CLOSE WINDOW

D4149
བོད་ཡིག

@##/ /rgya gar skad du/ ye d+ha rmASh+TI ka /bod skad du/ ye d+harmA'i 'grel ba/ sangs rgyas la phyag 'tshal lo/ /da ni ye d+harmA he tu pra bA wa he tuM/ zhes bya ba la sogs pas rgyud rab tu gnas pa'i don du grub pa'i mtha' gsungs pa yin te/ 'chad pa po rnams la yang gsungs pa yin no//mdo sde dang ni rnal 'byor gyi/ /khang par yang ni 'jug pa nang / /ye d+harmA sogs tshigs bcad kyis/ /sangs rgyas grub mtha'i phyag rgyas btab/ /ces so/ /de yang ye d+harmA sogs ni bod kyi skad du/ chos rnams gang dag rgyus 'byung de dag ni//rgyu dang de la 'gog pa gang yin pa'ang / /de bzhin gshegs pa nyid kyis bka' stsal te/ /de skad gsungs pa'i tshul can dge sbyong che/ /zhes bya ba'o/ /chos rnams gang dag rgyus byung zhes pa la gang dag ni rab tu grags pa bdun po rnams te/ma rig pa la sogs pa'i lcags sgrog gis kun du bskor ba'i 'khor lo ni rgyu dang 'bras bu'i bdag nyid can no/ /de dag ni zhes pa nyon mongs pa dang / las dang sdug bsngal gyi yan lag gsum dang / gnyis dang bdun gyis phye bas gsum du yang gyur pa yin te/ma rig pa'i thog ma yin par sangs rgyas nyid kyis gsungs pa yin no/ /ma rig pa dang / 'du byed dang / rnam par shes pa dang / ming dang / gzugs dang / skye mched drug dang / reg pa dang / tshor ba dang / sred pa dang / len pa dang / srid pa dang / skye ba dang / rga shi ste bcu gnyis po rnams so/ /ma rig pa ni 'dod chags dang / zhe sdang dang / gti mug gi bdag nyid can no/ /'du byed ni sngon gyi las so/ /rnam par shes pa ni mngal du 'jug pa'o//ming dang gzugs ni nur nur po la sogs pa lnga'o/ /skye mched drug ni mig la sogs pa la 'dod do/ /reg pa ni yul dang / dbang po dang / rnam par shes pa rnams phrad pa'o/ /tshor ba ni bde ba la sogs pa'i bdag nyid can no//sred pa ni 'khrig pa'i 'dod chags so/ /len pa ni 'dod pa'i yul len pa'o/ /srid pa ni 'byung bar 'gyur ba'i srid pa'i 'bras bu can gyi las so/ /skye ba ni slar yang phung po nying mtshams sbyor ba'o/ /rga shi ni gsal lo//dang po dang / brgyad pa dang / dgu pa rnams ni nyon mongs pa'o/ /las ni gnyis pa dang / bcu pa'o/ /lhag ma bdun ni sdug bsngal lo/ /de gsum gyis bsdus pa'i phyir bcu gnyis ni chos rnams so/ /gsum las gsum dang gnyis las gnyis 'byung la//bdun las bdun yin pa'i phyir/ de kho na 'khor ba'i 'khor lo rgyu dang 'bras bu yang ste/ 'gro ba thams cad de/ 'dir sems can gzhan ni 'ga' yang yod pa ma yin te/ stong pa 'od zer ltar chos rnams las stong pa'i chos rnams 'byung bar 'gyur te/kha ton dang / mar me lta bu dag ni rgyu las byung ba'i don du'o/ /rgyu dang de rnams kyi yang de bzhin gshegs pa nyid kyis bka' stsal te zhes pa ni/ de ji ltar thugs su chud pa de bzhin du gsungs pa'i phyir te/ gzhan ma yin par gsung ba nyid kyi phyir 'khor ba'i rgyu dang rkyen gsungs pa yin no//de la 'gog pa gang yin pa'ang / /zhes bya ba la/ 'ang gi sgra las de kho na rgyu dang bsams par gsungs pa yin gyi/ sangs rgyas rnams kyi mya ngan las 'das pa yan lag bcu gnyis 'gog pa'i mtshan nyid kyang gsungs pa yin te/zung 'jug pa'i bde ba brtags pa nam mkha'i me tog ma yin zhing sems med pa bems po ma yin pa'i rang bzhin no/ /de skad gsungs pa'i tshul can dge sbyong che/ /zhes bya ba ni zung du 'jug pa gsung ba'i tshul can yang dag par rdzogs pa'i sangs rgyas te/phyin ci ma log par gsung ba'i tshul can gyi tshangs pa'i cho ga'o/ /'di ni slob dpon rtag pa'i rdo rjes gsungs pa gzhon nus bsgyur ba'o// //