CLOSE WINDOW

D4145
བོད་ཡིག

@##/ /rgya gar skad du/ kun la a ba dA naM/ bod skad du/ kun la'i rtogs pa brjod pa/ sangs rgyas dang byang chub sems dpa' thams cad la phyag 'tshal lo/ /kun la'i rtogs pa brjod pa la/ 'di ltar rgyal po a sho ka'i na tshod gsum gyi tshad du gyur pa la/ de na tshod dang po la ni 'dod pa'i a sho kar gyur to//na tshod gnyis pa la ni gtum pa'i a sho kar gyur te/ gang gis btson ra bzang po byas nas skye bo bye ba'i srog brlag par gyur to/ /na tshod gsum pa la ni chos kyi a sho kar gyur te/ gang gis chos kyi rgyal po pa brgyad khri bzhi stong rab tu gnas shing spyan phye'o/ /de nas nyi ma de nyid la rgyal po a sho ka'i btsun mo pad+ma can zhes bya ba la bu btsas pa dang /de las bu gzugs bzang ba mdzes pa blta na sdug pa de'i mig shin tu mdzes pa zhig skyes so/ /de nas skyes bu nyung rum zhig rgyal po'i khab tu song ste smras pa/ lha khyed la sras bltam gyis dgyes pa bskyed du gsol/ rgyal pos smras pa/ deng ni nga yis dga' ba rgya chen thob/ /dpa' bo'i rigs kyi sgra ni grags gyur cing / /chos kyis rgyal srid rnam par 'phel ba na/ /bu skyes pas ni chos kyi rnam 'phel 'gyur/ /de nas rgyal bo mya ngan med des btsas ston bya bar brtsams te/ grong khyer pa ti li pu tra thams cad dang ldan pa legs par chag chag btab cing phyag dar byas shing sbyangs te/rdo dang / gseg ma dang / gyo mo bsal zhing / shing dang / so phag dang / mi gtsang ba'i 'dam rdzab dang / phyag dar gyi tshogs med par byas nas dar dang me tog gi chun 'phyang btags te/ bdug spos kyi snod nas spos gtul nas khyim dang /srang bar dang / bzhi mdo dang / sum mdo la sogs pa brgyan par byas pa ni 'di lta ste/ ras dang / dar dang / be'u ras dang / dar lwa dang / zar ma'i ras dang / du gu la'i ras dang / ras yug chen la sogs pa btags pa dang / rnga yab dang / mdzes pa'i gdu bu dang /dpung rgyan dang / do shal dang / se mo do dang / mu tig gi chun 'phyang dang / dril bu dang / nor bu chu shel dang / me shel la sogs pa dang / nor bu chen po'i rna rgyan btags pa dang / ba dan sngon po dang / ser po dang / dmar po dang / dkar po dang / le brgan bsgreng ba'i shing dang /khyim la btags pa dang / ras kyi bla re dang / dar gyi bla res spud pas grong khyer pa ta li pu tra kun nas dri za'i rgyal po'i gnas dang 'dra bar rnam par bzhag par gyur to/ /pa ta li pu tra dang / pa ta li pu tra'i nye 'khor ji snyed par sil snyan gyi sgra sgrogs pa rnams rab tu gnas pa ni 'di lta ste/gar mkhan dang / gar ston pa dang / gtam brjod pa dang / bzhad gad byed pa dang / mdzes byed pa dang / glu len pa dang mig 'phrul mkhan dang / mchod pa dang / bud med kyi cha lugs 'gebs pa dang / khar gsil dkrol ba dang / rnga rked nyag rdung ba dang / byis pa lnga tshoms pa dang /srang bar na rtse ba ste/ de dag thams cad srang dang / srang bar dang / bzhi mdo dang sum mdo de thams cad du rang rang gi bya ba thams cad kyis mdzes par byas so/ /grong khyer gyi sgo bzhir yang sbyin pa ni gtong / bsod nams dag byed pa ni 'di lta ste/ zas 'dod pa rnams la ni zas/gos 'dod pa rnams la ni gos/ dri dang / phreng ba dang / byug pa 'dod pa rnams la ni dri dang phreng ba dang / byug pa/ ras zung dang / ras ya ba dang / kAR+ShA pa Na 'dod pa rnams la ni/ ras zung dang ras ya ba dang kAR+ShA pa Na sbyin par byed pa dang / rab tu dga' ba'i rol mo rnams rdung /spyi bo la til mar gyis ni nyug par byed do/ /zhag gcig la ji lta ba de bzhin du gsum pa nas bdun pa nas/ nyin zhag nyi shu rtsa gcig gi bar du btsas ston rgya cher byas te/ pang na 'tsho ba'i ma ma gnyis dang / dri ma 'phyi ba'i ma ma gnyis dang / nu ma snun pa'i ma ma gnyis dang / rtsed grogs kyi ma ma gnyis te ma ma brgyad la gtad do//de ltar gzhon nu de ma ma brgyad po thams cad kyis rang gi bzo legs par byas pas yongs su bskyangs shing / mkhas pa dang ldan pa rnams kyis 'o ma dang / mar sar dang / zho dang / mar gyi snying po dang / sbrang rtsis skyed par byed par rtsom par gyur to/ /de nas rgyal po a sho ka bu blta bar mngon par dga' bas slas rnams la gzhon nu ci 'dra ba blta bar bya'o zhes smras so//de nas ma ma rnams kyis rgyal po la bstan pa'i phyir khyer ba dang / mthong nas rgyal pos gzhon nu'i ming ji ltar gdags par bya zhes bsams pa dang / gang gi phyir 'di ni nga la chos rab tu zhugs pa na skyes pas na de'i phyir chos 'phel ba nyid du ming gdags par bya'o zhes smras nas/gzhon nu rgyal po a sho kas blangs so/ /de nas rgyal pos gzhon nu la bltas nas dga' bzhin du smras pa/ nga'i bu la mig bzang legs skyes pa/ /ut+pal sngo 'dra rab yangs rdzi ma can/ /gang gis bzhin rgyan mdzes par byas pa ni//sgra gcan kha las thar pa'i zla ba 'dra/ /ji tsam na rgyal pos blon po rnams la smras pa/ khyed rnams kyis 'ga' zhig la 'di lta bu'i mig yod pa mthong ngam/ blon po rnams kyis smras pa/ lha ma mthong lags so/ /de nas de na gnas pa'i 'khor rnams la de skad rgyal pos smras pa dang /ri'i rgyal po kha ba can na lor bsten pa'i bram ze rnams de nyid du lhags pa dang / de rnams la rgyal pos gzhon nu bstan te/ khyed rnams kyis kyang 'ga' zhig la 'di lta bu'i mig yod par mthong ngam/ lha mir gyur pa rnams la ni ma mthong ste/ de lta mod kyi 'on kyang lha ri'i rgyal po kha ba can na kun la zhes bya ba'i bya de la 'di lta bu'i mig mchis so//yang smras pa/ ri rgyal kha ba can ni brag gi rtse/ /me tog mang zhing chu phran rab 'bab pa/ /de na kun la zhes bya ba'i bya/ /'di yi mig dang rnam par 'dra ba yod/ /de nas rgyal pos bya kun la myur du khyer la shog cig ces smras pa dang /de'i steng gi dpag tshad cig tsam du gnod sbyin rnams kyis thos so/ /'og gi dpag tshad gcig tsam du ni klu rnams kyis thos so/ /de nas gnod sbyin gyis skad cig ma de nyid la bya kun la khyer te 'ongs so/ /de rgyal pos gzhon nu dang / kun la'i mig la shin tu yun ring bar brtags na khyad par cung zad kyang ma rtogs so//de nas rgyal pos smras pa/ e ma ho/ gzhon nu dang / ku na la'i mig shin tu 'dra ba yin pas na gzhon nu la ming kun la zhes gdags par bya'o/ /yang smras pa/ sa bdag de ni mig la rjes dga' bas/ /de tshe bu la ku na la zhes smras//de nas 'phags pa'i sems can rgyal po'i bu/ /de yi ming ni sa stengs rab tu grags/ /de nas rgya cher gzhon nu chen por gyur ba'i bar du ste/ de la gser phreng can zhes bya ba'i bu mo chung ma'i don du bkug nas byin te/ pha'i bzo'i gnas dang las kyi gnas 'di lta ste/ glang po che'i gnyar bzhon pa dang /rta la bzhon pa dang / shing rta'i thabs dang / mda' gzhu'i thabs dang / lcags kyus bsgyur ba'i thabs dang / mda' bo che 'phen pa'i thabs dang / lcags mda' 'phen pa'i thabs dang / thag mdung 'phen pa'i thabs dang / mdun du bsnur ba dang / phyir bsnur ba dang / bcad pa dang / dral ba dang / rgyang nas phog pa dang / sgra grags par phog pa dang / gnad du phog pa dang / mi 'chor bar phog pa dang / tshabs che ba dang / dgas pa dang / 'dzin stangs dang / gom stangs la byang bar gyur to/ /rgyal po a sho kas de'i don du khyim gsum byed du bcug ste/gcig ni rgun gyi'o/ /gnyis pa ni so ga'i 'o/ /gsum pa ni dbyar gyi'o/ /de la re zhig rgun gyi ni gcig tu dro ba'o/ /so ga'i ni gcig tu bsil ba'o/ /dbyar gyi ni de gnyis ka yod pa ste/ shin tu grang ba yang ma yin/ shin tu dro ba yang ma yin pa'o/ /chung ma rnam pa gsum 'jog ste/che ba dang bar ma dang chung ba'o/ /de nas gzhon nu lha'i bu mo dang 'dra ba'i bud med kyi rab mchog dgod pa dang mig zur dang steg pa dang / sgeg pa dang / gar dang / glu'i nye bar spyod pa la mkhas pa rnams dang lhan cig khang bzangs kyi steng gi gzhir gtogs pa na btsun mo gser phreng can dang lhan cig dga' ba dang /rtse ba dang / yongs su spyod pa nas ji srid dus gzhan zhig na rgyal po kun la dang lhan cig khyim bya'i kun dga' ra bar song ba dang / de nas gnas brtan grags pa mngon par shes pa drug dang ldan pa des mthong ngo / /mthong nas kyang kun la'i mig ni yun ring bor mi thogs par 'jig par 'gyur ro snyam nas des rgyal po la smras pa/ci'i phyir gzhon nu rang gi las ma sbyar/ de nas rgyal pos kun la la smras pa/ ku na la dge 'dun gyi gnas brtan ji skad gsungs pa de dris shig /de nas gzhon nus gnas brtan gyi rkang pa gnyis la btud de smras pa/ gnas brtan ci zhig bka' stsal/gnas brtan gyis smras pa/ kun la mig ni mi rtag pa'o zhes yid la gyis shig /yang smras pa/ gang du 'gro mang rjes su chags gyur nas/ /mi phan thob pa'i las rnams byed pa yi/ /mig ni rab g.yo sdug bsngal stong ldan par/ /rtag tu so sor rtog byos kun la/ /de de bzhin du slob par byed pa'i yid la byed pa dang rab tu ldan zhing gcig pur mngon par dga' ba dang /rab tu zhi ba la mngon par dga' bar gyur to/ /de yang rgyal po'i pho brang gi gnas dben par 'dug cing / mig gi nyes dmigs dang / skye mched mi rtag pa la sogs pa'i rnam par yongs su rtog par byed do//de nas rgyal srung ma zhes bya ba'i btsun mo dam pa phyogs der nye bar song ba dang / des kun la de gcig pu 'dug pa mthong nas/ mig la rjes su chags pas lus la kun du 'khyud de/ smras pa/ khyed kyi lus las nges bab pa'i/ /'dod chags me ni stobs can gyis/ / nags me stobs can g.yo ba ni/ /mang pos rnam par bsregs par gyur/ /gzhon nu bdag dang lhan cig tu/ /dga' ba rjes su myong bar bya/ /des thos pa dang / kun las lag pa gnyis kyis rna ba bkag ste smras pa/ khyed ni tshig 'di smra bar mi rigs te/ /bu yi ma bzhin khyed ni bdag gi ma//'di ni ngan 'gro'i lam gyi sgo yin pas/ /chos min 'dod chags yongs su spang bar gyis/ /de nas rgyal srung mas smras pa/ /'dir nyes pa ci zhig mthong / /gzhan yang gzhon nu re zhig nyon cig /dper na nyi ma'i gzi brjid bstan pa'i tsha bas gdungs te chu ni 'thungs pa dang /ji ltar lus ni chu yis tshim bar byed la sdig pa yod par rigs ma yin/ /de bzhin 'dod pa'i me ni chen pos lhag par shin tu gdungs par gyur pa na/ /lus la reg pa'i chu yi dga' ba de las chos min ci zhig 'byung / /ku na las smras pa/ nga yi grags par mi 'gyur mchog tu brnyas shing phyi nas rjes su 'gyod par 'gyur//nga yi kun du spyod par mi 'gyur de bzhin rigs nyams pa yang nyid du 'gyur/ /'phags pa nyid du mi 'gyur bkren 'gyur ngan par tshig gis chad pa bcad par 'gyur/ /spyos pas 'gyur gyi grags par mi 'gyur chos kyang mi snang nyid du 'gyur ba'o//rgyal srung mas smras pa/ kun la de lta yin mod kyi gang khyed 'jigs par 'gyur ba 'di 'ga' zhig gis mthong nas grags par 'gyur ba ma yin te/ de yang rnam par dben zhing mi'i 'du ba dang bral ba'i phyir ro/ /yang smras pa/ yu bu'i mthong nas smra ba ni/ /bud med dag gam slas rnams kyang //gang yang yod pa ma yin te/ /de bas bdag gi tshig nyon cig /'dod dang bcas pa'i bud med ni/ /dben par yongs su spong byed na/ /de yi chos chen 'jig 'gyur zhes/ /thos pa las grags thos sam ci/ /gzugs kyi rjes su mthun pa yi/ /sbyin gnas sdig med mthong nas ni//der gang legs pa'i mdangs rnams dang / /na tshod dang ni 'dra bar gyis/ /ku na las smras pa/ gang khyod kyis 'di na gnas kyang mi mthong ngo zhes smras na/ de re zhig nyon cig /'di ni gzi brjid 'bar ba'i shing la gnas pa'i me lhas bdag ni mthong gyur la/ /tshangs pas mthong zhing brgya byin dag dang chu lha zla ba gshin rje dag gis mthong //gzhan yang gzhal yas khang pa mchog na gnas pa gzhan gyis nges par mthong 'gyur na/ /byis pa khyed kyis bdag dang gnyen gyi skye bo mi mthong rang yang mthong ma gyur/ /mi ni gang zhig dben par mer 'jug byed na de ci me yis mi 'tshig gam//gang zhig dregs pas 'bras bu mngar ltar dug za de ni nyams par mi 'gyur ram/ /mi ni gang zhig brang 'gro gdug pas zin pa de ni gnod par mi 'gyur ram/ /mi ni gang zhig dben par gtogs par sdig byas gos par mi 'gyur de mi srid/ /de nas rgyal srung mas smras pa/ gzhon nu re zhig khyod de ltar bur zhen pas gnas par ma byed cig /de yang / dus kyi sgo yi rdzong dang bin+da'i rigs yang 'dod pa'i don du rab 'jug la/ /'dod pa'i rgya mtsho'i chu yang rgal cing mdza' bo gang yin dag kyang 'bye ba yod/ /'dod pa'i phyir ni brtul zhugs thal ba shing gos 'chang pa'i dka' thub des de thub/de 'dir bde ba yang dag thob pa 'di la ci phyir kun du chags mi byed/ /ku na las smras pa/ khyed kyis nga ni zil gnod mi 'gyur te/ /lha yi bu mo 'dra ba'i bud med dag /de yang dmyal ba'i sdug bsngal yod pas na/ /gzhan gyi bud med yongs su spang ba yin//de nas rgyal srung mas rang gi 'dod pa'i rnam pa thob par ma gyur pas/ /khros te smras pa/ shin tu 'dod pas gdungs par gyur ba na/ /gal te 'di na nga yis mi 'dod na/ /blo ngan khyod ni ring por mi thogs par/ /dngos po thams cad med par 'gyur du 'ong / /mig ni gnyis po gang yin pas//khyod ni 'di na dregs thob pa/ /mi ring ba ni de dag gis/ /rgud par gyur la blta bar bya/ /ku na las smras pa/ chos ni rnam dag gyur na bdag ni myur du 'chi bar gnas par gyur kyang bla/ /skye bo dam pas bdag smad gyur pa'i 'tsho ba bdag la dgos ma yin/ /gang las mtho ris dag dang chos 'jig 'gyur ba'i 'tsho des ci zhig bya//mkhas pas zil gyis mnan pa'i bkren gyur bdag ni 'chi ba nyid yin mod/ /ji tsam na rgyal srung ma de kun la la glags skabs tshol zhing gnas par gyur to/ /de nas rgyal po a sho kas byang phyogs kyi grong khyer rdo 'jog pa dang rtsod par gyur pa thos pa dang /rgyal po rang nyid chas par gyur to/ /de nas blon po rnams kyis smras pa/ lha gzhon nu brdzang du gsol/ /des ni thul par 'gyur lags so/ /de nas rgyal pos kun la bos te smras pa/ kun la grong khyer rdo 'jog 'dul bar 'gro nus sam/ kun las smras pa/ lha rab tu mchi lags so//de nas rgyal pos yid la rab dad pa'i/ /bu zhes bya ba'i bsam pa shes pa dang / /brtse dang phun tshogs na tshod la rigs pa'i/ /chad pa'i rkyen ni lung du bsgo bar gyur/ /de nas rgyal po a sho kas grong khyer brgyan pa dang / lam mdzes par byas te/ rgan po dang / nad pa dang / bkren pa rnams rang gi lam nas bsal te/ gzhon nu dang lhan cig shing rta la zhon te/ ba ti li pu tra nas byung te bskyal nas/ ldog pa na kun la'i mdun nas yongs su 'khyud nas mig lta zhing dus te smras pa/ 'dab chags rab mchog kun la mtshungs pa'i/ /mig ni yangs shing ut+pal sngon po dang //'dra ba 'di la blta ba gang yin pa/ /der ni dpal yod bde ldan rims nad bral/ /ji tsam na bram ze mtshan mkhan zhig gis mthong ba dang / ku na la'i mig ni yun ring po mi thogs par 'gyur te/ rgyal po a sho kas de'i mig gnyis la shin tu chags pa ltas mkhan des mthong nas smras pa/mi dbang bu yi mig ni rnam dag la/ /sa bdag kyang ni mig la rjes chags pas/ /rnam dag dpal lam yid dang rjes mthun pa/ /ring po mi thogs 'jig par 'gyur ba mthong / /lha yul lta bur rab dga'i grong khyer 'di/ /gzhon nu mtho ba las byung skom ba dag /mig dang bral nas 'di yi sems/ /mya ngan dag gis yongs su gdungs par gyur/ /ci tsam na kun la rim gyis grong khyer rdo 'jog tu nye bar phyin pa dang / rdo 'jog gi grong khyer pas thos nas/ dpag tshad phyed dang gsum gyi bar du grong khyer brgyan pa dang / lam mdzes par byas te/bum pa gang ba mar sar gyis brgyan pas mdun bsus so/ /yang bshad pa/ rdo 'jog pa yi grong bas thos nas ni/ /rin chen bum gang pa la sogs pa yi/ /mchod pa thogs te mdun du song nas ni/ /sa bdag de la mang du rjed par gyur/ /mdun bsus nas thal mo sbyar te smras pa/bdag cag rnams ni gzhon nu la 'gal bar bgyid pa yang ma lags la/ rgyal po a sho ka la yang ma lags mod kyi/ 'on kyang blon po mi srun pa dag 'ongs nas bdag cag la brnyas par bgyis lags mod/ ci tsam na kun la bsnyen bkur chen pos grong khyer rdo 'jog tu zhugs par gyur to//de nas rgyal po a sho ka la nad chen po zhig byung bar gyur te/ de'i kha nas ngan skyugs 'ong zhing / ba spu'i bu ga thams cad nas mi gtsang ba 'dzag par gyur kyang gso bar ma nus so/ /de nas rgyal pos smras pa/ kun la khug cig /de rgyal srid la gzhag par bya ste/ kho bo yang slar 'tsho bas ci zhig bya/de thos nas rgyal srung mas bsams pa/ gal te kun la rgyal srid la bzhag na/ nga'i 'tsho ba med par 'gyur ro snyam nas des smras pa/ lha bdag gis khyed gsos par bgyi lags kyi/ 'on kyang sman pa rnams nang du mchi ba dgag tu gsol/ ji tsam na rgyal pos sman pa rnams 'ong ba bkag par gyur to//de nas rgyal srung mas sman pa rnams la smras pa/ gal te skyes pa'am/ bud med 'di lta bu'i nad kyis zin pa yod na de khyed rnams kyis nga la ston cig /de nas ri khrod pa gzhan zhig de lta bu'i nad kyis zin pa dang / de'i chung mas sman pa la nad de smras pa dang /sman pas smras pa/ nad pa de ni 'ong du chu gcig/ nad bltas la sman bstan bar bya'o/ /ci tsam na de bkug nas sman pa'i gam du phyin pa dang / sman pas rgyal srung ma'i gam du khyer ro/ /rgyal srung mas kyang shin tu dben pa'i sa phyogs su de bsad nas bltas pa dang / de zhu ba'i gnas na rgyu mar 'bu chen po zhig byung ste/de steng du 'gro ba dang / de'i ngan sgyugs gyen du 'byung ngo / /gal te thur du 'gro na ni 'og tu 'byung ngo / /des der na le sham btags te blugs kyang ma shi'o/ /de bzhin du pi pi ling dang / sring ga dang / lan tshwa la sogs pa blud pa nas ji tsam na sgog skya blugs pa dang / reg pa tsam gyis shi nas/ bshang ba'i lam nas byung ngo / /des de lta bu'i rnam pa rgyal po la go bar byas te/ lha sgog skya gsol cig /des na khyed sos par 'gyur ro/ /rgyal pos smras pa/ lha mo nga ni rgyal rigs spyi bo nas dbang bskur ba yin na/ ji ltar na sgog pa la yongs su longs spyod/ btsun mos smras pa/lha 'di ni srog gi don gyi sman yin pas nye bar spyod par mdzod cig /ji tsam na rgyal pos yongs su longs spyad nas 'bu de yang shi ste/ bshang ba'i lam nas byung ngo / /rgyal po sos par gyur nas/ des rgyal srung ma la mchog sbyin par brtsams so/ /khyod la mchog ni ci zhig sbyin par bya/des smras pa/ bdag la zhag bdun gyi bar du rgyal srid gsol cig /'o na kho bo cir 'gyur/ btsun mos smras pa/ zhag bdun 'das pa dang lha nyid rgyal po mdzod cig /ci tsam na rgyal srung ma la zhag bdun gyi bar du rgyal srid sbyin no/ /de blo skyes pa/ da ni bdag gis kun la la 'khon gcugs mngon du bya'o zhes des rdo 'jog pa'i grong khyer pa rnams kyis kun la'i mig brlag par gyis shig ces bcos ma'i yi ge bris te/ de yang rgyal po mya ngan med kyis bka' stsal pa/ shin tu dpa' zhing stobs dang pha rol gnon pa thogs pa med pa'i rtsal gyis rnam par gnon pa thob pa'i rgyal po rgya mtsho bzhi dang /sa'i bdag po'i spyi bo'i cod pan gyis stan dang / rkang par yongs su gtugs pa/ mya ngan dang bral nas mya ngan med pa/ ma ga d+hA'i grong khyer nas pa ti li pu tra dang / rdo 'jog la gnas pa'i bar la rgyun mi 'chad par dge ba'i las kyi rtsom pas nye bar 'tsho ba/sde tshom gsum pa'i grong khyer gyi skas la gnas pa'i skye bo rnams la ji ltar grong khyer pa rnams kyis shes par 'gyur ba de ltar khong du chud par gyis shig /'dir nga'i bu zhes btags pa'i dgra bcos ma'i spyod pa 'jam pa la mkhas pas sbyar ba'i rgyu'i bsgyings pas thal mo sbyar ba byas pa/rigs kyi sol bar gyur pa'i kun la des/ shin tu gcam bag gi tshul gyis kho bo phebs par byas nas/ bag phebs pas gnod pa byed cing / btsun mo'i 'khor la lta bar byed pas/ gang gi phyir 'di ni ma brtags par byed pa/ snying rje med pa/'jig rten pha rol spangs pa pha'i chung ma la yongs su lta bas de'i mod la dngos po'i rjes su zhugs pa/ gzugs kyis khengs shing ma'i phyogs la dregs pa 'phel bar byed pa/ rigs kyi chos kyi gzhung lugs sun 'byin par byed pa'i mig gnyis myur du phyung nas bkren pa nyid du gyis la shin tu dengs pa'i gos bskon te/chung ma dang bcas pa phyi rol du skrod cig /gang gi mig gnyis kyis dregs shing khengs par byed pa de med par gyis la/ de yang skye bo rnams kyis mthong bar gyis shig /de'i lan gyi yi ge yang gtong bar ma byed cig /byas pa mi gzo ba'i phongs pa thos pas kyang nga'i snying 'dar bar ma byed cig /ngas khyed rnams la gzhung lugs bzhag pa'i lung bsgo ba 'di khyed rnams kyis gyis shig /yang smras pa/ rgyal po mya ngan med gtum stobs ldan pa'i/ /bka' bzhin rdo 'jog grong khyer pa yis gyis/ /rgyal po la gnod kun la zhes bya'i//mig gnyis myur du dbyung ba nyid du gyis/ /de ltar rgyal srung ma des yi ge bris nas/ rgyal po mya ngan med pa'i so'i rgyas yi ge la rgya gdab par bya'o snyam nas/ ji tsam na rgyal srung mas yi ge de rgyal po gnyid log pa dang so'i rgyas gdab par bya'o snyam te/rgyal po dang nye bar song ba dang rgyal po skrag pas sad par gyur to/ /chung mas smras pa/ lha 'di ci zhig lags/ rgyal pos smras pa/ lha mo ngas rmi lam mi dge ba mthong ste/ bya rgod gnyis kyis ku na la'i mig 'byin par 'dod par mthong ngo / /btsun mos smras pa gzhon nu bde bar gnas lags kyi/de bzhin du rgyal po skrag pas sad nas smras pa/ lha mongs rmi lam rmis so/ /rgyal srung mas smras pa/ rmi lam ji lta bu/ rgyal pos smras pa/ kun la skra dang sen mo ring po 'chang zhing gos dri ma can gyon pa mthong ngo / /btsun mos smras pa/ gzhon nu bde bar gnas lags kyi/ji tsam na rgyal po gnyid kyis log pa dang / rgyal srung mas yi ge de so'i rgyas btab nas rdo 'jog tu bskur ro/ /yang rgyal po gnyid log pa na rang gi so lhags par gyur pa rmis so/ /de nas rgyal po mtshan mo de nyid 'das pa dang / ltas mkhan rnams bos te rmi lam bzlas nas 'di dag ston par gyis shig ces bsgo'o//ltas mkhan rnams kyis smras pa/ lha gang gis 'di lta bu'i ltas mthong ba des ni bu'i mig 'jig par mthong bar 'gyur ro/ /yang smras pa/ gang gi so ni dengs pa dang / /rmi lam nang na lhags gyur pa/ /bu yi mig ni 'jig pa dang //brlag pa'i bu ni des mthong 'gyur/ /de skad thos pa dang / rgyal po mya ngan med stan las myur bar langs te/ phyogs bzhir lha rnams la gsol ba 'debs pa la zhugs par gyur to/ /smras pa/ sangs rgyas chos dang tshogs kyi gtsor gyur pa'i/ /dge 'dun mngon dang lha ni gang yin dang //gang yang 'jig rten drang srong dka' thub mchog /bdag gi bu sdug phongs las bsrung bar mdzod/ /yi ge de yang rim gyis rdo 'jog tu phyin to/ /de nas rdo 'jog pa'i grong khyer ba de rnams kyis yi ge de mthong nas kun la'i yon tan rgya chen pos yongs su mgu bas mi dga' bas de brda' sprod par ma nus te/yun ring por rnam par dpyad nas rgyal po gtum po dang tshul ngan pa bu la yang bzod par mi byed na/ bdag cag rnams la bzod par lta ga la byed/ yang smras pa/ thub pa'i ngang tshul can dul ba/ /'byung po kun la phan 'dod pa'i/ /kun la la'ang sdang byed na/ / bdag cag rnams la cis mi 'byung / /ci tsam na grong khyer pa'i skye bo de rnams kyis yi ge de gzhon nu la bstan to/ /de nas gzhon nus pha'i yi ge spyi bos blangs te/ yi ge pa la smras pa/ yi ge pa khyod rnams kyis rgyal pos 'dir ci zhig bris pa yi ge klogs shig/ /rgyal po mya ngan med rang nyid kyis bris so zhes bya ba'i bar du'o//de nas yi ge bklags pa dang / mig mchi ma dang bcas par gyur cing kun du rmongs par gyur pas lag pa las yi ge ltung bar gyur to/ /yi ge pa gnyis pas blangs pa dang / de yang kun du rmongs par gyur nas de bzhin du lag pa las ltung bar gyur to//de bzhin du yi ge pa mang pos blangs te/ yi ge'i don thos pa dang / kun la'i yon tan yongs su dran pas kyi hud 'di ci zhig yin zhes rnam par sems shing yi ge ltung bar gyur to/ /de nas gzhon nus de rnams kyi sbyor ba de mthong nas smras pa/ ri dwags gzhon nu'i mig 'dra zhing / / bzhin ni pad+ma'i 'dab 'dra ba/ /pad+ma zhes bya snyan smra ba'i/ /nga yi ma dus ma byas sam/ /lha yis mthong na dga' ba yi/ /rgyal srung ma zhes bya ba de/ /gang zhig mya ngan nad kyis ni/ /de ni dus byas ma gyur tam/ /mig bzang 'jig rten grags pas gsal bar ni/ /grong khyer mchog gi bde 'byor mthong nas ni//ji ltar mchi mas mig khebs 'khrugs pa dang / /skye bo'i ngu sgra 'dra ba 'di ci yin/ /de bas na re zhig yi ge khyer la shog dang / 'dir ci zhig bris pa nga nyid kyis bklag par bya'o zhes gzhon nu rang nyid yi ge klog pa la zhugs par gyur pa dang / rgyal po a sho ka rang nyid kyis bris so zhes bya ba'i bar du rgyas par ro//de nas gzhon nus yi ge bklags nas gnas brtan grags pas smras pa mngon du gyur par byas te/ gnas brtan grags pas mig ni mi rtag pa'o zhes bya ba ni legs par gsungs so/ /de nas gzhon nus smras pa/ khyed rnams las 'ga' zhig gis bag phebs pa nyid kyis nga'i mig 'byin par spro'am/de ni bya dgos so/ /de rnams las 'ga' yang spro bar ma gyur to/ /ji tsam na rigs ngan rnams bkug nas kun las mig phyung shig ces smras pa dang / de rnams kyis thal mo sbyar te smras pa/ bdag cag rnams kyis rdo mi thogs te/ci'i phyir zhe na/ gang zhig zla ba'i mdangs ldan pa/ /bzhin las 'byin par byed pa'i mi/ /de ni zla 'dra'i zhal nas ni/ /khyed kyi spyan ni 'byin par bgyed/ /de nas gzhon nus rdo 'jog pa'i grong khyer pa rnams la gang bsod nams 'dod pa de chos kyi rgyal po can du shog shig ces dril bsgrags so//ji tsam na chos kyi rgyal po can du mar me'i phreng ba byas nas/ nyi ma gnyis pa la dge slong rnams bza' ba dang bca' bas bsnyen bkur bya ba dang / me tog gi gdugs btags pa byas so/ /de ltar byas nas chos kyi rgyal po can nas byung ste skye bo'i tshogs chen pos bskor nas rdo leb gzhan pa gang na ba der song ste phyin pa dang /der 'dug te gser gyi sgrom blangs nas smras pa/ gang zhig spro ba des gser gyi sgrom 'di long la nga'i mig phyung shig ces smras kyang thams cad du 'ga' yang spro bar ma gyur to/ /ji tsam na rgyal po mya ngan med kyi rmi lam du skyes bu spyi cer mig ser ba gnyis kyis/gzhon nu'i mig 'byin par byed par mthong ba ci 'dra ba de lta bu nyid ring po kho na nas 'ong ba gzhon nus mthong nas/ smras pa/ kye grong khyer pa rnams skyes bu 'ong ba 'di dag gis nga'i mig dbyung bar bya'o/ /gzhon nus skyes bu de gnyis la bos te dris pa/khyed kyis nga'i mig 'byin par spro'am/ skyes bu gnyis kyis smras pa/ gal te khyed dga' na mgo bo yang dgas par nus na/ chu'i chu bur lta bu'i mig gnyis lta smos kyang ci dgos/ de nas gzhon nu stan las langs te/ thal mo sbyar ba byas nas thams cad dang ldan pa'i 'khor rnams la bzod pa gsol ba la zhugs par gyur to//bdag ni byis par gyur pas gang byas dang / /dbang cher gyur pa'am 'on te mi rigs byas/ /de ni dpal nyams shin tu sdug bsngal ba/ /bdag la brtse bas bzod par bya ba'i rigs/ /gzhan yang /gzugs rnams mthong bar gyur kyang 'di/ /tha ma dag tu gyur pa yi/ /gzhon nu kun la la ni/ /gnod byas gang yin bzod par gyis/ /de'i tshe gzhon nus gnas brtan gyi tshig mngon sum du byas nas/ de rjes su dran bzhin du snyas pa/ rgud pa 'di ni mkhyen nas su/ / mig gi bdag nyid kun la/ /mi rtag yang dag ltos shig ces/ /de nyid smra ba de yis gsungs/ /de ni bdag gi dge ba'i bshes/ /'dod don phan par bzhed pa yin/ /gang zhig chos 'di ston pa ni/ /phongs la brtan par byed pa yin/ /mi rtag 'gyur bas de ni rtag min bar//bla mas bstan pas khyed kyis yid la gyis/ /dngos po 'di dag rang bzhin g.yo bas na/ /deng khyod gnod pa la ni nga mi 'jigs/ /ji ltar sa bdag bzhed pa ltar/ /khyed kyis mig ni dbyung bar gyis/ /mi rtag sogs kyis zag med pa'i/ /snying po'i mig ni nga len to/ / de nas kun las skyes bu de la smras pa/ kye skyes bu des na re zhig nga'i mig gcig phyung la nga'i lag tu byin cig /ji tsam na skyes bu des kun la'i mig 'byin par brtsams so/ /de nas srog chags brgya stong cho nges 'debs pa la zhugs te/ kyi hud sdug bsngal lo/ /dri med zer ldan zla ba 'di//nam mkha' las ni lhung bar gyur/ /pad+ma dkar po'i nags las kyang / /dpal gyi pad+ma 'byin par byed/ /de nas srog chags brgya stong du bzhin du des kun la'i mig gcig phyung ste/ lag tu byin no/ /de nas gzhon nus mig de blangs te/ yongs su bsgo bas smras pa/ 'byung ba chen po'i mthu dang ni/ /las kyi rgyu las 'di byung ste/ /srog med 'tsho ba med stong pa/ /mi yi srog gi rnam spangs pa'o/ /ji ltar sngon chad sha'i gong bu khyod/ /byad bzhin deng ni gzugs la cis mi lta/ /mi mkhas khyod la bdag tu gnas byed pa/ /de bslus de na smad par bya ba yin//dbu ba 'dra zhing chu bur dag dang mtshungs/ /shin tu nyam chung gnod byed rang dbang med/ /de ltar mthong ba rtag tu dregs med cing / /de ltar slar yang sdug bsngal mthong mi 'gyur/ /de ltar rnam par bsams pa dang / des dngos po thams cad la mi rtag pa nyid du mthong zhing rgyun du zhugs pa'i 'bras bu thob par gyur par skye bo'i tshogs rnams kyis kyang shes so//de nas gzhon nus bden pa mthong ba dang / /skyes bu de la smras pa/ bag phebs pas ji ltar mngon par 'dod par mig gnyis pa yang phyung shig /ji tsam na skyes bu des mig gnyis pa yang phyung nas kun la'i lag tu byin no//de nas kun la'i sha'i mig phyung ba dang / chos kyi mig rnam par dag pas smras pa/ nga yi sha yi mig phyung yang / /'on kyang shin tu rnyed dka' 'di/ /shes rab mig ni rnam dag pa/ /ma smad pa ni nga yis thob/ /rgyal pos rang gi bu yi ni//brtags pa spangs par gyur kyang ni/ /chos kyi rgyal po'i sras gyur pa/ /bdag nyid chen po thob par gyur/ /dbang phyug las ni nyams gyur kyang / /mya ngan sdug bsngal rnams spangs pas/ /sdug bsngal mya ngan rnam 'jig pa'i/ /chos kyi dbang phyug thob par gyur/ /de nas kun la'i mig phyung ba mthong ba dang /skye bo'i tshogs chen pos mgrin gcig tu smre sngags 'don zhing la la ni gos dang rgyan rnams gcod par byed/ la la ni sa la 'gre zhing ldog par byed/ la la ni dbyig pa dang gtun shing lag na thogs te skyes bu gnyis po de brlag pa'i phyir brtson par byed/gzhan dag ni rgyal po la yongs su smod par byed de/ kye ma'o rgyal po khro bo'i stobs can/ kye ma'o rgyal po shes rab zha nag kye ma'o rgyal po dbang phyug gi dregs pa gang na bu gcig par gyur pa la yang gnas skabs 'di lta bur byed ces de lta bu'i tshul rnam pa mang por smra bzhin du grong khyer du zhugs par gyur to//ci tsam na ku na las 'di ni rgyal po mya ngan med kyi bka' ma yin gyi/ gzhan du na sbyor ba 'di ni rgyal srung ma'i yin no zhes thos so/ /thos nas yang smras pa/ gang gis sbyor ba 'di ni bkur ba yis/ /gang zhig myong nas rang don byas gyur pa'i/ /rgyal zhes bya ba yun ring bder gyur cing //lha mo'i tshe dang stobs ni skyong bar shog /de nas gser phreng can mas kun la'i mig phyung ngo zhes thos so/ /thos nas kyang khyo la brtse bas kun la'i thad du song ste/ 'khor rnams bsal nas/ kun la'i mig phyung ba lus la khrag gis gang ba mthong ba dang /brgyal te sa la 'gyel bar gyur to/ /de ci tsam na chus gtor te bslangs so/ /de nas ji zhig ltar 'du shes rnyed pa dang / nga ro dang bcas par rab tu ngu zhing smras pa/ khyed kyi mig ni yid du 'ong ba gang / /nga yis bltas na shin tu dga' gyur pa/ /de ni da ltar bltas na 'jigs skyed cing //sems kyi mya ngan ma lus 'byin par byed/ /de nas kun las chung ma la rjes su brtse bas smras pa/ mya ngan la sten pa rigs pa ma yin gyi ngu ba thong / ci'i phyir zhe na/ 'di ni rang gis byas pa'i las kyi 'bras bu nye bar gnas pa yin no/ /'jig rten 'di las bdag nyid can du shes//'gro ba sdug bsngal dngos po dang ldan par/ /shes na sdug dang bral la zhen mi bya/ /de bas sdug pa mchi ma 'byin mi rigs/ /gzhan yang mig phyung ba ngas da ci zhig bya nye du'i gan du song / khyod kyang sdug bsngal gyi skal pa can du ma byed cig /gser phreng mas smras pa/ skyes bu gang zhig dpal rgyas bud med ni/ /brtse bas rjes 'jug pa la ngo mtshar med/ /gang tshe dpal nyams pa na rjes 'brang ba'i/ /bud med de ni mi nang lha dang mtshungs/ /de nas kun la chung ma dang lhan cig grong khyer las byung ba dang / mngal du zhugs pa nas brtsams te/ shin tu gzhon sha can gyi lus dang ldan pas/las ci yang byed par mi nus kyi/ gzhan du na pi wang dag rdung zhing glu dag len par nus so/ /de nas de gser phreng ma'i lag pa la 'jus te/ gzhon nu skyed byed phrag par khur nas 'di skad ces smras so/ /bu sdug dpa' bo'i rigs las skyes//khyod dang rab sdug bsngal te/ /yu bus mthar ni slong mo thob/ /mi bzad las ni sngon byas yin/ /sgyu ma lta bur mi brtan pa'i/ /dbang phyug la ni su yid rton/ /mya ngan med kyi bur gyur la/ /gnas skabs 'di 'dra thob par gyur/ /las byas pa ni tshogs pa dang //ldan pa'i 'bras bu 'di lta bu/ /las ni lhan cig byas pas na/ /lhan cig longs ni spyad par gyur/ /de bas na da ci zhig bya ste/ pa ta li pu trar song la/ rgyal po mya ngan med pa la gsol ba gdab par bya'o/ /'dzam gling dbang phyug mnga' bdag de/ /nga yi dka' ba byed pa'i pha//de ni sbyin pa'i gnas yin zhing / /nga la rtag tu rjes brtse yin/ /de nas kun las pi wang rdung zhing glu len pa dang / gzhan gyi khyim rnams su tshul 'dis 'tsho ba sgrub cing chas so/ /bsnyen bkur chen po las nyams shing / /'ong bskal dman sems can ni/ / slong mos rgyu bar byed pa la/ /chos ldan skyes bu su zhig ster/ /pha dang ma spangs longs spyod dang / /zas dang mal cha khyem med pa/ /nyam ngar rab zhugs long ba la/ /slong mo ma yis ster bar mdzod/ /longs spyod glog 'gyu dang 'dra zhing / /zil pa'i chu thigs 'dra ba la/ /'gro bkren snyan tshig sbyin pa yis//snying po myur du len par gyis/ /dbul po skra ni brdzes gyur cing / /'jig rten kun gyis brnyas pa dang / /dpal nyams khyim khyim slong mos rgyu/ /ngal ma yis slong mo byin/ /de nas kun las slong mo rnyed pa rnams chung ma dang lhan cig yongs su longs spyod par gyur to/ / gser phreng ma yang lam gang nas pa ta li pu tra nas 'ongs pa'i lam de nyid nas rjes su 'brang bar 'gro'o/ /de song ba dang chos kyi 'khor lo'i gnas su phyin to/ /de nas kun las gser phreng ma la dris pa/ bzang mo gang yu bus phyin pa'i grong khyer 'di gang zhig yin/ btsun mos mthong ba dang /brgyal te sa la 'gyel to/ /skad cig tsam na 'du shes rnyed de smras pa/ gang tshe dpal dang ldan par 'gro ba na/ /skye bo bye ba gnas 'dir lhags par lhags/ /khyed mig bral nas deng ni 'dir 'ongs pas/ /'du byed g.yo ba de ni cir mi rung / /ji tsam na rim gyis pa ti li pu trar phyin to//de nas skyed mos tshal yid 'phrogs pa zhes bya ba rgyal po mya ngan med kyis rang gi bu kun la'i don du byas pa zhig yod pa der zhugs par brtsams te zhugs pa dang / ji tsam na skyed mos tshal srung bas mthong nas smras pa/ long ba bkra mi shis shing mi bsngags pa 'di su zhig yin nas skyed mos tshal 'dir zhugs/kye ma'o long ba 'dzam bu'i gling gi dbang phyug gi rgyal po mya ngan med pa'i bu kun la zhes bya ba'i don du skyed mos tshal 'di srung ba khyed kyis mi shes sam/ gser phreng mas smras pa/ kye hud sdug bsngal lo/ /skyed mos tshal ni nags rgyas par/ / nga yi bu 'di dga' 'gyur zhes/ /bu la brtse bas sa bdag gis/ /gang gi don du byas gyur pa/ /bdag cag gnas pa'i don du der/ /'tsho ba zhan pas phyin gyur na/ /skal ba dman pas ma shes nas/ /de las de ltar skrod par gyur/ /gang du gzhon nu glu'i sgra snyan cing yid du 'ong ba dang /be+e DUR+Ya'i rkang rten dang ldan pa'i mal khri la nyal nas rtse zhing rol pa'i gnas pas dga' ba'i gnas gang yin ba der bgrod pa tsam yang thob par ma gyur to/ /de nas ku na las de yid bsring bar bya ba'i phyir smras pa/ bde bar gshegs pas rgyal srid dpal dag ni/ / sgyu ma rmi lam smig rgyu 'dra bar gsungs/ /phun tshogs rgud pa de la rim byung na/ /mkhas pa su zhig rgyal sring bde ba 'dod/ /de nas gzhon nu slar log nas/ /pa ta li pu trar 'jug par bya'o zhes nges par bsams nas der phyin pa dang sgor gser phreng ma ngu ba la zhugs par gyur to/ / ku na las smras pa 'di ci zhig yin/ des smras pa/ gang las sngon ni byung ba na/ /gang gis grong khyer brgyan gyur pa'i/ /da ni de la de med de/ /phreng ba skams pa dor bar 'gyur/ /ji tsam na rim gyis pha'i glang po che'i bres su mtshan mo gnas bcas par gyur to/ /de nas rgyal po mya ngan med de'i mtshan mo khang bzangs kyi steng na nyal ba dang /mtshan phyed kyi dus 'das pa na sad pa dang / de gzhon nu yid la byed pa la zhugs te/ nga'i bu bden pa'i tshig can de cir gyur zhig gu/ rgyal srung mas smras pa/ gzhon nu bde bar gnas lags kyi/ /rgyal pos smras pa/ nga yi bu yi pho nya med//'phrin med yi ge'ang yod min na/ /de yis nga ni brjed gyur tam/ /'on te nga la sdo bar gyur/ /de nas glang po che'i rdzi bo des smras pa/ kye glu mkhan longs shig /re zhig pi wang sbrengs la glu longs shig /kho bos mnyan par bya'o/ /de nas ku na la langs nas pi wang len par zhugs te/de ji ltar mig phyung bas bden ba mthong bar yang byas nas/ slong mo pa'i tshul gyis pa ta li pu trar phyin pa dang / rigs las byung ba'i glu len par brtsams so/ /mi gang mig dang bral bar gyur pa de la srog gi dgos pa ci zhig yod/ /gnyen gyi skye bos spangs shing khros pa'i bzhin ras dag la lta bar byed pa na//chu shing bshig ltar snying po med pa'i 'dus byas dag la mkhas pa su mi skyo/ /gang gis nga ni rin chen rang bzhin shing ltar 'bad pas rnam par gsos gyur cing / /bu yi sred pa ku na la zhes ming btags bya dang 'drar gyur pa//mi yi bdag po'i bu ru gyur kyang bkren pa'i tshul du nga ni sbyong bar byed/ /gzhan yang / skye mched rnams kyi ngo bo nyid/ /mig sogs ye shes sgron ma ni/ /dag pa'i shes rab kyis mthong gang / /de ni skye bo rnams las grol/ /gal te khyod ni srid pa'i sdug bsngal rnams kyis gzir/ / srid pa'i nyes pa rnam par nges byas blo ru bya/ /gal te 'di na brtan pa'i bde ba 'dod gyur na/ /skye mched nyid la brtan pa nyid du gsol ba thob/ /de'i glu'i sgra de rgyal po mya ngan med kyis thos so/ /thos nas kyang dga' bzhin du smras pa/ glu ni ku na la'i dang rab tu'ang ldan gyur cing / /yun ring zhig na pi wang sgra yang thos gyur na//cig 'di ru kun la ni 'ong gyur tam/ /ma 'ongs par ni bdag ni mthong bar dga' bar gyur/ /de nas rgyal po mya ngan med kyis nyung rum gyi skyes bu zhig la smras pa/ kye skyes bu/ cig glu yi sgra 'di ni/ /ku na la dang rab 'dra bas/ /brtan dang zhum pa mi mthun par/ /ston pa lta bur shes par gyur//de bas 'dir ni sgra 'di yi/ /brtan las shin tu g.yos gyur te/ /seng ge nyid kyi sgra yis ni/ /glang po rab tu skrag ltar gyur/ /de nas nyung rum glang po che'i bres su song ba dang / /ku na la mig phyung ba rlung dang tsha bas lus tshig pa de mthong ba dang ngo ma shes so/ /de nas glang po che skyong ba la smras pa//'di su zhig yin/ glang po che'i rdzi bos smras pa/ 'di ni long ba mig med pa zhig go/ /de song nas rgyal po la gsol pa/ /lha long ba zhig pi wang thogs te chung ma dang lhan cig lha'i glang po che'i bres na mchis so/ /de thos nas rgyal pos bsams pa/ ji ltar ngas rmi lam mi dge ba mthong ba las na/ gzhon nu'i mig nges par nyams par gyur to snyam mo/ /yang smras pa/ nga yis sngon ni rmi lam du/ /mtshan ma ji ltar mthong ba las/ /the tshom med par ku na la'i/ /mig ni brlag pa nyid du nges/ /de nas rgyal po rab tu ngu zhing smras pa/ bu yi sdug bsngal dogs pa yis//nga yi sems ni zhir ma gyur/ /de ni nga yi thad nyid du/ /myur ba kho nar khyer la shog /ji srid na skyes bu de yang glang po che'i bres su song ste/ ku na la la smras pa/ khyod su'i bu yin/ khyod kyi ming ni ci zhes bya/ /ku na las smras pa/ mya ngan med pa zhes bya'i rgyal/ / dpa' bo yi ni rigs dga' ba/ /gang gis sa 'di rgyas pa ni/ /mngag gzhug par ni dbang du gyur/ /nga ni rgyal po de yi bu/ /ku na la zhes rnam par grags/ /sangs rgyas nyi ma'i gnyen gyur pa/ /chos can sras kyang nga yin no/ /de nas ku na la chung ma dang lhan cig rgyal po mya ngan med kyi gan du song ngo //de nas rgyal po mya ngan med kyis ku na la'i mig phyung ba rlung dang than pas lus tshig pa/ phyag dar gyi dum bu bsdus pa'i gos gyon pa dang / smad dkris byas pas ngo shes par ma gyur gyi/ dbyibs tsam zhig mthong nas smras pa/ bu khyod ku na la yin nam/ /lha de lta lags te bdag ni ku na la'o//de thos pa dang rgyal po brgyal nas sa la 'gyel to/ /de nas ku na la'i gdong bltas na/ /mig bral mya ngan gyis ni sems gdungs shing / /mya ngan med pa sar lhung 'du shes bral/ /kyi hud bu gcig bu gcig ces par smras/ /ji tsam na rgyal po chus gtor nas sa las bslangs te stan la bzhag go//de nas rgyal po ci zhig ltar 'du shes rnyed nas ku na la pang par bzhag ste smras pa/ de nas yud tsam dbugs ni phyung nas su/ /mgul pa mchi mar bcas pas mgul 'khyud de/ /bu yi gdong la yongs su byugs nas su/ /rgyal po rnam pa mang du smre bar gyur//ku na la dang mtshungs pa'i mig brtags nas/ /nga yis rang bzhin de ni ming btags gang / /bu de'i mig ni phyung ba la bltas nas/ /ku na la zhes ji ltar smra bar bya/ /yang smras pa/ khyed kyi mdzes shing mdangs ldan bzhin 'di ni/ /nam mkha'i zla ba skar ma dang bral ltar//mdzes pa'i mig dang bral bar khyed sus byas/ /bu sdug re zhig smros shig smros shig dang / /snying rje med pa'i sems ldan su yis khyed/ /thub 'dra 'phags pa'i bden pa rtogs gyur pa/ /khyed kyi mig bzang dgra med 'khon bzung nas/ /rang bzhin 'di byas nga yi mya ngan rtsa//don 'di myur ba nyid du smros shig smros/ /nga yi lus 'di'ang 'jig par 'gyur du 'ong / /khyed kyi bzhin rgud mya ngan gyis bsregs pa/ /dgra yis nags bcad bsregs pa lta bur gyur/ /de nas ku na las pha la smras pa/ 'das pa'i don la ni mya ngan bya ba'i mi rigs te/ / sngon las rnams las sangs rgyas kyang mi 'da'/ /de bzhin rang rgyal 'bras bu la gnas dang / /so so'i skye bo'ang grol bar mi 'gyur zhes/ /thub pa'i gsung ni khyed kyis ma gsan nam/ /rgyal po skyes bus mi dge'i las byas rnams/ /'bras bu med par nam yang mi 'gyur na/ /'di na rang byas las kyi 'bras bu la//'di ni gzhan gyis byas zhes ji ltar smra/ /rgyal po chen po bdag gis nongs bgyis te/ /nongs bcas ma yin nam yang 'di 'dra min/ /mtshon dang rdo rje dug dang sbrul rnams kyis/ /nam mkha' 'gyur zhing gnod byed mi nus so/ /las kyi bdag nyid can ni lus mtshon pa'i//lus can rnams la mi dge'i sdug bsngal 'byung / /de nas rgyal po mya ngan med mya ngan gyi mes gdungs pa'i yid kyis smras pa/ nga yi bu yi mig bzangs su yis phyung bar gyur/ /su zhig shin tu sdug pa'i srog ni gtong ba zhugs/ /nga yi yid 'di mya ngan me yis bsregs gyur gyis//gang la chad pas gcad bya bu sdug myur du smros/ /ku na las smras pa/ gzhon nu ku na la 'di yi/ /mig ni gnyis ka phyung shig ces/ /tshems kyi rgya yis rgyas btab nas/ /yi ge lha yis bskur ba lags/ /rgyal pos smras pa/ bya ba 'di dag rnam bsams pa/ /rmi lam du yang ma dran na//ci yi phyir na tshig 'di dag /nga ni rab tu smra bar byed/ /de nas gzhon nu mig mchi mas gang ba dang bcas pa'i rgyal po la bltas nas smras pa/ mi yi bdag po mya ngan dag gis 'khrugs ma mdzad/ /rang gi mig dang bral ba mdzes pa min la gzigs/ /'di ni mi yis rang byas sdig pa'i khur bskur te//sa bdag gzhan byas 'bras bu gzhan ni spyod mi 'gyur/ /sa bdag mi dge'i las rnams byas par gyur pa dag /smin pa'i dus su 'jigs par nam yang mi 'gyur te/ /de 'dra'i 'bras bu 'di ni rang gis byas pa la/ /gzhan gyis 'di dag byas zhes ji ltar brjod par bgyi//lha gzhan yang bcom ldan 'das kyis ji skad du gsungs pa ma gsan nam/ 'jig rten gsum gyi snying po lha mis mchod gyur pa/ /stobs kyis stobs phyug pa yang stobs mtha' las mi thar/ /sngon byas las las nam yang thar par mi 'gyur na/ /'di na bdag 'dra gzhan dag smos kyang ci zhig 'tshal//ji tsam na rgyal po mya ngan med kyis sbyor ba 'di ni rgyal srung mas byas zhes thos so/ /thos nas kyang rgyal pos rgyal srung ma bos te smras pa/ skal med ci phyir sa ra ni nub ma gyur/ /chos bshig nga yang mi dgar byas pas na/ /chos min ldan pa bdag dpal 'phrog 'dra ba//shin tu sdig byed khyod ni spang bar bya/ /de nas rgyal po khro bo'i me 'bar ba dang / rgyal srung ma la bltas te smras pa/ 'di'i mig dbyung ngam 'on te 'di yi lus/ /sen mo shin tu rno bas dral ba'am/ /yang na gson por mdung rtser bskyon ba'am/ /'di'i lus sogs les rnam par dgas par bya//yang na lce ni spu gris gtubs byas shing / /dgra stas bsnun bas mgo bo gcad par bya/ /yang na bskal pa'i me 'drar gzhug bya zhing / /'on te dug gis lus 'di dgang bar bya/ /de la sogs pa gsod bcas sbyor ba ni/ /rnam mang mi yi dbang pos smras pa dang //snying rje'i bdag nyid can ku na las thos nas/ /bdag nyid chen po de la gsol ba 'debs/ /de nas rgyal po mya ngan med khro ba'i me kun du 'bar bas dkrugs pa dang / rgyal srung ma brlag pa'i thabs tshol ba la brtson pa la ku na las spyi bos phyag byas te/ snying rje rje skad du smras pa/lha bud med 'di gsad par rigs pa ma lags so/ /rgyal pos smras pa/ gang gis khyod dang nga'i lus bcom rab tu byas gyur la/ /'di lta'i tshig ni smra byed khyed ni rigs pa ma yin no/ /ku na las smras pa/ de de lta lags su zin kyang / bdag ni de'i tshe nas da lta de'i bar du 'di dang gshed ma pa'i skyes bu de gnyis la gzhon nu skyed byed la khong khro ba'i sems med pa de bzhin du de rnams la snying rje dang byams pa'i sems nyid shin tu bsgom lags so//rgyal pos smras pa/ khyod snying rje'i dbang du gyur pa yin par tshig 'di lta bu la su zhig yid ches par gyur/ ku na las smras pa/ nges par nang du bdag nyid tshad mar gyur pa dang /de bzhin du mngon par shes pa drug dang ldan par bdag nyid chen po gzhan gyi sems shes pa gzhan dag dpang du gyur pa lags so/ /rgyal pos smras pa/ gal te de lta yin na/ nga dang 'jig rten rnams kyi mngon du gyis shig /de yang 'di ltar shi bi'i rgyal pos phug ron gyi don du lus bcad nas/bden pa bdar bas sngon gyi lus ji lta ba bzhin du gyur to zhes thos kyi de bzhin du khyod kyis kyang bden pa bdar bas sngon gyi mig ji lta ba bzhin du gyis shig /de bzhin du bgyi'o zhes smras pa/ ku na las bram ze dang khyim bdag brgya stong du ma 'dus pa dang /rgyal po 'khor dang bcas pa'i nang du bcom ldan 'das kyi thugs rje la sogs pa'i yon tan mngon du byas te shar phyogs su bltas nas bden pa'i tshig 'di skad ces brjod do/ /bden pa gang gis rgyal srung ma dang skyes bu gnyis po'i bar la de'i tshe dang da lta'i bar du skyo ba'i sems med cing /bdag gi bu gcig pa skyed byed ji lta bar snying rje dang byams pa'i sems mnyam par gyur pa'i bden pa'i tshig des sngon gyi mig ji lta ba bzhin du gyur cig /tshig brjod pa dang dus mnyam pa nyid du ku na la'i mig sngon gyi ji lta ba bzhin du gyur to/ /de nas rgyal po dang / grong khyer pa rnams kye ma kye ma zhes sgra gsang mthon po sgrogs shing /rnam pa de lta bu'i ngo mtshar la lta'o/ /de nas rgyal po mya ngan med kyis ku na la rgyal tshab tu dbang bskur bar zhugs pa dang / ku na las smras pa/ rgyal po chen po bdag la ni rgyal srid dgos pa ma mchis so/ /bdag gis ni bden pa mthong lags so//de nas gzhon nu skyed byed rgyal tshab tu dbang bskur ro/ /de nas bar skabs su yang rgyal srung ma'i phyir gsol ba 'debs pa/ gal te rgyal srung 'phags min las bgyis kyang / /khyed 'phags las mdzod bud med 'gu ma mi bgyi/ /bzod dang 'dra ba'i stobs ni yod min zhes//bde gshegs bsngags pas gtso bo bzod mdzad rigs/ /ji tsam na rgyal po mya ngan med shin tu khros pas rgyal srung ma rgya skyegs kyi khang par bcug ste bsregs so/ /rdo 'jog pa'i grong khyer pa rnams kyang rab tu bcom mo/ /de nas dge slong ci'i phyir ku na las las gang zhig byas na 'di'i mig phyung ba dang /slar skyes pa yin zhes the tshom skyes la/ de ltar the tshom skyes pa gnas brtan grags pa la dris pa dang / gnas brtan grags pas smras pa/ de bas na tshe dang ldan pa dag nyon cig /dge slong dag sngon byung ba 'das pa'i dus na grong khyer bA rA Na sI na rngon pa zhig gnas te/ de kha ba can du song nas ri dwags rnams gsod do/ /de dus gzhan zhig na kha ba can du song ba dang / der ser ba bab par gyur la/ ri dwags lnga brgya phug gcig tu zhugs pa zhig rnyed pa dang / des rgyas thams cad bzung nas de la blo skyes pa/ gal te thams cad dus gcig tu bsad na ni sha rul par 'gyur bas thabs gzhan zhig brtsam par bya'o snyam nas des ri dgas lnga brgya'i mig phyung ngo //mig phyung ba de rnams gang du yang 'bros par ma nus so/ /de bzhin du rgya cher ri dgas brgya phrag mang po'i mig phyung ngo / /tshe dang ldan pa dag ri dgas kyi rngon pa gang yin pa de ni gzhan ma yin gyi ku na la 'di nyid yin no//gang der ri dgas mang po'i mig phyung ba de'i las kyi rnam par smin pas lo brgya stong mang por dmyal bar sdug bsngal rjes su myong la/ de nas las kyi lhag ma skye ba lnga brgyar mi rnams kyi nang du skyes pa na mig phyung bar gyur to/ /las ci zhig byas na las gang gi rnam par smin pas rigs mthon por skyes shing rab tu mdzes par gyur la/bden pa mthong bar byas pa de yang tshe dang ldan pa dag nyon cig /sngon byung ba'i dus skye dgu rnams kyi tshe lo bzhi khri thub pa na/ yang dag par rdzogs pa'i sangs rgyas 'khor ba 'jig ces bya ba 'jig rten du byung ste/gang gi tshe yang dag par rdzogs pa'i sangs rgyas 'khor ba 'jig gis sangs rgyas kyi mdzad pa ma lus pa mdzad nas phung po lhag ma med pa'i mya ngan las 'das pa'i dbyings su yongs su mya ngan las 'das pa dang / de la rgyal po mdzes pa zhes bya bas rin po che sna bzhi las byas pa'i mchod rten chu zheng dpag tshad tsam byas so//gang gi tshe rgyal po mdzes pa dus byas nas dad pa med ces bya ba rgyal srid la bzhag pa na/ rin po che de rnams ma byin par len pa rnams kyis brkus te/ phyag dar dang shing tsam zhig lus pa dang / der skye bo'i tshogs song ba na/ mchod rten rnam par dengs pa mthong nas kyi hud kyi hud sdug bsngal lo zhes yang dag pa'i nga ros ngu'o/ /tshong dpon gyi bu zhig kyang 'ongs nas/ des smras pa/ ci'i phyir du/ de rnams kyis smras pa yang dag par rdzogs pa'i sangs rgyas 'khor ba 'jig gi mchod rten rin po che sna bzhi'i rang bzhin can zhig yod de zhes bya ba nas de rnams kyis rgya cher mchod rten de sngon bzhin du bzhag par gyur to zhes bya ba'i bar du'o//de nas yang dag par rdzogs pa'i sangs rgyas 'khor ba 'jig gi sku'i tshad kyi sku gzugs yod pa las de zhig pa dang / legs par gsos te/ ston pa 'khor ba 'jig ci 'dra ba de 'dra'i ston pa mnyes par byed kyi mi ma nyes ba byed par ma gyur cig ces smon pa byas so//tshe dang ldan pa dag 'di ji snyam du sems/ tshong dpon gyi bu gang yin pa de ni ku na la 'di nyid yin te/ gang der bcom ldan 'das 'khor ba 'jig gi mchod rten legs par gsos pa'i de'i las kyi 'bras bus rigs mtho bar skyes pa yin la/gang sku gzugs gsos pa de'i las kyis gzugs bzang bar skyes pa yin la/ gang yang dag par smon par byas pa de'i las kyi 'bras bu de dang 'dra ba'i ston pa yang dag par rdzogs pa'i sangs rgyas shAkya thub pa mnyes par byas kyi mi mnyes par ma byas pa yin no//bden pa mthong bar byas pa gang yin pa de nyon cig /dge slong dag sngon byung ba 'das pa'i dus na/ yang dag par rdzogs pa'i sangs rgyas 'khor ba 'jig de nyid kyi mchod rten rin po che sna bzhi las byas pa rgyal po mdzes pas byas pa dang / mchod rten der sa las byas pa'i sku gzugs cig kyang byas so//ji tsam na tshong dpon zhig gi byis pa ma ma dang lhan cig mchod rten der song ba dang / de byis par gyur pas mde'u blangs te sangs rgyas kyi sku gzugs kyi spyan phyung ngo / /ji srid du gzhan zhig na chen por 'gyur nas/ yang mchod rten de nyid du song ngo //des mthong ma thag tu sku gzugs 'di byis par gyur pas bdag gis byas so dran pa dang / de khyim nas rdzas blangs te/ de dang rin po che sna bzhi las byas pa'i sku gzugs byas nas/ mig gnyis su rin thang che ba'i nor bu in dra nI la bcug ste/ mchod rten de la yang mchod pa chen po dang bskor ba byas nas/gang bdag byis par gyur pas/ bcom ldan 'das kyi spyan phyung nas sdig pa'i las bgyis te/ sdig pa'i las 'di'i skal ba can du ma gyur cig /dge ba'i rtsa ba 'dis kyang ston pa 'di lta bu mnyes par byed kyi/ mi mnyes pa byed par ma gyur cig ces smon pa byas so//dge slong dag tshong dpon gyi bu gang yin pa de ci gzhan dag yin par sems sam/ de'i tshe de'i dus su ku na la 'di nyid tshong dpon gyi bur gyur to/ /gang 'dis sdig pa can gyi las byas pa des skye ba lnga brgyar tshe rabs tshe rabs su mig dang bral bar gyur to/ / gang des nyes pa bshags nas smon lam byas pa des rigs mtho ba dang / gzugs mdzes par gyur to/ /gang in dra nI la'i spyan bcug pa des na 'di tshe rabs tshe rabs su mig mdzes par gyur pa yin no/ /gang des ston pa 'di lta bu mnyes par byed par gyur cig ces pa des na rgyun du zhugs pa'i 'bras bu thob pa yin no//gang des spyan phyung nas slar yang in dra nI la'i spyan bcug pa de'i las kyi 'bras bu mig phyung nas yang thob pa yin no/ /gnas brtan grags pas de skad ces smras pa dang / dge slong dag mngon par dga'o/ /ku na la'i rtogs pa brjod pa rdzogs so/