la ya mtshan skyes gyur te/ /nags nas byung ba'i na bza' nyid dang de la ni/ /slar yang ri mor bya ba mang po skyen par mdzad//gdong ni mchi ma dang bcas 'dun pa rnams bzlog nas/ /bdag nyid chen po brtan dang grags pa 'chang ba ste/ /mtshams kyi sprin gyis g.yogs pa'i skar ma'i rgyal po bzhin/ /ngur smrig gyon zhing gdung sems gang yin de nas gshegs/ /de nas de ltar jo bo rgyal srid mi bzhed par//dka' thub nags su gshegs pa mdog nyams snang ba na/ /mgyogs 'gro 'chang de phyag rgyas gyen du bskyod byas nas/ /shin tu rnam par ngu zhing sa la 'gyel gyur to/ /rnam par bltas nas slar yang sgra bcas par ngu zhing / /bsngags ldan rta la lag pa dag gis nyer 'khyud nas//de nas kho chad yang dang yang du zlos bzhin du/ /lus kyis song bar gyur kyang sems kyis ma yin no/ /la lar rab tu sems zhing la lar rnam par du/ /la lar sa la rab tu 'brad cing la lar 'gyel/ /de nas 'gro bzhin gus pa'i dbang gis sdug bsngal zhing //dbang med lam na bya ba mang po byas pa'o/ /sangs rgyas kyi spyod pa zhes bya ba'i snyan dngags chen po las/ bsngags ldan phyir la bzlog pa'i le'u ste drug pa'o// //de nas 'dun pa ngu zhing gdong ni mchi ma can/ /bzlog nas nags su 'dun pa'i dka' thub chags med pa//don kun grub pa'i lus kyis mngon par zil mnan nas/ /dka' thub gnas de grub pa bzhin du rab tu thob/ /de nas ri dgas rgyal po'i 'gros can rgyal po'i sras po de/ /ri dgas gnas der ri dgas bzhin du rab zhugs pa/ /phun tshogs rnams dang bral yang lus kyi phun tshogs kyis//dka' thub gnas ldan kun gyi mig dag phrogs par gyur/ /khur ldan rnams bzhin mgo bo rnams ni phyed dud pas/ /lag na gnya' shing bcas par 'gro gyur ya mtshan la/ /de bzhin 'khor los sgyur ba chung ma dang bcas pa/ /dbang po dang mtshungs de mthong song bar ma gyur to//sbyin sreg bud shing phyir ni bram ze rnams phyin nas/ /me tog lo 'dab rgyas pa'i lag pa gtsang ma rnams/ /dka' thub gtso bo rnams ni blo rnams byas na yang / /gshegs pa mthong ste klog glar song bar ma gyur to/ /chu gter sngon po bzhin du mthong nas rma bya rnams//dga' zhing gyen du dud cing skad dag 'don gyur la/ /rgya skyegs ri dgas spyod ldan rnams dang ri dgas rnams/ /'bru rnams bor nas mngon par gdong phyogs gnas par gyur/ /'od zer ldan pa shar ba lta bur 'bar ba yis/ /bu ram shing pa'i rigs kyi sgron ma de mthong nas/ / sbyin sreg 'jo rnams bzhos pa yin na yang / /rab tu dga' ba skyes te rab tu 'jo gyur to/ /'di ni nor sbyin rnams kyi brgyad pa yin nam ci/ /tha skar dag gi nang nas gcig ni 'phos sam zhes/ /de mthong ba la ya mtshan skyes par gyur pa yi/ /thub pa rnams kyi tshig der mthon por sgrogs bar gyur//lha yi khyu mchog gnyis pa'i lus po lta bu dang / /'jig rten rgyu dang mi rgyu'i snying po lta bu dang / /gang 'dod pa yis nyi ma mngon par babs 'dra ba/ /des ni nags tshal mtha' dag rab tu snang bar mdzod/ /de nas gdung gnas pa de rnams kyi ji lta bzhin//nye bar snyan gsan phab cing mngon par mchod gyur la/ /de ni chu bcas chu 'dzin lta bu'i dbyangs kyis ni/ /chos 'dzin rnams la slar yang rab tu mchod par gyur/ /de nas rnam par thar bzhed brtan pa de yis ni/ /dka' thub sna tshogs rnams la nges par rnam gzigs shing / /mtho ris mngon 'dod bsod nams byas pa'i skye bo yis//khyab pa'i dka' thub gnas der rjes su dpyad par gyur/ /dka' thub nor can rnams kyi dka' thub nags tshal der/ /dka' thub rnam par 'gyur ba rnams ni nges gnas nas/ /rjes su gshegs pa'i dka' thub ldan pa kha cig la/ /zhi bas de nyid rnam par shes bzhed 'di gsungs so//gang phyir chos kyi cho ga 'di ni mi shes pa/ /bdag gis dka' thub gnas mthong de ring snga ma'o/ /de phyir khyod kyis bdag la smra bar 'os min te/ /nges pa gang zhig gang la rab tu 'jug pa'o/ /de nas dka' thub rnam par rgyu ba'i gnyis skyes des//shAkya'i khyu mchog khyu mchog rnam par gnon pa po/ /de la rim gyis dka' thub khyad par rnams dang ni/ /dka' thub 'bras bu dang bcas gtam ngag byas pa'o/ /grong byung bza' ba ma yin chu la rab skyes pa'i/ /'dab ma rnams dang chu dang 'bras bu rtsa ba nyid/ / thub pa rnams kyi spyod pa 'di ni lung ji ltar/ /dka' thub rnams kyi rnam rtog tha dad de de'o/ /kha cig ri dgas bzhin du rtswa rnams la spyod la/ /gzhan rnams bor ba yis ni mkha' la rgyu ba'i bya ltar 'tsho/ /kha cig lag 'gro rnams dang lhan cig 'tsho ba ste/ /grog mkhar gyur pa rnams ni nags na rlung gis so//rdo yis rab 'bad bsgrub pa'i spyod pa gzhan rnams te/ /kha cig rang gi so yis nye bar blangs shing za/ /de bzhin gzhan ni gzhan gyi don du bcos byas nas/ /gal te lhag ma yod na bya ba byed pa'o/ /chu yis gsher ba'i ral pa'i tshogs can kha cig ni//gsang sngags sngon 'gro lan gnyis me la sbyin sreg cing / /kha cig nya dang mnyam par chu la rnams zhugs nas/ /rus sbal bzhin du lus rnams rab tu bskum pa'o/ /de ltar dus su bsags pa'i dka' thub nags tshogs kyi/ /mchog gis lhar 'gro gzhan gyis mi yi 'jig rten te//sdug bsngal lam gyis bde ba nye bar thob phyir dang / /chos kyi rtsa ba bde ba nyid du gsungs phyir ro/ /de skad ces sogs rkang gnyis dbang po'i sras po yis/ /dka' thub nor dang ldan pa de yi tshig gsan nas/ /de nyid gzigs pa min yang ngoms par ma gyur la/ / bdag tu song ba 'di ni dal bus gsungs par gyur/ /sdug bsngal bdag nyid dka' thub rnam pa du ma ste/ /dka' thub bdag gi 'bras bu mtho ris gtso bo'o/ /'jig rten thams cad yongs su 'gyur ba dang ldan la/ /nyung ngu la ngal 'di ni gdung gnas rnams kyi'o/ /phangs pa rnams dang gnyen dang yul rnams bor nas ni//gang zhig mtho ris phyir ni rnam par spyod byed la/ /de rnams rnam par bral te nges par 'gro 'dod la/ /slar yang shin tu 'ching ba chen po nyid yin no/ /lus kyi ngal dub gdung ba'i bya ba rnams kyis ni/ /'dod pa'i rgyu las rab tu 'jug par 'dod pa'o//'khor ba'i rgya mtsho'i skyon rnams yongs su mi rtog par/ /sdug bsngal gyis de sdug bsngal kho na rjes su tshol/ /'chi bas skye dgu rnams kyis rtag par 'jigs pa ste/ /'bad pa yis ni slar yang rab tu 'jug par 'dod/ /rab tu zhugs par gyur na nges par 'chi ba ste/ /'di nyid du ni gang las 'jigs pa rnams lhung ngo //'di yi don du gcig rnams ngal bar rab 'jug cing / /gzhan rnams mtho ris don du ngal ba 'thob pa ste/ /bde ba'i don du sred pa'i bkren pa don ma byas/ /gson pa'i 'jig rten nges par don med nyid du lhung / /gang zhig dman pa dor nas khyad 'phags 'gro ba can//'bad pa 'di ni nges par smad pa ma yin la/ /shes ldan rnams dang mnyam pa'i yongs su gdung ba yis/ /bya ba ma yin de 'dir slar yang byed pa'o/ /lus kyi gtser bas gal te 'dir ni chos yin na/ /lus kyi bde ba chos ma yin par 'gyur ba ste/ /pha rol du ni bde ba chos kyis kyang 'thob la//de phyir 'di yis chos kyi chos min 'bras bu'o/ /gang gi phyir na bsams pa'i dbang gis lus yin la/ /rab tu 'jug pa dang ni zlog pa dag kyang ngo / /de phyir sems kyi dul ba nyid ni rig pa ste/ /sems las gzhan pa'i lus ni shing dang mnyas ba'o/ /bza' ba gtsang bas gal te bsod nams 'dod na ni//de phyir ri dgas rnams kyang bsod nams yod pa ste/ /phyi rol skyes bu gang dag rnams kyang 'bras bu las/ /bskal pa'i nyes pas don rnams gzhan du kha bltas so/ /bsod nams phyir ni sdug bsngal mngon par mtshams sbyor na/ /'o na sdug bsngal mngon par mtshams sbyor tshad ma min//de ltar gang dag las ni rnam par dag pa'i phyir/ /stegs zhes rab tu zhugs te chu la reg par byed/ /de yang de yi snying la tshim pa tsam yin te/ /chu yis sdig pa dag par byed pa ma yin phyir/ /yon tan ldan bas rig pa'i chu ni gang dang gang / /de dang de ni sa la gal te stegs 'dod na//chu yang the tshom med par chu nyid kho na ste/ /de phyir yon tan ldan rnams kho na stegs su go/ /de ltar rigs pa mang po ldan pa de dang de/ /smras te rnam par mdzes pa'i nyi ma nub bar gyur/ /de nas sbyin sreg du bas kha dog 'gyur ba'i shing / /dka' thub rab tu zhi ba'i khrus sar rnam par zhugs//mngon par bton pa'i rab tu 'bar ba'i me yis thal ba ni/ /dbang bskur byas pa'i drang srong skye bos khyab pa ste/ /bzlas bya'i dbyangs kyis kun nas skad sgrogs lha yi tshogs/ /chos kyi lam gyi las kyi mtha' bzhin rab tu zhugs pa'o/ /de ni mtshan mo thang 'ga' mtshan mor byed 'od kyis//dka' thub rnams la yongs su rtog cing zhugs gyur la/ /dka' thub thams cad yongs su brtags shing mkhyen gyur na/ /dka' thub zhing gi thang de las ni gshegs par gyur/ /de'i gzugs bdag nyid chen por sod ba'i yid rnams kyis/ /dka' thub gnas ldan rnams ni de nas de rjes gshegs//'phags min sdig pa rnams kyis zil non yul las ni/ /drang srong chen po rnams ni chos bzhin pha rol gshegs/ /de nas ral pa shing shun zur phud kyis rol ba'i/ /dka' thub nor dang ldan ba de rnams des gzigs shing / /de dag rnams kyis dka' thub rnams la rjes brten te//dpal dang ldan la dge ba'i shing gi rtsa bar gnas/ /de nas dka' thub gnas ldan rnams ni nyer 'ongs nas/ /mi mchog de la yongs su bskor nas gnas gyur la/ /de dag rnams kyi rgyan pos mchod ma sngon btang ste/ /dus kyi zhi bas tshig 'di rab tu 'di smras so/ /khyod kyis byon tshe gdung gnas gang ba bzhin gyur la//rab tu gshegs tshe stong pa bzhin du rab tu thob/ /de phyir brtse ba 'di ni 'bor bar 'os min te/ /'tsho bar 'dod pa'i phangs pa'i tshe yis lus bzhin no/ /lha yi drang srong tshangs pa'i drang srong rgyal po yis/ /drang srong gis bsnyen bsod nams nye bar gang ldan ri//dka' thub nor ldan rnams kyi dka' thub de rnams ni/ /gang gi nye logs dag nas mang por 'gyur ba'o/ /de bzhin kun nas bsod nams dag gi stegs gyur la/ /nam mkha'i 'og gi them skas dag tu gyur pa ste/ /lha yi drang srong rnams dang drang srong chen po ni/ /chos kyi bdag nyid bdag nyid chen po rnams kyis bsnyen//'di nas slar yang khyad 'phags chos kyi ched las ni/ /byang gi phyogs nyid kho nar bsnyen par nus pa ste/ /blo dang ldan pas gom pa gcig tu gyur pa yang / /lho yi phyogs su 'gro bar nus pa ma yin no/ /dka' thub nags 'dir ji ste bya ba ngan pa 'am/ /bsre ma'i chos sam ltung ba min nam mi gtsang bar//khyed kyis mthong ste gang gis khyed 'di bzhugs 'dod min/ /de ni gsung la re zhig sred par bzhugs mdzod cig /dka' thub gter dang rab tu mtshungs par gyur pa la/ /'di rnams kyis ni dka' thub grogs su 'dod pa ste/ /dbang po dang mnyam khyed dang lhan cig gnas pa ni//phur bu yi yang mngon par mtho ba 'dren pa yin/ /dka' thub ldan pa'i gtso bos de skad ces smras te/ /srid pa rab tu nyams phyir dam bca' byas pa yis/ /mkhas pa'i gtso bo des ni dka' thub ldan dbus su/ /nang du song ba'i rang bzhin smras par gyur pa'o/ /'gron la sdug cing rang gi skye bo dang mtshungs pa'i//drang po'i bdag nyid chos 'dzin thub pa rnams kyis ni/ /bdag la rnam pa de ltar bsam pa skyes pa yis/ /bdag gi dga' ba mchog dang bkur sti skyes par gyur/ /mdor bsdus gyur na brtse zhing bsnyen pa 'di rnams dag /snying la song ba'i ngag rnams ngag gis khrus byas bzhin//kun nas 'dzin med chos can bdag gi dga' ba ni/ /de ring slar yang cung zhig g.yos par gyur pa nyid/ /de ltar rab tu zhugs pa'i khyed cag skyabs 'os rnams/ /shin tu phyogs su lhung ba yang dag bstan pa rnams/ /bor nas 'gro zhes kho bo yi yang sdug bsngal te//ji ltar gnyen 'dun rnams ni spangs pa de ltar ro/ /khyed cag rnams kyi chos 'di mtho ris ched du ste/ /bdag gi mngon par mtho bar yang srid ma yin phyir/ /nags der gang gi bdag ni sdod 'dod ma yin te/ /chos las ldog pa rab tu 'jug pa tha dad phyir/ / de phyir nags 'di dag na gang gis yongs 'gro ba/ /bdag gi ma dga' ma yin pha rol spyod log min/ /sngon gyi dus na rjes mthun chos la gnas pa yi/ /drang srong chen po thams cad rnams dang mtshungs par gyur/ /de nas don dang ldan la bde zhing yid du 'ong / /legs mthun mdangs dang ldan la snying po dang ldan pa//gzhon nu'i tshig ni dka' thub ldan pa de rnams kyis/ /thos nas khyad 'phags dang ldan bkur sti mang pos gshegs/ /de nas gnyis skyes thal ba la nyal kha cig ni/ /lus ring gtsug tor dang ldan shing shun gos gyon zhing / /mig ni cung zad dmar ser sna ni phra la rings//lag gcig spyi blugs ldan pas tshig 'di smras pa'o/ /khyod kyis nges pa nyid du rgya chen blo ldan zhing / /gzhon nu khyed kyi skye ba la ni nyes pa gzigs/ /mtho ris dang ni nyes pa yang dag rnam spyod phyir/ /thar pa gang gi blo gros yod pa de yin no/ /mchod sbyin dka' thub nges ba de dang de rnams kyis//chags pa dang ldan mtho ris la ni 'gro bar 'dod/ /dgra bo bzhin du chags dang lhan cig g.yul sprad nas/ /sems pa rang ldan thar pa ru ni 'gro bar 'dod/ /de phyir gal te khyod kyi blo gros 'di nges na/ /skyen par khyed nyid 'bigs byed phug par gshegs mdzod cig//gang zhig mthar thug nges par legs pa thob ba'i mig/ /thub pa 'di ni de ru mtshan mo min par gnas/ /de phyir khyod kyis de nyid lam ni thob 'gyur la/ /sred par gyur na yang dag rab tu thob par 'gyur/ /bdag gi mthong ba ji ltar blo gros de de ltar/ /de nyid kyi yang blo gros bor nas 'gro bar 'gyur//gsal zhing mtho ba'i shangs dang rnam rgyas yangs pa'i spyan/ /zangs mdog ya mchu ma mchu rno dkar mche ba can/ /ljags ni dmar zhing phra ba'i zhal dang ldan pa 'di/ /shes bya'i rgya mtsho mtha' dag la ni 'gro ba nyid/ /khyod kyi zab pa dang ni gting dpag dka' gang dang //gang zhig sgron ma nyid dang mtshan rnams gang yin pas/ /sngon gyi bskal par drang srong gis kyang ma mthong ba'i/ /slob dpon nyid de sa la mngon par dga' nas gshegs/ /dka' thub ldan pa de rnams kyis kyang de la yang / /cho ga bzhin rjes byas nas dka' thub nags der gshegs//sangs rgyas kyi spyod pa zhes bya ba'i snyan dngags chen po las/ /dka' thub kyi nags su zhugs pa'i le'u ste bdun pa'o// //de nas mgyogs 'gro spyod de yid mi bde gyur te/ /de ltar jo bo nags su nga med par gshegs la/ /lam du mya ngan med pa 'bad pa byas gyur te//de lta na yang de yi mchi ma khogs ma gyur/ /gang la jo bo'i bka' la mtshan mo gcig gis ni/ /mgyogs 'gro de dang gshegs par gyur pa'i lam/ /lam de nyid la 'gro zhag dag ni brgyad rnams kyis/ /jo bo nyid dang bral ba de yis sems shing 'ongs/ /'thon ba med pas rgyags pa med par gyur pa yis//bsngags ldan mgyogs 'gro nyid kyang mdangs med rgyu ba ste/ /de ltar rgyan de rnams kyis brgyan par byas na yang / /de yis dor bas dpal ni song ba bzhin du gyur/ /phyir log nas kyang dka' thub nags su mngon phyogs te/ /snying rje bar ni yang dang yang du drag tu 'tsher/ / lam na ltogs pa ldan pa yin yang 'bru dang chu/ /ji ltar sngon bzhin mngon par ma dga' ma bslangs so/ /de nas 'gro la phan pa'i bdag nyid bdag nyid chen po des/ /ser skya zhes bya'i grong khyer rnam par dman pa la/ /nyin mor byed pas bor ba'i nam mkha' 'bras med bzhin/ /rim gyis de gnyis stong pa bzhin du nye bar song //pad+ma dkar po dang bcas chu yis mdzes gyur zhing / /me tog 'dzin pa'i shing rnams kyis ni brgyan pa yang / /grong khyer pa rnams rab tu dga' ba song gyur te/ /de yi nye ba'i nags de nags ltar mdzes ma gyur/ /de ltar lta byed mchi mas bcom pa'i mi rnams ni//rab tu 'bar min zhan pa'i yid kyis phyogs su skor/ /'ong du mi ster ba bzhin gnyis po de grong du/ /dal bus log pa'i khrus bzhin mngon par song bar gyur/ /shAkya'i rigs kyi drang srong dang bral 'ongs pa yis/ /lus zags 'gros dang ldan pa de gnyis mthong nas kyang / / sngon tshe shing rta bcu pa'i shing rta 'ongs pa bzhin/ /grong khyer skye bo rnams ni lam du mchi ma phyung / /de nas mya ngan nye bar ldan ba'i skye bo dag /mchi ma byung ba rnams kyis 'dun pa la smras pa/ /grong khyer yul 'khor dga' mdzad rgyal bo'i sras po de/ /khyed kyis gang du bor zhes rgyab nas rjes su 'gro//de nas gus ldan skye bo de la des smras pa/ /mi dbang sras po bdag gis yongs su bor ba min/ /ngu bzhin skye bo med pa'i nags su kho bo dang / /khyim bdag cha lugs dag kyang de yis rnam par spangs/ /de yi tshig ni skye bo de rnams kyis thos nas/ /nges par shin tu dka' ba nyid ces nges par song gyur la//'gyel zhing mig skyes chu ni rnam par 'thor ba ste/ /yid la smod cing bdag nyid kyis ni 'bras bu long / /de nas smras pa gnyis skyes rgyal po'i shugs mnga' ste/ /gang du gshegs pa'i nags der di ring zhugs par bgyi/ /lus can dbang po ma tshang rnams kyi ji lta bar//de dag bral bas bdag cag 'tshe bar 'dod pa med/ /de dang bral ba'i grong khyer 'di ni nags yin la/ /de dang yang dag ldan pa'i nags de grong khyer yin/ /lha ni lha min gsod tshe brgya byin gyis ji ltar/ /de dag bral bas bdag gi grong khyer mdzes ma gyur/ /de nas slar yang gzhon nu phyir la log ces te//yan lag ma rnams skar khung phreng rnams rab thob ste/ /mgyogs 'gro'i rgyab ni rnam par dben ba mthong gyur nas/ /slar yang skar khung rnams ni rnam par bkag nas ngu / /brtul zhugs dang ni mya ngan dag gis yid dub cing / /brtul zhugs la rab zhugs pas sras po nyer thob phyir//bzlas byas shing gi lha yi khang par mi bdag gis/ /bsam pa ji ltar bya ba de dang de rnams byas/ /de nas mig dag mchi mas rab tu gang ba des/ /mgyogs 'gro blangs nas mgyogs 'gro rjes su 'gro ba ste/ /g.yul 'gyed pa na dgra bos jo bo khyer ba ltar/ /mya ngan dag gis mngon bcom mi skyong khang par zhugs//mi dbang rgyal po'i khab tu rnam par zhugs pa na/ /rnam par blta zhing mig dag mchi ma 'bab pa yis/ /skye bo la ni sdug bsngal rab tu rtogs 'jug bzhin/ /bsngags ldan mgyogs 'gro gsal ba'i dbyangs kyis ngus par gyur/ /de nas khang pa'i dbus na spyod pa'i bya rnams dang //nye bar brtags pa'i mgyogs 'gro dam par byed rnams kyis/ /mi dbang sras po log par gshegs la the tshom ste/ /mgyogs 'gro de yi dbyangs la so sor ram 'degs byas/ /ji ltar bsngags ldan mgyogs 'gro 'tsher bar byed pa ste/ /nges par gzhon nu khab tu rnam par zhugs snyam ste//dga' ba phul du byung bas bslus pa'i skye bo rnams/ /skye bo'i bdag po'i btsun mo'i 'khor gyi nye logs song / /shin tu dga' ba las ni mya ngan gyis brgyal rnams/ /gzhon nu blta ba la ni g.yo ba'i spyan ma rnams/ /ston ka'i chu gter sprin las glog ni g.yo ba bzhin/ /bud med rnams ni sred pas khyim nas phyir la 'thon//lan bu rnam par 'phyang zhing dar gos dri ma can/ /mig rtsi dang bral mchi mas mig bcom gdong rnams kyis/ /mtshan mo zad tshe skya rengs kyis mkhar skar ma bzhin/ /byi dor dang bral bud med rid rnams mdzes ma gyur/ /rkang pa rkang gdub dang bral zangs mdog ma chags rnams//gdong pa rna lung dang bral mgrin pa drang po rnams/ /rang bzhin gyis rgyas brla ni 'og phab dang bral rnams/ /nu ma do shal dang bral stod g.yogs tshad rnams so/ /rten dang bral ba'i 'dun pa dang ni mgyogs 'gro nyid/ /mig ni mchi ma dang ldan de rnams kyis mthong nas/ /nags mthar khyu mchog dang bral ba glang rnams bzhin du//sems khral gdong ldan yan lag mchog ma rnams ni ngus/ /de nas rgyal po'i btsun mo mchi ma dang bcas par/ /be'u nyams pa'i ma he mo ltar mnyes gshin ma/ /gser gyi chu shing lo 'dab rnam par g.yo ba bzhin/ /gau ta ma mas ni lag pa bzung nas 'gyel/ / dpung pa lag pa mnyam zhing gzi brjid bcom pa yis/ /bud med gzhan rnams yid mi bde bas sems med bzhin/ /mchi ma ma bton 'o dod 'bod min dbugs med par/ /g.yo bral ri mo bris pa bzhin du gnas par gyur/ /brtan min bdag po'i mya ngan gyis brgyal bud med gzhan//rnam par lta byed nas 'bab rgyun gyi gdong rnams kyis/ /sa 'dzin ri bo nas 'bab rgyun gyi rdo ba ltar/ /tsan+dan rab bskus nu ma rnams la rnam par 'thor/ /de rnams kyis ni mig chus btab pa'i gdon rnams kyis/ /rgyal po'i khab de de tshe mdzes par gyur pa ni/ / chu gsar dus na chu gter char gyis btab pa yi/ /chu 'dzin pad+ma rnams kyis rdzing bu ji ltar ro/ /rgyas shing bar med legs par zlum pa'i sor mo can/ /rgyan bral rtsa mi mngon pa'i yan lag mchog ma rnams/ /rlung gis g.yos pa'i ljon shing rang gi 'dab mas ltar/ /pad+ma lta bu'i lag pa rnams kyis brang rnams brdungs//nags rlung gis sgul pad+ma lta bur g.yos pa yis/ /ngang pa rnams kyi 'khrigs pa rnams kyis chu klung ltar/ /brang brdungs rab bskyod 'brel mtho'i nu ma rnams kyis ni/ /de lta na yang mi mo de rnams mdzes par gyur/ /ji ltar brang rnams la ni lag pas zug byas pa//de ltar lag pa rnams la brang ni zug byed cing / /le lo can ma brtse med stobs med ma yis der/ /lag pa'i rtse dang brang rnams phan tshun zug byas so/ /de nas khros pas rab tu dmar ba'i spyan ldan ma/ /sems khral gyis sbrel mgrin pa kha zhing ldab ldib dang / /shugs ring phyung bas 'o ma 'dzin g.yo brtan pa yi//mya ngan mchi ma 'dzin pa'i grags 'dzin mas smras pa/ /mtshan mo gnyid log dbang med bdag ni rnam spangs nas/ /'dun ba 'dod pa'i shing rta de ni gang du thal/ /gsum po mnyam du song la khyod dang bsngags ldan ni/ /nye bar 'ongs pas kho mo'i yid ni g.yos par gyur/ /kho mo 'phags min brtse min bshes ma yin pa'i las//phul byung de 'dir byas nas da ni ci la ngu / /mchi ma ma 'don khyod kyi sems ni sim par 'gyur/ /khyod kyi mchi ma dang ni las de gtam ma yin/ /dga' dang dbang du song dang phan dang legs pa dang / /ci lta ba bzhin don byed khyod nyid dang 'grogs shing / / slar mi ldog pa'i ched du jo bo sras po thal/ /khyod kyis nga la 'bras bcas sems ni dga' bar gyis/ /mi yi dbang po'i dgra bo dag ni mchog yin la/ /sbyor min la mkhas shes rab med pa'i bshes mchog min/ /nges par mdza' bshes rnam par mi mkhas khyod kyis ni/ /'di yi rigs kyi nye bar nub pa chen po byas//rab chags dri mas 'dres shing dmar ba'i mig can ma/ /kun nas rgyan dang bral ba 'di rnams mya ngan byed/ /gangs ldan ri bo dang mnyam bdag po gsan na yang / /bud med rnams ni yugs sa mo bzhin mdzes pa nyams/ /'di dag rnams kyang bya 'dab lag pa rnam bskyod cing / / rtag par phug ron rnams kyi ring ba'i skad rnams ni/ /de dang bral bas 'bras med pho brang 'khor dang bcas/ /gzhal med khang pa'i gtsang rnams shin tu ngu ba 'dra/ /skye bo 'di ni kun nas don med 'dod pa ste/ /bsngags ldan mgyogs 'gro de yang nges pa nyid du'o/ /mtshan mo skye bo gnyid che rkun pos rin chen bzhin//bdag gi 'di ltar 'di nas nor rdzas thams cad stor/ /mgyogs 'gro 'dis ni mda' yi rma srol byung rnams kyang / /sron par nus zhes grags na lcags rnams smos ci dgos/ /bdag gi snying dang 'dra ba'i dpal ni blangs gyur nas/ /'dis ni lcags lhung 'jigs las song ba yin nam ci//mi dbang pho brang yongs su gang ba bzhin du ni/ /'phags pa min las da lta drag tu 'tsher bar byed/ /gang gi tshe na bdag gi dga' ba phyi rol gshegs/ /de yi tshe na mgyogs 'gro lkugs pa thang chad gyur/ /gal te skye bo dag la go bar 'tsher byed dam/ /yang na rmig pas sa la rmig pa'i sgra byed dam//yang na 'gram pa'i sgra ni mchog tu bskyod na ni/ /bdag la sdug bsngal 'di 'dra 'byung ba ma yin no/ /de ltar 'dir ni lha mo'i smre sngags la brten zhing / /mchi mas 'dud pa yi ge'i tshig dag thos gyur nas/ /'og tu gdong phyogs mchi ma dang bcas thal sbyar te/ / 'dun pas lan 'di dal bus smras par gyur pa'o/ /lha mo bsngags ldan la ni smod par 'os min zhing / /kho bo la yang khro bar mdzad pa 'os ma yin/ /kho bo cag gi skyon min lha mo mkhyen par mdzod/ /mi yi lha de lha bzhin bkra shis kun gyis gshegs/ /bdag gis rgyal po'i brtan pa shes pa yin na yang //lha nyid gang dag gis ni stobs las byas pa bzhin/ /bdag gis mgyogs 'gro 'di ni nye bar 'ongs pa de/ /lam na ngal ba med par de ltar rjes su song / /mgyogs 'gro mchog 'di nyid kyang gshegs tshe sa la ni/ /bar snang dag la bzung bzhin rmig pas ma reg cing //de bzhin lha yi ched du gdong ni sngogs byas bzhin/ /'gram pa'i sgra ni byas min 'tsher ba dag kyang med/ /gang las sa skyong bdag nyid skyes pa gshegs pa na/ /de tshe sgo ni rang nyid bye bar gyur pa ste/ /mtshan mo'i mun pa nyi mas bzhin du bsal gyur te/ / de yi phyir yang lha yi cho ga de zung shig /gang phyir mi dbang bka' las skye bo stong phrag dag /khang pa dang ni grong khyer nyid du bag yod kyang / /de tshe de ni gnyid kyis phrogs shing ma sad de/ /de yi phyir yang lha yi cho ga de zung shig/ /gang phyir nags na gnas la mthun pa'i gos dag ni/ /lha na gnas pas dus su 'di la byin gyur la//rgyan dag mkha' la rab tu gtor ba de khyer te/ /de yi phyir yang lha yi cho ga de zung shig/ /de phyir de ltar lha mo nged gnyis la skyon du/ /ji ltar song ba de la rtog par 'os ma yin/ /mgyogs 'gro 'di dang bdag gi 'dod pa mi mdzad par/ /de ni lha rnams dag gis rjes 'gro byas shing gshegs//de ltar bdag nyid chen po de yis rab gshegs pa/ /lha yi mtshar mang bud med de rnams kyis thos nas/ /rab tu gshegs las yid la 'bar ba yang 'thob ste/ /mya ngan rab tu nyams bzhin ngo mtshar ldan par thal/ /de nas yid mi bde bas yongs lding mig can ma/ /phrug gu rab tu nyams pa'i 'ol ba sdug bsngal bzhin//rmongs gyur nyid kyang mchi ma dang ldan gdong gis smras/ /rlabs chen dang ldan 'jam zhing dkar min dge ba ste/ /so so so sor rtsa ba nas 'khrungs gyen du 'khyil/ /de yid bu skyes sa la 'thor ba de rnams ni/ /mi dbang dbu rgyan la ni yongs su dkri bar 'os/ / phyag ni rab 'phyang ri dgas rgyal po'i stobs mnga' zhing / /khyu mchog chen po'i spyan ldan gser 'bar 'od mnga' ba/ /'brug dang rnga yi sgra ldan sku stod rnam par yangs/ /de ltar gyur kyang dka' thub gnas su gnas par 'os/ /sor mo legs skyes 'jam zhing dra bas 'brel pa dang / /long bu mi mngon pad+ma'i rtsa ba ltar 'jam la//dbus na 'khor lo dang bcas zhabs ni de dag gis/ /drang srong rnams kyi nags mtha'i sa la 'gro 'am ci/ /khang bzangs logs na khri dang gdan la 'os pa ste/ /rin chen na bza' lci min tsan+dan gyis spras shing / /de yi lus ni mdangs dang ldan pa nags dag tu/ /grang dang dro dang chu 'od rnams su bskor ram ci//rigs dang gzugs dang stobs dang sems pa dag dang ni/ /thos dang phun sum tshogs dang na tshod kyis khengs shing / /slong bar ma yin ster ba nyid du mngon 'ongs pa/ /de ni pha rol dag la slong mo rgyu 'am ci/ /gser khri dang zhing gzims mal dag la gzims nas ni/ / mtshan mo sil snyan sgra rnams dag gis rab slong ba/ /gos kyi phyogs gcig bar na sa yi logs la ni/ /bdag gi brtul zhugs ldan de de ring ji ltar gzims/ /snying rje'i smre sngags rab tu zlos pa 'di thos nas/ /bud med de rnams phan tshun lag pas yongs 'khyud de/ /ljon shing g.yos las me tog las ni sbrang rtsi bzhin//rnam par lta byed dag nas chu dag 'thor ba'o/ /de nas ngang pa med pa'i ngang mo bzhin du ni/ /grags 'dzin ma ni nor 'dzin sa la 'gyel gyur la/ /rnam par 'khrugs shing yang dang yang du ldab ldib kyi/ /skad kyis de dang de dag rnam par smras pa'o/ /chos dang lhan cig spyod pa mgon med kho mo ni//de yis dor nas gal te chos ni byed 'dod cing / /chos dang lhan cig spyod ma dang bral dka' thub gang / /yongs su longs spyod 'dod 'di'i chos ni ga la zhig/ /sngon gyi sa skyong rnams des nges par ma mthong ste/ /legs mthong chen po la sogs mes po chen po rnams//bdag po ldan ma dang bcas nags su gshegs gyur la/ /kho mo dang bral chos byed 'dod pa de ltar ltos/ /mchod sbyin du 'am rig byed cho gas 'dus byas shing / /pho mo gnyis la dbang bskur de yi 'bras bu ni/ /gzhan du mnyam por longs spyod 'dod pa ma mthong ste/ /de nas bdag la 'di yi chos la ser sna skyes//bdag nyid la ni sdud dang phan tshun phrag dog cing / /yang yang rtsod par chos 'ga' des ni nges par shes/ /khro ba kho mo spangs nas dbang chen 'jig rten du/ /'jigs med lha mo las ni dga' ba len par 'dod/ /de la lus kyi yon tan bzung ba'i btsun mo de//ci 'dra zhig gam 'di ni bdag gis bsam mno ste/ /bdag gi gus pa nyid dang bud med bor nas ni/ /nags su gang phyir des ni dka' thub rnams la gdung / /nges par bdag gi 'dod 'di mtho ris bde phyir min/ /sems ldan skye bo de ni rnyed par dka' ba min/ / sdug pa des kyang bdag la 'di 'am gzhan du rung / /gang gis ma spangs zhes ni bdag gi yid la re/ /gal te bdag ni jo bo'i gzigs byed yangs pa'i zhal/ /gtsang zhing bzhad pa gyen du blta ba'i skal med na/ /skal ba dman par 'os min sgra gcan 'dzin de yang / /pha yi pang na yongs su gnas par nam zhig 'gyur//e ma yid mnga' 'di yi lus ni shin tu gzhon/ /yid ni mi rnams kyis bsngags shin tu sra ba ste/ /ngag gi skad grag rab zos dgra yang dga' ba yi/ /bu ni byis pa 'di 'dra kye ma spong bar byed/ /bdag gi 'dod pa'i sems kyang shin tu sra ba ste//rdo las gyur ram yang na lcags las byas pa'am/ /bder 'os jo bo dpal dor nags su song ba la/ /mgon med ldan pa gang zhig dum bur ma song ngo / /de lhar lha mo bdag po'i mya ngan gyis brgyal te/ sems shing rnam zlos lan cig ma yin 'di dus la/ /rang bzhin brtan yang dam ba mo de mya ngan gyis//brtan pa dran pa ma yin ngo tsha ma byas so/ /de nas de ltar mya ngan gyis smra rnam 'khrugs pa'i/ /grags 'dzin ma ni sa la 'gyel ba mthong nas ni/ /char gyis btang bas pad+ma chen po bzhin du ni/ /mchi bcas gdong gis bud med rnams ni cho nges 'debs/ /bzlas brjod rdzogs shing sbyin sreg bkra shis byas gyur te//mi skyong nyid kyang lta gang dag nas phyir gshegs pa/ /rdo rje'i sgra yis glang po ji bzhin skye ba yi/ /nyam thag sgra des kun nas bcom zhing g.yos par gyur/ /'dun pa dang ni bsngags ldan gnyis po mthong nas kyang / /sras kyi nges par brten pa yang dag gsan nas ni//bde sogs bdag po'i ltad mo zin pa'i rgyal mtshan bzhin/ /mya ngan gyis bcom sa yi bdag po 'gyel bar gyur/ /de nas sras po'i mya ngan gyis rmongs yud tsam zhig/ /skye bo mtshungs mnyam mngon pa'i skye bos bzung gyur la/ /chab kyis gang ba'i spyan gyis mgyogs bgro la gzigs nas//sa yi logs nas sa skyong gis ni sme sngags bton/ /g.yul 'gyed pa na dga' chen mang po byas nas ni/ /bsngags ldan khyod kyis bdag gi dga' ba ma yin byas/ /bdag gi dga' ba yon tan dga' de gang gis ni/ /dga' ba yin yang dga' ba med bzhin nags su bor//de phyir de nyid gang du gshegs pa der bdag khyer/ /yang na de ni slar yang skyen par khyer la shog /tshabs cher na ba'i sman dang bral bas de bzhin du/ /de dang bral bas bdag gi 'tsho ba med pa'o/ /rgyal bu gser 'bab 'chi bas phrogs par gyur pa na/ /dka' thub gang las yang dag rgyal ba shi ma gyur//bdag kyang chos 'dzin sras po gshegs par gyur pa na/ /bdag nyid thar 'dod bdag nyid med pa lta bur gyur/ /rgyal rigs bcu byas khyab bdag skye dgu'i bdag bo ni/ /mchog dang mchog min shes pa nyi ma'i sras po yi/ /bu ni phangs shing sdug bsngal dam pa dang bral la//yid mi bde byas yid kyi rmongs pa gang las min/ /rgyal bo a dza'i sras po blo dang ldan pa ni/ /mi bdag dbang po'i grogs la bdag gi 'dod pa ste/ /sras po nags su song la gang zhig lhar song la/ /mchi ma don yod ma yin bkren pas 'chos so kye/ / khyod kyis bdag gi chu yi snyim pa de gang du/ /phrogs pa'i dka' thub gnas der bzang po bdag la smros/ /de la bdag gi skom pa 'dis ni yongs 'dod de/ /bdag gi srog ni yi dgas 'gro bar 'dod/ /de ltar sras dang bral ba'i sdug bsngal skyes gyur te/ /sa dang 'dra ba'i lhan skyes brtan pa rnam spangs nas//rA ma'i mya ngan dag gis shing rta bcu pa bzhin/ /mi skyong 'du shes bral bzhin mang po rnam par labs/ /de nas de la thos dang dul dang yon tan ldan/ /rab bgres mdun na 'don dang blon po blo gros kyis/ /mnyam par gzhag 'di ji lta ba bzhin smas gyur te//yongs su gdung ba'i gdong min mya ngan med pa'ang min/ /mi mchog brtan pa mya ngan thong la brtan par gshegs/ /mya ngan bzhin du mchi ma 'don par 'os ma yin/ /me tog phreng ba rnying bzhin phun tshogs bor nas ni/ /sa na mi skyong mang po nags su shin tu song / /gzhan yang de yi dgongs pa nges pa 'di sngon tshe//drang srong dkar ming de yi tshig ni dran par mdzod/ /mtho ris su yang 'khor los sgyur ba'i rgyal srid la/ /skad cig kyang de gnas par bde bas nus ma yin/ /gal te yang de mi mchog 'bad pas byas pa ste/ /myur bar bka' lung stsol mdzod ji snyed 'dir 'gro bgyi//sna tshogs rnams kyi khyed kyi sras po de yi ni/ /sna tshogs mang bo'i 'thab mo de rnyed der byed shog /de nas de gnyis la ni mi bdag gis bslabs la/ /de phyir nges par 'di nas khyed gnyis mngon par song / /bu la lhag par chags pa'i nags kyi bya yi bzhin/ /bdag gi sems ni dga' bar rab tu song ma yin//dam pa zhes ni mi dbang bstan las blon po dang / /mdun na 'don pa de gnyis nags der song bar gyur/ /byas zhes gna' ma'i skye bo dang bcas btsun mor bcas/ /mi skyong gis kyang bya ba lhag ma rab tu mdzad/ /sangs rgyas kyi spyod pa zhes bya ba'i snyan dngags chen po las/btsun mo'i 'khor smre sngags bton pa'i le'u ste brgyad pa'o// //de nas de'i tshe mdun na 'don dang blon po de/ /mi skyong mchi ma'i lcag gis mngon par bsnun pa dag /phug pa'i dam pa'i rta bzhin 'bad pa thams cad las/ / bsam pa bzang pos skyen par nags der song bar gyur/ /'dra ba'i rjes 'brangs ngal ba skyes pa de gnyis ni/ /dka' thub nags der dus su nye bar phyin nas ni/ /rgyal po'i rdzu 'phrul dor de dul ba'i spyod pa yis/ /drang srong shes ldan bu yi khang par nye bar song / /de dag gis ni tshul bzhin bram ze de mchod nas//de ni de dag la yang rjes mthun mchod pa ste/ /gdan byas pa dag bdag tu lta ba bcad nas ni/ /shes ldan sras po gdan gnas pa la gtam smras so/ /mdangs gtsang gtsang zhing rnam par grags pa'i yangs pa mnga'/ /bu ram shing pa'i rigs su rab 'khrungs rgyal po yis//shru ka rab tu 'dzin dang gsang sngags yongs 'dzin la/ /nag por skye bo 'di ni khyod kyis rig par mdzod/ /dbang po dang mtshungs de yi rgyal ba dang mtshungs sras/ /rga dang 'chi ba'i 'jigs pa dag ni sgrol 'dod de/ / 'di na mngon par nye bar 'ongs grag de yi phyir/ /bdag cag nye bar 'ongs par bcom ldan mkhyen par mdzod/ /de dag la des smras pa phyag ring gyur pa de/ /rab tu thob gyur gzhon nu shes pa min pa min/ /chos 'di 'khor bar byed ces mngon par mkhyen nas ni/ / mngon par gdong phyogs ma yin thar bzhed skyen par gshegs/ /de nas de las de nyid de dag nyer thob nas/ /bram ze de la snyan dngags phab nas de ma thag /dub kyang ma dub pa bzhin rgyal po la gus pas/ /de nyid gang nas gshegs pa de nas rab tu song / /song ste de nas de dag gi ni rngon pa dang //rnam par bral ba'i sku lus rab tu 'bar ba de/ /nyi ma sdug po'i longs spyod dag la zhugs pa ltar/ /lam ni shing gi rtsa bar nye bar bzhugs pa mthong / /de nas de la mdun na 'don dang sngags 'dzin bcas/ /theg pa rnam par spangs nas nye bar gshegs pa ste/ / slar gnas thub pa'i bu ni g.yon gyi lhar bcas pas/ /nags gnas lhag spyod lta bar 'dod pa ji ltar ro/ /lha na pa ba sangs dang phur bus dbang chen bzhin/ /de dag gis ni de nyid bskyed cing mchod pa'o/ /lha na pa sangs phur bu dag la dbang chen bzhin/ /mchod 'os des ni de gnyis dag la slar mchod do//sbyor bar song ba'i zla ba nye sar nab so bzhin/ /de nas kun nas mngon par rjes gnang byas pa ni/ /de dag shA kya'i rigs kyi rgyal mtshan de yi ni/ /nye logs dag tu song ba rnam par mdzes par gyur/ /shing gi rtsa bar gnas pa mngon par 'bar ba yi/ /rgyal po'i sras po de la mdun na 'don gyis smras//lha na yongs 'dus dag la brgya byin sras po ni/ /rgyal ba nye bar gnas la phur bu ji ltar ro/ /khyod kyi mya ngan zug rngu snying la btags pa na/ /sa yi logs la rmongs shing brgyal bar gyur pa ste/ /gzhon nu mig gi chu yi char ltar rgyal po yis/ / gang zhig khyod la smras pa 'di ni mkhyen par mdzod/ /khyod kyis chos la rab dmigs nges par shes pa ste/ /khyod kyi 'byung bar 'gyur pa'i don ni shes pa'o/ /khyod kyi dus ma yin par nags su bsnyen las bdag /me dang rab mtshungs mya ngan me yis tshig pa'o/ /de phyir tshur spyon chos dga' dag gi dga' ston du//chos kyi don du blo gros de nyid thong mdzod dang / /chu bo'i shugs kyis 'gram ngogs mngon par bcom pa bzhin/ /bdag la mya ngan shugs 'dir rab tu 'phel ba'o/ /rlung dang nyi ma me dang thog chen rnams kyi ni/ /'jug pa gang zhig sprin dang chu me ri rnams su//rnam par 'byer dang skems dang srog dang 'byed rnams kyis/ /bdag cag rnams la mya ngan gyis 'jug pa de byed/ /de phyir re zhig nor 'dzin bdag nyid longs spyod la/ /dus su bstan bcos mthong ste nags su gshegs gyur te/ /'byung po thams cad la ni brtse ba chos yin phyir//mi 'dod gnyen 'dun kho bo la ni ltos par mdzod/ /chos de nags nyid kho nar 'grub pa ma yin te/ /sdom brtson rnams kyis nges par grong khyer na yang 'grub/ /'dir ni blo dang 'bad pa dag ni mtshan ma ste/ /nags dang stag ni 'jigs pa dag gi mtshan ma'o//dbu rgyan 'dzin zhing dpung par rna cha do shal dang / /dpung rgyan rnam par rengs pa'i phyag mnga' mi dbang rnams/ /phun tshogs yan lag dbus na yongs su gnas rnams kyis/ /khyim na gnas kyang thar ba'i lam ni rab tu thob/ /bstan pa'i nu bo stobs dang rdo rje'i lag pa dang //rnam mdzes bu dang chu stod de nas mthar gnas lha/ /lus 'phags rgyal po skyes byed dang ni de bzhin du/ /grong dang ljon shing can dang sde rgyal rgyal po rnams/ /nyes legs chos kyi cho ga la ni rnam dul ba'i/ /mi bdag khyim na gnas pa de rnams mkhyen mdzod la//nor gyi bdag po dang ni mi skyong dpal dag ste/ /gnyis po dag kyang de phyir dus gcig mkhyen par mdzod/ /mngon par dbang bskur byas pa'i chu yis brlan pa nyid/ /gdung ba skyob pa'i gdugs bzung khyed la drag tu ni/ /nye bar 'khyud nas kun nas gyen du lta ba ste/ /dga' ba des ni nags su rab tu 'jug par 'dod//de ltar mchi mas 'dud pa'i yi ge'i tshig gis ni/ /khyed nyid la ni sa yi bdag pos smras pa ste/ /thos nas de la brtse zhing de la dga' don du/ /khyed kyi brtse bas rjes su 'gro bar 'os pa'o/ /khyod las byung ba'i mya ngan chu ni gting med pa'i/ / sdug bsngal rgya mtshor shAkya'i rgyal po nub gyur te/ /de phyir mgon po rgya mtshor bying la gru bzhin du/ /dman zhing rten dang bral ba de ni sgrol mdzod cig /chu bo gang gA'i lto nas byung ba 'jigs byed dang / /lhag spyod dang ni ngan spong sras po lhag spyod kyis/ /pha yi dga' ba'i don du las byas thos nas ni//khyed kyang yab kyi bzhed pa mdzad par 'os pa lags/ /gnyen bshes be'u nyams par gyur pa'i ba bzhin du/ /rgyun mi 'chad par nyam thag snying rjer ngu ba mo/ /drang srong ri byi bsnyen zhing phyogs su ma song ba/ /yang dag skyed par byed pa'i lha mo mkhyen par mdzod/ / ngang pa rnam par bral ba'i ngang mo lta bu dang / /nags na glang po dang bral glang mo lta bu ni/ /mgon dang bcas kyang mgon med dman zhing nyam thag pa'o/ /btsun mo gzigs pa yis ni skyob par 'os pa yin/ /sras gcig byis pa sdug bsngal 'os pa ma yin pa/ /kun nas gdung ba mthar gyur pa ni 'dren pa ste//gang ba'i zla ba sgra gcan nye bar bsgyur las bzhin/ /sgra gcan 'dzin de gnyen gyi mya ngan las thar mdzod/ /pho brang btsun mo'i 'khor dang grong khyer mtha' dag ni/ /khyed dang bral ba'i bud shing can gyi mya ngan me/ /phyir 'byung dbugs ni du ba mun pa'i rtse mo yis//tshig pa dag ni khyed la lta ba'i chu 'dod do/ /mdun na 'don pa de yi tshig dag gsan gyur nas/ /byang chub sems dpa' yongs su gang ba'i sems dpa' des/ /yon tan ldan zhing yon tan shes pas yud tsam zhig /bsam gtan mdzad nas rigs pa'i lan 'di smras pa'o//pha rnams kyi ni bu la dgongs pa shes pa ste/ /gang zhig bdag la sa skyong gi ni khyad par du/ /shes pa yin yang na dang rga dang rgud pa las/ /'jigs te nags su phyin nas rang gi skye bo dor/ /mthar ni gal te dga' ba dang bral ma yin na/ /rang gi skye bo dga' ba lta 'dod cis ma yin//gang tshe yun ring gyur kyang rnam par 'bral ba ste/ /de phyir bla ma brtse ba yin yang 'dor bar bgyi/ /gang yang bdag gi ched du mi yi bdag po yi/ /mya ngan khyod kyis smras des bdag la dga' ba med/ /gang phyir rmi lam yang dag 'dus par gyur rnams su/ /rnam par 'bral bar 'gyur la kun nas gdung bar byed//'gro ba'i spyod pa rnam pa sna tshogs mthong nas ni/ /de bzhin du yang khyod kyi blo gros nges par song / /bu min gnyen min kun nas gdung ba'i rgyu yin bzhin/ /'ching ba de ni shes pa med pa'i mtshan ma nyid/ /lam du 'gro rnams 'dir ni 'dus pa ji lta ba'i//skye dgu rnams ni dus su nges par 'bral ba ste/ /gnyen 'dun dam 'cha' skye bos rnam par dman pa yi/ /shes rab ldan pa'i skye bos mya ngan bsnyen nam ci/ /gzhan du rang gi skye bo dor nas 'dir 'ongs la/ /'dir yang rab tu bslus nas slar yang 'gro ba ste/ /der song nas kyang pha rol gzhan du 'gro 'gyur la//de ltar 'dor ldan skyo la rjes su brten nam ci/ /gang tshe mngal nas bzung ste gnas skabs thams cad du/ /gsod pa'i phyir ni 'chi ba rab tu gnas pa ste/ /bu la dga' ba der ni khyed kyis smras pa yi/ /bdag gi nags su brten pa gang phyir dus ma yin/ / yul la mngon par lhung tshe dus ma yin pa de/ /de bzhin nor gyi cho gar zhugs pa dus yin no/ /dus rnams kun du dus kyi 'gro ba khyab pa ste/ /dge legs nges par thob pa dus yod ma yin no/ /gang yang rgyal pos bdag la rgyal srid 'dir bzhad la/ /de yang yab kyi rgya chen mtshungs shing 'dra ba ste//sred pa las ni nad pa'i mi 'phrod zas bzhin du/ /bdag gis rab tu 'dzin par nus pa ma yin no/ /gti mug rmongs pa'i gzhi ma mi skyong rgyal po nyid/ /rab tu 'thob par mi ni mkhas pas gang phyir nus/ /gang du skyo ba dang bcas rgyags dang ngal dub dang //pha rol log par spyod pas ches la gnod pa'o/ /'dzam bu chu gser bzhin du gsal ba'i lding khang ni/ /dug dang 'dres pa'i kha zas bzang po lta bu dang / /gza' yis 'khrugs pa'i pad+ma dang bcas chu lta bu/ /rgyal srid dang ni gser dag sdug bsngal dag gi rten//de ltar rgyal srid chos min bde ba ma yin pa/ /ji ltar mi gtsang skyes te mi dbang snga ma rnams/ /sdug bsngal yongs su spang bya na tshod rab mchog tshe/ /rgyal srid nges par dor nas nags su song bar gyur/ /rin chen bzhin du tshim ba mchog ni nyer mkhyud nas/ /'brog dgon dag na rtswa dag zos pa mchog yin la//sbrul nag bzhin du mthong ba ma yin nyes pa ni/ /rnyed bla'i dpal dang lhan cig nyal ba mchog ma yin/ /rgyal srid rnam par spangs pa rgyal po rnams kyi chos/ /mngon par 'dod pas nags su rab 'jug bsngags pa ste/ /nags tshal yongs su dor nas khyim du rab 'jug pa//dam bca' nye bar bcom pa'i 'thad pa ma yin no/ /rigs su skyes shing sems pa dang bcas mi gang gis/ /chos ni mngon par 'dod pas nags su rab zhugs la/ /ngur smrig rab tu dor nas ngo tsha rnam spangs nas/ /grong khyer 'joms pa yi yang grong la bsnyen ma yin//sred dang rnam par rmongs dang yang na 'jigs pa yis/ /gang zhig skyugs pa'i bza' ba slar yang len byed la/ /sred pa de ni rmongs dang yang na 'jigs pa yis/ /'dod pa rnams ni dor nas slar yang len par byed/ /gang zhig rab 'bar khang pa dag nas ci zhig ltar//byung nas slar yang de nyid kho nar rab 'jug la/ /nyes pa mthong de khyim na gnas pa dor nas ni/ /rmongs pas slar yang len par mngon par 'dod pa'o/ /gang yang mi skyong khyim na gnas pas thar pa ni/ /'thob pa dang ldan zhes thos de ni med pa ste/ /zhi ba gtso bo'i thar pa'i chos ni gang la yang / / chad pa gtso bo'i rgyal po'i chos ni gang du'o/ /zhi ba dga' ba gal te rgyal srid dman pa ste/ /rgyal srid la blo gal te zhi ba rnam par nyams/ /grang dang dro dang me dang chu yi gcig nyid bzhin/ /zhi ba dang ni rno nyid 'thad pa ma yin no/ /me dang chu yi 'du ba yod pa ma yin la/ /khram dang drang po'i 'du ba yod pa ma yin zhing //'phags dang sdig pa'i 'du ba yod pa ma yin te/ /zhi dang chad pa'i 'du ba yod pa ma yin no/ /de phyir sa 'dzin bdag po de rnams nges pas sam/ /rgyal po'i srid rnams spangs te zhi ba thob pa can/ /rgyal srid dag la bsnyen nam dbang po sbas nyid las/ / mthar ma thug par thar par mngon pa'i nga rgyal byas/ /de dag rnams kyi rgyal srid la zhi ji lta bzhin/ /bdag ni nags tshal rab thob nges pas ma yin zhing / /khyim dang gnyen gyi 'du shes zhags pa bcad nas ni/ /thar gyur slar yang rab tu 'jug par 'dod ma yin/ /de ltar bdag nyid rnam shes yon tan rjes mthun pa//re 'dod spangs shing gtan tshigs ldan pa sgrogs pa ste/ /mi dbang bdag nyid skyes kyi smra ldan thos gyur nas/ /gsang sngags 'dzin pa yis kyang lan ni smras pa'o/ /gang zhig chos kyi cho gar nges pa khyod kyi 'di/ / rig pa min pa ma yin 'di ni dus rig min/ /na tshod la gnas yab ma mya ngan phyir byin nas/ /chos 'dod khyod kyi chos ma yin par gyur pa'o/ /nges par khyed kyi blo yang shin tu phra min pa/ /yang na chos dang don dang 'dod par mkhas ma min/ /gang zhig ma mthong 'bras bu'i don du khyed nyid kyis//mngon sum don ni yongs su brnyas par mdzad nas gshegs/ /yang srid yod ces kha cig dag ni smra ba ste/ /med ces kha cig dag ni nges par dam 'cha'o/ /de ltar gang tshe don 'di the tshom gyur pa ste/ /de phyir longs spyod par nus dpal ni nye bar gnas/ /gal te slar yang rab tu 'jug pa gang yang yod//der ni ji ltar 'bad pa dag la dga' bar bgyi/ /ci ste gzhan du rab tu 'jug pa gang yang med/ /'gro ba 'di yi 'bad rtsol med las thar pa 'grub/ /kha cig 'jig rten pha rol yod ces smra ba ste/ /thar pa'i sbyor ba la ni bsngags pa byed ma yin//ji ltar me yi dro dang chu yi gsher ba nyid/ /de ltar rab tu 'jug par rang bzhin nyid du smra/ /dge dang mi dge nyid dang srid dang srid min la/ /kha cig rang bzhin las zhes bsngags pa byed pa ste/ /gang phyir 'di dag thams cad rang bzhin las yin te/ /de yi phyir yang rab tu 'bad pa don med 'gyur//gang zhig dbang po rnams kyis nges par rab spyod pa/ /yul rnams la ni dga' ba dang ni mi dga' nyid/ /gang zhig dga' dang nad rnams dag gis sbyor byed de/ /de la gang gis 'bad dam de ni rang bzhin no/ /chu rnams kyis ni me rnams zhi bar nye 'gro zhing //'od zer rnams kyis chu ni skams par byed pa ste/ /lus la yang dag gnas pa'i 'byung ba tha dad rnams/ /gcig nyid gyur nas 'gro ba dag ni 'dren par byed/ /gang zhig lag pa rkang pa lto rgyab mgo rnams kyis/ /mngal du song ba'i ngo bo nges par sgrub byed la/ / gang tshe bdag nyid de yi de yis sbyor ba ste/ /rang bzhin las byung de shes rnams kyis de smra'o/ /bya dang ri dgas rnams kyi sna tshogs ngo bo dang / /tsher ma'i rnon po nyid du rab tu byed pa su/ /rab tu 'jug pa 'di kun rang bzhin las yin la/ /'dod pa byed pa yod min 'bad pa gang las so//de bzhin gzhan rnams dbang phyug las skyes smra ba ste/ /der ni skyes bu'i rab tu 'jug pa la don ci/ /'gro ba'i rab tu 'jug la gang nyid rgyu yin zhing / /ldog pa la ni nges par de nyid rgyu yin no/ /kha cig bdag gi mtshan ma nyid du smra ba ste/ /rab tu skye ba nyid dang srid pa zad pa yang //'bad pa med las rab tu skye bar smra ba ste/ /'bad pa yis ni thar pa 'thob par smra ba'o/ /lha yi mchod sbyin drang srong rnams kyi rig byed dang / /pha yi bu lon med pa bu rnams kyis te mi/ /gang gi grol ba yod pa de yi thar pa zhes/ /bu lon gsum po de dang lhan cig skyes pa'o//de ltar cho ga'i bya ba'i rim pa 'di yis ni/ /'bad rtsol bcas pa'i thar pa de shes rnam smra la/ /'bad rtsol ldan pa yin yang rnam par gnon pa yis/ /thar pa 'dod pa rnams ni ngal ba thob par byed/ /de phyir zhi ba gal te thar la gus yod na/ /cho gar brjod pa ji ltar rigs pas bsnyen mdzod dang //'di yi nye bar 'thad pa de ltar gyur pa ste/ /mi yi bdag po'i kun nas gdung ba nyams par 'gyur/ /dka' thub nags tshal dag nas khang par 'jug pa la/ /khyod kyi skyon gyi blo gros gang zhig rab zhugs te/ /yab gcig der yang khyod kyi bsam par ma gyur dang //snga ma rnams kyang nags nas rang gi khang par gshegs/ /dka' thub nags na gnas pa bu rnams kyis bskor te/ /rgyal po a ma ri Sha grong du zhugs gyur la/ /de bzhin 'phags min rnams kyis sa ni rnam bcom pa/ /dka' thub nags nas 'ongs nas rangs byed kyis gsungs so//de bzhin rdo ba dang bcas bdag po'i ljon shing ming / /nags gnas bu dang bcas pa grong du bzhugs pa ste/ /tshangs pa'i drang srong gyur dang thub pa gnas 'jog las/ /sbyin sreg dang bcas mtha' can lha yis dpal bzung ngo / /rnam pa de ltar chos dang grags par rab bzhugs pa/ / nags rnams bor nas khang khyim rnams su song ba ste/ /de phyir dka' thub nags nas chos kyi ched du nyid/ /khyim na rab tu 'gro ba skyon yod ma yin no/ /de nas mi skyong rgyal po'i dga' dang phan pa nyid/ /byas pa'i blon po de yi tshig dag gsan nas ni//dman min ma 'khrugs chags min brtan dang gnas pa la/ /myur min tshig ni rgyal po sras kyis smras pa'o/ /'dir ni yod dang med ces the tshom gang de ni/ /gzhan gyi tshig gis bdag la 'di na nges pa med/ /dka' thub dang ni zhi bas de nyid rtogs gyur nas/ / gang 'dir nges par bdag nyid kyis ni gzung bar bgyi/ /phan tshun gnod cing mi gsal the tshom skye ba yi/ /lta ba dag ni len par bdag gis nus ma yin/ /mun par long bas long ba'i lam mkhan byed pa bzhin/ /mkhas pa'i skye bo su zhig gzhan gyi rkyen gyis 'gro/ /de nyid ma mthong gyur kyang 'on kyang kho bo yi//dge dang mi dger the tshom na dge blo gros gyur/ /'bras bu med phyir la yang dge ba'i bdag nyid mchog /smod pa'i bdag nyid de nyid la yang bde ba med/ /rnam gzhag med pa'i lung 'di yang ni mthong gyur nas//tshad ldan rnams kyis gang smras de ni legs rtogs mdzod/ /nyes la rab dman tshad ldan nyid ni rtogs mdzod dang / /nyes pa rab tu dman pas bden min smra ba yin/ /khyim la 'jug par dmigs gang bdag la khyod kyis ni/ /smras shing rangs byed la sogs rnams ni dpe bstan te//de rnams tshad min chos des rnams su nus med cing / /tshad ma'i ched du brtul zhugs rnams ni yongs su zad/ /de lta na yang nyi ma sa la lhung gyur la/ /gangs dang ldan pa'i ri bos brtan nyid 'dor na yang / /de nyid ma mthong yul la kha bltas dbang po ni/ /khyim rnams dag la so so skye bo mi bsnyen to//bdag ni 'bar bar gyur pa'i me la 'jug pa ste/ /don ma byas par khyim gyi gzhi la rab mi 'jug /de ltar thugs rgyal ldan des dam bca' mdzad gyur cing / /ji ltar 'dod bzhin bzhengs nas ngar 'dzin med par gshegs/ /de nas mchi ma dang bcas blon dang gnyis skyes gnyis//de yi bstan pa nyid dang nges pa thos gyur nas/ /gti mug bzhin ldan rjes su song nas sdug bsngal ba/ /dal bus song nas grong khyer nyid du song bar gyur/ /de nas de la brtse dang mi skyong la gus las/ /de dag ltos byas rab tu song zhing gnas gyur la//gsal zhing snang bas nyi ma blta bar dka' ba ltar/ /de ni lam du lta bar ma nus 'dor bar min/ /mchog tu gshegs te gshegs pa shes phyir de dag gis/ /so pa'i skyes bu gtsang ma sbas pa rnams byas nas/ /dga' zhing sras po 'dod pa'i rgyal po la song nas/ /ji ltar blta'am zhes ni ji ltar yang song ngo //sangs rgyas kyi spyod pa zhes bya ba'i snyan dngags chen po las/ gzhon nu rjes su tshol ba'i le'u ste dgu pa'o// //sku stod rgyas shing rgya chen rgyal po'i sras po ste/ /bsreg bya dang bsngags bdag po de dag rnams spangs te/ /dba' rlabs g.yo ba'i chu bo gang gA rgal nas ni//dpal dang ldan pa'i rgyal po'i khab tu gshegs par gyur/ /ri rnams dag gis legs par sbas dang brgyan pa dang / /dge dang dka' thub gter bas gzung dang gtsang ba ste/ /zhi ba rang byung tshangs pa mtho ris logs su bzhin/ /ri lngas mtshan pa'i grong khyer rab tu thob par gyur//zab mor gyur pa'i mdangs dar de yi lugs gsal ba/ /skyes bu rnams ni shin tu gnon pa mthong gyur nas/ /khyu mchog rgyal mtshan de yi brtul zhugs brtan pa bzhin/ /der ni de tshe skye bo rnams ni ya mtshan gyur/ /de rab mthong nas gzhan gang ma song de gnas shing //der ni gang zhig lam na gnas de rjes 'gro zhing / /gang zhig skyen por song ste brtan por song gyur la/ /kha cig bsdad pa gang yin de ni langs pa'o/ /skye bo kha cig de la mchod pa'i lag pa yis/ /bsti stang byas nas kha cig mgo bos phyag 'tshal zhing //kha cig gnyen po'i tshig gis mngon par stod byed cing / /kha cig de la rab tu mchod nas song bar gyur/ /de rab mthong nas sna tshogs cha lugs rnams ngo tsha/ /rab bkram tshig ni lam du smra ba med par song / /dngos su gzhan du chos rnams dag gi nye logs su//kha cig tshul ma yin pa'i blo gros ma gyur to/ /lha dang mtshungs pa'i mi dbang sras po de mthong nas/ /bya ba gzhan ma rnams kyang rgyal po'i lam du ni/ /mchod mang bkur sti sngon 'gro bud med rnams kyi 'am/ /skyes pa rnams kyis mig dang ngoms par ma gyur to//dpral ba 'am smin ma dag dang zhal lam spyan dag dang / /sku 'am phyag dag dang ni 'gros sam zhabs dag ni/ /gang gis de yi gang nyid der ni mthong gyur pa/ /de nyid kyis ni de yi mig dag bcings par gyur/ /smin ma mdzod spu dang bcas spyan dag yangs pa dang //sku lus mdzes shing dge ba'i dra ba dang ldan phyag /sa skyong nyid du 'os pa'i dge slong cha lugs de/ /mthong nas rgyal po'i khab kyi phun tshogs g.yos par gyur/ /de nas khang pa'i phyi nas rnam rgyas skye bo'i tshogs/ /ma ga d+hA yi khyim gyi ngo bo bzo sbyangs kyis/ / mthong bar gyur te de yi rgyu mtshan dris pa ste/ /de nas 'di la skyes bu rnams kyis de smras so/ /ye shes mchog gam yang na sa yi dpal dag ni/ /'thob par 'gyur zhes bram ze rnams kyis gang smras pa/ /rab tu gshegs par skye bos nges par mthong ba yi/ /shAkya'i bdag po'i sras po de ni 'di yin no//de nas don thos yid kyis chags shing zhen gyur pa'i/ /rgyal po yis ni skyes bu de nyid la smras pa/ /de ni gang du song zhes rnam par shes par mdzod/ /de nas de ltar bgyi zhes skyes bu rjes su song / /g.yo mi spyan ni gnya' shing gang tsam gzigs pa ste/ /gsung ni kun nas snyoms shing zab mo'i 'gros mnga' ba//g.yo ba'i sems dang lus rnams dag ni nges bsdams nas/ /dge slong mchog nyid de yang bsod snyoms la gshegs so/ /ji ltar nye bar 'thad pa'i bsod snyoms bsnams nas ni/ /rnam par dben zhing char rab 'bab par rab gshegs la/ /der ni tshul bzhin rigs pas mngon par gsol gyur nas//de ni sa 'dzin ri bo skya bseng la 'dzegs so/ /ro d+ha'i nags kyis nye bar sbas pa'i ri bo der/ /rma bya'i skad kyis rab gang lo ma'i spyil bo na/ /'char ri'i steng na nyi ma gzhon nu ji lta bar/ /ngur smrig gos kyis nyi ma'i nyi ma de mdzes so//der ni de nyid rgyal po'i 'khor de mthong gyur nas/ /bzo sbyangs rgyal po la ni gtam dag byas pa ste/ /thos nas rgyal po des kyang mchod pa mang po las/ /der ni sbas pa'i rjes su 'brang bas rab tu song / /skya bseng ri bo mchog la skya bseng na dang ni/ /brtson 'grus mnyam zhing ri bo dang mnyam sku lus can//mi yi seng ge'i 'gros can cod pan 'dzin pa ste/ /ral pa g.yo ba'i seng ge bzhin du 'dzegs par gyur/ /de nas de yi steng na rtse mor gyur pa yi/ /byang chub sems dpa' dbang po nye bar zhi ba ni/ /ri bong gis mtshan sprin gyi sbubs nas byung ba bzhin/ / skyil mo krung gis bzhugs nas rnam par mdzes pa mthong / /gzugs dang phun sum tshogs dang nye bar zhi ba yi/ /chos kyi sprul pa bzhin du nye bar bzhugs de la/ /ya mtshan dang bcas rab tu bsnyen ldan mi dbang po/ /rang byung la ni brgya byin gyis bzhin nye bar gnas/ /rigs pa yis ni rigs pa rig pa rnams kyi mchog /khams mnyam gyur pa de la song nas dris pa ste/ /de nyid kyis kyang mtshungs shing zhi bas mi skyong la/ /yid ni rang bzhin gnas dang nad med smras par gyur/ /de nas gtsang la glang po'i rna ba ltar sngo ba'i/ /rdo ba'i logs la rgyal po yang dag nges gnas shing //nye sar nye bar bsdad nas rjes su mthun pa yis/ /de yi dgongs pa rnam par shes 'dod 'di smras so/ /rim pas 'ongs pa nyid dang yongs su brtags pa ste/ /khyod kyi rigs kyis bdag gi dga' ba mchog yin la/ /gang phyir bdag la rang gi na tshod smra 'dod pa//skyes te de phyir brtse ba'i tshig 'di mkhyen par mdzod/ /khyod kyi rigs ni rnam rgyas sngon du nyi ma ste/ /lus kyang na tshod gsar pa gsal la mdzes pa 'di/ /gang phyir 'di ni khyod kyi blo gros rim med pas/ /slong mo nyid la mngon dga' rgyal srid la ma yin/ /khyod kyi lus 'di tsan+dan dmar po 'os pa ste//ngur smrig gis dkris de ni 'os pa ma yin no/ /lag pa 'di ni skye dgu skyong bar 'os pa ste/ /gzhan gyis byin pa'i bza' ba za bar 'os ma yin/ /de phyir zhi ba gal te yab kyi rgyal srid la/ /khyod kyi yab kyi brtse las stobs kyis mi 'dod cing / / khyod kyi blo gros rim par bzod par ma gyur na/ /skyen par kho bo'i yul gyi phyed la longs spyod mdzod/ /de lta na ni rang gi skye la gnod min zhing / /dus kyi rim pa yis kyang dpal gang bsngags pa ste/ /de phyir khyod kyis bdag la brtse ba mdzod cig dang / / dam pa rnams dang bcas pas dam pa'i dpal 'phel lo/ /ci ste da ni rigs kyis khengs pa nyid las ni/ /bdag cag rnams la khyod la blo gtad yon tan med/ /sde rgyas rnams ni mda' yis rnam par dkrugs byas nas/ /bdag dang bcas pas pha rol rnams ni pham par mdzod/ / de phyir 'dir ni gnyis dbus gcig blo tshol mdzod la/ /chos don 'dod pa rnams la cho ga bzhin bsnyen mdzod/ /'di na sde tshan gsum po chags las rnam bzlog nas/ /'di dang gzhan du phyin nas lhung ba kun nas 'thob/ /gang zhig don dang chos la gnod nas 'dod pa dang / /chos dang 'dod pa yongs su brnyas nas don dang ni//'dod dang don dag nye bar zhi bas chos de ni/ /don byas gal te mtha' dag 'dod na don yin no/ /de phyir sde tshan gsum la nges par bsnyen pa yis/ /khyod kyis gzugs 'di 'bras bu bcas pa nyid du mdzod/ /chos dang don dang 'dod pa dman min thob pa la/ / mi rnams dag gis dman min skyes bu'i don du smra/ /de phyir gzhu ni rnam par 'gengs 'os rgyas pa'i phyag /'di dag 'bras bu med par byed par 'os min te/ /nga las nu bzhin 'dis ni 'jig rten gsum rnams kyang / /pham par 'os pa yin na sa 'dir smos ci dgos/ /brtse bas nges par de ni bdag gis smra ba ste//ya mtshan gyis min dbang phyug nyid kyi chags pas min/ /khyod kyis dge slong nyid kyi cha lugs 'di mthong nas/ /rjes su brtse ba skyes nas mchi ma rang byung ngo / /de phyir rang rigs rab mtshungs khyod kyi gzugs ji srid/ /rga bas zil gyis mnan nas slar yang ma 'ongs par/ / slong mo'i gnas 'dod 'dod pa rnams la longs spyod la/ /dus su chos la dga' ba chos ni gyis mdzod cig /'khogs pas nges par chos ni 'thob par nus pa ste/ /'dod pa nye bar spyod la rgas pa'i 'gro ba med/ /de phyir dar la bab pa'i 'dod pa rnams smra ste/ /bar ma'i nor yin rgan po rnams kyi chos yin no//gson pa'i 'jig rten dag na chos dang don dag ni/ /rnam par 'gal bar gyur pa yin phyir lang tsho rnams/ /yang dag srung ba yin yang thub par dka' ba ste/ /gang phyir 'dod pas lam de las ni 'phrog par byed/ /na tshod 'khogs pa rnams ni rnam spyod ldan pa ste/ /shin tu brtan pa'i gnas skabs mchog tu song ba rnams//ngo tsha ba nyid phyir dang song ba ma yin phyir/ /'bad pa nyung ngus zhi ba'i bdag nyid gyur pa'o/ /de nyid phyir na g.yo zhing yul ni gtso bo dang / /rab myos bzod pa ma yin ring por mthong min la/ /'brog dgon dag la des par thar nas dbugs phyung bzhin//g.yo sgyu mang bo'i lang tsho shin tu 'das nas so/ /de phyir mi brtan g.yo la bag med ldan pa yi/ /na tshod gsar pa 'di ni re zhig rnam par 'ong / /'dod pa'i lha yi sngon du na tshod dben yin la/ /dbang po rnams las bsrung bar nus pa ma yin no/ /ci ste khyod kyi chos nyid mdzad par 'dod pa ni//mchod sbyin gyis lha mchod mdzod 'di ni rigs kyi chos/ /mchod sbyin rnams kyis mtho ris logs ni byin brlabs nas/ /lha dbang nyid kyang mtho ris logs su gshegs par 'gyur/ /gser gyi dpung rgyan rnam par bcings pa'i phyag rnams dang / /nor bu'i sgron mas 'bar ba'i dpung rgyan sna tshogs can//mi skyod drang srong rnams dang drang srong chen po rnams/ /ngal bas gar gshegs 'gros der mchod sbyin rnams kyis gshegs/ /de ltar ma ga d+hA yi bdag pos tshig smras pa/ /gang zhig dbang po'i bzhin du smra ba yang dag mdzes/ /sna tshogs du ma'i sa phyogs ti se'i gangs ri ltar//rgyal po'i sras des de thos gyur nas rnam ma g.yos/ /sangs rgyas kyi spyod pa zhes bya ba'i snyan dngags chen po las/ bzo sbyangs sngon du song ba'i le'u ste bcu pa'o// //de nas bshes kyi sgo nas phan pa min pa'i don/ /de ltar ma ga d+hA yi bdag pos smas pa yis//rang gnas rnam par 'gyur min rigs gtsang gtsang pa po/ /zas gtsang rgyal po'i sras kyis tshig 'di smras pa'o/ /seng ges mtshan pa'i yangs pa'i rigs su rab skyes pa/ /khyed kyi cho ga de ni ngo mtshar che ma yin/ /gang phyir bshes gnyen phyogs su gshegs 'dod khyod kyi ni//yongs su dag pa'i spyod pas spyod pa de yin no/ /rang rigs rjes su spyod pas dam pa min la byams/ /dbang po ma tshang ba la dpal bzhin gnas min la/ /snga mas byas pa'i dga' ba rim rnams kyis/ /de ni dam pa rnams kyis rnam par 'phel bar byed//don ni dka' ba rnams su mi rnams gang zhig gis/ /mdza' bo rnams kyis mnyam pa'i don gyur 'jig rten na/ /bshes gnyen de rnams blo yis yongs su shes bgyi ste/ /rang gnas dag ni 'phel bar gang gi phyir ma yin/ /de ltar gang gis rdzas dag thob nas 'jig rten na//bshes rnams dang ni chos la nges par sbyor byed pa/ /de rnams kyis ni nor gyi snying po thob pa ste/ /mthar ni nyams las gdung ba skyed par byed ma yin/ /rgyal po mdza' bo nyid dang 'phags pa nyid kyis kyang / /khyod kyi nges pa gang zhig bdag la dmigs pa 'di/ / mdza' bo nyid kyis 'dir ni rjes su bsnyad bgyi ste/ /rgol ba gzhan min 'dir ni bdag gis smra bar bgyi/ /bdag gis rga dang 'chi ba'i 'jigs pa rnam rig nas/ /thar pa 'dod pas chos 'di rab tu thob pa ste/ /gnyen 'dun dga' ba mchi ma'i gdong ldan rnams spangs nas/ /mi dge'i rgyur gyur 'dod pa rnams ni sngon nyid do//bdag ni yul rnams dag la ji ltar 'jigs pa nyid/ /de ltar sbrul gyi dug rnams la ni mi 'jigs shing / /nam mkha' dag las 'phos pa'i thog rnams las min la/ /rlung dang bcas pa'i me rnams dag las ma yin no/ /mi rtag 'dod pa rnams kyis dge ba'i nor rku zhing //stong pa rmi lam sgyu ma dang mtshungs 'jig rten na/ /yid la smos pa yis kyang rmongs par byed pa ste/ /mi yi sems ni bdag nyid gnas pa smos ci 'tshal/ /kye ma 'dod pas zil gyis non na mtho ris su/ /bde ba thob min 'chi ba'i 'jig rten na smos ci/ /rlung grogs ldan pa'i me yis bud shing gis ji ltar//sred dang bcas pa'i 'dod pa rnams kyis tshim pa med/ /'gro na 'dod pa rnams dang mnyam pa'i don med med/ /rmongs las de rnams kho nar skye bo rab tu chags/ /de nyid shes nas de ltar don med 'jigs pa ste/ /shes ldan su zhig rang gis don med mngon par 'dod//rgya mtsho'i gos can sa ni kun nas thob nas kyang / /rgya mtsho chen po'i pha rol rgal bar 'dod pa ste/ /rgya mtsho'i chu bo rnams dang chu bran rnams kyis ltar/ /'jig rten pa yi 'dod pa rnams kyis ngoms pa med/ /lha yis gser gyi char pa dag kyang phab gyur la/ / gling rnams bzhi po mtha' dag la yang longs spyad de/ /brgya byin gyi yang gdan phyed dag kyang rab thob nas/ /nga las nu ni yul rnams dag la ngoms pa med/ /lha na lha rnams kyi yang rgyal srid longs spyad nas/ /mchod sbyin brgya pa lha min 'jigs las rab nyams tshe/ /rgyags las drang srong chen po rnams la'ang khur bcom nas//'dod pa rnams la ngoms med sgra med lhung bar 'gyur/ /e la'i rgyal pos mtho ris rnams ni rnam dkrugs te/ /brla mdzes lha mo de nyid dbang du blangs nas kyang / /sred phyir drang srong rnams las gser dag phrogs pa ste/ /yul rnams la ni ngoms med nyams par song bar gyur//lha min las ni dbang chen dbang chen las dgra med/ /dgra med las slar dbang chen gang du nyer song ste/ /mtho ris dang ni sa 'am yul ni de rnams su/ /bskal ba'i tshogs 'khrugs rnams la su zhig blo gtad byed/ /shing shun gos can rtsa ba 'bras bu chu za zhing //lag 'gro'i sbrul ltar ring ba'i ral ba'i khur rnams kyang / /gang gis don gzhan ma yin thub pa yang nyams te/ /'dod pa zhes bya'i dgra bo rnams ni sa yis tshol/ /rno ba'i mtshon cha dang ni rno 'dzin mtshon cha yang / /gang gi don du 'jigs sde las ni 'chi thob la/ / de dag rnams kyi dge min sems kyang spyod rnams kyis/ /'joms phyir de phyir brtul zhugs rnams kyis smos ci dgos/ /yul rnams su ni mya ngan nyung ngur shes gyur nas/ /kun nas sbyor zhing mchog tu ngoms pa med pa nyid/ /dam pa rnams kyis smod cing nges par sdig pa ste/ /'dod pa'i mig can dug ni su yis len par byed//zhing gi las la sogs pa rnams kyis nyam thag cing / /'dod pa rnams la mi tshar rnams kyi rang gnas dang / /'dod pa'i bdag nyid rnams kyi rang gnas thob nas ni/ /'dod pa rnams ni spong bar sems ldan rnams kyis nus/ /grub 'gyur 'dod pa rnams su rgyags pa nyer 'thob phyir//'dod pa can la 'dod 'byor rgud pa shes bya ste/ /rgyags las bya ba min byed bya ba ma yin la/ /gang gis zad cing ngan 'gror nye bar 'gro bar 'gyur/ /gang la 'bad pas thob cing yongs su bskyangs pa rnams/ / rnam par bslus nas slar yang so sor 'gro ba ste/ /bdag nyid ldan pas g.yar po dang mtshungs de rnams su/ /'dod pa rnams la 'di na mkhas pa su zhig dga'/ /btsal nas dang ni blangs nas skom pa skyes pa yin/ /gang rnams mi 'dod sdug bsngal bar ni yongs 'gro la/ /'jig rten dag na rtswa sgron dang mtshungs de rnams su//'dod pa rnams la sems ldan su mi dga' ba yin/ /dga' ldan min pa'i snying la gang gis rnam rmugs te/ /rnam par nyams par 'gro 'gyur bde bar 'gro min zhing / /kun nas khros pa'i sbrul dang rab mtshungs de rnams su/ /'dod pa rnams la sems ldan su yi dga' ba yin//ltogs pas nyam thag khyi bzhin rus pa zos nas kyang / /gang rnams la ni ngoms par 'gyur ba ma yin nyid/ /'khogs pa'i nus pa'i keng rus dang mnyam de rnams su/ /'dod pa rnams la sems ldan su yi dga' ba yin/ / gang gi rgyal po rkun po chu dang me rnams las/ /thun mong gyur pa nyid phyir sdug bsngal sred byed de/ /rab tu gtor ba'i sha dang mtshungs pa de rnams su/ /'dod pa rnams la sems ldan su yi dga' ba yin/ /dgra bo dang ni gnyen 'dun 'brel pa rnams las kyang / /gang la gnas pa rnams ni skyen par rgud pa ste//skye mched dang mtshungs nye bar 'tshe ba de rnams su/ /'dod pa rnams la sems ldan su yi dga' ba yin/ /ri dang nags dang chu dang rgya mtsho rnams su yang / /gang la rnam par 'phyo ba rnams ni lhung 'gyur te/ /ljon shing rtse mo'i 'bras bu dang mtshungs de rnams su//'dod pa rnams la sems ldan su yi dga' ba yin/ /rnam pa sna tshogs 'bad pa drag bo 'thob pa rnams/ /gang gis skad cig gis 'dir nyams par 'gyur ba ste/ /rmi lam nye bar longs spyod dang mtshungs de rnams su/ /'dod pa rnams la sems ldan su yi dga' ba yin//gang rnams bsgrubs nas dang ni rnam par spel nas dang / /yongs su bskyangs nas dang ni bde bar 'gro min la/ /lci ba'i me ma mur dang rab mtshungs de rnams su/ /'dod pa rnams la sems ldan su yi dga' ba yin/ /gtum po long byed bcom brlag pa dang daN Da ka /gang gi don du sgra ngan rnams ni nyams gyur la/ /ro bsregs shing dang rab tu mtshungs pa de rnams su/ /'dod pa rnams la bdag ldan su yi dga' ba yin/ /lha min mdzes sbyin dang ni nye ba'i mdzes sbyin bdag /gang gi don du phan tshun dgrar song nyams gyur la//mdza' bshes gyur cing rnam par 'bral ba de rnams su/ /'dod pa rnams la sems ldan su yi dga' ba yin/ /gang dag rnams kyi don du chu dang me la dang / /sha za rnams la bdag nyid 'dir ni 'dor ba ste/ /dge ba ma yin dgra bor gyur pa de rnams su/ / 'dod pa rnams la sems ldan su yi dga' ba yin/ /bshes med 'dod pa'i don du bkren por byed pa ste/ /gsod dang 'ching ba la sogs sdug bsngal rab thob la/ /'dod pa'i don du sems ni bkren pa'i dka' thub can/ /gson pa'i 'jig rten 'ching ba dang ni ngal bar 'gro/ /ri dgas rnams ni gsod phyir glu yis 'phrog byed la//gzugs kyi don du phye ma leb rnams mer mchong zhing / /sha dag don gnyer nya yis lcags ni za ba ste/ /de phyir yul rnams don med nyid du 'bras bu smin/ /'dod pa'i longs spyod yin zhes gang gi blo yin la/ /kha cig longs spyod rnams ni yongs su spyod pa ste//gos sogs rdzas kyi yon tan yin phyir 'jig rten na/ /sdug bsngal zhi bar byed ces rab tu gzung bar bya/ /skom pa rab tu zhi phyir chu dag 'dod pa ste/ /bkres pa rnam par nyams phyir bza' ba de bzhin du/ /rlung dang gdung ba sgrib pa'i ched du khang pa ste/ / mdoms dang grang ba sgrib pa'i phyir ni bgo ba'o/ /de bzhin nyid ni rnam par 'joms phyir gnas yin la/ /de bzhin lam la ngal ba nyams phyir theg pa ste/ /de bzhin gnas ni rnam par sbyong phyir stan yin la/ /gtsang dang nad med stobs la brten phyir khrus yin no/ /sdug bsngal rab tu zhi ba'i ched du gyur pa ste//de bzhin skye dgu rnams kyi yul nas longs spyod min/ /rab tu zhi ba'i cho gar rab zhugs shes rab can/ /longs spyod rnams ni bza' zhes su yis khas len byed/ /gang zhig 'gro ba'i gdung bas rnam par gdungs pa ni/ / longs spyod yin zhes grang ba'i bya bar nan tan byed/ /sdug bsngal zhi ba'i bdag nyid la ni rab 'jug cing / /des ni 'dod pa rnams la longs spyod 'du shes byed/ /gang phyir 'dod pa rnams la mtha' gcig gyur min te/ /de phyir bdag gis de la longs spyod 'du shes med/ / dngos po gang nyid kyis ni bde ba ster byed pa/ /de nyid kyis ni slar yang sdug bsngal 'dren par byed/ /bgo ba lci mo dang ni lci ba ma yin nyid/ /grang dang dro ba'i tshe na bde dang bde min la/ /zla 'od rnams dang tsan+dan nyid kyang dro ba na/ /bde ba'i phyir dang sdug bsngal phyir yin grang ba na'o//gang phyir rnyed dang ma rnyed la sogs 'jig rten na/ /kun gyi gnyis su 'dzin pa rnams ni rab zhugs te/ /de phyir mtha' gcig bde ba yod pa ma yin zhing / /sa na skyes bu kha cig mtha' gcig sdug bsngal min/ /bde dang sdug bsngal nyid ni rnam par 'dres mthong nas//rgyal srid dang ni bran nyid mnyam pa bdag gi lugs/ /rgyal bo nyid ni rtag par rgod pa ma yin zhing / /bran ni kun nas gdung ba nyid kyang ma yin no/ /gang phyir mi skyong nyid du bka' lung lhag par gyur/ /de phyir rgyal po'i sdug bsngal dag ni chen po nyid//kun nas brten pa'i shing dang rab mtshungs rgyal po ni/ /srid pa'i rgyu las yongs su ngal bar 'gro ba nyid/ /rgyal srid 'dor ldan bshes min mang por mi skyong gis/ /gal te blo gtad 'cha' bar gyur na rgud pa ste/ /ci ste yang na blo gtad nye bar byed min na/ /'dir ni 'jigs ldan rgyal bo'i bde ba zhes bya ci//gang tshe sa ni mtha' dag rgyal bar gyur nas kyang / /gnas pa'i ched du grong khyer gcig pu nyid mthong zhing / /de nyid la yang pho brang gcig pu bsnyen bya ste/ /rgyal por gyur pa pha rol don du ngal lam ci/ /rgyal po sdod pa'i gnas kyang gnya' shing gcig nyid do//de bzhin bkres pa 'gegs phyir bza' ba tsam yin la/ /de bzhin nyal lam gcig dang stan ni gcig nyid de/ /lhag dang lhag min mi skyong gis ni rgyags phyir ro/ /gal te tshim pa'i don du 'bras bu de 'dod na/ /rgyal srid rnams dang bral yang bdag ni tshim pa yod//tshim pa yod par gyur na skyes bu'i 'jig rten na/ /khyad par med pa ma yin thams cad khyad par ro/ /de phyir dge dang zhi ba'i lam ni rab thob pa/ /kho bo 'dod pa rnams la slu bya ma yin la/ /mdza' bshes nyid du dran par byas nas yang dang yang / /dam bca' nges par skyongs zhes bdag la smras pa'o//bdag ni nags su zhugs pa mi bzod pas min la/ /dgra bo'i mda' rnams kyis ni mgo bo 'dar ba min/ /'bras bu lhag pa rnams las re ba byas min te/ /de phyir khyed kyi tshig de bzung ba ma yin no/ /gang zhig yang yang shin tu sos 'debs khros pa'i sbrul//spangs nas slar yang len pa la ni nan tan byed/ /yang na sreg pa'i rang bzhin 'bar ba'i rtswa yi me/ /spangs nas 'dod pa rnams ni slar yang de yis brten/ /gang zhig ma long long ba'i phyir ni 'dod pa ste/ /grol ba 'ching ba'i phyir dang phyug po nor med phyir/ / rang bzhin gnas pa'i sems ni bsnyon pa'i sems phyir la/ /yul gyi bdag nyid phyir ni 'dod par de yis byed/ /gang zhig 'dir ni mchog tu zhi ba'i bde ba dang / /gzhan du sdug bsngal rnams ni kun nas sgrib pa ste/ /byed ldan rga dang 'chi ba'i 'jigs las sgrol 'dod pa/ /slong mo nye bar rgyu zhes rjes su brtse bya min//gang zhig 'dir ni zhi ba'i bde ba 'thob min la/ /gzhan du sdug bsngal rnams kyis rab tu 'dzin byed cing / /phun tshogs chen po'i bdag nyid la yang rnam gnas pa'i/ /sred pas zil gyis gnon la rjes su brtse bar byas/ /sems pa yi dang spyod pa yi dang rigs nyid kyi/khyod kyis brjod pa la ni rjes su mthun pa ste/ /sems pa yi dang spyod pa yi dang rigs nyid kyi/ /kho bo yi yang dam bca' 'dren par mtshungs pa'o/ /bdag kyang 'khor ba'i rgya mtsho'i mda' yis rnam phug pa/ /zhi ba thob par 'dod pas rnam par nges 'byung ste/ /nad med mtho ris na yang rgyal srid 'thob pa ru//'dod pa med na kye ma mi rnams su smos ci/ /mi skyong gang yang sde gsum mtha' dag brten pa ni/ /rab mchog mi yi don zhes khyed kyis bdag la smras/ /de ltar don med ces ni bdag gi bstan pa 'dir/ /mdzad ldan sde tshan gsum ni tshim byed kyang ma yin//gang du dga' bar 'gro min 'jigs min nad ma yin/ /skyod min nye bar 'da' min sems kyi nad rnams min/ /gang na yang dang yang du bya ba yod min pa/ /de nyid skyes bu'i don ni mchog tu shes pa'o/ /ji srid na tshod so ma rnam par 'gyur bar 'gro/ /de srid dga' ba yongs su skyongs mdzod zhes smras pa//'di ni nges pa ma yin g.yo bar mthong ba ste/ /rga ba brtan pa min dang lang tsho brtan ldan mthong / /rang gi las mkhan mthar byed gang gi 'gro ba ni/ /na tshod kun la dbang med rnam par 'gugs pa ste/ /rnam gzhag ma yin rnam par nyams tshe gang ltar ni//zhi 'dod mkhas pa dag gis dga' ba rtogs par byed/ /gang tshe dga' ba'i gzhu dang nad rnams bkram pa'i mda'/ /mthar byed dge ba ma yin rngon pa bzhin gnas pas/ /skye dgu'i ri dwags bskal pa'i nags brten rnams gtor te/ /na tshod rab mchog la dmigs yid la re ba yi/ / de phyir gzhon nam rgan dang yang na byis pa ni/ /rab tu 'jug par 'dod dam rnam par ldog pa nyid/ /chos ldan bdag nyid byas pa ji lta bar gyur pa/ /de ltar myur ba ldan pas 'dir ni bya bar 'os/ /yang na 'dod pa'i 'bras bu rigs su 'os pa rnams/ /chos phyir mchod sbyin bya ba gyis zhes gang smras pa//gang zhig gzhan gyi sdug bsngal bya bas 'dod pa ste/ /mchod sbyin rnams la phyag 'tshal bde ba 'dod pa med/ /'bras bu 'dod pas dbang med pha rol gsod pa la/ /snying rje'i bdag nyid dam pa rnams kyi rigs tshul min/ /gang yang mchod sbyin dag gi 'bras bu rtag gyur pa//snying rje'i bdag nyid gang gis de ltar byas nas ci/ /sems ni zhi ba yis sam tshul khrims brtul zhugs kyis/ /gal te chos tshul gzhan gyi cho ga ma yin la/ /de lta na yang mchod sbyin bsnyen par 'os min te/ /gang du gzhan la 'tshes nas 'bras bur brjod pa'o/ /'di nyid du yang re zhig skyes bu gnas pa yi//bde ba gang zhig pha rol 'tshe bas rab zhugs pa/ /de yang brtse bcas blo dang ldan pa'i 'dod min te/ /gang zhig sred pa'i mtha' mar mi mthong kye ma ci/ /rgyal po 'khor bar bdag gi yid ni dga' med cing / /'bras bur rab tu 'jug phyir bdag ni bslu bya min//chu 'dzin char gyis brgyab pa'i ljon shing bzhin du ni/ /kun du song ba'i rab tu 'jug pa rnams ni g.yo/ /rnam par thar pa smra ldan rtsibs phur thub pa ni/ /blta bar 'dod pas bdag ni 'dir yongs de yi phyir/ /mi skyong khong la dge bar gyur cig de ni 'gro/ / bdag gi de nyid ltos med dag ni bzod par mdzod/ /lha na dbang po bzhin srungs rtag par nyi bzhin srungs/ /yon tan gyis srungs sa srungs 'dir ni dge legs srungs/ /tshe srungs 'phags pa yis srungs dam pa'i bu rnams dang / /dpal srungs rgyal po'i bdag nyid kyis ni chos srungs shig /kha ba'i dgra yi rdeg las skyes pa las skyes nas/ /ji ltar gnyis skyes gang zhig lus ni rnam thar 'gro/ /kha ba'i dgra yi dgra yis khyim gyi dgra 'joms nang / /nang du de ltar gang zhig yid ni rnam par thar gshegs mdzod/ /thal mo dang bcas re thob mi skyong gis smras pa/ / khyed kyis ji ltar 'dod pa bgegs med thob par shog /bya ba byas pa kun nas thob pa dus su 'dir/ /kho bo yi yang rjes su 'dzin pa khyed kyis mdzad pa'o/ /de ltar gyur zhes brtan pa'i dam bca' mdzad nas sa skyong la/ /de nas de ni thams cad sgrol gyi dka' thub gnas su gshegs/ /yongs su gshegs pa de mthong nas kyang ya mtshan gyur pa yi//mi skyong nyid kyang ri yi tshogs kyi grong khyer nyid du song / /sangs rgyas kyi spyod pa zhes bya ba'i snyan dngags chen po las/ 'dod pa la rnam par smod pa'i le'u ste bcu gcig pa'o// //de nas lus kyis gang ba bzhin/ / bu ram shing ba'i zla ba yis/ /zhi bar gnas pa'i thub pa yis/ /rtsibs 'phur gyis ni gnas su bsnyen/ /sgyu rtsal shes kyi rigs de yis/ /rgyang nas gzigs nas mthon po yis/ /legs par 'ongs zhes smras pa ste/ /drung du nye bar gshegs pa'o/ /de gnyis phan tshun rigs par ni/ / khams ni snyoms par dris nas su/ /shing gtsang brtul zhugs gdan dag la/ /sa phyogs gtsang bar bzhugs pa'o/ /bkur mang rnam par yangs pa yis/ /lta byed dag gis 'thung ba bzhin/ /mi skyong sras po bzhugs de la/ /thub pa mchog des smras pa'o/ / zhi ba bdag gi shes pa ltar/ /khyim nas nges par 'byung bar 'gyur/ /gnyis 'thung rgyags pas zhags pa ltar/ /brtse ba'i zhags pa bcad nas 'ongs/ /khyod kyi yid ni shes rab dang / /kun nas brtan pa ldan pa nyid/ /dug gi ljon pa'i 'bras bu bzhin/ /gang khyod dpal dor nas 'ongs so//longs spyad lhag ma'i phreng ba bzhin/ /bu rnams dag la dpal byin nas/ /sa skyong 'khogs pa'i na tshod rnams/ /gang zhig nags 'ongs ngo mtshar min/ /bdag gi lugs ni ngo mtshar te/ /so ma'i na tshod la khyod kyis/ /yul gyi spyod yul la gnas pa/ /dpal nyid longs ma spyad nas 'ongs//de phyir chos 'di shes pa la/ /khyod ni dam pa'i snod yin la/ /ye shes gru bo byin brlabs nas/ /skyen par sdug bsngal rgya mtsho sgrol/ /gang yang slob mar shes pa na/ /dus kyis bstan bcos la 'jug ste/ /zab pa las dang nan tan las/ /bdag gi yongs rtog khyod ma yin//de ltar rtsibs 'phur nyid kyi tshig /mi yi drang srong des gsan nas/ /mchog tu dga' bar gyur pa yis/ /lan gnyis rab tu smras pa'o/ /don ma byas kyang 'di yi ni/ /don byas bzhin du da lta nyid/ /chags dang bral ba gang 'di ni/ /dam pa khyed kyi mngon du gyur/ /blta bar 'dod pas 'od bzhin dang //sgrol bar 'dod pas gru bzhin dang / /'gro bar 'dod pas lam mkhan bzhin/ /khyed mthong ba la bdag gis shes/ /rga dang 'chi ba'i 'jigs rnams las/ /gal te gsung byar dgongs nas ni/ /de phyir gsung bar 'os pa'o/ /de ltar rtsibs 'phur gyis gzhon nu'i//bdag nyid che las bskul ba nyid/ /rang nyid kyi ni bstan bcos kyi/ /nges par mdor bsdus gsungs pa'o/ /ji ltar 'khor ba yin pa la/ /ji ltar nges par ldog pa nyid/ /nyan pa rnams kyi mchog grub mtha'/ /kho bo'i 'di ni gson mdzod cig /rang bzhin dang ni rnam 'gyur dang / / skye dang 'chi dang rga ba ste/ /re zhig sems pa zhes brjod pa/ /brtan pa'i sems pa de shes mdzod/ /de la rang bzhin shes bya ba/ /rang bzhin shes pa shes par mdzod/ /'byung ba lnga yi bdag nyid dang / /blo dang mi gsal ba nyid do/ /rnam 'gyur zhes bya mkhyen par mdzod/ /yul rnams dang ni dbang po rnams//lag pa rkang pa dag dang ni/ /'phongs dang mdoms dang de bzhin yid/ /'di yi zhing ni shes pa la/ /zhing shes pa zhes bya ba ste/ /zhing shes pa zhes bdag nyid du/ /bdag tu bsam byed rnams kyis smras/ /slob ma dang bcas ser skya yis/ /'di ni rab tu rtogs zhes dran//bu dang bcas pa'i rtogs pa yang / /skye dgu'i bdag por 'di brjod do/ /skye ba nyid dang rga ba dang / /na ba dang ni 'chi ba dang / /de ni gsal zhes rtogs bya ste/ /bzlog las mi gsal ba yang ngo / /mi shes pa dang las dang srid/ /'khor ba'i rgyu rnams shes bya ste//gsum po 'dir gnas 'gro ba ni/ /snying stobs de ni 'da' ba med/ /log pa las dang ngar 'dzin las/ /the tshom las dang mngon 'phyo las/ /khyad par med las thabs min las/ /chags pa las dang mngon lhung las/ /de la log pa zhes bya ba/ /phyin ci log tu 'jug pa ste//bsam par bya ba gzhan sems shing / /bya ba gzhan ni byed pa'o/ /smra ba dang rig pa dang / /'gro ba nga dang gnas pa nga / /de ltar 'di ni ngar 'dzin pa/ /ngar 'dzin med kyi 'jug pa'o/ /gang zhig the tshom med dngos rnams/ /gcig tu gyur pas mthong ba ste/ /the tshom med pas 'jim gong ltar//de 'dir the tshom du brjod do/ /gang zhig nga nyid de nyid 'di/ /yin dang blo dang las yin la/ /gang zhig drangs te de nyid nga / /zhes gang de ni mngon par 'phyo/ /rab rgyas rab rgyas ma yin pa'i/ /khyad par med pa'i khyad shes kyi/ /rang bzhin rnams kyis gang shes pa//de ni khyad par med ces dran/ /phyag 'tshal ba dang gzhi mi 'grib/ /bsang gtor dang ni mngon 'thor sogs/ /thabs min zhes ni shes ldan gyis/ /rab tu rtogs bya thabs shes kyi/ /chags pa mi skye yul rnams la/ /yid ngag blo dang las rnams kyis/ /blo ngan gang gis chags byed pa//de ni mngon par chags zhes dran/ /bdag gi 'di dang 'di bdag ces/ /gang zhig sdug bsngal mngon snyam ste/ /gang zhig 'khor bar lhung shes bya/ /de ltar mkhas skye ma rig pa/ /gnas skabs lnga ni rab thob ste/ /mun pa rmongs pa rmongs pa che//mun las gyur pa gnyis nyid do/ /de la mun pa le lor dang / /rmongs pa skye 'chir rtogs par mdzod/ /rmongs pa chen po 'dod pa zhes/ /kun nas rmongs med mkhyen par mdzod/ /gang phyir 'di na 'byung rnams kyis/ /chen por yang ni rab rmongs byed/ /de phyir phyag chen 'di dag ni//rmongs pa chen po zhes dran no/ /mun las gyur pa khro nyid du/ /lhag par byed pa'o khro med kyis/ /mi shes mun las gyur pa ni/ /skyo bar rab bshad skyo med kye/ /ma rig pa 'dis byis pa 'di/ /gnas skabs lnga dang ldan pa ste/ /'khor bar sdug bsngal gyur pa yi/ /skye ba rnams su 'bab par byed//lta bo nyan po shes pa po/ /bya ba dang ni rgyu nyid dag /da zhes de ltar 'ongs nas ni/ /'khor bar yongs su 'khor bar byed/ /blo ldan rgyu 'di rnams kyis 'di/ /skye ba'i rgyun la rab tu 'jug /rgyu med pa las 'bras bu med/ /de ltar rnam par shes par 'os//de la rgyun rab rab rgyas mig /gsal ba dang ni mi gsal nyid/ /thar pa 'dod pa bzhin rnams te/ /yang dag 'gro ba rigs par mdzod/ /bzhi po de dag ji lta bzhin/ /'gyur med go 'phang 'thob par byed/ /de phyir 'jig rten na tshangs pa/ /mchog tu tshangs par smra ba rnams//tshangs pa'i spyod pa spyod byed 'dir/ /tshangs pa rnams kyis gnas par byed/ /mi skyod sras kyis thub pa de'i/ /tshig 'di de ltar gsan nas ni/ /mthar thug go 'phang nyid dang ni/ /thabs mngon pa dag dran pa'o/ /ji ltar ji srid gang du ni/ /tshangs pa'i spyod pa 'di spyad cing //chos 'di yis ni mthar thug pa/ /khyod kyis rnam par bshad par 'os/ /de ltar thub pas bstan bcos ltar/ /rnam gsal don ni mdor bsdus pas/ /cho ga'i rtog pa gzhan nyid kyis/ /chos de de la smras pa'o/ /'dis ni dang por khyim spangs nas/ /slong mo'i rtags ni bsten pa ste//phrin las rnam par rgyas pa yi/ /tshul khrims blangs nas 'jug par byed/ /byed ldan rtsod med bstan bcos rig /mchog tu tshim pa la gnas nas/ /gang dang de yis gang dang der/ /rnam dben gnas ni bsten pa'o/ /de nas chags las 'jigs mthong nas//chags pa med las mchog zhi yang / /dbang po'i grong ni nges bzung ste/ /yid la zhi ni 'bad pa byed/ /de nas 'dod pa rnams las dang / /gnod sems sogs las rnam dben nyid/ /bsam gtan dang po rnam dpyod ldan/ /rnam par dben pa las skyes thob/ / bsam gtan bde ba de thob nas/ /de dang de nyid rnam dpyod cing / /sngar med bde ba thob pa yis/ /byis pa'i skye bo 'phrog par byed/ /'dod dang sdang ba rnam smad pa'i/ /zhi ba'i cho ga de 'dra 'dis/ /tshangs pa'i 'jig rten thob pa ste/ /yongs su tshim pas gnas pa'o/ /rnam dpyod yid ni skyong byed rnams//mkhas par rnam par shes nas kyang / /de las rnam par grol ba ni/ /bsam gtan dga' ba'i bde ldan thob/ /gang zhig khyad par ma mthong zhing / /dga' ba de yis phrogs pa de/ /'od gsal ba yi lha rnams su/ /'od gsal ba yi gnas 'thob bo/ /gang yang dga' ba'i bde de las//yid ni rnam par dben byed pa/ /dga' ba'i bde ba dang bral ba/ /bsam gtan gsum pa thob par byed/ /de 'dra'i bde ba 'dir thob nas/ /gang zhig chags min btang snyoms shing / /bde dang sdug bsngal rnam spangs pa'i/ /bsam gtan bzhi pa thob par byed//bde dang sdug bsngal zhi phyir dang / /sems kyi bya ba med pa'i phyir/ /thar zhes mngon pa'i nga rgyal gyis/ /der yang kha cig 'bad pa byed/ /bsam gtan de yi 'bras bu ni/ /'bras bu che bas lhas mnyam par/ /longs spyod shes rab che rnams kyis/ /chen po'i dus su smra ba'o/ / ting 'dzin de las rnam langs shing / /lus skyes skyon rnams mthong nas ni/ /lus las rnam par ldog pa'i phyir/ /shes ldan bsam gtan la 'jog go/ /de nas bsam gtan de bor nas/ /khyad par la ni nges byas pa'i/ /shes rab ldan de 'dod las bzhin/ /gzugs rnams las kyang chags pa med//lus 'di la ni kha gang du/ /de la yongs su rtog pa ste/ /de nas rdzas sdug rnams la yang / /nam mkhar lhag par mos par byed/ /nam mkhar song ba'i bdag nyid du/ /bsdus nas gzhan du blo ldan gyis/ /de nyid mtha' med par mthong zhing //khyad par 'phags pa lhag par 'thob/ /nang na mkhas pa gzhan dag ni/ /bdag nyid bdag nyid kyis bzlog nas/ /ci yang med ces mthong ba ni/ /ci yang med pa zhes dran no/ /de nas gur nas bya bzhin dang / /gong bu dag nas srin bal bzhin/ /zhing shes lus las 'thon pa las/ / thar pa zhes ni mngon par brjod/ /de nyid shes pa'i mkhas pa yis/ /gang zhig thar pa zhes brjod pa/ /'di de tshangs pa dam pa ste/ /rtags med rtag cing 'gyur ba med/ /de ltar thabs dang thar pa dag /bdag gis khyod la bstan pa ste/ /gal te shes shing gal te sred/ /ji lta ba bzhin rtogs par mdzod//rgyal 'dod bu dang skyed byed dang / /gzhan mi 'bral ba rgan po dang / /thar pa 'dod pa gzhan rnams kyang / /lam 'di thob nas grol bar 'gyur/ /de yi dam pa'i tshig 'di dang / /rnam par dpyod pa yang bzung nas/ /sngon du rgyu yi stobs thob pas/ /lan ni smras par gyur pa'o//gong nas gong du zhi ba yi/ /ye shes phra mo 'di thos shing / /zhing shes yongs su ma btang phyir/ /de ni mthar thug min par go/ /rnam gyur dang ni rang bzhin las/ /zhing shes grol bar kho bo yis/ /rab tu skye ba'i chos su dang / /sa bon chos su snyam pa'o/ /gang yang rnam dag bdag nyid ni//nges par thar zhes rtog pa ste/ /slar yang rkyen dag yod pa las/ /de ni grol bar mi 'gyur ro/ /ji ltar dus sbyor sa dang chu/ /me las sa bon skye ma yin/ /de bzhin rkyen ni de rnams kyis/ /skye ba de yang bdag gi lugs/ /gang zhig mi shes las sred rnams/ /spangs las thar pa rtogs byed pa//de ni mchog tu yongs spong ba/ /bdag yod gyur na yod ma yin/ /spangs nas spangs nas gsum po 'di/ /khyad par du yang nyer 'thob cing / /gang du bdag ni gnas gyur pa/ /der ni gsum po 'di phra'o/ /skyon rnams phra ba nyid las dang / /sems kyi bya ba med las dang //tshe ni ring ba nyid las kyang / /thar par kyang ni yongs su rtog /ngar 'dzin par ni yongs spong bar/ /gang de yongs su rtog byed la/ /bdag spyod gyur nas ngar 'dzin pa/ /yongs su spong ba yod ma yin/ /drang srong rnams kyis ma spangs pa/ /'di ni yon tan med ma yin/ /de phyir yon tan med gyur na//'di yi thar par mi brjod do/ /yon tan can gyis yon tan gyi/ /ldog pa yod pa ma yin te/ /gzugs dang 'gro ba dang bral ba'i/ /me ni nye bar 'thob ma yin/ /lus las sngon du lus can dang / /yon tan las sngar yon tan can/ /ma yin de phyir dang por grol/ /lus bzhin slar yang 'ching bar byed//zhing shes lus dang ma bral ba/ /shes pa yin nam shes min nyid/ /gal te shes 'di shes bya yod/ /shes bya yod na mi grol lo/ /ci ste khyod la shes mi 'grub/ /bdag tu rtog pas ci zhig bya/ /bdag dang bral yang shes pa ni/ /rab grub shing dang rtsig pa bzhin/ /gang phyir gong nas gong du ni//de ltar rtsibs 'phur gyi ni chos/ /mkhyen nas de ni ma tshim zhing / /mtha' dag min zhes shes nas su/ /de nas so sor gshegs pa'o/ /de nas khyad par chos 'dod pa/ /lhag spyod kyi ni gnas su gshegs/ /de yi bdag tu 'dzin las kyang / /des ni lta bar sred ma gyur//'du shes 'du shes med pa'i skyon/ /thub pa lhag spyod kyis shes nas/ /'du shes 'du shes med bdag min/ /cung zad med las gzhan 'gro thob/ /gang phyir dmigs pa phra mo ni/ /'du shes 'du shes med las gzhan/ /'du shes med min 'du shes min/ /de phyir der ni re 'dod min//gang phyir der ni blo gnas shing / /gzhan du rab tu rgyu pa med/ /phra zhing rno ldan de phyir der/ /'du shes med min 'du shes med/ /de phyir de yang rab thob nas/ /slar yang 'gro ba 'khor ba ste/ /byang chub sems dpa' mchog 'dod pas/ /de phyir lhag spyod dor ba'o/ /de nas de yi gnas thob nas//dge legs don gnyer nges byas nas/ /gang yang rgyal ba'i drang srong gis/ /grong khyer zhes bya'i gnas bsnyen no/ /de nas nai rany+dza na'i 'gram/ /gtsang mar gtsang zhing pha rol gnon/ /dben pa'i gnas ni mngon 'dod ba'i/ /thub pa yis ni gnas mdzad do/ /de nas de ni sngar brten zhing //dbang po lnga yi dbang las khengs/ /mun pas bsnyen pa'i brtul zhugs can/ /dge slong lnga rnams des gzigs so/ /bsod nams kyis bsgrubs nor nad med/ /dbang don rnams kyis dbang phyug bzhin/ /dge slong de rnams kyis kyang 'dir/ /de mthong gyur nas nye bar gnas//de'i dbang gis gnas slob ma rnams/ /dbang po g.yos pas yid bzhin du/ /rab tu de rnams kyis mchod cing / /rnam par dul las rjes su 'jug /'chi dang skye ba mthar byed la/ /de nas thabs ni 'di yis zhes/ /bza' ba med par shes pa yis/ /dka' thub gdung ba rnams brtsams so//basmyung gnas cho ga du ma rnams/ /mi yis spyod dka' rnams mdzad cing / /las ni thob bzhed lo drug tu/ /bdag gi sku lus rig par mdzad/ /pha mtha' med pa'i 'khor ba yi/ /pha rol thob par 'dod pa nges/ /bza' ba'i dus su til dang 'bru/ / rab sha rnams ni re re gsol/ /dka' thub gdung ba des de yi/ /sku las bri bar byas pa gang / /slar yang de yi gzi brjid kyis/ /sku lus nye bar 'phel byas gyur/ /ston ka'i dkar phyogs dang po yi/ /zla bas ku mu ta rnams bzhin/ /ring kyang dpal grags ring min zhing / /gzhan gyis mig rnams tshim par mdzad//rus lpags lhag ma lhag med par/ /tshil dang sha dang khrag rnams kyis/ /zad kyang zab mo ma zad par/ /rgya mtsho bzhin du de mdzes so/ /de nas sangs rgyas nyid 'dod pas/ /ngal dub gdung bas don med bsal/ /nyon mongs lus can thub pa ni//srid las 'jigs pa blo mdzad do/ /chos 'di chags bral phyir min zhing / /rtogs phyir ma yin thar phyin min/ /de tshe 'dzam bu'i rtsa bar gang / /bdag gis thos te nges pa yin/ /'di ni stobs chung gis thob par/ /nus pa min phyir gus 'ongs shing / /sku yi stobs ni 'phel don du//slar yang 'di ni rjes su bsams/ /bkres dang skom pas yongs gtser zhing / /ngal las rang gnas med pa'i sems/ /yid kyis thob bya'i 'bras bu ni/ /ldog pa med pa gang zhig 'thob/ /rtag par dbang po tshim pa las/ /yang dag gnas pa 'thob pa ste/ /dbang po yang dag tshim nyid kyis//yid ni rang bzhin gnas pa 'thob/ /dang zhing rab dang yid kyis ni/ /ting 'dzin nye bar skye ba ste/ /ting 'dzin gyis sbyar sems kyi ni/ /bsam gtan sbyor ba rab tu 'jug /bsam gtan rab tu zhugs pa las/ /rnyed dka' zhi zhing dga' med mchog /'chi med go 'phang de chos rnams//gang gis thob pa rab thob po/ /de phyir bza' ba rtsa ba ste/ /'di ni thabs zhes nges pa yin/ /bza' ba byed la brtan pa ni/ /dpag med blo yis blo mdzad nas/ /khrus byas nai rany+dza 'gram nas/ /lag byin 'gram gyi ljon shing ni/ /gus pa yis dud yal ga'i rtses/ /sku lus rid pa dal bus drangs//de nas lha rnams kyis bskul ba'i/ /ba lang skyong bdag bu mo ni/ /snying la dga' skyes 'gyur ba yi/ /dga' stobs ma ni der 'ongs so/ /dung dkar gyis 'bar lag pa can/ /la ba sngon po gon pa mo/ /dbu ba dang bcas chu sngon phreng / /chu mchog ya mu na bzhin no/ / spyan mig ut+pal rab rgyas shing / /dad pas 'phel ba'i dga' ma des/ /de la mgo yis rab btud nas/ /'o ma drangs par gyur pa'o/ /des de gsol nas de la ni/ /skye ba'i 'bras bu thob byas nas/ /yang dag dbang po drug tshim ste/ /byang chub 'thob par nus par gyur/ /phul byung rgyas pa'i sku mnga' zhing //rang gi grags bcas thub pa ni/ /nus gyur rgya mtsho gnyis dag gis/ /mdzes dang bstan pa gcig pus bzung / /bdag ni nges par grol ba la/ /blo ldan khams lnga rnams kyis ltar/ /kun nas 'jug ces rnam shes nas/ /dge slong lnga rnams kyis de dor/ / de nas 'bad rtsol gnyis pa ni/ /byang chub ched du nges mdzad de/ /rtswa 'jam bkram pa'i sa gzhi la/ /a shwad tha yi rtsa bar gshegs/ /de tshe glang po'i 'gros mnga' ba'i/ /dpe med zhabs kyi sgra yis sad par byas pa ni/ /thub pa chen po'i byang chub des par rtogs pa yi/ /grub mchog nag po zhes byas bstod pa smras par gyur//ji ltar thub pa khyod kyis zhabs kyis brdzis pa ni/ /yang nas yang du sa ni sgra skad sgrogs pa 'dra/ /ji ltar khyod kyi 'od ni nyi mar snang ba ste/ /khyod kyis nges par 'dod pa'i go 'phang mkhyen pa nyid/ /ji ltar mkha' la khug rta'i phreng ba rnams bskor zhing / /pad+ma'i spyan mnga' khyed la skor ba byed pa nyid//ji ltar mkha' la rlung rnams zhi bar 'gro ba ste/ /khyod kyis nges par de ring sangs rgyas 'gyur ba nyid/ /de nas glu mchog gis ni yang dag bstod pa ni/ /lco ga las ni gtsang ma'i rtswa rnams nyer blangs nas/ /byang chub shing chen rtsa ba dge la rab brtan cing //byang chub ched du dam bca' mdzad cing bzhugs pa'o/ /de nas gnyid log lto 'phye'i gdengs kas bsdus pa la/ /des ni rdo rje'i skyil krung g.yo med mchog bcings te/ /ji srid bya ba byas pa nyid ni ma thob par/ /de srid sa las gdan de 'byed par mi bgyi'o//de nas nges pa'i bdag nyid bcom ldan gdan mdzad tshe/ /lha na gnas rnams mnyam med dga' ba thob gyur la/ /ri dgas tshogs rnams gnas par ma gyur bya rnams dang / /rlung gis bsnun pa'i nags kyi ljon shing sgra med gyur/ /sangs rgyas kyi spyod pa zhes bya ba'i snyan dngags chen po las/ring 'phur dang lhag spyod kyi drung du gshegs pa'i le'u ste bcu gnyis pa'o// //der ni rnam par thar phyir dam bca' mdzad pa na/ /rgyal po'i rigs las rab 'khrungs drang srong chen po ni/ /der ni nye bar zhugs tshe 'jig rten rab dga' zhing //der ni bdud kyang dam pa'i chos kyi dgrar gyur to/ /gang la 'dod pa'i lhar ni 'jig rten na smra ba/ /sna tshogs mtshon cha me tog mda' can de bzhin du/ /'dod pa rab tu spyod pa'i bdag po de nyid la/ /thar ba'i dgra bo bdud du dpe rjod byed pa'o/ /de yi bu ni rol pa dga' ba rgyags pa dang //bu mo dga' ma dges ma sred ma gsum rnams kyis/ /de la sems kyi rnam par 'gyur ba dris pa ste/ /des ni de rnams la tshig mngon par smras/ /thub pa 'dis ni nges pa'i go cha rnam bzung zhing / /sems pa'i mtshon cha blo yi mda' ni bsdogs byas nas/ /bdag cag yul rnams la ni rgyal 'dod bsdad pa ste//gang phyir 'dis ni bdag gi yid ni rnam par 'gyur/ /gal te 'dis bdag zil gyis mnan nas 'gro ba ste/ /'jigs pa la yang thar ba'i lam dag 'chad byed cing / /lus 'phags jo bo spyod las lhung ba'i bzhin du ni/ /de phyir 'di yis bdag gi yul ni de ring stongs//de phyir ji srid 'dis ni spyan mig ma thob cing / /ji srid bdag gi spyod yul dag na gnas pa nyid/ /chu bo shin tu 'phel ba'i shugs kyis zam pa bzhin/ /de srid 'di yi brtul zhugs 'joms su 'gro ba'o/ /de nas me tog las byas gzhu ni bzung nas dang //kun du rmongs par byed pa'i mda' lnga rnams bzung nas/ /skye dgu rnams kyi yid kyi rang gnas mi byed pa/ /de ni bur bcas a shwad tha yi rtsa bar song / /de nas srid pa 'khor ba'i pha rol rgal 'dod pa'i/ /thub pa rab tu zhi bar gdan la bzhugs pa la/ /lag pa g.yas pa mtshon cha'i rtse mor bdungs nas ni//mda' yis rol zhing bdud kyis 'di ni smras pa'o/ /kye ho rgyal rigs 'chi bas 'jigs pa longs mdzod cig /thar pa'i chos ni spongs la 'jig rten mdzod/ /mda' dang mchod sbyin rnams kyis 'jig rten pham byas nas/ /'jig rten dag nas dbang po'i go 'phang 'thob par mdzod//gang zhig mi dbang snga ma rnams kyis 'drims pa ste/ /nges par 'byung la 'di ni grags pa'i lam yin zhing / /rgyal po'i drang srong rnams kyang rigs su skyes pa yis/ /slong mo rab thob la ni 'di ni bsngags ma yin/ /ji srid nges pa'i bdag nyid de ring mi ldang ba//dam bca' rnam par ma dor brtan par gyur cig dang / /gang zhig nya dgra sU rwa ka la rnam spangs pa'i/ /de nyid bdag gis mda' 'di 'bar bar byas pa'o/ /'dis ni cung zhig reg pa tsam gyis e la de/ /zla ba'i tsha bo yin yang sems med gyur pa ste//zhi ba'i lus zhes bya ba de yang der 'gyur nas/ /zad pa'i dus su kye ma mi gzhan smos ci dgos/ /de phyir skyen par longs la 'du shes thob gyis dang / /yang yang shin tu ro myang mda' ni mnan pa ste/ /dga' ma'i byar 'os dga' zhing dges pa rnams la ni/ /gang zhig ngang pa rnams la bzhin du mi 'phen no//gang tshe de skad brjod kyang chags pa dang bral ba'i/ /shAkya thub pas gdan ni bshig pa ma yin nyid/ /de nas 'di la bdud kyis mda' ni 'phangs pa ste/ /bu mo rnams dang bu rnams bdun nas byas nas so/ /der ni de yis mda' ni rab tu 'phangs na yang / / chags par byas pa med cing brtan las g.yos pa med/ /de ltar de mthong gyur nas bdud ni yi mug cing / /bsam mno yongs su ldan pa dal bus smras par 'gyur/ /ri dbang bu mo la dmigs gang gis phug pa yi/ /bde 'byung lha yang yongs su g.yos par gyur pa ste//'dis ni mda' de nyid la sems bar mi byed pa/ /sems med yin nam mda' 'di de ma yin nam ci/ /de phyir me tog mda' 'di 'os pa ma yin zhing / /dga' ba ma yin dga' bar sbyor ba 'os ma yin/ /'di ni zhi ba ma yin 'byung bo'i tshogs rnams kyis/ /'jigs dang bsdigs dang rdeg pa rnams ni 'os pa'o//de nas bdud kyis rang gi sde ni dran pa ste/ /shAkya thub pa'i bgegs ni mnyam por byed 'dod pa/ /ral gri be con shing rtse ljon shing rtse gsum mdung lag rnams/ /sna tshogs bsam pa dang ldan rjes su 'brangs rnams 'ongs/ /phag dang nya dang bong bu rnga mo'i gdong can rnams//stag dang dom dang seng ge gnyis 'thung gdong can rnams/ /mig gcig kha ni du ma mgo bo gsum ldan rnams/ /gsus pa 'phyang ba rnams dang gsus pa che ba rnams/ /brla rnams pus mo'i bar du bum pa'i bus mo rnams/ /mche ba'i mtshon cha rnams dang sen mo'i mtshon cha rnams//keng rus gdong can rnams dang gzugs ni mang po rnams/ /gdong phyed gzhom pa rnams dang gdong ni chen po rnams/ /thal skya rnams dang thig le dmar po sna tshogs rnams/ /kha T+wAM ga rnams dang ni spre'u ltar ngud sgra rnams/ / 'phongs 'phyang rnams dang glang bo'i rna ba'i rna ba rnams/ /pags pa'i gos can rnams dang gos dang bral ba rnams/ /gdong phyed dkar po rnams dang lus phyed ljang gu rnams/ /zangs mdog dung mdog rnams dang ljang gu dkar po rnams/ /sbrul gyi sham thabs rnams dang de bzhin lag pa rnams//rab tu sgra sgrogs dril bu 'khrugs pa'i ske rags rnams/ /ta la'i tshad mnyam rnams dang mdung rnams bzung ba rnams/ /byis pa'i tshad mnyam rnams dang mche ba gtsigs pa rnams/ /lug gi gdong can rnams dang bya yi mig can rnams/ /byi la'i gdong can rnams dang mi yi lus can rnams//skra bkram rnams dang ral pa can dang byi bo rnams/ /gos dmar rnams dang rnam par 'khrugs pas dkris pa rnams/ /rab dga'i gdong can rnams dang gnyer ma'i gdong can rnams/ /gzi brjid 'phrog pa rnams dang yid ni 'phrog pa rnams/ /kha cig dag ni 'pho zhing drag tu phan tshun du//mchan khung 'khyud cing de bzhin gzhan rnams mchongs/ /mkha' la 'gro ba rnams ni kha cig rtse ba ste/ /kha cig shing gi rtse mo rnams la zhon pa'o/ /kha cig rtse gsum bskor zhing gar ni byed pa ste/ /kha cig dbyug pa gdengs shing thog sgra sgrogs pa'o/ /kha cig dga' bas khyu mchog bzhin du skad 'don zhing //kha cig lus 'phos rnams las rab tu 'bar bar gyur/ /'dzin par 'dod pa rnams dang 'joms par 'dod pa rnams/ /jo bo'i bka' ni rab tu skyong bar byed pa ste/ /rnam pa de ltar 'byung po'i tshogs rnams kun nas ni/ /byang chub sems dpa' de la yongs su bskor nas gnas//mtshan mo snga ma la ni shAkya'i khyu mchog dang / /bdud kyi 'thab mo dus de rab tu mthong nas ni/ /nam mkha' gsal ba ma yin sa ni g.yos gyur la/ /phyogs rnams sgra dang bcas pa rab tu 'bar bar gyur/ /drag po'i shugs can rlung ni kun du g.yos gyur la//skar ma rnams ni mi snang zla ba gsal ma gyur/ /slar yang mtshan mor mun pa rnam par rgyas gyur la/ /rgya mtsho rnams ni thams cad kun du g.yos par gyur/ /sa gzhi 'dzin cing chos dag 'dzin pa'i klu rnams ni/ /thub pa chen po'i bgegs la bzod pa ma yin zhing / /bdud las khros pas rnam par log pa'i mig can rnams//rngam pa bton zhing lus ni rnam par 'gyur ba'o/ /gtsang mar lhag par gnas pa'i lha yi drang srong ni/ /dam chos bsgrub pa'i don du mngon par zhugs pa rnams/ /bdud las yid kyis rjes su brtse ba byas pa ste/ /chags dang bral ba las kyang khros bar ma gyur to//'tshe ba'i bdag nyid bdud kyi dpung ni de yis ni/ /byang chub rtsa ba de ni khyab pa mthong nas ni/ /chos kyi bdag nyid 'jig rten thar pa 'dod rnams kyis/ /nam mkha' dag la hA hA'i sgra dag byas par gyur/ /chos kyi cho ga de ni nye bar nyams byed pa/ /bdud dpung gnas pa drang srong chen pos gzigs nas ni//ba lang rnams kyi dbus su seng ge gnas pa bzhin/ /g.yo 'gul med cing rnam par 'gyur bar yang ma gyur/ /de nas de yi 'jigs pa'i ched du bdud kyis ni/ /'byung po'i sde ni drag po rnams la bka' stsal zhing / / de nas 'di yi sde des rang rang mthu rnams kyis/ /de yi bstan pa dbye phyir blo gros byas pa'o/ /kha cig lce rnams g.yo zhing du mar rnam 'phyang zhing / /mche ba'i rtse mo rnams rno mig rnams ljang ser zlum/ /kha rnams gdangs shing phur bu'i rna ba rnams bstan zhing / /kun nas skrag par byed pa snyam du gnas zhes grag /des ni gzugs dang bsam pa dag gis mi bzad pa/ /rnam pa de dag nyid du gnas pa de rnams las/ /rtsed mo byed pa'i byis pa rgyags pa rnams las ni/ /drang srong chen po zug med skyo bar ma gyur to/ /de nas kha cig khros pas lta byed rnam 'gyur zhing / /'di la dbyug pa rdeg par 'bad pa bya ba ste//sngon tshe grong khyer 'joms pa'i rdo rje dang bcas ltar/ /de nas 'di yi dbyug pa dang bcas lag pa rengs/ /kha cig rdo dang shing rnams gyen du 'phyar ba ni/ /thub pa la ni rnam par 'phen par ma nus te/ /'bigs byed ri brags rnams ni rdo rjes bcom pa bzhin//shing rnams dang bcas rdo rnams bcas pa de bzhin lhung / /kha cig mkha' la gyen du 'phur bas rdo rnams dang / /dgra sta rnams dang shing rnams rnam par 'phangs pa rnams/ /kha dog gcig min mtshams sprin rkang pa rnams bzhin du/ /mngon par lhung ba ma yin nam mkhar gnas par gyur//gzhan ni de yi steng du 'bar ba'i khyu mchog gis/ /glang bu ri bo tsam pa'i rwa can 'phangs pa ste/ /de ni 'phangs pa tsam du nam mkhar gnas pa nyid/ /de yi mthu las rnam pa brgyar ni gas par gyur/ /'jig rten 'jig tshe lhun po rab tu 'bar ba yis/ /gser gyi bya skyibs rnams kyi phye ma rnam bzhin du//kha cig nyi ma shar ba bzhin du 'bar ba yi/ /me mdag char pa chen po mkha' las phab par gyur/ /byang chub shing gi rtsa bar rab tu rnam 'phangs pa'i/ /me stag 'phro ba dang bcas me mdag char pa de/ /drang srong dam pa mchog gis byams pa'i gnas pa las/ / ut+pal dmar po'i 'dab ma'i char par gyur pa'o/ /lus dang sems la rnam par gnod par bya ba'i phyir/ /rnam pa de ltar phab pa de dang de rnams kyis/ /rang gi nges pa'i gnyen 'dun nye bar 'khyud nas bzhin/ /shAkya thub pa gdan las g.yos par ma gyur to/ /de nas gzhan rnams 'khogs pa'i ljon shing rnams nas ltar//kha rnams las ni sbrul rnams rnam par skyugs pa ste/ /sngags kyis bcings bzhin de rnams de yi drung du ni/ /song ba ma yin dbugs min g.yos par ma gyur to/ /gzhan rnams glog dang bcas shing thog dang bcas pa yis/ /chu 'dzin chen bo gtum pa'i dbyangs ldan rnams gyur nas//ljon shing de la rdo ba'i char pa phab pa ste/ /de ni me tog char pa mdzes par gyur pa'o/ /dbang phyug ma yin sron par dkar ba'i mi yi ni/ /snying la yongs su g.yos pa'i khro ba bzhin du ni/ /de nas gzhan gyis gzhu la mda' dag bkang ba ni/ /de nyid du ni 'bar zhing lhung bar ma gyur to//yul la rab tu 'jug la 'khor ba la 'jigs pa/ /yongs su rtog pa po yi dbang po lnga rnams bzhin/ /gzhan rnams dag gis mda' lnga rab tu 'phangs pa rnams/ /nam mkhar gnas bzhin thub pa la ni ma lhung ngo / /gzhan ni brdeg par 'dod pas khros shing rab bskor zhing //dbyug pa bzung nas drang srong chen po'i mngon du phyogs/ /don med byed pa'i nyes pa rnams la 'jig rten bzhin/ /des ni 'dod pa ma thob dbang med 'gyel bar gyur/ /bud med sprin pa nag mo lag na thod pa can/ /drang srong chen po'i thugs ni rmongs par byed ces grag /g.yo ba'i bdag nyid can gyi blo ni lung la bzhin//der ni nges pa med par bskor zhing gnas ma yin/ /kha cig mig ni rab tu 'bar bar byas nas ni/ /mig gi me yis sbrul gyi dug bzhin bsreg 'dod pas/ /'dod pa'i bdag nyid can gyis nyer gnas dpal bzhin du/ /der ni drang srong bzhugs pa mthong bar ma gyur to//ye shes ting 'dzin dag gis 'gro bya nyes legs chos/ /lus kyi ngal ba rnams kyis 'thob par 'dod pa bzhin/ /de bzhin gzhan ni rdo ba lci mo bteg pa ni/ /rab tu 'bad pa rnam bcom don med ngal bar gyur/ /de bzhin gzhan rnams dred dang seng ge'i rnam pa yis/ / chen po'i sgra rnams mthon po rab tu sgrogs pa ste/ /rdo rjes bsnun pa'i nam mkha' 'gas pa zhes snyam nas/ /sems can rnams ni gang gis kun nas 'khums par gyur/ /ri dgas glang po rnams ni nyam thag skad 'don zhing / /rnam par 'bros shing thim pa nyid du gyur pa ste//de yi mtshan mor phyogs rnams las ni nyin mo bzhin/ /nyam thag bya rnams skad 'don yongs su babs par gyur/ /rnam pa de ltar de rnams kyi sgra de rnams kyis/ /'byung po thams cad rnams su g.yos pa yin na yang / /khab rnams dag gi sgra rnams dag gis mkha' lding ltar//thub pa 'jigs pa ma yin 'khums par ma gyur to/ /'jigs pa 'dron pa yongs su bskor ba'i tshogs rnams las/ /ji lta ji ltar thub pa'i 'jigs pa ma yin pa/ /de lta de ltar chos 'dzin rnams kyi dgra bo yi/ /bdud rnams mya ngan las dang khros nas byer ba'o/ /de nas 'byung po cung zhig gzugs ni mtho ba ma yin zhing //khyad par 'phags par gyur pa nam mkhar gnas nyid kyis/ /drang srong la gnod dgra ma yin la khros mthong nas/ /bdud lha chen po'i dbyangs kyis smras par gyur pa'o/ /don med ngal bar byed par 'os pa ma yin bdud/ / 'tshe ba'i bdag nyid spongs la bde bar song mdzod dang / /ri bo chen po lhun po rnams kyi sa bzhin du/ /khyod kyis bskyod cing bsgul bar nus pa ma yin no/ /sa yi brtan pa nyid dang chu yi gsher ba nyid/ /me yi dro ba nyid ni rab tu 'dor ba yang / /bskal pa du mar bsgrub pa'i bsod nams las mnga' ba//'dis ni nan tan nges par 'dor ba ma yin no/ /'dis ni nges pa gang dang pha rol gnon pa dang / /gzi brjid gang dang brtse ba skye dgu rnams la brten/ /'od zer stong gis mun rnams ma bcom gnas bzhin du/ /'di ni de nyid ma thob nas ni ldang ma yin/ /shing la bsrubs nas me ni rnyed par 'gyur ba ste//sa la brkos na chu yang 'thob par 'gyur ba nyid/ /rigs pa dang ni ldan pa'i thams cad byas pa ste/ /brtson 'grus ldan pa'i bsgrub bya ma yin ci yang med/ /de phyir chags sogs nad rnams dag la gnas pa yi/ /'jig rten nyam thag pa la thugs rje mnga' ba ni/ / ye shes dman gyi don du yongs su ngal ba po/ /sman pa chen po 'di la bgegs 'os ma yin no/ /lam ngan mang po rnams kyis 'jig rten stor ba la/ /gang zhig zhi bas dam pa'i lam ni rjes tshol ba/ /chud zos pa la legs par ston byed ded dpon bzhin/ /ston mdzad de ni bskyod par rigs pa ma yin no//mun pa chen po sems can chud zos rnams la ni/ /ye shes sgron ma rab tu gsal bar mdzad pa 'di/ /mun pa la ni rab tu 'bar ba'i sgron ma yin/ /'phags pa'i mya ngan 'da' bar byed par 'os ma yin/ /'khor ba'i rnam 'gyur chu bo chen por 'gro ba ni/ /pha rol ma thob par ni bying bar gzigs nas ni//gang gis de ni sgrol bar byed la rab zhugs te/ /de la sdig pa 'phags pa su yis sems par byed/ /bzod pa'i chu rgyus bstan pa'i rtsa ba brtan pa ste/ /spyod pa'i me tog blo dang dran pa'i yal ga can/ /ye shes ljon shing chos kyi 'bras bu ster ba po//'phel bzhin pa ni zlog par 'os pa ma yin no/ /gang gi snying la rmongs pa'i zhags pa sra rnams kyis/ /bcings pa'i skye dgu rnams kyi grol phyir blo mnga' zhing / /'gro ba bcings pa thar pa'i ched du 'o brgyal ba/ /de la brdegs pa khyod kyis 'thad pa ma yin no/ /byang chub ched du las gang dag na mdzad pa rnams//de rnams kyis ni nges par de ring dus yin la/ /ji ltar thub pa snga ma rnams ni de bzhin du/ /gnas der de bzhin 'di ni nye bar bzhugs pa'o/ /dbyig 'dzin sa gzhi yi ni lte ba 'di yin zhing / /snying po dam pa mtha' dag dang ni ldan pa nyid/ /gang zhig 'di yis ting nge 'dzin gyi shugs bzod pa'i//sa yi phyogs de 'di las gzhan pa yod ma yin/ /de phyir khro bar ma byed zhi bar nyer song la/ /bdud ni khyod kyi drags pas nga rgyal ma gyur cig /dpal ni mi brtan blo gtad par ni nus min zhing / /go 'phang g.yo lnga rgyags par mngon par nyer 'gro zhing //de nas de yi tshig de yang dag thos nas dang / /thub pa chen po'i g.yo ba med pa nyid mthong nas/ /gang gis mda' yis 'gro ba'i snying la rdeg byed pa'i/ /bdud ni 'bad pa bcom zhing yid mi bde bar song / /dga' ba med cing 'bras med ngal ba byas pa rnams/ /pha bong rnams ni khyu mchog ljon shing rnams gtor te//dgrar gyur dgra bo'i dpung ni gtso bo bsad pa ltar/ /de nas 'di yi dpung ni phyogs phyogs bros pa'o/ /me tog tog can 'khor dang bcas pa bros shing nges par 'pham pa ni/ /drang srong chen po mun pa 'pham zhing rdul dang bral ba rgyal ba na//rgod pa dang bcas lang tsho ma bzhin zla ba dang bcas mkha' gsal zhing / /chu yi snying po can gyi dri zhim me tog char pa bab par gyur pa'o/ /de ltar sdig pa can ni nges par pham pa ni/ /de tshe phyogs ni rab snang mtshan mor byed pa mdzes/ /mkha' las me tog char rnams sa la bab pa ste//lang tsho ma bzhin ngal ba med par mtshan mo gsal/ /sangs rgyas kyi spyod pa zhes bya ba'i snyan dngags chen po las/ bdud las rnam par rgyal ba'i le'u ste bcu gsum pa'o// //de nas brtan dang zhi ba yis/ /bdud kyi stobs ni pham mdzad nas/ / don dam rnam par mkhyen bzhed pa/ /bsam gtan mkhas de bsam gtan mdzad/ /bsam gtan cho ga thams cad la/ /dbang phyug dam pa rab brnyes nas/ /sngon gyi skye ba rim pa ni/ /dang po'i thun la dran pa'o/ /che ge mo bdag ming 'di ni/ /de nas 'phos te 'dir 'ongs pa'o/ /zhes ni skye ba stong phrag rnams//rjes su myong ba bzhin du dran/ /'thad pa de dang de rnams su/ /skye bar 'chi ba dran nas ni/ /de nas sems can la thugs rjes/ /thugs rje'i bdag nyid can gyis mdzad/ /rang gi skye bo bor nas ni/ /slar yang gzhan du bya ba rnams/ /nges par 'jig rten mgon med 'di//'khor lo bzhin du yongs su 'khor/ /de ltar nges pa'i bdag nyid ni/ /de yi dran par gyur pa ste/ /chu shing snying po snying po med/ /'khor ba de ltar nges par ro/ /thun ni gnyis pa byung ba na/ /gnyis med pha rol gnon pa de/ /mig dang ldan pa kun gyi mchog /lha yi spyan ni thob par gyur//de nas des ni lha yi spyan/ /yongs su dag pa de yis ni/ /me long dri ma med pa ltar/ /'jig rten mtha' dag la gzigs so/ /mchog dang mchog min las rnams kyis/ /sems can rnams kyi 'chi 'pho dang / /skye ba gzigs pa de yis ni/ /thugs rje'i bdag nyid 'phel bar gyur//'di rnams sdig pa'i las can rnams/ /srog chags rnams ni ngan 'gror 'gro/ /'di gzhan dge ba'i las can rnams/ /mtho ris su ni rab gnas so/ /shin tu mi bzad dmyal ba ru/ /rab tu 'jigs par gyur pa rnams/ /'di rnams sdug bsngal sna tshogs kyis//kye ma bkren pas gtser par byed/ /kha cig me yi kha dog gi /lcags khu khol ma 'thung bar byed/ /lcags kyi ka ba tshan mo la/ /gzhan rnams cho nges 'debs shing 'dzeg /lcags zangs rnams su khas bub rnams/ /kha cig thug pa bzhin du 'tshed/ /me mdag phung po 'bar rnams su//kha cig snying rje bar sreg go/ /kha cig lcags kyi mche rno can/ /mi bzad khyi rnams kyis za zhing / /kha cig ma rungs lcags mchu can/ /lcags 'dra'i bya rog rnams kyis za/ /kha cig gdung bas yongs ngal rnams/ /bsil ba'i grib ma mngon 'dod pas/ /ral gri'i lo ma'i nags sngon por//'di rnams bcings pa bzhin du zhugs/ /kha cig sta re rnams kyis ni/ /lag pa bteg rnams shing ltar 'gems/ /las rnams kyis bzung srog rnams ni/ /sdug bsngal na yang rnam mi smin/ /sdug bsngal zlog pa'i don ched du/ /bde ba yin zhes las gang byas//de yi 'bras de dbang med kyis/ /sdug bsngal kho na nyer longs spyod/ /bde don mi dge ba byas nas/ /gang de shin tu sdug bsngal rnams/ /de dag rnams kyi ro myang des/ /bde ba phra mo yang byed dam/ /sdig pa'i bdag nyid rgod rnams kyis/ /sdig pa'i las ni byas pa gang //de ni mngon du gyur pa'i tshe/ /cho nge rnams kyis rjes su myong / /gal te de ltar sdig las can/ /las kyi 'bras bu mthong ba ste/ /dmigs su mngon par bsnun pa bzhin/ /skyen par khrag ni skyugs pa nyid/ /lus kyi sdug bsngal rnams las dang / / dmyal ba'i rnams las sems ldan gyi/ /'phags min rnams dang ldan cig 'grogs/ /ngal ba mchog ni bdag gi lugs/ /gzhan 'di sems kyis rnam g.yo las/ /byung ba'i las rnams sna tshogs kyis/ /byol song skye gnas sna tshogs su/ /nye bar skyes rnams gdung ba can//sha lpags spu dang so yi phyir/ /chags pa las sam rgyags pa las/ /gnyen 'dun rnams kyis mthong na yang / /gang du snying rje bar gsod do/ /nus med ldan yang dbang med rnams/ /bkres skom ngal bas gtser ba rnams/ /lcags kyis bsnun pa'i dbyig can rnams//rta dang ba lang gyur rnams 'khol/ /stobs can rnams kyang stobs chung gi /glang por gyur pa rnams 'khol te/ /lcags kyus nyon mongs mgo bo rnams/ /rkang pa'i rting pa rnams kyis btags/ /phan tshun rnam par rtsod las dang / / gzhan gyi dbang du gyur nyid kyis/ /sdug bsngal gzhan rnams la yod kyang / /gang la sdug bsngal khyad par ldan/ /phan tshun du ni rab phrad nas/ /ma gnas skam gnas rnams kyis dang / /chur gnas chur gnas rnams kyis dang / /mkhar gnas mkhar gnas rnams kyis 'joms//ser snas non pa'i sems ldan rnams/ /yi dgas 'jig rten snang med du/ /skyes pa 'di rnams de bzhin du/ /bkres pa 'bras bu la longs spyod/ /khab mig lta bu'i kha rnams dang / /ri bo lta bu'i lto ba rnams/ /bkres skom gyis bskyed sdug bsngal gyis/ / sdug bsngal skal can rnams gtser to/ /ser sna'i 'bras bu 'di 'dra ba/ /skyes bu gal te shes na ni/ /lus kyi cha shas rnams kyang ni/ /zhi ba bzhin du kun nas gtong / /rang gi las rnams kyis bzung zhing / /sred pas shin tu non pa rnams/ /bor ba'i mi gtsang ba rnams kyang //longs spyod par ni 'dis mi rnyed/ /'di gzhan dmyal ba dang mtshungs pa'i/ /mngal phyin mi gtsang khu ba ru/ /nye bar skyes rnams mi rnams su/ /'gro ba rnams ni sdug bsngal 'thob/ /de sngon skye ba tsam na yang / /lag pa rnon pos bzung ba rnams/ /ral gri rnams kyis gshegs pa ltar//gang du snying rje bar ni ngu / /byams dang bsrung dang skyong rnams kyi/ /gnyen 'dun rnams kyis 'bad nas sos/ /sdug bsngal las slar sdug bsngal drag /rang rang las kyis nyon mongs so/ /bya ba 'di dang bya ba 'di/ /zhes ni gang du lhag par la/ / sred dang yongs ldan byis rnams kyis/ /rgyun chad med par rjes su myong / /'di gzhan bsod nams las rnams kyis/ /mtho ris su ni skyes pa rnams/ /'dod chags me yis drag tu ni/ /me ltar rab tu sreg par byed/ /yul rnams kyis ni ngoms med rnams/ /gang las 'di rnams gzi bcom ste//phreng ba yongs rnyings zhags pa rnams/ /gyen du mig phyogs rnams lhung ngo / /gang du lha mo rnams kyis ni/ /sdug pa dbang med lhung ba la/ /snying la brtse ba ltos rnams kyis/ /lag pa rnams kyis gos rnams 'dzin/ /gang zhig sa la lhung ba bzhin//lus 'dud do shal g.yo rnams kyis/ /sdug rnams gzhal med khang rnams nas/ /snying rje dang bcas ltung ba lta/ /rnam pa sna tshogs rgyan phreng can/ /gzhan 'dis sdug bsngal lhung rnams la/ /gdung rnams brtse dang g.yo ba yi/ /lta byed rnams kyi rjes su 'gro//'dod pa can rnams lhung ba la/ /lag pa rnams kyis brang brdung zhing / /'khrugs chen gyi ltar nyam thag pa/ /lha mo'i tshogs rnams kyis bstan to/ /kyi hud shing rta sna tshogs rdzing / /kyi hud sdug pa gang na zhes/ /nyam thag pa rnams rnam zlos shing / /lha la gnas rnams sa la lhung //las mang rnams kyis thob pa yis/ /mtho ris mi brtan g.yo ba la/ /'bral bas byas pa'i sdug bsngal ni/ /gang du 'di 'dra thob par 'gyur/ /kye ma ded las khyad par du/ /'jig rten mdzad pa'i chos nyid de/ /'dod chags bral ba thob nas kyang //gzhan rnams lha nas nges par lhung / /'di ni rtag par gnas pa ste/ /zhes ni nges pa'i sems ldan rnams/ /'jig rten 'di yi rang bzhin ni/ /'di lta bur ni mthong ma yin/ /dmyal ba rnams su sdug bsngal drag /dud 'gro rnams su phan tshun za/ /bkres skom sdug bsngal yi dgas su//mi la tshol ba'i sdug bsngal lo/ /lha na sdug pa dang bral bas/ /skyed pa'i sdug bsngal phul byung ste/ /bskor ba gson pa'i 'jig rten gyis/ /gang na zhi ba nges par byed/ /'khor ba'i chu bo rten med du/ /'di ni 'chi bas bskor ba ste//tsam tsom du ni bskor ba yi/ /'gro bas gnas ni thob ma yin/ /de ltar des ni 'gro ba lnga/ /lha yi spyan gyis gzigs pa ste/ /chu shing gshags pa bzhin du ni/ /srid par snying po rnyed ma yin/ /de nas de yi mtshan mo'i thun/ /gsum pa nye bar gnas pa na//'jig rten 'di yi rang bzhin ni/ /bsam gtan rig pa mchog gis bsgoms/ /kye ma 'jig rten ngal thob gang / /yang dang yang du skye ba dang / /'khogs pa dang ni 'chi ba dang / /'pho ba dang ni skye ba nyid/ /yang na sdug bsngal che 'di las//chags las long min gyis bsgribs pa/ /skyes long shin tu dog sa nas/ /phyi rol 'gro ba shes ma yin/ /de ltar bsams pa de yis ni/ /thugs kyis rnam dpyod gyur pa ste/ /gang du gyur na nges sam zhes/ /rga bas 'chi ba mngon par song / /skye gnas nas de nyid bsgoms pa//de yis mngon par rtogs par gyur/ /rga dang 'chi ba dag gis ni/ /skye ba yod na rdzogs pa'o/ /mgo bo yod na mgo bo yi/ /nad 'di 'byung ba mthong ba ste/ /shing gi skye ba yod gyur na/ /'gyel ba 'byung bar 'gyur ba'o/ /de nas de yi slar gyur pa/ / skye ba 'di slar gang la zhes/ /de nas las srid las skye bar/ /skye ba yang dag mkhyen pa'o/ /des ni lha yi spyan gyis ni/ /las las 'jug par mkhyen pa ste/ /dbang phyug las min rang bzhin min/ /bdag las ma yin rgyu med min/ /ji ltar rig pa las gling bu/ /dang po'i tshigs ni bcad pa na//cho ga bzhin du kun myur 'gro/ /de ltar ye shes go rims so/ /de nas srid pa'i skye ba ni/ /mkhyen phyir thub pas blo gros mdzad/ /de nas srid pa'i skye ba des/ /nye bar len las byung bar mkhyen/ /tshul khrims brtul zhugs mchog 'dzin dang / /'dod blo bdag tu lta rnams kyis//bud shing rnams kyis me bzhin du/ /'di yis las ni nye bar len/ /gang gi rgyu las len pa zhes/ /de nas de yi gyur pa ste/ /de nas nye bar len pa'i rkyen/ /sred par des ni mkhyen pa'o/ /chung ngu'i me yis nags kyi me/ /rlung gis bud de bskyed pa bzhin//'dod sogs nyon mongs rgya chen rnams/ /sred pa yis ni skyed par byed/ /de nas de yis bsams pa ni/ /sred pa gang las byung zhes so/ /tshor ba'i rkyen gyis sred pa zhes/ /de nas rnam par nges pa mdzad/ /tshor bas mngon bcom skye dgu rnams/ /gnyen por byed la sred pa ste//skom pa med na chu la ni/ /kha cig mngon par dga' ba yin/ /de nas slar yang tshor ba yi/ /skye ba'i gnas ni gang zhes bsams/ /tshor ba tshor ba mthar byed kyis/ /reg pa'i rgyu can nyid du mkhyen/ /yul dang dbang po blo rnams kyis/ /'dus pa reg par brjod bya ste//gtsub shing las ni me bzhin du/ /gang las tshor ba skye ba'o/ /de nas reg pa rgyu yin zhes/ /de yis bsams par gyur pa'o/ /de nas skye mched drug gi ni/ /rgyu can nyid du des mkhyen to/ /long bas gzugs ni mi rig cing / /mig ni blo yis mi sbyor phyir/ /mig yod gyur na des sbyor te//de phyir dbang po yod na reg /de nas skye mched drug gis ni/ /skye ba mkhyen phyir blo gros mdzad/ /de nas de'i rgyu mid dang gzugs/ /rgyu la mkhas pas mkhyen pa'o/ /ji ltar myu gu yod pa las/ /lo ma sdong bu 'byung bar dran/ /de ltar ming dang gzugs yod na//skye mched drug ni 'byung ba'o/ /ming dang gzugs ni rgyu gang zhes/ /de yi de nas gyur de nas/ /de yi skye ba rnam shes su/ /ye shes pha rol son pas mkhyen/ /rnam par shes pa 'das pa na/ /ming dang gzugs ni rab gnas te/ /sa bon bskrun pa rdzogs pa na/ /myu gu rnam par 'dzin pa'o//de nas rnam par shes pa ni/ /gang las yin zhes bsams par gyur/ /ming dang gzugs la brten nas de/ /de nas de yi skye ba mkhyen/ /de nas rgyu yi go rims ni/ /mkhyen nas de yi blor gyur te/ /sems ni lugs 'byung bskor ba ste/ /gzhan du lugs las zlog par min//rnam par shes pa'i rkyen las ni/ /ming dang gzugs la brten nas ni/ /slar yang rnam par shes pa skye/ /ji ltar gru yis mi 'dren zhing / /de bzhin rnam par shes pa dang / /ming gzugs phan tshun gyi rgyu'o/ /ji ltar lcags ni 'bar ba yis/ /rtswa rnams 'bar bar byed na yang //'bar ba de yis de gdung ste/ /de bzhin phan tshun rgyu nyid do/ /de ltar rnam par shes pa las/ /ming gzugs 'byung ba mkhyen gyur pa/ /de nas dbang po 'byung 'gyur zhing / /dbang po las byung reg pa'o/ /reg pa las skyes tshor ba mkhyen//tshor ba las skyes sred pa'o/ /sred pa las skyes len pa'o/ /len pa las ni de bzhin srid/ /srid pa las ni skye ba dag /skye bas rga shi 'byung bar mkhyen/ /'gro ba dag ni rkyen rnams las/ /skyes zhes yang dag mkhyen pa'o/ /de nas 'di yi blo gros nges par song ba ni//skye ba zad las 'chi dang rga ba 'gags pa ste/ /srid pa nyams pa las kyang skye ba nyams pa nyid/ /len pa 'gags pa las ni srid pa rnam ldog cing / /de nas srid 'gags pa las de ni 'gag pa ste/ /tshor ba yod pa min na sred pa yod ma yin/ / reg las chud zos gyur na tshor ba yod min zhing / /skye mched 'jug pa med las reg pa zad pa'o/ /de bzhin ming dang gzugs ni yang dag 'gags pa las/ /skye mched drug po thams cad rnam par nyams par byed/ /rnam par shes pa 'gags las de dag 'gags pa ste//'du byed 'gags pa las kyang de ni 'gag pa'o/ /ma rig pa ni mtha' dag med las de bzhin du/ /'du byed 'gag par drang srong chen pos mkhyen pa ste/ /'di las mkhyen bya 'di ni yang dag mkhyen mdzad nas/ /sangs rgyas zhes ni 'jig rten na rab gnas par gyur//yan lag brgyad dang ldan pa rab tu shar ba yi/ /rtse mor myur 'gro dam pa'i lta ba'i lam gyis ni/ /srid rtse'i bar las mchog gyur bdag med rnam gzigs nas/ /bud shing tshig pa'i me bzhin zhi bar gshegs par gyur/ /de nas bdag nyid mdzad pa de yi gyur pa ni//mchog gi drang srong mchog dang mchog min mkhyen pa'i tshogs/ /gna' ma rnams kyis don dam rgyu las gshegs pa yi/ /snying po'i lam 'di bdag gis lhag par thob par gyur/ /thun ni bzhi pa'i skya rengs shar ba'i yud tsam na/ /rgyu dang mi rgyu'i 'byung po rnams ni zhi ba na//drang srong mchog gis 'gyur ba med pa'i go 'phang dang / /kun gyi mgon gyis thams cad mkhyen pa nyid brnyes so/ /de nyid 'di ni sangs rgyas nyid kyis mkhyen pa na/ /bud med chang gis myos bzhin sa ni g.yos gyur la/ /grub pa rnams kyis mngon gang phyogs ni rab snang ste//mkha' la rnga bo che rnams rab tu grag par gyur/ /dge ba'i rlung rnams rab tu zhi bar g.yos gyur zhing / /sprin med 'o ma rnams ni lha yis char phab ste/ /ljon shing rnams la dus min me tog 'bras bu rnams/ /mchod pa rab tu sbyor ba'i ched bzhin brul bar gyur//man dA ra ba'i me tog rnams dang pad+ma dang / /gser dang bai DUr+ya yi rang bzhin pad+ma ni/ /mkha' las bab pa rnams kyis shAkya thub pa'i sa/ /de tshe mtho ris bzhin du kun nas bkram par gyur/ /yud tsam de ni kha cig khro ba med gyur la/ /nad med gyur zhing mi dga' bar yang ma song ste//sdig pa bsnyen pa ma yin rgyags par ma byas shing / /grub pa brnyes pa bzhin du 'jig rten zhi bar gyur/ /thar pa 'dod pa'i lha yi tshogs rnams dga' ba ste/ /sems can 'og tu song ba rnams kyang dga' bar gyur/ /yon tan phyogs kyis 'phel bas chos ni rgyas pa ste//rdul dang mun pa dag las 'gro ba gyen du byung / /de yi las kyis ya mtshan dga' bas gang ba yi/ /bu ram shing pa'i rigs kyi mi skyong drang srong rnams/ /rgyal po'i drang srong rnams dang drang srong che rnams kyis/ /yang dag mchod rnams mkha' la gzhal med rnams su gnas//mthong min 'byung po'i tshogs kyis drang srong chen po yi/ /ston pa rnams ni mthon por 'thon zhing sgrogs pa ste/ /gson pa'i 'jig rten 'phel ba bzhin du dga' gyur zhing / /ltung ba mchog la bzhin du bdud ni yi mug cing / /de nas nad mi mnga' ba zhag bdun bdag nyid kyis//sems la gzigs shing spyan mi 'dzums par bzhugs pa ste/ /kho bos 'dir ni rnam par thar pa brnyes so zhes/ /thub pas yid la re ba yongs su rdzogs par gyur/ /de nas rkyen nyid thob pa 'di ni thub pa nyid/ /bdag med cho gar rnam par gzhag pas gsan nas ni//zhi phyir 'jig rten dag la mchog tu brtse bas so/ /sangs rgyas spyan gyis rnam par gzigs par gyur pa'o/ /lta ba ngan pas chud zos 'bad la 'khrugs pa yi/ /'gro ba rdul ni rgya chen dang ldan gzigs nas dang //rnam thar chos ni mchog tu phra pa nyid gzigs nas/ /g.yo ba med pa nyid phyir thugs ni mdzad par gyur/ /de nas sngon gyi dam bca' yang dag mkhyen gyur nas/ /zhi ba'i gdams pa la ni so sor nges par gshegs/ /de nas chen po'i rdul dang chung ngu'i rdul nyid dang //ldan pa'i skye bor yid ni rnam par dpyad pa'o/ /de nas zhi ba'i don du gdams pa'i ched du nges par ni/ /gzung ba'i bde bar gshegs pa'i thugs ni shes gyur nas/ /mngon par snang zhing 'gro la phan par 'dod pa can/ /mtho ris gnas pa'i gtso bo nyid ni nye bar 'ongs//sdig pa spangs shing don mdzad gdan la bzhugs pa po/ /mchog gi chos ni gzigs pa de la mchog gnyis so/ /mchog tu zhi bas rab tu bstod nas de gnyis kyis/ /'jig rten phan pa'i don du tshig 'di gsol ba'o/ /e ma 'gro ba 'di gang nor 'os 'di lta bu//skye dgu rnams la rjes su brtse mdzad khyed kyi thugs/ /'jig rten na yod skye bo rnam par bsre ma'i rgyu/ /chen po'i rdul dang nyung ngu'i rdul nyid ldan pa'o/ /thub pa srid pa'i mtsho las rang nyid rab rgal nas/ /'gro ba sdug bsngal bying ba rab tu drongs mdzod cig /legs pa'i dbang phyug gis ni phun sum tshogs pa thob nas bzhin/ /gzhan rnams la yang rang gi yon tan gyis sbyor mdzod/ /don mkhyen 'di na'i don dang pha rol du 'am gang / /skye bo kha cig 'di na bdag gi phan pa byed/ /gang zhig 'jig rten dge ba'i ched du rab zhugs de//mi yi 'jig rten dang ni mtho ris su rnyed dka'/ /de ltar drang srong che la tshig 'di gsol nas ni/ /lha na gnas pa de gnyis ji ltar 'ongs par gshegs/ /thub pa yis kyang de yi tshig de rab mnod nas/ /'gro ba rnam par thar phyir nges par rgyas par mdzad//de nas bsod snyoms dus su phyogs bzhir drang srong la/ /lha na gnas pas lhung bzed rnams ni phul ba ste/ /gau ta mas bzhi po de rnams rab bzhes nas/ /de yi chos kyi ched du gcig nyid mdzad pa'o/ /de nas de tshe don bcas rab song tshong dpon gnyis//mdza' bshes nyid kyis lha yis rab tu bskul ba dag /rgya chen thugs mnga' drang srong che la thog ma ru/ /dga' ba dang ldan phyag byas nas ni bsod snyoms phul/ /rtsibs 'phur dang ni rangs byed bu ste de gnyis ni/ /chos 'dzin nus pa'i blo gros thub pas gzigs pa ste//de gnyis lha na gshegs par thugs kyis mngon gzigs nas/ /dge slong lnga po rnams la thugs kyis gshegs pa'o/ /de nas zhi ba'i gdams pa las ni gau ta mas/ /nyi ma shar bas mun bzhin mun pa rnam 'joms phyir/ /bA rA Na sIs brgyan pa'i sna tshogs nags tshal can//'jigs byed shing rtas bsnyen pa'i grong khyer dge bar gshegs/ /de nas khyu mchog 'dra ba'i spyan mnga' glang chen myos pa'i 'gros ldan pa/ /'gro ba mngon par rnam par 'dus phyir kA shi sa la gshegs bzhed pa/ /glang chen bzhin du rang gi sku lus ma lus phyir la rab log nas//thub pas spyan mig mi 'dzums par ni byang chub shing gi rtsa bar gzigs/ /sangs rgyas kyi spyod pa zhes bya ba'i snyan dngags chen po las/ mngon par rdzogs par byang chub pa'i le'u ste bcu bzhi pa'o// //zhi zhing mdangs ldan mdzad pa kun nas brnyes pa de//gcig pur rab gshegs mang po dang ni thabs cig bzhin/ /lam na dge slong chos ldan kha cig gis mthong nas/ /ya mtshan dang bcas thal mor bcas pas 'di skad gsol/ /dbang po'i rta ni g.yo bar dbang po'i rta thul zhing / / sems can chags rnams ji ltar chags ma gyur/ /shin tu ro ldan gsar pa'i shes rab ro yis ni/ /ri bong gis mtshon dang mtshungs tshim par gyur pa rnams/ /brtan pa khyod kyi zhal ni ji ltar rab rgyas shing / /'dir ni dbang po rnams kyi dbang phyug mdzad pa ste/ /khyu mchog chen po'i spyan mnga' nges par don mdzad cing //khyod kyi bla ma su lags gang las grub pa gsungs/ /de rnams la des smras pa bdag la ston pa med/ /bdag la mchod bya med cing smad bya su yang med/ /mya ngan 'das pa thob cing gzhan rnams dang mi mnyam//bdag ni chos la rang byung du ni shes par mdzod/ /gang phyir gzhan rnams kyis ma rtogs pa'i rtogs bya ni/ /bdag gis mtha' dag rtogs pa de phyir sangs rgyas te/ /gang phyir bdag gi nyon mongs rnams ni dgra bzhin 'pham/ /de phyir zhi ba dag ni kun nas shes bar mdzod//sdug bsngal rnams kyis nyam thag grogs la phan don du/ /zhi ba kho bo 'di yang bA rA Na sIr 'gro/ /der ni 'chi med chos kyi rnga dag rdung ba ste/ /snyan grags bde ba'i phyir min nga rgyal phyir ma yin/ /rgal bas 'gro ba rnams ni rgal bar 'gyur bgyi zhing / / grol bas sems can rnams ni yongs su thar bar bgyi/ /de ltar gson pa'i 'jig rten nyam thag par mthong nas/ /sngon du bdag gi dam bca' 'di ni gyur pa'o/ /'di na kha cig nor ni thob nas bdag nyid ni/ /gcig tu nyid kyang 'dzin par byed pa ngo mtshar cing / /skye bo chen po ma btsums mig la gang gis kyang //khyad 'phags thob nas rnam par 'dzin pa de don yin/ /gang zhig skam la gnas pas mi ni chus khyer ba/ /'dren par 'dod min de ni legs pa'i gzugs ma yin/ /gang zhig gter ni thob nas skye bo dbul po la/ /nor gyi sbyor ba med pa de ni spyang po min//rang bzhin gnas pas nad kyis mngon par bcom pa la/ /lag tu song ba'i sman gyis gso bar rigs pa ste/ /de ltar lam ngan song ba'i ched du lam dag ni/ /nges par byad ba'i lam gyis bshad par 'thad pa yin/ /ji ltar sgron ma rab tu gsal bar byed pa ste//de yi rgyu can dmar por 'gro ba ma yin nyid/ /de bzhin sangs rgyas nyid kyis ye shes rab gsal bar/ /mdzad de de phyir chags par 'gro ba ma yin no/ /ji ltar shing rnams la ni me dag nges pa dang / /mkha' la rlung dang sa la chu ni nges pa ste/ /de bzhin gang yang rnams su thub pa rnams kyis ni//byang chub nges shing kA shi rnams dang chos smra des/ /de nas nye bar 'ongs nas a la la zhes pa/ /rnam par brjod nas ji ltar 'dod bzhin rab spangs nas/ /yang dang yang du ya mtshan mig ni g.yo ba yis/ /re 'dod skyes shing sangs rgyas la ni lta bzhin song //de nas thub pas rim gyis kA si'i grong khyer ni/ /nor gnas snying po dang ni rab mtshungs gzigs pa ste/ /grogs mo bzhin du 'khyud nas yang dag 'dus pa ni/ /skal ldan shing rta dang ni bA rA Na sI nyid/ /mthu dang gzi brjid dag gis mngon par mdzes pa des//khu byug rnams kyis sgra sgrogs shing gi tshogs ldan zhing / /drang srong chen pos bsnyen pa'i ri dgas nags nyid du/ /rnam par mdzes pas nyi ma bzhin du rab 'thob po/ /kauN+Di n+ya'i rigs dang de nas ming chen dang / /rlangs pa dang ni rta thul de bzhin bzang rgyal te/ /dge slong lnga yis de ni rgyang ring nas gzigs nas//phan tshun du ni tshig 'di smras par gyur pa'o/ /bde ba'i bdag nyid dge slong gau ta ma 'di/ /dka' thub de las phyir log mngon par 'ongs pa ste/ /mngon du 'gro bya ma yin nges par phyag 'os min/ /dam bca' bcom pa mchod par 'os pa ma yin no//de ni brgya la gal te sdod par 'dod gyur na/ /de nyid la ni gtam 'di rab tu gsol mdzod dang / /'gron po nye bar 'ongs pa gang dang su la ni/ /'phags pa rnams kyis mi byed par ni 'os ma yin/ /de ltar bya ba byas nas dge slong de rnams ni/ /nye bar gnas pa'i nye bar sangs rgyas gshegs pa ste//ji lta ji ltar de rnams la ni nye bar gshegs/ /de lta de ltar de rnams dam bca' nyams par gyur/ /de nas kha cig 'di yi na bza' blangs pa ste/ /de bzhin gzhan ni phyag 'tshal nas ni lhung bzed bzung / /kha cig 'di la 'os pa'i gdan ni phul ba ste//de bzhin gzhan gnyis zhabs bsil nye bar phul bu'o/ /de ltar rab byed mchod pa mang po ldan pa rnams/ /'di la thams cad kyis ni bla mar spyod pa byas/ /rigs su mngon brjod de rnams kyis kyang ma spangs shing / /de rnams la rjes brtse bcas bcom ldan gyis smras pa//mchod 'os dgra bcom la ni gus pa ma yin pas/ /sngar gyi spyod pas dge slong rnams kye ma smra shig /bstod dang smad pa nges par bdag gis mnyam pa ste/ /khyed rnams bsod nams min las rnam par bzlog par bgyi/ /sangs rgyas 'jig rten phan pa'i ched du sangs rgyas shing //'byung po kun la phan pas rab tu zhugs pa la/ /bla ma nye bar 'joms las ming gis gang smras de/ /ma rungs pa yi pha ma bzhin du chos 'chad do/ /de ltar drang srong chen po'i thugs rje'i bdag nyid can/ /smra ba rnams kyi mchog gis de skad gsungs pa ste//rmongs las snying po med pas chud zos de rnams kyis/ /gdong ni cung zad bzhad pa dang ldan rgol ba smras pa'o/ /gau ta ma re zhig dka' thub mchog dang ni/ /dam pa de yis de nyid rtogs pa ma yin te/ /don ni dga' bas bsgrub bya bde bas gnas pa'o/ / khyed kyis mthong zhes bya ba 'dir ni gtan tshigs gang / /gang tshe de ltar de bzhin gshegs pa'i de nyid la/ /de nas dge slong de rnams dad par gyur min te/ /byang chub pa yi lam ni de las gzhan du shes/ /de nas lam mkhyen pa yis lam ni bka' stsal pa/ /byis pa'i skye bo bdag nyid ngal bar ldan pa dang //dbang po'i spyod yul rnams la de bzhin chags pa ste/ /'chi ba med pa'i lung gis lam ma yin pa'i phyogs/ /skyon dang ldan pa gnyis po de la ltos mdzod cig /gdung bar mngon par brjod pa'i lus kyi ngal rnams kyis/ /yongs su 'khrugs shing rnam par gnod pa'i sems la ni//'jig rten tha snyad kyang ni brgya la shes min na/ /dbang po las 'das de nyid lam ni kye ma ci/ /ji ltar sgron mas mtshan mo'i mun pa nyams pa ru/ /'dir ni mngon par nyer 'gro chu rnams gtor bas min/ /de bzhin ye shes mi yis mi shes mun pa ni//nyams par sngon 'gro lus kyi ngal ba rnams kyis min/ /ji ltar me ni 'dod pas shing la 'bigs pa dang / /rnam par 'gems pas me ni thob pa ma yin la/ /de nyid mngon pa'i thabs las bsrubs pas thob pa ste/ /de bzhin sbyor las 'chi ba med thob ngal bas min//de ltar don med 'dod pa rnams la chags pa ni/ /rdul dang mun pa dag gis zil non sems ldan rnams/ /bstan bcos don la nus kyang grub pa thob min na/ /chags bral 'gog pa'i cho ga la ni sngon nyid do/ /ji ltar nad kyis mngon par bcom pa'i srog chags kyis//mi phan bza' ba za ba'i gso ba 'dir yod min/ /de bzhin mi shes nad kyis mngon par bcom pa yi/ /'dod pa rnams la chags pa'i zhi ba gang las so/ /ji ltar skam pa'i rten la gnas pa'i rlung gis ni/ /bus pa'i me yi zhi ba yod pa ma yin no/ / de bzhin 'dod pa'i rten la gnas pa'i chags pa yis/ /rjes su song ba'i sems kyi zhi ba yod ma yin/ /mtha' 'di gnyis po dag kyang rnam par dor byas nas/ /bdag gis lam gzhan dbu mas lhag par rtogs pa ste/ /shin tu sdug bsngal nye bar zhi ba'i 'dren pa po/ /bde ba dang ni dge ba nyid dang bral ba'o//yang dag lta ba'i nyi mas rab tu gsal byas shing / /rnam dag yang dag rtogs pa'i shing rtas drangs pa ste/ /yang dag brjod pa'i yang dag dag ni gtsug lag khang / /dge ba'i bya ba'i skyed tshal brgya phrag mngon par dga'/ /smad pa med pa'i 'tsho ba lo legs chen po ste//yang dag rtsol bas stobs rab rjes su 'gro ba can/ /kun du yang dag dran pa'i sbas pas sbas pa ste/ /ting 'dzin gzims mal dang ni gdan dang khyab pa yis/ /de ltar mchog gi yan lag brgyad 'dir 'di lam ste/ /'chi dang rga dang na ba rnams las 'dren pa po//gang la drangs nas bya ba thams cad byas pa ste/ /'di dang che ge mor ni slan chad 'gro ba med/ /'di ni sdug bsngal mtha' dag 'di ni mtshan ma ste/ /'di ni 'gog pa 'di yi lam ni 'di yin te/ /de ltar ma thos chos kyi cho ga sngar med pa'i/ /rnam par mthar phyin bdag gi spyan mig skye ba'o//skye dang rga dang na dang de nas rgud pa dang / /sdug pa dang bral mi sdug pa la sbyor ba dang / /'dod pa'i don ni rab tu 'thob pa med pa ste/ /rnam pa sna tshogs sdug bsngal 'di ni yongs su 'thob/ /'dod pa'i bdag can gyi 'am bdag rgyal can gyi 'am/ /lus can gyi 'am yang na lus can ma yin pa'i//gang zhig yon tan med pa gang la rab zhugs kyang / /mdor bsdus nas de sdug bsngal du ni shes par mdzod/ /de ltar 'bar ba zhi ba'i me ni chung na yang / /lhan cig skyes pa dro ba'i ngo bo spong min nyid/ /de bzhin bdag tu 'du shes zhi sogs kyis phra yang //sdug bsngal bdag nyid can zhes bdag gi shin tu nges/ /ji ltar sa chu sa bon dus rnams myu gu'i bzhin/ /'dod chags la sogs rnam pa sna tshogs skyon rnams dang / /skyon las rab tu skyes pa'i las rnams nyid dag ni/ /sdug bsngal dag gi rgyur ni nges par shes par mdzod//mtho ris su 'am 'og tu srid pa'i rgyun las ni/ /'dod chags la sogs skyon gyi tshogs rnams rgyu yin zhing / /dman dang 'bring dang mchog ste sna tshogs nyid kyi ni/ /de dang der ni las rnams dag ni rtsa ba'o/ /nyes pa zad las 'khor ba'i rgyun ni yod min te/ /las zad pa las sdug bsngal de ni yod ma yin//gang phyir don gang yong pa las ni kun 'byung ste/ /de phyir med pa las te slar yang 'byung ba med/ /gang du skye ba med cing rga med 'chi ba med/ /me med sa med chu med mkha' med rlung med la/ /thog ma bar dang mtha' med 'phags pa dbrog bya min/ / dge zhing 'gyur med 'gog pa de ni shes par mdzod/ /yan lag brgyad ldan gang zhig mngon brjod de lam ste/ /lhag par rtogs phyir 'di yi thabs de'i gzhan ma yin/ /lam 'di yin na ma mthong ba las 'jig rten rnams/ /de nyid dang ni nye du rnams ni yongs su 'khor/ /sdug bsngal yongs su shes par bya zhing rgyu 'di ni//spang bya 'gog pa yang ni dbang du bya ba'o/ /de bzhin lam 'di yang ni bsgom par bya ba ste/ /de ltar 'di ni bdag gi blo gros rab zhugs so/ /sdug bsngal 'di ni yongs shes rgyu ni spangs pa ste/ /de bzhin du ni 'gog pa mngon du byas pa'o/ /de bzhin du ni 'di yi lam 'di bsgoms pa ste//de ltar 'dir ni bdag gi spyan mig rab zhugs so/ /ji srid du ni yang dag 'phags pa'i bden pa ni/ /bzhi ba'i rkang pa 'di rnams mthong ba ma yin pa/ /de srid bdag 'dir grol ba med pa zhes brjod cing / /bdag nyid la ni don byas nyid du yang ma mthong //gang tshe 'phags pa'i bden pa rnams ni rtogs pa ste/ /rtogs byas kyang ni dor byar 'os pa byas pa'o/ /de tshe bdag 'dir rnam par grol zhes brjod pa ste/ /bdag nyid la ni don byas nyid du yang mthong ngo / /de ltar drang srong chen po thugs rje mnga' ba yis/ /'dir ni chos dag de skad mngon par gsungs pa na//kauN+Di n+ya'i rigs dang lha ni brgya phrag rnams/ /gtsang zhing rdul dang bral ba'i mig ni thob par gyur/ /bya ba thams cad nges par byas shing zhi ba de la ni/ /thams cad mkhyen pas khyu mchog bzhin du mthon po'i dbyangs kyis gsungs/ / khyod kyis shes shes bdag nyid chen po des ni tshig gsol pa/ /legs so khyod kyi blo gros mchog ni bdag gis shes pa'o/ /legs so bdag gis shes shes de nas des ni 'jig rten ni/ /kauN+Di n+yas de yi go 'phang rigs ni bzung ba ste/ /bla ma dam pa de bzhin gshegs pa'i slob ma rnams kyis ni//gtso bo nyid du chos la yang dag lhag par gshegs pa'o/ /sgra de sa la rgyu ba'i gnod sbyin rnams kyis thos nas ni/ /rnam par rgyas pa'i dbyangs 'di rab tu gsol bar gyur pa ste/ /'byung po rnams kyi 'chi med zhi ba'i ched du nges par ni/ / dam pa gzigs pas chos kyi 'khor lo bskor ba de legs so/ /tshul khrims rtsibs dang zhi dang dul ba'i mu khyud blo rnams yangs/ /dran pas blo gros brtan pa brtson 'grus lta ba ngo tsha'i gzer/ /zab pa'i phyir dang brdzun med phyir dang legs par bstan nyid phyir/ / 'jig rten gsum na brtan zhing bstan bcos gzhan rnams kyis mi ldog /sa 'dzin gnod sbyin rnams las sgra ni nye bar thob byas nas/ /mkha' la lha yi tshogs rnams kyis ni dbyangs byas shing / /de ltar thos nas mtho ris rim dang rim rnams kyis mthon por/ /tshangs pa'i 'jig rten bar du sgra yis nye bar 'dzegs pa'o//mtho ris dag na gnas pa'i bdag nyid ldan pa kha cig gis/ /drang srong che las 'jig rten gsum ni g.yo zhes thos nas ni/ /sna tshogs yul rnams la ni chags par gshegs pa ma yin zhing / /yang dag skyo las srid pa gsum na zhi ba nyid du gshegs//de ltar 'jig rten rnams kyi mchog tu zhi ba'i ched du ni/ /mtho ris dang ni sa na chos kyi 'khor lo bskor tsam na/ /sprin bral mkha' las me tog dang bcas chu yi char bab cing / /srid gsum gnas pa rnams kyis rnga bo che rnams mngon par brdungs//sangs rgyas kyi spyod pa zhes bya ba'i snyan dngags chen po las/ chos kyi 'khor lo bskor ba'i le'u ste bco lnga pa'o// //de nas thams cad mkhyen pa yis/ /rta thul la sogs dge slong rnams/ / rab snyoms sems ldan de rnams kun/ /thar pa'i chos la bkod pa'o/ /nyi ma dang ldan skar ma lngas/ /nam mkhar zla ba ldan pa bzhin/ /lnga sde pham pa'i lnga sde yis/ /kun nas bskor ba de mdzes so/ /de nas de tshe kha cig ni/ /mo rnams glos phab nyal mthong nas//grags pa zhes bya chen po'i bu/ /yang dag skyo bar nye bar song / /'di kun nye bar mdzes pa ste/ /zhes ni tshig dang brjod bzhin du/ /dpal ldan mchog gi rgyan ldan pa/ /sangs rgyas ga la ba der song / /sems dang nyon mongs mkhyen pas de/ /gzigs nas de bzhin gshegs pas gsungs//mya ngan 'das la nyer 'tshe med/ /tshur shog dge ba thob par gyis/ /de ltar rnam rgyas grags pa'i gsung / /'di ni thos nas tsha ba yis/ /nyam thag chu la 'dzul nas dang / /mchog tu tshim pa nye bar 'ong / /sngon gyi rgyu yi stobs brten nas//de nas lus de nyid bzung ste/ /lus kyis dang ni sems kyis ni/ /dgra bcom nyid ni nye bar thob/ /ston ka'i chu yis bkrus pa yi/ /gos la tshon ni bkod pa bzhin/ /dkar po'i blo yis dam pa'i chos/ /thos nas rab tu rtogs pa nyid//cha lugs de yis ngo tsha bzhin/ /gnas pa de ni gzigs gyur na/ /don mdzad dam pa'i don mkhyen pa/ /smra ba rnams kyi mchog gis smras/ /rtags ni chos kyi rgyu min zhing / /'byung po rnams la snyoms pa ste/ /zhi zhing dul la dbang po dul/ /brgyan pa yin yang chos la spyod//gang zhig lus ni 'thon pa ste/ /sems kyis 'thon pa ma yin pa/ /nags na gnas kyang chags pa can/ /khyim na gnas shes de shes bya/ /gang zhig sems ni 'thon pa ste/ /lus kyis 'thon pa ma yin pa/ /khyim na gnas kyang nga med pa//nags na gnas shes de shes bya/ /khyim na gnas par gyur pa'i lam/ /rab tu byung bar gyur pa'i yang / /gang gis bsgrub pa yod na ni/ /de yi thar pa mngon par brjod/ /ji ltar rgyal 'dod dgra sde la/ /rgyal phyir go cha 'dzin pa ste/ /de bzhin nyon mongs dgra de la//rgyal phyir rtags ni 'dren pa'o/ /de nas dge slong tshur shog ces/ /de bzhin gshegs pas de la gsungs/ /des ni dge slong rtags bzung ste/ /skad cig de nyid kyis grol to/ /de nas de yi rjes chags pas/ /de yi 'khor ni lnga bcu dang / /gsum rnams nyid dang gcig nyid dang //chos de rab tu thob par gyur/ /'dag chal gyis bsgos gos rnams ni/ /chu yis yang dag reg pa bzhin/ /sngon tshe bsgoms pa'i las can rnams/ /de rnams myur du dag par gyur/ /de nas de tshe dgra bcom slob ma yi/ /dang po don byas drug cu thams cad la//dgra bcom rnams kyis mngon mchod dgra bcom pas/ /ji ltar 'os par yang dag bka' stsal to/ /dge slong rnams kyis sdug bsngal rgal/ /rang gi bya ba legs chen byas/ /pha rol sdug bsngal rnams la yang / /rjes su 'dzin par byed pa'i rigs//de phyir re re thams cad kyis/ /sa 'dir yongs su gshegs mdzod la/ /nyam thag 'jig rten ched du chos/ /rjes su brtse bas bstan par bya/ /grub phyir rdzu 'phrul ldan pa'i sbun/ /'od srungs drang srong rnams 'dul phyir/ /rgyal po'i drang srong gis bsnyen pa'i/ /ga yar kho bo 'di yang 'gro//de nas de nyid mthong de rnams/ /de yi bka' las phyogs su song / /rtsod bral bde bar gshegs pa ni/ /drang srong che yang ga yar gshegs/ /de nas dus su der gshegs nas/ /chos kyi dgon par nye bar gshegs/ /dka' thub dngos su gnas pa bzhin//der ni 'od srungs gzigs pa'o/ /ri rnams dang ni nags rnams su/ /gnas rnams yod pa na yang de/ /rnam par 'dul bzhed stobs bcu bas/ /rab tu brten nas bslangs pa'o/ /de nas grub pa nyams tshad phyir/ /me khang lto 'phye ches bsnyen par//ma rungs gnas des 'di la byin/ /der gzims mtshan mor rang gnas shing / /ltos bral thub ba chen po la/ /mthong ba'i dug can khros pa yi/ /sprul des mthong nas dbugs phyung ngo / /de yi khro bas 'bar ba yi/ /me yi khang par gyur pa des/ /drang srong chen po'i sku lus la//'jigs pa bzhin du mes ma reg /dus mtha'i me nyer zhi ba na/ /tshangs pa bzhugs pa mdzes pa ltar/ /me yi khang par bsregs na yang / /gau ta ma rnam 'gyur med/ /gang tshe sangs rgyas der bzhugs tshe/ /gnod med g.yo ba med pa ste/ /de tshe klu de ya mtshan zhing //drang srong mchog la phyag 'tshal lo/ /ri dgas nags der skye bo yis/ /thub pa der bzhugs shes gyur nas/ /srugs pa 'o brgyal 'di 'dra ba'i/ /dge slong tshig ces rjes su brtse/ /de nas mtshan mo 'das pa na/ /rnam par 'dren pas 'od srungs la/ /sbrul ni zhi bas lhung bzed kyis//blangs nas de la bstan pa'o/ /de nas sangs rgyas che bdag nyid/ /thos nas de ni ya mtshan gyur/ /de lta na yang bdag nyid kyis/ /che zhing gong na med pa snyam/ /de nas dus su rab sbyar ba'i/ /sna tshogs rdzu 'phrul gzugs rnams kyis/ /de yi sems de mkhyen nyid las//zhi ldan thub pas thugs dgongs mdzad/ /ji ltar bdag las rdzu 'phrul gyis/ /sangs rgyas khyad par 'phags pa snyam/ /de yi chos ni rab sgrub phyir/ /de tshe nges ni nges par byas/ /kun nas slar log gnas pa yis/ /lteng rgyas 'od srungs mthong nas ni/ /slob ma rnams kyi tshogs rnams kyang //lnga brgyas de yi chos la bsnyen/ /der ni spun zla slob mar bcas/ /mthar phyin shun lpags spangs pa na/ /ga ya chu klung zhes byas kyang / /der song lam la bsnyen pa'o/ /de nas thub pas slob mar bcas/ /'od srungs gsum po de rnams la/ /sa 'dzin ga ya'i rtse mor ni//nges par mthar phyin gtam mdzad do/ /rnam par rtog pa'i skye gnas dang / /gti mug rnam bkram du ba can/ /chags sdang me yis 'gro ba ni/ /thams cad dbang med par bsreg go/ /de ltar nyon mongs mes tshig cing / /rab tu ma zhi mgon med can/ /rga na 'chi ba'i me rnams kyis//slar yang rgyun mi chad par sreg /rnam pa sna tshogs mes tshig pa'i/ /'gro ba skyabs med 'di mthong nas/ /yid bcas dbang po dang bcas pa'i/ /gzugs la blo ldan skyo ba ste/ /skyo ba las ni chags bral ro/ /chags bral las ni rnam grol zhing / /rnam grol de nas thams cad na//rnam par grol zhes shes pa'o/ /skye ba'i rgyun ni yongs 'dzad cing / /tshangs pa'i spyod pa 'dir gnas la/ /byed pa thams cad byas pa ste/ /sred pa gzhan ni yod ma yin/ /bcom ldan gyi gsung 'di thos nas/ /dge slong stong phrag dag gi sems/ /len pa med nas zag pa las/ / de ma thag tu rnam par grol/ /sbyin pa tshul khrims dul rnams kyis/ /chos ni yongs su yongs bskor bzhin/ /de nas shes rab rgya che ba'i/ /'od srungs gsum gyis sangs rgyas mdzes/ /chos don 'dod pa dang bral ba'i/ /sems can ngan pa'i srog bzhin du/ /bgres mchog de rnams kyis bor ba'i//dka' thub nags de mdzes ma gyur/ /de nas de rnams kyis yongs bskor/ /thub pa rgyal po'i khab tu gshegs/ /ma ga d+hA yi mi dbang phyir/ /sngon gyi dam bca' dran pa'o/ /de nas 'od ma'i tshal yul ni/ /de bzhin gshegs pas rab tu thob/ /blon po rnams ni rjes 'gro bas/ / thos nas rgyas po sngon du song / /de nas rang gi skal mtshungs pa'i/ /rkang pa bzhon pas skye bo ni/ /ya mtshan gyis ni rnam yangs mig /ri yi lam nas phyi rol byung / /ma ga d+hA yi mi dbang gis/ /thub mchog rgyang ma nas mthong nas/ /skyen pa dang bcas mchod pa'i phyir/ /shing rta las ni sa la babs//des ni rnga yab rlung yab dang / /rjes su 'brang ba rnam spangs nas/ /tshangs pa la ni dbang pos bzhin/ /thub pa rgyal po sngon du song / /cod pan rab g.yo mgo bo yis/ /drang srong mchog la phyag 'tshal nas/ /sa yi logs la rtswa 'jam la/ /mngon par rjes gnang bsdad pa'o//der mi rnams kyis bsams par gyur/ /e ma shAkya thub pa'i stobs/ /'od srungs bcom ldan drang srong ni/ /'di yi slob ma nyid du song / /de nas de'i sems sangs rgyas kyis/ /mkhyen nas 'od srungs la smras pa/ /'od srungs yon tan gang mthong nas/ / khyed kyis me ni spangs pa'o/ /chu sbyin chen po'i dbyangs kyis ni/ /bla mas de ltar de bskul te/ /mthon pos skye bo kun khyab par/ /thal mo sbyar zhing rnam par gsol/ /gang phyir mchod dang sbyin sreg gi/ /'bras bu yongs su 'khor ba ste/ /sems nad sna tshogs dang ldan te/ /de phyir me rnams bdag gis spangs//gang phyir yul la skom pa yis/ /bzlas dang sbyin sreg la sogs 'jug /yul rnams dag gis skom pa med/ /de phyir me rnams bdag gis spangs/ /gang phyir bzlas nas bsregs nas kyang / /skye ba la ni thar min zhing / /skye ba yi ni sdug bsngal che/ /de phyir me rnams bdag gis spangs//gang phyir mchod sbyin dka' thub kyis/ /dge legs yin zhes yid gyur pa/ /de ni brdzun pa nyid yin te/ /de phyir me rnams bdag gis spangs/ /gang phyir skye 'chi las grol ba/ /'gyur med go 'phang dge bar ni/ /brjod pa bdag gis shes pa ste/ /de phyir me rnams bdag gis spangs/ /de ltar de'i tshig dang skyed cing //don dang ldan pas gsan gyur nas/ /'dul ba'i slob dpon gau ta mas/ /dul ba'i 'od srungs la gsungs so/ /skal chen khyod ni legs par 'ongs/ /'di ni legs byas byas min min/ /gang khyod tha dad chos rnams su/ /dge legs gang de nye bar thob/ /de phyir re zhig 'khor rnams ni//rnam rgyas yang dag 'phel ba bzhin/ /sna tshogs sdug bsngal ston bzhin du/ /yid ni yang dag skyo bar gyis/ /de nas mchog ces smras nas ni/ /bdag la bdag ni yongs bsdus nas/ /mkha' 'gro'i bya ltar 'od srungs ni/ /rlung gi lam la 'phur ba'o/ /de mkhar sdong dum bzhin gnas shing //sa la bzhin du rnam par rgyu/ /khri la bzhin du bzhugs pa dang / /rdzu 'phrul mkhas pa gzims pa'o/ /slar yang me bzhin 'bar ba dang / /slar yang sprin bzhin char 'bab ste/ /slar yang cig car shin tu ni/ /'bar ba dang ni 'bab pa'o/ /glog gi snang ba'i 'od ldan pa'i/ / rab 'bab chu gter sprin bzhin du/ /'bar ba dang ni 'bab pa yis/ /rgya cher rnam par gnon te mdzes/ /der ni mig rnams chags byas nas/ /ya mtshan gyen phyogs skye bo rnams/ /mchod mang po las phyag 'tshal zhing / /seng ge'i sgra ni sgrogs pa'o/ /de nas rdzu 'phrul bsdus nas des/ /bya ba byas pa'i slob ma ni//bdag gi ston pa bcom ldan zhes/ /thub la mgo bos phyag 'tshal lo/ /drang srong mchog la de bzhin du/ /phyag 'tshal 'od srungs rab mthong nas/ /bde bar gshegs la kun mkhyen zhes/ /ma ga d+hA pa rnam nges so/ /de nas zhing byas mkhyen nas ni/ /dge phyir dge legs la gnas pas//chos thos par ni 'dod pa yi/ /bzo sbyangs la ni bka' stsal ba/ /gzi chen ldan pa yid bcas shing / /dbang po thul ba dbang por bcas/ /sa yi bdag po gzugs nyid ni/ /skye ba dang ni rnam par nyams/ /yon tan 'phel phyir 'di yi ni/ /skye dang 'gag pa shes bya ste//shes nas de gnyis yang dag par/ /lus ni yang dag rig par mdzod/ /skye dang 'gag pa'i chos can du/ /dbang po dang bcas lus shes nas/ /bdag ldan bdag ces cung zhig ni/ /nye bar len min nyer 'gro min/ /lus dang dbang po blo rnams las/ /gzhan ni dmigs pa ma yin te/ / sdug bsngal 'di ni skye ba ste/ /sdug bsngal nyid ni 'gag pa'o/ /gang tshe 'di kun mngon par 'gro/ /bdag med bdag gi ba yang med/ /de tshe mchog tu mi g.yo ba'i/ /mya ngan 'das pa thob pa'o/ /ngar 'dzin la sogs nyon mongs kyis/ /bdag tu 'dzin las 'ching ba ste/ /'jig rten bdag med par mthong na//chags pa rnams las rnam par grol/ /mi bden par mthong 'ching ba ste/ /bden par mthong ba rnam par grol/ /bdag yod ces ni 'jig rten 'dir/ /rab tu 'jug 'di bden min 'dzin/ /gal te bdag yod gyur na de/ /rtag gam yang na mi rtag nyid/ /phyogs ni gnyis po 'di dag la//nyes pa chen po rab tu chags/ /gal te re zhig mi rtag gyur/ /las kyi 'bras bu med par 'gyur/ /yang srid yod pa ma yin zhing / /thar pa 'bad pa med par 'gyur/ /ci ste rtag cing khyab bdag 'gyur/ /skye ba med dang skye ba min/ /nam mkha' khyab cing rtag pa ni//'god pa med cing skye ba med/ /gal te bdag 'di khyab bdag 'gyur/ /gang du mi gnas pa ma yin/ /'di dang song nas dang thar par/ /thams cad du ni cig car 'gyur/ /khyab bdag nyid phyir bya med 'di'i/ /las kyi bya ba med par 'gyur/ /las rnams ma byas pa las ni//'bras bur sbyor bar gang gis 'gyur/ /gal te 'di yi byed par 'gyur/ /bdag gi sdug bsngal byed ma yin/ /rang dbang gyur na sdug bsngal ni/ /bdag gis bdag gi byed pa su/ /bdag ni rtag pa nyid las ni/ /rnam par 'gyur ba skye min zhing / /bde dang sdug bsngal thob pa las//de yis rnam par 'gyur ba mthong / /ye shes thob pas dang nyon mongs/ /spangs las thar pa yod pa ste/ /bya ba med khyab bdag 'di yin/ /de phyir thar pa yod ma yin/ /yod min gyur las de nyid kyis/ /bdag ste 'di ni brjod min la/ /rgyur gyur pas kyang ma yin zhing / / 'di ni cung zad byed ma yin/ /bya ba las kyang gsal min zhing / /gang rnams kyis 'di byas min la/ /rnam pa de ltar gyur min smra/ /de phyir bdag gi yod ma yin/ /byed pa po med 'dir ni rig pa po yang med/ /bdag po med pa'i lus po 'di ni 'dren par byed/ /ji ltar 'khor ba'i chu bo rab tu bskor ba ste//smra ba de ni nyon mdzod nyan pa rnams kyi mchog /dbang po drug dang dbang po'i spyod yul drug rnams la/ /brten nas rnam par shes pa rnam drug 'char ba ste/ /gsum po so sor rig pa'i cho ga rab bskor zhing / /gang las dran dang blo dang las kyi 'jug par yin/ /nor bu bud shing nyi ma yang dag phrad pa las//ji ltar me ni sbyar ba'i dbang gis skye ba ste/ /de bzhin blo dang dbang don dbang po la brten nas/ /skyes bu la brten bya ba rnams ni thams cad 'gyur/ /ji ltar sa bon las ni myu gu skye ba ste/ /myu gu des na sa bon de ni shes min zhing / /gzhan las gzhan du ma yin de las de ma yin//de bzhin lus dang dbang po blo yi rim pa'o/ /de ltar thub pa mchog gi gsung ni mchog tu dge /dam pa'i don du bsngags pa yang dag thos nas ni/ /dri ma med pa'i rdul med gzhal du med pa'o/ /ma ga d+hA yi bdag po chos mig skyes par gyur/ /'khor der ma ga d+hA yi grong na gnas pa yi//mi ni du ma rnams dang lha na gnas pa rnams/ /thub pa'i gsung thob pa las rnam dag bsam ldan rnams/ /'gyur med 'chi ba med pa'i go 'phang thob par gyur/ /sangs rgyas kyi spyod pa zhes bya ba'i snyan dngags chen po las/ slob ma mang po dang ldan pa'i le'u ste bcu drug pa'o// //de nas rgyal po des ni thub la rnam gnas phyir/ /dpal ldan nags tshal 'od ma'i tshal ni rab phul nas/ /de nyid khong du chud phyir kun nas dmigs pa ni/ /mngon par rjes gnang byas pa grong khyer la zhugs so/ /de nas gtsug lag khang der 'gro la phan pa'i phyir//ye shes las gyur dge ba'i sgron ma bsnams pa ste/ /tshangs dang lha dang de bzhin 'phags pa rnams kyi ni/ /gnas pa de dang de yis sangs rgyas rnam par gnas/ /de nas rta thul dbang po'i rta ni kun bsdams shing / /bsod snyoms 'dod pas rgyal po'i khab ni rab thob ste//gzugs kyis dang ni zhi ba yis dang rnam 'gyur gyis/ /skye bo chen po rnams kyi mig rnams phrogs par gyur/ /ser skya'i rigs kyi dge slong slob ma du ma can/ /sha ra dwa ti'i bu zhes rab tu grags pa yis/ /dbang po zhi bar 'ongs pa de ni mthong ba ste/ /lam na rjes su gnas nas tshig ni mngon par smras//khyod kyi gsar pa'i rtags mtshan dang ni zhi ba nyid/ /mthong nas kho bo'i blo gros ya mtshan mchog gyur te/ /de phyir re zhig gal te de nyid rig pa dang / /khyod kyi ston pa'i mtshan ci smra ba gang yin smros/ /de ltar mchod mang sngon 'gro bram ze de yis ni/ /de skad brjod cing rta thul gyis kyang smras pa ste//bu ram shing pa'i rigs su rab 'khrungs thams cad mkhyen/ /bdag gi ston pa bla na med pa shes par mdzod/ /byis pa gsar bu chos las skyes par gyur pa yis/ /khyod la ston pa brjod par nus pa ma yin te/ /smras pa mkhyen pa'i mchog gyur thub pa chen po'i gsung //nyung ngu cung zad tsam zhig nges par rtogs par mdzod/ /gang zhig chos rnams mtshan ma las ni byung ba ste/ /de dag rnams kyi mtshan ma bcom ldan gyis gsungs shing / /gang zhig de dag rnams kyis nges par 'gog pa dang / /yang dag 'gog pa de yi thabs gang gsungs pa'o//de ltar rta thul gyi ni tshig 'di thos nas ni/ /gnyis skyes nyer rgyal zhes bya'i ming can de yi ni/ /skyen par chos la mig ni rdul dang bral ba ni/ /dge zhing rnam par dag par nges par gyur pa'o/ /rgyu med pa dang bya ba med dang dbang phyug ste/ /zhing shes pa ni nges par de yis sngon rig cing //rgyu las 'di rnams rab tu 'jug par thos nas ni/ /bdag med gyur pa mthong nas dam pa'i bden pa gzigs/ /sbom po'i nyon mongs tshogs kyis rnam par nyams pa ni/ /grangs can lus las cha shas dang bcas mthong ba ste/ /sbom po dang ni phra mo de yis nyams pa ni//sangs rgyas pa yi bstan las 'gyur zhes snyam par gyur/ /bdag tu 'du shes skyes pa nye bar mkhyud nas ni/ /ngar 'dzin spong ba ma yin de nas nga yi nyid/ /sgron ma dang ni nyin mor byed pa yod pa na/ /'od kyi rnam par nyams par gtan tshigs shes bya ci/ /ji ltar pad+ma'i chu ba che bar gyur pa yi//snal ma phra mo nyid ni bzhin dang 'brel pa ste/ /thar pa'i cho ga mthar thug min par de snyam zhing / /sangs rgyas pa yis rdo ba phye dang mnyam par rtogs/ /de nas bram zes rta thul de la mngon mchod nas/ /tshim zhing rang nyid kyi ni khang par rnam song zhing / /bsod snyoms rim bzhin rta thul gyis kyang rab thob nas//rang bzhin gnas shing mkhas pa 'od ma'i tshal du song / /de bzhin rab tu dang bas mchog dang ldan pa yi/ /nye rgyal kyang ni mngon du zhugs pa mthong nas ni/ /thos pa dang ni bsam pas bya ba mnyam pa yi/ /maud gal rigs su rab tu skyes pas smras pa'o/ /dge slong de nyid gang gis gzhan bzhin gyur pa ste//brtan pa yin yang yang dag dga' bzhin nye bar song / /khyed kyis 'chi med ci zhig de ring thob pa ste/ /bzhin ni rab tu dang 'di gtan tshigs med ma yin/ /de nas 'di ltar bgyi zhes 'di la nges bden smras/ /de nas des ni bdag la smos pa shes des smras/ /de nas tshig de nyid ni de yis smras pa ste//thos nas nyid kyi yang dag mig ni skyes par gyur/ /las dang bsam pa rnam dag blo ldan de gnyis ni/ /lag nas sgron ma bzhin du de nyid mthong ba ste/ /shes pas ston la rnam par g.yo min bsam ldan dag /de ni lta ba'i don du da lta nyid du gshegs/ /slob ma'i sder bcas de gnyis rgyang ma nas gzigs nas//bcom ldan drang srong chen pos dge slong rnams la gsungs/ /shes rab can dang rdzu 'phrul ldan ba rnams kyi gtso/ /kho bo'i mchog gi slob ma 'di gnyis 'dir 'ongs so/ /de nas zab dang brtan pa'i gsung ni zhi ba yis/ /thub pas de gnyis la ni gtam dag mdzad pa ste//dge slong 'dir ni mngon par nyer 'ongs rab zhi'i phyir/ /chos 'di ji lta ba bzhin yang dag thob par gyis/ /dbyu gu gsum lag gtsug phud dang ldan gnyis skyes te/ /gnyis la de bzhin gshegs pas 'di skad ces gsungs te/ /sangs rgyas mthu yis ngur smrig gos dang ldan pa yi//dge slong nyid du skad cig gis ni gyur pa'o/ /slob ma'i sder bcas cha lugs de yis de gnyis kyis/ /mgo bo dag gis thams cad mkhyen la mchod pa ste/ /de nas sangs rgyas kyis chos de gnyis la gsungs shing / /dus kyis de gnyis kyis ni nges legs thob par gyur//de nas 'od srungs rigs kyi sgron ma gnyis skyes kyis/ /kha dog dang ni gzugs dang nor dang nyer ldan las/ /rdzu 'phrul dang ni bdag ldan bzang mo rnams spangs nas/ /thar pa'i ched du ngur smrig bzung zhing gshegs pa'o/ /mdog bzangs gser gyi mchod sdong dang mtshungs 'bar ba ni//bu mangs ming bcas mchod rten du ni nges mthong nas/ /dngos po thams cad spangs shing ya mtshan dang bcas pas/ /thams cad mkhyen la thal mo rab sbyar mngon par song / /thub pa la ni rgyang nas mgo bos phyag 'tshal zhing / /phyag 'tshal nas ni ji lta ba bzhin mthon por gsol//bdag ni slob ma bcom ldan bdag gi ston pa lags/ /mun pa rnams su bstan pa bdag gi sgron mar gyur/ /gnyis skyes skom pa skyes shing nye bar 'ongs par ni/ /mkhyen nas bsam pa rnam dag thar 'dod de la ni/ /sems la gsung gi chab kyis rab tu tshim mdzad pa/ /de bzhin gshegs pas legs par 'ongs zhes bka' stsal to//gsung 'di yis ni ngal ba rnam par sos bzhin te/ /nges par legs par rtogs pa'i ched du gnas pa ste/ /de nas dag pa'i bdag nyid 'di la thugs rje can/ /thub pas chos ni mdor bsdus pa yis gsungs pa'o/ /gang phyir thub pas chos ni phra mor gsungs tsam na//de yis don ni mtha' dag yang dag thob gyur te/ /de phyir yang dag rig dang na tshod che gnyis las/ /dgra bcom 'od srungs chen po nyid du mtshan gyur to/ /gang gis lus las gzhan dang yang na lus su ni/ /bdag dang bdag gi ba zhes bdag tu rtogs pa ste//de yis bdag tu lta ba de ni nges spangs shing / /nyi tshe ba min sdug bsngal 'di ni mthong bar gyur/ /tshul khrims brtul zhugs dag gis dag par byed ces gang / /rgyu med pa dang rgyu las de yis rtogs pa ste/ /sdug bsngal nyid dang lam ni yang dag thob nas te/ /tshul khrims dang ni brtul zhugs mchog tu ma bzung ngo //phyin ci log tu gyur par song ba gang gis ni/ /mngon du bskor zhing mchog ni rab tu thob ma yin/ /bden pa bzhi po'i go 'phang rnams ni mthong gyur nas/ /the tshom som nyir gyur te yang dag mchod par gyur/ /'dod pa gang rnams su ni yang dag rgyar nyid dang //brgyal bar gyur dang brgyal bar 'gyur nyid 'jig rten pa/ /mi gtsang bden pa ma yin de rnams des shes nas/ /'dod chags shes bya'i yul de spangs par gyur pa'o/ /de bzhin du ni byams par gyur ba'i sems kyis des/ /bshes dang bshes min rnams su khyad par med pa ste/ / 'byung po kun la rjes su brtse ba byas pa yis/ /nad du song ba'i gnod sems spangs par gyur pa'o/ /gzugs la brten pa rnams dang grong khyer brten pa rnams/ /sna tshogs nyid dang ldan pa'i 'du shes rnams spangs nas/ /des ni gzugs kyi khams su chags pa rnam bcom ste/ /gzugs la 'jug pa'i nyes pa rnams ni rtogs nas so//rmongs las snyoms 'jug rnams su thar pa'i 'du shes dang / /gzugs med lha rnams mdzad pa can du rtogs nas ni/ /zhi zhing mtshan ma med pa'i sems ni gzung nas su/ /gzugs med sred pa las ni chags dang bral bar song / /chu bo sin d+hu'i shugs chen rab tu 'jug pa bzhin//sems kyis g.yo zhing skyod par byed pa shes nas ni/ /brtan pa'i brten las rgod pa rnam par spangs pa ste/ /zhi zhing rdzing bu gang ba bzhin du gnas par gyur/ /snying po med pa'i phyir dang 'god ba'i chos nyid phyir/ /bdag med nyid phyir dngos rnams yang dag rab mthong nas/ / khyad 'phags nyid dang mnyam dang mchog nyid mthong ba ste/ /nga rgyal rnam par spangs nas yod ma yin zhes rtogs/ /ye shes me yis mi shes mun pa rnams bcom nas/ /zad pa can dang zad pa med par sna tshogs mthong / /rnal 'byor gyis ni rig pa nyid ni yongs bsgoms nas/ /ma rig pa ni mtha' dag ji lta ba bzhin spangs//mthong dang bsgom pa dag gis kun du sbyor ba ni/ /bcu po 'di dag mtha' dag rnams kyis rnam par grol gyur cing / /thal mo sbyar byas sangs rgyas nyid la lta bzhin du/ /bya ba kun byas rang bzhin gnas te gnas par gyur/ /skar ma gsum gyis gnas skabs gsum skyong rjes skyes lha dang ni//ldan pa'i lnga gsum tshes kyi dus su skar ma'i rgyal po bzhin/ /gsum ni chud zos gyur cing gsum ni lhag par thob pa yi/ /gsum rig slob ma gsum gyis bde bar gshegs pa rnam par mdzes/ /sangs rgyas kyi spyod pa zhes bya ba'i snyan dngags chen po las/ nyan thos chen po rab tu gshegs par mdzad pa'i le'u ste bcu bdun pa'o// //de nas 'ga' zhig tshe na nor ldan khyim bdag ni/ /skal ba med pa rnams la nor ni rab sbyin pa/ /bzang sbyin zhes ni rab tu grags pa'i ming ldan pa/ /byang phyogs yul ko sa la rnams nas der song gyur//de yis der ni thub pa bzhugs pa thos pa ste/ /thos nas blta bar 'dod pas mtshan mo rab tu song / /rnam dag sems pa des ni rab sleb rab mkhyen nas/ /rab tu phyag byas pa la bde bar gshegs pas bstan/ /gang phyir chos la bsgoms pas nyid ni rnam spangs nas/ /blo ldan mtshan mor bdag la lta 'dod rab sleb ste//da lta nyid du 'ongs pa de yi de ma thag /nges par legs pa'i mgron 'di rab tu long mdzod cig /gang zhig khyod kyis lhag bsam gang zhig bstan pa dang / /bdag gis grags pa nyid las gang zhig dang ba dang / /gang zhig sngon gyi rgyu las blo gros rab zhugs te//des ni yon tan chen po rnams kyi snod yin no/ /de phyir 'jig rten dag na grags dang gzhan du ni/ /'bras bu sbyin pa mchog las byung bar rig nas ni/ /bkur sti byas nas dus su snyoms pa'i bdag nyid kyis/ /chos las thob pa'i nor ni sbyin par bya ba'o/ /tshul khrims yang dag blangs nas spyad par bya ba ste//tshul khrims nyid ni bsrung ba dang ni rgyan yin zhing / /'og tu song ba rnams kyi rnam par ldog byed do/ /nam mkha'i steng gi nges par rdzogs pa po nyid yin/ /'dod pa rnams su gcig min zhes pas rjes bcings pa'i/ /yongs su tshol ba la sogs skyon rnams thos nas ni//nges par 'byung ba'i cho gar yon tan rnam shes nas/ /rnam dben las skyes shi ba'i bden pa bsnyen par mdzod/ /'chi bas nye bar gzir zhing rga bas zil non pa'i/ /'jig rten rab tu bskor ba yang dag yongs shes nas/ /zhi ba skye ba med phyir 'bad pa mdzod cig dang / / skye ba bden pa med na rga med 'chi ba med/ /ji ltar mi rnams la ni mi rtag bdag nyid kyis/ /rab chags sdug bsngal mngon sum du ni rig mdzod la/ /de bzhin lha rnams la yang sdug bsngal rig mdzod dang / /'jug pa rtag pa nyid ni su yang yod ma yin/ /gang du mi rtag pa nyid der ni sdug bsngal zhing / / gang du rang nyid med pa der yang sdug bsngal te/ /gang du bdag ces pa dang bdag gi ba zhes pa/ /de tshe mi rtag sdug bsngal bdag med gang la yin/ /de phyir sdug bsngal las ni sdug bsngal 'di dang ni/ /mtshan ma las ni 'di yi mtshan ma ltos mdzod la/ /rnam par nye bar zhi las sdug bsngal zhi ba dang //lam las khyod kyi lam ni dge ba shes par gyis/ /'gro ba g.yo ba sdug bsngal 'di ni shes nas su/ /me dang rab mtshungs dus kyi me yis 'jig rten 'di/ /mtha' dag rab tu tshig par yongs su rtogs bzhin du/ /srid dang srid min rnams su smon pa med par gyis/ /stong pa nyid dang bdag med bdag gi ba med pa//sgyu ma dang mtshungs 'jig rten 'di ni shes byas nas/ /'du byed tsam zhig rab tu yongs su rtogs bzhin du/ /lus 'di la ni khams kyi 'du shes nyid du gyis/ /sems ni srid pa g.yos las yang dag g.yos nas dang / /'khor ba'i 'gro ba rnam pa sna tshogs mthong nas ni//rtog pa med cing zhi la bden zhing chags med par/ /sems ni snyoms shing u0f37mtshan ma med pa bsnyen par gyis/ /de nas drang srong chen po'i chos de thos pa las/ /chos kyi cho ga'i sngon gyi 'bras bu thob gyur zhing / /gang zhig thob nas 'di yi sdug bsngal las lhag ma/ /rgya mtsho chen po las ni thigs pa g cig bzhin gyur//chags bral rnams kyi dgon par yang dag gnas kyang ngam/ /lus med rnams kyis srid rtser yang dag gnas na yang / /nags sam lha na de nyid mthong min ma yin la/ /khyim na gnas pa yin yang lta bas dge legs gyur/ /rnam pa sna tshogs lta ba'i dra ba rnams kyis dang //'khor ba'i sdug bsngal rnams kyis de rnams rnam mi 'grol/ /de phyir rab tu nyams shing de nyid ma mthong bar/ /chags pa rnam par bsal nas khyad par 'phags par gshegs/ /lta ba legs skyes des ni lta ba ngan de rnams/ /ston ka'i sprin gyis rdo yi char bzhin spangs pa ste/ /dbang phyug la sogs mi mthun rgyu las ma yin zhing //des ni 'jig rten rgyu med par min zhes rtogs so/ /de phyir mi mnyam rgyur ni 'thad pa ma yin zhing / /rgyu med par ni 'gal ba chen po yod pa nyid/ /'dir yang rigs pa shes pas so sor mthong ba ste/ /the tshom med pas de nyid mthong ba kye ma ci/ /gal te dbang phyug gis ni 'gro ba skyed gyur na//'gro ba rim gyis rab tu 'jug pa ma yin la/ /skye dgu rnams kyi 'khor ba'i 'khor lo ma yin zhing / /gang du gang zhig bskyed nas de dang de nyid 'gyur/ /lus can rnams kyis mi 'dod thob pa ma yin zhing / /de yi bdag nyid rnams kyis 'dod pa'i spyod pa med//gang zhig lus can rnams kyi dge dang mi dger gyur/ /de ni dbang phyug nyid phyir dbang phyug la yin no/ /de yi dbang phyug nyid la the tshom 'gyur min zhing / /der ni mi rnams dag gis byams pa pha bzhin 'gyur/ /de la nyam thag pas ni smod pa smra min zhing / /lha rnams de dang de la 'jig rten mchod ma yin/ / gal te 'di mi bskyed la dgongs par gyur na ni/ /bya ldan nyid phyir deng 'dir dbang phyug ma yin zhing / /gal te 'di yis 'jug la 'dod par gyur na ni/ /de nyid dbang phyug yod pa nyid la byed par 'gyur/ /ci ste 'di yi skye la nus pa cung zhig med/ /byis pa bzhin du 'di yis spyod rnams rgyu med do/ /gal te dbang phyug gi ni bdag la mnga' nyid med//'jig rten bskyed la 'di yi stobs de ci zhig yod/ /ji ltar 'dod la gal te bde sdug la bsnyen na/ /'byung po rnams ni 'jig rten na des byas pa nyid/ /gang phyir 'dod la chags pa khong khro la 'jug ste/ /de phyir de yi dbang nyid yod pa ma yin no/ / de'i rten nyid la sems med rnams kyis gnas bya ste/ /skyes bu'i 'bad rtsol tshad mar gyur pa nyid yin no/ /las 'bras med par 'gyur zhing lung ni byas min la/ /las kyi sbyor ba rnams ni de yi rten yin na/ /gal te dbang phyug rang gi las kyis 'gyur na ni/ /thun mong gyur pa'i las la dbang phyug gyur ma yin//ci ste de yi khyab bdag rgyu med gyur na ni/ /'gro ba kun gyi dbang phyug nyid ni rab tu grub/ /ci ste de yi dbang phyug nyid gzhan las yin zhing / /de nyid kyi yang byed po'i dbang phyug gzhan yin la/ /de yis gzhan zhes de ltar 'dir ni rnam gzhag med/ /de phyir 'gro ba skyed pa yod pa ma yin nyid//dbang phyug skyed por gyur na rigs pas tha dad du/ /rnam par 'gal ba rnam pa du ma mthong ba ste/ /de yi phyir yang rang bzhin la ni nyes pa de/ /slar yang rab tu chags par 'gyur ba nyid yin no/ /rgyu shes rnams kyi rten ni cung zad rnam log pa'o/ /rgyu ni bya ba'i cho gar smra ba ma yin zhing / /bya ba'i cho gar sa bon la sogs de dang de//ltos pa yin te de phyir rang bzhin rgyu ma yin/ /'bras mi rdzogs par byed pa po ni gcig pa nyid/ /'ga' zhig gi yang rgyu ni cung zad yod ma yin/ /gcig gi bdag nyid can gyi rang bzhin rab bstan te/ /de phyir rab tu 'jug la rang bzhin rgyu ma yin/ /gang gi rang bzhin gyis ni khyab pa nyid 'dod pa//de yi bya ba med pa nyid kyang rab chags shing / /bya ba ma gtogs 'bras bu'i cho ga mthong min te/ /de yi phyir yang bskyed la rang bzhin rgyu ma yin/ /de yi khyab pa po nyid la ni rgyu nyid phyir/ /thams cad las ni thams cad rgyun mi 'chad par 'gyur/ /'bras bu'i rab tu 'jug la nges pa mthong ba ste//de phyir skyed pa la ni rang bzhin rgyu ma yin/ /ji ltar 'di yi yon tan med nyid grub pa ste/ /de ltar 'bras bu la ni yon tan med nyid 'gyur/ /rnam 'gyur yon tan can rnams 'jig rten na mthong ste/ /de phyir rab tu 'jug la rang bzhin rgyu ma yin/ /rtag pa'i rgyu las khyad par 'gyur ba ma yin phyir//rnam 'gyur la ni tha dad yon tan nyid ma yin/ /rnam 'gyur la ni tha dad yon tan zhugs pa ste/ /de phyir rang bzhin las ni skyed pa rigs ma yin/ /rang bzhin gyis ni bskyed pa'i bdag nyid can nyid la/ /'bras bu rnams su nyams pa'i rgyu ni grub ma yin/ /gang phyir rnam 'gyur gyi ni nyams pa mthong ba ste//de phyir rtogs par bya ba rgyu ni gzhan nyid do/ /nus par gyur pa'i sbyor la shin tu mthar thug pa'i/ /thar pa 'dod pa'i sdom brtson rnams kyi ma yin zhing / /skye dgu rnams kyi rang bzhin rab tu 'jug pa'i phyir/ /gang las thar pa'i ched dang pha rol gnon par gyur//skyed pa'i bdag nyid rang bzhin gyis ni nges nyid phyir/ /de yi bdag nyid rnam 'gyur la ni nges nyid yin/ /'jig rten dag na rnam 'gyur la ni brtan nyid med/ /de phyir rang bzhin gyis ni skyed par rigs ma yin/ /sems kyi spyod pa mi gsal rang bzhin zhes bya zhing / /rnam 'gyur gsal ba 'di ni de nas grags pa ste//de phyir rab tu 'jug la rang bzhin rgyu min zhing / /gsal ba'i rgyu la 'dir ni 'bras bu grub pa nyid/ /sems med rang bzhin las ni sems dang bcas pa yi/ /rta glang bong bu la sogs 'bras bu rigs pa ma yin zhing / /sems dang rnam par bral ba'i rgyu rnams dag las ni//sems dang ldan pa cung zad zhig ni 'jug ma yin/ /gal te 'gro ba skyed phyir dus ni nges pa ste/ /de phyir yongs su rtog byed rnams kyis thar pa med/ /gang phyir skye dgu rnams kyi mtha' ni byas min te/ /de phyir 'jig rten rgyun chad med par skye bar 'gyur/ /gang zhig yon tan rnams kyi gcig dang du mas byas//rjes rnams su ni rang nyid nges pa mthong ba ste/ /gal te rgyu gcig nyid du gnas par gyur pa na/ /de yang tha dad khyad par gyur pa ma yin no/ /gang zhig smin pa las skyes rdzas kyi cho gar sar/ /yon tan shes pas yon tan tha dad nyid du mthong / /gang phyir rgyu ni khyad par min pa 'dod pa ste//stong pa'i rdzas rnams su yang nges par gyur pa nyid/ /gang gi mi gsal ba las rdzas ni 'char ba ste/ /de yi rjes su dpag pa nges par grub ma yin/ /'bras bu gsal ba yi ni yang dag rab 'jug pa/ /mi gsal ba las gang gis mngon du mthong ma yin//gsal ba gnyis pa dag las rab tu 'jug pa bzhin/ /mi gsal ba las gang gi 'bras bu dang por gyur/ /de yi 'dod pa las 'dir mi 'dod chen po'o/ /rang bzhin nyid kyis nyes pa gnyis ni rab tu chags/ /ji ltar gser gyi phreng ba khyad par 'phags pa ste/ /de ltar rang bzhin gyi ni rnam 'gyur khyad par 'phags//'bras bu khyad par yin zhing rgyu yi ma yin te/ /de phyir skyed la rang bzhin rigs pa ma yin no/ /gal te bya bar skyes bu de ni rgyu yin na/ /gang gis nges par gang 'dod des de 'thob par 'gyur/ /'dod kyang kha cig don ni 'thob pa ma yin la//mi 'dod na yang dbang med 'dir ni 'thob par 'gyur/ /gang zhig ba glang rta bong rnga mo'i skye gnas 'gro/ /mnga' bdag nyid du gyur na de ni bsnyen min zhing / /de ru 'gro ba'i sdig pa'i las ni byed pa dang / sdug bsngal mi 'dod su yis sdug bsngal byed par 'gyur/ /gal te 'jig rten dag na skyes bu byed par gyur//sdug bsngal byed pa ma yin bde ba kho na byed/ /'dod pa byed par 'dod kyang mi 'dod byed pa ste/ /dbang phyug chen por 'gyur na mi 'dod su yis spyod/ /gang tshe mi ni chos min pa las rnam 'jigs shing / /'bad pas chos ni rab tu son par byed pa nyid/ /sna tshogs nyon mongs rnams kyis dbang med 'phrog pa ste//de phyir 'di na mi ni pha rol rgyud du gyur/ /grang dang dro dang char dang thog dang glog sogs kyi/ /bya ba rnams ni mi la bzlog nas mthong ba ste/ /gang phyir rang dbang ma yin mi ni gzhan ldan te/ /de phyir bya ba rnams su skyes bu dbang phyug min/ /gang tshe sa bon las dang sa chu'i rten las ni//dus sbyor rab tu 'jug la lo thog phun tshogs shing / /mar me dag las rab gsal shing las me yin te/ /rgyu med las yin zhes pa rgyu med ma yin no/ /rgyu med pa las gal te 'gro ba'i rab 'jug na/ /mi yi byed pa yis ni med par 'gyur ba ste/ / thams cad kyis ni thams cad nges par 'thob byed cing / /rtag na 'di ni thams cad du ni song bar grub/ /bde dang sdug bsngal gal te rgyu med las yin na/ /gang char kun gyi bde dang sdug bsngal skal min zhing / /rgyu med las kyang bde dang sdug bsngal rtogs min te/ /de phyir rgyu med las shes 'di ni rgyu ma yin//de skad ces pa la sogs mi mnyam rgyu rnams des/ /'jig rten rab tu 'jug la rgyu rnams shes ma yin/ /rgyu med par ni 'jig rten mthong ba ma yin zhing / /nyes pa 'di rnams rgyu med las ni yang dag rtogs/ /brtan pa dang ni g.yo ba'i 'byung po rnams su yang / / de dang de la brten nas de dang de 'byung ste/ /'jig rten dag na rgyu med ci yang yod min zhing / /kun gyi rgyu ni 'jig rten pa yis shes ma yin/ /de nas sbyin pa bzang por byin pa'i bzang byin des/ /rgya che'i chos kyis dam pa'i chos ni rnam shes nas/ /g.yo ba med pa'i blo gros nges par rab dang bas//drang srong chen po la ni tshig 'di gsal ba'o/ /mnyan yod rta ljang rta rid kyis bsnyen grong khyer ni/ /bdag gi gnas kyi sa ni bsod nams grags pa can/ /der ni bdag gis khyed kyi gnas ni byed 'dod de/ /sdig med gnas mchog dam pa de ni bsnyen par mdzod/ /gang lta na yang thub pa khyed kyi gnas su snyoms pa ni//gzhal yas khang gi logs sam rnam dben nags su ste/ /bdag la rjes su brtse phyir gnas kyi ched du ni/ /dgra bcom rab tu gzhes par mdzad par 'os pa lags/ /de nas gtong bar lhag par mos pa 'di yis ni/ /rnam par grol ba'i sems ni rnam par mkhyen nas ni//chags pa med pa'i blo mnga' blo gros mkhyen pa yis/ /mchog tu zhi bas blo gros yang dag bka' stsal to/ /sems dpa' brtan kye gang zhig rdzas glog g.yo rnams su/ /khyod kyi sems dpa' gtong la lhag par mos pa ste/ /rang bzhin gyis ni sbyin la dga' zhing chos la dgyes//de nyid mthong ba khyed la de ni ngo mtshar min/ /gang zhig khyim ni tshig las phyi rol 'thon byed pa/ /de yi don de 'tshig par byed pa ma yin te/ /de bzhin dus kyi me yis 'gro ba tshig pa na/ /gang gis gang zhig sbyin pa de yis de nyer 'thob/ /de phyir rnam spangs sems dpa' rnams kyis sbyin par dang //yul rnams yang dag longs spyod par ni shes pa nyid/ /bkren pa 'jig rten dag na zad pa'i skyon mthong bas/ /nye bar longs spyod ma yin 'jigs las sbyin ma yin/ /dus su smod la don ni rnam par gtong ba dang / /dpal dang nga rgyal las ni de bzhin g.yul 'gyed par//sems dpa' lhag pa nyid kyis shes te gzhan gyis min/ /sems dpa' yis ni sbyin pa nyid dang g.yul 'gyed do/ /sbyin byed dga' ba nyid du 'gro la 'gro ba ste/ /snyan pa dang ni dam par grags pa rab tu 'thob/ /sbyin pa po yod gang zhes dam pa rnams sbyin nas/ /yang dag bkur ba dang ni mngon du 'gro bar byed//de bzhin 'jig rten dag na blo gtad nyid 'gyur zhing / /mi bzad pa rnams las kyang nyes pa 'thob ma yin/ /bsod nams rnams ni bdag gis byas zhes tshim pa ste/ /'chi ba'i dus su skrag par mngon par 'gro ma yin/ / sbyin pa'i 'bras bu 'dir ni me tog tsam zhig ste/ /sbyin pa po yi 'bras bu gzhan nyid rab tu 'thob/ /'khor ba'i 'khor lo la ni 'khor ba'i skye bo yi/ /gtong ba dang mnyam gnyen ni yod pa ma yin no/ /mi yi 'jig rten na dang lha na skyes pa rnams/ /gtong ba las dang mnyam pa rnams las lhag par 'gyur//rta dang glang po'i skye gnas su yang gnas pa rnams/ /'bras bu de ni gtso bo thob par 'gyur ba'o/ /sbyin pas longs spyod rnams kyis yongs su 'dzin pa ste/ /tshul khrims kyis bsrungs mtho ris su ni 'gro bar 'gyur/ /ye shes sngon du 'gro ba can gyi zhi ba yis kyang ni/ / rten dang bral ba gang na grangs su 'gro ba 'gro ma yin/ /'chi med bdud rtsi de yis 'thob pa'i ched du yang / /sdom par gyur pa rab tu sbyin pa yin pa nyid/ /sbyin pa dran nas rab tu dga' bar gyur pa ste/ /yid ni rab tu dga' las nges par ting 'dzin yin/ /mnyam par gzhag na yang dag mtho ba 'di ru ni//skye dang 'god pa shes par rim gyis 'gyur ba ste/ /gzhan la sbyin pa sbyin pa'i sbyin pa po yis ni/ /snying la gnas pa'i nyon mongs rnams ni bsrabs par 'gyur/ /gang zhig sbyin pa byin byed de yi don rnams su/ /chags par grags pa de ni dang por chod pa nyid//gang la rab tu byams pa'i sems kyis sbyin pa ste/ /de phyir zhe sdang dang ni nga rgyal spangs par gyur/ /rab tu len pa po ni bde ldan rnams mthong nas/ /gang zhig 'ga' ste des na ser sna yod ma yin/ /sbyin pa pos ni sbyin pa'i 'bras bu mngon rtogs nas/ /med pa nyid dang mi shes mun pa 'joms pa po//de phyir zhi ba 'phags min gyis bsnyen ser sna dang / /sred pa gang las sbyin pa byed pas bcom pa ste/ /de nas thar pa'i yan lag gyur pa sbyin pa ni/ /yin zhing nyes pa rab tu thob phyir thar pa'o/ /ji ltar gzhan rnams grib ma'i don du shing 'dod cing //kha cig 'bras bu'i don du gzhan rnams me tog phyir/ /de ltar sbyin pa yongs su sbyin par byed pa ste/ /kha cig zhi ba'i don du gzhan rnams nor gyi phyir/ /de phyir khyad par du ni khyim na gnas rnams kyis/ /sbyin pa ji ltar nus pa mchog ni gter yin zhing / /sbyin pa snying po med pa'i nor gyi snying po ste//dam pa rnams kyi rjes su song ba lam 'di yin/ /bza' ba rab tu sbyin par stobs ni rab ster zhing / /bgo ba sbyin byed la yang lus ni ster ba'o/ /gang gis dam pa rnams la gnas ni sbyin byed pa/ /des kyang 'jig rten dag na thams cad byin pa yin/ /theg pa sbyin byed la yang bde ba byin pa ste//mar me sbyin byed la ni spyan mig sbyin pa nyid/ /de nas dbrog bya ma yin 'chi med rab sbyin zhing / /gang gis mthar thug gyur pa'i chos kyis ston pa nyid/ /kha cig 'dod pa'i ched du sbyin pa gtong ba ste/ /gzhan ni don gyi don du gcig ni grags pa'i phyir/ / kha cig mtho ris don du gzhan ni brtse ba'i phyir/ /khyod kyi sbyin pa 'di ni chags pa med pa yin/ /de phyir legs so khyod ni sred pa de ltar gyur/ /gang zhig yang dag bsgrubs mdzod 'dod pa tshim par shog /rdul bcas mun pa dang ldan gang khyed 'ongs nas ni/ /ye shes rnam dag blo ni rab tu 'gro bar 'gyur//de nyid de bzhin gshegs pas lam gyi yang dag par/ /dga' ba byas pa dang yang gzhug pa byas pa ni/ /gtsug lag khang de snying la rnam par byas nas ni/ /nye rgyal dang ni lhan cig dus su song bar gyur/ /song nas de na kau shAm rgyal po'i khab dang ni/ /gtsug lag khang gi sa la so sor yang dag rgyus//dpal ldan mnyam zhing mdzes la yid 'ong shing ldan pa/ /der ni de yis rgyal byed kyi ni tshal mthong ngo / /de nas de yi don du rgyal byed la zhus te/ /de yis chags pa las ni de la ma byin no/ /khyod kyis gal te don gyis kun nas bkram na yang / / sa ni bdag gis sbyin pa ma yin zhes smras so/ /de nas der ni bzang sbyin gyis de la smras pa/ /tshal de la ni rin byas shes ni mngon 'dod do/ /de nas des ni nor gyis sa ni yongs g.yogs nas/ /chos kyi tha snyad mthong zhing nyos par gyur pa'o/ /de yi gtong ba de ni mthong nas rgyal byed kyis/ / sangs rgyas la ni mchog tu rab tu dang ba byas/ /nags tshal de yi lhag ma dag ni kun nas ni/ /de bzhin gshegs pa la ni phul bar gyur pa'o/ /de nas mgon med zas sbyin gyis ni drang srong chen po yis/ /nye rgyal gyis ni nges par gzigs par bya ba'i don ldan par//myur ba'i blo gros dang ldan ma chags grol ba'i sems kyis ni/ /mdzes shing dge ba mchog gis gtsug lag khang ni byed du bcug /nor gyi dbang phyug nyid kyi gnas ni 'phos pa lta bu dang / /byang phyogs ko sha la yi khang pa'i bde ba lta bu dang / /de bzhin gshegs pa nyid kyi gzhi ni mtshungs pa lta bu dang //rang gi nor dang stobs kyi dang ni lta ba yi yang ngo / /sangs rgyas kyi spyod pa zhes bya ba'i snyan dngags chen po las/ mgon med zas sbyin la rjes su ston pa'i le'u ste bco brgyad pa'o// //de nas thub pa sna tshogs tha dad blo can gyi//ston pas thams cad ye shes kyis ni zil mnan nas/ /bcu phyed phrag ri nas dang grong khyer nas rim gyis/ /rgyal po bum pas bsnyen pa'i grong khyer du gshegs so/ /de nas slob ma stong phrag tsam ni dul ba na/ /gshegs so des ni yab kyi yul ni rab tu thob/ /de nas de la rjes su 'dzin pa mdzad bzhed pa//rang gi grong gi gnas la mtha' ru bsnyen pa'o/ /de nas mdun na 'don dang blon po blo gros can/ /dga' ba'i gtam la dam pa rgyu ba de rnams kyis/ /yongs su rdzogs pa'i rab brnyes 'phags pa ste/ /sa skyong rgyal po de la zhus shing gsol ba'o//de nas de ni 'ongs pa thos nas sa skyong ni/ /dga' ba yongs ldan sems kyis blta bar 'dod pa yis/ /grong khyer ba ni kun gyis rjes su 'gro byas pa/ /myur bas brtan pa spangs shing bsu ba la gshegs so/ /drang srong dbus su tshangs pa bzhugs pa bzhin du ni//slob mas bskor ba de ni rgyang ring nas gzigs nas/ /drang srong chen po'i chos la rjes su 'gro bas ni/ /shing rta spangs nas rkang pa rnams kyis nye bar gshegs/ /myur bar de yi nye logs su ni yongs phyin nas/ /thub pa mthong ba nyid de des ni ma smras so/ /de la bu zhes smra bar nus pa ma yin zhing //de bzhin dge slong zhes ni nus pa ma yin no/ /de nas de yi dge slong cha lugs de mthong zhing / /bdag tu song ba'i sna tshogs dpal la brtags nas ni/ /dbugs ring brgyus nas mchi ma rnam par bton pa de/ /drag tu mun par gyur cing rnam par zlos pa nyid/ / lam 'gro skom par gyur pa mngon par song ba yis/ /rgyang ring dag nas rdzing bu skam po mthong nas ltar/ /rang gnas rnam pa dang bral nye bar nyer bzhugs pa/ /mthong nas bdag gi nyam thag stobs ldan mchog tu gyur/ /'jig rten mtha' ru gnas pa'i sems gyur thim pa na/ /sdug pa'i rnam 'gyur ri mor song ba ji lta bar//gzugs de nyid ni mthong ba na ni bdag la ni/ /dga' ba yod pa ma yin 'di la dga' ba thal/ /gang gis mtha' dag ri yis zlums pas sa gzhi ni/ /dang po'i dus su nga las nu ni gnas pa bzhin/ /gang zhig dbang po la yang slong bar 'os min pa/ / bdag gi de ni pha rol rnams la slong mos 'tsho/ /gangs 'di snying po lhun po las ni khyad 'phags shing / /gsal bas nyi ma la dang mdzes pas zla ba la/ /'gros kyis glang po che la dbyangs kyis khyu mchog la/ /des ni slong mo za zhing sa ni rdzogs la min/ /de nas bu yi 'du shes kyis ni 'phyo ba nyid//rgyal po'i bsam pa 'di ni rnam par mkhyen nas dang / /'jig rten lhag ma la yang rdzas su brtse ba ste/ /de yi don du sangs rgyas mkha' la 'phur bar gyur/ /nyi ma'i shing rta phyag gis reg par mdzad nas ni/ /rlung gis bsnyen pa'i lam la zhabs dag gis gshegs shing / /sku la gcig tu gyur zhing du mar gyur pa dang //mang po nyid du gyur nas gcig tu gyur pa'o/ /sa la chu bzhin du yang zhugs shing thogs med la/ /chu yi logs la sa la bzhin du spyod pa dang / /ra ba dang ni ri la thad kar mdzad pa dang / /thogs pa med cing mkha' la bzhin du rab tu zhugs/ /lus kyi phyed kyis chu yi char pa 'bebs pa dang //phyed kyis me bzhin du ni 'bar bar gyur pa ste/ /ri bos 'bar ba'i sman dang rab tu 'bar ba bzhin/ /mkha' la gang zhig 'bar dang 'bar bas mdzes par gyur/ /dbang phyug mngon par 'dod pa'i skye bo de yi ni/ /sems kyi rab tu dga' ba de ltar skyed nas ni//nyi ma gnyis pa bzhin du mkha' la bzhugs nas su/ /mi skyong la ni chos dag bgro bar mdzad pa'o/ /mi skyong khyed kyis bdag la gang zhig ltos pa dang / /mya ngan rjes su zhugs pa snying rje'i bdag nyid shes/ /bu la dga' ba de ni chod mdzod zhi bar gshegs/ / bdag las bu yi 'bras bu gsar pa snoms mdzod cig /gang zhig sngon chad bu yis pha la ma byin zhing / /sngon ni pha yis bu las rab tu ma thob pa/ /rgyal srid las khyad 'phags shing mtho ris las khyad 'phags/ /rgyal po mchog gi bdud rtsi de ni bzhes mdzod cig /sa skyong las kyis bdag nyid las kyi skye gnas dang //las kyi rten dang las kyi rnam smin skal ba dang / /las kyi dbang gis gnas par 'gro ba shes nas ni/ /phan pa'i ched du las gang gyur pa de bsnyen mdzod/ /'jig rten de nyid rtogs nas dang ni btsal nas su/ /dam pa'i las ni mi yi bshes min gzhan ma yin/ / thams cad bor nas las dang lhan cig khyod kyi ni/ /rten dang bral zhing gcig pur 'gro bar bya ba'o/ /lha 'am dmyal ba dud 'gro mi yi 'jig rten du/ /las kyi rten las son pa'i 'jig rten 'gro ba ste/ /srid pa'i rgyu ni rnam pa gsum dang skye gnas gsum/ /sna tshogs las ni 'jig rten pa yis rab tu byed//de phyir sde tshan gnyis ni yang dag 'jug par yang / /lus dang ngag gi las 'di rnam par dag pa dang / /yid kyis rab tu zhi la 'bad par bya ba ste/ /de ni bdag gi don yin gzhan don ma yin no/ /'gro ba chu yi dba' rlabs g.yo bar shes nas ni/ /brtags nas khyod kyis srid pa rnams su dga' mi bya//las ni yongs su zad phyir dam pa'i las gang de/ /mchog tu bde ba'i don du gang gyur bsnyen par bya/ /rgyu skar 'khor lo mkha' la bzhin du rtag par ni/ /'jig rten yongs su 'khor bar shes par byas nas ni/ /rtse mo 'das nas lha nas lha yang lhung ba ste//kye ma mir gyur smos ci blo gtad byed pa su/ /bde ba rnams las mchog tu thar pa'i bde ba dang / /dga' ba rnams las bdag tu dga' ba gtsor shes nas/ /lag 'gro rnams kyis brang la bzhin du bdag ldan ni/ /su zhig 'jigs pa du ma'i dpal gyis bde la dga'/ /de phyir brten pa khyim la mes bzhin 'jig rten ni//'jigs pa chen po dang ni yongs ldan mthong nas ni/ /gang zhig skye 'chi ngal ba mya ngan dang bral ba/ /zhi zhing brtan pa'i go 'phang de ni slongs mdzod cig /don gyis ma yin g.yul gyis ma yin mtshon gyis min/ /gang la rta dang glang pos don ni yod ma yin//skyon ni dgra bo rnams kyi sde de choms mdzod dang / /de las rgyal na rnam par rgyal ba gzhal du med/ /sdug bsngal dang ni sdug bsngal gyi rgyu zhi ba dang / /zhi ba yi yang mngon pa'i thabs ni shes par mdzod/ /bzhi po 'di yi kun nas khong du chud pa las/ /'jigs pa chen po dang ni ngan 'gro rnams 'gog go//de nas bde bar gshegs pas rdzu 'phrul gyi sngon du/ /zhing du byas pa'i sems la dga' ba skyes pa ste/ /thos nas mi skyong de yis chos ni rab thob cing / /dga' bzhin thal mo sbyar nas 'di skad ces gsol to/ /blo ldan dang bcas 'bras bu dang bcas khyed dgyes shing //sdug bsngal chen po las ni rnam grol khyed dgyes so/ /mya ngan ched du don med sa sbyin bdag dga' la/ /bu yi 'bras bu dang ldan bdag ni dga' bar gyur/ /phun tshogs spangs nas gshegs pa khyed ni gnas su gyur/ /ngal ba chen pos dub las khyed ni gnas su gyur/ / dga' ba'i gnyen 'dun dga' ba khyod kyis bor ba rnams/ /bdag cag rnams ni snying rje bar du gnas su gyur/ /lha yi drang srong rnams sam rgyal po'i drang srong rnams/ /de rnams sngon dus na yang gang la ma gshegs pa/ /nyam thag 'jig rten dag gi dge ba'i ched du lam/ /nges par legs pa 'di dang khyed kyis lhag par thob//khyod ni 'khor los sgyur bar gal te gyur na ni/ /bdag gi dga' ba de ltar 'gyur ba ma yin zhing / /rnam pa de ltar rdzu 'phrul 'di dang khyod kyi chos/ /mthong nas ji ltar bdag gi bstan pa dga' bar 'gyur/ /'dir ni yang srid nyid du sbyor ba'i chos la ni//'khor los sgyur bas skye dgu rnams ni skyong ba ste/ /'khor ba'i sdug bsngal chen po rnams ni 'joms pa la/ /'jig rten ched du chos kyang thub pa khyod kyis gsungs/ /gang gi rdzu 'phrul 'di dang rnam rgyas blo gros dang / /'khor ba'i 'jigs pa mtha' dag nges par log pa ni//dpal dang bral yang 'jig rten na khyod dbang phyug ste/ /dpal ni 'phel yang dbang med sred bcas ma yin no/ /brtse ba'i chos kyis bstan pa'i 'os gyur pa/ /shAkya'i rgyal pos mang po de dag smras nas ni/ /rgyal po nyid dang yab nyid du ni gnas na yang / / sras la de nyid khong du chud phyir phyag byas so/ /thub pa'i mthu ni lhag par thob pa mthong nas dang / /de nyid rab tu 'bigs pa'i bstan bcos mthong nas dang / /bla ma rgyal pos sbyar ba'i mchod pa mthong nas ni/ /du ma rnams kyis rab tu 'byung phyir re 'dod byas/ /de nas gzhon nu mang po 'bras bu la gnas rnams/ /chos kyi cho ga de nyid rab tu thob gyur te//sngags dang 'dod pa chen po rnams la ltos med nas/ /byams pa'i gnyen 'dun du ba rnams ni spangs nas so/ /kun dga' mdzes dga' kra mi la dang ma 'gags pa/ /dga' bo nye dga' dag dang de nas 'khyil pa 'dzin/ /slob ma'i lkog tu ston pa yis ni lha sbyin te/ /thub pas rjes su bslabs pa de rnams byung bar gyur//de nas mdun na 'don gyi bu ni bdag nyid che/ /'char kas lam de nyid la rab tu song ba ste/ /de yis nges pa rab tu mthong nas de bzhin du/ /nye ba 'khor dang rgyun shes bu yi blo byas so/ /rgyal po yis kyang sras kyi mthu ni mthong nas dang / /mchog gi bdud rtsi rgyun ni rab tu thob byas nas//chags pa med par rgyal srid spun zla la byin zhing / /rgyal po'i drang srong spyod pas khyim rnams la bsnyen to/ /de skad ces pa la sogs legs pa'i gnyen rnams dang / /'khor dang gnyen rnams rjes su brtul nas sangs rgyas ni/ /mchi ma dang bcas grong khyer pa yis mngon dga' ba//rang gnas grong khyer la ni dus su rab zhugs pa/ /don kun grub pa zhes pa rgyal po'i sras po ni/ /don mdzad grub pa grong khyer du ni rab zhugs pa/ /zhes ni don thos khang pa rnams su mi mo rnams/ /sgo rnams dang ni skar khung rnams la mnyam par brten/ /mtshams kyi sprin gyis phyed bkag 'od zer ldan pa bzhin//ngur smrig bsnams shing mdzes pa de ni rab mthong nas/ /bud med de rnams mig nas mchi ma phyung ba ste/ /pad+ma dang mtshungs thal mo rnams kyis phyag 'tshal lo/ /chos kyis dang ni gzugs kyis gsal bar gyur pa ni/ /'og tu zhal gzigs gshegs pa de ni mthong gyur nas//brtse ba dang ni gus pa rnam par ston pa ste/ /mchi mas rnyogs pa'i mig can rab myos ma rnams zlos/ /legs skyes dbu ni bzhar bar rnam par mdzad nas dang / /na bza' rnying pa yongs su gsol nas dang / /sku la gser gyi kha dog rab tu g.yogs nas dang //des ni spyan mig rab tu bkod nas gshegs/ /gang zhig gdung ba skyob pa'i gdugs dkar bsnyen phyir dang / /sras po rnam par dul ba blta ba'i phyir 'ongs shing / /kun nas gnas phyir 'os shing rgyal ba'i phyir 'os pa/ /des ni lhung bzed yang dag yongs su bzung nas gshegs/ / 'gram par ta ma la yi lo ma rnam bkod pa'i/ /mdzes ma'i gdong dang gdung ba skyob pa'i gdugs dkar ni/ /gang gis bsnyen par 'os shing mgyogs 'gro 'os pa ste/ /des ni lhung bzed yongs su bzung nas rkang pas gshegs/ /sa skyong bdag skyes rnams kyi dgra rnams zad par dang / /dga' ba rnams kyi chags dang 'gro ba'i rjes chags par//blta bar 'os shing sna tshogs dbu rgyan bsnams pa gang / /des ni sa yi gnya' shing gang tsam gzigs shing gshegs/ /'di yi blta ba ci zhig mtshan nyid de ni ci/ /don gnyer ci zhig rol pas dgra bor gyur pa ci/ /gang 'di brtul zhugs dang ni lhan cig rol ba ste//bu byis rnams dang mo btsun mdzangs ma rnams dang ni/ /rgyal po'i mna' ma nges par mya ngan 'dzin ma'o/ /grags 'dzin ma de shin tu dka' thub byed pa ste/ /gang gis jo bo'i rab tu spyod pa 'di thos shing / /thos nas kyang ni gnas shing nyams par 'gro ba med/ /'di yi gzugs ni nges par rjes su mthun pa dang //kha dog ngan pa'i gzugs 'di snang ba mthong nas ni/ /sras 'dod mi dbang rgyal po ji lta bur gyur zhing / /'tshe ba'i dgra bo la yang ji lta bur byed dam/ /mchi mas gang ba'i sras po sgra gcan 'dzin mthong nas/ /gal te de lta nyid du 'di ni chags ma yin//byams pa'i gnyen rnams las kyang gzhan du kha bltas pa/ /'di 'dra nges pa'i brtul zhugs la ni dge legs shog /gzi mdangs dang ni lus kyi dbyibs dang 'gros sam ste/ /bde ba'i rab tu 'jug la nges par tshad ma yin/ /yon tan de rnams dag gis 'di ni mdzes pa ste//zhi bas ldan zhing yul rnams kyis ni rnam par bral/ /sna tshogs ston ni rang mtshungs bsam pa yang dag yongs bzung nas/ /de skad ces sogs rab myos ma rnams mang po rnam par labs/ /sangs rgyas ma chags thugs kyang rang gi grong khyer la gshegs nas//bsod snyoms brnyes shing n+ya gro d+ha yi mtshan ma'i nags su gshegs/ /nyung ngu nyung ngu'i bsod snyoms sbyin pa rnams kyis nor rdzas phra zhing dge ba ma byas skye bo sgrol bar mdzad bzhed pa/ /spyod pa 'di yis yang dag tshim pa ma yin dge sbyong skye bo bsam pa ma thul ba la brten par mdzad bzhed la//'jig rten dag na skyid de ba zhes rgol ba nub par mdzad bzhed de bzhin yongs su bris nyid ston par mdzad bzhed pa/ /brtag par snyam la bsod snyoms phyir ni yab kyi grong khyer la ni sred med thugs mnga' de bzhin gshegs pa zhugs par gyur/ /sangs rgyas kyi spyod pa zhes bya ba'i snyan dngags chen po las/yab dang sras mjal ba'i le'u ste bcu dgu pa'o// //nga rgyal nyid kyis skye bo dam pa ma smod cig /bshes gnyen 'du shes dka' thub rnams ni ma 'joms shig /nyon mongs dbang gis dam pa'i brtul zhugs ma byed cig / dam pa min pa'i lta ba cung zad ma bsnyen cig /mtshar la ma 'gro mi dge'i lam la ma gnas shig /rgyags par ma 'gro dga' min mi bzod ma nyan cig /snyan grags mi bzad brdzun la blo gros ma 'dzin cig /bstan bcos mthong las lhag par gtor ma ma 'phrog cig /blo ni mnyam par zhog cing chos ni gyis mdzod cig /dam pa rnams dang sbrel mdzod ri mo khod mdzod cig /ji ltar phul byung 'di ni thob nas slar yang ni/ /rgya cher mngon par 'gro ba de ltar gyis mdzod cig /brtson 'grus brtsams nas dang ni bstan pa yongs bzung nas/ /rigs pa rnams ni bskyed nas skyon rnams zil mnan nas//'chi ba yang dag dran nas 'phags pa'i bya ba gyis/ /che ba'i bdag nyid thob nas zhi lam thob par gyis/ /gang gi 'bras bu 'di ni zhi ba skyong ba ni/ /las de nyid ni slar yang byed par 'os pa ste/ /yid gzhungs ldan pa 'di dang byed pa byas pa nyid/ /'bras bu gang zhig mthong bas sa bon bskrun par byed//'di na mchog gyur gang zhig sdig pa byed pa ste/ /snang ba de ni mun par gnas pa bdag gi lugs/ /chos ni gtso bo skyes bu gtso bo ma yin pa/ /mun pa snang ba la ni gnas pa bdag gi lugs/ /khyad 'phags gang zhig chos kyi cho gar 'jug pa ste/ / dkar po dkar por mchog tu 'gro ba bdag gi lugs/ /dman pa gang zhig sdig pa'i las ni byed pa ste/ /de yang mun pa mun pa'i mtha' ru 'gro ba lugs/ /de phyir phung po bzhi po de rnams shes byas nas/ /rgyal po 'bad pa gyis shig de ltar ji ltar 'dir/ /bde nas bde bar gal te 'gro bar 'dod na ni//phyogs ni gsum pa bsnyen zhing snga ma ma yin no/ /gzhan gyis gzhan la dge ba byed pa ma yin zhing / /ci ste byed na de la rjes su 'gro ma yin/ /byis pa'i nyams pa yod min rang la 'thob pa ste/ /ma byas pa yi 'ong ba 'grub pa yod ma yin/ /ma byas pa yang brgya la byed pa ma yin zhing //ma byas pa ni gzhan du dge legs 'gyur ma yin/ /der ni 'gro ba la yang nor ni yod min te/ /de phyir dge ba'i las kyi cho gar 'bad pa bgyis/ /gang zhig sdig pa lhag par spyod pa legs min zhing / /gson pa'i 'jig rten na de'i bdag la dga' ma yin/ /bdag gi ched du bdag gis sdig pa byas nas ni//gzhan du 'bras bu bdag nyid kho nas longs spyod do/ /rgyal po chen po ri bo chen po bzhi rnams ni/ /'ongs pa rnams su 'gro ba kun nas srub pa ste/ /chos kyi bya ba rnam pa sna tshogs bsten las ni/ /ji ltar 'thad pas gzhan na bya ba ci zhig yod//rga dang rgud pa nad dang de nas 'chi ba ste/ /bzhi po 'di rnams de bzhin du ni 'ongs pa ste/ /ri bo rnams kyis kun nas bskor ba bzhin du ni/ /'jig rten mtha' dag dbang med 'khol bar byed pa'o/ /de nas 'ongs pa rnams su dbang med sdug bsngal te/ /rten ni yod min mngon du 'thab min srung ba med//der ni byed pa'i ched du nor med chad pa med/ /chos las ma gtogs sman gzhan yod min na/ /de ltar mi rtag gyur na gson pa'i 'jig rten na/ /glog ni g.yo ba'i yul la rab tu zhugs pa na/ /'chi ba'i lag pa'i rtse la yongs su gnas pa ste/ /chos ma yin pas 'bras bu longs spyod par 'os min//dbang chen dang mtshungs mi dbang de dang de rnams ni/ /g.yul du lha yi mngon par 'thab la phyin nas kyang / /rab tu rgyas pa rnams dang nges par zum pa rnams/ /dus kyi dus su bde dang sdug bsngal skal ba'o/ /'byung po 'dzin pa'i sa yang zad par 'gro ba ste//'jig pa'i mes ni lhun po de bzhin sreg par byed/ /rgya mtsho chen po yongs su bskams par 'gro ba ste/ /dbu ba dang mtshungs mi yi 'jig rten kye ma ci/ /shugs byas nas kyang rlung ni zhi bar 'gro ba ste/ /'jig rten gdungs nas kyang ni nyi ma nub par 'gro//bsregs nas kyang ni me nyid 'da' bar nyer 'gro ste/ /gang de de ltar gnas par 'gyur ba yin snyam mam/ /lus po 'di ni yun rings dus su bsrungs kyang ngam/ /sna tshogs longs spyod rnams kyis nye bar bskyangs kyang ni/ /de yis 'dir ni nyin zhag 'ga' zhig bzhugs nas su//skye bo chen po'i rjes su brtse ba mdzad nas ni/ /bde bar 'pham byed kyis ni phyag gis mngon bsrungs pa'i/ /grong khyer la ni chen po'i tshogs kyis rab tu dpags/ /me tog rab rgyas mya ngan med pas gsal byas shing / /yan lag dmar por gyur cing khu byug skad sgrogs pa//ti se'i gangs ltar mtho ba'i lding khang phreng ba can/ /dpal ldan rgyal byed tshal ni de nas rab tu thob/ /des ni gtsang ma'i chus gang phreng ba dkar po can/ /gser gyi bum pa dang bcas bum pa blangs nas ni/ /de nas dus su rgyal byed tshal ni bzang sbyin gyis/ /de bzhin gshegs pa la ni rab tu phul bar gyur//de nas shAkya thub pa lta 'dod rgyal po ni/ /sde rab 'pham byed rgyal byed tshal du song ba ste/ /song nas de nas bkur sti byas te thub pa la/ /rab tu btud cing gdan byas tshig 'di gsol ba'o/ /thub pa grong khyer 'dir ni khyed kyi gnas bzhed pa/ /nges par rang ni ko sa la rnams kyi dge ba'o//de nyid gzigs pa 'di 'dra brten pa med pa ni/ /nye bar 'tshe byas yul ni skal ba med pa'am/ /khyed mthong ba 'am yang na mngon par phyag 'tshal ba/ /yang dag thob po bdag cag rnams kyi rjes bzung phyir/ /dam pa rnams kyi 'dus pa thob nas 'jig rten na/ /tshim pa med kyang ji ltar tshim pa nyid yin no//gang gis rten can rlung ni rab tu g.yos pa ste/ /de yi bdag nyid las ni nye ba las 'gro ste/ /mkha' 'gro'i bya rnams lhun po'i 'dus pa nyer thob nas/ /rang bzhin rnam par spangs nas gser du 'gyur ba'o/ /de phyir 'di dang che ge mor ni mgon gyur zhing //skye bo legs pa'i rten las gzhan min bdag gi nags/ /ga d+ha'i sras po thub pa chen po rab thob nas/ /phur bu gsum pa'i khyim ltar lta na mdzes par gyur/ /'jig rten dag na rnyed pa rab rnyed sna tshogs pa/ /tshad dang ldan pa dag ni mdzad pa can yin la/ /khyod kyi nye ba las ni don gang yin pa rnams//de dag rnams kyi grangs med nyams pa yod ma yin/ /legs pa khyod kyi nges pa'i lta ba'i lta ba las/ /'di las gzhan du rnyed pa shes pa ma yin zhing / /khyab bdag bdag ni gnod pa rnyed bla sdug bsngal ba/ /chags pa dang ldan rgyal po'i chos la spyod par 'gyur/ /de ltar dbang po dang mtshungs rgyal po de yis ni//rnam pa de ltar mngon du gyur te gsan nas ni/ /don dang 'dod pa dag gi chags pa mkhyen nas su/ /de yi bsam pa yang dag bskul ba thub pas gsungs/ /mi dbang khyod kyi tshig 'di ngo mtshar che ma yin/ /khyod kyi spyod pa 'di ni legs pa rnams la min/ /'og nas 'phos pa 'gro bar 'dod pa rnams kyis ni//phan pa 'dod pa'i dam pa'i skyes bu rnams la sdang / /gang phyir sa skyong khyed kyi dgongs ba de nyid ni/ /des na khyod la 'dir ni cung zad smra 'dod de/ /de ni shes par gyis shig bdag gi lta ba ni/ /'bras bcas ji ltar gyur pa khyed kyi de ltar gyis/ /mi skyong rgyal bo'i dus kyis bcings nas bkug pa na//mdza' bshes ma yin gnyen min phun tshogs rjes 'gro min/ /thams cad kyis ni dman zhing dbang med 'gro ba ni/ /grib ma bzhin du las gcig rjes su 'gro ba nyid/ /de phyir mtho ris dang ni grags pa dam pa ni/ /mngon par 'dod bzhin chos kyi rgyal srid rjes su skyongs//rmongs pa las ni chos la 'khrul pa'i rgyal po yi/ /rgyal srid de nyid mtho ris na yang ma yin no/ /'dir ni rgyal srid yang dag yongs su bskyangs nas ni/ /chos las ring min rta rid mtho ris rab 'thob nas/ /'dir ni rmongs las mi yi bdag po ni kum+b+ha/ /chos las 'phos shing ka shi rnams su sa la zhugs//'phags pa yi dang sdig pa yi ni las kyi ni/ /khyod la dper bstan zhi ba bdag gis de smras te/ /rang gi skye dgu rnams ni rtag tu legs bsrungs shing / /dpyad nas de phyir brtan pa dge la 'bad pa gyis/ /ji ltar srog chags rnams ni gtse bar ma byed cig /rtag par dbang po rnams ni rol par ma byed cig /'phags min gyis bsnyen khro ba 'dzin par ma byed cig /phyogs min bya bar sems ni g.yo bar ma byed cig /nga rgyal dang ni rgyags pa khur nas dus su ni/ /rab tu 'thor zhing shin tu gyur pa gnyid log gyur/ / rnam pa de ltar 'jig rten 'gro ba shes nas su/ /de la ma nyal dge ba la ni gnyid ma log /'khor ba'i phyogs ni g.yo bar 'dzegs nas su/ /nges par ltung na sa gzhi bag med 'gyur ba'o/ /gang zhig bde ba 'brel min de ni bsnyen bya min/ /gang gis 'bras bu legs min gang de bya ba min//gang zhig dge la sbyor min de ni bshes ma yin/ /sdug bsngal rnam par 'joms min gang de ye shes min/ /gal te ye shes min na yang srid ma yin zhing / /srid par gyur na lus med nyid la yin pa ste/ /lus su gyur na yul las thar pa ma yin zhing / /nyi tshe ma yin 'dod pa'i srid pa don med do//gang phyir lha na gnas rnams dus kyi dbang gis ni/ /gzugs med rnams kyang mdzad pa can phyir mi rtag ste/ /de bzhin 'jug pa min la blo gros zhugs bya zhing / /gal te 'jug pa med na sdug bsngal yod ma yin/ /gang phyir lus ni 'gro dang gnas pa la sogs pa'i/ / sna tshogs rten gyi sdug bsngal dag gi rtsa ba ste/ /de phyir lus med du ni ye shes nus pa gang / /de yod lus kyi bu lon yod pa ma yin no/ /gang las 'gro bas 'dod pa'i ched du bskyed pa yis/ /sdug bsngal chen po du ma rnams la nyer 'gro ste/ /'di las 'dod pa'i srid las rnam par dben nus shing //sdug bsngal rnams las chags med nyam thag yod ma yin/ /de phyir gzugs dang bral ba'i lha rnams na yang ngam/ /'dod pa rnams dang ldan pa'i gzugs ldan rnams na yang / /skor ba nyid phyir 'jug pa zhi ba ma yin na/ /'dod pa spyod pa drug po rnams su sngon nyid do/ / rnam pa de ltar mi rtag sdug bsngal de med cing / /rtag par 'bar ba'i 'jig rten gsum po nyid mthong nas/ /bya tshang shing la sgong skyes rnams kyis gdung ba ltar/ /gang du 'jug la smon lam rigs pa ma yin no/ /mchog de rig par bya zhing gzhan ni rig bya min/ /mchog de blo gros yin zhing gzhan ni blo gros min//mchog de bya ba yin zhing gzhan ni grub pa min/ /chos 'di khyim dang ldan pa'i skye bo rnams kyis te/ /yod pa min zhes de ltar nges par rig bya min/ /nags sam khyim na gnas pa dag gi zhi ba ni/ /gang gis sgrub pa yod pa de yis yod pa'o//tshad pas mngon par gdungs pa chu la rnam zhugs te/ /spyi las thams cad tshim pa nye bar 'gro ba nyid/ /sgron ma dang ldan mun pa ru ni mthong ba ste/ /rnal 'byor tshad ma'o na tshod ma yin rigs ma yin/ /kha cig nags na gnas kyang na tshod la mi sbyor/ /brtul zhugs zad cing ngan 'gro la ni bsnyen pa nyid//kha cig khyim na gnas kyang rnam dag las can ni/ /bag dang ldan pa nges legs la ni bsnyen pa'o/ /mun pa'i rgya mtsho la ni lta ngan dba' rlabs can/ /sred pa'i chu la srog chags rnam par 'phyo rnams su/ /shes rab gru bo dran dang brtson 'grus skya ba ni//gang gis yod pa de ni de la sgrol ba yod/ /de ltar yul la mchog tu song ba'i rgyal po de yis ni/ /thams cad mkhyen las chos kyi de nyid 'di ni nyer thob nas/ /rgyal srid ngan pa mi rtag g.yo zhes nyer skyes blo can ni/ /myos pa dang bral gnyis 'thung bzhin du mnyan yod nyid du zhugs/ / sa dbang btud pa de ni shes nas mu stegs can gzhan rnams/ /der ni stobs bcu pa la rdzu 'phrul gyis ni 'gran btsugs gyur/ /sa skyong las ni rnam par gsol nas de nas bdag 'pham pa'i/ /drang srong gis ni rdzu 'phrul ched du sdug pas gnas pa byas/ /de nas gsal zhing 'od zer 'phro ba dang bcas dkyil 'khor can//skar ma rnams ni 'bar bar gyur pa'i nyi ma shar ba bzhin/ /yang dag dga' zhing rnam pa sna tshogs blo can ston pa rnams/ /der ni thub pas rdzu 'phrul rnam pa mang pos pham par mdzad/ /de nas mnyan yod kyi ni de las skyes pa'i grags pa dang / /bkur sti nges pa mchog gi dpal gyis yongs su spangs par gyur//de nyid kyis ni srid pa gsum las gyen du 'dzegs pa ste/ /de'i phyir chos dag gsung bar bzhed cing yul la phan phyir ro/ /de nas thub pa mtho ris gnas pa'i yul ni ye shes kyis/ /rnam par btul nas mtho ris gshegs pa lo ni rnam phul des//mkha' la lha yi rgyal po'i bsod snyoms cho ga bzhin bzhes nas/ /lha yi 'jig rten dag nas sAm ka par ni yang dag babs/ /de la gzhal med gnam sa'i logs la babs pa yi/ /zhi ba thob cing ltos pa dang bcas lha rnams rjes su 'ongs/ /sar gnas nam mkha'i logs la gyen du gdong phyogs rgyal po ni//de dang de rnams mgo bo rnams kyis btud cing rab tu bzung / /sangs rgyas kyi spyod pa zhes bya ba'i snyan dngags chen po las/ rgyal byed kyi tshal rab tu bzhes pa'i le'u ste nyi shu pa'o// //thar 'dod lha na gnas rnams dang / /skyed ma mtho ris su btul nas//thub pas gdul bya rnams 'dul zhing / /de nas de ni 'jig rten rgyus/ /ri lnga'i dbus kyi grong khyer du/ /'od ldan 'tsho byed dbang po dang / /gro bzhin skyes dang yan lag sbyin/ /rnam par 'dren pas de nas btul/ /rgyal po'i bu ni 'jigs med dang / /dpal sbas dang ni nye ba 'khor//n+ya gro d+ha sogs mthar ldan rnams/ /snga ma'i lta ba las zlog go/ /chos kyi thos pa nyid las ni/ /mi skyong dpal ni yangs pa can/ /spos 'dzin gyi ni dbang phyug 'dir/ /pad+ma zhes bya rnam par btul/ /de nas gnod sbyin gangs ldan dang / /rtse mo brgya pa de nas ni/ /rnam rgyas pha rol gnon pa yis//rnam rgyas ri bor btul ba'o/ /yon tan gzigs pas mi skyong ni/ /lta byed btsun mo'i 'khor bcas la/ /'tsho byed a mra'i nags tshal du/ /mtshan mo dad pas sbyar bar mdzad/ /de nas pha rol 'gro ba can/ /bram ze zhi bar 'gro rnams des/ /rdo ba'i ri bor phra mo yi//tshigs bcad don rnams klog tu bcug /de nas dam pa dran mdzad pas/ /dngos su nor sbyin mthong ba mo/ /dga' ba'i skyed ma legs ldan ma/ /'od ma'i tsher ma can du btul/ /de nas brtan ldan grong khyer du/ /brtsegs sbyin gnyis skyes dam pa ni/ /mchod sbyin rnam pa sna tshogs kyis//mchod 'dod thar pa'i chos la btsud/ /de nas lus 'phags ri bo ru/ /btsud phyed rtse mo nyid dang ni/ /lha min skyes ma dang lha rnams/ /nges par 'dzin du btsud par gyur/ /de nas ang+ga'i grong khyer du/ /gnod sbyin gang ba bzang po dang / /mchog dang dbyug pa dkar dmar dang //gtum po lto 'phyo che rnams btul/ /a pa Na yi grong khyer du/ /bram ze ke bya she la dag /dka' thub thob pa thar par sbyar/ /'tsho byed sor mo'i phreng ba can/ /bran bzangs dang mtshungs gnyis skyes ni/ /bcom ldan rdzu 'phrul phun tshogs kyis/ /phra mo rnams su btul ba mdzad//gang ba bzang po dang mtshungs rdzas/ /lug ces bya ba bzang pos 'tsho/ /nor sbyin bzang dang bzang po'i bu/ /bzang por yang dag rtogs par mdzad/ /de nas tshangs pa'i tshe ldan ming / /rnam rgyas tshangs pa'i tshe ldan pa/ /gang gi smra ba smra mchog gis/ /lus 'phags po yi grong du pham//yangs pa can gyi rdzing bu ru/ /srin bu sha za dang seng ge /la sogs lits+tsha bI rnams dang / /mchog dang bden byed nyid btul to/ /de nas las bzang pos gnod sbyin/ /bzang po bzang po'i sems ldan pa/ /rgyan byed dang mtshungs grong khyer du/ /chos kyi lam la btsud pa'o//de nas blo dang ldan pa yis/ /shin tu mi bzad 'brog tu ni/ /gnod sbyin 'brog gnas zhes bya dang / /gzhon nu legs 'ongs la ston to/ /de nas gnod sbyin sdig med la/ /gnod sbyin bdag pos phyag byas pas/ /bde dga'i grong du thar pa ni/ /thar pa gzigs pas gdams pa mdzad//thub pa grags pa yangs rnams dang / /gnod sbyin drag po'i las can dang / /kha spu ldan pa gnyis la ni/ /ga yar drang srong gis bstan to/ /de nas drang srong dkar min gyi/ /tsha bo kA t+yA ya na ni/ /bA rA Na sI'i grong du sngon/ /gnyis skyes stobs bcu ldan pas btul/ /mtsho 'obs bde bar pha rol 'gro'i//grong la rdzu 'phrul gyis gshegs nas/ /dus su tshangs pa rna bstod la/ /de nas des ni rjes su bstan/ /rjes su bstan de rab dang bas/ /drang srong mchog gi gtsug lag khang / /rtag par dri ldan kha la reg /tsan+dan rang bzhin byed du bcug /de nas gang du thub pa'i zhabs//rdo las 'khor lo'i mtshan mthong bas/ /ser skya dka' thub ldan pa ni/ /'od zer ldan pa des btul lo/ /de nas gnod sbyin glang po la/ /glang po ldan par bstan pa ste/ /de bzhin dgra po bong bu ni/ /bcom brlag tu ni btul ba'o/ / yul 'khor skyong dang rdzas mnyam pa/ /yul 'khor skyong zhes dran pa ni/ /grong rdal rags pa'i mdzod ldan du/ /ston pas de nas rnam par btul/ /tshangs pa dang 'dra skye bo mchog /dgra can du ni btul ba ste/ /mkhas pa rgya chen skyes bu can/ /nyon mongs dul bar de bzhin no//'jigs bcas kyi dang mtshams bzangs kyi/ /bu'i bu mos 'jug bu dag dang / /mu stegs gzhan rnams kyi mun pa/ /mnyan yod nyid du thub pas bcom/ /'dir ni bram ze mchod sbyin can/ /dge sogs rnams dang rigs gtsang dang / /ko sa la yi dbang phyug ni/ / sangs rgyas nyid kyis dad pas sbyar/ /de nas bram ze mkhas pa ni/ /bram ze su ka sA ri dang / /she ta bi ka'i 'brog zhi bar/ /bstan pa mchog gis bstan pa'o/ /de nas 'thab pa'i grong khyer du/ /grong khyer gtso dang dus byed dang / /'jigs pa'i las can chu srin klu/ /rab tu ma zhi zhi bar mdzad//de nas b+har ga rnams su des/ /gnod sbyin 'jigs byed btul mdzad cing / /rigs med kyi ni bla ma gnyis/ /rgan po de bzhin rjes su bzung / /nor ldan gyi mchog dbyangs ldan dang / /bud med sgur mchog sogs rnams dang / /skyes chen de rnams de rnams ni//kau shAm bIr ni rjes su bzung / /de nas spos 'dzin yul nyid dang / /klu chen sog ma med pa ni/ /dul ba'i bdag nyid dul ba la/ /nang gi pha rol son par gshegs/ /'bar zhing 'jigs pa'i las can ni/ /mthar byed bzhin du sreg 'dod pa/ /rnam par btul nas mkhas pa des//dus su de nas gdams ngag bstan/ /de la sogs pa'i 'byung po rnams/ /sa pa rnams dang mkha' 'gro rnams/ /btul nas tshigs su rgya mtsho bzhin/ /sangs rgyas grags pa 'phel bar gyur/ /che ba'i bdag nyid de mthong nas/ /lha sbyin rlom sems byas pa ste/ /bsam gtan rnams las 'khrul thob cing //'dra ba min pa mang po byas/ /nye bar bcom pa'i sems ldan des/ /thub pa dge 'dun dben byas shing / /'phye las 'dod pa ma byas te/ /de la gnod pa'i phyir brtsams so/ /de nas bya rgod phung po'i rir/ /rdo ba'i 'khrul 'khor byas pa ste/ / thub pa'i steng du gang 'phangs pa/ /ltung ba ma yin gnyis su gyur/ /'jig rten dus su chu 'dzin sngon po sgra sgrogs pa/ /zla ba 'gog pa la ni mkha' la rlung bzhin du/ /de bzhin gshegs pa la ni mngon du gdong phyogs par/ /glang po'i dbang po rgyal po'i lam la gtad pa'o/ /lus kyis snun pas yan lag mchog ni nyer blangs shing //mche bas phug pas rgyu ma'i dra ba rab bkram pa'i/ /lus po rnams kyis rgyal po'i khab kyi lam rnams ni/ /rgyu bar dka' bar byed la mngon par rab tu zhugs/ /sha ni 'dod pas mi yi brla la rmugs pa ste/ /mche ba'i rtse mos reg cing g.yo ba'i rgyu ma'i phreng //khrag gis gsher ba'i mgo bo sna ljags drag po yis/ /'phen pa'i don du rdo rnams bzhin du gyen du 'phen/ /gsum du rab dga'i chang gis 'thor ma'i dri ldan zhing / /rul ba'i khrag dang zhag gi dri yis bsgos rnams kyis/ /de tshe bskor zhing mtha' med khro ba dang ldan pa//grong khyer skye bo de la skyo bas 'jigs par byed/ /gnyis 'thung myos pa dus kyi dbyug pa 'jigs 'dra ba/ /khengs las gdong ni bcos shing sgra skad 'thon pa ste/ /khros pas rnam par log pa'i mig can de mthong nas/ /hA hA byed pa rgyal po'i khab nas byung bar gyur//kha cig yid mi bde bas phyogs su bros pa ste/ /gzhan ni mtho ba min pa'i yul rnams la thim zhing / /de bzhin 'jigs pa las gzhan 'jigs pa ma bzung nas/ /gzhan rnams gzhan rnams dag gi khyim rnams la zhugs so/ /kha cig rnam par 'dug pa'i seng ge'i sgra rnams ni//rang gi srog la the tshom yang dag ma bsams shing / /sangs rgyas la ni mngon par 'tshe ba ma byed ces/ /rab tu bzung nas gnyis 'thung de la rgyab nas 'bod/ /de bzhin gzhan rnams glang po skyong la 'bod pa ste/ /gzhan rnams 'di la thal mo dag gis phyag 'tshal lo/ /de nas de la gzhan rnams bsdigs par byed pa ste//kha cig nor gyis sred cing 'dod par byed pa'o/ /rlung 'gro skar khung dag nas rnam par lta bzhin du/ /lang tsho ma rnams lag pa g.yo zhing ngu ba ste/ /'jigs ma gzhan rnams gser gyi gdu bu dag dang ldan pa yis/ / zangs mdog lag pa rnams kyis mig rnams 'gebs pa'o/ /yongs su ro myang glang pos 'joms par 'dod pa na/ /gyen du lag bteg skye bo ngu bar gyur na yang / /gshegs pa 'byed pa med cing gnod pa mi mnga' bar/ /bde bar gshegs pa rang gnas rnam 'gyur med par gshegs/ / byams pas 'byung po rnams la rjes su brtse ba ni/ /gus pas lha rnams kyis ni rjes su 'gro ba ste/ /de la dbang po'i glang po ches kyang reg pa ru/ /nus pa ma yin gang phyir thub pa brtan par gshegs/ /gang phyir sangs rgyas la ni rjes 'gro dge slong ste/ /des ni rgyang nas glang chen mthong nas bros pa ste//sna tshogs bdag nyid 'jig rten rang bzhin gyis bzhin du/ /kun dga' bo gcig sangs rgyas la ni rjes su song / /de nas glang chen khros pa de ni nyer 'ongs nas/ /thub pa'i mthu las 'du shes nye bar thob pa ste/ /mig sman ri bo rdo rjes phye mar bcom pa bzhin/ /lus po rab tu zegs shing spyi bos 'gyel bar gyur//de la shin tu mdzes shing 'dam skyes 'jam po yis/ /legs skyes sor mo'i dra ba'i phyag gis mgo bo la/ /zla ba chu 'dzin la ni 'od zer gyis bzhin du/ /gnyis 'thung dbang bo la ni thub pas reg par gyur/ /chu yi shin tu khur las dus kyi sprin bzhin du//zhabs kyi rtsa bar gnyis 'thung de ni bsdad pa ste/ /thub pas rna ba'i ta la g.yo med la gzigs shing / /de la sems can ma 'os zhi bas bstan pa'o/ /sdig med dang bcas rnam par 'joms pa sdug bsngal te/ /sdig med nyid la glang chen gnod pa ma byed cig /srid pa srid par sdig med bcom pa'i srog chags kyis/ /bde 'gro brgyad la glang chen 'gyur ba ma yin no/ /'dod chags dang ni zhe sdang de bzhin gti mug ste/ /glang chen gsum bo bzod par dka' ba'i chang yin la/ /chang gsum rnams dang thub pa rnams ni bral ba ste/ / rims nad med cing mya ngan 'das pa mngon par brnyes/ /de phyir mun par 'dod pa 'di ni spongs 'dod pa/ /chang ni spangs la rang bzhin 'du shes thob par gyis/ /'khor ba'i rgya mtsho'i 'dam ni rgyas par chags pa ste/ /slar yang de ltar gnyis 'thung dbang po ma ltung cig /de nas glang po des ni gsung 'di thos nas su//chang ni spangs shing yang dag rig par song ba ste/ /bdud rtsi 'thungs nas nad rnams dag las grol ba bzhin/ /nang du song ba'i bde ba dam pa thob par gyur/ /slob ma bzhin du thub la rab btud de ma thag /chang ni yongs spangs glang po'i dbang po de mthong nas//kha cig chos rnams bskor zhing g.yug par gyur pa ste/ /gzhan rnams lag pa rnams ni rdebs shing skad 'don to/ /gzhan rnams kyis ni mgo bos thub la phyag 'tshal zhing / /de nas de la gzhan rnams bskor ba byas pa ste/ /gzhan rnams 'phags pa nyid las glang chen la bstod cing //ya mtshan dang bcas gzhan rnams reg par gyur pa'o/ /lding khang la gnas bud med gzhan rnams de la ni/ /gtsang zhing rin thang chen po'i gos rnams kyis mchod cing / /gzhan rnams gsar ba'i phreng ba yon tan yid 'ong dang //rgyan ni de dang de dag rnams kyis mngon par 'thor/ /dus dang mtshungs pa'i glang po dul bar gnas pa na/ /skye bo dad pa med pa dbus nas song ba ste/ /dbus gnas khyad par las ni dang bar rab song zhing / /dad pa rnams kyang gang de bstan par nye bar song //dad pa la gnas ma skyes dgra ni thub pa yis/ /glang chen dbang po de ni brtul ba mthong nas ni/ /ya mtshan gyur zhing de nas dga' ba skyes pa ste/ /sangs rgyas la ni mchog tu dad pa byas pa'o/ /nyon mongs rtsod ldan dus ni nges par log pa na/ /rdzogs ldan dus ni 'ongs nas slar yang chos don bzhin//de ltar rdzu 'phrul dang ldan snyan grags mchog rnams kyis/ /rab tu gnas pa'i dka' ldan thub pa mchog 'phel to/ /mi dge ba dang yongs su ldan pa'i lha sbyin no/ /nyon mongs sdig pa'i las ni mang po byas nas ni/ /mi skyong ste na rgu ba gnyis skyes drang srong gi /dmod pa las bzhin sa yi 'og tu bying bar gyur/ /sangs rgyas kyi spyod pa zhes bya ba'i snyan dngags chen po las/ las kyi rgyun gyi le'u ste nyi shu rtsa gcig pa'o// //de nas 'jig rten rjes bzung nas/ / dus kyi smra ba rnams kyi mchog /chos kyis sa ni khyab mdzad nas/ /mya ngan 'da' ba dang mtshungs dgongs/ /de nas dus su rgyal khab na/ /pa TA li yi grong du gshegs/ /mchod rten pa TA li mtshon pa/ /der ni 'phags pa de bzhugs so/ /dus ni de tshe grong khyer gyi/ /lits+tsha bI ni zhi ba'i phyir//ma ga d+hA yi rgyal po yi/ /blon po char dbyibs kyis byas so/ /lha rnams kyis der rang gi nor/ /nye bar len pa rab gzigs nas/ /grong de 'gro na phul byung du/ /de bzhin gshegs pas rnam par gsungs/ /de tshe char pa'i rnam pa yis/ /bkur byas byed pa rnams kyi mchog /rgya mtsho'i chung ma gtso bo la/ /mngon phyogs slob ma dang bcas gshegs/ /gang+gA'i 'gram du de gshegs nas/ /ji ltar rnyed gru de dang des/ /skye bo rnams ni sgrol ba gzigs/ /de rnams gzigs nas thugs mdzad do/ /'bad pas chu bo sgrol ba la//bdag gi de ltar 'dra ba yin/ /de phyir rdzu 'phrul mthu yis ni/ /bdag gi gru med rab tu 'gro/ /de ltar der ni slob mar bcas/ /lha mi rnams la mi snang zhing / /rlung gis 'gros kyang phan mdzad nas/ /skad cig gis ni pha rol gyur/ /sdug bsngal mtsho yi pha rol sngon//ye shes gru bos de mkhyen nas/ /slar yang gru 'di ma dmigs nas/ /thub pas gang+gA bsgral ba'o/ /bcom ldan nyi ma mdzes pa ni/ /gang gi sgo las nges 'byung ba/ /de ni de tshe gau tam sgor/ /de la mchod don nyid du byas/ /'gram gang dag las rnam 'dren pa/ /gang+gA'i pha rol du gshegs pa//de ni stegs su 'gro la grags/ /de yi rigs kyis mngon par brjod/ /de nas sgrol 'dod mi rnams dang / /rgal ba rnams dang sgrol ba rnams/ /ya mtshan rnam rgyas gdong rnams kyi/ /mig rnams de la btung bar gyur/ /de nas gang+gA'i 'gram nas ni/ / sangs rgyas ku Da'i grong du gshegs/ /der ni chos ldan gtam mdzad nas/ /nA dA'i kar ni mngon par gshegs/ /dus ni de tshe de na ni/ /skye bo chen po rgud pa ste/ /gang gis gang du gang 'gro ba/ /de rnams la der thub pas gsungs/ /der ni mtshan mo gcig phul nas/ /yangs pa can gyi grong du gshegs//de nas a mra skyong ba'i sa/ /dpal ldan tshal du dpal stug gshegs/ /a mra skyong ma res ma'i gtso/ /rnam par 'dren pa der thos nas/ /rnam dul theg pa la gnas nas/ /mchog tu dga' bas rab tu song / /phra ba'i gos dkar 'dzin pa mo//phreng ba med cing dbyug bral ma/ /lha yi bya ba'i dus su ni/ /legs ma rigs kyi mna' ma 'dra/ /rang gi gzugs kyis khengs pa yi/ /dam pa lits+tsha bI rnams kyi/ /sems rnams dang ni nor rnams dang / /yon tan mtha' dag rnams kyis phrogs/ /dpal dang mdzes pa brtan pa yis//nags kyi lha mo'i gzugs 'dra ba/ /de ni theg pa la babs nas/ /skyen par nags der rab tu zhugs/ /rigs kyi mo btsun gdung ba mo/ /mig rab g.yo ba de gzigs nas/ /bde bar gshegs pas rnga dbyangs kyis/ /dge slong rnams la bka' stsal pa//stobs chung rnams kyi yid kyi rim/ /a mra skyong ma 'di mngon 'ongs/ /dran ldan bdud rtsi'i sems ldan rnams/ /ye shes kyis ni khyed rnams gnas/ /nye sar sbrul ni mchog yin zhing / /ral gyi gdengs pa'i dgra bo mchog /dran dang ye shes rnams bral ba'i//nye sar bud med rnams ma yin/ /bsdad pa'am ni nyal ba'am/ /'gro 'am yang na gnas pa 'am/ /bud med ri mor bris pas kyang / /mi rnams kyi ni yid 'phrog go/ /'di rnams zhen pas nyam thag gam/ /gyen du lag bteg du na yang / /skra bkram rnams kyis bsreg pa ru//nus na mo btsun rnams sngon nyid/ /pha rol po 'brel rnam mang po'i/ /dbrog bya yon tan gyis bslus rnams/ /de yi rang bzhin ma mthong ste/ /bud med rnams la byis rnams rmongs/ /mi rtag sdug bsngal bdag med dang / /mi dge ba zhes mthong nas ni/ / lta zhing sgom pa po rnams kyi/ /sems ni zil gyis non ma yin/ /gnas de rnams su legs goms blo/ /spyod yul rnams su ba lang bzhin/ /lha yi yul rnams kyis 'joms par/ /nus min mi rnams kyis ci smros/ /de phyir shes rab mda' 'dzin zhing //brtson 'grus gzhu ni lag pa na/ /dran pa'i go cha yongs bgos shing / /yul gyi 'du shes can du mnos/ /lcags kyi thur ma tsha mo yis/ /mig la reg pa mchog yin zhing / /g.yo ba'i mig can bud med la/ /ma rungs dran pas lta phyir min/ /gal te dus ni de yi tshe//chags pa'i sems kyis dus byed na/ /dud 'gro 'am ni 'og nyid du/ /dbang med bcings nas khrid par byed/ /de phyir 'jigs pa 'di shes nas/ /mtshan mar spros pa mi bya zhing / /lus po la ni gzugs tsam du/ /gang gis mthong ba de mthong ngo / / dbang pos 'jig rten na yul rnams/ /'chi min dbang po rnams des min/ /gang zhig de rnams la chags gyur/ /de ni de rnams las 'ching ngo / /ba lang gnyis kyi sbyor ba'i phyir/ /sbyor ba la gcig ji ltar gyur/ /yul dang dbang po de dag ni/ /chags pa phan tshun de ltar min//mig gis gzugs ni 'dzin pa ste/ /sems kyis rnam par rtog par byed/ /rnam par rtog las der skye zhing / /chags dang chags bral nyid kyang ngo / /rnam par ma brtags dbang po'i don/ /gal te don med ched gyur na/ /dbang po'i spyod yul la spyod pa//thams cad don med kyis sbyor to/ /de phyir ma dor dran pas dang / /bag yod mchog tu 'gro bas dang / /rang don rjes su mthong bas dang / /gdung med sems kyis bsgom par bya/ /de ltar don mthar ma gyur pa'i/ /dge slong rnams la de rjes bstan//ltos byas a mra skyong ma ni/ /thal mo sbyar byas nye bar 'ongs/ /des ni thugs zhi drang srong ma/ /shing drung gnas pa mthong nas ni/ /nags kyi yongs su longs spyod kyis/ /mchog tu rjes su 'dzin pa snyam/ /de nas bkur sti mang po las/ /g.yo yang lta byed rab bkod nas//me tog tsam pa ka rgyas ltar/ /mgo bos thub pa la phyag 'tshal/ /kun mkhyen gyis kyang rjes gnang ma/ /de nas sa la bsdad pa ste/ /de yis blo la bzod gsung gis/ /thub pas de la bka' stsal to/ /bsam pa 'di ni yon tan ldan/ / rnam dag sems dpa' nyid bstan to/ /bud med byis pa phul gnas pa/ /chos la 'dod pa rnyed par dka'/ /gal te chos kyi bdag nyid gyur/ /zhen pas bcom pa'i sems ldan pa'i/ /na rab mi mo rnams kyis dang / /blo ldan mi rnams kyis mtshar cing / /rang bzhin gyis ni blo chung zhing //g.yo ba'i sems ldan lang tsho ma/ /yul gcig ro yis 'jig rten na/ /chos shes shes pa ya mtshan no/ /khyod kyi chos la yid gyur pa/ /de ni khyod kyis bdag nyid don/ /mi rtag gson pa'i 'jig rten na/ /chos las gzhan na nor yod min/ /nad kyis nad med 'joms pa ste//rga bas lang tsho gcod pa nyid/ /'chi bas srog ni len pa ste/ /chos kyis rgud pa yod ma yin/ /gang phyir dga' ba rnams dang bral/ /mi dga' ba rnams dang sbyor zhing / /mngon par 'dod pa thob pa na/ /de phyir chos ni mchog tu 'gro/ /gzhan dbang sdug bsngal chen po ste//rang dbang mchog tu bde ba nyid/ /ma nu'i rigs su skyes na yang / /bud med thams cad gzhan dbang ngo / /gang phyir gzhan dbang nyid phyir dang / /de bzhin phru gu 'dzin pa'i phyir/ /bud med rnams kyi sdug bsngal lhag /de phyir yang dag nges par 'os/ /de ltar thub pa chen po'i gsung //rang bzhin gyis dang mkhas las dang / /brtan las byis kyang byis min bzhin/ /thos shing mngon par dga' ba'o/ /de bzhin gshegs pa'i chos kyi smra ba yis/ /'dod pa'i bdag nyid can gyis sems la brabs pa ni/ /bud med nyid ni smad cing yul las log pa ste//gang gi skye bo'i rten la btsog par byas pa'o/ /de nas me tog khur las tsu ta'i mchod sdong bzhin/ /yang dag kun nas dud pa'i lus kyi mchod sdong can/ /thub pa chen po la ni gus pas mig zhugs shing / /yang yang chos ni rnam par dag pa'i lta bas gnas//rang bzhin gyis ni ngo tsha dang ldan bud med de/ /chos ni mngon par 'dod pas yang yang bskul ba ni/ /'dam skyes mdzod dang 'dra bas thal mo sbyar nas ni/ /dal bus smra ba'i skad kyi gdangs kyis gsol ba'o/ /bcom ldan don mdzad bdag la gsung don du//nang par bsod snyoms dus su dge slong sder bcas pa/ /sdug bsngal nye bar zhi ba'i mdzad po 'jig rten na/ /'bras bur gyur pa'i bdag la 'bras bur mdzad du gsol/ /de nas de yi gus pa de ltar gzigs nas dang / /sems can rnams ni bza' ba'i dbang nyid mkhyen nas ni//gsung ma phye nas bde bar gshegs pas de ltar zhes/ /de la nges par rnam 'gyur brda yis mdzad pa'o/ /skad cig mdzad pa dang ldan spyan yangs mchog gi chos mnga' zhing / /chos kyi snod la des ni dga' zhing mgu la rungs pa ste/ /gus pas rnyed pa mchog ni rnam par nges shing bstod par gyur//sangs rgyas kyi spyod pa zhes bya ba'i snyan dngags chen po las/ a mra skyong ma'i nags gzigs pa'i le'u ste nyi shu rtsa gnyis pa'o// //de nas thub pa'i thugs rig nas/ /phyag 'tshal nas kyang grong du song / /de ni lits+tsha bIs thos nas//lta 'dod sangs rgyas la song ngo / /dkar po'i rta dang shing rta gdugs/ /phreng ba rgyan dang bgo ba rnams/ /kha cig kha cig de rnams dang / /dmar ser rnams dang de bzhin gzhan/ /kha cig bai DUr+ya ljang dang / /gzhan rnams rma bya'i mjug ma ste/ /de ltar cha lugs rgya chen po//bdag gis dga' byed rnams dang song / /ri bo rnam rgyas ro stod can/ /gser gyi gnya' shing lag pa rnams/ /dpal ldan bong ring dngos su ni/ /de rnams mtho ris bzhin du mdzes/ /mtshams sprin rkang la sna tshogs rnams/ /glog ni rab tu snang ba bzhin//shing rta rnams las babs 'dod pas/ /de rnams gnas pa rnam par mdzes/ /dbu rgyan rnam g.yo rnam btud pa'i/ /brtan rnams thub la phyag 'tshal nas/ /nga rgyal ldan rnams rgyags med bzhin/ /chos la dga' bas de rnams gnas/ /nyi ma sprin dang bral ba yi//logs su khyer 'jigs gzhu bzhin du/ /thub pa'i drung der de rnams kyi/ /chags bral dkyil 'khor mdzes pa'o/ /sa la seng ge gnas pa rnams/ /gser gyis spras pa'i seng ge'i gdan/ /seng ge la sogs de rnams la/ /mi yi seng ges de nas gsungs//gzugs dang dpal dang stobs la sogs/ /bkur mang rnams dang ldan pa ni/ /khyed kyi chos la gus 'di gang / /de las lhag par mdzes pa nyid/ /tshul khrims la sogs yon tan gyis/ /ji ltar 'jig rten mdzes de ltar/ /lus ni sna tshogs gos sam rgyan//phreng ba rnams kyis ma yin no/ /gang du khyed cag bdag po rnams/ /chos shes 'dul ba 'dod pa rnams/ /spong byed pa rnams rjes bzung zhing / /skal ba bcas rnams bdag gi lugs/ /'phags skyes rnyed par dka' dus su/ /chos la gnas rnams srung byed gyur//phyis 'byung ma yin yul rnams kyi/ /skal bas dman pa rnams kyis min/ /dpal ldan skal ba chen po rnams/ /chos shes srung bar byed rnams kyis/ /bsrung ba nyid kyis yul 'di ni/ /chos kyis kyang ni rjes su 'dzin/ /rlung rnams rgal 'dod pa la rnams/ / khyu mchog rgal ba rnams kyi bzhin/ /rgyal po rnams kyis gang bzung ba'i/ /yul la de nas skye dgu 'gro/ /khyed cag rnams la tshul khrims de/ /rtag par 'gyur bar 'os pa ste/ /bdag gi don ni 'dod rnams kyi/ /'dir dang song nas dbrog bya min/ /yid ni tshim zhing bkur mang dang //rnyed dang grags dang yid ches nyid/ /dga' ba nyid dang song nas bde/ /tshul khrims kyi ni 'bras bu che/ /'byung po rgyu dang mi rgyu yi/ /rten ni ji ltar sa yin pa/ /de ltar yon tan thams cad kyi/ /rten ni tshul khrims dam pa'o/ /'phur 'dod gshogs pa med pa dang //rgal 'dod gru med ji lta bar/ /mi ni tshul khrims rnam spangs par/ /dge legs 'dod pa de ltar shes/ /me tog 'bras bus khyab pa'i shing / /tsher ma can gyur ji lta bar/ /thos dang gzugs don phun tshogs pa/ /tshul khrims 'chal pa de ltar ro/ / sna tshogs gos dang rgyan ldan zhing / /khang bzangs rnams su gnas na yang / /tshul khrims dang ldan skye bo gang / /de yi drang srong dang mnyam 'gros/ /ngur smrig shing shun zur phud dang / /gtsug phud spyi bo ral pa rnams/ /tshul khrims nyams pa kun rnams kyi//bcos ma nyid du shes par bya/ /stegs las dus gsum khrus byas nas/ /me la lan gnyis bsregs nas dang / /gdung ba drag por gdungs nas kyang / /tshul khrims med na bdag ma yin/ /sha za rnams la lus byin nas/ /ri yi logs nas bor nas sam/ /me 'am chur ni bdag mchongs na//tshul khrims med na bdag ma yin/ /'bras bu rtsa ba chu za zhing / /ri dgas bzhin du rtswa za'am/ /rlung gi bza' ba 'dod pa yang / /tshul khrims med na bdag mi 'gyur/ /mi gang tshul khrims kyis dman pa/ /de ni bya dang ri dwags mtshungs/ /rdol ba'i snod ni chu yis bzhin//de ni chos kyi snod ma yin/ /'jigs pa dang ni gtam ngan dang / /yid mi ches dang mi dga' nyid/ /mngon sum 'dir ni thob pa ste/ /song nas don med za bar 'gyur/ /de phyir tshul khrims gzhom mi bya/ /'brog dgon dag na lam mkhan bzhin/ /rang dbang dag ni rnyed dka' ba'i//tshul khrims mtho ris dag na gru/ /skyon rnams kyis bcom sems kyis ni/ /thams cad bcom nas 'jug pa ste/ /tshul khrims rab tu gnas byas nas/ /nyon mongs 'joms la 'bad pa gyis/ /de phyir dang por nga snyam pa/ /brgyan par 'dod pas spang bar bya//bsreg bya za ba'i du ba bzhin/ /yon tan rnams kyis nga snyam nyid/ /skar ma nyi ma zla ba rnams/ /sprin gyi dra ba chen pos bzhin/ /nga rgyal gyis bcom yon tan rnams/ /yod par gyur kyang mdzes ma yin/ /dregs pa ngo tsha 'joms pa ste/ /mya ngan gyis gtan dga' bas lus//yon tan rnams kyi rtsa ba nas/ /'joms phyir nga'o snyam pa skye/ /'gran pa dang ldan nga rgyal las/ /lha min lha rnams kyis bcom zhing / /mi skyong ta la'i byin pa dang / /dong gsum pa rnams zad par gyur/ /gang zhig mi rtag dngos rnams su/ /mchog ni nga yin snyam pa dang //mi dman pa ni nga zhes snyam/ /de ni mkhas pa min par rtogs/ /gzugs ni brtan pa ma yin zhing / /'jig pa'i chos can g.yo ba yis/ /nga zhes gang zhig nga rgyal te/ /yongs su rtog pa min gzhan ci/ /'dod pa'i 'dod chags stobs ldan pa//rab gab lhan skyes dgra bo ste/ /bshes min nang na spyod pa bzhin/ /gang zhig bshes kyi sgo nas 'joms/ /'dod chags me dang me nyid ni/ /sreg pa'i bdag nyid kyis mnyam ste/ /'dod chags me ni 'bar ba na/ /mtshan mo de nyid ring bar 'gyur/ /'dod chags me'i stobs ji 'dra ba//me yi stobs ni de 'drar smin/ /me ni chu rnams kyis shes te/ /'dod chags me ni mtshos kyang min/ /dus su nags su mes tshig rnams/ /nags kyi shing rnams skye ba ste/ /'dod chags mes tshig blo med rnams/ /chos la skye ba ma yin no/ /chags las bde ba tshol ba ste//bde phyir mi dge ba byed cing / /mi dge ba las dmyal bar 'gro/ /chags pa dang mnyam dgra bo med/ /chags las sred pa skye ba ste/ /sred las 'dod pa rnams la chags/ /'dod pa rnams las sdug bsngal 'thob/ /chags pa dang mnyam yul med do/ /chags pa zhes bya'i nad chen po//de ni byis pas rtogs ma yin/ /mi rtag nyid las mi gtsang las/ /sdug bsngal nyid las bdag med las/ /gal te mthong na mi chags te/ /log pa'i blo yis chags pa'o/ /de phyir dngos po la chags pa/ /gang du nye bar skye ba na/ /der ni ji ltar 'gyur brtag ste//gyur pa mthong ba zhes brjod do/ /yon tan yongs su rtogs pa na/ /ji ltar chags par nye bar 'gro/ /yon tan med na yongs rtogs na/ /de bzhin khro ba 'gugs par byed/ /de phyir khro ba spong 'dod pas/ /zhe sdang yongs su brtag mi bya/ /dkar min 'gros las ngu ba bzhin//khro ba las ni zhe sdang 'dzag /khro ba gzugs ldan rnams kyi dga'/ /mig ldan rnams kyi mun pa yang / /chos don 'dod pa rnams kyi gshed/ /mos pa'i mi mthun pa nyid do/ /khro ba blo yi mun pa mchog /mdza' bshes gyur pa'i dgra bo mchog / bkur sti mang po'i gcod pa po/ /zil gyis non pa'i byed pa po/ /de bzhin khro ba mi bya zhing / /byas nas kyang ni dor bar bya/ /dmug pa'i rang bzhin lto 'phye bzhin/ /khro ba'i rjes su 'jug mi bya/ /skor ba'i shing rta bzhin gang gis/ /khro ba brtan pas thag pas bzung //de bdag kha lo sgyur snyam ste/ /cig shos skye bo thag pa 'dzin/ /gang zhig khro ba 'dod pa ste/ /skye ba 'gog pa 'dod ma yin/ /phyis de khro ba med pa na/ /me la reg pa bzhin du bsreg /khro ba skyes pas sngon rol du/ /bdag nyid kyis ni sems bsreg ste/ /rnam par 'phel zhing phyin pa ni//gzhan ni sreg gam mi sreg gam/ /nad sogs nye bar 'tshe rnams kyi/ /gang tshe 'jig rten brtse ba rnams/ /lus can bshes ma yin rnams la/ /gnod sems byas nas yon tan ci/ /de phyir 'jig rten sdug bsngal ba/ /shes nas khro ba zlog pa'i phyir//'byung po kun la byams pa dang / /snying rje nyid ni bsgom par bya/ /de ltar nyon mongs lhag pa gang / /de yi de tshe gzigs pa ste/ /de la brtse bas sangs rgyas kyis/ /de rnams la gsungs smad pa'o/ /sems can nyam thag rnams la ni/ /ji ltar rang bzhin gyis mkhas pa'i//sman pas sman ni gsungs pa ste/ /nad rnams nye par zhi phyir ro/ /de bzhin chags dang rga sogs kyi/ /nad kyis 'byung po nyam thag la/ /thub pas bsam pa mkhyen nas ni/ /de nyid shes pa'i sman byin to/ /de ltar thub pa'i gsung la ni/ /lits+tsha bI rnams mngon dga' ste//rab 'phyang gtsug gi nor bu can/ /mgo bo rnams kyis phyag 'tshal lo/ /de nas thal mo rnam sbyar nas/ /cung zhig dud pa'i lus rnams kyis/ /phur bu la ni lha rnams bzhin/ /sangs rgyas la ni byon par zhus/ /dang po a mra skyong ma'i rigs/ /thub pas de rnams la gsungs shing //dam pa rnams kyis thog mar ni/ /snyan mnan 'dor bya min par gsungs/ /de rnams bud med de yis ni/ /bdag la bslus par shes pa ste/ /de bzhin gshegs la mchod mang po/ /nyis 'gyur nyid du byas pa'o/ /legs brjod drang srong sngags rnams kyis//sbrul rnams kyi ni dug bzhin du/ /kun mkhyen gyis bstan de rnams ni/ /rab tu zhi ba'i yid rnams song / /de yi mtshan mo 'das nas ni/ /a mra skyong mas bkur byas te/ /'od ma ldan pa'i grong du ni/ /dbyar rnams rnam par 'das pa na/ /yangs pa can nyid du gshegs shing //spre'u rdzing gi 'gram du ni/ /thub pa chen po bzhugs pa'o/ /shing gi rtsa bar de bzhugs so/ /de bzhin du ni 'bar ba la/ /nags tshal de ni snang byas shing / /nye bar 'ongs nas bdud kyis smras/ /nai rany+dza na'i 'gram du sngon/ /thub pa khyod la bdag gis smras//bya ba byas pa mya ngan zlos/ /zhes 'dir khyod kyis lan smras so/ /nyam thag pa rnams 'jigs med cing / /nyan thos rnams ni don byas par/ /bdag gi ji srid ma gyur pa/ /de srid mya ngan mi 'da' zhes/ /de 'di mang po rnams grol zhing / /de bzhin grol bar 'dod rnams dang //grol bar gyur pa rnams nyid de/ /de phyir mya ngan 'da' bar 'os/ /de nas tshig 'di gsan gyur nas/ /zla ba gsum na mya ngan 'da'/ /mi brtan pa ni dor cig ces/ /dgra bcom rnams kyi mchog gis gsungs/ /de nas dam bca' 'di shes nas/ /yid la re ba gang ba ste//rab tu dga' zhing mgu ba ni/ /de nyid du ni mi snang gyur/ /de nas drang srong chen po'i thugs kyi ting nge 'dzin/ /rnam pa de ltar rnal 'byor stobs las mdzad pa nyid/ /sku tshe ji ltar gyur pa sngon du btang ba ste/ /rdzu 'phrul mthu las mtshungs pa med pa 'tsho bar gyur/ / des ni sku tshe btang ba'i yud tsam de la ni/ /bud med myos ma bzhin du sa ni g.yos gyur la/ /ma yis tshos pa'i lhun po'i rdo ba rim bzhin du/ /phyogs rnams dag las sgron ma chen po rnams lhu dang / /de bzhin kun nas dbang po'i rdo rje mi bzad rnams/ /glog dang bcas shing me yi snying po can g.yos shing //bskal pa 'jig che 'jig rten bsreg par 'dod pa bzhin/ /phyogs rnams thams cad rnams su me dag 'bar bar gyur/ /shing rnams kyis ni phung po 'khogs pa rnams bor zhing / /ri rnams kyis ni rtse mo rnams ni dor ba ste/ /rlung gis mngon par gang ba'i rdo ba'i phug bzhin du//mkha' la rnga rnams kyi ni ma rungs sgra rnams bsgrags/ /de nas de ltar kun du bskyod tshe yud tsam la/ /mi yi 'jig rten na dang lha dang nam mkha' la/ /ting 'dzin chen po de las rnam par bzhengs mdzad nas/ /thub pa chen pos gsung ni 'di nyid gsungs pa'o//shing rta srog shing rnam par nyams pa dang 'dra ba'i/ /tshe btang lus po nang gi stobs las 'dren bgyi zhing / /sgo nga'i skye gnas pa rnams sgo nga phye nas bzhin/ /srid pa'i 'ching las tshe dang lhan cig 'grol bar bgyi/ /sangs rgyas kyi spyod pa zhes bya ba'i snyan dngags chen po las/sku tshe'i 'du byed byin gyis brlabs pa'i le'u ste nyi shu rtsa gsum pa'o// //de nas bskyod pa de mthong nas/ /kun dga' bo ni spu langs shing / /ci zhig gyur zhes shugs 'ongs te/ /'dar bar gyur cing dga' ma gyur/ /kun mkhyen gtan tshigs mkhas pa la//des der gtan tshigs dris pa ste/ /de nas de la thub pas ni/ /khyu mchog myos pa'i dbyangs kyis gsungs/ /rgyu mtshan gang gis g.yos pa 'di/ /bdag gi tshe 'di btang ba la/ /zla ba gsum ni yongs bgrangs par/ /byin gyis brlabs nas de ni 'tsho/ /de ltar thos nas kun dga' bo//tsan+dan ljon pa'i thang chu ni/ /glang po che yis brabs pa bzhin/ /mchi ma phyung zhing g.yos par gyur/ /des gnyen nyid phyir bla ma'i phyir/ /chags bral min phyir sdug bsngal zhing / /snying rje bar ni rnam zlos te/ /yongs su dga' ba med par dus//mgon gyi nges pa thos gyur nas/ /bdag gi lus ni lhung ba bzhin/ /bdag gi phyogs rnams spobs pa med/ /bdag gis chos rnams thos pa rmongs/ /gangs kyis gtser rnams la me bzhin/ /rga ba rnyings pa'i chos rnams su/ /kyi hud mis bsngags skyen par ni/ / de bzhin gshegs pa mya ngan 'da'/ /nyon mongs 'brog dgon chen po ru/ /chud zos lus dang ldan rnams la/ /lam mkhyen shin tu skyen pa ru/ /lam mkhan nges par nyams par 'gyur/ /thag ring lam la rab zhugs pa'i/ /sred pa yongs ldan bdag rnams kyi/ /lam na rdzing bu bsil ba'i chu//shin tu myur bar bskam par gyur/ /blo ni rdzi ma zhi ba smin/ /'das dang ma 'ongs da ltar gzigs/ /ye shes rnam spangs 'jig rten gyi/ /mig ni nges par zum par 'gyur/ /nges par lo thog skyed rnams su/ /chu ni don gnyer ngal rnams la/ /char bab gyur nas skyen pa ru//chu sbyin sprin ni nub par 'gyur/ /mi shes mun pas phrogs rnams su/ /sems can lam gol ba rnams la/ /rab tu gsal ba'i sgron ma ni/ /shin tu skyen par zhi bar 'gyur/ /de nas de ltar mya ngan gyis/ /sems gzir kun dga' bo gzigs nas/ / zhi byed mgon pos de nyid ni/ /de nyid rig pa'i mchog gis gsungs/ /'gro ba'i rang bzhin shes nas ni/ /mya ngan ma byed kun dga' bo/ /'dus byas ngo bo mi rtag cing / /'gro ba 'di kun 'dzad pa nyid/ /lus can rtsod pa'i skyed tshal du/ /sdug pa kun dang bral ba ste/ /brtse ba kun nas thang cig ces//sngon du bdag gis smras pa nyid/ /'dus byas g.yo ba skyes pa gang / /rten nas 'byung ba dbang med de/ /bdag gis rtag par gyur cig ces/ /'di ni rnyed par mi nus so/ /sa stengs 'byung po rtag gyur na/ /'jug pa g.yo ba ma yin zhing / /thar pas bya ba su yis 'gyur//de phyir mthar thug 'dod pa'o/ /ci ste khyod dam skye bo gzhan/ /bdag la khyod kyi sred pa ci/ /gang phyir ngal ba skyes pa 'di/ /khyod kyis bdag dang bral bas byas/ /lam ni mtha' dag khyed cag la/ /bdag gis bstan cing bshad pa ste/ /sangs rgyas rnams dang slob dpon gyi//dpe mkhyud med ces gzung mdzod cig /bdag gi gnas sam nyer zhi na/ /don ni de tsam nyid yin te/ /de bzhin gshegs rnams chos kyi sku/ /lus kyis khyed cag la don ci/ /de phyir dang ngam bdag 'das tshe/ /skyo ba yis dang bag yod dang //bdag gi sgron mas gsal byas te/ /chos kyi sgron ma rtag par ro/ /der zhugs brtson 'grus brtan pa dang / /rtsod med bdag gi don la mkhas/ /blo ni gzhan dbang ma yin pa/ /bdag gi sgron ma zhes shes bya/ /rig pa dang ldan mkhas pa ni/ /gang gi sgron mas mun pa bzhin//shes rab sgron mas 'joms pa ste/ /chos kyi sgron mar shes par bya/ /dge legs nye bar thob bya'i phyir/ /de dag rnams kyi spyod yul zhi/ /lus dang tshor ba nyid dang ni/ /sems dang bdag med pa nyid do/ /rus lpags khrag dang rgyus pa dang //sha dang spu sogs rnams kyis dkris/ /mi gtsang lus su mthong bas ni/ /lus la chags pa ma yin no/ /de lta de ltar rkyen rnams kyis/ /'jug pa'i tshor ba rnams su ni/ /sdug bsngal zhes de ltar mthong ba'i/ /bde ba'i shes rab rab tu 'joms/ /skye ba dang ni gnas pa dang //chos kyi 'god pa nyid dag ni/ /zhi ba'i sems kyis mthong ba yin/ /rtag par 'dzin pa ldog pa'o/ /rkyen rnams las ni skyes pa rnams/ /phung po rnams ni mthong ba yi/ /ngar 'dzin gyis ni skyed pa po/ /bdag tu 'dzin pa 'jug ma yin/ /sdug bsngal nye bar zhi ba'i phyir//bgrod pa gcig pa'i lam 'di ni/ /lam ni bzhi po de rnams su/ /de ltar dran pa nye bar gzhag /de ltar ram ni bdag 'das tshe/ /gang rnams 'di la gnas 'gyur ba/ /de rnams 'god med go 'phang mchog /nges par legs pa thob par 'gyur/ /de ltar kun dga' bo la gtam//de rnams rnam par 'dren pas mdzad/ /lits+tsha bI rnams kyis thos nas/ /de la gus phyir skyen par song / /thub la brtse dang gus pa'i phyir/ /gdung bas phrog pa'i sems can rnams/ /spyod mthas bkod pa'i don rnams kun/ /myur las rdzu 'phrul don rnams so//ston pa la ni smra 'dod pa/ /de rnams btud nas nye bar gnas/ /smra bar 'dod rnams ston pa yis/ /mkhyen nas thub pas tshig gsungs so/ /gang 'di bdag la song ba'i sems/ /khyed cag rnams kyis de kun shes/ /de nyid gzhan bzhin mya ngan gyis/ /de ring khyed kyis spobs par gyur//dpal gyi bde rnams la gnas kyang / /khyed cag rnams kyis thams cad nas/ /mngon par zhugs pa 'di yis ni/ /gsal ba nyid dang chos mkhan nyid/ /gal te ye shes bdag las kyang / /cung zhig thos shing shes pa na/ /bdag gi zhing ba rab dmigs te/ / gdung ba ma byed brtan par song / /mi rtag 'dus byas dngos po rnams/ /g.yo zhing yongs su gyur pa can/ /snying po dang bral blo gtad min/ /cung zhig brtan par gnas pa med/ /gnas 'jog rgyun shes la sogs dang / /gang gzhan thig le gzhan rnams dang / /dus kyi dbang du song ba ste//srid pa 'di ni ma rungs nyid/ /sa 'dzin nga las nu dang ni/ /brgya byin dang mtshungs dbyig nor dang / /skal ba che dang skal med min/ /'byung por mnyes gshin 'byung ba'o/ /'gro mgyogs de nas 'gro byar 'gro/ /skal ldan shing rta shing rta bzang / /sgra ngan gyis smad sgra ngan rdzogs//rangs byed ri mo rdul ma skyes/ /mi skyong drang srong bdag nyid che/ /de rnams dang gzhan mang po rnams/ /dbang chen dang mtshungs nyams pa ste/ /mi nyams pa ni yod ma yin/ /nyi ma gnas las 'phos pa ste/ /nor lha rnams ni sa la song / /dbang po brgya rnams 'das pa ste//rtag pa ci yang yod ma yin/ /gang gzhan yang dag sangs rgyas rnams/ /'gro ba'i snang ba mdzad nas su/ /mar me snum zad bzhin du ni/ /de rnams mya ngan 'das par gyur/ /gang gzhan bdag nyid chen po rnams/ /'byung 'gyur de bzhin gshegs rnams kyang //bud shing tshig pa'i me bzhin du/ /de rnams mya ngan 'da' bar 'gyur/ /thar 'dod dka' thub nags su bzhin/ /de phyir bdag kyang 'gro bar bgyi/ /bdag gi don med lus ming ni/ /'gran pa la ni rgyu mtshan med/ /gang du gdul bya 'ga' zhig yod/ /gang phyir 'di nas 'gro bar blo//nyams dga' yangs pa can la ni/ /khyed cag blo gzhan ma gyur cig /de phyir 'jig rten skyabs med cing / /dbang med g.yo bar shes nas su/ /chags bral la ni 'gro bar dang / /skyo ba thob par 'os ba'o/ /de ltar gtam bcad nas dus su/ /ltos med de bzhin gshegs pa ni//ston gyi zla ba snang byed bzhin/ /lus ngan phyogs su rab tu gshegs/ /de la mchi mas yongs gang mig /lits+tsha bI rnams rjes song zhing / /rgyan bcas lag pa rgyas rnams kyis/ /thal mo sbyar nas rnam par smras/ /kyi hud 'o brgyal gser mtshungs shing //sum cu rtsa gnyis mtshan mnga' ba/ /ston pa'i sku lus dbye 'gyur zhing / /thugs rje mnga' ba mi rtag nyid/ /srid cing 'o ma med pa yi/ /sems ma thob pa'i be'u ni/ /bkren rnams ye shes 'jo ba'i bas/ /kye ma shin tu skyen par 'bor/ / 'gro na mig ldan mi rnams kyis/ /rmongs pa'i mun pa bcom mdzad nas/ /ye shes 'od zer skyen pa ru/ /thub pa nyi ma nub par 'gyur/ /mi shes rgyun gyis 'jig rten na/ /de las de las khyer ba la/ /rnam yangs chos kyi zam pa ni/ /shin tu myur bar chag par 'gyur/ /brtse ldan sman pa chen po ni//ye shes mchog gi sman mnga' bas/ /sems nad kyis na 'jig rten ni/ /bor nas nges par gshegs par 'gyur/ /sems kyis gzer bu'i yo byad dang / /shes rab rgyan gyis brgyan pa ste/ /ltad mo la ni skom rnams kyis/ /dbang po'i tog ni 'gyel bar 'gyur/ / 'gro ba sdug bsngal skal ba can/ /'khor ba'i 'ching bas bcings pa la/ /gal te thar pa'i sgo 'di ni/ /dus kyis sdom par 'gyur ba'o/ /de ltar rnam zlog lits+tsha bI/ /mig rnams mchi mas rnams 'khrugs pa/ /rjes su 'ongs pa de rnams ni/ /thub pas slar la zlog par mdzad//de nas thub pas bcad shes nas/ /bstan pa rab tu bzung nas su/ /phyir la ldog phyir nges pa ni/ /sdug bsngal sdug bsngal gyis byas so/ /rlung gis bskyod pa'i me tog rnams/ /kar ni ka ra'i ljon shing bzhin/ /gser gyi ri ltar dkar de rnams/ / thub pa'i zhabs la phyag 'tshal te/ /de la sems rnams kyis chags shing / /rkang pa rnams kyang 'khyar ba ste/ /gnyen po'i rlung la chu gnyer bzhin/ /'gro ba med par de rnams log /zhe sa yin zhing dga' ma yin/ /dga' ba yin zhing zhe sa min/ /thub pa la ni de dag gis//dga' dang zhe sa g.yo ba med/ /'brog mtha' nas 'thon khyu mchog che/ /khyu mchog chen po rnams kyis bzhin/ /gnas na gnas kyang de rnams kyis/ /yang yang stobs bcu ldan la lta/ /de bzhin gshegs par sems song ba/ /lus dang ldan yang 'od med rnams//rkang pas de nas mya ngan 'das/ /log pa'i 'khrus bzhin rjes su 'ongs/ /rnam par ma 'khrugs mnga' gzhu rnams kyi sgra rnams zil mnan nas/ /de rnams nga rgyal ldan yang stobs dang ldan yang 'gugs ldan yang / /'gro na dpal 'dod li ts+tsha bI ni 'dod pa chen po rnams/ /mya ngan gyis 'khrugs gdong rnams rang gi khang pa rnams su 'ongs//sangs rgyas kyi spyod pa zhes bya ba'i snyan dngags chen po las/ li ts+tsha bI rnams la thugs brtse ba'i le'u ste nyi shu rtsa bzhi pa'o// //snang byed 'dzin par gyur pa na/ /mun bcas kyis 'khrugs nam mkha' bzhin/ / thub pa 'da' phyir gshegs pa na/ /de phyir yangs pa can ma mdzes/ /dpal ldan dregs pa mi ldan zhing / /thams cad du ni nyams dga' yang / /bdag po nyams las bud med bzhin/ /kun nas gdungs pas mdzes ma gyur/ /thos pas dman pa'i gzugs bzhin dang / /yon tan dang bral rig pa bzhin//ngag gis dman pa'i blo bzhin dang / /'du byed dang bral ngag bzhin no/ /spyod pas dman pa'i dpa' bzhin dang / /dang po dang bral byams pa bzhin/ /rnam gnon phun sum tshogs pa bzhin/ /chos kyis dman pa'i bya ba bzhin/ /ston kar char ni log pa na/ / sha li bskams pas nor 'dzin bzhin/ /de tshe mya ngan las ma mdzes/ /gang du der ni ma btsos shing / /zos pa ma yin mya ngan des/ /kun du ngu zhing thams cad kyis/ /grags ldan thub pa grags pa byas/ /gzhan ni ma gtams ma byas shing / /sus kyang bsams pa ma yin la/ /mya ngan dang ni ngu ba ste//grong khyer pa kun bya ba gcig /de nas dga' 'dun gtso bo la/ /brtan kyang mya ngan gyis nyam thag /sde chen bdag po seng ge ni/ /bsams shing rnam par zlos pa'o/ /lam log mu stegs rnams 'pham nas/ /'di 'dra'i lam la gshegs nas su/ /gang gis dam pa'i lam bstan te//slar mi ldog phyir gshegs pa nyid/ /nyam thag nyams par gyur pa yi/ /snang med 'jig rten bor nas su/ /skye dgu mgon med mdzad nas ni/ /mgon po de ni zhi phyir gshegs/ /rnal 'byor gtso bo bla ma mchog /mthar thug zhi la mngon phyogs nas/ / tshe zad pa las gzi mdangs bzhin/ /bdag gi brtan pa nyams par 'gyur/ /mi skyong sgra ngan mtho ris las/ /rdzu 'phrul dang ldan lhung pa bzhin/ /de dang bral ba rtse byar gyur/ /sa la mi shes bya ba ci/ /tsha bas dub pa chur bzhin dang / /grang bas nyam thag me la bzhin//the tshom gcod la skye bo rnams/ /da ni su la brten par 'gyur/ /me ni 'phel phyir sbud pa bzhin/ /gang gis sbud ba dge legs phyir/ /'jig rten slob dpon thub pa der/ /nyams tshe chos ni nyams par 'gyur/ /tshul med tshul ngan gyis bcings pa'i/ /rga shi dbang bdag rnams kyi ni//sdug bsngal 'khrul 'khor chen po yi/ /bshig byed de 'dra su zhig yod/ /sin d+hur shing ni skams pa rnams/ /dpyid mthar chu gter gyis bzhin du/ /chags skyes rgod pa'i mi rnams ni/ /gsung gis tshim mdzad su zhig lags/ /gang du bla ma lhun po'i snying / /kun mkhyen nyid kyang rgud 'gyur na//blo gros ldan pa 'jig rten na/ /blo gtad la 'gro 'os pa su/ /ji ltar gsang bya bskyangs byas nas/ /'chi ba'i ched du 'khrid par byed/ /de bzhin gson pa'i 'jig rten sdug /'ching ba'i ched du skye bar byed/ /ji ltar shing ni rno ba yi/ /sog le yis ni gshegs par byed//de bzhin 'gro 'di nyams pa yi/ /sog le yis ni gshegs par byed/ /nyon mongs mtha' dag bsregs nas kyang / /ye shes kyi ni stobs ldan kyang / /'gro ba'i mchog gi slob dpon ni/ /rab tu nyams phyir gshegs par gyur/ /lta ngan srog chags ngan pa chu//srid pa'i dba' rlabs rdul ni nya/ /ye shes gru bo chen po yis/ /gang gi srid pa'i mtsho las rgal/ /rga ba'i yal ga nad me tog /'chi ba'i rtsa ba srid myu gu/ /ye shes mtshon cha chen po yis/ /gang gis srid pa'i ljon shing bcad/ /ma rig gtsub shing las skyes shing / / 'dod chags me lce yul bud shing / /gang gis ye shes bsil ba'i chus/ /skyon gyi me ni zhi bar mdzad/ /gang gis zhi ba'i lam la gshegs/ /gang gis mun pa chen po spangs/ /gang gis dge legs mchog mkhyen zhing / /mkhyen nas byams pa yis bstan to/ /nges kyang nyon mongs kun mthar phyir//kun du zhi ba gzigs pa ste/ /kun mkhyen kun la phan pa mdzad/ /kun spangs ched du gshegs pa nyid/ /mnyen zhing rnam yangs dbyangs mnga' ba'i/ /phyag ring thub pa chen po de'i/ /gal te mtha' na su yi mtha'/ /'byung 'gyur ma yin 'byung 'gyur min/ /'brog dgon dag na chu mthong nas//lam 'gro don bcas 'khrul ba bzhin/ /myur ba dang ldan mkhas pas ni/ /de phyir chos la bsnyen par 'os/ /nyams phyir khyad par med pa yi/ /sdig pa mi rtag nyid shes nas/ /gang zhig chos la gnyid ma log /de ni nyal yang gnyid ma log /de nas mi yi seng ge yi/ /ye shes za phod seng ge des/ /skye ba'i nyes pa rnams smad cing / /srid pa zad pa'i bstod pa nyid/ /srid pa'i rtsa ba 'dor 'dod cing / /brtul zhugs dam pa len 'dod la/ /g.yo ba'i sems ni thul 'dod de/ /dge ba'i lam la gnas par 'dod//zhi ba'i lam la 'gro 'dod cing / /srid pa'i mtsho las rgal 'dod la/ /rtag par sbyin pa gtong 'dod de/ /yang srid gcod par 'dod pa'o/ /sbyin pa byin zhing nga rgyal spangs/ /chos ni bsams shing zhi bar song / /thub pa mya ngan 'da' bzhed tshe/ /de yis sa ni stong par go//de nas sku lus thams cad kyis/ /gnyis 'thung rgyal po bzhin bzlog nas/ /grong khyer la ni gzigs bzhin du/ /thub pas 'di skad bka' stsal to/ /yangs pa can gyi bdag gi 'di/ /khyod la lta ba'i phyi ma yin/ /gyad gnas kyi tshe tshong dus su/ /mya ngan 'da' phyir 'gro par gyis//de nas gus ldan chos 'dod pa/ /nye bar 'ongs pa rnams gzigs nas/ /de yi rab spyod las rnams la/ /thub pas mngon par rjes gnang mdzad/ /de nas rim gyis rnam 'dren pa/ /longs spyod grong la bsnyen pa ste/ /der bzhugs thams cad mkhyen pa yis//dge slong rnams la mngon par gsungs/ /da ltar ram ni bdag 'das nas/ /chos la mchog tu gzhol bar bya/ /de ni khyod kyi don mchog ste/ /gang gzhan de ni ngal bar 'gyur/ /gang zhig mdo sder ma zhugs shing / /'dul ba na yang mi snang la//rigs par so sor gnod pa ste/ /de ni cis kyang gzung mi bya/ /de ni chos min 'dul ba min/ /de ni bdag gi tshig ma yin/ /mang po rnams kyi tshig yin kyang / /nag po'i gdams pa de dor bya/ /dag pa'i gdams pa gzung bya zhing / /gang la yod min zlog pa ste//de ni chos yin 'dul ba ste/ /de ni bdag gi tshig yin no/ /de phyir bdag gis mdor bsdus nas/ /tshad ma 'di rnams bshad pa ste/ /gang zhig byed de tshad ma yin/ /'di las gzhan du tshad ma min/ /bdag gi dgongs pa phra mo de/ /rnam par ma bzhag ma shes nas//rmongs las chos ma yin pa la/ /chos kyi blo rnams 'byung bar 'gyur/ /mun pa dang bcas lta bas sam/ /khyad par rnams ni shes min las/ /gser dang rab tu mtshungs pa yi/ /ji ltar zangs kyis slu bar byed/ /shes rab khyab pa med pas sam/ / de nyid 'dzin pa ma yin pas/ /dam pa'i chos kyi gzugs brnyan gyi/ /de ltar chos ma yin pas slu/ /brdar las gcad las bsregs pa las/ /mkhas pa rnams kyis gser bzhin du/ /'dul ba mdo las rigs pa las/ /de phyir yongs su rtog par rigs/ /bstan bcos rnam par mi shes pas//mkhas pa rnams ni ma yin zhing / /tshul min la tshul blo gros dang / /tshul la tshul min mthong ba nyid/ /de phyir don dang tshig gis ni/ /yang dag thos pas gzung bya ste/ /bstan bcos log par gzung ba yis/ /mtshon cha bzhin du rnam par 'joms/ / sngar med ldan pas 'khyog mang po'i/ /mtshan mo'i 'od byed khyim la bzhin/ /tshig ni log par brjod pa yi/ /don la sdug bsngal gyis 'jug go/ /don nyams pa las chos nyams shing / /chos nyams pa las nus pa ste/ /de phyir ma log don la ni/ /gang gi blo de blo ldan no/ /dge mang de skad gsungs nas ni//dus su sdig pa'i grong la gshegs/ /der ni 'di la mkhyen rnams kyis/ /bsnyen bkur dam pa byas pa'o/ /de nas der ni gus ldan pa/ /skul byed legs pa'i khyim nyid du/ /bcom ldan 'das kyis zas mdzad de/ /de yi phyir yin rgyas phyir min//de nas nyan thos tshogs bcas te/ /de bzhin gshegs pas zas mdzad nas/ /skul byed la ni chos gsungs te/ /ku sha ldan pa'i grong du gshegs/ /de bzhin nor ldan zhes pa'i klung / /skul byed bcas pa de rgal nas/ /grong khyer der ni zhi ba yi/ /pad ma'i nags bcas nags su bsnyen//gser dang 'dra ba'i 'od mnga' des/ /gser ldan la ni khrus mdzad nas/ /kun dga' bo ni dga' med la/ /'jig rten dga' bas bka' stsal to/ /kun dga' gshin rje'i ra ba yi/ /dbus su bdag gi khri shoms shig /de ring nam gyi cha smad la/ / de bzhin gshegs pa mya ngan 'da'/ /zhes gsungs kun dga' bos thos nas/ /mchi mas zhag ngan mig ldan pas/ /thub pa'i gzims mal bshams pa ste/ /bshams nas bstod cing kyi hud do/ /de nas gzims mal bstabs pa la/ /rkang gnyis rnams kyi mchog byon te/ / yang yang sad pa med phyir dang / /sdug bsngal thams cad zad phyir ro/ /de ni rtsib logs g.yas kyi ni/ /phyag la dbu ni rnam gzhag nas/ /zhabs la zhabs ni bkod nas su/ /slob mas mdun bdar gzims pa'o/ /de nas yud tsam de na der/ /bya rnams skad ni mi sgrogs te/ / zags shing snyoms pa'i lus rnams kyis/ /bsam gtan la ni gzhol bzhin gnas/ /de tshe 'dab ma g.yo rnams las/ /rlung rnams kyis kyang ma g.yos pa'i/ /ljon shing rnams kyi mchi ma bzhin/ /mdog ngan me tog rnams gtor to/ /nub ri'i rtse la nyin mor byed/ /gnas la lam 'gro rnam pa bzhin//khri la thub pa lta bzhin du/ /don dam mthong rnams skyen par gyur/ /de nas mthar thug gzims mal la/ /thams cad mkhyen pa gzims pa yis/ /mchi mas rnam 'khrug kun dga' la/ /rjes su brtse bas bka' stsal to/ /bdag ni mya ngan 'da' ba'i dus//gyad rnams la smros kun dga' bo/ /mya ngan 'da' ba ma mthong na/ /phyis nas bdag la gdung bar 'gyur/ /de nas gsung ni rab bzung nas/ /mchi mas brgyal ba'i kun dga' bos/ /thub pa'i gzims mal mthar thug pa/ /gyad rnams la ni smras pa'o/ /de nas de'i tshe kun dga' bo yi tshig thos nas//mig nas chu yi char ldan de rnams ngu bzhin du/ /seng ge'i 'jigs las sa 'dzin dag nas khyu mchog ltar/ /brtan min rnam par gnon rnams grong khyer nas 'thon to/ /zhen pa med pas gos rnams g.yengs shing rnam bkram ste//'gros kyis kun nas bskyod pas cod pan g.yo ba rnams/ /lha na gnas rnams bsod nams yongs su zad las bzhin/ /de na nyam thag 'ongs pa rnams ni nags der song / /de ltar 'ongs pa rnams kyis thub pa mthong ba ste/ /mthong nas mchi ma'i gdod ldan rnams kyis phyag 'tshal zhing //phyag 'tshal nas ni yongs gdung sems rnams gnas pa ste/ /gnas pa de rnams la ni thub pas bka' stsal to/ /dga' ba'i dus su mya ngan byed par rigs min zhing / /yid mi bde bas don med bstan pa bsnyen par gyis/ /bskal pa du ma rnams su bdag gi 'dod pa gang //shin tu rnyed dka'i don de bdag la nye bar gnas/ /sa dang chu dang me dang rlung dang mkha' med pa'i/ /dge zhing 'gyur med dbang po'i dbang don las 'das pa/ /zhi zhing dbrog bya ma yin mchog de gang thob nas/ /skye ba med cing 'pho ba med la mya ngan med/ / ga ya rnams su byang chub tshe na bdag gis sngon/ /dge min srid pa'i rgyu rnams sbrul bzhin dor ba ste/ /sngon tshe bsags pa'i lus kyis rnam par gnas pa 'di/ /lus 'di nyid ni de ring nye bar 'gro bar 'gyur/ /sdug bsngal gyi ni gter chen phung po song ba na/ /'jigs pa chen po yang srid nye bar zhi ba na//gang tshe sdug bsngal chen po las ni byung ba ste/ /gang gis ngu ba bdag la mya ngan 'os ci yod/ /rab tu zhi ba'i dus yin na yang 'brug gi dbyangs/ /shAkya thub pa'i gsung ni de rnams kyis thos nas/ /de nas kha rnams bye zhing smra 'dod gyur pa ste/ /de dag rnams kyi tshig de gnas brtan gyis gsol to//gang gis ngu ba khyod kyi mya ngan 'os ci yod/ /me ni khang pa 'bar las rnam par 'thon pa ltar/ /de ltar thub pa de ni lha gtso rnams kyis kyang / /nges par bsnyen bya yin na mi rnams kyis smros ci/ /khyab bdag skye bo gang 'di de bzhin gshegs pa ni//mya ngan 'das 'di mthon min des na mya ngan byed/ /'brog dgon dag na song ba'i lam mkhan bzang po ni/ /rnam par nyams tshe kun nas 'khrul bar cis ma 'gyur/ /bla ma drang srong chen po thams cad gzigs pa ni/ /dngos su mthong nas gal te khyad par ma thob na/ / gser gyi 'byung gnas dag nas dbul po song rnams bzhin/ /de tshe 'di na bzhad gad nyid du 'gro ba nyid/ /de ltar don ldan mang po de de smra ba rnams/ /bu rnams la bzhin gus ldan thal mo sbyar ba rnams/ /dge zhing zhi la dam pa'i don ni bsngags pa yis/ /gyad rnams dag la mchog bdag rnams kyi mchog gis gsungs//de ltar nges pa de ni kho bo mthong ba las/ /rnal 'byor cho gar 'bad rtsol med par grol min te/ /bdag gi chos 'di gang zhig rjes su rtog byed pa/ /sdug bsngal dra ba las de ma mthong na yang grol/ /ji ltar sman ni bsnyen par mi byed skyes bu yis//sman pa mthong ba las kyang nad ni 'joms min te/ /de bzhin bdag gis ye shes 'di ni ma bsgoms na/ /bdag ni mthong ba las kyang sdug bsngal 'joms ma yin/ /'di ni bdag ldan gang zhig bdag gi chos mthong ba/ /rgyang ring dag na gnas kyang des ni bdag mthong ste//gang zhig dge legs la ni gzhol zhing mi 'jug pa/ /bdag gi nye bar gnas kyang de ni rgyang ring nyid/ /de phyir brtson 'grus ma spangs bsdams pa'i sems rnams kyis/ /dge ba'i las rnams la ni bag dang ldan par gyis/ /sdug bsngal du ma nye bar 'dus shing g.yo ba ste//srog ni tho rangs mar me dang ni mtshungs pa nyid/ /de ltar thub pa'i skyes mchog gis bstan de rnams ni/ /mig nas chu ni rnam byung nyam thag yid rnams kyis/ /chu bo'i gzhung ni so sor sgrol bar byed pa bzhin/ /ku sha zhes bya'i grong la dal bus dbang med zhugs/ /sangs rgyas kyi spyod pa zhes bya ba'i snyan dngags chen po las/mya ngan las 'da' bar gshegs pa'i le'u ste nyi shu rtsa lnga pa'o// //de nas bzang pos yang dag nyer ldan legs bzang ni/ /dbyu gu gsum 'dzin 'byung po'i tshogs su mi mchod pa/ /bde bar gshegs pa lta 'dod dge slong thar 'dod pas//kun dga' byed pa'i kun dga' bo la smras pa'o/ /thub pa mya ngan 'da' ba'i dus ni bdag gis thos/ /gang gi ched du bdag gis lta 'dod skyes pa ste/ /'jig rten dag na mchog gi chos kyi rtogs pa po/ /zla ba gnam stong la bzhin mthong bar zla ba min//sdug bsngal mtha' dag rnams kyi tha mar gshegs bzhed pa/ /khyod kyi 'dren pa de ni lta bar 'dod pa ste/ /sprin gyis mngon par bkag pa'i mkha' la nyi ma bzhin/ /bdag gis ma mthong bar de nub par 'gro ma yin/ /de nas yongs su 'gro ba po ni 'ongs pa ste/ /smra bar 'dod cing chos 'dod pa ni des shes nas//ngal ba dang ni ldan pa'i sems ldan kun dga' bos/ /dus ma yin zhes mchi ma'i gdong gis smras pa'o/ /de ni zla ba'i 'od mnga' bsam pa mkhyen pa po/ /'dab ma rgyas pa'i spyan yangs rnam par mkhyen nas su/ /gang phyir kho bo 'jig rten phan phyir skyes pa ste//kun dga' bo kye gnyis skyes ma 'gogs zhes gsungs so/ /de las legs bzang mchog tu dga' zhing yid ches shing / /dpal stug dge legs mdzod la mngon du song ba ste/ /de nas dus kyi rjes su mthun pas zhi ba yi/ /gsung ni mngon par gsungs nas slar yang de gsol to//kho bo lta ba'i yongs su rtog pa po rnams las/ /thar pa'i lam gzhan lhag par khyed kyis lhag par thob ces grag /de phyir bdag la gsung mdzod bdag la 'dzin 'dod yod/ /bdag gis lta 'dod rtse bar 'dod pa'i phyir ma yin/ /de nas gnyis skyes mngon par 'ongs pa de la ni//yan lag brgyad kyi lam ni sangs rgyas kyis gsungs shing / /rab tu chud zos lam ni yang dag dran pa bzhin/ /thos nas gang ni gang gis yang dag rtogs/ /des ni sngon du mthong bar gyur pa'i lam gzhan la/ /des ni mthar thug dam pa nye bar ma thob ste//sngon du ma mthong lam ni lhag par thob nas su/ /snying la mun pa dang bcas lam de dor bar gyur/ /rdul dang lhan cig mun pa rab tu 'phel ba ste/ /de dag rnams kyi mi dge'i las ni sogs zhes grags/ /snying stobs dang bcas rdul ni rab tu 'phel ba ste/ /de dag rnams kyi dge ba'i las ni rgyas zhes grags//thos dang blo dang 'bad pas snying stobs 'phel ba na/ /rdul dang mun pa nag ni rnam pa med pa'i phyir/ /las nyams pa las las ni zad par 'gro ba ste/ /de dag rnams kyi las de 'thad pa yin zhes grags/ /yid ni rmongs par byed pa rdul dang mun pa dag /rang bzhin par ni 'jig rten dag na smra ba ste/ /de phyir de gnyis zad pa yod min brtan nyid phyir/ /rang bzhin par ni brtan pa nyid du rab tu grub/ /snying stobs sbyor las de dag bde skye bar gyur na yang / /dus kyi dbang gis slar yang 'byung bar 'gyur ba ste//bsil ba'i chu ni tshan mo bzhin du rim gyis ni/ /dus kyi rim las rang bzhin du ni 'gro bar 'gyur/ /rtag pa'i bdag nyid snying stobs de ltar 'phel ba ru/ /thos pa blo dang 'bad pa rnams kyis mi nus te/ /de ma 'phel na de dag nyams pa yod min zhing / /de dag ma nyams pa las zhi ba yod ma yin//sngon du des ni rang bzhin las ni skyes snyam ste/ /des kyang der ni thar pa mthong ba ma yin zhing / /me yi 'bar ba'i 'od kyi nyams pa ji lta bar/ /rang bzhin la ni gnas na mthar thug gang las yin/ /sangs rgyas pa yi lam gyis de nyid mthong ba ste//srid pa la ni brten nas 'jig rten des rtogs shing / /de yi rnam par nyams pas zhi ba rigs pa ste/ /rgyu ni rab tu nyams phyir 'bras bu nyams pa'o/ /gsal ba 'di yin rnam par 'gyur ba med pa'i bdag /lus las gzhan ni de yis sngon du rtogs pa ste/ /thub pa'i gsung ni yongs su thob nas 'jig rten ni//bdag med pa dang bdag tu bya ba med par shes/ /chos ni du ma so sor brten nas skyes pa ste/ /rang nyid dbang med yongs su shes nas ni/ /des ni rab tu 'jug pa sdug bsngal nyid du dang / /nges par ldog ste sdug bsngal nyid du kye ma mthong / / ji ltar 'jig rten dag ni skye ba rtogs nas su/ /des ni chad pa'i lta ba rnam par spangs pa ste/ /'jig rten dag gi nub par 'gro ba shes nas su/ /rtag pa'i lta ba brtan po skyen par spangs pa'o/ /drang srong chen po'i gsung ni thos nas bzung ba ste/ /de ltar 'di na des ni sngon gyi lta ba dang / de yis sngon du yongs su las ni byas pas te/ /gang gis skyen par dam pa'i chos la rjes su song / /yid ni rab tu dang bas mchog dang ldan pa des/ /zhi zhing 'gyur med go 'phang de ni rab thob nas/ /thub pa gzims pa la ni bsngags pa byas pa ste/ /lta bzhin 'di las blo 'di rnams ni byas pa'o//mchod 'os dam pa mya ngan 'da' bar 'os pa yi/ /mgon po mthong nas bdag ni gnas par 'os ma yin/ /ston pa thugs rje ldan pa mya ngan 'da' ba yi/ /sngon du re zhig bdag ni mthar thug la 'gro'o/ /de nas des ni thub pa la ni phyag 'tshal nas/ / sbrul bzhin g.yo ba med pa'i gdan ni bcings nas su/ /sprin rlung gis ni phra mo'i phra mor byed pa bzhin/ /de ma thag tu zhi ba mya ngan 'da' bar gshegs/ /de nas de phyir gdung gi 'du byed cho ga ni/ /cho ga mkhyen pa'i thub pas rnam par bka' stsal pa/ /mthar gyur de ni skye ba mthar mdzad drang srong che//rgya chen slob ma mnga' ba'i slob mar gyur pa'o/ /de nas nam gyi thun ni 'das pa na/ /zla bas skar ma rnams kyi 'od ni phrogs pa na/ /nags rnams nyal ba bzhin du sgra med gyur pa na/ /dge slong rnams la thugs rje chen po mnga' bas bstan/ /slob dpon bzhin du sgron ma bzhin du don bzhin du//bdag 'das tshe na so sor thar pa bstan bya ste/ /khyed kyi ston pa de yin de'i dbang gis 'gyur bya/ /kho bo gnas pa na yang de tsam nyid smra'o/ /lus dang ngag gi las ni rnam par dag 'dod pas/ /de bzhin 'jig rten tha snyad thams cad 'dor ba dang //sa dang srog chags sa bon rdzas la sogs rnams kyis/ /rab tu 'dzin pa las ni me bzhin ldog pa'o/ /sa la skye ba gcod dang 'byed pa dag las dang / /sa yi logs la rko dang rmo ba dag las dang / /gso ba dang ni skar rtsis mtshan nyid rnams las ni/ /nges par ldog pa bza' ba'i cho ga dus yin no//pho nya'i rigs pa sman dang sngags ni bsnyen rnams la/ /sbyor min nyid dang 'chab pa nyid ni med pa nyid/ /chos las ma bkag pa yi sgrub pa rnams la ni/ /tshod shes nyid dang tshim dang sogs pa ma yin no/ /rnam pa de ltar tshul khrims yang dag bsdus pa 'di//thar pa'i rtsa ba zhes pa so sor thar pa ste/ /'di las ting nge 'dzin rnams rab tu skye ba ste/ /ye shes thams cad rnams dang mthar thug rnam 'da'o/ /de phyir ma ral ma nyams dbrog bya ma yin pa'i/ /gang gis tshul khrims gtsang ma yod pa de yi chos//de med gal te 'di yi thams cad med pa ste/ /tshul khrims yon tan dam pa rnams kyi rten yin no/ /tshul khrims ma nyams rnam par dag pa gnas pa na/ /dbang po spyod yul rnams la 'jug pa ma yin zhing / /dbyug pas ba lang tshogs rnams lo thog la bzhin du//brtan las dbang po drug rnams bsgrib par bya ba'o/ /dbang po'i rta rnams yul rnams la grol gang zhig gzhan/ /len zhing de rnams las ni de tsam nyid ma yin/ /g.yo ba'i rta rnams kyis phrogs lam ngan la bzhin du/ /des ni de yi ched du don med thob par 'gyur//dgra bo chen po rnams kyi dbang du song ba rnams/ /'di na kha cig sdug bsngal 'thob par 'gyur ba ste/ /rmongs pas yul rnams dag gi dbang du song nas ni/ /song nas deng 'dir dbang med rnams ni sdug bsngal 'os/ /de phyir dgra bo ma rungs dbang po rnams kyi bzhin//dbang po rnams kyi 'gro ba 'gro bya ma yin zhing / /dbang po rnams kyi dga' bo 'jig rten na byas nas/ /dbang po rnams kyi gshed ma 'jig rten na mthong ngo / /rang gi g.yo ba'i sems las 'jigs pa ji lta bar/ /stag rnams las dang sbrul dang 'bar ba'i me las dang //dgra bo las ni de ltar 'jigs par mi bya ste/ /gang gis sbrang rtsi dang ni yang dag rtog pa med/ /lcags kyu med pa'i gnyis 'thung myos pa lta bu dang / /yal ga'i ri dgas shing la rab tu ma zhi ltar/ /sems ni ji ltar 'dod bzhin phyogs su skor ba ste/ /g.yo zhing bskyod pa de la go skabs sbyin mi bya//de ni rang dbang yin na zhi ba yod min zhing / /de yi gnas pa yin na byed pa byas pa nyid/ /de phyir sems 'di ji ltar rnam par mi g.yo ba/ /de ltar rab tu 'bad pa yis ni gyis mdzod cig /bza' ba tsam ni sman bzhin nges par bsten bya ste//'dir ni khong khro bya ba ma yin chags pa min/ /ji srid bkres pa nyid ni ldog pa'i ched du dang / /lus kyi 'khrul 'khor gyis 'dzin pa yi ched du'o/ /ji ltar nags su bung ba rnams kyis me tog ro/ /'thung ste me tog rnams ni nyams par byed ma yin//de bzhin dus kyi dbang las bsod snyoms rgyu ba ste/ /pha rol dad pa rnams ni nyams par byed ma yin/ /drang pos rtag par khur bar byed ces khur bya dang / /skye bo sbyin pa po yang yod pa ma yin te/ /'di na sbyor ba min las khur ba ltung ba ste/ /ji ltar khur bu de ltar sbyin pa po yin no//rnal 'byor rim las nyin mo mtha' dag phul nas dang / /mtshan mo'i dang po'i thun dang cig shos dag kyang ste/ /dran pa dang bcas snga ma'i cig shos la nyol la/ /gnyid kyi tshe ni don med byed pa ma yin no/ /dus kyi me yis 'di na 'gro ba sreg pa na/ / mtshan mo mtha' dag la ni gnyid par 'os pa su/ /nyon mongs dgra po dang mtshungs 'joms pa po rnams ni/ /snying la gnas pa yin na su yi gnyid log 'gyur/ /de phyir khyim na nag po'i sbrul rnams nyal ba ltar/ /yid la nyes skyon sbrul rnams rab tu nyal ba rnams/ /rigs pa dang ni rkang pa sman gyis ston nas su//gnyid log par 'os 'di las gzhan du ngo tsha'o/ /ngo tsha rgyan nyid dang ni mchog gi gos yin zhing / /ngo tsha lam las 'khyog pa rnams kyi lcags kyus te/ /ngo tsha ldan pas de ltar gyur na 'jug bya zhing / /ngo tshas rnam par spangs ba'i yon tan rnams kyis spangs//ji srid pa la skyes bu ngo tsha dang bcas pa/ /de srid de yi mi yi ngo tsha nyid yin te/ /don dang don min rnams la rnam dpyod med pa ni/ /ngo tshas rnam par dman pa phyugs dang mnyam pa'o/ /gang yang yan lag nying lag rnams ni ral gris gcod/ /der yang yid kyis nyes pa bya ba ma yin zhing //zhi ba ma yin dag ni brjod par mi bya ste/ /bdag gi de yis khyed cag rnams kyi bar chod yin/ /bzod pa dang mnyam dka' thub yod pa ma yin zhing / /gang gi bzod pa de yis stobs dang brtan pa ste/ /gang rnams pha rol rnams las rtsub mo mi bzod pa//de rnams chos byed rnams kyi lugs min grol ba min/ /chos kyi 'byed pa po dang grags pa'i 'joms pa po/ /gzugs kyi dgra bo dang ni snying gi me yin te/ /khro ba de yis go skabs rab 'byam mi sbyin zhing / /yon tan rnams kyi dgra bo de 'dra gzhan ma yin/ / yongs su bsil ba'i chu las glog gi me bzhin du/ /ji ltar rab byung las ni khro ba 'gal ba ste/ /de ltar khyim pa rnams kyi skyes pa mi 'gal te/ /chags ldan de rnams de la dam bca' ma yin no/ /mdzes pa'i skra ni rgyang ring mgo la reg nas dang / /rnam par 'gyur ba'i gos dang lhung bzed mthong nas dang //gzhan las mthar gyur spyod pa rnam par bsams nas su/ /snying la skyes pa'i nga rgyal rab tu spang bar bya/ /khyim la brten pa khengs pa ldan pa rnams kyi yang / /nga rgyal rnam par 'phel ba 'joms pa'i phyir yin na/ /slong mo za bas bdag nyid yongs su rtog pa po//thar pa la dmigs skra bzhar rnams kyi sngon nyid do/ /ngan g.yo dang ni chos kyi mtshams sbyor yod min te/ /gang phyir 'di las 'khyog po nyid ni bsnyen mi bya/ /ngan g.yo nyid dang sgyu ni slu ba'i don du ste/ /chos kyi bdag nyid rnams kyi bslu bya yod ma yin/ / gang zhig rgya chen rnams las sdug bsngal 'ongs pa ste/ /nyung ngu 'dod la 'ong ba ma yin de dang bral/ /de yi phyir yang nyung ngu 'dod nyid bsnyen bya ste/ /gang zhig yon tan rnams kyis rdzogs byed kye ma ci/ /de ni bkren pa'i lta ba rnams la mi 'jigs shing / /dbang po rnams las gang zhig cung zad 'jigs min la//gang zhig thos nas med ces mya ngan med pa ste/ /gang gis nyung ngu 'dod de de yi thar pa min/ /gal te grol bar 'dod na tshim pa bsnyen mdzod dang / /tshim pa na ni 'dir bde de 'di chos yin zhing / /tshim pa rnams ni sar yang bde bar gnyid log ste//tshim med rnams ni mtho ris na yang rnam par sreg /phyug kyang tshim pa med pa rtag tu dbul po ste/ /dbul yang tshim pa dang ldan rtag tu phyug po nyid/ /tshim pa med pa sdug pa'i yul rnams dang 'bye zhing / /tshim pas 'gro ba ngal ba ldan la mya ngan byed/ /zhi ba'i bde ba dam pa thob par 'dod rnams kyis//de ltar tshogs la dga' ba rnams su 'gyur mi bya/ /zhi ba'i bdag nyid gcig tu rgyu phyir 'jig rten na/ /brgya byin la sogs lha rnams kyis kyang re 'dod byed/ /chags po sdug bsngal gyi ni gnas pa'i shing yin te//rang gi skye bo la 'am skye la chags pa spangs/ /chags pa rnam rgyas sdug bsngal la ni 'jig rten na/ /gnyis 'thung 'khogs pa 'dam la bzhin du chags par 'gyur/ /rtag par rab zhugs chu yi rgyun ni mnyen na yang / /rdo yi logs la dus su rnam par 'bigs pa ste/ /brtson 'grus kyis ni rnyed par dka' ba ci yang med//de phyir khur rnams mi 'bor bar ni bzod bgyis dang / /gang zhig yang yang ngal bso nas ni srub byed pa/ /de yi shing la me ni rnyed par sla min zhing / /brtson 'grus brtsams pas rnyed par sla bar 'gyur ba ste/ /de phyir sbyor ba yod na bya ba 'grub pa nyid//dran pa yod na skyon rnams 'jug pa ma yin te/ /dran pa dang mnyam mdza' bo med cing bsrung ba med/ /dran pa nyams las des par thams cad nyams pa ste/ /de phyir lus la song ba'i dran pa spang mi bya/ /ji ltar dpa' bo rnams ni go cha bzung nas su/ /dgra bo'i sde la 'jigs pa med rnams 'jug pa ste//de bzhin lus la dran pa'i go cha bgos nas su/ /brtan pa rnams ni yul gyi g.yul rnams la spyod do/ /mnyam par gzhag pa'i blo dang sems ni yongs bsdams shing / /'jig rten dag gi skye dang 'god pa shes pa ste/ /de phyir ting nge 'dzin la yongs su 'jug bya ste//ting 'dzin rab tu thob pa'i sems nad yod ma yin/ /rnam par 'thor ba'i chu ni rnam par 'dzin don du/ /ji ltar 'bad pas dong dang 'obs ni byed pa ste/ /ye shes chu ni gnas pa'i don du ting nge 'dzin/ /de ltar dong dang 'obs dang mtshungs par rab tu bstan//shes rab ldan pa yongs su 'dzin pa btang ba yi/ /chos 'di nang la mchog tu gzhol ba dag gis te/ /de ltar gnas pa'i grol ba yod cing 'di yi ni/ /phyin ci log ni khyim pa ma yin dge slong min/ /shes rab dga' dang 'chi ba'i mtsho chen dag la gru/ /rmongs pa'i mun pa rnams la ji ltar sgron ma ste//nad rnams thams cad 'joms pa dag gi sman yin zhing / /nyon mongs ljon shing 'joms byed mtshon cha rnon po yin/ /de phyir thos pa bsam pa bsgom pa rnams kyi ni/ /shes rab rnam par 'phel la rab tu 'jug par bya/ /gang gi shes rab rang bzhin lta byed mig yod pa//de ni mig dang bral yang mig dang ldan pa nyid/ /sems la rgyu ba'i spros pa de dang de rnams kyis/ /khyim na gnas pa spangs nas kyang ni grol min nyid/ /mchog tu zhi ba thob par 'dod pa rnams kyis 'di/ /shes nas spros pa med pa rnams su 'gyur bar bya//de phyir bag yod bla ma bzhin du bsnyen mdzod la/ /bag med dgra bo bzhin du rnam par spongs mdzod dang / /bag yod pa las brgya byin gyi na dpal thob cing / /bag med pa las lha min khengs rnams rnam par nyams/ /phan pa dang ldan rjes su brtse ba mnga' ba yi/ / ston pa thugs rje mnga' bas mdzad bya gang yin pa/ /de ni bdag gis byas shing dang ni rab bsdams pa/ /khyed cag rnams kyi sems ni zhi bas byas pa'o/ /ci ste ri rnams dang ni khang pa stong pa dang / /dgon pa de rnams gang dang der ni yod pa na/ /rab tu sbyor la rtag tu 'bad pa bya ba ste/ / phyi nas yongs su gdung ba ldan par ma gyur cig /sman pa rang bzhin yang dag legs par shes nas ni/ /nad pa rnams la dam pa'i sman ni brjod bya ste/ /de yi dus kyis sbyar bar nges par bsten pa la/ /nad pa gang de bdag po yin te sman pa min/ /dpal ldan drang zhing mnyam la 'jigs pa med pa yi//lam ni lam mkhan gyis ni rnam par bstan pa na/ /thos nas gang zhig mi 'gro de yi nyams pa ste/ /bstan pas 'dren pa po ni bu lon yod ma yin/ /sdug bsngal la sogs bden pa bzhi po kho bo yis/ /bstan pa rnams la 'di ni gang gi 'dod pa yod/ /de ni myur zhing spobs par bdag la smros shig dang //the tshom shin tu rnam par dpyad bya bcad par bgyi/ /de ltar mthon por gsungs pa'i drang srong chen po la/ /the tshom med pa de rnams ci yang ma gsol to/ /sems kyis de dag rnams kyi sems kyi gting dpags nas/ /byed ldan ma 'gags pas kyang tshig 'di smras pa'o//rlung ni g.yo ba ma yin nyi ma bsil ba dang / /ri bong mtshan ma can ni dro ba nyid na yang / /'jig rten dag na rkang pa bzhi po de rnams ni/ /bden pa min par byed par nus pa ma yin no/ /gang zhig sdug bsngal brjod pa de ni bde ba min/ / 'di yi rgyu gang rab tu skye bo de gzhan min/ /rgyu ni 'gags pa las ni nges par thar pa ste/ /gang zhig 'di yi lam ni thabs ma yin pa min/ /de phyir bdag nyid chen po bden pa bzhi rnams la/ /dge slong skye bo nges 'di gtam ci yod ma yin/ /ston pa mya ngan 'da' ba rnyed par 'gyur zhes te//gang zhig don ni rdzogs pa ma yin sdug bsngal te/ /gang zhig tshogs pa 'di ni brtul zhugs gzhon nyid las/ /sngon du don ni mthong bar gyur pa ma yin pa/ /de yang khyed kyi gsung 'dis da ni de ma thag /glog gi 'od kyis lam bzhin yang dag mthong bar gyur/ /gang gi don gyi lhag ma yod pa ma yin zhing //gang yang srid pa'i mtsho yi pha rol phyin pa ste/ /mgon po shin tu skyen par nges par gshegs thos te/ /de dag gi yang snying la bsams par gyur pa nyid/ /de ltar 'phags pa ma 'gags pa yi tshig de yis/ /don ni rnam par shes kyang shes nas slar yang ni//gus ldan rnams kyi blo gros brtan po mdzad bzhed pa/ /byams pas slar yang sangs rgyas kyis ni bka' stsal to/ /gang phyir skal bar gnas kyang de ni nyams pa ste/ /phan tshun du ni 'du ba nges par yod ma yin/ /bdag nyid kyi dang gzhan gyi don ni byas nas ni//kho bo gnas pa la ni dgos pa yod ma yin/ /gang rnams mkhar dang sa na bdag gi gdul bya rnams/ /de rnams thar par byas shing rgyun la bcug pa ste/ /'di las gzhan du slob ma rim dang rim rnams kyis/ /nga yi chos 'di skye dgu rnams la gnas par 'gyur/ /de phyir 'gro ba'i rang bzhin rnam par shes byas nas//bsam mno ma byed nges par rnam par 'bral ba ste/ /rnam pa de ltar 'gro ba shes nas su/ /ji ltar 'di ltar ma yin de ltar gyis mdzod cig /ye shes sgron mas mun pa rnam par bsal byas nas/ /srid pa rnams la snying po med par mthong nas su//ji ltar nad ni nye bar zhi ba de ltar ni/ /tshe ni rnam par 'gags na tshim pa nyid yin no/ /dor bar bya zhing rtsod ldan lus zhes bya ba ni/ /srid pa'i mtsho yi rgyun ni rnam par 'gags pa na/ /don med byed pa'i dgra bo'i rnam par nyams las bzhin/ /tshe ni nye bar zhi bas tshim pa ma yin su//rgyu dang mi rgyu thams cad rnam par 'god pa ste/ /de phyir khyed cag rnams ni legs par bag yod gyis/ /mya ngan 'da' ba'i dus ni yongs su gyur pa ste/ /khyed cag ma smra 'di ni bdag gi phyi ma'i tshig /de nas bsam gtan rig pa rnams kyi mchog gis ni//yud tsam de la bsam gtan dang po thob mdzad nas/ /de las rnam par bzhengs nas gnyis par gshegs pa ste/ /rim gyis ma tshang med par thams cad la gshegs so/ /de nas rjes su rim pas rab tu byed pa dgu/ /snyoms par 'jug pa'i tshogs ni mtha' dag bsam gtan mdzad//de nas drang srong chen pos slar yang rim gyis ni/ /bsam gtan dang po de nyid la ni bab pa'o/ /de las rnam par bzhengs nas kyang ni rim gyis ni/ /bsam gtan bzhi pa la ni slar yang 'dzegs pa ste/ /bsam gtan bzhi pa'i cho ga las de rnams bzhengs shing //mngon sum nyid du nye bar zhi ba la gshegs so/ /de nas thub pa mya ngan 'da' bar gshegs pa na/ /char gyis snun pa'i ba lang bzhin du sa g.yos shing / /phyogs kyi glang po rnams kyis sbyangs pa bzhin du ni/ /nam mkha' las kyang sgron ma rnams ni lhung bar gyur/ / lha yi nags tshal sna tshogs shing rta sreg 'dod pa'i/ /nags kyi me ni bar snang dag la byung ba bzhin/ /bud shing med cing rlung med du ba med pa'i me/ /phyogs ni sreg par byed pa byung bar gyur pa nyid/ /lha min 'joms par 'dod pa g.yul du 'jug pa na/ /khro ba brgya bas khro ba rnam par gtong ba bzhin//de bzhin me stag brgya pa'i me ni skyug pa yi/ /dbang po'i rdo rje mi bzad pa rnams lhung bar gyur/ /'jig pa'i rlung rnams dag gis btags pa rnams kyi bzhin/ /'dzin pa 'dzin pa rnams kyi rtse mo rnams lhung zhing / /'khri shing shing rnams dag ni zug rngu byed pa yi//phyag dar khur ba'i rlung ni drag tu g.yos par gyur/ /'dam gyi chus bsgos sdong du gzhon nu rnams kyis ni/ /lus ni yongs su dkris pa'i ngang pa'i rgyal po bzhin/ /cung zhig 'od zer kha dog ngan pa de rnams kyis/ /'od ni bcom ste zla ba mngon par gsal bar gyur//sprin dang bral yang mkha' la zla ba gnas na yang / /mun pa mi bzad rnams kyis phyogs rnams rgyas pa ste/ /yud tsam de la mya ngan gyis ni zil non bzhin/ /chu bo rnams ni de ma thag tu chu dron 'bab/ /de nas nye sar skyes pa'i sha la'i shing dag gis/ / rang gis me tog mdzes pa 'jug pa dus min la/ /rnam par btud nas drang srong chen po'i sku lus ni/ /gser gyi stegs bu'i gzugs brnyan la ni yang dag gtor/ /mkha' la mgo bo lnga rnams mi g.yo'i klu rnams ni/ /mya ngan gyis slar so sor dmar ba'i mig can rnams/ /rab tu gnyid log gdengs ka stod pa'i lus rnams kyis//thub pa la ni gus pas lta bzhin gnas par gyur/ /nang du song ba'i kun nas gdung ba rnams/ /de rnams shin tu dron po'i dbugs ni brgyus pa ste/ /'gro ba'i rang bzhin mi rtag pa ni rtogs nas su/ /mya ngan 'ongs pa min rnams mya ngan smad par gyur//nges par legs pa'i chos kyis cho gar rab zhugs pa/ /rgyal po rnam thos sras kyi 'dus pa dam pa de/ /chos la mngon par chags pas mya ngan ma byas shing / /lha yi rten la mchi ma phyung bar ma gyur to/ /gtsang mar lhag par gnas pa'i byed ldan lha rnams kyang //drang srong chen po'i yang dag shin tu gus ldan rnams/ /rang gnas gyur zhing rnam par 'gyur ba ma song ste/ /'jig rten dag ni rang bzhin rnam par smad pa'o/ /dri za'i rgyal po rnams dang de nas klu yi rgyal po rnams/ /gnod sbyin rnams dang dam chos la dga' lha rnams ni/ /mya ngan byed cing mya ngan mchog la gzhol rnams kyis//rigs chen po yi nyam thag bzhin du kha la gyur/ /yid la re ba thob pa'i bdud kyi sde rnams ni/ /rab tu dga' bas skad ni 'thon zhing dgod pa ste/ /'phyo zhing glu dbyangs gar byas dga' bar gyur pa rnams/ /rnga bo che dang rdza rnga pa Ta ha rnams brdungs//de nas rdo rje rtse mo bcom pa'i ri bo bzhin/ /chang dang bral ba'i gnyis 'thung dga' ba med pa bzhin/ /nog gis rnam par dman pa'i dbyibs can khyu mchog bzhin/ /thub pa'i khyu mchog nub ba na ni 'jig rten gyur/ /nyin mor byed pas rab tu dman pa'i nam mkha' bzhin//ba mos bsregs pa'i pad+ma dang ldan rdzing bu bzhin/ /nor dang bral zhing bya ba med pa'i rigs bzhin du/ /srid pa nyams mdzad rab tu nyams las 'gro bar gyur/ /sangs rgyas kyi spyod pa zhes bya ba'i snyan dngags chen po las/ yongs su mya ngan las 'da' ba chen po'i le'u ste nyi shu rtsa drug pa'o// //de nas ngang pa stong dang ldan pa'i lha yi ni/ /gzhal med khang nas gdong ni cung zhig rab btud nas/ /yud tsam thams cad mkhyen pa la ni bltas nas su/ /lha na gnas pa chen po gzhan zhig gis smras pa'o/ /kye ma 'gro na dngos po thams cad mi rtag cing //skye ba'i chos can dang ni 'dzad pa'i chos can la/ /skye ba rnams ni sdug bsngal skyed par byed pa ste/ /de dag rnams ni lhag med zhi bas zhi ba nyid/ /skye ba'i bud shing tshad ma min pa bsregs mdzad nas/ /ye shes me lce grags pas rnam khyab du ba can/ /chu yis mi bzhin du ni dus kyi chu yis ni//de bzhin gshegs pa'i me de mya ngan 'da' bar bya/ /de nas mchog gi drang srong dang mtshungs drang srong gzhan/ /mtho ris gnas kyang 'bras bu rnams la ma chags pas/ /rab tu zhi ba'i dgra bcom drang srong mthong nas su/ /ri dbang brtan pas tshig ni rnam par smras pa'o//'jig rten dag na 'ga' zhig nyams par mi 'gro med/ /de ltar 'gro ba med cing song ba med pa ste/ /mchog dang mchog min mkhyen pa mchog gi don rig pa/ /ston pa mtshungs med gang du rab tu zhi bar gyur/ /shes rab rnam par dag cing mchog gi spyan mnga' ba//yongs su 'dren pa po nyid 'di yis dman pa ni/ /rmongs pa nges par mig long gson pa'i 'jig rten ni/ /'du shes nyams shing lam ngan la ni gnas par 'gyur/ /de nas 'gro ba'i 'gal ba ma yin ma 'gags pa/ /rjes su chags pa nyams shing skye ba 'gags byas pas//'jig rten snang bas dman pa mthong nas su/ /thub ba zhi ba na ni zhi ba'i yid kyis smras/ /shes rab ldan pa 'du byed cho ga la gnas pa/ /dus 'dir nges par blo gtad bya ba ma yin zhing / /mi rtag nyid kyi rdo rje nges par btung ba yis/ /gang du thub ba ri bo chen po bcom par 'gyur//snying po med cing nga med rnam par nyams pa'i chos/ /'jig rten gson pa'i 'jig rten kye ma smod par shog /gang du thub dka' drang srong chen po seng ge yang / /nyes pa'i gnyis 'thung rnams ni nyams par mdzad nas nyams/ /'dod chags bral ba min pa'i 'gro ba 'jug pa la//da ni 'jigs pa chen po ma yin su yi lags/ /thun mong las ni gang du de bzhin gshegs pa yang / /gser gyi ka ba lta bu kun nas chag par gyur/ /sa bon drug dang myu gu gcig dang lo ma gcig /rtsa ba drug dang 'bras bu lnga dang yal ga gnyis/ / phung po gsum dang bdag nyid gcig la nyon mongs kyi/ /sdong po 'di ni bcag nas thub pa gnyis 'thung gzims/ /'gro rgyal mda' bzhin dgra bo rnams ni bcom nas su/ /chu med pa na rma bya bzhin du chags bral zhing / /mgyogs 'gro rta bzhin du ni rnam rgyal lam song ba/ /me bzhin thub pa skye ba med cing zhi bar gyur//mtho ris dbang phyug rdo rje 'dzin pa mig 'phel na/ /rab tu tshim byed rgyun bzhin gsung rnams btang nas su/ /'od kyis nyam thag ba lang bzhin sar rnam brgyus nas/ /grags pas phyogs ni mngon par bkang nas bla ma gzims/ /snyan grags ldan pa nyid dang 'od zer ldan pa ste//chu bo sin d+hu bzhin du gser skyug shugs ldan pa/ /rnam thos bu yi rdzu 'phrul mi skyong sder bcas pa/ /lam la bcug nas mi yi nyi ma nub par gyur/ /rmug pa'i do shal gyi ni phyogs rnams dkris pa bzhin/ /rgya chen sprin rnams kyis dkris nyi ma'i 'od rnams bzhin//mchod sbyin rdzogs tshe mar gyis sman pa'i me bzhin du/ /thub pa zhi tshe de ring 'jig rten gsal ma gyur/ /mdud pa med pa bden pa'i lam ni bsnyen nas su/ /mdud pa med pa zhi ba'i chos 'di brnyes nas ni/ /rdzu 'phrul gyis ni sku lus 'dren par nus na yang / /sdug bsngal dag gi gter ni lus yin zhes spangs so//mun pa mun pa nyi mas bzhin du zil mnan nas/ /rdul ni rdul ni char pa bzhin du mngon bcom nas/ /slar yang slar yang sdug bsngal 'khrul 'khor mi len te/ /thub pa thub pa skar rgyal bzhin du mngon par gshegs/ /gang zhig skye ba'i sdug bsngal 'joms phyir skyes pa ste//gang la 'jig rten pas ni zhi ba'i ched du bsnyen/ /gang zhig 'od zer mchog gis rnam par gsal ba dang / /khyad par 'phags pa'i blo yis rnam par gsal bar gyur/ /gang gis skye dgu rnams ni dge legs la bcug ste/ /yon tan rgya chen rnams kyis sa la rgyas pa nyid//'dod pa'i snyan grags gsal ba rnams kyis 'phel ba ste/ /khyim na gnas pa yin kyang grags pas 'phel ba nyid/ /gang gis mkhyen zhing smod pas 'o dod ma bos shing / /mi ni nyam thag rnams la brtse bas bos pa ste/ /bza' ba ngan pa rab tu 'joms shing ma gsol la/ /bza' ba legs pa rjes su 'gro zhing ma gsol to//mi gnas dbang po zhi ba gang zhig yul rnams la/ /stobs rab dbang po nyid las yang dag mi gnas shing / /gzhan rnams kyis ma thob pa'i lam bzangs thob pa ste/ /ro mkhyen pas ni nges par 'byung ba'i ro gsol to/ / gang gis sngar ma byin pa'i sbyin pa byin pa ste/ /'bras bu 'dod pas cung zad zhig ni mi byin la/ /mnyam nyid rjes mthun phun sum tshogs pa dor ba ste/ /dam pa rnams kyi yid rnams yon tan rnams kyis phrogs/ /brtan pa rnams kyi g.yo ba'i spyan ni bsrungs pa ste/ / brtan par gshegs shing sems ni bsrung du bcug gyur la/ /dge legs rnams ni bsrungs shing 'phel bar mdzad pa ste/ /chos skyes pa ni cung zhig 'dod par ma mdzad do/ /brtan pas mi dge ba las mi dge rnam spangs nas/ /dge legs kyi ni dgra bo skyon rnams spangs pa ste//gang zhig blo yis nyes pa rnams ni kun spangs la/ /de ni 'phags min mi rtag nyid kyis nub par gyur/ /gang la chos ni 'dod pa yang dag rjes song zhing / /dga' bas mchog tu nges pa rnam par bzung ba ste/ /me yis nor ni zos pa ji lta ba bzhin du/ /khyab bdag ye shes nor can de yang srog song ngo //brgyad po rnams la mchog tu sde [(]tshen [,]tshan [)]lnga thul zhing / /gsum gzigs spyod pa gsum ni zad byed spyan gsum pa/ /gcig ni bsrungs nas gcig ni thob nas gcig rtogs nas/ /lci ba bdun rnams spangs nas bla ma gzims par gyur//gang gi zhi ba'i ched du lam ni gsal mdzad de/ /legs pa'i skye bo zhi bas rab tu dang mdzad cing / /nyon mongs ljon shing rab tu chags pa bcad pa ste/ /srid pa rnams las gus pa ldan pa rnams bsgral to/ /gsung gi bdud rtsis 'jig rten shin tu tshim mdzad cing //bzod pa yis ni khro ba yongs su bzung ba ste/ /slob ma'i sde ni dge legs la ni rol mdzad la/ /dge legs don du gnyer rnams phra mo rtogs su bcug /legs pa rnams la chos kyi sa bon skyed mdzad cing / /rgyu yi bdag nyid 'phags pa'i lam ni thob mdzad la/ / 'jig rten 'das pas 'phags pa min pa ma brten zhing / /chos las ma gtogs gzhan la sbyar ba ma yin no/ /kA shi gnas su chos kyi 'khor lo bskor ba ste/ /blo dang ldan pa nyid kyis 'jig rten tshim mdzad cing / /gdul bya rnams ni chos kyi cho gar spyad mdzad la/ /bdag cag rnams la phan pa'i ched du dge bar mdzad//gzhan rnams kyis ma mthong ba'i de nyid mthong mdzad cing / /yon tan rnams kyis chos byed rnams la sbyar ba ste/ /gzhan gyi lugs rnams tshar bcad nas ni skul gyur la/ /rtogs par dka' ba'i don ni rnam par shes par mdzad/ / thams cad mi rtag pa dang bdag med par gsungs shing / /srid pa rnams su bde ba cung zad ma bsrungs la/ /snyan pa'i ba dan gyen du rnam par bsgrengs pa ste/ /nga rgyal ka ba mthon po rnam par bsgyel ba mdzad/ /smad kyang rang gi thugs ni bskyod pa ma yin zhing / /thams cad la ni 'jug pa rnams la sred ma mdzad//rang nyid rgal zhing bying ba bsgral bar mdzad pa ste/ /zhi zhing pha rol 'khrul pa zhi bar mdzad gyur la/ /grol zhing pha rol bcings pa grol bar mdzad pa ste/ /rtogs shing pha rol rmongs pas rtogs par mdzad pa'o/ /thub pa thub pas tshul dang tshul min mkhyen 'di des//sems can rnams ni yang dag gtam gyis rjes bzung nas/ /tshul min la dga' tshul min 'byung po rnams la ni/ /bskal pa 'jig pa'i tshe na chos bzhin rab tu gzims/ /chu ldan sprin bzhin sa 'dzin ri bo nags tshal bzhin/ /'od ldan rgan po bzhin du 'od ldan gzhon nu bzhin//'jig rten dag gi lta byed bcom nas 'jig rten gyi/ /lta byed nye bar phrogs nas 'gros su 'di gshegs so/ /dbang phyug dam pa gang la ltung bas me reg cing / /gang gis mchog tu zhi ba'i lam ni brnyes pa ste/ /zhi ba brnyes pa de ni gus pas mthong nas su//de ring 'jig rten gnyen 'dun med cing rgud pa 'dra/ /'joms par 'dod cing stobs ni rab zhugs bdud kyang ni/ /sde dang bcas pas gang ni thub par ma nus pa/ /'joms par 'dod cing stobs zhugs bdud kyis de ring ni/ /de ni dus kyi sbyor las 'joms par nus par gyur//'byung po rnams ni thams cad rnams ni 'dus pa rnams/ /sdug bsngal rnams kyis zil non lha dang bcas pa rnams/ /'khor ba'i 'jigs pa gang rnams zad pa ma yin zhing / /de ltar mchog tu mya ngan 'das pa thob ma yin/ /skye dgu rnams kyi snang mdzad gang gis 'jig rten ni//nye bar skye ba me long bzhin du gzigs pa ste/ /rgyang ring du'am nye bar mtho ris su'am mthar/ /lha yi rna bas sgra ni rnam par thos pa'o/ /bar snang dag la skar ma'i khang par 'dzegs pa ste/ /sa la rab tu zhugs kyang theg pa ma yin zhing / /chu la rab tu gshegs kyang nub pa ma yin la//sku yis rnam par 'gyur ba mang po rnams mdzad do/ /de rnams de rnams gnas rnams lam 'gros lam na bzhin/ /gang gis skye ba du ma rnams kyang dran pa ste/ /yid kyis pha rol rnams kyi yid kyi spyod pa rnams/ /dbang po las 'das sna tshogs rnams kyang mkhyen ba'o//thams cad mnyam par rab zhugs thams cad mkhyen pa des/ /zag pa thams cad bcad cing bya ba thams cad mdzad/ /ye shes kyis ni nyon mongs thams cad rnam spangs nas/ /ye shes de nyid kun nas brnyes nas gzims par gyur/ /skyes bu rnams kyi rno ba'i sems rnams btul ba ste//rno ba ma yin blo rnams rim gyis drag par mdzad/ /rigs las chos kyi nyes pa spang bar mdzad pa ste/ /'chi med ched du chos ni su yis ston par 'gyur/ /rten dang bral ba'i 'jig rten nyam thag pa la ni//zhi ba'i ched du chos kyi 'thor ma su yis ster/ /thugs rje'i bdag nyid ldan la rang gi don mdzad nas/ /gzhan gyi nyon mongs dra ba su yis 'byed par 'gyur/ /'khor ba'i rgya mtshor gzhol ba'i 'jig rten dag gi ni/ /zhi ba'i ched du ye shes dam pa su yis smra/ /shes pa med par gzhol ba'i 'jig rten dag gi ni//dge ba'i ched du ye shes dam pa su yis smra/ /ji ltar nyin mor byed pa 'od zer med pa dang / /ji ltar chu bo sin d+hu 'bab pa med pa dang / /sa bdag rgyal srid dang ni rnam par bral ba'am/ /de phyir 'jig rten 'jig rten mkhyen pas rnam par dman//blo yis rig pa bzhin du bde bas dbyangs bzhin du/ /dpal gyis mi skyong bzhin du bzod pas chos bzhin du/ /de bzhin skyes bu mchog gis rnam par dman pa ni/ /'gro ba de ni yod pa dang ni med pa nyid/ /ji ltar kha lo sgyur bas shing rta dor ba dang //skya ba 'dzin pas gru dang tshul gyis sde dang ni/ /tshong dpon gyis ni tshong pa sman pas nad pa ste/ /de bzhin 'jig rten bde bar gshegs pas rnam par sman/ /dbyar tha dang ni ston rar mkha' la sprin med na/ /rlung gis kyang ni mkha' la bsnyen pa med pa na/ /'tsho bar 'dod pa rnams kyi sdug bsngal ji lta ba//de ltar thar 'dod rnams kyi nga ni nyam thag 'di/ /de ltar dam pa'i don mdzad dgra bcom yin na yang / /byed pa shes pa nyid kyis bla ma la zhugs pa/ /de ni chags bral yin kyang srid pa'i skyon rnams dang / /ston pa'i yon tan rnams ni mang po rnams smras so//de nas chags bral min rnams mchi ma 'thon pa ste/ /brtan pa btang nas dge slong tshogs ni mya ngan dang / /'jig rten 'god pa'i bdag nyid can zhes byar bzung nas/ /bya ba'i 'khor lo rnams ni brtan las ma g.yos so/ /de nas dus kyi dbang gis gyad rnams kyis thos nas//gus pa'i dbang gis skyen par 'thon zhing song ba ste/ /khra yi stobs kyis zil mnan khrung khrung rnams bzhin du/ /kyi hud 'o brgyal zhes ni nyam thag 'thon pa'o/ /mun pa rab tu rgyas phyir thub pa rab gzims pa/ /nyi ma 'od med bzhin du de rnams kyis mthong nas//seng ges khyu mchog rmugs tsha ba lang rnams bzhin du/ /gus pas drag tu cho nges btab cing ngus pa'o/ /chos dga' chos kyi bla ma rab tu zhi ba na/ /gus pas ji lta ba dang bsam pa ji lta bar/ /'o dod 'bod cing mchi mas mig bcom de rnams kyi//dpal ldan dam pa 'ga' zhig 'di ni smras pa'o/ /gang zhig gson pa'i 'jig rten gnyid tshe rab sad pa/ /'di de mthar thug gzims mal la ni gzims pa ste/ /chos ni rnam par 'dzin pa'i rgyal mtshan 'di de ni/ /mchod sbyin mtha' na dbang po'i rgyal mtshan bzhin du btul//de bzhin gshegs pa'i nyi ma nges par blo gsal zhing / /brtson 'grus tshad gdung ye shes 'od zer stong ldan pa/ /nub par gyur tshe mi shes mun pa rnams bcom nas/ /'jig rten dag na slar yang mun pa 'di mdzad do/ /'das dang ma 'ongs pa dang da ltar gzigs nas su//da ni nges par 'jig rten mig ni sgrib pa ste/ /sdug bsngal rgya mtsho chen po rgod pa'i dba' rlabs las/ /'dren mdzad zam pa 'di ni nges par de ni rgud/ /de ltar 'di na kha cig snying rje bar zlos shing / /gzhan rnams shing rta'i rta rnams dud pa bzhin du sems//gzhan rnams skad bton gzhan rnams sa la 'gyel ba ste/ /bya ba de rnams de rnams sems can dbang gis byas/ /de nas dus su gser gyis spras shing sna tshogs pa/ /mche ba rin thang chen po longs ma spyad pa'i khyogs/ /gyad rnams ngu bzhin drang srong la ni glang chen gyi//lag pa dang mtshungs lag pa rnams ni btsugs pa'o/ /de nas dus dang mthun pa'i cho ga byas nas su/ /de la phreng ba yid 'ong rnam pa sna tshogs dang / /dri mchog dam pa rnams kyis de rnams kyis mchod cing / /de nas dga' dang gus pas mtha' dag bzung ba'o//de nas shing gzhon lus can gzhon nu ma rnams kyis/ /gdu bu rab 'khrol zangs mdog lag pa rnams kyis ni/ /glog gi 'phan rnams dag gis sprin ni dkar po bzhin/ /'di la rin thang mchog gi bla re bzung ba'o/ /de bzhin mi rnams kha cig dag gis gdugs rnams ni//phreng ba dkar po ldan rnams kun nas bzung ba ste/ /kha cig dag gis gser gyi yo byad dang ldan pa'i/ /rnga yab dkar po rnams ni rnam par g.yabs pa'o/ /de nas khyu mchog rnams kyis bzhin du ngal ba yis/ /mig dmar gyad rnams dag gis khyogs ni bzung ba ste//sil snyan rnams ni rna ba'i yid du 'ong ba rnams/ /dbyar dus chu gter bzhin du mkha' la rab tu grags/ /phyogs kyi glang po'i dbang po rnams kyi bskul ba yis/ /mdzes pa dang ni rtsub 'gyur shing rnams las bzhin du/ /me tog pad+ma la sogs de rnams de rnams ni//lha yi me tog rnams ni lha nas lhung bar gyur/ /dbang po'i glang po las skyes glang po che rnams kyis/ /nor gnas snying po'i chu skyes pad+ma rnams dang ni/ /man dA ra yi me tog 'dab bcas chags pa rnams/ /chu thigs zer mas 'thor ba rnams kyis mngon bar 'thor//de nas dga' ba'i tshal skyes lus mchog ldan pa yi/ /tsan+dan dmar po'i ro ni rnam par dul ba dang / /'bad pas ma bsgrubs bgo ba rnams ni dkar po rnams/ /dri za'i bu mo rnams kyis yang dag 'thor ba'o/ /rab tu g.yo ba'i ba dan rnams ni bzung ba ste//phreng ba rnam pa sna tshogs rnams kyis bkram pa ste/ /sil snyan rgya chen rnams kyis rjes su 'gro ba ste/ /zhi ba'i ched du zhi ba'i lam las khyogs te drangs/ /gus pa dang ldan gyad rnams kyis de yongs bzung nas/ /thub pa'i mthu las lan brgyar mngon par phyag 'tshal zhing //de yi rnam par nyams las kun nas ngu ba ste/ /grong khyer gyi ni dbus nas yongs su drangs pa'o/ /klu yi sgo nas zhugs te phyi rol byung nas ni/ /chu bo gser ldan zhes pa yang dag rgal nas su/ /cod pan zhes bya'i mchod rten gyi ni rtsa ba ru/ /grags pas bsags phyir bsags pa de rnams kyis byas so//de nas shun pa 'dab ma dri bzangs a ka ru/ /tsan+dan e la klu rnams kyis bsags bsags pa ru/ /mya ngan las ni sbrul bzhin dbugs rgyu de rnams ni/ /brtan min mig can rnams kyis thub pa'i sku bzhus so/ / de nas lan gsum bkod kyang me yi sgron ma yis/ /de tshe drang srong chen po'i bsags pa ma 'bar te/ /bag med ldan pa gzhu ni rnam par 'khrugs pa yis/ /mda' ni rang bzhin sa yi bdag po'i dpal bzhin no/ /lam dag tu ni rnam par 'ong ba'i 'od srungs ni/ /rnam par dag pa'i sems kyis sems ni gyur pa ste//bcom ldan 'das kyi sku gdung tshang ba lta 'dod de/ /gang gi mthu las me yi 'bar ba ma yin no/ /de nas de tshe bla ma blta ba'i don du ni/ /der ni dge slong skyen par nye bar song ba na/ /thub pa mchog la rab tu btud pa byas pa na/ / de ma thag tu me ni rang nyid 'bar bar gyur/ /nyon mongs rnams kyis ma tshig thub pa'i sku gdung la/ /pags pa sha dang spu dang cha shas rnams tshig nas/ /mar dang rlung dang bud shing yongs su rgyas na yang / /me yis rus pa tshig par nus pa ma yin no/ /de nas bdag nyid chen po 'das pa'i de rnams ni//chu mchog gis ni dang bar byas nas dus su ni/ /mngon par bstod cing gyad rnams dag gis grong khyer du/ /gser gyi bum pa rnams kyis rab tu spyan drangs so/ /'di ni ri bo chen po'i rin chen khams bzhin no/ /dge legs gang ba chen po rnams ni 'dzin pa ste//mtho ris dag na lha yi gtso bo'i khams bzhin du/ /khams ni me yis log par sbyor ba ma yin nyid/ /byams pas yongs su rnam par bsgoms pa 'di rnams ni/ /'dod chags me yis tshig pas rnam par spangs pa ste/ /de yi gus pa'i dbang gis gzung ba'i gdung rus rnams//bsil ba yin kyang bdag cag rnams kyi yid rnams bsregs/ /sred pa 'joms mdzad gang gi mthu las khyab 'jug gi /mkha' lding gis kyang khur bar nus pa ma yin pa/ /'jig rten dag na mtshungs med de yi rus pa rnams/ /mi rus gyur pa kho bo cag gis khur bar gyis//e ma 'jig rten chos ni nges par stobs ldan te/ /chos la nus kyang nus pas gang gis ma bzlog cing / /gang zhig snyan pas 'gro ba mtha' dag khyab pa ste/ /de yi sku yi cha shas 'di ni bum par gnas/ /gang zhig bdag gi snang bas nyi ma gzhan snang zhing / /de yi sa ni snang bas rnam par mdzad pa ste//gser gyi mdog dang ldan pa de yi sku lus ni/ /me rnams kyis ni rus pa lhag mar byas pa'o/ /gang gis nyon mongs ri bo rgyas pa rnams phye ste/ /sdug bsngal thob pa na yang bstan pa ma phye zhing / /sdug bsngal mtha' dag rnams ni bkag par gyur pa ste/ /drang srong de yi sku lus me yis bsregs pa'o//g.yul du dgra bo rnams kyis mchi ma phyung nas su/ /skyabs 'ongs rnams kyi mchi ma rnam par btul nas su/ /sdug pa na yang mchi ma bstan pas ma bton pa/ /lam du mchi ma 'thon zhing de rnams rnam par zlos/ /de rnams nga rgyal ldan zhing lag pa stobs dang ldan na yang / /de ltar mya ngan byed cing nags bzhin grong khyer der zhugs shing //lam rnams su ni gdung de rnams ni skye bos mchod pa ste/ /mchod pa'i don du gzhal yas khang par mdzes par byas pa'o/ /sangs rgyas kyi spyod pa zhes bya ba'i snyan dngags chen po las/ /mya ngan las 'da' ba bsngags pa'i le'u ste nyi shu rtsa bdun pa'o// // ji lta ba bzhin nyin zhag 'ga' zhig de rnams kyis/ /de rnams mchod pa dam pa rnams kyis mchod pa ste/ /chab 'og rgyal phran pho nya bdun rnams rim gyis ni/ /de yi ched du grong khyer der ni nye bar 'ongs/ /de nas de'i tshe gang rnams thos nas dus su ni/ /nga rgyal las dang de yi gus pa'i dbang las ni/ / gyad rnams 'thab mo la yang nges par song ba ste/ /sbyin pa la ni yid rnams byas pa ma yin no/ /de nas de dag rnams kyis rnam gzhag 'di rtogs nas/ /rlung bdun bzhin du mi dbang bdun po de rnams ni/ /gyen du zhugs pa'i gang gA'i shugs 'dra stobs tshogs ni/ /shin tu drag po rnams kyis ku sha zhes byar 'ongs//de nas grong ba'i skye bo nags mtha' nas skyen par/ /mi skyong de dag rnams kyi mgyogs 'gro'i sgra yis ni/ /khros pa las ni mgo bo rnams la bzung ba bzhin/ /'jigs pas rgyas pa'i gdong rnams grong khyer la zhugs so/ /de nas mi skyong de rnams grong khyer de bkag nas/ /glang po'i dbang po rnams bcings rtsed mo'i nags rnams su//gyad mchog rnams kyis mi mthun spyad du gyur pa rnams/ /rigs kyi rjes mthun cha lugs ldan rnams la gsos so/ /de nas mda' yab mdzes shing ring pa'i smin ma de/ /sgo yi mig ni rnam par btsums shing grong khyer de/ /mi dga' ba dang 'dus pa'i yan lag ma bzhin du//dpung pa'i khyogs ni bteg pa nyam thag par gyur to/ /rgyal po bdun po rnams ni bya ba gcig pa ste/ /dpal gyis 'bar zhing shugs kyis 'phro ba rnams kyis ni/ /mnyam du dus gcig la ni gza' bdun rnams kyi ni/ /'jigs pa dang bcas nam mkha' bzhin du sa gyur to/ / sna rnams gnyis 'thung myos pa'i chang dri rnams kyis dang / /mig rnams dpung gis bsnun pa'i rdul rnams dag gis dang / /rna ba rnams ni rta glang rnga yi dbyangs rnams kyis/ /mi mo'i skye bo yi yang der ni bcom par gyur/ /de nas skyogs rnams nang du khu ba 'bab pa ni/ /mdun du bdar rnams bsdogs byas rta pa'i tshogs rnams dang //glang po rnams kyis yongs bskor sgo ni phyed bkag ste/ /'gegs shing g.yul la phyogs rnams kyis byas so/ /de nas shag ti ral gri mda' lag grong khyer pa/ /skrag pas da ni dpa' bas ngo tsha btang ba rnams/ /khra rnams bzhin du dgra bo rnams la lta bzhin du/ /nye ba'i 'thab ra rnams su kun nas gnas pa'o//brtan min ldan pa kha cig 'o dod 'bod pa ste/ /de bzhin gzhan rnams tshogs nas dung ni rab tu sgrogs/ /drag tu dregs rnams kha cig rab tu 'phen pa ste/ /de bzhin gzhan rnams ral gri sngon po rnams 'debs so/ /de nas rgyal ba'i ched du gyad rnams 'thab 'dod cing / /gyad rnams bzhin du mtshan rnams sgrogs pa mthong nas ni//g.yul 'gyed yan lag ma rnams dag gi sems rnams dang / /sman rnams dang mnyam mchod yon rnams ni g.yos par gyur/ /g.yul der thog mar 'gro bar 'dod pa'i bu la ni/ /yul 'gyed yan lag ma rnams der ni yongs 'dar zhing / /go cha bcings nas zhi ba'i shes pa byed pa ste/ /sems khral gdong rnams mchi ma bton pa ma yin no//sems khral gdong las gzhan rnams ri dwags mo bzhin du/ /khyim thab 'gro bar 'dod pa'i gzhu la 'phyangs pa ste/ /gang gi gdong ni 'thab la dpa' ba de mthong nas/ /bcings pa'i 'phro spong song ba ma yin gnas ma yin/ /bum pa'i nang du yang dag bkag pa'i sbrul rnams bzhin/ /stobs kyis de ltar rab tu 'phro ba de rnams ni//de ltar rnam par gzhag pa'i gyad rnams mthong nas ni/ /mi dbang rnams kyis g.yul gyi ched du blo bsams so/ /shing rta glang po rta dang rkang thang dregs pa ni/ /g.yul la kun nas nye bar gzhol ba mthong nas ni/ / mkhas pa nyid kyis dang ni mdza' bo nyid kyis ni/ /gnyis skyes bre bos tshig ni 'di skad ces smras so/ /g.yul du dgra bo rnams kyi srog dang dregs pa ni/ /khyed cag rnams kyi mda' yis 'joms par nus pa ste/ /rdzod pa tha dad gnas rnams bde bar mi nus na//pha rol bya ba gcig pa rnams ni smos ci dgos/ /ci ste kun nas bkag pas pha rol 'joms pa la/ /blo ni byas rnams de ni rnam par zlog mdzod dang / /nyes pa med pa'i grong pa'i skye bo 'gegs pa yi/ /gtse bar byed pa de ni chos ni ci zhig yin/ /dong du zhugs pa'i nag po'i sbrul rnams bgrod pa ni//gcig la gnas pa rnams kyis dus su rmugs pa bzhin/ /bkag nas rgyal ba mtha' gcig yod pa ma yin zhing / /brgya la bkag pa rnams kyis rgyal ba 'thob par 'gyur/ /grong gi nang du bkag pa'i gtad rnams zhugs pa rnams//yid dang ldan pa nyid las mi rnams kyis thos nas/ /bsreg bya rnams kyis 'thor ba'i chung ngu'i me bzhin du/ /gzi brjid dman kyang legs pa chen por 'gro bar 'gyur/ /chos kyi bdag nyid can rnams grong du bkag na yang / /'joms 'dod thob pa rnams ni dka' thub [(]gyis [,]kyis [)]gtor te//dpung ni zad par gyur kyang kA sha'i grong khyer du/ /lag pa sgra byed chos kyi stobs las rnam par rgyal/ /snyan grags ched dam yul ni 'thob pa'i ched du sa/ /mtha' dag gang rnams kyis kyang mngon par thob pa ste/ /ba lang rnams kyis chu gnas nas chu 'thungs nas bzhin//bor nas nor 'dzin bdag po de rnams sa la song / /de phyir chos dang don ni yang dag mthong nas su/ /khyed cag rnams kyis zhi bas 'bad pa mdzod cig dang / /mda' yis 'pham pa rnams ni slar yang 'bar ba ste/ zhi bas 'pham pa rnams kyi rnam 'gyur yod ma yin//'di kun khyed cag rnams kyi tshad ma ma yin te/ /khyed kyi stobs kyi dgra yi stobs las 'gro bar nus/ /shAkya thub pa gang la mchod par blo yod na/ /de nyid kyi ni gsung la bzod pas bsnyen mdzod cig /de skad ces sogs 'dod pa rnam par nges pa ni//bram ze'i drang pos dang ni rab tu dga' ba yis/ /rgyal po yin yang rjes su bstan nas legs pa des/ /dge legs smras shing de nas de rnams kyis smras so/ /dus dang sbyar te mkhas shing phan la bshes kyis ni/ /tshig gang 'di de khyed kyis rnam par smras pa ste/ / chos la dga' ba nyid dang stobs la brten pa las/ /rgyal po rnams kyis bsam pa nges par shes par mdzod/ /'dod pa'i phyir dang khro phyir stobs phyir 'chi ba'i phyir/ /phal che bar ni bya bar song zhing 'gro ba ste/ /mngon pa'i nga rgyal dang bcas kho bo cag rnams kyis/ /sangs rgyas nyid la mchod pa la ni gzhu rnams bzung //nga rgyal don du mchod yon blangs la rtsod pa ni/ /byis pa skyong dang drag po dag gis khyab 'jug byung / /nga rgyal spang phyir mchod pa'i don du nged rnams kyis/ /tshe rnams dag kyang 'dor bar mi bgyi gang las yin/ /bu mo la ni sa skyong dag gi rgyal po rnams//gtum po long byed rnams ni rtsod par song ba ste/ /'dod pa 'joms phyir mchod pa'i don du nged rnams kyis/ /tshe rnams dag kyang 'dor bar mi bgyid gang las yin/ /rgyal rigs zad phyir drang srong drag tu khros pa ni/ /ngan spong bu yis g.yul du mtshon rnams bzung ba ste//khro ba 'joms phyir mchod pa'i don du nged rnams kyis/ /tshe rnams dag kyang 'dor bar mi bgyid gang las yin/ /lha mo sI tar mngon brjod 'chi ba yongs bzung nas/ /srin po shin tu dregs pa yang ni nyams pa ste/ /yongs 'dzin spong phyir mchod pa don du nged rnams kyis//tshe rnams dag kyang 'dor bar mi bgyid gang las yin/ /e Di lam ni pa ka zhes ni dgra 'phel zhing / /rgyal rigs bye ba rnams ni de ltar nyams pa ste/ /rmongs mun gtor phyir mchod pa'i don du nged rnams kyis/ /tshe rnams dag kyang 'dor bar mi bgyid gang las yin/ / de skad ces sogs 'jig rten dag na 'thab mo ni/ /skyon las skyes pa mang po rnams ni byung gyur te/ /ston pa bla na med pa'i gus pas mchi ba dang / /bcas pa yin kyang 'thab mo mi bgyid gang las yin/ /de lta na yang bdag cag rnams kyi nges pa 'di/ / khyed kyi pho nyar gyur cig skyen par gshegs mdzod la/ /ji ltar don ni 'thab mo min pas 'grub pa cig /de ltar bdag nyid kun gyis 'bad pa gyis mdzod cig /khyed kyis chos ldan tshig rnams kyis ni nged cag rnams/ /'thab par 'dod cing mda' yi mche ba rnon po can/ / nang du rab tu 'phel ba'i dug ni 'thungs pa rnams/ /sngags rnams kyis ni sbrul rnams bzhin du bkag pa'o/ /de ltar bgyi zhes rgyal po rnams kyi tshig bzung nas/ /bram ze de ni grong khyer de la rab zhugs shing / /ji ltar rim gyis gyad rnams dag ni mthong ba ste/ /mthong nas dus su tshig ni 'di skad ces smras so//gzhu rnams lag na gnas pa'i mi dbang 'di rnams ni/ /nyi ltar byi dor go cha 'bar rnams kyis/ /khyed cag rnams kyis grong 'dir nges par ro myang zhing / /seng ge bzhin du rnam par 'gying zhing gnas pa'o/ /de rnams kyi ni shubs su bkod pa'i ral gri dang //gser gyi rgyab ldan gzhu rnams nges par rtogs pa ste/ /grub pa'i chos dran nas ni chos min gyis 'jigs shing / /zhu ba gsol bar byed de g.yul la 'jigs rnams min/ /de rnams mngon par 'ongs rnams sa yi phyir min zhing / /nor phyir ma yin rgyags phyir ma yin dgra phyir min//thub pa'i gus pas nged cag rnams kyi zhe sa 'di/ /de phyir khyed cag rnams kyi bya bas bkur sti mdzad/ /thub pa de la khyed cag gi dang nged cag gi /bla ma nyid du mnyam ste 'di las ngal ba 'di/ /de phyir spun gyi tshogs ni 'dus nas 'ongs pa ste//bla ma'i gdung rnams mchod pa la ni bya ba gcig /ji ltar chos kyi cho ga la ni ser sna nyid/ /nor rnams la ni ser sna de ltar skyon ma yin/ /ser sna smra ba nges pa nyid du skyon yin zhing / /skyon ni chos kyi dgra bor gyur pa nyid yin no/ /gal te mi sbyin par ni khyed rnams kyis ngas na//rdzong nas 'thon nas 'gron po rnams la bsnyen par mdzod/ /gang rnams kyis stobs mnga' rnams ma yin sgo glegs rnams/ /de rnams rigs su skyes pa'i rgyal rigs ma yin no/ /byams pa dang ni gzi brjid ston par byed bzhin du/ /mi dbang rnams kyis khyed cag rnams la de skad smras//bdag gi smra 'dod gang yang rang gis rtogs nas su/ /dga' las bdag gi de ni khyed cag rnams kyis nyon/ /'ga' zhig rtsod pa dge ba ma yin chos min te/ /rnam par 'gras par ma 'gro zhi ba bsnyen par mdzod/ /thub pa des ni bzod pa rab tu bsngags pa ste//gang gis gus pas me ni kun nas 'phel bar 'gyur/ /nor dang 'dod pa dag gi gcig gi ched du ni/ /rnam par rtsod pa tshul ni nye bar 'gyur ba ste/ /chos kyi ched du slar yang 'phags par gyur pa ni/ /zhi ba dang ni dgra bo rnam par rtsod par smra/ /gang zhig nye bar zhi zhing byams pa'i thugs kyis ni//sems can thams cad rnams la brtse ba gsungs pa ste/ /thugs rje chen po mnga' ba de la mchod pa ni/ /'tshe ba byas nas bdag gi lugs dang mtshungs ma yin/ /de phyir gdung ni rab tu sbyin las 'di rnams la/ /grags pa dang ni chos kyis yang dag bgo ba mdzod//de ltar gyur na khyed kyis rtsod min de dag dang / /de dag gis kyang chos dang grags pa 'thob par 'gyur/ /chos ldan skyes bu rnams kyis chos las g.yos pa ni/ /chos la 'bad pa las kyang nged rnams kyis sbyor na/ /gang bdag rnams kyis gzhan dag chos la sbyor byed pa//de dag rnams kyis chos ni gnas pa'i ched du 'jug /drang srong dam pa mchog gis chos kyi sbyin pa ni/ /sbyin pa thams cad kyi ni khyad par 'phags par gsungs/ /gang zhig la las nor la sbyor bar byed pa ste/ /chos kyi sbyin pa po ni rnam par bsags pa yin/ /de nas snyan grags dang ni bde ba 'dren pa dang //chos kyi tshig ni de las nye bar thob nas ni/ /ngo tsha dang bcas phan tshun lta ba de rnams kyis/ /bre bo'i rigs mnyam bram ze la ni smras pa'o/ /e ma mdza' bo'i dge la khyod kyis nges pa ste/ /yon tan rnams la bram ze'i rjes su mthun pas chags//lam gzhan gyis ni 'khrul ba'i rta ngan rnams bzhin du/ /gang gis legs par bsnyen pa'i lam la bkod par 'gyur/ /ji ltar smras pa de ltar de ni ldan 'gyur zhing / /brtse zhing mnyen pa'i tshig 'di 'dzin par rigs pa ste/ /mdza' bo'i skye bo'i tshig la shin tu 'das nas su//phyi nas sdug bsngal nyid du lhung rnams mya ngan 'gyur/ /de nas 'gro ba'i khams rig gdung ni gyad rnams kyis/ /de rnams brgyad du gus pas yon tan las bgos so/ /de nas rang nyid kyis ni cha shas bzung nas ni/ /bdun po so so so sor gzhan rnams la byin to/ / gyad rnams dag gis mngon mchod sa skyong de rnams kyang / /dga' zhing don byas rnams ni rang yul rnams su gshegs/ /de nas drang srong gis gdung de rnams cho ga bzhin/ /rang grong rnams su mchod rten rab gnas rnams de byas/ /de nas rang gi yul du thub pa'i mchod rten ni/ /byed 'dod bre bos so sor bgos pa'i bum pa blangs//sol ba lhag ma rnams kyang pi sa la zhes pa'i/ /gus pas rjes su rab ldan rnams kyis bslangs par gyur/ /de nas gdung gi snying po can gyi sngon du brgyad/ /brag ri dkar po dang mtshungs mchod rten rnams gyur zhing / /de yi bum pas bsnyen pa bram ze'i dgu pa ste//sol ba'i snying po dang ldan bcu pa byung bar gyur/ /thub pa'i mchod rten sna tshogs ba dan g.yo ba rnams/ /ti se'i gangs ri'i rtse mo dang mtshungs de rnams la/ /rang gi skye bo dang bcas mi skyong de rnams dang / /skye dgu dang bcas bram ze rnams kyis sa na mchod//phreng ba mngon sbyar rnams dang dri bzangs mchog rnams dang / /phreng ba dge ba rnams dang sil snyan dbyangs rnams kyis/ /mchod pa dam pa mi skyong de rnams de rnams kyis/ /rgyal ba'i gdung ni 'dzin pa de rnams la byas so/ /de nas dus su dgra bcom rnams kyi lnga brgya rnams//ri bo lngas mtshan grong khyer du ni yongs 'dus nas/ /slar yang ji lta ba bzhin chos ni gnas pa'i phyir/ /thub pa'i gsung ni ri yi logs su yang dag bsdus/ /gnas skabs kun du drang srong che las thos pa ni/ /kun dga' bo nyid yin zhes nges par gyur pa yi/ /dge slong de rnams kyis ni 'dus pa mthun pa ru//gsung bar zhu zhes lus 'phags thub pa la zhus so/ /de nas de dag rnams kyi dbus su de bzhugs nas/ /smra ba rnams kyi mchog gis ji ltar gsungs pa'i tshig /gang du gang la gang gi tshe na gang zhig dang / /'di skad bdag gis 'di ni thos zhes gsungs par gyur//de phyir dgra bcom rnams kyis rjes su bcings pa des/ /thub pa chen po'i chos kyi bstan bcos gnas pa ste/ /gang zhig 'bad pas yang dag rab tu thob pa ni/ /mya ngan 'das shing 'da' la mya ngan 'da' bar 'gyur/ /dgra bo khengs pa rnams kyi mya ngan ster ba po//skye dgu sdug bsngal rnams kyi mya ngan gcod pa po/ /me tog 'bras ldan mya ngan med ltar blta na sdug /dus su de gus sa bdag mya ngan med pa byung / /'phags pa mau rgya'i dpal des skye dgur phan don du/ /'jig rten kun la mchod rten mtshan ma byed du bcug /gtum po mya ngan med nyid thob nas sa la ni/ /chos rgyal mya ngan med nyid las de thob par gyur/ /mngon du byas pa'i mchod rten bdun po de rnams las/ /drang srong de yi gdung rnams mau rgya des blangs nas/ /dpal ldan mchod rten ston ka'i sprin gyi 'od rnams kyi/ / stong phrag brgyad cur babs pa dus su zhag gis byas/ /dga' byed grong gnas mchod rten brgyad pa dang po ni/ /de yi dus su gus ldan klu rnams kyis bsrungs te/ /de phyir gdung rnams thob pa ma yin rgyal po des/ /der byas pa la ma dad rgya chen gyur pa'o/ /de'i phyir yid kyis dgra bo 'bras bu rnams la ni//kun nas gnas shing g.yo ba'i dpal ni bsrungs na yang / /mi skyong des ni ngur smrig gon pa las gzhan du/ /lta ba rnam par dag cing 'bras bu dang po thob/ /de las gzhan du gzhan gyis thub pa'i mchod pa ni/ /gang gis byas shing byed la byed par 'gyur ba ste//dam pa'i skye bos bsnyen pa'i 'bras bu bla na med/ /de yis thob cing 'thob la 'thob par 'gyur ba nyid/ /drang srong bzhugs pa la ni mchod pa sbyar nas sam/ /yongs su mya ngan 'das pa'i gdung la phyag byas nas/ /yid kyi dang ba mnyam na 'bras bu mnyam pa ste//sangs rgyas yon tan rnams ni mkhas rnams shes par mdzod/ /de phyir rtag tu mchog gi chos ni mkhyen pa'o/ /mchog tu mi 'gyur 'pho ba med pa brnyes ldan pa/ /brtse ba dang bcas thub pa blo gros chen po ni/ /mchod 'os mchog la mchod la dam pa 'ongs pa'o//mchog tu thugs rje dang ldan mchog gi thugs mkhyen pa/ /gzhan la phan phyir mchog tu ngal bar byon pa de/ /mdzad pa mkhyen pa nyid kyis dam pa mkhas rnams kyi/ /'di na gtang rag mchod pa gang phyir 'os ma yin/ /sa na 'chi dang rga ba dang mnyam 'jigs pa dang //mtho ris dag na 'pho ba dang mnyam yod min te/ /'gro ba'i de gnyis mkhyen nas gang zhig gnas pa ste/ /de phyir mchod par bya ba dam pa su 'dra yod/ /skye ba yod na bde ba min pa 'byung ba ste/ /yang srid med las shin tu bde bas bde ba med/ /de ni brnyes shing gang gis 'gro la byin pa ste//de'i phyir mchod par bya ba dam pa su 'dra yod/ /de ltar thub pa'i skyes mchog de yi gus pa yis/ /mkhas nyid yon tan las min snyan dngags nus pas min/ /thub pa'i lung gi rjes su 'brangs nas 'di brtsams te/ /skye dgu rnams kyi phan dang bde ba'i phyir gyur cig /yul shA se ta ka'i gser mig ma'i bu dge slong slob dpon snyan dngags mkhan chen po/ /smra ba dang ldan pa phyogs su rnam par grags pa/ btsun pa rta dbyangs kyis mdzad pa'i/ sangs rgyas kyi spyod pa zhes bya ba'i snyan dngags chen po las sku gdung rnam par bgo ba'i le'u ste nyi shu rtsa brgyad pa yongs su rdzogs so// //sa stengs rgya mtsho'i mthar thug bstan pa'i bdag po mchog /yon tan mtshungs med phul byung du ma'i gter chen po/ /mkhas pa rnams kyi bla ma skye dgu rnams kyi dpal/ / bla ma dam pa chos kyi rgyal po'i bka' lung gis/ /'jig rten kun na zla bral skyes mchog de nyid kyi/ /phrin las sgrub pa snye ba'i thugs dgongs rnam dag dang / /mi rje lha sras gung thang rgyal mo yum sras dang / /chos la gcig tu dkar ba'i lha gcig kun dga' 'bum/ /mang yul skyi rong bzang mo yon tan skyid la sogs//chos ldan dam pa rnams kyis sbyin bdag bgyis pa'i ngor/ /'phags pa rta dbyangs kyis mdzad thub pa'i mdzad pa 'di/ /sa dbang bzang po dang ni blo gros rgyal pos bsgyur/ /'di bsgyur bsod nams rgyal po gang des pha ma dang / /'gro rnams lam gyi rgyal po dam pa 'dir zhugs te/