CLOSE WINDOW

D4052
བོད་ཡིག

@##/ /rgya gar skad du/ pi pri t+ti gu h+yA r+tha pin+Da byA khyA/ bod skad du/ don gsang ba rnam par phye ba bsdus te bshad pa/ sangs rgyas dang byang chub sems dpa' thams cad la phyag 'tshal lo/ /rnal 'byor spyod pa'i sa ni/ nyan thos la sogs pa dang / thun mong dang / thun mong ma yin pa'i yang dbang du mdzad nas mdzad do//rab tu byed pa 'di ni nyan thos la sogs pa dang thun mong ma yin pa'i tshig gi don bcus theg pa chen po mtha' dag bsdu bar bzhed nas brtsams te/ gzhi gcig gis kyang ma yin/ kun rdzob dang don dam pa'i bden pa dang gnyis kyis kyang ma yin/brtags pa la sogs pa gsum gyis kyang ma yin/ dus gsum dang 'dus ma byas dang bzhis kyang ma yin/ ming la sogs pa lngas kyang ma yin no/ /theg pa chen po la shin tu zhugs pa zhes bya ba ni/ brtags pa'am yon tan phun sum tshogs pa yin te/ theg pa chen po nyid ni der 'gro bas na de bzhin nyid ces bya ba'i dmigs pa yin no//der zhugs pa ni sa dang po nyid la'o/ /shin tu zhugs pa ni/ kun du 'gro ba la sogs pa'i sgrib pa spangs pa'i phyir sa bcu pa la yin no/ /rjod pa dang brjod par bya ba'i bdag nyid kyi theg pa chen po ni mi bzung ste/ mthar ma phyin pa yang de la zhugs pa'i phyir ro//gzhan yang chos kyi dbyings la zhugs pa kho nas de la legs par zhugs pa yin no/ /pha rol tu phyin pa'i ngo bo nyid ma yin te/ de la 'jug pa'i thabs yin pa'i phyir ro/ /gzhan yang de dag kyang de rtogs pa kho nas rnam par dag par 'gyur ro/ /byang chub sems dpa'i skabs yin pa'i phyir 'bras bu'i bdag nyid ni ma yin no//de ltar na shin tu zhugs pa zhes smos pa yang gzhan du mi smra ba'i phyir te/ yang dag par ma zhugs pa ni bcom ldan 'das kyi spyan sngar yang brgya byin bzhin du log par yang smra ste/ ji skad du/ brgya byin gyis/ mjug tu bdag ni nyams gyur nas//zhes bya ba la sogs pa smras pa lta bu'o/ /gal te rdzas gcig bstan pa mdzad na ni de 'ba' zhig bcu pa ston nus par yid ches kyis/ sa bcu'i dbang phyug gzhan la ni ma yin no/ /spyir brjod na ni de 'dra ba'i phyir gzhan la yang yid ches par 'gyur ro/ / byang chub sems dpa' zhes bya ba ni/ byang chub dang sems can la dmigs pas na tha snyad du btags te/ mi sdug pa la sogs pa bzhin no/ /rnam pa gcig tu na 'di la byang chub tu sems dpa' yod pa ste/ sems dpa' zhes bya ba'i sgra bsam pa yin pa'i phyir byang chub sems dpa'o//theg pa chen po'i bdag nyid brjod pa'i phyir zhes bya ba 'dir theg pa chen po smos pa ni/ rjod pa dang brjod par bya ba dang / pha rol tu phyin pa rnams dang de bzhin nyid dang / 'bras bu la yod pa yongs su bzung ste/ 'di thams cad kyi che ba'i bdag nyid ni zab pa dang rgya che ba bdag gis bla na med pa nyid do//bdag nyid ces bya ba'i sgra ni rang bzhin dang 'bras bu'i tshig tu grags te/ dper na me ni tsha ba'i bdag nyid/ dug ni gsod pa'i bdag nyid ces bya ba lta bu'o/ /bcom ldan 'das kyi spyan sngar zhes bya ba ni/ sangs rgyas kyis gnang ba nyid kyis yid ches pa nyid du ston te/ ston pa dang nyen gzhan du mi smra ba'i phyir ro//ston pa dang mi nye ba ni sgrib pa'i lhag ma dang bcas pa'i phyir log par smra bar yang 'gyur ro/ /'di lta ste zhes bya ba'i sgra ni tshig gi don bcu po nye bar dgod pa'i phyir ro/ /'dir yang theg pa chen po zhes smos pa ni/ brjod pa'i bdag nyid kyi theg pa chen chen po la bsnyag ste/'chad par 'gyur pa'i khyad par rnam pa bcus tha dad pa'i de bzhin gshegs pa'i bka' theg pa chen po gang yin pa de'i dbang du mdzad pa yin pas/ de bas na 'dir ni tshig gi rang bzhin gyi theg pa chen po la bya bar mngon no/ /'on kyang ci'i phyir yang theg pa chen po zhes bya ba smos she na/tshig gi don bcus thun mong ma yin par bsdu par bstan pa'i phyir ro/ /gal te de ni don gyi bdag nyid la yang mtshungs pas 'on kyang smos par mi bya ste/ theg pa chen po'i bdag nyid brjod na gdon mi za bar bcu pa yang de sdud pa yin pa kho nar 'gyur ro zhe na/ ma yin te/ 'bras bu'i sgo nas kyang che ba'i bdag nyid du sems so//'di ltar theg pa chen po'i 'bras bu ni rnam pa bcu la ma gtogs pa nyan thos kyi theg pa mu stegs can dang thun mong ma yin pa zhig yod la des khyad par du 'phags so zhes bya bar yang 'dzin pas/ nyan thos dang thun mong ma yin par nges par 'chad par 'gyur bas theg pa chen po kho na bsdus so zhes bya bar de'i don du yang theg pa chen po zhes smos par bya ste/de bsdus par bstan pa'i phyir ro/ /chos mngon pa theg pa chen po'i mdo las zhes bya ba 'dis ni tshig gi don bcu po lung dang ldan pa nyid du ston te/ gzhi mthun pa nyid kyi gzhi'i bdun pa yin no//'di ltar gsung rab las mdo ni sangs rgyas kyi bka' nyid du grags la/ chos mngon pa yang smos pa'i don ston par byed pa nyid du grags so/ /gal te de ltar na mdo zhes smos pa kho nas chog mod ce na/ de ni ma yin te/ mdo rnams ni drang ba'i don gyi phyir yang yin pas tshig gi don bcu po yang de bzhin du gdul ba'i dbang gis dgongs pa can gyi don ston pas drang ba'i don nyid yin par 'dzin par 'gyur ro//chos mngon pa ni smos pa'i don ston pa lhur len pa'i phyir nges pa'i don yin no/ /gal te de lta na chos mngon pa zhes smos pa kho nas chog mod ce na/ de ni ma yin te/ ye shes la 'jug pa la sogs pa bzhin du gtsug lag ma yin pa nyid du thal par 'gyur ro//rnam pa gcig tu na gang gi phyir chos mngon pa zag pa med pa'i shes rab yin pa de'i phyir chos mngon pa ni phyi'i mtshan nyid kyis rab tu phye ba yin te/ zag pa med pa'i shes rab kyi yul ni phyi'i mtshan nyid de bzhin nyid yin pa'i phyir ro//rang gi mtshan nyid kyis rab tu phye ba gang yin pa de ni mdo yin te/ gdul pa'i dbang gis thun mong ma yin pa yang gtso bor bstan pa'i phyir ro/ /de bas na chos mngon pa'i mdo ni gnyi ga'i mtshan nyid kyis rab tu phye ba yin la/ de dang 'brel pas rab tu byed pa yang gnyi ga'i bdag nyid yin no zhes bya bar ston to//rnam pa gcig tu na chos mngon pa ni rab tu rnam par 'byed pa'i phyir lhag pa'i shes rab kyi bslab pas rab tu phye ba yin la/ de yang gtso bor mya ngan las 'das pa 'dren par byed pa yin gyi / bslab pa gzhan gnyis ni gtsor 'dren par byed pa nyid ma yin no//mdo ni bslab pa gsum char gyis rab tu phye ba yin te/ gdul pa'i dbang gis gsum char bstan pa'i phyir ro/ /de bas na de ni chos mngon pa dang mdo zhes bya ba'i tshig gnyi gas tha snyad gdags kyi 'dul pas ni ma yin no/ /de ni gcig tu lhag pa'i tshul khrims dang /lhag pa'i sems kyis rab tu phye ba'i phyir te/ tshul khrims kyis ni rang gi dngos su yin la/ mnyam par gzhag pas ni 'bras bu'i sgo nas yin gyi bar du chod pa'i phyir shes rab kyis ni ma yin no/ /de bas na rab tu phyed pa 'di ni chos mngon pa'i mdo dang 'brel gyi/'dul pa'i sde snod dang 'brel pa ni ma yin no zhes bya ba'i tha tshig go/ /theg pa chen po zhes smos pa ni nyan thos la sogs pa dang thun mong ma yin pa nyid du bstan pa'i phyir ro/ /nyan thos la sogs pa dang thun mong ma yin pa'i phyir rnam pa bcu po 'chad par 'gyur bas de dag nyid khyad par du zhugs pa yin te/de dag gi khyad par du 'phags pa'i gsung ngo / /brjod par bya ba med pa'i brjod pa ni thams cad khyad par med de/ de lta bas na shes bya'i gnas zhes bya ba la sogs pa don rnams kyis khyad par du byed do/ /shes bya ni yongs su grub pa la sogs pa'i bye brag gis rnam pa gsum mo//yongs su grub pa yang rnam pa gnyis te/ rtag pa dang mi rtag pa'o/ /rtag pa gang yin pa de ni de bzhin nyid ces bya ste/ de ni chos can gyi chos nyid yin pa'i phyir gnas ni chos can no/ /chos can du 'dra yang brtan pa'i phyir kun gzhi rnam par shes pa kho nas gnas su rnam par gzhag gi//mi brtan pa'i phyir 'jug pa'i rnam par shes pa ni ma yin no/ /de lta bas na 'dis ni de bzhin nyid ni chos can gyi chos nyid yin pa'i phyir/ nam mkha'i me tog la sogs pa bzhin du gtan med pa ma yin no zhes bshad pa yin no/ / mi rtag pa gang yin pa de yang rnam pa gnyis te/ yang dag pa'i ye shes kyi bdag nyid dang sa bon gyi bdag nyid do/ /yang dag pa'i ye shes gang yin pa de ni kun gzhi'i rnam par shes pa la rag las te/ 'byung ba'i phyir gnas kho na yin no/ /sa bon gyi bdag nyid kyang rang bzhin du gnas pa dang yang dag par bsgrubs pa dang rnam pa gnyis te/gnyis ka yang len pa'i rnam par shes pa dang lhan cig 'jug pa'i phyir de dag gi gnas yin pa nyid do/ /gzhan gyi dbang yang rnam pa gnyis te/ kun nas nyon mongs pa dang dag pa 'jig rten pa'o/ / dag pa 'jig rten pa ni len pa'i rnam par shes pa dang 'brel pa'i phyir de'i gnas yin pa kho na'o/ /kun nas nyon mongs pa yang rnam pa gnyis te/ rnam par shes pa bdun gyi tshogs kyis bsdus pa dang / kun gzhi rnam par shes pas bsdus pa'o/ /rnam par shes pa bdun gyi tshogs kyis bsdus pa gang yin pa de ni/kun gzhi rnam par shes pa dang 'jug pa'i rnam par shes pa dag phan tshun rgyu dang 'bras bu'i dngos po dag yin yang len pa'i rnam par shes pa ni brtan pa'i phyir/ len pa'i rnam par shes pa kho na gnas yin gyi rnam par shes pa gzhan ni ma yin te/ mi brtan pa'i phyir ro//kun gzhi rnam par shes pa yang sa bon dang rnam par smin pa'i bye brag gis rnam pa gnyis su dbye ste/ de gnyis las gang yang rung ba zhig gnas nyid du rnam par gzhag la cig shos ni de la brten par rnam par brtag par bya'o/ /yang na skad cig ma snga phyi 'jug pa'i sgo nas gnas dang brten pa nyid dang /rgyu nyid dang / 'bras bu nyid kyis tha dad pa nyid yin no/ /sems las byung ba gang dag rnam par shes pa dang mtshungs par ldan pa de dag gi gnas kyang rnam par shes pa kho na yin te/ des nye bar bstan pa'i yul la khyad par 'dzin pa nyid du zhugs pas de dag gtso bo ma yin pa'i phyir dang de ni gtso bo yin pa'i phyir ro//de bas na brten pa yin pa'i phyir de dag kho nas de la bsgo par byed kyi/ des ni de dag la ma yin no/ /kun brtags pa yang kun brtags par bya ba'i dngos po'i gzhi can nyid yin pas kun gzhi rnam par shes pa'i gzhi gang la brtags pa de ni dngos su de'i gnas nyid yin no//rnam par shes pa gzhan gyi gzhi can gyi gnas su yang brtan pa nyid yin pa'i phyir brgyud pa'i sgo nas de nyid rnam par gzhag go/ /'dir rnam pa bcu po dag gi rnam par dbye ba ni 'di yin te/ 'jug pa dang rgyu dang 'bras bu dag dang de dag bsgom pa'i rab tu dbye ba dang /bslab pa gsum zhes bya ba rnam pa 'di drug ni theg pa chen po'i spyod pa'i ngo bo nyid yin no/ /de yi dmigs pa ni shes bya'i gnas dang shes bya'i mtshan nyid do/ /de la yang shes bya'i mtshan nyid ni gdon mi za bar shes par bya ba yin pa nyid kyis dngos su rang gi ngo bos dmigs pa yin no//shes bya'i gnas ni de'i gnas yin pa nyid kyis so/ /spyod pa de nyid kyi 'bras bu ni spangs pa dang ye shes kyi khyad par gyi rnam pa dag yin pas de'i phyir tha mar bstan to/ /de lta bas na 'di las ni theg pa chen po'i dmigs pa gang yin pa dang /theg pa chen po gang yin pa dang / theg pa chen po'i 'bras bu gang yin pa de dag bstan to/ /dkyus ma nyid dpyad par bya ste/ shes bya'i mtshan nyid ni ngo bo nyid gsum mo/ /de la yongs su grub pa ni rtag pa dang mi rtag pa'i mtshan nyid de bzhin nyid dang yang dag pa'i ye shes kyi ngo bo nyid de/don dam pa dang rang rig pa'i sgo nas 'jig rten las 'das pa'i ye shes kyis shes par bya ba yin no/ /gzhan gyi dbang ni 'jig rten las 'das pa'i rjes la thob pa'i ye shes kyis shes par bya ba dang so so'i skye bo'i shes pas kyang rang rig pa'i sgo nas shes par bya ba yin no//'o na yongs su grub pa de ma mthong bar gzhan gyi dbang mi mthong ngo zhes 'byung ba gang yin pa de ji lta bu zhe na/ de ni gzhan gyi dbang ma lus par mngon sum pa dgag pa lhur bya ba yin pas nyes pa med do/ /rnam pa gcig tu na kun brtags pas dben par nges par mi bzung ba'i phyir te/gzhan gyi dbang rang rig pa yod kyang gcig tu nges par ma zin pa'i phyir/ yongs su grub pa 'di ma mthong ba zhes bya ba la sogs pa smos so/ /kun brtags pa ni so so'i skye bo'i shes pas shes par bya ba kho na yin te/ de ni gcig tu mngon par zhen pa'i yul yin pa'i phyir ro//rnam par gtan la dbab pa bsdus pa las/ brtags pa ni shes pa gang gi dmigs pa yang ma yin no zhes bshad pa gang yin pa ni/ med pa'i phyir gang gi rten du yang mi 'gyur ro zhes bya ba'i don yin gyi/ sgro btags par ming yul du mi 'gyur ba ni ma yin te/'di ltar de nyid las so so'i skye bo'i shes pa'i dmigs pa'o zhes 'byung ba de'i phyir yang de lta bu yin no/ /theg pa chen po'i skabs ma yin nam/ so so'i skye bo'i skabs su ci 'bab ce na/ zhar la smos pa'i phyir nyes pa med do/ /rnam pa gcig tu mos pas spyod pa'i yul yin pa'i phyir dang /zag pa med pa'i ye shes las langs pa'i sems dang ldan pa rnams kyi yang dam pa'i chos nyan pa la sogs pa na yul nyid du nye bar 'gro ba'i phyir skabs su 'bab ste 'gal ba med do/ /de bzhin gshegs pa'i gnas skabs na ni 'jig rten las 'das pa'i rjes la thob pa'i yul yang ma yin te/mngon par zhen pa thams cad spangs pa'i phyir la/ brtags pa yang mngon par zhen pas bya ba'i phyir ro/ /de bzhin gshegs pa gang gi tshe gzhan gyi sems kyis bzung ba'i kun brtags pa yongs su gcod pa de'i tshe yang phyin ci ma log pa'i de kho na nyid kyi bdag nyid yul du 'gyur gyi/ji ltar brtags pa de ltar ni yul du mi 'gyur ro/ /byang chub sems dpa'i spyod pa yang gang zag gi gnas skabs kyi rim pa dang bsgrub pa mngon par 'grub pa'i rim pa'i sgo nas tha dad do/ /gang zag gi gnas skabs kyi rim pa'i sgo nas ni rnam pa gsum ste/'jug pa dang de'i rgyu dang 'bras bu dag dang bsgom pa'i bar du dbye ba'o/ /de la yang dang po gnyis ni nye bar len pa yin la gsum pa ni nye bar blang ba yin te/ 'di ltar gang zag zhugs pa rgyu dang 'bras bu dag la gnas pa gang yin pa ni de la brten nas sa bcu rab tu dbye ba yin no//bsgrub pa'i rim pa ni bslab pa gsum gyis bstan te/ bsgrub pa'i rim pa 'dis ni gang zag gi gnas skabs gsum po 'di dag rab tu 'byed do/ /de la yang ni de bzhin gshegs pa'i gnas skabs na shes bya la 'jug pa phyin ci ma log pa yin mod kyi/'dir ni 'jug pa dang po la dgongs pa yin no/ /phyin ci ma log pa de yang gang du yongs su rdzogs she na/ 'di ltar bzod pa 'bring gi gnas skabs na ni kun brtags pa'i phyogs gcig po gzung ba'i rnam pa yang dag par rtogs so/ /chen po dang chos kyi mchog gi gnas skabs dag na ni 'dzin pa'o//de'i mjug thogs su mthong ba'i lam gyi skad cig ma dang po la ni de bzhin nyid do/ /de las gzhan pa'i sa rab tu dga' ba la ni 'jug pa yongs su rdzogs pa yin no/ /'jug pa de'i rgyu dang 'bras bu zhes bya bar tshig rnam par sbyar te/ mos pas spyod pa'i sa la ni rgyu'o//rab tu dga' ba la sogs pa'i gnas skabs na ni 'bras bu'o/ /de yi rgyu dang 'bras bu sgom pa rab tu dbye/ /zhes bya ba ni/ gtso bo yin pa'i phyir 'bras bu kho na'i rab tu dbye ba mdzad do/ /zhar la bskal pa grangs med pa rnams kyi rnam par dbye ba bstan par rgyu'i rnam par dbye bar mdzad par 'gyur ro//lhag pa'i tshul khrims zhes bya ba la sogs pa ni gtso bo yin pa'i phyir bslab pa gsum smos so/ /zhar la ni gzhan pha rol tu phyin pa rnams kyang smos te / sbyin pa dang tshul khrims zhes bya ba la sogs pa'i sgra'i bye brag gis de skad du bstan to//gang gi tshe sems can gyi don bya ba'i tshul khrims la sogs pa smos pa de'i tshe ni dngos kho nar yin no/ /lhag pa'i sems zhes bya ba la sogs pa ni/ sa dang po gsum la ni theg pa chen po rab tu snang ba'i ting nge 'dzin to/ /sa bzhi pa dang lnga pa dang drug pa dang bdun pa dag la ni bsod nams thams cad sdud pa'i ting nge 'dzin to//dgu pa dang brgyad pa la ni ting nge 'dzin gyi rgyal po bzang skyong ngo / /bcu pa la ni dpa' par 'gro ba dang nam mkha' mdzod la sogs pa'o/ /lhag pa'i shes rab ces bya ba la sogs pa ni/ gtso bo yin pa'i phyir dngos gzhi smos te/sbyor ba po dang rjes kyi dag ni phyis ston to/ /spangs pa'i khyad par zhes bya ba la sogs pa la mya ngan las 'das pa ni rnam pa bzhi ste/ phung po dang bcas pa dang phung po med pa dang / rang bzhin gyis mya ngan las 'das pa dang de bzhin du mi gnas pa'i mya ngan las 'das pa'o/ /de la 'dir ni gsum ni nyan thos la sogs pa dang thun mong yin pa'i phyir mi gzung gi /mi gnas pa'i mya ngan las 'das pa de bzhin nyid sgrib pa gnyis dang bral ba kho na thun mong ma yin pa'i phyir gzung ngo / /ye shes kyi khyad par zhes bya ba la sogs pa de la chos ni stobs la sogs pa'o/ / de dag gi sku ste rten ni chos kyi sku'o/ /de nyid de bzhin nyid yongs su dag pa yin te/ sangs rgyas kyi chos rnams ni de la rag las te 'byung ba'i phyir ro/ /kun zhes bya ba'i sgra yang rten du grags te/ lus kyi dbang po bzhin te/ bsags pa nyid yin yang mig la sogs pa'i rten yin pa'i phyir ro//rnam pa gcig tu na sku ni rang gi mtshan nyid kho na yin la rang gi mtshan nyid yin pa'i phyir chos so/ /'di ni sku yang yin la chos kyang yin pas chos kyi sku ste/ de yang de bzhin nyid yongs su dag pa yin no/ /sku zhes bya ba ni sgra yang rang gi mtshan nyid du yang grags te/ rnam par shes pa'i lus bzhin te/gzugs can ma yin pa rnams la bsags pa med pa'i phyir ro/ /chos kyi sku de ni ye shes kyi rgyu yin pa'i phyir ye shes kyi khyad par te/ de nyid ngo bo nyid kyi sku yin no/ /de bzhin gshegs pa'i ye shes thams cad ni nyid kyi longs spyod rdzogs par dgongs pa'i phyir longs spyod rdzogs pa'i sku yin no//stobs la sogs pa'i ngo bo nyid gang yin pa dang / mtshan dang dpe byad bzang po nyid du gyur pa gang yin pa de dag kyang de bzhin gshegs pa'i ye shes kyi ngo bo nyid yin pa'i phyir ye shes kyi khyad par yin no/ /de'i dbang gis byang chub sems dpa' rnams la so sor mtshan dang dpe byad bzang po la sogs par snang ba sems dang sems las byung ba dag la khyab pa gang yin pa de yang gzhan longs spyod rdzogs par dgos pa'i phyir longs spyod rdzogs pa'i sku yin no//de bzhin gshegs pa'i ye shes kyi dbang kho nas byang chub sems dpa' mos pa spyad pa spyod pa dang /nyan thos la sogs pa'i rgyud la so sor mtshan dang dpe byad bzang po la sogs par snang ba'i sku ni yun thung ngur gnas pa'i phyir sprul pa ste/ ye shes kyi 'bras bu yin pa'i phyir ye shes kyi khyad par yin no/ /sangs rgyas bcom ldan 'das rnams zhes bya ba bshad par bzhed nas/theg pa chen po sangs rgyas kyi bka' nyid du brjod pa'o zhes bya ba la sogs pa smos so/ /ji lta zhe na gang dag nyan thos kyi theg pa nyid theg pa chen po yin no zhes bya bar rtogs pa de dag ni sangs rgyas kyi gsung de theg pa chen po yin par yang brjod do/ / de'i phyir nyan thos kyi theg pa ni theg pa chen po nyid du sangs rgyas kyi bka' ma yin te/ rnam pa bcu bstan pa dang bral pa'i phyir grangs can la sogs pa'i bstan bcos bzhin no/ /nyan thos kyi theg pa las khyad par du byas pa zhes bya ba ni/ gsung khyad par rnam pa bcus khyad par du 'phags pa zhes bya ba de ston te/gang gi phyir nyan thos kyi theg pa las ni/ shes bya'i gnas la sogs pa yongs su ma rdzogs par bstan la/ 'di las ni shes bya'i gnas la sogs pa rnam pa thams cad bstan pa de'i phyir nyan thos kyi theg pa las khyad par du bya ba rnam pa bcus de bzhin gshegs pa'i gsung khyad par du spog pa yin no//mchog nyid kyi phyir yang khyad par du 'phags so/ /ji ltar mchog nyid yin zhe na/ mchog nyid du bstan pa'i phyir ro/ /mchog nyid du bstan pa nyid ji ltar zhe na/ ji ltar bcom ldan 'das kyis byang chub sems dpa' rnams las brtsams nas bstan pa yin pas so//'dis ni gdul ba mchog nyid kyi phyir mchog nyid do zhes bya ba'i tha tshig go/ /'di ltar gdul ba'i dbang gis kyang bstan pa dman pa dang mchog nyid yin te/ dper na so so'i skye bo yin pa'i phyir tshong pa ga gon dang mdzes ldan dag gi ched du ni dman pa bstan/'phags pa'i skabs yin pas lnga sde'i dbang du mdzad nas ni 'bring / byang chub sems rnams kyi dbang du mdzad nas ni/ shes rab kyi pha rol tu phyin pa rnam pa brgyad bstan te/ brtags pa'i rnam pa dgag pa'i sgo nas mchog go/ /rnam pa brgyad ni shes rab kyi pha rol tu phyin pa sum brgya pa dang /lnga brgya pa dang / bdun brgya pa dang / nyis stong lnga brgya pa dang / brgyad stong pa dang / khri brgyad stong pa dang / nyi khri lnga stong pa dang / 'bum pa bstan pa yin no/ /dam pa'i chos pad+ma dkar po la sogs pa bstan pa ni rab kyi mchog yin te/ 'di ltar de las ni theg pa gcig bstan pas ma nges pa'i rigs can rnams kyang de las 'dren to//mya ngan las 'das pa chen po'i mdo la sogs pa bstan pa ni rab kyi phul yin te/ 'di ltar de las ni de bzhin gshegs pa rnams 'khor ba ji srid par bzhugs shing sems can gyi don mdzad par bstan to//sangs rgyas phal po che'i mdo bstan pa ni rab kyi phul gyi mchog yin te/ 'di ltar mdo de ni de bzhin gshegs pa mngon par rdzogs par sangs rgyas nas ring po ma lon par phyogs bcu na gnas pa'i byang chub sems dpa' sa bcu'i dbang phyug rnams la lan cig rab tu bstan to//gong du nyan thos kyi theg pa chen po nyid du sangs rgyas kyi gsung yin pa nyid dgag pa'i phyir gtan tshigs rnam pa bcu bstan pa dang bral ba'i phyir zhes bya ba de ni ma grub ste/ nyan thos kyi theg pa las kyang kun du dga' ba zhes bya ba la sogs pas shes bya'i gnas bstan pa'i phyir ro//sems can rdzus te skye ba yod do zhes bya ba la sogs pas kun brtags pa yang bstan pa'i phyir ro/ /'di las sems can med do zhes bya ba la sogs pas yongs su grub pa yang bstan pa'i phyir ro/ /chos 'di dag ni rgyu dang bcas zhes bya ba la sogs pas gzhan gyi dbang yang bstan pa'i phyir ro//shes bya ba la 'jug pa yang mig dang gzugs la sogs pa zhes bya ba la sogs pas bstan pa'i phyir ro/ /de'i rgyu dang 'bras bu bstan pa yang yod de/ pha rol tu phyin pa drug bstan pa'i phyir ro/ /bsgom pa rab tu dbye ba yang dge 'dun phal chen sde'i sde pa las sa'i rnam par dbye ba'i mtshan nyid bstan pa'i phyir ro//bslab pa gsum yang bstan pa'i phyir ro/ /mya ngan las 'das pa yang zad pa dang 'dod chags dang bral ba zhes bya ba la sogs pas bstan pa'i phyir ro/ /chos kyi sku mi slob pa'i chos kyi ngo bo nyid dang / longs spyod rdzogs pa'i sku chos kyi 'khor lo bskor bar mdzad pa dang /des skye ba sprul pa'i sku bstan pa'i phyir sku gsum yang bstan to snyam pa'i bsam pa 'di ji ltar na 'dis zhes bya ba la sogs pa smos so/ /'di ltar gnas bcu po 'di dag ces bya ba la sogs pa 'dis ni gtan tshigs sgrub par byed do / /rnam pa bcu rdzogs par bstan pa dang bral ba'i phyir ro zhes gtan tshigs ston pa'i phyir ro//'di ltar nyan thos kyi theg pa las ni shes bya'i gnas kyang rgyu'i bye brag dang mtshungs par ldan pa'i bye brag dang / dmigs pa bstan pa dang bag chags kyi rten nyid la sogs pa'i dbye bas ma bstan no / /kun brtags pa yang gzugs la sogs pa'i bye brag dang yongs su grub pa yang chos la bdag med pa'i mtshan nyid dang gzhan gyi dbang gi dngos po yang rnam par shes pa brgyad kyi tshogs kyi mtshan nyid rab tu rnam par ma phye'o//shes bya la 'jug pa yang ji skad bstan pa'i kun brtags pa la sogs pa la 'jug pa'i mtshan nyid ma bstan to//de med pas 'khor gsum rnam par dag pa'i pha rol tu phyin pa dag kyang rnam par ma phye la sems can gyi don bya ba'i tshul khrims la sogs pa yang ma bstan to/ /dge 'dun phal chen sde rnams la sa'i dbye ba bstan pa gang yin pa de yang phyogs kyi khongs su gtogs pa yin no//lhag pa'i tshul khrims kyi bslab pa yang sems can gyi don bya ba'i tshul khrims kyi mtshan nyid rnam par ma phye'o/ /lhag pa'i sems kyang theg pa chen po rab tu snang ba'i mtshan nyid kyi ting nge 'dzin la sogs pa'i dbye ba dang / lhag pa'i shes rab kyang bdag med pa gnyi ga rtogs pa'i dbye ba dang /mi gnas pa'i mya ngan las 'das pa yang ji skad 'chad par 'gyur pa dang / sku gsum yang ji ltar bzhed pa bzhin rnam par ma phye'o/ /byang chub chen po kun du sgrub par byed pa ste zhes bya ba la sogs pas ni rang gi phyogs sgrub par byed do//'phags pa shes rab kyi pha rol tu phyin pa la sogs pa'i mdo ni theg pa chen po nyid du sangs rgyas kyi gsung yin te/ byang chub chen po kun du sgrub par byed pa'i don ston pa'i phyir gnyi ga la grags pa skyes pa'i rabs kyi sde la sogs pa bstan pa bzhin no/ /'dod do zhes bya ba'i sgra tshigs su bcad pa las 'byung ba 'chad par 'gyur ba dang /sbyor ba'i phyir ma grub pa nyid kyang ma yin te/ byang chub chen po kun du sgrub par byed pa'i don ston par 'dod pa'i phyir ro zhes bya ba'i tha tshig go/ /byang chub chen po ni 'dir de bzhin nyid dri ma med pa'o/ /de kun du sgrub pa ni mngon sum du byed pa'o//de ci'i phyir zhe na/ thams cad mkhyen pa'i ye shes thob par bya ba'i phyir ro/ /mi gnas pa'i mya ngan las 'das pa dang sku gsum po byang chub chen po'i gnas skabs kho na yin na ji ltar byang chub chen po kun du sgrub par byed pa yin zhe na/ rgyud gzhan dag la chos kyi dbyings kyi rgyu mthun pa thos pa'i bag chags kyi rim gyis so//yong ni byang chub ye shes yin mod kyi / 'on kyang tshig phye nas sbyar bar bya ste/ gang gi phyir 'di dag byang chub chen po kun du sgrub par byed pa de'i phyir thams cad mkhyen pa'i ye shes thob par byed pa yin no/ /byang chub chen po kun du sgrub par byed pa de yang shin tu 'thad pa zhes bya ba la sogs pa tshig gsum gyis khyad par du byed de/de la shin du 'thad pa ni dmigs pa'i ngo bo nyid kyi theg pa chen po gang yin pa shes bya'i gnas dang / shes bya'i mtshan nyid de phyin ci ma log pa'i phyir ro/ /mthun pa ni spyod pa'i ngo bo nyid kyi theg pa chen po gang yin pa shes bya la 'jug pa la sogs pa rnam pa drug ste/'bras bu'i rjes su mthun pa'i phyir ro/ /'gal ba med pa ni 'bras bu'i ngo bo nyid kyi theg pa chen po gang yin pa spangs pa dang / ye shes kyi khyad par gyi ngo bo ste/ rgyu dang mi 'gal ba'i phyir ro/ /rnam pa gcig tu na rnam pa bcu po ngo bo nyid gsum gyi nang du 'dus pa'i phyir ngo bo nyid gsum gyi dbye bas shin tu 'thad pa la sogs pa yin te/de la shin tu 'thad pa ni yongs su grub pa ste/ tshad ma dang mi 'gal ba'i phyir ro/ /mthun pa ni gzhan gyi dbang ste/ rnam par byang ba dang mthun pa'i phyir ro/ / 'gal ba med pa ni kun brtags pa ste/ tha snyad dang mi 'gal ba'i phyir ro/ /rnam pa gcig tu na rnam pa bcu char mngon sum gyi tshad ma dang ldan pa'i phyir shin tu 'thad pa'o/ /rjes su dpag pa dang ldan pa'i phyir mthun pa'o/ /sngon gyi sangs rgyas kyi lung dang mi 'gal ba'i phyir 'gal ba med pa'o//rnam pa gcig tu na mngon sum dang rjes su dpag pa dang lung rnams dang ldan pa'i phyir shin tu 'thad pa'o/ /rnam par byang ba dang mthun pa'i phyir mthun pa'o/ /'gal ba kun nas nyon mongs pa'i dgra bor gyur pa'i phyir 'gal ba med pa'o/ /rnam pa gcig tu na bden pa gsum gyi skabs kyi mtshan nyid kyi bden pa'i dbang du byas nas shin tu 'thad pa'o//don dam pa'i bden pa'i dbang du byas nas mthun pa'o/ /kun rdzob kyi bden pa'i dbang du byas nas 'gal ba med pa'o/ /rnam pa gcig tu na rnam pa bcu po bskal pa grangs med pa dang pos bsdus pa ni shin tu 'thad pa ste/sa gong ma dang mthun pa'i phyir ro/ /bskal pa grangs med pa gnyis pas bsdus pa ni mthun pa ste/ lhag pa'i bsam pa rnam par dag pa'i phyir ro/ /bskal pa grangs med pa gsum pas bsdus pa ni 'gal ba med pa ste/ mngon par 'du bya ba med par 'jug pa'i phyir ro//rnam pa gcig tu na rang bzhin du gnas pa'i rigs kyis bsdus pa ni shin tu 'thad pa'o/ /yang dag par bsgrub pa'i rigs kyis bsdus pa ni mthun pa'o/ /'bras bu'i gnas skabs kyis bsdus pa ni 'gal ba med pa'o/ /de la 'dir gnas bcu po 'di dag gi go rims ni bstan zin pa nyid de/dmigs pa'i ngo bo nyid gang yin pa de ni rgyu yin pa'i phyir dang por bstan to/ /dmigs pa ji lta ba bzhin shes bya la 'jug pa la sogs pa drug ni de'i 'bras bu yin pa'i phyir phyis so/ /spangs pa dang ye shes kyi khyad par dag ni de'i 'bras bu yin pa'i phyir de bas kyang phyis so//dmigs pa dag la yang snga phyi ni shes bya'i gnas ni rgyu yin pa'i phyir ro/ /shes bya'i mtshan nyid ni 'bras bu yin pa'i phyir ro/ /shes bya la 'jug pa la sogs pa drug la yang gsum tshan dang po gang yin pa de ni gang zag gi gnas skabs kyis rab tu phye ba yin pa'i phyir dang por bstan to//gsum tshan gnyis pa spyod pa'i ngo bo nyid ni de la brten pa yin pa'i phyir phyis bstan to/ /gsum tshan dang po la yang rnam pa dang po gnyis gang yin pa de ni nye bar len pa yin pa'i phyir sngar bstan to/ /rnam pa gsum pa gang yin pa de ni nye bar blang bar bya ba yin pa'i phyir phyis so/ /rnam pa dang po gnyis la yang shes bya la 'jug pa ni rgyu yin pa'i phyir dang por ro//rnam pa gnyis pa ni 'bras bu yin pa'i phyir phyis so/ /sgrub pa la yang mi mthun pa'i phyogs ji ltar rags pa bzhin go rims yin te/ 'di ltar 'chal pa'i tshul khrims ni brtag sla ba'i phyir ches rags pas/ de'i gnyen por lhag pa'i tshul khrims kyi bslab pa'o//de bzhin du rgod pa dang / rnam par g.yeng ba la sogs pa rags pa de dag gi gnyen por lhag pa'i sems kyi bslab pa'o/ /de bzhin du gnas ngan len gyi sa bon rjes su 'brel pa ni phra bas de'i gnyen por lhag pa'i shes rab kyi bslab pa'o//rnam pa gcig tu na sa'i rim pas go rims su bslab pa yin te/ 'di ltar sa gnyis pa ni lhag pa'i tshul khrims kyi bslab pas rab tu phye ba yin te/ de la tshul khrims kyi pha rol tu phyin pa yongs su rdzogs pa'i phyir ro/ /sa gsum pa ni lhag pa'i sems kyi bslab pas rab tu phye ba yin te/'jig rten pa'i bsam gtan dang ting nge 'dzin dang snyoms par 'jug pas gnas pa'i phyir ro/ /bzhi pa la sogs pa ni lhag pa'i shes rab kyi bslab pas rab tu phye ba yin te/ byang chub kyi phyogs dang mthun pa la sogs pa rab tu rnam par 'byed pas gnas pa'i phyir ro//spangs pa dang ye shes dag kyang bden pa ji ltar bstan pa bzhin go rims yin te/ 'di ltar mi gnas pa'i mya ngan las 'das pa ni 'gog pa'i bden pas bsdus pa yin la/ de'i 'bras bur gyur pa ye shes ni lam gyi bden pas bsdus pa yin te/ ye shes kyi khyad par ni spangs pa sngon du 'gro ba can yin pa'i phyir go rims de ltar bstan to//bstan bcos mdzad pas ni go rims gzhan du bstan pa'i phyir/ chos rnams kyi rgyu la mkhas pa la brten nas zhes bya ba la sogs pa smos te/ rgyu med pa dang mi mthun pa'i rgyu yongs su spangs pa'i phyir rgyu la mkhas pa'o//de'i ched du shes bya'i gnas bstan te/ chos thams cad ni kun gzhi rnam par shes pa la rag las pa'i phyir ro/ /rten cing 'brel par 'byung ba la mkhas par zhes bya ba ni sdug pa dang mi sdug pa'i 'gro ba rnam par 'byed pa dang nye bar spyod pa pa'i rten cing 'brel par 'byung ba bstan pa'i phyir ro//rgyu la mkhas pa zhes bya ba smos pa ni/ ngo bo nyid rnam par 'byed pa pa'i rten cing 'brel bar 'byung ba rab tu bstan pa'i phyir te/ 'dir yang gzhan la mkhas pa ni ngo bo nyid rnam par 'byed pa pa'i rten cing 'brel par 'byung ba la mkhas pa sngon du 'gro ba can yin pa'i phyir/rten cing 'brel par 'byung ba la mkhas par phyis bstan to/ /de'i 'og tu rten cing 'brel par 'byung ba la mkhas na chos rnams kyi mtshan nyid la 'jug par nus pas shes bya'i mtshan nyid bstan to/ /sgro 'dogs pa dang skur mtha'i nyes pa yongs su spangs pa zhes bya ba de la kun brtags la sgro 'dogs pa ni bye brag tu smra ba la sogs pa lta bu ste/gzugs la sogs pa la de kho na nyid du khas len pa'i phyir ro/ /gzhan gyi dbang la skur pa 'debs pa ni bdag nyid thams cad du gdags pa'i gzhi spang ba'i phyir ro/ /yongs su grub pa la skur pa 'debs pa yang kha cig tu med par rtogs pa'am/kun rdzob tu yod par rtogs pa'i phyir ro/ /re zhig gcig tu med pa ni ma yin te/ de bzhin nyid rdzas kyi chos yin pa'i phyir ro/ /gdags pa'i nye bar len pa med par ni btags pa'i ngo bos stong pa'i de bzhin nyid nges par gzung bar mi nus so//mi rtag pa nyid la sogs pa bzhin du btags pa'i yod pa yang ma yin te/ de dag ni gnas skabs kyi bye brag la btags pas 'khrul pa'i phyir la/ de bzhin nyid ni gnas skabs thams cad du mi 'khrul pa'i phyir ro/ /de bas na bstan pa'i phyir rdzas yin la/ rdzas kyi chos yin pa'i phyir med pa nyid kyang ma yin no//de ltar na brtags pa la sgro 'dogs par mi byed pa'i phyir dang / gzhan gyi dbang dang yongs su grub pa dag la skur pa 'debs par mi byed pa'i phyir sgro 'dogs pa dang skur pa'i nyes pa spangs pa nyid do/ /yang na ngo bo nyid re re la yang sgro 'dogs pa dang skur pa'i nyes pa spangs pa nyid sbyar te de la brtags pa la sgro 'dogs pa nyid snga ma bzhin no//skur pa 'debs pa ni thams cad kyi thams cad du kun rdzob tu yang sel ba'i phyir ro/ /gzhan gyi dbang la sgro 'dogs pa ni mdo sde pa la sogs pa lta bu ste/ de kho na nyid kho nar khas len pa'i phyir ro//'di ltar sems dang sems las byung ba rnams rigs mthun pa'i dngos po dang bral ba'i phyir de kho na'i bdag nyid du ni bsgrub par ni mi nus kyi / de ni 'jig rten gyi tha snyad kyis gzhi med par ma brtags pas rten cing 'brel pa nyid du khas blang ba 'ba' zhig tu zad do/ /gzugs ni 'jig rten gyi tha snyad kyis sems dang sems las byung ba las gud na yod par brtags te/rmi lam la sogs pa la 'khrul pa'i phyir dang / shin tu brtags mi bzod pa'i phyir rten cing 'brel par 'byung ba nyid yin pa bsal lo/ /skur pa 'debs pa ni snga ma bzhin sbyar ro/ /yongs su grub pa la sgro 'dogs pa ni ji ltar brjod pa de kho na bzhin du de kho na nyid du yongs su 'dzin pa'i phyir ro//skur pa 'debs pa ni snga ma bzhin no/ /gzhan dag ni gzhan gyi dbang la sgro 'dogs pa bzhin du 'chad de/ ji ltar 'dzin pa'i bdag nyid du grags pa de ltar mngon par zhen pa'i phyir yin gyi/yod pa'i phyir gzung ba dang 'dzin pas dben pa'i bdag nyid du ni ma yin te/ de ltar sgro 'dogs pa'i phyir sgro 'dogs pa yin no zhes so / /rten cing 'brel par 'byung ba'i chos de dag la zhes bya bas 'dir brgal ba/ gal te rten cing 'brel par 'byung ba dag la sgro 'dogs pa dang skur pa 'debs pa spangs pa nyid kyis mtshan nyid la mkhas pa yin na brtags pa dang yongs su grub pa dag la mkhas pa go skabs su ci 'bab ste/gcig ni med pa nyid kyis rten cing 'brel par 'byung ba ma yin pa'i phyir la/ cig shos de bzhin nyid kyi mtshan nyid kyang rtag pa'i phyir ro/ zhe na de ni ma yin te/mtshan nyid la mkhas pa zhes bshad pa mtshan nyid ni/ 'dis mtshon pas na gzhan gyi dbang la kun brtags pa dang yongs su grub pa yin te/ 'di ltar sems can ma dag pa rnams kyis ni brtags pa'i bdag nyid du dag pa rnams kyis ni bdag med pa'i bdag nyid du mtshon to/ / gzhan gyi dbang rang nyid ni mtshon par bya ba yin pas na mtshan nyid de de nyid sbyar bar bya'o/ /'di la thams cad kyi kun rdzob kyi bden pa bzhi dang / don dam pa'i bden pa bzhi'o/ /de la 'jig rten gyi kun rdzob tu ni brtags pa la sgro yang mi 'dogs skur pa yang mi 'debs so/ /rigs pa'i kun rdzob tu ni sems dang sems las byung ba'i ngo bo nyid gzhan gyi dbang la sgro yang mi 'dogs skur pa yang mi 'debs so//rtogs pa'i kun rdzob tu ni bden pa'i lugs ji ltar rnam par gzhag pa la mngon par zhen pa nyid kyis sgro yang mi 'dogs la/ mngon par rtogs pa dang mthun pa med par skur pa yang mi 'debs so//don dam pa'i kun rdzob tu ni ji skad brjod pa'i yongs su grub pa la/ sgro yang mi 'dogs skur pa yang mi 'debs te/ de bzhin du 'jig rten gyi don dam pa dang rigs pa'i don dam pa dang / rtogs pa'i don dam pa dang / don dam pa'i don dam pas de kho na bzhin du sgro 'dogs pa dang /skur pa 'debs pa spangs pa nyid sbyar bar bya'o/ /gzhan dag ni phung po la sogs pa rten cing 'brel par 'byung ba rnams la bde ba dang sdug bsngal ba dang rmongs pa yongs su 'gyur ba la sogs pa nyid du sgro 'dogs pa'i phyir sgro 'dogs pa'o/ / bdag nyid thams cad du med par rtogs pa'i phyir skur pa 'debs pa'o zhes brjod de/ brtags pa la sogs pa ngo bo nyid gsum dang sbyor bas ni ma yin no/ /rtogs par bya ste zhes bya ba la sogs pa la/ mkhas pa dang po la ni phan yon rten cing 'brel par 'byung ba la mkhas pa yin la/gnyis pa la yang mtha' gnyis spang ba la mkhas pa ma yin nam/ mkhas pa ni shes pa yin pas de nyid rtogs pa yin no zhe na/ de ni ma yin te/ mkhas pa ni mos pas spyod pa'i thos pa las byung ba dang / bsams pa las byung ba dang / bsgoms pa las byung ba zag pa dang bcas pa yin par bzhed la/rtogs pa ni zag pa med pa'i ye shes yin no/ /des sgrib pa rnams las zhes bya ba la sogs pa ni/ de la dro ba'i gnas skabs na ni pha rol tu phyin pa'i mi mthun pa'i phyogs ser sna la sogs pa rnam par gnon pa'i spong bas kun du mi 'byung ba tsam rnam par grol ba yin te/de dag ni bsgom pas spang bar bya ba yin pa'i phyir ro/ /rtse mo dang bzod pa dang chos kyi mchog gi gnas skabs na ni/ mthong bas spang bar bya ba'i nyon mongs pa'i sgrib pa dang / shes bya'i sgrib pa kun brtags pa rnam par gnon pa rnam par grol ba yin no/ /mthong ba'i lam gyi gnas skabs na ni sgrib pa rnam pa de gnyi ga'i sa bon yang dag par bcom pa rnam par grol ba yin no//de yan chad rdo rje lta bu'i ting nge 'dzin gyi bar du ni shes bya'i sgrib pa'i sa bon lhan cig skyes pa rim gyis yang dag par 'joms te/ 'jig tshogs la lta ba dang mthar 'dzin par lta ba lhan cig skyed pa yid kyi rnam par shes pa dang mtshungs par ldan pa dag ni sa bzhi pa la thams cad kyi thams cad du rnam par mnan to //de las gzhan pa 'dod chags dang zhe sdang dang gti mug rnams rnam pa thams cad du rnam par mnan pa dang / nyon mongs pa can gyi yid ni sa brgyad pa la rnam par mnan to//thams cad kyi sa bon dang nyon mongs pas 'phangs pa'i bag chags ni rdo rje lta bu'i ting nge 'dzin gyis cig car kun nas 'joms so/ /lhag pa'i bsam pa dag pa la brten nas zhes bya ba ni/ sa bcu pa las bstan pa drang po'i bsam pa nyid la sogs pas so//sngar sbyor ba can gyi zhes bya ba la sogs pa ni/ rgyun gcig pa'i phyir de skad brjod de/ rgyur gyur pa gang dag yin pa de dag rtogs pa'i sgo nas bsgrub par bya ba yin no/ /rtogs par bsgrub pa yang pha rol tu phyin pa'i mi mthun pa'i phyogs ser sna la sogs pa'i sa bon bcom pa dang /'khor gsum yongs su dag pas yongs su zin pa'i sgo nas pha rol tu phyin pa rnams gags med par 'jug pa gang yin pa'o/ /de'i 'og tu lhag pa'i bsam pa dag pa'i rgyu can sa bcu'i mtshan nyid bsgom pa rab tu dbye ba yin pas de bstan to/ /de yang yong ni bskal pa grangs med pa gnyis kyis yin mod kyi/'on kyang gsum nyid ni der yongs su rdzogs pa yin pas grangs med pa gsum du zhes bshad do/ /bslab pa yongs su rdzogs pa ni sa la brten pa yin pa'i phyir/ de'i 'og tu bslab pa gsum ste/ 'di dag gi nang go rims ni snga ma bzhin no/ / lhag ma'i go rims kyang snga ma bzhin no/ /theg pa chen po thams cad yongs su rdzogs pa yin no zhes bya ba ni/ dmigs pa la sogs pa'i bye brag ci skad bshad pa'i sgo nas so/ /'di ni bcu po mdor bsdus nas rnam par bshad pa yin te/ /rgyas par ni 'di man chad nas ston to/ /der yang rnam grangs dang rang gi mtshan nyid dang rigs pa dang rab tu dbye ba dang rnam pa bzhi rnam par bshad par bya ste/nyan pa po rnams kyis bye brag tu rtogs par bya ba'i phyir dang por rnam grangs tsam zhig bsnyad do/ /de'i 'og tu brjod par bya bar 'dod pa rnams la mtshan nyid brjod do/ /rang gi mtshan nyid rab tu grub par bya ba'i phyir rigs pa rgyas pa'o//rigs pas bsgrubs pa rang gi grub pa'i mtha' la rnam par gnas par bya ba'i phyir rab tu dbye ba'o/ /rnam grangs la yang khyad par rnam pa bzhi ste/ theg pa chen po'i thun mong ma yin pa dang / nyan thos kyi theg pa dang theg pa chen po thun mong pa dang /nyan thos kyi theg pa'i thun mong ma yin pa dang / de'i brtsad pa'o/ /de la brtsad pa ni 'di yin te/ ci 'jug pa'i rnam par shes pa'i rgyud la kun gzhi rnam par shes pa zhes bya bas rnam grangs shig yin nam 'on te de dang tha dad pa zhig yin zhes bya ba'o/ /de la re zhig rnam grangs dang po'i dbang du mdzad nas/bcom ldan 'das kyis kun gzhi rnam par shes pa zhes bstan pas kun gzhi'i rnam par shes pa gang du zhes bya ba la sogs pa smos so/ /'dir ni 'dri ba'i lan 'chad par 'gyur ba dang sbyar na 'dri ba 'di theg pa chen po pa mi mkhas pa zhig yin par mngon te/'di ltar dris pa'i don theg pa chen por gtogs pa'i mdo brjod pas gtan la dbab pa mdzad do/ /'on te sde pa zhig 'drin 'on kyang nyes pa med de/ 'di ltar de ltar tshad mas theg pa chen po sangs rgyas kyi gsung yin par khas len du bcug pas so/ / yang na slob dpon nyid kyis ma 'ongs pa'i skye bo la bltas nas/ bdag nyid kyis dris nas lan gdab pa byas pa yin no/ /thog ma med pa'i zhes bya ba la sogs pa ni/ 'dir yang kun gzhi rnam par shes pa zhes bya ba'i rnam grangs 'di bris na shes bya'i gnas zhes bya ba'i sgra chos kun gyi gnas yin pa nyid du ston pa mdzad de/kun gzhi rnam par shes pa dris na/ de yang dri ba byas pa yin no snyam du dgongs pas so/ /de'i phyir 'di ni skabs su ma bab pa ma yin gyi skabs su bab pa yin no/ /rnam pa gcig tu na kun gzhi'i rnam par shes pa'i lan gdab par mdzad pa yin na yang ci ltar sngar shes bya'i gnas bstan nas kun gzhi'i rnam par shes pa bstan pa de bzhin du 'dir yang shes bya'i gnas kyi ngo bo nyid dpyad pas kun gzhi rnam par shes pa'i sgra dpyod par mdzad pa yin no//rnam grangs kyi skabs su don gyi skabs la ci 'bab ces brjod par yang mi nus te/ rang gi mtshan nyid bstan pa 'di ltar ma yin pa ni 'og nas 'chad par 'gyur pa'i phyir ro//thog ma med pa'i dus kyi zhes bya ba ni glo bur du byung ba ma yin no zhes bya ba'i don to/ /dbyings zhes bya ba ni rgyu zhes bya ba'i tha tshig go/ /chos rnams kun gyi 'dri ba'i gnas/ /zhes bya ba ni/ 'di la re zhig las dge ba dang mi dge ba ni gnas ma yin no//de dag gnas shig yin na rnam par smin pa'i 'bras bu'i yin par 'gyur grang na rnam par smin pa'i 'bras bu lhan cig pa'am/ de ma thag pa ni med pas gang gi tshe 'bras bu de byung ba na las de 'das so/ /'das pa yang gnas ma yin te byed pa zhig pa'i phyir nam mkha'i me tog bzhin no/ / skal ba mnyam pa dang srog gi dbang po dag kyang gnas nyid ma yin te/ rdzas su med pa'i phyir ro/ /gal te de thams cad yin pa zhig tu gyur na yang tshad yod pa zhig gi gnas yin par 'gyur ro/ /bgegs mi byed pa'i ngo bo tsam gyis kun gyi gnas so zhes brtags par yang mi nus te/ 'di ltar gnas med pa yang gnas nyid du thal par 'gyur ro//de bzhin du rang gi sde pas kun brtags pa gzhan yang gnas yin pa nyid dgag pa dang / shugs kyis chos kun gyi gnas ni kun gzhi'i rnam par shes pa yin no/ /kun gzhi gang gi gnas yin pa'i kun de brtags pa'i phyir/ /de yod pas na 'gro kun dang //mya ngan 'das pa'ang thob par 'gyur/ /zhes bya ba smos te/ 'gro kun zhes bya ba ni kun nas nyon mongs pa'i gnas nyid yin pas so / /mya ngan 'das pa'ang thob par 'gyur/ /zhes bya ba ni/ thos pa dang bsams pa la sogs pa'i rim gyis rnam par byang ba'i gnas nyid yin par ston to/ / rgyu med par smra ba dgag pa'i phyir thog ma med pa'i dus zhes bya ba smos so/ /smra ba gang dag kha cig mi mthun pa'i rgyu gtso bo la sogs pa rtag pa nyid kyis thog ma med pa'i dus par rtog pa yod pa de dag yongs su spang ba'i phyir 'dra ba'i gnas zhes bya ba smos so/ /'bras bu dag dang 'dra na gnas yin no zhes bya ba'i don te/ji ltar 'bras bu skye ba dang 'brel pa de kho na bzhin du rgyu gang zhig skye ba dang 'jig pa dang ldan pa de ni 'bras bu dang 'dra bar dgongs pa yin no/ /de bzhin du smra ba gang kha cig rgyu rtag pa las kyang 'bras bu skye la/ rgyu ni byed pa dang ldan pa nyid du rtogs par byed pa yod de/ dper na bye brag pa dag lta bu'o/ /de dgag pa'i phyir de yod pas na zhes bya ba smos te/ byed pa med pa kho nar yod pa tsam gyis rgyu yin no zhes bya ba'i tha tshig go/ /'dir yang de kho na yod pas zhes bya ba dang de yod pa kho nas shes/ gnyi gar nges par gzung bar bya rig par bya ste/ gang dag rgyu rtag pa yin la bdag la sogs pa'i rdzas dang gzhan gtso bo las 'bras bu 'byung bar rtog par byed pa de dag ni nges par bzung ba dang pos bsal to//gang dag yod pa tsam dang byed pa dang ldan pa nyid kyis rgyu'i dngos por rtog par byed pa de dag ni nges par gzung ba gnyis pas so/ /yang dpyad par bya ste 'dir gang gi tshe kun nas nyon mongs pa'i gnas nyid kyis kun gzhi rnam par shes par tha snyad gdags te/ji skad du kun nas nyon mongs pa'i chos thams cad sbyor ba zhes 'chad par 'gyur pa lta bu zhig yin na ni phyogs de la ni thog ma med pa'i dus kyi dbyings zhes bya ba kun nas nyon mongs pa'i gnas nyid kyis dbyings yin par dgongs te/de'i tshe ni rgyu'i rkyen yin pa'i phyir de yod pas na 'gro kun dang zhes bya'o/ /rnam par byang ba la ltos na ni kun nas nyon mongs pa'i sa bon te / bdag po'i rkyen yin te mi mthun pa'i phyogs med par gnyen po med pa'i phyir ro//de bas na bdag po'i rkyen yin pa'i phyir mya ngan las 'das pa'ang thob par 'gyur zhes gsungs so/ /gang gi tshe kun nas nyon mongs pa'i sa bon la yang ltos rnam par byang ba rang bzhin gyi rigs la yang ltos nas kun gzhi'i rnam par shes par tha snyad gdags te/ dpal phreng seng ge'i nga ro'i mdo las/rnam par byang ba'i sa bon la ltos nas sems can thams cad de bzhin gshegs pa'i snying po can no zhes 'byung ba dang / mya ngan las 'das pa chen po'i mdo las/ kun gzhi rnam par shes pa dang / 'jug pa'i rnam par shes pa dag gis longs spyod rdzogs pa'i sku bsdus so zhes gang 'byung ba lta bu zhig yin na ni de'i phyir 'di lta bu yin te/thog ma med pa dus kyi dbyings/ /zhes bya ba gnyi ga'i sa bon la ltos te tha snyad gdags so/ /de'i tshe yang bde 'gror 'gyur pa'i kun nas nyon mongs pa'i sa bon rgyu'i rkyen yin pa'i phyir dang / thar pa'i cha dang mthun pa thos pa las byung ba la sogs pa'i dge ba'i rtsa ba bsags pa rnam par byang ba'i sa bon 'phel zhing kun nas nyon mongs pa'i sa bon yang bsal par byas nas/skad cig ma bcu gnyis 'dus pas nye bar gzung ba'i bdag gi ngo bo mngon par grub pa'i sgo nas rnam par byang ba'i sa bon bdag po'i rkyen yin pa'i phyir/de yod pas na 'gro kun dang / /zhes bya ba gsungs la kun nas nyon mongs pa mi mthun pa'i phyogs kyi ngo bos bdag po'i rkyen yin pa'i phyir dang / rnam par byang ba'i sa bon rgyu'i rkyen yin pa'i phyir/ mya ngan 'das pa'ang thob par 'gyur/ /zhes bya ba gsungs so/ / yang na kun nas nyon mongs pa'i sa bon rgyu'i rkyen yin pa'i phyir dang / rnam par byang ba'i sa bon yang rnam par byang ba'i rgyu'i rkyen yin pa'i phyir go rims bzhin du sbyar ba nyid du/ de yod pas na 'gro kun dang / /mya ngan 'das pa'ang 'thob par 'gyur/ /zhes gsungs so/ /rnam pa gcig tu rgyu rtag pa dgag pa'i phyir/thog ma med pa'i dus zhes bya ba gsungs te/ dus zhes bya ba ni skye ba dang 'jig pa'i mtshan nyid do/ /gang la de rgyun chags par 'jug pa'i sgo nas/ thog ma med pa yod pa de ni thog ma med pa'i dus kyi dbyings/ gzhan gyis kun brtags pa'i gtso bo la sogs pa ni de ltar bu ma yin no//kha cig ni sngon byas pa'i rgyur smra ba khas len la rang gi sde pa nyid dag la yang kha cig rgyu ni snga la 'bras bu ni 'phyi bar rtog par byed de/ 'di gnyi ga'ang rgyu dang 'bras bu dag snga phyi yod pa nyid du mngon par zhen to/ /'das pa dang ma 'ongs pa'i lta ba ngan pa de dag bsal pa'i phyir/ chos rnams kun gyi 'dra ba'i gnas/ /zhes bya ba gsungs so/ /dus mnyam pa'i gnas ni 'dra ba'i gnas te/ 'bras bu dang dus mnyam du rgyu yod pa zhes bya ba'i don yin na/ de la yang nges par mi zin te/ la las rgyu dang 'bras bu'i dngos po dus tha dad par yang khas blangs pa'i phyir ro/ /chad par smra ba gang dag kha cig 'di skad du/'di nyid du bdag 'di chad par 'gyur ro zhes zer ba yod pas de dgag pa'i phyir/ /de yod pas na 'gro kun dang / /zhes bya ba gsungs te/ de yod pas 'gro ba thams cad du 'pho bar 'gyur ro zhes bya ba'i don to/ /rtag par smra ba gang dag kha cig 'khor ba'i btson ra ba'i bdag ni rtag pa nyid du rtog par byed pa yod pas de dgag pa'i phyir/mya ngan 'das pa'ang thob par 'gyur/ /zhes bya ba gsungs so/ /yang na shes bya'i gnas dpyad pas kun gzhi rnam par shes pa'i sgra dpyod par mdzad pa yin zhes bshad pa shes bya'i gnas de ni rang gi ngo bos shes bya'i mtshan nyid rnam pa gsum gyi gnas yin la/de yang tshigs su bcad pas ston to/ /thog ma med pa dus kyi dbyings/ /zhes bya ba ni rang gi ngo bo'o/ /chos rnams kun gyi 'dra ba'i gnas/ /zhes bya ba ni/ gzhan gyi dbang sems dang sems las byung ba thams cad kyi gnas yin pa'o//de yod pas na 'gro kun dang / /zhes bya ba ni brtags pa'i bdag nyid de/ kun nas nyon mongs pa'i chos kun brtags pa nyid do zhes 'chad par yang 'gyur ro/ /mya ngan 'das pa'ang thob par 'gyur/ /zhes bya ba ni yongs su grub pa'i rten nyid de/ rnam par byang ba'i chos yongs su grub pa nyid do zhes 'chad par yang 'gyur ro//chos kun sa bon thams cad pa/ /zhes bya ba la sogs pa ni nyan thos kyi theg pa las grags pa kun gzhi la kun du dga' ba zhes bya ba 'di nyid sbyar bar bya ba ma yin nam zhe na/ 'di las rnam par shes pa smos pa mi 'byung ba sngar ni rnam par shes pa dris te/de lta bas na gang las rnam par shes pa smos pa 'byung ba de nyid nye bar sbyar ro/ /de ltar na 'o na dge 'dun phal chen sde las grags pa srid pa'i yan lag gi rnam par shes pa nye bar sbyar bar bya ba ma yin no zhe na/ de las kyang kun gzhi smos pa mi 'byung la sngar ni kun gzhi dris te/ de lta bas na gang las gnyi ga 'byung ba de kho na theg pa chen po'i thun mongs ma yin par bshad do//chos kun zhes bya ba ni kun nas nyon mongs pa thams cad kyi'o/ /grangs can gyis brtags pa gtso bo la sogs pa yang de lta bu yin pas de rnam par bcad pa'i phyir rnam par shes pa zhes bya ba gsungs so/ / 'di de dag gi gnas su 'gyur ba ni rten dang brten pa nyid kyi gnas su 'gyur ram zhe na/ sa bon thams cad pa'i zhes bya ba gsungs te/ rgyu nyid kyis gnas su 'gyur ro zhes bya ba'i don to/ /gal te rnam par shes pa yin na 'di'i dmigs pa ci zhig yin zhe na/ sa bon dang [(]migs [,]mig [)]la sogs pa dang yul gzugs la sogs pa'o//sa bon de yang rnam pa gnyis te/ dge ba dang mi dge ba dang lung du ma bsten pa'i sa bon yongs su smin pa dang yongs su ma smin pa'o/ /sa bon rnam pa de dag gnyi ga yang khams gsum na 'di'i dmigs pa yin no/ /mig la sogs pa dang / gzugs la sogs pa ni 'dod pa dang gzugs kyi khams kho na'o//mig la sogs pa zhes bya ba yang mig la sogs pa gang dag yin zhe na mig la sogs pa'i sa bon yongs su ma smin pa 'khor ba thog ma med pa nas pa gang gi tshe yongs su smin par gyur pa de'i tshe mig la sogs pa zhes bya'o//yang ji ltar yongs su smin par 'gyur zhe na/ mig la sogs pa 'grub par 'gyur pa'i las srid pa'i yan lag gi bag chags dang / mig mig ces bya ba nas lus lus zhes bya ba'i bar gyi mngon par brjod pa'i bag chags la yang brten nas gang gi tshe gzugs can gyi khams su sngon po la sogs pa'i rnam par shes pa rnams kyi bdag po'i rkyen gyi dngos por yongs su gyur pa de'i tshe yongs su smin pa zhes bya'o//yang de ltar sa bon yongs su smin pa rnams mig la sogs pa'i rnam par shes pa rnams la khyad par ci zhig byad ce na/ re zhig dge ba dang mi dge ba dang lung du ma bstan pa'i sa bon las mig gi rnam par shes pa dge ba dang mi dge ba dang lung du ma bstan pa'i ngo bor skye ba la mig yongs su smin pa sgra la sogs pa'i yul la ldog pas rang gi yul la 'jug pa'i khyad par byed do//yang mthong bar 'gyur pa'i srid pa'i yan lag gi bag chags mig gis sa bon la ci zhig byed na yongs su smin par byed ces bya zhe na/bde 'gro dang ngan 'gro'i ngo bor byed pa la de skad ces bya'o/ /mig mig ces mngon par brjod pa'i bag chags kyi mthun las ni ci nas kyang mig mig ces tha snyad 'dogs pa'i rgyur 'gyur na de ltar mig gis sa bon yongs su 'gyur ro/ /mig gi rnam par shes pa ni/mig gi rnam par shes pa'i mig gi rnam par shes pa zhes mngon par brjod pa'i bag chags kyi khyad par de dang / gzugs gzugs zhes mngon par brjod pa'i bag chags kyi khyad par de las ji lta ji ltar 'dzin par mngon par zhen pa dang / gzung ba mngon par zhen pa'i rgyur 'gyur pa de lta de ltar yongs su 'gyur bar 'gyur te/de bzhin du rna ba'i rnam par shes pa la sogs pa la yang bsam pa 'di bya'o/ /kun gzhi rnam par shes pa'i dmigs pa mig la sogs pa yin no zhes bshad pa ci rang gi rgyud du gtogs pa kho na dmigs sam zhe na/ smras pa ma yin te/ gzhan gyi rgyud du gtogs pa dag la yang dmigs te/de skad du sems can du snang ba ni dbang po lngar rang dang gzhan gyi rgyud dag la yang yin pa'o zhes bshad do/ /yang ji ltar mig la sogs pa dmigs par 'gyur zhe na/ kun gzhi rnam par shes pa de ni rang gi mig la sogs pa dang 'brel ba dang / gzhan dang 'brel par 'gyur pa'i las kyis gang gis na 'khrul pa can gyi rang gi rgyud la ni sems can gyi rnam par rig pa gzhan gyi rgyud la ni sems can gzhan du rnam par rig pa'i rgyud 'gyur ba de lta bur so sor snang ba'i khyad par can du 'gyur ro//kha dog dang dbyibs nyid 'ba' zhig dmigs par byas pa ma yin nam zhe na/de ni ma yin te de dag la dmigs kyang de dag dang tha mi dad par grags pa la sogs pa yang dmigs par byas so zhes tha snyad gdags so/ /'o na gal te gzhan gyi rgyud du gtogs pa'i mig la sogs pa yang dmigs pa yin la/ de dag kyang nus pas rab tu bya ba yin na go//ci'i phyir rang gi rgyud las gzhan gyi mig gi rnam par shes pa la sogs pa skye bar mi 'gyur te/ dmigs par byas pa mig la sogs pa'i nus pa yod pa'i phyir ro zhe na/ de ni ma yin te/ dper na yid kyi rnam par shes pa gzhan gyi mig la sogs par skye la/ mig gi rnam par shes pa la sogs pa'i rgyu ma yin pa dang yang dper na rang gi rgyud la yang kun gzhi rnam par shes pa'i rnam pa mig la sogs pa'i nus par snang ba'i dmigs pa la de dang mtshungs par ldan pa'i rig pa la sogs pa dmigs pa mtshungs pa nyid kyis dmigs la/mig gi rnam par shes pa la sogs pa'i rgyu yang ma yin pa ltar 'di yang de dang 'dra bar 'gyur ro//nus pa'i rten nyid kyang gzhan du yin la dmigs pa'i dngos po yang gzhan du yin te/ rten nyid kyis ni mig la sogs pa'i rnam par shes pa'i rgyu yin no/ /'o na gal te rnam par shes pa yin na 'di la sems las byung ba dag kyang yod par 'gyur ro zhe na/de ltar yin te/ reg pa la sogs pa lnga kun du 'gro ba yod do/ /ci'i phyir reg pa la sogs pa kho na yin zhe na/ thams cad du 'gro ba yin pa'i phyir ro/ /kha cig ni reg pa ma 'ongs pa kho na dbang po dang yul dang rnam par shes pa rnams phan tshun 'brel pa'i byed pa sems thams cad la byung bas kun du 'gro ba nyid yin par khas len to//de ni rigs pa ma yin te/ ma 'ongs pa la skyes bu'i byed pa med pa'i phyir ro/ /de lta bas na reg pa ni yul gyi khyad par phan pa dang gnod pa dang / gnyi ga las bzlog pa'i mtshan nyid kho na la reg pa dbang po 'gyur ba byed pas 'byung ba yin la/de yang phan pa dang gnod pa dang / bar mar gnas pa'i yul rnams las gang yang rung ba zhig la nges par 'byung ba'i phyir kun du 'gro ba yin no/ /tshor ba yang bye brag tu smra ba kha cig sems dang sems las byung ba thams cad la 'byung ba yul nyams su myong ba'i mtshan nyid yongs su gcod pa yin la/rang rig pa khas mi len pa'i phyir rang nyams su myong ba yongs su bor nas phan pa dang / gnod pa dang gnyi ga las bzlog pa'i yul yongs su gzung ba'i rnam pa can gyi reg pa'i gzugs brnyan gyi tshul du rnam par rjes su byed pa myong ba'i mtshan nyid yin par brjod de/de'i phyir reg pa'i rkyen gyis tshor ba yin no zhe'o/ /de yang rigs pa ma yin te/ tshor ba reg pa'i rjes su byed pa nyid kyis de la dmigs par thal par 'gyur du 'ong ngo / /sems dang sems las byung ba rnams ni phan tshun mi dmigs te/ dmigs pa nyid nyams par thal bar 'gyur ba'i phyir ro//de lta bas na tshor ba ni reg pas yongs su bcad pa'i yul gyi khyad par phan pa dang gnod pa dang / gnyi ga las bzlog pa'i mtshan nyid kho na rang gir byed pa nyams su myong ba'i mtshan nyid yin te/ reg pa'i rkyen can zhes kyang bya la/ de yang rang gir byed pa med na mi 'byung ba yin pas thams cad du 'gro ba nyid do//'du shes ni gzhan sel bar sgrub par byed pa mngon par brjod pa'i bag chags yongs su smin pa las byung ba/ rang gi yul la yul gzhan sel bar byed cing 'jug pa'o zhes bya bar thams cad kyis shes pa nyid do/ /yul gzhan sel pa yang dmigs par bya ba'i yul thams cad la yod pas kun du 'gro ba nyid yin no//yid la byed pa yang bye brag tu smra ba rnams kyi ltar na chos thams cad bzhi tshan du nges pa'i phyir rnam par shes pa yul gzhan dang phral nas yul gzhan la gtod pa ma yin gyi 'on kyang rang gi yul la 'jug pa tsam zhig byed par zad do//rnal 'byor spyod pa rnams kyi ltar na yang / gzung ba dang 'dzin pa'i sa bon las byung ba'i rnam par shes pa la bdag po'i rkyen nyid kyis gzung bar snang ba la gtod pa yin te/ don 'dis na sems kyis 'jug pa zhes bya'o/ /don 'di yang thams cad du 'byung bas thams cad du 'gro ba nyid yin no//sems pa yang dge ba dang mi dge ba dang gnyi ga las bzlog pa'i rnam par mngon par 'du byed cing 'byung ba yin pas thams cad du 'gro ba nyid las mi 'da'o/ /lung yang yod de gsum 'dus pa gang yin pa de ni reg pa'o/ /reg pa dang lhan cig skyes pa ni tshor ba dang sems dang 'du shes yin pas dbang po tha mi dad pa yin la/de las byung ba yid la byed pa yang nye bar gnas par 'gyur ro zhes bya ba la sogs pa yin no/ /yang bye brag tu smra bas 'dun pa la sogs pa kun du 'gro ba gzhan sngar bshad pa gang yin pa de dag ci'i phyir mi 'byung zhe na/ yul nges pa nyid kyis kun du 'gro ba nyid med pa'i phyir ro//de dag gi ltar na 'dun pa ni byed 'dod pa nyid de yul la gtod pa yin na de yang yid la byed pa las mtshan nyid tha dad pa ma yin pas de lta bu yin par mi bzung ngo / /de lta bas na bsams pa'i dngos po la 'dod pa ni 'dun pa yin na/ de yang mi 'dod pa dang bar mar gnas pa'i dmigs pa dag la mi 'byung bas kun du 'gro ba ma yin no//mos pa ni lhag par mos pa ste/ nges pa zhes bya ba'i don to/ /de yang bye brag tu smra ba rnams kyi ltar na the tshom yod pa'i gnas skabs ni the tshom dang mtshungs par ldan pa'i sems la yang 'byung ste/ yul gzhan las ldog pa'i rnam pa can yin par yongs su gzung ba'i phyir ro//de ni mtshan nyid de lta bu ma yin te/ 'du shes kyi byed pa kho nas grags pa'i phyir ro/ /de lta bas na mos pa na mos pa ni the tshom log pa nges pa'i dngos po la de kho na bzhin du nges par 'dzin pa yin te/ de bas na kun du 'gro ba ma yin no/ /ting nge 'dzin yang kha cig ni rtse gcig pa nyid kyi mtshan nyid skad cig ma gcig gnas pa yin par sems so//de ni de lta yin par ma bzung ste/ sems la rang gis skad cig ma gcig gnas pa yod pa'i phyir ro/ /gzhan dag ni sems dang sems las byung ba rnams yul so so la gyes pa yongs su spong bas yul gcig la sdud cing 'jog pa ni ting nge 'dzin yin par sems so//de yang de ltar yin par mi gzung ste/ 'du shes kho nas grags pa'i phyir ro/ /de lta bas na ting nge 'dzin ni brtag par bya ba'i yul kho na skad cig ma gcig dang / gnyis dang gsum la sogs pa'i rgyun 'jug pa nyid kyis sems rtse gcig pa nyid kyi rgyu yin par khas blangs la/de yang brtag par bya ba ma yin pa'i yul la rgyun dang bral ba'i gnas skabs na mi 'byung bas kun du 'gro ba ma yin no/ /dran pa ni bye brag tu smra ba rnams kyi ltar na sems kyi mngon par brjod pa nyid de/ de yang yul gsal bar byed pa'am/ mtshan mar 'dzin pa gcig yin grang na/gnyi ga ltar na yang shes rab dang 'du shes dag gi don grags pa'i phyir de ni yang dag pa ma yin no/ /de bas na dran pa ni yul 'dris pa la de'i rjes su 'gro ba'i sems kyi mngon par brjod pa yin la/ de yang ma 'dris pa la med pas kun du 'gro ba ma yin no/ /de ltar na yang dran pa yang dag byang chub kyi yan lag tu mi 'gyur te/mthong ba'i lam la de bzhin nyid sngon nyams su ma myong ba'i phyir ro zhe na/ de ni nyes pa med de/ skad cig ma dang po la dran pa yang dag byang chub kyi yan lag yod pa ma yin no/ /gnyis la sogs pa la ni yod do/ /de'i tshe ni de bzhin nyid sngar nyams su myong ba nyid do/ / mthong ba'i lam la byang chub kyi yan lag bdun zhes bshad pa ni rgyun las dgongs pa yin gyi/ skad cig ma ni ma yin pas 'gal ba med do/ /yang na sbyor ba'i dus na de bzhin nyid spyi'i rnam pa nyams su myong bas skad cig ma dang po la yang dran pa yang dag byang chub kyi yan lag mi 'gal lo/ /shes rab kyang bye brag tu smra ba rnams kyi ltar na chos rab tu rnam par 'byed pa yin no//rab tu 'byed pa yang gal te yul yongs su gcod pa tsam zhig yin na de ni sems dang sems las byung ba thams cad la mtshungs so/ /de lta bas ni shes rab ni nye bar brtag par bya ba kho na la rigs pa dang rigs pa ma yin pa dang gnyi ga las bzlog pa'i mtshan nyid kyi rab tu rnam par 'byed pa yin te/de bas na shes rab ni kun du 'gro ba ma yin no/ /de nyid kyi phyir mig la sogs pa'i rnam par shes pa'i tshogs nye bar gnas pa las byung ba rnams la shes rab mi srid de/ de dag yongs su rtogs par mi nus pa'i phyir ro//mtshungs pa de ma thag pa yid kyi rnam par shes pas 'phangs pa rnams ni yod do/ /kun du 'gro ba ma yin pa de dag kyang rnam par shes pa gsal ba dang mtshungs par ldan pa'i phyir kun gzhi rnam par shes pa mi gsal ba dang lhan cig mtshungs par mi ldan no/ /'phen par byed pa'i las kyi rnam par smin pa kun gzhi rnam par shes pa ni ma bsgribs la lung du ma bstan pa yin pa'i phyir 'dod chags la sogs pa nyon mongs pa can dang dad pa la sogs dge ba rnams kyang mi srid do//gnyid la sogs pa ma nges pa gzhan bzhi po gang dag yin pa de dag yang mtshungs par mi ldan te/re zhig gnyid na nye ba'i nyon mongs pa'i ngo bo nyid gang yin pa de ni gti mug gi khyad par 'ga' kho na la gdags te/ mi gsal ba'i ngo bo nyid kyis sems mngon par sdud par byed pa'i phyir ro/ /dge ba dang lung du ma bstan pa'i gnas skabs kyi gang yin pa de yang shes rab kyi rdzas ma nges pa gnyi ga'i gnas skabs su 'byung ba la gdags te/ma nges pa nyid kyi phyir dang gsal ba nyid du 'byung ba'i phyir ro/ /'gyod pa yang rtog pa'i rnam par yid la gcags pa 'dren pa'i phyir shes rab kho na la gdags so/ /rtog pa dang dpyod pa dag kyang rtog pa'i rnam par zhugs pa yin pas de dag kyang shes rab kho na la gdags so//shes rab kyang ma rig pa dag ni kun gzhi rnam par shes pa dang mtshungs par ldan pa ma yin te/ nyon mongs pa can ma yin pa'i phyir dang kun du 'gro ba ma yin pa'i phyir ro/ /rtog pa dang dpyod pa dag sems pa la gdags pa de dag kyang thams cad lam yin gyi/tshol zhing so sor rtog pa'i rnam pa can la yin na sems pa de lta bu ni kun gzhi rnam par shes pa dang mtshungs par ldan pa ma yin te/ mi gsal pa'i phyir ro/ /spros pa btang la de dkyus ma kho na brjod par bya ste/ yang na chos rnams kyi kun gzhi ni zhes bya ba 'di la kun gzhi rnam par shes pa ni rnam pa gnyis te/'bras bu'i gnas skabs rnam par smin pa gang yin pa dang / rgyu'i gnas skabs rnam par smin pa gang yin pa ste/ rnam par smin pa'i dbang du mdzad nas/ chos rnams kun gyi kun gzhi ni/ /zhes bya ba gsungs so/ /rnam par ma smin pa'i dbang mdzad nas/ sa bon kun pa'i zhes bya ba gsungs so/ /gnyi ga'i dbang du mdzad nas/ de bas kun gzhi rnam shes te/ /zhes bya ba gsungs so/ /de la dmigs par gyur pa mig la sogs pa dang / gzugs la sogs pa gang dag yin pa de dag ni de'i so sor snang ba'i ngo bo yin pa nyid kyis kun gzhi rnam par shes pa de rten nyid kyis kun gzhi yin no//rang dang mtshungs par ldan pa'i tshor ba la sogs pa dang / rnam par shes pa bdun gyi tshogs rnams kyi ni de la rag las te/ skye ba nyid kyi phyir kun gzhi yin no/ /skye ba can kun nas nyon mongs pa'i chos thams cad 'bras bu'i dngos por der sbyor ba'am zhes bya ba ni/phal che ba'i phyir de skad brjod de/ sems can gyi khams ni phal cher kun nas nyon mongs par 'gyur ro/ /kha cig kun nas nyon mongs par mi 'gyur ba ni mi slob pa rnams dang / byang chub sems dpa' sa brgyad pa la gnas pa la sogs pa rnams te/ de dag gi kun gzhi rnam par shes pa gyur pa de rnam par byang ba'i chos kyi rten du mi 'gyur ba ni ma yin no//gang yang kun nas nyon mongs pa'i gnas skabs na rang bzhin du gnas pa'i rigs dang yang dag par bsgrubs pa de yang rnam par byang ba'i chos kyi rgyu nyid yin yang kun gzhi nyid du ni mi 'dod de/ gnas skabs de na gtso bo ma yin pa'i phyir dang rdzas su med pa'i phyir ro//gang gi phyir kun gzhi zhes bya ba'i tha snyad bye brag med pa'i rgyu'i dngos po tsam la btags par snang ba de'i tshe ni yongs su gyur pa la yang bya ba nyid de/ yongs su mya ngan las 'das pa chen po'i mdo las ji skad du/ kun gzhi rnam par shes pa dang 'jug pa'i rnam par shes pa dag gis longs spyod rdzogs pa'i sku bsdus so zhes byung ba lta bu'o//'dir yang gal te gzhan dag der sbyor ro zhe'am/ de gzhan du sbyor ro zhes byas kyang rung / gnyi ga ltar na yang kun gzhi ni rgyu'i ngo bo kho na yin te/ sgra 'jug pa'i rgyu mtshan nges pa'i tshig gis byas pa tha snyad par zad do//'jug pa'i rnam par nges pa dag dang / lhan cig phan tshun rgyu dang 'bras bu'i ngo bo yin pa ni rkyen rnam par dpyod par 'gyur ro/ /sems can rnams la de'i bdag nyid du sbyor bas zhes bya ba ni gnas pa ste/ sems can rnams ni kun gzhi rnam par shes pa'i ngo bor gnas so//ji ltar zhe na/ bdag nyid du zhes bya ba smos te/ bdag nyid yin pa'i phyir ro/ /de ni sems can rnams kyi bdag nyid yin te/ bdag nyid shin tu dul ba yis/ /zhes 'byung ba'i phyir ro/ /gzhan 'jug pa'i rnam par shes pa la ni bdag ces nye bar mi 'dogs te/skabs skabs su rgyun 'chad pas bdag dang chos mi mthun pa'i phyir ro/ /rnam par gcig tu na sems can rnams de'i bdag nyid du sbyor bas zhes bya ba ni/ nyon mongs pa can gyi yid dang mtshungs par ldan pa'i 'jig tshogs la lta bas dmigs pa yin no/ /rnam pa gang du zhe na/bdag nyid du ste/ bdag gi rnam pa zhes bya ba'i tha tshig go/ /'jug pa'i rnam par shes pa gzhan dang gzhan dag kyang nye bar len pa'i phung po lnga'i khongs su ma gtogs pa ma yin pa'i phyir yid kyi rnam par shes pa dang mtshungs par ldan pa'i 'jig tshogs la lta ba rnam pa nyi shus bdag tu dmigs pa ma yin nam/de dag kyang kun gzhi yin par 'gyur ro zhe na/ phal cher dmigs pa la kun gzhir dgongs pa yin na yid kyi rnam par shes pa dang mtshungs par ldan pa'i 'jig tshogs la lta ba ni phal cher dmigs pa ma yin te/ dus dpag tu yod pa zhig tu kun du 'byung ba'i phyir ro//yang nyon mongs pa can gyi yid kyis kun gzhi rnam par shes pa la ji ltar dmigs she na/ de'i dbang gis bdag gi rnam par skye ba'i sgo nas yin gyi/ rang gi ngo bo 'jog pa'i sgo nas ni ma yin no/ /yang 'dir gang dag 'di skad du mig la sogs pa ni kun gzhi'i ngo bo nyid ma yin te/ dbang po yin pa'i phyir yid kyi dbang po bzhin no zhes zer ba de ni kun gzhi'i ngo bo nyid ma yin pa yid kyi dbang po dang de'i ngo bo nyid yin na srog gi dbang pos ma nges pa yin no//mig la sogs pa ni rnam par shes pa'i ngo bo nyid ma yin te/ rnam par shes pa grags pa'i rten yin pa'i phyir yid kyi dbang po bzhin no zhes kyang brjod par mi nus so//dgongs pa nges par 'grel pa'i mdo las zhes bya ba la dgongs pa ni ldem por dgongs pa'o/ /de la nyan thos rnams kyi dbang du mdzad nas bstan pa gang yin pa de ni de las gzugs la sogs pa brtags pa yin par ldem por dgongs pa ma bkrol lo/ / gang yang shes rab kyi pha rol tu phyin pa rnam pa brgyad bstan pa de yang / 'di ni kun brtags pa dgag pa lhur mdzad pa yin no zhes bya bar ldem por dgongs pa ma bkrol lo/ /'di las ni ldem por dgongs pa bkrol bas na dgongs pa nges par 'grel pa zhes bya'o/ /de la zag pa ni rnam par smin pa gang yin pa ste/'jig rten gyi mkhas pa rnams kyis gting dpag par mi nus pa'i phyir ro/ /phra ba ni sa bon gyi gnas skabs gang yin pa ste/ rdzas su med pas de nyid dang gzhan nyid dag tu brjod par bya ba ma yin pa nyid kyis brtags par dka' ba'i phyir ro/ /rnam pa gcig tu na thos pa las byung ba dang bsams pa las byung ba dang /skyes nas thob pa'i shes pa dag gis mngon sum du ma byas pa'i phyir zab pa'o/ /'jig rten pa'i bsgoms pa las byung ba'i mngon sum ma yin pa'i phyir phra ba'o/ /rnam pa gcig tu na nyan thos dang rang sangs rgyas dang / so so'i skye bo thams cad kyi shes pas yongs su ma shes pa'i phyir zab pa'o//byang chub sems dpa' mos pas spyod pa'i shes pas shes par dka' ba'i phyir phra ba'o/ /sa bon thams cad ces bya ba 'dis ni/ grangs can gyi smra ba sel te/ sa bon rnams dang lhan cig skye ba dang 'gag pa'i tshul gyis sa bon bzung ba byas pa rnam par shes pa de sa bon gyi dngos por 'gyur gyi/gtso bo bzhin du gzhan la mi ltos par sa bon yongs su 'dzin par ni ma yin no/ /rlung gi rgyun shugs drag po chu'i rlabs 'byung ba dang mthun pa ni chu bo'o/ /de bzhin du kun gzhi rnam par shes pa skad cig ma brgyud pa breng chags pa'i rgyun yang rim dang rig car dag tu 'jug pa'i rnam par shes pa bdun gyi rlabs 'byung ba dang mthun pa'i phyir chu bo'o//rnam pa gcig tu na rang gi sde pa kha cig rgyu dang 'bras bu dag de nyid dang gzhan nyid du sems pa de'i gnyen por chu bo bzhin du zhes gsungs pa yin te/ ji ltar klung gi chu bo las de nyid dang gzhan du brjod par bya ba ma yin pa rlabs 'byung ba de bzhin du kun gzhi'i rnam par shes pa'i rgyun gyi rgyun las kyang de nyid dang gzhan nyid du brjod par bya ba ma yin pa sems dang sems las byung ba'i rlabs rnams 'byung ngo //'di ltar rgyu las 'bras bu gzhan nyid du ni brjod par mi nus te/thams cad las thams cad 'byung bar thal par 'gyur du 'ong bas so/ /gzhan ma yin pa nyid kyang ma yin te/ grangs can gyi smra bar thal par 'gyur du 'ong bas so/ /byis pa rnams la zhes bya ba la/ byis pa ni 'dir nyan thos kyi rigs can gang dag de'i dus kyi skal pa med pa kun gzhi rnam par shes pa'i ldem por dgongs pa nges par 'grel pa bstan pa'i don la log par brtags pas ma thob par yongs su nyams pa'i sgo nas rang gi 'bras bu las yongs su nyams par 'gyur pa de dag yin no//dbang po gzugs can thams cad nye bar len par byed pa de nyid ces bya ba 'dis ni/nying mtshams sbyor ba sbrel pa'i 'og rol gyi dbang po gzugs can tshe ji srid pa gang dag yin pa de dag nye bar len pa ston te/ nying mtshams sbyor ba sbrel pa'i skad cig ma nye bar len pa ni mjug thogs kyi tshig gis ston pa'i phyir ro/ /dbang po gzugs can thams cad ni 'dir rten du gyur pa'i 'byung ba chen po dag dang /de dag dang tha mi dad par 'dug pa yul gzugs la sogs pa dang bcas pa la dgongs pa yin no/ /lus thams cad nye bar len pa'i gnas su gyur pa nyid ces bya ba 'dis ni nying mtshams sbyor ba sbrel ba'i skad cig ma ma lus skye ba ril dang 'brel pa mig la sogs pas bsdus pas bon gyi sgo nas dang /lus kyi dbang po rang gi ngo bo'i sgo nas nye bar len pa ston to/ /'di ltar tshe ji srid par rjes su 'jug pa'i bar du des dbang po gzugs can dag ces bya ba la sogs pas ni tshig dang po'i nye bar len pa'i don rnam par 'grel te/ 'jig pa'i gags su bdag gir byas so zhes bya ba'i tha tshig go//yang ji ltar mig la sogs pa bdag gir byas she na/ phan pa dang gnod pa dag gis bde ba dang sdug bsngal la sogs pa'i rten nyid du snang ba'i phyir ro/ /bdag gir ma byas par snang ba gang yin pa de ni ma zin pa yin te/ dper na snod kyi 'jig rten dang /shi ba'i ro la sogs pa lta bu'o/ /dper na rmi lam na yid kyi rnam par shes pa gcig las tha dad pa ma yin yang lus bde ba dang sdug bsngal la sogs pa'i rten du snang ba gang yin pa de ni zin pa'o zhes 'khrul pa'i rgyur grags la/ khang bzangs la sogs par snang ba gang yin pa de ni ma zin pa'o zhes grags pa ltar 'di la yang tshul ni de dang 'dra'o//nying mtshams sbyor ba sbrel pa na yang zhes bya ba la sogs pas ni/ tshig gnyis pa'i nye bar len pa'i don rnam par 'grel te/ nying mtshams sbyor ba sbrel pa skye ba ril dang 'brel pa'i lus kyi sa bon du gtogs pa ste mngon par bsgrubs pa'i sgo nas lus bzung ba yin no zhes bya ba'i don to//yang ci'i phyir bye brag tu nye bar len pa gnyis ston ce na/ rtsod pa'i phyir te/ rang gi sde pa rnams kyi ltar na/ chang dang mtshams sbyor 'dod chags bral/ /nyams dang 'chi 'pho skye ba dang / /yid kyi rnam shes kho nar 'dod/ /ces 'byung bas nying mtshams sbyor ba'i 'og rol tu ni mig la sogs pa'i rnam pa shes pa kho na nye bar len pa po yin par grags la/nying mtshams sbyor ba sbrel pa na ni yid kyi rnam par shes pa nye bar len pa po yin par grags so/ /de gnyi ga yang ji ltar mi srid pa de bzhin du skye ba'i kun nas nyon mongs pa spyod pa nas ston par 'gyur ro/ /de nyid kyi phyir de'i gnyen por bye brag tu nye bar len pa gnyis bstan to//de la dbang po gzugs can thams cad nye bar len par byed pa nyid ni 'dod pa dang gzugs kyi khams dag tu yin par rig par bya'o/ /gzugs med pa'i sems can rnams la yang dbang po gzugs can ni srid na/ ci'i phyir 'dod pa dang gzugs kyi khams dag tu zhes bya ste/'di ltar gzugs med pa'i sems can rnams kyi gzhal med khang dag dang / bcom ldan 'das la yang chos mnyan pa dang lta ba dang / rim gro bya ba'i phyir 'ong bar mdo gzhan dag las 'byung ngo zhe na/ las las skyes pa'i dbang po gzugs can nye bar len par byed pa nyid las bsams te smras pa'i phyir nyes pa med do//gzugs med pa na spyod pa rnams kyi mig la sogs pa ni ting nge 'dzin las skyes pa yin no/ /'on te de lta na go gzugs can gyi khams na yang lha'i mig dang rna ba yang ting nge 'dzin las skyes pa'i phyir ma zin par 'gyur ro/ / de ltar na 'o na ni/ /'dod pa dang gzugs na spyod pa'i dbang po gzugs can las bsams te smras pas nyes pa med de/ de na ni dbang po gzugs can yod pa nyid du rang gi sde pa rnams la grags so/ /nying mtshams sbyor ba sbrel ba na lus thams cad nye bar len pa'i gnas su gyur pa nyid ni khams gsum char na yin par rig par bya ste/rang gi sde pa ni khams gsum char na yang yid kyi rnam par shes pa kho nas nying mtshams sbyor ro zhes bya bar log par rtogs par bya ba'i phyir ro/ /thun mong ma yin pa'i rnam grangs brjod pa rdzogs so// //thun mong gi dbang du mdzad nas/de ni sems zhes kyang bya ste zhes bya ba la sogs pa smos so/ /de la khyad par ni 'di yod de theg pa chen po las ni re 'ga' ni rnam par shes pa brgyad ni tshogs sems dang yid dang rnam par shes pa zhes bya ba'i sgra sbyor la/ res 'ga' ni sems zhes bya ba'i sgra ni gtsor kun gzhi rnam par shes pa kho na la/yid ces bya ba'i sgra ni nyon mongs pa can gyi yid la rnam par shes pa zhes bya ba'i sgra ni rnam par shes pa drug la'o/ /nyan thos kyi theg pa las ni sgra 'di gsum char yang gtsor rnam par shes pa drug kho na la sbyor ro zhes brjod cing 'di rnams kyi nges pa'i tshig dbye ba yang 'di skad du brjod de/sogs pas na sems so/ /rtogs pas ni yid do/ /rnam par shes pas na rnam par shes pa'o/ /yang na dus kyi bye brag yin te ma 'ongs pa ni sems so/ /'das pa ni yid do/ /da ltar byung ba ni rnam par shes pa'o/ /yang na byed pa'i bye brag yin te/ ring du 'gro ba ni sems so/ /sngon du 'gro ba ni yid de chos thams cad ni yid sngon du 'gro ba can no zhes 'byung ba'i phyir ro//nying mtshams sbyor ba'i byed pa'i bye brag gis rnam par shes pa ste/ 'du byed kyi rkyen gyis rnam par shes pa'o zhes 'byung ba'i phyir ro/ /yang na bstan pa'i bye brag yin te/ khams bstan par ni sems te/ sems kyi khams bdun zhes 'byung ba'i phyir ro/ /skye mched bstan par ni yid de yid kyi skye mched ces 'byung ba'i phyir ro/ /phung po bstan par ni rnam par shes pa ste/ rnam par shes pa'i phung po zhes bstan pa'i phyir ro/ /yang na ldan pa ma yin pa'i ming gi bye brag yin no/ /yang na sgra tsam zhig tha dad par zad do zhes zer te/de thams cad ni rung ba ma yin no/ /de la re zhig sogs pas na sems so zhes smras pa gang yin pa/ gal te rang gi nus pa stsogs pa yin na ni sems las byung ba rnams dang gzugs la yang thal par 'gyur ro/ /'on te 'bras bu stsogs pas so zhe na/ las kho na yin par 'gyur te/las kyang kun gzhi rnam par shes pa med par mi sogs so zhes 'chad par 'gyur ro/ /de bzhin du gal te rnam par shes pa gang yin pa de nyid rtogs pa yin no zhes bya na ni sgra tsam zhig tha dad par 'gyur pa 'ba' zhig tu zad kyi rgyu mtshan ni ma yin no/ /'on te gzhan zhig la bya'o zhe na de yang ma bshad do//rnam par shes pas na rnam par shes pa zhes bya ba ni khas len pa nyid do/ /bcom ldan 'das kyis gre skyes kyi mdo las gsungs pa'i phyir ro/ /de bzhin du ma 'ongs pa ni sems so zhes bya ba ji ltar na sems zhes bya/ gal te sems las byung ba'i tshogs bsags nas da ltar gyi dus su 'ong bas so zhe na/de ni rnar mi 'ong ste ma 'ongs pa med pa'i phyir dang byed pa med pa'i phyir ro/ /de bzhin du 'das pa yang ji ltar yid yin/ gal te mtshungs pa de ma thag pa'i rkyen gyi dngos pos 'bras bu 'byin pa dang 'dzin par nus pa'i phyir yin la de yang yang dag pa nyid kho nar khas len na khyim bya shi ba yang skad 'byin par 'gyur bas de ni rnar mi 'ong ste/rnam par shes pa ni da ltar byung ba yin par khas len pa nyid do/ /de bzhin du byed pa'i bye brag la yang thag ring po 'dzin pa'i phyir sems yin na sems las byung ba dag la yang thal bar 'gyur ro/ /yid sngon du 'gro ba zhes bya ba 'di la yang gnas skabs gang na las byed pa de'i sngon rol na dngos su yid ma yin te 'das pa med pa'i phyir ro//nying mtshams sbyor ba yang 'jug pa'i rnam par shes pas mi srid kyi kun gzhi rnam par shes pas ni srid do zhes ston par 'gyur ro/ /de bzhin du sems kyi khams bdun zhes bya ba yang sems kyi sgra snga ma bzhin du brtag mi bzod do//skye mched bstan par yang yid kyi sgra skye mched du mi srid pa'i phyir dang 'das pa yang med pa'i phyir ro/ /de bzhin du phung po bstan par rnam par shes pa zhes bya ba'i sgra 'byung bar brjod de/ phung po la sogs pa ni gang zag gdags pa'i rgyu yin la/ gdags pa'i rgyur yang da ltar gyi rnam par shes pa rung ngo zhes 'don to//de yang 'thad pa ma yin te/ 'das pa la sogs pas tha dad pa la rnam par shes pa'i phung por 'byung ba'i phyir ro/ /gdul ba 'ga' zhig la rnam grangs 'ga' zhig gis yid ches par bya ba'i phyir dang / so so yang dag par rig pa bskyed pa'i phyir ming gi sgra tsam zhig tha dad par khas len pa nyid yin na rnam grangs tha dad pa de nyid rgyu mtshan gang gis yin pa ni ma smras pas de yang rung ba ma yin no//de lta bas na theg pa chen po pa rnams kyi ci lta ba de ltar na bzang ste/ gang gi tshe rnam par shes pa brgyad car gyi tshogs la bya ba de'i tshe ni kun gzhi'i rnam par shes pa ni sogs pas na sems so//nyon mongs pa can gyi yid ni don sems pas na sems so/ /rnam par shes pa drug gi tshogs ni sna tshogs la dmigs pa'i phyir sems so/ /rnam par shes pa'i tshogs brgyad car yang mtshungs pa de ma thag pa'i don tam/rtogs pa'i don gyis gdags pa'i sgo nas yid yin no/ /rnam par shes pa'i tshogs brgyad car yang yul so sor rnam par rig pa'i don gyis rnam par shes pa yin no/ /gang gi tshe gtsor bya ba de'i tshe ni sna tshogs pa'i phyir dang don sems pa'i phyir kun gzhi'i rnam par shes pa kho na sems yin gyi gzhan ni ma yin te/rgyu gsum mi srid pa'i phyir ro/ /dus rtag tu gsal ba'i rnam par rlom pa'i phyir nyon mongs pa can gyi yid kho na yid yin gyi gsal ba'i phyir kun gzhi'i rnam par shes pa yang ma yin la/ rgyun 'chad pa'i phyir rnam par shes pa gzhan dag kyang ma yin no//sna tshogs gsal ba'i rnam pa can yin pa'i phyir 'jug pa'i rnam par shes pa kho na rnam par shes pa yin gyi/ mi gsal pa'i phyir kun gzhi'i rnam par shes pa yang ma yin la sna tshogs can ma yin pa'i phyir nyon mongs pa can gyi yid kyang ma yin no/ /de la gtsor sems la brten na sems zhes kyang bya ste zhes bya ba smos so//khyad par nyid du na yang khungs bcom ldan 'das kyis sems dang yid dang rnam par shes pa zhes ji skad gsungs pa lta bu'o zhes bya ba smos so/ /de la gtsor ni sems kun gzhi'i rnam par shes pa kho na yin par ston par 'gyur ro/ / yid ni khyad par du bstan pa'i phyir/ de la yid ni rnam pa gnyis te zhes bya ba smos so/ /de ma thag pa'i rkyen byed pas gnas su gyur pa'i phyir zhes bya ba ni zhar la spyir yid kun rdzob pa de ston par mdzad pa yin no/ /'dir yang drug po kho na las 'das ma thag pa gang yin pa de gzung gi phan tshun dag tu ni ma yin te/lhan cig kyang 'byung ba'i phyir / /dngos bstan pa'i phyir/ gnyis pa nyon mongs pa can gyi yid ces bya ba smos so/ /nyon mongs pa bzhi po zhes bya ba ni kun gzhi'i rnam par shes pa la bdag nyid du 'dzin pa'i phyir 'jig tshogs la lta ba'o/ /bdag nyid du gzung ba gang yin pa des khengs par 'gyur pa'i phyir nga'o snyam pa'i nga rgyal lo//gang gis khengs par 'gyur ba de la mngon par zhen pa'i phyir bdag la chags pa'o/ /de dag thams cad kyang ma rig pa las 'gyur bas ma rig pa'o/ /de ni rnam par shes pa kun nas nyon mongs pa'i gnas so zhes bya ba ni rnam par shes pa drug car gyi yang zag pa dang bcas pa nyid kyi gnas yin no zhes bya ba'i tha tshig ste/kun nas nyon mongs pa zhes bya ba'i sgra ni zag pa dang bcas pa'i rnam grangs yin pa'i phyir skye ba'i kun nas nyon mongs pa bzhin no/ /de ltar ma yin na ma bsgribs la lung du ma bstan pa'i skye ba ji ltar kun nas nyon mongs pa yin par 'gyur/yid kyi rnam par shes pa la ltos na ni 'chad par 'gyur ba skyed pa'i rkyen nyid kyang yod de/ mtshungs pa de ma thag pa dang / thun mong ma yin pa'i phyir kun nas nyon mongs pa'i gnas nyid dang por bstan to/ /yang nyon mongs pa can gyi yid ji ltar na zag pa dang bcas pa nyid kyi rgyu yin zhe na/de la re zhig gang gi tshe rnam par shes pa drug gi tshogs nyon mongs pa can yin pa de'i tshe ni rang dang mtshungs par ldan pa'i zag pa dag kho na dang lhan cig 'byung ba'i phyir de dag zag pa dang bcas pa nyid du grub na/ gang gi tshe nyon mongs pa can ma yin pa de'i tshe go ji ltar yin/zag pa'i sa bon dang 'brel pa'i gnas las skye ba'i phyir ro zhes brjod par yang mi nus te lam gyi bden pa la yang thal par 'gyur du 'ong bas so/ /nyon mongs pa can gyi yid khas len na ni de dang mtshungs par ldan pa'i zag pa dag kho na dang lhan cig 'byung ba'i phyir zag pa dang bcas pa nyid yin no//de lta na 'o na ni 'gog pa dang 'jig rten las 'das pa'i lam la snyoms par 'jug pa'i gnas skabs na kun gzhi'i rnam par shes pa zag pa dang bcas pa nyid du mi 'gyur te/ de ni de'i tshe nyon mongs pa rnams dang lhan cig mi 'jug go zhe na/de ni ma yin te/ de ni zag pa'i rgyu yin pa'i phyir zag pa dang bcas pa nyid yin no/ /de la nyon mongs pa bzhi dang sngar bstan pa'i kun du 'gro ba lnga dang mtshungs par ldan pa'i phyir 'di'i sems las byung ba ni dgu kho na yin no/ /yul so sor nges pa rnams kyi nang nas re zhig 'dun pa ni mi 'byung ngo //de ni rnam pa gsum ste don du gnyer ba'i 'dun pa dang / 'phrad pa'i 'dun pa dang / mi 'bral ba'i 'dun pa'o/ /re zhig don du gnyer ba'i 'dun pa ni ma yin te/ yid kyi yul ni nye ba'i phyir ro/ /ma bral bar rnam par snang ba'i phyir 'phrad pa'i 'dun pa yang ma yin te 'phrad pa'i 'dun pa ni dngos po thag ring ba'i yul can yin pas so//mi 'bral ba'i 'dun pa yang ma yin te/ de ni bral gyis dogs pas rab tu phye ba yin pa'i phyir la nyon mongs pa can gyi yid la ni de med pa'i phyir ro/ /mos pa yang mi 'byung ste/ nges pa'i bdag nyid kyi mos pa ni the tshom rnam par chad pa sngon du 'gro ba can yin pa'i phyir dang yul nyams su myong ba can yin pa'i phyir la/yid ni ngo bo gcig pa nyid du 'jug pa'i phyir the tshom yang mi srid la da ltar byung ba'i yul can yin pa'i yang phyir ro/ /dran pa yang yul nyams su myong ba can yin pa'i phyir ma yin te/ nyon mongs pa can gyi yid ni skad cig re re la sngon med pa'i rdzas la dmigs pa'i phyir ro/ /ting nge 'dzin yang ma yin no/ /ci'i phyir te 'di ltar brtag par bya ba'i dngos po la sems rtse gcig pa nyid do zhes bshad pa/ 'di la yang brtag par bya ba'i dngos po yang yod la rtse gcig pa nyid kyang yod de kun gzhi'i rnam par shes pa la dmigs pa'i phyir ro zhe na/de ni ma yin te gang la rnam par g.yeng ba yod pa las sems kyis sems mnyam par 'jog pa de la ting nge 'dzin yod na/ nyon mongs pa can gyi yid ni de lta bur mnyam par 'jog pa ma yin te/ 'khor ba ji srid par ngo bo gcig pa nyid du 'jug pa'i phyir ro//yang na dmigs pa'i skad cig ma snga ma nyams su myong ba gang yin pa de nyid la yang dang yang du 'byung ba ni ting nge 'dzin dang mtshungs par ldan pa yin na nyon mongs pa can gyi yid ni de lta bu ma yin te/ skad cig re re zhing sngon med pa'i rdzas la dmigs pa'i phyir ro/ /yang na dbang po gzugs can gyi rnam par shes pa rnams ma gtogs pa mnyam par ma bzhag pa'i sems dang mtshungs par ldan pa'i shes rab gang yang rung ba de thams cad ni mngon par rtogs pa'i rtog pa yin na/de yang nyon mongs pa can gyi yid la yod de/ bdag tu lta ba dang mtshungs par ldan pa'i phyir ro//mngon par rtogs pa'i rnam par rtog pas rnam par rtog pa dang bcas pa'i sems gang yin pa de ni/ ting nge 'dzin dang mtshungs par ldan par rung ste/ de'i byed pa snang ba'i phyir ro/ /shes rab kyang khas blangs dgos pa nyid de bdag tu lta ba dang mtshungs par ldan pa'i phyir ro/ /rtsa ba'i nyon mongs pa bcu po'i nang nas de las gzhan pa'i lta ba rnams dang ni mtshungs par mi ldan te/shes rab gzhan dang mtshungs par mi ldan pa'i phyir ro/ /rnam grangs kyis mtshungs par ldan pa yang ma yin te/ de las rnam par brtags pa nyid kyi lta ba gsum po gang dag yin pa de dag ni mtshungs par mi ldan te yid ni bsgom pas spang bar bya ba yin pa'i phyir ro//bsgom pas spang bar bya ba mthar 'dzin pa dang yang mtshungs par mi ldan te/ bdag tu 'dzin pa sngon du 'gro ba can yin pa'i phyir ro/ /nyon mongs pa can gyi yid ni ngo bo gcig pa yin pa'i phyir bdag nyid du bzung nas rtag pa nyid du 'dzin par nus pa ma yin no//bdag tu lta ba rnam pa gnyis las kyang bdag gi'i rnam pa can de mi srid de/ bdag tu lta ba sngon du 'gro ba can yin pa'i phyir ro/ /zhe sdang ni mi dga' ba'i rnam pa can yin pa'i phyir la/ yid ni dga' ba'i rnam pa can du 'jug pa'i phyir ro//dga' ba'i rnam pa can nyid yin yang sems pa'i tshor ba can ni ma yin te/ gang du skyes pa de'i'o gzhan zhes 'byung ba'i phyir reg pa la sogs pa ji ltar skabs su bab pa dag kho na bsgres pa'i phyir ro/ /'on te tshor ba gzhan yang yod na ni khyad par du byas par 'gyur ro/ / mi rung ba'i yang phyir te/ yid bde ba dang mi ldan te kun brtags pa'i dbang gis 'byung ba'i phyir ro/ /yid ni mngon par rtogs pa'i rnam par rtog pa yod kyang gti mug pa'i rnam pa can gyis yongs su rtog pa ni med do/ /bde ba yang ma yin te/ rtag tu yod pa'i nyes par thal bar 'gyur ba'i phyir ro//'o na btang snyoms pa yin na ji ltar dga' ba'i rnam pa can yin zhe na/ bdag la chags pa dang mtshungs par ldan pa'i phyir ro/ /the tshom yang dngos po gnyis su byed pa'i yul can nyid kyis shes rab kho na la btags pa yin na/ de dang yang mi ldan te/ yid ni rigs gcig pa'i rnam pa can yin pa'i phyir ro//rigs gcig pa'i rnam pa can nyid kyis re zhig ma rig pa dang mtshungs par ldan par mi rung na/ 'dod chags la sogs pa phan tshun du go ji ltar zhe na/ 'dir sde pa'i gsung rab kyi lugs lta bur dgongs pa ni ma yin gyi 'dir ni 'jug pa'i rnam par shes pa rnams la yang 'dod chags la sogs pa mi 'gal ba rnams phan tshun mtshungs par ldan par zhal gyis bzhes so//rtsa ba'i nyon mongs pa 'di dag ni ma rig pa med par nyon mongs pa gzhan dang mtshungs par ldan pa yang ma yin te/ ma rig pa yang rtsa ba'i nyon mongs pa yin pa'i phyir rtsa ba'i nyon mongs pa ma yin pa dang 'dra'o//nye ba'i nyon mongs pa rnams las kyang khro ba dang rnam par 'tshe ba dang / khon du 'dzin pa dang / phrag dog dang / 'tshig pa gang dag yin pa de dag ni mi dga' ba'i rnam par 'jug pa'i phyir dang / kha phyir bltas pa'i phyir mtshungs par mi ldan no//rgyags pa dang sgyu dang g.yo dang 'chab pa dang ser sna dag ni/ 'dod chags dang gti mug gi char gtogs pa nyid yin yang kha phyir bltas pa'i phyir ro/ /ngo tsha med pa dang khrel med pa dag ni gcig tu mi dge ba yin pa'i phyir ro/ /shes bzhin ma yin pa ni kha phyir bltas pa'i phyir ro//rnam par g.yeng ba ni ngar 'dzin cing nga'o snyam pa'i nga rgyal gyi gnas ngan len gyi g.yeng ba yin pa'i phyir mtshungs par ldan no/ /bag med pa ni 'dod chags dang gti mug gi char gtogs pa'i phyir ro/ /rgod pa ni 'dod chags kyi char gtogs pa'i phyir ro//ma dad pa dang le lo dang rmugs pa rnams gti mug gi char gtogs pa'i phyir ro/ /yang na mtshungs par mi ldan pa nyid de 'dod chags la sogs pa ni sngar gsal ba'i rnam par zhugs pa yin la/ de'i rjes la shas kyis bri bar zhugs pa na nye pa'i nyon mongs pa rnams zhes gdags na//yid la ni de lta bu mi srid de/ ngo bo gcig pa nyid du zhugs pa'i phyir ro/ /brjed ngas pa yang ma yin te/ 'dres pa'i dngos po la dmigs pa'i phyir ro/ /gnyid kyang ma yin te gzugs dang gzugs med pa'i khams dang 'gal ba'i phyir ro//'gyod pa yang ma yin te/ mi dga' ba'i rnam pa can yin pa'i phyir ro/ /rtog pa dang dpyod pa dag kyang ma yin te tshol ba dang / so sor rtog pa'i rnam pa can yin pa'i phyir ro/ /yid 'di ni lung sil bu'i mdo las de ni nyon mongs pa rnams las nges par grol par ma gyur mi 'gyur ro zhes bya ba la sogs pa 'byung ba dang /dgongs pa nges par 'grel pa la sogs pa'i mdo las kyang grub po/ /rigs pas kyang bsgrub par mi rig pa ma 'dres pa zhes bya ba la sogs pa smos so/ /ma 'dres pa ni ma rig pa rang dbang can yin gyi/ rtsa ba'i nyon mongs pa gzhan dang mtshungs par mi ldan pas ni ma yin te/khro ba la sogs pa dang mtshungs par ldan pa yang der thal bar 'gyur du 'ong bas so/ /nyon mongs pa dang nye ba'i nyon mongs pa thams cad dang mtshungs par mi ldan pas der thal bar 'gyur ba ma yin te/ de med par thal ba nyid du 'gyur bas so/ /de lta bas na rtsa ba'i nyon mongs pa dang mtshungs par ldan pa dang /de las gzhan pa'i sems dang sems las byung ba'i tshogs las yang rdzas gzhan dang ma 'dres pa'i phyir rang dbang can ni ma 'dres pa yin gyi/ thun mong ma yin pa'i don gyis ni ma yin te/ rnam par shes pa gzhan dang mtshungs par ldan pas/der thal bar 'gyur du 'ong bas so/ /'di ni sde pa dag gi ltar na rnam pa gcig kho na ste/ 'jug pa'i rnam par shes pa dang mtshungs par ldan pa bden pa mthong ba'i gags byed pa yin te/ de ni mthong bas spang par bya ba yin pa'i phyir ro/ /theg pa chen po'i ltar na ni rnam pa gnyis te dus nges par kun du 'byung ba'i phyir/'jug pa'i rnam par shes pa dang mtshungs par ldan pa ni gcig go/ /gnyis pa ni dus thams cad du kun du 'byung ba'i phyir 'chad par 'gyur ba'i sgrub pas rab tu grub pa yin no/ /de ni 'jug pa'i rnam par shes pa rnams la ma yin te/ de rnams ni rgyun 'chad pa'i phyir/yang khyad par du dpyad par bya ste re zhig rnam par shes pa'i tshogs lnga la ni ma yin te/ /gang na mi mthun pa yod pa de na gnyen po yod pa'i phyir ro/ /nyon mongs pa can gyi yid la yang gnyen po med pa'i phyir de med par thal bar 'gyur ba ma yin nam zhe na/ de ni ma yin te 'di ni sgrub pa ma yin gyi 'on kyang 'di ni ma bslabs pa sde pa dag gis khas blangs pa sun 'byin pa yin no/ /gal te pha rol po rnam par shes pa'i tshogs lnga la yang ma 'dres pa yod do zhes smra bar byed na/ de la brjod par bya ste/ rnam par shes pa gang la mthong ba'i lam yod pa de la mi mthun pa'i phyogs yod par khyod kyis khas blangs na rnam par shes pa'i tshogs lnga la ni lam med de de kha phyir bltas pa'i phyir ro//yang na gang la zhes bya ba ni yul dang sbyar ro/ /yul bden pa bzhi'i ngo bo nyid gang la gnyen po yod pa de kho na la de'i dmigs pa nyid du de'i mi mthun pa'i phyogs mthong bas spang bar bya ba yod na/rnam par shes pa'i tshogs lnga ni ma yin te kha phyir bltas pa'i phyir ro/ /rang gi lta bas kyang tshig 'di la 'di ltar drang ste/ gang la zhes bya ba 'di ni yul du gyur pa de gzhan nyid dang sbyar ro/ /de la yang bstan pa'i phyir kun gzhi'i rnam par shes pa la de dang 'brel par ston to//de nyid la nyon mongs pa can gyi rnam par shes pa dang mtshungs par ldan pa'i ma rig pa yang yod de/ kun gzhi'i rnam par shes pa la bdag med par mthong pa'i gags su gyur pa'i phyir ro/ /gnas skabs dang yang sbyar te/ gnas skabs gang na mthong ba'i lam gyi skad cig ma dang po yod pa'i gnas skabs de na srang mda'i mthon dman bzhin du mi mthun pa'i phyogs chos kyi mchog rnams dang lhan cig 'gag pa yin na 'di thams cad ni rnam par shes pa'i tshogs lnga la mi srid de/gcig tu mnyam par ma bzhag pa yin pa'i phyir ro/ /dus thams cad du kun du 'byung ba de nyid kyi rnam par shes pa la yang rung ba ma yin te/gcig la chos gnyis rang dbang can mi srid pa'i phyir re zhig 'dod chags la sogs pa sems las byung ba rang dbang can la ni ma yin no/ /nyon mongs pa can ma yin pa la yang ma yin te/ de dang 'gal ba'i phyir na/ che chung gi rim pas sbyor ba'i lam bsgom pa nyams par 'gyur ba'i yang phyir ro//des na shugs kyis gang la dus thams cad du kun du 'byung ba de yod par 'gyur ba rnam par shes pa gzhan bdun pa khas blang dgos te/ de ni nyon mongs pa can gyi yid yin no/ /de la ni ma rig pa dang rang dbang can yod de de'i stobs kyis de dang mtshungs par ldan pa 'dod chags la sogs pa drangs pa'i phyir ro//'jug pa'i rnam par shes pa rnams la ni/ sngar kun du rmongs pa la de las gzhan pa'i nyon mongs pa 'byung ba'i phyir sngar spyad pa gtso bo yin pa'i phyir de'i 'og tu 'dod chags la sogs pa dang mtshungs pa ldan na res 'ga' rang dbang can ma yin par yang 'gyur ro//lnga po dag dang 'dra ba med pa'i skyon du yang 'gyur te zhes bya ba ni re zhig bye brag tu smra ba rnams kyi ltar rnam par shes pa'i tshogs lnga'i rten ni mig la sogs pa lhan cig skye ba yin no/ /dmigs pa ni gzugs pa la sogs pa'o/ /mtshungs pa de ma thag pa'i rten ni yid 'das pa kho na yin no//yid kyi rnam par shes pa'i rten ni yid 'das pa kho na yin no/ /dmigs pa ni dus gsum dang dus kyis ma bsdus pa yin no/ /gnas brtan pa rnams kyi ltar na rnam par shes pa'i tshogs lnga'i thams cad bye brag tu smra bas bshad pa bzhin no/ / yid kyi rnam par shes pa'i lhan cig skye ba'i rten ni snying gi phyogs kyi bu ga gcig dang gnyis dang gsum dang bzhi nas bu ga dgu'i bar yin no/ /dmigs pa ni snga ma bzhin no / /dge 'dun phal chen sde rnams kyi ltar na yang rnam par shes pa'i tshogs lnga'i rten ni tshul de dang 'dra'o/ /lhan cig skye ba'i rten gzhan ni rtsa ba'i rnam par shes pa yin no//yid kyi rnam par shes pa'i lhan cig skye ba'i rten ni de kho na yin no/ /mtshungs pa de ma thag pa'i rkyen ni snga ma bzhin no/ /sa ston sde rnams kyi ltar na rtsa ba'i rnam par shes pa zhes bya ba'i sgra btang ste 'khor ba ji srid pa'i phung po zhes bya ba'i sgra sbyar bar bya'o//gzhan thams cad ni de kho na dang 'dra'o/ /mdo sde pa rnams kyi ltar na rnam par shes pa'i tshogs lnga la dbang po dang don dag ni snga la/ rnam par shes pa ni 'phyi ste mi gsal bas de dag gi dbang gis skye ba'i phyir ro/ /mtshungs pa de ma thag pa'i rkyen ni snga ma bzhin no//yid kyi rnam par shes pa'i rten ni yid 'das ma thag pa kho na yin no/ /'di ni gsal ba'i phyir skye ba yul gyis byas pa'i nges pa ni med do/ /dmigs pa ni snga ma bzhin no/ /rnam par shes pa'i tshogs drug car gyi yang rgyu'i rkyen ni dbang po gzugs can la yod pa dang /sems la yod pa'i sa bon yin no/ /bdag po'i rkyen ni ma yin te/ bye brag tu smra ba'i srog gi dbang po la sogs pa lta bur de 'gyur ba'i rjes su byed pa med pa'i phyir ro/ /'dir ni rnam par shes pa'i tshogs lnga'i rten dang dmigs pa dag ni bye brag tu smra ba dang 'dra'o//sa bon gyi rten gyi dngos po ni lhan cig skye ba yin no/ /yid kyi rnam par shes pa'i yang dmigs pa ni de dang 'dra'o/ /yid 'das ma thag pa yang snga ma bzhin no/ /bdag po'i rkyen lhan cig skye ba ni nyon mongs pa can gyi yid yin no/ /de la 'dir bye brag tu smra ba rnams la brjod par bya ste/'jug pa'i rnam par shes pa nyid du mtshungs pa las ci'i phyir rnam par shes pa drug pa'i rten 'das ma thag pa kho na yin gyi / rten lhan cig skye ba ni ma yin/ rnam par shes pa drug pa ni rten 'das pa can kho na ma yin te 'jug pa'i rnam par shes pa yin pa'i phyir mig la sogs pa'i rnam par shes pa yin no zhes bya ba'i rjes su dpag pas gnod do//dge 'dun phal chen sde rnams dang sa ston sde rnams kyi ltar na rtsa ba'i rnam par shes pa dang 'khor ba ji srid pa'i phung po zhes bya ba rnam par shes pa drug car gyi tha mi dad pa'i rgyu yin pa de dag la yang brjod par bya ste/yid kyi rnam par shes pa ni rten thun mong can kho na ma yin te/ 'jug pa'i rnam par shes pa yin pa'i phyir de dag bzhin no/ /gang dag gi snying gi phyogs thun mong ma yin par rtog pa de dag gi ltar na yang sems las byung ba'i tshor ba nyid nyams par 'gyur te/ rdul phra rab bsags pa la brten pa'i phyir thams cad lus kyi kho na yin par 'gyur ro//rjes su dpag pas kyang 'gal te 'dod pa dang gzugs kyi khams kyi yid kyi rnam par shes pa'i rten ni gzugs can ma yin te/ yid kyi rnam par shes pa yin pa'i phyir gzugs med pa'i khams na spyod pa'i yid kyi rnam par shes pa bzhin no//mdo sde pa la yang brjod par bya ste/ lhan cig ces bya ba'i sgra de ma thag brjod par byed pa la brten nas/ lhan cig ces bya ba'i sgra de ma thag pa la yang mthong ste/ dper na byams pa zhes bya ba la sogs pa lta bu'o/ /de la yang dmigs kyis bsal ba ni bya dgongs so//ci'i phyir rten lhan cig sgye ba kho na ma yin zhe na/ 'gog pa'i snyoms par 'jug pa la sogs pa las ldang ba'i tshe mtshungs pa de ma thag pa'i rkyen lhan cig skye ba ma yin pa'i phyir ro/ /rang gi gzhung lugs kyis kyang brjod par bya ste/ yid kyi rnam par shes pa ni skye ba'i rten rang gi ming gis nye bar mtshon pa'i skye mched thun mong ma yin pa can yin te/rgol ba la rab tu grags pa'i 'jug pa'i rnam par shes pa'i khongs su gtogs pa'i rnam par shes pa yin pa'i phyir mig gi rnam par shes pa bzhin no/ /de la skye ba'i rten ces bya ba'i sgra ni/kun nas nyon mongs pa'i rten rnam par gcad pa'i phyir te/ de ni drug car la yang khyad par med pa'i phyir ro/ /mdo sde pa la dpe grub par bya ba'i yang phyir te/ lhan cig skye ba'i rten smos na ni/ der snang ba nyid yin par 'gyur ro/ /thun mong ma yin pa smos pa ni/ mtshungs pa de ma thag pa'i rten rnam par dpyad pa'i phyir dang /rtsa ba'i rnam par shes pa la sogs pa rnam par dpyad pa'i yang phyir te/ de ni de dag gis sa bon gyi khyad par med par yang rnam par shes pa'i tshogs drug car gyi yang thun mong gi rten nyid du brtags so/ /rang gi ming gis nye bar mtshon pa zhes smos pa ni gnas brtan pas rab tu brtags pa snying gi phyogs rnam par dpyad pa'i phyir ro//de ni ming gis nye bar mtshon pa med de/ yid kyi rnam par shes pa la yid ces bya ba'i sgrar brjod pa med pa'i phyir ro/ /'on te de nyid yid yin no zhes zer na skye mched ces smos pas de rnam par dpyad do//de nyid skye mched yin no zhes brjod par yang mi nus te/ dge slong yid ni mang gi skye mched de gzugs can ma yin pa bstan du med pa/ thogs pa med pa'o zhes bya ba la sogs pa'i lung gis gnod pa'i phyir ro/ /'jug pa'i rnam par shes pa'i khongs su gtogs pa zhes brjod nas/yang rnam par shes pa zhes brjod pa ni rnam par shes pa'i phung po yin par bstan pas ldan pa ma yin pa rnam par dpyod pa'i phyir ro/ /phyir rgol ba la grags pa dmyal ba'i srung ma la sogs pa'i yid kyi rnam par shes pas ma nges pa yang ma yin te/ gtan tshigs rgol ba la grags pa nyid kyis khyad par du byas pa'i phyir de dang 'dra ba ma yin no//lhan cig skye ba'i rten nyon mongs pa can gyi yid kyi ngo bo nyid la sogs pa mtha' yas pa bsgrub par bya ba dang 'gal ba'i chos 'grub pa dang 'gal ba khams gzhan na gnas pa'i sems can gyi yid kyi rnam par shes pa dang sems can gyi tshogs gsum pas bsdus pa rnams kyis kyang ma nges pa'i phyir ro//de ni khams gzhan du gtogs pas khyad par du byas pas 'grub pa yang ma yin te/ sems can gyi tshogs gsum pas bsdus pa dag kho nas ma nges pa'i phyir ro/ /yang dag par rdzogs pa'i sangs rgyas 'das pa'i yid kyi rnam par shes pa'i phyogs su byas pa'i phyir 'gal ba rang la rten ma grub pa'i phyir ro//zag pa dang bcas pa nyid khyad par du byed na ni/ chos thams cad la reg pa'i phyir sgrub pa sgrub pa'i nyes pa dang ldan no/ /'jig rten las 'das pa'i snyoms par 'jug pa slob pa'i gnas skabs kyi yid kyi rnam par shes pas ma nges pa yang ma yin te/de'i tshe yang yid gyur pa gnas pa'i phyir ro/ /dgongs pa nges par 'grel pa'i mdo las ni/ res 'ga' ni gcig dang ste gang gi tshe yid dang zhes 'byung ba'o/ /res 'ga' ni gnyis dang ste/ yid dang yid kyi rnam par shes pa dang zhes 'byung ba'i phyir ro//gal te yang de'i tshe gyur pa yang yid ma yin pa zhig tu gyur na ni 'di yang yid ma yin par 'gyur la/ 'di skad du res 'ga' ni gcig dang ste gang gi tshe yid kyi rnam par shes pa dang zhes kyang bshad par 'gyur ro/ /gzhan yang brgyal ba la sogs pa la 'jug pa'i rnam par shes pa'i tshogs yul la rag las te skye ba rnams de mi nye ba'i phyir rgyun 'chang ngo zhes bya ba ni rigs na /yid 'khor ba ji srid par rigs gcig pa dang dmigs pa nye ba kun gzhi rnam par shes pa las 'byung ba go ji ltar rgyun 'chad / yid de yang kha cig na re gnas skabs de na zag pa med pa yin te/'di ltar nyon mongs pa can gang yin pa de ni 'phags pa'i lam la snyoms par 'jug pas rgyun kun du mi 'byung bas sa bon gyi gnas skabs par 'jog go zhes zer ro/ /zag pa med pa ni thog ma med pa'i rang gi rigs las bdag med pa mngon sum du byas pa'i 'phags pa'i lam bzhin du kun gzhi rnam par shes pa dang 'byung ngo //yang zag pa med pa las langs pa la zag pa dang bcas pa'i sems pa mngon du gyur pa'i tshe nyon mongs pa can khyad par med pa gang yin pa skye bar 'gyur ro/ /'on te slob pa'i gnas skabs na sa bon bcom pa'i phyir nam yang nyon mongs pa can gyi yid med na ni zag pa med pa kho na 'byung ste/de nyid kyi phyir dgra bcom pa ni bya ba thams cad la spyod pa rab tu zhi ba'o zhes 'byung ngo / /kha cig na re zag pa dang bcas pa ste/ 'di ltar nus pa gnyis dang ldan pa'i phyir ro zhes zer ro//cig car bdag med pa gnyi ga mthong ba'i gags su gyur pa'i ma rig pa gang yin pa de la brten nas thag pa'i srid kyi dbyibs la rtog pa sngon du 'gro ba can gyi sprul du rab tu rtogs pa bzhin du nyon mongs pa can gyi yid dang mtshungs par ldan pa'i lta ba cig car chos dang gang zag tu rab tu rtog par byed pa 'byung ngo //'jig rten las 'das pa'i lam skyes na ni/ 'phags pa nyan thos gang zag la bdag med pa mthong ba'i phyir gang zag tu sgro 'dogs pa med par yid de chos rnams la mi gsal ba dang sgro 'dogs pa'i ngo bo nyid gti mug dang lta ba dang mtshungs par ldan par 'byung ngo //nyon mongs pa can ma yin pa de yang nyan thos kyi 'bras bu la gags mi byed pa'i phyir dang / 'dod pa'i 'bras bu'i rgyu yin pa'i phyir dang / mya ngan las 'das pa thob par byed pa yin pa'i phyir te/ don dam pa ma yin pa'i phyir dge ba ni ma yin no/ / gzhan yang las las skyes pa yin yang spyod lam pa dang sprul pa pa nyid du mi rung ba nyid kyis ma bsgribs la lung du ma bstan pa'i phyir rnam par smin pa las skyes pa nyid du bshad do/ /zag pa rnams dang lhan cig skye ba dang 'gag pas rang gi sa bon yongs su rgyas pa'i sgo nas 'byung ba'i phyir zag pa dang bcas pa yin no//chos nyon mongs pa can ma yin pa la chags pa dang nga rgyal dag dang yang mtshungs par ldan no/ /de nyid kyi phyir 'phags pa nyan thos kha cig la nyon mongs pa las byung ba lta bu'i spyod pa snang ste/ de ni bag chags zhes bya'o/ / 'on te gal te byang chub sems dpa' byang chub tu yongs su bsngo ba 'am nges pa'i rigs can zhig yin par gyur na ni/ gnas skabs de na bdag med pa gnyis mngon sum pa'i zag pa med pa kho na 'byung ngo / /lhan cig 'byung ba'i rten zhes bya ba ni/ bye brag tu smra ba'i phyogs ltar na lhan cig ces bya ba'i sgra cig car yin par bshad par bya'o//mdo sde pa'i phyogs ltar na ni/ /de ma thag pa yin te byams pa dang lhan cig par gyur pa zhes bya ba bzhin no/ /ji ltar cig car ram de ma thag tu yang rung mig la sogs pa'i skye ba'i rten lhan cig skye ba thun mong ma yin pa ltar/yid kyi rnam par shes pa'i yang de dang 'dra'o zhes bya'i tha tshig go/ /nges pa'i tshig med pa'i skyon du yang 'gyur ro zhes bya ba 'di ni sun 'byin pa yin no/ /gzhan gyis nges pa'i tshig yang dag pa nyid du khas blangs pa gang yin pa de ni 'jug pa'i rnam par shes pa rnams la mi rung gi nyon mongs pa can gyi yid la ni rung ste de ni gong du bstan zin to //'du shes med pa dang 'gog pa'i snyoms par 'jug pa zhes bya ba ni/ 'gog pa dang 'du shes med pa'i snyoms par 'jug pa dag go/ /kha cig ni so sor brtags pas 'gog pa'i khyad par gyi rang gi ngo bo sems dang sems las byung ba mi skye ba tsam kho na yin par 'dod do//kha cig ni sems dang ldan pa ma yin pa'o/ /kha cig ni rten gyi sems dang sems las byung ba dang 'gog pa'i gnas skabs dang / 'gag pa na sems dang sems las byung ba 'jug pas drangs pa'i bag chags te/ langs pa yang de dang ldan pa'i phyir/rnam par thar pa brgyad dang ldan pa zhes bya ba snang ba'i phyir ro/ /de la 'du byed kyi phung po'i zhes smos pa'i phyir dang / ldan pa ma yin pa rnams kyang bsal pa'i phyir yongs su rtog pa dang po dang gnyis pa spangs so/ /rtog pa gzhan gnyis las kyang 'gog pa'i snyoms par 'jug pa las 'du shes med pa'i snyoms par 'jug pa sbyor ba la sogs pa'i khyad par yod kyang 'du shes med pa'i snyoms par 'jug pa ni ngar 'dzin pa'i nga'o snyam pa'i nga rgyal dang /bdag la chags pa kun du 'byung ba'i phyir ma zhi ba nyid yin no/ /de gnyis 'phags pa dang 'phags pa ma yin pa'i rgyud kyi khyad par gzhan yang 'dod de/'phags pa rnams kyis g.yang sa bzhin du yongs su spangs pa'i phyir ro/ /snyoms par 'jug pa gnyi ga la sems dang sems las byung ba nye bar zhi ba khyad par med pa'i phyir ji ltar 'dir 'gyur/ de lta bas na nyon mongs pa can gyi yid khas blang dgos te/de 'gags pa'i phyir 'gog pa'i snyoms par 'jug pa zhi ba nyid yin la/ de ma 'gags pa'i phyir 'du shes med pa'i snyoms par 'jug pa dang 'dzin pa dang nga'o snyam pa'i nga rgyal dang / bdag la chags pa kun du 'byung ba'i phyir ma zhi ba nyid yin no//de lta ma yin na 'di gnyis la 'phags pa dang 'phags pa ma yin pa'i rgyud kyis byas pa'i khyad par yod par mi 'gyur ro/ /'du shes med pa par zhes bya ba la sogs pa ni gal te nyon mongs pa can gyi yid med na/ ci'i phyir 'phags pa rnams 'du shes med pa pa nyon mongs pa can ma yin pa mi khom par skye ba'i gnas nyid kyis spong bar mdzad/'jug pa'i rnam par shes pa nye bar zhi ba tsam ni mi khom pa'i gnas ma yin te 'gog pa'i snyoms par 'jug pa bzhin no/ /nyon mongs pa can gyi yid yod na ni ngar 'dzin pa la sogs pa kun du 'byung bas phyin ci log gis yun ring mo zhig tu gnas dgos pas mi khom pa'i gnas nyid du 'gyur ro//dus thams cad du zhes bya ba la sogs pa ni nga sbyin pa sbyin no/ /nga srog chags gsod do/ /nga ri mo 'dri'o zhes ngar 'dzin pa dge ba la sogs pa'i sems mngon du gyur pa'i dus na kun du 'byung bar grags so//ngar 'dzin pa kun du 'byung ba dang / skad cig ma tha dad pa las dus tha dad pa nyid cha phra ba'i phyir 'khrul pas dge ba la sogs pa'i sems dang dus mnyam pa nyid du yongs su bzung bar zad pa ma yin nam zhe na/ ma yin te ngar 'dzin pa ni gdon mi za bar dus thams cad du kun du 'byung ngo zhes bya bar khas blang dgos so//de lta ma yin na ji ltar dge ba dang lung du ma bstan pa dag zag pa dang bcas pa nyid yin/ re zhig rang gi rgyud la yod pa'i zag pa la dmigs pa nyid kyis ni ma yin te/ de'i gnas skabs na de dag 'das pa nyid dang /ma 'ongs pa nyid kyis med pa'i phyir ro/ /med pa ni zag pa rnams rgyas par yang mi 'gyur ro/ /gzhan gyi rgyud la yod pa'i zag pa la dmigs pa nyid kyis kyang ma yin te phyi'i dmigs pa btsal pa'i phyir ro/ /bdag po tsam gyis yin na ni zag pa med pa la thal bar 'gyur ro//yang na zag pa med pa la mi dmigs pa'i phyir rtag tu 'gyur ro/ /de dang rigs mthun pa nyid kyis yin na ni nye bar btags pa'i skyon du 'gyur ro/ /zag pa dang bcas pa'i sa bon dang 'brel pa nyid kyis kyang ma yin te/ lam gyi bden pa la yang thal ba'i nyes par 'gyur pa'i phyir ro/ / nyon mongs pa can gyi yid yod na ni zag pa dang bcas pa lhan cig 'byung ba'i phyir zag pa dang bcas pa nyid du 'grub bo/ /gzhan du na zhes bya ba la sogs pa la bye brag tu smra ba'i phyogs ltar na ngar 'dzin pa bsgribs la lung du ma bstan pa yin pa'i phyir de ji ltar mi dge ba'i sems la kun du 'byung /mdo sde pa'i phyogs dang rang gi phyogs ltar na ngar 'dzin pa dang nga'o snyam pa'i nga rgyal lhan cig skye ba dag bsgribs pa kho na la kun du 'byung ba'i phyir de dag ji ltar mi dge ba'i sems la kun du 'byung ba ma yin nam zhe na/ de ni ma yin te/ mi dge ba ni 'dir dge ba'i mi mthun pa yin no//bsgribs pa yang yin te rnam par smin pa mi 'dod pa can yin par dgongs pa ni ma yin no/ /bye brag tu smra ba'i lta bur ngar 'dzin pa dang nga'o snyam pa'i nga rgyal du grags pa gang yin pa de ni rang gi phyogs ltar na kun brtags pa kho na la yin te/ mi dge ba'i sems kho na la 'byung bas mi dge ba'i sems zhes smos so//lhan cig 'byung bar kun du 'byung ba dang zhes bya ba nyon mongs pa can gyi yid dang mtshungs par ldan pa'i ngar 'dzin pa dang / mtshungs par ldan par kun du 'byung ba la zhes bya ba 'jug pa'i rnam par shes pa dge ba dang mtshungs par ldan pa yin na nyes pa 'di dag du mi 'gyur te/dus thams cad du ngar 'dzin pa kun du 'byung ba med pa'i nyes pa'o/ /gzhan dag ni mtshungs par ldan par kun du mi 'byung ba la zhes bya bar 'dod de / tshig de gnyis ni don rnam pa drug car gyi mjug sdud pa yin no/ /nyon mongs pa can gyi yid yod na ni ngar 'dzin pa la sogs pa 'jug pa'i rnam par shes pa drug dang lhan cig kun du 'byung bar 'gyur gyi de dag dang mtshungs par ldan pa ni ma yin no//lhan cig 'byung bar kun du 'byung ba zhes bshad na mtshungs par ldan par yang 'gyur bas mtshungs par ldan par kun du mi 'byung ba la zhes bya ba smos so//kun du 'byung ba ni skad cig ma tha dad par yang yin pas lhan cig 'byung bar kun du 'byung ba zhes bya ba smos so/ /nyon mongs can gyi yid med na zhes bya ba la sogs pa'i tshigs su bcad pas ni tshigs su bcad pa gnyis bshad pa'i don nyid sdud pa yin no/ /gnyis med ces bya ba ni ma rig pa ma 'dres pa dang /lnga po dang 'dra ba'o/ /gsum po 'gal bar 'gyur zhes bya ba ni snyoms par 'jug pa'i khyad par dag dang / nges pa'i tshig dang / ngar 'dzin pa'i skye ba dang gsum mo/ /ma rig pa ma 'dres pa ni mi brtan pa dang brtan pa ste/ mi brtan pa ni yid kyi rnam par shes pa dang mtshungs par ldan pa kho na yin te/kha nang du bltas pas rang dbang can yin pa'i phyir ro/ /de yang mthong bas spang bar bya ba kho na yin no/ /gang zhig nyon mongs pa can gyi yid sgrub pa'i phyir gong du nye bar bkod pa gang yin pa de ni bstan pa dang bsgom pas spang par bya ba yang yin no//da ni de chos mngon pa'i mdo las gsungs pa'i tshigs su bcad pas ston par byed do/ /theg pa chen po sangs rgyas kyi gsung yin pa nyid du gong du rab tu bsgrubs pa'i phyir sil bu'i mdo'i tshigs su bcad pa/ lhan cig tu ni skye zhing 'gag /ces bya ba la sogs pa ci'i phyir nye bar ma bkod ce na/'di las ma rig pa dngos su ma bstan pa'i phyir ro/ /de la yang dag pa nyid don yin te/ 'phags pa'i bden pa bzhi'i ngo bo nyid yin no/ /de la dmigs par byed pa nyid du sems 'jug pa'o/ /bgegs su rtag gyur pa ni ji srid zag pa dang bcas pa'i sems kun du 'byung ba'i bar du'o//de ni bye brag tu smra ba rnams dang mdo sde pa rnams kyi ltar na res 'ga' mngon du mi 'gyur yang thob pa dang sa bon gyi sgo nas yang dag par mthong ba'i bgegs su gyur pas dus thams cad du kun du 'byung ba yin no zhes bya ste/gang gi phyir mngon sum du gyur pa bzhin du bgegs su gyur pa de'i tshe dus thams cad du 'byung ba yin par khas blang bar bya'o zhe'o/ /thob pa ni re zhig de gsal ba'i phyir dang snga ma dang phyi mar yang khyad par med pa'i phyir bgegs su gyur pa ma yin par yang rigs na/sa bon go ji ltar de 'di ltar de ma nyams pa ni yang dag par mthong ba'i bgegs su gyur pa yin la sdug bsngal la chos shes pa'i bzod pa'i skad cig la nyams pa ni de'i bgegs su gyur pa ma yin no/ /de nyid kyi phyir slob pa la sa bon nyams pa yod pa'i phyir sprin dang bcas pa'i nyin mo gzugs mthong ba bzhin du chos mthong ba yin la mi slob pa'i ni spangs pa'i phyir sprin med pa'i nyin mo gzugs mthong ba bzhin du chos mthong ba yin no//yang na mthong bas spang bar bya ba'i mi shes pa nyid nyon mongs pa can gyi gnas skabs dang dge ba zag pa dang bcas pa dang lung du ma bstan pa'i gnas skabs na mngon du gyur pa dang /sa bon gyi sgo nas yang dag par mthong ba'i gags su gyur pa yin no/ /de 'gags na ni mun pa 'gags na snang ba 'byung ba bzhin du yang dag par mthong ba 'byung ste/ de'i phyir ma rig pa'i khyad par gzhan brtag par mi bya'o zhe na/de ni rigs pa ma yin te gang zhig mi gsal pa'i ngo bo nyid kyi sgrib pa'i bdag nyid yin pa de ni yang dag pa mthong ba'i gags su gyur pa yin no / /mun pa mngon du gyur pa ni sgrib pa'i bdag nyid yin gyi sa bon gyi gnas skabs ni ma yin te phyi'i mun pa dang chos mthun pas so//phyi'i mun pa'i sa bon ni mthong pa'i bgegs byed par grags pa yin no/ /sa bon ni ma nyams pa dang nyams pa rang gi 'bras bu skye ba dang mi skye ba la bya ba byed kyi/ rigs gzhan gyi bgegs byed pa la ni ma yin no/ /skal pa mnyam pa'i rgyu ma bsags pa nyid dang /bsags pa nyid kyis yongs su ma rgyas pa'i phyir dang / yongs su smin pa'i phyir sprin dang bcas pa dang / sprin med pa'i nyin mo gzugs mthong ba bzhin du slob pa dang mi slob pa'i lta ba dag gis chos mthong ba yin gyi sa bon bgegs su gyur pa'i phyir ni ma yin no//'o na ni mi dge ba'i sa bon yongs su ma rgyas pa dang yongs su rgyas pa de nyid las yang dag pa ma mthong ba dang mthong bar 'gyur ro zhe na/ de ni ma yin te mi shes pa kun du 'byung ba'i gnas skabs pa kho na mthong ba'i bgegs byed pa yin no zhes de ni bshad zin to/ / bgegs byed pa med na ni/ dge ba zag pa dang bcas pa'i sems pa chung ngus kyang yang dag par mthong ba'i phyir nyon mongs pa zad par 'gyur ro/ /de lta bas na rtag tu kun du 'byung ba'i mi shes pas khas blang bar bya'o/ /de yang rnam par shes pa gzhan med pa ma yin te/ dge ba dang lung du ma bstan pa'i gnas skabs na de mi srid par thal par 'gyur pa'i phyir ro//de'i phyir nyon mongs pa can gyi yid ni grub pa yin no/ /nyon mongs pa can yin pa'i phyir zhes bya ba la sogs pas nyon mongs pa can nyid kyi yang dag pa mthong ba la sgrib pa'i phyir bsgribs pa ste/gzugs dang gzugs med pa na spyod pa'i nyon mongs pa bzhin du dus thams cad du ldan pa'i phyir ro/ /dus thams cad du ldan pa nyid ni kha nang du bltas pa nyid kyis phra ba'i phyir mi 'gal pas so/ /dge ba dang mi 'gal pa'i phyir lung du ma bstan pa yin te/ dper na gzugs dang gzugs med pa na spyod pa'i nyon mongs pa zhi gnas dang mthun pa lung du ma bstan pa de dang 'dra'o//zhar la 'ongs par rdzogs so// //dkyus ma nyid kyi dbang du mdzad nas sems kyi lus gsum pa zhes bya ba smos te/ bstan pa'i sgo nas gsum pa nyid ma yin gyi 'on kyang bshad pa'i sgo nas yin no//kun gzhi'i rnam par shes pa ma gtogs par zhes bya ba ni/ 'jug pa'i rgyu mtshan thun mong ma yin pa'i dbang du mdzad nas gsungs pa yin no/ /sems zhes bya ba ni rnam par shes pa las gzhan pa'i don rjod par byed pa yin te/ sems dang yid dang rnam par shes pa zhes bya ba'i tshig 'di'i phyogs gcig yin pa'i phyir/dper na bsgrubs pa'i yid ces bya ba dang 'dra'o/ /gtan tshigs de nyid kyi phyir yid kyang don gzhan rjod par byed pa yin te/ rnam par shes pa zhes bya ba bzhin no/ /kun gzhi'i rnam shes pa grub pa de cir dgos she na/de'i phyir sa bon thams cad pa de las yid dang rnam par shes pa 'byung ngo zhes bya ba smos so/ /da ni chos kyi bag chags kyi sa bon bsags pa rnams kyis zhes bya ba la sogs pas rgyu mtshan thun mong ma yin pa de ston to/ /sna tshogs nyid dang sems pa ni thun mong ma yin pa'i phyir nye bar ma bkod de/gang tshe sems zhes bya ba'i sgra sems dang sems las byung ba dang sems dang ldan pa ma yin pa zhes bya ba de lta bu la sogs pa la sbyor ba de'i tshe ni rgyu mtshan thun mong la brten to/ /yang ci'i phyir zhes bya ba ni theg pa chen po'i thun mong ma yin pa'i rnam grangs ston pa yin no//shes bya phra mo bsdu ba'i phyir/ /zhes bya ba ni shes bya ni rnam pa gnyis te/ phra mo dang rags pa'o/ /phra mo ni spyi'i mtshan nyid kyi sgo nas chos la bdag med pa dang / rang gi mtshan nyid kyi sgo nas shes par dka' ba nyid kyis kun gzhi'i rnam par shes pa'o/ / rags pa ni spyi'i mtshan nyid kyi sgo nas gang zag la bdag med pa dang / rang gi mtshan nyid kyi sgo nas gzugs la sogs pa'o/ /de la nyan thos rnams ni spyi'i mtshan nyid dang rang gi mtshan nyid rags pa thos pa dang bsams pa dag gis goms par byas nas go rims bzhin du 'phags pa'i lam dang de'i rjes la thob pa'i shes pas mngon sum du bya bar nus te/de'i phyir de rnams la de kho na bstan to/ /ci'i phyir zhe na/ shes pa ni zhar yin pa'i phyir la mya ngan las 'das pa ni gtso bo yin pa'i phyir ro/ /de nyid shes bya thams cad shes pa la rtogs pa ma yin no zhes bya bas ston te/de bas na de dag ni blo mi gsal pa'i phyir shes bya thams cad shes pas rtogs par bya ba'i phyir zhugs pa ma yin gyi rags pa kho na shes par nus pa de tsam gyis de dag gi rnam par grol ba 'grub pa'o/ /de'i phyir de dag ni zhes bya ba la sogs pas ni don de nyid ston to//byang chub sems dpa' rnams ni zhes bya ba la sogs pa ni med na med pa yin pa'i phyir la thams cad mkhyen pa'i ye shes ni gtso bo yin pa'i phyir ro/ /nus pa yang yod la don du yang gnyer ba'i phyir shes bya thams cad shes pa la gtogs pa yin no/ /de'i phyir 'phags pa'i lam gyis spyi'i mtshan nyid rags pa dang phra mo dang /de'i rjes la thob pa'i ye shes kyis rang gi mtshan nyid rags pa dang phra mo mngon sum du byas nas dgos pa'i gtso bo ma thob par 'khor ba nyid na yongs su rgyu'o/ /de bas na de'i phyir de dag la de bstan te zhes bya ba la sogs pa smos te/ 'di ltar gang kho na thos pa dang bsams pa dag gis yul du byas pa de kho na phyis mngon sum du byed do//nyan thos kyi theg pa dang thun mong ma yin pa'i dbang du mdzad nas/ yang zhes bya ba la sogs pa smos te/ thams cad yod par smra ba rnams kyi yin no/ /kun gzhi la kun du dga' ba zhes bya ba la sogs pa tshig bzhi ni rnam grangs tsam du zad de/dbang po rtul po rnams kyis rtogs par bya ba'i phyir ram/ gdul ba 'ga' zhig rnam grangs 'ga' zhig gis don grags pa rtogs par bya ba'i phyir ram/ gdul ba rnams la so so yang dag par rig pa'i sa bon bskyed pa'i phyir ro//yang na kun gzhi la kun du dga' ba zhes bya ba ni bstan pa yin no/ /lhag ma ni dus kyi khyad par gyis de'i bshad pa yin no/ /'das pa dang da ltar byung ba dang ma 'ongs pa'i yul gyi khyad par gyis go rims bzhin no/ /yang na 'dod pa dang gzugs dang / gzugs med pa'i bye brag gis tshig gsum go rims bzhin du de'i bshad pa yin no//yang na ngan song gi 'gro ba dang lha ma yin gyi 'gro ba dang / lha'i 'gro ba las brtsams nas tshig gsum go rims bzhin du bshad pa yin no/ /go rims bzhin du 'phen par byed pa dang rdzogs par byed pa/ yi dags dang lha'i 'gro bas bsdus pa dag gis mngon par grub pa'i phyir lha ma yin gyi 'gro ba gzhan du rnam par gzhag go//yang na mngal nas skye ba dang sgo nga las skye ba dang drod gsher las skye ba dang / rdzus te skye ba'i skye gnas kyi dbang du mdzad nas tshig bzhi go rims bzhin no/ /yang na 'dod pa na spyod pa dang /gzugs kyi sred pa dang / gzugs med pa'i sred pa dang / 'jigs pa'i sred pa las brtsams nas so/ /yang na phyin ci log bzhi las brtsams nas so/ /nyan 'dod la zhes bya ba la sogs pa tshig bzhi ni/ skyes bu dam pa la brten pa dang / thos pa dang / bsams pa dang /bsgoms pa las byung ba'i shes rab kyi dbang du mdzad nas go rims bzhin no/ /de la skyes bu dam pa la brten pa ni gsum gyi sbyor ba yin no/ /yang na thos pa las byung ba'i shes rab kyi khyad par yin no/ /yang na bsnyen bkur byed pa'i gnas skabs na skyes nas thob pa'i shes rab yin no//chos kyi rjes su mthun pa'i chos zhes bya ba la chos ni bden pa mthong ba'o/ /rjes su mthun pa'i chos ni de'i sbyor ba'i lam mo/ /rnam pa gcig tu na chos ni mi slob pa'i lam mo/ /rjes su mthun pa'i chos ni slob pa'i lam mo/ /rnam pa gcig tu na chos ni don dam pa mya ngan las 'das pa'o//rjes su mthun pa'i chos ni zag pa med pa'i lam thams cad do/ /lung rnams las zhes mang po'i tshig smos pa ni/ /lung mang po las 'byung ba'i phyir ro/ /rtsa ba'i rnam par shes pa zhes bya ba ni yid kyi rnam par shes pa gzhan bstan pa zhig yin no zhes bya ba de ltar rtogs so//de ni kun du rtog pa tsam du zad de yid kyi rnam par shes pa'i rgyud gzhan nyid mi rung ba'i phyir mig gi rnam par shes pa'i rgyud gzhan bzhin no/ /rtsa ba la brten pa'i shing ljon pa bzhin no zhes bya ba ni/ de las gzhan pa'i rnam par shes pa rnams kyi rtsa bar gyur pa'i phyir ro//'khor ba ji srid pa'i zhes bya ba ni ji srid 'tsho'i bar du 'jug ste dper na srog lta bu'o/ /la la ni skad cig tsam ste dper na 'jug pa'i rnam par shes pa lta bu'o/ /kun gzhi'i rnam par shes pa ni mya ngan las 'das pa'i bar du 'jug go//la lar res 'ga' zhes bya ba ni gzugs med pa'i khams dang / 'gog pa la sogs pa'i snyoms par 'jug pa'i gnas skabs na go rims bzhin du gzugs dang sems dag gi rgyud 'chad pa mthong ba'i phyir ro/ /'di la de dag ni ldan pa ma yin pa'i 'du byed kyi khyad par zhig 'khor ba ji srid pa yin pa nyid du rtogs te/ldan pa ma yin pa rnams bsal ba'i phyir de ni rigs pa ma yin no/ /gang shes bya'i gnas zhes bya ba ngo bo nyid bstan pa dang / len pa'i rnam par shes pa la sogs pa zhar la theg pa chen po'i thun mong ma yin pa'i rnam grangs brjod pa dang /nyan thos kyi theg pa dang thun mong gi tshig gsum dang / de ni kun gzhi'i rnam par shes pa ste zhes bya ba thun mong ma yin par bshad par bya ba'i rnam grangs bstan pas ni de mjug sdud pa yin no/ /dang 'khor ba ji srid pa'i phung po nyid ces bya ba la dang zhes bya ba'i sgra ni gong ma rnams bsdu ba'i don to//yang na sde ba gzhan dag 'don pa bsdu ba'i phyir te/ dper na mang pos bkur ba'i sde rnams mig la sogs pa'i rnam par shes pa drug bstan nas rnam par smin pa'i rnam par shes pa ston pa lta bu dang / gnas brtan pa rnams de kho na bzhin du bstan nas/srid pa'i yan lag gi rnam par shes pa ston pa lta bu ste/ de dag kyang rnam par shes pa drug las rigs gzhan du gyur pa'i phyir kun gzhi'i rnam par shes pa yin no/ /lam po che btang ba kho na yin no zhes bya ba ni dper na rgyal po chen po'i gshegs shul long ba rnams kyis mi mthong zhing mi ngan pas bgrod par bya ba ma yin pa de bzhin du kun gzhi'i rnam par shes pa skal ba med pa rnams kyi yul ma yin pa'am/dper na 'khor los sgyur pa'i rgyal po chen po gshegs shul gser gyi bye mas g.yogs pa de dbang thang med pa rnams la mi snang ba ltar 'di yang de dang 'dra'o//brtsad pa'i dbang du mdzad nas 'dir tshig 'bru tha dad do zhes bya ba smos so/ /sngar bshad pa rnam pa drug gi ni ming khyad par yod pa nyid 'ba' zhig tu zad do zhes ston par byed de tshig 'bru ni ming gi rten yin pa'i phyir ro/ /yid dang rnam par shes pa gnyis don tha dad par dmigs pa'i phyir ro zhes bya ba ni de dag gi gzhung lugs nyid kyi 'das pa ni yid de rgyur gyur pa yin pa la da ltar byung ba ni rnam par shes pa ste 'bras bur gyur pa yin no//de lta bas na sems zhes bya ba'i sgra ni rnam par shes pa las don gzhan rjod par byed pa yin te/tshig de dag gi phyogs gcig yin pa'i phyir yid ces bya ba'i sgra bzhin no/ /ma 'ongs pa sems yin par rnam par gzhag pa yang mi nus te/ nges pa'i tshig mi srid pa'i phyir ro/ /yang na don tha dad par dmigs pa'i phyir ro zhes bya ba ni sngar bsgrubs pa'i tshad ma'i lugs kyis de skad du brjod pa yin no//yang kha cig ni zhes bya ba ni btsun pa dbyig bshes so/ /nye bar len pa'i phung po lnga po dag ces bya ba ni/ de'i lta ba la grags pa kun gzhi'i rnam par shes pa la ma gtogs pa gang dag yin pa'o/ /gzhan dag ces bya ba ni sngar btsun pa mi'u thung ste/'dod chags dang bcas pa zhes bya ba ni 'dod chags dang mtshungs par ldan pa'o/ /yang na 'dod chags dang dus mnyam pa ste/ phyogs 'di la na 'dod chags la dmigs par byed pa yang bsdu'o/ /gzhan dag ces bya ba ni btsun pa dbyangs sgrogs te/don de dag gsum char yang 'dod chags kyi rang gir byed pa'i phyir kun gzhi zhes bya'o/ /lung dang zhes bya ba ni/ de las rnam par phye ste bsten pa'i phyir ro/ /rtogs pas zhes bya ba ni spyi'i mtshan nyid rags pa rtogs pa'i phyir dang / de'i rjes la thob pa'i shes pas rang gi mtshan nyid gzugs la sogs pa rags pa kho na rtogs kyi phra mo ni ma yin pas so//nyan thos kyi theg pa rnam par gzhag pa ni shes bya rags pa'i dbang du mdzad pa yin pas de dag gi yongs su rtog pa de yang shes bya rags pa la zhugs pa rnams la rung ba nyid do/ / chos bzang ngo zhes bya ba ni/ nying mtshams sbyor bar byed pa sems can thams cad la khyab par byed pa yin pa'i phyir ro/ /de yang gzhan gyi lta ba la mi srid pa dang / rang gi lta ba la srid pas sgrub par mdzad de/ 'di ltar zhes bya ba la sogs pa ni gzhan gyi lta ba la mi srid par ston pa yin no//bye brag tu smra ba rnams kyi ltar na 'phen par byed pa dang rdzogs par byed pa'i las mi dge ba kho na dmyal ba rnams su lus 'grub pa'i phyir/ /rnam par smin pa las skyes pa'i tshor ba sim pa dang bde ba yang ma yin sdug bsngal yang ma yin pa med de / /mnar med pa la gtogs pa tsha ba dang grang ba dag na ni rlung bsil ba dang dro ba'i reg pas rgyu mthun pa las byung ba'i bde ba yod do//yi dags dang dud 'gro dag na ni/ mi dge ba kho nas 'phangs mod kyi res 'ga' zhig la lar rdzogs par byed pa dge ba yin pas rnam par smin pa las skyes pa bde ba dang bde ba yang ma yin/sdug bsngal yang ma yin pa yod do/ /de lta bas na mnar med pa ni shin tu sdug bsngal ba'i ngan 'gro yin no/ /mdo sde pa gzhan rnams kyi ltar na/ mnar med pa ma gtogs pa dmyal ba dag na yang rgyu mthun pa las byung ba'i bde ba med de/ rlung gi reg pas ni sdug bsngal nye bar zhi ba tsam 'ba' zhig tu zad do//bde ba yang ma yin sdug bsngal yang ma yin pa ni yod mod kyi/ mi dga' ba'i rnam pa can yin pa'i phyir de ni 'dod chags dang mthun pa ma yin no/ /yi dags dang dud 'gro kha cig na yang de dang 'dra'o/ /de lta bas na gnyi ga la grags pa'i nye bar len pa'i phung po de dag la 'dod chags kyi sbyor ba med de/de dag dang 'bral bar 'dod pa'i phyir ro/ /bsam gtan bzhi pa yan chad ces bya ba la sogs pa ni mdo sde pa kha cig ni bsam gtan bzhi pa'i bar la mig la sogs pa'i rnam par shes pa srid pa'i phyir bde ba dang sdug bsngal yod la/srid pa'i rtse mo'i bar la yid kyi rnam par shes pa srid pa'i phyir yid bde ba yod par 'dod do/ /de dag gi lta ba de ni mthar gyis snyoms par 'jug pa bstan pa'i mdo la sogs pa dang 'gal ba'i phyir gong ma la med de zhes bya ba'o/ /de dang ldan pa zhes bya ba ni/bsam gtan bzhi pa la sogs pa dang ldan pa'o/ /'jig tshogs la lta ba zhes bya ba la 'jig tshogs la lta ba ni rnam pa gnyis te/ kun brtags pa dang lhan cig skyes pa'o/ / kun brtags pa gang yin pa de ni slob pa rnams kyi ni spongs pa'i phyir la/ sbyor ba'i lam la gnas pa'i so so'i skye bo rnams kyi ni kun du mi 'byung ba'i phyir mi mthun pa yin no//lhan cig skyes pa ni gnyi ga la kun du 'byung mod kyi bdag med pa la mos pa'i phyir de la chags pa ni ma yin no/ /rang gi lta ba la sred pa'i dbang du mdzad nas/ kun gzhi'i rnam par shes pa la zhes bya ba la sogs pa smos so//nang gi zhes bya ba ni nang du'o/ /rnam par gzhig par 'dod par ni nam yang mi 'gyur ro zhes bya ba ni btang snyoms kyi tshor ba dang mtshungs par ldan pas mi mthun pa med pa'i phyir ro/ /'di ltar sdug bsngal gyi phung po 'di dag rnam grangs med par med kyang ci ma rung snyam du sems kyi /bdag nyid med kyang ci ma rung snyam du ni ma yin te/ bdag tu lta ba'i gnyen po med pa'i phyir dang / nyon mongs pa can gyi yid dang mtshungs par ldan pa'i 'dod chags kyang 'di la sbyor bas so/ /yang ji ltar mi dge ba'i las kyi 'bras bu bde ba yang ma yin na sdug bsngal yang ma yin pa'i tshor ba yang yin zhe na/de ni ma yin te/ 'dir bde ba'i lta ba lta bu ni ma yin no/ /'dir ni bde ba dang yid bde ba ni dge ba'i las kyi rnam par smin pa las skyes pa yin la/ sdug bsngal dang yid mi bde ba ni mi dge ba'i las kyi rnam par smin pa las skyes pa yin no//bde ba yang ma yin sdug bsngal yang ma yin pa ni/ gnyi ga'i rnam par smin pa las skyes pa yin no/ /mi dge ba'i rnam par smin pa las skyes pa gang yin pa de ni/ mi dge ba'i rnam pa can nyid ma yin te/ mi gsal bas de la nyon mongs pa can gyi yid sbyor ba srid do/ /rnam grangs bstan pa rdzogs so// //da ni mtshan nyid rnam par gzhag pa'i skabs la bab po/ /'dir yang dngos po bdun nye bar bkod de/ mtshan nyid dang / bag chags dang / de'i de nyid dang / gzhan nyid dang / phan tshun du rkyen nyid dang / sna tshogs dang sna tshogs ma yin pa nyid dang rten cing 'brel bar 'byung ba dang / rkyen rnam par gzhag pa'o/ /'di thams cad ni mtshan nyid kyi zhar la yin pa'i phyir mtshan nyid du rnam par gzhag go/ /dngos po dang po'i dbang du mdzad nas/ de nas 'di'i mtshan nyid rnam par gzhag pa ji ltar zhes bya ba smos so//mdor bsdu na zhes bya ba ni rgyas par ni rnam par gtan la dbab pa bsdu ba las ji skad 'byung ba bzhin no/ /de la rang gi mtshan nyid ni kha cig na re gang la rgyu sa bon yongs su ma smin pa dang / sa bon yongs su smin pa yod pa de ni gzhan gyi dbang rten cing 'brel par 'byung ba'i sa bon yin te/gzhan gyi dbang de ni 'bras bu yin no zhes zer ro/ /de skye ba'i rgyu mtshan nyid do zhes 'byung ba'i phyir de ni rung ba ma yin te/ ma smin pa ni skye ba'i rgyu mtshan ma yin no/ /kha cig na re gzhan gyi dbang rten cing 'brel par 'byung ba'i rang gi mtshan nyid ni 'bras bu la ltos na sa bon te rgyu yin la/de nyid sgo bar byed pa'i chos la ltos na ni 'bras bu yin no zhes zer ro/ /de yang rigs pa ma yin te/ de skye ba'i rgyu mtshan nyid de zhes 'byung ba'i phyir dang / bag chags la brten nas 'byung ba zhes 'byung ba'i phyir ro//de lta bas na yongs su smin pa dang yongs su ma smin pa dbye ba ma byas par sa bon gyi cha dang rnam par smin pa'i cha bsdus nas rang gi mtshan nyid ces bya ba ste/ rnam smin sa bon thams cad pa/ /zhes 'byung ba'i phyir dang / 'og nas mdor bsdu na kun gzhi'i rnam par shes pa zhes bya ba la sogs pa 'byung ba'i phyir ro//de nyid de la kun gzhi'i rnam par shes pa'i rang gi mtshan nyid ni zhes bya ba la sogs pas ston to/ /bag chags la brten nas zhes bya ba ni 'dir 'byung ba zhes bya ba khong nas dbyung ste/ 'dis ni rnam par smin pa'i cha rten cing 'brel bar 'byung ba bshad do//de skye ba'i rgyu mtshan nyid do zhes bya ba ni/ de nyid kun nas nyon mongs pa'i chos de rnams skye ba'i rgyu mtshan nyid yin pa'o/ /yang ji ltar rgyu mtshan nyid yin zhe na/ sa bon yongs su 'dzin pa dang ldan pas zhes bya ba smos so//'di ni gtso bo la sogs pa rnam par dpyad pa'i phyir te/ 'di ltar sa bon yongs su 'dzin pa dang ldan pa ni skye ba dang ldan pa rnams dang lhan cig skye ba dang 'gag pa dag gis bag chags yongs su 'dzin pa yin no/ /'dis ni sa bon gyi cha bstan to/ /de la kun nas nyon mongs pa thams cad kyi bag chags ni 'di yin te/mngon par brjod pa'i bag chags dang / srid pa'i yan lag gi bag chags dang / 'jig tshogs la lta ba'i bag chags so/ /mngon par brjod pa'i bag chags ni rgyu'i rkyen yin te/ kun gzhi'i rnam par shes pa'i rang gi ngo bo mngon par 'grub pa'i rgyu yin pa'i phyir ro//srid pa'i yan lag gi bag chags ni bdag po'i rkyen yin te/ bde 'gro dang ngan 'gror 'gyur ba'i rgyu yin pa'i phyir ro/ /'jig tshogs la lta ba'i bag chags kyang bdag po'i rkyen yin te/ bdag dang gzhan du 'byed pa'i rgyu yin pa'i phyir ro//de lta ma yin na sems can thams cad gcig nyid du 'gyur ro/ /sa bon gyi cha de nyid rnam par phye nas/ kun nas nyon mongs pa'i chos de dag nyid kyi zhes bya ba la sogs pas rgyu'i mtshan nyid du bstan to/ /rnam par smin pa'i cha yang gang kun gzhi'i rnam par shes pa zhes bya ba la sogs pas 'bras bu nyid du bstan to//bag chags kyi dbang du mdzad nas/ bag chags zhes bya ba 'di ci zhig ces bya ba la sogs pa smos te/ chos mthun pa gang gis na bag chags zhes bya/ bag chags de ni ci yin zhes dri ba gnyis kyi don yin no//bsgo bar bya ba kun gzhi'i rnam par shes pa de sgo bar byed pa'i chos rnams dang lhan cig skye ba dang 'gag par gyur nas sgo bar byed pa'i chos de rnams kyis ma 'ongs pa skye ba'i rgyu mtshan du gyur pa ni bag chags te/ dper na 'jig rten na til rnams me tog dang phrad nas lhan cig skye ba dang 'gag pa la brten nas de dang 'dra ba'i dri 'byung ba'i rgyu mtshan du 'gyur ba lta bu'am/dper na bstan bcos la kun nas nyon mongs pa'i phyogs dang mthun pa 'dod chags la sogs pa dang / rnam par byang ba'i phyogs dang mthun pa mang du thos pas yongs su bsdus pa dran pa dang shes rab la sogs pa dang lhan cig skye ba dang 'gag par 'gyur ba'i sems de dag dang 'dra ba skye ba'i rgyu mtshan du 'gyur ba bag chags yin pa lta bu'o//'dir yang skad cig ma'i bye brag la bsgo bar bya ba dang sgo bar byed pa nyid dgag pa chad par 'gyur ba'i phyir rgyun gyi tshul du kun gzhi'i rnam par shes pa nyid rnam par gzhag la/rang gi tshogs dang mtshungs par ldan pa'i sems la pha rol bag chags khas len du bcug la/ lhan cig 'byung zhing 'gags na zhes brjod do/ /de 'byung ba'i rgyu mtshan nyid ces bya ba ni/dri ba gnyis pa'i lan yin no/ /sgo bar byed pa'i mthun pa nyid kyis bag chags zhes bya bas shugs kyis ni dri ba dang po'i lan yang yin no/ /'di la rnam par rtog pa gsum ste/ kha cig na re bag chags ni sgo bar byed pa la ni mi ltos par chos nyid kyi gnas la 'dod chags la sogs pa la lhan cig skye ba dang 'gag pas ni yongs su gso ba 'ba' zhig tu zad kyi skye ba ni ma yin no zhes zer ro//de ni de ltar yin te/ 'di ltar kun gzhi'i rnam par shes pa dang / 'phags pa'i lam skye ba'i rgyu mtshan nyid ni rang bzhin gyi rigs te/ rgyu'i rkyen nyid du bag chags yin par khas len na/ de dag ni lhan cig skye ba dang 'gag pas rang gi bag chags skyed par mi srid de/ kun gzhi'i rnam par shes pa gnyis phrad pa med pa'i phyir dang 'phags pa'i lam yang 'dris pa ma yin pa'i phyir ro/ /yongs su gso bar byed pa na mi 'dra bar yang 'gyur bas de ni mi 'gal lo//gzhan dag ni til la sogs pa la bag chags sgo bar byed pa la ltos pas mthong nas sgo bar byed pas sngon med pa skye ba dang / sgo bar byed pas sngon bskyed pa yongs su gso bar yang 'dod de nang gi skye mched la dmigs pa'i yid kyi rnam par shes pa de'i khongs su gtogs pa kun gzhi'i rnam par shes pa la yang dmigs par 'dra bas kun gzhi'i rnam par shes pa bskyed par bya ba la bag chags rgyu'i rkyen du gyur pa skyed par yang sems so//'phags pa'i lam gyi rigs kyang zag pa med pa'i lam gyi bdag nyid ma yin gyi/'on kyang rgyud gang la nyon mongs pa dang shes bya'i sgrib pa'i sa bon srab pa'i phyir spang du rung ba de ni byang chub sems dpa'i rigs yin la/ gang la nyon mongs pa'i sgrib pa'i sa bon yod pa de nyid nyan thos dang rang sangs rgyas kyi rigs yin/ gang la gnyi ga'i sa bon che ba'i phyir spang du mi rung ba yod pa de ni rigs med pa yin no/ /'phags pa'i lam gyi skad cig ma dang po la ni rgyu'i rkyen med do/ /rkyen gzhi zhes bya ba ni ji ltar srid par gsungs pa'i phyir ro zhes zer ro/ /gzhan dag na re bag chags ni chos nyid kyis gnas pa yongs su gso bar bya ba dang /sngon med pa bskyed par bya ba yang yin te/ bskyed pa'i bag chags du ma ni lhan cig byed pa'i rgyu nyid kyi chos nyid bag chags kyi bdag po'i rkyen yin la/ chos nyid kyi bag chags gang yin pa dang / sngon med pa bskyed pa pa'i bag chags du ma yang bye brag tu smra ba brtags pa skal ba mnyam pa'i rgyu bzhin du skad cig ma gcig pa'i 'bras bu skye ba'i yang rgyu'i rkyen nyid du sems so//de la rnam par rtog pa dang po la gleng bar bya ste/ 'dod chags la sogs pa ni yongs su gso ba tsam du nye bar gnas pa'i phyir rgyu'i rkyen du mi 'grub ste/dper na 'du byed kyi rkyen gyis rnam par shes pa zhes bya ba 'di la 'du byed rnam par shes pa'i sa bon yongs su gso bar byed pa yin pa'i phyir bdag po'i rkyen nyid yin pa lta bu'o/ /'o na rten cing 'brel par 'byung ba gnyis pa la gang gi rkyen zhes bya zhe na/bdag po'i rkyen to zhes 'byung ba'i yang phyir te/ des na kun gzhi'i rnam par shes pa ji lta ba de bzhin du kun nas nyon mongs pa'i chos rnams kyang rgyu'i rkyen yin no zhes bya ba 'di 'gal lo/ /de ni ma yin te/ rigs mthun pa'i sa bon yongs su gsos pas rgyu'i rkyen nyid yin te/dper na bye brag tu smra ba'i skal ba mnyam pa'i rgyu rdzas gzhan nyid skal ba mnyam pa'i phyir rdzas gzhan gyi yin pa lta bu'o/ /bdag po'i rkyen ni mi 'dra ba'i bag chags yongs su gsos pa'i phyir yin no/ /'on te til la sogs pa la de lta bu ma mthong ba'i phyir ji ltar chos nyid kyi gnas pa'i bag chags su 'gyur zhe na/de ni rigs pa ma yin te/ sgog skya'i rngo la sogs pa la me tog dang phrad kyang de'i dri mi 'dzin pa snang ba'i phyir til la sogs pa la chos nyid kho nas dri 'dzin pa'i nus pa yod do zhes bya bar shes so//gzhan yang sems dang sems las byung ba las ma gtogs pa'i dngos po med pa'i phyir til la sogs pa ni med pa kho na'i/ 'jig rten gyi grags par bag chags kyi rten nyid du grags pas bag chags 'byung ba la sogs pa'i dpe tsam du byas pa 'ba' zhig tu zad na na ji ltar de dang 'dra bar thal bar 'gyur/rnam par rtog pa gnyis pa la yang kha cig gleng ba/ kun gzhi'i rnam par shes pa ni kun gzhi'i rnam par shes pa gzhan dang lhan cig skye ba dang 'gag pa med pa'i phyir de skye ba'i rgyu mtshan gyi bag chags su mi 'gyur ro zhe'o/ / dmigs pa 'dra ba'i yid kyi rnam par shes pas bag chags bskyed do zhes bshad pa ma yin nam zhe na/ de ni rigs pa ma yin te/ dmigs pa ni rnam pa gnyis te/ sems dang sems las byung ba'i ngo bo nyid rdzas dang / gzugs kyi bdag nyid rdzas su med pa'o/ /de la sems dang sems las byung ba la dmigs pa'i yid kyi rnam par shes pa gang yin pa des ni/de dag kho na bskyed par bya ba'i phyir bag chags skyed la/ gzugs la dmigs pa gang yin pa des kyang de kho na bskyed par bya ba'i phyir ro/ /sems tsam nyid kyi lugs kyis ni gnyi ga ltar yang dmigs pa dang rnam pa ma grub pa'i phyir ji ltar na dmigs pa'i sgo nas 'dra bar 'gyur/'on te mngon sum du dmigs pa dang brgyud pa'i sgo nas gzhan du rnam pa gnyis te/ de la mngon sum gyi dmigs pa ni gzung ba'i rnam pa gang yin pa'o/ /brgyud pa'i dmigs pa ni kun gzhi'i rnam par shes pa ste/de'i dbang gis gzung ba'i rnam par snang ba'i phyir ro/ /de bas na brgyud pa'i dmigs pa'i sgo nas rdzas su yod pa la dmigs pa ni ji ltar na dmigs pa'i sgo nas mi 'dra snyam du sems na/ rtog pa 'di la yang gzhan gyi sems dang sems las byung ba'i dbang gis kyang yid kyi rnam par shes pa dmigs pa dang rnam pa yongs su 'dzin par skyed pa'i phyir/des bskyed pa'i bag chags gzhan gyi sems dang sems las byung ba rnams kyi rgyu'i rkyen du 'gyur bas sems can thams cad rgyud gcig pa nyid du thal par 'gyur ro//rgyud de dmigs pa nyid yin na yang dmigs pa dang rnam pa yongs su ma grub pa'i phyir dmigs pa dang rnam pa mi 'dra ba de'i so na 'dug go/ /gang yang rang bzhin gyi rigs nyon mongs pa dang shes bya'i sgrib pa srab pa yin no/ /'phags pa'i lam la rgyu'i rkyen med do zhes smras pa gang yin pa de yang rigs pa ma yin te/rang bzhin du gnas pa'i rigs ni skye mched drug gi khyad par ro zhes 'byung ba'i phyir dang / sde ba thams cad las kyang sems dang sems las byung ba thams cad rkyen bzhis skye bar 'byung ba'i phyir ro/ /rnam par gtan la dbab pa bsdu ba las 'byung ba ni sgrib pa'i sa bon srab pa nyid kyi chos nyid kyi sa bon zag pa med pa yod pa nyid du bstan pa yin no zhes bya bar dgongs pa yongs su brtag par nus so//de nyid dang gzhan nyid kyi le'u yi ge dbang du mdzad nas/ kun gzhi'i rnam par shes pa dang kun nas nyon mongs pa'i chos kyi sa bon de dag ci zhes bya ba la sogs pa smos so//kun nas nyon mongs pa zhes bya ba ni zag pa dang bcas pa'i chos kyi sa bon dag ces bya ba'i tha tshig go/ /zag pa med pa'i sa bon dag kyang yod pa ma yin nam zhe na/ 'di la rnam par rtog pa gnyis pa smra ba rnams na re/so so'i skye bo'i rgyud kyi chos kyi sa bon dag gi dbang du mdzad nas bshad pa yin na/ de dag la ni zag pa med pa'i sa bon yang med do zhes zer ro/ /de ni rigs pa ma yin te/ rnam par rtog pa de spang ba'i phyir ro/ /de lta bas na so so'i skye bo'i rgyud la sa bon gang dag sde pa dag las grags pa de dag gi dbang du mdzad nas bshad pa yin la/sde pa dag las ni zag pa dang bcas pa'i sa bon grags so/ /yang na zag pa med pa'i sa bon 'chad par 'gyur ba kun gzhi ma yin pa zhig bya ba las kun gzhi'i rnam par shes par bsdus pa gang yin pa de'i dbang du mdzad pa de bshad pa yin pas nyes pa med do//so so'i tha dad dam zhes bya ba ni kun gzhi'i rnam par shes pa las rdzas su gzhan pa nyid du gnas pa zhig gam/ gal te de ltar gzhan nyid gcig yin na ni/ gzugs ni bsal ba'i phyir sa bon de dag sems dang sems las byung ba'i ngo bo nyid yin par 'gyur ro//des na rten gcig la yang sems can gyi rgyud mang po zhig tu thal bar 'gyur ro/ /ji ltar skad cig ma gcig la sems dang sems las byung ba mang po zhig 'byung la/ rgyud du ma nyid kyang ma yin pa lta bu ma yin zhe na/'di la ni nyes pa med de/ sems las byung ba rnams la rag las te 'byung ba'i phyir ro/ /'o na ji ltar skad cig ma gcig la 'jug pa'i rnam par shes pa bdun 'byung la/ rgyud du ma nyid kyang ma yin pa lta bu yin no zhe na/ 'di la nyes pa med de/ de dag ni kun gzhi rnam par shes pa gcig la rag las te 'byung ba'i phyir ro//sa bon rnams ni sems dang sems las byung ba'i ngo bo nyid gcig yin na/ kun gzhi'i rnam par shes pa las rang dbang du gnas pa'i phyir rgyud du mar thal pa so na 'dug go/ /'on te kun gzhi rnam par shes pa las sa bon rnams tha mi dad pa zhig du gyur na ni/de ma bsgribs la lung du ma bstan pa'i phyir/ /sa bon rnams kyang ma bsgribs la lung du ma bstan pas ma bsgribs la lung du ma bstan pa'i chos 'byung ba kho nar 'gyur gyi/ ma bsgribs la lung du ma bstan pa las dge ba dang mi dge ba'i chos 'byung bar ni rigs pa ma yin no//de ltar phyogs gnyi ga la yang nyes pa gnyis snang bas/ de la gnas pa de dag dang rdzas su tha dad pa yang ma yin zhes bya ba la sogs pa smos te/ kun gzhi rnam par shes pa las de nyid dang gzhan nyid du brjod par bya ba ma yin pa rnams yin no zhes bya ba'i don to//de lta bur grags pa gzhan yang chud zad lta yod dam zhe na/ smras pa yod de dper na bye brag tu smra ba'i da ltar gyi rdzas la 'bras bu 'dzin pa'i mtshan nyid lta bu'o/ /de ni rdzas las gzhan pa yang ma yin te/ rdzas byed pas stong pa'i phyir da ltar ma yin par thal bar 'gyur du 'ong bas so//gzhan ma yin pa yang ma yin te/ rdzas kyi rang gi mtshan nyid las tha mi dad pa'i phyir 'das pa'i dus na yang byed pa yod pas da ltar nyid du thal bar 'gyur du 'ong bas so/ /yang dper na mdo sde pa'i gzugs med pa'i khams su 'phags pa zag pa med pa'i sems mngon du gyur na/sems de las kun nas nyon mongs pa'i sa bon rnams de nyid du brjod par bya ba yang ma yin te/ de dang 'dra bar zag pa med pa nyid du thal par 'gyur du 'ong bas so/ /gzhan nyid du yang brjod par bya ba ma yin te/ /snga ma bzhin du rgyud du mar thal bar 'gyur du 'ong ba lta bu yin no//de bzhin du grub pa'i mtha' gzhan dag la yang sbyar bar bya'o/ /mod kyi zhes bya ba la sogs pas ni/ don de nyid kyi mjug sdud cing sa bon gyi rang bzhin ngo bo ston to/ /'byung ba'i mthu yi khyad par can/ /zhes bya ba 'dis ni mthu'i khyad par yin pa'i phyir/kun gzhi'i rnam par shes pa'i bdag nyid kyang ma yin no zhes bya ba'i tha tshig go/ /de bzhin du 'byung ba zhes bya ba 'dis ni/ kun gzhi'i rnam par shes pa las gzhan pa yang ma yin te/ kun gzhi'i rnam par shes pa kho na rgyur byas nas ma yin no zhes bya ba'i don to//sa bon thams cad pa zhes bya ba 'dis ni/ de lta bu'i sa bon gyi sa bon thams cad pa zhes bya'o zhes bya bar ston to/ /phan tshun rkyen gyi le'u'i dbang du mdzad nas/ kun gzhi'i rnam par shes pa dang / /zhes bya ba la sogs pa smos te/ 'dir yang kun nas nyon mongs pa zhes smos pa ni snga ma bzhin du bshad par bya'o//mdo sde pa yang 'di la de bzhin du rgol zhing rtog ste/ de'i ltar na rkyen skad cig ma tha dad par rnam par 'jog go/ /de gal te dus mi mnyam pa dag kho na rgyu dang 'bras bu nyid yin no zhes sgrub kyang rung / 'on te dus mnyam pa dag 'gog kyang rung ste / gnyi ga ltar na yang ma nges pa nyid du rab du bstan pa'i phyir/ me lce dang tshig pa dang mdung khyim dag bshad par bya'o/ /de la re zhig tshig pa snga la me lce 'phyi ba ni ma yin te/ 'di ltar tshig pa zhes bya ba ni/ bud shing mes byas pa'i 'gyur ba yin no/ /de lta bas na me lce med par sngar tshig pa med do//de nyid kyi phyir me lce 'phyi ba yang ma yin no/ /de bzhin du me lce snga la tshig pa 'phyi ba yang ma yin te/ 'bar ba bzhin du bud shing 'gyur ba med par thal par 'gyur du 'ong bas so/ /ji ltar na bud shing ma tshig pa kho nar me lce'i rten du 'gyur te/ de lta bas na tshig pa dang me lce dag ni dus mnyam pa nyid do//kun gzhi'i rnam par shes pa ni/ sa bon gyi char bsdus pa dang / rnam par smin pa'i char bsdus pa dang rnam pa gnyis zhes bshad do/ /sa bon yang rnam par rtog pa gsum pa ltar na snying dang skyed pa dang rnam pa gnyis so/ /de la skad cig ma gang kho na las sa bon snying las 'jug pa'i rnam par shes pa skye ba skad cig ma de kho na la kun gzhi'i rnam par shes pa la sa bon gsar skyed de /gsar dang rnying nyid dbye ba ma byas par spyir 'jug pa'i rnam par shes pa'i sa bon yin la 'jug pa'i rnam par shes pa yang sa bon gyi rgyu yin no zhes bya ba'i don 'di dag rab tu grub par bya ba'i phyir dpe dang po'o//rnam par rtog pa dang po ltar na sa bon gang kho na las 'byung ba de nyid yongs su gso'o zhes bya ba'i don 'dir rab tu grub par bya ba'i phyir dngos kho nar dpe dang po'o/ /rnam par smin par bsdus pa gang yin pa de ni 'jug pa'i rnam par shes pa'i yin la/'jug pa'i rnam par shes pa yang rnam par smin pa bsdus pa'i bdag po'i rkyen yin te/ phan tshun rag las te 'byung ba'i phyir bye brag tu smra ba'i tshe la sogs pa phan tshun lta bu'o zhes bya ba'i don 'di rab tu 'grub par bya ba'i phyir mdung khyim gyi dpe'o//ji ltar mdung khyim phan tshun bsten pas mi 'gyel pa de bzhin du/ kun gzhi'i rnam par shes pa dang 'jug pa'i rnam par shes pa dag phan tshun gyi dbang gis mi 'jig go/ /'di yang 'gog pa'i snyoms par 'jug pa la sogs pa la nyon mongs pa can gyi yid kun du 'chad pa'i phyogs la ni/zag pa dang bcas pa'i gnas skabs na zhes bshad par bya'o/ /gzhan du gyur pa'i phyogs la ni spyir zhes bshad par bya'o/ /de ltar rgyu'i rkyen du rnam par gzhag ste zhes bya ba'i gzhung gang yin pa de na sa bon gyi cha dang / 'jug pa'i rnam par shes pa'i dbang du mdzad pa yin no zhes drang bar bya ste/rnam par smin pa'i cha gang yin pa de ni sa bon gyi cha'i rten tsam gyis bdag po'i rkyen yin la sa bon gang yin pa de ni sa bon gyi cha mngon par 'grub pa'i rgyu yin pa'i phyir rgyu'i rkyen yin no/ /sa bon rnam pa gsum zhes bshad pa de la 'jig tshogs la lta ba'i bag chags kyi sa bon gang yin pa de ni dus mnyam pa dang dus mi mnyam pa'i bdag po'i rkyen yin no//srid pa'i yan lag gi bag chags kyi sa bon gang yin pa de ni dus mi mnyam pa kho na'i bdag po'i rkyen yin no/ /spros pa'i bag chags kyi sa bon rgyu'i rkyen ces bya ba bshad pa gang yin pa de ni/kha cig na re dus mnyam pa nyid du gcig gi rgyu nyid du gcig gi rgyu nyid du gcig 'gyur zhes 'byung ba'i phyir/ /dus mnyam pa kho na'i rkyen yin te/ 'bras bu da ltar 'byung ba yin na/ 'das pa ni med pas nam mkha'i me tog bzhin du rgyu nyid du mi 'thad pa'i phyir dang /rgyu da ltar byung ba yin na 'byung bar 'gyur ba ni med pas 'bras bu nyid du mi 'thad pa'i phyir ro zhes zer ro/ /gzhan dag na re rnam par gtan la dbab pa bsdu pa las/ dus mi mnyam pa kho na'i rkyen du 'byung bas rgyu'i rkyen ni srid pa'i yan lag gi sa bon bzhin du dus mi mnyam pa kho na yin no//dus mnyam du gcig gi rgyu nyid du 'gyur zhes bya ba gang yin pa de ni 'di ltar drang ste/ rgyu sa bon ni da ltar byung ba yin la/ 'bras bu 'byung bar 'gyur ba ni ma 'ongs pa yin mod kyi/ 'on kyang rgyud ltar byung ba gang yin pa de nyid 'bras bu ma 'ongs pa yin no//de bzhin du 'jug pa'i rnam par shes pa skyes pa ni sa bon ma 'ongs pa 'bras bu 'byung bar 'gyur ba'i rgyu yin la/ rgyu da ltar byung ba gang yin pa de nyid 'bras bu ma 'ongs pa yin pas dus mnyam pa nyid yin te/ rim pa 'dis na sa bon ni rgyun 'jug pa'i rnam par shes pa'i rgyu yin la/'jug pa'i rnam par shes pa yang rgyun 'jug pas sa bon gyi yin pas gcig gi rgyu nyid du gcig 'gyur bar rig par bya ste/ dpe gnyis la yang de bzhin du sbyar bar bya'o zhes zer ro/ /kha cig na re dus mnyam du gcig gi rgyu nyid du gcig 'gyur zhes 'byung ba'i phyir dang /rnam par gtan la dbab pa bsdu ba las dus mi mnyam pa'i rgyu'i rkyen nyid du 'byung ba'i phyir/ rgyu'i rkyen ni dus mnyam pa dang dus mi mnyam pa gang yin no zhes zer ro/ /yang re zhig rnam par rtog pa dang po la gleng par bya ste/ sa bon dang 'jug pa'i rnam par shes pa dag ni dus mnyam du rgyu'i rkyen nyid du rung ngo //sa bon snga ma ni rgyun 'jug pas sa bon phyi ma'i dus tha dad pa kho na'i rgyu'i rkyen yin no/ /bdag po'i rkyen ni ma yin te/ skal pa mnyam pa mngon par 'grub pa'i rgyu yin pa'i phyir ro/ /mtshungs pa de ma thag pa'i rkyen yang ma yin te/ sems dang sems las byung ba'i ngo bo nyid ma yin pa'i phyir ro//dmigs pa'i rkyen yang ma yin te/ sa bon la dmigs pa med pa'i phyir ro/ /sa bon rgyun 'jug pas mi 'byung ngo zhes brjod par yang mi nus te/ byas pa chud za bar thal par 'gyur pa'i phyir ro/ /rnam par rtog pa gnyis pa yang gzhung yi ge dang mi mthun par bshad pa yin te/gzhung ni sa bon dang kun nas nyon mongs pa'i chos rnams da ltar byung ba'i dus kho nar dus mnyam pa nyid yin la/ de nyid la gcig gi rgyu nyid du gcig 'gyur bar bshad pa yin no/ /de lta bas na rnam par rtog pa gsum pa kho na bzang ste/de la rgyu'i rkyen nyid dus mnyam pa ni sa bon dang 'jug pa'i rnam par shes pa dag go/ /dus mi mnyam pa ni sa bon rgyun 'jug pas sa bon gyi'o/ /dus mnyam du gcig gi rgyu nyid du gcig 'gyur zhes bya ba gang yin pa 'di ni sa bon dang 'jug pa'i rnam par shes pa phan tshun gyi dbang du mdzad nas gsungs pa yin no//gang yang rgyu da ltar byung ba'i yin na 'byung bar 'gyur ba ni med pas 'bras bu nyid du mi 'thad pa'i phyir ro zhes smras pa ni/ don dam pa bsam pa la ni de de ltar yang yin no/ /kun rdzob tu ni rgyu rkyen du rnam par gzhag pa dus mnyam pa dang mi mnyam pa yang ma yin te/sa bon dang myu gu lta bu dang / mar me dang 'od lta bu'o/ /dngos po dang dngos po med pa dag kyang de dang ldan pa'i phyir dang / de la rag las pas te 'jug pa'i phyir de lta bur grags so/ /don 'di nyid mjug bsdu bar ji ltar kun gzhi'i rnam par shes pa zhes bya ba la sogs pa smos so//'di la kha cig na re kun nas nyon mongs pa'i chos ni kun gzhi'i rnam par shes pa dang mtshungs par ldan pa'i reg pa la sogs pa yang gzung ste/ 'di ltar de dag ni rang gi bag chags 'jog pa na kun gzhi'i rnam par shes pa'i rgyu yin la kun gzhi'i rnam par shes pa yang de dag gi bskyed pa'i sa bon yongs su smin pa'i sgo nas de dag bskyed par bya ba de dag gi yang rgyu yin no zhes zer ro//gzhan dag na re de dang mtshungs par ldan pa rnams ni gzung ste/ 'di ltar rnam par smin pa nyid kyis lung du ma bstan pas mi gsal pa'i phyir bag chags skyed mi nus kyi/las kyi 'phen pa'i dbang kho nas 'byung ngo / /byung ba rnams kyang rgyu mthun pa'i 'bras bu bskyed pa'i phyir bag chags mi 'jog ste/ 'di ltar las kyi 'phen pa kho nas ma shi'i bar du 'byung ngo zhes zer ro/ /rgyu'i rkyen gzhan mi dmigs pa'i phyir ro zhes bya ba ni sems dang sems las byung ba la ma gtogs pa gzugs can dang ldan pa ma yin te /'di ltar gnyi ga yang rdzas nyid du mi rung ba'i phyir sems dang sems las byung ba'i gnas skabs dag la gdags so/ /de'i phyir gtsor ni sems dang sems las byung ba rnams kho na phan tshun rgyu'i rkyen yin la/de'i sgo nas ni kha cig gzugs can rnams kyang sa bon skyed pa'i rim gyis rgyu'i rkyen nyid du khas len to/ /gzhan dag ni brtags pa ni med pa dang 'dra'o snyam du khas mi len to/ /yang na rgyu'i rkyen gzhan mi dmigs pa'i phyir ro zhes bya ba ni sde pa gzhan dag gis kun brtags pa rgyu zhes bya ba rgyu lnga nyid ces bya ba 'di'o//ji ltar mi dmigs she na/ re zhig lhan cig 'byung ba dang mtshungs par ldan pa'i rgyu dag ni phan tshun rigs mi mthun pa'i phyir ro/ /gal te dus tha mi dad pa nyid la rigs mi mthun pa rnams med na mi 'byung ba'i phyir rgyu'i rkyen nyid yin na ni/bdag po'i rkyen tha dad pa med par 'gyur te/ des na mig la sogs pa yang de dag gi rnam par shes pa rnams kyi rgyu'i rkyen nyid du 'gyur ro/ /de lta bas na rgyu'i rkyen ni rigs mthun pa'i 'bras bu mngon par 'grub pa la ltos pa yin no//de yang sa bon dang rdzas kyi sgo nas rnam pa gnyis la re zhig sa bon gyi sgo nas ni ma yin no/ /lhan cig 'byung ba dang mtshungs par ldan pa rnams rang skye bar bya ba'i phyir phan tshun sa bon 'jog pa ni med de/ gzugs can rnams dang ldan pa ma yin pa rnams gsal ba'i phyir dang /'jug pa'i rnam par shes pa la sa bon 'jog pa 'gog pa'i phyir dang / gzhan yang khas mi len pa'i phyir ro/ /gzhan ni lhan cig 'byung ba dang mtshungs par ldan pa rnams rang gi sa bon las 'byung zhing rang gi sa bon 'jog pas lhan cig 'byung ba dang mtshungs par ldan pa'i rgyu zhes so zhes khas mi len to //rdzas kyi sgo nas kyang ma yin te/ lhan cig 'byung ba dang mtshungs par ldan pa rnams ni phan tshun rigs tha dad pa'i phyir snga ma bzhin no/ /skal pa mnyam pa dang kun du 'gro ba'i rgyu dag rgyu'i rkyen nyid du 'gyur na/rdzas 'dra ba dang sa bon 'dra ba'i sgo nas rnam pa gnyis shig tu gyur grang na/ re zhig rdzas 'dra ba ni ma yin te/ 'das nas ring zhig lon pa rnams la skyes bu'i byed pa med pa'i phyir dang / skal pa mnyam pa dang / kun du 'gro ba 'gags ma thag pa yang rgyu'i rkyen du rung ba ma yin te/mtshungs pa de ma thag pa'i rkyen gyis 'phangs pa'i phyir ro/ /sa bon med par ni dngos po rnams kyi rang gi mngon par 'grub par yang rung ba ma yin no/ /'gags ma thag pa'i skad cig ma nyid sa bon gyi rten kyang ma yin te/ 'jug pa'i rnam par shes pa dag la sa bon 'jog pa 'gog pa'i phyir ro//sa bon ni 'bras bu mngon par 'grub par bya ba la nye ba yin na/ de yang kun gzhi'i rnam par shes pa kho na la srid pas de kho na rgyu'i rkyen nyid yin no/ /de ltar na gzhan gyi lta ba la skal pa mnyam pa dang kun du 'gro ba'i rgyu dag sa bon gyi sgo nas kyang rkyen nyid du mi rung ngo //rnam par smin pa'i rgyu yang rang gi ngo bo'i sgo nas ni/ 'das nas ring zhig lon pa nyid kyis med pa'i phyir ro/ /sa bon gyi sgo nas kyang rigs mi mthun pa nyid kyis bdag po'i rkyen gyis 'phangs pa'i phyir rgyu'i rkyen nyid du mi rung ngo / /yang na rgyu'i rkyen gzhan zhes bya ba ni dus tha dad pa ste/re zhig sems dang sems las byung ba 'gags ma thag pa dag ni rgyu'i rkyen ma yin te/ mtshungs pa de ma thag pa'i rkyen gyis 'phangs pa'i phyir dang / sa bon gyi rten ma yin pa'i phyir ro/ /gang gi tshe kun gzhi'i rnam par shes pa de'i tshe yang skad cig ma snga mas bsdus pa'i sa bon ni rnam par shes pa phyi ma'i rkyen ma yin te/nas kyi sa bon dang myu gu la sogs pa bzhin no/ /'di ltar gang na rgyu zhig nas 'bras bu yin pa de ni/ rgyu gang dang 'bras bu dag snga phyi nyid du 'gyur la/ gang la rgyu'i byed rgyu ma zhig par 'bras bu yin pa de ni rgyu dang 'bras bu dag dus tha mi dad pa kho na ste/dper na ut+pala'i rtsa ba la sogs pa lta bu'o/ /sa bon kun gzhi'i rnam par shes pa ma 'gags par yang 'bras bu rnam par shes pa zhes bya ba yin no/ /de lta bas na sa bon kun gzhi'i rnam par shes pa ni 'bras bu dang dus mnyam pa kho nar rgyu'i rkyen yin te/'bras bu dang mi 'gal ba'i phyir ut+pala'i rtsa ba la sogs pa bzhin no/ /ji ltar mi 'gal zhe na/ de'i gags byed pa ma yin pa'i phyir ro/ /kun gzhi'i sa bon gyi rgyu nyid ni 'jug pa'i rnam par shes pa ma yin te/ de'i rgyun yin pa'i phyir skad cig snga mas bsdus pa'i sa bon ni sa bon phyi ma'i rgyu'i rkyen du 'gyur ro//'o na de ltar na rgyu'i rkyen gzhan mi dmigs pa'i phyir ro zhes bya ba 'di 'gal bar 'gyur ro zhe na/ 'di ni 'jug pa'i rnam par shes pa'i dbang du mdzad nas gsungs pa yin pas mi 'gal lo/ / sna tshogs dang sna tshogs ma yin pa'i le'u'i dbang du mdzad nas/ bag chags tha dad pa ma yin zhing zhes bya ba la sogs pa smos so/ /ji ltar na bag chags ni kun gzhi'i rnam par shes pa rgyur byas nas 'jug pa'i phyir tha dad pa ma yin zhing / dge ba dang mi dge ba nyid du mi dmigs pa'i phyir sna tshogs ma yin la/de las byung ba'i chos rnams phan tshun rang gi mtshan nyid tha dad pa'i phyir dang / dge ba dang mi dge ba la sogs pa ngo bor mngon pa'i phyir tha dad pa dang / sna tshogs pa yin/ 'di skad du nas kyi sa bon sna tshogs ma yin pa las sA lu dang nas dang gro la sogs pa tha dad cing sna tshogs pa dag skye ba ni ma mthong ngo zhes ston to//dper na tshi gu rtsi sna tshogs kyis zhes bya ba la sogs pa la/ tshi gu rtsi ni tshon gyi khyad par bye brag mi mngon pa zhig go/ /yang na tshi gu rtsi ni tha gus bcing pa'i khyad par bye brag mi mngon pa yin no//de bzhin du sgo bar byed pa sna tshogs kyis bskyed pa'i bag chags sna tshogs kyang bag chags kyi dus na sna tshogs su mi mngon no/ /'bras bu 'grub pa nyid tshon gyi snod de der bcug pa'o/ /rkyen nyid du rnam par gzhag pa'i phyir gos lta bu ni kun gzhi'i rnam par shes pa yin te/tshon lta bu'i chos sna tshogs ston pa'i phyir ro/ /rten cing 'brel par 'byung ba'i le'u'i dbang du mdzad nas/ 'di ni theg pa chen po la zhes bya ba la sogs pa smos te/ phra ba ni so so'i skye bo rnams kyis shes par dka' ba'i phyir ro/ /mchog tu zab pa ni nyan thos dang rang sangs rgyas kyis gting dpogs par dka' ba'i phyir ro//yang na phra ba ni nyan thos la sogs pas shes par dka' ba'i phyir ro/ /mchog tu zab pa ni mos pas spyod pa spyod pa'i byang chub sems dpas gting dpogs par dka' ba'i phyir ro/ /yang na phra ba ni mnyam par ma bzhag pas shes par dka' ba'i phyir ro//mchog tu zab pa'i mnyam par bzhag pa'i shes pas kyang gting dpogs par dka' ba'i phyir ro/ /gang gi phyir de ltar kun gzhi'i rnam par shes pa la brten nas chos sna tshogs 'byung ba shes par dka' zhing gting dpogs par dka' ba de'i phyir 'di ni theg pa chen po kho na las bstan to//nye bar spyod pa can gyi rten cing 'brel par 'byung ba ngo bo nyid rnam par 'byed pa can gyi nang du bsdus nas mdor bsdu na zhes bya ba smos so/ /de la ngo bo nyid rnams rnam par 'byed par nus pa'ang der dgos pa ni/ ngo bo nyid rnam par 'byed pa can no//de bzhin du sdug pa dang mi sdug pa'i 'gro ba rnam par 'byed par nus pa'ang der dgos pa ni sdug pa dang mi sdug pa'i 'gro ba rnam par 'byed pa can no/ /ngo bo nyid sna tshogs rnam par dbye ba'i phyir rkyen gyis dngos por gyur pa'i phyir ro zhes bya ba ni 'di las 'byung bas na rten cing 'brel par 'byung ba'o zhes bya ba'i phyir te/de yang spros pa'i bag chags kyi ngo bo nyid do/ /bde 'gro dang ngan 'gro dag tu zhes bya ba la/ bde 'gro dang ngan 'gro ni ming dang gzugs la sogs pa tshor ba la thug pa rnams dang skye ba la sogs pa ste/ de la las dang nyon mongs pa'i ngo bo nyid kyi yan lag rnams rkyen du gyur pas na sdug pa dang mi sdug pa'i 'gro ba rnam par 'byed pa can nyid yin no//yang na bde 'gro dang ngan 'gro ni yan lag bcu gnyis nyid yin te/ yan lag snga ma snga ma la brten nas/ yan lag phyi ma phyi ma 'byung ba'i phyir ro//rim pa 'dis ni yan lag bcu gnyis po nyid bde 'gro dang ngan 'gro dag tu rgyu nyid du 'gyur ro/ /de la rten cing 'brel bar 'byung ba dang po ni phra ba'i phyir dang zab pa'i phyir theg pa chen po kho na las bstan te kun gzhi rnam par shes pa de las bstan pa'i phyir ro//gnyis pa ni kun gzhi'i rnam par shes pa rnam par ma phye ba'i phyir de ltar zab pa ma yin pas nyan thos kyi theg pa las kyang bstan to/ /de dag la la la zhig gis glang po che zhes bya ba ni kun gzhi'i rnam par shes pa ji ltar sngon sangs rgyas kyis bstan pa de bzhin du/de bzhin gshegs pa rnams kyis mu stegs can dag la bstan pa na'o/ /kha cig gis ni glang po che'i sna la zhes bya ba ni dper na kun gzhi'i rnam par shes pa de nyid la mu stegs can de nyid kyi sa bon thams cad pa la sogs pa'i dngos por thos pa lta bu'o//kha cig na re zhes bya ba ni dper na mu stegs can de dag nyid kyis nus pa bsags pa tsam du dmigs nas log par rang bzhin la sogs pa rgyu nyid du rtog par byed pa lta bu'o/ /sa bon thams cad pa zhes bya ba 'dir sa bon zhes bshad pas de'i zhar la sa bon bye brag tu shes par bya ba'i phyir phyi dang nang dang zhes bya ba la sogs pa smos te/phyi'i sa bon sA lu dang ut+pala'i rtsa ba la sogs pa'i'o/ /nang gi kun gzhi'i rnam par shes pas bsdus pa'o/ /mi gsal ba gnyis zhes bya ba ni dge ba dang mi dge ba gnyis sam kun nas nyon mongs pa dang rnam par byang ba gnyis mi gsal zhing yongs su mi gsal ba ste/lung du ma bstan pa zhes bya ba'i tha tshig go/ /kha cig ni gnyis su zhes 'don te sa bon ni dge ba dang mi dge ba gnyis su spyad na'am/ kun nas nyon mongs pa'am rnam par byang ba gnyis su dpyad na mi gsal te lung du ma bstan to zhes bya ba'i don to//de la phyi'i sa bon ni lung du bstan pa ste lung du ma bstan pa nyid kyis mi gsal ba yin no/ /nang gi yang dge ba la sogs pa'i ngo bor mi dmigs pa'i phyir mi gsal ba yin no/ /yang na phyi'i sa bon ni lung du ma bstan pa'i phyir ro//nang gi yang chung zad cig mi gsal te nang gi dge ba dang mi dge ba'i chos kyis skyed pa gang yin pa de ni dge ba dang mi dge ba yin pa'i phyir ro/ /gnyis dang kun rdzob ces bya ba ni phyi'i ste tha snyad pa'i shes pa'i yul yin pa'i phyir yongs su ma grub pa yin no//dam pa'i don ni nang gi ste/ brtag bzod pa gnyis kyis yongs su grub pa'i phyir ro/ /skad cig pa dang zhes bya ba la sogs pas ni sa bon rnam pa drug ston to/ /de la rtag pa las 'bras bu mi dmigs pa'i phyir phyi dang nang gi sa bon gnyi ga skad cig ma yin no//nang gi 'bras bu dang lhan cig 'byung ngo zhes sngar bsgrubs zin to/ /phyi'i yang chung zad cig lhan cig 'byung bar grags te dper na ut+pala'i rtsa ba dang chu shel dang sgron ma dang grib ma dang myu gu la sogs pa lta bu'o/ /yang na phyi'i sa bon thams cad kyang 'bras bu dang lhan cig 'byung ba yin no//sa bon dang myu gu la sogs pa gang la rgyu dang 'bras bu'i dngos por dus mi mnyam pa'i ngo bor grags pa der yang myu gu'i gnas skabs na sa bon sA lu'i 'bru'i rgyun 'jug pas 'byung ngo / /de ni de lta yin te 'di ltar myu gu la sogs pa'i rgyun gyi mthar thug pa'i dus su yang 'bras bu mngon par 'grub pas so //rgyun gyis 'jug pas 'byung ba de yang myu gu la sogs pa med na mi 'byung ba'i phyir mtshungs par ldan pa'i rgyu bzhin du rgyu yang yin la/ lhan cig 'byung ba yang yin te mi 'gal lo/ /phyi'i sa bon ni 'gal ba'i rgyu dang ma phrad kyi bar du rjes su 'jug pa tsam gyis rgyun chags su 'byung ba yin no//nang gi yang srid pa'i yan lag gi bag chags kyi sa bon ni rnam par smin pa'i 'bras bu ma byung gi bar du'o/ /'jig tshogs la lta ba'i sa bon dang nyon mongs pa can gyi spros pa'i bag chags kyi sa bon ni gnyen po ma byung gi bar du'o//dge ba dang lung du ma bstan pa'i spros pa'i bag chags kyi sa bon yang nyan thos dang rang sangs rgyas dag gi yongs su mya ngan las ma 'das kyi bar du'o/ /de bzhin gshegs pa'i ni rdo rje lta bu'i bar du rgyun 'jug pa tsam gyis rgyun chags su 'byung ngo //de lta bas na 'dis ni sa bon lhan cig 'byung ba yin yang glog bzhin du skad cig ma gcig gam gnyis sam gsum du gnas pa ni ma yin no zhes ston par byed do/ /gal te rgyun chags su 'byung na thams cad las thams cad ci ste mi 'byung zhe na/ nges dang zhes bya bas lan 'debs te 'bras bu 'ga' kho na la rgyu la la nges so zhes bya ba'i don to//nges kyang ci'i phyir dus thams cad du 'bras bu mi 'byung zhe na/ rkyen la ltos pa dang zhes bya bas lan 'debs te/ rkyen rtag tu nye ba ma yin pas nyes pa ma yin no/ /'o na sa bon de'i sa bon gang yin zhe na/de'i phyir rang gi 'bras bus bsgrubs pa'o zhes bya ba smos te/ sa bon dang sa bon can dag thog ma med pa'i phyir 'di'i 'bras bu gang yin pa de nyid sa bon no/ /'dis ni gtso bo la sogs pa sa bon nyid yin pa sel te/ ji skad bshad pa'i sa bon gyi chos dang mi ldan pa'i phyir ro//sa bon dang sa bon can gyi dngos po ni 'dir bsgo bar bya ba dang sgo bar byed pa la ltos pa yin par bzhed pas brtan zhes bya ba la sogs pas bsgo bar bya ba dpyod par byed do/ /de la brtan pa ni mi 'gyur ba ste/ til la sogs pa bzhin du rgyu rgyun chags su 'byung ba yin gyi rlung bzhin du g.yo ba ni ma yin no//rlung ni 'brel pas dri 'dzin pa kho nar zad kyi rang gi ngo bos dri 'byung bar bya ba'i phyir bag chags 'dzin pa ni ma yin no/ /sgra bzhin du chad pa yang ma yin no/ /brtan pa yang gang zhig lung du ma bstan pa dri mnyam pa yin gyi sgog skya dang tsan dan la sogs pa lta bu dri mi zhim pa dang zhim pa ni ma yin no//sgo bya ba zhes bya ba ni yan lag mnyen pa'i phyir bsgo bar 'os pa'am bsgo bar nus pa gang yin pa de bsgo bar bya ba yin/ yan lag sra ba'i phyir rdo la sogs pa ni ma yin no/ /bsgo bar bya ba yang sgo bar byed pa dang 'brel pa gang yin pa de la sgo bar byed kyi ma 'brel pa so so na gnas pa la ni ma yin no//de bzhin du kun gzhi'i rnam par shes pa kho na brtan pa'i phyir bsgo bar bya ba yin gyi gzugs ni ma yin te/ gzugs med pa'i gnas skabs na 'chad pa'i phyir ro//'o na ni kun gzhi'i rnam par shes pa yang phung po med pa'i mya ngan las 'das par 'chad pa'i phyir bsgo bar bya ba ma yin par 'gyur ro zhe na/ de ni ma yin te/ 'di ni dus ji srid du sgo bar byed pa yod pa'i dus de srid du bsgo bar bya ba rgyun chags su 'byung ba'i bstan pa la dgongs pa yin no//gzugs med pa'i khams na ni sgo bar byed pa yod kyang bsgo bar bya ba gzugs med do/ /de bzhin du lung du ma bstan pa'i phyir kun gzhi'i rnam par shes pa kho na yin gyi 'jug pa'i rnam par shes pa ni ma yin te/ de'i rgyun ni bar chad dang bcas pa dang bar chad med par dge ba dang mi dge ba kun du spyod pa nyid du shes che bas gcig tu ma bstan pa ma yin pa'i phyir ro//yang me long lta bu'i ye shes la sgo bar byed dam 'on te sgo bar mi byed/ gal te sgo bar byed na ni sngon gyi de bzhin gshegs pa dus mi thung bar bag chags can dag pas da ltar gyi de bzhin gshegs pa rnams bag chags nyung ba nyid kyis mthu dman par yang thal par 'gyur la/dge ba bsgo bar bya bar yang thal par 'gyur te/ sangs rgyas kyi chos rnams ni gcig tu dge ba'i phyir ro/ /'on te sgo bar mi byed na ni ji ltar skad cig ma'i rgyun gyi so sor rtog pa'i ye shes la sogs pa 'byung bar 'gyur ro zhe na/sgo bar mi byed do zhes bya ba 'di kho na bzang ngo / /so sor rtog pa'i ye shes la sogs pa 'byung ba ni sngon gyi sa bon gyi rgyun rdo rje lta bu'i dus nyid na cig car yongs su rgyas pa las yin gyi sngon med pa las ni ma yin no//de bzhin gshegs pa las gzhan pa rnams kyi ni bag chags med par nyon mongs pa can dang nyon mongs pa can ma yin pa'i chos rnams khyad par can du 'byung bar mi 'gyur bas gdon mi za bar bsgo bar bya ba yin par khas blang dgos so/ / de bzhin du mi rtag pa'i phyir kun gzhi'i rnam par shes pa kho na las bsgo bar 'os pa'am bsgo bar nus kyi/ brtan pa'i phyir nam mkha' dang so sor brtags pa'i 'gog pa dag la ni ma yin no/ /rang gi rgyud du gtogs pa'i kun gzhi'i rnam par shes pa sgo bar byed pa rnams dang lhan cig skye ba dang 'brel pa yin gyi 'das pa dang ma 'ongs pa dang /rgyud gzhan du gtogs pa yang ma yin pa 'di yang 'dir bsgo bar bya ba'i mtshan nyid du brjod par bya la/ rten bsgo bar bya ba yin gyi brten pa reg pa la sogs pa ni ma yin no/ /sde pa la ma grags pa'i phyir de skad du ma bstan te/sde pa la ni kun gzhi'i rnam par shes pa dang mtshungs par ldan pa'i reg pa la sogs pa ma grags so/ /bsgo bar bya ba'i mtshan nyid 'di ni gzhan la grags pa'i bsgo bar bya ba dgag pas rnam par gzhag pa yin te/ dgag pa rgyas par ni 'chad par 'gyur ro//de ni bag chags kyi mtshan nyid do zhes bya ba ni bag chags ni bsgo bar bya ba'i chos yin pas bsgo bar bya ba'i mtshan nyid gang yin pa de yang bag chags kyi yin pa'i phyir ro/ /mdo sde pa gang dag rnam par shes pa'i tshogs lnga dang dbang po rten dang bcas pa'i gzugs bsgo bar bya ba yin par sems pa de dag gi dgag pa 'chad par 'gyur ro//gang dag rnam par shes pa'i tshogs drug kho na bsgo bar bya ba yin gyi gzugs ni ma yin no zhes bya bar sems pa de dag gi dgag pa ni lung du ma bstan pa ma yin pa'i phyir zhes bya bar bshad zin mod kyi/de'i zhar la drug po dag la zhes bya ba la sogs pas dgag pa gzhan brtsam mo/ /de la kha cig na re 'jug pa'i rnam par shes pa drug po dag ni phan tshun bag chags 'jog pa ma yin te/ gzhan khas len pa nyid kyis lhan cig skye ba dang 'gag pa'i mtshan nyid kyis 'brel pa med pa'i phyir ro//yang gzhan gyi ji ltar de ltar khas blangs she na/ tha dad gsum dang 'gal pa'i phyir/ /'di ltar gsum po rten dang dmigs pa dang yid la byed pa dag ni rnam par shes pa'i tshogs drug la so so tha dad par mthong ste/ gal te cig car skye bar gyur na de dang 'gal bar 'gyur ro zhes zer ro//de ni rigs pa ma yin te/ dbang po la sogs pa tha dad pa nyid ma yin yang cig car skye bar ma mthong ba'i phyir dang / gang dang zla ba la lta ba la sogs pa la srog chags rnams kyi dbang po la sogs pa tha dad kyang cig car skye ba mthong ba'i phyir ro//de lta bas na gzhan du rnam par bya ste/ 'jug pa'i rnam par shes pa drug po dag ni 'brel pa med pa'i phyir phan tshun bsgo bar bya ba ma yin no/ /re zhig gzugs can ma yin pa'i phyir phrad pa'i 'brel pa ni med do/ /dus mnyam du skye ba tsam gyis 'brel pa yang ma yin te/rgyud gzhan la yang bag chags 'jog par thal par 'gyur pa'i phyir ro/ /mtshungs pa de ma thag pa'i rkyen gcig gis byas pa'i 'brel pa yang ma yin te/ de ni go 'byed pa tsam la nye bar sbyor gyi/ 'bras bu rnams phan tshun sbyor ba la ni ma yin no/ /gang gi tshe 'jug pa'i rnam par shes pa drug car gyi mjug thogs su 'jug pa'i rnam par shes pa drug car cig car rim gyis skye ba de'i tshe mtshungs pa de ma thag pa'i rkyen cig med pa'i yang phyir ro//rten dang dmigs pa dang yid la byed pa gcig skye bas 'brel pa yang ma yin te/ tha dad gsum 'gal ba'i phyir/ 'jug pa'i rnam par shes pa drug gi rten dang dmigs pa dang / yid la byed pa ni so sor tha dad par mthong ste de lta yin na 'gal bar 'gyur ro/ /'jug pa'i rnam par shes pa drug po 'di ni rten la sogs pa tha dad pa'i phyir phan tshun 'brel pa med pa yin te/rgyud gzhan bzhin no zhes gzhan la rjes su dpag pas gnod pa yin no/ /sems can gcig gi rgyud du gtogs pa nyid kyis 'brel pa yang ma yin te/ rten pa la sogs pa tha dad pa nyid kyis sems can gcig gi rgyud du gtogs pa nyid bsgrub par dka' ba'i phyir ro//'jug pa'i rnam par shes pa dang / kun gzhi'i rnam par shes pa dag ni mdung khyim bzhin gcig la gcig rten pa'i phyir 'brel pa yin no/ /gal te rten gcig pa nyid kyis 'brel pa'i phyir mig gi rnam par shes pa snga ma ni mig gi rnam par shes pa phyi ma'i sgo bar byed pa yin no zhe na/de'i phyir skad cig lhan cig med pa'i phyir zhes bya ba smos so/ /'di dag ni bsgo bar bya ba dang sgo bar byed pa nyid ma yin te/ dus tha dad pa'i phyir dus tha dad pa'i til dang me tog bzhin no/ /gal te yang snga ma dang phyi ma dag rgyun gcig pa nyid kyis rigs gcig pa'i phyir bsgo bar bya ba sgo bar byed pa yin no zhe na/de'i phyir/ rigs la bya na gzhan du thal/ /zhes bya ba smos te/ gzugs can gyi dbang po yang rigs gcig pa'i phyir gzugs can gyi dang po skad cig ma snga ma bsgo bar bya ba nyid du 'gyur ro/ /des na sems kyi rgyud kho na bsgo bar bya ba yin no zhes brjod par mi bya'o//gang gi phyir de ltar dpyad na kun gzhi'i rnam par shes pa las gzhan pa ni bsgo bar bya bar rung ba ma yin pas/ de las gzhan pa la sgo bar mi byed pa'i phyir phyi dang nang gi zhes bya ba la sogs pa smos so/ /phyi dang nang gi sa bon de gnyi ga yang skyed par byed pa dang 'phen par byed pa yin te/phyi'i sa bon ni myu gu'i mngon sum du skyed par byed pa yin no/ /sdong bu la sogs pa brgyud pa sbyang na 'dug pa'i bar gyi ni 'phen par byed pa yin no/ /nang gi sa bon kun gzhi'i rnam par shes pa yang ming dang gzugs kyi ni mngon sum du skyed par byed pa yin no//brgyud pa rga shi'i bar gyi ni 'phen par byed pa yin no/ /re zhig skyed par byed pa ni yin la reg na yang 'phen par byed pa go ji ltar yin zhe na/ ma btab shi ba 'phen pa'i phyir/ /zhes bya ba smos te/ gal te skyed par byed pa kho na yin gyi 'phen par byed pa ma yin par gyur na/nas la sogs pa'i sa bon sbyang la sogs pa na 'dug pa ma btab pa rnams kyi rgyun dus ring por 'brel par mi 'gyur ro/ /ma btab pa zhes smos pa ni btab pa ni chu la sogs pas bsgyur pa'i phyir de 'phangs pa ma yin pas so//shi ba'i lus rnams kyi rgyun yang rjes su 'jug par mi 'gyur ro/ /'o na ci zhe na shi ma thag tu 'jig par 'gyur ro/ /gal te yang sa bon ma btab pa dang shi ba'i ro rang gi rgyun kho nas 'jug gi 'phen par byed pa'i dbang gis ni ma yin no zhe na/ rang gi ngang gis mthar 'jig bzhin//zhes bya ba smos te/ 'di ltar phyi'i rkyen la ltos par snying po dang snum zad pa'i mar me 'jig pa'i tshul du rang gi ngang gis mthar yongs su 'gyur bas 'jig pa mthong ngo / /des na gdon mi za bar 'phen par byed pa zad de de'i phyir de 'du byed kyi rgyun gzhan rgyun chags par mi 'gyur ro zhes bya bar rjes su dpag go//de ltar phyi dang nang gi sa bon dag 'dra ba nyid du bstan nas/ phyi rol sa bon ma bsgos pa'am zhes bya ba la sogs pas mi 'dra ba nyid brjod do/ /'am zhes bya ba'i sgras ni bsgos pa yang yin pas te/bsgos pa'i sa bon nyid ni ma tu lung ga'i sa bon rgya skyegs kyi khu bas bskus pa rnams so/ /ma bsgos pa'i sa bon nyid ni nas kyi sa bon la sogs pa'o/ /nang ni 'dod pa ma yin te/ gal te sngon med pa skyed pa ste/ ji skad du rnam par rtog pa gnyis pa las brjod pa lta bu yang rung gal te chos nyid kyis gnas pa'i sa bon yongs su gsos pa yang rung ste/rnam pa thams cad du bsgos pa sa bon nyid yin na phyi rol gyi ni de lta yang ma yin no/ /nang la sogs pa rang dang mthun pa'i 'bras bu bskyed pa'i phyir chu la sogs pas yongs su gsos shing nus pa bzhag pa yang sa bon gyi khyad par yongs su gsos pa zhes ni bya'o//gzhan dag ni phyi rol sa bon ma btab pa'am zhes bya bar 'don te/ ma btab pa'i sa bon nyid ni dper na til dang ut+pala'i rtsa ba dang dUr ba la sogs pa la go rims bzhin du sol ba dang / ba lang gi lci ba dang /lug bal la sogs pa'i lta bu ste/ sol ba la sogs pa la til la sogs pa'i sa bon btab pa ni ma yin no/ /btab pa'i sa bon nyid ni nas la sogs pa'i'o/ /phyi'i sa bon 'di ni rnam par btags pa'i yin te/ nang gi chos nyid kyis gnas pa'i phyir ro//sngon med pa bzhag pas sa bon btab pa nyid yin na / sol ba la sogs pa la ni de ltar btab pa yang ma yin te/ grags pa med pa'i phyir ro/ /nang gi ni bsgos pa kho na'am btab pa kho na sa bon nyid yin zhe na bshad pa/ thos sogs bag chags med na ni/ de 'bras te/'bras bu mang du thos pa dang / mngon par shes pa la sogs pa ma mthong ba'i phyir ro/ /gzhan yang gal te ma bsgos par til dang ut+pala'i rtsa ba la sogs pa bzhin du/ glo bur du 'bras bu 'byung bar 'gyur na ni gtong ba can dbul por 'gyur la/ser sna can yang dbang phyug nyid du 'gyur te/ des na byas dang ma byas 'jig dang 'phrad / /nyes par 'gyur phyir grub pa'i mtha' dang 'gal bar 'gyur ro/ /byas pa sbyin pa'i sa bon 'jig pa'i phyir dang / ma byas pa dbul po nyid dang phrad cing 'byung bar 'gyur ba'i phyir ro//gal te phyi'i sa bon kun gzhi'i rnam par shes pa las tha dad pa yin na/ sngar kun gzhi'i rnam par shes pa ni sa bon thams cad pa nyid do zhes bshad pa la ji ltar gnod par mi 'gyur ba zhe na/ nang ni phyi rol rkyen yin te/ /zhes bya ba la sogs pas lan 'debs te/'di ltar sA lu la sogs pa'i sa bon de dag la nye bar spyod par byed pa'i srog chags rnams kyi las kyi bag chags kyi sa bon kun gzhi'i rnam par shes pa la yod pa dag gis de dag tu snang ba nyid du bsgrubs pa yin no/ /de bas na de las tha dad pa ma yin no/ /thun mong dang thun mong ma yin pa'i rten cing 'brel par 'byung ba'i zhar la 'ongs pa sa bon rdzogs so// //thun mong ma yin pa'i rten cing 'brel par 'byung ba'i khongs su gtogs pa nye bar spyod pa can gyi rten cing 'brel par 'byung ba gang yin pa de bstan par yang zhes bya ba smos so/ /'jug pa'i rnam par shes pa zhes bya ba ni 'jug pa'i rnam par shes pa drug po dag yin te/yang rnam par shes pa drug po dag ces 'byung ba'i phyir ro/ /ci'i phyir drug po kho na yin zhe na 'di ltar lus dang 'gro ba thams cad du yul 'dod pa dang mi 'dod pa dang phrad na nye bar spyod pa gtso bor bde ba dang sdug bsngal ba dang btang snyoms gsal ba yin pas so//kun gzhi'i rnam par shes pa la ni mi srid de mi gsal ba'i phyir ro/ /nyon mongs pa can gyi yid kyang gsal ba yin mod kyi / de ni gtsor lta ba gtso bor gyur pa yin gyi tshor ba ni ma yin no/ /de lta bas na nye bar spyod pa ni gtsor tshor bas rab tu phye ba yin pa'i phyir 'jug pa'i rnam par shes pa drug kho na nye bar spyod pa can yin no//ji skad gsungs pa lta bu'o/ /zhes bya ba ni nye bar spyod pa can nyid kyi khungs so/ /gcig ni rkyen gyi rnam par shes/ /zhes bya ba ni kun gzhi'i rnam par shes pa 'bras bu nyid kyang yin mod kyi sa bon gyi rten nyid kyis ni chos rnams kyi rang gi ngo bo'i rgyu yin pa'i phyir rkyen gyis rab tu phye ba yin pa la rkyen gyi rnam par shes pa zhes bya'o//'jug pa'i rnam par shes pa ni nye bar spyod pas rab tu phye ba yin pa'i phyir nye bar spyod pa can zhes bya'o/ /nye bar spyod pa ni gtsor 'jug pa'i rnam par shes pa dang mtshungs par ldan pa kho na'i tshor ba yin no//de la mtshan mar 'dzin pa ni yongs gcod do/ /nye bar spyod pa de la 'jug par byed pa ni de dag las gzhan pa'i 'du byed rnams te gtsor 'jug pa'i rnam par shes pa dang mtshungs par ldan pa'i sems las byung ba rnams yin no//de lta bas na 'dis ni phyi'i dngos po med kyang srog chags rnams kyi nye bar spyod pa 'byung ba srid par ston to/ /sngar gcig gi rkyen gcig yin par bshad pa de lung gis bstan par chos mngon pa'i mdo las tshigs su bcad pa zhes bya ba smos so/ /rkyen gyi rnam par shes pa zhes bshad pas gzhan rnams ni rkyen ma yin pa nyid du dogs pa de bsal ba'i phyir dang /zhar la 'og nas 'byung ba'i rkyen bstan pa'i phyir yang 'dir bkod do/ /chos kun rnam par shes pa la sbyor zhes bya ba ni/ rnam par gtan la dbab pa bsdu ba las ji skad du kun gzhi rnam par shes pa ni 'jug pa'i rnam par shes pa gnyis kyi rkyen byed de/sa bon gyi ngo bo dang / rten sbyin pa'i sgo nas so/ /de la sa bon gyi sgo nas ni 'jug pa'i rnam par shes pa dang dge ba dang mi dge ba dang lung du ma bstan pa gang chung zad 'byung ba de thams cad ni kun gzhi'i rnam par shes pa'i sa bon can yin pa'o//de la rten sbyin pa'i sgo nas ni kun gzhi'i rnam par shes pas zin pa'i gzugs can gyi dbang po rnams la brten nas rnam par shes pa'i tshogs lnga 'byung bar 'gyur gyi ma zin pa dag la ma yin pa dang / mig la sogs pa'i rten bzhin du kun gzhi'i rnam par shes pa yod na rnam par shes pa'i tshogs lnga dang /yid dang yid kyi rnam par shes pa 'byung bar 'gyur gyi/ /med na ma yin pa'o/ /de la 'jug pa'i rnam par shes pa ni kun gzhi'i rnam par shes pa la rnam pa gnyis kyis rkyen byed de mthong ba'i chos la sa bon yongs su gso ba dang tshe phyi ma la de mngon par grub par bya ba'i phyir sa bon yongs su 'dzin pa 'jog pa'i sgo nas so//de'i phyir mthong ba'i chos la sa bon yongs su rgyas na ji lta ji ltar kun gzhi'i rnam par shes pa la brten pa'i 'jug pa'i rnam par shes pa dge ba dang mi dge ba lung ma bstan pa 'byung ba de lta de ltar rang gi rten la lhan cig 'byung ba dang 'gag pas sgo bar byed do//rgyu dang rkyen des na 'jug pa'i rnam par shes pa phyi ma rnams dge ba la sogs pa'i ngo bor ches rgyas pa dang ches sbyangs pa dang ches gsal bar 'byung bar 'gyur ro zhes bya ba la sogs pa bshad pa lta bu'o//rkyen gyi le'u'i dbang du mdzad nas gal te rten cing 'brel par 'byung ba dang po la rnam par shes pa de dag ces bya ba la sogs pa smos te/ gang gi tshe kun gzhi'i rnam par shes pa ngo bo nyid rnam par 'byed par nye bar gnas pa de'i tshe ni sa bon de la brten nas ni 'jug pa'i rnam par shes pa yin la/de la yang brten nas ni mngon par 'du bya ba las byung ba'i kun gzhi'i rnam par shes pa yin pas de ltar rten cing 'brel par 'byung ba ngo bo nyid rnam par 'byed pa can rnam par shes pa de dag dang phan tshun rgyu'i rkyen nyid yin no/ /des na shugs kyis ni rten cing 'brel par 'byung ba dang po ni chos thams cad la rgyu'i rkyen yin no zhes bshad par 'gyur ro//kun gzhi'i rnam par shes pa ni de rnams la mtshungs pa de ma thag pa dang / dmigs pa dang / bdag po'i rkyen gyi ngo bor yang gnas pa'i phyir de mtshungs pa de ma thag pa la sogs pa'i rkyen nyid du yang brjod par bya ba ma yin nam zhe na/re zhig mtshungs pa de ma thag pa'i rkyen nyid ni brjod par mi bya ste/ rnam par shes pa gang zhig mngon du gyur na rnam par shes pa gzhan skye ba'i gags byed pa la 'gags na skabs 'byed pas skye ba dang mthun par 'gyur ba de ni mtshungs pa de ma thag pa'i rkyen yin na kun gzhi'i rnam par shes pa ni 'jug pa'i rnam par shes pa rnams la de ltar yang ma yin te/kun gzhi'i rnam par shes pa mngon du gyur bzhin du 'jug pa'i rnam par shes pa skye ba'i phyir ro/ /dmigs pa'i rkyen nyid du yang brjod par mi bya ste/mig la sogs pa'i rnam par shes pas mngon sum du mi dmigs pa nyid kyis dmigs pa'i rkyen dngos ma yin pa'i phyir ro/ /bdag po'i rkyen nyid du yang brjod par mi bya ste/ mi sgrib pa'i ngo bo tsam gyis gtso bo ma yin pa'i phyir ro/ /'di ni ngo bo nyid kyi rnam par 'byed par nus pa yang ma yin te rten tsam gyis phan 'dogs pa'i phyir ro//sngar phan tshun rkyen yin par bsgrubs pa'i phyir dang chos mngon pa las kyang tshigs su bcad de bstan pa'i phyir grub par byas nas/ gal te rten cing 'brel par 'byung ba dang po la rnam par shes pa de dag phan tshun du rgyu'i rkyen yin na zhes bya ba smos so//rten cing 'brel par 'byung ba gnyis pa la zhes bya ba ni sdug pa dang mi sdug pa'i 'gro ba can la'o/ /yang ji ltar sdug pa dang mi sdug pa'i 'gro ba 'grub ce na/ sdug bsngal la kun du rmongs pa bdag nyid bde bar bya ba'i phyir 'du byed rnam pa gsum la 'jug ste/de dag ni ma rig pa'i rkyen gyis 'du byed rnams yin no/ /de dag kun du spyod pas ma 'ongs pa'i 'bras bu rnam par shes pa'i sa bon ma 'ongs pa'i rnam par shes pa skye ba dang mthun par rnam par gzhag pa ni 'du byed kyi rkyen gyis rnam par shes pa zhes bya'o//de de ltar rnam par 'jog pa na ming dang gzugs kyi sa bon yang ma 'ongs pa'i ming dang gzugs skye bar bya ba'i phyir rnam par 'jog pa ni rnam par shes pa'i rkyen gyis ming dang gzugs zhes bya'o/ /de yang de ltar rnam par 'jog pa ni skye mched drug gi sa bon yang ma 'ongs pa'i skye mched drug skye bar bya ba'i phyir rnam par 'jog par byed pa ni ming dang gzugs kyi rkyen gyis skye mched drug ces bya'o//de yang de ltar rnam par 'jog pa na reg pa'i sa bon yang ma 'ongs pa'i reg pa'i skye bar bya ba'i phyir rnam par 'jog par byed pa ni skye mched drug gi rkyen gyis reg pa zhes bya'o//de yang de ltar rnam par 'jog pa na tshor ba'i sa bon ma 'ongs pa'i tshor ba skye bar bya ba'i phyir/ rnam par 'jog par byed na reg pa'i rkyen gyis tshor ba zhes bya ste/ sa bon de cig car yongs su gsos kyang 'bras bur gyur pa rnam par shes pa la sogs pa snga ma la phyi ma brten pa nyid du dmigs pa'i phyir gang ji ltar smos pa'i go rims bzhin rkyen du rnam par gzhag par brjod do//tshe rabs gzhan gyi las kyis mngon par grub pa'i tshor ba kun du spyod pa'i gnas skabs la brten nas de la dmigs pa'am de dang mthun pa'i dngos po la dmigs pa'i sred pa chung ngu skye ba ni tshor ba'i rkyen gyis sred pa zhes bya'o//de la yang brten nas 'dun pa'i 'dod chags 'dod pa la sogs pa la dmigs pa ni sred pa'i rkyen gyis len pa zhes bya'o/ /'dun pa'i 'dod chags kyis yongs su gsos pa bsod nams la sogs pa'i sa bon gang yin pa de ni srid pa'o//'bras bur gyur pa rnam par shes pa la sogs pa tshor ba la thug pa'i sa bon yin te/ de ni spros pa'i bag chags kyi ngo bo nyid rnam par 'byed pa'i rgyu yin pa nyid kyis ngo bo nyid rnam par 'byed pa'i rten cing 'brel par 'byung ba'i khongs su bsdus pa'i phyir dang /sdug pa dang mi sdug pa'i 'gro ba'i rgyu yin pa'i phyir ro/ /ris mthun pa gzhan du 'bras bur gyur pa rnam par shes pa la sogs pa tshor ba la thug pa srid pa sngon du 'gro ba can rim gyis mngon par 'grub pa ni skye ba'o//de yod na skra nyams pa dang mdog mi sdug pa dang pags pa 'khums pa la sogs pa'i ngo bor yongs su gyur pa'i gnas skabs dang srog 'chad pa'i gnas skabs ni rga shi zhes bya ste/ bden pa mthong ba la 'phen pa med do sred pa dang bral ba la srid pa med do zhes 'byung ba'i phyir rmongs pa ni 'dir mthong bas spang bar bya ba'i ma rig pa yin no//de la ji ltar phyir mi 'ong ba'i mi g.yo ba'i las bsam gtan spel ma dang mtshungs par ldan pa tshe rabs gzhan ma 'dris pas gnas gtsang ma lnga pa 'phen ce na/ de ni ma yin te bsam gtan bzhi pa'i snyoms par 'jug pa'i sa bon zag pa dang bcas pa chen po 'khor ba thog ma med pa nas 'dris pa 'bras bu che bar skye ba 'phen par byed pa gnas pa bsam gtan spel ma'i mthus mi che ba la sogs par skye ba bskyung bar byed de yan lag de ni sa 'og ma'i mi mthun pa'i phyogs kyis mi g.yos pa'i phyir mi g.yo ba nyid yin gyi mya ngan las 'das pa bzhin rnam par smin pa la mi g.yo ba'i phyir ni ma yin no//phyir mi 'ong ba rnams ni khyad par du 'gro ba yin pa'i phyir gnas kyi khyad par gcig tu skye ba gcig kho na ma yin nam skye ba gnyis pa la sogs pa ni so sor ma brtags pa'i 'gog pas 'gags pa'i phyir 'bras bu che ba dag tu skye ba lnga med na ji ltar mi che ba la sogs par rnam pa lnga sgyur bar byed ce na/de ni ma yin te 'bras bu che ba dag kho nar so sor ma brtags pa'i 'gog pas 'gags pa'i phyir ro/ /de la 'dir ma rig pa la sogs pa ni yan lag phyi ma rnams kyi dmigs pa dang mtshungs pa de ma thag pa'i rkyen nyid du 'khrul pa'i phyir dang ngo bo nyid dang rnam pa'i khyad par dag gis kyang rigs tha dad pa'i phyir rgyu dang dmigs pa dang mtshungs pa de ma thag pa'i rkyen nyid du khas mi len gyi khyab pa'i phyir dang rigs tha dad pa'i phyir bdag po'i rkyen nyid kho nar rnam par gzhag go//yang rnam par shes pa drug po dag ces bya ba ni nye bar spyod pa can gyi rten cing 'brel par 'byung ba'i ste/ bdag po'i rkyen ni mig la sogs pa dbang po drug go / /dmigs pa'i rkyen ni yul gzugs la sogs pa'o//mtshungs pa de ma thag pa'i rkyen ni drug po 'gags ma thag pa'o/ /'di dag la rgyu'i rkyen bdag nyid ji lta ba bzhin dge ba la sogs pa'i sa bon yang yod pa ma yin nam/ de ci'i phyir mi brjod ce na/ kha cig na re de ni ma khyab pa'i phyir ma brjod de 'di ltar 'phags pa'i lam ni 'dris pa ma yin pa'i phyir skad cig ma dang po skye ba sa bon med pa can yin no zhes zer ro//de ni rigs pa ma yin te/ rang bzhin gyi rigs sngar bsgrubs zin pa'i phyir ro/ /'on te yang bye brag tu smra ba rnams skal pa mnyam pa'i rgyu khas mi len pa'i phyir 'phags pa'i lam gyi skad cig ma dang po'i rgyu'i rkyen med pa can du 'dod de/de dang mthun par de ma brjod do zhe na de lta na yang rigs pa ma yin te de'i lugs kyis de la yang lhan cig 'byung ba dang mtshungs par ldan pa'i mtshan nyid kyi rgyu'i rkyen yod pa'i phyir ro/ /'on te nye bar spyod pa can ni nye bar spyad par bya ba la ltos pa yin la/nye bar spyod par bya ba yang sems dang sems las byung ba dang mig la sogs pa lus su bsdus pa dang 'gro ba de dang de dag na yul gzugs la sogs pa yin te/ de ltar na nye bar spyad par bya ba nyid ni gsum pa'i bdag nyid de kho na zhes de nyid kyi rkyen gsum gyis rnam par phye ste bstan to snyam na/de yang rigs pa ma yin te kun gzhi'i rnam par shes pa'i khongs su gtogs pa sa bon yongs su smin pa lus su bsdus pa nyid kyis nye bar spyad par bya ba nyid yin pas/ de'i rgyu rkyen yang brjod par thal bar 'gyur ro//de lta bas na ngo bo nyid rnam par byed pa'i skabs kyi rten cing 'brel par 'byung ba dang po la rgyu'i rkyen bstan zin pa'i phyir dang / nye bar spyod pa yang skad cig ma snga ma dang phyi ma 'gag pa dang skye ba'i rim gyis rgyun gyis rab tu phye ba yin pa'i phyir dang / mig la sogs pa'i rten nyid du gzugs la sogs pa ni dmigs pa nyid du grags pa'i phyir mtshungs pa de ma thag pa'i rkyen la sogs pa kho na bstan gyi rgyu'i rkyen ni ma yin no zhes byas na legs so//'di dag yin no zhes bya ba ni kha cig na re go rims bzhin du ji skad bstan pa'i rten cing 'brel par 'byung ba gsum gyi rkyen rnams mdor bsdus nas mjug sdud pa yin no zhes zer ro//gzhan dag na re sngar ni gtsor rkyen rnam par gzhag pa mdzad pa yin no/ /da ni yon tan gtso bo'i ngo bo la ma brten par rten cing 'brel par 'byung ba re re'i rkyen gzhi'i ngo bo nyid rkyen bzhi las skye bar ston to zhes zer ro//de la spros pa'i bag chags dbye ba ma byas par spyir 'khor ba ji srid par gnas pa'i sgo nas rten cing 'brel par 'byung ba dang po kun gzhi rnam par shes pa ni de las gzhan pa rnams kyi rkyen gzhir 'gyur te sa bon gyi rten dang mi sgrib pa dang dmigs pa dang rang gi rigs kyi skad cig ma la skad cig ma snga ma 'gags pas mtshungs pa de ma thag pa'i rten sbyin pa'i sgo nas so//de yang rkyen gzhi kho na las skye ste rang gi rgyud dang 'brel cing lhan cig 'byung ba'i sa bon gyi sgo nas rnam par shes pa'i tshogs bdun las de dang 'dra pa'i bag chags dang 'brel pa skye ba na rgyu'i rkyen dang rten dang bcas pa'i dbang po la dmigs pa'i phyir dmigs pa'i rkyen dang /rang las gzhan pa mi sgrib par gyur pa dag las te bdag po'i rkyen dang / rang gi rigs kyi skad cig ma 'gags pa mtshungs pa de ma thag pa'i rkyen las so//nying mtshams sbyor ba 'brel pa ni 'jug pa'i rnam par shes pa drug kun du 'byung ba dang 'gal ba'i phyir dang / de 'gags pa nying mtshams sbyor ba sbrel pa dang mthun pa'i phyir te de bas na srid pa bar ma'i yid kyi rnam par shes pa nyon mongs pa can tha ma yang de'i mtshungs pa de ma thag pa'i rkyen yin no//de bzhin du ma rig pa la sogs pa yang so sor rigs mi mthun pa'i 'bras bu skye ba la ltos nas rkyen gzhi'i ngo bo nyid kyi rkyen bzhi las skye bar ci rigs par bshad par bya'o/ /sa bon du gyur pa rnams dang gzugs can gyi yan lag rnams la rkyen bzhi ril mi srid pas 'jug pa'i rnam par shes pa'i tshogs drug po dag rkyen gzhi'i ngo bo nyid kyis rkyen bzhi las skye bar bshad par bya'o//rnam grangs zhes bya ba ni thun mong ma yin pa zhes bya ba la sogs pa'i ming ngo / /mtshan nyid kyis zhes bya ba ni le'u bdun gyis so/ /ji ltar na zhes bya ba ni ji skad smos pa'i rnam par 'god pa yin te 'jug pa'i rnam par shes pa rnams kho na la bsams nas gzhan rgol zhing rtog par byed do//de la 'jig rten pa rnams la rnam pa'i rab tu dbye ba mtha' yas pa zhig srid mod kyi 'das ma thag pa sdug pa dang mi sdug pa'i 'gro ba kun nas nyon mongs pa gsum gyi gnas skabs kyi rten cing 'brel par 'byung ba nye bar bstan pa nyon mongs pa'i kun nas nyon mongs pa la sogs pa gsum gyi bye brag kho na nye bar 'god do//'jig rten pa'i rnam par byang ba ni dag pa pa'i bsam gtan dang gzugs med pa'i mtshan nyid do//'jig rten las 'das pa ni 'phags pa'i lam gyi mtshan nyid dang 'gog pa'i snyoms par 'jug pa'i mtshan nyid dang / gnas gyur pa'i mtshan nyid do/ /'di dag ni 'jig rten las 'das pa nyid yin pa ni 'phags pa'i lam gyi stobs kyis snyoms par 'jug pa'i phyir dang /'phags pa'i lam sngon du 'gro ba can nyid kyi phyir ro/ /de ltar na kun nas nyon mongs pa dang rnam par byang ba spyir na rnam pa bdun yin no/ /nyon mongs pa rnams yang dang yang du byung ba ni nyon mongs pa'i kun nas nyon mongs pa ste/ de yang nyon mongs pa mang ba'i phyir 'dod pa'i khams yin no//de na yod pa nyid rnam pa gsum du dbye ste/ rgyun chags su kun nas nyon mongs pa 'byung ba dang 'du shes med pa'i snyoms par 'jug pa las langs pa la kun nas nyon mongs pa 'byung ba dang 'phags pa'i lam las langs pa kun nas nyon mongs pa 'byung ba'o//de ni rang gi bskyed pa'i bag chags dang 'brel pa yin na de yang kun gzhi'i rnam par shes pa med na mi rung ngo / /de la kun nas nyon mongs pa dang po la ni 'dod chags la sogs pas mig gi rnam par shes pa'am mig gi rnam par shes pa 'dod chags la sogs pa'am/'dod chags la sogs pa'i bag chags yongs su gzung ba'i mig gi rnam par shes pas rna ba'i rnam par shes pa la sogs pa'am/ 'dod chags la sogs pa'i bag chags yongs su gzung ba'i mig gi rnam par shes pas mig gi rnam par shes pa phyi ma gzhan la bsgo bar 'gyur grang na/de la 'dod chags la sogs pas mig gi rnam par shes pa la bsgo ba nyid dgag pa'i dbang du mdzad nas/ 'di ltar mig gi rnam par shes pa gang zhes bya ba la sogs pa de nyid de dag gi sa bon gyi dngos por bag chags bsgos par 'gyur gyi zhes bya ba'i bar smos so//'di ji ltar mi rung zhe na/ dgos pa med pa'i phyir de bag chags 'jog par byed pa ni rang dang mthun pa'i 'bras bu skyed pa'i ched yin na de ni lta ba 'di la rung ba ma yin no zhes mig gi rnam par shes pa 'gags pa rnam par shes pa gzhan gyis bar du chod pa de la ni zhes bya ba la sogs pas bstan to//rnam par shes pa gzhan gyis bar du chod pa zhes bya ba ni rna ba'i rnam par shes pa la sogs pas bar du chod pa'o/ /bag chags med cing bag chags kyi gnas kyang mi dmigs zhes bya ba ni 'dod chags la sogs pa'i bag chags rten dang bcas te 'gags pa'i phyir sa bon med pas de las 'dod chags la sogs pa dang mtshungs par ldan pa'i mig gi rnam par shes pa skye bar mi 'gyur ba'o//rgyud gcig tu gtogs pa'i phyir rna ba'i rnam par shes pa mjug thogs su skye ba nyid kun gzhi'i rnam par shes pa'i rgyun bzhin du mig gi rnam par shes pas zin pa'i bag chags yongs su 'dzin cing skye ba ma yin nam zhe na/de ni ma yin te/ rten tha dad pa'i phyir rgyud gcig tu gtogs pa nyid bsgrub par dka'o zhes de ni/ tha dad gsum dang 'gal ba'i phyir//zhes bya ba der rnam par phye zin to/ /ji ste yang 'di ni rgyud gcig tu gtogs pa kho na yin te/ 'di ltar rnam par shes pa gcig po nyid mig la sogs pa'i rten de dang de nas skye ba na de dang de'i ming thob par zad do snyam na/ de ltar na yang rigs pa ma yin te lhan cig skye ba dang 'gag pa'i ngo bos skad cig ma snga mas skad cig ma phyi ma la bag chags 'jog par mi srid pa'i phyir dang /bag chags chos nyid kyis gnas na yang yongs su gso ba med par skye bar mi rung ba'i phyir dang / sems med pa'i gnas skabs na sems kyi rgyud chad pa nyid kyis ji skad bshad pa'i skyon du thal par 'gyur ba'i phyir dang rten tha dad pa nyid kyis rgyud kyi rdzas gcig pa nyid bsgrub dka' ba'i yang phyir ro//yang 'dir brgyal bye brag tu smra ba nyon mongs pa 'das pa las nyon mongs pa yin la de yang mig gi rnam par shes pa skye ba yin no zhes zer na/ de'i phyir med pa 'das pa de las 'dod chags dang bcas pa 'byung du mi rung zhes bya ba smos so/ /'das pa'i las las zhes bya ba ni rnam par smin pa'i 'bras bu phyung zin gang yin pa de na dper dgod par bya'o/ /skal ba mnyam pa'i rgyu skad cig mas bar du chod pa ni rang gi 'bras bu mi 'byin to //'das nas yun ring du len pa'i phyir rnam par smin pa'i 'bras bu phyung zin pa lta bu'o/ /yang 'das pa'i las las zhes bya ba 'di ni 'od srungs pa'i lta ba yin te de dag gi ltar na 'das pa chung zad cig ni yod de skal ba mnyam pa'i rgyu thams cad dang rnam par smin pa'i rgyu 'bras ma phyung ba'o//chung zad cig ni med de rnam par smin pa'i rgyu 'bras bu phyung zin pa'o/ /de ni de dag gi phyir de skad bshad pa yin te/ de ni mdo sde pa'i skabs dgag pa'i phyir yang de skad du brjod par bya'o/ /mig gi rnam par shes pas 'dod chags la sogs pa la sgo bar byed pa dgag par mig gi rnam par shes pa 'dod chags la sogs pa dang lhan cig 'byung ste zhes bya ba la sogs pa smos so//mig gi rnam par shes pa ni mtshungs par ldan pa'i sgo nas nyon mongs pa can gyi yin pas de lta bu'i 'bras bu'i skye par bya ba'i phyir rang la brten pa'i 'dod chags la sogs pa la bag chags 'jog go zhe na/de ni rigs pa ma yin no/ /de la rten pa'i phyir zhes bya ba ni 'dir sems la byung ba rnams gang la brten pa'i rten nyid kyis sgo bar mi byed do zhes bya ba de ltar ni gzung bar mi bya ste/ 'jug pa'i rnam par shes pa bdun gyi kun gzhi'i rnam par shes pa dang mtshungs par ldan pa'i reg pa la sogs pa la sgo bar byed pa nyid du thal bar gyur na mi rung bas so//de lta bas na 'di skad du 'dod chags la sogs pa la sgo bar byed pa ni ma yin te skad cig re re la gzhan la rag las te skye ba'i rgyu can yin pa'i phyir sgra la sogs pa bzhin no zhes rnam par dbye bar bya'o//mi brtan pa'i phyir ro zhes bya ba ni 'dod chags pa la sgo bar mi byed de rgyu mi brtan pa'i phyir sgra dang glog la sogs pa bzhin no/ /'dod chags la sogs pa'i bag chags yongs su gzung ba'i mig gi rnam par shes pas rna ba'i rnam par shes pa la sogs pa la sgo bar byed pa nyid dgag pa'i dbang du mdzad nas rnam par shes pa gzhan dag la yang ma yin te zhes bya ba la sogs pa smos so//'di la kha cig na re mig la sogs pa'i rnam par shes rnams kyi gnas tha dad pa'i rgyus gzhan gyi lta bas lhan cig 'byung ba dang 'gag pa med do//gang dag rten gcig pa can du 'jug pa can de dag ni cig car skye ste/ dper sems dang sems las gyur pa rnams lta bu'o snyam du bsams pa'i phyir ro/ /de'i phyir mig gi rnam par shes pas rna ba'i rnam par shes pa la sogs pa la sgo bar byed pa ma yin te/lhan cig skye ba dang 'gag pa dang bral ba'i phyir 'das nas ring zhig lon pas da ltar lta bu dang ma 'ongs pa lta bu dang rgyud gzhan du gtogs pa rnam par shes pa dus tha dad pa lta bu'o zhes zer ro/ /gzhan dag na de dang lhan cig 'byung ba dang 'gag pa med pa'i phyir ro zhes dang zhes bya ba'i sgra'i don to//des na mig gi rnam par shes pas rna ba'i rnam par shes pa la sogs pa la sgo bar byed pa ni ma yin te/ gnas tha dad pa'i phyir rgyud gzhan gyi rnam par shes pa bzhin no/ /lhan cig 'byung ba dang 'gag pa med pa'i phyir ro zhes bya ba 'dis ni gzhan gyi lta ba kho nas gzhan la rjes su dpag pas gnod par brjod par bya'o//rnam par rtog pa bzhi pa dgag pa'i dbang du mdzad nas rang gi dngos po la yang ma yin te zhes bya ba la sogs pa smos so/ /de la mig gi rnam par shes pa ni mig gi rnam par shes pa'i phyi ma'i rang gi rigs yin pa'i phyir rang gi dngos po yin la 'dod chags la sogs pa phyi ma'i yin no//de dag la sgo bar byed pa ma yin te/ lhan cig 'byung ba dang / 'gag pa dang bral ba'i phyir snga ma bzhin no/ /rdzas gcig gi rgyu yin pa'i phyir kun gzhi'i rnam par shes pa bzhin du rang gi nus pa rjes su 'jug par 'gyur ba ma yin nam zhe na/ma yin te nus pa yod kyang 'bras bu mngon par 'grub pa ni yongs su gso ba la rag las pa yin no/ /de lta ma yin na 'dod chags la sogs pa rtag tu 'byung ba'am cig car 'byung ba kho nar 'gyur ro//yongs su gso ba yang lhan cig 'byung ba dang 'gag pa la rag las pa yin te/ dper na til la sogs pa'i me tog gi dri'i bag chags yongs su gzung ba me tog dang lhan cig 'byung ba dang 'gag par byas pa bzhin no/ /de lta bas na mig gi rnam par shes pa la zhes bya ba ni rnam par rtog pa dang po 'gag pa'i mjug sdud pa yin no//rnam par shes pa de la rnam par shes pas bsgos par yang mi rung ngo zhes bya ba ni rnam par rtog pa bzhi pa dgag pa'o / /dgag par ma dgag pa ni gtso bo ma yin pa'i phyir mjug bsdu ba ma byas so/ / de bzhin du 'jug pa'i rnam par shes pa lhag ma rnams la yang zhes bya ba na dpyad pa mthun pa'i phyir mthun par bsgre ba yin no/ /nyon mongs pa'i kun nas nyon mongs pa gnyis pa dgag pa'i dbang du mdzad nas gang yang sa gong ma 'du shes med pa nas shi 'phos te zhes bya ba la sogs pa smos te/gong ma zhes bya ba'i sgra ni 'du shes med pa'i zhes bya ba'i sgra dang go bar byed pa yin pa'i phyir khyad par dang nus pa med pa'i tshig bsdu ba yin par yang rig par bya'o/ /'dir skyes pa rnams kyi zhes bya ba ni 'dod pa'i khams yin par ston to/ /nyon mongs par gyur pa thog ma nyid du skye ba de yang zhes bya ba ni bye brag tu smra ba rnams kyi ltar na srid pa bar mar nying mtshams sbyor ba'i sems gdon mi za bar nyon mongs pa can yin pas de dang por nyon mongs pa can yin no//mdo sde pa rnams kyi ltar na srid pa bar ma'i sems tha ma gdon mi za bar 'dod chags la sogs pa gang yang rung ba zhig dang mtshungs par ldan pa'i phyir de dang por nyon mongs pa can yin no//de la sa bon med pa'i phyir skye bar yang mi rung ste 'dod pa spyod pa'i nyon mongs pa'i sa bon rten bcas te 'gags pa'i phyir ro/ /nyon mongs pa'i sa bon de gzugs kyi rgyud la yang ma yin te/gzugs la sgo bar byed pa nyid du gzhan khas mi len pa'i phyir dang / rnal 'byor spyod pa la gzugs ma grub pa'i yang phyir ro/ /gnas gzhan nas 'dir skyes pa rnams la yang ji skad bstan pa'i tshul gyi sa bon med pa'i phyir nyon mongs pa can gyi sems dang por skye ba de mi rung mod kyi sems kyi rgyun chad pa nyid kyis glags med pa'i phyir 'du shes med pa pa kho na nas 'chi 'pho ba nye bar bkod do//kun nas nyon mongs pa gsum pa dgag pa'i dbang du mdzad nas/ nyon mongs pa'i gnyen po'i rnam par shes pa byung na zhes bya ba la sogs pa smos te/nyon mongs pa'i gnyen po rnam par shes pa zhes bya ba ni sdug bsngal la chos shes pa'i bzod pa dang mtshungs par ldan pa'o/ /'gags na zhes bya ba ni zag pa dang bcas pa nyid du mtshungs pa'i phyir nges par 'byed pa'i cha dang mthun pa dag la nyon mongs pa'i sa bon yod par 'gyur ro zhe na/de dgag pa'i phyir 'gags na zhes smos pa yin no/ /de la yang gtan lung ma bstan zhes bya ba la sogs pas rung ba ma yin mod kyi gzhan dang mthun par de skad du bshad do/ /gal te yang 'jig rten pa'i chos kyi mchog 'gag pa kho na 'phags pa'i lam gyi skad cig ma dang po la sa bon 'jog go snyam du sems na/de'i phyir ngo bo nyid kyis rnam par grol ba'i phyir zhes bya ba smos so/ /la la ni ngo bo nyid kyis rnam par grol ba kho na yin te zag pa med pa slob pa'i sems gang yin pa'o/ /la la ni ngo bo nyid kyis rnam par grol ba dang rgyud rnam par grol ba yang yin te zag pa med pa mi slob pa'i sems gang yin pa'o//'di gnyis ka yang nyon mongs pa'i sa bon gyi rten ma yin pa'i phyir dang dmigs pa dang mtshungs par ldan pa dag gis nyon mongs pa rnams rgyas par mi 'gyur ba'i phyir rnam par grol ba yin no/ /de bas na slob pa'i gang zag pa med pa'i sems ni nyon mongs pa'i sa bon dang ldan pa ma yin te ngo bo nyid kyis rnam par grol ba nyid du 'dod pa'i phyir dgra bcom pa'i sems bzhin no//lhan cig 'byung ba dang 'gag pa med pa'i phyir ro zhes bya ba ni 'di skad du ston pa yin te zag pa med pa'i sems ni nyon mongs pa'i sa bon gyi rten ma yin te de dang 'gal pa'i phyir ro//gang zhig gang dang 'gal ba de ni de'i sa bon gyi rten ma yin te dper na mun pa'i snang ba lta bu'o/ /'gal ba nyid ji ltar zhe na/ mi mthun pa dang gnyen por gyur pa'i phyir te de yang lhan cig 'byung ba dang 'gag pa med par grags so//gang dag res 'ga' lhan cig 'byung ba dang 'gag par grags pa de dag ni mi mthun pa'i phyogs dang gnyen po'i ngo bor yang ma grags so/ /de ltar ni rim pa 'dis ni dge ba zag pa dang bcas pa'i sems kyang nyon mongs pa'i sa bon gyi rten ma yin na zag pa med pa lta smos kyang ci dgos/de'i 'og tu yang zhes bya ba ni mthong ba'i lam las langs pa'o/ /'das nas yun ring ste zhes bya ba la sogs pa ni don go bar zad do/ /bye brag tu smra ba'i thob pa'i phyogs ni mdo sde pa rnams nyid kyis bsal zin pas de ni skabs ma yin no//mdo sde pa'i yang bag chags kyi rten med pa'i nyes pa dang ldan pa nyid yin no/ /de lta bas na kun gzhi'i rnam par shes pa med na nyon mongs pa dang nye ba'i nyon mongs pa'i sa bon mi rung ngo zhes rigs pas gtan la phab nas mjug sdud pa yin no//'du byed kyi rkyen gyis rnam par shes pa zhes bya ba la kha cig gi lta ba ni tshe rabs gsum pa'i gnas skabs pa'i rten cing 'brel par 'byung ba khas blang ba la nying mtshams sbyor ba rnam par shes pa kho na 'du byed kyi rkyen can yin no / /de ni mdo sde pa rnams kho nas bkag ste/de ji ltar bkag pa ni rten cing 'brel par 'byung ba'i skabs nas nges par gzung bar bya'o/ /de lta bas na mdo sde pa'i lta bas kyang bsod nams la sogs pa'i 'du byed kyis yongs su bsgos pa'i rnam par shes pa 'byung ba kho na 'du byed kyi rkyen gyis rnam par shes pa zhes bya'o//gang gi phyir de lta yin pa de'i phyir las kyi kun nas nyon mongs pa'i skabs su rnam par shes pa'i yan lag bstan to/ /'du byed kyi bag chags 'jog pa de yang dgag pa ji skad smos pa dang rten cing 'brel par 'byung ba'i skabs su rnam par shes pa'i yan lag bstan pa las na 'jug pa'i rnam par shes pa rnams la mi srid do zhes bya bar nges par gzung bar bya'o//de lta bas na 'du byed kyis yongs su bsgos pa'i kun gzhi'i rnam par shes pa 'byung ba kho na la 'du byed kyi rkyen gyis rnam par shes pa zhes bya'o//sngar ni ngo bo nyid rnam par shes pa thun mong ma yin pa'i bdag po'i rkyen gyi skabs kyis ma 'ongs pa'i rnam par shes pa kho na las 'du byed kyi rkyen gyis rnam par shes pa zhes bshad do/ /da ni las kyi kun nas nyon mongs pa'i skabs yin pa'i phyir de skad du ma bshad do / /'du byed kyi sa bon dang rnam par shes pa ma 'ongs pa'i sa bon 'di gnyi ga yang spyir rnam par shes pa'i yan lag yin no//gal te rnam par shes pa'i yan lag kun gzhi'i rnam par shes pa yin na mdo las rnam par shes pa'i yan lag 'jug pa'i rnam par shes pa drug yin par rnam par phye ba dang 'gal ba ma yin nam zhe na/de ni ma yin te der ni rjes su 'jug pa'i tshul gyis 'bras bus rgyu ston te dper na bkres pa dang skom pa dag gis reg bya'i khyad par lta bu'o snyam du dgongs pa yin no/ /de ltar na kun gzhi'i rnam par shes pa med na 'phen par byed pa'i las kyis kun nas nyon mongs pa mi rung ngo //de med na zhes bya ba kun gzhi'i rnam par shes pa med na'am/ bag chags kyi mtshan nyid kyi sa bon med na las kyi sa bon de gang na gnas shing ma 'ongs pa mngon par grub par bya ba la mngon du phyogs par byed pa ni len pa yin par 'gyur te/'dis ni mngon par grub par byed pa'i las kyi kun nas nyon mongs pa med par ston to/ /skye ba'i kun nas nyon mongs pa ni rnam par smin pa'i mtshan nyid do/ /de yang 'chi 'pho ba'i gnas skabs dang 'chi 'pho ba'i gnas skabs ma yin pa'o/ /'chi 'pho gnas skabs ma yin pa yang rnam pa gnyis te nying mtshams sbyor ba sbrel pa'i skabs dang nying mtshams sbyor ba sbrel pa'i 'og gnas pa'i gnas skabs so//nying mtshams sbyor ba sbrel pa'i gnas skabs kyang khams gsum pa'i bye brag gis rnam pa gsum mo/ / de thams cad ni kun gzhi'i rnam par shes pa med na mi rung ngo / /de la 'dod pa'i khams kyi nying mtshams sbyor ba sbrel pa mi rung bar bstan pa'i phyir mnyam par ma bzhag pa'i sa nas zhes bya ba smos so/ /'di la yang byed brag tu smra ba rnams kyi lta ba ni nying mtshams sbyor ba'i sems ni nyon mongs pa can yin no zhes bya ba yin no//de ni mdo sde pa rnams kho nas nying mtshams sbyor ba'i sems ni nying mtshams sbyor ba sbrel pa'i skad cig mas bsdus pa yin pa'i phyir lus kyi dbang po bzhin te rnam par smin pa las skyes pa yin no zhes bya ba de lta bu la sogs pa'i rnam pas bsal to//de lta bas na mdo sde pa rnams kho nas khas blangs pa srid pa bar ma'i sems tha ma ni rjes su chags pa la sogs pa gang yang rung ba zhig dang mtshungs par ldan pa'i phyir nyon mongs pa can yin la de sngon du 'gro ba can ma'i mngal du nying mtshams sbyor ba'i sems rnam par smin pa'i bdag nyid kyang khu chu dang khrag dang lhan cig grub pa dang bde ba gcig pa'i nur nur po nyid du 'chags so//de ni lus kyi rnam par shes pa yang ma yin te lus kyi dbang po zhen pa'i phyir ro/ /de las gzhan pa'i dbang po gzugs can med pa'i phyir dbang po gzugs can gyi rnam par shes pa gzhan yang ma yin pas shugs kyis na yid kyi rnam par shes pa yin no zhe na'o//de la yang btsun pa dpal len na re rnam par smin pa rnam par shes pa de ni phyis dge ba la sogs pa'i sems kun du 'byung ba na 'gag la//de dag pa la sogs pa'i sems 'gags nas yang mtshams sbyor ro zhes zer ro/ /de ni rigs pa'i rjes su 'brel pa nyid las bar skabs su tshe gzhan du brje zhing rnam par smin pa'i rgyud 'chad pa'i nying mtshams sbyor ba ni med de lus kyi dbang po bzhin no zhes bkag la/dge ba la sogs pa'i sems 'gags nas rnam par smin pa'i sems su yang 'dod de/ de lta bas na nying mtshams sbyor ba nas bzung ste ma shi'i bar du rnam par smin pa'i rgyud 'jug go zhes de ltar gzhan gyi lta ba nges par byas nas gal te yid kyi rnam par shes pa nyid ces bya bar smos so//'o na mngal na 'dug pa la dge ba dang mi dge ba'i yul la rnam par rtog pa'i sems mngon du gyur na yid kyi rnam par shes pa'i khyad par gzhan du 'gyur ro zhe na/ de spang bar gzhan gyi lta ba nyid kyis de la brten nas zhes bya ba smos so//yid kyi rnam par shes pa dge ba dang nyon mongs pa can ni rnam par smin pa'i yid kyi rnam par shes pas tha dad ma yin gyi 'on kyang rnam par smin pa'i rnam par shes pa nyid kyi gnas skabs kyi khyad par 'ga' zhig la mngon par yid ches pa'i rnam pa yongs su 'dzin pa dang kun du chags pa la sogs pa'i bdag nyid kyis rnam par shes pa dge ba dang nyon mongs pa can zhes bya ste/de yang rigs pa'i rjes su 'brang ba kho na las rnam par phye'o/ /gnas skabs kyi khyad par yang gnas skabs gzhan la brten pa yin pas de skad ces bshad do/ / 'di yang nying mtshams sbyor ba'i skad cig ma'i 'og ma la bya ste/ nying mtshams sbyor ba'i skad cig ma ni gcig tu ma bsgribs la lung du ma bstan pa yin pa'i phyir ro/ /'dir bshad pa mngon par yid ches pa la sogs pa'i rnam pa can gang yin pa de ci rnam par smin pa'i rnam par shes pa 'dzin pa'i rnam pa can las gzhan zhig gam 'on te gzhan ma yin pa zhig yin/gal te gzhan ma yin na ni dge ba dang nyon mongs pa can nyid yin pa nyams te rnam par shes pa 'dzin pa'i rnam pa can bzhin no/ /las kyi mngon par grub pa'i lung du ma bstan pa ni mi gsal pa'i phyir phyin ci ma log par yongs su gcod pa'am phyin ci log tu brtag par nus pa ma yin no//'on te gzhan yin na ni dad pa la sogs pa rnam par smin pa'i rnam par shes pa las tha dad par 'gyur te 'dzin par byed pa'i rnam pa tha dad pa'i phyir tshor ba dang 'du shes dang sems pa bzhin no zhes bya bar gyur to//'di ltar mdo sde pa rnams kyi ltar na tshor ba la sogs pa sems las byung ba gsum rdzas nyid du mngon par 'dod do/ /'on te kun gzhi'i rnam par shes pa'i sa bon bzhin du mngon par yid ches pa'i rnam pa de nyid du brjod par bya ba ma yin no zhe na/de ni yang dag pa ma yin te 'dzin par byed pa nyid du 'dod pa'i phyir ro/ /dmigs pa 'dzin par byed pa ni brjod par bya ba ma yin par grags pa med la kun gzhi'i sa bon yang dmigs pa 'dzin par byed pa yin par mi 'dod do/ /de ltar na phyogs 'dis reg pa la sogs pa'i dbang shes pas nyams su myong ba'i yul la rnam par rtog par byed pa mngon par brjod pa la sogs pa dang mtshungs par ldan pa'i rnam par shes pa gzhan yang gzhan nyid yin par bsgrub par bya'o//de'i phyir yid kyi rnam par shes pa gzhan gnyis par gyur to zhes bya bar nges par byas nas/des na yid kyi rnam par shes pa gnyis zhes bya ba la sogs pa smos so/ /thal ba 'di ni mngal nas byung ba la yang srid mod kyi ma'i mngal du zhes bya ba 'dis ni nying mtshams sbyor ba'i skabs yin pa'i phyir de dang nye ba'i gnas skabs thal ba ston par byed do//de na gzhan ma yin na zhes bya ba la sogs pa dang ring du 'gro zhes bya ba la sogs pa mdo dang 'gal lo/ /ji ste yang mdo de ni dge ba'am mi dge ba'i rigs mthun pa gnyis cig car skyes pa med pa la bya'o zhes de ltar drang ngo snyam du sems na/ yid kyi rnam par shes pa chags pa de ni zhes bya ba la sogs pa smos so//nyon mongs pa can gnas yin pa'i phyir zhes bya ba ni 'dir dpyad par bya ste/ gal te re zhig nyon mongs pa gzhi dang mtshungs par ldan pa'i yid nyon mongs pa can gnas yin pa'i phyir de yid kyi rnam par shes pa ma yin te 'dod chags la sogs pa bzhin no zhe na/gtan tshigs ma grub pa'i don nyid yin te/ nyon mongs pa can gyi yid ma grub pa'i phyir ro/ /'on te bsgrubs zin to snyam du sems na/ de ltar yang phyogs gzhan du 'gro bar 'gyur bas rnam pa thams cad du gtan tshigs kyis ma nges pa nyid ldog pa med de/yid kyi rnam par shes pa yang srid pa'i phyir ro/ /'on te rnam par shes pa nyon mongs pa can mtshungs pa de ma thag pa'i rkyen yin pa'i phyir zhes gtan tshigs kyi don de lta bur brten te nying mtshams sbyor ba'i sems 'di la yang mtshungs pa de ma thag pa'i rkyen srid pa bar ma'i sems tha ma nyon mongs pa can yod do zhe na/de lta yang ma nges pa nyid yin te yid kyi rnam par shes pa mtshungs pa de ma thag pa'i rkyen rnam par shes pa nyon mongs pa can yang yod pa'i phyir ro/ /'on te gtan tshigs 'di nges par bzung ba yin no zhe na/de lta na ma grub pa nyid yin te nying mtshams sbyor ba'i sems 'di ni mtshungs pa de ma thag pa'i rten can kho na ma yin te sa bon gyi rten yang khas blangs pa'i phyir ro/ /ma nges pa nyid kyang yin te yid kyi rnam par shes pa dge ba'i rtsa ba kun du gcod par byed pa med par lta ba dgu pa dang mtshungs par ldan pa mtshungs pa de ma thag pa'i rkyen nyon mongs pa can gyi rten can du nges pa la yang rgyu yod pa'i phyir ro//de lta na 'o na srid pa bar ma'i sems tha ma kho na 'dir nyon mongs pa can du bzung ste de yang nying mtshams sbyor ba'i sems 'phen par byed pa yin pa'i phyir bdag po'i rkyen nyid kyi rten yin te/'di ltar skye ba'i nying mtshams sbyor ba thams cad ni nyon mongs pa can gyi sems sngon du 'gro ba can kho na yin par dmigs so/ /dus rtag tu zhes bya ba smos pa yang don 'di nyid nye bar bstan pa'i phyir te/ gal te nyon mongs pa can gyi sems de skabs 'byed pa tsam nyid kyis mtshungs pa de ma thag pa'i rkyen gyi ngo bor nye bar sbyor na ci'i phyir nying mtshams sbyor ba'i sems thams cad la nges par nye bar gnas par 'gyur/skabs 'byed pa tsam la ni nyon mongs pa can dang nyon mongs pa can ma yin pa dag khyad par 'ga' yang med do/ / de lta bas na nying mtshams sbyor ba'i sems nyid kyi 'phen pa byed pa nyon mongs pa can gyi sems yin zhes te yid kyi rnam par shes pa yin pa la ni cung zad kyang mi phan te de ltar nyon mongs pa can gyi sems nges par 'phang bar bya ba ni sems can gyi rgyud du ma la grags so/ /de'i phyir nying mtshams sbyor ba'i sems ni yid kyi rnam par shes pa yin te dus rtag tu srid pa bar ma'i sems tha ma nyon mongs pa can gyis 'phangs pa'i phyir lus kyi dbang po bzhin no//gzhan dag ni lus rtag tu zhes bya ba smos pa logs shig tu gtan tshigs kyi khyad par nyid du nye bar 'god de /nying mtshams sbyor ba'i sems de ni yid kyi rnam par shes pa ma yin te dus rtag tu ma shi bar du rnam par smin pa'i ngo bor rjes su 'jug pa'i phyir lus kyi dbang po bzhin no zhe'o/ /yid kyi rnam par shes pa'i dmigs pa'i rnam pa mi dmigs pa'i phyir ro zhes bya ba ni yid kyi rnam par shes pa'i dmigs pa'i rnam pa gang yin zhe na/gsal ba'i rnam par yongs su gcod pa nyid do de med pa'i phyir dmigs pa'i rnam pa yongs su ma chad pa nyid yin no/ /de'i phyir yid kyi rnam par shes pa ma yin te dmigs pa'i rnam pa yongs su ma chad pa'i phyir lus kyi dbang po bzhin no zhes bya bar grags so//'di gzhan la ma grub pa ma yin nam zhe na/ de ni ma yin te mdo sde pas brgyal ba dang 'du shes med pa dang 'gog pa'i snyoms par 'jug pa la sogs pa la yid kyi rnam par shes pa'i dmigs pa'i rnam pa yongs su ma chad pa nyid du khas blangs pa'i phyir ro/ /ma nges pa nyid kyang ma yin te 'du shes med pa la sogs pa'i sems kyang phyogs kho na yongs su 'dus pa'i phyir ro//bye brag tu smra ba gang zhig nying mtshams sbyor ba'i rnam par shes pa dmigs pa'i rnam pa dmigs pa can du sems pa de la yang de bzhin du lan gdab par bya ste/ yid kyi rnam par shes pa'i dmigs pa ni rnam pa bzhi ste/'das pa dang ma 'ongs pa dang 'dus ma byas pa dang da ltar byung ba'o/ /re zhig nying mtshams sbyor ba'i sems de 'das pa la dmigs pa la ni ma yin te/ mngon par shes pa med par nying mtshams sbyor ba'i sngon rol gyi lus rjes su dran pa ni med do//ma 'ongs pa dang 'dus ma byas la dmigs pa yang ma yin te/ mthong ba dang thos pa med pa'i phyir ro/ /mthong ba dang thos pa dag gis brtags nas ma 'ongs pa dang 'dus ma byas la dmigs pa de ni nying mtshams sbyor ba'i gnas skabs na mi srid do/ /da ltar byung ba ni rnam pa gnyis te rang gi rgyud du gtogs pa dang gzhan gyi rgyud du gtogs pa'o//de la gzhan gyi rgyud la ni mi dmigs te rtog pa'i rgyud med pa'i phyir snga ma bzhin no/ /rang gi rgyud du gtogs pa yang dbang po gzugs la ni mi dmigs te de kho na bzhin du rtog par mi rung ba'i phyir ro//yul gyi gzugs la yang dmigs par rung ba ma yin gzugs la sogs pa la mig la sogs pa'i dbang po rnam par shes pas drangs pa'i yid kyi rnam par shes pa khas len gyi mngon sum du byed pa ni ma yin na mig la sogs pa'i rnam par shes pa de yang nying mtshams sbyor ba'i gnas skabs na med do zhes sngar bstan zin to//yid kyi rnam par shes pa de brgyal ba yin du chug na yang zhes bya ba la sogs pa ni yid kyi rnam par shes pa gnyis su 'gyur ro zhes bshad pa la re zhig cig ni khas len pa nyid de dge ba la sogs par zhugs pa gang yin pa'o//cig shos kyang rnam par smin par gyur pa brgyal ba gang yin pa'o/ /de la mi tsam la brtsad pas kho bo cag la ci bya/ dngos po'i de kho na nyid brtag par bya ste/ yid kyi rnam par shes pa de brgyal ba yin du chug na yang zhes bya ba la sogs pa ni khyod nyon mongs pa can dang nyon mongs pa can ma yin pa'i chos rnams sa bon la rag las te skye bar khas len pa sa bon de gal te rnam par shes pa brgyal ba'i rten can nyid yin la rgyu'i rkyen gyis bdag po nyid kyi sa bon de las kyang nyon mongs pa can dang nyon mongs pa can ma yin pa'i bdag nyid de skye ba na de la brten nas skye'o zhes khas len na rnam par shes pa brgyal ba de sa bon thams cad pa yin pa'i phyir kun gzhi'i rnam par shes pa nyid yin par shugs kyis smras par 'gyur te kun gzhi'i rnam par shes pa'i dngos po rnam grangs gzhan gyis bsgrubs pa'i phyir ro zhes bya ba de ston to// 'on te gang de la brten nas zhes bya ba la sogs pas ni rnam par shes pa brgyal ba yin pa de ni sa bon thams cad pa yin pa'i phyir nyon mongs pa can dang / nyon mongs pa can ma yin pa'i rnam par shes pa'i bdag po tsam gyis rten ces bya ba 'ba' zhig tu zad kyi/ de la brten pa nyon mongs pa can dang nyon mongs pa can ma yin pa'i rnam par shes pa gang yin pa de kho na sa bon thams cad pa'o zhes brjod par nus pa yang ma yin no// ci'i phyir zhe na/ de la brten pa'i rnam par shes pa mi brten pa'i phyir dang / brten pa yin pa'i phyir dang / lung du bstan pa'i phyir dang /sgo bar byed pa rnams lhan cig skye ba dang 'gag pa med pa la sogs pa'i phyir ro zhes de ston par byed do/ /skye ba'i kun nas nyon mongs pa nying mtshams sbyor ba sbrel pa'i 'og gnas pa'i gnas skabs pa yang rnam pa gsum ste dbang po gzugs can len par byed pa dang /ming dang gzugs la ltos nas rkyen dang 'bras bu dang / sems can rnams kyi zas so/ /de la rnam pa dang po'i dbang du mdzad nas nying mtshams sbyor ba sbrel zin pa rnams kyi zhes bya ba la sogs pa smos so/ /'di yang 'dod pa dang gzugs kyi khams dag na srid mod kyi mnyam par ma bzhag pa'i skabs yin pa'i phyir 'dod pa na spyod pa kho na gzung ngo //de las gzhan zhes bya ba ni 'jug pa'i rnam par shes pa'o/ /dbang po gzugs can 'dzin par byed pa zhes bya ba ni 'dir dbang po zhes smos pas dbang po dang tha mi dad par 'dug pa'i gzugs la sogs pa yang gzung ste/'di ltar zin pa gang yin pa de 'dzin par byed pa yin na zin pa yang gzhan ma yin te/ dgu rnam gnyis zhes 'byung ba'i phyir ro/ /'di la zag pa med pa'i rnam par shes pa gang yin pa de ni dbang po 'dzin par byed pa ma yin te 'gal ba'i phyir mya ngan las 'das pa bzhin no//dge ba zag pa dang bcas pa gang yin pa de yang 'dzin par byed pa ma yin te dge ba'i phyir lam bzhin no/ /mi dge ba yang 'dzin par byed pa ma yin te/ lung du bstan pa'i dge ba bzhin no/ /lung du ma bstan pa gzhan spyod lam dang bzo ba'i gnas pa dang sprul pa bas bsdus pa gang yin pa yang 'dzin par byed pa ma yin te/rnam par smin pa ma yin pa'i phyir dge ba bzhin no/ /rnam par smin pa'i rnam par shes pa dbang po dang lhan cig las gcig gis 'phangs pa'i phyir grub pa dang bde ba nyid dang 'dra bar gyur pa ni gcig la gcig bstan pas dbang po 'dzin par byed pa yin par 'gyur ro//rang gi lta bas 'jug pa'i rnam par shes pa rnam par smin pa'i bdag ma yin mod kyi gzhan gyi lta bas ni khas blangs nas rnam par smin pa'i rnam par shes pa zhes brjod de 'jug pa'i rnam par shes pa de ji ltar 'dzin par byed pa yin/gal te dmigs pa'i dngos por rang gir byed pa'i phyir ro zhe na/ phyi rol yang zin par 'gyur ro/ /'on te rten gyi dngos por yongs su bzung ba'i phyir ro zhe na/ dbang po ni zin par 'gyur gyi dbang po dang tha mi dad par 'dug pa'i gzugs ni ma yin no//rten gyi dngos po kho nar yongs su bzung ba'i phyir 'dzin par byed pa yin la dbang po dang tha mi dad par 'dug pa'i gzugs ni dbang po dang tha mi dad par 'dug pa kho nas zin pa yin no zhe na/ 'jug pa'i rnam par shes pa de ni rim pa 'dis kyang 'dzin par byed par mi 'thad do zhes bstan pa'i phyir gnas so sor nges pa'i phyir zhes bya ba smos so//'jug pa'i rnam par shes pa ni gnas so sor nges pa'i phyir rnam par shes pa gzhan gyi gnas rnam par bcad de rang gi gnas 'dzin par byed pa yin pas rnam par shes pa gcig cig mngon du gyur na rnam par shes pa gzhan gyi rten ma zin pa'i phyir shi ba'i lus kyi bzhin du dbang po gzhan rnam par 'chad pas yang rgyud med par thal par 'gyur ro//yid kyi rnam par shes pa ni phyi'i gzugs bzhin du dbang po gzugs can la mi brten pa'i phyir/ dbang po gzugs can gang gi yang 'dzin par byed pa ma yin pas gzhan la rjes su dpag pas gnod pa yin no//dbang po gzhan gyi rnam par shes pas dbang po gzhan gyi rten 'dzin par byed par khas blangs kyang 'jug pa'i rnam par shes pa ni 'dzin par byad pa nyid du mi srid par bstan pa'i phyir mi brtan pa'i phyir ro zhes bya ba smos te/gang gi tshe sems med pa'i gnyid dang brgyal ba dang snyoms par 'jug pa'i gnas skabs na/ 'jug pa'i rnam par shes pa thams cad 'gags pas 'dzin par byed pa'i rnam par shes pa dang bral ba nyid kyis dbang po rnams ma zin pa'i phyir de'i rnam par chad pa'i thal ba son 'dug pas 'jug pa'i rnam par shes pa ni 'dzin par byed par rung ba ma yin no//gal te yang de'i tshe lus kyi dbang po lus thams cad la khyab pa'i phyir dbang po gzhan 'dzin par byed pa yin no snyam na/ de ni yin te lus dbang po de 'dzin par byed pa gzhan dang bral ba nyid kyis ma zin pa nyid du thal par 'gyur ro//'on te las kyi 'phen pa'i dbang kho nas dbang po gzugs can thams cad 'jug pa'i rnam par shes pa 'gags kyang rjes su 'jug par 'gyur ro snyam na/ rnam par shes pa med pa'i zhes bya ba la sogs pa smos te/ las kyi 'phen pa yod kyang rnam par shes pa dang bral ba'i phyir ma zin pa so na 'dug ste bum pa la sogs pa bzhin no zhes bya ba'i tha tshig go/ /yang na rnam par shes pa med pa'i dbang po gzugs can ni mi rung ngo zhes bya ba ni rang gi lta bas bshad pa yin te sems dang sems las byung ba la ma gtogs pa'i dngos po gsal na phyi dang nang gi gzugs 'di thams cad sems dang sems las byung ba'i gnas skabs kyi khyad par dag la gdags pa yin no//gnas skabs de na yang 'jug pa'i rnam par shes pa thams cad 'gags pas gal te kun gzhi'i rnam par shes pa khas mi len na mig la sogs pa gnas skabs kyi khyad par gang zhig gis rab tu phye bar 'gyur/yang na de'i tsheg nyid log pa dang brgyal ba dang snyoms par 'jug pa po yongs su dag cig yin/ 'o na ni kun gzhi'i rnam par shes pa yang dbang po gzugs can la brten pa pa yin pas ji ltar 'dzin par byed pa yin zhe na de ni ma yin te/'dir ni brten pa'i phyir 'dzin par byed pa ma yin gyi/ 'on kyang rten gyi phyir yin la kun gzhi'i rnam par shes pa ni chos thams cad kyi rten yin pa'i phyir dbang po gzugs can gyi rten yang yin no/ /gzhan yang 'di lta ste/dbang po gzugs can 'dzin par byed pa nyid 'di yang 'di'i 'bras bu yin no/ /gzhan yang ji ltar rang gi lta ba ltar gzugs can rnams zin pa nyid yin pa de bzhin du dbang po gzugs can thams cad 'dzin par byed pa nyid yin par nye bar len pa'i phyir zhes bya ba der rnam par phye zin to//skyo ba'i kun nas nyon mongs pa'i gnas skabs kyi rnam pa gnyis pa yang kun gzhi'i rnam par shes pa med na mi 'thad par bstan pa'i phyir rnam par shes pa dang zhes bya ba la sogs pa smos so/ /mdo 'dir ni ming phung po bzhi'i ngo bo nyid yin par bzung ste ming dang gzugs rnams rnam par dbye ba las de ltar bstan pa'i phyir ro//de'i phyir gal te kun gzhi'i rnam par shes pa med na rnam par shes pa gzhan gang zhig ming gi khongs su gtogs pa'i 'jug pa'i rnam par shes pa'i rkyen du 'gyur/ ming dang gzugs kyi khongs su gtogs pa'i 'jug pa'i rnam par shes pa de yang rnam par shes pa gang gi rkyen du 'gyur/rgyun 'jug pas ming snga ma yang 'jug pa'i rnam par shes pa phyi ma'i 'jug pa'i rnam par shes pa snga ma yang ming phyi ma'i rkyen yin no zhes khas blangs par yang mi nus te/ mdung khyim gyi dpes ming dang gzugs dang rnam par shes pa dus mnyam pa dag kho na cig gi rkyen gcig yin par bsgrubs pa'i phyir ro//rang gi lta bas nyon mongs pa can gyi yid gang yin pa de yang chos thams cad kyi gnas ma yin pa'i phyir dang / chos thams cad kyis yongs su gso bar bya ba ma yin pa'i phyir/'jug pa'i rnam par shes pa rnams dang gzugs kyi rgyu yang ma yin pas khongs su gtogs par rung ba med pa nyid do/ /skye ba'i kun nas nyon mongs pa gnas pa'i gnas skabs pa gsum pa yang tha mi dad par yang bstan pa'i phyir/ rnam par shes pa gzhan ni sems can 'byung bo rnams kyi zas su yang zhes bya ba la sogs pa smos so//zas ni bzhi ste zhes bya ba'i mdo de la kham gyi zas ni 'dod pa'i khams kho na na'o/ /reg pa la sogs pa ni khams gsum can pa yin no/ /de la 'jug pa'i rnam par shes pa ni khams gsum mtha' dag khyab pa mi srid pas/rnam par shes pa drug po rnams las gang yang rung bas zhes bya ba ni zas byed pa zhes bya ba ston pa yin no/ /gnas skabs gang na mi srid ce na/ sems med pa'i gnyid dang brgyal ba dang snyoms par 'jug pa dang 'du shes med pa'i gnas skabs na'o/ /reg pa dang sems pa dag kyang de na med pa'i phyir de dag kyang zas nyid du mi rung bar brjod par bya ba ma yin nam zhe na/brjod par bya ba ma yin te 'jug pa'i rnam par shes pa mi srid par bstan pa byas na de mtshungs par ldan pa rnams kyang don gyis byas pa kho na yin pas logs shig tu mi brjod do/ /de'i phyir gnas skabs de na zas med par gnas pa mi 'thad do//'di la mdo sde pa na re yid la sems pa'i zas ni rnam pa gnyis te/ mngon du gyur pa'i sems pa dang ldan pa'i sems pa rnam par smin pa'i rgyus bskyed pa'i bag chags rnam par smin zin pas bzung ba'o/ /sems med pa'i gnas skabs na sems pa dang po mi srid du chug /gnyis po go ci'i phyir mi srid ces zer te/ de ni kun gzhi'i rnam par shes pa la ma gtogs pa'i bsgo bar bya ba dgag pa bsgrubs pas lan gdab par bya'o/ /gzhan yang zhes bya nang gi yin pa'i lta ba la gal te sems dang sems las byung ba ril med na de'i gnas skabs kyi khyad par lus kyang med pa'i phyir las kyis 'phangs pa'i nus pa de ci la brten par 'gyur/gnas skabs de na yang kun gzhi rnam par shes pa ni phan 'dogs par byed pa nyid du yod do zhes bya bar ci'i phyir khas mi blang / yang na sems dang bcas pa'i gnas su bsam par bya ste/kham gyi zas ni rgyas pa'i rgyu yin pa'i phyir la/ 'jug pa'i rnam par shes pa dang mtshungs par ldan pa'i reg pa bde ba myong bar 'gyur ba dang / mngon par 'dod pa'i yul don du gnyer ba'i mtshan nyid yid la sems pa ni lus la phan 'dogs pa'i rgyu yin pa'i phyir rnam par smin pa'i 'bras bu yongs su gso bar byed pa nyid kyis zas nyid du yang rigs na/'jug pa'i rnam par shes pa go ji ltar/ gal te phan 'dogs par byed pa'i phyir ro zhe na/ de ni ma yin te bde ba la sogs pa myong bar gyur pa'i reg pa dang re ba'i sems pa ma gtogs pa de logs shig tu phan 'dogs pa nyid du mi rung ba'i phyir ro//'on te gags mi byed pa tsam gyis so zhe na/ de ni ma yin te de lta na mig la sogs pa yang zas nyung ngu thal bar 'gyur ro/ /'on te yul yongs su gcod pa tsam gyis so zhe na/de ni ma yin te 'phags pa'i lam la yang thal bar 'gyur ba'i phyir ro/ /'on te mthun pa'i phyir ro zhe na/ ji ltar mthun pa nyid yin zhes de nyid dpyad par bya'o/ /de lta bas na mig la sogs pa ni rnam par smin pa'i rnam par shes pa dang lhan cig las gcig gis 'phangs pa ste de dang lhan cig grub pa dang bde ba nyid gcig par gyur cing /de la rag las te gnas pa yin pas kun gzhi'i rnam par shes pa zas nyid yin par rigs so zhes de ltar nges par byas nas/ rnam par smin pa'i rnam par shes pa med na zhes bya ba la sogs pa smos so//kun gzhi'i rnam par shes pa ni dbang po gzugs can 'dzin par byed pa yin no zhes bya ba 'di kho nas don go ba'i phyir zlos bur 'gyur ba ma yin nam zhe na/ ma yin te zas ni bzhi ste zhes bya ba 'dir kun gzhi'i rnam par shes pa kho na rnam par shes pa'i zas [(]nying ngu [,]nyid du [)]dgongs so zhes bstan par gtsigs che ba'i phyir ro//skye ba'i kun nas nyon mongs pa gzugs kyi khams su nying mtshams sbyor ba'i dbang du mdzad nas/ 'di nas shi 'phos te zhes bya ba la sogs pa smos so/ /yid kyi rnam par shes pa zhes bya ba ni de nying mtshams sbyor ba dang mthun pa'i phyir ro//nyon mongs pa can zhes bya ba ni srid pa bar ma'i sems tha ma'o/ /mnyam par ma bzhag pa zhes bya ba ni ro myong ba dang mtshungs par ldan pa'i bsam gtan yang nyon mongs pa can yin no/ /de ni mnyam par bzhag pa dang 'dra bas de rnam par bcad pa'i phyir ro/ / nying mtshams sbyor ba sbrel pa zhes bya ba ni skye ba'i srid pa'o/ /de la mnyam par ma bzhag pa zhes bya ba la sogs pas ni srid pa bar ma'i sems tha ma nyon mongs pa can ni nyon mongs pa dpyad pa ji skad smos pa ltar na 'jug pa'i rnam par shes pa'i sa bon tha dad par mi 'thad do zhes bya bar ston par byed do//'di ni nyon mongs pa'i kun nas nyon mongs pa'i dbang du byas pa kho nar skabs su bab par byas zin mod kyi skye ba'i kun nas nyon mongs pa dang mthun pa'i phyir 'dir yang nye bar bkod de 'di ltar srid par nying mtshams sbyor ba thams cad ni nyon mongs pa can gyi sems sngon du 'gro ba can yin pas so//gal te de ltar yin dang 'di thams cad 'dod pa'i khams na spyod par nying mtshams sbyor ba la yang brjod par bya ste/ sgo gnyis su bstan pa kho nas don go ba'i phyir ro/ /ji ltar 'dir sa bon med pa'i phyir nyon mongs pa can gyi sems mi 'thad pas srid par nying mtshams sbyor ba med par 'gyur ba de bzhin du der yang der thal bar bya la/ji ltar der yid kyi rnam par shes pa gnyis cig car 'byung bar 'gyur ro zhes bya ba de bzhin du 'dir yang thal bar bya'o/ /yang de'i sa pa zhes bya ba ci'i phyir smos she na/ skye ba'i sa pas gang yin pa de mngon par 'grub par byed pa'i nyon mongs pa yang nges par de'i sa pa kho na yin no zhes nye bar bstan pa'i phyir ro//mngon par 'grub par byed pa'i nyon mongs pa de yang rnam pa gnyis te dus snga ma'i srid pa'i srid pa dang / len pa'i mtshan nyid dang gzugs can gyi khams skye ba'i srid pa bar ma'i sems tha ma dang mtshungs par ldan pa'o//'phen par byed pa'i nyon mongs pa ni ma nges te res 'ga' ni sa mtshungs pa yin te/ gang gi tshe 'dod pa na spyod pa'i ma rig pas 'dod pa na spyod pa kho na'i 'du byed dag tu kun nas slong bar byed na'o/ /res 'ga' ni sa mi mtshungs pa yin te gang gi tshe 'jig rten pa'i bsam gtan dang po'i nyer bsdogs bar chad med pa'i lam dang mtshungs par ldan pa'i las kun nas slong bar byed pa na mthong bas spang bar bya ba'i gti mug 'dod pa na spyod pa ste/'dod chags pa dang ma bral ba rnams sa gong ma gang yin pa'i nyon mongs pa kun tu mi spyod pa'i phyir dang /'dod chags dang bral ba'i gnas skabs na yang bar chad med pa'i lam mngon du mi byed pa'i phyir dang / bar chad med pa'i lam kho nas gong du yang skye ba'i phyir ro/ /gal te nying mtshams sbyor ba sbrel bas sa mtshungs pa'i nyon mongs pas byas pa kho na yin na/'o na gang gi tshe gzugs can gyi khams nas shi 'phos nas gzugs med pa'i khams dag tu skye ba de'i tshe gzugs med pa na spyod pa'i skye ba'i srid pa mngon par grub par byed pa'i sems nyon mongs pa can de gang zhig yin zhe na/ 'di la mdo sde pa rnams kyi lta ba ni gzugs kyi 'dod pa dang bral ba gzugs can gyi khams su 'chi ba la gang gis na gzugs med pa'i khams na spyod pa'i srid par nying [(]mtshang sa [,]mtshams [)]sbyor bar 'gyur ba 'chi ba'i sems tha ma gzugs na spyod pa'i nyon mongs pa can 'byung ste/ de bzhin du nam mkha' mtha' yas skye mched du 'chi ba'i sa gong ma pa yang brjod par zhes bya ba yin no//theg pa chen po las ni 'chi ba'i sems thams cad ma bsgribs la lung du ma bstan pa yin par brjod na der ji lta bu zhe na/ der yang 'dod chags dang bral ba 'chi ba la ji srid du 'chi ba'i sems tha ma 'byung ba de srid du gang zhig 'chi ba'i sems tha mas bar du chod kyang brgyud pas gzugs med par skye ba'i srid pa mngon par grub par byed pas gong ma pa'i lus la mngon par dga' ba dang mtshungs par ldan pa'i sems nyon mongs pa can 'byung ngo //gang yang 'di skad du de'i tshe phyir mi 'ong ba la de med do zhes bshad pa ni sa gang las 'dod chags dang bral bas de ba'i don du gnyer ba mi 'byung ba la dgongs te gsungs pa yin no//de ltar na gzugs med pa'i nying mtshams sbyor ba ni bar du chod pa'i rgyu can las dgongs nas nyon mongs pa can gnas yin pa'i phyir zhes brjod do//'o na gang gi tshe srid pa'i rtse mo nas shi 'phos nas rnam shes mtha' yas skye mched kyi bar nas shi 'phos nas ci yang med pa'i skye mched la sogs pas gsum du nying mtshams sbyor ba de na 'chi ba la nyon mongs pa can gyi sems gang gi dbang gis na 'og mar nying mtshams sbyor bar 'gyur ba dang /nyon mongs pa can gnas yin pa'i phyir zhes kyang brjod par 'gyur bas gang pa zhig yin srid pa'i rtse mo la sogs pa'i sa pa'i nyon mongs pas 'og mar nying mtshams sbyor bar byed pa ni ma yin la/ sa gong ma pa'i rkyen gyis sa 'og ma pa'i nyon mongs pa mngon du byed par yang rung ba ma yin no zhe na/de ni ma yin te de na yang 'chi ba la nyon mongs pa'i sa bon gang gi dbang gis na 'og mar nying mtshams sbyor bar 'gyur zhing nyon mongs pa gnas yin pa'i phyir zhes kyang brjod par 'gyur pas 'og ma pa rgyas par 'gyur ro/ /de ltar na rnam pa 'dis gzugs med pa'i nying mtshams sbyor ba ni don go pa'i phyir logs shig tu nye bar dgong par mi bya'o//nying mtshams sbyor ba sbrel zin pa rnams kyi zhes bya ba la sogs pas ni 'dod pa na spyod pa'i nying mtshams sbyor ba'i dbang du mdzad nas 'dod pa'i khams kho nar skye ba'i kun nas nyon mongs pa gnas skabs rnam pa gsum so sor bstan te khams gsum pa'i sems can 'byung po rnams kyi zhes bya ba'i zhar la smos pa yin no//de'i 'og tu ni gzugs na spyod pa'i nying mtshams sbyor ba bstan to/ /da ni skye ba'i kun nas nyon mongs pa gnas pa'i gnas skabs pa 'dod pa dang /gzugs na spyod pa dang thun mong ma yin pa bstan pa'i phyir/ yang gzugs med pa'i khams su skyes pa zhes bya ba la sogs pa smos so/ /'dis ni 'di ston par byed de gzugs med par spyod pa rnams la glo bur du 'dod chags la sogs pa dang dad pa la sogs pa skye ba de dag sa bon gzugs na spyod pa'i sems nyon mongs pa can thog ma med pa'i 'khor ba nas nye bar bstsags pa sngon du 'gro ba can yin par ni mi 'thad de 'das pa ni med pa'i phyir ro//sa bon rang mtshungs par ldan pa'i sems sngon du 'gro ba can yang ma yin te/ rgyu dang 'bras bu dus mnyam pa khas mi len pa'i phyir dang dgra bcom pa'i sems kyang nyon mongs pa can du thal bar 'gyur ba'i phyir ro//mig la sogs pa rnam par shes pa de'i sa bon yang ma yin te/ de dag ni gzugs med pa'i khams na med pa'i phyir ro/ /sa bon yid kyi rnam par shes pa lung du ma bstan pa 'gags ma thag pa can yang ma yin te/lung du ma bstan pa de ni gang gis na 'dod chags la sogs pa'am dad pa la sogs pa de'i sa bon can du 'gyur ba nyon mongs pa can dang dge ba dag gis lhan cig skye ba dang 'gag pas bsgos pa yin no//lung du ma bstan pa de chos nyid kyi sa bon dang bcas pa ma yin te/ rigs gcig pa'i rgyun chags pa med pa'i phyir ro/ /yid kyi rnam par shes pa lung du ma bstan pa de ni 'khor ba thog ma med pa nas rgyun chags pa ma yin te/ 'dod pa dang gzugs na spyod pa'i yid kyi rnam par shes pa nyon mongs pa can dge ba la sogs pa du ma dang mig gi rnam par shes pa la sogs pa rten gyi khyad par tha dad pa can dag gis bar du chod pa'i phyir ro//des na sa bon de rnam par 'chad pa'i phyir sa bon de sngon du 'gro ba can ma yin no/ /sa bon med par skye bar khas blangs par yang mi nus te/dgra bcom pa'i sems kyang nyon mongs pa can du thal bar 'gyur pa'i phyir ro/ /de lta bas na 'di'i rgyu'i rkyen med par rab tu bstan to/ /'di gzugs can gyi khams su yang brjod par bya ba ma yin nam zhe na/ de ni ma yin te der ni gal te na dbang po gzugs can rten dang bcas pa la sa bon nyid du brten par sems pas nye bar bkod do//gzhan yang dge ba dang nyon mongs pa can du byung ba de dag rten med par yang 'gyur te/ khams gang na yang rnam par smin pa'i 'bras bu'i rgyun la ma brten par nyon mongs pa can dang dge ba'i sems dus mnyam du 'byung ba ni mthong ngo //skye ba'i kun nas nyon mongs pa'i skabs yin pa'i phyir 'di skabs su ma bab par brjod pa ma yin nam zhe na/ 'di ni skabs su ma bab pa ma yin te/ de lta bas na nyon mongs pa can dang dge ba'i sems kyi sa bon gyi gnas dang rten du gyur pa skye bar bsdus pa rnam par smin pa zhes bya ba ni kun gzhi'i rnam par shes pa khas blang bar bya'o snyam du dgongs pa yin no//de nyid na zhes bya ba la sogs pa 'dis kyang 'di ston te 'jig rten pa'i 'jug pa'i rnam par shes pa dang 'gal bar lam gyi bden pa mngon du byed pa/gal te kun gzhi'i rnam par shes pa rgyun chags par 'byung ba khas mi len na/ des na gzugs med pa na spyod pa'i 'phags pa'i 'jig rten las 'das pa lam la snyoms par zhugs pa rnams kyi 'gro ba ma bsgribs la lung du ma bstan pa'i mtshan nyid log pa kho nar 'gyur ba zhig na/bag la nyal ba'i lhag ma dang bcas pa'am phung po med pa'i mya ngan las 'das pas yongs su mya ngan las 'das pa'i 'gro ba ni ldog par yang khas mi len to/ /mdo sde pa la 'gro bar yongs su rtag pa'i rgyu ldan pa ma yin pa'i srog dang ris su mthun pa la sogs pa yang yod pa ma yin no//nam mkha' mtha' yas skye mched la sogs pas gsum na ni/ rang gi sa pa'i 'phags pa'i lam yod pa srid do/ /'du shes med 'du shes med min gyi skye mched na ni 'du shes zhan pa'i phyir rang gi sa pa'i 'phags pa'i lam med de/de'i phyir sa gsum dang mi mthun pas 'du shes med 'du shes med min skye mched logs shig tu dpyad par/ 'du shes med 'du shes med min skye mched ces bya ba la sogs pa smos so/ /'dis ni 'di ston te srid pa'i rtse mor skyes pa ci yang med pa'i skye mched kyi lam mngon du byed pa na/re zhig ci yang med pa'i skye mched ni 'gro ba'i rten ma yin te/ de las 'dod chags dang bral ba'i phyir ro/ /srid pa'i rtse mo yang 'gro ba'i rten ma yin te de'i sa pa'i sems dang sems las byung ba med pa'i phyir ro//'gro ba'i rten med par ni sems can 'ga' yang gnas par ma grags so/ /'phags pa'i lam de nyid kyang 'gro ba ma yin te 'gro ba'i gnyen po yin pa'i phyir ro/ /'on te gal te mya ngan las 'das pa'i rten yin no snyam na/de'i phyir/ mya ngan las 'das pa'i 'gro ba yang zhes bya ba smos te 'gro ba zhes bya ba'i sgra ni 'dir ngo bo nyid yin no/ /yang ci'i phyir mya ngan las 'das pa rten ma yin zhe na mya ngan las 'das pa ni rnam pa gnyis te/ phung po'i lhag ma dang bcas pa dang phung po'i lhag ma med pa'o//'di gnyi ga yang mi srid pa'i phyir rten du rung ba ma yin no/ /'phags pa'i lam gyi skad cig ma dang po kho na la phung po lhag ma dang bcas pa'i mya ngan las 'das pa ni ma yin te/ phra rgyas lhag ma dang bcas pa'i phyir ro/ / phung po'i lhag ma med pa'i mya ngan las 'das pa yang ma yin te gson po'i gnas skabs yin pa'i phyir ro/ /yang na mya ngan las 'das pa ni nyon mongs pa dang skye ba mi skye ba tsam yin na mi skye ba yang med pa yin pas med pa ni gang gi yang rten yin par ma mthong ngo / /de lta bas na 'gro bar bsdus pa 'phags pa'i lam gyi rten du 'gyur ba gang yin pa kun gzhi'i rnam par shes pa khas blang bar bya'o//skye ba'i kun nas nyon mongs pa 'chi 'pho'i gnas skabs pa'i dbang du mdzad nas/ legs par bya ba byed pa'am nyes par bya ba byed pa 'chi 'pho ba na zhes bya ba la sogs pa smos te/smad dam stod nas zhes bya ba 'dis ni 'chi ba na legs par bya ba byed pa'i lus ni rkang mthil nas bzung ste/ rim gyis drod yal bar 'gyur la/ nyes par bya ba byed pa'i ni spyi bo nas bzung ste/ rim gyis drod yal bar 'gyur ro zhes bya ba de ston par byed do//de ltar rnam par shes pas rim gyis lus yongs su 'dor bar khas blangs pa de la rnam par shes pa gang gis zhes bya ba dpyod par bya ba'o / /de la re zhig lus kyi rnam par shes pas ni ma yin te ma shi'i bar gnas skabs kyi yan lag gang dang gang gis lus kyi rnam par shes pa mi skye ba'i yan lag de dang de lus kyi rnam par shes pas yongs su bor ba'i phyir/dbang po 'gags na drod yal ba nyid du thal bar 'gyur du 'ong bas so/ /de bzhin du mig gi rnam par shes pa la sogs pa yang brjod par bya'o/ /yid kyi rnam par shes pas kyang ma yin te ci'i phyir zhe na/'di ltar de lus la brten pa ma yin te yid la brten pa'i phyir ro/ /lus kyang de la brten pa ma yin te de'i 'bras bu ma yin pa'i phyir ro/ /rang gi rten la mi skye ba'am rang gi 'bras bu mi byed na yongs su 'dor ba zhes bya na de gnyi ga yang yid kyi rnam par shes pa dang lus su lhan cig mi srid do//'on te yod pa tsam gyis yongs su mi 'dor ba yin la/ med pas ni yongs su 'dor ro snyam du sems na/ de yang rigs pa ma yin te srog tha ma chad pa tshun chad rtag tu yid kyi rnam par shes pa yod pas rim gyis lus yongs su 'dor ba med par thal par 'gyur ba'i phyir ro//de ni gang gis na lus thams cad la khyab par gnas la phyis rim gyis zhum pa'am cha shas kyis 'gag pa na rim kho nas rang gi yan lag rnams med pa'i lus kyi phyogs de yongs su 'dor bar 'gyur ba yan lag dang bcas pa yang ma yin no//gzhan yang yid kyi rnam par shes pa ni rtag tu yod pa'i phyir de'i dbang gis lus yongs su mi 'dor ba'am yongs su 'dor bar rung ba ma yin no/ /de lta ma yin na sems med pa'i gnyid la sogs pa'i gnas skabs dang dbang po gzhan gyi rnam par shes pa kun du 'byung ba'i gnas na 'chi bar thal par 'gyur te de med pa'i phyir ro//'on te las kyi 'phen pa rim gyis zad pa'i phyir rim gyis dbang po rnams 'gag go snyam du sems na/ de nyid dpyad par bya ste/ ci rnam par shes pas rang gir ma byas pa'i dbang po kho na dus re zhig cig gnas nas rang nyid las kyi mthu zad nas 'gag par 'gyur ba zhig gam/'on te rnam par shes pas rang gir byas pa dus re zhig cig gnas nas las kyi mthu zad nas rnam par shes pas yongs su 'dor ba na 'gag par 'gyur ba zhig yin/ gal te rtog pa dang po yin na de ni grags pa ma yin te/brgyal ba la sogs pa'i gnas skabs na yang sems khas len pa'i bying rnam par shes pa med pa'i dbang po ni gang du yang ma grags so/ /tshe dang drod dang rnam shes kyis/ /zhes bya ba la sogs pa'i mdo dang yang 'gal bar 'gyur te/ de las ni rnam par shes pas yongs su bor bas dbang po rnams mi gnas par gsungs so//'on te rtog pa gnyis pa yin no zhe na / de nyid rnam par shes pa gang gis yongs su bor na 'gag par 'gyur zhes dpyad na rnam pa thams cad du 'jug pa'i rnam par shes pa dag gis de rung ba ma yin no/ / yang kun gzhi'i rnam par shes pa yod na ji ltar rung zhe na/ de la ni dbang po thams cad brten to/ /de'i phyir dbang po'i phyogs gang dang gang zhig las kyi 'phan pa yongs su zad pas rnam par smin pa'i rnam par shes pa de skye ba dang mi mthun par 'gyur ba'i sa phyogs de dang de'i dbang po 'gags pas drod yal ba nyid yin no//rim pa 'dis na dbang po ma lus par yongs su bor bas lus ril drod yal ba'i bar du 'gyur bas de ltar na rung ste/ 'di ni re zhig phyi rol gyi don khas blangs pa'i tshul can no/ /shes bya nang gi yin par lta ba la ni gang gi tshe kun gzhi'i rnam par shes pa lus mtha' dag du snang bar skye ba de'i tshe lus thams cad zin pa yin la/gang gi tshe lus kyi phyogs la la ni bdag tu/ la la ni phyi rol gyi rnam par snang ba de'i tshe gang zhig bdag tu snang ba'i rnam pa can de ni zin pa yin la/ phyi rol gyi rnam pa can ni ma zin pa'i phyir drod yal ba yin te/ de yang gnas pa'i skabs su 'dzin par byed pa'i skabs kho nar bstan zin to//nyon mongs pa kun nas nyon mongs pa la sogs pa dpyad pa kho nas sa bon med pa'i phyir gzugs na spyod pa'i nyon mongs pa dang dge ba'i sems mi 'thad par shugs kyis bshad zin pa nyid do/ /yang rnam par byang ba'i skabs kyis bstan par bya ba yin pas/ji ltar na 'jig rten pa'i zhes bya ba la sogs pas 'jig rten pa'i rnam par byang ba ston to/ /'dod pa las 'dod chags dang ma bral ba gal te na nyer bsdogs thob pa yin no snyam pa la gzugs na spyod pa'i sems ma thob pa zhes bya ba smos so/ /'dod pa na spyod pa'i dge ba'i zhes bya ba ni thos pa las byung ba dang bsams pa las byung ba dag gis so//sbyor ba las byung ba'i sems zhes bya ba ni bsams pa las byung ba rab kyi tha ma la gnas pa de gang gis mjug thogs su gzugs na spyod pa'i sbyor ba las byung ba skye ba'o/ /da ni gzugs na spyod pa'i sems kyi sa bon du mi rung ste/ji ltar bstan pa'i tshul gyis na sa bon yongs su 'dzin par mi rung ba'i phyir ro/ /'on te gzugs na spyod pa'i sems 'khor ba thog ma med pa nas 'dris pa gang yin pa de sa bon yin no snyam du sems na/ gzugs na spyod pa'i sems tshe rabs du mar 'dod pa na spyod pa'i sems tshe rabs du mas bar du chod pa de ni 'das pa nyid kyis med pa'i phyir sa bon du rung ba ma yin no//kun gzhi'i rnam par shes pa'i phyogs la ni gzugs na spyod pa'i sems kyi sa bon 'khor ba thog ma med pa nas chos nyid kyis gnas pa'am bskyed pa'ang rung rnam par bar ma chad par brgyud de 'ongs pa rnam par smin par gyur pa gzugs na spyod pa'i skal pa mnyam pa'i rgyu yin pa'i phyir/rgyu'i rkyen yin la 'dod pa na spyod pa'i sbyor ba las byung ba'i sa bon de yongs su gso bar byed pa yin pa'i phyir dang / ma bsgribs pa'i ngo bo yin pa'i phyir bdag po'i rkyen yin no//yang ci'i phyir 'dod pa na spyod pa mtshungs pa de ma thag pa'i rkyen nyid du yang brjod par mi bya ste/ 'di ltar de ni 'gags ma thag pa yin no zhe na/ ma khyab pa'i phyir brjod par mi bya ste/ 'di ltar 'gags ma thag pa gang yin pa de kho na mtshungs pa de ma thag pa'i rkyen yin gyi gzhan ni ma yin no//bdag po'i rkyen ni rtsol ba nas bzung ste thos pa las byung ba la sogs pa'i sems thams cad yin te/ 'di ltar de dag gis rim gyis sa bon yongs su gso bar byed pa na mjug tu gzugs na spyod pa'i sems bar chad med par 'byung ngo / / de bzhin du 'dod chags dang bral bar bya ba'i phyir snyoms par 'jug pa'i sa bsam gtan gnyis pa la sogs pa thams cad la yang ci rigs su sbyar bar bya'o/ /'jig rten las 'das pa'i rnam par byang ba dang po'i dbang du mdzad nas/ ci ltar 'jig rten las 'das pa'i zhes bya ba la sogs pa smos te/gzhan gyi sgra zhes bya ba ni sangs rgyas dang de'i nyan thos la sogs pa chos bstan pa'o/ /so so rang gi zhes bya ba ni rna ba'i rnam par shes pas tshig nges par bzung nas de'i rjes la thob pa rjod pa dang brjod par bya ba'i rnam pa phyin ci ma log pa'i bdag nyid du yongs su gcod par byed pa nye bar rtog pa'i rnam par zhugs pa'i rnam par shes pa ni rigs pa dang ldan pa'i yid la byed pa gtsor 'gyur ba'i phyir so so rang gi tshul bzhin yid la byed pa zhes bya'o//de'i rgyu las yang dag pa'i lta ba 'byung ngo zhes bya ba ni zag pa med pa'i shes pa thams cad kyi dang po'o/ /gzhan gyi sgra las yid la byed pa des zhes bya ba la sogs pas ni de yang ji ltar gzhan gyi lta ba la rgyu dang bdag po'i rkyen med pas mi skye ba de ston par byed de/de la ji re zhig bdag po'i rkyen chos kyi mchog ces bya ba sems kyi rab tu gyur pa de med par ston par byed do/ /de la so so rang gi tshul bzhin yid la byed pa des rna ba'i rnam par shes pa 'ba' zhig gam yid kyi rnam par shes pa 'ba' zhig gnyi gar dus pa la bag chags bsgo bar 'gyur grang /snga ma gnyis la mi 'thad na gnyi ga yang bsgo bar bya ba nyid du mi 'thad par bstan par 'gyur bas snga ma gnyis kho na bstan par de la chos de dag ces bya ba la sogs pa smos so//re zhig rna ba'i rnam par shes pa ni med pa'i phyir sgo bar mi byed do/ /yid kyi rnam par shes pa yang tshul bzhin yid la byed pa dang mtshungs par ldan pa gang yin pa de tshul bzhin yid la byed pa de dang lhan cig skye ba dang 'gag pas sgo bar byed mod kyi 'on kyang rang gi rigs dang mthun pa'i 'bras bu bskyed par nus pa ni ma yin no//ci'i phyir zhe na/ de'i mjug thogs su chos kyi mchog skye ba ni ma yin te/ chos kyi mchog rnams ni dus ring mo zhig tu mngon du bya ba yin pa'i phyir ro/ /gang zhig myur du thar pa de yang tshe gcig tu thar pa'i cha dang mthun pa thos pa las byung ba goms par byas pas yin no//de lta bas na tshul bzhin yid la byed pa dang mtshungs par ldan pa'i yid kyi rnam par shes pa sgra la dmigs pa de ni/ de las gzhan pa'i rnam par shes pa rnam par g.yeng ba nyon mongs pa can dang lung du ma bstan pa dag gis yun ring mo zhig bar du chod do//tshul bzhin yid la byed pa dang mtshungs par ldan pa'i sems zhes bya ba ni chos kyi mchog ces bya ba'i sems gang yin pa de zhes bya ba'i don to/ /'dis ni ston te 'jig rten las 'das pa'i yang dag pa'i lta ba'i bdag po'i rkyen gyi chos kyi mchog ces bya ba'i sems yin la/ de'i yang sa bon ni gzhan gyi lta bas sgra yid la byed pa dang mtshungs par ldan pa'i sems yin no//gal te sa bon nyid du rtog na de ni rung ba ma yin te/ 'gags nas yun ring du lon pa'i phyir ro/ /de'i phyir bdag po'i rkyen sa bon med par ci ltar rung bar 'gyur/ bdag po'i rkyen med pa'i phyir yang dag pa'i lta ba yang med de de ltar re zhig bdag po'i rkyen med par bshad pa yin no//rgyu'i rkyen yang med par bstan pa'i phyir/ gang yang tshul bzhin yid la byed pa dang mtshungs par ldan pa'i 'jig rten pa'i sems de ni zhes bya ba la sogs pa smos so/ /de la tshul bzhin yid la byed pa dang mtshungs par ldan pa'i 'jig rten pa'i sems chos kyi mchog ces bya ba de ni sa bon yongs su 'dzin par mi rung bas 'jig rten las 'das pa'i sems kyi bag chags ma bsgos pa'i phyir de'i sa bon ma yin pas 'jig rten las 'das pa'i sems kyi sa bon med pa'i phyir rgyu'i rkyen med do//gal te yang thos pa'i bag chags sgra yid la byed pas bskyed pa brgyud nas chos kyi mchog rnams la 'ongs pa gang yin pa de 'jig rten las 'das pa'i sems kyi sa bon du 'gyur ro snyam na/de la thos pa'i bag chags kyi zhes bya ba la sogs smos pa thos pa'i bag chags ni chos kyi mchog de la 'jig rten las 'das pa de'i ched du sa bon nyid du yongs su 'dzin par rung ba ma yin te ji skad sngar bstan pa bzhin no//de lta bas na 'dir kun gzhi'i rnam par shes pa'i phyogs la rgyu dang bdag po'i rkyen dag ma tshang ba med par gzhan la bstan par bya gnas pa de brjod par bya ba nyung ba'i phyir dang rgyu'i rkyen dpyad pa'i skabs 'das ma thag pa yin pa'i phyir dang gzhan 'dod pa'i klan ka spang ba'i sgo nas kyang re zhig rjes rgyu'i rkyen kho na bstan par bya'o//de la re zhig gzhan gyi klan ka ni tshul bzhin yid la byed pa dang mtshungs par ldan pa 'jig rten pa'i sems ni 'jig rten las 'das pa'i sa bon du mi rung ngo zhes bstan pas/don gyis na de'i sa bon kun gzhi'i rnam par shes pa yin no zhes khas blangs par 'gyur ro/ /de'i phyir ji ltar kun gzhi'i rnam par shes pa kun nas nyon mongs pa'i rgyu yin pa rang gi gnyen po'i sa bon du rung ste/ dug ni bdud rtsi'i sa bon du rung ba ma yin no zhes bya ba yin no//klan ka gzhan yang tshul bzhin yid la byed pa dang mtshungs par ldan pa 'jig rten las 'das pa'i sems ni 'jig rten las 'das pa'i sems dang lhan cig skye ba dang 'gag pa med pa'i phyir de'i sa bon du mi rung ngo zhes bstan pas don gyis na kun gzhi'i rnam par shes pa ni 'jig rten las 'das pa'i sems dang lhan cig skye ba dang 'gag par rung bas de'i sa bon yin no zhes bya bar khas blangs par 'gyur ro//de'i phyir ji ltar 'jig rten las 'das pa'i sems 'dris pa ma yin pa kun gzhi'i rnam par shes pa dang / lhan cig skye ba dang 'gag pa'i tshul gyis rang gi bdag nyid bskyed pa'i phyir bag chags 'jog par 'gyur zhes bya ba yin te klan ka gnyi ga spang ba'i phyir chos kyi dbyings shin tu rnam par dag zhes bya ba la sogs pa smos so//de la chos kyi dbyings ni de bzhin nyid do/ /de ni rang bzhin gyis yongs su dag pa yang yin pas gnas skabs rnam par dag pa nyid kyi dbang du mdzad nas shin tu rnam par dag pa zhes bya ba smos so// de la yang nyan thos dang rang sangs rgyas rnams kyi rnam par dag pa yin no/ /de bzhin gshegs pa rnams kyi ni sgrib pa gnyi ga dang bral ba'i phyir shin tu rnam par dag pa yin no/ /de'i phyir de bzhin nyid shin tu rnam par dag pa la dmigs pa'i 'jig rten las 'das pa'i ye shes de'i rjes la thob pa dag pa 'jig rten pa'i ye shes kha cig gi gzhung lugs kyis ni dmigs pa'i rnam pa dang bral la byed rgyu tsam gyi dbang gis/kha cig gi gzhung lugs kyis ni gsung rab yan lag bcu gnyis kyi rnam par snang ba dang ldan la rnam pa 'dra ba'i rgyu nyid kyi dbang gis gdul ba'i rgyud dag pa rna ba'i rnam par shes pa dang de'i rjes la thob pa yid kyi rnam par shes pa la gsung rab kyi rnam pa yongs su grub pa'i ngo bo nyid snang ba ni 'dra bas brgyud pa'i chos kyi dbyings kyi rgyu mthun pa zhes kyang bya thos pa zhes kyang bya'o//des kun gzhi'i rnam par shes pa la bag chags bzhag pa gang yin pa de ni bsams pa las byung ba'i sa bon yin la de yang rim gyis dro bar gyur pa'i sa bon yin pa nas de yang chos kyi mchog gi bar kyi sa bon yin zhing chos kyi mchog gis gzhag pa'i sa bon ni 'jig rten las 'das pa yin no//zag pa dang bcas pa ji ltar zag pa med pa'i sa bon du 'gyur ba ma yin nam zhe na/ 'di la kha cig na re sngar gzhan gyi lta ba la bdag po'i rkyen med par bstan pa de'i gnyen por rang gi lta ba la bdag po'i rkyen rim pa 'dis bstan te/ de la chos kyi mchog ni byed pa po yin pa'i phyir dang go skabs 'byed pa'i rgyu yin pa'i phyir bdag po'i rkyen dang mtshungs pa de ma thag pa'i rkyen yin no//des bskyed pa'i sa bon ni bdag po'i rkyen kho na yin no/ /de bzhin nyid ni dmigs pa'i rkyen te de ltar na zag pa med pa'i dang po ni rkyen gsum gyis skye'o//de ltar byas na de bzhin nyid dmigs pa'i rkyen gyi sa bon can no zhes bya ba dang mthun par byas pa yin no zhes zer te/ rgyu'i rkyen med do snyam du bsams pa'i phyir ro/ /gzhan dag na re zag pa med pa'i sa bon chos nyid kyi gnas pa chos kyi dbyings kyi rgyu mthun pa thos pa'i bag chags kyi rim pas yongs su gso bar bya ba yin par bstan to//phra ba'i phyir dngos su lhang por ni ma bstan te/ 'du byed kyi rkyen bstan pa la kun gzhi'i rnam par shes pa bzhin no/ /de lta bas na rkyen bzhi kho nas skye'o/ /de bzhin nyid dmigs pa'i rkyen gyi sa bon can zhes 'byung ba gang yin pa de ni chos kyi dbyings kyi rgyu mthun pa thos pa'i bag chags kyi sa bon pa zhes bya ba'i rim pa 'di kho na las dgongs nas bstan pa yin no zhes zer ro//gzhan dag na re rna ba'i rnam par shes pa la sogs pa'i sa bon zag pa med pa chos nyid kyis gnas pa la brten nas ji skad smos pa'i tshul gyis bshad par snang ba'i rna ba'i rnam par shes pa skye'o//de nas de'i mjug thogs su rang gi sa bon zag pa med pa kho na las de la dmigs pa'i yid kyi rnam par shes pa zag pa med pa bsams pa las byung bas bsdus pa'o/ /de nas rim pa 'dis zag pa med pa'i sems gzugs na spyod pa chos kyi mchog gis bsdus pa'i bar skye'o//de nas des bskyed pa'i sa bon las 'das pa sdug bsngal la chos shes pa'i bzod pa dang mtshungs par ldan pa'i sems so/ /thos pa las byung ba la sogs pa chos kyi mchog la thug pa thar pa'i cha dang mthun pa dang / nges par 'byed pa dang mthun pa 'di rnams kyang ldan pa ma yin mod kyi bsod nams kyi cha dang mthun par 'dra ba'i phyir nye bar gdags pa'i sgo nas 'dod pa dang /gzugs na spyod pa nyid yin la nyon mongs pa can gyi yid dang lhan cig 'dug pa'i phyir zag pa dang bcas pa nyid kyang yin te/ 'di ltar 'di ni kun gzhi ma yin pa'i rnam par shes pas bsdus par 'chad par 'gyur ro//mi gsal ba'i phyir de kho na nyid ma mthong ba yin te de lta bas na rim pa 'di ni dngos kho na la brten nas bstan pa yin no zhes zer ro/ /de la phyogs dang po ltar na ni gzhung dang 'gal te 'di ltar 'dir ni rgyu rkyen sgrub pa kho nar snang ngo / /gal te yang rgyu'i rkyen med par yang skye bar 'gyur na ni dgra bcom pa yang nyon mongs pa can gyi sems su 'gyur ro//phyogs gnyis pa ltar na yang zag pa dang bcas pa ji ltar zag pa med pa'i rgyu yin zhes bya ba'i lan thebs par dka'o/ /phyogs par ma de ni nyes pa med par snang ngo / /de lta bas na rim pa 'dis ni zag pa dang bcas pa'i sa bon rgyu'i rkyen nyid du khas blangs pa'i phyir dang /rang bzhin gyi sa bon zag pa med pa'i thos pa las byung ba la sogs pa'i rim gyis yongs su gsos pa yang rgyu'i rkyen nyid du khas blangs pa'i phyir go rims bzhin du klan ka dang po dang gnyis pa spang bar rig par bya ste/ de ltar na re zhig rgyu rkyen bsgrubs pa yin no/ /thos pa'i bag chags gang yin pa de yang zhes bya ba la sogs pa'i gzhung ni kha cig na re bdag po'i rkyen ni dro bar gyur pa la sogs pa'i rim gyis chos kyi mchog yin par don gyi nges par gzung ba nyid/de yang bsgrub par bya mi dgos pas thos pa la sogs pa'i bag chags de nyid kyi rab tu dbye ba bstan pa'i phyir ro zhes zer ro/ / kha cig na re gzhung 'di ni bdag po'i rkyen sgrub pa'i phyir ro zhes zer ro/ /gal te kun gzhi'i rnam par shes pa'i ngo bo nyid yin na ni zag pa dang bcas pa'i phyir bdag po'i rkyen nyid yin rgyu'i rkye na du mi 'grub pas/ ji ltar de'i gnyen po sa bon du rung zhes bya ba smos so/ /ji ste de'i ngo bo nyid ma yin na rgyu'i rkyen nyid du ni grub na/gang zhig de'i rten nyid du nye bar gnas shing 'jig rten las 'das pa'i lam la yang bya ba byed par 'gyur ba bdag po'i rkyen ni brjod dgos so zhe na/ sangs rgyas rnams kyi zhes bya ba la sogs pas kun gzhi'i rnam par shes pa kho na rten yin no zhes ston par byed do/ /byang chub la brten nas zhes bya ba 'dis kyang kha cig na re chos kyi dbyings kyi rgyu mthun pa thos pa'i rim pa ji skad bstan pa nyid ston to zhes zer ro//kha cig na re byang chub thob kyi bar du byang chub la brten nas te ched du zhes bya ba yin no zhes zer ro/ /gnas gang la zhes bya ba ni sems can gyi rgyud gang la'o/ /lhan cig 'dug pa'i tshul gyis rnam par smin pa'i rnam par shes pa la 'jug ste zhes bya ba la kun gzhi'i rnam par shes pa smos pa ni mi khyab pa'i phyir te 'di ltar de ni sa brgyad pa la sogs pa la gnas pa'i byang chub sems dpa'i rgyud dang /dgra bcom pa dang / rang sangs rgyas rnams kyi rgyud la med kyi rnam par smin pa'i rnam par shes pa ni yod do/ /thos pa'i bag chags de ni rten gcig tu gtogs pa'i phyir kun nas nyon mongs pa'i sa bon dang gcig pa nyid du 'gyur ba yang med de/'o ma dang chu bzhin du rang gi mtshan nyid tha dad pa'i phyir ro/ /'di ltar bsod nams kyi cha dang mthun pa'i sa bon 'dod chags la sogs pa'i sa bon dang mtshan nyid tha dad pa'i phyir 'o ma dang chu bzhin du 'dug na 'di la khyad zhugs pa ci zhig yod ce na/de'i phyir de ni kun gzhi rnam par shes pa yang ma yin zhes bya ba smos te/ gnyen po'i ngo bos de mtshan nyid tha dad pa nyid du dgongs pa yin gyi 'bras bu tha dad pa tsam gyis ni ma yin no zhes bya ba'i don to/ /bsod nams kyi cha dang mthun pa ni kun gzhi'i rnam par shes pa'i gnyen po yang yin no//ji ltar rten gcig na dug dang sman dug sel dag 'dug pa ltar 'di yang de dang 'dra bar rig par bya'o/ /kun gzhi'i rnam par shes pa las de nyid dang gzhan nyid du brjod par bya ba ma yin pa'i phyir bag chags kun nas nyon mongs pa'i gnyen por yang mi rung ngo zhes kyang brjod par mi nus te de bzhin nyid kyis ma nges pa'i phyir ro//yang rim pas gang gis gnyen po de 'phel bar 'gyur zhe na/ de la bag chags chung ngu la brten nas zhes bya ba la sogs pas 'phel ba'i rim pa ston to/ /so sor thos pa dang bsam pa dang / bsgom pa lan mang du bya ba dang ldan pa'i phyir te chung ngu gang yin pa de nyid chung ngu'i 'bring po nas chen po'i chen por 'gyur gyi bar du dge ba'i chos rnams bsgom par bya ba yin pa'i phyir ro//de lta ma yin gyi gal te chung ngu la sogs pa rgyud so so tha dad pa zhig tu gyur na mngon par 'phel bar bya ba'i phyir bsgom pa dgos pa med par 'gyur ro/ /'dod chags la sogs pa'i bag chags kyi rgyun ni chung ngu'i rgyun nas bag chags chen po'i rgyun gyi bar du yang gzhan kho na yin te de ltar byas na rim gyis spong ngo //de lta ma yin gyi chung ngu gang yin pa de nyid gnas skabs de bor nas chen po'i chen po'i bar du gyur na cig car spang bar 'gyur gyi rim gyis ni ma yin no/ /thos pa'i bag chags kyi sa bon chung ngu dang /'bring po dang / chen po de yang zhes bya ba ni/ gzhan gyi lta ba ltar na chos kyi sku zag pa med pa'i tshul khrims kyi phung po la sogs pa'i mtshan nyid yin te/ de ni de'i skyed par byed pa nyid kyi sa bon yin no/ /rang gi lta ba lung na ni chos kyi sku de bzhin nyid kyi mtshan nyid yin te/de ni de'i thob par byed pa nyid kyi sa bon yin par rig par bya'o/ /ci'i phyir de ltar rig par bya zhe na/ kun gzhi'i rnam par shes pa'i gnyen po yin pas kun gzhi'i rnam par shes pa'i ngo bo nyid ma yin par bsdus pa zhes bya bas ji skad smos pa'i rgyu nyid ston par byed do//kun gzhi'i rnam par shes pa'i ngo bo nyid ma yin par bsdus pa nyid 'di ni de'i gnyen po sa bon yin pa'i phyir ro zhes bshad na/ de'i gnyen po'i sa bon ji ltar yin zhe na/ de'i phyir 'jig rten pa yin yang 'jig rten las 'das pa chos kyi dbyings shin tu rnam par dag pa'i [(]rgya [,]rgyu [)] mthun pa yin pas zhes bya ba la sogs pa smos so//de la 'jig rten pa nyid yin pa ni de kho na mthong ba'i gnas skabs na kun du spyod pa'i phyir ro/ /sa bon de ni yon tan gyi khyad par byed pa na gnyen po 'dren par byed pas de'i phyir de ni 'jig rten las 'das pa'i sems ma byung du zin kyang zhes bya ba la sogs pa smos te/'dis ni nyon mongs pa dang skye ba dang las kun nas nyon mongs pa'i gnyen po nyid grogs nyid yin par bstan to/ /de la nyon mongs pa'i kun nas dkris pa'i gnyen po zhes bya ba 'dis ni nyon mongs pa'i gnyen po nyid bstan te/ ji lta ji ltar thos pa la sogs pa lan mang du byed pa de lta de ltar 'dod chags la sogs pa nye bar bcom pa'i phyir nyon mongs pa kun du mi 'byung ngo //bag med pas kun du byung na yang myur bar rnam par gnon te/ re zhig nye bar gzhom pa la nus pa yod pas de skad ces bstan to/ /de bzhin du 'og ma dag la yang gnyen po srid pa'i dbang du byas nas rnam par bshad par bya'o//de la ngan song gi 'gro ba'i gnyen po zhes bya ba 'dis ni skye ba'i kun nas nyon mongs pa'i gnyen po ste/ ji lta ji ltar thos pa la sogs pa lan mang du byed pa de lta de ltar ngan song spros pa'i bag chags kyi sa bon nye bar bcom pas ring mo zhig tu ngan song du mi 'gro'o/ /'on te ji zhig ltar song na yang myur du thar pa dang /de na yang skyo ba dang bcas shing sems can smin par byed do/ /de nyid kyi phyir/ 'jig rten pa yi yang dag lta/ /chen po gang la yod gyur pa/ /de ni bskal pa stong phrag du'ang / /ngan 'gror 'gro bar mi 'gyur ro/ /zhes gsungs so/ /de la nyes par byas pa thams cad de ngas par byed pa'i gnyen po zhes bya ba 'dis ni las kun nas nyon mongs pa'i gnyen po ste/de bzhin du thos pa la sogs pa lan mang du byas pas ngan song par 'gyur ba'i las sngon byas pa rnams gang gis na rang gi rnam par smin pa 'byin par nye bar 'joms so/ /ji ste bag med pas sdig pa'i las kun du spyod na yang myur du nye bar 'joms so//'on te las des ngan song du 'gro na yang ring mo zhig na ngan song du 'gro'o zhes bya ba de lta bu la sogs pa sbyar bar bya'o/ /de la sangs rgyas dang byang chub sems dpa' dang phrad pa'i rjes su mthun pa'o zhes bya ba 'dis ni grogs nyid bstan te/thos pa la sogs pa'i bag chags kyi grogs yongs su bzung bas bde 'gror skye bar 'gyur ba'i las dge ba zag pa dang bcas pa gang gis na de dag dang phrad par 'gyur ba sangs rgyas dang byang chub sems dpa' dang ma bral ba'i gnas kyi khyad par dag tu rnam par smin par 'gyur ro/ /sngar chos kyi sku'i sa bon zhes bshad pa de la de gang dag chos kyi sku'i sa bon yin zhe na/de'i phyir byang chub sems dpa' las dang po pa rnams kyi 'jig rten pa yin yang zhes bya ba la sogs pa smos te chos kyi sku'i rgyu yin pa'i phyir chos kyi skur bsdus pa zhes bshad do/ /de la de bzhin nyid nyon mongs pa dang shes bya'i sgrib pa bag chags dang bcas pa las rnam par grol ba ni stobs dang mi 'jigs pa la sogs pa'i chos kyi rten yin pa'i phyir chos kyi sku zhes bya'o//nyan thos dang rang sangs rgyas kyi rigs can gyi las dang po pa rnams kyi yang gang gi lus su bsdus pa yin zhe na/ rnam par grol ba'i lus su bsdus pa zhes bya ba la sogs pa smos te/de la nyon mongs pa'i sgrib pa las rnam par grol ba'i ngo bo nyid yin pa'i phyir rnam par grol ba'i lus zhes bya'o/ /rnam par smin pa'i shes pa gang 'bri zhes bya ba ni rdo rje lta bu'i ting nge 'dzin gyi gnas skabs na'o/ /gnas kyang 'gyur ro zhes bya ba ni de bzhin nyid kyi mtshan nyid kyi chos kyi sku nyid du 'gyur ro zhes bya ba'i tha tshig ste/'di yang de bzhin gshegs pa rnams las brtsams nas bshad pa yin no/ /gnas rnam pa thams cad du gyur na zhes bya ba ni de bzhin nyid kyi gnas rnam par grol ba'i sku nyid du gyur na zhes bya ba'i don to/ /rnam par smin pa'i rnam par shes pa sa bon thams cad pa yang sa bon med par gyur pa zhes bya ba ni kun nas nyon mongs pa'i sa bon thams cad spangs pa zhes bya ba'i tha tshig go//'di yang nyan thos dang rang sangs rgyas mi slob pa rnams kyi phung po'i lhag ma dang bcas pa'i mya ngan las 'das pa'i dbang du byas nas bshad pa yin te/ de na rnam par smin pa thams cad kyi thams cad du mi srid pa'i phyir ro//lhan cig 'dug pa'i tshul gyis 'jug /ces kyang bshad/ mjug thogs su rnam par smin pa'i rnam par shes pa yang 'bri zhes kyang bshad pas/ de'i phyir yang ji ltar na zhes bya ba la sogs pa gleng slong bar byed do/ /ngang pas chu las 'o ma mthungs pa lta bu zhes bya ba 'di ni grags pa yin te/lhan cig pa'i ngo bor 'jug kyang la la ni ril gyis zad la/ la la ni ma nyams par bsdus so zhes bya ba'i tha tshig go/ /'jig rten pa'i 'dod chags bral ba ni zhes bya ba la sogs pas ni ji ltar kun gzhi rnam par ma bzhag pa la rten gcig la 'dod pa na spyod pa'i kun nas nyon mongs pa'i bag chags mnyam par ma bzhag pa'i sa'i bag chags dang /lhan cig pa'i ngo bor 'jug pa'i 'jig rten pa'i lam gyi nye bar bcom pas nyams par 'gyur ba dang / mnyam par bzhag pa'i sa'i bag chags 'phel bar byas nas gnas 'gyur ba de bzhin du kun gzhi'i rnam par shes pa rnam par gzhag pa la yang 'jig rten las 'das pa dang kun nas nyon mongs pa'i sa bon dag rnam pa thams cad 'phel ba dang /ma lus par spong bar rig par bya'o zhes ston par byed do/ /gnas gyur pa bzhin yin no zhes bya ba ni de bzhin nyid gnas gyur pa yin par sems te/ji lta ji ltar 'jig rten pa'i lam goms pas kun nas nyon mongs pa'i bag chags bcom pa'i phyir/ 'dod chags la sogs pa mi 'byung ba de lta de ltar de bzhin mngon sum du ma byas kyang cha de yongs su 'gyur ro zhe'o/ / kha cig na re gnas ngan len gyi gnas gyur yin par sems so/ / ci 'gyur pa rdzogs so// //