CLOSE WINDOW

D4067
བོད་ཡིག

#/ /rgya gar skad du/ pany+tsa skan+d+ha bi ba ra Na/ bod skad du/ phung po lnga'i rnam par 'grel pa/ bam po dang po/ 'jam dpal gzhon nur gyur pa la phyag 'tshal lo/ /phung po lnga zhes bya ba 'di ni chos mngon pa'i bstan bcos so//bstan bcos 'di la thog mar 'brel pa dang / dgos pa dang / rang gi ston pa la mchod par brjod pa dang gsum bsnyad par bya'o/ /mchod par brjod pa ni mdzod kyi bstan bcos la sogs pa las smos pa de nyid 'dir blta bar bya ste/bsam pa des na slob dpon gyis 'dir mchod par brjod pa ma byas so/ /'di'i 'brel pa ni bcom ldan 'das kyis chos mngon pa stong phrag brgya pa la sogs pa gsungs pa de srog chags rnams kyis rtogs par mi nus pas de'i phyir ji ltar bstan bcos nyung dus srog chags rnams kyis chos mngon pa khong du chud par 'gyur snyam pa 'di ni 'brel pa'o//'di'i dgos pa ni chos rab tu rnam par 'byed pa'i phyir te/ chos ni 'dir zag pa dang bcas pa dang / zag pa med pa'i phung po lnga dag go/ /de dag rang gi mtshan nyid dang / spyi'i mtshan nyid du bye brag tu 'byed pa ni/rab tu rnam par 'byed pa ste/ 'phags pa'i lam dang sbyar ro/ /de ci'i phyir zhe na/ chos rnams rab tu rnam 'byed med par nyon mongs rnams/ /gang phyir nye bar zhi bar bya ba'i thabs med la//zhes bya ba dang / bcom ldan 'das kyis kyang chos gcig mngon par ma shes shing yongs su ma shes na yang yang dag par sdug bsngal zad par 'gyur bar nga mi smra'o zhes gsungs pa lta bu ste/ mngon par ma shes pa ni mthong ba'i lam gyis mngon par ma shes pa'o//yongs su ma shes pa ni bsgom pa'i lam gyis yongs su ma shes pa ste/ de ltar dgos par 'thad do/ /de la chos mngon pa ni mdor bsdu na rnam pa gnyis su blta ste/ tha snyad pa dang / don dam pa'o/ /de la don dam pa ni zag pa med pa'i phung po lnga ste/ tshul khrims kyi phung po dang / ting nge 'dzin gyi phung po dang / shes rab kyi phung po dang / rnam par grol ba'i phung po dang / rnam par grol ba'i ye shes mthong ba'i phung po'o//tha snyad pa ni shes rab mtshungs par ldan pa dang bcas pa ste/ thos pa las byung ba dang / bsams pa las byung ba dang / bsgoms pa las byung ba dang / skye bas thob pa dang / bstan bcos te/ de ltar 'di ni rgyas par bya na rnam pa drug gi bdag nyid la chos mngon pa zhes bstan pa yin no//nges pa'i tshig tu bya na mya ngan las 'das pa la mngon du phyogs pa'i chos dang / rang dang spyi'i mtshan nyid la mngon du phyogs pa'i chos la chos mngon pa zhes brjod do/ /'dir bstan bcos su 'dod pa gang zhe na/de'i don gyi yi ge'i rnam pa dang / sgra'i spyi ste mi ldan pa'i 'du byed dang sbyar ro/ /nges pa'i tshig gi tshul du na nyon mongs pa'i dgra 'chos pa dang / ngan 'gro dang / srid pa'i 'jig pa las skyob pa'i phyir bstan bcos te / de lta yin pas mngon par mtho ba dang / nges par legs pa rab tu bstan par 'gyur ro zhes brjod par 'gyur ro//ngan 'gro las skyob pas ni/ mngon par mtho ba rab tu bstan par 'gyur ro/ /nyon mongs pa'i dgra 'chos pa dang / srid pa las skyob pas ni nges par legs pa rab tu bstan par 'gyur te/ slob dpon 'phags pa lhas kyang / nyon mongs dgra rnams ma lus 'chos pa dang //ngan 'gro srid las skyob pa gang yin te/ /'chos skyob yon tan phyir yang bstan bcos te/ /gnyis po 'di dag gzhan gyi lugs la med/ /ces brjod pa lta bu'o/ /de la phung po lnga ni gzugs kyi phung po dang / tshor ba'i phung po dang / 'du shes kyi phung po dang /'du byed kyi phung po dang / rnam par shes pa'i phung po'o/ /ci'i phyir phung po'i go rims 'di ltar mdzad/ smras pa/ gzugs ni thogs pa dang bcas pa dang / rnam par shes pa'i tshogs lnga'i gnas yin pa dang / rnam par shes pa'i tshogs drug gi dmigs pa yin pa'i phyir/gzugs ni thams cad pas ches rags pa ste/ de'i phyir de thog mar smos kyi tshor ba la sogs pa ni ma yin no/ /tshor ba ni rgyu ba rags pa'i phyir gsum pas ches rags te/ 'di ltar 'jig rten na nga glad pa na'o/ /nga glad pa phyed na'o zhes tha snyad du bya'o/ /'du shes ni mtshan mar 'dzin pa ste/rnam par shes par sla ba'i phyir gnyis pas ches rags pa ste/ 'jug pa shin tu rtogs par sla ba'i phyir ro zhes bya ba'i tha tshig go/ /'du byed rnams ni mngon par 'du byed pa'i mtshan nyid yin pas 'dod chags la sogs pa kun tu 'byung ba gsal bar rtogs pa'i phyir rnam par shes pa bas ches rags so//rnam par shes pa ni shin tu phra ba'i phyir tha mar bstan to/ /yang na snod la sogs pas phung po'i go rims bstan te/ gzugs kyi phung po ni snod lta bu'o/ /tshor ba'i phung po ni zas lta bu ste/ tshor ba ni sems can gyi lus la phan pa dang /gnod par byed pa'i phyir zas dang 'dra ste/ de ni myang bar bya ba'o/ /'du shes kyi phung po ni tshod ma lta bu ste/ dgra dang mdza' bshes dang tha mal pa la bde ba la sogs par mtshan mar 'dzin pa dang 'dra ba'i phyir ro/ /'du byed rnams ni byan po lta bu ste/ de'i dbang gis 'dod pa dang mi 'dod pa'i rnam par smin pa mngon par 'grub pa'i phyir ro//rnam par shes pa ni za ba lta bu ste/ de dag la bdag tu 'dzin pa'i phyir ro/ /sdug bsngal dang bde ba rnam par shes pa ste / rnam par shes pa'i phyir rnam par shes pa zhes bya'o/ /yang na kun nas nyon mongs pa'i dbang du byas nas rim par gzhag ste/'di ltar thog ma med pa can gyi 'khor ba na skyes pa dang / bud med rnams phan tshun mngon par dga' ste/ kha dog dang dbyibs la mngon par dga' zhes bya ba'i tha tshig go/ /de'i phyir gzugs kyi phung po las thog mar kun nas nyon mongs pa 'byung bas gzugs kyi phung po thog mar smos so//de'i sgo nas tshor ba la chags te/ de la chags pa ni tshor ba'i ro myang ba'i phyir te/ mngon par dga' ba'i phyir ro zhes bya ba'i tha tshig go/ /de la chags pa ni bde ba'i tshor ba la mngon par chags pa ste/ de la mngon par dga' ba yin pas de'i 'og tu tshor ba'i phung po smos so//tshor ba'i sgo nas 'du shes phyin ci log byung ste ji lta zhe na/ bde ba la sogs par mtshan mar 'dzin pa'i phyir zhes bya ba'i tha tshig ste/ de'i phyir de'i 'og tu 'du shes kyi phung po'o/ /phyin ci log de nyid nyon mongs pa dang sbyar te/ 'du byed kyi phung po la gnas pa de'i 'og tu 'du byed kyi phung po bstan to//nyon mongs rnams kyi 'gro ba gzhan la sogs par rnam par shes pa kun nas nyon mongs par 'gyur ba'i phyir te phyis bstan to/ /go rims bshad zin to/ /ci'i phyir phung po lnga kho na ste/ mi mang mi nyung ba 'di brjod dgos so/ / smras pa/ 'di ltar phung po lnga po dag nyid kyis bdag gi ba'i dngos po dang bdag gi dngos po brjod de/ de la bdag gi ba'i dngos po ni phung po bzhis brjod de/ gzugs dang / tshor ba dang / 'du shes dang / 'du byed ces bya ba rnams kyis so/ /ji lta zhe na/ gzugs kyi phung pos ni yongs su 'dzin pa dang bcas pa lus kyi bdag nyid kyi dngos po brjod do//tshor ba'i phung pos ni longs spyod kyi bdag nyid kyi dngos po brjod do/ /'du shes kyi phung pos ni tha snyad kyi bdag nyid kyi dngos po brjod do/ /'du byed kyi phung pos ni chos dang / chos ma yin pa'i mngon par 'du byed pa'i bdag nyid kyi dngos po brjod do//rnam par shes pa'i phung pos ni de dag gi gnas kyi bdag nyid kyi dngos po brjod do/ /'di ltar 'jig rten na phal cher rnam par shes pa la ni bdag tu 'dzin/ lhag ma rnams la ni bdag gir 'dzin te/ de'i phyir phung po lnga nyid du 'thad do/ /de ltar 'di lta bu'i rang bzhin can gang yin pa'i bdag de khas len na grangs can dag rtag pa dang /yan lag med pa dang / byed pa po ma yin gyi zab po la sogs par smra ba dang / bye brag pa dag byed pa po dang za ba po la sogs par smra ba dang / gcer bu pa dag bum pa'i mar me bzhin du zhum pa dang rgyas par smra ba ji ltar 'thad de/de skad smra ba dag gi ltar na dge ba dang mi dge ba'i las kyi 'bras bu med par 'gyur ro/ /ci'i phyir zhe na/ bdag rtag pa'i phyir te/ dge ba dang mi dge ba'i las de dag gis bdag la phan pa dang gnod pa zhig bya grang na phan pa dang gnod pa gnyi ga yang bdag la mi 'byung ste/ nam mkha' ltar rtag pa'i phyir ro//ji ltar nam mkha' la rtag par 'gyur ba med pa la phan pa dang gnod pa med pa de bzhin du bdag la yang dge ba dang mi dge ba'i las kyi 'bras bu don med par 'dir 'thad do/ /yang smras pa/ mkha' la 'char nyis ci zhig bya/ /de gnyis 'bras bu pags la yod/ /gal te pags 'dra de mi rtag /gal te mkha' 'dra 'bras bu med/ /yang na bya rog gi so brtag pa lta bu 'dis ci zhig bya/ dkyus ma la 'jug par bya'o/ /de la phung po lnga ni chos mngon pa'i bstan bcos so zhes smras pa de la thog mar gzugs kyi phung po bstan pas de'i mtshan nyid bstan pa 'ba' zhig la brtsam mo//de la smras pa/ gzugs gang zhe na/ gzugs gang yin pa ci yang rung ste/ de dag thams cad 'byung ba chen po bzhi dang 'byung ba chen po bzhi dag rgyur byas pa'o/ /'di ni gzugs kyi phung po mdor bsdus pa'o/ /'byung ba chen po bzhi zhes bya ba'i don gang yin/ ci zhig the tshom za zhe na/'byung ba'i sgra ni don du mar 'jug pa'i phyir te/ 'di lta ste/ 'byung ba'i sgra ni skye ba la yang yod de/ zas bzhin sems can 'byung po rnams gnas par bya ba'i phyir ro zhes 'byung ba'i phyir te skye ba zhes bya bar mngon no/ /bden pa la yang yod de/ yang dag par smra ba zhes bya ba'i/ phyir ro/ /yod pa la yang yod de/ bdag ji ltar gyur pa bzhin du brjod pa'o/ /sems can la yang yod de/ 'byung po rnams la dbyig pa spangs nas zhes bya ba'o/ /'das pa rnams la yang yod de/ sngon byung ba zhes bya ba'o/ /mi ma yin pa la yang yod de/ 'dir ni 'byung po gang dag 'ongs gyur na//zhes bya ba dang de bzhin du 'byung pos zin to/ /'byung po yi chad do zhes bya ba'o/ /cung zad ma rdzogs pa la yang yod de/ pha dang 'dra zhes bya ba'o/ /'dir 'byung ba'i sgra gang la bya zhe na/ sa la sogs pa la blta ste/ 'byung ba chen po bzhi dag go/ /bzhi gang zhe na/ sa'i khams dang /chu'i khams dang / me'i khams dang / rlung gi khams so zhes bya ba'i phyir ro/ /skye dang bden dang de bzhin yod/ /sems can 'das dang mi ma yin/ /cung zad lus dang sa la sogs/ /'byung ba'i sgrar ni mkhas pas rtogs/ de dag ni 'byung ba yang yin la chen po yang yin bas 'byung ba chen po dag go//de dag gi che ba ni de las gzhan pa rgyur byas pa'i gzugs kyi gnas yin pa'i phyir ro/ /yang na sa dang / chu dang / me dang / rlung gi phung po de dag gi shas che ba la brten pa dang / sdud pa dang / smin par byed pa dang / g.yo ba'i skabs kyi las kyi sa chen por gnas par 'gyur ba'i phyir ro//yang na sa chen por gnas par snang ba nyid do/ /chu dang / me dang / rlung ni 'jig pa gsum gyi tshe chen por gnas pa nyid du gsal te/ 'di ltar mes 'jig pa na bsam gtan dang bo'i bar du tshig go/ /chus 'jig pa na bsam gtan gnyis pa'i bar du g.yengs so//rlung gis 'jig pa na bsam gtan gsum pa'i bar du 'jig go/ /'byung ba zhes bya ba'i don gang yin/ 'byung ba sna tshogs 'grub pa la de dang de dag gi rnam par 'byung ba'i phyir 'byung ba dag go/ /yang na 'byung ba'i phyir 'byung ba ste/ 'byung ba yod par byed pa'i phyir 'byung ba dag pa ste/'byung ba'i yod pa rgya cher byed/ /ces bya ba'i tha tshig go/ /khams zhes bya ba'i don gang zhe na/ rang gi mtshan nyid dang rgyur byas pa'i gzugs 'dzin pa'i phyir khams so/ /de la sa'i khams gang zhe na/ sra ba nyid do zhes bya ba ni gang lus la sra ba yod pa gang yin pa de sa'i khams so//chu'i khams gang zhe na/ gsher ba nyid do zhes bya ba ni gang lus la gsher bar byed pa'o/ /me'i khams gang zhe na/ tsha ba nyid do zhes bya ba ni gang lus la dro ba nyid yod pa'o/ /phyi rol gyi 'byung ba chen po rnams la yang mtshan nyid de ltar blta bar bya'o//rlung gi khams gang zhe na/ yang zhing g.yo ba nyid do zhes bya ba la yang ba nyid kyis chog gi /g.yo ba smos ci dgos/ smras pa/ rgyur byas pa'i gzugs kyang yang ba zhes bya ba'i phyir ro/ /de ltar na g.yo ba nyid ces bya bas chog mod/ de ltar na yang sems pa la yang thal du 'ong ste/sems pa yang g.yo ba'i bdag nyid yin pa'i phyir ro/ /de lta bas na gnyi ga gsal ba'i phyir chos gang yang ba nyid du gyur cing g.yo ba'i bdag nyid yin pa ni rlung gi khams zhes bya'o/ /g.yo ba ni bskyod pa ste/ gang yul gzhan du phyin par byed ces bya ba'i tha tshig go//'o na lnga pa nam mkha' ji ltar 'byung ba chen po ma yin zhe na/ 'byung ba'i mtshan nyid du mi 'thad pa'i phyir te/ 'byung ba dag ni sems can rnams la phan pa dang / gnod pa byed pa yin na nam mkha' ni de lta bu ma yin te/ snod dang zhig pa la bye brag med pa'i phyir ro/ /gzhan yang 'byung ba chen po dag ni sa bon la sogs pa'i gnas skabs las 'gyur ba ni myu gu'i gnas skabs kyi rkyen gyis dngos por 'gyur na/nam mkha' ni rtag pa'i phyir de ltar 'gyur ba ma yin te/ dngos po gzhan skyed pa ma yin no/ de'i phyir 'byung ba chen po ma yin te/ de lta bas na lus ni 'byung ba chen po bzhi po nyid du 'thad do//'byung ba chen po dag bshad zin to/ /de dag ni phan tshun med na mi 'byung ba nyid du blta ste/ ji lta zhe na shing dang / rdo la sogs pa la sdud pa dang / me 'byung ba dang / 'phel ba dang / ltung ba yod pas chu dang me dang rlung dang ldan par mngon no//chu la yang gru 'dzin pa dang / dro ba dang / g.yo ba dmigs pas sa dang me dang rlung dang ldan par mngon no/ /me lce la yang 'degs pa dang / sdud pa dang g.yo ba dmigs pas sa dang chu dang / rlung dang ldan par mngon no/ /rlung la yang 'degs pa dang /grang ba dang tsha ba'i reg pa dmigs pas sa dang chu dang me dang ldan par mngon no/ /'dir dpe ni phye dang lan tshwa dang / phye ma dang / skom sbyar ba lta bur blta bar bya'o/ /da ni rgyur byas pa'i gzugs brjod par bya ste/ de'i phyir smras pa/ rgyur byas pa'i gzugs gang zhe na zhes bya ba ste/de yang rnam pa bcu gcig nyid do/ /ji ltar zhe na/ dbang po lnga dang / yul lnga dang / rnam par rig byed ma yin pa zhes bya ba'o/ /de la 'byung ba chen po bzhi ni gzugs skye ba na rnam pa lngas rgyur 'gyur te/ skyed pa dang / gnas pa dang / brten pa dang / rton pa dang /'phel bar byed pa zhes bya ba'o/ /de la skyed pa'i rgyu ni skye ba'i rgyu nyid do / /de dag med na mi 'byung ba'i phyir ro/ /gnas kyi rgyu ni rten gyi rgyu nyid de/ 'byung ba dag bor na rgyur byas pa'i gzugs logs shig tu yul na gnas pa'i mthu med pa'i phyir ro/ /rten gyi rgyu ni rjes su 'jug pa'i rgyu nyid de 'byung ba dag gyur na de la brten pa rgyur byas pa'i gzugs kyang 'gyur pa'i phyir ro//rton pa'i rgyu ni gnas pa'i rgyu ste/ 'dra bar 'byung ba'i dus na 'byung ba rnams kyis rgyur byas pa'i gzugs kyi rgyun mi chad pa'i tshul ni 'dzin pa'i phyir ro/ /'phel bar byed pa'i rgyu ni 'phel ba'i dus na 'byung ba rnams kyis rgyur byas pa'i gzugs brtas par byed pa'i phyir ro//de ltar na 'byung ba chen po bzhi po de dag ni rnam pa lngas rgyur byas pa'i gzugs rnam pa bcu gcig gi rgyu yin no/ /de la mig gi dbang po gang zhe na/ yul kha dog gzugs dang ba'o/ /blta bas na mig ste/dbang byed pa'i don ni dbang po'i don to/ /de dag gang zhig gang la dbang byed ce na mig gi dbang po ni mig gi rnam par shes pa mtshungs par ldan pa dang bcas pa 'byung ba na dbang byed do/ /rna ba'i dbang po ni rna ba'i rnam par shes pa mtshungs par ldan pa dang bcas pa 'byung ba na dbang byed do//de bzhin du sna dang lce dang lus kyi dbang po rnams kyang sna dang lce dang lus kyi rnam par shes pa mtshungs par ldan pa dang bcas pa 'byung ba na dbang byed do/ /yul kha dog gzugs dang ba zhes bya ba ni yul gzugs kyi yul can mig gi dbang po ston to/ /dbang po de ni dang ba'i bdag nyid de /gzugs dang ba zhes bya ba ni mig gi 'bras bu phyogs gsal ba ste/ zho ga chu lta bu'o/ /gang yod na mig gi rnam par shes pa 'byung gi med na mi 'byung ba de ni mig gi dbang po gzugs dang ba'i bdag nyid du rig par bya'o/ /rna ba'i dbang po gang zhe na/ yul sgra gzugs dang ba'o zhes bya ba ni/ yul sgras yul can rna ba'i dbang po ston to/ /dbang po de ni dang ba'i bdag nyid de/ gzugs dang ba zhes bya ba ni rna ba'i 'brug gi phyogs gsal ba de zho ga chu dang ba lta bu'o/ /gang yod na rna ba'i rnam par shes pa 'byung gi med na mi 'byung ba de ni rna ba'i dbang po'i gzugs dang ba'i bdag nyid du rig par bya'o//de bzhin du sna'i dbang po ni sna'i tshigs kyi nang rol na'o/ /lce'i dbang po ni lce'i dbus na skra'i rtse mo tsam ma gtogs so/ /gzhan dag na re zla ba kham pa lta bu'o zhe'o/ /lus kyi dbang po ni thams cad du khyab po//gal te de lta na gang la lce'i dbang po yod pa de la lus kyi dbang po yang yod do zhe na/ gang gi yul drag pa'o/ /mnyam par gyur na/ lce'i dbang po yul sngar 'dzin te/ za 'dod pas phung po'i rgyun za 'dod par chums pa'i phyir ro/ /dbang po rnams bshad zin to/ /yul lnga brjod par bya ste/smras pa/ gzugs gang zhe na/ mig gi yul te/ kha dog dang dbyibs dang rnam par rig byed do zhes bya ba ni 'dir yul can dbang pos yul ston te/ mig gi dbang po'i spyod yul gyi don gang yin pa de gzugs zhes bya ba'i tha tshig go/ /de la kha dog ni rnam pa bzhi ste/sngon po dang / ser po dang / dmar po dang / dkar po'o/ /de'i dbye ba ni 'di lta ste/ grib ma dang / nyi ma dang / snang ba dang / mun pa dang / sprin dang / du ba dang / rdul dang / khug rna dang / nam mkha'o/ /dbyibs ni rnam pa brgyad de/ lham pa dang /zlum po dang / mtho ba dang / dma' ba dang / phya le ba dang / phya le ba ma yin pa dang / ring po dang / thung ngu'o/ /lham pa ni gru bzhi pa'o/ /kun tu dkyil 'khor ni zlum pa'o/ /ri la sogs pa ni mtho ba'o/ /khron pa la sogs pa ni dma' ba'o/ /dbyibs mnyam pa ni phya le ba'o//dbyibs mi mnyam pa ni phya le ba ma yin pa'o/ /ring po dang thung ngu ni ltos pa'o/ /gal te ltos pas tha dad pa'i phyir yongs su mi 'grub po zhe na/ ltos pas tha dad par mi rung ba med de/ pha dang bu bzhin no/ /dper na pha la ltos nas nam du yang bu phar mi 'gyur/ bu la ltos nas nam du yang pha bur mi 'gyur ba de bzhin du gang la ltos nas gang ring ba de de la ltos nas nam du yang thung ngur mi 'gyur ro/ /gang la ltos nas thung ba de de la ltos nas nam yang ring por mi 'gyur te/ ring po dang thung ngur 'thad do/ /gzugs bshad zin to/ /da ni sgra brjod par bya ste/de smras pa/ sgra gang zhe na/ rna ba'i yul ste zin pa dang / ma zin pa dang / gnyis ka'i ste/ 'byung ba chen po'i rgyu las byung ba'o/ /zin pa zhes bya ba don gang zhe na/ sems dang sems las byung ba rnams kyis rten gyi dngos por gzung ba ste phan pa dang gnod pa gnyis kyi phan tshun rjes su 'jug pa'i phyir 'jig rten na gang sems yod pa de zin pa zhes brjod do//de ltar zin pa'i 'byung ba chen po rnams kyis bskyed pa'i sgra de zin pa'i 'byung ba'i rgyu las byung ba zhes bya ba ste/ lag pa dang ngag gi sgra'o/ /ma zin pa'i 'byung ba chen po'i rgyu las byung ba ni rlung dang nags tshal la sogs pa'i sgra'o//gnyi ga'i sgra 'byung ba chen po'i rgyu las byung ba ni lag pa dang rnga la sogs pa'i sgra'o/ /de yang bshad pa'i bye brag gis rnam pa bzhir 'gyur te/ 'jig rten gyi grags pa dang / yongs su brtags pa dang / grub pas bstan pa dang / tha snyad btags pa'o//'jig rten gyi grags pa ni 'jig rten pa'i brjod pa ste/ 'di lta ste/ bum pa dang snom bu dang shing rta zhes bya ba la sogs pa'o/ /yongs su brtags pa ni mu stegs can rnams kyis brjod pa ste/ 'di lta ste/ gtso bo ni byed pa zhes bya ba la sogs pa'o/ /grub pas bstan pa ni 'phags pas bstan pa ste/'du byed thams cad ni mi rtag pa'o zhes bya ba la sogs pa'o / /tha snyad pa ni 'phags pa dang 'phags pa ma yin pa'i ste/ mthong ba dang ma mthong ba la sogs pa'i tha snyad kyi dbang du byas par rig par bya'o/ /grub pa'i mtha' las ni/ rna ba'i yul 'byung ba chen po bzhi las grub pa'i gzugs zhes 'byung ngo / /sgra bshad zin to / /dri gang zhe na/ sna'i yul te dri zhim pa dang / dri nga ba dang / de las gzhan pa'o/ /dri zhim pa ni gang mnam na phung po'i rgyun rgyas par 'gyur ba'o/ /dri nga ba ni gang bsnams na phung po'i rgyun nyams par 'gyur ro//dri mnyam pa ni gang de gnyi gar mi 'gyur ba'o/ /de yang lhan cig skyes pa dang sbyar ba dang gyur pa'o/ /dri bshad zin to/ /ro gang zhe na/ lce'i yul te / mngar ba dang / skyur ba dang / lan tshwa dang / tsha ba dang / kha ba dang / bska ba zhes bya'o / /myang bar bya ba'i phyir ro zhes bya ba ste/ro myang ba zhes bya ba'i tha tshig go/ /de la mngar ba ni bu ram dang / sha kha ra la sogs pa'o/ /skyur ba ni tsha dang skyur rtsi la sogs pa'o/ /lan tshwa ni lan tshwa lnga'o/ /tsha ba ni tsha ba gsum mo/ /kha ba ni pa to la'i lo ma la sogs pa'o/ /bska ba ni shing 'dzam bu'i shun pa la sogs pa'o//de yang yid du 'ong ba dang / yid du mi 'ong ba dang / gnyi ga ma yin pa dang / lhan cig skyes pa dang / sbyar ba dang gyur pa'o/ /ro bshad zin to/ /reg bya'i phyogs gcig gang zhe na/ lus kyi yul te/ 'byung ba chen po bzhi bzhag ste/ 'jam pa dang / rtsub pa dang / lci ba dang / yang ba dang / grang ba dang / bkres pa dang / skom pa'o zhes bya ba la 'jam pa ni gnyen zhing mnan par 'os pa ste/ pags pas bshud nas de rtog pa'i phyir ro/ /rtsub pa ni rud rud po ste/ reg bya tsam du zad cing bzung bas reg pa'i phyir ro/ / lci ba dang yang ba ni srang gis bcal bas de rtogs pa'i phyir ro/ /grang ba ni rlung gi 'dus te reg pa'i phyir te/ de ni dro ba 'dod par byed pa'o/ /bkres pa ni za 'dod pa'o/ /skom pa ni 'thung 'dod pa'o/ /gal te de lta na bkres pa dang / skom pa ni sems las byung ba yin pa'i phyir rgyur byas pa'i gzugs su mi 'grub po//smras pa/ rgyu la 'bras bu gdags phyir te/ /dper na/ sangs rgyas rnams ni 'byung ba bde/ /chos bstan pa yang bde ba'o/ /dge 'dun mthun pa bde ba yin/ /mthun pa rnams kyi dka' thub bde/ /zhes bya ba lta bu ste/ 'di la me dang rlung gi shas che ste/ zas dang skom pa bzhu ba'i skabs nas lus nyams dma' ste/ me dang rlung zhes bya ba'i reg bya de la brten nas 'bras bur gyur pa/ gnyen po 'dod pas bkres pa dang / skom pa 'byung ste/ rgyu reg bya de la bkres pa dang skom pa gdags so/ /de ltar reg bya rnam pa bdun po 'di dang /gong du smos pa 'byung ba chen po bzhi dang 'di dag ni bcu gcig gi bdag nyid yin no/ da ni rnam par rig byed ma yin pa brjod par bya ste/ de smras pa/ rnam par rig byed ma yin pa gang zhe na/ rnam par rig byed dang / ting nge 'dzin las byung ba'i gzugs te/bstan du med la thogs pa med pa'o/ /gzugs dang bya ba'i rang bzhin yin du zin kyang / rnam par rig byed bzhin du gzhan la rnam par rig par mi byed pas na/ rnam par rig byed ma yin pa'o/ /rnam par rig byed las byung ba zhes bya ba ni rnam par rig byed gnyis te/lus kyi rnam par rig byed dang / ngag gi rnam par rig byed do/ /de yang dge ba dang mi dge ba ste/ dge ba ni srog gcod pa dang / ma byin par len pa dang / 'dod pas log par g.yem pa dang / brdzun du smra ba dang / phra ma dang tshig 'khyal ba dang / ngag rtsub mo spangs pa'i sems zhes bya'o //sems nyid las yin te/ bcom ldan 'das kyis bka' stsal pa/ dge slong dag sems pa ni las su nga smra'o zhes gsungs pa lta bu'o/ /des bskyed pa'i rnam par rig byed ma yin pa ni dge ba dag go/ /mi dge ba'i rnam par rig byed ni srog gcod pa nas tshig 'khyal pa zhes bya ba'i bar gyi sems pa ste/des bskyed pa'i rnam par rig byed ma yin pa ni/ mi dge ba dag go/ /ting nge 'dzin las byung ba'i rnam par rig byed ma yin pa ni bsam gtan bzhis bskyed pa'i rnam par rig byed ma yin pa gang yin pa de ni ting nge 'dzin las byung ba'o//de ltar rnam par rig byed ma yin pa 'di ni sdom pa dang sdom pa ma yin pa zhes bya ba rgyur byas pa'i gzugs yin te/ las kyi bag chags zhes bya ba'i tha tshig go/ /rnam pa du ma de dag kyang gzugs rnam pa gsum du gyur te/ bstan du yod la thogs pa dang bcas pa dang /bstan du med la thogs pa dang bcas pa dang / bstan du med la thogs pa yang med pa'o/ /de la bstan du yod la thogs pa dang bcas pa ni kha dog dang dbyibs dang / rnam par rig byed do/ /yul bstan pas 'di ni 'di na'o/ /pha bi ni pha bi na'o zhes bstan du rung ba'i phyir ro//bstan du med la thogs pa dang bcas pa ni mig dang / rna ba dang / sna dang / lce dang / lus kyi dbang po dang / sgra dang / dri dang / ro dang / reg bya'o zhes bya ba'o/ /bstan du med la thogs pa med pa ni rnam par rig byed ma yin pa'i gzugs so/ /ci'i phyir rnam par rig byed ma yin pa'i bar 'di la gzugs kyi phung po zhes bya zhe na gzugs su yod pa'i phyir gzugs te/bcom ldan 'das kyis bka' stsal pa/ dge slong dag gzugs su rung ba gzugs su rung bas de'i phyir gzugs nye bar len pa'i phung po zhes bya'o/ /cis gzugs su rung zhe na/gzugs rnam pa gnyis kyis gzugs te reg pas gzugs su rung ba dang yul brtags pas gzugs su rung ba ste reg pas gzugs su rung ba gang zhe na/ lag pa'i 'dus te reg pas reg pa dang / dbyigs pa'i 'dus te reg pa dang / grang ba dang / tsha ba dang / bkres pa dang / skom pa dang / sbrang bu dang / sha sbrang dang / rlung dang / nyi ma dang / sdig sbrul rnams kyis reg na gnod par 'gyur ba'o/ /yul brtags pas gzugs su rung ba ni gzugs 'di dang 'di zhes bya ba dang / gzugs 'di lta bu dang 'di lta bu zhes bya ba ste/ mnyam par gzhag pa'i yid dam/ mnyam par ma bzhag pa'i yid rtog pa dang mtshungs par ldan pas mngon rtags su 'dzin pa'o/ /yul zhes bya ba mngon sum du gyur pa'i phyogs la 'di dang 'di zhes bya ba dang / keng rus la sogs pa shes bya'i dngos po dang 'dra ba'i gzugs brnyan la 'di lta bu dang 'di lta bu zhes kha dog dang /dbyibs kyi bye brag go/ /mngon rtags su 'dzin zhes bya ba ni de bzhin du shes pa'o/ /de skad du don gyi sde tshan las kyang gsungs te/ gal te 'dod pa tshol byed cing / /'dod pa skyes pa'i lus can de/ / 'dod pa de dag ma 'byor na/ /zug rngu zug bzhin gnod par gyur/ /zhes gsungs te/ sems dang ldan pa la ni gnod par rung na sems med pa la ni ji ltar gnod par rung / smras pa/ gyur pa 'byung ba dag na gzhan dang gzhan du gyur zhes bya ba'i tha tshig go/ /gzugs kyi phung po bshad zin to//tshor ba brjod par bya ste/ de smras pa/ tshor ba gang zhe na/ myong ba rnam pa gsum ste/ bde ba dang / sdug bsngal ba dang / sdug bsngal ba yang ma yin/ bde ba yang ma yin pa ste zhes bya ba ni tshor ba'i phung po zhes bya ba'i tha tshig go/ /rnam pa gsum zhes bya ba ni mdor bsdu na rnam pa gsum zhes bya ba'i tha tshig go//myong ba zhes bya ba ni nyams su myong bas na myong ba'o/ /yang na myong bar byed pas na myong ba'o/ /bde ba ni gang 'gag na phrad par 'dod pa'o zhes bya ba la bde ba myong ba 'gag pa ni med par 'gyur ba'o / / phrad par 'dod pa ni myong par 'dod pa'o/ /sdug bsngal ni gang byung na bral bar 'dod pa'o zhes bya ba la bral ba ni so sor gyes pa'o/ /'dod pa ni mngon par 'dod pa'o/ /sdug bsngal ba yang ma yin bde ba yang ma yin pa ni de gang byung na gnyi gar 'dod par mi 'gyur ba'o zhes bya ba ni phrad par yang mi 'dod 'bral bar yang mi 'dod ces bya ba'i tha tshig go//tshor ba ni gnas dang rang bzhin dang / gnas bsdu ba dang / kun nas nyon mongs pa dang / rnam par byang bas rnam par gzhag ste/ de la gnas ni mig gi 'dus te reg pa las byung ba nas/ yid kyi 'dus te reg pa las byung ba'i tshor ba'i bar du'o//rang bzhin ni bde ba dang / sdug bsngal dang / sdug bsngal ba yang ma yin bde ba yang ma yin pa'o/ /gnas bsdu ba ni gzugs can dang / gzugs med par gnas bsdu ba ste/ gzugs can du gnas bsdu ba ni rnam par shes pa lnga dang /mtshungs par ldan pa lus kyi tshor ba'o/ /gzugs med par gnas bsdu ba ni sems kyi tshor ba ste/ yid kyi rnam par shes pa dang mtshungs par ldan pa'o / /kun nas nyon mongs pa ni zang zing dang bcas pa'i tshor ba dang / zhen pa la gnas pa'o/ /zang zing dang bcas pa ni lus la sred pa dang ldan pa'o//zhen pa la gnas pa ni 'dod pa'i yon tan lnga la sred pa dang ldan pa'o/ /'dod pa'i yon tan lnga ni gzugs dang / sgra dang dri dang ro dang reg bya zhes bya ba'o / /'dod par byed pas 'dod pas te / don du gnyer zhes bya ba'i tha tshig go//rnam par byang ba ni zang zing med pa dang / mngon par 'byung ba la brten pa ste/ zang zing med pa ni bdag la sred pa dang bral ba zhes bya ba'i tha tshig go/ /mngon par 'byung ba la brten pa zhes bya ba la mngon par byung ba ni zag pa zad pa'i lam mo/ /de la brten pa'i tshor ba ni mngon par byung ba la brten pa'i tshor ba'o//de yang mtshan nyid ci zhe na/ myong ba'i mtshan nyid de/ myong ba rnam pa ji lta bus dge ba dang / mi dge ba'i las rnams kyi 'bras bu rnam par smin par so sor myong ba'o/ /ji ltar so sor myong zhe na/ las dge ba rnams kyi 'bras bu rnam par smin pa ni bde ba myong ba'o//mi dge ba rnams kyi sdug bsngal myong ba'o/ /gnyi ga rnams kyi ni 'bras bu rnam par smin pa sdug bsngal ba yang ma yin bde ba yang ma yin pa ste / dge ba dang mi dge ba'i las rnams kyi kun gzhi rnam par shes pa ji lta ba bzhin no/ /tshor ba'i phung po bshad zin to//tshor ba'i 'og tu 'du shes brjod par bya ste/ de smras pa 'du shes gang zhe na yul la mtshan mar 'dzin pa'o zhes bya ba ste/ dmigs pa la mtshan mar 'dzin zhes bya ba'i tha tshig go/ /de la kha cig gol te/ gal te 'du shes rgol sa chad dmigs pa la mtshan mar 'dzin pa yin na/mtshan ma med pa'i 'du shes dang / mtshan ma dang bcas pa'i 'du shes dang / chung ngu'i 'du shes dang / rgya chen por gyur pa'i 'du shes dang / tshad med pa'i 'du shes dang / ci yang med pa'i skye mched kyi 'du shes zhes bya ba'i mdo dang 'gal lo zhes zer ro//mtshan ma med pa'i 'du shes ni tha snyad la mi mkhas pa dang / mtshan ma med pa'i dbyings la snyoms par zhugs pa dang / 'du shes med 'du shes med min la snyoms par zhugs pa'i 'du shes gang yin pa'o/ /tha snyad la mi mkhas pa ni ming ma bslabs pas gzugs kyi 'du shes ni yod kyi/gzugs so zhes bya bar ni mi shes ba ste/ de'i phyir mtshan ma med pa'i 'du shes zhes bya'o/ /mtshan ma med pa'i dbyings la snyoms par zhugs pa ni/ gzugs dang sgra dang dri dang ro dang reg bya dang / mig la sogs pa dbang po lnga po thams cad kyi mtshan ma dang bral ba'o//mtshan ma med pa mya ngan las 'das pa la 'du shes pa ni mtshan ma med pa'i 'du shes so/ /srid pa'i rtse mo la snyoms par zhugs pa ni dmigs pa la mtshan mar mang du mi byed pas mtshan ma med pa'i 'du shes so//mtshan ma med pa'i 'du shes bshad zin to/ /mtshan ma dang bcas pa'i 'du shes ni gang tha snyad la mkhas pa'o/ /chung ngu'i 'du shes gang zhe na/ chung ngu'i ni 'dod pa'i khams te ngan pa'i phyir ro/ /de la 'du shes pa ni chung ngu'i 'du shes te/ gang gis 'dod pa'i khams shes pa'o//rgya chen por gyur pa'i 'du shes gang zhe na/ gang gi gzugs kyi khams shes pa'o/ /'di ltar gzugs kyi khams ni rgya chen por gyur pa ste/ de ni mchog yin pa'i phyir ro/ /tshad med pa'i 'du shes gang zhe na/ gang gis nam mkha' mtha' yas skye mched dang /rnam shes mtha' yas skye mched shes pa ste/ de nyid mtha' yas pa'i phyir ro/ /ci yang med pa'i 'du shes gang zhe na/ gang gis ci yang med pa'i skye mched shes pa'o/ /de lta bas na 'gal ba med de/ chos mngon pa las dmigs pa dang rnam pa'i bye brag 'dzin pa'i 'du shes zhes 'byung ba'i phyir ro//gal te de ltar 'du shes kyang yongs su gcod pa'i bdag nyid yin na rnam par shes pa dang 'di gnyis bye brag ci yod/ smras pa/ bye brag phye ste rnam par shes pa ni gzugs la sogs pa'i don tsam 'dzin to/ /'du shes ni yul de nyid yongs su bcad nas nges par 'dzin pa ste/'di ni bye brag go/ /'di'i mtshan nyid ni 'dus te shes par byed pa'i mtshan nyid de/ mtshan mar 'dzin pa dang / mngon rtags su 'dzin pa ci 'dra ba bas ji ltar mthong ba dang / thos pa dang bye brag phyed pa dang / rnam par shes pa'i don tha snyad 'dogs pa'o //mthong ba gang mig gis myong ba'o/ /thos pa ni gang rna bas myong ba'o/ /bye brag phyed pa ni gang bdag gis 'di lta bu dang 'di lta bu zhes dpyod pa'o/ /rnam par shes pa ni bdag nyid kyis myong ba'o/ /tha snyad 'dogs pa zhes bya ba ni brjod pa dag gis go bar byed ces bya ba'i tha tshig go//'du shes kyi phung po bshad zin to/ /'du shes kyi phung po'i 'og tu 'du byed kyi phung po brjod par bye ste/ 'dir smras pa/ 'du byed rnams gang zhe na zhes bya ba ste/ 'du byed kyi phung po zhes bya ba'i tha tshig go/ /tshor ba dang 'du shes las gzhan pa sems las byung ba'i chos rnams dang /sems dang ldan pa ma yin pa rnams so zhes bya ba ni tshor ba yang sems las byung ba'i chos yin la 'du shes kyang sems las byung ba'i chos yin pas de gnyis bton te/ sems las byung ba'i chos gzhan gang dag reg pa dang / yid la byed pa la sogs pa dang /thogs pa la sogs pa ldan pa ma yin pa ji snyed pa de dag thams cad 'du byed kyi phung po zhes bya ba'i tha tshig go/ /gal te de ltar na tshor ba dang 'du shes gnyis sems las byung bar 'dra ba las ci'i phyir phung po re res byas la/ reg pa dang yid la byed pa la sogs pa phung po re rer ma byas/smras pa/ tshor ba dang 'du shes gnyis phung po re rer so sor bya dgos te/ ci'i phyir zhe na/ rtsod pa'i rtsa ba dang / 'khor ba'i rgyur 'gyur ba'i phyir ro/ /rtsod pa'i rtsa ba gnyis te/ 'dod pa la lhag par zhen pa dang / lta ba la lhag par zhen pa'o// ji skad du 'dod pa la 'dod chags pa dang / lhag par zhen pa dang / rnam par bcing ba dang / yongs su zhen pa dang / kun tu 'dod chags pa'i rgyus khyim pa rnams dang khang khyim pa rnams rtsod do/ /lta ba la 'dod chags pa dang lhag par zhen pa dang / rnam par zhen pa dang /rnam par bcing ba dang / yongs su zhen pa dang / kun tu 'dod chags pa'i rgyus rab tu byung ba rnams dang / rab tu byung ba rnams rtsod do zhes gsungs pa lta bu'o/ /de la snga ma ni tshor bas bskyed pa'o/ /cig shos ni 'du shes kyis bskyed pa'o/ /tshor ba la ro myong ba'i dbang gis 'dod pa rnams la mngon par chags so//'du shes phyin ci log gi dbang gis bdag tu lta ba ste/ chos ma yin pa la chos su 'du shes pa dang / bdag med pa la sogs pa la bdag tu 'du shes pa ni lta ba de dang de dag las mngon par chags so/ /tshor ba la zhen pa dang / 'du shes phyin ci log gi dbang gis 'khor ro zhes bya ba ni srid pa la spyod pa'i tshor ba la zhen pa ni tshor ba'i dbang gis 'khor ro//lta ba la spyod pa ni 'du shes phyin ci log gi dbang gis 'khor ro/ /de ltar na sred pa la sbyor ba'i tshor ba dang / lta ba la spyod pa'i 'du shes ni 'khor ba'i rgyus zhes bya ba'o / / yang na tshor ba la zhen pa dang / 'du shes phyin ci log ces bya ba ni phyin ci log rnam pa bzhi'i 'du shes kyis 'khor ro zhes bya ba'i tha tshig go/ /de lta bas na 'di gnyis so sor phung por bya bar 'thad de/ tshor ba dang / 'du shes las gzhan pa/ reg pa dang yid la byed pa la sogs pa 'du byed kyi phung po zhes bya na/gal te de lta na ni mdo dang 'gal te bcom ldan 'das kyis ni sems pa'i tshogs drug la 'du byed rnams te/ mig gi 'dus te reg pa las byung ba sems pa nas yid kyi 'dus te reg pa las byung ba'i sems pa'i bar du'o zhes gsungs so/ /der ni bcom ldan 'das kyis gtso bor sems pa la 'du byed du gsungs te/de ni sems mngon par 'du byed pa'i phyir gtso bo zhes bya'o / /ji skad du dge ba la yang sems gtong ngo zhes bya ba la sogs pa gsungs pa lta bu ste/ de bas na reg pa la sogs pa yang 'du byed kyi phung po'i nang du 'dus par 'thad do//'jig rten na yang gtso bo bstan par mthong ste/ dper na rgyal po gshegs so zhes bya ba la rgyal po 'ba' zhig 'ong ba ma yin gyis de dang ma bral ba'i glang po che dang / rta dang shing rta la sogs pa yang 'ong ste/ nyes pa med do/ /de la sems las byung ba'i chos rnams kyang gang zhe na/chos gang dag sems dang mtshungs par ldan pa rnams so/ /ci'i phyir mtshungs par ldan zhe na/ mtshungs pa rnam pa lngas mtshungs par ldan pa rnams te/ gnas dang dmigs pa dang / rnam pa dang / dus dang rdzas mtshungs pa rnams kyis so/ /dbang po la gnas pa'i phyir ro//dmigs pa la 'dzin pa'i phyir ro/ /dmigs pa de nyid kyi rnam pa la 'dzin pa'i phyir te/ sngon po la sogs pa'i rnam par zhes bya ba'i tha tshig go/ /mtshungs par lhan cig dus gcig tu 'byung ba'i phyir ro/ /rdzas mtshungs par ni thams cad kyang rdzas re re'i phyir te/ rgyu de dag gis mtshungs par ldan pa yin no//sems ni sems gzhan dang mtshungs par ldan pa ma yin te/ mi 'phrad pa'i phyir ro/ /de dag ni reg pa nas dpyod pa'i bar du'o/ /de rnams las lnga ni kun tu 'gro ba'o/ /lnga ni yul so sor nges pa'o/ /bcu gcig ni dge ba'o/ /drug ni nyon mongs pa'o//lhag ma ni nye ba'i nyon mongs pa'o/ /bzhi ni gzhan du yang 'gyur ba'o zhes bya ba de la/ lnga kun tu 'gro ba ni tshor ba dang / 'du shes dang / sems pa dang / reg pa dang / yid la byed pa ste/ de dag ni sems thams cad dang / dge ba dang mi dge ba dang / lung du ma bstan pa la yang 'byung ngo //de la sems dge ba ni dad pa la sogs pa dang mtshungs par ldan pa'o/ /mi dge ba ni 'dod chags la sogs pa dang mtshungs par ldan pa'o/ /de gnyi ga ma yin pa ni lung du ma bstan pa'o/ /yul so sor nges pa lnga ni 'dun pa dang / mos pa dang / dran pa dang / ting nge 'dzin dang / shes rab ste/ mos pa gang du 'byung ba der gdon mi za bar 'dun pa dang / dran pa dang / ting nge 'dzin dang / shes rab kyang 'byung bar 'gyur te/ de dag ni phan tshun med na mi 'byung ba'i phyir yul so sor nges pa zhes bya ba'o / /bcu gcig dge ba ni dad pa nas rnam par mi 'tshe ba'i bar du'o/ / nyon mongs pa drug ni 'dod chags dang / khong khro ba dang / nga rgyal dang / ma rig pa dang / lta ba dang / the tshom gyi mtshan nyid do/ /nye ba'i nyon mongs pa dag ni khro ba nas shes bzhin ma yin pa'i bar du'o/ /bzhi ni gzhan du yang 'gyur ro zhes bya ba ni 'gyod pa nas dpyod pa'i bar du'o//gzhan du zhes bya ba ni don gang / smras pa/ bzhi po 'di dag ni nye ba'i nyon mongs pa 'ba' zhig ma yin te ci zhe na/ dge ba dang mi dge ba dang / lung du ma bstan pa la yang 'byung ngo / /'di ni sems las byung ba rnams bsdus pa ste / mdor bsdu na lnga bcu rtsa gcig yod do/ /de la reg pa la sogs pa ni mtshan nyid dang /las kyis bstan par lta'o/ /mtshan nyid ni reg pa gang zhe na/ gsum 'dus nas yongs su gcad pa'o/ /gsum zhes bya ba ni mig dang gzugs dang rnam par shes pa rnams so/ /de dag 'dus nas sems las byung ba'i chos gang 'byung ba de reg pa la sogs pa ste/dbang po'i 'gyur ba yongs su gcod pa'o/ /tshor ba'i rten byed pa'i las can no/ rnam par shes pa 'byung nas bde ba la sogs pa'i tshor ba dang / mthun pa dbang po'i 'gyur ba gang yin pa de reg pa yin par rig par bya'o/ /yid la byed pa gang zhe na/ gang sems kyi 'jug pa'o//rtsol bar byed pas 'jug pa ste/ sems dang sems las byung ba gtod cing ma lus par sems pa ni yid la byed pa'o/ /dmigs pa la sems 'dzin pa'i las can no/ /sems pa gang zhe na yon tan dang / nyes pa dang gnyi ga ma yin pa la sems mngon par 'du byed pa ni yid kyi las so//gang yod na dmigs pa la sems rnam par shes pas gzhol ba yin te/ khab long gi dbang gis lcags g.yo ba bzhin no/ /gang dge ba dang mi dge ba dang / lung du ma bstan pa la yang sems gtong ba ni las bstan pa'i ste/ 'di ltar ji ltar mngon par 'du byed pa bzhin du dge ba la sogs pa'i chos rnams la sems 'jug par 'gyur ro//kun tu 'gro ba lnga bshad zin to/ /'dun pa gang zhe na/ bsam pa'i dngos po la 'dod pa'o/ /bsam pa'i dngos po zhes bya ba ni gang 'dod pa'i dngos po de la lta ba dang / nyan pa la sogs pa byed 'dod pa'o/ /brtson 'grus brtson pa'i rten byed pa'i las can no//mos pa gang zhe na/ nges pa'i dngos po la de bzhin du 'dzin pa'o/ /nges pa'i dngos po zhes bya ba ni phung po lnga'i tshogs te/ ji skad du/ gzugs ni dbu ba rdos pa 'dra/ /tshor ba chu yi chu bur 'dra/ /'du shes smig rgyu lta bu ste/ /'du byed rnams ni chu shing 'dra/ /rnam shes sgyu ma lta bu zhes//nyi ma'i gnyen gyis bka' stsal to/ /zhes gsungs pa lta bu'o/ /de ltar na mos pa ni phung po rnams la mos pa'o/ /yang na dngos po ji ltar gnas pa de bzhin du/ de dag la mos pa ni mos pa ste/ nges par 'dzin zhes bya ba'i tha tshig go/ /mi 'phrogs pa nyid kyi las can te/ de ltar na de gces su byed pa ni gzhan gyis 'phrogs par mi nus so//dran pa gang zhe na/ 'dris pa'i dngos po nyid ma brjed pa ste/ sems kyi mngon par brjod pa nyid do/ /'dris pa'i dngos po ni sngon myong ba yin par rig par bya'o/ /rnam par mi g.yeng ba nyid du dran par dmigs pa gsal bar gyur na sems rnam par mi g.yeng ba'i las can no//ting nge 'dzin gang zhe na/ brtags pa'i dngos po la sems rtse gcig pa nyid do/ /brtags pa'i dngos po zhes bya ba ni phung po ni phung po lnga'i tshogs te/ mi rtag pa nyid dang / sdug bsngal ba nyid dang / stong pa nyid dang / bdag med pa nyid do/ /de la gang sems rtse gcig pa ni rnam par mi g.yeng ba zhes bya ba'i tha tshig go//shes pa'i rten byed pa'i las can no/ /rten byed pa ni mnyam par gzhag pa ni yang dag pa ji lta ba bzhin du shes pa'i phyir ro/ /shes rab gang zhe na/ de dag nyid la rab tu rnam par 'byed pa ste/ rigs pa dang rigs pa ma yin pa skyed pa dang gzhan pa'o//brtag pa'i dngos po zhes bya ba'i phung po lnga'i tshogs dngos po de nyid la chos rnams rang gi mtshan nyid dang spyi'i mtshan nyid kyis rab tu rnam par 'byed pa'o/ /som nyi zlog pa'i las can te/ shes rab kyis chos rab tu rnam par phye na/ nges pa rnyed pas som nyi zlog go/ / rigs pas bskyed pa ni chos 'di pa rnams kyi'o/ /rigs pa ma yin pas bskyed pa ni grangs can dang bye brag pa rnams kyi'o/ /gzhan pa ni skye bas thob pa dang / 'jig rten gyi tha snyad shes pa'o/ /yul so sor nges pa bshad zin to/ /dge ba bcu gcig brjod par bya ste/ de dag smras pa/ dad pa gang zhe na/ las dang / 'bras bu dang / bden pa dang / dkon mchog la mngon par yid ches pa dang / sems dang pa'o zhes bya ba'o/ /las ni rnam pa gsum ste/ bsod nams dang bsod nams ma yin pa dang / mi g.yo ba'i mtshan nyid do/ /bsod nams ni dge ba bcu'i las kyi lam mo//bsod nams ma yin pa ni mi dge ba bcu'i las kyi lam ste sbyor ba dang / dngos gzhi dang mjug bsdu ba dang bcas pa'o/ /gzhan yang gang 'di dag gis ma bsdus pa/ gsod pa dang / 'ching ba dang / go rar 'jug pa dang / rdeg pa la sogs pa'o/ /mi g.yo ba'i las ni gang bsam gtan bzhi dang /gzugs med pa'i snyoms par 'jug pa bzhi ste las 'di ni rnam par smin pa mi g.yo ba'i phyir mi g.yo ba'o/ /'bras bu ni rnam pa bzhi gsungs te/ rgyun tu zhugs pa'i 'bras bu dang / lan cig phyir 'ong ba'i 'bras bu dang / phyir mi 'ong ba'i 'bras bu dang / dgra bcom pa nyid kyi 'bras bu'o/ /'dir 'bras bu ni nyon mongs pa dang bral ba'o/ /yang na las dge ba'i 'bras bu ni 'dod pa'o/ /mi dge ba'i 'bras bu ni mi 'dod pa'o/ /'phags pa'i bden pa ni bzhi ste/ sdug bsngal ba dang / kun 'byung ba dang / 'gog pa dang lam mo/ /de la sdug bsngal gyi bden pa ni 'bras bur gyur pa ste/nye bar len pa'i phung po lnga'o/ /kun 'byung ba'i bden pa ni rgyu ste/ sred pa'i nye bar len pa sngon du 'gro ba'i lus dang ngag dang yid yongs su g.yo ba'o/ /mdor bsdu na yang 'byung ba'i las dang ldan pa'i nyon mongs pa rnams so/ /'khor ba'i phyogs kyi dbang du byas pa'o//'gog pa'i bden pa ni 'bras bu ste/ 'gog pa ni nyon mongs pa dang bral ba'o/ /lam gyi bden pa ni rgyu ste/ bral ba de nyid thob par byed pa'i thabs zhes bya ba'i tha tshig go/ /rnam par byang ba'i phyogs kyi dbang du byas pa'o/ /'phags pa'i bden pa zhes bya ba'i don gang zhe na/'di dag 'phags pa rnams la bden pa ste/ de lta bas na 'phags pa'i bden pa zhes mdo nyid las gsungs so/ /ci gzhan rnams la 'di dag brdzun nam 'di dag ni thams cad la yang bden pa ste/ phyin ci ma log pa'i phyir ro/ /'phags pa rnams kyis ni de dag ji lta ba bzhin gzigs so//gzhan dag gis ni de lta ma yin no de lta bas na de dag ni 'phags pa rnams la bden pa zhes bya'o/ /'phags pa ma yin pa rnams la ni ma yin te/ phyin ci log tu mthong ba'i phyir ro/ /'phags pas bde bar gang gsungs pa/ /de ni gzhan gyi sdug bsngal rtogs/ /gzhan gyis bde bar gang smras pa//de ni 'phags pas sdug bsngal rtogs/ /zhes tshigs su bcad pa'o/ /de la phung po lnga ni sdug bsngal gsum gyi sdug bsngal ba ste/ sdug bsngal gyi sdug bsngal nyid dang / 'gyur ba'i sdug bsngal nyid dang / 'du byed kyi sdug bsngal nyid kyis so/ /sems can dmyal ba dang /dud 'gro rnams kyi sdug bsngal gyi sdug bsngal nyid do/ /gzugs can gyi lha rnams dang mi rnams la ni 'gyur ba'i sdug bsngal nyid do/ /gzugs med pa rnams la ni 'du byed kyi sdug bsngal nyid do/ /'phags pa rnams kyis ni 'du byed thams cad 'du byed kyi sdug bsngal nyid kyis sdug bsngal bar gzigs te/'dir smras pa/ lag mthil spu nyag gcig gzhag pa/ /mi rnams kyis ni mi rtogs la/ /mig tu song na de nyid kyis/ /mi dga' ba dang gnod bskyed bzhin/ /byis pa dag ni lag mthil 'dra/ /'du byed sdug bsngal spu mi rtogs/ /'phags pa rnams ni mig par 'dra//de yis shin tu yid kyang 'byung / /ji ltar 'phags pa rnams ni sred pa rtse mo la yang sdug bsngal gyi blo 'jug pa ste de ltar byis pa rnams ni mtshams med pa'i phung po rnams la yang sdug bsngal gyi blo yis mi 'jug go/ /dkon mchog ni gsum ste/ sangs rgyas dkon mchog dang /chos dkon mchog dang / dge 'dun dkon mchog go/ /de la sangs rgyas dkon mchog ni bag chags dang / sgrib pa thams cad las rnam par grol ba rnam pa thams cad du thams cad thugs su chud pa'i bdag nyid 'byor pa thams cad kyi gnas/ rnam par mi rtog pa'i ye shes khyad par 'phags pa chos kyi skur gyur pa'o//de yang yon tan ji snyed cig dang ldan par rig par bya zhe na/ shin tu yongs su dag pa'i tshad med pa bzhi dang / shin tu yongs su dag pa'i rnam par thar pa brgyad dang / de bzhin du zil gyis gnon pa'i skye mched brgyad dang / zad par gyi skye mched bcu dang / nyon mongs pa med pa dang / smon nas shes pa dang / so so yang dag par rig pa bzhi dang / mngon par shes pa drug dang / skyes bu chen po'i mtshan sum cu rtsa gnyis dang / dpe byad bzang po brgyad cu dang / rnam pa thams cad yongs su dag pa bzhi dang / stobs bcu dang / mi 'jigs pa bzhi dang /bsrung ba med pa bzhi dang / dran pa nye bar gzhag pa gsum dang / bag chags yang dag par bcom pa dang / bsnyel ba mi mnga' ba'i chos can dang / thugs rje chen po dang / sangs rgyas kyi chos ma 'dres pa bco brgyad dang / rnam pa thams cad kyi mchog gi ye shes dang ldan ba ste/yon tan gyi tshogs 'di ni sangs rgyas bcom ldan 'das so/ /mdor bsdu na zag pa med pa'i phung po lnga ste/ tshul khrims kyi phung po dpag tu med pa dang / de bzhin du ting nge 'dzin gyi phung po dang / shes rab kyi phung po dang / rnam par grol ba'i phung po dang / rnam par grol ba'i ye shes mthong ba'i phung po dpag tu med pa ste/'di dag kyang gnas gyur pa'i mtshan nyid du blta bar bya'o/ /chos ni rnam pa gsum ste/ bstan pa'i chos dang / lam gyi chos dang / don dam pa'i chos so/ /de la bstan pa'i chos ni mdo'i sde dang / dbyangs kyis bsnyad pa'i sde la sogs pa'o/ /lam gyi chos ni 'phags pa'i lam yan lag brgyad pa ste/yang dag pa'i lta ba dang / yang dag pa'i rtog pa dang / yang dag pa'i ngag dang / yang dag pa'i las kyi mtha' dang / yang dag pa'i 'tsho ba dang / yang dag pa'i rtsol ba dang / yang dag pa'i dran pa dang / yang dag pa'i ting nge 'dzin to/ /don dam pa'i chos ni mya ngan las 'das pa ste/so sor brtags pa'i 'gog pa/ nyon mongs pa dang bral ba zhes bya ba phung po'i lhag ma dang bcas pa dang phung po'i lhag ma med pa las dang nyon mongs pa dang / skye ba dang bral ba'i rang bzhin no/ /dge 'dun ni 'phags pa'i skyes bu gang zag ya brgyad do / rgyun du zhugs pa mngon sum du bya ba'i phyir zhugs pa dang /rgyun du zhugs pa dang / lan cig phyir 'od ba mngon sum du bya ba'i phyir zhugs pa dang / lan cig phyir 'ong ba dang / phyir mi 'ong ba mngon sum du bya ba'i phyir zhugs pa dang / phyir mi 'ong ba dang dgra bcom pa nyid mngon sum du bya ba'i phyir zhugs pa dang /dgra bcom pa'o/ /de la rgyun du zhugs pa'i 'bras bu la zhugs pa ni/ mthong ba'i lam la gnas pa ste/ mthong ba'i lam ni skad cig ma bco lnga la bya'o/ /bcu drug pa la ni 'bras bu gnas pa ste/ rgyun du zhugs pa zhes bya ba'i tha tshig go/ /rgyun du zhugs pa zhes bya ba'i don gang zhe na/lam ni mya ngan las 'das pa'i rgyun te/ de de nas 'gro ba'i phyir ro/ /de der zhugs shing phyin la thob pa'i phyir rgyun du zhugs pa'o/ /de ni rnam pa gnyis te/ re ltar thogs na srid pa lan bdun pa dang / rigs nas rigs su skye ba'o/ /kun tu sbyor ba bdun lus te/ tha ma'i cha dang mthun pa nyid dang /gong ma'i cha dang mthun pa lnga lus pa'i phyir ro/ /rigs nas rigs su skye ba rnam pa gnyis te/ lha'i rigs nas rigs su skye ba ni lha'i nang du rigs lan gnyis sam gsum blangs nas yongs su mya ngan las 'das pa'o/ /mi'i rigs nas rigs su skye ba ni gang mi'i nang der ram/gling gzhan du yongs su mya ngan las 'da' ba'o/ /de nyid 'bras bu la gnas pa zhes bya'o/ /rnam pa lnga'i bar bcom pa la lan cig phyir 'ong ba la zhugs pa zhes bya'o/ /rnam pa dag zad pa ni lan cig phyir 'ong ba nyid yin te/ lan cig phyir 'ong ba'i 'bras bu la gnas pa zhes bya ba'i tha tshig go//lha'i nang du song ste mi'i 'jig rten du lan cig phyir 'ong ba dang lan cig phyir mi 'ong phan chad skye ba med pa'i phyir te/ de nyid 'bras bu la gnas pa'o/ /nyes cha bdun dang brgyad zad pa phyir mi 'ong ba'i 'bras bu la zhugs pa zhes bya'o/ /de nyid bar chad gcig ces bya ste/ tshe gcig las pa'i phyir ro//gsum pa'i 'bras bu la zhugs pa zhes bya ba'i tha tshig go/ /de dgu pa zad pas phyir mi 'ong ba rnam pa dgu zad pas phyir mi 'ong bar ba lta'o/ /'dod pa'i khams su phyir mi 'ong ba'i phyir phyir mi 'ong ba zhes brjod do/ /srid rtse'i bar cha brgyad zad pa dgra bcom pa nyid la zhugs pa ste/phyir mi 'ong ba de nyid bsam gtan dang po'i rnam pa gcig la 'dod chags dang bral bar gyur pa nas srid pa'i rtse mo'i bar gyi brgyad spangs pa ni dgra bcom pa nyid la zhugs pa yin no/ /dgu pa'i bar chad med pa'i lam la yang dgra bcom pa nyid la zhugs pa nyid la blta'o/ /bar chad med pa'i lam de ni rdo rje lta bu'i ting nge 'dzin zhes bya ste/bag la nyal ba thams cad shigs pa'i phyir ro/ /rdo rje lta bu'i ting nge 'dzin gyi 'og tu phyi ma rnam par grol ba'i lam ste/ de nyid zad pa shes pa'o/ /zag pa thams cad zad pa thob pa dang / lhan cig skyes pa'i phyir de zad pa'i shes pa ste/thog mar mi slob pa yin no/ /dgra bcom pa dang dgra bcom pa nyid kyi 'bras bu thob pa yang yin no/ /'bras bu gzhan thob par bya ba'i phyir bslab pa med pas mi slob pa'o/ /bdag dang gzhan gyi don byed par 'os pa dang / 'dod chags dang bcas pa thams cad kyis mchod par 'os pa'i phyir dgra bcom pa zhes bya'o//de ltar mdor bsdu na skyes bu gang zag brgyad po de dag ni dge 'dun no/ /las dang 'bras bu dang / bden pa dang / dkon mchog de dag la mngon par yid ches pa ni dad pa ste/ dad pa dang 'dod pa'o/ /'dun pa'i rten byed pa'i las can no/ / dad pa bshad zin to/ /ngo tsha shes pa gang zhe na/ bdag gam chos kyi dbang du byas te/ kha na ma tho bas 'dzem pa'o/ /bdag nyid gyi dbang du byas pa ni/ bdag rigs kyi bu yin na ji ltar sdig pa bya snyam pa'o/ /chos kyi dbang du byed pa ni ngan 'gros 'jigs pa'i rgyus bdag nyid kha na ma tho bas 'dzem pa'o//kha na ma tho ba zhes bya ba ni dam pa rnams kyis smad pa'i phyir sdig pa'o/ /'dzem pa ni sdig pa mi byed pa'o/ /nyes par spyod pa legs par sdom pa'i rten byed pa'i las can no/ /khrel yod pa gang zhe na/ 'jig rten pa'i dbang du byas te/ kha na ma tho bas 'dzem pa'o/ /med pa dang pha rol gyis byas pas 'jigs pa'i phyir pha rol la sdig pas 'dzem pa'o//de nyid kyi las can no/ /ma chags pa gang zhe na/ chags pa'i gnyen po ste/ /yid byung zhing mi len pa'o/ /chags pa zhes bya ba ni srid pa dang srid pa'i yo byad rnams la kun tu chags pa gang yin pa'o/ /de'i gnyen po ni ma chags pa ste/srid pa dang srid pa'i yo byad rnams la kun tu chags pa med ces bya ba'i tha tshig go/ /yid byung ba ni 'khor ba'i nyes dmigs yongs su shes pa'o/ /nyes par spyod pa la mi 'jug pa'i rten du byed pa'i las can no/ /zhe sdang med pa gang zhe na/ zhe sdang gi gnyen po ste byams pa'o//sems can rnams la rnam pa kun nas mnar sems med ces bya ba'i tha tshig go/ /nyes par spyod pa la mi 'jug pa'i rten byed pa'i las can no/ /gti mug med pa gang zhe na/ gti mug gi gnyen po ste/ yang dag pa la yang dag par rtogs pa'o/ /gti mug ni mi shes pa'o//yang dag pa ni mdor bsdu na 'phags pa'i bden pa bzhi'o/ /rgyas par bya na rten cing 'brel bar 'byung ba yan lag bcu gnyis pa'o/ /de rtogs pa ni shes pa'o/ /rnam par smin pa'i rtogs pa ni skye bas thob pa'i shes pa'o/ /thos pa las byung ba dang bsams pa las byung ba ni lung las so//bsgoms pa las byung ba ni thob pa las so/ /so sor brtags pa zhes bya ste/ shes rab dang brtson 'grus dang ldan par yang blta'o/ /nyes par spyod pa la mi 'jug pa'i rten byed pa'i las can no/ /brtson 'grus gang zhe na/ le lo'i gnyen po ste/ dge ba la sems mngon par spro pa'o//go cha dang / sbyor ba dang / ma zhum pa nyid dang / mi ldog pa dang / chog par mi 'dzin pa'o/ /dge ba'i phyogs yongs su rdzogs par byed pa dang / yongs su grub pa'i las can no/ /shin tu sbyangs pa gang zhe na/ gnas ngan len gyi gnyen po ste/ lus dang sems las su rung ba nyid do//gnas dan len ni mi dge ba bcu'i las kyi lam ste/ de dag shin tu sbyangs pa'o/ /sgrib pa thams cad sel ba'i las can no/ /sgrib pa thams cad sel ba ni de'i dbang gis gnas gyur bar blta ba'o / /bag yod pa gang zhe na/ bag med pa'i gnyen po ste/ ma chags pa nas brtson 'grus kyi bar de dag la gnas nas mi dge ba'i chos spong zhing dge ba'i chos rnams kyang bsgoms pa'o//bag med pa ni chags pa dang / zhe sdang dang / gti mug dang / le lo zhes bya ba'o/ /de'i gnyen po ni bag yod pa ste/ ma chags pa dang / zhe sdang med pa dang / gti mug med pa dang /brtson 'grus dang chos bzhi po de dag la gnas te/ mi dge ba'i chos rnams spong ba'o/ /de dag ni zag pa dang bcas pa'i chos rnams te/ 'dir ni zag pa rnams dang / zag pa'i gnas yul rnams yin par rig par bya'o/ /de'i gnyen po dge ba'i chos rnams kyang bsgoms pa ni ma chags pa dang /zhe sdang med pa dang / gti mug med pa dang / brtson 'grus kyi mtshan nyid ces bya ba'i tha tshig ste/ de dag la bag yod pa gdags so/ /'jig rten pa dang 'jig rten las 'das pa'i phun sum tshogs pa thams cad yongs su rdzogs pa'i las can no//btang snyoms gang zhe na/ ma chags pa nas brtson 'grus kyi bar de dag nyid la gnas shing / sems mnyam pa nyid dang / sems rnal du 'dug pa nyid dang / sems lhun gyis grub pa yang thob pa ste/ gang gis nyon mongs pa can gyi chos rnams bsal nas nyon mongs pa can med par gnas pa yin no//ma chags pa dang / zhe sdang med pa dang / gti mug med pa dang / brtson 'grus kyi mtshan nyid kyi chos de dag nyid kyi gnas skabs gzhan la btang snyoms zhes bya ste/ 'di ltar btang snyoms dang ldan pa'i sems la byid ba la sogs pa'i mi mnyam pa med pas 'dir sems mnyam pa nyid do//de'i 'og tu mngon par 'du byed pa med par 'jug pas rnal du 'jug pa'o/ /de'i 'og tu kun nas nyon mongs pa'i dogs pa med pas lhun gyis grub par gnas pa zhes bya'o/ /de ni nyon mongs pa dang nye ba'i nyon mongs pa thams cad kyi skabs mi phyed pa'i rten byed pa'i las can no/ /rnam par mi 'tshe ba gang zhe na/rnam par 'tshe ba'i gnyen po ste/ snying rje ba'o/ /rnam par 'tshe ba ni sems can la rnam par tho 'tshams pa ste/ de'i gnyen por gyur pa zhe sdang med pa'i cha can snying rje ba'i sems nyid do/ /rnam par tho mi 'tshams pa'i las can no/ rnam par mi 'tshe ba yang zhe sdang med pa las gud na med pas btags pa'i yod par rig par bya'o//dge ba rnams bshad zin to/ /nyon mongs pa drug brjod par bya ste/ de dag smras pa/ 'dod chags gang zhe na/ nye bar len pa'i phung po lnga la zhen pa dang / lhag par chags pa'o/ /nye bar len pa las byung ba'i phyir nye bar len pa'i phung po rnams te/rtswa dang sog ma'i me bzhin no/ /de dag las nye bar len pa rnams 'byung bas nye bar len pa'i phung po rnams te/ me tog dang 'bras bu'i shing bzhin no/ /nye bar len pa la rag las pas rgyal po'i mi bzhin no/ /de'i phyir nye bar len pa'i phung po gang yin pa de dag ni phung po rnams kyang yin la/phung po gang yin pa de dag ni gdon mi za bar nye bar len pa'i phung po ma yin par 'grub pa ste/ dgra bcom pa'i phung po rnams ni zag pa med pa'o/ /de lta bu'i rang bzhin can de dag la chags pa ni khams gsum pa'i rjes su chags pa zhes bya ba'i tha tshig go/ /sdug bsngal kun bskyed pa'i las can no//srid pa'i dbang gis nye bar len pa'i phung po 'grub pa'i phyir ro/ /khong khro ba gang zhe na/ sems can rnams la kun nas mnar sems pa'o/ /thogs pa dang 'dra bas khong khro ba'o/ /phung po lnga'i tshogs kyi rgyun la sems can zhes btags te/ sems can de dag la kun nas mnar sems pa'o//ji skad du bdag la gnod pa byas so byed do/ /byed par 'gyur ro zhes kun nas mnar sems 'byung ste/ rab tu 'khrug go/ /gang bdag gi mdza' bo de la gnod par byas so/ /byed do byed par 'gyur ro zhes kun nas mnar sems 'byung ste/ rab tu 'khrug go//gang bdag gi mi mdza' ba de'i don byas so/ /don byed do/ /don byed par 'gyur ro zhes kun nas mnar sems 'byung ste/ rab tu 'khrug go zhes gsungs pa lta bu'o/ /bde ba la reg par mi gnas pa dang nye bar spyod pa'i rten byed pa'i las can no/ /reg par mi gnas pa ni kun nas mnar sems kyi sems dang ldan pa dang sdug bsngal bar gnas pa'i phyir ro//nga rgyal gang zhe na/ nga rgyal rnam pa bdun te / nga rgyal dang / che ba'i nga rgyal dang / nga rgyal las kyang nga rgyal dang / nga'o snyam pa'i nga rgyal dang / mngon pa'i nga rgyal dang / cung zad snyam pa'i nga rgyal dang / log pa'i nga rgyal lo/ /nga rgyal thams cad kyi mtshan nyid ni 'jig tshogs la lta ba la brten nas sems khengs par nga rgyal thams cad kyi mtshan nyid bye brag med do/ /mi gus pa 'byung ba'i rten byed pa'i las can no/ /mi gus pa ni bla ma rnams dang yon tan can rnams la 'gying ba'o/ /bye brag gi mtshan nyid kyi dbang du byas te smras pa/nga rgyal gang zhe na/ chung ba bas kyang bdag che ba'am/ mtshungs pa dang mtshungs so snyam du sems khengs pa gang yin ba'o zhes bya'o / /bdag che snyam pa'am/ mtshungs pa la mtshungs so snyam pa gnyi gar sems khengs pa yang nga rgyal lo/ /che ba'i nga rgyal gang zhe na/mtshungs pa bas bdag che ba'am/ che ba dang mtshungs so snyam du sems khengs pa gang yin pa'o/ /'dir yang mtshungs pa bas bdag khyad par du 'phags pa'am/ mtshungs so snyam pa gnyi gar sems khengs pa yang che ba'i nga rgyal lo/ /nga rgyal las kyang nga rgyal gang zhe na/che ba bas kyang bdag che'o snyam pa'i sems khengs pa gang yin ba'o/ /dge bsnyen pas ni dge tshul che na/ dge bsnyen de 'di snyam du dge tshul bas kyang bdag khyad par du 'phags so snyam du sems khengs par byed pa 'di ni nga rgyal las kyang nga rgyal zhes bya'o//nga'o snyam pa'i nga rgyal gang zhe na/ nye bar len pa'i phung po lnga po rnams la bdag gam bdag gir yang dag par rjes su lta ba'i sems khengs pa gang yin pa'o/ /gzugs la sogs pa la 'dun pa dang / 'dod chags ni nye bar len pa ste/ de la 'dun pas ni ma 'ongs pa'i lus 'dod pa'i sgo nas len te/des ma 'ongs pa'i phung po 'grub po/ /'dod chags kyis ni da ltar gyi lus la lhag par zhen pa'i sgo nas len te/ des da ltar gyi phung po mi 'dor ro/ /de lta bas na 'di gnyis ni nye bar len pa zhes bya'o/ /de dag dang ldan pa ni phung po rnams te/ de ltar bdag med pa'i phung po de dag la bdag yod do snyam du rlom sems pa'am/bdag gi phung po'o snyam du sems pa de ni nga'o snyam pa'i nga rgyal lo/ /mngon pa'i nga rgyal gang zhe na/ gong ma'i khyad par thob par bya ba ma thob par bdag gis thob bo snyam du sems khengs pa gang yin pa'o/ /gong ma'i khyad par thob bar bya ba ni 'bras bu dang /bsam gtan dang / snyoms par 'jug pa zhes bya ba la sogs pa'o/ /de ma thob par bdag gis brtsal 'bad de thob bo snyam du sems khengs pa gang yin pa'o/ /ji skad du bcom ldan 'das kyis mi'i chos bla ma ni ltung bar 'gyur te/ mngon pa'i nga rgyal ni ma gtogs so zhes gsungs pa lta bu'o//cung zad snyam pa'i nga rgyal gang zhe na/ khyad ches 'phags pa bas bdag cung zad cig gis chung ngo snyam du sems khengs pa gang yin pa'o/ /mtshungs pa'am/ lhag snyam pa'i nga rgyal du rung na gang bdag chung snyam pa de ji ltar nga rgyal du 'gyur/ smras pa/ 'jig rten na dngos po ngan pa la yang khengs pa mthong ste/nga ni rgyal bo'i mi yin gyi nga mi phal pa ni ma yin no snyam pa'o/ /log pa'i nga rgyal gang zhe na/ yon tan ma yin pa dang ldan pa la bdag yon tan dang ldan no snyam du sems khengs pa gang yin pa'o/ /log pa'i nga rgyal zhes bya ba ni brdzun pa'i nga rgyal lo/ / yon tan ma yin pa dang ldan pa zhes bya ba ni yon tan dang ldan pa ma yin pa ste/ yon tan dang ldan pa ma yin pa de la mi dgag pa'o/ /yon tan ni sbyin pa dang / tshul khrims la sogs pa ste/ de dag bdag la med bzhin du bdag tshul khrims dang ldan no/ /yon tan dang ldan no snyam du gang sems khengs pa ni log pa'i nga rgyal lo//ma rig pa gang zhe na/ las dang 'bras bu dang bden pa dang / dkon mchog rnams mi shes pa ste/ khong du mi chud pa dang / mngon par mi rtogs pa dang / mun pa dang / kun tu gti mug pa dang / mun nag ces bya ba 'di dag ni ma rig pa'i rnam grangs su gtogs pa'o/ / las ni rnam pa gsum ste bsod nams dang bsod nams ma yin pa dang / mi g.yo ba'i mtshan nyid do/ /'bras bu ni rnam pa bzhi ste/ rgyun du zhugs pa la sogs pa'o/ /bden pa ni bzhi ste sdug bsngal la sogs pa'o/ /dkon mchog ni gsum ste/ de dag mi shes pa ni ma rig pa'o/ /lhan cig skyes pa ni ma 'dres pa'o//kun tu brtags pa ni 'dod chags la sogs pa dang mtshungs par ldan pa'o/ /yang na kun tu brtags pa na bye brag pa la sogs pa rnams kyi'o/ /log par nges pa dang / the tshom dang / kun nas nyon mongs pa 'byung ba'i rten byed pa'i las can no/ /log par nges pa ni phyin ci log tu shes pa'o//the tshom ni nem nur ro/ /nyon mongs pa 'byung ba ni/ 'dod chags la sogs pa la kun tu spyod pa'o/ /de'i rten byed pa ni nyon mongs pa thams cad 'byung bar rig par bya'o/ /'dod pa na spyod pa'i 'dod chags dang / khong khro ba dang / 'dod pa na spyod pa'i ma rig pa de dag ni mi dge ba'i rtsa ba gsum ste/chags pa dang / zhe sdang dang / gti mug mi dge ba'i rtsa ba'o/ /lta ba gang zhe na/ lta ba lnga ste/ 'jig tshogs la lta ba dang / mthar 'dzin par lta ba dang / log par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa'o/ / 'jig tshogs la lta ba gang zhe na/ nye bar len pa'i phung po rnams la bdag gam bdag gir yang dag par rjes su lta ba'i shes rab nyon mongs pa can gang yin pa'o zhes bya ba ni 'jig par 'gyur bas 'jig pa'o/ /bsags pas tshogs te/ 'jig tshogs ni mang pa'o/ /de la lta ba ni bdag phung po las gud na yod pa dang /phung po rnams ni bdag gi yin par lta ba'o/ /ci'i phyir de skad bshad/ smras pa/ 'jig ces bya ba ni rtag pa'i 'du shes spang bar bya ba'i phyir ro/ /tshogs zhes bya ba ni gcig pa'i 'du shes spang pa'i phyir te/ 'dir ni mi rtag pa 'dus pa yin pas 'di la bdag med do zhes bstan pa'o//lta bar gyur pa thams cad kyi rten byed pa'i las can no/ /mthar 'dzin par lta ba gang zhe na/ de nyid kyi dbang du byas nas rtag pa'am chad par yang dag par rjes su lta ba'i shes rab nyon mongs pa can gang yin pa'o/ /'jig tshogs la lta ba'i dbang du byas zhes bya ba ni bdag por byas pa'o//rtag pa zhes bya ba ni mtha' ste/ bdag thams cad du song ba dang / rtag pa dang / gtso bo zhes bya ba la sogs pa'o/ /lus rnams ni rtswa dang 'jim pa lta bu ste/ 'di ni rtag pa'i mtha' can gyi mthar 'dzin par lta ba'o/ /chad pa'i bdag nyid ni nang na byed pa'i skyes bu yod pa de shi phan chad med de/dper na bum pa chag nas yang mi 'byung ba bzhin no/ /dbu ma'i lam gyis nges par byung ba'i bar du gcod pa'i las can no/ /log par lta ba gang zhe na/ rgyu'am 'bras bu'am byed pa la skur ba 'debs pa dang / yod pa'i dngos po 'jig pa'i shes rab nyon mongs pa can gang yin pa'o//rgyu ni las dang nyon mongs pa'o/ /de dag kyang yan lag lngar 'gyur te/ nyon mongs pa ni ma rig pa dang / srid pa dang len pa'o/ /las ni 'du byed dang srid pa'o/ /yang na 'dir kun gzhi rnam par shes pa la gnas pa'i bag chags te/ ji skad du bcom ldan 'das kyis kun dga' bo las kyi rnam par smin pa gang ma 'ongs pa na 'bras bu 'byin nus pa de yang srid pa zhes bya'o zhes gsungs pa lta bu'o//'di la skur pa 'debs pa ni rgyu la skur pa 'debs pa'o/ /'bras bu la yan lag bdun te/ rnam par shes pa dang / ming dang gzugs dang /skye mched drug dang / reg pa dang / tshor ba dang / skye ba dang / rga shi zhes bya ba rnams so/ /'di la skur ba 'debs pa ni 'bras bu la skur pa 'debs pa'o/ /yang na mdor bsdu na legs par spyad pa yang med nyes par spyad pa yang med do zhes bya ba 'di ni rgyu la skur pa 'debs pa'o//legs par spyad pa dang nyes par spyad pa'i las rnams kyi 'bras bu rnam par smin pa med do zhes bya ba ni 'bras bu la skur ba 'debs pa'o/ /'jig rten 'di ni med do/ /'jig rten pha rol med do/ /pha med do/ /ma med do/ /sems can 'byung ba med do zhes bya ba ni byed pa la skur ba 'debs pa'o//'jig rten gzhan du 'gro ba dang / 'ong ba'i byed pa dang / sa bon 'debs pa'i byed pa dang / nying mtshams sbyor ba'i byed pa la skur ba 'debs pa'i phyir ro/ /'jig rten na dgra bcom pa med do zhes bya ba la sogs pa ni yod pa'i dngos po 'jig pa'o/ / dge ba'i rtsa ba rgyun gcod pa'i las can dang / mi dge ba'i rtsa ba dam du 'dzin pa'i las can dang / mi dge ba la 'jug pa'i las can dang / dge ba la mi 'jug pa'i las can no/ /lta ba mchog tu 'dzin pa gang zhe na/ lta ba rnam pa gsum po de dag nyid dang / de'i gnas phung po rnams la mchog dang /gtso bo dang / khyad par du 'phags pa dang / dam par yang dag par rjes su lta ba'i shes rab nyon mongs pa can gang yin pa'o zhes bya ba la/ lta ba rnam pa gsum ba zhes bya ba ni 'jig tshogs la lta ba dang / log par lta ba dang mthar 'dzin par lta ba'o/ /de'i gnas phung po zhes bya ba ni lta ba'i gnas zhes bya ba'i tha tshig go//mchog dang / gtso bo dang / khyad par du 'phags pa dang / dam par shes rab kyis yang dag par rjes su mthong zhes bya ba'i tha tshig go/ /shes rab nyon mongs pa can zhes bya ba ni nyon mongs pa dang ldan zhes bya ba'i tha tshig go/ /lta ba ngan pa la mngon par zhen pa'i rten byed pa'i las can no//tshul khrims dang brtul zhugs mchog tu 'dzin pa gang zhe na/ tshul khrims dang brtul zhugs dang / de'i gnas phung po rnams la 'dag pa dang / grol ba dang / nges par 'byin pa yang dag par rjes su lta ba'i shes rab nyon mongs pa can gang yin pa'o zhes bya ba ni tshul khrims dang brtul zhugs ni lta ba ngan pa sngon du song bar rig par bya'o//tshul khrims ni bdun spangs pa'o/ /brtul zhugs ni khyi dang ba lang gi brtul zhugs dang / dbyu gu rtse gsum pa dang mgo 'breg pa la sogs pa dang /grangs can gyi rnal 'byor shes pa la sogs pa ni/ thar pa'i lam gyi rgyu ma yin/ dbang phyug chen po dang / skye dgu'i bdag po dang / me dang chur 'jug pa la sogs pa ni mtho ris kyi rgyu ma yin na de dag la rgyur lta ba'o/ /de'i gnas phung po rnams zhes bya ba ni tshul khrims la sogs pa'i gnas zhes bya ba'i tha tshig go//'dag pa zhes bya ba ni gong du smos pa des 'dag par 'gyur zhes bya ba'i tha tshig go/ /grol ba zhes bya ba ni thabs 'dis nyon mongs pa rnams las grol bar 'gyur ba'o/ /nges par 'byin pa zhes bya ba ni 'khor ba las byung ba zhes bya ba'i tha tshig go//ngal ba 'bras bu med pa'i rten byed pa'i las can te/ ngal ba 'bras bu med pa ni des nges par mi 'byung ba'i phyir ro/ /the tshom gang zhe na/ bden pa la sogs pa la yang yid gnyis za ba'o zhes bya ba la sogs pa smos pa ni las dang 'bras bu dang / bden pa dang / dkon mchog rnams la sbyar ro//de dag la yod dam med ces yid gnyis su 'gyur zhes bya ba'i tha tshig go/ /dge ba'i phyogs la mi 'jug pa'i rten byed pa'i las can no/ /des dge ba'i phyogs la mi 'jug pa ste/ nges pa ma rnyed pas bar skabs nas mi rtsom pa'i phyir ro/ /nyon mongs pa de dag las lhan cig skyes pa ni du/kun tu brtags pa ni du zhe na/ smras pa/ lta ba 'og ma gsum dang / the tshom ni kun tu brtags pa'o zhes bya ba ni log par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa dang / the tshom ste/ de dag ni kun tu brtags pa nyid do//lhag ma ni lhan cig skyes pa dang kun tu brtags pa'o zhes bya ba ni 'dod chags dang / khong khro ba dang / nga rgyal dang ma rig pa dang / 'jig tshogs la lta ba dang mthar 'dzin par lta ba dang sbyar ro/ 'di dag gi rnam grangs ni bag la nyal ba dang / kun nas dkris pa dang / nyon mongs pa dang / zag pa dang bcas pa dang / rnyog pa dang / chu bo dang / sbyor ba dang / yon po dang / bskus pa zhes bya ba la sogs pa'o/ /nyon mongs pa rnams bshad zin to / /nye ba'i nyon mongs pa rnams brjod par bya ste/ de dag smras pa/ khro ba gang zhe na/ / 'phral du gnod par byed pa la gnas te/ gang sems kyis kun nas mnar sems pa'o zhes bya ba la/ 'phral du zhes bya ba ni da ltar byung ba ste/ de la gnod par byed pa'i rgyu de la khong khro ba'i char gtogs pa'i sems kyis kun nas mnar sems pa'o/ /dbyig pa dang / rdeg pa dang / mtshon gyis 'debs pa la sogs pa nyes pa rtsom pa'i rten byed pa'i las can no/ /khro ba la sogs pa yang khong khro ba la sogs pa las gud na med pa'i phyir brtags pa'o/ /khon du 'dzin pa gang zhe na/ mdud par 'dzin pa'o/ khros pa'i 'og tu khong khro ba'i char gtogs pa nyid mdud par 'dzin pa mi gtong ba'o//mi bzod pa'i rten byed pa'i las can te/ mi bzod pa ni dang du mi len pa'o/ /'chab pa gang zhe na/ bdag gi kha na ma tho ba ma khyud pa'o/ /yang dag par bskul ba na gti mug gi char gtogs pas kha na ma tho ba mkhyud pa'o/ /'gyod pas reg par mi gnas pa'i rten byed pa'i las can no//'di ni chos nyid de kha na ma tho ba 'chab na 'gyod par 'gyur te/ des na reg par mi gnas so/ /'tshig pa gang zhe na/ tshig brlang pos zher 'debs pa nyid do zhes bya ba ni khro ba dang khon du 'dzin pa sngon du 'gro ba'o/ /sems kyis kun nas mnar sems pa ste /tshig brlang bo ni gtum tshig go/ /ngag rtsub mo'i rten byed pa'i las byed pa'i las can dang / bsod nams ma yin pa skyes pa 'byin pa'i las can dang / reg par mi gnas pa 'byin pa'i las can no/ /gtum tshig dang / ngag rtsub mo de ni phan tshun mtshang la 'debs pa'i tshul gyis mngon sum du smra ba ste/'di nyid 'tshig pa'o/ /phrag dog gang zhe na/ gzhan gyi phun sum tshogs pa la sems khong nas 'khrugs pa'o/ /gzhan dag gi phun sum tshogs pa ni gzhan gyi phun sum tshogs pa ste/ gzhan gyi phun sum tshogs pa de la rnyed pa nyid dang /bkur sti la lhag par chags pas mi bzod par byas pa'i sems kyis khong nas 'khrugs pa'o/ /yid mi bde bas reg par mi gnas pa'i las can no/ /ser sna gang zhe na/ sbyin pa dang / mi mthun pa'i sems kyis kun tu 'dzin pa'o/ /gang gis rgyud las ma 'gro zhig / ces bya ba ni ser sna ste/ rnyed pa dang bkur sti la lhag par chags pa nyid kyis 'dod chags kyi char gtogs pa'i sems kyi yo byad rnams kun tu 'dzin pa'o/ /de nyid sbyin pa dang mi mthun pa'o/ /yo byad bsnyungs pa ma yin pa'i rten byed pa'i las can te/ yo byad bsnyungs pa ma yin pa ni ser snas mi khom pa'i yo byad rnams sogs par rig par bya'o//sgyu gang zhe na/ gzhan la slu ba'i yang dag pa ma yin pa'i don ston pa'o/ /rnyed pa dang bkur sti la chags pa nyid kyis 'dod chags dang gti mug gi char gtogs pas yang dag pa ma yin pa'i don ston pa ste/ log par 'tsho ba'i rten byed pa'i las can no//g.yo gang zhe na/ bdag gi nyes pa bcab pa'i las thabs bzung ste/ sems gya gyu'o zhes bya ba la rang gi nyes pa rnams ni rang gi skyon te/ rnyed pa dang bkur sti la chags pas de dag bcab par 'dod nas 'dod chags dang / zhe sdang dang / gti mug gi char gtogs pas nyes pa byung ba de ngos mi zin par gzhan nas gzhan du brgyud par rig par bya'o//yang dag pa'i gdams ngag thob pa'i bar du gcod pa'i las byas te/ bdag yang dag pa ji lta ba bzhin ma smras pas gdams ngag gi 'os ma yin pa'i phyir ro/ /rgyags pa gang zhe na/ bdag gi phun sum tshogs pa la chags pa'i rab tu dga' ba ste/ sems yongs su 'dzin pa'o/ /de ni rnam pa du ma ste/ rigs dang / stobs dang / gzugs dang / yid gzhungs pa dang / blo dang / longs spyod dang / dbang phyug la sogs par rig par bya'o/ /bdag gi phun sum tshogs pa zhes bya ba ni zag pa dang bcas pa'i phun sum tshogs pa gang yang rung ba'o//chags pa'i rab tu dga' ba zhes bya ba ni dga' ba'i yid bde ba ste/ nyon mongs pa can gyi dga' ba'i bye brag 'dod chags kyi char gtogs pa'o/ /yongs su 'dzin pa zhes bya ba ni dge ba'i rtsa ba thams cad sel ba'o//nyon mongs pa dang nye ba'i nyon mongs pa thams cad kyi rten byed pa'i las can no/ /rnam par 'tshe ba gang zhe na/ sems can rnams la tho 'tshams pa'o zhes bya ba ni khong khro ba'i char gtogs pa/ snying brtse ba med pa snying rje ba med pa'o/ /sems can rnams la rnam par tho 'tshams pa ni thal lcag dang khur tshur gyis brdeg pa la sogs pa byed pa ste/'di ni de'i las can no/ /ngo tsha ba med pa gang zhe na/ kha na ma tho bas bdag la mi 'dzem pa'o/ /ngo tsha ba mi shes pa ni ngo tsha med pa ste/ ngo tsha shes pa dang mi mthun pa'i chos so/ /ngo tsha shes pa ni 'dod chags dang zhe sdang dang gti mug gi char gtogs pa'o//kha na ma tho bas bdag la mi 'dzem pa'o zhes bya ba la bdag la zhes bya ba ni rang la'o/ /kha na ma tho ba ni sdig pa'o/ /des mi 'dzem pa ni sdig la byed ces bya ba'i tha tshig go/ /nyon mongs pa dang nye ba'i nyon mongs pa thams cad kyi grogs byed pa'i las can no/ /khrel med pa gang zhe na/kha na ma tho bas gzhan la mi 'dzem pa'o/ /khrel med pas ni khrel yod pa ma yin te/ khrel yod pa dang / mi mthun pa'i chos ni khrel med pa'o/ /kha na ma tho bas gzhan la mi 'dzem pa zhes bya ba ni gzhan nam gzhan rnams la mi 'dzem par sdig pa byed pa'o/ / nyon mongs pa dang nye ba'i nyon mongs pa thams cad kyi grogs byed pa'i las can no/ /rmugs pa gang zhe na/ sems las su mi rung ba ste blong ba nyid do zhes bya ba la/ gti mug gi char gtogs pas sems las su mi rung ba'o/ /rmugs pa ni nyon mongs pa dang nye ba'i nyon mongs pa thams cad kyi grogs byed pa'i las can no//rgod pa gang zhe na/ sems rnam par ma zhi ba'o zhes bya ba ni sdug pa'i mtshan ma'i rjes su 'brang ba ste/ 'dod chags kyi char gtogs pas sems rnam par ma zhi ba'o/ /sdug pa'i mtshan ma'i rjes su 'brang ba ni 'dod chags dang mthun pa ste/sngon dgod pa dang / rtse rtse brjes su dran pa'i phyir sems rnam par ma zhi bar rig par bya ste/ zhi gnas kyi bar du gcod pa'i las can no/ /ma dad pa gang zhe na/ las dang 'bras bu dang / bden pa dang / dkon mchog rnams la yid mi ches pa dang / sems ma dang ba ste/ dad pa'i mi mthun pa'i phyogs so//gong du smos pa'i las dang 'bras bu dang bden pa dang / dkon mchog la sogs pa la yid mi ches pa ste/ de ni sems ma dang ba'o/ /yid mi ches pa ni mi 'dod pa ste/ dad ba'i mi mthun pa'i phyogs so/ /le lo'i rten byed pa'i las can no/ /dang pa med na sbyor bar 'dun pa med ba'i phyir ro//le lo gang zhe na/ dge ba la sems mngon par spro ba med pa ste/ brtson 'grus kyi mi mthun pa'i phyogs so zhes bya ba la/ dge ba la sems dad pa la sogs pa dang mtshungs par ldan pa de la sems mi spro ba ste/ nyal ba dang / snyes pa dang / 'phres pa'i bsod nyams la brten nas/gti mug gi char gtogs pa brtson 'grus kyi mi mthun pa'i phyogs so/ /dge ba'i phyogs la sbyor ba'i bar du gcod pa'i las can no/ /bag med pa gang zhe na/ chags pa dang zhe sdang dang / gti mug dang le lo gang yin pa de dag gis nyon mongs pa las sems mi bsrung ba dang /dge ba mi bsgom pa'o/ /bag med pa ni 'dir chos bzhi ste/ chags pa dang / zhe sdang dang / gti mug dang / le lo zhes bya ba'o/ /de dag gis zil gyis non na nyon mongs pa rnams las sems 'dod chags dang bral bar mi byed pa'o/ /de dag la gnas pa ni ma chags pa la sogs pa'i dge ba'i rtsa ba sgom par mi byed pa'o//mi dge ba 'phel ba dang / dge ba yongs su 'grib pa'i rten byed ba'i las can no/ /brjed ngas pa gang zhe na/ dran pa nyon mongs pa can te/ dge ba mi gsal ba'o/ /dran pa nyon mongs pa can zhes bya ba ni nyon mongs pa dang mtshungs par ldan pa'o//dge ba mi gsal ba zhes bya ba ni yang dag pa'i gdams ngag brjed ces bya ba'i tha tshig go/ /rnam par g.yeng ba'i rten byed pa'i las can no/ /rnam par g.yeng ba gang zhe na/ 'dod chags dang / zhe sdang dang / gti mug gi shas kyis 'dod pa'i yon tan lnga po dag la gang sems rnam par 'phro ba'o//de yang rang bzhin gyis sems rnam par g.yeng ba dang / phyi rol du rnam par g.yeng ba dang / nang gi rnam par g.yeng ba dang / mtshan ma'i rnam par g.yeng ba dang / gnas ngan len gyis rnam par g.yeng ba dang / yid la byed pa'i rnam par g.yeng ba'o//rang bzhin gyis rnam par g.yeng ba ni rnam par shes pa'i tshogs lnga ste/ de dag ni rang bzhin gyis nang du mnyam par gzhog mi nus pa'i phyir ro/ /phyi rol du rnam par g.yeng ba ni dge ba la zhugs pa na 'dod pa'i yon tan lnga la sems rnam par 'phro ba ste/ thos pa la sogs pa dge ba la sbyor ba na/dmigs pa de las phyi rol du 'dod pa'i yon tan lnga la sems 'gro bar rig par bya'o/ /nang gi rnam par g.yeng ba ni dge ba la zhugs pa'i tshe bying ba dang / rgod pa dang / ro myong bar byed pa ste/ ting nge 'dzin la zhugs pa'i tshe bying ba dang / rgod pa dang / ro myong bar byed pa'o/ /ting nge 'dzin du ltung ba'i phyir nyes pa'o/ /mtshan ma'i rnam par g.yeng ba gang zhe na/ pha rol yid ches par bya ba sngon du btang nas dge ba la sbyor ba ste/ gzhan gyis bdag la yon tan dang ldan par yid ches par 'gyur ro snyam pa'o/ /de'i mtshan ma ni de'i rgyu ste/dge ba la zhugs pa dge ba las yongs su nyams par rig par bya'o/ /gnas ngan len gyis rnam par g.yeng ba gang zhe na/ ngar 'dzin pa dang / nga yir 'dzin pa dang / nga'o snyam pa'i nga rgyal gyi phyogs kyi gnas ngan len la brten nas/ dge ba la zhugs pa'i tshor ba 'byung zhing /byung ba rnams la nga zhes bya ba dang / nga yir zhes bya bar 'dzin te/ 'dren mar 'byung zhing mtshan mar byed pa'o/ /yid la byed pa'i rnam par g.yeng ba gang zhe na/ ting nge 'dzin gzhan nam/ theg pa gzhan la snyoms par 'jug pa'am/ gnas par byed pa na rnam par 'phro bar byed pa gang yin pa'o//'dod chags dang bral ba'i bar du gcod pa'i las can no/ /shes bzhin ma yin pa gang zhe na/ nyon mongs pa dang mtshungs par ldan pa'i shes rab ste/ des lus dang / ngag dang / yid kyi spyod pa la mi shes bzhin du 'jug pa'o zhes bya ba la lus dang / ngag dang / yid kyi spyod pa la mi shes pa ni 'gro ba dang ldog pa la sogs pa la legs par so sor ma brtags par 'jug par rig par bya'o/ /ltung ba'i rten byed pa'i las can no/ de ltar bya ba dang / mi bya ba mi shes pas nyes pa 'byung ngo / /nye ba'i nyon mongs pa rnams bshad zin to/ / bzhi gzhan du yang 'gyur ro zhes smos pa la/ 'gyod pa gang zhe na/ yid la gcags pa'o zhes bya ba ni smad par byas pa ste/ ngan pa byas pa'i dngos po zhes bya ba'i tha tshig go/ /ngan pa gang byas pa'i de 'dir sbyar te/ yid la gcags pa ni ma yin no/ /'dir ni yid la gcags pa la 'gyod pa zhes bya ste/de la dmigs pa'i phyir ro/ /dper na stong pa nyid la dmigs pa'i sems rnam par dag pa la rnam par thar pa zhes bya ba lta bu'o/ /yang na 'bras bu la rgyu gdags pa ste/ 'di la 'gyod pa'i 'bras bu ni yid la gcags pa'o/ /de gnyi ga yang gnyi ga'i rten te/dge ba dang mi dge ba so so'i / gang dge ba ma byas pas 'gyod pa de ni dge ba'i rten no/ /gang mi dge ba byas pas 'gyod pa de yang dge ba'i rten no/ /de bzhin du mi dge ba gnyi ga'i rten de bzlog pa'o/ /gang mi dge ba ma byas pas 'gyod pa de ni mi dge ba'i rten to/ / dge ba byas pas 'gyod pa de yang mi dge ba'i rten to/ sems gnas pa'i bar du gcod pa'i las can no/ /gnyid gang zhe na/ 'jug pa rang dbang med par sems sdud pa'o/ /gnyid kyi rgyu la brten nas gti mug gi char gtogs pa sems las byung ba'i chos kyi sems rang dbang med pa skyed do//rang dbang med pa de ni sems mngon par sdud pa ste/ dge ba dang mi dge ba dang / lung du ma bstan pa dang / dus dang dus ma yin par yang rung ste/ sems mngon par sdud pa'o/ /bya ba shor ba'i rten byed pa'i las can no/ /rtog pa gang zhe na/ kun tu chol ba'i rten gyi brjod pa ste/sems pa dang / shes rab kyi bye brag gang sems rtsing ba'o/ /kun tu tshol ba zhes bya ba ni tshor bar byed pa'o/ /yid kyi brjod pa zhes bya ba ni yid kyi rnam par shes pa'o/ /de ni sems pa'am/ shes rab la brten nas gang sems rtsing ba ste/rags pa bum pa dang snam bu dang shing rta la sogs pa la 'dzin pa'o/ /spyod pa gang zhe na/ so sor rtogs pa'i yid kyi brjod pa ste/ de bzhin du gang sems zhib pa'o/ /gzhan ni sngar smos pa dang sbyar ro/ /sems zhib pa zhes bya ba ni bum pa la sogs pa de nyid la tshes sam ma tshos zhes bya ba la sogs par 'dzin pa'o//gnyi ga yang reg pa dang / reg pa ma yin par gnas pa'i rten byed pa'i las can no/ /yang na dge ba'i chos rnams kyi las ni rang gi mi mthun pa'i phyogs spong ba'i las can dang / nyon mongs pa dang nye ba'i nyon mongs pa thams cad kyi rang gi gnyen po'i bar du gcod pa'i las can no sems las byung ba rnams bshad zin to//sems dang mi ldan pa rnams brjod par bya ste/ de dag smras pa/ sems dang mi ldan pa ma yin pa'i 'du byed rnams gang zhe na zhes bya ba'o/ /'di ni 'dri ba ste/ 'di'i lan btab pa ni/gang zag gzugs dang sems dang sems las byung ba'i gnas skabs la gdags pa ste zhes bya ba ste/ gzugs kyi gnas skabs dang / sems kyi gnas skabs dang / sems las byung ba'i gnas skabs la gdags kyi/ rdzas su yod pa ni ma yin no/ /sems ni ma bshad na 'di ji ltar sems kyi gnas skabs la gdags/smras pa/ ma 'ongs pa la ltos pa ste/ de la rig pa'i phyir nyes pa med do/ /de dag kyang ci'i gzugs dang sems dang sems las byung ba'i gang dag yin pa de dag nyid mi ldan pa rnams yin nam/ 'on te gzhan la'am brjod par bya ba ma yin pa zhig gam zhe na/de ni de lta ma yin te/ ji ltar zhe na/ de'i phyir/ de nyid dang gzhan du mi gdags so zhes bya ba smras te/ khu tshur bzhin no/ /dper na khu tshur ni sor mo las gzhan yang ma yin no / /gzhan ma yin pa yang ma yin no / /brjod par bya ba ma yin pa la yang ma yin no//gal te sor mo rnams las gzhan yin par gyur na ni logs shig tu bzung bar 'gyur te / ci ste gzhan ma yin na ni sor mo brkyang ba rnams la yang bzung bar 'gyur ro/ /brjod par bya ba ma yin pa la yang mi bya ste/ 'di ltar khu tshur zhes brjod pa'i phyir ro//de lta bas na de nyid dang gzhan dang brjod par bya ba ma yin pa la mi gdags par 'thad do/ /de dag kyang gang zhe na/ thob pa dang / 'du shes med pa'i snyoms par 'jug pa dang / 'gog pa'i snyoms par 'jug pa dang / 'du shes med pa dang / srog gi dbang bo dang / ris mthun pa dang / skye ba dang / rga ba dang / gnas pa dang / mi rtag pa nyid dang / ming gi tshogs dang / tshig gi tshogs dang / yi ge'i tshogs dang / so so'i skye bo nyid dang / de lta bu'i cha dang mthun pa dag go zhes bya ba la/ de lta bu'i cha dang mthun pa dag ces smos pa ni 'jug pa dang / so sor nges pa dang /'byor 'brel pa dang / mgyogs pa dang / go rims dang / dus dang / yul dang / grangs dang / grangs med pa dang / tshogs pa ste/ de dag bsdu ba'i phyir ro/ /chos de dag ni sems dang 'brel pa ma yin pa'i byed pa can yin pas sems dang mi ldan pa zhes bya'o/ /gzugs kyi rang bzhin yang ma yin no//sems las byung ba bzhin du sems dang lhan cig tu dmigs pa la mi 'jug ces bya ba'i tha tshig go/ /de la thob pa gang zhe na/ rnyed pa dang ldan pa'o/ /gang sngon ma thob pa thob pa de la rnyed pa zhes bya ste/ bye brag bstan to/ /thob pa rnams skad cig phyi ma la sogs pa yang mi 'bral ba ni ldan pa zhes bya ste/khyad par bstan to/ /de yang sa bon dang / dbang dang / mngon du gyur pa dang / ci rigs su sbyar ro zhes bya ba ni grangs bzhin du ma yin no/ /sa bon zhes bya ba ni thob pa'o/ /dbang dang sngon du gyur pa ni ldan pa'o/ /'du shes med pa'i snyoms par 'jug pa gang zhe na/dge rgyas kyi 'dod chags dang bral ba la gong ma'i ma yin ba 'byung ba'i 'du shes sngon du btang ba'i yid la byed pas sems dang sems las byung ba'i chos bstan pa ma yin pa rnams 'gog pa gang yin pa'o/ /'du shes med pa rnams kyi snyoms par 'jug pa ni 'du shes pa'i snyoms par 'jug pa ste/'du shes med pa'i lha rnams kyi zhes bya ba mngon no/ /yang na bdag nyid 'du shes med pa ste/ kun tu mi 'byung ba'i phyir ro/ /snyoms par 'jug pa ni rgyu zhes bya ba'i tha tshig go/ /dge rgyas kyi 'dod chags dang bral zhes bya ba ni 'dod pa'i khams gnas nyi shu la 'dzam bu'i gling gi 'og na sems can dmyal ba chen po brgyad de/mnar med pa dang / rab tu tsha ba dang / tsha ba dang / ngu 'bod chen po dang ngu 'bod dang / bsdus 'joms dang / thig nag dang / yang sos zhes bya ba ste/ go rims bzhin du gong nas gong du gnas par rig par bya'o//gzhan yang grang ba'i sems can dmyal ba brgyad de/ chu bur can dang / chu bur rdol ba dang / so thams thams pa dang / kyi hud zer ba dang / a chu zer ba dang / ut+pal ltar gas pa dang / pad+ma ltar gas pa dang /pad+ma ltar gas pa chen po ste/ sems can de dag ni grang ba drag pos nyen nas lus dang sgra'i 'gyur ba'i tshul la ming 'di dag btags so/ /de dag kyang sems can thams cad kyi las kyi dbang gis 'dzam bu gling gi 'og tu grub bo/ /nyi tshe'i sems can dmyal ba rnams ni rang rang gi las kyis grub pa dag ste/mang po'am gnyis sam gcig gi las kyis grub ba yin pas gnas ma nges te/ chu dang ri dang mya ngan gyi phyogs la sogs pa'o/ /dud 'gro ni/ thang dang chu dang / nam mkha'i spyod yul ba de dag gi gnas ni rgya mtsho ste de nas so sor gyes so/ / yi dwags rnams kyi rgyal po ni gshin rje ste/ 'dzam bu'i gling 'di'i 'og nas dpag tshad lnga brgyas chod pa'i 'og na rgyal po'i pho brang yod de/ de dag gi rtsa ba'i gnas te/ de nas so sor gyes so/ /gling bzhi ni 'dzam bu'i gling dang / nub kyi ba lang spyod dang / byang gi sgra mi snyan dang /shar gyi lus 'phags zhes bya ba'o/ /'dod pa'i khams su skyes pa'i lha drug la rgyal chen bzhi'i ris rnams dang / sum cu rtsa gsum pa rnams dang / 'thab bral rnams dang / dga' ldan rnams dang / 'phrul dga' rnams dang / gzhan 'phrul dbang byed rnams te/ de dag 'dod pa la spyod pa ni gnyis sprod pa dang / 'khyud pa dang / lag chang dang / 'dzum pa dang / lta ba las 'gyur te/ 'di ni 'dod khams so/ /gzugs kyi khams tshangs ris dang / tshangs pa'i mdun na 'don dang / tshangs chen ni bsam gtan dang po'o/ /'od chung dang /tshad med 'od dang / 'od gsal ni bsam gtan gnyis pa'o/ /dge chung dang / tshad med dge dang / dge rgyas ni bsam gtan gsum pa'o/ /sprin med dang bsod nams skyes dang / 'bras bu che dang / gnas de rnams ni so so'i skye bo'i gnas so/ /gnas gtsang ma lnga po mi che ba dang /mi gdung ba dang / gya nom snang ba dang / shin tu mthong dang / 'og min zhes bya ba rnams ni bsam gtan bzhi pa ste/ 'di dag ni gzugs kyi khams so/ /nam mkha' mtha' yas skye mched du nye bar 'gro ba dang / rnam shes mtha' yas skye mched du nye bar 'gro ba dang /ci yang med pa'i skye mched du nye bar 'gro ba dang / 'du shes med 'du shes med min skye mched du nye bar 'gro ba 'di ni gzugs med pa'i khams te/ 'di dag ni khams gsum du blta'o/ /de la 'di ni dge rgyas kyi lha'i ris kyi 'dod chags dang bral la/gong ma'i 'dod chags dad ma bral ba'o/ /yid la byed pa gang gis snyoms par 'jug pa 'di la snyoms par 'jug ce na/ smras pa/ 'byung ba'i 'du shes sngon du gtang ba'i yid la byed ba'o zhes smos pa'o/ /snyoms par 'jug pa de ni sems dang sems las byung ba'i chos bstan pa ma yin pa rnams 'gog pa'o//de dag ni 'jug pa'i rnam par shes pa mtshungs par ldan pa dang bcas pa drug ste/ mig gi rnam par shes pa dang / rna ba'i rnam par shes pa dang / sna'i rnam par shes pa dang / lce'i rnam par shes pa dang /lus kyi rnam par shes pa dang / yid kyi rnam par shes pa'o/ /bstan pa ni kun gzhi rnam par shes pa dang / nyon mongs pa can gyi yid do/ /'gog pa'i snyoms par 'jug pa gang zhe na/ ci yang med pa'i skye mched kyi 'dod chags dang bral ba/ srid pa'i rtse mo las gyen du bskyod pa'i gnas pa'i 'du shes sngon du btang ba'i yid la byed pas sems dang sems las byung ba'i chos bstan pa ma yin pa rnams dang /bstan pa rnams las kyang kha cig 'gog pa gang yin pa'o/ /'di la 'di ni bye brag yin te/ gnas pa'i 'du shes sngon du btang ba'i yid la byed pas 'di la snyoms par 'jug pa'o//bstan pa rnams las kyang kha cig 'gog pa zhes bya ba ni nyon mongs pa can gyi yid mtshungs par ldan pa dang bcas pa 'gog pa'o/ /snga ma ni 'jig rten pa rnams kyi snyoms par 'jug pa'o/ /'gog pa'i snyoms par 'jug pa ni chos 'di pa rnams kyi ste/phyir mi 'ong ba dang / dgra bcom pa snyoms par 'jug pa'o/ /de dag la sogs pa ni de dag gi khyad par rgyas pa'o/ /'du shes med pa gang zhe na/ 'du shes med pa'i snyoms par 'jug pa'i 'bras bu ste/ 'du shes med pa'i sems can gyi khrod lha rnams kyi nang du skyes pa'i sems dang sems las byung ba'i chos bstan pa ma yin pa rnams 'gog pa'o//bstan pa ma yin pa zhes bya ba ni 'jug pa'i rnam par shes pa drug dag 'gog pa gang yin pa'o/ /'du shes med pa 'di ni 'du shes med pa'i snyoms par 'jug pa'i 'bras bu'o//'bras bu che ba'i phyogs gcig gi khrod na 'du shes med pa'i lha rnams 'khod de/ bsam gtan khyad par can dang mtshungs so/ /srog gi dbang po gang zhe na/ ris mthun pa rnams su sngon gyi las kyis 'phangs pas gang 'du byed rnams kyi gnas pa'i dus nges pa'o//sngon gyi las kyi bag chags kyis 'phangs pa'i rnam par smin pa'i rgyun gzhan gyi mthu la srog gi dbang po zhes bya'o/ /de'i dbang gis ji srid las yod kyi bar du ris 'dra ba'i rgyun 'chad pa zhes bya ba'i 'chi bar mi 'gyur ro/ / ris mthun pa gang zhe na/ gang sems can rnams kyi lus 'dra ba'o/ /sems can gyi ris de dang de dag na sems can de dang de dag gi lus dang dbang po dang dbyibs dang g.yo ba dang kha zas la sogs pa mthun par byed pa dang / phan tshun du mngon par dga' ba'i 'brel pa'i rgyu'o/ / de la 'gro ba 'dra ba ni 'dra ba ste/ lus mtshungs pa nyid kyis 'dra ba ni 'dra ba'o/ /skye ba gang zhe na/ ris mthun par gang 'du byed rnams ma byung ba las byung ba gang yin pa'o/ /ris 'dra ba ni mthun pa'o/ /der 'du byed gzugs la sogs pa ma byung ba las nur nur po la sogs pa'i dbang po la skye ba zhes gdags so//rga ba gang zhe na/ de ltar de dag gi rgyun gzhan du gyur pa'o/ /'du byed byung ba de dag gi nur nur po la sogs pa'i gnas skabs rnams la rga ba gdags so/ /gnas pa gang zhe na/ de ltar de dag rgyun rgyud chags pa'o/ /'du byed 'byung ba de dag gi skad cig gcig nas gcig tu brgyud pa ma shi'i bar du nges par gnas pa la gnas pa gdags so//mi rtag pa nyid gang zhe na/ de ltar de dag gi rgyun 'chad pa'o/ /'du byed rnams kyi skad cig gcig nas gcig tu brgyud pa nges par 'byung bar gang shin tu rgyud chad pa de la mi rtag pa nyid ces bya'o//de'i phyir 'chi ba rnam pa gnyis su 'grub par 'gyur te/ rga ba dang gnas pa'i dus na skad cig ma 'chi ba dang / phung po zhig ste rgyun 'chad pa'i 'chi ba'o/ /bzhi po de dag ni 'dus byas kyi mtshan nyid rnams so/ /ming gi tshogs gang zhe na/chos rnams kyi ngo bo nyid kyi tshig bla dgas so/ /'di lta ste mig gi ces bya ba la sogs pa'o/ /tshig gi tshogs gang zhe na/ chos rnams kyi khyad par gyi tshig bla dgas so/ /'di lta ste kye ma 'du byed mi rtag ste zhes bya ba la sogs pa'o/ /ji tsam gyis brjod par 'dod pa'i don yongs su rdzogs pa ste/gang gis phyed pa dang yon tan dang / dus kyi 'brel pa'i khyad par rnams rtogs par byed ces bya'i tha tshig go/ /'di lta ste bum pa byas zhes bya ba'i [(]dag [,]ngag [)]'dis ni byed pa'i 'brel pa'i khyad par rtogs par byed do/ /lha sbyin nag po dkar po sdo ba sangs zhes bya ba ni yon tan gyi 'brel pa'i khyad par ro//lha sbyin 'tshed do 'tshed bar 'gyur ro/ /btsos so zhes bya ba 'dis ni dus kyi 'brel ba'i khyad par rtogs par byed do/ /de ltar rang gi mtshan nyid mngon par brjod pa zhes bya ste/ byed pa dang yon tan dang dus kyi 'brel ba'i khyad par brjod pa'i tshig ces bya'o//yi ge'i tshogs gang zhe na/ yi ge rnams te de gnyi ga gsal bar byed pa'i phyir ro zhes bya ba la/ gnyi ga ni chos rnams kyi ngo bo nyid dang khyad par ro/ /gsal bar byed ces bya ba ni mngon par byed ces bya ba'i tha tshig go/ /brjod pa yang de dag yin te/ming dang tshig la brten nas don brjod pa'i phyir ro zhes bya ba la/ ming ni mig ces bya ba la sogs pa'o/ /tshig ni mig mi rtag ces bya ba la sogs pa'o/ /de gnyi ga la brten nas don gyi rang bzhin dang / bye brag ces bya ba brjod pa'i phyir brjod pa'o/ / yi ge yang rnam grangs gzhan du mi 'gyur bar byed pa'i phyir ro zhes bya ba ni/ a zhes bya ba 'di rnam grangs gzhan gyis brjod par mi nus pa'i phyir ro/ /a zhes bya ba la sogs pa yang rig par bya'o/ /so so skye bo nyid gang zhe na/ 'phags pa'i chos rnams ma thob pa'o zhes bya ba ni gang dag sdig pa mi dge ba'i chos rnams la thag ring du log pa de dag 'phags pa rnams te/de dag gi chos rnams ma thob pa'o/ /'phags pa ni sangs rgyas dang / rang sangs rgyas dang / 'phags pa nyan thos rnams yin na / de dag gang gis ma thob/ smras pa/ bye brag tu ma phye bas thams cad kyis ma thob ces bstan par 'gyur ro/ /ma thob pa ni 'dir thob pa med par blta'o/ /'du byed kyi phung po ni bshad zin to/ / 'du byed kyi phung po'i 'og tu rnam par shes pa'i phung po brjod par bya ste/ de smras pa/ rnam par shes pa gang zhe na zhes bya ba ste/rnam par shes pa'i phung po zhes bya ba'i tha tshig go/ /dmigs pa rnam par rig pa'o zhes bya ba la/ dmigs pa ni rnam pa drug ste/ gzugs dang sgra dang dri dang ro dang / reg bya dang / chos rnams so/ /de dag khong du chud pa ni rnam par rig pa ste rnam par shes pa'o/ / de dag kyang 'jug pa'i rnam par shes pa drug go/ /de la mig gi rnam par shes pa gang zhe na/ mig ni rten/ gzugs ni dmigs pa ste/ so sor rnam par rig pa'o/ /rna ba'i rnam par shes pa gang zhe na/ rna ba ni rten/ sgra ni dmigs pa ste/ so sor rnam par rig pa'o/ / sna'i rnam par shes pa gang zhe na/ sna ni rten/ dri ni dmigs pa ste/ so sor rnam par rig pa'o/ /lce'i rnam par shes pa gang zhe na/ lce ni rten/ ro ni dmigs pa ste/ so sor rnam par rig pa'o/ /lus kyi rnam par shes pa gang zhe na/ lus ni rten/ reg bya ni dmigs pa ste/ so sor rnam par rig pa'o/ /yid kyi rnam par shes pa gang zhe na/ yid ni rten/ chos ni dmigs pa ste/ so sor rnam par rig pa'o/ /rnam grangs bstan pa'i phyir 'di skad brjod do/ /sems dang yid kyang de yin te/ /zhes bya'o/ /rnam grangs kyi don no/ /sna tshogs pa dang yid rten byed pa'i phyir ro zhes bya'o//de la sna tshogs pa'i phyir zhes bya ba ni sems te/ sna tshogs pa ni mig gi rnam par shes pa la sogs pa gzugs la sogs pa rnam pa du ma'i bye brag gis tha dad pa rnams la ji snyed pa de snyed de/ gzugs la sogs pa'i rnam pa nyid ces bya ba'i tha tshig go//de'i phyir de'i dbang po las byung nas yul rnam par shes pa zhes bya ste/ dbang po la ni ma yin no/ /yid rten byed ces bya ba ni 'jug pa'i rnam par shes pa drug yin la gnas pa ste/ ji skad du/ drug po 'gag ma thag pa yi/ /rnam shes gang yin de yid do//zhes bshad pa ste/ gang dang gang 'gags ma thag pa de la yid ces bya'o/ /dper na bu de nyid gzhan gyi pha zhes bya ba dang / 'bras bu de nyid gzhan gyi sa bon zhes bya ba de bzhin du 'jug pa'i rnam par shes pa'i 'bras bu drug po de dag nyid 'gags pa na gang gi tshe rnam par shes pa gzhan byung ba'i rten du gyur pa de'i tshe rten byed ces bya'o//de ltar 'jug pa'i rnam par shes pa drug la sems zhes bstan to/ /dngos su na/ sems ni kun gzhi rnam par shes pa ste/ /zhes bya bar blta'o/ /dngos sun sems ni kun gzhi rnam par shes pa nyid yin gyi/'jug pa'i rnam par shes pa drug ma yin par ci mngon zhe na/ de'i phyir 'di ltar 'di ni 'du byed thams cad kyi sa bon bsags pa'o zhes bya ba smos so/ /'du byed thams cad ni kun nas nyon mongs pa'i chos rnams so/ /de dag ni rkyen bzhis 'byung ste/de la rgyu'i rkyen ni kun gzhi rnam par shes pa la gnas pa'i bag chags rnams so/ /bdag po'i [(]kyen [,]rkyen [)]ni dbang po drug po rnams so/ /mtshungs pa de ma thag pa'i rkyen ni yod do/ /dmigs pa'i rkyen ni gzugs la sogs pa'o/ /de dag 'byung ba'i go rims ni mig la sogs pa rnams la yang brten gzugs la sogs pa la yang brten nas mig gi rnam par shes pa la sogs pa 'byung ngo //byung ma thag tu yid kyi rnam par shes pa yul rnams la rtog go/ /rnam par rtog pa las 'dod chags la sogs pa nyon mongs pa 'byung ngo //de la bsod nams dang bsod nams ma yin pa dang / mi g.yo ba'i mtshan nyid 'du byed ces bya ba'i las 'byung ngo / /'du byed ni 'dir sems par blta'o/ /skyes pa'i las de 'gags pa na kun gzhi rnam par sa pa la bag chags skyed par byed do/ /de bzhin du kun nas nyon mongs pa'i chos rnams kyang kun gzhi rnam par shes pa la bag chags skyed par byed do//bag chags kyi sa bon thams cad gong nas gong du sogs pas sems so/ /ji ltar kun gzhi rnam par shes pa kun nas nyon mongs pa'i 'du byed thams cad kyi rgyu yin pa de bzhin du de dag kyang kun gzhi rnam par shes pa'i rgyu yin no//kun gzhi rnam par shes pa de ni rnam pa gnyis su 'gyur te/ rgyu zhes bya ba dang / 'bras bu zhes bya'o / /rgyu zhes bya ba ni bag chags so/ /'bras bu zhes bya ba ni rnam par smin pa ste/ sngon gyi las kyi bag chags kyis skyed ces bya ba'i tha tshig go//'di ltar gcig gi rgyu las gcig 'byung bar blta'o/ /dper na mar me 'bar ba dang / ras tshig par byed pa 'byung ba phan tshun dus mnyam pa dang / mdung khyim dus gcig pa gcig gis gcig brten te mi 'gyel ba ltar 'byung ba'i rgyu gang yin pa de ni kun gzhi rnam par shes pa yin par khong du chud par bya'o//ci'i phyir kun gzhi rnam par shes pa zhes bya ba dmigs pa ni gang / rnam pa ni gang zhe na/ smras pa/ de yang dmigs pa dang / rnam pa yongs su ma chad pa'o zhes bya ba'o / /de yang ci dge ba'am/mi dge ba zhig smras pa/ ma yin te/ rigs gcig pa dang zhes bya ba ste/ lung du ma bstan pa'i rang bzhin zhes bya ba'i tha tshig go/ /skad cig pa'am/ skad cig pa ma yin pa zhe na/ smras pa/ rgyun chags par 'jug pa'o/ /zhes bya ba ste/ skad cig ma zhes bya ba'i tha tshig go//rang bzhin gcig pa de yod par ji ltar shes par bya zhe na/ lung dang rigs pa las te/ lung gi bcom ldan 'das kyis chos mngon pa'i mdo las tshigs su bcad de gsungs pa/ thog ma med pa'i dus kyi dbyings/ /chos rnams kun gyi gnas yin te//de yod pas na 'gro kun dang / /mya ngan 'das pa'ang thob par 'gyur/ /zhes bya'o/ /rigs pa ni/ 'di ltar 'gog pa'i snyoms par 'jug pa dang / 'du shes med pa'i snyoms par 'jug pa dang / 'du shes med pa rnams las langs nas yul rnam par rig pa zhes bya ba 'jug pa'i rnam par shes pa 'byung ba dang dmigs pa'i rkyen la ltos nas zhes bya ba ste/'di ltar zhes bya ba ni/ gang gi phyir zhes bya ba'i tha tshig go/ /'gog pa'i snyoms par 'jug pa la snyoms par zhugs pa na/ 'jug pa'i rnam par shes pa drug 'gag go//de bzhin du 'du shes med pa'i snyoms par 'jug pa la snyoms par zhugs pa dang / 'du shes med pa pa las langs nas yang yul rnam par rig pa zhes bya ba 'jug pa'i rnam par shes pa 'byung ba gang gi phyir zhes bya ba'i skabs dang sbyar te/ de'i rgyu ni kun gzhi rnam par shes pa la gnas pa'i bag chags so//dmigs pa'i rkyen la ltos nas zhes bya ba la/ dmigs pa ni yul drug ste/ gzugs dang / sgra dang / dri dang / ro dang / reg bya dang / chos zhes bya'o/ /gal te kun gzhi rnam par shes pa khas mi len na 'jug pa'i rnam par shes pa drug rgyu gang las 'byung bar 'gyur/de lta bas na kun gzhi rnam par shes pa khas blang bar bya'o/ /rnam pa gzhan du 'jug pa nyid ces bya ba ni mig gi rnam par shes pa la sogs pas sngon po la sogs pa'i rnam par byung ba na/ gang las byung ba de kun gzhi rnam par shes pa yin no//chad nas yang 'byung ba zhes bya ba ni gnyid kyis log pa dang / brgyal ba la sogs pa'i dus na 'jug pa'i rnam par shes pa rgyun chad pa rnams gang las 'byung bar 'gyur ba de kun gzhi rnam par shes pa'o/ /'khor bar 'jug pa dang ldog pa'i phyir ro zhes bya ba la/'khor ba ni nye bar len pa'i phung po lnga ste/ de dag gi 'jug pa dang ldog pa ni 'ong ba dang 'gro ba'i dngos po'o/ /de lta bu'i rang bzhin can gyi lus kyi rgyu'i bye brag ni kun gzhi rnam par shes pa zhes bya'o/ /kun gzhi rnam par shes pa de nyid ni sa bon thams cad kyi gzhi nyid dang /lus kyi kun gzhi dang rgyu nyid ces bya ba ni 'di ltar kun nas nyon mongs pa'i chos thams cad kyi sa bon gang yin pa de dag de la gnas te/ de'i phyir kun gzhi rnam par shes pa zhes bya'o/ /yang na de de dag la rgyu'i dngos por gnas pa'o/ / lus la gnas pa nyid kyi phyir ro zhes bya ba ni 'di ltar rnam par shes pa de lus la gnas pa de/ de'i phyir kun gzhi rnam par shes pa zhes bya'o/ /len pa'i rnam par shes pa yang de yin te/ lus len pa'i phyir ro zhes bya ba ni kun gzhi rnam par shes pa nyid len pa'i rnam par shes pa yin te/dgongs pa nges par 'grel pa'i mdo las/ len pa'i rnam par shes pa zab cing phra/ /sa bon thams cad chu bo bzhin du 'bab/ /bdag tu rtog par gyur na mi rung zhes/ /'di ni byis pa rnams la ngas ma bstan/ /ces gsungs pa lta bu'o/ /de'i phyir len pa'i rnam par shes pa zhes bya ste/dbang po gzugs can thams cad len pa dang / lus thams cad len pa'i gnas yin pa dang / lus len pa'i phyir te/ 'di ltar des dbang po gzugs can dag zin na ji srid 'tsho'i bar du mi 'chi bar gnas so/ /nying mtshams sbyor bar byed pa na/yang de mngon par 'grub pa dang / len pas lus zin pa yin te/ de'i phyir/ lus len pa nyid kyi phyir ro zhes smos so/ /dngos su na yid ni kun gzhi rnam par shes pa la dmigs te zhes bya ba ni/ kun gzhi rnam par shes pa la bdag tu dmigs zhes bya ba'i tha tshig go//de ni rtag tu rlom sems pa'i bdag nyid de/ rtag tu bdag tu rmongs pa dang / bdag tu lta ba dang / bdag tu nga rgyal ba dang / bdag tu 'chag pa la sogs pa dang mtshungs par ldan pa yin te/ de'i phyir de ni kun tu 'gro ba zhes bshad de/ dge ba dang mi dge ba dang lung du ma bstan pa la yang 'byung ngo / /rnam par shes pa ste/ rigs gcig pa zhes bya ba ni nyon mongs pa can gyi rang bzhin zhes bya ba'i tha tshig go/ /rgyun chags par 'jug pa ste zhes bya ba ni skad cig pa zhes bya ba'i tha tshig go/ /de ni kun tu 'gro ba yin yang /dgra bcom pa dang 'phags pa'i lam dang / 'gog pa'i snyoms par 'jug pa'i dus ma gtogs so/ /'phags pa'i lam gyi dus dang 'gog pa'i snyoms par 'jug pa'i dus na bag chags skyed nas 'gag go/ /langs nas yang sa bon de las 'byung ngo //dgra bcom pa'i dus na yongs su 'gag go/ /de ltar na 'jug pa'i rnam par shes pa drug dang / kun gzhi rnam par shes pa dang / nyon mongs pa can gyi yid dang rnam par shes pa brgyad po de dag ni rnam par shes pa'i phung por bshad pa yin no/ /rnam par shes pa'i phung po bshad zin to//de ci'i phyir phung po zhes bya zhe na/ zhes bya ba brjod par bya ste/ smras pa/ spungs pa'i phyir te zhes bya ba'o / /spungs pa'i phyir zhes bya ba de yang ji ltar shes par bya zhe na/ 'dir smras pa dus dang / rgyud dang / rnam pa dang / 'gro ba dang / yul tha dad pa'i gzugs la sogs pa mdor bsdus pa nyid kyi phyir ro zhes bya ba ste/ spungs pa'i don du rig par bya'o/ /dus tha dad pa'i gzugs la sogs pa zhes bya ba ni de bzhin du so sor sbyar bar bya'o/ /sogs pa smos pas ni tshor ba dang / 'du shes dang / 'du byed dang / rnam par shes pa bsdu bar rig par bya'o/ /de la 'das pa'i gzugs ni 'das pa'i dus te/ rgyu dang 'bras bu spyad zin pa'i phyir ro/ /da ltar byung ba'i gzugs ni da ltar byung ba'i dus te/ rgyu ni spyad zin la 'bras bu ni spyad ma zin pa'i phyir ro/ /ma 'ongs pa'i gzugs ni/ma 'ongs pa'i dus te/ rgyu dang 'bras bu spyad ma zin pa'i phyir ro/ /rgyud ces bya ba ni so so'i rgyud de/ gzugs la sogs pa bsdu bar rig par bya'o/ /rnam pa zhes bya ba ni sngon po dang ser po la sogs pa'i rnam par rig par bya'o/ /'gro ba zhes bya ba ni 'gro ba lnga ste/sems can dmyal ba dang / yi dwags dang / dud 'gro dang / mi dang / lha'i 'gro ba rnams so/ /lha ma yin gyi 'gro ba ni/ lha dang yi dwags kyi 'gro bar 'dus pa'i phyir gud dum smos so/ /'gro ba 'di dag ni gzugs la sogs pa gang dag yod pa de dag ni 'gro ba tha dad pas tha dad par rig par bya'o//yul tha dad pa'i gzugs la sogs pa ni nub kyi ba lang spyod la sogs pas tha dad par rig par bya'o/ /de ltar na gzugs la sogs pa rnam pa du ma mdor bsdus pa'i phyir gzugs la sogs pa'i phung po zhes bya'o/ /ci'i phyir phung po'i don de skad brjod ce na/'jig rten na mthong ba'i phyir te/ dper na gang du ma zlum pa de la phung po zhes bya ste/ 'bru'i phung po bzhin no/ /phung po rnams ni btags pa'i yod par bstan pa yin no/ /skye mched bcu gnyis ni mig gi skye mched nas/ chos kyi skye mched kyi bar du'o//mig la sogs pa ni snga ma bzhin du bshad do zhes bya ba ni 'di skad du gzugs kyi phung por gang mig la sogs pa dbang po lnga bstan pa de dag nyid mig la sogs pa'i skye mched du blta bar bya'o/ /de nyid du gzugs la sogs pa gang dag yul lnga bstan pa de dag ni gzugs kyi skye mched nas/reg bya'i skye mched kyi bar gyi skye mched lngar blta bar bya'o zhes bstan par 'gyur ro/ /der reg bya'i skye mched ni 'byung ba chen po bzhi gang yin pa dang / 'jam pa la sogs pa reg bya'i phyogs gcig bshad pa gang yin pa de ltar reg bya rnam pa bcu gcig po de dag ni reg bya'i skye mched du rig par bya'o//yid kyi skye mched ni rnam par shes pa'i phung po gang yin pa ste/ rnam par shes pa'i phung po gang gong du bshad pa de nyid yid kyi skye mched du rig par bya'o/ /chos kyi skye mched ni gang tshor ba dang /'du shes dang / 'du byed dang / rnam par rig byed ma yin pa dang / 'dus ma byas so zhes bya ba ni 'di skad du/ chos kyi skye mched ni rdzas brgyad po ste/ tshor ba'i phung po dang / 'du shes kyi phung po dang / 'du byed kyi phung po dang / rnam par rig byed ma yin pa dang / nam mkha' dang / so sor brtags pa'i 'gog pa dang / so sor brtags pa ma yin pa'i 'gog pa dang / de bzhin nyid ces bstan par 'gyur ro/ /de ltar na phung po gsum dang / rnam par rig byed ma yin pa bshad zin to/ /'dus ma byas ma bshad pas 'dir smras pa/'dus ma byas gang zhe na/ nam mkha' dang / so sor brtags pa ma yin pa'i 'gog pa dang / so sor brtags pa'i 'gog pa dang / de bzhin nyid do zhes bya ba ste/ gang rkyen rnams las ma byung ba de ni 'dus ma byas su rig par bya'o/ /bzlog pa ni 'dus byas so/ /de la nam mkha' gang zhe na/gzugs kyi go 'byed pa'o/ /'di'i nang du dngos po shin tu snang bas nam mkha' ste/ de ni gzugs kyi go 'byed pa tsam du blta bar bya'o/ /so sor brtags pa ma yin pa'i 'gog pa gang zhe na/ gang 'gog pa bral ba ma yin pa ste/ de ni gang nyon mongs pa'i gnyen po med par phung po rnams gtan du mi skye'o zhes bya ba la/so sor brtags pa med pa ni so sor brtags pa ma yin pa'o/ /gang des 'gog pa ni so sor brtags pa ma yin pas 'gog pa ste/ blo sngon du ma btang zhes bya ba'i tha tshig go/ /'di lta ste/ yul gcig la blo gtad pa na de'i tshe de las gzhan pa yul gzugs la sogs pa 'gags na rten de dang dmigs pa la rag las te skye ba'i mig la sogs pa'i rnam par shes pa ma 'ongs pa rnams rgyu dang dmigs pa dang bdag po'i rkyen tshogs su zin kyang bzhi pa mtshungs pa de ma thag pa'i rkyen med pa'i phyir ro//mi skye ba gang yin pa de ni so sor brtags pa ma yin pa'i 'gog pa ste/de ni bral ba ma yin no/ /ci'i phyir zhe na/ nyon mongs pa rnams kyi gnyen po med pa'i phyir ro/ /de yang phung po rnams gtan du mi skye bar blta ste/ ci'i phyir zhe na/ rnam par shes pa'i tshogs lnga'i yul ni de ltar yin pa'i phyir te/de dag 'das pa'i yul la dmigs par mi nus so/ /so sor brtags pa'i 'gog pa gang zhe na/ gang 'gog pa de ni bral ba ste/ de ni gang nyon mongs pa'i gnyen pos phung po rnams gtan du mi skye ba'o/ /so sor brtags pa zhes bya ba ni 'bad pas grub pa'i shes rab ste/des bden pa bzhi la so sor rtog go/ /yang na so sor rang gi bden pa so sor yang dag par rtogs pa ni/ so sor brtags pa ste/ mngon sum du byed ces bya ba'i tha tshig go/ /des thob pa'i 'gog pa ni so sor brtags pas 'gog pa'o/ /yang na so sor rtogs pa nyid so sor brtags pa ste/shes rab kyi bye brag go/ /des thob par bya ba ste/ thob pa'i sgra ni tshig par mi mngon par byas pa'i phyir ro/ /dper na glang dang ldan pa'i shing rta la glang gi shing rta zhes bya ba bzhin te / ldan pa'i sgra mi mngon par byas pa'i phyir ro/ /de ni zag pa dang bcas pa'i chos rnams dang bral ba ste/de'i phyir de ni gang nyon mongs pa'i gnyen pos mi skye ba'o zhes bya ba smras so/ /thar pa zhes bya ba de thob na nyon mongs pa rnams gtan du mi skye ste/ nges par 'gog pa'i phyir ro / /so sor brtags pas 'gog pa zhes bya'o/ /de bzhin nyid gang zhe na/gang chos rnams kyi chos nyid dang / chos bdag med pa nyid do/ /gzhan ma yin pa'i phyir de bzhin nyid do/ /chos rnams zhes bya ba ni gzugs la sogs pa'o/ /chos nyid ces bya ba ni gang de dag gi ngo bo nyid do/ /chos bdag med pa ji ltar ngo bo nyid du 'gyur/ 'di ltar snam bu zhes bya ba la sogs pa'i chos rnams rnam par spyad na ngo bo nyid du mi gnas so/ /ji ltar snam bu snam bu'i ngo bor ma grub pa de bzhin du rgyu skud pa yang rgyu skud pa'i ngo bor ma grub ste/ ci'i phyir zhe na/ cha shas kyi bdag nyid yin pa'i phyir ro/ /cha shas rnams kyang cha shas rnams kyi ngo bor ma grub ste/ci'i phyir zhe na/ nyag ma'i cha'i bdag nyid yin pa'i phyir ro/ /nyag ma'i cha la sogs pa yang de bzhin du rig par bya ste/ de ltar chos thams cad ngo bo nyid med par blta'o / /ci'i phyir skye mched ces bya zhe na/ rnam par shes pa skye ba'i sgo'i phyir ro zhes bya ba ni gang gi phyir skye mched bcu gnyis po de dag mtshungs par ldan pa dang bcas pa'i 'jug pa'i rnam par shes pa drug skye ba'i sgor gyur pa de'i phyir skye mched ces bya'o//nges pa'i tshig tu na sems dang sems las byung ba zhes bya ba skye ba mched par byed pas skye mched do//mched pa ni rgyas pa ste/ rgyas par byed ces bya ba'i tha tshig go/ /skye mched rnams bshad zin to/ /khams bco brgyad ni zhes bya ba brjod par bya ste/ de dag smras pa/ mig gi khams dang zhes bya ba rgya cher 'byung ba'o/ /mig la sogs pa'i khams dang gzugs la sogs pa'i skye mched rnams ji lta ba bzhin no zhes bya ba ni 'di skad du gang dag mig la sogs pa'i skye mched lnga dang /gang yang yul gzugs la sogs pa de dag skye mched du bstan pa de dag nyid mig la sogs pa'i khams dang / gzugs la sogs pa'i khams su blta bar bya'o zhes bstan par 'gyur ro//sogs pa smos pas ni rna ba dang sna dang / lce dang lus zhes bya ba bsdu'o/ /yul rnams la yang sgra dang dri dang ro dang reg bya zhes bya ba'i skye mched rnams bsdu'o/ /rnam par shes pa'i khams drug po 'di dag ni mig la sogs pa dag la brten te gzugs la sogs pa dmigs pa rnam par rig pa'o zhes bya ba ni 'di skad du mig dang /rna ba dang / sna dang / lce dang / lus dang / yid ces bya ba'i khams rnams ni mig la sogs pa'i rnam par shes pa'i khams drug gi rten yin la/ phyi rol gyi khams drug gzugs dang / sgra dang / dri dang / ro dang / reg bya dang / chos zhes bya ba ni dmigs par bstan par 'gyur te/ de ni 'di skad du drug pa gnyis las rnam par shes pa'i khams drug 'byung ngo zhes ston par 'gyur ro/ /yid kyi khams zhes smos pa 'jug pa'i rnam par shes pa drug las kyi yid kyi khams zhes bya ba gud na yod dam smras pa/gzhan gang yang med de/ de dag nyid 'gag ma thag pa ste/ 'jug pa'i rnam par shes pa'i khams drug gi rgyur 'gyur te/ rnam par shes pa gzhan skyed pa la yid kyi khams zhes bya'o//gzhan du na ni gcig gi nang du gcig 'dus pa'i phyir khams bcu bdun nam khams bcu gnyis su 'gyur ro/ /mig gi rnam par shes pa la sogs pa lnga'i rten ni mig dang / rna ba dang / sna dang / lce dang / lus zhes bya ba yin na rnam par shes pa drug pa gang la brten nas 'byung ba'i gnas gang yang med pas/de'i phyir rnam par shes pa drug pa'i rten bstan pa dang / khams bco brgyad du bskang ba'i phyir yid kyi khams 'dod do/ /de ltar na gzugs kyi phung po gang yin pa de ni skye mched dang / khams bcu dang / chos kyi skye mched dang khams kyi phyogs gcig go zhes bya ba ni phung po rnam par gzhag pa la gzugs kyi phung po'o//de nyid skye mched rnam par gzhags pa na skye mched bcu ste/ mig dang / rna ba dang / sna dang / lce dang / lus dang / gzugs dang / sgra dang / dri dang / ro dang / reg bya'i skye mched rnams so//chos kyi skye mched dang / khams kyi phyogs gcig ces bya ba ni der rnam par rig byed ma yin pa'i gzugs so/ /de dag nyid khams bcu gcig tu rig par bya ste/ mig gi khams nas reg bya'i khams kyi bar du'o/ /de ltar gzugs kyi phung po rnam par dbye'o//rnam par shes pa'i phung po gang yin pa de ni yid kyi skye mched dang / sems kyi khams bdun no zhes bya ba ni phung po rnam par gzhag pa la rnam par shes pa'i phung po'o/ /de nyid skye mched rnam par gzhag pa na yid kyi skye mched do/ /sems kyi khams bdun ni mig gi rnam par shes pa'i khams dang /rna ba'i rnam par shes pa'i khams dang / sna'i rnam par shes pa'i khams dang / lce'i rnam par shes pa'i khams dang / lus kyi rnam par shes pa'i khams dang / yid kyi khams dang / yid kyi rnam par shes pa'i khams so/ /de ltar rnam par shes pa'i phung po yang /khams dang skye mched du rnam par gzhag par rig par bya'o/ /gzhan phung po gsum po gang yin pa tshor ba dang / 'du shes dang / 'du byed ces bya ba dang / gzugs kyi phung po'i phyogs gcig rnam par rig byed ma yin pa zhes bya ba dang /'dus ma byas rnam pa bzhi po nam mkha' dang / so sor brtags pa ma yin pa'i 'gog pa dang / so sor brtags pa'i 'gog pa dang / de bzhin nyid dang / de ltar rdzas brgyad po 'di ni chos kyi skye mched dang / chos kyi khams su rig par bya'o/ /de ltar phung po lnga po dag skye mched bcu gnyis dang /khams bco brgyad du bstan pa yin no/ /ci'i phyir khams zhes bya zhe na/ byed pa med la rang gi mtshan nyid 'dzin pa'o/ /byed pa med pa ni mig gi khams gang gi tshe mig gi khams gzhan skyed pa de'i tshe de 'di snyam du bdag gis mig gi khams bskyed par bya'o snyam du mi sems pa'o//khams bcu bdun la yang de bzhin du blta bar bya'o/ /ci'i phyir phung po la sogs pa bshad ce na zhes bya ba ni gzhan 'di snyam du sems te/ 'di ltar phung po las gud na skye mched rnams dang / khams rnams med do / de'i phyir phung po bshad pa nyid kyis yongs su rdzogs pa/skye mched dang khams bshad par mi bya'o snyam du sems pa la smras pa/ bdag tu 'dzin pa rnam pa gsum gyi gnyen por bya ba nyid de/ bdag tu 'dzin pa rnam pa gsum ni gcig pur 'dzin pa dang / za bar 'dzin pa dang byed par 'dzin pa'o//gcig pur 'dzin zhes bya ba ni phung po la ril por bdag tu 'dzin pa'i don gang yin pa'o/ /za bar 'dzin pa ni gang yul la spyod pa de la bdag yin par 'dzin pa'o/ /byed par 'dzin zhes bya ba ni gang byed pa dang ldan pas byed pa de bdag ces bya ba'o/ /de ltar bdag tu 'dzin pa rnam pa gsum bzlog pa'i phyir go rims bzhin du sangs rgyas bcom ldan 'das rnams kyis phung po dang /skye mched dang / khams bshad par khong du chud par bya'o/ /khams bco brgyad la gzugs can du zhe na zhes bya ba ni dri ba'o/ /gang dag gzugs kyi phung po'i ngo bo nyid do zhes bya ba ni mig gi khams nas reg bya'i khams kyi bar du'o//gzugs can ma yin pa du zhe na/ lhag ma rnams so bya ba ni brgyad de mig gi rnam par shes pa'i khams nas chos kyi khams kyi phyogs gcig gi bar du'o/ /khams bcwa brgyad po de dag la bstan du yod pa du zhe na zhes bya ba ni dri ba'o//gzugs kyi khams gcig ste/ yul bstan du yod pa'o zhes bya ba ni yul bstan du yod pa ste/ 'di ni 'di na'o/ /pha bi ni pha bi na'o zhes bstan par nus pa'i phyir ro/ /khams bcu bdun ni bstan du med pa zhes bya bar grub pa yin no//khams bco brgyad pa de dag la thogs pa dang bcas pa du zhe na/ gzugs can bcu ste/ gang la gang thogs pa'o zhes bya ba ni gzhan la mi 'jug pa'o/ /gzugs ni mig la yang thogs te / dbang po gzhan gyi yul gyi dngos por mi 'gro ba'i phyir ro/ /de bzhin du gzhan brgyad la yang rig par bya ste/rna ba nas reg bya'i bar du'o/ /gzhan ni thogs pa med pa ste/ mig gi rnam par shes pa nas chos kyi khams kyi bar du'o/ /khams bco brgyad po de dag zag pa dang bcas pa du zhe na zhes bya ba ni dri ba'o/ bco lnga ni zag ba dang bcas pa'o/ / tha ma gsum gyi cha ni tha mar bstan pas tha ma ste/ yid kyi khams dang / chos kyi khams dang / yid kyi rnam par shes pa'i khams so/ /de dag gi phyogs gcig ni zag pa med pa ste/ 'dus ma byas zhes bya'o/ /khams bco lnga ni mig gi khams dang / gzugs kyi khams dang / mig gi rnam par shes pa'i khams nas/de bzhin du lus kyi khams dang / reg bya'i khams dang / lus kyi rnam par shes pa'i khams kyi bar du'o/ /zag pa dang lhan cig byung bas zag pa dang bcas pa'o/ /zag pa rnams ni nyon mongs pa rnams so/ /de dag ji ltar zag pa rnams dang bcas pa zhes bya zhe na/de dag nyon mongs pa skye ba'i mngon sum gyi spyod yul gyi phyir ro zhes bya ba ni mig la brten/ gzugs la brten nas mig gi rnam par shes pa 'byung ste/ mig gi rnam par shes pas myong ba'i gzugs rnams yid kyi rnam par shes pas rtog go/ /rnam par rtog pa las nyon mongs pa rnams 'byung ngo //lhag ma rnams la yang de bzhin du brjod par bya'o/ /zag pa med pa du zhe na/ tha ma gsum gyi cha'o zhes bya ba ni yid kyi khams dang / yid kyi rnam par shes pa'i khams dang / chos kyi khams dang / de gsum gyi cha ni chos kyi khams kyi phyogs gcig ste/'dus ma byas zhes bya'o/ /yang na gang gi tshe de dag 'phags pa'i lam gyis bsdus par gyur pa de'i tshe zag pa med par 'gyur ro/ /khams bco brgyad po de dag la 'dod pa dang / rab tu ldan pa du zhe na zhes bya ba la sogs pa ni 'dri ba'o/ /'dod pa dang / rab tu ldan pa du zhes bya ba ni 'dod pa'i khams dang ldan pa zhes bya ba'i tha tshig go//ldan pa ni zin pa ste/ rab tu ldan pa zhes bya ba'i tha tshig go/ /thams cad do zhes bya ba ni bco brgyad do/ /gzugs dang rab tu ldan pa du zhe na/ bcu bzhi ste/ dri dang / ro dang / sna dang / lce'i rnam par shes pa ma gtogs pa'o zhes bya ba ni 'di skad du gzugs kyi khams na dri'i khams dang /ro'i khams med de/ de dag kham gyis za ba'i 'dod chags dang bral ba'i phyir ro/ /dri dang ro med pa'i phyir de la 'dzin pa'i sna dang / lce'i rnam par shes pa'i khams yang med do/ / lhag ma bcu bzhi ni yod do/ /gzugs med pa dang rab tu ldan pa du zhe na/ tha ma gsum mo zhes bya ba ni yid kyi khams dang / chos kyi khams dang / yid kyi rnam par shes pa'i khams so/ /mi ldan pa du zhe na gsum gyi cha'o zhes bya ba ni gang dag zag pa med pa'o/ /'dir phung por bsdus pa du zhe na/'dus ma byas ma gtogs pa'o/ /nye bar len pa'i phung por bsdus pa du zhe na/ gang dag zag pa dang bcas pa rnams so/ /dge ba du mi dge ba du lung du ma bstan pa du zhe na zhes bya ba ni dri ba'o/ /bcu ni rnam pa gsum char te zhes bya ba la/ bcu ni dge ba dang / mi dge ba dang /lung du ma bstan pa dang yang yin no/ /bcu gang zhe na/ sems kyi khams bdun ni mig gi rnam par shes pa'i khams nas/ yid kyi khams kyi bar dang / gzugs kyi khams dang / sgra'i khams dang / chos kyi khams so/ /lhag ma brgyad ni lung du ma bstan pa'o zhes bya ba ni mig dang /rna ba dang / sna dang / lce dang / lus dang / dri dang / ro dang / reg bya zhes bya ba rnams te/ dge ba dang / mi dge bar lung du bstan du med pa'i phyir lung du ma bstan pa zhes bya'o/ /nang gi du zhe na/ bcu gnyis te/ mig dang / rna ba dang / sna dang / lce dang / lus dang / mig gi rnam par shes pa'i khams nas yid kyi khams kyi bar du'o//bdag yod pa ma yin na nang dang phyi zhes ji skad du bya/ so so'i lus kyi sems kyi rgyud de la nga'o snyam pa'i nga rgyal bskyed pa ni bdag ste/ de'i dbang du byas nas nang zhes bya'o/ /dmigs pa dang bcas pa du zhe na zhes bya ba ni de dag la dmigs pa yod pa'i phyir te/'di la rnam par shes pa lnga'i khams ni yul dmigs pa yongs su gcod pa ste/ yul so sor nges pa'i phyir ro/ /yul la brda mi byed pa yang yin te/ ming dang yi ger byed mi nus pa'i phyir ro/ /de las bzlog pa ni yid kyi rnam par shes pa'i khams su rig par bya'o//de dag kyang sems kyi khams bdun zhes bya ba ni mig gi rnam par shes pa'i khams nas yid kyi khams kyi bar du'o/ /chos kyi khams kyi phyogs gcig kyang yin te/ gang sems las byung ba'o zhes bya ba ni tshor ba dang / 'du shes dang / 'du byed kyi phung po rnams so/ /dmigs pa med pa du zhe na/lhag ma bcu ni gzugs can dang / chos kyi khams kyi phyogs te/ sems las byung ba'i rang bzhin ma yin pa'o/ /khams bco brgyad po de dag la/ rnam par rtog pa dang bcas pa du zhe na zhes bya ba ni dri ba'o/ /yid kyi khams dang yid kyi rnam par shes pa'i khams dang /chos kyi khams kyi phyogs so zhes bya ba ni tshor ba dang / 'du shes dang / 'du byed kyi phung po'o/ / zin pa du zhe na/ nang gi lnga ni mig dang / rna ba dang / sna dang / lce dang / lus zhes bya ba'o/ /bzhi ni phyogs te zhes bya ba la/ phyogs ni gzugs dang / dri dang / ro dang / reg bya rnams kyi'o/ zhes bya ba ni lus la gzugs la sogs pa yod pa de dag zin pa'o/ /gang dag phyi rol du gyur pa de dag ni zin pa ma yin pa'o/ /bsten pa mtshungs pa du zhe na/ nang gi gzugs can lnga ste/ mig dang / rna ba dang / sna dang / lce dang / lus zhes bya ba rnams so/ /rang gi rnam par shes pa dag gis rang gi yul dang mthun pa nyid kyi phyir ro zhes bya ba ni dbang po dang yul dang rnam par shes pa rnams kyi bstan pa ni mtshungs pa ste/de'i dbang du byas nas 'dzin pa'i phyir ro/ /cha mtshungs pa dang / rig pa mtshungs pa zhes bya ba'i tha tshig go/ /de ni 'di skad du gang rnam par shes pa dang bcas pa'i mig de la mtshungs pa zhes bya bar bstan par 'gyur ro//de dag dang mtshungs pa du zhe na/ de dag nyid rang gi rnam par shes pas stong pa ste/ rang gi rigs dang mthun pa'i phyir zhes bya ba ni rnam par shes pa med pa'i mig la de dang mtshungs pa zhes bya'o/ rna ba dang / sna dang / lce dang / lus la yang de bzhin du rig par bya'o/ phung po lnga'i 'grel pa slob dpon yon tan 'od kyis mdzad pa rdzogs so// //rgya gar gyi mkhan po dzi na mi tra dang / dA na shI la dang / zhu chen gyi lo tsA ba ban de ye shes sdes bsgyur cing zhus te gtan la phab pa// //