CLOSE WINDOW

D4135
བོད་ཡིག

rgya gar gyi mkhan po d+harma ka ra dang / zhu chen gyi lo tsA ba ban+de dpal brtsegs kyis bsgyur cing zhus te gtan la phab pa'o// //[ ]@##/ /rgya gar skad du/ /bi na ya ka pra sh+na TI ka /bod skad du/ 'dul ba dri ba rgya cher 'grel pa/ bde bar gshegs pa seng ge mu stegs can glang po che'i tshogs 'joms pa la phyag 'tshal lo/ /shAkya seng ge ngan smra ba'i/ /rkang gnyis 'joms la phyag 'tshal nas/ /'dul ba'i dri ba bsdus pa yi/ /don tsam bdag gis bshad par bya/ /ston pa la gus pa skyes pa'i slob ma rnams ni des bstan pa'i don rnam par dpyad pa'i rab tu byed pa la yang gus pa skye bas rab tu byed par brtsams pa la rang gis ston pa rab tu byed pa'i don gsungs pa'i yon tan brjod pa sngon du 'gro ba'i phyag 'tshal ba brtsam par rgyal ba nyi ma zhes bya ba la sogs pa smos so// rgyal ba nyid mi shes pa'i mun pa sel ba'i phyir dang / ye shes kyi snang ba mdzad pa'i phyir nyi ma yin pas rgyal ba nyi ma ste/ sangs rgyas bcom ldan 'das so/ /de nyid kyi phyir the tshom gyi mun 'joms zhes bya ba smos te/ the tshom nyid mun pa ste mun nag go/ /de 'joms pa ni sel bar mdzad pa ste/dngos po dang 'brel pa'i mi shes pa drungs phyin par mdzad pa zhes bya ba'i tha tshig go/ /de la phyag 'tshal nas zhes bya ba ni byas nas so/ /rgyal ba nyi ma yon tan gyi khyad par de lta bu dang ldan pa de la phyag 'tshal nas ci zhig bya zhe na/ dri ba kun las btus pa bshad ces bya ba smos te/dri ba ste brgal zhing brtag pa rnams bsdus pa bshad do/ /ci rang gi blos byas pa'i dri ba bslang zhing bslangs nas bshad dam zhe na/ 'dul ba las btus te zhes bya ba smos te/ 'dul ba ni 'dul ba'i sde snod las btus te/ 'dis slob ma rnams 'dul zhing rjes su ston pa'i phyir ro/ / bya ba dang bya ba ma yin pa nye bar ston pa gzhung gi tshad 'bum pa'i khyad par ro zhes bya ba'i tha tshig ste de las so/ /chos mngon pa'i dri ba'i tshig le'ur byas pa dag kyang yod pas de'i phyir 'dul ba zhes bya ba smos so/ /btus te zhes bya ba ni pha ki tshu ki sil bur 'dug pa las btus pa ste/'dis ni rang gi tshig le'ur byas pa byed pa gzhan la rag las par rab tu ston to/ /ji ltar btus te bshad ce na/ legs zhes bya ba smos so/ /legs pa ni phyin ci ma log pa ste/ bdag gis 'di dag ji ltar 'phags pa nye ba 'khor gyis zhus pa byas pa rnams bcom ldan 'das kyis lan btab pa/de bzhin du bsdus kyi/ rang gi blos dpags te ma yin no snyam du bsams pa yin no/ /mkhas pa rnams ni don med pa'i rab tu byed pa mi byed pas ci'i phyir bshad ce na/ gang zhig gis zhes bya ba la sogs pa smos te/ gang zhig ces bya ba ni 'dul ba la sdang ba ste/ming ma smos pa'i 'dul ba las ni 'di bya'o/ /'di mi bya'o zhes bya ba ni 'di tsam zhig yongs su shes par 'gyur gyi/ 'di las phung po dang / khams dang / skye mched dang / rten cing 'brel bar 'byung ba la sogs pa'i tshig gi don dang 'brel ba'i rnam par dpyod pa yang mi byed la/'dis de dag yongs su shes par yang mi 'gyur bas rig byed bzhin du blun por byed pa'i ngo bo'i bstan bcos skam thag chad pa 'di rtogs pa ni don med do zhes bya ba de lta bu la sogs pas brnyas pa ste/ tshig gi don ni 'dul ba'i lnga tshan gyi yon tan ma thos pas bla ma'i rigs ma bsten pa/ngan song gsum gyi g.yang sar ltung ba la gcig tu gzhol ba/ bde 'gro gnyis las phyir phyogs pa/ zhi ba'i rgyun gyi gnas skabs thag bsrings pa dang ji ltar bris pa'i bstan bcos gcig tsam rtogs pas bstan bcos thams cad khong du chud pas 'dres par dam bca' ba/bdag nyid bstod pa'i nyes pa ma mthong ba/ 'dul ba la sogs pa'i bstan bcos rtogs pas blo gsal ba/ rno ba dri ma med pa/ rnam par dag par 'gyur ba spong bar byed pa'i ched du 'di brtsams so zhes bya ba yin no/ /de la brnyas pa ni ma gus pa'am smod pa'o//de la rig pa zhes bya ba ni 'dul ba shes pa ste 'dul ba 'dzin pa zhes bya ba'i tha tshig go/ /rnam smod ni rnam par smod pa'o/ /snyems pa ni dregs pa'am nga rgyal lo/ /'chang ba ni bsrel ba'o/ /de'i ched du zhes bya ba ni 'dul ba 'dzin pa la rnam par smod pa'i ched du'o//'di zhes bya ba ni 'dul ba'i dri ba bsdus pa sems la gzhag pa'o/ /brjod do zhes bya ba ni bsnyad pa ste/ phyi rol du ston to zhes bya ba'i tha tshig go/ /kha cig zhe sdang gis 'dul ba shes pa kho na la rnam par smod par byed kyi/ 'dul ba la ni ma yin pas 'dul ba las zhes bya ba smos so//la la ni 'di gnyis la smod par byed kyi nga rgyal gyis khong gang ba'i sems kyis bdag nyid khengs pa ma yin pas de'i phyir yang zhes bya ba'i sgras de la yod pa'i snyems pa bsdu'o/ /dri ba kun las btus pa bshad do zhes dam bcas pa gang gi don du 'di brtsams pa de brjod dgos pas//sems can mi'i 'gro ba yin zhes bya ba la sogs pa smos te/ sems can gyi sems pa phun sum tshogs pa'i phyir sems dang sems las byung ba'i rgyud ma nyams pa ste/ tha snyad pa'i blo ma nyams pa zhes bya ba'i don to/ /sems can zhes smos pas ni smyon pa la sogs pa bkag go//mi'i 'gro ba ni mi'i 'gro bar skyes pa ste/ mi'i 'gro ba zhes smos pas ni mi'i 'gro ba ma yin pa bsal to/ /bar chad rnams kyang bsal ba la zhes bya ba ni ma bsad pa dang pha bsad pa nyid la sogs pa sdom pa skye ba'i gegs byed pa rnams med pa'o//sdom pa ni dge tshul la sogs pa'i ngo bo ste/ 'chal pa'i tshul khrims kyi rgyun 'gog par byed pa'o/ /mi 'chags pa ni mi skye ba'o/ /gsungs pa ni bcom ldan 'das kyi 'dul ba las so/ /ji lta bu yin zhes bya ba ni rnam pa gang gis so//bsgrims te zhes bya ba ni 'bod de zhes bya ba ste/ de bzhin du 'og ma dag la yang shes par bya'o/ /'di la 'dri ba'i bsam pa ni mi'i 'gro ba yang yin la/ smyon pa la sogs pa bar chad kyi chos dang yang bral ba gang yin pa de la sdom pa skye ba ko the tshom yang med pa kho na yin na/ 'on kyang bcom ldan 'das kyis kha cig las 'di la sdom pa skye ba med pa nyid du gsungs pa de 'di la sdom pa skye ba'i gegs ji lta bu zhig yod par gsungs pa khyod kyis 'bod de kho bo la smros shig ces bya ba 'di yin no/ /'di la lan ni 'di yin te/ byang gi sgra mi snyan pa'i mi'i dbang du mdzad nas de skad gsungs pa yin no//de bzhin du 'dir gzhung ni/ btsun pa re zhig dge slong rnams kyis byang gi sgra mi snyan pa'i gang zag gcig bsnyen par rdzogs par bgyid na bsnyen par rdzogs pa zhes bgyi'am/ ma rdzogs pa zhes bgyi/ nye ba 'khor bsnyen par ma rdzogs pa'o zhes bya ba yin no//gal te byang gi sgra mi snyan pa yang bar chad yin no zhe na ma yin te/ bkol ba chad pa yan chad yin no/ /'di la skye ba'i chos nyid med par 'dra'o/ /de lta bu'i rtags can ni bsnyil bar bya ba 'dir bar chad kyi chos kyi nang du ma bstan pa'i phyir ro/ /de bzhin du 'og ma dag la'ang ci rigs par shes par bya'o//rnam pa gcig tu na mkhan po dge slong ma yin pa nyid du shes pa la dgongs nas de skad gsungs pa yin te/ de bzhin du 'dir gzhung ni/ mkhan po rku thabs su gnas pa zhig gis bsnyen par rdzogs par 'tshal ba bsnyen par rdzogs par bgyid na bsnyen bar rdzogs pa zhes bgyi'am bsnyen par ma rdzogs pa zhes bgyi/bka' stsal pa/ gal te bdag gi mkhan po rku thabs su gnas pa yin no zhes bya bar shes na bsnyen par ma rdzogs pa zhes bya'o/ /gal te mi shes na bsnyen par rdzogs pa zhes bya'o zhes bya ba yin no/ / rnam pa gcig tu na mkhan po spong ba la dgongs nas de skad gsungs te/ de bzhin du 'dir gzhung ni/ bsnyen par rdzogs par bgyid pa'i tshe mkhan po spong bar bgyid na bsnyen par rdzogs pa zhes bgyi'am/ bsnyen par ma rdzogs pa zhes bgyi/ bka' stsal pa/ bsnyen par ma rdzogs pa zhes bya'o zhes bya ba yin no//rnam pa gcig tu na bsnyen par rdzogs par bya ba dang mkhan po dag gi ming ma smos pa la dgongs nas de skad gsungs pa yin te/ de bzhin du 'dir gzhung ni/ gang zag gsum ni bsnyen par ma rdzogs pa yin te/ bdag gi ming nas mi brjod pa dang /mkhan po'i ming nas mi brjod pa dang / bsnyen par rdzogs par mi shes pa'o/ /de bzhin du las byed pas mkhan po dang bsnyen par rdzogs par 'dod pa dang / dge 'dun te gsum gyi ming mi sgrogs na zhes bya ba la sogs pa gsungs pa yin no/ /yang na 'di ni khyim pa'am mu stegs can gyi rgyal mtshan 'chang ba'am gcer bu pa'am 'khrug pa la dgongs nas gsungs pa yin te/'di la bdag gi lung gi khungs ni ma rnyed do/ /mdo byed pa la brten nas smras pa yin par blta bar bya ste/ de bzhin du 'di la mdo byed pas bshad pa ni khyim pa dang mu stegs can gyi rgyal mtshan can la'ang mi skye'o//sgren mo dang 'khrug pa dang mtshan dug ma dag la yang mi skye'o zhes bya ba yin no/ /snga ma la yang mdo byed pas bshad pa ni mi ma yin pa'i 'gro ba pa dang byang gi sgra mi snyan pa gnyis ni sdom pa'i zhing nyid ma yin no/ /de dge slong nyid ma yin par shes na mi skye'o//de'i phyir spong ba la yang mi skye'o/ /de gnyis kyi ming ma brjod na yang mi skye'o/ /dge 'dun gyi na yang de'i skye gnas kyi mi skye'o zhes bya ba yin no/ /pha dang ma ni pha ma'o/ /ched du bsams pa ni blo sngon du btang ba'o/ /ched du bsams pa zhes smos pa ni ched du bsams pa ma yin pa de dgag pa'i phyir te/'di ltar ched du ma bsams par grub pa ni byed pa po nyid ma yin no zhes 'byung bas ched du bsams pa ma yin par de dag bsad pa la mtshams med pa ldang bar ma gsungs pa'i phyir ro/ /gsod pa ni gsod par byed pa'o//dge slong ma ni sun phyung dang / /zhes bya ba ni dge slong ma ma rung bar byed pa'o/ /dge 'dun dbyen byed pa ni dge 'dun ston pa dang lam gzhan la 'dod pa skyed pa'i sgo nas rnam gnyis su byed pa'i phyir te/ ston dang lam gzhan la bzod pa/ /dbye ba'o zhes 'byung ba'i phyir ro//sdom pa'i ched du zhes bya ba ni sdom pa skye ba'i snod nyid du'o/ /'di la 'dri ba'i bsam pa ni ma gsod pa dang / pha gsod pa dang / dge slong ma sun dbyung ba dang / dge 'dun gyi dbyen byed pa ni 'di ltar mtshams med pa la sogs pa byed pa yin pa'i phyir bcom ldan 'das kyis sdom pa skye ba 'byung bar mi rung ba nyid du gsungs la/'on kyang rnam pa gzhan 'ga' zhig gis sdom pa skye bar 'os pa nyid du yang gsungs pas de lta bu yin pa kho bo la smros shig bya ba 'di yin no/ /ma bsad pa dang / pha bsad pa dang / dge slong ma sun phyung ba dang /dge 'dun gyi dbyen byed pa 'di dag ni dgra bcom pa bsad pa dang / de bzhin gshegs pa la ngan sems kyis khrag 'byin pa dag gi dpe tsam du zad do/ /'di la lan ni 'di yin te/ gzhan gyi 'du shes kyis bsad pa la sogs pa la dgongs nas de skad gsungs pa yin no//de bzhin du 'dir gzhung ni/ btsun pa re zhig dge slong rnams kyis ma bkums pa'i gang zag gcig bsnyen par rdzogs par bgyid na bsnyen par rdzogs pa zhes bgyi'am/ bsnyen par ma rdzogs pa zhes bgyi/ nye ba 'khor kha cig ni bsnyen par rdzogs pa zhes bya la/ kha cig ni bsnyen par ma rdzogs pa zhes bya ste/gang zhig gis gzhan gyi 'du shes sam/ gzhan gyis sbyor bas ma bsad na 'di ni bsnyen par rdzogs pa zhes bya bas bsnyen par rdzogs nas kyang bsnyil bar mi bya'o/ /gang zhig gis ched du bsams te ma bsad par gyur na 'di ni bsnyen par ma rdzogs pa zhes bya bas bsnyen par rdzogs nas kyang bsnyil bar bya'o//ma bsad pa ji lta bar pha bsad pa dang / dgra bcom pa bsad pa yang de dang 'dra'o zhes bya ba yin no/ /rnam pa gcig tu na pha dang ma dud 'gro'i skye gnas su gtogs pa la dgongs nas de skad gsungs pa yin te/ de bzhin du 'dir gzhung ni/btsun pa dge slong gis pha dang ma dag bkums la mthar yang mi 'gyur/ mtshams ma mchis pa'i kha na ma tho bas reg par yang mi 'gyur ba lta mchis sam/ yod de/ gang gi pha dang ma dud 'gro'i skye gnas su gtogs pa dag yin na'o zhes bya ba yin no/ /rnam pa gcig tu na skyed par byed pa ma yin pa'i pha dang ma la dgongs nas de skad gsungs pa yin te/de bzhin du 'dir gzhung ni/ btsun pa re zhig mas ni bskyed la gzhan gyis ni gsos pas gang zhig bkums pas mthar 'gyur zhing mtshams ma mchis pa'i kha na ma tho bas kyang reg par 'gyur ba lags/gang gis bskyed pa'o zhes bya ba yin no/ /de nyid kyi phyir mdo byed pas mi ma yin pa'i 'gro ba pa gnyis ni ma yin no/ /de gnyis las mtshams med par mi 'gyur ro/ /de ni skyed par byed pa gnyis las de yin no/ /ma bsad pa la sogs pa de byas pa de nyid gtso bo zhes bshad do//rnam pa gcig tu nam la yod pa'i nur nur po zags pa de gzhan gyi mngal du blugs pa las skyes pa'i ma bsad pa la dgongs nas de skad gsungs pa yin te/ de bzhin du gang las khrag ni byung ba ma zhes bshad do/ /yang na zag pa dang bcas pa'i las kyi srid pa dang sred pa bsad pa la dgongs nas de skad gsungs pa yin te/de bzhin du 'dir gzhung ni/ btsun pa dge slong gis pha bkums la mthar yang mi 'gyur/ mtshams ma mchis pa'i kha na ma tho bas reg par mi 'gyur ba lta mchis lags sam/ yod de/ zag pa dang bcas pa'i las kyi srid pa bsad na'o//nye ba 'khor zag pa dang bcas pa'i las kyi srid pa ni mngon par sgrub pa'i don gyis pha zhes bya'o/ /btsun pa dge slong gis ma bkums la mthar yang mi 'gyur/ mtshams ma mchis pa'i kha na ma tho bas reg par yang mi 'gyur ba lta mchis lags sam/ yod de/ gal te sred pa bsad na'o//nye ba 'khor sred pa ni skyed pa'i don gyis ma zhes bya ba yin no/ /de nyid kyi phyir/ mi ni sred pas skyed par byed/ /'di yi sems ni rnam par rgyug /sems can 'khor bar gtogs pa ste/ /de yi las ni 'jigs pa che/ /zhes gsungs so//de nyid la dgongs nas/ pha dang ma ni bsad byas shing / /rgyal po gtsang sbra can gnyis dang / /yul 'khor 'khor dang bcas bcom na/ /mi de dag par 'gyur zhes bshad/ /ces gsungs so/ /de bzhin du dge slong ma sun phyung ba la sogs pa'i gzhung yang 'di yin te/ btsun pa re zhig dge slong rnams kyis dge slong ma sun phyung ba zhig bsnyen par rdzogs par bgyid na/bsnyen par rdzogs pa zhes bgyi'am/ bsnyen par ma rdzogs pa zhes bgyi/ nye ba 'khor kha cig ni bsnyen par rdzogs pa zhes bya la/ kha cig ni bsnyen par ma rdzogs pa zhes bya ste/ gang gis mi tshangs par spyod pas dge slong ma sun phyung ba de ni bsnyen par ma rdzogs pa zhes bya bas bsnyen par rdzogs na yang bsnyil bar bya'o//gang gis lus kyis reg pas dge slong ma sun phyung ba de ni bsnyen par rdzogs pa zhes bya bas bsnyen par rdzogs nas kyang bsnyil bar mi bya'o zhes bya ba yin no//yang na nyams su myong ba med pa'i dge slong ma sun phyung ba'i dbang du mdzad nas gsungs pa yin te/ de bzhin du 'dir gzhung ni/ btsun pa ji tsam gyis na dge slong ma sun phyung ba zhes bgyi/ gang gis mi tshangs par spyod pas dge slong ma 'dun pas sun phyung bar gyur na'o zhes bya ba yin no//de nyid kyi phyir mdo byed pas pham par 'gyur ba ma byung ba nyid la mi tshangs par spyod pas nyams su myong ba dag sun phyung ba nyid yin no zhes bshad do/ /shugs kyis na nyams su myong ba med par sun phyung ba ni dge slong ma sun phyung ba nyid ma yin no zhes blta bar bya'o/ /yang na so so nas gzhi brgyad kyis dge slong ma sun phyung ba nyid la dgongs nas de skad gsungs pa yin te/de bzhin du 'dir gzhung ni/ btsun pa re zhig gang zag brgyad kyis so so nas gzhi brgyad kyis dge slong ma sun 'byin par bgyid na dge slong de sun phyung ba zhes bgyi'am/ nye ba 'khor sun phyung ba zhes bya'o//de la gang zhig dge slong ma sun phyung ba zhes bgyi/ bka' stsal pa/ gang yang ma yin no/ /btsun pa dge slong rnams kyis de bzhin gshegs pa la ngan sems kyis khrag phyung ba zhig bsnyen par rdzogs par bgyid na bsnyen par rdzogs ba zhes bgyi'am/ bsnyen par ma rdzogs pa zhes bgyi/nye ba 'khor kha cig ni bsnyen par rdzogs pa zhes bya la/ kha cig ni bsnyen par ma rdzogs pa zhes bya ste/ gang gis de bzhin gshegs pa la ched du bsams te ngan sems kyis khrag phyung bar gyur pa de ni bsnyen par ma rdzogs pa zhes bya bas bsnyen par rdzogs na yang bsnyil bar bya'o//gang gis de bzhin gshegs pa la ched du ma bsams par ngan sems kyis khrag phyung bar gyur pa de ni bsnyen par rdzogs pa zhes bya bas bsnyen par rdzogs nas kyang bsnyil bar mi bya'o zhes bya ba yin no/ /'di nyid la dgongs nas/ sangs rgyas bkrongs par mi 'dod pa'i/ / mtshams med ma yin zhes bshad do/ /btsun pa re zhig gang zag dge 'dun gyi dbyen bgyis pa zhig bslab pa phul nas babs par gyur la/ de slar yang legs par gsungs pa'i chos 'dul ba la rab tu 'byung zhing bsnyen par rdzogs pa dge slong gi dngos po 'tshal la/ de dge slong rnams kyis bsnyen par rdzogs par bgyid na bsnyen par rdzogs pa zhes bgyi'am/bsnyen par ma rdzogs pa zhes bgyi/ nye ba 'khor kha cig ni bsnyen par rdzogs pa zhes bya la/ kha cig ni bsnyen par ma rdzogs pa zhes bya ste/ gang gis chos ma yin pa la chos ma yin par 'du shes pa dang / dbye ba la chos ma yin par 'du shes pas dge 'dun phye bar gyur pa de ni bsnyen par ma rdzogs pa zhes bya bas bsnyen par rdzogs nas kyang bsnyil bar bya'o/ /gang gis chos ma yin pa la chos su 'du shes pas dge 'dun phye bar gyur pa de ni bsnyen par rdzogs pa zhes bya bas bsnyen par rdzogs nas kyang bsnyil bar mi bya'o//yang na las kyi dbyen gyis bdag nyid kyis dge 'dun gyi dbyen la dgongs te de skad gsungs pa yin te/ de bzhin du 'dir gzhung ni/ kau shAm bI'i dge 'dun sus phye/ chos ma yin pa smra ba dag gis te/ mtshams kyi nang na mtshungs par gnas pa las ma 'dres pa'i chos gso sbyong bgyis so zhes bya ba yin no//yang na bzhad gad kyi bsam pa la dgongs nas de skad gsungs pa yin no/ /de bzhin du 'dir gzhung ni/ gang zhig de ltar ku re'i bsam pas rjes su sgrogs sam tshul shing 'brim par bgyi na dge 'dun bye zhes bgyi'am/nye ba 'khor ma yin no/ /las bgyid pa la ji ltar 'gyur lags/ dbyen gyi nyer bsdogs kyi ni nyes pa sbom por 'gyur ro zhes bya ba yin no/ /yang na dge 'dun du ma gyur pa la dgongs nas de skad gsungs pa yin te/ de bzhin du 'dir gzhung ni/lnga pa spangs pa yin na dge 'dun ma bye'o zhes brjod par bya'o/ /dgu pa rku thabs su gnas pa zhig gis dge 'dun phye na dge 'dun ma bye'o zhes brjod par bya'o/ /mtshan gnyis pa zhig gis tshul shing brims sam rjes su sgrogs par bgyid na ci dge 'dun bye ba zhes bgyi'am ma bye ba zhes bgyi/bka' stsal pa/ ma bye ba zhes bya ba yin no/ /yang na ma 'ongs pa la dgongs nas gsungs pa yin te/ de bzhin du 'dir gzhung ni/ btsun pa za mas tshul shing brim zhing las dag bgyir dbang lags sam/ nye ba 'khor mi dbang ngo / /de bzhin du ma ning dang / dge slong ma sun phyung ba dang / ma bkums pa dang / pha bkums pa dang / dgra bcom pa bkums pa dang / mu stegs can zhugs pa dang / rku thabs su gnas pa dang / tha dad du gnas pas tshul shing brim zhing las dag bgyir dbang lags sam/ nye ba 'khor mi dbang ngo zhes bya ba yin no//de bzhin du 'dir mdo byed pas kyang / chos dang chos ma yin pa gnyi ga la de bzhin du shes na mtshams med pa'o/ /dbye ba la chos su 'du shes pas kyang ngo zhes bshad do/ /'di la 'grel pa byed pas kyang / chos ma yin pa la yang chos ma yin pa nyid du/ chos la yang chos nyid kho nar shes shing dge 'dun gyi dbyen byed na mtshams med pa'i kha na ma tho ba dang ldan gyi/chos ma yin pa la chos su 'du shes pa dang / chos la chos ma yin par 'du shes pa la ni ma yin te/ de la bsam pa log par zhugs pa med pa'i phyir ro zhes bya ba la sogs pa bshad do/ de bzhin du chos ma yin pa smra ba dag gis dbye ba'i sems kyis mtshams kyi nang du las tha dad par byas na de dbye ba yin no/ /bzhad gad kyi dngos pos ni gang gir yang mi 'gyur ro/ /mi 'chags pa'i blos dbyen byed pa dang gnas nas 'byin pa dag la ni sbom po'o/ /dge 'dun du ma gyur pa nyid na nyes byas so//dbyen rjes su sgrub pa ni gsol ba dang 'dra'o/ /gang kha skong bar mi 'os pa de mdung dor bar yang ngo / /dge 'dun gyi dbyen la yang 'os pa ma yin pas tshul shing dag 'brim pa mi 'chags so/ /dbye bar byed pa dag dge 'dun gyi tshad ma yin pa dang / mtshams kyi nang na gzhan dge 'dun gyi tshad dag kyang med pa nyid yin na de mi 'chags so zhes bshad do//de nyid la dgongs nas/ dge slong lta spyad tshul ldan pas/ /'byed do gzhan du'o byis pa rnams/ /ston dang lam gzhan la bzod pa/ /bye ba'o de ni mi gnas so/ /de ni 'khor lo'i dbyen du 'dod//'dzam bu'i gling du'o dgu sogs kyis/ /bshad do/ /sngon du phas pham 'gyur byas la/ /zhes bya ba la sogs pa la sngon phas pham par 'gyur bar byas pa ni sngon bsnyen par rdzogs pa'i tshe phas pham par 'gyur ba byed pa'i ngang tshul can ni sngon phas pham par 'gyur ba byas pa ste sngon pham pa byung ba zhes bya ba'i tshig go//de la phas pham par 'gyur ba ni phas pham pa ste/ dge slong gi dngos po dang de'i 'bras bu 'phags pa'i lam las ltung ba zhes bya ba'i tha tshig go/ /phas pham pa las 'byung ba'i ltung ba ni phas pham par 'gyur ba ste de byed pas de skad ces bya'o//dge slong rnams la bsnyen par rdzogs pa gsol ba zhes bya ba ni dge slong gi dge 'dun la bsnyen par rdzogs pa'i don du gnyer ba ste/ dge 'dun las bsnyen par rdzogs par bya'o zhes 'byung bas bsnyen par rdzogs pa ni dge 'dun la rag las pa'i phyir ro/ / dge slong zhes smos pa ni dge slong ma bsal ba'i phyir te/ 'di ltar 'dir dge 'dun gyis bsnan par bya'o zhes 'byung bas dge slong ma rnams kyi bsnyen par rdzogs pa yang dge slong gi dge 'dun la rag las pa kho na yin no/ /rab bsgrims te zhes bya ba ni bsam pa thag pa nas te/ mya ngan las 'das pa'i bsam pas zhes bya ba'i don to//rab tu bsgrims pa smos pa ni 'jigs skyob kyi bsam pas sdom pa len pa skye ba gang yin pa de bsal ba'i phyir te/ mya ngan las 'das pa'i bsam pa brtan po med par sdom pa skye ba med do zhes 'byung ba'i phyir ro//de la zhes bya ba ni sngon phas pham par 'gyur ba byas pa la'o/ /'chags pa ni skye ba ste don gyi dbang gis na bsnyen par rdzogs par gzung ngo / /'di la 'dri ba'i bsam pa ni sngon pham pa byung ba la bcom ldan 'das kyis bsnyen par rdzogs pa dge slong gi dngos po bkag go zhes 'byung ba 'di ni legs par shes na/'on kyang bcom ldan 'das kyis rnam grangs 'ga' zhig gis 'di bsnyen par rdzogs par gnang ngo zhes bya ba 'di lta bu yin la/ kho bo'i the tshom de sol cig bya ba 'di yin no/ /'di la gtan la dbab pa 'di yin te/ dge slong ma thun mong ma yin pa'i pham par 'gyur ba byas pa bslab pa phul nas mtshan gyur pa la dgongs nas de skad gsungs pa yin te/de bzhin du 'dir gzhung ni/ btsun pa bcom ldan 'das kyis sngar pham pa byung ba rab tu dbyung bar mi bya zhing bsnyen par rdzogs par mi bya'o zhes bka' stsal pa gang lags pa/ btsun pa dge slong rnams kyis sngar pham pa byung ba zhig rab tu 'byin par bgyid cing bsnyen par rdzogs par bgyid na bsnyen par rdzogs pa zhes kyang bgyi/ ltung bar yang mi 'gyur ba lta mchis lags sam/ bcom ldan 'das kyis bka' stsal pa/ yod de/ 'di ltar dge slong ma zhig gis thun mong ma yin pa'i phas pham par 'gyur ba'i ltung ba spyad la de bslab pa phul nas babs pa dang de mtshan gyur te phor red pa dang rab tu 'byin cing bsnyen par rdzogs par byed na ltung ba med do zhes bya ba yin no//de bzhin du 'dir mdo byed pas kyang / bud med bslab pa phul nas skyes pa nyid du gyur pa ni rab tu 'byung ba dang bsnyen par rdzogs par rung ba nyid do//pham par 'gyur ba thun mong ma yin pa lhag par spyad pa can yang ngo zhes bshad do/ /bsam pa thag pas zhes bya ba la sogs pa la bsam pa thag pa zhes bya ba ni snying thag pa nas te/ mi lta ba'i sems kyis yin gyi tshig tsam gyis ni ma yin no zhes bya ba'i tha tshig go//dkon mchog gsum ni sangs rgyas dang / /chos dang dge 'dun zhes bya ba rin po che dang 'dra bar rnyed dka' ba'i phyir dang / rin thang med pa'i phyir dang / phan pa dpag tu med pa mdzad pa'i phyir dkon mchog go/ /de phyir spong bar byed pa la ste/phyir spong ba ni 'dor ba yin pas bdag la 'dir mi dgos so zhes de skad spong ba'o zhes bya ba'i don to/ /med par mi 'gyur ba ni 'bral bar mi 'gyur ba ste nyams par mi 'gyur ba zhes bya ba'i tha tshig go/ /lan ni lan gdab pa'o/ /rjod cig ces bya ba ni smros shig pa'o//'di la pha rol po'i bsam pa ni 'ga' zhig sangs rgyas sam chos sam dge 'dun spong bar byed cing de ltar bsam pa thag pa nas dkon mchog gsum yongs su spong bar byed pa gang yin pa des the tshom med pa kho nar phyir spangs pa la yin no zhes bya ba 'di ni de ltar bstan pa la zhugs pa bde bar gshegs pa thams cad kyis bde blag tu go na/'on kyang bcom ldan 'das kyis de phyir spangs par ma gsungs so zhes bya ba kho bo'i sems the tshom gyi 'phyang thag la 'ju ba yun ring po nas bsdogs pa g.yo ba 'di lan legs pa zhig gis rnal du phob shig ces bya ba 'di yin no//'di la lan ni 'di yin te/ rten nam thar pa'i tshul gzhan la dgongs nas de skad du gsungs pa yin te/ 'di ltar gzhan mu stegs can las rab tu byung ba'i dge slong ma nag mos dge slong ma dag dang lhan cig thab mo byung ba dang / sangs rgyas spong ngo //chos dang dge 'dun spong ngo ci shAkya'i bu'i dge slong dag kho na tshul khrims dang ldan pa dang / yon tan dang ldan pa dang / des pa dang dge ba'i chos can yin nam/ dge slong gzhan dag kyang tshul khrims dang ldan pa dang / yon tan dang ldan pa dang / des pa dang dge ba'i chos can dag yod kyis bdag gis de dag gi thad du tshangs par spyad pa spyod do zhes bya ba la sogs pa smras so//de'i tshe bcom ldan 'das kyis chos 'di ni de'i ltung ba dang po ste/ nges par 'byung ba yin no zhes bya ba la sogs pa bka' stsal pas de la dge 'dun gyi lhag mar 'gyur bar gsungs so//de bzhin du 'grel pa byed pas kyang rten nam thar pa'i tshul gzhan yod de/ 'di ni rten nam thar pa'i tshul ma yin no snyam pa'i bsam pa 'dis phyir spang na ni spangs par mi 'gyur ro/ /de lta bu cung zad yod do zhe'am/ de lta bu cung zad kyang med do zhe'am/de lta bu yod kyang rung med kyang rung ste/ re zhig bdag la ni de dgos so zhes bya ba'am/ thar pa'i tshul med pa nyid do/ tshul de yod kyang rung med kyang rung re zhig bdag la ni de mi dgos so zhes bya ba de lta bu dag tu rnam par mi rtog na ni phyir spangs pa yin no zhes bshad do//yang na nyams pa'i bsam pa'i dbang du mdzad nas de skad du bshad de/ de bzhin du zhu ba'i gzhung kha cig las/ btsun pa dge slong la khyod su yin zhes dris pa las/ nga dge sbyong ma yin no zhes smras na bslab pa phul ba zhes bgyi'am/ nye ba 'khor ma yin no/ /cir 'gyur lags/shes bzhin du brdzun smras pas ltung byed du'o/ /de bzhin du dge tshul ma'o zhes bgyi ba dang / dge slong ma'o zhes bgyi ba dang / khyim na gnas pa'o zhes bgyi ba dang / kun du rgyu'o zhes bgyi ba dang / gzhan mu stegs can no zhes bgyi ba dang / klu'o/ /gnod sbyin no//dri za'o/ /mi 'am ci'o/ /yi dwags so/ /sha za'o/ /grul bum mo zhes bgyis na thams cad du bslab pa phul ba zhes bgyi'am/ nye ba 'khor ma yin te/ 'on kyang shes bzhin du brdzun smras pas ltung byed du 'gyur ro zhes bshad do/ /de bzhin du rnam par 'byed pa las kyang nyams pa'i bsam pa kho nas spangs pa yin par gsungs pa yin te/'di skad du 'di ltar dge slong dga' bar gyur kyang rung / mi dga' yang rung / babs par 'dod kyang rung / dge slong don du mi gnyer ba yang rung / dge sbyong gis gnong zhing ngo tsha nas smod par byed/ rnam par smod par byed cing dge slong gi drung du song ste 'di skad ces/tshe dang ldan pa dgongs shig /bdag ming 'di zhes bya ba bslab pa 'bul lo zhes smras na zhes bya ba la sogs pa 'byung ngo / /nag mos phyir spangs pa bshad ma thag pa yang 'dir sbyar bar bya ste/ de bzhin du 'grel pa byed pas kyang /'di la ni nyams pa'i bsam pa dgos so zhes bya ba la sogs pa bshad do/ /sngon du zhes bya ba la sogs pa la sngon du zhes bya ba ni mi tshangs par spyod pa spyad pa'i sngon rol du ste/ sngon du smos pa ni de las gzhan pa'i bar chad kyi chos med pa bstan pa yin no/ /las kyi cho ga yis zhes bya ba la sogs pa la las ni gsol ba dang bzhi'i las kyis so//cho gas zhes bya ba ni yang dag pa'i cho gas te/ dge 'dun du tshang ba dang / las byed pa dge slong nyid yin pa dang / nyan pa po rnams gor btub pa nyid ces bya ba la sogs pa chos bzhin du zhes bya ba'i don to//cho ga smos pa ni las legs par ma byas pa bsal ba'i phyir ro/ /legs par zhes bya ba ni bsam pa thag pa nas te mya ngan las 'das pa'i bsam pa can la dge slong gi sdom pa skye ba'i phyir mya ngan las 'das pa'i bsam pas zhes bya ba'i tha tshig go/ /bsnyen par rdzogs par byas te zhes bya ba ni dge slong gi dngos po bsgrub pas te dge slong gi sdom pa skyes pa'o zhes bya ba'i don to//'khrig 'byung zhes bya ba la 'khrig pa ni zung ste pho dang mo zhes bya ba yin no/ /de las byung ba ni 'khrig 'byung ste/ nyon mongs pa can gyi bde ba spyod pa yin te/ bcug pa'i reg pa bdag gir byed pa'i mtshan nyid ces bya ba'i tha tshig go//phyis zhes bya ba ni 'khrig pa spyod pa'i 'og rol du'o/ /ci'i phyir zhes bya ba ni rgyu gang gi phyir ro/ /dge slong min zhes bya ba ni phas pham par 'gyur bar byed pa'o/ /mi 'dod ces bya ba ni mi 'gyur ba'o/ /'di la 'dri ba'i don ni gang zhig yang dag pa'i cho gas legs par bsnyen par rdzogs shing dge slong gi sdom pa skye ba la phyis mi tshangs par spyod pa 'khrig pa bsten pa de dag go//'di ltar phas pham par 'gyur ba spyad pas dge slong ma yin par 'gyur ro zhes bya ba the tshom yang med pa nyid de/ 'di ni legs par shes na/ 'on kyang bcom ldan 'das kyis rnam grangs 'ga' zhig gis 'di dge slong nyid du gsungs pa de rgyu gang gis yin pa kho bo la smros shig ces bya ba yin no/ /'di la lan ni 'di yin te/ las dang po ba la dgongs nas gsungs pa'am/ yang na smyon pa la bsten pa'am/yang na sems 'khrugs pa la dgongs pa'am/ yang na tshor bas nyen pa'i dbang du mdzad nas de skad du gsungs pa yin te/ de bzhin du 'dir gzhung ni/ las dang po pa dang / smyos pa dang / sems 'khrugs pa dang / tshor bas nyen pa la nyes pa med do zhes bya ba yin no//rnam pa gcig tu na 'di ni bslab pa byin pa la dgongs nas gsungs pa yin te/ 'di ltar bslab pa byin pa ste phas pham par 'gyur ba spyad pa yin yang dge slong nyid de'i so na 'dug pa kho na ste/ 'di ltar de la yang phas pham par 'gyur ba dang dge 'dun lhag ma la sogs pa'i ltung ba rnams rnam par gzhag pa'i phyir ro//de bzhin du 'dir gzhung ni/ dge slong la mi tshangs par spyod pa'i rkyen gyis mthar 'gyur ba de bzhin du bslab pa byin pa dang / dge slong ma la yang mthar 'gyur te zhes bya ba la sogs pa ltung ba'i rigs lnga ci rigs par brjod par bya ba yin no//de bzhin du 'di la mdo byed pas kyang bslab pa byin pa ni 'dra ba nyid do zhes bshad do/ /yang na rma'i sgo nyams pa dag tu mi tshangs par spyod pa byed pa thugs la bzhag nas de skad gsungs pa yin te/ 'di la ni nyes pa sbom por bstan pa'i phyir ro//de bzhin du 'dir gzhung ni/ 'di ltar dge slong bsten pa 'khrig pa la gzhol ba dang / bsten pa la 'bab pa dang / bsten pa la bab pa'i sems su gyur cing / de bsten pa la gzhol ba dang / bsten pa la 'bab pa dang / bsten pa la bab pa'i sems kyis mi'i bud med gson pa nyams pa la bar chad dang bcas pas bar chad dang bcas pa dang /bar chad med pas bar chad med par zag byed du zag byed 'jug par byed na nyes pa sbom por 'gyur ro zhes bya ba la sogs pa yin no/ /'di la gzhung gzhan ni btsun pa dge slong mi tshangs par spyod pas phas pham par 'gyur zhing /'on kyang mi tshangs par spyod pa bgyis pas phas pham par 'gyur ba'i ltung bar mi 'gyur ba lta mchis lags sam/ bcom ldan 'das kyis bka' stsal pa/ yod de/ gang zhig gson po nyams pa dang lhan cig mi tshangs par spyod pa byed pa de ni phas pham par 'gyur la/gang zhig gson po nyams pa dang lhan cig mi tshangs par spyod pa byed pa la ni phas pham par 'gyur ba'i ltung bar mi 'gyur ro zhes bya ba yin no/ /de bzhin du mdo byed pas kyang / nyams pa dag las ni spom po zhes bshad do/ /yang na de ni bar chad dang bcas par mi tshangs par spyod pa byed pa'i dbang du mdzad nas gsungs pa yin te/'di la gzhung ni bshad ma thag pa de nyid yin no/ /de bzhin du 'di nyid la gzhung gzhan ni/ btsun pa re zhig dge slong gis gos stug po'am phying bus dkris nas 'jug par bgyid na cir 'gyur lags/nyes pa sbom por ro/ /de bzhin du mdo byed pas kyang / mtha' nyid brjod pa'i g.yogs pa ni bsgribs pa ste des g.yogs pa la thams cad kyi thams cad du reg par mi 'gyur ba ma yin no/ /gzhan gyis g.yogs pa nyid ni mi reg par 'jug pas rnam par bshad pa yin no zhes bshad do//yang na ma reg par bcug pa la dgongs nas de skad gsungs pa yin te/ de bzhin du 'dir gzhung ni/ btsun pa re zhig dge slong gis bshang ba'i lam mam gci ba'i lam mam/ kha'i lam du ma reg par 'jud par bgyid na cir 'gyur lags/ nyes pa sbom por 'gyur ro zhes bya ba yin no/ /yang na bltabs te bcug pa la dgongs nas de skad gsungs pa yin te/ de bzhin du 'dir gzhung ni/ btsun pa bltabs nas 'jud par bgyid na cir 'gyur lags/ nyes pa sbom por 'gyur ro zhes bya ba yin no/ /de bzhin mdo byed pas bltabs pa dang mi reg par bcug pa gnyis so zhes bshad do//yang na rma'i kha gsum gyi mtshams sbyar ba 'phro mngon pa la dgongs nas de skad gsungs pa yin te/ de bzhin du 'dir gzhung ni/ btsun pa re zhig dge slong gis bud med phyed du btsal ba'i tshal ba gnyis sbyar nas 'jug par bgyid na cir 'gyur lags/gal te 'phro mi mngon na mthar 'gyur ro/ /'on te 'phro mngon na nyes pa sbom por ro zhes bya ba yin no/ /de bzhin du 'di la gzhung gzhan ni/ btsun pa re zhig bud med phyed du bkums par gyur cing de'i rma'i sgo gsum po dag kyang nyams par gyur la/de dag kyang dge slong gi kham tshad dang kham tshad du 'phro sbyar nas mi tshangs par spyod pa 'khrig pa'i chos bsten na cir 'gyur lags/ nyes pa sbom por ro zhes bya ba yin no/ /de bzhin du mdo byed pas kyang bstan par bya ba'i dbus phye ba'i mtshams mi mngon pa la yang ngo //mngon pa la ni tshig 'og mar 'gyur ro zhes bshad do/ /yang na mgo bcad pa dang mi tshangs par spyod pa byed pa la dgongs nas gsungs pa yin te/ de bzhin du 'dir gzhung ni/ btsun pa re zhig dge slong gis bud med mgo bkums pa dang lhan cig mi tshangs par spyod pa 'khrig pa'i chos bsten par gyur na cir 'gyur lags/gal te bshang ba'i lam mam gci ba'i lam du bsten par byed na mthar 'gyur ro/ /'on te kha'i lam mam mid pa 'am mchan khung du bsten par byed na nyes pa sbom por 'gyur re zhes bya ba yin no/ /de bzhin du mdo byed pas kyang mgo bcad pa'i khar ro zhes bshad do//yang na mtshams kyi phyi rol du mi tshangs par spyod pa byed pa la dgongs nas de skad gsungs pa yin te/ de bzhin du 'dir gzhung ni/ btsun pa re zhig dge slong gis so'i slad rol gyi mchur mi tshangs par spyod pa 'khrig pa'i chos bsten na cir 'gyur lags/nyes pa sbom por ro zhes bya ba yin no/ /de bzhin du mdo byed pas kyang mchu gnyis la'o/ /phyi rol gyi mtshams la thug par ro zhes bshad do/ /gang zhig dge slong nyid ces bya ba la sogs pa la/ gang zhig ces bya ba ni spyir bstan pa'o/ /dge slong gi dngos po ni dge slong nyid do//dge slong gi sgra 'jug pa'i rgyu mtshan zhes bya ba'i tha tshig ste/ gang gi dbang gis 'di dge slong yin no zhes tha snyad 'dogs pa'o zhes bya ba'i don to/ /de la gnas pa ni rnam par gnas pa ste/ dge slong gi sdom pa skyes pa zhes bya ba'i tha tshig go/ /'dod pa la yang bsten zhes bya ba ni mi tshangs par spyod pa'o//de la zhes bya ba ni dge slong la'o/ /mtha' ni phas pham par 'gyur ba ste/ ltung ba 'di ni tha ma dang / tha mal pa dang / tha chad pa dang / mi mthun pa dang mi 'phrod pa yin no zhes 'byung ba'i phyir ro/ /ma gsungs pa ni bka' ma stsal ba'o//ci'i phyir zhes bya ba ni rgyu gang gi phyir ro/ /dri yis zhes bya ba ni rmas zhes bya ba yin no/ /de ni zhes bya ba ni 'dod pa bsten pa spyad pa mthar ma gsungs pa'o/ /smros zhes bya ba ni shod cig pa'o/ /'di la 'dri ba'i bsam pa ni gang zhig dge slong gi sdom pa legs par skyes la mi tshangs par spyod pa byed pa de ni nges par phas pham par 'gyur ba'i ltung ba byung ba yin no zhes bya ba de go gsal ba kho nar rtogs na/'on kyang bcom ldan 'das kyis rnam grangs 'ga' zhig gis phas pham par ma gsungs ba de kho bo la rgyas par rab tu ston cig ces byas pa 'di yin no//'dir ni spyir mthar ma gsungs mod kyi/ 'on kyang la lar ni ltung ba med pa/ la lar ni nyes byas/ la lar ni nyes pa sbom por gsungs te ci rigs par sbyar ro/ /'di la lan ni 'di yin te/ las dang po pa'i dge slong gi dbang du mdzad nas de skad gsungs pa yin no/ /yang na smyon pa'am/sems 'khrugs pa'am/ tshor bas nyen pa'i dbang du mdzad pa yin te/ 'di la gzhung ni snga ma bzhin no/ /yang na sngar pham pa byung ba'am/ rku thabs su gnas pa'am/ dang po nas mi mthun pa can nam/ za ma 'am/ dge slong ma sun phyung ba la dgongs nas gsungs pa yin te/de bzhin du 'dir gzhung ni/ btsun pa dge slong gis mi'i bud med dang lhan cig nyams par bgyid la/ mthar mi 'gyur ba lta mchis lags sam/ yod de/ sngon pham pa byung ba'am/ rku thabs su gnas pa'am/ dang po nas mi mthun pa can nam/ za ma'am/ dge slong ma sun 'byin pa zhig gis nyams par bgyid na nyes byas su 'gyur ro zhes bya ba yin no/ /mdo byed pas kyang nyams pa dang ma skyes pa gnyis ltung ba la sbyor ba ni nyes byas so zhes bshad do/ /'dir ni bdag nyid dge slong gi tshul du nye bar ston pas dge slong nyid du shes par bya'i khyad par du ni ma yin no//de nyid kyi phyir 'grel pa byed pas/ gang du bdag nyid tshul du nye bar ston pa de ni de dang mthun pa ma yin te chags na de la nyes byas kyi ngo bo zhes bshad do/ /yang na nyams pa'i dge slong gi dbang du mdzad nas de skad du gsungs pa yin te/ 'di la yang dge slong nyid kyi tha snyad 'dogs pa ste/dge slong 'di yang phas pham par gyur pa yin gyi gnas par mi bya'o zhes bya ba dang / de bzhin du dge slong tshul khrims 'chal pa yin/ sdig pa'i chos can yin zhes bya ba dang / de bzhin du dge sbyong bzhi ste lnga po med do zhes 'byung ngo //'di nyid la dgongs nas/ bu lon nor bzhin kha ce rnams 'byung ba la ni gnyis su 'dod ces bshad do/ /yang na de'i rma'i sgo nyams pa'i dbang du mdzad nas gsungs pa'am/ bar chad dang bcas par 'jug pa zhes bya ba de'i dbang du mdzad pa'am/ ma reg par 'jud pa'am/bltabs te 'jug pa'am/ rma'i sgo gsum mtshams sbyar ba'am/ mgo bcad par ram/ mtshams kyi phyi rol du 'jug pa la dgongs pa yin te/ de bzhin du 'dir gzhung ni tshig le'ur byas pa bshad ma thag pa las dge slong smos pa bslab pa byin pa ma gtogs pa rnams yin no//gzhung de thams cad la yang mi tshangs par spyad pa spyod pa la mthar ma gsungs kyi/ 'on kyang nyes pa spom por gsungs pas nyes pa sbom bo'i skabs kyis kyang dri ba dang lan dag rung ngo / /dge slong gcig pu zhes bya ba la sogs pa la/ gcig pu zhes bya ba ni grogs med pa'o/ / gnas ni gnas lnga la sogs pa gnas so/ /gnas na grogs dang bcas pa yod pas gcig pu zhes bya ba smos so/ /zla med par zhes bya ba ni zla grogs med pa ste/ zla zhes bya ba'i sbyor ba ni 'dir zla grogs kyi yul can yin par blta bar bya'o/ /'di la zla grogs med pas na zla med pa ste de'o/ / ji lta bu zhes bya ba ni dri ba'o/ /sdom brtson zhes bya ba ni dge slong ngo / /soms te zhes bya ba ni gzobs te'o/ /'di la pha rol po'i bsam pa ni zla la ltos nas mi tshangs par spyod pa la sogs pa'i phas pham par 'gyur ba byung na/ ci de gcig pu la de 'byung ba gang yin pa srid pa yod dam zhes bya bde legs par rtogs te kho bo la smros shig ces bya ba 'di yin no//'di la lan ni 'di yin te/ zla dang bcas pa'i mi tshangs par spyod pa la sogs par gtogs pa'i sbyor ba byed pa'i dbang du mdzad nas de skad gsungs pa yin te/ de bzhin du 'dir gzhung ni/ btsun pa re zhig dge slong gcig pu sdum pa la zhugs pa la mi tshangs par spyod pa'i rkyen gyis mthar 'gyur ba lta mchis lags sam/nye ba 'khor yod de/ dper na mtshan rings dad rgyab mnyen lta bu zhes bya ba yin te/ de la don ni 'di yin te/ zla grogs skyes pa dang bud med la sogs pa dang lhan cig pa las phas pham par 'gyur ba'i rnam par gzhag pa gang yin pa'i nges pa de ni med kyi/'on kyang gcig pu la yang srid pa nyid de/ dper na mtshan rings dang rgyab mnyen lta bu'o/ /khyim bdag gi bu zhig pho mtshan tshad las 'das par gyur pa dang gzhi des de'i gnyen rnams kyis mtshan rings zhes bya bar ming btags so//re zhig cig na de bcom ldan 'das kyi bstan pa la rab tu byung nas pho mtshan de rang gi bshang ba'i lam du bcug ste reg pa bdag gir byas so/ /de bzhin du khyim bdag gi bu zhig dper na ri bong ngam byi la lta bur rgyab mnyen por gyur pa dang de la brten nas de'i ming rgyab mnyen du btags so//re zhig cig na de yang de bzhin gshegs pa'i bstan pa la rab tu byung nas pho mtshan kha'i nang du bcug nas reg pa bdag gir byas so zhes bya ba 'di rgyas par rnam par 'byed pa las 'byung ngo / /de bzhin du 'di nyid la gzhung gzhan ni/ btsun pa dge slong gcig pu gtsug lag khang du zhugs la phas pham par 'gyur ba bzhi spyod par 'gyur ba lta mchis lags sam/ bcom ldan 'das kyis bka' stsal pa/ yod de mi tshangs par spyod pa'i rkyen gyis ji lta bu lags/ dper na mtshan rings dang rgyab mnyen lta bu'o/ / ma byin par len pa'i rkyen gyis ji lta bu lags/ 'di ltar dge slong gis sbyor ba byas nas gtsug lag khang du zhugs pa dang de'i yang brkus pa lta bu'o/ /bkums pa'i rkyen gyis ji lta bu lags/ 'di ltar dge slong gis gsod pa'i sbyor ba byas nas gtsug lag khang du zhugs pa dang de yang bsad pa lta bu'o//smra ba'i rkyen gyis ji lta bu lags/ 'di ltar dge slong 'di skad ces nga ni dgra bcom pa sangs rgyas so zhes zer ba lta bu'o/ /gang gis yan lag lnga ldan par zhes bya ba la sogs pa ni dge slong gang gi phas pham pa 'byung ba'i rgyu lnga'o/ /ma byin pa len pa nyid dang / ma sha ka lnga nyid dang /rku sems nyid dang / mi'i 'gro bas bzung ba nyid dang / der 'du shes pa nyid dang zhes bya ba dang ldan zhing 'byor pa ste/ yan lag lnga zhes smos pa ni yan lag gcig ma tshang na smad par gsungs pa dag go/ /gzhan gyi nor ni gzhan skyes pa dang / bud med dang ma ning la sogs pas bdag gir byas pa'i nor te 'dis ni rang gi nor bsal to/ /ni zhes bya ba ni khyad par du bya'o/ /rku zhes bya ba ni blang ba byas pa'o/ /de la zhes bya ba ni dge slong la'o/ /de ni zhes bya ba ni gzhan gyi nor rku bar gtogs pa'i phas pham par 'gyur bar ma gsungs pa'o//gsal bar smros zhes bya bar sbyar te/ /gsal bar zhes bya ba ni gsal por ro/ /de la don ni 'di yin te/ bcom ldan 'das kyis dge slong gang zhig gzhan gyi nor gyi rigs par byin pa nyid la sogs pa yan lag lnga dang ldan pa rku ba de la phas pham par 'gyur bar gsungs na/'on kyang rnam grangs 'ga' zhig gis de la phas pham par 'gyur bar ma gsungs pa de kho bo la nges par smros shig ces bya ba 'di yin no/ /'di la lan ni 'di yin te/ de ni gzhan gyi don du rku ba'i skabs kyis gsungs pa yin no/ /'di ltar yan lag thams cad yod kyang gzhan gyi don du rku ba la nyes pa sbom por gsungs te/de bzhin du 'dir gzhung ni/ btsun pa re zhig dge slong gis ma smras par gzhan gyi don du rku na cir 'gyur lags/ nyes pa sbom por ro zhes bya ba yin no/ /de bzhin du 'dir gzhung gzhan ni dge slong gis dge slong zhig la 'di skad ces khyod kyis dge slong che ge mo zhig gi yo byad de lta bu dang de lta bu shes sam/shes so/ /song la de rkus shig /gnas nas gnas su spogs shig ces smras la/ gal te rku ba'i sems kyis de brkus rdzas gnas nas gnas su spogs nas byed pa mtshungs par 'gyur ro/ /'on te de 'di snyam du 'di ni kho bo'i yin no snyam na len pa la nyes pa med do//rkur 'jug pa gang yin pa de la ni dngos po ji lta ba bzhin du 'gyur ro zhes bya ba yin no/ /yang na byang gi sgra mi snyan gyi gling nas brkus pa la dgongs nas gsungs pa yin te/ de bzhin du 'dir gzhung ni/ btsun pa byang gi sgra mi snyan gyi gling nas brkus na cir 'gyur lags/nye ba 'khor de na ma byin par len pa ni med de/ gal te der rku ba'i sems bskyed na ni nyes pa sbom por 'gyur ro zhes bya ba yin no/ /de bzhin du mdo las kyang / byang gi sgra mi snyan na ni yongs su 'dzin pa med pa nyid do/ /de ni rang gi dang 'dra'o zhes bshad do//yang na phyogs bzhi'i dge 'dun gyi brkus pa la dgongs nas de skad gsungs pa yin te/ de bzhin du 'dir lung ni/ btsun pa re zhig dge slong gis phyogs bzhi'i dge 'dun gyis ma stsal ba brkus na cir 'gyur lags/ nyes pa sbom por ro zhes bya ba yin no//de bzhin du mdo byed pas kyang / bdag po tha dad pa ma yin pa ni rang gi dang 'dra'o zhes bshad do/ /yang na 'gro ba gzhan gyi la brten nas de skad gsungs pa yin te/ de bzhin du 'dir gzhung ni/ mi ma lags pa'i ma stsal ba la mi ma lags pa'i 'du shes kyis brkus na cir 'gyur lags/nyes byas su'o/ /mi ma lags pa'i ma stsal ba la mi'i 'du shes kyis brkus na cir 'gyur lags/ nyes pa sbom por ro zhes bya ba yin no/ /de bzhin du mdo byed pas kyang mi'i rgyud kyis yongs su gzung ba'o/ /der 'du shes pas so zhes bshad do/ /yang na nyes byas su gsungs pa ni sngon pham pa byung ba la sogs pa la dgongs nas gsungs pa yin te/'dir yang gzhung ni snga ma bzhin no/ /sdom brtson zhes bya ba la sogs pa la sdom brtson ni dge slong ngo / /blo ldan zhes bya ba ni snga phyi brtags pa ste ched du bsams nas zhes bya ba'i don to/ / blo ldan zhes bya ba ni gyi nar bslang ba stsal ba yin no/ /grangs 'das zhes bya ba ni ma sha ka lnga las lhag pa'i tshad dang ldan pa ste brgya stong ri ba yang zhes bya ba'i tha tshig go/ /de zhes bya ba ni sdom brtson no/ /ci ste zhes bya ba ni dri ba'o/ /de ni zhes bya ba ni smras ma thag pa'i dngos po'o/ /myur du zhes bya ba ni skyen par ro//smros zhes bya ba ni smros shig pa'o/ /'di la gzhan gyi bsam pa ni 'di yin te/ brgya stong ri ba yang rku la yan lag thams cad kyang yod na gdon mi za bar phas pham par 'gyur na/ 'on kyang bcom ldan 'das kyis skabs 'ga' zhig gis 'di phas pham par 'gyur ba 'byung ba ma gsungs pa de bdag la ma thogs par smros shig ces bya ba'i tha tshig go//'di la lan ni 'di yin te/ de ni ma sha ka re re nas brku ba la brten nas yin no/ /de bzhin du 'dir gzhung ni btsun pa bcom ldan 'das kyis ma sha ka brkus na mthar 'gyur ro zhes bka' stsal pa gang lags pa/btsun pa dge slong gis ma sha ka lnga brkus la mthar yang mi 'gyur ba lta mchis lags sam/ yod de/ gal te ma sha ka re re nas sam/ gnyis gnyis sam/ gsum gsum mam/ bzhi bzhi rku na'o/ /de bzhin du mdo byed pas kyang / phung po las rkun lan re re zhing blangs pa tha dad do zhes bshad do//yang na bor bar 'du shes pa la dgongs nas de skad gsungs pa yin te/ de bzhin du 'dir gzhung ni/ btsun pa bcom ldan 'das kyis ma sha ka lnga rku na mthar 'gyur ro zhes bka' stsal pa/ gang lags pa/ btsun pa dge slong gis ma sha ka stong brkus la mthar yang mi 'gyur ba lta mchis lags sam/yod de/ gal te bor ba'i 'du shes kyis rku na'o/ /bor ba'i 'du shes zhes bya ba ni 'dir yongs su btang ba'i 'du shes dang nges par ma btang ba'i 'du shes zhes bya ba'i tha tshig go/ /sdom brtson rin thang tshang ba'i zhes bya ba la sogs pa la/rin thang tshang ba ni ma sha ka lnga la sogs pa'i tshad gsungs pa'o/ /yo byad ni gser dang dngul la sogs pa ste/ 'dis 'tsho ba sbyor bar byed/ skyong bar byed pa'i phyir ro/ /gnas nas zhes bya ba ni bzhag pa'i phyogs nas te/ 'dir bzhag pas na gnas so//ma spags pa zhes bya ba ni ma bskyod par ro/ /'gyur ba ni thob ste mtha'i ltung ba dang ldan par 'gyur ro/ /kye zhes bya ba ni bod pa'o/ /nges par smros zhes bya bar sbyar te/ nges par zhes bya bar sbyar ba ni gtan la phab par ro/ /legs pa zhes bya ba ni bzang por te snga phyi mi 'gal bar zhes bya ba'i tha tshig go//'di la gzhan gyi bsam pa ni gser dang dngul la sogs pa'i nor ma sha ka lnga ri ba gnas nas spags pa tsam kho nas phas pham par 'gyur na/ 'on kyang bcom ldan 'das kyis gnas nas kyang ma spags pa 'di la phas pham par 'gyur ba gsungs pa de kye dge slong kho bo la nges par kha na ma tho ba med par smros shig ces bya ba 'di yin no//'di la lan ni 'di yin te/ de ni sa phyogs nor dang bcas te spags pa thugs la bzhag nas gsungs pa yin no/ /de bzhin du 'dir gzhung ni/ btsun pa bcom ldan 'das kyis yo byad rin thang tshang ba gnas nas spags na mthar 'gyur ro zhes bka' stsal pa gang lags pa/btsun pa dge slong gis yo byad rin thang tshang ba gnas nas ma spags la mthar yang 'gyur ba lta mchis lags sam/ yod de/ dper na gnas khang pa na 'dug pa dang bcas te brkus pa lta bu'o/ /gang du bzhag par 'gyur ba'i gnas nas brkus na'o zhes bya ba yin no//de bzhin du mdo byed pas kyang / gnas dang bcas pa yang ma yin no zhes bshad do/ /sdom brtson rku ba'i sems kyis zhes bya ba la sogs pa la/ rku ba'i sems kyis zhes bya ba ni brku bar bya sems kyis so/ /ma byin pa zhes bya ba ni byin par ma gyur pa ste gzhan gyi rdzas zhes bya ba'i tha tshig go//spags pa la zhes bya ba ni bskyod pa la'o/ /rgyu zhes bya ba ni gtan tshigs so/ /'di la 'dri'o bsam pa ni 'di yin te/ gzhan gyi nor gnas nas spags pa'i dge slong kho na phas pham par 'gyur bar rnam par bzhag na/'on kyang rnam pa 'ga' zhig gis 'di la pham par ma gsungs pa de kho bo la sgyu thabs brjod par gyis shig ces bya ba'i don to/ /'di la don ni 'di yin te/ de ni phyogs gcig gnas nas ma 'phags pa'i rku ba la dgongs nas gsungs pa yin no/ /de bzhin du 'dir gzhung ni btsun pa bcom ldan 'das kyis dge slong gis yo byad rin thang tshang ba gnas nas gnas su sbed par byed na mthar 'gyur ro zhes bka' stsal pa gang lags pa/dge slong gi yo byad rin thang tshang ba shin tu ring bar 'tshal kyang mthar ma 'gyur ba lta mchis lags sam/ yod de/ dge slong gi yo byad rin thang tshang ba mtha' gcig nas bzung ste shin tu thag ring por drangs kyang mtha' cig shos gnas de nas ma 'phags na nyes pa spom bor 'gyur ro zhes bya ba yin no//'di la mdo byed pas kyang / phyogs gcig gnas nas ma 'phags pa yang ma yin no/ /bshal ba la ni ngos kyi gzhi'i mtshams las ngos cig shos 'das na'o zhes bshad do//dge slong tshul khrims ldan pa yis/ /zhes bya ba la sogs pa la/ tshul khrims ldan pa ni phas pham par 'gyur ba ma byung ba ste/ tshul khrims dang ldan pa smos pa ni tshul khrims 'chal pa la sogs pa bsal ba'i phyir ro//yan lag lnga ldan zhes bya ba ni ma byin pa nyid la sogs pa yan lag lnga dang ldan pa ste/ yan lag lnga dang bcas par zhes bya ba'i tha tshig go/ /ltung ba med par zhes bya ba ni ltung ba yong pa ma yin pa'o/ /nyes pa med pa zhes bya ba'i don te 'di la nyes pa med pas so//the tshom ni som nyi'o/ /chod ces bya ba ni sol cig pa'o/ /'di la don ni gal te dge slong bsnyen par rdzogs pa dang bcas shing ma nyams pas gzhan gyi nor rdzas ma byin pa nyid la sogs pa yan lag lnga dang ldan par brkus na de'i tshe de la gdon mi za bar phas pham par 'gyur ba 'byung na/'on kyang bcom ldan 'das kyis ma byin par len pa de lta bu la ltung ba 'ga' yang ma gsungs pa zhes bya ba ni bdag gi the tshom yun ring po nas sol cig ces bya ba 'di yin no/ /'di la lan ni 'di yin te/ de ni las dang po pa dang / smyon pa dang / sems 'khrugs pa dang / tshor bas nyen pa la brten nas gsungs pa yin no//de bzhin du 'dir gzhung ni/ las dang po ba dang / smyos pa dngang / sems 'khrugs pa dang / tshor bas nyen pa la ltung ba med do zhes bya ba yin no/ /yang na de ni chos rku ba la brten nas bstan pa yin te/ de bzhin du 'dir ni/ btsun pa rku ba du zhig mchis lags/ nye ba 'khor drug ste/ bcom nas rku ba dang / nan gyis rku ba dang / phyir sbyin pa rku ba dang / bzhag pa rku ba dang / gtams pa rku ba dang / chos rku ba'o/ /btsun pa bcom ldan 'das kyis rku ba drug gsungs pa gang dag lags pa de dag las gang gis mthar 'gyur lags/ nye ba 'khor chos rku ba ma gtogs pa lhag ma rnams kyis mthar 'gyur ro zhes bya ba yin no//mdo byed pas kyang / dpe bri ba la ni nyes pa med pa nyid do zhes bshad do/ /yang na phas pham par 'gyur ba'i ltung ba med pa la dgongs nas ltung ba med par gsungs pa yin te/ de bzhin du 'dir gzhung ni/ btsun pa dge slong gis ma stsal ba blangs pas phas pham par 'gyur zhing /'on kyang ma stsal bar blangs na phas pham par 'gyur ba'i ltung bar mi 'gyur ba lta mchis lags sam/ nye ba 'khor yod de/ gang gis mi rnams kyi yo byad rin thang tshang ba ma byin par blangs pa de ni phas pham par 'gyur ro/ /gang gis mi ma yin pa rnams kyi yo byad rin thang tshang ba ma byin par blangs pa de la ni phas pham pa'i ltung bar mi 'gyur ro//'di la mdo byed pas kyang / mi'i rgyud kyis yongs su bzung ba'o zhes bshad do/ /dud 'gro'i mngal na zhes bya ba la sogs pa la/ dud 'gro'i zhes bya ba ni dud 'gro'i skye gnas su gtogs pa phyugs la sogs pa zhes bya ba'i don to//mngal na gnas pa zhes bya ba ni mngal na 'dug pa'o/ /bu zhes bya ba ni bu chags pa la sogs pa'o/ /gsad sems kyis zhes bya ba ni gsod pa'i bsam pas so/ /gsad na zhes bya ba ni bcom na'o/ /na zhes bya ba ni don gzhan nye bar bstan pa'i phyir te des na gsad par gyur na zhes bya ba'i don to//thub pa zhes bya ba ni nyon mongs pas byas pa'i brjod pa mi mnga' ba'i phyir te des so/ /de nyid mkhyen pa yis zhes bya ba ni blang ba dang dor bar bya ba'i de kho na nyid thabs dang bcas pa mkhyen pas de thams cad mkhyen pa zhes bya ba'i tha tshig go/ /'di la 'dri ba'i don ni bcom ldan 'das ni kho bo cag la dud 'gro'i 'du shes kyis srog dang bral ba'i bsam pas dud 'gro'i 'gro ba pa gsod cing srog dang yang bral na ltung byed du 'gyur ro zhes bstan la/'on kyang bcom ldan 'das kyis de la phas pham par gsungs pa de ji lta bu yin pa de kho bo la smros shig ces bya ba 'di yin no//'di la lan ni 'di yin te/ dud 'gro'i mngal na mi'i 'gro ba pa'i bu yod pa bsad pa la dgongs nas de skad gsungs pa yin te/ de bzhin du 'dir gzhung ni/ btsun pa re zhig dge slong gis dud 'gro'i skye gnas su gtogs pa'i bud med kyi mngal na mchis pa'i mi bkums na cir 'gyur lags/mthar 'gyur ro zhes bya ba yin no/ /sdom brtson zhes bya ba la sogs pa la/ gsad pa'i sems ldan gyis zhes bya ba ni srog bcad pa'i bsam pas so/ /mi'i zhes bya ba ni mi'i 'gro bar gtogs pa'o/ /ltung byed pa zhes bya ba ni gsod par byed pa ste mngal rlugs pa la sogs pa'i sbyor bas gsod par byed pa zhes pa'i tha tshig go//gal te zhes bya ba ni ji ste'o/ /mthu yod ces bya ba ni nus pa yod na'o/ /'di la bsdus pa'i don ni dge slong gis mi'i 'gro bar skyes pa'i bud med kyi mngal ltung bar byed na phas pham par 'gyur ro zhes bya ba ni legs par grags na/'on kyang la lar 'di la phas pham par ma gsungs so zhes pa 'di la gal te khyod la smra ba'i nus pa zhig yod na de kho bo la lan thob shig ces bya ba 'di yin no/ /'di la lan ni 'di yin te/ de ni mi'i 'gro ba pa'i bud med kyi mngal na dud 'gro'i skye gnas pa'i bu yod pa bsad pa la brten nas gsungs pa yin no//de bzhin du 'dir gzhung ni/ btsun pa re zhig dge slong gis mi'i bud med kyi mngal na dud 'gro'i skye gnas su gtogs pa'i bu mchis pa gsod par bgyid na cir 'gyur lags/ ltung byed du'o zhes bya ba yin no/ /pha ma bsams bzhin bsad pa la zhes bya ba la sogs pa la/mnar med pa zhes bya ba ni mnar med pa'i dmyal bar 'gro ba'i mtshams med pa byed pa zhes bya ba'i tha tshig ste/ 'di la bde bar snang ba'i bar skabs med pas so zhes bya ba ni bshad ma thag pa skad du'o/ /mdun du zhes bya ba ni mngon sum du'o//'di la bsdus pa'i don ni blo sngon du btang ste pha dang ma bsad na gdon mi za bar phas pham pa dang mtshams med par 'gyur na/ 'on kyang bcom ldan 'das kyis phas pham par 'gyur ba yang ma gsungs la mtshams med par yang ma gsungs so zhes bya ba 'di la kho bo la rgyu brjod par bya'o zhes bya ba 'di yin no//'di la lan ni 'di yin te/ pha ma dud 'gro'i skye gnas su gtogs pa bsad pa la dgongs nas de skad gsungs pa yin te/ de bzhin du 'dir lung ni/ btsun pa dge slong gis pha ma bkums la mthar yang mi 'gyur mtshams ma mchis pa'i kha na ma tho bas kyang reg par mi 'gyur ba lta mchis lags sam/yod de/ gang gis pha ma dud 'gro'i skye gnas su gtogs pa dag yin na'o/ /de bzhin du mdo byed pas kyang / mi ma yin pa'i 'gro ba pa gnyis ni ma yin no/ /de gnyis las mtshams med par mi 'gyur ro zhes bshad do/ /yang na skyed par byed pa ma yin pa'i pha ma dag la dgongs nas de skad du bshad pa yin te/de bzhin du 'dir lung ni/ btsun pa mas ma bskyed la gzhan gyis ni bskyed na gang zhig bkums pas mthar 'gyur zhing mtshams ma mchis pa'i kha na ma tho bas kyang reg par 'gyur lags/ skyed par byed pa gang yin pa'o zhes bya ba yin no//de bzhin du mdo byed pas kyang / de ni skyed par byed pa gnyis las te zhes bshad do/ /yang na zag pa dang bcas pa'i las kyis srid pa dang sred pa la dgongs nas de skad gsungs pa yin te/ de bzhin du 'dir gzhung ni/ btsun pa dge slong gis pha bkums la mthar yang mi 'gyur/mtshams ma mchis pa'i kha na ma tho bas reg par yang mi 'gyur ba lta mchis lags sam/ yod de/ zag pa dang bcas pa'i las kyis srid pa bsad na'o/ /nye ba 'khor zag pa dang bcas pa'i las kyis srid pa ni mngon par bsgrub pa'i don gyis pha zhes bya'o/ /btsun pa dge slong gis ma bkums la mthar yang mi 'gyur mtshams ma mchis pa'i kha na ma tho bas reg par yang mi 'gyur ba lta mchis lags sam/yod de/ gal te sred pa bsad na'o/ /nye ba 'khor sred pa ni skyed pa'i don gyis ma zhes bya'o zhes bya ba la sogs pa yin no/ /don 'di ni bshad mod kyi phas pham par 'gyur ba'i skabs kyis yang bshad do//brda phrad mdun du zhes bya ba la sogs pa la brda sprad mdun zhes bya ba ni don go ba'i mngon sum du ste/ brda phrad pa zhes smos pa ni/ /brdzun tshig 'du shes gzhan bsgyur bas/ /tshig don mngon par go ba'o/ /zhes 'byung ba'i brda mi phrad pa'i drung du ni na smad par bshad pa'i phyir/sangs rgyas zhes bya ba ni 'das pa dang ma 'ongs pa dang da ltar byung ba'i don lag mthil du skyu ru ra bzhag pa bzhin gsal bar mkhyen pa'i phyir ro/ /dgra bcom pa ni nyon mongs pa'i dgra bcom pa'i phyir dang / 'gro ba mtha' dag gis mchod par 'os pa'i phyir dang /mi skye ba'i chos can gyi phyir ro/ /ston pa ni phan pa dang mi phan pa nye bar ston pa'i phyir ro/ /don du gnyer gyis zhes bya ba ni bcol gyis zhes bya ba'o/ /des na tshig gi don ni gang gi tshe dge slong gis brda phrad pa'i mdun du nga ni sangs rgyas so/ /nga ni dgra bcom pa'o/ /nga ni ston pa'o zhes smras pa de'i tshe de la gdon mi za bar phas pham par 'gyur na/'on kyang bcom ldan 'das kyis rnam grangs 'ga' zhig gis des phas pham par 'gyur ba ma yin par gsungs pa de ji lta bu yin pa de kho bo la ji lta ba bzhin du smros shig ces bya ba 'di yin no/ / 'di la lan ni 'di yin te/ ming mthun pa'i don la brten nas de skad du gsungs pa yin no/ /de bzhin du 'dir gzhung ni/ btsun pa re zhig dge slong gis 'di skad du sangs rgyas yin no zhes smras na cir 'gyur lags/ gal te sdig pa mi dge ba'i chos rnams rtogs pa nyid dang / rtogs par byed pa nyid la bsams nas lung ston na ni nyes pa sbom por 'gyur ro/ /'on te sangs rgyas kyi chos med pa lung ston par byed na ni mthar 'gyur ro/ /btsun pa re zhig dge slong gis 'di skad du nga ni ston pa'o zhes smras na cir 'gyur lags/ gal te 'di snyam du bdag ni 'doms par byed pa'o//rjes su ston par byed pa'o zhes bya bar bsams te smras na nyes pa sbom por 'gyur ro/ /'on te ston pa'i chos lung ston par byed na ni mthar 'gyur ro/ /btsun pa re zhig dge slong gis 'di skad du nga ni mi slob pa'o zhes smras na cir 'gyur lags/ gal te nyon mongs pa spangs par lung ston na mthar 'gyur ro//'on te 'di snyam du bdag ni bzo 'ga' la yang mi slob bo zhes bya bar bsams te smras na nyes pa sbom por 'gyur ro zhes bya ba yin no/ /de bzhin du mdo byed pas kyang / bla ma brjod pa'i 'dun pas ming mthun pa'i don brjod na sbom po'i zhes bshad do/ /yang na/ de ni las dang po pa dang smyon pa dang sems 'khrugs pa dang tshor bas nyen pa la dgongs nas gsungs pa'am/mi ma yin pa'i 'gro ba'i mngon sum du smras pa la dgongs nas gsungs pa yin te/ de bzhin du 'dir gzhung ni/ btsun pa re zhig dge slong gis mi ma lags pa'i 'du shes kyis mi'i chos bla ma lung ston par bgyid na cir 'gyur lags/nyes pa sbom por ro zhes bya ba la sogs pa yin no/ /yang na smyon pa dang sems 'khrugs pa'i mngon sum du smras pa la brten pa yin te/ de bzhin du 'dir gzhung ni/ btsun pa re zhig dge slong gis smyon pa'i drung du mi'i chos bla ma brjod na cir 'gyur lags/ nyes pa sbom por ro/ / sems 'khrugs pa la sogs pa la yang de bzhin du blta bar bya'o zhes bya ba yin no/ /yang na de ni dbus pa la mtha' 'khob pa'i tshig tu smras pa la brten nas gsungs pa yin par shes par bya ste/ de bzhin du 'dir gzhung ni/ btsun pa re zhig dge slong dbus pa zhig gis mtha' 'khob pa'i skad du smra ba la mi'i chos bla ma brjod la/dbus pas kyang mtha' 'khob pa'i skad ma 'tshal na cir 'gyur lags/ nyes pa sbom por ro zhes bya ba la sogs pa yin no/ /'di la mdo'i khungs kyang go rims bzhin du ma bcas pa nyid la yang ngo / /tha snyad du rung ba'i 'du shes nyams pa la ni pham par 'gyur ba man chad kyi ltung ba yang mi 'byung ngo //mi'i 'gro ba la ni tha snyad du bya ba nyid yin no/ /rang bzhin nyams pa ni ma yin no/ /rnam par rig byed la ni don go ba'o zhes bshad do/ /yang na sngon pham pa byung ba la sogs pa la dgongs nas gsungs pa yin te/ de bzhin du gzhung ni sngar bshad pa bzhin no//yang na mngon pa'i nga rgyal la brten pa yin te/ 'dir gzhung ni/ btsun pa dge slong gis bdag nyid la mi'i chos bla ma mchis shing bdog bzhin du brjod na phas pham par 'gyur zhing / 'on kyang bdag nyid la mi'i chos bla ma mchis shing mi bdog bzhin du brjod na phas pham par 'gyur ba'i ltung bar mi 'gyur ba lta mchis lags sam/bcom ldan 'das kyis bka' stsal pa/ yod de/ g.yos shes pa lung ston na phas pham par 'gyur ro/ /mngon pa'i nga rgyal gyis kun shes pa lung ston na de la phas pham par 'gyur ba'i ltung bar mi 'gyur ro zhes bya ba yin no//khyod 'bras thob ces de skad dris zhes bya ba la sogs pa la/ khyod ces bya ba ni khyod kyis so/ /'bras bu ni rgyun du zhugs pa la sogs pa 'phags pa'i lam gyi 'bras bu ste/ dge slong tshul ni dri med lam/ /'bras bu 'dus byas 'dus ma byas/ /zhes 'byung ba'i phyir ro/ / de skad ces bya ba ni smras ma thag pa'i skad du'o/ /de bzhin du zhes bya ba ni de ltar yin no zhes bya ba ste khas len pa'i don to/ /smras na zhes bya ba ni brjod na'o/ /don bzhin zhes bya ba ni don gyi rjes su 'brangs nas te don ji lta ba bzhin du zhes bya ba'i tha tshig go/ /'di la don 'dir la la zhig la 'ga' zhig gis khyod kyis 'bras bu thob bam zhes dris la/des kyang 'di skad du de bzhin no zhes khas blangs na/ 'on kyang de la phas pham par ma gsungs so zhes bya ba de kho bo la nges par gsal bar smos shig ces bya ba yin no/ /'di la lan ni 'di yin te/ de yang ming mthun pa'i don brjod pa'i dbang du mdzad nas gsungs pa yin par blta bar bya ste/lung las 'byung ba gzhan nyid la brten nas yang bkod do/ /de bzhin du 'dir gzhung ni/ btsun pa dge slong la khyim bdag cig gis khyod kyis 'bras bu thob bam zhes dris pa dang / des kyang lo ma dang 'bras bu dang me tog dang /'bras bu ma smin pa dag cig blangs nas des 'di skad du de bzhin no zhes smras na cir 'gyur lags/ nyes pa sbom por ro zhes bya ba yin no/ /yang na de ni las dang po pa la sogs pa la dgongs nas gsungs pa yin no/ /brda phrad pa'i mi'i mdun du zhes bya ba la sogs pa la/brda phrad pa'i zhes bya ba'i rtogs pa'o/ /mi'i zhes bya ba ni skyes pa ste mi'i 'gro ba pa'i zhes bya ba'i tha tshig go/ /skyes pa smos pa ni nye bar mtshon par zad de bud med kyi yul la yang de dang 'dra bar blta bar bya'o/ /mdun du zhes bya ba'i don ni bshad zin to/ /'bras bu rnam pa bzhi ni 'bras bu bzhi po rgyun du zhugs pa dang /lan cig phyir 'ong ba dang / lan cig phyir mi 'ong ba dang / dgra bcom pa nyid kyi mtshan nyid kyi 'bras bu rnam pa bzhi'o/ /de nyid gzigs pas zhes bya ba ni don dam pa gzigs pa ste/ yang dag par rdzogs pa'i sangs rgyas kyis zhes bya ba'i tha tshig go/ / ma yin zhes bya ba ni dgag pa'i'o/ /'di la 'dri ba'i don ni gang gi tshe rgyun du zhugs pa la sogs pa'i 'bras bu bzhi mi'i 'gro bar gtogs pa brda phrad pa'i mdun du lung ston pa de'i tshe de la gdon mi za bar phas pham pa'i ltung bar 'gyur ro zhes bya ba de tsam ni shin tu nges la/ 'on kyang bcom ldan 'das kyis rnam grangs 'ga' zhig gis de la phas pham par 'gyur bar ma gsungs so zhes bya ba'i rgyu de bdag la smros shig ces bya ba 'di yin no//'di la yang ming mthun pa'i don brjod pa la brten nas gsungs pa yin par shes par bya ste/ skabs bzhin du gsungs pa'i gzhung las bsams nas yang bkod pa yin no//de bzhin du 'dir gzhung ni/ btsun pa re zhig dge slong gis 'di skad du bdag gis rim gror ni rgyun du zhugs pa'i 'bras bu'o/ /bya skyibs ngogs su ni lan cig phyir 'ong ba'i 'bras bu'o/ /bya rgod kyi phung po la ni phyir mi 'ong ba'i 'bras bu'o/ /'od ma'i tshal du ni 'bras bu mchog dgra bcom pa'o zhes smra na cir 'gyur lags/gal te 'di snyam du bdag gis 'dir lung mnos kha ton byas te bdag gis le lo ma byas so zhes bya ba las bsams nas smras na ni nyes pa sbom por 'gyur ro/ /'on te dge sbyong gi tshul gyi 'bras bu dag lung ston na ni/ mthar 'gyur ba'o/ /dge slong 'bras gcig smra byas las/ /zhes bya ba la sogs pa la/ 'bras gcig ces bya ba ni rgyun du zhugs pa'i 'bras bu la sogs pa'i nang nas brjod par 'dod pa'i 'bras bu gang yang rung ba zhig go/ /'bras bu gzhan zhes bya ba ni rgyun du zhugs pa'i 'bras bu las lan cig phyir 'ong ba'i 'bras bu la sogs pa gzhan de brjod par mi 'dod pa'o//'di la don ni rgyun du zhugs pa'i 'bras bu la sogs pa smra bar 'dod pa'i dge slong gis gal te 'bras bu gzhan lan cig phyir 'ong ba'i 'bras bu'am/ phyir mi 'ong ba'i 'bras bu'am/ dgra bcom pa nyid cig lung ston na ci'i phyir de la phas pham par 'gyur bar ma gsungs zhes bya bar bsnyad par bya ba la khyod kyis kho bo la 'brel ba brjod par bya'o zhes bya ba 'di yin no//'di la lan ni 'di yin te/ de ni mngon par 'dod pa ma yin pa'i 'bras bu brjod pa la brten nas gsungs pa yin no/ /de bzhin du 'dir gzhung ni/btsun pa re zhig dge slong gis rgyun du zhugs pa'i 'bras bu lung bstan to snyam pa las lan cig phyir 'ong ba'i 'bras bu lung bstan tam/ lan cig phyir 'ong ba'i 'bras bu lung bstan to snyam pa las phyir mi 'ong ba'i 'bras bu lung bstan tam/ phyir mi 'ong ba'i 'bras bu lung bstan to snyam pa las dgra bcom pa nyid kyi 'bras bu lung bstan na cir 'gyur lags/nyes pa sbom por ro zhes bya ba yin no/ /de bzhin du 'di la mdo byed pas kyang nor na yang ngo zhes bshad do/ /'dul ba dri ba'i tshig le'ur byas pa le'u dang po'i gtan la dbab pa'o// // yan lag bcu ldan 'byin byed pa/ /zhes bya ba la sogs pa la/ 'byin byed pa zhes bya ba ni khu chu 'byin par byed pa ste/ dang po'i gnas nas spos pa'i zhes bya ba'i tha tshig go/ /gyi nar yang 'byung ba yod pa de'i phyir yan lag bcu ldan zhes bya ba smos so/ /gang la yang yan lag bcu yod pa de ni yan lag bcu ldan pa ste/rgyu bcu dang ldan par khu chu 'byin pa'i tha tshig go/ /yan lag bcu po de dag ni 'di lta ste/ phyung ba dang / dbyung bar 'dun pa dang / rang gi khu chu dang / dang po'i gnas dang / pho mtshan dang / de la brtsal ba dang / de la reg pa dang /de gzhan gyi rgyud du gtogs pas kyang rung ba dang / sems can du bgrang ba nyid dang / sems can du bgrang ba'i rnam par gnas pa nyid do/ /dge 'dun lhag ma byed pa ni gang la ltung ba phyir bcos pa'i phyir lhag ma nyi shu la sogs pa'i dge 'dun yod pa de ni lhag ma ste/ ltung ba de ni dge 'dun la rag lus pa/dge 'dun kha na las pa dge 'dun la brten pas te/ dge 'dun gyi ltung ba las ldang bar 'gyur gyi gang zag las ni ma yin no zhes 'byung ba'i phyir ro/ /de byed pa'i ngang tshul can ni dge 'dun lhag ma byed pa ste/ dge 'dun lhag ma'i ltung ba byung ba zhes bya ba'i tha tshig go//bde bar gshegs pa ni nyon mongs pa dang nye ba'i nyon mongs pa thams cad bag chags dang bcas te bral ba dang / dngos po ma lus pa'i de kho na nyid legs par rtogs pa'o/ /gzhan dag na re phyir mi ldog par ma lus par gshegs pa'am/ de kho na nyid bstan pa'i khyad par ma lus par mkhyen pa'i phyir bkra shis pa yin no zhes zer te/don du na de bzhin gshegs pa'o/ /ma gsungs pa zhes bya ba ni bka' ma stsal pa'o/ /ji ltar zhes bya ba ni rnam pa gang gis so/ /rgyu zhes bya ba ni byed rgyu'o/ /'di la gzhan gyis bsam pa ni gang gi tshe dge slong gis phyung ba la sogs pa yan lag bcu dang ldan par rang gi khu chu 'byin pa de'i tshe de la dge 'dun gyi lhag ma'i ltung bar 'gyur ro zhes bya ba yang go the tshom yang med na/'on kyang de la dge 'dun gyi lhag ma'i ltung bar ma gsungs so zhes bya ba 'di la khyod kyis kho bo la rgyu cung zad cig gdon mi za bar brjod par bya'o zhes bya ba 'di yin no//'di la lan ni 'di yin te/ de ni shugs btang ba la dgongs nas gsungs pa yin par shes par bya ste/ de bzhin du 'dir gzhung ni/ shugs btang nas khu chu byung na nyes pa sbom por 'gyur ro zhes bya ba 'di yin no/ /de bzhin du mdo byed pas kyang shugs kyi gnas skabs su btang ba rdzogs par ma byas pa nyid do zhes bshad do//yang na mtshan gyur pa la brten nas de skad gsungs pa yin te/ de bzhin du 'dir gzhung ni/ btsun pa gzhi gang gis dge 'dun gyi lhag ma'i ltung bar 'gyur ba'i gzhi des dge 'dun gyi lhag ma'i ltung bar mi 'gyur ba lta mchis lags sam/bcom ldan 'das kyis bka' stsal pa/ yod de/ dge slong gis ched du bsams te khu chu phyung nas dge 'dun lhag mar 'gyur ro/ /dge slong mas phyung na de la dge 'dun gyi lhag ma'i ltung bar mi 'gyur ro zhes bya ba yin no/ /de bzhin du 'dir gzhung ni/btsun pa re zhig dge slong khu chu 'byin par bgyid pa las mtshan gyur te dge slong mar red na cir 'gyur lags/ ltung byed du'o zhes bya ba yin no/ /yang na de ni sngon pham pa byung ba la sogs pa la dgongs nas gsungs pa yin te/ de bzhin du 'dir lung ni snga ma bzhin no/ /'dod chags la sogs mtshungs ldan pa'i//zhes bya ba la sogs pa la/ 'dod chags dang mtshungs par ldan pa'i sems ni 'dod pa'i 'dod chags mngon du gyur pa'i sems so/ /sogs pa zhes bya ba smos pas ni de'i bde ba nyams su myong ba'i 'dun pa zhes bya ba ste bsdus te/ go rims bzhin du dral cing yongs su 'gyur ba'i sems kyis zhes bya ba'i don to//bzod pa la zhes bya ba ni mi tshangs par spyod pa bsten par spyod par bzod pa la'o/ /reg pa ni lus sprod par byed pa'o/ /dge 'dun lhag ma ni 'di la lhag ma dang dge 'dun yod pas na dge 'dun lhag ma zhes bya ba de skad du'o/ /'di la 'dri ba'i don ni dge slong gang zhig gis dral cing yongs su gyur pa'i sems kyis mi tshangs par spyad pa brten par bya ba bzod pa'i bud med dang lus sprod par byed pa de la lus la reg pa'i dge 'dun lhag mar 'gyur bar gsal na/'on kyang bcom ldan 'das kyis rnam grangs 'ga' zhig gis de la dge 'dun lhag mar ma gsungs so zhes bya ba 'di la rgyu gang yin pa kho bo la smros shig ces bya ba 'di yin no//'di la lan ni de ni 'gro ba gzhan pa'i bud med la dgongs nas gsungs pa yin te/ de bzhin du 'dir gzhung ni/ btsun pa re zhig dge slong gis 'gro ba gzhan pa'i bud med dang lhan cig lus sprod na cir 'gyur lags/nyes pa sbom por ro/ /de bzhin du mdo byed pas kyang reg pa ni tha snyad dang 'dra'o zhes bshad do/ /yang na gos kyis bar du chod pa'i bud med la dgongs nas de skad gsungs pa yin te/ de bzhin du 'dir gzhung ni/bud med bzod pa la dge 'dun lhag mar 'gyur ba gang yin pa de ni gos kyis bar du chod pa la nyes pa sbom po'o zhes bya ba yin no/ /de bzhin du 'dir gzhung gzhan ni/ btsun pa re zhig dge slong gis bar chad dang bcas pa la bar chad dang bcas par 'du shes pas lus reg par bgyid na cir 'gyur lags/nyes pa sbom por ro zhes bya ba yin no/ /de bzhin du mdo byed pas kyang gos kyis bar du chod pa la ni 'og mar ro zhes bshad do/ /yang na de ni bud med gzhan gyi 'du shes kyis reg pa la brten nas gsungs pa yin te/ de bzhin du 'dir gzhung ni/ btsun pa re zhig dge slong gis bud med gzhan dang lhan cig kun du chags la/bud med gzhan dang lhan cig lus sprod na cir 'gyur lags/ nyes pa sbom por ro zhes bya ba yin no/ /de bzhin du mdo byed pas kyang bsams pa ni de nyid yin no zhes bshad do/ /yang na de ni lus kyi dbang po nyams pa la dgongs nas bshad pa yin te/de bzhin du 'dir gzhung ni/ btsun pa re zhig bud med kyi lus kyi dbang po nyams la dge slong gis de dang lhan cig lus sprod par bgyid na cir 'gyur lags/ nyes pa sbom por ro/ /btsun pa re zhig dge slong lus kyi dbang po nyams la/ de ni bud med dang lhan cig lus sprod par bgyid na cir 'gyur lags/nyes pa sbom por ro/ /btsun pa re zhig gnyis ka lus kyi dbang po nyams la de dag lus sprod par bgyid na cir 'gyur lags/ nyes byas su'o zhes bya ba yin no/ /de bzhin du mdo byed pas kyang reg par bya ba nyid ni ma nyams pa'o zhes bshad do//yang na mnyen pa dang / 'jam pa dang / dro bar bsams pas reg pa la dgongs nas de skad du gsungs pa yin te/ de bzhin du 'dir gzhung ni/ btsun pa re zhig dge slong gis mnyen pa'i bsam pas lus reg par bgyid na cir 'gyur lags/ nyes pa sbom por ro/ /'jam pa'i bsam pa dang /dro ba'i bsam pa yang de dang 'dra'o zhes bya ba yin no/ /de bzhin du mdo byed pas kyang / 'jam pa dang dro ba dang snyi ba nyid sbom po'o zhes bshad do/ /yang na de ni sngon pham pa byung ba la sogs pa'i skabs sam las dang po pa la sogs pa'i dbang gis gsungs pa yin te snga ma bzhin no//sdom brtson bsams bzhin dge 'dun gyi zhes bya ba la sogs pa la/ dge 'dun gyi lhag ma ni khu chu 'byin pa la sogs pa'o/ /ci bsams bzhin du'am bsams bzhin du ma yin zhe na/ bsams bzhin du zhes bya ba smos te blo sngon du btang ste'o/ /'di ni bsams bzhin ma yin pa stsal to//cho ga bzhin zhes bya ba ni cho ga las ma 'das par te/ cho ga dang mthun par zhes bya ba'i tha tshig go/ /ma byas par zhes bya bar sbyar te/ des na 'dul ba las bshad na sbom po la sogs pa spyad pa'i mtshan nyid kyi cho ga'i rim pa ma byas par zhes bya ba'i don yin no//ci zhig ma byas par zhe na/ bshags pa la sogs zhes bya ba la sogs pa smos te/ bshags pa ni 'dir go bar bya ba'o/ /yang ni bshags pa yin te 'dul ba 'dzin pa la sogs pa dge slong gcig gi mdun du mi bya ba'i bsam pas dge 'dun lhag ma'i ltung ba lan gsum sgrogs pa yin no//sogs pa smos pas ni spo ba dang mgu bar bya ba dang dbyung ba rnams 'phangs so/ /de ma byas par te phyir bcos pa ma byas par ro/ /dag ces bya ba ni ltung ba med pa ste ltung ba las langs pa zhes bya ba'i tha tshig go/ /'di la 'dri pa'i bsam pa ni gang 'ga' zhig gis bsams bzhin du khu chu 'byin ba la sogs pa'i ltung ba spyad la/phyis spo ba dang mgu bar bya ba dbyung ba'i rim gyis cho ga bzhin du sgrub na yongs su dag par 'gyur ro zhes bya ba 'di ni gsal bar nges na/ 'on kyang cho ga bzhin du ma byas pa'i dge slong yang bcom ldan 'das kyis rnam pa gzhan gyis ji ltar dag pa kho nar gsungs pa zhes bya ba de kho bo la smros shig ces bya ba 'di yin no//de la lan ni 'di yin te/ de ni mtshan gyur pa la brten nas gsungs pa yin no/ /de bzhin du 'dir gzhung ni/ btsun pa dge slong dge 'dun gyi lhag ma'i ltung ba 'byung ba 'chags par yang mi bgyid/slar 'chos par yang mi bgyid la/ ltung ba las ldang bar yang 'gyur ba lta mchis lags sam/ nye ba 'khor yod de/ 'di ltar dge slong thun mong ma yin pa'i dge 'dun gyi lhag ma'i ltung ba byung bar gyur pa la de mtshan gyur nas dge slong mar red na ltung ba las langs pa zhes bya'o//dge 'dun gyi lhag mar 'gro bar gyur pa'i nyes byas kyi ltung ba ni bshags par bya'o/ /de bzhin du 'dir gzhung gzhan ni/ dge slong gi tshe ltung ba byung la dge slong ma lags pa'i tshe ldang bar 'gyur ba ji lta bu lags/ 'di ltar dge slong thun mong ma yin pa'i dge 'dun gyi lhag ma'i ltung ba phyung la de mtshan gyur nas dge slong mar red na ltung ba las langs pa zhes bya'o//de bzhin du 'dir gzhung gzhan ni/ btsun pa dge slong thun mong ma lags pa'i ltung ba'i ris bzhi byung ba 'chags par yang mi bgyid/ phyir 'chos par yang mi bgyid la/ langs pa zhes kyang bgyi/ ltung ba ma mchis par yang 'gyur ba lta mchis lags sam/ bcom ldan 'das kyis bka' stsal pa/ yod de/ mtshan gyur na'o/ /btsun pa dge slong ma thun mong ma lags pa'i ltung ba'i ris lnga byung ba 'chags par yang mi bgyid/ phyir 'chos par yang mi bgyid la/ langs pa zhes kyang bgyi ltung ba ma mchis par yang 'gyur ba lta mchis lags sam/bcom ldan 'das kyis bka' stsal pa/ yod de/ mtshan gyur na'o/ /de bzhin du mdo byed pas kyang zhing ma yin pa nyid la ni nyams so zhes bshad do/ /yang na las dang po pa la sogs pa la brten nas de skad gsungs pa yin te snga ma bzhin no//gang zag gcig la spo ba dang zhes bya ba la sogs pa la/ gang zag ni sems can te dge slong zhes bya ba'i tha tshig go/ /gcig la zhes bya ba ni dge 'dun gyi lhag ma byung ba la'o/ /spo ba ni dge 'dun gyi lhag ma byung ba bcabs pa'i nyes pa gzhom pa'i phyir ji ltar bcas pa bzhin chad pa'i las spyad pa'i phyir ro//spyad pa nyid ni spo ba spyad pa ste bcabs pa bzhin chad pa'i las spyad la da dung mgu bar bya ba ma yin pa'i phyir ro/ /mgu bar bya ba ni spo ba spyad pa la dge slong rnams kyis sems mgu bar bya ba'i phyir na zhag drug tu mgu bar bya ba sbyin pa'i phyir ro/ / spyad pa nyid ni mgu bar bya ba spyad pa ste mgu bar bya ba spyad zin pas zhes bya ba'i tha tshig go/ /de la mgu ba ni yid la 'thad cing yid 'bab ste sems rangs pa zhes bya ba'i tha tshig go/ /bzhi po dag srid pa zhes bya bar sbyar te bzhi po spo ba dang / spo ba spyad pa dang / mgu bar bya ba dang / mgu bar bya ba spyad pa'i mtshan nyid kyi tshig bzhi po dag go//gang gis zhes bya ba ni rgyu gang gis so/ /srid pa ni btub pa'o/ /'di la gzhan gyis bsams pa ni dge 'dun gyi lhag ma'i ltung ba byung ba'i gang zag gcig kho na spo ba pa'am/ spo ba spyad pa'am/ mgu bar bya ba spyad pa zhig tu 'gyur ro zhes bya ba de tsam zhig ni tshig rnams tha dad par gyur pa'i phyir shin tu mngon na 'on kyang bcom ldan 'das kyis ltung ba byung ba gcig kho na la bzhi srid par gsungs pa de ji lta bu yin pa smros shig ces bya ba 'di yin no//'di la lan ni 'di yin te/ de ni srid pa'i dbang du mdzad nas gsungs pa yin no/ /de bzhin du 'dir gzhung ni/btsun pa gang zag de nyid spo ba yang lags/ de nyid spo ba spyad pa yang lags/ de nyid mgu ba pa yang lags/ de nyid mgu bar bgyi ba spyad pa yang lags pa lta mchis lags sam/ yod de gang zag spo ba bya ba spyad pa zhig tu dge 'dun gyi lhag ma'i ltung ba 'chab pa med pa byung la/de dge 'dun gyi drung du song nas mgu bar bya ba gsol te/ de mgu bar bya ba phal cher spyad nas dge 'dun gyi lhag ma'i ltung ba gcig zhag gcig bcabs pa dang / gnyis pa zhag gnyis bcabs pa dang gnyis shig byung ba dang / de dag dge 'dun gyi drung du song ste spo ba gsol ba las de la dge 'dun gyis spo ba byin na de ltung ba gcig gi ni spo ba spyad pa ma yin no//gnyis pa'i ni spo ba spyad pa yin no/ /gsum pa'i ni mgu bar bya ba spyad pa yin no/ /bzhi pa'i ni mgu bar bya ba spyad pa yin no/ /ji srid 'tsho bar zhes bya ba la sogs pa la/ ji srid 'tsho'i bar ni ji srid 'tsho ba mthar thug pa'i bar ro//rang gi gos ni bdag nyid kyi gos dag gi'o/ /rab tu mang po ni bcu la sogs pa dpag tu med pa dag go/ /ma bsngos shing zhes bya ba ni mkhan po la sogs pa'i ming gis sngags sngon du 'gro ba'i bdag gir ma byas shing ngo //byin gyis ma brlabs par zhes bya ba ni sngon du 'gro ba kho na'i bdag gir ma byas par ro/ /yang zhes bya ba ni 'on kyang ngo / /dri ma med par zhes bya ba ni spangs pa'i ltung ba'i dri ma dang bral ba'o/ /'di la 'dri ba'i don ni gang gi tshe byin gyis ma brlabs shing ma bsngos pa'i gos gcig kyang zhag bcu 'das par 'chang na de'i tshe de la bcom ldan 'das kyis zhag bcu pa'i spang bar 'gyur ro zhes gsungs na 'on kyang yang 'di la ltung ba med pa kho nar gsungs so zhes bya ba 'di la kho bo la rgyu brjod par bya'o zhes bya ba yin no//'di la lan ni 'di yin te/ rim gyis byin gyis rlob pa la dgongs nas de skad gsungs pa yin te/de bzhin du 'dir gzhung ni/ btsun pa dge slong gis gos byin gyis ma brlabs shing ma bsngos pa brgyad dam dgu ji srid 'tsho'i bar du bcangs la ltung bar yang mi 'gyur ba lta mchis lags sam/ nye ba 'khor yod de/ 'di ltar dge slong gis nyin re nyin re zhing chos gos kyi sngags byung la gzhan byin gyis brlabs na'o//yang de zhag bcu tshun chad cig tu shi ba la dgongs nas gsungs pa yin te/ de bzhin du 'dir gzhung ni/ btsun pa dge slong gis gos lhag pa bcangs la ltung bar yang mi 'gyur ba lta mchis lags sam/nye ba 'khor yod de/ zhag bcu tshun chad cig tu shi bar gyur na'o/ /yang na rung ba ma yin pa'i gos 'chang ba la dgongs nas de skad du gsungs pa yin te/ de bzhin du 'dir gzhung ni/ btsun pa dge slong gis gos lhag pa zhag bcu las 'das par bcangs la spang ba'i ltung bar yang mi 'gyur ba lta mchis lags sam/nye ba 'khor yod de/ 'di ltar gos kyi spun rung la rgyu rung ba ma yin pa dang / rgyu rung la spun rung ba ma yin pa dang / gnyis ka rung ba ma yin pa'o//rung ba ma yin pa ni rnga bal dang / rnag gi spu dang / ri dwags kyi bal dang bsres pa dang / ma btags pa ste/ gos de lta bu zhag bcu las 'das par 'chang na nyes byas su 'gyur ro zhes bya ba yin no/ /de bzhin du mdo byed pas kyang / rab tu byung ba'i rdzas dag la ni rung ba nyid dang zhes bshad do/ /'og ma dag la yang lugs ni 'di yin no/ /yang na gzhan gyi ched du 'chang ba'i dbang du mdzad nas de skad du gsungs pa yin te/ de bzhin du lhung zed 'chang ba'i skabs nas rab tu 'byung bar 'dod ba'i ched du 'chang na ltung ba med do zhes gsungs so//lhung bzed la de skad du gsungs mod kyi 'on kyang gos la yang rung ngo zhes bya bar shes par bya'o/ /de bzhin mdo byed pas 'dir spyir rab tu byung ba'i don du nges par byas pa yang de nyid do zhes bshad do/ /'grel pa byed pas kyang 'di la ni lhung bzed la rab tu byung bar 'dod pa'i ched du 'chang na ltung ba med do zhes gsungs pa gang yin pa de'i bshad pa yin no zhes rjes su bzlas so//yang na las dang po pa la sogs pa'am sngon pham pa byung ba la sogs pa la brten nas de skad du gsungs pa yin no zhes bya bar shes par bya'o/ /dri ba dang lan 'di ni lhung bzed du gtogs pa la yang rung bas ma bshad kyang thams cad bdag nyid kyis brtag par bya'o//tha dad mtshams ni spangs pa'i gnas/ /gcig na gnas pa'i dge slong la/ /zhes bya ba la sogs pa la/ gnas gcig na zhes bya ba ni gnas khang la sogs pa 'dug gnas gcig pa ste/gnas gcig smos pas ni 'dug gnas gnyis dang / gsum dang / bzhi la sogs pa bkag pa yin no/ /gnas pa zhes bya ba ni 'dug pa'o/ /gcig yin yang bkad pa la sogs pa gnas chen po la nang na chu la sogs pas mtshams tha dad pa nyid kyang srid na de ci la rnam par bzhag pa nyid yin nam zhe na/tha dad mtshams ni spangs pa yin/ /zhes bya ba smos te/ chu la sogs pas mtshams tha dad pa dang bral ba'i yin te mtshams gcig pa'i zhes bya ba'i tha tshig go/ /'bral ba'i dri mas zhes bya ba ni 'bral ba'i spang ba'i ltung bas so/ /dri ma dang 'dra bas dri ma ste/ltung ba'i dri ma zhes bya ba'i don to/ /dri ma dang bcas pa'i zhes bya ba ni nyes pa dang bcas pa ste/ ltung ba'i dri mas nye bar gos zhes bya ba'i tha tshig go/ /'di la 'dri ba'i don ni rang 'khrungs dang bcos mas mtshams bcad pa med pa'i gnas chen po yang rung /chung ngu yang rung / gcig na gnas pa'i dge slong la gdon mi za bar 'bral ba'i spang ba'i ltung byed 'byung mi srid do zhes bya ba 'di ni mngon na/ 'on kyang ci rnam grangs 'ga' zhig gis gnas de lta bu la gnas pa la 'bral ba'i spang ba'i ltung ba 'byung bar 'gyur ram zhes bya ba ni kho bo la brjod par bya ba 'di yin no//'di la lan ni 'di yin te/ mu stegs can gyi gnas kyi dbang du mdzad nas de skad du gsungs pa yin no/ /de bzhin du 'dir gzhung ni/ btsun pa dge slong dgab pa gcig pa'i gnas gcig na mchis shing de nyid du de'i chos gos de dang 'bral bar 'gyur ba lta mchis lags sam/nye ba 'khor yod de/ 'di ltar gnas te mu stegs can gyi dge sbyong dang / rgyu ba pa dang / kun du rgyu sna tshogs pa'am/ spun ni nor bgos pa rnams kyi yin na'o zhes bya ba yin no/ /mdo byed pas kyang 'dir/ nor las dang lta ba las tha dad pa ma yin pa'i yang ngo zhes bshad do//de bzhin du 'dir gzhung gzhan ni/ dge 'dun gyi gtsug lag khang mu stegs can rnams dang nyer spyod kyis gcig pa na gnas pa rnams las gang zhig sgo gang la gnas pa la ni ltung ba med do zhes bya ba yin te/ de'i phyir 'dis ni tha dad pa nyid yin no zhes bshad pa yin no//de bzhin du 'dir gzhung gzhan ni/ btsun pa dge slong mtshams kyi nang mchis la chos gos kyang mtshams kyi nang na bzhag na chos gos de dang 'bral bar 'gyur ba lta mchis lags sam/ /nye ba 'khor yod de/ mtshams bcad pa byas la chos gos dang mi 'bral ba'i sdom pa ma byas na'o zhes bya ba yin no//de bzhin du mdo byed pas kyang / der gnang ba byas na ni chos gos dag dang 'bral bar mi 'gyur ro zhes bshad do/ /yang na gnas gcig gam mtshams gcig na gnas pa la zhes bya ba la sogs pa lta bur 'dri ba rnam pa gnyis bya la lan yang bshad ma thag pa de lta bu'i gzhung rnam pa gnyis brjod par bya'o//yang na las dang po pa la sogs pa'am sngon ltung ba byung ba la sogs pa la dgongs nas de skad du gsungs pa yin te/ snga ma bzhin no/ /zla ba pa'i gos dge slong gis zhes bya ba la sogs pa ni ci'i phyir ltung ba med par gsungs zhes bya bar sbyar te/zla ba'i gos ni zla ba 'das pa'i gos so/ /ma spangs pa zhes pa ni ma btang ba'o/ /ltung ba med pa ni kha na ma tho ba med pa'o zhes gsungs zhes bya ba ni de skad du gsungs pa'o/ /gsal bar smros zhes bya ba ni gsal por shes pa'o/ /'di la gzhan gyi bsam pa ni zla ba'i spangs pa ni zla ba 'das pa kho nas byung ngo zhes bya ba de ni kho bo cag la nges pa kho na yin na/'on kyang bcom ldan 'das kyis rnam pa gzhan gyis ji srid 'tsho'i bar du 'chang ba'i dge slong la ltung ba med pa kho nar gsungs so zhes bya ba 'di la ci ste 'di skad du gsungs zhes bya ba'i rgyu kho bo la brjod par bya'o zhes bya ba 'di yin no//'di la lan ni 'di yin te/ zla ba gcig tshun chad du shi ba la brten nas de skad du gsungs pa yin no/ /de bzhin du 'dir gzhung ni/ btsun pa dge slong gis ji srid 'tsho'i bar du bzhag la ltung bar yang mi 'gyur ba lta mchis lags sam/ nye ba 'khor yod de/zla ba gcig tshun chad du shi na'o zhes bya ba yin no/ /yang na chos gos rung ba ma yin pa la dgongs nas de skad du gsungs pa yin te/ de bzhin du 'dir gzhung ni/ btsun pa dge slong gis chos gos dgung zla ba gcig phan chad du bzhag la spang ba'i ltung byed du yang mi 'gyur ba lta mchis lags sam/nye ba 'khor yod de/ 'di ltar chos gos de spun rung la rgyu rung ba ma yin pa dang zhes bya ba yin te snga ma bzhin no/ /yang na sra brkyang bting ba la dgongs nas de skad du gsungs pa yin te/ de bzhin du 'dir gzhung ni/ btsun pa dge slong gis chos gos dgung zla drug tu bzhag la ltung bar yang mi 'gyur ba lta mchis lags sam/nye ba 'khor yod de/ chos gos rnyed nas zhag sum cu lon pa dang sra brkyang bting bar gyur na'o zhes bya ba yin no/ /mdo byed pas kyang / 'di gsum ni sra brkyang bting ba la mi 'byung ngo zhes bshad do/ /yang na sngon pham pa byung ba la sogs pa'i dbang du mdzad nas de skad du gsungs pa yin te/snga ma bzhin no/ /sdom brtson can ni pha ma las zhes bya ba la sogs pa la/ pha ma las zhes bya ba ni pha dang ma dag las so/ /rung ba ni btags pa la sogs pa ste/ dpag bsam gyi gos la sogs pa ma yin pa zhes bya ba'i tha tshig go//rung ba zhes bya ba smos pa ni rung ba ma yin pa bkag go/ /blang byas na zhes bya ba ni rang gis byas na'o/ /spangs pa'i nyes pa yis zhes bya ba ni spang ba'i ltung bas so/ /dri ma can du gyur pa zhes bya ba ni ma rung bar ro/ /'di la don ni dge slong gis pha ma las chos gos rung ba blangs pa ni nyes pa med pa kho na'o zhes bya ba de ni kho bo la gsal ba snyam byed na/'on kyang bcom ldan 'das kyis rnam grangs 'ga' zhig gis de la spang ba'i ltung byed du gsungs so zhes bya ba de lta bu yin zhes bya ba 'di la khyod kyis cung zad cig brjod par bya'o zhes bya ba ni 'di yin no//'di la lan ni 'di yin te/ dge 'dun la bsngos pa dang rang gir byed pa'i dbang du mdzad nas de skad du gsungs pa yin no/ /de bzhin du 'dir gzhung ni/ btsun pa dge slong gis pha ma las chos gos blangs la spang ba'i ltung byed du 'gyur ba lta mchis lags sam/nye ba 'khor yod de/ 'di ltar chos gos pha mas dge 'dun la bsngos pa yin la nges shes bzhin du gang zag bdag nyid kyis sgyur bar byed na chos gos grub na spang ba'i ltung byed do zhes bya ba yin no/ /'di la zhu ba las byung ba gzhung gzhan yang bcom ldan 'das kyis nye du ma yin pa las chos gos len na spang ba'i ltung byed du 'gyur ro zhes bka' stsal pa gang lags pa/dge slong gis dge slong ma las chos gos blangs la de yang spang ba'i ltung bar 'gyur ba lta mchis lags sam/ nye ba 'khor yod de/ gal te des dge 'dun la spags pa yin la/ dge slong gis bdag nyid la sbyor bar byed na'o zhes 'byung ngo //'di la mdo byed pas kyang gzhan gyis gang zag gzhan nam/ dge 'dun la bsngos pa'i rnyed pa shes bzhin du bdag nyid la bsgyur te thob na'o zhes bshad do/ /zhag bdun pa'i sman dag ni zhes bya ba la sogs pa la/ byin gyis brlabs pa dus zhag bdun gyi mthar thug par 'chang ba'i phyir te/mar sar dang 'bru mar la sogs pa'i sman ni zhag bdun pa'i sman zhes bya'o/ /sman dag bcangs na zhes bya bar sbyar te/ bcangs na zhes bya ba ni bzhag na'o/ /ltung ba med par gsungs pa zhes bya ba ni sdom brtson zhes bya bar sbyar ro/ /'bod de smra bar gyis zhes bya ba ni bsgrims te smros shig pa'o//'di la tshig le'ur byas pa'i don ni zhag bdun pa'i sman ni zhag bdun 'das pa kho nas spang ba'i ltung byed kyi ltung ba 'byung bar 'gyur ro zhes bya ba de ni kho bo cag la nges na/ 'on kyang bcom ldan 'das kyis zhag bdun pa'i sman ji srid 'tsho'i bar du bcangs pa la ltung ba med pa kho nar gsungs so zhes bya ba de ci'i phyir de skad du bka' stsal pa snying nas soms la kho bo la smros shig ces bya ba 'di yin no//'di la lan ni 'di yin te/ zhag bdun tshun chad du shi ba la dgongs nas de skad du gsungs pa yin no/ /de bzhin du 'dir gzhung ni/ btsun pa dge slong gis zhag bdun pa'i sman ji srid 'tsho'i bar du bcangs pa spang ba'i ltung byed du'ang mi 'gyur ba lta mchis lags sam/nye ba 'khor yod de/ zhag bdun tshud chad du shi na'o/ /yang na rung ba ma yin pa'i sman 'chang ba la dgongs nas de skad du gsungs pa yin te/ de bzhin du 'dir gzhung ni/ btsun pa dgung bdun pa'i sman dgung bdun las 'das par bcangs la spang ba'i ltung byed du mi 'gyur ba lta mchis lags sam/ nye ba 'khor yod de/ sman rung ba ma yin pa dang 'dres par gyur pa de gang dge slong rnams kyis spyad du rung ba ma yin no zhes bya ba yin no/ /yang na las dang po pa'am sngon pham pa byung ba la dgongs nas de skad du gsungs pa yin te/shes bzhin du ni brdzun gyi tshig ces bya ba la sogs pa la/ shes bzhin du phyin ci log pa'i 'du shes nyams su myong ba ste ched du bsams nas zhes bya ba'i tha tshig go/ /brdzun ni don log pa'o/ / tshig ni don brjod pa ste shes bzhin du slu ba la sogs pa'i ched du don gzhan du rnam par gnas pa gzhan du brjod pa zhes bya ba'i tha tshig go/ /shes bzhin du smos pas ni blo sngon du btang ba'i brdzun gyi tshig bsal to/ /de smras na ste brjod na'o/ /ltung byed me yis ni zhes bya ba la ltung byed ni dmyal ba la sogs par ltung bar byed pa'i phyir te ngan song ngan 'gro log par ltung ba dmyal ba dang dud 'gro dang yi dwags rnams su sreg par byed/'tshed par byed/ ltung bar byed pas zhes bya bas so/ /de nyid me yin te sdug bsngal ba'i rgyu yin pa'i phyir ro/ /shin tu sreg ces bya ba ni shin tu sdug bsngal bskyed pas so//min zhes ltung byed bkag pa smos pas nyes byas su brjod pa ni gnang ba yin te/ 'og ma dag la yang de bzhin kho nar shes par bya'o/ /gsal por smros zhes bya ba ni nges par smros shig pa'o/ /'di la gzhan gyis bsam pa ni gang dge slong 'ga' zhig gi ched du bsams te brdzun smras na de la gdon mi za bar ltung byed byung na/'on kyang bcom ldan 'das kyis de la ltung byed ma gsungs so zhes bya ba de la rgyu ci zhig yod ces bya ba de kho bo la smros shig ces bya ba 'di yin no/ /'di la lan ni 'di yin te/ de ni smyos pa la sogs pa'i mdun du smras pa'i dbang du mdzad nas gsungs pa yin no//de bzhin du 'dir gzhung ni/ btsun pa re zhig dge slong gis smyon pa'i drung du brdzun smras na cir 'gyur lags/ nyes byas su'o/ /de bzhin du sems 'khrugs pa dang / tshor bas nyen pa dang glen pa dang 'on pa dang gnyid kyis log pa dang / myos pa dang rab tu myos pa dang /smyon par zhugs pa dang / 'gro ba gzhan pa'i drung du brdzun smras na cir 'gyur lags/ nyes byas so zhes bya ba yin no/ /de bzhin du mdo byed pas kyang / rang bzhin nyams pa ni ma yin no/ /mi'i 'gro ba ni tha snyad du bya ba nyid yin no zhes bshad do/ /'og ma dag la yang de bzhin du shes par bya'o//yang na dben pa la dben par 'du shes pa la brten nas de skad du gsungs pa yin te/ de bzhin du 'dir gzhung ni/ btsun pa re zhig dge slong gis dben pa la dben pa'i 'du shes kyis brdzun smras na cir 'gyur lags/ nyes byas so zhes bya ba la sogs pa yin no//yang na dbus pas dbus pa la mtha' 'khob pa'i skad du smras pa la dgongs nas gsungs pa yin te/ de bzhin du 'dir gzhung ni/ btsun pa re zhig dge slong dbus pas dbus pa la mtha' 'khob pa'i skad du brdzun smras la des kyang mtha' 'khob pa'i skad dem 'tshal na cir 'gyur lags/nyes byas su'o zhes bya ba la sogs pa yin no/ /mdo byed pas kyang / 'di la rnam par reg byed la ni don go ba'o zhes bshad do/ /'og ma dag la yang de bzhin du shes par bya'o/ /de nyid la dgongs nas/ brdzun tshig 'du shes gzhan bsgyur ba'i/ /tshig don mngon par go ba'o//zhes bshad do/ /yang na las dang po pa dang sngon pham pa byung ba la sogs pa la dgongs nas de skad gsungs pa yin te snga ma bzhin no/ /dge slong gis dge slong la zhes bya ba la sogs pa ni khyim pa dang rab tu byung ba la sogs pa la yang mi'i skyon nas smra srid pas dge slong la zhes smos so//skyon nas smra ba ni khyod ni zhar ba'o/ /theng po sgur po spyi cer ro/ /mgo skya'o/ /khro ba'o zhes bya ba la sogs pas skyon nyid nas smra zhing brjod pa ste/ smad pa'i bsam pas smras pa'i tha tshig go/ /de rab la zhes bya ba ni byed pa po la ste/ yi ge lhag pa las na don lhag pa yod pas skyon brjod par 'dod pa'i 'dun pas zhes bya ba'i khyad par blta bar bya'o//de ltar yang dge slong gis mi'i skyon brjod pa'i bsam pas zhes gsungs so/ /kun mkhyen ni thams cad mkhyen pa'o/ /nges par smros zhes bya ba ni gtan la bab par smros shig pa'o/ /'di la gzhan gyis bsam pa ni gang gi tshe dge slong gis dge slong gi yul 'di'i skyon nyid brjod do snyam pa'i bsam pa des mi'i skyon nas smra ba rab tu sbyor ba de'i tshe de la the tshom med pa kho nar ltung byed du 'gyur na/'on kyang bcom ldan 'das kyis rnam pa 'ga' zhig gis de la de 'byung bar ma gsungs so zhes bya ba 'di la kho bo la rgyu brjod par bya'o zhes bya ba 'di yin no//'di la lan ni 'di yin te/ de ni mi'i skyon nas smra ba pho nya la btang ba kun tu spyod pa la dgongs nas gsungs pa yin no/ /de bzhin du 'dir gzhung ni/ btsun pa re zhig dge slong gis mi'i skyon nas smra ba pho nya la btang bas kun tu spyad na cir 'gyur lags/nyes byas su'o/ /de bzhin du yi ge dang / lag brda dang / gzhan la snyad 'dogs pa dang / brgyud pas na cir 'gyur lags/ nyes byas su'o zhes bya ba yin no/ /de bzhin du mdo byed pas kyang ngag gi'o/ /rang gi'o/ / bdag nyid dang 'brel ba'o zhes bshad do/ /yang na smyon pa la sogs pa la dgongs nas gsungs pa yin te/ de bzhin du 'dir gzhung ni snga ma bzhin no/ /yang na dbus pas dbus pa'i dge slong la mtha' 'khob pa'i skad du smras pa la brten nas gsungs pa yin te/de bzhin du 'dir gzhung ni snga ma bzhin no/ /yang na las dang po pa dang sngon pham pa byung ba la dgongs nas gsungs pa yin te snga ma bzhin no/ /dge slong nyon mongs can sems kyis/ /zhes bya ba la sogs pa la/ dge slong smos pas ni dge sbyong la sogs pa bsal ba'i phyir ro//nyon mongs can sems kyis zhes bya ba ni dbye ba'i bsam pa ste/ nyon mongs can zhes smos pas ni nyon mongs pa can ma yin pa'i sems bkag pa'o/ /dge slong gis smras zhes bya ba ni dge slong gis smras pa'o/ /phra ma ni dbyen gyi tshig go/ /dge slong la zhes bya ba ni dge slong gi yul la'o//dag ces bya ba ni ltung ba med par ro/ /bcol zhes bya ba ni don du gnyer gyis zhes bya ba'o/ /'di la gzhan gyis bsam pa gang gi tshe dge slong zhig gis dge slong gi yul la dga' yang rung mi dga' yang rung dge slong zhig gis mngon sum du 'di ni khro ba'o//'chab pa'o/ /tshig pa'o/ /mdze can no zhes zer ro zhes bya ba la sogs pa bden yang rung brdzun yang rung ba smra la de yang gal te dge slong gis smras pa de dge slong gi yul la dbyen gyi bsam pas smras na des na de la ltung byed du 'gyur ro zhes bya ba gsal ba nyid na/ 'on kyang bcom ldan 'das kyis des 'gyur bar ma gsungs so zhes bya ba 'di la khyod kyis kho bo la rgyu nye bar bstan par bya'o zhes bya ba ni 'di yin no//'di la lan ni mi'i skyon nas smra ba la bshad pa thams cad yin pa nyid la/ lung dang mdo las bshad pa'i gzhung yang de nyid yin te snga ma bzhin no//sdom brtson can gyis rung ba'i zhes bya ba la sogs pa la rung ba ni rung ba zhes bya ba me dang rma byung ba dang mtshon dang sen mo dang ne co dang rnyis pa dang bkrum pa dang bkas pa dang bcad pa zhes bya ba dag gis ci rigs par rung bar byas pa ste/ cho ga byas pa zhes bya ba'i don to/ /sa bon rnam pa lnga ni rtsa ba dang /sdong bu dang / rtse mo dang / 'gas pa dang / sa bon gyi sa bon zhes bya ba dag go/ /ltung byed byed pa zhes bya ba ni ltung byed kyi ltung ba dang ldan par ro/ /'di la gzhan gyi bsam pa ni gang zhig rtsa ba la sogs pa sa bon gyi ris lnga po rma byung ba la sogs pa'i cho gas rung bar byas pa za ba de la ni ltung byed kyi ltung ba med pa nyid do zhes bya ba de ni legs par shes na/'on kyang bcom ldan 'das kyis la lar de la ltung byed du gsungs so zhes bya ba 'di kho bo la 'bad de smros shig ces bya ba 'di yin no/ /'di la lan ni 'di yin te/ rung bar byas pa rnams myu gu skyes pa yongs su longs spyod pa la dgongs nas de skad du gsungs pa yin no//de bzhin du 'dir gzhung ni/ btsun pa dge slong gis sa bon gyi ris lnga po zhugs kyis rung ba bgyis te/ 'tshal la ltung byed kyi ltung bar 'gyur ba lta mchis lags sam/ nye ba 'khor yod de/ 'di ltar sa bon gyi ris lnga po rung bar byas pa sa la bzhag pa'am snod du bzhag pa'am gdang la btags pa las myur du skyes par gyur na'o zhes bya ba yin te/'dir mes rung bar bya ba ni rmad byung ba la sogs pa gzhan dag gi dpe tsam du zad par shes par bya'o/ /g.yogs ma med par zhes bya ba la sogs pa ni g.yogs ma med par gnas mal rung ba bshams nas ma bru bas shing ma bltas par song na ji ltar dag par gsungs zhes bya bar sbyar ro//de la g.yogs ma med par zhes bya ba ni bla gab med par ro/ /dge 'dun gyi zhes bya ba ni de bzhin gshegs pa'i nyan thos kyi dge 'dun gyi'o/ /gnas mal ni khri dang khri'u dang stan nang tshangs can la sogs pa'o//rung ba zhes bya ba ni khri dang stan nang tshangs can la sogs pa ba so dang gser dang dngul la sogs pa las byas pa dang dpag bsam gyi shing gi gos dang / tshad las lhag pa la sogs pa dang bral zhing tshad dang ldan pa zhes bya ba'i tha tshig go/ /bshams zhes bya ba ni ma bkram nas so//ma brubs zhes bya ba ni ma brtul cing ngo / /ma bltas par zhes bya ba ni blta ba ma byas par te ma bcol bar zhes bya ba'i don to/ /song na zhes bya ba ni mtshams las 'das na'o/ /ji lta bur na zhes bya ba ni rgyu gang gis na'o/ /dag par zhes bya ba ni ltung ba med par ro/ /'di la 'dri ba'i don ni gang 'ga' zhig gis dge 'dun gyi gnas mal du rung ba la khri dang khri'u la sogs pa bdag nyid kyis bla gab med par bshams la/phyis dge slong la sogs pa la bltar ma bcug par mtshams kyi phyi rol du 'gro na de'i phyir de la ltung byed kyi ltung bar 'gyur ro zhes bya ba de ni shin tu nges na/'on kyang bcom ldan 'das kyis kha cig tu de la ltung ba med par gsungs so zhes bya ba 'di la khyod kyis ci sta da skad gsungs pa kho bo la rgyu brjod par bya'o zhes bya ba 'di yin no/ /'di la lan ni 'di yin te/ bar chad kyi dbang du mdzad nas de skad du gsungs pa yin no//de bzhin du 'dir gzhung ni/ btsun pa dge slong gis dge 'dun gyi gnas mal bkram mam 'grems su stsal nas/ ma brubs shing 'brum du yang ma stsal/ dge slong gzhi pa la bltar yang ma stsal bar nye 'khor las 'das la ltung bar yang mi 'gyur ba lta mchis lags sam/nye ba 'khor yod de/ 'di ltar dge slong la gtsug lag khang der bar chad brgyad las bar chad gang yang rung ba cig nye bar gnas par gyur na'o zhes bya ba yin no/ /de bzhin du gzhan las kyang rkyen de lta bu ni ma gtogs so zhes gsungs so/ /mdo byed pas kyang nyam nga ba dang phrad pa la yang mi 'byung ngo zhes bshad do//yang na de ni las dang po pa dang sngon pham pa byung ba la sogs pa la brten nas gsungs pa yin par shes par bya ste snga ma bzhin no/ /sdom brtson can gyis zhes bya ba la sogs pa ni sdom brtson can gyis chos gos rung ba dge slong ma nye du ma yin pa la byin na ci'i phyir ltung ba med pa zhes gsungs zhes bya bar sbyar ro//de la rung ba ni rnga mo dang gnag dang ri dwags kyi spu la sogs pa dang bral ba'o/ /gos ni bgo ba ste snam sbyar bla gos dang mthar gos la sogs pa'o/ /nye du ni pha ma dag nas bdun pa tshun chad las snga ma gcig las skyes pa'o//nye du ma yin pa ni nye du min pa ste de la'o/ /byin zhes bya ba ni yongs su btang na'o/ /ltung ba med pa zhes bya ba ni nyes pa med pa'o zhes gsungs pa zhes bya ba ni bcom ldan 'das kyis de skad du bka' stsal pa ste nges par smros zhes bya bar sbyar ro/ /'di la don ni gang gi tshe dge slong gis dge slong ma nye du ma yin pa la gos rung ba byin pa de'i tshe de la ltung byed kyi ltung bar 'gyur ro zhes bya ba de ni nges na/'on kyang bcom ldan 'das kyis rnam pa 'ga' zhig gis de la ltung ba med pa kho nar gsungs so zhes bya ba 'di la khyod kyis kho bo la rgyu smros shig ces bya ba 'di yin no//de la lan ni 'di yin te/ de ni tshad du ma chog pa dang lhag pa la brten nas gsungs pa yin par blta'o/ /de bzhin du 'dir gzhung ni/ btsun pa dge slong gis dge slong ma nye du ma lags pa la gos stsal la ltung bar mi 'gyur ba lta mchis lags sam/ nye ba 'khor yod de/gos khru gang du ma chog pa'am bde bar gshegs pa'i chos gos kyi tshad yin no/ /yang na de ni rin du byin pa la dgongs nas gsungs pa yin te/ de bzhin du 'dir gzhung ni/ btsun pa dge slong gis dge slong ma nye du ma lags pa la gos stsal la ltung bar yang mi 'gyur ba lta mchis lags sam/nye ba 'khor yod de/ rin du byin la rin blangs na'o zhes bya ba yin no/ /yang na de ni dge 'dun la gos 'bul bar byed pa'am/ legs par smra ba'am/ bsnyen par rdzogs par byed pa'am/ bor rlag byung ba'am/ skyin par byin pa la brten nas gsungs pa yin te/de bzhin du 'dir gzhung ni/ dge 'dun la gos 'bul bar byed dam/ legs par smra ba la byin nam/ bsnyen par rdzogs par byed pa la sbyin nam/ bor rlag byung ba'am/ skyin par sbyin pa la ltung ba med do zhes bya ba yin no/ /yang na las dang po pa la sogs pa la dgongs nas gsungs pa yin te snga ma bzhin no//mtshams gcig gnas pa'i zhes bya ba ni mtshams kyi nang na gnas pa'o/ /mang po zhes bya ba ni bzhi la sogs pa'o/ /kha zas ma stsal bar zhes bya ba ni 'di dag la kha zas bza' ba dang bca' ba la sogs pa a ru ra tsam yang bsrul zhing bskur ba med pas zas ma stsal bar ro//tha dad ces bya ba ni so sor ro/ /bza' ba ni za bar byed pa ste/ dge slong dag ces bya bar sbyar ro/ /'di la bsam pa ni gang gi tshe mtshams gcig na dge slong bzhi la sogs pa so sor sder bcas nas zan za ba de'i tshe de dag la 'dus shing za ba'i ltung byed du 'gyur la/gal te kha zas kyis bsrul ba byas na ni de'i tshe ltung ba med pa kho nar 'gyur ro zhes bya ba ni nges pa kho na yin na/ 'o na bcom ldan 'das kyis kha cig tu ltung ba med pa kho na'o zhes gsungs pa 'di la khyed kyis rgyu brjod par bya'o zhes bya ba 'di yin no/ /'di la lan ni 'di yin te/dus yod pa la dgongs nas de skad du gsungs pa yin te/ de bzhin du 'dir gzhung ni/ dus ma gtogs par 'dus shing za ba la ltung byed du 'gyur ro zhes bya ba la sogs pa yin no/ /de bzhin du 'di la gzhung gzhan ni/ btsun pa dge slong gis 'dus shing 'tshal ba bgyis la ltung bar yang mi 'gyur ba lta mchis lags sam/nye ba 'khor yod de/ dus drug las dus gang yang rung ba zhig nye bar gyur na'o zhes bya ba yin no/ /yang na dge slong gsum zan za ba la dgongs nas de skad du gsungs pa yin te/ de bzhin du 'dir gzhung ni/ btsun pa gnas gcig tu mtshams gcig na dge slong mang po dag so sor 'tshal ma 'tshal la ltung bar yang mi 'gyur ba lta mchis lags sam/nye ba 'khor yod de/ gal te gsum zan za'i bzhi ma yin na'o zhes bya ba yin no/ /yang na zas kyi gnas so sor nges pa la dgongs nas de skad du gsungs pa yin te/de bzhin du 'dir gzhung ni/ btsun pa dge slong gis 'dus shing 'tshal ba bgyis pa ltung bar yang mi 'gyur ba lta mchis lags sam/ nye ba 'khor yod de/ 'di ltar zas kyi gnas so sor nges pa yin na'o zhes bya ba yin no/ /yang na las dang po pa la sogs pa la dgongs nas gsungs pa yin te snga ma bzhin no//kha zas bca' bar bya ba la sogs pa zhes bya ba ni kha zas bca' bar bya ba la sogs pa rung ba dus ma yin par zan ji ltar dag pa zhes bya bar gsungs zhes bya bar sbyar ro/ /de la kha zas ni mid par bya ba'o/ /mid par bya ba'i zas bu ram hags la sogs pa yang yod pas bca' bar bya ba la sogs pa zhes bya ba smos te/bca' bar bya ba zhes bya ba ni bca' bar bya ba lnga po bca' bar bya ba rtsa ba dang / sdong bu dang / lo ma dang / me tog dang / 'bras bu zhes bya ba rnams so/ /sogs pa zhes smos pas ni bza' bar bya ba lnga po 'bras chan dang /zan dron dang / lde gu dang / sha dang / snum khur zhes bya ba rnams bsdus te/ bca' bar bya ba dang bza' bar bya ba zhes bya ba'i tha tshig go/ /bca' bar bya ba dang bza' bar bya ba de yang rung ba ma yin pa glang po che dang / rta'i sha la sogs pa dang rung ba ma yin pa dang 'dres pa yang yod pas rung ba zhes bya ba smos te rung bar gyur pa'o//dus min ces bya ba la dus ni skya rengs shar nas nyi ma phyed kyi mthar thug pa'i bar yin no/ /de las bzlog pa ni dus ma yin pa ste der ro/ /za byed la zhes bya ba ni mid par byed pa'o/ /dag pa ni ltung ba med pa'o/ /the tshom gtan la dbab par zhes bya ba ni the tshom bsal bar ro//'di la bsdus pa'i don ni gang gi tshe dge slong gis dus ma yin par bca' bar bya ba ma yin pa bza' bar bya ba zos pa de'i tshe de la ltung byed kyi ltung ba 'byung bar 'gyur ro zhes bya ba de la ni kho bo cag mi mthun pa yang med na/ 'on kyang bcom ldan 'das kyis tshul 'ga' zhig gis de la ltung ba med pa kho nar gsungs pas de'i phyir kho bo'i yid gnyis bzlog par gyis shig ces bya ba 'di yin no//'di la the tshom bcad pa ni 'di yin te/ de ni gling gzhan du song ba dus ma yin par za ba'i rgyu mtshan la brten nas gsungs pa yin no/ /de bzhin du 'dir gzhung ni/btsun pa dge slong gis dus ma lags par bca' bar bgyi ba dang bza' bar bgyi ba 'tshal la ltung bar yang mi 'gyur ba lta mchis lags sam/ nye ba 'khor yod de/ gling gsum po dag tu 'dzam bu'i gling gi dus su za na'o zhes bya ba yin no/ /yang na lha'i bdud rtsi yongs su longs spyod pa la dgongs nas gsungs pa yin te/de bzhin du 'dir gzhung ni/ bcom ldan 'das dge slong gis dus ma lags par g.yar zas 'tshal la ltung bar yang mi 'gyur ba lta mchis lags sam/ nye ba 'khor yod de/ lha'i bdud rtsi za na'o zhes bya ba yin no/ /yang na nad pa'i dbang du mdzad nas de skad du gsungs pa yin te/de bzhin du nad pa la bcas pa'i kha na ma tho ba thams cad gnang bar gtogs pa'i gzhung ni/ btsun pa bro 'tshal ba la ji ltar rim gro bgyi lags/ nye ba 'khor rang bzhin gyis kha na ma tho ba ma gtogs pa ji ltar nad pa sos par 'gyur ba ltar ro zhes bya ba yin no//de bzhin du 'dir gzhung gzhan ni/ btsun pa bro 'tshal ba la ji ltar rim gro bgyi lags/ nye ba 'khor ston pa'i 'du shes nye bar bzhag la phan pa dang mthun pa'i sman dag gis rim gro bya'o/ /btsun pa bro 'tshal ba la ci zhig stsal bar bgyi/nye ba 'khor rang bzhin gyis kha na ma tho ba ma gtogs pa gang gis nad pa sos par 'gyur ba de sbyin par bya'o zhes bya ba yin no/ /de bzhin du 'dir gzhung gzhan ni/ btsun pa bro 'tshal ba la ci zhig stsal bar bgyi/ nye ba 'khor bcas pa'i kha na ma tho ba gang gis nad pa 'tsho bar 'gyur ba de nad pa la sbyin par bya'o zhes bya ba yin no//de bzhin du mdo byed pas kyang / rang bzhin gyi kha na ma tho ba dang bcas pa las gzhan pa thams cad la gso ba'i don nyid ma gtogs pa zhes bya ba'i lhag ma'o zhes bya ba dang / de bzhin du gso ba'i phyir nub mo za ba ni tshul dang mi mthun pa ma yin no zhes bshad do//dge slong cho ga sngon 'gro ba zhes bya ba ni cho ga gang gis byin len byung bas te mngon sum du mtshams kyi nang du 'thob pa'i phyogs su gnas pa lag pa bkan pas lus sam de dang 'brel bas gyen du 'degs nus pa rdzogs par ma bsnyen pa mi ma yin pa las kyang sbyin par 'dod pas yan lag gis sam de dang 'brel pas byin pa mnos pa ni byin len no zhes bya ba'i cho ga de bsgrub pa ste/cho ga yang dag par spyod pas yin gyi/ gyi na ni ma yin no zhes bya ba'i don to/ /byin len byas nas zhes bya ba ni mtshams kyi nang du rung ba byed pa la sogs pa 'thob tu rung bar gnas pa las mngon sum du blangs nas so//ci zhig ce na/ bca' bar bya ba la sogs pa zhes bya bar sbyar ro/ /ltung dang bcas zhes bya ba ni nyes pa dang bcas pa'o/ /'di la don ni dge slong gang zhig ji skad bshad pa'i cho ga brjod cing bca' bar bya ba dang bza' bar bya ba de la byin len byas te za ba de la ltung ba med pa kho na'o zhes bya ba de ni shes pa nyid na/'on kyang bcom ldan 'das kyis de la ltung ba dang bcas pa nyid du gsungs pa de gal te khyod la 'dir 'dul ba la gsal bar shes pa'i nus pa zhig yod pa de lta na kho bo la lan thob shig ces bya ba 'di yin no/ /'di la lan ni 'di yin te/de bzhin du de ni gzhan gyir 'du shes pa la dgongs nas gsungs pa yin te/ de bzhin du 'dir gzhung ni/ btsun pa dge slong gis bca' bar bgyi ba byin len bgyis pa 'tshal la ltung ba dang bcas par 'gyur ba lta mchis lags sam/ nye ba 'khor yod de/ gzhan gyi 'du shes kyis byin len byas nas za na'o/ /yang na de ni byin par rung ba ma yin pa gsog 'jog byas pa dus ma yin par za ba'i dbang du mdzad nas gsungs pa yin te/ de bzhin du 'dir gzhung ni/ btsun pa dge slong gis 'tshal ma lan cig 'tshal la ltung ba lan cig bzhi 'byung ba lta mchis lags sam/nye ba 'khor yod de/ byin len ma byas pa rung ba ma yin pa gsog 'jog byas pa dus ma yin par za na'o/ /dge slong gis dge slong la zhes bya ba la sogs pa la/ nyon mongs sems kyis zhes bya ba ni nyon mongs pa dang mtshungs par ldan pa'i sems kyis so//gsal bar lan thob shig ces bya ba ni nges bar smros shig pa'o/ /'di la don ni gang gi tshe dge slong gis khros nas dge slong la rdeg pa de'i tshe de la the tshom med par ltung byed kyi ltung bar 'gyur ro zhes bya ba de ni shes pa nyid na/ 'on kyang bcom ldan 'das kyis nyes byas su gsungs so zhes bya ba de brjod par bya'o zhes bya ba 'di yin no//'di la lan ni 'di yin te/ de ni 'dran thor la sogs pa la dgongs nas gsungs pa yin no/ /de bzhin du 'dir gzhung ni/ btsun pa dge slong gis dge slong la brgyab pa la ltung byed du yang mi 'gyur ba la lta mchis lags sam/nye ba 'khor yod de/ 'dren thor gyi bsam pa'am/ gsad pa'i bsam pas rdeg na'o zhes bya ba yin no/ /yang na gzhan gyi don du rdeg pa la dgongs nas de skad du gsungs pa yin te/ de bzhin du 'dir gzhung ni/ btsun pa re zhig dge slong gis gzhan gyi slad du dge slong la brgyab na cir 'gyur lags/nyes byas su'o zhes bya ba yin no/ /yang na gzhan rdeg tu 'jug pa la dgongs nas de skad du gsungs pa yin te/ de bzhin du 'dir gzhung ni/ btsun pa re zhig dge slong gis dge slong la gzhan gyis rdeg tu stsol na cir 'gyur lags/ nyes byas su'o zhes bya ba yin no//yang na dge slong smyon pa'i dbang du mdzad nas de skad du gsungs pa yin te/ de bzhin du 'dir gzhung ni/ btsun pa re zhig dge slong gis dge slong smyon pa la brgyab na cir 'gyur lags/ nyes byas su'o/ /de bzhin du dge slong sems 'khrugs pa dang tshor bas nyen pa dang glen pa dang 'on pa dang gnyid kyis log pa dang myos pa dang snyoms par zhugs pa dang 'gro ba gzhan du gnas pa la brgyab na cir 'gyur lags/nyes byas su'o zhes bya ba yin no/ /yang na sngon pham pa byung ba la sogs pa la dgongs nas de skad du gsungs pa yin te snga ma bzhin no//sdom brtson me la reg byed pa/ /zhes bya ba la sogs pa ni thams cad mkhyen pas me la reg pa ci'i phyir nyes byas kyi ltung bar gsungs pa nges par kho bo la smros shig ces bya bar sbyar te/ de la me la reg pa byed pa zhes bya ba ni me len par byed pa'o/ /reg par byed pa zhes smos pa ni reg pa yang bsdu ste/yang dge slong gang mi na bar 'dod nas bdag nyid kyi phyir me la reg gam reg tu 'jug na zhes 'byung ba'i phyir ro/ /kun mkhyen ni 'das pa dang ma 'ongs pa dang da ltar byung ba'i don blang bar bya ba dang / dor bar bya ba'i mtshan nyid thabs dang bcas pa thams cad lag mthil du skyu ru ra bzhag pa bzhin du yongs su mkhyen pa'i phyir ro//thugs rje dang ldan pa'i zhes bya ba ni thugs rje chen po dang ldan pas so/ /'di la don ni gang gi tshe dge slong gis me la reg gam reg tu 'jug pa de'i tshe la ltung byed kyi ltung bar 'gyur ro zhes bya ba de ni nges pa nyid yin na/ 'on kyang bcom ldan 'das kyis de la nyes byas su gsungs so zhes bya ba de ji lta bu yin pa kho bo la smros shig ces bya ba 'di yin no/ /de la lan ni 'di yin te/ de ni gzhan gyi don du reg pa la dgongs nas gsungs pa yin no/ /de bzhin du 'dir gzhung ni/ btsun pa re zhig dge slong gis gzhan du zhugs pa la reg na cir 'gyur lags/nyes byas su'o zhes bya ba 'di yin no/ /de bzhin du mdo las kyang / 'di skad du yang dge slong gang min bar bde bar 'dod nas bdag gi phyir me la reg gam reg tu 'jug na ltung byed do zhes 'byung ste bdag cis smos pa'i phyir gzhan gyi ched du ni nyes byas su'o zhes bya bar mngon no//de bzhin du mdo byed pas kyang / rang gi don nyid gtso cher yod pa'o/ /zhes bshad do/ /yang na pho nya la reg tu 'jug pa'i dbang du mdzad nas de skad du gsungs pa yin te/ de bzhin du 'dir gzhung ni/ btsun pa dge slong gis pho nya la zhugs la reg tu stsol na cir 'gyur lags/nyes byas su'o zhes bya ba yin no/ /de bzhin du yi ge dang lag brda dang gzhan la snyad 'dogs pa dang / brgyud pas reg tu stsol na cir 'gyur lags/ nyes byas su'o zhes bya ba yin te/ 'di la mdo byed pas bshad pa yang snga ma bzhin no/ / dge slong nub gnyis las lhag par zhes bya ba la sogs pa ni dge slong nub gnyis las lhag par bsnyen par rdzogs pa dang bral ba dang nyal bar byed pa ji ltar nyes byas kyi ltung ba byed par gsungs zhes bya bar sbyar ro/ /ci bsnyen par ma rdzogs pa dang / lhan cig rtag tu khyim na nyal ba la ltung ba rnam par gzhag gam zhe na/nub gnyis las lhag par zhes bya ba smos te/ nub gnyis kyi 'og tu zhes bya ba'i tha tshig go/ /su dang lhan cig ce na/ bsnyen par rdzogs pa dang bral ba zhes bya ba smos te/ bsnyen par rdzogs pa dang bral ba bsnyen par ma rdzogs pa dang dge sbyong la sogs pa dang lhan cig ces bya ba'i don to//de la rdzogs pa ni bkra shis pa ste/ mya ngan las 'das pa zhes bya ba'i tha tshig go/ /de ni sdug bsngal thams cad med pa'i phyir dang / gcig tu zhi ba'i mtshan nyid yin pa'i phyir rdzogs pa zhes bya ba'i sgrar brjod de/ dri ma thams cad bcom nas ni//mya ngan las 'das rdzogs pa thob/ /sdug bsngal tha mar byed pa ste/ /thams cad phun sum tshogs par 'gyur/ /zhes 'byung ba'i phyir ro/ /dge slong nyid rdzogs pa dang nye bar bsnyen pa'i ngo bor 'dug pa'i phyir bsnyen par rdzogs par brjod par bya bar shes par bya ste/ nga'i dge slong tshul khrims dri ma med pa de la mtho ris ni ras yug gis chod pa tsam la thar pa ni yol bas chod pa tsam mo zhes 'byung ba'i phyir ro/ /de dang bral ba ste bsnyen par rdzogs pa med pa dang zhes bya ba'i tha tshig go/ /nyal ba ni nyal te gnyid kyis log pa'i mtshan nyid de/ nyal na zhes bya ba ni gnyid kyis log na'o zhes 'byung ba'i phyir ro//byed pa zhes bya ba ni lhag par spyod pa'o/ /nyes byas ltung ba byed par zhes bya ba ni nyes byas kyi ltung ba dang ldan par ro/ /'di la bsdus pa'i don ni dge slong gang zag bsnyen par ma rdzogs pa dge sbyong la sogs pa dang lhan cig khyim gcig tu nub gnyis nyal nas nub gsum pa la de nyid dang lhan cig nyal na de'i phyir de la ltung byed kyi ltung bar 'gyur ro zhes bya ba de ni shin tu grags na/'on kyang dge slong bsnyen par ma rdzogs pa dang lhan cig nyal na de la ltung byed du 'gyur bar ma gsungs kyi nyes byas so zhes bya ba de brjod par bya'o zhes bya ba 'di yin no//'di la lan ni 'di yin te/ de ni gnas ma bskor ba'am ma g.yogs pa'i dbang du mdzad nas gsungs pa yin no/ /de bzhin du 'dir gzhung ni/ btsun pa dge slong gang zag bsnyen par ma rdzogs pa dang lhan cig tu sdum par nub gnyis lhag par mchis nyal bar bgyid la ltung byed du yang mi 'gyur ba lta mchis lags sam/nye ba 'khor yod de/ 'di ltar gnas de kun nas g.yogs la ma bskor ba'am/ phyed bskor ba yin pa'am/ kun nas bskor la ma g.yogs pa'am/ phyed g.yogs pa yin la gnas de lta bur nyal bar byed na nyes byas su 'gyur ro zhes bya ba yin no//mdo byed pas kyang 'di la phal cher g.yogs pa dang bskor ba ni gnas kyi mtha' yin no zhes bshad do/ /yang na ri'i phug la sogs par nyal bar byed pa la dgongs nas de skad du gsungs pa yin te de bzhin du 'dir gzhung ni btsun pa re zhig dge slong ri phug gam shing gi bu ga dag gam rtsig pa'i bu ga dag tu gang zag bsnyen par ma rdzogs pa dang lhan cig nub gnyis las lhag par gnas su nyal bar bgyid na cir 'gyur lags/nyes byas su'o/ /btsun pa re zhig dge slong gis shing drung du gang zag bsnyen par ma rdzogs pa dang lhan cig nub gnyis pas lhag par gnas su nyal bar bgyid na cir 'gyur lags/nyes byas su'o zhes bya ba yin no/ /mdo byed pas kyang 'di la shing ljon pa'i drung dang / rtsig pa'i bar dang / tshang tshing gi drung dag ni phyed nyid do zhes bshadado/ /yang na smyon pa dang lhan cig tu nyal bar byed pa la dgongs nas de skad du gsungs pa yin te/de bzhin du 'dir gzhung ni/ btsun pa re zhig dge slong smyon pa dang lhan cig nub gnyis sdum par mchis nyal la nub gsum pa la rang bzhin du gnas pa dang lhan cig mchis nyal na cir 'gyur lags/ nyes byas su'o/ /btsun pa re zhig dge slong rang bzhin du gnas pa dang lhan cig nub gnyis mchis nyal la nub gsum pa la smyon pa dang lhan cig mchis nyal na cir 'gyur lags/nyes byas su'o/ /de bzhin du sems 'khrugs pa dang tshor bas nyen pa dang glen pa dang 'on pa dang 'gro ba gzhan na gnas pa dang lhan cig mchis nyal na cir 'gyur lags/nyes byas su'o zhes bya ba yin no/ /yang na sngar pham pa byung ba la sogs pa la dgongs nas gsungs pa yin te snga ma bzhin no/ /dri ba dang lan 'di dag ni bud med dang lhan cig nyal ba la yang rung bas de la yang nub gnyis las lhag par lhan cig gnas na nyal ba ma gtogs par ci rigs par brtag par bya ste/de la gzhung ni/ btsun pa re zhig dge slong bud med dang lhan cig ri'i phug dag gam shing drung ngam tshang tshing gi nang ngam shing gi bu ga dag tu nyal bar bgyid na cir 'gyur lags/ nyes byas su'o/ /btsun pa re zhig dge slong bud med dang lhan cig kun nas g.yogs pa la ma bskor bar ram/phyed bskor bar mchis nyal bar bgyid na cir 'gyur lags/ nyes byas su'o/ /btsun pa re zhig dge slong bud med dang lhan cig kun nas bskor la ma g.yogs pa'am phyed g.yogs par mchis nyal bar bgyid na cir 'gyur lags/ nyes byas su'o/ /btsun pa re zhig dge slong dud 'gro'i skye gnas su gtogs pa'i bud med dang lhan cig sdum pa na mchis nyal bar bgyid na cir 'gyur lags/ nyes byas su'o/ /btsun pa re zhig dge slong bud med dang lhan cig steng gi nam mkha' la mchis nyal bar bgyid na cir 'gyur lags/nyes byas su'o/ /btsun pa re zhig dge slong smyon pa dang lhan cig sdum na mchis nyal bar bgyid na cir 'gyur lags/ nyes byas su'o/ /de bzhin du sems 'khrugs pa dang tshor bas nyen pa dang 'gro ba gzhan du gnas pa dang lhan cig sdum pa na mchis nyal bar bgyid na cir 'gyur lags/ nyes byas su'o zhes bya ba yin no/ /mdo byed pas kyang 'di la rang bzhin nyams pa ni ma yin no/ /mi'i 'gro ba pa ni tha snyad du bya ba nyid yin no zhes bshad do/ /sdom brtson tshon rtsi sna gsum gyis/ /zhes bya ba la sogs pa la/ tshon rtsi sna gsum ni rams dang / btsag dang / bska ba zhes bya ba dag go/ /gos ni gos so/ /gyon pa ni bgos pa'o/ /bcol ba ni gsol ba gdab pa sngon du 'gro ba'i don du gnyer ba'o/ /'di la dri ba'i don ni dge slong gis gang gi tshe gos lhag cig rnyed nas tshon rtsi gsum po rams dang / btsag dang / bska ba zhes bya bas kha dog bsgyur ba ma byas pa gyon na de'i tshe de la ltung byed kyi ltung bar 'gyur ro zhes bya ba bstan pa ni bstan pa 'di la zhugs pa rnams la grags pa yin no//'on kyang bcom ldan 'das kyis de la ltung ba med pa kho nar gsungs so zhes bya ba de 'di la rgyu ci zhig yod kho bo la smros shig ces bya ba 'di yin no//'di la lan ni 'di yin te/ rang bzhin gyi tshon gyis kha bsgyur ba'i gos gyon pa la dgongs nas de skad du gsungs pa yin te/ de bzhin du 'dir gzhung ni/ btsun pa dge slong gis chos gos kha dog ngan par bgyi ba gsum po dag las gang yang rung ba zhig gis kha dog ngan par ma bgyis par 'tshal la ltung bar yang mi 'gyur ba lta mchis lags sam/nye ba 'khor yod de/ 'di ltar dge slong gis rang bzhin gyi tshon can gyi gos gyon pa'o zhes bya ba yin no/ /yang na tshad du mchog pa'am lhag pa la brten nas dngos gzhi med pa la dgongs nas ltung ba med par gsungs pa yin te/de bzhin du 'dir gzhung ni/ btsun pa re zhig dge slong gis rad pa khru gang du ma 'tshal ba'am bde bar gshegs pa'i chos gos kyi tshad gcig kha dog ngan par bgyi ba gsum po gang yang rung ba zhig gis kha dog ngan par ma bgyis par 'tshal na cir 'gyur lags/nyes byas su'o zhes bya ba yin no/ /yang na gos rnying pa'i dbang du mdzad pa yin te/ 'di la lan ni/ gos sar pa rnyed nas zhes bya ba la sogs pa yin no/ /sar pa smos pa ni rnying pa kha dog ma bsgyur ba gyon na zhes shugs kyis nyes byas su shes par bya ba yin no//'dir de ltar yin par rnam par 'byed pa las/ sar pa zhes bya ba ni sar pa gnyis te sar pa'i sgo nas sar pa dang / rnyed pa'i sgo nas sar pa'o/ /don 'di la ni sar pa'i sgo nas sar pa yin par dgongs nas zhes bshad do/ /yang na de ni las dang po pa la sogs pa la dgongs nas gsungs pa yin te snga ma bzhin no//sdom brtson tshon rtsi rnam gsum gyis/ /zhes bya ba la sogs pa la/ legs par kha bsgyur ces bya ba ni te por kha bsgyur ba'o/ /gyon pa ni bgos pa'o/ /mchog ni phul du phyin pa'o/ /chod cig ces bya ba ni sol cig pa ste/ 'di la kho bo la te por the tshom yod kyi de sol cig ces bya ba'i don to/ /'di la gzhan gyi bsam pa ni dge slong gis gang gi tshe tshon rtsi sna gsum gyis kha bsgyur ba'i gos bgos pa de'i tshe de la ltung ba med par 'gyur ba gsal ba nyid na/ 'on kyang bcom ldan 'das kyis rnam pa 'ga' zhig gis ltung ba kho nar gsungs so zhes bya ba 'di la rgyu brjod par bya'o zhes bya ba 'di yin no//'di la lan ni 'di yin te/ de ni tshon rung ba ma yin pas kha bsgyur ba'i gos gyon pa la brten nas gsungs pa yin te/ de bzhin du 'dir gzhung ni/ btsun pa dge slong gis sar pa kha dog ngan par bgyi ba gsum po dag las gang yang rung ba zhig gis kha dog ngan par bgyis te 'tshal la ltung ba dang bcas pa lta mchis lags sam/nye ba 'khor yod de/ 'di ltar tshon chen pos kha dog bsgyur na'o/ /de la 'di dag tshon chen po yin te/ li khri dang thing shing dang rgya skyegs dang mtshal dang gur gum dang /btsod dang rma shing dang le brgan rtsi'o/ /tshon de lta bu dag gis kha bsgyur ba 'tshal na cir 'gyur lags/ nyes byas so/ /mdo byed pas kyang / 'di la kha dog chen por bsgyur ba'i gos bsten par mi bya'o zhes bshad do/ /yang na gos thams cad sngon po dang ser po dang /dmar po gyon pa la dgongs nas de skad du gsungs pa yin te/ de bzhin du 'dir gzhung ni/ btsun pa dge slong gis rad pa kha dog ngan par bgyi ba gsum po gang yang rung ba zhig gis kha dog ngan par ma bgyis par 'tshal la ltung ba dang bcas pa lta mchis lags sam/nye ba 'khor yod de/ 'di ltar dge slong gis gos thams cad sngon po'am dmar po bgos na'o/ /mdo byed pas kyang 'dir thams cad sngon po bgos na nyes byas su bshad do/ /yang na rung ba ma yin pa kha dog ma bsgyur ba gyon pa la brten nas de skad du gsungs pa yin te/de bzhin du 'dir gzhung ni/ btsun pa dge slong gis sar pa sar pa la kha dog ngan pa bgyi ba gsum po gang yang rung ba zhig gis kha dog ngan par ma bgyis par 'tshal la ltung byed du yang mi 'gyur ba lta mchis lags sam/ nye ba 'khor yod de/gos rung ba ma yin pa gyon na'o/ /de la rung ba ma yin pa ni 'di dag yin te/ rnga bal dang gnag gi spu dang ri dwags kyi bal dang bsres pa dang thags su ma btags pa'i gos gyon na cir 'gyur zhe na/ nyes byas su 'gyur ba'o/ /mdo byed pas kyang 'di la rab tu byung ba'i rdzas dag la ni rung ba nyid dang zhes bshad do//yang na sngar ltung ba byung ba la sogs pa'i dbang du mdzad nas de skad du gsungs pa yin te snga ma bzhin no/ /sdom brtson rin chen la reg na/ /zhes bya ba la sogs pa ni kye mdza' bo sdom brtson can gyis rin po che la reg na ji ltar dge 'dun gyi lhag ma dang sbom por gsungs pa myur du smros shig ces bya bar sbyar te/rin chen la reg na zhes bya ba la rin po che ni nor bu dang mu tig dang be+e DUr+ya dang shang ka shi la dang byi ru dang dngul dang gser dang rdo'i snying po dang spug dang dmar po dang g.yas su 'khyil ba la sogs pa bde ba sgrub pa'i phyir ro/ /de la reg pa ni reg par byed pa ste reg pa yod na'o//sbom zhes bya ba ni nyes pa sbom po'o/ /'di la ltung ba sbom zhing lci ba yod pa ste dge slong mang po tshogs pa la bshags pas ldang ba'i phyir ro/ /mdza' bo zhes bya ba ni mdza' bo zhes brjod pas 'bod pa yin no/ /brtan po zhes bya ba ni brtan pa'o/ /de la don ni dge slong gis rin po che bdag nyid kyi yin la de rung ba ma byas pa la reg na spang ba'i ltung bar 'gyur ro//'on te gzhan gyi yin na de'i tshe de la reg pa la ltung byed 'ba' zhig tu 'gyur ro zhes bya ba de ni khyod dang kho bos kyang shes pa nyid na/ 'on kyang bcom ldan 'das kyis rin po che la reg na dge 'dun gyi lhag ma dang nyes pa spom por gsungs pa de la rgyu ci zhig yod ces bya ba 'di yin no//'di la lan ni 'di yin te/ bud med rin po che dang / khyim bdag dang / blon po dang / glang po che dang / rta rin po che la dgongs nas de skad du gsungs pa yin te/ de bzhin du 'dir gzhung ni/btsun pa dge slong gis rang gi sug pas rin po che la bzung na ltung byed du yang mi 'gyur ba lta mchis lags sam/ nye ba 'khor yod de/ bud med rin po che la sogs pa rin po che lnga la bzung nas gzhi ji lta ba bzhin 'gyur ro/ /'on te nor bu rin po che'am 'khor lo rin po che la bzung na ltung byed du 'gyur ro zhes bya ba yin no//'di la gzhi ni ji lta ba bzhin gyi don ni 'di yin te/ kun du chags pa'i sems kyis bud med rin po che la reg na dge 'dun gyi lhag ma'o/ /gal te ma yin na nyes byas so/ /khyim bdag dang blon po rin po che dag la 'dod chags dang mtshungs par ldan pa'i sems kyis reg na sbom po'o//gal te ma yin na ltung ba med do/ /glang po che dang rta rin po che dag la kun du chags pa'i sems kyis reg na nyes byas so/ /gal te ma yin na ltung ba med do/ /rin po che dang der smos pa zhes bya ba la sogs pa la/ rin po che ni 'di skad bshad pa'i ngo bo'o//der smos pa ni rin po cher smos pa ste/ rol mo'i 'tshog chas wang dang 'od ma dang ba la ri dang ma hA ti dang su g+ho sha la sogs pa rtsed mo bya ba'i cha byad dang / g.yul ngo'i cha byad ral gri dang ral gri kyog po dang ral gri so gcig pa dang mdung thung dang 'phang mdung dang lcags kyo la sogs pa dang lcags mda' dang mda' phyed lcags la sogs pa mtshon cha'o//de bzhin du mdo byed pas kyang / nor bu dang / mu tig dang / bai DUr+ya dang shang ka shi la dang bye ru dang dngul dang gser dang rdo'i snying po dang sbug dang dmar po dang g.yas su 'khyil pa la sogs pa'i rin po che'o/ / reg gam reg tu bcug na byed pa po nyid yin no zhes bya ba dang / der smos pa yang de ni g.yul du spyad pa'i mtshon cha dang rol mor spyad pa'i lag cha'o zhes bshad do/ /de dag kyang rin po che bzhin du bde ba bsgrub pa'i phyir rin po che dang 'dra bas rin po cher smos pa zhes bya'o/ /kho bo zhes bya ba ni bdag gi'o//the tshom bsal ba zhes bya ba ni the tshom bcad pas so/ /rangs par zhes bya ba ni mgu bar ro/ /'di la gzhan gyi bsam pa ni dge slong gis rin po che dang rin po cher smos pa dag la reg na ltung byed du 'gyur ro zhes bya ba de tsam zhig ni shes pa nyid na/ 'on kyang bcom ldan 'das kyis nyes byas su gsungs so zhes bya ba 'dir khyod kyis kho bo'i the tshom yun ring po nas bsdogs pa bsal bas yid bde bar gyis shig ces bya ba 'di yin no//'di la lan ni lha'i rin po che dang rin po cher smos pa la dgongs nas de skad du gsungs pa yin no/ /de bzhin du 'dir gzhung ni/btsun pa dge slong gis rin po che'am rin po cher smos pa la bzung ba ltung byed du yang mi 'gyur ba lta mchis lags sam/ nye ba 'khor yod de/ lha'i rin po cher smos pa la bzung na nyes byas su 'gyur ro zhes bya ba yin no/ /yang na de ni rin po che'am rin po cher smos pa sprul pa la reg pa la dgongs nas gsungs pa yin no//de bzhin du 'dir gzhung ni/ btsun pa re zhig dge slong rin po che'am/ rin po cher smos pa sprul pa la bzung na cir 'gyur lags/ nyes byas su'o zhes bya ba yin no/ /yang na rin po che'am rin po cher smos pa nyams pa la reg pa la brten nas de skad du gsungs pa yin te/de bzhin du 'dir gzhung ni/ btsun pa re zhig dge slong gis rin po che'am rin po cher smos pa nyams pa la reg na cir 'gyur lags/ nyes byas su'o zhes bya ba yin no/ /yang na de ni sngon pham pa byung ba la sogs pa la dgongs nas gsungs pa yin te snga ma bzhin no//dge slong rin chen la reg pa zhes bya ba la sogs pa ni dge slong rin po che la reg pa ji lta bur thub pas ltung ba med par gsungs zhes bya ba yang gsal por smros shig ces bya bar sbyar te/ ltung ba med ces bya ba ni nyes pa med pa'o zhes bya ba de skad du gsungs pa ste reg na yang ltung ba med pa kho nar gsungs zhes bya ba'i don to//don gnyer zhes bya ba ni bcol ba'o/ /'di la gzhan gyi bsam pa ni dge slong gis rin po che la reg na gdon mi za par ltung byed dam nyes byas su 'gyur na/ 'on kyang bcom ldan 'das kyis rnam pa 'ga' zhig gis ltung ba med par gsungs so zhes bya ba 'di la rgyu ci zhig yod ces bya ba 'di yin no//'di la lan ni 'di yin te/ sbas pa len pa la dgongs nas de skad du gsungs pa yin no/ /de bzhin du 'dir gzhung ni/ btsun pa dge slong gis rin po che la bzung na ltung bar yang mi 'gyur ba lta mchis lags sam/nye ba 'khor yod de/ sbas pa len na'o zhes bya ba yin no/ /yang na de ni lha'i gnas la sogs par snod dang zas dang stan dang gding ba la sogs pa la brten nas gsungs pa yin te/ de bzhin du 'dir gzhung ni/ btsun pa dge slong gis rin po che la bzung la ltung bar yang mi 'gyur ba lta mchis lags sam/nye ba 'khor yod de/ lha'i gnas sam/ klu'i gnas sam/ gnod sbyin gyi gnas sam/ rgyal po'i pho brang ngam/ blon po chen po'i gnas dag tu son la de yang stan nam/ snod gzhan med na'o zhes bya ba yin no/ /de bzhin du mdo byed pas kyang 'jigs par 'gyur na rang gi la mi gnod na dge 'dun gyi dang mchod rten gyi dbyig dang gser sbas nas sam khyer nas 'gro bar bya'o//dad pa can nam dge tshul gyis so/ /med na rang gis so/ /des brko bar bya'o/ /bral na sbyin no/ /bru ba yang de dang 'dra'o zhes bshad do/ /dge slong gis dge slong la zhes bya ba la sogs pa la/gzhan gyis bsam pa ni gang gi tshe dge slong gis ga ga tshil bya ba'i bsam pas dge slong la ga ga tshil byed pa de'i tshe de'i dus na ltung byed du 'gyur ro zhes bya ba de ni shes pa nyid na/ 'on kyang bcom ldan 'das kyis rnam pa 'ga' zhig tu de la nyes byas byed par gsungs so zhes bya ba de don 'di la kho bo khyod la gsol ba 'debs kyi yang dag pa ji lta ba bzhin smras shig ces bya ba 'di yin no//'di la lan ni 'di yin te/ lus kyi dbang po nyams pas ga ga tshil byed pa'i rgyu mtshan la dgongs nas de skad du gsungs pa yin te/ de bzhin du 'dir gzhung ni/btsun pa re zhig dge slong lus kyi dbang po nyams pas lus kyi dbang po nyams pa la ga ga tshil bya ba bgyis na cir 'gyur lags/ nyes byas su'o zhes bya ba yin no/ /btsun pa re zhig dge slong lus kyi dbang po ma nyams pas lus kyi dbang po nyams pa la ga ga tshil bgyis na cir 'gyur lags/nyes byas su'o zhes bya ba yin no/ /de bzhin du mdo byed pas kyang reg par bya ba nyid ni ma nyams pa'o/ /ga ga tshil byed pa la yang ngo zhes bshad do/ /yang na bar chad dang bcas par ga ga tshil byed pa la brten nas de skad du gsungs pa yin te/de bzhin du 'dir gzhung ni/ btsun pa re zhig dge slong gis rma nas ga ga tshil bgyis na cir 'gyur lags/ nyes byas su'o zhes bya ba yin no/ /yang na rmar gtogs pa'i ga ga tshil byed pa'i rgyu mtshan gyis de skad du gsungs pa yin te/ de bzhin du 'dir gzhung ni/ btsun pa re zhig dge slong gis rma nas ga ga tshil bgyis na cir 'gyur lags/nyes byas su'o zhes bya ba yin no/ /yang na lus kyi phyogs gzhan gyis ga ga tshil byed pa la dgongs nas de skad du gsungs pa yin te/ 'dir gzhung ni/ /btsun pa re zhig dge slong gis sor mos ga ga tshil bgyid pa ma lags pa de las gzhan pa'i lus kyi phyogs mgo 'am dpung mgo 'am gru mo 'am pus mo'am rting pa'am zhugs shing ngam gor ma'am bong bas ga ga tshil bgyid na cir 'gyur lags//nyes byas su'o/ /so dang sen mo dang spu dag gis kyang de bzhin du brjod par bya'o zhes bya ba yin no/ / yang na sngon pham pa byung ba la sogs pa la dgongs nas de skad du gsungs pa yin te snga ma bzhin no/ /lo ni nyi shur ma lon pa zhes bya ba la sogs pa ni nyi shur ma lon par bsnyen par rdzogs par byed na ji ltar ltung ba med pa dang de don du gnyer ba la yang 'chags par gsungs zhes bya bar sbyar te/ci zhig ma lon zhe na/ lo ni zhes bya ba smos so/ /lo grangs ji snyed cig tu zhe na nyi shur zhes bya ba smos so/ /ci zhig byed pa la ltung ba med ce na/ bsnyen par rdzogs par byed pa la zhes smras so/ /'o na bsnyen par rdzogs par bya ba la cir 'gyur zhe na/ de don gnyer la'ang 'chags zhes bya ba la sogs par smos te/sdom pa skye bar 'gyur zhes bya ba'i tha tshig go/ /de don gnyer la zhes bya ba ni bsnyen par rdzogs pa don du gnyer ba la ste bsnyen par rdzogs par 'dod pa la zhes bya ba'i tha tshig go/ /yang zhes bya ba'i sgra ni bsdu ba ste/ mkhan po la sogs pa la ltung ba med pa 'ba' zhig tu ma zad kyi/bsnyen par rdzogs par 'dod pa la yang sdom pa 'chags pa snyam du bsams pa yin no/ /'di la 'dri ba'i bsam pa ni 'di yin te/ gang gi tshe lo nyi shu ma lon par bsnyan par rdzogs par byed pa de'i tshe mkhan po la sogs pa la yang ltung ba med pa la bsnyen par rdzogs par 'dod pa la yang bsnyen par rdzogs pa 'chags so zhes bya ba de lta bu zhig 'dir lo nyi shu ma lon par bsnyen par rdzogs par byed na mkhan po la ni ltung byed/gzhan dag la ni nyes byas/ bsnyen par rdzogs pa la ni mi 'chags par bstan to zhes bya ba 'di yin no//'di la lan ni 'di yin te/ lo nyi shu ma lon par khyim so bzung ba zhig bsnyen par rdzogs par byed pa'i dbang du mdzad nas de skad gsungs pa yin te/ de bzhin du 'dir gzhung ni/ btsun pa lo nyi shu ma lags pa zhig /dgung lo nyi shur ma lags pa'i 'du shes kyis bsnyen par rdzogs par bgyid la ltung byed kyi ltung bar yang mi 'gyur la/bsnyen par legs par rdzogs pa yang 'gyur ba lta mchis lags sam/ nye ba 'khor yod de/ lo nyi shu ma lon pa khyim so bzung ba zhig bsnyen par rdzogs par byed na'o zhes bya ba yin no/ /yang na lo nyi shu lon par 'du shes pa'am mi shes pa'am mi dran pa 'am the tshom za ba dang ldan pa la dgongs nas de skad du gsungs pa yin te/de bzhin du 'dir gzhung ni/ btsun pa re zhig dge slong gis dgung lo nyi shur ma lags pa zhig dgung lo nyi shu ma lags pa'i 'du shes kyis bsnyen par rdzogs par bgyid na bsnyen par rdzogs pa zhes bgyi'am/nye ba 'khor dang po nas mi mthun pa can gnyis ma gtogs par lhag ma brgyad ni bsnyen par rdzogs pa zhes bya ba'o zhes bya ba yin no/ /mdo byed pas kyang 'di la cig shos la ni lon par 'du shes pa nyid na'o/ /mi shes pa dang mi dran pa dang yid gnyis za ba dag la yang ngo zhes bshad do//yang na las dang po pa la sogs pa'i dbang du mdzad nas de skad du gsungs pa yin te snga ma bzhin no/ /sdom brtson myos 'gyur 'du shes kyis/ /zhes bya ba la sogs pa la myos 'gyur 'du shes kyis zhes bya ba ni gang la 'di ni myos pa bskyed pa yin no snyam pa de 'di lta bu'i 'du shes te sems yod pa de la 'di skad ces bya'o//'bru'i chang dang bcos pa'i chang myos pa skyed pa 'thung ba ni mid par mid pa'o/ /dogs pa med par zhes bya ba ni blo la the tshom med par ro/ /'di la 'dri ba'i bsam pa ni 'bru'i chang dang bcos pa'i chang myos par 'gyur ba 'thung na ltung byed du 'gyur ro zhes bya ba de ni nges pa nyid na/'on kyang bcom ldan 'das kyis de la nyes byas su gsungs so zhes bya ba de ji lta bu yin par brjod par bya'o zhes bya ba 'di yin no/ /'di la lan ni 'di yin te/ lha'i chang 'thung ba la dgongs nas de skad du gsungs pa yin no//de bzhin du 'dir gzhung ni/ btsun pa dge slong gis skyems 'tshal la ltung byed du yang mi 'gyur ba lta mchis lags sam/ nye ba 'khor yod de/ lha'i chang dag 'thungs na cir 'gyur zhe na/ nyes byas su'o zhes bya ba yin no/ /yang na sngon pham pa byung ba la sogs pa la dgongs nas de skad du gsungs pa yin te snga ma bzhin no//sdom brtson mtshan mo rin chen dag /ces bya ba la sogs pa ni sdom brtson can gyis mtshan mo rin po che dag 'dug bzhin du rgyal po'i btsun mo'i gnas na yod pa'i gtan pa'i rten la gtugs na ji ltar ltung ba med ces bya bar sbyar ro//de la mtshan mo zhes smos pa ni nyin par bkag ste de la nyes byas su gsungs pa'i phyir ro/ /rin chen ni mar me dang bsrung ba la sogs pa'i ched kyi nor bu la sogs pa'o/ /rin chen zhes smos pas ni skabs kyis na rin po cher smos pa ral gri dang pi wang dang 'od ma la sogs pas bsrung ba dang rtsed mo'i cha byad rnams kyang bsdus so//'dug bzhin du zhes bya ba ni ma bsdus par te rang gi gnas nas ma bton par ro/ /'dis ni btsun mo'i gnas rnal mar mi 'dug na de'i nyen chen po'i gnas su gyur pa'i phyir 'jug pa shin tu 'os pa ma yin no zhes bya ba bstan to//gtan rten ni rgyal po'i btsun mo'i gnas kyi sgo bcad pa'i shing ngo / /de ni dbang pos lha ma yin rnams 'jug tu mi ster ba bzhin du phur pas 'debs par byed pa 'gog par byed pa'i phyir ro/ /ro langs mi ldang bar bya ba la ji skad du sgor gtan pa'i rten btsugs na zhes bya ba la sogs pa lta bu'o//gtan pa'i rten de gang na yod pa zhig ce na/ btsun mo'i gnas yod la zhes bya ba smos te/ btsun mo'i gnas ni rgyal po'i btsun mo gnas pa'i gnas so/ /de na yod cing de dang 'brel pa ni btsun mo'i gnas yod de/ rgyal po'i btsun mo gnas pa'i gnas ni nyen chen po'i gnas su gyur pa nyid kyi phyir ltung byed du 'gyur la/de las gzhan pa dang 'brel pa'i gtan pa'i rten la gtugs pa la ni nyes byas su gsungs pa'i phyir ro/ /gtugs na ni zhes bya ba ni zhugs na'o/ /'di la ni don ni gang gi tshe dge slong gis mtshan mo rin po che dang rin po cher smos pa dag ma bsdus par rgyal po'i btsun mo'i gnas kyi gtan pa'i rten tsam du yang zhugs na de'i tshe de la ltung byed du 'gyur ro zhes bya ba de ni kho bos shes na 'on kyang bcom ldan 'das kyis kha cig las de la ltung ba med pa kho nar gsungs so zhes bya ba de ji lta bu yin par brjod par bya'o zhes bya ba 'di yin no// 'di la lan ni 'di yin te/ de ni btsun mo'i gnas stong par zhugs pa'i dbang du mdzad nas gsungs pa yin no/ /de bzhin du 'dir gzhung ni/ btsun pa dge slong gis dgung la sang skya rengs ma shar bar rin po che'am rin po cher smos pa dag ma bsdus par dag pa'i mtha'i gtan pa'i rten pa la gtugs la ltung bar yang mi 'gyur ba lta mchis lags sam/nye ba 'khor yod de/ 'di ltar dge slong gis btsun mo'i gnas stong par zhugs na zhes bya ba yin no/ /de la don ni 'di yin te/ 'di la dag pa ma 'dres pa gzhan dag thun mong ma yin pa rgyal po dang nye ba yod pas na dag pa'i mtha' yin no//yang na de ni de lta bu'i rkyen gyis 'jug pa la brten nas gsungs pa yin te/ de bzhin du 'dir gzhung ni/ rgyal pos bos sam btsun mo'am rgyal bu'am/ khrom gyi ru 'am grong mi 'am ljongs kyi mis bos na ltung ba med do zhes bya ba yin no/ /yang na las dang po pa la sogs pa la dgongs nas de skad du gsungs pa yin te snga ma bzhin no//grong nas dge slong ma la ni zhes bya ba la sogs pa ni grong na gnas pa'i dge slong ma la zhes bya bar sbyar te/ de na gnas zhes bya ba ni grong na gnas pa'o/ /de su zhig ce na sdom brtson zhes bya ba smos te dge slong zhes bya ba'i don to//ci gzhan len du 'jug pa yang yin nam zhe na/ bdag gis zhes bya ba smos te/ bdag nyid kyis yin gyi gzhan gyis ni ma yin no zhes bya ba'i tshig go/ /grong na gnas pas ci zhig byas she na/ blangs na zhes bya ba smos te/ kun du blangs na'o/ /ci zhig blangs she na/kha zas zhes bya ba smos te/ bca' bar bya ba'i bdag nyid kyi kha zas so/ /nyes med ces bya ba ni nyes pa med par ro/ /ci thams cad kyi thams cad du nyes pa med par gsungs sam zhe na/ so sor bshags bya'i zhes bya ba ni smos te/ so sor bshags dgos pa ni so sor bshags par bya ba'o//de ste so sor bshags par bya ba'i nyes pa dang mi ldan par gsungs kyi thams cad du ni ma yin no zhes bya ba'i don to/ /de la so sor bshags par bya ba ni rab tu bsgrags pa tsam gyis ltung ba bzlog pa'i phyir te/ de smra ba'i rnam par brjod pa las so sor bshags pa nyid du brjod kyi bshags pa ni ma yin no//gzhan dag na re ji ltar bshags pa ltung byed kyi ltung ba gcig cig gi mdun du bshags par bya ba ltar 'di yang de dang 'dra'o zhes zer ro/ /'di la 'dri ba'i bsam pa ni gang gi tshe dge slong grong na gnas pas dge slong ma grong na gnas pa zhig las bca' bar bya ba dang bza' bar bya ba blangs te 'chos sam zos na de'i tshe de la so sor bshags par bya ba'i ltung bar 'gyur ro zhes bya ba de ni shes na/'on kyang bcom ldan 'das kyis de la nyes byas kyi ltung ba kho nar gsungs so zhes bya ba de ji lta bu yin zhes bya ba yin no/ /'di la lan 'di yin te/kha zas rung ba ma yin pa len pa la dgongs nas de skad du gsungs pa yin no/ /de bzhin du 'dir gzhung ni/ btsun pa dge slong gis dge slong ma nye du ma lags pa shul po che na mchis pa la bsod snyoms blangs te 'tshal la so sor bshags par bgyi ba'i ltung bar yang mi 'gyur ba lta mchis lags sam/nye ba 'khor yod de/ kha zas rung bam yin pa blangs nas za bar byed na'o zhes bya ba yin no/ /yang na dge slong ma smyon pa la sogs pa la dgongs nas de skad du gsungs pa yin te/ de bzhin du 'dir gzhung ni/ btsun pa re zhig dge slong gis dge slong ma smyon ma shul po che na mchis pa la bsod snyoms rang gi sug par blangs te 'tshal na cir 'gyur lags/nyes byas su'o zhes bya ba yin te/ sems 'khrugs ma la sogs pas kyang de bzhin du brjod par bya ste snga ma bzhin no/ /yang na sngon pham pa byung ba la sogs pa la nyes byas su 'gyur ba yin te snga ma bzhin no//'dul ba dri ba'i tshig le'ur byas pa le'u gnyis pa'i gtan la dbab pa'o// //dge slong so sor thar pa'i zhes bya ba la sogs pa ni dge slong gis so sor thar pa'i mdo 'don pa lnga char yang ma bton par ji ltar des gso sbyong byas par 'gyur ba dris smros shig ces bya bar sbyar ro/ / de la so sor thar pa'i mdo 'don pa ni gleng gzhi dang pham par 'gyur ba dang / dge 'dun lhag ma dang / ma nges pa dang / ril gyis 'don pa'i mtshan nyid dag go/ /de dag ma bton par zhes bya ba ni dge 'dun gyi nang du ma brjod par ro/ /de dag gang dag 'brel pa zhe na/ so sor thar pa'i zhes smos so//so sor thar pa ni des dang por sdig pa las thar pa'i phyir de de'i yin no/ /de yis zhes bya ba ni dge slong gis so/ /gso sbyong ni tshul khrims gso ba'i phyir dang sdig pa rnam par sbyong ba'i phyir te/ 'di ltar/ dge ba mtha' dag yang dag gso byed cing / /sdig pa mtha' dag yang dag 'dir sbyong ba//de gso phyir dang sdig pa rnam sbyong phyir/ /de bzhin gshegs pas gso sbyong zhes gsungs so/ /zhes gsungs pa lta bu'o/ /'di la don ni gang gi tshe dge slong gis so sor thar pa'i mdo bton pa lnga po dag las so sor thar pa'i mdo 'don pa 'ga' tsam bton na yang de'i tshe des gso sbyong byas par gyur pa yin no zhes bya ba ni shes na/'on kyang 'ga' yang ma bton la gso sbyong yang byas par 'gyur ro zhes bya ba de ji lta bu yin pa brjod par bya'o zhes bya ba 'di yin no/ /'di la gtan la dbab pa'i rgyu ni 'di yin te/ dgag dbye la brten nas de skad du gsungs pa yin te/ de bzhin du 'dir gzhung ni/btsun pa dge slong gis so sor thar pa'i mdo 'don pa lnga po dag las so sor thar pa'i mdo 'don pa gang yang rung ba ma bton la gso sbyong yang bgyis par 'gyur ba lta mchis lags sam/ nye ba 'khor yod de/ dgag dbye'i tshe dgag dbye byed na'o/ /de bzhin du mdo byed pas kyang dgag dbye byas na 'di ma grub pa nyid ma yin no zhes bshad do//so sor thar pa'i mdo mi 'don cing zhes bya ba la sogs pa la/ so sor thar pa zhes bya ba dang / gso sbyong zhes bya ba'i don de ni bshad zin to/ /de mi 'don cing zhes bya ba ni dge 'dun gyi nang du mi brjod pa'o//de bas na 'di ni mthun pa'i gso sbyong bsal to/ /byin gyis brlabs pa ni rgyud dag pa'o/ /de ltar na 'o na gzhan nye na byin gyis rlob par 'gyur ro zhe na/ gzhan gyi drung du byin mi rlob/ /ces bya ba la sogs pa smos te/ gzhan gyi drung du zhes bya ba ni dge slong tshul khrims dang lta ba dang ldan pa'i mdun du ste/gso sbyong byin gyis mi rlob pa zhes bya bar sbyar ro/ /de bas na 'dis ni gso sbyong byin gyis brlab pa bkag go/ /'dir zhes bya ba ni gso sbyong byas pa yin la'o/ /'di la tshig gi don ni gang gi tshe dge slong gis so sor thar pa'i mdo 'don pas kyang gso sbyong mi byed la/ dge slong gzhan gyi drung du yang byin gyis mi rlob na de'i tshe ma byas pa yin no zhes bya ba de ni kho bo la nges na/'on kyang bcom ldan 'das kyis des gso sbyong byas par 'gyur ro zhes gsungs pa de ji lta bu yin pa brjod par bya'o zhes bya ba 'di yin no/ /'di la gtan la dbab pa ni 'di yin te/ sems bskyed pa'i byin gyis brlab pa la dgongs nas de skad du gsungs pa yin te/de bzhin du 'dir gzhung ni/ btsun pa dge slong gis tshig tu yang ma smras pa la gso sbyong yang bgyis par 'gyur ba lta mchis lags sam/ nye ba 'khor yod do/ /sems kyis na'o zhes bya ba yin no/ /'di la gzhung gzhan yang /btsun pa dge slong gis gso sbyong lnga po dag las gso sbyong gang yang rung ba zhig nyams su myong bar mi bgyis pa gso sbyong bgyis par yang 'gyur la/ ltung ba yang ma mchis par 'gyur ba lta mchis lags sam/ bcom ldan 'das kyis bka' stsal pa/ yod de/ gso sbyong byin gyis brlabs na'o zhes bya ba yin no//de bzhin du 'di la gzhung gzhan ni/ dge slong dag lnga po 'di dag ni sems bskyed pas 'grub par 'gyur ba ste/ gso sbyong dang / dgag dbye dang / gos byin gyis brlab pa dang / gos bsngo ba dang / gang zag mgron du bos pa'o zhes bya ba yin no/ / dge 'dun rnyed pa dge slong ni/ /zhes bya ba la sogs pa la/ dge 'dun la 'byung ba ni dge 'dun gyi'o/ /rnyed pa ni gos kyi rnyed pa la sogs pa'o/ /gcig pus zhes bya ba ni grogs med par ro/ /blangs nas zhes bya ba ni rang gir byas na'o/ /nyes med ces bya ba ni ltung ba med pa nyid du'o/ / gsal bar nges par smros zhes bya bar sbyar te/ 'di la don ni dge 'dun la bsngos pa'i rnyed pa dge slong gis rang gir byas na spang ba'i ltung ba 'byung ngo zhes bya ba ni nges pa kho na yin no/ /'on kyang bcom ldan 'das kyis ltung ba med pa nyid du gsungs so zhes bya ba de ji lta bu yin pa nges par brjod par bya'o zhes bya ba 'di yin no//'di la lan ni 'di yin te/ gcig pu gnas pas rnyed pa rang gir byas pa'i dbang du mdzad nas de skad du gsungs pa yin no/ /de bzhin du 'dir gzhung ni/ btsun pa dge slong gcig pus dge 'dun gyi rnyed pa rang gir bgyis la ltung bar yang mi 'gyur ba lta mchis lags sam/nye ba 'khor yod de/ 'di ltar dge slong gcig pu zhig gnas la/ der yang mi dag gis dge 'dun gyi ched du gos phul na'o zhes bya ba yin no/ /de bzhin du 'di la gzhung gzhan ni/ btsun pa dge slong gcig pu gnas na mchis la der yang mi dag gis dge 'dun la gos bgor btub pa dge 'dun mngon du gyur pa la bgo bar bgyi ba zhig phul na des ji ltar byin gyis brlab par bgyi lags/nye ba 'khor dge slong des gos byung ba las/ gnas 'di na ni bdag gcig pu gnas pa dge 'dun gyis gos byung ba 'di ni bgor btub pa dge 'dun mngon du gyur pa las bgo bar bya ba yin pas/gos 'di bdag gi skal ba yin te bcos legs bya'o/ /sba bar bya'o/ /bdag gis byin gyis brlab po/ /bdag gis gos 'di bcos legs bya'o/ /bdag gir byin gyis brlab po zhes sems bskyed par bya zhing tshig tu yang brjod par bya'o/ / 'on te de ltar ma byas na dge slong de gcig bus gos de rang gir mi bya ste/ gal te rang gir byed na nyes byas su 'gyur ro zhes bya ba yin no/ /de bzhin du mdo byed pas kyang dbang ba gcig nyid kyis shin tu mang po thob pa la ni mi dbang ba'i rgyur 'gyur ba med do zhes bshad do/ /'grel pa byed pas kyang 'di la 'di ltar ded dpon zhig gis dge 'dun gyi ched du rnyed pa rab tu mang po gtsug lag khang du bskur ba dang gtsug lag khang de na dge slong gcig pu zhig gnas pa mi rung ngo snyam nas len par mi byed pa dang /bcom ldan 'das kyis de ni de na gang gnas pa de dbang ngo zhes rjes su gnang ngo zhes bshad do//sdom brtson can gyis dge 'dun gyi zhes bya ba la sogs pa la/ rung ba ni kha na ma tho ba med pa ste/ rung ba zhes smos pa ni rung ba ma yin pa gser dang dngul la sogs pa'am rung ba ma yin pa'i gos rnga bal dang gnag gi spu dang ri dwags kyi bal la sogs pa'am spangs pa'am zas kyi rnyed pa sog 'jog byas pa'am/byin len ma byas pa'am/ nang du zhag lon pa la sogs pa'am/ mtshams kyi phyi rol na 'dug pa'am sbyin par bya ba ma yin pa bsal to zhes bya ba ni de skad du'o/ /rgyu ci yod ces bya ba ni 'brel pa ci yod ces bya ba'o/ /'bod de smros shig ces bya bar sbyar te/'bod de zhes bya ba ni snga phyi brtags te'o/ /re zhig dge slong gos kyi rnyed pa'am zas kyi rnyed pa'am rung ba rang gir byed pa la ni ltung ba med pa nyid du gnang na/ 'on kyang bcom ldan 'das kyis de la ltung ba kho nar gsungs so zhes bya ba la rgyu ci zhig yod pa smros shig ces bya ba 'di yin no//'di la lan ni 'di yin te/ dge 'dun gyi rnyed par bsngos pa rang gir byed pa la brten nas de skad du gsungs pa yin no/ /de bzhin du 'dir gzhung ni/ btsun pa dge slong gis dge 'dun gyi rnyed pa rung ba rang gir bgyis la ltung bar yang mi 'gyur ba lta mchis lags sam/ nye ba 'khor yod de/ dge 'dun la bsngos pa yin na'o zhes bya ba yin no/ /'di la gzhung gzhan yang / btsun pa dge slong gis pha ma las blangs la spang ba'i ltung byed du 'gyur ba lta mchis lags sam/ nye ba 'khor yod de/ 'di ltar pha mas gos de dge 'dun la bsngos pa yin la/ de dge slong gis shes bzhin du gang zag bdag nyid kyir sgyur ba byed na gos sngon du grub na spang ba'i ltung byed do zhes bya ba yin no//mchod rten la phul ba rnyed pa dag ces bya ba ni mchod rten la phul ba'i rnyed pa mchod rten de las dge slong gis blangs na ji ltar ltung ba med pa zhes gsungs zhes bya ba de bzhin du sdom brtson smros shig ces bya bar sbyar te de la phul ba ni byin pa'o//gang la zhe na mchod rten la zhes bya ba smos so/ /de la dran pa nye bar gzhag pa dang / yang dag par spong ba dang / rdzu 'phrul gyi rkang pa dang / dbang po dang / stobs dang / byang chub kyi yan lag dang / lam la sogs pa'i yon tan gyi gzugs brnyan du gyur pa'i phyir dang /'jig rten pa'i yon tan dag las yang dag par 'phags pa'i phyir mchod rten te de la'o/ /rnyed pa ni gos dang rgyan la sogs pa'i rdzas so/ /de las zhes bya ba ni mchod rten las so zhes bya ba ni de skad du'o/ /rgyal ba ni bdud bzhi'i dgra las nges par rgyal ba ste/sdig pa'i chos las nga rgyal bas/ /de bas nye 'gro nga rgyal ba/ /zhes pa 'byung ba'i phyir te/ 'di la don ni spyir mchod rten la phul ba'i rdzas blangs na gdon mi za bar ltung bar 'gyur na/ 'on kyang bcom ldan 'das kyis de la ltung ba med pa kho nar gsungs so zhes bya ba de ji lta bu yin zhes bya ba 'di yin no//'di la lan ni 'di yin te/ nyan thos kyi mchod rten la bsngos pa'i dbang du mdzad nas de skad du gsungs pa yin no/ /de bzhin du 'dir gzhung ni/ dbyar gyi nang rol dag tu mchod rten dang mchod rten la 'du ba'i rnyed pa bgos la ltung bar mi 'gyur zhing / rung bar yang 'gyur ba lta mchis lags sam/nye ba 'khor yod de/ nyan thos kyi mchod rten la bsngos pa yin la shi ba'i yo byad yin par bsams nas bgos na'o zhes bya ba yin no/ /de bzhin du mdo byed pas kyang nyan thos kyi mchod rten la phul ba ni tshangs pa mtshungs par spyod pa rnams dbang ba nyid yin no zhes bshad do//yang na dri ba dang lan 'di ni don gyi dbang gis gzhan du yang sbyar bar rung bas/ nyan thos kyi la bsngos pa'i rdzas zhes bya ba la sogs pa smos te/ nyan thos kyi mchod rten la bsngos pa'i rdzas sdom can gyis blangs na ji ltar thub pas ltung ba dang bcas par gsungs pa sdom brtson can smros shig ces bya bar sbyar ro//bsngos pa ni nges par btang ba ste byin pa zhes bya ba'i don to/ /de ci zhig ce na/ rdzas zhes bya ba smos te/ gos dang rgyan la sogs pa'o/ /gang la bsngos pa zhe na mchod rten la'o/ /mchod rten la ste de'i don ni bshad zin to//'og nas mchod rten las zhes 'chad par 'gyur te/ des na don gyi dbang gis rnam par dbye ba sgyur la mchod rten la zhes bdun par bya'o/ /mchod rten la zhes bya ba ni de bzhin gshegs pa'i mchod rten la yang yod pas gang dang 'brel pa'i mchod rten la zhe na/ nyan thos kyi la zhes smos so/ /kun shes pa'i 'bras bu sgrogs pas na nyan thos de dgra bcom pa la sogs pa la zhes bya ba'i tha tshig go/ /rdzas gang las blangs na zhe na/ mchod rten las zhes bya ba smos so/ /sdom brtson zhes bya ba ni bod pa'o/ /des na don gyis nyan thos kyi mchod rten la phul ba'i rdzas ni bcom ldan 'das kyis tshangs pa mtshungs par spyod pa rnams kho na la 'os pa nyid yin no zhes bka' stsal pa ltung ba med pa nyid du gsungs na/'on kyang bcom ldan 'das kyis rnam pa 'ga' zhig de ltung ba dang bcas pa nyid du gsungs so zhes bya ba de ji lta bu yin pa de kho bo la smros shig ces bya ba 'di yin no//'di la lan ni 'di yin te/ 'phags pa ba ra dwa dza bsod snyoms len la sogs pa bzhugs pa'i nyan thos kyi mchod rten gyi dkor blangs pa la dgongs nas de skad du gsungs pa yin no/ /de bzhin du 'dir gzhung ni/ dbyar gyi nang dag tu mchod rten dang mchod rten la 'du ba'i rnyed pa bgos na ltung bar yang mi 'gyur ba lta mchis lags sam/nye ba 'khor yod de/ nyan thos kyi mchod rten la bsngos pa yin la shi ba'i yo byad yin par bsams nas bgos na'o zhes bya ba yin no/ /'dis ni 'phags pa shA ri'i bu la sogs pa yongs su mya ngan las 'das pa'i mchod rten la phul ba'i rdzas ni shi ba'i yo byad yin par bsams nas bgo bar bya ba nyid yin gyi/'phags pa ba ra dwa dza bsod snyoms len la sogs pa yongs su mya ngan las 'das pa'i ni ma yin no zhes bstan pa yin no/ /de ni bstan pa yongs su bsrung ba'i phyir 'khor dgra bcom pa lnga brgya da rung klu'i rgyal po hu ru'i gnas na bzhugs zhes brjod do//spo ba spyod gnyis gnas gcig na/ /zhes bya ba la sogs pa ni spo ba spyod pa dang ldan pa gnyis gnas gcig na ste gnas par byed cing zhag tu gnas pas gnas par byed na ci'i phyir nyes pa med pa de nyid ces bya ba kho bo la te por smros shig ces bya bar sbyar te/te por zhes bya ba ni shin tu'o/ /'di la don ni spo ba spyod pa gnyis gnas gcig na gnas par byed na/ bcom ldan 'das kyis nyes byas dang zhag gi bul du mi chud par gsungs na/ 'on kyang de gnyis la ltung ba med pa kho nar gsungs so zhes bya ba de 'di la gal te khyod la 'dul ba yongs su shes pa'i nus pa ci zhig yod ce na/de nus pa dang mthun par kho bo la myur du smros shig ces bya ba 'di yin no/ /'di la lan ni 'di yin te/ mu stegs can spo ba'i dbang du mdzad nas de skad du gsungs pa yin no/ /de bzhin du 'dir gzhung ni/btsun pa bcom ldan 'das kyis spo ba pa gnyis gnas gcig na gnas par mi bya'o zhes bka' stsal pa gang lags pa/ btsun pa spo ba pa gnyis gnas gcig na gnas na ltung bar mi 'gyur ba lta mchis lags sam/ nye ba 'khor yod de/ gzhan mu stegs can dag cig spo ba la gnas pa yin na'o zhes bya ba yin no//de bzhin du mdo byed pas kyang / de dang mu stegs can gnas pa la gnas pa dang der lhan cig pa la nyes pa med do zhes bshad do/ /nam yang ltung ba mi byed pa zhes bya ba la sogs pa ni nam yang ltung ba mi byed na ci'i phyir thub pas spo bar 'os par gsungs pa snying rje dang ldan pa khyod gsal bar smros shig ces bya bar sbyar te/nam yang zhes bya ba ni tshe'i mthas gtugs kyi bar du'o/ /ltung ba ni dge 'dun lhag ma'o/ /mi byed pa zhes bya ba ni dgag pa'o/ /spo bar 'os pa spo bar spyad par bshad pa'o/ /brtse ldan ni snying rje dang ldan pa'o//'di la don ni tshe'i mthar thug gi bar du dge 'dun lhag ma'i ltung ba 'ga' yang mi byed na/ 'on kyang bcom ldan 'das kyis spo ba pa kho nar gsungs so zhes bya ba de ji lta bu yin pa/ gzhan la phan pa la brtson pa khyod kho bo la gsal bar smros shig ces bya ba 'di yin no//'di la lan ni 'di yin te/ mu stegs can spo ba byin pa la dgongs nas de skad du gsungs pa yin no/ /de bzhin du 'dir gzhung ni/ btsun pa nam yang ltung ba mi 'byin la de yang spo ba pa lags la lta mchis lags sam/ nye ba 'khor yod de/ mu stegs can spo ba pa yin na'o//ltung ba yod pa ma yin la zhes bya ba la sogs pa la ltung ba yod pa ma yin pa la gal te spo ba sbyin par byed na ci'i phyir thub pas ltung ba med par gsungs pa kho bo la nges par smros shig ces bya bar sbyar te/ de la ltung ba yod pa ma yin pa ni dge 'dun lhag ma mi spyod pa'o//spo ba ni chad pa'i las so/ /des na dge 'dun gyi lhag ma byung ba la dge 'dun gyis ci'i phyir spo ba byin/ 'on kyang dge 'dun la ltung ba 'gar yang ma gsungs so zhes bya ba de ji lta bu yin pa kho bo la smros shig /'di la lan ni 'di yin te/ mu stegs can spo ba la dgongs nas de skad du gsungs pa yin no//de bzhin du 'dir gzhung ni/ btsun pa dge 'dun gyis ltung ba ma byung ba zhig la spo ba stsal la ltung bar yang mi 'gyur ba lta mchis lags sam/ nye ba 'khor yod de/ mu stegs can la'o zhes bya ba yin no/ /gsar bus rgan po las 'das na'o zhes bya ba la sogs pa la/'das na zhes bya ba ni thod rgal du ste rgan rims las rgal na zhes bya ba'i tha tshig go/ /su zhig las 'das na zhe na rgan po las zhes bya ba smos so/ /su zhig gis she na/ gsar bus zhes bya ba smos te/ gzhon rabs kyis so/ /gnas mal ni gtsug lag khang la sogs pa ste 'dir gnas shing 'dug pas so//bzlog par gyis shig ces bya ba ni gsol gcig pa'o/ /des na gang gi tshe dge slong gsar bus rgan rims bkol nas gnas mal gtsug lag khang dang khri dang khri'u la sogs pa dang por len na de'i tshe rgan rims las 'das pa'i phyir nyes byas kyi ltung bar 'gyur ro zhes bya ba ni nges pa nyid na/shing dag kyang rgan rims bzhin du bskor bar bya'o zhes 'byung la/ de bzhin du thams cad la yang rgan rims bzhin du zhes gsungs na/ 'on kyang bcom ldan 'das kyis rgan rims ji lta ba las 'das pa 'di la ltung ba med pa kho nar gsungs so zhes bya ba de ji lta bu yin pa brjod dgos so//'di la lan ni 'di yin te/ gzhi'i spang ba thob pa la brten nas de skad du gsungs pa yin no/ /de bzhin du 'dir gzhung ni/ btsun pa bcom ldan 'das kyis dge slong gzhon rabs kyis dge slong rgan rabs bkol te gnas mal nod par mi bya'o zhes bka' stsal pa gang lags pa/btsun pa dge slong gzhon rabs kyis dge slong rgan rabs bkol te gnas mal mnos la ltung bar yang mi 'gyur ba lta mchis lags sam/ nye ba 'khor yod de/ gang gis dge 'dun las gzhi'i spang ba'am rim gro'i spang ba 'thab pa'am 'jigs pa dang bcas nas phyogs nas 'bros par 'dod pa yin na'o zhes bya ba yin no//gnas mal de nyid spyod pa la zhes bya ba la sogs pa ni gnas mal de nyid spyod pa la ni ci'i phyir thub pas nyes pa med pa dang nyes pa dang bcas par gsungs pa'o/ /'bod de kho bo la gsal bar smros shig ces bya bar sbyar te/gnas mal ni gding ba dang gding ba'i gding ba la sogs pa'o/ /de nyid ces bya ba ni brjod par 'dod pa'o/ /nyes pa med pa ni ltung ba med pa'o/ /dang zhes bya ba ni bsdu ba'o/ /nyes bcas zhes bya ba ni ltung ba dang bcas pa'o/ /'di la don ni gnas mal la res 'ga' chos nyams par spyod na ltung ba kho nar 'gyur la/'on te cho ga las 'byung ba bzhin spyad na ni ltung ba med pa kho na yin no/ /'on kyang bcom ldan 'das kyis yul gcig la ltung ba dang ltung ba med par ma gsungs so zhes bya ba de ji lta bu yin par brjod par bya'o zhes bya ba 'di yin no//'di la lan ni 'di yin te/ gang zag gi dge 'dun gyi gnas mal spyod pa'i dbang du mdzad nas de skad du gsungs pa yin no/ /de bzhin du 'dir gzhung ni/ btsun pa gnas mal de nyid spyod pa la ltung ba dang bcas shing de nyid spyod pa la ltung ba ma mchis pa lta mchis lags sam/ nye ba 'khor yod de/ gang zag gi gnas mal kha dog ngan par ma byas pa'am/ kha tshar ring po spyod na ltung ba dang bcas so/ /dge 'dun gyi spyod na ltung ba med do zhes bya ba yin no/ /dge 'dun gyi gnas mal la zhes bya ba la sogs pa la/ dge 'dun gyi zhes bya ba la ni dge 'dun mang ba'o//gnas mal zhes bya ba ni spyod pa zhes bya bar sbyar ro/ /rang gi gos kyis ni zhes bya ba ni gang zag gi gding ba dang gding ba'i gding bas so/ /ma g.yogs par zhes bya ba ni ma bkab par ro/ /brtul zhugs can zhes bya ba ni dge slong la 'bod pa ste/ 'di ltar brtul zhugs dge slong gi sdom pa yod pas so//nges tshig gi don ni gang gi tshe dge 'dun gyi gnas mal stan nang tshangs can la sogs pa la gang zag gi gding ba'i gding bas ma g.yogs par spyod na de'i tshe de la nyes byas kyi ltung bar 'gyur na/ 'on kyang dge slong gi dge 'dun gyi gnas mal la gding ba'i gding ngas ma g.yogs par spyod kyang ltung ba med do zhes gsungs so zhes bya ba de dge slong kho bo la smros shig ces bya ba 'di 'byung ngo //'di la lan ni 'di yin te/ de ni gding ba bgo ba nyid du phul ba spyod pa la brten nas gsungs pa yin no/ /de bzhin du 'dir gzhung ni/btsun pa bcom ldan 'das kyis dge slong gi dge 'dun gyi gzhi la bar du ma bcad par spyad par mi bya'o zhes bka' stsal pa gang lags pa/ btsun pa dge slong gi bar du ma bcad par spyad par ltung bar yang mi 'gyur ba lta mchis lags sam/ nye ba 'khor yod de/ 'di ltar khyim bdag gis gding ba'i gding ba'am/bgo ba bar chad ma byas par spyad par dge 'dun la phul ba yin na'o zhes bya ba yin no/ /'dul ba dri ba'i tshig le'ur byas pa le'u gsum pa'i gtan la dbab pa'o// //ltung ba zhes bya ba la sogs pa ni ltung ba rnam par rig byed yin nam/ ci zhig ces bya ba la sogs pa myur du kho bo la don ji lta ba bzhin du smros shig ces bya bar dri ba re re la sbyar bar bya'o//rnam par rig byed ni gzhan dag la go bar byed/ khong du chud par byed pa'i phyir te/ gzhan dag la bdag ni dge ba dang mi dge ba dang / lung du ma bstan pa'i sems dang sems las byung ba la 'jug pa dag gis kun nas bslang ngo zhes bya bar go bar byed pa zhes bya ba'i don to//ci zhig ces bya ba ni 'dri ba'o/ /gzugs can ni 'di la gzugs yod pa'i phyir ro/ /bstan mod ces bya ba ni 'di na'o/ /che ge mo zhig na'o zhes bstan par nus pa'i phyir ro/ /thogs dang bcas pa ni sgrib pa thogs pas rang gi yul du gzhan 'byung ba'i gags byed pa'i phyir ro//zag bcas ni zag pa yod pa'i phyir ro/ /'dus byas ni rgyu dang rkyen gyis byas pa'i phyir ram/ 'dus byas kyi mtshan nyid dang ldan pa'i phyir ro/ /'on te zhes bya ba ni 'dri ba'o/ /ci zhes bya ba ni yang 'dri ba nyid do/ /'jig rten pa ni 'khor ba'i khongs su gtogs pa'i phyir ro//phung por ldan pa ni gzugs dang / tshor ba dang / 'du shes dang / 'du byed dang / rnam par shes pa zhes bya ba spungs pa'i mtshan nyid phung po dag gi khongs su gtogs pa ste phung por gtogs pa zhes bya ba'i tha tshig go/ /khams dang ldan pa ni yul dang /dbang po dang / rnam par shes pa zhes bya ba rnam pa bco brgyad kyi ngo bo nyid kyis khams rnams kyi khongs su gtogs pa'i phyir te khams dang ldan pa zhes bya ba'i tha tshig go/ /skye mched dang ldan pa ni yul dang dbang po dang / yid dang / chos zhes bya ba sems dang sems las byung ba skye ba'i sgor gyur pa'i skye mched dag gi nang du chud pa'i phyir te skye mched du gtogs pa zhes bya ba'i tha tshig go//zin pa ni sems dang sems las byung ba rnams kyi gnas kyi ngo bor nye bar bzung ba ste phan pa dang gnod pa dag gis phan tshun rjes su byed pa'i phyir ro//lung bstan zhes bya ba ni 'bras bu yid du 'ong ba'i phyir ram/ dge ba dang mi dge ba'i ngo bor lung du bstan pa'i phyir bstan pa zhes bya ba'i tha tshig go/ /'byung ba ni sa dang / chu dang / me dang / rlung gi mtshan nyid do/ /de bzhin zhes bya ba ni bsdu ba'o/ /'byung ba las gyur pa ni 'byung ba dag la yod pa'i phyir te 'byung ba la brten pa zhes bya ba'i tha tshig go//de ni mig dang / rna ba dang / sna dang / lce dang / lus dang / gzugs dang / sgra dang / dri dang / ro dang / reg bya'i phyogs gcig dang rnam par rig byed ma yin pa'i mtshan nyid do/ /kun sbyor ni 'ching ba'i bdag nyid yin pa'i phyir ro//bsgribs pa ni nyon mongs pa'i dri mas khebs pa'i phyir ro/ /'am zhes bya ba ni rnam par rtog pa ste/ 'og ma dag la yang de dang 'dra'o/ /nyon mongs can ni mi dge ba'i phyir ro/ /zang zing dang bcas pa ni 'dod chags la sogs pa'i nyon mongs pa kun du spyod na des mngon par 'dod pa'i dngos po thob par ro myang ba'i bya ba yin pa'i phyir ro//'on te zhes bya ba ni dri ba'o/ /zhen pa rten pa ni 'dod pa'i yon tan dang ldan pa'i phyir ro/ /'thab bcas ni 'dod chags la sogs pa'i nyon mongs pa rnams ni bdag dang gzhan la gnod par byed pa'i bdag nyid kyi phyir 'thab pa zhes bya ste de dang der lhan cig 'brel par spyod pa'i phyir ro//dmigs pa dang bcas pa ni yul 'dzin pa'i phyir ro/ /sems ni rnam par shes pa'i ngo bo ste/ dge ba dang mi dge ba dang lung du ma bstan pa la sogs pa'i phyir ram/ dge ba dang mi dge ba dang lung du ma bstan pa'i chos rnams kyis bstsags pa'i phyir ro//las bya ba'i ngo bo nyid yin pa'i phyir ro/ /'am zhes bya ba'i sgra ni 'on te zhes bya ba dang bcas te dri ba'i don yin par shes par bya'o/ /rnam smin bcas pa ni 'bras bu yid du 'ong ba dang yid du 'ong ba ma yin pa'i phyir te rnam par smin pa yod pas so//de las gzhan pa ni bshad pa las bzlog pa'o/ /de bas na thams cad la so so'i dri ba 'di sbyar bar bya ste/ des na de las gzhan zhes bya ba'i sgras ltung ba ci zhig rnam par rig byed ma yin pa zhig gam/ gzugs can ma yin pa zhig gam/ bstan du med pa zhig gam/ thogs pa med pa zhig gam/ zag pa med pa zhig gam/ 'dus ma byas pa zhig gam/ 'jig rten las 'das pa zhig gam/ phung po dang / khams dang / skye mched dang mi ldan pa zhig gam/ ma zin pa zhig gam/ lung du ma bstan pa zhig gam/ kun du sbyor ba ma yin pa zhig gam/ma bsgribs pa zhig gam/ nyon mongs pa ma yin pa zhig gam/ zang zing med pa zhig gam/ nges par 'byung ba la brten pa zhig gam/ 'thab pa dang bcas pa ma yin pa zhig gam/ dmigs pa med pa zhig gam/ sems ma yin pa zhig pa zhig gam/ las ma yin pa zhig gam/rnam par smin pa ma yin pa zhig ces bya ba de rnams go rims bzhin du 'phags par blta bar bya'o/ /'das pa ni 'das pa'i dus su bsdus pa ste/ byed pa zhes bya ba'i tha tshig go/ /'am zhes bya ba ni dri ba'o/ /ma 'ongs pa ni ma 'ongs pa'i dus su bsdus pa ste/ byed pa ma thob pa zhes bya ba'i tha tshig go//da ltar ni da ltar gyi dus su bsdus pa ste byed pa zhes bya ba'i don to/ /yin zhes bya ba ni yin pa'o/ /dge ba ni rnam par smin pa yid du 'ong ba'i phyir ro/ /de las gzhan zhes bya ba ni rjes bsnyags te des na ci zhig mi dge ba'am zhes bya ba'i tha tshig tu 'gyur ro//lung du ma bstan pa'i dri ba ni sngar bshad zin to/ /'dod pa'i khams dang ldan pa ni 'dod pa'i khams dang ldan pa ste/ 'dod pa na spyod pa'i sred pas bdag gir byas pa zhes bya ba'i don to/ /de bzhin du/ gzugs khams ldan zhes bya ba ni gzugs kyi khams dang ldan pa ste/ gzugs na spyod pa'i sred pas bdag gir byas so zhes bya ba'i tha tshig go/ /yang zhes bya ba'i sgras ni gzugs med pa'i khams dang ldan pa'am zhes bya ba brjod de/ des na ci zhig gzugs dang ldan pa zhig yin nam zhes bya ba yin no/ /gzugs med pa'i khams dang ldan pa ste/ gzugs med pa na spyod pa'i sred pas bdag gir byas ba zhes bya ba'i tha tshig go//slob pa ni 'phags pa'i gang zag bdun gyi rgyud la skyes pa'i phyir ro/ /'on te zhes bya ba ni dri ba'o/ /mi slob pa ni dgra bcom pa'i rgyud la skyes pa'i phyir ro/ /de gnyis spangs pa ni slob pa dang mi slob pa'i mtshan nyid rnam gnyis dang bral ba ste/ci zhig slob pa yang ma yin mi slob pa yang ma yin pa zhig gam snyam du bsams pa bzhin no/ /bsgom pas spang bya zhes bya ba ni bsgom pas spang bar bya na zhes bya ba'i don to/ /bsgom pa ni goms pa'o/ /des na gang zhig 'phags pa'i lam yang dang yang du bsgom pas spang bar bya ba de la de skad ces bya'o//'on te zhes bya ba ni dri ba'o/ /mthong bas zhes bya ba ni spang bar bya ba zhes bya ba'i rjes bsnyeg go/ /des na dri ba'i don ni ci zhig mthong bas spang bar bya ba zhig gam zhes bya bar 'byung ste/ bden pa bzhi mthong bas spang bar bya ba zhig ces bya ba'i tha tshig go//lus kyi ni lus la brten nas bskyed pa'i phyir ro/ /ngag gi ni ngag la brten nas bskyed pa'i phyir ro/ /sems kyi ni sems la brten nas bskyed ba'i phyir ro/ /'dir ji skad bstan pa'i rnam par gzhag pa ni 'di yin te/ de la ltung ba ni ci zhig rnam par rig byed dam/ rnam par rig byed ma yin pa zhig yin smras pa/ gang yin pa de la bshad pa ni 'di yin te/ ltung ba ni rnam par rig byed dam rnam par rig byed ma yin pa'i ngo bo yin no/ /de bzhin du 'dir gzhung ni/ nye ba 'khor ltung ba ni rnam par rig byed ces kyang bya la/ rnam par rig byed ma yin pa zhes kyang bya'o zhes bya ba yin te/de bzhin du 'og ma dag la yang lan ci rigs par sbyar ro/ /gzugs can nam/ gzugs can ma yin pa zhes 'dri ba la/ ltung ba ni gzugs can du brjod pa'o/ /bstan du yod pa'am/ bstan du med pa zhes 'dri ba la/bstan du med par brjod par bya'o/ /thogs pa dang bcas pa'am/ thogs pa med pa zhes 'dri ba la/ thogs pa med pa zhes brjod par bya'o/ /zag pa dang bcas pa'am/ zag pa med pa zhes 'dri ba la/ zag pa dang bcas par brjod par bya'o/ /'dus byas sam 'dus ma byas zhes 'dri ba la/'dus byas su brjod par bya'o/ /'jig rten pa'am 'jig rten las 'das pa zhes 'dri ba la 'jig rten par brjod par bya'o/ /phung po dang khams dang skye mched du gtogs sam ma gtogs zhes 'dri ba la/ phung po dang khams dang skye mched du gtogs par brjod par bya'o//zin pa'am ma zin pa zhes 'dri ba lam zin pa zhes brjod par bya'o/ /lung du bstan pa'am lung du ma bstan pa zhes 'dri ba la/ lung du bstan pa yang yin la/ lung du ma bstan pa yang yin par brjod par bya'o/ /'byung ba'am 'byung ba las gyur pa zhes 'dri ba la/'byung ba las gyur par brjod par bya'o/ /kun du sbyor ba'am sbyor ba ma yin pa zhes 'dri ba la/ kun du sbyor bar brjod par bya'o/ /bsgribs pa'am ma bsgribs pa zhes 'dri ba la/ bsgribs par brjod par bya'o/ /nyon mongs pa can nam/ nyon mongs pa can ma yin pa zhes 'dri ba la nyon mongs pa can du brjod par bya'o//zang zing dang bcas pa'am/ zang zing med pa zhes 'dri ba la zang zing dang bcas par brjod par bya'o/ /zhen pa rten pa'am nges par 'byung ba rten pa zhes 'dri ba la/ zhen pa rten pa zhes brjod par bya'o/ /'thab pa dang bcas pa'am/'thab pa med pa zhes 'dri ba la 'thab pa dang bcas par brjod par bya'o/ /dmigs pa dang bcas pa 'am dmigs pa med pa zhes 'dri ba la/ dmigs pa med par brjod par bya'o/ /sems sam sems ma yin pa zhes 'dri ba la/ sems ma yin par brjod par bya'o//las sam las ma yin pa zhes 'dri ba la las su brjod par bya'o/ /rnam par smin pa dang bcas pa'am rnam par smin pa med ces 'dri ba la/ rnam par smin pa dang bcas pa yang yin la rnam par smin pa med pa yang yin par brjod par bya'o/ /'das pa'am ma 'ongs pa'am da ltar zhes 'dri ba la/'das pa'ang ma yin la ma 'ongs pa'ang ma yin da ltar yang ma yin par brjod par bya'o/ /dge ba'am mi dge ba'am lung du ma bstan pa zhes 'dri ba la/ mi dge ba dang lung du ma bstan par brjod par bya'o/ /'dod pa dang gzugs dang gzugs med pa'i khams dang ldan pa zhes 'dri ba la/'dod pa'i khams su gtogs par brjod par bya'o/ /slob pa'am mi slob pa'am slob pa yang ma yin mi slob pa yang ma yin zhes 'dri ba la/ slob pa yang ma yin mi slob pa yang ma yin par brjod par bya'o/ /mthong ba'am bsgom pas spang bar bya zhes 'dri ba la/bsgom pas spang bar brjod par bya'o/ /lus kyi'am ngag gi'am sems kyi zhes 'dri ba la/ lus kyi yang yin ngag gi yang yin sems kyi yang yin par brjod par bya'o/ /'dri ba'i lan bcom ldan 'das kyis gsungs pa kho nar blta bar bya ste/ bdag gis gzhung mangs pas 'dir ma smos so//'dri ba'i lan 'di dag ni bdag gis ci rigs par gzhung bla ma'i rgya cher bshad pa'i nang du bkod pas brtag par bya ste gzhung mangs pas 'dir ma smos so/ /ci dngos de nyid byed pa la/ /zhes bya ba la sogs pa la dngos ni don to/ /de nyid ces bya ba ni spyir smos pa'o//byed pa la zhes bya ba ni lhag par spyod pa la'o/ /gnyis su 'gyur ba ni dngos po gnyis su 'gyur ba'o/ /srid yod dam zhes pa ni btub bam zhes pa'o/ /de nyid bstan pa ltung dang zhes bya ba la sogs pa smos te/ dang zhes bya ba ni bsdu ba'o/ /myur du zhes bya ba ni myur bar ro//'di la don ni gzhi gcig pa rtag pa dang mi rtag pa lta bur 'gal ba'i chos nyid gnyis su 'gyur ba mi srid par ni shes pa nyid na/ ci gzhi gcig la ltung ba dang ltung ba med pa dag 'byung ba gang yin pa de srid pa yod dam zhes bya ba de kho bo la myur du smros shig ces bya ba 'di yin no//'di la gtan la dbab pa ni 'di yin te/ sra brkyang bting ba dang ma bting ba dang gnas su 'bral ba la sogs pa'i dbang du mdzad nas de skad du gsungs pa yin no/ /de bzhin du 'dir gzhung ni/ btsun pa dngos po de nyid spyod pa la ltung bar 'gyur zhing dngos po de nyid spyod pa la ltung ba ma mchis par 'gyur ba lta mchis lags sam/bka' stsal pa/ dngos po de nyid spyod pa la ltung bar 'gyur zhing dngos po de nyid spyod pa la ltung pa med par 'gyur ba yod do/ /btsun pa dngos po de nyid spyod pa la ltung bar 'gyur ba ji lta bu lags/ 'di ltar dge slong gis sra brkyang ma bting ba'i gnas su gos rung ba ma yin pa ci tsam 'dod pa bcangs pa'am/snam sbyar med par grong du 'jug gam/ mgron du ma bos par grong du 'jug gam/ 'dus shing za'am/ yang yang za na ltung bar 'gyur ro/ /ltung ba ma mchis par 'gyur ba ji lta bu lags/ 'di ltar dge slong gis sra brkyang bting ba'i gnas su gos rung ba ma yin pa ci tsam 'dod pa bcangs pa'am/ snam sbyar med par grong du 'jug gam/ mgron du ma bos par grong du 'jug gam/ 'dus shing za'am/ yang yang zan ltung ba med par 'gyur te/ de ltar na dngos po de nyid spyod pa la ltung bar 'gyur zhing /dngos po de nyid spyod pa la ltung ba med par 'gyur ro zhes bya ba yin no/ /ci gzhi gang gis lhag ma med par zhes bya ba la sogs pa la/ gang gis zhes bya ba ni spyir smos pa'o/ /lhag ma med pa ni 'di la dge slong gi dngos po las lhag ma ma lus pa'i phyir ro//de nyid kyis zhes bya ba gzhi rnam par spyod pa'i phyir nges par gzung ba yin no/ /lhag ma dang bcas pa ni dge 'dun lhag ma la sogs pa ste de dag lhag par spyad na dge slong gi dngos po med par mi 'gyur ba'i phyir te/ phas pham par 'gyur ba'i chos bzhi po dag ni lhag ma med pa yin gyi/'di ni lhag ma dang bcas pa'o zhes gsungs pa'i phyir ro/ /'di la don cig zhi gcig lhag par spyod pa la phas pham par 'gyur ba dang dge 'dun lhag mar 'gyur ba gnyis ka srid dam zhes bya ba 'di yin no/ /'di la lan ni 'di yin te/ thun mong ma yin pa'i phas pham par 'gyur ba lhag par spyod pa'i dbang du mdzad nas de skad du gsungs pa yin no//de bzhin du 'dir gzhung ni/ btsun pa gzhi gang gis lhag ma ma mchis pa'i ltung bar 'gyur ba'i gzhi des lhag mar bcas par 'gyur ba lta mchis lags sam/ bcom ldan 'das kyis bka' stsal pa/yod de/ 'di ltar dge slong mas thun mong ma yin pa'i phas pham par 'gyur ba gzhi lhag par spyad na lhag ma med par 'gyur ro/ /dge slong gis spyad na dge 'dun lhag ma'o zhes bya ba yin no/ /ci gzhi gang gis phas pham pa'i zhes bya ba la sogs pa'i ni gzhi gang gis zhes bya bar sbyar te/gzhi gang zhig lhag par spyod pa'i gzhi de nyid kyis so/ /gzhi des dge 'dun lhag mar 'gyur ram zhes bya bar sbyar ro/ /bsgre ba bstan pa'i phyir de bzhin zhes bya ba smos te/ de bzhin zhes bya ba de dang 'dra bar ro/ /ji ltar 'gyur zhes bya bar sbyar te/ ji ltar ltung byed kyi ltung bar 'gyur ro zhes bya ba'i tha tshig go//des na ci gzhi gang gis phas pham par 'gyur ba'i ltung bar 'gyur ba'i gzhi des ltung byed kyi ltung bar 'gyur ram zhes bya ba'i don yin no/ /'di la gtan la dbab pa'i sbyar ba ni 'di yin te/ thun mong ma yin pa'i pham par 'gyur ba lhag par spyod pa la dgongs nas de skad du gsungs pa yin no//de bzhin du 'dir gzhung ni/ btsun pa gzhi gang gis phas pham par 'gyur ba'i ltung bar 'gyur ba'i gzhi des dge 'dun lhag mar 'gyur ba lta mchis lags sam/ bka' stsal pa/ yod de/ dge slong mas lus reg pa spyad na phas pham par 'gyur la/dge slong gis spyad na dge 'dun lhag mar 'gyur ro/ /gzhi gang gis phas pham pa'i ltung bar 'gyur ba'i gzhi des ltung byed du 'gyur ba lta mchis lags sam/ nye ba 'khor yod de/ dge slong mas shes bzhin du dge slong ma'i gnas ngan len gyi ltung ba 'chab par byed na skya rengs shar nas phas pham par 'gyur la/dge slong gis bcabs na ltung byed du 'gyur ro zhes bya ba yin no/ /gang gis dge 'dun lhag mar 'gyur ba'i zhes bya ba la sogs pa ni 'di yang nyes byas la bsgre bar bstan pa'i phyir de bzhin du bya ba la sogs pa smos te/ yang zhes bya ba ni dri ba'o//des na don ni spyi'i ngo bo'i gzhi gang zhig lhag par spyad pas dge 'dun lhag ma'i ltung bar 'gyur ba'i gzhi de nyid kyis ltung byed kyi ltung bar 'gyur ram/ de bzhin du gzhi gang gis dge 'dun lhag ma'i ltung bar 'gyur ba'i gzhi de nyid kyis ci nyes byas kyi ltung bar 'gyur ram zhes bya ba yin no//'di la lan ni 'di yin te/ thun mong ma yin pa'i khu chu 'byin pa lhag par spyod pa la dgongs nas de skad du gsungs pa yin no/ /de bzhin du 'dir gzhung ni/ btsun pa gzhi gang gis dge 'dun lhag mar 'gyur ba'i gzhi des ltung byed du 'gyur ba lta mchis lags sam/bcom ldan 'das kyis bka' stsal pa/ yod de/ dge slong gis ched du bsams te khu chu 'byin par byed na dge 'dun lhag mar 'gyur la/ dge slong mas phyung na ltung byed do/ /dge slong ma zhig sde zhing gnas na dge 'dun lhag mar 'gyur la/dge slong gnas na nyes byas su 'gyur ro zhes bya ba yin no/ /ci gzhi gang gis ltung byed kyi zhes bya ba la sogs pa la/ ji ltar 'dod bzhin zhes bya ba ni ji ltar dga' ba bzhin du ste/ ji ltar bsams pa bzhin du zhes bya ba'i tha tshig go/ /'di la don ni gzhi gang gis gang zhig lhag par spyad pas ltung byed kyi ltung bar 'gyur ba'i gzhi de nyid kyis ci so sor bshags par bya ba'i ltung bar 'gyur ram zhes bya ba de ji ltar bsams pa bzhin smros shig ces bya ba 'di yin no//'di la lan ni 'di yin te/ thun mong ma yin pa'i ltung ba lhag par spyod pa la dgongs nas de skad du gsungs pa yin no//de bzhin du 'dir gzhung ni/ btsun pa gzhi gang gis ltung byed kyi ltung bar 'gyur ba'i gzhi des so sor bshags par bgyi ba'i ltung bar 'gyur ba lta mchis lags sam/ bcom ldan 'das kyis bka' stsal pa/ yod de/ dge slong gis nye du ma yin pa dag las kha zas bsod pa blangs na ltung byed du 'gyur la/dge slong mas blangs na so sor bshags par bya bar 'gyur ro zhes bya ba yin no/ /ci gzhi gang gis ltung byed kyi zhes bya ba la sogs pa la/ khyod ces bya ba ni khyod la'o/ /nus pa ni mthu'o/ /des na tshig gi don ni/ dge slong gis gang zhig lhag par spyad pas ltung byed kyi ltung bar gsungs pa des ci nyes byas kyi ltung ba rnam par gzhag pa srid dam zhes bya ba 'di yin no//'di la lan ni 'di yin te/ thun mong ma yin pa'i ltung byed lhag par spyod pa la dgongs nas de skad du gsungs pa yin no/ /de bzhin du 'dir gzhung ni/ btsun pa gzhi gang gis ltung byed kyi ltung bar 'gyur ba'i gzhi des nyes byas su 'gyur ba lta mchis lags sam/ bcom ldan 'das kyis bka' stsal pa/ yod de/ dge slong mas rtswa sngon po yod pa'i phyogs su bshang ba dang gci ba dag byas na ltung byed du 'gyur la/ dge slong gis byas na nyes byas so zhes bya ba yin no//gang gis so sor bshags pa la sogs pa la srid dam zhes bya ba ni btub bam zhes bya ba'o/ /bdag gi mdun du zhes bya ba ni bdag gi thad du'o/ /des na don ni rnam pa gang gis so sor bshags par bya ba'i ltung bar rnam par gzhag pa de nyid kyis ci nyes byas kyi ltung bar 'gyur ba srid dam zhes bya ba de dge slong gal te khyod la mthu yod na kho bo'i mngon du smros shig ces bya ba 'di yin no//'di la lan ni thun mong ma yin pa'i so sor bshags par bya ba'i ltung ba'i dbang du mdzad nas de skad du gsungs pa yin no/ /de bzhin du 'dir gzhung ni/ btsun pa gzhi gang gis so sor bshags par 'gyur ba'i ltung bar 'gyur ba'i gzhi des nyes byas su 'gyur ba lta mchis lags sam/bcom ldan 'das kyis bka' stsal pa/ yod de/ dge slong gis nags tshal gyi bsel ba ma bskos par kun dga' ra ba'i phyi rol du bca' bar bya ba dang bza' par bya ba len na so sor bshags par bya bar 'gyur la/dge slong mas blangs na nyes byas su 'gyur ro zhes bya ba yin no/ /ji ltar dge slong lung ma bstan pa'i zhes bya ba la sogs pa'i sems gnas zhes bya ba'i sgra ni gnyis ka la yang sbyar te/ dge ba'i sems la gnas pa dang / lung du ma bstan pa'i sems la gnas pa'i zhes bya ba'i don to/ /pha ma ni pha dang ma dag go/ /mnar med pa bya ba ni mtshams med par byed par ro/ /mi dge ba'i sems la gnas pa la mtshams med par ma gsungs zhes bya bar sbyar te/ mi dge bas smos pas ni lung du ma bstan pa'i sems la gnas pa bsdu'o//'di la don gang gi tshe dge slong gis dge ba ste/ 'bras bu yid du 'ong ba dang yid du mi 'ong ba dang bral ba'i sems kyis pha dang ma srog dang bral na de'i tshe mtshams med pa yin par gsungs kyi mi dge ba ste/ 'bras bu yid du mi 'ong ba dang lung du ma bstan pa'i sems kyis ni ma yin no zhes bya ba 'di la rgyu ci yod ces pa 'di yin no//'di la bsam pa ni de ni pha dang ma nad tshor ba drag po nyams su myong ba dag bsod nams kyi blos gsad pa la dgongs nas gsungs pa yin no/ /de bzhin du 'dir gzhung ni/ btsun pa ci lags/ dge slong gis dge ba'i sems kyis ma srog dang phral na yang phas pham par 'gyur zhing mtshams ma mchis pa'i kha na ma tho ba'i las kyis kyang reg par 'gyur la/ mi dge ba'i sems kyis ma srog dang phral na yang phas pham par mi 'gyur zhing mtshams ma mchis pa'i kha na ma tho ba'i las kyis kyang reg par mi 'gyur ba lta mchis lags sam/bcom ldan 'das kyis bka' stsal pa/ nye ba 'khor yod de/ dge slong gis dge ba'i sems kyis ma srog dang phral na yang phas pham par 'gyur zhing mtshams ma mchis pa'i kha na ma tho ba'i las kyis kyang reg par 'gyur la/mi dge ba'i sems kyis ma srog dang phral na yang phas pham par mi 'gyur zhing mtshams med pa'i kha na ma tho ba'i las kyis kyang reg par 'gyur ba yod de/ de bzhin du mi dge ba dang lung du ma bstan pa'i sems kyis kyang rgyas par brjod par bya'o/ /btsun pa ji ltar dge slong gis dge ba'i sems kyis ma srog dang phral na yang phas pham par 'gyur la mtshams ma mchis pa'i kha na ma tho ba'i las kyis kyang reg par yang 'gyur la/mi dge ba'i sems kyis ma srog dang phral na yang phas pham par mi 'gyur zhing mtshams ma mchis pa'i kha na ma tho ba'i las kyis kyang reg par mi 'gyur lags/nye ba 'khor 'di ltar dge slong gis ma nad pa zhig ste yun ring por sdug bsngal ba'i tshor ba mi zad pa rtsub pa drag pa yid du mi 'ong ba myong pa/ des de rkyen des srog dang phral na phas pham par 'gyur zhing mtshams med pa'i kha na ma tho ba'i las kyis reg par yang 'gyur ro/ / de bzhin du mdo byed pas kyang phan par 'dod pa nyid kyis 'chi ba'i phyir sman ma yin pa byin pa la ni na smad pa med do zhes bshad do/ /'di ltar dge slong gis ma nad pa la 'bras chan mngar thug gam 'u sha'am sha byin pa la de yang rkyen des dus las 'das na de la phas pham pa'i ltung bar yang mi 'gyur la mtshams med pa'i kha na ma tho ba'i las kyis kyang reg par yang mi 'gyur ro//de bzhin du mdo byed pas kyang / mid par bya ba mi 'phrod pas sbyin na'o zhes bshad do/ /btsun pa ji ltar dge slong gis mi dge ba'i sems kyis ma srog dang phral na phas pham par 'gyur zhing mtshams ma mchis pa'i kha na ma tho ba'i las kyis kyang reg par 'gyur la/mi dge ba'i sems kyis ma srog dang phral na yang phas pham par mi 'gyur zhing mtshams ma mchis pa'i kha na ma tho ba'i las kyis kyang reg par mi 'gyur lags/ nye ba 'khor yod de/ 'di ltar dge slong gis nor ram dbang gis bslu ba'i phyir ma srog dang phral ba ni phas pham par 'gyur zhing mtshams med pa'i kha na ma tho ba'i las kyis kyang reg par 'gyur ro//'di ltar dge slong gis mi dge ba'i sems kyis gnag gam lug gam ra la bsnun par byas la/ las de yang ma la bsnun pa/ de yang rkyen des dus las 'das la phas pham pas ltung bar yang mi 'gyur ba la mtshams med pa'i kha na ma tho ba'i las kyis reg par yang mi 'gyur ro//btsun pa ji ltar dge slong gis lung du ma bstan pa'i sems kyis ma srog dang phral na phas pham par 'gyur zhing mtshams ma mchis pa'i kha na ma tho ba'i las kyis kyang reg par 'gyur la/lung du ma bstan pa'i sems kyis ma srog dang phral na yang phas pham par mi 'gyur zhing mtshams ma mchis pa'i kha na ma tho ba'i las kyis kyang reg par mi 'gyur la/ 'di ltar dge slong gis ma gsad pa'i sbyor ba byed cing des ma gsad pa'i sbyor ba byas nas nyal la de gnyid log pa dang ma srog dang phral na phas pham par 'gyur zhing mtshams med pa'i kha na ma tho ba'i las kyis kyang reg par 'gyur ro//de la dge slong gis lung du ma bstan pa'i sems kyis sa'am shing ngam lo ma'i spyil bu la bsnun par byas pa las/ de yang ma la bsnun la de yang rkyen des dus las 'das na de la phas pham pa'i ltung bar yang mi 'gyur zhing mtshams med pa'i kha na ma tho ba'i las kyis reg par yang mi 'gyur te/pha dang dgra bcom pa srog dang 'bral bar byad na yang de bzhin du brjod par bya'o zhes bya ba yin no/ /dge slong rung ba gnas gcig dang zhes bya ba la sogs pa la rung ba ni tshul khrims dang lta ba dang ldan pa ste tshogs kyi kha bskang bar 'os pa zhes bya ba'i tha tshig go//de ni gnas kyang yin la gcig kyang yin pas gnas gcig go/ /de ni mtshams kyang yin la gcig kyang yin pas mtshams gcig go/ / gnas gcig mtshams gcig ni gnas gcig dang mtshams gcig go/ /gnas gcig dang mtshams gcig na gnas pas na gnas gcig dang mtshams gcig na gnas pa ste de yod pa bzhin du'o/ /gnas gcig smos pas ni gnas mang po bkag go/ /gnas gcig pa nyid yin yang res 'ga' bar du chu la sogs pas rnam par chod pas mtshams tha dad pa nyid du yang 'gyur bas de'i phyir mtshams gcig ces smos so//des na mtshams tha dad pa ma yin pa'i gnas gcig na gnas pa'i gnas pa zhes bya ba'i don to/ /de'i tshig ces bya ba ni bshad ma thag pa'i dge slong gi tshig gi ngag ste/'dun pa byin pa zhes bya ba'i tha tshig ste de med par ro/ /nyes byed min zhes bya ba ni ltung ba med par te tshul khrims dang lta ba dang ldan pa 'os pa mtshams kyi nang na gnas pa'i 'dun pa ma byin pa la sogs pa'i las des bsnyen par rdzogs pa la sogs pa ni ltung ba med pa zhes bya ba'i tha tshig go//'di la gzhan gyi bsam pa ni gang gi tshe mtshams de na 'dug pa tshogs kyi kha bskang bar 'os pa lus sam 'dun pa'i sgo nas tshogs par ma zhugs pa de las gzhan pa'i dge slong dge 'dun du gyur pas gsol ba la sogs pa'i las byas na de'i tshe mi mthun pa nyid kyis las su mi 'gyur ro zhes bya ba de ni legs par grags na/'on kyang gang gi tshe dge slong de lta bu yod bzhin du dge 'dun gyi las byas na de'i tshe ltung ba med do zhes gsungs so zhes bya ba de go ji lta bu zhig ces bya ba yin no/ /'di la bshad pa ni 'di yin te/ de ni de bzhin gshegs pa dgra bcom pa yang dag par rdzogs pa'i sangs rgyas kyi dbang du mdzad nas gsungs pa yin no//de bzhin du 'dir gzhung ni/ btsun pa dge 'dun gyis dge slong dang po nas ma bsnyil bar mtshams kyi nang na mtshungs par gnas par gyur pa de'i tshe tshig mchis par las thams cad bgyis na bgyis pa zhes kyang bgyi zhing ltung ba yang ma mchis par 'gyur ba lta mchis lags sam/nye ba 'khor yod de/ de bzhin gshegs pa dgra bcom pa yang dag par rdzogs pa'i sangs rgyas yin na'o/ /ngas 'di skad du maud gal gyi bu de lta bas na zla ba phyed phyed cing so sor thar pa'i mdo thon cig ces bka' stsal to//so sor thar pa ston par mdzad pa de bzhin gshegs pa byon to zhes ni bka' ma stsal to zhes bya ba yin no/ /de bzhin du mdo byed pas kyang / rgyal ba ni mi mthun pa byed pa nyid ma yin no/ /kha skong bar byed pa nyid kyang ma yin no zhes bshad do//khyim pa gnas bzhin dge 'dun gyis/ /zhes bya ba la sogs pa la/ khyim pa ni khyim can te 'di la khyim zhes bya ba khang khyim yod pas so/ /gnas bzhin zhes bya ba ni 'khor bzhin du ste 'dug bzhin du zhes bya ba'i tha tshig go/ /dge 'dun gyis zhes bya ba ni bzhi'i tshogs la sogs pa'i dge 'dun gyis so//las shig byas na zhes bya ba ni las brgya rtsa gcig nyams su myong bar byas na ste/ las kyang byas par 'gyur zhes bya ba dang 'dir sbyar ro/ /de yis zhes bya ba ni khyim pa 'dug par gyur pa'i las kyis so/ /las byas pa ni chos dang mthun par las byas pa'i phyir te/dge 'dun gyi las kyang byas par 'gyur zhing zhes bya bar sbyar ro/ /yang zhes bya ba ni bsdu ba'o/ /'di la gzhan gyi bsam pa ni bcom ldan 'das kyis thams cad tshul khrims yongs su dag pa dang / lta ba mtshungs pa dag dang lhan cig gsol ba dang / gsol ba dang gnyis dang gsol ba dang bzhi'i las bya bar gsungs kyi khyim pa 'dug pa la ni ma yin no zhes bya ba la sogs pa gsungs na/'on kyang bcom ldan 'das kyis khyim pa 'dug bzhin du dge slong dag gi las byas pa zhes kyang bya la ltung ba yang med do zhes gsungs pa de ji lta bu yin pa kho bo la brjod par bya'o zhes bya ba 'di yin no//'di la lan ni 'di yin te/ de ni rgyal po dad pa bskyed pa'i phyir gsungs pa yin no/ /de bzhin du 'dir gzhung ni/ btsun pa bcom ldan 'das kyis khyim pa 'dug par dge 'dun gyis gso sbyong mi bya'o zhes gsungs pa gang lags/khyim pa mchis bzhin du dge 'dun gyis gso sbyong bgyi zhing so sor thar pa'i mdo gdon pa bton na bton pa zhes kyang bgyi la/ ltung ba yang ma mchis par 'gyur ba lta mchis lags sam/ bcom ldan 'das kyis bka' stsal pa/ yod de/ ngas 'di skad du dge slong dag khyed kyis rgyal po'i khrom rnams sogs la rgyal po gsal rgyal gyi mdun du so sor thar pa thon cig dang de dad par 'gyur ro zhes bka' stsal to zhes bya ba yin no//de bzhin du 'dir gzhung gzhan ni/ /kun dga' bo khyod kyis nyes te gal te rgyal po gzugs can snying pos so sor thar pa thos par gyur na lhag par dad par 'gyur zhing dad nas kyang dad pa'i lhag pa'i bya ba byed par 'gyur ba gang yin pa de dag gnas yod do//kun dga' bo de lta bas na rjes su gnang gi skye bo gtso bo dad pa can de lta bu gang dag yin pa de dag la bsgrags par bya'o/ /'di la kha cig dbang phyug lags na de dag dad pa can ma lags so//kha cig ni dad pa can lags la de dag dbul ba lags so/ /bcom ldan 'das kyis bka' stsal pa/ de dag la yang bsgrags par bya'o zhes gsungs pa yin no/ /de bzhin du mdo byed pas kyang / dad pa can dang gtso bo dag dga' bar 'gyur ba lta na cho ga rjes su bsgrags pa la kha na ma tho ba med do//drung du gso sbyong byed pa la yang ngo zhes bshad do/ /dge dang lung ma bstan sems la/ /zhes bya ba la sogs pa la sems zhes bya ba'i sgra dang gnas pa zhes bya ba'i sgra ni gnyis ka dang sbyar bar bya ste/ des na tshig gi don ni dge ba'i sems la gnas pa dang lung du ma bstan pa'i sems la gnas pa la zhes bya bar 'gyur ro/ /de la dge ba'i sems ni dad pa la sogs pa dang mtshungs par ldan pa'i sems te/ rnam par smin pa yid du 'ong ba can zhes bya ba'i don to/ /lung du ma bstan pa'i sems ni bzo 'drub pa la sogs pa dang mtshungs par ldan pa'i sems te/rnam par smin pa yid du 'ong ba dang mi 'ong ba dang bral zhes bya ba'i tha tshig go/ /dri yis bdag gi bdag tu ji ltar 'dod par smras zhes bya bar sbyar te/ bdag ces bya ba ni bdag gi'o/ /ji ltar 'dod pa'i zhes bya ba ni dga' bar ro//'di la gzhan gyis bsams pa ni 'bras bu ni rgyu dang mthun par 'gyur ro zhes 'byung bas re zhig mi dge ba'i sems la gnas pa la ni ltung ba 'byung bar mthong ste sA lu'i sa bon las sA lu'i myu gu lta bu yin na/ des na ci dge ba dang lung du ma bstan pa'i sems la yang de 'byung ngam zhes bya ba de brjod par bya'o zhes bya ba 'di yin no//'di la lan ni 'di yin te/ mchod rten gyi 'khor sar rtswa sngon med par byed pa dang bsams bzhin ma yin par bslab pa'i gzhi las 'das pa la dgongs nas de skad du gsungs pa yin no/ /de bzhin du 'dir gzhung ni/btsun pa ci lags dge slong dge ba'i sems dang ldan pa la ltung ba 'byung ba lags sam/ 'on te mi dge ba'i sems dang ldan pa'am/ 'on te lung du ma bstan pa'i sems dang ldan pa la ltung ba 'byung lags sam/ bcom ldan 'das kyis bka' stsal pa/ kun dga' bo dge slong dge ba'i sems dang ldan pa la yang ltung ba 'byung la/mi dge ba'i sems dang ldan pa la yang ltung ba 'byung / lung du ma bstan pa'i sems dang ldan pa la yang 'byung ngo / /dge ba'i sems dang ldan pa la ji lta bu zhe na/ 'di ltar dge slong gsar bu bslab pa'i lo rgyus kyis mkhas pa mchod rten gyi 'khor sar rtswa sngon po med par byed cing 'chag pa'i srang dag nas me tog dag 'thog par byed pa ste/de ltar na dge ba'i sems dang ldan pa la 'byung bar 'gyur ro/ /mi dge ba'i sems dang ldan pa la ji lta bu zhe na/ gang zhig bsams bzhin du sangs rgyas kyi bslab pa'i gzhi bcas pa las 'da' bar byed pa ste/de ltar na mi dge ba'i sems dang ldan pa la 'byung bar 'gyur ba yin no/ /lung du ma bstan pa'i sems dang ldan pa la ji lta bu zhe na/ gang zhig bsams bzhin du ma yin par sangs rgyas kyi bslab pa'i gzhi bcas pa las 'da' bar byed pa ste/ de ltar na lung du ma bstan pa'i sems dang ldan pa la 'byung bar 'gyur ro zhes bya ba yin no//de nyid kyi phyir/ rab tu 'jug byed dge sogs las/ /rjes su 'jug pa'ang rnam pa gsum/ /zhes bshad do/ /mi dge ba'i sems dang ldan pa las ltung ba 'byung ba la ni the tshom med pas 'dir dri ba ma byas so zhes bya bar shes par bya'o//ci dgra bcom pa la ltung ba 'byung ngam zhes bya ba la sogs pa ni dgra bcom pa la ltung ba 'byung ngam zhes bya ba kho bo'i mdun du 'bod de smros shig /'di ltar kho bo la ni dgra bcom pa'i yul 'di la mi dge ba'i chos thams cad spangs pa'i phyir ltung ba 'byung ngo zhes bya te por the tshom yod do zhes bya ba'i tha tshig go//'byung ngam zhes bya ba ni skye'am zhes pa ste/ dgra bcom pa'i yul 'di la ltung ba 'byung na bdag la the tshom brtan po yod kyis zhes bya bar sbyar ro/ /'di la don ni re zhig mi dge ba'i sems dang ldan pa la ni ltung ba 'byung na dgra bcom pa'i sems ni mi dge ba'i sems thams cad spangs pa kho na yin na de ci 'di la ltung ba 'byung ngam/'on te ma yin zhes bya ba brjod par bya'o zhes bya ba 'di yin no/ /'di la lan ni 'di yin te/ lung du ma bstan pa'i sems dang ldan pa la dgongs nas de skad du gsungs pa yin no/ / de bzhin du 'dir gzhung ni/ btsun pa ci lags dge slong dgra bcom pa dge ba'i sems dang ldan pa la ltung ba 'byung bar 'gyur ram/ 'on te lung du ma bstan pa'i sems dang ldan pa la 'byung bar 'gyur lags/ bcom ldan 'das kyis bka' stsal pa/ dge slong dgra bcom pa la ltung ba gang cung zad ci 'byung ba de thams cad ni lung du ma bstan pa'i sems dang ldan pa la 'byung bar brjod par bya'o//btsun pa ji ltar dge slong dgra bcom pa la ltung ba gang cung zad ci 'byung ba thams cad lung du ma bstan pa'i sems dang ldan pa la 'byung bar brjod par bgyi lags sam/ nye ba 'khor 'di ltar brgya la res 'ga' zhig dran pa brjed nas gos rung ba ma yin pa ci tsam 'dod pa 'chang ngam/snam sbyar med par grong du 'jug gam/ mgron du ma bos par grong du 'gro'am/ yang yang za'am/ 'dus shing za'am/ gnyid log pa las mal stan mthon po dang mal stan chen po la bzhag gam/bud med kyi mal du bsnyal lam/ nub gsum pa la bsnyen par ma rdzogs pa dag phyung ste nyal ba las de'i 'og tu bsnyen par ma rdzogs pa dag zhugs na de dag dang bsad nas ltung ba de chos bzhin du slar 'chos pa ste/ de ltar na dge slong dgra bcom pa la ltung ba gang cung zad cig 'byung ba de thams cad ni lung du ma bstan pa'i sems dang ldan pa la 'byung bar brjod par bya'o zhes bya ba yin no//dge 'dun dbyen byed gang yang rung / /zhes bya ba la sogs pa la/ gang du yang rung zhes bya ba ni ming ma smos pa'o/ /bskal pa ni bar gyi bskal pa la sogs pa dus kyi bye brag go//der gnas pas na bskal par gnas pa ste/ mnar med pa'i bar gyi bskal par gnas pa'i phyir ro snyam du bsams pa yin no/ /byams na zhes bya ba ni 'grogs bshes yin te/ bshes pa yin na zhes bya ba'i tha tshig go/ /the tshom myur du sol cig ces bya bar sbyar te/myur du zhes bya ba ni skyen par ro/ /sol cig ces bya ba ni bor cig pa'o/ /'di la gzhan gyi bsam pa ni gang la la dge 'dun gyi dbyen byed pa de thams cad bskal par gnas par 'gyur ro zhes bya ba de ni nges na/ ci dge 'dun gyi dbyen byed pa yin la bskal par gnas pa yang ma yin no zhes bya ba de srid pa yod dam zhes bya ba de kho bo'i the tshom de lta bu sol cig ces bya ba 'di yin no//'di la lan ni 'di yin te/ mu bzhi srid pa'i dbang du mdzad nas de skad du gsungs pa yin no/ /de bzhin du 'dir gzhung ni/ gang la la dge 'dun gyi dbyen byed pa de thams cad bskal par gnas pa yang yin nam/gang la la bskal par gnas pa de thams cad kyis dge 'dun gyi dbyen byed pa yang yin nam zhe na/ dge 'dun gyi dbyen byed pa yin la bskal par gnas pa ma yin pa yod/ bskal par gnas pa yin la dge 'dun gyi dbyen byed pa ma yin pa yod/ dge 'dun gyi dbyen byed pa yin la bskal par gnas pa yin pa yang yod/ dge 'dun gyi dbyen byed pa yang ma yin la bskal par gnas pa yang ma yin pa yang yod do/ /nye ba 'khor dge 'dun gyi dbyen byed pa yin la bskal par gnas pa ma yin pa yang gang zhe na/ gang gis chos ma yin pa la chos su 'du shes shing bye ba la yang chos ma yin par 'du shes pas dge 'dun phye bar gyur pa ste/'di ni dge 'dun gyi dbyen byed pa yin la bskal par gnas pa ma yin no/ /bskal par gnas pa yin la dge 'dun gyi dbyen byed pa ma yin pa gang zhe na/ klu'i rgyal pos srung gi bu dang /klu'i rgyal po rab gnas dang / klu'i rgyal po yid las byung dang / klu'i rgyal po dga' bo dang / nye dga' bo dang / klu'i rgyal po la ba can dang / mgyogs 'gro dag dang / klu'i rgyal po gshin rje dang / tshangs ris kyi lha rnams te/ 'di dag ni bskal par gnas pa yin la dge 'dun gyi dbyen byed pa ma yin no//dge 'dun gyi dbyen byed pa yang yin la bskal par gnas pa yang yin pa gang zhe na/ lha sbyin te/ 'di ni dge 'dun gyi dbyen byed pa yang yin la bskal par gnas pa yang yin no/ /dge 'dun gyi dbyen byed pa yang ma yin la bskal par gnas pa yang ma yin pa gang zhe na/rnam pa de dag ma gtogs pa'o zhes bya ba yin no/ /dge slong min pas ltung byas la/ /zhes bya ba la sogs pa la/ dge slong min zhes bya ba ni dge slong nyid dang bral bas so/ /ldang 'gyur zhes bya ba ni ltung ba med pa'o/ /dang zhes bya ba ni don gzhan drang pa'i phyir te 'og ma dag la yang de bzhin no//bzlog pa ni ji skad bshad pa las bzlog pa'o/ /de la bzlog pa'i don ni/ dge slong gis ni ltung byas la/ /dge slong min pas ji ltar ldang / /zhes bya ba 'di yin no/ /the tshom myur du sol ces bya bar sbyar te/ myur du zhes bya ba ni mi thogs par ro/ /chod ces bya ba ni sol cig pa'o/ /'di la don ni gang gi tshe dge slong ma yin pa dge sbyong la sogs pas ltung ba lhag par spyad pa de'i tshe/ dge slong du gyur nas ji ltar ldang bar gsungs pa'am/ gang gi tshe dge slong gis ltung ba byung ba de'i tshe dge slong ma yin par gyur nas ltung ba las ji ltar ldang bar 'gyur zhes bya ba bdag gi the tshom de lta bu myur du sol cig ces bya ba 'di yin no//'di la lan ni 'di yin te/ mtshan gyur pa'i dbang du mdzad nas de skad du gsungs pa'i tshe yin no/ /de bzhin du 'dir gzhung ni/ btsun pa dge slong ma lags pas ltung ba byung la dge slong du gyur nas ldang bar 'gyur zhing /dge slong gis ltung ba phyung la dge slong ma lags par gyur pas ldang bar 'gyur ba lta mchis lags sam/ bcom ldan 'das kyis bka' stsal pa/ yod do/ /dge slong ma lags pas ltung ba byung la dge slong du gyur pas ldang bar 'gyur ba ji lta bu lags/'di ltar dge slong mas thun mong ma yin pa'i dge 'dun lhag ma'i ltung ba phyung la de'i mtshan gyur nas dge slong du red na langs pa zhes brjod par bya ste/ de ltar na dge slong ma yin pas ltung ba phyung la dge slong du gyur nas ldang ba yin no//dge slong gis ltung ba phyung la dge slong ma lags par gyur nas ldang ba ji lta bu lags/ 'di ltar dge slong gis thun mong ma yin pa'i dge 'dun lhag ma'i ltung ba phyung la de'i tshe mtshan gyur te/ mtshan gyur nas dge slong mar red na langs ba zhes brjod par bya ba ste/ de ltar dge slong gis ltung ba phyung la dge slong ma yin par red nas ldang ba yin no zhes bya ba yin no/ /dge slong gnyid ma log pa'i tshe zhes bya ba la sogs pa la/ gnyid ma log pa ni ma nyal ba'o/ /byas nas zhes bya ba ni ltung ba zhes bya bar sbyar ro/ /gnyid log nas zhes bya ba ni nyal na'o//dang zhes bya ba'i sgras ni bzlog pa yang gsal bar smros shig ces bya ba bsdus te/ bzlog pa ni bshad pa las bzlog pa'o/ /de las bzlog pa'i don ni/ dge slong gnyid log ltung byas nas/ /sad nas ji ltar ldang bar 'gyur/ /dri yis khyod ni smra bar gyis//zhes bya ba 'di yin no/ /de la gtan la dbab pa 'di yin te/ las brjod pa dang gzhan gyi tho 'tshams la dgongs nas de skad du gsungs pa yin no/ /de bzhin du 'dir gzhung ni/ btsun pa gnyid kyis ma log pa na ltung ba byung la gnyid kyis log nas ltung ba las ldang zhing gnyid kyis log pa na byung la gnyid sad nas ldang bar 'gyur ba lta mchis lags sam/bcom ldan 'das kyis bka' stsal pa/ yod de/ gnyid kyis ma log pa na ltung ba byung la gnyid kyis log nas ldang bar 'gyur ba ji lta bu lags/ 'di ltar dge slong dge 'dun lhag ma byung ba dbyung bar bya ba'i las rjod par byed pa na gsol ba thos nas nyal te de gnyid log pa dang las brjod pa gsum pa mthar phyin nas te/de ltar gnyid kyis ma log pa las na ltung ba phyung la gnyid kyis log nas ldang bar 'gyur ba yin no/ / gnyid kyis log pa na ltung ba byung la gnyid sad nas ldang bar 'gyur ba ji lta bu lags/ 'di ltar dge slong gnyid log pa las mal stan mthon po dang mal stan chen po la bzhag pa'am/ gnyid log pa las bud med kyi mal du bsnyal ba'am/ nub gsum pa la bsnyen par ma rdzogs pa dag phyir phyung te nyal ba las de'i 'og tu bsnyen par ma rdzogs pa dag zhugs na/de de dag dang sad nas ltung ba de chos bzhin slar 'chos pa ste/ de ltar na gnyid log pa na ltung ba 'byung la gnyid sad nas ldang bar 'gyur ba yin no zhes bya ba la sogs pa yin no/ / stan gcig la 'dug pa'i zhes bya ba la sogs pa ni stan gcig la 'dug pa'i dge slong la rgyu gang gis ltung ba'i ris lnga 'byung zhes bya bar sbyar ro/ /stan ni khri'u la sogs pa ste/ 'dir gzhan 'dug cing gnas pas so/ /'dug pa ni gnas pa'o/ /rgyu gang gis zhes bya ba ni byed rgyu gang gis so//ltung ba'i ris ni lnga po dag ces bya ba ni phas pham par 'gyur ba dang dge 'dun lhag ma dang / ltung byed dang / so sor bshags par bya ba dang / nyes byas zhes bya ba ris lnga po dag go/ /'di la 'dri ba'i bsam pa ni phan tshun 'gro ba dang bya ba'i ltung ba'i ris lnga po dag ma byung bar mthong gi stan gcig kho na la 'dug pa la ni ma yin na/'di la khyod kyis rgyu gang gis 'di dag 'byung ba'i rgyu kho bo la brjod par bya'o zhes bya ba 'di yin no/ /'di la gtan la dbab pa ni 'di yin te/ stan gcig la 'dug pa dang / 'brel pa'i ltung ba srid pa la brten nas de skad du gsungs pa yin no//de bzhin du 'dir gzhung ni/ btsun pa dge slong stan gcig la mchis pa la ltung ba'i ris lnga po thams cad 'byung bar 'gyur ba lta mchis lags sam/ bcom ldan 'das kyis bka' stsal pa/ yod de/ chos gos med par zan za na nyes byas su 'gyur ro//bslab pa'i sdom pas bsdams pa'i slob pa'i khyim dag nas rang gi lag gis bca' bar bya ba dang bza' bar bya ba dag len na so sor bshags par 'gyur ro/ /bud med la tshig lnga'am drug las lhag par chos ston na ltung byed du 'gyur ro/ / bud med la gnas ngan len brjod pa smra na dge 'dun lhag mar 'gyur ro/ /bdag nyid mi'i chos bla ma med cing mi bdog bzhin du brjod na phas pham par 'gyur ro zhes bya ba ni/ dge slong sbyor ba gcig gis ni zhes bya ba ni dge slong gcig gis sbyor ba gcig gis ji ltar ltung ba stong byed par 'gyur zhes bya bar sbyar ro//sbyor ba gcig gis bya ba ni byed pa gcig gis te rtsom pa gcig gis zhes bya ba'i tha tshig go/ /stong zhes bya ba ni brgya dang stong mtshon pa yin no/ /de nyid rig pa ni don dam pa rig pa ste 'dun pa'i don khong du chud pa zhes bya ba'i don to/ /'di la bsam pa ni sbyor ba tha dad pa nyid la ni ltung ba mang po dag 'byung bar btub kyi sbyor ba gcig gis ni ma yin na de ji lta bu zhig yin par brjod par bya'o zhes bya ba 'di yin no//'di la gtan la dbab pa ni 'di yin te/ khros nas gzhan dag la bye ma la sogs pa'i spar bas bsnun pa la dgongs nas de skad du gsungs pa yin no//de bzhin du 'dir gzhung ni/ btsun pa sbyor ba gcig gis ltung ba brgya'am ltung ba stong ngam/ de las lhag pa 'byung ba lta mchis lags sam/ bcom ldan 'das kyis bka' stsal pa/ yod de/ 'di ltar dge slong khros 'khrugs rngam ma rangs nas skye bo phal po che 'dus shing 'khod pa la sran spar gyis btab bam/mon sran sde'u spar gyis btab bam/ bye ma spar gyis btab ste bsnun na ji snyed phog pa de snyed kyi ltung bar 'gyur ro zhes bya ba yin no/ /bsam gtan dang po la sogs la zhes bya ba la sogs pa la/ bsam gtan dang po ni rtog pa dang bcas shing dpyod pa dang bcas pa/bsam gtan ni mnyam par gzhag pa dge ba rtse gcig pa'o/ /sogs pa zhes smos pas ni rtog pa yang med dpyod pa yang med pa la sogs pa'i mtshan nyid bsam gtan gnyis pa la sogs pa bsdu'o/ /ci'i phyir zhes bya ba ni rgyu gang gis so//'di la don ni re zhig dge ba'i sems la gnas pa la yang ltung ba 'byung ba med pas bsam gtan dang po la sogs pa la snyoms par zhugs pa la lta smos kyang ci dgos na de la de 'byung ngo zhes bya ba de ji lta bu yin par brjod par bya'o zhes bya ba 'di yin no//'di la gtan la dbab pa ni 'di yin te/ khang pa bya ba bsko ba'i dbang du mdzad nas de skad du gsungs pa yin no/ /de bzhin du 'dir gzhung ni/ btsun pa gzhi gang gis bsam gtan dang po la snyoms par ma zhugs pa la dge 'dun lhag mar 'gyur ba'i gzhi des bsam gtan dang po la snyoms par zhugs pa la dge 'dun lhag mar 'gyur ba lta mchis lags sam/bcom ldan 'das kyis bka' stsal pa/ yod de/ 'di ltar dge slong bsam gtan dang po la snyoms par zhugs pa'i tshe nga'i khang pa rtsigs shig ces bsgo zhing bsgos nas bsam gtan dang po la snyoms par zhugs pa de bsam gtan dang po la snyoms par zhugs pa dang /khang pa mthar phyin par gyur na dge 'dun lhag mar 'gyur ro/ /gzhi gang gis bsam gtan gnyis pa la sogs pa la snyoms par ma zhugs pa la dge 'dun lhag mar 'gyur ba'i gzhi des bsam gtan gnyis pa dang /gsum pa dang / bzhi pa la sogs par zhugs pa la dge 'dun lhag mar 'gyur ba lta mchis lags sam/ bcom ldan 'das kyis bka' stsal pa/ yod de/ 'di ltar dge slong bsam gtan gnyis pa dang / gsum pa dang / bzhi pa la sogs par 'jug pa'i tshe nga'i khang pa rtsigs shig ces bsgo zhing bskos nas bsam gtan bzhi pa'i bar la snyoms par zhugs la/de bsam gtan bzhi pa'i bar la snyoms par zhugs pa dang khang pa mthar phyin par gyur na dge 'dun lhag mar 'gyur ro zhes bya ba yin no/ /dge slong tha na nyes byas kyis zhes bya ba la sogs pa la/tha na zhes bya ba ni chung ngu na'o/ /nam du'ang zhes bya ba ni gzhar yang ste/ 'dis ni gtan du mi 'byung bar ston par byed do/ /'on kyang zhes bya ba ni de lta na yang ngo / /'di la 'dri ba'i don ni gang la las phas pham par 'gyur ba lhag par spyod pa de dge slong ma yin par gsungs kyi/nyes byas kyi ltung ba 'byung ba yang ni ma yin no/ /'on kyang dge slong ma yin pa zhes gsungs pa de ji lta bu yin par brjod par bya'o zhes bya ba yin no/ /'di la gtan la dbab pa ni 'di yin te/ mtshan gyur pa la dgongs nas de skad du gsungs pa yin no//de bzhin du 'dir gzhung ni/ btsun pa dge slong gis nam yang tha na nyes byas kyi ltung ba yang ma byung la/ 'on kyang dge slong ma lags par 'gyur ba lta mchis lags sam/ bcom ldan 'das kyis bka' stsal pa/ yod de/ dge slong mtshan gyur na'o zhes bya ba yin no//dge slong ma ni nam du yang zhes bya ba la sogs pa la nam du yang zhes bya ba ni gzhar yang ngo / /mi byed ces bya ba ni dgag pa'o/ /'di la skabs kyi don ni thun mong ngam thun mong ma yin pa'i phas pham par 'gyur ba lhag par spyod na dge slong ma ma yin pa rnam par gzhag gi/dge slong ma nyes byas kyi ltung ba lhag par spyod pa yang ni ma yin no/ /'on kyang dge slong ma ma yin zhes gsungs pa ji lta bu yin pa brjod par bya'o zhes bya ba 'di yin no/ /'di la lan ni 'di yin te/ de ni mtshan gyur pa la dgongs te gsungs pa yin te/ de bzhin du 'dir gzhung ni/dge slong mas nam du yang tha na nyes byas kyi ltung ba yang ma byung la/ 'on kyang dge slong ma ma lags par 'gyur ba lta mchis lags sam/ yod de/ dge slong ma mtshan gyur na'o zhes bya ba yin no/ /gal te dge slong dgra bcom min/ /zhes bya ba la sogs pa la dgra bcom min zhes bya ba ni dgra bcom pa las gzhan pa ste so so'i skye bo'o//pha min zhes bya ba ni pha las gzhan pa'i sems can mi'i 'gro bar skyes pa'o/ /de bzhin du zhes bya ba ni gzhan 'dren pa de ji lta bur phas pham par 'gyur bar gsungs zhes bya bar sbyar ro/ /'di la don ni gang dge slong 'ga' zhig gis dge slong dgra bcom pa ma yin pa so so'i skye bo zhig bsad na de la phas pham par 'gyur ba 'ba' zhig tu zad na/'on kyang des phas pham pa dang mnar med par yang gsungs so zhes bya ba de lta bu yin pa brjod par bya'o zhes bya ba 'di yin no/ /'di la lan ni 'di yin te/mtshan gyur pa la brten nas de skad du gsungs pa yin te/ 'dir gzhung ni/ btsun pa dge slong zhig gis dge slong zhig gi srog bkum la de pha yang ma lags dgra bcom pa yang ma lags na/ 'on kyang phas pham par 'gyur zhing mtshams ma mchis pa'i kha na ma tho ba'i las kyis kyang reg pa lta mchis lags sam/bcom ldan 'das kyis bka' stsal pa/ yod de/ 'di ltar dge slong gis ma rab tu phyung zhing bsnyen par rdzogs par gyur na/ de mtshan gyur te mtshan gyur nas bsad na phas pham par 'gyur zhing mtshams med pa'i kha na ma tho ba'i las kyis kyang reg par 'gyur ro zhes bya ba yin no//'di la 'dri ba'i don ni/ dge slong ma ni dgra bcom min/ /ma min bsad na ji lta bur/ /mtshams med pa dang de bzhin du/ /phas pham 'gyur ba gsungs par smros/ /zhes bya ba yang rung ste/ de la dgra bcom min zhes bya ba ni dgra bcom pa las gzhan pa so so'i skye bo'o//ma min pa zhes bya ba ni ma las gzhan pa'i sems can mi'i 'gro bar skyes pa'o/ /'dir yang lan ni 'di yin te/ pha mtshan gyur pa la brten nas de skad du gsungs pa yin no/ /de bzhin du 'dir gzhung ni/ btsun pa dge slong mas dge slong ma zhig bkum la de yang ma yang ma lags/dgra bcom pa yang ma lags na/ 'on kyang phas pham par 'gyur zhing mtshams ma mchis pa'i kha na ma tho ba'i las kyis kyang reg par 'gyur ba lta mchis lags sam/ bcom ldan 'das kyis bka' stsal pa/ yod de/ dge slong ma gang gis pha rab tu byung zhing bsnyen par rdzogs par gyur la/ de mtshan gyur nas bsad na phas pham par yang 'gyur zhing mtshams med pa'i kha na ma tho ba'i las kyis kyang reg par yang 'gyur ro zhes bya ba yin no/ /de bzhin du mdo byed pas kyang mtshan gyur pa gnyis las kyang ngo zhes bshad do//gzhan gyis tshig smras gzhan la ni/ /zhes bya ba la sogs pa la/ gzhan gyis zhes bya ba ni dge slong la sogs pas so/ /tshig smras pa ni tshig tu brjod pa'o/ /gzhan la zhes bya ba ni brjod par 'dod pa'i dge slong 'ga' zhig la'o/ /myur du zhes bya ba ni skyen par ro//'di la don ni ltung ba'i ris lnga po dag ni ci rigs par rang gi ngag dang 'brel pa yin na/ 'on kyang gzhan gyis tshig smra ba byas nas dge slong la 'di dag 'byung ba de ji lta bu yin pa de brjod par bya'o zhes bya ba yin no/ /'di la lan ni 'di yin te/ las brjod pa la sogs pa'i dbang du mdzad nas de skad du gsungs pa yin te/btsun pa gzhan gyis tshig smras la des smras pa'i rkyen gyis gzhan phas pham par 'gyur ba lta mchis lags sam/ bcom ldan 'das kyis bka' stsal pa/ yod de/ 'di ltar dge slong mas dge slong gi dge 'dun mthun pas dge slong zhig ma mthong ba'i phyir bskrad par shes bzhin du rjes su phyogs shing dge 'dun gyi nang du lan gsum gyi bar du bsgo yang gtong du mi btub na phas pham par 'gyur ro//btsun pa gzhan gyis tshig smras la des smras pa'i rkyen gyis gzhan dge 'dun lhag mar 'gyur ba lta mchis lags sam/bcom ldan 'das kyis bka' stsal pa/ yod de/ 'di ltar dge slong dge 'dun gyi dbyen byed pa dang / de'i rjes su phyogs pa dang / khyim sun 'byin pa dang / bka' blo mi bde ba dge 'dun gyi nang du lan gsum gyi bar du bsgo yang gtong du mi btub na dge 'dun lhag mar 'gyur ro//btsun pa gzhan gyis tshig smras la des smras pa'i rkyen gyis gzhan la ltung byed du 'gyur ba lta mchis lags sam/ bcom ldan 'das kyis bka' stsal pa/ yod de/ 'di ltar dge slong gis sdig pa can gyi lta ba yang dag par blangs la blangs nas 'dor du mi btub na ltung byed du 'gyur ro//btsun pa gzhan gyis tshig smras la des smras pa'i rkyen gyis gzhan la so sor bshags par bgyi bar 'gyur ba lta mchis lags sam/ bcom ldan 'das kyis bka' stsal pa/ yod de/ 'di ltar dge slong khyim dag tu mgron du bos te zan za la de na yang dge slong ma bsko sham byed pa zhig yod de 'di la ni bza' ba byin cig /'di la ni 'bras chan byin cig /'di la ni sran tshod byin cig 'di la ni mang du byin cig zer la/ de la ma bsgo bar zan so sor bshags par bya bar 'gyur ro/ /btsun pa gzhan gyis tshig smras la des smras pa'i rkyen gyis gzhan la nyes byas su 'gyur ba lta mchis lags sam/bcom ldan 'das kyis bka' stsal pa/ yod de/ 'di ltar dge slong so sor thar pa'i mdo gdon par 'dod pa'i tshe dge 'dun gyi dbus su lan gsum gyi bar du bsgrags kyang ltung ba dran bzhin du mi 'chags na des smras pa'i rkyen gyis nyes byas su 'gyur ro zhes bya ba la sogs pa yin no//ji ltar dge slong gcig pu la zhes bya ba la sogs pa la/ gcig pu zhes bya ba ni grogs med pa la bya'o/ /phas pham par 'gyur ba bzhi zhes bya ba ni mi tshangs par spyod pa dang /ma byin par len pa dang / gsod pa dang / smra ba dang zhes pa dag go/ /don bzhin du zhes bya ba ni yang dag pa ji lta ba bzhin du'o/ /'di la bsam pa ni zla zhig yod na phas pham par 'gyur ba rnams 'byung ngo zhes bya ba de ni shin tu grags na/ci gcig pu kho na la phas pham pa bzhi 'byung ba gang yin pa de srid pa yod dam med brjod par bya'o zhes bya ba 'di yin no/ /'di la gtan la dbab par bya ba ni 'di yin te/ dus gzhan na sbyor ba byas pa'i dbang du mdzad nas de skad du gsungs pa yin no/ /de bzhin du 'dir gzhung ni/btsun pa dge slong gcig pu gtsug lag khang du zhugs pa la phas pham pa bzhi 'byung ba lta mchis lags sam/ bcom ldan 'das kyis bka' stsal pa/ yod de/ mi tshangs par spyod pa'i rkyen gyis ji lta bu lags/ dper na mtshan rings dang rgyab mnyen lta bu'o//ma byin par len pa'i rkyen gyis ji lta bu lags/ 'di ltar dge slong gis sbyor ba byas nas gtsug lag khang du zhugs nas de brkus na'o/ /gsod pa'i rkyen gyis ji lta bu lags/ 'di ltar dge slong gis sbyor ba byas nas gzhal yas khang du zhugs la de yang bsad na'o/ / smra ba'i rkyen gyis ji lta bu lags/ 'di ltar dge slong gis 'di skad du bdag ni dgra bcom pa bdag ni sangs rgyas so zhes smras so zhes bya ba yin te/ don 'di ni bshad zin mod kyis phas pham pa bzhi 'byung ba'i skabs kyis yang bshad do/ /'dul ba dri ba'i tshig le'ur byas pa le'u bzhi pa'i gtan la dbab pa'o// //'di la gsol ba'i las dang ni/ /zhes bya ba la sogs pa la 'di la zhes bya ba ni las dag la'o/ /gsol ba ni byed par 'gyur ba'i las go bar byed pa'o/ /gsol ba nyid las yin pas gsol ba'i las so/ /de bas na gsol ba'i bdag nyid kyi las dag ni gsol ba'i las te/de dag du zhig yod ces bya ba grangs su zhes bya ba'i tha tshig go/ /dang zhes bya ba ni bsdu ba ste/ 'og ma la yang de dang 'dra'o/ /gsol bar bcas pa'i las zhes bya bar sbyar te/ las ni brjod pa bzlas pa zhes bya ba'i tha tshig go//des na gsol ba dang bcas pa'i las ni du zhig yod ces bya bar sbyar ro/ /legs grags zhes bya ba ni kun gyis shes pa ste/ de ni don mi gsal ba ma yin no zhes bya ba'i tha tshig go/ /de zhes bya ba ni bshad ma thag pa'o/ /rnam par dbye ba smra bar gyis zhes bya bar sbyar te/rnam par dbye ba ni tha dad pa nyid do/ /don gang las de skad du gsungs zhes bya ba'i don te/ 'bod de smra bar gyis zhes sbyar bar bya'o/ /'di la don ni gsol ba dang / gsol ba dang gnyis dang / gsol ba dang bzhi'i las ji snyed yod pa dang de dag gi rnam par dbye ba ji lta ba bzhin de ni kun la grags te/de las zab pa ci yang med pas de ni gsol ba nyid las de kho bo la 'bod de smros shig ces bya ba yin no/ /'di la lan ni 'di yin te/ de ni las brgya rtsa gcig gi dbang du mdzad nas gsungs pa yin no/ /de bzhin du 'dir gzhung ni/ las du zhig gis las thams cad bsdus lags/bcom ldan 'das kyis bka' stsal pa/ gsum gyis te/ gsol ba dang las dang / gsol ba dang gnyis dang / gsol ba dang bzhis so/ /btsun pa bcom ldan 'das kyis las brgya rtsa gcig bka' stsal pa gang lags pa/ de la gsol ba'i las kyis ni du zhig bsdus la/gsol ba dang gnyis kyi las kyis ni du zhig bsdus/ gsol ba dang bzhi'i las kyis ni du zhig bsdus lags/ bcom ldan 'das kyis bka' stsal pa/ gsol ba'i las ni nyi shu rtsa bzhi'o/ /gsol ba dang gnyis kyi las ni bzhi bcu rtsa bdun no//gsol ba dang bzhi'i las ni sum cu'o zhes bya ba yin no/ /'di dag ni rnam par dbye ba yang mdo byed pas bshad de/ gsang dang nang du dri phyir dang / /gso sbyong de la ltung bcas dang / /de la dge 'dun yid gnyis dang / / rtsod dang nges nyid ma yin dang / /de yi don du lnga po dag /thams cad dgag dbyer gtogs pa yin/ /dbyar gnas khas blangs nyid dang ni/ /shi ba'i rdzas dang nor 'dra dang / /chos gos sbyin par bya ba dang / /gnas ngan len ni brjod pa dang / /grangs su gzhug pa bzhi dag dang //khyim gyi sdom dang de gzhig dang / /lhung bzed khas bub bya ba dang / /de nyid bzlog par bya ba dag /gsol ba 'ba' zhig las yin no/ /gnas dang mtshams ni gnyis po dang / /mi 'bral smyos dang dgag dbye dang / /gnas mal stobs par byed pa dang / /rung ba'i sa gzhi bsko ba dang //sra brkyang dang ni de gding dang / /spong dang lag gi bla dang ni/ /gnas khang bsko la sogs pa dang / /gzu dang gsal dang sbed pa dang / /tshul shing 'drim par byed pa dang / /khang pa khang chen bstan pa dang / /gleng dang 'bral bar mi 'gyur dang / /stan dang lhung bzed 'dri ma pa dang //ma dang go byar bya ba dang / /ston pa dang ni nags nyul dang / /phyag mi bya dang mang phyir dang / /khar ba dra ba'i phyir dang ni/ /rnyed pa gcig tu bya phyir dang / /bslab pa sbyin dang nyer gnas dang / /bu dang nye du phyir 'gro dag /gsol dang gnyis kyi las yin no/ / bsnyen par rdzogs par bya ba dang / /mu stegs gnas dang mtshams dgrol dang / /mthun sbyin gso sbyong bdun po dang / /brgyad dang dran dang ma smyos dang / /de nyid tshol du gzhug pa dang / /bsgo bar bya ba rnams dang ni/ /nyams pa sbyin par bya ba dag /gsol dang bzhi yi las yin no/ / 'di nyid la brgal ba dang lan du bcas pa'i tshig le'ur byas pa dag cig kyang yod do/ /kho bos byas pa'i las brgya rtsa gcig rnam par dbye ba yod pas de yang blta bar bya'o/ /gzhung mangs kyis dogs nas 'dir ni nye bar ma bkod do/ /tshig tu yang ni mi smra la/ /zhes bya ba la sogs pa la/tshig tu smra ba ni tshig tu brjod pa'o/ /mi smra la zhes bya ni dgag pa'o/ /lus kyis rtsol bar mi byed pa/ /zhes bya bar sbyar te/ 'ang zhes bya ba ni bsdu ba'o/ /mi byed pa ni dgag pa'o/ /lus kyis rtsol ba ni lus kyis byed pa'o/ /phas pham pa 'byung bar 'gyur ba ji lta bu yin zhes bya bar sbyar ro//'di la don ni phas pham par 'gyur ba ni yang na ni tshig rnam bzhag ste/ dper na bla ma smra ba lta bu'o/ /yang na lus kyis byed pa ste/ dper na mi tshangs par spyod pa lta bu yin no/ /'on kyang lus dang ngag gi byed pa med par de 'byung ngam mi 'byung ba ji lta ba bzhin du kho bo la smros shig ces bya ba 'di yin no//'di la lan ni 'di yin te/ phas pham par 'gyur ba bcabs pa la dgongs nas de skad du gsungs pa yin no/ /de bzhin du 'dir gzhung ni/ btsun pa tshig tu yang mi smra lus kyis rtsol ba yang mi bgyid par 'on kyang dge slong ma ma lags par 'gyur ba lta mchis lags sam/bcom ldan 'das kyis bka' stsal pa/ yod de/ 'di ltar dge slong mas dge slong ma zhig phas pham par 'gyur ba'i ltung ba byung ba mthong la/ de bcabs te skya rengs shar na phas pham par 'gyur ro zhes bya ba yin no/ /ltung ba'i ris byas na ni zhes bya ba la sogs pa la byas na zhes bya ba ni lhag par spyad nas so//ni zhes bya ba ni ma bzod pa'o/ /yang ni zhes bya ba ni bsdu ba'o/ /mi byed cing zhes bya ba ni dgag pa'o/ /phyir 'chos pa ni ldog pa'i bsam pa'o/ /dag par zhes bya ba ni ltung ba med par ro/ /'di la don ni nyes byas tsam byas nas gal te phyir ma bcos na/de'i tshe de nges par ma dag pa zhes byas na ltung ba'i ris lnga ril 'byung la ma dag par 'gyur ba lta smos kyang ci dgos te/ srid pa yang med pa nyid na'o/ /'on kyang bcom ldan 'das kyis dag pa nyid du gsungs so zhes bya ba de ji lta bu nyid du yin na/brjod par bya'o zhes bya ba 'di yin no/ /'di la bshad pa ni 'di yin te/ mtshan gyur pa la dgongs nas de skad du gsungs pa yin no/ /de bzhin du 'dir gzhung ni/ btsun pa dge slong mas thun mong ma lags pa'i ltung ba ris lnga byung la/ 'chags par yang mi bgyid/phyir 'chos par yang mi bgyid par langs par zhes kyang brjod la/ ltung ba ma mchis par yang 'gyur ba lta mchis lags sam/ bcom ldan 'das kyis bka' stsal pa/ yod de/ mtshan gyur na'o/ /'di la gzhung gzhan yang dge slong thun mong ma lags pa'i ltung ba ris lnga phyung la de mtshan gyur nas dge slong du red na langs pa zhes brjod par bya'o zhes bya ba yin no//de bzhin du mdo byed pas kyang zhing ma yin pa nyid la ni nyams so zhes bshad do/ /gzhan gyis phas pham par 'gyur la zhes bya ba la sogs pa la/gzhan gyis zhes bya ba ni mngon par 'dod pa'i dge slong la sogs pa 'ga' zhig gis so/ /de ni zhes bya ba ni smos ma thag pa'o/ /da ltar zhes bya ba ni nga'o/ /'di la don ni dge slong bdag nyid gyis phas pham par 'gyur ba lhag par spyad na/ phas pham par 'gyur ba'i ltung ba rnam par gzhag gi/gzhan gyis byas na gzhan la ltung ba 'byung ba ma yin na zhes bya ba 'di yin te/ 'di ni the tshom can gyi blo gros can 'dri ba yin no/ /'di la lan ni 'di yin te/ dge slong ma la brten nas de skad du gsungs pa yin no/ /de bzhin du 'dir gzhung ni/ btsun pa gzhan gyis mi tshangs par spyad pa bgyis la/gzhan gyis phas pham par 'gyur ba lta mchis lags sam/ bcom ldan 'das kyis bka' stsal pa/ yod de/ 'di ltar dge slong mas dge slong ma zhig mi tshangs par spyod pa byed pa mthong la/ de bcabs nas skya rengs shar na phas pham par 'gyur ro zhes bya ba yin no//ltung ba kun la gang gis ni/ /zhes bya ba la sogs pa la/ ltung ba kun la zhes bya ba ni ltung ba'i ris lnga po'o/ /gang gis zhes bya ba ni rgyu gang gis so/ /bstan pa ni tha snyad du bya ba'o/ /bsdu ba ni khongs su bsdu ba'o/ /'gyur zhes bya ba ni btub pa'o//ngag gis kun nas bslang ba ni ngag la brten nas byung ba'o/ /kha na ma tho ba chen po ni nyes pa chen po skyed pa ste/ dmyal ba dag tu dus mtha' yas pa sdug bsngal ba skyed pa'i phyir ro zhes bya ba'i tha tshig go/ /lus kyi zhes bya ba ni lus la brten nas zhes bya ba ste/ kha na ma tho ba chen po'i ltung ba gang yin pa zhes sbyar bar bya'o//dge 'dun gang zag las byung zhes bya ba ni dge 'dun la brten nas byung ba ste/ dge 'dun gyis kun nas bslang zhes bya ba'i don to/ /de bzhin du gang zag las byung ba ni gang zag la brten nas byung ba ste/ gang zag gis kun nas bslang ba zhes bya ba'i tha tshig go//'dod ces bya ba ni mngon par 'dod pa ste/ mngon par bsams zhes bshad par 'gyur ro/ /srog gcod ces bya ba ni srog gcod pas kun nas bslang ba ste/ thams cad du kha na ma tho ba chen po gang yin zhes bya bar sbyar ro/ /dang zhes bya ba'i sgra yang thams cad du bsdu ba yin te/gsal bar bdag la smra bar gyis shig ces bya bar sbyar ro/ /'di la don ni rgyu gang gis ltung ba thams cad kyi bstan pa dang de bzhin du bsdu ba rnam par gzhag /ngag gis kun nas bslang ba'i ltung ba kha na ma tho ba chen po ni gang yin/ de bzhin du lus kyis kun nas bslang ba'i nang nas kha na ma tho ba chen po ni gang yin/phra mas kun nas bslang ba dang / gang zag gis kun nas bslang ba dang / dge 'dun gyis kun nas bslang ba dang / srog gcod pa dang / ma byin par len pa dang / mi tshangs par spyod pa dang / brdzun du smra bas kun nas bslang ba'i ltung ba sdug bsngal dpag tu med pa skyed par byed pa ni gang yin pa dris/de rim pa gsal ba yang dag pa ji lta ba bzhin du smros shig ces bya ba 'di yin no/ /'di la gtan la dbab pa ni 'di yin te/ bstan pa ni sdom pa ma yin pa'o/ /bsdu ba yang sdom pa ma yin pa'o//ngag gis kun nas bslang ba la ni de bzhin gshegs pa la mi snyan par brjod pa'o/ /lus kyis kun nas bslang ba la ni ngan sems kyis khrag 'byin pa'o/ /phra mas kun nas bslang ba la ni dge 'dun gyi dbyen no/ /dge 'dun gyis kun nas bslang ba la ni dge 'dun gyi dbyen nyid de// gang zag gis kun nas bslang ba la ni yang dag pa ma yin par skur ba 'debs pa'o/ /srog gcod pas kun nas bslang ba la ni rang sangs rgyas gsod pa'o/ /ma byin par len pas kun nas bslang ba la ni dge 'dun gyi 'du ba'i sgo 'phrog pa'o//mi tshangs par spyod pas kun nas bslang ba la ni dgra bcom ma mi tshangs par spyod pas sun 'byin pa'o/ /brdzun du smra bas kun nas bslang ba la ni phra ma smra ba'o/ /de bzhin du 'dir gzhung gi don go rims bzhin te/ dge slong dag rgyu gcig gis ltung ba thams cad bstan pa yin te/'di lta ste sdom pa ma yin pas so/ /'di la don ni 'di yin te/ sdom pa ma yin pas zhes bya ba ni mi ldog pa'i bsam pa ste/ mi ldog pa'i bsam pa can la ni bshags pa la sogs pa'i sgrub pa yod du zin kyang ltung ba yod do zhes bya bar bstan cing tha snyad gdags pa 'jug go zhes bya ba'i tha tshig go//mdo byed pas kyang gzhan la ni de dang bcas pa'i bshags pa'o zhes bshad pa'i phyir ro/ /rgyu gcig gis ltung ba thams cad bsdus par 'gyur te/ 'di lta ste sdom pa ma yin pas so/ /'di la yang don ni de kho nar zad do//ngag gis kun nas bslang ba'i ltung ba gcig kun gyi nang nas kha na ma tho ba che ba ni de bzhin gshegs pa la yang dag pa ma yin pas mi snyan par brjod pa gang yin pa'o/ /lus kyis kun nas bslang ba'i ltung ba gcig kun gyi nang nas kha na ma tho ba che ba ni de bzhin gshegs pa la ngan sems kyis khrag 'byin pa gang yin pa'o//phra mas kun nas bslang ba'i ltung ba gcig kun gyi nang nas kha na ma tho ba che ba ni de bzhin gshegs pa'i nyan thos kyi dge 'dun dbye bar rtsom pa gang yin pa'o/ /dge 'dun gyis kun nas bslang ba'i ltung ba gcig kun gyi nang nas kha na ma tho ba che ba ni 'di lta ste dge 'dun gyi dbyen no//gang zag gis kun nas bslang ba'i ltung ba gcig kun gyi nang nas kha na ma tho ba che ba ni/ 'di lta ste yang dag pa ma yin pas skur pa 'debs pa'o/ /srog gcod pas kun nas bslang ba'i ltung ba gcig kun gyi nang nas kha na ma tho ba che ba ni rang sangs rgyas gsod pa gang yin pa'o//ma byin par len pas kun nas bslang ba'i ltung ba gcig kun gyi nang nas kha na ma tho ba che ba ni de bzhin gshegs pa'i nyan thos kyi dge 'dun gyi 'du ba'i sgo 'phrog pa gang yin pa'o/ /mi tshangs par spyod pas kun nas bslang ba'i ltung ba gcig kun gyi nang nas kha na ma tho ba che ba ni ma dgra bcom pa sun 'byin pa'o//brdzun du smra bas kun nas bslang ba'i ltung ba gcig kun gyi nang nas sdig pa che ba ni mi'i chos bla ma byed cing mi bdog bzhin du brjod pa'o zhes bya ba yin no/ /'di ltar mjug bsdu ba'i thabs kyis dri ba gcig kho na zhig bsham pa'i rim pas dri bar bya ba'i phyir/mang du smra yang ci zhig dgos/ /zhes bya ba la sogs pa smos te/ mang du smra zhes bya ba ni bshad ma thag pa'i tshul lam/ 'dul bar gtogs pa ma bshad pa'o/ / ci zhig dgos zhes bya ba ni cir yang mi dgos pa nyid do zhes bya ba'i tha tshig go/ /mdor sdus shig ces bya ba ni spros pa dang bral ba ste/ gang gi phyir dri ba zab mo rnams ha cang zab mo byas na/ yun ring po zhig tu nyon mongs pa dang / khyod kho bo la ma rangs par 'gyur ba de'i phyir/kho bos khyod la mdor bsdus pa'i tshig gcig kho na cig smra'o zhes bya ba'i don to/ /khro spangs zhes bya ba ni mi dga' ba yongs su btang ste'o/ /mdza' bar gyur byas nas zhes bya ba ni bshes su byas nas te/ khro spangs phan par 'dod pas g.yo dang sgyu med pas khyod la smra'i brnyas par 'dod pas ni ma yin no zhes bya ba'i tha tshig go//sdom pa kun la brtan zhes bya ba ni/ dge bsnyen dang / dge bsnyen ma dang / dge sbyong dang / dge sbyong ma dang / bsnyen gnas la gnas pa dag la'o/ /kun mkhyen gyis zhes bya ba ni thams cad mkhyen pas so//skyabs zhes bya ba ni dkon mchog gsum la skyabs su 'gro ba ste/ 'dir ngan song dmyal ba la sogs pa'i sdug bsngal 'jigs par 'gyur bas so/ /dge slong nyid las zhes bya ba ni dge slong gi sdom pa la'o/ /gsal bar zhes bya ba ni sal sal por kho bo la smros shig ces bya bar sbyar ro//'di la don ni 'dul bar gtogs pa'i dri ba zab mo gzhan yang mang po zhig yod de de dag la kho bos khyod la dri ba dris na yun ring mo zhig tu nyon mongs par 'ong bas/ de'i phyir re zhig lag sprad pas sngon du 'gro ba'i gnas pas phan par 'dod cing de'i phyir dge slong gi sdom pa yang dag par blangs pa'i dus na ni/dkon mchog gsum la skyabs su 'gro ba ma gsungs la/ skyabs su ma song ba la min zhes 'byung bas gzhan dag la ni gsungs zhes bya ba'i dri ba gcig cig dris te/ kho bo la yang dag pa ji lta ba bzhin du smros shig ces bya ba 'di yin no//'di la gtan la dbab pa ni 'di yin te/ bsnyen par rdzogs pa zhes smos pas skyabs su 'gro ba grub pa'i dbang du mdzad nas de skad du gsungs pa yin te/ de bzhin du 'dir gzhung ni/ dge 'dun btsun pa rnams kyis bdag bsnyen par rdzogs par bya bar mdzad du gsol/dge 'dun btsun pa rnams kyis bdag rjes su gzung du gsol zhes bya ba la sogs pa yin no/ /de bzhin du 'grel pa byed pas bsnyen par rdzogs zhes bya ba'i sgra khong nas de'i don 'grub pa'i phyir te/ bya ba ma yin pa thams cad las ldog pa'i mtshan nyid yin pa'i phyir ro//bdag nyid thams cad kyis mya ngan las 'das pa khas len pa ni bsnyen par rdzogs pa ste/ 'di ltar bsnyen par rdzogs pa ni mya ngan las 'das pa la khang bsnyen te rnam par gnas pa yin no zhes bshad do/ /de bzhin du yang nga'i nyan thos tshul khrims ldan pa de la mtho ris ni ras yug gis bar du chod pa tsam mo//thar pa ni yol bas chod pa tsam mo zhes gsungs so/ /yang / rab tu bsngags dang nor rnyed dang / /pha rol mtho ris dga' ba yis/ /bde ba gsungs don gnyer byed pa/ /blo dang ldan pas tshul khrims bsten/ /gnas gsum de dag legs mthong ba'i//mkhas pas tshul khrims bsten par bya/ /'phags pa'i mthong ba'i phun tshogs te/ /'jig rten na ni zhi ba bsten/ /zhes gsungs so/ /de ltar rnam pa sna tshogs mang po brjod pas gzhan spobs pa med par byas nas mjug bsdu ba dang / de ltas 'dul ba rgya mtsho las/ /zhes bya ba la sogs pa smos te/ de ltas zhes bya ba ni bshad ma thag pa'i rnam par ro/ /bsdus pa ni phyung ba'o/ /gang las she na/ rgya mtsho las zhes bya ba smos te/ 'dul ba rgya mtsho chen po las so/ /ji ltar rgya mtsho de gting dang pha rol med ces grags pa de bzhin du/'dul ba rgya mtsho 'di yang / byung ba dang bca' ba dang / sngon gyi gtam dang / rtogs pa brjod pa dang / skyes pa rabs dang / 'khor lo ltar sbyar ba dang / mu bzhi pa la sogs pas gting dang mtha' med de/ de'i phyir rgya mtsho nyid kyis nye bar dpag go//de las ji tsam cig btus she na/ dri ba thigs pa tsam zhes bya ba smos so/ /thigs pa tsam ni nyung zhig ste/ tsam zhes bya ba smos pas ni/ brtags pas ha cang rnam pa mang po bsal to/ /brgya zhig ces bya ba ni rtogs par dka' ba'i don dri ba brgal zhing brtag pa brgya zhig ste/tshigs su bcad pa bkod pa don yongs su rdzogs la/ phal che ba las brtsams nas/ brgya zhig ces smos te/ 'on kyang ltung ba rnam par rig byed cig yin nam/ gzugs can zhig gam/ bstan du yod pa zhig gam zhes byas te/ de lta bu la sogs pa tshigs su bcad pa'i skabs na/dri ba lhag pa dag kyang yod do/ /bdag ni zhes bya ba ni 'dul ba dri ba'i tshig le'ur byas pa byed pa bdag nyid yin par ston to/ /'bad de zhes bya ba ni bsgrims nas so/ /'dis ni dri ba rnams zab pa nyid du bstan te/ don zab mo dpyad par bya ba la/ bdag lta bu blo rtsing po rnams kyis blo bab col du gting mi slebs so zhes bya ba brtsams pa'o//ci'i phyir zhe na/ ma rangs nas zhes bya ba smos te ma mgu nas so/ /yul gang la ma rangs she na/ brnyas byed la zhes bya ba smos te/ brnyas byed ces bya ba ni khyad du gsod par byed pa'o/ /'di la don ni bdag kyang so so'i skye bor rad pas 'dul ba dang 'dul ba 'dzin pa la brnyas par byed pas/thugs thub can nyid go bdag nyid kyi tshod kyang mi 'dzin par/ ji ltar gzhan la brnyas par byed snyam nas ma rangs te/ 'dul ba rgya mtsho las dri ba nyung shas 'di btu bar byas so zhes bya ba yin no//da ni dri ba byed pas bdag nyid kyi tshig dang don nges par 'dzin par gtogs pa'i nyes pa bshags shing bla ma dag la yang bzod pa gsol ba ni/ nongs bgyis bla mas thugs rjes kyang / /zhes bya ba la sogs pa smos te/ nongs bgyis zhes bya ba ni dri ba byed pas tshig dang don du gtogs pa'i nyes byas so//bla mas zhes bya ba ni mkhan po dang / /'dul ba 'dzin pa/ 'dul bar gtogs pa'i don gyi rang gi ngo bo rtogs par dka' ba ma lus par/ rab tu rnam par 'byed pa'i sgo nas/ sems dang sems las byung ba'i rgyud gsal bar byas pa rnams kyis so//bcos shing zhes bya ba ni don gyi bdag nyid dang tshig gi bdag nyid kyis bcos shing ngo / /bzod pa mdzad du gsol zhes bya ba ni/ nyes pa bzod par byas te/ nyes pa bkod par gtogs pa'i nyes pa bdag la bzod pa mdzod cig pa'o/ /ci tshig tsam gyis sam zhe na/thugs rje zhes bya ba smos te/ thugs rje ni sdug bsngal dang sdug bsngal gyi rgyu las drang bar 'dod pa'i brtse ba ste nges so/ /kyang zhes bya ba ni bsdu ba ste/ bcos pa 'ba' zhig tu ma zad kyi thugs rje rgyur gyur pas bzod pa mdzod cig pa ste/ bdag nyid chen po de dag nyes pa du ma zhig gis skyon chags su zin kyang /de dag gis byas pa'i nyes pa las gdon par 'dod pas/ thog mar drangs pa'i snying rjes sems kyi rgyud brlan pas nyes pa chen po yang bzod do/ /de nyid kyi don gzhan nye bar dgod pas bstan par bya ba'i phyir/ mthong ba rnams kyis long ba ni//zhes bya ba la sogs pa smos te/ mthong ba rnams kyis zhes bya ba ni yang dag pa'i lta ba phun sum tshogs pa rnams kyis so/ /long ba ni shes rab dang bral ba ste/ long ba dang 'dra bar long ba yin pas so/ /dam pa'i lam zhes bya ba ni yang dag pa'i lam la'o/ /ci zhes bya ba ni dri ba'o//mi gzung ba zhes bya ba ni mi dgod pa ste/ dam pa'i lam la dgod par bya ba nyid do snyam du bsams pa'o/ /'di la don gyi phyogs gang na gang zag 'dul ba 'dzin pa gnas pa'i phyogs de snang bar 'gyur bar snang ngo / /gsal bar 'gyur ba dang / rab tu gsal bar 'gyur bar snang ngo zhes gsungs pas/bla ma mi shes pa'i mun pa'i rab rib kyi ling tog gi tshogs dang rnam par bral ba/ rig pa kha na ma tho ba med pas gsal bar byas pa'i mig can rnams kyi 'dul bar gtogs pa'i don gyi rang gi ngo bo mthun pa dang / mi mthun par rab tu ston pa la/ brtson pa nyid kyis 'jig rten gyi mig tu gyur pa yin la/dbang gis snga phyi brtag pa'i mig dang bral bas long ba lta bu ste/ de bas na ma rig pa'i mun pas dri ma can du byas pa'i yid dang ldan pa dag dam pa ma yin pa'i lam las bzlog ste/ long bas thag ring po dang phra ba dang / bsgribs pa mi mthong ba bzhin du lam dam pa la shog shig ces bya ba 'di yin no//da ni 'dul ba dri ba'i tshig le'ur byas pas kun nas bslang ba'i dge ba mngon par 'dod pa'i 'bras bu'i khyad par du yongs su bsngo bar bya ba 'dul ba'i dri ba rnams byas nas zhes bya ba la sogs pa smos so/ /'dul ba dri ba rnams zhes bya ba ni 'dul bar gtogs pa'i dri ba ni 'dul ba'i dri ba ste/chos mngon par gtogs pa'i dri ba dag kyang yod pas de'i phyir 'dul ba'i zhes khyad par du byas so/ /byas nas zhes bya ba ni brtsams nas sam smras nas so/ /dge ba ni dge legs so/ /dkar po ni dkar ba'o//ji lta bu zhig ce na/ zla ba lta bur zhes bya ba smos te zla ba 'dra ba'o/ /dri ma med pa zhes bya ba ni tshig ste dge ba des so/ /'gro ba ni khams gsum pa'o/ /rtag tu zhes bya ba ni dus thams cad du'o/ /dge ba zhes bya ba ni bkra shis par ro/ /shog ces bya ba ni gyur cig pa'o/ / 'di la don ni bdag gis 'dul ba dri ba'i tshig le'ur byas pa bsdebs nas/ bsod nams ston kha'i zla ba'i 'od zer lta bur shin tu dkar ba bsgrubs pa des khams gsum pa'i 'gro ba 'di'i nyon mongs pa thams cad rnam par zlog par gyur cig ces bya ba yin no/ /bdag gis 'dul ba'i dri ba ni//bsdus pa rnam par phye nas gang / /dge ba thob pa de yis ni/ /'jig rten dge bshes byed par shog /'dul ba dri ba'i tshig le'ur byas pa lnga pa'i gtan la dbab pa rdzogs te/ 'dul ba dri ba'i tshig le'ur byas pa'i gtan la dbab pa/ slob dpon mdo sde 'dzin pa ka l+yA Na mi tras mdzad pa rdzogs so// //gal te bdag ni rmongs pa yis/ /lan zhig legs par ma thebs na/ /'di ni phyogs tsam bstan par byas/ /mkhas pas bde legs gdab tu gsol/ /sdug cing gdung ba sel byed pa/ /ji ltar 'dod pa'i 'bras bu ster/ / grib ma stug po'i shing mchog ltar/ /gzhan don dga' ba'i phyir 'khrungs pa/ /kun dga' go chas bdag la ni/ /shin tu bcol te de yi phyir/ /ci dran ba zhig 'bad de byas/ /nga rgyal gyi ni phyir ma yin/ /rgya gar gyi mkhan po d+harmA ka ra dang / zhu chen gyi lo tsA ba ban+de dpal brtsegs kyis bsgyur cing zhus te gtan la phab pa/