CLOSE WINDOW

D4098
བོད་ཡིག

zhu chen gyi lo tsA ba ban+de ye shes sde la sogs pas bsgyur cing zhus te gtan la phab pa'o// //[ ]@##/ /rgya gar skad du/ pra ka ra Na a b+hi d+har+m+ma a ba tA ra nA ma/ bod skad du/ rab tu byed pa chos mngon pa la 'jug pa zhes bya ba/ 'jam dpal gzhon nur gyur pa la phyag 'tshal lo//lha mi'i snying gi mun pa ngan song rtsa/ /gsung gi 'od zer dag gis gang gis bcom/ /thams cad mkhyen nyid dkyil 'khor dri med pa/ /sangs rgyas nyi ma de la phyag 'tshal lo/ /gang dag chos mngon tshul gyis chos rnams kyi/ /mtshan nyid rnams la rmongs pa drungs phyung zhing //thams cad mkhyen pa'i bka' yi gnas gyur pa/ /de dag la ni mgo bos bdag phyag 'tshal/ /blo zhan rnams kyis ma legs bshad pa yi/ /mun pas thub pa'i gsung ni khebs pa la/ /gang gi sgron mas gsal bar mdzad pa yi/ /sgron ma mdzad pa de la phyag 'tshal lo//la la dag ni thub pa'i dbang po'i gsung rab mtha' dag gi don dang / tshig gzung ba'i skal ba yod pa'i ngang tshul can dge ba dag yin du zin kyang / 'phral gyi bya ba la thogs pas ma thob pa'i nyams pas yongs su nyams par 'gyur ba dang / shes rab zhan pa la la dag chos mngon pa klags pa'i thos pa tsam gyis skrag par 'gyur la/de dag rtag tu khong du chud par 'dod pa yang yod de/ de bas na de dag dga' bar bya ba'i phyir/ bdag gis chos mngon pa'i mtshan nyid kyi rgya mtsho la 'jug pa 'di brtsam mo/ /'di ltar bde bar gshegs pa rnams kyi dngos po brgyad de/gzugs dang tshor ba dang 'du shes dang / 'du byed rnams dang / rnam par shes pa dang / nam mkha' dang / so sor brtags pa ma yin pas 'gog pa dang / so sor brtags pas 'gog pa'o/ /de la gzugs ni rnam pa gnyis te 'byung ba dang 'byung ba las gyur pa'i gzugs so//'byung ba dag ni bzhi ste sa dang chu dang me dang rlung gi khams rnams so/ /khams dag ni rang dang spyi'i mtshan 'dzin pa dang / rgyur byas pa'i gzugs thams cad 'dzin pa'i phyir ro/ /de dag gi rang bzhin ni sra ba dang gsher ba dang tsha ba dang g.yo ba nyid dag go/ / las ni rten pa dang sbyor ba dang smin par byed pa dang bskyod pa dag ste/ grangs ji lta ba bzhin no/ /de dag ni chen po yang yin la 'byung bar 'gyur bas na 'byung ba chen po dag ste/ nam mkha' ni 'byung ba chen po ma yin no/ /de dag ni rgyur byas pa'i gzugs la khyab pa'i phyir ro/ /mi dgos pa dang mi nus pa'i phyir bzhi kho na ste khri'i rkang pa bzhin no//'byung ba las gyur pa ni mig dang rna ba dang sna dang lce dang lus dang / gzugs dang sgra dang dri dang ro dang reg bya'i phyogs gcig dang rnam par rig byed ma yin pa'o/ /'byung ba dag las 'byung bas na 'byung ba las gyur pa ste 'byung ba la brten pa'i don gang yin pa'o//de la mig ni mig gi rnam par shes pa'i rten lta bu gzugs la lta ba'i bya ba can gzugs pa'o/ /'dis ni rna ba dang sna dang lce dang lus kyi dbang po rnams kyang so sor bstan to/ /gzugs ni rnam pa gnyis te kha dog gi bdag nyid dang / dbyibs kyi bdag nyid de/ ji skad du bcom ldan 'das kyis kha dog ngan pa dang dbyibs ngan par 'gyur ro zhes gsungs pa lta bu'o/ /de la kha dog gi gzugs ni rnam pa bcu gnyis te/ sngon po dang ser po dang / dmar po dang / dkar po dang / sprin dang du ba dang / rdul dang / khug rna dang /grib ma dang / nyi ma dang / snang ba dang mun pa'o/ /dbyibs ni rnam pa brgyad de ring po dang / thung ngu dang / lham pa dang / dkyil 'khor dang / phya le ba dang / phya le ba ma yin pa dang / sgang dang gshong ngo / /de la khug rna ni lho bur ro/ /snang ba ni zla ba dang skar ma dang me dang sman dang nor bu rnams kyi 'od do//grib ma ni gang na gzugs dag snang ba'o/ /de las bzlog pa ni mun pa'o/ /lham pa ni gru bzhi'o/ /dkyil 'khor ni zlum po'o/ /phya le ba ni dbyibs mnyam pa'o/ /phya le ba ma yin pa ni dbyibs mi mnyam pa'o/ /lhag ma ni brda phrad par bla bsam bshad do//rnam pa nyi shu po 'di dag mig gi rnam par shes pa dang / des drangs pa'i yid kyi rnam par shes pas rnam par rig go/ /sgra ni zin pa dang ma zin pa'i 'byung ba chen po'i bye brag gis rnam pa gnyis so/ /de la lus su gtogs pa rnams ni zin pa dag ste sems pa dang bcas pa'i don gang yin pa'o//bzlog pa ni ma zin pa dag go/ /gang snga mas bskyed pa de ni zin pa'i 'byung ba chen po'i rgyu las byung ba ste/ 'di lta ste/ lag pa dang smra ba'i sgra'o/ /gang phyi mas bskyed pa de ni ma zin pa'i 'byung ba chen po'i rgyu las byung ba ste/ 'di lta ste rlung dang nags tshal dang 'bab chu'i sgra ste/sems can du ston pa dang / sems can du ston pa ma yin pa rnam pa bzhi'o/ /'di lta ste smra ba'i sgra ni sems can du ston pa'o/ /lhag ma ni sems can du ston pa ma yin pa'o/ /gzhan yang sprul pa'i smra ba'i sgra ni sems can du ston pa'o/ /lhag ma ni sems can du ston pa ma yin pa'o//de yang yid du 'ong ba dang yid du mi 'ong ba'i bye brag gis rnam pa brgyad du 'gyur ro/ /rnam pa brgyad po de yang rna ba'i rnam par shes pa dang des drangs pa'i yid kyi rnam par shes pas rnam par rig go/ /dri ni rnam pa gsum ste dri zhim pa dang dri nga ba dang dri mnyam pa'o/ /dri zhim pa ni dbang po'i 'byung ba chen po rgyas par byed pa'o//de las bzlog pa ni dri nga ba'o/ /gnyi ga las bzlog pa ni dri mnyam pa ste rnam pa gsum po 'di yang sna'i rnam par shes pa dang des drangs pa'i yid kyi rnam par shes pas rnam par rig go/ /ro ni mngar ba dang skyur ba dang / lan tsha dang kha ba dang tsha ba dang bska ba'i bye brag gis rnam pa drug ste/drug po de dag kyang lce'i rnam par shes pa dang des drangs pa'i yid kyi rnam par shes pas rnam par rig go/ /reg bya'i phyogs gcig ni rnam pa bdun te/ 'jam pa nyid dang / rtsub pa nyid dang lci ba nyid dang yang ba nyid dang / grang ba dang bkres pa dang skom pa'o/ /de la 'jam pa ni mnyen pa ste reg tu mi bzod pa'i don gang yin pa'o/ /rtsub pa ni rud rud po'o/ /lci ba ni gang gis srang gi mgo dma' bar 'gyur ba'o/ /yang ba ni de las bzlog pa'o/ /grang ba ni gang gis nyan pas tsha ba 'dod pa'o/ /bkres pa ni zas 'dod pa'i rgyu'o//skom pa ni 'thung 'dod pa'i rgyu'o/ /rgyu la 'bras bu gdags par bya ste/ ji skad du sangs rgyas rnams ni 'byung ba bde zhes bya ba la sogs pa lta bu'o/ /'byung ba chen po 'dus pa me dang chu'i shas che na 'jam pa'o/ /sa dang rlung gi shas chen rtsub pa'o/ /sa dang chu'i shas che na lci ba'o//me dang rlung gi shas che na yang ba'o/ /chu dang rlung gi shas che na grang ba'o/ /rlung gi shas che na bkres pa'o/ /me'i khams kyi shas che na skom pa'o/ /bdun po de dag dang 'byung ba chen po bzhi rnams ni lus kyi rnam par shes pa dang / des drangs pa'i yid kyi rnam par shes pas rnam par rig go//sems dang sems las byung ba'i 'byung ba rnam pa tha dad pa dag gis gzhan la rig par byed pas na rnam par rig byed do/ /de bzhin du gzhan la rig par mi byed pas rnam par rig byed ma yin pa ste bram ze ma yin no zhes bya ba bzhin du de dang 'dra ba la ma yin par brjod do//de'i mtshan nyid ni rnam par rig byed dang sems dang 'byung ba chen po'i bye brag gis 'phangs pa rnam par ma g.yengs pa dang / de ma yin pa'i sems dang sems med pa yang rung ste/ gang dge ba dang mi dge ba'i gzugs kyi rgyun dge slong la sogs pa rnam par gzhag pa'i rgyu bstsags pa ma yin pa de ni rnam par rig byed ma yin pa'o//de med du zin na dge slong la sogs par gzhag pa med par 'gyur te/ bcom ldan 'das kyis kyang rdzas las byung ba'i bsod nams bya ba'i gzhi dag las bsod nams rtag par rgyun du mngon par 'phel lo zhes gsungs so//de yang sdom pa dang sdom pa ma yin pa dang / gnyi ga las bzlog pas bsdus pa'i phyir rnam pa gsum mo/ /sdom pa yang so sor thar pa dang bsam gtan dang / zag pa med pa'i bye brag gis rnam pa gsum mo/ /so sor thar pa'i sdom pa ni/ dge slong dang dge slong ma dang /dge tshul pha dang / dge tshul ma dang / dge bsnyen dang dge bsnyen ma dang / dus khrims pa'i sdom pa'i bye brag gis rnam pa brgyad de/ de ni 'dod par gtogs pa kho na'o/ /bsam gtan gyi sdom pa ni ting nge 'dzin gyi rjes su 'brang ba'i gzugs te gzugs su gtogs pa kho na'o//zag pa med pa'i sdom pa yang zag pa med pa'i ting nge 'dzin gyi rjes su 'brang ba'i gzugs te mi ldan pa nyid do/ /sdom pa ma yin pa ni ri dgas kyi rngon pa dang bya ba dang nya ba dang btson srung dang / ba glang 'dzin pa dang gsod pa'i gshed ma la sogs pa'i rgyud la gang mi dge ba'i gzugs kyi rgyun yod pa'o//sdom pa ma yin mi sdom pa yang ma yin pa ni gtsug lag khang dang mchod rten dang dge 'dun gyi kun dga' ra ba byed pa dang mchod rten la phyag bya ba dang bdug pa gsol ba la sogs pa yi dam du 'dzin pa dang / khu tshur dang thal lcag la sogs pa las byung ba/dge ba dang mi dge ba'i gzugs kyi rgyun gang yin pa'o/ /rnam par rig byed ma yin pa skad cig pa yin yang rigs smos pas na de skad du brjod do/ /so sor thar pa'i sdom pa 'thob pa ni yang dag par blangs pas so/ /bdun po ni ji srid 'tsho'i bar du'o/ /brgyad pa ni zhag gcig pa'o//bdun po'i btang ba ni bslab pa phul ba dang / shi 'phos pa dang / dge ba'i rtsa ba chad pa dang / mtshan gnyis skyes pas so/ /brgyad pa'i ni de rnams nyid dang / mtshan mo 'das pas so/ /gzugs na spyod pa'i sems thob pas bsam gtan gyi sdom pa 'thob ste sems dang 'brel bas na de nyid btang bas de gtong ngo //zag pa med pa'i sdom pa yang de bzhin no/ /byed pa dang khas blangs pas rngon pa yin pa 'thob po/ /rgyun chad pa ni sdom pa yang dag par gzung ba dang / mtshan gnyis skyes pa dang shi ba dang / chos nyid 'thob pa gzugs na spyod pa'i dge ba'i sems 'thob pas so//rnam par rig byed ma yin pa sar ma 'thob pa ni/ nyon mongs pa dang dad pa drag po'i shugs kyis khu tshur dang thal lcag la sogs pa'i bya ba byed pa dang / gang yang bcom ldan 'das la dkyil 'khor ma byas par zan mi bza'o zhes bya ba la sogs pa'i yi dam 'dzin pa dang /gtsug lag khang la sogs pa phul bas so/ /rgyun chad pa ni slong bar byad pa de dag nyid btang bas so/ /rnam par rig byed ma yin pa rnam pa du ma pa 'di dang / mig la sogs pa'i dbang po lnga rnams ni rnam par shes pa'i spyod yul nyid de gzugs kyi dngos po 'di snyed do//'di'i mtshan nyid ni rnam pa gsum ste/ rang gi spyi dang phyogs kyi spyi dang zad par gyi spyi'o/ /de la rang gi spyi ni gzugs pa'o/ /de la gzugs su rung bas na gzugs zhes bya ste gzhig par 'gyur ba zhes bya ba'i don gang yin pa'o/ /ji skad du chos kyi rjes kyang dge slong dag gzugs pa gzugs su rung bas/de'i phyir gzugs nye bar len pa'i phung po zhes gsungs pa lta bu'o/ /cis gzugs par 'gyur zhe na/ lag pa dang bong ba dang dbyig pas reg pa dag gis so/ /dper na mgyogs par 'gro bas rta'o/ /'gro bas na ba lang ngo zhes bya ba lta bu la sogs pa'o//phyogs kyi spyi ni mi rtag pa nyid dang sdug bsngal ba nyid do/ /zad par gyi spyi ni stong pa dang bdag med pa nyid de/ phyogs 'dis chos thams cad kyi mtshan nyid gsum ci rigs su mngon par brtag go/ /gzugs kyi dngos po'o/ /tshor ba ni myong ba rnam pa gsum ste bde ba dang sdug bsngal ba dang bde ba yang ma yin sdug bsngal ba yang ma yin pa ste/gsum tshor bar gyur pa'i don gang yin pa'o/ /'dod pa dang mi 'dod pa dang gnyi ga las bzlog pa ste reg pa'i skye gnas can lus dang sems kyi gnas skabs kyi bye brag sim pa dang gdung ba dang gnyi ga las bzlog pa ste/srid pa'i rgyu ni tshor ba zhes bya'o/ /ji skad du bcom ldan 'das kyis kyang reg pa'i rkyen gyis tshor ba/ tshor ba'i rkyen gyis sred pa zhes gsungs pa lta bu'o/ /de yang rnam par shes pa'i bye brag gis rnam pa drug ste/ mig gi 'dus te reg pa las skyes pa dang / rna ba dang sna dang lce dang lus dang yid kyi 'dus te reg pa las skyes pa'o//de yang rnam pa gnyis te lus kyi dang sems kyi'o/ /de la rnam par shes pa lnga dang lhan cig skyes pa ni lus kyi'o/ /cig shos ni sems kyi'o/ /dbang po'i bye brag gis rnam pa lnga ste/ bde ba'i dbang po dang sdug bsngal gyi dbang po dang /yid bde ba'i dbang po dang yid mi bde ba'i dbang po dang btang snyoms kyi dbang po'o/ /de la lus kyi sim pa gang yin pa dang / bsam gtan gsum pa las skyes pa'i yid kyi sim pa gang yin pa de ni bde ba'i dbang po ste pham par byed pa'i don gang yin pa'o/ /gang lus kyi sim pa ma yin pa de ni sdug bsngal gyi dbang po ste gnod par byed pa'i don gang yin pa'o//bsam gtan gsum pa ma gtogs pa 'og ma'i yid kyi sim pa gang yin pa de ni yid bde ba'i dbang po'o/ /de las bzlog pa ni yid mi bde ba'i dbang po'o/ /gang lus dang sems kyi sim pa yang ma yin mi sim pa yang ma yin pa de ni btang snyoms kyi dbang po'o//tshor ba'i dbang po'o/ /mtshan ma dang ming dang don dang brda zhes pa'i 'du shes te/ sngon po dang / ser po dang / ring po dang / thung ngu dang / dung dang / rnga dang / pad+ma dang / sna ma'i me tog dang / ut+pa la'i dri dang / kha ba dang lan tshwa dang / 'jam pa dang rtsub pa dang / bud med dang skyes pa la sogs pa'i mtshan ma dang / ming dang don gcig tu shes pa'i chos gang yin pa de ni rnam par rtog pa'i rgyu ste/ 'du shes zhes bya'o/ /de yang rnam par shes pa'i bye brag gis tshor ba bzhin du rnam pa drug go/ /yang chung ngu dang chen por gyur pa dang tshad med pa dang rnam pa gsum ste/de la yul chung ngu la dmigs pa ni chung ngu'o/ /ri rab la sogs pa la dmigs pa ni chen por gyur pa'o/ /nam mkha' mtha' yas skye mched la sogs pa dag la ni tshad med pa'o/ /'du shes kyi dngos po'o/ /'du byed kyi phung po ni rnam pa gnyis te mtshungs par ldan pa yin pa'o//de la mtshungs par ldan pa ni sems pa dang reg pa dang yid la byed pa dang / 'dun pa dang mos pa dang dad pa dang brtson 'grus dang / dran pa dang ting nge 'dzin dang / shes rab dang rtog pa dang dpyod pa dang bag yod pa dang bag med pa dang skyo ba dang rab tu dga' ba dang /shin tu sbyangs pa dang rnam par mi 'tshe ba dang / ngo tsha shes pa dang khrel yod pa btang snyoms dang dge ba'i rtsa ba rnams dang / mi dge ba'i rtsa ba rnams dang / kun du sbyor ba rnams dang / 'ching ba rnams dang / phra rgyas rnams dang / nye ba'i nyon mongs pa rnams dang / kun nas dkris te 'dug pa rnams dang /zag pa rnams dang / chu bo rnams dang / sbyor ba rnams dang / len pa rnams dang / sdud pa rnams dang / sgrib pa rnams dang / shes pa rnams dang bzod pa rnams so/ /de la gnas dang / dmigs pa dang / rnam pa dang dus dang rdzas mtshungs pa nyid de/ mtshungs pa lnga dag gis sems dang mtshungs par ldan pas de bas na mtshungs par ldan pa dag ces bya'o//bzlog pa ni ldan pa ma yin pa dag ste/ 'di lta ste/ 'thob pa dang 'thob pa med pa dang / 'du shes med pa'i snyoms par 'jug pa dang / 'gog pa'i snyoms par 'jug pa dang / 'du shes med pa dang /srog gi dbang po dang / skal ba 'dra ba dang / skye ba dang rga ba dang / gnas pa dang mi rtag pa nyid dang / ming gi tshogs rnams dang / tshig gi tshogs rnams dang / yi ge'i tshogs rnams te/ de gnyis bsdus nas 'du byed kyi phung po zhes bya'o/ /de bas na drang srong chen pos kyang 'du byed kyi phung po ni chu shing gi phung po lta bu'o zhes gsungs so//de la sems pa ni sems mngon par 'du byed pa yid kyi las te sems kun du g.yo'o zhes bya ba'i don gang yin pa'o/ /de yang dge ba dang mi dge ba dang lung du mi ston pa'i bye brag gis rnam pa gsum mo/ /reg pa ni yul dang dbang po dang rnam par shes pa las byung ba'i sems yul la reg par byed pa ste sems las byung ba'i chos 'tsho bar byed pa'i mtshan nyid do//de yang bde ba la sogs pa myong bar 'gyur ba'i bye brag gis rnam pa gsum mo/ /yid la byed pa ni sems kyi 'jug pa gang sems yul rnams la gtod pa ste/sngon myong ba la sogs pa sems pa zhes bya ba'i don gang yin pa'o/ /de yang rnam pa gsum ste/ slob pa'i dang mi slob pa'i dang slob pa yang ma yin mi slob pa yang ma yin pa'o/ /de la 'phags pa'i gang zag bdun gyi rgyud las byung ba dri ma med pa ni slob pa'o/ /dgra bcom pa'i rgyud las byung ba ni mi slob pa'o//zag pa dang bcas pa ni slob pa yang ma yin mi slob pa yang ma yin pa'o/ /'dun pa ni byed 'dod pa'i brtson 'grus kyi yan lag tu gyur pa ste/ 'di zhes bya ba bya'o snyam pa gang las byung ba'o/ /mos pa ni sems yul rnams la mos pa ste yul la ma zhum pa zhes bya ba'i don gang yin pa'o//dad pa ni sems dang ba ste dkon mchog gsum dang rgyu dang 'bras bur 'brel pa la mngon par yid ches pa'i rnam pa sems kyi rnyog pa sel bar byed pa'i chos ston te/ dper na chu dang bar byed pa'i nor bu mtsho'i nang du bcug na/ rdzab kyi rnyog pa thams cad bstsal nas chu gsal bar byed pa de bzhin du/dad pa'i nor bu sems kyi mtsho las byung bas kyang sems kyi rnyog pa thams cad bsal nas sangs rgyas rnams kyi byang chub dang / chos kyi legs par gsungs pa nyid dang / dge 'dun gyi legs par sgrub pa nyid dang / 'di las phyi rol tu gyur pa thams cad 'khrul par byed de/rten cing 'brel par 'byung ba'i chos nyid la mngon par dad pa'o/ /brtson 'grus ni dge ba dang mi dge ba'i chos skyed pa dang 'gog pa spro ba ste/ 'khor ba'i 'dam du bying ba'i sems mngon par 'byung ba'i don gang yin pa'o/ /dran pa ni sems kyi mngon par brjod pa nyid de/byas pa dang / bya ba dang / byed pa'i las ma brjed ces bya ba'i tha tshig go/ /ting nge 'dzin ni sems rtse gcig pa ste/ sems spre'u lta bu dmigs pa gcig la 'jug ces bya ba'i don gang yin pa ste/ dper na sbrul 'od ma'i sbubs su bcug na gya gyur mi 'gyur ba de bzhin du/sems ting nge 'dzin gyi sbubs su bcug nas drang srong 'gro'o zhes bye brag tu smra ba rnams so/ /shes rab ni chos rab tu rnam par 'byed pa ste/ chos rnam pa brgyad po de dag gi sdud pa dang mtshungs par ldan pa dang / rgyu dang rkyen dang 'bras bu dang rang dang spyi'i mtshan nyid la ji ltar mthun mthun du rtog pa'i don gang yin pa'o//rtog pa ni sems rtsing ba'i mtshan nyid do/ /gnyis su na rtog pa zhes kyang bya ste/ 'du shes kyi rlung gis bskyed na/ 'jug pa rnam par shes pa rtsing ba'i tshogs lnga 'jug pa'i rgyu'i chos so/ /dpyod pa ni sems zhib pa nyid kyi mtshan nyid de/ yid kyi rnam par shes pa'i 'jug pa dang mthun pa'i chos so//bag med pa ni dge ba'i chos rnams mi bsgom pa ste/ mi 'jug pa zhes bya ba'i don gang yin pa'o/ /bag yod pa ni dge ba'i chos rnams bsgom pa ste/ bag med pa las phyir 'jil ba'i chos so/ /skyo ba ni 'khor ba'i nyes pa la rtog pas 'dod chags dang bral ba dang /mthun pa'i chos yid 'byung ba'i mtshan nyid de/ sems las byung ba'i chos gang byung na 'khor ba la sems skyo bar 'gyur ba dang / gang dang ldan pas yid 'byung bas yid la byed pa zhes bya'o/ /mchog tu dga' ba ni mgu ba dang / rab tu dga' ba ste/ dge ba'i sems la gnod pa las 'byung bar gnyen po tshol ba can no/ /de rnyed nas de la yid tshim pa de gang yin pa de ni mchog tu dga' ba'o/ /shin tu sbyangs pa ni sems las su rung ba nyid do/ /rnam par mi 'tshe ba ni/ gzhan la gnod pa byed pa la mngon par dga' ba dang mi mthun pa'i sems bzang po nyid de/gang gi dbang gis gzhan la rnam par tho mi 'tshams pa'o/ /ngo tsha shes pa ni rigs pa la gzhol ba/ bdag dang chos kyi dbang du byas pa las byung ba/ sred pa'i rgyu mthun pa dang mi mthun pa'i sems kyi dbang ste/ gang gi dbang gis yon tan rnams dang / yon tan can rnams la gus pa dang bcas par gnas pa'o//khrel yod pa ni yon tan la goms par byed pa sngon du gtong ba gti mug gi rgyu mthun pa'i dgrar gyur pas chos ngan pa la smod pa ste/ gang yod na kha na ma tho ba la 'jigs par lta ba yin no/ /btang snyoms ni mi rigs pa sel ba dang /rigs pa la 'jug par byed pa la btang snyoms su byed pa ste/ de yod pas sems de mi rigs pa yang mi sel/ rigs pa la yang mi 'jug par srang 'dzin pa'i rigs pas mnyam pa nyid du gnas pa'o/ /dge ba'i rtsa ba ni gsum ste/ ma chags pa dang zhe sdang med pa dang gti mug med pa'o//de la ma chags pa ni chags par gyur pa'i gnyen po'i chos so/ /zhe sdang med pa ni khong khro ba dang mi mthun pa'i chos so/ /gti mug med pa ni shes rab kyi rang bzhin te mi shes pa dang mi mthun pa'i chos so/ /de dag ni bdag nyid kyis kyang dge la/ dge ba gzhan rnams kyi rtsa bar yang gyur pas na/ de'i phyir dge ba'i rtsa ba rnams te/ srid pa yid du 'ong ba dang thar pa'i myu gu mngon par sgrub par byed pas/ bde ba'i don ni dge ba'i don to/ /yang na gzugs bzang po mngon par grub par byed pas legs par lobs pa'i don te/ ri mo mkhan legs par lobs pa bzhin no//mi dge ba'i rtsa ba ni gsum ste/ de dag nyid kyi mi mthun pa'i phyogs su gyur pa/ chags pa dang zhe sdang dang gti mug go/ /de la 'dod par gtogs pa'i srid pa rnam pa lnga ni chags pa'o/ /khong khro ba lnga ni zhe sdang ngo / /'jig tshogs dang mthar 'dzin pa dang ldan pa'i gti mug ma gtogs pa gzhan 'dod par gtogs pa'i ma rig pa rnam pa sum cu rtsa bzhi po gang yin pa de ni gti mug go//de dag ni bdag nyid kyis kyang mi dge la/ mi dge ba gzhan rnams kyi rtsa bar yang gyur pas na de'i phyir mi dge ba'i rtsa ba rnams te/ srid pa yid du mi 'ong ba'i myu gu mngon par 'grub par byed pas mi bde ba'i don ni mi dge ba'i don to//yang na gzugs bzang po ma yin pa mngon par 'grub par byed pas/ ma lobs pa'i don de snga ma las bzlog pa'o/ /lung du mi ston pa'i rtsa ba ni bzhi ste/ sred pa dang lta ba dang nga rgyal dang ma rig pa zhes bya ba rnams so/ / de la dang po ni gzugs dang / gzugs med par gtogs pa'i sred pa rnam pa bcu'o/ /gnyis pa ni de na yod pa nyid kyi lta ba nyi shu rtsa bzhi dang 'dod par gtogs pa'i 'jig tshogs la lta ba dang / mthar 'dzin par lta ba gnyis so/ /gsum pa ni der gtogs pa nyid kyi nga rgyal rnam pa bcu'o/ / bzhi pa ni de na yod pa'i ma rig pa nyid dang / 'di na yod pa'i 'jig tshogs dang / mthar 'dzin par lta ba dang ldan pa'i ma rig pa gnyis so/ /bzhi po de dag ni lung du mi ston pa'i rtsa ba rnams su 'dod do/ /bsam gtan gsum gyi phyir te/ 'di ltar bsam gtan pa gsum ni/ sred pa dang lta ba dang nga rgyal gyi shas che ba'i bsam gtan pa ste/de dag ni ma rig pa'i dbang gis 'byung ngo / /dge ba dang mi dge ba'i don du lung bstan du med pa dang / yid du 'ong ba dang yid du mi 'ong ba'i 'bras bu mngon par 'grub par mi byed pa ste/ de dag ni rtsa ba yang yin la lung du mi ston pa gzhan rnams kyi rtsa bar yang gyur pas lung du mi ston pa rnams so//kun du sbyor ba ni rnam pa dgu ste/ rjes su chags pa dang khong khro ba dang nga rgyal dang ma rig pa dang / lta ba dang mchog tu 'dzin pa dang / the tshom dang phrag dog dang / ser sna zhes bya ba rnams so/ /de la khams gsum pa'i 'dod chags/chags pa'i mtshan nyid rgya skyegs zhu ba 'byar ba lta bu'i chos kyi rjes su ma chags pa ste/ rjes su chags pa nyid kun du sbyor bas rjes su chags pa'i kun du sbyor ba'o/ /sems can rnams la kun nas mnar sems/ gnod sems kyi mtshan nyid rtsa ba'i sa bon lta bu'i chos ni khong khro ba ste/khro ba nyid kun du sbyor bas khong khro ba'i kun du sbyor ba'o/ /bdag dang gzhan la dmigs nas sems khengs pa'i mtshan nyid skyes bu rengs pa lta bu'i chos ni nga rgyal lo/ /de yang rnam pa bdun te/ nga rgyal dang che ba'i nga rgyal dang / nga rgyal las kyang nga rgyal dang / nga'o snyam pa'i nga rgyal dang /mngon pa'i nga rgyal dang / cung zad snyam pa'i nga rgyal dang / log pa'i nga rgyal lo/ /de la nga rgyal ni chung ngu bas bdag rus dang rigs dang gzugs dang / nor dang thos pa dang / tshul khrims dang / bzo la sogs pa dag gis bye brag tu 'phags pa'am/ rus la sogs pa 'dra ba dang mtshungs so snyam pa de'i rgyu las byung ba'i sems de ni nga rgyal zhes bya'o//che ba'i nga rgyal ni mtshungs pa bas bdag rus la sogs pa dag gis bye brag tu 'phags pa'am/ che ba dang mtshungs so snyam pa des drangs pa'i sems khengs pa ni che ba'i nga rgyal lo//nga rgyal las kyang nga rgyal ni che ba bas kyang bdag ches che lo snyam pa des drangs pa'i sems khengs pa'o/ /nga'o snyam pa'i nga rgyal ni bdag tu lta ba'i rjes las byung ba'i sems khengs pa'o/ /mngon pa'i nga rgyal ni rgyun du zhugs pa'i 'bras bu la sogs pa gong ma'i khyad par thob par bya ba ma thob pa bdag gis thob po snyam pa de'i rgyu las byung ba'i sems kyi rlom sems so//cung zad snyam pa'i nga rgyal ni rigs la sogs pa khyad ches 'phags pa bas bdag cung zad cig gis chung bar lta zhing des rlom sems pa'o/ /log pa'i nga rgyal ni yon tan ma yin pa dang ldan yang bdag yon tan dang ldan par lta zhing des rlom sems pa'o//nga rgyal bdun po 'di dag ni nga rgyal gyi kun du sbyor ba zhes bya'o/ /ma rig pa zhes bya ba ni khams gsum pa'i mi shes pa mi rtogs pa'i mtshan nyid long ba lta bu ste/ rig pa'i gnyen po ni ma rig pa zhes bya'o/ /dgag pa ni gnyen po la gzhag pa'i phyir//mi mdza' ba dang mi bden pa la sogs pa bzhin no/ /ma rig pa nyid kun du sbyor bas na ma rig pa'i kun du sbyor ba'o/ /'jig tshogs dang mthar 'dzin pa dang log par lta ba gsum ni lta ba'i kun du sbyor ba'o/ /de la nye bar len pa'i phung po lnga po bdag med pa bdag gi med pa rnams la/bdag dang bdag gi tshul gyis zhugs pa/ nyon mongs pa can gyi blo ni 'jig tshogs la lta ba'o/ /de ni 'jig pa yang yin la tshogs kyang yin pas 'jig tshogs so/ /de lta bas na 'jig tshogs la lta ba'o/ /chad pa ma yin rtag pa ma yin pa de dag nyid la/chad pa dang rtag pa'i tshul gyis zhugs pa nyon mongs pa can gyi blo ni mthar 'dzin par lta ste/ mtha' gnyis su zhugs pa'i phyir ro/ /las med do las kyi 'bras bu med do/ /thar pa med do/ /de thob par byed pa'i lam yang med do snyam du de ltar dngos po yang yang dag par 'jig par zhugs pa nyon mongs pa can gyi blo gang yin pa de ni log par lta ba'o//lta ba gsum po de dag ni lta ba'i kun du sbyor ba'o/ /mchog tu 'dzin pa gnyis so/ /lta ba mchog tu 'dzin pa dang tshul khrims dang brtul zhugs mchog tu 'dzin pa ni/ mchog tu 'dzin pa'i kun du sbyor ba'o/ / de la lta ba mchog ma yin pa de dag dang / nye bar len pa'i phung po lnga po mchog ma yin pa rnams la/ mchog snyam du mchog 'dzin pa'i blo'i bye brag gang yin pa de ni lta ba mchog tu 'dzin pa ste/ rtogs pa zhes bya ba'i don gang yin pa'o/ /tshul khrims ni 'chal ba'i tshul khrims spangs pa'o//brtul zhugs ni khyi dang ri dgas dang / ba lang gi brtul zhugs dang / gcer bu dang thal ba'i nang na nyal ba dang / skra 'bal ba dang 'bab stegs su 'khru ba dang / 'bras bu dang rtsa ba za ba dang ral ba thogs pa la sogs pa ste/ dag pa'i bdag nyid ma yin pa/ de gnyi ga la dag par yid ches pa'i blo'i bye brag /bram ze cho ga can gtsang sbra 'dod pa lta bu'i chos gang yin pa de ni/ tshul khrims dang brtul zhugs mchog tu 'dzin pa'o/ /mchog tu 'dzin pa gnyis po de dag ni mchog tu 'dzin pa'i kun du sbyor ba'o/ /the tshom ni sdug bsngal dang kun 'byung ba dang /'gog pa dang lam zhes bya ba bden pa rnams la yid gnyis za ba/ lam kha brag dang rtsa mi 'dra ba'i chos yin te/ 'di sdug bsngal yin nam 'di sdug bsngal ma yin snyam pa la sogs pa'o/ /the tshom nyid kun du sbyor bas/ the tshom gyi kun du sbyor ba'o/ /phrag dog ni pha rol du 'byor ba la mi bzod pa ste/pha rol po nor dang ldan nam mkha' nas bkur ba rnams la/ sems khong nas 'khrug pa zhes bya ba'i don gang yin pa'o/ /phrag dog nyid kun du sbyor bas phrag dog gi kun du sbyor ba'o/ /dngos po 'di bdag las gzhan la mi gtong ngo snyam pa'i sems kyis kun du 'dzin pa gang yin pa de na ser sna ste/de nyid kun du sbyor bas ser sna'i kun du sbyor ba'o/ /kun du sbyor ba'i don ni 'ching ba'i don te/ ji skad du 'jig rten mgon pos kyang / mig gzugs rnams la kun du mi sbyor la/ gzugs rnams kyang mig la ma yin mod kyi/ de la 'dod pa la 'dod chags gang yin pa de ni 'dir kun du sbyor ba ste/dper na ba lang nag po yang ba lang dkar po la kun du mi sbyor la/ ba lang dkar po yang ba lang nag po la ma yin no zhes rgya cher gsungs pa lta bu'o/ /kun du sbyor ba rnams ni 'ching ba'i don yin la/ kun du sbyor ba gang dag yin pa de dag 'ching ba la yang yin mod kyi 'on kyang gtso bor gyur pa'i phyir/de bzhin gshegs pas mdo las/ 'dod chags ni 'ching ba/ zhe sdang ni 'ching ba/ gti mug ni 'ching ba zhes 'ching ba gsum gsungs te/ de dag gi mtshan nyid ni bshad zin to/ /phra rgyas ni bdun te/'dod pa la 'dod chags dang / khong khro ba dang / sred pa'i 'dod chags dang / nga rgyal dang ma rig pa dang lta ba dang the tshom gyi phra rgyas so/ /de rnams kyi mtshan nyid ni kun du sbyor ba bsam pa'i skabs su bshad zin to/ /khams dang tshul dang rnam pa'i bye brag de dbye bar bya'o//de la 'dod pa rnams la 'dod chags ni 'dod pa'i 'dod chags so/ /de nyid phra rgyas yin pas 'dod pa la 'dod chags kyi phra rgyas so/ /de la 'dod par gtogs pa'i 'dod chags sdug bsngal dang kun 'byung ba dang 'gog pa dang lam mthong ba dang / bsgom pas spang bar bya ba ni 'dod pa la 'dod chags kyi phra rgyas so/ /sdug bsngal la sogs pa mthong ba dang / bsgom pas spang bar bya ba'i khong khro ba lnga ni khong khro ba'i phra rgyas so/ /gzugs dang gzugs med pa'i 'dod chags bcu po sdug bsngal la sogs pa mthong ba dang / bsgom pas spang bar bya ba ni srid pa'i 'dod chags kyi phra rgyas so//nang du bltas par gyur pa dang bsam gtan dang gzugs med pa rnams la thar par 'du shes pa bzlog pa'i phyir khams gnyis nas skyed pa'i 'dod chags so zhes bde bar gshegs pas gsungs so/ /de bzhin du khams gsum pa'i nga rgyal bco lnga/sdug bsngal la sogs pa mthong ba dang bsgom pas spang bar bya ba ni nga rgyal gyi phra rgyas so/ /ma rig pa'i phra rgyas kyang de bzhin du khong du chud par bya'o/ /khams gsum pa'i lta ba sum cu rtsa drug po dag ni lta ba'i phra rgyas te/ de las 'dod par gtogs pa'i 'jig tshogs la lta ba dang /mthar 'dzin par lta ba dang / sdug bsngal mthong bas spang bar bya ba'i log par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa dang / rgyu mthong bas spang bar bya ba'i log par lta ba dang / lta ba mchog tu 'dzin pa dang 'gog pa mthong bas spang bar bya ba'i log par lta ba dang /lta ba mchog tu 'dzin pa dang / lam mthong bas spang bar bya ba'i log par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa de dag ni lta ba bcu gnyis so/ /gzugs dang gzugs med pa yang de bzhin te/lta ba sum cu rtsa drug po de dag ni lta ba'i phra rgyas so/ /khams kyi the tshom bcu gnyis ni/ the tshom gyi phra rgyas te/ de la 'dod par gtogs pa sdug bsngal la sogs pa mthong bas spang bar bya ba bzhi dang / de bzhin du gzugs dang gzugs med pa dag go//'dod pa la 'dod chags dang / khong khro ba'i phra rgyas dag ni rnam pa tha dad pa nyid de/ khams kyis ma yin tshul gyis ma yin no/ /srid pa'i 'dod chags kyi phra rgyas na/ khams dang rnam pa ste tshul gyis ma yin no/ /nga rgyal dang / ma rig pa dang / the tshom gyi phra rgyas kyang khams dang rnam pa ste tshul gyis ma yin no//lta ba'i phra rgyas ni khams dang rnam pa dang tshul gyi bye brag gis tha dad do/ /de la lta ba rnams kyi khams dang rnam pa'i bye brag ni bshad zin to/ /tshul gyi bye brag ni ma bshad de de brjod par bya'o/ /de la bdag dang bdag gi tshul gyis zhugs pa ni 'jig tshogs la lta ba'o//chad pa dang rtag pa'i tshul gyis zhugs pa ni mthar 'dzin par lta ba'o/ /med pa'i tshul gyis lta ba ni log par lta ba'o/ /mchog gi tshul gyis zhugs pa ni lta ba mchog tu 'dzin pa'o/ /dag pa'i tshul gyis zhugs pa ni tshul khrims dang brtul zhugs mchog tu 'dzin pa'o//phra rgyas ni don ni phra ba'i don to/ /yang na lus dang sems kyi rgyun gyi rjes su bsnyags pa ste/ chu na rgyu bas nam mkha' la rgyu ba'i grib ma bsnyags pa lta bu'i phyir phra rgyas so/ /yang na rjes su zhugs pa ste til rnams til mar lta bu'i phyir phra rgyas so/ / yang na nye bar len pa'i phung po lnga rnams la dmigs pa dang ldan pa gnyis kyis rgyas par 'gyur bas phra rgyas so/ /ci'i phyir rgyas par 'gyur zhes bya zhe na/ dmigs pa dang ldan pa gnyis kyis brtag par 'gyur zhes bya ba'i tha tshig go/ /de ltar phra rgyas bdun po/ khams dang tshul dang / rnam pa'i bye brag gis tha dad pa de dag brgyad cu rtsa brgyad du 'gyur te/ 'dod pa na sdug bsngal mthong bas spang bar bya ba bcu ste/ 'jig tshogs la lta ba dang / mthar 'dzin par lta ba dang / log par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa dang /the tshom dang 'dod chags dang khong khro ba dang nga rgyal dang ma rig pa'o/ /kun 'byung ba mthong bas spang bar bya ba bdun te/ de dag gi nang nas 'jig tshogs la lta ba dang / mthar 'dzin par lta ba dang / tshul khrims dang brtul zhugs mchog tu 'dzin pa ma gtogs pa rnams so//'gog pa mthong bas spang bar bya ba bdun te de dag nyid do/ /lam mthong bas spang bar bya ba brgyad de bdun po de dag nyid dang / tshul khrims dang brtul zhugs mchog tu 'dzin pa'o/ /bsgom pas spang bar bya ba bzhi ste/lta ba rnams dang / the tshom ma gtogs so/ /de ltar de dag ni 'dod par gtogs pa'i phra rgyas sum cu rtsa drug go/ /gzugs kyi khams rnams na ni de dag nyid las khong khro ba lnga ma gtogs so/ /gzugs med pa rnams na yang de bzhin te/ de dag ni dgu bcu rtsa brgyad yin no//de la de dag gcig tu bsdus na brgyad cu rtsa brgyad ni mthong bas spang bar bya ba'o/ /bcu ni bsgom pas spang bar bya ba'o/ /khams khams kyi sdug bsngal dang rgyu mthong bas spang bar phya ba'i lta ba dang / the tshom dang dgu dang de dang ldan pa'i ma rig pa dang / ma 'dres pa'i ma rig pa dang / de dag ni kun du 'gro ba zhes bya'o/ /lhag ma rnams ni kun du 'gro ba ma yin pa zhes bya'o/ /de bzhin du 'gog pa dang / lam mthong bas spang bar bya ba'i log par lta ba dang / the tshom dang / de dang ldan pa'i ma rig pa dang / ma 'dres pa'i ma rig pa dang /de dag ni zag pa med pa la dmigs pa ste/ 'gog pa dang / lam la dmigs pa dang / de gnyis kyang zag pa med pa'i phyir ro/ /lhag ma rnams ni zag pa dang bcas pa la dmigs pa'o/ /de la gang dag zag pa dang bcas pa la dmigs pa de dag ni dmigs pa dang ldan pa gnyis kyis rgyas par 'gyur ro//gang zag pa med pa la dmigs pa de dag ni ldan pa ste rang gi tshogs rnams so/ /de bzhin du khams khams kyi 'gog pa mthong bas spang bar bya ba'i log par lta ba dang / the tshom dang de dang ldan pa'i ma rig pa dang / ma rig pa 'ba' zhig dang /de dag ni 'dus ma byas la dmigs pa'o/ /lhag ma rnams ni 'dus byas la dmigs pa'o/ /de dag byung ba'i go rims ni dang po kho nar/ ma rig pa dang ldan pas sems can bden pa rnams rmongs te/ de rnams sdug bsngal nas lam gyi bar dag mi 'dod do/ /de glen pa rnams yang dag pa dang /log pa'i phyogs gnyis thos nas 'di sdug bsngal yin nam/ sdug bsngal ma yin snyam pa la sogs pa'i the tshom skye'o/ /de nas dam pa'i blos dam pa ma yin pa dang / bsnyen nas log par thos pa dang / log par sems pas log par nges par 'byung ste/sbyin pa med do/ /mchod sbyin med do snyam pa la sogs pa'o/ /de nas log par lta ba las 'jig tshogs la lta ba 'byung ste des nye bar len pa'i phung po lnga po rnams la sdug bsngal bsal bar bdag tu mngon par zhen to/ /de las mthar 'dzin par lta ba 'byung ste/des bdag chad pa'am rtag par mtha' gnyis bzung ba'i phyir ro/ /mthar 'dzin pa las tshul khrims dang / brtul zhugs mchog tu 'dzin pa 'byung ngo / /mthar 'dzin pa gang yin pa de nyid kyis dag par yid ches so/ /de las kyang lta ba mchog tu 'dzin pa 'byung ngo //gang gis dag par yid ches pa de la mchog tu 'dzin to/ /de'i 'og tu rang gi lta ba la 'dod chags skye'o/ /lta ba de nyid kyis kyang rlom sems su byed cing pha rol gyi lta ba la'am/ rang gi rgyud kyis sngon bzung ba las btang ba dag la zhe sdang skyes te/ de dag gi go rims ni de lta'o//nyon mongs pa re re yang rgyu gsum gsum las skyes te/ gal te phra rgyas ma spangs pa dang / tshul bzhin ma yin pa yid la byed pa dang / yul nye bar gnas par gyur na/ rgyu dang yul dang sbyor ba'i stobs de dag las nyon mongs pa skye'o/ /de dag ni lus dang sems kyi rgyud nyon mongs par byed pas nyon mongs pa rnams zhes bya ste/nyon mongs pa rnams gang yin pa de dag ni nye ba'i nyon mongs pa yang yin no/ /gang dag de rnams las gzhan pa sems las byung ba'i chos nyon mongs pa can 'du byed kyi phung por bsdus pa de dag ni nye ba'i nyon mongs pa nyid do//de dag kyang gang zhe na sgyu dang / rgyags pa dang / rnam par 'tshe ba dang / dus che ba dang / khon du 'dzin pa dang / g.yo la sogs pa rnam pa du ma rgyud las 'byung ba rnams so/ /de la sgyu ni pha rol la slu ba'o/ /rgyags pa ni gzugs dang lang tsho dang /rigs dang tshul khrims dang mang du thos pa la sogs pa rang gi chos rnams la chags te/ gzhan la mi ltos par sems yongs su gtugs pa'o/ /rnam par 'tshe ba ni lag pa dang bong ba dang dbyig pas brdeg pa dang / tshig rtsub pos pha rol la rnam par tho 'tshams pa'o//dus che ba ni kha na ma tho ba dang bcas pa'i dngos po mang du 'dzin pa ste/ de'i dbang gis rigs par bsgo ba mi 'dzin pa'o/ /khon du 'dzin pa ni kun du mnar sems kyi dngos po mang du byed pa'o/ /g.yo ni sems gya gyu ba ste/ de'i dbang gis gzhan nas gzhan brgyud cing gung du 'dren te gsal bar mi rtogs par byed pa'o//de la de dag gi nang nas sgyu dang rgyags pa gnyis ni 'dod chags kyi rgyu mthun pas 'dod chags kyi rjes su 'gro ba ste/ 'dod chags kyi rigs la rten ces bya ba'i tha tshig go/ /khon du 'dzin pa dang rnam par 'tshe ba ni khong khro ba'i rjes su 'gro ba'o//dus che ba ni lta ba bsnyems pa'i rgyu mthun pa'o/ /g.yo ni log par lta ba'i rgyu mthun pa ste gya gyu ba ji lta bu zhe na/ sdig pa can gyi lta ba'o zhes tshigs su bcad pa las 'byung ngo / /kun nas dkris te 'dug pa ni bcu ste/ rmugs pa dang / gnyid dang /rgod pa dang / 'gyod pa dang / phrag dog dang / ser sna dang / ngo tsha med pa dang / khrel med pa dang / khro ba dang 'chab pa'o/ /de la rmugs pa ni lus dang sems las su mi rung ba ste/ slong ba zhes bya ba'i tha tshig go/ /gnyis ni lus dang sems 'dzin mi nus pa dang / sems sdud pa ste de yang nyon mongs pa can nyid yin pas kun nas dkris te 'dug pa'o/ /rgod pa ni sems ma zhi ba'o/ /ngan pa byas pa'i dngos po ni 'gyod pa'o/ /'dir ni de la dmigs pa sems las byung ba'i chos la 'gyod pa zhes bya ste yid la gcags zhes bya ba'i tha tshig go/ / rgyu la 'bras bu btags te dper na mi sdug pa la dmigs pa'i chos la mi sdug ces bya ba lta bu'o/ /'jig rten na yang gnas kyis gnas pa ston te/ dper na grong thams cad lhags so zhes bya ba lta bu'o/ /de yang nyon mongs pa can nyid kun nas dkris te 'dug pa'o/ /phrag dog dang ser sna'i mtshan nyid ni bshad zin to//ngo tsha med pa ni yon tan rnams dang yon tan can rnams la mi gus pa ste/ gus pa'i gnyen po'i chos so/ /khrel med pa ni kha na ma tho ba la 'jigs par mi lta ba'o/ /kha na ma tho ba ni gang dam pa rnams kyis smad pa ngan song du 'gro ba'o/ /khro ba ni zhe sdang dang rnam par 'tshe ba ma gtogs te/sems can dang / sems can ma yin pa dag la kun nas mnar sems pa'o/ /'chab pa ni kha na ma tho bas mkhyud pa'o/ /sems las kun nas dkris te gnas pas kun nas dkris te 'dug pa rnams so/ /de dag la rmugs pa dang gnyid dang khrel med pa ni ma rig pa'i rgyu mthun pa'o//'gyod pa ni the tshom gyi rgyu las byung ba'o/ /ngo tsha med pa dang / rgod pa dang / ser sna ni 'dod chags kyi rgyu mthun pa'o/ /khro ba dang phrag dog ni khong khro ba las byung ba'o/ /'chab pa ni sred pa dang ma rig pa'i rgyu mthun pa'o/ /dri ma rnam pa bcu po de dag rnams kyang nye ba'i nyon mongs pa zhes bya'o//sems las byung ba rnams kyi rgyu ba phra ste/ de rgyun du 'bab pa yang bye brag phyed par mi nus na skad cig rnams lta smos kyang ci dgos/ bcom ldan 'das kyis gsungs pa'i chos kyi mtshan nyid la mkhas pa'i blo can dag gis ni de'i 'bras bu'i khyad par mthong bas/de dag gi rigs gzhan skyon med pas rtogs kyi/ bde bar gshegs pa'i gsung rab 'chad pa'i slob dpon la bsnyen bkur ma byas pa 'khrul pa'i blo gros can dag gis ni ma yin no/ /zag pa ni gsum ste 'dod pa'i zag pa dang /srid pa'i zag pa dang / ma rig pa'i zag pa'o/ /de la 'dod pa na spyod pa'i ma rig pa ma gtogs pa gzhan 'dod par gtogs pa'i/ nyon mongs pa kun nas dkris te 'dug pa dang bcas pa rdzas bzhi bcu rtsa gcig po gang yin pa 'di ni 'dod pa'i zag pa ste ma rig pa lnga ma gtogs pa/phra rgyas sum cu rtsa gcig dang kun nas dkris te 'dug pa bcu'o/ /gzugs dang gzugs med pa'i ma rig pa ma gtogs pa'i phra rgyas kun nas dkris te 'dug pa dang bcas pas rdzas lnga bcu rtsa bzhi ni/ srid pa'i zag pa ste/gzugs su gtogs pa'i phra rgyas nyi shu rtsa drug dang / de bzhin du gzugs med pa'i dang / rmugs pa dang rgod pa'o/ /lung du mi ston par mtshungs pa dang nang du bltas par gyur pa dang / mnyam par gzhag pa'i sa pa yin pa'i phyir khams gnyis nas skyes pa gcig tu bsdus so//khams gsum pa'i ma rig pa bco lnga ni ma rig pa'i zag pa'o/ /khams gsum du 'jog ste mya ngan las 'da' ba'i bar chad byed pa'i phyir zag pa dang / srid pa'i rtse mo nas mnar med pa'i bar dag tu skye mched drug gi sgo nas zag pas zag pa'o/ /chu bo ni bzhi ste/ 'dod pa'i chu bo dang / srid pa'i chu bo dang / lta ba'i chu bo dang / ma rig pa'i chu bo'o/ /de la 'dod pa'i zag pa nyid las lta ba'i rnams bton te/ rdzas nyi shu rtsa dgu ni 'dod pa'i chu bo'o/ /srid pa'i zag pa nyid las lta ba rnams ma gtogs pa rdzas sum cu ni sred pa'i chu bo'o/ / khams gsum pa'i lta ba rdzas sum cu rtsa drug ni lta ba'i chu bo'o/ /de dag ma yin pa'i lta ba nyon mongs pa gzhan dang ldan pa rnams dang / khams gsum pa'i ma rig pa ma 'dres pa rdzas brgya rtsa brgyad po de dag ni ma rig pa'i chu bo'o/ /dge ba las sems can rnams ded pas chu bo ste chu'i chu bo lta bu'o//sbyor ba rnams kyang tshul 'di dang 'dra ste/ nges pa'i tshig tu na sems can chu bos bdas pa rnams/ khams dang 'gro ba dang / skye gnas dang / sa rnams su sbyor bar byed pas sbyor ba ste sdug bsngal rnam pa sna tshogs dag la sbyor bar byed ces bya ba'i tha tshig go//len pa ni bzhi ste/ 'dod pa'i len pa dang / lta ba'i len pa dang / tshul khrims dang brtul zhugs kyi len pa dang / bdag tu smra ba'i len pa'o/ /de la 'dod pa'i chu bo nyid kyi steng du/ ma rig pa bsnan te rdzas sum cu rtsa bzhi ni 'dod pa'i len pa ste/ 'dod chags dang / khong khro ba dang / nga rgyal dang / ma rig pa nyi shu dang / the tshom bzhi dang / kun nas dkris te 'dug pa bcu'o/ /srid pa'i chu bo nyid kyi steng du ma rig pas bsnan te/ rdzas bzhi bcu ni bdag tu smra ba'i len pa ste/ khams gnyis nas skyes pa'i 'dod chags dang /nga rgyal dang ma rig pa sum cu dang / the tshom brgyad dang / rmugs pa dang / rgod pa'o/ /tshul khrims dang brtul zhugs mchog tu 'dzin pa ma gtogs pa khams gsum pa'i lta ba'i rdzas sum cu ni lta ba'i len pa'o/ /tshul khrims dang brtul zhugs mchog tu 'dzin pa rdzas drug ni tshul khrims dang brtul zhugs kyi len pa'o//de ni lam gyi dgrar gyur pa dang / khyim pa dang rab tu byung ba'i phyogs la slu ba'i phyir lta ba rnams las logs shig tu bshad do/ /'di ltar khyim pa rnams la 'dis slu ba ni zas mi za ba dang 'bab stegs su 'khru ba dang /ri kha nas g.yang du mchong ba la sogs pas mtho ris su re ba'o/ /rab tu byung ba rnams ni yid du 'ong ba'i yul yongs su spong ba dang / chos 'di la zhugs pa yang sbyangs pa'i yon tan yang dag par blangs pas dag par rtogs pa'o/ /len pa'i don ni shing gi don te las kyi me 'bar ba'i rgyun skyed pa'i phyir ro//dper na shing gi rgyus me 'bar ba de bzhin du nyon mongs pa'i shing gi rgyus las kyi me 'bar ro/ /yang na 'khri ba'i don te dar gyi srin bus dkris pa bzhin no/ /mdud pa ni bzhi ste/ brnab sems lus kyi mdud pa dang / gnod sems lus kyi mdud pa dang /tshul khrims dang brtul zhugs mchog tu 'dzin pa lus kyi mdud pa dang / 'di bden no snyam du mngon par zhen cing mchog tu 'dzin pa lus kyi mdud pa'o/ /de la 'dod par gtogs pa'i 'dod chags sdug bsngal la sogs pa mthong bas spang bar bya ba dang /bsgom pas spang bar bya ba lnga ni dang po'o/ /khong khro ba lnga ni gnyis pa'o/ /tshul khrims dang brtul zhugs mchog tu 'dzin pa rdzas drug ni gsum pa'o/ /lta ba mchog tu 'dzin pa rdzas bcu gnyis ni bzhi pa'o/ /bzhi po de dag ni rdzas nyi shu brgyad do/ /lus tha dad pa sna tshogs su mdud par byed pas mdud pa ste/'ching ngo 'dogs so zhes bya ba'i tha tshig go/ /sgrib pa ni lnga ste 'dod pa la 'dun pa dang / gnod sems dang / rmugs pa dang / gnyid dang / rgod pa dang / 'gyod pa dang / the tshom mo/ /'dod pa na spyod pa'i sred pa sdug bsngal la sogs pa mthong ba dang /bsgom pas spang bar bya ba lnga ni dang po'o/ /khong khro ba lnga ni gnyis pa'o/ /rmugs pa dang gnyid gcig tu bsdus pa ni gsum pa ste/ de dag gi mtshan nyid ni bshad zin to/ /rgod pa dang 'gyod pa gcig tu bsdus pa ni bzhi pa ste/ de dag gi mtshan nyid kyang bshad zin to//'dod pa na spyod pa'i the tshom ni lnga pa'o/ /de ltar spyir bsdoms na rdzas bco brgyad do/ /'phags pa'i lam dang / gnas dang / 'dod chags dang bral ba dang / de la sbyor ba dge ba'i rtsa ba rnams la sgrib par byed pas sgrib pa rnams te bar du gcod pa'i tha tshig go//de dang de nas khams dang / 'gro ba dang skye gnas dang / sa'i bye brag bshad pa'i khams de gang yin pa dang / 'gro ba dang skye gnas dang sa gang yin pa de dag brjod par bya'o/ /de la khams ni gsum ste/ 'dod pa'i khams dang / gzugs kyi khams dang /gzugs med pa'i khams so/ /'dod pa'i khams na gnas rnam pa nyi shu la/ sems can dmyal ba chen po brgyad de/ /yang sos dang / thig nag dang / bsdus 'joms dang / ngu 'bod dang / ngu 'bod chen po dang / tsha ba dang / rab tu tsha ba dang / mnar med pa'o/ dud 'gro dang / yi dags dang / gling bzhi ste/ 'dzam bu gling dang / shar gyi lus 'phags dang / nub kyi ba lang spyod dang / byang gi sgra mi snyan no/ /'dod pa la spyod pa'i lha drug ste/ rgyal chen bzhi'i ris dang / sum cu rtsa gsum dang / 'thab bral dang / dga' ldan dang /'phrul dga' dang / gzhan 'phrul dbang byed rnams so/ /de yan chad gzugs kyi khams te/ gnas rnam pa bcu drug go/ /de la bsam gtan dang po la gnas rnam pa gnyis te/ tshangs ris dang / tshangs pa'i mdun na 'don no/ /gnyis pa la gsum ste/ 'od chung dang /tshad med 'od dang / 'od gsal lo/ /gsum pa la yang gsum ste/ dge chung / tshad med dge dang / dge rgyas so/ /bzhi pa la gnas pa brgyad de/ sprin med dang / bsod nams skyes dang / 'bras bu che ba dang / mi che dang / mi gdung dang / gya nom snang dang /shin tu mthong dang / 'og min rnams so/ /tshangs chen ni 'du shes med pa'i sems can bzhin du sa gzhan med do/ /gzugs med pa'i khams ni ltag 'og gi rim pa med de/ de bas na 'di dag gnas med pa nyid do/ /skye ba ni rnam pa bzhi ste/ nam mkha' mtha' yas skye mched dang /rnam shes mtha' yas skye mched dang / ci yang med pa'i skye mched dang / 'du shes med 'du shes med min skye mched do/ /khams gsum po 'di rnams la/ 'gro ba lnga dag rnam par gzhag ste/ sems can dmyal ba dang / dud 'gro dang / yi dags dang / lha dang mi zhes bya ba rnams so//skye gnas rnam pa bzhi ste/ sgo nga las skyes pa dang / mngal nas skyes pa dang / drod gsher las skyes pa dang / rdzus te skyes pa zhes bya ba rnams so/ /sa ni bcu gcig ste/ 'dod pa'i khams dang / mi lcogs pa med pa dang / bsam gtan dang po dang /bsam gtan khyad par can dang / gnyis pa dang / gsum pa dang / bsam gtan bzhi pa rnams dang / gzugs med pa bzhi rnams so/ /de la 'dod pa'i khams dang / srid pa'i rtse mo ni gcig tu zag pa dang bcas pa'o/ /lhag ma rnams ni zag pa dang bcas pa dang zag pa med pa'o//skabs su bshad pa rdzogs te dkyus ma la bab po/ /shes pa rnams zhes bya ba ni shes pa bcu ste/ chos shes pa dang / rjes su rtogs pa'i shes pa dang / pha rol gyi sems shes pa dang / kun rdzob shes pa dang /sdug bsngal shes pa dang / kun 'byung shes pa dang / 'gog pa shes pa dang / lam shes pa dang / zag pa shes pa dang / mi skye ba shes pa'o/ /de la 'dod par gtogs pa'i 'du byed rnams dang / de'i rgyu dang / 'gog pa dang / spong ba dang / sbyor ba dang / rnam par grol ba dang / khyad par gyi lam rnams dang / chos shes pa'i sa la shes pa dri ma med pa gang yin pa de ni chos shes pa ste/ thog ma med pa dang ldan pa'i 'khor ba na/ rtag tu bdag gi chu srin 'dzin khris zin pa'i rgyud can gyis de thog ma kho nar chos tsam du mthong ba'i phyir chos shes pa zhes bya'o//gzugs dang gzugs med par gtogs pa'i 'du byed rnams dang / de'i rgyu dang / 'gog pa dang / spong ba dang / sbyor ba dang / rnam par grol ba dang / khyad par gyi lam rnams dang / rjes su rtogs pa'i shes pa'i sa la shes pa zag pa med pa gang yin pa de ni rjes su rtogs pa'i shes pa ste/chos shes pa'i rjes las skye bas rjes su rtogs pa'i shes pa'o/ /ting nge 'dzin las skyes pa'i shes pa gang gis gzhan dag sems dang sems las byung ba da ltar byung ba shes pa dang 'dra ba 'dod pa dang / gzugs su gtogs pa rnams dang /zag pa med pa kha cig shes pa gang yin pa de ni pha rol gyi sems shes pa'o/ /de yang rnam pa gnyis te zag pa dang bcas pa dang zag pa med pa'o/ /de la zag pa dang bcas pas ni 'dod pa dang gzugs su gtogs pa rnams shes so/ /zag pa med pa yang rnam pa gnyis te/chos shes pa'i phyogs dang / rjes su rtogs pa'i shes pa'i phyogs so/ /de la dang po ni chos shes pa dang / lhan cig rgyu ba shes so/ /'og mas ni rjes su rtogs pa shes pa dang lhan cig rgyu ba shes so/ /gzugs dang mi ldan pa rnams dang / 'dus ma byas dang / 'das pa dang ma byon pa dang gzugs med par gtogs pa rnams dang / sa dang dbang po dang / gang zag mchog rnams kyi ni mi shes so/ /kun rdzob shes pa ni shes rab zag pa dang bcas pa ste/ kun rdzob ni phal cher bum pa dang / snam bu la sogs pa la 'jug pas kun rdzob shes pa'o//de yang nyon mongs pa can dang / nyon mongs pa can ma yin pa'o/ /nyon mongs pa can de yang rnam pa gnyis te/ lta ba'i bdag nyid dang / lta ba'i bdag nyid ma yin pa'o/ /lta ba'i bdag nyid ni lta ba lnga po rnams te/ 'jig tshogs la lta ba dang / mthar 'dzin par lta ba dang /log par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa zhes bya ba rnams so/ /lta ba'i bdag nyid ma yin pa ni/ the tshom dang / 'dod chags dang / khong khro ba dang / nga rgyal dang / ma rig pa dang / khro ba la sogs pa'i tshogs dang ldan pa'i shes rab po//nyon mongs pa can ma yin pa yang rnam pa gnyis te/ dge ba dang ma bsgribs la lung du mi ston pa'o/ /de la lung du mi ston pa ni lta ba ma yin gyi shes rab nyid do/ /dge ba ni gang rnam par shes pa lnga dang lhan cig rgyu ba de ni shes rab kyi yin gyi lta ba ma yin te mi rtogs pa'i phyir ro//yid kyi sa gang yin pa de ni 'jig rten pa'i yang dag pa'i lta ba'o/ /nye bar len pa'i phung po lnga po 'bras bur gyur pa rnams la/ mi rtag pa dang / sdug bsngal ba dang / stong pa dang bdag med pa'i rnam pas zhugs pa'i shes pa gang yin pa de ni sdug bsngal shes pa'o//nye bar len pa'i phung po lnga po rgyur gyur pa/ las dang nyon mongs pa lhan cig rgyu ba de dag nyid la/ rgyu dang kun 'byung ba dang / rab tu skye ba dang / rkyen gyi rnam par shes pa zag pa med pa gang yin pa de ni kun 'byung ba zhes pa'o/ /de dag 'gog pa la 'gog pa dang / zhi ba dang gya nom pa dang nges par 'byung ba'i rnam par shes pa dri ma med pa gang yin pa de ni 'gog pa shes pa'o//de dag nyid kyis mya ngan las 'das pa thob par byed pa'i lam la/ lam dang rigs pa dang / sgrub pa dang / nges par 'byin pa'i rnam par shes pa dri ma med pa gang yin pa de ni lam shes pa'o//bdag gis sdug bsngal yongs su shes so/ /kun 'byung ba spangs so/ /'gog pa mngon sum du byas so/ /bdag gis lam bsgoms so snyam du de ltar zad pa'i tshul gyis zhugs pa'i shes pa zag pa med pa gang yin pa de ni zad pa shes pa'o/ /de dag nyid go rims bzhin sbyar te/yang yongs su shes par bya ba dang / spang bar bya ba dang / mngon sum du bya ba dang / bsgom par bya ba med do snyam du de ltar mi skye ba'i tshul gyis zhugs zhes pa dri ma med pa gang yin pa de ni mi skye ba shes pa'o/ /shes pa 'di gnyis rtogs pa ma yin pas lta ba'i bdag nyid ma yin no//lhag ma gzhan ni lta ba'i bdag nyid du 'grub po/ /de rnams kyi nang nas kun rdzob shes pa ni gcig tu zab pa dang bcas pa'o/ /gzhan gyi sems shes pa ni zag pa dang bcas pa dang zag pa med pa'o/ /lhag ma rnams ni zag pa med pa kho na'o/ /pha rol gyi sems dang /sdug bsngal dang / kun 'byung ba dang / lam shes pa bzhi po 'di dag ni 'dus byas la dmigs pa'o/ /'gog pa shes pa ni 'dus ma byas la dmigs pa'o/ /lhag ma rnams ni gnyi ga la dmigs pa'o/ /de dag ni nang nas sdug bsngal dang / kun 'byung ba shes pa'i spyod yul ni zag pa dang bcas pa'o//'gog pa dang lam shes pa'i spyod yul ni zag pa med pa'o/ /lhag ma rnams kyi spyod yul ni gnyi ga'o/ /chos shes pa sa drug la ste/ mi lcogs pa med pa dang / bsam gtan khyad par can dang / bsam gtan bzhi po rnams la'o/ / rjes su rtogs pa'i shes pa ni sa dgu la ste/ sa drug po dag nyid dang / gzugs med pa gsum la'o/ /pha rol gyi sems shes pa ni bsam gtan bzhi po rnams la'o/ /lhag ma'i nang nas chos shes pa'i phyogs gang yin pa de ni sa drug la'o/ /rjes su rtogs pa'i shes pa'i phyogs gang yin pa de ni sa dgu la'o//kun rdzob shes pa ni sa thams cad la'o/ /bzod pa ni brgyad de/ sdug bsngal la chos shes pa'i bzod pa dang / sdug bsngal la rjes su rtogs par shes pa'i bzod pa dang / kun 'byung ba la chos shes pa'i bzod pa dang / kun 'byung ba la rjes su rtogs pa'i shes pa'i bzod pa dang /'gog pa la chos shes pa'i bzod pa dang / 'gog pa la rjes su rtogs par shes pa'i bzod pa dang / lam la chos shes pa'i bzod pa dang / lam la rjes su rtogs par shes pa'i bzod pa'o/ /de ni nges pa'i shes pa bskyed pa'i blo'i bye brag go//bden pa bzhi la bzod pas de'i phyir bzod pa zhes bya'o/ /rnam pa brgyad po de dag gi lta ba nyid de shes pa ni ma yin no/ /nges pa'i don ni shes pa'i don to/ /bsam pa yongs su tshol ba la zhugs pa dag kyang bzod pa'o/ /de la sdug bsngal la chos shes pa'i bzod pa skyes nas/sdug bsngal mthong bas spang bar bya ba'i nyon mongs pa 'dod par gtogs pa bcu'i rnyed pa nas bzung ste 'gag go/ /chos shes pa yang de dag gi mya ngan las 'das pa'i rnyed pa nas bzung ste skye'o/ /bzod pa ni 'dir bar chad med pa'i lam mo/ /shes pa ni lam gyi rnam par grol ba'i lam ste/dper na mi gnyis las gcig gis ni khyim nas rkun po bzung ste phyung gcig gis ni sgo bcad pa dang 'dra'o/ /sdug bsngal la rjes su rtogs par shes pa'i bzod pa skyes nas/ gzugs dang gzugs med par gtogs pa'i nyon mongs pa sdug bsngal mthong bas spang bar bya ba bco brgyad kyi rnyed pa nas bzung ste 'gag go//rjes su rtogs pa'i shes pa yang de dag gi mya ngan las 'das pa'i rnyed pa nas bzung ste skye'o/ /sems bzhi po de dag gis/ khams gsum po'i sdug bsngal gyi bden pa mngon par rtogs par 'gyur ro/ /ji ltar sdug bsngal gyi bden pa sems bzhis mngon par rtogs pa de bzhin du kun 'byung ba dang /'gog pa dang / lam gyi bden pa rnams kyang / sems bzhi bzhir khong du chud par bya'o/ /sems bcu drug gis phra rgyas brgyad cu rtsa brgyad spangs nas/ bden pa bzhi mngon par rtogs te/rgyun du zhugs pa'i 'bras bu yang thob par 'gyur ro/ /bsgom pas spong bar bya ba bcu zhig lus te/ 'dod par gtogs pa bzhi dang / gzugs su gtogs pa gsum dang / gzugs med par gtogs pa gsum mo/ /de la re zhig 'dod par gtogs pa'i 'dod chags dang / / khong khro ba dang / nga rgyal dang / ma rig pa 'dam bu sbams pa'i tshul du bsdus nas rim pa dgur phye ste/ chen po'i chen po dang / chen po'i 'bring po dang / chen po'i chung ngu dang / 'bring po'i chen po dang / 'bring po'i 'bring po dang / 'bring po'i chung ngu dang / chung ngu'i chen po dang / chung ngu'i 'bring po dang / chung ngu'i chung ngu'o/ /de dag gi gnyen po bar chad med pa'i lam dang / rnam par grol ba'i lam yang de bzhin du rig pa dgu dgur rig par bya'o/ /de la nyes pa'i rnam pa chen po'i chen po'i gnyen po ni 'phags pa'i lam gyi rnam pa chung ngu'i chung ngu ste/de bzhin du nyes pa'i rnam pa chung ngu'i chung ngu'i gnyen po ni chen po'i chen po'i bar du'o/ /de la nyon mongs pa'i rnam pa drug spangs na/ lan cig phyir 'ong bar 'gyur ro/ /dgu char spangs na phyir mi 'ong bar 'gyur ro/ /ji ltar 'dod par gtogs pa'i nyon mongs pa bzhi la rnam pa dgu ste/de dag gi gnyen po bar chad med pa dang / rnam par grol ba'i lam zhes bya ba yang / rnam pa dgu dgur 'gyur ba de ltar/ so so'i nyes pa yang rnam pa dgu dgu ste/ de dag gi gnyen po yang de bzhin du khong du chud par bya'o/ /de ltar nyon mongs pa rnams mthar gyis spangs par gnas te/srid pa'i rtse mo pa'i nyes pa'i rnam pa chung ngu'i chung ngu spangs na dgra bcom par 'gyur ro/ /'bras bu bzhi po rnams kyi bar gyi lam la gnas pa rnams ni zhugs pa zhes bya ste/ 'bras bu gang dang gang gi tshu rol gyi lam la gnas pa de ni 'bras bu de la zhugs pa'o//de ltar de dag ni 'phags pa'i gang zag brgyad yin te/ bzhi ni zhugs pa'o/ /bzhi ni 'bras bu la gnas pa'o/ /'di lta ste/ rgyun du zhugs pa'i 'bras bu mngon sum du bya ba'i phyir zhugs pa dang / rgyun du zhugs pa dang lan cig phyir 'ong ba'i 'bras bu mngon sum du bya ba'i phyir zhugs pa dang /lan cig phyir 'ong ba dang / phyir mi 'ong ba'i 'bras bu mngon sum du bya ba'i phyir zhugs pa dang / phyir mi 'ong ba dang / dgra bcom pa nyid kyi 'bras bu mngon sum du bya ba'i phyir zhugs pa dang / dgra bcom pa'o/ /rigs kyi sa drug tu 'gyur te/ dbang po rtul po dang / rnon po'i rigs can gyi so so'i skye ba gang yin pa de gnyis mthong ba'i lam la sems kyi skad cig bco lnga rnams la dad pas rjes su 'brang ba can dang / chos kyi rjes su 'brang ba can zhes bya ba gnyis dang / de nyid bsgom pa'i lam la sems kyi skad cig ma bcu drug pa nas bzung ste/srid pa'i rtse mo'i nyes pa'i rnam pa chung ngu'i chung ngu dang / bar chad med pa'i lam gyi bar du ste/ bar der dad pas mos pa dang / lta ba thob pa zhes bya ba gnyis dang / de dag nyid yang mi slob pa'i lam la zad pa shes pa nas bzung ste sems kyi skad cig pa tha ma mya ngan las 'da' ba'i bar du ste/bar der dus kyis rnam par grol ba zhes bya ba dag go/ /chos 'di dang ldan pa nyid du zhes nges par bsnyad pa'i rgyu ni 'thob pa'o/ /'di na ni gdon mi za bar chos rnam pa gsum ste/ dge ba dang mi dge ba dang / lung du ma bstan pa'o/ /de la dge ba ni dad pa la sogs pa'o//mi dge ba ni 'dod chags la sogs pa'o/ /lung du mi bstan pa ni sprul pa'i sems la sogs pa'o/ /de rnams gang dag la yod pa de dag ni chos 'di dang ldan pa'o/ /de'i dngos po ni chos 'di dang ldan pa nyid do/ /de'i nges par bsnyad pa'i rgyu'i chos gang yin pa de ni 'thob pa ste/rnyed pa dang ldan pa zhes kyang bya'o/ /de med du zin na 'dod chags la sogs pas kun nas dkris te 'dug pa'i 'phags pa rnams la zag pa med pa'i sems med pas 'phags pa nyid ma yin par 'gyur ro/ /byis pa dge ba dang lung du ma bstan pa'i sems la gnas pa rnams kyang 'dod chags dang bral bar 'gyur ro//mya ngan las 'das pa'i 'thob pa med par 'dra na ni byis pa rnams kyang ma 'dres par thal bar 'gyur ro/ /chos kyi rjes kyang de mi slob pa'i chos bcu po 'di dag bskyed pa dang 'thob pa dang ldan pas 'phags par 'gyur te/ yan lag lnga spangs pa'o zhes rgya cher gsungs so//yang dge slong dag gang zag 'di ni chos dge ba rnams dang mi dge ba rnams dang yang ldan no zhes gsungs te/ sems can dag gi sems kyi rgyun la dge ba dang mi dge ba'i thob pa bsags pa dpag tu med pa dag gzigs nas/ gtso bo mchog gis dge slong dag gang zag gis tshod ma bzung zhig /gang zag la tshad kyang ma 'dzin cig ces rgya cher gsungs so/ /de yang rnam pa gnyis su blta bar bya ste/ ma thob pa dang / rnam par nyams pa las thob pa dang / thob nas ldan pa'o/ /de las bzlog pa ni 'thob pa med par rig par bya'o//'thob pa dang / 'thob pa med pa de gnyis kyang / rang gi rgyud la gnas pa'i chos rnams nyid kyi'o/ /so so dang so sor brtags pa ma yin pas 'gog pa gnyis kyi yang yod de/ /su yang gzhan gyi rgyu la gnas pa dang / sems can du bgrang ba ma yin pa'i chos de dag dang ldan pa ma yin no//nam mkha' yang ma yin no/ /de'i phyir de rnams kyi thob pa dang ma thob pa med do/ /de la 'thob pa rnam pa gsum ste/ grib ma rjes su 'brang ba lta bu dang / khyu mchog rjes su 'brang ba lta bu dang / be'u rjes su 'brang ba lta bu'o//de la dang po ni 'di lta ste lung du ma bstan pa rnams kyi'o/ /gnyis pa ni 'di lta ste/ gang nas shi 'phos te 'dod pa'i khams su skye ba'i mtshams sbyor ba'i dus dang / 'dod par gtogs pa'i dge ba dang mi dge ba rnams kyi'o/ /gsum pa ni 'di lta ste/ thos pa dang bsam pa las byung ba la sogs pa rnams kyi ste/lhan cig skyes pa ma gtogs so/ /de la mdor bstan na/ 'dod par gtogs pa'i dge ba dang mi dge ba'i gzugs kyi 'thob pa ni sngar skyes pa med do/ /lhan cig skyes pa dang / phyi nas skyes pa ni yod do/ /mngon par shes pa dang / sprul pa'i sems ma gtogs so//bzo'i gnas dang / spyod lam las kyang cung zad ma gtogs kyi/ gzhan ma bsgribs la lung du mi ston pa dang / bsgribs pa'i rnam par rig byed kyi gzugs thams cad kyi 'thob pa ni/ mthu chung ba'i phyir lhan cig skyes pa nyid de/ sngar ram phyi nas skye ba ma yin no//lhag ma dus gsum pa rnams kyi ni so sor dus gsum pa'o/ /dge ba dang mi dge ba dang lung du mi ston pa rnams kyi yang / dge ba dang mi dge ba dang lung du mi ston pa nyid de go rims bzhin no/ /'dod pa dang gzugs dang gzugs med par gtogs pa rnams kyi ni/ rang rang gi khams su gtogs pa nyid do//dri ma med pa ni khams gsum pa dang / zag pa med pa ste lam gyi bden pa dang / 'dus ma byas ni dri ma med pa'i rnams so/ /de la so sor brtags pa ma yin pas 'thob pa ni khams gsum pa'o/ /so sor brtags pas 'gog pa gzugs dang gzugs med pa'i lam gyis thob pa ni der gtogs pa nyid do//zag pa med pa'i lam gyis thob pa dang / lam gyi bden pa ni zag pa med pa'o/ /de yang bsdu na rnam pa bzhir 'gyur te/ khams gsum dang zag pa med pa'o/ /slob pa dang mi slob pa rnams kyi ni slob pa dang mi slob pa'o/ /slob pa yang ma yin mi slob pa yang ma yin pa rnams kyi ni rnam pa gsum mo//zag pa dang bcas pa dang 'dus ma byas dag ni/ slob pa yang ma yin mi slob pa yang ma yin pa'i chos rnams so/ /de la zag pa dang bcas pa rnams dang / so sor brtags pa ma yin pas 'gog pa dang / so sor brtags pas 'gog pa 'jig rten pa'i lam gyis 'thob pa ni ma yin mi slob pa yang ma yin pa'o//slob pa dang mi slob pa'i lam gyis thob pa ni slob pa dang mi slob pa'o/ /mthong ba dang bsgom pas spang bar bya ba rnams kyi ni mthong ba dang bsgom pas spang bar bya'o/ /spang bar bya ba ma yin pa yang rnam pa gnyis te/bsgom pas spang bar bya ba dang spang bar bya ba ma yin pa'o/ /spang bar bya ba ma yin pa'i chos rnams ni lam gyi bden pa dang 'dus ma byas so/ /de la so sor brtags pa ma yin pas 'gog pa dang / 'jig rten pa'i lam gyis thob pa cig shos kyi ni bsgom pas spang bar bya ba'o//dri ma med pa'i lam gyis thob pa'i so sor brtags pas 'gog pa dang / lam gyi bden pa'i spang bar bya ba ma yin pa kho na'o/ /'thob pa med pa ni thams cad kyang nyon mongs pa can ma yin la/ lung du mi ston pa ste de bas na 'di ni 'thob pa bzhin du bye brag mang du med de/ zhig pa dang ma skyes pa rnams kyi ni dus gsum pa'o/ /da ltar byung ba rnams kyi ni dus gnyis pa ste/ lhan cig skyes pa med do/ /'dod pa dang gzugs dang gzugs med par gtogs pa rnams kyi ni so sor khams gsum pa'o/ /'thob pa med pa la ni dri ma med pa gang yang med do/ / so so'i skye bo nyid gang zhe na/ gang 'phags pa'i chos rnams ma thob pa'o zhes chos mngon pa las 'byung ngo / /bsam gtan gsum pa'i 'dod chags dang bral ba/ bsam gtan bzhi pa'i sa pa/ sems dang sems las byung ba/ 'jug pa dang mi mthun pa mi ldan pa'i chos ni/'du shes med pa'i snyoms par 'jug pa zhes bya'o/ /sems dang sems las byung ba thams cad 'gags kyang 'du shes 'jig pa'i sgo nas de bskyed pas 'du shes nyid du ston te/ pha rol gyi sems shes pa bzhin no/ /de yang dge ba bsam gtan bzhi pas bsdus pa/so so'i skye bo'i rgyud de 'phags pa'i rgyud ma yin no/ /'phags pa ma yin pa thar pa'i 'du shes can dag de skyed do/ /'phags pa rnams kyis ni ngan song gi gnas lta bur dgongs so/ /myong bar 'gyur ba nges pa dang / skyes nas myong bar 'gyur ba yang yin no//de ni 'bad pas 'thob kyi/ 'dod chags dang bral bas ma yin no/ /'gog pa'i snyoms par 'jug pa ni ci yang med pa'i skye mched kyi 'dod chags dang bral ba/ srid pa'i rtse mo'i sems dang sems las byung ba 'jug pa dang mi mthun pa'i chos so/ /'byung ba chen po mnyam pa nyid du byed pas snyoms par 'jug pa'o//'di ni srid pa'i rtse mo ste/ dge ba dang skyes nas pa dang / lan grangs gzhan na myong bar 'gyur ba dang / myong bar 'gyur bar ma nges pa ste/ 'di ni bskyed nas mya ngan las 'da' bar byed na/ des de'i rnam par smin pa myong bar mi 'gyur ro//de'i rnam par smin pa srid pa'i rtse mo'i phung po bzhir yang 'gyur te/ de ni 'phags pa nyid kyi yin gyi/ byis pa yi ni ma yin no/ /'phags pas ni tshe 'di la bde bar gnas par bya ba'i phyir 'phags pa'i lam gyi stobs kyis 'di bskyed do/ /byis pa la ni de med pa dang chad kyis 'jigs pa'i de mi srid do//'phags pa yang sbyor bar 'gyur te/ 'dod chags dang bral bas ni ma yin no/ /bcom ldan 'das kyis ni 'dod chags dang bral bas brnyes te/ sangs rgyas bcom ldan 'das rnams kyis zag pa shes pa dang dus mnyam du 'di brnyes so/ /sangs rgyas bcom ldan 'das rnams kyis gang cung zad thob par bya ba ni sbyor ba cung zad kyang mi dgos te/bzhed pa tsam gyis yon tan phun sum tshogs pa de dag thams cad mngon du 'gyur ro/ /'du shes med pa'i sems kyi khrod/ /lha rnams kyi nang du skyes pa rnams kyi sems dang sems las byung ba'i gcod pa'i chos gzhan rnam par smin pa las byung ba/'du shes med pa'i snyoms par 'jug pa'i rnam par smin pa'i 'bras bu gang yin pa de ni 'du shes med pa ste/ lha 'bras bu che ba zhes bya ba gang yin pa de dag gi phyogs gcig pa ni 'du shes med pa ste/ dper na bsam gtan dang po'i phyogs gcig ni bsam gtan khyad par can lta bu'o//der skyes pa de dag kyang 'chi 'pho ba dang skye ba'i dus na ni 'du shes yod do/ /gzhan gyi tshe ni sems med par gnas so/ /nam 'chi 'pho ba de'i tshe na yang yun ring du gnyid kyis log log pa las sad pa bzhin du/ de nas shi 'phos nas 'dod pa'i khams kho nar skyes te/gzhan du ni ma yin no/ /der skyes pa rnams la 'dod par gtogs pa'i lan grangs gzhan na myong bar 'gyur ba'i las gdon mi za bar yod pa'i phyir te/ dper na byang gi sgra mi snyan pa rnams la lhar skye ba myong bar 'gyur ba'i las yod pa lta bu'o/ / khams gsum pa'i tshe sngon gyi las kyis 'phongs pa skye mched drug gi rgyun 'brel pa gnas pa'i rgyur gyur pa/ 'gro bar gdags pa'i rgyu gang yin pa de ni srog gi dbang po zhes bya'o/ /chos mngon pa las kyang srog gi dbang po gang zhe na khams gsum pa'i tshe yin no/ /tshigs su bcad pa las kyang /tshe dang drod dang rnam par shes/ /de dag nam zhig lus bor ba/ /de tshe spangs nas shi ba ni/ /dper na shing la sems med bzhin/ /zhes 'byung ngo / /mdo las kyang rnam par smin pa mngon par grub na sems can dmyal ba zhes bya ba'i grangs su 'gro ba de bzhin du/ 'du shes med 'du shes med min skye mched du 'gro ba'i bar gyi grangs su 'gro'o zhes 'byung ngo //srog gi dbang po ma gtogs par gang skye ba'i rgyun mi 'chad par 'gyur ba 'gro bar gdags pa'i rgyu khams gsum la khyab pa'i dbang po gzhan med do/ /'gro bar gdags pa'i rgyu'i chos med du zin na gzugs med par skyes pa rnams/dge ba dang bsgribs pa dang / sa 'og ma pa'i zag pa med pa'i sems mngon du byed pa na 'chi 'pho dang skye bar thar bar 'gyur ro/ /skal ba mnyam pa nyid ni sems can rnams kyi don gcig la 'dod pa'i rgyu'o/ /de yang tha dad pa ma yin pa dang /tha dad pa'o/ /de la tha dad pa ma yin pa ni/ sems can thams cad bdag la chags pa dang / kha zas 'dod par sems can so sor mthun pa gang yin pa'o/ /tha dad pa ni khams dang sa dang 'gro ba dang skye gnas dang / rigs dang bud med dang skyes pa dang / dge slong dang dge bsnyen dang / slob pa dang mi slob pa la sogs pa'i bye brag gis tha dad pa de rnams kyi don gcig la 'dod pa'i nges pa'i rgyu'o/ /de med du zin na 'phags pa dang 'phags pa ma yin pa dang / 'jig rten gyi tha snyad thams cad 'dres pa'i skyon du 'gyur ro/ /so so'i skye bo nyid dang /so so'i skye bo'i skal ba mnyam pa nyid la tha dad du dbye ba ci yod/ 'dod pa mthun pa'i rgyu ni skal ba mnyam pa nyid ces bshad do/ /so so'i skye bo nyid ni gnod pa thams cad kyi 'byung gnas su gyur pa'o/ /'di lta ste 'gro ba'i gtso bos kyang / dge slong dag byis pa so so'i skye bo thos pa dang mi ldan pa ni sdig pa mi dge ba'i las mi byed pa ci yang med do zhes nga smra'o zhes gsungs so//gzhan nas kyang gal te 'dir 'ong na ni/ mi rnams dang skal ba mnyam pa nyid rab tu 'thob po zhes rgya cher gsungs so/ /so so'i skye bo nyid la ni de ltar thob pa dang 'dor ba med de/ de bas na de bye brag shin tu che'o//skye ba ni chos skye ba'i nang gi yan lag ste/ rang gi nus pa 'thob pa'i rgyu'o/ /chos skye ba'i rgyu gnyis te/ nang gi yan lag dang / phyi'i yan lag go/ /de la nang gi yan lag ni skye ba'o/ /phyi'i yan lag ni rgyu dang rkyen rnams so/ /de med du zin na phyi'i yan lag rnams bskyod kyang /nam mkha' bzhin du chos skye bar mi 'gyur ba dang / nam mkha' la sogs pa yang 'dus byas su 'gyur ba'i skyon du 'gyur ro/ /gnas pa ni 'bras bu gzhan 'phen pa'i dus kyi gnas kyi rgyu ste/ chos gnas na 'bras bu gzhan 'phen nus par 'gyur ro/ / de bas na gang gi dbang gis 'bras bu 'phen pa'i chos de ni gnas pa zhes bya'o/ /de med du zin na 'phen par mi 'gyur ro/ /dga' ba ni 'bras bu gnyis pa 'phen nus pa la gnod pa'i rgyu'o/ /gal te chos gang 'bras bu 'phen nus pa de la gnod pa'i rgyu med du zin na chos de 'bras bu du ma 'phen nus par 'gyur te/de lta na ni skad cig par mi 'gyur ro/ /mi rtag pa nyid ni gnod par byed nus pa 'das par byed pa'i rgyu ste/ chos gang gis da ltar las spos nas 'das par byed pa'i chos de ni mi rtag pa de nyid ces bya'o/ /de med du zin na chos 'jig pa med pa nyid du 'gyur ba dang /nam mkha' la sogs pa yang 'jig par 'gyur ro/ /bzhi po de dag ni 'dus byas dag gi 'dus byas kyi mtshan nyid do/ /chos gang la 'di bzhi yod pa de ni 'dus byas kyi mtshan nyid dang ldan pas 'dus byas zhes bya'o/ /ji skad du 'jig rten gyi mgon pos kyang / dge slong dag gsum po 'di dag ni 'dus byas dag gi 'dus byas kyi mtshan nyid de/ 'dus byas la skye ba dang / 'jig pa dang / gnas pa gzhan du 'gyur ba yang snang ngo zhes gsungs pa lta bu'o/ /gnas pa ni 'dir 'dul ba'i dbang gi phyir te/ skye ba skyed pa'i phyir bcom ldan 'das kyis dpal can ma dang sna nag ma 'grogs pa bzhin du gnas pa dang /dga' ba 'grogs par gcig tu bsdus te gnas pa gzhan du 'gyur ba zhes gsungs so/ /de dag ni chos kyi bdag nyid du gyur pa ma yin no/ /gal te bdag nyid du gyur na ni/ des na ji ltar mtshan nyid kyi gzhi dang /mtshan nyid rnams tha dad pa ma yin pa de bzhin du/ mtshan nyid rnams kyang phan tshun tha dad par mi 'gyur ro/ /de ltar gyur na yang skye ba gang yin pa de nyid 'jig par 'gyur/ 'jig pa gang yin pa de nyid skye bar 'gyur ba dang / chos mi skye ba kho nar 'gyur ro//mtshan nyid rnams kyi rjes su mthun pa'i mtshan nyid kyang bzhi ste/ skye ba'i skye ba zhes bya ba la sogs par rig par bya'o/ /'di las thug pa med par yang mi 'gyur te/ 'di ltar rtsa ba'i mtshan nyid dag ni chos brgyad po dag la 'jug go/ /rjes su mthun pa'i mtshan nyid rnams ni re re la'o//de la skye ba ni bdag ma gtogs pa chos brgyad po dag gi nang gi yan lag rang gi nus pa 'thob pa'i rgyu yin te/ rtsa ba'i chos dang mtshan nyid gsum po rnams dang / rjes su mthun pa'i mtshan nyid bzhi po rnams la'o//mi rtag pa nyid kyi bar du de bzhin te/ bdag ma gtogs pa chos brgyad po rnams kyi rnam par 'jig pa'i rgyu'o/ /skye ba'i skye ba ni skye ba nyid kyi yin pa nas/ mi rtag pa nyid kyi mi rtag pa nyid kyang mi rtag pa nyid kyi yin pa'i bar du'o/ /mtshan nyid rnams ni rtsa ba'i chos la gnas pa'o//rjes su mthun pa'i mtshan nyid dag ni mtshan nyid rnams la gnas so/ /mtshan nyid rnams ni bshad zin to/ /da ni ming gi tshogs la sogs pa brjod par bya'o/ /de la gang dag ngag rnams la rag las te skye ba/ shes pa bzhin du don gyi tshul gyis gnas lta bu'i rnam par rang gi don khong du chud par byed pa/'du shes dang / ngag dang / yi ge'i 'bru zhes rnam grangs gzhan gyis brjod par bya ba de dag ni/ go rims bzhin du ming dang / tshig dang / yi ge rnams shes par bya'o/ /dper na mig la sogs pa la rag las te/skye ba mig gi rnam par shes pa la sogs pa/ gzugs la sogs pa'i don gyi tshul gyis gnas lta bu'i rnam pa rang gi don khong du chud par byed pa rnams bzhin no/ /ngag gi sgras ni don brjod par mi 'gyur te/ me zhes brjod pas tshig par gyur ta re/ ngag tu brjod pas ni me'i ming brjod pa yin no/ /mig gis ni me'i don khong du chud par byed de/ de'i blo skyed do zhes bya ba'i tha tshig go/ /sgra ni thogs pa dang bcas pa dang / de las gzhan du brda sprod pa pas brtag go zhes yongs su brtags pa yang ma grub pa'i phyir/ de las don khong du chud pa brtag pa mi rigs so//sgra dang ming dang don dang / shes pa chos bzhi po 'di dag ni ngo bo gcig pa 'dra bar snang ngo / /de la gzugs sgra zhes bya ba la sogs pa'o/ /tshig ni yi ge'i 'bru ji snyed kyis/ 'dod pa'i don yongs su rdzogs par 'gyur ba ste/ dper na/ sdig pa thams cad mi bya'o/ /zhes bya ba la sogs pa tshigs su bcad pa dang / 'jig rten na yang lha sbyin ba dkar mo khrid de shog ces bya ba la sogs pa lta bu'o/ /yi ge ni 'di lta ste/ a zhes bya ba yi ge 'bru gcig go/ /ming dang tshig dang yi ge so so na mang ba ni/ ming dang / tshig dang / yi ge'i tshogs rnams shes pa'o/ /drang srong chen pos kyang dge slong dag de bzhin gshegs pa 'jig rten du byung nas/ ming dang tshig dang yi ge'i tshogs rnams shes so zhes gsungs te/ phung po dang skye mched dang / khams dang / bden pa dang / dge sbyong gi 'bras bu dang / rten cing 'brel par 'byung ba la sogs pa'i zhes bya bar dgongs so/ /yang de bzhin gshegs pas/ ming dang / tshig dang / yi ge'i tshogs de dang / de dag brnyes so zhes kyang gsungs so/ /de bas na ming gi tshogs la sogs pa yod pa nyid do//'du byed kyi dngos po ni 'di snyed do/ /da ni rnam par shes pa brjod par bya'o/ /gzugs la sogs pa yul gyi dngos po tsam so sor rnam par rig pa ni rnam par shes pa ste/ mig la sogs pa lhan cig byed pa'i rgyus yongs su zin na 'byung nus pa/ gzugs la sogs pa yul drug po rnams la/dngos po tsam khong du chud pa'i chos gang yin pa de ni rnam par shes pa'o/ /de bye brag khong du chud pa ni ma yin gyi/ bye brag khong du chud par byed pa ni ra ba la sogs pa'i chos rnams kyi gnas su gyur pa ste/ da ltar gyi dus kyi skad cig tsam la dmigs pa/ yid dang sems kyi rnam grangs su brjod pa'o/ /dang po'i sems can gyi rdzas gdags pa'i rgyu dang gzugs la sogs pa/ yul so sor rnam par rig pa yang byed pa'o/ /de yang yul gyi bye brag gis rnam pa drug tu 'gyur te/ mig gi rnam par shes pa nas yid kyi rnam par shes pa'i bar dag go//de'i mtshan nyid ni bcom ldan 'das nyid kyi ste/ sna tshogs shes pas rnam par shes pa'o/ /rnam par shes pa'i dngos po'o/ /mtshan nyid bsam pa'i skabs su phyi'i yan lag gi byed pa ni rgyu dang rkyen rnams so zhes smos pa de la rgyu de dag ni gang / rkyen rnams ni gang zhe na/ rgyu ni drug ste mtshungs par ldan pa'i rgyu dang / lhan cig 'byung ba'i rgyu dang / skal ba mnyam pa'i rgyu dang / kun du 'gro ba'i rgyu dang / rnam par smin pa'i rgyu dang byed pa'i rgyu'o/ /de la sems dang sems las byung ba rnams ni/ phan tshun du mtshungs par ldan pa'i rgyu yin te/ 'di lta ste/ sems ni tshor ba nas shes rab kyi bar dag gi'o/ /shes rab kyang sems kyi'o/ /lhan cig 'byung ba'i rgyu ni phan tshun 'bras bu chos rnams te/ 'di lta ste/ 'byung ba rnams gcig gi gcig yin pa dang / mtshan gyi gzhi yang mtshan nyid rnams kyi ma yin la/de dag kyang de'i yin pa ltar/ sems kyang sems kyi rjes su 'brang ba rnams kyi'o/ /de dag kyang de'i 'o/ /de la lhan cig 'byung ba'i rgyu ni phan tshun gyi stobs kyis/ lam gyi dgon pa las byung ba'i tshul du'o/ /mtshungs par ldan pa'i rgyu ni gcig la gcig lam brgyags kyis mthud pa'i tshul du'o//sems kyi rjes su 'brang ba rnams ni/ sems las byung ba thams cad dang / bsam gtan dang zag pa med pa'i sdom pa dag dang / 'dus byas kyi mtshan nyid gang dag sems de'i yin pa dag go/ /de dag ni sems dang lhan cig tu/dus dang skye ba dang gnas dang 'gag pa gcig dang / 'bras bu dang rgyu mthun pa dang rnam par smin pa gcig dang / dge ba dang mi dge ba dang / lung du mi ston pa'i sems su gyur na dge ba la sogs pa ste/ de ltar rgyu bcu po de dag gi sems kyi rjes su gzung ba rnams zhes bya'o//rang gi sa dang rang gi ris pa'i chos 'dra ba sngar skyes pa rnams ni/ chos 'dra ba phyis skye ba rnams kyi/ sa bon gyi chos kyi tshul gyis skal ba mnyam pa'i rgyu yin no/ /rang gi sa pa kun du 'gro ba sngar skyes pa rnams ni nyon mongs pa can gyi chos phyis skyes pa rnams kyi kun du 'gro ba'i rgyu'o//mi dge ba rnams dang / dge ba zag pa dang bcas pa rnams ni rnam par smin pa'i rgyu ste/ de dag rnam par smin par 'gyur ba'i chos can yin pa'i phyir ro/ /chos skye ba ni rang bzhin ma gtogs pa chos thams cad ni skye ba la bgegs mi byed cing mi sgrib pa'i dngos pos byed pa'i rgyu yin no//de dag gi 'bras bu ni 'dus byas kyi chos thams cad dang 'dus ma byas la gcig go/ /de dag kyang lnga ste/ skyes bu'i byed pa'i 'bras bu dang / rgyu mthun pa'i 'bras bu dang / rnam par smin pa'i 'bras bu dang / bdag po'i 'bras bu dang / bral ba'i 'bras bu'o/ / de lhan cig 'byung ba dang mtshungs par ldan pa'i rgyu ni skyes bu byed pa'i 'bras bu'o/ /gang gi stobs kyis na gang 'byung ba de'i ste/ skyes bu byed pa'i 'bras bu zhes bya'o/ /skal ba mnyam pa dang / kun du 'gro ba'i rgyu ni rgyu mthun pa'i 'bras bu ste/ rgyu dang 'dra ba'i chos ni rgyu mthun pa zhes bya'o//rnam par smin pa'i rgyu ni rnam par smin pa'i 'bras bu'o/ /rgyu dang mi 'dra bar smin pa ni rnam par smin pa ste/ sems zhes bya ba ma bsgribs la lung du mi ston pa'i rang bzhin no/ /byed pa'i rgyu ni 'bras bu ste/ dper na mig gi rnam par shes pa ming dang gzugs la sogs pa'i yin pa dang /zhing pa la sogs pa'i lo tog la sogs pa lta bur de'i dbang gis de skyed pa'i phyir ro/ /mya ngan las 'das pa ni bral ba'i 'bras bu zhes bya ste/ de ni thob par bya ba yin gyi bskyed par bya ba ma yin no/ /rkyen ni bzhi ste/ rgyu'i rkyen dang / de ma thag pa'i rkyen dang / dmigs pa'i rkyen dang / bdag po'i rkyen no/ /de la byed pa'i rgyu ma gtogs pa rgyu lnga po dag ni rgyu'i rkyen to/ /'das pa dang da ltar byung ba'i sems dang sems las byung ba rnams kyi tha ma ma gtogs pa ni 'bras bu'i de ma thag pa'i rkyen no/ /dmigs pa'i rkyen ni chos thams cad do/ / bdag po'i rkyen ni byed pa'i rgyu'i rang bzhin no/ /nam mkha' ni bsags pa'i rdzas skye ba de'i skabs 'byed pa de'i bdag nyid ni nam mkha'o/ /de med du zin na bsags pa'i rdzas mi skye ba kho nar 'gyur ro/ kye gau ta ma sa ci la brten/ bram ze gser gyi dkyil 'khor la'o/ /gser gyi dkyil 'khor ci la brten chu la'o//chu ci la brten rlung la'o/ /rlung ci la brten/ rlung nam mkha' la'o/ /kye gau ta ma nam mkha' ci la brten/ bram ze ha cang thal ches te/ dri ba rnams kyi mtha' rtogs par mi nus par 'gyur ro/ /'on kyang snang ba yod pas nam mkha' mngon no/ nam mkha' ni gzugs med pa/ bstan du med pa/ thogs pa med pa yin na/ de ci la brten par 'gyur 'on kyang snang ba yod pas nam mkhar shes so zhes bde bar gshegs pas kyang gsungs so/ /nam mkha'i dngos po'o/ /so sor brtags pas 'gog pa ni sdug bsngal spong ba'o//sdug bsngal gang zhe na/ mdor bsdu na/ skye ba ni sdug bsngal lo/ /'di lta ste/ dge slong dag sdug bsngal ni srid pa mngon par 'grub pa'o zhes rgya cher gsungs so/ /srid pa mngon par 'grub pa'i 'jug pa de'i 'jug pa med pa ni spong ba zhes bya ste/rlung rgyu ba thogs par byed pa brag lta bur gnas pa gang yin pa de ni/ so sor brtags pas 'gog pa zhes bya'o/ /'dis bden pa bzhi po dag la so sor brtags pas/ so sor brtags pa ste/ blo'i bye brag dge ba'o/ / des 'gog pa thob pa gang yin pa de ni so sor brtags pas 'gog pa'o/ /de ni spang bar bya ba mtha' yas pa bzhin du mtha' yas te gcig pa ma yin no/ /gal te gcig pa zhig yin na ni 'phags pa'i lam gyi skad cig snga ma nyid kyis des mngon sum du byas pa'i phyir/lam bsgom pa phyi ma don dam par 'gyur ro/ /cung zad mngon sum du byed par rtogs na ni yan lag dang bcas par 'gyur ro/ /de bas na zag pa'i rdzas ji ltar snyed par/ spong ba'i rdzas kyang de snyed kho nar rtogs pa 'di ni legs so//'di ni 'bras bu'i bye brag gis rnam pa bzhir gzhag ste/ rgyun du zhugs pa'i 'bras bu dang / lan cig phyir 'ong ba'i 'bras bu dang / phyir mi 'ong ba'i 'bras bu dang / dgra bcom pa'i 'bras bu'o/ /spong ba dang / 'dod chags dang bral ba dang /'gog pa'i khams kyi bye brag gis rnam pa gsum mo/ /sdug bsngal dang kun 'byung ba'i bden pa gnyis po'i spong ba'i bye brag gam/ phung po dang bcas pa dang / phung po'i lhag ma med pa'i dbyings kyi bye brag gis yang rnam pa gnyis so//mtshams sbyor ba med pa skye ba 'gog par rnam par gzhag pas na gcig go/ /de'i rnam grangs ni zad pa dang / 'dod chags dang bral ba dang / 'gog pa dang / mya ngan las 'das pa zhes bya ba la sogs pa'o/ /de skad du mi'i mdo las kyang / dge slong dag phung po gzugs can ma yin pa bzhi po 'di dag dang / mig gi dbang po gzugs can dang / de dag ni mi nyid de 'di la sems can dang / mi dang / shed las skyes te/ shed bu zhes bya ba 'di ni ming ngo / /'di la bdag gis gzugs rnams mthong ngo snyam pa 'di ni dam 'cha' ba'o//'di la tshe dang ldan pa de'i ming ni 'di zhes bya zhes bya ba 'di ni tha snyad do zhes rgya cher brjod cing / dge slong dag de ltar na/ 'di ni ming tsam mo/ /'di ni tha snyad tsam mo/ /dge slong dag chos 'di dag thams cad ni mi rtag pa dang /sems pas 'phags pa dang / 'dus byas dang / sems pa las byung ba dang / rten cing 'brel par 'byung ba dag ste/ mi rtag pa nas rten cing 'brel par 'byung ba'i bar du gang yin pa de ni sdug bsngal lo/ /sdug bsngal de skye ba yang sdug bsngal lo//gnas pa dang / mngon par 'grub pa dang / 'byung ba yang sdug bsngal te/ sdug bsngal 'di ma lus par spangs pa dang / nges par spangs pa dang / byang bar gyur pa dang / zad pa dang / 'dod chags dang bral ba dang / 'gog pa dang / rnam par zhi ba dang / nub pa dang / sdug bsngal gzhan gyi mtshams mi sbyor ba dang / len pa med pa dang / mi 'byung ba gang yin pa de zhi ba/ de gya nom pa ste/ 'di lta ste/ phung po thams cad nges par spangs pa dang / sred pa zad pa dang /'dod chags dang bral ba dang / 'gog pa dang / mya ngan las 'das pa'o zhes gsungs so/ /de la 'dis phung po thams cad rab tu 'dor bas phung po thams cad dang bral ba'o/ /'di mthong ngam/ thos na sred pa zad par 'gyur bas sred pa zad pa'o/ / 'di thob nas 'dod chags med par 'gyur bas 'dod chags dang bral ba'o/ /'di mngon sum du byas na sdug bsngal 'gag pas 'gog pa'o/ /'di thob na gnod pa thams cad dang / 'tshe ba thams cad dang / nyon mongs pa thams cad las 'das pas mya ngan las 'das pa'o//so sor brtags pa'i dngos po'o/ /so sor brtags pas 'gog pa las gzhan pa/ ma 'ongs pa'i chos skye ba la gtan du bgegs su gyur pa'i chos so sor brtags pas 'gog pa med par rkyen ma tshang ba nyid kyis thob pa gang yin pa de ni/so sor brtags pa ma yin pas 'gog pa zhes bya ste/ dper na mig gis yid gzugs shig la yengs nas/ de ma yin pa'i gzugs gzhan dag dang / sgra dang dri dang / ro dang / reg bya rnams dang / chos rnams las kha cig 'gag pa ni/ de la dmigs pa'i sems dang /sems las byung ba gang dag skye bar 'gyur ba de dag gis thos na mi skye ste/ des de dag 'gag par 'gyur ba lta bu'o/ /bcom ldan 'das kyis kyang gang gi tshe bde ba tshor ba mngon du gyur pa de'i tshe/ 'di sdug bsngal dang / sdug bsngal yang ma yin bde ba yang ma yin pa'i tshor ba gnyis 'gog go zhes gsungs so//yang dge slong 'di'i sems can dmyal ba rnams zad do/ /dud 'gro rnams zad do/ /yi dags rnams zad do zhes gsungs so/ /so sor brtags pa ma yin pas 'gog pa'i dngos po'o/ /'di ni las dang po pa dga' bar bya ba'i phyir/ dpyad pa mang po med par bkod pa yin te/gang dag chos mngon pa'i mtshan nyid la mkhas par mi shes bzhin du/ rang gi blo gros kyis mtshan du brjod pa mang po rnam par bsgrubs nas/ mdun du gzhag ste/ klan ka ngan pa'i mda' rnams kyis 'bigs par 'dod pa de dag ni/ sangs rgyas bcom ldan 'das la skur pa 'debs pa yin te/'gro ba'i bdag pos kyang de bzhin gshegs pa la skur pa 'debs pa'i gang zag gnyis te/ ma dad pa ni zhe sdang gis so/ /dad pa ni log par zin pas so zhes gsungs so/ /rab tu byed pa chos mngon pa la 'jug pa zhes bya ba rdzogs so// //