CLOSE WINDOW

D4117
བོད་ཡིག

@##/ /rgya gar skad du/ bi na ya sU tra/ bod skad du/ 'dul ba'i mdo/ bam po dang po/ thams cad mkhyen pa la phyag 'tshal lo/ /nges par 'byung ba'i tshul khrims kyi dbang du byas te/dge 'dun thams cad 'dus pa na cha lugs 'di bzhin byas/ rgan rims la phyag 'tshal te thal mo sbyar/ tsog tsog por 'dug cing gsol ba btab par gyur pa gsum dang /gsol ba dang bzhi'i las kyis cig car rab tu dbyung ba dang / bsnyen par rdzogs pa nye bar bsgrubs par gyur pa lta bu ni sngon gyi cho ga'o/ /rab tu 'byung ba dang bsnyen par rdzogs pa de'i phyir dge slong 'ga' zhig la mkhan po nyid du gnas pa la'o//dang po'i mkhan po nyid kyis bar chad dris nas yongs su dag pa la skabs dbye'o/ /dge bsnyen nyid dang dge tshul nyid dang dge slong nyid dag gis snga ma bsnyen par ma rdzogs pa la phyi ma mi bya'o//skyabs su 'gro bar khas blang ba'i tshig rtsom pa dang / dge bsnyen nyid dang dge tshul nyid du khas blang ba'i tshig bya'o/ /de'i 'og tu bslab pa brjod pa khas blang ba'i tshul gyis bya'o//rang gis dge bsnyen nyid du nye bar bsgrubs nas dge 'dun la zhu ba'i dge slong la gtad par bya'o/ /ci yongs su dag gam zhes dris la dag na zhu bar bya'o/ / thams cad 'dus pa la yang rung / gnas khang so so na 'khod pa la yang rung ngo / /thams cad kyis gal te yongs su dag na'o zhes brjod par bya'o/ /mkhan por gsol bar bya'o/ /gtsug phud ma gtogs pa skra dang kha spu breg par bya'o//gtsug phud breg go zhes dris nas ster na de'o/ /khrus bya'o/ /mkhan pos gos ngur smrig dag sbyin par bya'o/ /rkang pa gnyis la gtugs te blang bar bya'o/ /mkhan pos bsko bar bya'o/ /mtshan ma tshor bar brtag par bya'o//skyabs su 'gro bar rtsom pas rab tu 'byung ba nye bar bsgrub par bya'o/ /gsol ba'i 'og tu yang rung ngo / /dge tshul nyid du nye bar sgrub par byed pa'i dge slong la gtad par bya'o/ /ci yongs su dag gam zhes dris nas dag na nye bar bsgrub par bya'o//de ni slob dpon yin no/ /gsang ste ston pa dang las byed pa dang gnas sbyin pa dang klog pa yang ngo / /don grub na gyur pa nyid do/ /mkhan por gsol ba khas blangs pa na der gyur to/ / brjod pa tha ma gang yin pa'i cha gsum pa la grub pa nyid do/ /dper na gzhan brjod pa'i dus na dge tshul nyid bzhin no/ /'dir tha ma mkhan po'i don to/ /gnas sbyin pa ni zhag gcig gnas nyid kyi phyir nye bar gnas pa mthar thug na'o/ /klog pa ni tshigs su bcad pa gcig lan gsum bzlas na'o//klog pa'i bsam pa med pas brjod pa ni klog pa nyid ma yin no/ /de gnyis la gzhan du nye bar mi brjod do/ /gzhan la mi bya'o/ /don gyi slad du mtshan nas smos te zhes bya ba dang bcas par ma smras par mkhan po'i ming mi gzung ngo //dge tshul nyid du nye bar sgrub pa'i cho ga'o/ /dge 'dun las bsnyen par rdzogs par bya'o/ /mkhan po nyid du phyogs par gyur pas las byed pa dang gsang ste ston pa'i dge slong la gsol ba gdab par bya'o/ /mkhan por gsol bar bya'o/ /de rang gis de la chos gos gsum byin gyis brlab par bya'o//lhung bzed kyang mi chung ngam mi che'am mi skya ba'am zhes dge 'dun la bstan nas so/ /thams cad kyis de lta bu nyid ma yin na lhung bzed bzang ngo zhes brjod par bya'o/ /bkar nas las byed pas gsang ste ston pa la gang yin zhes bya bas smrar bcug ste spro bar byas nas de dge 'dun la gsol bar bya'o//khyod nyon cig ces bya bas lkog tu rjes su bstan par bya'o/ /ma bos kyi bar du ma 'ong bar sdod cig ces smras nas rjes su bstan na zhes bya bas dge 'dun la yongs su dag pa go bar byas te/ ci mchi zhig gam zhes bya bas 'ong ba zhu bar bya'o//thams cad kyis gal te yongs su dag na'o zhes brjod par bya'o/ /las byed pas bsnyen par rdzogs pa gsol du gzhug go/ /dge 'dun la gsol nas bar chad dri bar bya'o/ /bsnyen par rdzogs pa nye bar bsgrub par bya'o/ /de ma thag tu grib tshod rig par bya'o//de ni thur ma sor bzhi pa bzang ngo / /de ni skyes bu nyid ces tha snyad du bya'o/ /nyin mtshan gyi cha snga dro la sogs pa dang / dus tshod kyang ngo / /de dag ni lnga'o/ /dgun gyi dus dang / dpyid kyi dus dang / dbyar gyi dus dang / dbyar thung ngu'i dus dang / dbyar ring po'i dus so//dang po gnyis ni zla ba bzhi bzhi'o/ /'og ma ni zla ba gcig go/ /de'i 'og ma ni nyin zhag gcig go/ /tha ma ni des zla ba gsum du ma chog pa'o/ /gnas rnams brjod par bya'o/ /ltung bar 'gyur ba'i chos rnams dang / dge sbyong du byed pa'i chos rnams kyang ngo //mchog tu 'dod par bya ba yang dag pa nyid kyis rdzogs pa nyid brjod nas tshul khrims kyis mnyam par gyur pa nyid bsgrub pa la nges par sbyar bar bya'o/ /tshul dang 'brel ba'i gzugs brnyan dang / dul bar gnas pa nyid dang / dgos pa rjes su sgrub pa la yang ngo //ma brjod pa yang dag par blangs pa yongs su shes pa'i sgrub par 'gyur ba nyid kyang brjod par bya'o/ /gus pa la yang nges par sbyar bar bya'o/ /bsgrub par bya ba thabs brjod pa dang bcas pa yang ngo / /bsnyen par rdzogs pa'i cho ga'o/ /gnas pas gnas pa la ma zhus par bya ba mi bya'o//bshang ba dang gci ba dang so shing dor ba dang nye 'khor dang bcas pa'i gtsug lag khang du mchod rten la phyag bya ba ni ma gtogs so/ /gtsug lag khang nas 'dom bzhi bcu rtsa dgu'i mtha' tshun chad du 'gro ba yang ngo / /lhung bzed dang chos gos kyi las dang nad g.yog dang 'gyod pa bsal ba dang sdig pa can gyi lta ba'i rnam pa spang ba la e ma'o bdag gis bya'o zhe'am byed du gzhug go zhes brtson pa shas chen pos bsgrub par bya'o//nan tur byed par 'dod pa'i dge 'dun la e ma'o dge 'dun gyis 'di la nan tur gyi las 'di lta bu mi bya'o zhes kyang ngo //byas na bzod par bya'o/ /spo ba dang gzhi nas spo bar bya ba dang / /mgu bar bya ba dang gzhi nas mgu bar bya ba dang dbyung bar 'dod pa la sbyin par bya zhing dbyung bar bya'o/ /des kyang de la de bya ste zhu ba ni ma gtogs so/ /bsnyen par rdzogs nas lo bcu ma lon par mkhan po nyid dang gnas nyid dang mi gnas par 'dug par mi bya'o//'og nas 'byung ba dag las lhan cig sbyar ba gang dang yang mi ldan pas ni ma yin no/ /nad g.yog dang 'gyod pa bsal ba dang sdig pa can gyi lta ba'i rnam pa spang ba dang / gnas mngon par mi dga' ba dor ba dag la byed dam byed du 'jug nus pa'o//slob pa nyid yan chad lnga pa ma yin pa la tshul khrims dang ldan pa nyid dang mang du thos pa nyid sbyar ro/ /sde snod mngon par shes pa nyid do/ /de dag 'dzin du 'jug nus pa nyid do/ /lhag pa'i tshul khrims dang sems dang shes rab la slob pa nyid do//slob tu 'jug kyang nus pa nyid do/ /lhag pa'i spyod pa dang 'dul ba dang so sor thar pa la yang de bzhin no/ /dad pa dang tshul khrims dang thos pa dang gtong ba dang shes rab phun sum tshogs pa nyid do/ /tshul khrims dang ting nge 'dzin dang shes rab dang rnam par grol ba dang de shes pa dang mthong ba rnams kyis kyang ngo //brtson 'grus brtsams pa nyid dang / shes rab dang ldan pa nyid dang yang sbyar ro/ /dran pa dang ldan pa nyid dang / nang du yang dag gzhag pa nyid dang mnyam par gzhag pa nyid do/ /slob pa nyid do//mi slob pa nyid do/ /byung ba dang bcas pa dang rjes su bcas pa dang bkag pa dang gnang ba mngon par shes pa nyid do/ /bar du gcod pa dang bar du gcod pa ma yin pa mngon par shes pa nyid dang smra ba po dang rjes su ston pa nyid dang gnas dang re zhig gi gnas 'char 'jug nus pa nyid dang yang sbyar ro//ltung ba dang ltung ba ma yin pa dang yang ba dang lci ba nyid mngon par shes pa nyid dang so sor thar pa dang rgyas pa thon pa nyid do/ /rgan pa med na gzhon pa la gnas bca' bar bya'o/ /'dud pa 'ba' zhig ma gtogs so/ /lo lnga lon zhing lhan cig sbyar ba tha ma dang ldan na gnas ma bcas par ljongs rgyur 'gro bar bya'o//gzhan du na gsum rig pa yin yang mi bya'o/ /gnas kyi skabs so/ /rab tu 'byung ba'i phyir nye bar 'ongs pa la mu stegs can ma yin nam zhes dri bar bya zhing bsnyen par rdzogs par byed pa dag gis kyang bya'o//shAkya dang me pa ral pa can ma gtogs pa sems mgu bar ma gyur pa'i mu stegs can rab tu dbyung ba dang bsnyen par rdzogs par mi bya'o/ /bkol ba de ni mu stegs can dang shAkya la sogs pa'i 'jug gi mu stegs can bkol ba'o/ /dkon mchog rnams kyi bsngags pa dang mu stegs can rnams kyi bsngags pa ma yin pa yang dag par brjod pa na mi g.yo ba nyid ni sems mgu bar gyur pa nyid do//de'i don du de dang mi ldan pa de dge bsnyen nyid du byas pa'i mtha' can de la dge 'dun gyis las kyi gnas pa byin la zla ba bzhir gnas par bya'o/ /de'i zan ni dge 'dun las so//gos ni mkhan po las so/ /las su bsko ba'i byed pa po nyid do/ /rab tu byung ba'i phyir nye bar 'ongs pa la lo bco lnga lon nam zhes dri bar bya'o/ /ma lon pa bya rog skrod mi nus pa dang / nus pa lo bdun ma lon pa rab tu dbyung bar mi bya'o/ /dge tshul gcig las lhag pa nye bar gzhag par mi bya'o//gal te so sor rab tu 'byung bar mi 'dod na rab tu phyung la rgan pa bsnyen par rdzogs par bya'o/ /gal te ma lon na gzhan la re zhig gnas pa'i don du gtad par bya'o/ /des de dbrog par mi bya'o/ /bsnyen par rdzogs par bya'o/ /mi ster ba las mthus bkug ste'o/ /bkol ba bran no/ / yin nam btang la khyod la la la'i bu lon mang yang rung nyung yang rung cung zad chags pa med dam zhes bya'o/ /rab tu 'byung bar 'dod pa pha ma gson zhing de gnyis kyis ma gnang ba yul thag mi ring ba ni zhag bdun pa bsrel bar bya'o/ /de yul thag ring na yang dge 'dun la ma zhus par rab tu dbyung bar mi bya'o//rab tu dbyung bar 'dod pa'i zan ni dge 'dun gyis byin na rung ngo / /bkol ba pha mas gnang ngam mjug tu yul thag ring ba ni ma gtogs so/ /nye bar 'ongs pa la nad pa ma yin nam zhes dri bar bya'o/ /khyod la nad gang yang rung ba med dam zhes byar yang rung ngo //bsnyen par rdzogs par byed pa dag gis bye brag tu'o/ /nad pa rab tu dbyung ba dang bsnyen par rdzogs par mi bya'o/ /bkol ba chad pa yan chad do/ /'di la skye ba'i chos nyid med par yang 'dra'o/ /de lta bu'i rtags can ni bsnyil bar bya'o/ /sprul pa'o/ / ma ning ngo / /de ni rnam pa lnga'o/ /skyes nas dang / zla ba phyed pa dang / 'khyud nas ldang ba dang / phrag dog can dang / nyams pa'o/ /'di las tha ma ni nyes pa brten na bsnyil ba'o/ /rku thabs su gnas pa'o/ /bsnyen par rdzogs pa'i cho ga ma byas pa nyid dam ma chags pa nyid du shes la lan gnyis su dge 'dun dang lhan cig las nyams su myong bar gyur pa nyid na de nyid yin no//mu stegs can zhugs pa'o/ /rab tu 'byung ba 'di yang dag par blangs pa lta ba de dang ldan pa chos gos 'di bor te rgyal mtshan des der skya rengs shar na de nyid yin no/ /de ma byas pa yang rku thabs dang 'dra'o//ma bsad pa dang pha bsad pa dang dgra bcom pa bsad pa dang / dge 'dun gyi dbyen byas pa dang / de bzhin gshegs pa la ngan sems kyis khrag phyung ba dang / dge slong ma sun phyung ba dang / pham par 'gyur ba bzhi las ltung ba gang yang rung ba zhig byung ba ma yin nam zhes so//rgyu las bzlog pa'i chad pa khas mi len pa dag rab tu dbyung ba dang bsnyen par rdzogs par mi bya'o/ /bsnyen par rdzogs na bzod pa gsol zin pa yin no/ /gal te bsnyen par rdzogs nas khas mi len pa ni tshogs pa yod na yang chad pas bcad do/ /gal te mthong ngo zhes brdzun zer na ltung byed do//lag rdum dag dang rkang rdum dang / /lag sor zlum por 'jas pa dang / /mchu med lus la rma mtshan can/ /rgan ches pa dang gzhon ches dang / /theng po smad 'chal zhar ba dang / /lag sor rdum sgur mi'u thung dang / /lba ba lkugs pa 'on pa dang / / rten 'phye dang ni rkang bam dang / /bud med kyis dub khur gyis dub/ /mi gang lam gyis dub rnams dang / /ya za ma lug gta' gam dang / /de lta bu yi mi rnams ni/ /drang srong chen pos dgag pa mdzad/ /mdzes pa rab tu dbyung ba dang / /yongs su dag pa bsnyen rdzogs par/ / rdzogs sangs rgyas kyis rab mkhyen te/ /bden pa'i mtshan gyis bka' stsal to/ /bsdu bar bya ba'i skabs rdzogs te rab tu 'byung ba'i gzhi rdzogs so// //bkol ba rgyal pos bkrabs pa'o/ /rgyal pos gnang ba yul thag mi ring ba'o/ /bkol ba chom rkun par grags pa'o/ / lham mkhan dang gdol ba dang g.yung po dang de lta bu rab tu dbyung bar mi bya'o/ /lag rdum la sogs pa ni mtshon pa yin no/ /skra ser dang ni skra ser skya/ /de bzhin skra ni ljang gu kha/ /mi rnams skra ni dkar ba dang / /glang chen skra 'dra skra med dang / /mgo 'bar 'bur can glang po che/ /ha cang sbom dang lus glebs 'dra//bong bu phag gi mgo lta bu/ /mgo gnyis pa dang mgo chung dang / /glang chen rna 'dra rta rna 'dra/ /ban glang rna 'dra spre'u rna 'dra/ /bong bu'i rna 'dra phag rna 'dra/ /rna gcig pa dang rna med dang / /mig dmar ha cang mig ches dang / / mi ga chung mig ha cang ser/ /shel mig mig chu bur lta bu/ /mig gcig pa dang mig med dang / /glang chen sna 'dra rta sna 'dra/ /ba lang sna 'dra spre'u sna 'dra/ /bong bu'i sna 'dra phag sna 'dra/ /sna sbugs gcig dang sna med dang / /glang chen kos 'dra rta kos 'dra/ /ba lang kos 'dra spre'u kos 'dra//bong bu'i kos 'dra phag kos 'dra/ /kos smyung dang ni kos med dang / /glang chen so 'dra rta so 'dra/ /ba lang so 'dra spre'u'i so 'dra/ /bong bu'i so 'dra phag so 'dra/ /so gcig pa dang so med dang / /mgul rings ches dang mjing nub dang / /phrag mig dang ni ches sgur dang //pho mtshan chad dang rlig rlugs dang / /rlig gcig dang ni rlig med dang / /ha cang rings dang ha cang thung / /skem po ma 'os ngal skyen dang / /sha mdog kha dog rnam bzhi dang / /de bzhin gyol po lus nyams so/ /rnam pa de lta bu dag gis 'gags pa de yang rab tu gzung bar bya'o//rigs dang lus la skyon chags pa rab tu phyung ba ni nye bar gzhag par mi bya'o/ /du ma mkhan po gcig pa gsum man chad tshig gcig gis bsnyen par rdzogs par byar rung ngo / /dus mnyam pa rnams ni gcig la gcig phyag mi bya'o/ /sngar 'ongs pa dang po yin no/ /dgon pa pas skra sor gnyis las lhag par mi bzhag go//grong mtha' pas ni de'i 'og ma nyid las mi bzhag go/ /skra ba lang gi spu 'dra bar mi breg go/ /rma yi than kor ni ma gtogs so/ /gtsug phud byed du mi gzhug go/ /mdoms kyi spu breg tu mi gzhug go/ /rma yi ched du gzhan gyis mi 'tsho na mkhas pa gnas brtan gnas brtan dag la dris te 'breg tu gzhug go//byin pa'i spu breg pa yang de'i phyir ma yin par byed du mi gzhug go/ /lus gzhan gyi yang mi bya'o/ /sen mo spu gri'i so lta bu'am ste'u'i kha lta bur breg par bya'o/ /de dag spyil bar mi bya'o/ /dri ma bsal ba'i phyir brud par bya'o//chos gos gyon bzhin du skra dang kha spu breg par mi bya'o/ /skra bzed bcang bar bya'o/ /med na rngul gzan gyis so/ /gding bar yang mi bya'o/ /gang du dge 'dun phyag dar phyags par yang mi bya'o/ /rgan po dang nad pa dang rlung dang nyi ma dang char pa dag la khyams la sogs par 'breg tu gzhug par bya'o//phyogs de byi dor bya'o/ /skra ni phyag dar khrod du dor ro/ /sen mo bcad pa yang de bzhin no/ /de 'dod chags dang bral ba ma yin na dge slong mas zhal ta ma byas par skyes pas skra mi breg go/ /kun tu chags par gyur na zhal ta byed pa mos rjes su bstan par bya'o//dran pa nye bar zhog cig /ci rnag gi lus 'di la snying po yod dam zhes so/ /'breg mkhan la ni ma dang sring mo'i 'du shes nye bar zhog cig ces so/ /de byas nas khrus bya'o/ /yang na yan lag lnga'i khrus kyang ngo / /sgren mor khrus mi bya'o/ /dge slong mas skyes pa'i chu ngogs su mi bya'o//bud med kyi chu ngogs su yang phye mas mi bya'o/ /mon sran sde'u la sogs pa'i phye ma dris bsgos pa rung ngo / /de ni blang bar bya'o/ /nad pas ni sman gyis dgos pa yang ngo / /dge slong mas bud med la phye mas mi gtor ro/ /sham thabs kyi tha ma nyid kyi mdun dang rgyab kyi mtha' ma mdud par skas la mi 'dzeg go//gzhan gyi dus su de ltar mi bya'o/ /kha ma bkab par gdangs par mi bya'o/ /khrus ras bcang bar bya'o/ /nyi rim la ni srog chags dag kun tu 'chags so/ /chos gos gsum par kyang ngo / /med na mdun dang rgyab nas lo ma dag gis glan la dben pa'i phyogs su khrus bya'o//srog chags chags na bshal bas med par 'gyur ro/ /de gtsug lag khang du ni stor khung du'o/ /btsog chu yang dbo bar bya'o/ /khrus khang bya'o/ /der so phag gi gcal dgram mo/ /stor khung gdod do/ /ljan ljin bsal bar bya'o//stor khung du khrus byed na de mi 'byung ngo / /so phag gi dum bus brud pas rkang pa gnyis las gzhan pa'i lus la brud par mi bya'o/ /de ni rnon po dang bzhar bcad gnyis kyi dpe yin no/ /nya lcibs ni mes sbyong ngo / /dge slong mas ni gang du yang khu tshur dag dang gos dril ba dag yan lag gang gis kyang brud par mi bya'o//gsher 'gyur gyi chu dang ma bral bas chos gos bgo bar mi bya'o/ /lus phyis bcang bar bya'o/ /med na yud tsam tsog pur 'dug la khrus ras kyis phyi bar bya'o/ /bsro khang bsten par bya'o/ /bsro khang gi bya ba ni gram sa che bar bzang ngo //dkyil du skar khung phyi rub la nang yangs pa rgya mtsho'i rnam pa lta bur gdod do/ /der skar khung dra ba can dang sgo glegs can dang 'khor gtan dang gnam gzer dang 'phred gtan dang bcas par gzhug go/ /dbyug gu skam kha yang nye bar gzhag go/ /sgor sgo glegs dang sgo gtan dang yang mig dang lag gzungs legs par bya'o//chu dron gzhag pa'i phyir nang gi phyogs su bzhag stegs bya'o/ /me bud pa'i gnas kyi sar so phag gi gcal bya'o/ /me mched par bya ba'i phyir spang bar bya'o/ /de'i ched du lcags kyi thal phyags bcang bar bya'o//me 'bar ba na mi rmya bar bya ba'i phyir 'jug pa bsdad par bya'o/ /bog pa mi dbyung bar bya ba'i phyir dang phye dang yungs mar du bsres pa dag mer blugs so/ /dri mi zhim pa bsal ba'i phyir bdug spos blugs so/ /mchi ma 'dzag na nas kyi bag zan gyis bcad do/ /skyu ru ra'i phye ma sbrus pa'i chang bus kyang ngo //de rtswa bam gyi stan gding ngo / /sa gzhir skye ba nyid kyis sam sbangs pas gsher ba'i rtswa gsher ba dag dgram mo/ /g.yan pa phrug pa'i ched du lcags kyi phrug spyad bya'o/ /rdzas kyi blas lung mig nas thag gus btags te dben par gzhag go/ /de la dri ma med pa nyid du bsgrub pa'i phyir mes rung bar bya'o//der khrus mi bya'o/ /de'i ched du khrus khang bya'o/ /khrus chu ldugs pa'i chos gos dag mi nyams par bya ba'i phyir so phag gis sbron pa'i khrus dong bya'o/ /de la stor khung gdod do/ /chu ha cang tsha na phyi ma rnams la sbran par bya'o/ /der grang mos bsre'o//chag chag gis chu la sogs pa yang ngo / /thal ba dang ba lang gi lci ba dang so shing gis bkang ba'i gyo mo dag gzhag par bya'o/ /gal te nyams dmas par gyur na khye'u sus bya'o/ /der ngo mi shes pa zhig shan bsre bas nye bar gnas par gyur na der gtogs pas nges par shes par bya ba'i phyir dri bar bya zhing /de'i ched du mi 'jug par bya ba'i phyir dge slong bsgo ba bsko'o/ /der ma dad pa dag 'jug tu mi gzhug go/ /der byi dor gyi las ni lhan cig gnas pa dang nye gnas dag gis bya'o/ /gzhan las ni gzhon rabs dag gis bya'o/ /sbar ba dang zangs dang 'bru mar dang so shing dang ba lang gi lci ba dang sa dang phye ma dang chu la sogs pa nye bar gzhag pa dang /shing brtag pa dang dril phyis dang snum gyis bsku ba dang / bkru ba dang phyags pa dang phyag dar dor ba la sogs pa'o/ /de dag gi ni gcig gis gcig la'o/ /khri'u dang nya lcibs dag kyang gtsang sbra nyid byas nas gnas ji lta bar gzhag go//snod spyad thams cad la cho ga de bzhin no/ /yo byad thams cad legs par sba ba dang byi dor bya'o/ /der sgra bskyungs te 'jug par bya'o/ /mdzes par ro/ /legs par bsdams pa dang spyod lam mdzes pa dang shes bzhin du'o/ /mdun du 'dug ste me mi 'de'o//'du 'dzi'i gtam spang ngo / /'phags pa mi smra ba nyid la dmigs pas so/ /mjug tu rgyun chags gsum pa gdon no/ /gos gcig pas byi dor gyi las mi bya'o/ /lus kyis de ma dad pa byed du mi gzhug go/ /'di dang gong ma la yang bstan pa ni dad pa can du 'dod do//seng ge lta bus wa lta bu la bsnyen bkur mi bya'o/ /slob dpon dang mkhan po ni mchog tu tshul khrims 'chal ba la yang bsnyen bkur bya'o/ /pha ma dang nad pa dag ni khyim pa yin na yang ngo / /legs par sbyar ba'i khrus kyis bkru'o/ /rlung 'dren pa'i rtsa ba dang sdong bu dang lo ma dang me tog dang 'bras bu bskol bas khrus bya ba ni de'i ming yin no//bsku mnye byas nas de ni mi rtsub pa nyid kyi phyir ro/ /de dang dbral ba'i phyir khrus chal gyis so/ /snga ma'i ched du chu'i bum pa phyi mar snum thigs pa gnyis sam gsum blugs so/ /lcags kyi gzhong rings su khrus bya'o//de ni nad pas bcang bar bya'o/ /de'i steng du kha gab gzhug go/ /der gnya' bar sngas nang tshangs can gzhug go/ /gar bab bab du rkang pa mi bkru'o/ /de'i gnas ni wa khar ro/ /rkang khrus kyi gzhi bya'o/ /gtsug lag khang gi steng gi shar lho'i mtshams su'o/ /rus sbal gyi rnam pa 'dra bar rtsub par ro//chol zangs sa las byas pa gzhag par bya'o/ /zhabs glang po che'i rmig mthil 'dra ba snying po can no/ /dbus na yod pa ka dam pa'i me tog 'dra la rtsub pa dang ngo / /bkrus nas khas bub tu gzhag go/ /dge 'dun gyi ni khang thog tu'o//gang zag gi ni gnas khang gi sgo glegs kyi phag tu'o/ /gtsug lag khang gi phyogs gang du lhung bzed kyi byi dor la sogs pa byas pa der chus byug go/ /yang na bsku'o/ /mdung rtse'i rnam pa lta bu'am rdza rnga'i rnam pa lta bur ro/ /ba lang gi lci ba'am 'jim pas so/ / dkon mchog gi don nyid du brku ba la ni rnam pa nges pa med do/ /lhung bzed med par rab tu dbyung ba dang bsnyen par rdzogs par mi bya'o/ /chung ngu dang chen po dang skyabs kyang mi bya'o/ /kha'i cha'i mtha' kho na nas mthe bo'i lto gang gis lhag mar 'bras thug po che ma ga d+hA'i bre'u chung gang btsos pa sran tshod dang bcas pa lhag pa nas do'i bar de shong ba de ni rigs pa yin no//dge slong mas dge slong gi chung ngu las lhag pa mi bcang ngo / /des de'i gzhir zha nye'i dbyar 'dab gzhag par bya'o/ /byang chub dang pa ta la'i lo ma'am lag mthil gyi rnam pa lta bu'o/ /tshad las kyang ngo //brnyan pos kyang de nyid dang bcas pa yin no/ /lnga po yang de bzhin no/ /dbyar dag lhung bzed med du mi rung ngo / /ljongs rgyu zhing 'gro bar mi bya'o/ /'jigs pa dang bcas pa nyid du lhung bzed chung ngus 'gro bar bya'o/ /med na rab tu dbyung bar bya'o/ /'greng bzhin du lhung bzed dbyung ba dang gzhug pa dang bskam par mi bya'o//ran par spyad par bya'o/ /gzhan gyis spangs pa der mi blugs so/ /des phyag dar mi dor ro/ /ngan pa yang mi dor ro/ /lag pa dang khas chu mi blugs so/ /dge tshul bag med pa'i chos can byi dor byed du mi gzhug go/ / bye ma can dang lci bas mi bya'o/ /ha cang gsher bzhin du 'phyir mi gzhug go/ /ha cang bskam par mi bya'o/ /rdo'i steng du mi bzhag go/ /mi gtsang ba'i phyogs su mi bzhag go/ /gar bab bab du ma yin no/ /der mi bzhag go/ /de'i ched du ngos khung bya'o/ /gtsug lag khang dang khang khyim dag rtsig pa'i tshe bya'i/rtsig pa brko bas ni ma yin no/ /dgon pa pa rnams kyis skon bu kha sbyar bya'o/ /lcug ma'am srad bu las byas pa'o/ /lci ba dang sas byugs pa'o/ /kha gab rnam pa de lta bu dang bcas pas so/ /de ni gzar thag gis shing la dpyangs na bzang ngo //sa la mi bzhag go/ /de bzhin du mi bskur ro/ /snod du bcug ste bskur bar bya'o/ /lag pas mi bskur ro/ /bskur ba ni lung thag btags te mchan khung gis so/ /lhung bzed dang sman dang bar bur dag snod tha dad par gzhug go/ /de dag bcang bar bya'o/ /de dag la dpyang ba'i lung thag mnyam par gdags par mi bya'o//sdug bsngal mi 'dod pas ni zheng chung ngu dag kyang ngo / /zhum par mi 'gyur bar bya ba'i phyir dbus su phying bus sbyar bar bya'o/ /de gnas par bya ba'i phyir mdo mdor bya rog rkang bya'o/ /lhung bzed mig bzhin du bskyang bar bya'o/ /snam sbyar pags pa dang 'dra bar ro//chos gos lhag ma yang ngo / /bcos legs bya ba yal bar mi dor ro/ /lhung bzed glan pa la nan tan bya'o/ /dben pa'i phyogs su'o/ /dge 'dun gyis mgar spyad dag bsrel bar bya'o/ /bu gu'i lhan par bu ram dang rgya skyegs kyi tshigs ma dang spra tshil dang ro nye dang tshon mo steng dag mi bzang ngo //lhan rings dang tham phran dang lhan pa chu srin gyi so lta bu dag bzang ngo / /phye mas kyang ngo / /lcags kyi'am rdo'i 'o/ /'bru mar dang bdar ba spra tshil dang 'dra ba la thug par gyur pas so/ /lcags sam ku ru bin das so/ /dro ba la glan no/ / dro bas g.yogs te 'jim pas bskus la ci ran tsam du bsro'o/ /'bru mar gyis bdar ro/ /sa las byas pa'i ni bu ram dang 'jim pas so/ /spyod pa nyid yin na zla ba drug gi 'og tu bsreg par bya ba nyid yin no/ /gal te sa las byas pa nyid yin na zla ba phyed na'o/ /gal te dbyar byung na de'i bya ba'i bar du bsku ba dang rtsub khrus nyid kyis legs par bcos pa nyid bya'o//de bsreg par bya'o/ /de'i ched du rdza bo bsrel bar bya'o/ /de nyid du grub pa'am dbyib mo yang rung ngo / /thal bas bkang ste rdza gzong gis brkos na bzang ngo / /de bcang bar bya'o/ /des du ba mi 'chor bar dgab po//phub ma dang 'jim par sbyar bas phyi rol byugs pas so/ /'bru mar gyi tshigs ma'am lci bas nang byugs pas so/ /skams par gyur pas so/ /sa gzhi byi dor byas par phub ma bting zhing du ba 'tsher bar byed pa 'bru mar gyi tshigs ma la sogs pa'i rdzas bkram pa'i steng du khas bub tu bzhag pa la'o//lci ba dang sog mas bcer te me sbar ro/ /te por grangs nas dbyung ngo / /kha dog rdzogs pa phun sum tshogs par gyur gyi bar du bzlas par bya'o/ /byi dor byas shing gzhug par bya'o/ /srog chags rnams la snying brtse bas nyen kor phyag dar dang chag chag bya'o//lo tshigs mi shes na mtshan gyi nyen kor du spu skyes pa bsnyen par rdzogs par khas blang bar bya'o/ /de ni sgyu thabs kyis brtag par bya'o/ /zung dang gos kyi gdang mthon po la 'dug pa'i dngos po dbab pa la sogs pas so/ /bsnyen par rdzogs par 'dod pa shing la 'dzeg tu mi gzhug go//mtshams kyi phyi rol tu mi gtang ngo / /de ltar snang ba'i nyen kor du bkar te tshogs la mngon du phyogs par thal mo sbyar te gzhag par bya'o/ /khyim pa la gnas brjod par mi bya'o/ /bsnyen par rdzogs ma thag pa la mi brjod par mi bya'o//gang na gnas med pa der gso sbyong la bsdad pa dang gnas par khas blang bar mi bya'o/ /gnas par khas blangs pa snga ma rjes su bsrung bar mi bya'o/ /phyi ma la yang zla ba gnyis las lhag pa'o/ /gnas dang las dang nye gnas kyi sta gon gyis de btsal bar bya'o/ / med na gzhon nu'i nang nas ches rgan pa la zhu bar bya'o/ /yod na yang re zhig gi gnas nyid kyis so/ /ma zhus par de lta bu la bdag gis sam des kyang bsnyen bkur gyi las mi bya'o/ /gnas par 'os pa yongs su tshol ba la zhugs pa ni med na mi gnas par 'dug pa la nyes pa med do//zhag lnga'i mthar thug pa'i bar du'o/ /rnyed pa yod na 'os pa nyid do/ /glo bur du 'ongs pas ni ngal bsos nas nyi ma gnyis pa'am gsum pa la gnas bca' bar bya'o/ /nyi ma gcig ni ched du mi bya'o/ /gnas pa nye bar mi gnas na gzhan la zhu bar bya'o/ / las su bskos par song ba na de gzhan du byung ba na ma zhus kyang nyes pa med do/ /gang yang rung ba la mi bya'o/ /dri ba la sogs pas tshul khrims dang shes pa dang 'khor ba la phan 'dogs pa nyid nges par shes par byas nas de gzung bar bya'o/ /sdom pa bzhin no/ /lag pa gnyis kyis rkang mthil gnyis la bcangs nas so//yongs su brtags nas sbyin no/ /bu dang pha'i 'du shes bskyed par bya'o/ /mkhan po de nyid gnas nyid yin no/ /de'i phyir de la de mi bca'o/ /gnyis ka la mi ltos pa nyid byung na ni gnas bcas pa 'jig pa'i rgyu yin no/ /mkhan po ma yin pa dag tshogs na 'dod pas 'jug par bya'o//de dang de gnyis kyis so/ /mkhan po mthong ma thag tu stan las ldang bar bya'o/ /gtsug lag khang de na 'dug na gnas pas nyin par lan gsum 'gro bar bya'o/ /gal te dgon pa na 'dug pa la rgyang grags tsam na nyin re lan re'o//rgyang grags lnga yod na zhag lnga'am drug cing ngo / /dpag tshad phyed dang gsum dag na gso sbyong gi tshe'o/ /gnas pa chad pas bcad par 'os pa chad pas mi bcad par mi bya'o/ /chad pa ni lnga'o/ /gtam 'dre bar mi bya ba dang / gdams ngag mi sbyin pa dang / bsnyen bkur dang chos dang zang zing dag gi longs spyod du mi gzhug pa dang / dge ba'i phyogs brtsams pa rgyun bcad pa dang / gnas dgag par bya ba'o/ /ma dad pa dang le lo can dang bka' blo mi bde ba dang ma gus pa dang sdig pa'i grogs byed pa la de dag 'os pa nyid do/ /chad pas bcad pa gzhan gyis len par byed pa la nyes pa sbom por 'gyur ro//gus par mi byed na drang por bya ba'i phyir dge slong shes nyen can bsko bar bya'o/ /rgyu btang ba bzod pa gsol bar byed pa la bzod par bya'o/ /mi 'os pa chad pas gcad par mi bya'o/ /'os pa la mi bzod par mi bya'o//mi 'os pa la bzod par mi bya'o/ /mi byed pa nyid yin na gnas khang nas bskrad par bya'o/ /dge tshul la ni chu tshags dang ril ba spyi blugs dang mthang gos dang bcas pa'i bla gos kyang byin te'o/ /gal te bsnyen par rdzogs par 'dod pa zhig yin na yo byad lnga'o/ / bsnyen par rdzogs pa la yang ngo / /seng ge ltar gya tshom mi bya'o/ /gnod par 'gyur ba'i khrims su bca' ba mi bya'o/ /kha'i gnas pa nyid ni ma bkrus pa nyid yin no/ /so shing dben par dor ro/ /bshang gci bya ba yang ngo / /longs spyod du rung ba'i shing ngam rtsig pa'i drung du mi dor ro//de'i tshad ni sor bcu gnyis man chad sor brgyad yan chad do/ /bad kan mang ba'i ni med na sor bzhi las lhag pa yan chad do/ /gnas khang du chol zangs kyi nang du so shing dor ba la mi rigs pa med do/ /de la wa kha yang mi dben par 'gyur ro/ / der khru gang khor yug tu rnam pa de lta bu byar rung ba nyid do/ /de'i rjes la lce bzhar bar bya'o/ /lce bzhar nye bar gzhag par bya'o/ /khab kyi rdzas dag las so/ /don 'di la so shing gi tshal pa rung ngo / /de mi rno bar bya ba'i phyir gcig gis gcig drud par bya'o/ /mi rno bas so dang lce dang rna ba drud bzhar bya'o//dal gyis ma yin par mi bya'o/ /de dag gis sha la mi gnod par ro/ /so dang lce gnyis kyi drud bzhar gyi phyogs kha'i dri mas gos pa ma bkrus sam sas ma bskus par mi dor ro/ /sgra ma byas par mi dor ro/ /de ni dpe yin no/ /bshang ba dang gci ba dang mchil ma dang snabs dang skyugs pa dang rlugs pa gzhan dag kyang ngo //de las byi dor 'byung bzhin du 'dag rdzas dang lci ba las kyang ngo / /lus kyi bya ba bsgrubs ma thag tu mchod rten la phyag bya'o/ /gnas pas sgrub pa'i dbang du byas te de nas de ma thag tu sngar song ste phyag bya'o//bsnyun gsol lo/ /'dag rdzas dang so shing dbul lo/ /tshang mang bltas te brjod par bya'o/ /dga' ba bstabs pa nyid du yid la bya'o/ /lhung bzed bkru bar bya'o/ /gal te bsod snyoms pa zhig na gsil byed kyang ngo / /gal te dgos pa yod na chu tshags kyang ngo //gal te de yang yin na zhu bar bya'o/ /gal te bzod cing 'dod na de nyid dang lhan cig 'jug par bya'o/ /nyam nga ba la sogs par mdun du 'gro bar bya'o/ bsod pa zhig na de la bsngo bar bya'o/ /gal te ma 'grogs na 'ongs nas bstan par bya'o/ /ches mchog tu gyur pa dbul bar bya'o//des thams cad la tshod rig par bya'o/ /chu snod dgang bar bya'o/ /dus brjod par bya'o/ /zan zos nas lhung bzed la sogs pa bkru bar bya'o/ /de dag gzhag par bya'o/ /mchod rten la phyag 'tshal ba na 'dag rdzas dang chu la sogs pa dbul lo//rkang pa bkru bar gtogs pa la nan tan bya'o/ /mal dang stan bsham par bya'o/ /sham thabs kyi gzan dbul bar bya'o/ /sham thabs blang bar bya'o/ /rkang pa'i chu dang rten dang tshol zangs dbul bar bya'o/ /mchil lham gnyis phyi'o/ /sgrub par byed pa nyid du ma bskos par phyags ma thogs pa mthong na las chung bar bya'o//gos 'tshem pa nyid du ma bskos par khab thogs pa yang ngo / /rung bar bya ba dang sngo chung ngu brnga ba dang me tog dang 'bras bu btog pa dang / so shing nye bar bsgrub pa la sogs par yang dge tshul bsko'o/ /sgo glegs la brdabs pas nang na gnas pa la go bar bya'o//de ni dal bus dang yun mi ring bar bya'o/ /de drag tu mi phul lo/ /dal bus shes bzhin du 'jug pa dang 'byung ba dang sgo skyes la mi 'drud par bya'o/ /de la bkur sti bya'o/ /bzhar bar bya'o/ /de dang zhe 'gras pa la mi bzhar ro/ / de la khrel yod par bya'o/ /de'i bya ba la grims par bya ba dang / gus par byas te bya ba dang / mdzes pas 'jug par bya'o/ /ngo tsha dang ldan pa dang gus pa dang bcas pa dang rjes dang bcas pa dang sems dma' ba dang shes bzhin gyis rang gi don mi nyams par bya'o/ /dge ba gang yin zhes tshol ba can du bya'o//nyes byed la 'jug na bzlog par bya'o/ /dge ba mi 'phel na de byed pa gzhan la gtad par gsol bar bya'o/ /gnas kyi 'os nges par shes par byas nas gtad par bya'o/ /sdig pa'i grogs po las bzlog par bya'o/ /dge ba la sbyar bar bya'o/ /de nye bar bsgrub par bya'o//ltung ba las bslang ba dang rjes su mthun pa'i 'tsho ba'i yo byad bsgrub pa la brtson par bya'o/ /lhan cig gnas pa dang nye gnas dang mkhan po dang slob dpon dang mkhan po gcig pa dang slob dpon gcig pa dang / gtam 'dres pa dang phebs par smra ba dang smon 'grin dang 'grogs bshes kyis nad g.yog bya'o//byed pa po med na 'og mas so/ /'dir klog pa'i slob dpon yang bzung ba nyid yin no/ /cig car mi nus na gnas pa gang dang 'jug pa'o/ /'dir de'i rtags brtsams pa yang rab tu byung ba dang 'dra'o/ /tshangs pa mtshungs par spyod pa na yal bar mi dor ro//de la nad g.yog med na mthar thug pa man chad las bsko bar bya'o/ /dge 'dun las byung ba'i sman ni nad pa 'ba' zhig gis spyad du rung ngo / /med pa nyid yin na de nad g.yog gis tshol du gzhug go/ /ma 'byor na dge 'dun gyis las sbyin par bya'o//med na sangs rgyas kyi sku la gsol ba man chad kyang ngo / /de'i phyir dge 'dun gyi las btung ba dang gdugs gdags pa la sogs pa'i mchod pa bya'o/ /med na sangs rgyas kyi las so/ /de gnyis kyis blangs pa des ma shi la 'byor pa yod na bsab pa nyid du bya'o//nad g.yog gis de la bsnyen bkur mi bya bar mi bya'o/ /de'i tshig don dang ldan pa tshig dang ldan pa bcag par mi bya'o/ /lhag par chags pa'i dngos po 'gugs pa dgag par mi bya'o/ /mi gdams par mi bya'o/ /de nad pas bzla bar shin tu mi bya'o/ /des de shir dogs na dge 'dun gyi mal stan las bslangs te gang zag gi sa la gzhag par bya'o//bsku mnye dang khrus sngar bya ba nyid kyi sgyu thabs kyis so/ /de'i gnas skabs kyi yongs su brtag pa la 'bad pa dang ldan par bya'o/ /des sme bar byas pa shi ba'i gos de dag bkru ba ni des bya ba nyid yin no/ / dge 'dun 'dus pa na de'i gnas brtan mdun du 'gro bar bya'o/ /'gro ba'i tshe thogs na bsdad par bya'o/ /de dag gis de yang ngo / /ma byung ba la mi ring bar song ste'o/ /grong gi nye 'khor du yang ngo / /gal te 'jug pa na phyi bzhin 'ongs na yang ngo / /gal te sbron pa 'ongs na yang de la gnas brtan 'ongs kyi bar du sdod cig ces bsgo bar bya'o//zas kyi phyir son pa nyid na lag chu drangs pa'i tshe gal te dus yod na yang ngo / /med na gral der de'i stan gzhag par bya'o/ /'dug pa dang phyi rol du yang so sor brtag par bya'o/ /legs par ma bsgos pa nyid dam/ legs par ma sbyangs pa nyid yin na mdzes par bya ba'i phyir de gnyis la brda bya'o//mgo na drung na mo la byed du gzhug go/ /ma gyur na rang gis so/ /gsar bu de dag la kun tu smra bar mi bya'o/ /gtsug lag khang dang dgon pa der de dag gis tshul khrims kyi tshul khrims de 'dzin du gzhug par bya zhing nges par sbyar bar yang bya'o//glo bur du 'ongs pas ni so sor brtags nas gnas mal gyi phyir gnyug mar gnas pa rnams la brjod par bya'o/ /'gro bar chas pas ni phyogs dang 'gron pa dang gnas dang gnas mal dang grogs na mi 'dor ba nyid brtags nas 'phags par bya'o/ / ring por ma son pa thams cad kyi tha mar la la'i cung zad ma lus sam zhes 'phral du dran par bya'o/ /gsar bu rnams ni rgod pa nyid dang ma khengs pa nyid la dgod par bya'o/ /khyim phyir nye ba na thams cad kyis thams cad kyang ngo / /kun shes par bya'o/ /spyod pa dang spyod lam brtan pa dang lung mnod pa la sogs pa dang zas kyi rnyed pa dang nad pa la bgo bsha' bya ba la sogs bya ba bsgrub pas phan gdags par bya'o//dbyar gnas par khas blangs pas gtsug lag khang byi dor mi byed pa la gros btab ste byi dor byed du gzhug cing byi dor byed pa la ni spro bar bya'o/ / thams cad kyis 'khor du gtogs pa gtam 'dod pa dag la rjes su mthun pa'i chos nye bar bsgrubs pas phan gdags par bya'o/ /mi smra ba nyid la dga' ba dag btang snyoms su bzhag go/ /khyim pa nye bar 'ongs pa'i 'tshal ma sbyor du gzhug go/ /mi byed dam mi 'dod na de dag la chos dang ldan pa'i gtam byas nas bdag cag 'di yod do zhes brjod par bya'o//de dang ldan pa thams cad kyis 'khor la so sor brtag par bya'o/ /don med par spyod na tshar gcad do/ /de la 'gro ba la sogs pa de ji lta ba bzhin no/ /gtam sna tshogs dang 'gal ba med par bya'o/ / phyi bzhin 'brang ba'i dge sbyong mdun du 'gro bar mi bya'o/ /'dug par mi bya'o/ /smras na smra bar bya zhing bsgrub par bya'o/ /gtam gyi bar chad mi bya'o/ /chos ma yin pa smra na bzlog par bya'o/ /chos kyi rjes su yi rang bar bya'o/ /chos dang ldan pa'i rnyed pa byung na blang bar bya'o/ /khyim du mi rgod pa dang ma khengs pa dang mi gnas par bya'o//mig smad pa dang khyim pa rnams la chos dang ldan pa'i gtam bya'o/ /sbyin pa dang dul ba dang yang dag par sdom pa dang tshangs par spyod pa la gnas pa dang / gso sbyong dang skyabs su 'gro ba dang bslab pa'i gzhi gzung ba dag la de dag nges par sbyar bar bya'o//ltung ba'i sgor gyur pa'i 'jug pa thams cad la dran pas bsgrub par bya'o/ /rjes su 'gro ba bslab pas mi bya bar mi bya'o/ /'ongs pa la 'ongs pa legs so zhes sngar snyan pa brjod par bya'o/ /bzhin gyi mdangs gsal bar bya'o/ /'dzum pa sngar bya'o//khro gnyer med par bya'o/ /gal te khyim pa zhig na de la chos dang ldan pa'i gtam bya'o/ /grong mtha' bas ni der mi 'ong na kun dga' bar 'gyur ba ci nus pas bzlug par bya'o/ /chu dang stan bstab par bya'o/ /phyag dar dang mal dang stan bshams pa dang / chu bzhag pa dang brim pa dang zan drang ba ni gsar bus bya'o/ /g.yog 'khor gyi bya ba mi mthun pa gal te rang dang gzhan la gnod par mi 'gyur ba ni ci bder gzhag go/ /gal te de ltar ma nus kyang de dag rgyun bcad la chos dang ldan pa bskyed nas des gros gdab par bya'o/ /de'i gzhi las g.yog 'khor mi dga' zhing 'pho bar lta na phyir bsdu bar bya'o//mi nus pa nyid yin na gzhan du 'gro bar bya'o/ /de'i rkyen gyis rtsod cing smra bar mi bya'o/ /dge 'dun gyi kun dga' ra bar gnod pa byed na ci nas kyang de nyid 'dzin du gzhug pa'i phyir 'dzin pa btang ba de ltar bya'o/ / mi 'gro na bab col du su la yang mi brjod par gzhon nu dang mdza' bshes dang zhong blon dang bkrabs pa dang zhabs 'bring gnyug ma dag la skad sbyar te sgra dag par thul 'og tu gzhug par bya'o/ /dge slong gi gnas su dge slong ma'o/ /rab tu 'byung ba thams cad kyi'o/ /bsnyen par rdzogs pa la ni de gsol ba la sogs pa'i las byed pa las gzhan pa'i'o//'dir dge 'dun gyis bsnan par bya'o/ /bar chad dri ba dge slong mas bsgribs pa la bya'o/ /bud med la ni dge slong ma zhes bya ba'i tshig gzhan yod do/ /gnas pa kho na'o/ /dge tshul ma nyid dang dge slong ma nyid kyi bar skabs su spyad pa'i dus ni lo gnyis so//bsnyen par rdzogs pa'i dus kyi dang por des ma lon pa'i dang po la skye'o/ /khyim so bzung ba bsnyen par rdzogs par bya ba'i lo rnams kyi dang po ni bcu gnyis nyid do/ /sbyin pa las skye'o/ /dge slong ma'i dge 'dun gyis so/ /sbyin pa ni bslab pa'i sdom pa zhes bya bas so//de'i 'og tu bslab pa brjod par bya'o/ /tshangs par spyod pa la nye bar gnas pa'i sdom pa ma thob par bsnyen par rdzogs par mi 'gyur ro/ /gsang ste bstan pa'i 'og tu dge 'dun gyis de sbyin par bya'o/ /bar chad dris nas so/ /gsol ba byas nas so//chos gos dag ni lnga nyid do/ /gnas rnams la shing drung nyid ma gtogs so/ /ltung bar 'gyur ba rnams la brgyad nyid do/ /lci ba'i chos rnams brjod par bya'o/ /ltung bar 'gyur ba dang dge sbyong du byed pa'i bar skabs su'o/ /bskol ba drug po dag go/ /de la ni skye ba'i chos nyid med par yang 'dra'o//mtshan gnyis pa'o/ /gle 'dams pa'o/ /rtag tu zla mtshan zag pa'o/ /zla mtshan mi zag pa'o/ /mtshan ma tsam yod pa'o/ /mtshan tsam du gyur pa'i mtshan ma yod pa ni de zhes bya'o/ /sngon rab tu byung ba'o/ /rab tu byung ba'i gzhi phran tshegs la sogs pa'i skabs so// //mi ma yin pa'i 'gro ba pa dang / byang gi sgra mi snyan pa gnyis ni sdom pa'i zhing nyid ma yin no/ /mtshan lan gsum gyur pa la yang ma yin no/ /dang po gnyis la ni mi nyams so/ /len pa nyid na yang skye'o/ /de dang ldan pa'i lhar mkhan po med pa nyid la yang ngo //de bsnyen par ma rdzogs pa nyid yin na yang ngo / /de dge slong ma yin par shes na ni mi skye'o/ /de phyir spong ba la yang mi skye'o/ /de gnyis kyi ming ma brjod na yang mi skye'o/ /dge 'dun gyi na yang de'i skye gnas kyi mi skye'o/ /khyim pa dang mu stegs can gyi rgyal mtshan can la yang mi skye'o//sgren mo dang 'khrugs pa dang mtshan dug ma dag la yang mi skye'o/ /rgyu las bzlog pa khas mi len pa gnas nas phyung ba la yang mi skye'o/ /tshig snga ma med pa nyid la ni nyes byas tsam du zad do/ /mkhan por ma gsol ba la yang ngo / /bar chad ma dris par yang ngo //de med par khas len pa la sbyin na yang ngo / /skyes pa 'dra ba'i bud med nyid dang / bud med 'dra ba'i skyes pa nyid mtshan gyi rnam pa gzhan ma yin pa la yang ngo / /de ni lag rdum la sogs pas 'phangs pa nyid yin no/ /sdig sdig lta bu'i mtshan nyid can dang / gling gzhan nas skyes pa'i tshul byad mi 'dra ba gnyis kyang ngo / /sen mo gcig pa dang / lag pa 'jas te ltebs pa dang / gzhogs phyed 'jas pa dang / mgo smyung dang / skra sgra sgre can dang / sgur po dang / dgye bo dang / dgye sgur gyur pa dang / sor mo drug pa dang 'byar ba dang med pa dang / mig rdzi ma nang du zug pa dang / ne'u le'i lta bu dang / 'ug pa'i lta bu dang / phyin ci log pa dang / bar 'dzings pa dang / glo ba dang / sle'o dang / zlum po dang / mig po che dang / mdzer pa can dang / shu ba can dang / 'brum bu can dang / rna ba ser ba dang / dkar ba dang / dmar ba dang / sbubs can dang /khyi rngo g.ya' ba dang / 'phungs pa dang / che ba dang / rlig pa'i nang du mtshan nub pa dang / glen pa dang / lce med pa dang / rkang lag gcig pa dang / med pa dang / skra sngon dang / mgo glang po che'i lta bu dang / rta'i lta bu dang / khyi'i lta bu dang / ba lang gi lta bu dang / lug gi lta bu dang / ri dgas kyi lta bu dang /nya'i lta bu dang / sbrul gyi lta bu dang / ring ba dang / mang ba dang / mgul ta la'i lta bu dang / skrangs pa dang / spyod lam gyis dub pa de dag las min pa rnams so/ /gzhan dag ni na bas so/ /rkun po ni phung khrol ba'o/ /rgyal po pha ma'i bsam pa can nyid kyis gnang ba ni pha ma dang 'dra'o//yongs su 'dzin par byed pa gnyis kyang gnang ba dang bsrel ba dang zhu ba dag la pha ma nyid dang 'dra'o/ /mi ma yin pa'i 'gro ba pa gnyis ni ma yin no/ /de gnyis las mtshams med par mi 'gyur ro/ /de ni skyed par byed pa gnyis las te mtshan gyur pa gnyis las kyang ngo //ma bsad pa la sogs pa de byas pa nyid gtso bo'o/ /pham par gyur pa ma byung ba nyid la mi tshangs par spyad pas nyams su myong ba dag sun phyung ba nyid yin no/ /bud med bslab pa phul nas skyes pa nyid du gyur pa ni rab tu 'byung ba dang bsnyen par rdzogs par rung ba nyid do/ /pham par 'gyur ba thun mong ma yin pa lhag par bcad pa can yang ngo //bud med bsnyen par rdzogs par bya ba la gnyug mar gnas pa rnams yan lag nyid do/ /skye ba'i tshe nyid na phul lam nyams na mi skye'o/ /rab tu 'byung ba'i gzhi zhu ba phal che ba'i skabs rdzogs so// //rang bzhin nyams pas byas pa nyid ni phul ba nyid ma yin no//de la ma yin no/ /lkugs pa la ma yin no/ /mi ma yin pa'i 'gro ba la ma yin no/ /ma go ba nyid ma yin no/ /dben par ma yin no/ /dben par 'du shes pas ma yin no/ /bslab pa'am sangs rgyas sam chos sam dge 'dun nam/mdo sde'am 'dul ba'am ma mo'am slob dpon nam mkhan po dbul lo/ /bdag khyim pa'am dge tshul lam za ma'am ma ning ngam dge slong ma sun phyung ba'am/ rku thabs su gnas pa'am tha dad du gnas par mi bya'am/ mu stegs can nam mu stegs can zhugs pa'am/ ma bsad pa'am pha bsad pa'am dgra bcom pa bsad pa'am dge 'dun gyi dbyen byas pa'am de bzhin gshegs pa la ngan sems kyis khrag phyung bar gzung du gsol/ bdag tshangs pa mtshungs par spyod pa khyed cag dang lhan cig gnas pa'am longs spyad pas chog go zhes bya ba lta bu ni 'bul ba'i tshig dag yin no//'bul ba'i cho ga'o// //'dul ba'i mdo bam po gnyis pa/ bcug reg nyams su myong bar byas na'o/ /zag byed do/ /der ro/ /ma nyams par ro/ /kha'am bshang ba'i lam du'o/ /nyams pa dag la ni sbom po'o/ /mi rung ba dag la ni na smad do//mi ma yin pa'i 'gro ba pa nyid dang / skyes pa nyid dang / ma ning nyid dang / ro nyid dang / rten par byed pa dang / brten par bya ba g.yogs ma can nyid dag la ni na smad pa med do/ /ma tshor ba dang rang bzhin nyams pa'i gnas skabs dang mi 'dod bzhin du bcug pa nyid na'o//rang gis brten par bya bar ro/ /sngar phyi rol du drud pa nyid la'o/ /nang du mi dbo bar phyi rol nyid du'o/ /ma bsrungs par nyin mo glos phab ste gnyid log par mi bya'o/ /srung ma ni gsum ste/ sgo bcad cing kun nas bskor ba na gnas pa nyid dang /dge slong gis kun nas bsrungs pa nyid dang / sham thabs kyi mtha' bcings pa nyid do/ /mi tshangs par spyod pa'i pham par 'gyur ba rnam par 'byed pa'o/ /gang du bud med kyis rngod pa der 'gro bar mi bya'o/ /gang du mi ma yin pas gnod pa'i phyir btsal ba der gnas par mi bya'o//'dod chags shas che bas 'dzag snod bcang bar bya'o/ /ra'am ri dgas sam byi ba'i pags pa las so/ /dri mi nga bar bya ba'i phyir skabs su bkru ba dang bskam par bya'o/ /de'i dus kyi ched du gzhan bya'o/ /ha cang mang bas 'dar bar gyur phru blugs so//bye ma'am sa'i'o/ /zan za ba dang / mchod rten la phyag 'tshal ba'i tshe phog la bkrus te'o/ /mi tshangs par spyod pa'i pham par 'gyur ba phran tshegs kyi skabs so// //kha'i dang po ni so phan chad do/ /bshang ba'i lam gyi bu gu'i sbubs kyi mtha' yan chad do//zag byed kyi ni pags rim yan chad do/ /der nor bu bcug pa nyid ni de'i mtha'o/ /phyogs kyi dang po cung zad zin pa nyid dang / skrangs pa nyid dang / rul ba nyid dang / myags pa nyid dang / srog chags dag gis zos pa nyid lta bu ni nyams pa nyid do/ /bgrod par bya ba phyed bcad pa nyid la yang na smad pa med do//bsten par bya ba'i dbus bye ba'i mtshams 'byor pa mi mngon pa la yang ngo / /mngon pa la ni tshig 'og mar ro/ /sbom po'i dbang du byas pa ni phag la sogs pa btsos pa [(]sbu [,]spu [)]med pa dag la'o/ /mgo bcad pa'i khar ro/ /brten par bya ba dang rten par byed pa lus las tha dad par byas pa gnyis kyi'o//gzhan pa gnyis kyang gzhan gyis gnyis dang gzhan du sbyor bar byed na'o/ /gzhan pa'i bu ga lus las bcad pa la yang ngo / /brten par bya ba ma ning mo sbubs med pa la yang ngo / /mchu gnyis la'o/ /phyi rol gyi mtshams la thug par ro//snod du'o/ /bstabs pa dang mi reg par 'jug pa gnyis so/ /mtha' nyid brjod pa'i g.yogs ma de ni bsgribs pa ste/ des g.yogs pa thams cad kyi thams cad du reg par mi 'gyur ba ma yin no/ /gzhan gyis g.yogs pa nyid ni mi reg par 'jug pas rnam par bshad pa yin no//pham par 'gyur ba dang po zhu ba'i skabs so// //dge slong gi dngos por mi shes na rang bzhin las nyams pa yin no/ /nyams pa ni gnyis te nang dang phyi rol lo/ /bsten pa'i phyir gzhan la khas blangs pa na bslab pa 'khrugs pa nyid do/ /de la de yang sbyin par bya ba nyid do//de ni dge slong gi sbom po'o/ /ma chud na yang ngo / /chud par bya ba'i phyir rma nyed na yang ngo / /skrag pa dang ngo tsha bas kun tu 'dod chags ma skyes na'o/ /yan lag gi rnam pa rdol ba'i phyir ro ma myangs na yang ngo / /las su mi rung ba bcug na'o/ / lag pas lag par dang / rkang pas rkang par dang / tshigs kyis tshigs su dang / mdoms kyis mdoms su lta bur mi rung na'o/ /sprad pa'i g.yo ba nyid tsam la'o/ /shing dang ba so dang rdo ba dang gos las bu mo'i gzugs byas pa la brtsal ba na gal te dbang po tsam dod na'o/ / yan lag thams cad du reg pa ster na dngos gzhi'o/ /bsten pa'i don du rtsol bas yan lag gi rnam par rkang pa 'jud na'o/ /bsten par bya ba la yan lag gi rnam pas de tsam la gzhol bas phyi rol du reg na'o/ /bstan pa'i phyir gzhan la bsgo na'o/ /rang bzhin gyis las su rung ba nyid ni na smad par bya ba med do//mdun ma dang phyi ma gnyis gang du brtsal ba de las gzhan du gtugs pa la med do/ /lam lhag ma rnams su brtsal bar bya'o snyam pa la yang med do/ /bdag ni nyams pa'o snyam pa'i bsam pa can la yang med do/ /nad dang dbral bar bya ba'i don nyid la yang med do//lam la gzhan nyid du 'du shes pa dang yid gnyis za ba la yang med do/ /lam ma yin pa la ni de gnyis sbom po'i dbang du byas pa nyid do/ /rdos pa bud med kyi steng du 'gyel ba la ni ltung ba med do/ /nyam thag pas mgul nas mi 'dod bzhin du 'khyud pa la yang ngo //mchur mchus reg pa la yang ngo / /khyi'i mdun du gci bar mi bya'o/ /gang du srog gi bar chad 'byung ba'i dgon pa der gnas par mi bya'o/ /gang na yan lag gi rnam pa 'dzin pa'i 'jigs pa yod pa'i chu klung der sgren mor rgal bar mi bya'o/ /der shes bzhin du gru rgal bar mi bya'o//ba lang gi nang du yang 'gro bar mi bya'o/ /khron pa yang brtag par bya'o/ /bsod snyoms la yang grong du rgyu bar bya'o/ /legs par so sor brtags par byas nas rab tu dbyung bar bya'o/ /gcig pu bla gab med par blos mi dbab bo/ /dge slong mas gnas khang sgo ma bcad par snyoms par 'jug par yang mi bya'o//pham par 'gyur ba dang po 'dul byed kyi skabs so/ /mi tshangs par spyod pa'i pham par 'gyur ba dang po rdzogs so// //rku'am rkur bcug pa dag gis so/ /mngags pas kyang ngo / /ma byin pa'o/ /ma sha ka lnga la sogs pa'o//rku sems kyis so/ /mi'i rgyud kyis yongs su bzung ba'o/ /der 'du shes pas so/ /khyer ba nyid na bsam pas ma btang ba ni bdag po nyid dang ma bral ba nyid yin no/ /tha snyad mi shes pa ni zhal ta byed pa bdag po nyid yin no/ /bza' btung gi phyir byin pa la ni bsam pa 'brel ba med pa nyid yin no//nags mes btang ba la sogs pa dag gis bzung ba'i phyir ri dgas dang bya dang sdig sbrul lings btab pa rnams la ni lings pa ma yin pa bdag po nyid ma yin no/ /bye brag ma phyed pa la ni gzhi las rnam par gzhag go/ /rin thang ni rku ba'i gnas dang dus kyis so//ma bsams pa la ni ltung ba med do/ /rang dang brnya ba dang yid gcugs pa'i sems dag gis gzhan la go bar byas te blangs na ltung ba med do/ /rku sems med pa gzhan gyis kyang ngo / /snying rjes rdzu 'phrul gyis phrogs na'o/ /thams cad du sbyor ba la ni nyes byas so/ /sde tshan de la gal te dngos gzhi yin na sbom po'o//'og ma la yang de bzhin no/ /ma chog pa brkus na'o/ /bdag po med pa'i gter ro/ /rang gi'o/ /'gro ba gzhan gyir ro/ /bdag gir ma byas par sba ba dang chud gzan pa dang zin pa dang btang ba la sogs pas bral bar byed na yang ngo / /snying rje dang ldan pa'i sems kyis na nyes byas so//sngar byas na phyir bcos kyang de ma byas pa nyid ma yin no/ /nom pa'i snga rol ni sbyor ba'i sbyor ba nyid do/ /phri ba'i gom pa re re la de tha dad pa yin no/ /de'i gzhi la ni sems can so so la'o/ /phur ba la bkrol ba ni gru la reg pa ma yin no/ /de byas nas rku ba la ni khur brkus pa na'o//btus nas ni phung po na'o/ /spyings pa la ni gnas kyi steng nas rdzas kyi steng bying na'o/ /der phyis dbyung ngo snyam pa'i blo gros gang yin pa de ni bkur ba'i'o/ /bshang ba la ni ngos kyi gzhi'i mtshams las ngos cig shos 'das na'o/ /khyab pa'i khongs su gtogs pa'i de dang ldan pa nyid la ni ma yin no//de'i mtshan nyid ni gyong grugs dang gas pa dang bris pa dang kha dog gzhan dang bar mtshams dang bar chad dag dgag go/ /srog chags la ni rtsib ma la sogs pa tha dad par rtag tu rung ba rnams bar chad nyid yin no/ /gding ba bting ba nyid yin no/ / skye ba ni gzhag pa dang 'dra'o/ /bskon pa ni phud na'o/ /sho gam ni sa las 'das na'o/ /mi la gal te brdas na ni de grub na'o/ /gal te de ltar na bya spar ba na'o/ /dud 'gro btags pa ni bkrol na'o/ /brtod pa dang khyu las bkar ba gnyis ni mi snang bar gyur pa nyid na'o/ /gsang sngags dag gis 'dren pa ni snang ba na'o//phyi bzhin 'brang ba dang nang byan byed pa gnyis nur ba dang 'byangs pa dang 'jam pa dang 'jug pa dang 'dzeg pa dag gis snga ma ltar yin gyi de gnyis kyis blangs pa ni ma yin no/ /gru ni skam sa dang yur po che dang chu bdal ba dag gis so/ /rgyun phyogs kyis so//thad kar yang pha rol gyi 'gram du mi snang bar gyur na'o/ /de las gzhan pa nyid la ni der phyin na'o/ /rgyun las bzlog pa la ni gru tshugs las 'das pa na'o/ /gzhan gyi las kyi mtha' dag la chu gtong ba'am 'gog pa la ni rang gi las kyi mtha' grub pa bskyed ma gtogs pa de'i ched du der 'dun pas gzhan du gyur na'o//rkun po rnams la de'i ched du lam rgyus go bar byed pa la ni shas thob na'o/ /sa gzhi dang khang khyim dag yongs su bskor bas ni mtshams 'byor na'o/ /shags kyis gal te bla yi grar ni rgyal na'o/ /gal te 'og gzur na pha rol po'i sbyor ba nyid btang na'o//de ni sbyor ba nyid do/ /rku sems med pa la sho gam du gtogs pa'i nyes pa 'byung bar dogs par mi bya'o/ /gang gis blangs pa nyid kyis snod las des sbyin par bya ba nyid yin no/ /gnang ba la gzhan gyis bzlas na ma bkrus pa ma yin no/ / ma gnang bas gzhan gyis bzla bar mi bya'o/ /ma tshor bar 'da' bar byed pa mi 'grub par bya ba'i phyir mi 'bad par bya'o/ /srung ma dge slong du ma gzhag par bya'o/ /de'i zan bskyal bar bya ba nyid do/ /des bzlog par bya'o/ /bcug pa nyid na brjod par bya'o/ / med na mtshan ma gdab bo/ /khyer te 'ongs pa la dri bar bya'o/ /gzhan gyis dor ba mi 'grub na reg pa nyid du bya'o/ /ma phul yang nges pa skyes nas phul ba dang 'dra'o/ /de dag gis rdzas gnang bar bya ba'i phyir pha ma'i bsngags pa brjod par bya'o/ /dkon mchog rnams kyis yang ngo / / don du gang yang rung ba'i dkor gang yang rung ba las skyin por blangs pa'i chos su sbyin par bya'o/ /sho gam gzhal dgos pa dang bcas par 'gro bar mi bya'o/ /des ma yin pa nyid ni ba lang gi lci ba bcir bas kyang kha sgyur ba dang kha tshar bcad pa yang ngo / /ma mthong ba la blo de mi 'chags so//gzhan gyi spyod pa brtol bar mi bya'o/ /yid gcugs pa ma yin pa la yid gcugs pa nyid du mi bya'o/ /de nyid ni 'og ma la gong ma'o/ /de ni sdug pa dang yid du 'thad pa dang bla ma dang bsgrub par 'os pa dang mchod par 'os pa dang bstod par 'os pa dang blangs na dga' ba'o/ / lag pod kyi las kyis las bya zhing bsod nams kyi blos kyang gla rngan gyis ni ma yin no/ /yul gyis nges pa'i tshig ni 'drid pa ma yin no/ /ltung ba blangs na yun ring du mi bsrel lo/ /de dge skos la gtad pa nyid du bya'o/ /des rab tu byung ba'i yin par dogs na dge 'dun la bstan par bya'o//bdag po ma byung na gzar thag la btags te gzhag go/ /nad pas ma gnang ba de la sman mi blang ngo / /ma byin par len pa'i pham par 'gyur ba rnam par 'byed pa'o// //yongs su gzung ba dang bcas pa gnang ba las gzhan pa'i thabs kyis bdag gir mi bya'o/ /bdag gir byas pa dgug par mi bya'o//de ni chos bshad pas bslang bar bya'o/ /rin phyed du nye bas kyang ngo / /lhung bzed dang chos gos ni rin pos bslus kyang ngo / /mi snyan pa 'byung bar 'gyur ba ni bor ba'o zhes skye bo phal po che'i mngon sum du ma bab par bkur bar mi bya'o/ /ro'i rdzas mi ma yin pas blangs pa nyid ni yongs su ma bzung ba nyid ma yin no//rab tu gtum pa de'i phyi bzhin du 'gro bar bya'o/ /kha bub tu bsnyal ba la rkang pa'i mtha' nas brtsams te g.yogs par bya'o/ /ma rmas pa las blang bar mi bya'o/ /rang gis rmas par dang rmas par byed du gzhug par mi bya'o/ / bsti gnas nyid du so shing dang chu dang 'dag rdzas dang lci ba dang sa ci bder bya'o/ /dge slong dang dge tshul mi 'dod du 'brel bas khrid pa na gzung bar bya'o/ /ma byin pa len pa'i pham par 'gyur ba phran tshegs kyi skabs so// //ka ka ni bzhi la ma sha ka'o/ /lnga nyid ni kAR+ShA pa Na bzhi cha'i dpe yin no//gang na de'i tshigs nyi shu yin pa de la brten nas so/ /rku ba'i gnas dang dus kyis de'i brtsi ba rnam par gzhag go/ /che ba nyid kyis rin thang gdab mi nus pa ni rab kyi mthar phyin pa nyid do/ /chung ba nyid kyis der mi chog pa nyid ni khongs su ma gtogs pa nyid ma yin no//de la sangs rgyas kyi sku gdung ni gzhal du med pa'i rin po che nyid yin no/ /mchod pa'i don nyid du na nyes byas so/ /dpe bri ba la ni nyes pa med pa nyid do/ /bshig ste rku ba la ni de'i gnas skabs rku ba'i dngos po nyid yin no/ /byang gi sgra mi snyan na ni yongs su 'dzin pa med pa nyid do//de ni rang gi dang 'dra'o/ /de'i dus na bdag nyid yod pa bdag po nyid do/ /mya ngan las 'das pa nyid ni lha nyid do/ /brnyas pa nges par byin pa bzhin du nye bar spyod na sbyor ba bzhin no/ /gsang sngags dang sman dag gis dbul du bcug na yang ngo / /gzhan gyi don nyid du na yang dngos gzhi'i rnam pa'o//rtogs pas kyang ngo / /bdams te bzang po rku bar 'dod pa la yang ngo / /rgyan la dor byed na gal te rgyal ba nyid du ma gyur pa'i tshe sbyor ba'o/ /de la de ni brkus pa yin no/ /grangs la ni de'i'o/ /mtshan ma phyis pa dang bsnan pa gnyis dang / gnas gzhan du bzhag pa yang de nyid do//de la grub pa na brkus pa yin no/ /tshoms gzhan du bgrang ba yang de dang 'dra'o/ /snga ma nyid phyi ma dag la dang phyi ma nyid snga ma dag la bsnyon pa yang ngo / /skal ba nyid ni de dag gang du thams cad kyi dang por bgrangs pa der ro/ /mi dbang ba dbang bar sgrogs pa yang ngo //ma bsgo bar slong ba yang ngo / /brnyas pa dang bskyis pa dang gtams pa rnams bsnyon pa ni sbyor ba'o/ /brnogs na brkus pa yin no/ /gtams pa sbas pa la gal te sbo ba dang lhan cig tu dang spo ba'i 'og tu dang / gal te sngar na ni sbyor ba gzhan nyid do//sgyid pa gcod pa dang gsod pa ni chud gzan pa yin no/ /mtshams kyi nam mkha' las sho gam 'dral na yang sbom po'i dbang du byas pa nyid do/ /rdzu 'phrul gyis khyer ba la ni nyes pa med pa nyid do/ /mtshams gzhan du yang ngo / /bsgo na nyes byas so/ / lam gzhan na ston na yang ngo / /thabs kyis brjod na phra mor ro/ /lam gol ba ni lam dang 'dra'o/ /kha dang tshem bu ni skungs gzhan dang 'dra'o/ /rku sems dang bral na mtha'i mthar thug pa nyid ma yin no/ /sbyor ba la med na de ma byas pa nyid ma yin no/ /spring yig la sogs pa la ni na smad pa med do//nan khugs dang dngan 'then yang ma brkus pa ma yin no/ /gnas dang bcas pa yang ma yin no/ /bsad pa nyid ni ma brkus pa nyid ma yin no/ /phyogs gcig gnas nas ma 'phags pa yang ma yin no/ /ltung ba ni de las khyer na brkus pa yin no//'dzag pa dang 'brul bar byed pa'i bu gu nas ni byung na'o/ /'dir tha ma de tshun chad rdzas gcig pa nyid yin no/ /phung po las rku na lan re re zhing blangs pa tha dad do/ /dbral bar bya ba du ma nyid yin na de'i cha so so'o/ /rkun po rnams kyang ngo / /'di la blo gros du ma nyid yin na thob na brkus pa yin no//ma byin par len pa'i pham par 'gyur ba zhu ba'i skabs so// //blang ba'i snga rol du shi ba nyid du gyur na bzhag pa nyid do/ /bzlog pa ni shi ba'i yo byad nyid do/ /dge 'dun ni phu nu dang 'dra bas de'i ched du rku ba ni bdag gir mi byed pa ma yin no/ /bdag po tha dad pa ma yin pa ni rang gi dang 'dra'o//phyir log gam mi blang bar nges pa na lhag pa rnams kyis brkus pa ni de'i yan lag nyid ma yin no/ /cha bdag gir bya bar 'dod pa ni mi blang ba'i bsam pa ma yin no/ /der gtogs pa'i las rjes su bsgrub pa ni de'i ma yin pa ma yin no/ / lhan cig gnas pa nyid dang nye gnas nyid kyang brkus par mi 'gyur ba'i rgyu ma yin no/ /yongs su bskor ba la mtshams nyid gtso bo'o/ /mtshams gnas pa spos pa yang 'dis ma bsdus pa ma yin no/ /mngon sum du blangs pa yang mi snang ba nyid na brkus pa yin no/ /mi mthus brkus pa ni dbang du byas pa nyid na'o//de bdag nyid ni ma yin no/ /gang bsams pa de dang 'brel bas ma bsams pa blangs pa ni brkus pa ma yin no/ /sbom po ni gang gis gang len pa de de yir rnam par gzhag pa la gzhan gyir rku ba'o/ /yongs su 'dzin pa dang bcas pa'i dur khrod nas len pa'o//rtsa ba'i ldum shing dang sdong bu dang lo ma dang me tog dang 'bras bu'i kun dga' ra ba la sogs pa gsang sngags dag gis skam par byed pa'o/ /chas kyis brngod pas rta bkri ba dang / zhon te 'di brku bar bya'o snyam nas lus 'gyur ba'o/ /gru la yang ngo / /'di las 'di ltar snyam pa yang ngo //pha dang ma dang phu nu dang bu sring dang mkhan po dang slob dpon dang mchod rten dang dge 'dun la sogs pa la bsngos pa sho gam gzhal dgos pa bzlas pa'o/ /brnyas pa dang bskyis pa dag mi sbyin par sems pa'o/ /gzhan gyi don du byin pa 'god pa yang ngo //yongs su ma bzung ba la yongs su bzung bar 'du shes pa'o/ /zan dron dang 'bras chan dang phye dang nya sha dang sha dang sha skam dang khur ba la sogs pa'i bsod snyoms gzhi med pa nod pa'o/ /gzhan gyis blangs par mi shes pa ni gzhi med pa nyid ma yin no/ /ma bcol bas ma yin no//mgron du ma bos par zan za na nyes byas so/ /rku ba'i ched du 'gro ba yang ngo / /de las gros byed pa tha dad pa nyid ma yin no/ /kun tu bzung ba ma yin nam zhes legs par so sor brtags pa byas te blang bar bya'o/ /lus bsnyal bar mi bya'o/ /chang gzhig par mi bya'o//ma gnas pa der chos gos kyi cha mi blang ngo / /chom rkun pa la sbyin bdag gi sems kyis len pa la nyes pa med do/ /'ong ba rku thabs can gyi chom rkun par ma grags pa las blang bar mi bya'o/ /de las blangs pa mtshon gyis bcad pa dang kha dog ngan par byas te bcang bar bya'o//de ltar byas kyang slong na sbyin no/ /gnad la bsgre bar mi bya'o/ /gsang sngags dag gis gtong ba la nyes pa med do/ /byi bas khyer ba dag bdag pos blangs pa la yang ngo / /dge slong gzhan gyi rdzas la de'i rdzas su na yang ngo / /rngon pa dag gis mngon par gtses par gyur pa'i ri dgas gnas khang du zhugs pa blangs pa yang ngo //de shi na de dag la sbyin par bya ba nyid do/ /ma byin par len pa'i pham par 'gyur ba'i 'dul byed kyi skabs so/ /ma byin par len pa'i pham par 'gyur ba rdzogs so// //nad pa la 'chi ba'i sems pa dang rjes su mthun pa'i nye bar bsgrub par mi bya'o//mi shes pa la 'chi ba'i dgra bo ma smras par de'i nad g.yog tu mi gzhag go/ /gnas yod na mi gzhag go/ /'chi ba'i 'tshog chas mi gzhag go/ /de 'chi ba'i phyir rjes su bsgrub pa las nad g.yog gis bzlog par bya'o//rdzas kyi phyir gzhan 'chi bar 'dod par mi bya'o/ /bya ba ma yin pa byed pa la sems kyis rjes su yi rang bar mi bya'o/ /srog bcad na'o/ /de ltar bsams pas so/ /mir gyur pa'i'o/ /de ltar 'du shes pas so/ /gang yang rung bas so/ /bye brag med pa ni lus dang de dang 'brel ba dang /'phangs pa dang gzhan dang bsgo ba rnams so/ /dug dang phye ma dang dong dang shing dang rang bzhin nyams pa gtong ba dang brang du 'debs pa dang 'khrul 'khor dang sgyu thabs dang ro langs dang rjes su sbyor ba rnams so/ /g.yang du gtong ba'o/ /me dang chur 'jud pa'o//grang ba dang tsha bar 'dogs pa'o/ /pho nyar gtong ba la sogs pa'o/ /de rjes su sgrub pa chung ngu nyid kyang ngo / /gsad par bya ba ni skyes pa dang bud med dang ma ning nyid do/ /gzhi des gzhan gyi tshe shi na'o/ /'dun pa bzlog pa'i 'og tu na rgyu nyid ma yin no//dku mnyes pas ma dang mngal na gnas pa gnyis las ma bsams pa shos na sbom po'o/ /gzhi de las gsod pa la 'jug pa dang du len na'o/ /khyod kyi ming gis 'chi ba'i yo byad sbyin no zhes zer ba yang ngo / /gzhan dud 'gro ma yin pa dang sprul pa bsad pa la yang ngo / / dri bar bya ba la ma smras par nad pa la sman sbyin par mi bya'o/ /'dir sman pa dang de rab tu byung ba dang bkol ba rnams dri bar bya ba nyid do/ /nad kyis kyang ngo / /dge slong rgan rabs rgan rabs shes rab can rnams la yang ngo / /snga ma med na phyi ma la'o/ /phan par 'dod pa nyid kyis 'chi ba'i phyir sman ma yin pa byin pa la ni smad pa med do//khur gdeg par mi nus pa la grogs nyid mi bya'o/ /gal te de lta bu'i rkyen gyis na khyim pa dag rub pa nyid la cig car gdeg par skad sbyar te bya'o/ /bzhag pa yang cig car nyid du skad sbyar te bya'o/ /so phag mi 'phang ngo / /bye ba dang gas pa ma brjod par de nyid sbyin par mi bya'o//rkun po spa bkong ba'i phyir tsham ngam bya'o/ /gaN+DI la sogs pa mi 'phog par 'phang ngo / /rdzi phyogs nas rdul gyi bum pa dang thal ba'i gyo mo yang ngo / /'ur rdo bcang bar bya'o/ /dge slong la ngal ba mi phul lo/ /de'i grogs bya'o/ /ngal gsor gzhug go//snod spyad blang bar bya'o/ /gal te lhan cig tu gnas su phyin par mi nus la zas dang skom gyi dus su ni ma yin na lhung bzed bkru ba dang byug ris bzhag pa dang byin len dang brtag par bya'o/ /gal te dus su na khyer te bsu bar bya'o/ /gsod pa'i pham par 'gyur ba rnam par 'byed pa'o//mi'i 'gro ba pa'i lag pa gcod na sbom po'o/ /nags mes gtong na'o/ /skra can 'tshong na'o/ /gang gis brkus pa de bla'i grar 'bul na'o/ /gsod pa'i pham par 'gyur ba phran tshegs kyi skabs so// //ston pas bsgo na'o/ /ma dang mngal na gnas pa gnyis ni dpe'o//bdag nyid gsod na sbom po'o/ /sems gyur pa med par ma legs pa byas na nyes byas so/ /ched du ma bsams par grub pa ni byed pa po nyid ma yin no/ /tshe rabs gzhan du las skye ba med do/ /gsod pa'i pham par 'gyur ba zhu ba'i skabs so// //sbom po ni kho bo 'chi bar 'ong ngo zhes de skad zer ba la yid mi ches shing de bzhin nyid du sgrub par byed na'o//nad pa shi sla'o zhes g.yog mi byed na'o/ /mid par bya ba mi 'phrod pa sbyin na'o/ /'bras yongs su ma smin pa brtol na'o/ /dong du 'jug pa dang sgo glegs kyis 'tshir ba la sogs pas nyon mongs par byed na'o//g.yang sa nas mchong ba dang 'ching ba la sogs pas 'chi ba'i don du sgrub pa yang ngo / /nad pa la bab col du mtshon dang thag pa sbyin par mi bya'o/ /zhal ta ba shes bzhin du bya'o/ /gsang sngags kyi thal lcag bya ba yang ngo / / thogs pa bsal ba'i phyir bsnun pa yang ngo / /der gyur pas legs par so sor brtags pa byas te dril bar bya'o/ /phyogs nyung ngus gdeg pa lci ba la 'bad par mi bya'o/ /spyi'u tshugs su 'gro bar mi bya'o/ /ma bslabs pas bslabs pa la sbyar bar mi bya'o/ /mtshon 'phangs pa la bsgo bar mi bya'o//nad pa mi nus pa lam du mi bkri'o/ /gsod pa'i pham par 'gyur ba 'dul byed dag go/ /gsod pa'i pham par 'gyur ba rdzogs so// //'du shes bsgyur te bdag nyid mi'i chos bla ma dang ldan pa nyid du smras na'o/ /mthong ngo bdag mthong ngo //sgra thos so bdag gis sgra thos so/ /'gro'o/ /bdag gi drung du 'ong ngo / /lhan cig gtam 'dre'o/ /phebs par smra'o/ /so sor kun dga'o/ /bdag dang rtag tu yang lhan cig gnas par byed do zhes smra ba de nyid do/ /lha dang klu dang gnod sbyin dang dri za dang mi 'am ci dang lto 'phye chen po dang yi dgas dang sha za dang grul bum dang lus srul po'i zla nyid la'o//sbom po'i dbang du byas pa nyid ni rdul khrod kyi sha za'o/ /mi rtag pa nyid la sogs pa'i 'du shes dang / bsam gtan rnams dang / tshad med pa rnams dang / gzugs med pa rnams dang /'bras bu rnams dang / mngon par shes pa la sogs pa ni chos bla ma'o/ /sbom po'i dbang du byas pa nyid ni zhi gnas kyi rgyu mtshan rang gi mtshan nyid 'dzin pa nyon mongs pa rnam par gnon pa'o/ /de dang ldan pa'i chos can nyid du smra ba ni de dang ldan pa nyid ma smras pa ma yin no//de yod do zhes rang gi bsam pa gzhan la sbyor zhing ston pa nyid do/ /nye bar sbyor na ma yin no/ /ma bsams par bstan par mi bya'o/ /smra ba'i pham par 'gyur ba rnam par 'byed pa'o// //bla ma thob pa yongs su nyams par go bar byed pa ni ma brjod pa ma yin no//bla ma brjod pa'i 'dun pas mi mthun pa'i don brjod na sbom po'o/ /nor na yang ngo / /gzhogs smos kyang ngo / /yang dag pa phyi ma nyid la de mi 'byung ba ma yin no/ /smra ba'i pham par 'gyur ba zhu ba'i skabs so// /sbom po ni btsun pa dgra bcom pa chos gos la sogs pa mchog 'os pa bram ze sdig pa'i chos bsal ba/btsun pa'i dbang po drug po dag ni shin tu dul ba sbas pa bsrungs pa bsgoms pa dag yin no/ /zhes zer ba la cang mi smra bas dang du len par byed na'o/ /btsun pa gal te dgra bcom pa yin na bdag gi bsod snyoms long shig/khyim du zhugs shig /stan la 'dug shig/lag chu zed cig//bza' ba dang / sran tshod dang bca' ba long la zo zhig /rjes su yi rang ba byos shig /byung shig ces pa la de bzhin du bsgrubs na'o/ /smra ba'i pham par gyur pa 'dul byed dag go/ / smra ba'i pham par 'gyur ba rdzogs so// //rmi lam ni med pa dang 'dra'o/ /de'i 'bras bu ni ma byas pa nyid do/ /phyung na'o/ /der 'dun pas so/ /rang gi khu ba'o/ /dang po la'o/ /bde ba dang rig sngags dang sa bon dang sman dang brtags pa'i phyir dag la bye brag med do//reg pas so/ /brtsal bas so/ /yan lag gi rnam pa la'o/ /phyi rol gyis kyang ngo / /sems can du bgrang bas so/ /de'i rnam par gnas pas so/ /ril gyis bcang ba dang dam du bcang ba gnyis med par yang ngo / /bye brag nges par myong ba dang byung la thug pa dang ngad las pa'i bde ba nyams su myong ba dag kyang ngo //sbubs su ma 'ongs pa la'o/ /shugs kyis gnas skabs su btang na rdzogs par ma byas pa nyid do/ /gar byed pa dang rab tu gar byed pa gnyis la ni na smad pa nyid do/ /nam mkha' la rked bskyod pa'o/ /phyogs gzhan du reg pa'o//rgyun las bzlog pa'i phyogs su gtod pa'o/ /rdzi phyogs ma yin par yang ngo / /mngon par nges par myong ba'i bde ba nyams su myong ba sgrub pa'o/ /sbubs su 'ongs pa'o/ /chags pa'i sems dang ldan pa nyid na gzhal ba'i ched nyid kyis reg pa ni sbyor ba ma yin pa yang ma yin no//lta na nyes byas so/ /rgyun dang rdzi phyogs su gtod pa yang ngo / /brla dang gos dang gzhan gyis reg pa dang / g.yan pa 'phrug pa dag gis bab col du de'i don ma yin par zhugs pa la ni ltung ba med do/ /reg bya ma yin pa nyams su myong ba'o//dran pas de la yang ngo / /'byin pa'i dge 'dun lhag ma rnam par 'byed pa'o// //'pho bar 'gyur ba dang 'phos ma thag pa ni shugs dang sbubs su 'ongs pa'o/ /brtsams pa tsam ni sbyor ba ma yin no/ /sbyor ba med par phyung ba la ro myang ba ni de dang ldan pa nyid do//yan lag gi rnam pa cung zad nyed pa dang yongs su nyed pa dang 'tshir ba'o/ /de las su rung ba la nom pa'o/ /sman gyis 'byin na'o/ /gzhan gyi las kyang ngo / /'byin pa'i dge 'dun lhag ma zhu ba'i skabs so// //rnam par bsngos pa la sogs pa dang rnam par zhigs pa dang /keng rus dag dang / mgo dang / rna ba dang / sna dag dang / mgul ba'i bar dang / rtsib logs dang / rgyab dang / brang dang / gnyer ma dag dang / skra'i gseb dang / lag pa dang / phrag pa dang / dpung pa dag dang / dpung pa'i bar dang /rked pa dang / brla dang / rkang pa dang / sgyid pa dang / sgyid pa'i bar du 'byin na dngos gzhi'o/ /sbom po ni la ba dang / phying pa dang / dre'u rngog dang / sngas nang tshangs can dang / khri dang / khri'u dang / stan nang tshangs can dang / khri'i gseb dang / bum pa dang / bum bu dang / bum pa'i bar dang / bya ma bum dang / chol zangs dang / rdo ba dang / skyang nul gyi bar dang / sgo gtan dang / sha'i dum bu dag go/ /rma 'tshir na'o/ /rtsom pa na bud med du byas pa 'tshir na'o/ /der mthe bo 'dzad na'o/ /nye bar 'gro ba la shor na'o/ /gnas nas gnas su 'pho ba la yang ngo //tshul bzhin ma yin pa yid la byed pa las so/ /yan lag gi rnam pa 'dzin pa las so/ /'dzag snod las drud pa las ni ltung ba med do/ /sngon gyi chung mas 'khyud pa las kyang ngo / /rkang pa dang / byin pa dang / dpung pa dang / mthe bo la sogs pa nas bud med kyis bzung ba la yang ngo //'byin pa'i dge 'dun lhag ma 'dul byed dag go/ /'byin pa'i dge 'dun lhag ma rdzogs so// //'di la byed pa po nyid ni bud med do/ /dben pa na 'dug pa dang 'greng ba gnyis kyi'o/ /nyal po byed par shom pa nyid la yang ngo / /lhan cig nyal ba la'o//rig pa'i skyes pa med pa'i bud med dang lhan cig lam du 'gro ba la'o/ /'og ma gnyis la'o/ /khyim pa mo la ston pa la'o/ /skyes pa med par ro/ /rig pa'o/ /yod kyang mi rung ba la'o/ /de ni nyes byas kyi'o/ /gling gzhan nas skyes pa dang / 'gyur ba brten pa gnyis ni mchog pa nyid do/ /de'i ni brda phrad pa nyid do/ /rnam pa de lta bu nyid la ni mtshan cig shos don med do/ /'dir phyed nyid byed pa yin no/ /'og ma gsum la legs par smras pa dang nyes par smras pa dag gi don kun shes pa dang / gzhan la 'khrig pa brten pa'i mthu yod pa nyid yin na dngos gzhi'o//gzhan du na 'og ma'i 'o/ /ma ning mo dang / ma ning pho dang / sprul pa mo la yang de bzhin no/ /gsum po 'di las skyes pa'o/ /gal te de dag gi bde ba nyams su myong bar bya ba'i 'dun pas kun tu 'dod chags dang ldan pas kyang ngo //lus kyis reg pa bdag gir byed na'o/ /'dir len bu ni de dang ldan pa nyid do/ /de dang 'brel ba'i gos la yang ngo / /nom pa dang / nyug pa dang / sprod pa dang / 'dzin pa dang / 'dren pa dang / yongs su 'dren pa dang /'og nas 'khyud pa dang /dam du sbyor ba rnams la ni bye brag med pa nyid do/ /bsten par bya bas byas pa nyid kyang ngo / /gos kyis bar du chod pa la ni 'og mar ro/ /nyes byas kyi ni smad pa ni gzhan nyid ma yin no/ /dge slong ma la reg par mi bya'o/ /bud med la yang ngo / /chur nyam thag pa bsgral ba'i phyir ni reg par bya'o//ma dang sring mo dang bu mo'i 'du shes nye bar gzhag ste lag pa'am skra dag las so/ /dran pa rnyed par bya ba'i phyir bye ma bdal ba'i steng du kha bub tu gzhag go/ /khri'u bzhin bsrung bar bya'o/ /ba lang rdzi dang phyugs rdzi dag la gtad de zan la 'gro bar bya'o//'tsho'am 'on te ma yin zhes yang dang yang du brtag par bya'o/ /sems dag pas snying brtse bas bud med 'khyud pa la nyes pa med do/ /lus kyi reg pa dge 'dun lhag ma rnam par 'byed pa'o// //'jam pa dang / dro ba dang snyi ba'i bsam pa nyid na sbom po'o//snying brtse bas sdug bsngal las thar bar bya ba la ni ltung ba med do/ /ma dang / sring mo dang / bu mo dag la de dag tu 'du shes so/ /sngon spyad pa nyid kun dga' bar bya'o/ /lus kyi reg pa zhu ba'i skabs so// //zas dang / sa dang / bong ba la sogs pa mo'i dbang por 'jud na sbom po'o//rkang pa dang phrag pa la sogs pas bud med la 'phul na nyes byas so/ /de'i stan la yang ngo / /'greng bar 'gyur ba'i bud med slong ba'o/ /bud med kyis de gsum byed pa la ni ltung ba med do/ /bzung ba la yang ngo / /mas 'khyud pa la yang ngo / / pang par bu mo 'dug pa la yang ngo / /bud med 'khrul ba steng du 'gyel ba la yang ngo / /lus kyi reg pa 'dul byed dag go/ /lus kyi reg pa'i dge 'dun lhag ma'o// //'khrig pa las byung ba'i smras na'o/ /rgya la sogs pa'i don gyis so/ /gang la go bar bya ba nyid de brda phrad pa na mtha'o//de dang 'brel ba'i don smras pa ni sbyor ba mi yin pa ma yin no/ /bsngags pa dang bsngags pa ma yin pa dang / gsol ba dang nye bar gsol ba dang / 'dri ba dang yongs su 'dri ba dang / brjod pa dang / smon pa dang / gshe ba dang / phyir smra ba sgrub pa dag la ni bye brag med pa nyid do//don gzhan la bsams pas ljongs kyi nges pa'i tshig gi dbang gis na ltung ba med do/ /ming gi cha nyid 'dra ba la yang ngo / /'khrig pa dang ldan pa smra ba'i dge 'dun lhag ma rnam par 'byed pa'o// //mdzes pa yin no/ /sdig can yin no/ / rma'i sgo mdzes pa'am sdig can yin no/ /bgo bsha' gyis shig /kho bo la bgo bsha' gyis shig /kho bo dang lhan cig nyol cig/phrad par gyis shig ces smra na sbom po'o/ /'khrig pa dang ldan pa'i dge 'dun lhag ma zhu ba'i skabs so// //de bzhin du rdzu 'phrul gyi rnam par 'phrul ba'i chos can la smras sna'o//sru kho bo la nas byin cig /sru khyod la ci mthong ba de byin cig /sru khyod kyi mdun na mo gang yin pa de byin cig /sru khyod kyi yid du 'ong ba gang yin pa de byin cig /khyod ci la dga' ba byin cig ces bdag la smras pa khyod ci la dga' zhes zer ba la sru khyod la kho bo dga'o zhes bya ba dang /sru kho bo la chu dang / bca' ba dang / thug pa dang / bza' ba byin cig /khyod nyid de dag yin no zhes smras pa dag la'o/ /khyod la bong bu dag de byed par gyur cig /sru skyes bu 'phyon ma dag la bsod snyoms spyod dam zhe na yang ngo //der mgal dum chug cig ce na yang ngo / /rang bzhin gyi gnas ngan len brjod pas gnas ngan len smras na yang ngo / /'khrig pa dang ldan pa smra ba 'dul byed dag go/ /'khrig pa dang ldan pa smra ba'i dge 'dun lhag ma'o// //bdag nyid dang 'khrig pa kun tu spyod pa bsngags na'o//des bsngags pa la rjes su yi rang ba'i don gyi tshig ni de dang 'dra'o/ /de nyid phyir bzlas na'o/ /de dang 'khrig pa nye bar ma sbyar na sbyor ba nyid do/ /gnyis ka dang na ni de'i'o/ /bsnyen bkur bsngags pa'i dge 'dun lhag ma'o// //phrad na'o//gzhan dang ngo / /gzhan du'o/ /de'i don du mi mthun pa mthun par bsgrub pa'i phyir sprad par bya ba las spring ba mnos pa gzhan de la go bar byas shing des smras pa snga ma la brjod na'o/ /'jug pa bar ma'i cha yar thos pa nyid na de byas pa nyid do/ /gsum po de dag gi bya ba nyid ni tha dad pa nyid do//mi nyid la mtha'i byed pa po nyid ma yin yang sbyor ba nyid ma yin pa nyid ma yin no/ /'bras bu gcig pa nyid kyi phyir byed pa po so so la bya ba rdzogs pa med pa yin no/ /'dir ma gsaM pa ni rang nyid dang 'dra'o/ /de gnyis ni bdag po dag ni sprad par bya ba nyid dang 'dra'o//gzhan la byas pa nyid ni nyes byas so/ /spring yig dang lag yig dang / yul phyogs dang brda dang mtshan ma rnams ni tshig nyid dang 'dra'o/ /smad 'tshong ma ni mi mthun pa nyid do/ /bdag po nyid ma yin pas bzhi pa man chad zhugs pa nyid do/ /'thab pa nyid na nyams pa nyid do//gal te de dbang ba chung ma ma yin par bsgrags pa nyid kyang ngo / /'thab pa nyid kyi mod la dang 'og tu dang dum pa bcad pa nyid dang rde'u gsum gtor ba nyid dang cho ga gtong ba nyid dang chung ma ma yin par bsgrags pa nyid dang dril bsgrags pa nyid dag ni srog dang ldan pa nyid dag bzhin no//de'i dang po gsum la ni nyes byas kyi dbang du byas pa nyid do/ /ci'i phyir 'di 'am 'di mi sprad gyos bo'i gan du mi 'gro/ /mi bkri zhes zer ba dag kyang ngo / /smyan byed pa'i dge 'dun lhag ma rnam par 'byed pa'o// //mngal na gnas pa dang med pa dang nges pa dang mi brten pa dang /nyos pa dang mthun pa dang bdag gi smyan byed pa ni sbom po'o/ /skad sbyar ba nyid ni ston na'o/ /'thab krol gyis 'phrog tu 'jug na'o/ /chung ma'am bud med che ge zhig nyos shig ces zer na'o/ /bud med ces zer na nyes byas so//rnyed mod ces pa yang ngo / /smyan byed pa zhu ba'i skabs so// //byin pa la dor byas sprad pas ni sbom po'o/ /chos kyi phung po sngon du btang ste bos pas so/ /don gzhan dang ldan pas kyang ngo / /gzhan zhes bya bas skyon chags pa med par sems can la bsnun pa yang ma 'phangs pa nyid ma yin no//smyan byed pa'i 'dul byed dag go/ /smyan byed pa'i dge 'dun lhag ma'o// //spyod lam bzhi'i snod ma yin pa nyid la ni nyes pa med do/ /bskos pa nyid dang ma bskos pa nyid dag ni gtso bo nyid ma yin no/ /bskos pa ni rang nyid dang 'dra'o//ji skad bsgo ba bzhin du mi byed pa lus dang ngag gis nod na'o/ /byams pa ni gcig nyid do/ /yan lag rnams ni byed pa po tha dad pa nyid ma yin no/ /btsal ba la'o/ /de rjes su gnang ba la'o/ /rnam pa de lta bus so/ /gzhi ma dag pa la'o/ /ma bstan pa la'o/ / gnas byed du bcug na'o/ /mthar ro/ /'og ma la yang de dag nyid de ma btsal ba nyid do/ /gcig gi don du'o/ /tshad las lhag pa'o/ /mi rung ba nyid dang rtsod pa dang bcas pa nyid dang brtsam du mi rung ba nyid ni ma dag pa'o/ /skye ba po phra mo'i gnas dang ldan pa nyid dang / rgyal po dang lha'i gnas dang mu stegs can gyi 'dug gnas la brten pa nyid dang /shing ljon pa gcad par bya ba ma yin pa nyid dang / phyi rol 'dom gang gi mtha'i nye 'khor gyi nang rol na chu klung ngam/ ngam grog gam/ khron pa'am 'dom pa nyid ni go rims bzhin du de dag yin no/ /tshad dang ldan pa'i khru phyed dang do ni bde bar gshegs pa'i mtho gang ste/nang rol nas de bcu gnyis dang bdun gyi tshad do/ /dge 'dun las bstan pa thob pa nyid ni bstan pa nyid do/ /ma dag pa la gsol bar mi bya'o/ /rang dag rtog tu 'dong bar bya'o/ /yang na dge slong bskos pa dag go//bstan pa la yang de bzhin no/ /byas pa rnyed pa dang byas pa la longs spyod pa dag la ni ltung ba med do/ /rnying pa 'chos pa la yang ngo / /khang pa'i dge 'dun lhag ma rnam par 'byed pa'o// //tshogs kyi don du'o/ /gtsug lag khang gi dge 'dun lhag ma rnam par 'byed pa'o// //rtsom pa ni sbyor ba nyid do/ /ma g.yogs pa byed du 'jug pa'i mtha' yang de dang 'dra'o/ /du ma'i don du'o/ /ma bskos par ro/ /gang zag gis so/ /'phro zin par byed na yang ngo / /rang bzhin mi mthun pa yang ngo / /gsol ba'i 'og tu ma grub na nyes byas so//khang pa dang gtsug lag khang gi dge 'dun lhag ma zhu ba'i skabs so/ /khang pa dang gtsug lag khang gi dge 'dun lhag ma gnyis so// //pham par 'gyur ba lhag par spyod pas dge slong nyams pa la yang ngo / /phyogs las rang gi nyid ni 'dir yan lag ma yin no//brdzun du smra bas so/ /gang yang rung ba la go bar byas na'o/ /nyams par 'dun pas so/ /de ni gzhi gzhan ma yin no/ /brjed pa ni yod pa nyid ma yin no/ /don gyi de nyid ni mi brdzun par smra ba nyid kyi rgyu ma yin no/ /gzhi med pa'i dge 'dun lhag ma rnam par 'byed pa'o//brjod par bya ba gzhan la gnas pa'i tshig gis brdzun na'o/ /gzhan gyi cha dang mthun pa'i dge 'dun lhag ma rnam par 'byed pa'o// //mi brten pas skur pa 'debs na sbom po'o/ /ming ma smos pa yang ngo / /de bzhin gshegs pa la ngan sems kyis khrag phyung ba dang /dge 'dun gyi dbyen byas pa'o/ /bsams te smras so zhes bya ba la sogs pas gzhogs smos byed na nyes byas so/ /gzhi med pa dang bag tsam gyi dge 'dun lhag ma zhu ba'o// //gzhan gyi 'khor kha 'dren na sbom po'o/ / bzlog pa'i tshul gyis mi gtong bar rjes su sgrub pa'i rang bzhin ni rjes su mthun no/ /gso ba ni bzlog pa dang 'dra ba nyid do/ /tshig gi skad cig ma gcig nyid do/ /bzlas pa ni tha dad pa nyid do/ /mjug sdud pa ni ma yin no/ /'jug pa ni sbyor ba nyid do/ /bskrad pa dang gleng ba dang /dran par ma byas pa ni de'i'o/ /de la ni bsgo bar mi bya ba nyid do/ /de dag la bzhams pa dang las kyis mi bsgo bar mi bya'o/ /de'i mtha' la mi gtong na'o/ /rtul bar byed pa nyid do/ /dbyen la'o/ /dge 'dun gyi'o/ /dge 'dun gyi dbyen byed pa'i dge 'dun lhag ma'o// //de'i grogs nyid rjes su sgrub par byed pa'o/ /rjes su phyogs pa'i dge 'dun lhag ma'o// //rang skrod par byed pa'i dge 'dun la log pa'i bsam pas de la de ltar zhugs so zhes brdzun du smra ba nyid do/ /khyim sun 'byin pa'i dge 'dun lhag ma'o// // dge slong gi lhag pa'i tshul khrims kyis glengs pa nyid ni bdag nyid kyis de la dge slong dag gis brjod par mi bya ba nyid du byed pa la'o/ /bka' blo mi bde ba'i dge 'dun lhag ma'o/ /dge 'dun lhag ma rnams rdzogs so// //nyin mtshan gyi dang po ma yin pa la tha ma yin pa med pa nyid do//gnas pa la ni sbyor ba'i snod nyid do/ /de'i dang po ni skya rengs dang po de'o/ /las la ni 'das na nyi ma shar ba'i'o/ /spang ba la ni 'du shes las gtso cher rang gi nyid do/ /de ni bsngos pa nyid na bral ba nyid do/ /rab tu 'byung ba'i don du nges par byas pa yang de nyid do//chos gos las kyang rung bar byas na'o/ /'di la rjes su zhugs pa nyid kyang nyams pa yin no/ /rang bzhin las nyams na yang ngo / /de yod na dngos po de lta bu gzhan la 'byung ba nyid do/ /zhag bdun pa la ni rigs mthun pa la'o/ /ltung ba de yod na yo byad tsam bdag gir byas pa la spang ba nyid do//chung ba nyid kyis dum bu de ni mi 'gyur ro/ /dge 'dun gyis yang ngo / /'di la med pa de nyid gtso bo'o/ /'di gsum ni sra brkyang bting ba la mi 'byung ngo / /yod na'o/ /rang gi nyid do/ /zhag bcur rjes su zhugs pa nyid do//gzhan gyi nyi ma'i dang po la'o/ /gos la'o/ /'khor gsum khebs pa'i mtha'i tshad la'o/ /byin gyis brlabs pa dang ma 'brel pa la'o/ /'brel kyang rjes su zhugs pa dang bcas pa la'o/ /'di la gzhan yod na byin gyis ma brlabs pa de'i shan tshun chad nas so//'chang ba'i spang ba'o// //gding ba dang bral ba la ni nyes pa med do/ /gal te deng nyid phyir log cing gnas par bya'o snyam pa med na gding ba gzhag ste 'gro bar mi bya'o/ /de ltar bsams te song nas dus ma 'byor na de brnyas te der gnas par bya'o/ / ma rnyed na bla gos bzhi bltab tu byas pa'i steng du yun ring du mi nyal bar ro/ /snam sbyar bzhag par mi 'os pa'i gnas su dbyar gyi ras chen yang bzhag par mi bya'o/ /char bab na mi bzhag go/ /chu klung gis chod par 'gro ba la yang mi gzhag go/ /de gnyis dogs par yang mi bzhag go//dge slong dang bcas pa nyid dang / sgo glegs dang bcas pa nyid du bcas pa'i gnas dang / char 'bab pa dang / 'bab tu dogs pa dang / bgrod par bya ba chu klung gis chod pa nyid lta bu med na gnang ba ma thob pa dang / sra brkyang ma bting bas snam sbyar med par gar yang 'gro bar mi bya'o//gnas su phyin par mi 'gyur na chos gos kyis phyung ste gzhan la byin gyis brlabs pa ni cho ga'i rnam pa'o/ /snam sbyar lci ba nyid yin na rgan po dang nad pa dag la mi 'bral ba'i gnang ba sbyin no/ /byin gyis brlabs pa dang gnang ba ma thob pa ni byed pa po nyid do//de'i gnas nye 'khor dang bcas pa nas gzhan na gnas pa la skya rengs shar na'o/ /mtshams byas pa la ni mtshams gnas kyi mtha'o/ /bdag po gcig nyid ma yin pa'i bar gyi mtshams rnams ni tha dad pa nyid do//nor las dang lta ba las tha dad pa ma yin pa'i yang ngo / /yal ga dang yal ga phra mo dag ma reg pa na gnas tha dad pa nyid do/ /rtsa ba ni thun mong ngo / /rtsa ba'i rtsa ba la sogs pa yang ngo / /yal ga dang lo ma reg pa'i shing ljon pa rnams ni gnas gcig pa nyid do//de'i cha 'og mar dpyangs pa nyid ni steng g.yogs dang 'dra'o/ /gru dang shing rta dag gi yang ngo / /mtshams med pa la ni yan lag gis khyab pa mtha'o/ /nye 'khor ni kho ra khor yug tu 'dom re re'o/ /rtsig pas bskor pa'i grong la ni ji tsam du ba lang drug dang ldan pa'i shing rta smyig ma can gyi'am bya gag spar nas 'gugs pa'i lam gyis khyab pa'o//rib mas bskor ba la ni ra lug gi rdul gyis sam mi rang bzhin gyis ngo tsha dang ldan pa'i bshang ba'i lam gyis so/ /'obs kyis bskor pa la ni skas gdang bu bcu gnyis pa'i 'am phyag dar bor ba'i bong ba rags pa'i lam gyis so//gnas de'i 'phral gyi bya ba dang / 'gro ba dang / 'dug pa dang / rdul dag gis der gtogs pa khyab bo/ /mtshams med pa'i lam du tha dad pa ma yin par 'gro ba'i mi la ni 'dom bzhi bcu rtsa dgu'o//mtshams gzhan ni ma yin no/ /dbus nas rgyang grags kyi mtha' phan chad ni gnas tha dad pa nyid do/ /'bral ba'i spang ba rnam par 'byed pa'o// //dam dum du gyur pa la byin gyis brlabs pa med par mi 'gyur ro/ /spang ba la mi 'chags pa ma yin no//dge 'dun gyi la yang ngo / /de las 'bral bar 'gyur ro/ /gzhan gnas pas gzhan gyi gnas mi nyams so/ /chos gzhan pa dang 'di pa dag ni lta ba las zhes bya bas ma 'phangs pa ma yin no/ /thun mong ba dag gis sgo khang yang ma yin no//nor las zhes bya bas pha dang bu dag kyang ma yin no/ /spangs pa nyid kyang de dang 'dra'o/ /nyal po byed par shom pa nyid kyang ngo / /grong la de yod pa ni gtsug lag khang gi nye 'khor nyid ma yin no/ /phral ba'i spang ba zhu ba'i skabs so// //'bral ba'i spang ba'o//kha bskang ba la re ba med na chung ba khru gang yan chad kyang chog pa dang 'dra'o/ /byin gyis brlab par bya ba yod pa nyid na yang ngo / /gzhan du na de ni zhag sum cu 'das na'o/ /kha dog la sogs pa las rigs mi mthun pa ni chog pa nyid ma yin no/ /dkar po nyid ni kha dog thams cad pa nyid do//de rnyed na zhag bcu pa de'i dang po la bag la glon pa nyid do/ /ser ba las snam sbyar gyi mtha' ni nyis rim mo/ /gding ba yang ngo / /bla gos dang mthang gos gnyis kyi tshig kyang ngo / /dus tshigs su spyad pa las ni nyis 'gyur du'o//phyag dar khrod las byas pa dag la ni nges pa med do/ /rnyings pa nyid dang dengs pa nyid la ni ci dgos pa lhag par sbyar ro/ /lhag par sbyar ba nyid du mi bya'o/ /spang bar 'gyur ba nyid kyang yin no/ /rigs pa can byi dor byas nas 'di nyid du sbyar bar bya'o//snyam pa'i sems ma skyed par dbog par mi bya'o/ /gang yang rung bas phog pa ma sbyar ba'i snga rol du spang bar 'gyur ba nyid do/ /snam sbyar gyi snam phran dag ni dgu yan chad nyi shu rtsa lnga man chad de zung ma gtogs so/ /de yan chad ni tshem bu'o/ / dang po gsum la ni de dag gi glegs bu phyed dang gsum pa nyid do/ /gnyis pa la ni glegs bu phyed dang bzhi pa nyid do/ /gsum pa la ni glegs bu phyed dang lnga pa nyid do/ /byin gyis brlab tu rung ba chen po dag ni rang gi khru gsum dang lnga dag go/ /chung ngu dag ni gnyis ka las khru phyed phyed dbri'o//'bring rnams kyi tshad ni bar ma'o/ /mthang gos ni do dang lnga yang yin no/ /do dang bzhi yang yin no/ /'khor gsum khebs pa nyid yan chad kyang ngo / /khru'i don ni lus kyi cha bdun las gnyis so/ /mi yogs na ral kha dpung chad bya'o//zla bas spang ba rnam par 'byed pa'o// //de bas sman pa ni chung ba dang 'dra ste nyes byas su 'gyur ba nyid do/ /'khor gyi phyed mi khebs pa re ba med pa nyid do/ /rung ba ma yin pa yang ngo / /gdong phyis dang / chu tshags dang / stan 'byam dang / dre'u rngog la sogs pa yo byad kyi gos byin gyis ma brlabs pa dag go/ /zla bas spang ba zhu'o/ /zla bas spang ba'o// //sbrum ma dben par bzhag go/ /der dge slong ma rnams kyis yal bar mi dor ro/ /de la zan sbyin par bya'o/ / pha ma dag gi bdun pa tshun chad las gang yang rung ba snga ma gcig las skyes pa yang nye du yin no/ /'du shes gtso cher byed pa po nyid yin no/ /de ni shes gtso bo'o/ /dge slong ma nyid dang nye du ma yin pa nyid dag la'o/ /'og ma la yang ngo / /byin gyis brlabs pa rang gi rnying pa 'khrur gzhug par 'os pa chos gos dag gding ba dag las 'ga' zhig bsgo bas 'khrur bcug gam/'tshed du bcug gam/ 'chag tu bcug pa dag na'o/ /phyogs las byas pa yang las byas pa nyid do/ /byas pa nyid na byed du bcug pa nyid yin no//'bras bu'i mtha' man chad gcig pa nyid do/ /tshigs su gyur pa nyid la 'bras bu rnams gcig pa nyid do/ /'du shes gtso bo nyid la don ji lta ba nyid la ni dngos gzhi'o/ /don ji lta ba nyid ma yin pa la ni dngos gzhi dang nye ba'o/ /yid gnyis ni 'du shes dang 'dra'o//dge 'dun gyi khrims su bya ba bsrung bar bya'o/ /glo bar du 'ongs pas kyang de las mi 'gal ba nyid du bya'o/ /yod dam med pa nyid dang ji lta bu yongs su shes par bya ba'i phyir des de bri bar bya'o/ /ha cang yun mi ring bar ro//sangs rgyas kyis gsungs pa dge 'dun las g.yo ba med do/ /lhung bzed dang / chos gos dang / dra ba dang / phor bu dang / ska rags lhag pa 'bul ba na dge 'dun gyis nye bar bzhag pa'i don du blang bar bya'o/ /de ltar nye bar bzhag pa ni de dag med pa dag gis ci dgar bkur bar bya'o//'khrur 'jug pa'i spang ba rnam par 'byed pa'o// //bshang ba dang / gci ba dang / ljan ljin dang / 'dam rdzab la sogs pas ma rung bar 'gyur ba 'khrur 'jug pa la na smad pa med do/ /dre'u rngog dang khyim pa'i gos dang /sngas nang tshangs can dang / rung bar byas pa dang / spangs pa dang / dge 'dun gyi rnams la ni nyes byas so/ /'khrur 'jug pa'i spang ba zhu ba'i skabs so/ /'khrur 'jug pa'i spang ba'o// //'dul ba'i mdo bam po gsum pa/ dge slong mas gos rin chen po rje ba'i phyir blang bar bya'o//dge slong ma dang lhan cig rje bar bya'o/ /mnyam pas so/ /yang na de dga' ba nyid kyis so/ /len ma'o/ /rnam par rig byed kyis so/ /gos so/ /dge 'dun la gos 'bul ba dang legs par smra ba la ltung ba med do//bsnyen par rdzogs par byed pa dang por rlag byung ba dag la'o/ /dad rdzas brjod de mdun du bzhag nas mi ltos par song ba la'o/ /len pa'i sdang ba rnam par 'byed pa'o// //lag tu 'ongs pa nyid na thob pa nyid do/ /lta ba'i nye 'khor du gyur pa ni de'i dang po yin no//nye bar ma gyur pa nod pa ni sbyor ba nyid do/ /rgya che ba dang tha snyad kyi dbang ma yin pa nyid ni gos sbyin pa la sogs pa kha gtso bo yin no/ /re zhig gi sems kyis na ltung ba med do/ /rin sbyin pa na brjed pa la'o/ /len pa'i spang ba zhu ba'o//len pa'i spang ba'o// //mi'i 'gro ba par gtogs pa khyim par gyur pa srog dang ldan pa nye du ma yin pa nyid ni ltung ba'i byed pa po yin no/ /'og ma gsum la yang ngo / /gos phrogs pa dang / brlag pa dang / tshig pa dang / rlung gis khyer ba dang chus khyer bar ma gyur pa la'o//blangs na nyes byas kyi'o/ /thob na dngos gzhi'o/ /chos gos so/ /mi chung ba'o/ /rin thang dang / kha dog dang / khru tshad las rnam pa gang blangs pa'o/ /gzhan la ni ltung ba med do/ /ras ma dang kha tshar dag slong ma'o//rgyu dang spun la ni na smad pa nyid do/ /de'i rang bzhin ni de dang 'dra'o/ /slong ba'i spang ba'o// //byin gyis brlab par bya ba thams cad med na slong bar rigs pa nyid do/ /de ni ltung ba'i byed pa med pa nyid do/ /khyim pa'i stod g.yogs che tshad ni ras yug chen khru bcu gnyis pa'o//smad g.yogs ni ras yug phran bdun pa dang do pa'o/ /dge slong gi che tshad ni snam sbyar dang sham thabs kyi rim pa ji skad bstan pa'o/ /zung blang bar bya ba nyid do/ /gang yang rung ba'o/ / tshad de las lhag pa ni blang bar bya ba nyid ma yin no/ /snga ma thog na kha bskang ba yang ngo / /lhag ma sbyin par bya ba nyid ma yin no/ /phyi ma thob na lhag pa sbyin par bya ba nyid do/ /blang bar bya ba ma yin pa blangs na nyes byas so/ /thob na dngos gzhi'o//sbyin par bya ba mi sbyin na yang ngo / /slong bar rigs pa'i spang ba'o/ /spangs pa ma phul bar shes pa ni ma spangs pa dang 'dra'o/ /de nyid gzhan yin no/ /spags pa slong ba'i spang ba'o/ /sbyin par byed pa spungs che ba yang ro/ /sbyor ba gcig pa'i phyir thob na gcig nyid do//so so nas spags pa slong ba'i spang ba'o// //bkur ba rung ba ma yin pa chos gos kyi rin spangs nas yongs su dri ba sngon du btang zhing bstan te/ bsgo zhing smras pa byung ba'i mtha' rjes su brjod pa sngar byas pa'i zhal ta byed pa la bskul bar gyur na'o//go bar ma nus pa nyid na bskul ba nyid ma yin no/ /ma grub na lan gnyis su yang ngo / /lan gsum du yang ngo / /de'i 'og tu lan gsum gyi bar du phyogs su bsdad par bya'o/ /ma grub na sbyin par byed pa la bsgrags par bya'o//de ltar spangs par gyur zin pa na 'bul bar byed na spangs pa smras te/ /sbyin par byed pa'i sems bsdu bar rjes su sgrub pa khas len pa las blang bar bya'o/ /bskul ba dang bsdad pa lhag gam khas ma blangs na'o/ /blangs na'o/ /gsum car mi nyid dang khyim pa nyid yin na'o//ma smras na nyes byas so/ /ma spangs pa la'o/ /ma dris par ston na yang ngo / /re ba med pa nyid na ma sbran na yang ngo / /bkur ba'i spang ba'o// //stan bcang bar bya'o/ /srin bal gyis byas sam byed du bcug na'o//stan la ni bkram pa nyid byed pa mthar thug pa'i dang po yin no/ /byas zin pa rnyed pa dang / yongs su longs spyod pa dang / mngon par 'du byed pa dag la ni ltung ba med pa'o/ /srin bal gyi spang ba rnam par 'byed pa'o// //nyung ngu dang bsres pa nyid na na smad pa nyid do//rdzas nyams pa nyid la yang ngo / /srin bal gyi spang ba zhu ba'o/ /srin bal gyi spang ba'o// //lug gi bal nag po 'ba' zhig dag go/ /rang bzhin gyis so/ /sngon po dang / 'dam kha dang / kham pa dag kyang de nyid do/ / bal nag po 'ba' zhig gi spang ba'o/ /de dag phyed pas lhag pa nyid na'o/ /phyed dkar po dang 'khob bal dag las cha mnyam pa nyid du'o/ /glo dang rgyab dang gnya' ba nas skyes pa ni snga ma'o/ /mgo dang rkang pa dang lto ba nas skyes pa ni phyi ma'o/ /cha gnyis bsres pa'i spang ba'o// //chu dang zheng gnyis kar lhag pa nyid yin na bcang bar bya'o/ /thung ba nyid dang dog pa nyid dag ni bskyed par bya'o/ /ral na btsem par bya'o/ /bu ga rdol du gyur tam sha zad pa nyid dag ni sbyar bar bya'o/ /bcos dka' ba nyid yin na sbyin no//gnang ba ma thob pa gzhan yod pa'am rang dgar btang bas lo drug ma lon par stan byas pa nyid na'o/ /brtsams pa nyid na rtsom na zin pa dang 'dra'o/ /mthar thug na sbyor ba'i ltung bar mi 'gyur ba ma yin no/ /rab tu byung ba gzhan gyi ni tha dad pa nyid do//lo drug bcang ba'i spang ba'o// //gding ba rnying pa las bde bar gshegs pa'i mtho gang gis ma glan pa'i gding ba sar pa spyod na'o/ /gal te yod na'o/ /de tsam na yang ngo / /bcos par nus na yang ngo / /mthud cing sbyar du rung bas kyang ngo //mtho gang gi spang ba'o// //khyer ba med na dpag tshad gsum las 'das par lug gi bal khyer na'o/ /yod na yang ngo / /lam du 'gro ba ni rgyang grags kyi bdag nyid do/ /phyed du na sbyor ba'o/ /rdzu 'phrul las gzhan pas nam mkha' la 'gro na nyes byas so//sprul pas kyang ngo / /zhwa dang / lham sgro gu can dang / stod kor nang tshangs can rgya cang dang / lcag pod dang / shur bu phre'u la sogs pa'i don du de tsam dag la ni nyes pa med do/ /rdul phra rab dang /rdul phra mo dang / chu dang / lcags dang / ri bong dang / lug dang / glang dang / nyi zer gyi rdul dang / sro ma dang / shig dang / nas dang sor rnams ni snga ma drug la phyi ma'o/ /sor bzhi drug la khru gang ngo / /khru phyed dang bzhi la mi'i srid do/ /khru bzhi la gzhu'o//de lnga brgya la rgyang grags so/ /dgon pa'i dang po ni de'i mtha'o/ /lus kyis khur mi bkur ro/ /glo dang rgyab dang rked pa dang mgo bo dag gis mi bkur ro/ /'dir thun mong ma yin pa nyid du dogs par mi bya'o/ /khur phyed las lhag par bkur bar mi bya'o/ /bal thogs pa'i spang ba'o// //chos gos rnying pa'i gnas su lug gi bal dag go/ /'chag par rmel ba'o/ /bal rmel du 'jug pa'i spar ba'o/ /rin po che bdag gir byas na'o/ /lcogs pa nyid na de rdzogs so/ /de bas pha zad na ni phyed nyid do/ /rang gi rung bar ma byas pa yang ngo / /reg gam reg tu bcug na'o//gang yang rung bas so/ /snyad gdags su rung ba'i zangs ma la ni nyes byas so/ /gzhan la ni ltung ba med do/ /zha nye dang / khro chu dang / ro nye dang / lcags dag la yang ngo / /dge tshul gnyis kyis kyang ngo / /sbyin bdag bdag po nyid du smos su gzhug pa dang /zhal ta byed pa bdag nyid du khas len du gzhug pa dang / byin gyis brlabs pa zhes bya ba ni rung ba dag yin no/ /chos dang ldan pa'i don mi bdog pa'i rkyen las gzhan pa la mi 'chags so/ /bdag po ring ba nyid yin na yang nyams pa med do//bdag nyid kyi don du bza' ba byed du gzhug tu rung ngo / /de byed pa la 'bul ba'i phyir kAR+ShA pa Na blang ba yang ngo / /lam rgyags ni rin po che man chad las so/ /me'i don du me shel nye bar gzhag par bya'o/ / de ma sbas par bzhag par mi bya'o/ /ma byin par len pa la bstan par mi bya'o/ /de'i 'bras bu phyung nas de la sbyin par bya'o/ /chu'i don du chu shel yang ngo / /bsrung ba'i cho ga ni 'dra'o/ /yo byad rjes su gnang bar rin po che bdag gir bya ba'i shan bsre bar mi bya ba nyid do//ra gan dang / zangs dang / khar ba dang / shing gi lhung bzed bdag gir mi bya'o/ /de dag bdag gir byas pa'am gzhan yang rung ste gal te yongs su spyad dgos par gyur na sman phor gyi yongs su spyad pas so/ /byin gyis brlab tu rung ba ni gnyis te/lcags las byas pa dang sa las byas pa'o/ /nor bu dang / mu tig dang / bai DUr+ya dang / man shel dkar po dang / byi ru dang / dngul dang / gser dang / rdo'i snying po dang / spug dang dmar po dang g.yas su 'khyil pa la sogs pa ni rin po che'o//snyad gdags su mi rung ba la ni na smad pa nyid do/ /'og ma la yang ngo / /de ni g.yas pa dang / chag pa dang / dum bu dang / tshig pa dang / sngon ma spyad pa dang ma byas pa dang / mtshan dang mi ldan pa dang bcos ma'o/ /gser dngul la reg pa'i spang ba'o// //rnyed pa 'dod pa la ltung ba 'byung ngo / /pha rol po khyim pa nyid dang nye du ma yin pa nyid yin na dngos gzhi'o/ /bskyed phyin na'o/ /'og ma la yang ngo / /pa Na'am rin po ches spyod pa las so/ /sbyor ba la ni gcig pa nyid do//kun dga' ra ba pa'am dge bsnyen dag yod na bsko bas dkon mchog gi don du bskyed par bya'o/ /gta' nyi rir blang bar bya'o/ /dpang po dang / lo dang / zla ba dang / nyi ma dang / dge 'dun gyi gnas brtan dang / dge skos dang /len pa po dang / rdzas dang bskyed rnams dpang rgyar bris nas so/ /rgyus shes pas de gzhan pa la yang khong du chud par bya'o/ /mngon mtshan can gyi spyod pa'i spang ba'o// //gzhan gyis so/ / dge 'dun gyi bshos kyi phyir dge 'dun gyis 'bras rin gyis nyo ba la sbyin par bya'o/ /gal te de nyid kyi na theb dang bcas par ro/ /zad na dge 'dun gyis nyo bar bya'o/ /sar pa yang ngo / /gal te srog chags med na rnying pa btsong bar bya'o//rin thang mi gdab bo/ /khyim pa'i nyo tshong dag tu lag gzhug par mi bya'o/ /khyim pa nyor gzhug go/ /med na lan gsum gyi bar du tshig brjod par bya'o/ /zong la rtseg pa ni gzhan gyi don du yang mi bya ste/ dkon mchog gsum ni ma gtogs so/ /gta' gzhug par mi bya'o//dge 'dun gyi rdzas de g.yogs pa la dge 'dun gyi las byed pa la gtad do/ /rgan rabs rgan rabs dag la ma zhugs par dge 'dun gyi don du brtson par mi bya'o/ /de'i tshig yi ger bri ba'i dam bzhag la nan tan bya'o/ /nyo tshong byed pa'i spang ba'o// // lhung bzed kyi'o/ /rab tu 'byung ba la ltos pa'i don nyid du nges par byas pa ni spangs pa nyid yin no/ /skya ba dang dkar ba dang che ba rnams ni rung ba nyid ma yin no/ /ma tshos pa yang chung ngu nyid yin no/ /lhung bzed chung ngu gcig la ni nyes pa med pa nyid do/ /lhung bzed 'chang ba'i spang ba'o//ha cang chags par mi bya'o/ /yo byad la ha cang chags par mi bya'o/ /gang la zhen pa de bcang bar mi bya'o/ /lhung bzed kyang med na blang bar bya'o/ /de yod pa nyid na yang ngo / /lhan pa bzhi man chad nas de dag rung zhing yongs su spyad bzed pa'o/ /khyim pa nye du ma yin pa las blangs pas yongs su btsal na'o//de gnyis ni 'og ma gnyis la yang ngo / /tha ga pa dang sbyin bdag dang gzhan dag la'o/ /nye du ma yin pa ltar nye du las ni bskyed dang lhung bzed gnyis ma gtogs pa la ni nyes pa med do/ /nyes byas so/ /de las grub na dngos gzhi'o//med pa nyid la yod pa'i blo can la ni na smad do/ /rang gi yo byad dag gis so/ /de dag yod pa nyid na yang ngo / /bzang po 'dod pas brje na'o/ /'di ni dge 'dun la spang ngo / /du ma nyid na mchog tu 'dod pa gcig go/ /gzhan ni thams cad kyi thams cad du spang bar bya ba nyid yin no//rab tu byung ba 'di pa la'o/ /de la tha chad sbyin par bya'o/ /brims pas bsnyigs par bya'o/ /bskos pas so/ /des sang de byed par 'gyur ba na tshogs pa'i dus su dge 'dun la mjal bar bya'o/ /tshe dang ldan pa dag bdag sang lhung bzed 'brel ba med pa 'drim par 'gyur gyis khyed cag rang rang gi lhung bzed dag thogs la dge 'dun gyi nang du gshegs par mdzod cig ces so//'khod pa'i don du nan tan bya'o/ /bsngags pa brtsam zhing dbul bar bya'o/ /gnas brtan lhung bzed 'di ni shin tu gsal ba/ dbyibs legs pa/ longs spyad par bzod pa lags kyis gal te bzhed na snoms shig ces so/ /yon tan ji lta ba bzhin du'o/ /'dod na blang bar bya'o/ /bar du chod pas blangs pa na blang bar mi bya'o/ /tshig gnyis pa la ni mi sbyin zhing 'og ma la ni ma yin no/ /ltung ba byung ba la spang bar mi bya ba nyid dang /byin gyis brlab par mi bya ba nyid dag go bar bya'o/ /nye bar spyod pa la ma chag gi bar du dal bu dal bus spyod cig ces so/ /des gnyis ka kun tu spyad par bya'o/ /de la yo byad ches bzang po nges par sbyar bar bya'o/ /spyod pa na ches yang ba'o//zas kyi bya ba nyid la ni mi bya ba kho na'o/ /byi dor yang dang por bya'o/ /lhung bzed tshol ba'i spang ba'o// //rin med par bsgo bas sam gzhan gyis kyang 'thag tu bcug na'o/ /gzhan nyid dang bcas pa la ni de ma byas pa nyid ma yin no/ /'thag tu 'jug pa'i spang ba'o// //de'i phyir brtag par bya ba bsam pa las byung ba nyid do/ /kho lag che ba nyid dam 'bras bzang ba nyid la 'thag pa nges par sbyar ba'o/ /gal te sbyin bdag gi zad na'o/ /rngan pa ma byin na yang ngo / /sbyin par byed pas de'i don du rjes su ma gnang ba lta bu ni byed pa po dag yin no//grub pa ni dngos gzhi'o/ /mdun rol du de'i phyir bsam pa las byung ba rjes su bsgrub pa tha dad pa ni nyes byas kyi'o/ /ma bsgo bar nye bar 'gro ba ni de nyid do/ /'thag pa bskyed pa'i spang ba'o// //dbral bar bya ba dge slong nyid do/ /dbrog par bya ba rang gi nyid ma yin na'o//de gos nyid yin na'o/ /de'i 'am des bskos pa'i lus dang ngag bsdus pa'am/ tha dad pa dag gis dbrog pa'i don du zhugs pa lta bu ni byed pa po dag yin no/ /lus las tha dad pa'i dngos por gyur pa mthar thug pa na mtha'i'o/ / sbyor ba la ni nyes byas kyi'o/ /de ni phyir sbyin par bya ba nyid do/ /'di la rang gi don nyid ni yan lag ma yin no/ /bsnyen par ma rdzogs pa la ni sprod pa dang 'dra'o/ /rang gi nyid bsrel bar gyur pa'i 'phrog pa 'dir bsdus pa yin no/ /blo gros ngan pas byas pa ni rjes su 'phrod pa nyid yin no//gnod pa dang mi phan par byed pa la 'jug pa'i gegs bya ba'i phyir ni ltung ba med do/ /'phrog pa'i spang ba'o// //dgon pa pa'i chos gos gcig la ni 'jigs pa dang bcas pa nyid yin na grong yang rang gi gnas dang 'dra'o/ /des don gyi dbang gis grong gzhan na 'dug pa de las zhag drug tshun chad du dbral bar bya'o//lhag pa la ni bag yangs med de/ bar chad kyi dbang gis ma 'ongs pa la nyes pa med do/ /'dir zhag drug tu 'gro ba ha cang thal ba nyid la ni gnag pa yan lag ma yin no/ /zhag bdun 'bral ba'i spang ba'o// //bdag nyid gnas par khas blangs pa'i nyin mo'i zla ba snga ma'i dang po tshun chad nas dbyar gyi ras chen btsal bar bya'o/ /bdag nyid kyis dbyar gyi 'og gi zla ba phyed kyi mtha'i bar du bcang bar bya'o/ /sngon dang phyi ma gnyis las de ma yin pa'i dus gnyis ni byed pa po nyid do//gzhan du 'chang ba la'o/ /sngar btsal ba ni nyes byas kyi'o/ /grub na mtha'i'o/ /rnyang rnying la ni na smad pa nyid do/ /de'i rjes su 'gro ba ni khas blang ba ji lta ba bzhin no/ /dbyar gyi ras chen gyi spang ba'o// //dbyar gyi rnyed pa ni byed pa po nyid do//dbyar gyi nang logs su bdag gir byed na'o/ /btang ba'i dbang gis mtha'i zhag bcu la rnyed pa ni ma gtogs so/ /de bgos na yang ngo / /ma bgos na yang ngo / /sbyin bdag gi tshig gis dbang med na'o/ /dgag dbye'i nyin mo'i phyi de'i nyin par te de sbed pa ma bskos pa rnams la'o//de mi sko bar mi bya'o/ /gtong ba las byung ba'i spang ba'o// //gzhan gyis gang zag gzhan nam dge 'dun la bsngos pa'i gos shes bzhin du bdag nyid la bsgyur te thob na'o/ /bsgyur ba la ni nyes byas so/ /'dir gzhan la yang ngo //de'i 'bras bu la yang ngo / /gzhan la yang ngo / /dbral ba dang sbyar ba gnyis ka sems can du bgrang ba nyid ma yin pa la yang ngo / /phyogs gcig nyid la yang ngo / /lhag ma za ba dud 'gro la sogs pa btsal te ma rnyed pa la ni ltung ba med do/ /bde bar gshegs pa'i sku gzugs gzhan la ni g.yar por sbyin du rung ngo //bsngos pa mi sbyin na nyes byas so/ /mtshams kyi phyi rol tu song ste dge 'dun gyi byin gyis rlob par byed na'o/ /ma tshogs pa dag gis 'god na'o/ /byin gyis ma brlabs par yang ngo / /kun dbang ba'i rnyed pa dge 'dun las gcig gam gnyis sam gsum gyis len na'o//de la gzhan dag gis shas nyid ma bral lo/ /rku sems kyis ni brkus pa nyid yin no/ /gya tshom du gtsug lag khang dor bar mi bya'o/ /rjes su chags pa dang bcas pa der srung mar gzhug go//ma lhags na lo bcur 'da' bar bya'o/ /lnga ni bsod snyoms kyis so/ /der dus su sbyin bdag ma byung na lo gzhan lnga ni nye 'khor gyi gtsug lag khang dang lhan cig tu'o/ /gso sbyong tha dad pa dang rnyed pa thun mong ba'i las bya'o/ /'gro ba na dngos po rnams nye 'khor gyi gtsug lag khang dag tu gdams par bya'o//gnyug mar gnas na sbyin par bya'o/ /gnas gzhan gyi rdzas gnas gzhan du mi sbyin no/ /mi ster na de dag gis sbyin par bya ba nyid yin no/ /khyim bdag de nyid yin yang nges pa la gzhig pa med do/ /mi ster na mthus gzung bar bya'o//g.yar po nyid du sbyin par bya'o/ /mchod rten gzhan la bsngos pa'i rnyed pa ma grub pa la ni nyes pa med de/ byang chub chen po dang / chos kyi 'khor lo dang / cho 'phrul chen po dang / lha las babs pa rnams kyi de dag las gzhan pa ni ma gtogs so/ /bsngos pa las bsgyur ba'i spang ba'o// //zhag bdun bar byin gyis brlabs pa'i nyi ma 'das so cog dge slong la brjod par bya'o/ /bza' ba'i phyir 'chang na'o/ /de'o/ /skya rengs brgyad pa shar na'o/ /bza' bar bya ba rung ba ma yin pa nyin mtshan 'das pa ni 'dir zos pa dang 'dra bar rnam par gzhag go//de don gang gi phyir brtags pa de'i phyir ni ltung ba med do/ /snar blugs pa dang bsku mnye bya ba dag ni sog 'jog byas kyang rung ngo / /sog 'jog gi spang ba'o/ /spang ba rnams rdzogs so// //dge 'dun 'dus pa las shes bzhin du chos ma yin pa chos su dang chos chos ma yin par ston pa ni nyes pa sbom po'o//gso sbyong la ci 'di la khyed yongs su dag gam zhes lan gsum gyi bar du dris pa las ma dag par shes bzhin du cang mi smra bas 'da' bar byed na nyes byas so/ /de gnyis dang pham par 'gyur ba dang dge 'dun lhag mar 'gyur ba gnyis las gzhan pa'i rdzun du smra ba'o//smra ba'i tshe nyid na yang 'du shes byung na de kun nas slong ba yin no/ /mna' 'dor bar mi bya'o/ /brdzun du smra ba'i ltung byed do// //dge slong gi'o/ /'og ma la yang ngo / /skyon nyid brjod par 'dod pas so/ /'jam pos byas kyang rung rtsub pos byas kyang rung ngo //rung ba ma yin par bsam pa gang yang rung ba smras na'o/ /mi dga' ba nyid du ma gyur na yang ngo / /gzhan rgyal rigs nyid dang bram ze nyid la sogs pa ni nyes byas so/ /skyon nas smra ba'i ltung byed do// //phra ma byed 'dod pas che ge mo zhig zer ro//zhes smra na'o/ /gal te mi nas so/ /de yang dge slong nyid yin na'o/ /gzhan du na nyes byas so/ /phra ma byed pa'i ltung byed do// //shes gtso bo/ /dge slong gnyis kyi rtsod pa dge 'dun gyis legs par zhi bar byas pa nyid la'o/ /skyo sngogs so/ /gnyug mar gnas pa dang las byed pa dang 'dun pa phul ba dag kho na la dngos gzhi'o//lta ba smra ba dang glo bur du 'ongs pa dag la ni nyes byas kho na'o/ /rtsod pa gzhan nyid la rtsod pa gzhan nyid du shes pa ni de dang 'dra ba nyid yin no/ /las kyi 'bras bu la gnas pa la de ma yin pa nyid kyis kun tu spyod pa la ni phyed nyid do//skyo sngogs byed pa'i ltung byed do// //ston pa la'o/ /chos so/ /tshig drug las lhag par ro/ /lhag pa nyid du shes pa la'o/ /tshig lnga pa la ni rtsom pa lnga pa las so/ /mkhas pas gong nas gong du dris pa gtan la dbab par byas pa dang slob gnyer gsod pa dang kha ton zhu ba dang /dmigs kyis 'dri ba dang dus khrims 'bogs pa dang yon bshad pa dag ni ma yin no/ /gnas gzhan du ni snga ma ma byas pa nyid do/ /ston pa'i ltung byed do// //bsnyen par ma rdzogs pa dang cig car ram mjug thogs su ston byed du gyur pa'i chos dang yi ge yang 'don na'o//mi 'dod bzhin du grub pa ni ma gtogs so/ /rjes su nyan du gzhug par bya bar 'dod pa yang ngo / /kha ton zhu ba dang slob gnyer gsod pa dang dmigs kyis 'dri ba yang ngo / /'don pa'i ltung byed do// //dge slong dang dge slong ma sdig can dag khyim du so sor go bar byed pa'i dge slong bsko bar bya'o//dge slong dang dge slong ma sdig can dag /khyim rnams su so sor go bar byed pas tshe dang ldan pa dag khyod nyon cig khyim rnams su khyim sun par byed pa dang / gnas rnams su gnas sun par byed pa 'di lta ste/ dper na 'bras sA lu'i zhing phun sum tshogs pa la ser ba'i 'khor lo mi bzad pa bab na 'di ltar 'bras sA lu de nyid shin te ma dang chud za ba dang tshul ma yin pas ma rung bar 'gyur ba dang / bu ram shing gi zhing phun sum tshogs pa la nad kyi rigs dmar po zhes bya ba byung na 'di ltar bu ram shing de nyid shin te ma dang chud za ba dang tshul ma yin pas ma rung bar 'gyur ba lta bu dag yod kyis tshe dang ldan pa dag khyed cag dge slong 'di dang dge slong ma 'dis bstan pa'i tshod ma 'dzin cig /'di ltar dge slong 'di dang dge slong ma 'di ni yos tshig pa bzhin du chos 'dul ba 'di la skyer mi rung ba'i chos can yin gyi/bcom ldan 'das dang dge slong gnas brtan gnas brtan rnams la ltos shig ces brjod par bya'o/ /mi spro na gsol bar bya'o/ /shes gtso bo'o/ /nyan pa po mi shes pa nyid dang bsnyen par ma rdzogs pa nyid dang ldan pa la'o/ /smras na'o/ / pham par 'gyur ba dang dge 'dun lhag ma dag so so yang rung bsdus pa yang rung ngo / /don du ma nyid la tshig tha dad pa med do/ /bsko ba ma byas pa la'o/ /dge 'dun la ma gsol ba la'o/ /gnas ngan len brjod pa'i ltung byed do// //bden pa nyid na'o/ / bden pa ma mthong ba bsnyen par rdzogs pa la'o/ /khyim pa'i mdun du rdzu 'phrul rnam par bstan par mi bya'o/ /dge slong mas ston pa'i spyan sngar mi bya'o/ /mi'i chos bla ma brjod pa'i ltung byed do// //gal te bstan pa nyid du dgos na gsol ba sngar btang ba'i don bya'o/ /dad pa phul ba la'o//dge slong gi dge 'dun gyi zas kyi rnyed pa ma yin pa dge slong gi gang zag la log par bsngos pa yang dag pa ma yin pa'i don nyid gzhan la yang ming ma smos par brjod na yang ngo / /skur pa 'debs pa'i ltung byed do// //'dul ba dang ldan pa nyid do/ /mdo sde la ni nyes byas so//khyad du gsod pa'i ltung byed do// //lag gi blas mchod rten dang dge 'dun gyi don du shing ljon pa bcad par bya'o/ /de'i mdun rol du nyi ma bdun nam brgyad nas de'i drung du dkyil 'khor dang dri dang me tog dang bdug pa dang mar me dang gtor ma sbyin pa dang rgyun chags gsum pa gdon pa dang sbyin pa bshad pa byas nas/lha gang dag shing ljon pa 'di la gnas pa de dag gnas gzhan tshol cig/shing ljon pa 'dis mchod rten nam dge 'dun gyi bya ba byed par 'gyur ro zhes brjod nas smra ba pos shes par gyis shig ces so/ /gal te me 'byung ba'am khrag 'dzag pa'am yal ga 'gul ba'am lo ma lhags pa la sogs pa rnam par 'gyur ba ston na/des zhing la sbyin pa dang ser sna dag gis bsngags pa dang bsngags pa ma yin pa brjod par bya'o/ /mi gtong na gcad par bya'o/ /shes gtso'o/ /ma nyams pa nyid la'o/ /sa bon dang khye'u kha ton pa rung bar ma byas pa dag gi'o//tha na rtsa rgyud yan chad nyams par byas na'o/ /ji ltar yang rung ngo / /sprugs pas kyang ngo / /rtswa dang 'dam rdzab dang sa rdul la sogs pa dag gis mnan nas kyang ngo / /khu tshan la sogs pa dag gis kyang ngo / /rlung dang nyi ma la 'jog pas kyang ngo / / sa gzhi skam par yang ngo / /der 'dun pas so/ /rang ngam gzhan gyis kyang ngo / /nyams par gyur pa na dngos gzhi dag go/ /nyams par bya ba'i grangs dag gi'o/ /sdong bu las so/ /sbyor ba la ni nyes byas dag tu'o/ /'di la snum pa re re las de tha dad pa yin gyi dngos po las ni ma yin no//bton nas bskyed par bya ba nyid yin du zin yang mtha' nyid do/ /nya lcibs dang nya tshang dag chu nas bton pa ni de nyid do/ /tshig gu ma bcom par ril mid byed pa ni phyed nyid do/ /gal te 'di bcad par gyur na legs so zhes smras na bton pa'i'o/ /rdzu 'phrul gyis na ma byas pa nyid do//sa bon la sa bon gzhan nyid du 'du shes pa ni de dang 'dra ba nyid do/ /shun pa dang phri dang 'dab ma skya bo dang me tog kha bye ba dang 'bras bu smin pa rnams ni phyed shi ba nyid du rjes su tha snyad gdags so/ /de dag gi rtsa bar gyur pa rang bzhin las ma bye ba ni ma yin no//sa bon gyi khams btab la rtsa ba ma skyes pa ni phyed skyes pa nyid du'o/ /sa 'bus pa dang sha mo dang sha ba la dang snod dang gos la sogs pa'i rlam rnams ni phyed skyes pa nyid du'o/ /'u sha'i khu tshan la sogs pa dbo ba dang / 'chag pa dang yal ga la sogs pa 'dren pa dang /dkyil 'khor dang skyang nul dag la de dag gis bsam pa nyid la ni ltung ba med do/ /phongs pa'i tshe rtsa ku sha la sogs pas bcings pa des de mi thar na bcad pa yang ngo / /du ma nyid yin na de dag las gcig gis so/ /sa bon gyi chos med pa ni nyes pa byed pa nyid ma yin no//mes reg pa dang mtshon dang sen mo dang ne tso dag gis rma phyung ba dang rnyings pa dang phyung ba dang dkrum pa dang bkas pa dang bcad pa lta bu dag ni rung ba'o/ /rung bar byed pa na sa bon ma yin pa nyid du gyur gyi bar du ltos par bya mi dgos pa nyid do/ /'di la blangs pa ni me ma yin pa nyid ma yin no//'bras bu dag mes rung bar bya ba la spyi'i tshoms ni gtso cher byas pa yang dag pa'i grangs nyid do/ /phyogs gcig nas ni spyi'i rung ba mi 'byung ngo / /dge slong gi rung ba dag byas pa nyid ni rung ba yin no/ /sa rung ba ma yin par yang ngo / /zhag bdun pa dang 'tsho ba'i bar du bcang ba chu grang mos ma gtor bar bza' bar mi bya'o//thun tshod du rung ba yang des ma gtor bar mi bya'o/ /sa bon dang skye ba 'jig pa'i ltung byed do// //gang zag bcu gnyis po dag byed pa po nyid yin no/ /ma bskos pa dag kyang ngo / /sbyor ba dag bag yangs su byas pa yang ngo //bdag dang 'brel ba'i don gyis thos par 'phya yang rung zur gyis gzhogs 'phyas byed kyang rung ngo / /bgrangs pa la ni dngos gzhi'o/ /cung zad tsam yang dang du len par mi nus pa la ni brjod par mi bya'o/ /zhe sdang bar gyur pa de rang gis las su bsko bar mi bya'o//'phya ba'i ltung byed do// //gleng bar gtogs pa'i bsgo ba tshig gis rna la gzon pa dang / cang mi smra bas rna la gzon pa dang / gang zag bstan pa rnams la ngor 'phya ba dang zur gyis gzhogs 'phyas byed pa gsol bas mi bgrang bar mi bya'o/ /dge slong gi bsgo ba rna la gzon na'o//der 'dun pas so/ /gzhan brjod pas so/ /cang mi smra bas na nyes byas so/ /mi dran no zhe na yang ngo / /gal te brjod par bya ba sdug bsngal bar 'gyur ba yin na med do/ /de'i phyir gsad par bya ba mthong ngam zhes 'dri ba la re zhig me 'de shig re zhig skom 'thung shig re zhig ngal so shig nam mkha' mthong ngo sen mo mthong ngo //don dam par na sems can nam gsad par bya ba ma mthong ngo zhes smras na ltung ba med do/ /gang du che bzhi nyid bya dgos pa'i gnas der bsten par mi bya'o/ /gnod pa'i sgo ma bcad pas che bzhi dbye bar mi bya'o/ / bsgo ba rna la gzon pa'i ltung byed do// //khri dang khri'u dang stan nang tshangs can dang la ba dang sngas dang gor bu zhes bya ba ni gnas mal lo/ /'dom bzhi bcu rtsa dgu tshun chad ni de'i nye 'khor ro/ /bskor ba la ni sgo khang nas so/ /de las 'da' bar bya ba'i phyir brjed pas kyang 'gro ba dang nang du gnyid log pa dang snyoms par zhugs pa la sogs pas ni lkog tu gyur pa yin no//phan tshun gyi mdun rol du ni sbyor ba'o/ /phan phun du gyur pa dang 'das pa la ni mtha'o/ /brtul bar byas sam byed du bcug pa la ni de dag mi 'byung ngo / /bcol ba'i dge slong yod pa la yang de mi 'byung ngo //nyam nga ba dang phrad pa la yang mi 'byung ngo / /spyod pa ni byed pa dang 'dra'o/ /gnyis ka cig car spyod spyod pa la ni phyis langs pas bya ba dang ldan pa yin no/ /gal te mnyam du na gzhon pas so/ /mnyam pa nyid yin na gnyis kas so/ /ngo tsha med pa dang nad dang bcas pa dang rgas pa dang na ba dang bsnyen par ma rdzogs pa rnams la ni 'di bcol bar bya ba ma yin pa nyid do//gtsug lag khang 'di re zhe'am ltos shig ce'am/ gnas mal 'de re zhe 'am sdus shig ce 'am/ sgo lcags chug shig ces bya ba lta bu ni bcol ba dag yin no//phan phun ni gsum ste/ rlung gis bzlog pa dang / char pas rim pa gzhan slebs pa dang / srin la sogs pas kyang ngo / /de la dge 'dun gyi gnas mal rang ngam bskos pas bla gab med par gzhag pa byas pa lta bu ni byed pa po dag yin no/ /mthar thug na dngos gzhi'o//sbyor ba la ni nyes byas kyi'o/ /re zhig gi dus su gzhan 'dug pa'i bar du yang de'o/ /gang zag gi yang ngo / /'og ma bzhi la yang ngo / /reg par bya ba ma yin pa nyid la ni mi 'gyur ro/ /brtul bar bya ba bting ste bsod snyoms la zhugs pa na gal te rlung dang char pa 'ong na gtsug lag khang na gnas pa rnams kyis brtul bar bya'o//de'i don nyid la nyes pa dang na smad pa ma yin no/ /gal te brjed pa las lam ring du 'das sam phyin nas dran pa rnyed na phyin chad 'di ltar mi bya'o/ /zhes sems bskyed par bya zhing tshig tu brjod par yang bya'o//gal te dge slong lam nas tshur 'ong ba zhig dang phrad par gyur na brtul ba'i phyir de la bcol bar bya'o/ /khas blangs pas son pa nyid yin na des bya ba nyid do/ /gnas nas 'phags par 'gyur ba na nyam nga ba dang phrad par mi 'gyur blta na gnas mal bsdu bar bya'o/ /gal te dri ma can du gyur na sprug par bya'o//de dbul bar bya'o/ /yang na bcol bar bya'o/ /dge slong la'o/ /med na dge tshul la'o/ /de yang med na khyim bdag la'o/ /thams cad med na phyogs bzhir rnam par bltas te lde mig sbas te 'gro bar bya'o/ /gal te lam kar dge slong mthong na phyogs de de la brjod par bya'o//gal te 'ongs pa na khyim gzhan du mgron du bos shing sgo bcad par gyur na rtsig drung ngam shing ljon pa'i drung du stan bzhag ste 'jug par bya'o/ /der stan yang g.yar por sbyin no/ /rang gis bkur bar mi bya'o/ /de ni khyim pa dge tshul dag gis so//med na bskyal bar bya ba'i phyir khyim pa la bcol te 'ong bar bya'o/ /bdag cag gis bskyal lo zhes zer na bzhag ste 'dong bar bya'o/ /de dag gis ma bskyal na gnas par byed pa dag gis blang bar bya'o/ /med na rang gis so/ /thams cad kyis na gaN+DI brdung bar bya'o//yon bdag gis gtsug lag khang du rang gi don du stan dag g.yar po byed na sbyin par bya'o/ /de dag bsrung ba'i phyir dge slong yang gzhag par bya'o/ /des phyogs gcig tu bsdad par bya'o/ /rang gi las mi nyams par bya'o/ /sems gtad pa yang ngo / /dong na brtul bar bya'o//ma rung ba dag byi dor bya'o/ /chang gis na chu dag gis so/ /snum gyis na chal gyis so/ /mi gtsang bas na sa'am 'dag rdzas sam lci bas so/ /thags ma ma dag na gcad par bya'o/ /khyim pa 'dug 'dug pa'i stan ma brtul ba mthong na brtul bar bya'o/ /gal te rgas pa dang nad pa yin na dge skos kyis so//des sbran par bya ba nyid do/ /thams cad kyis nad pa la blta bar bya'o/ /'dug ste'o/ /der stan thogs te 'gro bar mi bya'o/ /nad pa'i nad g.yog gis der stan dag bsham par bya'o/ /mkhan po'am slob dpon dge ba'i phyogs la 'gro na gal te gzhan gyis dge ba'i phyogs mi 'phel na phyi bzhin 'gro bar bya'o//de'i phyir rang gis stan bkur bar bya'o/ /'gro ba ma zhus par mi bkur ro/ /de rang nyid kyis bkur ro/ /bla gab med par chos nyan pa na rlung dang char byung na brtul bar bya'o/ /rgan po rnams kyi lci ba nyid kyi phyir rang gis mi nus na gzhon nu rnams dang lhan cig brje bar bya'o//mthun pa dang mthun par gzhag par bya'o/ /gtsug lag khang gzhan du gdan cha dang rdzas rnyed na bkur bar bya'o/ /gal te char 'bab pa dang char 'bab tu dogs pa med na'o/ /gal te lam kar rlung dang char pa byung na shing ljon pa'am rtsig drung du bcer bar bya'o//rdzas ngan pa gcig gis g.yogs par bya'o/ /gtsug lag khang du phyin nas rdzas rnams bskam par bya'o/ /me shor ram chu byung ba na dge 'dun gyi yang gdon par bya'o/ /rang gi lhung bzed dang chos gos thon zin na'o/ /bton zin pa bsrung ba'i phyir dge slong chen po mi nus pa gzhag par bya'o//mi bzod pa nyid du 'jug par mi bya'o/ /gnas mal gyi ltung byed do// //khyim gzhan du gding ba byas la khyim bdag la dris te dor bar bya'o/ /dgon par ni yang na slong bar bya'o/ /de ni mgo dang mjug bzlog pa byas pa nyid na byas pa nyid do//gos dag bskam pa'i phyir rtswa bting ba yang dor bar bya ba nyid do/ /slong ba la dor bar khas len na sbyin no/ /'chag sa dag tu rkang mthil gnyis la rtsub na rtswa dag gding bar bya'o/ /de dag kyang dor bar bya ba nyid do/ /btang na dor bar bya ba ma yin pa nyid du ma gyur pa dor bar bya'o//gzhan gyi tshe na dus dus su so sor brtag pa dang bsgyur bzlog bya'o/ /sa snum pa dang mngar bar ni nyin re zhing ngo / /gzhan du ni zla ba phyed cing ngo / /'chag sa dag tu rtswa'i chun po dag thag pas bcings te shing ljon pa la bcangs shing gzhag par bya'o//lci ba dang gyo mor gzhag par bya'o/ /gnas nas 'phags par 'gyur ba na zhes bya ba yan chad sngar thal ba'o/ /cig car spyod pa ni 'dra ba nyid do/ /dge 'dun gyi ma yin pa ni gnas de'i bdag po rnams la dri bar bya ba nyid yin no/ /dge 'dun gyi gtsug lag khang nyid dang /rdo ba dang bye ma'i gzhi nyid la sogs pa'i bdag nyid ma yin pa nyid dang / de lta bu'i nyes dmigs yod pa nyid kyi gzhir rang ngam bskos pas gding ba byas pa nyid lta bu ni byed pa po dag yin no/ /gding ba'i ltung byed do// //dge slong nyid dang dge 'dun gyi gtsug lag khang nyid dag ni byed pa po nyid do//gal te de la gnod pa dang dge 'dun 'khrug pa skye ba nye bar zhi bar mi 'gyur ba'i gnyen pho 'dod pa ma yin no/ /skrod pa la'o/ /gzhan gyis kyang ngo / /gzhan gyis rjes su 'jug pas kyang ngo / /dge slob ma dang dge tshul dang / dge tshul ma rnams kyis ni nyes byas kyi'o//de dag kyang ngo / /bzhad gad kyis kyang ngo / /khyim pa rnams la ni bsod nams ma yin pa mang ngo / /skrod pa'i ltung byed do// //shes gtso'o/ /dge 'dun gyi gtsug lag khang gi gnas su dge slong zhugs pa nyid la'o//na ba dang 'jigs pa'i dbang ma gtogs par phyis gnon byed pa la'o/ /de ni dpe ste/ mtho 'tshams par 'dun pas dge slong la mtho 'tshams pa dag kyang ngo / /phyis gnon gyi ltung byed do// //dge 'dun gyi gtsug lag khang gi steng gi thog nyid ni byed pa po'o//gal te byin gyis gzhol ba nyid dam spang leb nyid dam de dang 'dra bas g.yogs pa nyid ma yin na'o/ /mnan par 'os pa'i rtsa ba phur bu lta bu nyid kyang ngo / /bkan pa nyid dang rkang gtan bcug pa nyid ni ma gtogs so/ /gnon pa la'o/ /shes gtso'o/ /rtsa ba 'byung ba la 'dug pa'i ltung byed do// //rang spyod pa'i don nyid de las gzhan la'o/ /srog chags dang bcas pa la spyod pa'i ltung byed do// //sgo cha gzhug par bya'o/ /sgo glegs dag kyang ngo / /skar khung dag kyang gdod par bya'o/ /gtsug lag khang ni byed pa po nyid do/ /spyod lam bzhi shong ba la'o//gal te thams cad rdo'am so phag gam shing las byas pa ma yin na'o/ /char chu bskyabs pa'i g.yogs pa yang ngo / /yon bdag gis byas sam zin nas blta'o zhes ma smras pa la'o/ /pha gu'i rim pa gsum las lhag par rtsig pa byas pa la'o/ / gzhan gyis kyang ngo / /nyi ma de la'o/ /gzhan la yang 'jim pa med pa las so/ /chu khung dag ma gtod pa yang rung ngo / /brkos te rmang gi rtsa ba ma btsugs pa nyid kyang ngo / /sgo cha gong ma ma bcug pa yang rung ngo / /dang po'i mdun rol la ni nyes pa med do/ /gtsug lag khang gi ltung byed do// //pham par 'gyur ba ma byung ba mdo sde dang 'dul ba dang ma mo 'dzin pa lo nyi shu las mi nyung ba grong khyer ba'i skad smra ba dge slong ma la lus nye bar gzhol ba nyid phyir bcos pa byas pa dge slong ma'i ston par bsko'o/ /gso sbyong bco lnga pa la'o/ /mtshams kyi nang du'o/ / mdo sde la sogs pa 'dzin pa med na so sor thar pa thon pa'o/ /de yang na pham par 'gyur ba'am lci ba'i chos rnams ston nus pa'o/ /phyi ma ni sring mo dag ci khyed cag dge slong ma'i dge 'dun tshogs sam/ yongs su dag gam mthun nam kha na ma tho ba med dam/ khyed cag la dge 'dun gyis ma bskos pa'i gang zag 'ga' zhig ston par mi byed dam khyed cag la ston pa'i gang zag ni 'ga' zhig dge 'dun las 'ong ngo //khyed cag la dge slong 'ga' yang ston par mi spro'o/ /khyed cag gi gdams ngag dang rjes su bstan pa ni dge 'dun las so/ / sring mo dag gis bag yod par sgrubs shig ces bya ba de ston nus pa'o/ /chos bla ma'i mthu dang ldan pa ni ma gtogs so/ /bskos pa de dag las gcig dang yang mi ldan pa dang / ma bskos par dge slong ma la ston na'o/ /sngar bskos pa nyid ma bskos pa nyid ma yin no/ / dge 'dun du ma longs shing 'os pa la gsol na nyes pa med do/ /de dag la yang ngo / /ma bskos pa ston pa'i ltung byed do// //shes gtso'o/ /nyi ma nub pa nyid la'o/ /mtshan thog thag tu chos ston pa ma gtogs par dge slong ma la ston na'o/ /de'i tshe gal te sgo phye zhing de lta bu'i gtsug lag khang gi mdun na dbyar khang 'dug pa ma yin par ro//nyi ma nub kyi bar du ston pa'i ltung byed do// //dge slong mas chos 'dri ba la mi 'jigs par bya ba'i phyir dge slong la zas dbul bar bya'o/ /rgya cang dang shur bu dang lcag pod dang shur bu phre'u yang ngo / / dge slong gis de dag blang bar bya'o/ /dge slong de ltar gyur pa ma yin pa la zas cung zad tsam gyi phyir dge slong ma la chos ston to zhes smras na'o/ /zas cung zad tsam gyi phyir ston pa'i ltung byed do// //shes gtso'o/ /dge slong ma nye du ma yin pa nyid la'o/ /gos byed na'o/ /gos byed pa'i ltung byed do// //gos byin na'o/ /gos 'bul ba ma yin pa la'o/ /gal te bor rlag byung ba dang legs par smra ba dang bsnyen par rdzogs par byed pa dang brje ba'i phyir ma yin pa la'o/ /gos sbyin pa'i ltung byed do// //lam rgyags bkur bar bya'o/ /rtse rgod pho dang rtse rgod mo dang dge tshul dang dge tshul ma dag gis so//dge slong dang dge slong ma rnams gcig gi lam rgyags gcig gis bskur du rung ngo / /gcig gis gcig gi byin len yang ngo / /tshangs pa mtshungs par spyod pa na ba lam du dor bar mi bya'o//de bkur bar bya'o/ /dge slong ma la yang de bzhin no/ /de la phan tshun grogs bya'o/ /mgo logs nas bzung bas so/ /grong du phyin pa nyid na song yang nyes pa med do/ /nad pa'i sman dang zas legs par sbyar te rang bzhin mthun pa'i nad g.yog gcig kyang bzhag nas so//'jigs pa dang bcas pa'i lam nyid du 'gro na thabs cig tu bzhugs shing tha mi dad par 'gro ba nyid ma gtogs par dge slong ma gcig dang yang lam las 'da' zhing 'gro na'o/ /rgyang grags re rer ro/ /de'i phyed re rer ni nyes byas so/ /dge slong ma dang lhan cig 'gron lam du 'jug pa'i ltung byed do// //'gram gnyis 'jigs pa dang bcas pa nyid ma gtogs par 'thams nas cig car gru gcig gi lam las 'da' zhing 'gro na'o/ /thad kar pha rol du 'gro ba ma gtogs so/ /de'i phyir zhugs pa na yo ba dang gtibs chad pa dang dba' klong las gzur ba dang /ru skya dang gdos pa srog shing chag pa dang / ru skya 'dzin pa'i dbang gis 'jug pa gzhan du song ba la nyes pa med do/ /dge slong ma dang lhan cig grur 'jug pa'i ltung byed do// //'dul ba'i mdo bam po bzhi pa/ bud med gcig pu nyid dang skye bo'i rgyun lugs med pa nyid kyis phyogs dben pa nyid dang /skyabs dang bcas pa nyid dang / bar 'dom gang nyid ni byed pa po dag yin no/ /'dug pa la'o/ /de ni rkub tshos tsam bzhag pa la'o/ /gcig pu 'dug pa'i ltung byed do// //dge slong ma dang ngo / / 'greng ba la'o/ /gcig pu 'greng ba'i ltung byed do// //shes gtso'o/ /dge slong mas sbyor du bcug pa nyid la'o/ /yang dag pa ma yin pa'i yon tan dag gis so/ /mgron du ma bos pa la'o/ /bos pa la yang lhag na'o/ /bza' bar bya ba'o/ /sgrub pa phun sum tshogs pas so//de thos pas kyang rung ngo / /zos na'o/ /de ni mid na de'o/ /gzhan gyi don du na smad pa nyid do/ /bsod snyoms la zhugs pa na byin cig ces zer ba yang ngo / /dge slong mas sbyor du bcug pa'i ltung byed do// //khyim gzhan du yang zan la bos pa dang du blang bar bya'o//dus shes par byas te 'jug par bya'i snga tshoms su mi bya'o/ /de'i gaN+DI brdungs te rang gi 'khor la blta bar bya'o/ /glo bur du 'ongs pa la ni gnas brtan gyis so/ /gya tshom du zan gcad par mi bya'o/ /skom gyi phyir gsol ba dag 'debs na bsdad par bya'o/ /cig car yang rung phyis kyang rung ste gos kyi rnyed pa med pa'i mgron du bos pa gnyis pa gnyis rnyed na'o//bza' bar bya ba la'o/ /lnga'i khongs su gtogs pa la'o/ /gal te gzhan yang de nyid yin na'o/ /na ba ma yin pa dang las ma byas pa dang lam du ma song ba la'o/ /dang du blangs nas nyes byas kyi'o//zos na dngos gzhi'o/ /'dir gos kyi mthar gyur pa ni khru gang gi khyon no/ /lam ni dpag tshad phyed do/ /gzhan la yang ngo / /'dir ram grur 'gro ba la yang ngo / /las ni phyag dar re lde tsam mam dkyil 'khor ba mal tsam yin na'o/ /de yang dge 'dun gyi nyid dam mchod rten gyi nyid yin na'o//na ba nyid kyi tshad ni mi nus pa'o/ /bshams pa ni mgron du bos pa nyid ma yin no/ /kun tu lta ba yang ngo / /mgron du bos pa gzhan yod na zan snga ma la spong ba bsrung zhing 'jug par bya'o/ /mtho 'tshams pas byas pa ni ma yin pa nyid do/ /mi rung ba la bos pa yang ngo //de'i phyir ma yin par dge 'dun yang ngo / /gzhan du lnga po 'jog pa yang ngo / /de ni chos dang ldan pa nyid do/ /gzhan blang ba la yang ngo / /mu ge byung na mgron du bos pa ji snyed byung ba dag bdag gir bya'o/ /zos na yang ngo / /sbyin du yang rung ngo / /sbyin pa po mngon par mi dga' bar 'gyur ba lta na kham gnyis sam gsum zos pa'i 'og tu khyim bdag dge slong 'di bsod snyoms kyis phongs pa yin gyis rjes su yi rang bar gyis shig dang 'di la sbyin par bya'o zhes mngon par dga' bar byas nas so//yang yang za ba'i ltung byed do// // chos 'di pa ma yin pa bdag po khyim pa dang bcas pa ya mtshan can thams cad ma yin pa'i 'dug gnas so/ /mi na ba la'o/ /sbyin bdag gis ma bstabs pa la'o/ /de'i zas ni zos pa la dngos gzhi'o/ /gnas na zhag lon pa la nyes byas kyi'o//bdag po med pa yang ngo / /'di la rab tu byung ba 'di pa ni mu stegs can dang 'dra ba nyid do/ /nye dus kyang ngo / /'dug gnas su za ba'i ltung byed do// //stobs pa'i 'o/ /yongs su ma spags par ro/ /ci bder ma byas pa'o/ /khyim pa'i'o//bre'u chung dag gi tshad ni 'bras thug po che ma ga d+hA'i bre'u chung phyed dang lnga btsos pa'i tshod ma ma gtogs pa las lhag pa'i bsod snyoms te grogs kyi skal ba dang yang bcas pa yin no/ /zos pa na'o/ /mnos pa'i 'o/ /de la ni nyes byas kyi'o/ /gzhan gyis mnos pa yang ngo //gzhan la ni ltung ba med do/ /las su ma byas pa yang ngo / /blang bar bya ba gal te mang ba nyid na dge slong dag la bgo bsha' bya'o/ /lhung bzed do gsum tsam las lhag par len pa'i ltung byed do// //ji tsam gyis chog pa bza' bar bya'o/ / zas brtsams pa las ldang bar mi bya'o/ /tha na lan tshwa yan chad bza' bar bya ba gang yang rung ba cung zad cig blangs na rnam pa de nyid yin no/ /spangs pa ni gnas btang ba'o/ /'dug pa'i 'o/ /rtsa ba la sogs pa bca' bar bya ba la sogs pa'i zas brtsams pa'i'o/ / rtsa ba dang sdong bu dang 'dab ma dang me tog dang 'bras bu bca' bar bya ba dag dang / thug pa las gzhan pa bza' bar bya ba rung ba mi rung ba dang ma 'dres pa'i byin len stobs pa 'thob pa'i phyogs na 'greng ba spang ba byas nas so/ /gsol cig ces bya ba yang de nyid yin no/ /song shig ces bya ba yang ngo //'tshal lags so zhes bya bas kyang ngo / /re zhig ces bya ba'i sgra nye bar sbyar na ni ma yin no/ /chog go zhes bya ba yang ngo / /kha gzar gyen du 'greng du mi btub pa nyid kyi thug pa dag ni thug pa nyid do/ /sor mo lnga mi mngon pa ni skyo ma'i'o/ / mtho 'tshams pa ni byin len stobs pa nyid ma yin no/ /mtshams kyi phyi rol dang mi 'thob pa'i phyogs dang mdun ma yin pa na 'dug pa las lhag por bya ba mi 'byung ngo / /bya ba lag tu ma blangs pa la yang mi 'byung ngo / /rung ba ma yin pa dang de dang 'dres pa la ni mi bya ba nyid do//gnas ma btang bas bya ba nyid do/ /mi bza' bar brtag pa byas pas kyang ngo / /gsol bas bya ba nyid yin no/ /khyod kyir gyur gyis bzhud cig ces bya ba'i tshig gis so/ /kha cig ni bder gsol cig ces kyang ngo / /kham gnyis sam gsum zos nas so//bya ba btang bas ni bza' bar mi bya'o/ /lhag por byas pa gzhan gyis bza' bar bya'o/ /shes gtso'o/ /spangs pa nyid dang lhag por ma byas pa nyid dag la'o/ /zos na'o/ /zas tsam mo/ /lhan cig pa'i zas kyi ltung byed do// //stobs na'o/ / dge slong la'o/ /spangs pa la stobs pa'i ltung byed do// //shes gtso'o/ /so sor nges pa'i zas kyi gnas can dag las gzhan pa'i dge slong gi dge 'dun du gyur pa mtshams kyi nang na gnas pa dag gi zan lhan cig ma yin pa nyid la'o/ /lhan cig pa'i'o/ /cig car za ba dang ngo //gsum la sogs pa dang ngo / /dge slong rnams kyi'o/ /dge slong rnam pa ji lta bus gos med pa'i zas gnyis pa rnyed pa byed pa po nyid yin pa bzhin no/ /dus ston chen po las gzhan pa la'o/ /rtags 'di med pas rab tu byung ba'i zas las gzhan pa'o/ / zos na'o/ /der 'ong bar bya ba nyid du gnas pa mtshams kyi nang na 'khod pa dag gis 'ong ba nyid ma dris par za na 'da' ba'i phyed nyid do/ /gang yang rung ba cung zad cig brims na yang zan gcig pa nyid yin no/ /'gro bar chas pa dang / glo bur du 'ongs pa dang / nad pa dang nad g.yog dang dge skos las gzhan pas thams cad kyis ma zos par g.yos mal dang spyi bungs las mnos te bza' bar mi bya'o//'dus shing za ba'i ltung byed do// //rang gi phyed yol nas skya rengs 'char ba'i bar ni dus ma yin no/ /de nyid la shes gtso'o/ / bca' bar bya ba dang bza' bar bya ba zos na'o/ /dus ma yin par za ba'i ltung byed do// //snga dro ba'i zas byin len byas pa phyi dro ba'i zas su dang / de thun tshod las 'das pa lta bu ni sog 'jog byas pa yin no/ /de nyid la shes gtso'o/ / lag nyar blangs pa mid par mi bya'o/ /mtshams kyi nang du btsos pa dang zhag lon pa yang mi bya'o/ /dge slong gis btsos pa yang ngo / /'dir rjen pa btsos pa gang yin pa ni de'i'o/ /mi snyi ba rnams kyi ni sum cha bangs pa nyid kyi mdun rol du de nyid yin no/ /snyi ba rnams kyi ni kha dog gyur pa'i'o//khu ba rnams kyi ni lan gnyis khol bar gyur pa nyid kyi'o/ /mes rung bar byas pa ni ma btsos pa ma yin no/ /'dug pa'i 'grub pa nyid skye ba la rag las pa ni ma lon pa nyid ma yin no/ /snod phyogs na 'dug na des kyang sa der btsos pa nyid yin no/ / 'tshod par byed pa de na 'dug pa nyid kyis ni mi 'gyur ro/ /me ni snod ma yin pa nyid ma yin no/ /de las phyung ba dang byung ba dag ni de nyid ma yin no/ /nye 'khor ni gnas nyid yin no/ /'dom gang ngo / /steng du nam mkha' la slebs pa man chad do/ /nang yang ngo / / steng gi yang thog gzhan yang de nyid yin no/ /gzhan gnas pa nyid ni gzhan gyi gnas nyid ma yin no/ /lag nyar blangs pa dang nang du btsos pa dang dge slong gis btsos pa de dag dus kyi phyir dgag pa mdzad par 'tsho ba'i bar du bcang ba dag ni ma bsdus pa nyid yin no/ / 'bags pa ni zas kyi phyed nyid do/ /kha dri ma can gyis bza' ba dang btung ba dag kyang ngo / /de'i phyi rol ni lci ba'am sas kun nas drud de chus bshal na dag pa yin no/ /nang ni chu mkhur ba do'am gsum gyis bshal na'o/ /lhung bzed ni bsam pa thag pas lan gnyis lan gsum bkru bshal byas na sgra mi snyan yang dag pa nyid yin no//rtsi langs pa la ni nyes pa med do/ /'bags pa med par reg pa la yang ngo / /'dag rdzas sam lci ba'am sa gang yang rung bas lan gsum bkrus pa la snum pa nyid kyang ngo / /langs pa bsal bar bya ba nyid do/ / 'bags pa'i phyogs de nyi tshe bkru bar bya ba nyid do/ /bum pa la sogs pa snum bag can dag snum med par bya ba'i phyir chu'i rdzing bu zab mo'i nang du gzhug go/ /nya 'am rus sbal lam sbal pa'am chu srin byis pa gsod dam nya khyi ba dag gis ma lus par lhogs kyi bar du gzhag go/ / bsregs pas kyang snum med pa nyid du 'gyur ro/ /snum med par gyur pa ni bkru bas so/ /'dag rdzas sam lci bas 'dag pa nyid do/ /lan tshwa la sogs pa tshwa chu dang 'gyur byed kyi chu dang rnyog chur gyur pa ni phyed nyid do/ /de ni thams cad la dus ma yin par yang rung ba nyid do/ /lan tshwa dang 'gyur byed rang gi bya ba mi byed pa dag la ni nyes pa med pa nyid do//tha ma la ni gzugs brnyan 'byung na'o/ /ka ta ka'i 'bras bus chu shin tu 'dang bar 'gyur ro/ /'gyur byed kyis kyang ngo / /zan gyis kyang ngo / /de mi 'jig par bya ba'i phyir snum gyis bsku'o/ /'byung khungs dag tu btab pa mi mngon pa ni yod pa'i grangs nyid ma yin no//phyogs gcig tu 'dres par gyur na de nyi tshe bsal ba nyid yin no/ /kha'i mchus reg pa la ni than kor yang ngo / /de dang 'brel ba'i rgyun gyis reg pa ni de la reg pa nyid ma yin no/ /nor ba dang brjed pas kyang ma yin no//de gnyis kyis spos pa bzhag pa'i phyir yang ma yin no/ /gnas kyi thag shin tu nye bar bkur ro/ /g.yel bas lag nyar blangs pa nyid dang byin len blangs pa nyid ni ma yin no/ /byin len stobs par 'os pa dang 'brel ba ma bral ba'i blangs pa yang ma yin no/ /des bzung ba'i thag pa la sogs pa dang 'brel ba ni 'brel pa nyid yin no//sdom pas mnyam pa lta ba tha mi dad pa dag gi sog 'jog byas pa dang byin len byas pa dang lag nyar blangs pa dag ni gcig pa nyid yin no/ /mchog dang mchog ma yin par ro/ /skyes pa dang bud med dag ni phan tshun khyim pa dang 'dra'o//dge tshul dag gi la reg pa nas sbed pa'i bar la nyes par 'gyur ba ni de bzhin no/ /ltos pa dang bcas pas byin pa ni btang ba nyid ma yin no/ /ltos pa med par btang ba la ltos pa dang bcas pa nyid ni phyed nyid do/ /de'i phyir de blang bar mi bya'o/ /shes bzhin du mi blang ngo //shas mnos pa dang de grub pa'i phyir reg pa ni rkyen de lta bu dag yod na rung ba ma yin pa nyid du mi 'gyur ro/ /shing rta la ni kha lo ba'i stan ma gtogs pa nyid do/ /de gang la yang ngo / /nad pa zhon pa la yang ngo / /gru la ni ru skya'o/ /de 'dzin pa'i rten la yang ngo //dge 'dun gyi sman dag ldud pa na bskyam pa dang dbyung ba dang gzar bu'i las dang dpog pa dag la yang ngo / /dang por shing dbri ba dang me bsad pa dang gos kyi thu ba la sogs pas rlung g.yab pas 'bad par bya'o/ /chu klung brgal ba'i phyir ram khur tsha ba brnyag pa'i phyir lag nyar blangs pa'i lam rgyags rung ste/cho ga ma 'byor tam lam rgyags gzhan med na'o/ /khur tsha ba med na sbyin bdag spro bar bya'o/ /khyer ba med na rang gis so/ /de nyid las sbyin pas brje zhing blang ba bsgrub par bya'o/ /de yang ma grub na de bza' bar bya ba nyid do//byin len stobs pa med na byin len ma byas pa de'am gzhan yang ngo / /zan bcad par byas pa'i'o/ /nyi ma dang po la spar gang ngo / /gnyis pa la do'o/ /gsum pa la ni ji tsam gyis chog pa'o/ /shing tog rung bar ma byas pa dang byin len ma byas pa dang lag nyar blangs pa dag kyang dus ma yin par yang bza' bar bya'o//zan med pa'i'o/ /shin tu bkres pa nyid na'o/ /rtsa ba dag kyang ngo / /rang gis kyang btog pa nyid dang dbyung ba nyid dang / bsgrub par bya ba nyid byin len ma bstabs pa dang rung bar ma byas pa dang dus ma yin par za ba la sogs pa rung bar bya ba dag las rtsom 'dod pa na byang gi sgra mi snyan dag na grags pa yid la byed pa bya'o//lag bsnyal ba dang 'dab ma dag yod na skyogs kyis skom mi btung ngo / /med na ma bsgribs par mi bya'o/ /de chu dang bcas pa nyid yin na kham bcad par mi gzhag go//de'i khab ni rnam pa gsum ste/ shing las byas pa dang rdo las byas pa dang / sa las byas pa'o/ /skyogs gzhi shing las byas pa'am rdo las byas pa bcang bar bya'o/ /'dab ma dag snod nyid du spyod pa ni byin len ma byas pa nyid la nyes pa med do/ /'di la brngas pa dang ma brngas pa dag la khyad par med do//gzhan med na ma brngas pa dag kyang spyad do/ /sog 'jog gi ltung byed do// //gzhan dang byin len stobs pa med na sbyin bdag gis bsam pa thag pa nas btang ba rang gis blangs te bza' bar bya'o/ /mngon sum du mtshams kyi nang du 'thob pa'i phyogs na gnas pas lag pa bkan pas lus sam de dang 'brel bar gyen du 'degs nus pa bsnyen par ma rdzogs pa mi ma yin pa las kyang sbyin par 'dod pas yan lag gis sam de dang 'brel bas byin pa ma nos pa ni byin len no//yul gyi mi smad par bya ba nyid yin na dkyil 'khor gyi steng du zhog cig ces bstan na yang ngo //lhung bzed dang de'i gzhi dag ni gcig pa nyid do/ /spre'u rnams kyi spyod yul ni yal ga yin pas de nas de'i phyir mi 'thob pa'i sa nyid ma yin no/ /shing tog dag man shel dang khri dang khri'u dang thu ba dang lhung bzed kyi gzhi dag gis byin len mnod du mi rung ba nyid ma yin no//de dag gnas pa dag gis cang mi smra bas so sor brtag par bya'o/ /snyoms par 'brim par byed pa mos par bya'o/ /dge slong byin len byas pas brim pa nyid ni rung ba nyid yin no//zhun mar dang 'bru mar dang sbrang rtsi dang bu ram gyi dbu ba'i bum pa dag 'brim na rtswa dang lo ma la sogs pa dag gis gos dag bskyab par bya'o/ /brim par bya ba gces pa dang bar ma dang tha ma dag so sor bya'o/ /a mra zhim po rnams logs shig tu bsal te brim par bya'o/ / brim par byed pa ni mkhan po'am slob dpon gyis mnod par bya'o/ /mi 'thob pa 'thob na drung na 'dug pas so/ /du ma nyid yin na stan las ma 'phags pas ji tsam len nus pa'o/ /'dril ba ni rang gi gnas nas ma 'phags pas len nus pa nyid yin na byin len ma zhig go//sbrang bu dang grog sbur la sogs pa dag gis reg pa yang ngo / /dge slong gis ma btang ba la gzhan gyis kyang ngo / /byi bas ni zhig par byed do/ /byin len byas pa'i byin len stobs pa ni mi rigs pa nyid ma yin no/ /shes gtso'o/ /byin len ma bstabs pa nyid la'o//chu dang so shing ma gtogs pa bza' bar bya ba'i'o/ /khar ro/ /zos na'o/ /byang gi sgra mi snyan ma gtogs par ro/ /nad pas bsnyen par rdzogs pa med na bsnyen par ma rdzogs pa las zan mnod par bya'o/ /bsnyen par ma rdzogs pas bza' bar bya'o//byin len ma byas par za ba'i ltung byed do// //'o ma dang zho dang mar dang nya sha dang sha skam lta bu dag ni zas bsod pa yin no/ /de ni byed pa po'o/ /sbyin par byed pa nye du ma yin pa khyim pa nyid kyang ngo / /rang gis blangs te zos na'o/ / mi na bas blangs pa dang slong du bcug pa nyid de la ni nyes byas kyi'o/ /ci bder bstabs pa ma byas pa la'o/ /de'i phyir ngan pa'am bsod pa'am tha mal pa'am bzang po thob pa na gal te blangs na yang ngo / /ngan pa 'di la ni phyed nyid do/ /zas khyer te phyir byung bas cang mi smra ba'am phyir spong ba la 'o na ci slong zhes dris pa ni ci bder bstabs pa nyid yin no//bsod pa slong ba'i ltung byed do// //rang spyod pa'i don nyid la 'jug pa dang 'jug tu 'dzud pa dag la'o/ /shes gtso'o/ /srog chags dang bcas pa nyid la'o/ / chu dang zhun mar dang 'bru mar dang sbrang rtsi dang bu ram gyi dbu ba dang / 'o ma dang zho dang mar sar pa dang tshwa dang 'bru'i tsha dang zho kha chu dang rtsab mo dang / shing tog dang bca' bar bya ba la sogs pa nye bar sbyar bar bya ba'i'o/ /snang ba dag gis so/ /shi na'o/ /srog chags re re'i'o//spyad pa ni lus kyir nye bar spyad pa'o/ /'di lta ste khrus dang btung ba dang so shing dor ba dang lag pa dang rkang pa bkru ba'o/ /yo byad dag tu nye bar spyad pa gang yin pa de ni lus kyir yin no/ /bza' bar bya ba dang lhung bzed dang / chos gos dang gnas dang so bkru ba dang me la sogs pa ni lus kyi yo byad dag yin no//de dag tu ni sa dang lci ba dang tshon dang rtswa dang shing la sogs pa'o/ /de dag tu dgos pa ni 'di lta ste/ byi dor bya ba dang bkru ba dang / kha bsgyur ba dang / chag chag gdab pa dang / phyag dar bya ba dang / zhal zhal bya ba dang /'u sha dang / thang dang / thug pa dag tu bya'o/ /chu'i srol dgag pa dang bsal ba dag kyang ngo / /shing dang g.yeng ba dag gzhug pa dang drang ba dang bshal ba dag kyang ngo / /rim pa gcig las gzhan pa spu can la sogs pa bkru ba yang ngo / /de yang srog chags kyi khams lhag par mang ba'i chu lta bu yang sbyor ba dag yin no//srog chags dang bcas pa'i chu la spyod pa'i rnam par 'byed pa'o// //dpyang tshags bcang bar bya'o/ /bzed snod kyi steng gi nam mkha' la bzhag par bya zhing dgang ba dang btsag par bya ba'i chu bzed par byed pa'i tshags gdags bya ba'i phyir lcags gzer dag btab pa'i shing bu gsum dang ldan pa ni de zhes bya'o//chu gnas par bya ba'i phyir chu tshags su gcal gzhug par bya'o/ /bye ma 'am lci ba'o/ /yang na tshags rten snod do/ /sa dang zangs ma las byas pa'i gang yang rung ngo //de ni shing bu gsum gyi thog ma la gdags so/ /bu gur lung byas te'o/ /de ni ngos gnyis na btags na yang 'dug tu btub bo/ /phyi rol gyi ngos su tshags rten snod gzhag par bya'o/ /snga ma ni tha gus so/ /phyi ma ni lcags thag 'jam pos so/ / de bcang bar bya'o/ /chu mi 'dzag na shing leb kyis chu tshags la dal bu dal bus gdab par bya'o/ /bum tshags gce'u can ni tshegs chung ngo / /de bcang bar bya'o/ /sa'am zangs ma las byas pa'o/ /de ni bum pa'i dbyibs can nang pad+ma'i bu gu lta bu dang ldan pa'i sbubs can yin no//de dag tu ras mas dgab pa nyid do/ /chu tshags nye bar gzhag par bya'o/ /chu tshags gru gsum mam/ ril ba zhabs tshags can nam/ bsal tshags kyang ngo / /bya ma bum dang ril ba dag gis chu rung ba bcus pa nyid dang yod pa nyid kyang de dang ldan pa nyid do//de med par ljongs rgyu zhing 'gro bar mi bya'o/ /nang dang bcas pa dang lhan cig tu mi bya'o/ /gal te rkyen de lta bu yod na bzod pa gsol te'o/ /bya ba byed pa ni yod pa nyid ni yod pa yin no/ /gzhan gyis 'di ltar der de sbyin no zhes khas blangs pa ni de dang ldan pa nyid yin no//ljongs rgyu ba'i tshe 'bral na sbyin par khas ma blangs na de la brten par mi bya'o/ /phongs par mi 'gyur ba'i nye 'khor du 'gro ba ni rgyu ba ma yin no/ /de ni rgyang grags lnga nyid yin no/ /gnas su bzhag ste song ba de dang ldan pa nyid ma yin pa ni rang dgar byed pa ma yin pa ma yin no//gcig gis dge 'dun man chad du ma de dang ldan pa nyid ma yin par mi 'gyur ro/ /rgyun mgyogs pa la ni phongs par mi 'gyur ba nyid ma yin no/ /de la rgyun phyogs su rjes su 'grel bar 'gro bas ni des rgyang grags kyi bar du 'jug tu rung ngo //gal te de chu gzhan dang 'dres par gyur na de yan chad du'o/ /brtags pa nas 'dom gang khor yug ni de nyid yin no/ /mig gi dag pa nyid kyi chu ni dag pa yin no/ /tha mal pas so/ /mi g.yo ba nyid dang rnyog pa med pa la brtag par bya'o/ / bum pa gang yin pa nyid la'o/ /de la bya ba las 'das par bgrang ba'i yun ring po nyid du mi bya'o/ /rtse mo 'jam pos srog chags dag bstan sla'o/ /de dag 'chi bar 'gyur ba'i lam du mi dor ro/ /gzhan yang mi dor ro/ /gal te mar me'i nang du srog chags ltung na de byed pas de g.yogs par bya'o//smyig tshal gyi gzeb dar dkar ram lhang tsher srab mos g.yogs pa ni de zhes bya'o/ /mig brgya pa yang rung ngo / /dang po nas byas pa'am bum pa la sogs pa'i snod bu gu can no/ /skra'i rnyis sbrul gzung bar mi bya'o/ /se gol gyi sgra phyung ste bzhin bzangs mig lam na ma 'dug shig ces brjod par bya'o//mi 'gro na dbyu gu skam khas dal bus rdza ma'am bum par bcug ste kha bcad nas bu gu dag btod de bsal bar bya'o/ /ma grub na lcag pod dam shur bu phre'us sam tha gu ras mas dkris pa'i zhag mig gis mgul bar bcings te dor bar bya'o//de dag ni gzhug pa la yang ngo / /tshang tshing gi nang du dor bar mi bya'o/ /khung du zhugs kyi bar du bsdad par bya'o/ /shig rnams ni ras mar gzhug par bya'o/ /de ni gseb dag tu'o/ /rtswa shig rnams ni gsing mar ro/ /yang na phyogs bsal bar bya'o//snga ma gzhug pa'i phyir bsal snod bcang bar bya'o/ /yang na chu tshags de nyid kyis gzhug par bya'o/ /chu tshags la srog chags chags pa bsal ba'i thabs ni bshal ba yin no/ /dri ma ni bkru ba'o/ /rul ba nyid du mi 'gyur ba ni skam pa'o/ / de gnyis ka la yang dam du btsir na phan pa nyid do/ /dge 'dun dang gang zag dang chu tshags dang chu tshags ma rnyed pa'i shes pas 'jug pa la kha na ma tho ba med do/ /bcus pa dang khron pa dag pa ni nyi ma 'char kha tshun chad brtags pa nyid kyi rjes su 'jug go/ /rkang khrus snod stong par mthong na dgang bar bya'o//chu dang gzhan gyi snod kyang nye bar gzhag par bya'o/ /dge 'dun gyi der gtogs pa ni snod spyad 'brub pa'i las yin no/ /'dir sbyin pa dang blang ba dag kyang ma bsdus pa ma yin no/ /khyim pa rnying pa rmya ba nyid la de yod pa nyid na sbyin par bya'o/ / des gtsug lag khang du yon bdag rnams la sbyin par bya ba nyid kyang ma bstan pa nyid ma yin no/ /dge slong la ni sar pa phyir blang ba med pa nyid du'o/ /snod spyad kyi ched du mdzod khang bsko bar bya'o/ /sa dang zangs ma'i snod spyad dag so sor gzhag par bya'o/ /chu nye bar gzhag par bya'o//gar bab bab tu mi gzhag go/ /de'i ched du khang bu bya'o/ /gtsug lag khang gi nang gi lho nub kyi mtshams su'o/ /skar khung gdod pa dang / so phag gi gcal dgram pa dang / chu khung gdod pa dang / sgo gdod pa dang / sgo glegs dang / lag zungs dang yang mig gzug par bya'o//chu tshags gzhag pa'i phyir gdang bu bya'o/ /shing gi khri'u dag la gzhag go/ /yang na so phag gi stegs bu'i steng du'o/ /gzhi dag la'o/ /chu snod ni khrus chu'i ched kyi bar yan chad kyang gtsang sbra bya'o/ /gtsang bar bya'o/ /btung bar bya ba'i chu yang ngo //de lag pa dang gos rung ba ma yin pa dag gis brim par mi bya'o/ /chu snod rnams kyi nang du dus dus su sbyang bar bya'o/ /zab mo rnams ni pu shel tsi'i khru dang shing ngam 'dab ma'i chang bu 'am ras ma shing bu'i rtse mo la btags pas so/ /de la zas kyi 'gram gzer mi bsrung ba nyid du mi bya'o//skam par yang ngo / /de'i tshe brel bar mi 'gyur bar bya ba'i phyir cig car nyid du mi bya'o/ /chu dang 'brel ba'i las ni gnas pas bya ba yin no/ /srog chags dang bcas pa'i chu dang 'brel bas phran tshegs la sogs pa'i skabs so//srog chags dang bcas pa'i chu la spyod pa'i ltung byed do// //shes gtso'o/ /zhugs pa'am phyogs pa la'o/ /sprod pa la'o/ /skyes pa dang bud med kyi'o/ /khyim pa nyid do/ /gnas gzhan nyid na'o/ /gzhan med pa nyid kyis sprad du rung ba nyid yin na'o//mngon sum du gnag pas 'dug na'o/ /nyal po byed par shom pa'i khyim na 'dug pa'i ltung byed do// //dben par gnag pas 'greng na'o/ /skyabs yod par ro/ /gal te 'jigs pa'i dbang gis ma yin na'o/ /tshor bya dag dang tshor byed gnyis kyis ma tshor na nyes byas kyi'o//gnas gzhan la sems gtod pa yang ngo / /'di la mthong ba'i spyod yul gyi mtha' tshun chad ni gnas kyi mtha' yin no/ /mdzod ni khongs su gtogs pa nyid yin no/ /khyim gzhan ni tha dad pa nyid yin no/ /nyal po byed par shom pa'i khyim na 'greng ba'i ltung byed do// //[,]pho yang rung mo yang rung ba la'o/ /nye du dang rab tu byung ba la ltos pa dang nad pa ma gtogs so/ /rtags 'di dang rab tu byung ba 'di med pa'i gcer bu'o/ /lus sam lus dang 'brel par ro/ /bca' bar bya ba dang bza' bar bya ba dag go/ /rung ba dag go/ /rang dang de la'o//sdig pa can gyi lta ba'i rnam pa dang dbral ba nyid kyi phyir ma gtogs so/ /rang gis sbyin na'o/ /mi rung ba dag ni nyes byas so/ /sbyin du 'jug na yang ngo / /rang gis zhal ta byas na'o/ /bgo bsha' byed na yang ngo / /gcer bu la sbyin pa'i ltung byed do// // g.yul la mngon par dga' ba'i dmag dag la lta ba'i don nyid kyis so/ /rgyal po dang btsun mo dang gzhon nu dang zhang blon dang khrom gyi ru sna dang grong rdal gyi mi dang ljongs kyi mis bkug pa dang bar chad byung ba'i dbang nyid ma gtogs so/ /'phags pa'i nye 'khor gyi mtha' las 'das te mthong na'o//dmag la lta ba'i ltung byed do// //de dag med par nyin mtshan nyid las lhag par 'dug na'o/ /dgos pa med na snga ma la yang ngo / /dmag gi nang na 'dug pa'i ltung byed do// //dpung gi yan lag rnams ni byed pa po nyid do/ / bar chad kyi dbang gis 'gro ba ma yin pa la'o/ /bsdus pa dang so so ba dag go/ /sta gon byas pa rnams kyi dngos po la dngos gzhi'o/ /sbyor ba la ni nyes byas kyi'o/ /reg pa dang bshams pa dkrugs pa dang lta ba'i phyir 'phags shing nye 'khor gyi mtha' las 'das te mthong ba lta bu ni dngos gzhi dag yin no//ma chas pa nyid la ni na smad pa nyid do/ /glang po che dang rta dang bya gag dang bya la ba ka dang bya brta ka dang / skyes pa dang bud med 'thab pa la sogs pa bya ba dang byed du gzhug pa dang blta bar mi bya'o/ /dpung gi yan lag nyams su myong ba'i ltung byed do// //rnyog pa can gyi sems nyid kyis dge slong pha rol la lus sam des 'phangs pa'am de dang 'brel pa dag gang yang rung ba tha na rkang pa'i mthe bo'am yungs kar ram rtswa dag gis brdegs na'o/ /gzhan dag la yang ngo / / reg na'o/ /rdeg spyad re re la'o/ /ma phog na nyes byas so/ /brdeg par bya ba gzhan yin la gzhan la brdeg par mi bya'o/ /ka ba la brdeg par mi bya'o/ /rtsig pa dang sa dang shing ljon pa dang gzhan la yang mi bya'o/ /rdeg pa'i ltung byed do// //brdeg par gzas na'o//rdzas re re la'o/ /gzas pa'i ltung byed do// //pham par 'gyur ba dang dge 'dun lhag ma dag bcabs na'o/ /bde ba la mi reg pa dang dge sbyong gi tshul dang tshangs par spyod pa'i bar chad dang dge 'dun 'khrug tu dogs pa'i dbang nyid ma gtogs par 'chab na'o//nyin mtshan gyi mthar ro/ /snga rol du ni nyes byas so/ /ltung ba gzhan yang ngo / /gnas ngan len 'chab pa'i ltung byed do// //nad kyi gnyen po'i don nyid ma gtogs par ched du bsams te sbyin pa po khyim du zan gcod du bcug na'o/ / zan gcod du 'jug pa'i ltung byed do// //seng ge la reg par mi bya'o/ /ston pa chos dang dge 'dun dang tshangs pa mtshungs par spyod pa rnams kyi chos dang ldan pa'i bya ba'i don nyid dang / lhung bzed dang tshon gyi las la brtag pa ni dus byin gyis brlabs pa yin no//yun ring du byin gyis brlab par bya'o/ /rtse ba nyid na'o/ /gzhan la gtong bas zla ba dang nyi ma dang mgal me'i 'khor lo la sogs pa byed pas so/ /mes so/ /dus byin gyis ma brlabs par dge slong na ba'i dbang nyid du gnas pa ma yin pa la reg na'o//rang ngam bsgo bas so/ /sbar ba dang gsod pa dang reg pa dang / ma reg pa'i bud shing bskul ba dang bcas pa 'dren pa dang mdag ma sbung ba dang 'bru ba dag la'o/ /me ma mur ni phyed shi ba nyid do/ /me lce dag kyang ngo / /der bud shing 'jud pa dang 'byin pa ni me gzhan gyi nyes pa yin no//skra dang spu dang rus pa dag dang sen mo dang / mchil ma dang snabs dang skyugs pa dang rlugs pa dang mon sran sde'u dang mon sran gre'u dang til dang 'bru mar dang sbrang rtsi dang mar dag ni bud shing gi phyed nyid do/ /gzhan gyi bya ba gzhan la byin gyis rlob pa ni phyed byin gyis brlabs pa yin no//me la reg pa'i ltung byed do// //dge slong gi don gyi phyed kyi las byas pa la 'dun pa phul ba la phyir bsgyur ba'i phyir smras na'o/ /'dun pa phyir bsgyur ba'i ltung byed do// //zla ba dang nyi ma ma gtogs pa'i snang ba dang bcas pa'i gnas kyi phyogs su nyal bar mi bya'o//nad pa dang nad g.yog gi dbang nyid ma gtogs so/ /'di la kha cig ni ltung byed ce'o/ /nyal ba ma yin pa ni phyed nyid do/ /nyin mo tha dad pa nyid kyang ngo / /phal cher g.yogs pa dang bskor ba ni gnas kyi mtha' yin no/ /de'i sgo ngos dang 'brel ba'i nye 'khor gnas su gyur pa ni de'i khongs su gtogs pa nyid yin no//khyer gzhan bar ma chod pa sgo de dang 'brel ba yang ngo / /nye 'khor dang bcas pa nas gnas khang tsam gyi pha rol na tha dad par gyur cing gnas pa ni ma yin no/ /shing ljon pa'i drung dang rtsig pa'i bar dang tshang tshing gi drung dag ni phyed nyid do//thibs po dang bcas pa dag tu bud med dang lhan cig nyal ba yang ngo / /'di la bya gag 'phur nas babs par gyur pa'i lam ni bar du chod par gyur pa nyid yin no/ /nang gcig tu rgyu zhing bar na gnas gzhan med pa ma yin pa can nyid la ni g.yogs pa thams cad gcig pa nyid yin no//rang gi char gtogs pa'i sgo bcad pas bcad pa la ni nye 'khor yang tha dad pa nyid do/ /ltung ba 'byin par byed pa dge slong gis bsrungs pa nyid dang bud med bdag pos bsrungs pa nyid ni de dang 'dra'o/ /rim khang gzhan la ni skas steng du brtul ba nyid do//gzhan gnas ma yin pa nyid la ni na smad do/ /bsnyen par ma rdzogs pa dang lhan cig gnas gcig tu mtshan mo gsum pa la nyal na'o/ /mthar ro/ /mdun rol du ni nyes byas so/ /lam gyis dub pa rmya ba la ni nyes pa med do/ / mthar yang de bzhin no/ /dge slong gis byar mi rung ba yod na de sgrub par byed pa dang lhan cig pa'i nad pa dang nad g.yog la yang ngo / /dge tshul dang yang ngo / /de dang ldan pa de la'o/ /gnas de na dge slong sdig can nye bar gyur pa nyid na'o/ /de sprugs pa la 'bad pa byas sam byed pa la'o//gnas par khas blangs na dus phyi ma dang snga ma'i gnyis po dag la bab pa na'o/ /des lhag par gnas par mi bya ba nyid do/ /gnas par khas blangs pa snga ma shos mi bya ba nyid do/ /snga ma ni mi bsrung bar bya ba nyid do/ /des dge tshul nye bar ma gzhag pa nye bar gzhag par mi bya'o//lam du dge tshul gnyid bro bas rmya bar gyur na mdun du btang ste 'gro bar bya'o/ /gal te bru ba tsha bar gyur na de la nang par gyi dus su kha zas sbyin par bya'o/ /gal te dro kar yang na de'i tshe yang ngo / /bsnyen par ma rdzogs pa dang lhan cig nyal ba'i ltung byed do// //ji ltar bcom ldan 'das kyis bar du gcod pa'i chos su gsungs pa gang dag yin pa de dag brten kyang bar du gcod par mi 'gyur ro/ /de ltar bcom ldan 'das kyis chos bstan pa bdag gis shes so zhes bya ba la sogs par 'jug pa'i tshig mi gtong ba la'o//de la gsol bas smad pa nyid byas te de'i 'og tu'o/ /lta ba'i rnam pa mi gtong ba'i ltung byed do// //shes gtso'o/ /de skad smra bas spangs pa phyir bcos pa nyid ma byas pa'i dge slong la'o/ /lung dbog pa dang dmigs kyis 'dri ba dang gnas dang rjes su bstan pa dang gdams ngag sbyin na'o//lta ba smra na'o/ /zang zing gi longs spyod byed na'o/ /bsnyen bkur bdag gir byed na'o/ /gnas su lhan cig nyal na yang ngo / /mthar ro/ /mtshan mo'i'o/ /gzhan gyis bsrul na yang ngo //nad pa dang lta ba dang dbral bar gtogs pa'i don gyis ni ma gtogs so/ /spangs pa'i rjes su phyogs pa'i ltung byed do// //tshig de nyid la zhugs pa mi gtong na dge tshul bsnyil bar bya'o/ /khyod la dang por gsol ba dang bzhi'i las dang de'i 'og tu bsnyil ba rtsom mo zhes bya ba dang /gsol ba byas so/ /las brjod pa dang po dang gnyis pa yang byas zin gyi sdig pa can gyi lta ba'i rnam pa 'di lta bu 'di thong shig ces re re'i mthar dge slong gis de la bsgrag par bya'o/ /btang na phyi ma mi bya'o/ /dge tshul bsnyil ba nyid do//bsnyil ba sdud pa'i ltung byed do// //sngon po'am dmar po'am ngur smrig gis kha ma bsgyur ba rang gi gos tha na lhung bzed kyi kha g.yogs dang snod dang rkang pa'i 'bob dang ska rags dag gi bgo ba la sogs pa la yongs su longs spyad na'o/ /sde pa gzhan gyi ni yang rung bar bya mi dgos pa nyid yin no//khyim pas bskus pa la yang mi dgos so/ /kha dog chen por kha bsgyur ba'i gos bsten par mi bya'o/ /khyim pa'i gos kyang mi bya'o/ /gtsug lag khang gi nang du ngur smrig gis g.yogs te bsten par bya'o/ /lam du gos brnyas pa ni thun mong nyid do//grogs dag dang ngo / /dge slong dang dge tshul dag dang ngo / /gcig nyid yin na rgan rabs nas brtsams te ji srid du sleb pa'i steng du g.yogs so/ /dmigs kyis ma bsngos na gzhan las gyon te bcag par mi bya'o/ /bsod nams 'dod pas mgron du bos na kha tshar ma bcad pa man chad sar pa la ni mi rtag pas nyen par 'gyur ba'i yid la byed pas steng du brdzi bar bya'o//kha ma bsgyur ba'i gos gyon pa'i ltung byed do// //rin po che rang gi ma yin pa dang der smos pa la reg gam reg tu bcug na byed pa po yin no/ /de ni g.yul du bcad pa'i mtshon cha dang rol mor spyad pa'i lag cha'o//dgos pa'i phyir rung ba nyid du gyur pa ni dngos gzhi'o/ /gyur pa ma yin pa ni nyes byas kyi'o/ /gtsug lag khang dang de'i nye 'khor na 'dug pa la bdag gir bya ba dang ma 'brel par rdzas chud mi za bar bya ba'i sems kyis ni ma gtogs so//de yal bar mi dor ro/ /de zhag bdun nam brgyad du bsdu skyog bya'o/ /'gro ba'i lam g.yogs su sa'am lo ma'i tshogs dag gis g.yogs par bya'o/ /bdag po rtags thams cad la ma bstabs par kho bo'i yin no zhes zer ba la sbyin par mi bya'o//'ongs par ma gyur na de'i 'og tu dge 'dun gyi mdzod du gzhug par bya'o/ /zla ba drug gi mtha' tshun chad du bcang bar bya'o/ /de'i 'og tu ma 'ongs na sangs rgyas sam dge 'dun gyi ris gang nas rnyed pa der spyad du rung ngo / /de rung ba nyid ma yin na des rung ba brtan po nyo bar bya'o//gal te de'i tshe bdag po 'ongs par gyur na rjes su gnang ba gsol te mi ster na sbyin par bya'o/ /gal te skyed slong na kho bo cag gis yongs su bskyang ba gang yin pa de nyid drin che bar mi sems sam zhes brjod par bya'o/ /nor bu la sogs pa la ni bdar ba dang phugs pa nyid du rung ba nyid yin no//mgul rgyan dang gdu bu rgyan can dang dpung rgyan dang do shal dang se mo do nyid du gnas pa yang ngo / /pi wang dang 'od ma dang bal la ri dang ma ha ti dang su g+ho sha rnams ni rgyud dang bcas pa nyid na'o/ /dung dang rnga bo che dang rnga pa Ta ha dang rdza rnga rnams ni sgra 'byin na'o//gzhu ni rgyud dang bcas pa nyid na'o/ /ral gri dang ral gri kyog po dang ral gri so gcig pa dang 'phang mdung dang mdung dang lcags kyo rnams ni de dag nyid yin na'o/ /mda' dang lcags mda' dang mda' phyed lcags las byas pa rnams ni mde'u dang bcas pa nyid na'o//sku gzugs ni sku gdung dang bcas pa nyid na'o/ /de la ston pa'i 'du shes nye bar gzhag na nyes pa med do/ /nor bu mching bu dang sog ma'i phreng ba dang mchu sbrang dang rdza rnga kha gcig pa dang gzhu dang mda' ltar bcos pa rnams ni phyed nyid do//gser gyi stegs bu ni mi rung ba nyid do/ /'jigs par gyur na rang gi la mi gnod na dge 'dun gyi dang mchod rten gyi dbyig dang gser sbas nas sam khyer te 'gro bar bya'o/ /dad pa can nam dge tshul gyis so/ /med na rang gis so/ /der bsko bar bya'o/ / bral na sbyin no/ /bru ba yang de dang 'dra'o/ /mi ma yin pa'i gnas na gal te de dag gi bsod nams kyis byung ba rin po che'i rang bzhin gyi sa gzhi dang them skas la sogs pa la ni nyes pa med do/ /zan gyi phyir snod gzhan med na rin po che las byas pa yang ngo / / 'dug pa'i phyir mal cha dang stan la yang ngo / /bzhon pas 'gro bar bya'o/ /chos dang ldan pa'i don gyi dbang nyid kyis so/ /cha sgeg dang ldan pa nyid kyis mi bya'o/ /rgas pa dang na ba dag las gzhan pas mi bya'o/ /chos nyan du gzhug pa'i phyir rin po che las byas pa'i seng ge'i khri la mi rtag pas nyen par 'gyur ba'i yid la byed pas 'dug par bya'o//khyim gzhan du des bshams pa na gser dang dngul gyis spras pa dril bu g.yer kas bshigs pa'i gos dag la khyim pa'i yin no snyam du shes par byas nas kyang ngo / /de la nor bus spras pa gser dang dngul gyis brgyan pa dag la yang ngo //de dag brub par bya'o/ /khyim pa dang dge tshul med na sangs rgyas kyi sku gzugs la ston pa'i 'du shes nye bar gzhag pa rnams kyis chos dang ldan pa'i don gyi dbang nyid kyis reg pa la mi rung ba nyid med do//de'i rdzas la yang ngo / /rgyan gdags pa bsten par mi bya'o/ /rgya bcang bar bya'o/ /gdags su mi rung ba'o/ /ro nye'am zangs sam ra gan nam khar ba'am rgya skyegs kyi tshigs ma'am shing ngam rdo'am sa'am ba so'am rwa dag las byas pa'o/ /rtags ni dge 'dun gyi la ni dbus su 'khor lo ngos gnyis su ri dgas 'og tu gtsug lag khang gi bdag po'i ming bri'o//gang zag gi la ni rus pa'i keng rus sam mgo'i thod pa'o/ /so mangs kyis skra bshad par mi bya'o/ /de ni dpe'o/ /me long gis bzhin blta bar mi bya'o//chu yan chad kyis so/ /chu brtag pa'i ched nyid dang gnyer ma dang rma dang skra dkar blta ba dang snga phyi'i mtshan ma gzung ba la ni nyes pa med do/ /'phral ris gsum bsten par mi bya'o/ /gi wang gis bsku ba bsten par mi bya'o/ /dri dag gis kyang mi bya'o//bsod nams 'dod pas rkang pa gnyis la lus bsku ba'i dris skud pa bsten par mi bya'o/ /de'i mdun du dor bar mi bya'o/ /de dag bskus pa dge 'dun gyi nang du 'du bar mi bya'o/ /khyim bdag la chos bstan par mi bya'o/ /khyim bdag tu 'gro bar mi bya'o//mjug tu khrus bya'o/ /de dag blang bar bya'o/ /phreng ba rgyu dag kyang ngo / /mchod rten la dbul bar bya'o/ /nyan thos kyi la yang ngo / /sbyin par byed pa mngon par ma dad na mgo logs sam rkang pa logs su'o/ /sgo'i byang steng ma yin par bya'o/ /rtsig pa la'o//der khab bam tsher ma btsugs pa la me tog phreng rgyud dag bcang bar bya'o/ /mig la phan pa'i dri zhim po dus dus su bsnam par bya'o/ /bram ze'i srad bu thogs pa bsten par mi bya'o/ /sngags skud kyang ngo / /gso ba'i phyir ni dpung pa g.yon par ro/ /gar bab bab tu mi dor ro//gal te lhag ma dang bcas par gyur na chos gos kyi tha ma'am ska rags la gdags par bya'o/ /gal te ma gyur na ka ba'am rtsig pa'i gseb tu gzhug go/ /gar dang glu dang rol mo kun tu spyad par mi bya'o/ /bslab par mi bya'o/ /bzlas par mi bya'o//blta ba'i phyir 'gro bar mi bya'o/ /dge slong ma kun tu gar byed du mi gzhug go/ /ston pa'i yon tan yang dag par bsgrags pa dang / rgyun chags gsum pa gdon pa la dbyangs kyi nga ro bya'o/ /de dag dben pa'i phyogs su bslab par bya'o/ /mtho 'tshams pa dang kun du rtse ba dang kun tu ca co 'don pa dang rgod pa dang dregs pa dang lus la rdeg pa dag mi bya'o//rgod pa'i bsam pas lus dang ngag gi rnam par 'gyur ba mi bya'o/ /'dres pa ni char sdom mo/ /snod brgyud pas zas kyi bya ba mi bya'o/ /me tog rna rgyan brgyu bar mi bya'o//gdags par mi bya'o/ /ngo so las byung ba sbyin par mi bya'o/ /mi rings par rgyug par mi bya'o/ /myur ba dang mchongs pa mi bya'o/ /brla dang lag pa dang nya ltar skor ba bskor bar mi bya'o/ /chur gseg ma gdab par mi bya'o/ /chur rdza rnga kha gcig pa dang rnga bo che ltar brdung bar mi bya'o//rdzab la phyil mo nyug par mi bya'o/ /glang po che'i skad dang rta'i skad dang khyu mchog gi skad dang rma bya'i skad dang khu byug gi skad mi dbyung ngo / /khas dung dang sil krol dang rnga bo che'i skad mi bya'o/ /longs pa'i gzhir gtogs pa'i ltung byed do// //'dul ba'i mdo bam po lnga pa/ so ga rnams kyi zla ba lhag ma phyed dang gnyis dang / dbyar rnams kyi dang po las so/ /gos med pa'i zas gnyis pa rnyed pa'i rnam pa gang yin pa la'o/ /rlung gis mi bskyod pa la'o/ /gos kyi grwa bsgul ba ni de'i mtha' yin no//char gyis ma phog pa la'o/ /de'i thigs pa gnyis kyis phog pa'o/ /lus la'o/ /gzhan gyi dus su khrus kyi nyin mo ma yin pa zhag bco lnga'i mdun rol du khrus byed na'o/ /dbang bskur bas sam 'jug pas so/ /lte bar son na'o/ /mdun rol du ni nyes byas so//chu ma yin pas kyang ngo / /thams cad la dus dag yod kyang byin gyis ma brlabs na'o/ /don gzhan la gzhol bas chu nyams su myong ba ni khrus ma yin no/ /de'i phyir ma bsams par brgal ba dang rkyal pa la gdab pa dag la ni ltung ba med do/ / a mra pa ran ta'i yul dag na ni 'di med par shes par bya'o/ /cho ga btsan po yod na bag yangs su bya ba la brten par mi bya'o/ /khrus byed pa'i ltung byed do// //gsod pa'i sems kyis dud 'gro la bsnun na'o/ /gzhi des de'i tshe'am gzhan gyi tshe shi na'o/ /sems can gyi gzugs sems can ma yin pa la ni nyes byas byed pa nyid do//dud 'gro gsod pa'i ltung byed do// //khyod bsnyen par rdzogs pa ma yin zhing pham par 'gyur ba byung ngo zhes bya ba la sogs pa dge slong ma yin pa'i don gyis 'gyod pa bskyed na'o/ /dge slong la'o/ / bde ba la mi reg pa bskyed pa'i sems kyi'o/ /bzhad gad kyis kyang ngo / /'gyod pa ma skyes na yang ngo / /gzhan gyis ni nyes byas so/ /'gyod pa bskyed pa'i ltung byed do// //dge slong la sor mo'am khu tshur ram gru mo'am phrag pa'am mgo'am glo'am rgyab bam rked pa'am brla'am pus mo'am byin pa'am rkang pa'i mthe bo la sogs pa dag gis ga ga tshil byed pas reg na'o//skyi g.ya' bar bya ba'i sems kyis so/ /de'i phyir rma dang sbrang bu dang 'brum bu dang sme ba dang spu'i tshoms bstan pa la ni ltung ba med do/ /reg byed gcig gam du ma nyid la'o//ga ga tshil byed pa'i ltung byed do// //chu'i yul la rtse ba rjes su sgrub na'o/ /zhugs shing nub pa dang 'byung ba dang ngogs gzhan du brgal ba dang rgyun phyogs dang rgyun las bzlog phyogs su rtsol ba dang chu la rnga bo che dang rdza rnga kha gcig pa'i sgra 'byin pa dang gse ba ma 'khrab pa dang 'phen pa dang khor yug dang rdo rje dang khron pa dang dba' klong dang chu srubs 'dren pa dag byed na dngos gzhi'o//bem rtol gyis brdegs na nyes byas so/ /bum pa dang phru ba dang ril ba dang kham phor dang bu ram gyi khu ba 'dzag pa dang sran tshod dang 'u sha dang thang tsha ba nyid yod pa la yang ngo //chu ma yin pa la rtse ba yang ngo / /de lta bu la byed du bcug pa ni de dang 'dra'o/ /rgod pas dga' ba nyams su myong bar bya ba'i 'dun pas so/ /de'i phyir sim par 'dod pas brgal ba la sogs pa la ni ltung ba med do/ /rkyal slob pa thad ka 'am lta 'og tu rtsol ba la yang ngo //grangs par 'dod pas tsha ba dag la ri mo 'dod pa la yang ngo / /chu la rtse ba'i ltung byed do// //bud med dang lhan cig gnas gcig tu gnyid log na'o/ /mtshan mo'o/ /mthar ro/ /mdun rol du ni nyes byas so/ / bya gag ni tshad ni de byed pa nyid kyi mtha'o/ /bud med dang lhan cig nyal ba'i ltung byed do// //bzhad gad bya bar bsams pas kyang rung ste sngangs par 'dod pas 'jigs pa'i rgyu nye bar sgrub pa sngon du btang bas 'jigs par byed pa che ge mo zhig ces dge slong la gzhan gyis kyang go bar byed na 'jigs pa ma skyes kyang ngo //yid du mi 'ong ba la dngos gzhi'o/ /'di lta ste dper na yi dwags dang sha za dang grul bum dang lus srul po'i gzugs la ba nag po dang sol ba dang ka ba dang ka ba tshig pa lta bu/ seng ge dang stag dang gung dang bse dang gzig dang wa'i skad lta bu/ bshang ba dang gci ba dang ra dang de'i ze ba'i dri lta bu/ seg dang re lde dang phyar ba'i reg pa lta bu dag nyid sgrogs pa'o/ /yid du 'ong ba la ni nyes byas so/ /'di lta ste/ dper na lha dang klu dang dri za dang gnod sbyin dang mi'am ci dang lto 'phye chen po'i gzugs nor can dang tshong dpon dang ded dpon la sogs pa lta bu dang /pi wang la sogs pa'i sgra lta bu/ a ka ru dang tsan dan dang gur gum dang ta ma la'i lo ma'i dri lta bu/ dar dang ras yug chen po dang be'u ras dang dar la dang du gu la'i ras dang ko tam pa'i ras kyi reg pa lta bu nyid sgrogs pa'o//skyo bar bya ba'i ched nyid ni ma gtogs so/ /de'i phyir skyo bar bya ba'i ched nyid du sems can dmyal ba dang dud 'gro dang yi dwags kyi gtam la sogs pa ni ltung ba med do/ sngangs par byed pa'i ltung byed do// //rab tu byung ba 'di pa dbang ba'i lhung bzed dang / chos gos dang / dra ba dang / phor bu dang / ska rags la sogs pa dge sbyong gi 'tsho ba'i yo byad sbed dam sbed du bcug na'o/ /phan par 'dod pas ni ma gtogs so/ /sbed pa'i ltung byed do// // dge slong la gos blang ba med par byin pa des gnang ba med par spyod na'o/ /gal te gzhi des de dga' bar mi 'gyur na'o/ /byin pas nye bar 'tsho ba'i ltung byed do// //skur pa 'debs par 'dod pas dge slong la 'du shes bsgyur te dge 'dun lhag mas skur pa brjod na'o/ / bag tsam gyis kyang ngo / /skur ba 'debs pa'i ltung byed do// //'dod pas lam du 'gro na'o/ /rgyang grags re rer ro/ /de'i phyed re rer ni nyes byas so/ /bsel byed pa ni ma gtogs so/ /ngas lam nor ba lam du 'jug par byed pa yang ngo / /mi nus pa khrid pa yang ngo //bud med dang lhan cig 'gro ba'i ltung byed do// //grong 'joms par byed pa'i chom rkun pa dag gam sho gam 'dral bar byed pa'i tshong pa dag dang lhan cig 'gro ba la'o/ /zol pa dag dang rku thabs su rab tu byung ba dag dang lhan cig 'gro ba la ni nyes byas so//rkun ma dang lhan cig 'gro ba'i ltung byed do// //shes gtso'o/ /bsnyen par rdzogs par bya ba lo nyi shu ma lon pa nyid la'o/ /mkhan po nyid kyis so/ /bsnyen par rdzogs par byas na'o/ /des de la lon pa nyid mi dri bar mi bya'o/ /gzhan gyis kyang mi bya'o//nges par mi shes par de bsnyen par rdzogs par mi bya'o/ /rnam pa thams cad du de lo nyi shu lon pa la ni bsnyen par rdzogs pa 'chags so/ /cig shos la ni lon par 'du shes pa nyid na'o/ /mi shes pa dang mi dran pa dang yid gnyis za ba dag la yang ngo / /shes na ni de zhig go//gal te de skyes pa na ma lon pa'i'o/ /mngal na gnas pa dang shol gyi zla ba dag dang yang bcas te'o/ /ma lon pa bsnyen par rdzogs par byed pa'i ltung byed do// //rko ba'am rkor bcug pa la'o/ /sa'i'o/ /lag gi blas rgyu skar gyi sbyor bas rung bar byed pa med na thur ma sor bzhi tsam 'dzugs pa ma gtogs so//gal te rang bzhin can yin na dngos gzhi'o/ /gal te ma yin na nyes byas so/ /snga ma shos pa ni zla ba gsum lon pa'i 'thas pa'o/ /gal te char chu zhod na'o/ /gzhan gyi tshe na drug go/ /rtsig pa ni sa nyid ma yin par shes par mi bya'o//'dus pa dag la ni shas che bas mtshan nyid dag rab tu dbye ba nyid yin no/ /de'i phyir nyung ngu gzhan yod pa'i rdzas nyid la ni phal che ba nyid do/ /tshig pa nyid ni nyams pa nyid yin no/ /nyams pa nyid la ni phyed nyid do/ /sa zhag dang ngogs dang rtsig pa/ dang de'i skyang nul grugs pa dag kyang ngo / /rdo thal rgyu dang bye ma la sogs pa shas che ba yang ngo / /bya ba dag kyang ngo / /phur pa 'byin pa dang ri mo 'dren pa dang sa'i phye ma 'dres pa'i lci ba 'gogs pa dang / 'dam bskyod pa dang / de dang 'brel ba'i phru ba la sogs pa 'degs pa dang 'jig pa'i bdag nyid kyi tsha sgo dag kyang ngo //'dir gzhig pa'i blo dang ldan na de'o/ /de'i phyir bgrang ba dang shod dgod pa la sogs pa'i bsam pa la ni ltung ba med do/ /sa rko ba'i ltung byed do// //ha cang blang bar mi bya'o/ /mgron du bos pa'i khyim du gdugs tshod ma bskul ba de med na 'gror rung ngo //dus las yol du byed na brims shig ces bsgo ba yang ngo / /tshig 'bru de nyid ma yin pa la gus par mi bya'o/ /so sor mgron du bos pa bdag gir bya'o/ /dge 'dun dang bcas te mgron du bos pa yang ngo //dus thams cad du yang ngo / /tshig rnam par gzhag pa med par mgron du gnyer ba dang ldan pa las phyis gzhan nam yang dang yang du'am dus kyis mgron du gnyer ba ma byas par zla ba bzhi pa yongs su rdzogs pa'i 'og tu bshams pa zos na'o/ /rnam par rig byed la ni nyes byas so//nad pa la ni ltung ba med do/ /nye du las kyang ngo / /rnam par 'khyams pa las snga ma ni tha dad pa nyid do/ /de ni ma bstabs pa'i nyes pa byed pa nyid yin no/ /mdun rol du yang gang gis ma bstabs pa'o/ /mgron du gnyer ba las ring du 'dug pa'i ltung byed do// //shes gtso'o/ /mngon par shes pa nyid la'o/ /smra ba po la'o/ /bslab pa la'o/ /dge slong gis khyod kyis 'di la bslab par bya'o zhes brjod pa na'am bsgo ba ni mi slob bo zhes rgyu'i dngos po des go bar byed pa la mi shes pa nyid sgrogs par byed pa'i tshig brjod na'o//mdo sde las gsungs pa la ni nyes byas kyi'o/ /bslab pa la nye bar 'jog pa spang ba'i ltung byed do// //dge slong dag rtsod par gyur pa dge slong dag dang gros byed pa na mnyan pa'i phyir rna gtod na ste nye bar zhi bar 'dod pas ni ma gtogs so//sgra thos pa la ni nyes byas so/ /don la ni dngos gzhi'o/ /gal te 'khrug long bya ba la gzhol bas so/ /don gzhan gyi dbang nyid kyis son zhing shes pa'i 'og tu rkang pa dang se gol dang lud pa'i sgra dag gis go bar mi byed na nges par ltung ba 'byin pa nyid du 'gyur te/gal te nor ba dang zhi bar 'dod pa ni ma gtogs so/ /'thab gcugs mi bya'o/ /mnyan par mi bya'o/ /de byed pa la nye bar bskor te 'dug par mi bya'o/ /nye bar zhi bar bya ba'i phyir mi 'bad par mi 'bar bar mi bya'o/ /nyan rna las gyur pa'i ltung byed do// //gsol ba la sogs pa'i las la 'dus pa dge slong dag la ma smras par 'gro na'o/ /thos pa'i nye 'khor las 'das na dngos gzhi'o/ /mdun rol du ni nyes byas so/ /don med pa dang mi rigs pas 'gro ba'o/ /gsol ba byas pa nyid la'o/ / chos dang ldan pa'i don nyid ma yin pa'i las la yang ngo / /thos pa'i yul las mi 'da' bar 'dod pas ni ltung ba med do/ /mi smra bar 'gro ba'i ltung byed do// //'dug pa dang 'gro ba dang gnas mal dang gtsug lag khang len pa dang smra ba la sogs pa bsgo ba'i don la ma gus pas chos dang ldan par bshad kyis sbyang ba med par de las bzlog ste 'gal bar byed pa la'o//dge slong gi dge 'dun gyi la ni dngos gzhi'o/ /mkhan po dang slob dpon dag gi la ni nyes byas so/ /chos dang ldan pa nyid ma yin pa'i bsgo ba las kyang ngo / / gtam zer ba ni de nyid do/ /dge 'dun gyi tha snyad pa ni de'i kha yin no/ /sangs rgyas ni dge 'dun dang 'dra'o/ /rgyal po dang dgra bcom pa dang dge 'dun gyi gnas brtan rnams kyi tshig rnam par dkrug par mi bya'o/ /ma gus pa'i tshul gyis ltung byed do// //myos par 'gyur ba 'thung ba na'o//de bskol na ni de nyid las nyams pa yin no/ /sbang ma dang tshigs ma za ba la ni de'i 'jug pa yod do/ /phabs kyi chang bu ni phyed nyid do/ /rtsa ba dang sdong bu dang 'dab ma dang me tog dang 'bras bu myos par 'gyur ba rnams kyang ngo / /myos par 'gyur ba'i dri dang ro bro ba'i thug pa myos par mi byed pa rnams kyang ngo //mdog tsam myos par 'gyur ba dang 'dra ba la ni nyes pa med do/ /mkhur bar bsel ba dang lus skud pa ni sbyor ba dang 'dra'o/ /nad pa la ni ltung ba med do/ /myos par 'gyur ba 'thung ba'i ltung byed do// //shes gtso'o/ /dus ma yin pa nyid la'o/ /dge slong 'khod pa la ma smras pa la'o/ /grong du zhugs na'o/ /gal te brtad pa'i bya ba ma byung na'o/ /gzhan du rgyu ba la ni nyes byas so/ /'di la dge slong med na dge slong ma yang de dang 'dra'o/ /de yang na dge tshul lo//de yang na dge slob ma'o/ /de yang na dge tshul ma'o/ /brda mi phrad pa ni med pa nyid do/ /mtshams gzhan na gnas pa dang gnas nas phyung ba dang gzhan gyi phyogs dang mthun pa dag kyang ngo / /rdzu 'phrul gyis ni ltung ba med do/ /dus ma yin par 'gro ba'i ltung byed do// // dus ma yin par khyim bzhi pa la sogs par 'gro ba la'o/ /de'i tshig gis dge 'dun spyan drangs pa ni sbyin bdag la kho bo ma 'ongs pa'i dbang gis brim pa yol bar ma bya shig ces bsgo bar gsum pa la sogs par rgyu ba la yang ngo / /grong rgyu ba'i ltung byed do// //shes gtso'o/ / nam ma nangs pa nyid la'o/ /'dir ni skya rengs tha ma ma shar ba nyid de yin no/ /btsun mo'i 'khor 'dug pa'i gnas dang 'brel ba nyid la'o/ /de'i tshe skabs ma yin pa la yang ngo / /mtshan mo re re la'o/ /de'i sgo bstan pa dang nye 'khor gyi mtha' gnyis ni de'i dang po yin no//rgyal po'i pho brang dang grong khyer dag kyang de dang 'dra'o/ /rgyal po'i pho brang gi gnas la yang ngo / /grong khyer dang ni nyes byas so/ /gal te de'i don nyid yin na'o/ /'di la cig shos kyi kha na ma tho ba de yang ngo / /gal te rgyal po dang btsun mo dang gzhon nu dang zhang blon dang bar chad dang gdul ba'i dbang gis ma yin pa la'o//ma bzlugs par rgyal po'i pho brang du 'jug par mi bya'o/ /rgyal po'i pho brang du nub mo 'jug pa'i ltung byed do// //so sor thar pa'i mdo gdon pa 'don pa'i tshe de la lan gnyis nyams su myong zhing yid rmongs pa ma yin pas 'di la chos 'di yod par bdag gis da gzod shes so zer ba de la'o//mtshan gzhan gyi tshe 'don pa'i tshe thun mong ba la ni nyes byas so/ /mdo sde dang ldan pa smra ba na yang ngo / /thun mong ma yin pa ni ltung ba med do/ /so sor thar pa'i mdo gdon pa 'don pa'i tshe ma gus par nyan pa nye bar bsgrub pa 'gyod du gzhug go//bslab pa'i gzhi'i dngos po la khyad du gsod pa'i ltung byed do// //ba so dang rus pa dang rwa'i khab ral byed dam byed du bcug pa la'o/ /byas zin pa rnyed pa dang byas zin pa la spyod pa dag la ni ltung ba med do/ /bcag pa nyid ma dris par 'chags pa blang bar mi bya'o//gal te ma bcag na ma bshags pa nyid yin no/ /'og ma lnga po dag la yang de dag dang bcad pa dang ldan pa yin no/ /gnyis pa la ni bsdus pa dang po/ /khab ral 'chos pa'i ltung byed do// //rkang pa dma' ba dang ldan pa'i khri la nyal bar mi bya'o//mal dang 'brel ba'i khri nye 'khor gyi phyogs su rkang pa bkru bar mi bya'o/ /lham yod pas so/ /gzhan gyis ni mgo'i logs dang rkang pa'i logs ma gtogs par ro/ /mal stan mthon po dang mal stan chen po la 'dug pa'am nyal bar mi bya'o//khyim gzhan du gzhan med na snga ma shos bya'o/ /rkang rten dang bcas pa la mal bca' bar bya'o/ /khri brtsegs pa'i steng du 'dug par mi bya'o/ /tshad las lhag par byed dam byed du 'jug pa la'o/ /gnyis pa'i 'og ma gsum po dag la yang ngo / / khri'am khri'u dag gi'o/ /dge 'dun gyi'o/ /'og ma la yang ngo / /rkang pa dag gi'o/ /de dag gi tshad ni bu gar gzhug pa'i phyogs ma gtogs par khru gang ngo / /bde bar gshegs pa'i sum chas so/ /'og ma dag la yang ngo / /khri rkang 'chos pa'i ltung byed do// //shing bal gyis gos par byas pa la'o/ /rang ngam bskos pas so/ /shing bal ni lnga ste/ sha ma la'i dang / arka'i dang / ka shi'i dang / spra ba'i dang / er ka'i'o/ /shing bal gyis gos par bya ba'i ltung byed do// //gding ba'i'o/ /'di'i tshad ni srid du khru gsum mo//mi chog na khru phyed dang do man chad bskyed do/ /'di'i zhing du ni khru do dang sor drug go/ /de chung ngu la byin gyis rlob na nyes byas so/ /'og ma gnyis la yang ngo / /gding ba las gyur pa'i ltung byed do// //g.yan pa dgab pa'i'o//khru drug dang gsum mo/ /g.yan pa dgab pa las gyur pa'i ltung byed do// //dbyar gyi ras chen gyi'o/ /dgu dang gsum dang sor bco brgyad do/ /dbyar gyi ras chen las gyur pa'i ltung byed do// //ston pa rang gi khru lnga dang gsum pa'i chos gos so//de'i lus tsam med par de'i tshad dam lhag pa'i chos gos byed dam byed du 'jug pa la'o/ /de bcang bar mi bya'o/ /bde bar gshegs pa'i chos gos kyi tshad las gyur pa'i ltung byed do// //ltung byed 'ba' zhig tu gyur pa rnams rdzogs so// // shes gtso'o/ /dge slong ma nye du ma yin pa nyid la'o/ /rang gis mi 'brims par bsgrubs pa'i bca' ba dang bza' ba bdag nyid grong na 'dug pas blangs te zos na'o/ /dbyar khang ni grong nyid ma yin no/ /dge slong gi gnas kyang ma yin no/ /nam mkha' ni phyed nyid do//'jog par byed pa'i dge slong ma nye bar mi gnas na bzhag pa len pa ni de las ma yin no/ /dge slong ma las zas len pa'i so sor bshags par bya ba ste dang po'o// //de'am dge slong gzhan la 'di bca' ba'am btung ba'am sran tshod dam bza' ba'am yang byin cig ces bya ba la sogs pa bsko bsham byed pa la zhugs pa'i dge slong ma 'dug pa ni byed pa po yin no//gal te de'i tshig gis sam de'i nye dus mgron du bos pa ma yin na'o/ /byug ris ston pa dang ma byin pa la sbyin du 'jug pa ma gtogs so/ /de la dge slong gang yang rung ba lhan cig mi za bas kyang rung bas sring mo khyod dge slong rnams zan zos kyi bar du re zhig sdod cig ces ma bsgo bar dge slong gsum la sogs pa mgron du bos pas zos na'o//khyim du'o/ /gal te tshig de nye bar gdags su rung na dngos gzhi'o/ / gal te mi rung na nyes byas kyi'o/ /'di la bsgo ba nyid du rnam par gnas pa ni shes gtso'o/ /de'i phyir dri ba la brtson par bya'o/ /'di la rgan pa mi 'jug na gsar bus 'jug par bya'o/ /gral rims su ma phebs par 'brim du 'jug pa ma bzlog par za ba'i so sor bshags par bya ba ste gnyis pa'o// //dad pa can la gal te byin na de phongs par 'gyur ba lta na khyim gyi bslab pa'i sdom pa sbyin par bya'o/ /gsol bas so/ /bag yangs su bya ba yang ngo / /byin pa de'i sems rtogs nas khyim du 'gro ba dang stan la 'dug pa dang chos bstan pa dag bya'o//lhung bzed stong pas 'jug par mi bya'o/ /de'i byis pa slong ba dag la bsod snyoms las snum khur sbyin par bya zhing ril gyis ni mi sbyin no/ /'dod na bag yangs su bya'o/ /de byin pa'i mdun rol du mgron du ma bos pas bslab pa'i sdom pa byin pa'i khyim nas bza' ba dang bca' ba dag blangs shing zos pa la ste/ga gon dang la phug dang ldam ldum mod pa dag ni ma gtogs so/ /bslab pa dral te khyim du 'jug pa'i so sor bshags par bya ba ste gsum pa'o// //nags nyul ba'i dge slong bsko bar bya'o/ /des dpag tshad phyed kho ra khor yug tu brtag par bya'o//'jigs pa dang bcas pa nyid yin na dung brda brtul bar bya'o/ /ba dan sngon po bsgreng bar bya'o/ /'dab ma'i chang bu dag lam khar gzhag par bya'o/ /gzhan du na dkar po dag go/ /'dod pa nyid yin na de la khye'u sus dang grogs dag kyang sbyin par bya'o//shes gtso'o/ /nags ma nyul ba nyid dag la'o/ /kun dga' ra ba'i phyi rol gyi dgon par bca' ba dang bza' ba blangs te zos na'o/ /bsrung ba bsgrubs na phyed do/ /'jigs pa dang bcas pa'i gnas nas gzhan du gyur pa nyid du yang ngo //nags ma brtags pa las gyur pa'i so sor bshags par bya ba ste bzhi pa'o// //so sor bshags par bya ba rnams rdzogs so// //sham thabs ci nas kyang zlum por 'dug par 'gyur ba de ltar bgo bar bya'o/ /ha cang rtsengs pa ma yin par ro/ /ha cang 'jol ba ma yin par ro//grwa glang po che'i sna ltar nar ba ma yin par ro/ /gong du ma ltebs par ro/ /phur ma ltar 'dug pa ma yin par ro/ /sbrul mgo'i gdengs ka ltar phyir 'byung ba ma yin par ro/ /chos gos ci nas kyang dang po gsum ltar 'gyur ba de ltar bgo bar bya'o//shin tu bsdams shing khyim gzhan du 'gro bar bya'o/ /legs par bgos shing ngo / /sgra bskyung zhing ngo / /mig g.yeng bar mi bya zhing ngo / /gnya' shing gang tsam du blta zhing ngo / /mgo mi g.yogs pa'i rnam pas so//mi brdze bar ro/ /mi gzar bar ro/ /gnya' gong du mi bsnol bar ro/ /ltag par mi bsnol bar ro/ /mi mchong bar ro/ /mi brkyang bar ro/ /tsog pus ma yin par ro/ /brang bas ma yin par ro/ /dkur mi brten par ro/ /lus mi bsgyur bar ro//lag pa mi kyog par ro/ /mgo mi bsgyur bar ro/ /phrag pa mi sprad par ro/ /lag pa mi sbrel bar ro/ /der ma bsgo bar stan la 'dug par mi bya'o/ /stan la ma brtags par mi bya'o/ /lus thams cad kyi ljid kyis mi dbab par ro/ / rkang pa mi bsnol bar ro/ /brla mi bsnol bar ro/ /long bu'i steng du long bu mi bzhag par ro/ /rkang pa mi dgug par ro/ /rkang pa mi gdang bar ro/ /mdoms mi snang bar ro/ /lag pa la 'gram pa brten te mi bya'o/ /stan thabs bkur bar mi bya'o/ / thams cad du legs par zas blang bar bya'o/ /mu dang kha da chad du ma yin par ro/ /tshod ma dang mnyam pa ma yin par ro/ /mthar chags su'o/ /lhung bzed la blta zhing ngo / /bca' ba dang bza' ba ma 'ongs par lhung bzed mi bzed par ro/ /yang 'dod pa'i phyir 'bras chan gyis tshod ma mi dgab tshod mas 'bras chan me dgab par ro//steng du gzung bar mi bya'o/ /legs par zas bza' bar bya'o/ /kham ha cang chung ba ma yin par ro/ /kham ha cang chen po ma yin par ro/ /kham ran par ro/ /kham ma gzas par kha mi gdang ngo //kha kham gyis bkang ste mi smra bar bya'o/ /tsug tsug mi bya'o/ /cag cag mi bya'o/ /hu hu mi bya'o/ /phu phu mi bya'o/ /lce phyung ste zas mi bza' 'o/ /'bru nas tha dad du mi bya'o/ /'phyas mi gdags so/ /mkhur ba mi spo'o/ /rkan mi gtog go/ /kham 'phror mi gcad do//lag pa mi ldag go/ /lhung bzed mi byog go/ /lag pa mi sprug go/ /lhung bzed mi bskyam mo/ /mchod rten 'dra bar byas te mi gzhom mo/ /drung na 'dug pa'i dge slong gi lhung bzed la 'phyas gdags pa'i phyir mi blta'o/ /lag pa zas dang 'bags pas chu snod la mi bzung ngo //drung na 'dug pa'i dge slong la zas dang 'bags pa'i chus mi gtor ro/ /khyim pa 'dug pa la ma dris par de khyim du mi dbo'o/ /lhung bzed kyi nang du zas kyi lhag ma blugs te mi dbo bar ro/ /lhung bzed lan gsum bkrus te gtsug lag gi tshigs su bcad pa dag gi bzlas brjod byas pa'i lhung bzed kyi chu sbyin par bya'o//'og gzhi med pa'i sa phyogs su lhung bzed mi bzhag par ro/ /gad ka ma yin par ro/ /g.yang sa ma yin par ro/ /dkan gzar po ma yin par ro/ /'greng ste lhung bzed mi bkru bar ro//de de gsum du mi bya bar ro/ /des 'bab chu drag po'i rgyun las bzlog ste chu mi bcu bar ro/ /lam gyi bzhi mdor mi bya'o/ /bshang gci yan chad ni mi na ba la'o/ /de dag la ni mi na bar ro/ /'dug pa la 'greng ste chos mi bshad par ro//nyal ba la 'dug ste mi bshad par ro/ /stan mthon po la 'dug pa la stan dma' ba la 'dug ste chos mi bshad par ro/ /ngan pa dang bzang po yang de bzhin no/ /mdun du 'gro ba la phyi nas 'gro zhing mi bshad par ro/ /lam nas 'gro ba la lam gyi 'gram nas 'gro zhing mi bshad par ro//mgo g.yogs pa dang / brdzes pa dang / gzar ba dang / gnya' gong du bsnol ba dang / lhag par bsnol ba la mi bshad par ro/ /mgo do ker can dang / zhwa gyon pa dang / cod pan can dang / phreng ba can dang / dkris pa la mi bshad par ro//glang po che dang rta zhon pa dang / khyogs dang bzhon pa'i steng na 'dug pa dang mchil lham gyon pa la mi bshad par ro/ /lag na 'khar ba thogs pa dang / gdugs dang / mtshon cha dang / ral gri dang dgra cha thogs pa dang / go cha gyon pa la ni mi bshad par ro/ /'greng ste bshang gci mi bya bar ro/ /chu'i nang du mi bya bar ro/ /mi dor bar ro/ /mchil ma dang snabs dang skyugs pa dang rlugs pa yang ngo / /rtswa sngon po yod pa'i sa phyogs su yang mi bya mi dor bar ro/ /gnod pa byung ba ma gtogs par shing la mi gang tsam las mtho bar mi 'dzeg par ro//bslab pa rnams so/ /dge slong gi rnam par 'byed pa rdzogs so// //ltung ba la sbyor ba'i tshig yan chad dge slong ma rnams kyi'o/ /bzhi po dag go/ /bdag gir byed pa la'o/ /mig nas pus mo'i bar gyis so//reg pa'i 'o/ /pho'i'o/ /'khrig pa'i 'dod chags kyis so/ /yan lag gzhan gyis ni sbom po'o/ /sems gzhan gyis ni na smad do/ /gal te de'i tshe de la skyes pa'i de des shes pa na'o/ /gal te med na ni de las kyang ngo / /bdag gir mi byed pa la ni ltung ba med do//bu la reg pa la skyon chags pa med do/ /gzhan yin na byis pa la yang reg par mi bya'o/ /'dod pa dang ldan pa la brten pa dang tshig la de dang ldan pa'i don yongs su shes par bya ba'i mthu yod pa nyid kyis pho ni yongs su rdzogs par byed pa nyid yin no//reg pa'i pham par 'gyur ba'o// //lus bkan pa la'o/ /chags par gyur pas brten pa'i phyir nye bar gnas pa'i skyes pa chags pa'i phyir ro/ /des sprad du rung ba nyid la'o/ /chags par gyur pas chags par gyur pa dang lhan cig gzhogs stegs byed na sbom po'o//'phyar g.yeng ngo / /rtsab hral lo/ /de las dus mal mnos na yang ngo / /brda'o/ /mtshan ma'o/ /de'i 'ong ba dang 'gro ba'i 'jug pa dang bdag gir byed na'o/ /lus bkan pa'i pham par 'gyur ba'o// //dge slong ma'i pham par 'gyur ba 'chab pa la'o//'chab pa'i pham par 'gyur ba'o/ /dge slong gnas nas phyung ba bzod par gsol bar nges pa phyag bya ba'i 'os ma yin pa'i sdom pa byin par shes bzhin du de las bzlog pa nyid mi gtong na'o/ /dben pa la rtul ba nyid dang 'dra'o/ /bzlog pa'i pham par 'gyur ba'o//dge slong ma'i pham par 'gyur ba rnams rdzogs so// //smyan byed pa'o/ /dge slong ma la khyim pa mo nyid kyi bsngags pa brjod na sbom po'o/ /gzhan smad 'tshong ma nyid du byed du 'jug na yang ngo / /bran mo zong nyid du gtong ba ni de las phyi rol du gyur pa nyid ma yin no//smyan byed pa'i dge 'dun lhag ma'o// //gzhi med pa'o/ /bag tsam mo/ /pho nyid la ni mo nyid do/ /de la ni pho nyid do/ /gzhi med pa dang bag tsam gyi dge 'dun lhag ma gnyis so// //ci yang rung ba la bdag gir byed pa la'o/ /dge slong ma chags par gyur pas so//skyes pa chags par gyur pa las so/ /chags par ma gyur pas ni sbom po'o/ /chags par ma gyur pa las ni nyes byas so/ /ci yang rung ba len pa'i dge 'dun lhag ma la'o// //chags par ma gyur pa las chags par gyur pa las ci yang rung ba bdag gir byed pa la nyes pa med do//zhes dge slong ma la go bar byed pa la'o/ /ci yang rung ba len du 'jug pa'i dge 'dun lhag ma'o// //'og ma bzhi po dag la ni dge slong ma med par ro/ /dge slob ma la ni sum cha dang bral ba nyid yin na'o/ /dge tshul ma ni sum cha'o//mi 'dod bzhin du bral ba la ni nyes pa med do/ /bar chad byung ba'i bdag nyid kyis kyang ngo / /dus dang 'brel pa la mtha' nyid kyi mdun rol ni sbyor ba nyid do/ /nyi ma nub pa'i mtha' ni nyin mo'i mtha' yin no/ /mtshan mo dbyar khang las phyi rol du gyur na'o//mtshan mo 'bral ba'i dge 'dun lhag ma'o// //nyin mo'o/ /gcig pu nye du'i khyim du zan gyi phyir lo nyes byung ba'i tshe nye du rnams dang lhan cig 'brel ba'i nye bar sbyor ba gnang ba thob pas 'gro bar bya'o/ /de sbyin par bya'o/ /nyin mo 'bral ba'i dge 'dun lhag ma'o// //lam du zhugs pa la'o/ /lam du 'jug pa'i dge 'dun lhag ma'o// //chu klung gi pha rol du brgal ba la'o/ /lag rkyal dag gis pha rol tu phyin na'o/ /mdun rol du ni sbom po'o/ /yul phran gyi pha rol du ni nyes byas so//chu klung brgal ba'i dge 'dun lhag ma'o// //rab tu 'byin pa la'o/ /tshogs pa'i yid mthun pas bdag pos yongs su btang ba rgyal pos rjes su gnang ba'o/ /bsad pa'i phyir ro/ /mkhan po nyid kyis so/ /de shes pa nyid kyis so/ /rab tu 'byin pa'i dge 'dun lhag ma'o// //shi ba'i nor len pa la'o/ /dge 'dun gyi la ni ltung ba med do/ /gal te tshegs chung ngus na'o/ /shi ba'i nor rdzas len pa'i dge 'dun lhag ma'o// //mtshams kyi phyi rol du bzod pa gsol du 'jug pa la'o/ /bzod pa gsol du 'jug pa'i dge 'dun lhag ma'o// //dkon mchog gtong ngo / /'di dang mtshungs pa nyid kyi dge sbyong gzhan dag kyang yod kyis de dag la tshangs par spyod pa nyid spyad do zhes bya ba'i tshig de la zhugs pa mi gtong ba la'o/ /dge 'dun gyi dbyen la zhugs pa ltar ro//'og ma dag la yang ngo / /spong ba'i dge 'dun lhag ma'o// //dge slong ma rnams la 'dun pa la sogs pas 'gro ba nyid du rjes su sbyor ba la'o/ /dge slong ma rnams dang lhan cig 'thab krol dang mtshang 'bru ba dang rtsod pa dang 'gyed pa dang bzlog pa la'o//'thab krol byed pa'i dge 'dun lhag ma'o// //sde zhing gnas pa la'o/ /dge slong ma dang ngo / /gzhogs stegs dang / 'phyar g.yeng dang / rtsab hral gyi rgyur gyur pa dag gis so/ /bud med dang bsten pa'i dge 'dun lhag ma'o// //sde pa de yang dag par 'dzin du bcug pa la'o//bud med dang bsten du 'jug pa'i dge 'dun lhag ma'o// //dge 'dun 'byed pa la sogs pa gzhi ni dge slong gi skabs las so/ /dge slong ma'i dge 'dun lhag ma rnams rdzogs so// //bcu pa'o/ /gser dngul la reg pa dang /mngon mtshan can gyi spyod pa dang / nyo tshong byed pa dang / lhung bzed tshol ba dang / 'thag tu 'jug pa dang / 'thag pa bskyed pa dang / 'phrog pa dang / bsngos pa las bsgyur ba dang / sog 'jog las gyur pa'o/ /'khru ba la sogs pa ni dge slong gi'o/ / de las len na'o/ /dge slong ma la byin pa'o/ /lha rten bcang bar mi bya'o/ /'chang ba'i spang ba la sogs pa bcu dgu pa'o// //lhung bzed lhag ma zhag gcig las 'das par 'chang ba la'o/ /lhung bzed 'chang ba'i spang ba'o// //byin gyis brlab tu rung ba nyi ma dang po la 'am zla ba phyed phyed cing byin gyis ma brlabs pa la'o//byin gyis mi rlob pa'i spang ba'o// //dpyid zla ra ba nya'i nyin mo'i mdun rol du sra brkyang 'byin pa la'o/ /dge slong ma chom rkun gyis bcom pa'i don nyid la ni ltung ba med do/ /sra brkyang 'byin pa'i spang ba'o// // mi 'byin pa la'o/ /sra brkyang mi 'byin pa'i spang ba'o// //dbyig dang gser slong ba la'o// //rin po che slong ba'i spang ba'o// //gzhan gyi ched du rnyed pa'i gos zas su byas te bza' ba'i phyir 'jog pa la'o/ /gos za ba las gyur pa'i spang ba'o// //gos dang mal cha dang dbyar khang gi ched du yang ngo //gang yang rung ba'o/ /gos rgyu ba la sogs pa zab pa las gyur pa'i spang ba'o// //dge slong ma'i skye bo mang po'i phyir sbyor du bcug nas rang la yongs su bsgyur ba la'o/ /skye bo mang po la bsngos pa'i byin gyis rlob pa'i spang ba'o// //dge 'dun gyi phyir yang ngo //dge 'dun la bsngos pa byin gyis rlob pa'i spang ba'o// //tshig nyan du gzhug pa'i phyir rdzas bcings pa 'grol du 'jug pa la'o/ /bcings pa 'grol du 'jug pa'i spang ba'o// //srang brgya pa la sogs pa dang kAR+ShA pa Na nyi shu la sogs pa ri ba'i gos bdag gir byed pa la'o//gos lci ba bsten pa'i spang ba'o// //srang lnga pa'i mthar thug pa la'o/ /gos yang ba bsten pa'i spang ba'o/ /spang ba'i ltung byed rnams rdzogs so// //bdun cu rtsa gnyis so/ /ma bskos pa la sogs pa bcu dang / skrod pa dang / yang yang za ba dang /zas bsod pa slong ba dang / 'dug pa dang / 'greng ba dang / phyir ma blangs pa spyod pa dang / ma lon pa dang / dbyar gyi ras chen las gyur pa ni ma gtogs so/ /dge slong gis rab tu byung ba mo'i phyir zang zing nye bar bsgrub tu rung ste chung mar gyur pa nyid la yang ngo //des blang du yang ngo / /bu chung ngu dang lhan cig nyal ba ni ma gtogs pa nyid yin no/ /gnang ba thob pa la'o/ /de sbyin par bya'o/ /rab tu 'byin pa dang bsnyen par rdzogs par byed pa la'o/ /lo bcu gnyis ma lon pa nyid la'o/ /bdag nyid bsnyen par rdzogs pas so//ma lon pas nye bar 'jog pa'i ltung byed do/ /'khor ba dang 'khor mang po nye bar gzhag pa'i gnang ba sbyin par bya'o/ /de nye bar 'jog nus pa la'o/ /bsnyen par rdzogs nas lo bcu gnyis lon pa nyid la'o/ /gzhan gyis gsol bar mi bya'o/ /sngar gnang ba ma thob pa la'o//'khor nye bar 'jog na'o/ /'khor nye bar 'jog par byed pa'i ltung byed do// //cig shos ni 'khor mang po'o/ /'khor mang po nye bar 'jog pa'i ltung byed do// //khyim so bzung ba lo bcu gnyis nyid kyi mdun rol du bsnyen par ma rdzogs par byed pa la'o/ /lo bcu gnyis ma lon pa bsnyen par rdzogs par byed pa'i ltung byed do// //gzhan ni lo nyi shu'o/ /lo nyi shu ma lon pa bsnyen par rdzogs par byed pa'i ltung byed do// //bslab pa ma byin pa gnyis mkhan po nyid kyis so/ /tshigs las 'das pa'i ltung byed gnyis so// //de la ma bslabs pa nyid do//bslabs pa la ma bslabs pa bsnyen par rdzogs par byed pa'i ltung byed do// //spyad pa nyid mi byed pa la'o/ /bslabs pa la bslabs pa bsnyen par rdzogs par mi byed pa'i ltung byed do// //gal te kho mo la gos sbyin pa lta na de'i phyir khyod bsnyen par rdzogs par bya'o/ /zhes bsnyen par ma rdzogs par 'dod pa la zer ba la'o//chos 'tshong ba'i ltung byed do// //rab tu 'byung ba dang mthun pa bstan pas khyim rgyas pa bya ba spong du bcug nas rab tu mi 'byin pa la'o/ /'drid pa'i ltung byed do// //lo'i rjes su rab tu 'byin pa la'o/ /'khor mang po sog 'jog pa'i ltung byed do// //bdag pos ma gnang ba nyid rab tu 'byin pa la'o/ /ma gnang ba sdud pa'i ltung byed do// //'khrul pa mo'o/ /sbrum ma'o/ /mya ngan gyis gzir ba'o/ /rtsab krol can no/ /skyon can sdud pa las gyur pa'i ltung byed bzhi'o// //rab tu phyung ba dang bsnyen par rdzogs par byas pa dag la phan mi 'dogs pa la'o//bar chad mthong na mi 'dren pa la'o/ /dge slong ma'i bslab pa mi slob pa la'o/ /nad pa dag la nad g.yog mi byed pa la'o/ /nye gnas dang bcas pas kyang ngo / /yal bar 'dor ba las gyur pa'i ltung byed bzhi'o// //rang gi bsten par bya ba'i nang du rgya skyegs kyi chang bu 'jud pa la'o/ /rgyun las bzlog phyogs su brtsal bar mi bya'o/ /mngal gyi sgor khu chu blugs par mi bya'o/ /rked chings kyis glo bcing bar mi bya'o/ /brang chings kyis nu ma gnyis bcing bar mi bya'o//mdzes 'gyur gyi bar chad kyis bar du bcad par mi bya'o/ /de dag ni dpe'o/ /'dod pa bsten pa'i ltung byed do// //sor mo'i tshigs gnyis las lhag pas mo mtshan gyi nang 'khru ba'o/ /'dod pa bsten pa ltar bcos pa'i ltung byed do// //de la lag mthil gyi thal lcag gis bsnun pa la'o//'dod pa bsten pa ltar gnod pa'i ltung byed do// //de las spu 'thog par byed dam byed du 'jug pa la'o/ /bsten par bya ba 'chos pa'i ltung byed do// //khyim pa dang lhan cig dben pa skyabs yod pa na 'greng ba la'o/ /rtsig pa dang sab mo dang yol ba dang thibs po dang mun pa dag gis ni de nyid 'grub po//dge slong dang ngo / /bla gab med pa na snga ma dang ngo / /phyi ma dang ngo / /de grogs dang bcas pa nyid yin na ltung ba med do/ /dge slong ma khrims zla dang bcas pa nyid yin na yang ngo / / khyim pa'i rnar bshub cing smra ba la'o/ /de las des de nyan pa pa'o/ /dge slong gi'o/ /de las kyang ngo / /khyim pa las rig pa len pa la'o/ /de las de klog pa la'o/ /sgyu thabs kyis rmang bcings shing bcings shing 'grol du 'jug pa la'o/ /de'i phyir don bden pa nyid la ni ltung ba med do//reg par bya ba ma yin pa dang bsten pa las gyur pa'i ltung byed bcu gcig go// //bu 'tsho ba la'o/ /bu 'tsho ba'i ltung byed do// //khyim bdag la ma dris par khyim gzhan du mtshan mo 'da' bar byed pa la'o//bud med la rag las pa nyid yin na de la dris nas ltung ba med do/ /mtshan mo ma brtags par skyabs yod par 'da' bar byed pa la'o/ /gnas khang du dge slong ma gzhan med par mtshan mo 'da' bar byed pa la'o/ /de shi ba la sogs pa la ni ltung ba med do/ / gnod par 'gyur ba'i sgo spang ba'i ltung byed gsum mo// //dge slong ma dang khri gcig la lhan cig reg pa dang bcas shing mtshan mo nyal ba la'o/ /de dang ngam du ma dang lhan cig kyang rung ste gtur bu la sogs pas rab tu bcad cing dran pa nye bar gzhag ste lus kyi reg pa'i ro myang ba med par khri mi 'gul ba tha mal pa'am stan la ni ltung ba med do//yod na nyes byas so/ /longs spyod cing gnas pa btang ba'i ltung byed do// //rang gi lus kyi dril phyi dge slong ma byed du bcug pa la'o/ /dge slob ma'o/ /dge tshul ma'o/ /khyim pa mo'o/ / mu stegs mo'o/ /bkru bshal byed du 'jug pa la'o/ /rdzas dri zhim po dag gis rang gi lus skud pa la'o/ /'bru mar gyi tshigs mas so/ /byi dor byed pa las gyur pa'i ltung byed brgyad do// //lag pa sbrel te khrus byed pa la'o/ /chu la longs spyod pa'i ltung byed do// //bcos pa'i phyir pu shel tse 'chang ba la'o/ /so mangs dang smig shad dang gsum zhes bya ba dang / sgra brnyan gyis kyang ngo / /khyim pa'i rgyan thogs pa la'o/ /'chos pa las gyur pa'i ltung byed drug go/ /bro brdung ba la'o/ /yan lag gang yang rung bas so//glu len pa la'o/ /de'i bsam pa la'o/ /de'i bsam pas mgrin sgyur gang yang rung ba'o/ /rol mo byed pa la'o/ /rgyags pa las gyur pa'i ltung byed gsum mo// //longs spyod du gyur pa'i gdugs thogs pa la'o/ /mchil lham gyon pa la'o/ /dbyar khang dang mal stan bsrung ba'i phyir ni ltung ba med do//khri'u'i bsnyen bkur nyams su myong bar byed pa la'o/ /longs 'chos pa nyid las gyur pa'i ltung byed gsum mo// //khyim gzhan du ma bsgo bar stan la 'dug pa la'o/ /thug thub tu phyis gnon byed pa'i ltung byed do// //chos nyan du gzhug pa'i gnas skabs su khyim pa'i stan spyad pa khyim pa la ma sbran par bor te 'gro ba la'o//spangs pa'i nye 'khor gyi mtha' la'o/ /khyim pa la log pa'i thabs byed pa'i ltung byed do// //skud pa 'khal ba la'o/ /rgya cang dang lcag pod kyi don du dben pa'i phyogs su ltung ba med do//dge slong ma'i tshogs kyi gos bdag gir byed pa la'o/ /dge slong ma'i tshogs kyi gos la bdag gir byed pa'i ltung byed do// //zas btsong ba byas pa la'o/ /zas 'tshong ba'i ltung byed do// //khyim gyi bya ba yang ngo / /chang gi las mi bya'o/ /chang khang byed du mi gzhug go//rjen pa 'tshod pa la'o/ /dge slong gi dge 'dun dang mkhan po dang slob dpon dang tshangs pa mtshungs par spyod pa rnams kyi phyir dben pa'i phyogs su ni ltung ba med do/ /khyim pa mo'i bzo ston pa las gyur pa'i ltung byed gsum mo// //zas zos nas stan las langs te yang za ba la'o//lto 'dun las gyur pa'i ltung byed do// //sgog skya'o/ /tshogs par dbyung ba ma yin pa'i dri bsten pa'i ltung byed do// //sme gab mi 'chang ba la'o/ /de thag gus btags te bzhag go/ /de dus dus su bkru ba dang kha bsgyur bar bya'o/ /chu gos kyang ngo / /de gnyis bcang bar bya'o//bkru bshal ba la gos 'khrur 'jug pa la'o/ /gsu bel ba las gyur pa'i ltung byed gsum mo// //dge slong gis gos khyim pa la bgo ba'i phyir sbyin pa la'o/ /chos kyi rgyal mtshan la mi gus pa'i ltung byed do// //dge slong dang lhan cig snam sbyar brje ba la'o/ /rgyal mtshan brje ba'i ltung byed do// //bsdams pa la ser sna byed pa la'o/ /khyim dang gnas dang rnyed pa dang chos la ser sna byed pa la'o/ /ser sna byed pa las gyur pa'i ltung byed lnga'o// //dbyar khang nas dge slong ma gang yang rung bas skrod pa la'o/ /khyim gzhan nas dge slong ma snga nas gnas la skrod pa la'o//skrod pa las gyur pa'i ltung byed gnyis so// //legs par ma mthong ba la sogs pas gleng ba la'o/ /mtho 'tshams pa las gyur pa'i ltung byed do// //mna' 'dor ba la'o/ /log par ston pa'i ltung byed do// //khro bas bdag nyid la gnod par byed pa la'o//mi brtan pas rnam par 'gyur ba'i ltung byed do// //'dul ba'i mdo bam po drug pa/ /dge slong ma'i tshogs la brnyas thabs byed pa la'o/ /spyo ba la yang ngo / /'khor gtso bo la chus 'thor ba la'o/ /brgyal ba la ni ltung ba med do/ /dge slong la thu zhes mi bya'o//rab tu byung ba 'di pa la spyo bar mi bya'o/ /de la gnyis ka yang ngo / /dge slong gi mdun du spyod yul du rgyu bar mi bya'o/ /zam pa mi bstan par dge slong dang lhan cig 'gro bar mi bya'o/ /dge slong mthong ma thag tu stan las ldang bar bya'o/ /'dug pas de 'greng bas ha cang yun ring du 'da' bar byed na stan la 'dug du gzhug go//mi byed na 'dug pa'i phyir zhus te de la 'dug par bya'o/ /bla mar gyur pa la brnyas thabs byed pa'i ltung byed gsum mo// //dge slong ma rnams kyi rtsod pa mthu yod bzhin du nye bar zhi bar mi byed pa la'o/ / 'khrug long yal bar 'dor ba'i ltung byed do// //zhag lon pa'i 'dun pa sbyin pa la'o/ /blo mthun par mi byed pa'i ltung byed do// //zla ba phyed phyed cing dge slong rnams las gdams ngag dang rjes su bstan pa dag nyams su myong bar mi byed pa la'o/ /dge slong dag med par gso sbyong byed pa la'o//dge slong med pa'i gnas su dbyar gnas par khas len pa la'o/ /dbyar gnas pas gnyi ga'i dge 'dun la gnas gsum gyis dgag dbye mi byed pa la'o/ /lci ba'i chos las 'das pa las gyur pa'i ltung byed dag go// //dbul po sra brkyang sbyor du 'jug pa la'o/ / sra brkyang dbyung ba'i phyir bag yongs su bya ba'i tshogs pa la mi sbyin pa la'o/ /gos 'gyed pa'i phyir yang ngo / /'dis len mi 'dod pa nyid ni ma byas pa nyid do/ /gzhan la gnod par spyod pa las gyur pa'i ltung byed gsum mo// //dbyar khang ma gtad par 'gro ba la'o/ /nye 'khor btang na'o//dbyar khang slar mi btang ngo / /khang khyim gyi gzhi dang tshong khang gi gzhi yang ngo / /dbyar khang yal bar 'dor ba las gyur pa'i ltung byed do// //dbyar gyi nang du ljongs rgyu zhing 'gro ba la'o/ /bar chad nye bar gnas pa la ni ltung ba med do/ /dbyar gnas pa'i 'og tu der mi 'gro ba la'o//yul 'khor dogs pa dang bcas par 'gro ba la'o/ /mi mthun pa dang bcas par yang ngo / /'gro ba dang mi 'gro ba las gyur pa'i ltung byed bzhi'o// //lha'i gnas la sogs pa dang mu stegs can gyi gnas su song ste rtsod par byed pa la'o/ /skabs ma phye bar 'dri ba la'o//stan bting ste phan tshun kun dga' bar byas nas lung dri ba'i sbyor bas skabs 'byed du gzhug par bya'o/ /smra ba las gyur pa'i ltung byed gnyis so// //phyi sar gcig pu 'gro ba la'o/ /rtswa sngon po'i steng du bshang ba dor ba la'o/ /nad pa la ni ltung ba med do/ / rtsa sngon pos thams cad khyab pa la yang ngo / /rtsig pa'i phag tu ma bltas par bshang ba 'dor ba la'o/ /rtsig pa'i pu shu btags pa la ni ltung ba med do/ /mi gtsang ba la bong rdog 'phang bar mi bya'o/ /bshang ba las gyur pa'i ltung byed gsum mo// //ltung byed 'ba' zhig tu gyur pa rnams rdzogs so// //gzhan gyi khyim nas bdag gi don du 'o ma blangs te 'thungs pa la'o/ /mi na bas so/ /des blangs pa'i tshe ni nyes byas so/ /zho dang mar sar pa dang zhun mar dang 'bru mar dang sbrang rtsi dang bu ram gyi dbu ba dang nya sha dang sha dang sha skam rnams kyang ngo / / de dag las gzhan blangs pa las gzhan thob pa la ni na smad pa med do/ /mi gsod pa la yang ngo / /der gtogs pa la de thob pa la yang ngo / /de ni nyes byas med pa nyid do/ /seng ge las gyur pa'o/ /so sor bshags par bya ba rnams rdzogs so// //sham thabs rked pa snang bar bgo bar mi bya'o//chags par gyur cing khyim gzhan du 'gro bar mi bya'o/ /dge slong dag las gyur pa bzhin no/ /bslab pa rnams so/ /dge slong ma'i rnam par 'byed pa rdzogs so// //nyams pa dang ma chags pa gnyis ltung ba la sbyor ba la ni nyes byas so/ /bsnyen par ma rdzogs rdzogs shing rab tu byung bas blangs pa las 'das pa la yang ngo //de'i phyogs las mthun pa la yid kyi'o/ /bslab pa byin pa la ni 'dra ba nyid do/ /bsnyen par ma rdzogs pa dang ldan pa nyid kyang ngo / /de la ni ma yin no/ /dge slob ma la yang ngo / / 'gro ba gzhan gyi rnam pa brten pa ni dge slong gi 'du shes yod pa la yang ngo / /med na ni na smad pa nyid do/ /tshig snga mar sbyor ba byas pa la yang ngo / /phyi ma la yang de dang ldan pa nyid yin no/ /rdzas bkag pa pas bzang po la yang de dang ldan pa nyid yin no/ /'dra ba la yang ngo //mtshan gyur pa ni de'i zhing nyid yin no/ /na smad pa'i don gyi sbyor ba gang yin pa nyid las so/ /byas pa ni de nyid yin no/ /na smad pa ni rang gi nyid do/ /zhag bcur ma lon pa ni cha nyid do/ /zhing ma yin pa nyid la ni nyams so/ /de la nyes pa bcabs pa ma yin pa ma yin no//mgu ba spyad pa ni don med pa nyid yin no/ /'di la cho ga rnams gyur to/ /de'i tshe lus byed pa po nyid yin no/ /gzhan las skyes pa ni rang gi 'gro ba nyid ma yin pa ma yin no/ /'gro ba gzhan gyi rnam pa bsten pa bsad pa la yang ngo / / gnas skabs gzhan thob pa ni gzhan nyid ma yin no/ /nyes pa de med pa nyid la 'ong ba ni tha dad do/ /btang ba yang ngo / /gzhi gcig la du ma nyid bcas pa la ni ji snyed pa de nyid kyis nyes par 'gyur ro/ /de'i cha ni der gtogs so/ /phyung ba thams cad la mtha' nyid ma gtogs pa ni dge 'dun lhag ma'o//bya ba du ma'i 'bras bus ltung ba rnam par mi gzhag go/ /phyed byas pa la byed pa ni phyed nyid do/ /kha na ma tho ba na smad pa dag gi tshe nyid ni na smad pa yin no/ /thams cad la the tshom za bas zhugs pa ni bsam pa dang bcas pa yin no//sbyor ba la ni 'du shes yan lag yin no/ /bsams pa la ni de nyid do/ /mi tshangs par spyod pa dang khu ba 'byin pa gnyis la ni der ma zad do/ /mi bden pa la ni nyan pa po yang ngo / /yan lag thams cad dang du blang du rung ba nyid ni brten pa'i phyir mthu dang ldan pa nyid yin no//'og ma dag la na gzhan la ni smad pa nyid do/ /du ma tshang ba ni de bas kyang ngo / /mi la dud 'gro yang ngo / /rdzu 'phrul gyi chos can nyid ma yin pa ni reg pa ma yin pa'i yan lag yin no/ /reg par bya ba nyid ni ma nyams pa'o//ga ga tshil bye pa la yang ngo / /sen mo dang so dang sha med pa'i rus pa dang spu dag ni gzhan dang ldan pa nyid yin no/ /mi'i 'gro ba ni tha snyad du bya ba nyid yin no/ /rang bzhin nyams pa ni ma yin no/ /ma ning dang mtshan gnyis pa dag ni de dang ldan pa nyid do//reg pa ni tha snyad dang 'dra'o/ /phyi rol pa'i rab tu byung ba dang ma chags pa dang nyams pa dag ni phyed nyid khyim pa'o/ /dge slong dang dge slong ma bsnyen par rdzogs pa can ma nyams pa nyid ni bslab pa dag la yan lag nyid yin no/ /mtshan dang khas blangs pa dag gis ni rang gi phyogs nyid kyi khongs su gtogs so//'dir gtogs pa la khyim pa la ni rtags can nyid kyi bas na smad do/ /rab tu byung ba'i rdzas dag la ni rung ba nyid dang tshad dang ldan pa la sogs pa nyid do/ /rang gi don nyid gtso cher yod pa'o//rnam par rig byed la ni don go ba'o/ /smra ba po nyid la yod pa ste gsod pa dang rang gi don du rku ba dag las gzhan pa'i'o/ /yang dag par len par byed pa la ni der ma zad do/ /de ni snod yin no/ /ngag gi'o/ /rang gi'o/ /bdag nyid dang 'brel ba'o//rang gis bskos pa nyid byed du bcug pa yin no/ /rnam par 'byed par gtogs pa phal che ba'i phyir bstan pa rnams rdzogs so// //spyod yul du zhugs pas rnal 'byor bsgom par mi bya'o/ /mngon par 'du bya ba yang mi bya'o/ /rnam par g.yeng bar yang mi bya'o//rnam par g.yeng bar byed pa dang gtum po dang gya tshom pa dag yongs su spang bar rigs so/ /spong khang brtsig par bya'o/ /gnas khang gnyis kyi bar du srang gdod do/ /lnga'am drug gi'o/ /sgo glegs sgra mi 'byung ba dang drang ba'i thabs kyang ngo //gong du sum cha bor bar skar khung phyi rub la nang yangs pa yang bzang ngo / /dra ba dang sgo glegs dang 'phred gtan dang gnam gzer dang 'khor gtan dang dbyug gu skam kha nye bar bzhag go/ /mi shong na steng du khang mo che bya'o//yang na yang thog go/ /'dzeg pa'i phyir them skas so/ /mi ltung bar bya ba'i phyir kha khyer gyis bskor bar bya'o/ /de mi 'gul bar bya ba'i phyir lcags kyi gzer bu dag gis gdab bo/ /phyi rol du spong khang chen po'am gnas khang gi tshar dag kyang ngo //sgo'i thad kar sgo gdod par mi bya'o/ /sgo khang bya'o/ /phug kyang ngo / /'dug pa'i ched du sa'i stegs bu dag dang khri'u yang ngo / /de ni kho ra khor yug tu khru bzhis 'khor ba bzang ngo / /thags ma ni rnam pa lnga'o/ /mun dza'i dang sha na'i dang gres ma'i dang ras ma'i dang sba phra mo'i'o//der stan nang tshangs can dag gding ngo / /der kho ra khor yug tu mtho gang lhag pa dag bzang ngo / /arka'i dang ka sha'i dang er ka'i dang spra ba'i dang shal ma la'i dag gi bal gyis dgang ngo //bal dang sha na dang ras bal dang ras ma dag dang lo ma'i tshogs dag gis kyang ngo / /don ji lta ba bzhin du 'dug par bya ba'i phyir mdo mdor bya rog rkang dag bya'o/ /gnyid bro na gdos bu dag gdags par bya'o/ /dbyug gus dal bus gzugs par bya'o//snad par mi 'gyur bar bya ba'i phyir bre'i bcad 'phro lta bur ras ma dag gis dkris pas so/ /po long 'phang bar bya'o/ /yang phyir 'ong bar bya ba'i phyir tha gus gdags par bya'o/ /mdun du mar me gzhag par bya'o//rkang pa dbyung ngo / /ya gcig brkyang ngo / /mi 'thom par bya ba'i phyir phreng thag lta bu la bskon pa'i sbu gu 'am de la btags pa'i tha gu la 'jus te bcag par bya'o/ /mchil lham can gyis bcag par mi bya'o//rkang pa gnyis la rdul mi gos par bya ba'i phyir bar tang gding bar bya'o/ /spong ba pas zhag gsum zhing rkang pa gnyis bsku bar bya'o/ /ma nus na der yang nyal bar bya'o/ /sgo gcad par bya'o/ /glos kyang phab ste'o/ /spong ba pa'i phyir zhal ta pa bsko bar bya'o//de'i bya ba ni langs ma thag kho nar chag chag gdab pa dang phyag dar bya ba dang lci ba sar pa'i byug pas bsku bar bya'o/ /stan bsham par bya'o/ /mi gtsang ba'i skyabs gnyis byi dor bya'o/ /chag chag la sogs pas so//bong rdog dang sa dang chu dag bzhag par bya'o/ /bsdu ba'i phyir gaN+DI brdung ngo / /de'i gnas ni khang steng ngo / /dge 'dun bsdu ba'i phyir ni rgyud gsum dang de snyed kyi tog dag go/ /las bya ba'i don du ni rgyud gcig dang tog gsum mo/ / kha cig las ni rgyud gsum dang tog gnyis so zhe'o/ /shi ba la phrag pa dbyung ba'i don du ni byi ba'o/ /kha cig las ni rgyud gcig dang tog gcig go zhe'o/ /spong ba pa'i don du ni khar gsil lo/ /kha cig las ni gaN+DI chung ngu zhe'o//gnod pa byung ba la ni ji tsam gyis chog pa'o/ /zan gyi phyir 'du ba'i don du gaN+DI dang gaN+DI chung ngu gnyis ka brdung ngo / /bar du bcad de'o/ /brgyang bas so/ /'dus pa chen po'i tshe gaN+DI brdungs pas go bar mi 'gyur ba lta na dung sgril te bud par bya'o//rnga bo che dag brdung ngo / /gaN+DI brdungs par mi 'gro bar mi bya'o/ /der mi myur bar mi bya'o/ /bya ba 'grub pa'i dus kyi lhag ma lus pa tsam ni rgyun chags gsum pa gdon cing ci bder bya'o/ /de ran par bya'o/ / yon bshad par bya'o/ /ran par ro/ /spong ba pa'i zhal ta pa sngar 'du zhing mjug tu 'gyes par bya'o/ /gal te rkyen de lta bu byung na lde mig sbas pa bstan par bya'o/ /gso sbyong gi gzhi las zhi gnas kyi gso sbyong gi skabs so// //gso sbyong gi gnas la blo mthun par bya'o//gnas thams cad grub pa'am byas pa'am zin pa la'o/ /phyi rol nye 'khor 'dom gang dang ldan pa'o/ /dge 'dun 'dod na'o/ /las gzhan gyi gnas kyang de yin no/ /mtshams gcad par bya'o//dpag tshad phyed dang gsum gyi mtha' tshun chad du'o/ /phyogs phyogs su pha bong dang rtsig pa dang ka ba dang shing ljon pa dang ra ba dang bya skyibs dang lam po che dang khron pa la sogs pa de shes pa'i dge slong rnams kyis brtags nas dge 'dun gyi mdun du mtshan ma brtan po brjod de las bya'o//der gnas pa byas na chos gos dag dang 'bral bar mi 'gyur ro/ /de bya'o/ /thams cad kyi ched du dkyil 'khor bar blo mthun par bya'o/ /snga ma bag yangs su ma byas par gcad pa gzhan mi 'chags so/ /mtshams dag dgrol bar bya'o//tshig gcig gis mtshams gnyis gcad pa dang dgrol du rung ngo / /mtshams ma bcad pa'i gnas su ni las la rtsig pa mtshams yin no/ /wa kha nas chu 'dzag pa gang du bab pa yang ngo / /grong la ni nye 'khor gyi mtha' tshun chad do/ /dgon pa la ni phyogs phyogs su rgyang grags kyi mtha' tshun chad do//gso sbyong gi gzhi las mthun pa'i gso sbyong gi gnas kyi skabs so// //'dun pa 'bul ba las de dang mthun pa 'grub po/ /mtshams bcad pa la ni mi 'grub bo/ /bslab pa byin pa las de blang du rung ngo //de la dge slong gi 'du shes nye bar gzhag pa la'o/ /dbul du mi rung ngo / /smyos pa'i gnang ba thob pas ni mi mthun pa nyid du mi 'gyur ro/ /yongs su dag pa phul ba dang yang gcig pa nyid do/ /gso sbyong dang dgag dbye la'o/ /de phul bas so//de bzhin du de gnyis la bya'o/ /cho ga de mnod par bya'o/ /tshogs tha dad pas 'dun pa la sogs pas mthun par byas te las byed pa la mi rung ba med do/ /brjod par bya ba rtsom pa dang 'dra ba rnams cig car brjod pa la yang ngo / /gcig gis du ma'i de dag len pa la yang med do//'di la brjod nus pa'i tshig gis gzung ngo / /mi nus na de dag dbul ba gang yang rung bas 'grub bo/ /lus kyis yang ngo / /ji ltar yang mi nus na yang na dge 'dun der 'gro bar bya/ /yang na des khris blang bar bya'o/ /de blangs nas rgyug par mi bya'o//mgyogs par mi bya'o/ /mchong bar mi bya'o/ /phyi rol la mchong bar mi bya'o/ /bang rim la mchong bar mi bya'o/ /nam mkha' la 'dug par mi bya'o/ /phyi rol la mi bya'o/ /skas kyi rim pa gzhan bzhag nas gzhan du gom pa dor bar mi bya'o//them skas kyi them par mi bya'o/ /chu lkog ma nub tsam la 'bog par mi bya'o/ /gnyid log pa dang snyoms par 'jug par mi bya'o/ /de gnyis ni ma klas pa nyid kyis kyang smad par bya ba nyid yin no/ /dge slong la brjod par bya'o/ /kha cig las dge 'dun la zhe'o//btsun pa rnams dgongs su gsol zhes bya bas brtsam mo/ /dge 'dun gyi nang du ma phyin par dus byas sam khyim pa nyid la sogs par khas blangs na ma blangs pa nyid yin no/ /phyin na blangs pa nyid yin no/ /gzhan gyis tshes bco lnga la dge slong bzung na de la dge slong 'di bdag cag gi tshangs pa mtshungs par spyod pa yin gyis thong shig ces brjod par bya'o//ma btang na bdag cag 'di dang lhan cig bya ba cung zhig yod do zhes snga ma dang bcas te'o/ /de lta na yang dkyil 'khor ba bya'o/ /de btang ba'i phyir sngar mi 'bad par bya'o//'phrigs pas mi mthun pa nyid du 'gyur ro/ /tha dad pa nyid du 'dod pas mngon par brtags te las byed na nyes pa sbom po'o/ /rtog pa nyid na the tshom za'am nges par byed pa la ni nyes pa'i byed pa mi 'byung ba ma yin no/ /bsam pa thag pa nas yongs su btsal zhing gob lom ma byas na dag pa'i byed pa yin no//btsal ba dang bod pa dang mthon por 'dug ste phyogs su lta ba dag gis ni de ma yin no/ /gso sbyong gi gzhi las mthun pa'i gso sbyong gi tshogs pa'i skabs so// // gso sbyong bya'o/ /zla ba phyed phyed cing tshes bco lnga la'o/ /so sor thar pa'i mdo 'don pas so/ /dgag dbye byas nas 'di ma grub pa nyid ma yin no/ /gsol ba dang rnam par gzhag pa 'dzin du gzhug pa sngar bya zhing de gdon to/ /gleng gzhi gdon pa dang gsol ba ni tshig tu brjod pa nyid kyis bsgrub par bya ba nyid yin no//lhag ma ni thos pas bsgrags pas kyang ngo / /brtsams pa'i sde tshan ni rdzogs par bya dgos so/ /bzhi pa la reg na ril gyis so/ /'di la zla ba phyed 'das pa'i so so brtag par bya'o//'du bar 'gyur ba der ro/ /shes pa phyir bcos te thams cad du 'dug par bya'o/ /'dug pa na dran nam yid gnyis za na drung na mo la byin gyis brlab par bya'o/ /las byed pas ni sems kyis so/ /gal te tshes bco lnga la bdag gcig pu de dang mi ldan par shes na 'grogs pa shes la drang por 'bad par bya'o//tshe dang ldan pa 'di dang 'di lta bu byed pa gang yin pa des cir 'gyur/ /ltung ba dang bcas par ro/ /'o na tshe dang ldan pas kyang 'di dang 'di lta bu byas sam/ byas so/ /'o na tshe dang ldan pa yang ltung ba dang bcas pa yin no//tshe dang ldan pa kho bo gcig pur ma zad kyi dge 'dun thams cad don de dang ldan pa yin no/ /kye tshe dang ldan pa je khyod rang gi ltung ba chos bzhin du phyir gyis shig /dge 'dun thams cad kyis khyod la cir 'gyur zhes bya ba'i rtsom pas mig lam du lhag ma 'dod pa rnams 'chags su gzhug go//'di la mi 'dod pa de la gleng bar mi bya'o/ /gal te tshes bco lnga la thams cad kyis ltung ba shes sam yid gnyis su gyur na len par byed pa bsgrub pa'i phyir dge slong 'ga' zhig rang gi phyir bcos pa'i don du gnas gzhan du gtang bar bya'o//ma grub na byin gyis brlab pa'i phyir gsol ba bya ba 'dod par bya'o/ /bzhi pas nyung ba nyid la yang gtsug lag khang gi bya ba gnas pa kho na yin no/ /stan thabs nyams par mi bya'o/ /chag chag dang phyag dar dang lci ba sar pas byug pa bya ba dang /seng ge'i khri bsham pa dang mar me gzugs pa dang chos nyan du gzhug pa dag byas la/ phyogs ches mthon por 'dug ste phyogs bzhir rnam par blta bar bya'o/ /dge slong dag 'ong ba snang na kye tshe dang ldan pa myur ba myur bar shog shig deng dge 'dun gyi gso sbyong ngam dgag dbye bco lnga pa yin no zhes brjod par bya'o//gzhir ma tshang na dus kyi bar du bsdad de byin gyis brlab par bya'o/ /'ba' zhig na 'dug ste'o/ /lhag ma gzhan dang bcas pa yin na mdun du'o/ /gsum ni 'khod do//bzhi'i dgag dbye yang de bzhin no/ /de'i tshe gnas na so sor thar pa'i mdo 'don nus pa med par shes na gso sbyong la bsdad par mi bya'o/ /gang na de las 'da' ba der nye bar 'gro bar mi bya'o/ /gnas par khas blangs pa phyi ma'i gong ma bsrung bar mi bya'o//de la yang zla ba gnyis las lhag pa'o/ /gnas dang las dang rnyed pa dang bsnyen bkur ba bstabs pas 'don par byed pa gnyer bar bya'o/ /mdo sde 'dzin pa 'ong ba gdugs dang rgyal mtshan dang ba dan la sogs pa dag gis bsu bar bya'o/ /'dul ba dang ma mo yang ngo //dpag tshad phyed dang gsum du'o/ /ma nus na rgyang grags lngar ro/ /gsum mam dpag tshad phyed dam rgyang grags sam rgyang grags phyed dam khyams su yang rung ngo / /ngag gi bshes pa'i tshig gis bsu nas lhung bzed dang chos gos blang bar bya'o//khrus bya'o/ /dge 'dun la yang snum bag gi rnyed pa'o/ /gnas la sogs pa bstabs pa sbyin no/ /chos mnyan pa yang ngo / /dge slong phrag dog can la 'di dag bstan pa 'dzin pa yin no zhes go bar bya'o/ /gso sbyong dang dgag dbye ma byas pas de'i nyin mo rang gi de yod pa'i gnas nas 'gro bar mi bya ste/gal te de nyid kyi tshe rnam pa de lta bur phyin pa'am 'thab krol can dag dang 'bral ba'am spyod pa bzang po can dag dang phrad pa de lta bur 'gro ba nyid ma yin na'o/ /spyod pa bzang po can gyi dge slong dang bcas pa nas 'thab krol can gyi dge slong dang bcas par 'gro bar mi bya'o//dge slong dang bcas pa nas dge slong med par lhag ma rnams dang lhan cig ma yin pa'am/ gnod pa dang lus dang sems shin tu sbyangs pa'i dbang ma gtogs par 'gro bar mi bya'o//'gro ba'i phyir gnas pa gso sbyong dang dgag dbye ma byas par dor bar mi bya'o/ /rkyen de lta bu nyid yod na spyod pa bzang po dang ldan pa dang 'don pa dang ldan pa'i gnas bstan nas der 'gror gzhug par bya'o/ /bsgo ba de las 'da' bar mi bya'o/ /phyis 'ongs pa rnams kyi don du de gnyis yang byar rung ngo //gal te legs par na de la ci dgar 'jug par bya'o/ /'dun pa mthun pa dag la yang ngo / /gzhan gyis tshogs pa gsol bar bya'o/ /de ma thob na mtshams gzhan du bya'o/ /byed pa'i tshe 'ongs na lhag ma nyams su myong bas 'grub bo//gnas de nas 'ga' yang ma song ba nyid yin na nges pa yin no/ /glo bur du lhags pa dag ches mang ba nyid yin na yang ngo / /dus kyi phyir ni ches mang po rnams kyi rjes su 'jug par bya ba nyid yin no/ /mnyam pa nyid yin na gnyug mar gnas pa rnams kyi'o//'di la yang ngo / /gso sbyong gi gzhi las mthun pa'i gso sbyong gi cho ga'i skabs so// //ting nge 'dzin las blang bar mi bya'o/ /gdams ngag med par bsgom par mi bya'o/ /gdos bu dang pho long gi sbyor ba rigs pa nyid yin no//brtson 'grus lhod par mi bya'o/ /de ni mdo sde las gsungs pa bzhin no/ /lus dang sems dang gos ma 'char bas nyal bar bya'o/ /mi na bas nyin mo nyal bar mi bya'o/ /ro rgyab na bas pus 'khyud bcang bar bya'o/ /dbang po rnams nang du bsdus pa dang yid phyi rol du ma song ba dang gsal ba dang drang pos mi thogs par bcag par bya'o//mi nus na tha gu bres te'o/ /kha ton pa'i 'chag sa ni khru bcu gnyis so/ /spong ba pa'i ni bco brgyad do/ /de tha gus gzhal te bya'o/ /dge slong gis chos bshad par bya'o//'dug ste'o/ /gal te du ma nyid yin na gcig gis so/ /gang yang rung bas so/ /ma gsol bar mi bya'o/ /gal te de'i tshig gis byung ba ma yin na'o/ /gras mi bya'o/ /gra phyed kyis mi bya'o/ /gnyis kyis gcig tu mi bya'o/ /rgan rims kyis so//gal te mang ba nyid yin na stan gnyis sam gsum bzhag ste'o/ /gal te stan de dag mi thob pa yin na'o/ /seng ge'i khri la yang ngo / /mchil ma'i snod gzhag par bya'o/ /der bcal blugs so/ /phye ma'am thal ba'o/ /de dus dus su sbyang bar bya'o//tshes brgyad dang / bcu bzhi dang bco lnga'i nub mo chos mnyan par bya'o/ /nad pas de ma byas pa la ni nyes pa med do/ /de smra ba'i phyir gsol ba 'debs pa mi gnod par mi bya'o/ /mi nus pa la sogs pa yin na gsol ba 'debs pa la shad kyis sbyang bar bya'o//smra ba po med na rim gyis dran par bya zhing tha na tshigs su bcad pa re re tsam yang smra bar bya'o/ /der mar me gzugs so/ /khyams su chos nyan pa'i zla gam gyi rnam pa lta bu'am rdzing bu'i rnam pa lta bur bsham par bya'o/ /bla gab med par chos nyan na bla re gdags so//rlung dang char 'bab na btul lo/ /der chos nyan pa dag dor bar mi bya'o/ /der gnas brtan dang por 'dug ste yud tsam zhig cang mi smra bar bsdad nas chos smra bar bya ba'am gzhan la dge slong chos smros shig ces gsol bar bya'o/ / smra ba na sems gtad de gal te chos yin na spro bar bya'o/ /gal te ma yin na bzlog par bya'o/ /der khyim pa lhags pa rnams la chos la chos dang ldan pa'i gtam bya'o/ /mu stegs can klan ka tshol zhing gnas na legs par tshar bcad cing khro ba mi bstan par bzod par bya'o//ston pas 'khor khrid de 'gro bar mi bya'o/ /de dag 'gro na chos kyi sgor gzud par bya'o/ /rje sa dang bcas pa dang gus pa dang bcas pa dang sems dma' bas 'jug par bya'o/ /gus par byas te bstan par bya'o/ /chos la gus pa dang bcas pa dang bstan pa dang yid mi g.yeng bas rigs pa dang grol ba'i tshig dag gis so//don ji lta ba bzhin du thogs pa med par brjod pa dag gis so/ /ma 'dres par ro/ /'brel par ro/ /byams pa dang snying rje dang zang zing med pa'i sems kyis so//rangs pa dang mos pa dang dga' bar byed pas so/ /don gyi dbang gis ma rdzogs na gzhag par bya'o/ /dbyangs kyi chos smra bar bya'o/ /langs nas rnam par dbye bar bya'o/ /don bsdus te brjed par yang bya'o/ /gal te gzung ba dang gzhung gzugs pa la yang ngo //dge 'dun gyi gnas brtan gyis smyig ma'i thur ma skud pa la brgyus pa spo bas nyi ma bgrang bar bya'o/ /dge bskos kyis de las brtags te dge 'dun la brjod par bya'o/ /bye brag tu byas pa'i'o/ /ngo'i dbye bas so/ /gtsug lag khang gi bdag po dang lha'i phyir tshigs su bcad pa gdon par dge slong rnams la bskul ba'i tshig bya'o//mdo la'o/ /deng ni yar gyi ngo'i tshes gcig lags te/ gtsug lag khang gi bdag po dang gtsug lag khang gi lha rnams kyi slad du tshigs su bcad pa re re bklag tu gsol zhes so//gtsug lag khang gi bdag pos spyan 'dren pa'i tshig kyang brjod par bya'o/ /yon bdag ming 'di zhes bgyi bas sang dge 'dun bshos la spyan 'dren na btsun pa rnams kyis de la dge legs kyi yid dag gis so so nas thugs brtse bar mdzad du gsol zhes so//nyin zhag gcig gis mi chog par bya'o/ /dus tshigs rnams kyi zla ba phyed lus pa nyid la'o/ /zla ba shol dor ba ni rgyal po'i rjes su 'brang bas so/ /rgyu skar ni skar mkhan gyi rjes su 'brang bas shes par bya'o/ /'di la dgos pa ni tha snyad la mkhas par bya'o//ma brtags shing gso sbyong la ma bsdad par 'di stong pa zhig go snyam zhing mtshams gcad par mi bya'o/ /bcad pa nyid du shes pa nyid ni mi 'chags pa'i yan lag ma yin no/ /de med pa nyid kyis kyang bag yangs su 'gyur ro/ /rung ba'i khang pa yang ngo / / mtshams su mtshams kyi bskor du mi rung ngo / /dkyil 'khor ba dang dge slong ma'i dbyar khang dang khron pa dag la ni rung ngo / /shing ljon pa gcig la mtshams bzhi man chad kyi mu thug du ma rnam par gnas so/ /'di la tha snyad du rung ba mtshan ma yin no/ /rdzu 'phrul dang sgyu ma byas pa dag kyang de ltar gyur pa nyid ma yin no//zla ba dang nyi ma dang skar ma'i 'od dang dba' klong gi rlabs dag kyang mi brtan pa nyid yin no/ /mtshams su chu ni mtshams gzhan dang 'dra'o/ /bar du chod na gcig pa nyid ma yin no/ /gal te zam pa brtan po nyid yin na yul nyid yin no//de zhig pa yang phyir byas na ni rjes su 'jug go/ /sbyor ba ma btang ba nyid do/ /zhag bdun phan chad ni mi 'jug go/ /nam mkha' ni bar du chod par gyur pa yin pas de la yod pa nyid kyi tha snyad kyang med na 'brel pa lta ga la yod/ dbus nas dpag tshad phyed dang gsum gyi mtha' las lhag par mtshams bcad pa dag mi 'chags so//'og dang steng du sra ba dang 'brel ba la de tshun chad pa bzhi dang 'dra ba nyid do/ /sa gzhi mtshams ma bcad pa nyid du ni mi 'bral ba'i gnang ba mi chags so/ /bcad pa zhig na zhig go//des ni de mi zhig go/ /mchod rten dang gtsang khang dang / gtsang khang byur bu dang 'khor sa dang gso sbyong gi gnas dag tu phyag dar bya ba nyid do/ /dge 'dun la 'dun pa la sogs pa phul ba nyid ni phul ba nyid yin no/ /de las gang yang rung bas de brjod par bya ba nyid yin no//mtshams kyi phyi rol na gnas pas de dbul ba yang dbul du 'jug par mi bya'o/ /brgyud pas mi bya'o/ /na ba dang dbang med pa dang srog dang tshangs par spyod pa'i bar chad kyis 'jigs pa las gzhan pas 'bul ba la ni nyes byas so//ma brjod pa ni ma gus pa las so/ /des 'jigs pa las mtshams kyi phyi rol nas khyer te 'ongs pa la ni nyes pa med do/ /dge skos kyis gso sbyong gi tshe tshul shing brim pas dge slong rnams bgrang bar bya'o/ /legs par thon pas gdon te tshig phyed kyang ma 'khrul ba nyid na'o//dge 'dun gyi gnas brtan gyis so/ /mi nus pa nyid yin na gnyis pa'i'o/ /des kyang na gsum pa'i'o/ /des kyang na res kyis so/ /mi nus na gzhan la bcol bar bya'o/ /ma btub na dge 'dun gyis so//rtag tu yang ngo / /rtugs na lhag ma gzhan gyis so/ /dum bu 'dzin pa nyid yin na ji snyed kyis 'grub pa dag gis so/ /'jigs pa dang bcas pa nyid yin na gnas mdzes pa 'dod pas grong dang mi nye bar gso sbyong byar mi rung ngo / /'gron mi sdod na 'gro bzhin du bya'o//sgra mi 'dod na mdor bsdus pas so/ /de tsam na yang byin gyis brlab bo/ /dad pa can dang gtso bo dag dga' bar 'gyur ba lta na cho ga rjes su bsgrag pa la kha na ma tho ba med do/ /drung du gso sbyong byed pa la yang ngo / /phongs pa'i tshe khyim pa'i drung du bshags par bya'o//de la cho ga rjes su bsgrag pa la yang ngo / /rgyal po la go bar bya ba la yang ngo / /gzhan ma rdzogs pa la mi 'chags pa med do/ /gdon par bya ba dang de'i tshad dang dus dang 'don par byed pa rnams de kho na bzhin nye bar ma bzung ba ni 'dir chos ma yin no//thos pa'i nye 'khor las 'das pa nyid ni song ba nyid yin no/ /gso sbyong gi gzhi dang 'brel pa rnam par 'byed pa la sogs pa'i skabs so/ /gso sbyong gi gzhi rdzogs so// //dbyar gnas par khas blang bar bya'o//zla ba gsum du bya'o/ /tshes bcu drug la'o/ /dbyar zla 'bring po'i nya'i phyi de nyin par gyi'o/ /dbyar tha chungs nya'i'o/ /zhag bcu 'am zla ba phyed kyis 'byung bar 'gyur ba nyid na gtsug lag khang byi dor bya'o/ /kha cig las ni bdun nam brgyad na zhe'o/ / nyi ma snga ma la ni gnas mal bsdog go/ /khri'u dang chol zangs yan chad do/ /de stobs pa bsko bar bya'o/ /mi nus na du ma'o/ /des dri dag gis bskus pa'i tshul shing gzeb kyi sprog mar ras dkar po bting bas dkris pa dag rgan rims su bzhag nas tshe dang ldan pa dag gnas 'di na khrims su bya ba 'di dang 'di yod de/khyed cag las gang khrims su bya ba 'di dang 'dis gnas par spro ba des ni tshul shing long shig/khyed cag las sus kyang dbyar dge 'dun nang du 'khrug long bskyed par mi bya'o/ /khyed cag las gang gis 'ga' zhig la cung zad shes pa des ni smros shig /khyed cag las gang dbyar gyi nang du dge 'dun la 'khrug long skyed par 'gyur ba de la dge 'dun gyis phyis nye bar brtag par dgos so zhes dge slong rnams la go bar bya ba'o/ /gzhan gyis blang ba dang khas blang ba'i phyir dge 'dun la gsol ba bya'o//tshul shing brim mo/ /dang por ston pa'i blang ngo / /gzhan dag gis ni stan las phyed 'phags pas so/ /dge tshul rnams kyi ni slob dpon dang mkhan po dag gis so/ /mjug tu gnyug mar gnas pa rnams kyi de yang ngo //dal bus de gzhag par bya'o/ /bgrangs nas gnas 'dir dge slong 'di snyed kyis tshul shing blangs so zhes go bar bya'o/ /gnas kyi gzhi bstabs par bya'o/ /de dag gi sgo lcags dang lde mig blangs pas mdun du 'dug ste gnas brtan gtsug lag khang che ge mo ni rnyed pa dang bcas pa gos kyi rin dang bcas pa lags kyis bzhes shig ces yon tan ji lta ba bzhin du mos pa bskyed cing len du gzhug go//blang ba la sogs pa ni lhung bzed dang 'dra'o/ /mchod rten dang dge 'dun gyi don ma yin par song bar shes pa la ni 'theb nyid las bsko bar bya'o//shing ljon pa'i drung dang ne'u gsing gi gzhi dag la yang rgan rims bzhin du bsko bar bya'o/ /gnas khang gis mi chog na gnyis la sogs pa dag la tha na de'i sa gzhi gding ba'i tshad tsam yang ngo / /lhung bzed dang bya ma bum dang 'dag rdzas dang so shing dang sman gyi gnas la ltos par bya'o//sgo khang dang them skas kyi lkog dang khyams dang spong sa dang bkang sa dang bsro khang gi ra ba dag ni bsko bar mi bya'o/ /mtshan mo gnas mal mi bsko'o/ /nad pa 'dug pa'i gnas khang gzhan la mi sbyin no//de nyid thob pa med na mi sbyin par mi bya'o/ /de dang de'i g.yog las byed du mi gzhug go/ /mdze can gyis dge 'dun gyi gnas mal spyad par mi bya'o/ /de la gnas dben pa sbyin no/ /dge 'dun gyis bsten par bya ba dang bcas pa tha na khyams dang khyams su gru bzhi dang sgo khang gi gzhi dang bang rim dang 'chag sa dang shing drung gi gnas der yang 'dug par mi bya'o//bshang ba dang gci ba'i skyabs der gnyis su 'jug par mi bya'o/ /de la g.yog bsko bas snying brtse bar bya'o/ /dus thams cad du dgon pa dag la lhung bzed dang chos gos bzhag pa'i phyir gnas khang bsko bar bya'o//dbyar gnas par khas blangs pa na kha cig glo bur du 'ong srid pas gnas dang gnas mal gzhag par bya'o/ /mang po dag lhags na gnas pa dag gis gzod bsko bar bya'o/ / gnas par khas blang ba phyi ma phyin chad mi bya'o/ /mang ba nyid na gcig la yang gnyis la sogs pa khyab pa'i bar dag go/ /zhag gcig gi don du gnas mal mnod par mi bya'o/ /rnyed pa 'ded pas gtsug lag khang mi mnod do/ /thams cad yongs su spyad par bya'o//la lar klog pa dang kha ton dang 'dug pa dang bcag pa dag las gang yang rung ba bya/ la lar lhung bzed dang chos gos gzhag par bya/ la lar mtshan mo nyal bar bya/ la lar snga dro dang gung tshigs dang phyi dro 'dug pas de la sbyar bar bya'o/ /gnas par khas blangs pas gnas kyi gzhi ral ba dang 'grums pa bcos par bya'o//dge slong ma dbyar gnas pa rnams kyis dbyar khang bcos par bya'o/ /'thab krol can gyis gnas mi thob par bya ba'i phyir dgun mnod pa dang dpyid mnod pa'i gnas mal yang bstabs par bya'o/ / ril gyis bsko bar bya'o/ /'di lta ste gtsug lag khang dang khang khyim dag gi nye 'khor yang ngo / /khyams kyi de yang ngo / /de dag dong pa nyid kyi 'og tu de dag mi gtang bar mi bya'o/ /rang bzhin du gnas pa'i phyir sgyu thabs mi bya'o/ /'byung ba'i don du mi bsko'o/ / 'di ni 'di'i dus tshigs dang nyin mtshan dang de'i yan lag che ge mo zhig 'byung ba'i'o/ /'di ni mkhan po dang slob dpon che ge mo zhig 'byung ba'i'o/ /'di ni lhan cig gnas pa dang nye gnas che ge mo zhig 'byung ba'i'o/ /'di ni gtam 'dres pa dang phebs par smra ba dang 'grogs bshes dang smon 'grin la sogs che ge zhig 'byung ba'i'o zhes gtsug lag khang dag bsko bar mi bya'o//mnod par mi bya'o/ /tshang gzhig pa'i phyir dbyug gu thogs pa bsko bar bya'o/ /sgo nga med pa rnams ni gdon par bya'o/ /phra mo rnams kyis ni mi 'phel bar bya ba'i phyir skud pas dkri'o/ /gnas mal la sogs pa sbyin no//yod pa nyid du du ma yang ngo / /khri chen po dag kyang bsko bar bya ba nyid yin no/ /stan dag kyang ngo / /dge 'dun gyi gnas mal g.yogs pa dge tshul mi gtsang bas nyams par byed pa'i chos can la sus kyang mi sbyin no/ /dge slong ma la yang mi sbyin no//'dir gnas 'byor na de la 'dab tu gtsug lag khang sbyin no/ /gnas mal lhag ma bzang po ma yin pa yang ngo / /khyed cag las gang gis kyang dge 'dun gyi gnas mal la gding ba med par longs spyad par mi bya'o/ /gding ba rung ba ma yin pas longs spyad par mi bya'o//zhes go bar mi bya'o/ /zla ba phyed phyed cing so sor brtag par bya'o/ /dam tshig las 'das shing spyad na gnas pa'i ni gnas la gzhan gyi ni dge 'dun la brjod de dbrog par bya'o/ /dge 'dun sang sbyin bdag che ge mo dang zhal ta pa che ge mo dang spyod yul gyi grong khyer che ge mo dang nad g.yog che ge mos gnas par zhal gyis bzhes par 'gyur ro zhes brjod par bya'o//'gyod pa dang gzhan sdug bsngal ba dang yid mi bde ba mi bskyed pa nyid dang / sel ba nyid dag dang bde ba dang yid bde ba bskyed pa nyid dag dang /rjes su bsrung ba nyid dag dang nad g.yog nyid tshangs pa mtshungs par spyod pa dag las 'byung ba so sor brtags pas gnas dang spyod yul dang bsod snyoms dang sman sbyin par byed pa la rnam par bltas te gnas par khas blang bar bya'o/ / g.yogs par dge slong gi mdun du'o/ /gtsug lag khang du mar mi bya'o/ /gang na dge slong med pa nyid dang sgo glegs med pa nyid dang bcas par yang mi bya'o/ /sbyin bdag dang zhal ta pa dang / spyod yul gyi grong dang nad g.yog dag yod pa nyid yin na brjod par bya'o//byin gyis ma brlabs par mtshams kyi phyi rol du skya rengs 'char bar mi bya'o/ /chos dang ldan pa'i don du zhag bdun byin gyis brlab par bya'o/ /'di lta ste/ dge slong gi kun dga' ra ba 'bul ba dang / gtsug lag khang zhal bsro ba dang /gnas mal dbul ba dang / bslab pa brtan po bca' ba dang / mchod rten zhal bsro ba dang / mchod sdong gzugs pa dang / rgyal mtshan bsgreng ba dang / mchod pa bya ba dang / tshon dang tsan+dan dang gur gum gyi byug pa skud pa dang / klag pa dang 'gyod pa bsal ba dang /lta ba'i rnam pa spang ba dang / phyogs dang mthun pa sgrub pa dang / bzod pa gsol ba dang / spo ba la sogs pa bzhi bya ba dang / dbyung ba dang / nad pa dbugs dbyung ba dag la'o/ /dge slong ma'i lci ba'i chos kyis mgu bar bya ba dbul ba la yang ngo //dge slob ma'i tshangs par spyod pa la nye bar gnas pa'i sdom pa dang bsnyen par rdzogs par bya ba la yang ngo / /dge tshul gyis de la'o/ /dge tshul ma'i bslab pa'i sdom pa byin pa la'o/ /khyim pa dang khyim pa mo'i mgo dkri ba dang bar gsang ba dang /skra bskyed pa dang / skra breg pa dang / gdub kor bskyed pa dag la'o/ /bsnyen par ma rdzogs pa rnams kyi dge 'dun lhag ma'i skabs ma gtogs pa snga ma dag la yang ngo / /khyim pa dang khyim pa mo'i bzod pa gsol ba ni kha srang ba'o/ /zas dang sman dang g.yog dag med la de dag med par 'tsho mi nus na de las 'da' bar bya'o//dge sbyong gi tshul dang srog dang tshangs par spyod pa'i bar chad yod na yang ngo / /dge 'dun dbye ba'i phyir rtul ba rjes su mi mthun pa'i sems bskyed pa dang sdig pa can gyi tshig brjod pa dag byung na'o/ / de zhi bar bya ba'i phyir mthu yod pa lta na mi 'gro bar mi bya'o/ /song na mi 'da' bar mi bya'o/ /dam bcas na dbyar gnas pa dang gnas su mi 'brel bar mi bya'o/ /gso sbyong gcig pa nyid kyi gnas gnyis su ni de 'byung ba med do/ /rnyed pa gcig pa nyid la ni yod do//gzhir gtogs pa'i dbyar gyi gzhi'o/ /sde pa lnga char gyis kyang gnas par khas blang bar bya ba nyid yin no/ /dge tshul dag 'ga' zhig gis ma yin no/ /lo ma tshang ba dag gis kyang ngo / /de dag la khas blang ba mi 'chags pa nyid ni ma yin no/ / gnas mal mi gnod par bya ba nyid ma yin no/ /stobs pa med kyang ma yin no/ /ma bskos par bstabs par mi bya'o/ /'gyod pa la sogs pas sde snod 'dzin pa dang 'thab krol byed pa yod pa dang med pa dag ma bsdus pa nyid ma yin no/ /gnas par khas ma blangs pas gnas mi gtong na gnas pa nyid yin no//nam mkha' la gnas par khas blang ba mi 'chags so/ /gru la nang du 'byam pa nyid du shes na mi 'chags te sa la phyin pa dang sa la gnas pa brtan po dang 'brel ba ni ma gtogs so/ /de'i lta ba la mngon par zhen nas chos ma yin pa'i phyogs su song na skya rengs shar na 'jig go//the tshom za ba nyid la ni mi 'jig go/ /mtha'i zhag drug la byin gyis brlab pa mi 'chags so/ /bya ba med par shes nas phyir mi ldog pa gnas pa dag la ni 'jig go/ / 'di la mthar thug pa'i mtha' ni zhag bdun nyid do/ /gnang ba ma thob pa'i mtha' de yin no/ /gzhan gyi zhag bzhi bcu'o/ /de sbyin no/ /de las lhag par phyi rol du gnas par mi bya ba nyid do/ /de ni sde pa lnga po dag gis yang ma yin no/ /de ni mtshams kyi nang du 'chags so//dge slong gi dge 'dun du'o/ /mu stegs can gyi lta ba dang dbral ba'i phyir dang nye du'i bya ba dang bdag nyid kyi lung dang rtogs pa la ni ma nur za ba bsal ba'i phyir 'gro ba de la bya ba ma bsdus pa nyid du dogs par mi bya'o/ /gnas par khas blangs pa nyid la gnas pa spang bar mi bya ba nyid do//gnas pa ni dpe yin no/ /gleng gzhi la sogs par gtogs pa'i dbyar gyi gzhi'o/ /dbyar gyi gzhi rdzogs so// //mi smra ba'i yi dam bca' bar mi bya'o/ /'dis dag pa dang grol ba 'thob bo snyam na nyes pa sbom po'o//dbyar gnas pas dge 'dun la mthong ba dang thos pa dang dogs pa dag gis dgag dbye bya'o/ /dbyar rnams kyi tha ma'i nyi ma la'o/ /spyod yul du brjod par bya'o/ /gang tshun chad nas byi dor byed pa nas so/ /da phyin chad zhag 'di tsam na dge 'dun dgag dbye mdzad par 'gyur ba khyed cag la brjod pa yin no zhes so//gtsug lag khang brgyan par bya'o/ /khang pa brtsegs pa dag brtsig go/ /gtsang khang phyur bu dag kyang ri mo bri'o/ /mchod rten dag gso ba dang phyi byad bya'o/ / seng ge'i khri brgyan par bya'o/ /do mod mtshan thag thog chos mnyan pa 'byung bar 'gyur gyis der tshe dang ldan pa dag gis tshogs pa sbyin par bya'o zhes spyod yul du brjod nas mdo sde dang 'dul ba dang ma mo 'dzin pa gsol ba btab pa dag gis tshes bcu bzhi'i thag thog tu gang du chos mnyan pa sbyin par bya'o//gzhan la ni de dag gis las kyi mdun rol tshun chad du chos dang ldan pa'i gtam rnam par gtan la dbab pas mtshan 'da' bar bya'o/ /dgag dbye'i las ni skya rengs 'char ba'i mdun du'o/ /dge slong dgag dbye byed pa bsko bar bya'o//mi nus na du ma'o/ /dgag dbye bya ba'i phyir gzhan gyis dge 'dun la gsol ba bya'o/ /'di la gral gyi cha las byar rung ngo / /des rtswa dar b+ha brim par bya'o/ /dgag dbye byas zin gyi bar du dge slong re re'i mdun du 'dug par bya'o/ /de la dgag dbye go bar bya ba ni lan ni lan gsum mo//de tsam gyis nad pa ngal ba dang gnas mal phan tshun du 'gyur ba dang dus las yol ba dang gnod pa 'byung na lan gnyis so/ /de tsam gyis na yang lan gcig go/ /des gral rdzogs na gzhan la'o/ /med na gzhan la'o/ / dge 'dun thams cad kyis dgag dbye byas pa de nyid dge 'dun la go bar bya'o/ /thams cad kyis legs par dgag dbye mdzad do/ /shin tu dgag dbye mdzad do zhes bsgrub par bya'o/ /rang gi rdzas gang yang rung ba tha na khab tsam gyis kyang dge 'dun la rdzas kyi dgag dbye brtsam par bya ste/de blangs nas tshig gis so/ /btsun pa rdzas 'di lta bus kyang dbyar gnas pa'i dge slong gi dge 'dun la dgag dbye bgyir rung ngo zhes so/ /de'i 'og tu dge tshul rnams la dgag dbye bya'o/ /de'i 'og tu dge slong ma rnams la'o/ / byin gyis brlabs te song bas der sngar dgag dbye byed pa na de dag dang lhan cig byas pa na dgag dbye byas pa nyid yin no/ /bud med la ni ma yin no/ /gyur pa la yang ngo / /gnas par mi nus pa nyid yin na spyod yul du gyur pa'i dge slong la tshogs kyi dgag dbye go bar bya'o//dbyar gyi nang du bya bas 'gro dgos na dgag dbye bya'o/ /gzhi'am gang zag gam gnyis ka bzhag nas kyang ngo / /de dag mnod par bya'o/ /gzhag par bya ba mtha' dag ma gtogs pa nyid khas blang bar bya'o/ /tshe dang ldan pa kho bo cag ni tshe dang ldan pas ci nas kyang gzhi 'jog par mi byed pa de'i don du 'dus shing 'dug pa ma yin gyi/ji ltar bcom ldan 'das kyis tshul khrims rnam par dag par bya ba'i phyir ni gso sbyong gsungs la/ chos rnam par dag par bya ba'i phyir ni dgag dbye gsungs pas/gal te 'dod na dgag dbye gyis shig ces so/ /gang zag 'jog par byed cing gzhi 'jog par mi byed pa dang / gzhi yang 'jog par byed cing gang zag kyang 'jog par byed pa'i'o/ /khas blangs pa nyid na bzhag pa'am bzhag pa bsnyon pas ni khas blangs pa nyams par mi 'gyur ro//de la snga ma'am 'di'i rnam pa de lta bu cung zad kyang med do/ /zhes zer na brdzun nyid do/ /gal te gnas par khas blangs pa dag gis dge slong 'thab krol byed pa dag 'ong bar thos par gyur na gal te gso sbyong gnyis sam gsum thal bar gyur na dgag dbye bya'o//ma grub na dkyil 'khor pa lnga'am drug tu blo mthun par bya'o/ /ngag gi bshes pa'i tshig gis bsu nas lhung bzed chos gos blang ba dang / gnas khang dang khyams dang khang pa brtsegs pa bsko ba dang / khrus dang snum bag gi rnyed pa bstabs pa dang / chos nyan pa sbyin pa dang de lta bu'i mgu bar 'gyur ba dag bya'o/ /bdag nyid kyi dngos por ma grub na dkyil 'khor ba dag tu gso sbyong bya'o/ /'o na deng khyed kyi dgag dbye ma yin nam zhes zer ba dag la tshe dang ldan pa dag sdod cig /khyod cag glo bur du lhags pa yin gyi/ don 'di gnyug mar gnas pa dag gis yin no zhes lan gdab par bya'o/ /dong ba dag na dgag dbye bya'o/ /dgag dbye'i gzhi'o// //nang dang bcas pas bzod pa ma byas par dgag dbye mi bya'o/ /zhag bcu'am zla ba phyed kyis de 'byung bar 'gyur ba nyid na de'i dus yin no//kha cig las ni bdun nam brgyad na zhe'o/ /'dus par ni ma yin no/ /des bzod pa ma byas par mi bya'o/ /de'i tshe 'dus pa thams cad kyis phan tshun kun dga' bar ma byas par mi bya'o/ /gshe ba la bzod pa mi gsol bar mi bya'o//dge slong mas dge slong la gnas kyi phyi rol du bzod pa gsol bar mi bya'o/ /rkang pa gnyis la phyag byas te mi bya'o/ /bzod na phyag byas te 'gro bar bya'o/ /bzod pa gsol bar byed pa de la dge slong gis ma gus par byas te 'gro bar mi bya'o//'da' bar mi bya'o/ /bzod par bya ba la sngar shes pa shad kyis sbyong du gzhug par bya'o/ /mi 'dod na thabs btsal ba la mi 'bad par mi bya'o/ /mi brgyang ngo / /kun nas dkris pa dang ma bral gyi bar du mi bsdad par mi bya'o/ /bzod pa gsol bar byed pa la mi bzod par mi bya'o//dgag dbye'i gzhi dang 'brel pa phran tshegs la sogs pa'i skabs so/ /dgag dbye'i gzhi rdzogs so// //chos gos sra brkyang gding bar bya'o/ /gsum po dag ji lta ba bzhin du chos gos sra brkyang bting na yang yang za ba dang /'dus shing za ba dang / ma smras par grong du 'gro ba dang / gos slong ba la yang nyes pa med la/ de lhag ma dag dang rnyed pa thun mong du 'gyur ro/ /dbyar gnas par khas ma blangs pa dang dbyar ral ba dang dbyar phyi mar gnas par khas blangs pa dang dbyar gnas gzhan du gnas par khas blangs pa dag la de mi 'byung ngo //sa gzhan na gnas pa dag la yang ngo / /de dag nyid 'thob pa yin na mi 'byung ngo / /tha ma ma gtogs pa dag dang sa gzhan na gnas pa dag dang / dge tshul ni rnyed pa dbang ngo / /gnas nas phyung ba ni mi dbang ngo //bye ba dag na chos ma yin pa'i phyogs dang mthun pa dag tu song ba ni de nyid kyis 'thob pa dang 'dra'o/ /dngos gzhi'i dus kyi dgag dbye'i mthar dbyar gyi rgyu las byung ba'i gding ba'i nyi ma'i mthar grub pa gos kyi rnyed par bgrang ba'i chos gos gsum mo//dge 'dun gyi'o/ /bshad brdab ma byas pa dang / ya yor ma gyur pa dang / ma mugs pa dang / ma zegs pa'o/ /kha bsgyur ba'o/ /yongs su ma spyad pa'o/ /sra ba'o/ /'thud ma can dang / lhan rings can dang / lhan pa can dang / cha ga can dang /gzungs can ma yin pa'o/ /spangs pa dang / sgyu ma brtags pa dang / bral phrad ma yin pa'o/ /dras shing drubs pa'o/ /zin pa'o/ /lnga pa'o/ /lhag pa yang ngo / /sngar ma bting ba'o/ /bting ba'o/ /du ma yang ngo / /de ji snyed pa'i gding bar byed pa'o//de ni chos gos gzhan gyis byin gyis brlab pa yin pas de'i phyir byin gyis brlabs pa dag phyung nas so/ /zhag ma lon par tshogs pas mos par bya'o/ /mtshams kyi nang du blo mthun par bya'o/ /gding ba yang ngo / /gang la de 'byung ba'o//de la gtad par bya'o/ /gsol ba byas te'o/ /bkru ba dang drub pa dang / kha ma bsgyur ba dag la de sngon du 'gro bar bya'o/ /gnyis sam gsum rjes su sgrub pas so/ /zin pa zhig grub na rang gis khab srubs gnyis sam gsum drub par bya'o/ / mnos pa dang rang byed pa dang / de'i mjug dag tu go rims bzhin du gdings par 'gyur ro/ /gding ngo / /bting ngo / /snyam du sems bskyed par bya'o/ /dang po nyams na mi 'byung ba ma yin no/ /tshe dang ldan pa dag bdag chos gos sra brkyang 'dings par 'gyur gyi khyed cag gis chos gos rnams dbyung bar bya'o zhes tshogs pa la brjod par bya'o//'du ba'i skabs rjes su bsgrub par bya'o/ /dri dang me tog gis mchod cing bdug spos dri zhim pos bdugs pa du ma gzeb kyi prog mar lhan cig bzhag pa thogs te rgan rims su 'dug pas gding ba bsgrub par bya'o//tshes bcu drug la'o/ /ston zla 'bring po'i'o/ /lan gsum bzlas pas so/ /gding ngo zhes so/ /dge slong re re'i mdun du 'dug ste bting ngo shin tu bting ngo zhes go bar bya'o/ /gzhan gyis ni legs par bting ngo //'di la rnyed pa dang phan yon gang yod pa de bdag gi yin no zhes so/ /'di la rjes su yi rang ba nyams su myong ba dang 'dra'o/ /mngon sum du myur bas so/ /dus dus su bsang bar bya bsrad par bya sprug par bya'o/ /khyim du ba can dang rdul can du gzhag par mi bya'o//rgyal po'i pho brang du gzhag par mi bya'o/ /de dang 'bral bar mi bya'o/ /khyer te gzhan du 'gro bar mi bya'o/ /mi gtsang ba'i skyabs su 'jug par mi bya'o/ /bla gab med par 'dug par mi bya'o/ /dbyung ba'i rnam pa gnyis te/ rang 'jug pa dang bral ba dang bcos ma'o//rang 'jug pa dang bral ba ni chos gos sra brkyang gi mtshams gzhan du phyin pa dang / byin gyis rlob par byed pa med par mtshams kyi nang du skya rengs shar ba dang de'i dkyil 'khor gyi khongs su gtogs pa chad pa'o/ /de la de'o/ /mtshams las 'das pa na de 'grub bo//phyir mi 'ong ba'i sems kyis so/ /mtshams kyi phyi rol du de skyes na yang ngo / /chos gos bya ba'i bsam pa rjes su 'brel ba med na de'i tshe nyid na'o/ /yod na byed par 'gyur ba nyid chad na'o/ /phyir 'ongs na yang ngo / /byed par 'gyur ba'i mthar thug pa dang brtsams pa zhig pa dang /bsam pa'i rgyun chad pa gsum la de gnas so/ /yid gnyis ni nges par 'byin par byed pa dang 'dra'o/ /las las gzhan pa'i bya ba rjes su bsgrub par mi bya'o/ /de'i dus na dpyid zla ra ba'i nya'o/ /mdo la'o/ / bcom pa'i don nyid du sngar yang ngo / /der nyams su ma myong ba dang ldan pa la ni ma thos kyi bar du phan yon rjes su 'jug go/ /rjes su 'brel pa med na'o/ /yod na ma chad kyi bar du'o/ /ma phyung na thams cad kyis de'i dus kyi rnyed pa bgo bar mi bya'o/ /gzhir gtogs pa'i chos gos sra brkyang gi gzhi'o// //dgag dbye ji lta ba bzhin du gding ngo / /gso sbyong gi mtha' ma yin pa la mi bya'o/ /dbyung ba yang ngo / /'di ni nyi ma de nyid kyi'o/ /yang gso sbyong byas na phyung ba nyid yin no/ /bting nas bye ba dag la ni de tha dad par 'grub po//chos smra ba dag yod pas de bting ngo / /der gzhan dag gis byas kyang gnas kyi rnyed pa ni de dag las 'os pa nyid yin no/ /rang bzhin du gnas pa'i gnas su de spangs pa rnams la mi 'byung ngo / /bsam pa gnas pa ni bting ba yin no/ / lhan cig tu bya ba la 'dun pa phul ba'i dbang gis lhag ma rnams kyis byas na byas pa nyid yin no/ /de dang bral ba ni phyung ba yin no/ /de'i phyir 'dun pa ma phul ba la ni 'dug tu zin kyang gnyid log gam snyoms par zhugs na ma thos kyi bar du bting ba dang phyung ba mi 'byung ngo //mtshams phyung ba nyid yin na der gnas gzhan du gnas pa rnams kyang bting ba'i phyir gnas pa nyid yin no/ /de ni bting ba'i tshe de na gnas de nyid yin no/ /bting nas mtshams tha dad par byas na gang yang rung ba de las de'i gnas yin no/ /tha dad pa nyid yin na gnas so sor de dbyung ngo //bye ba nyid ni phyogs so so'o/ /ma bting bas phyung ba ni ma phyung ba ma yin no/ /de mi 'byung ba nyid kyis kha bskang du mi rung ba nyid ma yin no/ /ma bting ba nyid kyis dbyung bar mi rung ba nyid ma yin no/ /chos gos sra brkyang bting ba snam sbyar med par grong du 'jug pa la sogs pa dang sum mdo tshun chad du 'jug pa la yang nyes pa med do//chos gos sra brkyang gi gzhi zhu ba la sogs pa'i skabs so/ /chos gos sra brkyang gi gzhi rdzogs so// // 'dul ba'i mdo bam po bdun pa/ mtshon gyis ma dras pa'i gos spyad par mi bya'o/ /dras shing drubs pa chos gos nyid du byin gyis brlab par bya'o/ /snam phran snrel zhi nyid dang lhag ma mnyam pa nyid dang dbus nas gzhan du glegs bu'i 'phro phyogs phyogs su lta ba nyid dang mtha' bskor ba nyid dag gis so//mthang gos dang bla gos dang snam sbyar la'o/ /dge slong mas ni shing nga dpung chad rngul gzan rnam pa gang yang rung ba'o/ /brnyan po yang yod cing bdog na'o/ /de dag bzhag ste skya rengs 'char bar 'da' bar mi bya'o//gzhan med na kha ma bsgyur ba la yang byin gyis brlabs pa 'chags so/ /ma dras pa la yang ngo / /de la gal te 'byor na lhan thabs su glan no/ /khyim du rung ba'i rnam pa la yang ngo / /phying pa dang la ba dang be'u phrugs dang klam dang sems pa ni mi dra bar lhan thabs su glan zhing drub bo//gnas mal mi gtsang ba gos par de'i mod la sbyang bar bya'o/ /dge 'dun gyi rtswa'i khri dang khri'u ma gtogs pa stan yan chad la de ma yin pa'i gding ba med pa dang gding g.yogs la yang bar chad ma bcug par nye bar spyad par mi bya'o//thams cad kyi khra bo phal cher ma nyams pa la yang ngo / /ngan ngon tsam dang dri ma can gyis mi bya'o/ /gding ba bcang bar bya'o/ /de ni stug na gcig kyang rung ngo / /sengs pa ni nyis rim mo/ /khra khra bo mi rung ngo / /de la glegs bu'i 'phro bya'o/ / 'og rol gyi sum cha'i dang por ro/ /glegs bu gcig pa byin gyis brlab par mi bya'o/ /g.yan pa dgab pa de dang ldan pas bcang bar bya'o/ /de zhag lnga'am drug cing sbyang bar bya'o/ /srin bal gyi dang bal gyi dang sha na'i dang zar ma'i rung ngo / /rnams su ma byas pa dang gso ma ni mi rung ngo //skra las byas pa dang gcer bu pa dang bya 'ug pa yang dag par len pa yang ngo / /de la sbom po yang ngo / /gzhan bstan pa ni de'i'o/ /skra 'bal ba dang lo ma gyon pa dang g.yang gzhi'i smad g.yogs dang stod g.yogs dang bcas pas 'tsho ba dang /gso ras dang yan lag gi sbubs dang gos thams cad sngo ba dang / gdengs ka lta bu dang kha tshar ring po dang ral ka dang gtsug tor dang mgo dkris pa dang ra phyar dang rnga bal gyi snam bu dang mu stegs can gyi rgyal mtshan yang ngo / /pu la sa'i 'dab ma gang tsam dang mar me'i snying po tsam des kyang snyoms par bya ba'i phyir bgo bsha' bya'o//la ba dang de lta bu dag ni btsongs te'o/ /mi gshegs pa nyid do/ /rnyed pa bgo ba la lnga bya'o/ /de rnyed pa 'gyed par 'gyur gyis der khyed cag gis tshogs pa bya'o zhes dge 'dun la brjod par bya ba dang /gaN+DI brdung ba dang / tshul shing brim pa dang / bgrang ba dang / so so'i skal ba brim pa'o/ /tha ma yan chad byed pa nyid na 'ongs pa dbang ba nyid yin no/ /mjug tu phyin pa nyid ni mi dbang ngo / /de ni rnyed pa chung ngu la yang ngo / /rnyed pa'i bya ba der zhugs na song ba nyid yin yang mi dbang ba nyid ma yin no//de'i phyir 'gro bas mnod pa bcol bar bya'o/ /khas blangs pa dang ldan pas ma mnos na bsab par bya ba nyid do/ /rnyed pa chung ngu pa Na lnga la sogs pa'o/ /ma bcol na mnod par mi bya'o/ / slob dpon nam mkhan po'i mnod par bya'o/ /yid gcugs pa'i gnas kyi don du yang ngo / /rang gi phyogs dang mthun pa ma yin pa'i don du mi bya'o/ /de ni gnas mal la yang ngo / /zas la yang ngo / /gzhan gyi don du mnod pa pha rol la go bar bya'o/ /mi dbang bas nang du zhugs te mi bya'o//dbang ba gcig nyid kyis shin tu mang po thob pa la mi dbang ba'i rgyur gyur pa med do/ /bye ba na chos ma yin pa'i phyogs dang mthun pa dag tu song ba dge 'dun gyi rnyed pa mi dbang ngo / /de'i dus kyi rnyed pa la ni ches ring du gnas pa nyid yin no//babs pa dang shi bar gyur pa gnyis kyang ngo / /rnyed pa ni ji ltar rnam par nges par byed pa ltar rnam par gzhag go/ /'thob pa rnams kyis kyang ngo / /thams cad kyis phul na yang ngo / /dge 'dun yongs su ma bcad na las kyi mtshams kyis yongs su bcad do//'di la gcig la sogs pa ni de nyid do/ /chos kyi rnyed pa ni de smra ba rnams dbang ba nyid yin no/ /gtsug lag gi tshigs su bcad pa gcig 'dzin pa ni 'dir de nyid kyi mtha' yin no/ /mtshan mi mthun pa shi ba'i yo byad la cig shos yod na mi dbang ba nyid do//gnas nas phyung ba'i yang de bzhin no/ /med na yang ngo / /rgyu las sems ma log na'o/ /de'i de gnod par bya ba nyid la de ni tha dad pa nyid ma yin no/ /tha dad pa'i la ni tha dad pa nyid do/ /rab tu byung ba dang tshangs pa mtshungs par spyod pa las gzhan pa dag de ni mi dbang ba nyid yin no//gsol ba'am dang po dang tha mas byin gyis brlabs zin pa na 'ongs pa ni mi dbang ngo / /de las 'ga' zhig dge 'dun gyi rgan pa dang gsar bu gnyis la byin pa ni de zhes bya'o/ /gang na byin gyis brlab par bya ba 'dug pa de'i mtshams su gtogs pa rnams byin gyis rlob par byed pa yin no//'di la shi ba'i gnas nyid ni rgyu ma yin no/ /mtshams kyi bar na 'dug pa la lus sam gzhan gyis reg pas ji tsam non pa der gtogs pa rnams so/ /gang na nor dang 'dra ba der 'dug pa de'i khongs su yo byad gtogs pa nyid yin no//nor dang 'dra ba gzhan na 'dug pa yang byin gyis brlab par bya'o/ /skur ba bskur bar bya bas ma spangs pa ni de'i nyid yin no/ /spangs pa ni skur bar byed pa nyid kyi'o/ /des spangs na yang ngo //phyi rol du yang mtshams kyi nang du 'du shes pa dag 'ba' zhig gis byin gyis rlob pa mi 'chags so/ /dbyung ba dang rim gro dang chos mnyan pa dang yon bshad ma byas par byin gyis brlab par mi bya'o/ /lhung bzed dang chos gos khyim gzhan na 'dug pa nyid ni khyim bdag gis gang la byin pa de dbang ba nyid yin no//gal te dbang zhing des phongs pa yin na'o/ /sbyin par mi byed na blangs pa dang ldan pa'o/ /mthar gyis na dang po'o/ /med pa nyid yin zhing ma bsngos par bor na song ba dang ldan pa'o/ /de ni mthar gyis dang 'dra'o//bu lon pa byung na de la gzhal bar bya ba'i tshad kyis shi ba'i yo byad de dbang ba nyid yin no/ /bgos na yang ngo / /de dang lhan cig rnam par gzhag pa de la sbyin par bya ba nyid dam blang bar bya ba nyid gang yin pa ste de nyid ma yin no/ /des tshangs pa mtshungs par spyod pa rnams la bu lon chags pa nyid du mi 'gyur ro//lag gi blas dkon mchog gi blangs pa nyid yin na de'i ji snyed pa de snyed mnyam par bsab bo/ /nad g.yog dang bcas pa nyid yin na yo byad drug po de dbang ba nyid yin pas byin gyis brlab par mi bya ba nyid do//de ni rab dang 'bring dang tha ma dang bcas pa las so/ /du ma nyid yin na de thun mong ngo / /de'i don du song ba nyid yin la nad pa shi na sbyin par bya ba nyid do/ /rdzas de mi dbang ba nyid la ni mi sbyin no/ /gzhan du gnas par khas blangs pa la sbyin par mi bya'o//'di la bsnyen par ma rdzogs pa ni thams cad dbang ba nyid do/ /nad pas smras pas sbyin pa phrin yang ji skad smras pa bzhin bya ba nyid do/ /shi ba nyid kyi dus na rdzas nyid bsgrub pa la ni nor bdag mi dbang ngo / /khyim na gnas pa ni dbang ngo / /khyim pas bu dang chung ma phul nas shi na ci bder bya'o//glang po che dang rta dang bong bu dang dre'u dang go cha rnams ni rgyal po la dbul lo/ /dbyig dang gser dang gzhan byas pa dang ma byas pa rnams ni gsum la'o/ /rin po che rnams kyang ngo / /mu tig rnams ni gal te gzhan yod na de'i skal bas sam lhag pa nyid yin yang rung /gal te med na de bzhin du sangs rgyas la'o/ /tshon rtsi chen po rnams kyang ngo / /de dag ni btags te dri gtsang khang gi zhal zhal du bya'o/ /de ma yin pa sangs rgyas kyi ni sku gzugs dang dri gtsang khang dang mchod rten gyi yo byad du bya'o//chos kyi ni sangs rgyas kyi bka' 'dri ba dang seng ge'i khri dag gi'o/ /theg pa la ni sku gzugs la'o/ /rgyal mtshan dang de'i srog shing dag ni rgyal mtshan gyi don du'o/ /der rung ba'i srog shing rnams kyang ngo / /gzhan dag dang mtshon cha rnams ni dge 'dun la'o//de dag ni khar sil gyi yu ba dang khab dang gri gur byas te brim mo/ /dge 'dun gyi gzhan ni bzhag pa dang bgo ba dang bza' ba dag tu ci rigs par bya'o/ /zhing dang khang khyim dang tshong khang dang gnas mal dang mgar spyad dang gser mkhan gyi lag cha dang 'dreg mkhan gyi lag cha dang rdza mkhan gyi lag cha dang shing mkhan gyi lag cha dang /bsil yab mkhan gyi lag cha dang bran dang bran mo dang las byed pa dang zho shas 'tsho ba dang / ba lang dang ma he dang ra dang lug dang sman dang sangs rgyas kyi bstan bcos kyi glegs bam dang myur du mi 'grub pa'i dam rgya ni dang por 'os pa nyid yin no//ras dang ras yug chen dang be'u ras dang / mchil lham dang lham sgro gu can dang 'bru mar dang 'bru mar snod dang bya ma bum dang ril ba spyi blugs dang glegs bam gzhan dang dam rgya gzhan dang tshon rtsi gzhan dag ni gnyis par 'os pa nyid yin no//'bras dang til dang nas dang mon sran sde'u dang mon sran gre'u dang 'bru gzhan dang bza' ba dang btung ba dag ni gsum par 'os pa nyid yin no/ /gzhir gtogs pa gos kyi gzhi'o/ /glegs bu dang glegs bu phyed dag mnyam par bya'o//gzhal ba'i phyir de'i tshad kyi chags shing bcang bar bya'o/ /tshal bu dag kyang ngo / /de'i tshad kyi chags shing bcang bar bya'o/ /de'i che tshad ni sor bzhi'o/ /bya rog gi mtho gang yang ngo / /chung tshad ni sor gnyis sam phyed dang gsum mam mtheb sor gcig go//sa la chos gos gding bar mi bya'o/ /de'i don du bstan par bya'o/ /shing las byas pa'am smyig ma las byas pa gru bzhi btod pa'i phyir tha gu gzhug pa'i bu ga btod pa ni de zhes bya'o/ /chos gos ji tsam par ro/ /gri gus dra'o/ /de bcang bar bya'o//bya rog gi mchu lta bu'am/ bya gag gi gshog pa lta bur ro/ /lcags las byas pa las gzhan ma yin no/ /yu ba rtsi can dang khra bo mi bcang ngo / /sor drug gi tshad las lhag pa mi bcang ngo / /kha cig las ni brgyad las mi bcang zhes so/ /sor bzhi pas thung ba ni dgos pa med do//lci ba'i byug pas bskus par btsem mo/ /lci ba med na chag chag btab cing phyags par ro/ /de btsem par bya'o/ /khab kyis kyang ngo / /de bcang bar bya'o/ /ra gan dang zangs ma dang khar ba dang lcags las byas pa las gzhan pa mi bcang ngo //kha cig las zangs dang lcags dang rno ba dag las byas pa zhes so/ /de'i khab ral sbu gu lta bu'am chang ba lta bu bcang bar bya'o/ /de ngo tsha med pa dang dge tshul dag las rag las par bya'o/ /mi shes pa dang mi dran pa dang / rang bzhin du gnas pa dag ma yin pa dag las yang ngo //khab dang gri dag btsas mi zos par bya ba'i phyir spra tshil gyis bskus pa'i ras mar gzhug par bya'o/ /mi 'byil bar bya ba'i phyir chos gos la sgrog rten byas te sgrog zungs gdags so/ /sgro gu yang ngo / / btso blag mkhan la gos kha bsgyur ba dang kha ma bsgyur ba 'khrur gzhug par mi bya'o/ /de dang 'dra ba rang gis mi bya'o/ /de'i ngogs su mi bya'o/ /shing gi ngogs la mi bya'o/ /gzhong pa 'jam por bkru bar mi bya'o/ /chu bde bas so/ /lag pa gnyis kyis mthar gyis bsgyur zhing ngo //mi nus na rkang pa gnyis kyis so/ /de ltar khyim pas bkrur rung ngo / /de'i gzhan du gyur par spyod pa bsrung bar bya'o/ /phyag dar khrod ni legs par bkrus pa dang / btsems pa dang / kha bsgyur ba bcang bar bya'o/ /mi gtsang bas gos pa'i chos gos mi bcang ngo //tshon bzang ba nyid du bya ba'i phyir grib ma dang nyi ma 'dren mar brdung zhing bskam par bya'o/ /gos dag med par bskol lo/ /bye brag gsum man chad du'o/ /mang ba nyid du 'dod pa nyid yin na lan gsum du bya'o/ /phyi ma ches ngan pa nyid do/ / de'i phyir snod tha dad par bzhag go/ /'di ni dang po'o zhes bya ba la sogs pa'i yi ge bri'o/ /sngar dang po dang sbyar ro/ /gos kun nas bsubs pa la'o/ /de las thun ji tsam ran pa cung zhig gzhong bar blugs so/ /gsher ches na 'dzag la/ skam ches na 'dris par 'gyur bas de'i phyir ran par ro/ /gzar thag thang bcad pa nyid la bskams na bzang ngo / /mtha' 'byar bas so/ /dbang pu dag gis so/ /gzung dkar ba rnams ni rtswa bting bar ro/ /tshon phyogs gcig tu mi 'tshig par bya ba'i phyir yang dang yang bsgyur bar bya'o//tshon sar pa ni sar pa dag la blugs na bzang ngo / /rnying pa ni rnying pa dag la'o/ /sar pa ni nyi ma la bskams na'o/ /rnying pa rnams ni grib ma la'o/ /mi 'dris par bya ba'i phyir nyi ma gzhan la chu'i thun blugs so/ /bang rim 'chag sar tshon gyi las mi bya'o//gtsug lag khang du mi bya'o/ /de'i steng du mi bya'o/ /'thor 'thung bya ba'i nye 'khor du mi bya'o/ /phyogs der zhal zhal bya'o/ /gal te rdo thal gyis byugs pa yin na bkru'o/ /gal te brtsams pa na rlung dang char 'ong na khyams su'o//byas zin nas phyogs der lci ba 'am sas byug par bya'o/ /bcag pa dang brdabs pa rung bar ma gyur pa spyad pa bsten par mi bya'o/ /'di la 'tsher ba nyams pa ni rung ba yin no/ /chus brlan pa nyid na'o/ /zil pas brlan na lag pas mnye bas nyams par bya bla'o//sham thabs bgos pa'i steng du ska rags bcing ngo / /shur bu'am lcag pod dam rgya cang ngam shur bu phre'us so/ /ska rags ma bcings par grong du 'jug par mi bya'o/ /khris gcig gis kyang ngo / /tshom bu can dang tshar tshar can dang zla gam can dang /gser skud ni rgyan ma yin pa ma yin no/ /khra bor byas pa yang de dang 'dra'o/ /gzhi ma bting ba'i sar chos gos gzhag par mi bya'o/ /mi gtsang ba'i phyogs su mi bzhag go/ /rtul ba yod na khur lci bas mi mnan no/ /gzhan du spyad pas yongs su spyad par mi bya'o//bshang ba dang / gci ba bya ba dang mi gtsang ba'i byi dor bya ba dag tu bla gos bgo ba bsten par mi bya'o/ /der nyal bar mi bya'o/ /bsod snyoms la rgyu ba dang chos ston pa dang mchod rten la phyag bya ba dang rje sa bya ba dang dge 'dun tshogs pa dang gdams ngag dang chos mnyan pa nyams su myong ba las gzhan pa'i bya ba la snam sbyar gyon par mi bya'o//de la nyal ba'am 'dug par mi bya'o/ /'ga' yang bkur ba la sbyar bar mi bya'o/ /lus la reg par bgo bar mi bya'o/ /mchan khung g.yas pa'i drod kyis de ma rung bar 'gyur ro//de ltar mi 'gyur bar bya ba'i phyir phyogs der de la gos glan par bya'o/ /khru phyed dang do dang mtho gang ngo / /ngos gnyis kar skud pa'i zungs kyis sbyar ro/ /dus dus su de bkru ba dang kha bsgyur bar bya'o/ /de'i de ni btsag gis so//gdod phyis bcang bar bya'o/ /lus 'dzag pas rnag gzan no/ /de chos gos kyi nang du bgo'o/ /'byar na ska ba'i chu'am so phag gi phye ma dang sbyar ba'i chus sbangs te dal bus khad kyis dgog par bya'o/ /rnag dang khrag kyang ngo / /dus dus su bkru ba dang skam pa dang kha bsgyur bar bya'o//de'i de ni btsag gis bzang ngo / /de'i de la ni sa'i snying pos bzang ngo / /chos gos dag gar bab bab tu mi bzhag go/ /de'i don du gdang bu bca'o/ /de'i don du sbubs khung bya'o/ /gtsug lag khang brtsig pa'i tshe na'o/ / byas zin nas bu gu mi bya'o/ /khang khyim la yang de bzhin no/ /de ni shing bu'am thag pas 'grub bo/ /gtur bus gos dag bkur na bzang ngo / /de bya'o/ /khru gsum dang khru phyed dang gsum nyis bltab tu byas te btsem mo/ /dbus su kha gdod do/ /kha ra na bu gu can bya'o//tha gu las so/ /kha rgyun gzhan yang ngo / /spyad par bya ba dag steng du gzhug go/ /sang 'gro bar 'gyur ba nyid na bla ma la zhus te gnang na 'gro bar bya'o/ /rang gi gnas su chag chag la sogs pa byas te'o/ /lam du chos dang ldan pa'i gtam gyis sam 'phags pa'i mi smra ba nyid kyis 'gro bar bya'o//ngal bso ba'i gnas su gtsug lag gi tshigs su bcad pa gdon no/ /chu bcus par yang ngo / /chu de gang gi yin pa de'i phyir ro/ /lha rnams kyi phyir yang gzhan no/ / gnas par ni rgyun chags gsum pa'o/ /dpyang thag bcang bar bya'o/ /de'i tshad ni khru brgya yan chad nas lnga brgya bcu man chad do/ /kha cig las ni yul gyi rjes su mthun pa zhes bya'o/ /de med par khron pa'i chu ma yin pa dkon pa'i yul du rgyu bar mi bya'o/ / lam du 'gro bas chos gos sprugs shing khrus bya ba'am rkang lag bkrus te chu thogs nas mchil lham phyis shing chos gos gsum gyon te spyod lam zhi bas gtsug lag khang du 'jug par bya'o/ /rgan rims bzhin la phyag byas nas tha mal pa'i phyogs su bsdad par bya'o//sgra bskyung ba dang mdzes pa dang shin tu bsdams pa dang spyod lam ran par ro/ /rgyus shes pa dang ldan pas bsu bar bya'o/ /mi shes na mu gcig pa yin yang bsu bar mi bya'o/ /sgo chod cig /tshol na ma sbyin cig /len na bzlog shig ces bcol ba khas blangs nas yal bar bor ram 'di kho bo'i grogs yin no zhes bya ba la sogs pa'i tshig gis yid gcugs pa'i dngos po nyid du bsgrubs pa las brlag par gyur na gzhal bar bya ba nyid yin no//yid ches pa la brten par bya'o/ /gzhan gyis mi shes pa'i bye brag brtag pa ni thabs yin no//dbul bar bya ba ltung na'o/ /gal te ma blangs par btang na'o/ /de la bag med par mi 'gyur bar bya ba'i phyir dri bar bya'o/ /brnyas pa mi gtsang bas ma rung bar gyur pa bkru ba la sogs pas sems gzung bar ma gyur na rin sbyin no//lhung bzed dang chos gos blang bar bya'o/ /stan gding bar bya'o/ /rkang pa bkru bas mgron du gnyer bar bya'o/ /chus kyang ngo / /phyag bya'o/ /spyod pa bde'am 'dri'o/ /ci nus kyis yang dag par dga' bar 'gyur bar bya'o/ / gnas mal rkyen du bab pa sbyin no/ /dge 'dun gyi gnas brtan gyi gan du 'gro bar bya'o/ /des de gnas 'cha' ba la sbyar bar bya'o/ /gal te rgan na de la gnas mal bstab pa'i phyir de'i dge skos la'o/ /bab col du gnas mal gso bar mi bya'o/ /chos gos kyi mtha' zegs na mtha' bskor gyis glan zhing phyir bcos so//smyung tshems lta bu dag gis de'i zungs gdab po/ /ro'i gos ni bla gab med par shing ljon pa la sogs pa'i sting du nyi ma bdun nam brgyad dam kha cig las lnga'am drug bzhag ste 'khrur bcug nas spyad par bya'o//bdag dur khrod pa'o zhes go bar byas nas 'bod na gtsug lag khang dang khang khyim dag tu 'jug par bya'o/ /dur khrod pas bdag gir bya ba ma btang ba la yang spyad pa bsten par mi bya'o/ /dge 'dun gyi gnas mal la spyad par mi bya'o/ /mchod rten la 'dom gang tsam gyis 'gyed do//sbrang yab bcang bar bya'o/ /bal las byas pa dang sha na las byas pa dang ras bal las byas pa'i ras ma'am 'dab ma'i dog pa'o/ /glang po che dang rta dang ba lang gi spu la sogs pa las byas pa mi rung ngo / /thams cad du gang zag gis khar rtsi can nyid dang khra bo nyid mi rung ngo //sbrang skyabs kyang ngo / /shing bu'i steng du ras kyis g.yogs pa'o/ /bcing bas so/ /khru bzhi pa dang do pa'o/ /ras khru bcu gnyis pas g.yogs so/ /'byar ba dang bcas par ro/ /de'i ma mtha' ni mal chas sbyar ro//sgo gsegs kar gdod do/ /tsha bar ni bsil yab sbyar ro/ /bsil yab bcang bar bya'o/ /bsil yab mkhan gyis byas pa'am ta la'i chang bu'o/ /khra khra bo mi rung ngo / /dge 'dun gyis ni gzhan yang ngo / /nor bu dang rnga ma'i bsil yab rnyed na mchod rten la dbul lo//nyan thos kyi la yang ngo / /stan nang tshangs can dang la ba dang sngas nang tshangs can dang gor bu dag bcang bar bya'o/ /bu dang chung ma'i rnyed pa ni sbyin par byed pa'i dbang gis bsgrub bo/ /gal te slu bar byed na ci tsam 'dod pa de tsam du btsong ba nyid yin no//yang dang yang du dbul du rung ngo / /shing ljon pa la phul bas gal te rgyan yin na dus ston gyi tshe de nyid brgyan par bya ba'i phyir bzhag go/ /rtsig pa la na gal te gnas khang gi ni ri mo bya ba'i phyir ro/ /gal te ma yin nam ka ba la na las sar pa'i phyir ro//sa la na'o/ /me khang gi ni snang bar ro/ /yang na snum bag gi rnyed par ro/ /rung ba'i khang pa ni na ba'i sman du bzhag go/ /bkad sa'i ni zas su bya'o/ /skem mal gyi ni btung bar bya'o/ /bsro khang gi gnas kyi ni bsro khang ngam snum bag gi rnyed par ro//'khor gyi khyams dang spong sa'i ra ba'i snum bag gi rnyed par ro/ /yang ni skyes pa'i rabs kyi sde bri bar bya'o/ /bang rim dang 'chag sa dang sgo khang dang khyams dag la phul ba ni sgo'o/ /rdzing bu'i yang ngo / /kha cig las de ni phyogs bzhi'i dge 'dun gyi nyid du bzhag go zhes so//dkon mchog gi don du blang du rung ngo / /bsgrag tu yang rung ngo / /len pa'i tshe'o/ /mthong bar bya ba'i phyir 'phang lo bya'o/ /tsha ba dang rlung dang char pa'i gnod pas mi reg par bya ba'i phyir khang pa brtsegs pa sgo bzhi dang ldan pa yang ngo //dus ston gyi rjes la 'phang lo btul lo/ /snod spyad 'grub pas rnyed pa 'grub par bya'o/ /gnyis ka las ma bsngos par ston pa mchod pa'i tshe phul ba dge 'dun gyi la dge slong ma rnams kyi 'jug pa med do/ /'di la gcig gi nang du de dag gis 'phang lo tha dad pa btsugs na nyes pa sbom po'o//snod spyad 'gyed pas bgo bar bya'o/ /de bsko bar bya'o/ /btsong bar bya ba rnams btsongs te'o/ /dge 'dun 'dus pa la'o/ /bskyed pas so/ /de nyid kyis der 'du ba'i skabs rjes su bsgrub par bya'o/ /dge 'dun gyi gnas brtan gyis rin thang gdab par bya'o//ran par bya'o/ /des ni de la mi dbab pa nyid do/ /yang mi 'byung bar nges par byas nas bskyed pa la dbab bo/ /mi nyo bas bskyed par mi bya'o/ /bud med mi bya'o/ /rin ma phul gyi bar du spyad pa dang byi dor yang mi bya'o/ /bgo skal ba rnams mang ba nyid yin na bcu la sogs pa'i tshoms kyis bgo bar bya'o//phog pa ma bgos par tshoms 'ga' zhig shi na de'i skal ba tshoms de la dbang ba nyid yin no/ /mya ngan las 'das pa'i bsam pas rab tu byung ba tshul khrims dang ldan pa la ni gos stong phrag brgya pa dang /zas ro brgya pa dang / khang pa brtsegs pa lnga brgya pa yang 'os so/ /dge 'dun gyi rdzas kyang ngo / /mi slob pa man chad kyi'o/ /so so'i skye bo la'o/ /tshul khrims 'chal pa ni ma yin no/ /le lo can la ni blangs pa dang nye bar spyad pa bu lon du 'gyur ro//mtshams kyi nang nyid na gang zag gi gtsug lag khang ngam de'i rnyed pas 'tsho ba la ni dge 'dun gyi rnyed pa 'os so/ /nges pa'i gnas khang na yang ngo / /de ri mor bsko'o/ /lcags las byas pa'i snod spyad dag las lhung bzed dang lhung bzed chung ngu dang tshwa snod dang zo phor dang /lde mig kyog po dang gri'u dang khab dang sen mo gcod pa dang nal ze dang thal phyags dang sta re dang sla nga dang phor bu dag ni bgo bar bya ba nyid do/ /sa'i snod spyad dag las ni lhung bzed dang lhung bzed chung ngu dang sla nga dang bum pa dang bya ma bum dang gzhong pa dang ril ba spyi blugs dang chu snod dag go//khri ni rin po che las byas pa la sogs pa man chad nas lcags las byas pa'i bar dag go/ /brjes te'o/ /shing las byas pa ni ma yin no/ /tshon rtsi lnga las gzhan pa'o/ /ma bskol ba'o/ /bskol ba ni kha bsgyur bar bya ba la sbyar bar bya ba nyid do//dge 'dun gyi la'o/ /kun dga' ra ba dang gtsug lag khang dang de dag gi gzhi dang / gnas mal dag ni btsong bar bya ba yang ma yin no/ /gzhag par bya ba nyid ma yin no/ /byin gyis brlab par bya ba nyid ma yin no/ /pha ma la zas dang gos kyis gtang bar bya'o//gal te lhung bzed dang chos gos las lhag pa'i rnyed pa med na blangs te'o/ /ma grub na zan gyi skal ba las phyed sbyin no/ /bye brag shes par bya ba'i phyir chos gos dag la thig le bya'o/ /de dag la mtshan ma gdab bo/ /snag tsha'i thig le ni de zhes bya'o//lus dag kyang ngo / /kha tshar dang phun tshar gyi mthar rang chag bya'o/ /snam sbyar ma yin pa dag la dras te byin gyis brlab par nges pa med do/ /rkyen de lta bu dag med par ma dras pa des grong dang khyim gzhan dag tu 'jug pa dang 'dug par mi bya'o//mu stegs can gyi 'dug gnas su yang de bzhin no/ /'khor na 'jug pa dang 'dug par mi bya'o/ /spu can chos gos gsum nyid du byin gyis mi brlab bo/ /de bgo ba'i gos su mi bsten no/ /seng ba dag bdag gir mi bya'o/ /de ni rnam pa bzhi'o//bal las byas pa dang / zar ma las byas pa dang / du gu la las byas pa dang / ras bal las byas pa'o/ /spu dma' ba la sogs pa ras kyi rnam pa yang ba gzhan dag kyang ngo / /la ba yang ngo / /gnod pa med na spu phyir bsten te bgo bar mi bya ste gzhan du na'o//de de bzhin du gyon pas bcag par mi bya'o/ /par sig gi la ba dang be'u phrugs dang par thang khra bo gang zag gis bdag gir mi bya'o/ /'chag sar par tang gding ba mnod par bya'o/ /rtag tu mal gcig tu bcag par mi bya'o/ /nus pa nyid yin na btsem pa dang lhan pa ring po dag glan pas phyir bcos par bya'o//mi nus pa nyid yin na 'chag sa de nyid du lci ba dang sas byug par bya'o/ /gzhan bcang bar bya'o/ /sbyin bdag la yid brtan pas so/ /snam sbyar dang bla gos dang mthang gos dang sham thabs dang sham thabs kyi gzan dang rngul gzan dang rngul gzan gyi gzan dang gdong phyis dang rnag gzan dang g.yan pa dgab pa dang skra bzed dang gding ba dang dbyar gyi gos ras chen bcang bar bya'o//chos gos gnang ba de nyid du byin gyis brlabs te bcang bar bya'o/ /yo byad kyi gos kyang ngo //de nyid dkar po nyid dang kha tshar dang phun tshar dang bcas pa la yang nyes pa med do/ /dge 'dun gyi yang ngo / /gzhan du ma yang rung bar byas te bcang bar bya'o/ /sems mi brtan pa la rung bar mi bya'o/ /bsnyen par ma rdzogs pa la mi bya'o/ / mngon sum du mi bya'o/ /yul gzhan du gnas par gyur pa nyid yin na yang rung ba mi nyams so/ /shi na nyams so/ /shes na'o/ /'di la rung bar byed pa bdag po nyid do/ /spangs pa bdag gir mi bya'o/ /dge slong la spang bar bya'o/ /mi bsal ba la yang mi bya'o//ma byin na blang ngo / /mthus kyang dgug go/ /gos dri dag gis gos pa bkrus te bgo bar bya'o/ /phye ma dag gis na sprugs te'o/ /snum gyis na rtsub par byas te'o/ /char 'bab pa'i tshe bla gab med par dge 'dun gyi mi bgo'o/ /bkru bshal dang tshon dang lhung bzed kyi las dang shing gshags pa la sogs pa byed pa'i tshe mi bgo'o//lhan cig pa nyid la zhes ma bsgo na gcig dang dbral ba'i phyir 'doms pa la byin pa ni yang dag pa nyid kyi grangs yin no/ /'doms par byed pa dang bcas pa la mi sbyin no//smyon pas nye du ma yin pa dang de'i khyim nas blangs pa las blang bar mi bya'o/ /bu bskrad pa las blang bar bya'o/ /dur khrod nas phyir bzlog pa yang ngo / /phyir 'gugs na sbyin par bya'o/ /yang rnyed na blang ngo / /mchod rten gyi dkor dang 'byung khungs dang /rtsa ba dang 'bras bu dang bu ram shing las gzhan pa'i zas kyi don dang / bsko bas nye bar 'tsho bar bya ba dang / na ba'i rung ba ni bdag gir bya ba'i phyir bgo bar mi bya ba nyid yin no/ /rnyed pa la ni dbyar gyi mtshams 'jug go/ /dbyar ral ba ni mi dbang ba nyid ma yin no//gnas nas phyung ba nyid na mi dbang ngo / /rdzas kyis mnan par gnas par khas blangs pa la ni skal ba gcig kho na'o/ /de la mnan pa rnams su bdag nyid bgrang ba'i cha nyid do/ /gzhan pa gcig tu gnas par khas blangs pa la ni yun ring ba nyid kyis rnam par gzhag go//dge tshul dang dge tshul ma dag ni rnyed pa la sum cha dbri ba nyid do/ /zas la ni mnyam pa nyid do/ /bsnyen par rdzogs par 'dod pa dang dge slob ma dag kyang ngo / /dge slong dang dge slong ma rnams kyi skal ba bgo ba ni gang zag las yin gyi dge 'dun las ni ma yin no//zas kyi mjug thogs kyi rnyed pa bye brag tu ma bcad pa de la dge slong ma zos pa nyid dag kyang mi 'jug pa ma yin no/ /stan dang chu dang bsod snyoms dag la dge slong dge slong ma dag pas gtso bo nyid ma yin pa ma yin no//dge slong ma rnams kyis tshogs pa na rgan pa'i mthar stan gzhag go/ /dge slong dang bcas pa nyid na de dag gis mi nus na dge slong mas yon bshad par bya'o/ /'drim par byed pas sbyin pa'i phyir zas nye bar bzhag pa na dge 'dun gyi gnas brtan gyis dang por snyoms par brims shig ces bsgo bar bya'o//'khor ba la bltas te mang la zas nyung ba nyid na de'i tshe snga ma brjod cing khyed par zhes so/ /gzhan nyid yin na ci 'byor par zhes so/ /rgan pa'i mthar sam pra ba ta zhes ma brjod par dang por blang bar mi bya'o/ / zas bsngogs pa na bsngos pa dag las gzhan pa dag lhags na de la sbran par bya'o/ /dge slong chos gos gsum sbyin du gzhug par mi bya'o/ /dge 'dun gyis sos par gyur pa nyid na 'di la phyir sbyin no snyam pa 'di las gzhan pa'i yid gnyis kyis blang bar mi bya'o/ / stod g.yogs dang smad g.yogs gnyis kyis dor ro/ /'bring gis so/ /lhag mas mi bya'o/ /sham thabs ma bcings par grong du 'jug par mi bya'o/ /khris gcig gis kyang mi bya'o/ /gos kyi gzhi phran tshegs la sogs pa zhu ba dang bcas pa'i skabs so/ / gos kyi gzhi rdzogs so// //yul dbus kyi mtshams so/ /shar du ni li kha ra shing 'phel gyi mdun gyi nags li kha ra'i shing tshang tshing can zhes bya'o/ /lhor ni 'dam bu can gyi lho na chu klung de zhes bya'o/ /nub tu ni bram ze'i grong ka ba dang nye ba'i ka ba zhes bya'o//byang du ni u shi ra'i ri zhes bya'o/ /mtha' 'khob tu mchil lham dag bcang bar bya'o/ /gnas mal bskyab pa'i phyir yang ngo / /chig rim mo/ /sngogs pa gzhug pas bcos par bya'o/ /rim pa gzhan ni mi rung ngo / /khyim pas tha na gom pa bdun du bgos na ring ba mang ba yang rung ngo //rung ba tsam gyis don nyid du de dang sbyar ba'i dbang du len pa ni mi rung ba blangs pa nyid ma yin no/ /khra bo bkra ba dag mi bcang ngo / /lug ru lta bu dag mi bcang ngo / /a shwad+tha dang ka ra bI ra'i 'dab ma lta bu dag mi bcang ngo / / gser dang dngul gyis spras pa dag mi bcang ngo / /khrig khrig zer ba dag mi bcang ngo / /krog krog zer ba dag mi bcang ngo / /tug tug zer ba dag mi bcang ngo / /thrig thrig zer ba dag mi bcang ngo / /sgeg rdzas su 'gyur ba gzhan dag kyang ngo / /bol gong ba can ni mi rung ba nyid ma yin no//sna dang rting pa'i sbubs can bcang bar bya'o/ /kha chu chus byung ngo / /lham yu chad kyang ngo / /chu la chab brom chags pa'i yul du ni zhwa dang lham sgro gu can yang ngo / /bla ma'i drung du mchil lham bgo ba bsten par mi bya'o/ / seng ge dang stag dang gung dang glang po che dang rta cang shes kyi yan lag cung zad kyang lus la gdags par mi bya ba nyid do/ /de dag gis glang po che phal pa dang rta dmu rgod dang / de las gzhan pa'i gcan gzan dag kyang 'phangs pa yin no/ /mchil lham dag brdab par mi bya'o//ras ma gsher ba dag gis de dag gi rdul med par bya ba'i phyir phyi bar bya'o/ /de bcang bar bya'o/ /de dag rgyu bar bya'o/ /mi mdzes pa'i dngos po dben pa'i phyogs su bya'o/ /de'i ched du smyung bu dang ko ba bcang bar bya'o/ /dra gri ni ma yin no/ /khyim gzhan dang chab khungs las gzhan par shing gi mchil lham bgo bar mi bya'o//smyig ma'i glegs bu dang mun dza dang si ri dang dar ba dag gis yang mi bya'o/ /tha gu'i yang ngo / /rlung drag can ma yin pas so/ /khyim gzhan du gzhan med na ko lpags la 'dug par bya'o//der yang rkyen de lta bu dag med na nyal bar mi bya ba nyid do/ /mig la phan par bya ba'i phyir dom lpags blang bar bya'o/ /rkang pa'i gnas su gding bar bya'o/ /sangs rgyas kyi ni dri gtsang khang gi sgor ro/ /mchil lham dag tu bgo bar bya'o/ /rlung nad can gyis ni 'dug pa dang nyal ba yang ngo //gzhang 'brum can thams cad kyis de bzhin no/ /de la de ltar sbyar bar bya'o/ /spu la reg pas phan par byed pa nyid du rig go/ /mchil lham dag rim pa mang po nyid kyis kyang ngo / /du ma'i steng du gcig bzhag pas kyang ngo //asma pa ran ta dag tu ni ko lpags mi bcang bar mi bya'o/ /seng ge la sogs pa'i mi bcang ngo / /gang gi ko lpags mi rung ba nyid yin pa de'i rgyus pa dang rus pa dang so dang sha la sogs pa yang ngo / /rkyal pa ka ba can bcang bar bya'o/ /yang na rkyal skya'o//khra bo bkra ba mi bcang ngo / /rkyal mi shes pas sta gon ma byas par chu'i gting du 'jug par mi bya'o/ /dben pa'i phyogs su rkyal bslab par bya'o/ /de ma yin pa'i gting du khyu mchog ma gtogs pa'i ba lang yang bsten par mi bya'o/ / glang po che dang rta dang ma he dang g.yag dag bsten par bya'o/ /ko lpags kyi gzhi rdzogs so// //sman bsten par bya'o/ /de ni rnam pa bzhi'o/ /dus su rung ba dang / thun tshod du rung ba dang / zhag bdun pa dang / 'tsho ba'i bar du bcang bar bya ba nyid do//dang po ma yin pa nyid dag ni nad pa'i phyir ro/ /tso tsa dang chu shing gi 'bras bu dang rgya shug dang a shwad+tha dang u dum wA ra dang / pa ru sha ka dang / rtsub 'gyur dang rgun 'brum dang 'bra go'i btung ba rnams ni thams cad du'o/ /bcos pa'i tshwa dang 'bru'i tshwa dang zho ga chu dang dar ba'i dngas ma dang rtsab mo chus btab pa tshags kyis btsags pa shin tu sla ba bzhin snang ba 'dam bu'i nyag ma'i mdog lta bu dag kyang de dang 'dra'o//de lta bu nyid kyi mdun rol du bsnyen par ma rdzogs pa mtshan mthun pas reg tu mi rung ngo //a ru ra la sogs pa lnga yang ngo / /bu ram yang ngo / /de byin gyis brlabs pa bza' ba la lam du zhugs pa dang dge skos dang lag gi bla rnams ni nad pa dang 'dra ba nyid do/ /zan chad pas kyang de dang dus su rung ba ma yin pa bzar rung ngo / /thun tshod du rung ba ni btung ba dag go//shin tu bslab bo/ /de'i rdzas de nyid ma yin pa'i phyir gal te dus su rung ba yin na bsnyen par ma rdzogs pas sbyar zhing tshags kyis kyang btsag par bya'o/ /de dag tu gzhan bal po se'u dang ma du lung ga la sogs pa'i rdzas so/ / de dus su rung ba nyid yin na thun tshod kyi mtha' yin no/ /gzhan nyid yin na de'i gang yin pa'o/ /kha cig na re ma gyur na de yin gyi/ gyur na gang tshun chad de yin pa'o zhes zer ro/ /de ni ma yin te/ dus lhag pa la brten na mi 'chags par 'gyur ba'i phyir dang / de 'byung bar 'gyur ba phal pa rnams kyi bgrod pa ma yin pa'i phyir byin gyis brlab par bya ba nyid ma yin par 'gyur ba'i phyir ro/ /'dir ro dang phye ma dang sbyar ba'i btung ba dag 'dus pa nyid yin no/ /sman rtsa bas shin tu sla ba yang ngo / /de ni rtsa ba la sogs pa'i sman bskus pa skyur ba'o//zhun mar dang 'bru mar dang sbrang rtsi dang bu ram gyi dbu ba dag ni zhag bdun pa'o/ /bu ram dang hwags dang li kha ra la sogs pa thams cad ni bu ram gyi dbu ba nyid kyis 'phangs so/ /bdud rtsi ni zhun mar dang 'dra ba nyid do/ / zhag bskol zhing btsags pa dag ni 'bru mar dang 'dra ba nyid do/ /nya'i dang ri bong gi dang chu srin byis pa gsod kyi dang dom kyi dang phag gi'o/ /de dag ni nad pa la phal cher sbyor bar byed do/ /sos pa nyid na de dag nad pa'i phyir slong na sbyin no/ /de med na sman khang du'o//sman khu dang mig sman dag kyang ngo / /'tsho ba'i bar du bcang ba ni rtsa ba dang sdong bu dang 'dab ma dang me tog dang 'bras bu dang zas kyi don du khyab par byed pa ma yin pa'o/ /'di lta ste gla sgang dang shu dag dang yung ba dang sge'u gsher dang por dkar po dag go//tsan+dan dang dbyi mo dang shug pa dang sle tres dang thang shing dang skyer pa dag go/ /ba sha ka dang ko sha ta ki dang pa to la dang nim pa dang sab ta par+Na'i 'dab ma dag go/ /me tog ni ba sha ka dang nim pa dang da ta ki dang klu shing dang pad+ma'i ze ba dag go/ / a ru ra dang skyu ru ra dang ba ru ra dang na le sham dang pi pi ling dag go/ /spyi pa'o/ /'di lta ste shing kun dang sra rtsi dang rgya skyegs dang spra tshil dang shing ma zho'o/ /'gyur byed do/ /'di lta ste/ til gyi dang rgya skyegs kyi shing gi dang sa tshur gyi dang nas kyi dang nas gra ma'i dang bA sha ka'i dang thal ba'i 'gyur byed do//lan tshwa'o/ /'di lta ste rgyam tsha dang kha ru tsha dang tshwa dmar dang rgya mtsho'i tshwa dang ba tsha'o/ /sman khu'o/ /'di lta ste shing a mra dang nim pa dang ko sham pa dang shi ri sha dang 'dzam bu dag go/ / ji tsam gyis chog pa bsten no/ /bkrus na yang ngo / /mi mnye ba la lan cig bkru'o/ /sman khu de ltar bsten no/ /sman smos pas dug sman ma bsdus pa nyid ma yin no/ /de ni 'tsho ba'i bar du bcang ba nyid do/ /nu zhos 'tsho ba'i be'u rnams kyi lci ba dang gcin dag ni de zhes bya'o//de dag ni dug la phan no/ /thal ba'o/ /shing k+natsa na dang ka pi ta la dang a shwad+tha dang u dum bA ra dang n+ya gro d+ha rnams kyi'o/ /de'i'o/ /sa ni sor bzhi'i 'og gis bzang ngo / /de dge bsnyen dad pa can las blang ngo / / des byin len bstab par bya'o/ /sha'i bdag nyid kyi sman de yang ngo / /thams cad shan pa'i gnas nas blang ngo / /de ni bya ba nyid yin no/ /gal te dus ma yin pa nas las byas pa'i sman dgos pa nyid yin na de'i don du ba lang rgan po'i lci ba'i nas kyis chog par bya'i gzhan bza' bar mi bya'o//gal te skyo ma tshags kyis btsags na ste gzhan ni ma yin no/ /gal te sha'i sman dgos pa nyid yin na tsha'i rtug pa'i shas so/ /gal te khu ba tshags kyis btsags na ste gzhan ni ma yin no/ /gzhan dang bcas pa la de ltag par spyad pa yod do//de'i phyir de dang bcas pa la cho ga snga mas 'jug par bya'o/ /rang bzhin gzhan du ma gyur pa ni sngon gyi rang bzhin ma yin pa nyid ma yin no/ /de'i phyir gzhan dang ma 'dres pa la ni rang gi cho gas rung bar bya ba mi 'grub pa ma yin no//bu ram bsgong ba'i phyir 'bras phye'i nang du bzhag pa ni bkru bas rang kho na'i grangs nyid du 'grub bo/ /'gor gyi gzungs ni bu ram nyid du shes par bya'o/ /byin gyis brlabs pa la ni sog 'jog mi 'byung ngo / /nad pa'i ched du yongs su longs spyad pa'i phyir rang gi dus kyi mtha'i bar du byin gyis brlab par bya'o//zas snga ma'i tshe'o/ /byin len byas te'o/ /byin len ma byas pa dang sog 'jog dang 'dres pa bsrung bar bya'o/ /de'i phyir lag pa gnyis bsnyal nas so/ /lag nyar blangs pa dang sog 'jog byas pa dang byin len ma byas pa dang nang du zhag lon pa dang nang du btsos pa dang dge slong gis btsos pa dag la byin gyis brlabs pa mi 'chags so//ro dang sla ba nyid yongs su gyur na sog 'jog byas pa nyid yin no/ /byin gyis brlabs pa 'og ma dang lhan cig yongs su longs spyad par mi bya'o//sman gyi go rims ni dpe'o/ /mig sman bsten par bya'o/ /sman ma yin pa'i don du mi bya'o/ /de'i snod rigs pa'o/ /mig sman skyer khaN+Da'i ni za ma tog go/ /mig sman ri lu'i ni sgye'u'o/ /mig sman du ba dang sbrus pa dang phye ma rnams kyi ni dong bu'o//thur ma bcang bar bya'o/ /zangs ma dang lcags dag gi bzang ngo / /rang 'khrungs dgag go/ /nad pas sman gzhug pa'i phyir mchan khug bcang bar bya'o/ /der mi shong ba nyid yin na brungs sam thum po byas te bcer ro//bcug pa mi 'drul bar bya ba'i phyir dus dus su skam mo/ /nyi grib la'o/ /bskams na mthu 'bri'o/ /ma rungs par 'gyur ba'i rgyu byung na rang gis brub par bya'o/ /bsnyen par ma rdzogs pa med na'o/ /sman phor bcang bar bya'o//sman gyi nal ze yang ngo / /'gror mi btub pas bul ba'i btung phor ro/ /nad pas lan tshwa bcang bar bya'o/ /de'i snod ni rwa'i sbubs bzang ngo / /lci bas kun nas bskol ba'o/ /de med pa'i nyes par mi 'gyur bar bya ba'i phyir kha gab gzhug go//de nyid las byas pa'o/ /dris bsgos pa'i sa'o/ /chu bsro ba'i phyir lcags kyi gar bu'o/ /thams cad kyis bcang bar bya'o/ /bsregs pa brdeg pa'i phyir de la lcags thag gdags so/ /tsha ba'i dus na gsher bas de mnan no//bsregs pa na zas dang 'bags pa'i gnas med do/ /rung ba sngar bsro'o/ /longs spyod pa phyis bsro'o/ /'doms kyis gsob bsten par bya'o/ /gzhan gyis 'tsho bar nus pa nyid na de la sbom po'o/ /'di la zangs ma'am 'khar ba'i sbu gu bzang gi lcags kyi ni mi bzang ngo //mtshon gyis gso ba yang de dang 'dra'o/ /gdong du rtsa'i rgyun las gzhan par de mi bsten no/ /gzhang 'brum gcad par mi bya'o/ /mtshon las gzhan pas kyang ngo / /de ni gsang sngags dang sman dag gis gso'o//zhe 'gras pa gsor mi gzhug go/ /gso ba'i phyir nub mo za ba ni tshul dang mi mthun pa ma yin no/ /'di la byin len ma byas pa dang sog 'jog byas pa dag mi rung ba nyid du dgos par mi bya'o/ /gso ba'i phyir reng bu'i du ba brngub par bya'o//de ni sman gce'us 'grub bo/ /lcags las bya'o/ /sor bcu gnyis pa bzang ngo / /rno ba dang rtsub par mi bya'o/ /zhun mar ram 'bru mar gyis bskus te shugs su gzhug go/ /de ni zung ngam chos gos kyi gdang bu la gzhag go/ /dri ma med par bya ba'i phyir mer gzhug go//snar blugs pa'i las bya'o/ /de ni snar blugs pa'i spyad kyis 'grub bo/ /mchu gnyis pa mi rno ba bzang ngo / /de bya'o/ /sman gyi phyir sha rlon pa bsten par bya'o/ /de za mi nus na thabs bya'o/ /ras kyis mig gnyis dgab bo//mi dgal bar bya ba'i phyir dri zhim pos bsgo'o/ /sha med pa nyid na mdun du bza' ba dang bca' ba yid du 'ong ba bzhag ste dgrol lo/ /de gzhan gyi don der na sbom po'o/ /mi'i sha ni thams cad du'o/ /sha bsngos par shes na bza' bar mi bya'o//stag gi god ma bza' bar mi bya'o/ /glang po che dang rta dang klu rnams kyi mi bza'o/ /rmig gcig pa dang wa dang spre'u dang shing rta mo dang bya rog dang bya rgod dang chu skyar dang khyi dang bye'u khra dang 'ug pa dang / de dag las gzhan pa'i bya mi ro za ba dag dang / bya gar dang pha wang dang skyin gor dang dri'u srin dang srin bu rnams kyi yang mi bza'o/ /sha'i byin len stobs pa la bcad pa las byung ba nyid ma yin nam zhes dri bar bya'o/ /du ma nyid na dang pos so/ /nyams na 'og mas so/ /glang po che dang mi'i 'o ma dag btung bar mi bya'o//pags pa dang rma bsku ba dang snar blugs pa dang mig skud cing bza' btung mi byed pa lan skyon chags pa med do/ /nad pas ni zhun mar dang 'bru mar chang dang 'dres pa btung bar bya ba nyid do/ /chang ma yin pa nyid na nyes pa med pa nyid do//de ni bskol ba las 'grub bo/ /de ni nas brngos pas btab cing sa'i nang du bcug na tsha nyid du 'gyur ro/ /rgun gyi khu ba ni bskol na chang nyid du mi 'gyur ro/ /tha dad ma yin pa nyid la ni yod pa nyid ma yin no/ /bag chags su gyur pa nyid ni yod pa nyid do//chang gi sred pa dang bral bar bya ba'i phyir rtsa ba dang sdong bu dang 'dab ma dang me tog dang 'bras bu'i sman skam po'i phye ma chang gi dris bsgos pa chu dang sbyar ba btung ngo / /chang dang bcas pa'i snod du bcangs te bzhag pas bsgo bar bya'o/ /reg pa bsrung ngo //de'i phyir ma gang ba dang shugs dang bral ba nyid du'o/ /de bzhin du ro med par byed pa dang dus ma yin par btung ba la zas dang yang ngo / /mdzes pa yang bzang ngo / /de'i phyir ras ma dkar pos btsag par bya'o/ /nad pas chang ni rtswa mchog gis kyang btung bar mi bya'o//dge bsnyen yan chad thams cad kyis mi blud do/ /rang bzhin gyi kha na ma tho ba dang bcas pa las gzhan pa thams cad la gso ba'i don nyid ma gtogs so zhes bya ba'i lhag ma'o/ /sgog skya dang kun dong dang ke'u bza' bar mi bya'o//nad pas ni dben pa'i phyogs su'o/ /zos nas sgog skya ni zhag bdun/ kun dong ni zhag gsum/ ke'u ni zhag gcig ma lon par gtsug lag khang du 'jug par mi bya'o/ /gnas mal la mi bya'o/ /bshang ba'i sar 'jug par mi bya'o//gci ba'i sar yang mi bya'o/ /dge 'dun gyi nang du 'gro bar mi bya'o/ /mchod rten gyi nye 'khor du mi bya'o/ /de'i thag ni 'dom gang ngo / /khyim pa dag la chos bstan par mi bya'o/ /khyim dag tu 'gro bar mi bya'o/ /skye bos gang ba'i phyogs su mi bya'o//mjug tu khrus bya'o/ /gos dag gi dri ni bkru ba dang du ba dag gis bsal lo/ /rung ba nyid du byin gyis brlabs par btsos pa dang gnas pa dag ni phyi rol dang 'dra'o/ /byin gyis brlab par bya'o/ /shing drung dang glang po che'i ra ba dang mu stegs can gyi 'dug gnas dang rgyal po'i pho brang sa dang dge slong ma'i dbyar khang dang gtsug lag khang gi bang rim dang sgo khang dang khyams dang bsro khang dang spong sa'i ra ba dag tu mi bya'o//kha cig las bla gab med pa dang me khang dang mchod rten gyi gzhi dang khyim bdag gi gzhir yang shes so/ /der g.yos dang btso ba yang mi bya'o//tshos pa'i byi dor yang mi bya'o/ /'di la dus bzhi yod do/ /dang po so phag 'grems pa'o/ /phyis las sar pa dang bcas pa nyid do/ /gzhan gyi tshe dge slong gnas pa nyid dang ma bral ba'o/ /de dag med pa na gnas pa'i phyir dge slong dag phyin pa'o//bya ba gzhan brtsams pa dang ngal bso bas ma byas pa tshun chad ni de nyid do/ /thams cad la dge 'dun gyi las kyis so/ /dang po gnyis la ni gang zag gis kyang ngo / /lag gi blas so/ /dang po shos la ni 'ba' zhig gis kyang ngo / /brjod pas so/ /gnyis pa la ni dge slong rab tu mang po dag gis sems bsdu bas so//gsum pa la ni las kho nas so/ /bzhi pa la ni ji snyed phyin pa de snyed kyis rung ba'i khang pa nyid du bsgrags pa'i tshig cig car brjod pas so/ /gcig gis gtsug lag khang du ma'i bya ba byed pa la mi mdzes pa med do/ /de ni tha dad par gyur pa'i rung ba nyid du ma bstan no//pad+ma'o zhes bya ba yan chad du mu ge'i tshe'o/ /mu ge'i tshe dge slong gis btsos pa dang lag nyar blangs pa dang byin len ma byas pa dag bza' bar bya'o/ /nang du btsos pa dang zhag lan pa'o/ /snga dro pa'i zas so/ /btung ba ni dus thams cad du'o//sngar byin len byas pa spangs te langs pas so/ /de blang ba'i phyir ldang bar bya'o/ /lhag ma'o/ /mngon par bsgrub pa'o/ /de bsgrub par bya'o/ /nags kyi rus pa'o/ /'di lta ste rgun 'brum dang bal bo se'u dang 'bra go dang starga dang bA tA ma dang aru ma'i ka dang ku ru ma'i ka dang kham bu dang rgya shug dang sar dag ni de zhes bya'o//pad+ma'o/ /'di lta ste pad+ma'i rtsa ba dang pad+ma'i rtsa lag dang be+e ta dang ut+pa la'i rtsa ba dang pad+ma'i snying po dag ni de zhes bya'o/ /gzhir gtogs pa'i sman gyi gzhi'o// //'dul ba'i mdo bam po brgyad pa/ rgyal srid dang de'i ched du mnod par mi bya'o/ /dge 'dun gyi ched du grong mnod par bya'o/ /zhing yang ngo / /de yal bar mi dor ro/ /de'i thog shas mnod do/ /thog shas btsal lo/ /rmos pas de gtsug lag khang du dbul bar bya ba nyid do/ /bdag nyid kyi bas dang por ro/ / bsrung ba'i phyir dge slong bsko'o/ /'du ba dang 'god pa dang gnyis ka las gang yang rung ba mi mngon pa la rtsis gdab par mi bya'o/ /gzhan la dran pa dang shes bzhin sngon du btang ste de la 'jug par bya'o/ /dge 'dun gyi ched du g.yog nye bar gzhag go/ /gang nas gtsug lag khang du skra mi 'byung ba der lha 'bangs kyi khyim byed du gzhug go//ji snyed dgod pa 'jug par bya'o/ /zan dang gos sbyin par bya ba nyid do/ /gal te las byed na'o/ /nad pa rnams la g.yog bya'o/ /ba lang dang ma he dang ra dang lug dang glang po che dang rta dang rnga mo dang bong bu dang 'bru rtsam pa dang snod kyang ngo //de dag mchod rten gyir yang mi rung ba ma yin no/ /kha gzar dang tshwa khug bcang bar bya'o/ /de gnyis dang 'phul ba'i btung phor las gzhan khar ba'i snod gang zag gis bcang bar mi bya'o/ /kun dga' ra ba pa nye bar gzhag par bya'o/ /bsrung ba'i phyir byis pa mtshan mthun pa 'bul ba dag blang bar bya'o//de dag gi cha lugs ni mgul par chos gos btags pa nyid do/ /rked par yang ngo / /phan gdags pa'i sems kyis so sor brkyang bar bya'o/ /de'i nye dus phul ba blang bar bya'o/ /mjug tu rin nyid du yang ngo //de dag gis byas pa shes pas kyang ngo / /de'i rin 'da' bar mi bya'o/ /shing tog gi rnyed pa dag gir bya'o/ /zhun mar dang 'bru mar dang sbrang rtsi dang bu ram gyi dbu ba'i bum pa yang ngo / /de dag gi snod kyang ngo / /de dag gzhag par bya'o/ /gzhi la'o/ /bshang ba dang gci ba dang chang gi bum pa dag ni mi mkho ba nyid do//dge 'dun gyi phyir g.yos dang 'tshod pa gang yin pa dag gi zhal ta bya'o/ /lhung bzed du bsod snyoms ma blugs pa'i mdun rol du ma bzung ba nyid kyis bsod snyoms la 'jug pa bsten par mi bya'o/ /lhung bzed kyi kha g.yogs bcang bar bya'o//'di dang khar ba'i snod bcang ba la thun mong ma yin pa nyid du dogs par mi bya'o/ /nad pas zhwa bcang ba la mi rung ba nyid du yang ngo / /gsil byed kyi sgra ma phyung bar bsod snyoms la khyim du 'jug par mi bya'o/ /de bcang bar bya'o/ /'byung ba dang 'jug pa la mkhas par 'bad par bya'o//mtshan ma bya bas so/ /bsod snyoms kyi 'bram gzer la sogs pas so/ /chos btsong bas 'tsho ba sbyar bar mi bya'o/ /chu med na zho ga chu la sogs pa'i khu bas rkang pa dag bkru'o/ /rtswa bam la 'dug par bya'o/ /bla gab med pa'i mtha' gcig tu gzhag go//spungs te yang ngo / /mjug tu dor ro/ /mang ba nyid yin na bya'o/ /gral gyi tshar du ma nyid kyang ngo / /lnga brgya'i tshar ro/ /rgan pa'i mtha' re rer spyi bungs bya'o/ /'drim pa dag rku ba nyid na spyan pa dag bsko'o/ /zan gyi las byed pa dag gis dang por bza' bar bya'o//'dus pa chen po'i tshe rgan rims su 'khod du gzhug pa'i phyir dang 'drim du gzhug pa'i dge slong dag bsko'o/ /'di la dge slong mas ni gnyis sam gsum bzhag ste ci dgar 'khod par bya'o/ /sgra bskyungs te zan gyi ched du 'gro bar bya'o/ /shin tu bsdams pa dang spyod lam mdzes pas so//de bzhin du 'dug par bya'o/ /zas rkang pas brdzi bar mi bya'o/ /lhung bzed kyi gzhi la rkang pas reg par mi bya'o/ /dran pa nye bar gzhag ste bsod snyoms blang bar bya'o/ /sems rnam par ma g.yengs par bsod snyoms blang bar bya'o//mi 'phro ba dang / 'tsho ba tsam dang / de ma 'dres pa dang / mi dkrugs pa dang / shin tu dben pa dang / dus las ma yol ba bsgrub par bya'o/ /gang la mgron du bos pa de las gzhan rnyed pa bdag gir byed pa la mi rigs pa med pa nyid do/ /rang gi zas las gzhan mnos pa la nyes pa med pa nyid do//gzhan du mgron du bos pa na 'dug pa la des gnang na gzhan gyis byin pa ni de'i khongs su gtogs pa dang 'dra'o/ /bsams pa'i don gyis sgra'i sbyor ba rnam par gzhag pa grags pas ni ma yin no/ /blangs pa spang bar mi bya'o/ / lta ba dang tshul khrims phun sum tshogs pa dag las blangs pa gzhan go rims bzhin la sbyin pa dang 'tsho bar byed pa lhag pa kha cig yan chad len pa dang za ba ni dad pas sbyin par bya ba chud gzon pa yin no/ /pha ma dang nad pa dang rab tu 'byung bar 'dod pa dang sbrum ma dag dang gdul ba dang 'dod pas bsod snyoms la reg pa dang khyim pa 'ongs pa la ni de las bgo bsha' bya'o//kham chad gcig za ba pos rnam par ma bcad par bzhag par bya'o/ /dud 'gro la yang sbyin par bya'o/ /bza' ba'i phyir nye bar gzhag pa las ma rdzogs par sbyin par mi bya'o/ /dad pas sbyin par bya ba nyid kyis mgron du bos pa la yang mi bya'o//lhung bzed kyi gzhi ni lhag ma za ba rnams la ci bder bya'o/ /gnyug mar gnas pa rnams la gtor ma sbyin no/ /de dag gi cho ga'i rjes su 'brang bas snga dro la sogs par ro/ /cho ga tha dad pa nyid yin na tha dad par ro/ /a mra rus pa ma chags pa nyid kyi gnas skabs su bza' bar mi bya'o//rtsa ba dang sdong bu dang 'dab ma dang me tog dang 'bras bu bca' bar bya ba dang 'bras chan dang zan dron dang lde gu dang sha dang snum khur dang 'o ma dang zho dang mar dang nya sha dang sha skam dag ni mi rung ba nyid ma yin no/ /gso ma dang yungs kar dang rtsa ba dang sdong bu dang 'dab ma dang me tog dang 'bras bu la sogs pa'i thug pa dag bsten par bya ba nyid ma yin par dogs par mi bya'o//chus kyang sbangs na 'tshag tu 'gyur ba nyid do/ /rkyal par blugs pa ni mi rung ba nyid ma yin no/ /snod du zan bzar rung ngo //yol gor ro/ /rdo las byas par yang ngo / /zas byas par yang ngo / /lcags kyi lhung bzed la sogs pa bzhin du bkrus te'o/ /bkru bshal ni gnas pa'i las yin no/ /zos nas kyang ngo / /gzhan dang lhan cig tu snod gcig tu bza' bar mi bya'o/ / lam du snod dag med na bza' bar bya'o/ /dge slong dang yang ngo / /gzhan gyis lag pa bteg na rang gis gzhug go/ /dge tshul dang ni 'og ma bzhin no/ /mi ldan na lhan cig tu'o/ /g.yog rnams bcangs te sbyin no/ /nye du bcugs pas gsol na thams cad du dben pa'i phyogs su'o//de gnyis las byin len byas pa 'jig pa dang / byin len ma byas pa dang 'dre ba bsrung bar bya ba nyid do/ /lhung bzed byin gyis brlabs te lag pa dag bsnyal du bcug nas so/ /mchil lham dang bcas bzhin du bza' bar mi bya'o/ /nad pas ni mnan te'o/ / sgren mo dang gos gcig pas mi bya'o/ /nad pa la ni ltung ba med do/ /de g.yog dag gis skyo bar bya'o/ /nus na rngul gzan la bsten par bya'o/ /gsang ba'i phyogs kyang ngo / /zan gyi phyir 'dug pas 'di'am 'di nas byin cig ces 'drim mkhan la go bar mi bya'o/ / nad pas 'phrod pa la ni ltung ba med do/ /dper na drod chung bas tshos pa dang drod che bas rlon pa lta bu'o/ /bdag nyid la nad pa'i 'du shes dang zas la sman gyi 'du shes nye bar gzhag ste bza' bar bya'o/ /dran pa yang ngo / /'byung ba dang 'dra ba dang 'gyur ba dang phyir rgol ba nyid dang /rgyu mthun pa dang brten pa'i rnam pa dang btsal ba dang gzhan la rag las pa nyid dang / nad pa dang bcas pa nyid dang / so sor 'gro ba nyid dag gis mi mthun pa nyid du gzhag go/ /dran pa nye bar gnas pas so/ /sems rnam par ma g.yengs pas so/ / shes bzhin gyi sgra bskyung zhing ngo / /de mi bya bar ro/ /mi 'byung bar thug pa dag go/ /khrum khrum mi bya bar ro/ /skra 'byung ba dag chu la sogs pas snyi bar bya'o/ /bza' ba de'i don du rol mo byed du mi gzhug go/ /bshad pa byas pa nyid du mi bya'o/ /de so sor rig par bya'o/ / dus yol bar 'gyur na tshigs su bcad pa gnyis sam gsum du'o/ /zos nas gtsug lag gi tshigs su bcad pa gdon no/ /zos nas mgron du bos pa la yon bshad pa dang chos bshad pa dag go/ /thams cad kyis zos zin pa nyid du nges par shes nas so/ / kun tu blta bas so/ /du ma nyid na dang pos so/ /mi nus na nus pa gzhan la bcol lo/ /gal te ma byas par dge slong rnams 'gro ba'i rkyen byung na 'khor tha na bzhi yan chad sbyin no/ /de la rkyen byung na sbyin bdag la zhus te'o/ /yon 'chad pa na dga' bo dang nye dga' dag gi ming smos par bya'o//mid pa gnyis pas dus ma yin pa'i sgregs pa dag dang por gnyis sam gsum bor te kha bkrus nas mid par bya'o/ /de ni zas ma yin pa ma yin no/ /de'i phyir gzhan gyis dus ma yin pa dang spangs pa'i tshe sgregs pa byung na kha bkru bar bya'o/ /ma bshams pa'i phyogs su mchil ma dor bar mi bya'o//byi dor byas par yang mi bya'o/ /sos lce btsir te yang mi bya'o/ /de dang de'i sgra dkon mchog dang bla ma'i drung du mi bya'o/ /za ba'i drung du yang mi bya'o/ /lhag ma'i drung du yang dang yang du mi bya'o/ /mi nus na gzhan du 'gro bar bya'o//gzhan la mi bde bar mi bya'o/ /sngur sgra can gyis nyal bar mi bya'o/ /des bcag pa'am gzhan du 'gro bar bya'o/ /de'i snod ni glang po che'i rmig mthil lta bu'am brtsegs ma'o/ /de nye bar gzhag par bya'o/ /der so phag gi phye ma'am thal ba dag gi gcal blugs so//sbrang bu dag bskrad pa ni gnyen po yin no/ /dri nga bar mi 'gyur ba dang srog chags 'byung bar mi 'gyur bar bya ba'i phyir dus dus su bkru ba dang bskam par bya'o/ /de'i dus kyi ched du gzhan nya bar gzhag go/ /mi brel bar bya ba'i phyir gtsug lag khang gi grwa ka ba bzhi po dag gi ngos su yang mchil ma'i snod dag gzhag par bya'o//rlung gi las sgra dang bcas par mi bya'o/ /dkon mchog dang bla ma'i mdun du mi btang ngo / /gzhan gyi mdun du yang dang yang du mi btang ngo / /shing ljon pa'i drung du bshang ba dang gci ba dag mi bya'o//dgon par de dag gi skabs med pa nyid yin na ma gtogs so/ /tsher ma can gyi yang ngo / /bshang ba'i bskyab bya'o/ /gal te gtsug lag khang du na nub bam byang gi ngos su'o/ /gsong ldong ngam phug rdugs so/ /'og tu shing tsher ma can dag bskyed par bya'o//steng du bu gu'i nye 'khor du rkang rten dag gzhug go/ /ril ba spyi blugs gzhag par bya'o/ /sgo bsnol mar gdod do/ /sgo glegs gzhug go/ /yang mig dang sgo gtan dag kyang gzhug go/ /'jug par 'dod pas sgra bya'o/ /der zhugs pas kyang thos na'o//gos legs par brdzes pas shes bzhin du 'jug par bya'o/ /dkyil du 'dug par bya'o/ /rkang rten gnyis la mi gos par khad kyis bya'o/ /mi 'ong na bsdad par mi bya'o/ /'ong na dgag par mi bya'o/ /de dang 'brel pa'i don las gzhan pas de'i drung du 'dug par bya'o//rkang pa bkru ba dang 'thor 'thung bya ba dag tu yang de bzhin no/ /dge skos kyis nyi ma re re zhing byi dor bya'o/ /sa dang lo ma bzhag pa yang ngo / /lo ma ni phyi bar bya ba'i bong rdog la sogs pa dag gi dpe yin no/ /phyogs ma yin par gci bar mi bya'o/ /du mar mi bya'o//rgyun gyi khung sgor gzhug go/ /gci ba'i bskyab bya'o/ /de'i glor ro/ /phug rdugs la wa gzhug par bya'o/ /gzhan ni 'dra'o/ /'khru ba'i nad can la ni khri'u'i bu gu bya'o/ /thags ma bshugs pas so/ /mi btub na bcad do/ /gal te na na than kor du lo ma'i chang bu dag gzhag go//sa snad pa bsrung bar bya'o/ /de'i phyir 'og gzhir gyo mo bya'o/ /ha cang mi mtho ba bzang ngo / /dri nga bar mi 'gyur bar bya ba'i phyir dus dus su bkru ba dang bskam pa dang yungs mar gyis bsku bar bya'o/ /de'i dus kyi ched du gzhan bsgrub bo//ma 'byor na gzhi nyid du lo chun gzhag par bya'o/ /bshang ba byas nas de byed pa'i bshang ba'i lam phyi bar bya'o/ /rnon po dang rtsa'i chang ba ma yin pas so/ /'di la ras ma dang lo ma'i chang bu dang shing dang bong rdog dag bzang ba nyid do/ /sa gnyis kyis bkru bar bya'o/ / sngar gzhag pa'i sa ma 'dres pa dag gis phyis bkru bar bya'o/ /'thor 'thung gi rkang rten dag zer ma dag gis mi nyams pa nyid du khad kyis dal bu dal bus so/ /bdun po dag gis g.yon pa'o/ /bdun gyis ni gnyis ka'o/ /lag ngar gnyis kyang bkru'o/ /yang lag pa gnyis sas bkru'o//gzhan gyis ril ba spyi blugs so/ /rkang pa gnyis bkru'o/ /lto 'dzag pas ni tha ma'i mdun dag tu phyi ba tsam du byas te 'dug pa la nyes pa med do/ /de las gzhan pas ni chu yod na 'thor 'thung ma byas par 'dug par mi bya'o/ /sman gyi gzhi phran tshegs la sogs pa'i skabs so//sman gyi gzhi rdzogs so// //cho ga las 'das na las mi 'chags so/ /'dir cho ga ni dge 'dun tshang ba dang las brjod pa dang las byed pa nyid do/ /las ni gsol ba dang brjod pa dang so sor thar pa gdon pa dang dgag par dbye'o/ / thos par bya ba ma yin pas thos pas ni mi 'chags par mi 'gyur ro/ /mi 'chags par mi bya'o/ /chos ma yin pas mi bya'o/ /mi mthun pa dag mi bya'o/ /tshogs kyis mi bya'o/ /dge 'dun du ma gyur pa dag gis mi bya'o/ /dbyung ba la ni nyi shu la sogs pa dge 'dun nyid do//bsnyen par ma rdzogs pa la ni bcu la sogs pa'o/ /mtha' 'khob dag tu ni med na 'dul ba 'dzin pa dang lnga la sogs pa'o/ /lhag ma ni bzhi la sogs pa'o/ /dge slong ma rnams kyi las ni tha dad pa nyid do/ /dgag dbye ni dge slong gi dge 'dun la yang ngo / / gso sbyong ni de dang mthun par grub pa rnams kyis so/ /'dun pa dang gso sbyong 'bul bas de bsgrub bo/ /'di la gnyis kyis bya'o/ /de gnyis nus pa nyid kyis so/ /med na gcig go/ /dge slong gi dge 'dun gyis len pa'i dge slong bsko bar bya'o/ /des sgo khang du bsdad par bya'o//'bros na shad kyis sbyang ngo / /des kyang de bzhin no/ /'bros par mi bya'o/ /mi shes na ming rus bri'o/ /mgu ba dang dbyung ba ni gnyis ka tshogs pa la'o/ /bsnyen par rdzogs par bya ba yang ngo / /'di la de dag gi tshogs ni bcu gnyis so//sngon rol gyi sdom pa gnyis dang 'khor dang 'khor mang po nye bar gzhag pa'i gnang ba sbyin pa dang bcas pa ni dge 'dun gyi mtha'o/ /lhag ma dag gi tshogs ni bzhi'o/ /las byed pa mos mi nus na des dge slong gis byas pa'i tshig nges par brtags na rung ngo / /'di ltar cang mi gsung bas zhes bya ba'i gong yan chad do//mi 'dug par 'greng ba ni kha skong ba nyid ma yin no/ /gang la bya ba yang ma yin no/ /de'i phyir 'dun pa dang yongs su dag pa'i cho ga las kyang ma yin pa nyid do/ /de gnyis dbul bar bya ba nyid ma yin no/ /dgag dbye byed pa nyid du mi bsko'o//bsnyen par ma rdzogs pa dang nyams pa dang mtshams med pa byas pa dang sdig pa'i lta ba can dang sa gzhan na gnas pa dang tha dad par gnas pa rnams kyang ma yin no/ /'khrul pa dang bcas pa yang ngo / /bsdam par bya bas kyang yin gyi/ bshags par bya ba 'ba' zhig gis yin par ma zad do//byin gyis brlabs pas dag pa nyid du 'gyur ro/ /nus pa nyid yin na mi 'gyur ro/ /de'i tshe len pa yod na ltung byed 'ba' zhig tu 'gyur ba dang / so sor bshags par bya ba dang phyir bcos par bya ba'i nyes byas ni nus pa nyid yin te bshags pa tsam yin pa'i phyir ro//ltung ba 'byung ba la ni 'du shes ji lta ba bzhin du bsgrub par bya'o/ /gcig la de ltar bsnyil ba dang mi bsnyil ba dang phyir bcos pa rnam pa du ma ni mi rigs pa kho na'o/ /de dag ni byed pa po nyid ma yin no/ /lhag ma dang bcas pa phyir 'chos pa la zhugs pa ni 'don par byed pa nyid yin no//de las gzhan pa de dag gis ni thos pa dang bcas par mi bya'o/ /ma spangs pa dang ma log pa ma gtogs so/ /gnas nas phyung ba ni rang gi las la yang ngo / /nang du dri ba'i phyir gsol ba la sogs pas bsnyen par ma rdzogs par bya ba yang ngo //de dag bya ba la lta ba'i nye 'khor du bzhag pas ni mngon sum du bsgrub bo/ /go bar bya ba ni rjes su bsgrags pa'o/ /smyos pa'i gnang ba phyag mi bya ba dang mi smra ba dang longs mi spyad pa dang gtsug lag khang gi sdom pa dag ni mngon sum du ma gyur par ro/ / gsol ba ma byas par de'i don du brjod par mi bya'o/ /de'i mtshams kyi khongs su gtogs pa kha skong bar 'os pa lus sam de la 'dun pas 'dus par rjes su ma zhugs pa nyid dang phyir zlog par byed pa yang gang la las de byed pa de las gzhan pa gal te mi mthun pa dang chos dang ldan na/spyod lam las ma nyams pa dang rang bzhin du gnas pa dang ngag yang dag par bsdams pas mngon par mi shes pa dang / nang dang bcas pa ma gtogs pa ni mi mthun pa nyid do/ /brdzun du smra ba'i rjes mthun pa nyid ni gang yang dag par ma bsdams pa'o/ /phra ma dang ngag rtsub po dang tshig kyal pa'i yang ngo //rang bzhin du gnas pa ma yin pa dag kyang de dag gi'o/ /gzhan yang bya ba ma yin pa'o/ /bya ba mi byed pa'o/ /de brtsams pa 'gro ba'i sems kyis btang ba ni spyod lam las nyams pa yin no/ /lta ba dge 'dun la brjod par mi bya'o//gzhan la'o/ /bsnyen par ma rdzogs pa la mi bya'o/ /kha skong bar 'os pa ma yin pa la yang ngo / /lhag ma lus pa nyid mi bya'o/ /bskos pa brjed nas ches legs pa dang ches mang du byed pa bsko bar bya'o/ /dus nges par byas te mi bya'o/ /yang dang yang du 'am gzhan la'o//gzhan la yang ji tsam gyis chog pa na spang ba sbyin no/ /bskos pa med na mdung dor bas bgo'o/ /gang kha skong bar mi 'os pa de dag mdung 'dor bar yang ngo / /dge 'dun gyi dbyen la yang 'os pa ma yin pas tshul shing dag brim pa mi 'chags so//las kyi gzhi gzhir gtogs pa'o// //brjod pa lhag pa dag gis ni ma byas pa nyid ma yin no/ /nyams na ma byas pa nyid do/ /byed pa nyid na song na tshig ma rdzogs pa rnam par 'khrug pa nyid do/ /las de la dge 'dun gyi tshad dag tu ma langs pa rnams ma lus pa nyid ma rdzogs pa'o//lus pa nyid na mi 'gyur ro/ /gal te de yang byed par 'dod na tshig gis rnam par dkrugs shing gsol bas dge 'dun la btsun pa dag yang gsol ba bgyi'o zhe 'am/ rjes su bsgrag go zhes bya bas so/ / bzlog pa'i phyir bgo ba dang bsnyil ba dang / de'i ngo bo nyid tshol du gzhug pa dang / bslab pa dang / mthun pa dang / de'i gso sbyong dang / mu stegs can gyi gnas pa dang / de las gzhan pa'i spo ba dang / mgu ba dang / yang gzhi nas bslang ba dang / dran pas 'dul ba dang /ma myos pas 'dul ba sbyin pa dang / bsnyen par rdzogs par bya ba dang / mtshams dgrol ba dang / nan tur gyi las dang / dbyung ba dag la brjod pa gsum mo/ /lhag por ma gtogs pa rang gi don gyi sngags brjod pa yang ngo / /gzhan gyi don du gang zag dag la yang ngo //lhag por yang mdun du tsog pur 'dug ste'o/ /zhu ba yang ngo / /bsnyen par rdzogs par byed pa na gsang ste bstan pa ma gtogs par pha gu la rting pa gnyis kyis so/ /bud med ni stan nang tshangs can la sogs pa la'o/ /gzhan gtso bo ma yin pa nyid la ni dge 'dun la rgan pa'i mthar ro//gzhan gyi don du ni 'greng ste 'dud pa dang bcas par ro/ /kha cig las gsang ste ston pa nyid ni lam gyi dbus nas shes so/ /rdzas byin gyis brlabs pa yang ngo / /rung bar bya ba ni de nyid do/ /de gzung ste de'o/ /lhung bzed dang sman ni lag pa g.yon par bzhag ste lag pa g.yas pas bkab ste'o//gzung bar bya ba ma yin pa nyid la ni mdun du bzhag ste'o/ /las ni 'dug pa nyid kyis so/ /dge 'dun nam gcig kho na la ma brten pa la ni gang zag dge slong la brjod par bya ba nyid do/ /chos gos dbyung ba dang byin gyis brlabs pa ni nye bar mi gnas na yid kyis rnam par brtags pas 'chags so//snga ma ma phyung na phyi ma mi 'chags so/ /gcig pus byin gyis rlob na de la dang por bsam pa bsgrub cing tshig tu brjod par bya'o/ /dge slong dag 'du ba nyid na bla gos phrag pa gcig tu byas pa nyid do//rang gi don du sngags lan gsum rjod par byed pa nyid na de'i 'os nyid na phyag byas te'o/ /gsang ste ston par yang ngo / /snam sbyar dang bcas pa nyid na bsnyen par rdzogs pa'i phyir 'dus pa la yang ngo / /dang por gsum mo/ /de'i don nyid du dang nyi ma brjod pa la thal mo sbyar ba nyid do//gal te gang zag gis rang gi don du brjod na gsol ba btab pas mjug tu thabs yin no zhes so/ /de'i rjes la cig shos kyis legs so zhes so/ /'dun pa dang zhe sdang dang gti mug dang 'jigs pas 'gro ba dang bral ba/ byas pa dang ma byas pa dran par nus pa spro bar byas te bsko'o//byas pa nyid na gnas pas brjod par bya'o/ /mtshams gcod pa nyid ni bcad pa dang 'dra ba nyid du shes par bya'o/ /sdud par byed pas gaN+DI brdung ba dang 'dri ba la brjod pa rjes su bsgrub pa dag gis bsdu bar bya ba dag la go bar bya'o//des de dag gi don du stan bsham mo/ /bskos pa'i bya ba de'i don nyid la ni de nyid do/ /thams cad la rgan rims su'o/ /blang bar bya ba la ni 'dod pa mchog nyid yin no/ /las phyir bstan pa'o/ /bsgo ba las byung ba phyir ma bcos pas las nyams su myong bar mi bya'o//gso sbyong dang dgag dbye dag ni ma gtogs so/ /mtshams gzhan na gnas pa ni gang gi yan lag nyid kyang ma yin no/ /der song na tshogs pa'i yan lag nyams so/ /gcig tu rkang pa ya gcig la gcig tu ya gcig na gnyis kar gnas pa nyid do//thams cad non pa la gnas pa non pa nyid do/ /du mar gnas par khas blangs pa la ni 'chags pa kho na'o/ /gnas mal du ma mnod par rig pa nyid do/ /des ci dgar gnas par bya ba nyid do/ /brgyal ba ni mi mthun par byed pa nyid ma yin no/ / kha skong bar byed pa nyid ma yin no/ /des bya ba las ma yin pas mi 'chags so/ /tshig phal cher byas pa nyid na byas pa nyid do/ /'og ma med pa la'o/ /mtshan ma dag ma brjod pa nyid ni ma bcad pa nyid yin no/ /spo ba byed pas ni nye bar gnas pa'i sdom pa las gzhan pa'o//smyon pas bton pa yang ngo / /dbyen rjes su bsgrub pa ni gsol ba dang 'dra'o/ /'di la mtshan mi mthun pa nyid ni yan lag ma yin no/ /bzhad gad kyi dngos pos ni gang gir yang mi 'gyur ro/ /mi 'chags pa'i blos dbyen byed pa dang gnas nas 'byin pa dag ni sbom po'o//dge 'dun du ma gyur pa nyid na nyes byas so/ /tha dad par gnas pa dag las gzhan pa kha skong bar 'os pa ma yin pa dag gi tshogs kyis gsol ba dang brjod pa dag ni ma yin no/ /rang gi 'os pa'i dge 'dun gyis nyams su myong ba ma grub pa nyid ni ma yin no//gsol ba thos na de grub pa nyid yin no/ /skal ba dang ldan pa'i rang bzhin can la mngag pa 'dra bas rab tu 'byin du 'jug pa ni cho ga ma yin pa ma yin no/ /mngag pa des de'i skabs rjes su bsgrub par bya'o/ /bud med la ni bud med dang skyes pas kyang ngo //skyes pa la ni skyes pa kho nas so/ /gsol ba dang khas blang ba dag de'i ming kho nas bya'o/ /bsnyen par rdzogs pa man chad gong ma yang ngo / /mi nod na sbyin pa nyid ma yin no/ /de la gsol ba nyams so/ /sngar bzhams te bsgo ba ni cho ga nyid yin no//gnas nas dbyung ba la yang de bzhin no/ /dgongs su gsol zhes bya ba la sogs pa la ni pha rol gyi sems gtad pa nyid gtso bo yin no/ /don gyi skabs dag gi go rims 'khrugs pas ni mi 'chags pa ma yin no/ /de ni mi bya ba nyid do//mtshan gzhan la brten pas ni ma yin no/ /dge slong dang dge slong ma nyid dag gis las gzhan byed pa ma yin no/ /las kyi gzhi zhu ba la sogs pa'i skabs so/ /las kyi gzhi rdzogs so// //gzhi ma zhi bar shes nas gleng ba pos so sor shes par byas shing mngon sum du 'jog pa la nan tur gyi las bya'o//gleng ba po rang ma byung na dge 'dun gyis blang bar bya'o/ /'du ba mi ster na grags pa tsam gyis so/ /ma mthong ba la ni khas len pa yan lag ma yin te/ yod pa nyid rnam par bshig pa'i phyir ro/ /skabs mi 'byed na yang mi rigs pa'i phyir ro//gleng ba po rang ma langs na bsko bas blang bar bya'o/ /gshe ba dang khro ba dang spyo ba nyid dang / dge 'dun gyi rnyed pa med pa dang gnas med par bya bar sems pa nyid dang / bla'i grwa dang 'og gzu dang nye du'i gang zag rten nyid dang / dge 'dun rten ma yin pa nyid du mi 'dzin pa dang /khyim pa dang mu stegs can gyi rgyal mtshan 'chang ba dang / mu stegs can la brten pa dang / cho ga ma yin pa spyod pa dang / dge slong gi bslab pa la slob par mi byed pa dang / skra 'greng bar gyur pa dang / skra 'phyar bar gyur pa dang /dge 'dun la spu snyol bar byed pa dang / 'byung ba bskyod pa dang mtshungs par nye bar ston pa dang / rgyu las phyir ldog pa dang / bzod pa gsol ba la'o/ /las sbyin pa dang dbyung ba dang bsnyen par rdzogs par bya ba dang gzhig pa dang bsrang ba yang ngo / /'thab krol byed pa la las kyis bsdigs par bya'o//dge 'dun lhag ma'i ltung ba phyir mi 'chos par rgyun du byed pa la ni smad pa'o/ /khyim sun 'byin pa la ni bskrad pa'o/ /de'i phyir 'du ba mi sbyin pa dang skabs mi 'byed pa dag la yang ngo / /de ma mthong ngo zhes zer na yang ngo / / khyim pa la brnyas thabs byed pa la ni phyir 'gyed pa'o/ /'di la bzod pa gsol ba'i las kyi gnas su de las bzod pa gsol du gzhug go/ /ltung ba grags pa phyir ma bcos pa bsdams pas phyir bcos su mi rung ba dang / ma mthong ngo zhes zer zhing phyir 'chos pa rjes su bsgrub par mi 'dod pa dang /sdig pa can gyi lta ba'i rnam pa mi gtong ba ni gnas nas dbyung bar bya'o/ /'di nyid du ltung ba 'di phyir bcos par gyis shig /dge 'dun 'di nyid kyis khyod bag yangs su byed par 'gyur ro zhes brjod par bya'o/ /ltung ba bcab par mi bya'o//tha na ming go bar bya ba nyid do/ /nyes byas ni gang yang rung bas so/ /rang bzhin du gnas pa la'o/ /lta ba tha dad pa la'o/ /bsnyen par rdzogs pa dang bcas pa la'o/ /mtshan mthun pa la'o/ /de nyid la 'di dang 'og ma dang bcas te'o/ / rab tu byung ba bsnyen par ma rdzogs pa dag ni bsnyen par rdzogs pa'i dge 'dun gyi yongs su bzung ba tsam yin pa'i phyir ro/ /chos 'di pa la de byas na byas pa nyid do/ /mtshams gzhan na gnas pa la yang ngo / /bsgo ba las byung ba rnams ni dge 'dun thams cad la'o//so sor bshags par bya ba ni gnas der tshogs pa la'o/ /tshe dang ldan pa dag bdag la smad pa'i gnas mi rigs pa so sor bshags par bya ba byung gi chos de so sor 'chags so zhes so/ /de ni sngags dang 'dra ba ma yin no/ /yid kyi de las ni bsdam pa bya bas ldang ngo //gzhan las de dang bcas pa'i bshags pa'o/ /de gcig pu lta ba tha mi dad pa la'o/ /kha na ma tho ba mi mthun pa la'o/ /sde tshan las so/ /med na ltung ba las so/ /spang ba las ni spangs pa dang bral ba sngon du btang ba las so/ / lhag ma dang bcas par gtogs pa'i sbom po lci ba las ni dge 'dun lnga la sogs pa thams cad la'o/ /lhag ma med par gtogs pa'i sbom po lci ba las ni ma bcad pa lhag pa la'o/ /yang ba de las ni bzhi la sogs pa la'o/ /mthar de la brtsal ba rkyen ma 'byor pa nyid na las byas pa dang 'dra'o//smyos pas byas pa des phyir sangs pa na 'du shes pa ni nyes byed dang 'dra ba nyid do/ /ming dang rigs dang ldan par brjod na ltung ba las so/ /dge 'dun lhag ma la ni dus 'di srid cig bcabs pa nyid dam ma bcabs pa nyid dang ngo / / de las blang ba byed pa ni dbyung ba'o/ /dge 'dun las zhag drug mgu bar bya ba mnos te bcad pa'o/ /dge slong mas ni zla ba phyed do/ /lci ba'i chos las 'das na yang de spyad par bya ba nyid yin no/ /bcabs pa'i nyes pa med na de 'chags so/ /spo bas de med par 'gyur ro//dge 'dun las dus de srid de mnos te'o/ /de gnyis byed pa nyid na dge 'dun lhag ma de byung na mnos te byas pa de gnyis zhig pas de'i phyir gzhi nas brtsams pa nyid sbyin no/ /brtsams pa ni mthar thug par bya ba dang 'dra'o/ /de'i phyir ma chags na de'i tshe dang po yang tha dad par blang bar bya ba nyid do//bar ma de phyir bcos par bya'o/ /de'i phyir de'i don du yang brten par bya ba nyid do/ /de bcabs pa'i dus lhag pa yang der gzhug pa nyid do/ /de gnyis las kyi sbyin no/ /dbyung ba yang ngo / /der bsdigs pa yang ngo / /gsol ba dang las brjod pa dang po'i bar du'o//rtswa bkram pa lta bur 'gyel ba la'o/ /gzengs bstod pa yang ngo / /brjod pa byas ma thag tu'o/ /phyir bcos pa'i gzhi gzhir gtogs pa'o// //tshul khrims 'chal pa bskrad par bya'o/ /'di la dge 'dun dbang ngo / /de des yal bar mi dor ro//bsnyil ba la bzod par bya ba nyid do/ /nan tur byed pa dag gis ma bskos na nan tur byas pa la bzod pa mi 'chags so/ /bskrad pas sun phyung ba'i gnas su gnas par mi bya ba nyid do/ /gnas nas phyung ba thams cad la gnas par bya ba ma yin pa nyid dang longs spyad par bya ba ma yin pa nyid do//'di la 'du shes kyis rnam par gzhag go/ /bye ba nyid na de gnyis chos ma yin pa'i phyogs dang cig shos su yin gyi cig shos dang ni ma yin no/ /nan tur byas pa gzhan dag la de gnyis mi bya'o/ /des 'grogs bshes la brten te gnas par bya ba nyid do//nan tur byas pas sam nyams pa bskrad par bya bas 'gyur ba brten na yo byad kyang chung ste dor ro/ /mthus kyang bskrad par bya'o/ /'jug pa gcad par bya'o/ /de sdig pa'i chos can ma yin na dbyung ngo / /dge 'dun gyis phyir bcos so//bcol te'o/ /ma grub na gtsug lag khang gi rdzas kyis so/ /'thab krol byed pa bskrad pa ni gzung bar mi bya'o/ /'thab krol las 'bad pa ma log na nye bar zhi bar bya ba'i phyir gnas nas dbyung bar bya'o/ /rnam par gtan la 'bebs pa las gyur pa las nye bar zhi bas so//gnas pa la gnas kyis 'bad par bya'o/ /'thab krol gyi rgyu nye bar bsgrub pa yang gnas nas dbyung bar bya ba nyid do/ /dge slong ma rnams dang 'dre zhing gnas pa la yang gnas nas dbyung bar bya'o/ /'dis gnas nas phyung ba la dge slong mas phyag bya ba'i 'os ma yin pa'i sdom pa bya'o//nan tur gyi rgyu gzhan la de'i don du bsam pas gzhan byed pa ni 'chags so/ /gzhan du na mi 'chags so/ /gzhan la nyams so/ /gnas nas phyung ba la ni mi 'chags so/ /shes pa dang bsod nams chen po dang mdo sde dang 'dul ba dang ma mo 'dzin pa dang thos pa dang phyogs dang 'khor mang ba dag la ni sbom po'o//khyim pa ni dpe'o/ /de dge slong la sogs pa lnga po dag la brnyas thabs byed pa la yang phyir 'gyed pa'o/ /khro ba ni brnyas thabs ma yin pa ma yin no//nan tur gyi las dag thun mong ma yin par dogs par mi bya'o/ /rab tu byung zhing bsnyen par ma rdzogs pa la yang de dag bya ba nyid do/ /khyim pa la mi bya'o/ /dge slong la pham par 'gyur ba yang dag pa ma yin pas skur pa dang gshe ba dang spyo ba la lhung bzed khas dbub par bya'o//rnam par gzhag par bya bas so/ /gsol bas so/ /lhung bzed khas sbubs pa'i khyim du 'gro bar mi bya'o/ /stan la 'dug par mi bya'o/ /sbyin par bya ba'i chos bshams pa la yongs su longs spyad par mi bya'o/ /bsod snyoms blang bar mi bya'o//chos bstan par mi bya'o/ /gang du las bya ba der gtogs pa dag la lhung bzed khas sbubs pa yin no/ /tha na gnas nas phyung ba phan chad rang gi phyogs dang mthun pa ma yin pa'i khyim du de mi 'chags so/ /de 'ga' zhig gis go bar bya'o//bzod pa gsol ba dang ldan na gsol bas bzlog par bya'o/ /bcabs pa'i sems ma skyes na mtha' las ldang bar 'gyur ro/ /bslab pa spyod pas so/ /de thob pas so/ /dge 'dun las so/ /las kyis sbyin no/ /ji srid 'tsho ba'i bar du'o/ /ngo tsha dang ldan pa dang /mdo sde 'dzin pa dang / 'dul ba 'dzin pa dang / ma mo 'dzin pa dang / shes pas ni gcig gi mdun du bshags pas dge 'dun lhag ma las ldang ngo / /bsam pas ltung ba las ldang gi chad pa'i las kyis ni ma yin no/ /'dir ming ni ltung byed kyi sde tshan las ming ngo //dbyung ba ni rigs so/ /phyir bcos pa'i gzhi zhu ba la sogs pa'i skabs so/ /phyir bcos pa'i gzhi rdzogs so// //'di la dge 'dun lhag ma mi shes pa nyid dang / bcabs pa'i sems ma bzhag pas brjed pa dang / byas sam ma byas ci zhig ji lta bu zhig ces dran par mi nus pa nyid dang /bsnyen par ma rdzogs pa nyid dang / gnas nas phyung ba nyid la 'chab pa mi 'byung ngo / /tha snyad du rung ba'i 'du shes las nyams pa nyid la ni pham par 'gyur ba man chad kyi ltung ba yang mi 'byung ngo / /ma bcas pa nyid la yang ngo //mi shes pa nyid la ma yin no/ /mngon par yid mi ches pa nyid la yang ngo / /mngon par mi shes pa nyid du 'du shes pa yang ngo / /sa gzhan na gnas pa nyid la ni snga ma yang ngo / /'chab pa la dge 'dun lhag ma nyid la yid gnyis za ba ni shes pa dang 'dra'o/ /sa gang la 'chab pa mi 'byung ba de spyad pa yang ngo //ma gus pas spyod pa gtong na nyes byas so/ /de la de'i sde pa lhag par spyod pa yang ngo / /yod la phyir mi 'chos na yang ngo / /mi spyod pa'i sa nas phyir 'ongs pa ni de'i gnas skabs nyid yin no/ /sbyangs pa'i gzhi la lhag ma rjes su bsgrub bo//bcabs pa'i dus nges par mi shes na nyung ba nyid du mi 'gyur ba la brten par bya'o/ /spyad par bya ba nyid la dag pa'i mtha' can nyid kyi bye brag gi'o/ /dag pa'i mtha' can zla ba bzhi la'o/ /bcabs pa ni dpag tu med pa la'o/ /bsams bzhin du khu ba phyung ba las byung ba dpag tu med par zhes so//'di la ji snyed sems pa de snyed du gtogs pa nyid rjes su bsgrub bo/ /nges par mi shes na de dpag tu med pa la brten par bya'o/ /mang po nyid la ni tshad shin tu mang po dang ldan pa zhes bya'o/ /dus rnams ni lhags pas so//ming dag la ni sogs pa dang ldan pa nyid du'o/ /lci ba nyid dang bsam pa drag pos byas pa nyid dag ni dang po nyid du'o/ /spyod pa la sngon byung ba gzhan phyir gso bar 'dod pa skyes na tha dad par sbyin zhing cig car spyad do/ /de bcabs pa nyid yin na mgu bar bya ba mi srid do//dus dang dus ma yin pa bsdus pa 'byung ba'i gzhi'o// //nyin mtshan gyi tha ma'i cha yin pa la 'chab pa mi 'byung ngo / /brjod pa'i yan lag med na de'i sems ma yin pa nyid 'chab pa ma yin no/ /bgrod du med dam song ba'i dbang ni med pa dang 'dra ba nyid do//de'i don gyi dbang gis byas pa yang ngo / /don med pas ni nyes byas so/ /mtha'i mdun rol du yang ngo / /'chab pa'i sems ma btang ba nyid ni de'i sems nyid yin no/ /dge slong pham par gyur pas ltung ba phyir ma bcos pa la nyes pa med do//dus dang dus ma yin pa bsdus pa 'byung ba'i gzhi zhu ba'i skabs so/ /dus dang dus ma yin pa bsdus pa 'byung ba'i gzhi rdzogs so// //spo ba dang mgu bar bya ba spyod pa dag gis dge slong rang bzhin du gnas pa las mngon par smra ba dang phyag dang mngon du ldang ba dang thal mo sbyar ba dang gus pa'i las dag bdag gir bya'o//de gnyis kyis mi bya ba yang gang yin pa de'i gnas skabs gzhan dag gis kyang de dag la'o/ /de dang lhan cig tu gom pa bsri ba nyid las gzhan pas bcag par mi bya'o//stan ches dma' ba nyid las gzhan pas 'dug par yang ngo / /phyi bzhin 'brang ba'i dge sbyong gi bdag nyid las gzhan pas khyim gzhan du 'gro bar yang ngo / /g.yogs ma gcig tu mal bsham par mi bya'o/ /rab tu dbyung ba dang bsnyen par rdzogs pa dang gnas sbyin pa dang dge tshul nye bar gzhag pa dag mi bya'o//gsol ba dang brjod pa dag khas mi blang ngo / /las byed pa dang dge slong ma'i ston pa dang dge 'dun gyi yid brtan par bsko ba yang ngo / /sngar bskos pas kyang mi bya'o/ /dge slong ma rnams la bstan par yang mi bya'o//'don pa gzhan yod na gso sbyong la so sor thar pa gdon par mi bya'o/ /dge slong la nyams pas gleng bar mi bya'o/ /dge 'dun las ma bkar ba la'o/ /brjod pa dang bcas pa nyid dang phur pa bcas pa nyid dag mi bya'o/ /gdams ngag dang gso sbyong dang dgag dbye dang gsol ba dang brjod pa dag gzhag par mi bya'o//de dang brten par mi bya'o/ /chad pa de'i rgyu byed pa spang ngo / /nyes pa gzhan yang ngo / /tshangs pa mtshungs par spyod pa rnams la nyes pa dang mthun pa nyid mi bya'o/ /brtul zhugs snying po med par 'gyur ro snyam du yid la bya'o//nang par sngar langs te sgo dbye ba dang mar me'i kong bu bsal bar bya'o/ /gtsug lag khang du chag chag dang phyag dar dang lci ba 'jam po'i byug pas bsku ba dag kyang ngo / /bshang ba dang gci ba'i skyabs dag sbyang ngo / / sa chag pa dang dus dang mthun pa'i chu dag gzhag par bya'o/ /wa'i kha dag bsal bar bya'o/ /stan bsham mo/ /dus shes par byas te bdug spos dang de'i pog phor dag nye bar gzhag go/ /gal te nus pa nyid yin na ston pa'i yon tan yang dag par bsgrag go/ /gal te mi nus na smra ba po la bcol lo//spyi bungs bshams pa na gaN+DI brdung ngo / /gal te dge slong rnams tsha na bsil yab bya'o/ /de dag gis 'dug pa la sogs pa ni bsnyen par rdzogs pa thams cad kyi mtha' nyid do/ /zas kyi bya ba byas nas stan cha dben par brtul lo//lhung bzed kyi gzhi dor ro/ /dus shes par byas te mchod rten dag gi phyag dar bya'o/ /lci ba 'jam po'i byug pas bsku'o/ /'du ba'i dus su stan bsham pa la sogs pa nas yon tan gyi skabs kyi bar dag go/ /gal te nus pa nyid yin na nyi ma brjod pa yang ngo //gal te mi nus na dge slong gzhan la bcol lo/ /dgongs kar dus dang mthun pa'i chus dge slong rnams kyi rkang pa dag bkru'o/ /rkang pa dag la bsku'o/ /mi 'dod na snum dbul lo/ /de ni gtsug lag khang tha mar 'os pa nyid yin no/ /thams cad rnyed pa dbang ba nyid yin no//dge ba'i phyogs la mi g.yel bar bya'o/ /'di la de'i ngo bo nyid tshol ba byin pa dang bslab pa byin pa dag kyang de dang 'dra'o/ /gdon par mi bya'o/ /snga ma ni bzod pa gsol bas rang bzhin du gnas pa 'thob bo/ /'og ma ni dgra bcom pa nyid kyis so/ / sgo dbye ba yan chad gtsug lag khang la sogs pa la spo ba dang ldan pa dang spyad pa dang ldan pa gnyis kyang ngo / /bsdigs pa dang smad pa dang bskrad pa dang phyir 'gyed pa dang gnas nas phyung ba dag kyang de bzhin no/ /gdon pa ni mi bya ba nyid do/ /gzhan dag gis gnas nas phyung ba spang bar bya ba kho na'o//de'i dus nyid kyis rgyu las byung ba'i rnyed pa yang mi dbang ba nyid yin no/ /bye ba bzhin no/ /bye ba dag ni chos ma yin pa'i phyogs dang mthun pa yang de dang 'dra'o/ /rang bzhin du gnas pa ma yin pa dag la spo ba dang mgu bar bya ba dang slob pa spyod pa dag mi 'chags so//dge 'dun ma yin pa la yang ngo / /gnas de na 'khod pa dag las yongs su bcad pa dag la yang ngo / /mang po nyid yongs su spang bar mi bya'o/ /gnas brtan dang so sor thar pa dang bcas pa nyid du 'bad par bya'o/ /gang na gzhan gsum la sogs pa de dag gis ming rnams thams cad spyod pa der de spyad par mi bya'o//dang po gnyis kyis gzhan du skya rengs 'char bar mi bya'o/ /'dus pa'i dge 'dun las 'das pa dang 'byung bar 'gyur ba brjod par bya ba nyid do/ /gal te yun ring du spyad par bya ba nyid ma yin na nyin re zhing ngo //'di la gsum mam bzhi zhing ngo / /de gnyis la don des brnyas thabs mi bya'o/ /'thab krol byed pa 'ong ba thos shing / gal te des 'jigs na dge 'dun tshogs pa'am gang zag la phyir gtang bar bya ba nyid yin no/ /'jigs pa dang bral na de nyid du phyir blang bar bya'o//sa gzhan na gnas pa'i spyod pa'i gzhi'o// //spo ba dang mgu bar bya ba spyod pas rang bzhin du gnas pa dang lhan cig tu g.yogs ma gcig par nyal na nyin mtshan de bcad do/ /mtshams kyi phyi rol du yang ngo / /ma brjod na yang ngo //thos par bya ba dag mtshams de na nye bar mi 'khod na de mi 'byung ngo / /nyi ma de nyid la phyir 'ongs na mtshams gzhan du 'gro ba la nyes pa med do/ /spo ba byed pas spo ba byed pa dang lhan cig g.yogs ma gcig par nyal bar mi bya'o/ /de dang mu stegs can gnas pa la gnas pa dang der lhan cig pa la ni nyes pa med do//sa gzhan na gnas pa'i spyod pa'i gzhi zhu ba'i skabs so/ /sa gzhan na gnas pa'i spyod pa'i gzhi rdzogs so// //ma grags pa ni gzhi nyid ma yin no/ /dgag dbye brjod pa rdzogs na dgag dbye bzhag pa mi 'chags so//byed pa po nad pa dang ldan pa nyid la de bzhin no/ /mngags pas kyang ngo / /nad pa nyid la yang ngo / /de gnod par mi bya'o/ /tshe dang ldan pa nad pa ni sbyor ba mi bzod pa yin gyi/ khyod sdod cig ce'am/ tshe dang ldan pa pho nya nad pa de la ni rgal zhing brtag pa ma yin no zhes lan gdab par bya'o//byas pa dang byed pa'i rang gi ngo bo ma rtogs pa nyid na yang gleng ba mi 'chags so/ /lhag mas kyang dus ma yin par 'jug par mi bya'o/ /dran pa dang shes bzhin nye bar ma bzhag par mi bya'o/ /mtha' ma yin par mi bya'o//skabs 'byed du ma bcug par mi bya'o/ /dgag dbye ni de nyid yin no/ /mi dran na dran par bya'o/ /de mi byed na de la brjod pa dang bcas pa nyid bya'o/ /tshe dang ldan pa khyod la brjod pa dang bcas pa nyid byas kyi/ khyod kyis gnas 'di nas ma zhus par 'gro bar mi bya'o/ / kho bo la tshe dang ldan pa la brjod pa'i phyir bsngogs pa yod do zhes so/ /des dul bar mi 'gyur na mi gdams pa nyid du'o/ /de la gtam 'dre ba la sogs pa yang bzlog par bya'o/ /de lta na yang gso sbyong bzhag go/ /des kyang na dgag dbye'o/ /'jog par byed pa dag gis gzhag pa de dang lhan cig tu bya ba yang 'dir bzod pa yin no//skabs phye ba nyid na gal te mnyan pa nyid ma yin na phung ba dang bcas pa bya'o/ /gnas 'di 'am gzhan du 'am gzhi 'am gang yang rung ba la 'dod pa smra bar bya'o/ /zhes bya ba dang / ltung ba bkal zhing nyes pa bstan te btang bas so//tshul khrims dang lta ba dang cho ga dang 'tsho ba nyams pas gling ba la sogs pa de dag thams cad byed pa na gzhi dang bcas pas 'chags so/ /gzhi legs pa ma yin pas mi bya'o/ /'di la dngos po las bden pa nyid kyis rgyu ma yin no//thos pa ni rnam pa gsum ste/ bya ba'i mtshan ma dang / gzhan phebs par smra ba dang / rang gi rjes su thos pa'o/ /yid mi ches pa ni gzhi ma yin no/ /yongs su sbyang ba'i gzhi'o// //shes pa du ma nyid yin na gleng ba la sogs pa 'dod pas so//dgag dbye ma yin par de bzhag par mi bya'o/ /gso sbyong ma yin par de mi bya'o/ /'jog par byed pa bud med nyid kyis gzhan skyes pa'i gzhag pa nyid byed dam byas pa nyid na gzhag pa nyid ma yin no/ /rang bzhin nyams pas kyang ma yin no/ / tshul khrims med pa dang gcig pa nyid ma yin pas kyang ma yin no/ /de gnyis kyis kyang ma yin no/ /yongs su sbyang ba'i gzhi zhu ba'i skabs so/ /yongs su sbyang ba'i gzhi rdzogs so// //dge 'dun tha dad pa nyid du nus pa la mi 'dod par gleng ba dang gleng bar byed pa na log par mi bya'o//'da' bar bya ba gang na mi mthun pa yod pa de dang lhan cig tu 'khod par mi bya'o/ /gzhan du ni go gnyis sam gsum gyi bar du bcad do/ /des cig shos dang yang de bzhin no/ /de gnyis kyi gtsug lag khang bar du chod pa sbyin par bya ba nyid dang mnod par bya ba nyid do//chos dang 'dul ba la gal te de dang ldan par shes nas chos ma yin pa la mngon par zhen pa la dge 'dun mthun pa med do/ /de'i phyir de las gzhan pa dag dang tshogs te/ las byas na yang mi 'chags la phan tshun mi mthun pa nyid du yang mi 'gyur ro/ /de dag de'i mi mthun pa'i phyogs dang 'thab par gyur pa nyid na chos 'di pa dag gis phyag mi bya ba nyid yin no//mngon du ldang ba dang stan la bod pa dang gtam 'dre ba dang phebs par smra ba dang kun dga' bar 'gyur ba dang rnam par lta ba dang cung zad lta ba dag kyang mi bya'o/ /lag pa'i tha snyad kyis gnas mal ngan pa rjes su sbyin no//kha cig las ni tshig gis thos pa dang bcas par gzhan la'o zhes so/ /gtsug lag khang 'jug tu'o/ /kho bo cag rgan no zer na khyed cag kyang bdag cag shAkya'i sras kyi dge sbyong dag yin no snyam du bdag nyid khas 'che'am/ khyed cag gang dag gi spyod tshul 'di lta bu dang gtam 'di lta bu la 'di yang mi 'thob pa yin na khyed kyi ston pa thugs rje dang ldan pas des na 'di rjes su gnang ngo zhes gzhan la lan gdab par bya'o//dge slong mas stan las ldang ba dbri bar mi bya'o/ /dge bsnyen gyis bsod snyoms dbul bar bya'o//bzod pa byas pa de dag la mthun pa thob pa med par mthun pa mi 'byung ngo / /gso sbyong med par rang bzhin du gnas pa nyid mi 'thob bo/ /de byin nas bya'o/ /de ni las kyis so/ /snga ma yang ngo / /mthun pa dang bkra shis dang gnod pa byung ba'i don du gso sbyong byar rung ngo //'di la dus de kho na'i rgyu nyid du'o/ /las bye ba'i gzhi'o/ /chos ma yin pa smra ba dag gis dbye ba'i sems kyis mtshams kyi nang du las tha dad par byas na de bye ba yin no/ /'di la so so'i rang gi las 'chags so/ /rang gi phyogs dang mthun pa ma yin pa la ni mi 'chags so//dge 'dun gyi ni chos smra bas byas pa nyid na byas pa nyid yin no/ /'di la gal te gzu bo dag yod na dge slong ma rnams la bstan par bya ba nyid yin no/ /de dag gi ni chos kyi phyogs dang mthun pa dag gis mi mthun pa nyid do/ /rjes su zhugs na de nyid nyams so//de mi bya'o/ /dge slong ma'i dge 'dun phyogs dang gzhan gyi phyogs su rnam par gnas pa la gdams par bya ba nyid yin no/ /bye ba la ni de lta ma yin no/ /gsol ba na mthun pa nyid la nges par sbyar bar bya ba nyid yin no/ /dbyar gyi rnyed pa ni chos smra ba dbang ba nyid do/ / gnyis ka 'dus pa la bye brag tu ma byas par bgo bsha' bya ba dge 'dun la phul ba yang ngo / /de la gal te dge 'dun gyi tshad nyid yin na de dag go/ /gal te nyung ba nyid yin la cig shos ni de nyid yin na gang gis pang par phul ba'o/ /gal te gnyi ga'i na gnyi ga 'o/ /de la gang zag las cha nyid yin gyi dge 'dun las ma yin no//las bya ba'i gzhi zhu ba dang bram ze'i bu mo'i skabs so/ /las bye ba'i gzhi rdzogs so// //dge 'dun gyi dbyen ni chos las tha dad pa'i dngos por gsol bas sam don des tshul shing len du 'jug pas so//dbye bar bya ba dag dge 'dun gyi tshad nyid ma yin pa dang / mtshams kyi nang na gzhan dge 'dun gyi tshad dag kyang med pa yin na de ni mi 'chags so/ /chos dang chos ma yin pa gnyis ka de bzhin du shes na mtshams med pa'o/ /dbye ba la chos su 'du shes pas kyang ngo //'khor lo dbye ba'i gzhi'o// //'dul ba'i mdo bam po dgu pa/ 'khrug long gi rgyu bzhi'o/ /dngos po'i de bzhin nyid la log par bsgrub pa dang / spong ba dang / ltung ba dang / bcas pa nyid dang / las la mthun pa mi sbyin pa'o/ /rgyu dang po las byung ba ni rgyud gcig tu byas pas nye bar zhi'o//rgyu gnyis pa las byung ba ni 'di dang dag pa sbyin pas so/ /rgyu gsum pa las byung ba ni phyir bcos pa dang nges par 'dzin pa la sbyar ba nyid sbyin pas so/ /tha ma ni sbyin du gzhug pas so/ /'gyed pa gnyis rang gi mi nus na tshogs par dbyung ba dag gis legs par bsgrub bo//dge slong dag gis so/ /'drang ba dag gis so/ /de gnyis so/ /gcig yan chad kyis so/ /gzu bo dag la 'drang bar bya'o/ /de dag dge 'dun gyis gtan du bsko'o/ /'dir 'thab mo mi bskyed pa bsko bar bya ba nyid do//ngo tsha shes shing bslab pa 'dod pa'o/ /'dul ba la shin tu rnam par nges pa'o/ /rtsod pa byung ba spyod pa la mkhas pa'o/ /rnam par zhen pa'o/ /brtan zhing nyes rtsom med par 'jug pa'o/ /snyoms pa'o/ /brda phrad pa'o/ /brda sprod par byed pa'o/ / mkhas pa'o/ /de dag gis nye bar ma zhi na dge 'dun la dbul lo/ /des ma nus na gsal ba dag bsko'o/ /dge 'dun gyi tshad las mi nyung ba dag go/ /sde tshan des ma nus na rang gi gsal ba dag bsko ba nyid do/ /ma nus shing gzhan mi byed na gang las blangs pa de la dbul lo//phyir 'ongs na dge 'dun bzhi pos rtsod pa sbed pa bsko'o/ /des gnas brtan dang bcas pa'i dge 'dun gzhan la dbul lo/ /sngar byung ba brjod dus zla ba gsum du dbul lo/ /de ni de'o/ /phyir phul ba na des mdo sde dang 'dul ba dang ma mo 'dzin pa dag la'o//zla ba drug tu'o/ /de dag gis gnas brtan mthu dang ldan pa la'o/ /thug pa med par ro/ /des de gnyis las bdag gir bya ba tha na 'dag rdzas dag dang so shing yan chad cung zad kyang spang bar bya'o/ /lhan cig 'greng ba dang 'dug pa dang / lhan cig 'chag sar 'chags pa dang gtam 'dre ba dang phebs par smra ba yang ngo //rjes su 'brang na de dag la 'di skad ces tshe dang ldan pa dag khyed cag legs par gsungs pa'i chos 'dul ba la rab tu byung nas 'thab par gyur/ mtshang 'dru bar gyur/ rtsod par gyur/ 'gyed par gyur cing gnas pa ni ma rnyed de rnyed pa ma yin no/ /nyes pa rnyed kyi legs par rnyed pa ma yin gyis tshe dang ldan pa dag ma 'thab shig /mtshang ma 'dru zhig /ma rtsod cig /ma 'gyed cig /'gyed pa gnyis ka rgyal ba med do/ /rgyug pa gnyis ka rgyal ba med de gcig rgyal gcig pham du 'gyur ro zhes brjod par bya'o//ches mang ba'i blos legs par gzhag pa ni legs par sgrub pa'i rnam pa gzhan yin no/ /'di ni chos rnam par gtan la dbab pa la srid kyis tshul khrims rnam par gtan la dbab pa la mi srid do/ /de'i skabs kyi shes pa ni 'gyed pa gnyis dang 'brel pa yin pa'i phyir ro//rgol ba dang phyir rgol ba dag gis gces par bzung ba nyid dang / rab tu dam pa nyid dang / mi bzad pa nyid yin zhing de dag dbye bar dogs pa nyid kyis de la brten par bya'o/ /bsdam par bya ba nyid ma yin pa'i don la'o//gnas brtan gyi mthar thug pa dag yongs su nyon mongs par gyur pa dag la'o/ /dge 'dun bzhi pos so/ /'di la tshul shing 'brim pas blos gzung bar bya ba nyid do/ /tshul shing 'brim pa la bsko bar bya'o/ /des tshul shing rnam pa gnyis dag nye bar gzhag go//chos kyi tshul shing dag ni ya yo med pa dang khyar khyor med pa dang chas chus med pa dang kha dog bzang ba dang dri zhim pa dang reg pa 'jam pa nyid dag yin la cig shos kyi ni bzlog pa'o/ /dge 'dun la 'du bar gsol lo/ /tshul shing 'brim par 'gyur gyis thams cad kyis 'du bar bya'o zhes so//gal te de ltar 'dun pa sbyin pas tshogs pa na chos ma yin pa'i tshul shing lhag par 'gyur bar sems na brim par mi bya'o/ /'brim pa'i tshe lag pa g.yas pas chos kyi tshul shing dag gzung zhing g.yon pas cig shos dag go//de dag g.yogs te snga ma dag snang bar byas nas brjod par bya'o/ /gnas brtan 'di dag ni chos kyi tshul shing ya yo med pa khyar khyor med pa chas chus med pa kha dog bzang ba dri zhim pa reg pa 'jam pa dag yin gyis long shig ces so//cig shos tshol na tshig gnyis kyi bar du mi dbul lo/ /g.yogs sam phye ba gang gis chos kyi mang bar 'gyur ba de ltar brim par bya'o/ /tshe dang ldan pa khyod kyis mkhan po dang slob dpon dang mkhan po gcig pa dang slob dpon gcig pa dang gtam 'dres pa dang phebs par smra ba dang smon 'grin dang 'grogs bshes kyis chos kyi tshul shing blangs kyis khyod kyis kyang chos kyi tshul shing long shig/khyod de dag dang lhan cig rtsod par gyur na ma legs so zhes rna drung du gshub bo/ /chos ma yin pa'i tshul shing blang bar mi bya'o/ /mdo sde dang 'dul ba dang ma mo 'dzin pa dag ma dris par mi bya'o//dbyen du 'gyur ba'i bzod pas mi bya'o/ /chos ma yin pas mi bya'o/ /de gnyis 'byung bar 'gyur ba nyid du shes na mi bya'o/ /mnyam pa nyid na nyan thos chen po'i phyir chos kyi tshul shing gcig blang ngo / / chos ma yin pas nye bar zhi ba la skyo sngogs mi bya'o/ /gleng ba'i kha na ma tho ba med pa la ni dag pa sbyin no/ /gleng ba ni rnam pa bzhi ste/ gzhi med pa dang / gzhi gzhan rjes su bsgrub pa'i dbang gis dang / phyir bcos pa la mi ltos pa'i phyir dang / smyon pas byas pa'o//dang po gsum la ni dran pas 'dul ba sbyin no/ /tha ma la ni ma smyos pas 'dul ba'o/ /ltung ba dang bcas pa nyid kyi phyir 'khrug long rnam pa gsum ste/ phyir 'phros pa med pa dang / phyir 'phros pa dang bcas pa rnam pa gnyis po nyi tshe ba dang / dge 'dun mtha' dag dang 'brel ba'o//dang po las ni khas blang ba'i bya bas phyir bcos so/ /gnyis pa las ni mngon sum gyis 'dul bas so/ /gsum pa las ni rtswa bkram pa lta bus so/ /'di la mang po dag gi don du dge 'dun ma yin pa la bshags par bya ba dag ni gcig gis phyir bcos par bya'o//du ma dag cig car du yang ngo / /gang yin pa zhes smos pa dang shes pa snang bar bya bas so/ /phyogs gzhan gyis kyang mthun par gyur na'o/ /khas mi len pa dang don med pa la ni bshags pa mi 'chags so/ /lhan cig gi dngos pos gleng ba nyid du rung ngo //gleng ba po nyid kyang de bzhin no/ /'di la grangs kyi bye brag ni nges pa med do/ /gleng ba pos lus dang ngag dag gis bsdams pa nyid dang / sde snod dag shes pa nyid dang / dge 'dun gyi nang du bsams bzhin du chos dang 'dul ba la log pa dang / de las bzlog pa dag mi ston pa nyid ces bya ba gsum dang ldan pa la gus par bya'o//tshul khrims 'chal pa dang log par ston pa la mthun par mi bya'o/ /rnam pa de lta bu ma yin pa sde snod dag 'dzin zhing mi shes pa la ni slon gdab par bya'o/ /de la bsam pa rtogs par bya ba'i phyir rgal zhing brtag par bya'o//gnas su mi gzhag pas so/ /gnas ni dus dang yul dang spyod lam dang rjes su bsgrub pa dag go/ /gnas gzhan du 'pho ba dang rnyog pa can du gyur na gleng ba ni 'chags so/ /gleng bas khas blangs na mthar thug pa yin no/ / smra ba po bden pa mthong ba nyid dang yon tan las ches mchog tu gyur pa khyim pa yin yang rung gzhan tshad mar bya'o/ /gzhan dang bcas pa nyid yin na tshig bstun par bya'o/ /the tshom nyid du gyur na shes pa nyid ma yin no/ /de las nges par gyur pa ni khas blangs pa dang 'dra'o/ / ltung ba'i phyir rtsod pa 'di la de'i ngo bo nyid tshol ba dang mthun pa sbyin par bya ba nyid do/ /nges pa dang bral ba ni khyad du gsod pa yin no/ /dge 'dun la khas blangs nas khyad du gsod na nges par 'dzin du gzhug pa'i phyir nges par sbyor ba sbyin no/ /de ni de'i ngo bo nyid tshol ba la phan pa yin pa'i phyir de'i ngo bo nyid tshol ba dang mthun pa nyid do//kha cig gis 'di nan tur gyi tshul du bstan no/ /'di ni mi bzang ste mdo sde dang 'gal ba'i phyir ro/ /nye bar zhi ba nyid kyis sde tshan las logs shig tu mdzad par ni mi bzhed de/ bsdigs pa la sogs pa ni de nyid yin pas rnam par ma bzhag pa'i phyir ro/ /de shes bzhin du khyad du gsod do snyam na yod bzhin du ma mthong ba nyid kyis shes pa bskyed pa'i phyir ro/ /nye bar zhi bar bya ba'i phyir 'bad pa mi skyed par mi bya'o/ /rtsod pa'i gzhi'o// // zhi ba thams cad ni bya ba'i phyir rtsod pa la 'jug go/ /kha bskang bar 'os pa ma yin pa ni dge 'dun gyi tha snyad la tshogs par dbyung ba nyid ma yin no/ /gzhan gyi dag la ni bsnyen par rdzogs pa dang bcas pa rnams kyi dbang du bya'o/ /bud med rnams kyi ni skyes pas rigs pa nyid do//srog gam bsnyen par rdzogs pa las nyams na nye bar zhi ba nyid do/ /spangs pa nyid nas gzhan gyi phyogs kyi bar du gyur na yang ngo / /gzhan du song ngam nad kyi rnam pa yun ring pos btab na yang ngo / /don sbyin par byed pa 'am mngon par brtson pa'o/ / rtsod pa'i gzhi'i zhu ba'i skabs so/ /rtsod pa'i gzhi rdzogs so// //so sor thar pa'i sdom pas mchog la rab tu byung bas phyag bya'o/ /mnyan na rgan pa la'o/ /mtshan tha mi dad pa la'o/ /skyes pa mi dman pa la bud med kyis so/ /sa gzhan na gnas pa dang nyams pa dang dge slong ma sun phyung ba dang chos ma yin pa'i phyogs dang mthun pa dang tha dad par gnas pa dang mtshams med pa byas pa dang nyal ba dang snyoms par zhugs pa dang brel ba dang sems gzhan du song ba dang rgyab kyis phyogs pa dang khyim gzhan na 'dug pa dang /zas kyi gral na 'dug pa ma gtogs so//khyim pas rab tu byung ba la'o/ /thams cad kyis sangs rgyas la'o/ /gtsug lag khang bya'o/ /ngos gcig gi dbus su dri gtsang khang bya ba nyid do/ /de'i mdun du sgo khang ngo / /gru bzhi bzang ba nyid do/ /khyams gsum pa yang ngo / / mnod par bya'o/ /gtsug lag khang du gnas par bya'o/ /gnas dag dge 'dun gyi gzhir dge 'dun gyi phyir ram gang zag dge slong gi phyir gnas kyi gzhi byed pa rjes su gnang bar bya'o/ /gal te sbyin bdag yod na des rjes su gnang na'o/ /grong khyer gyi phyi rol lam nang du bsti ba'i gnas dag rung ngo //rang gi khron pa bar du bcad pa'i phyir rtsig gu bya bas kun nas chags pa'i shes pa bsal bar bya'o/ /snyim pa bkang ste blud pas bud med rjes su gzung bar bya zhing chu'i rgyun mi 'chad par blugs pas mi bya'o/ /de'i dus nyid kyi dbyar gyi nang du 'ongs pa ni rnyed pa dbang ngo //za zhing rnyed pa ma byin pa la ni las mi rigs so/ /las su ni gzhon rims nas mthar gyis bsko'o/ /rnyed pa mi 'thob pa la zan sbyin par bya ba nyid do/ /gzhan gyi rnyed pa la gdu bar mi bya'o/ /de'i don du ma song ba dro la bab nas gtsug lag khang gzhan du za ba la nyes pa med do//mu ge'i tshe rang gis ma khyer ba la yang ngo / /dge slong gi tshod nyid pas lhag pa nyid la blangs pa yang ngo / /gtsug lag khang yal bar mi dor ro/ /phyir bcos pa'i phyir sbyin bdag spro bar bya'o/ /ma grub na dge 'dun gyi las ji tsam gyis nus pa nges par sbyar ro//rang gis kyang phyir bcos par bya'o/ /rnyed pa nod pas gtsug lag khang byi dor bya'o/ /dad pa'i rnyed pa ni gtsug lag khang nyid kyi ma yin no/ /gtsug lag khang sgo bcad de 'gro bar bya'o/ /srung ma yang bzhag ste'o//de la zan med na sbyin no/ /des chom rkun pa'i rang dbang nyid med par nges par mi shes par sgo dbye bar mi bya'o/ /khang steng du 'jogs te lta ba dang khyod rims kyis ma btab bam zhes brda skad brjod pa ni 'dir thabs yin no/ /gnas dang mi dang pha ma la sogs pa so sor shes par byed du gzhug pa yang ngo //yid mi ches shing 'jigs pa dang bcas pa nyid na sgo dbye bar mi bya'o/ /dgon pa pas khyi bcang bar bya'o/ /des nang par sngar langs ma thag kho nar gtsug lag khang dang mchod rten gyi 'khor sa blta bar bya'o/ / gal te des bshang ba byas na dor bar bya zhing / gal te gci ba byas na phyi bar bya/ gal te sder mo dag gis brad na mnyam par bya'o/ /de dag gis gnas dag tu dkyil 'khor bya'o/ /de la lhung bzed kyi lhag rol sbyin no/ /mchod rten dang gtsug lag khang gi nye 'khor gyi phyi rol du'o//spyod lam gyi 'dod pas lung dbog go/ /gsar bus mnod pa'i phyir ni khams snyoms pa nyid dris te phyag bya ba sngar btang ba'i spyod lam brten par bya'o/ /thal mo bsnol te bcang ngo / /lus dang sems gdud do/ /drang por ro/ /'chag pa na gom pa sri bas bcag pa'i 'o//'greng ba na 'greng ba'i'o/ /'dug pa dang nyal ba na 'dug pa'i'o/ /stan ches dma' ba la'o/ /gsar bus ni bsgo na'o/ /ma bsgo na tsog pus so/ /mnod par bya ba mang ba nyid na zhu bar bya'o/ /thos pa'i nye 'khor ma gtogs pa snang ba'i nye 'khor du 'dug ste kha ton bya'o//gdams ngag ni mtha' gcig tu song ste bsgrub par bya'o/ /lung dbog pa dang mnod pa ni shin tu legs par bklags pa dang shin tu yongs su byang ba dang the tshom med par byas te'o/ /gnas khang dang zas la bsko ba dang thug pa dang bag chos dang shing tog 'drim pa bsko bar bya'o//par bur 'drim pa yang ngo / /lhag rol phyi de nyin par 'drim par bya ba ni de zhes bya'o/ /snod spyad 'grub pa'o/ /dbyar gyi ras chen no/ /sra brkyang ngo / /gos dag go/ /'ged pa yang ngo / /dge skos dang mngag gzhug pa dag go/ / sder bcad 'drim pa'o/ /de dag brim pa dang zan gyu nas brub pa ni de'i las yin no/ /chu'i zhal ta pa'o/ /mdzes chos so/ /des bltas te rab tu byung ba rnams mi mdzes pa bstan nas se gol gyi sgra sngon du btang ste mdzes pa la nges par sbyar bar bya'o/ /'di lta ste/ zas la sgra bskyung ba nyid dang shin tu bsdams pa nyid dang shin tu nogs thub pa nyid kyis so/ /mchod rten la phyag bya ba la sgra bskyung ba nyid dang rgan rims kyis so/ /bang rim gyi zhal ta pa'o/ /des dang por zan zos te dbyug gu blangs nas zan za ba dag la khwa dang bye'u dang phug ron la sogs pa dag bzlog par bya'o//gnas mal dbog pa dang gnas mal byi dor dbog pa'o/ /zas rung ba dang bcas pa nyid yin na mi dag 'ong ba la sge'u chung bsrung ba'o/ /gnas mal gyi gzhi'o// //phyag 'tshal ba'i gnas mun khrod du phyag dang bcas pa'i tshig brjod par bya'o//nye 'khor du gyur pa gzhan gyis phyag bya bar brtsams pa la phyag mi bya bar mi bya'o/ /tshangs pa'i phyag gis ni da byas pa nyid yin no/ /nang dang bcas pa la phyag mi bya'o/ /phyag 'tshal ba la a rog gya zhes mi bya bar mi bya'o/ /'das pa na phyag bya ba yin pa la ni phyag mi bya ba nyid ma yin no//sbags pa la phyag mi bya'o/ /sbags pas mi bya'o/ /de bdag gir mi bya'o/ /sbags pa las mi bya'o/ /sbags pa la ni rnam pa gnyis te/ tha na so shing yan chad za bas dang / tha na de'i byi dor byed pa yan chad mi gtsang bas so/ /'di la gcer bu nyid dang gos gcig pa nyid ni sbags pa dang 'dra'o//phyag ni rnam pa gnyis te/ yan lag lngas phyag 'tshal ba dang / sgyid pa la 'khyud pas 'tshal ba'o/ /sbrid pa byung ba la sos zhes brjod par mi bya ste/ rgan zhugs dang khyim pa la ni ma gtogs so/ /gsar bu de la ni a rog gya zhes bya'o//rgan pa la phyag bya'o/ sbrid pa byung na yang ngo / /de bzhin gshegs pa la tshe dang ldan pa dang ming dang rus brjod pas kun tu spyad par mi bya'o/ /nye ba'i tshig dang bral bar de'i mtshan nam gdung smos par mi bya'o/ /rgan pa'i mi bya'o/ / 'di la gnas brtan dang tshe dang ldan pa ni nye ba'i tshig nyid kyi tshul dang mthun pa yin no/ /snga ma la ni ma yin no/ /lag gi blas 'gro ba dang 'ong ba dang ldan pa'i gzhir gtsug lag khang rab tu gnas par bya'o/ /shing ljon pa dang rdzing bu dang 'chag sa dag kyang ngo / /nye 'khor yang ngo //rgan lugs dang klag cor dang sgra dang tug ring chung bar ro/ /sbyin pa pos rjes su gnang na gtsug lag khang bya ba'i dngos po las de bya ba'i spyad bya'o/ /de bzhag pa'i khang pa byin no/ /der dgos pa'i 'bru mar la sogs pa tshod ran par nyo'o/ /lag gi blas spyi bungs ci 'dra ba de 'dra ba bza'o//gnas de'i gtsug lag khang med pa nyid yin na nye 'khor gyi gtsug lag khang gi'o/ /snum bag gi rnyed pa mnod do/ /gtsug lag khang dag gi brtsegs ma nyid kyi mtha' ni lnga'o/ /dge slong ma rnams kyi brtsegs ma nyid ni gsum mo//dri gtsang khang dang sgo khang dang steng khang gi bsil khang dag ni brtsegs rim gnyis kyis lhag par bya'o/ /de dag lci bas 'jig pa nyid yin na brtsegs ma gzhig pa la kha na ma tho ba med do/ /brtsams pa bskyed pa'am bskyung bar bya ba'i phyir gzhig pa yang ngo / / mchod rten dang sku gzugs dag ni bskyed pa'i phyir ro/ /rnyings pa nyid kyi phyir ni zin kyang mnyam pa'i phyir yang ngo / /phyogs phyir bcos pa'i phyir yang ngo / /gdugs la sogs pa dbog pa yang ngo / /gzhan gdags pa'i phyir yang ngo / /de'i don du nye bar ma bzhag pa dbog par mi bya'o//skyes pa'i rabs la sogs pa'i ri mo dang / sangs rgyas kyi bka'i yi ge dag kyang ngo / /byid pa'i bye brag kho na bya ba'i phyir ro/ /rtsom par byed pas ma byas na gzhan gyis lhag ma bya'o/ /gal te dge 'dun gyi phyir phyed brtsigs na mkhar lan sbyin par bya ba nyid do//des btang ba'i dus ni gal te dgun yin na zas kyi 'og rol du'o/ /gal te so ga yin na zas kyi mdun rol du'o/ /zas kyi bya ba'i dus lus par bya'o/ /de las byi dor ma byas par 'tsho ba la 'jug par mi bya'o/ /de'i mtha' ni rkang lag bkrus pa nyid do//lag gi blas khye'u sus sbyor du gzhug go/ /zas kyi 'og rol du na skom dang rkang lag bsku mnye bya'o/ /gnas khang gi sgo gdod do/ /sgo glegs gzhug go/ /lag zungs dang yang mig dang ko ba'i dum bu dag go/ /skar khung gdod do/ /dkyil du'o//phyi rub la nang yangs pa rgya mtsho'i rnam pa lta bu'o/ /dra ba gzhug go/ /sgo glegs so/ /'khor gtan dang gnam gzer dang 'phred gtan dag go/ /dbyug gu skam kha bcang ngo / /gsor gyis btsugs pas brgyu'o/ /gnas khang gi mdun du khyams bya'o//so phag gi gcal bdun nam brgyad gzhug go/ /de'i steng du ka rten gyi spang leb bo/ /de'i steng du ka ba'i tshar dag go/ /de'i steng du ka zhu'i 'dab ma dag go/ /de'i steng du gdung ma dag go/ /de dag gi steng du phyam dag go/ /de dag gi steng du spang leb dag go/ / de dag gi steng du so phag dgram mo/ /de dag gi steng du so phag gi phye ma'i 'jim pa'o/ /mi ltung bar bya ba'i phyir lan kan bya'o/ /mi 'gul bar bya ba'i phyir shar ba gzhug go/ /de lcags kyi gzer bu dag gis sbyar ro/ /'dzeg pa'i phyir them skas bya'o/ / 'og tu rdo las byas pa/ bar du sa las byas pa/ steng du shing las byas pa'o/ /ya gad las gzeg par bya'o/ /shing dang smyig ma dang thag pa las byas pa yang ngo / /rdzing bu dang sgo khang du rdzab mi 'byung bar bya ba'i phyir so phag gi gcal gzhug go/ /de'i steng du so phag gi phye ma'i 'jim pa'o//de'i steng du rdo thal gyis so/ /med na rkang pa bskyab pa'i phyir shing gi spang leb bo/ /yang na bar bar dag tu so phag dag go/ /mchod rten la yang de bzhin no/ /'di la de 'dom gang tsam byas pa nyid na byas pa nyid do/ /seng ge'i khri gru bzhi bya'o//rkang pa dag la seng ge'i gdong nyid do/ /spo ba'i don du gzung ba'i phyir bzhi po dag la lcags kyi yang mig dag gdags so/ /tha gu dag gis gdags so/ /der stan nang tshangs can bzhag go/ /steng du bla re'o/ /dpyang pa dag go/ /brten pa la ni so phag las byas pa'i them skas bya'o//spo ba la ni shing las byas pa'o/ /ma 'byor na ya gad do/ /rkang rten yang ngo / /mchod pa'o/ /steng du lo ma'i chun po 'am rtswa'i chun po bzhag go/ /'di ni rkang pa gnyis mi 'chu bar bya ba'i phyir ro/ /'di ni rdos 'grub bo//zan za ba rnams la khwa dang bye'u dang phug ron dag gis mi 'tshe bar bya ba'i phyir bya rgya bya'o/ /de ni rnam pa bzhi'o/ /mun dza las byas pa dang / bal ba dza las byas pa dang / sha na las byas pa dang / ras bal las byas pa'o/ /grwa bzhi dag tu gzungs gzer gdab bo//de dag la gdags so/ /shing gi ni 'chag pa dang 'drul bas de'i phyir lcags las byas pa dag go/ /de'i phyogs gcig tu mthongs gdod do/ /zan zos zin nas 'jug par bya ba'i phyir ro/ /de dro khar gdab bo/ /dbyar dag khyams su chu mi 'byung bar bya ba'i phyir spang leb dag go//ka ba'i bar dag tu'o/ /snang bar bya ba'i phyogs ma gtogs par ro/ /med na seg dag gam re lde dag go/ /dbyar gyi zla ba bzhi po dag gi mthar dbyung ngo / /'khor gyi khyams bya'o/ /gnas bsil bar bya ba'i phyir phyi rol rtsig pas bskor ro//ka ba'i tshar dag gzugs so/ /skar khung gdod do/ /ma mtha' dag stan gyi ya mtha' dang thad kar bab par bya'o/ /dra ba dang sgo glegs dag gzhug go/ /zas dang me dang spong sa dang 'chag sa'i khang pa dag bya'o/ /rtsig ngos kyi phyogs 'khor bar glo 'bur dag bya'o//sa khyim rung ngo / /dgra khang yang ngo / /'di la lan kan gyi skabs ni khyams dang 'dra'o/ /rab tu byung ba'i kun dga' ra ba rtsig pas bskor ba nyid kyang ngo / /rtsig pa la chu khung gdod pa nyid kyang ngo / /rtsang dang 'obs dag kyang ngo / /gang zag gi gtsug lag khang yo byad dang bcas pa yang ngo //sngon po la sogs pa zad par gyi mtshan ma mngon du bya ba'i phyir gnas khang gi rtsig pa dag sngon po la sogs pa rnam pa bzhir bya'o/ /rab tu byung ba'i kun dga' ra ba la ri mo bri ba nyid rung ngo / /sgor gnod sbyin lag na rdo rje 'dzin pa dag bri'o//sgo khang du 'khor ba'i 'khor lo'o/ /cha lnga par bya'o/ /steng du lha dang mi rnams so/ /gling bzhi po dag go/ /rdzus te skye ba'i sems can zo chun brgyud mo bzhin du 'chi 'pho ba dang skye ba dag kyang ngo / /dbus su 'dod chags dang zhe sdang dang gti mug dag phug ron dang sbrul dang phag gi rnam par ro//snga ma de gnyis gti mug gis za bar ro/ /kho ra khor yug tu rten cing 'brel par 'byung ba'i yan lag bcu gnyis dang / thams cad mi rtag pa nyid kyis gzung bar ro/ /steng du sangs rgyas mya ngan las 'das pa'i dkyil 'khor dkar po nye bar ston pa'o//'og tu brtsam par bya zhing zhes bya ba'i tshigs su bcad pa gnyis so/ /de ston par byed pa gzhag par bya'o/ /de'i kho ra khor yug tu cho 'phrul chen po dang bdud bcom pa dag go/ /khyams su skyes pa'i rabs dag go//dri gtsang khang gi sgor gnod sbyin phreng thogs dag go/ /dpong sa'i khang par gnas brtan gyi gral dag go/ /mdzod kyi sgor gnod sbyin lag na myu gu thogs pa dag go/ /zas kyi khang par lag na bza' ba dang / bca' ba thogs pa dag go/ /bsro khang gi khang par lag na myu gu dang bum pa thogs pa dag go//me khang du grul bum me sbar bar byed pa dag dang grul bum gyi bu mo byi dor la sogs pa dang me sbar bar byed pa dang / sbyin bdag mar me thogs pa dang lha'i pho nya dag go/ /chu'i khang par klu lag na bum pa thogs pa rgyan sna tshogs kyis brgyan pa dag dang /klu'i bu mo chu 'drim par byed pa dag go/ /nad pa'i rung ba'i khang par de bzhin gshegs pa nad pa'i rim gro mdzad pa'o/ /bshang ba dang gci ba'i skyabs su dur khrod dag gam mgo'i thod pa dag go/ /gtsug lag khang bla gab med pa ma yin par me du ba dang bcas pa bud par yang mi bya bcang bar yang mi bya'o//spyil bar ni thams cad mi bya'o/ /de'i don du zhugs gling bcang bar bya'o/ /mnyam par bcer ba'i lcags kyi phra skam mo/ /shing gi yog pas kyang las de 'grub bo/ /khang skyong gis gtsug lag khang nyi ma re re zhing phyag dar bya'o//mi nus na 'khor ba'i phyogs so/ /lhag ma ni tshes brgyad dang tshes bcu bzhi la gaN+DI brdungs te dge 'dun thams cad kyis chos dang ldan pa'i gtam gyis sam 'phags pa'i mi sma ba nyid kyis so/ /chos kyi mdun sar chag chag dang lci ba 'jam po'i byug pas byug go//mjug tu khrus bya'o/ /yang na rkang lag bkru'o/ /chus brlan pas lus kyang byug go/ /snum bag gi rnyed pa bya'o/ /dkon mchog gi don du phyag dar bya ba dang zhal zhal bya ba dang dri gtsang khang dang sku gzugs dang mchod rten dang srog shing gi grib ma la gtsug lag khang gi tshigs su bcad pa gdon zhing 'gom mo//nyi ma de nyid la gnas mal la so sor brtag pa dang bcos par bya'o/ /rdol ba la sogs pa dang ldan pa dag gis so/ /gnas pa dag gis so/ /gnas mal gyi gzhi chag chag dang phyag dar dang lci ba 'jam po'i byug pas bsku bar bya'o//mal cha dri mas gos pa sprug par bya'o/ /gal te ha cang na bkru'o/ /chag chag btab pa'i 'og tu phyag bya'o/ /de'i 'og tu stan bsham mo/ /gzhi rdul dang bcas pa ma sprugs pa la mi bya'o/ /bsham par bya ba dag la gos gcig sprug par spyad do//ngan pa'o/ /de bcos so/ /mi nus pa nyid na ras mar byas te shing bu'i rtse mo la btags nas sprug go/ /de ltar na yang mi rung ba nyid yin na sbyin pa po'i bsod nams mngon par spel ba dang / yun ring ba nyid du bya ba'i phyir lci ba dang sa bsres te ka ba dang rtsig pa'i ser kar glan par bya'o//sgo khang dang khyams su mal bca' ba dang bcas pa yang gzung bar mi bya'o/ /sbyin pa pos mya ngan bsang ba'i phyir phul ba des mthong bar bzhag par mi bya'o/ /sgra mi snyan pa'i gnyen po'i phyir tshes brgyad dang bcu bzhi dag la khyams su bsham par bya'o//khri dang khri'u bcang bar bya'o/ /spyil ba mi nyams par bya ba'i phyir khri rkang gi mthil mnyam par gcad par bya'o/ /yang na de'i 'og tu phub ma'i phung po bzhag pa'am de ras mas dkri bar bya'o/ /dge 'dun ma yin pas rkang pa bris pa'i khri'u bdag gir bya ba brten par mi bya'o//stan bzang po rgyab rten dang bcas pa'i stan yang mi bya'o/ /mar me'i sdong bu yang mi bya'o/ /kha cig las ni yal ga du ma pa zhes so/ /stan nang tshangs can gru bzhi dang sngas nang tshangs can bcang bar bya'o/ /khru bzhi dang do pa nyis bltab tu byas te btsem mo//shing bal gyis brdzang ngo / /so sor brtag par ma byas par nyal bar mi bya'o/ /dran pa nye bar ma bzhag par mi bya'o/ /gzhan dang lhan cig khri'am stan nam gzhan la cig car mi bya'o/ /ngo tsha shes pas med na stan so sor btang ste gtur bu'am lhung bzed kyi snod la sogs pas bar du bcad nas dran pa nye bar gzhag ste nyal bar bya'o//gsum las lhag pa mang po dang lhan cig khri la 'dzeg pa nyid bsten par mi bya'o/ /khri ring po la ni gnyis las mi bya'o//khri'u gcig ma yin pas mi bya'o/ /lo gsum las lhag pas bar du chod pa dang lhan cig stan la 'dug par mi bya'o/ /khyim gzhan du stan med na mkhan po dang yang dran pa nye bar gzhag ste stan gcig la 'dug par bya'o/ /khyim pa dang gang du yang mi bya'o/ /bsnyen par ma rdzogs pa dang yang mi bya'o//za ma dang ma ning dang ma bsad pa la sogs pa dang / mu stegs can dang mu stegs can zhugs pa dang / rku thabs su gnas pa dang / tha dad par gnas pa dang / gnas par mi bya ba dag dang mi bya'o/ /bslab pa byin pa dang mi bya'o/ /ar mo nig ni bsnyen par ma rdzogs pa dang bcas pa'i dge 'dun 'dus pa las gzhan par stan nyid yin no//stegs bu ni ma yin no/ /dogs pa'i gnod par gyur na gal te ltung ba med do/ /gnas mal sbed pa na gal te gnyis yod na gcig gi khri 'am khri'u bkur zhing cig shos kyis stan nang tshangs can la sogs pa'o//dge 'dun de snying mi brtse bar mdun nas drang ba g.yas g.yon nas drang bar mi bya'o/ /ci nas kyang de du ba dang dri ma dang rdul dag gis gos par 'gyur ba de ltar mi bya'o/ /de mi gtsang ba'i skyabs dang nye bar spyad par mi bya'o/ / nyams pa dor bar mi bya'o/ /bsrad pa dang skam pa dang sprug pa dang bu gu glan par bya'o/ /ral ba la lhan rings so/ /dbus gzegs na mtha' gnyis dbus nyid du bya'o/ /der 'os pas kha bsgyur bar bya'o/ /phyir bcos par mi nus pa nyid yin na dkon mchog la phul ba'i mar me gang zag sbyin bdag yin pa yang rung ba dag gis snying po nyid du spyod do//der mi 'khob pa nyid yin na 'jim pa dang bsres te dkon mchog dag gi rtsig pa dang / ka ba dang sgo glegs kyi ser ka dag byug pa'i phyir de la nan tan bya'o/ /bskos pa ni mnos pas so/ / lhag ma ni dge 'dun gaN+DI brdungs pas bsdus te'o/ /dge 'dun gyi rku 'phrog byed pa mthong la nus na mi bzlog par bya'o/ /skrag pa na dge 'dun gyis yal bar mi dor ro/ /gnas su ma son gyi bar du khyer bar byed pas longs spyad par bya ba nyid do/ /de rang gi gnas su bkur bar mi 'grub na gzhan du longs spyad pas yongs su spyad par bya'o//gnas gzhan gyi zas dang yo byad kyi rnyed pa gzhan du longs spyad par mi bya'o/ /de de la sbyin par mi bya'o/ /nod pa 'bul du gzhug par bya ba nyid do/ /mi khugs na dbrog pa'o/ /cha dbang ba dag gis dge 'dun gyi rtswa dang shing mi mkho ba rang gi dang 'dra bar spyad pa la kha na ma tho ba med do//ma bskos pa 'khor zhing spyad pa ji ltar 'ongs pas yin gyi rgan rims kyis ma yin no/ /cig car brnyas na ni de'o/ /ma zin na de las dbral bar mi bya'o/ /de bkru bar chus rkang pa 'bags pa nyid na de yin no/ /chab khungs sa der zhugs pa nyid na'o//sgom pa'i phyir 'dug pa blang bar mi bya'o/ /de la rgan rims su mi bya'o/ /dge slong las dang zas kyis 'bags par mi bya'o/ /byug ris ma yin par 'dug par mi bya'o/ /bya ba byas nas 'khor zhing spyad pa 'dod pa yod na bcang bar mi bya'o/ / bar du don gyi ched nyid du khri'u las langs pa ni bya ba byas pa ma yin no/ /de'i dus na de la chos gos sam pus 'khyud gzhag par bya'o/ /'dod pa yod la gnas yod na dge 'dun gyis sbags pa nyid bsten par mi bya'o/ /don yod na rnam pa de lta bu las bral bar byas pa la kha na ma tho ba med do//dge 'dun gyis mchig dang de'i mchig gu bcang bar bya'o/ /'dreg mkhan gyi lag cha yang ngo / /snod du bcug ste rtsig pa la bzhag go/ /ste'u dang sta re dang gzong la sogs pa dang / de dag gi snod dang bcas pa yang ngo / /des dge slong la g.yar po nyid dus la byas pa yan chad sbyin no//dge slong mas chang bu'i snod bcang bar mi bya'o/ /thams cad kyis 'bru mar snod bcang bar bya'o/ /phul gang man chad nas phul phyed yan chad shong ba'o/ /lcags kyi dog le yang ngo / /de'i lcags sgyed kyang ngo / /sa las byas pa'i thab kyang ngo / /gnang ba thob pas 'khar ba'o//dra ba kha dog gcig pa yang ngo / /de sbyin par bya'o/ /rgas pa dang na ba dag la'o/ /de gnyis tshig gcig gis sbyin pa yang srid do/ /sdig sbrul la sogs pa'i gnyen po'i phyir 'khar ba sgra dang bcas pa bcang ngo / /yu ba'i rtsa ba nas gas na sbu gu bskon no/ /ya tog ni dkri bas so/ / smyig ma mkhan gyis byas pa'am lo ma las byas pa'i gdugs bcang bar bya'o/ /yu ba ni lus kyi tshad do/ /des grong gi dbus su 'gro bar mi bya'o/ /gal te lam gyi dbang gis ni glor bsnyal te'o/ /char 'bab pa na bsod snyoms la rgyu bar bya'o/ /yu ba la gzhal du mi rung ba nyid ma yin no/ /chad na khyim gzhan dag tu bzhag go//'byung kar blang ngo / /rol mo mkhan gyi gnas dang / smad 'tshong ma'i gnas dang / chang 'tshong ma'i gnas dang / rgyal po'i pho brang dang / gdol pa'i khyim gyi gnas dag bsten par mi bya'o/ /mi gtsang ba'i skyabs dang nye bar 'dug par mi bya'o/ /gos rin po cher gyur pas dgon par gnas par mi bya'o//ldum bu mi ru ka'i phye mas la ba la srog chags dag mi 'byung ngo / /shing kun gyi yang ngo / /shing nim pa dang ba sha ka'i lo ma dag gi yang ngo / /rim pa der song na de la shin tu phan pa nyid do/ /brkam pa yang de'i don nyid yin no/ /dgon pa bas phyogs dang lam dang tshes grangs dang nyi ma dang rgyu skar dag la mkhas par bya'o//rtag tu me dang chu yod par bya'o/ /phye dang ras ma dag dang sbrang rtsi dang zhun mar dag ci 'byor pa nye bar bzhag go/ /gal te zas las lhag byung na yang ngo / /dge slong mas dgon par gnas par mi bya'o/ /grong khyer gyi nang du dbyar khang bya'o//des de'i phyi sgor 'dug par mi bya'o/ /snang yal can du mi bya'o/ /lam gyi bzhi mdor mi bya'o/ /gos med pa can gyis mi bya'o/ /de la rngul gzan ni gos nyid yin no/ /dpung pa gnyis ma g.yogs par khyim pa'i drung du mi bya'o/ /de'i skyil mo krung gi gnas su skyil mo krung phyed do//zag byed kyi sgor srog chags mi 'jug par bya ba'i phyir gos la sogs pas g.yogs so/ /dge slong gis dge slong ma gtsug lag khang du 'jug pa dag bzlog par mi bya'o/ /de dag gtam mi 'dre ba dang mi gdams pa dang gso sbyong dang dgag dbye bzhag pa dag gis yongs su gdul bar bya'o//des dge slong rjes su gnang ba byed du ma bcug par gtsug lag khang du 'jug par mi bya'o/ /khyod nang bcabs pa dang bcas pa nyid ma yin na rjes su gnang ngo zhes so/ /dri bas zhe 'gras pa med pa nyid nges par shes par byas te'o/ /'phred gtan dang gnam gzer dang 'khor gtan dang sgo lcags dang lde mig kyog po dag gtsug lag khang bsdam pa'i phyir yang dag par sbyar ro//dge skos kyis dgongs kar gtsug lag khang bsdams nas so sor brtag par bya'o/ /'jigs pa dang bcas pa nyid yin na thun nyid kyis mel tshe bya'o/ /der gyur pas nyal ba dang snyoms par 'jug pa dag spang ngo //der dge 'dun gyi gnas brtan gyis dge skos la dam bzhag byas pa dri bar bya'o/ /gal te yang dag par sbyar ba dag gis ma bsdams pa nyid na gtsug lag khang brlag na dge skos 'jal du gzhug par bya ba nyid yin no/ /de dag ji tsam mnyam par byas la de tsam gyi cha dag go/ /lde mig kyog po dang sgo lcags bcang bar bya'o//sdom pa ji snyed yod pa de dag gis sgo ma bsdams par 'gro bar mi bya'o/ /gal te gnas stong par zhugs par gyur na der chag chag la sogs pa bya'o/ /snod spyad sar pa mkhos su dbab par bya'o/ /gal te bzod na byi dor bya'o/ /gal te rung bar bya ba yod na sngo bsrab par byed du bzhug go//gal te der khyim pa dag lhags na de dag la chos dang ldan pa'i gtam dang nus pa'i chos gzhan yang ngo / /shing ljon pa bskyed pa mi rung ba ma yin no/ /de bskyed nas mi bskyang bar mi bya'o/ /de'i shing ljon pa ni me tog chags kyi bar du'o/ /gzhan ni 'bras bu'i bar du'o/ / yun ring ba nyid na lo lngar ro/ /'di la dge slong bskos pa ni rang nyid dang 'dra'o/ /lag pa dag dang rkang pa dag bkru ba dang so shing dor ba dang lhung bzed bkru ba dang khrus bya ba ni bcu pa yin no/ /grang ba bskyab pa'i phyir khang bu'i sbubs bya'o/ /dbugs dbyung ba'i phyir de la skar khung gdod do/ /g.yogs mas dgab bo//so ga mi tsha bar bya ba'i phyir de bsal lo/ /dbyar dag ni mi 'drul bar bya ba'i phyir snga ma yang ngo / /chu'i yur ba gdod do/ /rtsa ba'i 'ong yal bar mi dor ro/ /'khor rnam par dbye ba'i bye brag gis byi dor bya'o/ /kha cig tu so shing bza' ba dang / kha cig tu kha bkru ba dang / kha cig tu rkang pa dag bkru ba de lta bus de la 'jug pa nyid ma yin pas so//me tog dang 'bras bu bsrung ba'i phyir dge slong dag bsko bar bya'o/ /zan gyi dus kyi ched nyid du gzhan dag go/ /de dag gis ches dang por zan zos te 'gro bar bya'o/ /klog tu 'jug pas bsnyen bkur ches mang po byed pa dang / mi nus pa la logs shig tu bya bas kyang rjes su brtse bar bya'o//de'i 'dul ba bzung ste de'i lung dbog pa dang kha ton bya ba dang dmigs kyis 'dri ba sbyin pa dag gis dge slong ma la rjes su brtse bar bya'o/ /yi ger bri bar bya'o/ /dran pa dang 'dzin par mi nus pas 'dul ba'o/ /de mi bri bar bya ba nyid yin no/ /'di la so sor thar pa ni de dang 'dra'o//de dang ldan pa yang ngo / /gang zag gi yang ngo / /mtshan ma byas pa nyid la nyes pa med do/ /dge 'dun gyi gnas mal la ming yi ger bri'o/ /'di ni che ge mo'i gtsug lag khang ming 'di zhes bya ba'i sbyin par bya ba'i chos so zhes so/ /gos dag la yang ngo / /rnam pa de ltar gzhan pa yang ngo / / gang zag gi yang ngo / /sangs rgyas kyi bka' sdeb sbyor dang tshig dang rim pa la gzhol ba nyid kyis sbyar te bklag par mi bya'o/ /gzhan la legs par go bar byed nus shing sangs rgyas kyi bka' la brtson pa nyid mi gtong na phyi rol pa'i bstan bcos dag gzung bar bya'o/ /de'i dus ni nyi ma'i sum cha bde ba ma yin pa'o//mtshan mo yang ngo / /gsang sngags phan 'dogs par byed pa dag gzung bar bya'o/ /sbyar bar yang ngo / /gnod par byed pa ni mi bya'o/ /de dag gis phyag gi gnas su dkon mchog gsum brjod par bya'o/ /lha gzhan la ni phyag mi bya'o/ /mchod pa mi bya'o/ /bkur sti mi bya'o//gnas su phyin na mngon sum du 'greng ste se gol gyi sgras go bar byas nas gtsug lag gi tshigs su bcad pa gdon pas de la phan gdags par bya'o/ /bzo rjes su sgrub pa dang bslab pa dang de'i snod nye bar bzhag pa mi bya'o/ /mtshon gyi shubs dang khab ral dang ram phyis ni ma gtogs so//mu gcig pa ni bsod nams kyi bsam pas dge ba'i gso ba nye bar bsgrub par bya ste gla rngan gyis ni ma yin no/ /bkru sman btang nas gzhan du 'gro bar mi bya'o/ /rkyen de lta bu dag byung na ha cang 'khru ba la sogs pa'i gnas pa'i gnyen po'i cho ga bstan te'o/ /tshangs pa mtshungs par spyod pa mtshan mthun pa la dben pa'i phyogs su 'dreg mkhan gyis las bya'o//khri'u yan lag chag pa bcos pa yang ngo / /phreng ba'i rim pa dag brgyu ba yang ngo / /dkon mchog mchod par gyur pas sems can gyi gzugs ma yin pa'i ri mo bri ba yang ngo / /de'i phyir 'dri ba ni de nyid yin no/ /tshangs pa mtshungs par spyod pa shi ba'i lus la mchod pa bya'o//de bsreg par bya'o/ /gal te srog chags dang bcas pa'i rma med pa nyid yin na'o/ /so sor brtags pas nges par bya'o/ /brko ba'am chu klung la bskur ro/ /mi rung na tshang tshing gi dbus su gzhag go/ /glo g.yas pas bsnyal te mgo byang phyogs su bstan no/ /sngas su rtswa'i chun po gzhug go//rtswa dag gam lo ma dag gis g.yogs so/ /chos mnyan pa dang yon bshad pa dag bya'o/ /reg pa dag gis gos dang bcas te khrus bya'o/ /gzhan dag gis ni rkang lag bkru'o/ /mchod rten la phyag byas te 'jug par bya'o/ /mchod rten ni rnam pa gnyis te/ gtsang khang can nyid dang / ka ba lta bu nyid do/ /de rab tu byung ba rnams la 'os pa nyid de/gal te dge ba yin na'o/ /sangs rgyas rnams kyi rnam pa thams cad do/ /rnam pa ni bang rim bzhi dang 'dab ma dang bum pa dang pu shu dang srog shing dang gdugs bcu gsum dang char gab dag go/ /rang sangs rgyas rnams kyi ni char gab med pa'o/ /nyan thos rnams kyi ni 'bras bu'i tshad dag gis de'i gdugs gcig lhag pa'o//de bzhin gshegs pa'i phyogs kyi yul nyid du gang du de dag gnas par gyur pa'i phyogs der de'i 'khor du bya'o/ /'di la rgan rims su mi bya bar mi bya'o/ /so so'i skye bo rnams kyi ni byi bo'o/ /de dag ni dge 'dun gyi kun dga' ra ba'i phyi rol du bya'o/ /'phags pa la ni mchod rten gyi dus ston rigs so//nyan thos kyi mchod rten la phul ba ni tshangs pa mtshungs par spyod pa rnams dbang ba nyid yin no/ /mu tig dag ni bstan pa bzhin bya'o/ /bud dung dag ni sangs rgyas la dbul lo/ /de las zhig ral bcos pa'i phyir gzhag par bya'o/ /mchod par rung ba nyid kyang ngo / / sangs rgyas la lcags las byas pa'i mchod rten bya ba ni chos dang mthun no/ /dbu skra dang sen mo'i mchod rten gser dang dngul dang bai DUr+ya dang shel las byas pa yang ngo / /de la mthun pa'i 'khor bya'o/ /dga' ldan gyi gnas na bzhugs pa la sogs pa nas yongs su mya ngan las 'das pa'i mtha'i bar du spyod pa ni de zhes bya'o//dkar rtsis dkar por bya'o/ /mar me 'dzin pa bya'o/ /lan kan gyis bskor ro/ /rta babs bsgreng bar bya'o/ /rgyal mtshan gzugs so/ /de ni rnam pa bzhi'o/ /seng ge'i rgyal mtshan dang / chu srin gyi rgyal mtshan dang / klu'i rgyal mtshan dang / khyu mchog gi rgyal mtshan no/ /gtsang khang gi mu khyud bya'o//der rta babs bsgreng bar bya'o/ /sgo yab bya'o/ /de la lan kan gyis bskor ro/ /ka ba rnams btsag gis bsku'o/ /rtsig pa dag rgya skyegs kyis bre'o/ /dris dbang bskur ba dbul lo/ /'bru mar dang ba bla dang tsan+dan dang gur gum gyi chag chag dag kyang ngo / /gzer bu mi gdab bo/ /rtsig pa'i tshe phreng ba la sogs pa gdags pa'i phyir zung dag gzhug go//mi dbug go/ /steng du mar me mi gzugs so/ /mchod pa bya ba'i phyir khyim pa dag 'dzeg tu gzhug go/ /med na dge tshul dag dri chus rkang pa bkrus te'o/ /gal te de ma byas na dri dag gis dril phyis byas te'am gos kyang dkris te ston pa'i 'du shes mngon du gzhag nas don gyi brnab sems kyi dran pa dag gis so//de dag kyang na dge slong dag gis de bzhin du'o/ /de'i ched du thag pa gdags so/ /rin po che las byas pa'i phreng ba dbul lo/ /'jig par byed pa bzlog pa'i phyir sbubs g.yogs kyis g.yogs so/ /mun mi gnag par bya ba'i phyir de la sgo gdod do//sangs rgyas kyi sku gzugs bya'o/ /de la dus ston bya'o/ /bltams pa dang gtsug phud dang dbu skra dang byang chub pa'i dus ston dag kyang ngo / /de grong khyer du gshegs par bya'o/ /'di la de dge slong gis bkur du rung ngo / /de ni gsar bu la 'bab bo/ /sde pa lnga po dag gis zhabs 'bring bya'o/ /mchod yon du bya ba ni rgan po dag gis gzung ngo //de la rol mo byed pa dag gis rol mo bya ba dang bkur sti chen po gzhan yang bzang ngo / /rol mo byed du gzhug pa'i phyir kye mi dag ston pa la mchod pa dag gyis shig ces brjod pa la kha na ma tho ba med do/ /lam po che dang srang dang bzhi mdo dang sum mdo dag tu sang ngam gnangs 'byung bar 'gyur ba nyid ni yi ger bris pa bsgrag par bya'o//de ltar sangs rgyas gshegs par 'gyur ro zhes gro ga la sogs pa la bris pa glang po che'i bshul steng du gdugs dang rgyal mtshan dang ba dan la sogs pas yongs su bskor ba'o/ /byang chub sems dpa'i sku gzugs bya ba chos dang ldan no/ /de la rgyal mtshan dag gis bskor ro//lan kan gyis bskor ro/ /lcags kyi ka ba dag gis kyang ngo / /de dag la ba dan dag gdags so/ /rjes su 'gro bar bya'o/ /rkang rgyan dang rna rgyan ma gtogs pa'i rgyan gdags so/ /spos kyi lus sbyin par bya'o/ /khyogs kyis bkur ro/ /shing rtas kyang ngo / /de la gdugs dang rgyal mtshan dang ba dan dag bsgreng ngo //dbu la me tog rna rgyan gdags so/ /mchod yon dang zhabs la gsol ba dag kyang ngo / /dad rdzas ni gnas pa dang gzhon nu dang rgan po dag gis blang ngo / /gnas brtan rnams kyis bsrung ngo / /lam po cher phreng ba'i za ma tog bya'o/ /phreng ba'i za ma tog tu dri'i za ma tog gzhug go/ /phreng ba gdags so/ /mchod pa rdzogs shing rol mo brtul ba dag na skye bo'i tshogs phyir dong ba'i tshe rgyan brtul lo//mtshan mo'o/ /rab tu byung ba'i gnas su dus ston bya ba chos dang mthun no/ /mi rung ba dang mthun la rung ba dang 'gal ba ni rung ba ma yin par bsdu'o/ /phyi ma dang mthun la snga ma dang 'gal ba ni rung bar bya'o/ /gnas mal gyi gzhi phran tshegs la sogs pa'i skabs so//gnas mal gyi gzhi rdzogs so// //'dul ba'i mdo rdzogs so// //'dul ba'i mdo zhes bya ba nges par 'byung ba'i tshul khrims kyi dbang du byas pa/ 'dul ba rgya mtsho'i snying po mdor bsdus pa/ lhag pa'i tshul khrims kyi bslab pa mtha' dag gi mdzod du gyur pa/ 'dul ba'i sde snod thams cad kyi ma lta bu 'di ni/'phags pa gzhi thams cad yod par smra ba'i 'dul ba 'dzin pa chen po/ bram ze'i slob dpon btsun pa yon tan 'od bdag dang gzhan gyi grub pa'i mtha' rgya mtsho'i pha rol du son pa/ bde bar gshegs pa'i chos 'dul ba bdud rtsi'i nying khus shes rab kyi dbang po rgyas pa/bde bar gshegs pa'i bka' dam pa nan tan snying por bsgrubs pas/ sde pa thams cad kyi sde snod mtha' dag gi gtso bor gyur pa 'phags pa gzhi thams cad yod par smra ba'i 'dul ba kun las btus pa yin no/ /dbang phyug dam pa'i mnga' bdag dpal lha btsan po'i bka' lung gis 'phags pa gzhi thams cad yod par smra ba'i 'dul ba 'dzin pa/kha che'i bye brag tu smra ba'i slob dpon dzi na mi tra dang / zhu chen gyi lo tsA ba ban+de klu'i rgyal mtshan gyis bsgyur cing zhus te gtan la phab pa// //'di la sh+lo ka nyis stong bdun brgya yod do/ /bam po dgur byas so// //