CLOSE WINDOW

D4139
བོད་ཡིག

@##/ /rgya gar skad du/ kA ya b+he do bi b+haM ga byA khyA na/ bod skad du/ sde pa tha dad par byed pa dang rnam par bshad pa/ dkon mchog gsum la phyag 'tshal lo/ /sde pa bco brgyad po dag ni gang yin/ de dag gi bye brag ni ji ltar byung zhe na/ bdag gi bla ma gcig nas gcig tu brgyud pa las 'di ltar rjes su thos te/sangs rgyas bcom ldan 'das yongs su mya ngan las 'das nas/ lo brgya drug cu lon pa na grong khyer me tog gis rgyas pa zhes bya bar rgyal po d+harma a sho ka zhes bya ba rgyal srid byed pa'i tshe/ rtsod pa'i chos 'ga' zhig byung ba'i dbang gis dge 'dun gyi dbyen chen por gyur to//des re zhig dang por sde pa gnyis su chad nas gnas te/ dge 'dun phal chen pa dang gnas brtan pa'o/ /de la dge 'dun phal chen pa'i sde pa yang rim gyis bye bar gyur pa na rnam pa brgyad du gnas te/ dge 'dun phal chen sde pa dang / tha snyad gcig pa dang / 'jig rten pas 'das par smra ba dang / mang du thos pa dang / btags par smra ba dang / mchod rten pa dang / shar gyi ri bo dang / nub kyi ri bo ba'o/ /gnas brtan pa yang rim gyis bye bar gyur pa na rnam pa bcur gyur te/ 'di lta ste gnas brtan pa nyid la gangs ri ba zhes kyang brjod pa dang / thams cad yod par smra ba pa nyid la rnam par phye ste smra ba dang / rgyur smra ba dang / kha cig mu run ta ka pa zhes kyang zer ba dang / gnas ma'i bu dang / chos mchog pa dang / bzang po'i lam ba'o/ /kun gyis bkur ba la kha cig ni a pan ta ka pa zhes kyang zer/ kha cig ni ku ru ku la pa zhes kyang zer ba dang /mang ston pa dang / chos sbas pa dang / chos bzang 'bebs zhes bya ba la kha cig ni 'od srungs pa zhes zer ba dang / bla ma la kha cig ni 'pho bar smra ba zhes zer ba ste/ sde pa bco brgyad kyi dbye ba ni de dag go/ /de la dge 'dun yang yin la phal chen pa yang yin pas dge 'dun phal chen te/de nye bar ston par byed pa ni dge 'dun phal chen pa'o/ /kha cig ni sangs rgyas bcom ldan 'das rnams kyis chos thams cad thugs gcig rnam par mkhyen cing skad cig gcig dang ldan pa'i shes rab kyis chos thams cad yongs su mkhyen to zhes tha snyad 'dogs te/ des na tha snyad gcig pa zhes bya'o/ /'jig rten thams cad kyi 'jig rten pa las sangs rgyas bcom ldan 'das rnams 'das par gyur pas de bzhin gshegs pa la 'jig rten pa'i chos mi mnga' 'o zhes smra ba ni 'jig rten las 'das par smra ba pa'o/ /mang du thos pa'i slob dpon gyis rjes su ston par byed pas na mang du thos par smra ba'o//'dus byas rnams phan tshun brtags pa nyid kyis sdug bsngal pa yin no zhes smra ba'i phyir btags par smra ba'o/ /mchod rten can gyi ri la gnas bcas pa nyid ni mchod rten pa'o/ /shar gyi ri dang nub kyi ri la gnas pa nyid ni/shar gyi ri bo pa dang / nub kyi ri bo pa'o/ /gnas brtan 'phags pa'i rigs yin par ston pa ni gnas brtan pa'o/ /de nyid la gangs ri pa zhes kyang zer te/ gangs kyi ril brten nas gnas pa'i phyir ro/ /gang cung zhig 'das pa dang / ma 'ongs pa dang / da ltar byung ba thams cad yod do zhes smra ba'i phyir/thams cad yod par smra ba'o/ /de dag nyid las 'ga' zhig ni yod de 'das pa'i las 'bras bu ma phyung ba gang yin pa'o/ /la la ni med de/ gang 'bras bu myong zin pa dang / ma 'ongs pa dag go zhes rnam par phye nas smra bar byed pa'i phyir/de nyid la rnam par phye ste smra ba zhes bya'o/ /de dag nyid las gang cung zhig byung ba dang / 'byung ba dang / 'byung bar 'gyur ba de thams cad ni rgyu dang bcas pa'o zhes smra bas rgyur smra ba'o/ /de rnams nyid la kha cig mu run ta'i ril gnas pa'i phyir mu run ta pa ka zhes bya'o/ /gnas pa'i rigs nyid kyi bud med ni gnas ma yin la/de las skyes pa'i bu ni gnas ma'i bu ste/ de'i rigs yin par ston pa ni gnas ma'i bu'o/ /slob dpon chos mchog gi rjes su ston par byed pa ni chos mchog pa'o/ /bzang po'i lam pa'i slob ma ni bzang po'i lam pa'o//kun gyis bkur ba'i slob dpon gyi lugs ston par byed pa ni kun gyis bkur ba ba'o/ /de nyid las a pan ta'i grong khyer du yang dag par bsdu ba bya ba'i phyir a pa na ta ka pa'o/ /kha cig ni ku ru ku la'i ri la gnas pa'i phyir ku ru ku la pa'o/ /sa su'i skad kyi dbyings las rdzas su ston du bsgyur te/skye bo'i tshogs chen po la yang srid par mi 'byung bar rjes su ston par byed pa ni mang ston pa'o/ /slob dpon chos sbas kyis yin par smra ba ni chos sbas pa'o/ /rab tu bsngags pa'i dmigs pa'i chos kyi char 'bebs par byed pas na char bzangs 'bebs pa'o//de nyid slob dpon 'od srungs kyi yin par smra bas ni 'od srungs pa'o/ /de bzhin du bla ma pa'i yin par smra ba ni bla ma ba'o/ /de nyid las kha cig na re/ 'jig rten 'di nas 'jig rten pha rol du gang zag 'pho bar 'gyur ro zhes smra ba ni 'pho bar smra ba pa'o//de rnams las sngar bstan pa'i dge 'dun phal chen pa la sogs pa brgyad dang / phyis bstan pa'i phyir gnas brtan pa dang / thams cad yod par smra ba dang / mang ston pa dang / chos mchog pa dang / 'od srungs pa rnams ni bdag med par smra ba yin te/ mu stegs pa'i 'dod pas brtags pa'i bdag dang bdag gi dag ni stong pa yin pa dang /chos thams cad ni bdag med pa yang yin par smra ba yin no/ /lhag ma gnas ma'i bu la sogs pa sde pa lnga ni gang zag tu smra ba yin te/ gang zag ni phung po dag las de nyid dang gzhan du brjod du med pa rnam par shes pa drug gis shes par bya ba 'khor bar 'gyur ba yongs su gsal bar gyur pa yin no zhes zer ro//de dag ni sde pa bco brgyad kyi dbye ba yin no// //gzhan nyid kyis smra ba ni gzhi ni snga ma bzhin du brjod par bya'o/ /rtsa ba'i dbye ba ni gsum ste/ 'di ltar gnas brtan pa dang / dge 'dun phal chen pa dang /rnam par phye ste smra ba'o/ /de la gnas brtan pa yang rnam pa gnyis te/ thams cad yod par smra ba dang / gnas ma'i bu'i sde pa zhes bya'o/ /yang thams cad yod par smra ba yang rnam pa gnyis te/ thams cad yod par smra ba dang / mdo sde smra ba zhes bya ba'o/ / gnas ma'i bu yang rnam pa bzhi ste/ mang pos bkur ba dang / chos mchog pa dang / bzang po'i lam pa dang / grong khyer drug pa zhes bya ba ste de ltar na gnas brtan pa ni rnam pa drug tu gnas so/ /yang dge 'dun phal chen sde ni rnam pa brgyad de/ dge 'dun phal chen pa dang / shar gyi ri bo dang / nub kyi ri bo dang / rgyal po ri bo dang / gangs ri pa dang / mchod rten pa dang / brten grub pa dang / ba lang gnas pa zhes bya ba ste/ de ltar na de dag ni dge 'dun phal chen pa'i dbye ba yin no/ /rnam par phye ste smra ba yang rnam pa bzhi ste/ sa ston pa dang / 'od srungs pa dang / chos sbas pa dang / gos dmar ba zhes bya'o/ /de ltar 'di dag ni 'phags pa'i sde rnams rnam par phye ba nas rnam pa bco brgyad du gyur pa'o// //yang gzhan dag ni 'di skad smra ste/ bcom ldan 'das yongs su mya ngan las 'das pa nas bzung nas/ lo brgya sum cu rtsa bdun lon pa na rgyal po dga' bo dang pad+ma chen po zhes bya bas grong khyer pa ta li pu tra'i nang du sdud par byed pa la sogs pa'i 'phags pa phal ni yang len pa med par bsil ba'i dngos po thob par gyur pa na 'phags pa 'od srungs chen po dang / 'phags pa spu chen po dang / gtong ba chen po dang / bla ma dang / re ba ta la sogs pa so so yang dag par rig pa thob pa'i dgra bcom pa'i dge 'dun de ltar bzhugs pa na bdud sdig to can bzang po thams cad kyi mi mthun pa'i phyogs su gyur pa/ dge slong gi cha byad 'dzin pas rdzu 'phrul sna tshogs bstan nas/ gzhi lngas dge 'dun gyi dbyen chen po bskyed de/gnas brtan klu zhes bya ba dang / yid brtan pa zhes bya ba mang du thos pa dag gi gzhi lnga bsngags par byed/ rjes su ston par byed cing de gzhan la lan gdab pa dang / mi shes pa dang / yid gnyis dang / yongs su brtags pa dang / bdag nyid gso bar byed pa ni lam yin te/'di ni sangs rgyas kyi bstan pa yin no zhes zar ro/ /de nas sde pa gnyis su chad nas gnas te/ gnas brtan pa dang / dge 'dun phal chen sde zhes bya'o/ /de ltar lo drug cu rtsa gsum gyi bar du dge 'dun bye nas 'khrug long gis gnas so//de nas lo brgya phrag gnyis 'das pa'i rjes la gnas brtan gnas ma'i bus bstan pa yang dag par bsdus so/ /des yang dag par bsdus pa na dge 'dun phal chen pa yang rnam pa gnyis su byung bar gyur te/ tha snyad gcig pa dang / ba lang gnas pa zhes bya'o//de la tha snyad gcig pa rnams kyi dam tshig gi rtsa ba ni sangs rgyas bcom ldan 'das rnams ni 'jig rten las 'das pa ste/ de bzhin gshegs pa la 'jig rten gyi chos ni mi mnga'o/ de bzhin gshegs pa thams cad kyi chos kyi 'khor lo bskor ba'i rjes su gsung ni mi 'jug go//de bzhin gshegs pa thams cad kyi gsung ni snying po la mngon par mos pa'o/ /de bzhin gshegs pa la gnas der gzugs nye bar len pa ni mi mnga'o/ /byang chub sems dpa'i dus na nur nur po dang / mer mer po dang / ltar ltar pos 'jug ba ma yin te/glang po cher gyur nas yum gyi dku nas zhugs nas rang nyid nges par 'byung ba yin gyi/ byang chub sems dpa' rnams la 'dod pa'i 'du shes ni mi 'byung ngo / /ngan 'gro rnams su bdag nyid kyi 'dod pas skye ba blangs te sems can yongs su smin par byed do/ /ye shes gcig gis bden pa bzhi rnams yongs su shes so//rnam par shes pa drug po dag ni 'dod chags dang bcas pa dang 'dod chags dang bral ba yin no/ /mig gis ni gzugs rnams mthong ngo / /dgra bcom pa rnams kyang gzhan dag gis bstan pa sgrub par byed do/ /mi shes pa dang / yid gnyis dang / yongs su brtags pa dang / sdug bsngal spong ba'i lam yang yod do/ /mnyam par gzhag pa'i tshe ngag 'jug pa yang yod do/ /mi gtsang ba spangs pa yang yod do/ /yang dag par sdom pa mngon du byas pa nyid kyis kun du sbyor ba thams cad rab tu spangs par brjod bar bya'o//de bzhin gshegs pa rnams la 'jig rten pa'i yang dag par lta ba ni mi mnga'o/ /sems ni rang bzhin gyis 'od gsal ba yin bas bag la nyal ba rnams sems dang mtshungs par ldan zhe'am/ mi ldan zhes brjod par mi bya'o/ /bag la nyal ba yang gzhan la/ kun nas ldang ba yang gzhan yin no/ /'das pa dang ma 'ongs pa ni med do/ /rgyun du zhugs pa ni bsam gtan thob pa yin no zhes bya ba ste de lta bu rnams ni tha snyad gcig pa rnams kyi dam tshig yin no/ /yang ba lang gnas pa rnams kyi dbye ba ni mang du thos pa dang btags par smra ba zhes bya'o/ /de la mang du thos pa rnams kyi rtsa ba'i dam tshig ni nges par 'byung ba'i lam la ni rnam par dpyod pa med do//sdug bsngal gyi bden pa dang / kun rdzob kyi bden pa dang / 'phags pa'i bden pa ni bden pa'o/ /'du byed kyi sdug bsngal rnams mthong bas yang dag par skyon med pa la 'jug gi /sdug bsngal gyi sdug bsngal dang 'gyur ba'i sdug bsngal mthong bas ni ma yin no//dge 'dun ni 'jig rten las 'das pa'o/ /dgra bcom pa rnams la yang gzhan gyis nye bar bstan pa bsgrub pa yod do/ /yang dag par bsgrags pa'i lam yang yod do/ /mnyam par gzhag pa la yang dag par 'jug pa yod do zhes bya ba rnams ni mang du thos pa rnams kyi dam tshig go//yang btags par smra ba rnams kyi phung po med pa'i sdug bsngal yang yod do/ /yongs su ma rdzogs pa'i skye mched kyang yod do/ /'du byed rnams ni phan tshun brtags pa yin no/ /yang sdug bsngal ni don dam par ro/ /sems las byung ba ni lam ma yin no/ / dus ma yin par 'chi ba ni med do/ /skyes bu byed pa yang med do/ /sdug bsngal thams cad ni las las byung ba yin no zhes bya ba de lta bu ni btags par smra ba rnams kyi rtsa ba'i dam tshig yin no/ /yang ba lang gnas pa rnams kyi bye brag las gnas brtan mchod rten pa zhes bya ba ste/ de ni lha chen po zhes bya ba'i kun du rgyu zhig rab tu byung nas mchod rten can gyi ril gnas pa yin te/yang de ni dge 'dun phal chen pa'i gzhi 'don par gyur pa na mchod rten pa zhes bya ba'i sde par rnam par bzhag ste/ de dag ni dge 'dun phal chen pa rnams kyi sde pa drug tu bzhag pa yin no/ /yang gnas brtan pa yang rnam pa gnyis te/sngar gyi gnas brtan pa dang / gangs ri pa zhes bya ba'o/ /sngar gyi gnas brtan pa'i rtsa ba'i dam tshig ni dgra bcom pa rnams la gzhan gyis ston cing bsgrub pa ni med do/ /de bzhin du gzhi lnga po yang med do/ /gang zag ni yod do/ /srid pa bar ma ni yod do//dgra bcom pa yongs su mya ngan las 'das ba ni yod do/ /'das pa dang ma 'ongs pa yang yod do/ /mya ngan las 'das pa'i don ni yod do zhes bya ba ni gnas brtan pa'i rtsa ba'i dam tshig go/ /de la gangs ri ba'i rtsa ba'i dam tshig ni byang chub sems dpa' ni so so'i skye bo ma yin zhes bya'o/ / phyi rol pa la yang mngon par shes pa lnga ni yod do/ /phung po las gang zag ni gzhan yin par brjod par bya ste/ mya ngan las 'das par 'gyur ba na gang du phung po 'gags pa na gang zag ni gnas pa'i phyir ro/ /mnyam par gzhag pa la ngag 'jug pa ni yod do/ /lam gyi sdug bsngal spong ngo zhes bya ba de dag ni gangs ri pa'i dam tshig go//yang dang po'i gnas brtan pa yang rnam pa gnyis su gyur te/ thams cad yod par smra ba dang / gnas ma'i bu'i zhes bya'o/ /de la thams cad yod par smra ba'i rtsa ba'i dam tshig ni gnyis kyis thams cad bsdus te/ 'dus byas dang 'dus ma byas so/ /de skad smras pas cir 'gyur/gang zag ni med ces bya ba ste/ ji skad du/ bdag med pa yi lus 'di 'byung ba na/ /byed pa med cing rig pa po yang med/ /ji ltar 'khor ba'i chu klung 'jug 'gyur ba/ /nyan pa'i mchog khyod de ni bstan gyis nyon/ /zhes gsungs pa lta bu'o/ /de dag ni thams cad yod par smra ba'i rtsa ba'i dam tshig go//yang de dag gi rtsa ba'i dam tshig ni ming dang gzugs kyis thams cad bsdus so/ /'das pa dang / ma 'ongs pa ni yod do/ /rgyun du zhugs pa ni mi nyams pa'i chos can yin par brjod par bya'o/ /'dus byas rnams kyi mtshan nyid ni gsum yin no/ /'phags pa'i bden pa bzhi ni rim gyis rtogs par 'gyur ro//stong pa nyid dang / smon pa med pa dang / mtshan ma med pa dag gis skyon med pa la 'jug par 'gyur ro/ /skad cig ma bcom lngas ni rgyun du zhugs pa'i 'bras bu la zhugs pa yin no/ /rgyun du zhugs pa ni bsam gtan thob pa yin no/ /dgra bcom pa yang nyams pa srid do//so so'i skye bo la yang 'dod pa'i 'dod chags sam gnod sems spong ba yod do/ /phyi rol ba la yang mngon par shes pa lnga yod do/ /lha rnams la yang tshangs par spyod pa la gnas pa yod do/ /mdo sde thams cad ni drang ba'i don yin no/ /skyon med pa la 'jug par 'gyur ba ni 'dod pa'i khams nas so//'dod pa'i 'jig rten pa'i yang dag pa'i lta ba ni yod do/ /rnam par shes pa'i tshogs lnga ni 'dod chags dang bcas pa yang ma yin/ 'dod chags dang bral ba yang ma yin no zhes bya ba 'di dag ni thams cad yod par smra ba'i dam tshig go/ /yang thams cad yod par smra ba'i bye brag ni rnam par phye ste smra ba yin no//yang rnam par phye ste smra ba'i bye brag ni mang ston pa dang / chos sbas pa dang / gos dmar ba dang / 'od srungs pa zhes bya'o/ /de la mang ston pa rnams kyi rtsa ba'i dam tshig ni 'das pa dang ma 'ongs pa ni med do/ /da ltar byung ba'i 'dus byas nyid ni yod do/ /sdug bsngal mthong bas bden pa bzhi char mthong bar 'gyur ro//bag la nyal yang gzhan yin la mngon du rgyu yang gzhan yin no/ /srid pa bar ma ni med do/ /lha'i gnas na yang tshangs par spyod pa ni yod do/ /dgra bcom pa yang bsod nams bsog go/ /rnam par shes pa'i tshogs lnga la yang 'dod chags dang bcas pa dang 'dod chags dang bral ba yod do//gang zag ni mgo la sogs pa lus dang mnyam po yin no/ /rgyun du zhugs pa ni bsam gtan thob pa'o/ /so so'i skye bos kyang 'dod chags sam gnod sems spong ngo / /sangs rgyas ni dge 'dun gyi khongs su gtog pa'o/ /dge 'dun ni 'bras bu chen po 'byung bar byed kyi sangs rgyas ni de lta ma yin no//sangs rgyas dang nyan thos kyi rnam par grol ba ni gcig go/ /gang zag ni mi mthong ngo / /sems dang sems las byung ba 'ba' zhig ni skye ba'i chos cung zad tsam yang 'jig rten 'di nas 'jig rten pha rol du 'pho ba ni med pa nyid do/ /'dus byas thams cad ni skad cig ma'o//'du byed rgyas par gyur ba las ni skye ba yin no/ /'du byed rnams gnas pa ni med do/ /sems ji lta ba de ltar las yin gyi lus dang ngag gi las ni med do/ /nyams par mi 'gyur ba'i chos med do/ /mchod rten mchod pa la ni 'bras bu med do/ /da ltar byung ba rtag tu ba ni bag la nyal ba yin no//'dus byas mthong ba'i skyon med pa la 'jug par 'gyur ro zhes bya ba 'di dag ni mang ston pa rnams kyi rtsa ba'i dam tshig yin no/ /yang chos sbas pa rnams kyi rtsa ba'i dam tshig ni sangs rgyas ni dge 'dun gyi khongs su gtogs pa ma yin no/ /sangs rgyas las 'bras bu chen po 'byung ba de dag dge 'dun las ni ma yin no//lha'i gnas na yang tshangs par spyod pa ni yod do/ /'jig rten pa'i chos ni yod do zhes bya ba de dag ni chos sbas pa rnams kyi rtsa ba'i dam tshig yin no/ /de la 'od srungs pa rnams kyi dam tshig ni rnam par smin pa rnam par smin pa'i chos rnams kyang 'byung bar 'gyur ba'i chos ni yod do//spangs la yongs su ma shes pa yod do zhes bya ba dang / chos sbas pa'i thams cad kyang 'dod/ de dag ni 'od srungs pa'i dam tshig yin no/ /gos dmar ba rnams kyi dam tshig ni gang zag ni med do zhes bya'o/ /yang thams cad yod par smra ba rnams kyi bye brag slob dpon bla ma'i gzhung ston par byed pa'i 'pho bar smra ba rnams kyi rtsa ba'i dam tshig ni phung po lnga ni 'jig rten 'di nas 'jig rten pha rol du 'pho ba'o//lam ma rtogs par phung po 'gag pa med do/ /rtsa ba'i ltung ba dang bcas pa'i phung po ni yod do/ /gang zag ni don dam par mi dmigs so/ /kun kyang mi rtag go zhes bya ba de dag ni 'pho ba'i dam tshig yin te/rnam pa bdun po de lta bu dag tu thams cad yod par smra bar dam tshig dag gnas so/ /yang gnas ma'i bu'i dam tshig ni nye bar blang ba nye bar len pa dang ldan pa ni btags pa'o/ /chos gang yang 'jig rten 'di nas 'jig rten pha rol tu 'pho ba med do/ /gang zag ni phung po lnga nye bar blangs nas 'pho bar 'gyur ro//'dus byas ni skad cig ma dang skad cig ma ma yin pa yang yod do/ /gang zag ni nye bar blangs pa'i phung po nyid dang / gcig pa'am gcig pa ma yin par brjod par mi bya'o/ /mya ngan las 'das pa ni chos thams cad dang gcig pa nyid dang tha dad pa nyid du mi brjod do//mya ngan las 'das pa ni yod pa nyid dam med pa nyid du mi brjod do/ /rnam par shes pa'i tshogs lnga'i ni 'dod chags dang bcas pa yang ma yin 'dod chags dang bral ba yang ma yin no zhes bya ba ni gnas ma'i bu ba rnams kyi dam tshig nyid do/ /yang gnas ma'i bu yang rnam pa gnyis te/ ri chen po dang / mang pos bkur ba pa'o/ /de la mang pos bkur ba pa rnams kyi rtsa ba'i dam tshig ni 'byung bar 'gyur ba dang / 'byung ba dang 'gag par 'gyur ba dang / 'gag pa dang skye bar 'gyur ba dang / skye ba dang / 'chi bar 'gyur ba dang / 'chi ba dang / byed par 'gyur ba dang / byed pa dang /chad par 'gyur pa dang / chad pa dang / 'gro bar 'gyur ba dang / 'gro ba dang / rnam par shes par 'gyur ba dang / rnam par shes pa ni yod do zhes bya ba de lta bu ni mang pos bkur ba pa rnams kyi rtsa ba'i dam tshig go/ /yang ri chen po pa yang rnam pa gnyis te/ chos mchog pa dang / lam bzangs ba zhes bya ba'o//chos mchog pa rnams kyi rtsa ba'i dam tshig ni skye la ma rag pa dang / skye ba dang / 'gag pa la ma rag pa dang / 'gag pa'o/ /lam bzangs pa'i yang de bzhin no/ /grong khyer drug pa la kha cig na re ri chen po pa'i bye brag yin zer/ gzhan dag gis smras pa ni/ mang pos bkur ba pa'i bye brag yin par 'dod de/de ltar de rnams ni gnas ma'i bu'i sde pa rnam pa bzhir gnas pa yin no/ /gang de dag ni slob dpon dag gi rjes su 'brangs pa'i rim gyis rnam pa bco brgyad du gyur pa yin te/ de dag ni rtsa ba'i rtog pa dag yin no/ /gzhan nang gses kyi dbye ba ni mang du yod pas brjod par bya'o/ /ci lta zhe na/thams cad yod par smra ba rnams kyi 'dod gzhung gi bye brag kyang dbye ba rnam pa bzhi ste dngos po dang / mtshan nyid dang / gnas skabs dang / gzhan gzhan du 'gyur ba nyid kyi bye brag gis so/ /de la dang po dngos po gzhan nyid du 'gyur pa ni btsun pa chos skyob kyi ste/ de ni chos rnams dus kyis 'jug par gyur pa na/dngos po gzhan du gyur pa nyid yin gyi/ rdzas gzhan du gyur pa nyid ni ma yin te/ gser gyi snod bcom nas gzhan du byas pa na dbyibs gzhan du gyur pa nyid yin gyi rdzas gzhan du gyur pa ni ma yin no/ /ji ltar 'o ma la zhor gyur pa na/ ro dang nus pa dang smin pa gzhan du gyur pa las kha dog ni ma yin pa de bzhin du chos rnams kyang 'das pa'i dus nas da ltar gyi dus su byung ba na/'das pa'i dus kyi dngos po nyams pa yin gyi rdzas ni ma yin no/ /de bzhin du da ltar gyi dus nas ma 'ongs par 'gyur ba na yang / da ltar gyi dngos po nyams pa yin gyi rdzas kyi dngos po ni ma yin no zhes zer ro/ / mtshan nyid gzhan du gyur pa ni btsun pa dbyangs sgrogs kyi ste/ de na re chos rnams dus kyis 'jug par gyur pa na/ 'das pa'i mtshan nyid dang ldan pa ni ma 'ongs pa dang da ltar gyi mtshan nyid dang mi ldan pa yang ma yin la/ ma 'ongs pa yang ma 'ongs pa'i mtshan nyid dang ldan pa ni 'das pa dang da ltar gyi ngag dang mi ldan pa ni ma yin no//dper na skyes bu bud med gcig la chags par gyur pa na/ lhag ma rnams la chags pa dang bral ba ni ma yin no zhes zer ro/ /gnas skabs su gzhan du gyur pa ni btsun pa dbyig bshes kyi ste/ de ni chos rnams dus kyis 'jug par gyur pa na gzhan dang gzhan du rjod par byed pa ni gnas skabs gzhan du gyur pa yin gyi/rdzas gzhan du gyur pa ni ma yin te/ dper na sdong bu gcig pu bgrang ba'i tshe ni gcig ces brjod par gyur pa la/ grangs brgyar gtogs pa'i tshe ni brgya zhes bya/ / grangs stong du bgrang ba'i tshe ni stong zhes bya ba dang 'dra'o zhes zer ro/ /gzhan gzhan du gyur pa ni btsun pa sangs rgyas lha'i ste/ de ni chos rnams su dus kyis 'jug par gyur pa na sngon dang phyi ma la ltos nas gzhan dang gzhan du brjod par bya ste/ dper na bud med gcig la ma zhes kyang brjod/bu mo zhes kyang brjod pa yin no/ /bzhi po de dag ji lta ba bzhin du thams cad yod ces smra ba'i phyir thams cad yod par smra ba'o/ /de bzhin du kha cig rkyen bdun te/ rgyu dang / dmigs pa dang / de ma thag pa dang / bdag po dang / las dang / zas dang / rten zhes bya'o//de bzhin dul la ni rtogs pa'i sems bzhi ste/ bden pa so so pa'o/ /gzhan rnams ni chos shes pa dang / rjes su shes pa brgyad yin te/ so sor rtog pa'i ye shes ni ma yin no zhes zer/ gzhan rnams ni bcu gnyis su 'dod do/ /de las kyang gzhan pa rnams ni bcu drug tu 'dod do//de bzhin du sems med pa'i gnyid la ni sems ma yin no/ /mtshungs par ldan pa lhag ma rnams la ni yod do/ /'du shes dang tshor ba 'gog pa la 'du shes dang tshor ba 'gog pa ni yod do/ /lhag ma rnams la ni mtshungs par ldan pa yod do/ /ji ltar yid kyis skyo bar gyur pa ni spyod pa med pa'i bsam gtan la snyoms par 'jug la/dga' bas skyo bar gyur pa ni dga' ba med pa'i bsam gtan la snyoms par 'jug bzhin du 'du shes pa dang / tshor bas skyo bar gyur pa ni 'du shes dang tshor ba 'gog pa la snyoms par 'jug la/ de bzhin du kha cig na re sems kyis yul gyi khyad par thob pa ni mya ngan las 'das pa thob pa yin no zhes zer ro//la la na re phung po med par gyur par mya ngan las 'das pa yin gyi dngos po'i don ni ma yin zhes zer/ kha cig na re rang bzhin gyis lung du bstan du med pa ni mya ngan las 'das pa yin no zhes brjod do//de bzhin du la la na re tshad med pa rnams ni byang chub kyi yan lag yin no yang zer ro/ /kha cig na re 'bras bu che ba ni gsum ste/ gzhan gyi sems kyi 'bras bu dang / 'bras bu che ba dang / tshad med pa'i 'bras bu zhes bya ba'o/ /de bzhin du nyon mongs pa'i dbang gis 'gro bar 'gro ba na grogs su gyur pa ni las yin no//de bzhin du de spangs par gyur pa ni 'gro ba de dag tu 'gro bar mi 'gyur ro/ /yang la la na re sngar byas pa'i las rnams kyi dbang gis dang por 'gro bar 'dod do/ /kha cig ni ji ltar goms pa'i las rnams kyis yin par 'dod do//la lan re rnam pa lngas goms pas te/ snga ma bzhi dang rkyen gyi khyad par goms pas so/ /kha cig na re 'das pa'i nye bar len pa las me 'bar ro zhes zer ro/ /kha cig na re da ltar gyi las so zhes zer ro/ /kha cig na re sgrib pa lnga po rnams las gang yang rung ba la mi mthun par sems pa las so zhes zer/kha cig ni gzugs kyi khams ni khams bzhi par kha dog bzhi par 'dod do/ /gzhan ni kha dog gcig par 'dod do/ /de bzhin du gzhan dag ni gang zag ni yod do/ /de yang phung po las gzhan yin no zhes zer/ phung po tsam yang ma yin te/phung po nye bar blangs pa dang ldan par brtag pa'o/ /nye bar len pa med pa ni mya ngan las 'das pa yin pas so/ /'di ltar 'phags pa'i bden pa bzhi las rim gyis brtags nas mngon par rtogs par 'gyur te/ bar ma dor mi mthun pa'i sems 'byung ba med do/ /sdug bsngal la dmigs pa'i byang chub kyi yan lag gis skyon med par 'jug go//'dod par gtogs pa'i 'du byed mi rtag par yid la byed pa la brten pa'i sems bcu gsum gyis rgyun du zhugs pa'i 'bras bu thob par 'gyur te/ chos de la gnas pa la nyams pa med do//de bzhin du zhugs pa yang ngo / /dgra bcom pa la yang nyams pa'i chos yod do/ /srid pa bar ma do yang yod do/ /'das pa dang ma 'ongs pa yang yod do/ /gcig tu dge ba'i chos kyi don mya ngan las 'das pa ni yod do/ /phung po 'gag pa ni dus las rnam par grol ba yin no//lha la yang tshangs par spyod pa la gnas pa yod do/ /'dod pa'i khams nas skyon med pa la 'jug par 'gyur ro/ /so so'i skye bos kyang 'dod pa'i 'dod chags dang gnod sems spong ngo / /rnam par shes pa'i tshogs lnga ni 'dod chags dang bcas pa'am bral ba yang ma yin te rnam par rtog pa med pa'i phyir ro//drug pa ni 'dod chags dang bcas pa dang 'dod chags dang bral ba yang yin no/ /dgra bcom pa ni zag pa dang bcas pa'i gzugs dang sems kyis zag pa dang bcas pa dang / zag pa med pa las dmigs pa yin no/ /sems kyis yul gzhan du phyin pa ni ma yin gyi/'di na gnas bzhin du thag ring po na gnas pa la dmigs par byed do/ /gzugs med pa'i khams na gzugs med do/ /dgra bcom pa la yang nyams pa'i chos yod do/ /dus ma yin par 'chi ba yod do/ /skyes bu'i byed pa yod do/ /'jig rten pa'i yang dag pa'i lta ba yod do//phyi rol pa la yang mngon par shes pa lnga yod do/ /dgra bcom pa la gzhan gyis bstan cing bsgrub pa med do/ /mi shes pa med do/ /yid gnyis med do/ /gzhan gyi la yongs su brtag pa med do/ /ngag 'jug pa'i smra ba med do/ dbang po dang stobs dang byang chub kyi yan lag bskyed pa'i phyir ro//bcom ldan 'das kyi nyan thos rnams byang gi sgra mi snyan dang / bdud ris dang / 'du shes med pa'i sems can du skye ba ni med do/ /rgyun du zhugs pas bsam gtan rnams thob pa ma yin no/ /mdo sde thams cad ni nges pa'i don yin no/ /mtshungs par mi ldan pa'i bag la nyal dang sems las byung ba'i bag la nyal yang yod do//'dus byas ni skad cig ma dang / skad cig ma yin pa yang yod do/ /'gag par 'gyur ba'i nye bar len pa las me 'bar bar 'gyur ro/ /sems can gcig cig 'chi zhing skye bo mi shes pa'i gzhi las 'chi ba'i mthar thug gi bar du'o//'chi ba'i rkyen byed pa'i sems gcig po de nyid yang dag par zhi bar bya'o/ /tshad med pa rnams ni byang chub kyi yan lag ma yin no/ /snyoms par 'jug pa drug cu rtsa bdun grub par byas nas snyoms par 'jug pa bcu dgu dang /dbang po dang / stobs dang / byang chub kyi yan lag rnams byang chub sems dpas yang dag par sbyong bar byed do/ /kun du sbyor ba rnams ma gtogs pa nyid ni bar chad med pa'i lam gyis spang bar bya ba rnams so/ /'gro ba dang bcas pa'i lam ni nges par gnyis nyid yin no//dge sbyong gi 'bras bu ni rim gyis thob pa ma yin no/ /'jig rten pa'i lam gyis kyang lan cig phyir 'ong ba'i 'bras bu dang / phyir mi 'ong ba'i 'bras bu mngon du byed do/ /'khor ba gzhan du 'gyur ba yang yod do/ /chos cung zhig kyang 'jig rten 'di nas 'jig rten pha rol du 'gro ba med do//phung po nye bar blangs nas sems can ni 'pho bar 'gyur ro/ /gzugs kyi khams ni kha dog bzhi pa yin no/ /de bzhin du srid pa bar ma ni kha dog bcu'am nya phyis kyi mdog 'dra ba yin no/ /de bzhin du srid pa bar ma ni zhag lnga'am bdun du gnas pa'am yun ring por yang ngo //de bzhin du las ni nam yang med par mi 'gyur ro/ /nyams par mi 'gyur ro/ /'phrogs par mi 'gyur ro/ /las kyi rnam par smin pa nyams su myong bar 'gyur ba ni med do/ /srid pa ji srid kyi bar du rigs kyi ngo bo dang lhan cig tu gnas so//sngar nye bar bsags pa dang phyis nye bar bsags pa'i las kyi rkyen nye bar rnyed par gyur nas 'gro ba rnams su 'gro bar byed do/ /nges pa'i las nas bzlog par mi nus so/ /byang chub sems dpa' ni skyes bu'i gzugs kyis lhums su zhugs pa yin/ yum gyi dku nas glang po cher gyur nas zhugs pa ni ma yin te/de ni de'i rmi lam gyi rnam rtog yin no/ /nur nur po dang / mer mer po dang / ltar ltar po'i ngo bor yang 'gyur ro/ /skye gnas na yang sgrib pa med pa'i rnam par grol ba'i nus pa can du 'gyur ro/ /sangs rgyas bcom ldan 'das rnams kyi ye shes ni longs spyod pa la 'jug par 'gyur ro//so so'i skye bo nyid kyang sems gcig gis 'gog go/ /sems gcig gis sgrib pa thams cad spong / sems gcig gis thams cad mkhyen pa'i sgrib pa med pa'i rnam par thar pa yang rab tu thob bo/ /sems gcig gis zhugs pa'i chos rnams 'gag par byed cing 'bras bu la gnas pa rnams skyed par byed do//rkyen bzhi nyid kyis rkyen thams cad bsdus so/ /sdug bsngal gyis spang bar bya ba'i kun nas ldang ba la gnas pa ni mtshams med pa dag byed pa yin gyi gzhan gyis ni ma yin no/ / mthong bas spang bar bya ba'i bag la nyal bzhis bsdus pas thams cad bsdus pa ste des dge ba'i rtsa ba thams cad gcod par byed kyi bsgom pas spang bar bya bas ni ma yin no/ /bsgom pa'i rang bzhin thams cad la 'jig rten ji srid gnas kyi bar du gzhan gyis gnod par byed pa'i 'bad pas gnod par mi 'gyur gyi/bdag nyid kyi tshe zad pas dus byed par 'gyur ro/ /dgra bcom pa thams cad ni 'bral bas 'chi bar 'gyur gyi/ 'pho bas ni 'chi ba med de/ ji skad du lus dang bral bas dus byed par 'gyur te/ dgra bcom pa ni lus tha ma dang bral bas 'bral ba'i phyir ro zhes bya bar gsungs pa lta bu ste/lus ni 'dir dbang po'i lus la bya bar bzhed do/ /'byung bar 'gyur ba dang / 'byung ba dang / 'gag par 'gyur ba dang / 'gag pa dang / skye bar 'gyur ba dang / skye ba dang / 'chi bar 'gyur ba dang / 'chi ba dang / byed par 'gyur ba dang /byed pa dang / chad par 'gyur ba dang / chad pa dang / 'gro bar 'gyur ba dang / 'gro ba dang / rnam par shes par 'gyur ba dang / rnam par shes pa'o/ /phung po gsum gyis sems thams cad bsdus kyi chos thams cad ni ma yin no/ /chor ba thams cad ni las las byung ba yin no//sngar byas pa'i sgom pas spang bar bya ba'i las thams cad kyi rnam par smin par 'gyur ro zhes bya ba'i bar rnams so// //sde pa tha dad par byed pa dang rnam par bshad pa slob dpon b+ha byas mdzad pa rdzogs so// //ra sa 'phrul snang gi gtsug lag khang du dge slong legs pa'i shes rab kyis gsol ba btab nas rgya gar shar phyogs baM ga la'i mkhas pa chen po 'di paM ka ra shrI dz+nyA na zhes bya ba'i paN+Di ta'i zhal snga nas dang /bod kyi lo tsA ba dge slong tshul khrims rgyal bas bsgyur cing zhus te gtan la phab pa'o// //