CLOSE WINDOW

D4130
བོད་ཡིག

@#/ /rgya gar skad du/ shra ma Ni ra shik+Sha pa dAd sru tra/ bod skad du/ dge tshul gyi babe+eb sno pa'i gzhi'i mdo/ thams cad mkhyen pa la phyag 'tshal lo/ /sangs rgyas chos dang tshogs kyi mchog /dge 'dun la yang phyag 'tshal te/ /dge tshul ched du bya ba yi/ /mdo ni cung zad bshad par bya//de bzhin gshegs pas dge tshul rnams kyi bslab pa'i gzhi bcu po gang dag mdor bsdus te gsungs pa ni 'di lta ste/ srog gcod pa spong ba'i bslab pa'i gzhi dang / ma byin par len pa dang / mi tshangs par spyod pa dang / brdzun du smra ba dang / 'bru'i chang dang sbyar ba'i chang myos par 'gyur ba bag med pa'i gnas dang /gar dang glu dang rol mo'i sgra dang / phreng ba dang / spos 'byug pa dang / rgyan dang kha dog 'chang ba dang / mal mthon po dang / mal chen po dang / dus ma yin pa'i kha zas dang / gser dngul len pa spong ba'i bslab pa'i gzhi zhes bya ba'o zhes bya ba 'di ni bcom ldan 'das kyis bslab pa'i gzhi bcu po mdor bsdus te gsungs pa yin no//gang yang btsun pa shAkya 'od kyis de dag tu gtogs pa'i tshig le'ur sbyar ba dang / gang yang kho bos slob dpon dang mkhan po dag las cung zad bslab pa'i phyir kho bos tshangs pa mtshungs par spyod pa rnams kyi don du mdo cung zad brtsam par bya'o//srog gcod pa spong ba zhes bya ba ni bsams bzhin du bud med dang skyes pa dang ma ning dang / lha'i 'gro bar gtogs pa'i srog gcod par mi byed cing / gzhan gyi sgo nas kyang mi byed pa dang / sngags pa la sogs pa la thabs kyis gsod par mi byed pa dang /gsad par bya ba'i phyir bzung ba dang / gsod bzhin pa dang / gsod pa la bag med par mi byed pa dang / srog gcod pa mthong ba la yid dga' bar mi byed pa dang / thams cad du bya ba ma yin pa la rjes su yi rang bar mi byed la/ sbyor bar yang mi byed cing gzhan dag la srog gcod par yang dag par 'dzin du mi 'jug pa dang /srog chags grog spur phra mo rnams kyang bsams bzhin gsod par mi byed pa'o/ /srog chags dang bcas pa'i chu la sogs pa longs spyad par mi bya'o/ /dran pa dang shes bzhin dang ldan pa rnams nyi ma shar ba na chu la sogs pa brtag par bya zhing mi g.yo ba 'di la brtag par bya ste/lha'i mig gis ma yin/ yun ring du ma yin/ myur bar ma yin zhing / dus ji srid kyis sems dag pa'i dus de srid du brtag par bya'o/ /brtags pa 'di yang ji srid du nyi ma ma shar ba de srid du longs spyad du rung ba yin no/ /btsags pa la sogs pa dang 'brel pa skyon med par byas nas brtags pa'i chu lam du 'gro ba'i tshe rgyang grags lnga'i bar du btung bar bya'o//chu tshags lnga po rnams kyi nang nas gdon mi za bar chu tshags gcig bcangs nas lam du 'gro bar bya'o/ /chu tshags lnga ni chu tshags gru gsum dang / bum tshags dang ril ba zhabs tshags can dang /bum tshags gce'u can dang / bsal tshags so/ /rang gis ma brtags pa'i chu ni yid ches pa'i tshig gis nye bar longs spyad par mi bya'o/ /gal te gzhan dang ma 'dres pa yin na rgyang grags kyi mtha'i bar du chu klung 'bab pa la brtags nas btung bar bya'o//chus gang ba'i bum pa la sogs pa la brtag par bya'o/ /chu btsags pa ni gal te srog chags yod na chu'i khron pa dben par thar par byed pa'i snod kyis srog chags dang bcas pa btang zhing dbo bar bya ste/ sa la dbo bar mi bya'o/ /srog chags med pa'i chu la yang ma yin no//mi smra bar gyur pa dang shes bzhin dang ldan pa rnams kyis lo ma la sogs pa la brtag par bya'o/ /lo ma la sogs pa la brtags pa na gal te srog chags yod na rtswa sngon po dang bcas pa'i sa'i phyogs su dor bar bya'o/ /srog chags dang bcas pa'i chu la srog chags dang bcas par 'du shes pa dang /yid gnyis za ba dang / srog chags med pa la srog chags dang bcas par 'du shes pa dang / yid gnyis za bar gyur na nye bar longs spyad par mi bya'o/ /mthong ba dang thos pa dang dogs pa'i gzhi gsum gyi yongs su dag pa'i sha yin na bza' bar bya'o//gang dang gang bza' ba'am btung bar gyur pa de dang de dag nyid so sor brtag par bya'o/ /gos la sogs pa rnams la srog chags rnams brtag par bya zhing dag par bya'o/ /dus dang dus su zang zing chu dang bcas pa dang zang zing med par longs spyod pa'i bum pa gtsang bar bya zhing /bkru ba dang bskam par bya ste/ gang gi phyir snod skyon dang bcas par yin na srog chags skye bar 'gyur ba'i phyir ro/ /shig rnams ni ras mar bcug la rtsig pa la sogs pa bu ga'i nang du gzhug par bya'o/ /rtswa shig rnams ni dpyid kyi dus su rtswa drur ba dang bcas pa'i bsel ba'i sa phyogs su dor bar bya zhing /dgun ni dro ba'i phyogs su'o/ /nad pa la dug dang mtshon dang 'dod pa'i zas btung ba sbyin par mi bya'o/ /sman pa mkhas pa la dris nas 'di la 'dod pa'i zas dang btung ba dang sman sbyin par bya'o/ /glen pa dang mi shes pa la 'di'i sman dpyad brtag par mi bya mod kyi/'on kyang mkhas pa la brten par bya'o/ /gang gis 'di'i sems gzhan du gnas par 'gyur ba de lta bu'i chos nad pa la bshad par mi bya'o/ /'di la nad kyi 'jigs pa las thar te tshe ring zhing brtan pa dang / bde bar 'gyur ba de ltar smra bar bya'o//'di ji srid du chos spyod par 'tsho ba de srid du dge ba mang po rab tu skye bar 'gyur ro zhes bya bar spro ba bskyed par yang bya'o/ /nad pa la 'chi ba'i bsngags pa brjod par mi bya'o/ /'chi ba yang dag par 'dzin par byed du mi gzhug go/ /brtse ba med pa'i sems kyis nad g.yog mi bya'o/ / shi na rnyed pa 'thob pa'i phyir yang ma yin no/ /rim gro dam pa'i nad g.yog bya'o/ /rdeg par mi bya'o/ /sbyor du gzhug par mi bya'o/ /rnam par 'gyur bar mi bya'o/ /'jigs par mi bya'o/ /kun nas dkris pa la gnas pas khro ba la bzod par bya'o/ /rdo la ri mo bris pa lta bu'i sems su mi bya mod kyi/'on kyang chu la ri mo bris pa lta bur bya'o/ /bsams bzhin du 'gyod par mi bya'o/ /bzhad gad kyi phyir ga ga tshil mi bya'o/ /brgya la nad pa na re gal te khyod nga'i dgra la sogs pa gsod par byed dam gzhan la bsgo nas gsod par byed pa de lta na nga nad las ldang ba dang 'tsho ba yin par smra ba'i tshig de rnams ni rnam pa thams cad du mi bya'o//nad pas khyod nga gsod dam gzhan bsgo nas gsod pa'i rang bzhin gyis kha na ma tho ba dang bcas pa mi bya'o/ /gzhan bsgo nas gsod par byed pa yang mi bya'o/ /nad pas srog gcod par mi bya'o/ /shi ba'i ro la phol yod pa de la dral nas srog chags brtags te bsreg par bya'o//sems can thams cad la byams pa'i sems nye bar gzhag par bya'o/ /sems can 'di rnams nyams sam/ bcings sam pham par gyur tam/ chad pas gcad pa la ltos pa med pa'i sems su mi bya'o//de lta bu la sogs pa'i srog gcod pa rnam pa du ma yin pa de'i phyir srog gcod pa rnam pa thams cad du thabs thams cad kyi sgo nas srog la bab kyang bsrung bar bya'o/ /ji skad brjod pa las 'das na thams cad 'dir nyes byas su 'gyur ro/ /ji ltar bdag nyid kyi srog bsrung ba de bzhin du gzhan dag gi yang bsrung bar bya ba ste/gang gi phyir srog gcod par byed pa ni tshangs pa mtshungs par spyod pa rnams kyis yongs su spong bar 'gyur ba dang / dmyal bar yang ltung bar 'gyur ba'i phyir ro/ /thams cad du yang thabs thams cad kyi sgo nas shes bzhin dang ldan par bya'o//dge tshul gyi bslab pa'i gzhi'i mdo las srog gcod pa spong ba zhes bya ba'i bslab pa'i gzhi dang po'o// //ma byin par len pa spong ba zhes bya ba ni/ rku sems kyis dge 'dun nam gang zag gi rdzas mi len cing gzhan gyi sgo nas kyang mi len la/ rku sems kyis gnas nas gzhan du bskyod par mi byed pa'o//gal te rdzas dgos pa yin la/ yid gcugs pa yin na/ yid gcugs pa dang 'brel bas blang bar bya'i/ rku ba'i blos ni ma yin mod kyi 'on kyang de dang 'dra ba'am rin du gyur pa sbyin par bya snyam pa 'di lta bu'i sems kyis blang bar bya zhing /de dang 'dra ba bgrangs la rin sbyin par bya'o/ /gtsug lag khang mang po rung mod kyi thams cad nas rnyed pa la sogs pa blang bar ni mi bya ste/ gang kho nar gnas pa de kho nar blang par bya'o/ /rku sems kyis gzhan gyi til gyi phub ma yang blang bar mi bya'o/ /gtams pa dbrog par mi bya'o//gal te khyim pa 'ga' zhig gis gtams te bzhag pa las nga shi na khyod kyi yin no zhes smra ba na longs spyod pa la nyes pa med do/ /'on te ma dang pha dang bu dang nye du dang bshes rnams la byin cig zer na sbyin par bya'o/ /gal te dge 'dun la phul cig zer na dbul bar bya'o/ / 'on te cung zad kyang ma smras par shi bar gyur na nyams par mi bya'o/ /gal te ma dang pha dang bu dang nye du la sogs pa slong du 'ongs nas che ge mos khyod la 'di dang 'di bzhag pa la kho bo ni de'i nye du yin pas de kho bo la byin cig ces zer na/ gal te nye du yin par shes par gyur na dbang po'i mngon sum du sbyin par bya'o//gang gi phyir khyim pa rnams ni ltos pa dang bcas pas dus byed la/ rab tu byung ba rnams ni ltos pa med pas yin no/ /'on te 'ga' zhig kyang slong du 'ong ba med na/ de'i ched du shi ba'i bsod nams bya'o/ /dge slong ngam dge tshul gyis nye bar gzhag ste shi bar gyur na dge 'dun la dbul bar bya'o//gal te 'ga' zhig gis cung zad bcol te bzhag par gyur la/ de dus gzhan du ni gzhan 'ga' zhig len du btang na de 'di la sbyin par bya ste/ myur ba nyid du ni sbyin par mi bya mod kyi 'on kyang 'di skad du dan rtags khyer la shog shig ces brjod par bya zhing /gal te khyer te 'ongs pa na dan rtags 'dra bar gyur na sbyin par bya'o/ /yang na che ge mo la ngas 'di dang 'di lta bu'i dan rtags byin pa des khyod la gtad par bya ba yin par de nyid kyis brjod na sbyin par bya'o/ /yang pho nya'i thad du mi shes pa yin na rang nyid kyis gtad par bya ba'am yid ches pa'i lag tu bskur bar bya'o//rkun ma dang lhan cig grogs po mi bya zhing lam bstan par yang mi bya'o/ /de dang lhan cig 'gro bar mi bya'o/ /rkun ma la nye bar mkho ba bcang bar mi bya'o/ /rngon pa la sogs pa rnams kyis ri dgas la sogs pa skyabs kyi don du gtsug lag khang du bros nas 'ongs pa yin na de dag bsrung bar bya'o//shi na de dag nyid la sbyin par bya'o/ /gal te bu lon blangs nas dus las 'das par gyur na bgo bar byas la/ yo byad la sogs pa rnams kyis bu lon de dag par bya'o/ /nad pa 'chi 'dod pas nad g.yog la 'di skad du nga shi na nga'i gos la sogs pa gang yin de khyod kyi yin no zhes smras na blang bar bya'o//'on te gzhan nam dge 'dun gyi yin zer na blang bar mi bya'o/ /grur zhugs pa na lhung bzed la sogs pa go bar bya ste gtong ba na ngas btang gi bzung ngam zhes smras pa na/ gal te lhung na rin sbyin par mi bya'o/ /ma smras pa ra lhung na rin sbyin par bya'o//gos la sogs pa gtsug lag khang gi nang du lhung ba rnyed par gyur na/ gal te 'ga' zhig 'ongs nas 'phags pa nga'i 'di dang 'di lta bu stor ba de khyed kyis gal te blangs na de sbyin par bya'o zhes zer na blangs mod kyi 'on kyang dan rtags ci yod ces brjod par bya'o//gal te dan rtags dang bcas par rjod par byed na dbang po'i mngon sum du sbyin par bya'o/ /'on te cung zad kyang med du 'ongs pa med na rang gis longs spyad par bya ba ma yin gyi dge 'dun la dbul bar bya'o/ /gzhan la snyad btags par smra bas pha rol po gzhan gyi nor dbrog par mi bya'o//ma byin spyo pa la gzhan dag yang dag par 'dzin par byed du mi gzhug go/ /spro bar yang mi bya'o/ /nad pas ni byin pa la rku sems kyis blang bar mi bya'o/ /gzhan gyi sgo nas kyang blang bar mi bya'o/ /gcig yin yang ma byin par len pa rnam pa du ma yin pa de'i phyir srog la bab kyang ma byin par blang bar mi bya'o//ji ltar bdag nyid kyi nor bsrung ba de ltar gzhan gyi yang yin te/ gang gi phyir ma byin par len par byed pa ni tshangs pa mtshungs par spyod pa rnams kyis spong bar 'gyur ba dang / dmyal bar ltung bar yang 'a ba'i phyir ro/ /de'i phyir ma byin par len pa ni rnam pa thams cad du thams cad kyi sgo nas bsrung zhing thams cad du shes bzhin dang ldan par bya ba yin no//dge tshul gyi bslab pa'i gzhi'i mdo las ma byin par len pa spong ba zhes bya ba'i bslab pa'i gzhi gnyis pa'o// // mi tshangs par spyod pa spong ba zhes bya ba ni bud med kyi zag byed dang bshang ba dang kha'i lam rnams su rang gi yan lag gi rnam pa bcug nas reg pa bdag gir mi byed pa'o/ /de bzhin du skyes pa dang / ma ning dang / mi dang / dud 'gro'i 'gro bar gtogs pa la sogs pa rnams la yang ngo //tshor ba dang / rang bzhin nyams pa'i gnas skabs dang / mi 'dod pa las gal te mi tshangs par spyod par byed pa na bdag gir mi bya'o/ /khyim pa dang / dge slong dang / dge tshul gzhan dang lhan cig lus la reg pas nyal bar mi bya mod kyi 'on kyang so sor tha dad par bya'o/ / gnas ma rnyed na gos kyis lus so sor dkris la mal gcig tu nyal bar bya'o/ /mu stegs can dang khyim pa dang lhan cig nub gsum pa la nyal du mi rung ngo / /snang ba la yang ma yin no/ /bsams bzhin du khu ba dbyung bar mi bya'o/ /rmi lam gyi nang du ni nyes pa med do/ /gang la'am de la'am thabs gang gis sam/des yan lag gi rnam pa bzung ba sngon du 'gro bas brtsal te khu ba dbyung bar mi bya'o/ /bud med dag mthong nas 'dod chags kyi sems su gyur na mi sdug pa bsgom par bya'o/ /bud med la 'khrig pa bslang bar mi bya'o/ /'khrig pa'i rgyu mtshan yang bstan par mi bya'o//'khrig pa'i gtam mi bya'o/ /bud med dang lhan cig dben par nyi ma nub kyi bar du 'dug par mi bya'o/ /yang dang yang du bud med la blta bar mi bya'o/ /gal te 'ga' zhig 'ga' zhig tu mi tshangs par spyod par byed pa der 'gro bar mi bya'o/ /der 'dug par mi bya zhing blta bar yang mi bya'o//bud med la reg par mi bya'o/ /chu la lhung ba nye bar byung shig ces 'o dod 'bod par byed pa la/ 'ga' zhig kyang gnas pa med na ma dang bu mo dang sring mo'i 'du shes byas te nye bar gdon par bya'o/ /bud med rnams la chags pa med pa'i sems kyis chos smra bar bya'o//gcig pu bud med rnams la chos bstan par mi bya'o/ /bud med dang lhan cig khyim gcig du nyal bar mi bya'o/ /stan gcig la 'dug par mi bya'o/ /lam du 'gro bar yang mi bya'o/ /gal te skyes pa yod na nyes pa med do/ /bud med rnams mthong na lo'i tshad dang rjes su mthun par shes nas ma dang bu mo dang sring mo'i 'du shes su bya'o//bud med gnas khang du 'jug pa sbyin par mi bya'o/ /gal te sman la sogs pa dang dge ba'i phyogs byed na nyes pa med do/ /der yang gcig pu 'dug par mi bya'o/ /bud med dang lhan cig bza' bar mi bya'o/ /snod med na pha ma dag dang lhan cig dben pa'i phyogs su bza' bar bya'o//yang na de dag 'u bu cag lhan cig bza'o zhes zer na bdag nyid dben pa'i phyogs su bza' bar bya'o/ /gal te bud med bya ba ma yin pa mi rigs pas mgron du gnyer na lhag par gnas par mi bya'o/ /bud med gal te mdun du bud med slu zhing /bud med g.yo byed cing / bud med sgyu byed pa la blta bar mi bya'o/ /lam du 'gro bas bud med dang lhan cig reg pas 'gro bar mi bya'o/ /bud med kyi gtam mi bya'o/ /gang du bud med khrus byed pa des mi bya'o/ /bud med gcer bu yod pa der 'dug par mi bya zhing blta bar yang mi bya'o//rang gos med pas kyang bud med kyi drung du 'dug par mi bya'o/ /bud med kyi yan lag dang nying lag la blta bar mi bya'o/ /bud med 'khrig pa yang dag par 'dzin par byed du mi gzhug go/ /gzhan la 'khrig pa'i phyir rin sbyin par mi bya'o/ /bud med kyi gar dang / glu dang rol mo dang /gos rnams dang / rgyan rnams kyi sgra la nyan pas ro myang bar mi bya'o/ /bud med kyi thad las dril phyis dang / khrus dang / bsku mnye bdag gir mi bya'o/ /e ma bdag tshul khrims sam/ brtul zhugs sam/ dka' thub kyi tshangs par spyod pa la brten pa 'dis lha nyid dam/ gzhan gang yang rung snyem du smon pas tshangs par spyod pa spyad par mi bya'o/ /bud med dang lhan cig dgod pa dang rtsab hral dang rtsed mo mi bya'o/ /mi tshangs par spyod pa byed pa la lta ba dang dga' bar mi bya zhing spro bar yang mi bya'o/ /gang yang gzhon nu mi tshangs par spyod pa 'khrig pa'i chos bsten pa'i mthu dang ldan pa de yang sngar bstan pa'irnam pas yongs su dor bar bya'o//gal te nad pa 'di skad du gang bdag bud med dang lhan cig mi tshangs par spyod pa 'khrig pa'i chos bsten cing ba dag la bud med khyer te 'ong ba de lta na bdag 'tsho zhes smra na rkyen des mi 'tsho na yang 'di la kun tu sbyin par mi bya'o//nad pas mi tshangs par spyod pa mi bya'o/ /mi tshangs par spyod pa byed pa la lta ba thag ring por yongs su spang bar bya'o/ /ji ltar 'bar ba'i me'i phreng bas khyab pa yongs su dor bar bya ba yin pa de bzhin du bud med kyang yongs su dor bar bya'o/ /de lta bu la sogs pa mi tshangs par spyod pa rnam pa du ma yin pa de'i phyir rnam pa thams cad du thabs thams cad kyi sgo nas srog la bab kyang mi tshangs par spyod pa bsrung bar bya ste/gang gi phyir mi tshangs par spyod pa byed pa la ni tshangs pa mtshungs par spyod pa rnams kyis spong ba dang / dmyal bar ltung ba yang yin no//dge tshul gye bslab pa'i gzhi'i mdo las mi tshangs par spyod pa spong ba zhes bya ba'i basbab pa'i gzhi gsum pa'o// //brdzun du smra ba spong ba zhes bya ba ni mi'i chos bla ma med pa la med bzhin du yod par mi smra ba ste/ 'di lta ste/ dper na lha la sogs pa rnams mthong ngo //lha la sogs pa rnams kyis kyang bdag mthong ngo / /lha la sogs pa rnams kyi sgra thos so/ /lha la sogs pa rnams kyis kyang bdag gi sgra thos so zhes bya ba la sogs pa dang / de bzhin du bsam gtan dang / tshad med pa dang / gzugs med pa dang / 'bras bu dang / mngon par shes pa dang / 'du shes med pa la sogs pa zag pa med pa'i chos rnams bdag gis thos pa mi smra ba'o/ /stan khra bo la sogs pa ni dgra bcom pas rnyed la/ bdag gis kyang de rnyed kyi gzhan gyis ni ma yin no/ /bdag gis dgra bcom pa thob ste bdag khyad par thob pa las yongs su nyams so//khyim 'di gang gis yin pa 'dod chags dang bral ba yin te/ bdag gis yang 'di yin no/ /dgra bcom pas bdag mthong nas smin par byed pa de la sogs pa'i tshig brjod par mi bya'o/ /bdag gi phyir ram zang zing gi phyir yang shes bzhin du brdzun du smra ba brjod par mi bya'o//bdag gi lus sam ngag gis sdig pa'i las cung zad byas pa de la mkhan po la sogs pa rnams kyis ci 'di dang 'di lta bu khyod kyis byas sam zhes 'dri na de la ji ltar gyur pa bzhin du brjod par bya'o/ /nye du dang grogs la sogs pa rnams dang / gzhan dang gzhan gyi lus dang ngag gis sdig pa'i las cung zad byas par gyur na de la rgyal po'i pho brang 'khor du gtogs pa'am/gzhan gyi 'khor du gtogs pa'i dbang po la 'phags pa 'dis ci zhig byas zhes 'dri bar gyur na/ de la 'di skad du gal te 'di la nye bar gnod pa cung zad kyang mi byed pa de lta na bdag che bzhi byed kyi gzhan du ma yin no zhes brjod par bya'o//gal te mi byed ces zer na dam tshig la bkod na ji lta ba bzhin du gyur pa'i che bzhi dbye bar bya'o/ /'on te mi smra na rnam pa thams cad du srog la bab kyang brjod par mi bya'o/ /bzhad gad kyi phyir yang shes bzhin du brdzun du smra bar mi bya'o//slob dpon dang mkhan po dang tshangs pa mtshungs par spyod pa rnams kyis dris pa'i tshig la gzhan dang gzhan du spro bar mi bya mod kyi/ 'on kyang g.yo sgyu byed pa ma yin pas gang kho na dris pa de kho na brjod par bya'o/ /gal te mi gsad par bya ba bros pa mthong na de la gsod par byed pas khyod kyis 'di lta bu bros pa mthong ngam zhes 'dri na/de la gzhan dang gzhan spro bar bya'o/ /de ltar byas pa na gal te 'phags pas smra bar bya ba rjod cig ces zer na re zhig sen mo mthong ngo re zhig nam mkha' mthong ngo zhes brjod par bya'o/ /de ltar byas kyang 'phags pas smra bar bya ba rjod cig /gzhan dris pa na gzhan lung bstan pas ci bya zhes zer na/ phyogs bzhir bltas te 'di skad du don dam par sems can ma mthong zhes brjod par bya'o/ /nye bar gnod pa rnams yongs su bsrung ba'i phyir gzhan dang gzhan du spro bar bya'o/ /slob dpon dang mkhan po rnams cung zad smra na chos dang ldan pa'i tshig rnams bya ste/gang gi phyir de bzhin gshegs pa dang / dgra bcom pa dang / slob dpon dang / mkhan po dang / dge 'dun dang / dge 'dun gyi gnas brtan dang / rgyal po dang / de'i 'khor rnams kyi tshig spang bar bya ba ma yin no/ /rnam par 'gyur ba thob pa'i slob dpon dang mkhan po ni dor bar bya'o//tshig rtsub po smra bar mi bya'o/ /mi'i skyon nas smra bar mi bya'o/ /che ge mo'i rigs ni rigs 'di yin no zhes brjod par mi bya ste/ de bzhin du rdza mkhan dang / mgar ba la sogs pa'i rigs kyang ngo / / phra ma mi bya'o/ /nad pas brdzun smra bar mi bya'o/ /gzhan la brdzun du smra ba yang dag par 'dzin du gzhug par mi bya zhing / spro ba bskyed par mi bya'o/ /de lta bu la sogs pa brdzun du smra ba rnam pa du ma yin pa de'i phyir srog la bab kyang shes bzhin du brdzun du smra bar mi bya'o/ /brdzun du smra ba ni rnam pa thams cad kyis thabs thams cad du bsrung bar bya ste/gang gi phyir brdzun du smra ba ni tshangs pa mtshungs par spyod pa rnams kyis spong bar 'gyur ba dang /dmyal bar ltung bar 'gyur ba'i phyir ro/ /bslab pa'i gzhi bzhi po 'di rnams ni rang bzhin gyi kha na ma tho ba dang bcas pa yin pas srog la bab kyang 'di rnams nad pas kyang spyad par mi bya'o//dge tshul gyi bslab pa'i gzhi'i mdo las brdzun du smra ba spong ba zhes bya ba'i bslab pa'i gzhi bzhi pa'o// //'bru'i chang dang bcos pa'i chang myos par 'gyur ba'i khu ba spong ba zhes bya ba ni 'bru'i chang dang / bcos pa'i chang tha na rtswa'i mchog mas kyang btung bar mi byed pa'o//'bru'i chang ni zas kyi btung ba'o/ /bcos pa'i chang ni me tog dang sdong bu'i btung ba'o/ /myos par 'gyur ba na 'bras bu'i btung ba'o/ /myos par byed pa'i 'bras bu gang yin pa de ni bza' bar mi bya ste ko Ta ba yang ngo / / myos par 'gyur ba'i btung ba la myos par 'gyur bar 'du shes pa'am/ yid gnyis za ba'am myos par 'gyur ba ma yin pa la myos par 'gyur bar 'du shes par btung bar mi bya'o/ /tshigs ma bza' bar mi bya'o/ /myos par 'gyur ba bskol ba la nyes pa med de/ /de yang gal te myos par 'gyur ba'i ro dang dri dang bral ba yin zhing myos par 'gyur ba'i kha dog dang ldan pa la nyes pa med do//gzhan la 'bru'i chang dang bcos pa'i chang gi khu ba mi sbyin zhing sbyin du yang mi gzhug go/ /'bru'i chang dang bcos pa'i chang gi rin mi sbyin zhing sbyin du yang mi gzhug go/ nad pas 'bru'i chang dang bcos pa'i chang myos par 'gyur ba'i btung ba btung bar mi bya ste/ bcas pa'i kha na ma tho ba dang bcas pa yang yin pa'i phyir ro/ /bskol ba'i khu ba'i rnam pa lta bu dang / chab lta bu btung bar bya'o/ /bum pa ni gsum ste/ bshang ba'i bum pa dang / gci ba'i bum pa dang /chang gi bum pa'o/ /de la ji ltar bstan ma thag pa'i bum pa gnyis po yongs su dor bar bya ba yin pa de bzhin du chang gi bum pa yang ngo / bcom ldan 'das kyis kyang dge slong dag nga la ston par smra ba rnams kyis myos par 'gyur ba tha na rtswa'i mchog mas kyang mi sbyin zhing mi btung ngo zhes gsungs so//'bru'i chang dang bcos pa'i chang myos par 'gyur ba'i btung ba yang dag par 'dzin du mi gzhug go/ /de lta bu la sogs pa myos par 'gyur ba'i btung ba rnam pa du ma yin pa de'i phyir 'bru'i chang dang bcos pa'i chang thabs thams cad kyi sgo nas thams cad du bsrung bar bya ste/gang gi phyir 'bru'i chang dang bcos pa'i chang 'thungs pa la tshangs pa mtshungs par spyod pa rnams kyis yongs su spong bar 'gyur ba dang / dmyal bar ltung bar yang 'gyur ba'i phyir ro/ /dge tshul gyi bslab pa'i gzhi'i mdo las 'bru'i chang dang bcos pa'i chang gi btung ba spong ba zhes bya ba'i bslab pa'i gzhi lnga pa'o// //gar dang glu dang rol mo'i sgra spong ba zhes bya ba ni gar dang glu dang rol mo'i sgra mi bya zhing gzhan byed du gzhug par yang mi bya ba'o/ /mchod pa'i don du sangs rgyas bcom ldan 'das la bstod pa dang / rgyun chags gsum pa la dbyangs kyis 'don par byed pa la nyes pa med do//dbyangs kyi nga ro rang bzhin mngon par mi shes na dben par zhugs te bslab par bya'o/ /gar mkhan la sogs pa gar byod pa la blta bar mi bya'o/ /gang du gar byed pa dang / glu len pa der 'dug par mi bya'o/ /steng du 'gro ba dang / mchong ba dang / rgyug pa dang / rtsed mo mi bya'o/ /chu la rtsed mo nyams su myong bar mi bya'o/ /dge tshul gyi bslab pa'i gzhi'i mdo las gar dang glu dang rol mo spong ba zhes bya ba'i bslab pa'i gzhi drug pa'o// //phreng ba dang spos nyug pa dang rgyan dang kha dog 'chang ba dang spong ba zhes bya ba ni phreng ba dang / me tog sil ma dag bdag gi lus la mi 'dogs pa dang / rang la dri'i chus khrus mi byed pa dang / dga' ba'i phyir gdu bu dang / /dpung rgyan dang / mgul rgyan la sogs pas bdag nyid kyi lus la rgyan mi byed pa dang / bdag nyid la dri zhim po'i rdzas kyis nyug pa la sogs pa mi byed cing /lus la dri zhim po'i rdzas kyis yang dag par 'byug par mi byed ba'o/ /chos gos la bdug spos kyis bdug par mi bya'o/ /gal te dri mi zhim pa yin na dri nga ba spang ba'i phyir chos gos la bdug spos kyis bdug pa de nyid bya'o/ /sangs rgyas bcom ldan 'das la phreng ba dang /spos nyug pa dang / rgyan dang kha dog la sogs pa dri ma zhim po'i rdzas kyis nyug par bya'o/ /gal te dge bsnyen dad pa can gyis dri chu dang khrus byed na bkru bar byas te/ de'i bsod nams spel bar bya ba'i phyir ro/ /ut+pal sngon po la sogs pa'i me tog rnyed par gyur na bsnam par bya ste//slob dpon dang / /mkhan po dang / /dge slong dang / /'jig rten pa'i mdun du ni ma yin no/ /gang gi phyir dri zhim po thams cad ni mig dang rjes su mthun pa yin no/ /so phag dag gis rkang pa dag ma gtogs pa'i lus la yongs su khrud par mi bya'o//gal te dad pa can dag gis lag pa rkang pa dag la dri zhim pos 'byug par byed na de'i mdun du dor bar mi bya'o/ /de bzhin gshegs pa dang / nyan thos kyi sku gzugs dang / mchod rten dag la rjes su byug par bya'o/ /gal te dekhyod 'di ltar longs spyod par mdzod cig ces zer na de'i phyir dge bsnyen gyi tshig las longs spyod par bya'o//nad pa la sman pa'i tshig gis dri zhim po 'byug pa dang / dri'i chus khrus byed na nad pa la nyes pa med do/ /dge tshul gyi bslab pa'i gzhi'i mdo las phreng ba dang spos nyug pa dang / rgyan dang kha dog 'chang ba spong ba zhes bya ba'i bslab pa'i gzhi bdun pa'o// //mal mthon po dang / mal chen po spong ba zhes bya ba la mal mthon po ni gang zhig /stan la 'dug pa'i rkang pa sa la ma reg pa yin la/ mal chen po ni dngul dang gser dang mu tig la sogs pa rnams las byas pa yin te/de la nyal ba dang 'dug par mi bya'o/ /dngul dang gser dang nor bu dang mu tig la sogs pa rnams las byas pa'i seng ge'i khri la mi rtag pa'i 'du shes kyis 'dug la chos nyan pa sbyin par bya ste/ dam pa'i chos mchod pa'i phyir ro/ /stan mthon po bkra ba'am nye bar bkra ba la 'dug ste chos mnyan pa sbyin par bya'o//ma gsol bar chos nye bar bstan par mi bya'o/ /bkra ba dang nye bar bkra ba'i stan la thun mong gi gnas skabs su 'dug par mi bya'o/ /gal te dad pa can gyis khyim gyi nang du nye bar mgron du bos pa der dngul dang gser la sogs pa rnams las byas pa'i stan bstabs par gyur na/de la mi rtag pa'i 'du shes kyis 'dug par bya ba dang / dad pa can rnams la chos sbyin zhing longs spyad par bya ba'i yang phyir ro/ /g.yogs ma med par dge 'dun nam gang zag gi mal cha dang stan la sogs pa longs spyad par mi bya'o//ko lpags kyi rang bzhin nam/ ko lpags dang brtags pa'i stan la 'dug par mi bya ba dang / nyal bar yang mi bya/ khyim pa'i khyim gyi nang du stan med na 'dug pa la nyes pa med do/ /gtsug lag khang gi nang du shing gi rang bzhin gyi lham bgo bar mi bya'o/ /gci ba'i khang pa'am/bshang ba'i khang pa'am/ khyim kyi nang du ni dor bar mi bya'o/ /rjes su ma gnang bar stan la 'dug par mi bya'o/ /mdze can gyis kyang ma yin te/ dge 'dun gyi khri dang mal cha dang stan la sogs pa yang spang bar bya'o/ /gtsug lag khang gi phyi rol du 'di'i gnas khang bya'o//nad pa'am rgan po dag gis ni khyogs la 'gro bar bya'i/ thun mong gi gnas skabs su ni glang po che dang / rta dang / shing rta'i bzhon pas 'gro bar mi bya'o/ /dge tshul gyi bslab pa'i gzhi'i mdo las mal mthon po dang mal chen po spong ba zhes bya ba'i bslab pa'i gzhi brgyad pa'o// //dus ma yin pa'i kha zas spong ba zhes bya ba ni dus ma yin par za bar mi byed pa ste/ ji srid skya rengs sngon po shar nas rang gi nyi ma phyed kyi bar de srid du dus yin la/ de las gzhan pa ni dus ma yin pa'o/ /nang par langs nas gdong bkru bar bya'o/ /dus las yol ba na lo ma dang 'bras bu la sogs pa longs spyad par mi bya zhing /zang zing yongs su ma dag pa cung zad kyang spyad par mi bya'o/ /rgun 'brum la sogs pa'i btung ba myos par mi 'gyur ba dang / tsang shu dag ras kyis btsags la zang zing med par byas nas/ dus ma yin par btung bar bya'o//skom par gyur na bu ram dang lhan cig pa dang sbrang rtsi dang lhan cig pa'i chu yongasasu btsags te dus ma yin par btung bar bya'o/ /ya rabs rnams kyis gnang ba'i nya dang sha gang yin pa da ni gzhi gsum gyis yongs su dag pa na longs spyad par bya'o/ /ro la sogs pa la sred par mi bya'o//shan pa las khyim pa dad pa can gyis nyos la bza' bar bya'o/ /sha rjen pa mi za'o/ /nad pa la dus ma yin par za ba la nyes pa med do/ /nad pa nyid ni nus pa med pa nyid mthar thug pa yin no/ /zang zing dang bcas pa'i chu la sogs pa btung bar mi bya'o//dge tshul gyi bslab pa'i gzhi'i mdo las dus ma yin pa'i zas spong ba zhes bya ba'i bslab pa'i gzhi dgu pa'o// //gser dngul len pa spong ba zhes bya ba ni sa le sbram dang dngul bdag gir byed pa mi rung ba yin gyi/ len pa ni rung ba yin no/ /'ga' zhig gser dang dngul la sogs pa yon gyi ched du 'bul bar byed na/de la 'di skad du nga'i chos gos dang bza' ba nyos la byin cig ces brjod par bya'o/ /yang na 'dis bdag gis chos gos dang bza' ba la sogs pa nyo bar bya'o snyam pa 'di lta bu'i sems kyis blang bar bya ba'am/ sbyin bdag spro bar bya ste blang bar bya'o//glang po che dang / rta dang / ba lang dang / khyi dang / phag dang / bud med dang / /skyes pa dang / khye'u dang / bu mo dang / bran pho dang / bran mo dang / las byed pa dang / zho shas 'tsho ba la sogs pa'i yon ni blang bar mi bya'o/ /log par 'tsho bas rnyed pa bsgrub par mi bya'o//tshul 'chos dang / kha gsag dang / gzhogs slong dang / thob kyis 'jal ba dang / rnyed pas rnyed par byed 'dod pa mi bya'o/ /dge tshul gyi bslab pa'i gzhi'i mdo las gser dngul len pa spong ba zhes bya ba'i bslab pa'i gzhi bcu pa'o// //khyim pa'i rtags spong ba zhes bya ba ni ji ltar khyim bdag gos gyon pa de ltar gos gyon par mi byed pa dang /nyin par phyi rol nas gos dkar po dang / kha tshar ring po can gyon par mi byed pa'o/ /tshon rtsi gsum po dag gis kha bsgyur bar byas nas 'chang du rung ste/ tshon rtsi gsum ni ngur smrig dang / ni li ka dang /dmar po dag yin no/ /tshon chen po brgyad po dag ni mi rung ste/ mtshal dang / rgya skyegs dang / btsod dang / gur gum dang / mthing shing dang / li khri dang / rma shing dang / le brgan zhes bya ba ni tshon chen po dag yin no/ /chos gos thams cad ni sngon po'i kha dog can du bgo bar mi bya'o//khra bo nye bar bkra ba'i gdugs she bcang bar mi bya'o/ /ste'u'i so ci lta ba de bzhin du sen mo gcad par bya'o/ /dgon par gnas pas ni skra sor gnyis las lhag par gzhag phye par mi bya'o/ /grong mtha' bas ni de las dman pa'o/ /gri gu dang chan pas skra breg par mi bya'o//byin pa dang / mchan khung dang / rked pa dang / smin ma breg par mi bya'o/ /skra bregs pa'i rjes la khrus bya'o/ /tshogs pa med na yan lag lnga bkru bar bya'o/ /phyogs gang du skra bregs pa'i phyogs der chag chag gdab par bya zhing skyang nul bya'o/ /rnga'i rnam pa lta bu'am mdung rtse'i rnam pa lta bu'i dkyil 'khor bya'o//mig la dud pa byug par mi bya'o/ /gal te mig na ba yin na nyes pa med do/ /me long la gdong blta bar mi bya'o/ /skyo ba bskyed pa'i ched du ni nyes pa med do/ /khur lci ba mi bskur zhing / phrag pa dang / rked pa dang / mgo bo rnams kyis bsdus khur bu ma yin no/ /chu'i phyogs su rtsa bar zhwa gzung bar bya'o/ /smad sham thabs kun nas zlum por bgo bar bya zhing / stod du kun nas chos gos kyang ngo / /bya ba byed pa'i tshe chos gos kyi mtha' mar mdud pa bcings la las bya'o/ /rnam pa thams cad du khyim pa'i rtags kun tu spyad par mi bya'o//dge tshul gyi bslab pa'i gzhi'i mdo las khyim pa'i rtags spong ba zhes bya ba rdzogs so// //rab tu byung ba'i rtags yang dag par len pa zhes bya ba ni re zhig rim gyis brjod par bya ste/ mkhan po dang slob dpon dag la nye bar ldang bar bya'o//je dang por bshang ba dang gci ba'i khang par 'gro bar bya ste/ chos gos brdzes la se gol byas nas 'chag pa'i khang par 'jug par bya'o/ /bshang ba dang gci ba byas nas mchan khung du bum pa bzung ste lag pa g.yon pas bshang ba'i lam dang por sa 'jam po'am bong bas phyi bar bya'o//de nas sa phung gsum po dag gis bshang ba'i lam dag par byas nas phyir byung ste/ rjes su mthun pa'i gnas su sa phung bdun so sor gzhag par bya'o/ /de nas gzhan sa phung bdun po dag gis lag pa g.yon pa dag par bya'o/ / de nas lag pa gnyis sa phung de rnams kyis dag par bya'o/ /sa blangs nas sen mo'i dri ma bsal bar bya'o/ /sa blangs nas lag ngar dag par bkru bar bya'o/ /bum pa ni sa phung gcig gis dag par bya'o/ /byin pa dag dang rkang pa dag bkru bar bya'o/ /rab tu dben pa'i phyogs su bshang gci bya'o//de dag dang nye bar gtam sna tshogs mi bya/ yun ring du gnas par yang mi bya'o/ /kha don dang btso blag la sogs pa yang der mi bya'o/ /de las dal bus 'ongs nas/ dal bu dal bus sgo gtan phye ste/ gnas khang du 'jug par bya zhing sgo skyes la ma brjed par bya'o//rung ba'i chu'i lag pa dag mkhrig ma'i bar du bkru ba'am phyi ba bya'i/ rdul lam sas ni ma yin no/ /ril ba spyi blugs thogs te rab tu dben pa'i phyogs su song nas so shing dor bar bya'o/ /so shing ni rnam pa gsum ste/ chen po dang / 'bring dang / chung ngu dang / chen po ni sor bcu gnyis pa'o/ /chung ngu ni sor brgyad pa'o/ /'bring ni de dag las bar pa'o/ /de rnams las gzhan gang yang rung bas dor bar bya'i shin tu rtsub pa dang phra ba dag gis dang yun ring du yang ma yin no/ /de rnam pa gnyis su bkas te phan tshun 'brud pa la dal bus lce bzhar bar bya'o//chus bkru ba'am rdul lam/ so la brud par bya'o/ /de bzhin gshegs pa'am/ mchod rten nam/ slob dpon nam/ mkhan po'i mdun du so shing dor bar mi bya'o/ /dge slong mchog tu gnas brtan rnams kyi drung du ma yin no/ /nye bar longs spyod pa'i gnas su ma yin no//'chag sa dang nye bar ma yin mod kyi 'on kyang rab tu dben par bya'o/ /kha gdong bkrus nas de ma thag pa nyid du bcom ldan 'das la phyag 'tshal lo/ /de gal te mkhan po la phyag byed na mkhan pos gdong bkru ba dang so shing dor bar byas nas/ de'i phyir dgongs su gsol zhes bya bas phyag byas nas gus pa dang bcas pas bsgul la mnyam mam dri ba dang /kun tu dri bar bya'o/ /mkhan po dgongs su gsol/ chag chag dang / phyag dar dang / skyang nul dang / klog pa dang / kha don dang / kun tu spyod pa dag bgyid ces zhu bar bya'o//brtsam pa'i bya ba thams cad kun tu dri bar bya'o/ /kun tu zhus te de bzhin gshegs pa la dkyil 'khor bya ba dang / chag chag dang / phyag dar dang / skyang nul dang / bstod pa mngon par brjod pa dag bya ba dang / de bzhin gshegs pa la bskor ba bya ba dang / yan lag lngas dge slong rnams la phyag dag bya'o//tshul khrims 'chal pa la yan lag lngas phyag mi bya'o/ /nang dang bcas pa la'ang phyag mi bya'o/ /gnyis po dag dang lhan cig stan gcig la 'dug par mi bya'o/ /de'i rjes la nyi ma shar ba na chu brtag par bya'o/ /mkhan po la kun tu zhus te mdun du 'gro ba gus par bya'o//ma zhus par mtshams kyi nang du mchod rten la phyag byed pa dang / chu btung ba dang / so shing dor ba dang / bshang gci dag bya'o/ /ma zhus par ni tha na khab mig tu skud pa gzhug par yang mi bya'o/ /mkhan po gnas pa med na gnas kyi slob dpon la zhu bar bya'o//gnas kyi slob dpon gnas par ma gyur na dge slong 'grogs bshes la kun tu zhu bar bya'o/ /ma zhus par gnas par mi bya'o/ /gnas med par ljongs rgyu zhing 'gro bar mi bya'o/ /tshul khrims 'chal ba dang / nang dang bcas pa dang / lhan cig gang du'ang 'gro bar mi bya'o//dran pa dang shes bzhin dang ldan pa dang / gnya' shing gang tsam blta ba dang / phyogs su mi blta ba dang / zhi ba'i spyod lam dang / gtam sna tshogs mi byed pa dang / chos kyi gtam smra ba'am/ 'phags pa'i mi smra ba nyid kyis 'gro bar bya'o/ / gal te mchod ston gyi dus su dge 'dun gyi nang du 'jug pa na chos gos kyi mtha' mar sgro gu bcings nas lag pa gnyis bkrus te/ rkang pa dag bkrus nas gus pa dang bcas pas dge 'dun gyi nang du 'jug par byas la/ gral rims ji lta ba bzhin du 'dug ste/ dran pa dang shes bzhin dang ldan pas longs spyad par bya'o/ /skad gsang mthon pos brim par bya ba 'brim du mi gzhug go/ /byin cig byin cig ces brjod par mi bya mod kyi 'on kyang brims shig ces so/ /bsod snyoms la yongs su longs spyod pa ni rgyags pa'i phyir ma yin/ sgeg pa'i phyir ma yin/brgyan pa'i phyir yang ma yin mod kyi 'on kyang ji srid kho nar lus 'di gnas par bya ba'i phyir dang /tshangs par spyod pa rjes su gzung bar bya snyam pa de lta bu'i sems kyis longs spyad par bya'o/ /bca' ba dang bza' ba la sogs pa gya nom pa rnyed na de mkhan po dang slob dpon dag la bstabs par bya'o//de dag gis kyang tshod rig par bya ba yin no/ /kha kham dang bcas pas smra bar mi bya'o/ /kham chung ba'am/ che ba gzhug par mi bya/ mgron du ma bos pa'i zas mi bza'/ skog pa bza' bar mi bya'o/ /nad pas ni sman pas lung phog na bza' bar bya'o/ / ji srid du dri dang ma bral ba de srid du dben pa'i phyogs su gnas par bya'o/ /dge 'dun gyi nang du mchil lham bgos nas 'jug par mi bya'o/ /zas kyi tshod rig par bya ba yin no/ /bya rog rnams kyis lhag mar byas pa gang yin pa de ni mchus sleb tshad bor nas bza' bar bya'o/ /ched du mi bya bar zas kyi chang pa gzhag par bya'o//snod dam tshogs pa med na pha ma dang nye du rnams sam/ 'grogs bshes dang / tshul khrims dang ldan pa'i dge tshul dang lhan cig dben pa'i phyogs su bza' bar bya'o/ /tshul khrims 'chal pa dang / lhan cig bza' bar ni mi bya'o//zang zing med pa'i chu dang / lce bzhar dang / so shing dag gis kha zang zing med par bya'o/ /de nas mkhan po la yan lag lngas phyag byas nas kun du zhu bar bya'o/ /mkhan po dgongs su gsol/ klog pa dang / kha don dang / kun du spyod pa dag spyad par zhu'o zhes zhus nas klog pa dang kha ton la sogs pa bya'o//zan zos pa'i de ma thag nyid du sbyin bdag gi yon bshad par bya'o/ /sgra brda byas nas mchil ma la sogs pa dor bar bya'o/ /dge 'dun gyi rtsig pa'am/ ka ba'am khang pa'am/ rjes su mthun pa'i gnas pa gzhan du ni ma yin no/ /sham thabs kyi mtha' ma gnyis dang dbus su bzung nas ya gad la sogs pa la 'dzegs pa dang thur du 'bab pa dang /nyin par gnyid log par bya'o/ /slob dpon dang mkhan bo dag gi thad du ma dang pha'i 'du shes nye bar gzhag par bya'o/ /de dag la yang rkang pa dag bkru ba la sogs pas bsten bkur bya'o//de dag gis kyang de'i steng du bu lta bu'i 'du shes nye bar gzhag par bya'o/ /de dag la yang ston pa bzhin du gus pas bsnyen bkur bya'o/ /mchog tu tshul khrims 'chal pa yin na yang slob dpon dang mkhan po dang ma dang pha dang nad pa dag la bsnyen bkur bya'o/ /slob dpon dang mkhan po la sogs pa rnams la mun khung du phyag mi bya/nad pa rnams la ma yin/ gos gcig pa rnams la ma yin/ khyim gyi nang du gnas pa rnams la ma yin/ zas za ba rnams la ma yin/ kha zang zing dang bcas pa rnams la ma yin/ bshang ba dang gci ba'i khang pa'i steng du gnas pa rnams la ma yin/bya ba gzhan la sems g.yengs pa rnams la phyag mi bya'o/ /rang nyid de lta bur gyur pas kyang phyag mi bya'o/ /phyag byed par 'dod pas dgongs su gsol zhes brjod par bya'o/ /cang mi smra bar byed na phyag dag bya'o/ /yang ma byed cig ces zer na mi bya'o//slob dpon dang mkhan po dang tshangs pa mtshungs par spyod pa rnams mthong nas de ma thag pa nyid du stan spang bar bya'o/ /phyag ni rnam pa gnyis te/ sgyid pa nas bzung ba dang / yan lag lngas so/ /gal te bdag nyid skra bregs par gyur na slob dpon dang mkhan po la sogs pa dang /bcom ldan 'das la yan lag lngas phyag bya'o/ /slob dpon dang mkhan po la sogs pa rnams kyi skra bregs par gyur na yan lag lngas phyag bya'o/ /gsar bu dang khyim pa dag gis gal te phyag byas par gyur na a rog gya zhes brjod par bya'o/ / khyim pa la phyag mi bya/ lha gzhan dag la phyag mi bya'o/ /lam du 'gro ba'i tshe lha gzhan gyi rten mthong na bde bar gshegs pa'i tshigs su bcad pa gdon par bya'o/ /khron pa la sogs pa rnams nas chu blangs nas sbyin pa dang ldan pa'i tshigs su bcad pa gdon par bya'o//shing ljon pa'i rtsa ba dang / lha khang la sogs pa rnams su gnas pa na rgyun chags gsum pa brjod par bya'o/ /rgyun chags gsum pa ni/ dkon mchog gsum la phyag 'tshal ba dang / bsod nams yongs su bsngo ba dang / nges par bya ba dag yin no/ /lag pa dag dang rkang pa dag bkrus nas chos gos rnams sbrugs la mchil lham dag phyis te zhi ba'i spyod lam gyis gtsug lag khang du 'jug par bya'o//de glal bar gyur na lag pa'am gzhan gos kyis kha dgab par bya'o/ /mchod rten gyi grib ma'am bde bar gshegs pa'i sku gzugs kyi grib ma mthong nas gtsug lag khang gi tshigs su bcad pa brjod la 'gom par bya'o//'thab par byed pa'am/ 'thab tu gzhug pa'am/ blta bar yang mi bya'o/ /rgyan po byed pa mi bya'o/ /gang du cho lo byed pa der 'dug par mi bya'o/ /dpang po byed pa der 'dug par mi bya'o/ /gnya' bo mi bya'o//chos zong du mi bya'o/ /bsod nams kyi blos las bya'i gla rngan gyis ni ma yin no/ /dad pas sbyin par bya ba dge 'dun nam gang zag las byung ba yongs su longs spyad nas snyom las kyis dus 'da' bar mi bya'o/ /'on kyang klog pa dang kha ton dag gis so/ /rgod pa med pa dang rnam par g.yengs pa med par bya'o//gnas brtan rnams dang bar ma rnams dang / gsar bu rnams la gus pa dang bcas pa dang / zhe sa dang bcas par bya'o/ /mu cor ma yin pa dang / rnam par g.yengs pa'i tshig ma yin par bya'o/ /ngo tsha dang ldan par bya zhing dbang po'i sgo bsdam par bya'o//gsong por smra ba dang / dga' ba'i gtam dang / kye tshur shog 'ongs pa legs so zhes smra ba dang / khro gnyer med pa dang / 'dzum pa sngon du 'gro bar bya'o/ /dus su mkhan po la kun tu dri bar bya ste/ mkhan po dgongs su gsol/ kun tu dri ba ni bdag klog pa dang /kha ton dang / kun tu spyod pa dag bgyid cing / mtshan mo'i thun dang po dang / mtshan mo'i thun tha ma la mi nyal bar sbyor ba la rjes su brtson par bgyid do zhes kun tu dri bar bya'o/ /kun tu dris nas kyang klog pa dang / kha ton la sogs pa dag bya zhing mtshan mo'i thun dang bo dang / mtshan mo'i thun tha ma la mi nyal bar sbyor ba'i rjes su brtson pa nyid du bya'o/ /dus su spyad par bya'i dus ma yin par spyad par mi bya'o/ /'dug pa la mkhas pa dang / nyal ba la mkhas par bya'o/ /'dug pa dang nyal ba la so sor brtag par bya'o/ /shin tu khyad par can dang / shin tu dman pa'i gos bgo bar mi bya'o//lhag par chags pa med pa'am/ mgo lhag par g.yogs pa med par bya ba'am/ rkang pa'i steng du rkang pa mi gzhag pa'am/ kun nas g.yogs par mi bya ba'am/ de bzhin gshegs pa'am/ slob dpon nam mkhan po'am gnas pa rnams sam/dge slong rnams kyi mdun du 'dug par mi bya'o/ /de dag gi mdun du bcag par yang mi bya ba nyid do/ /'dug pa la 'greng ste chos bshad par mi bya/ nyal ba la 'dug pas ma yin/ stan ches mtho bar 'dug pa la stan ches dma' bar 'dug pas ma yin/ mgo zhwa can dang /cod pan can la ma yin/ glang po che la zhon pa dang / rta dang shing rta dang khyogs na 'dug pa'am/ mchil lham can la ma yin no/ /lhung bzed gnyis bcang bar bya ste/ sa dang lcags kyi rang bzhin no/ /go bar bya ba'i phyir dang / khyi rnams bskrad par bya ba'i phyir khar sil sgra dang ldan pa bcang bar bya'o//rgan po la ni gnas brtan nam/ btsun pa'i tshig gis brjod par bya'o/ /bar ma la ni gnas brtan gyi tshig gis so/ /gsar bu la ni tshe dang ldan pa'i tshig gis so/ /slob dpon dang mkhan po dang gnas brtan rnams la ni tshe dang ldan pa'i tshig gis kun tu brjod par mi bya'o//gzhan dag la slob dbon dang mkhan po dag gi ming gis brjod par mi bya'o/ /dbyar rnams las snga ma'am phyi ma dag tu dbyar nye bar khas blang bar bya'o/ /snga ma ni ji srid dbyar zla tha chungs kyi zla ba'i tshes gcig nas/ ston zla 'bring po'i tshes bco lnga'i dgag dbye'i bar de srid du dbyar 'dral bar mi bya'o//phyi ma ni ji srid ston zla ra ba'i tshes gcig nas ston zla tha chungs kyi bla ba yar gyi ngo'i tshes bco lnga'i bar de srid du dbyar 'dral bar mi bya'o/ /de ltar yang dbyar nye bar khas blang bar bya ste/ mkhan po'am/ slob dbon nam/ dge slong gzhan dag gi mdun du tsog pus 'dug ste/ thal mo sbyar ba byas nas tshig 'di skad ces brjod par bya'o/ /mkhan po dgongs su gsol/ deng dge 'dun gyi dbyar zla 'bring po nye bar bsgrub pa'i dus yin la/ bdag dge tshul ming 'di zhes bgyi ba'i yang dbyar zla 'bring po dbyar nye bar bsgrub pa'i dus yin te/bdag dge tshul ming 'di zhes bgyi ba mtshams kyi nang dang bcas pa'i gnas 'dir ji srid du 'di lta ste/ gnas ral ba dang / 'drums pa bcos pa'i slad du sbyin bdag che ge mo zhes bgyi ba dang / zhal ta byed pa che ge mo zhes bgyi ba dang / nad g.yog byed pa che ge mo zhes bgyi ba dang /spyod yul gyi grong khyer che ge mo zhes bgyi bas dbyar zla ba gsum nye bar khas blang bar bgyi ste/ bdag dbyar 'di nas mchis shing bdag gi dbyar gyi gnas ni 'di lags so/ /de bzhin du lan gnyis lan gsum du'o/ /thabs yin no/ /legs so/ / dbyar nye bar khas blangs nas gal te gzhan gang yang rung ba zhig tu 'gro ba na chos kyi don du zhag bdun byin gyis brlab par bya'o/ /mkhan po'am/ slob dpon nam dge slong gzhan gang yang rung ba'i mdun du phyag 'tshal nas tsog pus 'dug ste 'di skad brjod par bya'o/ /mkhan po dgongs su gsol/bdag dge tshul ming 'di zhes bgyi ba mtshams kyi nang dang bcas pa'i gnas 'dir dbyar snga ma zla ba gsum gnas par khas blangs pa las bdag dge tshul ming 'di zhes bgyi ba chos dang ldan pa'i bgyi ba nyid kyis zhag bdun mtshams kyi slad rol du mchi ba dang de tshun chad kyis slar mchi bar byin gyis brlab bo//bdag dbyar 'di nas mchis shing bdag gi dbyar gyi gnas 'di lags so/ /de bzhin du lan gnyis lan gsum mo/ /thabs yin no/ /legs so/ /byin gyis brlabs nas 'gro ba na zhag bdun nas slar ldog par bya zhing de bzhin du lan gnyis dbyar 'dral bar mi bya'o//srog gi bar chad dang / tshangs par spyod pa'i bar chad dang / bsod snyoms chad par gyur na dbyar ral ba la nyes pa med do/ /de ji lta ba bzhin du dbyar phyi ma khas len pa dang / khas blangs pa byin gyis brlabs pa dag ci rigs par brjod par bya'o/ /de nas dgag dbye'i nyin mo dgag dbye bya'o//'di ltar dgag dbye bya ste/ mkhan po'am slob dpon nam gzhan gang yang rung ba'i mdun du tsog pus 'dug pa nyid kyis lag pas rtswa drur ba la bzung ste/ thal mo sbyar ba byas nas 'di skad ces brjod par bya'o/ /mkhan po dgongs su gsol/ deng dge 'dun gyi dgag dbye bco lnga pa lags la/ bdag dge tshul ming 'di zhes bgyi ba'i yang dgag dbye bco lnga pa lags te/ bdag dge tshul ming 'di zhes bgyi bas tshul khrims kyi phung po yongs su rdzogs par bya ba'i phyir dge 'dun ma tshogs pas deng de srid tshun chad mkhan po'i mdun du dgag dbye byin gyis brlab bo//gang gi tshe yang dge 'dun tshogs pa rnyed pa de'i tshe dge 'dun tshogs pa dang lhan cig dgag dbye bgyi'o/ /de bzhin du lan gnyis lan gsum du'o/ /thabs yin no/ /legs so/ /cung zad sdig pa'i las byas pa gang yin pa de ni mkhan po'am slob dpon nam gzhan dge slong gang yang rung ba'i mdun du tsog tsog por 'dug ste/thal mo sbyar la so sor bshags par bya'o/ /mkhan po dgongs su gsol/ bdag dge tshul ming 'di zhes bgyi ba la dus 'di'i nang du lus dang ngag las byung ba'i nyes byas kyi ltung ba dpag tu ma mchis pa byung ba gang yin pa de bdag dge tshul ming 'di zhes bgyi bas/nyes byas kyi ltung ba dpag tu ma mchis pa de 'di nyid du mthol rab tu ston to/ /'chags so/ /rnam par smad do/ /mi 'chab bo/ /mthol zhing bshags na bdag dge tshul ming 'di zhes bgyi ba la nyes byas kyi ltung ba dpag tu ma mchis pa rnams spangs na bdag bde ba la reg par gnas par 'gyur gyi/ma mthol ma bshags na ni mi 'gyur ro/ /ltung bar mthong ngam/ mthong ngo / /phyin chad sdom mam/ sdom mo/ /legs par shin tu sdom par byed dam/ slan chad de ltar mi bgyid do //de bzhin du lan gnyis lan gsum du'o/ /thabs yin no/ /legs so/ /bshags nas slar mi byed cing de ltar bshags na bdag bde ba la reg par gnas par 'gyur ro/ /bshags pa byas nas kyang gso sbyong bya'o/ /'di ltar bya ste mkhan po'am slob dpon nam gzhan dge slong gang yang rung ba la phyag byas nas mdun du tsog tsog por 'dug ste/thal mo sbyar ba byas nas 'di skad ces brjod par bya ste/ mkhan po dgongs su gsol/ dge 'dun gyi gso sbyong bcu bzhi pa'am/ bco lnga pa lags te/ bdag dge tshul ming 'di zhes bgyi ba'i tshul khrims kyi phung po yongs su rdzogs par bgyi ba'i slad du ltung ba byin gyis brlabs shing bshags te/bar chad kyi chos rnams yongs su dag go zhes bdag nyid mchi'o/ /de bzhin du lan gnyis lan gsum du'o/ /thabs yin no/ /legs so/ /thams cad du bslab pa la gus par bya'o//yongs su dag par yang tshul khrims yongs su bsrungs pa las rnyed pa 'thob pa dang / mtho ris la sogs pa mtho ba dang / legs par tshangs par spyod pa dang bcas pas rang gi yon tan grags pa yin no/ /bcom ldan 'das kyis kyang / grags dang rnyed pa 'thob pa dang //pha rol du ni mtho ris dag /bde ba gsum po don gnyer bas/ /shes bzhin du ni tshul khrimasabasten/ /zhes gsungs so/ /yang / gnas rnams 'di dag mthong ba yis/ /mkhas pa tshul khrims la brten pa/ /'phags pa'i mthong ba thob pa ste/ /'jig rten du ni zhi ba 'thob//ces gsungs so/ /me tog dri ni rdzi phyogs min mi 'gro/ /rtswa'am rgya spos tsan+dan yang ma yin/ /mkhas rnams dri ni rdzi phyogs mi 'gro ste/ /skyes bu dam pas phyogs rnams kun tu 'gro/ /rgya spos dang ni tsan+dan nyid/ /dbyar gyi dus kyi ut+pal bcas/ /dri yi rnam pa de dag las/ / tshul khrims dri ni bla na med/ /tshul khrims rnam par ma dag pas/ /dmyal ba'i sdug bsngal chen po yin/ /'di lta ste mig dbyung ba dang / shing bzhin du gshags pa dang / 'bras bu bzhin du btsos pa dang / bu ram shing bzhin btsir ba dang / gtun gyis phye mar 'thag pa dang / lag pa dang / rkang pa dang / lce gcod pa dang / zangs bskol ba 'thung ba dang / lcags kyi thu lum 'bar ba za ba dang / thal tshan gyi chu bo las rgal ba dang / lcags kyi shal ma ri'i sdong po la 'dzeg pa dang / lcags kyi bum pa'i nang du 'jug pa dang / mche ba rnon po can gyi khyis za ba dang /ral gyi lo ma'i nags tshal la 'dzeg pa ste/ de lta bu la sogs pa dang / rnam pa du mas dmyal ba rnams su sreg pa dang / 'tshe ba dang /rdung ba la sogs pa'i sdug bsngal rnams te/ lha'i pho nya'i mdo dang / stobs la mkhas pa'i mdo las blta bar bya'o/ /yi dgas rnams kyang bkres pa dang /skom pa dang / gnod pa'i sdug bsngal rnams dang / dud 'gro gcig la gcig za ba'i 'jigs pa la sogs pa'i sdug bsngal rnams te/ tshul khrims yongs su ma dag pa la nyes dmigs de lta bu dang gzhan yang yin no/ /ji ltar dge slong rnams chos bzhi dang ldan pas dge slong ma yin par gyur pa de bzhin du dge tshul yang dge tshul ma yin par 'gyur ba yin no//de lta bas na srog la bab kyang yongs su dag par tshul khrims bsrung bar bya'o/ /dge tshul kyi bslab pa'i gzhi'i mdo las rab tu byung ba'i rtags yang dag par blang ba rdzogs so// //dge tshul rnams kyi bslab pa'i gzhi/ /yang dag bsdus pa byas pa las /bsod nams byung ba gang bsags pas/ /skye bo dge ba'i skal ldan shog/ //mdo sde 'dzin pa'i slob dpon ka l+y+nya Na mi tras mdzad pa/ dge tshul gyi bslab pa'i gzhi'i mdo rdzogs so// // kha che'i mkhan po grong khyer dpe med kyi paN+Di ta ma hA dza na dang / shAkya'i dge slong gzhon nu mchog gis bsgyur cing zhus te gtan la phab pa las/ slad kyis kha che'i paN+Di ta pa ra he ta dang / lo tsA ba shAkya'i dge slong gzhon nu mchog gis bcos shing zhus pa'o// //