CLOSE WINDOW

D4128
བོད་ཡིག

#/ /thams cad mkhyen pa la phyag 'tshal lo/ /dge sbyong gi kA ri kA lnga bcu pa'i tshig gi brjed byang du byas pa/ dper na sa gzhi la sa bon btab nas sa bon la brten nas myu gu/ myu gu la brten nas 'dab ma/ 'dab ma la brten nas sdong bu/ sdong bu la brten nas me tog /me tog la brten nas 'bras bu 'byung ba de bzhin du/ tshul khrims sa gzhi dang 'dra ba la brten nas myu gu la sogs pa lta bu'i ting nge 'dzin gyi phung po 'byung ngo / /ting nge 'dzin gyi phung po byung nas de'i 'og tu me tog lta bu'i shes rab kyi phung po 'byung ngo / /shes rab kyi phung po byung nas de'i 'og tu rnam par grol ba'i phung po dang /rnam par grol ba'i ye shes mthong ba'i phung po 'bras bu lta bu 'byung ngo / /de bas na dge ba thams cad 'byung ba'i gzhi tshul khrims yin pa'i phyir tshul khrims bsrung ba la nan tan bya'o/ /dge sbyong gi bslab tshig lnga bcu pa 'di mgo mjug tu bsdu na don rnam pa brgyad kyis 'chad de/gang zhe na/ bstod cing phyag 'tshal ba bstan pa dang / bslab pa nyams su blang ba dang / snga dro'i dus na las gang bya ba dang / zas kyi bya ba byas pa'i 'og tu las gang bya ba dang / phas pham pa'i gnas dang / bslab pa phra mo'i gnas dang /phyi dro phan chad ji ltar bya ba dang / brgyad pa 'bras bu ji ltar bya ba bzhin du bstan pa'o/ /de la mgon po zhes bya ba nas brtsams te/ mdo tsam nges par bshad par bya/ /zhes bya ba yan chad kyis rang gi lha la bstod cing phyag 'tshal ba bstan to/ /shAkya seng ge zhes bya ba nas brtsams te/bdag gi lus bzhin bslab pa bsrung / /zhes bya ba yan chad kyis bslab pa nyams su blang ba bstan to/ /nam gyi cha smad ces bya ba nas brtsams te/ sbyin pa'i tshigs bcad gnyis shig brjod/ /ces bya ba yan chad kyis snga dro'i dus na las gang bya ba bstan to//man ngag yod na bsam gtan bya / /zhes bya ba nas brtsams te/ bsgrub pa la ni brtson par bya/ /zhes bya ba yan chad kyis dge ba bya ba bstan to/ /brtul zhugs gnas sems zhes bya ba nas brtsams te/ ngag rnams shin tu bsdam par bya//zhes pa yan chad kyis phas pham pa'i gnas bstan to/ /'bru btags phabs dang sbyar ba yi/ /zhes bya ba nas bzung nas/ gus bcas zhe sa bcas par bya/ /zhes bya ba yan chad kyis bslab pa phra mo rnams bstan to/ /lag pa dag par bsnyal nas ni/ /zhes bya ba nas brtsams te/ji skad bstan pa bzhin du bya/ /zhes pa yan chad kyis phyi dro phan chad kyi bya ba bstan to/ /ji ltar nyon mongs myur zad nas/ /byang chub dam pa thob par 'gyur/ /de ltar bsgrims dang ldan par bya/ /zhes bya bas ni 'bras bu bstan to/ /de la sangs rgyas kyi slob ma rnams kyi lha ni dkon mchog gsum ste/sangs rgyas dang / chos dang / dge 'dun dang / mgon po thams cad mkhyen zhes bya ba ni sangs rgyas la bstod cing phyag 'tshal ba bstan te/ sangs rgyas la bstod pa yang gzhan gyi don mdzad pa dang / rang gi don phun sum tshogs pa brnyes pa'i sgo nas bstod de /de la mgon po zhes bya bas gzhan gyi don phun sum tshogs par mdzad pa ston te/ sems can ngan song gsum du skyes pa rnams de las thar pa'i skyabs mdzad pa dang / lha dang mir skyes pa skye rga na 'chis gtses pa thams cad kyi skyabs mdzad pas na sangs rgyas la mgon po zhes bya ste/sems can thams cad kyi skyabs dang dpung gnyen du gyur pa yin no zhes bya ba'i don to/ /de la sems can ngan song gsum du skyes pa rnams la ni 'od zer bkye ba dang sprul pa'i sku bstan pa'i sgo nas ngan song las thar par mdzad do/ /lha dang mir skyes pa skye rga na 'chis gtses pa rnams la ni 'phags pa'i bden pa bzhi bshad cing de la bkod nas skye rga na 'chi las thar pa'i sgo nas skyabs mdzad do//thams cad mkhyen zhes bya bas bdag gi don phun sum tshogs pa brnyes pa bstan te/ phung po dang khams dang skye mched dang rten cing 'brel par 'byung ba la sogs pa ji snyed du shes par bya ba'i chos thams cad ma lus par shes shing /de dag kyang mi rtag pa dang sdug bsngal ba dang stong pa dang bdag med pa'i mtshan nyid du phyin ci ma log par shes pas na sangs rgyas bcom ldan 'das la thams cad mkhyen pa zhes bya ste/ 'di dag bdag dang gzhan gyi don phun sum tshogs pa'i sangs rgyas la phyag 'tshal te zhes bya bar sbyar ro//chos zhes bya bas ni chos la bstod cing phyag 'tshal bar bstan te/ de la chos la yang rnam pa gsum mo/ /gang zhe na/ bshad pa'i chos dang / sgrub pa'i chos dang / 'bras bu'i chos so//de la gsung rab yan lag bcu gnyis ni bshad pa'i chos so/ /rang gi la byang chub kyi phyogs kyi chos sum cu rtsa bdun ni sgrub pa'i chos so/ /mya ngan las 'das pa ni 'bras bu'i chos so/ /chos de gsum la phyag 'tshal te zhes bya bar sbyar ro/ /'phags pa'i tshogs la zhes bya bas dge 'dun la bstod pa bstan te/nyon mongs pa dang sdig pa'i chos las ring du spangs pa la ni 'phags pa zhes bya la/ 'phags pa'i gang zag de lta bu mang po la ni 'phags pa'i tshogs zhes bya ste/ de yang mdor na slob pa'i gang zag dang / mi slob pa'i gang zag 'phags pa gnyis yod do//de la slob pa'i gang zag ni bdun yod de/ rgyun du zhugs pa dang / rgyun du zhugs pa'i 'bras bu thob pa dang / lan cig phyir 'ong ba dang / lan cig phyir 'ong ba'i 'bras bu thob pa dang / phyir mi 'ong ba dang / phyir mi 'ong ba'i 'bras bu thob pa dang / dgra bcom pa la 'jug pa dang bdun no//mi slob pa'i gang zag ni dgra bcom pa'i 'bras bu thob pa ste/ de dag la yang phyag 'tshal te zhes bya ba sbyar ro/ /de la phyag 'tshal ba yang rnam pa gsum ste/ lus kyis phyag 'tshal ba dang / dag gis phyag 'tshal ba dang / yid kyis phyag 'tshal ba'o//de la lus kyis phyag 'tshal ba ni/ dpral ba gtugs pa thal mo sbyar ba la sogs pa byed pa'o/ /ngag gis phyag 'tshal ba ni de dag gi yon tan tshig tu rjod par byed pa'o/ /yid kyis phyag 'tshal ba ni de dag la dad pa dang dga' ba dang mos ba'i sems kyis phyag 'tshal ba'o//phyag 'tshal te zhes bya ba ni phyag 'tshal nas zhes bya ba'i don to/ /phyag 'tshal nas ci bya zhe na/ dge tshul gyi ni cho ga rnams/ /mdo tsam nges par bshad par bya/ /zhes bya ba smos te/ dge tshul dge sbyong rnams kyi bslab tshig dang las su bya ba rnams la bya'o//mdo tsam nges par bshad par bya ba ni dge sbyong gi bslab tshig dang las su bya ba rnams ni kA ri kA sum brgya pa dang / 'dul ba 'bum gyi nang nas 'byung bas der brtag par bya'o/ /'dir mdo tsam ste/ mi byar mi gnang ba'i dmigs pa nyi tshe tsam zhes bya ba'i don to/ / rang gi lha la phyag 'tshal ba dang bstod pa'i bshad pa rdzogs so// // bslab pa nyams su blang ba yang tshig rnam pa bzhi zhig gis ston te/ gang zhe na/ chos phun sum tshogs pa dang / gang zag phun sum tshogs pa dang / sgrub pa phun sum tshogs pa dang / ji ltar bsgrub par bya ba'o//shAkya seng ge'i bstan pa la/ /zhes bya bas chos phun sum tshogs pa bstan te/ de la chos phun sum tshogs pa yang tshig rnam pa gnyis so/ /ston pa phun sum tshogs pa dang / bstan pa phun sum tshogs pa'o / /shAkya seng ge zhes bya bas ston pa phun sum tshogs pa bstan te/ston pa ni sangs rgyas bcom ldan 'das so/ /sangs rgyas bcom ldan 'das gsung dbyangs rnam par dag pa dang thugs rnam par dag pas na ston pa phun sum tshogs pa zhes bya ste/ shAkya zhes bya bas gdung rus rnam par dag pa ston te/ spyir mi rnams kyi nang du skyes pa la rigs rnam pa bzhi yod de/dmangs rigs dang / rje'u rigs dang / bram ze'i rigs dang / rgyal rigs so/ /sangs rgyas bcom ldan 'das ni shAkya rnams kyi nang du gau ta ma'i rigs kyi gdung rus dang ldan pas na shAkya zhes bya'o/ /shAkya zhes bya bas ni gdung rus rnam par dag pa ston to//seng ge zhes bya bas thugs rnam par dag pa ston to/ /dper na seng ge ni dpa' bo'i sems dang ldan pas ri dgas rnams kyis mi skrag cing ri dgas rnams seng ges zil gyis gnon pa dang 'dra bar sangs rgyas bcom ldan 'das kyang mi 'jigs pa bzhi brnyes pa'i thugs dang ldan pas bdud dang mu stegs pa ri dgas dang 'dra bas sangs rgyas zil gyis mi non cing skrag par byed mi nus la/sangs rgyas ni bdud dang mu stegs ri dgas dang 'dra ba rnams zil gyis gnon cing skrag par byed pas na sangs rgyas la seng ge zhes bya ste/ de bas na seng ge'i sgras thugs dag pa ston to/bstan pa zhes bya bas bstan pa phun sum tshogs pa ston to/ /slob ma rnams la 'di dag ni bsgrub par bya ba yin/ 'di dag ni spang bar bya ba yin no zhes ston pa'i chos la bstan pa zhes bya ste/ 'dul ba'i sde snod dang / mdo sde'i sde snod dang / mngon pa'i chos kyi sde snod do//de las rab tu byung ba rnams kyis bslab tshig rnam pa gsum ste/ lhag pa tshul khrims kyi bslab pa dang / sems kyi bslab pa dang / shes rab kyi bslab pa'o/ /de 'dul ba'i sde snod kyi nang nas ni lhag pa tshul khrims kyi bslab pa 'byung ngo / /mdo sde'i sde snod las ni lhag pa sems kyi bslab pa 'byung ngo //mngon pa'i chos kyi sde snod nas ni lhag pa shes rab kyi bslab pa 'byung ste/ de ltar sde snod gsum la bstan pa zhes bya'o/ /dad pas rab tu byung nas ni/ /zhes bya bas gang zag phun sum tshogs pa ston te/ gang zag phun sum tshogs pa yang rnam pa gnyis kyis phun sum tshogs so//gang zhe na/ bsam pa phun sum tshogs pa dang / sbyor ba phun sum tshogs pa'o/ /dad pa zhes bya bas bsam pa phun sum tshogs pa bstan te/ las dang 'bras bu la sogs pa ni yod par yid ches pa dang / dkon mchog gsum la ni yon tan phun sum tshogs pa dang ldan par sems pa dang / 'phags pa'i lam ni bsgrub par 'dod pa dang / mya ngan las 'das pa thob par 'dod pa'i sems la ni dang ba zhes bya'o/ /dad pas zhes bya ba ni/ dad pa'i sems kyis rgyur byas nas/ /zhes bya ba'i don to//rab tu byung nas ni zhes bya bas ni sbyor ba phun sum tshogs pa bstan te/ dkon mchog gsum la skyabs su song zhing bslab tshig bcu mnos pa las rab tu byung ba zhes bya'o/ /yang na/ dad pas rab tu byung nas ni/ /zhes bya ba'i tshig 'dis bcom ldan 'das kyis 'dul ba las skra dang kha spu bregs nas gos ngur smrig bgos te dad pas yang dag pa kho nar khyim nas khyim med par rab tu 'byung ngo zhes rab tu byung ba'i mtshan nyid gsungs pa'i don bstan pa yin te/tshig 'dis ni rab tu byung ba rnams kyi phun sum tshogs pa rnam pa bzhi bstan pa yin no//rnam pa bzhi gang zhe na/ tshul khrims phun sum tshogs pa dang / /las phun sum tshogs pa dang / gnas phun sum tshogs pa dag /bsam pa phun sum tshogs pa'o/ /de la skra dang kha spu bregs nas gos ngur smrig bgos te zhes bya bas tshul khrims phun sum tshogs pa bstan te/de tshul de las nyon mongs pa spong ba dang mthun pa'i tshul yin pas khyim na gnas pa'i tshul las 'phags pa yin no/ /dad pas yang dag pa kho nar zhes bya bas bsam pa phun sum tshogs pa bstan te/ bu lon ma 'khor ba dang rgyal po la sogs pa'i 'jigs pas rab tu byung ba ma yin gyi dad pa'i sems kyis rab tu byung ba yin no//rab tu byung zhes bya bas ni las phun sum tshogs pa bstan te/ bya ba mchog tu gyur pa la zhugs pa'i phyir ro/ /khyim nas khyim med par rab tu byung zhes bya bas ni gnas phun sum tshogs pa bstan te/ bu smad dang nye du la sogs pa'i 'jigs pa mi bzad pa'i gnas spangs nas khyim med par shing drung dang brag phug na gnas pas na/gnas phun sum tshogs pa'o/ /rab tu byung nas ni zhes bya bas ni rab tu byung ba'i 'og tu zhes bya ba'i don to/ /brtul zhugs brtan pas rab bsgrims te/ /zhes bya bas sgrub pa phun sum tshogs pa ston te/brtul zhugs zhes bya bas ni rang bzhin gyi kha na ma tho ba dang / bcas pa'i kha na ma tho ba'i bslab pa la bya'o/ /de la rang bzhin gyi kha na ma tho ba'i bslab tshig ni phas pham pa bzhi'o/ /bcas pa'i kha na ma tho ba'i bslab tshig ni chang mi btung ba la sogs pa rnam pa drug go//brtan pas rab bsgrims te zhes bya bas ni lus ngag yid gsum gyis rab tu bsgrims la phas pham pa mi 'byung bar bya ba'i phyir bstan pa ste/ nyes pa phran tshegs kyang mi 'byung bar bsrung ba'o/ /de yang shing chen po bsrung na de la bskor ba'i ra ba dang shing thags rnams ci nas kyang mi gzhig par bya'o//de dang 'dra bar phas pham pa mi 'byung bar bya na ra ba dang shing thags lta bu'i bslab pa phran tshegs rnams ma zhig par bsrungs na tshul khrims brtan par bsrung ba yin no/ /bdag gi lus bzhin bslab pa bsrung / /zhes bya bas ji ltar bsgrub par bstan te/dper na bdag gi lus 'di la dug dang tsher ma dang ngam grog la sogs pas 'chi bar mi 'gyur bar bsrung ba dang / bza' ba dang bgo ba dang sman la sogs pas ci nas kyang mi brnyas par bya ba'i tshul du bsrung ba dang 'dra bar tshul khrims kyang ci nas kyang mi zhig par bsrung ba dang /rnam par dag pa'i tshul du bsrung ba'o/ /bslab pa nyams su blang ba'i bshad pa rdzogs so// // snga dro'i dus na las gang bya ba bstan pa la rnam pa brgyad bya bar bstan te/ kha ton bya ba dang / de bzhin gshegs pa la phyag 'tshal ba dang / mkhan po dang slob dpon la snyun gsol nas las su bya ba zhu ba dang /chu brtag pa dang / mkhan po dang slob dpon gyi las su bya ba bsgrub pa dang / zhu ba dang / zas bza' ba dang / bsod nams bsngo ba dang brgyad bya'o/ /nam gyi cha smad mal nas langs/ /nam langs bar du kha ton bya/ /zhes bya bas kha ton bya ba bstan to//de nam gyi cha smad ni mtshan gcig la thun lngar bgos pa las tho rangs la bya ste/ tho rangs mal nas langs nas ni tsog tsog por 'dug la lha ma srin la chos kyi sbyin pa bya'o snyam du bsams nas lha ma srin rnams la tshigs su bcad pa ster ba la bos te nam langs kyi bar du kha ton ci nus su bya'o//kha ton byas pa'i bsod nams sems can kun gyi don du bsngo ba'o/ /gdong dang so yi dri bkrus nas/ /rdzogs sangs rgyas la gus phyag bya/ /zhes bya bas de bzhin gshegs pa la phyag bya ba bstan te/ langs nas chu dang so shing la sogs pas so dang gdong gi dri ma bkrus nas rdzogs sangs rgyas te sangs rgyas bcom ldan 'das rnams la gus pas phyag bya'o//de la chos thams cad thugs su chud cing yon tan phun sum tshogs pa ma lus par brnyes pas na rdzogs pa zhes bya'o/ /skyes bu gnyid las sangs pa bzhin du ma rig pa spangs nas/ma rig pa'i gnyid las sangs pas na sangs rgyas zhes bya'o/ /gus phyag bya zhes bya bas gus par phyag bya ba la yang rnam pa gsum ste/ lus kyis gus par phyag bya ba dang / ngag gis gus par phyag bya ba dang / yid kyis gus par phyag bya ba'o//de la lus smad lnga sa la gtugs te zhi ba'i tshul gyis phyag bya ba ni lus kyis gus par phyag bya ba'o/ /mi drag mi ngal ba'i dbyangs gyis de bzhin gshegs pa la bstod pa ni ngag gis gus par phyag bya ba'o/ /lus kyis gus par phyag bya ba'i sngon rol du sangs rgyas bcom ldan 'das ni nyes pa thams cad spangs pas yon tan phun sum tshogs pa dang ldan pa thugs rje chen po can zhes sems can thams cad kyi mgon dang skyabs su gyur pa/'gro ba thams cad kyi bsod nams kyi gzhi yin pas phyag bya ba'i gnas yin no snyam du sems pa ni yid kyis gus par phyag bya ba ste/de lta bu'i sems sngar bskyed la de nas gdod lus ngag gis phyag bya bas phyag bya'o/ /bla ma gnas pa'i sgo glegs la/ /lag pas dal gyis brdung bar bya/ /nang zhugs gus par bla ma la/ /khams bde mi bde la sogs dri/ / 'di dag bya zhes dris nas ni/ /dkyil 'khor la sogs rnam bya'i phyir/ /zhes bya bas mkhan po dang slob dpon la snyun gsol nas las su bya ba zhu ba bstan te/ bla ma gnas pa'i sgo glegs la/ /lag pas dal gyis brdung bar bya/ /zhes bya ba la de ltar sangs rgyas la phyag byas pa'i 'og tu bla ma ste mkhan po dang slob dpon gyi gnas su song la sgo 'phar la lag pas dal gyis brdung ba'am/se gol gtogs te nang du shog cig ces zer na nang du 'gro bar bya'o/ /de ltar sgra ma byung na yang lan gnyis kyi bar du de bzhin du bya'o/ /de ste sgra ma byung na yang lan gnyis lan gsum gyi bar du de bzhin du bya'o//de nas nang du shog cig na gdod nang du 'gro bar bya'o/ /thug thub tu mi bya bar tshul 'di ltar bya ba ni dge sbyong gi tshul zhi ba dang dul ba'i rang bzhin yin pa'i tshul bstan par bya ba dang / thug thub tu zhugs na bla ma rnams kyis dge ba'i bar chad du gyur zhing sems 'khrug par 'gyur bas bla ma'i sems mi 'khrug par bya ba'i phyir tshul de ltar bya'o//de nas bla mas nang du shog cig ces smras te nang du zhugs nas ci bya zhe na/ de'i phyir/ nang zhugs gus pas bla ma la/ /khams bde mi bde la sogs dri/ /zhes bya ba smos te/ khams kyi sgras ni sa dang chu dang me dang rlung dang 'byung ba chen po bzhi la bya ste/'byung ba chen po bzhi shas che chung du gyur pa las nad du 'gyur ro/ /de la sa'i khams shas che na ni kha zas mi 'ju zhing lus lci'o/ /chu'i khams shas che na ni bad kan shas che'o/ /me'i khams shas che na ni mkhris pa can du 'gyur ro//rlung gi khams shas che na ni rlung nad can du 'gyur ro/ /de ltar nang du zhugs nas zhi ba dang du la ba dang srid zhu'i tshul gyis phyag bya ste/ khams bzhi ma snyoms pa las snyun du gyur pa mchis sam ma mchis snyun gsol lo/ /sogs pa'i sgras ni mtshan mo bde bar mnal lam ma mnal/dgongs pa la bar chad du gyur tam ma gyur zhes bya'o/ /de ltar snyun gsol nas ci zhig bya zhe na/ de'i phyir na/ 'di dag bya zhes dris nas ni/ /dkyil 'khor la sogs rnam bya'i phyir/ /zhes bya ba smos te/ snyun gsol ba'i 'og tu mchod rten la phyag bya zhing bskor ba dang bshang gci che chung du 'gro ba ma gtogs par nang par snga dro'i bar du ci dang ci bya ba thams cad zhu'o//de ltar zhus pa'i 'og tu dkyil 'khor byas la de nas gdod g.yar tshus bza'o/ /sogs pa'i sgras ni me tog dang bdug pa la sogs pa mchod pa yang bsdu'o/ /nya phyis la sogs chu brtags te//steng dang bar gting rim bzhin no/ /nya phyis la sogs med na yang / /khyor ba'am 'dab mas bum pa dgang / /chu yi skye bo che chung rnams/ /yun mi ring bar nan tan brtag /snying rje can gyis khu ba rnams/ /rab tu brtags te spyad par bya/ /srog chags yod na legs par btsag /srog chags rnams la gnod mi bya/ /rtswa dang lci ba shing la sogs/ /dgos pa gang dang gang yang rung / /de dag srog chags med par bya/ /sdom pas srog chags gsad pa srung / /zhes bya bas chu la sogs pa brtag par bstan te/ de dag dkyil 'khor byas nas g.yar tshus thob pa'i 'og tu ci bya zhe na/de'i phyir/ nya phyis la sogs chu brtags te/ /zhes bya ba la sogs pa smos te/ de'i 'og tu chu tshags lnga 'dul ba las gsungs pa'i chu tshags gang yang rung ba cig gis chu btsag go//de la chu tshags lnga ni ril ba dang / gru gsum pa dang / yu ba can dang / chos can zhes bya ba dang / grol bar byed pa'i ras so/ /de ltar chu btsags nas btsags pa tsam gyis kyang mi chog ste/ nya phyis la sogs pa chus gang bar bkang la srog chags yod dam med brtag go//sogs pa'i sgras ni dung phor rnams kyang bsdus so/ /ji ltar brtag ce na/ de'i phyir/ steng dang bar gting rim bzhin no/ /zhes bya ba smos te/ brtag pa'i rim pa ni thog mar chu'i steng na srog chags yod dam med brtag go/ /de nas bar du/ de nas gting ste zhabs su brtags la/srog chags med na ni chu de spyad du rung ngo / /srog chags yod na ni chu de spyad du mi rung bas slar snga ma'i gnas su dbo'o/ /gal te nya phyis dang dung phor ma 'byor na ji ltar bya snyam pa la/ de'i phyir/ nya phyis la sogs med na yang / /khyor ba'am 'dab mas bum pa dgang //zhes bya ba smos te/ nya phyis dang dung phor ma 'byor na yang khyor ba bkang ste brtag go/ /'dir yang steng dang bar gting rim bzhin du brtag pa ni snga ma bzhin no/ /'di'i skabs su ji ltar brtag ce na/ de'i phyir/ chu yi skye bo che chung rnams/ /yun mi ring bar nan tan brtag / ces bya ba smos te/ chu brtag pa yang mig nad kyis phog pa'am/ mig ling tog gis khebs pas ni mi brtag gi mig gsal bas chu na gnas pa'i srog chags phra mo dang sbom po rnams yod dam med brtag go/ /mig gsal bas brtags na yang yun ring du mig bgrad de bltas na mig zi zi por 'gyur bas srog chags mi mthong ba'i phyir yun mi ring bar yang nas yang du mig gsal bas brtag ste/srog chags med par yid ches kyi bar du brtag go/ /de bas na nan tan brtag ces smos te/ srog chags med par yid ches shing the tshom med kyi bar du blta'o zhes bya ba'i don to//ci'i phyir de ltar brtag ce na/ de'i phyir snying rje can gyis zhes bya ba smos te/ rab tu byung ba rnams ni sems can gyi sdug bsngal sel bar byed pa'i snying rje dang ldan pa yin pas/ de'i phyir sems can gyi gnod pa bsal ba'i don du srog chags yod dam med brtag go//gal te chu las skyes pa'i srog chags ni med kyi sbrang bu la sogs pa glo bur du 'ongs pas chu de srog chags dang ldan par gyur pa dang / kha zas kyi khu ba la sogs pa la glo bur gyi srog chags yod par gyur na de dag dor bar ji ltar bya snyam pa la khu ba rnams rab tu brtags te spyad par bya zhes bya ba smos te/chu btsags pa dang kha zas kyi khu ba la glo bur du 'ongs pa'i srog chags yod par gyur na yang yod dam med legs par brtags te spyad par bya'o/ /dor bar ni mi bya'o/ /thabs ji ltar bya zhe na/ de'i phyir/ srog chags yod na legs par btsag /srog chags rnams la gnod mi bya/ /zhes bya ba smos te/ btsags pa dang kha zas kyi khu ba la glo bur du 'ongs pa'i srog chags yod na legs par ma snad par btsags par rig pa ni btsag /lag pas bsal bar rig pa ni legs par bsal la so so'i gnas su ma snad ma shi bar bskyal bar bya'o//de la chu grang mo la gnas pa'i srog chags rnams chu dron mo la bskyal na gnod par 'gyur bas chu grang mo nyid du bskyal lo/ /chu dron mo la gnas pa'i srog chags rnams chu grang mo la bskyal na gnod par 'gyur bas chu dron mo nyid du bskyal lo/ / gal te ma byas par srog chags dang bcas pa'i chu 'thungs sam/ srog chags rnams rang rang gi gnas ma yin par bskyal te/ shi bar gyur na srog chags kyi grangs du yod pa'i nyes byas kyi grangs kyang de snyed cig 'thob bo/ /chu btsags te brtags pa de yang de ring lta bu'i nang par brtags na/de'i phyi de nyid kyi nang par gyi bar du spyad par byar rung ngo / /chu rnam pa lnga ni bdag gis ma btsags ma brtags kyang spyad du rung ba'i chu ste/ lnga gang zhe na/ kho ra khor yug 'dom gang du brtags pa'i chu dang / khron pa la sogs pa dang / dge slong yon tan can gyi chu dang / dge 'dun gyi chu dang /yid chas pa'i chu'o/ /de la kho ra khor yug 'dom gang du brtags pa'i chu ni lteng ka'am mtshe'u la sogs pa'i dbus su pus mo nub tsam du song la srog chags yod dam med brtags te med par gyur na 'dom gang kho ra khor yug tu brtags pa yin par spyad du rung ngo //khron pa la sogs pa'i chu ni khron pa dang lteng ka dang rdzing la sogs par nya phyis gang gi chu blangs te/ srog chags yod dam med brtags te med na nyin zhag gcig gi bar du spyad du rung ngo / /dge slong yon tan can gyi chu ni dge slong tshul khrims la gnas pa sdig pa la 'dzem pas chu btsags te btsags pa la bdag gis ma brtags ma btsags par spyad du rung ngo //dge 'dun gyi chu ni dge 'dun spyi'i chu lta bu brtags nas btsags te bzhag pa la ni bdag gis ma brtags ma btsags kyang spyad du rung ngo / /yid ches pa'i chu ni brag kha'am/ ri kha gzar po nas 'bab pa'i chu'am/sa'i 'og nas gyen du rdol pa'i chu mig lta bu la srog chags yod mi srid pas yid ches pa'i chu zhes bya ste spyad du rung ngo / /chu btsags pa'i bslab tshig ni dge slong mos pa can gyi srog chags dang bcas pa'i chus chag chag dang dkyil 'khor la sogs byas pa las bcas so//de'i phyis dge sbyong gis chu tshags lnga las gang yang rung ba cig med par gnas su mi rung ngo / /med par gnas na nyes byas su 'gyur ro/ /chu la de ltar brtags shing btsags nas srog chags med par byas te spyad na/ 'o na rtswa dang shing la sogs pa la srog chags yod na ji ltar spyad snyam pa la/de'i phyir/ rtsa dang lci ba shing la sogs/ /dgos pa gang dang gang yang rung / /de dag srog chags med par bya/ /zhes bya ba smos te/ mal gyi 'og tu gding ba'i rtsa la sogs pa dang / dkyil 'khor dang khang pa bkru ba'i lci ba dang / ma bud pa'i shing dang /sogs pa'i sgras ni sa la sogs pa'i yang bsdus te/ dge sbyong gis spyad par bya ba'i rdzas gang ci yang rung ste kun la srog chags yod dam med brtags nas srog chags yod na btsags la srog chags rnams kyang rang rang gi gnas su bde bar bskyal te/ srog chags med par byas nas spyad par bya'o/ /chu'i skabs su bshad pa rnams kyi don mdor bsdus te bstan pa'i phyir/ sdom pas srog chags bsad pa bsrung / /zhes bya ba smos te/ dge sbyong rnams ni snying rje can la khrims dang ldan pa yin pas ci nas kyang sems can che phra kun gyi bsad pa bsrung ste/sems can gang yang mi bsad do/ /zhes bya ba'i don to/ /stan chu sa dang so shing dang / /'dag pa'i chal yang sta gon bya/ /lhung bzed bkru la sogs pa dang / /bla ma'i dgos pa thams cad bya/ /zhes bya bas mkhan po dang slob dpon gyi las su bsgrub pa bstan te/de ltar brtags pa dang btsags pa'i 'og tu/ bla ma'i dgos pa thams cad bya/ /zhes sbyar te/ bla ma ni mkhan po dang slob dpon la bya ste/ de'i dgos pa ni mkhan po dang slob dpon gyi las su bya ba rnams nyams su blang ste bsgrub bo zhes bya ba'i don to/ /nyams su blang ba de dag kyang gang zhe na/de bstan pa'i phyir/ stan chu sa dang so shing dang / /'dag pa'i chal yang sta gon bya/ /zhes bya ba smos te/ mkhan po dang slob dpon gyi las su bya ba ni nang bar mkhan po dang slob dpon gang du kha gdong bkru ba'i gnas su gdan gding ba dang / bkru ba'i chu dang so shing dang / 'dag pa'i chal la sogs pa sta gon bya ste/gshegs pa dang / bshang gci byed pa'i gnas su sa dang 'dab ma dag kyang sta gon byas te bzhag go/ /de tsam zhig byas pas chog gam zhe na/ mi chog par bstan pa'i phyir/ lhung bzed bkru la sogs pa dang / /zhes bya ba smos te/ 'dir mkhan po dang slob dpon gyi lhung bzed bkru'o//sogs pa'i sgras ni chos gos bkru zhing btsem pa dang gnas byi dor bya ba la sogs pa las su bya ba thams cad bya'o/ /de nas dus rig phyag bya ste/ /de bzhin gus par thal sbyar nas/ /zas bza' bya zhes bla ma la/ /brtul zhugs can gyis de ltar zhu/ /zhes bya bas zhus nas zas bza' ba bstan te/de nas zhes bya bas ni bla ma'i dgos pa thams cad byas pa'i 'og tu zhes bya ba'i don to/ /dus rig phyag byas la dge slong rnams kyi zas bza' ba'o/ /dus ni skya rengs shar ba nas brtsams te/ 'dzam bu'i gling gi nyi ma dros man chad de/ de'i bar du zas bza' bar gnang ba'i dus rig nas zhes bya'o//phyag byas te/ de bzhin gus pas thal sbyar nas/ /zhes bya ba la mkhan po'am slob dpon la phyag byas te/ de bzhin nang par sngar zhus pa bzhin du lus kyis ma gus pa rkang pa brkyang ba dang / lag pa brkyang ba la sogs pa byed pa dang /ngag gis ma gus pa rta gad byed pa la sogs pa btang la/ lus dang ngag zhi ba dang dul bar bya ste/ thal mo sbyar la 'tshal ma 'tshal/ /zhes bla ma mkhan po dang slob dpon la brtul zhugs can de dge slong gis de ltar zhu'o/ /lag pa bkrus nas tshul bzhin du/ / de ni mi smra tshod rig bya/ /zhes bya bas sbyor ba phun sum tshogs pa bstan te/ lag pa bkrus nas zhes bya ba ni lag pa dang lhung bzed gnyis ka bkrus zhes bya ba'i don to/ /tshul bzhin du zhes bya bas ni zas bza' ba'i tshe g.yas g.yon du mi blta'o/ /kha zas 'brim pa la mi blta'o//ha cang kham cher mi za'o/ /de ni mi smra tshod rig bya/ /zhes bya ba ni zas za ba'i tshe gad mo mi bgad do/ /gtam mi bya'o/ /rkan sgra mi gtog go/ /cag cag mi bya'o/ /tshod rig ces bya ba ni ha cang mang du mi bza' la/ ha cang nyung du zos na yang dge ba byed mi nus pas ci tsam gyi dge ba byed pa de tsam gyi tshod de tsam zhig bza'o //bru ba'i nad las bzlog pa'i phyir/ /bza'o snyam pa'i sems kyis bza'/ /zhes bya bas bsam pa phun sum tshogs pas bza' bar bya ba bstan te/ 'di ltar zas za ba'i tshe stobs che ba dang gzugs mdzes par 'dod pa'i bsam pas zos na ni zas zos pa de nyid mi dge bar 'gyur ro//zas ma zos na lus nyam chung bas dge ba byed mi nus pa'i phyir dge ba byed pa'i don du zas bza'o snyam pa'i sems kyis zas zos na zas zos pa de nyid dge bar 'gyur ro/ /de gnyis gang du yang ma gtogs par kha zas bza'o snyam ste zas zos pa de nyid lung ma bstan du 'gyur ro//de bas na zas za ba'i tshe yang zas ma zos na bkres pa'i nad kyis 'debs so/ /bkres pa'i nad kyis btab na dge ba byed mi nus pas/ kha zas zos la bkres pa'i nad bzlog la dge ba bya'o snyam pa'i bsam bas zas bza' bar bya ste/ de lta bu'i bsam pa bzang pos zos na kha zas zos pa de dge bar 'gyur ro//zos shing de bzhin 'thungs pa dang / /rung ba'i chu yis de 'og tu/ /sbyin pa yang dag 'phel bya'i phyir/ /sbyin pa'i tshigs bcad gnyis shig brjod/ /ces bya bas bsod nams bsngo ba bstan te/ zos shing zhes bya bas ni bza' ba lnga zos shing bca' ba lnga 'chos so//de la bza' ba ni kha zas la bya'o/ /bca' ba ni spyan gzigs la bya'o/ /de bzhin 'thungs pa dang zhes bya bas ni btung bar bya ba 'thungs pa'o/ /rung ba'i chu yis zhes bya ba ni btsags shing brtags pa'i chus lag pa dang kha bkrus la/ de'i 'og tu lhung bzed kyang dag par bkru bar bya'o//de'i 'og tu/ sbyin pa yang dag 'phel bya'i phyir/ /sbyin pa'i tshigs bcad gnyis shig brjod/ /ces bya ba la/ lag pa dang lhung bzed bkrus pa'i 'og tu sbyin pa'i yon bdag gi smon lam bdag dang gzhan la gnod par 'gyur ba bzlog ste/ sbyin pa'i 'bras bu lha dang mi'i lus thob pa'i longs spyod chen po thob par bya ba'i phyir sbyin pa'i yon bdag gi don du tshigs su bcad pa gcig bklags pa dang / klu'i rgyal po dga' bo dang / nye dga' bo'i don du tshigs su bcad pa gcig bklags te de ltar tshigs su bcad pa gnyis shig gdon to//man ngag yod na bsam gtan bya/ /rab tu 'bad de bklag par bya/ /sdom dang cho ga mkhas pa dang / /bsgrub pa la ni brtson par bya/ /zhes bya bas dge ba bya ba bstan te/ de rnam pa bzhi yod de bsam gtan bya ba dang / bklag pa dang / ltung ba dang / mi ltung ba la mkhas pa dang /tshul khrims ma nyams par bsrung bar bya'o/ /man ngag yod na bsam gtan bya/ /zhes bya bas bsam gtan bya bar bstan te/ de la yang gang zag rnam pa bzhi yod de / 'dod chags la spyod pa'i gang zag dang / zhe sdang la spyod pa'i gang zag dang / gti mug la spyod pa'i gang zag dang /rnam par rtog pa la spyod pa'i gang zag go/ /de la 'dod chags la spyod pa'i gang zag gis ni mi gtsang ba bsgom mo/ /zhe sdang la spyod pa'i gang zag gis ni sems can thams cad gnyen bshes dang nye du bzhin du sdug pa dang phangs par bsgom mo/ /gti mug la spyod pa'i gang zag gis ni rten cing 'brel par 'byung ba lugs bzhin 'byung ba dang lugs las bzlog pa'i mtshan nyid bsgom mo//rnam par rtog pa la spyod pa'i gang zag gis ni dbugs phyi nang du rgyu ba bsgom mo/ /sgom pa 'di dag ni bdud rtsi'i sgo zhes bya ste/ mya ngan las 'das pa thob pa'i rgyu yin no/ /gal te bsam gtan 'di dag la sogs pa man ngag gang mkhan po dang slob dpon la thos nas zas zos pa'i 'og tu bsam gtan bya'o/ /rab tu 'bad de klag par byed/ /ces bya bas bklag par bya ba bstan te/ gal te bsam gtan bsgom pa'i man ngag med na bklag par bya ste kha ton bya ba'am/d+harma glegs bam la bklag par bya ba'o / /de ltar klog pa'i dus na yang rab tu 'bad de bklag par bya'o/ /dkyil 'khor dang mchod pa la sogs pa byas la sems ma yengs par rtse gcig tu bsdus nas lha klu la sogs pa la chos kyi sbyin pa bya'o//ha cang yang mi drag ha cang yang mi dal bar ren par bya ste/ zur phyin par bklag go/ /bklags pa'i rjes la yang bsod nams bdag dang sems can gyi don du bsngo'o/ /sdom dang cho ga mkhas pa dang / /zhes bya bas ltung ba dang mi ltung bar bya ba la mkhas par bya ba bstan te/sdom pa'i sgra ni phas pham pa bzhi la bya la/ cho ga'i sgra ni sbom po dang nyes byas la sogs pa bslab tshig phra mo dang dge sbyong gi bya ba rnams la bya ste/ mkhas pa zhes bya bas ni 'di tsam gyi phas pham par 'gyur la/ 'di tsam gyis phas pham par mi 'gyur zhes shes par bya ba dang /'di dag ni nyes byas yin/ 'di dag ni bdag gi las su bya ba yin/ 'di dag ni bdag gi las su bya ba ma yin no zhes shes par bya'o/ /bsgrub pa la ni brtson par bya/ /zhes bya bas tshul khrims lhur len pa bstan te/ phas pham pa dang sbom po dang nyes byas la sogs pa mi 'byung bar bsrung ba nyid bsgrub par bya ba la brtson pa yin no//da ni phas pham pa'i gnas 'chad de/ de la phas pham pa'i don ci zhe na/ sangs rgyas bcom ldan 'das ni chos kyi rgyal po/ /bdag ni chos kyi rgyal po'i rgyal tshab bo/ /tshul khrims dang ting nge 'dzin dang shes rab la sogs pa byang chub kyi phyogs kyi chos rnams ni bdag gi nyon mongs pa thams cad zhi bar bya ba'i grogs sam mig lta bu yin te/byang chub kyi phyogs kyis nyon mongs pa bcom nas chos kyi rgyal po'i gnas thob par bya ba yin pa las/ 'dod chags la sogs pa nyon mongs pa'i dbang du gyur pa rnams kyis tshul khrims la sogs pa byang chub kyi phyogs kyi chos rnams med par byas pas bdag gis chos kyi rgyal po'i gnas mya ngan las 'das pa thob par bya ba'i skal ba med pa la phas pham pa zhes pa bya ste/nyon mongs pa'i gnas su gyur zhes bya ba'i don to/ /de la phas pham pa rnam pa bzhi ste/ srog gcod pa dang /ma byin par len pa dang / mi tshangs par spyod pa dang / brdzun du smra ba'o/ /phas pham pa 'byung ba'i rgyu ni rnam pa gsum ste/ zhe sdang dang / 'dod chags dang / gti mug go/ /de la zhe sdang las ni srog gcod pa'i phas pham pa 'byung ngo / /'dod chags las ni ma byin par len pa dang mi tshangs par spyod pa'i phas pham pa 'byung ngo //gti mug las ni brdzun du smra ba'i phas pham pa 'byung ngo / /bcom ldan 'das kyi nyan thos kyi dge 'dun la lo bcu gnyis kyi bar du lta ba mnyams skyon med pas/ des na bcom ldan 'das kyis 'dir mdor bsdus te/ nyan thos rnams la so sor thar pa'i mdo bshad de bstan pa/sdig pa thams cad mi bya ste/ /dge ba phun sum tshogs par bya/ /rang gi sems ni yongs su gdul/ /'di ni sangs rgyas bstan pa'o/ /lus kyi sdom pa legs pa ste/ /ngag gi sdom pa legs pa yin/ /yid kyi sdom pa legs pa ste / /thams cad du ni sdom pa legs//kun du bsdams pa'i dge slong ni/ /sdug bsngal kun las rab tu gol / /ngag rnams bsrungs shing yid kyang rab bsdams te/ /lus kyis mi dge ba dag mi spyod cing / /las rnams gsum po 'di dag rab sbyangs nas / /drang srong gsung ba'i lam ni thob par 'gyur/ / zhes gsungs pas slob par zad do/ /lo bcu gnyis 'das nas bcom ldan 'das kyi bstan pa la skyon dang phan 'byung ngo / /de la dang po srog gcod pa'i phas pham pa bshad de/ de yang sangs rgyas bcom ldan 'das yul bri dzi'i ljongs chu bo dga' skyed kyi 'gram thang shing gi nags stug bo na bzhugs so//de nas bcom ldan 'das kyis dge slong gi dge 'dun la mi gtsang ba bsgom du bcug nas dge slong dag mi gtsang ba la brten nas bsgom pa lan mang du byas nas 'bras bu che zhing legs pa chen por 'gyur ro zhes bsngags pa brjod pas/ dge slong rnams kyis mi gtsang ba bsgoms pas lus rnag can 'dis yid byung sgyid lug ste/rnam par smod cing mtshon gyis kyang 'debs/ dug kyang za/ 'gegs kyang 'geg /g.yang du yang mchong / dge slong gis kyang dge slong yang gsod / de nas dge slong zhig lus la rnam par smod cing ri dgas dbyig pa can dge sbyong srung ba la 'di skad ces smra'o//bzhin bzangs nga sod cig dang chos gos kyang khyod kyir 'gyur ro/ /de nas dbyig pa can gyis de'i srog bcad nas ral gri khrag can chu bo dga' skyed la 'khru'o/ /de nas lha'i bu'i bdud cig chu bo'i rgyun la ma reg tsam du 'dug nas dbyug pa can la legs pa'i bsod nams mang du spel lo//sems can no zhes bstod pas dbyig pa can yang chos gos dang lhung bzed 'dod pas bsod nams bya'o snyam nas ral gri rnon po mchan du bcug ste/ gtsug lag khang nas 'chag sa'i bar du gcig nas gcig tu dge slong drug cu'i bar du srog bcad nas dge slong rnams nyung zhing 'gribs par gyur to//de nas bcom ldan 'das gso sbyong bco lnga pa'i tshe dge slong gi dge 'dun thams cad la gzigs nas tshe dang ldan pa kun dga' bo la bka' stsal pa/ rgyu rkyen gang gis da lta nga'i dge slong nyung zhing 'gribs par gyur zhes smras pa dang ji lta bur gyur pa rgyas par gsol to//bka' stsal pa/ kun dga' bo dge slong gsod dam/ btsun pa 'gums lags so/ /bcom ldan 'das kyis dge slong ma yin zhes rnam grangs du mas smad nas/ legs pa bcu gzigs pa'i phyir bslab pa'i gnas bcas so/ /gleng gzhi ni yul bri dzi/gang zag ni dbyig pa can dge sbyong srung / nyon mongs pa ni mi bzod pa/ nyes pa ni gsod pa dang / dngos po ni mir chags pa'o/ /srog gcod pa'i phas pham pa 'di rnam pa gsum gyis bstan te/ phas pham pa'i gnas bstan pa dang / sbom po'i gnas bstan pa dang /nyes byas kyi gnas bstan pa'o/ /phas pham pa'i gnas bstan pa la gsum ste/ bdag gis bsad pa dang / gzhan gsod du bcug pa dang / thabs kyis bsad pa'o/ /brtul zhugs gnas sems ma nyams pas/ /ched du bsams te ma nor bar/ /mi gzhan bdag gam gzhan rnams kyis//bsad na brtul zhugs nyams par 'gyur/ /zhes bya ba bdag gis bsad pa dang / gzhan gyis bsad pa bstan te/ brtul zhugs gnas zhes bya bas bslab pa nyams par yang ma byas/ bslab pa phul yang ma phul ba la brtul zhugs gnas zhes bya'o/ / 'dir rnam pa bzhi bzhag go / /bslab pa phul la nyams par ma byas pa dang / bslab pa nyams par byas lam phul ba dang / bslab pa nyams par yang byas la phul ba dang / bslab pa nyams par yang ma byas phul yang ma phul lo/ /de la bslab pa phul la nyams par ma byas pa ni 'di ltar dge sbyong chags par gyur tam mi dga' 'am/slar 'bab 'dod dam/ dge sbyong don du mi gnyer bas dge sbyong gi gan du song nas/ tshe dang ldan pa dgongs shig bdag ming 'di zhes bgyi ba bslab pa 'bul lo zhes zer ba dang / sangs rgyas dang chos dang dge 'dun 'bul ba'am/ mkhan po dang slob dpon 'bul lo zhes zer na bslab pa phul lo zhes bya'o//bdag khyim pa yin no zhe 'am/ dge bsnyen yin no zhe 'am/ mtshams med pa lnga byas pa'am/ mu stegs can nam/ tshangs pa mtshungs par spyod pa khyed dang lhan cig 'grogs su ma dgongs so zhes zer na bslab pa phul ba yin te/bslab pa nyams par byas pa ma yin no/ /ji ltar bslab pa nyams par ni byas la bslab pa phul ba ma yin zhe na/ 'di ltar dge sbyong chags shing mi dga' ste 'bab par 'dod nas mkhyen par mdzod cig tshangs par spyad pas rab tu dben pa dang / dgon pa ni spyad dka'o/ / pha ma bu sring phu nu mkhan po dran no/ /bdag bzo slob bo/ /bdag dga' ba'i rigs rnams la gtod cig /babs pa'i rtags smras kyang bslab pa 'bul zhes ma smras na bslab pa nyams par byas kyi phul ba ma yin no/ /ji ltar bslab pa nyams par yang byas phul ba yang yin zhe na/ dge sbyong chags shing 'bab par 'dod pas tshangs par spyod pa dang dgon pa ni dka'o//pha dang ma dang mkhan po la sogs pa dran na bdag dga' ba'i rigs la gtod cig ces smra zhing tshig gis go bar bslab pa 'bul zhes zer na bslab pa nyams par yang byas pa bslab pa phul ba yang yin no//ji ltar bslab pa nyams par yang ma byas la phul ba yang ma yin zhe na/ nyams pa'i tshig kyang ma smras 'bul ba'i tshig kyang ma smras pa'o/ /de la bslab pa ma phul yang nyams par byas pas kyang bslab pa nyams pa dang phul bar 'gyur ro/ /bslab pa ma phul ba las nyams par byas pa dang /bslab pa phul yang ma phul la nyams par yang ma byas pas ni phul bar mi 'gyur ro/ /sems nyams pas zhes bya ba la sems nyams pa ni smyos te mi dran pa la bya ste/ bdag smyos kyang ma smyos te dran bzhin du bsad na phas pham par 'gyur ro/ /smyos te mi dran par gyur nas bsad na ni phas pham par mi 'gyur ro//ched du bsams te zhes bya ba la bsad par ni ma bsams kyi rtsed mo la sogs pa byed byed de shi nas phas pham par mi 'gyur gyi/ ched du gsad par bsams te shi nas pham par 'gyur ro/ /ma nor ba zhes bya ba la yang mi rnam pa gsum bsad na phas pham par 'gyur ba las/bdag kyang mi'i rgyud du gtogs pa yin te/ bdag gis bdag bsad pa na phas pham par mi 'gyur gyi bdag gis gzhan bsad na phas pham par 'gyur ro/ /bdag gis gzhan bsad na brtul zhugs nyams par 'gyur zhes bya bar sbyar te/ bdag nyid kyis lag dar te mi rnam pa gsum bsad na brtul zhugs nyams par 'gyur te phas pham pa 'byung bas dge sbyong du mi rung zhing 'phags pa'i bden pa mthong ba dang mya ngan las 'das pa thob pa'i skal ba med par 'gyur ro zhes bya ba'i tha tshig go//de la bdag gis bsad pa la yang rnam pa gsum ste/ zin pa'i lus su gtogs pa dang /phyi rol gyis 'phangs pa dang / gnyis ka dang yang ldan pa'o/ /ji ltar zin pa'i lus su gtogs pas she na/ dge sbyong gis gsad sems kyis skyes pa dang / bud med dam ma ning khu tshur ram rdo'am tha na sor mo gcig bsnun te/ shi bar gyur cig snyam pa las de nyid kyi tshe'am phyis shi bar gyur na ni phas pham par 'gyur ro//ma shi na nyes pa sbom po'o/ /phyi rol gyis 'phangs pa gang zhe na/ dge sbyong gis bsad sems kyis mi la mda' 'phangs pa'am/ mdung dang / be con dang / tha na rgya shug gis bsnun te des shi bar gyur cig snyam pa las de nyid kyi tshe'am dus phyis shi na yang pas pham pa'o//ma shi na sbom po'o/ /gnyis ka dang ldan pa gang zhe na/ dge sbyong gis mi la bsad sems kyis ral gri dang dbyig pa dang mdung thung gis bsnun te 'dis shi bar gyur cig snyam pa las de nyid kyi tshe'am phyis shin yang phas pham par 'gyur ro/ /ma shi na sbom po'o//gzhan rnams kyis bsad na brtul zhugs nyams par 'gyur zhes bya ba la/ mi rnam pa gsum bsad pa'i phyir bdag gis gzhan la gsod du bcol ba las des mi ma pa gsum gang yang rung bas bsad na phas pham par 'gyur ro/ /'dir rnam pa gsum bzhag ste/ zin pa'i lus su gtogs pa dang /phyi rol gyis 'phangs pa dang / gnyis ka dang ldan pa bshad pa ni snga ma bzhin no/ /tshig de dag gis ni bdag gis bsad pa dang / gzhan gyis bsad pa ston to/ /tshul khrims ldan nam tshul khrims 'chal/ /de bzhin nad kyis btab pa la/ /gang thos sdug bsngal nyam thag ste//nges 'chi'i chos gtam de mi bya/ /sman dang sngags dang rig pa dang / /'chi ba'i phyogs su btang ba'am/ /mi gzhan thabs rnams sna tshogs kyis/ /bsad na brtul zhugs nyams par 'gyur/ /zhes bya ba yan chad kyis thabs kyis gsod pa bstan te/ thabs kyis/ tshul khrims ldan nam tshul khrims 'chal/ /de bzhin nad kyis btab pa la/ /gang thos sdug bsngal nyam thag ste/ /nges 'chi'i chos gtam de mi bya/ /zhes bya bas tshig gi sgo nas thabs kyis gsod pa rnams shig bstan te/ de yang rnam pa gsum yod de/ gang zhe na/tshul khrims dang ldan pa dang / tshul khrims 'chal ba dang / nad kyis btab pa la tshul khrims dang ldan nam zhes bya ba dang / gang thos zhes bya ba dang / nges 'chi'i chos gtam de mi bya/ /zhes bya bar sbyar te/ tshul khrims dang ldan pa la 'tsho ba'i yo byad 'dod pa'i phyir tshe dang ldan pa khyod tshul khrims dang ldan pa dge ba'i chos can yin pas 'di nas shi 'phos nas tshe rabs gzhan du skyes na lo legs pa dang 'dra/mtho ris ni dar las chod/ thar pa ni yol ba lta bus chod de lus dang bral nas lhar skyes par 'gyur gyis rang gis rang sod cig ces bsgo ba las de shi na ni phas pham pa'o//ma shi na sbom po'o/ /tshul khrims 'chal ces bya ba dang / gang thos zhes bya ba dang / nges 'chi'i chos gtam de mi bya/ /zhes bya bar sbyar te/ tshul khrims 'chal ba can la yo byad 'dod pa'i phyir/ 'chir gzhug go snyam du bsams nas tshe dang ldan pa sdig pa'i chos can lus dang ngag gis ngan par spyod pa khyod ji tsam du yun ring du gson pa de tsam ngan song du skye bar 'gyur ba'i sdig 'phel bas rang gis rang sod cig ces bsgo ba las shi na phas pham par 'gyur ro //ma shi na sbom po'o/ /de bzhin nad kyis btab pa la/ /gang thos sdug bsngal nyam thag ste//nges 'chi'i chos gtam de mi bya/ /zhes bya bas nad pa sbyar te/ nad kyis btab pa'i nad pa la nad pa'i yo byad 'dod pa'i phyir/ tshe dang ldan pa nad bu can sdug bsngal gyis rnyongs pa ji srad du yun ring du 'tsho ba de srid du sdug bsngal du 'gyur gyis rang gis rang sod cig ces gdon mi za bar 'chi ba'i gtam mi bya'o//gal te gdon mi za bar 'chi bar 'gyur pa'i gtam byas pa las shi na phas pham pa'o/ /ma shi na sbom po'o/ /gong du smos pa ltar bstan pa la dge sbyong gis 'gyod de nga ni byis pa dang 'dra bas gyi na zhig smras kyi rang ma gsod cig ces bsgo ba las shi yang rung ma shi yang rung phyis 'gyod de bsgo na sbom por zad do//sman dang zhes bya ba la/ sman de dug gis bsad pa'i gleng gzhi ni / bcom ldan 'das dze ta'i tshal na bzhugs so/ /de na khyim bdag stobs sde zhes bya ba longs spyod che ba zhig 'dug pa chung ma dang yongs su spyod pa las khye'u gnyis bdog ste/ phu bo ni sde pa/ nu bo ni nye sde zhes ming du btags so/ /de nas dus gzhan zhig na sde pa gzhan du tshong la chas pas nor mang du rnyed pas de chags te/ yun ring du ma log go/ /de nas sde ba'i chung ma 'dod chags kyis khol bar gyur nas nye sde la lan du ma zhig bsgugs pa las/ nye sdes kyang phyi zhig na spyad de bu chags so//de nas sde pa 'ong ba thos nas nye sdes 'jigs nas dze ta'i tshal du rab tu byung ngo / /des phyis bdag gi khyim du phyin pa dang / sde pa'i chung mas khyo ni 'ong khyod ni thar na bdag ji ltar bya zhes dris pa dang / nye sdes grogs po sman pa gcig la ji ltar gyur pa rgyas par smras nas/sman pas bdag gis mngal 'jig par 'gyur ba'i sman gyis mngal na yod pa de dum bur zhig par 'gyur ba de sbyin no zhes byas te/ sde pa'i chung ma la sman phye ma blud pas rum na yod pa yang med par gyur to/ /nye sde yang sman byas pa la yi rang nas cang ma smras so/ /dus phyi zhig na de ltar gyur pa skye bo kun gyis thos nas dge slong zhes 'dzer to//de ltar gyur pa de dge slong rnams kyis bcom ldan 'das la gsol te/ bcom ldan 'das kyis nye sde la khyod kyis de ltar byas pa bden nam zhes smras nas/ btsun pa de ltar ni ma bgyis kyi rjes su yi rang ba ni bgyis so zhes gsol pas/bcom ldan 'das kyis bka' stsal pa/ nye sde la ni ltung ba med kyis phyin chad de lta bu la yi rang na nyes pa dang bcas par 'gyur ro/ /dge sbyong gis skyes pa'am bud med dam ma ning la gsad sems kyis kha zas kyi nang du dug sbyar ma blugs pa dang / khrus chu dang / skom dang /bdug spos kyi nang du dug gi phye ma blugs te 'dis 'chi bar 'gyur ro snyam na yang de nyid kyi tshe shi'am dus phyis shi na phas pham pa'o/ /ma shi na sbom po'o/ /dge sbyong gis chang ngam smyo ba'i sman byin te shi bar gyur cig snyam pa las de nyid kyi tshe'am phyis shi na phas pham pa'o/ / ma shi na sbom po'o/ /'chi ba'i phyogs su btang ngam zhes bya ba la dge sbyong gis gsad sems kyis g.yang du phul ba dang / mer phul ba dang / 'chi ba'i phyogs su btang ba dang / stag gzig la sogs pa gcan gzan gdug pa'i gnas su btang ba dang / sbrul dang sdig pa la sogs pa srog chags gdug pa'i gnas su btang ba'am/gsad par 'dod pas grang ba'i tshe grib ma la bzhag nas lhags pa la bor ba dang / dro ba'i tshe nyi ma la bzhag nas dro khung du bzhag ste thabs 'dis shi bar gyur cig snyam pa las de'i tshe shi'am phyis shi na yang phas pham pa'o/ /mi gzhan thabs rnams sna tshogs kyis//bsad na brtul zhugs nyams par 'gyur/ /zhes bya ba la gzhan gsad pa'i bsam pas thabs kyis 'chi bas bsad pa 'am shing la 'ching bas bsad pa dang / de la dge sbyong gis gsad sems kyis spyugs nas stag gzig gam 'phar spyang la sogs pas zos sam/thabs ci yang rung bas shi na phas pham pa'o/ /dge sbyong gis gsad sems kyis mi shing la 'breng rlon gyis bcings te bzhag pa la stag gzig gam 'phar spyang la sogs pas zos sam ci'i thabs kyis shi yang pham pa'o/ /dge sbyong gis bud med sbrum ma gsad par bsams te dku mnyes pa las ma shi na phas pham pa'o//bu shi la ma ma shi na sbom po'o/ /gnyis ka ma shi na sbom po'o/ /bu bsad par 'dod de/ dku mnyes pa las bu shi la ma ma shi na phas pham pa'o/ /bu ma shi la ma shi na yang sbom po'o/ /gnyis ka ma shi na yang sbom po'o//de bzhin du dge sbyong gis gsad sems kyis snying khar 'debs pa'i ral gri dang chu gri bzhag pa dang / gtor ma bzhag pa dang / sa mda' dang / rtsang btsugs pa la sogs pa bzhag pa la shi na phas pham pa'o/ /ma shi na sbom po'o/ /'di yan chad kyis phas pham pa'i zla la sbom po yang bcad de bshad do//yan lag bdun dang ldan na srog gcod pa'i mtshan nyid phas pham par 'gyur ro/ /bdun gang zhe na/ mi'i rgyud yin/ mi yin/ gzhan ma yin/ mir 'du shes/ sbyor ba byas/ 'tsho ba nyams/ bdag ma smyos pa'o/ /byol song dang ni sems dmyal dang / / yi dgas 'on te lha yang rung / /bsad na ngan 'gror lhung ba yis / /sdig pa sbom po thob par 'gyur/ /brtul zhugs can gyis bsad snyam ste/ /lus dang ngag gi sbyor ba las/ /skye bo gson yang de la ni/ /kha na ma tho rnam gsum 'gyur/ /zhes bya bas nyes pa sbom po'i gnas bstan te/byol song ni rta dang ba lang dang lug la sogs pa la bya ste/ dge sbyong gis gsad sems kyis byol song bsad na sdig pa sbom po thob par 'gyur zhes bya bar sbyar te/ sems can dmyal ba dang zhes bya ba sems can dmyal ba la rnam pa gnyis te/ sems can dmyal ba chen po dang /phyogs gcig pa'i sems can dmyal ba'o/ /sems can dmyal ba chen po la yang rnam pa gnyis te/ tsha ba'i sems can dmyal ba dang / grang ba'i sems can dmyal ba'o/ /de la tsha ba'i sems can dmyal ba ni mnar med pa dang / rab tu tsha ba dang / tsha ba dang / ngu 'bod chen po dang /ngu 'bod dang / bsdus 'joms dang / thig nag dang / yang sos so/ /grang ba'i sems can dmyal ba chen po la yang brgyad de/ chu bur dang / chu bur chen po dang / pad+ma dang / pad+ma chen po dang / ut+pa la dang / ut+pa la chen po dang / ha ha zhes zer ba dang / hu hu zhes zer ro//phyogs gcig pa'i sems can dmyal ba zhes bya ba ni lha'i longs spyod kyang yod la bar 'ga' ni sems can dmyal ba'i sdug bsngal yang myong ba'o/ /dge sbyong gis gsad sems kyis sems can dmyal ba bsad na sdig pa sbom po thob par 'gyur zhes bya bar sbyar ro/ / yi dgas zhes bya ba la/ yi dgas zhes bya ba ni phal cher gcong rong dang mya ngan dag na gnas so/ /dge sbyong gis gsad sems kyis yi dgas bsad na sdig pa sbom po thob par 'gyur zhes bya bar sbyar ro/ /lha yang rung zhes bya bas 'dod khams kyi lha dang / gzugs khams kyi lha dang / gnas ris bcu bdun zhes bya ba na gnas pa'i lha rnams dge sbyong gis bsad na sdig pa sbom po thob par 'gyur zhes bya bar sbyar ro/ /sdig pa sbom po thob par 'gyur zhes bya ba gang zhe na/ sdig pa sbom po'i 'bras bu bstan pa'i phyir/ bsad na ngan song ltung ba'i zhes bya ba smos te/ dper na dug chen pos kyang skyes bu chen po gsod la/dug chung ngus kyang skyes bu chen po gsod pa dang / de bzhin du me stag chen pos kyang yul chen po tshig la me stag chung ngus kyang yul chen po sreg pa dang / phas pham pa byung na ngan song gsum du skye bar 'gyur ba de bzhin du nyes pa sbom po byung ba la tshul bzhin du ma bshags na ngan song gsum du ltung bar 'gyur ro zhes bya ba'i don to//brtul zhugs can gyis bsad snyam ste/ /zhes bya ba la/ dge sbyong gis skyes pa dang bud med dang / ma ning ste mi rnam pa gsum las gang yang rung ba cig bsad do snyam du bsams te lus dang ngag gi sbyor ba bshams pa las zhes bya ba la/lus kyis bshams te khu tshur dang thal mo dang rdo dbyig dang mtshon chas kyang btab/ ngag gis bshams te gong du bshad pa bzhin du tshul khrims dang ldan pa dang / tshul khrims 'chal ba dang / nad pa rnams 'chi ba'i rigs so zhes bsngags pa brjod pa las zhes bya ba'i tha tshig go//skye bo gson yang de la ni/ /kha na ma tho rnam gsum 'gyur/ /zhes bya ba la/ gsad par yang bsams lus dang ngag gis kyang bshams pa las mi gsum po gson te ma shi yang dge sbyong de la kha na ma tho ba rnam pa gsum thob par 'gyur te/yid kyi nyes pa sbom po dang / lus kyi nyes pa sbom po dang / ngag gi nyes pa sbom po thob par 'gyur ro/ /de la gsad par bsams pas na yid kyi nyes pa sbom po thob par 'gyur ro/ /lus kyis bshams pas na lus kyi nyes pa sbom po thob par 'gyur ro/ /ngag gis bshams pas na ngag gi nyes pa sbom po thob par 'gyur ro//de dag tshul bzhin du ma bshags na ngan song gsum du ltung ngo zhes sngar bshad pa bzhin du sbyar ro/ /rdo dbyug khu tshur 'tshog pa dang / /de las gzhan pa'i gnod pa dang / /ba lang la sogs gnod mi bya/ /rta la sogs pa mi bzhon no/ /zhes bya bas nyes byas kyi gnas bstan te/de zhes bya ba la gsad sems ni med kyi dge sbyong gis khro sems kyis mi rnam pa gsum la btsogs na nyes byas su 'gyur ro/ /khu tshur 'tshog pa dang zhes bya ba la gsad sems ni med kyis/ khro sems kyis mi rnam pa gsum btsogs na nyes byas su 'gyur ro//de las gzhan pa'i gnod pa dang zhes bya ba ni gsad sems med par khro sems kyis mi rnams la thal mo bsnun nam/ lcag gis gzhus sam/ lhags pa'i tshe grang ba la bor tam/ tsha ba'i tshe dro ba la bor na nyes byas su 'gyur te dbyug pa la sogs pa'i grangs su phag pa nyes byas kyi grangs kyang de snyed cig 'thob bo//ba lang la sogs gnod mi bya/ /zhes bya ba ni gzhan yang ba lang dang glang po che dang rta dang lug la sogs pa la khal dgal ba dang brdeg pa la sogs pa'i gnod pa mi bya ste/ de lta bu'i gnod pa byas na nyes byas su 'gyur ro/ /rta la sogs pa mi bzhon no//zhes bya ba ni dge sbyong gis rta dang glang po che la sogs pa bzhon par mi bya ste/ zhon na nyes byas su 'gyur ro/ /de la gnod sems med la yan lag gzhan yod na ni nyes byas su bzhag go/ /gnod sems yod la yan lag gzhan mi ldan na sbom po'o/ /yan lag thams cad dang ldan na mi de nor te gzhan bsad na yang sbom po'o//gsad par bsams te sbyor ba byas pa las ma shi na yang sbom po'o/ /yan lag thams cad dang ldan na phas pham pa'o/ /phas pham pa bzhi las srog gcod pa'i phas pham pa rdzogs so// //ma byin par len pa'i gleng gzhi ni bcom ldan 'das yul rgyal po'i khab 'od ma'i tshal bya ka lan da ka gnas pa na bzhugs so//de'i tshe sngon rdza mkhan las rab tu byung ba'i dge slong nor can zhes bya ba zhig rgyal po'i khab kyi dgon pa na spyil po byas nas gnas so/ /de nas nor can gang gi tshe rgyal po'i khab tu bsod snyoms la zhugs pa de'i tshe rgyal po'i khab kyi phyugs rdzi dang shing thun rnams kyis spyil po bshig dral cing rtswa dang shing rnams so sor khyer ro//de lta bu lan du ma zhig byas pa dang rdza mkhan nor can gyis bsams pa 'di lta bu thams cad du gtses shing spyil po byed pa yang shin tu nyon mongs la dag ba'i bar chad du yang 'gyur bas 'o na bdag gis sngon gyi gnas rjes su bsgrub pas sa'i spyil po zhig byas la so btang ste gnas so snyam du bsams nas khang bu'i rmang bting zhing brtsigs nas so btang nas shin tu mdzes pa me tog dzi ba ka bzhin du dmar zhing 'tsher ba zhig byas te gnas so//dus gzhan zhig na bcom ldan 'das 'khor dge slong rnams dang gnas rgyu zhing gshegs pas khang bu gzigs nas su'i yin/ de ni dge slong nor can gyi lags so zhes smras so/ /'di lta bu'i phyir mu stegs pa rnams ngal 'phya bar 'gyur gyis khang bu choms shig ces bka' stsal nas/dge slong rnams kyis khang bu bcom ste gnas so/ /de nas yang nor can gyis bsam pa rgyal po'i khab [(]gyi [,]kyi [)]shing srungs kyi dpon dang bdag mdza' bas shing gi khang pa zhig bya'o snyam du bsams nas/ shing srungs pa la lhas shing byin pa 'on cig ces smras pa dang / shing srungs kyi dpon pos kyang lhas phul na btsun pa ci bder snoms shig ces smras nas/rgyal po'i khab kyi zhig ral bcos pa'i rgyu shing bcad pa du ma zhig gshags gtubs te khyer ba grong khyer srungs pa'i dpon pos mthong nas rgyal po ma skyes dgra la smras so/ /rgyu mtshan can bkug ste/dge slong khyod ni shing ma byin par len pa dbang byas pa dang / mi dbang gis bdag la stsal to/ /sngon yab kyis lha khyod rgyal por dbang bskur ba'i tshe nga'i yul dge bar grags pas dge slong dang bram ze rnams rtswa dang shing dang chu ma byin par mi spyod pa de thams cad ci bder spyod cig ces khyu mchog gi sgra chen po bsgrags pa ni mi dgongs sam/rgyal pos smras pa/ de ni yongs su bzung ba med pa la bya'i yongs su bzung ba la ni ma yin no zhes smras pa dang / yongs su ma bzung ba la ni rgyal pos mnga' bgyir ci mchis zhes gsol pa dang / rgyal po shin tu khros nas ma byin par len pa'i dge slong bsad par rigs na khyod da slan chad de ltar ma byed cig ces spyos nas slar btang ngo //de nas de ltar gyur pa dge slong rnams kyis bcom ldan 'das la gsol to/ /bcom ldan 'das kyis kun dga' bo la bka' stsal pa/ kun dga' bo khyod song la rgyal po'i grong dpon dang ded dpon lam byin par len pa ji tsam zhig blangs pas srog la 'bab pa dang yul nas dbyung ba'i chad pa gcod par byed smros shig ces bka' stsal pa dang /kun dga' bos de bzhin du smras pa dang / ma sha ka lnga'am lnga las lhag pa blangs pas srog la 'bab pa dang yul nas 'byin pa'i chad pa gcod do zhes mchi ba bcom ldan 'das la de bzhin gsol pas/dge slong nor can bkug nas rnam grangs du mar smad nas 'dul ba la bslab pa'i gnas bcas so/ /dge tshul bdag gam gzhan rnams kyis/ /rku sems mthu dang 'jab bu yis/ /'khrul pa med par mi gzhan gyi//gnas nas ma sha lnga tsam mam/ /rang gi yul nas byung ba yang / /kAr ShA pa Na'i bzhi cha brkus / /de brkus tshul khrims zhig par 'gyur/ /zhes bya ba la dge tshul ni rab tu byung ba'i sdom pa la gnas pa'o/ /bdag gis kyang rku sems dang ldan pas mthu dang 'jab bu yis brkus na tshul khrims zhig par 'gyur zhes bya bar sbyar te/'di ltar rku sems dang ldan pas mthu dang 'jab bus kAr ShA paNa'i bzhi cha brkus te rin thang tshang na phas pham pa'o/ /rku sems med na bsdam par bya ba'i nyes byas gcig /gzhan gyis mthu dang 'jab bus brkus na tshul khrims zhig par 'gyur te/bdag nyid kyis ni ma yin gyis dge slong grogs po zhig la rkur bcug pa las des mthu dang 'jab bus brkus te/ nor bdag cag so sor bgos rin thang tshang na phas pham par 'gyur ro/ /rin thang ma tshang na nyes byas sbom po re re brkus na brkus shas kyi skal ba blangs na nyes pa sbom po gcig /'khrul pa med par mi gzhan gyi zhes bya ba la 'khrul pa ni rmongs pa dang mi dran pa yin la de med pa ni sems rang bzhin du gnas pa'o/ /yang brku bar bya ba'i rdzas gang yin pa de nyid mngon par thob pa la bya ste/ brku bar bya ba'i rdzas nyid ni ma thob kyi bar du rdzas gzhan gyis thob pa las 'khrul zhes bya ste de ni rin thang tshang yang phas pham par mi bya ste sbom por 'gyur ro//mi gzhan zhes bya ba ni bdag gi nor dgar ba'i tshig ste/ mi gzhan gyi nor brkus na phas pham par 'gyur ro / /bdag gi nor brkus na rin thang tshang yang spom por mi 'gyur ro/ / gnas nas ma sha lnga tsam zhes bya ba la gnas ni nor rdzas gnas nas spags te bar du chod rin thang tshang ba las pham pa'o/ /de yang gnas gcig ste gzhi ma nyams pa la tshon la sogs pa ma grogs pa dang / sa sgar sgur med na gzhi gcig pa zhes bya ba ste nam tha dad pa gcig gis ma chod kyi bar du pham par mi gzhag go//ma sha lnga tsam zhes bya ba ni rgya gar gyi rin thang gzhal na dngul zho gcig tsam brkus na pham par brtsi'o/ /yang kha cig gis ni zho'i brgyad cha gcig la byas te de tsam gyis ni rin thang tshang bar brtsi'o/ /rang gi yul nas byung ba gang zhes bya ba ni rin thang tshang ba yang brkus ba'i dus de nyid na rin thang tshang ma tshang brtsi'o//kha cig brkus pa'i dus de nyid na rin thang ma tshang la dkon mod dang sbyar te/ dus phyi zhig na rin thang tshang ba lta bu ni pham par mi gzhag sbom po'o/ /kAR+ShA pa Na'i bzhi cha brkus/ /zhes bya ba ni gong du ma sha lnga bshad pa dang 'dra'o/ / sbyor ba'i tshe na nyes byas so zhes bya ba ni dang po brku bar bsams te stan dang khri las langs pa'i dus nyid na nyes byas su 'gyur ro/ /rdo khu rtsa ba 'bras bu shing / /zhes bya ba la rtsa ba ni gla sgang dang bong nga zhes bya ba la sogs pa'o/ /'bras bu ni shing thog la sogs pa'o/ / shing ni skyed shing rnam pa sna tshogs te/ de dag brkus te rin thang tshang na pham pa ma tshang na sbom po'o/ /sdong bu lo ma shun pa chu/ /zhes bya ba la/ sdong bu ni mar dang sman khril bu'i rigs su gtogs pa'o/ /lo ma ni shing lo ldum longs spyad par 'os par rung ba'o/ /shun pa ni gro ga la sogs pa'o//chu ni khrus chu dang btung chu lta bu ste rgya mtshor zhugs pa dang mya ngam lta bur 'gro ba ste chu shin du dkon pa'i dus na brku ba'o/ /me tog chu skyes thang skyes dang / /zhes bya ba ni me tog chu nas skyes pa pad+ma dang ut+pal la sogs pa'o/ /thang las skyes pa ste nA ga ge sar la sogs pa'o//zhing dang lo thog sa gzhi dang / /zhes bya ba la zhing gi mu rku ba ste/ yul gyi rgyal po'i bka' khrims las byung ba bzhin rin thang brtsi'o/ /lo tog ni than pa chen po'i tshe gzhan gyi zhing la chu gtong ba gcod cing bdag gi zhing la chu gtong ba dang / char pa che ba'i dus na bdag gi zhing la chu bcad nas gzhan gyi zhing la btang ste bdag gi lo legs la gzhan gyi lo nyes na rin thang tshang na pham pa/ma tshang na sbom po'o/ /lo tog gnyis ka la ma phan yang bla snyam pas zhing rku sems de ltar btang ste pha rol po la nyes pa sbom por 'gyur ro/ /zhing rku ba la rnam pa gnyis te/ shags bkar gtong ba dang ra bas bskor ba'o/ /dge sbyong gis zhal che ba'am yul dpon gyi mdun du shags bkye la dge sbyong rgyal bar bcad la khyim pas kyang sbyor ba'i bsam pa btang na pham pa/ sbyor ba'i bsam pa ma btang na sbom po'o/ /rgyal pos rgyal bar bcad na yul gyi gtso bos rgyal bar gyur par gcad ma thag tu pham pa'o//bskor bas brku ba ni zhing la ra ba dang 'obs lta bus skor bar byed pa na nam langs kyi sna ma phrad kyi bar du sbom po'o/ /phrad na pham par gzhag go/ /sa gzhi ni khangs dang tshong dus lta bu ste/ dge sbyong gis mi dbang bzhin brkus na rin thang tshang na pham pa'o//mtshang na sbom por bzhag go/ /gru dang shing dang sho gam dang / /zhes bya ba la dge slong gis gru rku bar bsams te chu rgyun las gyen du bzlog de gru tshugs las gru 'jug thal na pham pa/ chu rgyun thog thag khyer te sgur dang gad pa dang sne'u chod na sbom po'o/ /de mi snang na pham pa/ thad kar rku na pha rol gyi 'gram skam sa la phyin na pham pa/ de nyid rdzab dang sa'i 'og tu sbas na gru mi snang bar gyur tsam na pham pa'o/ /shing ni bza' shing dang me tog gi shing dang grib shing lta bu ste rin thang tshang na pham pa'o/ /gseb lam dang lam gyi sho gam lta bu bka' khrims gyis mi sbyin du mi rung ba las gzhan gyi dge sbyong gis bzlas sam gang gis gang zag gzhan la gsangs te sho gam ma byin te rin thang brtsis te tshang na pham pa/de bzhin gru yi btsas rnams dang / /zhes pa dang yang sbyar bar bya'o/ /srog chags rkang pa med pa dang / /rkang mangs rkang gnyis rku ba dang / / brtul zhugs can gyis mi yi nor/ /dbyig la sogs pa gang yang rung / /rku ba'i sems kyis gang brkus kyang / /rin thang tshang na sdom pa zhig /ces bya ba la/ mi'i longs spyod dgos par bya ba'i phyir gsos shing btsal ba srog chags rkang pa med pa sbrul dang 'bu lta bu dang / rkang pa gnyis pa mi lta bu dang /pha rol la gnod par bya ba'i phyir rkang mangs sdig pa la sogs pa lta bu/ rang nyid kyis brkus pa dang / rkur bcug pa dang / yang gzhan gyi nor gser dngul lta bu rnams rku ba'i sems kyis brkus te rin thang tshang na pham pa'o/ /stsogs pa'i sgras ni mi'i nor rnyi dang spre'u dang bya rgya dang bod rgya dang nya rgya la sogs pa rku ba yang bsdu ste/'dir dge sbyong gis bdag gi nor du rku sems kyis ming du smos pa 'di dag brkus te rin thang tshang na pham pa'o/ /bdag gi don du ma yin gyi pha rol la gnod pa bya ba'i bsam pas rku na pham pa'o/ /gnyis ka la phan gnod med pa'i bsam pas de dag dral zhing bsregs na yang sbom po'o//snying rje'i bsam pas dral zhing bsregs na nyes byas so/ /de dag gis zin pa'i srog chags brkus te rin thang tshang na pham pa'o/ /gnyis ka la mi phan pa'i bsam pas btang na sbom po'o/ /snying rje'i bsam pas btang na nyes byas so//sngags kyi bdag po yod pa'i gter bdag gir byas pa sgrub pa las gter phas 'ong na ji tsam mig gis ma mthong gi bar du sbom po'o/ /mthong ste rin thang tshang na lag tu ma thob kyang pham pa'o/ /bdag po med pa'i gter bsgrubs pa las phas 'ong ba ma mthong gi bar du nyes byas/mthong ste rin thang tshang na sbom po'o/ /lhung bzed la sogs rkun khyer na/ /chos bshad nas ni bsgrub par bya/ /yang na ri ba'i rin gyis blu / /de ltar ma byas nyes byas so/ /zhes bya bas ni ma byin par len pa'i dngos po thams cad nas thams cad du mi bya bar dgag pa ste/'di ltar bdag gi 'tsho ba'i yo byad med du mi rung ba lhung bzed dang khar gsil dang / chos gos la sogs pa rkun pos khyer zhing phrogs na rku ba'i rnam par smin pa yid du mi 'ong ba la sogs pa rnam par smin pa thob par 'gyur ba'i chos bshad nas slar blang bar bya'o/ /de ltar chos bshad pa las slar ma ster na yo byad de dag dge sbyong bdag la med du mi rung bas ci ri ba'i rin gyis blus te blang par bya'o//de ltar ma byas par nan gyis blangs sam phrogs na nyes byas su 'gyur ro/ /phas pham pa gnyis pa bshad zin to// //phas pham pa gsum pa mi tshangs par spyod pa'i gleng gzhi ni/bcom ldan 'das yul ka lan da ka gnas pa'i grong na bzhugs so/ /de'i tshe khyim bdag ka lan da ka'i bu bzang byin zhes bya ba zhig rab tu byung nas gnas pa las / de'i mas bu khyod pha dang ma'i nor ni sbyin du yod pa la bdag cag bza' bran rgas te shi bar gyur na kun kyang rgyal po'i nor du gyur na khyod slar 'babs su mi rung na yang sa bon cung zad cig zhog cig ces byas nas/bzang byin gyi chung ma zla mtshan dang ldan zhing dus la bab pa rgyan gyis klubs te khrid de 'ongs pa dang / tshe dang ldan pa bzang byin yang 'dod chags bdo ba dang nyes dmigs ma mthong bas mi tshangs par spyod do/ /de nas dus mi ring ba zhig na bcom ldan 'das kyis dge slong rnams la 'dod chags dang zhe sdang dang gti mug gi nyes pa las dpral ba'i phyir/sems rnam par grol ba dang shes rab rnam par grol bar 'gyur ba'i chos bshad pa dang / tshe dang ldan pa bzang byin nyes pa dran nas shin tu 'gyod cing mi dga' nas/de dge slong rnams kyis mthong nas ci nyes smras pa dang / tshe dang ldan pa bzang byin gyis drang por smras so/ /de lta bu bcom ldan 'das la gsol nas bcom ldan 'das kyis bzang byin la rnam pa du mas smad nas legs pa bcu gzigs te 'dul ba la bslab pa'i gnas bcas so/ / sdom can nyams pa med sems kyis/ /nyams pa med pa'i sgo gsum du/ /chags pas nang du nor bu 'das/ /dga' ba tshor na brtul zhugs nyams/ /zhes bya bas mi tshangs par spyod pa dang / rang bzhin bstan te/ sdom pa can dge sbyong bslab pa ma phul zhing nyams pa med pa'i sems rang bzhin du gnas pas kha dang /rkub dang / mo mtshan te sgo gsum po 'di dag ma rul ba dang / rma ma byung ba dang / 'bu zhugs pa lta bu nyams pa med pa spyad du bzod par bdag nyid chags pa'i sems kyis nang du bcug ste mtshams 'das la/ dga' ba tshor na brtul zhugs nyams te pham par 'gyur ro zhes bya ba'i don to//de la yan lag ni rnam pa lnga ste/ sems ma nyams/ sgo gsum spyad bzod/ chags sems yod/ mtshams las 'das/ dga' ba tshor/ de rnams gcig dang mi ldan na sbom por gzhag go/ /skyes pa bud med ma ning gis/ /tshan kar bor te mnan pa las//gang gis bde ba'i ro myong ba/ /de yang sdom pa zhig par 'gyur/ /zhes bya ba ni bdag dge sbyong mthu chung zhing zhan pa la/ skyes pa dang bud med dang ma ning ste/ mi rnam pa gsum gyis tshan kar bor te mnan nas bdag dang de dag gi sgo gsum gang yang rung bar bcug pa'i tshe/bdag nyid kyis nyams su blangs te dga' ba tshor na de yang sdom pa zhig ste phas pham par 'gyur ro zhes bya ba'i don to/ /'dis ni ji ltar gyur yang nyams su mi blang ba ston to/ /yan lag skyes nas bde 'dod pas/ /gdug pa sbrul gyi khar bcug bla/ /lus la dka' thub mi gzhig ces//rdzogs sangs rgyas kyis bka' stsal to/ /zhes bya ba la/ gal te 'dod chags kyi dbang gis bdag gi yan lag skyes bsgrengs te shin tu bdo bar gyur pa 'dod chags de dang bral zhing bde bar 'dod par bya ba'i phyir/ sbrul gdug pa'i khar bcug ste/ 'dod chags dang bral bar gyur pa ni bdag la phan pa yin pas bla'i/lus la bdag gi sdom pa ni mi gzhig par bya'o zhes rdzogs pa'i sangs rgyas bcom ldan 'das kyis bka' stsal to/ /ji ltar zhe na/ gal te sbrul gyis gsad gyur kyang / /tshul khrims gnas la de phan te/ /zhes bya ba smos te/gal te chags pa'i dbang gis yan lag skyes bsgrengs nas sbrul gdug pa'i khar bcug ste shi bar gyur pa ni sgo gsum snang ba'i gnas su ma bcug pa tshul khrims can de la phan te mtho ris su skyes pa'i phyir ro / /tshul khrims de zhig par gyur pas sdug bsngal yin te ngan song gsum du skye'o//der yang ma zad kyi mya ngan las 'das pa la'ang sgrib par 'gyur te/ tshul khrims nyams na thar pa mya ngan las 'das pa'i skal ba yang med par 'gyur ro zhes bya ba'i don to/ /phas pham pa gsum pa bshad zin to// //phas pham pa bzhi pa brdzun gyi gleng gzhi ni/ bcom ldan 'das yul yangs pa can gyi spre'u rdzing gi 'gram na bzhugs so//de'i tshe mu ge chen po byung nas kha zas kyis shin tu brel te pha ma yang bu la kha zas mi ster ba tsam du dkon pa'i tshe/ dge slong rdzu 'phrul can dang gnas brtan rnams ni byang gi sgra mi snyan la sogs pa yul gzhan 'byor cing rgyas pa dag tu dong zhing bdag nyid kyang za/gang zag gzhan la yang stobs so/ /de la nya pa las rab tu byung ba'i dge slong lnga brgya la sogs pa dag gis kyang dge slong de dag ltar bya zhing dbyar tshul du 'jug tu ni rdzu 'phrul yang ma thob cing thos pa dag kyang nyung zhing de ltar mi nus kyis bdag cag gis yul nyid du dbyar tshul du zhugs la bdag cag so so'i yon tan bsgrags te rnyed pa bsgrub po snyam nas tshul du zhugs so//de nas lnga brgya po de dag gis gcig gis gcig gi yon tan brjod pa la zhugs so/ /'dis rgyun du zhugs pa'i 'bras bu thob bo/ /'dis lan cig phyir 'ong ba'i 'bras bu thob bo/ / 'dis phyir mi 'ong ba'i 'bras bu thob bo/ /'dis ni dgra bcom pa'i 'bras bu thob bo/ 'dis ni 'jig rten pa'i lam gyis grub bo/ /'di ni sde snod gsum smra ba'o zhes so so'i yon tan brjod pas kha zas la sogs pa mang po du ma rnyed de sha khrag gi lus shin tu rtas pas gnas so/ /de nas dbyar 'das nas tshul nas byung ste/bcom ldan 'das kyi zhabs la phyag 'tshal du phyin to/ /dang por kun dga' bo dang phrad pa dang smras pa/ mu ge chen po byung ba'i dus na dge slong gzhan rnams ni rmya ste lhags na/ khyod ni shin tu tsho ste byung na de ci'i rgyu zhes smras pa dang / bdag cag so so'i yon tan brjod pas rnyed pa mang po byung ste lus rtas so zhes smras so//khyed la yon tan yod de brjod dam med de brjod/ bdag cag la yon tan med par brjod do zhes smras pa dang / zang zing cung zad tsam gyi phyir mi'i chos las bla mar gyur pa med pa la yod pa gzhan bzhin du sma ba shin tu mi rigs so zhes kun dga' bo la sogs pa rnams kyis smras so//de ltar gyur pa bcom ldan 'das kyis gsan to/ /de nas bcom ldan 'das [(]gyis [,]kyis [) rnam pa du mas smad nas 'dul ba la bslab pa'i gnas bcas so/ /lha dag mthong zhes de yi sgra/ /thos par gyur dang kun smra dang / /zhes bya ba la/ dge sbyong gis bdag gis lha mthong ngo //lha'i sgra thos so/ /lha rnams dang bdag tu smra zhing kun du smra bar byed do zhes zer na gsum char la yang pham pa re rer 'gyur ro/ /gang na bdag 'dug lha 'ong zhing / /bdag kyang de yi gnas 'gro dang / /zhes bya ba la/ dge sbyong gis bdag gang na 'dug pa'i gnas su lha dag 'ong ngo //bdag lha gang na gnas pa'i gnas de dag tu 'gro'o zhe na yang pham pa/ ji ltar lha mthong zhing sgra thos zer ba dang / lha dang smra zhing kun du smra'o/ /bdag 'dug pa'i gnas su 'ong ngo zhes smra'o / /de bzhin dri za grul bum klu/ /gnod sbyin lto 'phye chen po dang / /sha za yi dgas mi'am ci/ / mthong ngo zhes la sogs smra'am/ /zhes bya ba rnams la yang sbyar bar bya'o/ /bsam gtan mngon shes tshad med dang / /rgyun zhugs la sogs 'bras bu dang / /lam la rab tu zhugs pa'ang rung / /bdag gis thob ces smras na ni/ /don rig pa las brdzun pa'i tshig /ces bya ba la/ dge sbyong gi 'du shes sbas nas/gzugs kyi khams kyi bsam gtan dang po thob bo zhe'am/ gnyis pa thob po zhe'am/ gsum pa dang bzhi pa thob bo zhes smra na yang pham pa/ de bzhin du mngon par shes pa lnga las gang yang rung ba zhig thob po zhes smra na yang pham pa'o/ /yang 'du shes sbas nas tshad med pa bzhi gang yang rung ba zhig grub po zhes zer ba dang /dge sbyong gi 'du shes sbas nas 'bras bu bzhi las bdag gis rgyun du zhugs pa'i 'bras bu thob bo zhe'am/ lan cig phyir 'ong ba dang / phyir mi 'ong ba dang / dgra bcom pa'i 'bras bu thob po zhes smras te/ gzhan gyis don go bas don rig ste go na brdzun gyi tshig ste pham par 'gyur ro//lam la rab tu zhugs pa ni dge sbyong gis 'du shes sbas te 'jig rten las 'das pa'i lam bdag gis thob bo zhes smras na pham pa'o/ /'jig rten pa'i lam gyi zhi gnas kyi mtshan ma 'ga' zhig la brten te 'dod chags dang gnod sems la mi spyod do zhes zer na sbom por 'gyur ro//khyad par thob pa'i bdag nyid can/ /ma nyams zhes bya ba la/ dge sbyong bdag gis sems ma smyos pa nad kyis gzir bar ma gyur te rang bzhin du gnas/ gong du bstan pa'i yon tan khyad par can thob cing mthong zhes smras na phas pham par 'gyur gyi/sems smyos pa dang nad kyis gzir ba rnams ni pham par mi 'gyur gyi sbom por gzhag go zhes bya ba'i don to/ /nga rgyal med bzhin du/ smras na brtul zhugs nyams par 'gyur/ /zhes bya ba la/ sngon dge sbyong zhig dgon pa na gnas pas 'jig rten pa'i lam gyis nyon mongs pa bcom ste/mi 'byung bar byas nas yun ring mo zhig lon pa na/ nyon mongs pa mi 'byung ba'i gnas rnams la brtags na nyon mongs pa mi skye bas bdag cag gis nyon mongs pa spangs so zhes bsams shing brjod nas slar grong du lhags pa las 'jig rten pa'i lam gyis nyon mongs pa rtsad nas ma phyin pa'i phyir nyon mongs pa skye ba'i yul bud med dang dgra la sogs pa mngon du gyur pa dang nyon mongs pa slar skyes nas dge slong de dag bdag cag gis nyon mongs pa ma spangs par spangs so zhes smras te mi'i chos las bla mar gyur pa'i pham par ma gyur grang zhes bcom ldan 'das la zhus pa dang /mngon pa'i nga rgyal can de lta bu ma gtogs te slan chad de lta bu'i khyad par zhig thob na yang smra bar mi bya'o zhes gsungs pa lta bu ste/ de lta bu ni pham par mi gzhag go/ /dge sbyong gis 'du shes sbas te/ lha dang klu dang gnod sbyin mthong ba dag yod do zhes ni smra la/bdag nyid yin no zhes ni mi smra na sbom por 'gyur ro/ /sha za rnams mthong ba yod do zhes smra la/ bdag nyid yin par mi smra na ni nyes byas su 'gyur ro/ /dgon pa na dge slong du gnas pa de la mi ma yin pa rnams kyis gtses pa las 'phags pa rnams la mi gtse ste bdag la yang mi gtse zer na pham pa/'phags pa rnams kyi phyir khyim bdag rnams stan khra bo 'dings te bdag gi phyir yang khyim bdag stan khra bo 'dings so zhes zer ba yang don rig na pham pa'o/ /khyad par thob pa ma gtogs par zhes bya ba la sogs pas nyes byas su 'gyur ba bstan to/ / de las gzhan pa'i brdzun tshig rnams/ /de dag thams cad sdig mang 'gyur/ /zhes bya ba ni gong du yon tan khyad par can thob bo zhes bya ba las ma gtogs par ku re dang kyal ka la sogs pa'i phyir/ brdzun pa'i tshig smras na sdig pa mang du 'gyur te nyes byas lci bar 'gyur ro/ /ji ltar mdza' bo 'byed 'gyur ba//phra ma'i tshig rnams smra mi bya/ /zhes bya bas ni ngag gi nyes pa gnyis pa bstan te 'dum zhing mdza' bar 'gyur bas 'thab cing dbye bar 'gyur ba'i phra ma'i tshig gis dbye ba rnams slar mi sdum zhing dbyes su 'gyur ba phra ma'i tshig rnams mi bya'o/ /ngan du zer la ngan mi smra/ / gshe ba la yang slar mi gshe/ /mtshang 'bru ba la slar mi 'bru/ /rdeg pa la yang slar mi rdeg /ces bya bas ni ngag gi nyes pa spong ba dge sbyong gi tshul bzhi ste/ bdag nyid la nyes pa rnams la'ang mi rigs par mi bya na/ sems can nyes pa med pa rnams la bdag nyid kyis mi rigs par bya ba lta ci smos/gzhan gyis ngan du smra ba la sogs pa byas pa slar lan mi glan no zhes bya ba'i don to/ /blo ldan bslab pa 'dod pa yin/ /bsgrims te ngag gi skyon rnams spang / /zhes bya ba ni ngag gi nyes pa bzhi pa ste/ rgyal po'i gtam dang / chom po'i gtam dang / tshong pa'i gtam la sogs pa ni tshig kyal pa ste ngag gi skyon rnams te gang bslab par 'dod pa'i dge slong blo dang ldan pas spang bar bya'o//de ltar 'gyur bar rig nas ni/ /ngag rnams shin tu bsdam par bya/ /zhes bya ba ni gong du bshad pa ltar ngag gis nyes pa bzhi spyad na brdzun dang sbom po dang nyes byas su rig nas de dag bsdam zhing spang ngo zhes bya ba'i don to//pham pa bzhi pa bshad pa ste phas pham pa bzhi'i bshad pa rdzogs so// //de ltar phas pham pa'i gnas bstan nas/ da ni bslab pa phra mo'i gnas bstan pa'i phyir/ 'bru btags phabs dang sbyar ba yi //zhes bya ba la sogs pa smos so/ /de yang rnam pa drug ste/ 'bru btags phabs dang sbyar ba yi/ /btung ba'i bye brag 'bru yi chang / /zhes bya ba ni nas 'bras btags te chang du bya ba'am/ ma btags pa chang du byas pa rnams te/ de ni myos par 'gyur rig nas/ /rtswa mchog gis kyang mi btung ngo //zhes bya bar 'gyur ro/ /sdong bu me tog 'bras bu las/ /sbyar ba'i khu ba bcos pa'i chang / /de ni myos par 'gyur rig nas/ /zhes bya ba dang / rtswa mchog gis kyang mi btung ngo / /zhes bya bar sbyar te/ 'di ltar sdong bu ste bu ram shing bcir ba las byas pa dang /me tog 'bras bu ste rgun 'brum la sogs pa sbyar ba'i khu bas myos shing dran pa nyams par 'gyur bar rig nas bdag nyid kyang rtswa mchog gis mi btung la gzhan la yang sbyin par mi bya zhes ston to/ /ci'i phyir zhe na/ sdom can phan 'dod mi btung ngo / /zhes bya ba ste/ 'di ltar dge sbyong sdom pa can bslab pa la gnas pas bdag la phan pa dang bde bar bya ba'i phyir ro/ /'thungs na nyes pa ci yod ce na/ de 'thungs na ni dran nyams shing / /brtul zhugs ldan pa bag med 'gyur/ /bag med pa las brtul zhugs nyams/ /zhes bya ba ste/ gong du smos pa'i chang gi rnam pa de dag 'thungs shing gzhan la blud na bdag dang gzhan gyi sems rang bzhin du gnas shing gsal ba nyams su myong ba'i dran pa nyams pas lus kyis rjes su rdeg btsog dang /ngag gi sgo nas tshig ngan pa la sogs pa bag med pa 'byung ngo / /de ltar bag med pa'i sgo nas srog gcod pa dang /ma byin par len pa la sogs pa brtul zhugs te tshul khrims nyams par 'gyur ro/ /de bas na/ de bas ston pa'i bka' dran bya/ /myos 'gyur nyes pa 'phel 'gyur ba/ /rtswa mchog gis kyang mi btung ngo / /zhes smos te/ de bas na ston pa sangs rgyas kyi bka' tshad ma dran par byas la dran pa nyams shing myos par 'gyur ba'i gnas nyes pa rnam pa du ma 'phel bar byed pa'i rgyu rtswa mchog gis kyang reg par mi bya na gzhan lta smos kyang ci dgos zhes bya ba'i don to//ji ltar chang 'thungs na nyes byas su 'gyur ba bzhin du glu ma dang sbang ma zos na nyes byas su 'gyur ro//'di ltar chang la chang gi kha dog dang dri dang ro dang myos par 'gyur ba'i mthu dang bzhi char ldan pa 'thungs na nyes par gzhag go/ /sbrang rtsi dang bro ba la sogs pa myos pa'i mthu yod du zin kyang kha dog dang dri dang ro la sogs pa dang / 'jig rten la sogs pa smad pa ma yin pas de dag gis myos pa ni ma yin no//gal te dge sbyong nad kyis thebs te chang gi cho ga bya dgos na chang gis lus la bsku bar bya'o/ /yi ga 'chus pa phan par bya na yang khar blugs pa las btung bar mi bya'o/ /chang ma 'thungs na yang mi 'tsho ba tsam du thug na bskol ba chang gi ro dang myos pa'i mthu med par byas te/chang dang ro nyams pa dang kha dog dang 'dra ba tsam bya'o/ /glu gar rol mo'i gleng gzhi ni bcom ldan 'das rgyal po'i khab na bzhugs so/ /rgyal po gzugs can snying pos klu'i rgyal po ri bo dang yid 'ong gi phyir gtsug lag khang brtsigs nas dus ston chen po byas pa'i tshe/lho phyogs nas gar mkhan 'ongs te drug sde ci byed pa'i lad mo bzlas pa dang / drug sde khros nas dus gzhan zhig na dus ston byed pa'i gar mkhan la gnod pa'i phyir drug sdes bro gar byas pa dang / skye bo kun gar mkhan la mi lta bar drug sdes bro gar byed pa la bltas nas rol mo mkhan gyis rnyed pa ma grub ste/'tsho ba chad nas rol mo mkhan kha zer ba la bcas/ yul ni rgyal po'i khab/ gang zag ni drug sde / nyon mongs pa ni zhe sdang / nyes pa ni glu gar rol mo'i sgra byed pa'o/ /glu gar de bzhin sil snyan rnams/ /sdom la gnas pas mi bya'o//zhes bya bas dregs pa'i nyes pa spang ba ston te/ de la glu ni shar dang gan da ra la sogs pa'o/ /gar ni rkang lag g.yob cing lus sgyur bar byed pa'o/ /de gnyis sdom pa la gnas pas byas na nyes byas su 'gyur ro/ /gzhan byed du mi gzhug ste byed du bcug na nyes byas so//sil snyan ni mchod pa'i yo byad dang rol mo'i cha byad do/ /de gsil zhing dkrol ba rnam pa sna tshogs te/ de dag sdom pa la gnas pas mi bya'o/ /ci'i phyir zhe na/ de dag ni rgya gas shing dregs par 'gyur ba'am/ yan lag 'khor bar byed pa'i rgyu yin pa'i phyir ro//mchod pa bya ba'i phyir glu gar byed du bcug na yang glu gar byed du mi gzhug /lha dang lha ma yin gyi dbang pos mchod pa ltar sangs rgyas kyi zhabs kyi rdul la mchod pa gyis shig ces byas la byed du gzhug go/ /yang na gnang ba ni sems can gzhan rnams dad pa bskyed pa'i phyir/dkon mchog gsum gyi che ba'i yon tan bstod ra rnams dbyangs dang glu bsres te byas na nyes pa med do/ /glu dbyangs dag mi shes te slob 'dod na yang shes pa khrid de gnas dben par slob tu gzhug go/ /'dir glu gar la sogs pa dngos su ma byas kyang chu la sogs pa la brda thabs dang lag thabs su byad na yang nyes byas so//phreng ba dang spos dang byug pa dang / rgyan 'dogs pa'i gleng gzhi ni bcom ldan 'das rgyal po'i khab 'od ma'i tshal bya ka lan da ka gnas pa na bzhugs so/ /de'i tshe gtsug lag khang gi dus ston byed pa na drug sde kha dog gis brgyan nas gar byas pa la bcas so//yul ni rgyal po'i khab/ gang zag ni drug sde / nyon mongs pa ni zhe sdang / nyes pa ni rgyan phreng dang kha dog 'chang ba'o/ /lus la spos kyis mi byug ste/ /zhes bya ba la sogs pa sh+lo ka phyed dang gsum gyis kha dog gi nyes pa ston to/ /de la lus la spos kyis byug pa ni lus kyi mdog mdzes pa dang dri zhim par bya ba'i ched du a ka ru dang 'bu sug la sogs pa dri zhim po'i rnam pa lde gu dang phye mar byas te lus la bsku zhing gdags par mi bya'o//de bzhin du tsan+dan la sogs pa mi bsku'o/ /yung dang gur gum la sogs pas/ kha dog rnams su mi bri'o ste/ming gis smos pa 'di rnams kyis kyang lus kyi mdzes shing spa ba dang dri zhim par bya ba'i ched du lus la gdags shing bsku ba dpral ba la res su mi bya'o/ /stsogs pa'i sgras ni mtshal dang li khri dang / kha dog mdzes par 'gyur ba'i rgyu gzhan dag kyang bsdu'o/ /me tog mgo rgyan phreng ba dag /brtul zhugs can gyis gdags mi bya/ /zhes bya ba ni me tog brgyus pa'i chun pos mgo dang mgul du mi gdags shing spang ngo zhes bya ba'i don to/ /gser la sogs pa'i rgyan rnams kyis/ /bdag la brgyan par mi bya'o/ /zhes bya ba la/ dge sbyong bdag nyid gser dang dngul dang mu tig la sogs pa nor bu rin po che'i rgyan rnams kyis bdag gi mgul dang rkang lag la sogs pa brgyan cing gdags par mi bya'o//dud pa la sogs mig sman rnams/ /mig mi na bar mi byug go/ /zhes bya ba ni dge slong bdag nyid mig mi na bar mtshal dang gur gum dang ga bur dang dud pa sbyar ba la sogs pas mig la bsku bar mi bya'o//lus kyi mdog mdzes pa dang chags pa skye bar bya ba'i phyir me long dang chu dang ba la blta bar mi bya/ sen mo mi bcos/ chags pa'i bsam pas so rtsi la sogs pa bza' zhing mchu dmar por mi bya'o/ /g.yan pa dang 'brum bu'i nad med par lus 'jam pa dang /mdzes par bya ba'i phyir rdo dang so phag gis mi brud / khrus chu la sogs pa'i nang du dri zhim po sna tshogs sbyar la mi blugs/ yon bdag dad pa can 'ga' zhig dri 'bul te lus la mi bskur mi rung na yang yid bsrung ba'i phyir skad cig tsam bskus la yon bdag song ma khad du ma tshor bar dbyi'o//rims nad dang g.yan pa'i nad la phan pa'i phyir tsan+dan dang gur kum gyis lus la bsku dgos na 'jig rten pas mi 'phya bar bsku'o/ /shing khri khru gang mtho ba dang / /zhes bya ba la sogs pa sh+lo ka gcig gis mthon po na 'dug pa'i nyes pa bstan te/ shing khri khru gang las mtho ba zhes bya ba ste de la nyal bar mi bya'o/ /ba so la sogs brgyan pa'i khri/ /dma' yang nyal khri bzang po la/ /nyal la sogs pa mi bya'o/ /zhes bya ba ni khru gang snyed du mi mtho zin kyang ba so dang dung dang rwa las byas pa'i khri'am/ de dag gis brgyan pa'i khri bzang po dma' yang nyal bar mi bya'o//ci'i phyir zhe na/ mal stan mthon po dang bzang po dang chen po la nyal na mal gyi bde ba la chags shing rlom sems 'byung ba'i phyir dang / gzhan du na bkra mi shis par yang 'chad pas nyal bar mi bya'o/ /gnang ba ni de bzhin gshegs pa'i gsung rab kha don du 'don cing 'chad pa'i tshe ni rin po che sna tshogs kyis brgyan pa'i khri la 'dug tu gnang ngo //de la 'dug pa'i tshe yang chags shing bde ba'i bsam pas ni 'dug par mi bya'o/ /'du byed thams cad skad cig mi rtag pa'i rang bzhin yin par bsams te 'dug par bya'o/ /gding ba ko lpags 'chang ba gnang ba ni yul mtha' 'khob dang lhags pa che ba dag tu ni mal gos dang stan gnyis ka ko lpags las byed du gnang gi yul dbus ma ga d+hA'i phyogs su ni mi gnang ngo //ko lpags bcang du gnang ba yang gzhan gyi gnang gi pa glang dang stag dang seng ge dang dom dang dred dang rta dang byi la'i pags pa 'di bdun bkra mi shis shing /'jig rten pa rnams kyis smad cing dkon pa yin pa spyod cing 'dug tu mi gnang ngo / /nad kyi gzhi la phan na ni sman pas bsgo ba la nyes pa med do/ /glu gar la sogs bsten pa dang / /gang la dregs pa skye mi 'gyur/ /dregs pa'i yan lag spangs nas ni//brtul zhugs gnas zhes brjod pa yin/ /zhes bya ba ni dregs pa'i nyes pa spangs pa'i phan yon yin te/ 'di ltar glu dang gar la sogs pa dngos po gang bsten cing gnas na dregs pa dang rgyags pa skye bar 'gyur ba'i dregs pa'i yan lag gam dngos po de yang spangs na brtul zhugs gnas pa ste/sdom pa la gnas pa tshul khrims dang ldan pa yin no zhes bya ba'i don to/ /nyi ma phyed mtshams phan chad nas/ /zhes bya ba la sogs pa sh+lo ka gsum gyis ni dus ma yin pas zas za ba'i nyes pa bstan to / /de la dge sbyong gis zas za ba'i dus ma yin pa ni rang gi gnas 'dzam bu'i gling du nyi ma phyed mtshams tshun chad nas bzung ste skya rengs ma shar bar du za ba'i dus ma yin par sangs rgyas bcom ldan 'das kyis bka' stsal te /dge sbyong sdom pa la gnas pas dus der zas mi bza' bar bya ste/ de bas na/ nyi ma phyed mtshams phan chad nas //skya rengs ma shar dus min te/ /de ni rgyal bas dus min gsungs/ /sdom can rnams kyis der mi bza'/ /zhes bya ba bstan pa yin no/ /'o na dge sbyong gi zas bza' ba'i dus gang zhe na/ skya rengs shar nas phyed kyi bar/ /de yi skabs su zos na ni/ /de ni bdag shes sdom pa ste//bza' ba dus su zos pa yin/ /zhes bya bas bstan te/ 'di ltar rang gi gnas ni 'dzam bu'i gling du skya rengs shar ba nyi ma phyed ma yol gyi bar skabs der bza' ba zos pa ni bdag shes bzhin dang ldan pa sdom pa la gnas pa ste dge sbyong gis gnas bza' ba'i dus su zos pa yin te de ni dus yin no//dus min dus su 'du shes nas/ /nam yang bza' bar mi bya'o/ /zhes bya ba ni phyed mtshams phan chad dus ma yin pa las dus yin no snyam pa'i 'du shes bzhag nas bza' ba rnams bza' bar bya ba ni nam yang mi bya'o zhes bya ba'i don to/ /dus ma yin par bzar gnang ba ni/sman pas nyon mongs bsgo na ni/ /nad pas nyes par mi 'gyur ro/ /zhes bya ba la sogs pa ste/ snga dro zos pas 'tsho bar mi nus na phyi dro yang zo cig ces sman pas bsgo na nyes par mi 'gyur ba dang / lam du zhugs te dpag tshad gcig tsam du 'gro ba dang / mu ge chen po byung ste nyam thag pa'i dus su ni dus dang sbyar ba'i gtol med pas nam zas rnyed pa'i tshe dus ma yin par bzar gnang ngo / /dge slong ba lang bdag bzhin du las kyi rnam par smin pas mid pa gnyis yod par gyur na snga dro ni mid pa gcig nas nang du rgyu/ phyi dro ni gcig nas phyir rgyu zhing za ba'i dus yin pas de lta bu ni dang po kham gcig gnyis tsam gyis phyir bor te slar kha bkru bar bya/de'i phyi ma phan chad bza' bar bya'o/ /de lta bu ma gtogs pa rnams ni sgregs pa'i khrod na kha zas kyi tshal ma zhig byung na kha zas dang bcas par mi bya'i brtags pa'i chus kha dag par bkru bar bya'o//sa le sbram ni gser yin te/ /zhes bya ba la sogs pa sh+lo ka gsum gyis dbyig 'chang ba'i nyes pa spang ba ston te/ dge sbyong gis bdag gi ched du gser sa le sbram dang / bdog pa la sogs pa dang / dngul la sogs pa ste rin po che rnams sbyin bdag rnams kyis de byin na/bdag nyid kyis kyang mi blang la/ /gzhan yang len du mi gzhug go/ /gal te de ltar ma byas par blangs na nyes byas te lci bar 'gyur ro/ /dge sbyong gis khab ral dang gri shubs la sogs pa rwa dang ba so dang rus pa las byas pa dang / gser dngul la sogs pa las byas pa'am/gser dngul dang rin po ches spras pa la sogs pa gdags shing bcang bar mi bya ste byas na nyes byas so/ /tshon mo steng dang zha nye dang khar ba la sogs pa la reg na nyes byas so/ /'o na dge sbyong gser dngul la sogs pa la ci nas kyang reg tu mi rung ngam zhe na/bdag gis rung ba ma yin 'dis/ /rung ba'i dngos po btsal snyam du/ /de ltar mngon par bsams nas ni/ /de nas gzhan zhig len du gzhug /ces smos te/ dge sbyong gis bsams pa 'di gzhan te/ bdag gis gser dngul la sogs pa rung ba'i dngos po ma yin pa 'dis/ rung ba'i dngos po chos gos gsum btsal ba'i zong dang / gser dngul cung zad ma bcangs na 'tsho ba 'chad par 'gyur bas 'tsho ba'i phyir dang / sman med nad kyis gtses par 'gyur bas sman btsal ba'i zong gi phyir bcang zhing blang ngo snyam du bsams te dge bsnyen nam khyim bdag gzhan len du gzhug go//yang nyes par mi 'gyur ba ni/ dkon mchog gsum gyi ched ka dang / /tshangs pa mtshungs par spyod rnams kyi/ /gser dang dngul la reg gyur kyang / /nyes par gyur pa ma yin no/ /zhes pa ste/ 'di ltar dkon mchog gsum gyi ched du ste de'i dkor du gtogs pa dang / tshangs pa mtshungs par spyod pa mkhan po dang slob dpon gcig pa'i dge sbyong gi yo byad lta bu dang / mkhan po dang slob dpon gyi yo byad du gtogs pa'i gser dngul la dge sbyong bdag gis reg kyang nyes par mi 'gyur ro/ /yang / bdag gis rung ba ma yin 'dis/ /rung ba'i dngos po btsal snyam du//zhes bya ba ni gser dngul 'dis de bzhin gshegs pa'i sku gzugs lugs su blugs shing ris su bris pa dang / d+harma bris shing glegs bam du byas pa dang / dge 'dun spyi la 'bul ba'i bsams pas blangs na nyes par mi 'gyur ro zhes bya ba'i don to/ /dge sbyong gis khe spogs 'dod pa'i phyir bdag gi nor gzhan la 'tshong du bcol tam/gzhan gyi nor bdag gis blangs te tshong byas na nyes byas so/ /dkon mchog gsum gyi phyir ram/ de ltar ma byas na sman zong tsam yang med la 'tsho ba yang 'chad par 'gyur ba zhig gam/ bsod nams bya ba zhig tu bsams te tshong gi khe spogs bya dgos na yang bdag nyid kyis mi bya'i/khyim pa gzhan la bcol bar bya'o/ /de ltar bcol ba'i 'os med na yang bdag nyid tshong byed pa'i tshe bdag gis nan dang mthus mi bya'o/ /rung ngam mi rung dga' mi dga'/ /zhes lan gsum gyi bar du dris la/ mi dga' ba med de rung ngo zhes zer na tshong bya'o//pha rol po ma dad bzhin du nan gyis tshong byas te rin brtsis la thob na pham par 'gyur ro/ /de ltar 'di yan chad du dge sbyong gi bslab tshig bcu po mdo tsam du bshad zin to// //'dod pas bar du gcod byed cing / /rdzogs sangs rgyas kyis bka' stsal pa ni bcom ldan 'das kyis rab tu byung ba rnams 'dod pa'i yon tan lnga la brten pa rnams ni mo tha ris dang thar pa la bar du gcod pa'o zhes bka' stsal pa las/nye dga'i slob ma dge sbyong tsher ma can dang mchod sbyin gnyis na re 'dod pas bar du gcod pa'o zhes bcom ldan 'das kyis bka' stsal pa ni de ltar ma yin te/'dod pa la brten kyang bar du gcod par mi 'gyur te de'i don bdag gis shes so zhes smras pa las/ bcom ldan 'das la gsol te bka' stsal pa/ de skad du smra ba la dang por tshig 'jam pos smros shig /des ma btub na gsol ba dang / bzhi'i las kyis dge tshul gti mug ma smra shig ces bsgo zhig /de skad du bsgo ba las kyang ma btub ste de skad smra na dge 'dun gyis 'tsho ba'i yo byad du gtogs pa longs spyod rnams dang phral nas/ gtsug lag khang nas bskrad par bya'o/ /de ltar bskrad pa'i dge sbyong de ni dge sbyong dang gnyis gnas khang gcig tu nyal ba gnang ba de la med na/tshangs pa mtshungs par spyod pa rnams dang spyod pa gcig cing yo byad gcig pa dang / lta ba gcig pa rnams kyang de la med pas na/ de nas ro dang 'dra bar 'gyur ro/ /'phyar dang rta gad byed la sogs/ /'chi bar bsams te mi bya'o//zhes bya ba la/ rab tu byung ba rnams ni dul zhing zhi ba'i rang bzhin pas / gdol pa dang ma rabs kyi chos lus kyi sgo nas mchong zhing brgal ba la sogs pa dag dang / ngag gi sgo nas rta gad drag po la sogs pa mi bya'o/ /ci'i phyir zhe na/ 'phyar ba ni ma brtags pa'i chos yin pa dang /rta gad dang gag tshil byed pa ni rlung 'tshub cing sngon shi ba dag byung bas/ de'i phyir 'chi bar bsams shing mi bya'o/ /glal tshe lag la sogs pa yis/ /kha dgab par yang nan tan bya/ /ci'i phyir zhe na/ so snang ba dang gcan gzan chad pa ltar shin tu mi mdzes pa'i phyir ro//rgan la sbrid byung phyag bya ste/ /gzhon la nad med gyur zhes bya/ /khyim pa sbrid pa byung ba dang / /yun ring sos zhes brjod par bya/ /zhes bya ba las/ rgan pa ni bdag pas tshul khrims dang shes pa rgan pa'am mkhan po dang slob dpon no/ /gzhon pa ni bdag pas [(]da [,]de [)] dag gis dma' ba chung ba'o//yun rings pos zhes bya ba ni khyim pa rnams ni tshe ring ba la dga' ba'i phyir ro/ /bla ma dag gi mdun dag tu/ /snabs dang mchil ma mi dor zhing / /so shing bca' bar mi bya'o/ /de bzhin stan la mi 'dug cing / /mdun du bcag par mi bya'o/ /gos gcig dag kyang bgo mi bya//khyed rengs su yang mi dbyung ngo / /zhes bya ba la/ mkhan po dang slob dpon dang shes pa dang tshul khrims kyi yon tan gyis 'phags pa rnams ni bla ma ste/ de dag gi mdun du ming gis 'byung ba de dag mi dor mi bya'o/ /ci'i phyir zhe na/ ma rabs smad pa'i chos yin pa dang /ma gus shing bsnyems pa'i tshul yin pas spang bar bya'o/ /so shing za na yang phu rung gis kha bkab ste bza' bar bya'o/ /bla ma rnams la ji ltar bya zhe na/ rgan po rnams la sdom can gyis/ /gus bcas zhe sar bcas par bya ba ste/ rgan pa gong du smos pa rnams la lus kyi sgo nas kyang gus shing zhi bar bya ba dang /ngag gi sgo nas kyang tshig 'jam zhing gsong por smra ba dang zhe sa dang bcas par bya'o/ /bslab pa phra mo'i gnas bstan zin to// //lag pa dag par bsnyal nas ni/ /bum pa la sogs rdul med bya/ /zhes bya ba ni zas zos pa'i 'og tu/ kha lag legs par bkrus nas nang par spyad par bya ba'i chu btsag cing blang bar bya'o//chu'i snod bum pa la sogs pa rdul dang dri ma med par srog chags med par brtags nas chu yang btsag cing blang bar bya ste/ chu btsag pa'i thabs ni/ srog chags yod na legs par btsag /ces pa'i skabs su bstan pa bzhin no//gnas med par ni gnas mi bya/ /zhes bya ba ni bsnyen par rdzogs nas lo bcu'am/ lnga ma lon gyi bar du gnas ma bcas par gnas su mi dbang bas dge sbyong rnams kyis gnas med par zhag gcig kyang gnas su mi gnang ngo zhes bka' stsal to/ /dge 'dun mal stan la sogs pa//dran pa med par 'dug mi bya/ /zhes bya ba ni/ dge 'dun spyi'i mal cha dang stan khri dang khri'u la sogs pa ni shin tu spyad par bya ba ma yin pas mi rtag pa la sogs pa'i chos dran par byas te 'dug par mi bya'o/ /de lta bu'i dran pa med par ni 'dug par mi bya'o/ /de lta bu'i chos yid la byed pa dang ldan pas 'dug tu gnang ste/de bas na dran dang ldan na nyes med do/ /so bkru ba dang chu btung dang / /bshang gci byed du 'gro ba dang / /mtshams nang ston la phyag bya ba/ /de dag ma zhus nyes med do/ /zhes bya ba'i ming gis 'byung ba 'di dag ni mkhan po dang slob dpon la ma zhus kyang nyes par mi 'gyur ro zhes bstan to//brtul zhugs can gyis bya ba gzhan/ /de dag thams cad ma lus par/ /gal te bla ma ma zhus par/ /byas na de ni nyes byas 'gyur/ /zhes bya ba la/ dge sbyong gis bsgom zhing bklag par bya ba dang / gos dra ba dang 'drub pa la sogs pa las su ci bya ba kun kyang mkhan po la zhu bar bya ste/gal te ma zhus par sna 'ga' byas na nyes byas su 'gyur ro zhes gsungs so/ /mchod rten la sogs phyag byas te/ /mi nyal byas nas de 'og tu/ /bla ma'i rkang bkru/ /zhes bya ba la/ nub mo dge sbyong gis mchod rten dang sku gzugs la sogs pa la phyag byas te/zhu ba'i gnas gang yin pa'i gang zag la sang nang par gyi bar du mi nyal bar dge ba rngo thogs tshad du bgyi zhes zhu zhing de ltar byas pa'i 'og tu mkhan po dang slob dpon gnyis ka dang bla ma rnams kyi rkang pa chu gtsang mas bkru bar bya'o/ /bla ma la/ / brtul zhugs can gyis kun zhus te/ /zhes bya ba ni de ltar bla ma'i rkang lag bkru bar byas nas dge ba la sogs pa ci bya brtul zhugs can dge sbyong bdag gis zhus nas zhes bya ba'i tha tshig go/ /ci bya zhe na/ rkang pa gnyis ka bkrus nas ni/ /nam gyi cha stod cha smad la/ /bsgrims te mi nyal bya ba ste//zhes bya ba ste/ slar bdag gi gnas khang du phyin nas/ rkang pa gnyis dag tu bkrus te zhus pa bzhin nam gyi cha stod srod dang nam gyi cha smad tho rangs la bsgrims pa brtson 'grus chen pos mi nyal bar dge sbyor bya'o/ /de ltar byas na zhus pa bzhin dge sbyong des ni bden par smra bar 'gyur te/zhus pa bzhin du byas pa yin no/ /ldang dang snang ba'i 'du shes kyis/ /seng ge'i nyal thabs bzhin du bya/ /zhes bya ba la/ gnyid 'ong ste mal du lus phab pa'i tshe na yang bsam pa med par nyal bar mi bya'i/ myur du ldang ba'i bsam pa dang myur du sad cing snang ba'i 'du shes yid la byas nas seng ge bzhin du glo g.yas pa phab ste nyal bar bya'o//dran dang bsam pa'i rgyud dag dang / /de bzhin myur du sad nas ni/ /ji skad bstan pa bzhin du bya/ /zhes bya ba la/ de ltar snang ba dang ldang ba'i 'du shes kyis nyal ba ni dran pa'i bsam pa dang ldan pa zhes bya ba ste/des ni myur du sad cing ldang bar 'gyur ro/ /de ltar sad nas/ nam gyi cha smad mal nas langs/ /nam langs bar du kha ton bya/ /zhes ji skad bstan pa bzhin du bsgrub cing bsgom par bya'o zhes bya ba'i don to/ /phyi dro phan chad kyi bya ba bstan zin te / /da ni tshig rkang gsum gyis dge sbyong gi bslab tshig bsrung ba dang /snga dro dang phyi dro'i dus su kha zas bza' zhing chu gtsang ba dang / mkhan po dang slob dpon dang bla ma rnams la lus ngag gi sgo nas bkur sti la sogs pa'i las su bya ba ji ltar bstan pa bzhin du nyams su blangs te bsgrubs na yon tan dang 'bras bu gsum 'thob bo zhes bstan pa'i phyir/ji ltar nyon mongs myur zad nas/ /byang chub dam pa 'thob 'gyur ba/ /de ltar bsgrims dang ldan par bya/ /zhes bya ba smos te/ de ltar bsgrims dang ldan par bya/ /zhes bya ba ni gong du bstan pa bzhin nan tan byas na tshe 'dir yang nyon mongs pa myur du zad par 'gyur la/ma 'ongs pa na yang byang chub rnam pa gsum las dam pa bla na med pa'i byang chub thob par 'gyur ro/ /dge sbyong gi kA ri kA lnga bcu pa mdo tsam du bshad pa/ slob dpon ka ma la shI las mdzad pa rdzogs so// //