CLOSE WINDOW

D4059
བོད་ཡིག

paN+Di ta chen po shAn ti b+ha dra dang / zhu chen gyi lo tsA ba 'gos lhas btsas kyis gtan la phab ste legs par bsgyur ba'o//[# @#/ /rgya gar skad du/ pany+tsa skan+d+ha pra ka ra Na/ bod skad du/ phung po lnga'i rab tu byed pa/ 'jam dpal gzhon nur gyur pa la phyag 'tshal lo//phung po lnga ni gzugs kyi phung po dang / tshor ba'i phung po dang / 'du shes kyi phung po dang / 'du byed kyi phung po dang / rnam par shes pa'i phung po'o/ /gzugs gang zhe na/ gzugs gang yin pa ci yang rung ste/ de dag thams cad 'byung ba chen po bzhi dag dang /'byung ba chen po'i bzhi dag rgyur byas pa'o/ /'byung ba chen po bzhi dag gang zhe na/ sa'i khams dang / chu'i khams dang / me'i khams dang / rlung gi khams so/ /de la sa'i khams gang zhe na/ sra ba nyid do/ /chu'i khams gang zhe na/gsher ba nyid do/ /me'i khams gang zhe na/ tsha ba nyid do/ /rlung gi khams gang zhe na/ /yang zhing g.yo ba nyid do/ /rgyur byas pa'i gzugs gang zhe na/ mig gi dbang po dang / rna ba'i dbang po dang / sna'i dbang po dang / lce'i dbang bo dang / lus kyi dbang po dang /gzugs dang / sgra dang / dri dang / ro dang / reg bya'i phyogs gcig dang / rnam par rig byed ma yin pa'o/ /de la mig gi dbang po gang zhe na/ yul kha dog gzugs dang ba'o/ /rna ba'i dbang po gang zhe na/ yul sgra gzugs dang ba'o//sna'i dbang po gang zhe na/ yul dri gzugs dang ba'o/ /lce'i dbang po gang zhe na/ yul ro gzugs dang ba'o/ /lus kyi dbang po gang zhe na/ yul reg bya gzugs dang ba'o/ /gzugs gang zhe na/ mig gi yul te/ kha dog dang / dbyibs dang /rnam par rig byed do/ sgra gang zhe na/ rna ba'i yul te/ zin pa dang ma zin pa dang gnyi ga'i ste/ 'byung ba chen po bzhi'i rgyu las byung ba'o/ /dri gang zhe na/ sna'i yul te/ dri zhim pa dang / dring ba dang / de las gzhan pa'o/ /ro gang zhe na/ lce'i yul te/ mngar ba dang /sgyur ba dang / lan tshwa dang / tsha ba dang / kha ba dang / bska ba zhes bya'o/ /reg bya'i phyogs gcig gang zhe na/ lus kyi yul te/ 'byung ba chen po rnams bzhag ste/ 'jam pa nyid dang / rtsub pa nyid dang / lci ba nyid dang / yang ba nyid dang / grang ba nyid dang /bkres pa nyid dang / skam pa'o/ /rnam par rig byed ma yin pa gang zhe na/ rnam par rig byed dang / ting nge 'dzin las byung ba'i gzugs te/ bstan du med la thogs pa med pa'o/ /tshor ba gang zhe na/ myong ba rnam pa gsum ste/ bde ba dang sdug bsngal ba dang /sdug bsngal yang ma yin/ bde ba yang ma yin pa ste / bde ba de gang 'gags na phrad par 'dod pa'o/ /sdug bsngal ni gang byung na bral bar 'dod pa'o/ /bde ba yang ma yin/ sdug bsngal ba yang ma yin pa ni gang byung na gnyis kar 'dod par mi 'gyur ba'o//'du shes gang zhe na/ yul la mtshan mar 'dzin pa'o/ /de ni rnam pa gsum ste/ chung ngu dang / rgya chen por gyur pa dang / tshad med pa'o/ /'du byed rnams gang zhe na/ tshor ba dang 'du shes las gzhan pa sems las byung ba'i chos rnams dang / sems dang ldan pa ma yin pa rnams so/ /de la sems las byung ba'i chos rnams kyang gang zhe na/ chos gang dag sems dang mtshungs par ldan pa rnams so/ /de dag kyang gang zhe na/ reg pa dang / yid la byed pa dang / tshor ba dang / 'du shes dang / sems pa dang /'dun pa dang / mos pa dang / dran pa dang / ting nge 'dzin dang / shes rab dang / dad pa dang / ngo tsha shes pa dang / khrel yod pa dang / ma chags pa'i dge ba'i rtsa ba dang / zhe sdang med pa'i dge ba'i rtsa ba dang / gti mug med pa'i dge ba'i rtsa ba dang / brtson 'grus dang /shin tu sbyangs pa dang / bag yod pa dang / btang snyoms dang / rnam par mi 'tshe ba dang / 'dod chags dang / khong khro ba dang / nga rgyal dang / ma rig pa dang / lta ba dang / the tshom dang / khro ba dang / khon du 'dzin pa dang / 'chab ba dang / 'tshig pa dang /phrag dog dang / ser sna dang / sgyu dang / g.yo dang / rgyags pa dang / rnam par 'tshe ba dang / ngo tsha med pa dang / khrel med pa dang / rmugs pa dang / rgod pa dang / ma dad pa dang / le lo dang / bag med pa dang / brjed ngas pa dang / rnam par g.yengs pa dang / shes bzhin ma yin pa dang / 'gyod pa dang / gnyid dang / rtog pa dang / dpyod pa'o/ de rnams las lnga ni kun tu 'gro ba'o/ /lnga ni yul so sor nges pa'o/ /bcu gcig ni dge ba'o/ /drug ni nyon mongs pa'o/ /lhag ma rnams ni nye ba'i nyon mongs pa'o/ /bzhi ni gzhan du yang 'gyur ba'o//reg pa gang zhe na/ gsum 'dus nas yongs su gcod pa'o/ /yid la byed pa gang zhe na/ sems kyi 'jug pa'o/ /sems pa gang zhe na/ yon tan dang / nyes pa dang / gnyi ga ma yin pa yin pa la sems mngon par 'du byed pa yid kyi las so/ / 'dun pa gang zhe na/ bsam pa'i dngos po la 'dod pa'o/ /mos pa gang zhe na/ nges pa'i dngos po la de bzhin du nges par 'dzin pa'o/ /dran pa gang zhe na/ 'dris pa'i dngos po nyid ma brjed pa ste/ sems kyi mngon par brjod pa nyid do/ /ting nge 'dzin gang zhe na/ brtag pa'i dngos po la sems rtse gcig pa nyid do//shes rab gang zhe na/ de dag nyid la rab tu rnam par 'byed pa ste/ rigs pa dang / rigs pa ma yin pas bskyed pa dang / gzhan pa'o/ /dad pa gang zhe na/ las dang 'bras bu dang / bden pa dang / dkon mchog la mngon par yid ches pa dang /'dod pa dang / sems dang ba'o/ /ngo tsha shes pa gang zhe na/ bdag gam chos kyi dbang du byas te / kha na ma tho bas 'dzem pa'o/ /khrel yod ba gang zhe na/ 'jig rten gyi dbang du byas te kha na ma tho bas 'dzem pa'o/ /ma chags pa gang zhe na/chags pa'i gnyen po ste/ yid byung zhing mi len pa'o/ /zhe sdang med pa gang zhe na/ zhe sdang gi gnyen po ste byams pa'o/ /gti mug med pa gang zhe na/ gti mug gi gnyen po ste / yang dag pa la yang dag par rtogs pa'o/ /brtson 'grus gang zhe na/ le lo'i gnyen po ste/ dge ba la sems mngon par spro ba'o/ /shin du sbyangs pa gang zhe na/ gnas ngan len gyi gnyen po ste/ lus dang sems las su rung ba nyid do/ /bag yod pa gang zhe na/ bag med pa'i gnyen po ste/ ma chags pa nas brtson 'grus kyi bar de dag la gnas nas mi dge ba'i chos spang zhing /de'i gnyen po dge ba'i chos rnams bsgom pa'o/ /btang snyoms gang zhe na/ ma chags pa nas brtson 'grus kyi bar de dag nyid la gnas shing sems mnyam pa nyid dang / sems rnal du 'dug pa dang / sems lhun gyis grub pa yang thob pa ste/gang gi nyon mongs pa can gyi chos rnams bsal nas nyon mongs pa can med par gnas pa nyid do/ /rnam par mi 'tshe ba gang zhe na/ rnam par 'tshe ba'i gnyen po ste/ snying rje ba'o/ /'dod chags gang zhe na nye bar len pa'i phung po lnga la mngon par zhen pa dang /lhag par chags pa'o/ /khong khro ba gang zhe na/ sems can rnams la kun nas mnar sems pa'o/ /nga rgyal gang zhe na/ nga rgyal rnam pa bdun ste / nga rgyal dang / che ba'i nga rgyal dang / nga rgyal las kyang nga rgyal dang / /nga'o snyam pa'i nga rgyal dang / /mngon pa'i nga rgyal dang /cung zad snyam pa'i nga rgyal dang / log pa'i nga rgyal lo/ /nga rgyal gang zhe na/ chung ngu bas bdag che ba'am/ mtshungs pa dang mtshungs so snyam du sems khengs pa gang yin pa'o/ /che ba'i nga rgyal gang zhe na/ mtshungs pa bas bdag che ba'am/ che ba dang mtshungs so snyam du sems khengs pa gang yin pa'o//nga rgyal las kyang nga rgyal gang zhe na/ che ba bas kyang bdag che'i snyam du sems khengs pa gang yin pa'o/ /nga'o snyam pa'i nga rgyal gang zhe na/ nye bar len pa'i phung po lnga po rnams la bdag gam bdag gir lta ba'i sems khengs pa gang yin pa'o//mngon pa'i nga rgyal gang zhe na/ gong ma'i khyad par thob par bya ba ma thob par bdag gis thob bo snyam du sems khengs pa gang yin pa'o/ /cung zad snyam pa'i nga rgyal gang zhe na/ khyad par ches 'phags pa bas bdag cung zad chung ngo snyam du sems khengs pa gang yin pa'o//log pa'i nga rgyal gang zhe na/ yon tan ma yin pa dang ldan pa la bdag yon tan dang ldan no snyam du sems khengs pa gang yin pa'o/ /ma rig pa gang zhe na/ las dang 'bras bu dang bden pa dang / dkon mchog rnams mi shes pa de/de yang lhan cig skyes pa dang / kun tu brtags pa'o/ /'dod pa na spyod pa'i 'dod chags dang / khong khro ba dang / 'dod pa na spyod pa'i ma rig pa de dag ni mi dge ba'i rtsa ba gsum ste/ chags pa dang zhe sdang dang gti mug mi dge ba'i rtsa ba'o/ /lta ba gang zhe na/lta ba lnga ste/ 'jig tshogs la lta ba dang / mthar 'dzin par lta ba dang / log par lta ba dang / lta ba mchog tu 'dzin pa dang / tshul khrims dang / brtul zhugs mchog tu 'dzin pa'o/ /'jig tshogs la lta ba gang zhe na/ nye bar len pa'i phung po lnga rnams la bdag gam bdag gir lta ba'i shes rab nyon mongs pa can gang yin pa'o/mthar 'dzin par lta ba gang zhe na/ de nyid kyi dbang du byas te/ rtag pa'am chad par lta ba'i shes rab nyon mongs pa can gang yin pa'o/ /log par lta ba gang zhe na/ rgyu 'am 'bras bu'am/byed pa la skur ba 'debs pa dang / yod pa'i dngos po la 'jig pa'i shes rab nyon mongs pa can gang yin pa'o/ /lta ba mchog tu 'dzin pa gang zhe na/ lta ba rnam pa gsum po de dag nyid dang / de'i gnas phung po rnams la mchog dang gtso bo dang khyad par du 'phags pa dang /dam par lta ba'i shes rab nyon mongs pa can gang yin pa'o/ /tshul khrims dang brtul zhugs mchog tu 'dzin pa gang zhe na/ tshul khrims dang brtul zhugs dang / de'i gnas phung po rnams la dag pa dang grol ba dang nges par 'byin par lta ba'i shes rab nyon mongs pa can gang yin pa'o//the tshom gang zhe na/ bden pa la sogs pa la gang yid gnyis za ba'o/ /nyon mongs ba de dag las lta ba 'og ma gsum dang / the tshom ni kun tu brtags pa'o/ lhag ma ni lhan cig skyes pa dang kun tu brtags pa'o//khro ba gang zhe na/ 'phral du gnod pa byed pa la gnas te/ gang sems kyi kun nas mnar sems pa'o/ /khon du 'dzin pa gang zhe na/ mdud par 'dzin pa'o/ /'chab pa gang zhe na/ bdag gi kha na ma tho ba mkhyud pa'o//'tshig pa gang zhe na/ tshig brlang pos zher 'debs pa nyid do/ /phrag dog gang zhe na/ gzhan gyi phun sum tshogs pa la sems khong nas 'khrug pa'o/ /ser sna gang zhe na/ sbyin pa dang mi mthun pa'i sems kyis kun tu 'dzin pa'o/ /sgyu gang zhe na/ gzhan slu ba yang dag pa ma yin pa'i don ston pa'o/ /g.yo gang zhe na/ bdag gi nyes pa bcab pa'i thabs gzung ste sems gya gyu ba'o/ /rgyags pa gang zhe na/ bdag gi phun sum tshogs pa la chags pa'i rab tu dga' ba de sems yongs su 'dzin pa'o/ rnam par 'tshe ba gang zhe na/sems can rnams la rnam par tho 'tshams pa'o/ /ngo tsha med pa gang zhe na/ kha na ma tho bas bdag la mi 'dzem pa'o/ /khrel med pa gang zhe na/ kha na ma tho bas gzhan la mi 'dzem pa'o/ /rmugs pa gang zhe na/ sems las su mi rung ba ste blang ba nyid do/ / rgod pa gang zhe na/ sems rnam par ma zhi ba'o/ /ma dad pa gang zhe na/ las dang 'bras bu dang bden pa dang / dkon mchog rnams la yid mi ches pa dang / sems ma dad pa ste/ dad pa'i mi mthun pa'i phyogs so/ /le lo gang zhe na/ dge ba la sems mngon par spro ba med pa ste/brtson 'grus kyi mi mthun pa'i phyogs so/ /bag med pa gang zhe na/ chags pa dang / zhe sdang dang / gti mug dang / le lo gang yin pa dag gis nyon mongs pa las sems mi srung ba dang dge ba mi bsgom pa'o/ /brjed ngas pa gang zhe na/dran pa nyon mongs can te/ dge ba la mi gsal ba'o/ /rnam par g.yeng ba gang zhe na/ 'dod chags dang zhe sdang dang gti mug gi cha shas kyis 'dod pa'i yon tan lnga po dag la gang sems rnam par 'phro ba'o/ /shes bzhin ma yin pa gang zhe na/ nyon mongs pa dang mtshungs par ldan pa'i shes rab ste/des lus dang ngag dang yid kyi spyod pa la mi shes bzhin du 'jug pa'o/ /'gyod pa gang zhe na/ yid la gcags pa'o/ /gnyid gang zhe na/ 'jug pa rang dbang med par sems sdud pa'o/ /rtog pa gang zhe na/ kun tu tshol ba'i yid kyis brjod pa ste/sems pa dang shes rab kyi bye brag gang sems rtsing pa'o/ /dpyod pa gang zhe na/ so sor rtog pa'i yid kyis brjod pa ste/ de bzhin du gang sems zhib pa'o/ /sems dang mi ldan pa'i 'du byed rnams gang zhe na/ gang dag gzugs dang sems las byung ba'i gnas skabs la gdags pa ste de nyid dang gzhan du mi gdags so//de dag kyang gang zhe na/ thob pa dang / 'du shes med pa'i snyoms par 'jug pa dang / 'gog pa'i snyoms par 'jug pa dang / 'du shes med pa dang / srog gi dbang po dang / ris mthun pa dang / skye ba dang / gnas pa dang / mi rtag pa nyid dang / ming gi tshogs dang / tshig gi tshogs dang / yi ge'i tshogs dang / so so'i skye bo nyid dang / de lta bu'i cha dang mthun pa dag go/ /de la thob pa gang zhe na/ rnyed pa dang ldan pa'o/ /de yang sa bon dang / dbang dang / mngon du gyur pa dang ci rigs su sbyar ro/ /'du shes med pa'i snyoms par 'jug pa gang zhe na/ dge rgyas kyi 'dod chags dang bral la/ gong ma'i ma yin pa 'byung ba'i 'du shes mngon du btang ba'i 'du shes yid la byed pas sems dang sems las byung ba'i chos brtan pa ma yin pa rnams 'gog pa gang yin pa'o//'gog pa'i snyoms par 'jug pa gang zhe na/ ci yang med pa'i skye mched kyi 'dod chags dang bral la/ srid pa'i rtse mo las gyen du bskyod pa'i gnas par 'du shes sngon du btang ba'i yid la byed pas/sems dang sems las byung ba'i chos brtan pa ma yin pa rnams dang / bstan pa rnams las kyang kha cig 'gog pa gang yin pa'o/ /'du shes med pa gang zhe na/ 'du shes med pa'i snyoms par 'jug pa'i 'bras bu ste / 'du shes med pa'i sems can gyi khrod kyi lha rnams kyi nang du bskyed pa'i sems dang /sems las byung ba'i chos brtan pa ma yin pa rnams dang 'gog pa'o/ /srog gi dbang po gang zhe na/ ris mthun pa rnams su sngon gyi las kyis 'phangs pas/ gang 'du byed rnams kyi gnas pa'i dus nges pa'o//ris mthun pa gang zhe na/ gang sems can rnams kyi lus 'dra ba'o/ /skye ba gang zhe na/ ris mthun par 'du byed rnams ma byung ba las byung ba gang yin pa'o/ /rga ba gang zhe na/ de ltar de dag gi rgyun gzhan du 'gyur ba'o/ /gnas pa gang zhe na/de ltar de dag gi rgyun rgyud chags pa'o/ /mi rtag pa nyid gang zhe na/ de ltar de dag gi rgyun chad pa'o/ /ming gi tshogs gang zhe na/ chos rnams kyi ngo bo nyid kyi tshig bla dgas so/ /tshig gi tshogs gang zhe na/ chos rnams kyi khyad par gyi tshig bla dgas so/ / yi ge'i tshogs gang zhe na/ yi ge'i rnams te/ de gnyis ka gsal bar byed pa'i phyir ro/ /brjod pa yang de dag yin te/ ming dang tshig la brten nas don brjod pa'i phyir ro/ /yi ge yang rnam grangs gzhan du mi 'gyur ba'i phyir ro/ /so so'i skye bo nyid gang zhe na/'phags pa'i chos rnams ma thob pa'o/ /'di ni 'du byed kyi phung po zhes bya'o/ /rnam par shes pa gang zhe na/ dmigs pa rnam par rig pa'o/ /sems dang yid kyang de yin te/ /sna tshogs pa dang yid rten byed pa'i phyir ro/ dngos su na sems ni kun gzhi rnam par shes pa ste/'di ltar de ni 'du byed thams cad kyi sa bon bsags pa'o/ /de yang dmigs pa dang rnam pa yongs su ma chad pa'o/ /rigs gcig pa dang / rgyun chags par 'jug pa'o/ /'di ltar 'gog pa'i snyoms par 'jug pa dang /'du shes med pa'i snyoms par 'jug pa dang / 'du shes med pa pa rnams langs nas yang yul rnam par rig pa zhes bya ba 'jug pa'i rnam par shes pa 'byung ba dang / dmigs pa'i rkyen la ltos nas rnam pa gzhan du 'jug pa nyid dang / chad nas yang 'byung ba nyid dang /'khor bar 'jug pa dang / ldog pa'i phyir ro/ /kun gzhi rnam par shes pa de nyid ni sa bon thams cad kyi gzhi nyid dang / lus kyi kun gzhi dang / rgyu nyid dang / lus la gnas pa nyid kyi yang phyir ro/ /len pa'i rnam par shes pa yang de yin te/ lus len pa'i phyir ro//dngos su ni yid ni kun gzhi rnam par shes pa la dmigs te/ rtag tu bdag tu rmongs pa dang / /bdag tu lta ba dang / bdag tu nga rgyal dang / bdag la chags pa la sogs pa dang mtshungs par ldan pa'i rnam par shes pa ste/ rigs gcig pa dang /rgyun chags par 'jug pa ste/ dgra bcom pa dang / 'phags pa'i lam dang / 'gog pa'i snyoms par 'jug pa'i dus ma gtogs so/ ci'i phyir phung po zhes bya zhe na/ spungs pa'i phyir te dus dang rgyud dang rnam pa dang grol ba dang / yul tha dad pa'i gzugs la sogs pa mdor bsdus pa nyid kyi phyir ro//skye mched bcu gnyis ni mig gi skye mched dang / gzugs kyi skye mched dang / rna ba'i skya mched dang / sgra'i skye mched dang / sna'i skye mched dang / dri'i skye mched dang / lce'i skye mched dang / ro'i skye mched dang /lus kyi skye mched dang / reg bya'i skye mched dang / yid kyi skye mched dang / chos kyi skye mched do/ /mig la sogs ba dang / gzugs dang sgra dang dri dang ro'i skye mched la sogs pa yang snga ma bzhin du bshad do/ /reg bya'i skye mched ni 'byung ba chen po bzhi dag dang /gang reg bya'i phyogs gcig bshad pa'o/ /yid kyi skye mched ni rnam par shes pa'i phung po gang yin pa'o/ /chos kyi skye mched ni gang tshor ba dang / 'du shes dang / 'du byed rnams dang / rnam par rig byed ma yin pa dang /'dus ma byas so/ /'dus ma byas gang zhe na/ nam mkha' dang / so sor brtags pa ma yin pa'i 'gog pa dang / so sor brtags pa'i 'gog pa dang / de bzhin nyid do/ /de la nam mkha' gang zhe na/ gzugs kyi go 'byed pa'o/ /so sor brtags pa ma yin pa'i 'gog pa gang zhe na/gang 'gog pa la bral ba ma yin pa ste/ de ni nyon mongs pa'i gnyen po med par phung po rnams gtan du mi skye ba'o/ /so sor brtags pa'i 'gog pa gang zhe na/ gang 'gog pa de ni bral ba ste/ de ni gang nyon mongs pa'i gnyen pos phung po rnams gtan du mi skye ba'o/de bzhin nyid gang zhe na/ gang chos rnams kyi chos nyid dang / chos bdag med pa nyid do/ /ci'i phyir skye mched ces bya zhe na/ rnam par shes pa skye ba'i sgo'i phyir ro/ /khams bco brgyad ni mig gi khams dang / gzugs kyi khams dang / mig gi rnam par shes pa'i khams dang / rna ba'i khams dang / sgra'i khams dang / rna ba'i rnam par shes pa'i khams dang / sna'i khams dang / dri'i khams dang / sna'i rnam par shes pa'i khams dang / lce'i khams dang / ro'i khams dang / lce'i rnam par shes pa'i khams dang / lus kyi khams dang / reg bya'i khams dang / lus kyi rnam par shes pa'i khams dang / yid kyi khams dang / chos kyi khams dang / yid kyi rnam par shes pa'i khams so/ /mig la sogs pa'i khams dang /gzugs la sogs pa'i khams ni skye mched rnams ji lta ba bzhin no/ /rnam par shes pa'i khams drug po dag ni mig la sogs pa rnams la brten te/ gzugs la sogs pa la dmigs pa rnam par rig pa'o/ /yid kyi khams ni de dag nyid 'gags ma thag pa ste/rnam par shes pa drug pa'i gnas brtan pa'i phyir ro/ /de ltar na khams bco brgyad du rnam par gzhag go/ /gzugs kyi phung po gang yin ba de ni skye mched dang / khams bcu dang / chos kyi skye mched dang / khams kyi phyogs gcig go//rnam par shes pa'i phung po gang yin pa de ni yid kyi skye mched dang / sems kyi khams bdun no/ /gzhan phung po gsum po gang yin pa dag dang / gzugs kyi phung po'i phyogs gcig po de dang / 'dus ma byas dang bcas pa ni chos kyi skye mched dang /chos kyi khams so/ /ci'i phyir khams zhes bya zhe na/ byed pa med la rang gi mtshan nyid 'dzin pa'i phyir ro/ /ci'i phyir phung po la sogs pa bshad ce na/ bdag tu 'dzin pa rnam pa gsum gyi gnyen po go rims bzhin no/ /bdag tu 'dzin pa rnam pa gsum ni gcig pur 'dzin pa dang /za bar 'dzin pa dang / byed par 'dzin pa'o/ /khams bco brgyad la gzugs can du zhe na/ gang dag gzugs kyi phung po'i ngo bo nyid do/ /gzugs can ma yin pa du zhe na/ lhag ma rnams so/ /brten du yod pa du zhe na/ gzugs kyi khams gcig ste/ yul bstan du yod pa'o/ /bstan du med pa ni du zhe na/ lhag ma rnams so/ /thogs pa dang bcas pa du zhe na/ gzugs can bcu ste/ gang la gang thogs pa'o/ /thogs pa med pa du zhe na/ lhag ma rnams so/ zag pa dang bcas pa du zhe na/bco lnga dang tha ma gsum gyi cha'o/ / de dag nyon mongs pa skye ba'i mngon sum gyi spyod yul gyi phyir ro/ /zag pa med pa du zhe na/ tha ma gsum gyi cha'o/ /'dod pa dang rab tu ldan pa du zhe na/ thams cad do/ /gzugs dang rab tu ldan pa du zhe na/ bcu bzhi ste/ dri dang / ro dang / sna dang / lce'i rnam par shes pa ma gtogs pa'o/ /gzugs med pa dang rab tu ldan pa du zhe na/ tha ma gsum mo/ /mi ldan ba du zhe na/ gsum gyi cha'o/ /phung por bsdus pa du zhe na/ 'dus ma byas ma gtogs pa'o//nye bar len pa'i phung pos bsdus pa du zhe na/ gang zag pa dang bcas pa rnams so/ /dge ba du/ mi dge ba du/ lung du ma bstan pa du zhe na/ bcu ni rnam pa gsum char te/ /sems kyi khams bdun dang / gzugs dang / sgra dang / chos kyi khams so//lhag ma rnams ni lung du ma bstan pa'o/ /nang gi du zhe na/ bcu gnyis te/ gzugs dang / sgra dang / dri dang / ro dang / reg bya dang / chos kyi khams ma gtogs pa'o/ /phyi rol gyi du zhe na/ drug ste/ gang dag ma gtogs pa rnams so/ / dmigs pa dang bcas pa du zhe na/ sems kyi khams bdun dang / chos kyi phyogs gcig kyang yin te/ gang sems las byung ba'o/ /dmigs pa med pa du zhe na/ lhag ma bcu dang / chos kyi khams kyi phyogs so/ /rnam par rtog pa dang bcas pa du zhe na/ yid kyi khams dang /yid kyi rnam par shes pa'i khams dang / chos kyi khams kyi phyogs so/ /rtog pa med pa du zhe na/ lhag ma rnams so/ /zin pa du zhe na/ nang gi lnga dang / bzhi'i phyogs te/ gzugs dang / sgra dang / dri dang / ro dang / reg bya rnams kyi'o/ /zin pa ma yin pa du zhe na/bzhi'i phyogs so/ /bstan pa mtshungs pa du zhe na/ nang gi gzugs can lnga ste/ rang gi rnam par shes pa dag dang yul thun mong ba nyid kyi phyir ro/ /de dag dang mtshungs pa du zhe na/ de dag nyid rang gi rnam par shes pas stong pa ste/ rang gi rigs dang mthun pa'i phyir ro//phung po lnga'i rab tu byed pa slob dpon dbyig gnyen gyis mdzad pa rdzogs so// //rgya gar gyi mkhan po dzi na mi tra dang / shI len+d+ra bo d+hi dang / dA na shI la dang / zhu chen gyi lo tsA ba ban de ye shes sde la sogs pas bsgyur cing zhus te/ gtan la phab pa/