CLOSE WINDOW

D4147
བོད་ཡིག

/ //rgya gar gyi mkhan po a dzi ta shrI b+ha dra dang / dge slong shAkya 'od kyis bsgyur// //[ ]@##/ /rgya gar skad du/ sab+ha ku mA rI ka a ba dA naM/ bod skad du/ gzhon nu ma bdun gyi rtogs pa brjod pa/ dkon mchog gsum la phyag 'tshal lo//chags bral ldan dang legs par bshad pa dang / /ngo mtshar dang ni de nyid don nges dang / /dam pa rnams kyi gcig tu mnyan bya yi/ /rtogs pa brjod pa bdag gis bshad kyis nyon/ /'di ltar dge ba'i rtsa ba yongs su smin pa rnams la ni/ longs spyod chen po'am/lang tshos bar du gcod par mi 'gyur bas mdzes par gyur pa yin no/ /de yang 'di ltar rjes su thos te/ rgyal po kri kI zhes bya ba tshul dang du la ba la sogs pa yon tan gyi dpal phun sum tshogs pa dang ldan pa/ bcom ldan 'das yang dag bar rdzogs pa'i sangs rgyas 'od srungs la dad pa yang dag par thob pa zhig byung bar gyur pa de/de'i bu mo bdun sngon du byung ba'i sangs rgyas rnams la dge ba'i rtsa ba rgya cher bskrun pa'i stobs dang ldan pa de dag 'khor bas shin tu yid byung bar gyur nas/ de rnams kyis dul ba dang zhe sar bcas pas pha la phyag byas te snyan pa'i tshig gis smras pa/'jig rten gnas pa chu nang song ba'i zla ba'i gzugs bzhin g.yo bar mthong / /'dod pa khros pa'i sbrul gyis lus skyil gdengs ka'i grib ma lta bur mthong / /'gro ba 'di dag sdug bsngal me yis kun du 'bar ba mthong bas na//rgyal po bdag cag nges par 'byung la mngon dga' dur khrod dag tu mchi/ /rgyal pos smras pa/ khyed ni byis pa bde la brten 'os shing / /yid la bsams pa'i don yang ma byas na/ /dka' thub gnas su khyed rnams song shig ces/ /ji lta bur nang yis smra bar nus//bu mos smras pa/ sa bdag khyed kyi mdzad spyod bdag cag rnams kyis 'tshal lags te/ /'gro la thugs rjes brlan zhing des pa'i ngang tshul ldan bas na/ /dgos pa med la'ang byams par mdzad na nyid kyi phang par ni/ /rnam bskyed sdig med nyer son bdag cag rnams lta smos ci 'tshal//khyed dang lhan cig gnas kyang dbang med bral ba mngon phyogs pa'i/ /phongs pa 'di yis phyir zhing nye bar gdung bar ma gyur ces/ /rgyal po shin tu dga' ba'i gnas su gyur pa gang dag yin pa yi/ /zhi ba'i go 'phang thob par 'tshal ba'i yid ni skyes par gyur//de nas rgyal po de snying brtse ba'i dbang gis yid rnam par nyams shing / mig gnyis zangs ltar dmar la mi 'gyur bas yang dang yang du bltas nas smras pa/ ci phyir khang bzangs rang dgar gyur dang 'jam yangs pa'i/ /sna tshogs stan bzangs rgya chen rnam par spangs nas ni//dur khrod mi bzad skye bo ngan pa'i yid 'dra zhing / /sa gzhi rus pa dkar po'i tshal pas bkram pas stan/ /gdung ba'i gdong can pha dang yul rmugs lta bur ni/ /mchi ma'i gdong can ma yang cig car ji ltar 'dor/ /g.yo med sems kyi rgyun du yid ni brtse ba yi / mdza' bshes spangs nas ci phyir dka' thub bstan par dga'/ /de nas bu mo de rnams kyis shin tu brtan pa'i yid kyis bsnyems par byas nas/ smras pa/ pha dang ma dang mdza' bshes gces pa tha snyad tsam/ /'di dag srid par phyir yang lhung dang gnod pa'i gzhi/ /'byung ba'i don mthong lkog tu gyur pa'i dri ma yis//mi yi bdag po 'jig rten 'jig pas yongs su skyo/ /mdza' bshes rang mi gnyen gyi ngo bo sna tshogs pa/ /g.yon can phung khrol ldan pa 'di la su zhig chags/ /'tsho ba'i 'jig rten rmi lam mig 'phrul dang 'dra la/ /'di na su zhig gang gis rang mi'am skye bor brtag /mi yi dbang po 'jig rten dam chos gsung gi 'od zer snang bcas shing / /ji srid sangs rgyas nyi ma'i yid 'ong grags pa'i 'od zer phreng yod pa/ /de srid phongs pa'i mun nag tshogs kyis shin tu g.yogs gyur pa'i/ /srid pa'i mun pa mi zad mun rum nas ni 'byung bar bya ba'i rigs//ji ltar rlung gis brdabs pas bskyod pa'i me lce 'bar ba'i khyim las ni/ /'byung bar byed pa'i skyes bu de la phan par 'dod rnams zlog mi byed/ /de bzhin sdug bsngal me chen rtser gnas srid pa ma lus gnod pa yi/ /dra ba las ni nges par 'byung la phan phyir dam pas bzlog mi bya//de nas rgyal po des bu mo de rnams mdza' bshes dang rang mi dang rtsa lag rnams la ltos pa med pa'i tshig rtsub po dang / rang gi lus dang srog la yang shin tu ma chags pa'i tshig gis lhag par yang mya ngan gyis gdungs par gyur pa'i yid kyis de rnams la yang smras pa/dus min dka' thub mngon par 'dod pa ni/ /yid dang rjes mthun don du mi 'gyur te/ /bu mo dus min mngal dang ldan pa la/ /yan lag cha shas mdzes pa mi skye bzhin/ /dus la bab par dka' thub la sbyor ba/ /zla ba skyon dang bral ba lta bur mdzes/ /de bas gzhon nus phan med blo 'gyur 'di'i//log pa'i lam du 'jug las bzlog par gyis/ /bde la brten zhing sdug bsngal ma mthong bas/ /lus kyis sdug bsngal bzod par mi 'gyur te/ /a mra'i shing ni rtsa ba ma zug la/ /glang chen mchog gi mche ba bsnun dang mtshungs/ /khong nas me 'bar ltas ngan sgra 'byin pa'i//ce spyang 'jigs pa'i sgra sgrogs tshang tshing gang / /'jigs pa rnams kyang 'jigs par byed pa yi/ /mi bzad dur khrod dag ni 'jigs par bcas/ /khyed lus pad+ma'i rtsa ltar 'jam pa la/ /sems gang sog les lta bur brtse med 'dis/ /gzhan gyi ngor byed pa ni spangs gyur pa//e ma ho gnam bskos bdag la brtse med sdang / /bai DUR+Ya ltar sngo ljang ngur pa'i gos gyon cing / /me tog rnam pa du ma'i tshogs ni bkram gyur dang / /bung ba myos pa'i tshogs kyis khyab pa'i rtsed mo'i tshal/ /'dir ni bu mo khyed rnams mngon par dga' bar gyis//skyed mos tshal na rdzing khang ngogs na me tog shing 'phyang zhing / /rlung gis bskyod pa'i chu rlabs mdzes pa'i phreng bas ska rags bcings/ /pad+ma dag dang ut+pa la rgyas gseb dang pa sgra sgrogs pa/ /brgya byin gyis kyang rnyed dka' bu mo dga' bas gnas par gyis//me tog na pa ma li ka yi dris bsgos gyur pa yi/ /chu rlabs mdzes par gyur pa'i nye bar g.yo ba yi/ /rlung dang bcas pa'i khyim 'di dang ni nags tshal ni/ /khu byug sgra 'byin pa yi bu mo dga' bar gyis/ /skar khung dra ba can nang bya rnams skad 'byin me tog dris bsgos dang //sgeg pas khrus byas dri zhim bsgos pa'i nags dang 'dra ba'i rlung dag ni/ /khang bzangs mda' yab can dang bya gag bde bar nyal ba gang yin 'dir/ /bud med 'dus pa'i glu dbyangs rol mo ldan par khyed rnams dga' bar gyis/ /de nas gzhon nu ma rnams pha'i tshig des yi ma rangs par gyur nas smras pa/mi yi bdag po lha yul sa steng na/ /brgya phrag stong du spyad pa ma byas pa'i/ /bde ba gzhan dag ci yang yod min te/ /bdag cag rnams ni don med mkhas pa yin/ /yul la lhag par sred cing goms pas na//dbang po rnams ni yul gyis ngoms pa med/ /srid pas 'jigs pa'i rtog pa'i blo can dag /srid pa'i longs spyad zad par bya phyir 'jug /ngo bo nyid kyis 'gyur zhing mi brtan la/ /rlung gis bskyod pa'i chu rlabs ltar 'jigs pas/ /sdom can dbang po drug las rnam rgyal rnams//phyir zhing srid par 'jug las ldog par byed/ /byis pa srid pa'i btson rar phag lta bur/ /sems kyi spags pa'i spyod pas bslus gyur te/ /bde bar mngon par rlom zhing brkam pa dag /phongs shing 'jigs pa'i g.yang sa mtha' med lhung / /bdag tu rtog pas sems g.yengs skyes gyur pa//de ni rab 'bar mtshon cha'i 'khrul 'khor 'dra/ /yul la rjes su brten pas sems bcom pa/ /yongs su smin na sdug bsngal mi bzang rgyu/ /'gro ba 'di dag mi brtan dbang med cing / /sbrul gdug mtshon gyis zin 'dra'i yul rnams dag /rtogs kyang gang zhig srid la chags gyur pa/ /de ni mi yi gzugs ldan phyugs nyid yin/ /rnga rtsid shing la thogs pa'i g.yag bzhin du/ /blo yi lam ni rnyog pas nyer 'gags shing / /log par chags pa'i yal gas sems thogs pa'i/ /skyes bu ngan pa'i khyim rten phung bar 'gyur//dga' ba'i rgyu tsam 'tsho ba'i 'jig rten la/ /phongs pa rgyun mi 'chad par 'byung 'gyur na/ /yab cig srid pa'i dga' ba mang po las/ /slu bar mi 'gyur gang zhig mchis par gsungs/ /mi dbang srid na skal ba mnyam pa yis//nye bar bsgrubs shing bsags par gyur kyang ni/ /bcom zhing sems ni dman pa dman pa yis/ /srid pa'i dgon pa gzhan du 'gro bar 'gyur/ /rgyal po rgyar chud gyur pa'i nya bzhin du/ /skyes bu legs par brtags shing byed pa dang / /tha snyad kun la ngang gis mkhas pa yang //khyim gyi btson rar gnas na 'jig par 'gyur/ /sa yi bdag po 'bad pa mang po yis/ /khyim du rdzas rnams bsags pa byas pa dag /mi yis skad cig gis ni 'dor 'gyur te/ /legs bshad gcig pu 'di nyid lam du bstan//de bas 'jig rten mgon pos 'tsho ba yi/ /'jig rten mi rnams las bdag byar gsungs te/ /'chi ba mngon phyogs mi la rang gi las/ /ba la be'u bzhin du rjes su 'brangs/ /yongs su gyur na mi bzad gnyen sdug dang / /sdug dang 'dre bar mngon pas 'dod des chog /sdug dang phrad pas dga' bar sems pa dag /nges par sdug dang bral ba'i sdug bsngal 'thob/ /mi dbang gzhan yang ngang gis mthar 'jig pa'i/ /'tsho ba'i 'jig rten dag na sdug pa su/ /dam pa'i don la rnam dpyod mkhas pa yang / /sdug ces bya ba 'dis blo rnam par g.yengs//sa bdag khyed ni gal te bdag cag la/ /sdug pa 'ga' zhig mchis na bdag cag rnams/ /ma smad 'phags pas bsten zhing mi phrogs pa'i/ /bde ba yid la 'dod pa sgrub tu gsol/ /de nas rgyal po de brtse ba'i yi ma rangs par gyur kyang /bde bar gshegs pa'i bstan pa la mngon par dad pas chos la bar chad byed pa'i 'jigs pa skyes pa dang / /rang gi bu mo rnams kyis sngon gyi skye ba rjes su dran te 'gro bar 'dod pas na skye ba dran pas nyes so snyam du bsams te shin tu yun ring por cang mi smra bar gyur to//mi yi skyes bu de yis ni/ /'chi ba med par shes pas na/ /song bas yongs su ma spangs par/ /ci zhig ltar ni rjes snang smras/ /de nas bu mo de rnams kyis me tog phreng ba dang byug pa dang rgyan rnams spangs nas/ dul ba dang ldan par zhugs pa'i lus la gos dkar po phra zhing rab tu 'phyang ba gyon bas chu bo rlung gi shugs kyis bskyod pa'i dbu ba'i phreng ba lta bu'am/ston ka'i mtshan mo zla ba'i 'od kyis gos kyis bkab pa lta bu'am/ drang srong sme bdun gyi skar ma rang gi 'od zer gyi dra bas g.yogs pa lta bu dang / rim gyis ro bsreg pa'i gnas me'i dbus su ro bzhag pa cil cil zer ba rnam par bkram pa dang /ro rnam par mnam pa dri mi zhim cing 'jigs su rung ba dang / mi'i thod pa bya rgod kyis mchu'i rtse mo rnon pos brdol ba'i bu ga nas glad pa dang chu ser rnam par 'jigs pas mi ro'i gdong la spags pas mtha' ma khyab cing 'jigs pa dang /rnyings shing dengs la mdog rnam par 'gyur ba'i rus pa dum bu'i tshogs kyis non cing rtsub pas sa'i phyogs rnams bgrod par dka' ba dang / lus can dag yongs su yid 'byung bar byed pa gshin rje'i gnas bzhin mya ngan dang yid mi bde ba dang /sdug bsngal ba'i gnas su gyur pa'i dur khrod du phyin par gyur to/ /de la 'di skad ces bya ste/ mi yi khrag dang zhag gis dri mi zhim pas myos bar gyur pa'i bya rgod dang / rgyu lto nar bas khyab cing mi sdug 'jigs pa'i ro yi yan lag rnams kyis khebs/ /kun da 'dra bar dkar zhing rtag tu dgod pa 'dra bar mtha' gas thod pa dang //n+ya gro d+ha snying sul nas 'ug pa sna tshogs hUM sgrogs 'jigs pa'i dur khrod phyin/ /ce spyang kha ni mer bcas brlang ba'i sgra dag sgrogs pas 'jigs pa dang / /la lar thod pa dkar po'i dra bas khyab cing bgrod dka' dang / / srin bu rigs kyi tshigs kyis gzengs shing rna khung bskyod pa dang / /bung ba sbrang bu brgya phrag mang po rol 'phungs shing 'du/ /rus pa dkar dang dmar rlon rlung gis bskyod par gyur ba dang / /ro bsregs me gsal 'phro dang shing skam rtsa na sbrul nyal dang / /la lar mi yi lus ni mdung rnos phug nas bskyon pa dag /gshin rje rtag tu dga' ston byed la 'jug pa'i tshang bang 'dra/ /la lar mi mgo'i thod pa'i gseb nas khrag dang chu ser 'dzags pa yi/ /khu ba mi sdug dag la sred pa'i sha za'i tshogs kyis khyab/ /la lar cil cil zer ba'i ro bsreg me yis bskor ba dang //mi ro'i khong nas rgyu long phyung ba gtor bas khyab par gyur/ /skyo bas brlan pa'i sems kyis ni/ /der ni bud med der brtags nas/ /'tsho ba'i 'jig rten rgyu mi rgyu'i/ /ngo bo nyid ni sems par gyur/ /skra yi snying ni rdul gyis rtsub cing dmar/ / mig sbubs bya yi mchu dang sder mos brus/ /gsang gnas 'gyur zhing mi sdug rnag bcas par/ /bor ba'i bud med lus der rab tu bltas/ /dam pa'i spyod pa thang cig gnyer g.yos shing / /ut+pal 'dab ltar dkyus ring mig gis ni/ /ro yi gzeb de mngon par bltas nas kyang //tshig mang rnam pa du ma smras par gyur/ /'di nyid rdo thal byugs pas dga' ba'i gnas khang ni/ /zla zer gsal bas spras par byas pa ru/ /sdug pa'i phong par brten zhing gnas pa las/ /de ni sa yi dkyil 'khor gzhi la nyal/ /sdug pa'i lag pa'i gzeb tu nyal ba na//'brug sgra sgrogs pa yis ni khyod skrag na/ /mer bcas ltas ngan ce sbyang sgra yis ni/ /dka' thub ma khyod ci phyir 'dir mi 'jigs/ /'di nyid rang gi khyim 'khor zla zer de/ /ro smad lci ba'i khur gyis dal 'gro la/ /rol cing dgod la sgeg par rnam lta ba//brtse med bya rnams da ltar za bar byed/ /'gro ba 'di dag ngan cing mi brtan te/ /snying rje med pa'i sdug des ci yi phyir/ /mi ro brgya yis khyab par gyur pa yi/ /dur khrod 'di ru khyod ni bor bar 'gyur/ /rang mi rtsa lag mdza' bshes sdug pa dang / /pad+mar bung ba bzhin du gnas pa las//ci phyir mtshan mos rgyu bas 'jigs kyang ni/ /nyon mongs deng 'dir dur khrod dag tu dga'/ /sngon ni mdzes shing snum la dkyus ring 'jam pa'i mig gis lta ba na/ /chags can rnams kyis mig 'bras mtha' dmar 'gyur zhing mi rnams nyams byed pa/ / 'dod lha'i ri dwags rgyar gyur bud med de nyid deng ni bya rnams kyis/ /mig phyung sdug bsngal byas pas chags dang bcas rnams shin tu 'jigs par byed/ /mi gtsang sna tshogs khong na mi mngon srog shing gi /lus la bdag gir chags pas long ba'i mig bslus zhes/ /bud med mchog 'di 'dod chags ldan pa rnams la ni//brkam pa'i bya yis mchus btog gdong gis nye bar dgod/ /pi wang gling bu'i sgra snyan rnams dang snyan pa'i glu gar dang bcas pas/ /mchog tu sdug pa'i pang na bag phab bde bar gnyid log pa'i/ /bud med de ni ce spyang skad 'byin mu cor sgra bcas shing //sa rdul gyis khyab rtsub pa'i dur khrod 'dir deng nyal bar gyur/ /gang du rnam par brtags kyang skra yi rtse mo tsam gyis ni/ /gtsang ba mi gtsang tshogs kyis tshang tshir 'dir mi snad/ /phung khrol chos can nad mang 'dod pa thang chad la/ /rang bzhin ngan rnams ci phyir de ni chags par gyur/ / bu mo 'gro ba kun gyi tshul yang 'di 'dra bas/ /rmi lam mig 'phrul chu zla lta bur rang bzhin gyis/ /g.yo ba rtogs pa ji srid srog ni lhag ma dang / /bcas shing lus gzhon gyur tshe chags dang nyer bral byos/ /gshin rje'i chu srin dga' ba'i khar ni chud gyur cing / /skra dkar tshogs kyis spyi nas bzung nas ni//srog mthar gyur pa'i gnod pa'i tsher ma'i gnad phug la/ /mchi mas mig khebs gyur tshe dge ba ji ltar bya/ /'jig rten pha rol mi bzad mun nag g.yang chen du/ /ltung zhing lus byer gyur tshe dge ba 'dod gyur pa/ /dug can sbrul kha dog pa'i nang du chud gyur pa'i//sbal pa nga ro 'don dang mtshungs zhes mkhas rnams smra/ /ci phyir tshig rtsub phra ma ma 'brel spyi rtol smra ba dang / /snyan tshig bcos mas 'jig rten bslus par gyur nas di ring ni/ /mi smra gnas zhes spyod pa lta bus mdun so'i phrag nas ni/ /bya rnams tsham tshom med par mchu yi skam pas lce yang 'byin par 'gyur//chags pas mdongs shing log pa'i yul goms yon pa'i bsam pa can/ /byis pa gang gis mig gi yul mthong bstan pa rnam 'jig pa'i/ /mdzes pa'i ro smad de ni de ring 'jigs dang bral ba yi/ /mi bzad bya rgod mchu dang sder mor 'jog cing tshul du 'dri//gang dag rang gi khang pa sa gzhi me tog sel mas gtor ba yi/ /rtsig pa'i ri mo yongs 'gyur bzhin dang zur gyis lta byed cing / /sdug pa'i lag pa'i pad+mar brten zhing dal gyis 'gro ba yi/ /bud med de yi rkang pa de ni wa dag za bar 'gyur/ / 'di ltar lhan cig skyes pa'i mi sdug mi gtsang 'dam rdzab dang / /dregs pas myos shing sems lhung gyur pas sdug bsngal nyon mongs pa'i/ /lus la khyed kyis 'di ni rang bzhin ma zhir bltas nas ni/ /'tsho ba'i 'jig rten glog ltar rab tu 'jig la'ang yid byung gis/ / yang dag ji bzhin thugs chud chos kyi rgyal pos sems can rnams/ /nyon mongs rma nang rgyun mi 'chad par 'dzag pas gdung ba la/ /rang bzhin bsil ba'i chos gsung chu yi bum pas tshim mdzad pa/ /sman pa'i mchog gyur ston pa de la rtag tu phyag 'tshal lo/ /shes par dka' zhing g.yon can ma zhi las dang nyon mongs ldan//rnam par 'gyur la ma zhi skye bar bshad pa gang yin pas/ /rmongs pa shing rta'i 'phang lo bzhin du dbang med 'khor/ /'jig rten mi bzad phongs pa'i rdo rjes lus ni nges 'joms 'gyur/ /gzhon nu'i tshe nam yis lan bur ldan ba'i skra byas shing //gang la lang tsho mdzes pa'i nor bu'i phreng ba mchog bcings dang / /bram zes me tog bcas pa'i zhi ba'i chu thigs kyis gtor ba'i/ /bud med mgo la mi bzad khwa rnams thogs pas nyon mongs so/ /gang zhig bag ma'i dus su me tog bzang bsgos shing //ma yi lag pas dge mtshan bkra shis byas gyur pa'i/ /skra de di ring rab drag rlung gis bskyod nas ni/ /dur khrod dag gi shing la rnga yab nyid du gyur/ /rang bzhin sgrin bar lta dang zur gyis lta gang song / /sgeg pa'i goms stabs dang ni dregs myos gang du song //dga' bas steg cing glu dang dgod pa gang du song / /e ma sgyu ma'i gsang ba'i rab bkod ngo mtshar che/ dgod cing dal gyis rnam g.yo'i rna rgyan 'od kyis mkhur ba dmar po dang / /gang du srog dang mnyam pa'i mdzes pa'i ri mo 'bad de bris pa dang / /pad+ma gzhon nu'i snying po lta bu 'jam pa'i mkhur tshos gang yin der//bya rnams dpral bar gnas shing khrag gis spags pa'i mchu yis 'tshog par byed/ /'od can mu tig phreng ba'i lbu ba dkar zhing ba spu'i chu bal can/ /nu ma rgyas pa'i ngur pa zung ldan brang gi rdzing mchog yangs pa dag /g.yo ba'i gos lhung byas pas phongs pa'i mig ni gang du chags gyur pa//der ni rnam par rnags pas sbrang bu'i tshogs rnams 'phungs par gyur/ /sngon ni tsan dan chu thigs phreng gtong ta la'i lo ma rlung yab dang / /mngag gzhug rnams dang bzang mo'i gdu bu'i sgrar ldan pa dag g.yog byed cing //khang bzangs zla zer gyis spras dkar bas mdzes pa'i sngas ni rten gyur pa/ /de ni deng 'dir khwa yi sgro gshog rtsub bas bskyod pa'i rlung gis g.yo ba par gyur/ /gang gis sngon ni 'di bskyod cing / /gseb nang dag tu gnas bcas nas/ /lus kyi shing ni spangs nas ni//sems kyi spre'u de gang du song / /gang gis byed pa med 'di yang / /byed pa lta bur ston byed pa/ /bdag med ro 'di spangs nas su/ /sems kyi bzhad gad mkhan gang song / /gang zhig rmongs las blo mdongs pas/ /nang na bdag tu 'dogs gyur cing / /mu stegs can rnams rmongs byed pa'i//rnam shes srin po de gang song / /gang gis yun ring rnam rmongs kyang / /yang dag par ni mi gnas pas/ /sna tshogs sems kyi sgyu ma mkhan/ /'gro ba 'di las gang du song / /bdag gi 'gro ba ser skya sogs/ /dka' thub pas kyang mi shes pas/ / nam mkha'i yul gyi spyod yul can/ /sems kyi rig 'dzin de gang song / /g.yo dang mi g.yo'i sgo dgu po/ /mi gtsang 'di ni spyod spyod pa/ /de nas lus kyi gzeb 'di las/ /sems kyi bya de gang du song / /mi bzad sul las sdug bsngal 'bab pa'i lan tshwa chen pos rab tu khengs gyur pa'i//srid pa'i rgya mtsho nyon mongs sbrul dang nyar 'gre gang yin der chud cing / /mi shes chu srin 'khrugs pa'i chu rlabs g.yo ba'i chu bor nub gyur pa/ /sems kyi mtshan mo spyod pa lus 'di spangs nas di ring gang du song / /nyes bral bcom ldan de ni gdul pa'i thabs rnams gang dag yin mkhyen gyi//ma dul gang gis mthar ni dmyal bar me 'bar 'phro bar gyur pa yi/ /gser ltar ser ba'i gseb tu dbang med par ni 'dor byed pa/ /rang bzhin g.yo bar byed pa'i sems kyi rta de di ring gang du song / /de nas rdo rje'i 'od kyis 'khrig ma rgyas ljang ba//brgya byin dga' bas mig gdangs dul bcas nyer song ste/ /bu mo rnams la rang bzhin skal bzang tshig gis ni/ /rjes su mthun zhing dge bas legs so legs zhes smras/ /sring mo na tshod gzhon zhing 'dod lha'i gnas gyur dang / /rgyal rigs 'byor pa'i dpal gyi bde ba spangs nas ni//sngon gyi drang srong rnams kyi bka' la zhugs gyur pa/ /dka' thub 'dis bdag yongs dga' khyed rnams ci 'dod smros/ /'dod pa'i dbang phyug lag mthil gnas bzhin shes par gyis/ /sum cu rtsa gsum bdag po'i bde ba'ang des rtogs la//lha rgyal brgya byin bdag yin khyed nyid gang 'dod dang / /sring mo bdag gis nges par gang bya myur du smros/ /de nas gzhon nu de rnams yul gyi bde la 'dod med cing / /rang bzhin g.yo med sems kyis brgya byin zur mig gis bltas nas/ /rang gi dge ba yongs smin brtan pa'i rang bzhin gyis//kha na ma tho med gsal sna tshogs don ldan tshig 'di smras/ /brgya byin bdag cag skye ba'i sdug bsngal gyis ni gdungs gyur pa'i/ /srid pa'i bde ba'i zil pa'i kha chu 'dzag pa'i rgyu 'dra'i phyir/ /bzhin ras mdzes pa mya ngan mchi mas bris shing rnyogs pa yi//gnyen rnams spangs nas dka' thub 'di la rjes su zhugs pa min/ /gzhan yang 'gro ba ma lus tshul ngan gyis bcings mi bzad pa/ /phongs pa brgya phrag stong gis bcom pas nges par skyo gyur cing / /bkren pas nyam thag mthong bas nyes zad rnams kyis rjes 'brangs te//rga med mya ngan med pa'i go 'phang thob phyir brtson pa yin/ /gal te 'gro la rjes brtse lhag bsam ngang tshul ldan gyur cing / /ci ste brgya byin khyod kyis mchog ni yang dag ster nus na/ /'chi med mi phrogs tshangs bzhi tshangs pa'i go 'phang rnam grol te/ /srid pa'i 'jigs pas yongs gdungs bdag cag rnams kyis thob par mdzod//lus las byung zhing 'dzag pa'i dri ma skyon gyis bsgos par gnas pa dang / /ma yi mngal du mi gtsang 'dam gyi tshogs na yang ma spangs spyod/ /byung na rus pa'i 'khrul 'khor gyis ni ma go btsir brgyal zhing nyam thag pas//nyon mongs sdug bsngal gcig nas gcig tu brgyud pa'i skye ba gcad par mdzod/ /rga ba'i srin mos skra dkar mche ba dkar po myu gu ldan pa yi/ /kha gdangs nas ni 'gro la gzhung lugs med par spyi nas 'dzin byed cing / /gang 'di mi yi brtson dran blo gros dga' ba'i dpal ni rab 'joms pa//lha yi dbang po khyod kyis gal te nus na de las bskyab par mdzod/ /dbugs rgod g.yo zhing lto ba sra la pags pa skya zhing rtsub pa dang / /longs spyod 'bar ba sna tshogs thob kyang spyod par mi nus stobs med pa/ /gang gis lus zin 'chi bdag pho nya'i skyes bu nad tshogs rab 'jigs pa//lha dbang khyod ni ci ste mchog sbyin 'dod na de las bdag cag skyobs/ /mig ni phyir phyogs gyur cing mi g.yo gnad rnams gcod pas sdug bsngal ba/ /nyon mongs 'khrugs pas rab tu lus bcom 'jigs pas phung po 'gyel ba dang //gnyen rnams mthong bas mchi mas mkhur ba dag dang mchu ni bkrus gyur pa/ /gang gis zin na rab tu 'jigs 'gyur 'chi ba de las bdag cag srungs/ /gang gis yid khyab gyur na phyugs bzhin 'gyur zhing mya ngan gyis zin la/ /bya dang mi bya'i rnam pa blo la mi sems smad pa'i gnas bskyed pa//tha mal bsil ba'i 'thor ba'i rlung gis g.yab kyang lus tshim mi 'gyur ba'i/ /'dod chags me chen de ni mchog sbyin khyod kyis nges par zhi bar mdzod/ /gang gi shugs kyis mig 'gyur g.yo zhing so yis sgros gnon la/ /skad cig gis kyang mi bzad dmyal ba'i 'bras bu ster byed sdig can ni//dengs pa'i lo ma dang ni chu dag za ba'i thub rnams kyis kyang ma bton pa'i/ /yid kyi sul gnas khro ba'i sbrul de brgya byin khyod kyis bsal bar mdzod/ /gang gis mig khebs gyur na blo gros ngan rnams zhi ba'i lam spong zhing //log lta'i dug gis nye bar sbags pa'i yid kyis lam gzhan dag la bsten/ /gang zhig rab rib bsal bas zag pa kun gyi rgyur ni rab gsungs pa/ /log yid khyim na spyod pa rmongs pa'i mun nag brgya byin khyod kyis sol/ /brgya byin mchog ni de dag rnams/ / khyod la bdag cag rnams slong gis/ /dam bcas don las 'gal ba ni/ /mkhas pas 'dod par mi byed do/ /de nas brgya byin gyis de rnams 'dod pa'i yul dag slong bar mi byed cing ltos pa med la gsal zhing mdzes pa'i tshig gis rnam par 'khrul pas ngo mtshar du gyur cing yang dag par dad pas lus kyi spu zing zhes byed de/smras pa/ mi 'byor dngos po slong bar gyur pa ni/ /'jig rten dag na bra zhing zhum gyur pas/ /gang 'di bdag gis sbyin bar nus pa yi/ /mchog rnams sbyin gyi bu mo khyed kyis smros/ /de nas bu mo de rnams kyis de'i nang na mi mngon ba'i rgyus rnam par smras pa'i tshig des yang dag par skyo bas nye bar bskyed pa'i khro bas brgya byin la smras pa/ci phyir nye bar 'drid pa'i thabs dang ni/ /brgya byin mdzem med de dag gang du lhags/ /bde ba tsam dang mi mkhas blo can nam/ /mi bsrun pa yi bgrod bya bdag cag min//'dir ni phyogs rnams rgya cher grags pa'i tshogs ldan pa'i/ /rgyal po'i rigs su gyur par khyod kyis mi shes sam/ /gang gis nor gyi snying po nges par bltas nas ni/ /nor bdag ming yang ji bzhin don dang ldan pa yi/ /rga bas gzir zhing 'chi ba'i sdug bsngal gyis//dub cing yid 'byung zhum pa'i 'jigs spang phyir/ /lha yi mgon po gnas skabs 'dir zhugs kyi/ /dregs pas ma yin byis min mi brtan min/ /bsod nams byed pa rnams la 'tshe ba'i phyir/ /gang phyir khyed ko bdag cag sdug bsngal byed//gnyen dang mdza' bshes 'khor gyi sbyor ba yi/ /dga' bas brgya byin yun ring 'tsho bar gyis/ /rang byas mgo skal ldan pa'i 'bar ba yi/ /gang phyir lha yi bdag por khyod gyur des/ /gzhan gtses rgyu yis lha yi rgyal po yi/ /dam pa'i phun sum tshogs thob mi 'gyur ro//de nas dbang po chen po des de'i tshig gsal zhing tshig gi don sna tshogs ston pa'i tshig rnams kyis lus tshim zhing / mchog tu ngo mtshar du gyur la dad pas bzhin rab tu dang zhing mdzes pa dang / gzhan yang de rnams kyis bsam pa sad pa'i phyir shin tu bsti stang dang bcas pa'i tshig gis smras pa/kye ma ma dang 'dra ba'i sring mo dag /'jig rten dka' thub can dag kyang / /mgon du bdag ni lta 'dod na/ /ci phyir 'di ltar mchog ster ba/ /nga la khyed rnams brtse med 'gyur//de nas bu mo de rnams lhag par yang 'khrugs shing khro ba dang bcas pas brgya byin la smras pa/ bde sogs kyis ni bzhin ras la/ /chags shing 'dzum dang zur mig gis/ /rnam lta'i gnas ni gzhan yin zhing / /sbyin bya'i mchog kyang gzhan yin no//gal te brgya byin khyod kyis ni/ /mchog rab ster bar nus na ni/ /yul rnams kyi ni sha za ni/ /mi srun de las rgyal bar gyis/ /yang na 'dod pa spang dka' zhing / /log pa'i rtog pas chags gyur na/ /rgyun de nyid la rtag tu gnos//gal te nus yod 'di 'drar gyis/ /mig stong ldan khyod mi brtan pa'i/ /'dod la yid ni chags gyur pa/ /khyod ni sbyin bya tha dad na/ /mchog ces pa ni ji ltar smra/ /ji ltar chu bo 'jigs pa yi/ /shugs kyis bdas par gyur pa'i mi/ /gzhan dag bsgral bar bya'o zhes//yongs rtogs byed pa'i rmongs pa'i gnas/ /skra rnams bregs par gyur nas ni/ /phyag dar khrod kyi gos 'chang zhing / /dgon pa yul du 'dod par ni/ /nam zhig de ltar 'gyur zhig gu/ /gnya' shing gang tsam rnam lta zhing / /sa yi lhung bzed lag thogs nas//dpyas med khyim nas khyim du ni/ /nam zhig slong mo spyod par 'gyur/ /rnyed dang bkur sti chags med cing / /nyon mongs tsher ma'i 'dam rdzab dag /sbyor ba byed cing grong khyer gyi/ /sbyin pa'i gnas su nam zhig 'gyur/ /rtswa yi tshogs las langs nas ni//ba mos lci ba'i gos dag dang / /zas skom ngan ngon tsam gang gis/ /nam zhig lus la chags med 'gyur/ /shing drung ne tso ltar ljang ba'i/ /ngur pa 'jam po'i gos can du/ /mthong chos bde ba'i dga' ston dang / /nam zhig bdag ni nyal bar 'gyur//'dor bar 'gyur ba'i lus srog la/ /chu dang rtswa yi zil pa ltar/ /ltos med yun ring goms pa yi/ /bde ba chen po nam zhig 'thob/ /nam zhig chu ngogs sman ljongs su/ /gnas nas chu ngogs 'byung 'jig dang / /'tsho ba'i 'jig rten gnas 'dra bar//yang dang yang du lta bar 'gyur/ /lta ba kun gyi mar gyur pa'i/ /'jig tshogs lta ba 'byin pa dang / /srid pa'i longs spyod mi 'dod par/ /bdag ni nam zhig 'gyur zhig gu/ /rmi lam smig rgyu sgyu ma sprin/ /dri za'i grong khyer mtshungs par ni//rgyu dang mi rgyu'i 'jig rten dag /nam zhig rtogs par byed par 'gyur/ /ming po 'di ltar dga' ba yi/ /re ba'i yid kyis rnam rol pas/ /zang zing bcas shing g.yo ba yi/ /mchog de rnams kyis ci zhig bgyi/ /kye ma mchog rab sbyin par sems gzhan yang //log par rtog pa skad cig tsam 'ga' zhig /lha mgon 'dod pa ngo bo nyid kyis g.yo/ /g.yang sa chen po mun nag bcas 'dra bas/ /sems rgya che ba'i dam pas rnam par spangs/ /mi rigs 'tshe ba kun gyi rgyur gyur cing / /'dod pas mi rnams 'khrul par byed pas na//'di ni smad bya 'jigs pa chen po ste/ /mi gtsang bsgos pa'i sbrul nag dag dang mtshungs/ /gang 'di thog mtha' med nas 'gro ba dang / /'gro bar 'gyur dang gnas pa'i sems can lus/ /de ni gsod 'joms bstan dang mtshungs pas na/ / sdig pa'i gzhir gyur 'dod pas ci zhig bya/ /lha dbang brgya byin 'dod pa'i yul 'di ni/ /phyag dar khrod 'drar byed 'dra'i ngo bo bas/ /brdzun par rtog cing rnam smin mi bzad pa'i/ /'dod pa yid kyis kyang ni su zhig bstan/ /bai DUR+Ya sngo ljang skyes pa yi rtswa dang ni//me tog rgyas par gyur pa'i shing gi nags spangs nas/ /lcags kyu rnon pos spyi bor 'tshog cing 'dri ba dang / /glang chen dbang pos khur skyed yul gyis bslus pa yin/ /mdung rtse lus bskyon grong gi kha yi tshogs rnams kyi/ /gshog pa'i rlung gis rab tu g.yob par byed 'gyur la//mdza' bo rnams kyang g.yo byas mig gis lta byed par/ /skyes bu 'jigs par 'gyur ba'ang yul gyis brlag pa yin/ /byis pa log rtog rlung gis rab 'bar 'dod pa yis/ /rang nyid khang pa bdag nyid kyis ni sreg byed na//smyig ma lo brgya lon pa phan tshun 'dar ba yis/ /rang nyid kyis ni sreg par byed pa ji bzhin no/ /brgya byin gzhan yang rnam rgyal khang par gnas nas ni/ /'od 'phro nor bu'i dpal gyis dga' ba 'di las ni//me chen rang 'bar 'jigs pa'i mnar med sar phyin pas/ /gang 'di dug can yul gyi bde ba de ni bde legs min/ /mtho ris gnas nas 'gro ba ngan pa'i gnas 'jug cing / /skad cig gis lhung 'pho ba'i sdug bsngal gyis gzir pa/ / gang dag myong 'gyur lha yi 'jig rten mngon dga' ba/ /sngar myong gyur pa de ni bde ba myong ma yin/ /gser gyi pad+ma kha khyer ngang pa nyal ba dang / /gang 'dir lha yi khang pa rdzing bur grul rgal ba dag /'dod pa'i las kyis slar yang mi ro rul pa yis/ / gzings pa'i chu bo rab med nang du ltung bar 'gyur/ /yongs su gyur na dga' bral rmi lam lta bu yi/ /lha rnams bde la de ni brgya byin su zhig 'dod/ /'tsho ba'i 'jig rten khros pa'i sbrul gyis me ltar g.yo bar ni/ /thams cad rtog pas bdag cag thar la gzhol ba gnas//srid 'gro tshang tshing nang na gnas pa'i byis pa rnams/ /'di bde yin zhes pa de log par brtags tsam ste/ /gang 'di srid pa ma lus sdug bsngal kun bskyed ces/ /yang dag gsungs pa'i sangs rgyas rnams kyis gsungs//'tsho ba'i 'jig rten rang bzhin sdug bsngal mang pos g.yengs 'gyur te/ /gang tshe 'di na bde ba myong ba'ang bya rog ta lar mtshungs/ /de yang phrad gyur sdug bsngal du mas zil gyis gnon 'gyur te/ /chu bo'i chu ni rgya mtshor phyin pa dag dang mtshungs//gang phyir bud med lag pa ge sar bcas pa'i pad+ma'i 'dab 'dra dang / /gdu bu cung zad khrol ba tsan dan bsil bas bsgos par gyur pa yis/ /reg cing zangs ltar dmar bcas sor mo zlum pas brtse bas 'khyud par byas pa dang //bsil yab rlung gi rgyan phreng gtor bas khyab par gnyid log gyur pa dag /'jag ma'i rtse mor bcer ba'i lam du thal ba dang 'dres rlung dmar ni/ /drag pos g.yob cing dub la lci ba'i lus kyi slar yang nyal 'gyur te/ /de bas 'tsho ba'i 'jig rten skad cig thang cig g.yo bar shes gyis la//phongs pa'i 'bras 'byin 'dod pa spongs la tshams pa'i zhi la brten par gyis/ /de nas bu mo rnams la mig stong ldan/ /dga' bas lus kyi ba spu ldang 'gyur zhing / /brtson la mngon dga'i sems dang lhan cig gis//sum cu rtsa gsum mngon phyogs song bar gyur/ /de nas bu mo de rnams rab byung nyer son cing / /de nyid don la rnam brtag blo mig dgang gyur pas/ /dregs pa'i chu rlabs g.yo zhing 'jigs par byed pa yi//sdug bsngal mtsho chen mtha' med 'khor ba brgal bar gyur/ /'gro ba ma rig mdongs pa kun gyi mig gcig pa/ /rang bzhin 'gro don rnam byed nges pa'i bdag nyid kyi/ /thub pas sems can rnams la tshul 'di gsungs pas na/ /sems can rnams kyi srid pa'i tsher ma zad par shog /