CLOSE WINDOW

D4112
བོད་ཡིག

@##/ /rgya gar skad du/ Ar+ya sarba asti bA di mU la b+hik+Shu nI pra ti mok+Sha sU tra br-it+ti/ bod skad du/ 'phags pa thams cad yod par smra ba'i rtsa ba'i dge slong ma'i so sor thar pa'i mdo'i 'grel pa/sangs rgyas dang byang chub sems dpa' dang 'phags pa nyan thos thams cad la phyag 'tshal lo/ /so sor thar pa'i mdo 'di 'chad par 'dod pa'i thog ma kho nar nyan thos kyi sde snod gsum dang po sus gang du bsdus pa'i gtan tshigs dang 'di gsung rab bcu gnyis gang du bsdu bar bya ba dang /sde snod gsum gang du gtogs pa dang / sde pa gang gi gzhung yin pa dang / dgos pa la sogs pa dang / nges pa'i tshig gi don dang / gzhung nyid bstan pa dang bdun brjod par bya ste/ de dag gi don gsung rab dang / bstan bcos dang / slob dpon dag brgyud de thos pa mdo tsam zhig bshad par bya'i//de la nyan thos kyi sde snod gsum dang po sus gang du ji ltar bsdus she na/ ston pa mya ngan las 'das pa'i 'og tu/ 'phags pa 'od srungs chen po la sogs pa dgra bcom pa lnga brgya rgyal po'i khab kyi gsang ba'i brag phug tu 'dus nas/mdo sde thams cad ni 'phags pa kun dga' bos bsdus/ 'dul ba thams cad ni 'phags pa nye bar skyong gis bsdus/ma mo ni 'phags pa 'od srungs kyis bsdus zhes grags te/ 'phags pa nye bar skyong gis 'dul ba yang dag par bsdu ba yang ma 'ongs pa'i skye bo rnams 'dul ba zab cing rgya che ba 'di la kha cig mi dgos so zhes 'bri ba dang /nyungs so zhes bsnan par dogs pa dang / dbang po rtul po rnams kyis dgos pa'i don gzung sla bar bya ba'i phyir/ sdom pa rnam pa gsum du bsdus nas brtsams te/ gsum gang zhe na/ spyi sdom dang / sdom dang / bar sdom mo/ /de la spyi sdom ni rnam par 'byed pa la sogs pa las de la spyi sdom ni zhes 'byung ba lta bu ste/ 'og nas 'byung ba'i sdom gyi don rnams mdor bsdus te bstan pa'o/ /sdom ni spyi sdom gyis bsdus pa'i don de nyid go rims bzhin du ston pa'o//bar sdom ni spyi sdom dang sdom gyis ma 'dus pa'i don rnams skabs skabs su tshigs su bcad par bsdus nas ston pa ste/ 'phags pa de dag gis sde snod gsum tshul ji ltar bsdus pa rgya cher ni mangs pas 'dir ma bstan te/zhib tu ni 'dul ba dngos po phra mo la lnga brgya 'dus pa zhes bya ba'i skabs nas 'byung ba de bzhin du sbyar bar bya'o/ /de la gsung rab mtha' dag ni bcu gnyis su bsdu bar bya ba yin pas/ 'di gsung rab bcu gnyis kyi nang nas gang du bsdu bar bya zhe na/'di ni gleng gzhi dang / rtogs pa brjod pa dang / de lta bu byung ba dang / skyes pa rabs kyi sder bsdu bar rig par bya ste/ de yang gleng gzhi'i sde ni gtso bo yin la gzhan gsum ni de'i 'khor yin te/ chos mngon pa kun las btus pa las//gsung rab bcu gnyis sde snod gsum du bsdu ba'i skabs nas/ gleng gzhi'i sde dang / rtogs pa brjod pa'i sde dang / de lta bu byung ba'i sde dang / skyes pa rabs kyi sde'i 'khor dang bcas pa 'di ni 'dul ba'i sde snod zhes 'byung ba'i phyir/ de la gsung rab bcu gnyis thams cad ni sde snod gsum du 'dus te/gsum gang zhe na/ mdo'i sde dang / 'dul ba dang / chos mngon pa'i sde snod yin na/ so sor thar pa'i mdo 'di de gsum gang du bsdu bar bya zhe na/ 'dul ba'i sde snod du bsdu bar bya ste/ 'dul ba thams cad kyi gnas 'di yin pa'i phyir ro//gsung rab bcu gnyis po de dag sde snod gsum du ji ltar bsdu zhe na/ chos mngon pa kun las btus pa las/ mdo dang / dbyangs kyis bsnyad pa dang / lung du bstan pa dang / tshigs su bcad pa dang / ched du brjod pa'i sde snod gang yin pa 'di nyan thos kyi mdo sde'i sde snod nyid do//gleng gzhi dang / rtogs pa brjod pa dang / de lta bu byung ba dang / skyes pa rabs kyi sde'i 'khor dang bcas pa gang yin pa 'di ni 'dul ba'i sde snod nyid do/ shin tu rgyas pa dang / rmad du byung ba'i chos kyi sde snod gang yin pa 'di ni byang chub sems dpa'i mdo sde'i sde snod do//gtan la phab par bstan pa ni gnyis ka'i chos mngon pa'i sde snod do zhes bshad do/ /ci'i phyir mdo sde zhes bya zhe na/ rnam pa bzhi'i phyir te/ gnas rnams dang mtshan nyid dang chos rnams dang don ston pa'i phyir ro//ci mngon zhe na/ bstan bcos mdo sde'i rgyan las/ gnas rnams dang ni mtshan nyid dang / /chos don ston phyir mdo yin no/ /zhes 'byung ba'i phyir ro/ /ci'i phyir 'dul ba zhes bya/ de yang bzhi'i phyir te/ ltung ba dang / skye ba dang / bslang ba dang / 'byung ba'i chos rnams ston pa'i phyir te/ ltung dang skye dang bslang ba dang / /'byung ba'i chos ni 'dul ba ste/ /zhes bshad pa lta bu'o/ /ci'i phyir chos mngon pa zhes bya zhe na/ mngon du ba dang / rgyun mi chad pa dang / zil gyis gnon pa dang / rtogs pa'i phyir te/ ji skad du/ mngon du ba dang rgyun mi 'chad/ /zil gnon rtogs phyir mngon pa'o/ /zhes 'byung ba lta bu'o/ /de ltar gcig la yang don rnam pa bzhir sbyar bar ci mngon zhe na/ de bas na mdo sde dag las/ mdo sde 'dul ba mngon pa'i chos/ / mdor na rnam bzhi don du bshad/ /blo ldan pas ni de shes na/ /byang chub dam pa thob par 'gyur/ /zhes gsungs pa'i phyir ro/ /ci'i phyir de bzhin gshegs pa rnams kyis sde snod gsum rnam par gzhag ce na/ nye ba'i nyon mongs pa the tshom gyi gnyen po'i phyir mdo sde'i sde snod rnam par gzhag go//nye ba'i nyon mongs pa mtha' gnyis dang ldan pa'i gnyen po'i phyir 'dul ba'i sde snod rnam par gzhag go/ /rang gi lta ba mchog tu 'dzin pa'i nye ba'i nyon mongs pa'i gnyen po'i phyir chos mngon pa'i sde snod rnam par gzhag go/ /yang bslab pa gsum brjod pa'i phyir mdo sde'i sde snod rnam par gzhag go//lhag pa'i tshul khrims dang / lhag pa'i sems kyi bslab pa sgrub pa'i phyir 'dul ba'i sde snod rnam par gzhag go/ /lhag pa'i shes rab kyi bslab pa mngon par sgrub pa'i phyir chos mngon pa'i sde snod rnam par gzhag go//yang chos dang don brjod pa'i phyir mdo sde'i sde snod rnam par gzhag go/ /chos dang don mngon du bya ba'i gzhi'i gnas kyi phyir 'dul ba'i sde snod rnam par gzhag go/ /'bel ba'i gtan gyis gtam la 'bebs par chos la rdzogs par longs spyod pas bde bar reg par gnas par bya ba'i phyir chos mngon pa'i sde snod rnam par gzhag go//ston pa mya ngan las 'das pa'i 'og tu nyan thos kyi 'dul ba yang rtsa ba gtogs par sde pa mi mthun pa nyi shu rtsa gnyis su gyur zhes 'byung na da ltar bshad pa'i mdo sde gang gi gzhung yin zhe na/ 'di ni nyi shu rtsa gnyis las thams cad yod par smra ba'i rtsa ba'i sde pa'i gzhung yin par rig par bya ste/thams cad smra ba la yang rtsa ba dang yan lag yod de/ de la rtsa ba ni gcig ste thams cad yod par smra ba'o/ /de las gyes pa'i yan lag ni bdun te/ gzhi thams cad yod par smra ba dang /'od srungs sde dang / sa ston dang / srung ba pa dang / mang du thos pa dang / gos dmar ba dang / rnam par phye ste smra ba'i sde rnams so/ /de la thams cad yod par smra ba'i sde rnams ni/ dus gsum dang ming dang gzugs rnams kyis ni 'dus byas rnams bsdus so//drug pa dang mi ldan pa rnams dang / 'dus byas rnams ni shes par bya ba yang ma yin rnam par shes par bya ba yang ma yin no/ /'dus ma byas ni rnam pa gsum mo/ /nyon mongs pa rnams ni mtshungs par ldan pa'o/ /thub pa ni rnam pa gnyis so/ /de'i gsung dang dbang po rnams ni gzugs can nyi tshe la yod do//mchod rten la phul ba ni 'bras bu che'o/ /byang chub sems dpas ngan 'gro spangs pa ni rnam pa gnyis su 'dod pa yod do zhes zer ro/ /bsod nams lam gyi tshogs su 'gyur ro zhes zer ba la sogs pa ni mi 'dod do zhes de lta bas na thams cad yod par smra ba'i sde pa zhes bya'o//de las gzhan pa'i sde pa rnams kyi lta ba dang / nyi shu rtsa gnyis su dang po ji ltar gyes pa'i lo rgyus zhib tu ni 'dir mangs pas ma bris te/ slob dpon dbyig gi bshes gnyen dang dul ba'i lhas gzhung lugs kyi bstan bcos mdzad pa las rgya cher 'byung bas de bzhin du sbyar bar bya'o//mdo sde la sogs pa gang bshad kyang rung ste/ dgos pa la sogs pa ma bstan na nyan pa po rtog pa sngon du gtong ba dag nyan par khas mi len te/ de'i phyir nyan pa po skye bo dag spro ba skyed pa'i phyir gdon mi za bar dgos pa la sogs pa ston pas 'dir yang de dag dang lugs mthun par dgos pa dang /'brel pa rnams bstan par bya ste/ de las dgos pa bstan pa ni/ dper na bya rog la so yod pa dang med par rtsod pa lta bu bshad pa yod kyang / 'bras bu med par dogs pa'i phyir dgos pa smos te/ dgos pa ni skabs 'dir tshig gi don gsal bar byed cing mthar phyin pa'i 'bras bu lhag ma lus pa dang / lhag ma lus pa'i mya ngan las 'das pa rnam pa gnyis 'thob par 'gyur ba la bya'o/ /'brel pa bstan pa ni klu 'jog po'i gtsug gi nor bu bsil sman du rung zhing phan pa'i dngos po yin yang /klu mig gdug pas blang bar bya ba'i thabs med pa 'dra bar 'jug pa la thabs med par dogs pa'i phyir 'brel pa smos te/ de la 'brel pa zhes bya ba ni/ rgyu dang 'bras bu 'brel pa ste/ bshad pa dang dgos par 'brel pa'o//dris pa nyan pa'i 'khor rnams spro ba skyed pa'i phyir dgos pa la sogs pa bstan to zhe na/ ston pa'i zhabs drung nas ma nyan te thos pa ni ma yin te/ brgyud pa'i tshul gyis thos pa la/ dgos pa la sogs pa bstan kyang yid ches pa'i gtan tshigs su mi rung ngo zhe na/'jig rten na yang kha cig phan pa dang gnod pa la dogs pa dang bcas bzhin du 'jug pa lta bu ste/ spangs kyang the tshom med pa ni gnyis te/ sangs rgyas bcom ldan 'das thams cad mkhyen pa'i ye shes lhun gyes grub pas the tshom mi mnga' ba dang / glen pa dag rmongs pa'i phyir the tshom med do/ /'di gnyis ma gtogs pa gzhan thams cad ni the tshom dang bcas bzhin du 'jug pas na/ ston pa'i zhabs drung nas mngon sum du thos pa ma yin yang phan pa la ni the tshom dang bcas bzhin du 'jug par bya/ gnod pa las ni bdag dang gzhan gnyi ga bzlog par bya'o//ci'i phyir 'di'i ming so sor thar pa bya zhe na/ nges pa'i tshig gi don bstan pa'i phyir dge slong ma'i so sor thar pa'i mdo zhes bya ba gsungs te/ de la dge slong ma'i zhes bya ba ni go sla bas ma bshad do/ /so sor thar pa zhes bya ba ni nyon mongs pa yongs su ma nyams pa chung ngu'i chung ngu la sogs pa'i rnam pa las 'dis shin tu thar par byed pas so sor thar pa'o//kha cig na re so sor zhes bya ba ni mang po la bya ste/ gcig gis spyad pas mang po thar pa ma yin gyi gang nyams su blangs pa de nyid thar par 'gyur ba'o//thar pa zhes bya ba ni las dang nyon mongs pa dang / tshe'i kun nas nyon mongs pa rnams dang / ngan song gsum las thar bar byed pa'i phyir thar pa zhes bya'o zhe'o/ /dris pa nyon mongs pa dang las dang tshe'i kun nas nyon mongs pa rnams las thar cing mya ngan las 'das pa thob par 'gyur ba ni 'phags pa'i lam yin no zhes 'byung ba na 'phags pa'i lam la thar pa zhes bstan pa'i rigs kyi 'di'i ming so sor thar pa zhes bstan pa ni mi rigs so//smras pa/ de yang bden mod kyi/ tshul khrims la gnas pa tshul khrims la brten nas bden pa bzhi ji lta ba bzhin mthong par 'gyur te/de las nyon mongs pa dang / las dang / tshe'i kun nas nyon mongs pa spangs shing mya ngan las 'da' ba thob par 'gyur ro zhes 'byung bas na/ tshul khrims la gnas te thos pa dang / bsam pa dang / bsgom pa'i rim pa rnams skye ba'i phyir tshul khrims kyi rgyu brgyud pa la so sor thar pa zhes byas kyang 'gal ba med do//mdo zhes bya ba ni mang ba'i don nyung ngur bsdus pa ste/ 'dul ba rnam par 'byed pa la sogs pa'i don ma lus pa 'dir 'dus pa'i phyir ro/ /da ni gzhung nyid bstan pa zhes bya ba ston te/ de'i phyir/ snyan pa'i ba dan 'jig rten gsum du grags//zhes bya ba nas/ thub dbang go 'phang thob par shog /ces bya ba'i bar du rgya cher gsungs so/ /'di'i bsdus pa'i don ni rnam pa brgyad du rig par bya ste/ gleng gzhi dang / bslab pa'i dngos po rnams kyi don bsdus te bstan pa dang / sngon gyi tshul dang /so sor thar pa nyid kyi 'bras bu dang / gso sbyong gi dgos pa dang / tshul khrims ji ltar bsrung ba'i tshul bstan pa dang / 'jig rten yongs la bsod nams bsngo ba'o/ de la gleng gzhi bstan pa ni/ snyan pa'i ba dan zhes pa nas de de bzhin du 'dzin to zhes bya ba'i bar du'o//bslab pa'i dngos po rnams bstan pa ni phas pham pa ni brgyad nas/ zhi bar bya ba'i chos bdun rdzogs pa'i bar du'o/ /bslab pa'i dngos po rnams kyi don bsdus nas bstan pa zhes bya ba ni/ 'phags ma dag bdag gis so sor thar pa'i mdo bshad zin te zhes bya ba nas/dga' ba la rab tu brtson par bya'o zhes bya ba'i bar dang sbyar ro/ /sngon gyi tshul bstan pa zhes bya ba ni/ /bzod pa dka' thub dam pa bzod pa ni/ /zhes bya ba nas/ grags ldan rnams kyi so sor thar/ /'di ni rab tu rgyas par bshad//ces bya ba'i bar du'o/ /so sor thar pa nyid kyi 'bras bu bstan pa zhes bya ba ni/ 'di la sangs rgyas rnams dang / gang zhes bya ba nas/ sdug bsngal mtha' mar phyin par 'gyur/ /zhes bya ba'i bar rnams so/ /gso sbyong gi dgos pa bstan pa zhes bya ni/phan tshun tshul khrims bsrung ba dang / /zhes bya ba nas/ dge 'dun gyis ni gso sbyang bya/ /zhes bya ba'i bar du'o/ /tshul khrims ci ltar bsrung ba'i tshul bstan pa ni/ /gang gi phyir ni mdo bshad dang / /zhes bya ba nas/ g.yag rnga'i rtse mo ji bzhin no/ /zhes pa'i bar dang sbyar ro//'jig rten yongs la bsod nams bsngo ba yang tha ma'i tshigs su bcad pa gcig dang sbyar ro/ /de la gleng gzhi bstan pa yang bsdus pa'i don ni drug tu rig par bya ste/ de bzhin gshegs pa'i yon tan brjod cing phyag byas nas so sor thar pa'i mdo bshad pa'i gnas bstan pa dang /so sor thar pa nyid kyi legs pa'i yon tan bstan pa dang bsgrub par bskul ba dang / 'di nyid thos pa la sogs pa dka' bar bstan cing 'phags pa rnams mthong ba dang / de bsgrub pa'i rgyu 'bras rnams thob par bstan pa dang / mi rtag pa la sogs pa bstan pa gso sbyong gi yan lag kun tu spyad pa'i chos rnams bstan pa'o//de la re zhig de bzhin gshegs pa'i yon tan brjod cing phyag byas nas so sor thar pa'i mdo bshad pa'i gnas bstan pa zhes bya ba bstan pa'i phyir/ snyan pa'i ba dan 'jig rten gsum du grags//zhes bya ba nas/ 'phags pa'i tshogs kyi dbus su dbye bar bya/ /zhes pa'i bar du gsungs te/ tshigs su bcad pa 'di gnyis la phyed dang gnyis kyis ni de bzhin gshegs pa'i yon tan brjod cing phyag byas pa bstan to/ /tha ma'i rkang pa gnyis kyis ni so sor thar pa'i mdo bshad pa'i gnas bstan pa yin te/phyed dang gnyis kyis de bzhin gshegs pa'i yon tan brjod cing phyag byas pa la yang don rnam pa bdun gyis bshad pa sbyar bar bya ste/ rgyu dang 'bras bu dang / gzhan gyi don dang / ye shes dang / thugs rje dang /'bras bu'i khyad par dang / bdag gi don dang / zhar la grub pa'i 'bras bu phun sum tshogs pa'o/ /de la rgyu dang 'bras bu phun sum tshogs pa'i dbang du mdzad nas/ snyan pa'i ba dan 'jig rten gsum du grags/ /zhes bya ba gsungs te/ snyan pa zhes bya ba ni de bzhin gshegs pas bskal pa grangs med pa nas sa dang pha rol tu phyin pa la sogs pa dka' ba rnam pa sna tshogs spyad de/thams cad mkhyen pa'i ye shes lhun gyis grub pa'i yon tan stobs dang mi 'jigs pa la sogs pa tshad med pa rnams so/ /ba dan ni dpe ste ji ltar mang po 'dus pa'i gnas su ba dan btsugs na/gsal zhing mdzes pa dang / des mtshon pa rnams pa ma mi nor ba de bzhin du/ de bzhin gshegs pa'i che ba'i yon tan yang snyan cing mdzes pa dang / de la brten pa rnams kyis ngan song gsum la sogs pa lam log pa yongs su spang pa'i phyir/de bzhin gshegs pa'i yon tan yang ba dan dang 'dra zhes bshad do/ /'jig rten zhes bya ba ni rnam pa gnyis te/ sems can dang snod kyi 'jig rten no/ skabs 'dir ni sems can gyi 'jig rten dang sbyar te/ de bzhin gshegs pa'i yon tan de dag sems yod pa la grags su rung ba'i phyir ro/gsum du grags zhes pa ni 'dod pa dang / gzugs dang gzugs med pa'i khams gsum du grags pa'o/ /sgra dang sgra thos pa'i dbang po ni gzugs can yin na/ gzugs med pa'i khams su sgras ji ltar grags par 'gyur/dper na dngul gyi rgyu stang zil yin pa dang 'dra bar sngon 'dod pa dang gzugs kyi khams na gnas pa'i tshe/ de bzhin gshegs pa'i che ba yon tan thos pa'i bag chags de la yod pas de nyid la grags zhes byas kyang 'gal ba med do/ gzhan gyi don phun sum tshogs pa'i dbang du mdzad nas/ dam pa'i chos sgra seng ge'i sgra bsgrags pa/ /zhes bya ba gsungs so/ /de la dam pa zhes bya ba ni de bzhin gshegs pa ste/ sgrib pa rnam gnyis spangs shing 'jig rten mchog tu gyur pa'i phyir ro/ chos ni des gsungs pa'i chos de bstan pa dang /sgrub pa dang / 'bras bu'i chos gang yang rung ba'o/ /yang na dam pa'i chos gsum po de nyid skyon med cing gzhan dag las khyad par du gyur pa'i phyir yang dam pa zhes bya'o/ /seng ge'i sgra bsgrags pa zhes bya ba ni dpe ste/ ji ltar seng ge'i sgras byol song thams cad zil gyis gnon pa dang 'dra bar/de bzhin gshegs pa yang mi 'jigs pa bzhi la sogs pa'i yon tan dang ldan pas/ khams gsum na bag rkyong zhing bdud dang log par lta ba thams cad zil gyis mnan te/ dam pa'i chos ston cing gzhan gyi don mdzad pa'i phyir ro/ / ye shes phun sum tshogs pa'i dbang du mdzad nas/ thams cad mkhyen pa zhes bya ba gsungs te/ ci'i phyir de bzhin gshegs pa thams cad mkhyen pa zhes bya zhe na/ de ni 'jig rten las 'das pa dang / zag pa dang zag pa med pa dang / 'dus byas dang 'dus ma byas dang / bla na yod pa dang bla na med pa'i chos ji snyed pa dang / ji lta ba de dag thams cad skyes bu mig dang ldan pa'i lag mthil du skyu ru ra'i 'bras bu bzhag pa bzhin du thams cad ma lus par gzigs pa yin pa'i phyir thams cad mkhyen pa zhes bya'o/ /yang kha cig na re rnam pa bzhi'i thams cad mkhyen pa zhes 'chad de/bzhi gang zhe na ma lus pa dang / tshad med pa dang / thun mong ma yin pa dang / ma nor bar mkhyen pa'o/ /de ma lus par mkhyen pa ni 'jig rten pa dang 'jig rten las 'das pa dang / 'dus byas dang 'dus ma byas la sogs pa ma lus par mkhyen pa'o//tshad med par mkhyen pa ni nyan thos dang / rang sangs rgyas lta bu stong khams gnyis dang gsum shes pa lta bu ni tshad yod pa yin gyi/ de bzhin gshegs pa'i mkhyen pa la ni tshad bzung zhing dpag tu med pa'i phyir tshad med par mkhyen pa'o/ /thun mong ma yin par mkhyen pa ni gang nyan thos dang /rang sangs rgyas kyis shes shing mthong ba ni de bzhin gshegs pas mkhyen gyi/ de bzhin gshegs pas thugs su chud pa ni gzhan gyis mi shes pa'i phyir thun mong ma yin par mkhyen pa'o/ /ma nor bar mkhyen pa ni bshad ma thag pa'i gsum po ltar mkhyen pa yang chos kyi chos nyid ji lta ba bzhin du phyin ci ma log par mkhyen pa'i phyir ro zhe'o//yang na skye mched bcu gnyis mkhyen pa'i phyir yang thams cad mkhyen pa zhes bya ste/ lung las kyang bram zes gsol pa/ bcom ldan 'das kyi mtshan thams cad mkhyen zhes bgyi ba yab yum gyis btags sam/yon tan gyis mtshan du gsol/ bka' stsal pa/ bram ze nga'i ming thams cad mkhyen pa zhes bya ba ni yon tan las mtshan du gsol ba ste/ skye mched bcu gnyis mkhyen pa'i phyir ro/ /bram zes gsol pa/ de ltar na rnam par shes pas thams cad mkhyen pa zhes mtshan gsol ba mi rigs so/bka' stsal pa/ phyi'i skye mched dang / nang gi skye mched 'dus pa las rnam par shes pa 'byung bas na bcu gnyis su 'dus te/ de'i phyir thams cad mkhyen pa zhes byas kyang 'gal ba med do/ /thugs rje phun sum tshogs pa'i dbang du mdzad nas/rin chen mdzod brnyes pa zhes bya ba gsungs so/ /dper na rin po che yod na bang mdzod dgos pa bzhin du/ de la rin chen zhes bya ba ni de bzhin gshegs pas gsung pa/ dam pa'i chos sngar bshad pa rnam pa gsum la bya ste/ de'i mdzod lta bur gyur pa ni nyan thos kyi dge slong la sogs pa dag yin pas/mdo dag las kyang / sangs rgyas lta bu'i ston pa med/ /dam chos lta bu'i 'dren pa med/ /dge 'dun lta bu'i snod kyang med/ /ces gsungs so/ /de yang bcom ldan 'das kyis thugs rje'i byin gyis brnyes pas na/'di la thugs rje phun sum tshogs pa zhes bya'o/ /'bras bu khyad par gyi phun sum tshogs pa'i dbang du mdzad nas/ zhabs la tshangs dbang gtsug gi nor bus gtugs/ /zhes bya ba gsungs so/ /mtshan dang dpe byad la sogs pa'i yon tan rnams kyis brgyan pa/sangs rgyas bcom ldan 'das kyi zhabs la gzugs kyi bsam gtan dang po la dbang ba tshangs pa dang / pad+ma 'byung ba zhes kyang bya ba dang / sum cu rtsa gsum gyi lha'i rgyal po dbang po dang / brgya byin dang / mig stong zhes bya ba spyi gtsug gi nor bu rin po che yod pas gtugs te/phyag byas na gzhan lta ci smos zhes khyad par du bstan pa'o/ /bdag gi don phun sum tshogs pa'i dbang du mdzad nas/ sdug bsngal rgya mtsho gting mtha' med brgal ba/ /zhes bya ba gsungs te/ de la sdug bsngal zhes bya ba ni gsum dang brgyad de gsum gang zhe na/'du byed dang / 'gyur ba dang / sdug bsngal gyi sdug bsngal lo/ /brgyad ni skye ba dang / rga ba dang / na ba dang / 'chi ba dang / sdug pa dang bral ba dang / mi sdug pa dang phrad pa dang / 'dod pas phongs pa dang / phung po lnga rgyas pa'i sdug bsngal lo//rgya mtsho dang pha mtha' med ces bya ba ni dpe ste/ ji ltar rgya mtsho la pha rol gyi 'gram dang / gting gi mtha' med pas brgal bar dka' ba de bzhin du/ thog ma med pa'i dus nas las dang nyon mongs pa bsags pa'i 'bras bu sdug bsngal rnams kyang / rgya mtsho dang 'dra bar pha mtha' med de brgal dka' ba de las de bzhin gshegs pa nyag gcig gis brgal bas na 'dis bdag gi don phun sum tshogs pa zhes bya'o//byang chub gnyis po yang sdug bsngal de dag las ma brgal ba ma yin gyi/ phyis de bzhin gshegs pas bzlas par zad de/ thog mar brgal ba nyid bstan pa'i phyir nyag gcig smos so//yang na byang chub gnyis kyi sdug bsngal las brgal ba tsam du zad kyi sdug bsngal gyi chos nyid yang dag pa ji lta ba bzhin du ma rtogs pa'i phyir ro/ /de bzhin gshegs pa nyag gcig ces smos kyang 'gal ba med do/ /sdug bsngal rgya mtsho dang 'dra ste mtha' med pa de bzhin gshegs pas brgal zin pas/pha mtha' med ces bstan pa 'gal lo zhe na/ pha mtha' med ces bya ba so so skye bo 'jug pa zhen pa la bya'i/ bskal pa grangs med pa nas dka' ba spyad de/ sa dang pha rol tu phyin pa rnams rdzogs nas/thams cad mkhyen pa'i ye shes lhun gyis grub pas brgal ba la ni pha mtha' med pa'ang ma yin pas 'gal ba med do/ /zhar la grub pa'i 'bras bu phun sum tshogs pa'i dbang du mdzad nas/ 'gro ba'i gtso la spyi bos phyag 'tshal te/ /zhes bya ba gsungs so//de la 'gro ba zhes bya ba ni khams gsum na rgyun mi 'chad par las dang nyon mongs pa'i dbang gis 'khor ba nas 'gro ba zhes bya ste/ 'gro ba lnga'am drug tu bstan pa rnams so/ /de'i gtso bor gyur pa ni sangs rgyas bcom ldan 'das rnams te/ de la gtso bo zhes bya ba ni mchog dang / dam pa dang / khyad par can zhes bya ba'i rnam grangs su gtogs pa'o/ /spyi bos phyag 'tshal ba na 'dul ba la yang dag par sdud pa'i dus su/ 'phags pa nye bar skyong gis phyag byas pa'o/ /so sor thar pa'i mdo bshad pa'i gnas bstan pa'i phyir/ thams cad mkhyen pa'i bslab tshig rin chen snod//'phags pa'i tshogs kyi dbus su dbye bar bya/ /zhes gsungs te/ de la thams cad mkhyen pa zhes bya ba ni sngar bshad pa bzhin no/ /de la bslab pa ni srog gcod pa la sogs pa ltung ba sde lnga'i nyes pa lngas zlog par byed pa rnams so/ /tshig ces bya ba ni brjod pa dang /bshad pa ste des go bar byed pa'o/ /rin chen zhes bya ba ni dkon pa'i phyir te/ 'dul ba rnams so/ /snod ces bya ba ni 'dul ba rin po che rnams kyi snod de so sor thar pa 'di nyid yin par bstan te/ yang na snod ces bya ba ni 'phags pa'i bslab tshig rin chen gyi snod yin par bshad de/so sor thar pa nyid bslab tshig rin chen yin pas snod du mi sbyar ro/ /de la 'phags pa zhes bya ba ni sdig pa las ring du gyur pa'i phyir ro/ /tshogs ni bzhi yan chad du 'dus pa la bya ste/ dper na ji ltar rin po che yang ya rabs la bstan na bzang bar shes pa dang 'dra bar thams cad mkhyen pa'i bslab tshig rin po che dang 'dra bar so sor thar pa 'di yang 'phags pa dag gi dbus su bshad par bya'i/byis pa glen pa mi gsal ba dag gi dbus su bstan kyang don med pa'i phyir 'phags pa'i tshogs kyi dbus su dbye bar bya'o zhes bstan pa yin no//so sor thar pa nyid kyi legs pa'i yon tan bstan pa zhes bya ba ston to/ /de'i phyir/ sangs rgyas kyis ni 'dul ba mtsho/ /zhes bya ba nas/ dge slong mngon sum nyid du bstod/ /ces pa'i bar du gsungs so/ /'di la yang don rnam pa brgyad kyis bstan par bya ste/'dul ba rnams kyi gnas bstan pa dang / 'di gsang ba yin par bstan pa dang / bla na med pa'i rgyur bstan pa dang / 'tshal ba'i tshul khrims kyi gnyen po bstan pa dang / bdag med pa'i gnyen por bstan pa dang / ngan song rnams spang zhing mngon par mtho ba thob pa'i rgyu bstan pa dang /nyon mongs pa spang zhing mya ngan las 'das pa'i rgyu bstan pa dang / ston pa dang 'dra bas bstan pa'o/ /de la 'dul ba rnams kyi gnas bstan pa zhes bya ba sngar bshad pa'i phyir/ sangs rgyas kyi ni 'dul ba mtsho/ /ma lus gting dang pha rol med//gnas dang snying gi snying po ni/ /so sor thar pa 'di yin no/ /zhes bya ba gsungs so/ /sangs rgyas kyi ni zhes pa phyi rol pa rnams dgag pa'i phyir ro/ 'dul ba ni dug gsum 'dul zhing nyes pa las bzlog pa'am/ yang na rnam par 'dren zhes kyang bya ste/ ngan song gsum las 'dren cing bde ba'i gnas su 'jog pa'i phyir ro//mtsho gting dang pha rol med ces bya ba ni 'dul ba rnams mang ba'i dpe ste/ ji ltar rgya mtsho pha rol dang gting med pas grangs mang zhing zab pa de bzhin du 'dul ba yang grangs mang zhing zab pas sems can rnams kyi shes par dka' ba de dag ma lus par mdo 'di'i nang du 'dus pa'i phyir ro//gting dang pha rol med pa lus/ /zhes rmongs pa'i rigs pa las tshigs bcad la mi bde nas/ ma lus gang du smos te de bzhin du rig par bya'o/ /de la gnas zhes pa ni 'dul ba rnams kyi gzhi 'am rten lta bu so sor thar pa 'di gnas pa'i phyir ro//snying gi snying po zhes bya ba la ston pas gsungs pa'i chos rnams kyi nang du 'dus pa ni gsang ba yin pas snying po yin la/ de rnams kyi snying po ni so sor thar pa yin pas snying po zhes bya'o/ /so sor thar pa 'di yin no zhes bya ba ni 'di nyid yin par bstan pa'o//'di gsang ba yin par bstan pa zhes bya ba ston te/ de'i phyir/ 'di ni dam chos rgyal po yi/ /dam chos mi bri bsdus pa yin/ /zhes bya ba gsungs so/ /de la 'di ni zhes smos pas so sor thar pa 'di nyid do/ /dam chos rgyal po zhes bya ba ni ji ltar rgyal pos yul dang mi rnams la dbang byed pa de bzhin du/de bzhin gshegs pa yang 'jig rten dang 'jig rten las 'das pa'i chos thams cad la mnga' brnyes pa'i phyir ro/ /dam chos mi bri bsdus pa yin/ /zhes bya ba ni gsung rab bcu gnyis la mdo sde dang chos mngon pa dag ni yi ger bri zhing bstan par bya ba yin gyi 'dul ba ni gsang bas na yid la bri zhing gzung bar bya ba yin pa'i phyir ro//ma 'ongs pa'i skye bo dbang po zhan pa dag ni yi ger bri zhing bstan pa yang gnang ste/ mdo phra mo las bcom ldan 'das la tshe dang ldan pa u pa lis zhus pa/btsun pa ma 'ongs pa'i dus na dge slong dran pa nyams pa dang / dran pa zhan pa dag byung ste/ de dag gis grong dang grong khyer gang du/ ji ltar gnas shing bslab pa'i gzhi gang du bcas pa de dag gi ma 'tshal na ci lta bur nan tan bgyi/ bka' stsal pa dran pa nyams pa dang /dran pa zhan pa de dag gis 'dul ba rnams lo ma la yi ger bris la bcang bar bya ste/ de la the tshom ma byed cig ces gsungs pa'i phyir ro/ /bla na med pa'i rgyur bstan pa zhes bya ba bstan pa'i phyir/ 'di ni dge slong tshong pa yi/ /bslab zong tshong khang chen po'o/ / zhes bya ba gsungs te/ 'di'i don ni dpe las rig par ste/ ji ltar tshong pa rnams tshong 'dus na nor rin po che rnams nyo 'tshong zhing khe tshol ba dang 'dra bar/ dge slong mas kyang bslab pa 'di zong du thogs nas/ bla na med par khe tshol ba la so sor thar pa 'di 'phags pa'i 'byung gnas su gyur pa'i phyir bslab zong tshong 'dus chen po zhes bshad do//de la 'di zhes bya ba ni so sor thar pa 'di nyid do/ /dge slong zhes bya ba ni mya ngan las 'das pa'i don slong zhing tshol ba dang / gsol ba dang bzhi'i las kyis bsnyen par rdzogs la/ chos dang mthun par bsod snyoms len pas 'tsho bas na dge slong zhes bya'o//bslab pa ni tshul khrims la bstan nas nyon mongs pa zad par slob cing sbyong ba na bslab pa zhes bya'o/ /chen po ni bla na med pa'i zong so sor thar pa 'di ma yin pa gzhan med pa'i phyir ro/ /gzhan ni brda sprad par zad do//'chal ba'i tshul khrims kyi gnyen po bstan pa zhes bya ba bstan pa'i phyir/ tshul khrims ngan pas zin pa yi/ /gdug pa sel ba'i sman 'di yin/ /zhes bya ba gsungs so/ /ji ltar gdug pas zin pa la/ /dug sman gyis 'tsho ba de bzhin du tshul khrims ngan pa ste/lus dang ngag dang yid gsum gyi sgo nas/ kha na ma tho ba spyod pa rnams las bzlog cing mdo 'di las 'byung ba bzhin du spyad na kha na ma tho ba de dag las grol zhing bde ba 'thob pa'i phyir tshul khrims ngan pas zin pa'i dug la so sor thar pa 'di sman dang 'dra ba'i phyir ro/ / de la tshul khrims zhes bya ba ni/ /shI la zhes bya ba'i sgra las drangs nas legs par spyod pa la zhugs shing tshul khrims dam pos bsrungs pas mi dge ba spangs pa'i ming la bya/ yang gcig tu na nyon mongs pa'i gdung ba me dang 'dra ba zhi zhing bsil bar gyur pa'i ming yang yin te/ dngos su na dang tshul gyis mi dge ba mi spyod cing tshul khrims bsrung ba'i ming ste/ de'i phyir tshul khrims zhes bya'o/ /bag med pa'i gnyen por bstan pa zhes bya ba ston te de'i phyir/ 'di ni lang tsho 'khrul pa yi/ /glang po gzhon nu'i lcags kyu'o/ /zhes bya ba gsungs te/dper na glang po che lang tsho la bab pa g.yeng sa la sogs pa bag med par mchong zhing 'gro bas bdag gi srog gi bar chad du yang 'gyur la de'i zhor gyis srog chags mang po 'chi zhing skrag pas bdag dang gzhan la gnod par 'gyur pa de la glang po che'i thabs la mkhas pas lcags kyus bcos na dul bar 'gyur ba de bzhin du/dge slong ma lang tsho la bab pa bag med cing sems nang du 'jog mi nus pa rnams so sor thar pa'i lcags kyu 'dis bcos shing btul na/ sems las su rung zhing lang tsho'i nyes pa las grol ba'i phyir so sor thar pa 'di ni lcags kyu'i sgrar bstan to//de la lang tsho'i dus ni 'dod pa spyod nus pa nas lo sum cu man chad la bya'o/ /ngan song rnams spang zhing mngon par mtho ba 'thab pa'i rgyu bstan pa zhes bya ba bstan pa'i phyir/ ngan 'gro 'khor ba zab mo las/ /sgrol ba'i gzings ni 'di yin no/ /'di ni bzang 'gror 'gro ba yi//stegs dang zam par nges pa'o/ /zhes gsungs so/ /de la ngan 'gro ni gsum ste/ sems can dmyal ba dang / dud 'gro dang / yi dags so/ /'khor ba zhes bya ba ni ngan song gsum po de dag tu nye bar len pa'i phung po yang dang yang du len pa'i phyir ro/ /zab mo zhes bya ba ni rnam pa gnyis te/shin tu 'jigs pa dang / brgal bar dka' ba'o/ /de la shin tu 'jigs pa ni ngan song gi 'bras bu ste/ tsha ba dang / grang ba dang / nye ba dang / nyi tshe'i dmyal ba dag tu skyes pa rnams gtub cing gshegs pa la sogs pa'i 'jigs pa dang / dud 'gro glen zhing gti mug ste/ nying sha nying gis za ba la sogs pa'i 'jigs pa dang / yi dags bkres skom gyis gdungs pas 'jigs pa'o/ /brgal bar dka' ba ni ngan song de dag rgya mtsho dang 'dra ba'i phyir ro/ /sgrol ba'i gzings zhes bya ba ni dpe ste/ ji ltar rgya mtsho'i pha rol tu bgrod na gru dang gzings kyi sa pha rol tu phyin par byed pa de bzhin du/ngan song gsum po de dag gi sdug bsngal rgya mtsho dang 'dra ba de las bzla bar 'dod pa rnams kyis so sor thar pa 'di las 'byung ba bzhin du spyad na sdug bsngal de dag las grol bar 'gyur bas na/ gzings dang 'dra zhes bshad do/ /bzang 'gro zhes bya ba ni legs pa dang bde ba'i gnas su 'gro ba mngon par mtho ba ste/lha dang mi'i 'gro ba la bya'o/ /'gro ba'i stegs dang zam pa zhes bya ba ni lha dang mi'i gnas der 'gro ba'i stegs dang zam pa ste/ ji ltar chu bo la stegs dang zam pas brgal bar 'gyur ba dang 'dra ba lha dang mi'i stegs dang zam par nges pa'i so sor thar pa 'di las 'byung ba bzhin byas na lha dang mi'i bde ba myong bar 'gyur ba'i phyir ro//nges pa zhes bya ba ni gdon mi za ba'i tha tshig go/ /nyon mongs pa spang zhing mya ngan las 'da' ba'i rgyu bstan pa zhes bya ba stan te/ de'i phyir/'di ni nyon mongs pham byed lam/ /rgyal ba yi ni 'dren pa mchog /'di ni thar pa'i grong 'jug pa'i/ /them skas gzhi dang 'dra bar gnas/ /zhes bya ba gsungs so/ /'di ni zhes bya ba ni so sor thar pa 'di nyid do/ /nyon mongs pa zhes bya ba ni gnyis te/ mthong bas spang bar bya ba dang /bsgom pas spang bar bya ba ste/ brgyad cu rtsa brgyad dang / /bcur bstan pa rnams so/ /theg pa chen po'i bstan bcos las ni mthong ba dang bsgom pas spang bar bya ba'i nyon mongs pa ni brgyad cu rtsa gnyis dang / bcu drug yod ces 'chad do/ /pham byed lam zhes bya ba ni nyon mongs pa spang zhing pham par byed pa'i lam ste/so sor thar pa 'di nyid yin par bstan to/ /rgyal po'i 'dren pa mchog ces bya ba ni dpe ste/ ji ltar rgyal pos gzhan gyi dgra la rgol na/ sa mkhan gyis dang por drangs te/ de nas dmag gi dpung gis 'joms par byed pa dang 'dra bar/ dgra dang 'dra ba'i nyon mongs pa de gzhom na/ sngar tshul khrims la brten nas de'i 'og tu 'phags pa'i lam gyis nyon mongs pa spang bar 'gyur ba'i phyir ro/ /lam ni rgyal po lta bur bstan la/ lam de 'dren pa'i mchog ni so sor thar pa yin par bshad do/ /thar pa'i grong khyer 'jug pa yi//zhes bya ba ni mya ngan las 'da' ba'i grong khyer nyid du 'jug go/ /them skas gzhi dang 'dra bar gnas/ /zhes bya ba ni/ ji ltar grong khyer mthon po'i steng du 'dzegs na skas la brten cing skas kyang gzhi sa la brten dgos pa dang 'dra bar/ gang dag mya ngan las 'da' ba'i grong khyer du 'jug par 'dod pa rnams kyang /them skas kyi gzhi dang 'dra bar so sor thar pa 'di la brten dgos pa'i phyir/ 'phags pa'i lam ni them skas su bstan la/ de'i gzhi dang 'dra bar ni so sor thar pa 'di nyid yin par bstan to/ /ston pa dang 'dra bar bstan pa zhes bya ba bsten pa'i phyir/ nga ni mya ngan 'das gyur na//'di ni khyod kyi ston zhes kyang / /rang byung nyid kyis nan tan du/ /dge slong mngon sum nyid kyis bstod/ /ces bya ba gsungs so/ /'di ni ston pa lhag ma ma lus pa'i mya ngan las 'da' bar nye ba zhig na/ kun dga' bo la sogs pa dge slong rnams kyis gsol pa/ bcom ldan 'das mya ngan las 'das pa'i 'og tu/dge slong khyim sun 'byin pa dang / sdig to can dang ji ltar lhan cig gnas shing bstan pa bzhin du bgyi/ ston pa ni sus bgyi zhes gsol ba'i lan du gsungs so/ /de la nga ni zhes bya ba ni mu stegs can gyis btags pa'i nga yod pa ma yin gyi/ gzhan dag go bar bya ba'i phyir ram gong na med pas che'o zhes bya ba'i tha tshig go/ /mya ngan 'das gyur na zhes bya ba ni gnyis te/ lhag ma dang bcas pa dang / lhag ma med pa ste skabs 'dir ni lhag ma med pa'i mya ngan las 'das pa gzung ngo / /'di ni zhes bya ba ni 'di nyid do/ /khyed kyi ston pa zhes bya ba ni dge slong ma rnams kyi ston pa ste/de bzhin gshegs pa dang 'dra bar blta bar bya'o zhes bstan pa'o/ /rang 'byung zhes bya ba ni gzhan gyi dring las skyes pa ma yin gyi/ de bzhin gshegs pa nyid kyis chos nyid rtogs nas mngon par rdzogs par sangs rgyas pa'i phyir ro/ / nyid kyis nan tan du zhes bya ba 'dis yang dag par gsungs pa'o/ /mngon sum nyid du bstod ces bya ba ni 'di la ston par ltos shig ces nyan thos rnams la mngon sum du gsungs pa'i phyir ro/ /da ni sgrub par bskul pa zhes bya ba ston te/ de'i phyir sangs rgyas zhes bya ba'i sgra 'di yang zhes bya ba nas/mnyan pa'i phyir ni 'bad par bya/ /zhes bya ba'i bar du gsungs so/ /'di la yang rnam pa bzhir dbye ste/ ston pa mthong zhing thos pa dang / mi lus rnyed par shin tu dka' bar bstan pa dang / mi khom pa spangs nas tshangs par spyod pa rnyed pa shin tu dka' bar bstan pa dang /dge ba'i bshes gnyen rnyed par shin tu dka' ba bstan pa dang / mjug bsdu zhing rtsol du gzhug pa'o/ /ston pa mthong zhing thos pa dang / mi lus rnyed par shin tu dka' bar bstan pa zhes bya ba'i dbang du byas na/ sangs rgyas zhes bya'i sgra 'di yang / /'jig rten dag na rab tu dkon//mi nyid rnyed par shin tu dka'/ /zhes bya ba gsungs te/ de la sangs rgyas zhes bya ba ni gti mug gi gnyid sangs pa nas gnyid sangs pa bzhin te sangs pa la snyegs/ blo bye zhing rgyas pas na pad+ma kha bye zhing rgyas pa dang 'dra bas tshig gi don spyir bsdus nas/chos thams cad thugs su chud cing ma lus par byang chub pa'i phyir sangs rgyas zhes bya/ de la mi zhes bya ba'i sgra ni shed shes pa las skyes pa'i phyir te/ de la dngos po 'dod par bya ba yin pa'i phyir ro/ /yang na de dag gis thos pa dang ldan pa rnams kyi yid la rjod par byed pas na mi zhes bya'o zhes yo ga tsa ra'i TI ka las bshad do//sangs rgyas zhes bya ba'i sgra 'jig rten na ci'i phyir dkon zhe na/ sangs rgyas 'jig rten du 'byung ba shin tu rnyed par dka' ba'i phyir te/ cis mngon zhe na/ dam pa'i chos pad+ma dkar po'i mdo las/ dge slong dag de bzhin gshegs pa dgra bcom pa yang dag par rdzogs pa'i sangs rgyas rnams ni 'byung ba rnyed par dka' ste/bskal pa bye ba khrag khrig brgya stong phrag mang por yang 'jig rten du de bzhin gshegs pa mthong yang srid mi mthong bar yang srid de/ dper na u dum wA ra'i me tog bzhin no/ / zhes gsungs so/ /rnam par gtan la dbab pa'i rgyal po'i mdo las/ kun dga' bo 'di lta ste/ u dum wA ra'i me tog ni sangs rgyas skyes pa dang dus gcig tu 'byung ste/ kha cig ldan zhing gsal te/ 'od bzang la dris ni dpag tshad gcig khor yug tu khyab par byed do/ /me tog des ni rab rib med par byed//dran pa yongs su sbyong bar byed/ /nad kyang rab tu zhi bar byed/ dri nga ba yang sel zhing snang bar byed/ dri zhim po yang 'byin par byed do/ /dri des khams bzhi dngas par 'gyur te/ 'khor los sgyur ba'i rgyal po thams cad la yang me tog mi 'byung na/ sems can tshul khrims 'chal ba rnams dang /sangs rgyas 'byung ba dang mtshungs pa'i me tog lta 'byung bar ga la 'gyur zhes gsungs so/ /me tog de ci 'dra/ gang du nam skyes she na/ rtogs pa brjod pa'i mdo las mtsho chen po ma dros pa 'das pa'i byang phyogs na/ ri rtse lnga pa zhes bya ba de'i pha rol na u dum wA ra'i tshal yod de/nam sangs rgyas bcom ldan 'das dag dga' ldan lha'i ris nas babs te/ yum gyi lhums su zhugs pa de'i tshe tshal de kha 'bu bar byed do/ /nam yum gyi lhums nas bltams pa de'i tshe tshal de kha 'byed par 'gyur ro/ /nam bla na med pa yang dag par rdzogs pa'i byang chub mngon par rdzogs par sangs rgyas pa de'i tshe/tshal de'i me tog kyang rab tu rgyas par 'gyur ro/ /nam tshe'i 'du byed 'dor ba de'i tshe/ tshal de rnyings par 'gyur ro/ /nam yongs su mya ngan las 'das pa de'i tshe tshal de'i lo ma dang / me tog dang / 'dab ma dang / 'bras bu yang lhags par 'gyur ro/ /me tog de'i tshad ni shing rta'i 'phang lo tsam mo/ /nam sangs rgyas bcom ldan 'das dag rgyal rigs su 'byung ba de'i tshe me tog de dag kha dog dkar por rab tu 'gyur ro/ /bram ze'i rigs kyi nang du 'byung ba de'i tshe yang me tog de dkar por 'gyur ro zhes gsungs so//sdong po bkod pa'i mdo las kyang / /gang dag mthong zhing thos pa dang / /bsnyen bkur byas pa don yod pa/ /'jig rten 'dren pa 'jig rten na/ /bskal pa bye bar rnyed par dka'/ /zhes gsungs so/ /bskal pa bzang po'i mdo las kyang bskal pa bzang po 'di'i 'og tu sangs rgyas med pa'i bskal pa drug cu 'byung ngo //de'i 'og tu bskal pa snyan pa chen po zhes bya ba 'byung ste/ bskal pa gcig pu de la sangs rgyas khri 'byung ngo / /bskal pa snyan pa chen po de'i 'og tu sangs rgyas med pa'i bskal pa brgyad khri 'byung ngo / /de'i 'og tu bskal pa skar ma lta bu zhes bya ba 'byung ste/bskal pa de gcig pu la sangs rgyas brgyad khri 'byung ngo / /bskal pa skar ma lta bu de'i 'og tu bskal pa sum brgyar sangs rgyas mi 'byung ngo / /de'i 'og tu yon tan bkod pa zhes bya ba'i bskal pa 'byung ste/ bskal pa de gcig pu la sangs rgyas brgyad khri bzhi stong 'byung ngo zhes gsungs te//de ltar na sangs rgyas 'byung ba'i bskal pa ni nyung la/ sangs rgyas med pa'i bskal pa ni mang ba'i phyir ston pa 'jig rten du 'byung ba mthong zhing de'i sgra thos par dka' bar mngon no/ /brgya la sangs rgyas 'jig rten du byung na yang mi lus shin tu thob par dka' ste/cis mngon zhe na/ yang dag par ldan pa'i lung las/ dge slong dag 'di lta ste/ dper na sa chen po 'di chu 'ba' zhig tu gyur la de'i nang du mi 'ga' zhig gis shing bu ga gcig pa zhig bor te/ de shar gyi rlung gis nub phyogs su phul/ nub kyi rlung gis ni shar phyogs su phul/byang gi rlung gis ni lho phyogs su phul/ lho'i rlung gis ni byang phyogs su phul la/ /de na rus sbal zhar ba tshe lo brgya phrag du ma thub pa dang / lo brgya phrag du mar 'tsho ba/ lo brgya 'das shing lan cig steng du 'byung ba de bu ga gcig gi shing der mgrin pa 'jug na/ dge slong dag de ji snyam du sems rus sbal zhar ba tshe lo brgya phrag du ma thub pa lo brgya phrag du mar 'tsho ba de lo brgya 'das shing lan cig steng du 'byung ba des/ shing bu kha gcig pa der mgrin pa chud dam/ gsol pa bcom ldan 'das stes na 'gyur lags so/ /bka' stsal pa/ dge slong dag de bzhin du/de bzhin gshegs pa rnams brgya la brgya lam na 'jig rten du 'byung zhing zhi bar 'gyur ba/ yongs su mya ngan las 'da' bar 'gyur ba/ rdzogs pa'i byang chub tu rdzogs par byed pa/ bde bar gshegs pas rab tu bstan pa'i chos ston to/ /mir 'gyur ba yang brgya la brgya lam ni stes na thob ste/shin tu rnyed par dka'o zhes gsungs pa'i phyir ro/ /mi khom pa spangs nas tshangs par spyod pa rnyed par shin tu dka' bar bstan pa'i dbang du byas te/ rab tu byung ba shin tu dkon/ /de bzhin rab tu byung rnams kyi/ /tshul khrims phun sum tshogs pa dkon//zhes bya ba gsungs so/ /de la mi khom pa zhes bya ba ni brgyad de/ sems can dmyal ba dang / dud 'gro'i skye gnas dang / gshin rje'i 'jig rten dang / lha tshe ring po dang / mtha' 'khob kyi mi dang / dbang po ma tshang ba dang / log par lta ba dang / sangs rgyas ma byung ba'i skabs su skyes pa'o//brgyad po de dag la mi khom pa zhes bstan cing / ngal ba 'byor pa rnyed pa dka' bar cis mngon zhe na/ gcig las 'phros pa'i lung las/ dge slong dag mi khom pa brgyad po 'di dag ni gang zag tshangs par spyod pa la gnas pa'i dus ma yin no/ /brgyad gang zhe na dge slong dag 'di la de bzhin gshegs pa 'jig rten du 'byung ste/zhi bar 'gyur ba/ yongs su mya ngan las 'das par 'gyur ba/ rdzogs pa'i byang chub tu 'gro bar byed pa/ bde bar gshegs pas rab tu bstan pa'i chos ston na/ gang zag de sems can dmyal bar skyes pa yin te/ de ni gang zag tshangs par spyod pa la gnas pa'i dus yin pa mi khom pa dang po'o//de bzhin du dud 'gro'i skye gnas dang / gshen rje'i 'jig rten dang / lha tshe ring po dang / mtha' 'khob kyi mi rku 'phrog byed pa dang / kla klo dang brnab sems can dang gnod sems can gang du dge slong dang / dge slong ma dang / dge bsnyen dang / dge bsnyen ma mi 'ong ba'i nang du skyes pa yin no/ /'jig rten 'dir de bzhin gshegs pa byung ste chos kyang ston la/ gang zag de dbus kyi mi'i nang du yang skyes na/ de glen zhing lug ltar lkugs pa/ lag brda byed cing legs par smras pa dang / nyes par smras pa'i don go ba'i mthu med pa yin no/ /de bzhin gshegs pa 'jig rten 'dir byung ste/ chos kyang ston la/ /gang zag de dbus kyi mi'i nang du yang skyes shing de glen pa ma yin pas na don go ba'i mthu yod pa'i bar du yang gyur na/ de log pa blta zhing phyin ci log tu mthong ste/de 'di ltar sbyin pa yang med/ mchod sbyin yang med/ sbyin sreg byas pa'ang med/ legs pa dang / nyes pa byas pa'i las kyi 'bras bu rnam par smin pa yang med/ 'jig rten 'di dang 'jig rten pha rol yang med/ pha dang ma yang med/ 'jig rten na dge sbyong dang / bram ze yang dag par sod ba dang /yang dag par zhugs pa dang / dgra bcom pa 'jig rten rig pa gang rang gi mngon par shes pas 'jig rten 'di dang pha rol mngon sum du byas te/ khong du chud par byed pa yang med par lta ba yin no/ /gzhan yang gang zag dbus kyi mi rnams kyi nang du skyes te/ glen pa ma yin pa nas 'jig rten 'di dang pha rol mngon sum du byas te/khong du chud par byed pa yang yod pa'i bar du lta na/ de bzhin gshegs pa 'jig rten du ma byung ste/ zhi bar 'gyur ba yongs su mya ngan las 'da' bar 'gyur ba/ rdzogs pa'i byang chub tu 'gro bar byed pa/ bde bar gshegs pas rab tu bstan pa'i chos mi ston pa yin no//gang zag tshangs par spyod pa la gnas pa'i dal ba'i dus ni gcig ste/ gong ma brgyad po de dag las bzlog pa rnams yin par gsungs pa'i phyir/ brgyad po de dag mi khom pa yin zhing / dal ba 'byor pa rnyed par dka' bar mngon no//de ltar mi khom pa brgyad po de dag spongs te rab tu byung nas tshul khrims phun sum tshogs pa dang ldan pa ni tshangs par spyod pa zhes bya ste de yang mi khom pa brgyad po de dag ma spangs kyi bar du mi 'thob pa'i phyir shin tu rnyed par dka' ba bstan to/ /de la rab tu byung ba zhes bya ba ni/dge ba'i chos la 'dun pa de nyid kyi dbang du byas nas/ gsol pa dang bzhi'i las kyis bsnyen par rdzogs pa dang / dge sbyong gi tshul khrims yang dag par blangs pa gang yin pa'o/ /tshul khrims phun sum tshogs pa zhes bya ba ni/ de ltar rab tu byung ba de tshul khrims dang ldan par gnas pa dang /so sor thar pa'i sdom pas bsdoms pa dang / cho ga dang spyod yul phun sum tshogs pa dang / kha na ma tho ba phra rab tsam dag la yang 'jigs par lta ba dang / bslab pa'i gzhi rnams yang dag par blang zhing slob par byed pa gang yin pa'o/ /dge ba'i bshes gnyen rnyed par shin tu dka' bar bstan pa'i dbang du byas nas/tshul khrims yongs su dag gyur kyang / /grogs bzang shin tu rnyed par dka'/ /zhes bya ba gsungs te/ de la grogs bzang zhes bya ba ni dge ba'i bshes gnyen te/ 'phags pa'am/ so so'i skye bo 'ang rung / de dag kyang sangs rgyas 'jig rten du 'byung ba la rag lus pa'i phyir rnyed par dka' bar bstan to//da ni mjug bsdu zhing rtsol du 'jug pa zhes bya ba bstan pa'i phyir/ 'jig rten sangs rgyas 'byung ba dang / /mi dang rab tu 'byung ba dang / tshul khrims phun sum tshogs pa dang / /grogs bzang shin tu rnyed par dka'//mkhas pa bdag legs 'dod pa dag /'bras bu bcas te byed 'dod pa/ /sdom can rnams kyis so sor thar/ /mnyan pa'i phyir ni 'bad par bya/ /zhes bya ba gsungs so/ /'di'i don ni sngar bstan pa ltar 'jig rten na sangs rgyas 'byung ba dang / mi lus thob cing rab tu byung ste tshangs par spyod pa la gnas pa dang /dge ba'i bshes gnyen shin tu rnyed dka' bas brgya lam na lan cig ston pa 'jig rten du byung ste/ tshangs par spyod pa/ thog mar dge ba/ bar du dge ba/ tha mar dge ba yang gsungs la/ mi lus thob pa'i tshe blo dang ldan pa mngon par mtho ba dang /nges par legs pa'i 'bras bu 'dod pa rnams kyis mdo 'di las 'byung ba bzhin spyad par bya'o zhes bya ba'i tha tshig go/ /de la mkhas pa zhes bya ba ni blo dang ldan pa'o/ bdag legs 'dod pa dag ces bya ba ni gang dag bdag nyid mngon par mtho ba dang nges par legs pa'i 'bras bu 'dod pa dag ces bya ba'i tha tshig go//gzhan ni brda sprad pas ma bshad do// //da ni 'di nyid thos pa la sogs pa dka' bar bstan cing 'phags pa rnams mthong ba dang / de bsgrub pa'i rgyu rnams thob na bde bar bstan pa zhes bya ba ston te/ de'i phyir bskal pa bye ba rnams su yang //zhes bya ba nas/ dar la bab pa yol ba rnams kyang bde/ /zhes bya ba'i bar du gsungs so/ /'di la yang don rnam pa brgyad kyis bstan te/ so sor thar pa thos pa la sogs pa dka' ba dang / dkon mchog gsum 'jig rten du byung na bde ba dang /dge ba'i bshes gnyen la brten na bde ba dang / mi dge ba'i grogs po spangs na bde ba dang / dge ba'i bshes gnyen gyi khyad par bstan pa dang / thob par bya ba'i dngos pos bde ba dang / sgrub pa dang ldan pa bde ba'i rgyur gzhag pa dang / sgrub pa dang ldan pa de nyid sbyangs pa'i yon tan phun sum tshogs pa dang ldan pas bde ba'i rgyur bstan pa'o//de la so sor thar pa thob pa la sogs pa dka' bar bstan zhes bya ba bstan pa'i phyir/ bskal pa bye ba rnams su yang / /so sor thar pa thos pa dang / /gzung dang 'dzin pa rnyed dka' ste/ /sgrub par byed pa'ang shin tu dkon//zhes bya ba gsungs te/ de la bskal pa zhes bya ba ni gnyis te/ bar gyi bskal pa dang / bskal pa chen po'o/ /skabs 'dir bskal pa zhes smos pa ni bskal pa chen por gzung ngo / /de la bar kyi bskal pa ji lta bu zhe na/ sems can tshe dpag tu med pa dag gi tshe 'grib ste/lo brgyad khri la thug par 'gyur ba dang / de dag gis mi dge ba'i chos rnams yang dag par blangs par yang 'grib nas tshe lo bcu pa la thug par 'gyur ba dang / de dag skyo bar 'gyur te/ dge ba'i chos rnams yang dag par blangs pas tshe nur nas phyir tshe lo brgyad khri la thug par 'gyur ba de'i dus kyang yod de/de ltar mar 'grib pa gang yin pa dang / yar skye ba gang yin pa de gnyis bsdus te grangs rnam par gzhag pas/ bar gyi bskal pa zhes bya'o/ /de la bskal pa chen po ni 'jig rten 'di bar gyi bskal pa nyi shur ni 'jig go//nyi shur ni zhig par gnas so/ /nyi shur ni chags so/ /nyi shur ni chags nas gnas par 'gyur bas de dag ni bar gyi bskal pa brgyad cur 'gyur te/ de ni grangs kyi gdags pas bskal pa chen po zhes bya'o/ /de la bar gyi bskal pa de yang mu ge dang /nad dang / mtshon dang rnam pa gsum gyis thar par 'gyur te/ mu ge ni gang gi tshe mi rnams lo sum cu thub pa de'i tshe 'byung ngo / /mu ge de yang ci lta bu zhig 'byung bar 'gyur zhe na/ 'di lta bu dag 'byung bar 'gyur te/ rus pa rnying pa dag kyang bskol zhing bskol zhing srog zungs su byed do//de'i brgya la res 'ga' nas sam/ 'bras sam/ rgya shug gam/ rgya sran nam/ til gyi 'bru dag rnyed par gyur na/ de dag nor bu rin po che bzhin du za ma tog gi nang du bcug ste srung bar byed de/ /sems can de dag las phal cher nyams stobs med de/sa la gan rkyal du 'gyel nas ldang yang mi nus te/ mu ge de lta bus sems can phal cher ni 'chi ba'i dus byed par 'gyur te/ mu ge de yang re ltar thogs na lo bdun/ zla ba bdun/ zhag bdun du zad de/ de phan chad thal zhes bya'o/ /sems can de dag 'dus shing 'tshogs nas shas chung ngur skyo bar 'gyur te/de dag rgyu dang rkyen des tshe 'grib par yang mi 'gyur la/ mu ge yang med par 'gyur ro/ /de la nad ni mi rnams kyi tshe lo nyi shu thub cing skyo ba de nyid med par gyur nas 'grib pa de'i tshe yams kyi nad dang / gnod pa dang / 'go ba'i nad dang / 'khrug pa mang po 'byung bar 'gyur te/ de dag nad mang pos phal cher 'chi ba'i dus byed par 'gyur ro/ /de dag gi nad de yang re ltar thogs na zla ba bdun dang / zhag bdun du zad de/ de phan chad thal zhes bya'o/ /de nas sems can de dag 'bring du skyo bar 'gyur te/rgyu de dang rkyen des tshe 'grib par mi 'gyur la nad de dag kyang 'byung bar mi 'gyur ro/ /de la mtshon ni gang gi tshe mi rnams kyi tshe lo bcu thub cing skyo ba de nyid med par gyur pas tshe 'grib par gyur pa de'i tshe/ sems can de dag gcig gis gcig mthong na gsad pa'i sems drag po nye bar gnas par 'gyur te/de nas de dag gis rtswa 'am shing ngam/ gseg ma'am/ gyo mo'am/ gang dang gang blangs pa de dang de dag mtshon cha rnon po legs par brdar ba bzhin du 'gyur te/ de dag gis de dag gcig la gcig gsod par byed do/ /de yang re ltar thogs na zhag bdun du zad do//de phan chad thal zhes bya'o/ /sems can de dag la de'i tshe mchog tu rgud pa gsum 'byung ste/ tshe dang / lus dang / yo byad rgud pa'o/ /de la tshe rgud pa ni/ tshe'i tshad re ltar ring na lo bcu thub pa yin no/ /de la lus rgud pa ni lus kyi tshad re ltar ring na mtho gang dang chang gang pa yin no//de la yo byad rgud pa ni zas kyi mchog ni khre rgod yin no/ /gos kyi mchog ni skra'i la ba'o/ /rgyan gyi mchog ni mtshon cha yin no/ /ro rnam pa lnga po mar gyi dang / sbrang rtsi'i dang / 'bru mar gyi dang / bu ram shing las byung ba dang /lan tsha'i ro rnams ni thams cad kyi thams cad du med par 'gyur ro/ /de nas de dag shas cher skyo bar 'gyur te/ phan tshun 'dus shing tshogs nas tshe yongs su 'grib par 'gyur ba'i sdig pa mi dge ba'i chos rnams ni spangs/ tshe nur bar byed pa'i dge ba'i chos rnams ni yang dag par blangs pas/de dag gi tshe yang phyir nur zhing mdog dang / stobs dang / bde ba dang / dbang phyug la dbang byed pas kyang phyir zhing dar bar 'gyur te/ tshe yang lo brgyad khri la thug par 'gyur ro/ /de la bskal pa ji ltar 'jig cing chags she na/ de la 'jig pa ni rnam pa gsum yod par rig par bya ste/me dang / chu dang / rlung ngo / /de la mes 'jig pas ni mnar med pa yan chad tshangs pa'i 'jig rten man chad 'jig go/ /chus 'jig pas ni bsam gtan gnyis pa man chad mtha' dag 'jig go/ / rlung gis 'jig pas ni bsam gtan gsum pa man chad mtha' dag 'jig go/ /bsam gtan bzhi pa na ni sa de pa'i lha de dag gzhal med khang dang lhan cig skye zhing 'chi 'pho bar 'gyur bas/ de'i phyir de dag la 'jig par bya ba dang / 'jig pa'i rgyu yang med do/ /de la mes 'jig pa nam gang gi tshe 'jig par byed ce na/de ltar mar 'bri ba nyi shu dang / yar skye ba nyi shu ste/ mar 'bri ba dang / yar skye ba bzhi bcu nam thal bar gyur pa de'i tshe/ thams cad kyi tha mar yar skye ba na sems can dmyal ba rnams sems can dmyal ba dag nas 'chi 'pho la phyir skye bar mi 'gyur te/de dag thams cad shi 'phos pa na/ sems can dmyal ba pa 'jig pas 'jig rten zhig ces bya'o/ /sems can dmyal ba pa zhig pa ji lta ba bzhin du/ dud 'gro dang / yi dags 'jig pa yang de dag 'dra'o/ /mi rnams kyi nang na yang sems can gang yang rung ba zhig gis chos nyid thob pa'i bsam gtan gnyis pa'i bar du rdzogs par bya ste gnas pas so//sems can gzhan dag kyang de'i rjes su slob cing chos nyid kyis thob pa'i bsam gtan gnyis pa'i bar du rdzogs par bya ste gnas pas/ de dag 'di nas shi 'phos nas 'od gsal gyi lha'i ris su skye bar 'gyur te/de'i tshe mi 'jig pas 'jig rten 'di zhig ces bya'o/ /mi 'jig pa ji lta ba de bzhin du lha 'jig pa yang de dang 'dra'o/ /gang gi tshe 'gro ba lnga'i 'jig rten gnas pa na sems can gcig kyang med par gyur pa de'i tshe/yo byad 'byung ba yang med par 'gyur ro/ /gang gi tshe yo byad 'byung ba med par gyur pa de'i tshe/ char pa yang med par 'gyur ro/ /char mi 'bab pas sa chen po 'di la rtswa dang sman dang shing ci yod pa de dag skam par 'gyur ro/ /than pa byung bas nyi ma'i dkyil 'khor 'di nyid kyis kyang shas cher sreg par byed do//bsreg par bya ba'i dngos po rnam pa drug yod pa'i phyir sems can rnams kyis 'jig par 'gyur ba'i las kyi dbang gis nyi ma'i dkyil 'khor gzhan drug 'byung bar 'gyur ste/ nyi ma'i dkyil 'khor de dag kyang nyi ma'i dkyil 'khor 'di las bzhi 'gyur bzhi 'gyur gyi mthus sreg par byed do//de dag bdun gyur du gyur nas sreg par byed do/ /dngos po drug gang zhe na/ lteng ka chung ngu dang chen po dang / chu klung chung ngu dang chen po dang / mtsho chen po ma dros pa dang / rgya mtsho chen po dang / ri rab dang / sa chen po'o/ /de la lteng ka chung ngu dang chen po de dag ni nyi ma'i dkyil 'khor gnyis pas skem par byed do//chu klung chung ngu dang chen po dag ni nyi ma'i dkyil 'khor gsum pas skem par byed do/ /mtsho chen po ma dros pa ni nyi ma'i dkyil 'khor bzhi pas skem par byed do/ /rgya mtsho chen po ni nyi ma'i dkyil 'khor lnga pa dang drug pa'i phyogs gcig gis skem par byed do//ri rab dang sa chen po ni gzugs ches sra ba'i phyir nyi ma'i dkyil 'khor drug pa nyid dang / bdun pas sreg par byed do/ de nas de nyid kyi me lce'i rlung gis brdas nas tshangs pa'i 'jig rten man chad du 'gro zhing sreg par byed de/dper na mar ram 'bru mar sreg cing tshig pa na dud pa yang med/ thal ba'i lhags ma yang med pa de bzhin du sa chen po 'di dang / ri'i rgyal po ri rab kyang sreg cing tshig pa na dud pa yang med la/ thal ba'i lhag ma yang med par 'gyur te/ de tsam gyis na snod 'jig pas 'jig rten zhig ces bya'o//bar gyi bskal pa nyi shu 'das so/ /de bzhin du 'jig rten stong par gnas pa yang bar gyi bskal pa nyi shur gnas so/ /chus 'jig pa gang zhe na/ gang tshun chad mes 'jig pa lan bdun 'das pa de'i 'og tu bsam gtan gnyis pa nyid las chu'i khams 'byung ste/chu'i khams kyis 'jig rten de lan tshwa bzhin du bzhu nas/ chu'i khams de yang snod kyi 'jig rten de nyid dang lhan cig tu med par 'gyur ro/ /med par gyur nas kyang bar gyi bskal pa nyi shur stong par gnas so/ /de la rlung gis 'jig pa gang zhe na/ gang tshun chad mes 'jig pa lan bdun 'das shing /chus 'jig pa lan cig 'byung ba de lta bu lan bdun 'das par gyur pa de'i 'og tu yang mes 'jig pa bdun lan cig byung nas/ de'i 'og tu bsam gtan gsum pa nyid las rlung gi khams 'byung ste/ snod kyi 'jig rten de rlung gis lus bskam pa bzhin du med par byed pa'o//rlung de yang de nyid dang lhan cig tu med par 'gyur te/ 'di ltar 'ga' zhig la rlung gi khams 'khrugs par gyur na/ rus pa'i bar du yang 'bri bar byed par snang ba bzhin no/ /zhig nas kyang de bzhin du bar gyi bskal pa nyi shur stong par gnas te/de ltar na mes 'jig pa lnga bcu rtsa drug dang / chus 'jig pa bdun dang / rlung gis 'jig pa gcig ste/ bskal pa chen po drug cu rtsa bzhi po de dag ni dge rgyas kyi lha'i tshe'i tshang du gzhag pa yin pas/ 'jig pa'i tshul yang de ltar blta bar bya'o/ /de la chags pa ji lta bu zhe na/bar gyi bskal pa nyi shu po de dag 'das nas/ yang sems can rnams kyi 'chags par 'gyur pa'i las kyi dbang gis 'chags pa'i bskal pa kun du rtsom par rig par bya ste/ de la thog ma kho nar snod 'chags pas nam mkha' la bsam gtan gsum pa 'chags par 'gyur te/bsam gtan gsum pa ji lta bar gnyis pa dang dang po yang de dang 'dra'o/ /de 'jig pa gsum pa'i rtse mo bsam gtan bzhi pa nas sems can tshe dang las dang / bsod nams zad pa rnams 'chi 'phos nas bsam gtan gsum par skye bar 'gyur te/ de bzhin du 'jig pa gnyis pa dang /dang po'i rtse mo nas sems can gang yang rung ba zhig tshe dang las dang / bsod nams zad nas tshangs pa'i 'jig rten du skye ba'i bar du yang sbyar bar bya'o/ /de nas 'dod pa na spyod pa'i lha'i rigs bzhi po dag gi gzhal med khang na nam mkha' las 'byung bar 'gyur te/ gzhal med khang de dag thams cad kyang nam mkha' la sprul pa bzhin du 'byung bar blta bar bya'o/ /de dag tu yang snga ma bzhin du 'od gsal gyi lha'i ris nas sems can dag tshe dang / las dang / bsod nams zad pa rnams shi 'phos nas skye bar 'gyur ro/ /de'i 'og tu 'dir stong gsum gyi stong chen po'i 'jig rten gyi khams kyi tshad tsam gyi rlung gi dkyil 'khor stong gsum gyi stong chen po'i 'jig rten gyi rten dang /sems can gzhal med khang pa ma yin pa rnams kyi rten du gyur pa mngon par grub par 'gyur ro/ /de yang rnam pa gnyis te/ 'og gzhir gnas pa dang / glo nas gnas pa ste/glo nas gnas pa des ni chu de dag thad kar yang mi 'bol/ 'og gzhir gnas pa des ni chu de dag thur du yang mi 'dzag go/ /rlung gi dkyil 'khor de'i steng du sems can de dag gi las kyi dbang gis gser gyi snying po'i sprin 'byung bar 'gyur te/ de la char 'bab par 'gyur ro/ /chu de dag kyang rlung gi dkyil 'khor nyid la brten no//de la rlung rnams 'dus nas kun tu 'thas pa dang sra bar byed de/ de ni steng dang 'og gi chu'i 'khrug pa thub pa'i phyir gser gyi sa gzhi zhes bya'o/ /gser gyi sa gzhi de chags nas de'i steng du yang de dag gi las kyi dbang nyid kyis khams sna tshogs kyi snying po'i sprin 'byung ste/de la char 'bab par 'gyur ro/ /chu de dag kyang gser gyi sa gzhi la gnas par 'gyur te/ de bzhin du yang rlung rnams kyis kun tu 'thas shing sra bar byed do/ /de yang khams bzang po mchog dang / gtso bo dang / gya nom pa gang yin pa de las rlung gis bsgrubs pa'i dbang gis ri rab 'byung bar 'gyur te/de yang rin po che sna bzhi po gser dang / dngul dang / shel dang / bai DUr+ya'i rang bzhin can yin no/ /de la khams 'bring gang yin pa de las ni gser gyi ri bdun po gnya' shing 'dzin dang / rnam par 'dud dang / rta rna ri dang / blta na sdug dang / seng ldeng can dang / gshol mnga' 'dzin dang / mu khyud 'dzin rnams mngon par 'grub par 'gyur te/ de dag kyang rim par ri rab 'khor bar 'dug go/ /ri rab kyi tshad ni 'phang du dpag tshad brgyad khri yod la/ rgyar yang de dang 'dra ste/ dpag tshad brgyad khri ni chu'i nang du nub bo//gnya' shing 'dzin gyi tshad ni de'i phyed de/ de las gzhan pa'i ri rnam par 'dud la sogs pa drug po'i tshad ni phyi ma phyi ma do phyed phyed 'bri ba'i tshad du rig par bya'o/ /de la khams ngan pa rnams las ni ri rab kyi ngos bzhi dang gser gyi ri rnams kyi phyi rol gyi gling bzhi dang / gling phran brgyad dang / ri khor yug 'byung bar 'gyur ro/ /ri khor yug gi tshad ni mu khyud 'dzin gyi phyed yin te/ des gling bzhi po 'khor lo bzhin du bskor to/ /lha ma yin gyi gnas ni ri rab chu'i 'og tu nub pa'i nang na yod do/ /ri rab de'i drung na yang bang rim bzhi yod de/ bong rim dang po'i tshad ni dpag tshad khri drug stong phyir 'phags so//lhag ma rnams kyi tshad ni de'i phyed phyed yin te/ /rim bzhin sbyar ro/ /bang rim dang po la ni lag na yol go thogs pa rnams gnas so/ /gnyis pa dang gsum pa dang bzhi pa la ni lag na khrag thogs dang / rtag tu myos dang / phreng thogs rnams gnas te/rim pa bzhin no/ /gnya' shing 'dzin gyi ngos bzhi shar dang / lho dang nub dang / byang rnams na rgyal po chen po bzhi po yul 'khor srung dang / 'phags skyes po dang mig mi bzang dang rnam thos kyi bu rnams kyi pho brang gnas te/ rim bzhin no/ /rnam par 'dud pa la sogs pa gser gyi ri gzhan drug po la ni rgyal po chen po de dag gi grong dang /grong rdal dang / ljongs rnams yod do/ /ri rab de'i steng na brgya byin lha'i dbang po yod de/ pho brang de'i tshad ni chu zheng du dpag tshad khri khri yod do/ /gzhan dag na ni lha de dag gi grong dang / grong rdal dang / ljongs rnams yod do/mtsho chen po ma dros pa'i nye 'khor na gangs ri yod de/ de'i 'og na ni sems can dmyal ba chen po rnams kyi gnas tsha ba'i sems can dmyal ba rnams dang / nyi tshe ba'i sems can dmyal ba rnams dang / /grang ba'i sems can dmyal ba rnams dang / nye 'khor gyi sems can dmyal ba rnams dang /dud 'gro dang / yi dags kha cig gnas so/ /ji ltar snod kyi 'jig rten mngon par grub nas/ sems can tshe dang / las dang bsod nams zad pa bskal pa dang po myong bar 'gyur ba'i las nyid kyis/ 'od gsal gyi lha'i rigs nas shi 'phos nas 'dir skye ba nas 'dir skye bar 'gyur te/de dag na 'dod pa na spyod pa'i las kyi nang nas rab dang / mchog dang / gtso bo yin no/ /las de'i 'bras bu ni de nyid kyi tshe mngon par 'grub par 'gyur gyi/ gzhan na ni ma yin no/ /de'i tshe sems can de dag ni bskal pa dang po pa zhes bya'o/ /bskal pa ji ltar 'jig/ji ltar 'chags pa rgya cher ni mangs pas 'dir ma bstan te/ 'jig rten gzhag pa'i mdo dang / rnal 'byor spyod pa'i sa la sogs pa las 'byung ba bzhin du sbyar bar bya'o/ /de la dbye ba zhes bya ba ni grangs kyi ming ste/ de yang gcig phrag bcu la bcu/ bcu phrag bcu la brgya/brgya phrag bcu la stong / stong phrag bcu la khri/ khri phrag bcu la 'bum/ 'bum phrag bcu la sa ya/ sa ya phrag bcu la bye ba zhes 'byung ste/ de la bye ba smos pa ni sa 'dzin tsam du zad kyi/ de bzhin gshegs pa rnams 'jig rten du 'byung ba ni/ bskal pa chen po bye ba'am/de las lhag par yang mi 'byung bas de bzhin gshegs pa 'byung ba dkon pa nyid kyis/ so sor thar pa thos pa yang shin tu dkon te/ de bzhin gshegs pa 'byung ba la rag las pa'i phyir ro/ /de bzhin gshegs pa 'jig rten du byung gis kyang / lo bcu gnyis kyi bar du so sor thar pa 'di ma gsungs pas na/'di thos pa rnyed par dka' bar mngon no/ /de la thos pa zhes bya ba ni tshig dang don rna ba'i rnam par shes pa dang / de'i rjes las byung ba yid kyi rnam par shes par dpyad pa'o/ /de las gzung ba zhes bya ba ni tshig dang don shes rab kyis rtogs pa'o/ / 'dzin pa zhes bya ba ni dran pas de nyid kha ton bya ba la sogs pa'i tshul gyis yun ring du mi brjod par byed pa'o/ /sgrub par byed pa zhes bya ba ni de'i don lus dang ngag dang yid kyis nan tan du byed pa ste/ gzung ba dang / 'dzin pa dang / sgrub par byed pa shes rab rnam gsum dang rim bzhin no/ / rnyed dka' ste zhes bya ba dang / shin tu dkon zhes bya ba ni/ nan tan gyis kyang tshegs chen pos rnyed pa'i phyir ro/ /tshigs su bcad pa 'dis ni lung dang khong du chud pa las/ so sor thar pa rnyed par dka' bar bstan te/ de la thos pa dang gzung ba dang 'dzin pa ni lung las rnyed par dka' bar bstan to//sgrub par byed pa ni khong du chud pa las rnyed dka' bar bstan to/ /dkon mchog gsum 'jig rten du 'byung na bde ba zhes bstan pa'i phyir/ sangs rgyas rnams ni 'byung ba bde/ /chos bstan pa yang bde ba'o/ /dge 'dun mthun pa bde ba yin/ /mthun pa rnams kyi dka' thub bde//zhes bya ba gsungs te/ de la/ sangs rgyas rnams ni 'byung ba bde/ zhes bya ba/ sangs rgyas zhes bya ba ni sngar bshad pa bzhin no/ /rnams zhes bya ba ni mang po ste/ gcig ma yin pa'o/ /'byung ba zhes bya ba ni/ lhums su zhugs pa'i dus sam bltams pa'i dus na sangs rgyas 'byung ba ste/'gyur ba'i tshul gyis byang chub sems dpa' la sangs rgyas zhes bya ba'i phyir ro/ /yang na mngon par rdzogs par byang chub pa'i dus la/ sangs rgyas 'byung ba zhes bya ba ste/ de'i tshe sangs rgyas zhes bya ba'i rgyu thams cad mkhyen pa nyid brnyes pa'i phyir ro//bde zhes bya ba ni de bzhin gshegs pa 'jig rten du 'byung ba sems can rnams mngon par mtho ba dang / nges par legs pa'i sa la bkod pa'i phyir bde ba zhes bya ste/ mi bde zhes bya ba bzhin no/ /de la chos bstan pa yang bde ba'o zhes bya ba ni mdo la sogs pa gsung rab yan lag bcu gnyis gsungs pas/de la zhugs pa rnams rnam par grol ba'i sa thob pa'i phyir ro/ /chos zhes bya ba'i sgra ni rang gi mtshan nyid 'dzin pa la bya'o/ /bstan pa zhes bya ba ni bshad pa dang / bkol ba zhes bya ba'i rnam grangs su gtogs pa'o//dge 'dun zhes bya ba ni skyes bu gang zag brgyad dam de las gzhan pa'o/ /mthun pa zhes bya ba ni tshul khrims dang / lta ba dang / cho ga dang / 'tsho ba mtshungs pa ste/ bya ba gcig pa dang / tha mi dad pa zhes bya ba'i tha tshig go/ /de la tshul khrims mtshungs pa ni lo brgya lon pa'i dgra bcom pas bslab par bya ba de la/deng sang rab tu byung nas bsnyen par rdzogs pas kyang bslab par mthun pa ste/ ltung ba sde lnga'i nyes pa spangs par mtshungs pa'o/ /lta ba mtshungs pa ni spyi'i mtshan nyid mi rtag pa dang / sdug bsngal ba dang / stong pa dang / bdag med par lta zhing / mu stegs can ltar lta ba mi mthun pa ma yin no/ /cho ga mtshungs pa ni lus dang ngag dang yid rnams bsdams par mthun pa'o/ /'tsho ba mtshungs pa ni kun kyang gang de bzhin gshegs pas gnang ba'i yo byad bcu gsum dang / bsod snyoms tsam gyis chog par 'dzin cing log par 'tsho ba spangs pa'o//de la bde ba yin zhes bya ba ni tshul khrims la sogs pa de bzhin du mthun na mu stegs can gyis mi phyed cing / sbyin bdag rnams kyi bsod nams 'phel bar 'gyur ba'i phyir ro/ /mthun pa rnams kyi dka' thub bde/ /zhes bya ba la/ mthun pa rnams kyi zhes bya ba ni nyan thos kyi dge 'dun rnams kyi ste/tshul khrims yongs su sbyang ba'i phyir ro/ /dka' thub ces bya ba ni bslab pa gsum mo/ /lhag pa'i tshul khrims dang / lhag pa'i sems dang / lhag pa'i shes rab bsgrub pa ste/ de gsum gyis nyon mongs pa gdung bar byed pas dka' thub ces bya ste/de nyid bde ba'i rgyur bstan to/ /dge ba'i bshes gnyen la bstan na bde ba zhes bya ba de'i dbang du byas nas/ 'phags pa rnams ni mthong ba bde/ /dam pa rnams dang 'grogs na bde/ /zhes bya ba gsungs so/ /de la 'phags pa zhes bya ba ni sdig pa las ring du song ba'i phyir ro//mthong na bde zhes bya ba ni dge ba'i bshes gnyen sdig pa las ring du song ba de dag mthong na mngon par mtho ba dang / nges par legs pa'i lam 'thob pa'i phyir ro/ /dam pa dag ces bya ba ni sdig pa las ring du song ba'i 'phags pa de dag nyid de/legs so zhes bsngags pa'i phyir dam pa zhes bya ste/ de dag mthong na yang 'bras bu dang ldan par gyur na/ 'grogs pa la ci smos zhes bya ba'i tha tshig go/ /mi dge ba'i grogs po spangs na bde zhes bya ba bstan pa'i phyir/ byis pa rnams ni ma mthong na/ rtag tu bde ba nyid du 'gyur//zhes bya ba gsungs so/ /byis pa rnams zhes bya ba ni 'phags pa ma yin zhing sdig pa byed pa rnams te/ lus kyis mi dge bar spyod pa dang / ngag gis mi dge bar smra ba dang / yid kyis mi dge bar sems pa rnams so/ /mi dge ba'i bshes gnyen sdig pa byed pa de lta bu ma mthong na kha na ma tho ba mi 'phel ba'i phyir bde ba'i rgyur bstan to//dge ba'i bshes gnyen gyi khyad par bstan pa zhes bya ba ston te/ de'i phyir tshul khrims ldan pa zhes bya ba nas/ dgra bcom pa dag mthong na bde/ /zhes bya ba'i bar du gsungs te/ /dge ba'i bshes gnyen la yang rnam pa gnyis te/kun rdzob dang / don dam pa'i dge ba'i bshes gnyen no/ /de la kun rdzob kyi dge ba'i bshes gnyen zhes bya ba ni/ tshul khrims ldan pa mthong ba bde/ /mang du thos pa mthong ba bde/ /zhes bya ba gsungs pa'o/ /kun rdzob kyi dge ba'i bshes gnyen la yang gnyis te/zhi gnas kyi yan lag la gnas pa dang / lhag mthong gi yan lag la gnas pa'o/ /tshul khrims ldan pa mthong ba bde/ /zhes bya ba ni/ zhi gnas kyi yan lag la gnas par sbyar te/ de la tshul khrims dang ldan pa zhes bya ba ni rang bzhin dang bcas pa'i kha na ma tho ba spangs pa ste/de la rang bzhin gyi kha na ma tho ba dang bcas pa'i rang bzhin gyis mi dge ba bdag dang gzhan dang gnyis ka la nyam nga ba dang / kun nas nyon mongs shing gnod par 'gyur ba gang yin pa ste/ bcas pa la spyod pa ngan 'gror 'gro bar 'gyur ba dang / ma bcas pa la spyod pa dge sbyong gi tshul gyi bar du gcod par 'gyur ba'o//bcas pa'i kha na ma tho ba dang bcas pa ni/ bcom ldan 'das kyis rtags mi mthun pa nyid kyi phyir dang / dam pa'i chos la gus par bya ba dang / rang bzhin gyi kha na ma tho ba dang bcas pa dang mthun pa dang / gzhan gyi sems bsrung ba dang /bde 'gro dang / srog dang / dge sbyong gi tshul gyi bar du gcod pa nyid yin pa'i phyir spangs pa gang yin pa de la spyod pa ni bcas pa'i kha na ma tho ba zhes bya'o/ /mong du thos pa mthong ba bde/ /zhes bya ba ni/ lhag mthong gi yan lag la gnas pa dang sbyar te/ de la mang du thos pa zhes bya ba ni sde snod gsum mo//mdo sde dang / 'dul ba dang / chos mngon pa la mkhas pa'o/ /de la mdo sde la mkhas pa ni bdag gi lta ba mi nor ba dang / mu stegs can tshar gcod par byed do/ /'dul ba la mkhas pas ni ltung ba dang mi ltung ba dang / lci ba dang / yang ba dang /mi gnang ba dang gnang ba shes par byed do/ /chos mngon pa la mkhas pa ni sngar bsgoms pa dang / phyis bsgom pa'i rim pa shes par byed do/ /gzhan yang mang du thos pa la yon tan lnga yod de/ khams dang / skye mched dang / rten cing 'brel bar 'byung ba dang / gnas dang gnas ma yin pa la mkhas pa dang /lung bstan pa gzhan la rag ma lus pa yin no/ /de ltar tshul khrims dang ldan zhing mang du thos pa dang ldan pa'i dge ba'i bshes gnyen mthong na nyes par spyod pa las bzlog cing the tshom gcod par 'gyur ba'i phyir bde ba'i rgyur bstan to/ /ci'i phyir de gnyis la kun rdzob ces bya zhe na/'khor ba'i rgyu kun tu 'byung ba spangs shing sdig pa rnams las ring du song yang mi slob pa ma yin pas kun rdzob ces bya'o/ /don dam pa'i dge ba'i bshes gnyen zhes bya ba ni/ yang srid rnam par grol ba yi/ /dgra bcom pa dag mthong ba bde/ /zhes gsungs pa'o/ / de la yang srid ces bya ba ni yang srid pa phyi mar skye ba'i rgyu las dang nyon mongs pa ste/ de las rnam par grol ba ni dgra bcom pa yin te/ lhag ma dang bcas pa'am lhag ma med pa'i mya ngan las 'das pa'o/ /dgra bcom pa zhes bya ba ni ar han zhes bya ba nyon mongs pa dgra dang 'dra ba bcom pas na/ dgra bcom pa zhes bya/ yang gcig tu ni lha dang mi la sogs pa kun gyis mchod par 'os pas na 'os pa zhes kyang 'dren te/ skabs 'dir ni don btsan par byas pas dgra bcom pa zhes btags so/ /'thob par bya ba'i dngos pos bde/ /zhes bya ba'i dbang du byas te/ 'bab stegs bde ba'i chu klung bde//zhes bya ba gsungs so/ /'di ni dpe ste ji ltar chu bo klung nas 'bab pa la gad pa dang / g.yang sa la sogs pa nyam nga ba spangs pa'i 'bab stegs bde ba la brten pa rnams kyi chu bo bde bar lon pa de bzhin du/ gang dag chu bo lta bu'i rnam par grol ba 'dod pa rnams kyis kyang /so sor thar pa dang / 'phags pa'i lam rtag chad kyi mtha' spangs pa la brten nas/ 'thob par bya ba'i dngos po rnam par grol ba 'thob na bde bar 'gyur ba'i phyir so sor thar pa dang 'phags pa'i lam ni bde ba'i 'bab stegs su bstan cing rnam par grol ba'i ni chu bo'i sgrar bstan to//bsgrub pa dang ldan pa bde ba'i rgyur gzhag pa zhes bya ba bstan pa'i phyir/ chos kyi rgyal po'i skye bo bde/ /shes rab rab tu thob pa bde/ /nga 'o nga rgyal zad pa bde/ /zhes bya ba gsungs te/ chos kyi rgyal ba zhes bya ba ni bsgrub pa'i chos 'phags pa'i lam gyis mi mthun pa'i phyogs pham par byas pas na/chos kyi rgyal ba zhes bya ste/ 'di'i don ni/ shes rab rab tu thob pa bde/ /nga 'o nga rgyal zad pa bde/ /zhes bya ba nyid kyis bstan pa yin te/ 'phags pa'i lam shes rab kyi ral gris mi mthun pa'i phyogs nga rgyal gyi rgyal mtshan rtsa ba nas bcad pa'i phyir ro//skye bo bde zhes bya ba ni gang dag sgrub pa'i chos 'phags pa'i lam shes rab kyi ral gri dang ldan pas 'khor ba'i rgyu/ nga rgyal gyi rgyal mtshan bcad nas rnam par grol ba 'thob pa'i phyir bde bar bstan to/ /de la shes rab ces bya ba ni rab tu rnam par 'byed pa la bya ste/ de yang rnam pa gsum ste/rigs pas bskyed pa dang / rigs pa ma yin pas bskyed pa dang / de las gzhan pas so/ /skabs 'dir rigs pas bskyed pa la bya'o/ /rab tu thob pa zhes bya ba ni zag pa med pa'i shes rab po/ /nga 'o nga rgyal zhes bya ba ni/ nga rgyal bdun po/ nga rgyal dang / che ba'i nga rgyal dang /nga rgyal las kyang nga rgyal dang / nga 'o snyam pa'i nga rgyal dang / mngon pa'i nga rgyal dang / cung zad snyam pa'i nga rgyal dang / log pa'i nga rgyal rnams las nga 'o snyam pa'i nga rgyal la bya ste/ 'khor ba'i rgyu nyon mongs pa thams cad ni bdag dang bdag gir 'dzin pa las 'byung ba'i phyir/'khor ba'i rgyu'i gtso bo snyam pa'i nga rgyal zad na bde ba'i rgyur bstan gyi/ nyon mongs pa gzhan ni ma smos so/ /de la nga'o snyam pa'i nga rgyal gyi mtshan nyid ni nye bar len pa'i phung po rnams la bdag gir yang dag par rjes su lta ba'i sems longs pa la bya'o/ /sgrub pa dang ldan pa de nyid sbyangs pa'i yon tan phun sum tshogs pa dang ldan pas bde ba'i rgyur bstan pa zhes bya ba ston te/de'i phyir nges par byas dang zhes bya ba nas/ dar la bab pa yal ba rnams kyang bde/ /zhes bya ba'i bar du gsungs so/ /'di la yang rnam pa lngar dbye ste/ sbyangs pa'i yon tan gyi thog ma'i dag pa dang /'khor gtsang ba dang / gnas phun sum tshogs pa dang / 'bras bu dang bcas pa dang / yongs su ma nyams par bstan pa'o/ /de la sbyangs pa'i yon tan gyi thog ma'i dag pa bstan pa zhes bya ba ni/ nges par byas dang zhes bya ba yin te/ sgrub pa'i chos 'phags pa'i lam shes rab kyi ral gris 'khor ba'i rgyu nga rgyal gyi rgyal mtshan rtsa ba nas bcad pa'i phyir dgon par gnas pa la thog ma kho nar dam bca' ba ste/ bsam pa nges par mthar phyin par bya dgos pa'i phyir/ nges par byas dang zhes bya ba 'dis ni thog ma'i dag pa bstan pa yin no//'khor gtsang ba zhes bya ba ni/ dbang po thul ba dang zhes bya ba yin te de la dbang po thul ba zhes bya ba ni/ mig la sogs pa'i dbang po sdom pa dang ldan pa la bya ste/ dbang po sdom pa dang ldan pa ji lta bu zhe na/ tshul khrims kyi sdom pa la brten nas dran pa kun tu bsrungs pa dang / dran pa la rtag 'grus byed pa dang / dran pas yid kun tu bsrungs pa dang / gnas skabs mnyam pa la 'jog par byed cing / des mig gis gzugs rnams mthong ba mtshan mar mi 'dzin cing / mngon rtags su mi 'dzin la gzhi gang kho na las de'i sems kyi rjes su sdig pa mi dge ba'i chos rnams zad par 'gyur ba de dag bsdam par bya ba'i phyir sgrub par byed cing /mig gi dbang pos kyang sdom pa sgrub par byed pa dang / de la rna ba dang / sna dang / lce dang / lus dang / yid rnams kyis sgra dang / dri dang / ro dang / reg bya dang / chos rnams la rnam par shes pa ni yang mtshan mar mi 'dzin cing /mngon rtags su mi 'dzin la gzhi gang kho na las de'i sems kyis rjes su sdig pa mi dge ba'i chos rnams zad par 'gyur ba de dag bsdam par bya ba'i phyir sgrub par byed cing / yid kyi dbang po yang srung par byed la/ yid kyi dbang pos kyang sdom pa sgrub par byed pa yin te/ dgon par gnas pa la dam bcas pa'i 'og tu dbang po rnams bsdam dgos pa'i phyir 'dis ni 'khor gtsang bar bstan to//gnas phun sum tshogs pa zhes bya ba ni/ dgon pa zhi ba rnams su gnas par gyur/ /zhes bya ba yin te/ de la dgon pa zhes bya ba ni grong dang grong rdal las dben pa rgyang grags gcig phan chad na gnas pa gang yin pa'o//zhi rnams su zhes bya ba ni dgon pa'i gnas dben pa la bya ste/ shing drung dang / khang stong dang / ri khrod dang / ri phug dang / rtswa gseb dang / bla gab med pa dang / dur khrod pa dang / nags 'dab dang / bas mtha'i gnas dag tu gnas par byed cing / 'du 'dzin la sogs pa spangs pa ste/de'i phyir gnas phun sum tshogs pa bstan to/ /dgon par gnas pa la phan yon bcu yod de/ bcu gang zhe na 'du 'dzi rnam par spong ba dang / rab tu dben pa la brten pa dang / de'i sems bsam gtan la dmigs par 'gyur ba dang / sangs rgyas kyi mdzad pa nyung ba la smon pa dang /de'i lus la dga' ba dang bde ba skye ba dang / bar chad med pa dang / chos ji ltar shes pa bzhin du don rgya cher shes pa dang / zhi gnas 'thob pa dang / lhag mthong 'thob pa dang / myur du yongs su mya ngan las 'da' bar 'gyur ro/ /'bras bu dang bcas pa zhes bya ba ni mang du thos pa zhes bya ba yin te/mang du thos pa dgon par gnas na 'bras bu dang ldan par 'gyur gyi/ gzhan ni ma yin pa'i phyir ro/ /de la mang du thos pa zhes bya ba ni sde snod gsum thos shing mkhas pa'o/ /yongs su ma nyams par mnyan pa zhes bya ba ni/ nags su rgas pa dang / dar la bab pa yal ba rnams kyang bde zhes bya ba yin te/dar la ma bab pa'i tshe thos pa dang ldan par byas la/ dar la bab pa'i tshe dgon par song nas nam 'tsho'i bar du gnas par byed pa nyid dam bcas pa las ma nyams pa yin pas na/ 'di yongs su ma nyams par bstan pa zhes bya'o/ /de rgas pa zhes bya ba gang du zhe na/nags su zhes pa dang sbyar ro/ /de la rgas pa ni na tshod gyur pa ste/ lo bdun cu man chad do/ /de yan chad ni 'khogs pa'i dus so/ /dar la bab pa zhes bya ba ni lo sum cu yan chad lnga bcu man chad do/ /yol ba zhes bya ba ni de las 'das pa'o/ /kyang zhes bya ba'i sgra ni bsdu ba ste/bde zhes bya ba tha mar smos pa 'di gong ma rnams dang sbyar ba'i phyir ro/ /'dir mdo las dgon pa zhes bya ba nyi tshe smos kyang sbyangs pa'i yan lag gzhan rnams kyang bsdu bar rig par bya'o/ /mi rtag pa la sogs pa bstan pa zhes bya ba ston te/ de'i phyir 'phags ma dag dpyid rnams las zhes bya ba nas/ bag yod par 'thob bo zhes bya ba'i bar du gsungs so/ /'di la yang rnam pa bzhir dbye ste/ dpes bstan pa dang / dpe dang don du sbyar zhing lus dang skye ba'i gnas nyams par bstan pa dang / bag yod par bzung ba dang / de nyid kyi 'bras bu bstan pa'o/ /de la dpes bstan pa zhes bya ba ni/ 'phags ma dag dpyid rnams las ji tsam 'das pa dang / lhag ma lus pa dag go zhes bya'o/ /'phags ma zhes bya ba ni mdza' zhing yid du 'ong ba'i phyir snyan par brjod pa'o/ /dpyid rnams las zhes bya ba ni sa 'dzin tsam du zad de/ dus gsum las gang yang rung ste/ gcig cig so sor thar pa'i mdo 'don pa'i tshe brjod par bya'o//dus gsum yang grang ba dang / dro ba dang / grang ba yang ma yin dro ba yang ma yin pa las rnam par gzhag go/ /ci tsam 'das pa dang / lhag ma lus pa dag go zhes bya ba ni so sor thar pa'i mdo 'don pa'i tshe/ dpyid dam/ dbyar ram/ dgun gang yang rung ste/de dag las snga ma tsam 'das pa dang / phyin ji tsam lus pa brjod par bya'o/ /yang na lo gcig la zla ba bcu gnyis yod pa las 'di tsam ni zad de 'das/ 'di tsam ni lus so zhes brjod par bya ste/ 'dis ni 'di ltar lo dang zla ba snga ma 'das na gdon mi za bar phyi ma 'ong ba de bzhin du/rga ba dang 'chi ba yang mngon par 'ongs pas bag yod pa la brtson par bya'o zhes bstan par 'gyur ro/ /dpe dang don du sbyor zhing lus dang skye ba'i gnas nyams par bstan pa zhes bya ba ni/ 'phags ma dag rga ba dang 'chi ba mngon par 'ong zhing ston pa'i bstan pa yang 'jig par 'gyur gyi zhes bya ba'o//tshangs par spyod pa yun ring du gnas shing phun sum tshogs par 'gyur ba'i rgyu ni gnyis te/ lus ma nyams pa ste rgas shing ma non pa dang / skye ba'i gnas ma nyams pa ste ston pa'i bstan pa gnas pa'o/ /de bas na ji ltar lo dang zla ba 'das shing 'ong ba de bzhin du lus dang skye ba'i gnas nyams pa yang mngon par 'ong /brtsal bar bzod cing thub pa'i skye gnas ma nyams pa'i tshe nan tan du bya ba'o zhes bya ba'i tha tshig go/ /de la rga ba dang 'chi ba zhes bya ba gnyis kyis ni lus yongs su nyams pa bstan te/ sbyor ba mi bzod pa dang rgyun chad pa rim pa bzhin no/ /ston pa'i bstan pa 'jig par 'gyur gyi zhes bya ba ni/skye ba'i gnas yongs su nyams par bstan to/ /de la rga ba dang 'chi ba zhes bya ba ni phung po smin nas 'jig par 'gyur ba'i mtshan nyid do/ /mngon par 'ong zhes bya bar gdon mi za bar 'ong ba'o/ /ston pa zhes bya ba ni de bzhin gshegs pa de don phyin ci ma log par ston pa'i phyir ro//bstan pa ni gsung rab yan lag bcu gnyis te/ bcom ldan 'das kyis de dag lha dang mi dang lha ma yin du bcas pa'i 'jig rten la bstan pa'i phyir ro/ /'jig par 'gyur ba zhes bya ba ni mi gnas par 'gyur ba'o/ /bag yod par gzud pa zhes bya ba ni/ 'phags ma dag bag yod pa la rnal 'byor du bya'o zhes bya ba'o/ /gang gi phyir de ltar lus dang skye ba'i gnas yongs su nyams par 'gyur ba de'i phyir/ bag yod pa la rnal 'byor du bya'o zhes bstan pa yin te/ de la bag yod pa zhes bya ba ni bag med pa'i gnyen po ste/ ma chags pa dang / zhe sdang med pa dang / gti mug med pa dang / brtson 'grus la gnas nas mi dge ba'i chos spong zhing / de'i gnyen po dge ba'i chos rnams kyang bsgom pa ste/ bag yod pa smos pa ni dge ba'i chos thams cad bsdu ba'i don to/ /de la rnal 'byor zhes bya ba ni 'jig rten las 'das pa'i lam la sbyor ba gzung ba'i don te/ zhi gnas dang lhag mthong zung du 'brel par 'jug pa'i lam la bya'o/ /ci mngon zhe na skye mched drug rnam par 'byed pa'i mdo las/ de zhi gnas dang lhag mthong mnyam par 'jug go zhes gsungs pa'i phyir ro/ /yang na ting nge 'dzin la rnal 'byor zhes bya ste/ rnal 'byor spyod pa mnyam par gzhag pa'i sa las/yang dag par rtsol ba dang dran pa ni rnal 'byor yid la byed pa mthun na/ sdud pa'i rgyu yin no zhes bshad pa'i phyir ro/ /yang na dad pa dang / 'dun pa dang / thabs dang / brtson 'grus la rnal 'byor zhes bya ste/ de dag gis sbyor ba'i phyir ro/ /de yang rnal 'byor spyod pa thos pa las byung ba'i sa las/rnal 'byor gang zhe na/ de ni rnam pa bzhi ste/ dad pa la sogs pa'o zhes ji skad smos pa lta bu'o/ /de nyid kyi 'bras bu bstan pa zhes bya ba ni/ de bzhin gshegs pa dgra bcom pa yang dag par rdzogs pa'i sangs rgyas rnams kyi byang chub dang gzhan yang gang dag de lta bu phyogs kyi dge ba'i chos byang chub kyi phyogs rnams kyang bag yod pas 'thob po zhes bya ba yin te/de la de bzhin gshegs pa zhes bya ba ni sngon gyi sangs rgyas rnams ji ltar gshegs shing phyin pa dang / chos thams cad kyi rang bzhin de bzhin nyid ji lta ba bzhin du mkhyen cing gsungs pa ltar/phyi ma rnams kyang de bzhin du gshegs te mkhyen cing gsung ba'i phyir ro/ /dgra bcom pa zhes bya ba ni sngar bshad pa bzhin no/ /yang dag par rdzogs pa zhes bya ba ni bsod nams dang ye shes kyi tshogs ma lus par leg par rdzogs pa'i phyir ro/ /sangs rgyas zhes bya ba sngar bshad pa bzhin no/ /rnams zhes bya ba ni mang po'o//byang chub ces bya ba ni zad pa dang mi skye ba'i ye shes so/ /gzhan yang gang dag de lta bu'i phyogs kyi dge ba'i chos byang chub kyi phyogs rnams zhes bya ba ni yang dag par rdzogs pa'i byang chub las gzhan pa ste/ byang chub skyed par byed pa dge ba'i chos gang yin pa de dag thams cad ni 'dir byang chub kyi phyogs rnams su 'dod do//bag yod pas 'thob bo zhes bya ba ni gong du bstan pa rnams kyang 'dis 'thob pa'i phyir bag yod pa'i 'bras bu bstan pa zhes bshad pa yin no/ /gso sbyong gi yan lag kun du spyad pa'i chos rnams bstan pa zhes bya ba ston te/ de'i phyir dge 'dun gyi thog mar bya ba ci zhe na//zhes bya ba nas/ de de bzhin du 'dzin to zhes bya ba'i bar du gsungs so/ /'di la yang don rnam pa brgyad kyis bstan te/ mi 'du ba dgag pa dang / mi 'dur gnang ba dang / mchod pa'i cho ga dang / yang dag par 'dzin du gzud pa dang / yang dag par 'dzin pa'i legs pa dang /yang dag par mi 'dzin pa'i nyes dmigs dang / yang dag par bsgo ba dang / 'khor rnam par dag pa'o/ /de'ang mi 'du ba dgag pa zhes bya ba ni/ dge 'dun gyi thog mar bya ba ci zhe na/ bcom ldan 'das kyi nyan thos kyi dge 'dun ni don nyung ba la bya ba nyung ba'o zhes bya ba yin te/ de la thog mar bya ba ci zhe na/ gso sbyong gi tshe dge 'dun gyi thog mar bya ba ci zhig bya zhe na zhes 'dri ba ste/ de'i lan du don nyung ba dang / bya ba nyung ba'o zhes bya ba'o/ /thog mar bya ba ci zhe na/ gso sbyong gi tshe dge 'dun ma 'dus sam/ sngar gang zag gi gso ba ma byas sam/ stan gding ba dang /chag chag dang / phyag dar la sogs pa ma byas sam/ so sor thar pa'i mdo 'don pa ma bskos na/ gso sbyong dang mi mthun pa yin pas de lta bu ma byas pa dag med dam zhes dri bar bya ste/ 'di dag ni sngar bya ba'o/ /de la don nyung ba zhes bya ba ni 'dod pa chung ba'i rgyu mthun pa ste/'di ltar bdag nyid kyi sems kyis 'gyod cing bshags pa la sogs pa dam bcas pa byas zin pa'o/ /bya ba nyung ba ni ngag gis 'gyod cing nyes pa bshags pa dang / lus kyis phyag byas pa la sogs pa byas zin pa'o/ /de'i phyir don nyung ba ni yid kyi las su bstan la/bya ba nyung ba ni lus dang ngag gi las su bstan to/ /kha cig na re bya ba nyung ba zhes bya ba ni gso sbyong gi gnas su thog mar bya dgos pa'i phyir gso sbyong gi gnas su bsku ba dang phyag dar bya ba la sogs pa byas zin pa la bya'o zhes 'chad de/ de lta bu ma byas pa gang yang med do zhes lan gdab pa'i phyir don nyung ba bya ba nyung ba zhes gsungs so//de la bcom ldan 'das zhes bya ba ni/ b+ha ga ban zhes bya ba bdud bcom zhing legs pa drug dang ldan pa'i phyir te/ de la bdud bzhi ni nyon mongs pa dang / phung po dang / 'chi bdag dang / lha'i bu'i bdud do/ /de la nyon mongs pa'i bdud ni khams gsum na spyod pa'i nyon mongs pa rnams so//phung po'i bdud ni nye bar len pa'i phung po lnga'o/ /'chi bdag gi bdud ni sems can de dang de dag sems can gyi ris de dang de dag nas 'chi ba'i dus byas pa gang yin pa'o/ /lha'i bu'i bdud ni bdud gsum po de dag 'da' bar bya ba'i phyir dge ba'i phyogs la rab tu brtson pa la bar chad byed pa dang /g.yeng bar bya ba'i phyir/ 'dod pa'i khams su skyes pa'i lha'i bu dbang phyug thob pa dag nye bar 'ong ba gang yin pa ste/ bzhi po de dag dge ba'i chos kyi srog dang bral bar byed pas na bdud ces bya'o/ /legs pa drug ni gzugs dang / grags pa dang / dbang phyug dang / dpal dang /shes pa dang / brtson 'grus so/ /'das pa zhes bya ba ni sangs rgyas kyi yon tan las mtshan 'jig rten las 'das pa'o zhes bya ba 'byung ba nas/ 'jig rten pa'i b+ha ga wan las khyad par du 'das zhes bla thabs su bsnan pa'i phyir ro/ /de la nyan thos zhes bya ba ni shra ba ka zhes pa'i sgra las drangs nas/de bzhin gshegs pa las chos kyi lung ma nos bar bdag nyid kyis rtogs par mi nus pas nyan pa la yang bya/ yang gcig tu na yang dag pa'i shes pas rgyun du zhugs pa la sogs pa'i 'bras bu thob pas gzhan la sgrog cing thos par byed pas na nyan thos zhes bya'o/ /dge 'dun zhes bya ba ni sngar bshad pa bzhin no//de bzhin gshegs pa'i nyan thos kyi dge 'dun no/ /mi 'dur gnang ba zhes bya ba'i dbang du byas nas 'phags ma dag ma lhags pa rnams la dad pa dang yongs su dag pa dris shig /dris nas kyang brjod par bya'o zhes bya ba gsungs te/ de la ma lhags pa rnams zhes bya ba ni/gso sbyong bya ba'i gnas su ma phyin pa rnams so/ /dad pa dang yongs su dag pa zhes bya ba ni 'di'i dbye ba mang mdo kyis 'dir ni de gnyis kyi mtshan nyid dang / bye brag dang / de dag blang zhing dbul ba'i kun tu spyad pa dang / gnang mi gnang gi skabs dang / de dag gi gnas bstan pa dang / lnga mdo tsam zhig bstan par bya'o/ /de la dad pa'i mtshan nyid ji lta bu zhe na/ ma lta bu la dad pa zhes bya ba ni dge 'dun gyi chos bzhin bya ba rnams la lta ba dang / blo gros dang / 'dod pa dang / bsam pas dad pa 'bul ba dang / dge 'dun gyi chos bzhin du bya ba rnams la rjes su yi rang ba dang /nye bar phyogs pa dang / khas blangs pa dang / khas len par byed pa 'di ni dad pa'i mtshan nyid do zhes gsungs so/ /yongs su dag pa'i mtshan nyid ni yang de nyid las yongs su dag pa zhes bya ba ni dag pa/ bdag ni nyes pa ma byung mod kyi 'on kyang zla ba phyed phyed cing dge slong gi sems rtse gcig pas bdag gi sems la/bdag gis ji ltar blangs pa'i tshul khrims kyi phung po dang ldan nam/ ma nyams sam/ ma ral lam/ 'dres par ma byas sam/ yongs su dag gam/ bdag la nyes pa ma byung ngam/ nyes pa med pa yin nam zhes brtag par bya ste/'di ni yongs su dag pa'i mtshan nyid do zhes gsungs so/ /dad pa dang yongs su dag pa'i mtshan nyid bshad zin to/ /dad pa dang yongs su dag pa la bye brag ci yod ce na/ de la dad pa phul bas ni dge 'dun mthun par bya ba'i phyir ro/ /yongs su dag pa phul bas ni gso sbyong gi tshe bdag nyid snod du gyur par bstan pa yin te//de bas na gang du gso sbyong dang / las byed pa der ni dad pa dang yongs su dag pa bsres te dbul bar bya'o/ /las 'ba' zhig byed pa'i tshe ni dad pa nyi tshe dbul bar bya'o zhes gsungs so/ /dad pa dang yongs su dag pa'i bye brag ni 'di yin no//dad pa dang yongs su dag pa ji ltar blang zhing dbul bar bya zhe na/ dge slong ma na bar gyur pa'am/ dge ba'i phyogs khyad par can la sbyor ba zhig ste/ dge 'dun gyi nang du 'ong ma nus na/ dge 'dun gyis dge slong ma chos lnga dang ldan pa gcig dad pa dang yongs su dag pa blang ba'i phyir bsko bar bya ste/'dod pa dang / zhe sdang dang / gti mug dang / 'jigs pas mi 'gro ba dang / dad pa dang yongs su dag pa blangs pa dang / ma blangs pa shes pa las bsko bar bya'o/ /gang bskos pa de yang dad pa dang / yongs su dag pa len cing slar dge 'dun la dbul du 'gro ba'i tshe brgyug par mi bya'o//ngam grog dang / bang rim la mchong bar mi bya/ /nam mkha' la gnas par mi bya/ mtshams kyi phyi rol du 'gro bar mi bya/ gom pa gcig gis skas kyi them pa gnyis su 'gro bar mi bya/ snyoms par 'jug par mi bya/ nyal bar mi bya bar blang zhing dbul bar bya'o//de nas dad pa dang yongs su dag pa'i mdun du gang ma lhags pa de dag 'di ltar dbul bar bya ste/ bla gos phrag pa gcig tu gzar nas/ lham phud la thal mo sbyar te/ tsog tsog por 'dug nas/ 'di skad du 'phags ma dgongs su gsol/ /bdag dge slong ma ming 'di zhes bgyi ba nad kyis nyen to zhe'am/dge ba'i phyogs la sbyor te/ deng dge 'dun gyi yang bcu bzhi'am bco lnga pa'i gso sbyong / bdag ming 'di zhes bgyi pa'i yang bcu bzhi'am/ bcwa lnga'i gso sbyong ste/ dge 'dun chos bzhin du mdzad pa la dad pa 'bul zhing bar chad kyi chos rnams yongs su dag go zhes bdag nyid mchi na/bdag gi dad pa dang / gso sbyong yongs su dag par brjod pa bzhin du/ bzlas su gsol zhes lan gsum brjod par bya'o/ /de nas dad pa dang yongs su dag pa len pa'i dge slong mas/ dge 'dun la dbul ba'i tshe drung du 'dug pa'i dge slong ma la 'di skad du 'phags ma dgongs su gsol/gnas 'di zhes bgyi ba na/ dge slong ma ming 'di zhes bgyi ba zhig bro 'tshal to zhe'am/ dge ba'i phyogs la sbyor te/ deng dge 'dun gyi'ang bcu bzhi'am bcwa lnga pa'i gso sbyong bdag ming 'di zhes bgyi ba'i yang bcu bzhi'am bcwa lnga pa'i gso sbyong ste/bdag ming 'di zhes bgyi ba bar chad kyi chos rnams yongs su gtsang / dge 'dun chos bzhin du mdzad pa la dad pa 'bul zhing yongs su dag pa yang brjod pa lags zhes nyid mchi ste/ brjod pa bzhin du bzlas pa lags zhes brjod par bya'o/ /dad pa dang yongs su dag pa ci'i phyir gang zag la bzlas kyi/dge 'dun la ma yin zhe na/ ring du thogs pa la sogs pa'i nyes pa spangs pa'i phyir ro/ /dad pa dang yongs su dag pa blang zhing dbul ba'i kun tu spyad pa'i chos rnams bshad zin to/ /dad pa dang yongs su dag pa de yang rkyen ji lta bu byung na gnang zhe na/ na'am/ nar dogs sam/nad sos nas ring po ma lon nam/ nad g.yog byed dam/ ngal lam/ zhigs sam/ bkres sam/ skom mam/ kun nas bskor ba rmugs pa dang gnyid stug po sel zhing dge ba'i phyogs byed dam/ so sor thar pa'i mod 'don pa la zhugs par gyur tam/ de'i don nyan pa zhig gam/de mi brjed par bya ba'i phyir tshig gtso bor 'dzin cing / tshul bzhin sems sam yid la byed pa khugs pa thob nas ring po ma lon nam/ de rjes su bsrung ngam/ byang chub kyi phyogs kyi chos rnams la rgyun du brtson 'grus rtsom pa la brtson par gyur pa'am/ bden pa mthong bar gyur na nyes pa med do//le lo'i phyir ram/ las ngan par 'brel te dad pa dang yongs su dag pa phul na nyes byas so/ /dad pa dang yongs su dag pa len pa'i dge slong ma/ dad pa dang yongs su dag pa blangs nas lam du shi ba'am/ babs sam/ dge tshul ma la sogs par dam bcas na/dad pa dang yongs su dag pa blangs pa ma yin no/ /bzla nus na gcig gis kyang du ma'i dad pa dang yongs su dag pa blang bar bya'o/ /sa la 'dug pas nam mkha' la 'dug pa'am/ bzlog pa yang rung ste len cing dbul bar mi bya'o/ /gal te dad pa dang yongs su dag pa len pa'i dge slong ma dang /'bul ba gnyis mtshams med pa lnga byas pa dang / mu stegs can dang / mu stegs su 'gro ba dang / 'gro ba gzhan du gnas pa dang / so sor gnas pa dang / bslab pa byin pa la sogs par khas blangs na len cing phul bar mi chud do/ /gal te dad pa dang yongs su dag pa 'bul ba na bar gyur te dge 'dun gyi nang du 'ong zhing smra yang mi nus na dge 'dun thams cad der 'ong bar bya'o//gal te smra mi nus kyang dad pa dang yongs su dag pa 'bul bar lus sam ngag gis go bar byed na phul ba yin no/ /gal te dad pa dang yongs su dag pa ni mang 'du ba ni nyung na rgan po rnams kyis kyang dge ba'i phyogs bzhag ste 'du bar bya'o//dad pa dang yongs su dag pa len cing 'bul ba'i gnang mi gnang gi skabs bshad zin to/ /dad pa dang yongs su dag pa gang du blang zhing dbul bar bya zhe na/ mtshams kyi nang na gnas pas mtshams kyi nang na gnas pa la blang zhing dbul bar bya'i/mtshams kyi phyi rol du gnas pa rnams la dad pa dang yongs su dag pa ma blangs kyang mi mthun pa nyes pa med pa'i phyir ro/ /de la mtshams ni rnam pa gnyis te/ las kyis bcad pa dang / rang mtshams so/ /de la las kyis bcad pa'i mtshams la yang rnam pa gnyis te/chen po dang chung ngu'o/ /de la chen po'i tshad ni gal te chu med pa zhig na steng logs su dpag tshad phyed dang gsum mo/ /'og logs su yang de dang 'dra'o/ /mtshams chung ngu'i tshad ni dkyil 'khor gang du grangs bzhi bcu shong ba'o/ /rang mtshams ni dge 'dun gang du gnas kyang rung las kyis ma bcad kyang rang bzhin gyis yod pa ste/rgyang grags dang / rtsig pa dang / chu'i mtshams la bya'o/ /mtshams 'di dag ji ltar bcas shing dgrol ba ni mangs bas 'dir ma smos te/ gzhan nas 'byung ba bzhin sbyar bar bya ste/ dad pa dang yongs su dag pa'i gnas bstan pa bshad zin to//de la dris shig ces bya ba ni gang gis dad pa dang yongs su dag pa dbul bar bya ba de dbul du gzhug pa ste/ de sbyin par bya ba'i phyir ro zhes bya ba'i tha tshig go/ /dris nas kyang brjod par bya'o zhes bya ba ni gang gis dad pa dang yongs su dag pa blangs pa de bzlas su gzhug pas te de shes par bya ba'i phyir ro//mchod pa'i cho ga zhes bya ba'i dbang du byas nas/ shAkya seng ge de la ni/ /sor mo bcu yi thal sbyar te/ /zhes bya ba gsungs te/ 'di la yang rnam pa gnyis su dbye'o/ /gnyis gang zhe na bstod pa dang phyag 'tshal ba'o//de la bstod pa zhes bya ba ni/ shAkya seng ge zhes smos pa yin te/ shAkya seng ge zhes bya ba ni khyim pa'i phyogs su rigs che zhing btsun pas na rigs kyi sgo nas bstod pa'o/ /seng ge zhes bya ba ni rab tu byung ba'i phyogs su mi 'jigs pa rnams kyis mu stegs can gyi tshogs thams cad skrag par mdzad pa'i phyir rab tu byung ba'i phyogs nas bstod pa'o//phyag 'tshal zhes bya ba ni/ sor mo bcu yi thal sbyar te/ /zhes smos pa yin te/ mchod pa rnam pa mang mod kyi/ skabs 'dir ni zhe sa'i tshul du thal mo sbyar bas mchod par 'gyur bas gzhan ma bstan to/ / yang dag par 'dzin du gzud pa zhes bya ba'i dbang du byas te/ so sor thar pa bshad par bya/ /'dul ba de ni nga la nyon/ /zhes bya ba nas/ srab 'dra so sor thar pa 'di'o/ /zhes bya ba'i bar du gsungs so/ /'di la yang rnam pa bzhir dbye ste/ mnyan du gzud pa dang / phyin ci ma log par bsgrub par bskul ba dang /mi g.yel bar sbyor ba la gzud pa dang / lta ba la chags su mi gzhug par sbyor ba'o/ /de la mnyan du gzud pa zhes bya ba ni/ so sor thar pa bshad par byas/ /'dul ba de ni nga la nyon/ /zhes pa yin te/ de la so sor thar pa zhes bya ba'i don ni sngar bshad pa bzhin no//bshad par byas zhes bya ba ni gso sbyong gi tshe'o/ /'dul ba zhes bya ba ni/ 'phral 'dod chags la sogs pa kun nas bskor ba rnams 'dul ba'i phyir 'dul ba zhes bya ste/ sngar bshad pa bzhin no/ /nga las nyon zhes bya ba ni so sor thar pa'i mdo 'don pa nyid las te/dbang po bsdus la nyon cig pa'i tha tshig go/ /phyin ci ma log par sgrub par bskul ba zhes bya ba ni/ thos nas drang srong chen po yis/ /kha na ma tho phra rnams las/ /bsgrims te gus par gyis shig ces bya ba yod de/ de bzhin gshegs pas ji skad gsungs pa de bzhin du sgrub par bskul ba'i phyir ro//thos nas zhes bya ba ni rna ba'i dbang pos so/ /drang srong zhes bya ba ni shes pa dang ldan pa la yang bya/ smon pa rnams 'byor cing 'grub pa la yang bya/ yang gcig tu na lus dang ngag dang yid drang por gnas shing bsrang ba la yang bya ste/skabs 'dir drang srong chen po zhes bya ba ni bcom ldan 'das la bya ste/ tshul khrims kyis rgyas pa'i phyir ro/ /chen po smos pa ni 'jig rten pa dang / dgra bcom pa dang / rang sangs rgyas kyi drang srong rnams las khyad par du 'phags pa'i phyir ro/ /kha na ma tho ba zhes bya ba ni 'phags pa rnams kyis smad pa'i phyir te/sdig pa'i dngos po byas pa rnams so/ /phra rnams la zhes bya ba ni bcas pa'i kha nas ma tho ba rnams la bya ste/ de dag la nan tan tu bya bar bstan pas rang bzhin gyis kha na ma tho ba rnams la yang nan tan bya bar bstan pa yin no/ /ci'i phyir zhe na yang zhes bya ba'i sgra zhig mi mngon par byas pa yang blta ba'i phyir ro//bsgrims te zhes bya ba ni des dge ba'i chos rnams la brtson 'grus rtsom pa gang yin pa'o/ /gus par zhes pa ni rim gror bya ba'o/ /gyis shig ces bya ba ni yang dag par 'dzin du gzhug pa'o/ /mi g.yel bar sbyor ba la gzud par zhes bya ba ni gsungs pa bzhin du sgrub par gyis shig ces bya ba yin te/ston pas ji skad gsungs pa de bzhin du/ bcas pa dang rang bzhin gyis kha na ma tho ba rnams mi 'byung bar nan tan gyis shig pa'i tha tshig go/ /lta ba la chags su mi gzhug pa'i sbyor ba zhes bya ba ni/ rtag par shin tu brten pa yi/sems rta kha blan dka' ba la/ gzer bu brgyab pa rnon po yi/ /srab 'dra so sor thar 'di'o/ /zhes bya ba yin te/ ji ltar rta rgod lam drang por 'gror mi btub pa rtag tu lam log par brten pa la/ dgug srab kyis bsrabs te btul na lam drang por btub ba de bzhin du/dge slong ma ma dul ma zhi ba sems nang du 'jog mi nus pa la yang so sor thar pa srab dang 'dra ba 'dis 'dul bar 'gyur ba'i phyir ro/ /rtag par shin tu brten pa zhes bya ba ni kha blan dka' ba dang sbyar te/ /dus thams cad du brten cing yul la chags pas sha tshig ste/ bzlog dgos so zhes bya ba'i tha tshig ste/kha blan dka' ba zhes bya ba 'dis ni sems gdul dka' bar bstan to/ /sems smos pa ni sems 'ba' zhig gdul ba'i don te/ de ni kun nas nyon mongs pa'i phyir rnam par sbyong gi bdag gis ni ma yin te/ bdag ni kun nas nyon mongs pa dang rnam par dag pa dang mi ldan zhing nam mkha' bzhin du 'gyur ba med pa'i phyir ro//gzer bu brgyab pa zhes bya ba ni so sor thar pa'i srab 'di las 'das pa rnams tshe 'di nyid la sgo mang po nas 'gyod cing mi bde ba'i phyir ro/ /rnon po zhes bya ba ni tshe gzhan na kha na ma tho ba 'byung ba gcod pa'i don te/de'i phyir so sor thar pa 'di srab tu bstan te/ srab ces bya ba ni ngang tshul ngan pa'i khas 'dul ba ma yin pa la zhugs pas na kha de snad pa bya ba'i don to/ /'dra zhes bya ba ni mthun pa la bya ste/ ha cang dog pa dang / yangs pa ma yin pa'i phyir ro/ /bdag ngal bar sbyor ba'i mtha' yongs su spangs pa'i phyir/ha cang dog pa yang ma yin no/ /'dod pa'i bde ba la sbyor ba'i mtha' yongs su spangs pa'i phyir ha cang yangs pa yang ma yin no/ /yang na gang zag blun po'i 'jug pa la sogs pa dang mthun par bstan pas 'dra ba zhes bya'o/ /so sor thar pa 'di'o zhes bya ba ni 'di nyid srab tu bstan pa'i phyir ro//yang dag 'dzin pa'i legs pa bstan pa'i phyir/ /che ba gang dag ngag tsam gyis/ /ldog pa'i mtshams las mi 'da' ba/ /de dag mi rta bzang po ste/ /nyon mongs g.yul las thar bar 'gyur/ /zhes bya ba gsungs so/ /che ba zhes bya ba ni bslab pa 'dod pa rnams so//gang dag ces bya ba ni su yang rung ba'o/ /ngag tsam gyis zhes bya ba ni dbyig pa'am mtshon chas ma yin no/ /ldog cing ces bya ba ni bcad pa dang / rang bzhin gyis kha na ma tho ba rnams las ldog pa'o/ /mtshams las zhes bya ba ni bslab pa'i mtshams so//mi 'da' ba ni 'gal bar mi byed pa'o/ /de dag mi rta bzang po ste/ /zhes bya ba ni/ ji ltar mi dpa' bo dang rta bzang pos dgra'i g.yul las thar pa dang 'dra bar che ba gang dag ngag tsam gyis sdig pa las ldog cing 'phags pa'i mtshams las mi 'da' ba de dag kyang dgra dang 'dra ba'i nyon mongs pa'i g.yul las thar par 'gyur ba'i phyir ro//nyon mongs g.yul zhes bya ba ni nyon mongs pa dang 'thab pa'i phyir ro/ /thar par 'gyur zhes bya ba ni dgra bcom pa thob pa'i dus na'o/ /yang dag par mi 'dzin pa'i nyes dmigs bstan pa'i phyir/ su la 'ang srab 'di med pa'am//nam du'ang 'dod par mi 'gyur ba/ /de dag nyon mongs g.yul las pham/ /gzungs med rnam par 'khyams par 'gyur/ /zhes bya ba gsungs te/ su la'ang srab 'di med ces bya ba ni mu stegs can rnams dang / 'dod pa la longs spyod pa rnams la chos nyid kyis so sor thar pa'i srab 'di med pa'i phyir ro//nam du'ang 'dod par mi 'gyur ba/ /zhes bya ba ni kha mu stegs can dang / 'dod pa la longs spyod pa rnams ma yin yang / yongs su mya ngan las 'da' ba ma yin pa'i chos can rnams so sor thar pa'i srab 'di spangs pa'i phyir nyon mongs pa'i dbang du gyur cing 'khor ba'i rgya mtshor yun ring por 'khyam pa'i phyir ro//nyon mongs g.yul las pham zhes bya ba ni/ so sor thar pa'i srab 'di med pa dang / nam du'ang 'dod par mi 'gyur ba de gnyis nyon mongs pa'i dbang du gyur pa'i phyir ro/ /gzugs med ces bya ba ni de gnyis kyis so sor thar pa'i srab rnam par spangs pa'i phyir ro//rnam par 'khyams par 'gyur zhes bya ba ni de gnyis 'gro ba lnga'i 'khor bar sna tshogs su 'khyam pa'i phyir ro/ /yang dag par bsgo ba zhes bya ba bstan pa'i phyir/ dge 'dun 'phags ma dag gson cig/deng dge 'dun gyi gso sbyong bcu bzhi pa'am bcwa lnga pa ste gal te dge 'dun gyi dus la bab cing bzod na/ dge 'dun gyis gnang bar mdzod cig dang / deng dge 'dun gso sbyong mdzad de so sor thar pa'i mdo bshad pa gdon no/ /'di ni gsol ba'o zhes gsungs te/ 'di dag ni sems rnam par g.yeng ba las mngon du byed du gzhug pa'i don yin pas na yang dag par bsgo ba zhes bya'o//de la dge 'dun zhes bya ba ni rnam pa drug ste/ bzhi dang / lnga dang / bcu dang / nyi shu dang / bzhi bcu dang / lnga bcu las lhag par 'dus pa'o//de la bzhi 'dus pas ni tshul nas 'byung ba dang / bsnyen par rdzogs par bya ba dang / dbyung ba ma gtogs pa de las gzhan thams cad bya'o/ /lnga 'dus pas ni bsnyen par rdzogs par bya ba dang / dbyung ba ma gtogs so/ /bcu 'dus pa dang / nyi shu 'dus pas ni dbyung ba ma gtogs so//bzhi bcu'am bzhi bcu las lhag par 'dus pas ni las thams cad bya'o/ /gson cig ces bya ba ni gus par byed du gzhug pa'o/ /deng zhes bya ba ni gso sbyong gi dus kyi tshe'o/ /gso sbyong zhes bya ba ni po sha d+hA zhes bya ba'i sgra las drangs na/ po sha ni dge ba'i gso sbyong rgyas par byed pa la bya/d+hA ni rgyug pa'am/ dag par byed pa lta bu la bya/ spyir na dus drug tu khrims nod pa'am/ dge slong ma khrims kyi yan lag nyams pa rnams gso zhing sbyong ba'i ming ste/ de'i phyir gso sbyong zhes bya'o/ /'dul ba ma lta bu las kyang / ci'i phyir gso sbyong zhes bya zhe na/sdig pa mi dge ba'i chos dang / nyon mongs pa dang / rnam par ma byang ba dang / rang bzhin gyis ma dag pa rnams nges par spong bar 'gyur zhing rnam par dag pa rang bzhin nye bar 'thob par 'gyur ba'i phyir ro zhes gsungs so/ /bcu bzhi pa'am bcwa lnga pa zhes bya ba ni gso sbyong gi dus shes par byed pa ste/de la bcu bzhi pa smos pa ni zhag la shol yod pa'i phyir te/ rgyal po gzugs can snying po'i yul du ni lo lnga zhing lan cig shol 'dor ba'i phyir/ de dang sbyar na lo bcu bzhi pa'i gso sbyong ni drug go/ /bcwa lnga pa ni bcwa brgyad de/ de la bcu bzhi pa drug gang zhe na/dgun zla 'bring po dang / dpyid zla tha chungs dang / ston zla ra ba dang / dgun zla tha chungs dang / dbyar zla ra ba dang / ston zla 'bring po dang / 'di drug gi gnam stong ni bcu bzhi'i gso sbyong ste/ 'dul ba bsdus pa las kyang / de la dgun dang / dpyid dang /dbyar rnams kyi zla ba phyed dang gsum dang / bdun pa ni gso sbyong bcu bzhi pa'o/ /de las gzhan pa ni bcwa lnga pa'o zhes bshad do/ /gso sbyong la rnam pa lnga ste/ bkra shis dang / zhi gnas dang / 'dum pa dang / glo bur dang / dus kyi gso sbyong ste/ skabs 'dir bcu bzhi dang bcwa lnga smos pa ni dus kyi gso sbyong la bya'o//de la bkra shis kyi gso sbyong ni dge 'dun la chos ngan pa dang / ltas ngan pa byung na zhi bar bya ba'i phyir dge 'dun 'dus nas dus la ma bab par gso sbyong byed pa'o/ /'dul ba bsdus pa la ni dge 'dun bye ba'i sdums bya ba dang mthun par bya ba'i gso sbyong ste/dgar ba'i las byas pa tshangs par bya zhing mthun par bya ba'i gso sbyong bya bar gsol ba 'debs pa zhes bshad do/ /zhi gnas kyi gso sbyong ni bsam gtan bsgom pa nyid rnam par dag pa yin pas/ rnal 'byor yid la byed pa la bya'o/ /'dum pa'i gso sbyong ni chos kyi rtag chad dang /'dul ba'i lci yang ma dum pa'i phyir dge 'dun sde so sor chad pa la phyis 'dum par 'gyur na/ 'dum pa'i gso sbyong ma byas na/ mthun par mi 'gyur bas 'dum pa'i gso sbyong gyis shig pa'o/ /glo bur gyi gso sbyong ni nad pa la sogs pa la ye 'drog byung na de zhi bar bya ba'i phyir dge 'dun gso sbyong gyis shig pa'o//gso sbyong gi nyi ma yongs su shes par bya ba dang / 'jig rten pa la bsnyad pa'i phyir de ni zla ba phyed kyi tshes 'di yin no zhes dge 'dun la tshes grangs brjod cing gtsug lag khang gi bdag po dang srung ma rnams kyi phyir/zhal nas gsungs pa'i tshigs su bcad pa re re brjod cig ces gtsug lag skyong gis nyin gcig bzhin du brjod par bya'o/ /nyi ma dang zla ba ni skar ma dang rgyal po dang yang mthun par bya'o/ /dus la bab ces bya ba ni gso sbyong gi dus so/ /bzod ces bya ba ni bdag gis so sor thar pa'i mdo bklags par bzod par gyur na zhes bya ba'i tha tshig go//dge 'dun gyis gnang bar mdzad cig pa'o/ /je so sor thar pa'i mdo bshad pa gdon no zhes bya ba ni rnam pa bzhi ste/ gleng gzhi brjod nas gzhan ni gsan pa lags zhes brjod pa dang / de bzhin du pham pa dang /lhag ma rdzogs nas gzhan ni gsan pa lags zhes bya ba dang / rdzogs par 'don pa dang bzhi'o/ /'di ni gsol ba'o zhes bya ba ni dge 'dun thams cad ces bya ba'i mtha' ston te/ gsol ba gcig pa'i las 'di yin par bstan pa'o/ /ci'i phyir thams cad kyis mi gdon zhe na/thams cad kyis 'don na chos nyan pa'i tshul du yang mi rung la/ la las mgor bklags la las mjug tu bklags pas rdzogs par mi 'gyur ba la sogs skyon du 'gyur ba'i phyir ro/ /'khor rnam par dag pa'i dbang du byas nas 'phags ma dag bdag cag gso sbyong bya ste zhes bya ba nas/de de bzhin du 'dzin to zhes bya ba'i bar du gsungs te/ 'di la yang rnam pa lngar dbye zhing bshad par bya'o/ /lnga gang zhe na nyes pa bshags su gzhug pa dang / yongs su dag par rig par bya ba dang / nyes pa ma bshags pa'i nyes dmigs bstan pa dang /nyes pa bshags pa'i phan yon gyi 'bras bu dang / mjug bsdus shing yongs su dag pa 'dri ba'o/ /de la nyes pa bshags su gzhug pa zhes bya ba ni/ 'phags ma dag bdag cag gso sbyong byas te/ so sor thar pa'i mdo bshad pa gdon gyi/ khyed cag su la nyes pa yod pa des mthol cig ces bya ba yin te/gzhan go sla bas ma bshad de/ de la khyed cag su la zhes bya ba ni gang yang rung ba'o/ /nyes pa zhes bya ba ni rang bzhin dang / bcas pa'i kha na ma tho ba rnams bka' la brnyas pa dang / lung du mi ston pa'i sems kyis byas pa'o//yod pa zhes bya ba ni gnyen po ma byas pa rnams so/ /des mthol cig ces bya ba gnyen po la brten par bya'o zhes bya ba'i tha tshig ste/ dge slong ma gcig gi mdun du nyes pa byung ba gang yin pa des bla gos phrag pa gcig tu gzar te/ tsog pur 'dug cing thal mo sbyar nas/bdag nyes pa'i ming nas smos te/ 'phags ma dgongs su gsol/ bdag ming 'di zhes bgyi ba nongs pa 'di ltar bu zhig byung ste/ de bdag gis 'phags ma'i mdun du gtsang ma'i mtha' nas bzung ste/ mthol zhing bshags so/ /mi 'chab bo//mthol zhing bshags na bdag bde ba la reg cing bde bar 'gyur gyi/ ma mthol ma bshags na ni ma yin no zhes brjod par bya'o/ /des kyang 'di skad du khyod nyes pa mthong ngam/ de ltar 'gyod dam/ phyin chad sdom mam zhes 'dri bar bya ste/ des kyang nyes pa mthong /da ltar 'gyod/ phyin chad chod par sdom mo zhes de ltar phan tshun lan gsum gyi bar du brjod par bya'o/ /ltung ba la the tshom za na 'dul ba 'dzin pa la sogs pa las the tshom bsal nas/ ltung ba gang yin pa gtan la phab ste bshags par bya'o/ /dge slong ma'i drung du nyes pa bshags par bya'i/dge slong ma la sogs pa la ni ma yin te/ /de dag gi mdun du 'chags na/ 'das pa dang bcas pa'o/ /nyes pa 'dra ba'i mdun du bshags par mi bya ste/ nyes pa 'dra ba ji lta bu zhe na/ phas pham pa ni phas pham pa 'dra la/de bzhin du nyes byas kyang nyes byas dang 'dra ba'i bar du'o/ /gal te dge 'dun gyi nang nyes pa dran na/ des 'di ltar byin gyis brlab par byas te/ deng dge 'dun gyi gso sbyong bcwa lnga ste/ bdag ming 'di zhes bgyi ba/ dge 'dun gyi nang du nongs par dran pa 'di rang gi sems kyis bslab po//re zhig gso sbyong bgyis la slad kyis chos bzhin du bgyi'o zhes byin gyis brlab par bya'o/ /gal te so sor thar pa'i mdo 'don pas dge 'dun gyi nang du nyes pa dran na yang de bzhin du byin gyis brlab par bya'o/ /dge 'dun gyi nang du ltung ba la the tshom yod na yang gong ma bzhin du bya'o//gal te gso sbyong gi tshe dge 'dun ltung ba dang bcas par gyur na/ gnas gzhan du dge slong ma ltung ba ma byung ba yod pa der/ dge slong ma gcig ltung ba bshags su btang zhing phyir 'ong ba spro ba bskyed par bya'o/ /de nyes pa bshags nas phyir 'ongs pa dang /gzhan dag de'i mdun du nyes pa rnams bshags nas de nas gdod gso sbyong bya'o/ /de lta bu med na dgrol ba'i gsol ba 'ba' zhig bya ste/ de nas gso sbyong bya'o/ /de yang 'di ltar bya ste/ 'phags ma'i dge 'dun gson cig /deng dge 'dun gyi gso sbyong bcwa lnga pa ste/dge 'dun thams cad nongs pa dang bcas par gyur na/ gang gi mdun du bdag nongs pa de chos bzhin du gnyen po bgyi bar 'ga' tsam gnas gzhan du mchis nas/ /dge slong ma'i mdun du chos bzhin du bgyi bar spro ba ma mchis te 'di ni gsol ba'o zhes brjod par bya'o//gal te dge 'dun thams cad ltung ba la the tshom du gyur na yang / cho ga gong du bshad pa bzhin du bya'o/ /dge 'dun thams cad nyes pa dang bcas par gyur la/ gzhi pa'am glo bur du lhags pa'ang rung ste/ dge slong ma ltung ba ma byung ba gcig yod na/des ngo shes pa rnams la 'di ltar bskul bar bya ste/ 'phags ma gang gis 'di dang 'di lta bu byas na de la cir 'gyur/ ltung ba dang bcas pa'o/ /'phags ma yang de'i tshe na 'di dang 'di lta bu byas pa dran nam/ dran no/ /de yang ltung ba dang bcas pa yin no zhes smras pa dang /gal te bdag 'ba' zhig ma lags kyi dge 'dun thams cad kyang byung ngo zhes zer na/ de la khyod nyid ltung ba chos bzhin du byos shig dang / dge 'dun thams cad kyang khyod ji lta ba bzhin du byed do zhes smros shig /de 'chags su btub par gyur na/bla gab med pa'i gnas su dge slong ma gzhan dag gis kyang mthong 'chags su btub par gyur pa de ltar 'chags su gzhug go/ /de bzhin grub na legs/ ma grub na de bzhin zhog shig /ma dad bzhin gleng zhing bskul na 'das pa dang bcas pa'o/ /khyim pa dang /ma ning dang / za ma dang / dge slong pha sun phyung ba dang / mtshams med pa lnga byas pa dang / mu stegs can la sogs pa dang gso sbyong mi bya'i/ mthun par gnas pa yongs su dag pa lta ba mtshungs par spyod pa rnams dang bya'o/ /gang gcig pur gnas te gzhan med na des gso sbyong gi nyin par dri gtsang khang la sogs pa bsku ba dang /phyag dar dang / gdan gding ba la sogs pa yo byad rnams bshams te/ dge slong ma rnams bsdad cing khyim pa rnams la chos bshad par bya'o/ /khyim pa chos nyan pa med na gtsug lag khang gi srung ma'i phyir kha ton bya'o//de ltar bsdad de dge slong ma su yang 'ong ba med na bdag nyid stan la 'dug ste/ de dang dge 'dun gyi gso sbyong bcwa lnga pa/ bdag ming 'di zhes bgyi ba'i gso sbyong bcwa lnga ste/ bdag ming 'di zhes bgyi ba bar chad kyi chos rnams gtsang bar bdag nyid smra ste/gso sbyong byin gyis brlab pa'o/ /tshul khrims kyi phung po yongs su rdzogs par bya ba'i phyir nam dge 'dun 'dus pa dang phrad pa der gso sbyong bgyi'o zhes lan gsum brjod par bya'o/ /gang na gnyis dang gsum gnas pa der yang cho ga 'di bzhin bya'o/ /sems bskyed pas drug 'grub ste/chos gos byin gyis brlab pa dang / chos gos dbyung ba dang / gos brtags pa dang / gang zag mgron du bos pa dang / gso sbyong dang / tshul nas 'byung ba'o/ /yongs su dag par rig par bya ba ni/ nyes pa med na cang ma smra shig / cang mi smra na bdag cag gis 'phags ma dag yongs su dag par rig par bgyi ste/ ji ltar so sor dris nas dge slong mas lan btab pa de bzhin du dge slong ma'i 'khor 'di ltar bur lan gsum bsgrag par bya'o zhes bya ba yin te/ de la nyes pa med na zhes bya ba ni ltung ba sde lnga'i nyes pa med pa'o//ma smra shig ces bya ba ni 'phags ma rnams ni cang mi smra bas 'grub pa yin pas 'dir yang gang mi smra ba de nyid yongs su dag par lan btab par gyur pa'i phyir ro/ /cang mi smra na bdag cag gis 'phags ma dag yongs su dag par rig par bgyi ste zhes bya ba ni gang mi smra ba nyid nyes pa med pa yin par gong du dam bcas pa'i phyir ro//ji ltar so sor dris nas dge slong mas lan btab pa de bzhin du zhes bya ba ni ji ltar gang zag gi gso sbyong byed pa'i tshe/ gang gi mdun du bshags par byed pa de la drung na 'dug pas khyed nyes pa dran nam/ da ltar 'gyod dam phyin chad chod par sdom mam zhes dris pa dang /des kyang nyes par mthong / da ltar 'gyod/ phyin chad sdom zhes khas blangs pa tsam gyis yongs su dag pa 'thob par 'gyur ba de bzhin du 'dir yang cang mi smra bas lan btab pas yongs su dag par 'gyur ro zhes bya ba'i tha tshig go//dge slong ma'i 'khor 'di lta bur lan gsum du bsgrag par bya'o zhes bya ba ni/ gong du mdo las 'phags ma dag bdag cag gso sbyong bya ste/ so sor thar pa'i mdo bshad pa gdon gyi khyed cag nyes pa yod pa des mthol cig/ /nyes pa med na cang ma smra zhig ces 'byung ba de lan gsum du bsgrag dgos pa'i phyir ro//ci'i phyir lan gsum kho na zhe na/ gsum las nyungs na ni g.yeng ba kha cig gis don mi go'o/ /de las mangs na ring du thogs pa'i phyir gnyis dang gsum ni ran par gsungs so/ /nyes pa ma bshags pa'i nyes dmigs bsten pa zhes bya ba ni/yang dge slong ma gang dge slong ma'i 'khor 'di lta bur lan gsum gyi bar du bsgrags pa las nyes pa yod la dran bzhin du/ ma mthol na shes bzhin du brdzun zer ba yin no/ /'phags ma dag shes bzhin du brdzun smra ba ni/ bcom ldan 'das kyis bar du gcod pa'i chos su gsungs so bya ba yin te/de la nyes pa yod la zhes bya ba ni ltung ba sde lnga'i gang yang rung ba'o/ /dran bzhin du zhes bya ba ni nyes pa yod kyang ma dran te/ ma bshags na brdzun du mi 'gyur ba'i phyir ro/ /de shes bzhin du brdzun zer ba yin no zhes bya ba ni gang nyes pa yod par dran bzhin du ma bshags shing cang mi smra bas lan btab pa nyid tshig gis go bar bya ba'i don brdas go bar bya ba'i phyir cang ma smras kyang brdzun du 'gyur ba'i phyir ro//bar du gcod pa zhes bya ba ni dus gnyis su ste tshe 'di nyid la dge ba'i chos rnams dang /tshe rabs gzhan na mngon par mtho ba dang / nges par legs pa'i bar du gcod pa'i phyir ro/ /nyes pa bshags pa'i phan yon gyi 'bras bu zhes bya ba ni/ de bas na dge slong ma nyes pa byung ba rnam par dag par 'dod pas nyes pa yod na dran zhing mthong ba bshags par bya'o//bshags na bde bar 'gyur ro/ /ma bshags ma mthol na ni ma yin no zhes bya ba'o/ /de la rnam par dag par 'dod pas zhes bya ba ni gang dag mya ngan las 'das par 'dod pa rnams so/ /bshags na bde bar 'gyur zhes bya ba ni rnam pa lnga'i tshul du bshags na bde bar 'gyur ba'i phyir te/le lo'i gnyen po brtson 'grus rtsom pa dang / kha na ma tho ba 'byung ba'i gnyen po kha na ma tho ba med pa skyed pa dang / bslab pa khyad du gsod pa'i gnyen po gus pa dang bcas pa dang / 'gyod pa'i gnyen po 'gyod pa med pa dang / rnam par ma dag pa'i gnyen po ting nge 'dzin dang yang dag pa ji lta ba bzhin du shes pa rnams kyis rnam par dag pa ste/'di rnams kyis mi mthun pa'i phyogs spang zhing mya ngan las 'das pa'i bde ba la reg pa'i phyir ro/ /gzhan ni go sla bas ma bshad do/ /mjug bsdu zhing yongs su dag pa 'dri ba zhes bya ba ni/'phags ma dag bdag gis so sor thar pa'i mdo bshad pa'i gleng gzhi brjod zin to/ /de la bdag gis 'phags ma dag la ci 'di la yongs su dag par gnas sam zhes dri'o/ /ci 'di na yongs su dag par gnas sam zhes lan gnyis lan gsum du dri'o//'di ni 'phags ma dag yongs su dag na gang gi phyir cang mi smra bas de de bzhin du 'dzin to zhes bya ba'o/ /de la gleng gzhi zhes bya ba ni so sor thar pa'i mdo 'don par 'gyur ba'i rgyu ste/ de'i 'og tu so sor thar pa'i mdo 'don pa nyid 'byung ba'i phyir ro//brjod zin to zhes bya ba ni nyan pa'i 'khor rnams spro ba skyed pa'i phyir te/ 'di ni mjug bsdu ba'o/ /ci 'di ni yongs su dag par gnas sam zhes bya ba ni bshad ma thag pa'i gleng gzhi las 'byung ba bzhin yongs su gtsang ngam zhes bya ba'i tha tshig ste/ 'di ni yongs su dag par 'dri ba'o//so sor thar pa'i bsdus pa'i don rnam pa brgyad du bstan pa las dang po ste/ gleng gzhi bstan pa zhes bya ba bstan zin to/ /'di man chad ni bsdus pa'i don rnam pa brgyad du bstan pa las gnyis pa ste/ bslab pa'i dngos po rnams bstan zhes ston to/ / 'di la yang rnam pa gnyis su dbye ste/ ltung ba'i dngos po rnams bstan pa dang rtsod pa'i gnyen po rnams bstan pa'o/ /de la ltung ba'i dngos po rnams bstan pa zhes bya ba ni phas pham pa brgyad nas bslab pa'i chos mang po rnams rdzogs pa'i bar du'o/ /rtsod pa'i gnyen po rnams bstan pa zhes bya ba ni zhi bar bya ba'i chos bdun po rnams so//de la ltung ba'i dngos po bstan pa yang ltung ba sde lngar dbye ste ltung ba sde lnga gang zhe na/ phas pham pa dang / dge 'dun lhag ma dang / ltung ba dang / so sor bshags pa dang / nyes byas kyi sde rnams so/ /de la phas pham pa'i sde zhes bya ba ni phas pham pa brgyad po rnams so//dge 'dun ltag ma'i sde zhes bya ba ni dge 'dun lhag ma'i chos nyi shu po rnams so/ /ltung ba'i sde zhes bya ba ni spang ba ltung ba'i chos sum cu rtsa gsum dang / ltung ba brgya brgyad cu po rnams so/ /so sor bshags par bya ba'i sde zhes bya ba ni so sor bshags par bya ba'i chos bcu gcig po rnams so//nyes byas kyi sde zhes bya ba ni bslab pa'i chos mang po rnams so/ /'dir phas pham pa'i sde rnams sngar bstan pa'i phyir ro/ /mdor bstan pa ni/ mi tshangs spyod dang ma byin len pa dang / /mi gsod mi chos bla mar gyur smra dang //ri dgas dgra yi bu dang spos 'tshang khye'u/ /mdza' can ma dang gre las skyes bya ba gsungs so/ /tshigs su bcad pa 'di ni phas pham pa brgyad po rnams kyi bsdus pa'i don te/ phas pham pa brgyad las mang nyung du skyed cing dbrir dogs pa dang / 'og nas 'byung ba'i don rnams bde blag tu khong du chud par bya ba'i phyir ro//bslab pa'i dngos po re re la yang spyir don rnam pa nyi shu rtsa gcig gis bshad pa'i phyir te/ nyi shu rtsa gcig po gang zhe na/ 'di lta ste/ gleng gzhi dang / gang zag dang / nyes pa dang / dngos po dang / nyon mongs pa dang / mtshan nyid dang / nyes par 'gyur ba dang / nyes par mi 'gyur ba dang / yan lag rnams dang / 'byung ba dang / mtshan ma dang / rgyun chad pa dang / rgyun ma chad pa dang / kha na ma tho ba dang / byas ma byas dang / spyad ma spyad dang / lci yang dang /spyi'i mtshan nyid dang / gso ba dang / nyon mongs par mi 'gyur ba dang / nyes pa 'byung ba'i rgyu'o/ /des grong khyer gang du bcas pa de ni gleng gzhi'o/ /gang la brten te bslab pa babs pa ni gang zag des lus dang ngag gis nyes pa byas pa gang yin pa de ni nyes pa'o//dngos po ni rgyas par dbye na mang mod kyi mdor bsdus na rnam pa gnyis te/ sems can dang sems can ma yin par brjod pa ste/ bslab pa'i dngos po thams cad 'di gnyis las bcas pa'i phyir ro/ /nyon mongs pa ni rgyas par dbye na mang mod kyi mdor bsdu na gnyis so//gnyis gang zhe na lhan cig skyes pa dang / kun nas brtags pa'i nyon mongs pa ste/ ltung ba thams cad 'di gnyis las 'byung ba'i phyir ro/ /mtshan nyid bslab pa'i dngos po rnams kyis mtshan nyid bstan pa ste/ yang zhes bya ba'i sgra ni las dang po pa la nyes pa med par ston to zhes bshad pa lta bu'o//nyes par 'gyur ba ni 'di ltar byas na nyes par 'gyur ro zhes bstan pa'o/ /nyes par mi 'gyur ba ni 'di ltar byas na nyes par mi 'gyur ro zhes bstan pa rnams so/ /yan lag 'di rnams dang ldan na nyes par 'gyur 'di rnams dang mi ldan na nyes par mi 'gyur ro zhes bstan pa rnams so//'byung ba ni rnam pa drug ste/ lus dang / ngag dang / lus dang sems dang / ngag dang / ngag dang sems dang / lus dang ngag dang sems rnams te/ ltung ba thams cad 'di drug gis 'byung ba'i phyir ro//mtshan ma ni phas pham pa la sogs pa'i ming ste/ dge ba'i chos kyi nus pa phongs par byed pa dang / ngan song gi kha na ma tho ba skyed pa'i phyir phas pham pa zhes bya ba'o/ /dge 'dun gyis bskrad pa'i phyir lhag ma yang yin te/ de ltar nyes pa de byung na dge 'dun gyis bsnyigs te/bsgo ba'i phyir ro/ /ngan song rnams su bsreg pa dang 'tshed pa dang ltung ba'i phyir ltung ba yang yin no/ /ma bshags na kha na ma tho ba mang du bskyed do/ bshags par bya ba'i phyir so sor bshags pa yin no/ /ngan par byas pas smad pa'i phyir nyes byas kyang yin no//rgyun chad pa dang ma chad pa ni gnyen po la brten pa ni nyes pa'i rgyun chad pa'i phyir rgyun chad pa zhes bya'o/ /de las bzlog pa ni rgyun ma chad pa'o/ /kha na ma tho ba ni rnam pa gnyis te/ rang bzhin dang / bcas pa'i kha na ma tho ba ste/ ltung ba thams cad 'di gnyis kyi rang bzhin yin pa'i phyir ro//byas ma byas ni sbyor ba byas pa dang / sbyor ba ma byas kyang nyes par 'gyur ba gang yin pa'o/ /spyad ma spyad ni nyes par gyur nas bcas pa gang yin pa'o/ /lci yang ni lci ba la rnam pa drug ste/ bcas pa dang / dngos po dang / nyon mongs pa dang /sgrub pa dang / gang zag dang / dus so/ /de la bcas pa las lci ba ni bslab pa bcas nas rang bzhin dang bcas pa'i kha na ma tho ba byung ba'o/ /dngos po la lci ba ni byol song gi skye gnas pa srog gcod pa'i ltung ba ni lci'i/ dge 'dun lhag ma ni de lta ma yin pa'i phyir ro//nyon mongs pa las lci ba ni ma gus pa'i nyon mongs pa las byung ba gang yin pa'o/ /bsgrub pa las lci ba ni rgyun du byung ba gang yin pa'o/ /gang zag las lci ba ni dge ba'i rtsa ba bsam gtan pa blun po'i rgyud kyis byas pa'o/ /dus kyi lci ba ni gang nyes pa byas nas yun ring por bcabs pa ste/de drug las bzlog pa ni yang ba'o/ /spyi'i mtshan nyid ni lus dang ngag gi las kyi mtshan nyid de bslab pa thams cad 'di gnyis kyi las kyi mtshan nyid yin pa'i phyir ro/ /gso ba ni rnam pa bzhi ste/ chad pa chen po'i las kyi gso ba ni phas pham pa'o//chad pa 'bring gi las kyi gso ba ni dge 'dun lhag ma'o/ /chad pa chung ngu'i las kyi gso ba ni spangs pa'o/ /chad pa med pa'i las kyi gso ba ni gzhan rnams so/ /nyon mongs par 'gyur ba ni gang 'dod chags la sogs pa'i nyon mongs pa las byung ba gang yin pa'o//nyon mongs par mi 'gyur ba ni de ma yin pa nyon mongs pa gzhan dag las byung ba'o/ /nyes pa 'byung ba'i rgyu ni rnam pa bzhi ste/ mi shes pa dang / bag med pa dang / nyon mongs pa mang ba dang / ma gus pa'o/ /ji ltar mi shes pas 'byung zhe na/'di ltar 'di na la las ltung ba ma thos shing ma rtogs pas de blo ma byang ba'i phyir ltung ba la ltung ba med par 'du shes pas ltung ba 'byung bar 'gyur ba'i phyir ro/ /ji ltar bag med pas 'byung zhe na/ 'di na la la ltung ba la blo byang ba yin yang brjed ngas par gnas shing /shes bzhin ma yin par gnas pas de dran pa nye bar mi gnas pas ltung ba 'byung bar 'gyur ba'i phyir ro/ /ji ltar nyon mongs pa mang bas 'byung zhe na/ 'di ltar 'di na la la ltung ba la blo byang ba yin yang 'dod chags dang /zhe sdang dang / gti mug gi shas che ba'i rang bzhin can yin pas 'di ni bya ba ma yin no zhes bya bar shes kyang rang dbang med pas nyon mongs pa rnams kyi ltung ba 'byung bar 'gyur ba'i phyir ro/ /ji ltar ma gus pas 'byung zhe na 'di ltar 'di na la la ltung ba la blo byang ba yin yang /dman pa la mos shing sngon rgyu ma spyad pa yin pas de dman pa la mos pa'i phyir dge sbyong gi tshul la mi lta zhing mya ngan las 'das pa dang / chos dang dge 'dun la gus pa dang zhes byed pa dang / ngo tsha med pa dang / bslab pa mi 'dod pa dang / mi gus pas 'dod dgur ltung ba 'byung bar 'gyur ba'i phyir te/ nyi shu rtsa gcig po 'di rnams kyis bslab pa'i dngos po rnams dang ci rigs par kun dang sbyar zhing bshad par bya'o/ /de la mi tshangs spyod dang zhes bya ba ni phas pham pa'i dang po ston te/'di'i gleng gzhi ni sangs rgyas bcom ldan 'das rgyal po'i khab na bzhugs so/ /de'i tshe na ser skya bzang mo zhes bya ba'i dge slong ma snga dro sham thabs dang / chos gos bgos lhung bzed thogs nas rgyal po'i khab tu bsod snyoms la zhugs pa las/ ma skyes dgra'i blon pos ser skya bzang mo gzugs bzang ba blta na sdug pa mdzes par mthong ste/de mthong nas 'dis ni rgyal po'i mya ngan 'dul bar nus so zhes smras nas chos gos phrogs te gos dkar po bskon nas rgyal po ma skyes dgra'i btsun mo'i nang du bzhag go/ /rgyal po bzang mo de'i gzugs mthong ma thag tu 'dod chags kyis gzir te/rgyal po ma skyes dgras nan gyis mthus bzung ba dang / de yang sdug bsngal zhing mi bde bas gzir bar gyur to/ /de'i tshe gau ta mi skye dgu'i bdag mo chen mo bcwa lnga'i gso sbyong gi tshe/ dge slong ma'i dge 'dun 'dus shing 'khod pa'i mdun du 'dug go//de nas gau ta mi skye dgu'i bdag mo chen mos dge slong ma'i dge 'dun gyi nang na dge slong ma gang ma 'ongs zhes kun las bltas te brtags na/ ser skya bzang mo btsun mo'i nang du chud de sdug bsngal ba dang dogs pa dang gnod par gyur par mthong nas dge slong ma dag la ser skya bzang mo mi snang ngo zhes smras so//de nas gau ta mi skye dgu'i bdag mo chen mos/ ut+pa la'i kha dog ma la ut+pa la'i kha dog ma ser skya bzang mo de la soms shig ces smras so/ /de skad ces bsgo ba dang / ut+pa la'i kha dog ma 'di lta ste/ skyes bu mthu bo che de'i dpung pa bskum pa las brkyang brkyang ba las bskum pa tsam gyis dge slong ma ut+pa la'i kha dog la gau ta mi skye dgu'i bdag mo chen mo las mnyan te/ gso sbyong gi gnas nas mi snang bar gyur te/ rgyal po'i khang bzangs kyi steng na 'dug go//ut+pa la'i kha dog mas ser skya bzang mo sdug bsngal zhing dogs pas gnod par 'gyur ba mthong ngo / /mthong nas kyang ser skya bzang mo la 'di skad ces smras so/ /phu nu mo khyod kyis bdud kyi sde thams cad la tshugs na/ mu stegs can dang thun mong du bzung ba'i rdzu 'phrul tsam yang ma nus sam/de nas ut+pa la'i kha dog mas de la lung byin te/ nub mo 'di dang 'di lta bu yid la byos shig ces bsgo ba dang / des lung blangs te/ yid la byas pa dang / des rdzu 'phrul grub nas gos dkar po dang bcas bzhin du steng gi nam mkha' las byung ste song ngo //ut+pa la'i kha dog mas bzang mo khrid nas gso sbyong gi gnas su 'ongs pa dang / dge slong ma bcu gnyis sde mos bzang mo mthong ba dang / 'phya zhing smod do/ /bdag cag btsun mo dang lhan cig tu gso sbyong mi bya'o zhes smras so/ /gau ta mi skye dgu'i bdag mo chen mos de la bu mo rgyal po la gsol te/chos gos gyon la shog shig ces smras pa dang / bzang mo steng gi nam mkha' la byung nas rgyal po'i khyim ga la ba der song ba dang / rgyal po gnyid kyis log par mthong ngo / /de nam mkha' la 'dug nas se gol gyi sgras rgyal po sad par byas so//rgyal pos de mthong ba dang 'jigs skrag ste/ ba spu bu ga nas langs bzhin du smras pa khyod ci lha mo'am/ gnod sbyin mo'am/ klu mo'am/ dri za mo'am/ lha ma yin mo'am/ ci zhes smras pa dang / bzang mos smras pa/ bdag lha mo yang ma yin/gnod sbyin mo yang ma yin/ klu mo yang ma yin/ dri za mo la sogs pa gang yang ma yin zhes smras pa dang / rgyal pos smras pa/ 'o na khyod su yin zhes smras pa dang / bzang mos smras pa/ bdag ni dge slong ma ste/ 'jig rten gyi ston pa'i nyan thos ma'o//rgyal pos smras pa/ chos gos med pa lhung bzed med/ /skra ma bregs ma dge slong ma'i/ mtshan ma cha lugs khyod la mi snang gi /myos med skyon de gnyis 'gal don med smros/ /bzang mos rgyal po la thams cad rgyas par smras so/ / khyod kyi mi srun blon pos bdag gtses te/ /lhung bzed dang ni chos gos nan gyis phrogs/ /gso sbyong bar chad bya bar mi rigs te/ /pha dang ma yi nor de bdag stsol cig /rgyal pos de thos pa dang brgyal te sa la 'gyel nas chus gtor te slar bslang ngo / /de nas rgyal po'i rkang pa la gtugs te dga' bar byas nas/chos gos dang lhung bzed byin no/ /des chos gos dang lhung bzed thogs nas/ gau ta mi skye dgu'i bdag mo chen mo ga la ba der song ba dang / de lta bur gyur pa dge slong ma dag gis dge slong dag la smras so/dge slong dag gis bcom ldan 'das la gsol pa dang / de nas bcom ldan 'das kyis byung ba 'di dang / gleng gzhi 'di dang / don 'di dang / de lta bur gyur pa 'di'i phyir dge slong ma'i dge 'dun rnams bsdus te/ ser skya'i bzang mo la smras pa/ dge slong ma khyod kyis 'di 'dra ba'i mi rigs par byas pa bden nam/btsun pa mad do/ /dge slong ma nyams su blangs sam/ btsun pa bdag snga nas 'dod chags dang bral ba lags na/ ga la zhig nyams su len/ bka' stsal pa/ dge slong ma 'di la nyes pa med do//de lta bu byung yang bcom ldan 'das kyis de'i mod la/ nyan thos ma rnams la 'dul ba la bslab pa'i gnas ma bcas mod kyi/ de legs par bcu gzigs pa na nyan thos ma rnams la bslab pa'i gnas bcas te/ bcu gang zhe na/ 'di lta ste/ dge 'dun bsdu ba'i phyir dang / dge 'dun legs par bya ba'i phyir dang / dge 'dun bde bar gnas par bya ba'i phyir dang / gnong mi bskur ba'i gang zag rnams tshar bcad pa'i phyir dang / ngo tsha shes pa rnams bde bar gnas par bya ba'i phyir dang / mngon par ma dad pa rnams mngon par dad par bya ba'i phyir dang /mngon par dad pa rnams phyir zhing dad par bya ba'i phyir dang / tshe 'di'i zag pa rnams bsdam par bya ba'i phyir dang / tshe rabs phyi ma'i zag pa rnams gzhom pa'i phyir dang / nga'i tshangs par spyod pa yun ring du gnas par 'gyur zhing ji tsam du lha dang mi dang /skye bo mong po la rgya cher yang dag par rab tu bshad pa'o/ /de la dge 'dun bsdu pa'i phyir zhes bya ba ni rgyal rigs nas dmangs rigs kyi bar gyi rigs kyi bu dang / rigs kyi bu mo dag kyang gzud pa'o/ /dge 'dun legs par bya ba'i phyir zhes bya ba ni/zhugs pa rnams legs par gsungs pa'i chos 'dul ba la brten nas/ bde ba'i chos rnams mngon par 'phel ba'o/ /dge 'dun bde bar gnas par bya ba'i phyir zhes bya ba ni/ dge ba'i chos rnams la brten nas dad pas byin pa yongs su sbyang bar bya'o//gnong mi bskur ba'i gang zag rnams tshar bcad pa'i phyir zhes bya ba ni/ ngang tshul ngan pa can dang bslab pa la mi slob pa'i gang zag rnams nan thur gyi las kyis bskrad par bya'o/ /ngo tsha shes pa rnams bde bar gnas par bya ba'i phyir zhes bya ba ni ngo tsha shes pa ni so so'i skye bo'i dge ba rnams te/de dag mi 'thab pa dang / mtshang mi 'bru ba dang / mi rtsod pa dang / mi 'gyed pa bya ba'o/ /mngon par ma dad pa rnams mngon par dad par bya ba'i phyir zhes bya ba ni khyim pa dad pa ma rnyed pa rnams dad pa rnyed par bya'o//mngon par dad pa rnams phyir zhing dad par bya ba'i phyir zhes bya ba ni/ dad pa rnyed pa rnams kyis sems bsrung bar bya'o/ /tshe 'di'i zag pa rnams bsdam pa'i phyir zhes bya ba la tshe 'di'i zag pa rnams ni kun nas dkris pa ste de spang bar bya'o/ /tshe rabs phyi ma'i zag pa rnams gzhom pa'i phyir zhes bya ba la/tshe rabs phyi ma'i zag pa zhes bya ba ni bag la nyal ba ste/ de spang bar bya'o/ /nga'i tshangs par spyod pa yun ring du gnas par 'gyur zhing ci tsam du lha dang mi dang skye bo mang po la rgya cher yang dag par rab tu bshad pa zhes bya ba ni/sde snod gcig nas gcig tu brgyud pa'i tshul gyis bstan pa yun ring du gnas pa'o zhes 'dul ba bsdus pa las 'byung ngo / /rnal 'byor spyod pa'i sa rnam par bshad pa bsdu ba las ni/ dge 'dun bsdu ba'i phyir zhes bya ba ni/ mdor bstan pa'i tshig yin no//dge 'dun legs par bya ba'i phyir zhes bya ba ni 'dod pa'i bsod nyams kyi rjes su brtson pa'i mtha' rnam par spang ba'i phyir ro/ /dge 'dun bde bar gnas par bya ba'i phyir zhes bya ba ni/ bdag nyid ngal ba'i rjes su brtson pa'i mtha' rnam par spang pa'i phyir ro//gnong mi bskur ba'i gang zag rnams tshar gcad par bya ba'i phyir zhes bya ba ni tshul khrims 'chal ba rnams la nan tur du bya ba'i phyir ro/ /ngo tsha shes pa rnams bde bar gnas par bya ba'i phyir zhes bya ba ni/ tshul khrims dang ldan pa rnams 'gyod pa med par bya ba'i phyir ro//mngon par ma dad pa rnams mngon par dad par bya ba'i phyir zhes bya ba ni/ ma zhugs pa rnams gzhug pa'i phyir ro/ /mngon par dad pa rnams phyir zhing dad par bya ba'i phyir zhes bya ba ni zhugs pa rnams yongs su smin par bya ba'i phyir ro/ /tshe 'di'i zag pa rnams bsdam pa'i phyir zhes bya ba ni nyon mongs pa'i kun nas dkris pa rnam par gnon pa dang rjes su mthun par bya ba'i phyir ro//tshe rabs phyi ma'i zag pa rnams gzhom pa'i phyir zhes bya ba ni smon nas tshangs par spyod pa la gnas pa gsal bar bya ba'i phyir dang / nyon mongs pa'i bag la nyal spang ba dang rjes su mthun par bya ba'i phyir ro//nga'i tshangs par spyod pa skye bo mang po la phan pa yangs par gyur pa lha dang mi rnams kyi bar la yang dag par rab tu bstan pa yun ring du gnas par 'gyur ba'i phyir zhes bya ba ni bstan pa rgyun mi 'chad par bya ba'i phyir ro zhes bshad do//rnal 'byor spyod pa'i sa 'dul ba bsdus pa las kyang / de la dge 'dun bsdu ba'i phyir zhes bya ba ni/ rigs bzhi po dad pas legs pa kho nar khyim nas khyim med par rab tu byung ba rnams bsdu ba las brtsams pa bzhin no/ /de ltar rab tu byung ba rnams gzhi dang bcas/nges par 'byung ba dang bcas/ pha rol gnon pa dang bcas/ cho 'phrul dang bcas pa'i chos bstan pa rjes su 'jug pas ni dge 'dun legs par 'gyur bar rig par bya'o/ /dge 'dun bde bar gnas par bya ba ni rnam pa lngas rig par bya ste/yo byad rkyen du 'bab pa dag yod pa dang / /chos mi mthun pa'i gang zag rnam par sprad pa dang / 'gyod pa skyes pa sel ba dang / nyon mongs pas kun nas dkris pa rnam par gnon pa dang / nyon mongs pa'i bag la nyal spangs pa'o/ /de la bde bar gnas par bya ba dang po'i dbang du mdzad nas ni mngon par ma dad pa rnams dad par bya ba'i phyir dang /mngon par dad pa rnams phyir zhing dad par bya ba'i zhes gsungs so/ /gnyis pa'i dbang du mdzad nas ni/ gnong mi bskur ba'i gang zag rnams tshar gcad par bya ba'i phyir zhes bya ba'o/ /gsum pa'i dbang du mdzad nas ni/ngo tsha shes pa rnams bde bar gnas par bya ba'i phyir zhes bya ba'o/ /bzhi pa'i dbang du mdzad nas ni tshe 'di'i zag pa rnams bsdam pa'i phyir zhes bya ba'o/ /lnga pa'i dbang du mdzad nas ni tshe rabs phyi ma'i zag pa rnams gzhom pa'i phyir zhes bya ba'o//thob pa rnams bde bar gnas par bya ba dang ma thob ma zhugs pa rnams bde bar 'jug par bya ba'i phyir/ nga'i tshangs par spyod pa skye bo mang po la phan pa/ yangs par gyur pa lha dang mi rnams kyi bar la yang dag par rab tu bstan pa yun ring du gnas par 'gyur ba zhes bya ba gsungs so//de dag thams cad mdor bsdu na dang po bsdu ba dang / legs par bsdu ba dang / bsdus pa rnams bde bar gnas par bya ba dang / ma 'ongs pa ma bsdus pa rnams bde bar 'jug par 'gyur ba'i thabs yongs su bstan pa yin te/ de ni rnams grangs gzhan yin no zhes 'byung bas/de ltar na bcom ldan 'das kyis legs pa bcu gzigs pa'i phyir/ nyan thos rnams la 'dul ba la bslab pa'i gnas bshad do/ /yang dge slong ma gang dge slong ma rnams dang lhan cig bslab pa mtshungs par gyur pa las/bslab pa ma phul bslab pa nyams par ma byas pas mi tshangs par spyod pa 'khrig pa'i chos byas na/ tha na byol song gi skye gnas su song ba dang lhan cig kyang rung / dge slong ma de phas pham pa yin gyi gnas par mi bya'o/ /de la yang zhes bya ba'i sgra ni las dang po pa las nyes pa med par ston to//dge slong ma gang zhes bya ba ni/ dge slong ma la rnam pa lnga ste/ ming gi dge slong ma dang / khas 'che ba'i dge slong ma dang / slong ba'i dge slong ma dang / nyon mongs pa dang bral ba'i dge slong ma dang / gsol pa dang bzhi'i las kyis bsnyen par rdzogs pa'i dge slong ma'o//skabs 'dir ni gang gsol ba dang / bzhi'i las kyis bsnyen par rdzogs pa de ni dge slong mar dgongs te/ de'i phyir dge slong ma zhes gsungs so/ /dge slong ma dang lhan cig pa ni/ de ma yin pa chos mtshungs par spyod pa rnams so//bslab pa mtshungs par gyur zhes bya ba ni/ gang bsnyen par rdzogs nas lo brgya lon pa'i dge slong mas bslab pa gang la bslab par bya ba de la/ de'i nyin mo bsnyen par rdzogs pas kyang bslab par bya'o/ /'di la gang tshul khrims dang bslab pa dang /so sor thar pa'i mdo bcad pa mtshungs pa 'di ni bslab pa'i mtshungs pa zhes bya'o/ /bslab pa ma phul zhes bya ba ji tsam gyis bslab pa ma phul pa yin zhe na/ ji ltar dge slong mas khros pa dang / smyos pa dang / sems 'khrugs pa dang / nad kyis gzir nas bslab pa phul na/bslab pa ma phul zhes bya'o/ /de rnams dang ldan pa zhig la phul na/ phul bar mi chud do/ /glen pa dang / lkugs pa dang / 'on pa dang / mi dben pa la dben par 'du shes pa gsum dang / gal te 'phags mas mtha' 'khob ma'i skad du/gzhi rgyud du smyos pa dang / gnyid kyis log pa dang / snyoms par zhugs pa dang / mi ma yin pa dang / lha dang / sprul pa dang / byol song dang / gzugs dang / ca co'i nang du bslab pa phul na/ bslab pa phul ba ma yin no/ /mdor na gtong ba'i sems kyang med la dge sbyong don du gnyer zhing /khyim pa don du mi gnyer la brda sprad pa'i skyes pa'am bud med brda phrad par ma byas na/ bslab pa phul ba ma yin zhes bya'o/ /bslab pa nyams par ma byas pa zhes bya ba ni bslab pa nyams par byas kyang bslab pa ma phul ba yang yod/ /bslab pa phul la bslab pa nyams par ma byas pa yang yod/bslab pa nyams par byas la bslab pa phul ba yang yod/ bslab pa nyams par ma byas la bslab pa ma phul ba yang yod do/ /ji ltar bslab pa nyams par byas kyi/ bslab pa ma phul ba yin zhe na/ 'di ltar dge slong ma chags par gyur tam/ mi dga' 'am/ slar 'bab par 'dod dam/ dge sbyong don du gnyer tam/ dge sbyong gi sma bab bam/ ngo tsha'am/ the tshom za'am/ smod cing dge slong ma'i gan du song nas 'di skad ces 'phags ma mkhyen par mdzod cig /tshangs par spyod pa ni spyad par dka'o//rab tu dben par bya dka'o/ /gcig pur dga' bar bya dka'o/ /dgon pa dang / nags dang / ri dang nye ba dang bas mtha'i gnas su gnas par dka'o/ /gcig pur dgon par gnas na sdug bsngal ba ste/ pha ma dang / phu nu mo dang / ming po dang / slob dpon ma dang / mkhan mo dran no/ /bdag bzo slob tu chug cig /bdag las byed du chug cig /bdag dge ba'i rigs rnams la gtod cing zhes smra zhing tshig gis go bar byed kyang bslab pa 'bul lo zhes de skad ma smras na/ de lta bu ni bslab pa nyams pa yin te/ bslab pa phul ba ma yin no/ /ji ltar bslab pa phul yang / bslab pa nyams par ma byas pa yin zhe na/ 'di ltar dge slong ma dge slong ma'i gan du song nas 'di skad ces 'phags ma dgongs shig /bdag ming 'di zhes bgyi bas bslab pa phul ba zhes bya'o/ /dkon mchog gsum dang /sde snod gsum dang / mkhan po dang / slob dpon mi 'bul lo zhe'am/ bdag khyim par zung shig ce'am/ za ma dang / ma ning dang / dge slong ma sun phyung ba dang / pha ma dang / dgra bcom pa bsad pa dang / dge 'dun gyi dbyen byed pa dang /de bzhin gshegs pa la ngan sems kyis khrag phyung ba dang / mu stegs can dang / mu stegs can zhugs pa dang / rkun gnas pa dang / tha dad du gnas pa dang / mi gnas pa dang / tha ni 'di skad du bdag dang chos mthun pa tshangs pa mtshungs par spyod pa/khyod dang 'grogs mi dgos so zhes smra na/ bslab pa phul ba zhes bya'o/ /de ltar bslab pa phul ba yin yang / bslab pa nyams par byas pa ma yin no/ /ji ltar na bslab pa nyams par yang byas la/ bslab pa phul ba yin zhe na/ gong du smos pa gnyis dang ldan pa de ni/bslab pa nyams par yang byas la/ bslab pa phul ba yang yin no/ /ji ltar na bslab pa nyams par yang ma byas la/ bslab pa phul ba yang ma yin zhe na/ rnam pa 'di lta bu ma gtogs pa'o/ /mi tshangs par spyod ces bya ba ni gnyis kyis gnyis phrad pa'o//'khrig pa zhes bya ba ni gang mi tshangs par spyod pa de nyid 'khrig pa'o/ /chos zhes bya ba ni chos ma yin pa 'di chos kyi sgrar gsungs so/ /byas zhes bya ba ni spyad pa'o/ /tha na byol song gi skye gnas su song ba dang lhan cig ces bya ba ni phra mo'am de dang 'dra ba dag go zhes bya ba ni nye bar bstan pa'i tshig bla dgas so//dge slong ma zhes bya ba ni gsol ba dang bzhi'i las kyis bsnyen par rdzogs pa'o/ /phas pham pa zhes bya ba ni ltung ba tha ma 'di lta ste/ tha shal ngan pa mi cha ba'i nyes pa can mi mtshungs pa ste/ de lta bu'i gnas kyi ltung ba byung ma thag tu dge slong ma ma yin//shAkya'i sras mo ma yin/ dge slong ma'i dngos po dang bral ba zhes bya ba ni/ dge slong mar bslad du mi rung ngo zhes bya ba'i bar du ste/ des phas pham pa zhes gsungs so/ /gnas par mi bya'o zhes bya ba ni/ de dang dge slong ma dag gso sbyong dang / gsol ba'am/ gsol ba dang gnyis sam/ gsol ba dang bzhi'i las la mi gnas pa ste/ gang zag bcu gnyis su bsko ba la yang mi chud de/ de na gnas par mi bya'o zhes gsungs so/ /de la ltung ba ci lta bu zhe na/ dge slong ma rten pa la gzhol/ rten pa la bab/rten pa la bab pa'i sems kyis skyes pa dang / ma ning dang / mi ma yin pa dang / byol song yang rung ste/ gson po ma nyams pa'am/ gal te g.yogs pas g.yogs pa'am/ g.yogs pas ma g.yogs pa'am/ ma g.yogs pas ma g.yogs pa la yang rung ste/ mi tshangs par spyod na phas pham pa'i ltung bar 'gyur ro/ /gson po ji lta ba bzhin du shi ba la ma nyams pa yang de bzhin du sbyar ro/ /gal te 'di rnams gson po nyams pa'am/ shi ba nyams pa yang rung ste/ thams cad nyes pa sbom por 'gyur ro/ /dge slong nyal ba la dge slong mas mnan pa las gal te dge slong gi thog ma dang /bar dang tha mar yang ma tshor la shes nas kyang nyams su ma blangs na gang gnon pa de ma rung bar 'gyur ro/ /gal te dge slong gis gong ma gsum ltar tshol la/ shes nas kyang nyams su blangs na ni gnyi ga ma rung bar 'gyur ro//dge slong ji lta ba bzhin du dge tshul dang khyim pa la de bzhin no/ /dge slong pha dang / dge slong ma dang / dge tshul ni ma rung bar 'gyur ro/ /khyim pa dang / khyim pa mo'i bsod nams ma yin pa mang du 'phel lo/ dge slong mas dge slong chang gis myos par byas sam/yang na sngags dang sman dang rig pas de'i sems dkrugs sam/ yang na mthus bzung yang rung ste/ mnan pa las/ gal te dge slong gis thog ma dang bar dang tha mar yang tshor ba'am yang na thog ma dang bar ma'i tshe ma tshor ram/ yang na thog ma tshor la bar ma dang tha ma'i tshe mtshor ram yang na dang po dang tha ma mtshor la bar ma'i tshe tshor la shes kyang dga' bar ma bzung ba kun 'dra ste/gang gnon pa de ma rung bar 'gyur ro/ /mnan pa las gal te dge slong gis gsum char yang tshor la shes nas dga' bar bzung na/gnyi ga ma rung bar 'gyur ro/ /dge slong la ci lta ba dge tshul dang khyim pa yang de bzhin no/ /dge slong dang / dge slong ma dang / dge tshul la ni ma rung bar 'gyur ro/ /khyim pa dang khyim mi mo ni bsod nams ma yin pa mang du 'phel lo/ /yan lag drug dang ldan na pham pa ste/bdag gi lam gsum yang yin/ pha rol po yang ma nyams pho mtshan yang yin/ der yang bcug /reg kyang reg /dga' bar ma tshor ba'o/ /phas pham pa dang po rdzogs so// //de la ma byin pa dang zhes bya ba ni ston pa rgyal po'i khab na bzhugs so//de'i tshe na dge slong ma nor can ma gzhan gyis yongs su zin pa'i rtsi shing la sogs pa ma byin par blangs pas bram ze dang khyim bdag dag 'phya ste/ khyim bdag kyang de ltar byed na shAkya'i dge sbyong ma bram ze dang khyim pa rnams su khyad par ci yod/ dge sbyong mgo reg ma de dag la su zhig bsod snyoms sbyin par spro zhes mi snyan par 'dzer to//de ltar gyur pa snga ma bzhin du dge slong dag gis ston pa la gsol ba dang / ston pas nor can ma rnam grangs du mas smad nas nyan thos rnams la bslab pa'i gnas bcas pa'o/ /yang dge slong ma gang gzhan gyi grong na yod pa'am dgon pa na yod pa ma byin par rku ba'i grangs su gtogs pa blangs na/ji tsam ma byin par blangs pas/ rgyal po'am blon pos bzung nas gsod dam 'ching ngam bcug kyang rung / de la dge slong ma khyod ni rkun ma'o byis pa'o blun pa'o/ / rku ba'o zhes de skad zer na/ dge slong ma 'di ltar ma byin par len pa de yang phas pham pa yin gyi/ gnas par mi bya'o/ /yang dge slong ma zhes bya ba nor can ma ste gzhan yang de dang 'dra'o/ /gzhan dag gis zhes bya ba ni skyes pa dang / bud med dang ma ning rnams kyi'o/ / grong na yod pa zhes bya ba ni ra ba'i nang na'o/ /dgon pa na yod pa zhes bya ba ni ra ba'i phyi rol na'o/ /ma byin par len pa zhes bya ba ni de la skyes pa dang bud med dang / ma ning gis ma byin pa'o/ /rku ba'i grangs su gtogs zhes bya ba ni ma byin pa de rku ba'i grangs su gtogs pa'o/ / blang zhes bya ba ni len pa'o/ /ji tsam ma byin par blangs pa zhes bya ba ni ma sha lnga'am lnga las lhag pa'o/ /rgyal pos sam zhes bya ba ni 'di ltar rgyal rigs spyi bo nas dbang bskur ba ste rigs rnam pa bzhi las gang yang rung ste/ rgyal po rgyal thabs spyi bo nas dbang bskur ba'o/ /rgyal po'i blon po zhes bya ba ni dbang po chen po rgyal srid 'dzin pa dang bka' gros kyis 'tsho ba'o//gzung nas zhes bya ba ni zin pa'o/ /gsod pa zhes bya ba ni 'tsho ba dang phral ba'o/ /bcings pa zhes bya ba ni btson rar bcug pa'o/ /spyugs pa zhes bya ba ni yul spos pa'o/ /kye dge slong ma khyed rkun ma'o//byis pa'o blun po'o rku ba'o zhes bya ba ni gshe ba dang bcas pa'i tshig go/ /de la 'di skad ces kyang zer ro zhes bya ba smra ba'o/ /dge slong ma zhes bya ba ni gsol ba dang bzhi'i las kyis bsnyen par rdzogs pa'o/ /'di lta bur ma byin par len pa zhes bya ba ni gong ma dang 'dra'o//de yang zhes bya ba ni nye bar bstan pa'o/ /dge slong ma de yang phas pham pa yin gyi/ gnas par mi bya'o zhes bya ba ni gong ma bzhin du sbyar ro/ /yan lag drug dang ldan na phas pham par 'gyur te/ rku sems dang / ma byin par len pa dang / rin thang tshang ba dang /mis yongs su bzung ba dang / mir 'du shes pa dang / gnas nas gnas su spos pa'o/ /dge slong mas rnam pa gsum gyis gzhan dag gi yo byad dam pa zhig ma byin par blangs na phas pham pa'i ltung bar 'gyur ro/ /gsum gang zhe na bdag dang pho nya dang mngon sum du bcol bas so//bdag gis zhes bya ba ji lta bu zhe na/ bdag gis brkus pa dang / bdag gis thabs kyis brkus pa dang / bdag gis gnas nas gnas su spos pa'o/ /pho nya la yang gsum mo/ /gsum gang zhe na/ pho nyas brkus pa dang /pho nyas thabs kyis brkus pa dang / pho nyas gnas nas gnas su spos pa'o/ /mngon sum du bcol ba yang gsum mo/ /gsum gang zhe na mngon sum du rkur bcug pa dang / mngon sum du thabs kyis rkur bcug pa dang / mngon sum du gnas nas gnas su [(]sded [,]bsdad [)]du bcug na phas pham par 'gyur ro//phas pham pa gnyis pa'o// //mi gsod ces bya ba ni/ bcom ldan 'das mnyan du yod pa na bzhugs so/ /dge slong pa nad kyis btab nas nad g.yog bran can byed de/ sman pa la dpyad dris nas sman khyer te 'ongs kyi/de'i bar du kha zas ma za cig cis zer te song ngo / de'i 'og tu dge slong gzhan dag gis kha zas dang thug pa la sogs byin te 'grangs par zos so/ /bran can sman khyer te 'ongs nas sman zo zhig ces byas nas/ nga 'grangs zin gyi za mi nus so zhes zer nas nad g.yog gis smras pa/nad dang mi mthun pa'i zas zos pa pas ni dug 'thungs kyang sla'o zhes byas pa dang / de'i ched du dug rdog gu gcig 'chos nas shi'o/ /bran can gyis bsams pa bdag gis de skad smras pa'i phyir/ de shi bas bdag pham par ma gyur grang snyam te the tshom skyes pa dang /bcom ldan 'das kyis bka' stsal ba/ dge slong 'di la ni ltung ba med de phyin chad nad pa shi bar sems pa'i gtam byas na 'das pa dang bcas pa'i nyes byas su 'gyur ro/ /der yang bslab pa ma bcas so/ / bcom ldan 'das mnyan du yod pa na bzhugs so/ /de'i tshe dge slong mgo can nad kyis btab ste/ mchu can nad g.yog byed do/ /mgo can gyis bsams pa 'di ltar na zhing sdug bsngal bas ni tshul khrims ma nyams par shi na mtho ris su skye'o zhes bsams nas bdag ni shi mi nus na mchu can gyi tsha bo rngon pa gnyis gsod du gzhug go snyam nas/mchu can la smras pa khyod kyi tsha bo gnyis kyang nad g.yog byed du chug cig ces smras pa dang / tsha bo gnyis bkug nas mgo can gyis smras pa tsha bo nga sod cig dang lhar skye'o zhes zer ba dang /ral gris mgo bcad nas gos kyis g.yogs nas bzhag nas mchu can phyir 'ongs te mthong ba dang / bdag gis mtshon thogs pa gnyer bar ma gyur tam snyam ste/ the tshom skyes pa dang / bcom ldan 'das la gsol ba dang / bka' stsal pa dge slong 'di la ni ltung ba med de phyin chad nad g.yog blun po bzhag na 'das pa dang bcas pa'i nyes byas so//mnyan du yod pa na dge slong cig gis lhung bzed btsas khyer ba bkru na ci nyes zhes byas pa dang / bkru ba'i yo byad mi 'byor ro zhes zer ro//'o na lhung bzed med par spyod dam zhes dris pa dang / des smras pa gnas 'di zhes bya ba na dge slong ma gcig na ba tshabs che ba zhig yod kyi/ de shi na lhung bzed spyod do zhes smras pa dang / de lta bur gyur pa ston pa la gsol nas bka' stsal pa/ dge slong 'di la ltung ba med de/phyin chad ma rungs pa gdol bu'i sems bskyed na 'das pa dang bcas par 'gyur ro/ /chos gos kyi phyir bcas pa'i rgyud kyang lhung bzed dang 'dra'o// //mnyan du yod pa na tshong dpon zhig 'dug pa chung ma dang yongs su spyad pa las bu mo cig btsas so/ de'i chung ma dus las 'das pa dang / de'i chung ma zhig blangs pa las khye'u zhig btsas so/ /chung ma des bu mo la khu tshur dang thal mos rtag tu brdeg go/ /bu mo des bsam pa/ bdag srog dang bral bar gdon mi za bas rab tu 'byung ngo snyam nas/ dge slong ma'i gan du song ste rab tu byung bsnyen par rdzogs nas/des pha la chos bstan skyabs su btang ste/ bslab pa'i gnas su gzhag go/ /dus phyi zhig na pha nad kyis btab pa dang des smras pa/ pha khyod kyis sbyin pa ni byin bsod nams byas pas yul gzhan du song na lo legs pa dang 'dra/mtho ris ni ras lta bu/ thar pa ni yol ba lta bus chod de lus dang bral na skye'o zhes byas pa dang / phas bsams pa'o na ni nad kyis sdug bsngal bas myur du tshe 'phos na legs so snyam nas bran mo blun mo skyong ba mo la smras pa/ nga'i lus nang du dgra zhig zhugs na gal te de slar phyin na/ngas khyod la byams par bya'o zhes byas pa dang / des rkang pa nas mgrin pa'i bar du btsir bas ma bzod nas 'gul pa dang / ci thur btsir nas dus las 'das so/ /dge slong ma des bdag gi pha dus las 'das pa thos nas/ma yar mo mya ngan bsang snyam nas de'i thad du song ba dang / des rgyang nas 'ongs pa mthong ste/ des smras pa sdig can ma khyod sde snod gsum dang ldan na chos bshad pa gzhan med dam ci nyes na/ pha la yul gzhan du lo legs pa na lhar skye bar 'gyur ro zhes bya ba'i bar du de lta bur chos bshad pas pha bsad/nga yang tshur shog nga la sod cig ces smras pa dang / de bdag gis pha la 'chi bar sems bskyed par ma gyur grang snyam nas 'gyod pa skyes so/ /de ltar bur gyur pa dge slong ma dag gis dge slong pha la'o//de dag gis ston pa la gsol ba dang / bka' stsal pa dge slong ma 'di la ni ltung ba med de/ phyin chad nad pa la 'chi bar sems pa 'di lta bu'i chos bshad par ma byed cig byas na 'das pa dang bcas par 'gyur ro/ /mnyan du yod pa na bud med cig khyim thab dang bral nas skyes pa gzhan dang 'dus pas sems can dang ldan par gyur to//de la khyim thab kyis nga ni ring por mi thogs par 'ong ngo zhes yi ge spring ba de thos nas spangs par gyur te/ de la grong du nye bar 'gro ba'i dge slong ma zhig yod do/ /des de la 'phags ma bdag gis ci ltar bgyi zhes smras na des cang mi smra bar 'dug go/de la khyim mi mo ma zhig yod de des dge slong ma de la bdag gis phye ma zhig sbyar 'tshal te/ gal te khyod kyis ming du smos te/ khyim bdag gi bud med la byin cig ces smras pa dang / des nyams su blangs so//des de'i drung du song nas phyi ma 'di ni dge slong mas khyod la bskur gyis chu dron po las 'thungs shig bsgo nas des 'thungs so/ /de la mdza' mo grogs mo zhig yod pas khyod kyi rum na 'dug pa de ga re zhes smras pa dang / des zhib tu smras te rum na yod pa dum bu brgyar zhig go zhes smras pa dang /bram ze dang / khyim pa'i chung ma dag 'phya smad nas dge sbyong ma dag ni tshig pa'o/ /rum na yod pa yang blugs par byed do zhes mi snyan par brjod do/ /de ltar gyur pa dge slong dag gis ston pa la gsol pa dang /bka' stsal pa de lta bur byas pa bden nam/ btsun pa bdag gis rum na blugs par bgyis pa ni ma mchis kyi nyams su ni blangs so/ /de nas ston pas bka' stsal pa/ dge slong mas 'di 'dra ba'i gnas la nyams su ma len cig nyams su blangs na nyes pa sbom por 'gyur ro//sangs rgyas bcom ldan 'das yangs pa can gyi chu bo dga' skyed kyi 'gram thang shing gi nags stug po na bzhugs so/ /de'i tshe dge slong ma dag la mi gtsang ba sgoms shig par chos bshad pa dang / de na dge slong ma rnams kyang mi gtsang ba bsgoms pa las lus rnag can 'dis yid byung ngo //sgyid lug ste rnam par smod cing mtshon gyis 'debs dug kyang za srad bus kyang 'gags te dge slong ma dag gis dge slong ma gsod pas de'i tshe na dge slong ma rnams nyung zhing 'gribs par gyur to/ /de nas bcom ldan 'das kyis tshe dang ldan pa kun dga' bo la ci'i rgyu ci'i rkyen gyis dge slong ma'i dge 'dun 'di dag nyung bar gyur zhes smras pa dang /kun dga' bos ji ltar gyur pa gsol pa dang / ston pas gleng gzhi 'di dang / byung ba 'di'i phyir dge slong ma'i dge 'dun bsdus nas dge slong ma mang po la de ltar dge slong mas dge slong ma gsod pa bden nam zhes smras pa dang /btsun pa mad do zhes gsol nas rnam grangs du mas smad do/ /nyan thos ma'i dge 'dun rnams la bslab pa'i gnas bcas so/ /yang dge slong ma gang mi'am mir chags pa la ched du bsams nas/ lag dar te srog bcad dam/ de la mtshon byin nam/de la mtshon thogs pa gnyer tam/ de la 'chir bcug gam/ de la 'chi ba'i bsngags pa brjod kyang rung ste/ kye mi khyod sdig pa dang mi gtsang ba dang 'tsho ba ngan pa 'dis ci zhig bya/ kye mi khyod gson pa bas shi ba sla'o zhes de skad kyang zer la/ sems kyis 'dod pa dang sems kyis kun du brtags nas rnam grangs du mas 'chir bcug gam/'chi ba'i bsngags pa brjod pa las de yang thabs des 'chi ba'i dus byas na/ dge slong ma 'di phas pham pa yin gyi gnas par mi bya'o/ /yang dge slong ma gang zhes bya ba ni gang ma dang 'dra'o//mi'am zhes bya ba ni gang ma'i mngal du dbang po drug thob par gyur pa'o/ /mir chags pa zhes bya ba ni ma'i mngal du dbang po gsum thob pa ste/ lus dang 'tsho ba dang yid kyi dbang po'o/ /ched du bsams te zhes bya ba ni dpyad pa'o/ /lag dar te zhes bya ba ni lag gis bsnun pa'o//srog bcad pa zhes bya ba ni srog dang phral ba'o/ /mtshon byin zhes bya ba ni ral gri dang spu gri dang chu gri'o/ /mtshon thogs pa gnyer tam zhes bya ba ni bud med dang skyes pa dang ma ning ngo / /de la 'chir [(]gcug [,]bcug [)]ces bya ba ni rnam pa gsum ste/ tshul khrims ngan pa can dang / tshul khrims dang ldan pa dang /nad pa'o/ /ji ltar na tshul khrims ngan pa can la zhe na/ 'di ltar tshul khrims ngan pa can gyi dge slong ngam dge slong ma yang rung / de'i chos gos la sogs pa dge sbyong gi 'tsho ba'i yo byad 'dod nas de ji srid du 'tsho ba de srid du ngas mi thob kyis de 'chir gzhug go snyam nas de'i gan du song ste 'phags ma khyod tshul khrims ngan pa sdig pa'i chos can sgo gsum nas ngan du spyod dge sbyong ma yin par dge sbyong du 'che ba khyod ji tsam du ring du 'tsho ba de tsam du bsod nams ma yin pa mang du skyed pas lus dang bral na ngan song gsum du yun ring du skye'o zhes smras pa dang /des de la 'phags ma 'di ci ltar bya/tshur shog rang gis rang sod cig ces byas pa dang / des kyang rang gis kyang srog bcad na pham par 'gyur ro/ /gal te dge slong ma de 'gyod de/ de'i gan du song nas ngas gyi na don med pa ma brtags pa'i tshig gis smras so/ /btsun pa khyod tshul khrims ngan pa can gyis dge ba'i bshes gnyen 'ga' zhig rnyed na/des lus dang ngag dang yid yongs su ma dag par spyod pa las bzlog nas/ lus dang ngag dang yid yongs su dag par kun tu spyad pa la rab tu 'jug ste/ lus dang bral na mtho ris su skye'o zhes de skad smras pa dang / gal te des 'phags ma bdag gis ci zhig bya zhes smras pa dang /des de la khyod rang la ma gsod ces byas pa dang / gal te dge slong ma des rang la rang gis ma bsad na/ dge slong ma la sbyor ba snga ma nyid kyis nyes pa spom po'o/ /gal te dge slong ma des 'di skad zer mod kyis 'on kyang bdag rang la rang gis rang srog bcad na snga ma bzhin du nyes pa sbom pa'o//ji ltar na tshul khrims dang ldan pa la zhe na/ 'di ltar dge slong mas tshul khrims dang ldan pa'i dge slong la zhes bya ba nas 'chir gzhug go snyam nas zhes bya ba'i bar du snga ma bzhin no/ /de'i gan du song ste/ 'phags ma ni tshul khrims dang ldan pa dge ba'i chos can gtong ba phun sum tshogs pa ste/khyod yul gzhan du skyes na lo legs pa dang 'dra ste/ mtho ris ni ras lta bus chod thar pa ni yol ba lta bus chod de/ lus dang bral na ni lhar skye'o zhes pa dang sring mo bdag gis ci zhig bya zhes bya ba nas/nyes pa sbom po'i ltung bar 'gyur zhes bya ba'i bar du snga ma bzhin no/ /ji ltar na nad pa la zhe na nad pa sdug bsngal ba nad kyis gzir ba'i dge slong de la lhung bzed dam zhes bya ba nas/ de'i gan du song ste 'chir gzhug go snyam pa'i bar du snga ma bzhin no/ /de de'i gan du song ste 'phags ma ni nad bu can nad kyis sdug bsngal ba ser sna can 'jungs pa ste/khyod ji srid du yun ring du 'tsho ba de srid du sdug bsngal mi zad pa myong ngo zhes smras pa dang / gal te des sring mo bdag gis 'dir ci zhig bya zhes de skad smras pa dang / des de la 'phags ma tshur shog la rang gis rang sod ces pa nas/don med pa la ma brtags par smras so zhes pa'i bar du snga ma bzhin no/ /'phags ma dge ba'i bshes gnyen 'ga' zhig rnyed na/ des khyod la 'phrod pa'i sman gtong zhing ring po mi thogs par bde bar nad med par 'gyur ro zhes smras pa dang / des de la sring mo bdag gis 'dir ci zhig bya zhes de skad zer ba dang /des de la 'phags ma khyod rang gis rang la ma gsod ces pa nas spom por 'gyur zhes bya ba'i bar du snga ma bzhin no/ /de la 'chi ba'i bsngags pa brjod ces bya ba ni/ 'chi bar 'dod pa'i mdun du 'chi ba'i bsngags pa brjod pa'o//kye mi khyod ces bya ba ni dge slong mas 'bod pa'i tshig go/ /sdig pa dang mi gtsang ba dang 'tsho ba ngan pa 'dis ci zhig bya/ kye mi khyod gson pa bas shi ba sla'o zhes bya ba 'di dag ni smad pa'i tshig go/ /de la 'di skad ces zer zhes bya ba ni smra ba'o/ /sems kyi 'dod sems kyis kun tu brtags nas zhes bya ba ni ngan sems kyis mngon par 'dod pa'o//rnam grangs du mas de 'chir bcug gam zhes bya ba ni rnam grangs mang pos 'chir bcug pa'o/ /'chi ba'i bsngags pa brjod ces bya ba ni/ 'chi bar 'dod pa'i mdun du rnam grangs du mas 'chi ba'i bsngags pa brjod cing /snon te mi zlog par byed pa'i don to/ /de yang thabs des 'chi ba'i dus byas zhes bya ba ni/ me'am/ dug gam/ mtshon nam/ g.yang sa'am/ thag pas 'gogs pa 'am/ chur mchongs pa la sogs pa'o/ /dge slong ma zhes bya ba ni gsol ba dang bzhi'i las kyis bsnyen par rdzogs pa'o//des yang zhes bya ba ni nye bar bstan pa'o/ /phas pham pa zhes bya ba ni gong ma bzhin no/ /gnas par bya ba ma yin no zhes bya ba ni snga ma bzhin du sbyar ro/ /ltung ba gang zhe na/ zin pa'i lus su gtogs pa dang / phyi rol gyis kyang 'phangs pa dang /gnyis dang yang ldan pa'o/ /ji ltar na zin pa'i lus su gtogs pa zhe na/ dge slong mas mi rnam gsum la gsod sems kyis sor mo lngas bsnun te/ dus byas na pham mo/ /des de ma byas kyi de nas phyi zhig na gyur na yang pham mo/ /des de'i tshe yang ma yin te/phyis kyang ma yin na sbyor ba snga ma nyid kyis sbom po'o/ /sor mo gcig ji lta ba bzhin du lus kyi yan lag tha na rkang pa'i mthe bong bsnun te dus byas pa yang gong ma bzhin du sbyar ro/ /ji ltar na phyi rol gyis 'phangs pa zhe na/ dge slong mas mi rnam gsum la/ gsod sems kyis 'phangs te/dus byas pa yang mda' dang rdo dbyig la sogs pa thams cad 'dra'o/ /ci ltar na gnyi ga dang ldan pa yin zhe na/ dge slong mas mi rnam gsum la gsod sems kyis ral gri la sogs pas bsnun te/ /'di thabs 'dis 'chi ba'i dus byed par 'gyur ro snyam pa las de yang thabs des dus byas pa yang gong ma bzhin du sbyar ro//yan lag lngas pham par 'gyur te/ gzhan yin pa mir gyur pa gsod sems dang ldan pa de sbyor ba dus byas pa'o/ /phas pham pa gsum pa'o// //mi chos bla mar gyur smra zhes bya ba ni/ sangs rgyas bcom ldan 'das 'od mkhan gyi grong phyogs shing sha pa'i nang du bzhugs te/ de'i tshe na mu ge byung ste/ dge slong ma rnams kyang yangs pa can gyi nye 'khor na mdza' bo dag dang dbyar tshul du zhugs so/ /ston pa la bsnyen bkur byed pa'i phyir/ kun dga' bo ni 'od ma can de nyid du dbyar tshul du zhugs so//de'i tshe dge slong ma de dag gis 'di snyam du bsams so/ /da ltar gyi dus na mu ge byung bas sdug bsngal te/ bsod snyoms slong pas kyang rnyed par dka' ste/ khyim pa dag gis rang gi bu'i zas sbyar ba yang dka' na/ dge slong ma rnams la lta smos kyang ci dgos/bdag cag rnams ni grags pa chung la/ 'jig rten pa rnams ni yon tan la dga' bas ci nas bdag cag phan tshun yon tan brjod par bya'o snyam nas/ bram ze dang khyim bdag gi gan du song nas smras pa grong phyogs gang na 'di 'dra ba'i dge slong ma'i dge 'dun rnams 'khod pa de dag gis bram ze dang khyim bdag khyed kyis rnyed pa rab tu rnyed de/dge slong ma 'dis ni bsam gtan bzhi dang / 'du shes med min skye mched kyi bar du thob bo/ /dge slong ma 'dis tshad med pa bzhi dang / mngon par shes pa drug dang / dge sbyong gi 'bras bu bzhi thob pa'o//dge slong ma 'dis ni dgra bcom pa thob bo zhes bya ba dang / 'jig rten pa ni yon tan dag la dga' bas bdag gi bu la sbyin pa dang / sbyar bar mi sems so/ /de dag dbyar zla gsum 'das nas chos gos zin nas mnyan du yod par phyin to/ /de nas dge slong ma de dag gis 'phags ma khyed kyis dbyar gang du tshul du zhugs zhes dris pa dang /'phags ma dag bdag cag ni yul bri dza'i grong na'o/ /'o na bde ba la reg par spyod dam bsod snyoms kyis ma brel tam zhes smras pa dang / de dag gis bdag cag ni bde ba la reg par spyod cing bsod snyoms kyis kyang ma brel to//'o na rgyu gang rkyen gang gis brel par ma gyur 'jig rten pa ni yon tan la dga' ste/ bdag cag gcig gis gcig gi yon tan brjod pa'i phyir ro/ /ci bden nam 'on te brdzun du smras/ brdzun du'o/ /de ltar gyur pa dge slong rnams kyis ston pa la gsol nas/bka' stsal pa/ dge slong ma mang po la khyed kyis mi chos las bla mar gyur pa smras pa bden nam/ btsun pa mad do zhes gsol ba dang / rnam grangs du mas smad do/ /nyan thos ma rnams la 'dul ba la bslab pa'i gnas bcas so/ /yang dge slong ma gang mngon par mi shes shing yongs su mi shes la/med pa med bzhin du mi'i chos las bla mar gyur pa dang / mtha' dang 'phags pa'i bye brag thob pa dang / shes pa dang mthong ba dang / reg par spyod pa med la med bzhin du 'di shes so 'di mthong ngo zhes khas 'che ba las nyes pa byung ba tshangs par 'dod nas/de dus gzhan zhig na dris kyang rung ma dris kyang rung 'phags ma rnams bdag gis mi shes par shes so zhes smras/ ma mthong bar mthong ngo zhes smras te/ gsob gsog brdzun du smras so zhes de de skad kyang zer na dge slong ma de yang phas pham pa yin gyis lhan cig tu gnas par mi bya'o zhes de ltar bslab pa'i gnas bcas pa dang /dge slong ma mang zhig rnal 'byor la brtson pas zhi gnas kyi mtshan ma zhig la brten nas/ 'jig rten gyi lam yid la byed pas nyon mongs pa sel te/ 'dod chags la sogs pa mi spyod pas/de dag phan tshun 'phags ma bdag gis thob par bya/ nyon mongs pa 'dod chags la sogs pa mi spyod pa thob par bya ba ni bdag gis thob zin to/ /skye ba ni zad tshangs par spyad pa ni spyod bya ba ni byas srid pa gzhan mi shes te/ dgra bcom pa yang thob po zhes bya ba las de dag khyim pa mo dang /dge tshul ma dang / lhan cig gnas pa las nyon mongs pa skyes pa dang / de dag gcig la gcig smras pa/ bdag cag khyim pa mo dang / dge tshul ma dang lhan cig tu 'dres shing gnas pa'i tshe/ nyon mongs pa de dag slar skyes na ston pas ni med bzhin du mi'i chos las bla mar gyur pa smras na pham mo zhes gsungs na/bdag cag pham par ma gyur grang snyam pa dang / de lta bur gyur pa dge slong mas dge slong pha la smras pa dang / de dag gis ston pa la gsol nas/ bka' stsal pa snga ma ni bcas pa'o/ / 'di ni rjes su gnang bas na nyan thos ma rnams la 'dul ba'i gnas bca'o/ /yang dge slong ma gang mngon par mi shes shing yongs su mi shes pa med la med bzhin du mi'i chos las bla mar gyur pa dang / mtha' dang 'phags pa'i bye brag thob pa dang / shes pa dang mthong ba dang /reg par spyod pa med la med bzhin du 'di shes pa'o 'di mthong ngo zhes khas 'che ba las nyes pa byung ba tshangs par 'dod nas/ de dus gzhan zhig na dris kyang rung / ma dris kyang rung 'phags ma rnams bdag gis ni mi shes par shes so zhes smras so / /ma mthong bar mthong ngo zhes smras te gsob gsog brdzun du smras so zhes de skad zer na/mngon pa'i nga rgyal ma gtogs te/ dge slong ma de yang phas pham pa yin gyis lhan cig tu gnas par mi bya'o/ /mngon par mi shes pa ni 'jig rten gyi lam mi shes pa dang / rjes su mthun pa'i sgo nas mi shes pa dang /mi rtag pa la mi rtag par mi shes pa la sogs te/ mi rtag pa'i sgo nas mi shes pa'o/ /yongs su mi shes pa ni 'jig rten las 'das pa'i lam rnam par grol ba mi shes pa dang / rjes su mi mthun pa'i sgo nas mi shes pa ste/ mi rtag pa la rtag pa med par mi shes pa ni rjes su mi mthun pa'i sgo nas mi shes pa'o//mi'i chos zhes bya ba ni sgrib pa rnam pa lnga ste/ 'dod pa'i 'dod chags dang / gnod sems dang / gnyid dang rmugs pa dang / 'gyod pa dang g.yeng ba dang / the tshom mo/ /bla ma zhes bya ba ni 'dod pa'i khams las bla ma'i gzugs so//de'i bla ma ni gzugs med pa'i khams so/ /mtha' zhes bya ba ni mya ngan las 'das pa las mtha' zhes bya'o/ /'phags ma zhes bya ba ni dge slong gi 'bras bu bzhi'o/ /shes zhes bya ba ni ye shes bcu ste/ sdug bsngal la chos su ye shes dang / sdug bsngal rjes su shes pa'i ye shes te/de bzhin du bden pa bzhi la gcig cing gnyis gnyis mthong ba zhes bya ba ni brgyad de/ sdug bsngal la chos su shes pa'i bzod pa dang / sdug bsngal rjes su shes pa'i bzod pa dang / bden pa bzhi la de bzhin du gnyis gnyis te brgyad do/ /reg par spyod pa med la zhes bya ba ni/mngon sum du ma thob pa thob bo zhes zer ba'o/ /med bzhin du zhes bya ba ni bdag la dbang yod do/ /thob par bya ba ni sla ste/ thob par bya ba'am mi bya bar zad do zhes zer ba'o/ /'di shes zhes 'di mthong zhes bya ba ni lha la sogs pa'o/ /khas 'che zhes bya ba ni mi shes par shes so zhes zer ba dang /ma mthong bar mthong ngo zhes khas 'che ba'o/ /dus gzhan zhig na zhes bya ba ni dus phyi zhig na'o/ /dris kyang rung 'gyod pa skyes nas rang smra ba'o/ /'phags ma rnams bdag gis mi shes par shes so zhes smras/ ma mthong bar mthong ngo zhes smras te/gsob gsog ces bya ba ni yon tan med par kha zas dang grags pa med par smra ba'i phyir snod stong pa dang 'dra'o/ /brdzun zhes bya ba ni 'du shes sbas nas gzhan bslus pa'o/ /dge slong ma zhes bya ba ni dge slong ma'i dngos po yod pa'o/ /de yang zhes bya ba ni nye bar bstan pa'o//phas pham par gyur te mi'i chos la bla mar gyur pa dang / rang gi tshig dang / bdag gi phyir dang / gzhan gyi don go ba'o/ /de la ltung ba ji lta bu zhe na/ lha dang / klu dang / gnod sbyin dang / dri za dang / lto 'phye chen po dang / yi dags la sogs pa ma mthong ba mthong ngo zhes zer na spom por 'gyur ro//de bzhin du de dag gi sgra thos so zhes zer ba yang de bzhin du bshad par bya'o/ /lha la sogs pa nas dur khrod kyi sha za yan chad gong du smos pa rnams bdag la ltar 'ong ngo zhe'am bdag de dag ltar zhes pa dang / gong ma bzhin du sbyar ro/ /bdag gis 'phags pa'i 'bras bu thob po zhes zer ba na pham/ dge slong ma las de lta bu thob pa yang yod de zhes zer na bdag nyid ma smos na sbom por 'gyur te/ ltag 'og kun kyang de bzhin du bshad par bya'o/ /pham pa bzhi pa rdzogs so// // ri dgas dgra'i bu zhes bya ba ni/ sangs rgyas bcom ldan 'das mnyan du yod pa na bzhugs so/ /de'i tshe dge slong ma rnams ri dgas dgra'i bu sa ga'i khang pa na gnas shing 'khod do/ /de yang nyin gcig bzhin phyag 'tshal du 'ong ste gzugs bzang ba blta na sdug pa zhig ste/ gtsug dga' mos mthong ste chags par gyur pas na ba'i thabs su byas nas/ der 'ong ba sdod pa'i phyir gnas khang du zhugs nas nyal zhing 'dug go/ /sa ga dge slong mas der 'ongs pa dang thams cad bsod snyoms la dong ste/ khang skyong gcig pu 'dug pa la phyag byas te phyir byung ba dang /gtsug dga' mos bdag ni na'o zhes bos pa dang / des kyang bdag nad pa bltas nas 'gro'o snyam ste/ de'i gnas khang du song ste phyag byas na ji ltar na zhes dris pa dang / mos smras pa shin tu dka' ba zhig zhes smras so/ /de'i gsos ci'i phyir mi mdzad/ gtsug dga' mos smras pa/sman med do/ /sa gas rnyed par dka' ba'i sman de gang zhig lags/ gtsug dga' mos rnyed dka' ba yang ma yin te/ 'on kyang bdag cag lta bu la ni de lta bu rnyed par dka'o/ /sa gas smras pa bdag kyang dad pa can lags kyis khyod sos par gyur na bdag gis yan lag gi sha bcad de yang khyod la sbyin no zhes byas pa dang /gtsug dga' mos mi rigs pa bya bsgugs pa dang / des 'phags ma de skad ma gsungs zhes rna ba bkag ste phyir byung bar brtsams pa dang / gtsug dga' mos smras pa/ de ltar mi byed na tshur shog pa'i yan lag dang nying lag nyes shig/des de'i mgo bo dang yan lag dang nying lag mnyes pa dang / gtsug dga' mos dga' bar tshor ro/ /de dge slong ma rnams kyis mthong ba dang sa ga yang skyengs te/ spyi bo smad nas phyir byung ngo / /de ltar gyur pa dge slong ma rnams kyis dge slong la smras pa dang /de dag gis ston pa la gsol nas dge slong ma'i dge 'dun bsdus nas/ gtsug dga' mo la khyod kyis mi mdzes pa 'di 'dra ba byas pa bden nam zhes smras pa dang / btsun pa mad do zhes gsol nas rnam grangs du mas smad do/ /nyan thos ma rnams la bslab pa bcas so//yang dge slong ma gang chags par gyur la/ skyes pa chags par gyur pas pus mo yan chad mig man chad du mnams la kun tu mnams te/ dga' bar tshor na dge slong ma de yang phas pham pa yin gyis gnas par mi bya'o/ / yang dge slong ma gang zhes bya ba ni/ gtsug dga' mo ste gang de dang 'dra ba gzhan yang ngo / /chags par gyur zhes bya ba ni gang 'dod chags pa dang / kun du 'dod chags pa kun du dkris pa dang / 'dod chags pa'i 'dod chags kyis gzir ba ni chags pa zhes bya'o/ / skyes pa zhes bya ba ni mi'o/ /chags pa zhes bya ba ni gong ma dang 'dra'o/ /lhan cig ces bya ba ni phrad par byed pa'o/ /pus mo yan chad mig man chad ces bya ba ni gnas bstan pa'o/ /mnams kun du mnams zhes bya ba ni lus kyis lus phrad pa'o/ /dga' bar tshor zhes bya ba ni nyams su len par byed pa'o//'di zhes bya ba ni mngon par bstan pa'o/ /pham zhes bya ba nas gnas par mi bya zhes bya ba'i bar du snga ma bzhin no/ /de la nyes pa ji lta bu zhe na dge slong ma chags la skyes pa chags pa dang / dge slong ma chags la skyes pa ma chags pa dang / dge slong ma ma chags la skyes pa chags pa dang /dge slong ma ma chags la skyes pa ma chags pas lhan cig tu pus mo yan chad mig man chad kun du reg pa las dga' ba tshor na dang po gnyis ni pham par gyur/ gsum pa ni sbom por 'gyur ro/ /tha ma ni nyes byas so/ /nyes pa ni las dang po pa dang /smyos pa dang / sems 'khrugs pa dang / nad kyis gzir ba rnams la ltung ba med do/ /pus mo yan chad mig man chad kun du reg pa ni gong ma bzhin du bshad de/ khyad par ni snga ma gnyis ni sbom po'o/ /gsum pa ni nyes so/ /tha ma ni nyes med do/ /yan lag bzhis pham ste/reg pa de skyes pa yang yin de la yang reg mig man chad pus mo yan chad kyi gnas kyang yin reg pa bdag gis byas pa'o/ /phas pham pa lnga pa rdzogs so// //spos 'tshong khye'u zhes bya ba ni/ sangs rgyas bcom ldan 'das mnyan du yod pa na bzhugs so//de'i tshe na spos 'tshong gi khye'u zhig 'dug ste/ chung ma blangs nas ring po ma lon pa de sbom dga' mos mthong ma thag tu chags par gyur te/ khye'u de la khyod kyis chung ma blangs nas ji srid lon/ yid du 'ong ngam de yang khyed la dga' 'am/ khyod ci snyam byed ces dris pa dang /'phags ma bdag cag ni khyim pa khyed ni rab tu byung na de ltar dris te ci rung / sbom dga' mos ci khyod dang lhan cig tu ma 'ongs sam zhes smras te/ khyod dge slong ma'i dbyar mo khang du shog shig ces dus btab bo/ /des 'phags ma gzhan dag gis tshor bar 'gyur ro zhes byas pa dang sbom dga' mos khyod la dril gyi phreng ba btags sam zhes smras nas/sbom dga' mos bslus te nyi ma nub nas de'i gnas su 'ongs te khri'i 'og tu sbas te gzhag go/ /sbom dga' mos slob ma dag la chos bstan nas gnas khang du zhugs pa dang / des sbom dga' mo mthong nas langs pa dang mos de mthong nas rkun po zhugs so snyam nas 'jigs par gyur pa dang /des smras pa bdag yin te khyed kyis khri'i 'og tu sbas so/ /spos 'tshong gi khye'u chags pas sbom dga' mo bzung nas khri'i steng du mnan pa las spom dga' mos bsams pa bdag gis dge slong ma dag mnyes pa yang tshul khrims kyi mthu yin na tshul khrims zhig na kun gyis spangs par 'gyur ro snyam nas khye'u la thong shig ces byas pa dang //des kyang btang ba dang sbom dga' mos khye'u de'i brang du rdog pa gcig bsnun pa dang khrag skyugs so/ /sbom dga' mos myur zhing rings par byung ste/'phags ma rnams bdud bcom mo/ /pham par byas so zhes sgra phyung ba dang dge slong ma dag gis thos nas ci khyod kyis dgra bcom pa mngon du byas sam ma yin no zhes smras so/ /'o na khyod kyis ci byas dris pa dang / des ji lta bur gyur pa smras pa dang dge slong ma dag gis de mthong nas sdig pa can mi mdzes pa 'di lta bu byas na ded la rjes su yi rang bar byed du bcug go zhes 'phya'o//de ltar gyur pa ston pa la gsol nas dge slong ma'i dge 'dun bsdus pa'i gnas bcas so/ /yang dge slong ma gang chags par gyur la skyes pa chags par gyur pa dang lhan cig tu steg gam rtse'am/gad rgyangs byed dam tsum slad byed dam/ snyegs sam lus la 'tshog cing dus mal dang brda dang mtshan ma byas te/ skyes pa 'ong ba dang 'gro ba dga' ba tshor la gang skyes pa dang bud med dang mthun pa de lta bu'i phyogs su lus bkan te//dge slong mas dngos po brgyad kyis gnas de lta bu byas na dge slong ma de yang phas pham pa yin gyis lhan cig gnas par mi bya'o/ /yang dge slong ma gang zhes bya ba ni spom dga' mo ste/ de dang 'dra ba gzhan yang ngo / /chags pa zhes bya ba ni gong ma dang 'dra'o//skyes pa zhes bya ba ni spos 'tshong ba'i khye'u'am gang de dang 'dra ba gzhan yang ngo / /chags par gyur ces bya ba ni 'dod chags kyis kun du dkris pa'o/ /steg ces bya ba ni tsum sled byed pa'o/ /snyegs zhes bya ba ni rtse'o/ /lus la 'tshog ces bya ba ni gad rgyangs byed pa'o//dus mal zhes bya ba ni skyed mos tshal lam dpong sa'am/ lha khang che ge mo zhig ces bya ba'o/ /brda zhes bya ba ni snga dro'am nyi ma'i gung ngam phyi dro'o/ /mtshan ma zhes bya ba ni bdag skra bregs nas ring po ma lon pa'am/ /sbyar ma dmar ser ram/lhung bzed zha nyes glan pa'am mar ram/ 'bru mar ram/ bu ram gyis gang ba gang yang rung ste/ de lta bu mthong ba de na don grub bo snyam du shes par byos shig pa'o/ /skyes pa 'ong ngam 'gro bar tshor zhes bya ba ni nyams su myong ba'o/ /gang na skyes pa dang bud med mthun pa zhes bya ba ni dbang du 'gyur ba'o//de lta bu'i phyogs zhes bya ba ni gnas bsgyur du med pa'o/ /lus bkan zhes bya ba ni lus nyid do/ /dngos po brgyad kyis gnas 'di lta bu zhes bya ba ni gang gnas brgyad po bstan pa de dag go/ /yang zhes bya ba ni nye bar bstan pa'o/ / de la nyes pa ji lta bu yin zhe na/ dge slong ma chags par gyur la skyes pa chags par gyur pa dang / lhan cig tu steg pa dang / snyegs pa dang / lus la 'tshog pa dang / dus mal 'dor ba dang / brda dang mtshan ma dang / skyes pa 'ong ba'am 'gro ba na yang dga' bar tshor na sbom po re re ste bdun no//gang na skyes pa'am bud med mthun par gyur pa bsgyur du med pa'i phyogs der lus bkan na pham par 'gyur ro/ /yan lag brgyad kyis pham ste/ snyegs pa dang / lus la 'tshog pa dang / bstan pa kha brda byed pa/ mtshan ma byed pa/ skyes pa 'ong ba bdag gir byed pa/'byung mi nus pa'i gnas su lus bor ba'o/ /pham pa drug pa rdzogs so// //mdza' can ma zhes bya ba ni/ sangs rgyas bcom ldan 'das mnyan du yod pa na bzhugs so/ /nam dge slong ma grogs mos/ tshe dang ldan pa gyad bu nor bden pa ma yin pas skur te/bdag khas 'che ba las dge slong ma rnams kyis bskrad pa na babs te khyim par gnas shing 'dug go/ /de'i nu mo grogs mo can zhes bya bas dge slong ma 'khor dang bcas pa 'khod par mthong ba dang gal te bdag gi phu nu mo babs par ma gyur na de yang 'di lta bur 'khor dang bcas par 'gyur ba zhig ces smras pa dang /dge slong ma rnams kyis phu nu mo dge slong ma ma rung bar gyur pa de'i ming phyung ste ci bya zhes smras pa dang / des smras pa gyad bu nor la skur pa 'debs pa'i sdun logs su phas pham pa'i ltung ba byung ba kho mos shes so/ /'on kyang mnyen sdug pas na ma bzlas so zhes smras pa dang /dge slong ma dag gis kha na ma tho ba shes bzhin du 'chab bam zhes smras pa dang / des smras pa bdag ni dgra'i kha na ma tho ba yang mi zlos na gnyen pa rnams lta ci smos/ khyed de ltar byed du rung ngam mi rung yang sla ste/ bdag gis ni byas so/ /de ltar gyur pa dge slong ma dag gis gsol nas/bcom ldan 'das kyis nyan thos ma rnams la 'dul ba la bslab pa'i gnas bcas so/ /yang dge slong ma gang dge slong ma phas pham pa'i ltung ba byung bar snga nas shes la babs nas de nas shi 'phos sam/ shi'am/ ltung ngam/ /gzhan gyi yul 'khor ram/yul gzhan du bros par gyur pa de'i 'og tu 'phags ma dag bdag gis ni ci ltar dge slong ma de la phas pham pa'i ltung ba byung bar snga nas shes so zhes de skad zer na dge slong ma kha na ma tho ba 'chab pa'i gnas 'di lta bu rnam pa byed pa'i dge slong ma de yang phas pham pa yin gyi lhan cig gnas par mi bya'o//gang yang dge slong ma gang zhes bya ba ni grogs mo can nam gang de dang 'dra ba gzhan yang ngo / /shes so zhes bya ba ni bdag gis mthong ngam gzhan gyis de la smras par gyur pa'o/ /dge slong ma zhes bya ba ni chos 'di la gnas pa'o/ /phas pham pa zhes bya ba ni brgyad las gang yang rung ngo //bcabs zhes bya ba ni brnags pa'o/ /nam zhes bya ba ni dus phyi zhig na'o/ /dge slong ma zhes bya ba ni chos 'di la gnas pa'o/ /bral lam zhes bya ba ni chos dang 'dul ba 'di las so/ /shi'am zhes bya ba ni de'i tshe 'tsho ba'i dbang po 'gags par gyur pa'o//ltung ba zhes bya ba ni mu stegs can gyi bstan pa la gnas par gyur pa'o/ /bros zhes bya ba ni yul bor nas song bar gyur pa'o/ /de la dge slong ma rnams zhes bya ba ni chos 'di la gnas pa'i rnams la'o/ /'phags ma bdag gis ni snga nas shes so zhes bya ba ni bdag gis thams cad snga nas shes kyi khyod kyis ni phyis shes so zhes bsgo ba'i tshig go//ci ltar dge slong ma de la zhes bya ba ni grogs mo'o/ /phas pham zhes bya ba ni brgyad las gang yang rung ngo / /'di skad zer na zhes bya ba ni smra ba'o/ /kha na ma tho ba bcas pa zhes bya ba ni sdig pa rnams so//gnas 'di lta bu zhes bya ba ni rnam pa de lta bur gyur pa'o/ /phas pham pa zhes bya ba dang gnas par mi bya ba ni gong ma dang 'dra ba nas 'dir yang ma bshad do/ /nyes pa ji lta bu zhe na/ dge slong mas kha na ma tho ba de lta bu dge slong ma'i pham pa brgyad po de ci tsam du chung zad cig bcabs na pham par 'gyur ro//yan lag lngas pham ste pha rol dge slong ma yang yin/ pham pa yang byung / bdag gis kyang shes/ gzhan la yang ma smras/ bcab pa'i sems kyang yod pa'o/ /dge slong ma'i phas pham pa bdun pa rdzogs so// //gre las skyes zhes bya ba ni/ sangs rgyas bcom ldan 'das mnyan du yod pa na bzhugs so/ /de'i tshe tshe dang ldan pa gre las skyes mnyan du yod pa na 'dug ste/ de dge slong ma dang 'dres par gnas so/ /gal te gre las skyes kyi mdun du 'ga' zhig gis dge slong ma'i nyes pa brjod na de yang khro zhing ngan du sems nas/spyi bo smad nas 'dug ste/ mi dga' zhing dge slong gi dge 'dun la yang rtsod par byed do/ /gre las skyes la 'ga' zhig gis nyes pa brjod na dge slong ma dag kyang de bzhin du khro bar gyur pa nas dge slong ma'i dge 'dun rnams la yang rtsod par byed do//de ltar gyur pa dge slong ma dag gis gsol ba dang / gre las skyes spang ba'i las byos shig ces bka' stsal to/ /gang de dang 'dra ba gzhan yang ngo / /de yang 'di ltar bya ste/ dge 'dun thams cad 'dus pa dang glengs la dran par bya ste/dngos por bcas pa nyid khas len du chug la/ gsol ba dang bzhi'i las kyis spang ba'i las gyis shig ces bka' stsal te/ dge 'dun gyis gang la spang ba'i las byas par gyur pa de la dge slong ma dag gis gtam dang phyag ma byed cig /de mthong ma thag tu dge slong ma stan las lang bar bya ba ma gtogs so//de ltar gyur pa skye dgu'i bdag mo chen mos mthong nas dge slong ma dag gre las skyes la phyag bya bar mi 'os pa'i sdom pa gsol ba dang bzhi'i las kyis sdom pa byin cig ces smras nas/ dge slong gang la dge slong gi dge 'dun gyis spang ba'i las byas par gyur te/de la dge slong ma'i dge 'dun gyis kyang phyag mi bya ba'i sdom pa byin par gyur pa dang / de la dge slong ma dag gis gtam dang phyag ma byed cig mthong nas ldang ba ni ma gtogs so/ /de nas gre las skyes dge 'dun gyis spangs pa dang / dge slong ma'i gan du 'ongs nas gtam dang kun du gtam zer ba dang /lta bar mi byed stan las langs te 'khod do/ /gre las skyes kyis smras pa dge slong gang gi dge 'dun la bdag gis nyes pa byas pas na dge 'dun gyis spangs par ni rigs na/ dge slong ma rnams la bdag gis nyes pa ci byas na bdag la mi smra zhing phyag mi byed ces smras pa dang /skye dgu'i bdag mos gzhan la smra ba ltar bya ste/ sangs rgyas bcom ldan 'das ni bdag cag gi ston pa dge 'dun ni bdag cag gi rten te/ dge 'dun la nyes pa byed pa de bdag cag la yang nyes pa byed pa ste/ rigs dman pa las rab tu byung bas kyang ston pa mnyes par byed na/gre las skyes shAkya'i rigs las rab tu byung bas ci'i phyir mnyes par mi byed/ dge slong ma dag gis khyod la phyag mi bya ba'i sdom pa bcas kyis song la dge 'dun la bzod par gyis shig ces byas pa dang / des kyang bzod pa gsol du 'gro'o snyam du song ba las lam gyi bar du sbom dga' mos mthong ste 'phags pa phyag 'tshal lo gar bzhud ces smras pa dang /des kyang bzod par gsol du 'gro zhes byas pa dang sbom dga' mos smras pa/ 'phags pa shAkya'i rigs las rab tu byung na da ni rigs tha dad rus tha dad las rab tu byung ba rnams kyis rkang pa la 'dre ba mi bzang ngo //gre las skyes kyis smras pa sring mo dge 'dun gyis spangs pa'i las byas dge slong ma dag gis phyag mi bya ba'i sdom pa phyin na ci ltar bya/ sbom dga' mos smras pa de dag yul thams cad nas spangs par gyur cig /khyod dge 'dun la spu bsnyal zhing 'byung ba dang nyes pa 'dor bar ma gsol cig /bdag gis khyod la dge sbyong gi yo byad dang 'tsho ba'i longs spyod kyis bsnyen bkur bya zhes smras pa dang / gre las skyes kyang 'dug go/ /de ltar gyur pa snga ma bzhin du ston pa la gsol nas/ bka' stsal pa dge slong ma khyod kyis sbom dga' mo la tshig 'jam pos bsgo shig /dge slong ma dag gis de bzhin du bsgo na/ 'di nyid ni bden gyi gzhan ni gti mug go zhes nga rgyal bzung ste/ ma mnyan pa dang / de lta bur gyur pa ston pa la gsol nas/ bka' stsal pa/ dge slong ma khyod kyis sbom dga' mo la gsol ba dang bzhi'i las kyis bsgo shig de dang 'dra ba gzhan yang ngo //dge slong ma dag gis gsol ba dang bzhi'i las kyis bsgo na yang 'di nyid bden pa'o/ /gzhan ni gti mug go zhes te/ de nyid la mthu bskyed cing snyem zhing mngon du bzung ste spyad pa dang de lta bur gyur pa ston pa la gsol nas/ston pas sbom dga' mo la khyod spangs pa'i rjes su phyogs pa bden nam/ btsun pa mad do zhes gsol nas nyan thos ma rnams la bslab pa'i gnas bcas so/ /yang dge slong ma gang gis dge slong gang dge 'dun gyis spang pa'i las byas par gyur la/dge slong ma'i dge 'dun gyis kyang de la phyag bya bar mi 'os pa'i sdom pa phyin par dge slong de'i skra long long po rdud rdud por gyur/ spu snyol bar byed 'byung bar byed phyag 'tshal bar ston pa mtshams kyi nang du 'dug ste g.yo 'dor bar gsol ba 'debs par shes bzhin du de'i gan du song nas 'phags pa khyod skra long long rdud rdud por gyur te/dge 'dun la spu snyol bar ma byed cig /'byung bar ma byed cig /phyag 'tshal bar ma ston cig /mtshams kyi nang du 'dug ste g.yo 'dor bar gsol ba ma 'debs shig /'phags pa khyod la bdag gis lhung bzed dang chos gos dang lhung bzed kyi snod dra ba dang /phor bu dang / ska rags dang / ston pa dang / klog pa dang / kha ton bya ba dang / rnal 'byor dang / yid la bya bas bsnyen bkur bya'o/ /'phags pa la ci dang cis brel ba de dang des brel bar mi bya'o zhes de skad zer na dge slong ma de yang dge slong ma rnams kyis 'phags ma khyod kyis dge slong dang dge 'dun mthun pas spangs pa'i las byas par gyur/dge slong ma'i dge 'dun gyis kyang de la phyag bya bar mi 'os pa'i sdom pa byin par shes bzhin du dge slong de'i skra long long po dang / rdud rdud por gyur nas dge 'dun la spu snyol bar byed/'byung bar byed/ phyag 'tshal bar byed/ mtshams kyi nang du 'dug ste g.yo 'dor bar gsol ba 'debs pa 'phags ma khyod skra long long rdud rdud por gyur te/ dge 'dun la spu snyol bar ma byed cig /'byung bar ma byed/ phyag 'tshal bar ma ston cig /mtshams kyi nang du 'dug ste 'dor bar gsol ba ma 'debs shig /bdag gis 'phags pa khyod la lhung bzed dang / chos gos dang / lhung bzed kyi snod dra ba dang / phor bu dang / ska rags dang / bklag pa dang / kha ton bya ba dang / rnal 'byor dang / yid la bya bas bsnyen bkur bya'o//'phags pa la ci dang cis brel ba de dang des mi brel bar bya'o zhes de skad ma zer cig /'phags ma khyod spangs pa'i rjes su phyogs pa'i gnas 'di lta bu thong shig ces bsgo bar bya'o/ /dge slong ma de la dge slong ma rnams kyis de skad bsgo nas gal te dngos po de gtong ba lta na ni legs gal te mi gtong na dngos po de spong bar bya ba'i phyir lan gnyis lan gsum du yang dag par bsgo//yang dag par bstan nas dngos po de gtong na ni legs gal te mi gtong na dngos po de spang ba'i phyir lan gnyis lan gsum du yang dag par bsgo bar bya/ yang dag par bstan par bya lan gnyis lan gsum du yang dag par bsgo/ /yang dag par bstan nas dngos po de gtong na ni legs/ gal te mi gtong na dge slong ma spangs pa'i rjes su phyogs pa'i gnas de lta bu byed pa'i dge slong ma de yang phas pham pa yin gyis lhan cig tu gnas par mi bya'o//yang dge slong ma gang zhes bya ba ni sbom dga' mo ste/ de dang 'dra ba yang gzhan yang ngo / /dge slong gang la zhes bya ba ni gre las skyes la'o/ /dge slong gi dge 'dun zhes bya ba ni de bzhin gshegs pa'i nyan thos kyi dge 'dun gyis so/ /spang pa'i las byas par gyur zhes bya ba ni gsol ba dang bzhi'i las kyis so//dge slong ma'i dge 'dun zhes bya ba ni de bzhin gshegs pa'i nyan thos ma'i dge 'dun no/ /de la zhes bya ba ni dge slong gre las skyes la'o/ /phyag bya bar mi 'os pa'i sdom pa byin zhes bya ba ni gsol ba dang gnyis kyi las kyis so//skra long long po dang rdud rdud po zhes bya ba ni bag 'chums zhes byed pa dang / sems yang zhes byed pa'o/ /spu snyol bar byed ces bya ba ni rtsa bting ba bzhin du byed pa'o/ /'byung bar byed ces bya ba ni bcom ldan 'das kyi chos ni 'byung ba yin gyi mi 'byung ba ma yin par ston zhes bya ba ni tshig snyan pa dang phyag byed pa dang thal mo sbyar ba'o//mtshams kyi nang na 'dug ste g.yo 'dor bar gsol ba 'debs zhes bya ba ni mtshams kyi nang ni gang na mtshams bcad pa'i gnas so/ /sdig pa'i las ngan par spyod pa spong zhing phyin chad de lta bu mi byed par gsol ba 'debs pa ni g.yo 'dor bar gsol ba 'debs pa zhes bya'o//shes bzhin zhes bya ba ni bdag nyid kyis shes pa'am gzhan gyis de la bsgo bar gyur pa'o/ /'phags pa khyod ces bya ba ni zhe sa'i tshig go/ /skra long long po dang rdud rdud por gyur te dge 'dun la zhes bya ba ni de bzhin gshegs pa'i nyan thos kyi dge 'dun la'o//spu snyol bar ma byed cig /'byung bar ma byed cig /phyag 'tshal bar ma ston cig /mtshams kyi nang du 'dug ste g.yo 'dor bar gsol ba ma 'debs shig ces bya ba ni slar bzlog pa'o/ /'phags pa khyod la bdag gi lhung bzed dam zhes bya ba ni lcags sam sa'i lhung bzed sbyin no zhes zer ba'o//chos gos zhes bya ba ni bal la sogs pa rnam bdun las gang yang rung ngo / /dra ba zhes bya ba ni lhung bzed kyi snod do/ /phor bu zhes bya ba ni lhung bzed chung ngu'o/ /ska rag ces bya ba ni rgya cang ngam lcags pod dam lhas ma'o//ston pa zhes bya ba ni klog pa'i zur phyin pa'o/ /klog pa zhes bya ba ni klog pa nyid do/ /kha ton zhes bya ba ni 'don du 'jug pa'o/ /rnal 'byor zhes bya ba ni sems rtse gcig pa'o/ /yid la byed pa zhes bya ba ni zhi gnas dang lhag mthong ngo / /bsnyen bkur bya'o zhes bya ba ni stobs pa'o//ci dang cis brel bar ma gyur pa de dang des mi brel bar bya'o zhes bya ba ni yo byad thams cad kyis stobs pa'o/ /dge slong ma des zhes bya ba ni sbom dga' mo'o/ /dge slong ma rnams zhes bya ba ni chos 'di la zhugs pa'o/ /tshig 'jam po la sogs pas bsgo bar bya ba yang gong ma dang 'dra'o//de la nyes pa ji lta bu zhe na/ dge slong mas dge slong gang la la spang ba'i las byas pa de la yo byad kyis bsnyen bkur byed cing spangs pa'i rjes su phyogs na nyes byas so/ /tshig 'jam pos bsgo ba'i tshe mi gtong na sbom po gcig /gsol ba byed pa'i tshe mi gtong na sbom po gnyis/las dang po pa'i tshe mi gtong na sbom po gsum/ las gnyis pa'i tshe mi gtong na sbom po bzhi/ las gsum pa ma rdzogs par dngos po de gtong na legs/ gal te mi gtong na phas pham par 'gyur ro/ /yan lag brgyad dang ldan na phas pham par 'gyur te/spangs pa de dge slong yang yin/ dge 'dun rnams kyang de la phyag mi bya ba'i sdom pa yang bcas de yang 'du shes/ dge slong de dge 'dun la 'byung bar gsol zhing bzod pa gsol bar 'dod pa yang yin/ 'byung ba ma gsol cig ces kyang byas/ dge 'dun mas kyang de la de ltar ma byed cig ces bsgo/des dge 'dun gyis bka' yang bcag /las gsum rdzogs pa dang brgyad do/ /phas pham pa brgyad pa rdzogs so// //'phags ma dag bdag gis phas pham pa'i chos brgyad po dag bshad zin to zhes bya ba ni mjug bsdu zhing nyan pa'i 'khor rnams spro ba bskyed pa'o//dge slong mas nyes pa de dag las gang yang rung ba zhig byas na thog ma ji lta ba phyis kyang de bzhin phas pham pa yin te/ dge slong ma rnams dang lhan cig gnas shing spyod du mi dbang gis gnas par mi bya'o zhes bya ba la nyes pa de dag las gang yang rung ba zhes bya ba ni phas pham pa brgyad las gang yang rung ba zhig byas pa'o//thog ma ji lta bar phyis kyang de bzhin zhes bya ba ni phas pham pa brgyad las gang yang rung ba zhig byas na ji ltar sngon rab tu ma byung zhing bsnyen par ma rdzogs pa'i tshe khyim pa yin pa de bzhin du/nga yang sngon bzhin du khyim pa yin no zhes bstan pa'o/ /kha cig na re thog ma ji lta bar phyis kyang de bzhin zhes bya ba ni ji ltar ston pa 'jig rten na bzhugs pa'i tshe/ brgyad po de dag las gang yang rung ba zhig byas na phas pham par gsungs pa de de bzhin du ma 'ongs pa'i dus na byas pa rnams kyang de bzhin no zhes gsungs pa'i phyir de skad bstan pa yin no zhe'o//yongs su dag pa 'dri ba ni gleng gzhi'i skabs su bshad pa dang 'dra bas 'dir yang bshad pa ma byas so/ /ltung ba'i dngos po rnams bstan pa zhes bya ba la rnam pa lngar phye ba'i dang po ste/ phas pham pa'i sde bshad pa rnams rdzogs so// //da 'dir ni ltung ba'i dngos po rnams bstan pa zhes bya ba la rnam pa lngar phye ba'i rnam pa gnyis te/ dge 'dun lhag ma'i sde zhes bya ba bstan pa'i phyir/ dge slong ma'i dge 'dun lhag ma'i chos nyi shu ste/ mdor na/ smyan dang rtsa ba med pa dang / /gsum po bag tsam yod pa dang //bzhi po de ni chung zad yin/ /lnga po chags pa med pa ste/ /mtshan mo nyin par lam dag dang / /klung gi pha rol btang ba dang / /shi ba'i chags pa len pa dang / /dge slong ma yi bzod byed dang / /sangs rgyas chos dang dge 'dun dang / /dad pa zhe sdang 'jigs pa dang / / gnyis po 'dus pas sbyor ba dang / /de yi rjes su phyogs byed do/ /sangs rgyas bcom ldan 'das mnyan du yod pa na bzhugs so/ /de'i tshe bcu gnyis sde mo dag bud med la skyes pa'i tshig dang / skyes pa la bud med kyi tshig gis smyan byed par zhugs pa dang / bram ze dang / khyim bdag rnams kyis dge sbyong ma 'dis ni skyo mi shes te/bud med la skyes pa'i tshig gis smyan byed bram ze dang khyim bdag gi bud med kyang de ltar smyan byed na/ de dag bram ze dang khyim bdag gi bud med rnams dang khyad ci yod/ de dag la su zhig bsod snyoms sbyin par spro zhes smod cing mi snyen par 'dzer to//de lta bur gyur pa ston pa la gsol ba dang / bka' stsal pa/ bcu gnyis sde la khyod kyis smyan byas pa bden nam/ btsun pa med do zhes gsol nas/ rnam grangs du mas smad de/ nyan thos ma rnams kyi phyir 'dul ba la bslab pa'i gnas bcas so/ /yang dge slong ma gang bud med la skyes pa'i tshig dang /skyes pa la bud med kyi tshig gis chung ma'am mdza' na mor smyan byed na tha na skad cig pa de nyid kyang rung ste/ chos 'di ni thog ma nyid kyis ltung bar 'gyur la 'byung bar byas te dge 'dun gyi lhag ma'o/ /nges pa ni rnam pa gsum ste/ bdag po nges pa dang /dngos po nges pa dang / dus nges pa'o/ /de la bdag po nges pa ni gcig la gcig 'phrin skyel ba'o/ /dngos po nges pa ni skyes pa dang bud med do/ /dus nges pa na thi na skad cig phrad pa'o/ /dge slong ma gang zhes bya ba ni bcu gnyis sde ste/ de dang 'dra ba gzhan yang ngo //bud med la skyes pa'i tshig dang / skyes pa la bud med kyi tshig ces bya ba ni gcig la dus 'phrin skyel zhing dus 'debs pa'o/ /chung ma'am mdza' na mo zhes bya ba ni chung ma bdun dang mdza' na mo bcu'o/ /chung ma bdun gang zhe na 'di lta ste/ chu las byin pa dang / nor gyis nyos pa dang /rgyal mtshan gyis 'phrogs pa dang / dga' bas gnas pa dang / dgab pas gnas pa dang / mnyam du 'tsho ba dang / de'i skad cig pa'o/ /mdza' na mo bcu la pha dang ma dang / ming po dang / phu nu mo dang / sgyug mo dang / gyos po dang / gnyen dang rigs dang / rus kyis bsrungs pa dang / 'khrugs pa med pa can dang bcu'o/ /mas bsrungs pa'i mdza' na mo gang zhe na/ bud med gzhon nu ma gang khyim thab dus las 'das sam/ smyos sam/ sems 'khrugs sam/ dgra'i yul lam/ gzhan du bros par gyur nas de ma'i drung na gnas te/de la gzhan zhugs kyis dogs pa'i phyir bsrungs shin tu bsrungs sbas/ shin tu sbas pa'o/ /ming pos bsrungs pa'i bar du snga ma bzhin no/ /sgyug mo dang / gyos pos bsrungs pa ni pha ma dang khyim thab dus las 'das pa yang snga ma bzhin no/ /gnyen gyis bsrungs pa ni rabs bdun tshun chad kyi rigs su gnas pa ni gnyen no//de phan chad ni gnyen ma yin no/ /rigs kyis bsrungs pa ni rigs rnam pa bzhi'o/ /rus kyis bsrungs pa ni kau s+ya dang / bad s+ya dang / gau ta ma la sogs te/ pha ma dang / khyim thab dus 'das pa zhes bya ba ni snga ma bzhin no//'khrul pa med pa ni mu stegs can gyi dge sbyong ngam khyim thab gcig las gzhan mi tshol ba'am mu stegs kyi dge bsnyen yang rung ba'o/ /chos zhes bya ba chos ma yin pa de chos kyi sgrar gsungs so/ /thog ma nyid kyi ltung bar 'gyur zhes bya ba ni byas ma thag tu'o/ /dbyung bar bya ba ni 'byung bar byed pa'o//dge 'dun gyi lhag ma zhes bya ba ni dge 'dun gyi dbang du gyur dge 'dun la rag las dge 'dun gyi dbang bya ba ste/ ltung ba 'di la dge 'dun gyis dbyung bar 'gyur gyi gang zag ma yin zhing pas pham pa brgyad ni lhag ma ma lus/ 'di ni dge 'dun gyis gso ba'i lhag ma lus pa'i phyir dge 'dun gyi lhag ma'o//de la ltung ba gang zhe na bdag nyid kyis 'phrin blangs la bdag nyid kyis bzlugs pa/ bdag nyid kyis bskyal ba'am/ dge slong ma bdag nyid kyis 'phrin blangs/ 'phrin pa la bzlugs/ 'phrin pa la bskyal pa'am/ 'phrin pa 'ba' zhig las gong ma bzhin du byas pa dang /yang 'phrin gyi bar du lan gsum gyi tha mar lhag mar 'gyur ro/ /dbang yod pa las 'phrin blangs pa yang lan gsum gyi tha mar lhag mar 'gyur ro/ /dbang med pa la 'phrin blangs/ dbang med pa la bzlugs/ dbang yod pa la lan bskyal na nyes byas gnyis dang /sbom po gcig /dge slong mas dbang med pa la 'phrin blangs/ de la bzlugs de la lan bskyal na nyes byas gsum ste/ gzhan yang de bzhin du sbyar ro/ /chung ma dang po gsum 'thabs pa las bsdums pa la rnam pa bdun te/ 'thabs ma thag pa bsdums na nyes byas gcig /cung zad lon pa bsdums na nyes byas gnyis/ rtsa bcad pa la nyes byas gsum rdo bor ba la nyes byas gsum dang sbom po gcig /brtsad pa la nyes byas gsum dang sbom po gnyis/ chung ma ma yin pa zhes bsgrags pa la nyes byas gsum sbom po gsum lhag ma gcig /dril brdungs pa las bsdums na nyes byas gsum sbom po bzhi lhag ma gnyis/ chung ma bzhi dang mdza' na mo bcu ni 'thabs ma thag tu bsdums na lhag mar 'gyur ro/ /dge slong ma khyim pa'i der song ste/ bu mo 'di ci'i phyir bag mar mi gtong zhe'am/ khye'u 'di'i chung ma ci'i phyir mi blang zhe na/ khye'u 'di gyos sgyug gi khyim du ci'i phyir mi 'gro zhes byas rung / bu mo 'di khyim thab kyi khyim du ci'i phyir mi 'gro zhes dris na nyes byas su 'gyur/ yan lag bzhis lhag mar 'gyur te mi'i bud med dpyad bzod pa sngar ma 'dus pa 'dus par yang gyur pa'o//lhag ma dang po rdzogs so// //sangs rgyas bcom ldan 'das mnyan du yod pa na bzhugs so/ /de'i tshe sbom dga' mos 'thab pa dang / 'khrugs pa dang / rtsod pa'i tshe dge slong ma rnams la rtsa ba med par phas pham pa'i chos kyis skur par byed de/des na dge slong ma rnams bag 'chums pa dang spa gong par gyur pas klag pa dang kha ton dang yid la bya ba rnams nyams par gyur te mi dga' zhing 'khod do/ /de ltar gyur pa ston pa la gsol nas bslab pa'i gnas bcas so/ /yang dge slong ma gang zhe sdang can zhig khros nas gnod par byed de ji nas kyang 'di tshangs par spyod pa dang dbral lo snyam nas dge slong ma gtsang ma ma nyes pa la rtsa ba med par phas pham pa'i chos kyis skur pa las de dus gzhan zhig na dris kyang rung ma dris kyang rung rtsod pa de yang rtsa ba med par gyur la/dge slong ma yang zhe sdang la gnas pa zhig pas khros te smras so zhe na yang chos 'di gnyis kyis ltung bar gyur la 'byung bar bya ste/dge 'dun gyi lhag ma'o/ /yang dge slong ma zhes bya ba ni sbom dga' mo'o/ /zhe sdang zhes bya ba ni 'khrug pa'o/ /khros nas gnod par byed ces bya ba ni yi ma rangs te 'khrug pa ma btong ngo //ci nas kyang 'di tshangs par spyod pa dang dbral lo snyam zhes bya ba ni ci nas kyang 'di dge sbyong gi las 'bral par byed pa'o/ /dge slong ma gtsang ma zhes bya ba ni chos 'di la zhugs pa'o/ /nyes pa med ces bya ba ni ltung ba ma byung ba'o/ /rtsa ba med par zhes bya ba ni mthong ba dang thos pa dang dogs pa med pa'o//phas pham pa zhes bya ba ni brgyad po las gang yang rung ba'o/ /chos kyi zhes bya ba ni chos ma yin pa la chos kyi sgrar bsgrags so/ /skur pa zhes bya ba ni slang btang ba'o/ /dus gzhan zhig na zhes bya ba ni dus phyis zhig na'o//dris kyang rung zhes bya ba ni gzhan gyis so/ /ma dris kyang rung zhes bya ba ni bdag nyid 'gyod pa skyes nas rab tu 'gyod pa'o/ /rtsod pa de yang rtsa ba med par gyur zhes bya ba ni rtsod pa la rnam pa bzhi ste/ 'khrug pa'i rtsod pa dang / mi 'doms pa'i rtsod pa dang / ltung ba'i rtsod pa dang /bya ba'i rtsod pa'o/ /rtsa ba med ces bya ba ni gong ma bzhin no/ /dge slong ma yang zhe sdang la gnas zhes bya ba ni skur pa gdab par 'dod pa'o/ /khro zhes bya ba ni skur pa 'debs pa'o/ /chos 'di yang zhes bya ba ni gong ma bzhin no/ /thog ma nyid kyis ltung bar 'gyur la zhes bya ba ni ltung ba byung ma thag pas so//dbyung bar bya ba ni 'byung bar 'gyur ba'o/ /dge 'dun gyi lhag ma zhes bya ba ni gong ma bzhin no/ /de ltung ba gang zhe na/ dge slong ma gtsang ma la skur na rnam pa bcus ltung bar 'gyur ro/ /rnam pa lngas na ltung bar mi 'gyur ro/ /dge slong ma mi gtsang ba la skur na rnam pa bcu gcig gis ltung bar 'gyur ro//rnam pa drug gis ltung bar mi 'gyur ro/ /de la gtsang ma la skur na bcus nyes par 'gyur ba ni des ma mthong ma thos mi dogs par 'du shes sbas nas mthong thos dogs zhes zer ba dang / sngon thos pa dang dogs pa las brjed nas ngas thos nas ngas thos dogs te ma brjed do zhes zer ba dang /thos la yid ches pa dang / thos la yid ma ches par mthong ngo zhes zer ba dang / thos la dogs pa dang / thos la mi dogs par ngas mthong ngo zhes pa dang / dogs la dogs bzhin du ngas ma mthong ngo zhes zer ba rnam pa bcu gang ltar smras na yang rung ste/re re la yang lhag ma re rer 'gyur ro/ /rnam pa lngas na ltung bar mi 'gyur ba gang zhe na/ des ma mthong mi thos mi dogs la 'du shes ma sbas te/ ngas ma mthong ma thos mi dogs zhes zer ba dang / thos dogs pa la brjed nas 'du shes ma sbas te/ thos dogs de brjed do zhes zer ba ste de ltar na rnam pa lngas ltung ba med do/ /de bzhin du dge slong gtsang ma la mi gtsang ba'i tshul du snang ba la skur ba yang de bzhin du sbyar te/ dge slong ma mi gtsang ba la skur na bcu gcig gis nyes par 'gyur ba dang drug gis nyes par 'gyur ba yang gong ma bzhin du bshad de/skabs 'dir ni mthong ba las brjed nas ma brjed ces zer bas nyes par 'gyur ba dang / mthong ba las brjed nas brjed do zhes zer bas nyes pa med pa de gnyis kyis bsnan te/ bcu gcig dang drug tu bzhag ste/ ci'i phyir zhe na gtsang ma la ni mthong ba las brjed pa dang ma brjed pa med pa'i phyir ro//dge slong ma mi gtsang ba la skur na bcu gcig gis nyes par 'gyur ba dang drug gis nyes par mi 'gyur ba de bzhin du/ dge slong ma mi gtsang ba la gtsang ba'i tshul du snang ba la skur pa yang de bzhin du sbyar ro/ /dril brdungs pa dang ri mor bris pa dang bdag gis shes pa bzhin du kun gyis shes na nyes pa med do//yan lag bzhis lhag mar 'gyur te/ bral bar 'dod pa/ 'du shes sbas pa/ skur ba btab pa/ gzhan gyi don go ba'o/ /lhag ma gnyis pa rdzogs so// //sangs rgyas bcom ldan 'das mnyan du yod pa na bzhugs so//de'i tshe na sbom dga' mos bag tsam gyi cha las/ dge slong ma rnams la skur ba 'debs pa dang de lta bur gyur pa dge slong dag gis gsol ba dang / bcom ldan 'das kyis bslab pa'i gnas bcas so/ /yang dge slong ma gang zhe sdang can zhig khros nas gnod par byed de ci nas kyang tshangs par spyod pa dang dbral lo snyam nas/dge slong ma gtsang ma ma nyes pa la gzhan gyi cha ma yin pa phas pham pa'i chos kyis skur pa la dus gzhan zhig na dris kyang rung ma dris kyang rung rtsod pa de yang gzhan gyi cha ma yin par gyur la gzhan gyi cha ma yin pas rtsod pa de yang bag tsam gyi cha las chos 'ga' zhig blangs par zad la/dge slong ma yang zhe sdang la gnas pa zhig khros te smras so zhe na yang chos 'di yang thog ma nyid kyis ltung bar 'gyur la/ 'byung bar bya ste dge 'dun gyi lhag ma'o/ /gzhan ni gong ma dang 'dra/ gzhan gyi cha ma yin zhes bya ba ni dngos po gzhan la de las char blangs te gzhan la skur pa'o//yang gzhan zhes bya ba ni 'khor ba las gzhan pa ste/ 'khor ba dang mi mthun pa ni mya ngan las 'das pa ste mya ngan las 'das pa'i cha ma yin pa phas pham pa brgyad kyis skur pa'o/ / rtsod pa de yang gzhan gyi cha ma yin par gyur la zhes bya ba ni rtsod pa bzhi ste/ mi mthun pa'i phyir rtsod pa dang / lung bsgo ba med pa'i phyir rtsod pa dang / nyes pa'i phyir rtsod pa dang / bya ba'i phyir rtsod pa'o/ /gzhan gyi cha ma yin pas rtsod pa de yang bag tsam gyi cha las chos 'ga' zhig blangs par zad la zhes bya ba ni 'di lta ste/ri dgas pho dang ri dwags mo'o/ /yan lag ni gong ma dang 'dra ltung ba ji lta bu zhe na/ dge slong mas dge slong ma la phas pham pa'i ltung ba byung bar mthong na/ des de pham pa ma yin snyam du bsams pa las des 'du shes sbas nas dge slong ma la phas pham pa byung ba bdag gis mthong ngo zhe na lhag mar 'gyur ro//de bzhin du dge slong ma la phas pham pa byung ba las lhag ma yin no snyam du sems te/ phas pham pas skur ba dang / dge slong ma la phas pham pa byung ba ltung ba yin no snyam pa las pham pas skur pa dang / de bzhin du phas pham pa byung ba las so sor bshags pa yin no snyam du bsam kyang rung nyes byas yin no snyam du bsams kyang rung ste/ phas pham pas skur na lhag mar 'gyur ro/ /dge slong ma'i lhag ma gsum pa rdzogs so// //sangs rgyas bcom ldan 'das mnyan du yod pa na bzhugs so//mnyan du yod pa de na spos 'tshong pa'i khye'u gzugs bzang ba blta na sdug pa zhig 'dug ste/ gtsug dga' mos nyo zhing 'tshong ba'i rnam pa de la byed do/ /gtsug dga' mo spos 'tshong ba de la chags te/ khye'u des kyang rin nyung yang rdzas mang du ster ro//dge slong ma gang la nyo ba cung zad cig yod na de dag gtsug dga' mo la bcol te/ de yang cung zad cig bdag gir len to/ /de lta bur gyur pa ston pa la gsol nas rnam pa du mas smad nas bslab pa'i gnas bcas so/ /yang dge slong ma gang chags par gyur la skyes pa chags par ma gyur pa las cung zad cig blangs na/chos 'di yang thog ma nyid kyis ltung bar 'gyur la 'byung bar bya ste dge 'dun lhag ma'o/ /chags par gyur zhes bya ba ni chags pa'o/ /kun du dkris pa'o/ /cung zad ces bya ba ni cung zad pa'o//blangs zhes bya ba ni len pa'o/ /chos zhes bya ba ni chos ma yin pa la chos kyi sgrar gsungs so/ /thog ma nyid kyis ltung ba'o zhes bya ba ni ltung ba byung ma thag pa'o/ /nyes pa ji lta bu zhe na dge slong ma chags pas skyes pa chags pa las cung zad cig blangs na lhag mar 'gyur ro//dge slong ma chags la skyes pa ma chags pa dang / /dge slong ma ma chags la skyes pa chags pa las cung zad cig blangs na nyes pa sbom po'o/ /gnyi ga ma chags la cung zad cig blangs na nyes byas so/ /lhag ma bzhi pa rdzogs so// //sangs rgyas bcom ldan 'das mnyan du yod pa na bzhugs so//nam bcom ldan 'das kyis dge slong ma chags pas skyes pa chags pa la cung zad kyang ma lon par bslab pa'i gnas bcas pas na gtsug dga' mo phyis kyang der 'gro ste/ de la dge slong ma dag gis khyod gang nas 'ongs zhes dris na/des bdag cung zad cig gi phyir song ngo zhes smras so/ /dge slong ma dag gis 'o na ci ston pas bslab pa'i gnas ma bcas sam zhes de skad smras pa dang / sbom dga' mos gtsug dga' mo la/ kye khyod chags par ma gyur na cung zad cig blangs kyang sla'o zhes smras pa dang /de yang de bzhin du 'gro'o/ /de ltar gyur pa ston pa la gsol nas bslab pa'i gnas bcas so/ /yang dge slong ma gang dge slong ma zhig la/ kye khyod chags par ma gyur na chags pa med pas skyes pa chags par gyur pa las cung zhig blangs te khyod la sla'o zhes zer na chos 'di yang thog ma nyid kyis ltung bar 'gyur la dge 'dun lhag ma'o//yang dge slong ma gang zhes bya ba ni sbom dga' mo'o/ /dge slong ma la zhes bya ba ni chos 'di la zhugs pa'o/ /'di skad ces bya ba ni smra ba'o/ /kye khyod chags par ma gyur zhes bya ba ni ma chags pa'o//chags pa med pa zhes bya ba ni chags par ma gyur pa'o/ /skyes pa chags par gyur pa las cung zad cig blangs na skyes pa chags par gyur pa las so/ /cung zad cig blangs zhes bya ba ni dngos su zad do/ /khyod la sla'o zhes bya ba ni chags pa med pas sla'o//gzhan ni gong ma dang 'dra'o/ /nyes pa ji lta bu zhe na/ dge slong mas ji tsam du dge slong ma la/ kye khyod chags pa med na skyes pa chags pa las cung zad long shig ces zer na lhag mar 'gyur ro/ /lhag ma lnga pa rdzogs so// //sangs rgyas bcom ldan 'das rgyal po'i khab na bzhugs so//nam dge slong ma mdza' mos tshe dang ldan pa gyad bu nor la mi bden pas skur te dge slong ma rnams kyis bskrad pas/ /der song nas rang gi khyim na gnas pa las nad kyis btab bo/ /de la nu mo dge slong ma grogs mo can zhes bya ba zhig yod do/de 'chi ba'i 'khor de la phrad kyis myur du shog cig par spring ngo / /de yang song ste mdza' mo de'i nub mo dus las 'das so/ /grogs mo can yang de nyid du zhag lon no/ /mdza' mo'i khyim thab kyis mdza' bo zhig khyim du song ba de la des bus pa 'di dag sus bskyang bar bya zhes smras pa dang /des grogs mo can de nyid la tshol cig dang / bus pa rnams skyong bar byed do zhes smras pas mos thos nas 'di snyam du bsams so/ /gal te bdag gis tshig gi lan smras na ni tshangs par spyod pa las bral lo snyam nas cang mi smra bar 'dug go/ /nam langs nas grogs mo 'gro bar chas pa dang mdza' mo'i khyim thab [(]gyis [,]kyis [)]gar 'gro bus pa 'di dag sus bskyang zhes smras nas des de la bzung bar byas pa dang /grogs mo can gyis khyod bus pa dang bcas te me dong du lhung zhig smras te bros so/ /dge slong ma dag gis khyod mtshan gcig tu gang du nyal zhes dris pa dang /de bzhin du smras so/ /'o na khyod kyi grogs su yin zhes smras pa dang / grogs mo can gyis gang yang med do zhes smras pa dang / dge slong ma dag gis khyod ni stobs dang ldan pa 'ga' zhig gis zin na tshangs par spyod pa dang bral na ji ltar bya zhes smras pa dang /de ltar gyur pa snga ma bzhin du ston pa la gsol ba dang / nyan thos ma rnams la bslab pa'i tshig bcas so/ /yang dge slong ma gang gcig pu mtshan mo dbyar mo thad nas byung nas chos 'di yang thog ma nyid kyis ltung bar 'gyur la dbyung bar bya ste dge 'dun lhag ma'o/ / yang dge slong ma gang zhes bya ba ni grogs mo can no/ /gcig pu zhes bya ba ni zla med pa'o/ /dbyar mo thang nas byung zhes bya ba ni mtshan mo gzhan du skya rengs kyis chod pa'o/ /gzhan ni gong du bshad pa dang 'dra'o/ /de la nyes pa ji lta bu zhe na yang dge slong ma gang gcig pu dbyar mo thang gi phyi rol du skya rengs kyis non par byed na thams cad la'ang dge 'dun lhag ma'i ltung bar 'gyur ro//dge tshul ma dang lhan cig gzhan du skya rengs kyis non par byed na nyes pa sbom por 'gyur ro/ /dge slong ma dang gzhan du skya rengs kyis non par byed na nyes byas kyi ltung bar 'gyur ro/ /gal te phyi bzhin 'ong ba'i dge slong ma des smras sam/shi'am/ khrims ral lam/ nyams sam/ babs sam/ pha rol gyi 'khor tam/ yul gzhan du bros par gyur pa dang / bar chad brgyad po las bar chad gang yang rung ste byung bar gyur na nyes pa med do/ /lhag ma drug pa rdzogs so// //sangs rgyas bcom ldan 'das mnyan du yod pa na bzhugs so/ /de'i tshe na sbom dga' mos nyin par gcig pu song nas bram ze dang khyim bdag gi khyim du chos bshad do/ /de la dge slong ma dag gi si khyod gcig pu ma 'gro shig tshangs par spyad pa'i bar chad du gyur ta re zhes smras pa dang /sbom dga' mos ngas spos 'tshang gi khye'u rdog pas bsnun te/ gan ta log tu bor nas khrag skyugs su bcug pa ma mthong ngam zhes smras pa dang / de dag gis thams cad spos 'tshong gi khye'u mi 'dra'o zhes smras so/ /de ltar gyur pa snga ma bzhin du ston pa la gsol nas bslab pa'i gnas bcas so//yang dge slong ma gang gcig pu dbyar mo thang nas sod na chos 'di thog ma nyid kyis ltung bar 'gyur la/ 'byung bar bya ste/ dge 'dun lhag ma'o/ /yang dge slong ma gang zhes bya ba ni sbom dga' mo'o/ / gcig pu nyin mo zhes bya ba ni zla med pa'o/ /dbyar mo thang nas song na zhes bya ba ni gzhan du nyi ma nub par gyur pa'o/ /gzhan ni snga ma bzhin no/ /de la nyes pa ji lta bu zhe na/ dge slong mas ji tsam du dbyar mo thang nas gcig pu song la gzhan du nyi ma nub par gyur na thams cad la'ang lhag mar 'gyur ro//dge tshul ma dang lhan cig dbyar mo thang nas song ste/ gzhan du nyi ma nub na nyes pa sbom pa'o/ /dge slong ma dang lhan cig dbyar mo thang nas song ste/ gzhan du nyi ma nub na nyes byas so/ /gal te khrims zla dmas sam shi ba 'am/babs sam/ pha rol gyi 'khor tam/ yul gzhan du bros par gyur tam/ bar chad brgyad las gang yang rung ba zhig byung na nyes pa med do/ /las dang po pa la sogs pa la nyes pa med do/ /lhag ma bdun pa rdzogs so// //sangs rgyas bcom ldan 'das mnyan du yod pa na bzhugs so//sbom dga' mos rgyal po'i khab tu 'ong ba'i 'dron po mang po dang lhan cig tu chas te/ gcig pu grong khyer drug tu so sor 'dong ba'i 'dron po mang po dang lhan cig tu dang nas ngal chad de rim gyis slar dge slong ma'i dbyar mo thang du 'ongs so/ /de nas dge slong ma dag la lus mnyer bcug cing ngal sos par byed do//dge slong ma dag gis khyed gang nas 'ongs zhes dris pa dang / bdag grong khyer chen po drug gi lam bgrod de 'dir 'ongs so/ /dge slong ma dag gis smras pa khyod ni mthu dang ldan pa 'ga' zhig gis zin na tshangs par spyad pa'i bar chad du mi 'gyur ba'am/sbom dga' mos smras pa/ spos 'tshong gi khye'u khrag dron po skyugs pa ma thos sam zhes gong ma bzhin du smras pa dang / dge slong mas smras pa thams cad spos 'tshong gi khye'u 'dra bar 'gyur ram zhes byas pa dang / de ltar gyur pa ston pa la gsol nas bslab pa'i gnas bcas so/ /yang dge slong ma gang gcig pu lam du zhugs shing 'gro na chos 'di la thog ma nyid kyis ltung bar 'gyur la 'byung bar byas te/ dge 'dun gyi lhag ma'o/ /dge slong ma gcig pu zhes bya ba ni gong ma dang 'dra'o//lam zhes bya ba ni dgon pa'i lam mo/ /gzhan ni sngar bshad pa bzhin no/ /de la nyes pa ji lta bu zhe na/ dge slong ma ji tsam du gcig pu lam du zhugs shing song na lhag mar 'gyur ro/ /dge tshul ma dang dge slong ma dang lhan cig lam du zhugs te song na nyes pa'i khyad par ni gong ma bzhin no//dge slong ma gcig pu grong khyer gyi bar du ni rgyang grags gcig las 'das na lhag ma dgon pa yang de bzhin no/ /rgyang grags gcig tsam du phyin nas phyir ldog go snyam ste song ba las phyir ldog na sbom po'o/ /lhag ma brgyad pa rdzogs so// //sangs rgyas bcom ldan 'das mnyan du yod pa na bzhugs so//dge slong ma mang zhig ljongs rgyur dong ba las chu bo khyim ldan gyi 'gram du phyin pa dang gru pha rol du 'dug go/ /de nas dge slong ma nag mo zhes bya ba sngon mnyan pa mo yin te/ des bdag gis pha rol du brgal nus kyis song la gru pha gi tshur khrid de 'ong ngo zhes smras te gru phyir rkyal ba dang ngal nas shi la thug ste/dge slong ma dag gis nag mo ma 'jigs ma sdangs par skyol cig ces bos so/ /nag mo yang nyon mongs shing de'u ma brgal ba las pha rol gyi ngogs su phyin no/ /de ltar gyur pa ston pa la gsol nas bslab pa'i gnas bcas so//yang dge slong ma gang gcig pu klung gi pha rol du brgal na chos 'di yang thog ma nyid kyis ltung bar 'gyur la dbyung bar bya ba ste/ dge 'dun gyi lhag ma'o/ /yang dge slong ma gang zhes bya ba ni nag mo'o/ /gcig pu zhes bya ba ni zla med pa'o//klung gi pha rol brgal zhes bya ba ni rkyal ba'o/ /lhag ma zhes bya ba'i bar du ni snga ma bzhin no/ /de la nyes pa ji lta bu zhe na/ dge slong ma gcig pu klung gi pha rol du brgal tam rgyal te brgal na lhag ma'o/ /rtsang lag gi pha rol tu brgal na nyes byas so/ /dge tshul dang lhan cig 'grogs na sbom po'o//dge slong ma dang lhan cig 'grogs na nyes byas so/ /lhag ma dgu pa rdzogs so// //sangs rgyas bcom ldan 'das mnyan du yod pa na bzhugs so/ /de'i tshe rgyal po gsal rgyal gyi dmag dpon kan+ta shaka ti ka zhes bya ba dmag la 'dong ba'i 'og tu de dag gi chung ma skyes pa gzhan dag dang yongs su spyod do//de dag dmag las slar lhags nas thos pa dang de dag bcings nas lcag gis kyang gzhus so/ /de ltar byas kyang gtod du ma btub nas de dag gis bsams pa ri brags kyi grong rnams dbang du gyur na bdag cag gi chung ma dbang du ma khugs snyam nas rgyal po gsal rgyal gyi drung du dong nas lha mkhyen par mdzod cig/bdag gi bud med khrims las 'gal bar bgyid pas chad pas bcad pa'i khrims bcas so zhes gsol ba dang / rgyal pos kyang rjes su yi rang ngo //dus phyi zhig na dmag dpon me na zhes bya ba'i bu mo me ni ka zhes bya ba de khrims dang 'gal te/ de mang pos chad pa bcad/ khyim thab kyis ni yongs su btang / rgyal pos ni bsgo ba dang / des mang po la gsol nas 'phral du mi gsad cing zhag bdun nas bsad par gnang ba dang /de yang ngu zhing 'dug ste/ sbyin pa ni byin bsod nams ni byed do/ /sbom dga' mo bsod snyoms la song ste/ me ni ka'i khyim du phyin pa dang khyod ci'i phyir du zhes dris pa dang des kyang zhib tu smras so/ /sbom dga' mos 'o na ci'i phyir rab tu mi 'byung / des smras pa su zhig gis bdag rab tu 'byin sbom dga' mos ngas rab tu dbyung ngo zhes smras nas/de rab tu phyung ba dang / kan+ta shag ti kas thos nas de ltar mi gnang gis zhag bdun tshang ba dang bsad do zhes smras pa sbom dga' mos thos nas me ne ka khrid de btsun mo phreng ldan ma la gsol pa dang / des smras pa ci bud med zad dam de lta bu rab tu dbyung ba mi rigs mod kyi ngas rgyal po la gsol zhes byas nas de lta bur gyur pa rgyal po gsal rgyal la gsol pa dang / rgyal pos blon po la bsgo ba rab tu byung ba bsad na nga la mi snyan gyis ma bsad cig ces byas pa dang / kan+ta shaka ti ka 'phya ste de lta bu ci'i phyir rab tu 'byin zhes mi snyan par 'dzer to//de ltar gyur pa ston pa la gsol nas bslab pa'i gnas bcas so/ /yang dge slong ma gang gis bud med mang po mthun pas bcad cing khyim thab kyis yongs su btang la/ /rgyal pos kyang bsgo bar shes bzhin du rab tu phyung na chos 'di yang thog ma nyid kyis ltung bar 'gyur la dbyung bar bya ba ste dge 'dun lhag ma'o//yang dge slong ma gang zhes bya ba ni sgom dga' mo'o/ /bud med gang zhes bya ba ni me ne ka'o/ /mang pos mthun pas bcad ces bya ba ni rgyal rigs kan+ta shaka ti'i sde rnams kyis so/ /khyim thab [(]gyis [,]kyis [)]yongs su btang zhes bya ba ni khyos so//rgyal pos kyang bsgo zhes bya ba ni gros mthun par byas pa'o/ /shes bzhin du zhes bya ba ni bdag nyid kyis shes sam/ gzhan gyis bsgo bar gyur pa'o/ /rab tu byung na zhes bya ba ni legs par gsungs pa'i chos 'dul ba la'o/ /de la nyes pa ji lta bu zhe na/dge slong mas ci tsam du de dang 'dra ba yin par shes bzhin du rab tu phyung na yang thams cad la'ang dge 'dun lhag ma'i ltung bar 'gyur ro/ /lhag ma bcu pa rdzogs so// //mnyan du yod pa na khyim bdag phyug po zhig 'dug ste/ de nad kyis btab nas 'chi ba'i khar dge sbyong dang bram ze dang phongs pa rnams la sbyin pa ni byin/bsod nams ni byas so/ /sbom dga' mo yang bsod snyoms la song ste khyim bdag de'i khyim du 'ongs te khyim bdag nad med cig ji lta zhing 'dug bde bar 'tsho'am zhes smras pa dang / des kyang ji ltar gyur pa zhib tu smras so//sbom dga' mos smras pa khyim bdag khyed kyis sbyin pa byin pa rjes su yi rang na/ bud med kyi bus pa ni rnyed pa chung na/ bdag la skal ba byin par gyis shig ces smras pa dang / /nad pas smras pa/ thams cad btang lags so zhes smras pa dang / sbom dga' mos khyod kyi khyim nas ma rnyed par 'gro ba mi rigs so//khyim bdag de la bu lon gyi chags rgya tsam zhig yod de de sbom dga' mo la bstan te/ 'di las ma lus te bzhed na snoms shig/ des kyang chags rgya khyer ro/ /nad pas smras pa/ rigs kyi bu de dbul mod kyis brdzun mi mchi bas ci phul ba long la de snyon ma rmongs shig ces smras so//sbom dga' mos bdag cag ni sdom pa la gnas pas de ltar ga la byed ces smras nas/ /khyim bdag de dus 'das pa dang / sbom dga' mos rigs kyi bu de bzung nas nyon mongs pa dang khyim bdag dag 'phya ste/ ci'i phyir na dge slong mas shi ba'i nor dad par byed ces mi snyan par brjod do//de ltar gyur pa ston pa la gsol nas/ bslab pa'i gnas bcas so/ /yang dge slong ma gang shi ba'i nor chags pa 'das na chos 'di yang thog ma nyid kyis ltung bar 'gyur la dbyung bar bya ba ste dge 'dun lhag ma'o//dge slong ma gang zhes bya ba ni sbom dga' mo'o/ /shi kha'i nor chags pa bda' zhes bya ba ni bdag gis byas pa'o/ /de la nyes pa ji lta bu zhe na dge slong mas ji tsam du shi ba'i nor rab tu byung ba'am gnyen bshes la sogs pa gzhan gyis byin yang rung ste/ shi ba'i nor nyon mongs par byas te bdas na blangs ma thag tu lhag mar 'gyur ro/ /gal te dge 'dun gyi'am nyon ma mongs pa zhig tu khugs na nyes pa med do/ /lhag ma bcu gcig pa rdzogs so// //mnyan du yod pa na dge slong ma rnam par 'khyam pa zhes bya ba zhig yod de//kha ngan can khong khro ba mang du smra ba zhig ste/ des dge slong ma thams cad mi dga' bar byas so/ /de bsod snyoms la song ba'i 'og tu dge slong ma rnams de la ji lta bur gyur pa mi snyan par smra'o/ /rnam par 'khyam pa'i bu mo gtsug mo zhes bya ba zhig yod de/ des ma 'ongs pa dang thams cad bzlas te/de thos pa dang / dge slong ma rnams la tshig gdug pas shin tu gnod par byed do/ /dge slong ma dag gis ji ltar gtsug mos thos pa thams cad bzlas par shes na/ de dag gis gtsug mo spang ba'i las byas so/ /de yang ngu bzhin du ma la bdag la dge slong ma dag gis spang ba'i las byas so zhes smras pa dang mas thos nas khros te/de dag nyid yul 'di nas gzhan du spong bar shog shig ces smras te/ bu mo khrid nas mtshams kyi phyi rol du dbyung bar byas so/ /dge slong ma dag gis khyod kyi bu mo ded kyis spang ba'i las byas so zhes smras pa dang de khros nas 'di ngas phyung ngo //dge slong ma dag gis gang du ji ltar phyung / des smras pa mtshams kyi phyi rol du'o/ /dge slong ma dag gis mtshams kyi phyi rol du de ltar dbyung du rung ngam/ /des smras pa rung ngam mi rung yang sla ste ngas phyung ngo zhes smras pa dang de ltar gyur pa ston pa la gsol nas dge slong ma rnams la bslab pa'i gnas bcas so//yang dge slong ma dag gis dge slong ma gang la dge slong ma'i dge 'dun gyis spang ba'i las byas pa shes bzhin du de mtshams kyi phyi rol du song nas g.yo 'dor bar byas na chos 'di yang thog mar nyid kyis ltung bar 'gyur la dbyung bar bya ba ste dge 'dun gyi lhag ma'o//yang dge slong ma gang zhes bya ba ni rnam par 'khyam pa'o/ /dge slong ma gang la zhes bya ba ni gtsug dga' mo'o/ /dge slong ma'i dge 'dun zhes bya ba ni snga ma bzhin no/ /spang ba'i las zhes bya ba ni gsol ba dang bzhi'i las kyis so/ / shes bzhin zhes bya ba ni bdag gis shes sam gzhan gyis smras pa'o/ /mtshams kyi phyi rol du song nas g.yo 'dor bar byas zhes bya ba ni dge 'dun la bzod par gsol zhing nyes pa 'dor ba'o/ /gzhan ni snga ma bzhin no/ /nyes pa ji lta bu zhe na dge slong mas ji tsam du shes bzhin du mtshams kyi phyi rol du g.yo 'dor bar byas na dge 'dun gyi lhag mar 'gyur ro//lhag ma bcu gnyis pa rdzogs so// //ston pa mnyan du yod pa na bzhugs so/ /de'i tshe na sngon mu stegs byed las rab tu byung ba dge slong ma dus can zhes bya ba de/ dge slong ma dag dang 'thab cing rtsod par gyur te/ thab mo byung ba'i tshe sangs rgyas dang chos dang dge 'dun btang ngo / /'di lta ste shAkya'i dge sbyong nyi tshe tshul khrims dang ldan yon tan dang ldan par ma zad de/ /dge sbyong tshul khrims la sogs pa dang ldan pa gzhan dag kyang yod kyis de dag gi drung du tshangs par spyad pa spyad do zhes de skad zer ba dang / de ltar gyur pa ston pa la gsol nas bka' stsal pa dge slong ma khyod kyis tshig 'jam por bsgo shig/dge slong ma dag gis de bzhin du bsgo ba dang / de nyid bden gyi gzhan ni gti mug go zhes sdig pa'i lta ba mi gtong nas de ltar gyur pa ston pa la gsol nas gsol ba dang bzhi'i las kyis bsgo shig ces bka' stsal nas/dge slong ma dag gis de bzhin du bsgo ba dang snga ma bzhin du mnyan nas de ltar gyur pa ston pa la gsol nas snga ma bzhin du bslab pa'i gnas bcas so/ /yang dge slong ma gang rtsod par gyur 'thab par gyur/ mtshang 'bru bar gyur/ 'gyed par gyur/ sangs rgyas gtong ngo //chos gtong ngo / /dge 'dun gtong ngo / /'di lta ste/ shAkya'i sras dge sbyong rnams kyi nyi tshe'i tshul khrims dang ldan/ yon tan dang ldan pa des pa dge ba'i chos dang ldan pa'i dge sbyong du ma zad de/ dge sbyong tshul khrims dang ldan pa/ yon tan dang ldan pa/des pa dge ba'i chos dang ldan pa gzhan dag kyang yod kyis/ de dag gi drung na tshangs par spyad pa spyod do zhes de skad zer na dge slong ma de la dge slong ma rnams kyis 'phags ma khyod rtsod par gyur/ mtshang 'bru bar gyur/ 'thab par gyur/ 'gyed par gyur pa'i tshe/ sangs rgyas gtong ngo / /chos gtong ngo / /dge 'dun gtong ngo / /'di lta ste/ shAkya'i sras kyi dge sbyong rnams nyi tshe tshul khrims dang ldan pa/ yon tan dang ldan pa des pa dge ba'i chos dang ldan pa'i dge sbyong du ma zad de/ dge sbyong tshul khrims dang ldan pa/ yon tan dang ldan pa/ des pa dge ba'i chos dang ldan pa gzhan yang yod kyis/ de dag gi drung du tshangs par spyod pa spyad do zhes de skad ma zer cig/ 'phags ma khyod sdig pa la lta bar gyur pa 'di lta bu 'di thong shig ces bsgo bar bya'o/ /dge slong ma de la dge slong ma rnams kyis de skad bsgo nas gal te dngos po de gtong na ni legs gal te mi gtong na dngos po de spang bar bya ba'i phyir lan gnyis lan gsum du yang dag par bsgo bar bya yang dag par bstan par bya'o//lan gnyis lan gsum du yang dag par bsgo/ yang dag par bstan nas dngos po gtong na ni legs gal te ma btang na chos 'di ni lan gsum pa dbyung bar bya ste/dge 'dun gyi lhag ma'o/ /yang dge slong ma gang zhes bya ba ni dus can ma'o/ /sangs rgyas dang chos dang dge 'dun gtong ngo zhes bya ba ni rkang gnyis kyi nang na mchog dang / 'dod chags dang bral ba'i mchog dang / mang du 'dus pa'i nang na mchog go//'di lta ste/ shAkya'i dge sbyong nyi tshe tshul khrims dang dge ba'i chos dang ldan par ma zad do zhes bya ba'i bar du sdig pa las lta bar byed pa dang bslab pa nyams par byed pa'o/ /dge sbyong tshul khrims dang ldan pa yon tan dang ldan pa dge ba'i chos dang ldan pa gzhan yang yod do zhes bya ba ni 'di las phyi rol gyi dge sbyong dang bram ze rnams yod pa'i tha tshig go//de dag gi drung du tshangs par spyod pa spyad do zhes bya ba ni bslab pa 'bul bar mngon sum du ston pa'o/ /de skad zer zhes bya ba ni smra ba'o/ /dge slong ma de la zhes bya ba ni dus can no/ /dge slong ma rnams kyis de skad bsgo bar bya'o zhes bya ba ni tshig 'jam pos bsgo bar bya ste/sngar bsgo ba bzhin no/ /tshig 'jam pos bsgo ba las dngos po de gtong na ni legs zhes bya ba de ltar na bzang po'o/ /gal te mi gtong na gsol ba dang bzhi'i las kyis bsgo bar bya ste/ sngar bsgo ba bzhin no/ /gzhan ni snga ma bzhin no//nyes pa ji lta bu zhe na/ tshig 'jam pos bsgo ba'i tshe ma btang na nyes byas so/ /gsol ba byed pa'i tshe ma btang na sbom pa'o/ /las dang po'i tshe ma btang na sbom po gnyis/ las gnyis pa'i tshe ma btang na sbom po gsum/ las gsum pa ma rdzogs par dngos po de gtong na ni legs mi gtong na lhag mar 'gyur ro//chos ltar ma yin na 'dul ba ltar ma yin par bsgo ba dang / chos bzhin du byed la dge 'dun ma 'dus pa dang / /chos bzhin mi byed la dge 'dun 'dus pa dang / chos dang 'dul ba dang ston pas bstan pa bzhin du ma bsgo na ltung ba med do//chos dang 'dul ba bzhin du bsgo ba las ma btang na lhag ma'o/ /dge slong ma de stan la 'dug bzhin du 'phags ma dag bdag la lhag ma byung ngo zhes ma smras na bcabs par 'gyur te/ de ma bshags par gsol ba dang / gsol ba dang gnyis kyi las dang /gsol ba dang bzhi'i las myong bar gyur na thams cad du yang nyes byas so/ /lhag ma bcu gsum pa rdzogs so// //ston pa mnyan du yod pa na bzhugs so/ /de'i tshe na sbom dga' mo dge slong ma dag dang lhan cig tu 'thab cing rtsod pa dang mtshang 'bru bar gyur pa de la dge slong ma dag gis de ltar ma byed cig par bsgo na/de 'di skad du 'di na dge slong ma kha cig ni 'dod pa dang zhe sdang dang gti mug dang 'jigs pas 'gro'o/ /'di ltar dge slong ma kha cig ni rtsod pa las bzlog/ kha cig ni ma bzlog go zhes zer ba dang / de ltar gyur pa ston pa la gsol nas bka' stsal pa/dge slong ma khyed kyis sbom dga' mo la tshig 'jam pos bsgo zhig ces bya ba nas gsol ba dang bzhi'i las kyis bsgo shig ces bya ba'i bar du snga ma bzhin no/ /de ltar gyur pa ston pa la gsol nas bslab pa'i gnas bcas so//yang dge slong ma gang dge slong ma rnams dang rtsod par gyur/ mtshang 'bru bar gyur/ 'thab par gyur/ 'gyed par gyur cing 'dug pa la dge slong ma rnams kyis 'phags ma ma rtsod cig/ mtshang ma 'bru zhig/ ma 'thab cig/ ma 'gyed cig ces bsgo ste bzlog na 'di skad ces 'di na dge slong ma kha cig ni 'dod pas 'gro'o//zhe sdang gis 'gro'o/ /gti mug gis 'gro'o/ /'jigs pas 'gro'o/ /'di ltar dge slong ma kha cig ni rtsod pa las bzlog kha cig ni ma bzlog go zhes de skad zer na dge slong ma de la/ dge slong ma rnams kyis 'phags ma khyod ma rtsod cig/mtshang ma 'bru zhig/ ma 'thab cig/ ma 'gyed cig ces dge slong ma rnams kyis bsgo na/ 'di na dge slong ma kha cig ni 'dod pas 'gro/ /zhe sdang gis 'gro/ /gti mug gis 'gro/ /'jigs pas 'gro ste/ 'di ltar dge slong ma kha cig ni rtsod pa las bzlog /kha cig ni ma bzlog go zhes de skad ma zer cig /'phags ma khyod 'dod pas 'gro'o zhes bya ba'i tshig gi lam dang / zhe sdang gis 'gro/ /gti mug gis 'gro/ /'jigs pas 'gro'o zhes bya ba'i tshig gi lam de lta bu 'di thong shig ces bsgo bar bya'o/ / dge slong ma de la dge slong ma rnams kyis de skad bsgo ba las gal te dngos po de gtong na ni legs gal te mi gtong na dngos po de spang bar bya ba'i phyir lan gnyis lan gsum du yang dag par bsgo bar bya yang dag par bstan par bya'o/ /lan gnyis lan gsum du yang dag par bsgo/ yang dag par bstan pa las dngos po de gtong na ni legs/gal te mi gtong na chos 'di yang lan gsum du dbyung bar bya ste dge 'dun gyi lhag ma'o/ /yang dge slong ma gang zhes bya ba ni sbom dga' mo'o/ /dge slong ma rnams zhes bya ba ni chos 'di la zhugs pa'o/ /ma rtsod cig ma 'thab cig ces bya ba ni de las bzlog pa'o//'di na dge slong ma kha cig ni 'dod pas 'gro'o zhes bya ba ni 'dod pas so/ /zhe sdang gis 'gro'o zhes bya ba ni zhe sdang gis so zhes smra ba'o/ /gti mug gis 'gro'o zhes bya ba ni gti mug go zhes smra'o/ /'jigs pas 'gro'o zhes bya ba ni 'jigs so zhes smra ba'o//'di skad zer zhes bya ba ni smra ba'o/ /dge slong ma de la zhes bya ba ni sbom dga' mo'o/ /dge slong ma rnams kyis zhes bya ba ni chos 'di la zhugs pa'o/ /'di skad bsgo bar bya'o zhes bya ba ni tshig 'jam pos bsgo bar bya ste snga ma bzhin no/ /tshig 'jam pos bsgo ba las dngos po de gtong ba lta na ni legs/gal te mi gtong na gsol ba dang bzhi'i las kyis bsgo bar bya'o/ /de las nyes pa ji lta bu zhe na dge slong ma la tshig 'jam pos bsgo ba'i tshe ma btang na nyes byas so/ /gzhan ni thams cad gong du bshad pa bzhin no/ /lhag ma bcu bzhi pa rdzogs so// //ston pa mnyan du yod pa na bzhugs so/ /de'i tshe na dge slong ma riSh+Ta dang u pa riSh+Ta 'dus shing 'khod pa las 'phyar snyegs lus la rdeg par byed nas/ de dag la dge slong ma dag gis de ltar ma byed par so so na 'khod par gyis shig/ 'on kyang dge ba'i chos 'phel bar 'gyur gyis 'grib bar mi 'gyur ro zhes bsgo na yang /nyan du mi btub pas de ltar gyur par ston pa la gsol nas bka' stsal pa/ dge slong ma khyod kyis dge slong ma 'di gnyis la tshig 'jam pos bsgo shig ces bka' stsal to/ /dge slong ma dag gis de ltar bsgo na nyan du ma btub pa dang /gsol ba dang bzhi'i las kyis bsgo shig ces pa nas bslab pa'i gnas bcas pa'i bar du snga ma bzhin no/ /yang dge slong ma gang 'dus shing 'khod pas 'phyar snyegs lus la rdeg par byed na/ dge slong ma de dag la dge slong ma rnams kyis phu nu mo dag khyed 'du zhing ma 'khod cig/khyed 'du zhing 'khod pas dge ba'i chos rnams 'bri bar 'gyur gyis 'phel bar mi 'gyur bar shes par bya'o/ /phu nu mo khyed so so ma 'khod cig/ khyed cag so so na 'khod dang dge ba'i chos rnam par 'phel bar 'gyur gyi 'bri bar mi 'gyur bar shes par bya'o zhes bsgo shig/dge slong ma de dag la dge slong ma rnams kyis de skad bsgo nas gal te dngos po de gtong na ni legs/ gal te mi gtong na dngos po de spang bar bya ba'i phyir lan gnyis lan gsum du yang dag par bsgo bar bya yang dag par bstan par bya'o//lan gnyis lan gsum du yang dag par bsgo/ yang dag par bstan nas/ dngos po de gtong na ni legs gal te mi gtong na chos 'di yang lan gsum pa dbyung bar bya ste dge 'dun gyi lhag ma'o/ /dge slong ma gang zhes bya ba ni riSh+Ta dang / u pa riSh+Ta'o/ /'du zhing 'khod ces bya ba ni gcig tu 'dus pa'o//'phyar snyegs lus la rdeg ces bya ba ni rdeg pa'o/ /snyegs zhes bya ba ni rtsed mo byed pa'o/ /lus la rdeg pa ni gad mo 'don pa'o/ /dge slong ma de dag ces bya ba ni riSh+Ta dang / u pa riSh+Ta'o/ /dge slong ma rnams zhes bya ba ni chos 'di la zhugs pa'o//de skad bsgo bar bya zhes bya ba ni tshig 'jam pos so/ /gzhan ni gong du bshad pa bzhin te ltung ba'i khyad par nyes byas gcig dang sbom po gsum dang lhag ma gcig byung ba yang gong ma dang 'dra'o/ /chos bzhin du las ma byas na lhag mar mi 'gyur ba dang / stan las ma langs par bdag la lhag ma byung ngo zhes ma smras na bcabs pa'i nyes par 'gyur ba yang snga ma bzhin du bshad de//'og nas 'byung ba rnams kyang thams cad de bzhin du bshad par rig par bya'o/ /lhag ma bco lnga pa rdzogs so// //ston pa mnyan du yod pa na bzhugs so// /nam dge slong ma a riSh+Ta dang u pa riSh+Ta 'du zhing 'khod pa las/gsol ba dang bzhi'i las kyis bsgo nas so so nas 'khod par gyur pa dang / sbom dga' mo de gnyis kyi gan du song ste phyin nas 'di skad smras te/ khyod ci'i phyir na so so na 'khod tshur shog /khyed 'dus te 'khod na dge ba'i chos 'phel bar 'gyur gyi 'grib par mi 'gyur ro smras pa dang /de ltar gyur pa ston pa la gsol nas tshig 'jam pos bsgo shig ces byas nas bslab pa'i gnas bcas pa'i bar du snga ma bzhin no/ /yang dge slong ma gang dge slong ma dag so so nas 'khod par shes la/ so so na 'khod pa de dag gi gan du song nas phu nu mo khyed cag so sor ma gnas shig/khyed so sor gnas pas dge ba'i chos rnam par 'phel bar mi 'gyur gyis 'grib par 'gyur bar shes par bya'o/ /phu nu mo khyed 'dus te 'khod cig khyed 'dus te 'khod pa dang / dge ba'i chos rnams 'phel bar 'gyur gyi mi 'bri bar shes par bya'o zhes de skad zer na dge slong ma de la dge slong ma rnams kyis 'phags ma khyed dge slong ma gang de dag so so na gnas par shes la/so so na gnas pa de dag gi gan du song nas phu nu mo khyed so sor ma gnas shig/ khyed so so na 'khod pas dge ba'i chos rnams 'phel bar mi 'gyur gyi 'bri bar 'gyur bar shes par bya'o//khyed cag 'dus te 'khod cig 'dus te 'khod dang dge ba'i chos rnams 'phel bar 'gyur gyi 'bri bar mi 'gyur bar shes par bya'o zhes de skad ma zer cig/ /'phags ma khyod dngos po 'di lta bu thong shig ces de skad bsgo bar bya'o//dge slong ma de la dge slong ma rnams kyis de skad bsgo nas/ gal te dngos po de gtong na ni legs/ gal te mi gtong na ni dngos po spang bar bya ba'i phyir lan gnyis lan gsum du yang dag par bsgo bar bya yang dag par bstan par bya'o/ /lan gnyis lan gsum du yang dag par bsgo yang dag par bstan nas dngos po de btang na ni legs gal te mi gtong na chos 'di la lan gsum pas dbyung bar bya ste dge 'dun gyi lhag ma'o//yang dge slong ma gang zhes bya ba ni sbom dga' mo'o/ /dge slong ma gang dag so so nas 'khod ces bya ba ni tha dad du gnas pa'o/shes la zhes bya ba ni bdag nyid kyis shes pa'am gzhan gyis bstan pa'o/ /de dag gi gan du song zhes bya ba ni de'i drung du song ba'o/ /so so na ma gnas zhes bya ba ni tha dad du ma 'dug cig pa'o/ /khyed so sor gnas pas dge ba'i chos rnams 'phel bar mi 'gyur gyi 'bri bar 'gyur bar shes par bya'o zhes bya ni dge ba'i chos skye bar mi 'gyur ba'o//khyed 'dus te 'khod cig ces bya ba ni gnas gcig tu 'dus shig pa'o/ /dge ba'i chos 'phel bar 'gyur gyi mi 'bri bar shes par bya'o zhes bya ba ni skye bar 'gyur ba'i don no/ /'di skad zer zhes bya ba ni smra ba'o//dge slong ma de la zhes bya ba ni sbom dga' mo'o/ /dge slong ma rnams kyis zhes bya ba ni chos 'di la zhugs pa'o/ /'di skad bsgo zhes bya ba ni tshig 'jam pos so/ /gzhan ni gong ma dang 'dra'o/ /lhag ma bcu drug pa rdzogs so// //ston pa rgyal po'i khab na bzhugs so//de'i tshe na nyan thos chen mo gau ta ma ri de ma dang / ut+pala'i kha dog dang skye dgu'i bdag mo chen mo la sogs pa dbyar rgyal po'i khab tu tshul du bzhugs so/ /de'i tshe na mu ge byung ste/ bsod snyoms slong bas rnyed dka' ba ni mi ngan bzhin no/ /de'i tshe na sbom dga' mo dge slong ma rnams dang 'thab cing rtsod par gyur cing 'dug go//sbom dga' mos/ dga' mo dang / nye dga' mo dang / gtsug dga' mo dag la smras pa/ dga' mo nye dga' mo tshur shog dge slong ma'i dge 'dun dbye'o/ /'khor lo yang dbye bar bya'o zhes smras pa dang /sbom dga' mo ston pa'i nyan thos ma rnams ni rdzu 'phrul che pha rol gyi sems shes pas na bdag cag g.yos pa yang shes pa yod na mi nus pa snyam/ dga' mo de la thabs yod do/ /sbom dga' mos thabs gang yin/ dga' mo tshur shog/ bdag gis gnas brtan dag chos gos dang zas dang yo byad dag gis bstabs par bya/dge slong ma rnams ni nye bar bcar la lhung bzed dang chos gos la sogs pa dang / klag pa dang / kha ton dang / yid la byed pa rnams kyis bsdu zhing dbang du dgug go/ /sbom dga' mo thabs de ni rung ngo zhes te/de dag sbyor ba las dge slong ma dag gis tshor nas/ der gyur pa ston pa la gsol nas tshig 'jam pos bsgo shig ces bya ba nas/ gsol bzhi'i las kyis bsgo ba dang / 'di ni bden gyi gzhan ni gti mug go zhes don de nyid la mthu bskyed de mngon du bzung ste 'dug go//de'i grogs mo rjes su phyogs pa dga' mo dang bsnyen dga' mo dang gtsug dga' mo dag gis smras pa/ 'phags ma khyed kyis dge yang rung sdig kyang rung dge slong ma 'di la cang ma zer cig/ de ci'i phyir zhe na/ dge slong ma 'di ni chos smra ba'o/ /dge slong ma 'di ni chos dang 'dul ba bzung nas rab tu 'dzin cing spyod pa'o//dge slong ma 'di shes bzhin du smra'i mi shes par ma yin no/ /dge slong ma 'di gang la dad cing bzod pa dag kyang de la dad cing bzod do zhes bya ba dang / de ltar gyur pa ston pa la gsol nas bka' stsal pa/ dge slong ma khyod kyis dga' mo dang bsnyen dga' mo dang gtsug dga' mo dag tshig 'jam pos bsgo shig ces bya ba nas/bslab pa bcas so zhes bya ba'i bar du snga ma bzhin no/ /yang dge slong ma gang dge 'dun la dbye ba'i phyir zhugs te/ dbye bar bya ba'i phyir rtsod pa yang dag par rab tu bzung nas rab tu 'dzin cing 'dug na/ dge slong ma de la/ dge slong ma rnams kyis 'phags ma khyod dge slong ma'i dge 'dun mthun pa la dbye ba'i phyir ma 'jug cig/ dbye bar bya ba'i phyir rtsod pa yang dag par bzung nas rab tu 'dzin cing ma 'jug cig/ 'phags ma dge slong ma'i dge 'dun dang lhan cig mthun pa dang / dge slong ma'i dge 'dun dang mthun pa dang /dge slong ma'i dge 'dun dang sdum pa dang / mi phyed pa dang / kun dga' ba dang / mi rtsod pa dang / rtse gcig pa dang / 'don pa mtshungs pa dang / chu dang 'o ma gcig tu 'dres pa bzhin du ston pa'i bstan pa rgyas par bya ba'i phyir bde ba la reg par gnas par gyis shig/'phags ma khyod kyis dge 'dun dbye bar bya ba'i dngos po 'di lta bu 'di thong shig ces bsgo bar bya'o/ /dge slong ma de la dge slong ma rnams kyis de skad bsgo nas gal te dngos po de gtong na ni legs/ gal te mi gtong na dngos po de spang bar bya ba'i phyir lan gnyis lan gsum du yang dag par bsgo bar bya/yang dag par bstan par bya'o/ /lan gnyis lan gsum du yang dag par bsgo/ /yang dag par bstan pa las dngos po de gtong na ni legs/ gal te mi gtong na chos 'di la lan gnyis lan gsum du dbyung bar bya ste dge 'dun lhag ma'o//dge slong ma gang zhes bya ba ni sbom dga' mo'o/ /dge 'dun zhes bya ba ni de bzhin gshegs pa'i nyan thos kyi dge 'dun no/ /mthun zhes bya ba ni yid gcig pa'o/ /dbye zhes bya ba ni gnyis su 'byed pa'o/ /zhugs zhes bya ba ni phyir brtun pa'o/ /dbye bar bya ba'i phyir zhes bya ba ni dbye bar bya ba'i dngos po bcu bzhi las gang yang rung ste/legs par shin tu bzung ba'o/ /rtsod pa zhes bya ba ni bzhi ste/ 'khrug pas rtsod pa dang / mi ston pas rtsod pa dang / ltung ba'i rtsod pa dang / bya ba'i rtsod pa'o/ /'di skad bsgo shig ces bya ba ni tshig 'jam pos so//gzhan ni sngar bshad pa bzhin no/ /lhag ma bcu bdun pa rdzogs so// //de nas ston pa gdan de la bzhugs bzhin du nyan thos ma rnams la bslab pa'i gnas bca' bar dgongs nas dge slong ma dag la gsungs pa/ dge slong ma'i dge 'dun la bya ba cung zad cig yod kyis ma ldang zhig/dge slong ma de la grogs dge slong ma'i rjes su phyogs pa/ dbyen du smra ba gcig gam/ gnyis sam mang po'ang rung ste/ gal te de dag dge slong ma rnams la dge slong ma khyed la dge slong ma la dge yang rung sdig kyang rung cung zad kyang ma zer cig/de ci'i phyir zhe na/ dge slong ma 'di ni chos smra ba'o/ /'dul ba smra ba'o/ /dge slong ma 'di ni chos dang 'dul ba yang dag par bzung nas rab tu 'dzin cing spyod pa'o/ /dge slong ma 'di ni shes bzhin du smra'i mi shes par ma yin te/ dge slong ma 'di gang la dad cing bzod pa bdag cag kyang de la bzod do zhes de skad zer na dge slong ma de la dge slong ma rnams kyis dge slong ma khyod dge slong ma gang dge slong ma'i dge 'dun mthun pa la dbye bar zhugs te/dbye bar bya ba'i phyir rtsod pa yang dag par bzung nas rab tu 'dzin cing 'dug par shes bzhin du de'i grogs su 'gyur te/ rjes su phyogs nas dbyen du smra bar byed de/ dge slong ma rnams la dge slong ma 'di ni chos smra'o/ /'dul ba smra'o/ /dge slong ma 'di ni chos dang 'dul ba yang dag par bzung nas rab tu 'dzin cing spyod pa'o/ /dge slong ma 'di ni shes bzhin du smra'i mi shes par ma yin te/ dge slong ma 'di gang la dad cing bzod pa de la bdag cag kyang dad cing bzod do zhes de skad ma smra shig//de ci'i phyir zhe na/ dge slong ma 'di ni chos ma yin par smra'o/ /dge slong ma 'di ni chos ma yin pa 'dul ba ma yin pa yang dag par bzung nas rab tu 'dzin cing spyod pa'o/ /dge slong ma 'di ni mi shes bzhin du smra'i shes par ma yin gyis/dge slong ma 'di gang la dad cing bzod pa de la khyed dad cing bzod par ma byed par khyed dge 'dun dang mthun pa dang / 'dum pa dang / mi phyed pa dang / mi rtsod pa dang / rtse gcig pa dang / 'don pa mtshungs pa dang / chu dang 'o ma gcig tu 'dres pa bzhin ston pa'i bstan pa rgyas par bya ba'i phyir bde ba la reg par gnas par gyis shig/dge slong ma khyed dge 'dun dbye ba 'di 'dra ba rjes su phyogs nas dbyen du smra ba thong shig ces de skad bsgo shig/ dge slong ma de dag la dge slong ma rnams kyis de skad bsgo nas/ gal te dngos po de gtong na ni legs/gal te mi gtong na dngos po de spong bar byed pa'i phyir lan gnyis lan gsum du yang dag par bsgo bar bya yang dag par bstan par bya'o/ /lan gnyis lan gsum du yang dag par bsgo/ /yang dag par bstan pa las/ gal te dngos po de gtong na ni legs/ gal te mi gtong na chos 'di yang lan gsum pa dbyung bar bya ste/ dge 'dun gyi lhag ma'o/ /dge slong ma de'i zhes bya ba ni sbom dga' mo'o/ /grogs dge slong ma zhes bya ba ni dga' mo dang / bsnyen dga' mo dang gtsug dga' mo'o/ /rjes su phyogs zhes bya ba ni gcig tu dad cing gcig tu sbyor ba'o//dbyen du smra zhes bya ba ni dbye bar smra ba'o/ /gcig gam gnyis sam mang po zhes bya ba ni gnyis yan chad mang po'o/ /dge slong ma dag ces bya ba ni chos 'di la zhugs pa'o/ /de skad ces bya ba ni smra ba'o/ /dge slong ma khyed kyis dge slong ma 'di la cang ma zer cig ces bya ba ni sbom dga' mo la'o//dge'am sdig pa yang rung zhes bya ba ni dge ba la 'jug par mi bya zhing / sdig pa las bzlog mi dgos zhes zer ba'o/ /dge slong ma 'di ni chos smra ba 'dul ba smra ba'o zhes bya ba ni chos dang 'dul ba dang ston pa'i bstan pa bzhin du smra ba'o/ /dge slong ma 'di zhes bya ba ni sbom dga' mo'o//gang la dad cing bzod pa de la bdag cag kyang dad cing bzod do zhes bya ba ni dngos su zad do/ /gzhan ni gong du bshad zin pa dang 'dra'o/ /lhag ma bco brgyad pa rdzogs so// //ston pa mnyan du yod pa na bzhugs so/ /de'i tshe na srin bu'i ri zhes bya ba na dge slong ma bcu gnyis sde/dga' mo dang / bsnyen dga' mo dang / sbom dga' mo la sogs pa 'khor de dag kyang khyim sun 'byin pa'i chos kun tu sbyor te/ skyes pa dang steg /gad rgyangs byed/ stan gcig la 'dug /snod gcig gi nang du za/phor bu gcig gi nang na chang sna mang po 'thung / gar byed glu len/ len du 'jug rol mo mkhas pa rnams la bya dga' sbyin/ gos brdze/ bang rgyug /glang po che la sogs pa ste byol song sna tshogs kyi skad 'byin/ de dag 'thab pa ltar yang byed/ byed du 'jug ste/dge sbyong gi las ma yin pa 'di dag dang gzhan dag kyang byed cing byed du 'jug pas srin bu'i ri der dge slong ma ma 'ongs pa rnams ni mi 'ong / 'ongs pa rnams kyang dge slong ma sdig can gyi gnas so zhes spong ngo / /de nas dge slong ma mang zhig ljongs rgyu zhing dong ba las srin bu'i rir phyin te/de dag snga dro srin bu'i rir bsod snyoms la zhugs pa dang / de dag ji ltar lhung bzed bkrus pa bzhin du slar byung ste/ bsod snyoms cung zad kyang ma rnyed nas de dag gis bsams pa/ srin bu'i ri 'dir sngon 'byor pa rgyas pa skye bo mang pos gang ste bsod snyoms kyang rnyed na da ni bdag cag lhung bzed stong par slar log la ston pa'i nyan thos byis pa lta bu mi gsal ba mi mkhas pa dag gis rigs kyi skyes pa dang bus pa dag la kha ngan mang du smras grang snyam mo//de'i tshe na srin bu'i ri'i bram ze dang khyim bdag mang po dag gnas bzang po zhig na don zhig gi phyir 'dus shing 'khod do//de'i tshe na dge bsnyen chur 'jug can zhes bya ba des dge slong ma mang pos bsod snyoms ma rnyed pa mthong nas de dag la ji lta bur gyur pa smras so/ /'phags ma dag bdag la rjes su brtse ba'i phyir mnyan du yod par bzhud la ji ltar gyur pa ston pa la gsol cig ces bya ba dang /dge slong ma dag gis kyang de bzhin du khas blangs so/ /de nas dge slong ma rnams dge bsnyen des bza' ba dang / bca' bas tshim par byas nas stan las langs te dong ngo / /de nas mnyan du yod par phyin pa dang / ji ltar gyur pa dge slong ma dag la smras pa dang /snga ma bzhin du ston pa la gsol pa dang / bka' stsal pa/ skye dgu'i bdag mo dge slong ma lnga brgya dang song la de dag bskrad pa'i las gyis shig ces bka' stsal nas/ de dag kyang ston pas gsungs pa bzhin du lam gyi bar du 'khod cing gleng ba po chos lnga dang ldan pa bskos te/ 'khor lnga brgya dang srin bu'i rir phyin pa dang / bcu gnyis sdes skye dgu'i bdag mo la sogs pa bdag cag la bskrad pa'i las byed du'ang zhes thos nas bzang mo dang / mdzes ma dang / rgyal mtha' dag gis bsams pa skye dgu'i bdag mos de dag la bskrad pa'i las byas na bdag cag la'ang byed du 'ong ngo snyam nas nub phyogs kyi sgor byung ste/mnyan du yod par phyin pa dang / de dag gis bshags pa dang bsdam par bya ba rnams byas nas dge slong ma rang bzhin du gnas pa dang lhan gcig tu gnas so/ /de nas skye dgu'i bdag mo chen mo 'khor dang bcas pas de dag bskrad pa'i las byas nas de dag slar log ste/mnyan du yod par phyin pa dang / ji ltar gyur pa ston pa la gsol nas song ngo / /de nas dge slong ma dga' mo la sogs pas bsams pa gang sa nyid las gred pa de ni sa nyid la brten te ldang ngo / /bdag cag kyang ston pa dang dge slong ma'i dge 'dun la bzod par gsol lo zhes mnyan du yod par dong ste phyin pa dang ston pas bka' stsal pa bzhin du dge slong ma dag kyang khyim sun 'byin pa'i dge slong ma dag gis phyag byas pa dang /gtam yang mi zer phyag lan yang mi ster nas de dag mdzes dga' mo dag dang phrad na yang snga ma bzhin du gtam dang phyag lan mi ster ba dang /de dag gis smras pa gzhan dag gis bdag cag la mi smra ba ni yus na/ mdzes dga' mo dang bdag cag gis khyim sun 'byin pa'i las byas par 'dra na khyed cag ci'i phyir bdag cag la mi smra de dag gis smras pa khyed zer ba yang bden mod kyis/ nged kyis nyes pa bshags zin pas na gnas ngan len khyed dang lhan cig mi spyad do zhes bya ba dang /de dag gis smras pa 'di na dge slong ma kha cig ni 'dod pa dang / zhe sdang dang / gti mug dang 'jigs pas 'gro ste/ nyes pa 'dra ba las kha cig ni bskrad kha cig ni ma bskrad ces bya ba dang / de ltar gyur pa ston pa la gsol nas/tshig 'jam pos bsgo shig ces bya ba nas bslab pa'i gnas bcas so zhes bya ba'i bar du snga ma bzhin no/ /dge slong ma gang zhig grong ngam grong rdal zhig na gnas shing 'khod pa de dag kyang rigs sun pa dang / sdig pa'i chos kun tu spyod de/de dag rigs sun par snang ngam thos sam rab tu shes sam de dag gis sdig pa'i chos kyang kun tu spyod par snang ngam thos sam rab tu shes na dge slong ma de dag la dge slong ma rnams kyis dge slong ma khyed rigs sun pa dang / sdig pa'i chos kun du spyod de/ khyed kyis rigs sun par snang ngo //thos so/ /rab tu shes so/ /khyed kyis sdig pa'ang kun tu spyod par snang ngo thos so rab tu shes so/ /dge slong ma khyed 'di na gnas pas chog gis gnas 'di nas deng shig ces de skad bsgo bar bya'o/ /gal te de dag dge slong ma rnams la 'di na dge slong ma kha cig ni 'dod pas 'gro'o/ / zhe sdang gis 'gro'o/ /gti mug gis 'gro'o/ /'jig pas 'gro ste/ ltung ba byung bar 'dra ba las dge slong ma kha cig ni bskrad/ kha cig ni ma bskrad do zhes de skad zer na/ dge slong ma de dag la dge slong ma rnams kyis dge slong ma khyed 'di na dge slong ma kha cig ni 'dod pas 'gro'o//zhe sdang gis 'gro'o/ /gti mug gis 'gro'o/ /'jigs pas 'gro ste/ ltung ba byung ba 'dra ba las dge slong ma kha cig ni bskrad/ kha cig ni ma bskrad ces de skad ces ma zer cig/ dge slong ma khyed rigs sun pa dang sdig pa'i chos kun tu spyod de/ khyed kyis rigs sun par snang ngo //thos so rab tu shes so/ /sdig pa yang kun tu spyod par snang ngo thos so rab tu shes so/ /dge slong ma 'dod pas 'gro'o zhes bya ba'i tshig gi lam dang / zhe sdang gis 'gro'o zhes bya ba'i tshig gi lam dang / gti mug gis 'gro'o 'jigs pas 'gro'o zhes bya ba'i tshig gi lam de lta bu 'di thong shig ces bsgo bar bya'o//de dag la dge slong ma rnams kyis de skad bsgo nas/ gal te dngos po de gtong na ni legs/ gal te mi gtong na dngos po de spang bar bya ba'i phyir de lan gnyis lan gsum du yang dag par bsgo bar bya/ yang dag par bstan par bya'o//lan gnyis lan gsum du yang dag par bsgo yang dag par bstan nas dngos po de gtong na ni legs/ gal te mi gtong ma'i chos 'di yang lan gsum du dbyung bar bya ste dge 'dun lhag ma'o/ /dge slong ma mang zhig ces bya ba ni gnyis las lhag pa ni mang ba'o/ /grong ngam gong rdal zhig na gnas shing 'khod na zhes bya ba ni srin bu'i ri'o//de dag kyang rigs sun par zhes bya ba ni rnam pa gnyis kyi phyir rigs sun pa zhes bya ste/ gnas dang longs spyod gcig pa'o/ /gnas pa gang zhe na/ skyes pa dang lhan cig steg pa/ rtsen pa/ gad rgyangs byed pa yin te/de ltar na gnas pa'o/ /longs spyod gcig pa gang zhe na/ zang zing dang me tog dang 'bras bu dang lo shing la sogs pa ste/ de ltar na lhan cig spyod pa'o/ /sdig pa'i chos kun du spyod ces bya ba ni kha na ma tho ba'i chos kun du spyod pa'o/ /de dag gis rigs sun par kun du snang zhes bya ba ni mig gis so//thos so zhes bya ba ni rna bas so/ /rab tu shes zhes bya ba ni yid kyis so/ /sdig pa'i chos kun du spyod par snang ngo / /thos so rab tu shes so zhes pa ni snga ma bzhin no/ /dge slong ma de dag la zhes bya ba ni dga' mo la sogs pa'o//dge slong ma rnams zhes bya ba 'di chos 'di la zhugs pa'o/ /'di skad ces bya ba ni tshig 'jam pos so/ /gzhan ni snga ma bzhin no/ /lhag ma bcu dgu pa rdzogs so// //ston pa mnyan du yod pa na bzhugs so/ /de'i tshe na dge slong ma ti sha srung la ltung ba byung nas/de la dge slong ma phan par 'dod pa bde bar 'dod pa dag gis gleng dran par bya ste/ phu nu mo khyod 'di ltar shes par gyis shig/ khyod la ltung ba byung gis bshags par byos shig ces bsgo ba dang / gang la ltung ba byung ba de slar byed grang / khyed la byung na gzhan su zhig byed/ gang 'gyod par gyur pa'o/ /khyed ni rus dang rigs tha dad pa las rab tu byung ste/ dper na shing tha dad pa'i 'dab ma rlung gis khyer nas gcig tu bsdus gcig tu spungs pa bzhin du rus dang rigs tha dad pa las rab tu byung ste/ khyed dge yang rung / sdig kyang rung / cung zad kyang bdag la ma smra shig/bdag kyang khyod la dge yang rung sdig kyang rung cung zad kyang mi smra'o/ /khyed bdag la smra ba'i tshig gi lam thong shig/ khyod kyis bdag la smras pas chog go zhes smras pa dang / de ltar gyur pa ston pa la gsol nas tshig 'jam pos bsgo shig ces byas pa nas bslab pa'i gnas bcas so zhes bya ba'i bar du snga ma bzhin no//dge slong ma 'ga' zhig bka' blo mi bde ba'i rang bzhin can du gyur la/ de la bstan par gtogs pa dang / bde bar gshegs pa'i mdo sder gtogs pa'i bslab pa'i gnas kyis dge slong ma dag gi chos dang mthun pa 'dul ba dang mthun pas bsgo na/ngag mi nyan te/ 'phags ma dag dge yang rung sdig kyang rung bdag la cung zad kyang ma smra shig/ bdag kyang 'phags ma dag la dge yang rung sdig kyang rung cung zad kyang mi smra'o/ /'phags ma khyod kyis bdag la tshig gi lam phyir mi ldog par bya ba byos shig/bdag la smras pas chog go zhes zer na/ dge slong ma de la dge slong ma de dag gis 'phags ma khyod bstan par gtogs pa dang / bde bar gshegs pa'i mdor gtogs pa'i bslab pa'i gnas rnams kyis dge slong ma dag gis chos dang mthun pa 'dul ba dang mthun pas bsgo na/bdag nyid ngag mi nyan par ma byed par ngag nyon cig/ 'phags ma la dge slong ma rnams kyis chos dang mthun pa dang 'dul ba dang mthun pas bsgo ste/ 'phags mas kyang dge slong ma rnams la/ chos dang mthun pa dang 'dul ba dang mthun par smros shig/de ci'i phyir zhe na/ 'di lta ste/ gcig gis ngag gcig nyan pa dang / gcig la gcig 'doms shing rjes su ston pa dang / gcig gis gcig ltung ba las 'byin pas/ de ltar na bcom ldan 'das de bzhin gshegs pa dgra bcom pa yang dag par rdzogs pa'i sangs rgyas kyi 'khor 'phel bar 'gyur ro//'phags ma khyod ngag mi nyan pa'i las kyi mtha' 'di lta bu thong shig ces bsgo bar bya'o/ /dge slong ma de la dge slong ma rnams kyis de skad bsgo na/ gal te dngos po de gtong na ni legs/gal te mi gtong na dngos po de spang bar bya ba'i phyir lan gnyis lan gsum du yang dag par bsgo bar bya/ yang dag par bstan par bya'o/ /lan gnyis lan gsum du yang dag par bsgo/ yang dag par bstan nas gal te dngos po de gtong na ni legs/ gal te mi gtong na chos 'di yang lan gsum du dbyung bar bya ste dge 'dun lhag ma'o//dge slong ma gang zhes bya ba ni ti sha ste/ gzhan yang de dang 'dra'o/ /bka' blo mi bde ba'i rang bzhin can du gyur zhes bya ba ni/ rigs pa dang mthun pas nyes pa byung ba dang / /shogs shig ces bsgo ba na byed du mi btub cing log par 'dzin pa'o//bstan par gtogs pa bslab pa'i gnas zhes bya ba ni ltung ba sde lnga la bya'o/ /bde bar gshegs pa'i mdor gtogs pa zhes bya ba ni ston pa la bde bar gshegs pa zhes bya ste/ des bstan pa'i mdo sde'am/ yang na mdo sde kun bstan pa'am/ sangs rgyas kyis bstan pa'am/ nyan thos kyis bstan pa'o/ /dge slong ma dag gis zhes bya ba ni chos 'di la zhugs pa'o/ /chos dang mthun pa 'dul ba dang mthun pa zhes bya ba ni chos dang 'dul ba dang ston pas bstan pa bzhin du rim gyis phan pa la zhugs pa'i phyir bsgo ba'o//bdag ngag mi nyan ces bya ba ni de la gdams shing rjes su bstan pa la bdag nyid ma gtogs par byed pa'o/ /'phags ma dag dge yang rung sdig kyang rung bdag la cung zad kyang ma smra shig ces bya ba ni 'phags ma ni snyan tshig go/ /dge ba la ni ma gzhug cig /sdig pa la ni ma bzlog cig pa'o/ /bdag la cung zad kyang ma smra shig ces bya ba ni bdag nyid kyi phyir pha rol gyi tshig gi lam 'gog pa'o/ /bdag kyang 'phags ma dag la dge yang rung sdig kyang rung zhes bya ba ni/ dge ba la mi gzung ngo / /sdig pa las mi ldog ste/bdag nyid kyi phyir gcig la gcig 'doms shing rjes su ston pas spong bar byed pa'o/ /tshig gi lam bzlog shig ces bya ba ni zhi bar byos shig nga la rjes su ston par khyed sus bsgos zhes bya ba'o/ /smras pa chog go zhes bya ba ni 'di skad du smras pas bdag la 'tshe ci dgos chog go//khyed cag nyid la phan pa la 'jug par gyis shig /gzhan la glengs te ci bya zhes pa'o/ /dge slong ma de la zhes bya ba ni ti sha'o/ /dge slong ma rnams kyis zhes bya ba man chad ni gong du bshad pa bzhin no/ /lhag ma nyi shu pa rdzogs so// //'phags ma dag bdag gis dge 'dun lhag ma'i chos nyi shu po dag bshad zin to zhes bya ba ni mjug bsdu zhing spro ba bskyed pa'o/ /bcu gnyis ni nyes pa dang po de nyid kyis so zhes bya ba ni dge 'dun gyis bzlog kyang rung ma bzlog kyang rung / byas ma thag tu nyes pa rnam par gzhag pa'i phyir ro//brgyad pa ni lan gsum gyi bar du'o zhes bya ba ni dkon mchog gsum dang bslab pa gtong ba nas bka' blo mi bde ba'i bar brgyad po rnams ni dge 'dun gyis bzlog ste/ mi ldog na lan gsum pa'i tshig tshogs ma thag tu dge 'dun gyis bka' bcag pas nyes pa rnam par gzhag pa'i phyir ro//dge slong ma de dag las zhes bya ba la sogs pa ni nyes pa las dbyung ba'i chos rnams ston te/ 'di la yang rnam pa lngas bshad de/ nyes pa dang / bsam pa dang / nyes pa'i chad pa'i las dang / spyad pa dang / gang zag bstan pa'o//de la nyes pa bstan pa zhes bya ba ni dge slong mas de dag la nyes pa gang yang rung ba zhig byas la zhes bya ba yin te/ /de dag las nyes pa gang yang rung ba zhes bya ba ni dge 'dun lhag ma nyi shu las gang yang rung ba'o/ /bsam pa gtan pa zhes bya ba ni ji srid du shes bzhin du bcas pa de srid du mi 'dod pa bzhin du chad pa byed du gzhug go zhes bya ba'o//de la ji srid du zhes bya ba ni zhag gam zla ba'am lo yang rung ngo / /de bzhin du zhes bya ba ni nyes pa byung yang nyes par mi shes sam dran pa nyams pa yang rung ste/ bcabs pa'i sems med pas zhag 'das kyang de la mtshan mo bcabs pa'i nyes pa med pa'i phyir ro//bcabs pa zhes bya ba ni mtshan mo bcabs pa dang / sems kyis bcabs pa'o/ /de la mtshan mo bcabs pa ni lhag ma byung na bcabs par sems bskyed de skya rengs kyis chod pa'o/ /sems kyis bcabs pa ni nyes pa byung nas bcabs par sems bskyed gang la gang skya rengs kyis mchod pa'o//skabs 'dir mi 'dod bzhin du chad pa byed du gzhug pa ni 'di gnyi ga gzung ngo / /bshags par 'dod pa las brjed de ma bshags na bcabs pa'i nyes pa med zhag res nyes byas re re'o/ /'on pa dang /skad brda mi phrad pa dang / mtshams kyi phyi rol du gnas pa dang / rang bzhin du gnas pa ma yin pa dang / phas pham pa byung ba dang / mtshams med pa lnga byas pa dang / khyim dang / dge tshul ma la sogs pa la mthol na mthol bar mi chud de bcabs pa'i nyes pa ni med/nyes byas ni yod do/ /bcabs pa bshags par bsams pa las dran pa nyams sam/ khyim par babs te slar dran pa rnyed cing rab tu byung na/ dran pa nyams pa dang / bcabs pa bkol te/ snga phyi ji srid bcabs pa de'i chad pa byed du gzhug go//lhag ma gnyis dus gcig tu byung ste/ zla ba gnyis bcabs pa las cig sngar mthol te/ chad pa zla ba gnyis tshang ba'i tshe cig shos kyang mthol na zla ba gnyis kyis chad pa de yang bral bar bya ste/ dus gcig tu mthol na yang chad pa zla ba gnyis su zad pa'i phyir ro//zla ba gnyis bcabs pa ji lta bar gzhan rnams kyang de bzhin du rig par bya'o/ /gang nyes pa byung nas ji srid du bcabs pa'i zhag mi mngon pa des ni/ gtsang ma'i mtha' nas bzung ste chad pa byed du gzhug go/ /nyes pa byung na bcabs pa las mthol nas snga ma'i chad pa byed pa'i tshe/nyes pa snga ma dang 'dra ba'am mi 'dra ba gzhan byung na chad pa snga ma blangs pa spang la bub ste/ chad pa gzhi nas blangs nas byed du gzhug ste/ 'di ni gzhi nas blangs pa'i chad pa zhes bya'o/ /gal te chad pa de nyid byed pa'i tshe yang nyes pa byung na snga ma spang la bub ste/yang chad pa gzhi nas bzlas te byed du gzhug go/ /'di ni gzhi nas blangs pa bzlas pa'i chad pa zhes bya'o/ /mi 'dod bzhin du chad pa byed du gzhug ces bya ba ni mi btub na btang ba ma yin pa'i phyir te/ gal te mi btub na gnyen po la mi brten pa'i phyir dgar ba'i las bya'o//chad pa ci zhig byed du gzhug ce na/ chad pa byed pa dang / mgu ba spyod pa gnyis ni 'dra'o/ /chad pa dang mgu ba byed pa'i tshul ni 'dra ste/ rang bzhin du gnas pa dang / phyag bya ba bdag gir mi bya/ stan gcig la 'dug par mi bya/ stan mtho ba'am mnyam pa nyid la ma yin/bstabs te 'dug par mi bya/ mdun na 'chag par mi bya/ phyi nas 'gro ba'i dge sbyong ma 'gro bar bya'o/ /g.yogs pa gcig gi nang du gnas par mi bya/ gzhan rab tu mi 'byung / bsnyen par rdzogs par mi bya/ gnas bca' ba mi sbyin/ dge tshul bsdu ba'i las mi bya/gsol ba la sogs pa'i las byed par mi bsko/ dge slong ma rnams la gleng bar mi bya/ rang bzhin du gnas pa rnams kyis rkang ba bkru ba dang / sgo dbye ba dang / me mar 'byung ba dang / gtsug lag khang bsku ba dang / phyag dar bya ba dang / bshang gci sa'i wa bkru ba dang /sa dang lo ma dang / grong dro bsal ba rlung yab kyis g.yab pa dang / mal stan sba ba dang / lhung bzed kyi gzhi bsal bar bya'o/ /bsnyen par rdzogs pa thams cad kyi ni 'og /dge tshul ma rnams kyi gong du 'dug par bya'o/ /ston pa 'dug pa gsol zhing bstod pa dang /gaN+DI brdung bar bya ba dang / dri gtsang khang phyags pa dang / chag chag gdab pa dang / tshes grangs rnams brjod par bya'o/ /chad pa dang mgu ba zhag tu spyad pa yang dge 'dun 'dus pa rnams la brjod par bya ste/ re re'i drung du ni ma yin no/ /chad pa dang mgu ba spyad pa yang /chad pa'am mgu bar byed pa'am/ chad pa dang mgu bar bya ba byas zin pa'am/ bslab pa byin pa la sogs pa'i tshogs kyi nang du mi bya'i gang na rang bzhin du gnas pa yod pa der spyad par bya'o/ /'di dbye ba mang mod kyis 'dir mdo tsam zhig bstan to/ /nyes pa'i chad pa'i las bstan pa zhes bya ba ni dge slong mas mi 'dod bzhin du chad pa byas nas de'i 'og tu dge 'dun gnyi ga mgu bar bya'o zhes bya ba yin te/chad pa dang mgu ba spyad pa'i tshul ni gong du bshad pa dang 'dra bas ma bshad de/ de'i 'og tu zhes bya ba ni chad pa byas pa'i 'og tu'o/ /dge 'dun gnyi ga zhes bya ba ni dge slong pha'i dge 'dun dang /dge slong ma'i dge 'dun no/ /mgu bar bya'o zhes bya ba ni zla ba phyed kyi bar du dge 'dun gnyi ga mgu bar byos shig pa'o/ /spyod pa bstan pa zhes bya ba ni dge slong mas mgu bar byas nas dbyung ba la thogs te chos dang mthun par byas na zhes bya ba'o/ /de la dbyung ba la thogs te zhes bya ba ni ji ltar dug mdas phog pa ji srid du ma phyung ba de srid du mi bde ba dang 'dra bar nyes pa byas pa 'di yang dge 'dun gnyi gas gsol ba dang bzhi'i las kyis ma phyung na yun ring por ngan song gsum du mi bde ba rnam pa sna tshogs myong bar 'gyur ba'i phyir ro//chos dang mthun par byas na zhes bya ba ni nyes pa byung ba des ji srid du bcabs pa'i chad pa yang chos bzhin du bcad/zla ba phyed kyi bar du dge 'dun gnyi ga la mgu ba yang chos bzhin du byas pa'o/ /gang zag bstan pa zhes bya ba ni gang na dge 'dun gnyi ga'i tshogs bzhi bcu yod pa der dge slong ma de dbyung bar bya'o//dge 'dun gnyi ga las bzhi bcur gcig gis ma tshang bas gal te dge slong ma de phyung na dge slong ma de yang ma phyin pa dge 'dun gnyi ga yang smad par 'gyur te/ de la ni dus yin no zhes bya ba yin te/ de la gnyi ga'i tshogs bzhi bcu zhes bya ba ni dge 'dun ma yang nyi shu dge 'dun pha yang nyi shu ste de las nyung du mi gnang ba'i phyir bzhi bcu zhes smos par zad kyi de las lhag na brgya ste ci snyed kyang rung ngo //dge slong ma de dbyung bar bya'o zhes bya ba ni gsol ba dang bzhi'i las kyis so/ /de yang ma phyin la bya ba'i nyes pa las so/ /smad par 'gyur te zhes bya ba ni dge 'dun gnyi ga la 'das pa dang bcabs pa'i nyes byas yod pa'i phyir ro//de la de ni dus yin no zhes bya ba ni dge 'dun lhag ma'i nyes pa byung ba'i gang zag de la tshangs par 'gyur zhing nyes pa las phyin pa'i dus ni 'byin par byed pa'i chos sngar bstan pa las byung ba bzhin du byas pa yin no zhes bya ba'i tha tshig go//gang zag chad pa dang mgu ba spyod pa rnam pa drug yod de/ thams cad gnag pa dang / phal cher gnag pa dang / phyed gnag pa dang / phyogs gcig gnag pa dang / cung zad gnag pa dang / nag po med pa'o//de la thams cad gnag pa ni chad pa rnam pa gsum dang / mgu ba rnam pa gsum dang / 'byung ba bdun te thams cad chos bzhin ma yin pas byas pa'o/ /phal cher gnag pa ni gang chad pa ni chos bzhin la gzhan drug po thams cad chos bzhin ma yin pa'o//phyed gnag pa ni gnyis chos bzhin la/ gzhan lnga po rnams chos bzhin ma yin pa'o/ /phyogs gcig gnag pa ni gsum chos bzhin la bzhi chos bzhin ma yin pa'o/ /cung zad gnag pa ni drug chos bzhin la/ gcig chos bzhin ma yin pa'o/ / nag po med pa ni tha ma'i dbyung ba yang chos bzhin pa ste/ de bas na nag po med pas ni nyes pa las phyung ba yin gyi snga ma rnams ni ma yin no/ /gang zag rnam pa drug gis ni dge slong ma gcig gi mdun du bshags pas tshang bar 'gyur te/ drug gang zhe na mdo sde dang / 'dul ba dang / ma mo zad par 'dzin pa dang /shin tu ngo tsha yod de gang dag rkyen des 'chi bar 'gyur ba dang / dge 'dun gyi gnas brtan ma dang grags shing bsod nams che ba ste/ bsam pa rnam par dag pas nyes pa las dbyung ba yin gyi chad pa'i las kyis ni ma yin pa'i phyir ro/ /yongs su dag pa dri ba ni go sla bas 'dir bshad pa ma byas so//ltung ba'i dngos po rnams bstan pa la sngar phye ba'i gnyis pa ste dge 'dun lhag ma'i sde'i bshad pa rnams rdzogs so// //ltung ba'i dngos po bstan pa la lngar phye ba'i gsum pa ste/ ltung ba'i sde rnams 'dir ston to/ /'di la yang gnyis su dbye ste/spang ba'i ltung ba dang / ltung ba'o/ /de la spang ba'i ltung ba ni sum cu rtsa gsum pa'o/ /ltung ba ni brgya brgyad cu ste/ spang ba'i ltung ba rnams bstan pa'i phyir/ mdor na/ zhag bcur bcad dang bral bar mi bya dang / /zla ba dang ni 'bru dang mi blang dang / gnyen min mi blang stod g.yogs dang //pags pa gnyis dang pho nya rin bskur ba'o/ /zhes bya ba gsungs te/ de la zhag bcur bcad dang zhes bya ba ni ston pa mnyan du yod pa na bzhugs so/ /de'i tshe sbom dga' mo gos mang por gyur te/ bsod snyoms la 'jug pa'i tshe gos gzhan gyon te/de bzhin du zan za ba dang / mkhan mo dang / slob dpon gyi drung du 'gro ba dang / mchod rten la phyag 'tshal ba'i tshe gos len re brje bas bya ba dang byed pa mang bar gyur te/ dge ba sna tshogs kyi bar chad du gyur pas de lta bur gyur pa ston pa la gsol nas/ sbom dga' mo rnam pa du mas smad de bslab pa'i gnas bcas so//dge slong mas chos gos zin te/ gtan pa phyung nas chos gos lnga chongs shig de las lhag par 'chang na spong ba'i ltung ba'o/ /de ltar ston pas bslab pa'i gnas bcas pa dang / khyim bdag gi bud med zhig gis bsams pa/skye dgu'i bdag mo ni lha dang mi'i mchod gnas yin na/ de la bdag gis rin thang chen po'i gos shig bskon no snyam pa las/ de'i tshe ut+pa la'i kha dog ma mnyan du yod par bsod snyoms la zhugs te/ rim gyis bsod snyoms rgyu ba las/ khyim bdag gi bud med de'i gan du phyin pa dang des phyag 'tshal nas 'di skad ces smras so//'phags ma skye dgu'i bdag mo gang na bzhugs/ des smras pa dbyar mo thang na'o/ /khyim bdag gi bud med kyis smras pa/ 'phags ma mkhyen par mdzod cig/ bdag gis yun ring mo nas bsams pa/skye dgu'i bdag mo la rin thang chen po'i gos shig bskon snyam nas bdag cag khyim pa mo ni bya ba mang bas na/ 'phags mas gos 'di skye dgu'i bdag mo la bskon par ci gnang / de nas ut+pa la'i kha dog mas bsams pa/ ma blangs na ni skye dgu'i bdag mo'i rnyed pa yang stor la/bud med de'i bsod nams kyang 'gag par 'gyur snyam nas gos de blangs te skye dgu'i bdag mo'i gan du song ste/ de ltar gyur pa rgyas par smras pa dang / dge slong ma dag gis ston pa la gsol nas bka' stsal pa/ snga ma ni bcas pa'o/ /'di ni gnang ba ste/nyan thos ma rnams la bslab pa'i gnas bca'o/ /dge slong mas gos zin te gtan pa phyung nas/ gos lhag pa rung bar ma byas pa ring na zhag bcu'i bar du chongs shig de las 'das par bcangs na spong ba'i ltung ba'o/ /dge slong mas gos zin te gtan pa phyung zhes bya ba ni gos zin la gtan pa ma phyung ba yang yod/gtan pa phyung la gos ma zin pa yang yod/ gos zin la gtan pa phyung ba yang yod/ gos kyang ma zin la gtan pa yang ma phyung ba yang yod do/ /gos zin zhes bya ba ni bkrus drubs kha dog bsgyur ba'o//gtan pa phyung zhes bya ba ni tshul nas byung nas dge slong ma thams cad spyi'i gos gtan pa drubs nas/ zla ba lnga yul rgyu zhing gos tshul du dong ba las zla ba lnga lon te phyir lhags nas spyi'i chos gos la gtan pa phyung nas/ so so'i chos gos la sngags btab pa'o/ /zhag bcu zhes bya ba ni gos lhag rnyed pa nas bzung ste zhag bcu'i bar du'o//gos lhag ces bya ba ni byin gyis brlabs pa las lhag pa'o/ /rung bar ma byas zhes bya ba ni gos lhag gi sngags kyis ma btab pa'o/ /chongs shig ces bya ba ni bdag gis bya ba'o/ /de las 'das par bcangs na zhes bya ba ni de las thal ba'o//spang ba'i ltung ba zhes bya ba ni dngos po spangs la ltung ba bshags pa'o/ /zhag bcu la nyin re gos re re ste gos bcu rnyed na/ thog ma rnyed pa'i gos zhag bcu 'das na de'i shugs kyis gzhan zhag ma tshang pa yang spang ngo / /snga phyi gos re re zhig rnyed na phyi nas rnyed pa rung bar byas na/sngar rnyed par rung bar byos shig/ sngar rnyed pa rung bar ma byas la zhag bcu 'das na snga ma ni spang / gos phyi ma rung bar byas pa ni spang mi dgos so/ /gos rgyu dang dbyibs brtags pa rnams ni mkhan po dang slob dpon la bsngo'o/ /ma brtags pa rnams ni yon bdag la bsngo'o//phyogs bcu'i dge 'dun dang dkon mchog gsum gyi dkor dang ma 'dres pa mtshams gcig gi dge 'dun gyi rdzas ni gtsug lag khang gzhan gyi dge slong la bsngo'o/ /ma bsngos te zhag bcu 'das na dge 'dun gyi rdzas spang bar 'gyur ro/ / chos gos sngags kyis btab pa ni byin gyis brlab pa zhes bya/ gos lhag sngags kyis btab pa ni rung bar byas pa zhes bya ste/ dge slong mas gos lhag ma spangs kyang bral bar ma byas/ bral bar byas kyang ltung ba ma bshags pa ste/ de la gsum las gcig ma byas kyang rung /gnyis dang gsum char ma byas kyang rung ste/ de'i shugs kyis lhung bzed dang / de'i snod dang / phor bu'am/ ska rags sam/ dge sbyong gi yo byad gang yang rung / rdzas lhag spang ba byung ba'i sngon rol na sngags kyis ma thebs pa kun spang ngo / /spang ba'i ltung ba dang po rdzogs so// //ston pa mnyan du yod pa na bzhugs so/ /de'i tshe dge slong ma rnams gos mang zhig rnyed par gyur te/ de dag gis gos de rnams bkrus drubs kha dog bsgyur te/ gtur bu'i nang du bcug nas dge slong ma gzhi na 'khod pa rnams su gtams nas/ sham thabs dang bla gos bgos te/ ljongs rgyu zhing dong ba dang / lus ma yogs shing sha snang bar gyur la/ dge slong ma gzhi na 'khod pa dag kyang de dag gi gos skems/ 'ding / sprug/ sdud cing sbed pas na bya ba dang byed pa mang bas dge ba'i bar chad du gyur te/ don nyung ba'i dge slong ma rnams 'phya ste/de ltar gyur pa ston pa la gsol nas/ gso dka' ba dang dgang dka' ba'i nyes pas smad nas nyan thos ma rnams la bslab pa'i gnas bcas so/ /dge slong mas gos zin la gtan pa phyung nas gal te nub gcig chos gos lnga las chos gos gang yang rung ba las mtshams kyi phyi rol du bral na spang ba'i ltung ba'o//de ltar bslab pa'i gnas bcas nas ston pa rgyal po'i khab na bzhugs so/ /de'i tshe na skye dgu'i bdag mo rgyal po'i khab dge slong ma'i dbyar mo thang rgyal po'i kun dga' zhes bya ba na 'dug go/ /de nas skye dgu'i bdag mo bco lnga'i gso sbyong gi tshe/dge slong ma'i dge 'dun dang gso sbyong la 'dus shing 'dug go/ /dge slong ma chos sbyin ma yang gso sbyin gyi gnas su song ba las chu bo dbyar bzangs brug pas sbyar ma gsher te skam pa la ring du thogs te/ gso sbyin gyi gnas su song ste phyin pa dang gnas brtan ma dag gis bdag cag ni khyod ma 'ongs pa la ring zhig thogs so zhes byas pa dang /chos sbyin mas kyang ji lta bur gyur pa smras nas/ 'phags ma rnams bdag ni rgas te/ sbyar ma lci bas bkur mi nus na ji ltar bgyi gyis shig ces smras pa dang / de ltar gyur pa ston pa la gsol nas dge slong ma chos sbyin ma rgas pa sbyar ma dang bral bar mi 'gyur ba'i sdom pa byin cig ces bka' stsal te/de bas na snga ma ni bcas 'dan gnang ba ste/ de ltar na nyan thos ma rnams la bslab pa'i gnas bcas so/ /dge slong ma gos zin te gtan pa phyung nas gal te chos gos lnga las gang yang rung ba zhig nub gcig mtshams kyi phyi rol du bral na dge 'dun gyis gnang ba ma gtogs te spang ba'i ltung ba'o//gtan pa phyung zhes bya ba ni snga ma bzhin no/ /chos gos lnga zhes bya ba ni sbyar ma dang / stod chags dang / nang g.yogs dang /gong lugs dang / rdul gzan no/ /nub gcig ces bya ba ni zhag gcig gi skya rengs kyis chod pa'o/ /mtshams kyi phyi rol zhes bya ba ni grong shing thags kyis bskor ba'i mtshams ni shing thags nas glang drug gis 'dren pa'i 'od ma'i shing rta'i khor yug dang bya gag 'phur ba chun chad do//grong rtsig pas bskor ba'i grong ni ba lang dang / lug gi mig rdul gar babs pa tshun chad dang / rang bzhin gyis ngo tsha ba bshang gci skyel ba tshun chad do/ /'obs kyis bskor ba'i grong ni 'obs nas skas khru bcu gnyis pa tshun chad do/ /yang na phyag dar gyi phung po'i steng nas bong ba 'dril nas gar phyin pa tshun chud do//tshong 'dus kyi grong ni tshong pa spun ma bgos pa'i tshong dus kyi phyi nas 'dom gang tshun chad do/ /gru ni phyi rol 'dom gang tshun chad dang yang na phur pa btab ste gru 'dogs pa tshun chad do/ /shing drung ni lo ma rlung gis bskyod de gar lhung ba dang /thigs pa zags pa'i sa dang / nyi ma phyed nas grib ma nyi ma gar 'khor ba tshun chad do/ /'brog dgon pa ni 'dom gang tshun chad mtshams so/ /shing phal mo che'i ni lo ma 'dres nas mtshams ma phye ba tshun chad do/ /ma 'brel ba la ni 'dom gang tshun chad do//'dron pa lam du zhugs pa ni 'dom bzhi bcu rtsa dgu tshun chad do/ /mtshams kyi bar du ni chos gos kyi mtha' lus dang ma bral bar bya'o/ /mtshams de rnams kyi phyi rol du chos gos lus la bdag nang du 'dug gam bdag phyi rol na 'dug la chos gos nang du lus te zhag gcig gi skya rengs kyis chod na spang bar 'gyur ro//dge 'dun gyis gnang ba ma gtogs zhes bya ba ni gnang ba bkol ba'o/ /spangs pa'i ltung ba zhes bya ba ni dngos po spangs te ltung ba bshags pa'o/ /spang ba gnyis pa rdzogs so// //ston pa mnyan du yod pa na bzhugs so//de'i tshe dge slong ma rnams gos sngon po zhig rnyed na de mi langs te bzhag nas nam 'di 'dra ba zhig rnyed na gdod gos bya'o snyam mo/ /sngon po ji lta ba bzhin du ser po dang / dmar po dang / sdug po dang / srab mo yang ngo / /gang su yang rung ste/ chos gos tshol bas bya ba dang /byed pa mang bas dge ba'i bar chad du gyur nas/ de ltar gyur pa ston pa la gsol nas bslab pa'i gnas bcas so/ /dge slong mas chos gos zin te gtan pa phyung nas dus ma yin pa'i gos rnyed la 'dod na dge slong ma des gos de longs shig/ blangs nas gal te langs na ni myur du gos su drubs te chongs shig/khal te ma langs na gos kha ma langs par rnyed du re ba yod na dge slong ma des gos de zla ba gcig gi bar du zhog shig/ de las 'das par bzhag na spang ba'i ltung ba'o/ /dge slong mas chos gos zin la gtan pa phyung zhes bya ba ni snga ma bzhin no//dus ma yin pa'i gos zhes bya ba ni gtan pa bting na ston zla tha chungs nas dpyid zla ra ba nya'i bar du zla ba lnga ni dus zhes bya'o/ /de phan chad ni dus ma yin pa'o/ /gtan pa ma bting na thams cad kyang dus ma yin no/ /gos rnyed du re ba yod na zhes pa ni ma dang pha dang ming po dang phu nu mo dang /mkhan po dang slob dpon dang dus ston gyi tshe rnyed du re ba'o/ /kha ma langs zhes bya ba ni chos gos lnga'i kha mi langs pa'i phyir ro/ /spangs pa'i ltung ba zhes bya ba ni ltung ba bshags pa las dngos po spang ba'o/ /ltung ba ji lta bu zhe na/ tshes gcig la gos shig rnyed la re med dam snon mi rnyed du dogs na byin gyis rlobs shig/yang na rung bar gyis shig/ yang na bskur cig/ yang na gzhan la byin cig/ de ltar ma byas na tshes bcu gcig gi skya rengs shar na spang ba'i ltung ba'o/ /tshes gcig la gos shig rnyed na tshes bcu gcig la gos phyi ma rnyed na snga ma'i shugs kyis zhag bcur sdod du mi snang ngo //kha langs pa ser po zhig rnyed du re ba las phyis kha dog mi mthun pa zhig rnyed na zla ba gcig tu sdod du mi gnang ngo / /gnyi ga kha ma langs pa rnyed du re ba yod na zla ba gcig tu gnang ngo / / gos la rnam pa lnga ste/ bdag po yod pa dang / bdag po med pa dang / song nas phyir 'ongs pa dang / dur khrod pa dang / phyag dar khrod pa'o/ /chos gos sbyar ma gsar ba ni nyis rim du sbyar/ rnying pa ni bzhi rim du sbyar/ tshem bu ni du yang rung ngo / /snam bu dgu pa dang bcu gcig pa dang bcu gsum pa ni dkyil 'khor phyed dang gsum pa'o//bco lnga pa dang bcu bdun pa dang bcu dgu pa ni dkyil 'khor phyed dang bzhi pa'o/ /nyi shu gcig dang nyi shu gsum pa dang nyi shu lnga pa ni dkyil 'khor phyed dang lnga'o/ /snam bu nyi shu lnga las lhag na tshem bu'o/ /zhing khru gsum dang chur khru lnga'o//yang na khru phyed dang lnga dang phyed dang gsum mo/ /lnga pa na zhing khru gsum chur khru lnga'o/ /yang khru phyed dang gsum dang chur bzhi'o/ /'khor gsum yod pa des kyang chud do/ /spang ba gsum pa rdzogs so// //byang chub sems dpa' bcom ldan 'das dga' ldan gnas nas rnam pa lnga la gzigs te/rigs dang yul dang rus dang dus dang bud med la gzigs nas yul gyi dbus ser skya/ yab zas gtsang ma/ yum sgyu ma'i lha mo'i lhums su gshegs nas btsas pa'i nyin mo mnyan du yod par rgyal po u ra tshangs pas byin gyi bu gsal rgyal dang /rgyal po'i khab tu pad+ma chen po'i bu gzugs can snying po dang / kau shA m+bIr sde rgyal gyi bu shar ba dang / grong khyer rab rgyal du mtha' yas mu khyud kyi bu rab snang btsas te/ rgyal po de rnams na re sa chen po g.yos pa ni nged kyi bu'i yon tan te/ yon tan las bu'i ming rnams kyang brtags so//mtshan mkhan gyis mtshan bltas na/ rab tu byung na ni mngon par 'tshang rgya'o/ /rab tu ma byung na 'khor los sgyur ba'i rgyal po rin po che bdun dang ldan par 'gyur ro/ /mtshan ni don thams cad grub par btags so/ /rgyal po chen po bzhi yang skrag nas dpya 'bulo//shAkya lnga brgya g.yog mos pa can lnga brgya lnga brgya dang rta dang ba lang cang shes lnga brgya lnga brgya'ang de dang dus gcig tu btsas so/ /don thams cad grub pas dka' ba lo drug spyad nas don med par gzigs nas yul bde 'gror grong dpon gyi bu mo dga' mo dang dga' stobs kyis lan bcu drug tu bzhos pa'i 'o ma sbrang rtsi can gyi thug pa gsol nas klu'i rgyal po dus can gyi rtswa gser gyi kha dog lta bu'i byang chub kyi shing drung du bting ste steng du bzhugs nas nam gyi gung thun la bdud btul nas mngon par sangs rgyas so//thog mar yul 'khor mo 'jig tu nye lnga dang grong dpon gyi bu lnga bcu sde btul/ba lang gi gnas stug por drug cu sde btul/ bzang por mi phyed pa dang dga' mo dang dga' stobs bden pa la bkod/ lteng rgyas su ral pa can stong dang ga ya mgo'i mchod rten du dge slong stong po cho 'phrul gyis btul/ yul mnyam dga'i rgyal po gzugs can snying po lha stong phrag brgyad cu dang bram ze brgya stong bden pa la bkod/rgyal po'i khab tu maud gal gyi bu dang shA ri'i bu 'khor nyis brgya lnga bcu rab tu phyung mnyan du yod par gsal rgyal btul nas mnyan du yod pa na bzhugs so/ /yab kyis 'char ka der btang nas spyan drangs so//'char ka bcom ldan 'das kyis bka' stsal te/ shA ri'i bus rab tu phyung ngo / /de nas bcom ldan 'das ser skyar gshegs nas yab dang shAkya'i rigs rnams btul te bden pa la bkod do/ /mnyan du yod par 'char ka bsod snyoms la song pa chung ma sbed mas mthong nas dud mo btab ste/nga bor te ci bya zhes pa dang / khyod pas byang chub sems dpa'i btsun mo grags 'dzin ma dang / mgo phyi ka la sogs pa drug stong bor nas rab tu byung na/ 'dam dang 'dra ba khyod cig ces zhes pa dang / 'o na bdag kyang rab tu 'byung ngo //de bzhin du sang rab tu dbyung ngo zhes smras so/ /'char ka 'gyod de da ltar lhung bzed nag po can dag 'phya zhing 'dug na gal te/ dge slong ma 'di rab tu phyung na drug sde pos dge slong ma 'di rab tu phyung ngo zhes je thu 'phya bar 'gyur ro snyam nas rgyal po'i khab tu bros te tshul du zhugs so//sbed ma phyi de nyin par 'char ka la bsdad de med nas ngu zhing 'dug pa skye dgu'i bdag mos mthong nas rab tu phyung ngo / /tshul nas byung nas phyir mnyan du yod par phyin nas kha ton zer zhing 'dug pa la sbed ma phyag 'tshal du 'ongs pa dang / sngun gye spyad pa rnams dran nas 'dod chags langs pa sbed mas shes te bros so//'char kas mgo reg ma sdod cig ces bdas pa dang brla la reg ste khu ba gtor ro/ /de nas 'dod chags zhi ba dang sbed ma slar log ste smad g.yogs bkrus te lta zhes pa dang / khu ba mthong ba dang mo 'dod chags langs te/khu ba bkog ste mngal sgor bcug pa dang sems can dang ldan par gyur to/ /dge slong ma rnams kyis khyod 'char ka dang nyal lo zhes pa dang / bdag 'char ka dang reg kyang ma reg go zhes rgyas par bcom ldan 'das la gsol to/ /'di pham par gyur pa ma yin gyis dben par zhog la zas kyis ma brel bar zhog shig/bu ni 'od srungs gzhon nu zhes bya ba phyis dgra bcom par 'gyur ro/ /de nas ston pas dgongs pa gnyen ma yin pa'i dge slong ma la gos 'khrur bcug pa'i nyes dmigs su 'gyur ro snyam nas bslab pa'i gnas bcas so/ / yang dge slong ma gang gnyen ma yin pa'i dge slong gos rnying 'khru ba'am 'tshed dam 'chag na spang ba'i ltung ba'o/ /gnyen ma yin zhes bya ba ni pha'i brgyud zung bdun/ ma'i brgyud zung bdun gyi bar du gnyen pa'o/ /gos zhes bya ba ni bal dang srin bal dang / sha na'i shun pa la sogs pa'o//rnying pa zhes bya ba ni zla ba bzhi/ 'khru zhes bya ba ni tha na chu'i nang du bcug pa tsam yang ngo / /'tshed ces bya ba ni tshon gyi nang na smyug pa tsam yang ngo / /'chag ces bya ba ni lag mthil gyis brdabs pa'o/ /sprad ba'i ltung ba'o zhes pa ni dngos po spangs la ltung ba bshags pa'o//ltung ba ji lta bu zhe na gnyen pa ma yin pa la gnyen ma yin par 'du shes pa dang / gnyen ma yin pa la the tshom za bzhin 'khru 'chag la sogs pa byas na ltung ba'o/ /gnyen yin pa la ma yin par 'du shes pa dang gnyen la the tshom za ste byas na gnyi ga nyes byas so//spang ba'i ltung ba bzhi pa rdzogs so// //bcom ldan 'das mnyan du yod pa na bzhugs so/ /de'i tshe na khyim bdag phyug cing longs spyod che ba zhig 'dug ste/ des rigs mnyam pa las chung ma blangs so/ /de nas dus phyi zhig na khyim bdag de longs spyod zad par gyur to//khyim bdag des bdag ni rgas te nor bsgrub mi nus so snyam nas chung ma la bzang mo rab tu 'byung ngo zhes smras pa dang / mo na re jo bo de ltar bdag kyang rab tu 'byung ngo zhes byas pa dang / des de la de bzhin du bya'o zhes te/ gcig ni dge slong ma'i nang na rab tu 'byung ngo / /khyod ni dge slong pha'i nang na rab tu 'byung ngo //dus phyi zhig na dge slong de bsod snyoms la zhugs pa dang / des gos rnying pa mthong nas khyod la gos lta yod dam zhes smras pa dang / bdag la ma mchis so zhes smras pa dang / dge slong des rang gi sbyar ma byin no/ /des ston pas kun dga' bo la khyod song la dge slong dag de bzhin gshegs pa dang lhan cig tu ljongs rgyu bar dad pa rnams chos gos dang chos shig ces bka' stsal ba dang /kun dga' bos kyang de bzhin du bsgo nas ston pa 'khor dang bcas pa ljongs rgyu zhing gshegs so/ /de'i tshe na ston pa glang po che ltar g.yas phyogs su gzigs nas/dge slong zhig bla gos nyi tshe dang ljongs rgyu zhing 'gro pa gzigs so/ /de nas kun dga' bo la/ kun dga' bo dge slong dbyar gnas pa dag gis gos kyi rnyed pa med dam/ btsun pa rnyed pa mchis so/ /'o na ci'i phyir sbyar ma med par ljongs rgyur 'gro/btsun pa dge slong 'dis sbyar ma dge slong ma la btsal to/ /kun dga' bo ci dge slong ma gnyen ma yin pa'i dge slong la gos len tam/ btsun pa len to/ /de nas ston pas dge slong ma rnams la smad nas bslab pa'i gnas bcas so/ /yang dge slong ma gang gnyen ma yin pa'i dge slong las gos blangs na brjes pa ma gtogs te spang ba'i ltung ba'o//gnyen ma yin zhes bya ba ni snga ma bzhin no/ /gos zhes bya ba ni ldum bu sha na ka la sogs pa'o/ /len zhes bya ba ni nyams su blangs pa'o/ /brje ba ma gtogs zhes bya ba ni brje ba bkol ba'o//spang ba'i ltung ba zhes bya ba ni snga ma bzhin no/ /ltung ba ji lta bu zhe na gnyen ma yin pa la gnyen ma yin par 'du shes pa dang / gnyen ma yin nam zhes the tshom za zhing blangs na ltung ba'o/ /gnyen yin pa la ma yin par 'du shes pa dang /gnyen yin pa la gnyen yin nam ma yin zhes the tshom za bzhin blangs na nyes byas so/ /dge 'dun ma la dbul ba'i nang du gtogs pa dang / tshig snyan par smras te byin pa dang / bsnyen par rdzogs par bya ba la byin pa dang / rkun pos phrogs pa dang / rin gyis 'og tu byin pa dang / brjes te byin pa dang / grags pa dang / bsod nams chen po dang ldan pa la 'phags ma thugs brtse ba'i slad du bzhes shig ces chags pa med par phul te song na ltung ba med do/ /spang ba'i ltung ba lnga pa rdzogs so// //ston pa ma mnyan du yod pa na bzhugs so/ /de nas sbom dga' mo snga dro'i dus la bsod snyoms la zhugs te/khyim bdag gcig gis khyim der song ba de'i chung ma rgyan gyis bklubs nas sgo khang du 'dug pas/ sbom dga' mo mthong ba dang phyag 'tshal nas sbom dga' mos chos bshad do/ /de yang dad pa skyes nas ras yug cig gsol lo zhes byas pa dang /sbom dga' mos de la/ sang dag 'chi 'am sus shes kyis/ /de ring nyid du brtul te bya/ /'chi bdag sde chen de dang ni/ /bdag dang bshes pa ma yin no/ /zhes 'byung ba khyod kyis ma thos sam zhes bya ba nas/ khyim bdag gi chung ma'i bla gos blangs te byin pa'i tshig bshad byas nas song ngo //bram ze dang khyim bdag rnams ci'i phyir na dge slong ma gang sbyin pa des ma mgu ste/ de'i gos nan gyis phrogs zhes mi snyan par 'dzer to/ /de ltar gyur pa ston pa la gsol nas bslab pa'i gnas bcas so/ /yang dge slong ma gang gnyen ma yin pa'i khyim bdag gam/khyim bdag gi chung ma las gos blangs na spang ba'i ltung ba'o zhes bcas pa dang / dge slong ma mang zhig ljongs rgyu zhing dong ba las rkun pos bcom pa dang / de dag gis bsams pa/ ston pas gnyen ma yin pa'i khyim pa la slong du ma gnang snyam ste/de dag rim gyis mnyan du yod par phyin pa dang / dge slong ma dag gos bslangs nas de dag gis kyang so so nas gos kyis bshugs so/ /de ltar gyur pa ston pa la gsol nas/ bka' stsal pa/ dge slong ma rnams snga ma ni bcas pa'o/ /'di ni gnang ba ste bslab pa'i tshig bca'o//dge slong ma gang gnyen ma yin pa'i khyim bdag gam/ khyim bdag gi chung ma las gos slong na dus la bab pa ma gtogs te spang ba'i ltung ba'o/ /de'i dus ni 'di lta bu ste dge slong ma'i gos phrogs pa dang / gos brlag pa dang / gos tshig pa dang / gos rlung gis khyer ba dang /gos chus khyer ba'i 'di lta bu ni de'i dus so/ /khyim bdag ces bya ba ni skyes pa'o/ /chung ma zhes bya ba ni bud med do/ /de nyi du ma yin zhes pa ni snga ma bzhin no/ /gos zhes bya ba ni bal dang sha na ka la sogs pa'o/ /dus ma gtogs zhes pa ni dus bkol ba ste/rkun pos khyer zhes pa ni rkun po'am g.yon can gyis phrogs pa'o/ /brlag ces bya ba ni brlag gam brjed pa'o/ /tshig pa dang rlung gis khyer ba dang / chus khyer ba zhes bya ba ni de kho na'o/ /ltung bar 'gyur ba ni rin thang dang khru dang kha dog ste/ rin thang ni kAr ShA pa Na lnga ri ba zhig blangs te lnga ri ba thob na slong pa'i tshe nyes byas/thob na spang ba'i ltung ba'o/ /kAr ShA shA pa Na gzhan ni du ri ba slong ba de bzhin du sbyar/ kAr ShA pa Na lnga ri ba zhig blangs pa las lnga ri ba zhig thob na slong ba'i tshe nyes byas/ lhag par thob pa la nyes pa med do/ /kha dog sngon po zhig blangs te sngon po thob na blang pa'i nyes byas/thob na spang ba'i ltung ba'o/ /sngon po ji lta ba de bzhin kha dog gzhan dang stug po dang srab mo yang de bzhin no/ /gos sngon po zhig bslangs pa las ser po zhig thob na slong ba'i tshe nyes byas thob na nyes pa med do/ /khru gzhan yang de bzhin no//khru lnga blangs pa las lhag par thob na slong ba'i tshe nyes byas/ lhag par thob pa la ltung ba med do/ /kha tshar dang ras ma bslangs pa las ras yug gam ras chen thob pa la ltung ba med do/ /spang ba drug pa rdzogs so// //ston pa mnyan du yod pa na bzhugs so/ / de nas dge slong ma mang zhig rkun pos bcom mo/ /sbom dga' mos de dag la smras pa/ ston pas ni dge slong ma rkun pos bcom pa'i phyir gos slong du gnang na khyed ci'i phyir mi slong / de dag gis smras pa/ mi nus so/ /sbom dga' mos 'o na khyod kyi phyir ngas blang ngo / / de dag gis smras pa/ de ltar na slongs shig ces byas pa dang / sbom dga' mos de dag gi phyir bram ze dang khyim pa la chos bshad nas gos mang zhig bslangs te bzang po ni bdag gis khyer ngan pa ni dge slong ma dag la byin te/ de dag gos rnying pa 'tshems shing 'khod pa dang dge slong ma dag gis mthong nas smras pa/khyod kyis gos mang zhig thob ce na/ ci'i phyir gos rnying pa 'tshems/ dge slong ma dag gis smras pa/ khyed kyis ni thos par zad kyis nged kyis ni mthong mod kyis sbom dga' mos bzang po ni khyer ngan pa ni nged la byin no/ /de ltar gyur pa ston pa la gsol nas/ sbom dga' mo rnam pa du mas smad de bslab pa'i gnas bcas so/ /dge slong ma gos 'phrogs sam/ gos brlag gam/ gos tshig gam/ gos rlung gis khyer ram gos chus khyer yang rung / gnyen ma yin pa'i khyim bdag gam/ khyim bdag gi chung ma las gos slongs shig / gal te bram ze'am khyim bdag de dag dad pa can te dus kyi gos mang po 'bul la/ 'dod na dge slong ma des de las stod g.yogs dang smad g.yogs las gos lhag par ma len cig de las lhag par blangs na spang ba'i ltung pa'o/ /dge slong ma gos rkun mos khyer ram chus khyer ram zhes pa nas khyim bdag gi chung ma nye du ma yin pa'i bar du ni snga ma bzhin no//stod g.yogs las lhag par len ces pa ni rnam pa gnyis te/ dge slong ma dang khyim pa'o/ /khyim pa'i stod g.yogs ni ras khru bcu gnyis pa'o/ /smad g.yogs kyi ras ni srid du khru bdun zheng du khru gnyis so//dge slong ma stod g.yogs ni ras ma bsgos pa zhig na ni sbyar ma nyis rim dang / smad g.yogs srid du khru lnga zheng du khru do'o/ /de las lhag par bslangs zhes pa ni de las 'das pa'o/ /spang pa'i ltung ba ni snga ma bzhin no/ /ltung ba ji lta bu zhe na khyim pa'i stod g.yogs dang smad g.yogs blangs te/khyim pa'i stod g.yogs thob pa las lhag par blangs na bslang ba'i tshe nyes byas thob pa na ltung ba'o/ /dge slong ma stod g.yogs dang smad g.yogs kyang de bzhin no/ /khyim pa'i stod g.yogs dang smad g.yogs bslang ba ste thob na mi langs na ma slongs shig/lhag ma'ang ma byin cig/ dge slong ma'i stod g.yogs dang smad g.yogs blangs te/ thob na ma langs na slongs shig/ lhag na phyir byin cig/ gos spangs par gyur pa de ma spangs sam/ ltung ba ma bshags par gzhan zhig rnyed na/ de snga ma'i shugs kyis spang bar 'gyur ro//spang ba bdun pa rdzogs so// //ston pa mnyan du yod pa na bzhugs so/ /de na khyim bdag cig gzhan gyi chung ma dang nyal ba dang / chung mas ma nyal cig ces bsgo na ma btub nas chung ma yang skyes pa gzhan dag dang nyal bar gyur te/ khyim so kun ni zhig nas bran mo mngags gzhug pa gcig yod pa la/khyim so zhig go zhes zer nas gnyi gas rtag tu brdeg ste sdug bsngal bar 'gyur ro/ /dus phyi zhig na sbom dga' mos khyim bdag bza' shug de gnyis la chos bshad nas log par spyod pa btang ste skyabs su song / bslab tshig la bkod de langs te song ngo / /bran mos bsams pa cung zad bdag la legs pa'i dpal yon du gyur pa'ang sbom dga' mo dri ni yin na de la phan zhig phya'o snyam pa dang / de nas dus phyi zhig na chung ma na re jo bo sbom dga' mos ni bdag cag gnyis kyi dge ba'i bshes gnyen bgyis te dri ma dang phral nas bslab tshig la bkod na de la phan pa cung zad cig dbul bar bya'o zhes byas pa dang /khyim bdag gis ras yug cig bskon no zhes smras pa dang / bran mos thos te/ sbom dga' mo snga dro bsod snyoms la rgyu zhing khyim bdag der 'ongs pa dang 'phags ma dgyes pa skyed cig/khyim bdag pho mo gnyis kyis khyed la ras yug cig sbyin par byas so/ /de nas sbom dga' mo bran mo la yid ma ches bzhin du/ de gnyis kyi khyim du song nas bdag gis da dung ras de ma thob po zhes smras pa dang / khyim bdag gis bdag cag gis gsang ste bgros nas 'phags mas su la gsan zhes byas pa dang /sbom dga' mos nga rab tu byung nas yun ring du lon na de tsam yang mi shes sam zhes pa dang / de gnyis kyis ras yug de phul ba dang / ma mgu nas khyed gnyis ras yug 'di byin pa'i bsod nams ni yod la/spyad pa'i bsod nams ni med kyis 'di khyer la ras gzhan byin cig ces byas pa dang / khyim bdag gi chung mas khyol jo bo tshong dus nas ras bzang po zhig long la phul cig/ khyim bdag gis kyang sbom dga' mo khrid nas tshong dus su ras rin thang chen po zhig tshong ba las nyos nas sbom dga' mo la phul lo//tshong pa de yang dus tshang nas khyim bdag des rin thang chen po ma 'khor nas tshong pas bzung ba dang / dad pa'i bram ze dang khyim pa rnams 'phya nas de lta bur gyur pa ston pa la gsol nas bslab pa'i gnas bcas so/ /dge slong ma'i phyir khyim bdag gam khyim bdag gi chung ma gnyen ma yin pas gos kyi rin zhig spags nas bdag gis gos kyi rin 'dis 'di lta bu 'di 'dra ba'i gos zhig nyos la dge slong ma ming 'di zhes bya ba 'ongs na/de la gos rung ba dus su bskon no snyam pa las/ de la sngar ma bsgo bar gal te dge slong ma de rnam par rtog pa 'ga' zhig byung ste/khyim bdag gam khyim bdag gi chung ma nye du ma yin pa'i gan du song la/ bzang po 'dod pa'i phyir tshe dang ldan pa bdag gi phyir gang gos kyi rin spags pa'i gos kyi rin des tshe dang ldan pa gos 'di lta bu 'di 'dra ba zhig nyos la gos rung ba dus su bdag la bskon na legs so zhes smras te gos mngon du grub na spang ba'i ltung ba'o//dge slong ma'i phyir zhes bya ba nas khyim bdag ces pa'i bar du ni snga ma bzhin no/ /gos kyi rin zhes pa ni gser dang dngul la sogs pa'o/ /gos 'di lta bu 'di 'dra ba nyos zhes bya ba ni rgyu dang dbyibs brtags pa gang yang rung ba'o/ / dge slong ma ming 'di zhes bya ba 'ongs na zhes pa sbom dga' mo'o/ /de la gos rung ba bskon no zhes bya ba ni spyad du bzod pa'o/ /sngar ma bsgo zhes bya ba ni sngar ma sbran pa'o/ /rnam par rtog pa 'ga' zhig byung zhes bya ba ni 'di ltar slong bar 'gyur ba'o/ /gos kyi rin des gos 'di lta bu 'di 'dra ba nyos zhes bya ba ni bdun las gang yang rung ba'o//bzong po 'dod ces bya ba ni mchog 'dod pa'o/ /nyes pa ji lta bu zhe na rin dang kha dog dang khru tshad de gong ma dang 'dra'o/ /skud pa blangs pa las ras ma thob bam ras ma blangs pa las ras chen thob pa la nyes pa med do/ /spang ba brgyad pa rdzogs so// //ston pa mnyan du yod pa na bzhugs te/ bslab pa'i gnas bcas so zhes bya ba'i bar du gong ma bzhin te/ khyad par ni khyim bdag gam khyim bdag gi chung mas so so nas gos kyi rin zhig spags te zhes smos so/ /ltung ba lci yang khyad par gong ma dang 'dra ste/spang ba dgu pa rdzogs so// //ston pa mnyan du yod pa na bzhugs so/ /de'i tshe na sbom dga' mo snga dro rgyal po'i khab tu bsod snyoms rgyu ba las blon po bram ze dbyar byed kyi khyim du song ngo / /des dbyar byed la chos bshad pa dang / de yang chos la dga' bas kAr ShA pa Na drug cu gsol lo zhes byas pa dang /sbom dga' mos sbyin pa'i tshig bcad byas te song ngo / /dbyar zla ba gsum 'das te chos gos byas te dbyar byed kyi gan du song ste phyin pa dang / dbyar byed la mkhyen par mdzod cig bdag ni mnyan du yod par ston pa la phyag 'tshal du mchi'o zhes smras pa dang //'phags ma rgya mtsho'i pha rol du gshegs kyang pa Na drug cu bskur ro zhes byas pa dang / sbom dga' mos tshigs bcad byas te song ngo / /mnyan du yod par phyin pa dang / de nyid du dge slong ma'i dbyar mo thang na 'dug go/ /de nas dbyar byed kyis tshong pa la pa Na drug cu bskur te/tshong pa mnyan du yod pa na dge slong ma'i dbyar khang du phyin nas sbom dga' mo bzhugs sam zhes dris pa dang / dge slong ma dag gis bsod snyoms la song ngo zhes byas pa dang / tshong pa slar log ste bdag gis 'di lta bu zhig tu byon cig gsungs shig/ de nas song ba dang sbom dga' mos 'ongs pa la dge slong ma dag gis rgyas par smras nas/sbom dga' mos dge slong ma zhig khrid de song ba dang / tshong pas rgyang ring po nas 'ongs pa mthong nas 'di ni rings par 'ongs pa las na sbom dga' mo yin par nges so snyam mo/ /sbom dga' mo der 'ongs nas tshong pa la kAr ShA pa Na drug cu khyer te 'ongs sam smras pa dang tshong pas kyang phul lo//de nas tshong pa'i khye'u gsar du dad pa skyes pa zhig la gtams nas song ngo / /tshong pa'i khrims las nyi ma shar nas tshong dus su ma grams na kAr ShA pa Na drug cus chad pas gcod do//sbom dga' mos nang par kAr ShA pa Na byin cig ces byas pa dang / khye'us 'phags ma cung zad bzhes shig /sbom dga' mos de ltar mi rung gi byin cig ces gos kyi mtha' nas bzung ba dang / khye'u khros te kAr ShA pa Na phyung ste mdun du bor ba dang / sbom dga' mos smras pa/ grongs la byin cig khye'u bgrang ba la zhugs pa dang nyi ma shar nas kAr ShA pa Na drug cu phab po//de nas pha mas smras pa khyod kyis nor ji snyed cig bsgrubs nas kAr ShA pa Na drug cu bcal/ des smras pa shAkya'i dge slong ma la dad pa ni de ltar 'gyur ro/ /khyim pa dag gis rigs kyi bu dad pa skyes ma thag tu myu gu bcad do zhes 'phya zhing mi snyan par brjod do//de ltar gyur pa ston pa la gsol nas bslab pa'i gnas bcas so/ /dge slong ma'i phyir rgyal po'am blon po'am/ bram ze'am/ khyim bdag gam/ grong rdal gyi mi'am/ ljongs kyi mi'am/ nor can nam/ tshong dpon nam/ ded dpon gyis kyang rung / pho nya'i lag tu gos kyi rin bskur te/ pho nya khyod kyis gos kyi rin 'di 'dra ba 'di lta bu dus su rung ba'i gos shig nyos la/ dge slong ma ming 'di zhes bya ba 'ongs pa dang bskon cig ces bsgo ba las/ pho nya de yang gos kyi rin de khyer nas dge slong ma de ga la ba der song ste phyin pa dang /dge slong ma de la 'phags ma mkhyen par mdzod cig/ khyed la gos kyi rin 'di dag ni rgyal po'am/ blon po'am/ bram ze'am/ khyim bdag gam/ grong rdal gyi mi'am/ ljongs kyi mi'am/ nor can nam/ tshong dpon nam/ ded dpon ming 'di zhes bya bas bskur gyis 'phags ma thugs brtse ba'i slad du 'di dag bzhes shig ces de skad zer ba dang /dge slong ma des pho nya la tshe dang ldan pa pho nya dge slong ma dag ni gos kyi rin len du mi rung gi dus su rung ba'i gos shig rnyed na ni bdag cag len to zhes de skad smros shig/ gal te pho nya des dge slong ma de la gang 'phags ma rnams kyis zhal ta dang 'phags ma rnams la zhal tar bgyi ba lta ci mchis sam/de skad zer ba dang dge slong ma gos 'dod pas zhal ta byed pa bstan te/ kun dga' 'am/ dge bsnyen yang rung / 'di ni dge slong ma rnams kyi zhal ta ba ste/ 'di dag ni dge slong ma rnams la zhal ta byed do zhes byos shig/de nas pho nya des gos kyi rin de khyer nas zhal ta byed pa ga la ba der song ste phyin pa dang / tshe dang ldan pa zhal ta byed pa shes par gyis shig/ khyod kyis gos kyi rin 'dis gos 'di lta bu 'di 'dra ba zhig nyos la/ dge slong ma ming 'di zhes bya ba 'ongs pa dang gos rung ba dus su bskon cig ces de skad smras te/de nas pho nya des zhal ta byed pa la shin tu legs par bsgo zhing bstan nas/ dge slong ma de ga la ba der song ste phyin pa dang / dge slong ma de la 'phags mas zhal ta bgyid pa gang lags pa bstan pa de la bdag gis legs par bstan gyis de'i gan du bzhud cig dang /khyed la dus su rung ba bskon no zhes de skad zer ba dang dge slong ma gos 'dod pa zhal ta byed pa'i gan du song la tshe dang ldan pa zhal ta pa la bdag la gos dgos so/ /tshe dang ldan pa zhal ta pa bdag la gos dgos so zhes lan gnyis lan gsum du bskul cig/ dran par gyis shig/lan gnyis lan gsum du bskul zhing dran par byas nas gal te gos grub pa lta na ni legs gal te ma grub na lan bzhi lan lnga lan drug gi 'og tu snang ba'i phyogs su cang mi smra bar 'dug cig/ de ltar lan bzhi lan lnga lan drug gi 'og tu snang ba'i phyogs su cang mi smra bar 'dug nas/gal te grub na ni legs gal te ma grub na de'i 'og tu yang gos grub pa'i phyir brtsal te/ gos grub na spang ba'i ltung ba'o/ /gal te ma grub na phyogs gang nas gos kyi rin 'ongs pa der bdag 'gro bar bya'o/ /yang na yid brtan pa'i pho nya thong la tshe dang ldan pa khyod kyis dge slong ma ming 'di zhes bya ba'i phyir gang gos kyi rin bskur ba ste/dge slong ma de'i gos kyi rin yang ma grub kyis shes par gyis shig tshe dang ldan pa dag rang gi nor de chud ma gsan cig ces bsgo shig de la de'i dus yin no/ /rgyal po zhes pa ni rgyal rigs spyi bo nas dbang bskur pa'o/ /blon po zhes bya ba ni rgyal po la blo dang gros kyis 'tsho ba'o//bram ze zhes bya ba ni gtsang sbra can no/ /khyim bdag ni phyug po'o/ /ljongs zhes pa ni yul mi'o/ /nor can zhes pa ni bye ba snyed kyi phyug po'o/ /tshong dpon zhes pa ni thabs byin pa'o/ /ded dpon zhes pa ni 'dron pa mang po'i dpon po'o//pho nya'i lag tu bskur zhes pa ni mi rnam gsum mo/ /gos kyi rin zhes pa ni gser dang dngul lo/ /dus su rung ba'i gos zhes bya ba ni spyad du 'os pa'o gos 'dod pa'i dge slong ma zhes pa ni gos dgos par gyur pa'o/ /kun dga' ra ba zhes pa ni rung bar byed pa'o/ /dge bsnyen zhes pa ni skyabs su song ba'o//snang ba'i phyogs zhes pa ni bzhi ste/ rdza mkhan dang / 'dreg mkhan gyi gnas dang / khron pa'i drung dang / zhing las byed pa'i gnas tshong dus dang bzhi'o/ /bskul ba'i sgo drug ste/ khyod 'dir byon nam/ de'i phyir ro/ /bde bar byon tam/ don de'i phyir ro/ /gdan la bzhugs/bca' ba 'cho/ bza' ba zo/ /btung ba 'thung / don de'i phyir zhes pa dang drug ste/ de'i phyir don de ma go zhes zer na dngos su smros shig/ don de drug ma thos sam tshig zur gyis smras pas pha rol gyi tshig ma go na drug po go ba'i bar du smros shig/ yang na bdag po shig ces bya ba ni nye gnas sam 'gro ba dag 'gro ba'o//de ltar byas pa'i 'og tu zhal ta pas gos phul na thog ma'i nor bdag nyid la phul cig ces smros shig/ gal te zhal ta pas dge slong ma de la 'phags mas 'di bzhes shig dang bdag gis de'i sems mgu bar bya'o zhes zer na/ dge slong mas gos de long shig gal te dge slong mas rnam pa 'di lta bu rnams ma byas par bslangs na thams cad du spang ba'i ltung bar 'gyur ro//de la ltung ba ji lta bu zhe na mi ma yin pas byin te/ mi ma yin pas pho nya byas mi ma yin pas rung bar byas na nyes byas su 'gyur ro/ /mi ma yin pas pho nya byas mis rung bar byas na nyes byas/mi ma yin pas byin mis pho nya byas mis rung bar byas na nyes byas/ mis byin mis pho nya byas mi ma yin pas rung bar byas na nyes byas/ mi ma yin pas pho nya byas mis rung bar byas na nyes byas/ mis byin mis pho nya byas mis rung bar byas na spang ba'i ltung ba'o/ /spang ba'i ltung ba bcu pa dang po rdzogs so// //mdor bstan pa ni/ mi blang mtshan btab sna tshogs dang / /nyo zhing tshong bar byed pa dang / /lhan pa lnga med lhung bzed dang / /bdag bslangs legs par 'thag 'jug dang / /mi sbyin bsngos pa zhag bdun pa/ /ston pa mnyan du yod pa na bzhugs so/ / de'i tshe na dge slong ma bcu gnyis sdes rang gi lag gis sa le sbram dang dngul len cing len du 'jug/ phung po gcig tu byed/ phung po gnyis su byed/ khri dang khri'u'i steng du 'jog pa la bram ze dang khyim bdag 'phya ste/ dge slong ma mgo reg ma rang gi lag gis sa le sbram dang dngul len du 'jug ste/rab tu byung ba dag kyang de ltar byed na de dag khyim pa dang khyad par ci yod/ de dag la bsod snyoms sbyin par su zhig sems zhes mi snyan par 'dzer to/ /de ltar gyur pa ston pa la gsol nas bslab pa'i gnas bcas so/ /dge slong ma gang rang gi lag gis sa le sbram dang dngul len nam len du 'jug na spang ba'i ltung ba'o//dge slong ma zhes bya ba ni bcu gnyis sde'o/ /rang gi lag gis zhes pa ni lag nas lag gis so/ /sa le sbram dang dngul zhes pa ni gser dang dngul lo/ /len zhes pa ni bdag nyid do/ /len du 'jug ces pa ni gzhan gyi la'o//spang ba'i ltung ba zhes bya ba ni snga ma bzhin no/ /ltung ba ji lta bu zhe na/ bcwa brgyad de de la mngon sum du gyur pa dgu ste/ 'di long 'di nas long 'di tsam long / 'di zhog 'dir zhog 'di tsam zhog /'di khyer 'di nas khyer 'di snyed cig khyer/ 'di long zhes bya ba ni gser dang dngul lo//'di nas long zhes bya ba ni sgrom mam sgro ba 'am gzeb nas so/ /'di snyed long zhes bya ba ni srang brgya'am stong ngo / /mngon sum du gyur pa 'di dgu la 'di long zhes bsgo na spang bar 'gyur ro/ /mngon sum du ma gyur pa dgu yang gong du mngon sum du gyur pa dgu la gong du gsum bshad pas 'og ma drug kyang de bzhin rig par bya ba bzhin du mngon sum du ma gyur pa dgu yang de bzhin du sbyar te/de nas long zhes bsgo na nyes byas su 'gyur ro/ /gser dang dngul dang mu tig dang bai DUr+ya dang dung dang shel dang sa le sbram dang asma gar+b+ha la reg na ltung ba'o/ / zangs kyi dong tse mtshan mas btab pa sdom pa la reg na nyes byas/ lcags dang zangs dang khar ba dang ro nye dang tshon mo steng la reg na nyes pa med do/ /tha na sog ma'i phreng ba dang nor bu ma phug pa dang mthing bu la reg na nyes byas so/ /ston pa mnyan du yod pa na bzhugs te/yul tsam pa na khyim bdag dad pa bzang pos byin zhes bya ba'i gtsug lag khang dge slong ma dag cig tshul du zhugs te/ dbyar tshul nas 'byung kar bdag cag ni ston pa la phyag 'tshal du 'dong gis gos stsol cig ces pa dang / 'phags ma gos bzang po ma mchis te/tshong pa 'ong ba la skad cig cung bzhes shig/ de las bzang po 'jal te gsol lo zhes byas pa dang / med na gos ngan pa'ang rung gis byin cig/ bdag ni bzang po sbyin na ngan pa gsol du mi rung ste/ khyed ring na na bza'i rin kAr ShA pa Na snoms te/ bzhud cig ces pa dang /bdag cag kAr ShA pa Na len du bcom ldan 'das kyis ma gnang ngo zhes dong ngo / /dge slong ma rnams kyis smras pa/ khyed gos ngan na ci nyes zhes pa dang / dge slong ma dag gis rgyas par smras so/ /de ltar gyur pa dge slong ma dag gis bcom ldan 'das la rgyas par gsol to//bcom ldan 'das kyis bka' stsal ba/ khyim bdag gam bram ze la gos kyi rin long shig bslangs nas sbyin bdag gam zhal ta pa la bsngos shig par rjes su gnang ba bcas so/ /zhal ta byed pa yul gzhan du song na yang de nyid la brten par bya'o/ /dge slong mas mi rung ba zhig rnyed na long la dge slong ma'i mdun du byin gyis rlobs shig dgongs shig bdag ming 'di zhes bgyi bas mi rung ba'i dngos po 'di lta bu zhig rnyed pas/rung ba'i dngos po bsgrubs so/ /de bzhin lan gnyis lan gsum du'o/ /spang ba bcu gcig pa rdzogs so// // ston pa mnyan du yod pa na bzhugs so/ /de'i tshe na bcu gnyis sde mtshan mas btab pa sna tshogs la spyod de/ sbyor bar byed/ spel bar byed/ 'phel bar byed/ sgyur bar byed/ brdungs pas brdungs pa nyo/ /brdungs pas ma brdungs pa nyo bas khyim pa dag smod cing mi snyan pa 'dzer to//de ltar gyur pa ston pa la gsol nas bslab pa'i gnas bcas so/ yang dge slong ma gang mtshan mas btab pa mang por sgyur bar byed na spang ba'i ltung ba'o/ /dge slong ma zhes pa ni snga ma bzhin no/ /rnam pa mang po zhes pa ni mtshan mas btab pa'o/ /mang por spyod par byed ces pa ni gser dngul lo//spang ba'i ltung ba ni snga ma bzhin no/ /ltung ba ji lta bu zhe na spyod pa zhes bya ba ni yul phyogs tshol zhing rta tshol yul phyogs su brin pa'i zong rnams rdzong ngo / /gsel ba'i rnams tshol/ gro ba dang ras phyis dang smyi gu tshol zhing skyed tshol nam grub kyi bar du nyes byas/grub na ltung ba'o/ /spel ba ni brgyad ka dang bdun ka dang bcu kar gtong zhing gong ma bzhin du ma grub kyi bar du nyes byas/ grub na spang ba'o/ /'phel bar byed pa na 'phral du ba dang / rkang so dang gyur du gtong zhing snod dang yi ge tshol ba'i bar du gong ma bzhin te nyes byas dang ltung ba yang gong ma dang 'dra'o//sgyur bar byed pa ni nor bu bre gang mu tig bre gang du gtong ba dang / mu tig bre gang nor bu bre gang du gtong zhing spang ba dang zhes bya ba nas spang ba'i bar du snga ma bzhin no/ /brdungs pas brdungs pa nyo zhes bya ba ni mtshan mas btab pa'i gser gyis mtshan mas btab pa'i gser tshol ba ste/gzhan yang de bzhin du rig par bya'o/ /ston pas de ltar bslab pa'i gnas bcas pa dang / dge slong ma'i gtsug lag khang zhig par gyur te sbyin bdag 'ongs nas 'phags ma ci'i phyir gtsug lag khang zhig par gyur/ dge slong ma dag gis gtsug lag khang gi bdag po dus las 'das so zhes smras pa dang /de dag gis dge slong ma'i gtsug lag khang zhig pa gso ba'i phyir mtshan mas btab pa mang zhig dge slong ma la phul te/ 'phags ma bdag gis mi zad par bgyi ba 'di spel la khe ci mchis pa gtsug lag khang gi las gsar pa gyis shig ces de la byin no//dge slong ma dag gis de sbas pa dang bka' stsal pa/ dge slong mas spel cig de dag gis dbul po dag la byin pa dang / slar ma khugs nas ma dad pa dang / dge bsnyen dbul po la ma sbyin par gta' nyi rim zho ga la tshes grangs kyang dri bar byos la zla ba re re zhing skyed kyang longs shig/des ni las sar pa byos shig/ dge slong mas kun tu spyod pa'i chos bcas pa bzhin du ma byas na 'das pa dang bcas par 'gyur ro/ /spang ba'i ltung ba bcu gnyis ba rdzogs so// // ston pa mnyan du yod pa na bzhugs so/ /de'i tshe na bcu gnyis sde mtshan mas btab pa rnam pa mang pos nyo zhing tshong pa la zhugs te skyed cing 'byin par byed/ nyo zhing 'tshong bar byed do/ /ji ltar skyed par byed ce na/ gal te grong dang grong khyer na rin thang che la yul phyogs na rin thang chung na de'i tshe de nas nyo zhing 'dren no//ji ltar 'byin par byed ce na/ nam grong khyer na rin thang chung bar gyur la yul phyogs na rin thang che na de'i tshe der 'byin to/ /de bzhin du lo legs pa'i tshe nyos la mu ge byung ba'i tshe 'tshong ba dang / bram ze dang khyim bdag rnams 'phya zhing mi snyan par 'dzer to//de ltar gyur pa ston pa la gsol nas bcu gnyis sde la khyed kyis de 'dra ba mi mdzes pa byas pa bden nam zhes bka' stsal pa dang / btsun pa mad do zhes gsol nas rnam pa du mas smad de bslab pa'i gnas bcas so/ /yang dge slong ma gang rnam pa du mar nyo zhing 'tshong bar byed na spang ba'i ltung ba'o//rnam pa du ma zhes bya ba ni rnam pa mang por nyo zhing 'tshong ba'o/ /byed ces bya ba ni de bzhin sbyor ba'o/ /gzhan ni gong ma bzhin no/ /de la ltung ba ji lta bu zhe na khe'i phyir nyo khe'i phyir 'tshong na de la nyo ba'i tshe nyes byas/ 'tshong na spang ba'i ltung ba'o/ /khe ma yin pa'i phyir nyos la/khe ma yin pa'i phyir 'tshong na nyes pa med do/ /khe'i phyir nyos la khe ma yin pa'i phyir 'tshong na nyo ba'i tshe nyes byas so/ /'tshong ba la nyes pa med do/ /khe ma yin pa'i phyir nyos la khe'i phyir 'tshong na nyo ba'i tshe nyes pa med do/ /'tshong na spang ba'i ltung ba'o/ / yul gzhan du sbyor zhing sdun gyi bu lon 'jal lo snyam pa la nyes pa med do/ /spang ba'i ltung ba bcu gsum pa rdzogs so// //ston pa mnyan du yod pa na bzhugs so/ /de'i tshe sbom dga' mo snga dro bsod snyoms la zhugs so/ /de'i tshe na dri 'tshong ba'i khye'u zhig la lhung bzed zlum po yongs su dang ba spyad du bzod pa zhig yod do//sbom dga' mos mthong nas su'i zhes smras pa dang / dri 'tshong ba'i khye'us 'di bdag gi lags so zhes byas pa dang / de ltar nang la ci'i phyir mi sbyin/ khye'u na re rin gyis 'jal na rung ngo / /nga la rin med kyi skyes bu sa'i lhung bzed kyis gser gyi lhung bzed rnyed nad 'gyod du ci yod ces 'byung ba ma thos sam/pham par mi 'gyur gyis tshur lta/ khye'us lhung bzed ma ster ba dang / tshong dpon zhig der 'ongs pas phyag byas pa dang / khyod kyi phyag skom pos ci rung zhes pa dang / tshong dpon gyis lhung bzed kAr ShA pa Na drug cus nyos te sbom dga' mo la phul lo//de la sbyin pa'i tshigs bcad byas nas dri 'tshong ba la skyes bu dam pa 'dis kAr ShA pa Na 'di snyed cig byung ba la ltos/ khyod ni ser sna byas pas yi dags lkog rlon por skye bar 'gyur ro zhes byas nas dbyar mo khang du song ste lhung bzed spyom zhing 'dug pa dang /de ltar gyur pa ston pa la gsol nas bslab pa'i gnas bcas te yang dge slong ma gang lhung bzed lhan pa lngar ma tshang ba rtag tu spyod du bzod pa yod bzhin du bzang po 'dod pa'i phyir/ gzhan btsal na spang bar 'gyur ro/ /de ltar bslab pa'i gnas bcas pa dang /dge slong ma zhig bsod snyoms spyod pa'i lhung bzed zag pas sbrang ma 'dus pa dang / bus pa dag gis bskor nas 'phags mas 'khor mang po'i las byas pa la ltos zhes 'dzer to/ /mgon med zas sbyin gyis mthong nas 'phags mas zhal nas gsungs ba ni bzang na mi bzang bar byed pa 'di ci zhig/dge slong mas smras pa khyim bdag kho mos mi bzang ba ci byas/ 'o na ci'i phyir khyod bus pa rnams kyis bskor zhing 'gro/ /kho mo'i lhung bzed zag go/ /gzhan ci'i phyir sbyar/ ston pas lhung bzed spyad bzod pa yod bzhin du gzhan tshol du ma gnang ngo //de ltar gyur pa ston pa la gsol nas bka' stsal pa/ lhung bzed zag pa lhan pa lngas glon cig/ /'jog 'jog po dang gzer bu dang / rus sbal gyi so lta bu dang / leb leb po dang / lcags phyes so/ /lcags phye ni 'bru mar dang bsres la me la bsreg par bya'o/ / zhes gsungs so/ /de nas dge slong ma zhig lhung bzed dum bu lngar gyur pa dang / skud pas btsems nas rung bar byas te bsod snyoms la 'gro'o/ /zan zos nas yang slar skud pa bkrol te rung bar byas te 'jog pa dang / dge ba'i bar chad du gyur pa dang / de ltar gyur pa ston pa la gsol nas bka' stsal pa snga ma ni bcas pa'o//'di ni rjes su gnang ba'o zhes bslab pa'i gnas bcas so/ /dge slong ma gang lhung bzed lhan pa lnga las lhag par rung bar spyad du bzod pa yod bzhin du bzang po 'dod pa'i phyir lhung bzed gsar pa gzhan btsal te lhung bzed grub na spang ba'i ltung ba'o//dge slong ma des lhung bzed de dge slong ma'i 'khor du brims la/ dge slong ma'i 'khor na gang gi lhung bzed tha mar gyur pa dge slong ma de la dge slong ma khyod kyis lhung bzed 'di tha mar chag pa la thug gi bar du byin gyis brlabs par mi bya/ bskur bar mi bya/ gzhan la sbyin par mi bya'i/ bags kyis dal bus spyod cig ces sbyin te de la ni dus yin no/ /lhan pa lnga las nyung ba ni sngar ma chog pa'o/ /lhung bzed ces bya ba ni byin gyis brlabs pa ste spyad du bzod pa'o/ /lhung bzed gzhan tshol zhes bya ba ni gnyis pa'o/ /bzang po 'dod ces bya ba ni mchog 'dod pa'o//lhung bzed grub ces bya ba ni lhung bzed rnyed pa'o/ /dge slong ma des zhes bya ba ni dge slong ma gang yin pa'o/ /lhung bzed ces bya ba ni lhung bzed lhag mar gyur pa'o/ /dge slong ma'i 'khor du phul cig ces bya ba ni lhung bzed 'brim pa'i dge slong ma chos lnga dang ldan pa gsol ba dang gnyis kyi las kyis bskos la/gnas brtan nas brims la kun gyi tha mar gyur/ lhung bzed do dge slong mas byin gyis ma brlabs bar ma bskur bar tha ma chag pa la thug gi bar du bags kyis spyod cig ces byin cig /des kyang lhung bzed kyi snod gnyis byos la/gang bzang ba'i nang du byin gyis ma brlabs pa'i lhung bzed chug cig /gang ngan pa'i nang du byin gyis brlabs pa chug shig /kha zas bzang ba dang 'jam pa dang snod la mi gzan na ni byin gyis ma brlabs pa'i nang du chug shig /ngan pa dang rtsub mo ni byin gyis brlabs pa'i nang du chug shig /khyer ba'i mi yod na byin gyis brlabs pa de la bskur cig /lhan pa med pa ni bdag nyid khyer cig /khyer ba med na ni phrag pa g.yas pa la ni byin gyis brlabs pa khyer cig /phrag pa g.yon pa la ni ma glan pa thogs shig /tha ma chag pa spyad du mi rung ba'i bar du chongs shig /spang ba'i ltung ba zhes bya ba ni snga ma bzhin no/ /nyes pa ji lta bu zhe na dge slong mas lhung bzed rdol ba lhan pa gcig glan pas spyad du bzod pa mi glon par lhung bzed spyad du bzod pa yod bzhin du lhung bzed gzhan tshol na nyes byas rnyed na spang ba'i ltung ba'o/ /de bzhin du lhan pa lnga'i bar du'ang de dang 'dra'o//dge slong mas lhung bzed rdol bar gyur te/ lhan pa gcig gis spyad bzod pa de glan te/ de ltar lhung bzed spyod du yod bzhin du lhung bzed gzhan tshol na nyes byas so/ /rnyed pa spang ba'i ltung ba'o/ /de bzhin du lhan pa bzhi'i bar du gong ma dang 'dra'o//dge slong mas lhan pa lngas glan pa'i rigs pa des/ glan kyang rung / ma glan kyang rung / lhung bzed gzhan tshol na nyes pa med do/ /rin gyis nyos sam/ brjes te rnyed na nyes pa med/ las dang po pa la sogs pa la nyes pa med do/ /spang ba'i ltung ba bcu bzhi pa rdzogs so// //ston pa mnyan du yod pa na bzhugs so/ /de nas sbom dga' mo 'di snyam du sems te/ ston pas bslab pa'i gnas bcas te rnyed pa cung zad kyang bsgrub tu med do snyam nas/ mnyan du yod pa'i shar phyogs kyi sgo na yugs sa mo lnga brgya tsam ras kyi skud pa 'khal zhing 'khod do//de dag gi thad du song ba dang / de dag gi nang nas gcig langs te stan bting nas phyag byas te phyogs gcig tu 'dug go /sbom dga' mos de dag la chos bshad pa la zhugs te/ khyed sngon dge ba'i las byas pas mir skyes na de yang 'jig rten phyi ma'i rgyags zong mi sgrub bam/de dag gis smras pa/ /'o na ci zhig bka' stsal/ khyod kyis dge 'dun ma la bshos stsol zhing gos re re bskon nus sam/ 'phags ma mi 'byor to/ /'o na bcu gnyis sde la dbul nus sam/ 'phags ma mi nus so//'o na nga gcig pu la dbul nus sam mi nus so/ /'o na khyed thams cad kyis nga la skud pa zho gnyis gnyis 'bul nus sam/ de ni nus so zhes smras pa dang / de dag gis skud pa zho gnyis gnyis byin te sbom dga' mos thag pa chung mar bcas pa zhig 'dug pa de la ras de thogs shig ces byas pa dang /des kyang btags te sbom dga' mo la byin no/ /sbom dga' mo mnyan du yod pa'i lho dang byang dang nub phyogs su song nas/ /de bzhin du skud pa blangs nas thag pa'i gan du song nas 'thag tu bcug pa dang / tha ga pas smras pa ras snga ma yang bu lon skyin po byas te zos pa yang da rung ma 'khor bas na 'thag mi nus so zhes bya ba dang /sbom dga' mo khros nas btsun mo phreng ldan ma la gsol pa dang / blon po chen po zhes bya ba gtang ngo / /de nas kyang skud pa blang nas rang rta la bskur to/ /tha ga pa spyi cher 'thag tu chug pa dang /tha ga pas skud pa ngo shes nas mi 'thag go zhes byas pa dang / sbom dga' mos blon po chen po la btson rar gzhug par rigs so zhes byas pa dang / des kyang de bzhin du btson rar bcug pa dang / tha ga pa skrag nas ras btags te sbom dga' dga' mo la byin pa dang /rngan pa byin du re ba las ma byin pa dang smod cing mi snyan pa zer ro/ /de ltar gyur pa ston pa la gsol nas bslab pa'i gnas bcas so/ /yang dge slong ma gang bdag nyid kyis bslangs pa'i skud pa gnyen ma yin pa'i tha ga pa la gos 'thag tu bcug na spang ba'i ltung ba'o//bdag nyid kyis bslangs pa ni rang gis bslangs pa'o/ /skud pa zhes pa ni kha cig gis ni zho gcig kha cig gis ni srang phyed kha cig gis ni zho gnyis byin pa'o/ /gos zhes bya ba ni bdun las gang yang rung ba'o/ /'thag tu bcug ces bya ba ni dngos po zin par byed pa'o//ltung ba ji lta bu zhe na gnyen ma yin pa las bslangs/ gnyen ma yin pa la 'thag tu bcug na bslangs pa'i tshe nyes byas so/ /'thag pa la ltung ba med do/ /gnyen ma yin pa las bslangs ba dag gis btags na nyes byas gnyis so/ /gnyen ma yin pas btags na spang ba'i ltung ba'o//dge slong mas gnyen la skud pa bslangs te/ gnyen ma yin pas btags na spong ba'i ltung ba'o/ /des te gnyen gyis btags na nyes pa gnyi ga med/ des te bdag gis btags na nyes byas gcig tu zad do/ /rngan pa byin te 'thag tu bcug pa dang las dang po pa la nyes pa med do//spang ba'i ltung ba bco lnga ba rdzogs so// //ston pa mnyan du yod pa na bzhugs so/ /sbom dga' mos khyim bdag bza' shug skyabs su 'gro ba'i tshig la bkod pa dang / de gnyis kyis 'phags ma sbom dga' mo la ras shig bskon no snyam nas de dag gis thag pa la skud pa byin nas 'thag tu bcug pa sbom dga' mos thos nas/thag pa'i gnas su song ste smras pa/ bzhin bzangs ras 'di ni kho mo'i phyir 'thag gis legs par thogs shig ces bsgo'o/ /de nas btsun mo phreng ldan ma la bsod snyoms blangs nas des kyang bdag chos bzhin dgus sbom dga' mo'i lhung bzed bkang ste byin no//sbom dga' mos song ste thag pa la byin nas gos 'di nga'i yin gyis/ srid dang zheng 'di tsam byos la legs par thogs shig ces smras nas song ngo / /de nas sbom dga' mo nyin gcig bzhin lan gsum der 'ongs te tha ga pas 'phags ma skud pa bas so/sbom dga' mos smras pa khyim bdag de'i khyim du song la longs shig ces bsgo ba dang / tha ga pas kyang skud pa bas so zhes khyim bdag las lan gsum gyi bar du bslangs pa dang /khyim bdag gis ras bzang po mthong nas sbom dga' mo la mi sbyin par bshams pa dang / tha ga pa la nga khyim bdag gi khyim der 'dug pa'i tshe khyer te shog shig ces smras nas sbom dga' mo khyim bdag la chos 'chad cing 'dug go/ /tha ga pas ras de khyer te der 'ongs pa dang khyim bdag gis skad cig ma 'ongs shig pa'i brda byas pa dang /tha ga pas ras de sbom dga' mo la bstan nas des kyang blangs te sbyin pa'i tshigs bcad byas pa dang / khyim bdag mos tshur stsol tshul bzhin bgyis la 'bul lo/ /des smras pa tshul bzhin ji lta bu/ bshos gsol lo/ /sbom dga' mos ci bdag la ngan pa cig bskon par sems sam/ 'di kha dog bsgyur dgos zhes byas nas ras khyer te song ngo / /tha ga pas khyim bdag la bdag la rngan pa byin cig /des smras pa ras de su la byin pa der rngan pa slongs shig /sbom dga' mo la bdag la rngan pa stsol cig byas pa dang / sbom dga' mos nga'i bag chos dang / mar dang / bu ram brtsis na khyod kyis slar nga la mang du 'bul bar 'gyur ro zhes byas nas gnyi gar yang re ba chad nas tha ga pa 'phya ste/ gang la phan du re ste byas pas de slar gnod par gyur to zhes mi snyan par 'dzer to//de ltar gyur pa ston pa la gsol nas bslab pa'i gnas bcas so/ /dge slong ma'i phyir gnyen ma yin pa'i khyim bdag gam khyim bdag gi chung ma zhig gis gnyen ma yin pa'i thag pa la gos 'thag tu bcug pa las/dge slong ma de la gal te sngar ma bsgo bar de rnam par rtog pa 'ga' zhig byung nas gnyen ma yin pa'i tha ga pa'i gan du song ste tshe dang ldan pa tha ga pa shes par gyis shig /gos 'di bdag gi phyir 'thag gis/ tshe dang ldan pa thag pa gos 'di thag ran pa bzang ba dang / yug khyim che ba dang /'jur mdud med par thogs la bcags na legs so/ /tshe dang ldan pa tha ga pa 'di lta ste/ ngas bza' ba'am bca' ba'am zas kyi rin cung zad cig sbyin no zhes de skad smras nas/ gal te dge slong ma des gos bsgrub pa'i phyir/ 'di lta ste bza' ba'am/ bca' ba'am kha zas kyi rin cung zad cig byin te/ gos grub na spang ba'i ltung bar 'gyur ro/ /gzhan ni dngos su zad/ sngar ma bsgo zhes pa ni mgron du ma bos pa'o/ /de rnam par rtog pa 'ga' zhig byung zhes bya ba ni bran mo las thos pa'o/ /yug khyim che zhes bya ba ni/ zheng 'di tsam chur 'di tsam mo//'jur mdud med ces pa ni dngos so/ /chogs shig pa ni 'jam pa dang stug pa dang chags bzang po'o/ /bza' ba dang bca' ba zhes bya ba ni lnga'o/ /kha zas kyi rin zhes bya ba ni bza' ba lnga'o/ /gos bsgrub pa'i phyir zhes pa ni thob par bya'o/ / gos grub pa zhes bya ba ni thob pa'o/ /ltung ba ji lta bu zhe na/ dge slong gis gos bsgrub pa'i phyir chas nas bza' ba dang bca' ba la sogs pa tha ga pa la byin te gos ma grub kyi bar du nyes byas so/ /grung na spang ba'i ltung ba'o/ /phyogs 'di lta bu zhig na gos 'thag gis de la byos shig ces byas na ltung ba med do//las dang po pa la sogs pa ni snga ma bzhin no/ /spang ba'i ltung ba bcu drug pa rdzogs so// //ston pa mnyan du yod pa na bzhugs so/ /sbom dga' mos slob ma la gos byin nas smras pa tshur shog lhan cig ljongs rgyu zhing spyod du 'dod do zhes bya ba las der 'gror mi btub nas sbom dga' mos chos gos phrogs so//de ltar gyur pa ston pa la gsol nas bslab pa'i gnas bcas so/ /yang dge slong ma la chos gos byin te/ de'i 'og tu khros 'khrugs rngams te mi dga' bar gyur slar phrogs sam 'phrog tu bcug kyang rung dge slong ma khyod la gos 'di mi sbyin gyis slar byin cig ces de la de skad kyang smras na dge slong ma des chos gos de'i lhag ma yod pa slar byin te bgos na spang ba'i ltung ba'o//gos zhes bya ba ni bal la sogs pa bdun no/ /byin pa zhes bya ba ni byin pa'o/ /de'i 'og tu zhes bya ba ni dus gzhan du'o//khros 'khrugs rngams te zhes bya ba ni 'khrug pa ma zhi ba'o/ /lhag ma yod ces bya ba ni de lhag ma ji tsam yod pa'o/ /byin cig ces bya ba ni gtan spang ba'o/ /spang ba'i ltung ba zhes bya ba ni snga ma bzhin no/ /ltung ba ji lta bu zhe na lus kyis 'phrogs pa dang /ngag dang lus gnyi gas phrogs pa'o/ /lus kyis drangs te gos kyi mtha' dang lus su ma bral gyi bar du nyes byas so/ /lus dang bral na ltung ba'o/ /ngag gis phrogs na yang de bzhin no/ /khyim pa 'phrog tu bcug na nyes byas/ lus dang bral na ltung ba dge slong ma gang gis dge slong ma la byin pa/dge slong ma gang gis 'phrog tu bcug na ltung ba'o/ /lus dang ma bral gyi bar du nyes byas re re/ /lus dang bral nas phrogs pa ni ltung ba'o/ /'phrog tu bcol ba la nyes byas/ dge slong ma 'phrog tu bcug na ltung ba'o/ /lus dang ma bral na gnyi ga nyes byas/bral na dge slong ma la ni nyes byas/ 'chol ba la ni ltung ba'o/ /don gzhan dang 'dul ba'i phyir na nyes pa med do/ /gzhan gang zhe na slob dpon dang mkhan pos slob ma 'jigs pa dang bcas pa'i sa phyogs sam dus ma yin pa'am chu ngogs sam g.yang sa lta bur 'gro ba las chos gos phrogs na nyes pa med do//'dul ba'i phyir zhes bya ba ni slob ma sdig pa'i grogs po la brten tam/ de dang lam du 'gro bar 'gyur ba las bzlog pa'i phyir chos gos phrogs pa la nyes pa med/ las dang po pa la nyes pa med do/ / spang ba'i ltung ba bcu bdun pa rdzogs so// //ston pa mnyan du yod pa na bzhugs so/ /de'i tshe na dge slong ma ut+pa la'i kha dog mas khyim bdag cig log par lta ba las phral te/ skyabs su song ba'i bslab tshig la gzhag go/ /dge slong ma dag gis 'phags ma khyod kyis khyim pa gang zhig bslab tshig la gzhag ces dris pa dang 'di'o//kho mo cag gis ni de la sngan chad bslangs pa gzar bu gang yang thob pa myong ngo / /ut+pa la'i kha dog mas smras pa/ gal te nus na dge slong ma'i dge 'dun la bshos sbyar du gzhog go zhes smras nas/ khyim bdag de'i gan du song ste khyod kyis dge 'dun ma'i bshos sbyar nus sam zhes smras pa dang /des kyang sbyor ro zhes smras so/ /ut+pa la'i kha dog mas ci gos dang bcas pa sbyor ram gos med par sbyor zhes smras pa dang / khyim bdag gis dge 'dun bshos gsol nas ras yug gcig 'bul lo zhes smras nas dge 'dun ma spyan drangs te de'i nub mo bza' ba dang bca' ba sbyar ro//de lta bu sbom dga' mos thos nas ras zung gcig po de ngas ma thob na sbom dga' mo ma yin no zhes smras nas khyim bdag gi gan du song nas phyin pa dang / khyim bdag gis ci dang ci sbyor ba zhib tu smras pa dang /sbom dga' mos khyim bdag khyod sbyin pa'i bsod nams ni yod na/ spyad pa'i bsod nams ni med mod kyi/ shAkya'i bu rab tu byung ba sde snod gsum dang ldan pa cig la byin cig /khyim bdag gis de lta bu yon tan dang ldan pa ni khyod lags kyis snoms shig /sbom dga' mos bsams pa de'u re bskur na ni mi rigs par 'gyur snyam/ dge 'dun ma la bshos gsol zin nas/ khyod ras de rgan rims nas ston la kho mo'i pang du 'or cig ces bsgo ba dang / khyim bdag gis kyang phyi de nyin dge slong ma'i dge 'dun bshos gsol nas rgan rims nas ras zung re bstan nas sbom dga' mo'i pang par gzhag go//dge slong ma gos [(]'ged [,]'gebs [)]pas sbom dga' mo la ras zung de tshur stsol dang bsgo bar bya'o/ /sbom dga' mos ras de ni nga la khyim bdag gis byin no zhes smras pa dang / dge slong ma dag gis khyim bdag la smras na mad do zhes gsol ba dang /dge 'dun ma'i rnyed pa gang zag bdag gir bsngos so zhes mi snyan par 'dzer to/ /de ltar gyur pa ston pa la gsol nas bslab pa'i gnas bcas so/ /yang dge slong ma gang dge 'dun la bsngos pa'i rnyed pa gang zag bdag gir bsngos na spang ba'i ltung ba'o//yang dge slong ma gang zhes bya ba ni sbom dga' mo'o/ /dge 'dun gyi zhes bya ba ni de bzhin gshegs pa'i nyan thos kyi dge 'dun no/ /rnyed pa zhes bya ba ni rnyed pa la rnam pa gnyis te/ kha zas rnyed pa dang gos kyi rnyed pa'o/ /skabs 'dir ni gos kyi rnyed pa la bya'o//bsngos zhes bya ba ni yongs su grub pa'o/ /bdag nyid kyir bsngos zhes bya ba ni rang gi ched du'o/ /spang ba'i ltung ba ni snga ma bzhin no/ /ltung ba ji lta bu zhe na/ dge slong mas dge 'dun la bsngos pa'i rnyed pa gang zag bdag gir bsngos na spang ba'i ltung ba'o/ /gang zag gcig la bsngos pa gang zag gzhan la bsngos pa nas gcig la bsngos pa gnyis kyis bsngos pa la sogs te/dge 'dun sde gnyis gcig las gcig tu'am thun mong pa las gcig tu'am/ sku gzugs dang mchod rten gyi yan lag gang la bsngos kyang rung ste/ gcig la gcig tu bsnor ba ni bsngo ba'i tshe nyes byas/ thob pa yang nyes byas dang po'o/ /spang ba'i ltung bar gyur pa ma gtogs pa gzhan bsnor ba thams cad kyang sbyor ba'i tshe nyes byas dang thob na yang nyes byas so/ /dge slong mas pham babs bza' ba'i rnyed pa gcig la bsngos pa gzhan la bsngos pa dang /byol song gcig la bsngos pa gzhan la bsngos na nyes byas su 'gyur ro/ /btsal te ma rnyed na nyes pa med do/ /bskyis pa thang bzhin du bsags pa dang brnyan por byin pa la nyes pa med do/ /spang ba'i ltung ba bco brgyad pa rdzogs so// //ston pa mnyan du yod pa na bzhugs so/ /de'i tshe na gau ta ma skye dgu'i bdag mo'i lhan cig spyod pa dang nye gnas rnams sman gang yang rung ste/ de nas blangs de nas yang slar blangs/ zas phye ma dang 'dres pa phan tshun 'dres pa rang gi rgyud kyis myags nas gang dbyer mi rtog pa de lta bu dus dang dus ma yin par za bas na de ltar gyur pa ston pa la gsol nas bslab pa'i gnas bcas so//bcom ldan 'das kyis dge slong ma na ba rnams la gang phan pa'i yi ga 'byed pa'i sman gsungs pa 'di lta ste/ mar dang / 'bru mar dang / sbrang rtsi dang / bu ram ste de dag 'dod na dge slong ma rnams la zhag bdun du byin gyis brlabs la spags pa yongs su spyad pa bzhin du bza' bar bya'o/ /de las 'das par zos na spang ba'i ltung ba'o/ /dge slong ma zhes bya ba ni chos 'di la zhugs pa'i rnams so/ /na ba'i rnams zhes bya ba ni mi bde ba rnams la'o//phan pa'i yi ga 'byed ces bya ba ni sman dang mthun pa'o/ /mar dang / 'bru mar dang / sbrang rtsi dang / bu ram zhes bya ba ni dngos su zad do/ /'dod na zhes bya ba ni dgos par gyur pa'o/ /dge slong ma des zhes bya ba ni gang na bar gyur pa'o/ /rang gis byin gyis rlobs shig ces bya ba ni bdag nyid kyis so//spags pa yongs su spyad pa bzhin du bza' bar bya'o zhes bya ba ni thog mar byin len byas nas bza' bar bya'o/ /de las 'das zhes bya ba ni zhag bdun 'das pa'o/ /de las sman gang de nas blangs de nas slar yang blangs/ /zas kyi phye mar 'dres te rang gi rgyud kyis myags nas phan tshun 'dres te gang dbyer mi rtog pa de lta bu dge slong ma khyim pa dang dge sbyong la byin cig /de rnams las bzlog pa ni dge slong mas byin len byos la dge slong ma'i mdun du byin gyis rlobs shig /'phags ma dgongs shig bdag ming 'di zhes bgyi bas sman 'di bdag dang mtshungs par spyod pa'i phyir zhag bdun du byin gyis brlabs so//de bzhin du lan gnyis lan gsum du brjod par bya'o/ /nyin gcig bzhin du ji ltar zos pa de yang dge 'dun la brjod par bya ste/ bdag gis deng zhag gcig 'tshal lags te/ phyi na zhag 'di snyed cig lus so zhes zhag re re bzhin du brjod cing bza' bar bya'o//ltung ba ji lta bu zhe na dge slong mas tshes gcig la sman zhig rnyed la/ tshes gnyis la yang gzhan zhig rnyed la/ dge slong mas snga ma de'i zhag bdun tshun chad zo zhig yang na phyi ma'o/ /yang na phyi ma skur cig/ /yang na gzhan la byin cig /ma bskur ram gzhan la ma byin te zhag brgyad po'i skya rengs kyis chod na spang ba'i ltung ba'o/ /de bzhin du tshes gnyis po dang gsum po nas bdun po'i bar du de bzhin du sbyar ro/ /dge slong mas sman spangs par gyur la zhag lon par ma byas pa dang / zhag lon par byas la ltung ba ma bshags pa dang /gsum char ma byas sam gcig ma byas pa 'dra ste/ gzhan rnyed na de yang snga ma'i rgyud kyis spang ngo / /spang ba bcu dgu pa rdzogs so// //bsdus pa'i mdo sde/ lhung bzed sogs byed so so ste/ /skye bo mong po dge slong ma yang gnyis//kun du sbyor ba'i tshogs ni brjod pa yin/ /mdor na/ lhung bzed rnams ni sogs pa dang / /bya ba chos gos brje ba dang / /dus min chos gos dus su dang / /mtshan mas btab pa blang mi bya'o/ /ston pa mnyan du yod pa na bzhugs so/ /de'i tshe na dge slong ma bcu gnyis sde rnams lhung bzed grub cing rnyed pa rnams bsags te/bdag cag nyid kyang mi spyod dge slong ma gzhan dag la yang sbyin par mi byed de/ de ltar gyur pa ston pa la gsol nas bslab pa'i gnas bcas so/ /dge slong mas lhung bzed lhag pa ring na zhag gcig tu chongs shig de las lhag par bcangs na spang ba'i ltung ba'o//ring na zhag gcig ces bya ba ni nyin zhag gcig las 'da' ba'o/ /lhung bzed lhag pa zhes bya ba ni byin gyis brlabs pa'i lhung bzed las lhag pa'o/ /de las 'das par bcangs na zhes bya ba ni de las 'das par bcangs pa'o//tshes gcig la lhung bzed rnyed nas gnyis las lhung bzed gzhan zhig rnyed na dge slong ma des tshes gcig po'i de nyid byin gyis rlobs shig phyi ma skur cig /yang na gzhan la byin cig /ma skur ma byin te/ phyi de nang par gyi skya rengs kyis non na spang ba'i ltung ba'o//tshes gcig la ma yin gyi tshes gnyis la rnyed tshes gsum la rnyed na/ dge slong ma des tshes gnyis pa'i snga ma de byin gyis rlobs shig /phyi ma skur cig /yang na gzhan la byin cig /ma skur ram gzhan la ma byin na phyi de nyin mo'i skya rengs shar na spang ba'i ltung ba'o//de bzhin du tshes gnyis nas brgyad kyi bar du ma rnyed na/ dgu la lhung bzed gcig rnyed de/ tshes bcu la yang lhung bzed gzhan zhig des rnyed na dge slong ma des tshes dgu pa'i lhung bzed snga ma de byin gyis rlobs la phyi ma skur cig /yang na gzhan la byin cig /ma skur ram gzhan la ma byin te phyi de nyin mo'i skya rengs shar na spang ba'i ltung ba'o/ /dge slong mas tshes gcig la lhung bzed gnyis rnyed de/ tshes gnyis la yang de gzhan zhig rnyed na dge slong ma des tshes gnyis po'i snga ma'am phyi ma las gang yang rung / lhung bzed gcig byin gyis rlobs shig /spang ba ni snga ma bzhin no/ /tshes gcig la ma yin gyi tshes gnyis la'am dgu'i bar du ste/ tshes bcu la yang gzhan zhig rnyed na dge slong ma des tshes dgu po'i snga ma de'am phyi ma yang rung / ma bskur na spang ba'i bar du snga ma bzhin no/ /dge slong mas tshes gcig gi nyin mo lhung bzed mang zhig rnyed la/tshes gnyis la yang des gzhan zhig rnyed na spang ba'i bar du snga ma bzhin no/ /lhung bzed chung ba'am lhung bzed skya bo la nyes pa med do/ /spang ba'i ltung ba nyi shu pa rdzogs so// //zla ba phyed phyed cing zhes bya ba ni ston pa mnyan du yod pa na bzhugs so//bud med kyi bu dge slong ma rnams dran pa nyams pa na bdag gi sbyar ma gang yin/ stod g.yogs gang yin/ nang g.yogs gang yin/ gang lugs gang yin rngul gzan gang yin pa mi shes so/ /de nas gau ta mi skye dgu'i bdag mo chen mo ston pa ga la ba der song ste phyin pa dang spyi bos phyag 'tshal nas/de lta bur gyur pa rgyas par gsol pa dang / ston pas dge slong ma rnams kyis zla ba phyed phyed cing chos gos rnams byin gyis rlob par gyis shig ces bka' stsal nas/ sbom dga' mos zla ba phyed cing chos gos byin gyis rlob par mi byed de/de ltar gyur pa dge slong ma dag gis ston pa la gsol nas/ ston pas sbom dga' mo rnam pa du mas smad nas bslab pa'i tshig bcas so/ /yang dge slong ma gang chos gos rnams bzla ba phyed cing byin gyis ma brlabs na spang ba'i ltung ba'o/ /gzhan ni dngos su zad chos gos rnams zhes bya ba ni byin gyis brlabs pa lnga la bya ste/sbyar ma dang / stod g.yogs dang nang g.yogs dang gang lugs dang rdul gzan no/ /byin gyis brlabs zhes bya ba ni so sor byin gyis brlabs pa'o/ /de la nyes pa ji lta bu zhe na dge slong mas zla ba phyed phyed cing chos gos rnams las gang yang rung ba byin gyis ma brlabs na spang ba'i ltung ba'o//spang pa nyi shu gcig pa rdzogs so// //gtan pa zhes bya ba ni ston pa mnyan du yod pa na bzhugs so/ /ston pas dge slong ma rnams kyis gtan pa phyung shig ces bka' stsal pa dang /sbom dga' mos dus la ma bab par gtan pa sbas te ci zhig byas dbyung ngo zhes smras pa dang / dge slong ma dag gis smras pa 'di dbyung ba'i dus la ma bab bo/ /sbom dga' mos gtan pa'i dus zhes bya ba gang yin zhes smras te gtan pa phyung ngo / /dge slong ma dag chos gos lnga khyer nas ljongs rgyu zhing dong ba dang /dge slong ma dag gis ci 'phags ma rnams kyis gtan pa ma bting ngam zhes dris pa dang / dge slong ma dag gis bting ngo zhes smras pa dang / de ltar bting na ci'i phyir chos gos lnga dang ljongs rgyu zhing dong / de de ltar gyur pa ston pa la gsol nas bslab pa'i tshig bcas so//dge slong ma gang dus ma yin par gtan pa phyung na spang ba'i ltung ba'o/ /dus la ma bab par gtan pa phyung zhes bya ba ni gtan pa'i dus gang yin zhe na/ ston zla tha chungs nya nas dpyid zla 'bring po'i bar du ste/ 'di ni gtan pa'i gos kyi dus so/ /de phan chad ni dus ma yin no//phyung zhes bya ba ni gsol ba dang gnyis kyi las kyis so/ /spang ba'i ltung ba zhes bya ba ni dngos po spangs la ltung ba bshags par bya ba'o/ /de la nyes pa ji lta bu zhe na/ dge slong mas gang cung zad gtan pa dus la ma bab par phyung na thams cad spang ba'i ltung bar 'gyur ro//dge slong ma rkun pos bcom pa'i phyir 'byin na nyes pa med do/ /spang ba'i ltung ba nyi shu gnyis pa rdzogs so// //ston pa mnyan du yod pa na bzhugs so/ /ston pas dge slong ma rnams la dus la ma bab par gtan pa ma 'byin zhes bka' stsal pas na/sbom dga' mo dus la bab kyang gtan pa byin du mi btub ste de nyid nyes pa'i dmigs su gyur to/ /de ltar gyur pa ston pa la gsol nas bslab tshig bcas pa'i bar du snga ma bzhin no/ /yang dge slong ma gang dus la bab kyang gtan pa mi 'byin na spang ba'i ltung ba'o/ /dge slong ma gang zhes bya ba ni sbom dga' mo ste gang gzhan yang de dang 'dra'o//dus su gtan pa mi 'byin na zhes bya ba ni gtan pa'i dus gang zhe na/ ston zla tha chungs nya nas dpyid zla 'bring po'i nya'i bar du ni gos kyi dus so/ /mi 'byin zhes bya ba ni gsol ba dang gnyis kyi las kyis so/ /spang ba'i ltung ba zhes bya ba ni dngos po spang ba'i ltung ba bshags par bya'o//de la nyes pa ji lta bu zhe na/ dge slong mas dus la bab bzhin du gtan pa'i gos mi 'byin na thams cad du yang spang ba'i ltung ba'o/ /spang ba'i ltung ba nyi shu gsum pa rdzogs so// //mtshan mas btab ces bya ba ni mnyan du yod pa na gser mgar zhig yod de/des rigs mnyam pa las chung ma blangs so/ /gser mgar gyis bsam pa/ bdag gis chung ma 'di khyim so zin tam ma zin bgam mo snyam nas/ gser gyi 'khor lo zhig de'i mdun du gzhag ste song ngo / /de nas spom dga' mos snga dro bsod snyems kyi phyir gser mgar de'i khyim du zhugs nas des bu mo la bsod snyoms blangs nas phyir byung ba dang /gser gyi 'khor lo de mthong ste bkra mi shis pa 'di bor cig thong shig bdag gis thog mar khyer la zas kyi sman blang ba'i mi rigs kyi gser gyi sman blang gis byin cig ces smras pa bud med de yang ci yang mi smra bar 'dug go//sbom dga' mos cang mi zer ba ni khas blangs pa'i tha tshig go zhes smras te/ gser gyi 'khor lo khyer te song ngo / /gser mgar de slar 'ongs te/ gser gyi 'khor lo de ga re rmas na/ bu mo na re rab tu byung ma zhig 'ongs te des khyer te song ngo zhes smras pa dang gser mgar gyis sbom dga' mo bzung ste nga'i gser ci'i phyir rku/sbom dga' mo na re nga ni ma byin par mi len no zhes smras nas de'i gdong du bor ba dang gser mgar gyis sbom dga' mo'i gdong du shin tu brdegs nas 'phya zhing mi snyan par 'dzer to/ /de ltar gyur pa ston pa la gsol nas bslab pa'i tshig bcas so//yang dge slong ma gang mtshan mas btab pa slong na spang ba'i ltung ba'o/ /mtshan mas btab ces bya ba ni gser dang dngul lo/ gzhan ni gong ma dang 'dra'o/ /de la nyes pa ji lta bu zhe na/ dge slong mas gag ji tsam du khyim pa'i der song ste/ mtshan ma btab pa blangs na thams cad kyang spang ba'i ltung bar 'gyur ro//spang ba'i ltung ba nyi shu bzhi pa rdzogs so// //mdor na/ chos gos so so byas nas ni/ /phyi phyir du ni mi gtong ba/ /gzhan phyir chos gos mal stan gtsug lag khang / /skye bo mang pos rnyed dang dge 'dun phyir slong ba'o/ /chos gos lci ba yang bar gyur pa tha ma ste//dge slong ma gnyis 'dus la lug bal drug /bcu las 'das pa lhung bzed chung ngu dbyar/ /ras can de dag bya ma yin/ /lhag ma rnams ni bya ba'o/ /ston pa mnyan du yod pa na bzhugs so/ /de'i tshe na sbom dga' mo chos gos ngan par gyur te sbyar ma yang shin tu rnyings so//snga dro btsun mo phreng ldan ma'i der song nas chos bshad pa dang / btsun mos 'phags ma'i chos gos ci'i phyir ngan/ sbom dga' mos smras pa/ bdag la chos gos sbyin pa'i khyim thab dang bu mchis sam zhes smras pa dang / btsun mo phreng ldan mas gos phrag cig gzeb nas phyung ste sbom dga' mo la phul ba dang /btsun mo khyed la btang ba'i bsod nams ni mchis na yongs su spyad pa'i bsod nams ma mchis kyis/ drub pa'i gla dang tshon gyi rin byin cig smras pa dang / des kyang byin no/ /sbom dga' mos de dag kun btsongs te zos nas gos ngan bzhin du btsun mo'i gan du song ngo //btsun mos 'phags ma ci da dung yang na bza' rnams 'di ltar ngan bzhin du bzhugs sam/ sbom dga' mos btsun mo rjes su yi rang bar mdzod cig /nyes pa brgyad las thar ba'i gter du brubs so/ /de skad ces smras pa dang /btsun mos 'phags ma ji skad gsungs dris nas sbom dga' mos bdag gi bu ga 'di dag dgab pa gos bzang po mi dgos te phyag dar khrod pas kyang 'tshal lo/ /bdag gi lus gre ba 'di ni dgang dka' ste/ shing rta'i lte ba'i mig bzhin snum gyis ma bskus kyi bar du mi 'khor ba dang 'dra ste/'di dgang ba'i phyir de dag bag chos sna tshogs su sbyar to zhes smras pa dang btsun mos thos nas 'phya ste ci'i phyir na/ dge slong ma 'di dag gos lus la bgo ba rnams kha'i sgor bsgrub pa rigs sam zhes smras pa dang / de ltar gyur pa ston pa la gsol nas snga ma bzhin du bcas so/ / yang dge slong ma gang chos gos kyi dngos po gzhan kha'i sgor sbyar na spang ba'i ltung ba'o/ /gos zhes bya ba ni ldum bu shan ka la sogs pa de bdun las gang yang rung ba'o/ /dngos po gzhan zhes bya ba ni dngos po gzhan du bsngos pa'o/ /kha'i sgor sgrub ces bya ba ni bca' pa rnam pa lnga la sogs pa nyos te mgrin par mid pa'o//spang ba'i ltung ba ni dngos po spang ba la nyes pa bshags par bya'o/ /nyes pa ji lta bu zhe na dge slong mas gos kyi dngos po gzhan dag kyang rung / dngos po chung zad cig kha'i sgor bsgrubs te zos na spang ba'i ltung ba'o/ /spang ba'i ltung ba nyi shu lnga pa rdzogs so// // ston pa mnyan du yod pa na bzhugs so/ /de'i tshe sbom dga' mos yang de bzhin du chos gos ngan pa dang snga dro bsod snyoms la zhugs te khyim pa dang bram ze'i khyim du song nas chos bshad pa dang / de dag gi chung mas 'phags ma'i na bza' ngan to zhes smras pa dang / sbom dga' mos kho mo la khyim thab bam bus sbyar zhing khyed la sbyin pa lta bu med do//khyim bdag gi chung mas de ltar na 'phags ma'i na bza' bdag gis sbyar ro zhes smras nas/ la las ni skud pa byin/ la las ni thag pa'i gla byin/ kha cig gis ni drubs pa'i gla byin/ la las ni tshon gyi rin byin pa dang thams cad zos te nyes pa brgyad las thar pa'i gter du brubs so//rjes su yi rang bar byos shig ces pa'i bar du snga ma bzhin no/ /de dag gis 'phags ma khyed kyis ci zhig bgyis zhes dris pa dang / sbom dga' mos smras pa kho mo la gos bzang po ci zhig bya/ bu ga 'di dag mi snang ba tsam gyis phyag dar khrod ci lta bu yang rung ste/yogs pa tsam gyis chog go zhes byas nas dge slong mas so so'i gos kha'i sgor sbyar ro zhes mi snyan par 'dzer to/ /de ltar gyur pa ston pa la gsol nas bslab pa'i tshig bcas pa'i bar du snga ma bzhin no/ /yang dge slong ma so so nas gos rnyed pa kha'i sgor byas na spang ba'i ltung ba'o//so so'i gos zhes bya ba ni kha cig gis skud pa/ kha cig gis ni btags pa'i gla/ kha cig gis ni tshon rin byin pa'o/ /rnyed pa zhes bya ba ni rnyed pa la rnam pa gnyis te/ gos rnyed pa dang zas rnyed pa'o/ /skabs 'dir ni gos rnyed pa la bya'o/ /kha'i sgor sbyor zhes bya ba ni de btsongs nas bca' ba lnga dang bza' ba lnga sbyar ba ste mgrin par mid na spang ba'i ltung ba snga ma bzhin no//spang ba nyi shu drug pa rdzogs so// //mal stan zhes bya ba ni ston pa mnyan du yod pa na bzhugs so/ /sbom dga' mo dbyar khang du 'dug pa dang der bram ze dang khyim bdag gi chung ma dag der lhags so//sbom dga' mos de dag la nor las byung ba'i bsod nams kyi dngos po rnam pa bdun brjod de chos bshad pa dang de dag gi sems dga' bar gyur te/ 'phags ma bdag cag gis ci zhig gyis shig pa bka' stsol cig smras pa dang / kho mo'i gtsug lag khang 'di ni mal cha dang stan med do zhes smras pa dang / khyim bdag gi chung ma dag gis mal cha dang stan gyi rin byin pa dang / sbom dga' mas de dag thams cad zos so/ /sbom dga' mos dus phyi zhig na bram ze'i khyim bdag gi chung ma'i khyim du song ba nas/ chos bshad pa dang /khyim bdag gi chung ma dag gis 'phags ma ma la stan de dag mjal tam zhes smras pa dang / sbom dga' mos lus 'di ni gag tu rtsa bting ba la yang gzhan du rung na za 'og stan gyis ci zhig bya/ ro lta bu 'di dgang dka' ba ni shing rta'i lte ba ma bskus na 'gror mi btub pa bzhin du 'di dgong ba'i phyir khur ba la sogs pa zhim po mang du sbyar ro zhes smras pa dang /khyim bdag gi chung ma dag 'phya ste ci'i phyir na dge slong mas 'di ltar mal cha dang stan gyi phyir rnyed pa kha'i sgor sbyar zhes mi snyan par 'dzer to/ /de ltar gyur pa ston pa la gsol nas bslab pa'i tshig bcas so//yang dge slong ma gang mal cha dang stan gyi phyir bsngos pa'i rnyed pa kha'i sgor sbyar na spang ba'i ltung ba'o/ /mal cha dang stan zhes bya ba ni nyal ba dang stan gyi phyir ro/ /rnyed ces bya ba la rnam pa gnyis te/ gos rnyed pa dang zas rnyed pa'o/ /skabs 'dir mal cha dang stan rnyed pa la bya'o//kha'i sgor sbyor zhes bya ba btsongs te bca' ba lnga dang bza' ba lngar sbyar te mgrin par mid pa'o/ /nyes pa ji lta bu zhe na/ dge slong mas mal cha dang stan gyi rnyed pa gang ji tsam yang rung kha'i sgor sbyar na spang ba'i ltung ba'o/ /spang ba nyi shu bdun pa rdzogs so// //ston pa mnyan du yod pa na bzhugs so//sbom dga' mos dge slong ma'i gtsug lag khang zhig pa slar bcos pa'i phyir bram ze dang khyim bdag gi chung ma sbom dga' mo'i thad du lhags pa de dag la chos bshad nas khyim bdag gi chung ma dag gis gtsug lag khang slar bcos pa'i phyir nor bsdus te byin no//sbom dga' mos de thams cad zos so/ /khyim bdag gi chung ma dag phyis kyang der lhags te/ dbyar mo khang ma bcos kyi zhig cing 'dug pa mthong nas/ 'phags ma ci'i phyir dbyar mo khang ma bcos zhes dris pa dang / sbom dga' mos spyil po de tsam gang du'ang rung bskyab pa tsam gyis gnas par rung na/dbyar mo khang chen pos ci zhig bya/ de dag ni bdag gis ro keng rus brel ba 'dir brubs so zhes smras pa dang / bram ze dang khyim bdag gi chung ma dag 'phya ste/ ci'i phyir na dge slong mas dge 'dun gyi rnyed pa bdag gir bkur ro zhes mi snyen par 'dzer to//de ltar gyur pa dge slong ma dag gis ston pa la gsol nas bslab pa'i tshig bcas so/ /yang dge slong ma gang dbyar mo khang gi phyir bsngos pa'i rnyed pa kha sgor sbyar na yang spang ba'i ltung ba'o/ /dge slong ma zhes bya ba ni ston pa'i nyan thos ma'o/ /rnyed ces bya ba ni rnam pa gnyis te/ gos dang zas rnyed pa'o/ /skabs 'dir ni gtsug lag khang gi rnyed pa la bya'o/ /gang zag bdag gi phyir zhes bya ba ni rang gi phyir ro/ /bsngos zhes bya ba ni bdag la'o/ /de la nyes pa ji lta bu zhe na/ dge slong mas gang ci tsam yang rung gnas kyir bsngos pa'i rnyed pa kha'i sgor sbyar na thams cad spang ba'i ltung ba'o//spang ba nyi shu brgyad pa rdzogs so// //skye bo mang po zhes bya ba ni ston pa mnyan du yod pa na bzhugs so/ /de'i tshe dge slong ma mang zhig ljongs rgyu zhing lhags so/ /de dag gi phyir sbom dga' mos bram ze dang khyim bdag gi khyim du song nas bslang ba dang rnyed pa mang zhig grub bo/ / de thams cad bdag gir byas pa dang / dge slong ma rnams 'phya ste/ ci'i phyir na dge slong ma skye bo mang po'i phyir rnyed pa gang zag nyid kyi phyir bsngos zhes mi snyan par 'dzer to/ /de ltar gyur pa dge slong ma dag gis ston pa la gsol nas bslab pa'i tshig bcas so/ /yang dge slong ma gang skye bo mang po'i phyir bsngos pa'i rnyed pa gang zag bdag gir bsngos na spang ba'i ltung ba'o//skye bo mang po'i phyir zhes bya ba ni dge slong ma'i dge 'dun gyi phyir ro/ /rnyed ces bya ba rnam pa gnyis te/ skabs 'dir ni kha zas rnyed pa la bya'o/ /gzhan ni dngos su zad do/ /de la nyes pa ji lta bu zhe na gang ji tsam du skye bo mang po'i phyir rnyed pa gang zag nyid kyi phyir bsngos na spang ba'i ltung ba'o//spang ba nyi shu dgu pa rdzogs so// //ston pa mnyan du yod pa na bzhugs so/ /dge slong ma sbom dga' mo yang dge slong ma'i dge 'dun gyi phyir rnyed pa der khyer na bdag gis byas so zhes dge slong mas thos nas 'phya ste/ci'i phyir na dge slong mas dge 'dun gyi phyir bsngos pa'i rnyed pa gang zag gi phyir bsngo'o zhes mi snyan par 'dzer to/ /de ltar gyur pa ston pa la gsol nas bslab pa'i tshig bcas so/ /yang dge slong ma gang dge 'dun gyi phyir rnyed pa gang zag bdag nyid kyi phyir bsngos na spang ba'i ltung ba'o//dge 'dun gyi phyir zhes bya ba ni dge slong ma'i dge 'dun gyi phyir ro/ /rnyed ces bya ba ni rnam pa gnyis te/ skabs 'dir ni gnyis ka la bya'o/ /bsngos zhes bya ba ni dge 'dun gyi nang du'o/ /gzhan ni thams cad gong ma bzhin no/ /spang ba sum cu pa rdzogs so// // bcings pa 'grol ba zhes bya ba ni mnyan du yod pa na ste/ gtsug dga' mo dri 'tshong ba'i khye'u la chags nas mo de'i tshong khang du song nas rdzas gang cung zad nyos pa mo de la chags pas na des thum bur bcing zhing bcings pa dang / yang dang yang 'grol zhing de'i tshig nyams su len/lan ldon cing gtam zer ro/ /de la dge slong ma dag gis bzlog kyang / de bzhin du tshig nyams su len no/ /de ltar gyur pa ston pa la gsol nas bslab pa'i tshig bcas so/ /yang dge slong ma gang bcing zhing bcings pa'i thum bu yang dang yang 'grol bar byed na spang ba'i ltung ba'o//yang dge slong ma gang zhes bya ba ni gtsug dga' mo'o/ /bcing zhing bcings pa'i thum bu zhes bya ba ni nyos pa'o/ /'grol zhes bya ba ni 'grol ba yang byed pa'o/ /nyes pa ji lta bu zhe na gang ji tsam du bcing zhing bcings pa'i thum bu 'grol te/ de'i tshig kyang nyams su blangs na ltung bar 'gyur ro//spang ba sum cu gcig pa rdzogs so// //lci la rin che zhes bya ba ni ston pa mnyan du yod pa na bzhugs so/ /rgyal po gsal rgyal gyis kad shag ti la la ba rin po che rin thang cher ri ba zhig byin no/ /des kyang la ba de chos sbyin ma la phul lo/ / chos sbyin mas kyang la ba de blangs nas chos gos kyi gdang la bkal te gzhag go/ /gtsug dga' mo chos sbyin gyi khyim du 'ongs nas phyag byas pa dang / des la ba rin po che mthong nas 'phags ma la ba 'di gang nas 'ongs zhes dris dris pa dang / des kyang zhib tu smras so/ /gtsug dga' mos lha dang mis mchod pa khyod la su zhig mi ster zhes smras pa dang /chos sbyin mas ci 'dod dam zhes smras pa dang / gtsug dga' mos 'tshal lo zhes byas pa dang / de la la ba byin ma thag tu bgos nas bsod snyoms la zhugs pa dang / bram ze dang khyim bdag gis mthong nas 'phya ste/e ma'o dge sbyong ma rnams 'dod pa'i yon tan gyis gzir to/ /ci'i phyir na dge slong ma rnams kyis rgyal po la rigs pa'i gos bgos so zhes mi snyan par 'dzer to/ /de ltar gyur pa ston pa la gsol nas bslab pa'i gnas bcas so/ /yang dge slong ma gang lce zhing rin che ba'i gos bcangs na spang ba'i ltung ba'o//lci ba zhes bya ba ni srang brgya'am de las lhag pa 'das pa'o/ /rin che zhes bya ba ni kAr ShA pa Ni nyi shu'am de las 'das pa'o/ /gos zhes bya ba ni ka shi ka'i phra mo'am srin bal las byas pa'o/ /'chang zhes bya ba ni bdag gir byed ba'o/ /nyes pa ji lta bu zhe na/dge slong mas gang ji tsam du lci la rin thang che ba'i gos bcangs na spang ba'i ltung ba'o/ /spang ba sum cu gnyis pa rdzogs so// //yang la rin che zhes bya ba ni ston pa mnyan du yod pa na bzhugs so/ /rgyal po gsal rgyal gyis rin che ba zhig btsun mo phreng ba can la byin pa dang /des kyang skye dgu'i bdag mo la byin nas gos kyi gdang la bkal nas gzhag pa dang gtsug dga' mos mthong nas/ 'phags ma yang la bzang ba 'di su'i lags zhes smras pa dang / ci 'dod dam 'tshal lo zhes byas pa dang de la byin no/ /des yang ba de bgos te bsod snyoms la zhugs pa dang /bram ze dag 'phya ba nas bslab pa'i tshig bcas pa'i bar du snga ma bzhin no/ /yang dge slong ma gang gos yang la rin che ba 'chang na spang ba'i ltung ba'o/ /yang zhes bya ba ni srang lnga'am de las chung ba'o/ /rin che zhes bya ba ni kAr ShA pa Ni nyi shu 'am de las lhag pa'o//gos zhes bya ba ni ka shi ka'i phra mo 'am/ srin pa la las byas pa'o/ /'chang zhes pa ni bdag gir byed pa'o/ /de la nyes pa ji lta bu zhe na/ dge slong mas ji tsam du yang la rin che ba'i gos bcangs na thams cad spang ba'i ltung ba'o/ /spang ba sum cu gsum pa rdzogs so// //dge slong ma dang 'brel par gnyis/ /drug po dag dang lug bal dang / /lhung bzed ring na zhag bcu dang / /ma tshang dbyar gyi ras chen dang / /de dag 'dir ni bya ma yin/ /lhag ma rnams ni bya ba'o/ /dge slong dag gis mtshungs pa zung ba/ /de dag rnams kyi lhag ma ni//sum cu las ni rtsa gsum mo/ /dge slong ma'i yid bsgrags pa yin no/ /bdag gis dge slong ma'i spang ba'i ltung ba sum cu rtsa gsum pa'i chos rnams bshad zin te/ bdag gis dge slong ma rnams la ci nas de la yongs su dag gam zhes lan gnyis lan gsum dris te/'phags ma rnams yongs su dag pas na cang mi smra ste de de bzhin du 'dzin to/ /dge slong ma rnams 'di ni ltung ba brgya brgyad cu'i chos rnams te/ zla ba phyed byed cing so sor thar pa'i mdo las 'byung ngo / /mdor na/ dge slong brdzun skyon phra ma byed pa dang / / skyo sngogs byed dang 'chang pa dang / /klog dang gnas ngan len dang chos/ /mdza' dang khyad du gsod pa'o/ /sangs rgyas bcom ldan 'das rgyal po'i khab na bzhugs so/ /de'i tshe na tshe dang ldan pa sgra gcan 'dzin yang rgyal po'i khab kyi chu dron gyi kun dga' ra ba na gnas so/ /de'i tshe na dad pa'i bram ze dang khyim bdag der lhags nas sgra gcan 'dzin ston pa ga la bzhugs zhes dris so//gal te ston pa 'od ma'i tshal na bzhugs na ni de bya rgod kyi phung po na'o zhes zer te/ ston pa bya rgod phung po na bzhugs na ni 'od ma'i tshal na'o zhes zer la gzhan nas gzhan du ston pas de dag gis btsal kyang ma rnyed nas lus ngal chad de/sgra gcan 'dzin ga la ba der song nas sgra gcan 'dzin gyis khyed cag gis ston pa mthong ngam btsun pa ma mthong ngo / /sgra gcan 'dzin gyis bgad pa dang de dag smod cing mi snyan par 'dzer to/ /de ltar gyur pa ston pa la gsol nas rnam grangs du mas smad de/tshigs su bcad pa 'di dag gsungs so/ /chos gcig las ni 'das pa yis/ /brdzun du smra ba'i lus can ni/ /'jig rten pha rol spang ba ste/ /sdig pa mi byed med pa'o/ /tshul khrims ngan pa sdom med pa/ /grong gi bsod snyoms za ba pas/ /me lce tsha ba 'bar 'dra ba'i//lcags kyi thu lum za ba sla/ /zhes smad de bslab pa'i gnas bcas so/ /shes bzhin du brdzun du smra na ltung ba'o/ /shes bzhin zhes bya ba ni btags pa'o/ /brdzun smra na zhes bya ba ni brdzun la rnam pa dgu yang yod/ rnam pa brgyad kyang yod/ /rnam pa bdun yang yod/rnam pa drug kyang yod/ rnam pa lnga yang yod/ rnam pa bzhi yang yod/ rnam pa gsum yang yod/ rnam pa gnyis kyang yod do/ /de la brdzun rnam pa dgu ni rtsa ba med par phas pham pa dang / lhag ma dang / ltung ba dang / so sor bshags pa dang / nyes byas dang tshul khrims dang /lta ba dang / spyod pa dang / 'tsho ba log par zhugs pa'o/ /brgyad ni gong ma lnga'i steng du rtsa ba med par mthong ba dang thos pa dang dogs pa'o/ /bdun ni gong ma bzhi'i steng du rtsa ba med par mthong ba dang thos pa dang dogs pa'o/ /drug ni dge slong gis brdzun du smra bar 'dod de/'di snyam du sems te brdzun du smra'o snyam du sems pa dang / brdzun du smra ba'i tshe 'di snyam du sems te brdzun zer ro snyam pa dang / smras na yang 'di snyam du sems te bdag gis brdzun du smras so snyam pa dang rtsa ba med par mthong thos dogs pa gsum dang drug go/ /lnga ni dang por smos pa lnga'o//bzhi ni dang po bzhi la bya'o/ /gsum ni gong du drug smos pa'i gsum pa gnyis las gang yang rung ba'o/ /gnyis ni brdzun du smra ba'i tshe 'di snyam du sems te brdzun du zer ro snyam pa dang / brdzun du smras nas yang 'di snyam du sems te bdag gis brdzun du smras so snyam pa'o/brdzun du smras pa gcig po ni med do/ /gzhan yang brdzun rnam pa lnga yod de pham pa'i brdzun ni brda phrad par zad do/ /lhag ma'i brdzun ni rtsa ba med par pham par skur ba'o/ /sbom po'i brdzun ni dge slong ma des dge 'dun gyi dbus su chos la chos ma yin pa dang chos ma yin pa la chos su sgrogs pa'o//nyes byas kyi brdzun ni so sor thar par 'dod pa na yongs su dag par gnas sam zhes dris pa na ma dag bzhin du mi smra bar 'dug pa'o/ /'di bzhi ma gtogs par gzhan brdzun du smras pa thams cad ltung bar 'gyur ro/ /ltung ba zhes bya ba ni ngan song ngan 'gro byol song yi dags sems can dmyal bar ltung zhing sreg pa 'tshed par byed pa'o//nyes pa 'di ma bshags sam so sor ma bshags na dge ba'i chos la sgrib par byed pas na ltung ba zhes gsungs so/ /de la nyes pa gang zhe na/ mdor na/ brjed dang the tshom za ba dang / /'du shes pa ni tha ma'o//des ma mthong ma thos ma shes rnam par ma shes bzhin du mthong thos shes rnam par shes zer na tshig re la ltung ba re rer 'gyur ro/ /des mthong bar gyur pa las brjed de 'du shes sbas nas ngas mthong ste de yang ma brjed do/ /ngas thos ngas shes zhe'am rnam par shes zhes zer na tshig re re la ltung ba re rer 'gyur ro//des mthong bar gyur la de yang the tshom du gyur te/ des thos shing rnam par shes pa las the tshom du gyur nas/ ngas mthong rnam par shes pa la the tshom du gyur nas med do zhes zer na tshig re re la ltung ba re rer 'gyur ro//mthong yang ma mthong ba'i 'du shes su gyur/ rnam par shes kyang mi shes pa'i 'du shes su gyur zhes pa'i bar du 'du shes sbas nas/ mthong ngo rnam par shes so zhes zer na tshig re re la ltung ba re rer 'gyur ro/ /de bzhin du rnam pa 'di bzhi nang bsnor te/ mthong la shes zhes zer ba dang /mthong la brjed nas shes pa ni ma brjed na ngas mthong ba ni ma brjed kyis shes pa ni brjed do zhes zer na tshig re re la ltung ba re rer 'gyur ro/ /de bzhin du the tshom du 'du shes kyang nang bsnor te bshad par bya'o/ /ltung ba dang po rdzogs so// //sangs rgyas bcom ldan 'das mnyan du yod pa na bzhugs so//de'i tshe na bcu gnyis sde dag dge slong ma rnams la mi'i skyon nas smras te/ 'phags ma 'di ni zhar ma'o zhes pa dang / sgur mo dang / lkog blo dang / theng mo zhes bos pas dge slong ma rnams bag 'chums pa dang spa gong bar gyur te/ lung 'bogs pa dang kha ton yid la byed pa btang nas/ mi dga' bar gyur nas don nyung ba'i dge slong ma dag 'phya ste/ de ltar gyur pa ston pa la gsol nas bslab pa'i gnas bcas so/ /mi'i skyon nas smras na ltung ba'o/ /mi'i skyon nas smras zhes pa brgyad de/ rigs dang / bzo dang / las dang / mtshan ma dang / nad dang / ltung ba dang / nyon mongs pa'o/ /de la rigs kyi skyon ni rgyal rigs dang / bram ze'i rigs dang / rje'u rigs dang / bran rigs las rab tu byung na dge sbyong ga la yod/ tshangs pa ga la yod ces smras na de dag spa gong yang rung ma gong yang rung ste/gong ma gnyis la nyes byas/ 'og ma gsum la ltung ba'o/ /dge slong mas mi'i skyon nas smra bar bsams te/ bram ze las rab tu byung ba nas bran las rab tu byung na zhes pa'i bar du khyed la dge slong dang tshangs pa ga la yod rang gi bzo slobs shig /'di lta ste/bram ze'i spyod lam dang / gtsang sbra dang / cho ga dang / oM zhes bya ba dang / b+ho zhes bya ba dang / sbyin pa dang / slongs shig ces smras pa dang / rgyal rigs las rab tu byung ba rang gi bzo slobs shig /'di lta ste/ glang po che'i gnya' bar zhon pa dang / shing rta la zhon pa dang /'phong bya ba dang / rgyal chos dang / rgyal po'i bya ba rnams slobs shig ces smras pa dang / khyed rje'u'i rigs las rab tu byung bas na/ rang gi bzo zhing rmo ba dang / phyugs btsa' ba dang / tshong bya ba slobs shig smras pa dang / dmangs rigs las rab tu byung bas na rang gi bzo zor ba gdab pa dang /khur shing thogs pa la sogs pa slobs shig /bran rigs las rab tu byung bas rang gi bzo lus phyi ba dang / mnye ba dang / bang tsen du 'gro ba dang / gzhan yang bran gyi bzo las slobs shig ces de skad smras na/ spa gong yang rung ma gong yang rung ste/gong ma gnyis la nyes byas/ 'og ma gsum ni ltung ba'o/ /las kyi skyon yang tshig gong ma bzhin du smos pa la khyad par ni las zhes smos te/ ltung ba dang nyes byas kyang gong ma dang 'dra'o/ /bzo dang las kyi skabs su skud ris dang / mgar ba dang /rdza mkhan dang / 'dreg mkhan la sogs pa las dang bzo sna tshogs kyang brjod par bya'o/ /dge slong mas mi'i skyon nas smra bar bsams te tshe dang ldan pa khyod theng po las rab tu byung na/ dge sbyong ga la yod tshangs pa ga la yod ces smras na dge slong ma spa gong yang rung ma gong yang rung ste ltung bar 'gyur ro//de bzhin du zhar ba dang / sgur po dang / 'phye bo dang / grum po la sogs pa ste/ de'i mtshan ma'i skyon dang sbyar ro/ /gong ma bzhin du brjod la mdze can dang / 'brum bu dang / g.yan pa dang / sha bkra dang / rngo dang rims la sogs pa ste/spa gong yang rung ma gong yang rung ba'i bar du'o/ /de dag ni nad kyi skyon dang sbyar ro/ /de la ltung ba zhes pa ni tshe dang ldan pa khyod la ltung ba sde lnga byung zhes zer ba'o/ /khyod ni khro ba dang / khon du 'dzin pa dang / g.yo dang sgyu dang ngo tsha dang khrel med pa de lta bu las rab tu byung bas dge sbyong dang tshangs pa ga la yod ces smras na ltung bar 'gyur te 'di ni nyon mongs pa dang sbyar ro//sangs rgyas mtsho zhes bya ba bram ze las rab tu byung ngo zhes bya ba la sogs pa ni nyes pa med do/ /las dang po pa dang / smyos pa dang / sems 'khrugs pa dang /nad kyis gzir ba la nyes pa med do/ /ltung ba gnyis pa rdzogs so// //sangs rgyas bcom ldan 'das mnyan du yod pa na bzhugs so/ /de'i tshe na bcu gnyis sde rnams phra ma la zhugs pas dge slong ma dag bag 'chums pa dang spa gong zhing 'dzem par gyur pas lung 'bogs pa dang kha ton dang rnal 'byor dang yid la bya ba btang ste/de yun ring po nas mdza' zhing sdug pa chos bzhin du 'khod pa yang bye bar gyur nas/ don nyung du ma rnams 'phya zhing mi snyan par 'dzer to/ /de lta bur gyur pa bcom ldan 'das la gsol nas rnam grangs du mas smad do//dge slong ma dag sngon byung ba nags tshang tshing zhig na seng ge mo sbrum ma zhig 'dug ste chos nyid kyis seng ge bu byung kar sha'i tshogs byed do/ /seng ge mo de phyugs mang po'i phyi bzhin 'brangs nas/ ba zhig be'u byung nas be'u skyong ba'i phyir khyu las yan te phyir lus pa dang seng ge mo des ba bsad de rang gi gnas su khyer ba dang /be'u de yang ma'i zho 'dod pas ma'i phyi bzhin du song ngo / /seng ge mos bsams pa be'u 'di yang bsad do snyam pa las gal te bdag gi bu byung na de'i grogs su rung snyam nas de ma bsad de/ de'i bu byung nas rang gi bu dang be'u gnyis ka zhos gsos te skyes pa dang /seng ge mo nad kyis btab ste 'chi kar smras pa/ bu khyod gnyis nga'i nu ma 'thungs pa'i spun yin gyis/ 'jig rten 'di phra ma can gyis gang bas na/ nga shi ba'i 'og tu su ci zer yang khyed gnyis ma nyan cig ces byas nas dus las 'das so/ /seng ge de dang khyu mchog gnyis sha tshon po dang rtsi mchog la za bas cher gyur to//seng ge de'i phyi bzhin du wa rgan po gcig snyogs shing de'i lhag rol dag za zhing 'dug /phyi bzhin du yang 'brang / seng ges ri dgas tshon po bsad de sha zos nas myur du rang gi gnas su 'ongs nas khyu mchog mchog dang lhan cig rtse zhing 'dug go//wa rgan po des bsams pa/ seng ge gar 'gro ba lta'o snyam nas/ phyi bzhin du song ba dang / khyu mchog dang rtse ba mthong nas 'di ni bdag gi lto'i dgra yin gyis de gnyis kyi bar du dbyen bya'o snyam nas/ khyu mchog gi mdun du rna ba phab nas 'dug pa dang /khyu mchog gis smras pa/ zhang po rlung dro ba dang gdug pa ma langs sam grang / des smras pa/ tsha bo rab tu 'bar ba'i rlung langs so/ /seng ge 'di na re khyu mchog sha khrag dang ldan pa 'di ngas gud nas sha ma rnyed na 'di'i sha bza'o zhes zer ro/ /des smras pa/zhang po de skad ma zer cig/ /nged cag gnyis kyi ma 'chi ba'i khar bsgo ba ni/ 'jig rten 'di na phra ma can gyis kad bas khyed gnyis nga shi ba'i 'og tu su'i ngag kyang ma nyan cig ces bsgo'o/ /des smras pa tsha bo'i ngag ma nyan pas khyed ma rung bar gyur to/ /'o na ci mngon/seng ge rang gi gnas nas byung nas rkang lag rgyong ngo / /de'i 'og tu glal lo/ /glal nas phyogs bzhir bltas te seng ge'i sgra gsum bsgrags pa nas khyed kyi mdun du 'ongs dang / de na bdag 'dis bsad do snyam du rig par byos shig /de nas seng ge'i gan du song ba dang rna ba phab ste 'dug pa dang /seng ges zhang po rlung dro ba gdug pa ma langs sam zhes smras pa dang / tsha bo rlung rab tu tsha ba langs so/ /de ci'i phyir zhe na/ khyu mchog na re 'di'i mas nga'i ma bsad de rtsa'i seng ge 'di ngas mi 'chor gyis lto dral te bsad do zhes zer ba'i phyir ro/ /des zhang bo de skad ma zer cig ces bya ba nas khyed gnyis su'i ngag kyang ma nyan cig ces bsgo'o zhes pa'i bar du snga ma bzhin du smras pa dang /des smras pa/ tsha bo bdag gis bsgo ba ma nyan pas khyod ma rung bar 'gyur ro/ /'o na ci mngon khyu mchog rang gi gnas nas phyung ste rkang lag rkyong ngo / / de'i 'og tu 'bod do/ /bos nas sa 'thor ro/ /de nas sgra phyung ste khyod kyi gan du 'ong ba dang / de nas bdag 'dis bsad do snyam du rig par byos shig /de gnyis rtag tu yang de bzhin byed mod kyi nam yang mtshan mar ma bzung ngo / /de nas dus gzhan zhig na ri dgas kyi rgyal po seng ge gnas nas byung nas rkang lag rkyong gong ma bzhin du glal/phyogs bzhir bltas/ sgra chen po gsum phyung nas khyu mchog gi gnas su 'ong ngo / /khyu mchog kyang gong du smos pa bzhin du seng ge'i mdun du 'ongs pa dang / khyu mchog kyang 'dis ni bdag bsad do snyam du bsams/seng ge yang 'di ni wa zer ba bzhin du 'ongs pas na 'dis ni bdag bsad do snyam nas/ seng ges khyu mchog gi nog tu gcig bsnun pa dang / khyu mchog gis kyang seng ge'i ltor gcig bsnun nas lto dral te gnyis ka shi nas lhas tshigs su bcad de smras pa/skye bo ma rabs bsten na ni/ /mig gis bzang po mthong mi 'gyur/ /seng ge khyu mchog mdza' ba la/ /wa yis tha dad phye la ltos/ /dge slong ma dag byol song du gyur pa de gnyis kyang phra ma zhugs pa las gsod pa'i sems byung na/ mi lta smos kyang ci dgos kyi de bas na phra ma ma byed cig /dge slong mas dge slong ma la phra ma byas na 'das pa dang bcas par 'gyur ro/ /dge slong ma dag sngon byung ba nags tshang tshing zhig na seng ge phru gur bcas pa dang / stag phru gur bcas pa zhig 'dug pa las seng ge mo bzas la song ba dang / de'i phru gu de 'khyams pa las stag gi tshang du 'ongs so/ /stag gis mthong nas bsad do snyam pa dang / yang bsams pa 'di bdag gi bu 'di'i grogs su rung gis bsad par mi bya'o snyam nas des de la nu ma snun par brtsams so/ /seng ge mos kyang spyod yul du brgyus nas 'ongs pa dang / phru gu mi snang nas btsal ba na stag mos snun par mthong ngo / /mthong nas rang nyid skrag ste 'bros par brtsams pa dang / de la stag mos smras pa/ nu mo ma 'bros shig dang lhan cig tu 'khod par bya ste/ 'di ltar kho mos spyod yul du song ba na khyod kyis kho mo'i phru gu la mkho ba stobs shig /gal te khyod kyis spyod yul du 'gro bar gyur na/ kho mos kyang khyod kyi phru gu la mkho ba bstab par bya'o/ /des kyang de skad thos nas de bzhin brtsams par khas blangs te lhan cig tu 'khod do/ /de gnyis kyis seng ge'i phru gu'i ming ni mche bzangs zhes bya ba dang /stag gi phru gu'i ming ni dpung bzangs zhes bya bar btags nas bskyed bsrings pas cher son par gyur to/ /dus gzhan zhig na seng ge mo dang stag mo gnyis nad kyis btab nas 'chi khar bu gnyis la kha chems gong ma bzhin smras nas dus byas so/ /seng ge dang stag gnyis ni rtag tu sha dang khrag dag zos shing 'thungs nas/seng ge ni myur ba myur bas tshang du 'jug cing stag ni yun ring pos phyi nas 'ongs so/ /dus gzhan zhig na stag gis lhag rol sbas pa de zos nas myur du 'ongs pa dang / de la seng ges smras pa/ khyod sngon chad yun ring pos phyi nas 'ongs la/deng myur du 'ongs pa 'di la rgyu ci yod ces dris pa dang / stag gis smras pa/ kho bos lhag rol sbas par gyur pa dag zos nas 'ongs so/ /seng ges smras pa/ kho bos ni ri dgas dam pa dag bsad nas sha dam pa dag zos shing khrag dam pa dag 'thungs nas ltos pa med par 'gro'o//stag gis smras pa/ khyod ni stobs dang ldan pa yin gyi/ kho bos ni de ltar byed par mi nus so/ /seng ges de la bdag cag lhan cig 'dong ngo zhes smras nas lhan cig 'gro bar brtsams so/ /yang seng ge de la wa rgan po lhag ma za ba cig phyi bzhin du 'brang ba des bsams pa/stag 'di ni bdag gi lto'i dgra yin gyis/ 'di gnyis kyi bar du dbyen bya'o snyam nas/ seng ge'i mdun du 'dug pa dang dris lan snga ma bzhin las/ stag 'di na re kho bo'i rtsa ba'i seng ge de gar song / des kho bo la lhag ma zar bcug gis ngas de nges par gsad par bya'o zhes zer ro//seng ges smras pa zhang po de skad ma zer cig /nged gnyis la ma gnyis kyis 'chi ba'i khar bsgo ba zhes pa nas bdag 'dis gsod do snyam du rig par gyis shig gi bar gong du khyu mchog la smras pa'i skabs bzhin sbyar ro/ / de'i 'og tu yang stag gi mdun du 'dug pa dang dris lan snga ma bzhin las/ seng ge 'di na re kho bo'i rtsa ba'i stag de gar song de nges par gsad par bya'o zhes zer ro/ /stag gis smras pa/ zhang po de skad ma zer cig /nged gnyis la ma gnyis kyis 'chi ba'i khar bsgo ba zhes pa nas bdag 'dis gsod do snyam du rig par gyis shig gi bar du yang gong ma bzhin sbyar ro//de gnyis rtag tu de bzhin byed mod kyi nam yang mtshan mar ma bzung ngo / /de nas dus gzhan zhig na ri dgas kyi rgyal po seng ge des gnas nas byung nas rkang lag rkyong /de'i 'og tu glal/ de nas bltas/ sgra chen po thang gsum phyung nas stag gi mdun du 'ongs so/ /stag gis kyang de bzhin du byas nas/ seng ge'i mdun du 'ongs pa na/ gang gi tshe rgyud la dbyen gyi sa bon btab pa des mtshan mar bzung nas seng ges bsams pa/ 'dis ni bdag gsod do snyam pa dang / stag gis kyang 'dis ni bdag gsod do snyam du bsams so/ /yang seng ges bsams pa/ bdag ni stobs dang ldan la/ stag 'di ni de lta ma yin na 'dis bdag la rgol mi nus kyis je brtag par bya'o snyam nas tshigs su bcad pas smras pa/ chu zheng phun sum tshogs pa dang / /rtsal dang shugs dang ldan pa yi/ /mche bzangs la ni rgol byed pa'i/ /dpung bzangs de ni legs pa yin/ /stag gis kyang smras pa/ chu zheng phun sum tshogs pa dang / /rtsal dang shugs dang ldan pa yi/ dpung bzangs la ni rgol byed pa/ / mche bzangs de ni legs pa yin/ /seng ges khyod la de skad su zer zhes smras pa dang / des smras pa wa 'di'o/ /stag gis khyod la de skad su zer zhes smras pa dang / des smras pa nga la yang wa 'dis so/ /seng ges bsams pa 'di ni nged kyi dbyen byas so snyam nas/ de nas wa de la thal mo cig bsnun te bsad pa dang /lhas tshigs su bcad pa smras pa/ gzhan gyi tshig gis mdza' bo spang mi bya/ /gzhan gyi smras pa rnams la brtag par bya/ /'byed par 'dod pa rnams ni skabs tshol gyis/ /de bas dbyen can skye bo bsten mi bya/ /wa 'di tha ma tha shal te/ /wa ni brdzun du smra ba yin//mdza' bo 'byed pa phra ma can/ /bsad pas gnyi ga bde bar 'gyur/ /dge slong ma rnams srog chags byol song gi skye gnas su gyur pa de gnyis kyang phra ma zhugs pas bsad pa'i sems su gyur na mir gyur nas mir gyur pa lta ci smos kyis/ de lta bas na dge slong mas dge slong ma la phra mar smra ba la ma 'jug shig /dge slong mas dge slong ma la phra ma smras na 'das pa dang bcas par 'gyur ro/ /de nas ston pas rnam pa du mas smad nas bslab pa'i gnas bcas so/ /yang dge slong ma gang dge slong ma la phra ma byed na ltung ba'o/ /phra ma zhes bya ba ni phra ma bya bar bsams te tshig tu brjod pa'o//gzhan ni gong ma bzhin no/ /nyes pa ji lta zhe na/ mdor na/ rigs dang bzo dang las rnams dang / /mtshan ma dag dang nad dang lnga/ /ltung ba nye ba'i nyon mongs dang / /ngan du smra ba tha ma'o/ /tha ga skud ris gzod mkhan dang //lcags dang mgar mkhan lham mkhan dang / /rdza mkhan 'dreg mkhan shing mkhan dang / /smig ma mkhan dang bran rigs so/ /dge slong ma phra ma bya bar bsams nas tshe dang ldan pa khyod bram ze las rab tu byung bas na/ khyod la dge sbyong dang tshangs pa ga la yod ces 'dzer to//dge slong ma gang la ming 'di zhes bya rus 'di zhes bya'o zhes ming nas brjod de de skad du smra na nyes byas su 'gyur ro/ /rgyal rigs kyang de bzhin du bshad do/ /rje'u rigs la sogs pa ming nas brjod na ltung bar 'gyur ro/ /kun la yang de bzhin du sbyar ro/ / mdor na gong du drug po las gang yang rung ste/ khyod la yod do zhes kha zer/ gcig la gcig phra ma zer zhing gang zag 'byed pa'o/ /ltung ba gsum pa rdzogs so// //sangs rgyas bcom ldan 'das mnyan du yod pa na bzhugs so/ /de'i tshe bcu gnyis sde dag dge 'dun ma mthun pas chos bzhin rtsod pa spang bar shes bzhin du slar yang las de skyo sngogs byed do//rtsod pa 'di ni legs par ma spangs la gdod spang bar bya'o/ /'di ni legs par ma sbyangs kyi/ slar yang sbyang dgos so/ /'di ni legs par zhi bar ma byas kyi slar yang zhi bar bya dgos so zhes dge slong ma rnams la rtsod pa yang las kyi skyo sngogs byas pas bya ba dang byed pa mang bar gyur pas/klag pa dang rnal 'byor dang nang du sems zhi bar bya ba gtang bas de lta bur gyur pa dge slong ma dag gis ston pa la gsol nas bslab pa'i gnas bcas so/ /yang dge slong ma gang dge slong ma'i dge 'dun mi mthun pas chos bzhin du rtsod pa spangs par shes la yang las kyi skyo sngogs byed na ltung ba'o//dge 'dun zhes bya ba ni de bzhin gshegs pa'i nyan thos kyi dge 'dun ma'o/ /mthun zhes bya ba ni gcig tu mthun pa'o//chos bzhin zhes bya ba ni ji ltar 'dul ba ji lta ba dang / ston pa'i bstan pa ji lta ba'o/ /rtsod pa zhes bya ba ni rnam pa bzhi ste/ 'khrug pa'i rtsod pa dang / mi ston pa'i rtsod pa dang / nyes pas rtsod pa dang / bya ba'i rtsod pa'o/ /spangs par zhes bya ba ni dge 'dun gyi nang du'o/ / shes la zhes bya ba ni rang gis rig par gyur pa dang / gzhan gyis bsgo ba'o/ /yang las kyi skyo sngogs byed ces bya ba ni slar yang byed par 'dod pa'o/ de la nyes pa ji lta bu zhe na dge slong mas 'khrug pa'i rtsod pa la 'khrug pa'i rtsod par 'du shes shing spangs pa la spangs par 'du shes pa dang / spangs pa la the tshom du gyur pa zhig gis yang las kyi skyo sngogs byed na ltung bar 'gyur ro/ /ma spangs pa la spangs par 'du shes pa dang / ma spangs pa la the tshom ste yang las kyi skyo sngogs byed na nyes byas so/ /dge slong mas 'khrug pa'i rtsod pa la mi ston par 'du shes shing / spangs pa la spangs par 'du shes pa dang spang ba la the tshom ste/ yang las kyi skyo sngogs byed na ltung bar 'gyur ro/ /ma spangs pa la spangs par 'du shes pa dang / de bzhin du/ yang las kyi skyo sngogs byed na nyes byas su 'gyur ro/ /de bzhin du 'khrug pa'i rtsod pa la mi ston pa'i rtsod par 'du shes kyang rung /nyes pa'i rtsod pa dang / bya ba'i rtsod par 'du shes kyang rung / ltung ba gnyis dang nyes byas gnyis so/ /de bzhin du mi ston pa'i rtsod pa la mi ston pa'i rtsod par 'du shes pa dang / mi ston pa'i rtsod pa la 'khrug pa dang / nyes pa dang / bya ba'i rtsod par 'du shes pa'ang gong ma bzhin du bshad do//de bzhin du nyes pa'i rtsod pa dang bya ba'i rtsod pa gnyis la gcig cing yang bzhi bzhi ste/ ltung ba dang nyes byas bzhin du sbyar ro/ gang zag lnga ste/ yun du gnas pa dang / las byed pa dang / dad pas 'bul ba dang / ji lta bur lta ba dang /glo bur du lhags pa'i gang zag go/ /yun du gnas pa ni rtsod pa de'i thog ma dang bar ma dang / tha ma shes pa'o/ /las byed pa ni gang de'i las byed pa'o/ /dad pa 'bul ba'i gang zag ni gang gis rtsod pa de la dad pa phul ba'o/ /ji ltar mthong ba'i gang zag ni rtsod pa gang la rang gis ji ltar lta ba la sogs par 'dod pa la bzod pa lta bur smras te/bdag gis ni 'di ltar 'dod cing bzod do/ /'di lta bur blta zhing bya ba ni bdag gi 'dod cing mi bzod do zhes zer ba'o/ /glo bur du 'ongs pa'i gang zag ni rtsod pa de'i thog ma dang bar mi shes so/ /de ltar na gang zag snga ma gsum la ni ltung bar 'gyur/tha ma gnyis la ni rtsod pa spang ba las skyo sngogs byed na nyes byas so/ /ltung ba bzhi pa rdzogs so// //sangs rgyas bcom ldan 'das mnyan du yod pa na bzhugs so/ /de'i tshe dge slong ma sbom dga' mo yan lag gi nor bu zhes bya ba la sogs pa'i mtshan blta ba la mkhas pas khyim bdag dang bram ze'i khye'u dang bu mo la mtshan blta zhing /khye'u dang bu mo 'di dang 'di zhes bya ba ni skyid cing longs spyod chen po la sogs pa'i dbang dang ldan/ 'di dang 'di zhes bya ba ni dbang thang med do zhes lung ston cing kha kyal pa dag zer gcig pu grogs med par khyim bdag dang bram ze dag la chos 'chad pa dang /khyim bdag dang bram ze dag dge sbyong gau ta ma'i nyan thos ma 'di dag ni gcig pu grogs med par khyim bdag dang bram ze dag la chos 'chad/ khye'u dang bu mo la sogs pa'i mtshan blta zhing lung ston/kha kyal pa dag kyang smra'o zhes mi snyan par 'dzer zhing 'phya smod/ de ltar gyur pa thos nas/ dge slong ma rnams kyis dge slong la smras nas/ dge slong dag gis bcom ldan 'das la gsol pa dang / bcom ldan 'das kyis sbom dga' mo la bka' stsal nas legs pa bcu gcig gzigs te/nga'i nyan thos ma rnams la 'dul ba las bslab pa'i gnas bca'o zhes bya ba'i bar du snga ma bzhin no/ /yang dge slong ma gang gcig pu skyes pa la chos kyi tshig lnga'am drug bshad na rig pa'i bud med ma gtogs te lhung ba'o//yang dge slong ma gang zhes bya ba ni sbom dga' mo ste gzhan yang de dang 'dra'o/ /gcig pu zhes pa la zhes bya ba ni grogs med par bram ze dang khyim bdag gi skyes pa dag la chos 'chad pa'o/ /chos kyi tshig lnga'am drug bshad pa la/ chos ni sangs rgyas dang nyan thos kyis chos bshad pa la bya'o//tshig lnga'am zhes bya ba ni phung po lnga'i ming brjod pa tsam la bya'o/ /drug bshad na zhes bya ba ni rnam par shes pa drug gi ming brjod pa tsam la bya'o/ /rig pa'i bud med ma gtogs zhes bya ba ni de ltar bcom ldan 'das kyis dge slong ma gcig pu rig pa'i bud med med par skyes pa la chos kyi tshig lnga'am drug las lhag par ma 'chad ces bka' stsal pa dang /bcu gnyis sde mo dag rig pa'i bud med kyi gor spra mo dang lug mo dag bzhag nas khyim pa dang bram ze dag la chos kyi tshig lnga'am drug las lhag par 'chad do/ / dus phyi zhig na skye dgu'i bdag mo chen mo grong du bsod snyoms la zhugs pa dang / khyim bdag dang bram ze dag gis chos bshad par gsol zhes byas pa dang / skye dgu'i bdag mos rig pa'i bud med med do zhes smras pa dang / khyim bdag dang bram ze dag gis sbra mo dang lug mo la sogs pa yod do zhes smras so//de ltar gyur pa dge slong dag gis bcom ldan 'das la gsol ba dang / bcom ldan 'das kyis rig pa'i bud med ma gtogs zhes bka' stsal to/ /rig pa'i bud med ni mi'i bud med kyang yin la/ skad dang yang ldan zhing legs nyes ci smras pa brda phrad pa la bya'o/ / ma gtogs zhes bya ba ni spra mo dang lug mo la sogs pa la bya'o/ /ltung ba ni brgya brgyad cu po thams cad 'dra ste ngan song gsum du bsreg pa dang / btso ba dang / 'tshed par 'gyur bas ltung ba zhes bya ba'i tha tshig go/ /de la shes rab rnon pos the tshom dris pa'i len 'debs sam/ smyos pa dang nad kyis gzir ba la sogs pa la lhag par bshad kyang nyes pa med do//ltung ba lnga pa rdzogs so// //sangs rgyas bcom ldan 'das mnyan du yod pa na bzhugs so/ /de'i tshe na dge slong ma bcu gnyis sde mo dag bsnyen par ma rdzogs pa'i dge slong dang khyim bdag dang lhan cig chos kyi tshig dbyangs su cig char bram ze dag smrang klog pa bzhin du klog pa dang /khyim bdag dang bram ze dag 'phya smod nas/ 'dul ba la bslab pa'i gnas bcas pa'i bar du snga ma bzhin no/ /yang dge slong ma gang bud med bsnyen par ma rdzogs pa dang / chos kyi tshig cig char 'don na ltung ba'o//yang dge slong ma gang zhes bya ba ni bcu gnyis sde mo'am gang gzhan yang de dang 'dra'o/ /bud med bsnyen par ma rdzogs pa dang / chos kyi tshig cig char klog ces bya ba ni dge slong ngam khyim pa la sogs pa dang / sangs rgyas dang nyan thos kyis bshad pa'i chos kyi tshig dang yi ge gcig pa dbyangs rgyud gcig par klog na tshig nyid snga phyir gyur na'ang ltung ba'o//de la gang zag gis gsung rab la brten te gtsug lag khang brtsams pa lta bu dag lhan cig klog na nyes byas so/ /chos nyan pa dang slob ma dag ste/ gcig la gcig ston pa dang /brjed ngas pa la ston pa dang / nad pa dang sems 'khrugs pa la sogs pa ni lhan cig klog kyang nyes pa med do/ /ltung ba drug pa rdzogs so// //sangs rgyas bcom ldan 'das mnyan du yod pa na bzhugs so/ /de'i tshe na dge slong ma nyon mongs pa ma spangs 'dod chags dang ma bral ba dag la lhag ma'i ltung ba dag byung nas chos bzhin du lhag ma'i chad pa dang mgu ba dag byed pa dang /khyim bdag dang bram ze dag gis mthong ste/ dge slong ma 'di dag ni rin po che dang rin che bsags pa dang 'dra ste dkon mchog gsum la mchod pa dag byed do zhes pa dang /bcu gnyis sde mo dag gis dge slong ma 'di dag ni tshul bzhin du dkon mchog gsum la mchod pa byed pa ma yin gyis chad pa dang yid mgu bar byed do zhes smras pa dang / dge slong ma de dag gi nye gnas dge sbyong ma de dag khyim pa dang bram ze dag gis thos so//dge slong ma de dag nyes pa las tshangs pa de dag gi nye gnas dge slong ma dag la byin len la sogs pa byos shig ces smras pa dang / dge slong ma de dag gis khyed ni ltung ba chen po yang byed na/ byin len bya ci dgos zhes phyir 'khyal lo/ /de ltar gyur pa bcom ldan 'das la gsol nas 'dul ba la bslab pa'i gnas bcas pa'i bar du snga ma bzhin no//yang dge slong ma gang bsnyen par ma rdzogs pa'i gang zag la gnas ngan len gyi nyes pa brjod na dge 'dun gyis gnang ba ma gtogs te ltung ba'o/ /yang dge slong ma gang zhes bya ba ni bcu gnyis sde mo ste gang gzhan yang de dang 'dra'o//bsnyen par ma rdzogs pa'i gang zag la gnas ngan len gyi nyes pa brjod ces bya ba ni bsnyen par ma rdzogs pa'i dge sbyong man chad kyi khyim pa la bya'o/ /gnas ngan len zhes pa ni phas pham pa dang lhag ma'i nyes pa la bya'o//de la phas pham pa la sogs pa'i nyes pa khyim pa la sogs pas mi shes so snyam ste/ gnas ngan len gyi nyes pa brjod na ltung ba'o/ /mi shes pa la the tshom na'ang ltung ba'o/ /mi shes pa la mi shes so snyam na'ang nyes byas so/ /shes pa la the tshom na'ang nyes byas so/ / dge 'dun gyis gnang ba ma gtogs zhes bya ba ni dge slong ma drang mo nyes pa med pa la dge slong ma dag gis gsol ba dang zhu ba'i las kyis de'i nyes pa sgrogs su ma bcug pa lta bu la ni nyes pa med do/ /ltung ba man chad kyi nyes pa dge 'dun gyis sgrogs su bcug par bsnyen par rdzogs pa'i gang zag la sogs pa la brjod na nyes byas so//nad pa dang smyos pa dang sems 'khrugs pa la sogs pa la nyes pa med do/ /ltung ba bdun pa rdzogs so// //sangs rgyas bcom ldan 'das yul yangs pa can na bzhugs so/ /de'i tshe na dge slong ma gnas brtan gnas brtan ma bla ma'i khyad par thob pa gang dag yul gzhan zhig tu tshul du zhugs so//de'i dus na mu ge byung ste bsod snyoms la sogs pa rnyed par dka' nas gnas brtan ma de dag gis gcig la gcig bstod cing bla ma'i khyad par thob pa rnams gzhan la smras pa dang / bsod snyoms kyis kyang ma brel bar gyur to//tshul nas byung nas yangs pa can du song ba dang / dge slong ma dag gis bde bar 'ongs sam/ dbyar gnas pa'i tshe bsod snyoms dag gis brel bar ma gyur tam zhes dris pa dang / ji ltar gyur pa rgyas par smras so/ /don nyung ba'i dge slong dag zang zing cung zad kyi phyir mi las bla mar gyur pa'i yon tan rnams gzhan la smra'o zhes 'phya smod do//de ltar gyur pa bcom ldan 'das la'o zhes bya ba nas 'dul ba la bslab pa'i bar du snga ma bzhin no/ /yang dge slong ma gang bsnyen par ma rdzogs pa'i gang zag la mi'i chos la bla mar gyur pa bden pa brjod na ltung ba'o//yang dge slong ma gang zhes bya ba ni dge slong ma gnas brtan ma dag gam/ gang gzhan yang de dang 'dra ba dag go/ /bsnyen par ma rdzogs pa'i gang zag ces bya ba ni gong ma dang 'dra'o/ /mi'i chos la bla mar gyur pa bden pa brjod na zhes bya ba ni/ mi las bla mar gyur pa 'phags pa'i chos kyi khyad par bdag gis nges par rdzogs pa rnams zang zing cung zad kyi phyir/bsnyen par ma rdzogs pa'i gang zag la smras na ltung ba zhes bya ba'i tha tshig go/ /de la ma dad pa rnams dad pa bskyed pa'i phyir smras sam/ smyos pa dang sems 'khrugs pa la sogs pa la ni nyes pa med do//ltung ba brgyad pa rdzogs so// //sangs rgyas bcom ldan 'das mnyan du yod pa na bzhugs so/ /de'i tshe na dge slong ma chos sbyin ma zhes bya ba dge slong ma rnams kyi zhal ta byed de/ chos gos la sogs pa yang dengs/ cung zad ci rnyed pa la sogs pa yang dkon mchog gsum la 'bul lo//dus phyi zhig na dge 'dun rnams la gos kyi rnyed pa zhig grub pa dang / dge slong ma rnams kyis gos kyi rnyed pa 'di chos sbyin ma la stsal to zhes bcom ldan 'das la gsol pa dang / bcom ldan 'das kyis bka' stsal pa/dge slong ma rnams 'dus te mthun par gyis la gsol ba dang zhu ba'i las kyis gos rnyed pa chos sbyin ma la byin cig ces bka' stsal pa dang / de bzhin byin no/ /de'i 'og tu dge slong ma sbom dga' mos bcu gnyis sde la smras pa/ dge slong ma 'di dag ni dge 'dun gyis rnyed pa'i gos mdza' ba'i phyir gang zag bdag gir bsngos so zhes smras pa dang /don nyung du ma'i dge slong ma dag thos nas sngar mthun par byas pa'i 'og tu mi snyan par smra'o zhes 'phya smod de/ de ltar gyur pa dge slong dag gis bcom ldan 'das la'o zhes bya ba'i bar du snga ma bzhin no//yang dge slong ma gang sngar mthun te rung bar byas pa las/ de'i 'og tu khros 'khrugs rngams te/ dge slong ma dag la 'di ltar 'phags ma dag gis mdza' ba'i phyir dge 'dun la bsngos pa'i rnyed pa gang zag bdag gir bsngos so zhes de skad zer na ltung ba'o//sngar mthun te rung bar byas zhes bya ba ni sngar yid mthun par byas te dad pa phul nas byin pa'o zhes bya ba'i tha tshig go/ /mdza' ba'i phyir dge 'dun la bsngos pa'i rnyed pa gang zag bdag gir bsdos pa zhes bya ba ni slob dpon dang slob ma mdza' ba'am/ slob dpon dang mkhan po gcig par mdza' ba'i phyir dge 'dun gyi rnyed pa gang zag gir byas pa la bya'o//de la dge 'dun mthun par ma byas par bden pa lta bu la mdza' ba'i phyir bsngos zhes smra'am/ smyos pa la sogs pa la ltung ba med do/ /ltung ba dgu pa rdzogs so// //sangs rgyas bcom ldan 'das mnyan du yod pa na bzhugs so//de'i tshe na dge slong ma dag zla ba phyed phyed cing so sor thar pa'i mdo 'don pa dang / bcu gnyis sde dag gis bslab pa phra mo 'di dag zla ba phyed phyed cing gdon ci dgos gang gis nyes pa byas pa dag gis nyes pa'i dngos po dang / gang zag dang grong dang yul gyi phyogs la sogs pa mngon du bltar snang bas/bsgrag dgos na'ang de dag la bsgrag pa'i rigs/ yang gcig tu na nyes pa dang bcas pa dag ni thos nas phyir mi dga' bar 'gyur/ nyes pa med pa dag la ni mdza' bar 'gyur ro zhes smras pa dang / don nyung ngu ba'i dge slong ma dag bcu gnyis sde mo 'di dag ni bcom ldan 'das kyis gsungs pa'i bslab pa yang khyad du gsod do zhes 'phya zhing mi snyan par 'dzer to//de ltar gyur pa nas 'dul ba la bslab pa'i gnas bcas so zhes bya ba'i bar du snga ma bzhin no/ /yang dge slong ma gang zla ba phyed phyed cing so sor thar pa'i mdo bshad pa 'don pa'i tshe bslab pa khyad du bsad nas dge slong ma rnams la tshe dang ldan ma dag dge slong ma rnams 'gyod pa dang zhum pa dang /bag 'chums pa dang / gnod pa dang / yid la gcags par 'gyur ba bslab pa'i gnas phran tshegs rab tu phra ba 'di dag zla ba phyed phyed cing so sor thar pa'i mdo bshad pa 'don pa'i na 'don ci dgos zhes de skad zer na ltung ba'o//'gyod pa dang zhum pa zhes bya ba la sogs pa ni tshig gi rnam grangs so/ /bslab pa'i gnas zhes bya ba ni ltung ba sde lnga'i spyi la bya'o/ /phran tshegs zhes bya ba ni ltung ba la bya'o/ /rab tu phran tshegs zhes bya ba ni nyes byas la bya'o//de la mdo sde la sogs pa'i nang nas 'dul ba'i bslab par gtogs par 'byung ba dper na bcom ldan 'das bram ze dmar po las glengs te mig mangs dang rgyan po la sogs pa mi bya'o zhes bya ba'i bslab tshig lta bu dag 'don pa'i tshe 'di dag ci dgos zhes khyad du gsod na nyes byas so//zla mtshan zag pa'i dus dag lta bu'am smyos pa la nyes pa med do/ /ltung ba bcu pa rdzogs so// //mdor bstan pa ni/ sa bon 'phya ba bsgo ba dang / /khri dang gding dang phyis gnon dang / /'byung sla ba dang 'debs pa dang //rim pa gnyis su rtsig pa'o/ /sangs rgyas bcom ldan 'das mnyan du yod pa na bzhugs so/ /de'i tshe dge slong shing mkhan las rab tu byung ba cig shing dag gcod cing shing gi las byed pa dang shing la gnas pa'i lha dag gnas bshig go zhes mi dga' nas bcom ldan 'das la gsol pa dang /bcom ldan 'das kyis dge slong gis shing ma gcod cig ces bslab pa bcas pa dang / dge slong ma bcu gnyis sde mo dag nged kyi phyir 'dul ba la ma bcas so zhes rtsa dag gcod sa bon gyi tshogs dag 'jig tu bcug pa dang / don nyung ngu ba'i dge slong ma dag 'phya smod do//de ltar gyur pa nas 'dul ba la bca' ba'i bar du snga ma bzhin no/ /yang dge slong ma gang sa bon gyi tshogs dang 'byung po'i gnas 'jig gam 'jig tu bcug na ltung ba'o/ /de la sa bon gyi tshogs zhes bya ba rnam pa lnga ste rtsa ba dang sdong bu dang / rtse mo dang / 'gas pa dang / sa bon gyi yang sa bon no/ /de la rtsa ba'i sa bon la sa bon du'ang 'du shes la skye bar yang 'du shes te bcad na'ang ltung ba'o/ /sa bon skye ba yin pa la the tshom na'ang ltung ba'o/ /sa bon yin pa mi skye ba la skye bar 'du shes na'ang nyes byas/ the tshom na'ang nyes byas so//rtsa ba'i sa bon la sdong bur bsnor te skye ba la skye bar 'du shes te bcad na'ang ltung ba ste/ de bzhin du sa bon rnam pa lnga bsnor te skye ba la skye bar 'du shes te bcad na ni ltung ba'o/ /the tshom za na'ang ltung ba mi skye ba la skye bar 'du shes na yang nyes byas/the tshom za na'ang nyes byas so/ /'byung po zhes bya ba ni sbrul dang sdig pa dang sbrang ma la sogs pa la bya'o/ /gshas zhes bya ba ni shing ngam rtsa la bya'o/ /'jig gam zhes bya ba ni bdag gis bshig ba'o/ /'jig tu bcug ces bya ba ni gzhan la bcol na'o/ /sha mo dang /nya lci bas dang / tho bu rtse lta bu dag bkog pa ni nyes byas so/ /'chag pa'am 'gro ba'i tshe rtswa rang chag gam brtag pa lngas rung ba byas pa la ni nyes pa med do/ /smyos pa dang sems 'khrugs pa la sogs pa ni ltung ba thams cad kyang 'dra ste nyes pa med par bshad do/ / ltung ba bcu gcig pa rdzogs so// //ston pa rgyal po'i khab na ste/ de'i tshe na dge slong gyad bu nor dge 'dun gyi zhal ta byed pa'i tshe dge slong ma grogs mo dang / mdza' mos kyang gyad bu nor la 'phyas pa dang / lkog 'phyas dag byed pa dang / dge slong ma tshul bzhin du byed pa dag gis dge slong gyad bu nor ni 'khor gyi dam pa yin gyi rjes su 'phya ba mi rigs so zhes smras na/'on kyang dge slong ma mdza' mo phyi phyir 'phya ba dang / don nyung du ba'i dge slong ma rnams 'phya smod pa dang / bcom ldan 'das kyis bka' stsal nas 'dul ba la bslab pa'i gnas bcas pa'i bar du snga ma bzhin no//'phya ba'am gzhogs 'phyas byed na ltung ba'o/ /'phya ba'am zhes bya ba ni mngon sum du 'phya ba'o/ /gzhogs 'phyas byed ces bya ba ni lkog nas 'phya ba'o/ /de la dge slong gang zag bcu gnyis kyi las byed par gsol ba dang / zhu ba'i las kyis bskos nas las byed pa'i sbyor ba ma btang ba la 'phya na ltung ba'o/ /sbyor ba btang ba'i dge slong la yang snga ma'i las kyis glengs nas 'phya'am gzhogs 'phyas byed na yang ltung ba'o/ /gang zag gi las bcu gnyis su gsol ba dang zhu ba'i las kyis ma bskos pa mdong gsol tsam gyis rang gi rig pas gang zag gi las bcu gnyis byed pa lta bu 'phya'am gzhogs 'phyas byed na ltung ba'o//gang zag las su ma bskos pa'i dge slong phal pa dang dge sbyong dang khyim pa man chad la 'phya'am gzhogs 'phyas byed na nyes byas so/ /gang zag gi las su bskos pa las chos bzhin mi byed pa la 'phya na nyes med do//ltung ba bcu gnyis pa rdzogs so// //ston pa yul bai sha li na ste/ dge slong ma mos pa can zhes bya ba ltung ba byung nas/ dge slong dang dge slong ma tshul bzhin gnas pa dag gis phan pa dang bde ba dang yun du bde bar 'dod pa'i grogs mo dag gis ltung ba ma byed cig ces smras na/phyir lan log par ldon no/ /de ltar gyur pa nas 'dul ba la bslab pa'i gnas bcas pa'i bar du snga ma bzhin no/ /bsgo ba'i lan log par glon na ltung ba'o/ /de la dge slong ma rnams kyis dge sbyong ma khyod ni 'dri ba'i lan log par glon no zhes lan cig bsgo ba'i dge slong ma lta bu la ni phyin chad dge slong dang dge slong mas ci dris kyang rung ste lan log par glon pa'i bsam pas 'dri ba'i lan log par glon na thams cad du yang ltung bar 'gyur ro//dge slong ma rnams kyis ngag log pa can yin no zhes ma bsgo ba'i dge slong ma la dris te lan log par glon na thams cad nyes byas so//dge sbyong dang khyim pas dris pa'i lan log par glon na thams cad nyes byas so/ /dris pa'i lan mi smra na yang nyes byas so/ /mi bsad pa dang bros pa'i phyir 'dri na gtam rgyud gcig cing smra ba dang /smra na za ba'i tshe smras mi rung ba lta bu la nyes pa med do/ /ltung ba bcu gsum pa rdzogs so// //ston pa yul mnyan du yod pa na ste/ de'i tshe dge slong ma mang po rnams khyim bdag zhig gis mgron du bos pa dang / khri dang khri'u rnams bla gab med bar bor nas dong ba dang / bcom ldan 'das ni chos nyid kyis don rnam pa lnga'i phyir bshos gtsug lag khang du mnos nas gsol te nad pa la gzigs pa dang / lha la chos 'chad pa dang / nang du yang dag par 'jog pa la zhugs pa dang / mal stan la gzigs pa dang /nyan thos rnams la bslab pa bca' ba'i phyir ro/ /dus der ni mal stan gzigs par bzhed do/ /de'i dus char yang bab mal stan dag kyang bcom ldan 'das nyid kyis bsdus nas dge slong dag slar lhags pa dang / bcom ldan 'das kyis khyim bdag dang bram ze la sogs pa yon bdag rnams ni sha khrag zad zad du mal stan la sogs pa byed pas mal stan bla gab med par ma 'dor cig ces bslab pa bcas pa dang /dge slong ma tshul bzhin byed pa dag ni bka' bzhin du byed/ dge slong ma bcu gnyis sde rnams 'dul ba dge slong dag gi phyir bcas kyi nged kyi phyir ma yin zhes mal stan rnams bla gab med par 'dor ba dang /don nyung ngu ba'i dge slong ma rnams 'phya smod pa zhes nas 'dul ba la bslab pa'i gnas bcas pa'i bar du snga ma bzhin no/ /yang dge slong ma gang dge 'dun gyi khri 'am khri'u 'am stan nang tshangs can nam la ba 'am/sngas sam/ gor bu bla gab med pa la 'ding ngam 'ding du bcug pa las ma brtul tam brtul du ma bcol bar mtshams kyi phyi rol du ste/ dge slong ma 'khod pa la yang ma bcol na de 'dra ba'i rkyen ma gtogs te ltung ba'o//bla gab med ces bya ba ni steng dgab pa med pa la bya'o/ /mtshams kyi phyi rol zhes bya ba ni 'dom bzhi bcu rtsa dgu'i mtshams las 'das par song na ltung ba'o/ /mtshams der ma 'das kyang mal stan bla gab med par bzhag par char thigs gcig tsam phog gam/ rlung gis gra bzlog pa tsam gyis ltung ba'o//dge slong ma 'khod pa la ma bcol zhes bya ba ni lha khang ltos gtsug lag khang ltos/ /mal stan ltos mal stan sbos zhes lde mig khyog po la sogs pa ma byin pa'o/ /gtad pa ma byin pa'i gnas lnga ste/ nad pa dang / rgas pa dang po tsha med pa dang /khon yod pa dang / khyim pa la bcol na nyes byas so/ /dge sbyong ma la'ang nyes byas so/ /de 'dra ba'i rkyen ma gtogs zhes bya ba ni bar chad brgyad la bya'o/ /ltung ba bcu bzhi pa rdzogs so// //ston pa yul mnyan du yod pa na ste/ lho phyogs nas dge slong rgan zhugs gcig gnyis shig mnyan du yod pa'i gtsug lag khang du dbyar tshul du zhugs pa de dag dong ba'i tshe gtsug lag khang du mal stan rtswa bting ba dag bor nas de dag rul cing srin bu dag skyes pa dang /bcom ldan 'das kyis gtsug lag khang du mal stan rtswa bting ba bsdus te bor la song shig ces bka' stsal pa dang /dge slong ma bcu gnyis sde nged kyi phyir ma yin no zhes gtsug lag khang du rtswa bting ba dag mi sdud pa dang / don nyung ngu ba'i dge slong ma 'phya nas bslab pa bcas pa'i bar du snga ma bzhin no/ /yang dge slong ma gang dge 'dun gyi gnas khang du rtswa bting ngam lo ma bting yang rung ste/bting ngam 'ding du bcug pa las ma brtul tam brtul du ma bcol bar mtshams kyi phyi rol tu song ste/ dge slong ma 'khod pa la'ang ma bcol na de 'dra ba'i rkyen ma gtogs te ltung ba'o/ /gtsug lag khang du rtswa bting ngam lo ma bting pa las ma bsdus par 'dom bzhi bcu rtsa dgu tshun chad du 'gron/rtswa'i nang du srin bu byung ngam rtswa rlung gis bskyod pa tsam gyis ltung ba'o/ /bshad pa gzhan ni gong ma dang 'dra/ 'og gzhi skam po'am rdo gseg ma'i steng du bting ba la ni nyes pa med do/ /ltung pa bco lnga pa rdzogs so// //ston pa yul mnyan du yod pa na ste/ sbom dga' mos tshul las byung ba'i bco lnga'i nyin par dge slong ma gzhon nu ma dag la khyed kyi gos rnyed pa la sogs pa yang bsgrub bsod snyoms la 'dong zhes byas pa dang / dge slong ma de dag gis kyang /rang rang gi mkhan mo la byas nas sbom dga' mo dang bsod snyoms la 'dong ngo / /de bzhin dong ba las sbom dga' mo ni gzhan dang gtam 'dzer cing phyin 'dug /dge slong ma dag sngar gtsug lag khang zhig tu song ste nyal ba sbom dga' mos phyis 'ongs nas dge slong ma de dag gi steng du brdzis shing bar du 'tshang ste nyal ba dang /dge slong ma de dag la mi bde bar gyur nas phyir mnyan du yod par dong ste phyin pa dang / dge slong ma dag gis dris nas 'dul ba la bcas so zhes bya ba'i bar du snga ma bzhin no/ /yang dge slong ma gang dge 'dun gyi gnas khang na dge slong ma snga ma 'khod pa shes bzhin du su la gnod pa de 'gro bar 'gyur ba'i rkyen de nyid kyis phyir 'ongs te mnan nas stan la 'dug gam nyal na ltung ba'o//yang dge slong ma gang zhes bya ba ni sbom dga' mo ste gzhan yang de dang 'dra ba'o/ /'gro bar 'gyur ba'i rkyen de nyid ces gang 'gro bar 'gyur ba gnod par byed pa'i rkyen de nyid la bya'o//nad pa'am 'jigs pa lta bu rab tu 'tshong ngam steng du brdzis te nyal yang nyes pa med do/ /ltung ba bcu drug pa rdzogs so// //ston pa yul mnyan du yod pa na ste/ gleng gzhi snga ma bzhin du sbom dga' mo yang thog khang bur khri 'am khri'u gzer bu med pa la lus kyi ljid kyis phab pa dang /khang pa rdol nas khri'i rkang pa lhung nas dge slong ma 'og na nyal ba'i mgor phog ste gnod par gyur nas/ phyis mnyan du yod par phyin nas dge slong ma dag gis smras nas 'dul ba la bslab pa'i gnas bcas pa'i bar du snga ma bzhin no//yang dge slong ma gang dge 'dun gyi gnas khang gi steng yang thog gi khang bur khri'am khri'u rtsa ba 'byung sla ba la shes bzhin du lcid kyis phab nas 'dug gam nyal na ltung ba'o/ /rtsa ba 'byung sla ba zhes bya ba ni khri dang khri'u gzer bus ma btab pa la bya'o//shes bzhin du zhes bya ba ni 'og na dge slong ma nyal bar shes pa la bya'o/ /gang zag gis gnas khang gi yang thog gam/ khyim pa'i gnas khang gi steng gi yang thog lta bur 'og nas mi yod par shes bzhin du ljid kyis phab ste nyal lam 'dug na nyes byas/sa phug steng brtan po'am thog spang leb kyis bkab pa'i steng ngam/ skyang nul bzang por byas pa'i steng lta bu'am/ khri rkang gi steng yod pa lta bur nyal na nyes pa med do/ /ltung ba bcu bdun pa rdzogs so// //ston pa yul mnyan du yod pa na ste/spom dga' mo srog chags dang bcas pa'i chu spyod pa dang / grogs mo dag gis ci'i phyir srog chags dang bcas pa'i chu spyod ces smras na sbom dga' mos srog chags 'di dag nga'i snod du ci 'dod/ shar phyogs kyi rgya mtsho la sogs pa de bzhin du phyogs bzhi'i rgya mtshor ci'i phyir mi 'gro zhes smras pa dang /don nyung ngu ma'i dge slong ma dag 'phya smod pa nas 'dul ba la bslab pa bca' ba'i bar du snga ma bzhin no/ /yang dge slong ma gang chu srog chags yod par shes bzhin du rtswa'am lci ba'am sa la 'debs sam 'debs su bcug na ltung ba'o//chu srog chags yod par shes bzhin du zhes bya ba ni srog chags la rnam pa gnyis te/ mig gis mthong ba dang / chu tshags kyis zin pa'o/ /rtswa'am lci ba zhes bya ba ni thag pa dang maN+Dal gyi las byed pa'o/ /srog chags yod pa la yod par 'du shes pa dang the tshom na'ang ltung ba re re'o//srog chags med pa la yod par 'du shes pa dang / the tshom gnyis la'ang nyes byas re re'o/ /dge slong mas srog chags yod par shes bzhin du brtol te chu btang ba dang / skam la sems can yod par shes bzhin du chu phab ste sems can shi ba rnams ni sems can du shi ba'i grangs bzhin du ltung ba re rer 'gyur ro//ltung ba bco brgyad pa rdzogs so// //ston pa yul mnyan du yod pa na ste/ de'i tshe bcom ldan 'das kyis dge slong rnams la rdzas las byung ba'i bsod nams kyi dngos po bdun bshad pa dang /sbom dga' mos bdag gis kyang gtsug lag khang zhig brtsig go snyam nas/ bram ze'i chung ma zhig la 'di bzhin du chos bshad de dad pa skyes nas gtsug lag khang gong lugs 'dra ba cig brtsigs pa dang / de'i nub mo char pa bab nas thams cad zhig go//yon bdag bram ze mo dang don nyung ngu ba'i dge slong ma dag 'phya smod pa nas 'dul ba la bcas pa'i bar du snga ma bzhin no/ /dge slong mas gtsug lag khang chen po zhig brtsigs na sgo dang gtan pa'i gnas dang / 'jim pa dang pha gu'i spel ma rim pa gnyis sam gsum zhig rtsigs shig de las 'das par brtsigs na ltung ba'o//gtsug lag khang zhes bya ba ni spyod lam bzhi dang ldan pa'o/ /chen po zhes bya ba ni tshad dang rin che pa'o/ /rim pa gnyis gsum rtsigs shig de las 'das par brtsigs na ltung ba zhes bya ba ni rim pa gnyis sam gsum brtsig pa ma skams par de las 'das par brtsigs na ltung bar 'gyur zhes bya ba'i tha tshig go//rdo rje lta bu'i rim pa du yod kyang nyes med/ yon bdag gis myur du rtsigs shig ces pa ni nyes pa med do//ltung ba bcu dgu pa rdzogs so// //mdor bstan pa ni/ thun mong gnas dang khur ba dang / /spangs dang spangs par byar 'jug dang / /'dus dang dus min gzhag pa'o/ /kha nas mid la'ang de bzhin no/ /ston pa mnyan du yod pa na ste/ khyim bdag mu stegs can gcer bu pa'i chos la dad pa cig /phyogs bzhi'i dge sbyong rnams la sbyin pa'i 'gron khang chen po zhig brtsigs so/ /dus phyi zhig na gcer bu pa dag cig gnas pa dang / drug sde rnams der lhags nas/ gcer bu pa dag brdegs btsogs te bskrad pa dang / khyim bdag dang bram ze rnams 'phya smod nas/ bcom ldan 'das kyis gnas thun mong bar zhag lon na zan za gcig las ma za cig par bslab pa bcas pa dang / dge slong ma tshul can rnams ni de bzhin byed do/ /bcu gnyis sde dag nged kyi phyir ma bcas so zhes zan mang du za bar byed pa dang /don nyung ngu ba'i dge slong ma dag 'phya nas 'dul ba bcas pa'i bar du snga ma bzhin no/ gnas thun mong par zhag lon te/ dge slong ma min na zan lan cig zo shig de las lhag par zos na ltung ba'o/ /gnas thun mong zhes bya ba ni dge sbyong gang 'ongs pa gnas par bya ba'i phyir brtsigs pa'o//de la dge slong mas gnas thun mong du zhag gcig las lhag par 'dug na zhag grangs bzhin nyes byas re re/ zan lhag par zos na zan grangs bzhin ltung ba re/ gnas der 'dug ste/ zan gzhan du za na 'dug pa la nyes byas/gud na zos pa la nyes pa med/ gnas gzhan du 'dug ste zan der zos na ltung ba'o/ /gnas gzhan du 'dug pa la nyes pa med do/ /ltung ba nyi shu pa rdzogs so// //ston pa mnyan du yod pa na ste/ khyim bdag gi bu cig chung ma lan bdun gyi bar du bslangs kyang de bzhin du shi nas gzhan sus kyang bu mo ma byin no//khyim bdag cig gi bu mo g.yas zhar ma zhig yod pa yugs sa po de la byin no/ /g.yas zhar ma bag mar len pa'i dus su sbom dga' mo yang der song nas bsod snyoms bslangs pa dang / brel gyis sdod cig ces byas pa dang /sbom dga' mos g.yas zhar ma'ang nga'i nu mor 'ong gis nga la byin cig ces byas pa dang / des ci 'dod par byin no/ /de'i 'og tu sbom dga' mos bcu gnyis sde rnams slong du btang nas de bzhin du byin pa dang / de'i bag ma len pa'i rgyu cha la sogs pa zad par gyur nas/khye'u yugs sa pos bsnyad btags te ma blangs pa dang / de'i pha ma la sogs pa 'phya smod cing mi snyan par 'dzer nas 'dul ba bcas so zhes bya ba'i bar du snga ma bzhin no/ /dge slong mang mo khyim rnams su dong ba las gal te de dag la bram ze'am khyim bdag dad pa can dag gis phye'am khur ba dus kyis bdar ba 'dod na dge slong ma de dag gis de la lhung bzed gnyis sam gsum gang bar long shig /de las gzhan par bslangs na ltung ba'o/ /lhung bzed gang ba gnyis sam gsum bslangs nas phyi rol gyi kun dga' ra bar song la bdag kyang bza' bar bya/dge slong ma 'khod pa dang yang bgo bar bya ste/ de la de ni dus yin no/ /dad pa zhes bya ba ni dkon mchog gsum la dad pa la bya'o/ /lhung bzed gang ba gnyis sam gsum zhes bya ba ni lhung bzed la rnam pa gsum ste chen po dang 'bring po dang chung ngu'o//de la chen po ni yul ma ga d+hA'i 'bras skam phul lnga btsos pa'i chan dang tshod ma shong ba'o/ /chung ngu ni phul phyed dang gsum btsos pa'i chan dang tshod ma shong ba'o/ /'bring ni de gnyis kyi bar ro/ /de la dge slong mas bsod snyoms 'dod la dus kyis stobs na khyim gcig gi sgor lhung bzed gsum blang bar bya ste//de las lhag par phul gang tsam bslangs kyang ltung ba'o/ /lhung bzed chen po gang ba gnyis dang / 'bring po gang bar gcig bslangs na'ang ltung ba'o/ /'bring po gang ba gnyis dang chen po gang ba gcig dang gsum bslangs na'ang ltung ba'o//de la de ni dus yin no zhes bya ba ni lhung bzed gang ba gnyis sam gsum bslangs pa de gtsug lag khang du khyer la dge slong ma rnams dang lhan cig bza' bar bya ste/ de ltar ma byas na nyes byas so zhes bya ba'i tha tshig go//ltung ba nyi shu gcig pa rdzogs so// //ston pa yul mnyan du yod pa na ste/ drug sde rnams zas zos nas spangs pa'i 'og tu yang kha zas bab col tu za ba dang / dge slong dang khyim pa dag dang / bram ze dag 'phya smod nas bcom ldan 'das kyis bslab pa bcas pa dang /dge slong ma tshul bzhin du byed pa dag ni de bzhin du byed/ dge slong ma bcu gnyis sde dag zas zos spangs pa'i 'og tu kha zas bab chol du zos pa dang / don nyung ngu ba'i dge slong ma rnams 'phya nas 'dul ba'i bslab pa bcas pa'i bar du snga ma bzhin no//yang dge slong ma gang zas zos zin nas spangs pa la lhag mar ma byas par bca' ba'am bza' ba 'chos zos na ltung ba'o/ /spang ba zhes bya ba ni kha zas zos nas chog go zhes sems kyis gtang ba la bya'o/ /lhag mar ma byas pa zhes bya ba ni gzhan gyis zos pa'i lhag mar ma byas pa ste/lhag ma ni smod pa ma yin pas de za bar gnang ba yang / kha zas spangs pa'i 'og tu za 'dod pa'i phyir chad pa yin par shes par bya'o/ /bca' ba dang bza' ba zhes bya ba ni bca' ba lnga dang / bza' ba lnga'o/ /de la dge slong ma dag gis zan zos pa nas spangs pa las spyod lam btang ba'i 'og tu lhag mar ma byas pa'i bca' ba dang bza' ba zos na ltung ba'o//spyod lam ma nyams par zos na nyes byas/ lhag mar ma byas pa la lhag mar ma byas pa dang the tshom pa gnyis la ltung ba re re/ lhag mar byas pa la lhag mar ma byas par 'du shes pa dang the tshom pa gnyis la'ang nyes byas re rer 'gyur ro//shing tog dkon pa lta bu rnyed pa'am/ nad pa lhag mar ma byas pa zos kyang nyes pa med do/ /ltung ba nyi shu gnyis pa rdzogs so// //ston pa yul mnyan du yod pa na ste/ de'i tshe dge slong ma cig la nye gnas slob ma rgan blun zhig yod pa na de rtag tu ltung ba byung nas slob dpon gyis nyes pa 'chags su bcug pa dang /rgan blun des bdag gi slob dpon 'dis rtag tu nyes pa 'chags su bcug nas bdag gis kyang nyes pa zhig 'chags su gzhug go snyam mo//dus phyi zhig na dge slong ma des zan zos nas spangs pa'i 'og tu kha zas zhig rnyed pa dang / slob ma rgan blun de la lhag ma byed du btang ba dang / des bsam pa bdag gis ltung ba 'chags su gzhug pa'i skabs rnyed do snyam nas lhag mar ma byas par bza' ba'i phyir khyer te 'ongs nas slob dpon la zar bcug ste/zan de zos pa'i 'og tu ltung ba shogs shig ces byas pa dang / slob dpon gyis smras pa/ ngas ma nyes te/ khyod nyid ltung ba shogs shig ces byas nas bslab pa'i gnas bcas pa'i bar du snga ma bzhin no/ / yang dge slong ma gang gis dge slong ma'i zas zos nas spang bar shes la klan ka btsal te/ dge slong ma 'di ci nas kyang nyes pa byung bar bya snyam nas rkyen des 'phags ma 'di 'cho 'di zo zhes lhag ma ma byas pa'i bca' ba dang / bza' ba dus kyis stobs na ltung ba'o/ /klan ka btsal te zhes bya ba ni ltung ba'i nyes pa 'chags su gzhug pa'i klan ka tshol ba la bya'o//kha zas lhag mar ma byas pa la lhag mar ma byas par 'du shes pa dang the tshom za ba gnyis la ltung ba re re/ kha zas lhag mar byas pa la ma byas par 'du shes shing the tshom pa la'ang nyes byas re rer 'gyur ro//ltung ba gong ma dang 'di gnyis rgya gar gyi yi ge las mi 'byung ste/ ltung ba gnyis pa 'di yang dge slong ma dang sbyar na ni sbom dga' mo'i slob mar 'os zhes bshad do/ /ltung ba nyi shu gsum pa rdzogs so// //ston pa yul rgyal po'i khab na ste/lha sbyin gyis dge 'dun dbye ba'i phyir mtshams kyi nang du dge 'dun la so sor logs shig tu 'dus shing za ba dang / bcom ldan 'das kyis mtshams kyi nang dge 'dun du longs par logs shig tu zan ma za cig par bcas pa dang / bcu gnyis sde dag nged kyi phyir 'dul ba ma bcas so zhes mtshams kyi nang du logs shig tu 'dus te zan za ba dang /don nyung ngu ba'i dge slong ma dag 'phya ba nas bslab pa bcas pa'i bar du snga ma bzhin no/ /'dus shing za na dus la bab pa ma gtogs te ltung ba'o/ /de la dus ni 'di yin te na ba dus so//las dus so/ /lam du zhugs pa dus so/ /grur zhugs pa dus so/ /dus ston chen po dang dge sbyong gi zas dus te/ de la de ni dus yin no/ /'dus shing za zhes bya ba ni dge 'dun bzhi yan chad mtshams kyi nang du 'dus shing za ba la bya/dus la bab pa ma gtogs zhes bya ba ni dus 'di rnams su 'dus shing za bar gnang ba la bya/ na ba dus zhes bya ba ni nad pa gral du 'gro mi nus na nad g.yog tshun chad bzhi la bya/ las dus zhes bya ba ni mchod rten dang gtsug lag khang rtsig pa la bya/ lam du zhugs pa la dus zhes bya ba ni gdugs tshod yol gyis dogs pa la bya ste/sngar lhags pa dang phyis lhags pa dag so sor 'dus shing za ba la bya'o/ /grur zhugs pa dus zhes bya ba ni gru chen po gcig gi nang du dge slong mang po 'khod pa dag yon bdag so sor dge slong bzhi bzhi'am/lnga lnga'i zan so sor sbyar ba la bya/ dus ston chen po dus zhes bya ba ni mngon par byang chub pa'am dus kyi ston mo ji lta bu byed kyang rung ste/ sder so sor zhag tu go dogs nas 'dus shing za ba la bya/ dge sbyong gi zas zhes bya ba ni dang po rgyal po gzugs can snying po'i zhang po mu stegs kyi dge sbyong kun tu 'tsho ba zhes bya bas mtshams kyi nang du dge sbyong dag gi zan sbyar ba las so sor 'dus shing zar rjes su gnang ste/mu stegs kyi dge sbyong gis mtshams kyi nang dge 'dun gyi zan so sor sbyar kyang bzar gnang ba la bya'o/ / gnang ba'i dus 'di lta bu ma gtogs par mtshams kyi nang du 'du shes pa dang the tshom gnyis la ltung ba re re/ mtshams kyi phyi rol la mtshams kyi nang du 'du shes pa dang the tshom gnyis la nyes byas re re/ mtshams kyi nang du dge 'dun so sor 'du shes shing za ba rnams tha na lan tshwa dang chu tsam yang phan tshun bsrul par bya ste//de ltar bsrul pa 'ongs sam zhes ma dris par so sor zan za na'ang dge 'dun gnyi ga las ltung ba/ mtshams kyi nang na gsum man chad 'dus te za na nyes byas zan cung zad tsam bsrul te zos na ltung ba med do/ / ltung ba nyi shu bzhi pa rdzogs so// //ston pa yul mnyan du yod pa na ste/ de'i tshe bcu bdun sde rnams byis pa gzhon pas bkres pa dang / dge ba dag byed mi nus pa dang / phyi dro'i dus shig na khyim bdag cig ston mo byed pa'i zan la lta zhing 'dug go/ / de nas khyim bdag des ci 'phags pa dag phyi dro'i bshos bzhed dam zhes byas pa dang / bcu bdun sde dag byin cig dang za'o zhes smra nas de dag zan zos nas dge ba cher spyad pa dang / drug sde dag gis ci'i phyir de ring dge ba dag lhag par byed ces dris pa dang / bcu bdun sdes phyed yol ba'i zan dag zos pa rgyas par smras so//de ltar gyur pa la bslab pa bcas pa dang / bcu gnyis sde rnams nged kyi phyir ma yin no zhes zas dag dus med par za ba dang / don nyung ba'i dge slong ma dag 'phya ba nas 'dul ba bcas pa'i bar snga ma bzhin no//yang dge slong ma gang dus yol nas bca' ba'am bza' ba 'chos sam zos na ltung ba'o/ /dge slong ma gang zhes bya ba ni bcu gnyis sde ste/ gang gzhan yang de dang 'dra ba'o/ /dus yol zhes bya ba ni dus la rnam pa gnyis te/ /phyed yol ba dang skya rengs ma shar ba'o//de la dge slong mas dus ma yin pa la dus ma yin par 'du shes pa dang the tshom pa gnyis la ltung ba re re/ dus la dus ma yin par 'du shes pa dang / the tshom pa gnyis la nyes byas re re/ bza' ba zhes bya ba ni phye dang / khur ba dang / 'bras chan dang /zan dang sha rnams so/ /bca' ba ni rtsa ba dang sdong bu dang / me tog dang / 'bras bu dang lo ma rnams so/ /ltung ba nyi shu lnga pa rdzogs so// //ston pa yul mnyan du yod pa na ste/ de'i tshe dge slong 'char ba nag po zhes bya ba cig rtag tu bsod snyoms byed cing zas kyi lhag ma dag sbed kha zas gsher ba rnyed pa dag skams shing sbed de/nam yul rmugs shing bsod snyoms mi nus pa na za ba dang / dge slong ma dag 'phya smod par gyur nas bcom ldan 'das kyis bslab pa bcas pa dang /dge slong ma tshul bzhin can dag ni de bzhin du byed/ bcu gnyis sde dag kha zas kyi lhag ma sogs shing spags pa rnams za ba dang / don nyung ngu ba'i dge slong ma rnams 'phya nas 'dul ba bcas pa'i bar du snga ma bzhin no/ /yang dge slong ma gang bzhag pa'i bca' ba dang bza' ba 'chos sam zos na ltung ba'o//bzhag pa zhes bya ba ni sngar bdag gis byin len byas nas reg pa mtshams kyi nang du bzhag nas/ snga dro'am phyi dro lta bu'i dus las yol na spags pa zhes bya ba ste de lta bu'i kha zas zos na ltung ba'o/ /de la phyi dro spags pa ni bu ram dang sbrang rtsi lta bu'o//de la dge slong mas spags pa la spags par 'du shes pa dang / the tshom pa gnyis la ltung ba re re/ spags pa ma yin pa la spags par 'du shes pa dang / the tshom du gyur pa nyes byas so/ /lhung bzed zas kyis 'bags pa ma bkrus na nyes byas/de bzhin du chos gos dang / ril ba dang / lde mig khyog po la sogs pa zas kyi nang du 'bags na thams cad nyes byas so/ /ltung ba nyi shu drug pa rdzogs so// //ston pa yul mnyan du yod pa na ste/ de'i tshe dge slong nag po zhes bya ba mnyan du yod pa na nad po che chen po byung ste mi mang po shi ba dur khrod du bskyal ba'i sngas na zan bzhag pa dag za zhing nyams tshon por gyur te rtag tu dur khrod du 'gro bas mnyan du yod pa'i sgo bas/dge slong nag po chen po 'di ni rtag tu dur khrod du 'gro zhing grong du bsod snyoms dag mi slong nyams tshon por gyur pa las mi sha za bar nges so zhes kun tu bsgrags pa dang /yul mi dag gis mi sha za'am mi za bgom mo snyam nas mi gson po zhig dur khrod du gzhag ste sngas su zan lnga bzhag pa dang / dge slong nag po chen po der zan len du song ba dang /wa zhig kyang der zan bza'o snyam nas der 'gro ba dge slong nag pos mthong nas brgyugs pa dang dur khrod kyi mi de skrag nas langs so/ /khyim bdag 'phya bar gyur nas dge slong dag gis byin len ma byas par zan ma za cig ces pa dang / dge slong ma dag gis byin len ji lta bu mi shes nas byin len rnam pa lngar gsungs nas bslab pa bca' ba'i bar du snga ma bzhin no//yang dge slong ma gang ma byin par kha nas mid pa'i zas zos na chu dang so shing ma gtogs te ltung ba'o/ /ma byin pa zhes bya ba ni byin len ma byas pa la bya ste byin len ni rnam pa lnga'o//lus kyis lus la byin pa dang / lus kyis zin pas lus kyis zin pa la byin pa dang / lus kyis zin pas lus kyis ma zin pa la byin pa dang / lus kyis ma zin pas lus kyis ma zin pa la byin pa dang / yul smod pa can dang lnga'o//shing tog la sogs pa'i 'bru rnams byin len bya ba'i gnas lnga ste/ khri chen po dang / khri dang khri'u dang thu ba dang sle'u rnams so/ /shing thog la sogs pa brtag pa rnam pa lnga ste/ me dang mtshon dang sen mo dang ne tso dang nyams pa rnams so/ /yang rnam pa lnga ste/dbyug pa dang / gshegs pa dang / bcad pa dang dbug pa dang phyung ba rnams so/ /byol song cang shes rta dang spre'u la sogs pa gtong ba'i 'du shes dang ldan pas byin len byas na nyes pa med do/ /byin len ma byas pa la ma byas par 'du shes pa dang /byas pa la ma byas par 'du shes pa bzhi rgyud kyang gong ma dang 'dra bar sbyar ro/ /byang gi sgra mi snyan lta bur byin len ma byas kyang nyes pa med do/ /ltung ba nyi shu bdun pa rdzogs so// //mdor bstan pa ni/ srog chags bcas chu gcer bu dang / / dmag ltar 'gro dang gnas pa dang / /g.yul shom rta dang rdeg pa dang / /bzas pa dang ni 'chab pa'o/ /ston pa yul kau shAm+bI na ste/ de'i tshe dge slong ma bcu gnyis sde'i nang na ti sha dang nan+da ti sha zhes bya ba gnyis srog chags dang bcas pa'i chu spyod cing 'thung ba dang / dge slong ma grogs mo dag gis ci'i phyir srog chags dang bcas pa'i chu spyod cing 'thung zhes smras na srog chags 'di dag ci'i phyir shar phyogs kyi rgya mtsho la sogs pa phyogs bzhi'i rgya mtshor mi 'dong zhes smras pa dang / don nyung ba'i dge slong ma rnams 'phya smod pa nas bslab pa bcas pa'i bar du snga ma bzhin no//yang dge slong ma gang srog chags dang bcas pa'i chu shes bzhin du spyod na ltung pa'o/ /dge slong ma gang zhes bya ba ni ti sha dang nan+da ti sha ste/ gang gzhan yang de dang 'dra'o/ /srog chags zhes bya ba ni rnam pa gnyis te/ mig gis mthong ba dang / chu tshags zin pa'o/ / spyod na zhes bya ba ni chu spyod pa la phyi nang rnam pa gnyis so/ /de la phyi'i ni chag chag dang 'ji ba la sogs pa'i las byed pa la bya'o/ /nang gi ni zas kyi bya ba rnams dang skom du btung ba'o/ /skabs 'dir ni nang gi bya ba rnams dang sbyar ro/ /de la dge slong mas srog chags dang bcas par 'du shes pa dang /the tshom pa la ltung ba re re sbyar ro/ /srog chags med pa'i chu la srog chags yod par 'du shes pa dang / the tshom la'ang nyes byas re rer 'gyur ro/ /de bzhin du sha tse dang ldum sna tshogs pa'ang de bzhin du bzhi rgyud dang sbyar ro//ltung ba nyi shu brgyad pa rdzogs so// //ston pa rgyal po'i khab na ste/ de'i tshe dge slong kun dga' bos dus ston chen po zhig gi tshe lag na zas kyi lhag ma khyer ba gcer bu ma rgan gzhon gnyis shig sbrang mo byed pa'i gzhon nu shos la byin pa dang / rgan pas smras pa 'phags pa kun dga' bo khyod la chags kyis phyi bdar dag gyis shig ces smras pa dang /khyim bdag dang bram ze dag gis thos nas 'phya zhing smod pa las bcom ldan 'das kyis 'dul ba bcas pa dang bcu gnyis sde rnams nged kyi phyir 'dul ba ma bcas so/ / zhes yang dang yang gcer bu pa dag la zan byin pa dang / don nyung ngu ba'i dge slong ma dag 'phya smod pa nas 'dul ba la bcas pa'i bar snga ma bzhin no/ /yang dge slong ma gang gcer bu pa'am/ gcer bu ma'am/ kun tu rgyu'am/ kun tu rgyu mo'am/ rang gi lag nas bza' ba dang bca' ba byin na ltung ba'o//kun tu rgyu zhes bya ba ni mu stegs grangs can gyi gzhung 'dzin pa la'o/ /de la dge slong mas pha ma gcer bu pa'am lta ba las bzlog pa'i phyir ram/ phor bu sa la gzhag pa'i nang du so sor bgos te/ byin na nyes pa med do/ / ltung ba nyi shu dgu pa rdzogs so// //ston pa yul mnyan du yod pa na ste/ de'i tshe rgyal po gsal rgyal gyi 'bangs ri brags na gnas pa dag cig log nas de dag la dmag rgol du 'gro ba'i tshe drug sde rnams dmag 'dong ba'i lam gar 'dug nas khyed kyi mi spre'u dang 'dra/ba glang ni phag dang 'dra/ rta ni lug lta bu'o zhes 'phya nas dmag mi rnams phyir log nas rgyal pos ci'i phyir log ces smras pa dang / de dag gis drug sdes 'phya ba rgyas par smras nas/ rgyal pos bcom ldan 'das la gsol nas bslab pa bcas pa dang / bcu gnyis sde rnams deng [(]kyi [,]gi [)]phyir ma yin no zhes dmag chas pa lta ba nas don nyung ba la 'phya smod de 'dul ba bcas pa'i bar du snga ma bzhin no//yang dge slong ma gang dmag chas pa bltar 'gro na de 'dra'i rkyen ma gtogs te ltung ba'o/ /dmag ces bya ba ni rnam pa bzhi ste/ shing rta dang ba glang dang /rta dang / rkang thang pa'i tshogs so/ /gtsug lag khang lam ka na 'dug ste ched du bltar ma song bar mthong ba la nyes pa med do/ /ltung ba sum cu pa rdzogs so// //gleng gzhi gong ma dang 'dra ste/ rgyal po gsal rgyal gyi dmag ri brags pa la rgol ba'i tshe mi thub pa 'dra ste blon po dag gis bsod nams chen po dang ldan pa 'ga' 'dir 'bod par rigs zhes gsol pa dang /rgyal po gsal rgyal gyis khyim bdag mgon med zas sbyin bos so/ /khyim bdag mgon med zas sbyin gyis der yun ring du gnas pas skya zhing rid par gyur pa dang /rgyal pos bud med dran nam ci nyes dris pa dang / bdag dge slong dag blta bar 'tshal lo zhes gsol to/ /de nas rgyal pos drug sde rnams bos nas der gzhag pa dang / yun ring du gnas shing dmag la lta ba dang / 'phyas 'dogs pa la zhag gnyis las 'das par ma gnas shig ces bslab pa bcas pa dang /bcu gnyis sde mo dag nged kyi phyir ma yin zhes zhag mang du gnas pa dang / don nyung ngu ba'i dge slong ma dag 'phya smod pa nas bslab pa bcas pa'i bar du snga ma bzhin no/ / de 'dra ba'i rkyen gcig gis dge slong ma dmag chas pa la bltar 'gro na dge slong ma des dmag de'i nang du zhag gnyis las 'das par mi bya'o/ /de las 'das par gnas na ltung ba'o/ /de 'dra ba'i rkyen ces bya ba ni rgyal po'am blon pos ched du bkug pa la bya'o/ / bar chad brgyad byung na de las 'das par gnas kyang nyes pa med do/ /ltung ba sum cu gcig pa rdzogs so// //gleng gzhi gong ma dang 'dra ste/ bcu gnyis sde mo dag dmag gi nang du zhag gnyis gnas pa'i tshe g.yul bshams pa dkrug cing lta ba dang /dmag mi rnams mi dga' bar gyur nas 'dul ba la bslab pa'i gnas bcas so/ /zhag gnyis dmag de'i nang na gnas pa'i tshe'ang gal te dge slong mas bshams pa dkrugs sam/ rgyal mtshan dang dpung gi mchog gi g.yul bshams pa'i dmag la lta na ltung ba'o//bshams pa dkrugs sam zhes bya ba ni dmag bshams pa rnam pa bzhi lta bu ste/ sog ka pa dang / nam mkha' lding lta bu dang / nam gru'i dbyibs lta bu dang / zla ba kham pa lta bu de de lta bur dkrugs pa la bya'o/ /rgyal mtshan zhes bya ba ni rnam pa bzhi gzugs brnyan bris pa ste/seng ge dang / khyu mchog dang / chu srin dang / nam mkha' lding ngo / dpung gi mchog ces bya ba ni stobs kyi mchog lta bu la bya'o/ /ltung ba sum cu gnyis pa rdzogs so// //ston pa mnyan du yod pa na ste/ bud med ni rang bzhin gyis khro spro thung bas sbom dga' mo dge slong ma dag la khu tshur dang thal mo la sogs pas brdeg 'tshogs pa dang /don nyung ngu ba'i dge slong ma dag 'phya smod pa nas bcom ldan 'das kyis bka' stsal pa'i bar du ste/ bslab pa bcas pa'i bar du snga ma bzhin no/ /yang dge slong ma gang khros 'khrugs rngam nas dge slong ma la brdegs na ltung ba'o//khros zhes bya ba ni cung zad khros pa la bya'o/ /'khrugs zhes bya ba ni dbang du gyur pa la bya'o/ /rngam zhes bya ba ni brdeg par 'dod pa la bya'o/ /de la dge slong mas khros pa'i bsam pas brdeg par 'dod pas sor mo la sogs pa yan lag so sor gang gis brdegs kyang ltung ba re rer 'gyur ro//khu tshur gyis brdegs na ltung ba gcig /phyags ma lta bus brdegs na phyags ma'i grangs bzhin du ltung ba re re/ thal mo rig pa'i sngags byed pa'i tshe thal mos bsnun pa dang /len pa'am nad la phan pa'i phyir bsnun pa lta bu ni nyes pa med do/ /dge tshul man chad la brdeg pa dang dge slong la bsnun pa las ma phogs na nyes byas so/ /ltung ba sum cu gsum pa rdzogs so// //gleng gzhi gong ma dang 'dra ste/ sbom dga' mos dge slong ma dag la rdeg par gzas pa las/don nyung ngu ba'i dge slong ma dag 'phya nas snga ma bzhin te bslab pa bcas so/ /yang dge slong ma gang khros 'khrugs rngam nas dge slong ma rdeg par gzas na ltung ba'o/ /dkyus kyi bshad pa yang snga ma dang 'dra'o//ltung ba sum cu bzhi pa rdzogs so// //ston pa yul mnyan du yod pa na ste/ de'i tshe bcu gnyis sde mo dag la lhag ma dang pham pa'i sbom po dag byung na bcabs so/ /phyis 'thab mo byung ba dang / gcig la gcig nyes pa byung ba glengs pa dang /don nyung ba'i dge slong ma dag 'phya smod pa nas bslab pa bcas pa'i bar du snga ma bzhin no/ /yang dge slong ma gang dge slong ma'i gnas ngan len gyi nyes pa shes bzhin du 'chab na ltung ba'o/ /gnas ngan len gyi nyes pa zhes bya ba ni pham pa'i sbom po dang lhag ma gnyis la bya'o//dge slong mas ltung ba man chad kyi nyes pa shes bzhin du bcabs na nyes byas so/ /mdo sde dang 'dul ba 'dzin pa lta bu'i dge slong ma'i nyes pa glengs na phyir gnod par 'gyur ba lta bu'am/ 'thab krol can lta bu'i nyes pa glengs na 'thab mo'am bdag la gnod pa cher 'gyur ba lta bu ni nyes pa shes bzhin du ma glengs kyang nyes pa med do//ltung ba sum cu lnga pa rdzogs so// //mdor bstan pa ni/ bde dang me dang dad pa dang / /bsnyen par ma rdzogs chos pa smra/ /dge tshul ma dang kha bsgyur dang //rin po che dang tsha ba'i dus/ /ston pa yul mnyan du yod pa na ste/ /de'i tshe dge slong ma bcu gnyis sde dag lhag ma byung nas dge slong ma gzhan dag gis glengs te 'chags su bcug pa dang / sbom dga' mo dang gtsug dga' mo dag gis ci nas kyang dge slong ma 'di dag la 'gyod pa dang mi dga' pa skyed do snyam nas/dge slong ma de dag la nged kyis zan blangs te sbyin dang grong du bsod snyoms la 'dong ngo zhes smras nas de dag bsod snyoms la khrid do/ /bcu gnyis sde sbom dga' mo la sogs pa ni res kyis grong du zas zos nas gdugs tshod yol ba dang /dge slong ma gzhan la khyed kyi zan nged mi 'byor gyis song shig ces de dag gi zan bcad nas de dag la rmya bar gyur te glos phab cing nyal ba dge slong ma dag gis rmas pa'i bar du rgyas par sbyar te/ bcom ldan 'das kyis bslab pa bcas so//yang dge slong ma gang ci nas kyang dge slong ma 'di zan bcad do snyam nas zan bcad par bsams te/ rkyen de nyid kyis dge slong ma la 'phags ma tshur shog khyim dag tu 'dong / der khyod la bca' ba dang bza' ba bzang po 'grangs kyi bar du sbyin du gzhug go zhes de skad smras la/des de la sbyin du ma bcug gi de'i 'og tu 'phags ma khyod song shig khyod dang lhan cig 'dug gam gtam zer ba nga la bde ba med kyi/ nga gcig pu 'dug gam smras na bde'o zhes de skad zer na ltung ba'o/ /de la dge slong mas zan gcod pa'i bsam pas thabs gang gis kyang rung ste/zan bcad na ltung ba'o/ /sman gyi cho ga'am bsgo bzhin du byed pa la ni nyes pa med do/ /ltung ba sum cu drug pa rdzogs so// //sangs rgyas bcom ldan 'das mnyan du yod par ljongs rgyu zhing gshegs pa'i tshe dgongs mal cig tu 'khor rnams sdong rgan re re'i drung du gnas bcas pa dang /drug sde rnams me mgal skor zhing rtse ba dang / bcom ldan 'das kyis bslab pa bcas pa dang / bcu gnyis sde rnams nged kyi phyir ma bcas so zhes me la rtse zhing me 'bud pa dang don nyung ba'i dge slong ma rnams 'phya ba nas bcas pa'i bar du snga ma bzhin no//yang dge slong ma gang min bar bdag me gzhug pa'i phyir me la reg gam reg tu bcug na ltung ba'o/ /de la dge slong ma dkon mchog gsum gyi phyir me la reg ste pog phor 'gengs pa'i tshe dkon mchog gsum la mchod do snyam pa'i bsam pas byin gyis ma brlabs te reg na ltung ba'o//reg tu bcug pa yang de bzhin no/ /de bzhin du slob dpon dang / tshangs pa mtshungs par spyod pa grogs kyi phyir me 'bud na'ang de dag gi phyir ro zhes byin gyis ma brlabs par bus na thams cad ltung bar 'gyur ro/ /dge 'dun gyi phyir me 'bud na'ang ji srid 'bud kyi bar du rgyun gcig tu byin gyis ma brlabs na shing re re bcug pas ltung ba re rer 'gyur/lhung bzed bsreg pa dang tshon gyi las byed pa na 'di lta bu'i phyir ro zhes byin gyis ma brlabs na nyes byas so/ /de la nad pa'i phyir ram byin gyis brlabs pa rnams ni me la reg tu bcug kyang nyes med do//me ma mur thal tshan la reg na nyes byas so/ /nyi ma shar ba bla gab med pa na me bus na nyes pa med do/ /ltung ba sum cu bdun pa rdzogs so// //ston pa mnyan du yod pa na ste/ de'i tshe bcu gnyis sde rnams ni gzhon dar la bab par gyur/drug sde rnams la 'char ka ni dgra bcom par gyur/ mos pa can ni cang mi smra bar gyur/ tha skar skyes dang nab so po gnyis ni tshe 'phos/ dga' bo dang bsnyen dga' bo gnyis ni rgas 'khogs par gyur te lus pa dang / bcu bdun sde rnams kyis sngon bdag cag chung ba'i tshe 'di gnyis kyis gtses kyis/da ni dga' bo la spangs pa'i las bya'o snyam nas dga' bo'i gos bkru'o zhes brid nas dga' bo'i gos rnams chur bcug ste/ bcu bdun sdes dga' bo las dad pa blangs nas bsnyen dga' bo chos bzhin du spang ba'i las byas pa dang /phyis dga' bos dad pa mi sbyin no zhes smras pa dang / bcom ldan 'das kyis bslab pa bcas so/ /de ltar bslab pa bcas pas dge slong ma tshul la gnas pa dag ni de bzhin du byed/ bcu gnyis sde dag dad pa sngar phul ba'i 'og tu phyir len cing skyo sngogs byed pa dang don nyung ngu ba'i dge slong ma dag 'phya nas/'dul ba bcas pa'i bar du snga ma bzhin no/ /yang dge slong ma gang gis dge 'dun gyi bya ba chos bzhin du byed pa la dge slong ma la dad pa byin nas de'i 'og tu dge slong ma la dad pa slar byin cig /khyod la mi sbyin no zhes de skad zer na ltung ba'o/ /chos bzhin ces pas ni gsol ba'i las dang / gsol ba dang gnyis kyi las dang gsol ba dang bzhi'i las tshul bzhin du byed pa'o/ /las tshul bzhin du mi byed pa las dad pa phyir blangs kyang nyes med do/ /ltung ba sum cu brgyad pa rdzogs so// //ston pa yul mnyan du yod pa na ste/ de'i tshe dge slong ma rnams bcu bzhi 'am bco lnga'i nub mo khyim pa dang dge slong gi rnams 'dus nas mtshan rangs me mar 'dzugs shing mdo sde klog pa dang / dge slong rgan zhugs cig me mar gyi 'od la gnyid kyis log nas sngon gyi chung ma dang ci byas pa bla brdol ba dang /khyim bdag dang bram ze dag dge slong rgan po rnams kyang sngon gyi chung ma dag dran no zhes 'phya smod nas bslab pa bcas pa dang / bcu gnyis ste dag nged kyi phyir ma yin no zhes bsnyen par ma rdzogs pa dang /dge tshul ma dag dang lhan cig nyal ba las bslab pa bcas so/ /yang dge slong ma gang bsnyen par ma rdzogs pa'i gang zag dang / khyim gcig gi nang du nub gnyis las ring du nyal na ltung ba'o/ /bsnyen par ma rdzogs pa'i gang zag ces bya ba ni dge tshul man chad la bya'o//khyim zhes bya ba ni khyim rnam pa bzhi ste/ zad par g.yogs pa la zad par bskor ba dang / zad par g.yogs pa la zad par ma bskor ba dang / cung zad bskor la cung zad g.yogs pa'o/ /nub gnyis zhes bya ba ni 'char ba dang sgra gcan 'dzin lhan cig 'dug pa las/sgra gcan 'dzin bcom ldan 'das kyi nam sa'i sar nyal ba dang / sbrul gdug pas de'u zos pa dang / dge slong ma dag gis dge tshul ma phyi rol du gzhag pa dang / bcom ldan 'das kyis nub gnyis lhan cig nyol cig ces rjes su gnang ba la bya'o//nub gnyis las 'das zhes bya ba ni nub gsum pa'i skya rengs kyis chod na ltung bar 'gyur te/ skya rengs ma shar ba'i dus su bdag phyir byung ngam/ dge sbyong phyir byung ngam langs te 'dug na nyes med do/ /ltung ba sum cu dgu pa rdzogs so// //ston pa rgyal po'i khab na ste/dge slong ma ha ri sti ma dang / dge slong ma gcig gnas pa las ltung ba mnyam du byung nas dge slong ma grogs mos ni ltung ba byung ba mthol zhing bshags nas dgra bcom pa thob pa dang / dge slong ma ha ri sti mas bcom ldan 'das kyis bar du gcod pa'i chos su gsungs pa gang yin pa de dag bsten kyang bar du gcod par mi 'gyur ro zhes smras pa dang /don nyung ngu ba'i dge slong ma rnams 'phya smod pa nas 'dul ba bcas so zhes bya ba'i bar du snga ma bzhin no/ /yang dge slong ma gang bcom ldan 'das kyis bar du gcod pa'i chos su gsungs pa gang yin pa de dag bsten kyang bar du gcod par mi 'gyur te/de ltar bcom ldan 'das kyis chos bstan pa bdag gis shes so zhes de skad zer na/ dge slong ma de la dge slong ma dag gis 'phags ma khyod ji ltar bcom ldan 'das kyis bar du gcod pa'i chos su gsungs pa gang yin pa de dag bsten kyang bar du gcod par mi 'gyur te/de ltar bcom ldan 'das kyis chos bstan pa bdag gis shes so zhes ma zer cig /bcom ldan 'das la skur pa ma 'debs shig /bcom ldan 'das la skur pas legs par mi 'gyur ro/ / bcom ldan 'das ni de skad mi gsung ngo / /'phags ma bar du gcod pa'i chos ni bar du gcod pa nyid do zhes bcom ldan 'das kyis rnam grangs du mar gsungs te/ de dag bsten na bar du gcod par 'gyur ro/ /'phags ma khyod 'di 'dra ba'i sdig pa can gyi lta bar gyur pa thong shig ces de skad bsgo shig /dge slong ma de la dge slong ma rnams kyis de skad bsgo nas/ gal te dngos po de gtong na ni legs/ gal te mi gtong na dngos po de spang bar bya ba'i phyir lan gnyis lan gsum du yang dag par bsgo bar bya'o/ /yang dag par bstan par bya'o//lan gnyis lan gsum du yang dag par bsgo/ yang dag par bstan nas dngos po de gtong ba lta na ni legs/ gal te mi gtong na ltung ba'o/ /dar du gcod pa zhes bya ba ni ltung ba sde lnga'i nyes pa la bya'o/ /lan gnyis lan gsum du bsgo zhes bya ba la dang po tshig 'jam pos bsgo ste ma nyan na nyes byas/de bzhin lan gnyis kyi bar du bsgo ste ma nyan na nyes byas re re/ bsgo ba lan gsum rdzogs te ma nyan na ltung ba'o/ /chos bzhin du ma bsgo ba la ma nyan na nyes pa med/ ltung ba bzhi bcu pa rdzogs so// //gleng gzhi gong ma dang 'dra ste/ dge slong ma ha ri sti ma sdig pa'i lta ba mi gtong nas dge slong ma dag gis bskrad pa dang / bcu gnyis sde dag gis ma ha ri ste ma bsten cing lhan cig gnas shing bsten pa las bcas/ yang dge slong ma gang de skad smra ba'i dge slong ma chos bzhin ma byas pa sdig pa can gyi lta bar gyur pa ma spangs par shes la smra/kun tu smra/ gnas par byed spyod par byed cing dang khyim gcig gi nang du nyal bar byed na ltung ba'o/ /de skad smra ba zhes bya ba ni bar du gcod pa'i chos rnams bar du gcod par mi 'gyur ro zhes smra ba'o//chos bzhin ma byas zhes pa ni sdig pa'i lta ba slar ma bshags pa'o/ /spyod par byed ces bya ba ni bsnyen bkur la sogs pa byed pa'o/ /sdig pa'i lta ba de las dbral ba'i phyir na nyes pa med do/ /ltung ba bzhi bcu gcig pa rdzogs so// // ston pa rgyal po'i khab na ste/ dge tshul ma mdzes ma dang / rgyal mtha' ma zhes bya ba gnyis dge slong ma grogs mo dag gcig dang 'dug pa las de dag 'dod pa la chags pa'i nyes pa'i nyes pa dag cig byung ngo / /nyes pa byung ba dang de gnyis kyi grogs chos slar nyes pa chos bzhin du byas bsgrims shing 'bad pas dgra bcom pa thob po//dus phyi zhig na dge tshul ma de gnyis me tog thu ba'i tshe grogs mo dgra bcom ma de nam mkha' la 'phur zhing 'gro ba'i grib ma las dge tshul ma de gnyis kyis mthong nas de gnyis kyis 'dod pa ni bar du gcod par mi 'gyur ro zhes smras pa dang /dge slong ma dag 'phya smod nas 'dul ba bcas pa'i bar du snga ma bzhin no/ /dge tshul ma zhig 'di skad du ji ltar bcom ldan 'das kyis 'dod pa ni bar du gcod pa'o zhes gsungs pa gang yin pa de dag bsten kyang bar du gcod par mi 'gyur te/de ltar bcom ldan 'das kyis chos bstan pa bdag gis shes so zhes zer na/ dge tshul ma de la dge slong ma dag gis dge tshul ma khyod ji ltar bcom ldan 'das kyis 'dod pa ni bar du gcod pa'o zhes gsungs pa gang yin pa de dag bsten kyang bar du gcod par mi 'gyur te/de ltar bcom ldan 'das kyis chos bstan pa bdag gis shes so zhes de skad ma zer cig /bcom ldan 'das la skur pa ma 'debs shig /bcom ldan 'das la skur pas legs par mi 'gyur ro/ /bcom ldan 'das ni de skad mi gsung ngo //'dod pa la bar du gcod pa ni bar du gcod pa nyid do zhes bcom ldan 'das kyis rnam grangs du mar gsungs te/ de dag bsten na bar du gcod par 'gyur gyis/ dge tshul ma khyod 'di lta bu'i sdig pa can gyi lta bar gyur pa thong shig ces de skad bsgo shig / dge tshul ma de la dge slong ma rnams kyis de skad bsgo nas gal te dngos po de gtong ba lta na ni legs/ gal te mi gtong na dngos po spang ba'i phyir lan gnyis lan gsum du yang dag par bsgo bar bya/ yang dag par bstan par bya'o/ /lan gnyis lan gsum du yang dag par bsgo yang dag par bstan nas dngos po de gtong ba lta na ni legs//gal te mi gtong na dge tshul ma de la dge slong ma dag gis deng phyin chad dge tshul ma khyod bcom ldan 'das de bzhin gshegs pa dgra bcom pa yang dag par rdzogs pa'i sangs rgyas de la ston pa'o zhes ma zer cig /tshangs pa mtshungs par spyod pa mkhas pa bla ma'i gnas gang gis phyi bzhin du yang ma 'gro shig /dge slong ma rnams dang dge tshul ma zhag gnyis kyi bar du gang nyal du dbang ba de yang deng phyin chad khyod la med de/ bud med blun mo khyod mig lam na mi snang bar byas kyis phar song shig ces bsgo shig /yang dge slong ma gang gis dge tshul ma de ltar mig lam na mi snang bar byas par shes bzhin du gnas byin nam yo byad byin nam de dang khyim gcig gi nang du nyal bar byed na ltung ba'o/ / gnas byin zhes bya ba ni zhur bcug pa la bya'o/ /lan gnyis lan gsum du bsgo zhes bya ba ni dge tshul ma de dag gsol ba dang bzhi'i las byed par snang ba'i phyogs su bzhag nas bsgo bar bya ba'o/ /sdig pa'i lta ba las bzlog pa'i phyir bsten na nyes pa med do/ /ltung ba bzhi bcu gnyis pa rdzogs so// //ston pa rgyal po'i khab na ste/ de'i tshe klu ri bo dang dga' skyed gnyis kyi rten btsugs pa la mchod pa chen po byed pa'i dus na lho phyogs kyi gar mkhan gyis gar sna tshogs byas nas/ de'i 'og tu mi 'dus pa dag gad mo dbyung ba'i phyir bsnyen dga' bo dang mos pa can gnyis gcig la gcig zas kyi lhag ma byed cing za ba ltar lhung bzed thal bas bkang bkang nas steng du bu ram kham gcig bzhag ste/gcig la byin pa dang / bu ram khar bcug nas thal ba phyir mgo steng du pho ba dang / gad mo cher byung nas gar mkhan yang rnyed pa mang du grub bo//drug sde rnams snying na nas phyi de nang par bcu gnyis sde rnams dang gros byas nas cha lugs rol mo mkhan ltar sgyur te/ mngon par byang chub pa'i gar stabs ke'u ra zhes bya ba byas nas mi 'dus pa rnams ngo mtshar cher gyur nas lho phyogs kyi gar gyi rnyed pa yang chad par gyur pa dang /gar mkhan la sogs pa khyim bdag dang bram ze rnams dge sbyong 'di dag ni rol mo mkhan bzhin gos dkar po gyon zhes 'phya smod pa las 'dul ba la bslab pa'i gnas bcas so/ /yang dge slong mas gos gsar pa zhig rnyed nas sngon po'am dmar po'am ngur smrig gam kha dog rnam pa gsum las gang yang rung ba zhig tu sgyur cig /gal te dge slong mas sngon po'am dmar po'am ngur smrig dag gam kha dog rnam pa gsum las gang yang rung ba cig gos kha dog ma bsgyur bar spyod na ltung ba'o//sar pa zhes bya ba ni rnam pa gnyis te/ gsar du rnyed pa dang / gos nyid gsar pa'o/ /sngon po zhes bya ba ni rams su btsos pa'o/ /dmar po zhes bya ba ni btsag tu btsos pa'o/ /ngur smrig ces bya ba ni star ga dang shing shun la sogs pa las btsos pa ste/ kha dog nog bag chags pa'o/ /de la dge slong mas tshon chen po brgyad de/ gur gum dang / li kru dang / mtshal dang / mthing shing dang / le brgan rtsi dang / rma shing dang / rgya skyegs dang / btsod rnams su kha dog bsgyur ba'i gos 'chang na nyes byas so/ /tha na lhung bzed kyi snod yan chad kha dog ma bsgyur bar 'chang na ltung ba'o//ltung ba bzhi bcu gsum pa rdzogs so// //ston pa yangs pa can na ste/ yangs pa can gyi byis pa dag cig rgyan dag bkrol nas chu ngogs su bzhag nas khrus byed pa la khrus zin pa dang rgyan dag brjed de dong ba las/rgyan de rnams bsnyen dga' bos bdag po med pa'i nor snyam nas blangs pa dang / byis pa de rnams kyis nged kyi rgyan brkus so zhes bsnyen dga' bo'i gos kyang dral 'phya zhing smod pa las bslab pa dang / dge slong ma tshul bzhin gnas pa dag de bzhin byed bcu gnyis sde mo dag nged kyi phyir ma bcas so zhes nor bu dang rgyan la sogs pa rin po che rnams la reg pa dang /don nyung ngu ba rnams 'phya ba nas 'dul ba bcas pa'i bar du snga ma bzhin no/ /yang dge slong ma gang rin po che lta bur rang gi lag gis len tam len du bcug na ltung ba'o/ /kun dga' ra ba'i nang na 'dug gam gnas khang gi nang na 'dug pa ni ma gtogs so//kun dga' ra ba'i nang na 'dug pa 'am gnas khang gi nang na rin po che'am rin po che lta bu zhig yod na/ dge slong ma de su'i yin pa de len grang snyam du sems la long shig /de la de ni dus yin no//rin po che zhes bya ba ni rgyan la sogs pa'am gser dngul dag la bya'o/ /rin po che lta bu zhes bya ba ni mda' gzhu mtshon cha la sogs pa dang / rol mo'i cha byad rnams la bya'o/ /kun dga' ra ba na 'dug pa'am gnas khang gi nang na 'dug pa ma gtogs zhes bya ba ni mnyan du yod pa na lha mtshams ma rgyan rnams bkrol nas chos nyan pa las rgyan rnams gtsug lag khang gi nang du bkrol te bzhag pa brjed nas song ba dang /kun dga' bos gzhan gyis len grang snyam ste blangs nas/ bcom ldan 'das kyis rjes su gnang bar nges so snyam nas blangs pa dang /bcom ldan 'das kyis kyang kun dga' ra ba'i nang ngam/ gnas khang gi nang na rin po cher gtogs pa'am/ rin po che lta bu 'dug pa su'i yin pa len grang snyam du sems la long shig ces rjes su gnang ba la bya/ de la dge slong mas nor bu la sogs pa rin po che rnams phug pa dang mtshan mas btab pa tha na zangs kyi dong rtse sna chad la reg gam gzhan reg tu bcug na thams cad ltung ba'o//ma phug pa dang mtshan mas ma btab pa la len nam len du bcug na nyes byas/ mda' gzhu la sogs pa rol mo'i cha byad rgyud chags pa rnams la reg na tha na chu sbrang yan chad la reg na ltung ba'o//rgyud ma chags pa'am yan lag ma tshang ba la reg gam len du bcug na nyes byas/ ko ba'i dong rtse dang byis pa rtse ba'i mda' gzhu lta bu la reg na nyes byas/ de bzhin gshegs pa'i gdung sha ri ram lta bu la reg na ltung ba'o//mchod pa'i phyir na nyes med/ ltung ba bzhi bcu bzhi pa rdzogs so// //ston pa rgyal po'i khab na ste/ rgyal po gzugs can snying po la chu mig lnga brgya zhig yod pa'i nang na chu mig gnyis shig lhag par yon tan che ste/grang ba'i tshe na dro/ /dro ba'i tshe na grang ngo / /de gnyis gcig gi nang du ni rgyal po khrus byed gcig gi nang du btsun mo rnams khrus byed do/ /rgyal pos bdag gi yo byad gzhan ni thams cad kyis de bzhin gshegs pa 'khor dang bcas pa la bstabs na/ da ni chu mig yon tan dang ldan pa 'di gnyis su khrus mdzad par bstab po snyam nas/bcom ldan 'das la gsol pa dang / rgyal po khrus byed pa'i chu mig tu ni drug sde rnams 'khru/ btsun mo rnams khrus byed pa'i chu mig tu ni bcu gnyis sde rnams rtag tu khrus byed pas rgyal po dang btsun mo rnams khrus byed pa'i bar chad du gyur nas/khyim bdag dang bram ze rnams 'phya smod pa nas 'dul ba bcas pa'i bar du snga ma bzhin no/ /zla ba phyed phyed cing khrus gyis shig ces bcom ldan 'das kyis bka' stsal to/ /de dang 'gal bar byas na dus la bab pa ma gtogs te ltung ba'o//de la dus ni 'di yin no/ /dpyid smad kyi zla ba phyed dang gnyis dang / dbyar gyi dang po zla ba phyed dang gsum po 'di dag ni rab tu tsha ba'i dus yin no/ /lhag ma ni na ba dus so/ /las dus so/ /char bab pa dus so/ /de la de ni dus yin no/ /zla ba phyed phyed cing khrus gyis shig ces bya ba ni dge slong ma rnams dri ma mi 'khru zhing dri ma dang bcas par bsod snyoms la zhugs pa dang /khyim bdag dang bram ze rnams khyed dri mas rnam par grol ba'i lam tshol zhes 'phya ba nas zla ba phyed phyed cing rjes su gnang ba la bya'o/ /dpyid smad kyi zla ba phyed dang gnyis dang /dbyar gyi dang po zla ba phyed dang gsum zhes bya ba ni dbyar zla ra ba nas dbyar zla tha chungs nya'i bar du zla ba phyed dang gsum po 'di ni tsha ba'i dus pas rtag tu 'khrur gnang ngo / /lhag ma ni nad pa'i dus so zhes bya ba la sogs pa smos pa ni tsha ba'i dus zla ba phyed dang / gsum po ma gtogs par rkyen 'di lta bu dag byung na gnas so zhes bya ba'i tha tshig go//ltung ba bzhi bcu lnga pa rdzogs so// //mdor bstan pa ni/ byol song 'gyod pa mdzub mo dang / /rtse dang lhan cig dngang byed dang / /sbed dang gdeng med rtse ba med/ /skyes pa med par lam du 'gro//ston pa rgyal po'i khab na ste/ de'i tshe 'char ba 'phong slob pa'i slob dpon zhig 'dug pa'i slob ma dag gi gan du song nas mda' lnga 'phangs te bya rog bsad pa dang / 'phong slob pa'i slob dpon gyis 'char ba la mi snyan par bsgrags pa'i phyir/ slob ma dag la bya rog gi ro bskur nas grong khyer thams cad du sgrogs su bcug pa dang /khyim bdag dang bram ze dag dge sbyong tshig pa'o zhes 'phya smod pa las bslab pa bcas pa dang / dge slong ma bcu gnyis sde dag nged kyi phyir ma bcas so zhes shes bzhin du srog chags byol song dag gsod pa dang /don nyung ngu ba'i dge slong ma dag 'phya smod pa nas 'dul ba bcas pa'i bar du snga ma bzhin no/ /yang dge slong ma gang ched du bsams te byol song gi skye gnas su song ba'i srog chags bsad na ltung ba'o/ /bag ma byas pa las byol song shi na thams cad nyes byas/bag dang bcas bzhin du shi na nyes pa med do/ /ltung ba bzhi bcu drug pa rdzogs so// //ston pa yul mnyan du yod pa na ste/ de'i tshe dge slong ma bcu gnyis sdes dge slong ma gzhan dag gi 'gyod pa skyed cing mi dga' bar byed pa dang / don nyung ngu ba'i dge slong ma rnams 'phya smod nas bslab pa'i gnas bcas so//yang dge slong ma gang gi ched du bsams te ci nas kyang dge slong ma 'di skad cig mi dga' bar bya'o snyam nas rkyen de nyid kyis dge slong ma la 'gyod pa skyed na ltung ba'o/ /yang dge slong ma gong zhes bya ba ni bcu gnyis sde dag ste/gang gzhan yang de dang 'dra'o/ /de la dge slong mas pha rol la 'gyod pa skyed pa'i bsam pas khyod bsnyen par rdzogs pa'i tshe rgyal po 'di zhes bya ba dang / nyi ma dang zla ba gza' la zhugs pa dang / sa g.yos pa shes sam zhes dris na/ des mi shes zhes smras pa dang /'o na khyod lo nyi shu ma lon zhes 'gyod pa skyed pa'am mkhan po dang slob dpon gyi chos gos dag khyer ram zhes dris pa dang / khyer ro zhes smras nas khyod pham pa byung ngo zhe'am/ khyod ni mkhan po dang slob dpon nyes pa can bskrad pa'i slob ma yin no zhe'am/khyod 'jigs pa'i sa 'di lta bur phyin no zhes zer bas bdag nyid dgra bcom par ston to zhe'am thabs 'di rnams gang gis kyang rung ste/ 'gyod pa skyes na ltung ba re re'o/ /'o ma dang mar dang / nya sha zos pas mdze can du 'gyur ro zhes zer na nyes byas so/ /phan par 'dod pa'i phyir khyod la gzhan gyis 'di skad du 'gyod pa bskyed na 'gyod pa ma skye shig ces bstan pa dang /'dul ba'i phyir spyod yul ma yin pa'i grong du ma 'jug shig ces bstan pa la nyes med do/ /ltung ba bzhi bcu bdun pa rdzogs so// //ston pa mnyan du yod pa na ste/de'i tshe bcu gnyis sde mo dag gcig la gcig ga ga tshil dag byed pa dang / don nyung ngu bas 'phya smod pa nas 'dul ba bcas pa'i bar du snga ma bzhin no/ /yang dge slong ma gang dge slong la mdzub mos ga ga tshil byed na ltung ba'o/ /de la dge slong mas mdzub mo re res ga ga tshil byed na ltung ba/khu tshur gyis byed na ltung ba gcig /smre ba bstan pa'i phyir na nyes pa med do/ /ltung ba bzhi bcu brgyad pa rdzogs so// //ston pa yul mnyan du yod pa na ste/ de'i tshe bcu bdun sde rnams chu bo a dzir ba ti zhes bya ba na khrus byed cing 'khod pa dang /rgyal po gsal rgyal gyis btsun mo phreng ldan ma la khyod kyi yon gnas dag rtsed mo byed pa la ltos zhes byas pa dang / phreng ldan mas rgyal po nyid bgres kyang bdag la rtse na/ bcu bdun sde rnams ni gzhon pas rtse bas lta ngo mtshar ci che zhes smras so//de'i tshe bcu bdun sde'i nang u pA li zhes bya ba dgra bcom pa zhig yod pa des rgyal po 'phya bar shes nas/ rdzu 'phrul bskyed de bcu bdun sde rnams 'khor dang bcas pa nam mkha' la 'phur ba dang / phreng ldan mas rgyal po la bcu bdun sde nam mkha' la 'phur zhing mdzes pa la gzigs/sems ni glog dang 'dra nyon mongs pa ni ye shes kyis spong bas sems can gyi drod bzung du mi rung ngo zhes smras so/ /de ltar gyur pa bcom ldan 'das kyis gsan nas bslab pa bcas pa dang / bcu gnyis sde rnams nged kyi phyir ma yin no zhes rtag tu chu la rtse zhing chu la khrus byed pa dang don nyung ngu ba'i dge slong mas 'phya smod pa nas 'dul ba bcas pa'i bar du snga ma bzhin no//chu la rtse na ltung ba'o/ /de la dge slong mas chu la rtse na dngos po dgus re res kyang ltung bar 'gyur te/ khrus ras bcing ba dang / chur zhugs pa dang /lte ba man chad nub pa dang / byi 'dzul byed pa dang / 'gram gcig nas gcig tu byung ba dang / sbal skad zer ba dang / chu rnga brdung ba dang / chu rgyun las bzlog pa dang / gcig la gcig chu 'thor ba ste 'di rnams gang byas kyang dngos po re res ltung bar 'gyur ro//rtse ba'i bsam pa med pas 'khru na nyes med do/ /chu la rtse ba'i bsam pas sor mo man chad chu'i nang du bcug na nyes byas so/ /ltung ba bzhi bcu dgu pa rdzogs so// //ston pa yul mnyan du yod pa na ste/ de'i tshe 'phags pa ma 'gags pa bcom ldan 'das kyis dgra bcom pa thob par byas pas rus pa'i ri las ni bsgral/mchi ma dang khrag gi rgya mtsho ni bskams pas/ bcom ldan 'das la drin la lan glan na/ bcom ldan 'das kyang sems can dag 'dul ba la dgyes pas bdag gis sems can dag 'dul na/bcom ldan 'das kyi drin lan lon par 'gyur ro snyam nas yul gzhan du song ba dang / khyim bdag cig la bu mi sring gsum yod pa las bu mo ngo mtshar du 'phyo ba zhig pas/ 'phags pa ma 'gags pa der 'ongs pa la chags nas/chags pa'i mtshan ma dag bstan nas 'phags pa ma 'gags pa la 'dzin du chas pa dang / ma 'gags pa nam mkha' la 'phags nas rdzu 'phrul dag bstan pa dang / mo yang dad pa skyes nas bden pa mthong bar gyur to/ /bden pa mthong nas 'phags pa ma 'gags pa bshos la spyan drangs pa dang /ma 'gags pas zan za ba'i tshe sgo dam du gcod na zan bza' zhes smras pa dang / mos kyang de bzhin du khas blangs nas ma 'gags pa zan za ba'i tshe bu mo de'i ming po khye'u gnyis la bram ze dang khyim bdag gzhan gyi bu dag gis khyed kyi sring mo ni sbyar ma ste ya mtshan kun dang nyin zhag 'das par byed do zhes smras pa dang /khye'u de gnyis khros nas ma 'gags pa bsad pa'i phyir ral gri phyung ste brgyugs pa dang / sgo la mthar nas ma 'gags pas kyang khye'u de gnyis la chos bshad de bden pa mthong bar byas nas ma 'gags pa la dge slong dag gis rmas pa nas rgyas par sbyar te bslab pa bcas pa dang /bcu gnyis sde mo rnams nges kyi phyir ma bcas so zhes skyes pa dang khyim gcig gi nang du nyal bar byed pa dang / don nyung du mas 'phya ba nas 'dul ba bcas pa'i bar du snga ma bzhin no/ / yang dge slong ma gang skyes pa dang khyim gcig gi nang du nyal na ltung ba'o/ /khyim zhes bya ba zad par g.yogs pa lta bu bzhi rgyud gong ma dang 'dra'o/ /de la dge slong mas khang pa'i yang thog tu nyal lo/ skyes pa 'og khang du nyal na yang na skas dbyung bar bya/ sa skas yod na mthongs dgab par bya'o//de ltar ma byas na ltung bar 'gyur ro/ /de bzhin du 'og khang dang bar khang la sogs pa yang sbyar te/ sab mo dang rib ma dang yol ba la sogs pa yang de bzhin du bar ma chad ma byas na ltung bar 'gyur ro/ /ma ning la sogs pa mi ma yin pa pho dag dang lhan cig khyim gcig tu nyal na nyes byas so//ltung ba lnga bcu pa rdzogs so// //ston pa yul mnyan du yong pa na ste/ de'i tshe dge slong ma sbom dga' mos gzugs mi sdug par bsgyur nas dge slong ma dag la bsdigs shing sngangs par byed pa dang / dge slong ma dag 'phya smod pa nas 'dul ba bcas pa'i bar du snga ma bzhin no/ /yang dge slong ma gang dge slong ma la sngangs par byed du 'jug na tha na rtsed mo bya bar bsams na yang ltung ba'o/ /dge slong mas dge slong ma sngangs par bya ba'i phyir sol ris bris sam/ gzugs sdong dum 'dra bar mi sdug par bsgyur te gnod sbyin la sogs pa'i gzugs 'di 'dra'o zhe'am/sgra mi snyan par phyung ste/ gnod sbyin la sogs pa'i sgra 'di 'dra'o zhe'am/ lus la rtsub pos reg par byas te gnod sbyin la sogs pa'i reg pa 'di 'dra'o zhes bdag byed dam gzhan byed du bcug kyang rung ste/thams cad ltung ba'o/ /lha'i gzugs la sogs pa nas 'jam pas reg pa'i bar du byas na thams cad nyes byas su 'gyur ro/ /dri zhim pa dang mi zhim pa'i khyad par yang gong ma bzhin no/ /dge slong ma dang khyim pa la sogs pa la bsdigs na nyes byas so//nyon mongs pa las dgrol ba'i phyir lam rgyud lnga'i sems can gyi gzugs dang rgyud la sogs pa bstan cing bshad pa la nyes pa med do/ /ltung ba lnga bcu gcig pa rdzogs so// //ston pa yul mnyan du yod pa na ste/khyim bdag cig gis sangs rgyas la sogs pa dge slong 'khor dang bcas pa bshas la spyan drangs so/ /de'i tshe drug sde dang bcu bdun sde rnams rdzing zhig gi 'gram du phyin pa dang / drug sdes bcu bdun sde la smras pa/ 'u bu cag chu'i nang du byi'u zul byas te/su ring du 'dug phod pa lta'o zhes smras pa nas/ bcu bdun sde dag chu'i nang du zhugs te byi'u zul byed pa dang / drug sde rnams kyis de dag gi gos rnams bsdus nas sbas te song ngo / /bcu bdun sde dag chu'i nang nas byung ba dang / gos rnams med nas rdzing gi 'gram na sgren mor 'khod pa'i tshe/'phags pa maud gal gyi bu yang der 'ongs nas maud gal gyi bus ting nge 'dzin gyis dgongs te de dag gi gos rnams phyung ste byin no/ /de lta bur gyur pa las bslab pa bcas pa dang / bcu gnyis sde rnams nged kyi phyir ma bcas so zhes gzhan gyi gos dang yo byad la sogs pa sbed pa dang /don nyung ngu ba'i dge slong ma rnams 'phya smod pa nas 'dul ba bcas pa'i bar du snga ma bzhin no/ /yang dge slong ma gang dge slong ma'am dge tshul lam dge tshul ma'i lhung bzed dam/ chos gos sam lhung bzed kyi snod dra ba'am skom btub ba'i snod dam/ska rags sam/ dge slong gi 'tsho ba'i yo byad dag kyang rung ba zhig sbed dam sbed du 'jug na de 'dra ba'i rkyen ma gtogs te ltung ba'o/ /dge slong mas pha rol ku re bya ba'i phyir tha na lan tshwa'i snod yan chad sbed dam sbed du 'jug na ltung ba'o/ /bar chad brgyad byung ba lta bu'i phyir na sbas kyang nyes pa med do//ltung ba lnga bcu gnyis pa rdzogs so// //ston pa yul mnyan du yod pa na ste/ dge slong ma sbom dga' mo mang du za mang du 'thungs pas bsod snyoms dag 'dug pa'i chos gos dag rdul dang dri mas ma rung bar gyur pa dang /gos dri ma can dag slob ma rnams la byin no/ /slob ma dag gis gos dri ma can dag bkrus nas gdur gyi nang du sbas te gzhag pa dang / spom dga' mos slob ma dag la ma byas par gos de phyung nas gyon te dri ma can du gyur pa dang / slob ma dag mi dga' bar gyur nas 'phya smod do zhes bya ba'i bar du rgyas par sbyar te/bslab pa bcas pa'i bar du snga ma bzhin no/ /yang dge slong ma gang gis dge slong ma la gos byin nas de'i 'og tu gdeng med par gyon na ltung ba'o/ /gdeng med pa zhes bya ba ni bdag gi gos su byin gyis ma brlabs pa la bya'o//de la dge slong mas mdza' bo'i 'du shes yod dam mthong na dga' bar 'gyur ba lta bu ni gyon na'ang nyes pa med do/ /ltung ba lnga bcu gsum pa rdzogs so// //ston pa yul mnyan du yod pa na ste/ /de'i tshe dge slong ma bcu gnyis sde rnams dge slong ma gzhan dag la rtsa ba med par lhag ma'i chos kyis skur cing de'i phyir rtsod cing gcig la gcig 'thab par gyur pa dang /don nyung ngu ba'i dge slong ma rnams 'phya smod do zhes bya ba nas bslab pa bcas pa'i bar du snga ma bzhin no/ /yang dge slong ma gang zhe sdang can zhig khros nas ma rangs te/dge slong ma gtsang ma nyes pa med pa la rtsa ba med pa'i dge 'dun lhag ma'i chos kyis skur na ltung ba'o/ /gtsang ma zhes bya ba ni lhag ma la sogs pa'i nyes pa ma byung ba la bya'o/ /de la dge slong mas dge slong ma nyes pa med pa la nyes pa med par 'du shes te bzod pa nas lta ba'i bar du sbas nas skur na ltung ba'o//de bzhin du the tshom na'ang / ltung ba lhag ma byung ba las lhag ma ma byung bar 'du shes nas lta ba'i bar du sbas te ltung bas skur na'ang ltung ba/ nyes pa ma byung ba las nyes pa byung bar 'du shes pa dang /the tshom pa gnyis la nyes byas re re/ lhag ma nyid byung ba la byung ngo zhes smras pa la nyes pa med do/ /ltung ba lnga bcu bzhi pa rdzogs so// //ston pa yul mnyan du yod pa na ste/ de'i tshe yul tsam pa zhes bya ba na tha ga pa gzhon nu cig 'dug pas mnyan du yod par song ste chung ma zhig blangs so//chung ma blangs nas ring po ma lon par chung ma dang 'thab mo byung nas tha ga pa de yul tsam par 'gro'o zhes chas pa dang / sbom dga' mo lam du 'gro ba dang phrad do/ /thag pas sbom dga' mo la gar 'gro zhes dris nas sbom dga' mos yul tsam par 'gro'o zhes smras so//'o na 'grogs so zhes de gnyis 'grogs te song ba dang / thag pa'i chung mas khang thog tu byung ste bltas na de gnyis 'grogs par mthong ngo / /des skad cher phyung ste/ dge sbyong mgo reg mas nga'i khyo kha drangs so zhes bos pa dang /grong khyer gyi mi rnams kyis bsnyags nas sbom dga' mo brdegs pa dang / sbom dga' mos mig dag skrangs bzhin du dge slong ma dag gi gan du phyin nas dge slong ma dag gis smras pa nas 'dul ba bcas pa'i bar du snga ma bzhin no/ /yang dge slong ma gang skyes pa dang lhan cig lam du zhugs te 'gro na tha na grong gzhan zhig tu phyin na yang ltung ba'o//dge slong ma skyes pa dang lam du zhugs te 'gro na rgyang grags phyed tshun chad du ni nyes byas/ rgyang grags gcig las 'das na ltung ba'o/ /lam mtshon pa'i phyir ram/ lam mi shes te 'grogs pa la nyes pa med do//ltung ba lnga bcu lnga pa rdzogs so// //mdor bstan pa ni/ 'gron pa mang po rkun ma dang / /brko dang mgron dang bslab pa dang / /'thab dang mi smra 'gro ba dang / /ma gus chang 'thung dus min pa'o/ /ston pa yul mnyan du yod pa na ste/de'i tshe dge slong ma sbom dga' mo tshong pa'i 'dron pa mang po dag dang 'grogs shing gseb lam du byung ste dong ba dang sho gam pas bdas nas sho gam gyi lam las 'byol zhing gseb lam du 'gro ba nyid dge slong ma 'di yin no zhes sbom dga' mo la brdegs so/ / sbom dga' mos snad bzhin du slar gtsug lag khang du phyin pa dang / dge slong ma dag gis smras pa nas 'dul ba bcas pa'i bar du snga ma bzhin no/ /yang dge slong ma gang 'dron pa mang po rkun ma dang lhan cig lam du zhugs nas 'gro na ltung ba'o/ /nyes pa lci yang gi khyad par dang gnang mi gnang gi rim pa ni gong ma dang 'dra'o//ltung ba lnga bcu drug pa rdzogs so// //ston pa yul mnyan du yod pa na ste/ drug sde rnams rang gis sa brkor 'jug pa dang / bram ze dang khyim bdag dag dge sbyong 'di dang nged du tha dad ci yod ces 'phya smod pa nas sa ma brko shig ces bslab pa bcas pa dang /bcu gnyis sde rnams nged kyi phyir ma yin zhes sa brko zhing brkor 'jug pa dang / don nyung ngu pa dag 'phya ba nas bslab pa bcas pa'i bar du snga ma bzhin no/ /yang dge slong gang rang gi lag gis sa brko'am brkor 'jug na ltung ba'o//sa zhes bya ba la rnam pa gnyis te/ 'thas pa dang ma 'thas pa'o/ /'thas pa'i sa ni sor bzhi yan chad brkos na ltung ba'o/ /ma 'thas pa'i sa brkos na nyes byas/ sa'i shas che la bye ma chung sar rdo phyung ngam/ lci ba brkos na ltung ba'o/ /bye ma che na nyes byas/phur pa btab na ltung ba'o/ /phyung na nyes byas/ phur pa btsugs pa'i khung du btsugs na'ang nyes byas/ rtsig pa dang gdangs 'phan med pa las bshig na ltung ba'o/ /'phan nam ser ka yod pa bshig na nyes byas/ brtsigs pa bkog pa dang / rlam chags pa phyis pa dang /'dam bsgul lam bsgul du bcug gam/ don med par sa la ri mo 'dri na nyes byas gzhan yang mthun mthun du rgyas par sbyar ro/ /ltung ba lnga bcu bdun pa rdzogs so// //ston pa yul mnyan du yod pa na ste/ de'i tshe shAkya ming chen gyis sangs rgyas la sogs pa dge slong gi dge 'dun 'khor dang bcas pa zla ba bzhir mgron du byas so//zla ba bzhi tshang nas drug sde rnams 'gror mi btub cing de na 'dug pa dang / bcom ldan 'das kyis ji srid du mgron du bos pa de las lhag par zas bdag gir byed cing ma 'dug shig par bslab pa bcas pa dang /bcu gnyis sde rnams nged kyi phyir ma yin no zhes ci srid du mgron du bos pa de las lhag par gnas shing kha zas bdag gir byed pa dang / don nyung ngu ma'i dge slong ma rnams 'phya smod nas bcom ldan 'das kyis bka' stsal nas bslab pa bcas so zhes bya ba'i bar du snga ma bzhin no//zla ba bzhi mgron du byas nas dge slong mas bdag gir gyis shig de las lhag par bdag gir byas na ltung ba'o/ /so sor mgron du byas pa dang / /yang yang mgron du byas pa dang / dus kyis mgron du byas pa dang /rtag tu mgron du byas pa ma gtogs te de las de ni dus yin no/ /so sor mgron du byas zhes bya ba ni dge 'dun spyir zla ba bzhir mgron du byas pa las/ de'i nang nas kha cig ming gis btus te zla ba bzhi las ring du bzhag pa la bya'o/ /dus kyis mgron du bos zhes bya ba ni ji srid mgron du bos pa las ring du mi 'dug tu mi rung bar dus kyis 'chu ba la bya'o//rtag tu zhes bya ba ni tshe gcig tu mgron du byas pa la bya'o/ /de la dge slong gis ji srid du mgron du bos pa las zan gcig tsam lhag par za na'ang ltung ba'o/ /yon bdag gis kha zas ngan pa bsngos pa las/bzang por bsnor te bslangs na gang bslangs kyang rung ltung ba re re'o/ /ngan par bsnor te bslangs na nyes byas so/ /nad pa la nyes pa med do/ /ltung ba lnga bcu brgyad pa rdzogs so// //ston pa yul mnyan du yod pa na ste/ de'i tshe bcom ldan 'das kyis dge slong pho mo gnyis ka'i bslab pa thun mong ba cig bcas nas/ dge slong gcig dge slong ma rnams la bsgor btang ba dang / dge slong des kyang dge slong ma gcig la smras so/ /dge slong ma des dge slong ma rnams la bsgo ba dang / dge slong ma bcu gnyis sde dag byis pa glen pa khyed lta bus bsgo ba las nged mi nyan no zhes phyir 'khyal zhing smras pa dang /de ltar gyur pa dge slong ma dag gis zhes bya ba nas bslab pa bcas so zhes bya ba'i bar du snga ma bzhin no/ /yang dge slong ma gang dge slong ma rnams kyis 'phags ma bslab pa 'di la slobs shig ces bsgo na/'di skad ces bdag ni dge slong ma mdo sde 'dzin pa dang / 'dul ba 'dzin pa dang / ma mo 'dzin pa la ma dris kyi bar du byis pa glen pa mi gsal ba mi mkhas pa khyed cag gi tshig gi bslab pa 'di la mi bslab po zhes zer na ltung ba'o/ / kun shes par 'dod pa'i dge slong mas kyang bslab pa 'di la slobs shig dge slong mas mdo sde 'dzin pa dang 'dul ba 'dzin pa dang / ma mo 'dzin pa la dris shig de la de ni dus yin no/ /byis pa zhes bya ba ni mdo sde dang 'dul ba spyir mi shes pa la bya'o/ /glen pa zhes bya ba ni mdo sde dang 'dul ba'i don mi shes pa la bya'o//mi gsal ba zhes bya ba ni cung zad shes kyang mdo sde dang 'dul ba'i tshig mi gsal ba la bya'o/ /mi mkhas pa zhes bya ba ni mdo sde dang 'dul ba so sor mtshams 'brel bar mi shes pa la bya'o/ /kun shes par 'dod pa zhes bya ba ni tshul khrims kyi khyad par shes par 'dod pa zhes bya ba'i tha tshig go//de la dge slong mas bslab pa slobs shig ces rigs par bsgo ba las byis pa'o zhes bya ba la sogs pa gzhung gzhan las smos pa'i tshig gang smos te smras kyang rung ma mnyan na thams cad ltung ba'o/ / ltung ba lnga bcu dgu pa rdzogs so// //ston pa yul mnyan du yod pa na ste/ de'i tshe bcu gnyis sde rnams lkog bur nyan cing gcig la gcig tshig dag skyel ba dang / dge slong ma rnams 'thab cing rtsod par gyur nas don nyung ngu ba'i dge slong ma rnams 'phya ba nas bslab pa bcas pa'i bar du snga ma bzhin no//yang dge slong ma gang dge slong ma rnams 'thab par gyur mtshang 'bru bar gyur/ mi mthun par gyur cing 'khod pa las dge slong ma 'di dag ji skad zer ba bdag gis mnyan te/ de lta de lta bur sta gon bya'o snyam nas cang mi smra bar bzhabs te nyan cing 'dug na ltung ba'o//de la dge slong mas sgra thos pa tsam du nyan na nyes byas so/ /sgra dang don gnyi ga thos par nyan na ltung ba'o/ /de bzhin du ra ba dang yol ba dang sab mo la sogs pa'i phag nas mnyan pa'ang de bzhin no/ /rtsod pa byung ba zhi bar bya ba'i bsam pas nyan na nyes pa med do//dge slong ma grogs kyis der 'gro na se gol dang skad dang rting sgra dag mi 'byin cing 'jab pa'i tshul du 'gro na nyes byas so/ /ltung ba drug cu pa rdzogs so// //ston pa mnyan du yod pa na ste/ de'i tshe bcu gnyis sde dag dge 'dun chos bzhin pa'i las byed pa'i 'phro las stan las langs te 'gro ba dang /dge slong ma rnams la 'phya smod pa nas 'dul ba bcas pa'i bar du snga ma bzhin no/ /yang dge slong ma gang dge 'dun chos bzhin du rnam par gdon mi za ba'i gtam zer ba na cang mi smra bar stan las langs te 'gro la dge slong ma 'khod pa la yang ma smras na de 'dra ba'i rkyen ma gtogs te ltung ba'o//rnam par gdon mi za ba'i gtam zer ba na zhes bya ba ni/ gsol ba dang bzhi la sogs pa'i las brgya rtsa gcig gang yang rung ba la bya'o/ /dge slong mas rkyen byung ste 'gro na rkyen byung ngo zhes ma smras par song na dge 'dun gyi sgra thos kyi bar du ni nyes byas/sgra dang don gnyi ga mi thos par song na ltung ba'o/ /rkyen byung ngo zhes smras te song ba la nyes pa med do/ /ltung ba drug cu gcig pa rdzogs so// //ston pa yul mnyan du yod pa na ste/de'i tshe dge slong ma sbom dga' mo sangs rgyas la sogs pa dkon mchog gsum la ma gus pa dang / don nyung ngu ba'i dge slong ma rnams 'phya smod pa nas 'dul ba la bslab pa bcas pa'i bar du snga ma bzhin no/ /gus par mi byed na ltung ba'o/ /de la dge slong mas dge 'dun dang khang skyong la sogs pa la stan long shig ce'am/song shig ces bya ba la sogs pa rigs pa'i tshig gis bsgo ba ma mnyan pa ni dge 'dun la ma gus pa zhes bya ste ltung ba'o/ /slob dpon dang mkhan po la sogs pa grogs mo rnams kyis 'dug shig ces bya ba la sogs pa rigs pa'i tshig gis bsgo ba ma nyan na nyes byas so//ltung ba drug cu gnyis pa rdzogs so// //ston pa yul mnyan du yod pa na ste/ de'i tshe khyim bdag rtogs ldan gyi bu dge slong bder 'ongs dgra bcom pa thob pa'i 'og tu yul sbal kar zhes bya ba na a mra mu stegs zhes bya ba'i klu 'dul du song ba las/slar 'ong ba'i lam yogs su sngon gyi mdza' bo ba lang rdzi zhig gis zan la bos nas ba lang la blud pa'i chang nyung zad cig skom dang bses te blud pa dang / bde bar 'ongs ra ro nas tshong dus kyi dbus su 'gyel ba dang / bcom ldan 'das kyi byin gyi rlabs gyis bde bar 'ongs kyi thog tu rdo'i khang bu zhig sprul to//de ltar gyur pa las bslab pa bcas pa dang dge slong ma rnams kyis bdag cag gi chang gi slad du ji lta bur bslab par bgyi zhus pa dang / bcom ldan 'das kyis chang 'thung ba'i nyes pa rnams bshad nas 'dul ba la bslab pa'i gnas bcas so//'bru'i chang dang 'bras bu'i chang myos par 'gyur ba 'thungs na ltung ba'o/ /'bru'i chang zhes bya ba ni nas 'bras la sogs pa'i chang la bya'o/ /'bras bu'i chang zhes bya ba ni rgun 'brum la sogs pa la bya'o/ /de la dge slong mas chang gi kha dog dang ro dang chang gi dri dang myos par 'gyur ba ste 'di bzhi dang ldan pa'i chang 'thungs na ltung ba'o//'di gcig dang mi ldan pa'i chang 'thungs na nyes byas so/ /chang nar ma son pa 'thungs na nyes byas/ dge slong mas bza' ba dang btung ba la sogs pa myos par 'gyur ba shes bzhin du zos sam 'thungs na nyes byas so//mdze nad byung ba'i phyir lus bsku ba'am/ kha nad byung ba'i phyir khar blugs nas pho ba la nyes pa med do/ /ltung ba drug cu gsum pa rdzogs so// //ston pa yul mnyan du yod pa na ste/ de'i tshe drug sde 'char ba dgra bcom pa thob pa'i 'og tu khyim bdag gi chung ma gtum mo zhes bya ba'i mna' ma la 'dod chags smad pa'i chos bshad pa dang /gtum mo'i mna' ma'i byi po mi rgod kyis 'char ba'i mgo bcad pa'i bar du rgyas par sbyar te/ bcom ldan 'das kyis bslab pa bcas pa dang / dge slong ma bcu gnyis sde dag dge slong ma 'khod pa dag la ma smras par dus dang dus ma yin par grong du 'jug pa dang /don nyung ngu ba'i dge slong ma dag 'phya smod pa nas 'dul ba la bcas pa'i bar du snga ma bzhin no/ /yang dge slong ma gang dus ma yin par grong du 'jug la dge slong ma 'khod pa la ma smras na de 'dra ba'i rkyen ma gtogs te ltung ba'o//dus ma yin pa zhes bya ba ni phyi dro la bya'o/ /de 'dra ba'i rkyen ma gtogs te zhes bya ba ni sngon dge slong ma gcig gos lhag rnams khyim pa cig gi khyim du gtams te gzhag pa las/ khyim bdag de'i khyim me shor nas dge slong ma des dge slong ma rnams la smras kyi bar du gos lhag ma rnams kyang mes tshig pa dang /dge slong ma de las glengs te bar chad brgyad byung na dge slong ma 'khod pa las ma byas par song yang nyes pa med do zhes rjes su gnang ba la bya'o/ /de la dge slong mas dge slong ma 'khod pa la 'khod par 'du shes bzhin ma byas pa dang /the tshom za ba la ltung ba re re/ mi 'khod pa la 'khod par 'du shes pa dang / the tshom pa gnyis la nyes byas te gong ma'i bzhi rgyud dang 'dra bar sbyar ro/ /ltung ba drug cu bzhi pa rdzogs so// // mdor bstan pa ni/ khyim dang mtshan mo da gdod dang / /khab ral khri dang bdal ba dang / /gding dang g.yan pa dgab pa dang / /bde bar gshegs kyi chos gos so/ /gleng gzhi ni mnyan du yod pa na ste/ de nas dge slong ma dga' mo snga dro chos gos gyon lhung bzed thogs nas khrims zla dge slong ma gzhan dag dang yon bdag gzhan zhig gi khyim du song ste/de la mthun pa'i chos bstan pas mngon par dad par byas te/ dge slong ma'i dge 'dun gyi phyir bshos sbyor bar bskul to/ /de nas phyi nyin gyi tshe dge slong ma'i dge 'dun snga dro sham thabs dang chos gos dang lhung bzed thogs te/khyim bdag de'i bkad sa gang na ba der song ste stan bting ba la 'dug pa'i bar du'o/ /dge slong ma dga' mo bya ba dag mang du byed pa mang bas gdugs tshod las yol du byed pa dang / dge slong ma de dag gis khyim bdag de la 'di skad ces smras so//khyim bdag dge slong ma'i dge 'dun bsnyen bkur ba'i dus la bab bo/ /des 'di skad ces smras so/ /'phags ma bdag gis ga la 'tshal ba shos kyi zhal ta ba dga' mos 'tshal to zhes pa nas don nyung ngu ma'i dge slong ma dag 'phya bar gyur te/de lta bur gyur pa bcom ldan 'das la gsol to/ /bcom ldan 'das kyis bka' stsal pa/ zas kyi snga rol dang / zas zos kyi 'og tu khyim du rgyu bar mi bya'o/ /de na zhal ta ba dang bshos kyi bskul ma btab pa zhig yod na de dag dge 'dun gyi bya ba dang /dge 'dun gyi byed pa zhig yod pa las nyams par gyur pas/ bka' stsal pa/ zas kyi snga rol ni khyim gnyis so/ /de nas bcom ldan 'das kyis dge slong ma rnams la bslab pa 'dod pa nas bslab pa la gus pa'i bsngags pa brjod de 'di skad ces bka' stsal to//yang dge slong ma gang zas dang bcas pa'i khyim du mgron du bos nas zas kyi snga rol dang zas kyi 'og tu grong rgyu zhing 'gro la/ khyim pa 'dug pa la ma bsgo na de 'dra ba'i rkyen ma gtogs te ltung ba'o/ /yang dge slong ma gang zhes bya ba ni dga' mo'o/ /zas yod pa na zas dang bcas pa'o//khyim ni khyim bdag gi khyim du mgron du bos pa'o/ /zas kyi snga rol ni snga dro'i dus so/ /zas zos kyi 'og tu zhes bya ba ni phye ma red kyi dus so/ /ltung ba ni snga ma bzhin no/ /de la ltung ba ji lta bu zhe na ji tsam du dge slong mas dge slong ma dag zas dang bcas pa'i khyim du mgron du bos pa las zas kyi snga rol du khyim gnyis gnyis su 'gro ba las ched du bsams nas khyim gsum du 'gro na ltung ba'o//zas zos kyi 'og tu khyim gsum du 'gro ba las ched du bsams nas khyim bzhir 'gro na ltung ba'o/ /gal te khyim bdag la byas te song na nyes pa med do//ltung ba drug cu lnga pa rdzogs so// //ston pa mnyan du yod pa na ste/ tshe dang ldan pa 'char ba btsun mo phreng ldan ma'i slob dpon yin pas/ de nam ma nangs skya rengs ma shar bar rgyal po'i pho brang du song ste btsun mo la chos bshad pa las bcas te/phyis bcu gnyis sde rnams dge slong ma rnams la ma bcas so zhes nam ma nangs par rgyal po'i pho brang du 'dong bas de lta bur gyur pa dge slong ma dag gis bcom ldan 'das la gsol zhes bya ba nas/ bslab pa bcas zhes bya ba'i bar du snga ma bzhin no//yang dge slong ma gang nam ma nangs skya rengs ma shar rin po che lta bu ma bsdus par rgyal po rgyal rigs spyi bo nas dbang bskur ba'i sgo'i gtan pa'am gtan pa'i nye 'khor las 'das na de 'dra ba'i rkyen ma gtogs te ltung ba'o/ / yang dge slong ma gang zhes bya ba ni bcu gnyis sde dang 'dra ba gzhan yang ngo / /nam ma nangs zhes bya ba ni nam ma zad pa'o/ /skya rengs ma shar zhes bya ba la skya rengs la gsum ste/ sngon po dang / ser po dang / dmar po'o/ /skabs 'dir dmar po la bya'o//ma shar zhes bya ba ni ma byung ba'o/ /rin po che zhes bya ba ni mtshan mo snang bar byed pa ste/ nor bu dang / mu tig dang / bai DUr+ya dang / g.yas su 'khyil pa la sogs pa la bya'o/ /rin po che lta bu zhes bya ba ni 'thab mo'i cha byad thams cad dang / rol mo'i cha byad du gtogs pa rnams so//rgyal po zhes bya ba ni dbang bskur ba ste tha na bud med kyang rung ngo / /gtan pa zhes bya ba ni gsum ste/ rgyal po dang grong khyer dang btsun mo'i 'khor gyi sgo gtan no/ /skabs 'dir ni rgyal po'i grong khyer gyi sgo gtan 'das par bzung ngo / /nye 'khor ni de'i g.yas g.yon no//'das na zhes bya ba ni song ba'o/ /rkyen ma gtogs zhes bya ba ni gnang ba'o/ /ltung ba zhes bya ba ni snga ma bzhin no/ /de la ltung ba ji lta bu zhe na/ dge slong mas nam ma nangs pa la nam ma nangs par 'du shes sam the tshom za yang rung / rgyal po dang grong khyer gyi sgo gtan las 'das na ltung ba'o//nam ma nangs pa la ma nangs par 'du shes pa dang / the tshom za ba ni nyes byas so/ /nam ma nangs pa la nam ma nangs par 'du shes sam the tshom za bzhin du btsun mo'i 'khor gyi gtan pa las 'das na nyes byas/ nam nangs pa lam nangs par 'du shes pa dang the tshom za ba yang nyes byas nyid do//rgyal po'am btsun mo'am rgyal bu'am blon pos bos pa dang bar chad brgyad las gang yang rung ba byung ste der song na nyes pa med do/ /las dang po pa la sogs pa la ltung ba med do/ /ltung ba drug cu drug pa rdzogs so// // gleng gzhi mnyan du yod pa na ste/ drug sde po rnams zla ba phyed phyed cing so sor thar pa'i mdo 'don pa'i tshe/ ri mo dang / bla ma dang / gces pa dang / yid la 'dzin pa dang / sems rtse gcig pa dang / gus par yang mi nyan la/ dge slong rnams la yang tshe dang ldan pa dag chos 'di yang mdo'i nang du gtogs shing 'dus par bdag cag gis da gdod shes so zhes byas pa dang /de dag la dge slong ma rnams kyis khyod sngon so sor thar pa'i mdo 'don pa'i tshe ma thos sam ci na de skad zer/ de dag na re nged kyi las 'di gcig pu'am 'dod pa dang gnod sems dang 'tshe ba'i rnam par rtog pa la yang rtog mod ces zer ba dge slong dag gis ston pa la gsol nas bslab pa bcas pa dang /bcu gnyis sde rnams 'di dge slong ma rnams la ma bcas so zhes zla ba phyed phyed cing so sor thar pa'i mdo 'don pa'i tshe gong ma skad du zer bas dge slong ma dag gis bcom ldan 'das la gsol nas bslab pa bcas pa'i bar du snga ma bzhin no//yang dge slong ma gang zla ba phyed phyed cing so sor thar pa'i mdo bshad pa 'don pa'i tshe/ 'phags ma dag ji ltar chos 'di yang mdo'i nang du 'dus mdo'i nang du gtogs par bdag gis da gzod shes so zhes de skad zer la/de gal te dge slong ma rnams kyis kyang dge slong ma 'di sngon gyi gso sbyong gi tshe lan gnyis sam gsum gyi tshe 'dug par shes na lan mang du lta ci smos/ dge slong ma de mi shes pas ni mi 'grol te/ de la ltung ba gang byung ba de chos bzhin du 'chags su gzhug pa'i steng du khyod zla ba phyed phyed cing so sor thar pa'i mdo bshad pa 'don pa'i tshe bsti stang byed cing chos mi nyan/bla mar mi byed/ rus pa bzhin du mi byed/ yid la mi 'dzin/ sems rtse gcig tu mi byed/ rna blags te mi nyan/sems thams cad kyis bsams te chos mi nyan pas dge slong ma khyod ma rnyed pa'o/ /rnyed pa ma yin no/ /nyes pa rnyed pa'o/ /legs pa ma rnyed pa'o zhes 'gyod du gzhug go/ /dge slong ma de la 'gyod par bya ba ni 'di yin te ltung ba'o/ /yang dge slong ma gang zhes bya ba ni bcu gnyis sde dang 'dra ba gzhan yang ngo //zla ba phyed phyed ces bya ba ni gso sbyin gyi dus so/ /so sor thar pa ni phas pham pa bzhi nas rtsod pa zhi bar bya ba'i chos bdun pa'i bar dag go/ /mdo bshad ces bya ba ni yang dag par bkod pa'o/ /'don pa zhes bya ba ni rab tu bsgrags pa'o//ji ltar chos 'di yang mdo'i nang du gtogs/ mdo'i nang du 'dus par bdag gis da gdod shes so zhes bya ba ni/ bcom ldan 'das kyis gsungs pa'i mdo'i nang nas 'byung ba yin par bdag gis da gdod shes so zhes zer ba'o//gso sbyin gyi las gnyis gsum zhes pa ni des so sor thar pa'i mdo lan gnyis sam gsum thos pa'o/ /lan mang du lta ci smos zhes pa ni lan mang du'o/ /mi shes pas ni mi 'grol zhes pa ni gal te mi shes na yang de bzhin du mi gtong gi ltung ba dang bcas pa yin par bstan pa'o//de ltung ba gang 'byung ba zhes bya ba ni ltung ba sde lnga las gang yang rung ba'o/ /de chos bzhin du byed du gzhug ces pa ni 'chags su gzhug pa'o/ /bsti stang byed cing chos mi nyan bla mar mi byed ces pa ni rim gro dang btsun par mi byed pa'o/ /rus pa bzhin mi byed ces pa ni dpe ste/ji ltar lus kyi gtso bo rus pa bzhin so sor thar pa la gtso bor mi 'dzin pa'o/ /yid la mi 'dzin ces pa ni sems la 'dris par mi byed pa'o/ /sems rtse gcig tu mi byed pa ni sems thams cad gcig tu mi sdud pa'o/ /rna blags te mi nyan ces pa ni rna ba'i dbang bo der mi gtong pa'o//sems thams cad kyis bsams te chos mi nyan ces pa ni dbang po rnams ma bsdus pa'i phyir ro/ /ma rnyed pa zhes pa ni dge ba'o/ /rnyed pa ma yin no zhes pa ni dge ba de ma rnyed pa'i phyir ro/ /nyes pa rnyed pa'o zhes pa ni dge ba rnyed pa ma yin pa'i phyir ro//legs pa ma rnyed pa ni de nyid ma thob pa'o/ /'gyod du gzhug ces pa ni nyes pa la yid byung zhing skyo bar bya ba ste/ 'gyod du 'jug pa'i 'og tu 'chags su gzhug pa'o/ /ltung ba zhes bya ba ni snga ma bzhin no/ /de la ltung ba gang zhe na/ dge slong mas ltung ba sde lnga'i nang du gtogs pa 'don pa'i tshe bsti stang dang bla ma dang rus pa bzhin du mi byed/yid la mi 'dzin sems rtse gcig tu mi byed/ rna blags te mi nyan sems thams cad kyis bsams te mi nyan par bdag gis da gdod chos 'di mdo'i nang du gtogs shing 'dus par shes so zhes zer na thams cad ltung ba'o//lam log par rgas pa dang / mi shes par bden pa la nyes pa med do/ /las dang po pa la sogs pa la ltung ba med do/ /ltung ba drug cu bdun pa rdzogs so// //gleng gzhi mnyan du yod pa na ste/ ba so mkhan chos can sngon gcer bu pa la dad pa zhig gnas par bsod snyoms pa zhig gis chos bshad de btul nas bslab pa'i gnas la bkod de rdzas las byung ba'i bsod nams bshad pa dang /chos can rang gi bzos dge 'dun la bsnyen bkur bgyi'o zhes byas pa dang / dge slong ma rnams kyis ba so dang rus pa dang rwa las khab ral byed du bcug /dge slong ma bcu gnyis sdes kyang rin ma byin par khab ral mang du bcol bas ba so dang / rus pa dang / rwa yang zad de dbul por gyur pas gcer bu pa dag 'phya ste/ 'di nged la dga' ba'i tshe yo byad phun sum tshogs pa dang ldan na da ni dge slong shAkya'i bu la dga' bas zan yang med do zhes mi snyan par zer te/de lta bur gyur pa dge slong ma dag gis ston pa la gsol nas bcu gnyis sde rnam grangs du mas smad de/ 'dul ba la bslab pa'i gnas bcas pa'i bar du snga ma bzhin no/yang dge slong ma gang ba so'am rus pa'am rwa'i khab ral byed du bcug nas bcag na ltung ba'o/ /yang dge slong ma gang zhes bya ba ni bcu gnyis sde dang 'dra ba gzhan yang ngo / /ba so dang rus pa dang rwa ni dngos su zad khab ral ni rnam pa gnyis te/ kha gab can dang glo gab can no//byed ces bya ba ni bdag gam gzhan gyis so/ /bcag nas zhes bya ba ni dngos po de sngar chog la gdong ltung ba bshags par bya'o zhes bya ba'i tha tshig go/ /ltung ba zhes bya ba ni snga ma bzhin no/ /de la ltung ba gang zhe na/ dge slong mas ba so'am/rus pa'am/ rwa yang rung khab ral byas sam byed du bcug na thams cad du ltung ba'o/ /gang gi mdun du 'chags pa'i tshe des kyang khyod kyis dngos po bcag gam zhes dris shig /ma dris par nyes pa bshags na gnyi ga la nyes byas te ltung ba yang bshags par mi 'gyur ro//ma zin par btong ba dang / zin te mi 'chab pa dang / gzhan gyi phyir byed pa ni nyes byas so/ /byas pa rnyed pa dang byas pa spyod pa ni nyes pa med/ khab ral rnam pa bzhi ni 'chang du gnang ste/ ra gan dang zangs dang / khar ba dang / lcags kyi'o//las dang po pa la sogs pa la nyes pa med do/ /ltung ba drug cu brgyad pa rdzogs so// //gleng gzhi mnyan du yod pa na ste/ dge slong zhig ljongs rgyu zhing mnyan du yod par phyin nas rkang pa bkrus te khri thung ngu ba cig gi steng du 'dug pa dang / dpyid tsha bas sbrul gdug pa zhig kyang tsha bas nyen te bsil bar 'dod pas dge slong des khri'u'i drung du rkang pa bkrus pa'i gnas der nyal lo//dge slong de yang lam gyis dub pas lus 'gyur zhing mgo 'chog ste/ lus yang dang yang btud pa dang / sprul gyis 'dis bdag la gnod pa byed do snyam nas dge slong de'i 'phral bar bzung bas dus las 'das so//de lta bur gyur pa bcom ldan 'das la gsol nas phyin chad khri rkang thung ngu la nyal bar mi bya'o zhes bka' stsal pa dang / bcu gnyis sde dag gis khri rkang pa khru bcu gnyis pa byas te skas btsugs nas nyal bar byed pa dge slong ma dag gis ston pa la gsol nas bslab pa bcas so//dge slong ma'i dge 'dun gyis khri'am khri'u byed na rkang pa bu gar gzhug pa ma gtogs par bde bar gshegs pa'i sor brgyad kyi tshad du gyis shig /de las lhag par byas na bcad nas ltung ba'o/ / gzhan ni go sla bas ma bshad do/ /sor brgyad kyi tshad du gyis shig ces bya ba ni ston pa'i sor de mi tha mal pa'i khru tshad ma gang ngo / /bcad na zhes bya ba ni lhag ma bcad nas ltung ba bshags so/ /ltung ba zhes bya ba ni snga ma bzhin no/ /de la ltung ba gang zhe na dge slong mas ji tsam du bde bar gshegs pa'i sor brgyad las chung zad cig lhag na thams cad du ltung bar 'gyur ro//gang gi mdun du bshags pa des kyang lhag ma bcad dam zhes dris shig ma dris par bshags na gnyi ga la nyes byas te/ ltung ba yang bshags par mi 'gyur bas slar yang bshags par bya'o//ltung ba drug cu dgu pa rdzogs so// //ston pa mnyan du yod pa na ste/ bsnyen dga' bos snga phyir khri thob pa rnams rgan rims kyis phrogs pas yang mal stan bsgo ba'i dus la bab pa dang / gzhan gyis khri phrogs su dogs pa'i phyir khri shing bal gyis bdal te gzhag go//yang dge slong rgan rims shig 'ongs te/ bsnyen dga' bo la 'di su'i khri/ 'di bdag gi shing bal lo zhes byas pa dang / dge slong gzhan zhig gis shing bal ni bsnyen dga' bo'i yin/ khri ni dge 'dun gyi'o zhes smras pa dang /bsnyen dga' bo khros nas shing bal bsdus te nyung zad cig steng du gtor ro/ /dge slong de yang ma brtags par nyal bas nam nangs te langs na shing bal gyis lus kun g.yogs shing skya bor gyur to/ /dge slong dag gis khyod 'bras kyi g.yul na nyal lam zhes byas pa dang /ji ltar gyur pa rgyas par smras te/ dge slong dag gis ston pa la gsol nas bslab pa bcas pa dang / bcu gnyis sde rnams 'di dge slong ma rnams la ma bcas so zhes dge 'dun gyi khri'u dang khri la shing bal bdal bas don nyung ngu ba'i dge slong ma rnams kyis ston pa la gsol nas 'dul ba la bslab pa'i gnas bshad do//yang dge slong ma gang dge 'dun gyi khri'u'am khri la shing bal bdal tam bdal du bcug na bsdus nas ltung ba'o/ /gzhan ni go sla bas ma bshad do/ /de la shing bal zhes bya ba ni rnam pa lnga ste/rtswa ka sha dang / shing mar ka dang / shing zhom pa dang / ras bal dang / lcang ma'i bal lo/ /bdal zhes bya ba ni bdag nyid kyis so/ /bdal du bcug ces bya ba ni gzhan la'o/ /bsdus nas zhes bya ba ni bdal ba bsdus pa'i 'og tu ltung ba bshags par bya'o//ltung ba zhes bya ba ni snga ma bzhin no/ /de la ltung ba ji lta bu zhe na/ dge slong mas dge 'dun gyi khri'am khri'u la shing bal bdal tam bdal du bcug na thams cad du ltung ba'o/ /gang gi mdun du bshags pa des kyang bdal ba bsdus sam zhes dris shig /ma dris par bshags na gnyi ga la nyes byas te ltung ba yang bshags par mi 'gyur bas slar yang bshags par bya'o/ /ltung ba bdun cu pa rdzogs so// //ston pa mnyan du yod pa na bzhugs so/ /de'i tshe na dge slong ma rnams gding ba ring por byas nas rings so zhes bcad/thung ngur byas nas thungs so zhes slar sdud de bya ba mang pos dge ba'i bar chad du gyur pas rnam grangs du mas smad de/ 'dul ba la bslab pa'i gnas bshad pa'i bar du snga ma bzhin no/ /dge slong ma gding ba byed na tshad bzhin du gyis shig /de la gding ba'i tshad ni 'di yin te/ srid du bde bar gshegs pa'i mtho do/ /zheng du mtho phyed dang do ste/ srid du mtho gang gis bsrings shig de las lhag par byas na bcad nas ltung ba'o/ /gding ba zhes bya ba ni stan no/ /srid du bde bar gshegs pa'i mtho do ni khru tshad ma gsum mo//zheng du mtho phyed dang do la khru tshad ma gnyis dang sor drug go/ /srid du mtho gang gis bsrings shig ces bya ba ni gal te lus rings te mi chog na'o/ /lhag par byas na zhes bya ba ni de las 'das pa'o/ /bcad nas zhes bya ba ni dngos po lhag ma bcad nas ltung ba bshags par bya'o//ltung ba zhes bya ba ni snga ma bzhin no/ /de la ltung ba gang zhe na/ dge slong mas gding ba srid du khru phyed dang lnga/ zheng du khru do dang sor drug las lhag par byas na thams cad du ltung ba'o/ /gang gi mdun du bshags pa des kyang dngos po lhag pa bcad dam zhes dris shig ma dris na gnyi ga la nyes byas so//ltung ba yang bshags pa slar bshags par bya'o/ /ltung ba bdun cu gcig pa rdzogs so// //gleng gzhi mnyan du yod pa na ste/ de na dge slong ma zhig g.yan pas btab ste g.yan pa dgab pa med par bsod snyoms la song ba las sbrang ma dag 'du bar gyur pa dang /khyim bdag dang bram ze rnams 'phags ma 'khor mang zhes 'phya ba dge slong ma dag gis ston pa la gsol nas 'dul ba la bslab pa'i gnas bshad de/ dge slong ma g.yan pa dgab par byed na tshad bzhin du gyis shig /de la g.yan pa dgab pa'i tshad ni 'di yin te/ srid du bde bar gshegs pa'i mtho bzhi/ zheng du mtho do'o/ /de las lhag par byas na bcad nas ltung ba'o/ /de la g.yan pa dgab pa ni nad kyi gos so/ /srid du bde bar gshegs pa'i mtho bzhi ni khru tshad ma drug go//zheng du mtho do ni khru tshad ma gsum mo/ /de la ltung ba gang zhe na dge slong mas ci tsam du g.yan pa dgab pa srid du khru drug zheng du khru gsum las lhag par byas na thams cad du ltung ba'o/ /gang gi mdun du bshags pa des kyang dngos po lhag ma bcad dam zhes dris shig /ma dris par bshags na gnyi ga la nyes byas so/ /ltung ba yang bshags pa ma yin pas slar bshags par bya'o/ /ltung ba bdun cu gnyis pa rdzogs so// //bcom ldan 'das mnyan du yod pa na bzhugs so//de'i tshe bsnyen dga' bo bde bar gshegs pa'i chos gos kyi tshad dang / de las lhag pa'i tshad du gos byas te gyon pas de ltar mi gnang ngo zhes dge slong ma rnams la bslab pa bcas pa dang / sbom dga' mos bslab pa 'di dge slong ma rnams la ma bcas so zhes bde bar gshegs pa'i chos gos kyi tshad dang /de las lhag pa'i tshad du chos gos byed pas/ don nyung ngu ba'i dge slong ma dag 'phya ste/ ston pa la gsol nas sbom dga' mo rnam grangs du mas smad de 'dul ba la bslab pa'i gnas bcas so/ /yang dge slong ma gang bde bar gshegs pa'i chos gos kyi tshad kyi chos gos byed dam/bde bar gshegs pa'i chos gos las lhag par byed na ltung ba'o/ /bde bar gshegs pa'i chos gos kyi tshad ni 'di yin te/ srid du bde bar gshegs pa'i mtho bcu/ zheng du mtho drug ste/ de la 'di ni bde bar gshegs pa'i chos gos kyi tshad do//bde bar gshegs pa'i mtho bcu la khru tshad ma bco lnga'o/ /mtho drug la khru dgu'o/ /gzhan ni brda phrad par zad do/ /de la ltung ba zhes bya ba ni snga ma bzhin no/ /de la ltung ba gang zhe na/ dge slong ma ji tsam du bde bar gshegs pa'i chos gos kyi tshad du chos gos byas sam bde bar gshegs pa'i chos gos las lhag par byas na thams cad du ltung bar 'gyur ro//las dang po pa dang smyos pa dang sems 'khrugs pa dang nad kyis gzir ba dag la ltung ba med do/ / ltung ba bdun cu gsum pa rdzogs so// //mdor bstan pa ni/ sgog skya spang bar bya ba dang / /rmongs kyang breg par mi bya dang / /sor mo'i tshigs gnyis mi 'da' dang / /thal mo brdeg par mi bya dang / /rjen pa btso bar mi bya dang / /chus kyang gtor par mi bya dang //sngon po bshang ba mi dor dang / /rtsig pa'i rgyab tu dor mi bya/ /bcom ldan 'das mnyan du yod pa na bzhugs te/ 'khor mang po rnams la chos 'chad pa las dge slong cig bden pa mthong ba'i rgyu dang ldan par mkhyen nas chos bstan na des bden pa mthong bar ma gyur te/ci'i phyir bden pa mthong bar ma gyur ces brtags na/ dge slong des sgog skya zos pas bden pa mthong bar ma gyur te/ bcom ldan 'das kyis bka' stsal pa/ dge slong gis sgog pa za bar mi bya sgog pa zos par gyur na bden pa mthong ba'i bar chad du yang 'gyur lha'i 'khor rnams nyan pa dang /srung ma dag kyang mi dga' bar gyur pa las bcom ldan 'das kyis zar ma gnang ba dang / dge slong ma rnams sgog skya za bar gyur ba las mi gnang bar bcas/ yang dge slong ma gang sgog skya za na ltung ba'o/ /dge slong ma mi na bar sgog skya za na thams cad du ltung bar 'gyur ro//na bar gyur pa mtshams kyi phyi rol du 'dug la bza' bar bya'o/ /sgog pa za ba'i tshe klog 'dri dang kha ton dag kyang mi bya/ khyim pa rnams la yang chos mi bstan/ gtsug lag khang du phyag la sogs pa'ang mi bya/ dge 'dun gyi phyi sar yang 'gro bar mi bya/nad sos nas lus dang chos gos la sogs pa khrus byas nas/ gdod gtsug lag khang du sngon bzhin du gnas par bya'o/ /ltung ba bdun cu bzhi pa rdzogs so// //ston pa yul mnyan du yod pa na ste/ sbom dga' mos bdag rang gi gsang ba'i spu rnams bregs nas chu bo a dzir ba tir gtor khyim bdag mo dang khrus byed pa las ngoms par gyur te/nga'i 'dra bar thig le can 'di shin tu sdug cing mdzes pas khyed kyang breg pa'i rigs so zhes bstan pa las/ khyim bdag 'phya zhing ma dad par gyur pa las bcas/yang dge slong ma gang rmongs 'breg na ltung ba'o/ /yang dge slong mas ched du bsams te gsang ba'i spu 'breg na ltung bar 'gyur ro/ /de la nyes pa med pa ni rma byung bar gyur tam/ shu ba byung bar gyur na/ dge 'dun ma la zhus te breg par bya/ ma dris na nyes byas so//ltung ba bdun cu lnga pa rdzogs so// //ston pa yul mnyan du yod pa na bzhugs te/ bcom ldan 'das 'khor mang po la chos 'chad pa'i tshe dge slong ma'i 'khor rnams khyim mi mo bzhin du dri mi zhim par gyur/ bcom ldan 'das kyis khrus gyis shig par bka' stsal nas/sbom dga' mos mdzub mo'i tshigs gnyis 'das par bkrus na rma byung zhing snad par gyur te ngu ba las dge slong ma dag gis thos te ci'i phyir du zhes smras na/ gsang ba'i phyogs 'khru ba'i tshe mdzub mo'i tshigs gnyis 'das par bkrus pas snad par gyur te ngu'o zhes smras pa dang /don nyung ngu bas 'phya ba la bcas so/ /yang dge slong ma gang 'khru ba na sor mo'i tshigs gnyis las 'das par bcug ste 'khru na ltung ba'o/ /dge slong ma khrus byed pa'i tshe mdzub mo'i tshigs gnyis las 'das par bcug ste 'khru na ltung ba'o//tshigs gnyis ma 'das na nyes byas/ /ltung ba bdun cu drug pa rdzogs so// //ston pa mnyan du yod pa na ste/ dge slong ma sbom dga' mo 'dod chags kyis gzir bar gyur nas 'dis nyes byas so zhes mo mtshan la brdegs pa dang /snad par gyur te ngus pa las dge slong ma dag gis ci'i phyir du zhes smras nas/ 'dod chags skyes pa las mo mtshan la brdegs te snad nas ngu'o zhes smras pa dang / de ltar gyur pa dge slong dag gis bcom ldan 'das la gsol pa dang /bka' stsal pa dge slong ma 'dod chags skyes nas sems gdul bar rigs pa las sems mi gdul bar mo mtshan brdegs na ltung bar 'gyur ro zhes bcas/ yang dge slong ma gang gsang ba'i phyogs su thal mo brdegs na ltung ba'o/ /dge slong mas ji tsam du ched du bsams te gsang ba'i phyogs su thal mo brdegs na ltung ba'o//ltung ba bdun cu bdun pa rdzogs so// //bcom ldan 'das mnyan du yod pa na bzhugs te/ de'i tshe na tshe dang ldan pa kun dga' bos bsams pa bdag gis rnam pa thams cad kyi sgo nas bcom ldan 'das la bsnyen bkur gyis bstabs na/rang gi lag gis dar te btsos pa de lta bu zhig bcom ldan 'das la ma gsol gyis bdag gi lag dar te btsos pa zhig gsol zhes zhus pa dang / bka' stsal pa de bzhin gshegs pa'am de bzhin gshegs pa'i nyan thos ni rang gis btsos pa'am/dge slong gis btsos pa bza' bar ma brtags so zhes bka' stsal pa las/ phyis dge slong ma zhig bdag nyid kyis rjen pa 'tshod cing za ba las bcas/ yang dge slong ma gang rjen pa 'tshed na ltung ba'o//rjen pa 'tshed ces bya ba ni bza' ba lnga dang bca' ba lnga sngar gzhan gyis ma btsos par bdag 'tshed na ltung ba'o/ /de la nyes pa med pa ni sngar gzhan gyis btsos pa las ma tshos pa'am/ sngar lhan cig bsnun pa bdag nyid kyis btsos na'ang nyes pa med do//ltung ba bdun cu brgyad pa rdzogs so// //ston pa yul mnyan du yod pa na ste/ dge slong ma sbom dga' mo dang 'od srungs chen po zam pa'i 'og tu phrad pa dang / sbom dga' mos smras pa 'di ni sngon mu stegs can rigs dma' ba las rab tu byung ba'o zhes tshig gis spos nas chus kyang gtor ba las bcas so//yang dge slong ma gang 'khor gyi gtso bo la chu gtor na ltung ba'o/ /'khor gyi gtso bo la zhes bya ba ni dge 'dun gyi gnas brtan nam dge slong pha la bya ste dge slong mas ched du bsams te chu gtor na ltung ba'o//de la nyes pa med pa ni brgyal bar gyur pa las chu gtor ram nad kyis btab pa la chu gtor na nyes pa med do/ /ltung ba bdun cu dgu pa rdzogs so// //ston pa yul mnyan du yod pa na bzhugs te/ sbom dga' mos ldum pa zhig la shang tse bslangs pa las ma byin pa dang /de'i nub mo 'khru sman 'thungs te ngan skyugs bsags nas shang tse zad par bskus pa dang / khyi dag gis zos nas ldum pa de ma dad cing 'phya ba las bcas yang dge slong ma gang rtswa sngon po la bshang ba 'dor na ltung ba'o/ /dge slong mas sa gzhan yod bzhin du sngon po'i sa phyogs su bshang ba 'dor na ltung ba'o//nyes pa med pa ni phyogs thams cad sngo ste sa gzhan med na nyes pa med do/ /ltung ba brgyad cu pa rdzogs so// //ston pa mnyan du yod pa na ste/ sbom dga' mos mang du ni za nyung ngu ni mi 'thung ba las bshang ba gci ba dag mang bar gyur te/nub mo gtsug lag khang gi sgo bcad pas ngan skyugs snod du bsags pa las de'i tshe rgyal po gsal rgyal gyis blon po dpal 'phel zhes bya ba bka' chad cig bcad pa las/ de'ang rgyal po la bzod pa gsol du 'gro ba'i lam du dge slong ma'i dbyar mo khang gi drung du byung ba las sbom dga' mos ma brtags par mi gtsang ba'i bum pa rtsig pa'i rgyab tu 'phangs pa las de'i mgo bor phog nas dpal 'phel gyis bsams pa/yang na ni bdag la bkra shis par 'gyur/ yang na ni bdag la mi dge bar 'gyur ro zhes bsams nas song ste rgyal po la bzod par gsol ba dang /rgyal pos kyang bzod par gnang ste blon po de yang dga' bar gyur nas bdag la mi gtsang ba'i bum pas 'thor ba gang yin pa de la ras chen po zhig sbyin no snyam nas/ dge slong ma'i dbyar mo khang du smras pa dang /sbom dga' mo yin par gyur te de la byin no/ /phyis sbom dga' mo dge slong ma gzhan dag dang 'thab par gyur pa dang / nga'i bshang ba tsam yang khyod kyis mi nus te nga'i bshad bas kyang ras chen po 'di lta bu rnyed do zhes ngoms pa las bcas/ yang dge slong mas gang ma brtags par rtsig pa'i rgyab tu bshang ba 'dor na ltung ba'o/ /dge slong mas rtsig pa'i rgyab tu sngar ma brtags par bshang ba 'dor na ltung bar 'gyur ro/ /ltung ba brgyad cu gcig pa rdzogs so// // mdor bstan pa ni/ skyabs yod par ni skyes pa dang / /dge slong dang yang 'greng mi bya/ /bla gab med par skyes pa dang / /gcig pu dge slong gnas mi bya/ /rna bar bshub par byed pa gnyis/ /bdag la brdeg par mi bya dang / /tshangs par spyod pa mnal rdo dang //legs par ma mthong mi gleng ngo / /ston pa mnyan du yod pa na ste/ dge slong ma sbom dga' mos spos 'tshong khye'u dang gnas khang gcig tu 'dug tu ma gnang ba dang / sbom dga' mos bsams pa gnas khang gcig gi nang du 'dug tu ma gnang na yang 'greng ba ni nyes pa med do snyam nas/spos 'tshong khye'u dang 'greng zhing gtam rnam pa sna tshogs smra ba las bcas/ /yang dge slong ma gang skyes pa dang lhan cig dben pa skyabs yod pa na 'greng na ltung ba'o/ /dben pa skyabs yod pa zhes bya ba ni khyim rnam pa bzhi gong du smos pa dang 'dra'o//bdag kyang gcig pu skyes pa yang gcig pu ste/ /gzhan med par dben par 'gro zhing gtam zer na ltung ba'o/ /nyes pa med pa ni pha ming dang gtam zer ba la nyes pa med do/ /ltung ba brgyad cu gnyis pa rdzogs so// //ston pa mnyan du yod pa na ste/dge slong ma rnams bsod snyoms la dong / de'i tshe dge slong ma sbed ma la khang skyong gi res bab ste/ gtsug lag khang gi phyag dar byed cing 'dug pa las 'char ba yang der 'ongs te 'gro zhing sngon gyi gtam rnam pa sna tshogs zer ba las dge slong ma nad pa zhig gis mthong nas/dge slong ma dag slar lhags na gtsug lag khang gi phyag dar la sogs pa ma zin nas/ ci'i phyir ma zin zhes smras pa dang / nad pa des ji lta bur gyur pa zhib tu smras te dge slong ma dag 'phya ba las bcas/ yang dge slong ma gang dge slong dang lhan cig skyabs yod pa na 'greng na ltung ba'o//ltung ba'i khyad par ni gong ma dang 'dra'o/ /ltung ba brgyad cu gsum pa rdzogs so// //ston pa mnyan du yod pa na ste/ dge slong ma sbom dga' mos bsams pa dben pa skyabs yod par ni 'greng zhing gtam zer du bcom ldan 'das kyis ma gnang bas/bla gab med par 'greng zhing gtam byas kyang nyes pa med do snyam nas/ 'greng zhing gtam rnam pa sna tshogs zer ba las bcas so/ /yang dge slong ma gang skyes pa dang / lhan cig bla gab med pa na 'greng na ltung ba'o//ltung ba'i khyad par ni gong ma dang 'dra'o/ /ltung ba brgyad cu bzhi pa rdzogs so// //ston pa mnyan du yod pa na ste/ sbed ma dang 'char ba gnyis bla gab med par 'greng zhing gtam rnam pa sna tshogs zer ba las bcas te/ yang dge slong ma gang gcig pu dge slong dang lhan cig bla gab med pa na 'greng na ltung ba'o//'di'i khyad par yang gong ma dang 'dra'o/ /ltung ba brgyad cu lnga pa rdzogs so// //ston pa mnyan du yod pa na ste/ dge slong ma sbom dga' mo gcig pu gnas khang gcig na gnas pa las phye ma red khar spos 'tshong gi khye'u khri'i 'og tu sbas te bzhag nas/de'i 'og tu brjed de khye'u de byung nas sbom dga' mo yang skrag par gyur nas rkun po byung ngo zhes khus btab pa dang / dge slong ma dag gis smras te spos 'tshong yin pa dang 'phya bas/ bcom ldan 'das kyis khyim zla med par dge slong ma gcig pu ma gnas shig /gcig pu gnas na ltung bar 'gyur ro zhes bcas/ yang dge slong ma gang gcig pu gnas khang na gnas na ltung ba'o/ /dge slong mas shes bzhin du gcig pu gnas khang gcig gi nang du gnas par byed na ltung ba'o//bsam gtan gyi mthu khugs su nye ba'am khugs zin na nyes pa med do/ /ltung ba brgyad cu drug pa rdzogs so// //ston pa mnyan du yod pa na ste/ sbom dga' mos skyes pa'i rna bar bshubs pa las bcas/ yang dge slong ma gang skyes pa'i rna bar bshubs na ltung ba'o//ltung ba brgyad cu bdun pa rdzogs so// //ston pa mnyan du yod pa na ste/ sbom dga' mo'i rna bar skyes pas bshubs pa las bcas/ yang dge slong ma gang skyes pas rna bar bshubs pa nyan na ltung ba'o/ /ltung ba brgyad cu brgyad pa rdzogs so// //ston pa mnyan du yod pa na ste/ sbom dga' mos dge slong dag gi rna bar bshubs pa las bcas so/ /yang dge slong ma gang dge slong gi rna bar bshubs na ltung ba'o/ /ltung ba brgyad cu dgu pa rdzogs so// //ston pa mnyan du yod pa na ste/ sbom dga' mo'i rna bar dge slong dag gis bshubs pa nyan pa las bcas/ yang dge slong ma gang dge slong gis rna bar bshubs pa nyan na ltung ba'o/ /ltung ba dgu bcu pa rdzogs so// //ston pa mnyan du yod pa na ste/ dge slong ma sbom dga' mo dge slong ma gzhan dang 'thab pa las de'i 'og tu khros nas bdag nyid la brdeg pa las bcas/yang dge slong ma gang khros nas bdag la brdegs na ltung ba'o/ /de la dge slong mas ji tsam du khros 'khrugs rngams te/ bdag nyid la khu tshur dang thal mo dang rdo dbyug gis brdegs kyang rung ste ltung bar 'gyur ro/ / ltung ba dgu bcu gcig pa rdzogs so// //ston pa mnyan du yod pa na ste/ dge slong ma sbom dga' mo la khyim bdag gis ci dag mthong ngam thos sam zhes smras nas/ mthong re dkon mchog gsum med par gyur/ tshul khrims med par gyur ces pa las bcas/yang dge slong ma gang tshangs par spyod pa mna' rdor byed na ltung ba'o/ /yang dge slong ma gang zhes bya ba ni sbom dga' mo'o/ /tshangs par spyod pa zhes bya ba ni mya ngan las 'da' ba'o/ /de la mna' rdor byed ces bya ba ni de la mna' 'dor ba'o/ /de la mthong re sangs rgyas med par gyur cig ces bya na'ang ltung ba'o//chos zhig par gyur cig ces bya na'ang ltung ba'o/ /dge 'dun med par gyur cig ces zer na'ang ltung ba'o/ /nga'i tshul khrims la gtogs zhes zer na ltung ba'o/ /dge slong grogs dga' ba dang / pha ma dang / khyim pa gzhan la mna' rdor byed na nyes byas so//mna' rdor byed na nyes byas/ ltung ba dgu bcu gnyis pa rdzogs so// //ston pa mnyan du yod pa na ste/ dge slong ma mang po rnams dge 'dun gyi lhag ma byung ba'i gang zag dang nyes pa gzhan byung ba rnams la mthong ba dang thos pa dang dogs pa med par spang ba'i las byed pa las bcas/yang dge slong ma gang legs par ma mthong ba la sogs pa glengs na ltung ba'o/ /yang dge slong mas nyes pa ma mthong bar glengs te spang ba'i las byed na'ang ltung ba/ ma thos par glengs na'ang ltung ba'o//mi dogs par glengs na yang ltung ba'o/ /so so nas bsnor te glengs na 'ang ltung ba'o/ /ltung ba dgu bcu gsum pa rdzogs so// //mdor bstan pa ni/ mun pa rgya skyegs chang chang dang / /ma gtad par ni 'gro mi bya/ /khyim pa dag gi stan la'ang min/ /de la gnas par bya ma yin//snga na gnas par shes pa dang / /nad pa la yang ngan grogs bya/ /dbyar mo khang nas bskrad mi bya/ /khri dang gding ba gcig la'ang min/ /ston pa mnyan du yod pa na ste/ dge slong ma dag cig ljongs rgyur dong ba las/ khang pa mun can zhig tu ma brtags par nub mo nang du zhugs pa las khyim pa dag gis bzung ste/mi tshangs par spyad pa las bcas/ yang dge slong ma gang ma brtags par gnas na ltung ba'o/ /ci tsam du dge slong mas khang pa sngar mun nag can du ma brtags pa la ma brtags par shes bzhin du 'dug na ltung bar 'gyur ro//sngar brtags sam mun pa med pa ni nyes pa med do/ /ltung ba dgu bcu bzhi pa rdzogs so// //ston pa mnyan du yod pa na ste/ sbom dga' mo 'dod chags kyis gzir nas khyim mi mo rnams la/ khyed khyim thab med pa'i tshe 'dod chags kyis gzir ba na thabs ci ltar 'dod chags sel/de dag gis smras pa/ rgya skyegs kyi chang chang po 'dzud do/ /de nas yang btsun mo phreng ldan ma'i der song ste/ sbom dga' mos smras pa/ rgyal po bya ba dang byed pa dag la song ba'i tshe 'dod chags kyis gzir na thabs gang gis zhi bar byed/btsun mos smras pa/ de ni khyim mi mos byas pa yin na/ khyed rab tu byung bas ci zhig bya/ sbom dga' mos smras pa/ bdag kyang 'dod chags kyis rab tu gzir bar gyur to/ /btsun mos smras pa/ rgya skyegs kyi chang chang gis zhi bar bgyid do//dge slong ma sbom dga' mo yang nam 'dod chags kyis gzir bar gyur pa de na rgya skyegs chang chang rting pa la sbyar te 'jug pa las/ de'i dus su khang pa me shor bas rting pa la chags bzhin du byung ba dang / me gsod pa'i ra mda' ba khyim pa dag gis mthong ste/sbom dga' mo la 'di ji zhes dris na khyed kyis ma la dris shig /sring mo la dris shig ces byas pas khyim pa rnams 'phya ba las bcas/ yang dge slong mas rgya skyegs kyi chang chang 'jug na ltung ba'o/ /yang dge slong mas 'dod chags kyi dbang gis ched du bsams te rgya skyegs la sogs pa'i chang chang 'jug na ltung ba'o//ltung ba dgu bcu lnga pa rdzogs so// //ston pa mnyan du yod pa na ste/ sbom dga' mos grong gi dbus su khyim mi mo rnams bsdus nas kha phug tu bltas te chos mang du ston cing 'chad pa las/khyim mi mo rnams khyim gyi bya ba dang byed pas brel te so sor langs te dong ba dang / sbom dga' mo kha phug tu bltas pas ma mthong ste/ da dung yang chos sgrogs pa las/ grogs mo khyod su la chos 'chad ces dris na khyim mi mo rnams la 'chad do zhes smras pa dang /des smras pa khyim mi mo rnams ni dong zin to zhes smras nas/ de dag gis kyang stan rnams bor te song ba las/ stan rnams rkun po dag gis khyer te stor bar gyur nas khyim pa rnams ma dad par gyur pa las bcas/ yang dge slong ma gang chos 'chad na khyim pa'i stan khyim pa la ma gtad par stan bor te song na ltung ba'o//yang dge slong ma gang zhes bya ba ni sbom dga' mo'o/ /dge slong mas ci tsam du khyim mi mo rnams la chos 'chad pa'i tshe khyim pa rnams dong bar shes bzhin du/ stan bdag nyid kyis ma brtul tam/ khyim pa la brtul cig ces ma bsgo bar song na 'dom bzhi bcu rtsa dgu tshun chad ni nyes byas/de las ring du song na ltung ba'o/ /bar chad brgyad byung na nyes med do/ /ltung ba dgu bcu drug pa rdzogs so// //ston pa mnyan du yod pa na ste/ sbom dga' mo snga dro bsod snyoms la zhugs pa las khyim bdag gtsang sbra la dga' ba zhig gi sgor phyin te//khyim bdag de'i mal sgo khyams na 'dug pa bu mo zhig bsrung zhing mis reg pa lta ci smos te/ chung ngu na sbrang ma yang 'dug tu mi rung ste skrod pa las sbom dga' mos smras pa/ mtshan bzangs mo bsod snyoms byin cig ces smras pa dang /bu mos smras pa bdag ni mal 'di srung ngo / /sbom dga' mos smras pa bsod snyoms khyer shog /de'i bar du srung ngo zhes nas bu mos bsod snyoms len du song ba'i 'og tu sbom dga' mos rkang pa ma bkrus pa khyim bdag de'i mal thog tu 'dug pa las/ khyim bdag de ma dad cing 'phya ba las bcas/yang dge slong ma ma bsgo bar khyim pa'i khyim du stan la 'dug na ltung ba'o/ /dge slong mas khyim pa 'dug pa la ma dris par khyim pa'i stan la 'dug na ltung ba'o/ /ltung ba dgu bcu bdun pa rdzogs so// //ston pa mnyan du yod pa na ste/ dge slong ma cig ljongs rgyur dong ba las phye ma red dgongs su khyim bdag po ni med/khyim bdag mo la dris nas der nyal ba las khyim bdag kyang phyis 'ongs te/ de chung ma dang yongs su spyod pa las/ de'i chung ma nyor zhing skad mi snyen par zer ba las dge slong ma de dag gis thos te dge slong ma gzhon nu ma zhig gis gad mo shor nas/khyim bdag de la 'phya zhing mi snyan par zer ba las bcas so/ /yang dge slong ma gang khyim bdag la ma dris par gnas par byed na ltung ba'o/ /dge slong mas ji tsam du khyim bdag po la ma dris par khyim bdag gi khyim du zhag lon par byed na ltung ba'o//bud med dbang che ba yugs sa mo la dris pa la nyes pa med do/ /ltung ba dgu bcu brgyad pa rdzogs so// //ston pa mnyan du yod pa na ste/ dge slong ma sbom dga' mo ljongs rgyu zhing dong ba las/ khyim bdag gi grong du phyin te/ de na sngan dge slong ma 'khod pa gang gis khyim pa'i tha snyad kyis bsu ba dang /phyag byas pa la sogs pa ma byas pas sbom dga' mo khros te/ de dag bskrad nas bdag nyid der gnas pa la bcas/ yang dge slong ma gang khyim pa'i khyim na sngon gnas pa skrod na ltung ba'o/ / yang dge slong ma gang gis khyim pa'i khyim na dge slong ma snga na gnas pa las bdag phyis 'ongs te khros nas skrod par byed na ltung ba'o/ /de la nyes pa med pa ni gnas de nas ma bskrad na srog la sman pa'am/ tshangs par spyod pa'i bar chad du 'gyur ba tsam gyi tshod na nyes pa med do/ /ltung ba dgu bcu dgu pa rdzogs so// //ston pa mnyan du yod pa na ste/ dge slong ma sbom dga' mos slob ma dang nye gnas dag sngar bsnyen nas/ phyis nad kyis btab par gyur pa la nad g.yog dang sman dang zas dag ma byin pa las bcas/ yang dge slong ma gang lhan cig gnas pa dang /nye gnas bsnyen pa la nad kyis btab nas grogs mi byed na ltung ba'o/ /dge slong mas dge slong ma dang nye gnas rab tu byung zhing bsnyen par rdzogs par byas la de'i 'og tu na bar gyur la nad g.yog mi byed na ltung ba'o/ /sman mi byed na yang ltung ba'o/ /kha zas la sogs pas gso bar mi byed na yang ltung ba'o//bdag la med na gzhan las btsal te sbyin no/ /bdag mi khom na gzhan la yang bcol te nad g.yog byed du gzhug go/ /yo byad ma rnyed pa'am/ med pa'am bar chad brgyad byung na nyes pa med do/ /ltung ba brgya pa rdzogs so// // ston pa mnyan du yod pa na ste/ sbom dga' mos bsams pa/ skye dgu'i bdag mo chen mo ni spang ba phun sum tshogs pa dang ldan pas de dang lhan cig gnas par yang bdag gis mi nus/ chos sbyin ma ni 'khor mang bas de dang gnas par yang bdag gis mi nus te/ gau ta ma rid de ma dang lhan cig tu gnas so snyam nas/de dang lhan cig tu gnas par gyur pa las/ srod kyi dus su sbom dga' mo zas bzang po'i gtam dang / zas zhim po'i gtam mang du byed cing de 'ba' zhig gis nam nangs par byed de/ slob ma dag la chos mi slob bo/ /de nas snga dro'i dus su bsod snyoms la 'jug par byed do//sbom dga' mo rtag par yang de ltar byed pa las gau ta ma rid de mas de'i 'khor rnams mi dge ba las bzlog ste dge ba la btsud pa las sbom dga' mo khros 'khrugs rngams nas gau ta ma rid de ma 'di sngon bu sha za ba yin no zhes 'dzer cing bskrad pa las bcas/yang dge slong ma gang dbyar mo khang nas dge slong ma skrod na ltung ba'o/ /dge slong mas ji tsam du khros 'khrugs rngams te/ dge slong ma'i gtsug lag khang nas dge slong ma skrod dam skrod du 'jug gam bar chad brgyad byung na nyes pa med do/ /ltung ba brgya rtsa gcig pa rdzogs so// //ston pa mnyan du yod pa na ste/ dge slong ma rid de dang a ri sta gnyis khri gcig gi steng mthang sprad cing nyal ba las/ don nyung ngu ba'i dge slong ma dag 'phya ba las bcas/ yang dge slong ma gang dge slong ma dang lhan cig khri gcig gi steng du nyal na ltung ba'o//yang dge slong mas ched du bsams te khri gcig gi steng du gos gcig gi nang du mthang sprad de nyal na ltung ba'o/ /rjes su gnang ba ni dge slong ma dag cig ljongs rgyu zhing dong ba las/ khyim bdag gi grong du gnas par gyur pa las/ khyim bdag gi mal khri dag brnyan por byin pa dang /khyim pa'i de na khri nyung bas bcom ldan 'das kyis khri gcig gi steng du nyal du ma gnang ngo zhes kha cig sa la nyal bar gyur pa dang / phyis bka' stsal pa khri nyung zhing dge slong ma mang na khri gcig gi steng du gnyis nyal bar gnang ste/ bar du gtur bu dang /chos gos kyis chod cig dang nyes pa med do zhes bka' stsal to/ /ltung ba brgya rtsa gnyis pa rdzogs so// //mdor bstan pa ni/ dbyar ma tshang bar mi 'gro dang / /dbyar gnas de nas 'gro ba dang / /dogs dang bcas pa'i yul 'khor gnyis/ /lha rten khang pa tha ma yin//lo ni bcu gnyis ma lon dang / /lon yang bskos pa ma yin gyis/ /khyim so bzung na bcu gnyis dang / /de yang dge 'dun ma bskos na'o/ /ston pa mnyan du yod pa na ste/ dge slong ma sbom dga' mo dbyar tshul du zhugs pa las/ zla ba ma tshang bar tshul dral te/ljongs rgyu zhing 'gro ba la bcas/ yang dge slong ma gang dbyar ma tshang bar ljongs rgyu zhing 'gro na ltung ba'o/ /dge slong mas dbyar tshul du zhugs na zla ba gsum gyi bar du tshang bar tshul bsrung bar bya'o/ /zla ba gsum ma tshang bar tshul dral na ltung ba'o//bar chad brgyad byung na nyes pa med do/ /ltung ba brgya rtsa gsum pa rdzogs so// //ston pa mnyan du yod pa na ste/ bcom ldan 'das kyis bka' stsal pa/ dge slong ma rnams tshul byung ba'i 'og tu ljongs rgyu ba spyod cig ces gsungs pa las bcas/yang dge slong ma dbyar gnas nas ljongs rgyu zhing mi 'gro na ltung ba'o/ /yang dge slong ma gang zhes bya ba ni gang gzhan yang de dang 'dra ba dag go/ /dbyar gnas zhes bya ba ni/ dbyar zla ba gsum du tshul bsrungs pa'o/ /ljongs rgyu zhing mi 'gro na zhes bya ba ni tshul nas byung ba'i 'og tu ljongs rgyu zhing mi spyod pa'o//dge slong mas tshul nas byung ba'i 'og tu tha na nyin zhag tsam yang ljongs rgyu ba mi spyod na ltung bar 'gyur ro/ /ltung ba brgya rtsa bzhi pa rdzogs so// //ston pa mnyan du yod pa na ste/ bcom ldan 'das kyis dge slong ma ljongs rgyu ba spyod cig ces bka' stsal pa las/sbom dga' mos yul dogs pa dang bcas pa/ 'jigs shing bag tsha ba dang bcas pa'i phyogs su ljongs rgyu ba las mi rgod dag gis bcom pa las bcas/ yang dge slong ma gang yul 'khor dogs pa dang bcas par ljongs rgyu zhing 'gro na ltung ba'o/ / dge slong ma gang zhes bya ba ni sbom dga' mo'o/ /dogs pa dang bcas zhes bya ba ni mi rgod dag yod par dogs pa'o/ /'jigs pa dang bcas zhes bya ba ni mi rgod dag gis bcom par mngon du snang ngo / /bag tsha ba dang bcas zhes bya ba ni gcan gzan gtum po mi la za ba dag gnas pa'o/dge slong mas ji tsam du shes bzhin du de 'dra ba'i yul 'khor du ljongs rgyu zhing 'gro na ltung ba'o/ /bar chad brgyad byung ste der mi 'gror mi rung na nyes pa med do/ /ltung ba brgya rtsa lnga pa rdzogs so// //ston pa yul mnyan du yod pa na ste/ dge slong ma zhig ljongs rgyu zhing dong ba las/pha rol po gzhan dag 'khrugs shing dmag 'gyed pa'i nang du phyin te/ de dag gis mi tshangs par spyad nas tshangs par spyod pa'i bar chad du gyur pa las bcas/ yang dge slong ma gang yul 'khor 'khrugs par ljongs rgyu zhing 'gro na ltung ba'o/ /yang dge slong ma shes bzhin du yul 'khrugs pa'i nang du 'gro na ltung bar 'gyur ro//'khrugs pa de'i nang du rgyal po'am blon po dag gis nan gyis bkug na nyes pa med do/ /ltung ba brgya rtsa drug pa rdzogs so// //ston pa mnyan du yod pa na ste/ bcom ldan 'das kyis khyim pa rnams la bka' stsal pa/'jig rten gyi lha la mchod cig dang / lha dga' na 'go zhing ston par 'gyur zhes gsungs pa las/ dge slong ma dag kyang ma mo'i tshogs dang 'jig rten pa'i lha la brten la phyag 'tshal zhing mchod pa byed pa dang / bka' stsal par khyim pa rnams la lha mchod par gsungs kyi rab tu byung ba la ma yin no zhes gsungs pa dang /phyis drug sde po dang bcu gnyis sde rnams lha'i rten khang du song nas la la lha la smod cing mi snyan par zer ro/ /de la mi dga' bar gyur pa bcom ldan 'das la gsol nas/ bcom ldan 'das kyis dge slong ma rnams la bka' stsal pa/lha'i rten khang du song nas mi snyen par zer cing smra na ltung ba'o zhes bcas/ yang dge slong ma gang lha khang rnams su song nas smra bar byed na ltung ba'o/ /dge slong mas 'jig rten pa'i lha'i rten khang du song nas smod cing mi snyan par zer na thams cad du ltung bar 'gyur ro//dge slong mas rten khang du phyin nas se gol brdabs te zhal nas gsungs pa'i tshigs su bcad pa rgyud gnyis sam gsum brjod par bya'o/ /de ltar ma byas na 'ang nyes byas so/ /ltung ba brgya rtsa bdun pa rdzogs so// //ston pa mnyan du yod pa na ste/dge slong ma sbom dga' mo bdag bsnyen par rdzogs nas lo bcu gnyis ma lon par gzhan dag rab tu 'byin cing bsnyen par rdzogs pa'i mkhan mo byed pa las/ /don nyung ngu mas 'phya ba las bcas yang dge slong ma gang lo bcu gnyis ma lon par rab tu 'byin pa bsnyen par rdzogs par byed na ltung ba'o//dge slong ma gang zhes bya ba ni sbom dga' mo'o/ /lo bcu gnyis ma lon par zhes pa ni bdag bsnyen par rdzogs nas lo bcu gnyis ma lon pa'o/ /rab tu 'byin bsnyen par rdzogs par byed ces pa ni gzhan gyi mkhan mo byed pa'o/ / de la dge slong mas bdag lo bcu gnyis ma lon par shes bzhin du rab tu 'byin pa dang / bsnyen par rdzogs par byed na ltung ba'o/ /lo bcu gnyis lon kyang chos lnga dang mi ldan bzhin du rab tu 'byin pa dang bsnyen par rdzogs pa'i mkhan mo byed na ltung ba'o/ /chos lnga dang ldan yang lo ma tshang na ltung ba'o//ltung ba brgya rtsa brgyad pa rdzogs so// //ston pa mnyan du yod pa na ste/ sbom dga' mo lo bcu gnyis lon no zhes nas gzhan rab tu 'byin pa dang bsnyen par rdzogs par byed de/ /'khor 'chang ba'i sdom pa dge 'dun las ma thob bzhin du bdag nyid kyis slob ma'i 'khor 'chang pa las bcas/yang dge slong ma gang dge 'dun las 'khor 'chang du gnang ba'i sdom pa ma thob par 'khor 'chang na ltung ba'o/ /dge slong ma bsnyen par rdzogs nas lo bcu gnyis lon la chos lnga dang ldan par gyur kyang rab tu 'byin pa dang bsnyen par rdzogs pa'i mkhan mo byed cing 'khor 'chang ba'i sdom pa dge 'dun la gsol cig /dge 'dun gyis sdom pa sbyin par bya'o/ /'khor 'chang ba'i sdom pa ma gsol tam/ dge 'dun la sdom pa ma thob bzhin du 'khor 'chang na ltung ba'o/ /ltung ba brgya rtsa dgu pa rdzogs so// //ston pa mnyan du yod pa na ste/ dge slong ma sbom dga' mos bud med khyim so myong ba rab tu byung ba rnams lo bcu lon la lo gnyis kyi bar du bslab pa'i chos drug dang rjes su mthun pa'i chos drug byin la/ lo bcu gnyis lon kyang bsnyen par rdzogs par gyis shig ces gsungs pa las/sbom dga' mos khrims ma phog par lo bcu gnyis kyang ma lon par thal byung bsnyen par rdzogs par byas pa las bcas/ yang dge slong ma gang khyim so bzung ba lo bcu gnyis ma lon par bsnyen par rdzogs par byed na ltung ba'o/ /yang dge slong ma bud med bag ma myong ba/ bar khrims ma phog /lo bcu gnyis kyang ma lon par shes bzhin du bsnyen par rdzogs par byed na ltung ba'o/ /ltung ba brgya rtsa bcu pa rdzogs so// //ston pa mnyan du yod pa na ste/ dge slong ma sbom dga' mos khyim so bzung ba lo bcu gnyis lon kyang bslab pa'i chos drug dang / rjes su mthun pa'i chos drug ma byin par thal byung du bsnyen par rdzogs par byas pa la bcas/ yang dge slong ma gang khyim so bzung ba lo bcu gnyis lon na yang bslab pa'i sdom pa ma byin par bsnyen par rdzogs par byed na ltung ba'o/ /ltung ba'i khyad par ni gong ma dang 'dra'o/ /ltung ba brgya rtsa bcu gcig pa rdzogs so// //mdor bstan pa ni/ mang po sdom pa byas pa dang / /sbrum ma dang ni mi slob dang / /bsdus nas yal bar dor ba dang / /bkar bar bya ba tha ma'o/ /lo ni nyi shu ma lon dang / /lon yang sdom pa ma byin dang / /gtum mo mya ngan gzir ba dang / / chos drug rnams la ma bslab pa'o/ /ston pa mnyan du yod pa na ste/ dge slong ma sbom dga' mo bdag nyid kyis slob ma dang nye gnas kyi 'khor mang du bsdus shing de'i thog tu gzhan gyi slob ma dang nye gnas dag 'khor du bsdus pas mang ches te/ de dag la chos kyang mi ston/ kha ton gyi lung yang mi 'bogs pa las/ de dag gis chos dag ma lobs pa las bcas/ yang dge slong ma gang 'khor mang po 'chang bar dge 'dun las sdom pa ma thob par 'khor 'chang na ltung ba'o/ /dge slong ma gang zhes bya ba ni sbom dga' mo'o/ /'khor mang du 'chang zhes bya ba ni slob ma dang nye gnas mang du sdud pa'o//sdom pa ma thob ces bya ba ni dge 'dun las so/ /dge slong mas 'khor mang du 'chang ba'i sdom pa ma thob bzhin du 'khor mang po 'chang zhing 'chad pa dang / kha ton la sogs pa'i lung mi 'bogs na ltung bar 'gyur ro/ /ltung ba brgya rtsa bcu gnyis pa rdzogs so// //ston pa mnyan du yod pa na ste/ dge slong ma sbom dga' mo ljongs rgyu zhing song ba las/ bud med sbrum ma cig dang phrad de de'ang rab tu byung nas phyi bzhin du khrid pa las lam du bu byung ba dang / khyim bdag rnams kyis mthong ste dge slong ma 'di dag ni mi tshangs par spyod do zhes 'phya zhing ma dad pa las bcas/yang dge slong ma gang sbrum ma rab tu 'byin na ltung ba'o/ /dge slong mas bud med sbrum mar shes bzhin du rab tu 'byin na ltung ba'o/ /sbrum mar mi shes na nyes pa med do/ /ltung ba brgya rtsa bcu gsum pa rdzogs so// //ston pa mnyan du yod pa na ste/ dge slong ma sbom dga' mos slob ma la chos ma bstan cing yal bar bor ba las bcas/ yang dge slong ma gang rab tu byung bsnyen par rdzogs par byas nas mi ston na ltung ba'o/ /dge slong mas slob ma nye gnas rab tu byung bsnyen par rdzogs par byas la tshul khrims la sogs pa ma bstan tam/chos gzhan yang ma bstan na ltung bar 'gyur ro/ /bdag nyid 'chad mi shes na yang gzhan mkhas pa dag la bcol bar bya'o/ /ma bcol na yang nyes byas so/ /ltung ba brgya rtsa bcu bzhi pa rdzogs so// //ston pa mnyan du yod pa na ste/ sbom dga' mos slob ma nye gnas dag bsnyen par rdzogs par byas nas na bar gyur pa la nad g.yog kyang mi byed/ sman dang zas la sogs pa yang mi stobs pa las de dag tshangs par spyod pa'i bar chad du gyur te/ don nyung ngu ba'i dge slong ma dag 'phya ba las bcas/yang dge slong ma gang rab tu byung bsnyen par rdzogs par byas nas yal bar bor na ltung ba'o/ /dge slong mas slob ma na bar gyur pa dag la nad g.yog mi byed na ltung bar 'gyur ro/ /zas dang sman gyis mi stobs na'ang ltung ba'o/ /bdag la med na'ang gzhan la btsal te'ang sbyin par bya'o//de ltar ma byas na nyes byas so/ /ltung ba brgya rtsa bco lnga pa rdzogs so// //ston pa mnyan du yod pa na ste/ dge slong ma sbom dga' mos khyim bdag mo zhig khyo lam ring por song ba'i 'og tu rab tu byung ba las/ phyis khyo slar 'ongs pa dang chung ma slar phrogs te tshangs par spyod pa'i bar chad du gyur pa las bcas/ yang dge slong ma gang rab tu byung nas ma bkar na ltung ba'o/ /dge slong mas gzhan gyi bud med rab tu byung la/ de la gnod pa'am/ tshangs par spyod pa'i bar chad du 'gyur ba la skyabs ma byas sam gud du ma bkar na ltung bar 'gyur ro//de ltar mi shes pa la nyes pa med do/ /ltung ba brgya rtsa bcu drug pa rdzogs so// //ston pa mnyan du yod pa na ste/ sbom dga' mos bud med khyim so ma bzung ba lo bco brgyad lon na lo gnyis su bar khrims srung du bcug la/lo nyi shu lon na bsnyen par rdzogs par gyis shig ces bka' stsal pa las/ sbom dga' mos lo nyi shu ma lon par/ bar khrims phog ste thal byung bsnyen par rdzogs par byas pa las bcas/ yang dge slong ma gang gzhon nur gyur pa lo nyi shu ma lon par bsnyen par rdzogs par byas na ltung ba'o//dge slong mas bud med khyim so ma bzung ba lo bco brgyad lon pa la lo gnyis kyi bar du bar khrims phog la lo nyi shu na bsnyen par rdzogs par bya ba'i rigs pa las/ de ltar ma byas par shes bzhin du bsnyen par rdzogs par byed na ltung ba'o/ /ltung ba brgya rtsa bcu bdun pa rdzogs so// //bcom ldan 'das mnyan du yod pa na bzhugs so/ /skye dgu'i bdag mo chen mos gsol ba/ dge slong pha dang dge slong ma gnyis bsnyen par rdzogs par bya ba la rim pa dang khyad par ci mchis zhes gsol ba dang bka' stsal pa gzhon nu ma lo bco brgyad lon pa lo gnyis kyi bar khrims kyang bsrungs la/lo nyi shu lon pa zhig bsnyen par rdzogs par byed na dge slong ma dag gis stan rnams thing la gaN+DI brdungs te/ dge 'dun thams cad 'dus nas gsol ba dang las kyis tshangs par spyod pa'i nye gnas kyi sdom pa dge slong ma rnams kyis byin cig /de'i 'og tu dge slong ma gnyi ga'i tshogs 'dus la/ gsol ba dang bzhi'i las kyis dge slong ma bsnyen par rdzogs par gyis shig ces gsungs pa la/ phyis dge slong ma dag gis tshangs par spyod pa'i nye gnas kyi sdom pa ma byin par shes bzhin du bsnyen par rdzogs par byas pa las bcas/yang dge slong ma gang gzhon nur gyur pa lo nyi shu lon pa tshangs par spyod pa la nye bar gnas pa'i sdom pa ma byin par bsnyen par rdzogs par byed na ltung ba'o/ /dge slong ma tshangs par spyod pa'i nye gnas kyi sdom pa sngar ma byin par bsnyen par rdzogs par byed na ltung ba'o//ltung ba brgya rtsa bco brgyad pa rdzogs so// //ston pa mnyan du yod pa na ste/ dge slong ma sbom dga' mo snga dro bsod snyoms la zhugs pa las bud med gnyis shig 'thab mo 'gyed pa mthong ste/ de gnyis las ske rtsa sgreng zhing grogs kyi g.yo mtshang mang du 'dru ba las/sbom dga' mos bsams pa/ bud med 'di rab tu byung na bdag 'thab mo byed pa'i grogs su rung ngo zhes de rab tu phyung nas phyi bzhin du khrid do/ /phyis sbom dga' mo dge slong ma gzhan dag dang 'thab par gyur pa'i tshe/ dge slong ma de cang mi zer bar 'dug go/ /sbom dga' mos smras pa/ khyod nga'i 'thab mo'i grogs su 'gyur bar bya ba'i phyir rab tu byung na ci'i phyir bsam gtan bzhi la snyoms par zhugs pa bzhin du cang mi smra bar 'dug /des smras pa sngon khyim mi mo de dag gi g.yo mtshang ni ngas kyang shes kyi/dge slong ma 'di dag gi g.yo mtshang ni ngas kyang mi shes so zhes smras pa dang sbom dga' mos smras pa skye dgu'i bdag mo chen mo ni lci ba brgyad khas blangs pa las bsnyen par rdzogs pa yin/ ut+pa la'i kha dog ma ni grong khyer chen po drug tu smad 'tshong ma byed pa yin/ gau ta ma rid de ma ni sngon bu sha zos pa yin no zhes dge slong ma dag gi g.yo mtshang bstan pa dang / phyis dge slong ma dag 'thab mo byung ba'i tshe de dag gi g.yo mtshang smra zhing de skad zer ba las bcas/ yang dge slong ma gang bud med gtum mo rab tu phyung nas bsnyen par rdzogs par byed na ltung ba'o//dge slong mas bud med gtum mo 'thab mo rgod par shes bzhin du rab tu phyung na ltung ba'o/ /de ltar mi shes na nyes pa med do/ /ltung ba brgya rtsa bcu dgu pa rdzogs so// //ston pa mnyan du yod pa na ste/ sbom dga' mo snga dro bsod snyoms la song ba las bud med dang khyim thab dang bu dag shi ba'i mya ngan gyis gzir zhing du ba rab tu phyung ba las/de rab tu phyung yang rtag tu ngu zhing mya ngan byed par gyur te/ chung ngu na rmi lam du yang ston cig ces zer ro/ /de ltar gyur pa don nyung ngu mas 'phya ba las bcas/ yang dge slong ma gang mya ngan gyis gzir pa'i bud med rab tu byung na ltung ba'o//dge slong mas bud med mya ngan gyis mnan ba mya ngan ma sangs par shes bzhin du rab tu byung na ltung ba'o/ /ltung ba brgya nyi shu pa rdzogs so// //ston pa mnyan du yod pa na ste/ sbom dga' mos bsnyen par rdzogs par 'dod pa la lo gnyis kyis bar du khrims ma phog kyang lo gnyis ma bsrungs par thal byung bsnyen par rdzogs par byas pa las bcas/yang dge slong ma gang lo gnyis su chos drug dang mthun pa'i chos drug la ma bslabs par bsnyen par rdzogs par byed na ltung ba'o/ /dge slong mas chos drug dang mthun pa'i chos drug la ma bslabs par shes bzhin du thal byung bsnyen par rdzogs par byed na ltung ba'o//de la chos drug ces pa ni gcig pu lam du mi 'gro ba dang / gcig pu chu mi rgal ba dang / skyes pa la reg par mi bya ba dang / skyes pa dang khyim gcig gi nang du zhag lon par mi bya ba dang / smyan mi bya ba dang /grogs kyi kha na ma tho ba phas pham pa'am lhag ma byung ba mthong na mi bcab bo/ /rjes su mthun pa'i chos drug ni gser dngul la reg par mi bya ba dang / gsang ba'i spu mi breg pa dang / sa mi brko ba dang / rtswa sngon mo mi gcad pa dang / byin len bya ba dang / spangs pa'i kha zas mi bza' ba'o//ltung ba brgya nyi shu gcig pa rdzogs so// //mdor bstan pa ni/ chos drug rnams la bslab pa dang / /khyim thab kyis kyang ma btang dang / /gal te bdag la gos byin dang / /phyi nas khyod ni mi dga' dang / /lo re bzhin du ma gnang dang //zhag gis chod pa'i dad pa dang / /zla ba phyed cing gdams pa dang / /dge slong med pa'i gso sbyin no/ /ston pa mnyan du yod pa na ste/ bcom ldan 'das kyis bka' stsal pa/ dge tshul ma rnams chos drug dang rjes su mthun pa'i chos drug lo gnyis bslabs nas bsnyen par rdzogs par gyis shig ces bka' stsal na/sbom dga' mo'i slob ma rnams lo gnyis su chos drug dang rjes su mthun pa'i chos drug bslabs kyang da dung bsnyen par rdzogs par byed du mi btub pas don nyung ngu bas 'phya ba las bcas/ yang dge slong ma gang lo gnyis su chos drug dang rjes su mthun pa'i chos drug bslab par shes la bsnyen par rdzogs par mi byed na ltung bar 'gyur ro//dge slong mas bdag nyid kyi slob ma bar khrims mnos nas lo gnyis lon par shes bzhin du bsnyen par rdzogs par mi byed na ltung bar 'gyur ro/ / slob ma de nyid na bar gyur tam bar chad brgyad gcig byung na nyes med do/ /ltung ba brgya nyi shu gnyis pa rdzogs so// //ston pa mnyan du yod pa na ste/ sbom dga' mo snga dro bsod snyoms la song ba las/ khyo shug gnyis shig 'thab pa mthong nas/ sbom dga' mos de'i chung ma la khyod rab tu byung shig ces bsgo nas de'i khyo ma dad bzhin du rab tu byung ba las bcas/yang dge slong ma gang khyim thab kyis ma btang bar shes bzhin du bud med rab tu 'byin na ltung ba'o/ /dge slong mas gzhan gyi bud med khyim thab kyis ma btang bar shes bzhin du rab tu 'byin na ltung ba'o//khyim thab ring por song ste thal byung ma 'khor ba'am bud med rang dbang yod na nyes med do/ /ltung ba brgya nyi shu gsum pa rdzogs so// //ston pa mnyan du yod pa na ste/ sbom dga' mo la slob ma dag gis bdag cag bsnyen par rdzogs par bya bar gsol zhes byas ba dang /sbom dga' mos smras pa dang / nga la chos gos byin cig dang gdod bsnyen par rdzogs par bya'o zhes nas de dag chos gos byin nas de'i 'og tu gdod bsnyen par rdzogs par byas pa dang don nyung ngu pas 'phya ba las bcas/ yang dge slong ma gang bsnyen par rdzogs 'dod pa la gal te nga la chos gos byin na de'i 'og tu khyod bsnyen par rdzogs par bya'o zhes de skad zer na ltung ba'o//dge slong mas slob ma bsnyen par rdzogs par 'dod pa la rngan pa chos gos dag len na ltung bar 'gyur ro/ /slob ma chos gos mang la ser sna can zhig na ser sna dang dbral ba'i phyir thabs des bslangs na nyes med do//ltung ba brgya nyi shu bzhi ba rdzogs so// //ston pa mnyan du yod pa na ste/ gau ta ma rid de khyim pa mo dag la chos bshad pa'i rjes la khyod khyim gyi bya ba rnams thong shig dang phyis rab tu byung ngo zhes smras nas/de dag gis khyim gyi bya ba rnams btang ste/ bdag cag rab tu dbyung du gsol zhes byas pa dang / des rab tu ma phyung ngo / /des rab tu ma phyung ba dang khyim mi mo rnams 'phya bar gyur te/ bdag cag gis khyim gyis bya ba rnams kyang btang ba las rab tu ma phyung ngo zhes 'phya ba las bcas/ yang dge slong ma gang khyim bdag mo khyim so thong shig dang phyis khyod rab tu dbyung ba mi dka'o zhes de skad smras la/ de'i 'og tu rab tu mi 'byin na ltung ba'o/ /dge slong mas khyim mi mo la khyim so thong shig dang phyis rab tu dbyung ngo zhes smras pa las de'i 'og tu ma phyung na thams cad du 'ong ltung bar 'gyur ro/ / bar chad brgyad la sogs pa'i glo bur ba byung ba la nyes med do/ /ltung ba brgya nyi shu lnga pa rdzogs so// //ston pa mnyan du yod pa na ste/ dge slong ma sbom dga' mo bud med mang pos rab tu 'byin par gsol ba la de dag cig car rab tu 'byin par mi byed cing kun kyang lo re re zhing re re bsngos la/ming yang lo gcig ma lo gnyis ma zhes btags shing 'bod pa dang / dge slong ma gzhan dag gis khyod ci'i phyir de skad 'bod ces dris na/ de dag gi ming ni lobs dka' ste de skad du 'bod na bde'o zhes de skad du smras pa las don nyung ngu mas 'phya ba las bcas/ yang dge slong ma gang lo re zhing rab tu 'byin na ltung ba'o//dge slong mas bud med rab tu 'byung bar gsol ba las cig car du rab tu mi 'byin zhing lo re zhing re re 'byin par byed na ltung ba'o/ /gnyis ka ming mthun pa las lo gcig ma zhes 'bod pa dang lo re bzhin du gsol du 'ongs pa'i thad kar rab tu 'byin pa la nyes med do//ltung ba brgya nyi shu drug pa rdzogs so// //ston pa mnyan du yod pa na bzhugs/ sbom dga' mo zla ba phyed kyi tshe dge slong pha la lung ston par gsol ba'i dad pa blangs nas dge slong ma'i gso sbyin gyi dus su dad pa mi len pa dang / dge slong ma gzhan gyis ci'i phyir dad pa mi len ces dris pa dang /gso sbyin snga ma'i tshe dad pa blangs pas chog mod ces pa las don nyung ngu mas 'phya ba las bcas/ yang dge slong ma gang zhig gis mchod pa'i dad pa byin na ltung ba'o/ /dge slong mas gso sbyin gyi dus su dad pa mi len par gso sbyin snga ma'i dad pas chog go zhes zer na ltung bar 'gyur ro//ltung ba brgya nyi shu bdun pa rdzogs so// //nam bcom ldan 'das kyis dge slong ma rnams la zla ba phyed phyed cing dge 'dun pa la chos bstan pa lung nos shig ces gsungs pa las/ dge slong ma bcu gnyis sde rnams bdag cag sde snod gsum dang ldan pas lung nod mi dgos so zhes lung mi nod pa las bcas/yang dge slong ma gang zla ba phyed phyed cing gdams pa dang rjes su bstan pa mi nyan na ltung ba'o/ /dge slong mas zla ba phyed phyed cing chos bshad pa'i rigs pa las chos bshad pa'i lung mi nod na ltung bar 'gyur ro//gdams pa zhes bya ba ni mdo tsam bstan pa'o/ /rjes su bstan pa zhes bya ba ni rgyas par 'chad pa'o/ /ltung ba brgya nyi shu brgyad pa rdzogs so// //ston pa mnyan du yod pa na ste/ /dge slong ma dag cig ljongs rgyur dong ba las/dge slong med pa'i gnas su gso sbyin byas te/ don nyung ngu bas 'phya ba las bcas/ yang dge slong ma gang dge slong med par gso sbyin byed na ltung ba'o/ /dge slong mas ched du bsams te dge slong med pa'i gnas su gso sbyin byas na ltung bar 'gyur ro//lam ring por 'gro ba'i tshe gso sbyin gyi dus la bab na dge slong med na'ang nyes med do/ /gang na dge slong gi dge 'dun yod pa la sems kyis dmigs shing byin gyis brlab par bya'o/ /ltung ba brgya nyi shu dgu pa rdzogs so// //mdor bstan pa ni/ /dge slong med par dbyar mi gnas//dbyar gnas nas kyang skabs dbye dang / /tshogs la'ang khang na mi smra dang / /mi snyan zer dang ser sna lnga/ /spangs nas bza' bar mi bya dang / /rgyud kyang gzhag par mi bya'o/ /ston pa mnyan du yod pa na dge slong ma dag cig dge slong med pa'i gtsug lag khang du tshul du zhugs pa las bcas/yang dge slong ma gang dge slong med pa'i gtsug lag khang du dbyar gnas shing tshul du 'jug na ltung ba'o/ /dge slong ma dbyar tshul du 'jug pa'i tshe dge slong pa la brten nas lung ma nos shing tshul du 'jug dgos pa las/ ched du dge slong pha med pa'i gnas su song ste/dge slong ma 'ba' zhig tshul du 'jug par byed na ltung bar 'gyur ro/ /tshul du 'jug pa'i thad kar dge slong thams cad babs sam shi bar gyur na nyes med do/ /ltung ba brgya sum cu pa rdzogs so// //ston pa mnyan du yod pa na ste/ bcom ldan 'das kyis bka' stsal pa/dge slong ma tshul nas byung ba'i tshe dge 'dun sde gnyis la mthong ba dang thos pa dang dogs pa gsum gyi sgo nas gleng ba gsol cig ces bka' stsal ba las/ phyis sbom dga' mo tshul nas byung ba'i tshe dge 'dun gnyis ka la gleng ba mi gsol ba las bcas/ yang dge slong ma gang dbyar gnas nas dge 'dun gnyi ga las gnas gsum po dag gi skabs mi 'byed na ltung ba'o/ /ji tsam du dge slong mas tshul nas 'byung ba'i tshe dge 'dun sde gnyis las mthong ba dang / thos pa dang / dogs pa gsum gyi sgo nas gleng bar mi gsol zhing / dge slong ma nyi tshe tshul las 'byung bar byed na kun la ltung bar 'gyur ro//nyes med pa ni gong ma dang 'dra'o/ /gong ma dang gnyi ga la'ang lci ba'i chos su gtogs so/ /ltung ba brgya sum cu gcig pa rdzogs so// //ston pa mnyan du yod pa na ste/ sbom dga' mo dge slong ma'i dge 'dun la tshig mi snyan pa sna tshogs kyis bsdigs par byed pa dang /don nyung ngu bas 'phyas pa las bcas/ yang dge slong ma gang tshogs la ngan du zer na ltung ba'o/ /dge slong mas ched du bsams te dge 'dun 'dus pa'i tshogs la tshig ngan pa sna tshogs kyis skrag pa'am 'jigs par bya ba'i phyir bsdigs na ltung ba'o//dge slong ma de thams cad chos ma yin pa la phyogs par gyur te/ gtong du mi btub pa las bsdigs pas ni nyes med do/ /ltung ba brgya sum cu gnyis pa rdzogs so// //ston pa mnyan du yod pa na ste/ sbom dga' mo dag dge 'dun ma'i tshogs la mya ngan gyi tshig smra ba las don nyung ngu bas 'phya ba las bcas/yang dge slong ma gang tshogs la mi snyan par zer na ltung ba'o/ /dge slong mas dge 'dun ma'i tshogs la mya ngan gyi tshig tu smra ba la sogs pa ni sbyar ma 'di zhes bya ba la sogs te/mya ngan gyi tshig tu 'gyur ro cog gang smras kyang ltung ba'o/ /ltung ba brgya sum cu gsum pa rdzogs so// //ston pa mnyan du yod pa na ste/ dge slong ma dag ljongs rgyu ba las de dag gis khyim bdag dag la skye dgu'i bdag mo la sogs pa dgra bcom pa dag gi yon tan brjod de/skye dgu'i bdag mo chen mo ni bcom ldan 'das kyis nyan thos ma'i nang na mchog gnas brtan rgyal mo lta bur gsungs/ ut+pa la'i mdog ni thos pa 'dzin pa'i mchog tu gsungs/ chos sbyin ma ni mdo sde rnam par 'dzin pa'i nang na mchog tu gsungs/gau ta ma rid de ma ni 'dul ba 'dzin pa'i mchog tu gsungs te/ de la sogs pa'i kun gyi yon tan bsngags pa las/ sbom dga' mos thos par gyur pa dang phrag dog skyes nas de dag de ma yin te/ skye dgu'i bdag mo ni lci ba'i chos brgyad khas blangs pa las rab tu byung ba yin/ut+pa la'i kha dog ni grong khyer chen po drug tu smad 'tshong bar byed pa yin/ chos sbyin ma ni 'phrin gyis rab tu byung ba yin/ gau ta ma rid de ma ni bu sha zos pa yin no zhes bsngags pa las ser sna byed cing mi snyan par bsgrags pa las/ khyim bdag gis 'phya ba las bcas/yang dge slong ma gang bsngags pa la ser sna byed na ltung ba'o/ /dge slong mas dge slong ma gzhan gyi yon tan bsngags pa thos na phrag dog gi sems kyis de la mi snyan par sgrogs na ltung bar 'gyur ro/ /ltung ba brgya sum cu bzhi pa rdzogs so// //ston pa mnyan du yod pa na ste/dge slong ma sbom dga' mo grong mi dag cig la chos bshad nas de dag dad par gyur pa dang / phyis dge slong ma gzhan dag grong der bsod snyoms la 'gro ba dang / de la 'gog par byed de/ grong 'di dag nga nyid kyis dad par byas pa yin pas khyed su yang der ma 'dong shig ces 'gog pa las bcas/yang dge slong ma gang khyim la ser sna byed na ltung ba'o/ /dge slong mas dge slong gzhan bsod snyoms la 'jug pa'i tshe/ grong la ser sna byed cing gzhan la 'gog par byed na ltung ba'o/ /dge slong ma sdig can du gyur pas grong mi de dag sngar bdag gis dad par byas pa mi dad par 'gyur gyis dogs pa la nyes med do//ltung ba brgya sum cu lnga pa rdzogs so// //ston pa mnyan du yod pa na ste/ dge slong ma sbom dga' mos gnas khang mang du brtsigs te/ dge slong ma gsar du 'ongs pa gnas khang med pa dag la'ang brnyan por mi ster ba las don nyung ngu mas 'phya ba las bcas/yang dge slong ma gang gnas khang la ser sna byed na ltung ba'o/ /dge slong ma gnas khang la ser sna byed cing tshangs pa mtshungs par spyod pa gsar du 'ongs pa'am/ gnas med pa dag la gnas 'chugs par mi byed na ltung bar 'gyur ro/ /gnas khang dog par gyur na gding ba tsam gyi tshad du yang ngas gzhi bgo bar bya'o//de ltar ma byas na yang ltung bar 'gyur ro/ /ltung ba brgya sum cu drug pa rdzogs so// //ston pa mnyan du yod pa na ste/ sbom dga' mos gzhan gyis sngar bsod snyoms bslangs kyis dogs pa'i phyir nang par snga rab tu bsod snyoms la 'ongs pa las/bram ze dag bkra shis byas pa'i sgor phyin pa dang dge sbyong ma mgo reg ma 'di dag mthong bas ltas ngan to zhes shin tu brdegs te/ mig dag kyang skrangs nas slar gnas su phyin pa dang dge slong ma dag gis ci'i phyir mig skrangs zhes dris pa dang des kyang zhib tu smras so//de lta bur gyur pa don nyung du pas 'phya ba las bcas/ yang dge slong ma gang rnyed pa la ser sna byed na ltung ba'o/ /rnyed pa zhes bya ba la rnam pa gnyis te/ zas kyi rnyed pa dang / gos kyi rnyed pa'o/ /skabs 'dir zas kyi rnyed pa dang sbyar ro/ /dge slong mas zas kyi rnyed pa la phrag dog bya ba'i phyir dge slong ma gzhan dag bsod snyoms la 'dong ba la ngas ma bslangs kyi bar du khyed ma slong shig ces bsgo na'ang ltung bar 'gyur ro//gzhan pas sngar song ste bdag nyid kyis bslangs te zas grub na 'ang ltung ba'o/ /ltung ba brgya sum cu bdun pa rdzogs so// //ston pa mnyan du yod pa na ste/sbom dga' mos slob ma dang nye gnas dag la chos mi slob cing rgun 'brum dang bal po se'u dag mnyed cing las ngan pa mang du byed du bcug pa las slob ma dag gis chos bshad par gsol ba dang / sbom dga' mos smras pa ngas 'phags pa drug sde pa rnams la chos kyi phyir bal po se'u dang rgun 'bru dag mnyed mnyed de ni lag pa chu bur gyis gang /phyag 'tshal 'tshal nas klad pa'i skra byi zhing pus mo'ang rdol/ the tshom 'dri 'dri ste kha chu bur gyis gang ste/ de lta bu dka' ba mang po spyad pas chos thos pa de dang khyed kyis las mang po ma byas par ci'i phyir chos bstan zhes zer ba las bcas/yang dge slong ma gang chos la ser sna byed na ltung ba'o/ /dge slong mas slob ma dang nye gnas dag chos 'dri'am gzhan dag chos 'dri yang rung ste phrag dog dang ser sna'i bsam pas mi ston na ltung bar 'gyur ro/ / bdag la klan ka tshol lam shes sam mi shes bgam pa'i phyir 'dri ba la ma bstan na 'ang nyes med do/ /ltung ba brgya sum cu brgyad pa rdzogs so// //ston pa mnyan du yod pa na ste/ dge slong ma bcu gnyis sde rnams kha zas byin len byas nas mdun du bzhag ste za ba'i tshe/ za bzhin du langs shing las byed/ de nas yang slar 'dug cing za ba las don nyung ngu mas 'phya ba las bcas/ yang dge slong ma gang zas zos te spangs nas zos na ltung ba'o/ /lhag mar ma byas pa'i zas zos na'ang ltung bar 'gyur ro zhes gong du bshad pa dang khyad par ci yod ce na/ gong ma ni spyod lam las kyang nyams sems kyi rgyud kyis kyang mi bza' bar bcad nas kha zas zhig rnyed de za bar 'dod na lhag mar gyis te zo shig ces gsungs/ 'dir ni kha zas za ba'i tshe sems kyi rgyud kyis ma bcad par 'phral du spyod lam las nyams par byed cing / yang za yang 'dug par byed pa las ltung bar 'gyur ro//ltung ba brgya sum cu dgu pa rdzogs so// //ston pa mnyan du yod pa na ste/ dge slong ma sbom dga' mo snga dro'i dus su bsod snyoms la zhugs pa dang khyim bdag mo zhig gi sgor bsod snyoms bslangs pa las/ khyim bdag mo de ngu ba mthong nas sbom dga' mos ci'i phyir du zhes dris pa dang /des bdag gi bu thon bu byung bas bu'i bya ba dag ma 'tshal te khyod kyis mkhyen nam zhes dris pa dang / sbom dga' mos smras pa khyod ni khab khrin dang 'dra ste las gcig pu byed shes par 'gyur gyi/ ngas ni las kyi gnas dang bzo'i gnas thams cad shes kyi nga la bsod snyoms byin cig /nga'i mkhan mo byin nam tshangs pa mtshungs par spyod pa dang mdza' mo'i bsod snyoms kyang byin cig /khyod kyi bu'i bya ba ngas bya'o zhes smras nas khyim bdag mo des kyang bsod snyoms mang du byin no/ /de nas sbom dga' mos bu de legs par bkrus legs par phyis nas/mtshog ma sra bar bya ba'i phyir sa lci ba'i 'ji bas bskus/ gnod pa bsrung ba'i phyir sgo ka'i sa las dpral bar thig le gsum byas nas bsod snyoms mang du khyer te song ngo / /de'i 'og tu de'i khyim thab kyang 'ongs nas bu'i bya ba byas pa mthong nas chung ma la smras pa/bzang mo bu'i bya ba bdag legs par byas pa ni legs so legs so zhes smras pa dang / des smras pa bdag gis ni ma 'tshal gyi sbom dga' mos bgyis so zhes smras pa dang / des smras pa phyis kyang dge slong ma dag 'ongs pa dang byed du chug shig ces smras so//dus gzhan zhig na skye dgu'i bdag mo chen mo bsod snyoms la zhugs pa las khyim de'i sgor phyin no/ /khyim bdag mo des smras pa/ 'phags ma bu'i bya ba byos shig ces smras pa dang / skye dgu'i bdag mos smras pa sngon byang chub sems dpa' lhums nas byung ba ma gtogs par gzhan gyi bu'i bya ba byed ngas ma myong ba'i steng du/dge slong mas khyod kyi bu'i bya ba byas na ni khyod la bsod nams ma yin pa mang du 'phel lo zhes smras pa dang / khyim bdag mo des sngon sbom dga' mos bu'i bya ba byed pa dag zhib tu smras pa dang / khyim bdag mo des thos nas dge slong ma rnams 'phya zhing mi snyan pa zer ba las bcas/yang dge slong ma gang rgyud 'jog na ltung ba'o/ /yang dge slong ma gang zhes bya ba ni sbom dga' mo'o/ /rgyud ces bya ba ni bus pa chung ngu la bya ste rigs kyi rgyud la bya'o/ /'jog ces bya ba ni 'khru ba dang 'phyi ba dang /gos bskon pa dang / zas bsnyod cing rtsed mo la sogs pa'o/ /dge slong mas gzhan gyi bu chung ngu 'khru bar byed dam 'phyi bar byed dam gos bskon nam zas bsnyod na thams cad du ltung bar 'gyur ro/ /gnyen du 'ongs pa la nyes med do/ /ltung ba brgya bzhi bcu pa rdzogs so// //mdor bstan pa ni/ khrus ras bcang bar bya ba dang / /chos gos bkru bar bya ba dang / /sbyar ma dang ni brje ba dang / /dge sbyong chos gos sbyin pa dang / /sme gab dang ni tshogs kyi gos/ /dbul po yi rang byed pa dang / /gtan pa dbyung bar bya ba dang //chos gos bgo bsha' bya ba'o/ /ston pa mnyan du yod pa na ste/ sbom dga' mo chu bo a tsir ba ra ta'i nang na khyim mi mo dag dang lhan cig khrus byed pa'i tshe de dag la rmongs bstan nas nga'i spu phyogs gcig tu 'khyil zhing lcang lo can du 'dug pa ltos zhes de dag la ngom pa dang /dge slong ma gzhan dag 'phya bar gyur pa las bka' stsal pa/ phyin chad khrus byed na khrus ras gyon la khrus gyis shig ces bcas/ yang dge slong ma gang khrus ras mi 'chang na ltung ba'o/ dge slong mas khrus ras med par khrus byed na 'bab chu'am lteng ka'i nang na'ang rung ste/dang por chur zhugs nas lte bar ma phyin gyi bar du ni nyes byas/ lte ba 'das na ltung ba'o/ /chu bcus pa zhig la khrus byed na'ang dang po mgo nas yas blugs nas lte bar ma phyin gyi bar du nyes byas/ lte ba las blangs 'das na ltung bar 'gyur ro/ /gcig pur khang pa dben pa na khrus byed na khrus ras med na'ang nyes med do//ltung ba brgya bzhi bcu gcig pa rdzogs so// //ston pa mnyan du yod pa na ste/ sbom dga' mo sham thabs khrag gis phog pa khyer nas khrus mkhan gyi nang du song ste/ bzhin bzangs nga'i 'di khrus te byin cig ces smras pa dang /des smras pa gos phal 'khru ba'i nang du chug shig ces bsgo ba dang sbom dga' mos kyang der bcug go/ /de'i 'og tu khrus mkhan des gos bkru bar bshams pa dang / sbom dga' mo'i sham thabs de khrag gis phog pa mthong nas 'dis nga'i gos thams cad mi gtsang bas 'phags te ma rung bar gyur to zhes de yang khros par gyur pa las bcas/yang dge slong ma gang btso blag mkhan la chos gos 'khrur bcol na ltung ba'o/ /dge slong mas khrus mkhan la gos rnying pa 'khrur bcol na thams cad du ltung bar 'gyur ro//ltung ba brgya bzhi bcu gnyis pa rdzogs so// //ston pa mnyan du yod pa na ste/ sbom dga' mo ste spang ba'i skabs na bshad pa dang mthun/ yang dge slong ma gang zla ba phyed phyed cing chos gos byin gyis mi rlob na ltung ba'o/ /sdom gyi tshigs su bcad pa las kyang mi 'byung bas lhag ma 'dra nas ltung ba'i grangs su ma stsal to//ston pa mnyan du yod pa na ste/ khyim bdag cig la bu ming sring gnyis bdog pa dang / khyim bdag de dus las 'das pa'i 'og tu bu ming sring gnyis ma dang gsum rab tu byung ngo / /de'i ming po'i ming ni mos pa can zhes bya/sring mo'i ming ni mos ma can zhes bya ste/ dus phyi zhig na mos pa can de sbyar ma bzang po cig gyon te/ dge slong ma'i dbyar mo khang du 'ongs pa dang / mos ma can gyis chos gos sbyar ma de blangs te khyer nas bdag gi rnying pa ni mos pa can la byin no/ /mos pa can gyis chos gos rnying pa de yang legs par bkrus/legs par kha dog bsgyur te bzang por byas nas dbyar mo khang du song ba dang / mos ma can gyis mthong nas smras pa/ khyod bdag gi chos gos slar khyer la nga bdag gi byin cig mos smras pa dang / des kyang byin no/ / dge slong ma gzhan dag gis mos ma can la smras pa/ khyod gtsang ma'i ris kyi lha bzhin du rtag tu gos bzang po she dag gis cha bar byed na ga las rnyed ces smras na/ des kyang zhib tu smras nas/ dge slong ma de dag 'phya ba las bcas/ yang dge slong ma gang 'khor gyi gtso bo dang sbyar ma rje na ltung ba'o//yang dge slong ma gang zhes bya ba ni mos ma can lta bu'o/ /'khor gyi gtso bo zhes bya ba ni dge slong pha'o/ /sbyar ma zhes bya ba ni chos gos gsum gang yang rung ste brjes na ltung ba'o/ /ltung ba brgya bzhi bcu gsum pa rdzogs so// //ston pa rgyal po'i khab na ste/ klu ri bo dang /skyas kyi dus ston byed pa'i tshe/ lho phyogs nas gar mkhan dag cig lhags te/ drug sde po'i tshul du gar bya ba'i phyir sbom dga' mo'i gan du song ste/ chos gos rnams brnyas nas sbom dga' mos gla mang du blangs so/ /de nas gar mkhan de dag gis chos gos bgos shing drug sde'i tshul du gar byas pa dang /drug sde po dag khros nas sbom dga' mo la sogs pa bcu gnyis sde dag brdegs pa dang / bcom ldan 'das kyis bka' stsal pa/ dge slong mas dge sbyong gi gos khyim pa la 'tshong na ltung ba'o zhes bcas/yang dge slong ma gang dge sbyong gi gos khyim pa la byin na ltung ba'o/ /yang dge slong ma gang zhes bya ba ni sbom dga' mo'o/ /dge sbyong gi gos zhes bya ba ni chos gos lnga las gang yang rung ba'o/ /khyim pa la 'tshong zhes bya ba ni/ zas sam gos kyi rin du 'tshong ba ste/dge slong mas 'tshong na thams cad du ltung bar 'gyur ro/ /ltung ba brgya bzhi bcu bzhi pa rdzogs so// //ston pa mnyan du yod pa na ste/ bka' stsal pa/ dge slong mas sme gab chongs shig ces bka' stsal pa dang / sbom dga' mos snga dro bsod snyoms la zhugs pa'i tshe khrag gis byin pa la phog pa khyim pa dag gis mthong ste/de dag gis ci yin zhes dris pa dang / sbom dga' mos smras pa ci yin pa mi shes na ma la dris shig /sring mo la dris shig ces smras pa dang / de dag 'phya ba las bcas/ yang dge slong ma gang sme gab mi 'chang na ltung ba'o//dge slong mas sme gab mi 'chang na thams cad du ltung bar 'gyur ro/ /ltung ba brgya bzhi bcu lnga pa rdzogs so// //ston pa mnyan du yod pa na ste/ sbom dga' mos btsun mo phreng ldan ma'i gan du phyin pa dang btsun mo phreng ldan ma'i dge slong ma sme gab 'chang na gnang bar thos nas/dge slong ma spyi la sme gab kyi rgyu gos sna tshogs las mang du bskur ba dang / de dag thams cad sbom dga' mos bdag gir byed pa las bcas/ yang dge slong ma gang tshogs kyi gos bdag gir byed na ltung ba'o/ /yang dge slong ma gang zhes bya ba ni sbom dga' mo'o//tshogs zhes bya ba ni dge slong ma'i dge 'dun no/ /gos zhes bya ba ni sme gab kyi gos so/ /dge slong mas dge 'dun gyi spyi la bsngos par shes bzhin du bdag gir byas na ltung bar 'gyur ro/ /ltung ba brgya bzhi bcu drug pa rdzogs so// //ston pa mnyan du yod pa na ste/sbom dga' mos tshul nas byung ba'i 'og tu gtan pa gding ba'i dus la bab pa dang / khyim bdag dbul po nad pa zhig gi gan du song ste/ bzhin bzangs dge 'dun la gtan pa'i gos phul zhes bsgo ba dang / des smras pa bdag ni dbul zhing nad pa bas chos gos mi 'byor te zhes smras pa dang /sbom dga' mos smras pa tshong pa las snga skyin gyis la rin phyis bcol zhes smras nas/ tshong pa'i gan du khrid de gtugs nas ras rin po che zhig khyer ro/ /de nas dus phyi zhig na khyim bdag nad pa des ras rin ma 'khor nas/ des bzung ste nyi tshan la btags pas ma dad cing 'phya ba las bcas/yang dge slong ma gang dbul po'i rgyud gos kyi sbyin pa yang dag par 'dzin du 'jug na ltung ba'o/ /dge slong mas gtan gding ba'i gos khyim la dbul po'am nad pa sbyor mi bzod pa la slong zhing sbyor du 'jug na ltung bar 'gyur ro/ /ltung ba brgya bzhi bcu bdun pa rdzogs so// //ston pa mnyan du yod pa na ste/ bka' stsal pa/ dge slong ma dag chom po dag gis bcom ste/ glo bur du lhags na gtan pa glo bur du phyung la dge slong ma de dag la'ang gos byin cig /gtan pa 'byin pa'i tshe'ang dge slong ma thams cad 'dus shig ces bka' stsal pa las/sbom dga' mo 'dur mi btub pa las bcas/ yang dge slong ma gang gtan pa 'byin par mi 'du na ltung ba'o/ /dge slong ma dge 'dun glo bur du gtan pa 'byin pa'i tshe mi 'du na ltung bar 'gyur ro/ /ltung ba brgya bzhi bcu brgyad pa rdzogs so// //ston pa mnyan du yod pa na ste/ bka' stsal pa/ zla ba lnga tshang yang dus su gtan pa phyung la dge slong ma thams cad 'dus te rnyed pa bgos shig ces gsungs pa las/ sbom dga' mo 'dur mi btub pa las bcas/ yang dge slong ma chos gos kyi rnyed pa bgo bsha' byed par mi 'du na ltung ba'o//gtan pa phyung ba'i 'og tu gos kyi rnyed pa bgo bsha' byed par mi 'du na ltung ba'o/ /len par mi 'dod na ma 'dus kyang nyes pa med do/ /ltung ba brgya bzhi bcu dgu pa rdzogs so// //mdor bstan pa ni/ tshur shog rnam par zhi bya dang / / bor nas 'gro bar byed pa dang / /gtsug lag bslab par mi bya dang / /mi sbyin la zas mi btsong dang / /khyim gyi so nam mi bya dang / /khri 'dug bsnyen bkur byed pa dang / /bal bkal bar yang mi bya dang / /gdugs dang mchil lham mi bcang ngo / / ston pa mnyan du yod pa na ste/ sbom dga' mos slob ma dang nye gnas dag gi 'thab gcugs byas nas de dag 'thab par gyur pa dang / slar gcugs par mi byed do/ /dge slong ma dag gis 'thab pa ci'i phyir mi gcugs zhes byas na/ sbom dga' mos smras pa/ 'di dag 'thab 'dod na ci'i phyir mgos mgo bo mi rdung / 'thabs kyang sla'o zhes zer ba dang don nyung du mas 'phya ba las bcas/ yang dge slong ma gang gcugs nus la 'thab mo zhi bar mi byed na ltung ba'o/ /dge slong mas slob ma dang nye gnas gang 'thab kyang rung ste/ gcugs nus bzhin du gcugs par mi byed dam/ ched du gcugs byas te 'thab na'ang ltung ba'o/ /ltung ba brgya lnga bcu pa rdzogs so// //ston pa mnyan du yod pa na ste/ dge slong ma sbom dga' mos gtsug lag khang sgo bcad de lde mig kyog po thogs bzhin du ljongs rgyur song ba las/dge slong ma gzhan gyis sgo ma phyed de me shor ba las bcas/ yang dge slong ma gang dbyar mo khang bor te 'gro na ltung ba'o/ /dge slong mas gtsug lag khang sgo bcad de/ lde mig gzhan la ma bzhag par ljongs rgyur 'gro na ltung ba'o/ /lde mig bzhag pa brjed dam bar chad brgyad byung ba la nyes med do//ltung ba brgya lnga bcu gcig pa rdzogs so// //ston pa mnyan du yod pa na ste/ sbom dga' mo snga dro bsod snyoms la zhugs pa las/ spos 'tshong gi khye'u 'jig rten gyi rig pa slob pa mthong ba dang de la chags par gyur nas bdag la rig pa slobs shig ces smras pa dang /sbos 'tshang gi khye'us mo la bslabs te/ si ri b+hu si ri b+hu si ri b+hu si ri swAhA/ sbom dga' mo yang lobs bzhin du da dung nga la slobs shig ces yang nas yang du slob pa las spos 'tshong gi khye'u yang khros nas/ gtum mo mgo reg ma khyod dgos pa med do zhes smras shing langs te song ngo //dge slong ma gzhan dag gis smras pa ci'i phyir lobs bzhin du yang slob ces dris pa dang / de la chags pas na lhan cig 'dug na bdag dga'o zhes zer ba las 'phya ste bcas/ yang dge slong ma gang khyim pa las gtsug lag slob na ltung ba'o//dge slong mas skyes pa la chags pa'i phyir de la bdag nyid rig pa slob na ltung ba'o/ /ltung ba brgya lnga bcu gnyis pa rdzogs so// //ston pa mnyan du yod pa na ste/ sbom dga' mo skyes pa gzhan zhig dang phrad pa dang de la chags nas tshur shog ngas khyod la rig pa bslab po zhes sngar lobs pa de skyes pa de la yang slob po//des smras pa bdag lobs so zhes byas pa dang mos smras pa/ da dung yang slobs shig ces byas pa dang / de yang khros nas mgo reg ma gtum mo khyod dang rig pa 'di gnyi ga nga la dgos pa med do zhes smras te song ba las bcas/yang dge slong ma gang skyes pa la gtsug lag slob na ltung ba'o/ /dge slong ma gang skyes pa la chags pa'i phyir rig pa slob tu 'jug na ltung ba'o/ /ltung ba brgya lnga bcu gsum pa rdzogs so// //ston pa mnyan du yod pa na ste/ sbom dga' mo bsod snyoms mang du rnyed nas/kha zas gsher ba dag ni za/ phye ma la sogs pa skam po dag gis gos dag nyo bar byed pa las don nyung ngu ba'i dge slong ma dag 'phya ba las bcas/ yang dge slong ma gang kha zas 'tshong na ltung ba'o/ /dge slong mas phye la sogs pa bsod snyoms kyi kha zas kyis gos nyo bar byed na ltung ba'o//ltung ba brgya lnga bcu bzhi pa rdzogs so// //ston pa mnyan du yod pa na ste/ sbom dga' mos snga dro bsod snyoms la zhugs pa dang / khyim pa zhig gi sgor phyin pa dang bud med gzhon nu ma zhig tu zhing 'dug pa mthong nas/khyod ci'i phyir du zhes dris pa dang / bdag ni khyim gsar du phub pa zhig khyim gyi bya ba dag ma 'tshal te ngu'o zhes smras pa dang / sbom dga' mos smras pa/ nga la bsod snyoms mang du byin na khyim gyi bya ba rnams ngas bya'o zhes smras pa dang / des kyang bsod snyoms mang du byin nas sbom dga' mos kyang de'i khyim phyag dar byas chag chag gis btab snod sbyad dag bkrus te legs par gzhag nas slar bsod snyoms khur te song ngo //phyis skye dgu'i bdag mo yang bsod snyoms la zhugs pa dang khyim bdag mo des smras pa 'phags ma khyim gyi bya bdag mdzod cig ces byas pa dang /skye dgu'i bdag mos smras pa/ sngon rab tu ma byung ba'i tshe rgyal po zas gtsang ma'i khyim gyi bya ba rnams ngas byas pa ma gtogs par gzhan gyi khyim gyi bya ba byed ma myong ba'i steng du/ dge slong mas khyod kyi khyim gyi bya ba byed na khyod la bsod nams ma yin pa mang du 'phel lo zhes smras pa dang /des smras pa/ 'o na sbom dga' mos nga'i khyim gyi bya ba mang du byas so zhes rgyas par smras so/ /de nas don nyung ngu mas 'phya ba las bcas/ yang dge slong ma gang khyim gyi bya ba byed na ltung ba'o/ /dge slong mas khyim gyi bya ba byed na ltung bar 'gyur ro//bdag gi gnyen yin na nyes med do/ /ltung ba brgya lnga bcu lnga pa rdzogs so// //ston pa mnyan du yod pa na ste/ sbom dga' mo nyin mo gnas pa'i sar khri'u dang khri stan dag slob ma dang nye gnas dag la bskur zhing de la bdag 'dug na bsnyen bkur byed pa bdag gir byed pa las don nyung ngu mas 'phya ba las bcas/yang dge slong ma gang khri la 'dug cing bsnyen bkur byed pa bdag gir byed na ltung ba'o/ /dge slong mas dge slong ma dang nye gnas dang slob ma dag khri stan yang mang du skyed cing de la bdag 'dug par byed dam/de la bdag gir bsnyen bkur nyams su len na ltung ba'o/ /na ba dang rgan mo la nyes med/ ltung ba brgya lnga bcu drug pa rdzogs so// //ston pa mnyan du yod pa na ste/ gtsug dga' mo las bcas te/ de'i gleng gzhi yang gong ma khyim gyi bya ba byed pa dang 'dra ste/dge slong mas bal 'khal na ltung bar 'gyur ro/ /lkog tu dben par 'dug ste/ rgya cang dang / lcag pod dang glegs thag tsam 'khal zhing 'thag ste/ dge slong pha'i bya bar bsams na nyes med do/ /yang dge slong ma bal 'khal na ltung ba'o/ /ltung ba brgya lnga bcu bdun pa rdzogs so// //ston pa mnyan du yod pa na ste/ sbom dga' mos gdugs thogs shing grong du 'jug pa las khyim pas 'phya ste bcas/ yang dge slong ma gang gdugs 'chang na ltung ba'o/ /dge slong mas gdugs thogs shing grong du 'gro na ltung ba'o/ / ltung ba brgya lnga bcu brgyad pa rdzogs so// //ston pa mnyan du yod pa na ste/ dge slong ma sbom dga' mos mchil lham rtseg ma ri mo khra bos bris pa gyon nas khyim pa'i grong du 'jug pa las khyim pas 'phya ste bcas/ yang dge slong ma gang mchil lham khra bo byas te 'chang na ltung ba'o//dge slong mas mchil lham rtseg ma ri mo can khro bor byas te 'chang ngam gyon na ltung bar 'gyur ro/ /ltung ba brgya lnga bcu dgu pa rdzogs so// //mdor bstan pa ni/ lag pa 'brum bu byung ba dang / /dge slong ma yi 'phyon ma dang / /dge slong ma ni phyir mi gzhug /dge slong ma dang dge tshul ma/ /khyim bdag mo yang phyir mi gzhug /kun du rgyu mo de bzhin no/ /spos dang til gyi tshigs mas skud/ /rtag tu bsug par mi bya'o/ /ston pa yul mnyan du yod pa na ste/ de'i dus na dge slong ma gtsug dga' mo dpung pa la rma zhig byung ba las/de sman pa la 'ching du bcug pa las sman pa de la chags te/ yang dang yang 'ching zhing 'grol du bcug pa las/ sman pa khros te mgo reg ma khyod la sman byed pa su spro zhes langs te song ngo / /de nas dge slong ma dag gis gtsug dga' mo la khyod ci'i phyir de ltar byed ces dris pa dang /des smras pa skyes pa dang cung zhig lhan cig 'dug cing reg na bde'o zhes smras pa dang / don nyung du ba'i dge slong ma dag khyod gtsub shing dang 'dra ste/ 'di ltar chags so zhes 'phya ba las bcas/ yang dge slong ma lag pa la 'brum bu byung ba skyes pa la yang dang yang bcings pa 'grol du bcug na ltung ba'o//dge slong mas lus la rma byung ba chags pa'i sems kyis skyes pa la yang dang yang bcings pa 'grol du bcug na thams cad du'ang ltung bar 'gyur ro/ /pha dang bu dang gnyen la gnyen pa'i dran pas 'ching du bcug na nyes med do//ltung ba brgya drug cu pa rdzogs so// //ston pa mnyan du yod pa na ste/ sbom dga' mos bud med smad 'tshong ma gcig rab tu byung ngo / /de nas bud med de rab tu byung ngo zhes sngon rtse rtse ba'i skyes bu dag thos pa dang / da ni gos dang zas kyang sbyar mi dgos par yongs su spyad do zhes dge slong ma'i dbyar mo khang du 'ongs nas de dang steg cing dus dag 'debs pa las don nyung du mas 'phya ba las bcas/yang dge slong ma gang bud med 'phyon ma rab tu 'byin na ltung ba'o/ /mi shes pa la nyes med de rab tu phyung ba'i 'og tu yul gzhan du bkar bar bya'o//ltung ba brgya drug cu gcig pa rdzogs so// //ston pa yul mnyan du yod pa na ste/ sbom dga' mos dge slong ma grogs mo bdag gi lus mar dang bag phyes phyir bcug pa dang / de dag gis ci bya zhes dris na/ 'di ltar phyis na lus 'jam zhing dkar bas 'dod pa can dag gi snying dgar gzhug go zhes smras pa dang don nyung du ma dag gis 'phya ba las bcas/yang dge slong ma gang dge slong ma lus phyir 'jug na ltung ba'o/ /dge slong mas bzang du 'dod pa'i phyir dge slong ma lus phyir 'jug na ltung ba'o/ /ltung ba brgya drug cu gnyis pa rdzogs so// //ston pa mnyan du yod pa na ste/ sbom dga' mos dge slong ma lus 'phyir bcug pa las bcas/ yang dge slong ma gang dge slong ma lus 'phyir 'jug na ltung ba'o/ /'di yang ltung ba'i khyad par gong ma dang 'dra'o/ /ltung ba brgya drug cu gsum pa rdzogs so// // ston pa mnyan du yod pa na ste/ sbom dga' mos dge tshul ma lus 'phyir 'jug pa las bcas/ yang dge slong ma gang lus 'phyir 'jug na ltung ba'o/ /'di yang ltung ba'i khyad par gong ma dang 'dra'o/ /ltung ba brgya drug cu bzhi pa rdzogs so// //ston pa mnyan du yod pa na ste/ sbom dga' mos bsams pa/dge slong ma dang dge slob ma dang dge tshul ma las 'phyir 'jug tu ni bcom ldan 'das kyis ma gnang na/ khyim bdag mo 'phyir gzhug na nyes med snyam du bsams te/ khyim bdag mo lus 'phyir bcug pa dang / dge slong ma dag gis ci bya zhes dris na/ sbom dga' mos smras pa/khyim mi mos phyis pa la nyes med do zhes smras pa dang / don nyung du ma dag gis 'phyas te bcas so/ /yang dge slong ma gang khyim bdag mo 'phyir 'jug na ltung ba'o/ /dge slong mas khyim bdag mo la 'phyir 'jug na'ang ltung ba'o/ /bzang du re ba'i bsam bas phu nu mo dag 'phyir 'jug na ltung ba'o//ma dang phu nu mo dang bu mo bdag na ba la phan pas 'phyir bcug pa la nyes med/ ltung ba brgya drug cu lnga pa rdzogs so// //ston pa mnyan du yod pa na ste/ sbom dga' mos kun du rgyu mo la lus 'phyir bcug pa las bcas/ yang dge slong ma gang kun du rgyu mo la 'phyir bcug na ltung ba'o//'di'i khyad par yang gong ma dang 'dra'o/ /kun tu rgyu mo zhes bya ba ni mu stegs grangs can las rab tu byung ba'o/ /ltung ba brgya drug cu drug pa rdzogs so// //ston pa mnyan du yod pa na ste/ sbom dga' mos lus la spos kyis bskus pa dang / dge slong ma dag gis spos nyug ste ci bya zhes dris pa dang / sbom dga' mos smras pa/ /ngas skyes pa dag 'dod pa skyed du gzhug go zhes smras pa dang don nyung du ma dag 'phya ba las bcas/ yang dge slong ma gang spos kyis nyug na ltung ba'o/ /dge slong ma lus la spos bskus na thams cad du ltung bar 'gyur ro//na ba la phan pa'am ha cang dri mi zhim par gyur pa la nyes med do/ /ltung ba brgya drug cu bdun pa rdzogs so// //ston pa mnyan du yod pa na ste/ sbom dga' mos til gyi tshigs mas lus bskus shing mnyes pa dang / dge slong ma dag gis ci bya zhes dris pa dang /'dis bskus na lus mnyen cing gzhan dag 'dod pa skyed du gzhug go zhes smras pa dang / don nyung ngu ma dag gis 'phya ba las bcas/ yang dge slong ma gang til gyi tshigs mas nyug na ltung ba'o/ /dge slong mas til gyi tshigs mas lus la nyug na ltung ba'o//nad pa la phan na nyes med do/ /ltung ba brgya drug cu brgyad pa rdzogs so// //ston pa mnyan du yod pa na ste/ dge slong ma bcu gnyis sde dag khrus byed cing drag tu yang nas yang du bsug go/ /de ltar byed pa dge slong ma dag gis ci bya zhes dris pa dang / gong du smos pa mar dang bag phye dang til gyis bskur ni bcom ldan 'das kyis ma gnang ste/de chus drag tu bsug cing bkrus la lus 'jam zhing dkar por bya'o zhes smras pa dang don nyung ngu ma dag 'phya ba las bcas/ yang dge slong ma gang drag tu bsug na ltung ba'o/ / dge slong mas lus dkar por bya ba'i phyir chus drag tu bsug cing bkrus na ltung ba'o/ /ltung ba brgya drug cu dgu pa rdzogs so// //mdor bstan pa ni/ skabs ma phye bar 'dri ba dang / /khyim pa rgyan rnams mi bcang dang / /lag pa sbrel zhing 'khru ba dang / /gar byed glu len rol mo dkrol//dge slong ma yi gnas khang nas/ /gcig pu spa brang byed mi 'gro/ /u shi ra dang so mangs dang / /smyig bshad chos kyi rgyan mi bcang / /ston pa mnyan du yod pa na ste/ /sbom dga' mos dge slong pha'i gnas khang du song nas dge slong cig la des skabs ma phye bar chos dag dris nas dge slong des lan ma thebs te sma bab par gyur pa bcom ldan 'das kyi snyan du bdas nas/da phyin chad dge slong mas skabs ma phye bar dge slong pha la chos ma 'dri zhig ces bslab pa bcas so/ /yang dge slong ma gang skabs ma rnyed par dge slong pha la dri ba 'dri na ltung ba'o/ /dge slong mas dge slong gis chos bshad par gnang ba'i skabs ma phye bar shes bzhin du chos 'dri ni ltung bar 'gyur ro//sngar bshad par gsol te gnang ba las chos brtags shing 'dri rtog byed pa la nyes med do/ /ltung ba brgya bdun cu pa rdzogs so// //ston pa mnyan du yod pa na ste/ sbom dga' mo snga dro bsod snyoms la song ba las/ khyim bdag phyug po cig gi sgor phyin pa nas khyim bdag de dag gi rgyan bkrol te bzhag pa mthong nas blangs te/ bdag gi lus brgyan pa dang / khyim bdag gis nged kyi rgyan dag gis brgyan te ci bya zhes dris pa dang / sbom dga' mos smras pa/ngas ci tsam du bzang ba lta'o zhes byas pa dang / mgo reg ma khyod la rgyan ci dgos rgyan yang bzang ba med ces 'phya zhing ma dad pa las bcas/ yang dge slong ma gang khyim pa'i rgyan 'chang na ltung ba'o/ /dge slong ma khyim pa'i nang du 'gro zhing rgyan gyis brgyan na thams cad du 'ang ltung bar 'gyur ro//rgyan zhes bya ba ni mgo rgyan dang dpung rgyan dang rgyan sna tshogs la bya'o/ /ltung ba brgya bdun cu gcig pa rdzogs so// //ston pa mnyan du yod pa na ste/ bcu gnyis sde dag khyim mi mo lhan cig chu bo a tsir rar dir khrus ras med par chu'i nang du zhugs te/lag pa dag sbrel zhing khrus byed de/ khyim mi mo de dag gis mo mtshan la mdzub tshugs dag byed cing gcig la gcig 'phyas btags pa las/ khyim mi mo rnams ma dad cing 'phya ba las bcas/ yang dge slong ma gang lag sbrel te khrus byed na ltung ba'o/ /dge slong mas khyim mi mo dang lhan cig khrus byed na ltung bar 'gyur ro//ltung ba brgya bdun cu gnyis pa rdzogs so// //ston pa rgyal po'i khab na ste/ de'i dus na rgyal rigs dang bram ze'i rigs mdza' ste de dag 'dus shing rtse ste/ 'phong rtsal dang / las sna tshogs dag gis 'gran no/ / de ltar 'gran pa las rgyal rigs rnams ni dmag 'gyed pa la mkhas so/ /bram ze'i rigs rnams ni glu dang gar la mkhas so/ /de nas rgyal rigs rnams bram ze la gar ma thub nas de dag sbom dga' mo'i gan du dong ste/ 'phags ma gar mkhyen nam zhes dris so/ /sbom dga' mos ngas shes so zhes smras pa dang /de dag gis bdag cag la bslab tu gsol zhes byas pa dang / nga la rngan pa yod na rung ngo zhes smras pa dang / de dag gis kyang rngan pa mang du byin no/ /de nas sbom dga' mos gar sha rdza ga dang / ke'ur la sogs pa sna tshogs bslabs pas/ rgyal rigs kyis bram ze la 'gran thub pas/ bram ze rnams sbom dga' mo la 'phya zhing ma dad pa las bcas/ yang dge slong ma gang gar byed na ltung ba'o/ /dge slong mas bdag gar byed na ltung ba'o/ /gzhan gar byed du bcug na'ang ltung ba'o/ /gar byed pa la lta na'ang ltung ba'o//dkon mchog gsum la mchod pa'i phyir byed du bcug pa la nyes med/ ltung ba brgya bdun cu gsum pa rdzogs so// //ston pa rgyal po'i khab na ste/ sbom dga' mos rgyal rigs dag la glu bslabs pa las/ bram ze dag ma dad de 'phya ba las bcas/ yang dge slong ma gang glu len na ltung ba'o//ltung ba'i khyad par ni gong ma dang 'dra'o/ /dar ma klog pa'i tshe gtang rag snyen par zer ba nyes med/ ltung ba brgya bdun cu bzhi pa rdzogs so// //ston pa rgyal po'i khab na ste/ sbom dga' mos rgyal rigs rnams la rol mo'i cha spyad dkrol zhing len pa sna tshogs bslabs pa las bram ze rnams ma dad nas bcas/yang dge slong ma gang rol mo'i cha byad dkrol na ltung ba'o/ /ltung ba'i khyad par ni gong ma dang 'dra'o/ /ltung ba brgya bdun cu lnga pa rdzogs so// //ston pa mnyan du yod pa na ste/dge slong ma gtsug dga' mo snga dro bsod snyoms la zhugs pa las/ des skyes pa cig bsdus te dbyar mo khang du dus btab po/ /de nas skyes pa de de'i nub mo dbyar mo khang du 'ongs pa dang / der ma bde nas gtsug dga' mos smras pa 'dir ni mi bde'o zhes byas pa dang / skyes pa na re nga'i khang par 'dod zhes zer ro//gtsug dga' mos smras pa khyod kyi gnya' bar bskyon na der 'dod zhes byas pa dang / des kyang gnya' bar bskyon no/ /de nas gtsug dga' mos bsams pa/ da ltar btsun par bya zhing kha drag bya ba yang tshul khrims 'di yod pa'i phyir bya bar zad de/tshul khrims med na kun gyis brnyas smad par 'gyur zhes bsams nas/ da ni rkun pos khyer ro zhes kus btab pa dang / byi bo'ang khros nas shin tu brdegs te song ngo / /de nas dge slong ma dag gis ci nyes smras pa dang / ji ltar gyur ba zhib tu smras pa dang / don nyung du ma dag gis 'phya ba las bcas/yang dge slong ma gang gcig pu phyi rol gyis phyogs su 'gro na ltung ba'o/ /dge slong ma gcig pu phyi rol du 'gron chung ngu na nam phyi sar song na'ang ltung ba'o/ /khang pa rtseg ma'i yang tog tu gcig pu 'gron nyes pa med do/ /ltung ba brgya bdun cu drug pa rdzogs so// //ston pa mnyan du yod pa na ste/ bcu gnyis sde dag u shi ra'i so mangs 'chang zhing skra bshad de phyil phyil por byas pa las/ dge slong ma dag gis ci'i phyir de ltar byed/ gzhan dag 'dod pa skyed skyed pa'i phyir ro zhes byas pa dang / don nyung ngu ma dag 'phya ba las bcas/yang dge slong ma gang u shi ra'i so mangs 'chang na ltung ba'o/ /dge slong mas u shi ra'i so mangs 'chang na ltung ba ste/ u shi ra zhes bya ba ni gres ma'i rtsa ba las byas pa'i/ /ltung ba brgya bdun cu bdun pa rdzogs so// //ston pa mnyan du yod pa na ste/ bcu gnyis sde mo rnams u shi ra'i so mangs 'chang du mi ster ba dang so mangs gzhan dag bcangs pa las bcas/yang dge slong ma gang so mangs 'chang na ltung ba'o/ /ltung ba'i khyad par ni gong ma dang 'dra bas bshad pa ma byas so/ /ltung ba brgya bdun cu brgyad pa rdzogs so// //ston pa mnyan du yod pa na ste/bcu gnyis sde mo rnams so mangs snga ma de dag ma gnang ba dang smyig bshad bcangs na nyes pa med do snyam du bsams te 'chang ba las bcas so/ /yang dge slong ma gang smyig bshad 'chang na ltung ba'o/ /ltung ba'i khyad par ni gong ma dang 'dra ste/ smyig bshad ces bya ba ni smig ma'i rtsa ba shad shad po la bya'o//ltung ba brgya bdun cu dgu pa rdzogs so// //ston pa mnyan du yod pa na ste/ sbom dga' mos bsams pa/ bdag gis sngan chad gzhan ni ci yang byas na chos kyi rgyan gyis ma brgyan to snyam nas des bdag gi lus bsku byug la sogs pa byas te brgyan nas khang pa'i sgor smad 'tshong ma'i rgyal mtshan bsgreng ba dang /der skyes pa dag 'ongs te kye bzang mo nyin gla ji tsam zhes dris pa dang / des smras pa kAr ShA pa Na lnga brgya'o zhes byas pa dang / de dag gis kAr ShA pa Na lnga brgya byin nas khang pa'i nang du 'dong zhes byas pa dang / sbom dga' mos bsams pa/bdag da ltar kun gyis btsun par bya zhing bsnyen bkur byed pa thams cad kyang tshul khrims 'di yod pa'i yon tan te/ gal te tshul khrims 'di dral na ni kun gyis smad cing brnyas par 'gyur ro snyam bsams nas/ kAr ShA pa Na khyer bzhin du bros pa las de dag gis bsnyegs te zin nas thor to las drangs pa dang skra brnyan lhung bas mgo reg ma ma rungs ma 'di zhes mi snyan pa zer ba las dge slong ma dag gis thos nas 'phya ba las bcas so//yang dge slong ma gang chos kyi rgyan 'chang na ltung ba'o/ /de la chos kyi rgyan zhes bya ba ni skra brnyan la bya ste/ dge slong mas skra brnyan 'chang ngam byas na ltung bar 'gyur ro//ltung ba brgya brgyad cu pa rdzogs so// //brgya rtsa brgyad po 'di dag la/ /gzhan yang bdun cu gnyis kyis bsnan/ /dge slong ltung ba bsdoms na ni/ /brgya dang brgyad cur 'dres pa yin/ /skrod pa dang ni yang yang dang //bzang po gnas dang sman byed gnas gnyis dang / /gdeng med lo ma tshang dang ras chen dang / /dgu bcu po las bco brgyad 'di bkol te/ /bud med kyi dang thun mong ma yin no/ /lhag ma 'di dag bya bar bya'o/ /zhes bya ba ni dge slong ma'i ltung ba brgya brgyad cur gzhag pa de/dge slong gi ltung ba dgu bcu dgu las logs shig tu thun mong ma yin pa'i ltung ba brgya rtsa brgyad yod par bstan zhing / dge slong dag gi ltung ba dgu bcu las/ gang dag ni dge slong ma'i bslab pa yin/ gang dag ni ma yin par dbye zhing brgya brgyad cur bsdu ba'i tshul bstan pa'i phyir tshigs su bcad pa 'di dag smos so//de la brgya rtsa brgyad po 'di dag la/ /gzhan yang bdun cu gnyis kyis bsnan zhes bya ba ni dge slong gi bslab pa dang thun mong ma yin pa sgog skya za na ltung bar 'gyur ba man chad brgya rtsa brgyad yod pa'i steng du/ dge slong gi ltung ba dgu bcu las bco brgyad bton te bdun cu gnyis kyis bsnan na/brgya brgyad cur bstan pa yin te/ ltung ba dgu bcu las bco brgyad bton na ni thun mong ma yin pa la brgya rtsa brgyad du med de/ ci'i phyir zhe na/ yang dge slong ma gang zla ba phyed phyed cing chos gos byin gyis mi rlob na ltung ba'o zhes pa de/ sngar gong du spang ba'i ltung ba'i skabs su yang bshad zin la/ de nyid sdom gyi tshigs su bcad pa las kyang mi 'byung ste/ ltung ba de gcig lhag pa'i phyir brgya rtsa brgyad du med do/ /'og nas gdeng med gtogs par bco brgyad bkol lo zhes 'byung mod kyi gdeng med ni bkol du mi rung ste/ci'i phyir zhe na gong du sdom gyi tshigs su bcad pa las kyang 'byung la/ lhag ma med pa'i phyir te de ltar na thun mong ma yin pa brgya rtsa bdun gyi steng du thun mong gi ltung ba bdun cu rtsa gsum gyis bsnan cing brgya brgyad cur bskang dgos so/ /skrod pa dang ni yang yang dang / bzang po'i gnas dang sman byed gnas gnyis dang / /gdeng med lo ma tshang dang ras chen dang / /dgu bcu pa las bco brgyad 'di bkol te/ /zhes bya ba ni dge slong gi ltung ba dgu bcu las bcu phung gnyis pa dge slong ma'i tshogs kyi steng du brgyad po 'di bsnan te/ spyir bco brgyad bkol bar bya'o zhes bstan pa ste/gdeng med bkol du mi rung ba'i gtan tshigs ni sngar bshad pa bzhin no/ /ci'i phyir 'di rnams bkol zhe na/ de'i phyir bud med kyi dang thun mong ma yin no zhes bya ba yin te/ bco brgyad po de dag dge slong ma dang thun mong ma yin pa'i phyir ro zhes bstan pa'o/ / lhag ma 'di dag bya ba bya'o zhes bya ba ni bco brgyad po de dag las gzhan pa rnams ni dge slong ma'i bslab par gtogs par bstan pa'o/ /'phags ma dag bdag gis ltung ba brgya brgyad cu dag bshad zin to zhes bya ba ni mjug bsdu zhing nyan pa'i 'khor rnams spro ba skyed pa'o/ /de la bdag gis 'phags ma dag la ci 'di na yongs su dag par gnas sam zhes dri'o//ci 'di ni yongs su dag par gnas sam zhes lan gnyis lan gsum du dri'o/ /'di na 'phags ma dag yongs su dag na gang gi phyir cang mi smra bar de bzhin du 'dzin to zhes bya ba ni yongs su dag pa dri ba ste go sla bsam bshad do//ltung ba'i dngos po rnams bstan pa la rnam pa lngar phye ba'i gsum ste/ ltung ba'i sde'i bshad pa rnams rdzogs so// //ltung ba'i dngos po bstan pa la rnam pa lngar phye ba'i bzhi pa ste/ so sor bshags pa'i sde zhes bya ba 'dir ston te/ de'i phyir mdor bstan pa ni/'o ma zho dang mar sar dang / /mar dang 'bru mar bu ram dang / /sbrang rtsi dang ni sha dang nya/ /sha skam slob pa des byas pa'o/ /zhes gsungs te/ de la 'o ma zhos bya ba'i gleng gzhi ni ston pa mnyan du yod pa na bzhugs so/ /de'i tshe bcu gnyis sde mo dag bud med kyi yeb rngam gyis/gzhan gyi khyim nas 'o ma blangs te yongs su spyod do/ /de la 'o ma slong ba'i phyir lung 'bogs pa dang klog pa dang kha ton dang rnal 'byor dang yid la byed pa dang rang gi sems kyi zhig nas gtong bar gyur nas/ don nyung ngu ma'i dge slong ma dag 'phya bar gyur pa'i bar du ste/de lta bu'i rnam pa dag bcom ldan 'das la gsol to/ /bcom ldan 'das kyis bka' stsal pa/ bslang bar mi bya'o/ /phyis nyo bar byed de/ de nyid nyes par gyur te/ bcom ldan 'das kyis bka' stsal pa/ nyo bar mi bya'o gnyen rnams la slong bar byed pa dang //de nyid nyes pa'i dmigs su gyur nas bka' stsal pa/ blang bar mi bya'o zhes pa nas dge slong ma nad pa gzhan zhig sman pas 'o ma 'thungs shig ces bsgo ba dang / des smras pa/ bzhin bzangs bdag shi'o/ /sman pas smras pa ci'i phyir/ /des smras pa/ bcom ldan 'das kyis ma gnang ngo //sman pas smras pa/ khyod kyi ston pa ni thugs rje can te gnang bar 'gyur ro/ /de lta bu'i rnam pa dge slong ma gang gis bcom ldan 'das la gsol to/ /bcom ldan 'das kyis bka' stsal pa/ na bar gyur na sman pa'i lung gis sman ni yongs su spyad par bya'o zhes bya ba'i bar du'o//de nas sbom dga' mo na'ang rung mi na'ang rung gzhan gyi khyim nas 'o ma blangs te yongs su spyad do/ /de lta bu'i rnam pa bcom ldan 'das la gsol ba nas/ bcom ldan 'das kyis byung ba 'di nas bslab pa bcas pa'i bar du ste/ yang dge slong ma gang min par bdag gi phyir gzhan gyi khyim nas 'o ma blangs te 'thungs na dge slong ma de dge slong ma'i dbyar mo khang du song ste//dge slong ma rnams la 'phags ma dag bdag smad pa'i gnas su gyur nas mi rigs pa so sor bshags pa'i chos de so sor bshags par bya'o zhes so sor bshags par bya ste chos 'di so sor bshags par bya'o//yang dge slong ma zhes bya ba ni sbom dga' mo'o/ /bdag gi phyir zhes bya ba ni lus kyi phyir ro/ /mi na ba ni nad med pa'o/ /khyim ni bram ze dang / khyim bdag gi gnas so/ /'o ma ni 'o ma lnga ste/ ba'i 'o ma dang / ma he'i 'o ma dang / rnga mo dang / ra dang / lug gi 'o ma dang lnga'o/ /bslangs pa ni gsol ba btab pa'o/ /'thungs zhes bya ba ni mid par mid pa'o/ /dge slong ma de zhes pa ni gang dge slong mar gyur pa'o/ /dbyar mo khang du song zhes pa ni gtsug lag khang du'o/ /dge slong ma rnams la zhes pa ni chos 'di la so sor bshags par bya ba'o//bdag smad pa'i gnas su gyur ces bya ba ni 'di dge slong mas bya ba ma yin pas so/ /mi rigs pa ni dge slong mas byas par mi rigs pa'o/ /so sor bshags par bya ba'i chos de so sor bshags par bya'o zhes so sor bshags par bya ste zhes pa ni kun las bshags pa'i phyir ro//chos 'di so sor bshags par bya'o zhes pa ni nges par bshags par bya ba'i phyir ro/ /de la nyes pa ji lta bur 'gyur zhe na/ dge slong mas ji tsam du 'o ma blangs pas thams cad du nyes byas su 'gyur ro/ /thob na nyes byas so/ /yongs su spyad na nyes pa so sor bshags par 'gyur ro//las dang po pa dang smyos pa dang sems 'khrugs pa dang tshor bas nyen pa rnams la nyes med do// //gleng gzhi ni ston pa mnyan du yod pa na ste/ nam bcom ldan 'das kyis dge slong ma rnams la 'o ma ma gnang ba de na phyis zho slong bar byed pa nas bslab pa bcas pa'i bar du ste/zho slong du mi gnang ba yang sngar smos pa bzhin no/ /de la 'o ma lnga ni 'dir zho lngar rgyas par bya'o/ /gleng gzhi ni mnyan du yod pa na ste/ de bzhin du mar sar slong ba las bslab pa bcas pa'i bar du ste/ mar sar lnga yang gong du smos pa'i 'o/ /gleng gzhi ni mnyan du yod pa na ste/ mar slong bar gyur pa las bslab pa bcas te/ mar rnam pa lnga yang gong du smos pa'i'o/ /gleng gzhi ni mnyan du yod pa na ste/ 'bru mar slong ba las bcas te/ 'bru mar ni 'bru'i mar ro/ /gleng gzhi ni mnyan du yod pa na ste/ bu ram slong bar gyur pa las bcas te/ bu ram ni bu ram nyid do/gleng gzhi ni mnyan du yod pa na ste/ phyis sbrang rtsi slong bar gyur pa las bcas te/ sbrang rtsi ni mngar ba'o/ /gleng gzhi ni mnyan du yod pa na ste/ phyis nya sha slong bar gyur pa las bcas te/ nya sha ni chu la spyod pa rnams kyi'o/ /gleng gzhi ni mnyan du yod pa na ste/ de nas phyis sha gzhan slong bar gyur pa las bslab pa bcas te/sha ni phyugs la sogs pa'i sha'o/ /gleng gzhi ni mnyan du yod pa na ste/ phyis sha skam slong bar gyur pa las bcas te/ sha skam ni sha skam po'o/ /btung ba'i rim pa dang gzhan ni 'o ma'i skabs su smos pa dang mthun no/ / yul yangs pa can na nam gyi tshe ded dpon seng ge bden pa mthong nas/ bcom ldan 'das kyis bka' stsal te/ dge 'dun gyis kyang sdom pa bcas pa'i bar du'o/ /de nas bcu gnyis sde mo de dag khyim der 'gro zhing bsod snyoms len par byed do/ /de nas dge slong ma dag gis che zhe dag bcom ldan 'das kyis khyim 'dir bslab pa'i sdom pa ma bcas sam smras pa dang /de dag gis 'di skad ces smras so/ /dge slong rnams la bcas kyi dge slong ma la ni ma yin no/ /de nas don nyung ngu ma'i dge slong ma dag 'phya bar gyur nas de lta bur gyur pa bcom ldan 'das la gsol to//bcom ldan 'das kyis byung ba de las bslab pa bcas pa'i bar du ste/ gang dge 'dun gyi slob pa'i khyim 'di 'dra bar bslab pa'i sdom pa byin pa shes pa rnams su sngar ma bos par song ste/ rang gi lag gis bca' ba dang bza' ba bslangs nas 'chos sam zos na dge slong ma de dag dge slong ma'i dbyar mo khang du song ste/dge slong ma rnams la 'phags ma dag bdag smad pa'i gnas su gyur pa mi rigs par so sor bshags par bya ba'i chos te/ so sor bshags par bya'o zhes so sor bshags par bya ste chos 'di yang so sor bshags par bya'o/ / gang zhes bya ba ni bcu gnyis sde'o/ /dge 'dun gyi zhes bya ba ni de bzhin gshegs pa'i nyan thos kyi dge 'dun gyi'o/ /slob pa'i khyim zhes bya ba ni bden pa mthong ba'o/ /bslab pa'i sdom pa byin pa shes pa ni gsol ba dang gnyis so/ /sngar ma bos pa ni sbyin bdag gis ma bos pa'o/ song ste zhes bya ba ni slob ma'i khyim du'o/ /rang gi lag gis zhes bya ba ni bdag nyid kyi lag gis so/ /bca' ba dang bza' ba ni bca' ba lnga dang bza' ba lnga'o/ /'chos sam zos pa ni mid par mid pa'o/ /dge slong ma de zhes bya ba ni gang dge slong mar gyur pa'o/ /dbyar mo khang du zhes pa ni gtsug lag khang du'o//dge slong ma rnams la zhes bya ba ni chos 'di la zhugs pa'o/ /'phags ma dag bdag smad pa'i gnas su gyur pa zhes bya ba ni dge slong mas bya ba ma yin pa'i phyir ro/ /mi rigs pa zhes bya ba ni dge slong ma la rigs par mi 'gyur ba'i phyir te rang bzhin ltar mi 'jug pa'o//gzhan ni gong du bshad pa bzhin no/ /de la nyes pa ji lta bu zhe na/ ci tsam du dge slong mas slob pa'i khyim du bslab pa'i sdom pa byin par shes bzhin du sngar ma bos par bdag nyid song ste bca' ba dang bza' ba 'chos sam zos na thams cad so sor bshags par 'gyur ro//gal te sngar bos sam bslab pa'i sdom pa bshig par gyur pa dang / las dang po pa dang / smyos pa dang / sems 'khrugs pa dang / nad kyis gzir ba la nyes pa med do/ /'phags ma dag bdag gis so sor bshags par bya ba'i chos bcu gcig po dag bshad zin to zhes bya ba la sogs pa go sla bsam bshad do//ltung ba'i dngos po bstan pa la rnam pa lngar phye ba'i bzhi pa ste so sor bshags par bya ba'i sde'i bshad pa rnams rdzogs so// //ltung ba'i dngos po rnams bstan pa la rnam pa lngar bye ba'i tha ma ste/ nyes byas kyi sde bslab pa'i chos mang po rnams 'dir ston te/de'i phyir/ mdor bstan pa ni/ chos gos bsdams pa g.yogs pa dang / /mchong ba dang ni lus bsgyur dang / /'dug par bya dang rkang pa dag /mang po yang dag bsdus pa yin/ /zhes bya ba gsungs so/ /sangs rgyas bcom ldan 'das yul na ti ka'i 'ol ma se'i gnas na bzhugs te/de na skye dgu'i bdag mo chen mo gau ta mi dang shAkya mo lnga brgya tsam skra bregs nas gos ngur smrig gyon te yul na ti ka gang na ba der rgyu zhing song ngo / /rim gyis spyod pa spyod cing yul na ti ka'i 'ol ma ser phyin to/ /nam gyi tshe bcom ldan 'das kyis skye dgu'i bdag mo gau ta mi la brten nas chos dang 'dul ba 'di la dge slong ma rnams rab tu byung bsnyen par rdzogs par gnang ba de na/de dag bdag cag gis gos ji ltar bgo ba mi shes nas de lta bar gyur pa dge slong rnams la smras so/ /dge slong rnams kyis bcom ldan 'das la gsol nas/ bcom ldan 'das kyis bka' stsal pa/ sham thabs ha cang rtsengs pa ma yin pa dang / ha cang 'jol ba yang ma yin pa dang / zlum por bgo bar bslab par bya'o/ /nam gyi tshe bcom ldan 'das kyis sham thabs 'di lta bur bgo bar bya'o zhes bka' stsal pa/ de na skye dgu'i bdag mo la sogs pa dge slong ma rang bzhin du gnas pa rnams ni de bzhin du gyon no//de nas dus gzhan zhig na dge slong ma bcu gnyis sde mo dag sham thabs ha cang rtsengs par gyon pa dang / de la dge slong ma dag gis ci'i phyir khyed cag ha cang rtsengs par gyon zhes smras pa dang / de dag gis smras pa/ khyim na gnas pa nas bdag cag 'di ltar goms so/ /de nas bcom ldan 'das kyis bka' stsal pa/ sham thabs ha cang rtsengs par yang bgo bar mi bya'o/ /de bzhin du ha cang 'jol bar yang bgo bar mi bya'o zhes bslab pa bcas pa dang / de dag dbye mgo las dma' bar sham thabs gyon pa dang /dge slong ma dag gis ci'i phyir khyed dpyi mgo las dma' bar sham thabs gyon zhes smras pa dang / de dag 'di skad du khyim mi mo rnams 'di ltar gyon no/ /dge slong ma de dag gis ci khyed khyim mi mo'am zhes smras so/ /de lta bur gyur pa dge slong ma rnams kyis bcom ldan 'das la gsol nas bka' stsal pa/ha cang rtsengs pa yang ma yin/ ha cang 'jol ba yang ma yin pa dang / dpyi mgo las sham thabs dma' bar mi bgo ba dang / zlum por bgo bar bslab par bya'o/ /gleng gzhi ni mnyan du yod pa na ste/ de nas bcu gnyis sde mo dag sham thabs glang po che'i sna ltar bgos pa dang /dge slong ma dag gis ci'i phyir che zhe khyed sham thabs glang po che'i sna ltar gyon zhes pa dang / de dag 'di skad du nor can dang tshong dpon dang ded dpon rnams 'di ltar gyon no zhes smras pa nas bcom ldan 'das kyis bka' stsal pa'i bar du ste/glang po che'i sna ltar ma yin pa dang / ta la'i lo ma ltar ma yin pa dang / nas can gyi phur ma ltar ma yin pa dang / sbrul mgo'i gdengs ka ltar ma yin par sham thabs bgo bar bslab par bya'o/ /chos gos kyang sham thabs kyi gleng gzhi dang mthun par sbyar ro//gleng gzhi ni mnyan du yod pa na ste/ de nas bcu gnyis sde mo dag dpung pa sgren mor phyung ste khyim gyi nang du 'gro ba dang / de la dge slong ma dag gis smras pa/ che zhe khyod ci'i phyir dpung pa sgren mor phyung ste 'gro/ /de dag la 'di skad ces smras so/ /'phyon ma 'di dag gis mthong na snying dga' ba'i phyir ro zhes pa nas/bcom ldan 'das kyis bka' stsal pa/ shin tu bsdams te khyim du 'gro bar bslab par bya'o zhes pa'i bar du'o/ /khyim gyi nang du yang sgra mthon po dang sgra chen por byed cing 'gro ba dang / bcom ldan 'das kyis bka' stsal pa/sgra bskyungs te 'gro bar bya'o/ /de nas phyis phan tshun lta zhing 'gro ba dang / bcom ldan 'das kyis bka' stsal pa/ mig phab ste 'gro bar bya'o/ /de nas mdun gyis mi mthong bar 'gro bar byed pa nas/ bcom ldan 'das kyis bka' stsal pa/ shin tu bsdams te khyim pa'i khyim du 'gro bar bslab par bya'o//legs par bgos pa dang / sgra bskyungs pa dang / mig gzum par mi bya ba dang / gnya' shing gang tsam du lta zhing khyim pa'i khyim du 'gro bar bslab par bya'o zhes bya'i bar du'o/ /de nas bcu gnyis sde mo dag khyim gyi nang du mgo g.yogs te 'gro ba dang de la khyed ci'i phyir 'di ltar 'gro zhes dris pa dang /de dag gis 'di skad ces smras so/ /nged sngon gyi bag sar du gyur pa na 'di 'dra ba'i phyir ro/ /de dag gis smras pa ci khyed da ltar yang khyim gyi bag sar mo'am/ de dag gis smras pa/ khyed gang mi shes pa de bsal bar 'gyur zhing khyed kyang bslab pa la slob pa 'gyur ro zhes pa nas bcom ldan 'das kyis bka' stsal pa/mgo mi g.yogs par khyim gyi nang du 'gro bar bya'o zhes bya ba'i bar du'o/ /de nas bcu gnyis sde mo rnams lag pa gnyis kyis gong lugs brdzes te 'gro ba dang /de dag gis ci'i phyir khyed 'di ltar 'gro zhes dris pa dang / de dag gis 'di skad ces smras so/ /bag sar mo dag 'di ltar 'gro'o/ /de dag gis smras pa ci khyed bag sar mo'am/ bcu gnyis sde mo dag gis 'di skad ces smras so/ /gang mi shes pa de spangs par 'gyur zhing khyed kyang bslab pa la slob par 'gyur bar bya ba'i phyir ro zhes pa nas/bcom ldan 'das kyis bka' stsal pa/ brdzes te khyim gyi nang du 'gro bar mi bya'o zhes pa'i bar du'o/ /de nas bcu gnyis sde mo dag chos gos phrag pa la gzar te 'gro ba nas/ phyugs rdzi la sogs pa 'di ltar 'gro'o zhes pa'i bar du ste/ bcom ldan 'das kyis bka' stsal pa nas gzar bar bya'o zhes pa'i bar du'o//de nas bcu gnyis sde mo dag chos gos gnya' gong du bsnol te khyim du 'gro ba nas/ byis pa dag byis pa'i slob pa na slob pa'i tshe 'di ltar byed ces pa'i bar te/ bcom ldan 'das kyis bka' stsal pa/gnya' gong du mi bsnol bar bya'o zhes pa'i bar du'o/ /de nas bcu gnyis sde mo dag phrag pa gnyi ga la gzar te khyim du 'gro ba nas/ zham 'bring ba dag 'di ltar 'gro'o zhes smras pa'i bar du nas/ bcom ldan 'das kyis bka' stsal pa/ mgo mi g.yogs pa dang / mi brdze ba dang / mi gzar ba dang / gnya' gong du mi bsnol ba dang / phrag pa la gzar ba dang / phrag pa gnyi ga la mi gzar bar khyim pa'i khyim du 'gro bar bslab par bya'o zhes pa'i bar du'o/ /de nas bcu gnyis sde mo dag khyim gyi nang du rkang pa'i brang bas 'gro ba nas nal gyi bu dag 'di ltar 'gro zhes pa'i bar du ste/bcom ldan 'das kyis bka' stsal pa/ brang bas 'gro bar mi bya'o zhes pa'i bar du'o/ /de nas bcu gnyis sde mo dag khyim gyi nang du 'jal thabs su 'gro ba nas shing rkang can dag 'di ltar 'gro'o zhes pa'i bar du ste/ bcom ldan 'das kyis bka' stsal pa/'jal thabs su 'gro bar mi bya'o zhes pa'i bar du'o/ /de nas bcu gnyis sde mo dag khyim gyi nang du tsog pus 'gro ba nas/ thun bu thub dag 'di ltar 'gro'o zhes pa'i bar du ste/ bcom ldan 'das kyis bka' stsal pa/ 'gro bar mi bya'o zhes pa'i bar du'o/ /de nas bcu gnyis sde mo dag khyim gyi nang du sgu ste 'gro ba nas khyim phug pa dag 'di ltar 'gro'o zhes pa'i bar du ste/bcom ldan 'das kyis bka' stsal pa/ 'gro bar mi bya'o zhes pa'i bar du'o/ /de nas bcu gnyis sde mo dag khyim gyi nang du dkur brtan te 'gro ba nas nor can dang tshong dpon dag ni 'di ltar 'gro'o zhes pa'i bar du ste/bcom ldan 'das kyis bka' stsal pa/ brang bas ma yin pa dang / 'jal thabs su ma yin pa dang tsog pus ma yin pa dang / sgu ste ma yin pa dang / dkur mi brtan par khyim pa'i khyim du 'gro bar bslab par bya'o zhes pa'i bar du'o/ /de nas bcu gnyis sde mo dag lus bsgyur zhing 'gro bar byed pa nas/ba glang mo dag 'di ltar 'gro'o zhes pa'i bar du ste/ bcom ldan 'das kyis bka' stsal pa dang / lus mi bsgyur bar khyim gyi nang du 'gro bar bya'o zhes pa'i bar du'o/ /de nas bcu gnyis sde mo dag lag pa kyog cing khyim gyi nang du 'gro ba nas/nor can dang tshong dpon dag 'di ltar 'gro'o zhes pa'i bar du ste/ bcom ldan 'das kyis bka' stsal pa/ 'gro bar mi bya'o zhes pa'i bar du'o/ /de nas bcu gnyis sde mo dag mgo bsgyur zhing khyim gyi nang du 'gro ba nas/ srog chags rtsangs pa dag ni 'di ltar byed do zhes pa'i bar du ste//bcom ldan 'das kyis bka' stsal pa/ 'gro bar mi bya'o zhes pa'i bar du'o/ /de nas bcu gnyis sde mo dag phrag pa sprad cing khyim du 'gro ba nas/ ne'u ldangs dag 'di ltar 'gro'o zhes pa'i bar du ste/ bcom ldan 'das kyis bka' stsal pa/ 'gro bar mi bya'o zhes pa'i bar du'o//de nas bcu gnyis sde mo dag lag pa sbrel te khyim du 'gro ba nas/ nal gyi bu dag 'di ltar 'gro'o zhes pa'i bar du ste/ bcom ldan 'das kyis bka' stsal pa/ /lus mi bsgyur ba dang / lag pa mi kyog pa dang / mgo mi bsgyur ba dang / phrag pa mi sprad pa dang / lag pa mi sprel bar khyim pa'i khyim du 'gro bar bslab par bya'o zhes pa'i bar du'o/ /de nas bcu gnyis sde mo dag bram ze dang khyim bdag gi khyim du ma bsgo bar stan la 'dug par byed pa dang / de dag 'phya bar gyur pa nas/ bcom ldan 'das kyis bka' stsal pa/'dug par mi bya'o zhes pa'i bar du'o/ /bcom ldan 'das kyis u da yi la brten te ma brtags par stan la 'dug par mi bya'o zhes bslab pa'i tshig bcas pa'i tshe/ de nas bcu gnyis sde mo dag khyim gyi nang du stan la ma brtags par 'dug pa nas/ bcom ldan 'das kyis bka' stsal pa/'dug par mi bya'o zhes pa'i bar du'o/ /nam bcom ldan 'das kyis ser skya'i gnas su u da yi nyid la brten te lus thams cad kyi ljid kyis phab ste 'dug par mi bya ba'i bslab pa'i tshig bcas pa'i tshe bcu gnyis sde mo dag khyim pa'i khyim du lus thams cad kyi ljid kyis phab ste 'dug pa las bcom ldan 'das kyis bka' stsal pa/'dug par mi bya'o zhes pa'i bar du'o/ /de nas bcu gnyis sde mo dag rkang pas rkang pa dag mnan te khyim pa'i khyim du 'dug pa nas/ nal gyi bu dag 'di ltar 'dug go zhes pa'i bar du ste/ bcom ldan 'das kyis bka' stsal pa/ 'dug par mi bya'o zhes pa'i bar du'o/ /de nas bcu gnyis sde mo dag brla gong du brlas mnan te/ khyim gyi nang du 'dug par byed pa nas nor can tshong dpon 'di ltar 'dug go zhes pa'i bar du ste/ bcom ldan 'das kyis bka' stsal pa/ 'dug par mi bya'o zhes pa'i bar du'o//de nas bcu gnyis sde mo dag long bus long bu mnan te 'dug pa nas mya ngan can 'di ltar 'dug go zhes pa'i bar du ste/ bcom ldan 'das kyis bka' stsal pa/ /'dug par mi bya'o zhes pa'i bar du'o/ /de nas bcu gnyis sde mo dag rkang pa bkug ste khyim gyi nang du 'dug pa dang /bram ze dang khyim bdag gi chung ma dag 'ongs te rkang pa la phyag byas pa dang / de rkang pa bkug pas de dag mgo sa la thug par gyur pa nas 'phya ba'i bar du ste/ bcom ldan 'das kyis bka' stsal pa/ rkang pa bkug te 'dug par mi bya'o zhes pa'i bar du'o//de nas bcu gnyis sde mo dag khyim pa'i khyim du rkang pa gdangs te 'dug pa dang / bram ze dang khyim bdag gi chung ma dag lhags te/ rkang pa la phyag byas nas bcu gnyis sde mo de dag a rog gya phyed las mi ster to/ /de dag gis 'di skad ces smras so/ /ci'i phyir a rog gya rdzogs par mi zer/bcu gnyis sde mos smras pa khyed ci'i phyir rkang pa gcig la phyag 'tshal/ de dag rkang pa gnyis po la phyag 'tshal zhing 'phya bar gyur pa nas/ bcom ldan 'das kyis bka' stsal pa/ rkang pa gdangs te 'dug par mi bya'o zhes pa'i bar du'o/ /de nas bcu gnyis sde mo dag khyim pa'i khyim du mdoms snang bar stan la 'dug pa nas bram ze dang khyim bdag gi chung ma dag phyag byed pa'i tshe 'phya bar gyur pa'i bar du'o//bcom ldan 'das kyis bka' stsal pa/ ma bsgo bar khyim pa'i khyim du stan la mi 'dug pa dang / stan lam brtags par dang /lus thams cad kyi ljid kyis mi dbab pa dang / rkang pa mi bsnol ba dang / brla mi bsnol ba dang / long bu'i steng du long bu mi gzhag pa dang / rkang pa mi dgug pa dang / rkang pa mi gdangs pa dang / mdoms mi snang bar khyim pa'i khyim du stan la 'dug par bya'o zhes pa'i bar du'o//mdor bstan pa ni/ legs par byas dang ma 'ongs dang / /tsug tsug 'bru byed khur ba sbed/ /lag pa dang ni 'phyas 'dogs dang / /ma bting ba dang 'greng ste min/ /sangs rgyas bcom ldan 'das yul brga na sbal kar ri'i nags tshal 'jigs 'jigs ltan bzhugs te/de'i tshe na rgyal bu rtogs ldan gyis sbal kar ri'i khang bzangs sar pa ko ka na da lta bu byas te/ der sangs rgyas bcom ldan 'das dge slong dang dge slong ma thabs cig tu spyan drangs te de nas rgyal bu rtogs ldan gyi khyim tshes ma dad pa sha dag ste/ de dag gis 'bras chan gyi gong bus dge slong ma rnams lhung bzed lag nas shor ba'i tshul byed do//de nas gnas de na bcu gnyis sde mo dag 'khod do/ /de dag phan tshun du 'di skad ces smras so/ /ci dga' mo dang bsnyen dga' mo dag bu gsod ma'i bu 'di dag bdag cag gis bskyang bar bya'o/ / gang gi tshe kha zas 'drim pa de'i tshe lhung bzed bzed pa ltar bya ste/ kha zas kyis 'bras chan gyi gong bu de yang sa la ltung ngo / /don nyung ngu ma'i dge slong ma dag 'phya bar gyur pa nas bcom ldan 'das kyis bka' stsal pa/ legs par zas blang bar bya'o zhes pa'i bar du'o/ /de bzhin du gzhan zhig gi khyim du spyan drangs pa nas/'bras chan dang tshod ma lhung bzed nas sa la bo ba'i phyir zhes pa'i bar du'o/ /mu dang kha da chad du ma yin par zas blang bar bya'o zhes pa'i bar du'o/ /mnyan du yod pa na khyim bdag gzhan zhig gis zhes pa nas/ khyim gyi nang du spyan drangs te bcu gnyis sde mo dag la 'bras chan dang tshod ma mnyam par brims pa las phyis kyang slong bar byed pa'i bar du ste/bcom ldan 'das kyis bka' stsal pa/ zas tshod ma dang ran par bza' bar bya'o zhes pa'i bar du'o/ /de nas bcu gnyis sde mo dag khyim bdag gzhan zhig gi khyim du zas za ba'i tshe/tshod ma dag 'drim pa mi len te phyis ring du song ba dang pos nas blangs pas tshod ma 'khrul par gyur te/ mi dga' bar gyur pa'i bar du ste/ bcom ldan 'das kyis bka' stsal pa/ zas mthar chags su bslang bar bya'o zhes pa'i bar du'o/ / de nas bcu gnyis sde mo dag bca' ba dang bza' ba ma 'ongs par lhung bzed bzed par byed nas ma dad pa 'phya ba'i bar du ste/ bcom ldan 'das kyis bka' stsal pa/ bca' ba dang bza' ba ma 'ongs par lhung bzed bzed par mi bya'o zhes pa'i bar du ste/ /de nas bcu gnyis sde mo dag bza' ba dang bca' ba'i steng du lhung bzed gzhag par byed pa nas/dad pa'i khyim bdag dag gtsang sbrar mi rung ngo zhes 'phya ba'i bar du ste/ bcom ldan 'das kyis bka' stsal pa/ bca' ba dang bza' ba'i steng du lhung bzed mi zed par bya'o zhes pa'i bar du'o/ mnyan du yod pa na khyim bdag gzhan zhig gis khyim gyi nang du spyan drangs pa las de na 'bras chan ni mang tshod ma ni nyung ngu gyur nas 'bras chan gyis tshod ma bkab ste phyis yang slong bar byed pa nas/bcom ldan 'das kyis bka' stsal pa/ 'bras chan gyis tshod ma mi dgab par bya'o zhes pa'i bar du'o//de bzhin du gzhan zhig tu tshod ma ni mang 'bras chan ni nyungs par gyur pa dang / yang 'dod pa'i phyir tshod mas 'bras chan dgab pa nas/ bcom ldan 'das kyis bka' stsal pa/ tshod mas 'bras chan mi dgab par bslab par bya'o zhes pa'i bar du'o/ /mnyan du yod pa na ste/de nas bcu gnyis sde mo dag sle ma 'phyo zhing zan za nas dad pa'i khyim bdag gis 'di bzhin du ni gzugs gyis 'tsho ba dag za ste mi rigs so zhes 'phya ba'i bar du ste/ bcom ldan 'das kyis bka' stsal pa/ legs par zas bza' bar bslab par bya'o zhes pa'i bar du'o//de nas bcu gnyis sde mo dag 'bras chan gcig gam gnyis nas 'brum bus khar 'jug pa nas/ yi ga 'chus pa dag zas za na 'di ltar byed do zhes smras pa'i bar du ste/ bcom ldan 'das kyis bka' stsal pa/ kham ha cang chung ba ma yin no zhes pa'i bar du'o//de nas bcu gnyis sde mo dag kham lhag par bskyed de khar bcug pa nas/ zhing pa dag 'di ltar za'o zhes pa'i bar du ste/ bcom ldan 'das kyis bka' stsal pa/ kham ha cang chen po yang ma yin pa dang / kham ran par bza' bar bslab par bya'o zhes pa'i bar du'o//de nas bcu gnyis sde mo dag grong du zas za ba'i tshe/ dge slong ma rab tu byung ma rgan mo zhig kha gdangs shing 'dug par gyur pa dang / de nas spom dga' mos de'i khar bong pa bcug pa nas/ bcom ldan 'das kyis bka' stsal pa/ kham ma gzas par kha mi gdangs par bslab par bya'o zhes pa'i bar du'o//de nas bcu gnyis sde mo dag za zhing smra bar byed de/ de nas dge slong ma dag gis smras pa/ che zhe khyed ci'i phyir de ltar byed/ de dag gis smras pa ming brjed par mi 'gyur bar bya ba'i bar du ste/ bcom ldan 'das kyis bka' stsal pa/ kham gyis bkang ste mi smra bar bslab par bya'o zhes pa'i bar du'o//de nas bcu gnyis sde mo dag tsug tsug byed cing zas za ba dang / de nas dge slong ma dag gis khyed ci'i phyir de ltar byed ces smras pa dang / de dag gis smad 'tshong ma dag 'di ltar za'o zhes bya ba'i bar du ste/ bcom ldan 'das kyis bka' stsal pa/tsug tsug mi bya bar zas bza' bar bslab par bya'o zhes pa'i bar du'o/ /mnyan du yod pa na ste/ khyim bdag gzhan zhig gis spyan drangs pa las khyim bdag de snod nyung bas 'bras chan sgrom du blugs pa dang dbyar gyi dus su drod che bar gyur to/ /bcu gnyis sde mo dag gis de bsting ba'i phyir 'bras chan 'di grang gi dbugs kyis bsro'o zhes pa nas/khyim bdag des thos nas skyengs shing mi dga' bar gyur pa'i bar du ste/ bcom ldan 'das kyis bka' stsal pa/ hu hu mi bya bar bslab par bya'o zhes pa'i bar du'o/ /de bzhin du khyim bdag gzhan zhig gis spyan drangs pa las khyim bdag de dbul po zhig ste/des dgun gyi dus su kha zas grang mo brims pa dang / de dag gis bsting ba'i phyir phu phu zhes bya ste za'o/ /de nas khyim bdag de mgo smad nas 'di skad ces smras so/ /'phags ma dag bdag gis 'tshal mod kyi/bdag dbul bas ji ltar bgyi zhes pa nas bcom ldan 'das kyis bka' stsal pa/ phu phu mi bya bar zas bza' bar bya bar bslab par bya'o zhes pa'i bar du'o/ /de nas bcu gnyis sde mo dag gzhan zhig gis spyan drangs pa dang / des de dag la kha zas ngan pa zhig byin pa dang /de dag de la kha zas kyi bsngags pa brjod do/ /gzhan zhig gis de dag la kha zas bzang po zhig byin pa dang / de la 'phyas 'dogs par byed pa nas/ bcom ldan 'das kyis bka' stsal pa/ bsngags pa dang 'phyas mi gdags par zas bza' bar bslab pa'o zhes pa'i bar du'o//de nas bcu gnyis sde mo dag maN+Dal gyi steng du kha zas gtor te 'brum bu re re nas btus te khar bcug pa dang / dge slong ma dag gis ci'i phyir 'di ltar byed ces dris pa dang / de dag gis smras pa khyim bya dag 'di ltar gtor ba la thu'o zhes pa nas/bcom ldan 'das kyis bka' stsal pa/ 'bru nas tha dad du mi bya'o zhes pa'i bar du'o/ /de nas bcu gnyis sde mo dag kham phyed tsam bldad de lce'i rtse mor bzhag nas gcig la gcig ston te yang bldad dam zhes nas/ bcom ldan 'das kyis bka' stsal pa/ lce phyung ste zas bza' bar mi bya'o zhes pa'i bar du'o/ /bcu gnyis sde mo dag rkan gtog cing zan za bas/ bcom ldan 'das kyis bka' stsal pa/ rkan gtogs te zan mi bza' bar bslab par bya'o zhes pa'i bar du'o/ /de nas bcu gnyis sde mo dag zan kham gyis gcod cing za ste/de dag kham gcig ni khar bcug /gnyis pa ni lag pa na/ gsum pa ni lhung bzed na 'dug pa nas/ bcom ldan 'das kyis bka' stsal pa dang / kham 'phror mi gcad par bslab par bya'o zhes pa'i bar du'o/ /de nas bcu gnyis sde mo dag zas za ba'i tshe mkhur ba nas mkhur bar spyod pa nas/nad pa 'di dag 'di ltar za'o zhes pa'i bar du ste/ bcom ldan 'das kyis bka' stsal pa/ mkhur bar mi spo bar zas bza' bar bslab par bya'o zhes pa'i bar du'o/ /de nas bcu gnyis sde mo dag ljongs rgyu zhing spyod pa las chu 'gram zhig gi drung du phyin te/de dag gis gnas der chos gos dag sprugs rkang lag bkrus te zas kyi bya ba byed pa la zhugs so/ /de nas chu 'gram gyi pha rol du gcer bu ma dag cig kyang phyin te/ zas kyi bya ba byed pa la zhugs pa'i bar du ste/ de nas bcu gnyis sde mo dag rtse bar bya ba'i bsam pas 'od srungs rdzogs byed kyi ming nas phyung ste/zan gyi mchod rten byas nas la phug gi srog shing btsugs te gcer bu ma de dag la khyed kyi ston pa'i mchod rten 'di yin no zhes smras so/ /de nas mchod rten de la bcad cing za ste/ tshig gcig tu 'di skad ces rdzogs byed kyi mchod rten gzhig go//de nas gcer bu ma de dag yid mi dga' ba skyes te/ bdag cag gi ston pa dus las 'das so zhes pa nas/ bcom ldan 'das kyis bka' stsal pa/ mchod rten 'dra bar sbrus te mi bza' bar bslab par zas bza' bar bya'o zhes pa'i bar du'o/ / de nas bcu gnyis sde mo dag kha zas yod bzhin du lag pa ldag par byed pa nas/ bcom ldan 'das kyis bka' stsal pa/ lag pa mi ldag par zas bza' bar bslab par bya'o zhes pa'i bar du'o/ /de bzhin du lhung bzed byog par byed pa dang / bcom ldan 'das kyis bka' stsal pa/lhung bzed byog par mi bya'o zhes pa'i bar du'o/ /de nas sbom dga' mos kham khar bcug te lag pa sprugs pa nas/ bcom ldan 'das kyis bka' stsal pa/ lag pa sprug par mi bya'o zhes pa'i bar du'o/ /de nas bcu gnyis sde mo bdag khyim gzhan zhig tu spyan drangs pa dang /de nas sbom dga' mos phye zhig thob nas lhung bzed bsigs te nga'i lhung bzed kyis bslangs pa'i tshad 'di yin gyi da rung byin cig ces smras pa dang / bcom ldan 'das kyis bka' stsal pa/ lhung bzed mi bskyom par zas bza' bar bslab par bya'o zhes pa'i bar du'o/ /de nas khyim bdag gzhan zhig gis khyim du dge slong ma'i dge 'dun spyan drangs te/de nas bza' ba dang bca' ba mang du sbyar te brims so/ /de nas bcu gnyis sde mo dag gi nang na dge slong ma rgan zhugs zhig kyang 'dug par gyur ro/ /khyim bdag des kyang thog mar dge slong ma'i dge 'dun la mar dang phye brims te/de nas bcu gnyis sde mo dag gis phye mang du bslangs so/ /de nas khyim bdag des kyang rgan rims su kha zas sna nyi shu rtsa brgyad brims so/ /de nas rgan zhugs de rgan rims rnams la lta bar byed pa dang / bcu gnyis sde mo dag gis rgan zhugs de'i mdun du zan gong spungs te bzhag nas 'di skad ces smras so//rgyal po nga la byin gyi tshe rin po che'i char bab ces grag na khyod kyang bsod nams can zhig ste/ zan gong gi char bab po zhes pa nas/ bcom ldan 'das kyis bka' stsal pa/ lhung bzed la brtags te zas bza' bar bslab par bya'o zhes pa'i bar du'o/ /de nas bcu gnyis sde mo dag drung na 'dug pa'i dge slong ma'i lhung bzed la bltas 'di la ni mang du byin no/ /nged la ni nyung du byin no 'khod par gyur pa nas/ bcom ldan 'das kyis bka' stsal pa/ drung na 'dug pa'i dge slong ma'i lhung bzed la 'phyas gdags pa'i phyir blta bar mi bya'o zhes pa'i bar du'o//de nas khyim bdag gzhan zhig gis dge slong ma'i dge 'dun spyan drangs te/ mos pa dang bsnyen dga' mo dag gi nang du dge slong ma gzhan zhig sbyar ma ngur kha gyon pa zhig 'dug pa dang de dag gis lhung bzed bkrus pa'i chus sbyar ma ma rung bar byas pa nas 'phyas gdags pa'i bar du ste/de dag gis smras pa nyon mongs pa ngan pa khyod 'ba' zhig la sbyar ma 'di lta bu yod dam zhes pa nas/ bcom ldan 'das kyis bka' stsal pa/ zas la 'bags pa'i chus drung na 'dug pa'i dge slong ma la mi gtor bar bslab par bya'o zhes pa'i bar du'o/ /de nas bcu gnyis sde mo dag lag pa zas dang 'bags pas chu snod la 'dzin par byed pa dang / zas kyis bsgos pas sbrang ma dag 'du bar byed pa dang / khyim pa dag gis mthong nas 'phya bar gyur pa nas/bcom ldan 'das kyis bka' stsal pa/ lag pa zas dang 'bags pas chu snod la mi gzung bar bslab par bya'o zhes pa'i bar du'o/ /nam gyi tshe sbal kar rir khang bzangs ko ka nad las glengs te/ khyim gyi nang du zas dang 'bags pa'i chu dor du mi gnang ba dang /khyim bdag gzhan zhig la brten na khyim bdag yod pa la dris nas dor du rung bar gnang ba las/ de nas bcu gnyis sde mo dag ma dris par khyim gyi nang du dor ba dang / bcom ldan 'das kyis bka' stsal pa/ khyim pa 'dug pa la ma dris par chu zas dang 'bags pa khyim du mi dbo bar bslab par bya'o zhes pa'i bar du'o//mnyan du yod pa na bram ze'i bu zhig sems 'khrugs par gyur pa las dze ta'i tshal du phyin nas dge slong gzhan zhig gi lhung bzed kyi chus gtor ba dang / de slar rang gi sems rnyed par gyur to//de nas bram ze gzhan zhig gi bu yang sems 'khrugs par gyur nas/ de nas bram ze de bram ze'i las thob nas/ dge slong ma'i dbyar mo khang du song ba nas/ sbom dga' mo las lhung bzed kyi chu blangs pa'i bar du ste/ des kyang dge 'dun ma'i zas kyi lhag mas bkang ste phyung ba dang /bram ze des kyang blangs te nga'i bu shi yang bla'i btsog par mi bya'o zhes pa'i bar du ste/ bcom ldan 'das kyis bka' stsal pa/ lhung bzed kyi nang du lhag ma blugs te mi dor bar bslab par bya'o zhes pa'i bar du'o//bcu gnyis sde mo dag 'og gzhi med pa'i sa la yang lhung bzed 'jog pa nas/ bcom ldan 'das kyis bka' stsal pa/ 'og gzhi med pa'i sa phyogs su lhung bzed mi gzhag par bya'o zhes pa'i bar du'o/ /de nas bcu gnyis sde mo dag 'greng ste lhung bzed dbyung ba nas/bcom ldan 'das kyis bka' stsal pa/ 'greng ste lhung bzed mi dbyung bar bslab par bya'o zhes pa'i bar du'o/ /dge slong ma gzhon nu ma gzhan zhig 'greng ste lhung bzed 'khru ba dang / dge slong ma dag gis smras pa/ phu nu mo 'greng ste lhung bzed ma 'khru/des smras pa cir 'gyur/ lhung bzed 'khru ba las lag pa nas lhung ste/ lhung bzed chag pa dang / de dag gis de ltar 'gyur ro zhes smras pa dang / bcom ldan 'das kyis bka' stsal pa/ 'greng ste lhung bzed bkru bar mi bya'o zhes pa'i bar du ste/ de nas bcu gnyis sde mo dag lhung bzed lam kar gzhag pa nas/bcom ldan 'das kyis bka' stsal pa/ lhung bzed lam kar gzhag par mi bya'o zhes pa'i bar du'o/ /de nas bcu gnyis sde mo dag lhung bzed gad kar gzhag pa dang / da nas lhung bzed chag par gyur pa nas/bcom ldan 'das kyis bka' stsal ba/ lhung bzed gad kar gzhag par mi bya'o zhes pa'i bar du'o/ /de bzhin g.yang sar 'jog pa dang / dkan gzar por 'jog pa dang / bkru ba dang / skems pa dang / 'bab chu drag po'i rgyun las bzlog ste lhung bzed kyis chu bcu bar byed pa las/bcom ldan 'das kyis bka' stsal pa/ gad kar ma yin pa dang / g.yang sar ma yin pa dang / dkan gzar por ma yin par lhung bzed gzhag pa dang / bkru ba dang / bskam pa dang / 'bab chu drag po'i rgyun las bzlog ste lhung bzed kyis chu mi bcu bar bslab par bya'o zhes pa'i bar du'o//mdor bstan pa ni/ 'greng ste ma yin mgo g.yogs min/ /glang chen do ker lag na min/ /rtswa dang chu la bshang mi bya/ /shing la mi gang mthor mi 'dzeg /de nas bcu gnyis sde mo dag 'greng ste 'dug pa la chos bshad par byed nas/bcom ldan 'das kyis bka' stsal pa/ bshad par mi bya'o zhes pa nas/ nad pa 'ongs te bka' stsal pa/ mi na bar 'dug pa la 'greng ste chos bshad par mi bya'o zhes pa'i bar du'o/ /de bzhin du 'dug ste nyal ba la chos bshad pa nas bka' stsal pa mi na bar nyal ba la 'dug ste bshad par mi bya'o zhes pa'i bar du'o//de bzhin du stan dma' nas mthon po la 'dug pa la chos bshad pa nas bka' stsal pa/ mi na bar stan mthon po la 'dug pa la stan dma' ba la 'dug ste/ chos mi bshad par bslab par bya'o zhes pa'i bar du'o//de bzhin du lam du 'gro ba la lam gyi 'gram nas 'gro zhing chos ston pa las/ bka' stsal pa/ lam du 'gro ba la lam gyi 'gram nas 'gro zhing nad pa ma yin pa la chos bshad par mi bya'o zhes pa'i bar du'o/ /de bzhin du mdun du 'gro ba la phyi nas 'gro zhing chos bshad pa las bka' stsal pa/mi na bar mdun du 'gro ba la phyi nas 'gro zhing chos bshad par mi bya'o zhes pa'i bar du'o/ /de nas bcu gnyis sde mo dag mgo g.yogs pa la chos bshad par byed pa nas/ bka' stsal pa/ mi na bar mgo g.yogs pa la chos bshad par mi bya'o zhes pa nas mig nad can 'ongs te bka' stsal pa/nad pa la chos bshad par bya'o zhes pa'i bar du'o/ /de bzhin du brdzes pa la chos bshad par mi byed pa nas bka' stsal pa/ brdzes pa la chos bshad par mi bya'o zhes pa nas/brdzes pa na ba dag 'ongs nas bka' stsal pa/ nad pa la bshad par bya'o zhes pa'i bar du'o/ /de bzhin du gzar ba dang / gnya' gong du bsnol ba dang / phrag pa gnyi ga la gzar ba la chos bshad par mi bya'o zhes pa nas lag pa na ba dag 'ongs nas bka' stsal ba/nad pa la bshad par bya'o zhes pa'i bar du'o/ /de nas bcu gnyis sde mo dag do ker can la bshad pa dang bka' stsal pa/ do ker can la chos bshad par mi bya'o zhes pa'i bar du ste/ rgyal po dag 'ongs nas bka' stsal pa/ bshad par bya'o zhes pa'i bar du'o//de bzhin du zhwa gon pa dag lhags nas chos bshad pa dang / bka' stsal pa/ zhwa gon pa la bshad par mi bya'o zhes pa nas nad pa dag 'ongs te/ bka' stsal pa/ nad pa la chos bshad par bya'o zhes pa'i bar du'o/ /de bzhin du cod pan can dag lhags nas chos bshad pa dang /bka' stsal pa/ cod pan can la bshad par mi bya'o zhes pa nas/ bka' stsal pa/ tshang dpon nad pa la bshad par bya'o zhes pa'i bar du'o/ /de bzhin du mgo phreng ba can dag lhags nas chos bshad pa dang / bka' stsal pa/mgo phreng ba can la bshad par mi bya'o zhes pa nas nad pa la bshad par bya'o zhes pa'i bar du'o/ /de bzhin du thod bcings pa dag lhags nas chos bshad pa dang / bka' stsal pa/ thod bcings pa min pa la chos mi bshad par bslab par bya'o zhes pa nas/ nad pa la chos bshad par bya'o zhes pa'i bar du'o/ /glang po che la zhon pa dag la chos bshad pas/ bka' stsal pa/ mi na bar glang po che zhon pa la chos bshad par mi bya'o zhes pa nas/ de nas glang po che zhon pa dmag 'gro ba dag cig chos bshad par gsol ba dang /de dag gis bobs dang bshad do zhes pa las/ de dag gis smras pa bdag cag la gsod pa'i phyir rgol ba phyi bzhin du 'ong ngo zhes pa nas/ bka' stsal pa/ nad pa zhes bya ste/ chos bshad par bya'o zhes pa'i bar du'o/ /de bzhin du rta zhon pa dang khyogs dang bzhon pa gang yang rung ba'i steng na 'dug pa dang /lham mthon po gyon pa la chos bshad pa dang / bka' stsal pa/ rta zhon pa dang / khyogs na 'dug pa dang / bzhon pa'i steng na 'dug pa dang / lham mthon po gyon pa la chos mi bshad par bslab par bya'o zhes pa nas brtad pa dang nad pa la bshad par bya'o zhes bka' stsal pa'i bar du'o//de nas bcu gnyis sde mo dag lag na dbyig pa thog pa la chos bshad pa dang / bka' stsal pa/ mi na bar lag na dbyig pa thogs pa la chos bshad par mi bya'o zhes pa nas nad pa dang rgan mo 'khar ba med par 'gro mi nus pas de dag la chos bshad par bya'o zhes pa'i bar du'o/de bzhin du de dag gis lag na gdugs thogs pa la sogs pa la chos bshad pas/ bka' stsal pa/ lag na gdugs thogs pa dang / lag na mtshon cha thogs pa dang /go cha gon pa la chos mi bshad par bslab par bya'o zhes pa nas/ nad pa dang dgra la rgol du 'gro ba rnams la bshad par bya'o zhes pa'i bar du'o/ /bcu gnyis sde mo dag 'greng ste bshang gci byed pas/ mi na bar 'greng ste bshang gci mi bya bar bslab par bya'o zhes bslab pa bcas te/nad pa dag 'dug mi nus pas nad pa la rjes su gnang ngo / /gleng gzhi ser skya na ste/ sbom dga' mos rang gi btso blag mthong nas/ kye nga rab tu ma byung na khyed kyis nga la ji skad du 'bod/ des smras pa jo mo zhes 'bod do//'o na da nga'i chos gos ci'i phyir mi bkru/ khyod rab tu byung ba dang bdag bya ba mi gcig go zhes bkrur ma btub pa dang / sbom dga' mos de la gnod par bya ba'i phyir bkru sman 'thungs nas dmyangs pas gyo ral bkang ste/ gos 'khru ba'i rdzing du blugs so/ /de nas btso blag mkhan gyis der gos bkrus pa dang /gos kun mnam zhing ma rung bar gyur ro/ /spom dga' mo der 'ongs nas/ kye nang rje khyod kyi gos de dag ci nyes dri re zhim/ des smras pa 'phags mas ma bgyis sam/ bkren pa khyod de ltar mi dga' bar bya'o zhes pa dang /dge slong ma dag 'phya ba las bcas te/ mi na bar chu'i nang du bshang gci dang / mchil ma dang / snabs dang / skyugs pa dang / sna nas zags pa mi dor bar bslab par bya'o zhes bka' stsal pa nas/ nad pa la rjes su gnang ba'i bar du'o/ / gleng gzhi snga ma bzhin te/ ldum pa la ci'i phyir khyod nga la tshod ma dang / me tog dang shang tshe dag 'bul bar mi byed/ des smras pa/ nam khyod kyis bdag la 'tshal ma dang rad pa stsal pa'i dus na bdag gis kyang phyag rjed bgyis na/ da khyod ni rab tu byung / bdag ni khyim pa lags pas zham ring rngo mi thogs pas mi 'bul lo zhes byas pa dang /sbom dga' mos de la gnod par bya ba'i phyir snga ma bzhin du dmyangs pas gyo ral bkang nas phyags ma thogs te/ ldum rar song nas ldum ra thams cad mi gtsang bas bskus so/ /mi gtsang ba'i dri des wa dang khyi dag lhags te/der 'gres pas ldum kun ma rung par byas/ ldum pa mi dga' bar gyur pa sbom dga' mos der song ste/ kye khyod kyi ldum ra dri re zhim/ ldum dang shang tshe dang me tog dag re mang / des smras pa/ 'di ni 'phags ma khyod kyis bgyis so//des bgad de de ltar khyod shes par bya'o zhes ston pa la gsol nas/ bka' stsal pa/ mi na bar sngon po yod pa'i sa phyogs su bshang gci dang / mchil ma dang / snabs dang / skyugs pa dang / sna nas zags pa mi dor bar bslab par bya'o zhes pa nas nad pa la rjes su gnang ba'i bar du'o//bcom ldan 'das kyis mnyan du yod par khang skyong las glengs nas shing la 'dzeg tu mi gnang ba'i bslab pa bcas pa las/ phyis sbom dga' mos don cung zad tsam gyi phyir yang shing la 'dzeg pas dge slong ma dag gis che zhe bcom ldan 'das kyis bslab pa ma bcas sam/des smras pa/ de yang dge slong dag la bcas kyi dge slong ma dag la ma yin no zhes zer/ ston pa la gsol nas bka' stsal pa/ gnod pa byung ba ma gtogs par shing la mi gang tsam las mthor mi 'dzeg par bslab par bya'o zhes gsungs so//'phags ma dag bdag gis bslab pa'i chos mang po rnams bshad zin to zhes bya ba pa la sogs pa'i bshad pa ni snga ma bzhin no/ /ltung ba'i dngos po rnams bstan pa la rnam pa lngar phye ba'i tha ma nyes byas kyi sde bslab pa'i chos mang po rnams kyis bshad pa rdzogs te/ltung ba'i dngos po rnams bstan pa zhes bya ba bshad zin to// //'di man chad ni bslab pa'i dngos po rnams bstan pa zhes bya ba la rnam pa gnyis su phye ba'i gnyis pa ste/ rtsod pa'i gnyen po rnams bstan pa zhes bya ba ston to//'di la yang rnam pa gnyis su dbye ste/ rtsod pa rnams bstan pa dang / zhi bar bya ba'i chos rnams bstan pa'o/ /de la rtsod pa rnams bstan pa zhes bya ba la rnam pa lngar dbye ste/ rtsod pa rnams kyi gleng gzhi dang / de dag gi mtshan nyid dang / de dag gi rgyu dang / de dag dge ba la sogs par rnam par gzhag pa dang / de dag gi rnam par dbye ba bstan pa'o/ /de la rtsod pa rnams kyi gleng gzhi ni ston pa ser skya'i gnas n+ya gro d+ha'i tshal na ste/ bcom ldan 'das kyis shAkya bden pa la bkod pa de na/ de dag bcom ldan 'das blta ba'i phyir dus gsum du 'ongs pas/bcom ldan 'das kyis kyang rtag tu chos bshad do/ /rgyal po zas gtsang ma yang shAkya ba dag gis bskor nas/ dus gsum du bcom ldan 'das la blta ba'i phyir rtag tu 'dong bar goms te dus gzhan zhig na bcom ldan 'das kyis 'khor brgya phrag du ma'i mdun du tsha ba'i tshe sbrang ma phra mo'i sbrang rtsi tshigs ma med pa lta bu'i chos bshad pas/de dag kyang mngar ba'i chos bshad pa la mig gi dbang po mi 'dzums par nyan to/ /de nas rgyal po zas gtsang ma la sogs pa chos nyan nas slar dong ba dang /shAkya ming chen gyis rang gi khyim du phyin nas/ e ma'o sangs rgyas chos dge 'dun/ sangs rgyas 'byung ba ni bdag cag gi 'bras bur gyur to zhes smras pa dang / de'i chung mas dris pa/ /'phags pa'i sras de ci lags/ de ring bcom ldan 'das kyis chos bshad pas srog chags brgya stong du ma khyad par chen po chud par gyur to zhes smras so/de'i chung mas sangs rgyas byung bas bdag cag gi 'bras bur gyur to zhes smras pa de ni mad de/ khyed cag la ni 'bras bur gyur gyi bdag cag la ni ma lags so/ /de ci'i phyir zhe na/skyes pa rnams kyi phyir bcom ldan 'das 'jig rten du byung gi bud med kyi phyir ni ma yin no/ /des smras pa de skad ma zer cig /bcom ldan 'das ni sems can thams cad la phan pa dang / rjes su brtse ba yin gyi khyed cag kyang deng chos nyon cig ces byas pa dang / lha dag ni shAkya mang pos bskor nas bcom ldan 'das la gzigs par bzhud pas/ bdag cag bud med lha'i spyan sngar chos nyan du ngo tsha na/ des te lha dag ni snga dro chos nyan/ bdag cag ni slad dro chos nyan par gnang na 'chi'o/ /de nas ming chen gyis bsams pa bdag gis rgyal po zas gtsang ma la smras pa ni mnyan par mi 'gyur bas skye dgu'i bdag mo chen mo la bcol lo snyam nas de la bcol ba dang /des kyang rgyal po la gsol nas de bzhin gnang ngo / /de nas skye dgu'i bdag mo chen mo shAkya'i chung ma lnga brgyas bskor te/ chos nyan pa'i phyir n+ya gro d+ha'i kun dga' ra bar dong ngo //de'i tshe shAkya ming chen gyi chung ma rgyan thams cad kyis brgyan nas de dag dang lhan cig song ba dang / de gzugs bzang zhing gzhon pa rgyan thams cad kyis brgyan pas na/ 'dod chags dang ma bral ba dag yid 'phrog par byed pa tshe dang ldan pa kun dga' bos mthong nas/sring mo khyed ni yongs kyis kyang dbyibs legs la blta na sdug cing bzang na rgyan thams cad kyis brgyan pa lta ci smos te/ khyed rgyan gyis klubs te 'ongs pa ni ma legs so/ /de ci'i phyir zhe na/ mthu bo che 'di dag thams cad ni 'dod chags dang bral ba ma yin no zhes byas pa dang /de ngo tsha bar gyur nas rgyan thams cad 'phog ste de la bu mo mngag gzhug ma skung ba can zhes bya ba chos nyan pa'i phyir de dang lhan cig 'ongs pa rgyan 'di dag khyim du skyol cig byas pa dang / des kyang bskyal nas slar 'ongs so//de nas bcom ldan 'das kyis chos bshad pa dang / shAkya mo gzhon nu ma zhig chos 'chad pa'i tshe rang gi mgul na yod pa'i mu tig gi se mo do la chags pas yang dang yang du lta zhing lag pas kyang nom mo/ /de nas bcom ldan 'das kyis mi rtag pa'i chos bshad na yang 'on kyang ma btang ba dang /ming chen gyi chung mas gzhon nu ma de rang gi se mo do la chags par mthong nas 'di snyam du bsams te/ ston pas 'dus byas mi rtag par bshad pa na yang 'di rang gi se mo do la rab tu chags nas yang dang yang du blta na/'dis gal te bdag gi se mo do de mthong na ni/ de'i dregs pa thams cad med par 'gyur ro snyam du shes nas mngag gzhug ma skung ba can la nga'i mu tig gi se mo do long shig ces bsgo ba dang / de chos nyan pa'i skabs med par gyur nas yid la 'di snyam du bsams so//e ma'o bdag chos 'di lta bu bshad pa las rje mos mngags te btang bas bar chad du gyur te bran du gyur pa ni dka' bar shes nas sdug bsngal zhing yid blong ste smre sngags bton nas tshigs su brjod de smras pa/ bran gyur ngan pa sdug bsngal mang la gzhan gyi dbang //bdag 'tsho ngan pa sngon byas chos kyang thob/ /sdig pas rgyal ba'i zhal la bltar ma gyur/ /dri med chos ni bde gshegs las ma thos/ /zhes smras pa dang / bcom ldan 'das kyis dgongs pa 'di yang sngon sangs rgyas la bya ba byas pa zhig ste/ tshe thung bas 'khor bar rgyu ba las dbyung bar bya'o snyam nas rdzu 'phrul gyis tshigs su bcad pa gcig gro ga la bris te de la byin no/ /skye ba rnams ni 'jig par 'gyur/ /dge mas tshe yang rig par byos/ /nan tan 'dug ste dge la nyon/ /nga bdag gis ni bshad pa la'o/ / bu mo de yang dga' nas tshigs bcad de zlos shing sangs rgyas dran bzhin du song ba las/ tshe thung ba'i las kyis dus la bab pas lam du ba drus ma zhig gis 'tsho ba dang bral lo/ /de sangs rgyas dran bzhin du 'chi ba'i dus byas pas sing ga la'i gling du sing ga la'i rgyal po'i bu mor skyes so//de bltams pa dang btsas pa'i tshe mu tig gi char bab pas ming yang mu tig mar btags so/ /de nas dus gzhan zhig na mnyan du yod pa'i tshong pa cig rgya mtsho'i gling du gru chen po bshams te rgya mtshor zhugs pa las rlung gi mthus sing ga la'i gling du phyin to//de nas rgyal po'i pho brang dang mi ring ba zhig na gnas te/ de nas tho rangs la gleng gzhi dang bden pa mthong ba dang / gnas brtan dang / gnas brtan ma'i tshigs su bcad pa dang / thub pa'i tshigs su bcad pa dang / don mang po'i mdo sde dag rgyas par dbyangs kyis kha ton du byas pa dang mu tig ma khyim na 'dug pa skar khung nas thos nas rgyal po la yab dbus kyi yul na mchis pa dag ni glu rab tu mkhas so zhes gsol to//de nas de dag bkug ste glu long zhes byas pa dang / lha mo bdag cag ni glu mkhan ma lags kyi sangs rgyas kyi tshigs su bcad pa kha ton bgyis pa lags so//mu tig mas sangs rgyas zhes bya ba sngon ma thos pas thos ma thag tu spu zing zhes byed de the tshom skyes nas sangs rgyas zhes bya ba ci zhes dris so/ /de dag gis kyang sangs rgyas kyi che ba'i yon tan bsngags pa la zhugs te/ lha mo gangs kyi ri dang nye ba na chu bo ba gi ra ta'i ngogs ser skya'i gnas drang srong ngal bso ba'i gnas nas mi ring ba zhig na shAkya las gzhon nu zhig byung ste//bram ze dang ltas mkhan dang skar mkhan dag gis lung bstan pa ni de ste khyim na gnas na ni 'khor los sgyur ba'i rgyal por 'gyur/rab tu byung na ni de bzhin gshegs pa dgra bcom pa yang dag par rdzogs pa'i sangs rgyas zhes bya bar 'gyur ro zhes sgra grags pa de ni 'di ltar sangs rgyas zhes bya'o zhes smras pa dang / mu tig mas de dag la khyed nam 'dod pa'i tshe bdag la sbron cig/ de dag 'gro kar sbran pa dang / de nas bcom ldan 'das la spring yig bris te gsol pa dang / lha ma yin dang lha mis phyag byas pa/ /skye dang na ba'i 'jigs las mngon du bral/ /grags pa chen po bsngags pa kun tu grags/ /drang srong bdud rtsi'i dngos po mnyam med bdag la'o//de nas tshong pa de dag gis spring yig de khyer nas bcom ldan 'das la phul ba dang / bka' stsal ba/ tshong pa khyed nam sing ga la'i gling du 'gro ba'i tshe nga la sbron cig /de dag 'gro kar gsol pa dang / bcom ldan 'das kyis nyid kyi sku'i tshad ri mor bris te//de'i 'og tu gsum la skyabs su 'gro ba dang / bslab pa'i dngos po lnga dang / rten cing 'brel par 'byung ba lugs dang mthun pa dang / mi mthun pa dang / 'phags pa'i lam gyi yan lag rnams bris nas gong du tshigs su bcad pa/ brtsam pa par bya zhing dbyung bar bya//zhes bya ba nas/ sdug bsngal mtha' mar 'byin par 'gyur/ /zhes bya ba'i bar du bris nas bskur ro/ /de nas mu tig ma 'di ci yin zhes tshong pa dag la smras pa dang / de dag gis re re nas zhib tu smras so/ /mu tig mas rten cing 'brel par 'byung ba'i yan lag bcu gnyis rjes su sems pa la zhugs te/lan gsum du ma bzlas par bden pa mthong bar gyur te/ tshigs su bcad de smras pa/ /sangs rgyas ring na bzhugs bzhin du/ /shes rab kyis ni mig sbyangs te/ /gang gi mig ni 'di 'dra ba/ /sman mkhas de la phyag 'tshal lo//sangs rgyas ring na bzhugs bzhin du/ /lta ba'i zug rngu rtsa nas phyung / /zug rngu 'byin par byed pa can/ /sman mkhas de la phyag 'tshal lo/ /zhes smras nas/ tshong pa dag la khyed nam 'gro ba na bdag la gyis shig/ de dag gis sbran pa dang /mu tig mas de dag la bdag gi tshig gis bcom ldan 'das kyi zhabs la phyag bgyis te 'di skad du gsol cig /mi bde ba chung ngam myur du bzhengs sam/ gnod pa ma mchis sam/ mthu dang ldan nam/ bde bar spyod dam zhes smos la/ yang 'di skad du gsol cig /btsun pa dge ba'i bshes gnyen bcom ldan 'das la brten pas na/ bdag sems can dmyal ba dang / byol song dang yi dags las ni phyung / lha dang mi'i gnas su ni bzhag /'khor ba ni mthar bgyis/ mchi ma dang khrag gi rgya mtsho ni skams/ rus pa'i ri las ni rgal/thog ma ma mchis pa tshun chad bsags pa 'jig tshogs mang por lta ba'i rtse mo ni ye shes rdo rjes bcom nas/ rgyun du zhugs pa'i 'bras bu mngon du bgyis te/ btsun pa bdag rgal to/ /mngon du rgal to/ /da ni bcom ldan 'das dang / chos dang / dge slong gi dge 'dun la skyabs su mchi yis/nam 'tsho'i bar du bdag dge bsnyen mar gzung du gsol/ mu tig bre gsum po 'di yang khyer la sangs rgyas dang chos dang dge 'dun la phul cig/ de nas de dag gis de bzhin du bcom ldan 'das la gsol nas/ mu tig kyang phul lo/ /bcom ldan 'das kyis kun dga' bo la bka' stsal pa/kun dga' bo shAkya ming chen gyi bran mo skur ba can nga las chos nyan te song ba las lam du bas bsad pa mthong ngam/ btsun pa mthong ngo / /de nga la sems dad bzhin du dus las 'das te/ sing ga la'i rgyal po'i bu mor skyes nas ming mu tig mar btags te/bden pa mthong ba des skyes 'di bskur ro/ /'di la sangs rgyas kyi sku skal gyis ni dri gtsang khang du skyang nul byos shig/ chos kyi sku skal ni chos 'dzin pa'i gang zag rnams la'o/ /dge 'dun gyis ni dge 'dun 'dus la gos shig/ ston pas chos kyi sku skal gang yin pa de chos 'dzin pa'i gang zag rnams la'o zhes gsungs pa dang /de'i tshe mdo sde 'dzin pa rnams bdag cag ni bcom ldan 'das kyis mdo sde ma lus par 'dzin pas na rnyed pa 'di bdag cag dbang po zhes zer/ 'dul ba 'dzin pa rnams ni bdag cag bcom ldan 'das kyi nang gi mdzod srung ba yin te 'dul ba ma lus par 'dzin pas rnyed pa 'di bdag cag dbang ngo zhes zer/ma lta bu 'dzin pa dag gis bdag cag ni mdo sde dang 'dul ba dag gi rang dang spyi'i mtshan nyid 'dzin pas rnyed pa 'di bdag cag dbang ngo zhes zer bas/mdo sde dang / 'dul ba dang / ma mo 'dzin pa dag de'i tshe 'thab cing gshe ba dang / khon cing 'khrug par gyur pa dang / bcom ldan 'das kyis bka' stsal ba/ dge slong dag 'thab cing smod par ma byed cig /khon cing 'khrug par ma byed cig /dge slong dag rtsod pa la rnam pa bzhi ste/mi mthun par smra ba las rtsod pa dang / lung bsgo ba med pa las rtsod pa dang / nyes pa las rtsod pa dang / bya ba las rtsod pa'o zhes gsungs te/ 'di ni gleng gzhi'o// //de la mi mthun par smra ba'i phyir rtsod pa zhes bya ba ni/ /gang gis chos smra ba las zang zing zhig rnyed na/kha cig 'di chos kyi phyir phul bas chos dbang ngo zhe'am chos smra ba'i gang zag phul bas chos 'chad pa'i gang zag dbang ngo zhes zang zing gi phyir rtsod par gyur pa'am/ chos kyi lta ba la sogs pa'i mi mthun par smra ba las rtsod par gyur pa'o/ /lung bsgo ba med pa las rtsod pa zhes bya ba'i gang zag gtsang ma nyes pa med pa la/gleng ba'i mi rigs pa las nyes pa byas so zhes ngan par glengs pas na/ mkhan po slob dpon gyis de las klog pa dang / kha ton la sogs pa'i lung ston pa med pa las rtsod par gyur pa ste/ ji ltar gyad bu nor las can dang mdza' bos skur pa bzhin no//nyes pa las rtsod pa zhes bya ba ni ltung ba sde lnga'i nyes pa byung nas gleng ba'i dge slong gis glengs pa las khas mi len mi 'chags pa'am/ nyes pa gzhan la gzhan gyis glengs pa'i phyir rtsod pa'i gleng gzhir gyur pa'o/ /bya ba las rtsod pa zhes bya ba ni gsol ba'i las la sogs pa brgya rtsa gcig las gang yang rung ba zhig byed pa'i tshe rtsod pa'i gleng gzhir gyur pa ste/'di ni rtsod pa rnams kyi mtshan nyid bstan pa zhes bya'o/ /de la mi mthun par smra ba las rtsod pa'i rgyu ni nyi shu ste/ 'khrug pa'i rtsa ba drug dang dbyen byed pa'i dngos po bcu bzhi'o//de la 'khrug pa'i rtsa ba drug ni khro zhing khon du 'dzin pa dang / 'chab cing 'tshig pa dang / phrag dog cing ser sna byed pa dang / sgyu dang g.yo byed pa dang / ngo tsha mi shes shing khrel gyis mi dogs pa dang / sdig pa la mos shing log par lta ba bdag tu smra ba bsnyems pa'o//dbyen byed pa'i dngos po bcu bzhi ni chos so zhes smra ba dang / chos ma yin no zhes smra ba dang / de bzhin du 'dul ba'o/ /'dul ba ma yin no/ /nyes pa'o/ /nyes pa med pa'o/ /lci ba'o/ /yang ba'o/ /lhag ma lus pa'o/ / lhag ma ma lus pa'o/ /bsngam par bya ba'o/ /bshags par bya ba'o/ /'dul ba las 'da' ba'o/ /ngan par smra bar 'gyur ba'o zhes bya ba rnams te/ mi mthun par smra ba'i phyir rtsod pa thams cad ni drug dang bcu bzhi'o/ /'di dag las byung ba'i phyir rgyu zhes bya'o//lung bsgo ba med pa la rtsod pa'i rgyu ni gcig ste lung mi ston pa nyid la bya'o/ /de ni dge 'dun la lung ma ston cig ces zer ba dang / lung mi ston pa dang / lung mi ston par 'jog pa ste/ de lta bu'i phyir 'thab cing gshe ba dang / khon cing 'khrug pa 'di ni lung bsgo ba med pa la rtsod pa'i rgyu ba mi ston pa 'jog pa ste/de lta bu'i phyir 'thab cing gshe ba dang / khon cing 'khrug pa 'di ni lung bsgo ba med pa la rtsod pa'i rgyu ba zhes bya'o/ /nyes pa las rtsod pa'i rgyu ni lnga ste/ ltung ba sde lnga po phas pham pa nas nyes byas kyi bar du gang yang rung ba zhig byas pa'o//rgyu lnga po de dag kyang ngag dang sems kyis ma yin gyi lus 'ba' zhig las 'byung ba yang yod de/ ji ltar bsnyen par ma rdzogs pa'i gang zag phyir ma byung ba las phyir byung bar 'du shes te nyal ba'am/ nyal ba'i 'og tu skyes pa phyis 'ongs nas khyim cig tu nyal ba'am//gnyid log pa las mal stan chen po'i steng du gzhag pa lta bu lus dang sems kyis ma yin gyi ngag 'ba' zhig las byung ba yang yod do/ /ji ltar skyes pa la ma bsams bzhin du tshig drug gam bdun las 'das par chos bshad pa lta bu'o/ /ngag gi ma yin gyi lus dang sems gnyi ga las byung ba yang yod do//ji ltar dge slong mas byol song du gyur pa'i srog chags 'tsho ba dang phral na ji ltar bdag gis bsad pa bzhin du gzhan la srog chags 'tsho ba dang phrol cig ces tshig tu ni mi smra la/ de ltar bsad na legs par bsad pa yin no snyam du sems pa ste/de bzhin du ma byin par len pa dang / mi tshangs par spyod pa dang / myos pa'i khu ba 'thung pa'i tshe tshig tu mi smra ba lta bu'o/ /lus kyi ma yin gyi ngag dang sems gnyi ga las 'byung ba yang yod de/ ji ltar bsams pa bzhin du skyes pa la tshig bdun las 'das par chos bshad pa lta bu'o//lus dang ngag dang sems gsum char las 'byung ba yang yod de/ ji ltar srog bcad pa dang / ma byin par len pa dang / mi tshangs par spyod pa dang / myos pa'i khu ba 'thung ba de nyid la tshig gis kyang bsngags pa lta bu'o//bya ba la rtsod pa'i rgyu ni brgya rtsa gcig yod de/ gsol ba'i las nyi shu rtsa bzhi dang / gsol ba dang gnyis kyi las bzhi bcu rtsa bdun dang / gsol ba dang / bzhi'i las sum cu po rnams te/ 'di ni rtsod pa de dag gi rgyu bstan pa zhes bya'o// // mi mthun par smra ba las rtsod pa de ni dge ba zhes kyang bya/ /mi dge ba zhes kyang bya/ lung du mi ston pa zhes kyang bya ste/ gang dge 'dun gyi don du bya ba dang / don du sems pa dang / dge ba'i don gyi phyir 'thab pa dang / gshe ba dang / 'khon pa dang / 'khrug pa de ni dge ba zhes bya'o//gang dge 'dun gyi don du ma yin pa dang / don du mi sems pa dang / mi dge ba'i don gyi phyir 'thab pa la sogs pa de ni mi dge ba zhes bya'o/ /gang dge 'dun gyi don yang ma yin/ don ma yin pa yang ma yin/ don du sems pa yang ma yin/ mi sems pa yang ma yin/ dge ba'i don du yang ma yin/ mi dge ba'i don du yang ma yin par 'thab pa la sogs pa de ni lung du mi ston pa zhes bya'o/ /mi mthun par smra ba'i rtsod pa ji lta bar lung bsgo ba med pa la rtsod pa dang / nyes pa la rtsod pa dang / bya ba la rtsod pa rnams kyang dge ba dang mi dge ba dang /lung du mi ston par rnam par gzhag ste dge bar 'dod pa dang mi dge bar 'dod pa dang / de gnyi gar mi 'dod pa ni rim bzhin du sbyar zhing bshad par bya ste/ 'di ni rtsod pa de dag dge ba'i la sogs par rnam pa gzhag pa bstan pa zhes bya'o//de la mi mthun par smra ba'i rtsod pa la rnam pa bzhi yod do/ mi mthun la rtsod pa med pa dang / mthun la rtsod pa dang / mi mthun la rtsod pa dang / mthun la mi rtsod pa'o/ /mi mthun la rtsod pa med pa ni gang tha dad du smra ba ni yod la/ 'thab cing gshe ba dang /'khon pa ni med pa'o/ /mthun la rtsod pa ni lung bsgo ba med pa dang / nyes pa dang bya ba'i rtsod pa ni yod la mi mthun par smra ba'i rtsod pa ni med pa'o/ /mi mthun la rtsod pa ni gang dge 'dun tha dad du smra ba dang / 'khrug par mi mthun par bya ba dang / ma gus par byed pa dang / gcig tu ma yin par de lta bu phyir 'thab cing gshe ba dang / 'khon par gyur pa'o/ /mthun la mi rtsod pa ni rnam pa de dag ma gtogs pa'o/ /skabs 'dir ni mi mthun par smra ba la rtsod pa zhes bya ba ni gsum pa bzung ngo / /lung bsgo ba med pa'i phyir rtsod pa yang rnam pa bzhi ste/lung mi bsgo ba la rtsod pa med pa dang / rtsod pa la lung bsgo ba dang / lung yang mi bsgo la rtsod pa dang / lung yang bsgo la rtsod pa med pa'o/ /de la lung mi bsgo la rtsod pa med pa ni gang dge 'dun lung ston du mi 'jug pa dang /lung mi ston pa ni/ yod la 'thab pa la sogs pa ni med pa'o/ /rtsod la lung bsgo ba ni mi mthun par smra ba dang / nyes pa dang bya ba'i rtsod pa ni yod la/ lung mi ston pa'i phyir rtsod pa ni med pa'o/ /lung yang mi bsgo ba la rtsod pa ni gang dge 'dun lung ston du mi 'jug pa dang /lung mi ston pa dang / lung ston mi 'jug pa de'i phyir 'thab cing gshe ba dang / 'khon cing 'khrug par gyur pa'o/ /lung yang bsgo la rtsod pa med pa ni rnam pa de dag ma gtogs pa ste/ skabs 'dir lung bsgo ba med pa'i phyir rtsod pa zhes bya ba ni gsum pa gzung ngo //nyes pa'i phyir rtsod pa la yang rnam pa bzhi yod de/ nyes pa yod pa la rtsod pa med pa dang / nyes pa med pa la rtsod pa dang / nyes pa yod pa la rtsod pa dang / nyes pa med la rtsod pa med pa'o/ /de la nyes pa yod la rtsod pa med pa ni phas pham pa nas nyes byas kyi bar gyi nyes pa ni byung la 'thab pa la sogs pa ni med pa'o//nyes pa med pa la rtsod pa ni mi mthun par smra ba dang / lung bsgo ba med pa dang / bya ba'i rtsod pa ni yod la nyes pa'i phyir rtsod pa med pa'o/ /nyes pa yod pa la rtsod pa ni phas pham pa nas nyes byas kyi bar du byung la/de'i phyir 'thab cing gshe ba dang / 'khon cing 'khrug par 'gyur ba'o/ /nyes pa med pa la rtsod pa med pa ni/ rnam pa de dag ma gtogs pa ste/ 'dir nyes pa'i rtsod pa zhes bya ba ni gsum bzung ngo // //bya ba'i phyir rtsod pa la yang rnam pa bzhi yod de/bya ba yod la rtsod pa med pa dang / rtsod pa yod la bya ba med pa dang / bya ba yang yod la rtsod pa dang / bya ba med pa la rtsod pa'o/ /de la bya ba yod la rtsod pa med pa ni gang gsol ba'i las la sogs pa'i bya ba ni yod la/ 'thab pa la sogs pa'i bya ba ni med pa'o//rtsod pa yod la bya ba med pa ni mi mthun par smra ba dang / lung bsgo ba med pa dang / nyes pa'i rtsod pa ni yod la bya ba'i phyir rtsod pa ni med pa'o/ /bya ba yang yod la rtsod pa ni gang gsol ba la sogs pa'i las kyi phyir 'thab cing gshe ba dang / 'khon zhing 'khrug par gyur pa'o//bya ba yang med la rtsod pa med pa ni rnam pa de dag ma gtogs pa ste/ 'dir bya ba'i phyir rtsod pa zhes bya ba ni gsum pa gzung ngo / /'di ni rtsod pa de dag gi rnam par dbye ba bstan pa zhes bya ba ste/ rtsod pa'i gnyen po rnams bstan pa zhes bya ba la gnyis su phye ba'i dang po rtsod pa rnams bstan pa zhes bya ba bshad zin to// //'dir ni zhi bar bya ba'i chos rnams bstan pa zhes bya ba bstan to/ /'di la yang rnam pa bzhir dbye ste/ zhi bar bya ba'i chos de dag gi gnas bstan pa dang / bslab pa'i dngos po so so'i mtshan nyid bstan pa dang /mjug bsdu ba dang / yongs su dag pa dri ba'o/ /de dag gi gnas brtan pa ni/ rtsod pa zhi bar bya ba'i chos bdun po 'di dag ni zla ba phyed phyed cing so sor thar pa'i mdo 'don pa las 'byung ngo zhes gsungs pa'o/ /bslab pa'i dngos po nyid kyi mtshan nyid bstan pa yang gnyis su dbye ste/mdor bstan pa dang / de nyid kyi rnam par bshad pa'o/ /de la mdor bstan pa zhes bya ba ni/ mdor bstan pa ni/ mngon sum dran pa ma myos dang / /de bzhin gang mang ngo bo nyid/ /rtswa rnams bkram pa lta bu dang / /khas blang bar yang bya ba'o/ / zhes gsungs pa'o/ /de nyid kyi rnam par bshad pa zhes bya ba ni mngon sum du 'dul bar 'os pa la mngon sum du 'dul ba sbyin no/ /dran pas 'dul bar 'os pa la dran pas 'dul ba sbyin no/ /mya myos pas 'dul bar 'os pa la ma myos pas 'dul ba sbyin no/ /gang tshul shing mang po sbyin par 'os pa la tshul shing mang po sbyin no//de'i ngo bo nyid tshol du gzhug par 'os pa la de'i ngo bo nyid btsal bar sbyin no/ /rtswa bkram pa lta bur 'os pa la rtsa bkram pa lta bu sbyin no/ /khas blang bar 'ongs pa la khas blang bar bya'o zhes gsungs pa'o/ / 'di dag kyang gang gis gang zhi bar bya ba dang / so so'i mtshan nyid bstan pas ston te/ de la mi mthun par smra bas rtsod na gnyis kyis zhi bar bya ste/ mngon sum du 'dul ba dang tshul shing mang po len pas so/ /de la mngon sum du 'dul ba zhes bya ba ni gang zag gsum ste/ rgol ba dang //len 'debs pa dang / gzu bo mngon sum du gyur pa'o/ /rgol bas don rnam pa bcu drug po 'di las bsams nas gleng bar bya ste/ bden pa dang / dus dang / tshod dang / don du ldan pa dang / mthong ba dang / thos pa dang / dogs pa dang / lus dang ngag dang /grong dang / dgon pa dang / mtshan mo dang / nyin par byas pa dang / lhag ma lus pa dang / lhag ma ma lus pa dang / slong bar nus pa'o/ /rgol bas glengs kyang de'i tshig mi brtsan par rnam pa lnga ste/ don gtan la ma phebs pa dang / gcig nas gcig tu brgyud pa'i tshig dang /bsnyen par ma rdzogs pa'i tshig las don du 'dzin pa dang / mdo sde mi shes pa dang / gnas mi shes pa'o/ /slar zlog pa lnga ni brtsan no/ /lan 'debs pas kyang rnam pa bcu drug po 'di rnams las bsams nas skabs dbye bar bya ste/ci 'di tshul khrims dang ldan pa yin nam/ 'gyod pa can nam/ mang du thos pa'am/ 'dul ba gtan la 'bebs pa yin nam/ ci mthong ba las gleng bar byed dam zhes bya ba la sogs pa bcu gnyis ni snga ma bzhin no/ /lan 'debs pa'i tshig mi brtsan par bya ba rnam pa lnga ste/mtshams sbyor bar mi smra ba dang / gzhan las gzhan du 'gyur ba dang / phyogs la brten te nyes pa khas len pa las kyang mnyes par smod pa dang / dge slong ma rnams la skur pa 'debs pa dang / rim gro med pa pa'o//slar bzlog pa lnga ni brtsan par bya'o/ /rgol ba dang lan 'debs pa gnyis rtsod pa'i nyes dmigs de zhi ba'i yon tan du snang na/ de gnyis kyis gzu bo chos bcu drug dang ldan pa btsal bar bya ste/ tshul khrims dang ldan pa dang / slob pa la 'dod pa dang / mang du thos pa dang /'dul ba la mkhas pa dang / gzu bo chos bzhin ma 'dres pa dang / 'dod pas mi 'gro ba dang / zhe sdang gis mi 'gro ba dang / gti mug gis mi 'gro ba dang / 'jigs pas mi 'gro ba dang / las byas pa dang / ma byas par shes pa dang / 'dod chags kyis rgyal ba'i bka' las mi 'da' ba dang zhe sdang gis rgyal ba'i bka' las mi 'da' ba dang /ma bcas pa mi 'cha' ba dang / bcas pa las mi 'gyur ba dang / rtsod pa de zhi bar nus pa dang / nyes pa las slong bar nus pa'o/ /gzu bo la rnam pa gsum ste/ phyogs gnyi ga'i thad du bdag nyid song nas dkrugs par byed pa dang / gang dag mi sdom pa ste/ phrin las la sbyor ba dang / lus dang ngag gnyi ga sdom pa ste/ gong ma gnyis las bzlog pa'o/ /de bas na lus ngag gnyis sdom pa'i gzu bo bsgo bar bya'o/ /snga ma gnyis gnyis ni ma yin no//gzhan yang chos lnga dang ldan na gzu bo bus pa lta bu zhes bya ste/ chos ma yin pa'i phyogs su 'jug pa dang / rtsod pa 'phel bar byed pa dang / gzu bo gzhan la mdo sdes bsngo ba dang / so sor thar pas dge slong ma rnams la smod pa dang / rim gro med pa'o//de nas bzlog pa ni gsal ba'o/ /gzu bos rtsod pa zhi bar bya bar khas blangs na/ rnam pa brgyad kyi bdag nyid la brtag par bya ste/ ci bdag gis rtsod pa'i gzhi thog ma ci las byung ba shes sam/ bdag gi grogs mo gzu bo chos bzhin byed pa yin nam sngon 'dris par 'gyur ba ma yin nam/ci bdag gi tshig brtsan par 'gyur ram/ nyes pa de dag rnam par sbyang nus sam/ lan glan par nus sam/ chos bzhin du bya bar nus sam/ ci mi dge ba las slong ba la mkhas sam zhes brtag par bya'o/ /de nas rnam pa brgyad kyis gzhan la brtag par bya ste/'di na 'di ltar rgyal ba'i gsung skung ba/ mdo sde dang / 'dul ba dang / ma mo 'dzin pa lta yod dam/ gang 'phyas tshol ba la slar zlog pa'i gnas brtan ma yod dam/ de gnyis rgyal po la brten pa ma yin nam/ blon po la brten pa ma yin nam/khyim bdag la brten pa ma yin nam/ phyi rol pa ma yin gyi dge 'dun nyid la zhi bar sbyor ba lta yod dam zhes brtag par bya'o/ /de nas gzu bo de dag gis mngon sum du 'du bar rtsod pa de zhi bar bya'o/ /mngon sum du bya ba ni rnam pa gnyis te/ gang zag mngon sum dang /chos mngon sum mo/ /de la gang zag mngon sum du bya ba ni gang la zhi bar bya ba dang / gang gis zhi bar byed pa de dag mngon sum du gyur pa'o/ /chos mngon sum du bya ba na chos ji ltar chos dang 'dul ba bzhin no/ /gzu bo rnams kyis rgol ba la rnam pa brgyad du brtag par bya ste/cho ga dang / spyod yul dang / mdza' bo dang / grogs mo dang / lus kyi las dang / ngag gi las dang / 'tsho ba dang / thos pa ste/ gal te brgyad po de dag sdig pa can du gyur pa na ma smra shig ces bsgo bar bya'o/ /rgol ba la ji ltar lan 'debs pa la yang rnam pa brgyad du brtag par bya ste/gal te brgyad po de sdig pa can du gyur na khyod kyi lus dang ngag dang yid kyi las thog ma ji lta bu yin zhes dris la ji ltar khas blangs pa bzhin du byed du gzhug go/ /ci ste cho ga la sogs pa dge ba can zhig yin na lan 'debs pa la ni 'jam por smros shig /rgol ba la ni shes par byos la rtsod pa de zhi bar bya'o/ /gzhan yang rnam pa bcu drug tu sbyar bar bya ste/ rgol ba nyid rig par bya ba dang / brtag pa dang / 'byung ba dang / dri ba dang / dam 'char gzhug pa dang /spro bar bya ba ste rgol ba la drug tu sbyar ba bzhin lan 'debs pa la yang drug ste bcu gnyis dang / lan ldon pas dam bcas pa gzung ba dang / mdo sde dang sbyar/ 'dul ba dang sbyar/ ma mo dang sbyar zhing rtsod pa rma bar bya'o/ /chos lnga dang ldan pa'i gzu bos rtsod pa de zhi bar byed mi nus te/rjes su bstan pa'i tshig lnga dang / mngon sum du mi shes pa'i phyir ro/ /lnga gang zhe na rgol ba dang / lan 'debs pa dang / chos bzhin du brtag pa dang / chos bzhin du ma yin par rtogs pa dang / dam bca' ba bzhin mi 'dzin pa'o//gzhan yang rnam pa lnga ste/ rtsod pa'i rang bzhin dang / 'byung ba dang / gzung ba dang / gcad pa dang / zhi gnas pas mi 'byung bar mi shes pa'o/ /gzhan yang rnam pa lnga ste/ 'khrul ba dang / gsang ste smra ba dang / nor bar smra ba dang / glo bur du smras pa 'dzin pa dang / smras pa yang lan gsum gyi bar du dam 'cha' bar mi 'jug pa'o/ /gzu bo 'dul ba 'dzin pas gnas bcu drug gis 'dul ba shes par byas nas/ gnas bcu drug gis nyes pa brjod par bya ste/ lci ba dang / yang ba dang / lhag ma lus pa dang / lhag ma ma lus pa dang / gnas ngan len pa dang / lus kyi dang / ngag gi dang / dge ba dang / mi dge ba dang / lung du mi ston pa dang / bcas pa dang / ma bcas pa dang / bshags par bya ba dang / bsdam par bya ba dang / ngan du smras pa dang /'dul ba'i las 'das par gyur pa'i rnam pa ste/ de ltar gnas bcu drug po de dag gis nyes pa brjod nas/ gnas bcu drug gis chad pa'i las kyis sma dbab par bya'o/ /bcu drug po ni 'di lta ste/ nyes pa ngor brjod pa dang / 'phyas 'dogs pa dang / bsgo ba bzhin mi nyan pa dang /cang mi smra zhing mi nyan pa dang / bsdigs pa dang / bskrad pa dang / slar bsdum pa dang / smad pa dang / ma mthong ba'i phyir spang ba dang / gnyen po la mi brten pa'i phyir spang ba dang / sdig pa'i lta ba mi gtong ba'i phyir spang ba dang / chad pa dang / gzhi nas bslong ba'i chad pa dang / yid mgu bar bya ba dang / gzhi nas bslang ba'i yid mgu ba dang / gzhi nas bslangs te smos pa'o/ /de ltar chad pa'i las kyis sma phab nas/ gnas rnam pa bcu drug gis las byas te/ mngon sum du gyur pa dang / skabs phye ba dang /mthong bas glengs pa dang / thos pas glengs pa dang / dogs pas glengs pa dang / mthong bas dran par byas pa dang / thos pas dran par byas pa dang / dogs pas dran par byas pa dang / rang gis khas blangs pa dang / gzhan gyis bskul nas khas blangs pa dang /brtag mi dgos pa dang / dri ba dang / dri mi dgos pa dang / khas len du bcug pa dang / khas len du ma bcug kyang rung ba las bya'o/ /de ltar rnam pa bcu drug gis rtsod pa zhi bar byas nas legs par zhi ba yin te/ chos bzhin du las byas pa dang / dge 'dun gyis bsgo ba dang / rgyal ba'i gsung bzhin mthun pa dang / rgol ba dang lan 'debs pa la bsgo ba dang / rgol bas 'dul ba las mi 'gal ba dang / nyes pa mi 'chab pa dang / byung ba dang bcas pa dang / rjes su bcas pa dang / gnang ba dang / mi gnang ba dang / mi gnang bar sbyor ba dang / rgol ba dang lan 'debs pa'i dam bca' ba 'dzin pa dang / mdo sde ston pa dang / 'dul bar mthun pa dang / chos kyi tshul 'phel ba dang / chos dang 'dul ba bzhin zhi bar byed pa'o/ /slar bzlog pa ni legs par zhi ba ma yin te ma zhi ba'o//gal te des kyang zhi bar ma nus na dge 'dun la slar dbul bar bya ste/ dge 'dun gyis mngon sum du 'dul bas zhi bar bya'o/ /des kyang zhi bar ma nus na yang mang du thos pa gsol ba yon tan dang ldan pa'i gzu bo mchog bskos te/des mngon sum du 'dul bas zhi bar bya'o/ /de dag gis kyang ma nus na mchog gi yang mchog la gtad de/ de dag gis mngon sum du 'dul bas zhi bar bya'o/ /de dag gis kyang zhi bar ma nus na slar yang dge 'dun la dbul bar bya'o//de nas dge 'dun gyis rtsod pa spo zhing / gtod par byed pa'i dge slong ma chos lnga dang ldan pa gcig bsko bar bya ste/ 'dod chags dang / zhe sdang dang / gti mug dang / 'jigs pas mi 'gro ba dang / spos pa dang / ma spos pa shes pa las bsko zhing des gang na gnas brtan ma dang /so sor thar pa dang bcas pa'i dge 'dun la thog mar ci las rtsod pa rgyas par smros la gtod cig /dge 'dun de dag gis kyang zla ba drug gi bar du dge 'dun dang / gang zag dang / chos mngon sum gyis zhi bar bya'o/ /de dag gis kyang zhi bar ma nus na rtsod pa spo bar byed pa la slar gtod cig /des kyang mdo sde la sogs pa 'dzin pa la spo bar bya ste/ de dag gis gang zag dang / chos mngon sum gyis 'dul zhing zhi bar bya'o/ /gal te ma nus na slar yang rtsod pa spo ba la gtod cig /des kyang gang na gnas brtan ma grags pa dang ldan pa la thog ma nas smros la gtod cig /des kyang de dag la ci yang blang bar mi bya/ kha ton la sogs pa la yang sbyin par mi bya/ mdun nam rgyab tu 'dug la/ 'di skad du 'phags ma dag 'thab par ma byed cig / gnyi ga la rgyal bar mi 'gyur gyi/ gcig pu la'o zhes smros shig /des zhi bar gyur na legs par zhi ba zhes bya ste/ de ltar mngon sum du 'dul ba yin no/ /gal te gnas brtan mas kyang zhi bar ma nus na rtsod pa spo bar byed pa la slar gtod la/ des kyang dge 'dun la slar dbul bar bya ste/dge 'dun gyis kyang tshul shing mang po len du bcug nas rtsod pa de zhi bar bya'o/ /de la tshul shing 'drim pa la rnam pa bzhi ste/ gang la gnas brtan ma chos bzhin smra ba mi mang na dgab par bya ba dang / chos bzhin smra ba mang na dgab par mi bya ba dang /rna bar bshub pa ste/ khyod kyi mkhan po dang slob dpon la sogs pas ni chos bzhin gyi tshul shing blangs kyi khyod kyis kyang long shig ces bsko ba dang / gang na nad pa mang zhing dge 'dun thams cad kyi dang bzhi'o/ /chos bzhin ma yin par tshul shing len pa rnam pa bcu yod de/chos bzhin ma yin par len pa dang / 'dul bar mi mthun pa dang ma 'dus par len pa dang / cung zad cig gi nyes pa chung ngus dbye bar dogs pa dang / gnas brtan ma'i mthar ma phyin pa sbyor zlog pa dang / shes par ldan pa kha lo sgyur bar mi byed cing 'dul ba 'dzin pa la sogs pa la mi 'dri ba dang /dge 'dun dbye bar bya'o snyam du sems pa dang / chos bzhin ma yin par smra ba mang por 'dod pa dang / dge 'dun dbye bar 'dod pa dang / chos ma yin par smra bar 'gyur ro snyam pa'o/ /de las zlog pa rnam pa bcu ni chos bzhin blangs pa zhes bya'o//tshul shing 'drim pas tshul shing rnam pa gnyis su bya ste/ chos bzhin smra ba'i tshul shing ni dbyibs dang kha dog dang gzugs su ldan pa'o/ /chos ma yin par smra ba'i tshul shing ni slar zlog pa'o/ /de nas tshul shing 'drim pas chos bzhin smra ba'i tshul shing ni lag pa g.yas pas khyer cig /chos bzhin ma yin par smra ba'i tshul shing ni lag pa g.yon pas khyer la/ dge 'dun gyi mdun du chos bzhin smra ba'i tshul shing la ni bsngags par bya ste/ 'di ni chos bzhin smra ba'i tshul shing ste/dgye dgu med pa/ mi 'khyor ba/ drang ba/ kha dog sdug pa yin gyi long shig ces bsgrags par bya'o/ /chos ma yin par smra ba'i tshul shing la ni smad par bya ste/ 'di ni chos bzhin ma yin pa'i tshul shing ste/ dgye dgu can/ 'khyor ba/ mi drang pa/kha dog mi sdug pa/ reg na mi bde ba yin gyi long shig ces brjod par bya'o/ /gang yang rung chos ma yin pa'i tshul shing lag pa brkyang na tshig dang po dang gnyis pa la mi byin par gsum pa la sbyin par bya ste/ 'dul ba las 'das pa'i nyes byas kyang 'chags su chug shig /de nas slar bsdus te grongs la gal te mnyam par gyur na gnas brtan cang shes kauN+Di n+ya'i phyir tshul shing gcig long la chos bzhin smra ba'i tshul shing gi steng du mnan te/ mang bar gyur na chos bzhin smra ba rgyal ba yin pas/ ma dad du mi gnang bar rtsod pa de zhi bar bya ste/gang gis bskyos pa de ltung bar 'gyur ro/ /gal te gcig pu des bsnan kyang chos bzhin ma yin par smra ba'i mang bar gyur na/ dge ba'i phyogs su btang na rtag tu rtsod par mi rigs so snyam du sems la/ sdig pa la lta bzhin zhog la des zhi bar byos shig /gang gis bskyos pa de'i nyes byas so/ /zhus pa las ni btsun pa bcom ldan 'das kyis tshul shing ma spos rtsod pa zhi bar byas pa las/ gang gi phyogs su tshul shing gcig gis lhag par gyur na/ de'i phyogs des rnam par zhi bar bya'o zhes gsungs na/ btsun pa gal te phyogs gnyi ga tshul shing mnyam par gyur na gang gi dbang gis rtsod pa rnams zhi bar bgyi/ u pA li'i phyogs gang gi dge slong dag mang du thos pa'o/ /gnyi ga yang gzhung la mtshungs par gyur na gang gi tshig gzung bar bgyi/ gang byang ba'i yin no//gal te gnyi ga byang bar gyur na/ gang gi gzung bar bgyi/ gal te phal cher byung ba'i shas che ba yin no zhes gsungs so/ /lung bsgo ba med pa'i phyir rtsod pa la rnam pa gsum gyis zhi bar bya ste/ mngon sum dang / dran pa dang / ma myos pas 'dul ba'o/ de la mngon sum du 'dul ba'i mtshan nyid ni sngar bshad pa bzhin no/ /dran pas 'dul ba ni ji ltar gyad bu nor la sa can dang mdza' bos skur ba btab pa las dge 'dun gyis gsol ba dang gnyis kyi las kyis gyad bu nor la nyes pa byas pa dran nam zhes smras na/ dran te ma byas so zhes smras pa de nyid kyis rtsod pa de zhi bar gyur pa lta bu ste/de dang 'dra ba gzhan yang bden pa mthong ba'am/ ngo tsha shes pa dang ldan pa'i gang zag zhig la gzhan gyis nyes pa byas so zhes gleng ba'i mi rigs pa la glengs par gyur na dge 'dun gyis de la nyes pa 'di lta bu byas pa dran nam zhes gsol pa dang /gnyis kyi las kyis smra bar byas te/ gal te bdag gis nyes pa byas par mi dran no zhes zer na/ de gnyis kyi rtsod pa zhi bar bya ba dang / nyes pa gzhan byung na gzhan gyis glengs pa dang / nyes pa slar chos bzhin du byas pa la yang bya'o//ma myos pas 'dul ba ni ji ltar dge slong bye ma can smyos pa'i tshe nyes pa byas pa gzhan gyis glengs pa'i phyir dge 'dun gyis gsol ba dang gnyis kyi las kyis bye ma can la khyod myos pa sangs te dran tshun chad nyes pa byas pa dran nam zhes smras pa las/ sangs te dran tshun chad nyes pa byas pa med do zhes smras pa de nyid kyis rtsod pa de zhi bar gyur pa lta bu'o//gzhan yang de dang 'dra ba la de bzhin du zhi bar bya'o/ /chos bzhin ma yin par dran pas 'dul ba byin pa gsum ste/ nyes pa tha ma byung ba dang / smyos pa'i tshe nyes pa byung ba dang /nyes pa byung ba bsnyon cing khas len pa'o/ /de la dang po ni ma rung bar bya ba'i rigs/ gnyis pa ni ma myos pas 'dul ba sbyin pa'i rigs/ gsum pa ni de'i ngo bo nyid tshol du gzhug pa'i rigs pa'i phyir ro/ /chos bzhin ma yin par ma myos pas 'dul ba sbyin pa ni gcig ste/gang smyos pa ma yin pa las bdag smyos so zhes khas len pa ste/ des ni nyes pa gang byung ba de nyid byed du gzhug pa'i rigs pa'i phyir ro/ /nyes pa'i phyir rtsod pa la rnam pa bzhis zhi bar bya ba ste/ khas blangs pa dang / mngon sum dang / de'i ngo bo nyid tshol du gzhug pa dang / rtswa bkram pa lta bu'i 'dul bas zhi bar bya ste/ de la khas blangs pas 'dul ba ni ji ltar nyes pa byung ba la glengs kyang rung / dran par byas sam/ dran par ma byas kyang rung ste/ dge slong ma'i mdun du nyes pa 'chags shing tshul bzhin byed pa'o//de la chos bzhin ma yin par khas len pa rnam pa bcu ste/ nyes pa'i rigs lnga byung ba las ma byung ngo zhes khas len pa dang / ma byung ba las byung ngo zhes khas len pa ste/ gong ma lnga ni khas blangs kyang tshangs pa sbyin pa'i rigs pa'i phyir ro//slar zlog pa bcu ni chos bzhin du byas pa'o/ /mngon sum du 'dul ba ni ri dgas sgra'i bu nag po las brtsams te/ 'di ni mtshan nyid kyang sngar bshad pa bzhin no/ /de'i ngo bo nyid tshol du gzhug ste/ de'i ngo bo nyid tshol du gzhug pa ni dge 'dun gyi nang du gleng ba phos glengs pa'i tshe/nyes pa khas blangs pa las slar bsnyon pa la slar khas len/ khas len pa la yang bsnyon na/ dge 'dun gyis gsol ba dang gnyis kyi las kyis bsnyon du mi gnang bar nyes pa'i ngo bo nyid gang yin pa tshol du gzhug ste/ de'i ngo bo nyid gtan la ma phab kyi bar du kha ton dang /gso sbyin la sogs pa yang dgag cing nam nyes pa'i ngo bo nyid rnyed de khas blangs na chos bzhin du byed du gzhug pa ste/ de nyid kyis zhi bar bya'o/ /de la rtswa bkram pa lta bu ni dge 'dun phyogs gnyis su chad de rtsod pa las/ phyogs kyi gtso bo gnyis kyis rang rang gi phyogs la/ bdag cag dge ba'i phyir rab tu byung na rtag tu rtsod pa mi rigs pas/ phyogs pha rol po la bzod pa byos la nyes pa yang bshags par bya'o zhes bsgo ste/ nam phyogs gcig gi phyogs gnyis po la spu zhol bar byed/ 'byung brtsol phyag 'tshal bar ston cing / phyogs cig shos kyis kyang de bzhin bya ste/ phan tshun nyes pa gleng bar bya ste/ dper na rtswa bcad na rad rod med cing bsnol mar nyal ba bzhin/ phan tshun nyes pa gleng bar mi byed pa'i phyir rtswa bkram pa lta bus rtsod pa zhi bar byas pa yin no//bya ba'i phyir rtsod pa ni gcig pu nges pas dge 'dun pas dngos po gang la rtsod pa de'i gnyen po zhi bar bya'o/ /ji ltar tshangs pa de ltar gcig pu ste/ /ji ltar brgya byin de ltar gnyis po yin/ /ji ltar rgyal po de ltar gsum po ste/ /de las 'das pa dag ni ca co pa'o/ / zhus pa las zhi bar bgyi ba bdun ma mchis kyang rtsod pa zhi bar 'gyur ba mchis sam/ yod de gal te gnyis las gcig dus las 'das sam/ khyim pa la sogs par gyur tam/ nad yun rings su btab bam/ yul gzhan du song ba'o/ /de lta bus na gang gis tshigs su bcad pa gcig klags kyang rung des chos kyi rnyed pa yongs su spyad par bya ste de la the tshom ma byed cig ces gsungs so//gang gis gang zhi bar bya ba dang / so so'i mtshan nyid bstan pas bslab pa'i dngos po yod pa nyid kyi mtshan nyid bstan pa zhes bya ba bshad zin to//da ni mjug bsdu zhing yongs su dag pa dri ba'i phyir/ rtsod pa byung bar gyur pa'i rnams/ rtsod pa zhi bar bya ba'i chos 'di dag gis chos dang / 'dul ba dang / ston pa'i bstan pa bzhin du dul bar bya zhi bar bya rnam par zhi bar bya'o zhes pa nas/ de de bzhin du 'dzin to zhes bya ba'i bar du gsungs te de ni go sla bas ma bshad do//rtsod pa'i gnyen po rnams bstan pa zhes bya ba la/ gnyis su phye ba'i tha ma zhi bar bya ba'i chos rnams bstan pa zhes bya ba bshad zin to/ /so sor thar pa'i bsdus pa'i don rnam pa brgyad du phye ba'i gnyis pa bslab pa'i dngos po rnams bstan pa zhes bya ba'i rgya cher bshad pa rnams rdzogs so// //da ni bslab pa'i dngos po rnams kyi don bsdu ste bstan pa zhes bya ba ston te/ de'i phyir 'phags ma dag ces bya ba nas dga' ba la rab tu brtson par bya'o zhes bya ba'i bar du gsungs so//'di la yang rnam pa gsum du dbye ste/ so sor thar pa'i lus su bsdu ba dang / ston pa'i bstan par bsdu ba dang rjes su mthun pa'i chos la yang bslab par gzung pa'o/ /de la so sor thar pa'i lus su bsdu ba zhes bya ba ni/ 'phags ma dag bdag gis so sor thar pa'i mdo bshad pa'i gleng gzhi bshad zin to/ /phas pham pa'i chos brgyad dang / dge 'dun lhag ma'i chos nyi shu dang / spang ba'i ltung ba'i chos sum cu rtsa gsum dang / ltung ba brgya brgyad cu dang / so sor bshags par bya ba'i chos bcu gcig dang /bslab pa'i chos mang po dang / rtsod pa zhi bar bya ba'i chos bdun po dag bshad zin to zhes bya ba yin te dge slong mas bslab par bya ba ni 'di rnams yin pas 'di ni so sor thar pa'i lugs yin no/ /de lta bas na dge slong mas gang gi gleng gzhi las byung ba de'i mtshan ma yongs su spang bar bya'o//des kyang zhi bar ma nus na dug gsum gyi gnyen po yid la bya ba dang / dkon mchog gsum la mchod cing bsnyen bkur gyi las byas pa dang / zas bsnyung ba la sogs pas dbral bar bya ste/ des kyang ma nus na tshul khrims rnam par ma dag bzhin dad pas byin pa yongs su spyad pa'i mi rigs kyi bslab pa dbul bar bya'o/ /ston pa'i bstan par bsdu ba zhes bya ba ni/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas de mdor gtogs shing mdor 'dus pa ni 'di snyed do zhes bya ba yin te/de'i mdor gtogs pa zhes bya ba ni tshig tu gtogs pa'o/ /mdor 'dus zhes bya ba ni don 'dir 'dus pa'o/ /'di snyed do zhes bya ba ni gong du bstan pa'i rnams so/ /gzhan ni sngar bshad pa dang mthun pas ma bshad do// //rjes su mthun pa'i chos lnga la yang bslab par gzung ba zhes bya ba ni/ gang gzhan nas 'byung ba chos kyi rjes su mthun pa'i chos de la yang khyed rnams 'dun pa dang / mthun pa dang / dga' ba dang / mi rtsod par sems kun du bsrung ba dang /dran pa dang / dga' ba la rab tu brtson par bya'o zhes bya ba yin te/ de la gang gzhan nas 'byung ba zhes bya ba ni 'dul ba dngos po la sogs pa'i gzhung las 'byung ba'o/ /chos kyi rjes su mthun pa'i chos de la yang zhes bya ba ni mya ngan las 'das pa'i chos dang mthun pa de dag la yang nan tan du bya'o//khyed rnams zhes bya ba ni nyan thos kyi dge slong ma rnams so/ /'dum pa zhes bya ba ni cho ga dang mtshan ma mthun pa la sogs pa ni gong du smos pa drug po las 'byung ba bzhin du sgrubs shig pa'o/ /mthun pa zhes bya ba ni sngar bstan pa bzhi ste tshul gcig tu gyur pa'o//dga' ba zhes bya ba ni dge ba'i phyogs mngon par 'phel ba la dga' ba'o/ /mi rtsod pa ni phan tshun lta ba dang zang zing 'dod pa mi mthun pa'i rtsod pa spangs pa'o/ /sems kun du bsrungs pas ni 'dod pa'i yon tan lnga ste/ dbang po lnga'i dmigs pa la sems mi gtong ba'o/ /yang na gcig gi yid gcig gis bsrung ba'o/ /dran pa ni bya ba'i rigs pa dang / mi rigs pa'i rnams shes shing rjes su bsrung ba'o/ /dga' ba la rab tu brtson par bya'o zhes bya ba ni kha na ma tho ba spong ba la nan tan rgyun mi 'chad par gyis shig ces bya ba'i tha tshig go//bcom ldan 'das kyis thog ma nas gnang ba yang ma lags spangs pa yang ma lags pa de la ji lta bur bsgrub par bgyi/ ji ltar 'dul ba mdo phra mo las 'byung ba 'dul ba'i mdo bsdus pa dran par bya ste/ dge slong ma rnams ngas thog ma nas gnang ba yang med spangs pa yang med pa de gal te rung ba dang mthun la mi rung ba dang mi mthun na rung ba'o snyam du sems la spyad par bya'o/ /mi rung ba dang mthun la rung ba dang mi mthun na ni mi rung ba'o snyam du sems la spang bar bya'o zhes gsungs so//so sor thar pa'i bsdus pa'i don rnam pa brgyad du phye ba'i gsum pa bslab pa'i dngos po rnams kyi don bsdu ba zhes bya ba bshad zin to// //sngon gyi tshul bstan pa zhes bya ba 'dir ston te/ 'di yang rnam pa gnyis su dbye ste/ sangs rgyas bdun gyi 'dul ba bstan pa dang /de dag ston pa gang dag gi gsung rab yin pa'i khungs bstan pa'o/ /de la sangs rgyas bdun gyi 'dul ba bstan pa zhes bya ba ni/ bzod pa dka' thub dam pa bzod pa ni/ /zhes bya ba nas/ drang srong gsungs pa'i lam ni thob par 'gyur//zhes bya ba'i bar du gang gsungs so/ /bskal pa bzang po 'di'i snga rol bskal pa dgu bcu rtsa gcig gi snga rol na skye dgu rnams tshe lo brgyad khri thub pa'i tshe sangs rgyas rnam par gzigs zhes bya ba 'jig rten du byung ste/ ston pa de'i ring la nyan thos rnams mu stegs can gyi dka' thub spyod de/dka' thub la nan tan byed cing de'i 'bras bu dang dka' thub ston pa la mos te/ lam rnying pa rnams ni dka' thub kyis sbyangs/ gsar pa ni ma byas te bkag pas chu lon bzhin te de ltar na tshe phyi mar zag pa med/ zag pa med pas na sdug bsngal zad cing mya ngan las 'da'o zhes de lta bur ston pa ni yang dag pa'i dge sbyong yin no zhes gsungs pa la mos shing gzhan la yang ston par gyur te/dka' thub kyis nyon mongs pa spang bar mi nus pas de'i gnyen por/ /bzod pa dka' thub dam pa bzod pa ni/ / mya ngan 'das pa mchog ces sangs rgyas gsungs/ /rab tu byung ba gzhan la gnod pa dang / /gzhan la 'tshe ba dge sbyong ma yin no/ /zhes gsungs so/ /'di la yang rnam pa gsum du dbye ste/ dka' thub la nan tan byed pa'i gnyen po dang / /de'i 'bras bu la mos pa'i gnyen po dang /gzhan la dka' thub ston par mos pa'i gnyen po bstan pa'o/ /de la dka' thub la nan tan byed pa'i gnyen po bstan pa ni/ /bzod pa dka' thub dam pa bzod pa ni/ /zhes bya ba ste/ mu stegs can lta bu lus nyon mongs shing gdung bar byed pa ni dka' thub kyi dam pa ma yin gyi/sems gdung bar bya ba de gnyis shin tu dka' ba'i phyir dka' thub kyi dam pa ni sems kyis bzod pa ste/ chos la rtogs pa'i bzod pa'o/ /dka' thub de'i 'bras bu la mos pa'i gnyen po bstan pa ni/ /mya ngan 'das pa mchog ces sangs rgyas gsungs//zhes bya ba yin te/ lus la 'tshe ba'i dka' thub kyis mya ngan las mi 'da' ba'i chos la rtogs par bzod pa de'i don ni mya ngan las 'das pa zhes bya ba ste/ de la brten nas mya ngan las 'da' ba'i phyir ro/ /de lta bas na chos la rtogs pa'i ye shes kyis mya ngan las 'da' ba thob par 'gyur gyi//dka' thub kyis ni ma yin no zhes bstan par 'gyur ro/ /gzhan la dka' thub ston par mos pa'i gnyen po bstan pa ni/ /rab tu byung ba gzhan la gnod pa dang / /gzhan la 'tshe ba dge sbyong ma yin no/ /zhes bya'o/ /de la rab tu byung ba zhes bya ba ni khyim nas khyim med par rab tu byung ba'o//gzhan la gnod pa ni lus nyon mongs shing don med pa'i dka' thub la gzhan dag 'dzud cing nyon mongs pa'i phyir gzhan la gnod pa zhes bya'o/ /gzhan la 'tshe ba dge sbyong ma yin no/ /zhes bya ba ni log par sbyor ba la gzhan dag 'dzud cing nyon mongs par byed pa nyid yang dag pa'i dge sbyong ma yin pa'i phyir ro//dge sbyong zhes bya ba ni sdig pa zhi bar bya ba la spyod cing legs par spyod bas na dge sbyong zhes bya ste/ dngos su na 'phags pa rab tu byung ba rnams dang / de'i rjes su rab tu byung ba rnams la bya'o//de bas na nyon mongs pa dang bde bar spyod pa'i mtha' gnyis spangs pa chos la rtog pa'i ye shes kyis mya ngan las 'da'i dka' thub kyis ni ma yin zhes gsungs so/ /bskal pa dgu bcu rtsa gcig gi snga rol skye dgu rnams tshe lo bdun khri thub pa na sangs rgyas gtsug tor can zhes bya ba 'jig rten du byung ste/ston pa de'i ring la nyan thos phal cher mtho ris su smon lam 'debs shing tshangs par spyod pa la mos par gyur te/ mtho ris nyid ngan 'gro log par ltung ba yin pas de las bzlog par bya ba'i gnyen por/ mig dang ldan pas g.yang sa bzhin//thob par bya ba yod pas na/ /mkhas pas 'tsho bar 'jig rten 'dir/ /sdig pa dag ni yongs su spong / /zhes bya ba gsungs te/ ji ltar skyes bu mig dang ldan pas g.yang sa dang / /lam mi bde ba spong bar byed pa de bzhin du/ /gang dag shes rab kyi mig dang ldan pas kyang mtho ris g.yang sa ya nga ba dang 'dra ba spong zhing thob par bya ba'i gnas mya ngan las 'da' ba'i grong khyer du 'jug par bya'o zhes bstan pa'i phyir/mig dang ldan pas yang bzhin/ /thob par bya ba yod pas na/ /zhes bya ba gsungs so/ / de la shes rab ni mig lta bu'o/ /ldan pa zhes bya ba ni thob pa'o/ /bzhin zhes bya ba'i sgra ni rnam pa gnyis su 'dren te/ shes rab ni mig dang 'dra bas mig can bzhin no zhes kyang 'dren/ yang gcig tu na mtho ris g.yang sa ya nga ba bzhin no zhes kyang 'dren pa'i phyir ro/ / mkhas pa zhes bya ba ni thabs la mkhas pa'o/ /'tsho ba ni tshe dang bcas pa'o/ /'jig rten ni sngar bshad pa bzhin no/ /'dir zhes bya ba ni tshe 'di nyid la'o/ /sdig pa dag ni yongs su spong / /zhes bya ba ni mtho ris su smon pa las slar zlog ste/sdig pa'i skye mched mtho ris su mos pa de sdig pa spangs pa ma yin pa'i phyir ro/ /de lta bas na yang dag pa'i shes rab kyi mig dang ldan pas g.yang sa dang 'dra ba'i mtho ris de thabs la mkhas pas spang bar bya'o zhes gsungs so// //bskal pa sum cu rtsa gcig 'das pa'i snga rol skye dgu rnams tshe lo drug khri thub pa na/sangs rgyas thams cad skyob ces bya ba 'jig rten du byung ste/ ston pa de'i ring la nyan thos rnams tshul khrims tsam gyis chog par 'dzin cing / gzhan dag ngan du smra bar zhugs pa rnams la ngag gis skur pa 'debs shing yid kyis gnod par byed de/bdag nyid tshul khrims tsam gyis chog par 'dzin pas kyang dge sbyong gi 'bras bu thob par mi 'gyur la/ gzhan la ngan du smra zhing gnod par byed pa yang skyes bu dam pa'i tshul ma yin pas de dag las bzlog pa'i gnyen por/ skur pa mi gdab gnod mi bya//zhes bya ba la sogs pa gsungs so/ /'di la yang rnam pa gsum du dbye ste/ ngag gis skur pa 'debs pa'i gnyen po dang / yid kyis gnod par byed pa'i gnyen po dang / tshul khrims tsam gyis dge sbyong gi 'bras bu thob par 'dzin pa'i gnyen po bstan pa'o//de la ngag gis skud pa 'debs pa'i gnyen po bstan pa zhes bya ba ni/ skur pa mi gdab ces bya ba yin te/ mu stegs can la sogs pa dang tshul ngan pa mi dge ba spyod pa rnams la tshul khrims la mi gnas shing / sdig pa can no zhes ngan du brjod par mi bya'o/ / yid kyis gnod par byed pa'i gnyen po bstan pa zhes bya ba ni/ gnod mi bya zhes bya ba yin te/ gzhan dang tshul ngan pa can rnams la yid kyis gnod par mi bsam pa'o/ /tshul khrims tsam gyis dge sbyong gi 'bras bu thob par 'dzin pa'i gnyen po bstan pa zhes bya ba ni/ so sor thar pa'ang bsdom par bya/ zas kyi tshod kyang rig par bya/ /bas mtha'i gnas su gnas par bya/ /lhag pa'i sems la yang dag 'jug /'di ni sangs rgyas bstan pa'o/ /zhes bya ba yin te/ de la so sor thar pa zhes bya ba ni mya ngan las 'das pa'i tshul khrims te//ltung ba sde lnga'i nyes pa las bzlog pa'o/ /[(]bsngam [,]bsdam [)]par bya ba ni lus dang ngag dang yid kyi nyes pa rnams so/ /zas kyi tshod kyang rig par bya/ /zhes bya ba ni 'dod pa la bde bar spyod pa'i mtha' spangs pa ste/ so sor thar pa [(]bsngam [,]bsdam [)]pa'i thog mar 'gro ba ni zas kyi tshod rig par bya ba yin te/de la zas kyi tshod rig par bya ba ji lta bu zhe na/ dbang po rnams bsdams nas/ so sor brtags shing zas za bar byed la/ rnam par rtog pa'i phyir ma yin/ rgyags pa'i phyir ma yin/ brgyan pa'i phyir ma yin gyi lus 'di gnas par bya ba dang /'tsho bar bya ba dang / bkres pa bsal ba dang / tshangs par spyad pa la phan par bya ba dang / tshor ba rnying pa rnams spang bar bya ba dang / gsar rnams mi skye bar bya ba dang / bdag 'tsho zhing stobs dang ldan pa dang / kha na ma tho ba med pa dang /bde ba la reg par gnas par yang 'gyur ro snyam du sems pa yin te de ni zas kyi tshod rig pa nyid ces bya'o/ /bas mtha'i gnas su gnas par bya/ /zhes bya ba ni bdag nyid nyon mongs par sbyor ba'i mtha' spangs pa ste/ de ltar zas kyi tshod rig par byas nas kyang /'du 'dzi'i nang du gnas par bya ba ma yin gyi grong gi 'du 'dzi las ring du gyur pa bas mtha'i gnas su sems dben par bya dgos pa'i phyir te/ de la bas mtha'i gnas su gnas par bya ba ji lta bu zhe na/ gnas mal dben pa dgon pa dang /shing drung dang / khang stong dang / ri khrod dang / ri phug dang / rtswa gseb dang / bla gab med pa dang / dur khrod dang / nags 'dab dang / bas mtha'i gnas mal gang yang rung ba dag tu gnas par byed cing / sgrib pa lnga po 'dod pa la 'dun pa dang /gnod sems dang / rmugs pa dang / gnyid dang / rgod pa dang / 'gyod pa dang / the tshom dag las sems rnam par sbyong zhing de sgrib pa de dag las sems rnam par sbyangs nas sgrib pa med pas ting nge 'dzin gyi nyams bde ba la nye bar gnas pa dag yin no//de la/ bas mtha'i gnas su gnas par bya/ /zhes smos pa ni sa 'dzin tsam du zad de/ gong du bstan pa'i gnas mal dben pa gang yang rung ba'o/ /lhag pa'i sems la yang dag 'jug/ /ces bya ba la/ lhag pa'i sems ni so so'i skye bo'i srid pa dang bcas pa'i sems las lhag par gyur pa ste/zag pa med pa'i ting nge 'dzin la bya'o/ /yang dag 'jug ces bya ba ni de sbyor bar byed pa'o/ /de lta bas na mya ngan las 'da' ba'i tshul khrims la gnas te 'dod pa las bde bar spyod pa dang /bdag nyid nyon mongs par sbyor ba'i mtha' gnyis spangs la zhi ba'i gnas su zhugs te/ zhi gnas la brten na thar pa thob par 'gyur ro zhes bstan par 'gyur ro/ /'di ni sangs rgyas bstan pa'o/ /zhes bya ba ni 'di skad du ston pa thams cad skyob kyis gsungs so// //bskal pa bzang po 'di nyid la sangs rgyas stong 'jig rten du 'byung ba la/ dang po ni yang dag par rdzogs pa'i sangs rgyas log par dad sel lo/ /tha ma ni de bzhin gshegs pa mos pa zhes bya ba 'byung ngo / /de la de bzhin gshegs pa log par dad sel dang /gser thub dang / 'od srungs dang / shAkya thub pa dang bzhi ni 'das zin te/ yang dag par rdzogs pa'i sangs rgyas log par dad sel ni skye dgu rnams tshe lo drug khri thub pa na 'jig rten du byung ste/ ston pa de'i ring la nyan thos rnams phal cher rnyed pa dang bkur sti la lhag par chags par gyur pas de las bzlog pa'i gnyen por/ji ltar bung ba me tog bzhin/ /kha dog dri la mi gnod par/ /khu ba gzhibs nas 'phur ba ltar/ /de bzhin thub pa grong du rgyu/ /zhes gsungs so/ /'di'i don ni dpe las rig par bya ste/ji ltar bung ba me tog gi kha dog dang dri la mi gnod par khu ba tsam blangs nas de nyid du chags shing mi gnas par sngon gyi gnas su 'phur zhing 'gro ba de bzhin du/ /rab tu byung ba rnams kyis kyang sgo gsum bsgom zhing grong gi longs spyod la mi gnod par bsod snyoms tsam blangs te/rnyed pa dang / bkur sti la mi chags par rang gi gnas su 'gro bar bya'o zhes pa'i tha tshig go/ /de la bung ba zhes bya ba ni rab tu byung ba rnams so/ /me tog ni grong ngo / /kha dog dri la mi gnod pa ni tshul khrims kyi kha dog dang / ting nge 'dzin gyi dri la gnod par mi bya ste/ tshig 'di gnyis kyis ni rnyed pa dang / bkur sti la chags pa las bzlog par bstan te/ /de yang rnyed pa la chags pas ni tshul khrims kyi kha dog la gnod par 'gyur ba dang / bkur sti la chags pa ni ting nge 'dzin gyi dri la gnod par 'gyur ba'i phyir ro//de bas rnyed pa ni kha dog gi sgrar bstan la bkur sti ni dri'i sgrar bstan te/ khu ba gzhibs zhes bya ba ni grong gi longs spyod la mi gnod par bsod snyoms tsam blang ba'o/ /'phur ba ni de nyid du mi gnas pa'o/ /thub pa zhes bya ba ni lus dang /ngag dang / yid gsum thub pa'o/ /grong du rgyu zhes bya ba ni yon tan gong ma rnams dang ldan pas grong gi bsod snyoms blangs te/ /de nyid du mi gnas par gnas mal dben pa dag tu bag yod par sgrubs shig pa'o/ /bskal pa bzang po 'di gnyis la skye dgu rnams tshe lo sum khri thub pa nas/sangs rgyas gser thub ces bya ba 'jig rten du byung ste/ ston pa de'i sku'i ring la nyan thos rnams phal cher skyes bu dam pa'i chos ma yin pa la zhugs par gyur te/ de dag bdag nyid la ni stod/ gzhan la ni smod cing thos pa'i longs spyod pa dang /tshul khrims kyi longs spyod la zhugs te gzhan dag la mi mthun par brjod cing bya ba dang mi bya bar sbyor ba'i nyes pa la rtog pa na de'i gnyen por/ bdag gi rigs dang mi rigs la/ /zhes bya ba la sogs pa gsungs so/ /'di la yang rnam pa gnyis su dbye ste/thos pa'i longs spyod kyi rjes la gzhan dag la mi mthun par brjod pa'i gnyen po bstan pa dang / tshul khrims kyi longs spyod la zhugs te des gzhan dag la bya ba dang / mi bya bar sbyor ba'i nyes pa la rtog pa'i gnyen po bstan pa'o//de la thos pa'i longs spyod kyi rjes la gzhan dag la mi mthun par brjod pa'i gnyen po bstan pa zhes bya ba ni/ bdag gi rigs dang mi rigs la/ brtag par bya ste gzhan rnams kyi/ /mi mthun pa dang zhes bya ba yin te/ / bdag gi rigs dang mi rigs la/ /brtag par bya ste zhes bya ba ni bdag gis legs par spyad pa dang nyes par spyad pa la brtag par bya'o/ /gzhan rnams kyi/ mi mthun pa dang zhes bya ba ni bdag gis thos pa dang shes pa'i longs spyod ni bzang / gzhan dag gis thos pa dang shes pa ni de lta ba ma yin no zhes mi mthun pa rnams la 'phyas gdags par mi bya'o//min zhes bya ba ni 'di yang yod par sbyar ro/ /tshul khrims kyi longs spyod la zhugs te/ des gzhan dag la bya ba dang mi bya bar sbyor ba'i nyes pa la rtog pa'i gnyen po bstan pa zhes bya ba ni/gzhan dag gis/ byas dang ma byas rnams la min/ /zhes bya ba yin te/ bdag gis tshul khrims bsrungs pa dang / ma bsrungs pa dang / dge ba byas pa dang / ma byas pa rnams la brtag par bya'i gzhan dag gis bsrungs pa dang / ma bsrungs pa dang /byas pa dang ma byas pa rnams la brtag par mi bya'o// //bskal pa bzang po 'di nyid la skye dgu rnams tshe lo nyi khri thub pa na/ sangs rgyas 'od srungs zhes bya ba 'jig rten du byung ste/ ston pa de'i ring la nyan thos rnams las phal cher sred pa dang bcas pa'i ting nge 'dzin gyi ro la chags par gyur te/des nyon mongs pa gtan nas spong bar mi 'gyur bas de las bzlog pa'i gnyen por/ lhag pa'i sems la bag bya ste zhes bya ba la sogs pa gsungs so/ /'di la yang rnam pa bzhir dbye ste/ sred pa'i ting nge 'dzin gyi ro myong ba las bzlog pa dang /bden pa rnams mngon sum du rig par bya ba la gzung pa dang / bden pa mthong ba'i yon tan bstan pa dang / kun du sbyor ba'i lhag ma spang ba'i rim pa bstan pa'o/ /de la sred pa'i ting nge 'dzin gyi ro myong ba las bzlog pa zhes bya ba ni/ lhag pa'i sems la bag bya ste//zhes bya ba'o/ /de la lhag pa'i sems zhes bya ba ni skye bo ma rabs 'du 'dzi can las lhag pa ste/ srid pa dang bcas pa'i ting nge 'dzin la bya'o/ /bag bya ste zhes bya ba ni de zag pa dang bcas pa'i rgyu yin pa'i phyir chags par mi bya'o zhes bya ba'i tha tshig go//bden pa rnams mngon sum du rig par bya ba la gzung bar bya zhes bya ba ni/ thub pa'i thub gnas rnams la bslab/ /ces bya ba yin te/ de la thub pa zhes bya ba ni sku dang gsung thub pa'i phyir thub pa zhes bya ste sangs rgyas rnams la bya'o/ /thub gnas zhes bya ba ni 'phags pa'i bden pa bzhi ste/dus gsum du gshegs pa'i de bzhin gshegs pa rnams kyi rgyu'am thub pa'i skye mched du gyur pa'i phyir 'phags pa'i bden pa rnams la thub gnas zhes bstan to/ /bslab ces bya ba ni mngon sum du rig par bya'o/ /bden pa mthong ba'i yon tan bstan pa zhes bya ba ni/nyer zhi rtag tu dran ldan pa/ /skyob pa mya ngan mi mnga'o/ /zhes bya ba yin te/ de la/ nyer zhi rtag tu dran ldan pa/ /zhes bya ba ni de ltar thub pa'i skye mched du gyur pa/ 'phags pa'i bden pa rnams la bslab pas mthong bas spang bar bya ba'i nyon mongs pa rnams nye bar zhi ba'i phyir nyer zhi zhes bya la/de ltar nye bar zhi na khams gsum gyi mthong bas spang bar bya ba'i nyon mongs pa brgyad cu spangs nas/ bden pa mthong ba'i 'bras bu 'thob par 'gyur te/ de ni mi brjed pa'i chos can yin pas rtag tu dran ldan pa zhes bya'o//skyob pa mya ngan mi mnga'o/ /zhes bya ba ni/ mthong bas spang bar bya ba'i nyon mongs pa rnams spangs nas/ nyon mongs pa'i dbang du ma gyur pa nyid sems kyi rgyud skyob pa yin te/ de la ni mthong bas spang bar bya ba'i nyon mongs pa med pa'i phyir ro//de bas na de ni 'di skad du zag pa dang bcas pa'i ting nge 'dzin thob tu zin kyang de ni skad cig nyon mongs pa med mod kyi/ tshe phyi ma la yang skye zhing zhi bar mi 'gyur bas/ dran pa dang ldan pa ma yin te/ thub pa'i skye mched du 'gyur ba'i 'phags pa'i bden pa rnams la bslabs nas/rtag tu dran pa dang ldan zhing sems kyi rgyud bskyabs pas spang bar bya ba'i nyon mongs pa rnams med do zhes bstan par 'gyur ro/ /kun du sbyor ba'i lhag ma spong ba'i rim pa bstan pa zhes bya ba ni/ byin pas bsod nams rab tu 'phel/ / zhes bya ba la sogs pa yin te/ 'di la yang khams kyi bye brag gis rnam pa gnyis su dbye ste/ 'dod pa'i khams kyi bsgom pas spang bar bya ba'i nyon mongs pa'i gnyen po bstan pa dang / khams gong ma gnyis kyi bsgom pas spang bar bya ba'i nyon mongs pa rnams kyi gnyen po bstan pa'o//de la 'dod pa'i khams kyi bsgom pas spang bar bya ba'i nyon mongs pa'i gnyen po bstan pa ni/ byin pas bsod nams rab tu 'phel/ /bsdams pas dgra sogs mi 'gyur ro/ /dge dang ldan pas sdig pa spong / /zhes bya ba ste/ 'di dag gis ni 'dod pa'i khams kyi bsgom pas spang bar bya ba'i nyon mongs pa 'dod chags dang / khong khro ba dang / ma rig pa dang / nga rgyal dang bzhi spong ste/ de yang ji ltar spong zhe na/ byin pas bsod nams rab tu 'phel/ /zhes bya ba ni 'dod chags spong bar byed de/sbyin pa ni 'dod chags kyi gnyen po yin pas/ /sbyin pa byas na ser sna'i dri ma kun nas dkris pa dang bral zhing gtong ba skyed do/ /bsod nams 'phel bar 'gyur ba'i phyir ro/ /bsdams pas dgra sogs mi 'gyur ro/ /zhes bya ba ni khong khro ba'i gnyen po yin pas/khong khro ba spong bar byed de/ lus dang ngag dang yid gsum bsdams shing gal te gzhan dag gis smad dam/ khros sam/ spyos kyang rung / lag pa dang / bong ba dang / dbyug pa dang / mtshon cha'i reg pa rnams kyis bsnun kyang rung ste/bdag la bar chad du gyur na mi rung ngo snyam nas sems sdang bar mi byed cing sdig pa'i tshig mi 'byin te/ de nyid la dmigs nas byams pa dang ldan pa'i sems kyis phyogs thams cad du khyab par byas te gnas nas/ de gzhi des tshe 'di la bdag dang gzhan gyi rgyud la yod pa'i 'khon rab tu zhi bar gyur pa dang /phyi ma la yang gnod pa med pa'i 'jig rten du skye bar 'gyur la/ 'khon pa mang bar mi 'gyur zhing 'gran zla mang bar mi 'gyur te/ 'jig rten gyis mthong na dga' bar 'gyur zhing / zhe sdang gis dgra mi sogs pa'i phyir ro//dge dang ldan pas sdig pa spong / /zhes bya ba ni ma rig pa dang / nga rgyal gnyis spong ste/ de la dge ba dang ldan pa zhes bya ba ni lhag pa'i sems la bya ste/ ma rig pa dang / nga rgyal gyi bag chags phra zhing spang dka' ba'i phyir lhag pa'i sems kyis spong ngo //sdig pa spong zhes bya ba ni ma rig pa dang nga rgyal gyi bag chags la sdig pa zhes bya ste/ /de gnyis kyang lhag pa'i sems la brten nas lhag pa'i shes rab skye ste/ bden pa mngon par rtogs pa'i dus na ngan song du 'gro ba'i sdig pa'i rgyu de gnyis spong bar 'gyur ba'i phyir ro//khams gong ma gnyis kyi bsgom pas spang bar bya ba'i nyon mongs pa rnams kyi gnyen po bstan pa zhes bya ba ni/ nyon mongs zad pas mya ngan 'das/ /zhes bya ba yin te/ 'di ni gzugs dang gzugs med pa'i khams kyi bsgom pas spang bar bya ba'i nyon mongs pa 'dod chags dang /ma rig pa dang / nga rgyal khams gcig la yang gsum gsum ste/ drug spong bar byed de/ de yang khams gong ma gnyis kyi bsgom pas spang bar bya ba'i nyon mongs pa rnams 'phags pa'i lam gyis yongs su gtugs nas phung po'i lhag ma dang bcas pa dang phung po lhag ma med pa'i mya ngan las 'das pa'i dbyings su mya ngan las 'da' bar 'gyur ba'i phyir ro//bskal pa bzang po 'di nyid la skye dgu rnams tshe lo brgya thub pa na/ sangs rgyas shAkya thub pa 'jig rten du byung ste/ ston pa 'di'i ring la nyan thos rnams phal cher nyon mongs pa mang bas sdig pa rnams sogs par byed cing dge ba'i phyogs cung zad tsam gyis chog par 'dzin te/des 'bras bu chen po 'grub par 'dod/ 'dod pa la nye bar bsgrubs shing sems nang du 'jog mi nus pas nyes pa de dag las bzlog par bya ba dang /gzhan yang de dang de'i nyan thos rnams la 'phan gzhan 'byung bas lo bcu gnyis kyi bar du so sor thar pa'i mdo/ sdig pa thams cad mi bya ste/ /zhes bya ba nas/ drang srong gsungs pa'i lam ni thob par 'gyur/ /zhes bya ba'i bar 'di dag gsungs so//'di la yang rnam pa gsum du dbye ste/ sdig pa spang ba dang / sdig pa spang ba'i thabs bstan pa dang / de la zhugs pa rnams dran pa mi nyams par bya ba'i thabs bstan pa'o/ /de la sdig pa spang zhes bya ba ni/ sdig pa thams cad mi bya ste//dge ba phun sum tshogs pa bya/ /rang gi sems ni yongs su gdul/ /'di ni sangs rgyas bstan pa'o/ /zhes bya ba'o/ /'di la yang rnam pa gsum du dbye ste/ sdig pa rnams sogs pa'i gnyen po dang / dge ba'i phyogs cung zad tsam gyis chog par 'dzin cing de'i 'bras bu chen por 'dod pa'i gnyen po dang /'dod pa la nye bar bsgrubs shing sems nang du 'jog mi nus pa'i gnyen po bstan pa ste/ 'di gsum tshigs su bcad pa'i rkang pa dang po gsum dang rim bzhin no/ /de la dang po/ sdig pa thams cad mi bya ste//zhes bya ba ni lus kyi nyes pa gsum spang bar bya'o/ /dge ba phun sum tshogs par spyad/ /ces bya ba ni ngag gi nyes pa bzhi spang bar bya ba'o/ /rang gi sems ni yongs su gdul/ /zhes bya ba ni yid kyi nyes pa gsum spang ba'i phyir lhag pa'i sems la bya'o/ / 'di ni sangs rgyas bstan pa'o/ /zhes bya ba ni de ltar sgrubs shig pa'o/ /sdig pa spang ba'i thabs bstan pa zhes bya ba ni/ lus kyi sdom pa legs pa ste/ /ngag gi sdom pa legs pa yin/ /yid kyi sdom pa legs pa ste/ /thams cad du ni sdom pa legs/ / kun tu bsdams pa'i dge slong ni/ /sdug bsngal kun las rab tu grol/ /zhes bya ba yin te/ sngar bstan pa'i lus dang ngag dang yid kyi nyes pa rnams spangs te/ sdom pa dang ldan na so so'i nyes pa las grol zhing thar pa thob par 'gyur bas legs so zhes bsngags pa'o/ / de la thams cad du ni sdom pa legs/ /zhes bya ba ni gcig bsdams na yang legs pa yin na thams cad lta ci smos zhes bstan pa'o/ /gzhan ni go sla bas ma bshad do/ /de la zhugs pa'i rnams dran pa mi nyams par bya ba'i thabs bstan pa zhes bya ba ni/ ngag rnams bsrung zhing yid kyis rab bsdams te//lus kyis mi dge ba dag mi byed cing / /las lam gsum po 'di dag rab spangs na/ /drang srong gsungs pa'i lam ni thob par 'gyur/ /zhes bya ba yin te/ de la ngag rnams bsrung zhing bya ba ni gleng gzhi'i dge slong mas glengs pa'i tshe nyes pa chos bzhin du byed pa'o//yid kyis rab bsdams zhes bya ba ni yid kyi nyes pa rnams bsdam par bya zhing gzhan gyis gtses na yang khong khro bar mi byed pa'o/ /lus kyis mi dge ba dag mi byed ces bya ba ni spyod yul ma yin pa lngar mi 'gro ba ste rgyal po'i pho brang dang //chang 'tshong ba dang / gzugs kyis 'tsho ba dang / rol mo mkhan dang / rigs ngan gyi khyim rnams su mi 'gro ba dang / gzhan yang bsod snyoms spyod pa'i zas ma brtags pa rnams mi blang ba dang / lus kyis gzhan dag la 'tshe bar mi byed pa'o/ / las lam gsum zhes bya ba la/ de la las ni 'du byed sems pa yin te/ sems pa de yang brnab sems dang / gnod sems dang / log par lta ba gsum gyi dbang du 'gro zhing mngon par 'du byed pas na/ 'di gsum ni las kyi lam zhes bya'o/ /srog gcod pa la sogs pa lus dang ngag gi las rnams bdun ni las nyid kyang yin la las 'di rnams slong zhing bskyed pa'i sems pa de yang de dag la brten cing 'jug pas na las kyi lam yang yin no//rab sbyangs zhes bya ba ni de dag gi sdom pa dang ldan pa'o/ /drang srong zhes bya ba ni sngar bshad pa bzhin no//de bzhin gshegs pa rnams la bya'o/ /lam zhes bya ba ni 'phags pa'i lam ste/ de yang las lam gsum po dag sbyangs pas 'thob par 'gyur ba'i phyir ro/ /sngon gyi tshul bstan pa zhes bya ba la/ rnam pa gnyis su phye ba'i tha ma de dag ston pa gang dag gi gsung rab yin pa'i khungs bstan pa zhes bya ba 'dir ston te/de'i phyir/ sangs rgyas rnam gzigs gtsug tor thams cad skyob/ /log par dad sel gser thub 'od srungs dang / /shAkya thub pa gau tam lha yi lha/ /mi 'dul kha lo sgyur ba bla na med//'jig rten mgon po skyob pa mchog /sangs rgyas dpa' bo bdun po dag /grags ldan rnams kyis so sor thar/ /'di ni rab tu rgyas par bshad/ /ces bya ba gsungs te/ 'di ni yang dag par sdud par byed pas/ sngar gong du bstan pa'i sangs rgyas bdun gyi 'dul ba de dag ston pa gang dag gi gsung rab yin pa ma 'ongs pa'i skye bo rnams kyis mi shes kyis dogs pa'i phyir smos te/sangs rgyas bdun gyi 'dul ba sngar bstan pa dang ston pa 'di bdun rim bzhin du sbyar ro zhes bya ba'i tha tshig go/ /de las sangs rgyas drug gi mtshan bshad pa ni/gzhan nas 'byung ba bzhin du sbyar ro/ /shAkya thub pa zhes bya ba ni nam rgyal bu don grub lum bi ni'i tshal du bltams te/ rin po che sna bzhi las byas pa'i khyogs kyi steng du bzhag nas skye bo mang po dang lha dag gis bskor zhing bsti stang byas te/grong khyer ser skya'i gnas su gshegs pa'i tshe/ shAkya rnams ni nga rgyal can/ kha drag pa/ mi 'jigs pa yin na/ gzhon nu grong khyer du gshegs pas de dag thub pa bzhin du 'khod par gyur pa dang / rgyal po zas gtsang mas gzhon nu 'di shAkya rnams thub pas na/shAkya thub pa zhes mtshan gsol ba'i phyir ro/ /yang na sku dang / gsung thub pa'i phyir thub pa zhes bya'o/ /gau tam zhes bya ba ni gau'i sgra las drangs na/ tshig dang / phyogs dang / sa dang / 'od dang / rdo rje dang / ba lang dang / mtho ris la sogs pa rnam pa du ma la snyegs mod kyi/ skabs 'dir ni rus la bya'o/ /lha'i lha zhes bya ba ni lha la rnam pa gnyis te/ rnam par dag pa'i lha dang / tshe'i lha'o/ /de la sangs rgyas thams cad ni rab tu byung ba'i phyir rnam par dag pa'i lha zhes bya/de las gzhan pa rnams ni skye ba'i phyir tshe'i lha zhes bya ba ste/ rnam par dag pa'i lha rnams kyi nang na de bzhin gshegs pa shAkya thub pa ni snyigs ma lnga po sems can dang / tshe dang / bskal pa dang / nyon mongs pa dang / lta ba rnams rnyog pa'i dus su gdul dka' ba rnams gdul zhing kha lo sgyur ba'i phyir lha'i lha zhes bya'o//yang na yum gyi lhums su bltams pa'i tshe 'jig rten gyi lha thams cad kyis phyag byas pa'i phyir yang lha'i lha zhes bya'o/ /yang lha'i lha zhes bya ba ni shAkya rnams kyi lha gnod sbyin shAkya skyed pa zhes bya ba zhig yod de/shAkya dag su yang rung bu pho dang bu mo dag byung na/ de dag gis thog mar gnod sbyin shAkya skyed pa'i drung du de'i rkang pa la phyag 'tshal ba'i phyir khrid par byed de/ nam rgyal bu don grub bltams pa'i dus de na yang rgyal po zas gtsang mas blon po rnams la kye deng la/gzhon nu 'di gnod sbyin shAkya skyed pa'i rkang pa la phyag 'tshal du chug cig ces bsgo ba dang / blon po rnams kyis kyang de bzhin du de'i mdun du khrid do/ /de nas gnod sbyin shAkya skyed pas byang chub sems dpa' rgyang nas mthong ba dang /de rtabs bzhin myur zhing rings pa'i 'gros su song nas byang chub sems dpa'i zhabs la phyag 'tshal lo/ /de nas rgyal po zas gtsang mas kye gnod sbyin shAkya skyed pas kyang gzhon nu 'di'i zhabs la phyag byas pas 'di ni lha'i nang na yang lha ste/ gzhon nu 'di'i ming lha'i lha zhes gdags so zhes mtshan gsol ba'i phyir ro/ /de la/ mi 'dul kha lo sgyur ba bla na med/ /ces bya ba ni/ de bzhin gshegs pa rnams ngan song rnams 'dul ba'i phyir yang rjes su 'dzin mod kyi/ ngan song gi lus de nyid kyis 'phags pa'i bden pa'i snod du mi 'gyur bas na/de gdul ba zhes ma bshad de 'phags pa'i bden pa chud pa'i gnas ni mi yin pas mi 'dul zhes bstan to/ /de yang ji ltar 'dul zhing kha lo sgyur zhe na/ sor mo'i phreng ba la sogs pa zhe sdang che ba dang /dga' bo la sogs pa 'dod chags che ba dang / lteng rgyas 'od srungs la sogs pa gti mug che ba 'dul ba'i sems can rta rgod dang 'dra ba gdul dka' ba rnams 'jam pos gdul bar 'os pa yang 'jam pos btul/ drag pos gdul bar 'os pa rnams kyang drag pos btul/gnyi gas gdul bar 'os pa rnams kyang gnyi gas btul te/ thabs bzang zhing sla bas thabs bzhin du btul nas sgrub pa'i mchog mya ngan las 'das pa'i gnas su kha lo sgyur zhing 'jog pas na/ mi 'dul kha lo sgyur ba bla na med/ /ces bya'o/ / bla na med ces bya ba ni gong na med pa'i phyir ro/ /'jig rten mgon po skyob pa mchog /ces bya ba ni/ brgya byin dang tshangs pa la sogs pa 'jig rten gyi mgon po skyob pa yin mod kyi/ de bzhin gshegs pa rnams ni sems can rnams ngan song gsum las skyob cing mya ngan las 'das pa'i gnas su 'jog pas na khyad par du bstan pa'i phyir skyob pa mchog ces bya'o//sangs rgyas dpa'o bo bdun po dag /ces bya ba ni bdud bzhi las rgyal ba'i phyir te rnam par gzigs la sogs pa'o/ /grags ldan rnams kyis so sor thar/ /'di ni rab tu rgyas par bshad//ces bya ba la grags ldan zhes bya ba ni de bzhin gshegs pa bdun po de dag go/ /gzhan ni go sla bas bshad pa ma byas so/ /so sor thar pa'i bsdus pa'i don rnam pa brgyad du phye ba'i bzhi pa sngon gyi tshul bstan pa zhes bya ba bshad zin to// // da ni so sor thar pa nyid kyi 'bras bu bstan pa zhes bya ba 'dir ston te/ de'i phyir/ 'di la sangs rgyas rnams dang gang / /zhes bya ba la sogs pa gsungs so/ /'di la yang rnam pa gsum du dbye ste/ so sor thar pa nyid kyi 'bras bu mdor bstan pa dang / spro ba bskyed pa dang / so sor thar pa nyid la nan tan byed pa'i legs pa brjod pa'o/ /de la so sor thar pa nyid kyi 'bras bu mdor bstan pa zhes bya ba ni/ /'di la sangs rgyas rnams dang gang / /sangs rgyas nyan thos rnams kyang gus/ /'di la gus bcas gyur pa ni/ /'dus ma byas pa thob par 'gyur//zhes bya ba yin te/ 'di la zhes bya ba ni so sor thar pa 'di nyid la'o/ /sangs rgyas rnams dang sangs rgyas kyi nyan thos kyang gus zhes bya ba ni/ so sor thar pa 'di nyid la dus gsum du gshegs pa'i sangs rgyas rnams dang de dag gi nyan thos rnams kyang gus par mdzad de/thams cad kyang 'di nyid la brten nas chos kyi sku dang rnam par grol ba brnyes shing thob par 'gyur ba'i phyir ro/ /'di la gus dang bcas pa ni/ /'dus ma byas pa thob par 'gyur/ /zhes bya ba ni sangs rgyas dang nyan thos ma yin pa su yang rung so sor thar pa 'di la zhes skyed de nyams su blangs na mya ngan las 'das pa rnam pa gnyis thob par 'gyur ro zhes so sor thar pa'i 'bras bu mdor bstan pa'o//spro ba skyed pa zhes bya ba ni/ brtsam par bya zhing dbyung bar bya/ /zhes bya ba la sogs pa'o/ /'di la yang rnam pa gsum du dbye ste/rab tu dbyung bar bskul ba dang / mthong ba'i lam bskyed pa dang / bsgom pa'i lam bskyed pa'o/ /de la rab tu dbyung bar bskul ba zhes bya ba ni/ brtsam par bya zhing dbyung bar bya/ /zhes gsungs so/ /brtsam par bya zhes bya ba ni rab tu dbyung bar brtsal ba'o//'byung bar bya zhes bya ba ni khyim nas khyim med par rab tu 'byung ba'o/ /rab tu 'byung ba la yon tan bcu yod de/ bu dang chung ma dang nor la sred pa med par 'gyur/ de 'dod pa med pas yongs su 'dzin par 'gyur/ dgon par gnas pa la dga' bar 'gyur/dkon mchog gsum la ri mo dang bcas par 'gyur/ byis pa'i spyod yul rnam par spong bar byed/ ngan 'gror 'gro ba'i chos rnams spong bar byed/ /bde 'gror 'gro ba'i chos rnams yongs su tshol bar byed/ lha dang mi rnams kyang rtag tu smon par byed/de bzhin gshegs pa'i gsung rab la rab tu byung ba rnyed par 'gyur/ myur du yongs su mya ngan las 'das par 'gyur te/ de bas na rab tu byung ba la brtson par bya'o/ /mthong ba'i lam skyed pa zhes bya ba ni/ sangs rgyas bstan la 'jug par bya//zhes bya ba yin te/ de ltar rab tu byung bas mi chog gi/ sangs rgyas kyi bstan pa 'phags pa'i bden pa rnams la 'jug cing mthong ba'i lam skyes nas/ mthong bas spang bar bya ba'i nyon mongs pa rnams spongs shig pa'o/ /bsgom pa'i lam skyed pa zhes bya ba ni/'dam bu'i khyim la glang chen bzhin/ /'chi bdag sde rnams gzhom par bya/ /zhes bya ba yin te/ ji ltar glang po ches 'dam bu'i khyim brdzis na rdul du bshig ste med par byed pa de bzhin du/ mthong ba'i lam gyi gong du bsgom pa'i lam bskyed nas/ 'khor ba'i nyes dmigs 'chi bdag gi bdud dang /de'i rgyu ma rig pa la sogs pa bcom ste/ mya ngan las 'das pa thob par bya'o zhes bstan pa'o/ /de la 'chi bdag sde rnams zhes bya ba la 'chi bdag ni gtso bo ste rgyal po lta bu'o/ /sde rnams zhes bya ba ni/ skye ba la sogs pa yan lag bcu gcig po rnams te/de dag ni 'chi bdag de'i 'khor yin pas de dag kyang spang bar bya'o zhes bstan pa'o/ /so sor thar pa nyid la nan tan byed pa'i legs pa brjod pa zhes bya ba ni/ gang zhig bar du bag yod par/ /chos 'dul 'di la spyod 'gyur ba//skye ba'i 'khor ba rab spangs nas/ /sdug bsngal tha mar byed par 'gyur/ /zhes gsungs so/ /de la gang zhig ces bya ba ni su yang rung ba'o/ /bag yod par zhes bya ba ni bag med pa'i gnyen po ste/ ma chags pa nas brtson 'grus kyi bar la gnas nas mi dge ba'i chos spong zhing de'i gnyen po dge ba'i chos rnams kyang bsgom pa'o//chos 'dul 'di la spyod 'gyur ba/ /zhes bya ba ni/ so sor thar pa'i chos 'dul ba 'di nyid la'o/ /skye ba'i 'khor ba zhes bya ba ni nye bar len pa'i phung po rnams so/ /rab spangs zhes bya ba ni gtan du'o//sdug bsngal tha mar byed pa ni skye ba'i 'khor ba spang zhing mya ngan las 'da' ba 'thob par 'gyur ba'i phyir ro/ /so sor thar pa bsdus pa'i don rnam pa brgyad du phye ba'i lnga pa so sor thar pa nyid kyi 'bras bu bstan pa zhes bya ba bshad zin to// //da gso sbyong gi dgos pa bstan pa zhes bya ba ston te/de'i phyir/ phan tshun tshul khrims bsrung ba dang / /bstan pa 'phel bar bya ba'i phyir/ /so sor thar pa bshad pas na/ /dge 'dun gyis ni gso sbyong byas/ /zhes bya ba gsungs so/ /phan tshun gcig gi nyes pa las gcig 'byin cing tshul khrims bsrung ba dang /de bzhin gshegs pa rnams kyi bstan pa 'jig rten na yun ring du gnas shing rgyas par bya ba'i phyir/ zla ba phyed phyed cing dge 'dun 'dus te so sor thar pa'i mdo bton nas gso sbyong chos bzhin du byed pa yin te/ 'di ni gso sbyong gi dgos pa'o/ /tshig gnyer gzhan ni sngar bstan pa dag dang 'dra bas ma bshad do// //so sor thar pa'i bsdus pa'i don rnam pa brgyad du phye ba'i drug pa gso sbyong gi dgos pa bstan pa zhes bya ba bshad zin to// //tshul khrims ji ltar bsrung ba'i tshul bstan pa zhes bya ba ston te/de'i phyir/ gang gi phyir ni mdo bshad dang / /gang phyir gso sbyong byas gyur pa/ /tshul khrims de ni bsrung bya ste/ /g.yag rnga'i rtse mo ji bzhin no/ /zhes bya ba gsungs so/ /de ltar so sor thar pa'i mdo bshad cing /gso sbyong byed pa yang tshul khrims bsrung bar bya ba'i phyir byed pa yin te/ tshul khrims de yang ji ltar bsrung bar bya zhe na/ ji ltar gangs kyi g.yag ces bya ba de rnga ma'i nyag ma cig shing dag la thogs nas/ de bsrung ba'i phyir ma shi bar du sdod pa de bzhin du/nyes byas phra mo yan chad la yang srog lus la mi lta bar bsrung bar bya'o zhes bya ba'i don to/ /so sor thar pa'i bsdus pa'i don rnam pa brgyad du phye ba'i bdun pa tshul khrims ji ltar bsrung bar bya ba'i tshul bstan pa zhes bya ba bshad zin to// // da ni so sor thar pa bsdus pa'i don brgyad du phye ba'i tha ma 'jig rten yongs la bsod nams bsngo ba zhes bya ba bstan pa'i phyir/ so sor thar pa bshad pa yi/ /bsod nams grub pa gang yod pa/ /des ni 'jig rten ma lus pa/ /thub dbang go 'phang thob par shog /ces bya ba gsungs so/ /'di ni yang dag par sdud par byed pa dag gis brtsams pa'i mthar phyin nas 'gro ba yongs la bsod nams bsngo ba'o/ /de la thub pa ni nyan thos dang rang rgyal ba rnams so/ /thub pa de dag gi dbang po ni de bzhin gshegs pa dgra bcom pa yang dag par rdzogs pa'i sangs rgyas rnams te/de ltar so sor thar pa'i mdo bton pa'i dge ba'i rtsa ba ci yod pa de dag kyang gzhan du mi bsngo'i 'gro ba rnams bla na med pa'i go 'phang thob par gyur cig ces bsngo ba'o/ /so sor thar pa'i bshad sbyar 'di//'dul ba rgya mtsho las btus pa'i/ /bsod nams cung zad gang bskyed des/ /'gro rnams sangs rgyas 'grub par shog /'phags pa thams cad yod par smra ba'i rtsa ba'i dge slong ma'i so sor thar pa'i mdo'i 'grel pa rdzogs so// //