CLOSE WINDOW

D4077
བོད་ཡིག

@#/ /rnal 'byor spyod pa'i bsgom pa'i don mdor bsdus te bstan pa/ 'jam dpal gzhon nur gyur pa la phyag 'tshal lo/ /ji skad du brjod pa'i ye shes de ni rtag pa dang chad par lta ba rnams kyis thob par mi nus te/ 'di ltar gal te yod par rnam par rtog na ni de'i phyir rtag pa nyid du 'dzin pa'i mthar ltung bar 'gyur/ji ste med par rnam par rtog na ni de lta na yang chad par lta ba'i mthar ltung bar 'gyur te/ de bas na 'di ni dbu ma'i lam gyis 'byung ba'i ngang tshul can yin pas ye shes de nyid de lta bur lta ba rnams kyis thob par mi nus so/ / de bas na dbu ma'i lam la brtson par bya'o zhes bstan pa'i phyir/ dbu ma'i lam las byung ba yi/ /ye shes rnam par mi rtog de/ /rtag par chad pa lta rnams kyis/ /thob par nus pa ma yin no/ /zhes bya ba smos so/ /dbu ma'i lam de yang dpyad na rnam par rig pa tsam nyid de/rnam par rig pa tsam nyid ni gtsor na rten cing 'brel bar 'byung ba'i dngos po mtshon pa'o/ /gzhan gyi dbang 'khrul pa tsam yin pas gzung ba dang 'dzin pa nyid du snang ba'i phyir/ gal te ji ltar snang ba de bzhin du yod na ni rtag pa'i mthar 'gyur ro/ /ci ste ci yang med na ni de lta na chad par 'gyur te/de lta bas na gdags pa'i gzhi yod pa nyid du khas blang bar bya dgos te/ de'i phyir/ dbu ma'i lam zhes bya ba yang / /rnam rig tsam nyid ma gtogs par/ /rigs pas brtags na 'dir gzhan ni/ /rnam pa kun tu mi 'thad do/ /zhes bya ba smos so//'o na bdas dang rigs mthun pa'i mdo las/ kun dga' bo yod ces bya ba ni rtag par 'gyur ro/ /med ces bya ba chad par 'gyur ro/ /de lta bas na de bzhin gshegs pa dbu ma'i lam gyi chos ston to zhes gsungs pa ji lta bu zhe na/ de ni nyes pa med de/ /gtso bor gang zag dgag pa'i phyir gsungs kyi/gzhan gtso bor byed pa ni ma yin te/ gzhan gtso bor mdzad pa ma yin pa de yang gang zag gis gsal bar mdzad pas bcom ldan 'das kyis gsungs so/ /de ltar rnam par rig pa tsam nyid du dbu ma'i lam du bsgrubs nas/de la gzung ba'i phyir/ rdzogs pa'i byang chub 'dod rnams kyis/ /mi rtog ye shes skyed pa'i phyir/ /de bas rnam par rig tsam du/ /bsgom pa rtag tu sbyar bar bya/ /zhes bya ba smos so/ /gang dag bla na med pa yang dag par rdzogs pa'i byang chub mngon par rdzogs par 'tshang rgya bar 'dod pa de dag gis rnam par mi rtog pa'i ye shes yongs su bsgrub pa'i phyir/'di thams cad ni rnam par rig pa tsam mo zhes rnam par rig pa tsam nyid du bsgom pa la rtag tu sbyar bar bya'o/ /de ltar rnam par rig par snang ba mthong ba skyes te/ thams cad la dngos po'i ngo bo mi mthong na/ gzung ba med par 'dzin pa yang med do zhes rnam par rig pa tsam yang yang dag par rjes su mi mthong ste/ de'i phyir gzung ba dang 'dzin par rtog pa dang bral bas/ rnam par mi rtog pa'i ye shes lhun gyis grub pa nyid du 'byung bar 'gyur te/ de'i phyir bsgom pa la rtag tu sbyar bar bya zhes bya ba smos te/'di ni phan yon yin pas de'i phyir sgrims shig ces ston to/ /de ltar de bsgom pa la mngon par brtson pa'i blo gros dang ldan pa ni sa bcu rim gyis rnam par rtog pa rnam par 'jig pas mi rtog pa'i ngo bo nyid mthong ste/ gzung ba dang 'dzin pa'i bdag nyid gnyis po gang yin pa de yang gnyis med kyi ngo bo nyid du rtog cing /'di na brtag par bya ba yang med la/ rtog pa yang med de/ 'di thams cad med pa la sgro btags pa yin pas/ 'di kun ni rmi lam dang 'dra'o zhes nges par byed de/ de'i phyir/ rnam rtog mi rtog bdag nyid yin/ /gnyis dang gnyis med bdag nyid de/'di dag thams cad rmi lam bzhin/ /'di la brtag bya med rtog med/ /ces bya ba smos te/ de ni 'di skad du phyin ci log tu gyur pa ma gtogs par chos phra rab tsam yang med de/ de bas na phyin ci log spangs tsam zhig bya bar zad do zhes bstan par 'gyur ro//dngos po gang yang bsnan med cing / /bsal ba med de de yi phyir/ /zhes bya bas ni de nyid sgrub par byed de/ 'di la bsal bya ci yang med/ /gzhag par bya ba ci yang med/ /yang dag nyid la yang dag lta/ /yang dag mthong bas rnam par grol/ /zhes bya ba ste de'i phyir/chos kyi rang gi ngo bo nyid/ /de bzhin nyid tsam mthong bas grol/ /zhes bya ba smos so/ /rnal 'byor spyod pa'i bsgom pa'i don mdor bsdus te bstan pa/ slob dpon ye shes zla bas mdzad pa rdzogs so// //rtsa ba slob dpon klu'i bshes gnyen gyis mdzad pa lags so/