CLOSE WINDOW

D4050
བོད་ཡིག

@##/ /rgya gar skad du/ ma hA yA na sang gra ha b+hA Sh+yaM/ /bod skad du/ theg pa chen po bsdus pa'i 'grel pa/ bam po dang po / sangs rgyas la phyag 'tshal lo/ /'phags pa 'jam dpal gzhon nur gyur pa la phyag 'tshal lo/ / gang zhig shes bya'i sgrib pa mun pa rab rib dag gis ji snyed ji lta bar//yod pa don dam kun rdzob tshul gyis chos gang gzugs brnyan gzhan du snang gyur pa'i/ /sems can rnams la bsam pa bzhin du dri med thar pa'i thabs ni rnam pa gsum/ /nyon mongs bag chags bcas par bcom pa'i dri med yang dag byang chub mchog rtogs pa//rnam rtog dra ba thams cad spangs pa'i dri med ye shes zer gyis thob gyur nas/ /gang gis lhun gyis grub par phyogs bcu rnams su rab tu ston kyang 'khor ba la/ /der mi rtog pas gnas pa med cing snying rje mya ngan 'das la mi gnas gang / /thabs dang shes rab chen pos yongs su gzung bas bdag gzhan don gyi mthar byon dang //gang yang dam pa'i chos gang bcom ldan de yis yang dag rtogs nas legs bstan pa/ /gang 'di legs par sgrub dang ldan pa de yis bdud rtsi'i go 'phang zhi ba 'thob/ /gang zhig spong bar byed pa de ni sdug bsngal rgya mtshor yun ring shin tu 'bying //slob dang mi slob 'bras bu la gnas lam de nas song dge 'dun gzhan gyi mchog /gang zhig bde gshegs dge 'dun yon tan dri med rig pa'i brtul zhugs kyis bsgrub pa/ /bla na med bsod nams zhing la dge ba cung zad phra mo dag kyang 'dir byas na/ /sa dang nam mkha' rgya che ba ltar mkhas pa rnams kyis thar pa sgrub par byed//de dag la ni lus ngag yid kyis lan cig min par gus pas phyag 'tshal lo/ /mkhas par rlom par rang gi rtog la brten pas lung dang rtogs pa dkrugs gyur cing / /de ltar yang dag dam chos tshul dkrugs pa la chos kyis rab tu snang mdzad pa'i/ /ting 'dzin mi g.yo 'jig rten 'das la brten nas 'phags pa byams pa la brnyes pas//sngon chad ma byung ba yi dam chos ston par mdzad pa'i slob dpon la yang ngo / /ji ltar nyi ma phyogs rnams thams cad kun tu 'od zer dra ba 'gyed pa ltar/ /gang gis legs pa'i grangs pa gzhung gi 'od zer dri med rnam par spro byed de//zab cing don che bzang la sna tshogs tshig bzang nges pa'i don gyi mdo las byung / /gang zhig skye bo mkhas pa rang dga' med pa drang ba mnyen zhing gus par byed/ /shin tu rtogs par dka' ba'i chos de nyid la'ang gang gi blo ni thogs med la/ /rnyed dang grags pa dang ni bstod dang bde ba rnams la'ang chags pa rtag med pa'i//gang gis ming yang yon tan rjes mthun nges pa mkhas pa dag gis brtag brjod de/ /gang zhig thogs med ces ni mi dang lha yis grags pa'i yon tan rjod byed pa/ /mi zad blo las dam chos tshig don bdud rtsi'i char 'bab pa las phyogs gcig nyid//thos te byi'u lta bur rang gi nus pa cung zhig gang yang ci bzung dang / /bsdu ba gtan la dbab par shin tu rgyas par bstan las cung zhig brjod par bya/ /des kyang la la shin tu rgyas pa'i gzhung gi rgya mtshos skrag pa'i don byed srid/ /'di ltar sangs rgyas bcom ldan 'das rnams kyi gsung khyad par rnam pa bcus khyad par du 'phags pa gsungs te zhes bya ba don ci las brtsams nas rgyu gang gis brjod na/shin tu yangs pa'i shes bya chos kyi rang bzhin zab cing rgya che ba nyid sangs rgyas dang byang chub sems dpa'i mthus brjod kyi gzhan du na ga la nus/yang gang gis na bstan bcos 'di rim pa 'di ltar bstan na gang gi phyir chos mngon pa smos pa med na 'di gtsug lag nyid du mi shes pa des na de'i phyir dang / mdo'i ming bstan pa'i phyir te/ sa bcu pa bzhin du chos mngon pa theg pa chen po'i mdo zhes bstan to/ /gzhan yang gtsug lag nyid du shes par bya ba'i phyir chos mngon pa zhes bya'o//da ni mdo brtsams pa'i dgos pa ni ma rtogs pa rnams kyis rtogs par bya ba'i phyir te/ chos mngon pa'i mdo smos pa ni 'dis chos kyi rnam grangs brjod par bya ba'i don dang / mdo'i ming bstan pa'i phyir ro/ /theg pa chen po smos pa ni yang nyan thos kyi chos mngon pa btsal ba'i phyir te/gang gi phyir chos mngon pa kun gtsug lag ma yin no zhes log par rtog pa'i phyir ro/ /de yang kha cig rang gi rtog pa'i blo dag gis chos mngon pa sangs rgyas kyis gsungs par 'dod do/ /kha cig ni nyan thos kyis bstan pa dang /mkhas pa dag gis byas par 'dod do/ /theg pa chen po'i mdo zhes bya ba 'dis ni nyan thos la sogs pa las khyad par du 'phags pa nyid ston to/ /yang chos mngon pa smos pa ni byang chub sems dpa'i sde snod gzung ngo / /yang byang chub sems dpa'i sde snod gzung bas ni rang gi theg pa chen po las rang gi nyon mongs pa 'dul bar yang dag par snang ngo //gang theg pa chen por byang chub sems dpa' rnams kyi nyon mongs pa ni rnam par rtog pa nyid nyon mongs pa yin pas byang chub sems dpa'i chos mngon pa ni rgya che zhing zab pa'i mtshan nyid can nyid do/ /de la sde snod gsum ni mdo sde dang /'dul ba dang / mngon pa'o/ /gsum po de dag nyid theg pa dman pa dang / theg pa mchog gi bye brag gis gnyis su 'gyur te/ nyan thos kyi sde snod dang / byang chub sems dpa'i sde snod do/ /yang de ni gsum yang rung gnyis kyang rung ste/ ci'i phyir sde snod ces bya na/bsdus pa'i phyir te/ shes bya ma lus pa'i don bsdus pa nyid kyis so/ /rgyu gang gis gsum yin na rgyu dgu ste/ the tshom gyi gnyen po yin pas na mdo sde ste/ gang don gang la the tshom za ba de'i don de nges par bstan pa'i phyir ro/ /mtha' gnyis su sbyor ba'i gnyen pos na 'dul ba ste/ kha na ma thob dang bcas pa'i longs spyod bkag pas 'dod pa'i bsod nyams la sbyor ba'i mtha' spong ba nyid dang /kha na ma tho ba med pa'i longs spyod rjes su gnang bas bdag nyid ngal ba'i mtha' la sbyor ba spong ba'i phyir ro/ /bdag gi lta ba mchog tu 'dzin pa'i gnyen pos na chos mngon pa ste/ phyin ci ma log pa'i chos kyi mtshan nyid gsal bar byed pa'i phyir ro//yang bslab pa gsum ston pas na mdo sde'o/ /lhag pa'i tshul khrims dang / lhag pa'i sems yang dag par sgrub pas 'dul ba ste/ tshul khrims dang ldan pa ni 'gyod pa las rab tu 'da' bas ting nge 'dzin 'thob pa'i phyir ro/ /lhag pa'i shes rab yang dag par sgrub pas chos mngon pa ste/phyin ci ma log pa'i don la rab tu rtogs pa'i phyir ro/ /yang chos dang don rtogs pas mdo sde'o/ chos dang don sgrub pas 'dul ba ste/ nyon mongs pa 'dul ba dang ldan pa ni de rtogs pa las so/ /chos dang don rnam par gtan la dbab pa la mkhas pas na chos mngon pa ste/rgyu dgu po de dag gis na sde snod ni gsum du 'dod do/ /de dag gis kyang 'khor ba las rnam par grol bar byed pa'i phyir ro/ /yang ji ltar na de dag gis rnam par grol bar byed ce na/ bsgo ba dang / rtogs pa dang / 'jil ba dang / rab tu 'byed pas rnam par grol bar byed pa nyid do//thos pas ni sems la bsgo ba nyid do/ /bsam pas ni rtogs pa nyid do/ /zhi ba'i don tu sgom pa'i phyir 'jil ba nyid do/ /lhag mthong gis ni rab tu 'byed pa nyid do/ /mdor bsdu na mdo sde dang / 'dul ba dang / chos mngon pa de dag so so zheng don rnam pa bzhi ste/byang chub sems dpa' de rnams rtogs na thams cad mkhyen pa nyid thob par 'gyur ro/ /nyan thos kyis ni tshigs su bcad pa gcig gi don shes pas kyang zag pa zad pa 'thob bo/ /de ltar so so zhing don rnam pa bzhi yin zhe na/ gnas dang mtshan nyid dang / chos dang don mdor ston pas na/mdo sde'o/ /de la gnas ni yul gang du gang gis gang la bstan pa'o/ /mtshan nyid ni kun rdzob kyi bden pa'i mtshan nyid dang / don dam pa'i bden pa'i mtshan nyid do/ /chos ni phung po dang / skye mched dang / khams dang / rten cing 'brel par 'byung ba dang / zas dang / bsam gtan dang /tshad med pa dang / rnam par thar pa brgyad dang / zil gyis gnon pa'i skye mched dang / zad par gyi skye mched dang / byang chub kyi phyogs dang / so so yang dag par rig pa la sogs pa'o/ /don ni rjes su brjod pa'o/ /mngon du phyogs pa'i phyir dang / yang dang yang du ston pa'i phyir dang / zil gyis gnon pa'i phyir dang / mngon par rtogs pa'i phyir chos mngon par rig par bya ste/ mi gnas pa'i mya ngan las 'das pa la mngon du phyogs pa'i chos ni chos mngon pa'o/ /bden pa dang / byang chub kyi phyogs dang / rnam par thar pa'i sgo la sogs pa yang dang yang du ston pa'i chos ni chos mngon pa ste/chos re re zhing yang nges pa'i tshig dang / rang gi mtshan nyid dang / spyi'i mtshan nyid la sogs pa rab tu dbye ba mang pos ston pa'i phyir ro/ /zil gyis gnon pas na chos mngon pa ste/ phas kyi rgol bar 'dod pa'i dbang du byas nas zil gyis gnon pa nyid do/ /mdo sde'i don 'dis rtogs par byed pas na yang chos mngon pa'o//yang 'dul ba ni ltung ba dang / kun nas 'byung ba dang / ldang ba dang / nges par 'byung bar rig par bya'o/ /de la ltung ba ni ltung ba'i ris lnga'o/ /kun nas 'byung ba ni ltung ba mi shes pa nyid dang / bag med pa nyid dang / nyon mongs pa mang ba dang /ma gus pa las so/ /ltung ba ni ji lta ba bzhin du sdom pa 'dzin pa'i bsam pas yin gyi/ chad pa'i las kyis ni ma yin no/ /nges par 'byung ba ni rnam pa bdun te/ so sor chags pa dang / ltung bar mthong ba dang / bslab pa sbyin pa la sogs pa'i chad pa'i las dang /nang khrims kyis te/ bslab pa'i gnas bcas pa la yang rim gyis rjes su gnang ba la brten nas dge 'dun blo mthun pas rab tu bcas pa'i bslab pa'i gzhi rjes su gnang ba nyid dang / rten gnas gyur pa nyid kyis te/ dge slong dang dge slong ma bud med pa dang skyes pa nyid du mtshan gyur pas thun mong ma yin pa'i bye brag dag go//ltung ba'i de kho na nyid chos kyi skyed mos tshal gyi rnam pas so sor rtog pa'i khyad par dang / chos nyid rab tu rtogs pas bden pa mthong ba nyid kyis ltung ba phra zhing phra ba dag las nges par 'byung ngo / /yang don rnam pa bzhis na 'dul bar rig par bya ste/ gang zag nyid ni gang la brten nas bslab pa bcas pa'o//gang zag gi nyes pa gang gis zhus pa na/ de'i dbang gis dge 'dun thams cad 'dus nas bslab pa bcas pas na bcas pa'o/ /rab tu dbye ba ni bslab pa'i gzhi bcas pa de rnam par phye nas gtan la phab pa'o/ /nges par gzung ba ni de la ji ltar ltung ba dang /ltung ba med par nges par gzung ba'o/ /da ni rtsa ba'i gzhung brtsam par bya ste/ bcom ldan 'das kyi spyan sngar zhes bya ba ni 'bad pa dang gus par bcas pas tshig gzhan du ma yin pa'i don to/ /theg pa chen po la shin tu zhugs pa'i zhes bya ba ni gzungs la sogs pa'i yon tan rab tu thob pa zhes bya ba'i don te/yon tan de dag thob pas kyang don dang tshig yang dag par 'dzin pa dang / rab tu ston pa nyid du 'dis bstan pa'am/ de lta bu'i ming can gyi byang chub sems dpas so/ /ci'i phyir brjod na/ theg pa chen po che ba'i bdag nyid brjod pa'i phyir te/ de la brjod pa ni theg pa chen po che ba'i bdag nyid rab tu bstan pa'o//'di lta ste/ theg pa chen po las brtsams nas zhes bya ba ni de'i dbang du byas nas so/ /gsung khyad par rnam pa bcus khyad par du 'phags pa zhes bya ba la/ khyad par rnam pa bcus khyad par du 'phags pa'i gsung gang la mnga' ba de ni gsung khyad par rnam pa bcus khyad par du 'phags pa'o//gang gzhan yang khyad par du 'phags pa'i sgra'i don ni mchog gi don te/ de lta bu ni khyad par du 'phags pa'i don to/ /de la shes bya'i gnas kyi khyad par gyis khyad par du 'phags pa'i gsungs zhes bya ba la/ shes par bya bas na shes bya'o//de yang kun nas nyon mongs pa dang / rnam par byang ba ste/ de yang ngo bo nyid gsum mo/ /de'i gnas ni rgyu zhes bya ba'i don to/ /khyad par du 'phags pa'i gsungs zhes bya ba de yang kun gzhi rnam par shes pas so/ /'di ni las 'dzin pa ste/ shes bya ji snyed pa nyid kyi khyad par yin pas shes bya'i khyad par ro//shes bya'i mtshan nyid ni shes bya'i ngo bo zhes bya ba'i don to/ /shes bya'i mtshan nyid ni shes bya'i mtshan nyid de ngo bo nyid gsum mo/ /shes bya'i mtshan nyid de la ji ltar 'jug par 'gyur ba'am/ gang gis 'jug par 'gyur ba ste/ rnam par shes pa tsam mo//der 'jug pa ni de la 'jug pa'o/ /'jug pa de'i rgyu dang 'bras bu zhes bya ba la rnam par shes pa tsam la 'jug pa ni 'jig rten pa'i sbyin pa la sogs pa pha rol tu phyin pa la sbyor ba'i dus su ni rgyu'o/ /de dag nyid mngon du gyur cing 'jig rten las 'das par gyur pa ni 'bras bu'o/ /de'i rgyu dang 'bras bu'i sgom pa rab tu dbye ba zhes bya ba la/de'i rgyu dang 'bras bu nyid ni de'i rgyu dang 'bras bu'o/ /de'i sgom pa'i rab tu dbye ba ni sgom pa goms pa ste/ de'i goms pa ni sa'i khyad par gang yin pa'o/ /de'i bya ba ni yang dag pa'o/ /sgom pa rab tu dbye ba de nyid la lhag pa'i tshul khrims zhes bya ba la /tshul khrims kyi dbang du byas pa'i bslab pa ni lhag pa'i tshul khrims te/ bslab pa de yang byang chub sems dpa'i sgom pa gang mi dge ba'i chos mi byed pa'i sems so/ /lhag pa'i sems zhes bya ba la/ nang gi sems ni lhag pa'i sems so / /sems nyid kyi dbang du byas pa'i bslab pa ni lhag pa'i sems te ting nge 'dzin to //lhag pa'i shes rab ces bya ba la/ mngon par rtogs par byed pa'i shes rab ni lhag pa'i shes rab bam/ shes rab nyid kyi dbang du byas pa'i bslab pa ni lhag pa'i shes rab ste/ de yang rnam par mi rtog pa'i ye shes so/ / spangs pa'i khyad par zhes bya ba la/ khyad par du 'phags pa'am/ rab tu dbye bas sam/ so so rang gi rig pas nyon mongs pa dang shes bya'i sgrib pa spangs pa ste/ de yang mi gnas pa'i mya ngan las 'das pa'o/ /ye shes kyi khyad par gyis khyad par du 'phags pa'i gsung zhes bya ba ni sgrib pa dang bral ba'i ye shes te/de yang rnam par mi rtog pa'i ye shes rjes su mthun pa'o/ /sangs rgyas kyi ye shes ni sgrib pa thams cad kyi bag chags spangs pa ste/ 'di ni rnam par mi rtog pa'i ye shes dang / ye shes kyi khyad par ro/ /ji ltar brjod ces bya ba ni rnam pa gang gis zhes bya ba'i tha tshig go//pha rol tu phyin pa drug po dag ni de la 'jug pa'i rgyu dang 'bras bur zhes bya ba la/ rnam par shes pa tsam nyid kyis na ngo bo nyid gsum gyi khyad par dag pa'i pha rol tu phyin pa ni rgyu ste/ 'jig rten dang 'jig rten las 'das pa 'dren par byed pa'i phyir ro/ /sar chud pa rnams kyis ni de dag nyid dag pa'o//'jig rten las 'das par gyur pa ni 'bras bu'o/ /byang chub sems dpa'i sa bcu dag ni de'i rgyu dang 'bras bu sgom pa rab tu dbye ba zhes bya ba la bslab pa gsum dang / de'i 'bras bu dang / de'i spangs pa ni de'i 'bras bu spangs pa'o/ /de'i ngo bo ni de'i 'bras bu spangs pa nyid de/shes bya'i sgrib pa spangs pa zhes bya ba'i don to/ /rnam par mi rtog pa'i ye shes ni lhag pa'i shes rab ces bya ba la/ nyan thos kyi rnam par mi rtog pa ni phyin ci log bzhis rnam par mi rtog pa'o/ /byang chub sems dpa'i chos ni chos thams cad rnam par mi rtog pa nyid de/ de dag ni rnam par mi rtog pa dag gi khyad par yin no//sangs rgyas kyi sku gsum ni de'i 'bras bu zhes bya ba la/ de rnams kyi 'bras bu ni de'i 'bras bu ste/ de'i 'bras bu dang ye shes ni de'i 'bras bu ye shes so/ /de'i ngo bo ni de'i 'bras bu ye shes nyid do/ /de la ngo bo nyid med na chos kyi sku nyid kyang ma yin te/mig bzhin no/ /de med na longs spyod rdzogs pa'i sku yang ma yin te/ mig gi rnam par shes pa bzhin te/ 'dir rten dang brten pa mtshungs pa'i chos blta bar bya'o/ /longs spyod rdzogs pa'i sku med par sa chen por zhugs pa'i byang chub sems dpa' rnams kyi chos kyi longs spyod mi 'byung ngo //de med par yang tshogs yongs su rdzogs pa mi 'byung ste/ gzugs mi mthong ba bzhin no/ /sprul par yang mos pas spyod pa'i byang chub sems dpa' rnams dang / nyan thos dman pa la mos pa rnams kyi dang ba'i tshol ba nyid nyams par 'gyur ba des na nges par sku gsum du 'gyur ba yin no//theg pa chen po nyan thos kyi theg pa las khyad par du byas pa zhes bya ba la/ nyan thos kyi theg pa las ma bstan pa theg pa chen po las khyad par du 'phags pa mchog nyid du bstan pa dag go/ /de dag kyang gang zhe na/ gnas bcu po 'di dag ni byang chub chen po kun tu sgrub par byed pa ste/thams cad mkhyen pa'i ye shes 'thob par shin tu 'thad pa mthun pa 'gal ba med pa'o zhes bya ba la/ byang chub chen po kun tu sgrub par byed pa nyid ni/ byang chub chen por sgrub par byed pa nyid de rgyu zhes bya ba'i don to/ /shin tu 'thad pa zhes bya ba ni rigs pa la sogs pa'i tshad mas brtags nas nye bar bstan pa'i lam gyi rgyu mtshan te/rgyu mtshan rnam pa bcu po'o/ /mthun pa zhes bya ba ni mngon par rtogs pa la rab tu sbyor ba ni / rjes su mthun par gnas pa ste/ ji ltar lam bstan pa rjes su mthun par gnas pa bzhin no/ /'gal ba med pa zhes bya ba ni sa rnams la mi mthun pa'i gnod pa'i rgyu med pa ste/ji ltar bstan pa'i lam la chom rkun la sogs pa'i gnod pa med pa bzhin te/ 'khor ba dang mya ngan las 'das pa dag mi 'gal ba nyid do/ /ci'i phyir go rims 'di ltar bstan zhe na/ gang gi phyir byang chub sems dpas re zhig dang po nyid du chos zhes bya ba nas brtsams nas/'bras bu mya ngan las 'das pa dang / bla na med pa yang dag par rdzogs pa'i byang chub mngon par rdzogs par byang chub pa'i bar du 'di las bstan te/ 'di ltar rgyu'i chos rnams shes nas / rten cing 'brel par 'byung ba la mkhas par 'gyur te/ gang gi rgyu las 'bras bu 'byung gi//dbang phyug la sogs pa las ni ma yin pas des na rgyu dang 'bras bu gnyis ka yang shes par 'gyur ro/ /des na ni gang rgyu gang nyid las byung ba'i chos rnams kyi mtshan nyid shes par bya ste/ mtshan nyid kyang gang zhe na/ yod pa ma yin pa'i kun tu brtags pa la yod par mngon par zhen cing sgro btags pa ste/yod pa ma yin pa la sgro btags pas na yod pa'i yongs su grub pa la skur pa btab par 'gyur bas mtha' de dag gnyi ga'i skyon spangs pa ni mkhas pa yin no/ /de nas ni 'di ltar rnam par shes pa tsam nyid kyi mtshan nyid du bzung zhing rtogs par bya ste/ des ni sgrib pa med par 'gyur ro/ /de nas rnam par shes pa tsam nyid la 'dug pa na rjes su mthun pa'i pha rol tu phyin pa drug po 'jig rten pa kun rdzob tu rtogs pa dang / don dam pa dag rtogs par bya ste/ yongs su dag pa'i bsam pas gzung bar bya'o zhes bya ba'i don to/ /de nas ni sa bcu po rnams kyi khyad par gyis bskal pa grangs med pa gsum du goms par bya ste/nyan thos kyi rtogs pa ltar ni ma yin te/ de dag ni skye ba gsum gyi gnyen pos thar par 'gyur ro/ /de nas de dag nyid la bsgoms pas bslab pa'i tshul khrims la sogs pa'i bslab pa gsum yongs su rdzogs par bya'o//de nas lhag pa'i 'bras bu mya ngan las 'das pa nyon mongs pa dang / shes bya'i sgrib pa spangs pa bla na med pa yang dag par rdzogs pa'i byang chub sku gsum rdzogs par byang chub pa zhes bya ba ni go rims te / 'di dag nyid ni theg pa chen po'o/ /des na 'di ltar rten cing 'brel par 'byung ba brjod par bya ba de yang kun gzhi rnam par shes pa'i nang du 'dus so//de'i mtshan nyid ni de'i ngo bo nyid gsum mo/ /des na rtogs pa ni rnam par shes pa tsam nyid do/ /de las ni pha rol tu phyin pa'o/ /pha rol tu phyin pa las ni sa dag go/ /sa dag ni bslab pa'o/ /bslab pa las ni spangs pa dang ye shes te/mi gnas pa'i mya ngan las 'das pa ni sku gsum gyis bsdus pa'o/ /de dag nyid ni sangs rgyas zhes bya ste/ de bas na go rims ni 'di ltar bstan to/ /rnam grangs gzhan yang byang chub chen po kun tu sgrub par byed pa zhes bya ba ni spros pa med pa rnam par mi rtog pa'i ye shes kun tu 'dren pa'o//shin tu 'thad pa ni rigs pa'i tshad ma gsum dang mi 'gal lo / /mthun pa zhes bya ba ni sngar rjes su mthun par gyur la/ phyis 'gal ba ma yin pa ste / ji skad du/ dge la rjes su chags pa dang / /gnod la phan pa byed pa la/ /dkar nag ngo bor mi lta ba'i/ /dang po'i rtsa ba snying rje 'dod//ces bya bas so/ /thams cad mkhyen pas ye shes 'thob par zhes bya ba ni chos thams cad rgyun mi 'chad par rnam par thams cad kyis mkhyen pa 'byung ba nyid do/ /shin tu 'thad pa la sogs pa dag gi don bzhin yang shin tu 'thad pa mthun pa 'gal ba med pa zhes bya ba ni bstan pa dang bshad pa nyid de/ji ltar zhe na/ shin tu 'thad pa ni mthun pa 'gal ba med par gnas pas so/ /de la kun gzhi rnam par shes pa nyid kyi lung ni bcom ldan 'das kyis chos mngon pa de nyid las dang por bstan pa thog ma med pa'i dus kyi dbyings zhes bya ba'i tshigs su bcad pa gsungs te/ dbyings zhes bya ba ni rgyu'o//chos rnams kun gyi gnas yin te/ /zhes bya ba ni gang rgyu yin pa des na chos thams cad kyi gnas yin no zhes bya ba'i don to/ /de yod pas de chos rnams kun gyi gnas yod na 'gro kun te/ gang su 'khor ba na yod pa'i 'gro ba'o/ /'gro ba 'ba' zhig ma yin gyi mya ngan las 'das pa'ang ste/de yod pas na kun nas nyon mongs pa dang mya ngan las 'das pa nyid kyang ngo / /de ni shes bya'i gnas kun gzhi rnam par shes pa nyid kyi lung ngo / /lung gzhan yang / chos rnams kun gyi gnas yin te/ /rnam shes sa bon thams cad pa/ /zhes bya ba la/ rkang pa dang po ni rkang pa gnyis pas bshad do//dam pa dag la zhes bya ba ni byang chub sems dpa'i nges pa'i tshig yin gyi/ kun gzhi rnam par shes pa ni ma yin no/ /der sbyor ba zhes bya ba ni gnas pa'o/ /skye ba can zhes bya ba ni gang dag la skye ba yod pa de dag la skye ba can zhes byas nas so/ /kun nas nyon mongs pa'i chos zhes bya ba ni rnam par byang ba las bzlog pa'i don to//sems can dag skyes pa'i de'i bdag nyid du sbyor bas zhes bya ba ni 'dzin par byed ces bya ba'i don to/ /yang 'di'i lung ni dgongs pa nges par 'grel pa de las blo gros yangs pa 'gro ba drug gi 'khor ba 'di na sems can gang dang gang dag sems can gyi ris gang dang gang du yang sgo nga las skye ba'i skye gnas sam/yang na mngal las skye ba'am/ yang na drod gsher las skye ba'am/ yang na rdzus te skye ba'i skye gnas su lus mngon par 'grub cing 'byung bar 'gyur ba de'i dang por 'di ltar len pa rnam pa gnyis so / /rten pa dang bcas pa'i dbang po gzugs dang /len pa dang / mtshan ma dang / ming dang / rnam par rtog pa la tha snyad 'dogs pa'i spros pa'i bag chags len pa la brten nas sa bon thams cad pa'i sems rnam par smin cing 'jug la rgyas shing 'phel ba dang yangs par 'gyur ro/ /de la gzugs can gyi khams na ni len pa gnyi ga yod la/gzugs can ma yin pa'i khams na ni len pa gnyis su med do/ /blo gros yangs pa rnam par shes pa de ni len pa'i rnam par shes pa zhes kyang bya ste/ 'di ltar des lus 'di gzung zhing blangs pa'i phyir ro/ /kun gzhi rnam par shes pa zhes kyang bya ste/ 'di ltar de lus 'di la grub pa dang /bde ba gcig pa'i don gyis kun tu sbyong ba dang / rab tu sbyor bar byed pa'i phyir ro/ /sems zhes kyang bya ste/ 'di ltar de ni gzugs dang / sgra dang / dri dang / ro dang / reg bya dang / chos rnams kyis kun tu bsags pa dang / nye bar bsags pa yin pa'i phyir ro//blo gros yangs pa len pa'i rnam par shes pa de la brten cing gnas nas rnam par shes pa'i tshogs drug po 'di lta ste/ mig gi rnam par shes pa dang / rna ba dang / sna dang / lce dang / lus dang / yid kyi rnam par shes pa dag 'byung ngo / /de la rnam par shes pa dang bcas pa'i mig dang gzugs rnams la brten nas mig gi rnam par shes pa 'byung ste/mig gi rnam par shes pa de dang lhan cig 'jug pa dus dang spyod yul mtshungs pa rnam par rtog pa'i yid kyi rnam par shes pa yang 'byung ngo / /gal te mig gi rnam par shes pa gcig lan cig 'byung na ni mig gi rnam par shes pa dang /spyod yul mtshungs pa rnam par rtog pa'i yid kyi rnam par shes pa yang gcig kho na tsam lan cig 'byung ngo / /gal te rnam par shes pa'i tshogs gnyis sam/ gsum mam/ bzhi lhan cig gam/ lnga char lhan cig byung na yang der rnam par shes pa'i tshogs lnga po dang spyod yul mtshungs pa rnam par rtog pa'i yid kyi rnam par shes pa yang gcig kho na lan cig 'byung ngo //dpe'i sgo nas rgyas par blo gros yangs pa 'di lta ste dper na chu'i klung chen po 'bab pa las gal te rlabs gcig 'byung ba'i rkyen nye bar gnas par gyur na rlabs gcig kho na 'byung ngo //gal te rlabs gnyis sam/ gal te rab tu mang po dag 'byung ba'i rkyen nye bar gnas par gyur na rlabs mang po dag 'byung zhing chu'i klung de rang gi rgyun 'chad par yang mi 'gyur la/ yongs su zad par yang zad mi 'gyur ro/ /me long gi dkyil 'khor yongs su dag pa la gal te gzugs brnyan gcig 'byung ba'i rkyen nye bar gnas par gyur na gzugs brnyan yang gcig kho na 'byung ngo //gal te gzugs brnyan gnyis sam/ gal te rab tu mang po dag 'byung ba'i rkyen nye bar gnas par gyur na gzugs brnyan rab tu mang po dag 'byung zhing /me long gi dkyil 'khor de gzugs brnyan gyi dngos por yongs su 'gyur ba yang ma yin la/ yongs su sbyor bar yang mi mngon no/ /blo gros yangs pa de bzhin du chu klung lta bu dang / me long lta bu'i len pa'i rnam par shes pa de la brten cing gnas nas gal te mig gi rnam par shes pa gcig lan cig 'byung ba'i rkyen nye bar gnas par gyur na yang mig gi rnam par shes pa yang gcig kho na lan cig 'byung ngo //gal te rnam par shes pa'i tshogs lnga char gyi bar dag lan cig 'byung ba'i rkyen nye bar gnas par gyur na yang rnam par shes pa'i tshogs lnga char lan cig 'byung ngo //blo gros yangs pa de ltar byang chub sems dpa' chos kyi lugs shes pa la brten cing chos kyi lugs shes pa la gnas nas sems can dang / yid dang / rnam par shes pa'i gsang ba la mkhas pa yin la/ de bzhin gshegs pa ni byang chub sems dpa' sems dang / yid dang /rnam par shes pa'i gsang ba la mkhas par 'dogs na de tsam gyis thams cad kyi thams cad du 'dogs so/ /blo gros yangs pa gang gi phyir byang chub sems dpa' nang gi so so rang gi len pa mi mthong / len pa'i rnam par shes pa yang mi mthong la/ de yang yang dag pa ji lta ba bzhin du yin pa dang /kun gzhi yang mi mthong / kun gzhi'i rnam par shes pa yang mi mthong / bsags pa yang mi mthong / sems kyang mi mthong / mig kyang mi mthong / gzugs kyang mi mthong / mig gi rnam par shes pa yang mi mthong / rna ba yang mi mthong / sgra yang mi mthong / rna ba'i rnam par shes pa yang mi mthong /sna yang mi mthong / dri yang mi mthong / sna'i rnam par shes pa yang mi mthong / lce yang mi mthong / ro yang mi mthong / lce'i rnam par shes pa yang mi mthong / lus kyang mi mthong / reg bya yang mi mthong // lus kyi rnam par shes pa yang mi mthong zhing / blo gros yangs pa gang gi phyir byang chub sems dpa' nang gi so so rang gi yid kyang mi mthong /chos rnams kyang mi mthong / yid kyi rnam par shes pa yang mi mthong la/ de yang yang dag pa ji lta ba bzhin du yin na/ de ni byang chub sems dpa' don dam pa la mkhas pa zhes bya ste/ de bzhin gshegs pa yang byang chub sems dpa' don dam pa la mkhas pa ni sems dang /yid dang / rnam par shes pa'i gsang ba la mkhas pa yin par 'dogs so/ /blo gros yangs pa de tsam gyis sems dang / yid dang / rnam par shes pa'i gsang ba la mkhas pa yin la/ de bzhin gshegs pa byang chub sems dpa' sems dang /yid dang / rnam par shes pa'i gsang ba la mkhas par 'dogs na yang de tsam gyis 'dogs so zhes bya ba dang / yang don 'di nyid tshigs su bcad pa/ len pa'i rnam par shes pa zab cing phra / /zhes bya ba la sogs pas bstan te rtogs par dka' ba'i phyir ro//sa bon thams cad chu bo'i rgyun bzhin 'bab/ /ces bya ba ni rim gyis 'jug pa nyid kyis der sa bon thams cad chu bo'i rgyun bzhin du skad cig ma'i rim gyis 'jug pas so/ /len pa'i rnam par shes pa zhes bya ba ni ming gi rnam grangs dang / nges pa'i tshig go/ /bdag tu rtog par gyur na mi rung zhes bya ba ni rnam pa gcig tu zhugs pa nyid la bdag tu rtog par ma byed cig pa'o//dbang po gzugs can thams cad kyi rgyu yin pa zhes bya ba'i bshad pa ni 'di ltar tshe ji srid par rjes su 'jug gi bar du zhes bya ba la sogs pa yin te/ gang gi phyir mig la sogs pa'i dbang po gzugs can rnams kun gzhi rnam par shes pas ma bzung na shi ba'i lus bzhin du sngon po la sogs pa'i gnas skabs su 'gyur bas gang yang shi ba'i dus na de dang bral bar gyur pa na 'di dag kyang sngon po la sogs pa'i gnas skabs su 'gyur ro//des na 'di ltar gzung bar bya ste/ ji srid des bzung ba'i bar du tshe nyams par mi 'gyur ro/ /lus thams cad nye bar len pa'i gnas su gyur pa'i phyir na yang len pa ste/ 'di'i bshad pa ni/ nying mtshams sbyor ba sbrel ba na yang de dag mngon par 'grub par nye bar 'dzin pa zhes bya ba 'dis bshad pa yin no//gang gi phyir nying mtshams sbyor bar byed pa des na yang nying mtshams sbyor zhing sbrel ba mngon par grub pa 'dzin par byed pas lus thams cad yongs su gzung ba byas pas 'gyur te/ kun gzhi rnam par shes pa la lus thams cad kyi bag chags kun tu gnas pa'i phyir ro//de dag mngon par grub pa ste/ de'i mngon par 'grub pa ni de mngon par 'grub pa'o/ /nye bar 'dzin pa ni de dag mngon par 'grub pa nye bar len te/ de'i nye bar 'dzin pa yang bdag gi dngos po bskyed par 'gyur ba'o/ /don 'dis ni kun gzhi rnam par shes pa len pa'i rnam par shes pa nyid du yang brjod pa yin no//yang de ni sems zhes kyang bya ste/ zhes bya ba'i sems nyid ni kun gzhi rnam par shes pa ste/ yid kyi rnam par shes pa'i don sna tshogs nyid du dmigs pa ltar 'di'i don yang sna tshogs nyid du 'gyur ro zhes bya ba 'dis bstan to//de la mtshungs pa de ma thag pa'i rkyen byed pa nyid kyi phyir rnam par shes pa gang de ma thag par 'gags pa nyid ni yid kyi rnam par shes pa'i rgyur 'gyur bas de ni yid gcig go/ /gnyis pa ni nyon mongs pa bzhis nyon mongs pa can gyi yid de/ de ni 'jig tshogs la lta ba ste/ bdag nyid du mngon par zhen pa dang / gang gi dbang gis nga'o snyam du nga rgyal te/ bdag nyid mtho'o zhes pa dang / yang de la mi bden pa'i bdag la sred pa'i bdag nyid la chags pa dang / gsum po de dag gi rgyu ma rig pa ste/ ma rig pa mi shes pa'o/ /gang gnas gcig pos ni bskyed pa / gnyis pos ni nyon mongs pa can du byas pa ste zhes bya ba de la 'gags ma thag pa'i rnam par shes pa yid ces brjod pas ni rnam par shes pa thams cad 'byung ba'i skabs sbyin pas skye ba'i rten yin no/ /gnyis pa nyon mongs pa can ni kun nas nyon mongs par byed pa ste/ gang phyir dge ba'i sems la yang bdag go zhes 'byung ba'i phyir ro//yul la rnam par rig pa'i phyir rnam par shes pa'o/ /de ma thag pa'i rten byed pa dang / ngar sems pa'i phyir yid kyi rnam pa gnyis so zhes bya ba la/ de la yul la 'dzin pa'i don gyis na rnam par shes pa ni skabs ster ba'i don gyis ni yid gcig go/ /bdag tu nga rgyal la sogs pas kun nas nyon mongs pa'i don gyis na gnyis pa nyon mongs pa can gyi yid do//gzhan yang gang nyon mongs pa can gyi yid de med na/ gang gi rgyu can yid dang 'jug pa'i rnam par shes pa yang 'jug par mi 'gyur ro zhes blta bar bya'o/ /rnam par shes pa smos pas yid kyi gnyis pa yang smos pa nyid du 'gyur te/rgyu gang gis yid gang 'gags pa de nyid yid ces brjod na thob pa'i phyir ro/ /yang 'di'i nges pa'i tshig ni rnam pa sna tshogs kyi chos kyi bag chags kyi sa bon gyis gang zhing nye bar len pa'i phyir ro/ /de la rnam pa sna tshogs ni rnam pa tha dad pa'o/ /chos kyi bag chags kyi sa bon zhes bya ba ni rgyu gang gis nus pa'i khyad par ro//gang zhing zhes bya ba ni shin tu gang zhing bsags zhes bya ba'i don to/ /shes bya phra mo kun tu bsdus pa'i phyir te zhes bya ba ni de phra mo yang yin la shes bya yang yin pas shes bya phra mo ste/ shes bya phra mo'i khongs su gtogs pa'am/rtogs par dka' ba'i phyir ro/ /nyan thos ni shes bya thams cad shes pa'i don du spro ba med kyi/ bdag gi don 'ba' zhig gi rgyur de dag ni nyon mongs pa'i sgrib pa rags pa nyid sdug bsngal la sogs pa shes pas spong ngo / /byang chub sems dpa' ni bdag dang gzhan rnams kyi'o//yang de ltar grags pa de sgrub pa gang yin zhe na/ de med du zin na ma rig pa ma 'dres pa med pa'i skyon du 'gyur ro/ /yang ma 'dres pa'i ma rig pa gang zhe na/ gnyen po ma skyes pa na de kho na nyid shes pa la sgrib par byed pa ste/ de yang rnam par shes pa lnga la ni ldan pa ma yin te/de la gnas pa la mi sgrib pa'i phyir gang na gnyen po 'byung ba yod pa de ni mi mthun pa'i phyogs kyang 'byung ba yin no zhes bya bas so/ /nyon mongs pa can ma yin pa'i yid kyi rnam par shes pa de la yang med de/ nyon mongs pa can nyid du thal bar 'gyur ba'i phyir ro//nyon mongs pa can ma yin pa ni gzhan du nyon mongs pa dang / kun tu spyod par mi 'grub bo/ /de lta na nyon mongs pas nyon mongs pa can du yid kyi rnam par shes pa khas len na shin tu nyon mongs pa can nyid du thal bar 'gyur bas ji ltar sbyin pa la sogs pa dge ba'i sems 'byung bar 'gyur/de dang mtshungs par ldan pa las te/ yang gang dge ba dang mtshungs par 'jug pa'i yid yod pas de la de mtshungs par ldan par 'gyur gyi yang nyon mongs pa can gyi yid la ni gnyen po'i phyogs 'dren par mi rigs so/ /yang gang la nyon mongs pa tsam gyi yid dang mtshungs par 'jug pa dge ba'i sems yod na/de dang des drangs pa'i gnyen po'i phyogs skyes pa na cig shos 'gag pa yin pas 'di la skyon med do/ /lnga po dag dang chos mtshungs dang ste/ ji ltar mig gi rnam par shes pa la sogs pa lnga po dag la mig la sogs pa lnga po dag rten mtshungs par yod pa de bzhin du yid kyi rnam par shes pa la yang de dang mtshungs par 'gyur ba'i rten yod pa yin no//snyoms par 'jug pa'i bye brag dang ste/ gang la nyon mongs pa can gyi yid yod pa de ni 'du shes med pa'i snyoms par 'jug pa ste de yod pas so/ /gzhan la ni de med de/de ni khyad par yin no/ /gzhan du na gnyi ga la yid kyi rnam par shes pa kun tu rgyu ba med na bye brag med par 'gyur ro/ /des tshig med pa'i skyon du 'gyur/ gang 'di skad du ngar 'dzin pas na yid ces bya ba'i nges pa'i tshig de skad du brjod pa'i gzhi gang yin/ rnam par shes pa drug po 'gags ma thag pa'i rnam par shes pa la ni 'di ltar mi brjod de 'gags pa'i phyir ro//'du shes med pa'i skye ba'i rgyun thob pa na ngar 'dzin pa med pa'i skyon du 'gyur te/ 'di ltar de'i dus skabs na nyon mongs pa can gyi yid med na ngar 'dzin pa med par skye bar 'gyur ro/ /de lta na ni 'phags pas kyang smad par mi 'gyur na de ni smad pa nyid yin pas des na de ni de na yod pa nyid du rtogs par bya'o//ngar 'dzin pa dang ldan par ni ste/ sbyin pa la sogs pa sbyin pa la yang ngar 'dzin pa dang ldan pa nyid do/ /ngar 'dzin pa dang ldan pa yang ma rig pa med par mi rigs la/ ma rig pa yang rten med par ma yin zhing /rten yang nyon mongs pa can gyi yid med na gzhan med de/ nyon mongs pa dang shes bya'i sgrib pa spangs pa'i phyir 'bad pas de dag gi phyir bstan to/ /skye dgu kun gzhi la kun tu dga' ba zhes bya ba ni bstan pa'i tshig go/ /da ltar dang 'das pa dang / ma 'ongs pa'i dus gsum gyi go rims bzhin du tshig lhag ma rnams kyis ni bshad do//don gzhan yang kun gzhi la kun tu dga' ba ni de ltar ro/ /kun gzhi la dga' ba ni 'das pa'i dus su ste/ gang sngar kun gzhi la dga' ba las de ltar kun gzhi las yang dag par 'byung ngo / /gang kun gzhi la dga' ba dang / kun gzhi las yang dag par 'byung ba las ma 'ongs pa'i dus su kun gzhi la mngon par dga' ba'o//chos kyi rjes su mthun pa'i chos ni man ngag ji lta ba bzhin du byed pa'o/ /rtsa ba'i rnam par shes pa zhes kyang 'byung ste/ rnam grangs des kyang de nyid bstan te/ rtsa ba la brten pa'i shing ljon pa bzhin no zhes brjod pa la de la rtsa ba'i rnam par shes pa ni rnam par shes pa thams cad kyi rgyur gyur pa nyid do //dper na shing gi rtsa ba yal ga la sogs pa'i rgyu yin te/ rtsa ba med na yal ga la sogs pa mi 'byung ba bzhin du kun gzhi rnam par shes pa yang rtsa ba'i rnam par shes pa nyid do//'khor ba ji srid pa'i phung po rnams zhes 'byung ste/ rnam grangs des kyang zhes bya ba la 'khor ba ji srid pa'i phung po nyid kyang de nyid yin no/ /gang gi phyir la lar te gzugs med pa'i khams su gzugs so/ /res 'ga' zhes bya ba ni snyoms par 'jug pa kha cig gi gnas skabs su ste/'di lta ste/ 'du shes med pa'i snyoms par 'jug par ro/ /kun gzhi rnam par shes pa la de'i sa bon ni rgyun mi 'chad ces bya ba la/ gzugs dang sems kyi bag chags kyi rgyu gang las yang srid pa'i gzugs dang sems dag 'byung bar 'gyur ro/ /kun gzhi rnam par shes pa'i lam po che gtong ba zhes bya ba ni shin tu rgyas par byas zhes bya ba'i don te/kun gzhi rnam par shes pa yongs su bzung nas rnam par 'jog pa de ni shin tu mdzes pa yin no/ /de la ma rmongs pa rnams kyis kun gzhi rnam par shes pa rnam par gzhag pa zhes bya ba la/de la ma rmongs pa'i byang chub sems dpa' gang yin pa dag la de bstan pa'o/ /de la kun gzhi rnam par shes pa'i rnam par gzhag pa ni de bas na shin tu 'thad pa zhes bya ba nas brtsams te/ de bas na kun gzhi rnam par shes pa kun gzhi nyid du ches legs par rnam par gzhag pa grub po zhes bya ba'i bar gyis so//de la ngan 'gro zhes bya ba ni yi dwags dang dud 'gro dang / dmyal ba ni ngan 'gro'o/ /shin tu sdug bsngal ba zhes bya ba ni las kyi 'bras bu shin tu mi 'dod pa can gyi ngan 'gro rnams te/ gang yang der res 'ga' bde ba'i tshor ba 'byung ba de ni rgyu mthun pa'i 'bras bu yin gyi rnam par smin pa nyid ni der skyes pa rnams kyi sdug bsngal kho na'o//bde ba'i tshor ba 'dod chags dang bcas pa yang bsam gtan bzhi pa yan chad gong ma la med de/ de dang ldan pa'i sems can rnams dang mi mthun pa yin pas/ bsam gtan bzhi pa yan chad gong ma ste/bsam gtan bzhi pa dang gong ma la yang ngo / /de dang ldan pas zhes bya ba ni der skyes pa zhes pa rnams so/ /kun gzhi rnam par shes pa la nang gi dngos por khas blangs pa zhes bya ba nas brtsams nas de rnam par zhig par 'dod pa ni nam yang mi 'gyur ro zhes bya ba'i bar la/de la nang gi bdag gi dngos por khas blangs pa smos pa ni nang gi bdag nyid khas blangs pa'o/ /sdug bsngal gyi phung po rnam par gzhig par 'dod pa ni tshor ba sdug bsngal dang bral bar gsol ba 'debs so/ /kun gzhi rnam par shes pa la bdag tu chags pas bcings pa zhes bya ba ni kun gzhi rnam par shes pa la bdag go zhes khas blangs nas sred pas bcings pa'o//de ltar re zhig rnam grangs rnam par gzhag pa bstan to/ /yang rnam grangs bstan pa tsam gyis kun gzhi rnam par shes pa zhes bya ba'i ngo bo nyid dang / rgyu nyid dang 'bras bu nyid gang yin pa de ni nges par gzung bar mi nus pas de'i rang gi mtshan nyid ni gang kun nas nyon mongs pa'i chos thams cad kyi bag chags la brten nas de skyed pa'i nus pa'i khyad par can gyi rnam par shes pa gang yin pa ni rang gi ngo bo nyid dang /de nyid kyi nus pa ston pa ni sa bon yongs su 'dzin pa dang zhes bya ba la/de la kun nas nyon mongs pa'i chos rnams thams cad kyi bag chags la brten nas chos de rnams nyid skyes pa'i rgyu mtshan gyis sa bon yongs su 'dzin pa zhes bya ste/ nus pa'i bye brag goms pa dang ldan pa zhes bya ba'i don to/ /'di dag ni de'i rang gi mtshan nyid do/ /des na rgyu nyid kyi mtshan nyid ni kun nas nyon mongs pa thams cad kyi bag chags la brten nas de skyes pa'i rgyu mtshan gyi sa bon yongs su ldan pa ste/rnam par shes pa gang kun nas nyon mongs pa'i chos kyis bsgo zhing nus pa khyad par can du kun tu bsgrubs pa gang de dag nyid skyed pa'i rgyu mtshan de ni kun gzhi rnam par shes pa'i rgyu nyid kyi mtshan nyid do//de la 'bras bu nyid du rnam par gzhag pa nas brtsams nas/ thog ma med pa'i dus kyi bag chags la brten nas byung ba'o zhes bya ba'i bar la/ chos de dag rnams kyi bag chags la brten nas mngon par grub pa'i thog ma med pa'i dus nas bag chags yongs su bzung bas chos de dag dang lhan cig skye ba dang /'gag pa la brten nas gang skye ba'i rgyu mtshan 'di ni brjod par bya'o zhes bya ba'o/ /kun nas nyon mongs pa'i chos de dag dang lhan cig skye ba dang 'gag pa thob pa ni gang skye ba'i rgyu mtshan nyid ces bya ste/chos de dag nyid kyi rgyu nyid yin pa'i phyir ro/ /yang ci kun gzhi rnam par shes pa de dang / kun nas nyon mongs pa'i chos kyi sa bon dag tha dad dam 'on te ma yin/ des cir 'gyur de dang tha dad na ni yan lag thams cad kyis kyang tha dad pa thob par 'gyur zhing kun gzhi rnam par shes pa skad cig mas kyang gnod par 'gyur te/de dang tha dad pa'i phyir de la dge ba dang mi dge ba bdag gi bag chags yod pa sa bon nyid yin par 'gyur na de ni lung du ma bstan par 'dod do/ /tha mi dad na yang ji ltar na mang po yin des na de lta na yang ma yin te/ gnyi ga ltar yang skyon yod do//de la gnas pa de dag dang rdzas su ni tha dad pa yang ma yin zhes bya ba nas brtsams nas/ sa bon thams cad pa zhes bya'o zhes bya ba'i bar la de la tha dad pa yang ma yin tha mi dad pa yang ma yin zhes smos pa ni sngar smras pa'i skyon spangs pa'i don to//de de bzhin du 'byung ba la zhes bya ba ni rnam pa de lta bur 'byung ba'o/ /de 'byung ba'i mthu'i khyad par can zhes bya ba ni kun nas nyon mongs pa ba'i chos de dag rnams skyed pa'i nus pa khyad par can gyi sbyor ba dang ldan pa ste/ de skyed pa'i nus pa dang ldan pa yang sa bon thams cad pa zhes brjod do//don 'di'i dpe ni ji ltar nas kyi sa bon la myu gu skyed pa'i rgyu nyid yod pas 'di ni de'i rgyu nyid do/ /yang ji ltar dus ring por bzhag pa'am/ me yis nyams pa'i nas kyi 'bras bu de ni nus pa nye bar bcom pa na de de lta bu'i rnam par gnas su zin kyang mthu nyams par gyur pas sa bon med pa nyid du 'gyur ro//de bzhin du kun gzhi rnam par shes pas chos thams cad skyed pa'i nus pa yod pa'i phyir ro / /des na nus pa dang ldan pa las sa bon thams cad pa zhes brjod do/ /yang ji ltar kun nas nyon mongs pa'i chos de dag dus mnyam du gcig gi rgyu nyid du gcig 'gyur bar ji ltar blta zhe na zhes bya ba ni dpes bstan te ji ltar mar me'i me lce byung ba dang snying po tshig pa phan tshun dus mnyam pa skad cig ma gcig nyid la snying po gang la brten nas don der byung ba de ni de'i rgyu'o//'bar ba yang skad cig ma de nyid la brten nas bsregs pas de yang de'i sreg pa'i rgyu'o/ /de ltar na lhan cig 'byung ba'i rgyu yang bstan pa yin no//de bas na yod bzhin du yang rgyu dang 'bras bur grub par mthong ngo / /ji ltar kun gzhi rnam par shes pa kun nas nyon mongs pa'i chos zhes bya ba nas brtsams nas rgyu'i rkyen gzhan mi dmigs pa'i phyir ro zhes bya ba'i bar 'dis ni kun gzhi rnam par shes pa dang /kun nas nyon mongs pa'i chos rnams phan tshun gyi rgyu can nyid du bstan te/ de ltar na rgyu'i rkyen yin no/ /bag chags tha dad pa ma yin zhing / sna tshogs ma yin pa de chos tha dad pa sna tshogs dag gi rgyur ji ltar rung zhes bya ba la/ ji ltar rung ba dpes bstan par bya ste/ ji ltar gos skud pa mang pos bcings na yang sna tshogs nyid du mi mthong la/tshon gyi snod du bcug pa na sna tshogs su mthong ba ltar kun gzhi rnam par shes pa ni gos kyi gnas lta bu'o/ /'bras bu mngon par grub pa'i tshon gyi snod ni 'bras bu mngon par grub pa'i tshon gyi snod de/ der bcug pa ni rkyen gyis yongs su gzung ba zhes bya ba'i don to//bag chags kyi dus na sna tshogs ma yin yang 'bras bu'i dus na rnam pa du ma'i chos kyi rgyu'i ngo bo mthong ste btsos pa'i gos bzhin no// //bam po gnyis pa/ 'di ni theg pa chen po la phra ba mchog tu zab pa zhes bya ba la/ de la phra ba ni so so'i skye bo'i blos rtogs par dka' ba'i phyir ro//mchog tu zab pa zhes bya ba ni dgra bcom pa dag gis kyang rtogs par dka' ba'i phyir ro/ /de la mdor bsdu na rten cing 'brel par 'byung ba ni 'di gnyis te/ zhes bya ba las brtsams te/ bdag la byed pa po dang zab por rtog pa ste zhes bya ba'i bar la/de la ngo bo nyid rnam par 'byed pa can dang / sdug pa dang mi sdug pa rnam par 'byed pa can zhes bya ba 'di gnyis kyis ni rten cing 'brel par 'byung ba'i ming bstan to / /gang kun gzhi rnam par shes pa la brten nas zhes bya ba ni kun gzhi rnam par shes pa'i rgyu can gyi chos rnams 'byung ba de ni ngo bo nyid rnam par 'byed pa can te/ngo bo nyid sna tshogs rnam par dbye ba'i rkyen gyi dngos por 'gyur ba'i phyir ro/ /gang ma rig pa la sogs pa can de ni sdug pa dang mi sdug par rnam par 'byed pa can no/ /de'i phyir sdug pa dang mi sdug pa'am/ bdag gi ngo bo'i bye brag rnam pa sna tshogs kyi rgyur gyur pa yin no//kha cig ni sngon byas pa'i rgyu las byung ba nyid du zhes bya ba ni skyes bu byed pa'i rgyu las kyang de ni mi 'dod do / /'di ni dmus long la glang po che'i dpes bstan to/ /ma rig pas dmus long zhes bya ba ni ma rig pas dmus long ste/ kun gzhi rnam par shes pa'i ngo bo mi shes so //rgyu nyid ces bya ba ni gang sngar rang gi mtshan nyid rnam par gzhag pa'o/ /rgyu'i mtshan nyid rnam par gzhag pa ni rgyu nyid kyi mtshan nyid do/ /'bras bu rnam par gzhag pa ni 'bras bu'i mtshan nyid bstan pa ste/ de mi shes pa ste ma rig pa'i dbang gis kun gzhi rnam par shes pa'i dbye ba mi shes pas chos rnams kyi rgyu nyid du rang bzhin la sogs pa sems so//gnyis pa sdug pa dang mi sdug pa rnam par 'byed pa mi shes pas bdag nyid byed pa po dang / zab por shes so/ /de la chos thams cad kyi rgyu ni kun gzhi rnam par shes pa ste/de la bag chags bsags pa'i phyir ro/ /'bras bu yang de nyid de/ de nyid la bsgos pa'i phyir ro/ /ngo bo nyid ni rnam par smin pa'i rnam par shes pa sa bon thams cad pa zhes bya ba la/ gang bdag nyid kyi ngo bo so sor thob pa ni rnam par smin pa'o/ /sa bon thams cad pa nyid ni des bsgos pa'i phyir ro//lus thams cad dang 'gro ba thams cad ces bya ba de la 'gro ba ni lnga'o/ /'gro ba de dang de'i ris mthun pa dang ris mi mthun pa rnam pa sna tshogs pa ni lus thams cad do/ /kun gzhi rnam par shes pa chos thams cad kyi sa bon du bstan pa des bon gyi ngo bo nyid du kun tu gsal bar bya bar 'dod nas/phyi dang nang zhes bya ba la sogs pa tshigs su bcad pa lngas bstan to/ /de la phyi dang nang la sogs pa la nang gi bdag nyid can ni kun gzhi rnam par shes pa'o/ /mi gsal ba ni phyi rol te/ lung du ma bstan pas zhes bya ba'i don to/ /gnyis ni kun gzhi rnam par shes pa dge ba dang /mi dge ba'o/ /don gzhan yang kun nas nyon mongs pa dang / rnam par byang ba'o/ /kun rdzob ces bya ba ni phyi rol te/ kun rdzob de'i sa bon zhes brjod do/ /de bas na 'di dag ni kun gzhi rnam par shes pa yongs su gyur pa nyid yin no/ /dam pa'i don yang kun gzhi rnam par shes pa ste/ de ni chos thams cad kyi sa bon no/ /'di ltar kun gyi sa bon nyid ni rnam pa drug go/ /yang de dag ni skad cig pa ste/ gnyi ga yang byung ma thag tu 'jig pa'i phyir dang / sa bon gyi ngo bo nyid du rtag tu mi rung ba'i phyir dang / de bzhin du dus thams cad du khyad par med pa'i phyir ro/ /lhan cig 'byung ba ni 'das pa ma yin/ma 'ongs pa ma yin/ tha dad du ma yin par sa bon gyi dus na gang yin pa de nyid ni 'bras bu skyed pa'o/ /de ni rgyun chags 'byung bar 'dod/ de ni rten kun gzhi rnam par shes pa ni ji srid gnyen po skyes kyi bar du'o/ /phyi rol gyi yang ji srid rtsa ba yod pa dang / ji srid smin pa yod kyi bar du'o//nges dang ste gang sa bon thams cad las thams cad 'byung ba ni med de/ so sor nges pa de'i sa bon las de 'byung ngo / /rkyen la ltos pa dang / sa bon thams cad las thams cad du mi 'byung ste/ rkyen gang thob pa na de 'byung bar 'gyur ro/ /rang gi 'bras bus bsgrubs pa zhes bya ba la/rang gi sa bon las rang gi 'bras bu 'byung ba ste/ kun gzhi rnam par shes pa las kun gzhi rnam par shes pa nyid dang / 'bru las 'bru nyid de/ de ltar re zhig sa bon las 'bras bu 'byung ngo / /bag chags kyi mtshan nyid ji lta ba bzhin du bstan par bya ba ni/ brtan pa la bsgo bar bya'o //g.yo ba la ni ma yin te/ rlung bzhin no/ /rlung gis ni bsgo ba mi 'dzin te/ gang gi phyir rgyang grags tsam gyi bar du yang de la bsgos pa rjes su mi 'jug go/ /tsam gyi bar gyis ni dpag tshad brgya'i bar du yang dri rjes su 'byung ngo / /lung ma bstan zhes bya ba ni lung du ma bstan pa la dri zhes bya ba'i don to //gang dri mi zhim pa sgog skya dang de bzhin du dri zhim pa la ni ma yin te/ lung du ma bstan pa la sgo bar byed do/ /bsgo bar 'os pa la sgo bar byed kyi bsgo bar bya ba ma yin pa 'di lta ste/ rdo ba dang / dngul dang / gser la sogs pa la mi bsgo'o/ /gang bsgo ba 'dzin pa de la sgo bar byed pas bsgo ba zhes bya ba ste/bsgo bar 'os pa la'o/ /'brel pa la sgo byed ces bya ba ni 'brel pa med pa la ni ma yin te/ bar chad med par 'byung ba la zhes bya ba'i don to/ /de las gzhan ni min zhes bya ba ni de las gzhan nyid de/ de ma yin pa de las grol ba ste/ kun gzhi rnam par shes pa las gzhan pa la mi bsgo'o//skad cig ma la sogs pa de dag thams cad ni kun gzhi rnam par shes pa la yod kyi/ de ni skad cig ma nyid kyi 'jug pa'i rnam par shes pa dang / gnyen po skyes pa'i bar la mi 'jug pa'am/ 'khor ba ji srid pa'i bar du dge ba la sogs pa nges pa'i rgyur gyur pa'i phyir bsod nams dang bsod nams ma yin pa dang mi g.yo ba 'du byed pa'i rkyen la ltos nas dge ba dang mi dge ba'i 'gro bar rnam par smin pa nyid yin gyi 'jug pa'i rnam par shes pa la ni chos mi mthun pa thams cad la sbyar bar bya'o//gang yang de ltar kun gzhi rnam par shes pa yon tan de dag dang ldan pas de na bsgo bar bya ba yin gyi/drug po dag la ni ma yin te/ 'brel pa med pa dang / rnam par shes pa g.yo ba nyid kyis so/ /tha dad gsum dang 'gal ba'i phyir/ /zhes bya ba la/ rten gzhan dang gzhan la re re zhig /dmigs pa gzhan dang gzhan la/ yid la byed pa gzhan gyi don gzhan la rnam pa gzhan gyis 'jug pa'i phyir ro//skad cig ma snga ma las skad cig phyi ma 'byung bar 'gyur bas zhes bya ba dpes bstan pa de dgag par bya ba'i phyir/ skad cig lhan cig med pa'i phyir/ /zhes pa ste/ skad cig dag gcig tu yod pa med de/ gang lhan cig 'byung ba dang 'gag pa yod na ni bag chags kyi gnas su 'gyur ro//gal te rigs mthun pa'i rnam par shes pa de dang mthun pa'i rigs gang yin pa la 'brel ba med kyang sgo bar byed de zhes 'dod na/ rigs la bya na gzhan du thal te / rigs gzhan la yang thal bar 'gyur te/ mig la sogs pa rnams gzugs dang ba nyid du rigs mthun pas de dag kyang phan tshun bsgo bar thal bar 'gyur ro//gang yang sngar bstan pa'i sa bon gnyis po phyi dang nang gi skyed pa dang ni 'phen par 'dod ces bya ba las/ de la skyed par byed pa'i sa bon ni phyi rol gyi 'bras bu smin par 'gyur gyi bar du'o/ /nang gi sa bon ni mthar thug pa'i bar du skyed par byed pa nyid do//'phen par byed pa ma btab pa ni phyi rol gyi'o/ /shi ba ni nang gi ste/ lus ni 'di phyis kyang mi 'gyes par 'phangs nas gnas so/ /gal te skye ba'i sa bon gyi rgyu can yin na/ gang gis na de nyams par mi 'gyur te/ dus phyis cung zad tsam yang rjes su 'jug par mi 'gyur ro//gal te skad cig ma gcig nas gcig tu 'jug par 'gyur na/ skad cig snga ma skad cig phyi ma'i rgyur gyur na ni des na nam yang nyams par mi 'gyur bas de bas na nges par 'phen pa'i rgyu las byung ba yin no/ /sa bon de dag kyang mda' ltong sbyor ba dang 'dom rdzogs pa gnyis mda' 'gro ba dang phog pa gnyis kyi rgyur 'gyur ba bzhin no//yang 'jug pa'i rnam par shes pa gzhan gang yin pa de ni lus dang 'gro ba thams cad du nye bar spyod pa can du blta bar bya ba ste zhes bya ba la/ 'di ltar de la nye bar spyod pa 'byung ba nyid ces bya ba'i don te/ nye bar spyod pa'i ngo bo ni nye bar spyod pa can zhes byas nas so//don de nyid dbus dang mtha' rnam par 'byed pa'i tshigs su bcad pa dang mngon pa'i lung gis bstan te/ rnam par shes pa de dag nyid gcig gi rkyen gcig yin pa nyid kyi lung ni chos mngon pa'i mdo las/ chos kun rnam par shes la sbyor/ /zhes bya ba'i tshigs su bcad pa ste/phan tshun rgyu'i dngos po dang zhes bya ba la rtsa ba'i rnam par shes pa las de dag 'byung ba'i phyir rgyu'o/ /'bras bu'i dngos por rtag tu sbyor/ /zhes bya ba la gang gi tshe kun gzhi rnam par shes pa rgyu yin pa na de'i tshe de 'bras bu yin la/ /gang gi tshe de rgyu yin pa na kun gzhi rnam par shes pa 'bras bu yin no//de dag ni rten cing 'brel par 'byung ba rnam pa gsum mo/ /'khor ba dang / 'dod pa dang / mi 'dod pa'i 'gro ba dang / nye bar spyod pa can la rkyen rnam pa bzhir 'gyur te/ de la dang po la ni rgyu'i rkyen te/ kun gzhi rnam par shes pa la gnas pa'i chos rnams kyi bag chags so/ gnyis pa la ni bdag po'i rkyen te/ ma rig pa la sogs pa'i dbang gis 'du byed rnams 'byung ngo / /yang nye bar spyod pa can gyi rten cing 'brel par 'byung ba zhes brjod la/ rnam par shes pa drug po rnams kyi ni rkyen gsum du 'gyur te / de la mig gi rnam par shes pa'i bdag po'i rkyen ni mig go/ dmigs pa'i rkyen ni gzugs so/ /mtshungs pa de ma thag pa'i rkyen ni gang gi de ma thag tu rnam par shes pa gang 'byung ba ste/ gang gi phyir gal te des skabs ma byin na gang yang 'byung bar mi 'gyur bas so/ /de bzhin du rnam par shes pa lhag ma rnams la yang ngo / /de ltar kun gzhi rnam par shes pa'i rnam grangs gzhan bstan nas/da ni mtshan nyid rnam par gzhag par bya ba ste/ ji ltar gnyi ga yang kun gzhi rnam par shes pa la rung gi/ gzhan du ma yin pa de ltar rig pas nges par bstan par bya ste/ de yang 'di ltar mig gi rnam par shes pa gang 'dod chags la sogs pa nyon mongs pa dang /nye ba'i nyon mongs pa gang dag dang lhan cig skyes shing 'gags pa de nyid la de dag gi sa bon gyi dngos por bag chags bsgos par 'gyur gyi gzhan la ni ma yin no zhes bya ba la de la de nyid la zhes bya ba ni mig gi rnam par shes pa la'o/ /de dag gi zhes bya ba ni 'dod chags la sogs pa dag gi'o//sa bon gyi dngos por zhes bya ba ni rgyu'i dngos por ro/ /gzhan la ni ma yin zhes bya ba ni rnam pa'i rnam par shes pa zhes bya ba la sogs pa la ni ma yin no/ /rnam par shes pa gzhan gyis bar du chod pa zhes bya ba ni rnam pa'i rnam par shes pa la sogs pas bar du chod pa'o//bag chags zhes bya ba ni 'dod chags la sogs pa'i bag chags so/ /bag chags kyi gnas zhes bya ba ni mig gi rnam par shes pa'o/ /'dod chags la sogs pa dang bcas par 'byung du zhes bya ba ni 'dod chags pa dang bcas par 'byung ba'o//de lta bas na 'das pa'i rgyu las ni mi rung ste/ 'di ltar 'das pa'i dus las rnam par smin pa'i 'bras bu 'byung ba ji ltar mi rung ba bzhin du de'i yang mi rung ngo / /gal te bye brag tu smra ba 'das pa yod pa nyid du 'dod pas de'i phyir 'das pa las 'byung ngo zhe na/ de dag gi 'das pa zhes bya ba ni brjod pas brjod par bya ba nyid du mi 'grub pas de nas 'das pa zhes bya ba 'di gang yin/chos gang rnam par smin pa'i 'bras bu skyes pa yod pa de ni bag chags med pas ma yin no/ /mig gi rnam par shes pa zhes bya ba la / re zhig mig gi rnam par shes pa 'dod chags la sogs pa dang lhan cig 'byung ba de la yang bag chags mi rung ste/mig gi rnam par shes pa skyes pa de la bag chags ji ltar rigs/ re zhig 'dod chags la ni ma yin te/ 'dod chags la mig gi rnam par shes pa'i bag chags ni mi rigs te/ gang gi phyir 'dod chags ni mig gi rnam par shes pa la brten pa'i phyir dang /mi brten pa'i phyir ro/ /rnam par shes pa gzhan dag la yang ma yin te zhes bya ba ni rna ba'i rnam par shes pa la sogs pa la ste/ gang gi phyir de dag ni gnas tha dad pa'i phyir dang / gnas tha dad pa nyid yod na lhan cig 'byung ba dang 'gag pa med pa'i phyir ro//mig gi rnam par shes pa'i gnas ni mig /rna ba'i rnam par shes pa'i gnas ni rnam pa'o/ /de bzhin du yid kyi rnam par shes pa'i gnas ni yid ces bya ba'i bar du ste/ 'di ltar des na bskal pa'i gnas nyid yin pas gzhan dag la gzhan dag gi bag chags mi rigs so//rang gi dngos po la yang ma yin te zhes bya ba la/ mig gi rnam par shes pa la mig gi rnam par shes pa'i bag chags kyang ma yin te/ mig gi rnam par shes pa gnyis 'byung ba ni med de/ gnyis kyi ngo bo med pas na lhan cig 'byung ba dang 'gag pa med pa'i phyir ro/ /de lta bas na mig gi rnam par shes pa la 'dod chags la sogs pa nyon mongs pa dang /nye ba'i nyon mongs pas bag chags bsgos par mi rung la/ mig gi rnam par shes pa de la mig gi rnam par shes pa'i bag chags nyid kyang ma yin no/ /thog ma nyid du zhes bya ba ni 'dir dang por ro/ /de yang sa bon med par skye bar 'gyur te zhes bya ba ni rgyu med par skye ba'o//bag chags de gnas dang bcas par zhes bya ba ni sems dang bcas pa'i nyon mongs pa'i bag chags so/ /nyon mongs pa'i gnyen po'i rnam par shes pa byung na de ma yin pa gzhan 'jig rten pa'i rnam par shes pa thams cad ni 'gags na zhes bya ba ni rnam par shes pa drug po 'gags pa na'o//rnam par shes pa de ni nyon mongs pa dang / nye ba'i nyon mongs pa'i sa bon dang bcas par mi rung ste zhes bya ba ni gang gnyen po'i rnam par shes pa'i rgyun can du 'jig rten pa'i rnam par shes pa rnam par 'jug par 'gyur ro/ /de'i 'og tu yang zhes bya ba ni des na 'jig rten las 'das pa'i sems nyid kyi rting la'o//bag chags de gnas dang bcas te zhes bya ba la/ gnas dang bcas pa ste/ rnam par shes pa dang bcas pa'o/ /bag chags de zhes bya ba ni nyon mongs pa dang / nyon mongs pa'i bag chags so/ /sa bon med pa las zhes bya ba ni rgyu med pa las so//skye bar ni 'byung bar ro/ /'gyur ro zhes bya ba ni kun gzhi rnam par shes pa med par yang ngo / /de la nyon mongs pa nyid ni kun nas nyon mongs pa nyid de/ nyon mongs pa'i kun nas nyon mongs pa'o/ /de ltar na 'dir nyon mongs pa'i kun nas nyon mongs pa mi rung ngo / /las kyi kun nas nyon mongs pa rnam pa gang gis mi rung ba de bsgrub par bya ste/ji ltar mi rung zhe na/ 'du byed kyi rkyen gyis rnam par shes pa mi rung ba'i phyir zhes pa ni bsod nams dang / bsod nams ma yin pa dang / mi g.yo ba'i 'du byed 'byung ba dang / 'gag pa kun gzhi rnam par shes pa med na gang la bag chags 'jog par 'gyur/ji ltar na rnam par shes pa'i tshogs drug gis bag chags mi 'dzin pa ni sngar nyon mongs pa'i kun nas nyon mongs pa bstan par bsgrubs zin to/ /de med na zhes bya ba ni 'du byed kyi rkyen gyis rnam par shes pa med na'o/ /len pa'i rkyen gyis sred pa yang mi rung ste/gang gi phyir 'du byed kyis yongs su bsgos pa'i rnam par shes pa len pa'i dbang gis bag chags rgyas pas srid pa 'byung bas so/ /de la las nyid kun nas nyon mongs pa ni las kyi kun nas nyon mongs pa'am/ las las kun nas nyon mongs pa ni las kyi kun nas nyon mongs pa ste/kun gzhi rnam par shes pa med na/ de yang mi rung ngo / /de'i tshe kun nas nyon mongs pa yang ji ltar mi rung zhe na/ de bstan par bya ba'i phyir ro / /nying mtshams sbyor ba sbrel ba mi rung ba'i phyir zhes bya ba ste/ bdag gi dngos po 'thob pa yang mi rigs pa'o/ /mnyam par ma bzhag pa'i sa nas zhes bya ba ni 'dod pa'i khams nas so//shi 'phos pa'i zhes bya ba ni shi ba'o / /yid kyi rnam par shes pa nyon mongs pa can gyis zhes bya ba ni nyon mongs pa dang bcas pa'i yid kyi rnam par shes pa'o/ /nying mtshams sbyor zhing sbrel te zhes bya ba ni bdag gi dngos po yongs su 'dzin pa'o//de yang nyon mongs pa can gyi yid kyi rnam par shes pa skye ba'i srid pa la dmigs nas bar mdo'i srid pa 'gag par 'gyur ro/ /brgyal ba de la zhes bya ba ni yid kyi rnam par shes pa khu ba dang khrag dang lhan cig grub pa dang / bde ba gcig par 'gyur ba ste/ yid kyi rnam par shes pa brgyal bar gyur pa de la brten nas yid kyi rnam par shes pa gzhan nyid 'jug par 'gyur ro//lhan cig tu zhes bya ba ni dus gcig tu yid kyi rnam par shes pa brgyal bar gyur pa de dang yid kyi rnam par shes pa dang ldan par gyur pa'o/ /de ci'i phyir zhe na/ dus rtag tu nyon mongs pa can gnas yin pa'i phyir te/yid kyi rnam par shes pa 'dod chags la sogs pa'i nyon mongs pas nyon mongs pa can gyi yid kyi gnas te/ 'byung ba'i srid pa la dmigs pa yid nyon mongs pa can 'di'i gnas yin pas 'di ni nyon mongs pa can gyi gnas so/ /rnam par smin pa lung du ma bstan pa'i gnas skabs de na nyon mongs pa can gyi gnas ni mi srid do//yid kyi rnam par shes pa'i dmigs pa la mi dmigs zhes bya ba ni yid kyi rnam par shes pa ni dmigs pa la nye bar gnas te/ 'di lta ste chos so/ /brgyal bar gyur pa de la ni dmigs pa med de/ de'i phyir 'di ni yid kyi rnam par shes pa nyid du mi rung ngo //nying mtshams sbyor ba sbrel zin pa zhes bya ba ni bdag gi lus rab tu thob pa'o/ /de nas gzhan zhes bya ba ni kun gzhi rnam par shes pa ma yin pa ni gzhan pa ste/ gzhan rnam par shes pa drug po rnams ni gnas so sor nges pa dang g.yo ba'i phyir ro/ /ji ltar mig gi rnam par shes pa gnas so sor nges pa yin pa bzhin du rna ba'i rnam par shes pa la sogs pa lhag ma rnams kyi yang rna ba la sogs pa dbang po gzugs can rnams ni rten yin no//des na gal te rnam par shes pa de dag gi rang rang gi gnas blangs par gyur la/ rnam par shes pa de rnams 'gags par gyur pa na thob pa'i mig la sogs pa rnams rul par 'gyur ro//ji ltar kun gzhi rnam par shes pa ma yin pa'i rnam par shes pa dang ming dang gzugs mdung khyim ltar gcig la gcig brten pa'i tshul gyis 'jug pa gang yin pa de yang mi rung ngo zhes bya ba la/ ji ltar mi rung ba bstan par bya ste/ji ltar bcom ldan 'das kyis rnam par shes pa'i rkyen gyis ming dang gzugs/ ming dang gzugs kyi rkyen gyis kyang rnam par shes pa zhes gsungs pa de la/ rnam par shes pa'i rkyen gyis ming ste/ rnam par shes pa'i tshogs so/ /de ni gzugs can ma yin pa'i phung po bzhi yin par brjod do/ / gzugs ni nur nur po'o/ /ming dang gzugs kyi rkyen gyis rnam par shes pa zhes bya ba de la/ kun gzhi rnam par shes pa las gzhan gang yang ma yin te/ gang de ni ming dang gzugs la brten nas skad cig ma gcig nas gcig tu brgyud pa'i rgyun mi 'chad par 'jug go/ / rnam par shes pa gzhan gyi zas su mi rung ste zhes bya ba de bstan par bya ste/ zas ni bzhir bcom ldan 'das kyis gsungs te/ khams kyi zas dang / reg pa dang / yid la sems pa dang / rnam par shes pa'i'o/ /de la kham gyi zas ni zhu bar gyur pa na ste/ zhu bar gyur pa na gang gi phyir rten la phan 'dogs par byed pa'o//reg pa'i zas ni yul dang ldan pa ste/ gzugs la sogs pa'i yul rnams mthong ba tsam nyid kyis rten la phan 'dogs pa skyed pa'o/ /yid la sems pa'i zas ni bsam pa dang ldan pa na ste/ gang gi phyir bsam pas rten la phan 'dogs pa 'byung ba ste/skom pas gdungs pa chu mthong bas ma shi ba bzhin no/ /rnam par shes pa'i zas ni nye bar len pa dang ldan pa ste/ gang gis de blangs pa nyid kyis rten gnas pa ste/ de las gzhan du na shi ba'i ro bzhin du rul par 'gyur ro/ /de lta bas na rten la phan 'dogs par byed pa'i phyir rnam par shes pa'i zas nyid ni khas blang bar bya'o//de la reg pa'i zas ni rnam par shes pa'i tshogs drug gang yin pa'i'o/ /yid la sems pa'i zas ni yid kyis bsams pa'i'o/ /gzhan pa rnam par shes pa'i zas nyid du bstan pa gang yin pa ni sems med pa'i gnyid dang / brgyal ba dang / 'gog pa la snyoms par zhugs pa na rnam par shes pa drug ni 'gag par 'gyur na/kun gzhi rnam par shes pa med na lus blangs pa mi 'drul bar byed pa gzhan gang yin/ de ltar mnyam par ma bzhag pa'i nying mtshams sbyor ba'i 'brel pa bstan to/ /mnyam par bzhag pa'i yang ji ltar mi rung ba de bstan par bya ste/'di ni nyon mongs pa can gyi rnam par shes pas nying mtshams sbyor zhing sbrel te/ mnyam par bzhag pa'i sa la nyon mongs pa can dang / mnyam par ma bzhag pas nying mtshams sbyor zhing sbrel to/ /nyon mongs pa can zhes bya ba ni de'i sa pa'i nyon mongs pas nyon mongs pa can te/ de'i sa pa'i nyon mongs pa ni ting nge 'dzin gyi ro myang ba gang yin pa'o//de'i nyon mongs pa can gyi sems ni mnyam par bzhag pa'i sa pa nyid kyi dang / mnyam par ma bzhag pa'i sems so/ /mnyam par ma bzhag pa'i sa 'di nas shi 'phos pa na shi 'phos pa'i sems gang yin pa de de'i sa pa dang phrad par gang gis ji ltar 'gyur /des na kun gzhi rnam par shes pa nges par khas blang bar bya ste/ gang la thog ma med pa nas sa de'i sems kyi bag chags yod de/ bag chags gang las sems de kun tu rgyu ba des nying mtshams sbyor zhing sbrel to/ /gzugs med pa'i khams su skyes pa zhes bya ba ni/ gzugs las grol ba'o//nyon mongs pa can gyi sems dang dge ba'i sems zhes bya ba ni ting nge 'dzin gyi ro myang ba nyid do/ /sa bon med cing gzhi med pa zhes bya ba ni rgyu med pa nyid dang rkyen med pa nyid do/ /don gzhan yang rgyu med pa'i phyir gang las 'byung bar 'gyur/ gzhi med na gang la brten te 'jug par 'gyur na sems de ni kun gzhi rnam par shes pa la rnam par shes pas yongs su gzung ba'i rang gi sa bon las 'byung bar 'gyur te/de la brten nas de nyid kyi rgyun rab tu 'jug par 'gyur ro/ /de nyid na 'jig rten las 'das pa'i sems mngon du byed pa'i tshe/ de ma yin pa gzhan 'jig rten pa'i sems med par gyur pas de'i 'gro ba ldog pa nyid du 'gyur ro zhes bya ba ni 'bad pa med par phung po lhag ma med par mya ngan las 'das pa thob par 'gyur ba zhig na/de yang kun gzhi rnam par shes pa med na ma yin pas de ltar yang mi 'grub bo/ /'du shes med 'du shes med min skye mched du skyes pa rnams kyang ci yang med pa'i skye mched pa'i 'jig rten las 'das pa'i sems mngon du byed pa na/gang gi phyir sems de ni gsal por 'jug pa yin la/ 'du shes med 'du shes med min skye mched kyi ni mi gsal ba yin no/ /des na gsal bar 'jug pa'i sems la gnas nas 'jig rten las 'das pa'i sems mngon du byed de 'jig rten las 'das pa'i sems gcig pu de'i gzhir 'gro ba gnyis mi rung ngo //'jig rten pa'i sa de dag ni sa gzhan du skyes pa'i sa gzhan pa'i sems mngon du byed pa 'gro ba gnyi ga'i rten du mi rigs la/ phung po lhag ma dang bcas pa'i mya ngan las 'das pa'i gzhir yang sems de ni mi rung ngo //de'i phyir 'gro ba gsum po de dag kyang gzhi'i ngo bor mi rigs pas kun gzhi rnam par shes pa med na sems de gang la brten par 'gyur/ 'jig rten las 'das pa'i sems de legs par bya ba byed pa'am/ nyes par bya ba byed pa 'chi 'pho ba na lus smad dam stod nas drod yal bar 'gyur ba'ang mi rung ste zhes bya ba la de legs par bya ba byed pa dang /nyes par bya ba byed pa'i lus kyi smad dang stod nas drod yal bar 'gyur te/ 'di ltar legs par bya ba byed pa ni smad nas so/ /nyes par bya ba byed pa ni stod nas so/ /de nas de dag kyang kun gzhi rnam par shes pas yongs su gzung bar mi 'dod na/lus drod yal bar 'gyur ba de ji ltar yin/ kun gzhi rnam par shes pa des gzung bas ni lus 'dor bar byed pa na smad dam stod nas ji ltar rigs pas drod yal bar 'gyur ro/ /'dor bar 'gyur ro/ /ji ltar na 'jig rten pa'i rnam par byang ba yang mi rung zhe na/de bstan par bya ste/ 'dod pa'i 'dod chags dang bral bar bya ba'i phyir/ rab tu sbyor ba na 'dod pa na spyod pa'i sbyor ba las byung ba'i sems de yang gzugs na spyod pa'i sems dang lhan cig 'byung ba dang 'gag pa med pa'i phyir des bsgos pa med pa gzugs na spyod pa'i sems de sa bon med par skye ba nyid yin par 'gyur te/gzugs na spyod pa'i sems 'das pa tshe rabs du mar sems gzhan gyis bar du bcad pa de yang 'das pa'i phyir med pa nyid de/ mnyam par gzhag pa'i sems de'i sa bon nyid du mi rung ngo / /de'i rgyu de'i rkyen zhes bya ba ni/ kun gzhi rnam par shes pa la gnas pa'i rang gi sa bon las byung ba'o//sbyor ba las byung ba'i dge ba'i sems de ni nus pa med pa ma yin pas bdag po'i rkyen ni de'i nus pa yin pas / rgyu'i rkyen nyid ni ma yin no/ /de bas na bdag po'i rkyen las 'dod pa na spyod pa'i sems de 'byung ngo / /de bzhin du 'dod chags dang bral ba la sogs pa la yang sbyar ro//ji ltar 'jig rten las 'das pa'i rnam par byang ba mi rung zhe na/ de bstan par bya ste/ de ni gzhan gyi sgra la brten pa dang / so so rang gi tshul bzhin yid la byed pa zhes bya ba ni/ sgra dang mtshungs par ldan pa'am/ yid la byed pa'o/ /yid kyi rnam par shes pa yang de las gzhan pa'i rnam par shes pa rnam par g.yeng bas bar du chod la zhes bya ba ni yang dag pa'i lta ba dang mtshungs par ldan pa'i 'jig rten las 'das pa'i sems rnam par nyams pa zhes bya ba'i don to//gang gi tshe tshul bzhin yid la byed pa dang mtshungs pa'i sems byung ba de'i tshe/ yid kyi rnam par shes pa thob pa'i bag chags bsgos pa des ni bag chags dang bcas te 'gags shing 'das nas yun ring du lon te zhes bya ba la yid kyi rnam par shes pa thos pas bsgos pa de bag chags dang bcas par dus ring du shin tu 'gags shing shin tu 'das pas yod pa ma yin na phyis de'i rgyu can dag yang gang las 'byung bar 'gyur/tshul bzhin yid la byed pa dang mtshungs par ldan pa'i sems de la thos pa'i bag chags kyis ni de'i sa bon yongs su 'dzin par mi rigs zhes bya ba la/ de la zhes bya ba ni 'jig rten pa'i yid kyi rnam par shes pa la'o/ /thos pa'i bag chags zhes bya ba ni gzhan gyi sgra la brten nas thos pa'i bag chags yid kyi rnam par shes pas brtags pa'o//de'i sa bon yongs su 'dzin par mi rigs zhes bya ba ni 'jig rten las 'das pa'i rnam par byang ba'i sa bon yongs su 'dzin par mi rigs pa des na de de las skye bar mi rung ngo / /yang ji ltar sa bon thams cad smin pa'i rnam par shes pa ni kun nas nyon mongs pa'i rgyu yin na/de'i gnyen po 'jig rten las 'das pa'i sems kyi sa bon du ji ltar rung zhes bya ba la rnam par smin pa'i rnam par shes pa de nyid mi mthun pa'i phyogs kyi rgyur gyur pa yin na gnyen po'i phyogs kyi rgyu nyid du yang mi rung ngo / 'jig rten las 'das pa'i sems ni ma 'dres pa ste zhes bya ba dang / de ni sngar ma skyes pas de'i gang de'i bag chags ni med pa nyid do zhes bya ba la/ 'jig rten las 'das pa'i sems de'i bag chags ni med pa nyid du the tshom med do/ /chos kyi dbyings shin tu rnam par dag pa'i rgyu mthun pa thos pa'i bag chags kyi sa bon las de 'byung ngo zhes bya ba la nyan thos la sogs pa las bye brag tu byas pa ni//chos kyi dbyings shin tu rnam par dag pa'i rgyu mthun pa thos pa'i bag chags so/ /gang gi phyir chos kyi dbyings shin tu rnam par dag pa ni nyon mongs pa dang shes bya'i sgrib pa rab tu spang pa'o //chos kyi dbyings shin tu rnam par dag pa gang yin pa de'i rgyu mthun pa ni bstan pa'i chos te mdo sde la sogs pa'o/ /chos kyi dbyings kyi rgyu mthun pa mdo sde la sogs pa thos pa ni chos kyi dbyings rgyu mthun pa thos pa'o/ /de thos pa'i bag chags ni chos kyi dbyings kyi rgyu mthun pa thos pa'i bag chags so //yang na thos pa nyid kyi bag chags ni thos pa'i bag chags te/ de'i bag chags gang kun gzhi rnam par shes pa la gnas pa de'i rgyu can de las 'jig rten las 'das pa'i sems 'byung bar 'gyur ro/ /thos pa'i bag chags gang yin pa de ltar kun gzhi rnam par shes pa'i ngo bo nyid yin nam/'on te ma yin te/ de cir 'gyur/ kun gzhi rnam par shes pa'i ngo bo nyid yin no / de ji ltar kun gzhi rnam par shes pa de'i gnyen po'i sa bon nyid du 'gyur/ 'on te de'i ngo bo ma yin no / /thos pa'i bag chags kyi sa bon de'i gzhi gzhan yin par 'gyur ro//sangs rgyas rnams kyi byang chub la brten nas thos pa'i bag chags 'jug par 'gyur zhes bya ba ni chos kyi dbyings shin tu rnam par dag pa'i rgyu mthun pa thos pa'i bag chags de nyid do brten nas zhes bya ba ni gang gi rgyud las 'jug pa ste/ de yang lhan cig 'dug pa'i tshul gyis chu dang 'o ma bzhin du ngo bo gcig par 'jug par 'gyur na yang de de'i ngo bo ma yin pa nyid de/kun gzhi rnam par shes pa ma yin no/ /de'i phyir kun gzhi rnam par shes pa'i gnyen po yin no/ /de la chung ngu dang 'bring dang chen po'i thos pa las byung ba dang / bsam pa las byung ba dang /bsgoms pa las byung ba yang blta bar bya ba yin pas re re zhing rnam pa gsum pa nyid du 'gyur ro/ /don gzhan yang thos pa las byung ba ni chung ngu'o / /bsams pa las byung ba ni 'bring ngo / /bsgoms pa las byung ba ni chen po'o/ /thos pa dang / bsams pa dang / bsgoms pa lan mang du bya ba dang ldan pa'i phyir zhes bya ba ni thos pa la sogs pa lhag par byed pa ste/de yang chung ngun gyi rgyu las 'bring dang / 'bring las chen po'o/ /nyon mongs pa'i kun nas dkris pa'i gnyen po zhes bya ba ni 'dod chags la sogs pa lhag par 'jug pa'i gnyen po'o/ /gang gis de spong ba de ni ngan 'gro'i gnyen po yin no//gang la rnam grangs gzhan la myong bar 'gyur ba'i las gang gis ngan song du skye bar 'gyur ba de yang / nges par 'gyur ba'i rgyu yin no / /mdor bsdu na 'das pa dang / ma 'ongs pa dang / da ltar byung ba'i nyes par spyod pa thams cad kyi gnyen po'o/ /ma 'ongs pa na dge ba'i bshes gnyen dad pa dang / phrad pa thob pa'i rgyu nyid kyang yin no/ /byang chub sems dpa' las dang po pa rnams kyi 'jig rten pa yin yang chos kyi skur bsdus pa yin par blta bar bya zhes bya ba la/ las dang po pa zhes bya ba ni so so'i skye bo rnams so/ /chos kyi skur bsdus pa zhes bya ba ni de'i rgyur gyur pa'o/ /rnam par grol ba'i lus su bsdus pa zhes bya ba la/rnam par grol ba'i lus de'i rgyur gyur pa ni nyan thos rnams rnam par grol ba'i rgyur gyur pa ste/ gang las de 'ba' zhig pa'i rnam par grol bar 'gyur gyi chos kyi sku ni mi thob bo / /ji ltar kun gzhi rnam par shes pas rig par byed kyi rnam par smin pa'i rnam par shes pas ni ma yin te/'gog pa la snyoms par zhugs pa'i kun gzhi rnam par shes pa ni ma yin no/ /rnam par shes pa dang mi 'brel pa'i zhes gsungs pas zhes bya ba ni kun gzhi rnam par shes pa yod pa nyid du grub bo/ /gang bcom ldan 'das kyis 'di'i rnam par shes pa lus las 'das pa ma yin no zhes gsungs pa de ni rnam par smin pa'i rnam par shes pa ma yin pa gzhan la mi rung ngo //gang gi phyir 'gog pa la snyoms par zhugs pa na 'jug pa'i rnam par shes pa'i gnyen po skyes pa na de ni zhi ba nyid mthong ngo / /yang gal te rtog pa skyes pa na de yang 'byung bas de las dgongs nas ma 'das pa'o zhes gsungs pa yin no zhes zer na/de ni mi rung ste gang gi phyir de dag ni de las langs pa na yang 'byung bar 'gyur te/ rnam par smin pa'i rnam par shes pa 'gags pas nying mtshams sbyor zhing sbrel ba de gang gi phyir med na 'byung ba'i srid pa mngon par 'grub pa yang yod par mi 'gyur ro//gang yang 'gog pa'i snyoms par 'jug pa la yid kyi rnam par shes pa yod pas sems dang bcas pa'o snyam du sems pa de ltar na yang sems ni mi rung ste/ snyoms par 'jug par mi rung ba'i phyir kun gzhi rnam par shes pa rang gi mtshan nyid ji skad bstan pa por nas 'jug pa'i rnam par shes pa'i bye brag la 'gog pa'i snyoms par 'jug pa sems dang bcas pa nyid du 'dod pa de ni mi rung ngo //ci'i phyir zhe na/ snyoms par 'jug pa mi rigs te/ de la yod pa dang bral bar mthong ba'i phyir de las gzhan pa'i sems yin no/ /'du shes dang tshor ba dag ni 'dir 'gog pa yin te/de dang de ni 'gog pa'i yod pas de dang de 'gog pas rab tu bsgos pa de la snyoms par 'jug pa mi rigs par 'gyur ro/ /kun gzhi rnam par shes pa yod par khas len na ni skyon de med de/ de la gnas par 'dod pa'i de dang mi mthun pa de las gzhan pa'i sems dang sems las byung ba de'i gnyen po 'byung gi rnam par gsal bar bstan pa ni kun gzhi rnam par shes pa ma yin no//des na de las gzhan pa la ni sems de mi 'byung ngo / /ci'i phyir zhe na/ dmigs pa dang rnam pa mi dmigs pa'i phyir te/ sems dang sems las byung ba'i rgyun ni dmigs pa dang rnam par shes pa med pa ma yin no//snyoms par 'jug pa'i sems kyang dmigs pa dang rnam pa med pa'i ngo bor mi 'gyur ba zhig na de dag gnyi ga la yang mi dmigs so/ /kun gzhi rnam par shes pa yod par 'dod pa las ni rkyen 'di dag yod par mi 'gyur te/de'i rten nye bar gzung bas rab tu phye ba'i phyir ro/ /de la 'jug pa'i rnam par shes pa dge ba la sogs pa'i bye brag yod na rnam par shes pa de la dge ba dang mi dge ba dang lung du ma bstan pa nyid du 'gyur na re zhig dge ba ni ma yin te/ dge ba'i rtsa ba dang mtshungs par ldan par thal bar 'gyur bas de ni 'gal lo ngo bo nyid kyis kyang ma yin no //rnam par shes pa de ni dge ba dang mi dge ba'i mtshungs par ldan pa dang ma bral bar yang 'gyur ro/ /snyoms par 'jug pa'i sems dge ba nyid yin pas ma chags pa la sogs pa'i dge ba'i rtsa ba dang mtshungs par ldan pa mi 'dod pa yang thob par 'gyur na/'di ltar ni mi 'dod de/ dge ba'i sems kyi khyad par gzhan la yang thams cad du de thal bar 'gyur ba'i phyir ro/ /mi dge ba dang lung du ma bstan pa la yang med pas mi dge ba dang lung du ma bstan pa la yang mi rigs te/ 'dod chags dang bral ba'i dus nyid na mi dge ba'i rtsa ba thams cad spangs pas des na mi dge ba ma yin no//snyoms par 'jug pa ni dge ba yin pa'i phyir lung du ma bstan pa yin no/ /'di'i phyir yang de dge ba ma yin te/ 'du shes dang tshor ba kun tu spyod par thal bar 'gyur te/ dge ba'i rtsa ba med par dge ba nyid ni med pa'i phyir ro//dge ba'i rtsa ba la kun tu spyod pa bzhin du 'du shes dang tshor ba la spyod par yang 'gyur te/ rgyu la khyad par med pa'i phyir ro/ /des na 'di ltar rigs te/ mi mthun pa'i phyogs kun tu spyod pa na gnyen po'i phyogs med pa nyid do / /'dod chags la sogs pa mngon du spyod pa na mi sdug pa la sogs pa med pa bzhin no//de ltar de las sems gzhan yod pa ma yin no / /'di ltar yang de ni kun gzhi rnam par shes pa ma yin pa sems gzhan yod na/ reg pa dmigs par thal bar 'gyur zhing / dge ba kun tu spyod par yang 'gyur te/ mnyam par gzhag pa'i gnas skabs gzhan bzhin du zhes bya ba ni lhag ma'o//de'i phyir mnyam par gzhag pa na 'jug pa'i rnam par shes pa'i khyad par yod na/ des na de ni ting nge 'dzin las skyes pa'i shin tu sbyangs pa'i phyir mtshan nyid can gyi tshor ba bde ba'am/ tshor ba sdug bsngal ba'i reg pa 'dor bar mi 'gyur ro//des na rkyen de dag las bde ba dang / bde ba yang ma yin sdug bsngal ba yang ma yin pa tshor ba dag tu 'gyur ro/ /de ci'i phyir zhe na/ de'i mthus mnyam par gzhag par 'gyur pa ste/ mnyam par gzhag pa'i khyad par gzhan dag la yang tshor ba de dag 'byung ba'i mthu yod pa mthong ba de bzhin du 'dir yang nying mtshams sbyor ba'i rgyu'i ngo bo reg pa'i rkyen gyis tshor ba 'byung bar 'gyur na/de ni mi rigs pa nyid de/ 'du shes rgyun chad pa tsam du 'gyur te/ reg pa'i tshor ba khas len pas de la ni 'du shes rgyun chad pa tsam du 'gyur na/ de ltar mi 'dod de/ gnyi ga yang rgyun chad par gsungs pas de'i phyir reg pa ni mi rung ngo //rnam par shes pa gzhan dang de dang lhan cig mtshungs par ldan pa'i reg pa yod na sems dang dad pa la sogs pa'i dge ba'i rtsa ba kun du 'byung bar 'gyur ba'i phyir na rnam par shes pa dang mtshungs par ldan pa'i reg pa 'byung bas de dang lhan cig skyes pa'i sems pa yang yod de zhes gsungs pas sems pa yang 'byung bar 'gyur ba nyid do//de 'byung bar 'gyur ba yod na dge ba'i sems mngon par 'du byed pa nyid yin pa'i phyir dad pa la sogs pa dge ba'i rtsa ba kun tu spyod pa yang 'byung bar 'gyur ba zhig na de ltar ni mi 'dod do/ /gal te ji skad bstan pa'i skyon rnams spang bar bya ba'i phyir dang /'gal ba spang bar bya ba dang / des sun dbyung ba'i phyir sems las byung ba bzhag nas sems tsam khas len par byed na de yang mi rung ste/ rten las brten pa dbyer mi rung ba'i phyir te/ rten ni sems tsam mo/ /brten pa ni sems las byung ba ste/rten dang brten pa sems las byung ba dag 'khor ba thog ma med pa nas phan tshun med pa ma yin pas dus thams cad du de bzhin du 'jug pa na rten dang brten pa dag 'bad pa dang ldan pas kyang dbyer mi nus te/ ci'i phyir zhe na/ dpe yod pa'i phyir te/ gang dus thams cad du lhan cig 'jug pa'i rten pa de ni rten las dbyer rung bar yod pa ma yin te/skye ba dang 'jug pa la sogs pa la phan tshun med na ma yin pa'i phyir 'byung ba las gyur pa bzhin no/ /de bzhin du sems tsam las sems las byung ba yang dbyer mi rung ba'i phyir mi rigs so/ /gzhan yang rten las brten pa dbye bar rigs pa ma yin te/'du shes dang tshor ba dag ni de'i mi mthun par 'gyur bas rnam par sun dbyung ba'i phyir kun tu spyod pa med la de las gzhan pa dag kyang ma yin te/ mi rigs pa'i phyir ro/ /rgyu gang gis she na/ kun tu 'gro ba nyid yin pa las de bzhin du med pa'i phyir te/ de las gzhan pa dag kyang rnam pa de nyid kyis gzhan pa de la bye brag gi rgyu med pa'i phyir kun tu spyod pa med par 'gyur ba zhig na/de ltar na mi 'dod de/ mthong ba dang 'gal ba'i phyir ro/ /sems dang bcas pa'i snyoms par 'jug pa brtag pa rdzogs so// //da ni gang yang phyogs gnyis de'i don brjod par bya ste/gang yang gang dag 'gog pa'i snyoms par 'jug pa ni yid kyi rnam par shes pas sems dang bcas pa nyid yin gyi/ kun gzhi rnam par shes pas ni ma yin no snyam du sems so / /yang de dag gi sems ni dge ba dang mi dge ba dang lung du ma bstan par mi 'thad pa'i phyir zhes bya ba la/de ni dge ba nyid yin pas na re zhig mi dge ba med pa nyid do/ /lung du ma bstan pa spyod lam dang ldan pa dang / bzo'i gnas dang / sprul pa dang ldan pa gang yin pa de la yang sprul pa dang med pa po nyid do/ /'on te rnam par smin pa lung du ma bstan pa yin na ni de ni kun gzhi rnam par shes pa nyid yin te/lung du ma bstan pa lnga ni med do/ /gal te sems de dge ba yin na ni de la ma chags pa la sogs pa'i dge ba'i rtsa ba dang mtshungs par ldan par 'gyur te/ de lta bu ni sems med pa yin na nyon mongs pa can gyi yid gnas gyur pas dge bar gyur pa'i gnas skabs dge ba'i sems de la brten cing dmigs nas gsum 'dus pa'i reg pa ji ltar 'byung bar mi 'gyur/reg pa yod par gyur na de ltar na yang 'gog pa'i snyoms par 'jug pa med pa nyid du 'gyur te/ de sems dang sems las byung ba ma 'gags pa'i phyir ro/ /yang la la dag dge ba'i sems kyis bde ba skyed pas dge ba ste/snyoms par 'jug pa 'dren par byed pa'i sems kyi sbyor ba'i shugs kyis dge ba yin na yang bag chags la sogs pa dang lhan cig mtshungs par ldan pas ni ma yin te/ nus pa 'dus pa ni 'dus pa zhes bya ba nas so/ /des na de ni dge ba yin yang skyed par byed pa gsum 'dus pa'i mthu ste/rgyu mthun pa'i 'bras bu 'byung ba bzhin no zhes rtogs na/ de ci yang gang dang gang sbyor ba'i sems dge ba yin pa de ni dge ba'i rtsa ba dang mtshungs par ldan pa yin la/ des 'phangs pa yang ma chags pa la sogs pa'i dge ba'i rtsa ba dang mtshungs par ldan par 'gyur te/de bas na snyoms par 'jug pa'i sbyor ba'am/ snyoms par 'jug pa de dag dang 'gal bar gnas pa'i bag chags la sogs pa rnams gang gi phyir mi 'jug la dge ba ni yang 'jug go zhes zer na/ gang de lta bu ni sus kyang mi 'dod de/ rgyu mthun pa'i 'bras bu yang gang gi phyir kun tu sbyor ba dang bcas pa'i chos rnams ni kun tu sbyor ba dang bcas pa nyid du 'gyur/rnam par shes pa dang bcas pa yang kun gzhi rnam par shes pa dang lhan cig gi dngos po nyid du gyur pa na/ ji ltar kun gzhi rnam par shes pa ni med cing / kun gzhi rnam par shes pa ma yin pa ni de bzhin du gnas pa nyid du 'gyur te/ de yang 'o ma dang chu mnyam par bsres pa bzhin no zhes bya ba dpes bstan to//yang ji ltar 'jig rten pa'i 'dod chags dang bral ba'i kun gzhi rnam par shes pa gcig la mnyam par ma bzhag pa'i sa pa'i nyon mongs pa'i bag chags spangs pa dang / mnyam par bzhag pa'i sa pa'i dge ba'i bag chags rgyas par rten gnas gyur 'gyur ro//de bzhin du 'di la yang blta bar bya ste/ 'gog pa la snyoms par zhugs pa de yang rnam par shes pa med pa ma yin no zhes gsungs pa des ni kun gzhi rnam par shes pa de yod pa nyid du bsgrubs so// //bam po gsum pa/ gang bcom ldan 'das kyis 'di'i rnam par shes pa lus las ma 'das so zhes gsungs pa de rnam par smin pa'i rnam par shes pa ma yin pa gzhan la mi 'thad de/gang gi phyir 'gog pa'i snyoms par 'jug pa la 'jug pa'i rnam par shes pa spangs pas mi 'byung ste/ de ni zhi bar mthong bas so//yang gang la la langs pa na de yang 'byung bar 'gyur bas de'i phyir de las dgongs nas ma 'das pa yin no zhes gsungs pa yin no zhes rtogs na/ de ni mi rigs te/ de dag gi ltar na rnam par smin pa'i rnam par shes pa'i nying mtshams sbyor zhing sbrel ba gang rgyun chad ce med na/mngon par 'grub pa rigs par mi 'gyur bas langs pa na yang 'byung bar 'gyur ba yod pa ma yin no/ /gang yang kun gzhi rnam par shes pa ma yin par yid kyi rnam par shes pa dang bcas pas 'gog pa'i snyoms par 'jug pa sems dang bcas pa nyid yin no snyam du sems pas de bas na de ltar mi 'thad do//'di ltar na yang mi 'thad de/ gang bcom ldan 'das kyis lus kyi 'du byed 'gag par 'gyur zhing / yid kyi 'du byed ni dbugs 'byung ba dang rngub pa'o/ /ngag gi 'du byed ni rnam par rtog pa dang rnam par dpyod pa'o/ /yid kyi 'du byed ni sems pa dang 'du shes so zhes gsungs pa de la/ji ltar rnam par rtog pa dang rnam par dpyod pa 'gag par gyur na ngag 'jug par mi 'gyur la/ de bzhin du yid kyi 'du byed 'gag par gyur na yid 'jug par 'byung bar mi 'gyur ro/ /gal te ji ltar snyoms par 'jug pa'i dus na lus kyi 'du byed 'gags na yang lus gnas par 'gyur la/de bzhin du yid kyi 'du byed 'gags par gyur kyang yid gnas par 'gyur ro zhes 'dod na/ de lta bu de yang mi 'thad de/ gang lus gnas pa ni rgyu rnam pa gzhan gyis kyang yin te/ lus kyi 'du byed pa bcom ldan 'das kyis gsungs pa 'di lta ste/ zas dang / srog gi dbang po dang rnam par shes pa ste/gang dbugs rngub pa dang 'byung ba med na yang gnas par 'gyur ba nyid do/ /yid la ni 'du byed pa nyid gzhan med pas yid kyi rnam par shes pa gang rnam par gnas pa de med na/ sems med pa'i gnas skabs nyid 'thob par 'gyur ro/ /rnam par smin pa'i rnam par shes pa nyid la bcom ldan 'das kyis rnam par shes pa'i sgrar gsungs par 'dod pas/des na yang langs pa na sa bon thams cad la las 'jug pa'i rnam par shes pa 'byung bar 'gyur ro zhes 'dod do/ /gang yang gzugs dang sems kyi mjug thogs su 'byung ba chos rnams kyi sa bon du rtog pa zhes bya ba la/gzugs kyi skad cig snga ma ni gzugs kyi skad cig phyi ma'i rgyu nyid rnam par shes pa'i sa bon nyid rnam par shes pa'o/ /de la gzugs med pa nas shi 'phos pa'i gzugs na'i 'gags nas ring du lon par gyur na yang 'byung ba'i rgyur gzugs ji ltar 'gyur/'du shes med pa nas shi 'phos pa dang / 'gog pa'i snyoms par 'jug pa las langs pa'i tshe yang de'i sems ni 'gags nas ring du lon par gyur na sems 'byung ba de'i rgyu nyid du sems de ji ltar 'gyur/ de lta yin na dgra bcom pa'i phung po lhag ma med pa'i mya ngan las 'das pa yang mi 'thad de/rgyu gzugs dang sems dag zad pa med pa'i phyir ro/ /gang 'das pa de ma thag pa'i rkyen nyid kyi dang po'i gzugs kyi skad cig las ni gzugs/ rnam par shes pa las ni rnam par shes pa 'byung bar blta bar bya'i rgyu'i rkyen las ni ma yin no/ / de ltar na kun gzhi rnam par shes pa yod pa nyid du 'grub bo/ /ji ltar na 'jug pa'i rnam par shes pa la gnas pa tsam gyis rten gnas par gyur par mi rigs pa de tshigs su bcad pa gsum gyis bstan te/ byang chub sems dpa' bzang po'i sems zhes bya ba ni yid kyi rnam par shes pa gnyen po dge ba dang mtshungs par ldan pa ste/'jig rten las 'das pa zhes bya ba'i don to/ /rnam par shes pa lnga spangs pa zhes bya ba ni mig gi rnam par shes pa la sogs pa rnam pa lnga spangs pa'o/ /bsal ba de las gzhan pa la zhes bya ba ni kun nas nyon mongs pa can gyi yid kyi rnam par shes pa gzhan pa la ste/dge ba zag pa dang bcas pas mi dge ba zag pa dang bcas pa yongs su spang ba'i don du bzang po zhes smos bzhin du yang de las gzhan pa la zhes smos so/ /sems ni ji ltar 'gyur bar byed ces bya ba ni kun nas nyon mongs pa thams cad kyi sa bon can kun gzhi rnam par shes pa sa bon med par byed ces bya ba'i tha tshig go//gnyen po gyur pa yin zhes bya ba la/ gnyen po yongs su gyur pa yin no / /spangs pa min phyir mi rung ngo ste/ kun nas nyon mongs pa spangs pa las 'gyur gyi/ 'di ltar gnyen po ni spangs pa ma yin pa de'i phyir de ni spangs pa'i rgyu yin na yang 'di ltar 'gyur te/de lta yin na yang rgyu 'bras tha dad med par 'gyur pa'i skyon du thal bar 'gyur te/ spangs pa zhes bya ba ni mya ngan las 'das pa ste/ 'bras bu dang gnyen po zhes bya ba ni lam dag ste/ 'bras bu dang gnyen po ni spangs pa yin zhes bya ba 'dir gcig pa nyid du 'gyur bas gnyen po skyes pa tsam gyis mya ngan las 'das pa nyid du 'gyur ro//gal te sa bon bral ba'am/ /dngos po med par 'gyur 'dod na/ /zhes bya ba la/ 'jug pa'i rnam par shes pa rnams sa bon med par byas pa'am/ dngos po med pa nyid du 'gyur bar 'dod na/ de med pa na gnyis med pa'o //'gyur ba rung ba ma yin no zhes bya ba ste/ mnyam par gzhag pa'i gnas skabs na 'jug pa'i rnam par shes pa dag nye bar gyur pa ma yin pas na sa bon med par 'gyur ba'i phyir ram/ dngos po med par byas pas de ni dngos po med pa'o/ /des na de ltar 'gyur ba rung ba ma yin no//kun gzhi rnam par shes pa yod na ni 'jug pa'i rnam par shes pa de dag ring bar gyur pa yin na yang de'i sa bon kun gzhi rnam par shes pa la gnas pa de sa bon dang bral ba'am/ dngos po med par bya bar nus so/ /des na 'di ltar gyur pa dang ldan pa kun gzhi rnam par shes pa nyid 'dod par 'gyur ro//de ltar sgrub pa'i kun gzhi rnam par shes pa nyid de'i rnam pa'i bye brag bstan par bya ba'i phyir/ de la bag chags rnam pa gsum gyi bye brag gis zhes bya ba ste/ de la mngon par brjod pa'i bag chags kyi bye brag ni 'di lta ste/ mig ces rjod par byed pa'i rnam par smin pa'i rnam par shes pa'i bag chags de ni mig mngon par 'grub pa'i rgyur 'gyur te/mig gang grub cing rnam par smin pa las skyes par brjod par bya ba de mig ces brjod pa'i rgyu las gyur pa'o/ /de bzhin du rna ba la sogs pa brjod par bya ba thams cad la zhes bya ba ni 'di'i bye brag go/ / bdag tu lta ba'i bag chags kyi bye brag ces bya ba ni 'jig tshogs la lta ba'i dbang gis nyon mongs pa can gyi yid gang gis kun gzhi rnam par shes pa las bdag ces bag chags sgo bar byed de/ gang gis bdag ces bya ba dang / gzhan zhes bya ba'i bye brag 'dir 'gyur bar byed do/ /srid pa'i yan lag gi bag chags kyi bye brag ces bya ba ni gang dge ba dang /mi dge ba dang / mi g.yo ba'i 'du byed mthar thug pa med par 'jug pa ste/ 'di dag ni ji ltar shes bya'i mtshan nyid rgyas pa nyid du bshad par bya'o/ /de la 'phen pas rab tu dbye ba ni zhes bya ba ni 'phags pa'i rnam pa'i bye brag go//bag chags gsar du 'byung ba zhes bya ba ni gang dang por byung ba'i bag chags de ste/ bye brag de skad du brjod pa'i kun gzhi rnam par shes pa de med du zin na 'du byed 'byung ba dang 'gags pas yongs su bsgos pa'i rnam par shes pa dang len pas yongs su gzung ba'i 'byung ba'i srid pa la mngon par phyogs pas byas pa'i srid pa mi rung ngo //srid pa ste/ 'di las skye ba mngon par grub pas na srid pa'o/ /'di ni len pa zhes bya ba dge ba'am/ mi dge ba goms pa'i 'bras bu'o/ /de la rnam par smin pas rab tu dbye ba zhes bya ba ni gang 'du byed dang / srid pa'i rkyen gyis 'phangs pa'i 'gro ba dag tu rnam par smin pa ste/rnam par smin pa zhes brjod pa'i kun gzhi rnam par shes pa'i bye brag de med du zin na rgyu med pas yang srid pa can nyid kyi chos gzugs can gyi dbang po mig la sogs pa rnams 'byung bar rung ba ma yin te/ de ni rnam par smin pa'i 'bras bu yin pas so//de la rgyu nyid du rab tu dbye ba zhes bya ba la yang kun gzhi rnam par shes pa de nyid la yid rten pa'i phyir bdag tu lta ba dang / bdag tu 'dzin pa'i rgyu mtshan nyid kyi kun gzhi rnam par shes pa'i bye brag ste/ rgyu mtshan zhes bya ba de med na 'jig tshogs la lta ba'i rgyu gang yin pa yid kyis bdag tu bzung ba de'i dmigs pa mi rigs te/de ni rgyu mthun pa'i 'bras bu yin pas so/ /de la mtshan nyid kyis rab tu dbye ba zhes bya ba la/ de ni rnam pa mang du 'byung ngo / /de yang thun mong gi mtshan nyid dang / thun mong ma yin pa'i mtshan nyid dang / tshor ba med pa 'byung ba'i sa bon gyi mtshan nyid dang /tshor ba dang bcas pa 'byung ba'i sa bon gyi mtshan nyid de zhes bya ba ni mdor bstan pa'o/ /de la kun gzhi rnam par shes pa ni sems can thams cad kyi thun mong gi snod kyi 'jig rten rgyur gyur pas na/ tshor ba med pa 'byung ba'i sa bon no/ /gang thun mong ma yin pa zhes bya ba de ni kun gzhi rnam par shes pa so so rang gi gzugs la sogs pa dang /skye mched rnams kyi rgyur gyur pa ste/ de ni tshor ba dang bcas pa 'byung ba'i sa bon no/ /de lta bu'i rnam pa can gyi kun gzhi rnam par shes pa med na gang sems can thams cad kyi thun mong gi longs spyod kyi rgyur gyur pa snod kyi 'jig rten yod par mi 'gyur ro//de bzhin du kun gzhi rnam par shes pa gnyis pa med na yang sems can gyi 'jig rten yod par yang mi 'gyur te/ des na shing bzhin du tshor ba 'byung bar mi 'gyur ro/ /yang gnas ngan len gyi mtshan nyid ces bya ba ni gang rten las su mi rung ba nyid do//shin tu sbyangs pa'i mtshan nyid ni gang las su rung ba nyid do/ /spyad zin pa'i mtshan nyid ni kun gzhi rnam par shes pa med na yang dang yang du byas pa'i dge ba dang mi dge ba'i las gang gis 'bras bu 'byung ba zad par 'gyur ba de yod par mi rung ngo / /ma spyad pa'i mtshan nyid ni gang mngon par brjod pa'i bag chags kyi sa bon te zhes bya ba ni mngon par brjod pa'i bag chags kyi bye brag ji lta ba bzhin du bstan pa'o//thog ma med pa'i dus nas spros pa 'byung bas sa bon yin pa'i phyir ro zhes bya ba la/ thog ma med pa'i dus nas yang dag pa'i tha snyad kyi rgyur gyur pa kun gzhi rnam par shes pa zhes brjod pa de med na mngon par brjod pa'i bag chags gsar du 'byung ba yang mi 'thad do//rnying rnams med pas de'i phyir da ltar gyi mngon par brjod pa yang ma yin no/ /snga na med par yang 'gyur te/ gang 'jig rten na thog ma med pa nas ma byung ba'i phyir ro/ /dpe'i mtshan nyid ni ci sgyu ma sgyu ma byas pa'i rgyu nyid yin pas 'khrul pa'i glang po la sogs pa'i rgyur 'gyur pa de bzhin du kun gzhi rnam par shes pa dpe'i mtshan nyid du bstan pa yang yang dag pa ma yin pa'i kun tu rtog pa'i sa bon yin pas phyin ci log gi rgyu mtshan yin te/de med na rgyu mtshan nyid du mi rung ngo //ma bsgribs la lung du ma bstan pa zhes bya ba la/ ma bsgribs pa ni nyon mongs pa can ma yin pa ste/ nyon mongs pa can gang yin pa dang lung du ma bstan pa ni ma bsgribs la lung du ma bstan pa yin gyi/ ji ltar gzugs kyi khams su skye bas nyon mongs pa dang / dge ba ma yin pa dang lung du ma bstan pa ni ma yin no//dge ba dang mi dge ba'i rnam par smin pa nyid yod na kun nas nyon mongs par ldog par mi 'gyur ro/ /de'i phyir na dge ba las dge ba dang / mi dge ba las mi dge bar 'byung bas 'dus byas la mthar thug pa med de/ des na kun nas nyon mongs pa dang / dge ba zag pa dang bcas pas 'khor bar 'gyur ro//shes bya'i mtshan nyid kyi dbang du byas nas bstan pa la de la gzhan gyi dbang gi mtshan nyid gang zhe na/ de ni mdor bsdu na zhes bya ba ni yang dag par bsdus pa'o/ /yang dag pa ma yin pa kun tu rtog pas bsdus pa zhes bya ba ni yang dag pa ma yin pa kun tu rtog pa'o//lus dang / lus can dang / zab po'i rnam par rig pa zhes bya ba de la/ lus ni mig la sogs pa'i khams lnga'o/ /lus can ni nyon mongs pa can gyi yid do/ /za ba po ni yid kyi khams so/ /des nye bar spyad par bya ba'i rnam par rig pa ni phyi rol gyi gzugs la sogs pa'i khams drug go//de la nye bar spyod pa'i rnam par rig pa ni rnam par shes pa drug gi khams so/ /dus kyi rnam par rig pa ni 'khor ba'i rgyun 'jug pa rnam par chad pa med pa nyid do/ /grangs kyi rnam par rig pa ni bgrang ba'o/ /yul gyi rnam par rig pa ni snod kyi 'jig rten no/ /tha snyad kyi rnam par rig pa ni mthong ba dang /thos pa dang / shes pa dang / rnam par shes pa ste/ tha snyad rnam pa bzhi'o/ /re zhig de lta bu'i rnam par rig pa dag ni shes bya'i gnas su bstan pa ni mngon par brjod pa'i bag chags kyi rgyu can yin no/ /bdag dang gzhan gyi bye brag gi rnam par rig pa gang yin pa'i bye brag gi rten ni bdag tu lta ba'i bag chags kyi rgyu can no//gang bde 'gro dang ngan 'gro dang / 'chi 'pho ba dang / skye ba'i rnam par rig pa ste/ 'khor ba'i 'gro ba sna tshogs de ni srid pa'i yan lag gi bag chags kyi sa bon nye bar len pa las byung ngo / /rnam par rig pa 'di rnams kyis zhes bya ba ni bshad ma thag pa'i rnam par rig pa dag go//khams dang / 'gro ba dang / skye gnas thams cad bsdus pa zhes bya ba ni khams gsum dang de'i khongs su gtogs pa 'gro ba rnam pa lnga dang / skye gnas rnam pa bzhi dag kun nas nyon mongs pa'o//bsdus pa zhes bya ba ni de'i ngo bo nyid do/ /gzhan gyi dbang gi mtshan nyid ces bya ba ni gzhan gyi dbang gi bdag nyid de/ yang dag pa ma yin pa'i kun tu rtog pa bstan pa yin no/ /rnam par rig pa 'di rnams kyi rnam par rig pa tsam nyid yang dag pa ma yin pa'i kun tu rtog pas bsdus pa zhes bya ba de la yang dag pa ma yin pa'i kun tu rtog pas bsdus pa zhes bya ba ni de'i ngo bo nyid do//yod pa ma yin pa dang / nor pa'i don snang ba'i gnas gang yin pa 'di ni zhes bya ba ni yod pa ma yin pa dang / nor ba'i don snang ba'i rgyu ste/ de la yod pa ma yin pa ni med pa ste/ 'di ltar bdag gi ngo bo don de bzhin du yod par bzung nas de nyid la bdag med par bdag ces snang ba ste/ de'i gnas ni snang ba'i gnas te rgyu zhes bya ba'i tha tshig go/ /de lta bu ni gzhan gyi dbang gi mtshan nyid do/ /kun tu rtog pa'i mtshan nyid gang zhe na/ gang don med kyang 'di ltar bden pa nyid du snang ba'o//rnam par rig pa tsam ste don nyid du zhes bya ba ni yang dag pa ma yin pa'i don gyi snang ba ste/ 'di ltar bdag nyid kyi don snang ba tsam de'i snang ba'o/ /don nyid du snang ba zhes bya ba ni gzung ba nyid du snang ba ste/ 'di ltar bdag med pa de bdag tu snang ba'o/ /yongs su grub pa'i mtshan nyid ni gang yod pa ma yin pa mi bden pa snang ba'i rgyu don de'i bdag nyid du snang ba gtan med par gyur pa ste/'di ltar bdag tu snang ba gtan med par gyur pa nyid ni bdag med pa tsam yod par gyur pa nyid yin te/ 'di dag ni rnam par shes pa tsam mo zhes bya ba sa bcu pa las gsungs pa dang / dgongs pa nges par 'grel pa'i mdo las kyang /rnam par shes pa ni dmigs pa rnam par rig pa tsam gyis rab tu phye ba can no zhes ngas bshad do zhes gsungs pa des na dmigs pa rnam par rig pa tsam gyis rab tu phye ba can de ni rnam par rig pa tsam nyid de/ don gyis stong pa zhes bya ba'i tha tshig go/ /rnam par shes pa zhes ngas bshad do zhes bya ba'i rnam par shes pa smos pa des ni ting nge 'dzin gyi spyod yul gyi rnam par shes pa bstan to//'on kyang de ltar skyes pa'i zhes bya ba ni rnam pa de lta bur skyes pa'o/ /des na don tha dad par snang ba zhes bya ba la/ de las zhes bya ba ni ting nge 'dzin gyi spyod yul las so//don tha dad par zhes bya ba ni gzung ba'i ngo bo nyid du rnam par chad pa lta bur rnam par shes pa snang ba nyid do/ /rnam par bsngos pa la sogs pa'i ting nge 'dzin gyi spyod yul gyi gzugs brnyan ni rnam par shes pas dran pa ni ma yin te/ gang gi phyir ji lta ba bzhin du yul na gnas pa'i phyir ro//de bzhin du nyams su myong ba ni dran pa ma yin te/ mdun du byas pa mthong ba'i phyir dang / rnam par shes pas dran pa'i don ni mi gsal ba yin pa'i phyir la/ mdun na gnas pa 'di ni gsal bar mthong ba'i phyir ro/ /gzhan yang gal te ji ltar thos pa dang / bsams pa dang /goms par byas pa de ni ring du 'das par gyur na yang / ji ltar da ltar byung ba bzhin du de yang de bzhin no zhe na/ de la thos pa dang bsams pa ni 'das nas ring du lon pa nyid kyis med pa yin la/ thos pa dang bsams pa'i rang bzhin ni 'das nas ring du lon pas med pa'i phyir te med pa nyid yin te des na gang byung ba de ni rnam par shes pa nyid de/de lta bur snang bar gyur pa yin pas des na 'di dag ni rnam par rig pa tsam nyid du 'thad de/ de'i phyir don med pa nyid du grub bo/ /mig gi rnam par shes pa la sogs pa'i rnam par rig pa rnams ni gzugs can ma yin pas rnam par rig pa tsam nyid du rigs na/mig la sogs pa'i rnam par rig pa gzugs can rnams ji ltar zhes bya ba de la/ de dag kyang lung dang rigs pas blta bar bya ste/ snga ma bzhin no zhes bya bar bstan to/ /mtshungs la brtan par rgyun gyis 'jug /ces bya ba de la mtshungs pa ni 'dra ba'o//brtan pa ni dus gzhan du gnas pa'o/ /phyin ci log la sogs pa'i kun nas nyon mongs pa ste/ nyon mongs pa dang shes bya'i sgrib pa zhes bya ba rgyur gyur pa dag go/ /gzhi'i gnas zhes bya ba ni rgyu'i ngo bo'i 'di dag nyid gzhan du 'jug par 'gyur na don ma yin pa la don yin no zhes sems phyin ci log tu 'byung bar mi 'gyur la/de med pas kyang nyon mongs pa'i sgrib pa'i kun nas nyon mongs pa dang / shes bya'i sgrib pa'i kun nas nyon mongs pa de mi 'byung ngo / /don 'di dag nyid tshigs su bcad pas bstan pa ni/ 'khrul pa'i rgyu dang 'khrul pa ni rim pa bzhin du gzugs kyi rnam par rig pa dang /rnam rig gzugs can min par 'dod/ /ces bya ba'o/ /de la gzugs can gyi rnam par rig pa ni 'khrul pa'i rgyu ste/ rgyur gyur pa'i gzugs can gyi rnam par rig pa med na 'bras bur gyur pa'i rnam par rig pa gzugs can ma yin pa gang yin pa yang mi 'byung bas ji ltar na lus dang longs spyod thams cad yod par 'gyur zhes bya ba'o//lus dang lus can dang zab por rnam par rig pa gsum rnam par rig pa lus thams cad la lhan cig 'byung zhing zhes bya ba ni dus gcig tu 'byung ba'o / /nye bar spyod pa zhes bya ba ni rgyu'i ngo bo ste/ rnam pa gsum char rnam par rig pa tsam du tshigs su bcad pa dang / rkyang pas rnam par 'jog par byed do/ /de rkyang pa ni tsam du zad pas zhes bya ba ste/ thams cad rnam par rig pa tsam ni rnam par rig pa tsam nyid yin pa'i phyir de rnyed ni rnam par rig pa tsam mo/ /de'i phyir rnam par rig pa tsam yin gyi don ni med do //yang rnam pa gnyis nyid ni rgyu mtshan dang bcas pa dang / lta ba can gyi rnam par shes pas rnam par gzhag par 'gyur ro/ /gal te rnam par rig pa tsam gcig po de'i cha gcig ni rgyu mtshan yin la/ gnyis pa ni lta bar 'gyur na/ des na yang mig gi rnam par shes pa la sogs pa rnams gnyis nyid de/sna tshogs kyi ngo bo nyid du rnam par bzhag pas yang rnam par rig pa tsam gcig po de nyid la ji ltar rigs pa cha gcig ni sna tshogs su 'byung bar 'gyur la/ gnyis pas ni 'di ltar 'dzin par byed do/ /yang gang gi phyir yid kyi rnam par shes pas 'dzin par byed pa des na mig la sogs pa'i rnam par rig pa chos kyi mthar thug pa thams cad ni rgyu mtshan yin pas yid kyi rnam par shes pa ni 'di ltar lta ba zhes bya ba'o//yid kyi rnam par shes pa de dag nyid ni rgyu zhes bya bar yang bstan te so sor nges pa ma yin pa'i phyir ro/ /yang gzhan dag ni yul so sor nges pa yin pa'i phyir dang /rnam par rtog pa med pa nyid de/ des na gang rnam par rtog pa can de ni lta ba zhes bya'o/ /de ltar na 'di ni rnam par rig pa tsam du rnam par gzhag pa'o/ /tshigs su bcad pa de tsam ste/ don med pa la 'jug pa nyid de/ de tsam gnyis dang ste rgyu mtshan dang bcas pa dang /lta ba can gyi rnam par rig pa tsam mo/ /sna tshogs nyid 'jug pa ste/ gang sna tshogs kyi rnam pa can nyid du 'byung ba'i rnam par shes pa de'i'o/ /rnal 'byor pa rnams rtogs par 'dod/ /ces bya ba ni rnal 'byor spyod pa pa rnams 'di ltar 'dod pa'o/ /gang du zhe na/ sems tsam la ni zhugs gyur pa/ /de dang bral na de phyir yang / /zhes bya ba ste/ 'di ltar yang sems tsam la zhugs pas don med pa bral bar yang 'gyur ro/ /yang gal te gzung ba'i don med na sems kyis gang la 'dzin par 'gyur zhe na/ de tsam nyid dang / gnyis nyid dang / sna tshogs nyid la zhugs par gyur na/rgyu tsam du bstan pa zhes bya ba'i tha tshig ste/ gzhan dang mtshungs so/ /byang chub sems dpa' kha cig ni yid kyi rnam par shes pa gcig pu nyid du 'dod do/ /gang yang de'i rim pa rnam par gzhag pa bstan par bya ste/ de la sems pa la lus dang ngag gi las zhes bya ba bzhin no zhes bya ba la/ji ltar sems pa lus kyi sgo nas zhugs par gyur pa na lus kyi las zhes bya ba la/ ngag gi sgo nas ni ngag gi las zhes bya/ yid kyi las ni yid kyi las zhes bya ba thob pa bzhin du yid kyi rnam par shes pa gcig pu yin na yang mig la brten nas 'jug pa na de mig gi rnam par shes pa zhes bya ba'i ming 'thob la/de bzhin du lus kyi rnam par shes pa zhes bya ba'i bar gyi ming 'thob kyi/ yang de la yid kyi rnam par shes pa ma yin pa rnam par shes pa gzhan kun gzhi rnam par shes pa zhes bya ba lta bu ni med do/ /de ltar na rten thams cad du 'byung ba na gang gi sna tshogs kyi rnam pa gnyis su snang ba byung ste/de don tsam du snang ba dang / rnam par rtog par snang ba'i phyir ro zhes bya ba 'di dag gis yongs su spong ngo / /de la rten thams cad du zhes bya ba ni mig la sogs pa'i rten thams cad du'o/ / sna tshogs kyi rnam pa gnyis su snang ba zhes bya ba ni de don tsam du snang ba dang / rnam par rtog par snang ba'i phyir ro zhes bya ba'i tshig gnyis kyis ston par byed do/ /gang tshig gnyis po 'dis ni rnam par shes pa gcig po de nyid kyi cha gcig ni don tsam du snang bar 'gyur la/yang de gnyis pa ni don gyi rnam par rtog pa'i rnam pa 'byung ste/ des na sngar smras pa'i skyon med do/ /gang gi phyir gzugs yod na thams cad du reg bya'i snang ba 'byung bar 'gyur te/ gang gi phyir mnyam par gzhag pa na rnam par shes pa lnga ni nye ba ma yin la/ nang gi nyams su myong ba ni 'byung bar 'gyur te de las gzhan pa'i dbang po gzugs can lus la gnas pa bzhin du bya ba ste/de ji ltar lus la gnas pa'i dbang po mig la sogs pa gzhan rnams lus de la gnas pa yin pa'i phyir/ dbang po'i rang gi gnas nyid de la des byas pa'i phan 'dogs pa dang gnod pa nye bar sgrub par byed do//de bzhin du 'dir yang yid kyi rnam par shes pa ni lus la gnas pa yin pa'i phyir lus 'gyur bar byed par 'dod par bya'o/ /don gzhan yang ji ltar lus kyi dbang po rnams lus la brten pa nyid na phyi rol gyi rkyen reg par bya ba yod na lus kyi dbang po la yang reg bya'i snang ba 'byung bar 'gyur te/de byung bar gyur pa na rang gi rten lus la phan 'dogs pa'am/ gnod par 'gyur bar byed par 'gyur ro/ /de bzhin du yid kyi rnam par shes pa yang lus la brten pa yin pa'i phyir reg bya'i snang ba byung nas lus la phan 'dogs pa dang / gnod pa sgrub par byed do//'di dag gi lus ni gal te mig la sogs pa rnam par rtog pa med pa de la brten pa'i yid kyi rnam par shes pa 'jug pa yang rnam par rtog pa med pa nyid thob par 'gyur te/ ji ltar nyon mongs pa can gyi yid kun nas nyon mongs pa la brten nas nyon mongs pa can du 'byung ba bzhin no//de yang byang chub sems dpa' tshigs su bcad pas bsgrub pa'i phyir gsungs pa la/ ring du 'gro zhes bya ba ni yul thams cad la dmigs pa can nyid kyis so/ /gcig pu rgyu ba ni gnyis pa med pa'i phyir ro/ /gang zhig lus med ces bya ba ni lus dang bral ba nyid do//phug gnas zhes bya ba ni lus kyi phug gi nang na gnas pa nyid do/ /sems 'dul byed ces bya ba ni dbang du byed pa'o/ /gdul bar dka' ba zhes bya ba ni bcos dka' ba'o/ /yang lung ni 'di dag gi spyod yul gyi yul ni yid kyis so sor nyams su myong ste zhes bya ba la/ gang dbang po'i spyod yul du bstan pa'i yul de ni yid kyis re re zhing so so so sor nyams su myong bar 'gyur te/chos thams cad la rnam par rtog pa can yin pa'i phyir so sor nyams su myong ba'o/ /yid ni 'di dag gi rten pa'o zhes bya ba la/ gang gi phyir yid g.yeng bar gyur na de dag 'byung bar mi 'gyur bas dbang po de dag 'byung ba'i rgyur gyur pa'i phyir ro//yang lung gis ni rnam par nges pa'i tshogs drug ni yid ces bya ba'i sgras bstan gyi rnam par shes pa gzhan gyi sgras ni ma yin te/ rnam par shes pa'i tshogs drug ni yid kyi skye mched do zhes gsungs pa'i phyir ro/ /des na yid 'ba' zhig ni yod do zhes 'di ltar rtogs par bya'o//mtshan ma'i lta ba dang bcas pa'i rnam par shes pa rnam par gzhag par bya ba ni kun gzhi rnam par shes pa ste/ yid kyi rnam par shes pa kun gzhi rnam par shes pa dang bcas pa ni lta ba'o/ /mig la sogs pa rnam par reg pa ni rgyu mtshan no/ /de ni chos thams cad kyang yin la rnam par rig pa tsam yang yin pas rnam par rig pa rgyu mtshan du gyur pa de dag nyid ces bya ba ste/mig la sogs pa 'byung ba'i rgyur gyur pa ni dmigs pa'i ngo bo nyid do/ /de'i lta ba 'byung ba'i rgyu mtshan yin pa'i phyir zhes bya ba ni de nyid lta ba yin pa ni de'i lta ba'o/ /de lta ba nyid du snang bar gyur pa na yid kyi rnam par shes pa'i lta ba rgyun mi 'chad par gnas pa'i rgyur gyur pa'i phyir rten gyi bya ba byed do zhes brjod do//rnam par shes pa mi mthun pa'i rgyu mtshan nyid shes pas ni zhes bya ba la/ rnam par shes pa mi mthun pa rnams kyi rgyu mtshan ni don yin no/ /shes par byed pas na shes pa'o//dmigs pa med pa'i rnam par rig pa dmigs pas zhes bya ba ni dmigs pa med par yang rnam par shes pa 'byung ba ni lta ba ste/ dper na 'das pa la sogs pa dmigs pa lta bu'o/ /'bad pa med par yang phyin ci log med par thal bar 'gyur te 'di ltar shes pa'o/ / shes pa rnam pa gsum gyi rjes su mthun par shes pas ni zhes bya ba la/ gang gi phyir don ni 'di ltar 'gyur te/ ji ltar snang ba de med par yang gnyen po 'byung bar 'gyur bas phyin ci log med par thal bar 'gyur te 'di ltar shes pa'o/ /shes pa rnam pa gsum gyi rjes su mthun par shes pas zhes bya ba ni don de shes pas rnam pa gsum gyi rjes su mthun par shes zhes bya ba'o//bsam gtan pa zhes bya ba dang / nyan thos dang rang sangs rgyas rnams zhes bya ba ni nyan thos dang rang sangs rgyas rnams so/ /sems la dbang thob pas zhes bya ba ni sems las su rung ba thob pa'o //mos pa'i dbang gis de ltar don de dag snang ba zhes bya ba la/ gal te sa'i rang bzhin du mos nas yang de bzhin du 'gyur la/ de bzhin du me la sogs pa la yang don de bzhin du blta'o/ /zhi gnas thob pa zhes bya ba ni ting nge 'dzin thob pa'o/ /chos la lhag mthong la brtson pa rnams la zhes bya ba ni mdo sde la sogs pa la spyod pa la brtson pa rnams so//yid la byed pa tsam du don snang ba zhes bya ba ni don gcig la yang ji lta ji ltar yid la byas pa de lta de ltar rnam pa mang po snang ba'o/ /rnam par mi rtog pa'i ye shes thob pa zhes bya ba la/ drug po la snang ba'i don ji lta ba bzhin du yod pa yin na rnam par mi rtog pa'i ye shes med pa nyid du 'gyur ro//de lta na yang de yod pa'i dus na yang don gyi ngo bo nyid med pa ni nges par khas blang bar bya'o/ /gal te rnam par rig pa tsam don snang ba'i gnas zhes bya ba ni don med bzhin du yang rnam par rig pa nyid don du snang ba'i rgyu yin na zhes bya ba'i don to //gal te rnam par rig pa tsam gzhan gyi dbang yin na de ji ltar gzhan gyi dbang yin zhe na/ rang nyid gzung bar bya ba yin te/ rgyu des na gzhan gyi dbang yin la/ gzhan zhes brjod na ni rang gi rgyu las byung zhing byung ba nyid na gnas par mi rung ba dang /rang nyid kyis 'dzin pas gzhan zhes bya ba'i gzhan dbang yin no/ /de la gnas pa zhes bya ba ni bstan pa'i gzhan gyi dbang rnam par rig pa tsam la brten pa'o/ /don med pa zhes bya ba ni yod pa ma yin pa zhes bya ba'i don to/ /snang ba zhes bya ba ni don du dmigs pa'o/ /de ji ltar na zhes bya ba dang ci'i phyir zhes bya ba dag ni ji ltar bshad ma thag pa lta bu'o//dpag tu med pa'i rnam pa can gyi zhes bya ba ni yul thams cad la dmigs pa'i yid kyi rnam par shes pa'o/ /kun tu rtog pa zhes bya ba ni yid kyi rnam par shes pas kun tu brtags pa'o/ /phyin ci log 'byung ba'i rgyu mtshan yin zhes bya ba ni dmigs pa'i ngo bo nyid kyis don phyin ci log skye ba'i rgyu mtshan du gyur pa nyid do//rang gi mtshan nyid med ces bya ba ni de'i lus med pa'o/ /kun tu rtog pa tsam du dmigs pas zhes bya ba ni 'khrul pa'i rnam par shes pa tsam la dmigs pa nyid do/ /de gtan med pa'i mtshan nyid ces bya ba ni kun tu brtags pa'i ngo bo med pa'i ngo bo nyid do//de ji ltar na zhes bya ba dang / ci'i phyir na zhes bya ba ni gzhan gyi dbang ji lta ba bzhin no/ /gzhan du mi 'gyur ba'i phyir zhes bya ba ni slu ba med pa nyid do / /slu ba med pa'i 'khor bzhin no/ /rnam par dag pa'i dmigs pa yin pa dang /dge ba'i chos thams cad kyi mchog yin pa'i phyir zhes bya ba ni rnam par dag pa'i dmigs pa'i ngo bo ni yongs su grub pa yin te/ mchog yin pa'i phyir yongs su rdzogs pa'i gnas bzhin no/ /kun tu rtog pas ji ltar kun du rtog ces bya ba ni yid kyi rnam par shes pa ni kun tu rtog pa zhes bya ba la/de la ni gzhan gyi dbang la kun tu rtog pa ste/ rnam pa gang gis kun tu rtog pa de ston par byed pa de ni ming gis dmigs pa dang zhes bya ba la sogs pa'i gzhung yin te/ gzhan gyi dbang gi ngo bo nyid la der mtshan mar 'dzin pa dang zhes bya ba la/ gzhan gyi dbang nyid la mig la sogs pa'i ming gi mtshan mar 'dzin pas gang gi phyir mtshan ma bzung nas kun tu rtog go//lta bas de la mngon par zhen pa dang zhes bya ba ni 'di ni 'di lta bu'o zhes mtshan mas mtshan ma nyid du bzung nas zhen pa'o/ /rnam par rtog pa rnams kyis ngag kun nas slong ba zhes bya ba la/ ji ltar mngon par zhen pas mi gnod pa yin na yang rnam par rtog pa gsum gyis ngag kun nas 'byung bar byed do//mthong ba la sogs pa tha snyad bzhi po dag gis tha snyad 'dogs pa zhes bya ba la ni ji ltar mthong ba dang / thos pa dang / shes pa dang / rnam par shes pa'o zhes bya ba'i tha snyad rnam pa bzhis gzhan dang tha snyad du byed pa'o//med pa'i don la yod pa zhes sgro 'dogs pas zhes bya ba ni tha snyad ji lta ba bzhin du med pa'i don la don yod pa nyid do zhes bzung ba'i phyir ro/ /kun tu rtog pa'i rgyu mtshan zhes bya ba ni kun tu rtog pa zhes bya ba nyid kyi rnam par shes pas kun tu brtags pa zhes bya ba'i mtshan mar bzung nas dmigs pa'i ngo bo nyid du skye'o//des kun nas brtags pa'i phyir ro zhes bya ba ni kun tu rtog pa zhes bya ba yid kyi rnam par shes pa des kun tu brtags pa zhes bya ba dmigs par 'gyur ba'i mtshan mas bzung nas kun tu rtog par byed pas don des na gzhan gyi dbang la kun tu brtags pa zhes bya'o//yid kyi rnam par shes pa kun tu rtog pas kun tu brtags pa nyid kyis kun tu brtags pa ji ltar kun tu brtags pa de bzhin du de gtan med pas 'di ltar don des na gzhan gyi dbang de nyid yongs su grub pa zhes bya'o/ /kun nas nyon mongs pa dang rnam par byang ba'i ngo bo nyid yongs su ma grub pa gzhan gyi dbang zhes bya ba ni gang gi phyir de lta bu'i gzhan gyi dbang de rnam par rtog par gyur na kun nas nyon mongs par 'gyur la/rnam par mi rtog par gyur na rnam par byed par 'gyur ro/ /de dag gnyi ga'i sgra gcig tu zhugs par gyur pa ni ma grub pa yin no/ /ngo bo nyid du kun tu rtog pa dang /khyad par du kun tu rtog pa zhes bya ba de la/ ngo bo nyid du kun tu rtog pa ni ji ltar mig la sogs pa rnams la mig gi ngo bo la sogs pa kun tu rtog pa'o/ /khyad par du kun tu rtog pa ni 'di lta ste/ de dag nyid kyi ngo bo mi rtog pa la sogs pa'i bye brag gis kun tu rtog par byed pa'o//rang bzhin gyis yongs su grub pa dang / rnam par dag pa yongs su grub pa zhes bya ba de la/ rang bzhin gyis yongs su grub pa ni dri ma dang bcas pa'i de bzhin nyid do/ /rnam par dag pas yongs su grub pa ni dri ma med pa'i de bzhin nyid do/ /byang ba ni tha snyad la mkhas pa zhes bya ba ni tha snyad shes pa'o//tha snyad la mi mkhas pa rnams kyi zhes bya ba ni ba lang la sogs pa dag gis te/ gang gi phyir de dag la rnam par rtog pa yod na yang yi ger brjod par mi nus pa'i phyir ro/ /rnam par rtog pa thams cad bsdus nas rnam par rtog pa rnam pa bcur bstan te/ de la rtsa ba'i rnam par rtog pa zhes bya ba ni kun tu brtag par bya bas na rnam par rtog pa'i rtsa ba zhes bya ba'i tha tshig ste/de yang kun gzhi rnam par shes pa'o/ /mtshan ma'i rnam par rtog pa zhes bya ba ni rgyu mtshan can gyi rang bzhin gyis rnam par rtog pa zhes bya ba'i tha tshig ste/ de yang gzugs la sogs pa'i rnam par rig pa'o//mtshan mar snang ba'i rnam par rtog pa zhes bya ba ni gang mtshan ma'i rnam pa can gyi rnam par rtog pa skye ba ste/ rnam par brtag par bya ba'am/ rnam par rtog pa zhes dbye ba byas te/ de yang mig gi rnam par shes pa la sogs pa'i rnam par rig pa rten dang bcas pa'o/ mtshan mar 'gyur ba'i rnam par rtog pa zhes bya ba ni gang mtshan ma'i 'gyur ba la mtshan mar 'gyur ba'i bdag nyid can rnam par rtog pa zhes byas nas te/ rga ba la sogs pa zhes bya ba ni lus kyi 'byung ba chen po rnams kyi rang bzhin dengs shing don gzhan du gyur pa ste/ der rnam par rtog pa ni mtshan mar 'gyur ba'i rnam par rtog pa zhes bya'o//stsogs pa smos pas ni nad dang / 'chi ba dag bsdu'o/ /bde ba'i tshor ba la sogs pa yang de bzhin te/ lus gzhan du 'gyur ba'o/ /stsogs pa smos pas ni sdug bsngal dang / sdug bsngal yang ma yin bde ba yang ma yin pa bsdu'o/ /'dod chags la sogs pa la yang de bzhin te/stsogs pa smos pas ni zhe sdang dang gti mug bsdu'o/ /gnod pa dang dus kyi yongs su 'gyur ba la sogs pa zhes bya ba la/ de bzhin du lus gzhan du 'gyur ba ste/ gang rnam par rtog pa de la dmigs nas 'byung ba'o/ /gnod pa dang zhes bya ba ni rdeg pa dang /'ching ba la sogs pa'o/ /dus kyi yongs su 'gyur ba zhes bya ba ni grang ba la sogs pa'i dus na gzhan du yongs su 'gyur ba'o/ /dmyal ba ba'i 'gro ba zhes bya ba la sogs pa yang de bzhin te/ stsogs pas ni dud 'gro dang / yi dwags bsdu'o/ /'dod pa'i khams la sogs pa zhes bya ba snga ma bzhin te/stsogs pa smos pas ni gzugs dang gzugs med pa'i khams bsdu'o/ /mtshan mar snang bar 'gyur ba'i rnam par rtog pa zhes bya ba la/ mig la sogs pa'i mig gi rnam par shes pa la sogs pa de'i mtshan mar snang bar gang 'gyur ba ste/ mtshan mar snang bar 'gyur ba'i bdag nyid kyi rnam par rtog pa'o//de lta bas na 'di dag gi yang dag pa ji lta ba bzhin du bstan pa'i rga ba la sogs pa gang gis de dang de'i gnas skabs su 'gyur ba skyed par byed pa'o/ /gzhan gyis bstan pa'i rnam par rtog pa zhes bya ba ni gang gzhan gyis bstan pa'o//yang de ni rnam pa gnyis te/ dam pa ma yin pa'i chos nyan pa'i rjes su 'gro ba dang dam pa'i chos nyan pa'i rjes su 'gro ba'o/ /de yang rnam pa gnyis te/ chos rnams la rnam par rtog pa ni chos nyan pa'i rjes su 'gro ba ste/ dge ba rnams dang mi dge ba rnams zhes bya ba 'di ltar bsdu bar bya'o//tshul bzhin ma yin pa'i rnam par rtog pa zhes bya ba la/ de yang dam pa ma yin pa'i chos mnyan pa la byung ba'o/ /'di las phyi rol pa rnams kyis zhes bya ba ni mu stegs pa rnams so/ /tshul bzhin gyi rnam par rtog pa zhes bya ba la/ de yang dam pa'i chos nyan pa las byung ba ste/chos 'di pa rnams zhes bya ba ni sangs rgyas rnams so/ /mngon par zhen pa'i rnam par rtog pa zhes bya ba ni gang tshul bzhin ma yin pa'i yid la byed pa'i rgyu las byung ba ste/ bdag tu lta ba la brten pa mdo las bstan pa'i lta ba drug cu rtsa gnyis su gtogs pa dang mtshungs par ldan pa'i rnam par rtog pa gang yin pa'o//rnam par g.yeng ba'i rnam par rtog pa zhes bya ba ni byang chub sems dpa' rnams kyi rnam par rtog pa bcu gang yin pa'o/ /de la dngos po med pa'i mtshan ma'i rnam par g.yeng ba zhes bya ba ni dngos po med pa nyid mtshan ma ste/ rnam par g.yeng ba'o zhes byas nas so//yang rnam par g.yeng ba de'i gnyen po ni shes rab kyi pha rol tu phyin pa'i gzhung las/ byang chub sems dpa' nyid yod bzhin du zhes bya ba ste/ yod ces smos pas ni byang chub sems dpa' stong pa nyid kyi bdag nyid du yod pa'o/ /'di ltar bstan te/ gang las bstan pa nyid bdag nyid yod pa de ni stong pa nyid kyi bdag nyid do zhes bya ba'o//dngos po'i mtshan ma'i rnam par g.yeng ba zhes bya ba ni dngos po nyid ni rnam par g.yeng ba'i mtshan ma ste/ de'i gnyen po ni yang gzhung de nyid las/ byang chub sems dpa' yang dag par rjes su mi mthong ngo zhes bya ba ste/kun tu brtags pa dang / gzhan gyi dbang gi bdag nyid can gyi yang dag par rjes su mi mthong ngo zhes bya bar dgongs so/ /sgro 'dogs pa'i rnam par g.yeng ba zhes bya ba la/ de'i gnyen por ni yang gzhung de nyid las/ gzugs ni gzugs kyi ngo bo nyid kyis stong zhes bya ba la sogs pa gsungs pa ste/kun tu brtags pa zhes bya ba'i tha tshig go/ /skur pa 'debs pa'i rnam par g.yeng ba zhes bya ba la/ de'i gnyen po 'di yang gzhung de nyid las/ stong pa nyid kyis ni ma yin no zhes bya ba ste/ chos nyid kyi ngo bo zhes bya ba'i tha tshig go/ /gcig pu nyid du rnam par g.yeng ba zhes bya ba la/de'i gnyen po'i gzhung ni gzugs kyi stong pa nyid gang yin pa de gzugs ma yin no zhes bya ba ste/ gal te gzhan gyi dbang dang yongs su grub pa dag gcig yin na des na gzhan gyi dbang yang yongs su grub pa bzhin du dmigs pa rnam par dag par 'gyur ro/ /tha dad pa nyid du rnam par g.yeng ba zhes bya ba la/de'i gnyen po'i gzhung ni gzugs ni stong pa nyid las gzhan pa yang ma yin te/ gzugs nyid stong pa nyid do zhes bya ba ste/ gang gi phyir de dag tha dad pa yin na chos las chos nyid tha dad pa nyid du 'gyur na/ tha dad pa nyid du 'gyur ba ni mi rung ba ma yin te/ mi rtag pa'i mi rtag pa nyid bzhin no/ /kun tu brtags pa'i ngo bo yongs su bzung nas gzugs nyid stong pa nyid do/ /stong pa nyid gzugs so zhes bya ba ste/ gang kun tu brtags pa de'i ngo bo nyid med pa de ni stong pa nyid yin la/ gang stong pa nyid yin pa de ni de'i ngo bo nyid med pa yin gyi/ ji ltar gzhan gyi dbang dang yongs su grub pa dag ni ma yin no//ngo bo nyid du rnam par g.yeng ba zhes bya ba la/ de'i gnyen po'i gzhung ni rab 'byor 'di lta ste/ gzugs zhes bya ba 'di ni ming tsam mo zhes bya ba ste/ gang gi phyir 'di la gzugs kyi ngo bo nyid yod pa ma yin no zhes bya ba'i tha tshig go/ /khyad par du rnam par g.yeng ba zhes bya ba la/de'i gnyen po ni ngo bo nyid ni mi skye mi 'gag kun nas nyon mongs pa ma yin/ rnam par byang ba ma yin no zhes bya ba ste/ de la skye ba ni kun nas nyon mongs pa'o/ /'gag pa ni rnam par byang ba ste/ de ltar mi skye mi 'gag /kun nas nyon mongs pa ma yin/ rnam par byang ba ma yin no zhes bya ba'i tha tshig ste/rkang pa 'di rnams kyi don ni de yin no/ /ming ji lta ba bzhin du don du rnam par g.yeng ba zhes bya ba ni ming ji lta ba bzhin du don du rnam par g.yeng bar 'gyur ba'o/ /de'i gnyen po ni ming bcos ma la chos de dag so sor brtags nas zhes bya ba ste/so sor zhes bya ba ni ming dang ming gis so sor ro/ /don ji lta ba bzhin du ming du rnam par g.yeng ba zhes bya ba la/ don ji lta ba bzhin du ming du rnam par g.yeng bar 'gyur ba ste/ de'i gnyen po ni glo bur pa'i ming gis tha snyad du byed de zhes bya ba ste/ don gyi ngo bo nyid kyi ming ni med do zhes bya ba'i tha tshig go//rnam par g.yeng ba bcu po 'di dag gi gnyen por shes rab kyi pha rol tu phyin pa bstan te/ yang bstan pa'i rgyu las ni rnam par mi rtog pa'i ye shes 'byung bar 'gyur ro/ /gzhan gyi dbang gi ngo bo nyid kun tu rtags pa'i ngo bo nyid du ji ltar snang ba de'i bdag nyid ma yin par ci mngon zhe na/de bstan pa ni ming gi snga rol na blo med pas de'i bdag nyid du 'gal ba'i phyir zhes bya ba ste/ gal te gzhan gyi dbang dang kun tu brtags pa dag gcig pa nyid du gyur na ming la ma ltos par blo don la 'jug par 'gyur te/ ji ltar bum pa zhes bya ba'i ming med par ni bum pa'i don la bum pa'i blo 'byung bar mi 'gyur ro//gal te yang bum pa zhes bya ba'i ming dang bum pa mtshan nyid gcig pa yin na ni de la 'jug par 'gyur na yang gang gi phyir mtshan nyid gcig pa ni ma yin pa nyid de/ des na ming dang don de'i bdag nyid yin par 'gal bar 'gyur ro/ / yang 'dir ni ming ni gzhan gyi dbang yin la/ don ni kun brtags pa nyid du rnam par gzhag ste/ gang gi phyir ming gzhan gyi dbang gi stobs kyis don gcig la yang ming mang po kun tu rtog ste/ gal te ming dang don dag mtshan nyid gcig pa nyid yin na des na ming bzhin du don yang mang po nyid du 'gyur ro//de ltar gyur na don yang mang po'i bdag nyid du 'gyur bas don gcig mang po nyid kyang yin zhes bya ba ni 'di ltar 'gal ba nyid yin no/ /gzhan yang de dag ngo bo nyid gcig pa yin na 'gal ba gnyis pa 'dir yang thal bar 'gyur te/ gang gi phyir go'i sgra don rnam pa bcu la 'jug par 'gyur ba lta bus ming la ni nges par med pa ma yin te/des na gal te ming dang don dag gcig pa nyid 'dod na ni don de gnyis kyi bdag nyid can yin pas 'gal bar 'gyur ro/ /de ltar 'dod na skyon gsum la yang 'byung bar 'gyur te/ gang gi phyir bag chags la sogs pa mtshan nyid can gyi ming gi don rnams gcig pa nyid du 'gyur ro//don 'di nyid tshigs su bcad pas bstan pa la/ grub par 'gyur zhes bya ba ni gzhan gyi dbang dang kun tu brtags pa dag gcig pa nyid du 'grub pa'o/ /chos rnams med la dmigs pa dang / /zhes bya ba la sogs pa'i tshigs su bcad pa 'di ni sgyu ma la sogs pa'i dpe dag gis slob ma yid ches par byed pa yin te/slob mas 'gal ba gnyis dris pa ni chos rnams med la dmigs pa dang / nyon mongs med par dag pa 'gal lo zhes the tshom za bas de la sgyu ma'i dpes bstan te/ ji ltar sgyu ma'i glang po med bzhin du yang dmigs par 'gyur ba de bzhin du yang yod pa ma yin na yang dmigs su rung ngo zhes blta bar bya ba dang /ji ltar nam mkha' rang bzhin gyis 'od gsal ba yin pa'i phyir khug rna la sogs pas bsgribs pa ma yin na yang de dag med pa tsam la dang bzhes brjod pa bzhin du chos rnams kyang rang bzhin gyis 'od gsal ba yin pa'i phyir kun nas nyon mongs pa nyid med pa yin na yang glo bur ba'i dri mas sgrib g.yogs su snang ba med par gyur pa ni yang rnam par dag par blta bar bya'o//gzhan gyi dbang ji ltar snang ba bzhin med du zin na gzhan gyi dbang gi ngo bo nyid thams cad kyi thams cad du med par ci'i phyir mi 'gyur/de med na yang yongs su grub pa'i ngo bo nyid kyang med par 'gyur te/ gang gi phyir kun nas nyon mongs pa la rnam par byang bar 'gyur bas so/ /des na de dag gnyi ga med na yang thams cad med par ji ltar mi 'gyur bas de bstan par bya ba'i phyir/ kun nas nyon mongs pa dang rnam par byang ba med pa'i nyes par 'gyur zhes bya ba la sogs pa bstan pa ste / gang gi phyir kun nas nyon mongs pa dang rnam par byang ba ni dmigs pa'i phyir ro/ /des na de dag gnyi ga dmigs bzhin du yang med do zhes 'dod pa des ni kun nas nyon mongs pa dang rnam par byang ba dag yod bzhin du yang med do zhes skur pa btab par 'gyur ro// //bam po bzhi pa/ rang bzhin gyis rnam par byang ba zhes bya ba ni ngo bo nyid kyis rnam par byang ba'i ngo bo nyid de/ de yang de bzhin nyid du yod pa yin no sems can thams cad la spyi'i mtshan nyid kyis de ni yod pa nyid kyi phyir chos thams cad ni de bzhin gshegs pa'i snying po can zhes gsungs so//dri ma med pas rnam par byang ba zhes bya ba ni de bzhin nyid de nyid nyon mongs pa dang shes bya'i sgrib pa zhes bya ba'i dri ma dang bral bar gyur pa'i phyir gang rnam par dag pa'i de bzhin nyid kyis rab tu phye ba'i sangs rgyas nyid do//de 'thob pa'i lam rnam par byang ba zhes bya ba ni de 'thob pa'i lam gang yin pa de yang rnam par byang ba ste/ de yang byang chub kyi phyogs dran pa nye bar gzhag pa la sogs pa dang / pha rol tu phyin pa drug la sogs pa'o/ /de skyed pa nyid kyi dmigs pa rnam par byang ba zhes bya ba ni byang chub kyi phyogs kyi chos de rnams mngon par rtogs pa skyed pa yang yin la dmigs pa yang yin pas skyed pa nyid kyi dmigs pa'o//de rnam par byang ba yang yin pas de skyed pa nyid kyi dmigs pa rnam par byang ba zhes bya'o/ /de yang mdo'i sde la sogs pa gsung rab yan lag bcu gnyis su gtogs pa'i bstan pa ste/gang gi phyir bstan pa gang yin pa de kun tu brtags pa yin na ni kun nas nyon mongs pa'i rgyu las byung bar 'gyur ro/ /'on te gzhan gyi dbang yin na ni bden pa ma yin pa'i don du 'gyur ro/ /chos kyi dbyings rnam par dag pa'i rgyu mthun pa can yin pas de dag gnyi ga las rnam par grol ba'i phyir mi bden pa ma yin te/yongs su grub pa nyid las 'byung bar 'gyur ba yin no/ /yang gang du rnam pa bzhi po de dag las gang yang rung ba zhig bstan pa ni theg pa chen po ste/ yongs su grub pa'i ngo bo ston pa yin no zhes 'di ltar rig par bya'o/ /de la dang po gnyis ni mi 'gyur bar yongs su grub pa nyid kyi yongs su grub pa'o//phyi ma ni phyin ci ma log par yongs su grub pa yin no/ /don 'di dag nyid tshigs su bcad pa phyi mas bstan to/ /byung rten sgyu ma la sogs bstan / /zhes bya ba ni gzhan gyi dbang du 'byung bar bsam pa'o/ /de yang gang du chos thams cad sgyu ma lta bu'o zhes bya ba nas sprul pa lta bu'o zhes bya ba'i bar gyis bstan pa ste/de ni gzhan gyi dbang gi ngo bo bstan pa yin par shes par bya'o/ /brtags la brten nas med pa bstan/ /zhes bya ba ni gang du gzugs med ces bya ba nas/ chos thams cad med do zhes bya ba'i bar du bstan pa der ni kun tu brtags pa bstan pa yin par shes par bya'o//gang gi phyir gzhan gyi dbang gi ngo bo nyid sgyu ma la sogs pa'i dpe nyid kyis bstan pas de ston par mdzad pa ni de la nor pa nyid du som nyi za ba yin te/ nor pa nyid la som nyi za ba la gzhan gyi dbang gi ngo bo nyid de sgyu ma'i dpes ston/ par mdzad de/ ji ltar sgyu ma'i glang po dang / rta don du med na yang yul du 'gyur ba de bzhin du don yang blta bar bya'o zhes de'i som nyi bzlog par bya ba'i phyir ro/ /gzhan yang sems dang sems las byung ba don med pa rnams dmigs pa med par ji ltar 'byung bar 'gyur snyam du som nyi za bar 'gyur bas de'i gnyen por smig rgyu ste/de la smig rgyu'i gnas lta bu ni sems dang sems las byung ba'o/ /chu'i gnas lta bu ni don to/ /des na ji ltar smig rgyu rgyu bar gyur pa na chu'i don med bzhin du yang chu'i don gyi blo skyed par byed pa'o/ /de bzhin du sems dang sems las byung ba'i rgyu bar gyur pa na yang yod pa ma yin pa'i don gyi blo 'byung bar 'gyur ro//yang byis pa rnams ji ltar don med na 'dod pa dang mi 'dod pa'i nye bar spyod pa ji ltar thob par 'gyur zhes som nyi za ba de bzlog par bya ba'i phyir gzhan gyi dbang ni rmi lam lta bu nyid de/ rmi lam na don ji lta ba bzhin du med na yang 'dod pa dang mi 'dod pa'i nye bar spyad pa thob pa mthong ba bzhin du 'dir yang de bzhin du 'gyur ro zhes shes par bya'o//yang don med na las dge ba dang mi dge ba rnams kyi 'bras bu 'dod pa dang mi 'dod pa ji ltar mngon par 'grub par 'gyur snyam du som nyi za ba de bzlog pa'i phyir gzugs brnyan gyi dpes chos mthun pa'i gzhan gyi dbang bstan te/ji ltar gzugs kyi don med bzhin du yang gzugs brnyan la gzugs nyid kyi blo 'byung bar 'gyur na yang gzugs nyid kyi don yod pa ni ma yin pa de bzhin du 'dir yang 'dod pa dang mi 'dod pa'i 'bras bu'i don yod pa ma yin na yang de dmigs pa nyid du blta bar bya'o//yang don med na ji ltar rnam par shes pa sna tshogs 'byung bar 'gyur snyam du som nyi za ba de'i gnyen por gzhan gyi dbang dang chos mthun pa mig yor gyi dpes bstan te/ ji ltar grib ma'i rtsed mo 'dod pa'i dbang gis rnam pa sna tshogs su sgyur bar byed pa na de na mig yor gyi don med bzhin du yang rnam pa sna tshogs su snang ba ni dmigs so//de bzhin rnam par shes pa yang don rnam pa sna tshogs med na yang don rnam pa sna tshogs pa nyid du snang ba yin no/ /yang don med na ji ltar tha snyad brjod pa rnam pa sna tshogs 'byung bar 'gyur snyam du som nyi za ba de bzlog pa'i phyir brag ca lta bu nyid do zhes 'di ltar rnam par 'jog par byed de/'di ltar don med bzhin du yang brag ca grag pa dmigs par 'gyur ba de bzhin du yang tha snyad brjod pa sna tshogs med bzhin du de nye bar dmigs par 'gyur ro/ /yang don med na ji ltar mnyam par gzhag pa rnams kyi sems dang sems las byung ba rnams la 'jig rten pa'i don dmigs par 'gyur zhes bya ba dang /mnyam par gzhag pa'i sems kyis ji lta ba bzhin du rab tu shes shing ji lta ba bzhin mthong ngo zhes 'di ltar 'byung ba de ji lta bu zhes som nyi za bas de'i gnyen por chos mthun pa chu zla'i dpes bstan te/ji ltar chu la zla ba'i don med bzhin du yang rlan pa nyid dang / dang ba'i phyir chu la de nye bar dmigs pa bzhin du mnyam par gzhag pa'i sems la dmigs pa'i don med bzhin du yang de nye bar dmigs par 'gyur te/ 'dir yang chu zla lta bu ni rlan pa'i bdag nyid can yin pa'i phyir ting nge 'dzin yin no/ / yang ji ltar don med na sems can gyi bya ba bsgrub pa'i phyir byang chub sems dpa' de kho na nyid rtogs pa rnams sems can rnams kyi don gyi phyir blo sngon du btang nas 'gro ba de dang de dag tu bdag gi lus 'dzin par byed ces som nyi za ba de'i gnyen por gzhan gyi dbang dang chos mthun pa sprul pa lta bus bstan te/ji ltar sprul pa'i don med bzhin du yang sprul pa'i dbang gis dgos pa sgrub par byed pa na yang sprul pa'i don dmigs pa bzhin du bdag gi lus len pa'i don med bzhin du yang sems can thams cad kyi don byed pa po'i bdag gi lus len pa'i don nye bar dmigs par blta bar bya'o//bcom ldan 'das kyis don ci las dgongs nas yod pa ma yin pa'i sgyu ma la sogs pa'i dpe brgyad bstan ce na/ de bstan par bya'o/ /de la re zhig sgyu ma'i dpe ni nang gi bdag nyid can gyi skye mched drug po mig la sogs pa rnams kyi gnyen po ste gang gi phyir sgyu ma'i glang po bzhin du de dag yod pa ma yin na yang nye bar dmigs pa nyid du blta bar bya'o zhes ston to//smig rgyu'i dpes kyang gang gi phyir snod kyi 'jig rten de rnams kyang de dang mtshungs pa'i phyir smig rgyu bzhin te/ yod pa ma yin na yang gdungs pa'i dbang gis chur dmigs pa bzhin no/ /gzugs la sogs pa'i nye bar spyod pa'i gnyen po ni rmi lam gyi dpes te/des na rmi lam bzhin du gzugs la sogs pa 'di dag yod pa ma yin na yang de las byung ba'i 'dod pa dang mi 'dod pa'i nye bar spyod pa yang de bzhin du bstan to/ /lus kyi las kyi gnyen por gzugs brnyan gyi dpe 'dra bar nye bar bstan te/des na lus kyi las dge ba dang / mi dge ba la brten nas de las gzhan pa'i gzugs kyi gzugs brnyan 'byung ngo zhes ston to/ /ngag gi las kyi gnyen por ni brag ca dpe bstan te/ ngag gi las kyi rgyu nyid las ngag gi las kyi 'bras bu brag ca lta bu nyid du des bstan to/ /yid kyi las ni rnam pa gsum ste mnyam par bzhag pa'i sa pa dang /thos pa'i rjes su 'gro ba dang / 'dod pa na spyod pa dang / de la mnyam par ma bzhag pa'i sa pa gang yin pa'i gnyen por mig yor lta bu nyid ces bstan te/ des ni mig yor lta bur zhes bya ba yid kyi las kyi 'bras bu bstan to/ / mnyam par gzhag pa'i sa pa'i yid kyi las kyi gnyen por ni chu zla'i dpe ste/ des ni mnyam par gzhag pa'i sa pas yid kyi las ni chu'i zla ba dang 'dra'o zhes bstan to/ /thos pa'i rjes su 'gro ba'i yid kyi las kyi gnyen por ni sprul pa'i dpe ste/ de la thos pa'i rjes su 'gro ba ni thos pa dang bsam pas bsgos pa'o//des ni thos pa'i rjes su 'gro ba'i yid kyi 'jug pa ni sgyu ma dang 'dra ba'o zhes bstan to/ /ngo bo nyid gsum gyi mtshan nyid kyi chos kyi chos nyid de dag ji ltar mdo las 'byung ba dang rjes su mthun par 'gyur ba yin zhe na/ da ni de bstan par bya ba'i phyir/ tshangs pas zhus pa las bcom ldan 'das kyis ci las dgongs te/de bzhin gshegs pas 'khor ba yang ma dmigs mya ngan las 'das pa yang ma dmigs zhes bstan zhes bya ba gang / 'khor ba dang mya ngan las 'das pa nyid bye brag med pa las dgongs nas bstan zhes bya ba ste/ gzhan gyi dbang ni 'khor ba ma yin te/gang gi phyir de mya ngan las 'das par 'gyur bas so/ /kun tu brtags pa'i chos ni de mya ngan las 'das pa yang ma yin te 'khor ba yin no/ /des na gcig pa nyid du brjod par mi nus par gzigs nas gcig nyid du zhugs pa'i bye brag gi ngo bo med pas 'khor ba yang mi dmigs la mya ngan las 'das pa yang mi dmigs zhes bya ba ni de las dgongs nas der gsungs pa yin no//de bzhin du kun tu brtags pa'i ngo bo nyid ni kun nas nyon mongs pa nyid do/ /yongs su grub pa'i ngo bo nyid ni rnam par byang ba nyid do/ /gzhan gyi dbang ni de dag gnyi ga'i bdag nyid ma yin pa nyid de/de la dgongs nas chos mngon pa'i mdo las chos ni gsum ste/ kun nas nyon mongs pa'i char gtogs pa dang / rnam par byang ba'i char gtogs pa dang / de gnyi ga'i char gtogs pa'o zhes bya ba bstan pa yin no/ /de yang gser gyi snying po can gyi sa'i dpes bstan te/ de la sa khong na gser yod pa zhes bya ba ni gser gyi sa bon no//sa'i khams ni sra ba nyid do/ /sa ni nye bar rten pa'i gzugs sa'i kha dog gang yin pa ste/ de la gsum po de dag nye bar dmigs pa yin no/ /gser ni sa nyid du snang ba'o/ /de'i gser nyid du shes pa ni phyis 'byung bar 'gyur te/ gang gi tshe me dang 'phel bar gyur pa na/gser nyid du dmigs par 'gyur ba ste/ des na de yod pa nyid du grub par 'gyur ro/ /don gyi tshigs su bcad pa ni/ ji ltar chos rnams yod min zhing / /ji ltar rnam pa du mar snang / /zhes bya ba la go rims bzhin du/ de bzhin chos dang chos med min//zhes bya ba dang sbyar te/ rgyu gang gis gang gi phyir med pa des na chos rnams yod pa ma yin zhing gang gi phyir snang ba des na chos med pa yang ma yin te/ chos yin no zhes bya ba'i tha tshig go/ /des na/ de bzhin chos dang chos med min/ /gnyis su med pa gnyis su bstan/ /cha res zhes bya ba ste mtha' gcig gis so//med pa dang yod pa zhes bya ba ni dngos po dang dngos po med pa'o/ /rab tu bstan zhes bya ba ni bshad pa'o/ /gnyi ga'i cha ni yod min zhing / /med pa'ang min zhes brjod par mdzad/ /ces bya ba ni gang gi phyir gnyi ga'i bdag nyid can gyi gzhan gyi dbang yongs su bzung nas yod pa dang med pa nyid du bstan pa'o//ji ltar snang ba de bzhin med/ /ces bya ba ni ji ltar dmigs pa de dang de bzhin du med pa ste/ de phyir med ces brjod par mdzad/ /gang phyir de ltar snang gyur pa/ zhes bya ba la/ snang ba tsam du yod pa'i phyir/ yod pa zhes brjod pas/ de phyir yod ces brjod par mdzad//ces bya ba'o/ /gang las dgongs na ngo bo nyid med par bstan pa yin pa de ston par byed pa ni/ rang dang zhes bya ba la/ gang gi phyir rang nyid rkyen med par mi 'byung zhes bya ba ste/ re zhig ngo bo nyid med pa nyid kyi dgongs pa gcig yin no/ /chos rnams kyi bdag nyid med pa'i phyir zhes bya ba ni yang 'di'i dgongs pa ni 'di yin te/gang 'gags pa de ni de'i bdag nyid du yang mi 'byung bas de'i phyir na yang ngo bo nyid med de / rang gi dngos la mi gnas phyir/ /zhes bya ba ni byung ba tsam nyid na skad cig phyi mar mi gnas pa ste/ gnas par mi nus pa'i phyir na yang ngo bo nyid med do/ /de lta bu ni re zhig nyan thos dang thun mong gi chos rnams kyi ngo bo nyid med pa nyid do//gzung ba bzhin du de med phyir/ /zhes bya ba ni 'dis ni nyan thos dang thun mong ma yin pa ste/ gang gi phyir ji ltar byis pas yongs su bzung ba'i kun tu brtags pa'i ngo bo ni de bzhin du med pas de las dgongs nas theg pa chen po'i tshul 'dir chos thams cad kyi ngo bo nyid med pa'o zhes gsungs so//thams cad ngo bo nyid med pa nyid ni 'di ltar grub pa yin pa ste/ skye ba med pa la sogs pas so/ /gang gi phyir gang ngo bo nyid med pa de ni ma skyes pa'o/ /gang ma skyes pa de ni ma 'gags pa'o/ /gang ma skyes pa ma 'gags pa de ni gdod ma nas zhi ba'o//gang gdod ma nas zhi ba de ni rang bzhin gyis mya ngan las 'das pa yin pas so/ /phyi ma phyi ma rten byas te/ /zhes bya ba ni phyi ma phyi ma'i rgyu'i ngo bo yin no zhes bya ba'i tha tshig go/ /mnyam pa nyid la dgongs pa ni ji ltar kha cig mnyam pa nyid kyi chos nyid la bsams nas de gang yin pa ni bdag yin la bdag gang yin pa ni de yin no zhes smras pa ltar/bcom ldan 'das kyis kyang chos kyi sku mtshungs pa thugs la bzhag nas/ nga nyid de'i tshe de'i dus na zhes bya ba la sogs pa bstan pa yin gyi/ rnam par gzigs gang yin pa de ni shAkya thub pa nyid ni ma yin te/mnyam pa nyid la dgongs pa ni 'di yin no/ /dus gzhan la dgongs pa zhes bya ba la/ gang snyom las mang ba rnams thabs kyi rnam pa 'di nyid kyis chos 'di la sbyor bar byed pa yin te/ de bzhin gshegs pa rin chen mang gi mtshan bzung ba'i rgyu las byung ba'i dge ba'i rtsa bas de dag khyad par thob pa'i rgyur 'gyur ba tsam la dgongs nas yin gyi mtshan bzung ba tsam nyid kyis nges pa la 'jug par 'gyur zhing /bla na med pa'i byang chub thob pa ma yin te/ ji ltar paN gcig paN stong du sgyur zhes brjod pa de ni nyi ma gcig gis sam/ dus gzhan du zhes bya ba'i don te/paN gcig po de nyid paN stong gi rgyur gyur pa bzhin no/ /smon lam btab pa tsam gyis 'jig rten gyi khams bde ba can du skye bar 'gyur ro zhes bya ba yang de bzhin du blta bar bya'o/ /don gzhan la dgongs pa ni theg pa chen po'i chos kyi don khong du chud par 'gyur ro zhes bya ba'i ngo bo nyid gsum gyi don gyi mtshan nyid rang gi khong du chud par ni mi 'gyur ro//gal te sgra ji bzhin du don khong du chud pa 'di bcom ldan 'das kyis bzhed pa yin na ni 'di ltar byas pas kyang rtogs par 'gyur bas des na dgongs pa 'di'i don 'di ni/ sangs rgyas mang po la bsnyen bkur byas par gyur pas ni ma yin no zhes bya ba'o//gang zag gi bsam pa la dgongs pa ni zhes bya ba la/ kha cig la sbyin pa'i bsngags pa gsungs la/ yang de nyid ni mi bsngags par yang mdzad do/ /de la 'di ni gang zag gi bsam pa la dgongs pa yin te/ gang zag gang ser sna can du gyur pa de la ni sbyin pa bsngags par mdzad la/gang sbyin pa la mos pa yod pa de la de nyid bsngags par mi mdzad de/ des na dgongs pa 'di med na sbyin pa la bsngags pa dang ma bsngags pa 'gal ba nyid kyi phyir dgongs pa 'di nyid kyis ni sbyin pa la bsngags pa dang mi bsngags pa rig par 'gyur ro/ /de bzhin du tshul khrims la sogs pa la yang blta bar bya'o//sgom pa kha cig kyang zhes bya ba ni 'jig rten pa'i bsgom pa'o/ /dgongs pa dang ldem por dgongs pa la tha dad du bya ba ci yod ce na/ bcom ldan 'das kyis kyang thugs la bzhag pa ston par mdzad pa de ni dgongs pa yin no/ /gang nyid kyis nges par bstan pa la 'jug par mdzad pa de ni ldem por dgongs pa yin no//de la bzhugs pa la ldem por dgongs pa ni gang du gang zag dang chos kyi ngo bo dang / khyad par du kun rdzob kyi bden pa'i tshul du sems can rnams bzhugs pa'i phyir bstan pa la ni bzhugs pa la ldam por dgongs pa'o/ / de la mtshan nyid la ldem por dgongs pa ni gang du chos kyi mtshan nyid bstan par bya ba der ngo bo nyid gsum ston pa'o/ /gnyen po la ldem por dgongs pa ni gang du sems can rnams kyi spyod pa'i gnyen po bstan pa ste/ sems can rnams nyon mongs pa'i gnyen po la gnas par bya ba'i phyir ro//bsgyur ba la ldem por dgongs pa ni gang du tshig gi don gzhan du brjod la/ don de nyid gzhan du ston pa ste/ dper na snying po med pa la snying por shes/ phyin ci log la shin tu gnas/ /nyon mongs kun nas rab nyon mongs/ /byang chub dam pa thob par 'gyur/ /zhes bya ba lta bu'o/ /de la snying po med ces bya ba ni ting nge 'dzin te/'phro ba med pa ni snying po med pa'o zhes byas nas te/ de la bla ma'i blo 'byung ba ni snying por shes pa'o/ /phyin ci log la shin tu gnas/ /zhes bya ba ni mi mthun pa la rab tu gnas zhes bya ba'i tha tshig ste/ mi rtag pa la rtag pa'o zhes gang phyin ci log pa de ni rtag pa las bzlog pa'i mi rtag pa la rab tu gnas zhes bya ba'i tha tshig go//nyon mongs kun nas rab nyon mongs/ /zhes bya ba la/ nyon mongs pa ni ngal ba ste/ de nyid kyis ni yun ring por sems can gyi don la rab tu nyon mongs te/ ji ltar nyon mongs par gyur kyang dus ring por 'khor ba na 'di ltar gnas so zhes gsungs pa lta bu'o//byang chub dam pa thob par 'gyur/ /zhes bya ba'i tshig gi don ni go sla'o/ /chos rnams brjod pa'i bag chags las 'byung ste/ de dag nyid las te zhes bya ba de la brjod pa'i bag chags las te/ rnam par rtog pa dang phyi rol gyi bag chags kun gzhi rnam par shes pa la kun tu gnas pa'o//bag chags de las byung ba ni chos thams cad de/ gang 'jug pa'i rnam par shes pa'i ngo bo'o/ /de dag nyid las te zhes bya ba ni rnam par rtog pa'i bag chags de yang chos kyi rgyu las byung ngo zhes bya ba'i tha tshig go//des ni kun gzhi rnam par shes pa dang 'jug pa'i rnam par shes pa dag phan tshun gyi rgyu can du bstan to/ /'jug pa'i rnam par shes pa'i mtshan nyid kyi chos de dag ni/ rgyu mtshan lta ba dang bcas pa'i rnam par rig pa'i ngo bo nyid do zhes bya ba ni/gang rnam par rig pa rgyu mtshan dang bcas/ lta ba dang bcas pa de'i bdag nyid can no zhes bya ba'i tha tshig go/ /de dag gi mtshan nyid kyang rnam pa gsum ste 'di ltar gnas kyi mtshan nyid ces bya ba ni gzhan gyi dbang gi mtshan nyid do/ /de ltar bstan pa 'di ni ngo bo nyid gsum gyi mtshan nyid bstan pa yin no//de dag gi don yang tshigs su bcad pa phyed kyis bstan te/ rgyu mtshan lta dang bcas pa las/ de dag mtshan nyid gsum shes bya/ /zhes bshad pa ji lta ba bzhin du bstan par bya'o/ /de gnyi ga yod pa dang med pa mi dmigs pa'am/ dmigs pa'am/ de kho na nyid ma mthong ba dang mthong ba dag dus mnyam pa nyid du zhes bya ba la/de gnyi ga tsam ni kun tu brtags pa dang / yongs su grub pa'o/ /de gnyis las gcig ni med pa'o/ /gnyis pa ni yod pa ste/ des na de dag gnyi ga med pa dang yod par zhes gsungs pa yin te/ gang gi phyir de kho na nyid ma mthong ba la ni kun tu brtags pa nye bar dmigs shing yongs su grub pa dmigs par mi 'gyur ro//dus de nyid na de kho na nyid mthong ba la kun tu brtags pa ni mi dmigs la yongs su grub pa ni dmigs par 'gyur ro/ /don de dag nyid tshigs su bcad pas ston pa ni/ gzhan dbang la ni brtags pa med/ /ces bya ba la sogs pa smos te/de phyir de la gnyi ga mnyam/ /zhes bya ba la/ mnyam pa zhes bya ba ni dus gcig tu'o/ /de la zhes bya ba ni gzhan gyi dbang de la'o/ /gnyi ga zhes bya ba ni de kho na nyid mthong ba dang / ma mthong ba dag go/ /de phyir zhes bya ba ni rgyu des na zhes bya ba'i tha tshig ste 'di ltar gzhan gyi dbang la kun tu brtags pa ni med la/yongs su grub pa ni yod do zhes bya ba'i don to/ /byis pa phyin ci log tu 'dzin pa la sngar bstan pa'i tshig gi don tshig gi lhag mas yang dag par ston te/ de la kun tu spyod pa gnyis mi mnga' ba zhes bya ba ni gnyis su spyod pa 'di la mi mnga' bas de ni kun du spyod pa 'di la mi mnga' ba ste/ji ltar nyan thos dang / rang sangs rgyas rnams kyi shes pa ni bsgribs pa dang ma bsgribs pa can yin no zhes bya ba'i don to/ /yod pa dang med pa gnyis su med pa'i mtshan nyid mchog tu rnam par dag pa ste/ rnam par dag pa'i de bzhin nyid de ni mtshan nyid med pa'i chos te gang gi phyir re zhig 'di la dngos po'i mtshan nyid ni med de/'di ltar chos thams cad med pas so/ /med pa'i mtshan nyid kyang ma yin te/ dngos po'i rang gi mtshar nyid la gnas pas so/ /mtshan nyid med pa'i chos mchog tu rnam par dag pa rtogs pas na de ni de bzhin nyid mchog tu rnam par dag par gshegs par mdzad pa'i yon tan zhes bya ba ste/mchog nyid du rtogs pas na mchog tu gshegs par mdzad pa ste/ gshegs pa zhes bya ba ni 'gro ba zhes bya ba'i don yin pa'i phyir 'gro ba'i tha tshig go/ /sangs rgyas kyi mdzad pa lhun gyis grub pa rgyun mi gcod par gnas pa'i yon tan zhes bya ba la/sangs rgyas kyi mdzad pa la dmigs nas gnas pa ste/ des rnam par gnas zhes bya ba'i tha tshig go/ /sgrib pa thams cad kyi gnyen po bsgoms pa'i yon tan dang zhes bya ba ni sgrib pa thams cad kyi gnyen po 'di ltar dus thams cad du bsgom pa'i blo'o/ /'jig rten du skyes kyang 'jig rten gyi chos kyis mi 'phrogs pa zhes bya ba la/de 'jig rten gyi spyod yul du 'jig rten du skyes pa yin na yang rnyed pa la sogs pa'i 'jig rten pa'i chos kyis 'di ltar mi gos pa'o/ /chos rnam par gzhag pa'i yon tan zhes bya ba ni tshad med pa nyid dang / bsam gyis mi khyab pa nyid kyi mdo sde la sogs pa'i chos byis bas rtogs par dka' ba rnams mkhyen pas shin tu rnam par dag pa'i blo mnga' ba ste/shin tu rnam par dag pa'i blo zhes bya ba'i tha tshig 'di dag ni tshig so so thams cad la sbrel bar bya'o/ /phyi ma la chos 'byung ba mkhyen pa'i yon tan zhes bya ba ni ye shes kyis ma 'ongs pa na chos 'di lta bu 'byung ngo zhes bya ba mkhyen pa'i tha tshig go//sku dpag tu med pas sems can 'dul ba sbyor ba'i yon tan zhes bya ba la/ byang chub sems dpa' lus dpag tu med pa gang gis sems can rnams 'dul bar mdzad pa ste/des sangs rgyas las bdag dang gzhan mnyam pa nyid du shes pa 'thob pa dang / ye shes mnos pa nyid yin pa'i phyir sangs rgyas nyid kyis gdul bya rnams la mdzad par 'gyur ro zhes bya ba'i don to/ /chos kyi sku mnyam pa la pha rol tu phyin pa rnams grub pa'i yon tan zhes bya ba ni gnyis su med pa'i chos kyi sku ni chos kyi sku mnyam pa ste/de lta bas na 'dir gnyis su med pa'i sku shin tu rnam par dag pa'i pha rol tu phyin pa thob ces bya ba'i tha tshig go/ /de bzhin gshegs pa tha mi dad pa rnam par thar par mdzad pa'i ye shes kyis mthar phyin pa zhes bya ba ni de bzhin gshegs pa tha mi dad pa la mos par mdzad pa'i ye shes kyis mthar phyin pa zhes bya ba ste/'dir rnam par thar pa ni mos pa'o/ /sangs rgyas kyi sku gsum gyi yul yongs su chad pa'i yon tan zhes bya ba la/ 'di ltar re zhig chos kyi sku'i yul ni 'di dag go zhes yongs su bcad par mi nus so//de bzhin du longs spyod rdzogs pa dang / sprul pa'i sku yang 'jig rten khams 'di snyed do zhes bcad par mi nus so/ /chos kyi dbyings kyi mchog ces bya ba ni gang 'dir rnam par dag pa'i chos kyi dbyangs de ni mchog yin pas chos kyi dbyings de yang mchog yin no/ /nam mkha'i khams kyi mthas gtugs pa zhes bya ba ni nam mkha' ltar sangs rgyas ye shes mi zad pa'i phyir shin tu rnam par dag pa'i blo mnga' ba zhes bya'o//yang don gyi dbang du bya ba'i sems can thams cad la phan pa dang bde bar bya ba'i lhag pa'i bsam pa zhes bya ba gzhan gyi don 'di ni las kyi tshig lhag ma bcu drug gis bstan te/de la bde bar bya ba'i lhag pa'i bsam pa'i las ji lta bu zhig ce na/ thams cad mkhyen pa'i ye shes la 'dzud pa zhes bya ba ste/ 'di ltar sems can de dag thams cad mkhyen pa'i ye shes la btsud par gyur pas des kyang gcig nas gcig tu brgyud pa'i sbyor bas mar me gcig las mar me stong du gyur pa ltar bde bar bya ba'i lhag pa'i bsam pa yang dag par bstan par 'gyur ro//de bzhin du tshig thams cad la yang phan pa dang bde bar bya ba'i lhag pa'i bsam pa la sbyar bar bya'o/ /bdag ci ri zhes yongs su shes pa dang zhes bya ba ni phan pa dang bde bar bya ba'i lhag pa'i bsam pa yod la/yang phyin ci log kyang yod na ni 'di ltar la la phan pa dang bde bar bya ba'i lhag pa'i bsam pa nyid kyis myos par 'gyur ba'i btung ba la sogs pa la nges par sbyor bar byed do/ /gal te des bdag nyid yang dag pa ji lta ba bzhin du yongs su shes pa yin na/ de dang rjes su mthun pa la sems can rnams la yang nye bar ston par byed do//nga rgyal dang ldan par gyur pa ni mi shes bzhin du 'di ltar phan btags pa'i sems kyis phan pa ma yin pa la sbyor bar byed do zhes bya ba'i tha tshig go/ /nga rgyal bcom pa zhes bya ba ni 'di ltar nga rgyal bcom pa'i sems kyis gsol ba 'debs pa la sdod pa med par chos ston pa zhes bya ba'i tha tshig go//lhag pa'i bsam pa brtan pa zhes bya ba ni 'di ltar sems can phyin ci log tu sgrub pa la sems brten pa nyid kyi phyir khros pas phan pa'i lhag pa'i bsam pa mi 'dor ba zhes bya ba'i tha tshig go/ /bcos ma ma yin par byams pa zhes bya ba ni gang rnyed pa'i rgyus sems can rnams la phan pa dang bde bar mi byed pa dang lhag pa'i bsam pa dang ldan pa dang /phan pa byed pa yin no zhes ji ltar shes par gyur zhes bya ba ma yin pa'o/ /de dang mthun pa'i lus dang ngag gi las ngag ste/ de la tshig cung zad kyis sngon du gsong por smra ba ni ngag gi las so//'dir bde ba nyid rgyun mi gcod pa'i snying rje chen po dang / bzhin 'dzum pa ni lus kyi las te/ de la tshig cung zad ces bya ba ni 'di ltar chos kyi gtam byed pa'o/ /snying rje chen po yongs su ma chad pa ni sdug bsngal gyis sdug bsngal ba dang bde ba rnams ni 'gyur ba'i sdug bsngal dang /sdug bsngal yang ma yin bde ba yang ma yin pa ni 'du byed kyi sdug bsngal nyid kyis sdug bsngal ba la bde ba dang sdug bsngal gnyis su med pa'o/ /mi zhum pa'i las ni bdag gis sangs rgyas nyid bsgrub par ga la nus zhes bya ba'i rnam pas bdag nyid la spyod pa med pa'o//yid yongs su mi skyo ba zhes bya ba ni gang sangs rgyas nyid bsgrub pa la skye ba med pa'o/ /thos pa dang don gyis ngoms mi myong ba zhes bya ba ni gang thos pa mang po nyid yin na yang btang snyoms dang bcas par mi 'gyur ba'o/ / spyod lam thams cad du byang chub kyi sems yongs su sbyong bar byed pa dang zhes bya ba'i tshig gi don ni spyod lam yongs su dag pa'i mdo bzhin no/ /khyad par du 'gro ba'i las zhes bya ba la/ phan pa'i lhag pa'i bsam pa 'phel bar byed pa'i rgyur gyur pa yongs su rdzogs pa sbyor ba'i las drug po 'di dag mang du byas pas rdzogs par 'gyur ro//gus par byas te dgon pa la gnas zhes bya ba ni de la gnas pa na bden pa ma yin pa'i rnam par rtog pa yongs su spong ba'o/ /'jig rten gyis sna tshogs zhes bya ba ni gang dang gang byed pa la sogs pa'o/ /'grub par sbyor ba las zhes bya ba ni de'i rdzogs par byed pa'i las kyi rtags so//mthu thob pa zhes bya ba ni mngon par shes pa drug go/ /ye shes la rton pa zhes bya ba ni ye shes la rton gyi rnam par shes pa la ni ma yin te/ so so rang gis rig pa'i bdag nyid kyis ye shes bskyed nas ye shes de la mngon sum du sbyor ba'i tshul gyis chos la rab tu gnas pa'o//de la 'jog pa'i las zhes bya ba ni phan pa dang bde ba bya ba'i lhag pa'i bsam pa gang gis phan pa dang bde ba de nyid la sems can rnams rab tu 'god par byed pa'o/ /de la tshogs yongs su sdud pa'i yon tan zhes bya ba gang gis tshul khrims 'chal ba yang yongs su gtong bar mi byed cing thams cad du spong ba ma yin te/mi dge ba las bslangs nas dge ba la sbyor bar byed pa'o/ /the tshom med par 'doms shing rjes su ston pa zhes bya ba ni gang la cha gcig gis gdams ngag byas pa de la yang bdag gis khyod la bstan pa de la bdag gis legs par bstan pa ma yin no zhes brjod par mi byed pa ste/des na de'i tshig gzung bar 'os par 'gyur ro / /chos dang zang zing gis sdud pa yang gang bden par smra bar byed pa'i chos dang zang zing chos gos la sogs pa de rnams kyis bsdus pa de dag gis kyang de bzhin du sgrub par byed do/ /sems kun nas nyon mongs pa can ma yin pa zhes bya ba ni gang byang chub kyi sems yongs su bzung nas sems can gyi don byed pa yin gyi/bdag nyid yongs su spyod par byed pa ni ma yin no/ /de lta na yang dge ba'i rtsa ba 'dis bla na med pa yang dag par rdzogs pa'i byang chub mngon par rdzogs par sangs rgyas nas sems can rnams nye bar sdud par byed par shog shig ces bya ba lta bu'o//don 'di dag nyid tshigs su bcad pas/ dang po'i tshig ni nyer bzung nas/ /zhes bya ba la sogs pas bstan to/ /de ltar re zhig shes bya dang / mtshan nyid rnam pa gnyis so/ / ji ltar 'jug par 'gyur ba de bstan par bya'o//de la shes bya dang mtshan nyid la 'jug pa ji lta bu zhe na/ bsod nams dang ye shes kyi tshogs legs par bsags pa'i byang chub sems dpa'o zhes bya ba'o/ /yang de ni rim pa ji lta bus bsod nams dang ye shes kyi tshogs yongs su rdzogs par byed ce na/ rgyu'i stobs dang / dge ba'i bshes gnyen gyi stobs dang /yid la byed pa'i stobs dang / nye bar ston pa'i stobs kyis so/ /de la tshig gnyis kyis ni stobs gnyis la grangs bzhin du rig par bya'o/ /de la yid la byed pa'i stobs kyis ni gcig tu mos par byed pa'o/ /de yang theg pa chen po'i bag chags kyi rgyu can no/ / de la gcig pu lhag par mos pa yod na sgrub pa la yang dag par 'jug go/ /sgrub pa la yang dag par gnas na dge ba'i rtsa ba nye bar sogs par 'gyur te/ de ltar na yid la byed pa'i stobs kyis bsod nams dang ye shes kyi tshogs legs par sogs par 'gyur bas go rims kyi tshul ni de ltar ro/ / de ltar na bsod nams dang ye shes kyi tshogs legs par bsags pa ni sa la 'jug par 'gyur la/ de ltar nye bar bstan par gyur pa ni nye bar ston pa'i stobs kyis theg pa chen po'i chos kyi rgyu las byung ba zhes bya ba ste/ bstan pa'i chos la dmigs pa zhes bya ba'i don to/ /gang gis 'jug ce na dge ba'i rtsa ba'i stobs bskyed pa dang /rnam pa gsum gyis sems sbyong ba zhes bya ba nas/ rtag tu gus par byas te sbyor ba dang / bag yod pas 'jug go zhes bya ba'i bar gyis so/ /dge ba'i rtsa ba'i stobs skyed pa ni yang ji skad bstan pa'i tshig brgyad la sbyar bar bya'o/ /de la zhum pa gsum gyi gnyen por sems sbyong ba rnam pa gsum ste/de yang 'di ltar byang chub sems dpa' mchog tu zab cing rgya che ba'i bla na med pa yang dag par rdzogs pa'i byang chub mngon par rdzogs par 'tshang rgya bar rtogs par dka' ba thos pa na zhum par 'gyur te/ de'i gnyen por ni sems sbyong ba dang po'o//yang byang chub sems dpas mchog tu zab cing rgya che ba rtogs par dka' ba'i pha rol tu phyin pa sgrub pa la zhum par 'gyur te/ de'i gnyen por sems sbyong ba gnyis pa bstan te/ bsam pa gang gis sbyin pa la sogs pa pha rol tu phyin pa rnams la kun tu spyod pa'i bsam pa zhes bya ba de la/bsam pa ni dad pa dang 'dun pa'o/ /yod pa dang / yon tan dang ldan pa dang / nus pa nyid dang pha rol tu phyin pa la yid ches pa nyid de ni byang chub sems dpa'i dad pa'o/ /dad pas bskyed pa'i nan tan byed par 'dod pa nyid ni 'dun pa'o/ /de lta bu'i dad pa dang 'dun pa'i ngo bo nyid kyi bsam pa thob par gyur pa'i byang chub sems dpa' ni tshegs chung ngu nyid kyis pha rol tu phyin pa drug sgom pa yongs su rdzogs par 'gyur ro//yang byang chub sems dpas sangs rgyas rnams kyi zab cing rgya che ba'i chos rab tu 'byed pa la mkhas par gnas pa na 'di ltar sems par byed de/ 'di ltar bla na med pa yang dag par rdzogs pa'i byang chub skad cig ma gcig tu gtogs pa thob par bya'o zhes bya ba ni rtogs par dka'o zhes zhum par 'gyur bas de'i gnyen por sems sbyong ba gsum pa bdag dge ba sgrib pa med pa zhes bya ba la sogs pa ste/gang gi phyir bdag sa bcu po thams cad du ye shes kyi tshogs legs par bsags pa lta zhes bya bar sbyar ro//dge ba sgrib pa med pa dang / zhes bya ba ni 'dod chags dang bcas pa'i gnas ngan len bsrabs par byed cing dbral bar dka' ba'i sgrib pa 'byed pa rdo rje lta bu'i ting nge 'dzin te/ ting nge 'dzin gyi bar mtshams med pas sgrib pa thams cad dang bral zhing de'i rten gnas gyur pa des thob par 'gyur ro zhes bya'o//shi ba tsam nyid dang ni rnam par bral ba nyid chos mthun pa nyid du 'dod do/ /phun sum tshogs pa ni rnam pa thams cad mkhyen pa'o/ /the tshom thams cad the tshom med par gzung bar bya'o zhes bya ba ni mi gang theg pa chen po'i chos kyi mtshan nyid rnam par gzhag pa la brtsams nas ngo bo nyid gsum ston pa ste/'di lta ste/ chos thams cad ngo bo nyid med pa/ ma skyes pa/ ma 'gags pa/ gdod ma nas zhi ba'o/ /chos thams cad ni rang bzhin gyis mya ngan las 'das pa'o zhes bya ba la sogs pa med pa'i rnam grangs kyis kun tu brtags pa'i ngo bo nye bar gzung bar bya'o//sgyu ma dang / smig rgyu dang / rmi lam dang / mig yor dang / gzugs brnyan dang / chu zla dang / sprul pa bstan pas ni gzhan gyi dbang gi ngo bo nye bar gzung bar bya'o/ /de bzhin nyid dang / yang dag pa'i mtha' dang /mtshan ma med pa dang / don dam pa dang / chos kyi dbyings dang / stong pa nyid la sogs pa'i rnam grangs bstan pas ni yongs su grub pa'i ngo bo nyid nye bar gzung ba nyid de/ 'di la blo gros ngan pa thams cad kyi som nyi 'jug par mi 'gyur ro/ /thos pa dang bsam pa'i chos la ngar 'dzin pa dang nga yid 'dzin pa'i mngon par zhen pa yongs su spong ba zhes bya ba ni chos la mngon par zhen pa tsam spong bar bzhed pa'o//rnam par rtog pa spangs pas mdun gnas pa dang bzhag pa'i mtshan ma thams cad yid la mi byed cing rnam par mi rtog pa zhes bya ba ni sbyor ba las byung ba'i rnam par mi rtog pa'i ye shes la gnas pa'i dge ba'i rtsa ba'i stobs las byung ba'i sems sbyong ba rnam pa gsum la brten nas 'di ltar rtag tu gus pa dang bcas pas bag yod par 'byung ba'i tshul bzhin yid la byed pa'i gnas skabs la gnas pa thams cad du mnyam par gzhag pa'i sems rjes su mthun pa'i bzod pa rnon po la gnas pa yin par rig par bya'o//[(]ltan [,]lhan [)]cig tu sna tshogs kyi rnam pa'i don snang ba 'byung ba'i phyir ro zhes bya ba ni ming dang tshig dang yi ge'i tshogs sna tshogs kyi rnam pa snang ba 'byung ba'i phyir dang / de la brten pa'i don sna tshogs kyi rnam pa snang ba 'byung ba'i phyir ro/ / tshigs su bcad pa ni/ chos dang gang zag chos dang don/ /bsdus pa dang ni rgyas dang rigs/ /ma dag pa dang dag dang mtha'/ /rab tu dbye bas ming gi yul/ /mdor bsdu na byang chub sems dpa'i ming la dmigs pa ni rnam pa bcu ste/ 'di lta ste chos kyi ming ni mig la sogs pa'o/ /gang zag gi ming ni bdag dang sems can la sogs pa'o//chos ni gsung rab yan lag bcu gnyis su gtogs pa'o/ /don ni gsung rab yan lag bcu gnyis po de'i don gang yin pa'o/ /ming bsdus pa ni chos thams cad ni 'dus byas dang 'dus ma byas zhes bya ba la sogs pa'o//ming rgyas pa ni gzugs dang / tshor ba la sogs pa dang nam mkha' la sogs pa'o/ /rigs kyi ming ni dang po yi ge a nas ha'i mthar thug pa'i bar ro/ /ma dag pa'i ming ni don dang bcas pa'i so so'i skye bo'o/ /dag pa'i ming ni bden pa mthong ba rnams kyi'o/ /mthar thug pa'i ming ni gang ma 'dres pa'i chos la dmigs pa'i 'jig rten las 'das pa dang /de'i rjes las thob pa'i ye shes gnyis kyi dmigs pa'o/ /de bzhin gshegs pa'i rigs su skyes pa yin/ /zhes bya ba ni rnam pa sna tshogs kyi chos thams cad la brten nas so/ /sems can thams cad la sems mnyam pa nyid ni bdag dang gzhan mnyam pa nyid du rtogs pas bdag la ji lta ba bzhin du de dag la yang sdug bsngal zad par 'dod pa'o//byang chub sems dpa' thams cad dang sems mnyam pa nyid ni byang chub sems dpa' thams cad dang sbyor ba'i bsam pa mnyam pa'o/ /sangs rgyas thams cad dang sems mnyam pa thob pa ni de dag dang chos kyi dbyings kyi bdag nyid tha mi dad par mthong ba'o//yongs su tshol ba ni bzhi po dag gi bsrabs pas don med par bzod pa chung ngu'i tshe snang ba thob pa'i ting nge 'dzin zhes bya ba la/ bsrabs pa ni don med par 'dod pa zhes bya ba'i tha tshig ste/don med par shes pa ni snang ba thob pa zhes bya ba'i sgras bstan to/ /snang ba thob pa'i ting nge 'dzin zhes bya ba ni don med pa la yang dag par brten pa'i ting nge 'dzin gyis mthong ba'o/ /don med par bzod pa chen po'i tshe zhes bya ba la/ de la bzod pa ni 'dod pa ste/ mngon par 'dod pa'o//snang ba mched pa'i ting nge 'dzin zhes bya ba ni/ don med par shes pa chen po ni snang ba mched pa zhes bya ba'i sgras bstan to/ /ting nge 'dzin zhes bya ba'i sgras ni don med par shes pa de la yang dag par brten pa de bstan to/ /de kho na nyid kyi don gyi phyogs gcig la zhugs pa'i ting nge 'dzin zhes bya ba ni don med par nges par bstan te/ting nge 'dzin gyi sgras ni don med par nges par shes pa de la yang dag par brten pa de ni ting nge 'dzin zhes bstan to/ /bden pa'i rjes su mthun pa'i bzod pa'i gnas zhes bya ba la/ chos bdag med pa ni bden pa zhes bya'o/ /de'i rjes su mthun pa gang yin pa'i bzod pa ni bden pa'i rjes su mthun pa'i bzod pa'o//ji ltar byas pas she na/ gzung bar bya ba med na nges pa kho nar 'dzin pa yang med do zhes mos par 'gyur bas so/ /shes bya'i mtshan nyid la 'jug pa zhes bya ba'i don gzhan yang / mang du thos pas bsgos pa'i gnas/ zhes bya ba ste/ theg pa chen po yongs su bsgom pa'i bdag nyid kyi ngo bo'o //kun gzhi rnam par shes pa bsdus pa ma yin la zhes bya ba dang / kun gzhi rnam par shes pa ltar tshul bzhin yid la byed pas bsdus pa'i sa bon yin no zhes bya ba ni ji ltar kun gzhi rnam par shes pa kun nas nyon mongs pa'i chos rnams kyi rgyu yin pa de bzhin du de rnam par byang ba'i chos rnams kyi rgyur 'gyur ro zhes bya ba'i tha tshig go //tshul bzhin yid la byed pas bsdus pa zhes bya ba nas brtsams te/ lta ba dang bcas pa'i yid kyis brjod pa rnams kyi yang ste/ tshul bzhin yid la byed pa las chos dang don gyi rnam pa 'byung bar 'gyur ba'i rgyu yin no//tshul can bzung ba'i dngos po lta bu zhes bya ba ni gzugs su gyur pa zhes bya ba'i don to/ /lta ba dang bcas pa'i zhes bya ba ni lta bar gyur pa rnams so/ /de dag nyid ni rgyu mtshan dang lta ba dang bcas pa'i rnam par shes par rnam par 'jog par 'gyur ro/ /de lta bu'i rnam pa la 'jug pa na su zhig 'jug pa bstan par bya ste/de la theg pa chen po smos pas ni nyan thos la sogs pa'i theg pa spang ba'i don to/ /sangs rgyas 'byung ba tshad med pa mnyes par bya ba thob pa zhes bya ba ni grangs las shin tu 'das pa'i sangs rgyas 'byung ba mnyes par bya ba gang gis thob par gyur pa ste/ sangs rgyas mngon sum du byas zhes bya ba'i tha tshig go/ /gcig tu mos pa can zhes bya ba ni gang gi mos pa theg pa chen po las bskyod par mi nus pa ste/ 'das ma thag par bshad pa'i dge ba'i rtsa ba bsags pa'i rgyu rnam pa gsum po dang / bsod nams dang ye shes kyi tshogs legs par bsags pa ni mi dge ba'i grogs po zhes bya ba'i tha tshig go//de lta bu'i rnam pas 'jug pa'i gnas bstan par bya ba'i phyir smras pa/ yid kyi brjod pa ste yid kyi rnam par rtog pa'o/ /de ni theg pa chen po'i chos gang 'byung ba'i rgyur gyur pa'o/ /yang de nyid du yid kyi brjod pa'i bye brag gang gis dag 'jug pa de ni mos pas spyod pa'i sa la 'jug par 'gyur te/'di ltar de chos thams cad rnam par rig pa tsam du rjes su sgrogs pa la mos pa skyed par byed de/ des na de dag ni der zhugs pa zhes brjod do/ /de ji ltar mthong ba'i lam la 'jug pa de bstan par bya ba'i phyir ro //ji lta ba bzhin du de rab tu rtogs pa dang zhes bya ba ste/ yid kyi brjod pa de ji lta ba bzhin du rab tu rtogs pa'o/ /ji ltar na de ji lta ba bzhin du rab tu rtogs she na/ ji ltar chos med pa/ don med pa/ gzung ba med pa/ 'dzin pa med pa'o zhes yid kyi brjod pa rtogs pa gang yin pa'o/ bsgom pa'i lam la 'jug pa bstan par bya ba'i phyir sgrib pa thams cad kyi gnyen po bsgom pa zhes bya ba ste rab tu rtogs pa de nyid goms par byed pa ni sgom par gyur pa'o/ /de lta bas na rnam par mi rtog pa la sogs pa de dag gis gang rtogs pa de nyid kyis sgrib pa rnam par sbyong bar byed pa'o/ /mthar phyin pa'i lam la 'jug pa de bstan pa'i phyir sgrib pa med pa'i phyir zhes bya ba ste/shin tu rnam par dag pa'i ye shes kyi dus skabs na shin tu phra ba'i sgrib pa yang med pa ni mthar phyin pa'i lam la 'jug pa'o/ /gang gis 'jug pa ston par byed pa ni dge ba'i rtsa ba'i stobs skyed pa dang / rnam pa gsum gyis sems gzengs bstod pa zhes bya ba ste/dge ba'i rtsa ba'i stobs skyed pa'i byang chub sems dpa' ni de'i stobs kyis bstan pa'i phyir sems 'gong bar mi 'gyur te/ rnam pa gsum gyis sems sbyong bas kyang sems gzengs pa bstod pa nyid do/ /de la sbyor ba gnyis pa gang yin pa ji ltar sbyor ba yin pa de bstan par bya ba'i phyir/'di lta ste/ ser sna la sogs pa'i sgrib pa spangs pas pha rol tu phyin pa'i rnam par 'ching ba med pa nyid kyis de rnams yongs su rdzogs par 'gyur ro/ /de yongs su rdzogs pa yang sangs rgyas nyid yin te/ chos dang don la dmigs pa la sogs pa nas/ bag yod pa zhes bya ba'i bar gyis so//de la rtag tu zhes pa ni rtag tu byed pa nyid do/ /gus par byas te sbyor ba ni bla mar byed pa nyid do/ /gang gang du bstan pa'i rnam pa nyid de de ni bag yod pa'o/ /gsum pa gang yin pa de bstan par bya ste de la dge ba sgrib pa dang bcas pa zhes bya ba ni 'jig rten pa'i dge ba sgrib pa dang bcas pa zhes bya ba'i don to//de'i phyir bdag dge ba sgrib pa med pa dang shin tu ldan pa ni sangs rgyas su mi 'gyur ba nyid ni rigs pa ma yin te zhes bya ba'o/ /de dag gi don tshigs su bcas pa ston pa/ de'i phyir zhum par mi bya'o/ /zhes bya ba ni sems zhum pa nyid du sems gnas par mi bya'o zhes bya ba'i tha tshig go//ji ltar bdag gis bla na med pa'i byang chub mngon par rdzogs par 'tshang rgya bar mi nus zhes don de lta bur byung ba'o/ /legs yid kyis zhes bya ba ni mi dge ba dang lung du ma bstan pa'i sems ma yin zhes bya ba'i tha tshig ste/ 'di ltar lung du ma bstan pa ni rnam par g.yeng ba'i sems kha cig gis sbyin pa la sogs pa byed pa'o//de bzhin du mu stegs pa la sogs pa mi dge ba'i sems kyis sbyin pa la sogs pa byed pa ma yin te/ bla na med pa yang dag par rdzogs pa'i byang chub 'dod pas so/ /yang na de'i bsam pas dge ba'i rtsa ba mchog thob pa ni bstan pa rnams so//sbyin pa la sogs pa byed pa'i zhes bya ba la/ de la de'i bsam pa ci 'dra ba cig thob nas sbyin pa la sogs pa pha rol tu phyin pa goms par byas pas de'i mi mthun pa'i phyogs ser sna la sogs spangs pa'i sems thob pa zhes bya ba'i tha tshig go/ /byang chub sems dpa' brtan rnams kyi//sbyin pa la sogs nyid du brjod/ /ces bya ba ni sbyin pa la sogs pa kho nar brjod pa'o/ /sogs pa smos pas ni tshul khrims la sogs pa nas/ shes rab kyi pha rol tu phyin pa rnams gzung ngo / /'dod bzhin phun sum tshogs lus 'thob/ /ces bya ba ni 'du shes med 'du shes med min skye mched kyi bar 'thob pa ste/'gyur ro zhes bya ba'i tha tshig go/ /spangs pa zhes bya ba ni sgrib pa spangs pa'o/ /phun sum tshogs de zhes bya ba ni sangs rgyas nyid ces bya ba'i tha tshig go/ gang gnas bzhi spang bar bya ba de bstan par bya ste/ yid la byed pa yongs su spong ba zhes pa ni nyan thos la sogs pa'i yid la byed pa yongs su spong ba'o//yid gnyis dang som nyi spangs nas zhes bya ba ni zab cing rgya che ba'i theg pa chen po la yid gnyis dang som nyi spangs pa'o/ /de la yid gnyis ni blo ngan pa'am de bzhin du g.yo ba'o/ /som nyi ni the tshom mo//chos la mngon par zhen pa spangs pas zhes bya ba ni ji snyed thos pa dang bsams pa'i chos rnams la bdag tu 'dzin pa dang bdag gir 'dzin pa yod kyi bar 'jug par mi 'gyur ro/ /rnam par rtog pa spangs pas zhes bya ba ni gang gzugs la sogs pa mdun na gnas pa dang / gang yang mnyam par bzhag pas rus pa'i phung po la sogs pa dmigs par 'gyur ba'i mtshan ma thams cad yid la mi byed pas rnam par brtag par bya ba la rnam par mi rtog pa'i thabs kyis 'jug par 'gyur gyi//gzhan du rnam par rtog par gyur na 'jug par mi 'gyur ro/ /mdun bzhag dang zhes bya ba ni tshigs su bcad pa ste/spang bar bya ba'i don phyi ma gsal bar byed pa'o/ /gang gis ji ltar 'jug pa de bstan par bya ste/ de la thos pa'i bag chags kyi rgyu las byung zhes bya ba ni thos pa'i bag chags kyi rjes su mthun pa'o/ /gang du 'jug pa'i gnas sngar bstan pa ste/ de yang theg pa chen po'i bag chags las yang dag par byung ba'i phyir yongs su grub pa'i ngo bo nyid kyis bsdus pa nyid du blta bar bya'o//yang ji ltar 'jug pa de ston par byed pa ni tshol ba rnam pa bzhi ste/ de ston par byed pa yang ming dang don dang / ngo bo nyid la sogs pa tshig bzhi po de dag gis ji lta ba bzhin du yongs su shes pa mdor ston te ming dang /don dang / ngo bo nyid dang / khyad par du btags pa dang / ngo bo nyid dang / khyad par yang dag pa ji lta ba bzhin du yongs su shes pa zhes bya ba la/ ngo bo nyid kyi khyad par gang btags pa de bzhin du byas pa'o/ /ming khyad par du btags pa ni zhes bya ba ni de mi dmigs pa zhes bya ba'i don to//mi dmigs pa ni ming de'i ngo bo nyid dang khyad par du btags pa tsam dpyod par byed pa'o/ /gang gi phyir de ltar na ming de'i ngo bo nyid dang khyad par med pa des na ming de'i ngo bo nyid btags pa tsam du 'dzin pa'o/ /gang yang dag par dpyod pa ni yongs su tshol ba'o/ /gang mi dmigs pa ni yang dag pa ji lta ba bzhin du yongs su shes pa'o//'jug ces ni ji skad bya/ ci 'dra bar 'jug ce na zhes bya ba ni dpe dris pa'o/ /de la de tsam nyid ces bya ba ni rnam par rig pa tsam nyid do/ /rgyu mtshan dang lta ba dang bcas pa gnyis zhes bya ba ni/ rgyu mtshan dang lta ba dang bcas pa'i rnam par shes pa bstan te/rgyud rab tu gnas pa dang / rgyu mtshan du snang ba zhes bya bar grags pa de lta bu'i rnam par shes pa gcig nyid rnam par sna tshogs su 'byung ba ste/ myur ba nyid du brgyud mar 'byung bas so/ /gsum po 'di dag nyid rnam par rig pa tsam nyid du 'jug go/ /de la ngo bo nyid gsum la 'jug pa ni dpe bstan te/rnam pa drug la yang dag pa'i don gsal zhes bya ba la/ don gyi rnam pa drug la yang dag pa'i don rnam par gsal ba tsam ni rnam par gsal ba'o/ /yid kyi brjod par snang ba'i don gyi mtshan nyid la 'jug pas zhes bya ba ni don gang yin pa de kun du brtags pa tsam yin no zhes de ltar kun du brtags pa la 'jug par 'gyur ro//ngo bo nyid kyi rnam par rig pa'i ngo bo tsam la 'jug ces bya ba ni yid kyi brjod pa de dag gis rnam par rig pa tsam nyid du bzung nas gzhan gyi dbang la 'jug par 'gyur ro// //bam po lnga pa/ don du snang ba thams cad 'byung ba'i skabs med pa yin no zhes bya ba ni ji ltar rnam par rig pa tsam gyi rnam par yang mi 'byung na de don gyi rnam par snang ba 'byung ba lta ci smos te/de'i phyir rnam par rig pa tsam nyid du brtags na yang don du 'gyur bas/ de'i phyir de las gzhan pa de bzhin nyid mngon sum nyid du 'gyur ba yin no//gnas skabs de ni brjod par nus pa ma yin te/ so so rang gis rig par bya ba yin pa'i phyir ro/ /de'i tshe byang chub sems dpa' de'i dmigs par bya ba dang dmigs par byed pa mnyam pas mnyam pa'i ye shes rnam par mi rtog pa 'byung ba ste zhes bya ba la dmigs par byed pa ni ye shes dang dmigs par bya ba de ni de bzhin nyid de/de dag mnyam pa nyid du gyur pa ni nam mkha' nyid du gzung ba dang / 'dzin pa med par gnas pa zhes bya ba'i tha tshig ste/ gzung ba dang 'dzin par rnam par rtog pa med pa ni rnam par mi rtog pa'o/ /de ltar na yongs su grub pa nyid la zhugs pa yin no//gang gi tshe don thams cad la rnam par mi rtog pa'i ming la gnas shing zhes bya ba ni de'i ming ci rnam pa ji snyed ces bya ba'i tha tshig las de'i ming gi bye brag tshigs su bcad pas bstan to/ /de la chos kyi ming ni gzugs dang / tshor ba dang / mig ces bya ba la sogs pa'o//gang zag gi ming ni sangs rgyas bshes gnyen dang / dad pas rjes su 'brang ba zhes bya ba la sogs pa'o/ /yang chos kyi ming ni mdo sde la sogs pa'o/ /don gyi ming ni chos de dag la brten pa'i don to/ /bsdus pa'i ming ni sems can zhes bya ba lta bu'o/ /rgyas pa'i ming ni de dag nyid re re nas brjod pa lta bu'o//rigs kyi ming ni yi ge'i phyi mo rnams so/ /ma dag pa'i ming ni so so'i skye bo rnams kyi'o/ /dag pa'i ming ni slob pa rnams kyi'o/ /mthar thug pa rnams kyi ming ni gang 'dres pa'i chos la dmigs pa ste/ sa bcu pa lta bu'o/ /de la don thams cad ni 'dres pa'i chos la dmigs pa'i ye shes kyi dmigs pa'o//de lta bu'i rnam pa ni byang chub sems dpa'i ming gi yul yin no/ /de bzhin gshegs pa'i rigs su skyes pa yin zhes bya ba ni gang gis sangs rgyas kyi gdung rgyun mi gcod par gyur pa'o/ /sems can thams cad la sems mnyam pa yin zhes bya ba ni gang gi phyir bdag ji lta ba bzhin du sems can thams cad mya ngan las bzla'o zhes sems pa'o //byang chub sems dpa' thams cad dang sems mnyam pa zhes bya ba ni 'di ltar de dag dang sems mnyam pa nyid thob pa'o/ /sangs rgyas thams cad dang sems mnyam pa zhes bya ba ni gang gi phyir sangs rgyas rnams kyi chos kyi sku'i gnas skabs des thob par gyur pa ste/de thob pas sangs rgyas thams cad dang sems mnyam pa thob par gyur pa'o/ /zhi gnas dang lhag mthong gi shes pa zhes bya ba ni zhi gnas dang lhag mthong zhes brjod pa'i shes pa'o/ /kun gzhi rnam par shes pa'i sa bon rgyu mtshan dang bcas pa'i rgyu mtshan spangs nas zhes bya ba la rgyu mtshan dang bcas pa zhes bya ba ni rgyu mtshan dang bcas pa zhes bya ba'i tha tshig ste/gang kun gzhi rnam par shes pa kun nas nyon mongs pa'i chos rnams kyi sa bon can no/ /yang rgyu mtshan smos pa ni de'i sa bon de dag gi dmigs pa'i rgyu mtshan bstan pa'i don to//de ltar byas nas sa bon de dag rgyu dang 'bras bu dang bcas par spangs pa bstan par 'gyur ro/ /de'i rjes las thob pa la dgos pa ci yod/ gal te rnam par mi rtog pas sgrib pa thams cad spangs pa dang sangs rgyas kyi chos rnams kun tu bsgrub par 'gyur ro zhe na/rgyu dang bcas pa'i 'bras bu'i chos rnams des bstan par mi nus te/ de ni mi rtog pa yin pa'i phyir ro/ /de'i phyir rjes la thob pas rgyu dang 'bras bu'i chos rnams ston par byed de/ rtog pa yin pa dang / sgyu ma mkhan gyis sgyu ma byas pa bzhin du phyin ci ma log par 'gyur ba'i phyir ro//kun gzhi rnam par shes pa las thams cad rab tu skye ba zhes bya ba ni gang kun gzhi rnam par shes pa'i rgyu las byung ba rnams so/ /rnam par rig pa'i mtshan ma thams cad de/ rnam par rig pa'i rgyur gyur pa las sgyu ma byas pa bzhin du rjes las thob pa'i phyin ci log med par 'byung bas yang dus thams cad du ston par byed do//thams cad du de kho na nyid la 'jug pa ni nges par 'byed pa'i cha dang mthun pa las yin pas de'i phyir 'dir yang de bstan par bya ba'o/ /nges par 'byed pa'i cha dang mthun pa la yang dag par brten pa zhes bya ba ni nges par 'byed pa'i cha dang mthun pa la brten pa zhes bya ba'i tha tshig go//mngon par rtogs pa dang nye ba zhes bya ba ni mngon par rtogs pa'i dus su zhes bya ba'i don to/ /ji ltar rnam par gnas pa bstan pa zhes bya ba ni gang sgyu ji ltar rnam par gnas pa sa bcu par sa'i rnam par gnas pa bstan pa'o/ /'dres pa la dmigs pa zhes bya ba ni mkhas pas dmigs pa'i gnas la dmigs pa'o//'jig rten las 'das pa zhes bya ba ni rnam par mi rtog pa'o/ /de'i rjes la thob pa zhes bya ba ni rnam par gzhag pa ste/ de ni 'jig rten pa zhes brjod par bya ste/ 'di ltar 'jig rten pa dang rjes su mthun pa'i phyir ro//gang gi phyir 'jig rten las 'das pa 'ba' zhig ni 'jig rten pa la reg pa ma yin pas so/ /de bas na gcig tu zhugs par mi brjod do/ /de gnas gyur nas zhes bya ba ni 'dres pa la dmigs pa'i ye shes kyi bye brag gnas gyur pa'o/ /sangs rgyas kyi sku rnam pa gsum thob par zhes bya ba ni sangs rgyas kyi sku rnam pa gsum thob par 'gyur ba zhes sbyar bar bya'o//mya ngan las 'das pa'i khyad par ni zhes bya ba ni 'di ltar byang chub sems dpa' rnams mi gnas pa'i mya ngan las 'das pa 'dzin par byed kyi nyan thos ni ma yin no/ /yongs su dag pa'i khyad par ni zhes bya ba la/'di ltar byang chub sems dpa' rnams bag chags dang bcas pa'i nyon mongs pa rnams spong ba dang / sangs rgyas kyi zhing yongs su sbyong ba yin gyi nyan thos rnams ni ma yin no/ /ji lta bur de kho na nyid la 'jug pa de tshigs su bcad pa/ ming dang dngos gnyis phan tshun du//glo bur yin par yongs su btsal/ /zhes bya ba la/ ming ni don la glo bur ba yin la/ don ni ming la glo bur ba ste/ de'i bdag nyid ma yin pa nyid do/ /yongs su btsal zhes bya ba ni mnyam par gzhag pas blta bar bya'o/ /btags pa rnam pa gsum po la/ /de tsam nyid du btsal bar bya//zhes bya ba ni don gyi ngo bo dang khyad par ma yin pa btags pa'i don dang / btags pa'i khyad par de tsam pa nyid du blta bar bya'o zhes bya ba'i tha tshig go/ /yang dag ji bzhin yongs shes pas/ /zhes bya ba ni yang dag pa ji lta ba bzhin du yongs su shes pa ste/ 'di ltar gang gi phyir tshol ba rnam pa bzhi zhes bya ba'i rgyu las yang dag pa ji lta ba bzhin du shes par 'gyur ro zhes bya ba'i tha tshig go//don med par ni rtog pa gsum dang / mthong ba gsum la zhes bya ba la/ don med par brtags pa rnam pa gsum mthong ba ste/ ming du brtags pa dang / ngo bor brtags pa dang / khyad par du brtags pa'o/ /don med pa ni don med pa nyid do/ /mthong ba gsum la zhes bya ba ni don med na rtogs pa yang med par 'gyur ba ste/ gang gi phyir brtag par bya ba yod na de la dmigs pa yod de/ de'i phyir don med par gyur na rtog par byed pa yang med par blta'o zhes bya ba'i tha tshig go/ / gsum la 'jug pa zhes bya ba ni ngo bo nyid gsum la 'jug pa'o/ /de la ming dang don gnyis phan tshun glo bur ba nyid du mthong ba nyid du mthong bar gyur na kun tu brtags pa'i ngo bo nyid la bzhugs pa yin no/ /ming gi ngo bo nyid brtags pa dang / khyad par du brtags pa tsam du mthong ba na gzhan gyi dbang gi ngo bo nyid la zhugs pa yin no//brtags pa de nyid mthong ba na yongs su grub pa la zhugs pa yin te/ de lta bu ni gsum la 'jug pa yin no/ /gang gis de kho na nyid la 'jug pa'i don gyi man ngag sbyin par byed de/ de la don gyi tshigs su bcad pa/ gzugs brnyan yid du mthong ba ni/ /zhes bya ba la/chos dang don du snang ba gang yin pa'i gzugs brnyan de yid yin no zhes mthong ba'o/ /gang gis mthong zhe na/ byang chub sems dpas so/ /gang gi dus na zhe na/ mnyam gzhag pas so/ /don gyi 'du shes bzlog nas su/ /rang gi 'du shes nges par gzung / /zhes bya ba ni de'i dus na don gyi 'du shes bor nas rang gi sems nyid chos dang don gyi rnam pa de yin par gzung zhes bya ba'i tha tshig go//de ltar nang du sems gnas so/ /zhes bya ba na gang gi sems 'di ltar gnas par gyur pa ste/ don ni med do/ /de lta na yang sems la sems gnas par 'gyur ro zhes bya ba'i tha tshig go//gzung ba med par rtogs par byos/ /zhes bya ba ni/ gzung ba med par shes par gyis shig ces bya ba'i tha tshig go/ /de phyir 'dzin pa med rtogs kyis/ /zhes bya ba ni gang gi phyir gzung bar bya ba'i don yod pa ma yin pas 'dzin par byed pa'i sems nyid kyang rigs pa ma yin pa nyid du 'gyur ro//des na dmigs pa med la reg /ces bya ba ni/ de'i phyir na de las gzhan pa'i de bzhin nyid la reg par 'gyur ro zhes smras pa yin te/ de bzhin nyid ni dmigs su med pa'i phyir ro/ /de las gzhan pa mngon par rtogs pa'i tshigs su bcad pa ji ltar mdo sde'i rgyan las bstan pa las gang de las rtogs par dka' ba de bstan par byas pa/mtha' yas pha rol med ces bya ba ste/ pha rol ring bas ji ltar tshig la mtha' med ces bya ba lta bu ste/ de la mtha' med pa ma yin na yang mang po nyid la mtha' med ces bya ba'i brjod pa 'thob ste/ 'di yang de dang 'dra'o//ci'i tshogs rnams she na/ bsod nams ye shes kyi'o/ /de la sbyin pa la sogs pa la pha rol tu phyin pa gsum ni bsod nams kyi tshogs so/ /shes rab kyi pha rol tu phyin pa ni ye shes kyi tshogs so/ /brtson 'grus kyi pha rol tu phyin pa ni gnyi ga ste/ de'i don gyi thabs kyi brtson 'grus ni ye shes so//gang sems can gyi don gyi brtson 'grus ni bsod nams kyi tshogs so/ /de bzhin du bsam gtan gyi pha rol tu phyin pa yang rnam pa gnyis te/ de la gang yang tshad med pa rnams la dmigs pa'i bsam gtan gyi bsod nams so//de las gzhan pa dag ni ye shes kyi tshogs so/ /gang zhe na/ byang chub sems dpa' nyid do/ /chos la sems pa legs par rnam nges phyir/ /zhes bya ba ni/ /gang ting nge 'dzin gyi rjes la chos rnams sems par byed pa de lags par rnam par nges pa yin gyi gzhan ni ma yin no/ / don gyi rnam pa brjod pa'i rgyus byung rtogs/ /zhes bya ba la/ don gyi rnam pa brjod pa'i rgyus zhes bya ba ni yongs su shes pa'o/ /de 'dra ba'i sems tsam nyid la gnas zhes bya ba ni gang gi phyir de ni 'di ltar don du snang ba 'di dag ni sems tsam nyid do zhes bya bar shes pa'o/ /de bas gnyis kyi mtshan nyid bral ba yi//chos kyi dbyings ni mngon sum nyid du 'gyur/ /zhes bya ba ni gzung ba dang 'dzin pa dang bral ba nyid kyis de las gzhan pa'i de bzhin nyid mngon sum nyid du 'gyur pa'o/ /de las gzhan pa ji ltar mngon sum nyid du 'gyur zhe na/ de bstan par bya ba'i phyir/ sems la gzhan med par ni blos rtogs nas//de phyir sems kyang med pa nyid du rtogs/ /zhes bya ba la/ sems las gzhan pa'i dmigs par bya ba'i don med la de med pas dmigs par byed pa'i sems kyang med pa nyid 'thob pa ste/ de gnyis kyi med pa nyid byang chub sems dpas rtogs nas/ de dang mi ldan chos kyi dbyings la gnas//zhes bya ba ste/ don de dag dang sems bral bar gyur ces bya ba'i tha tshig go/ /rtog med shes stobs zhes bya ba rnam par mi rtog pa'i ye shes kyi stobs so/ /mnyam pa'i rjes song bas zhes bya ba ni nam mkha' dang 'dra bar mdo sde la sogs pa'i chos thams cad mnyam pa nyid du mthong ba'o/ / kun nas zhes bya ba ni phyi dang nang gi bdag nyid do/ /ji ltar mthong ba'i chos de dag nyid dus rtag tu mthong bar ni rtag par yang ngo / /de'i gnas thibs po nyes pa bsags pa zhes bya ba ni kun nas nyon mongs pa'i chos de'i gnas te rgyu'o/ /thibs po zhes bya ba ni rjes su rtogs par dka' ba nyid do/ / nyes pa bsags pa zhes bya ba ni kun nas nyon mongs pa'i chos rnams kyi bag chags kyi ngo bo zhes bya ba'i don to/ /thub pas gsungs pa'i legs chos legs gzhag pa/ rtsa ba chos kyi dbyings la de blo bzhag /ces bya ba la/ rtsa ba dang bcas pa'i sems kyis dmigs pa gang la blo nges par bzhag pa ste/de bzhin nyid de la'o/ /de la rtsa ba'i sems ni gang de bzhin gshegs pa ma lus pa'i ston pa bsdus pa la dmigs pa ste/ de yang rnam par mi rtog pa'i ye shes yin par blta'o/ /dran pa'i rgyud ni rtog pa tsam shes nas/ /zhes bya ba la/ de yang rtsa ba'i sems la gnas pa ste/bstan pa'i rjes la thob pa'i don te/ 'das pa dran pa ni dran pa'i rgyud de gang rnam par rtog pa tsam du gyur pa'o/ /rnam par mi rtog pa dang / de'i rjes la thob pa de dag gnyi gas kyang / yon tan rgya mtsho'i pha rol te sangs rgyas nyid du'o/ /brtan myur te byang chub sems dpa' nyid do//tshigs su bcad pa de rnams kyi bsdus pa'i don ni dang pos ni tshogs kyi lam mo/ /gnyis pa'i phyed kyis ni sbyor ba'i lam mo/ /phyed phyi ma dang gsum pas ni mthong ba'i lam mo/ /bzhi pas ni bsgom pa'i lam mo/ /lnga pas ni mthar phyin pa'i lam mo/ /gang gi tshe zhugs pa de'i tshe lhag pa'i bsam pa rnam par dag pa yin pa'i phyir pha rol tu phyin pa drug la kun tu spyod pa'i sbyor ba zhes bya ba ni kun tu spyod pa sbyor ba thams cad du sbyor ba'o//bstan pa la mos pa zhes bya ba ni gang pha rol tu phyin pa drug dang rab tu ldan pa'i shin tu zab pa de dag la yang ngo //ro myang ba yid la byed pa ste/ de dag gi yon tan mthong bar ro myang ba'o/ /mngon par dga' ba yid la byed pa ni ji lta bu'i lhag pa'i bsam pas mchog tu pha rol tu phyin pa thob pa nges pa de lta bu bdag dang sems can thams cad kyis thob par gyur cig ces de lta bu mngon par dga' ba'o//re zhig lhag pa'i bsam pa dag pa de dag nyid kyi mtshan nyid gang yin/ gang gis de dag yongs su bzung ba yin zhe na/ gang gi rjes thogs su tshigs su bcad pa dag gis de'i mtshan nyid ston par byed de/ de la re zhig mos pas spyod pa'i sa la tshogs legs par bsags pa dang /dkar po'i chos rnams kun rdzogs pa nyid do/ /bzod rnon thob dang zhes bya ba ni chung ngu la sogs pa bzod pa rnams pa gsum las bzod pa'i mchog la gnas pa zhes bya ba'i tha tshig go/ /gang la dmigs nas dag par 'gyur pa de bstan par bya ba'i phyir/theg chen la zhes bya ba ste/ gang du zhe na/ zab cing rgya che bstan pa la'o/ /de nyid ni rang gi theg pa ste/ byang chub sems dpa' rnams kyi'o/ /de la bzod pa ni chos bdag med pa'o/ /rgya che ba ni nam mkha' mdzod la sogs pa'i ting nge 'dzin to/ /yid la byed pa ji lta bus rnam par dag pa de bstan pa'i phyir gal te rtog pa tsam du chos thams cad rtogs pa de'i ngo bo nyid de bstan par bya ste/'dod pa dang ni mos pa dag /dag pa bsam pa dag pa nyid yin no/ /de la 'dod pa ni mngon par 'dod pa'o/ /mos pa ni dad pa'o/ /de'i rtags gang yin pa de bstan par bya ste/ snga la sogs su ni thog mar bsam pa dag pa'o//der zhes bya ba ni bsam pa dag pa der sangs rgyas rnams ni mthong bar 'gyur ba ste/ de ni rtags so/ /chos kun zhes bya ba ni mnyam par gzhag pa'i dus so/ /de'i phan yon gang yin pa de bstan par bya ste/ de la gnas pa ni byang chub nye bar rtogs gyur nas te/ de thob par byed pa'i thabs rnyed pas tshegs med par 'thob par 'gyur pa'o//bsam pa dag pa gang yin pa dang / rgyu ci 'dra ba dang / ji lta bu'i bzod pa dang / dmigs pa gang yin pa dang / ji lta bu'i yid la byed pa dang / rtags gang yin pa de tshigs su bcad pa de dag gis bstan te/ de dag ni lhag pa'i bsam pa dag pa'i lus rnam par gzhag pa'o//chud za ba'i rgyu 'chal pa'i shes rab ces bya ba la/ de la shes rab 'chal pa'i ni phyin ci log tu 'dzin pa ste/ ji ltar mu stegs pa lta bu'o/ /des kyang de chud za bar 'gyur ro/ /lhag ma'i don ni go sla ba'o / /mi mthun pa'i phyogs dang / gnyen pos grangs rnam par gzhag pa dang /sangs rgyas kyi chos thams cad yang dag par 'grub pa'i gzhi'i gnas kyis zhes bya ba ste/ sangs rgyas thams cad kyi chos rnams kyi rgyu'i dngos pos ni rnam par gzhag pa'i rnam grangs gnyis pa ste/ de'i phyir pha rol tu phyin pa drug las lhag pa yang ma yin zhing chad pa yang ma yin pa ste/rnam par g.yeng ba med pa la brten nas sangs rgyas kyi chos rnams kyi de kho na nyid rtogs par 'gyur bas bsam gtan gyi pha rol tu phyin pa la brten pa'i shes rab kyi pha rol tu phyin pas yang dag pa ji lta ba bzhin du de kho na nyid rtogs par 'gyur zhes bya ba'i tha tshig go//'di dag gi don lhag ma ni go sla ba'o / /gang gi phyir rnam par gzhag pa'i rgyu gsum pa ni sems can thams cad yongs su smin par bya ba dang rjes su mthun pas zhes bya ba ste/ sems can thams cad yongs su smin par bya ba nyid la rjes su mthun pa'i phyir na 'di ltar drug tu 'gyur te/de'i phyir na yang drug tu rnam par gzhag go/ /sems mnyam par gzhag pa rnams mnyam par gzhag par bya ba'i phyir bsam gtan gyi pha rol tu phyin pa'o/ /sems mnyam par gzhag pa rnams rnam par thar par bya ba'i phyir shes rab kyi pha rol tu phyin pa ste/ yongs su smin par byed pas so//gdams par bya ba rnams zhes bya ba ni gdams ngag sbyin par bya'o zhes bya ba'i tha tshig go/ /sbyin pa la sogs pa rnams mtshan nyid gang dang ldan pas pha rol tu phyin pa zhes bya ba 'thob ce na/ gang gi phyir 'jig rten pa dang nyan thos la sogs pa dag la yang sbyin pa la sogs pa yod pas des na 'di dag gi mtshan nyid nges par brjod par bya ste/pha rol tu phyin pa drug gi mtshan nyid la gnas dam pa zhes bya ba ni 'di ltar byang chub kyi sems gnas pa yin pa'i phyir ro / /dngos po dam pa zhes bya ba ni phyi dang nang gi bdag nyid mtha' dag kun du spyod pa ni gzhan yod pa ma yin la/byang chub sems dpa' ni 'dir dngos po mtha' dag yongs su spyod pa yin no/ /ched du bya ba dam pa zhes bya ba ni sbyin pa gang sems can thams cad la phan pa dang / bde ba'i ched du byed pa'o/ /thabs la mkhas pa dam pa zhes bya ba ni 'dir 'khor gsum yongs su dag pa'i thabs la mkhas pas yongs su bzung ba ste/sbyin par bya bar yang ma yin/ sbyin pa por yang ma yin la/ len pa por yang rtog par mi byed pa'o/ /de ltar na sbyin pa la sogs pa rnams rnam par mi rtog pa'i ye shes kyis yongs su zin par gyur pa'o/ /yongs su bsngo ba dam pa zhes bya ba ni 'di ltar sbyin pa la sogs pa rnams bla na med pa yang dag par rdzogs pa'i byang chub tu yongs su bsngo ba'o//rnam par dag pa dam pa zhes bya ba ni gang gis gang gi tshe sangs rgyas su 'gyur ba nyid kyi sbyin pa la sogs pa rnams te/ de yang nyon mongs pa'i sgrib pa dang shes bya'i sgrib pa dag las rnam par grol ba kun tu sgrub par gyur pa'o//sbyin pa gang yin pa de pha rol tu phyin pa yang de yin nam/ pha rol tu phyin pa gang yin pa de sbyin pa yang de yin nam zhes dris pa'i phyogs de bstan par bya ste/ sbyin pa gang yin pa de pha rol tu phyin pa ma yin pa ni gang pha rol tu phyin pa drug dang bral ba'o//pha rol tu phyin pa ni yin la sbyin pa ma yin pa ni tshul khrims la sogs pa pha rol tu phyin pa drug gis yongs su bsdus pa'o/ /sbyin pa yang yin la pha rol tu phyin pa yang yin pa ni pha rol tu phyin pa drug gis bsdus pa'i sbyin pa'o/ /sbyin pa yang ma yin pa pha rol tu phyin pa yang ma yin pa ni tshul khrims la sogs pa drug po de dag dang bral ba'o//de bzhin du mu bzhi po thams cad la blta bar bya'o/ /nges pa'i tshig blta bar bya ste/ re zhig thams cad kyi spyi'i nges pa'i tshig ni pha rol tu song ba ni pha rol tu phyin pa ste/ 'jig rten pa dang / nyan thos dang rang sangs rgyas rnams kyi sbyin pa la sogs pa thams cad kyi mchog tu phyin pas des na pha rol tu phyin pa'o//so so'i ni rgyu'i dus na ser sna ma bcom par sbyin pa gtong bar mi byed pa'i phyir dang / 'bras bu'i dus na ni dbul ba lus 'dzin par byed pa'i phyir dang / longs spyod chen po dang / bsod nams kyi tshogs sbyin par byed pas sbyin pa'o//rgyu'i dus na 'chal pa'i tshul khrims zhi bar byed pa dang / 'bras bu'i dus na ngan 'gro zhi bar byed pa dang / bde 'gro dang ting nge 'dzin thob par byed pas tshul khrims so/ /de bzhin du pha rol tu phyin pa thams cad kyi nges pa'i tshig ji ltar rigs pa bzhin du sbyar bar bya ste/ bdag dang gzhan dag la bde bar byed pas zhes bya ba la bdag nyid ngan 'gro dang /khon du 'dzin pa dang / khro ba la sbyor bar mi byed cing / pha rol dag kyang bde bar byed de/ de dag la sdug bsngal skyed par mi byed do/ /bsgom pa rnam pa lngar blta bar bya ste zhes bya ba de la kun tu spyod pa la sbyor ba ni kun tu spyod pa la bsgom pa'o//bya ba sgrub pa bsgom pa zhes bya ba ni sangs rgyas kyi mdzad pa shin tu sbyangs pa 'bad pa med pa mnga' bas kun tu spyod pa med bzhin du yang sangs rgyas rnams kyi sku'i gnas skabs kyi pha rol tu phyin pas sems can rjes su bzung ba'i phyir bya ba sgrub pa 'byung bar 'gyur ba'o/ /de lta bu re zhig bsgom pa'o//de snyed kyi dus skad cig ma gcig tu zhes bya ba la/ gang de lta bu'i grangs med pa gsum la sogs pa'i tshad kyi dus skad cig ma gcig tu byas la/ de lta bu'i skad cig mas ji srid byang chub par gyur pa de srid kyi dus su skad cig re re la bdag gi lus zhes bya ba la sogs pa rtsa ba'i gzhung gi rjes su 'brangs nas blta bar bya ste go sla'o//rim pa de lta bu nyid kyis byang chub kyi snying po la gnas kyi bar de srid du de lta bu'i tshul khrims la sogs pa'i sems gcig nyid skyed par byed pa nyid do/ /stong gsum gyi stong chen po'i 'jig rten gyi khams mes yongs su gang ba skad cig re re la spyod lam bzhi byed cing yo byad thams cad dang mi ldan pa yang zhes bya ba la/'dis ni gnas med cing yo byad thams cad dang mi ldan pa nyid bstan to/ /nges par byas pa'i sgrib pa thams cad kyang bshig par 'gyur na zhes bya ba ni nges par bshig pa tsam gyis rnam par smin par mi nus par 'dod pa'o//yang na ngan 'gror 'gro ba'i gnyen po nyid yin pa'i phyir bsam pa rgya chen po nyid ni mi ngoms pa'i bsam pa'o/ /'di ltar de dag nyid rgyun ring por yang mi 'dor ba'i bsam pa de yod pas na rgyun ring po'i bsam pa ste/ rgyun ring du zhes bya ba ni dus ring du'o/ /don lhag ma ni go sla'o//pha rol tu phyin pa'i lus rnam par gzhag pa dang / rab tu dbye ba bstan pa de bshad par bya ste/ gang gi phyir sbyin pa rnam pa gsum yin zhe na/ chos kyi sbyin pa la sogs pa ste/ 'di ltar chos kyi sbyin pa ni gzhan gyi dge ba'i rtsa ba nye bar brtan par byed pa'o/ /zang zing gi sbyin pa ni 'di'i lus brtan par byed pa'o//mi 'jigs pa'i sbyin pa ni de nyid kyi sems brtan par byed pa ste/ de'i phyir rgyu des na sbyin pa rnam pa gsum du bstan to/ /tshul khrims kyang rab tu gnas pa'i tshul khrims ni sdom pa'i tshul khrims te/ lhag ma gnyis po dag gi don gyi gnas yin pa'i phyir te/'di ltar sdom pa la gnas pa'i dge ba'i chos sdud pa'i tshul khrims kyis sangs rgyas kyi chos rnams dang / byang chub mngon par sgrub pas rten du gyur pa nyid dang / sems can gyi don byed pa'i tshul khrims kyis sems can yongs su smin par byed pas rten du gyur pa'o//bzod pa yang gnod par byed pa la ji mi snyam pa'i bzod pa ni gang gzhan gyis gnod pa byed pa la khro ba rab tu spong ba nyid do/ /de'i dbang gis 'khor ba'i sdug bsngal dang du len pa'i bzod pa ste/ gang gi stobs kyis 'khor ba'i sdug bsngal gang yin pa des ldog par mi 'gyur pa'o/ / chos la nges par rtogs pa'i bzod pa ni yang chos gang la nges par brtag pa de la 'dod pa ste/ de yang bshad ma thag pa'i bzod pa gnyis po dag gi rten du gyur pa'o/ /brtson 'grus kyi lus kyang rnam pa gsum du gzhag ste/ 'di ltar bcom ldan 'das kyis mdo sde gzhan dag las/ brtan pa dang ldan pa pa dang /brtson 'grus dang ldan pa dang / spro ba can dang / pha rol gnon pa brtan pa dang / blangs pa mi 'dor zhing zhes gsungs pa'i tshig de dag brtson 'grus kyi lus rnam par gzhag pa gsum dang sbyar bar bya'o/ de la go cha'i brtson 'grus ni brtan pa dang ldan pa nyid du 'gyur ro/ /dang por sbyor ba'i brtson 'grus ni brtson 'grus dang ldan par 'gyur ro//sbyor ba'i dus su mi zhum pa dang / mi 'khrugs pa dang / chog par mi 'dzin pa zhes bya ba dag rim pa ji lta ba bzhin du spro ba can dang / pha rol gnon pa brtan pa dang / blangs pa mi 'dor ba zhes bya ba 'di dag gis bstan pa yin no/ /gang gi phyir gang dag dang por bla na med pa'i byang chub kyi don du brtan pa dang yang ldan la/sbyor ba'i dus su brtson 'grus dang ldan du zin kyang sems zhum par gyur na ma yin pas de lta bas na de'i gnyen por spro ba can te/ gang sems spro ba dang ldan pa de sems zhum par mi 'gyur te/ zhum pa ni 'dir sems 'gong pa'i bdag nyid du 'dod do//sems zhum pa med du zin kyang 'khrugs par gyur na sangs rgyas nyid las ldog par 'gyur bas des na de'i gnyen por mi 'khrugs pa'i brtson 'grus bstan te/ de yang pha rol gnon pa brtan pa zhes bya bas pha rol gnon pa brtan pa nyid du bstan to/ /'di ltar pha rol gnon pa brtan pa nyid ni sdug bsngal gyis ldog par mi 'gyur ro//sdug bsngal gyis ldog par mi 'gyur du zin kyang gang nyung zad kyis chog par 'dzin na bla na med pa'i byang chub thob par mi 'gyur bas/ de'i phyir chog par mi 'dzin pa'i brtson 'grus zhes bya bar yang bstan te/ cung zad kyis chog par mi gzung ngo zhes bya ba'i tha tshig go//de yang blangs pa mi 'dor ba zhes bya ba 'dis bstan te/ don de dag nyid kyis ni brtson 'grus rnam pa gsum bshad pa yin no/ /yang gnas pa'i bsam gtan ni gang gis mthong ba'i chos la bde bar gnas pas gnas pa'o/ /mngon par sgrub pa ni gang gis mngon par shes pa drug mngon par bsgrub pa'o//bya ba sgrub pa'i bsam gtan zhes bya ba ni gang bsam gtan la brten nas sems can gyi don byed pa ste/ de ni bya ba sgrub pa'i bsam gtan no/ /bsam gtan rnam pa gsum gyi don ni de dag nyid do/ shes rab kyi lus rnam par gzhag pa gsum gyi don ni go sla'o//'di dag bsdus par ji ltar blta zhe na zhes bya ba ni pha rol tu phyin pa 'di dag gis dge ba'i chos rnams ji ltar bsdu zhes blta bar bya'o/ /gang gi phyir de dag tu 'di dag bsdus pa'i phyir 'di dag tu yang de dag bsdus pa yin par blta bar bya'o/ /'di dag gis dge ba'i chos thams cad bsdus zhes bya ba ni 'dir dge ba'i chos thams cad ni byang chub kyi phyogs kyi chos rnams su 'dod do//de'i mtshan nyid ces bya ba la/ de'i mtshan nyid ni shes rab bo/ /de'i rgyu mthun pa zhes bya ba la/ de ni ji ltar mngon par shes pa dang / stobs bcu la sogs pa'i yon tan gzhan dag gi yang rgyur mthun par gyur ba'o//de dang mthun pa zhes bya ba ni dad pa la sogs pa ni de dang mthun par blta bar bya ste/ gang yang dkar po'i chos rnams thams cad yang dag par bsdus pa pha rol tu phyin pa rnams des bstan to/ /de dag gi mi mthun pa'i phyogs rnams kyi kun nas nyon mongs pa'i chos thams cad ji ltar bsdus pa de bstan par bya'o//de la de'i mtshan nyid de zhes bya ba ni de'i mtshan nyid 'dod chags pa la sogs pa dag go/ /de'i gzhi zhes bya ba ni gzhi ste/ ji ltar ser sna'i gzhi dang / ma dad pa nyid dang / lta ba log pa la sogs pa'o//de'i 'bras bu zhes bya ba ni ji ltar ser sna dang / 'chal ba'i tshul khrims dang / khro ba la sogs pa'i 'bras bu'o/ /pha rol tu phyin pa 'di dag gi phan yon bstan par bya ba ni/ kha na ma tho ba med par mngon par mtho ba ste/ ji ltar phyi rol pa'i lta bu ni ma yin te/ de dag gi mngon par mtho ba nyid yin na yang kha na ma tho ba dang bcas pas dman pa nyid yin pa dang / yang de dag ni mi rtag pa nyid yin pas so/ /yang pha rol tu phyin pa'i 'bras bu ni mi rtag pa ma yin te/ byang chub kyi snying po la gnas kyi bar du zhes gsungs pa'i phyir ro/ /yang de ni bdag 'ba' zhig gi don yin gyi/gzhan gyi ma yin pa de ni ma yin te/ gang gi phyir pha rol tu phyin pa'i 'bras bu ni sems can gyi don bya bar nye bar gnas pa zhes bstan pa'i phyir ro/ /pha rol tu phyin pa thams cad kyi 'bras bu'i phan yon ni/ kha na ma tho ba med pa la sogs pa 'di dag yin no/ /shes rab kyi pha rol tu phyin pa sum brgya pa la sogs pa las pha rol tu phyin pa gcig bstan par byas pa der gang thams cad bstan pa yin no zhes bya ba de'i dgongs pa gang yin zhe na/gcig la rab tu sbyor ba na thams cad kyi byed pa 'gro bar 'gyur ro zhes dgongs pa yin no/ /de la sbyin pa byed pa ni lus dang ngag bsdams nas sbyin par byed pa ni de'i tshul khrims kyi pha rol tu phyin pa'i byed pa yin no//sbyin pa'i rgyu dang 'bras bu shes pa nyid ni shes rab kyi byed pa ste/ lhag ma rnams kyi byed pa la yang sbyar bar bya'o/ /de'i rgyu dang 'bras bu'i bye brag las brtsams pa ni shes bya chos kyi dbyings rnam pa bcu po kun tu 'gro ba'i don dang / gzungs dang ting nge 'dzin gyi sgo la dbang ba'i don gyi bar du'o//de la shes bya chos kyi dbyings rnam pa bcu ni lus dang sa la shes bya'i rnam pa re re ste/ de yang ma rig pa'i dbang gis mi shes pa yin pas de'i phyir de lta bu'i ma rig pa'i gnyen por sa bcu pa'o / /yang na de'i mi mthun pa'i phyogs rnam pa bcu las sa bcur gzhag ste/de'i mi mthun pa'i phyogs rnam pa bcu gang zhe na/ so so'i skye bo nyid dang / bden pa la lus la sogs pas phyin ci log tu sgrub pa dang dbul ba nyid do/ /thos pa dang / bsams pa dang / bsgoms pa brjod pa nyid do / /nyon mongs pa phra ba kun tu rgyu ba ste/ lhan cig skyes pa'i 'jig tshogs la lta ba la sogs pas bsdus pa'o//de yang chung ba'i rnam pa nyid kyi phyir dang / yid la byed pa dang bcas pa'i dmigs pa nyid kyi phyir dang / kun tu spyod pa'i ring du song ba nyid ni phra ba yin par rig par bya'o/ /theg pa dman pas mya ngan las 'da' ba dang / mtshan ma rgya chen po la kun tu spyod pa dang /mtshan ma phra mo la kun tu spyod pa dang / mtshan ma med par mngon par 'du byed pa dang sems can gyi don byed pa la mngon par 'du byed pa med pa dang / thob par bya ba'i chos la gtso bor bya ba med pa'o/ /de la sngon du 'gro ba'i don las brtsams pa ni chos kyi dbyings kun tu 'gro ba ste/ 'di ltar chos gang yang bdag med pa'i bdag nyid ma yin pa'o//mchog gi don zhes bya ba ni de ni sa gnyis pa'i ye shes so/ /rgyu mthun pa'i don gyi mchog ni gong du theg pa chen po'i chos bstan pa'i rgyu mthun pa'o/ /mchog ces bya ba ni sa gsum par gyur pa'i ye shes so/ /gang la bdag tu 'dzin pa yod pa de ni kun tu 'dzin pa can te/ji ltar bdag tu 'dzin pa med pa ni byang gi sgra mi snyan no/ /de la 'di lta bu'i chos kyi dbyings thob par gyur pa ni gang la yang bdag gir 'dzin pa 'byung bar mi 'gyur te/ 'di ltar de lta bu'i ye shes ni bzhi pa las 'byung bar 'gyur ro/ /de nyid rgyu tha dad pa med pa ste/ ji ltar mig la sogs pa sems can so so la yod pa rnams nyid tha dad pa ma yin par shes pa de ni lnga pa'o/ /kun nas nyon mongs pa ma yin pa ni rang bzhin gyis kun nas nyon mongs pa ma yin pa'i phyir kun nas nyon mongs pa ma yin pa ste dag pa nyid kyi ye shes de ni drug pa'o/ /mdo sde la sogs pa sna tshogs kyi don tha dad pa med pa nyid kyi ye shes ni bdun pa'o//de ni nyon mongs pa spangs pas bri ba med cing spel bas rnam par byang ba la 'phel ba med pa dang / rgyu mtshan la dbang ba'i gnas dang / zhing la dbang ba'i gnas shes pa de ni brgyad pa'o/ /de la rgyu mtshan la dbang ba ni 'di ltar de 'dod par gyur na mtshan ma de mngon sum du byed par 'gyur ba'o//zhing la dbang ba ni ji ltar gser gyi rang bzhin du sgyur bar 'dod na yang der 'gyur ba de ni de la dbang ba'o/ /so so yang dag par rig pa'i ye shes la dbang ba'i gnas ni dgu pa'o/ /lus la sogs pa'i las la dbang ba'i gnas ni bcu pa'o//gzungs dang ting nge 'dzin gyi sgo la dbang ba nyid kyi gnas kyi don kyang bcu pa ste/ ma rig pa 'di yang nyan thos rnams kyi ni nyon mongs pa can ma yin te/ gang gi phyir de dag sa la mi 'jug pas so/ /dang po nyid kyis thams cad rab tu rtogs par gyur na/ yang ci'i phyir so so'i rim pa gzhag par byed ces rgol ba la des lan gdab pa'i phyir gang la gnas pa'i gnas pa de'i dbang gis sa rnam par gzhag par bya ste/ji ltar dang po nyid kyis thams cad yang dag par so sor rtogs na ci'i phyir dang po la rab tu dga' ba zhes bya zhe na/ 'di ltar bdag dang gzhan gyi don yang dag par bsgrub pa'i nus pa de'i tshe dang po thob pa yin pas so//yang nyan thos rnams kyis de kho na nyid du mngon par rtogs pa'i dus na ni bdag gi don yang dag par bsgrub pa'i nus pa ni thob kyi/ de dag gis gzhan gyi don gyis ni ma yin pas/ byang chub sems dpa' rnams kyi ji lta bu de lta bu'i dga' ba 'byung bar mi 'gyur ro/ /ci'i phyir dri ma med pa zhes bya ba ni gang gis de rang bzhin gyi tshul khrims can du gyur pa nyid yin gyi/dang po bzhin du so sor brtags pa'i tshul khrims can ni ma yin no/ /des na 'di ltar 'tshal ba'i tshul khrims kyi dri ma ring du byed pa'i phyir/ de ni rang bzhin gyi tshul khrims can nyid yin no/ /gang gi phyir sa gsum pa la 'od byed pa'o zhes bya zhe na 'di ltar de ni ting nge 'dzin la snyoms par zhugs pa de las 'bral bar mi 'gyur te/de las nyams pa med pa na theg pa chen po'i chos kyi snang ba 'byung bar 'gyur bas so/ /gang gi phyir bzhi pa la 'od 'phro ba zhes bya zhe na/ 'di ltar de yis byang chub kyi phyogs kyi chos de dag la gnas par gyur pa na/de la gnas par gyur pa nyid kyis nyon mongs pa dang nye ba'i nyon mongs pa thams cad sreg par byed pas so / /ci'i phyir sa lnga pa la shin tu sbyang dka' ba zhes bya zhe na/ gang gis de bden par shes pa'i rnam par mi rtog pa dang / 'jig rten pa'i bzo dang bstan bcos la sogs pa rnam par rtog pa dang bcas pa kun tu sgrub par byed pa na de dag 'gal bas shin tu dka' ba dang /de gnyis 'gal ba yang mngon par sgrub par byed pa na sdug bsngal bas shin tu sbyang dka' ba zhes bya'o/ /yang gang gi phyir drug pa la mngon du gyur pa zhes bya zhe na/ 'di ltar des rten cing 'brel par 'byung ba shes pa la gnas par gyur pa na//de nas de rnam par mi rtog pa la gnas pa'i ye shes kyi stobs kyis shes rab kyi pha rol tu phyin pa zhes bya bas kun nas nyon mongs pa'i chos ma yin rnam par dag pa'i chos kyang ma yin/ bdun pa mngon par 'du byed pa dang ldan pa dang / brgyad pa mngon par 'du byed pa med pa la mngon du phyogs par gyur pas so/ci'i phyir sa bdun pa la ring du song ba zhes bya zhe na/ 'di ni sbyor ba las byung ba'i spyod pa de'i mthar 'gro bar 'gyur ba yin pa dang / gang gi phyir mtshan ma thams cad kyis mi bskyod pas mngon par 'du byed pa dang bcas par gyur pas so/ /ci'i phyir sa brgyad pa la mi g.yo ba zhes bya zhe na/mtshan ma med pa dang / mngon par 'du byed pa thams cad kyis bskyod par mi nus pa ste/ rang gi ngang gis 'jug pa'i phyir dang / rnam par rtog pa med pa'i phyir ro/ /ci'i phyir sa dgu pa la legs pa'i blo gros zhes bya zhe na/ legs pa'i blo ni legs pa'i blo gros te/'dir so so yang dag par rig pa ni 'dir blo gros kyi sgras bstan te/ ye shes de ni 'dir legs pa'i blo gros zhes bya'o/ /ci'i phyir sa bcu pa la chos kyi sprin zhes bya zhe na/ gang gis chos thams cad bsdus pa la dmigs pa'o/ /'di ltar de la ye shes ni sprin lta bu'o/ /ting nge 'dzin dang gzungs kyi sgo rnams ni char gyi chu lta bu'o//de yang ye shes de'i khong na gnas pa ste/ 'di ltar nam mkha' sprin gyis khebs par byas nas gnas pa ltar 'dres pa'i chos la dmigs pa'i ye shes kyis kyang sgrib pa rgya chen po rnams mi mngon par byed do/ /chos kyi sku yongs su rdzogs par bya ba'i phyir zhes bya ba ni ji ltar sprin gyis nam mkha' rgyas par 'gengs pa ltar chos kyi skus byang chub sems dpa'i rten la rgyas par 'gengs so//'dir 'gengs pa ni spros pa'o/ /'grub pas thob pa ni zhes bya ba ni gang gis sa 'di rnams bsgom pa las mthar phyin par 'gyur ba'o zhes blta bar bya'o//ji ltar sa 'di dag re re zhing bsgom pa sgom par 'gyur ba de bstan par bya ba ni sa rnam pa lnga ste/ yang de ni zhi gnas dang lhag mthong dag bsgom pa na de dag gnyi ga yang rnam pa lngas bsgoms te/ skad cig re re la gnas ngan len gyi gnas skabs thams cad 'jig par byed pa zhes bya ba ni 'di ltar gnas ngan len zhes bya ba nyon mongs pa dang shes bya'i sgrib pa'i sa bon thog ma med pa'i dus can gyi bag chags zhes bya ba ste/sgrib pa de'i tshogs de ni 'dres pa'i chos la dmigs pa'i zhi gnas dang lhag mthong gi ye shes kyi skad cig re re la stobs chung bar byed pa'am/tshogs 'jig par byed pa ni 'dir 'jig par byed par bzhed do/ /yang stobs chung bar byed pa ni 'jig par byed pa'o/ /sna tshogs kyi 'du shes dang bral ba ste/ chos kyi kun dga' la dga' ba thob pa dang zhes bya ba la phyogs bcur rnam pa yongs su ma chad pa'i chos kyi snang ba rab tu shes pa ste/gzhung kha ton legs par byang ba bzhin no/ /rnam par dag pa'i cha dang mthun pa'i mtshan ma rnam par brtags pa ma yin pa rnams de la kun tu 'byung ba zhes bya ba la dgos pa yongs su grub pa dang rab tu ldan pa ni 'di'i rnam par dag pa'i cha dang mthun pa'i mtshan ma rnam par brtags pa ma yin pa rnams de la kun tu 'byung ba ste/'dir sangs rgyas nyid ni dgongs pa yongs su rdzogs pa'o zhes 'dod do/ /chos kyi sku yongs su rdzogs pa dang yongs su grub par bya ba'i phyir gong ma bas ches gong ma'i rgyu yongs su 'dzin par byed ces bya ba ni de la yongs su rdzogs pa ni sa bcu pa'o / /yongs su grub pa ni bcu gcig pas sangs rgyas kyi sa la chos kyi sku yongs su grub pa'o//gong ma bas ches gong ma'i rgyu yongs su 'dzin pa zhes bya ba ni 'di ltar rgyu de las kyang sangs rgyas kyi sa'i bar du 'jug par 'gyur ba'o/ /gtsor ni sa bcu dag tu pha rol tu phyin pa bcu sgom par 'gyur te zhes bya ba la/ 'di ltar sa bcu pa las 'byung ba bzhin du ste/dang po la sbyin pa'i pha rol tu phyin pa lhag par 'jug pa nas ji srid bcu pa la ye shes kyi pha rol tu phyin pa'i bar gtso bor 'jug pas na bcu po dag tu bcu bstan pa yin la/ 'di ltar yangs thams cad la thams cad kyang bsgom par bya ba yin no/ /drug tu ni drug ces bya ba ni go rims bzhin bstan pa yin te/'di ltar sbyin pa'i pha rol tu phyin pa phyi nas bstan la/ ye shes kyi pha rol tu phyin pa sngon du bstan pa lta bu ni ma yin no/ /phyi ma bzhi ni zhes bya ba ni ji ltar bstan par bya ba bzhi pa'o/ /gong du pha rol tu phyin pa drug pa bstan pa der thabs la mkhas pa'i pha rol tu phyin pa la sogs pa bzhi po dag kyang 'dus par 'gyur ba nyid yin no//gang yang bcur bstan pa der ni rnam par mi rtog pa'i ye shes nyid ni shes rab kyi pha rol tu phyin pa'o/ /de'i rjes la thob pas bsdus pa nyid pas ni de las gzhan pa'i thabs la mkhas pa la sogs pa'i pha rol tu phyin par 'gyur ro//des na phyi ma rnams la 'di dag sgom par 'gyur ba yin no/ /thabs la mkhas pa'i pha rol tu phyin pa ni zhes bya ba de ston par byed pa na sems can thams cad dang thun mong du zhes bya ba la sogs pa ste/ de la thun mong nyid ni dge ba'i rtsa ba bsags pa rnams sems can rnams la ji lta ba bzhin du 'byung bar byed pa'o//de yang bstan par bya ste/ gang yang bla na med pa yang dag par rdzogs pa'i byang chub thob par 'dod pas byang chub mngon par rdzogs par byang chub nas sems can thams cad kyi don bya'o zhes bya ba de lta bu'i bsam pa dang mthun pa'o/ /des na gang su dag de lta bu'i sems dang / de lta bu'i dge ba'i rtsa ba yongs su bsngo bas sems can thams cad kyi don bya'o zhes bya ba des ni sems can thams cad dang thun mong du thabs la mkhas pa'i shes rab dang snying rje dag bstan te/'di ltar pha rol tu phyin pa drug gis dge ba'i rtsa ba bsags pa rnams snying rjes ni sems can thams cad dang thun mong du byed do//shes rab kyis ni brgya byin la sogs pa nyid du yang yongs su sngo bar mi byed do/ /des na nyon mongs pa 'byung bar yang mi 'gyur te/ yongs su shes pa'i phyir ro/ /'khor ba yang yongs su mi gtong la/ der yang kun nas nyon mongs pa 'byung bar mi 'gyur ba ni thabs la mkhas par 'gyur ba yin te/'di ni thabs la mkhas pa'o/ /gang smon lam sna tshogs kyi rgyu'i dbang gis pha rol tu phyin pa sna tshogs kyi rkyen sdud pa de lta bu ni smon lam gyi pha rol tu phyin pa'i las yin te/ smon lam nyid kyi pha rol tu phyin pa ni smon lam gyi pha rol tu phyin pa'o/ /phyi ma la zhes bya ba la phyi ma'i rgyu mtshan ni phyi ma ste 'di ni rgyu mtshan bdun pa yin te/de'i tshe smon lam sna tshogs bsgom pas des ni phyi ma la 'di dag rnams sgom par 'gyur ba yin te/ de'i dbang gis pha rol tu phyin pa sna tshogs kyi rkyen sdud pa 'thob bo/ /mdo gzhan las stobs gnyis bstan pa ni so sor rtog pa'i stobs dang /bsgom pa'i stobs so/ /yang gal te bsgom pa'i stobs med pa ni so sor rtog pa'i stobs kyis 'jug par 'gyur te/ pha rol tu phyin pa gang gis pha rol tu phyin pa'i mi mthun pa'i phyogs zil gyis mnan nas pha rol tu phyin pa rgyun mi 'chad par 'byung bar 'gyur te/'di dag ni stobs kyi pha rol tu phyin pa'o/ /ye shes kyi pha rol tu phyin pa'i las gang yin pa de bstan par bya ste/ ye shes des ni shes rab kyi pha rol tu phyin pa'i ngo bo rnam par mi rtog pa'i ye shes kyi pha rol tu phyin pa gang yin pa rnam par 'jog pa ste/ gang gis chos la longs spyod pa myong ba dang /lhan cig tu chos dang ldan pa'i don dang / sems can yongs su smin par byed pa'i don yang ye shes kyi pha rol tu phyin pas rnam par gzhag pa yin no/ /chos kyi rnam grangs de pha rol tu phyin pa'i sde snod kyis bsdus pa'i phyir ro zhes bya ba la/ de la pha rol tu phyin pa'i sde snod ni theg pa chen po'i chos thams cad do//sa bcu pa'i chos kyi rnam grangs 'di yang pha rol tu phyin pa'i sde snod nyid yin gyi nyan thos kyi ni ma yin no/ /de bsdus pa nyid kyi yang phyir na yang pha rol tu phyin pa thams cad bsgom pa ni sa thams cad la 'byung bar 'gyur ba yin no/ /sangs rgyas kyi zhing rab 'byams thams cad du sangs rgyas byung ba thams cad kyis kyang rab tu bsgoms pa yin pa'i phyir sa 'di rnams ni shin tu mchog tu gyur pa nyid yin pa'i phyir chos kyi rnam grangs de ni yul gyi mchog nyid du bstan la dang por bstan pa yang yin no//yang yul de ni shin tu gnas par gyur pa yin pa dang /nye ba na gnas pa'i yul gzhan gyi gtso bor gyur pa nyid kyis de ni mchog yin no/ /gang zag lnga ni bskal pa grangs med pa gsum gyis rdzogs par 'gyur te zhes bya ba la/ de la re zhig mos pas spyod pas na mos pas spyod pa ste/ de ni mos pas spyod pa'i sa bskal pa grangs med pa gcig gis rdzogs par 'gyur ro//gang yongs su rdzogs pas ni lhag pa'i bsam pa rnam par dag pa dang / de kho na nyid so sor rig par 'gyur ro/ /de ni yang sa bcu po thams cad du lhag pa'i bsam pa rnam par dag pas spyod par 'gyur ro/ /de ni yang sa drug pa la ni mtshan ma dang bcas par spyod do//bdun pa la ni mtshan ma med par spyod cing mngon par 'du byed pa dang bcas pa yin te/ grangs med pa gnyis pas grub par 'gyur ba yin no/ /brgyad pa la zhugs pa ni mngon par 'du byed pa med pa yin te/ mngon par 'du byed pa med pa la spyod pa yongs su rdzogs pa ni ma yin no//mngon par 'du byed pa med pa la spyod pa yongs su rdzogs pa nyid ni dgu pa dang bcu pa la yin te / gang zag de'i ni bskal pa grangs med pa gsum pas so/ /de lta bu dag ni gang zag gcig la rgyun du zhugs pa dang / lan cig phyir 'ong ba dang / phyir mi 'ong ba rnam par gzhag pa bzhin du rnam par gzhag pa'i khyad par gzhan rnam pa lngar 'gyur ba yin no//gang bskal pa grangs med pa gsum gyis byang chub sems dpa' bsgom pa rdzogs par 'gyur zhes bstan pa de thog ma med pa'i dus nas 'khor ba na gnas pa'i tshe sbyin pa la sogs pa byin pas kyang 'di ltar sangs rgyas 'byung ba dang phrad par gyur pas gang de lta bu'i bskal pa grangs med pa gsum po de dang po gang nas brtsams nas bstan pa yin zhe na/de tshigs su bcad pas bstan par bya ste/ bzang dang smon pa'i stobs can dang / /zhes bya ba ni/ dge ba'i rtsa ba'i stobs can du 'gyur ba dang / smon lam gyi stobs can du 'gyur ba'o/ /de la dge ba'i rtsa ba'i stobs can ni mi mthun pa'i phyogs kyis zil gyis gnon par mi nus par blta bar bya'o//smon lam gyi stobs kyis ni rtag tu dge ba'i bshes gnyen dang phrad pa yin par blta bar bya'o/ /sems brtan khyad par 'gro ba zhes bya ba ni/ sems bskyed pa brtan pa can du 'gyur ba dang khyad par du 'gro bar 'gyur ba'o//de la sems bskyed pa brtan pa ni/ dge ba'i bshes gnyen gyi dbang gis byang chub kyi sems yongs su mi gtong bar blta bar bya'o/ /khyad par du 'gro ba nyid ni skye ba gzhan dang gzhan du mthong ba'i chos nyid la dge ba rnams 'phel bar 'gyur zhing nyams par mi 'gyur bar blta bar bya'o//lhag ma ni go sla'o/ /ji ltar byas na byang chub sems dpa' rnams kyi bslab pa nyan thos la sogs pa dag las khyad par du 'phags pa yin zhe na/ rab tu dbye ba'i khyad par dang / /zhes bya ba la/ 'di ltar nyan thos rnams la ni sdom pa'i tshul khrims gcig pu yod kyi dge ba'i chos sdud pa'i tshul khrims kyang ma yin/sems can gyi don byed pa'i tshul khrims kyang ma yin no/ /thun mong dang thun mong ma yin pa'i zhes bya ba la/ de la rang bzhin gyis kha na ma tho ba dang bcas pa srog gcod pa la sogs pa ni thun mong gi'o/ /sa brko ba dang rtswa gcod pa la sogs pa ni thun mong ma yin pa ste/gang yang bcas pa'i kha na ma tho ba'i bslab pa phyi ma rnams so/ /nyan thos kyi ltung bar 'gyur ba de la byang chub sems dpa'i ltung ba med do zhes bya ba ni ji ltar dbyar gyi nang du nyan thos rnams song bar gyur na ltung ba yin no/ /sems can gyi don mthong la ma song na byang chub sems dpa' rnams kyi ltung ba yin la/song na ni ltung ba med do/ /kha na ma tho ba med par sems can thams cad la phan 'dogs pa zhes bya ba ni sems can thams cad la kha na ma tho ba med pas phan 'dogs par byed kyi/ ji ltar bud med khyer la shog ces bya ba lta bus ni ma yin te/ gang gi phyir yang de ni gzhan gyis yongs su gzung ba yin pas kha na ma tho ba med par yang ji ltar 'gyur/de bas na de dang 'dra ba'i don gzhan yang yongs su spangs la kha na ma tho ba med pas phan gdags par bya'o/ /sems kyi ltung ba zhes bya ba ni gang 'dod pa dang gnod sems la sogs pa'i rnam par rtog pa ni byang chub sems dpa' rnams kyi ltung ba yin gyi/nyan thos rnams kyi ni ma yin no/ /lhag pa'i tshul khrims kyi bslab pa la sogs pa gsum ni pha rol tu phyin pa'i ngo bo nyid yin na/ ci'i phyir de pha rol tu phyin pa las tha dad du rnam par gzhag par bya zhe na/ gang gi phyir tha dad du rnam par gzhag par bya ba de bstan par bya ste/'di ltar bslab pa rnams phan tshun rgyu'i ngo bo rnam par gzhag par bya ste/ tshul khrims la brten nas ni/ bsam gtan bskyed par bya ba yin no/ /bsam gtan la brten nas ni shes rab bskyed par bya ba yin no/ /sna tshogs dang tshad med pa'i bslab pa rgya che ba zhes bya ba ni/ byang chub sems dpa' rnams kyi bslab pa sna tshogs pa dang tshad med pa ste/gang gi phyir des sems can yongs su smin par byed pa dang / de dag la phan 'dogs pa ni dgongs pa'o/ /bsod nams tshad med pa yongs su 'dzin pa zhes bya ba ni 'di ltar des sems can tshad med pa'i bsod nams kyi tshogs yongs su 'dzin gyi nyan thos rnams kyis ni ma yin no//sems can thams cad la phan pa dang bde bar bya ba'i bsam pa yongs su 'dzin pa zhes bya ba ni de la phan pa la 'god pa ni phan pa'i bsam pa'o/ /gang dge ba'i rtsa ba 'di la 'bras bu ci yod pa de gang zag 'dis thob par gyur cig ces bya ba ni bde ba'i bsam pa'o//bla na med pa yang dag par rdzogs pa'i byang chub la brten pa rgya che ba zhes bya ba ni gang gi phyir tshul khrims 'di ni bla na med pa yang dag par rdzogs pa'i byang chub kyi rten du 'gyur gyi nyan thos rnams kyi ni ma yin no// //bam po drug pa/ zab pa nyid ni gang byang chub sems dpa' thabs la mkhas pa'i rnam pa de lta bus zhes bya ba de la/byang chub sems dpa' ji lta ba de lta bu'i thabs la mkhas pa'i rnam pa'i nus pa can du 'gyur ba de bstan par bya ste/ gal te re zhig 'di ltar shes te/ gang zag 'di ni 'dir mi dge ba mtshams med pa la sogs pa dang ldan par bya'o zhes gal te pha rol gyi sems shes par gyur na/gal te de las bzlog par bya ba'i thabs gzhan med na/ 'di nges par 'di ltar bsad na ni bde 'gror 'gro bar 'gyur la/ nges par las 'di byas na ni nges pa kho nar ngan 'gror 'gro bar 'gyur bar shes shing de lta bur rig par gyur na/ gang 'di ltar sems bskyed par bya ste/'di ltar yang bdag gis las 'di byas pas bdag ngan song du 'gro ba de ni 'dod kyi/ 'di da ltar gyi sdug bsngal cung zad la sbyar bas ma 'ongs pa'i bde ba thob par 'gyur bar bya'o zhes des 'di ltar sman pa dang 'dra ba'i sems bskyed nas bsad par gyur kyang bsod nams ma yin pa med kyi/bsod nams nyid mang du 'phel bar 'gyur te/ gang bsod nams nyid mang du 'phel bar 'gyur ba des na myur du bla na med pa yang dag par rdzogs pa'i byang chub rjes su thob par 'gyur ba ste/ 'di lta bu ni shin tu zab pa'o/ /gang yang sprul pa'i lus dang ngag gi las kyang byang chub sems dpa'i zab pa'i tshul khrims su rig par bya ste/des rgyal srid kyang byed cing sems can la gtse ba sna tshogs bstan nas sems can 'dul ba la 'god do zhes bya ba la/ gang yang sprul pa'i ngo bo nyid ni sprul pa ste/ 'di ltar de yang rgyal po me yis gzhon nu nor bzangs la ji ltar bstan pa bzhin du sbyar bar bya'o//skyes pa'i rabs sna tshogs bstan pas zhes bya ba ni ji ltar thams cad sgrol gyi skyes pa'i rabs 'byung ba lta bu ste/ der byang chub sems dpas bram ze la bu sbyin par gtong ba de ni sprul pa yin te/ sems can gzhan la gnod pa byed pas sems can gzhan la phan 'dogs pa ni ma yin na yang /gang gi phyir byang chub sems dpa' sems can gzhan la gnod pa byas nas sems can gzhan la phan 'dogs par byed pa 'di lta bu ni zab pa yin no/ /khyad par rnam pa bzhi po de dag nyid ni yang 'dul ba bsgrags pa zhes bya ba shin tu rgyas pa'i mdo sde las brgya stong du mar bstan to//lhag pa'i sems las brtsams nas theg pa chen po'i chos las dmigs pa zhes bya ba ni gang gi phyir byang chub sems dpa' rnams theg pa chen po'i chos la dmigs kyi/ nyan thos rnams ni ma yin no/ /theg pa chen po snang ba dang / bsod nams thams cad yang dag par bsags pa dang /ting nge 'dzin gyi rgyal po zhes bya ba la/ ting nge 'dzin smos pa ni 'di lta bu'i ting nge 'dzin sna tshogs las gang gi phyir nyan thos rnams la ni gcig tsam yang med do/ /gnyen pos rab tu dbye ba zhes bya ba ni gang gi phyir sgrib pa thams cad kyi gnyen por rnam par gnas pa ste ji ltar khye'u rags pa ni phra mos 'byin par byed pa de bzhin du kun gzhi rnam par shes pa la rnam par gnas pa'i kun nas nyon mongs pa'i sa bon bag chags zhes bya ba rags pa ni gnyen po phra mos 'byin par byed do zhes bya ba'i tha tshig go//las su rung ba nyid kyis rab tu dbye ba zhes bya ba ni las su rung ba bsam gtan gang la bde bar gnas na gang du sems can gyi don mthong ba der skye bar 'gyur ba ste/der yang bsam gtan nyams par mi 'gyur ro/ /de lta bu ni nyan thos rnams la med do/ /mngon par sgrub pas rab tu dbye ba dang zhes bya ba ni 'jig rten gyi khams thams cad du thogs pa med pa ni mngon par shes pa bsam gtan gyis mngon par sgrub par byed pa'o//las kyis rab tu dbye ba zhes bya ba la/ g.yo bar byed pa ni 'jig rten gyi khams rnams g.yo bar byed pa'o 'bar bar byed pa ni de dag nyid 'bar bar byed pa'o/ /khyab par byed pa ni 'od kyis khyab par byed par blta bar bya'o//ston pa ni gang gzhan gyis mi nus pa de'i 'od kyis gzhan 'jig rten gyi khams du ma'i sangs rgyas la sogs pa mthong bar byed pa'o/ /gzhan gyi dngos por bsgyur ba ni sa la sogs pa rnams chu nyid la sogs par bsgyur bar blta bar bya'o/ /'gro ba ni skad cig gcig la 'jig rten gyi khams du mar 'gro ba'o//'ong ba nyid ni de dag nyid nas so/ /sdud pa ni rdul phra rab gcig gi nang du 'jig rten gyi khams du ma chud par byas na yang de la 'phel ba med pa'o/ /rgyas par byed pa ni rdul phra rab gcig gis 'jig rten gyi khams tshad med pa rnams 'gengs par byed pa'o/ / gzugs thams cad lus su 'jug pa zhes bya ba ni ji ltar lus la bya ba rnam pa sna tshogs su du ma thams cad ston pa'o/ /skal pa mnyam pas 'gro ba ni ji ltar gdul bya'i don du sum cu rtsa gsum pa rnams la kha dog dang dbyibs dag de dang mthun pas mnyam par 'gro ba ste/de bzhin du thams cad du sbyar ro/ /snang bar byed pa ni rab tu gsal bar byed pa'o/ /mi snang bar byed pa ni rab tu mi snang ba'o/ /dbang nyid du byed pa ni ji ltar bdud sangs rgyas nyid du byed pa lta bu'o/ /gzhan gyi rdzu 'phrul rab tu 'joms pa ni gzhan gyi rdzu 'phrul zil gyis gnon par byed pa'o/ / spobs pa sbyin pa ni 'dri ba nyid la'o/ /dran pa sbyin pa dang / bde ba sbyin pa ni nyan pas ting nge 'dzin sbyin pa'o/ /'od zer gtong ba'i rdzu 'phrul chen po ni 'jig rten gyi khams gzhan nas byang chub sems dpa' rnams sdud pa'o/ /rdzu 'phrul chen po mngon par sgrub pa ni chen por gyur pa'i rdzu 'phrul te/ bstan ma thag pa de dag nyid yin te de dag ni nyan thos rnams la med do/ /byang chub sems dpa' ni dka' ba spyod pa yin no zhes gsungs pa'i dka' ba spyod pa gang yin zhe na/ dka' ba spyod pa rnam pa bcu po de dag thams cad kyis bstan pa yin no/ /de la mi 'byed par kun nas nyon mongs pa med par dka' ba spyod pa zhes bya ba ni mi 'byed pa ni 'dir ma thar pa'o//'di lta bu ni thar pa yin te/ gang 'khor ba las kyang ma grol la/ de nyid du kun nas nyon mongs pa yang ma yin pa'o/ /lhag ma dka' ba spyod pa dgu ni don go sla'o/ /dgongs te gsungs pa'i dgongs pa bstan par bya ste/ de la ji ltar na byang chub sems dpa' sbyin phod pa yin zhe na zhes bya ba la/sems can thams cad bdag nyid lta bur rtogs pas de'i phyir des sbyin pa byin par gyur pa ma yin no zhes dgongs so/ /ji ltar na sbyin pa 'dod pa yin zhe na/ kha na ma tho ba dang bcas pa'i sbyin pa la sogs pa la 'di ltar 'dod pa med pa ste/byang chub sems dpa'i sbyin pa nyid la 'dod par byed pas ro myang ba med pa'i don te/ ro myang bar mi byed ces bya bar bzhed do/ /des na ro mi myang ba ni ro myang ba med pa'i sbyin pa'o/ /ji ltar na sbyin pa la mos pa yin zhe na/ gang gi phyir bdag nyid kyis sbyin pa byed pa thob pa yin gyi/gang gzhan gyi rkyen gyis 'gro ba ma yin pa'o/ /ji ltar na sbyin pa la 'jug par byed pa yin zhes bya ba la/ rang bzhin gyis sbyin pa gtong pa yin zhes bya ba dgongs pa ste/ 'di ltar bdag nyid kyis kyang 'jug par dgos pa ma yin te / ser sna shin tu spangs pa'i phyir ro//des na gzhan dag bzhugs pa la yang nus pa dang ldan par 'gyur ro/ /ji ltar na sbyin pa la mngon par dga' ba yin zhes bya ba la/ res 'ga' zhig 'ga' sbyin par byed pa ma yin gyi rtag tu ci bdog pa sbyin pa'o/ /ji ltar na sbyin pa la che ba yin zhes bya ba la/ snying po med pa ni rnam par g.yeng ba med pa ste/de ni 'di ltar mnyam par bzhag pas sbyin zhing g.yeng ba med pas sbyin par bya'o zhes bya ba'i tha tshig go/ /ji ltar na sbyin pa dag pa yin zhes bya ba la/ 'byung ba ni rab tu gnas pa ste/ ser sna rtsa ba nas 'byin par byed pa ste/ gal te ser sna rgyas par gyur na 'byin par byed cing nye bar 'byin par byed pa'o//ji ltar na sbyin pa mthar phyin pa yin zhe na zhes bya ba la/ gal te mtha' zhes bya ba mya ngan las 'das pa la/ nyan thos bzhin du gnas par ma gyur na'o/ /'di ltar sbyin pa la sogs pa'i mi mthun pa'i phyogs de dag gi dbang du gyur pa ma yin te /des sbyin pa la sogs pa'i dbang du gyur pa yin te/ de'i mi mthun pa'i phyogs kyi dbang du ma gyur pa'i phyir ro/ /ji ltar na sbyin pa mi zad pa yin zhes bya ba la/ zad pa med pa ni 'dir mya ngan las 'das pa yin par bzhed de/ 'di ltar nyan thos bzhin du mya ngan las 'das pa la gnas pa ma yin no zhes bya ba'i tha tshig go//gang mdo sde las dge slong dag nga ni srog gcod pa yin no zhes bya ba la sogs pa gsungs pa de dag gi dgongs pa gang gis gsungs pa de ston par byed pa ste/ ji ltar na 'dod pas log par spyod pa yin zhes bya ba la/ gang gi phyir 'dod pa 'di dag ni log pa yin no zhes de ltar spyod pa'o//shes bya'i pha rol tu gnas pa zhes bya ba ni shes bya'i pha rol tu phyin par byas nas gnas zhes bya ba'i tha tshig go/ /ji ltar na log par lta ba can yin zhes bya ba la/ gang thams cad du gtogs pa'i gzugs la sogs pa dag log pa nyid yin pa'i phyir kun tu brtags pa nyid dang /gzhan gyi dbang nyid yang dag pa ji lta ba bzhin du mthong ba ste/ kun tu brtags pa nyid ni gzhan gyi dbang las log pa nyid du mthong zhes bya ba'i tha tshig go/ /lhag ma mi dge ba bcu'i las kyi lam rnams ni go sla'o/ /yang mdo gzhan las gsungs pa'i rtag pa'i chos rnams ni sangs rgyas kyi chos rnams te zhes bya ba/mi gos pa'i chos rnams ni sangs rgyas kyi chos rnams te zhes gsungs pa'i bar la de dag la dgongs pa gang yin zhe na/ de bstan par bya ste/ rtag pa ni chos kyi sku'o/ /de bas na chos de ni rtag pa'i chos rnams zhes bstan to/ /chad pa'i chos rnams zhes bya ba ni sgrib pa ji snyed pa dag de la yongs su chad par gyur pas de'i phyir don des na de ni chad pa'i chos rnams zhes brjod do//dmigs pa'i chos rnams ni sangs rgyas kyi chos rnams te zhes bya ba la/ sems can gyi spyod pa gnyen po dang bcas pa stong phrag brgyad cu rtsa bzhi nye bar dmigs pa ste/des na chos de ni dmigs pa'i chos rnams so/ /mi dge ba'i chos rnams zhes bya ba la/ sgrib pa thams cad kyis mi gos pa zhes bya ba ni de bzhin nyid do/ /de'i phyir chos de ni mi gos pa'i chos yin no zhes bya ba'i tha tshig go/ /las kyi rab tu dbye ba ma bstan pas de'i phyir byang chub sems dpa' rnams kyi ting nge 'dzin rnams kyi las gang yin pa bstan par bya'o//de la ting nge 'dzin la yang dag par brten nas byang chub sems dpa' rnams pha rol tu phyin pa rnams sgom par byed do/ /de bzhin du de la yang dag par brten nas sems can rnams yongs su smin par byed do //rdzu 'phrul la sogs pa dag gis 'dun par byas nas 'jug par byed do/ /de bzhin du de'i stobs kyis sangs rgyas kyi zhing yongs su sbyong bar byed de/ sems la dbang thob par gyur na ji ltar 'dod pa bzhin du de gser la sogs pa'i rang bzhin du byed do//de bzhin du de'i stobs kyis sangs rgyas kyi chos thams cad sgrub par byed de/ de'i las ni de dag yin no/ /lhag pa'i shes rab brjod par bya ba'i dus la bab pas de brjod do/ /de la rnam par mi rtog pa'i ye shes ni lhag pa'i shes rab tu 'dod do/ /de yang rnam pa gsum ste/ sbyor ba las byung ba'i rnam par mi rtog pa ste/kun tu tshol ba'i rnam par mi rtog pa dang / dngos gzhi dang / de'i rjes las thob pa'o/ /de la shes rab kyi dbang du byas pa ni lhag pa'i shes rab dang po'o/ /nang gi bdag nyid kyi shes rab ni lhag pa'i shes rab gnyis pa'o/ /gang gnas pa'i shes rab ni lhag pa'i shes rab gsum pa'o//de la re zhig rnam par mi rtog pa nyid ni bsgrub par bya ba yin pas de'i de nyid ni 'bras bu yin la/ kun tu tshol ba ni rgyur gyur pa yin no/ /'bras bur gyur pa de ni rjes la thob pa'i rgyur gyur pa yang yin pas de bsgrubs na gnyi ga yang bsgrub pa byas par 'gyur ro//de la dang por re zhig rnam par mi rtog pa'i ye shes kyi ngo bo brjod par bya'o/ /'dir ngo bo nyid de ni mtshan nyid ces brjod de/ byang chub sems dpa' rnams kyi shes/ /rnam rtog med pa'i ngo bo nyid/ /rnam pa lnga ni rnam spangs shing / /yang dag don la bkrar 'dzin med//ces bya bar sbyor ro/ /rnam pa lnga ni yid la byed pa med pa tsam rnam par mi rtog pa'i ye shes nyid yin na gnyid log pa dang / ra ro ba dang / bag med pa la sogs pa yang rnam par mi rtog pa'i ye shes su thal bar 'gyur ro/ /yang rnam par rtog pa dang bcas rnam par dpyod pa dang bcas pa'i sa las 'das pa rnam par mi rtog par 'dod na/de'i phyir bsam gtan gnyis pa la sogs pa thams cad kyang rnam par mi rtog par thal bar 'gyur ro/ /de lta yin na ni 'jig rten pas kyang rnam par mi rtog pa thob par thal bar 'gyur ro/ /yang na gang du sems dang sems las byung ba mi 'jug pa 'du shes dang tshor ba 'gog pa la sogs pa de'i gnas skabs rnam par mi rtog par 'dod na de ni ye shes nyid du mi 'gyur te/'gog pa'i snyoms par 'jug pa la sogs pa'i dus na sems med pa'i phyir ro/ /yang na gzugs kyi ngo bo bzhin du rnam par shes pa 'dod na yang de'i phyir ji ltar gzugs bems po yin pa bzhin du rnam par shes pa yang bems po nyid du 'gyur ro//yang na gang de kho na nyid kyi don la bkra bar 'dzin par zhugs pa de rnam par mi rtog pa yin na/ de nyid ni rnam par rtog par 'gyur te/ 'di ni de kho na nyid do zhes rtogs pa'i phyir ro/ / de lta bu'i rnam pa 'di lnga yongs su spangs pa'i ye shes kyis de kho na nyid kyi don la gal te zhugs par gyur na ni de kho na nyid kyi don ni 'di'o zhes de kho na nyid kyi don la bkra bar 'dzin par mi 'gyur ro/ /de lta bu ni rnam par mi rtog pa'i ye shes kyi mtshan nyid de kho na nyid kyi don la dmigs pa ma yin te/ mig gi rnam par shes pa bzhin du sna tshogs kyi rang bzhin ma yin no zhes bya ba'i tha tshig go/ /don 'di dag nyid kyis tshigs su bcad pa dang po yang bstan par gyur pa yin no/ /de ltar ngo bo nyid bstan nas gnas gang la 'byung bar 'gyur ba bstan par bya ste/ de ltar bstan pa'i ye shes de'i gnas ni sems yin no//gal te de'i gnas sems yin na sems ni sems par byed pas na sems zhes bya ba yin pas sems kyi gnas la 'jug par 'gyur ba ni rnam par mi rtog pa zhes bya bar mi rigs so/ /yang sems med pa yin na ni de ni shes pa ma yin pa thob par 'gyur ro zhe na/skyon gnyi ga spang bar bya ba'i phyir tshigs su bcad pa/ byang chub sems dpa' rnams kyi shes/ /rnam par rtog pa med pa'i gnas/ /zhes bya ba la sogs pa gsungs te/ de'i gnas ni sems ni ma yin te/ don la mi sems pa'i phyir ro/ /sems med pa yang ma yin te/gang de'i gnas sems kyi 'phen pa'i gnas skabs las de 'byung bar gyur pas na de sems kyi rgyu las byung ba'i phyir te/ de'i phyir sems kho na zhes brjod par bya'o zhes bya ba'i tha tshig go/ /rgyu gang las 'byung bar 'gyur ba de tshigs su bcad pas bstan pa ni/ byang chub sems dpa' rnams kyi shes//rnam par rtog pa med pa'i gzhi/ /thos pa'i bag chags brjod bcas pa'i/ /zhes bya ba la sogs pa la/ gang gzhan gyis bstan pa thos pa la bag chags so/ /gang bag chags kyi rgyu las ni yid kyi brjod pa yid la byed pa ste/de ni tshul bzhin yid la byed pa zhes bya'o/ /yang ye shes de'i dmigs pa gang yin pa de de las gzhan pa'i tshigs su bcad pas bstan pa la/ byang chub sems dpa' rnams kyi shes/ /rnam rtog med pa'i dmigs pa ni/ /zhes bya ba la/ de la gang kun tu brtags pa'i ngo bo nyid kyi chos thams cad ni brjod par bya ba med pa yin pas na chos rnams brjod du med pa nyid do//yang de'i brjod du med pa nyid gang yin zhe na/ bdag med de bzhin nyid kyang de/ /da ni gang zag dang chos kyi bdag med pa ste/ kun tu brtags pa'i ngo bo nyid kyi bdag med pa'o/ /de'i ngo bo ni de nyid de / de bzhin nyid do//des na chad par lta bar ma gyur cig pa'o/ /yang de la dmigs par byed pa'i rnam pa gang yin zhe na/ de ston pa'i tshigs su bcad pa/ byang chub sems dpa' rnams kyi shes/ /rnam par mi rtog rnam pa ni/ /shes bya dmigs pa de nyid la/ /mtshan ma med pa gang yin pa'o/ /zhes bya ba la/ye shes de ni de bzhin nyid de la mnyam par 'byung bas mtshan ma med pa tha mi dad pa'i rnam pa ste/ 'di ni rnam pa'o/ /ji ltar mig gis gzugs rnams 'dzin pa na de la sngon po la sogs pa mthong ba nyid kyi rnam pa dang / gzugs sngon po la sogs pa nyid gzhan ma yin pa de bzhin du/'dir yang ye shes dang de bzhin nyid dag gzhan ma yin pa ni rnam pa'o/ /yang gal te chos thams cad brjod du med pa yin na de lta na gang la rnam par rtog par byed ce na/ sbyor ba las byung ba'i rang bzhin te/ don du/ rnam brtags de las gzhan du min/ /de bas na de las gzhan du ma yin no//yang ji ltar byas nas she na/ de bsgrub par bya ste/ yi ge phan tshun sbyor bas na/ don de sbyor las byung ba yin te/ yi ge gzhan dang gzhan dag lhan cig tu brjod pa'i don ni sbyor ba las byung ba'i don yin te/ ji ltar mig ces bya ba lta bu'i yi ge rnam par ma chad par brjod pa'i don ni 'di ltar sbyor ba ste/rnam par brtag par bya ba ni de yin no/ /chos thams cad brjod par bya ba med pa yin no zhes bstan pa de gang gis grub pa yin zhe na/ 'di ltar/ brjod pa med par brjod ces la / /shes pa 'jug pa ma yin no/ /rjod par byed pa la ma byang ba'i phyir brjod par bya ba yod na yang de'i blor mi 'gyur ro//yang gal te rjod par byed pa ni brjod par bya ba'i blo 'gyur ro zhe na/ 'gal ba'i phyir na brjod la min te/ rjod par byed pa dang / brjod par bya ba mtshan nyid gzhan yin pa'i phyir 'gal ba nyid do/ /rjod par byed pa dang / brjod par bya ba dag/de phyir thams cad brjod du med/ /ces bya ba ste/ rjod par byed pa dang / brjod par bya ba dag rgyu de'i phyir brjod du med do zhes bya ba'i tha tshig go/ /yang rnam par mi rtog pa'i ye shes de gang gi rten yin zhe na/ rnam par mi rtog ye shes de/ byang chub sems dpa'i de rjes la/ /thob par bya ba'i rten yin te//gang rnam par mi rtog pa'i ye shes kyi rjes la byang chub sems dpa'i spyod pa thob par 'gyur bas de'i phyir ye shes de'i rten du 'gyur ro/ /de ni 'phel bar 'gyur ro zhes bya ba ste/ de'i phyir de lta bu'i byang chub sems dpa'i spyod pa 'phel bar 'gyur ba'i phyir yang rnam par mi rtog pa'i ye shes ni rten du 'gyur ro//yang de'i grogs gang yin zhe na/ byang chub sems dpa' rnams kyi shes/ /rnam par rtog pa med pa'i grogs/ /lam gnyis su ni brjod pa de / /pha rol phyin lnga'i rang bzhin no/ /de la lam gnyis ni tshogs kyi lam dang / /rten gyi lam mo/ / de la tshogs kyi lam ni sbyin pa dang / tshul khrims dang / bzod pa dang / brtson 'grus kyi pha rol tu phyin pa'o/ /rten gyi lam ni bsam gtan gyis pha rol tu phyin pa ste/ gang gi phyir sngar bstan pa'i pha rol tu phyin pa las yang dag par byung ba'i dge ba'i rtsa ba dang / bsam gtan la brten nas rnam par mi rtog pa'i ye shes shes rab kyi pha rol tu phyin pa zhes bya ba de 'byung bar 'gyur bas so//sangs rgyas nyid ma thob kyi bar du rnam par mi rtog pa'i ye shes des rnam par smin pa gang sgrub par 'gyur zhe na/ byang chub sems dpa' rnams kyi shes/ /rnam rtog med pa'i rnam smin ni/sangs rgyas dkyil 'khor gnyis su ste/ /sangs rgyas rnams kyi dkyil 'khor gnyis ni longs spyod rdzogs pa'i dkyil 'khor dang / sprul pa'i dkyil 'khor te/ gang gi tshe gang gis rnam par mi rtog pa'i sbyor ba la zhugs pa'i rnam par smin pa ni sprul pa'o//rnam par mi rtog pa'i don thob pa de'i rnam par smin pa ni longs spyod rdzogs par 'gyur ro/ /de dag nyid kyi don bstan pa ni/ sbyor ba dang ni thob pas so/ /zhes bya ba yin no/ /ye shes de'i rgyu mthun pa gang yin zhe na/ byang chub sems dpa' rnams kyi shes/ /rnam rtog med pa'i rgyu mthun ni//phyi ma phyi ma'i tshe rnams su/ /zhes bya ba ste/ bshad ma thag pa'i dkyil 'khor gnyis po dag phyi ma phyi ma'i tshe la rnam par rtog pa med pa'i rgyu mthun pas/ khyad par du mi 'gro bar 'dod/ /ces bya ba ste/ gang rnam par mi rtog pa'i ye shes bye brag tu gyur pa de nyid de'i rgyu mthun par blta bar bya'o//de ji ltar nges par 'byung bar 'gyur zhe na/ de la/ byang chub sems dpa' rnams kyi shes/ /rnam rtog med pa'i nges 'byung ni/ /zhes bya ba la/ /mthar thug par 'gro ba ni nges par 'byung ba ste/ mya ngan las 'das pa zhes bya ba'i tha tshig go/ /thob pa dang ni grub phyir ro//zhes bya ba la/ ye shes de dang po thob pa dang ldan par 'gyur ro/ /de nas bskal pa brgya stong du ma na grub pa dang ldan par 'gyur ro/ /sa bcu dag tu shes bya ste/ /zhes bya ba la/ dang po nas brtsams nas rim pa 'di nyid kyis sa dang po la ni thob pa tsam du 'gyur ro/ /dus phyis ni chen po nyid du 'grub par 'gyur te/de'i phyir 'di ltar bskal pa grangs med pa gsum gyis mya ngan las 'das par 'gyur te/ 'di ltar byang chub sems dpa' rnams kyis de srid kyis rnam par mi rtog pa'i mthar nges par 'byung bar 'gyur ro/ /mthar thug par 'gro ba gang yin zhe na/ 'di ltar bshad ma thag pa'i rim pa 'di nyid kyis thob par gyur pa ni mthar thug pa ste/byang chub sems dpa' rnams kyi shes/ rnam rtog med pa'i mthar thug pa/ /dag pa'i sku gsum thob phyir dang / /zhes bya ba'i don te/ dag pa smos pa ni 'dir 'di ltar sku gsum po sa dang po nyid du thob pa yin la/ bcu pa la ni shin tu rnam par dag par 'gyur ro/ /dbang gi mchog ni thob phyir ro/ /zhes bya ba ni dag pa'i sku gsum 'ba' zhig thob pas mthar thug par 'gro ba ma yin gyi/ gang yang ye shes rnam par mi rtog pa dang / 'chad par 'gyur ba'i dbang bcu po de dag thob pas kyang yin par blta bar bya'o/ /rnam par mi rtog pa de'i phan yon gang yin zhe na/de la re zhig rnam par mi rtog pa ni rnam pa gsum ste/ sbyor ba las byung ba'i rnam par mi rtog pa dang rtsa ba ste/ gang rnam par mi rtog pa nyid dang / rnam par mi rtog pa'i rjes las thob pa'o/ /de las sbyor ba las byung ba'i rnam par mi rtog pa nyid ni gang byang chub sems dpa' des dang por pha rol po las rnam par mi rtog pa thob pa la de nas bdag nyid kyis rigs pas dpyad nas lhag par mos par byed cing /lhag par mos pa de la brten nas gang nges par zhugs pa'i rnam par mi rtog pa de ni/ sbyor ba las byung ba'i rnam par mi rtog pa zhes bya bas/ de lta bu nyid ni rnam par mi rtog pa nyid du 'gyur ro//sbyor ba las byung ba de'i phan yon gang zhe na/ rnam rtog med pa'i ye shes de/ /gos pa med de nam mkha' bzhin/ /gang gis ma gos she na/ de bstan pa/ sdig pa sna tshogs drag rnams kyis so/ /rgyu gang gis ma gos pa de bstan pa/ dad pa tsam dang mos pa yis//zhes bya ba la/ dad pa tsam dang / gang rnam par mi rtog pa la lhag par mos pa de ni de'i phyir ngan 'gror 'gro ba'i gnyen po nyid yin zhing / sgrib pa spangs par gyur pas mi gos pa'o/ /rtsa ba rnam par mi rtog pa'i phan yon yang / gos pa med de nam mkha' bzhin/ gang zhe na/ rnam rtog med pa'i ye shes de// gang gis she na/ sgrib pa kun las so/ /ji ltar zhe na/ thob pa dang grub pa dang ldan pas na/ /zhes bya ba ste/ sa rnams thob pa dang ldan pa dang / grub pa dang ldan pa'i phyir ro/ /'dis ni sgrib pa de'i gnyen po nyid bstan par 'gyur ro/ /rnam par mi rtog pa'i rjes las thob pa'i phan yon ji lta bu yin zhe na/de yang / rnam rtog med pa'i ye shes de/ /gos pa med de nam mkha' bzhin/ /'jig rten dag na rnam rgyu yang / /'jig rten chos kyis rtag mi gos/ /zhes bya ba la/ ye shes de nyid kyis ni sems can gyi don mthong nas srid pa dag tu yang skye bar 'gyur la/de 'jig rten du skyes par gyur na yang de la 'jig rten gyi chos kyis ni mi gos te/ 'jig rten gyi chos ni rnyed pa dang ma rnyed pa dang / grags pa dang / ma grags pa dang / bstod pa dang / smad pa dang / bde ba dang / sdug bsngal zhes bya'o/ /de yang rnam par mi rtog pa nyid yin te/rnam par mi rtog pa'i ye shes las de byung ba'i phyir ro/ /gang ye shes gsum po de dag nyid kyi bye brag ni ji ltar de dag bstan pa bzhin du de yang bstan par bya'o/ /ji ltar lkugs pas don ni myong 'dod ltar te/ brjod pa med pa ltar sbyor ba las byung ba'i rnam par mi rtog pa ni de bzhin no//ji ltar lkugs pas don myong dang ste brjod pa med pa de lta bu ni dngos gzhi rnam par mi rtog pa'o/ /ma lkugs pas ni don myong ltar te/ brjod pa ltar de bzhin du rnam par mi rtog pa'i rjes las thob pa'i rnam par mi rtog pa blta bar bya'o/ /'dir brjod pa ni yi ge brjod pa yin par bzhed do//rmongs pas don ni myong 'dod dang / /zhes bya ba la/ 'dir tha snyad la ma byang ba ni rmongs pa yin par bzhed do/ /rmongs pa 'di dag kyang ye shes gsum dang dpe yang lkugs pa bzhin du sbyar bar bya'o/ /lnga pos don ni myong 'dod dang / /zhes bya ba la/ lnga smos pas ni rtog pa med pa'i mig la sogs pa rnams bsdu bar blta bar bya'o//de dag gi 'dod pa dang myong ba zhes bya ba ni thams cad lkugs pa bzhin du ye shes gsum dang sbyar ba'o / /yid kyis don ni myong ba ltar/ /zhes bya ba la/ ji ltar yid kyis don la rnam par rtog cing nyams su myong ba ltar de'i rjes las thob pas nyams su myong ba yang de bzhin te/rnam par rtog par byed do zhes bya ba'i tha tshig go/ /bstan bcos ma shes pas bstan bcos 'dod pa lta bu ni sbyor ba las byung ba'o/ /ji ltar bstan bcos de'i chos dang don myong ba lta bu ni rnam par mi rtog pa'o/ / 'dir chos ni yi ge tsam du bzhed do/ /ji ltar bstan bcos shes pas chos dang don myong ba de lta bur ni de'i rjes las thob par blta bar bya'o/ /go rims smos pa ni 'dir chos dang don dang ye shes gnyis bstan pa yin no/ /mi zhig mig ni btsums pa ltar/ /zhes bya ba la sogs pa'i tshigs su bcad pa ni rnam par mi rtog pa dang /de'i rjes las thob pa gnyis po de dag gi bye brag bstan to/ /nam mkha' bzhin du zhes bya ba ni/ ji ltar nam mkha' khyab pa dang / ma gos pa dang / mi rtog pa dang / brtag par bya ba ma yin pa de bzhin du rnam par mi rtog pa'i ye shes kyang chos thams cad la ro gcig pa stong pa nyid kyis khyab pas na khyab pa'o//chos thams cad kyis ma gos pas na gos pa med pa'o/ /rang nyid kyis rnam par mi rtog pas na rnam par rtog pa med pa'o/ /gzhan gyis brtag par bya ba ma yin pa nyid kyis rnam par brtag par bya ba ma yin pa ste/ rnam par mi rtog pa'i ye shes ni de ltar blta bar bya'o//de la gzugs ni snang ba ltar/ /de yi rjes thob shes de 'dra/ /ji ltar nam mkha' la gzugs kyi snang ba rnam par brtags pa ltar/ de bzhin du de'i rjes las thob pa'i ye shes blta bar bya ste/ rnam par brtag par bya ba la rnam par rtog pa med pa zhes bya ba'i tha tshig go/ /yang gal te de lta bu'i rnam par mi rtog pa'i ye shes kyis rab tu bsgos pa'i sangs rgyas nyid des sems can gyi rnam par rtog pa med pa de bzhin du/de'i sems can gyi don mdzad pa yang rnam par rtog pa med par ji ltar 'gyur zhe na/ de tshigs su bcad pas nor bu dang sil snyan gyi dpes bstan pa/ ji ltar nor bu sil snyan dag /ces bya ba la/ ji ltar yid bzhin gyi nor bu rnam par rtog pa med pa bzhin du yang sems can rnams kyi 'dod pa'i don gyi las byed pa dang / lha rdzas kyi sil snyan rnams ma brdungs par yang der skyes pa'i sems can rnams kyi 'dod pa bzhin du sgra 'byung bar 'gyur ba ltar/ sangs rgyas rnams kyang rnam par rtog pa mi mnga' bzhin du yang phrin las rnam pa sna tshogs 'byung bar 'gyur ro zhes bya ba'o//rnam par mi rtog pa'i zab pa nyid brjod par bya ste/ ci ye shes de gzhan gyi dbang zhes brjod pa'i rnam par brtag par bya ba'i dngos po la 'jug gam/ 'on te gzhan zhig la dmigs des cir 'gyur/gal te rnam par brtag par bya ba la dmigs na ni de'i rnam par mi rtog pa nyid mi dmigs so/ /gzhan la mi dmigs so zhe na/ de'i dmigs pa gzhan ni med pa nyid kyi phyir/ de la ma yin gzhan la min/ /zhes bya ste/ de la re zhig de la ni ma yin te/rnam par brtag par bya ba la dmigs pa ni mi 'gyur te/ rnam par mi rtog pa yin pa'i phyir ro/ /gzhan la yang ma yin te/ gang gi phyir gzhan gyi dbang zhes brjod pa'i chos de nyid kyi chos nyid la dmigs pa'i phyir te/ de'i chos nyid dang chos de dag ni gcig pa nyid dang gzhen pa nyid du brjod par bya ba ma yin pa nyid do//de'i phyir rnam par brtag par bya ba la dmigs pa'am/ gzhan la dmigs pa yin zhes brjod par mi bya'o/ /gzhan yang de shes pa yin nam/ yang na ma yin/ des cir 'gyur/ gal te shes pa yin na ni de ji ltar rtogs med par 'gyur/'on te mi shes pa'i ngo bo yin na ni ji ltar na ye shes rnam par mi rtog pa zhes brjod par bya zhe na/ shes dang mi shes pa ma yin/ /zhes bya bas bstan te/ re zhig de shes pa ni ma yin te/ 'di ltar sbyor ba las byung ba'i rnam par rtog pa dang bcas pa'i ye shes kyi ngo bo ltar mi 'jug pas so//de mi shes pa yang ma yin te/ gang gi phyir sbyor ba las byung ba rnam par rtog pa dang bcas pa'i ye shes rgyur gyur pa las de byung ba'i phyir ro/ /de la ma yin gzhan la min/ /shes dang mi shes pa ma yin/ /zhes bya ba'i don gzhan yang gang gi phyir rnam par rtog pa 'jug pa de la yang ma yin te/des na shes pa yang ma yin no/ /gang gi phyir chos nyid la 'jug pas de las gzhan pa yang ma yin te/ des na mi shes pa ma yin no/ /de ni snga ma phyi mas bshad par gyur pa ma yin no/ /shes bya dang ni khyad med pa'i/ /shes gang de ni mi rtog nyid/ /ces bya ba la/ gang gzung ba dang 'dzin pa'i ngo bor 'jug pa'i sbyor ba las byung ba lta bu ni rnam par mi rtog pa ma yin gyi/gang yang gzung ba dang shes bya tha mi dad par 'jug pas mnyam pa nyid du 'jug pa de ni rnam par mi rtog pa nyid do/ /ye shes de ni gzung ba dang 'dzin pa'i ngo bo la mi gnas pa nyid do/ /gang yang bcom ldan 'das kyis mdo gzhan las/chos thams cad rnam par rtog pa med pa'o zhes gsungs pa de bstan par bya ba'i phyir/ chos rnams thams cad rang bzhin gyis/ /rnam rtog med pa zhes bya ba la/ chos thams cad ni rang bzhin gyis rnam par rtog pa med pa'o zhes bya ba'i tha tshig go//gang gi phyir zhe na/ rnam par brtag bya med pas na/ /zhes bya ba ste/ gang gi phyir brtag par bya ba'i dngos po med pas so/ /gang yang de ltar rnam par brtag par bya ba med pas rang bzhin gyis chos rnams rnam par mi rtog pa nyid yin pa de'i phyir des na sems can thams cad gang gi phyir thar par mi 'gyur zhe na/'di ltar/ shes gang de ni mi rtog nyid/ /ces bya bas chos thams cad rang bzhin gyis rnam par rtog pa med pa nyid yin na yang sems can la thar pa med par bstan pa ni gang yang rnam par rtog pa mi brten pa nyid yod pa'i phyir ro/ /des chos thams cad rang bzhin gyis rnam par mi rtog pa nyid yin na yang /gal te der rtogs pa'i ye shes skyes par gyur na des mngon sum du mthong bar 'gyur la/ de ni rnam par mi rtog pa nyid do/ /des kyang grol bar 'gyur te skyes par ma gyur na ni grol bar mi 'gyur ro zhes bya ba'i tha tshig go/ /de'i phyir ye shes de ni rnam par mi rtog pa'o/ /ye shes gsum pa de rnams kyi rab tu dbye ba bstan par bya ba'i phyir rgyu dang 'phen pa dang /goms pa las byung bas rab tu dbye ba'i phyir ro zhes bya ba ste/ de la rnam par mi rtog pa'i sbyor ba las byung ba ni rnam pa gsum ste/ 'di ltar kha cig ni rigs kyi stobs las/ kha cig ni 'phen pa'i stobs las/kha cig ni da ltar gyi dus su goms pa'i stobs las 'byung bar 'gyur ro/ /de la rigs kyi stobs las ni der rgyur gyur pa las 'byung bar 'gyur ba nyid do/ /de 'phen pa'i stobs las ni de skye ba snga ma la goms par byas pa'i rgyu nyid las 'byung bar 'gyur ro/ /gang goms pa'i stobs las da ltar gyi skye ba nyid la skyes bu byed pa'i stobs kyi rgyu las de 'byung bar 'gyur ba'o//chos shes pa dang / phyin ci ma log pa dang / spros pa med pas rnam par mi rtog pa'i phyir ro zhes bya ba la/ de la chog shes pas rnam par mi rtog pa ni thos pa dang bsams pa las byung ba'i mthar phyin pa yin par blta bar bya ste/chog shes pa las rnam par mi rtog pa ni chog shes pas rnam par mi rtog pa'o zhes de ltar byas nas thos pa'am bsams pa gang gis blo gang gi mthar phyin par gyur pa de ni so so'i skye bo'i sa la gnas pa'i byang chub sems dpa'i chog shes pa 'byung bar 'gyur ba ste/de ni re zhig 'di tsam mo zhes de ltar byas pa'i don 'dis chog shes pa'i rnam par mi rtog pa'o/ /don gzhan yang 'jig rten pa'i chog shes pa'i rnam par mi rtog par blta bar bya ste/ gang srid pa'i rtse mor phyin par gyur pa de ni mya ngan las 'da' bar blta bas de'i pha rol na rtogs par bya ba gzhan med do zhes chog shes pa 'byung bar 'gyur ba'o//phyin ci ma log pa'i rnam par rtog pa ni nyan thos la sogs pa rnams kyi yin par blta bar bya ste/ gang gi phyir de dag rnams kyi de kho na nyid rab tu rtogs pa'i ye shes de ni mi rtag pa la sogs pa'i phyin ci ma log pa rnam pa bzhi las de rtag pa la sogs pa'i rnam pa phyin ci log tu rnam par mi rtog pa'i phyir ro//yang spros pa med pas rnam par mi rtog pa ni byang chub sems dpa' rnams kyi yin par blta bar bya ste/ gang gi phyir chos thams cad nas byang chub kyi bar la yang spros pa med par rnam par mi rtog pa nyid kyi phyir rnam par rtog par mi byed do//yang spros pa med pa ni gang gi yul las yang dag par 'das pa dang / 'jig rten pa'i shes pa'i yul las yang dag par 'das pa yin par rig par bya ste/ gang gi phyir tshig gis bstan par mi nus pa dang / 'jig rten pa'i shes pas shes par mi nus pa'i phyir ro//yang rnam par mi rtog pa'i rjes las thob pa de yang rab tu dbye ba rnam pa lngar blta bar bya ba yin pas rtogs pa dang / rjes su dran pa dang / rnam par gzhag pa dang / 'dres pa dang / 'byor pa la dpyod pa tha dad pa'i phyir ro zhes bya ba la/ de yang rtogs pa la dpyod pa dang / rjes su dran pa la dpyod pa dang / rnam par gzhag pa la dpyod pa dang / 'dres pa la dpyod pa dang / 'byor pa la dpyod pa zhes bya ba ste rab tu dbye ba rnam pa lnga yin no/ /de la rtogs pa la dpyod pa ni/ gang rtogs pa'i dus nyid na bdag gis 'di ltar rtogs so zhes dpyod pa ste/khong du chud pa ni 'dir dpyod pa yin par 'dod do/ /rjes su dran pa la dpyod pa ni gang langs pa na bdag gis rnam par mi rtog pa rtogs so zhes dran pa'o/ /rnam par gzhag pa la dpyod pa ni gang pha rol la bdag gis rtogs pa de ston par byed pa'o/ / 'dres pa la dpyod pa ni gang chos thams cad 'dres shing bsdus pa la dmigs pa'i ye shes kyis mthong ba ste/ 'di ltar rten gnas gyur pa nyid do/ /rten gnas gyur pa de nyid las ni 'byor pa la dpyod par 'gyur te/ gang ci bsams pa de thams cad 'byor par 'gyur ro/ /de yang ji ltar sa la sogs pa yang de ltar brtags na gzhan gser la sogs par 'gyur ba'o//yang de ni brtags pas 'byor par 'gyur bas na 'byor pa la dpyod pa ste / ji ltar dpyod pa de bzhin du 'byor par 'gyur ba'o/ /rnam par mi rtog pa'i rnam par gzhag pa bstan zin to/ /sgrub par byed pa ma bstan pas de ston par byed pa'i tshigs su bcad pa ni/yi dwags dud 'gro mi rnams dang / /lha rnams ji ltar 'os 'os su/ /zhes bya ba ste/ dud 'gro rnams kyis chu la/ yi dwags rnams kyis thang du dang / mi rnams kyis mi gtsang ba dang / dud 'gro phag la sogs pas gtsang bar mthong ba dang / mi rnams la zas de dag gtsang ba la/lha rnams la de dag mi gtsang ba de ltar byas nas/ dngos gcig yid ni tha dad par mthong bas na don rnams grub pa med par 'dod par bya'o/ /de la bden pa nyid du ma grub pas don gang yang yod pa ma yin te/ des na rnam par shes pa dmigs pa med pa nyid du 'gyur ba yin no/ /de'i phyir 'di ni dmigs pa med pa yin te/'di'i dmigs pa ni rmi lam ji lta ba bzhin no/ /ji ltar 'das pa dang ma 'ongs pa la de dmigs pa dang / ji ltar me long dang / ting nge 'dzin gyi spyod yul lta bu yin pas de tshigs su bcad pas ston pa ni/ 'das sogs de bzhin rmi lam dang / /zhes bya ba la sogs pa ste/de yang phyed snga mas phyi ma dang go rims ji lta ba bzhin du blta bar bya'o/ /'di ltar yod pa ma yin pa'i dmigs pa ni/ dmigs pa yod pa ma yin pa'i phyir te/ dmigs pa med pa nyid do/ /de nyid la dmigs pa ni de la dmigs pa ste/ rang gi gzugs brnyan la dmigs pa nyid do zhes bya ba'i tha tshig go//de yang 'das pa dang / ma 'ongs pa dang / rmi lam dang / gzugs brnyan dag go rims bzhin du sbyar bar bya'o/ /don ni don du grub na ni/ /ye shes rtog pa med mi 'gyur/ /zhes bya ba la/ gal te don gyi ngo bo nyid du yod na ni des na rnam par mi rtog pa'i ye shes med par 'gyur ro//'on te de med pa'i ngo bo nyid ni 'dod pa yin no zhe na/ des na rnam par mi rtog pa de med pas na sangs rgyas nyid kyang 'thob par mi 'gyur ro/ /des na nges par 'di ltar 'dod par bya ba yin pas/ byang chub sems dpa' dbang thob dang / / zhes bya ba ste/ dbang thob par gyur pa zhes bya ba'i tha tshig go/ /mos dbang gis zhes bya ba ni bsam pa'i dbang gis de lta bu med pa'i sa la sogs pa dag 'di ltar gser la sogs pa'i rang bzhin du 'gyur ba zhes bya ba'i tha tshig go/ /bsam gtan pa'i zhes bya ba ni nyan thos la sogs pa gzhan gyi yang ngo //'di la rnam par 'byed grub pa/ /zhes bya ba ni lhag mthong grub pa zhes bya ba'i tha tshig go/ /blo ldan zhes bya ba ni byang chub sems dpa'o/ /zhi ba thob pa zhes bya ba ni ting nge 'dzin thob pa zhes bya ba'i don te nang gi bdag nyid kyi'o/ /chos kun yid la byed pa la/ /de ltar don du snang phyir ro/ /zhes bya ba la 'di ltar ji lta ji ltar mdo sde la sogs pa'i chos rnams kyi don yid la byed pa na de la de lta de lta bur snang bar 'gyur te/gal te sangs rgyas nyid yin no zhes chos de dang de dag yid la byed pa na sangs rgyas kyi don du snang bar 'gyur ro/ /de bzhin du gzugs dang tshor ba la sogs pa yang de bzhin no//ye shes rgyu ba rtog med la/ /don rnams thams cad mi snang phyir/ /zhes bya ba la/ rnam par rtog pa med pa'i ye shes kyi rgyu ba 'jug pa la 'di ltar don thams cad snang bar mi 'gyur ro/ /de'i phyir/ don med khong du chud par bya ste/ des na gal te don med pa yin na rnam par rig pa yang med par 'gyur ro//ji ltar zhe na/ rnam par rig pa med pa bstan par bya ba'i phyir/ don med pas na rnam rig med/ /ces bya ba la/ rnam par rig par bya ba'i don med na / rnam par rig pa yang rigs par mi 'gyur bas de med par blta bar bya'o/ /don 'di ni shes bya'i mtshan nyid du go sla bar phye zin to//de lta bu'i rnam par mi rtog pa'i ye shes gang yin pa de ni shes rab kyi pha rol tu phyin pa yin te/ gang gi phyir de ni shes rab kyi pha rol tu phyin pa la mi gnas pa'i tshul gyis gnas nas zhes bya ba la sogs pa 'byung bas so/ /de dag nyid kyi don gsal bar bya bar 'dod nas gzhung 'di dag gis bstan te/ji ltar mi gnas pa'i tshul gyis gnas nas pha rol tu phyin pa rnams bsgom pa yongs su rdzogs par byed ce na/ mu stegs can gyi ngar 'dzin pa'i gnas yongs su spong ba dang zhes bya ba la mu stegs can shes rab la gnas nas nga rgyal dang bcas par 'gyur te/ bdag ni shes rab la gnas pa/bdag gi shes rab ni 'di lta bu zhes mu stegs kyi gnas pa'i rnam par rtog pa spong ba'i phyir shes rab kyis gnas pa med pa'i tshul gyis gnas par 'gyur ro/ /de kho na ma mthong ba'i byang chub sems dpa'i rnam par rtog pa gnas yongs su spong ba dang zhes bya ba la/ ji ltar de kho na ma mthong ba'i byang chub sems dpa' rnams shes rab kyi pha rol tu phyin pa rnam par brtag par bya ba med pa la 'di ni shes rab kyi pha rol tu phyin pa'o zhes rnam par rtog par byed pa des na mi gnas pa'i tshul gyis de bzhin du rnam par rtog par mi byed do//'khor ba dang mya ngan las 'das pa'i mtha' gnyis kyi gnas yongs su spong ba dang zhes bya ba la/ji ltar 'jig rten pa 'khor ba'i mtha' la gnas pa dang / nyan thos mya ngan las 'das pa'i mtha' la gnas pa de bzhin du byang chub sems dpa' gnas pa ma yin te/ de ltar na mi gnas pas gnas pa ni ji ltar rigs pa nyid du blta bar bya'o//nyon mongs pa'i sgrib pa spangs pa tsam gyis chog par 'dzin pa'i gnas yongs su spong ba dang zhes bya ba la/ ji ltar nyan thos rnams nyon mongs pa'i sgrib pa spangs pa tsam gyis chog par 'dzin pa de bzhin du byang chub sems dpa' ni ma yin te/ de'i phyir na dgongs pa 'dir byang chub sems dpa' rnams mi gnas pa'i tshul gyis gnas par rig par bya'o//sems can gyi don la mi lta ba phung po lhag ma med pa'i mya ngan las 'das pa'i dbyings kyi gnas yongs su spong ba zhes bya ba la/ ji ltar nyan thos rnams sems can gyi don la ltos pa med par phung po dag pa dang ma dag pa ni rten nyid yin no//de dag ni kham gyi zas por ba reg pa dang / yid la sems pa dang / rnam par shes pa'i zas gsum gyis de'i rten gnas par byed par 'gyur te/ de'i phyir de'i rten gnas par byed pa ni gsum yin no/ /dag pa'i rten gnas par byed pa ni kham gyi zas la sogs pa bzhi po de dag nyid yin te/nyan thos la sogs pa de dag gi rten yang dag pa rnams 'di ltar gnas par byed pa'i phyir ro/ /gnas par ston pa yang bzhi po de dag nyid de/ de yang gnas pa ltar ston pa'i zas ni sangs rgyas rnams kyi ste bzhi pa'o//'di ltar sangs rgyas bcom ldan 'das rnams des ston pa ltar ston te/ sems can sbyin pa po rnams des rab tu mgu bar bya ba'i phyir dang / bsod nams bsags pa'i don du yin gyi yang de dag gi zas kyi bya ba mdzad par mi 'gyur te/ zas de dag bzhes pa'i dus su sangs rgyas las lha rnams kyis blangs nas gzhan sems can rnams la sbyin par byed de/de dag kyang rgyu des byang chub thob par 'gyur ro/ /de dag thams cad kyang zab pa gcig nyid du rig par bya'o/ /de lta mod kyi sangs rgyas kyi skye ba med pa dang skye ba'i mtshan nyid ni rnam pa bcur rig par bya ste/ kun tu rmongs pa rnam par sel ba nyid dang / tha dad pa rnam par sel ba nyid dang / len pa la rang dbang nyid dang / gnas pa la rang dbang nyid dang / gtong pa la rang dbang nyid dang / gnyis su med pa'i mtshan nyid dang / snang ba tsam nyid dang / sgyu ma lta bu nyid dang / mi gnas par rab tu gnas pa nyid dang /don chen po sgrub pa nyid do/ /rnam pa bcus de bzhin gshegs pa rnams 'khor ba dang mya ngan las 'das pa la rab tu mi gnas par rig par bya ste/ lags par yongs su shes pa nyid dang / legs par spangs pa nyid dang / dngos po med pa shes pa nyid dang / dngos po med pa'i ngo bo nyid shes pa nyid dang /mi dmigs shing mi rtog pa nyid dang / sems yongs su spangs pa nyid dang / sems so sor thob pa nyid dang / sems mnyam pa nyid dang / dngos po la mi dmigs pa nyid dang / dmigs pa la dmigs pa nyid do/ /sangs rgyas rnams kyis sangs rgyas kyi mdzad pa lhun gyis grub pa yang rnam pa bcus 'grub ste rab tu spangs pa nyid dang /bya ba la lhun gyis grub pa nyid dang / byed pa lhun gyis grub pa nyid dang / las lhun gyis grub pa nyid dang // med pa lhun gyis grub pa nyid dang / yod pa lhun gyis grub pa nyid dang / snga ma las khyad pa nyid dang / bya ba mthar phyin pa nyid dang /bya ba mthar ma phyin pa nyid do/ /rnam pa bcus na sangs rgyas zas kyis zas kyi bya ba mi mdzad kyang sku zas kyis gnas par ston te/ sems can rnams kyi bsod nams bsags pa'i phyir dang / chos mthun pa nyid du yang dag par bstan pa'i phyir dang / rigs pa la longs spyad par rjes su bslab par bya ba'i phyir dang /chags pa med par bslab par bya ba'i phyir dang / mchod pa nye bar bsdu ba'i phyir dang / brtson 'grus brtsams pa yang dag par shes par bya ba'i phyir dang / dge ba'i rtsa ba yongs su smin par bya ba'i phyir dang / bdag nyid chags pa med par bstan par bya ba'i phyir dang /las la gus pa nye bar bstan par bya ba'i phyir dang / smon lam 'byung ba yongs su rdzogs par bya ba'i phyir ro/ /de la gang 'og nas brjod par bya ba rnam par gnas pa dang / grangs dang phrin las zab pa nyid tshigs su bcad pas bstan pa/ tha dad med cing dpag tu med/ /ces bya ba ste/rnam par gnas pa zab pa yin no/ /de la tha dad med ces bya ba ni chos kyi sku la dbye ba med pa'o/ /dpag tu med pa ni rten du ma las mngon par byang chub pas so/ /phrin las dpag tu med cing gcig /ces bya ba ni grangs zab pa nyid de/ gang gi phyir sangs rgyas rnams du ma nyid yin na yang phrin las ni gcig pa nyid yin no//mi brtan brtan pa'i phrin las can/ /sangs rgyas rnams ni sku gsum ldan/ /zhes bya ba la/ sangs rgyas rnams sku gsum dang ldan pas longs spyod rdzogs pa'i phrin las ni brtan pa yin la/ sprul pa'i phrin las ni mi brtan pa yin te/ de lta bu dag ni phrin las zab pa nyid yin no//mngon par rdzogs par byang chub pa zab pa nyid tshigs su bcad pas bstan pa ni/ gang yang mngon rdzogs sangs rgyas med/ /ces bya ba ni/ gang zag dang chos dngos po med pa'i phyir ro/ /thams cad sangs rgyas ma yin min/ /zhes bya ba ni 'di ltar gdags pa ni yang sangs rgyas thams cad mngon par rdzogs par sangs rgyas pa yin no//de'i mngon par rdzogs pa ji lta bu zhe na/ skad cig re la dpag tu med/ /ces bya bas bstan te/ gang gi phyir skad cig re re la yang dpag tu med pa mngon par rdzogs par 'tshang rgya bar 'gyur bas so/ /dngos po'i dngos med rab tu phye/ / zhes bya ba ni 'dir de bzhin nyid ni dngos po'i dngos po med pa ste/ des rab tu phye ba ni sangs rgyas yin no zhes bya ba'i tha tshig go/ /'dod chags dang bral ba zab pa nyid bstan par bya ba'i phyir/ chags pa ma yin mi chags min/ /zhes bya ba gsungs te/ 'dod chags med pas chags pa ma yin la/chags pa med pa nyid kyis na yang mi chags pa yang ma yin te/ 'di ltar chags pa yod na mi chags pa yang rigs pa'i phyir ro/ /'dod chags nyid kyis byung ba yin/ /zhes bya ba ni gang gi phyir 'dod chags kyi kun nas dkris pa spangs pas 'dod chags kyi bag la nyal dag ma bzung ba'i phyir gang 'di ma bzung ba nyid kyis des na nyan thos bzhin du mya ngan las 'da' bar 'gyur bas so//'dod chags 'dod chags min mkhyen nas/ /'dod chags chos nyid la yang zhugs/ /zhes bya ba ni kun tu brtags pa'i 'dod chags ni 'dod chags ma yin no zhes rnam par shes nas/'dod chags kyi de bzhin nyid la zhugs so zhes bya ba'i tha tshig go/ /phung po spangs pa zab pa nyid ston pa'i tshigs su bcad pa ni/ sangs rgyas phung po rnams las 'das/ /phung po rnams la'ang rnam par bzhugs/ /zhes bya ba ste/ nye bar len pa'i phung po lnga po gzugs la sogs pa las shin tu 'das nas de dag mi dmigs pa'i chos nyid kyi phung po la rab tu gnas pa'o//de las gzhan min gzhan min min/ /zhes bya ba ni/ kun tu brtags pa'i phung po de dag spangs pa las de gzhan ma yin te/ gang gi phyir de dag nyid kyi chos nyid gang yin pa de la gnas pa'i phyir ro//yang gzhan ma yin pa yang ma yin te/ gang gcig nyid yin na yang kun tu brtags pa rnam par dag pa la dmigs pa dang ldan pa'i phyir ro/ /de ma btang bas legs par 'das/ /zhes bya ba ni de dag gis yongs su grub pa'i phung po ma btang bas legs par 'das so zhes bya ba'i tha tshig go//yongs su smin par mdzad pa ston pa'i tshigs su bcad pa ni/ kun kyang 'dres pa'i phrin las can/ /zhes bya ba ste/ thams cad kyang sems can yongs su smin par mdzad pa'i phrin las mnyam pa nyid yin no/ /ji lta bur zhe na/ rgya mtshor chu 'dra zhes bya ba ste/ ji ltar rgya mtshor 'jug pa'i chu rnams ni nya dang /rus sbal la sogs pa rnams kyi nye bar spyad par 'gyur ro/ /de bzhin du chos kyi dbyings su bzhugs pa de dag kyang / sems can yongs su smin par mdzad pa nye bar 'byung ba mnyam pa nyid yin no/ /byas so byed do bya'o zhes bya ba ni dus gsum du sems can gzhan gyi don la dgongs pa med ces bya ba ste/de lta na yang nor bu dang sil snyan bzhin du sems can thams cad kyi don mdzad par 'jug par 'gyur ba nyid yin no zhes bya ba'i tha tshig go/ /mthong ba zab pa nyid bstan par bya ba'i phyir/ gang / sangs rgyas rtag pa'i sku yin no/ /zhes brjod pa de la rtag pa'i sku nyid yin na 'jig rten gyis mi mthong ba de rgyu gang gis mi mthong zhe na/sems can nyes pas mi snang ste/ /snod chag pa yi zla ba bzhin/ /ji ltar snod chag pa'i nang du chu gnas par mi 'gyur la/ de med na yang der zla ba mthong bar mi 'gyur ro/ /de bzhin du zhi gnas kyi rlan med pa'i sems can gyi rgyud la yang sangs rgyas kyi zla ba mthong bar mi 'gyur te/'dir chu zla lta bu ni ting nge 'dzin yin te/ rlan pa'i bdag nyid yin pa'i phyir ro/ /'jig rten kun la nyi bzhin du/ /de dag chos 'od khyab par mdzad/ /ces bya ba ni/ sangs rgyas rnams ni ma mthong du zin kyang phrin las mdzad pa nyid yin te/ 'di ltar mdo'i sde la sogs pa'i chos bstan pa 'od zer lta bu gang yin pa des/sangs rgyas kyi mdzad pa sems can yongs su smin pa la sogs pa 'jig rten la snang bar mdzad pa nyid yin no/ /mngon par rdzogs par byang chub pa dang / mya ngan las 'das pa kun tu ston pa zab pa nyid ni/ la lar rdzogs par byang chub ston//la lar me bzhin mya ngan 'das/ /zhes bya ba ste/ la lar rdzogs par byang chub pa dang / la lar mya ngan las 'das pa ston pa ni me bzhin du ste/ ji ltar me ni la la na 'bar/ la la na zhi ba de bzhin du sangs rgyas kyang sems can yongs su smin pa kha cig la ni mya ngan las 'das par ston la/yongs su ma smin pa kha cig la ni de yongs su grol bar bya ba'i phyir rdzogs par byang chub par ston te/ mer tha mi dad pa gcig la ji lta ba de bzhin du chos kyi sku gcig la yang de bzhin du blta bar bya'o/ /tshigs su bcad pa lhag ma'i don ni go sla'o/ /bzhugs pa zab pa nyid bstan pa'i phyir/sangs rgyas 'phags min chos rnams dang / /mi dang ngan song ba rnams dang / /tshangs spyod ma yin chos rnams las/ /bdag nyid dang ni bzhugs pa mchog /ces bya ba la/ bdag nyid mchog dang bzhugs pa mchog ste/ 'phags pa la sogs pa'i bzhugs pas bzhugs pa'o//de la 'phags pa'i bzhugs pa ni stong pa nyid la bzhugs pa gang yin pa'o/ /lha'i bzhugs pa ni bsam gtan gyis bzhugs pa'o/ /tshangs pa'i bzhugs pa ni byams pa la sogs pa tshad med pa dag gis bzhugs pa'o/ /de la 'phags min chos rnams zhes bya ba ni mi dge ba ste/des de dag stong pa nyid la bzhugs pas de'i phyir yang 'phags pa'i bzhugs pa'o/ /gang mi dang ngan song ba rnams kyi sems can de dag la dmigs pa'i bsam gtan de ni lha'i bzhugs pa'o/ /tshangs par spyod pa ma yin pa la sogs pa'i chos rnams las mchog kyang yin la bdag nyid kyang yin pas 'di ni bdag nyid mchog ste/stong pa nyid la bzhugs pa de'i bdag nyid do/ /sku kun tu ston pa zab pa nyid ni/ de dag kun tu rnam par dpyod/ /gang du'ang rnam par dpyod mi mnga'/ /zhes bya ba la/ dge ba dang mi dge ba la blo 'jug par 'gyur ba ste/de'i rjes las thob pas de dag yongs su dpyod la/ rnam par mi rtog pas ni gang la yang dpyod par mi byed do/ /don gzhan gnyis pa ni sprul pa'i skus ni thams cad la dpyod par byed la/ sku gzhan gyis ni ma yin no/ /zhes bya ba'o/ /gnas rnams kun na'ang mthong mod kyi/ /zhes bya ba ni sprul pa'i lus de nyid thams cad du mthong bar 'gyur ro zhes bya ba'i tha tshig go//dbang po drug gi spyod yul min/ /zhes bya ba ni sems can dmyal ba la sogs par skyes pas mthong ba'i sprul pa de ni der skyes pa de dag 'dul ba'i phyir yin gyi/ de dag nyid ni sprul pa'i sku'i ngo bo nyid ni ma yin te/dmyal ba de dag gis de mthong ba na 'di yang sems can dmyal ba yin no zhes shes pas yang dmyal ba de dag gis de dbang po drug gi spyod yul du gyur pa ma yin no zhes bya ba'i tha tshig go/ /nyon mongs pa spangs pa zab pa nyid ston pa ni/ nyon mongs thul la spangs pa med//sngags kyis bsad pa'i dug dang 'dra/ /zhes bya ba ste/ byang chub sems dpa'i gnas skabs kyi kun nas dkris pa'i nyon mongs pa thul na yang nyon mongs pa spangs pa ni ma yin te/ de'i bag la nyal yod pa'i phyir ro/ /sngags kyis bsad pa'i dug dang 'dra/ /zhes bya ba ni ji ltar sngags kyis bsad pa'i dug gis ni 'chi bar mi nus pa de bzhin du de dag gis kyang nyon mongs pa yongs su shes pas kun nas nyon mongs par mi byed do zhes bya ba'i tha tshig go//sangs rgyas rnams ni nyon mongs las/ /nyon mongs zad pa kun mkhyen brnyes / /zhes bya ba ni 'di ltar nyon mongs pa'i bag chags bzung ba dang ldan pa ni nyan thos bzhin du mya ngan las 'da' bar mi 'gyur ro zhes bya ba'i tha tshig go//sangs rgyas rnams ni zhes bya ba ni nyon mongs pa zad pa dang bcas pa'i thams cad mkhyen pa nyid brnyes zhes bya ba'i don to/ /bsam gyis mi khyab pa zab pa nyid de bstan par bya ste/ de yang 'di ltar/nyon mongs byang chub yan lag 'gyur/ /zhes bya ba ste/ kun 'byung gi bden pa'o/ /'khor ba'ang zhes bya ba sdug bsngal gyi bden pa ni zhi ba'i bdag nyid do/ /de lta bu thams cad kyis ni de bzhin gshegs pa'i bsam gyis mi khyab pa sngar bstan pa rgyu gsum gyis so sor rang gis rig par bya ba yin par bstan pa yin no//da ni ji ltar sangs rgyas rnams chos kyi skur rjes su dran zhe na/ byang chub sems dpas rnam pa bdun gyis rjes su dran par byed cing de dag gis de bsgom pa nyid do/ /de la chos thams cad la dbang sgyur ba zhes bya ba ni mngon par shes pa dag gis chos thams cad la dbang sgyur ba de dag nyid kyis gnas pa ste/'di ltar 'jig rten gyi khams thams cad du thogs pa med pa'i mngon par shes pa can du sangs rgyas rnams 'gyur gyi/ nyan thos bzhin du thogs pa dang bcas pa ni ma yin no/ /gal te chos thams cad la dbang sgyur ba yin na de ci'i phyir sems can thams cad mya ngan las 'das par mi byed ce na/de tshigs su bcad pas ston par byed de/ rgyu gang gi phyir mya ngan las bzla bar mi nus pa ni/ bsgribs shing rgyu dang mi ldan la / /zhes pa la sogs pa ste/ de la bsgribs shing zhes bya ba ni gang las las la sogs pa'i sgrib pas bsgribs pa sangs rgyas mang pos kyang mya ngan las bzla bar mi nus so//re zhig de dag la rnam pa de lta bur sangs rgyas rnams la yang nus pa mi mnga' ba nyid do/ /rgyu dang mi ldan la zhes bya ba ni yongs su mya ngan las mi 'da' ba'i chos can ni 'dir rgyu dang mi ldan par 'dod de/ gang la de'i rigs med pa'o//nges pa gnyis dang ldan pa'i zhes bya ba la / nges pa gnyis ni las byas par nges pa dang / rnam par smin pa so sor myong bar nges pa yin par rig par bya'o/ /de'i phyir na yang nges pa gnyis po de dag la sangs rgyas rnams la nus pa mi mnga'a'o/ /de la rnam par smin pa'i sgrib pa ni lkugs pa'i dngos po la sogs pa yin par blta bar bya'o//rnam par smin pa so sor myong ba ni yang dmyal ba la sogs pa dag tu nges par 'gro bar 'gyur ba ste/ de ni de dag gi bye brag go/ /sku rtag pa'o zhes bya ba ni dri ma las rnam par grol ba'i de bzhin nyid rgyun mi 'chad pa de ni rtag pa yin la/de ni de bzhin gshegs pa'i sku yin te/ de'i phyir na sku rtag pa'o/ /de bzhin gshegs pa rnams longs spyod chen po mnga' ba'o zhes bya ba ni gang sangs rgyas kyi zhing yongs su dag pa de ni chen po yin la/ de bzhin gshegs pa rnams kyis rjes su longs spyod par mdzad pa yin par rig par bya'o//don chen po'o zhes bya ba'i don chen po nyid ni sangs rgyas rnams kyis sems can yongs su smin par mdzad pa rnams yongs su grol bar mdzad pa dang / ma smin pa rnams smin pa dang / mngon par rdzogs par byang chub pa'i mya ngan las 'da' bar byed pa yin par blta bar bya'o//sangs rgyas rjes su dran pa'i rnam pa lhag ma rnams kyi don ni go sla'o/ /sangs rgyas rjes su dran pa rnam pa bdun po de dag nyid yang tshigs su bcad pa gnyis kyis bstan pa ni/ rang gi sems la rag las dang / /zhes bya ba la sogs pa ste/ de la rnam pa bdun po des ni phun sum tshogs pa bstan te/de la re zhig dang por rang gi sems la rag las pa'o zhes byang chub sems dpa' sangs rgyas kyi phun sum tshogs pa dran par bya'o/ /de yang rtag dang dge ldan te/ /de'i phyir na yang mchog tu kha na ma tho ba med pa'o/ /btsal mi dgos zhes bya ba ni lhun gyis grub par sangs rgyas kyi mdzad pa mdzad pa'o//chos kyi longs spyod chen po ni sangs rgyas kyi zhing yongs su dag par rig par bya'o/ /dbang du ma gyur rab tu rgyu/ /zhes bya ba ni gang sdug bsngal gyi dbang du ma gyur pa yang yin la/ de ni rab tu rgyu ba yang yod de/ sangs rgyas rnams kyi tha snyad ces bya ba'i tha tshig go//de'i phyir 'di ltar/ skye bo mang por de 'dod do/ /zhes bya ba ni skye bo mang po'i don 'dod pas phun sum tshogs pa rjes su dran pa gang yin pa'o/ /gang yang stong phrag brgya pa'i mdo sde'i gleng gzhi las sangs rgyas kyi zhing yongs su dag pa rab tu bstan te/ sangs rgyas kyi zhing yongs su dag pa de'i yon tan phul du byung ba gang yin pa de tshig 'di rnams kyis gsal bar byed de/re zhig kha dog phun sum tshogs pa ni rin po che sna bdun te/ gser dang / dngul dang / bai DUR+Ya dang / mu sa la gar ba dang / rdo'i snying po dang / de smos pas ma rgad la sogs pa yang gzung bar rig par bya ba dang /mu tig dmar po ste/ de yang srog chags dmar po zhig gi nang nas 'byung ste/ de yang thams cad kyi mchog yin te / 'jig rten gyi khams dpag tu med pa rin po che'i rgyal pos kun tu snang bar byed de / bshad ma thag pa'i rin po che rnams las kun tu byung bas so//tshig gcig gis ni dbyibs phun sum tshogs pa'o/ /tshig gcig gis ni tshad phun sum tshogs pa'o/ /tshig gcig gis ni yul phun sum tshogs pa'o/ /ji lta bu'i rgyu las she na/ 'jig rten las 'das pa rnam par mi rtog pa dang / de'i bla ma rjes las thob pa dang / de dag gnyi ga'i dge ba'i rtsa ba las yang dag par byung ba'i dge ba'i rtsa ba ni rgyu yin te/rgyu phun sum tshogs pa de lta bu yang tshig gcig gis so/ /'bras bu phun sum tshogs pa yang tshig gcig gis so/ /shin tu rnam par dag pa'i rigs la gang dbang sgyur ba'i mtshan nyid de ni bdag po phun sum tshogs pa ste tshig gcig gis so//phyogs phun sum tshogs pa ni tshig gcig gis so/ /zham ring ba phun sum tshogs pa yang tshig gcig gis so / /de dag nyid la klu smos pas ni lto 'phye chen po yang gzung bar bya ste/ sbrul chen po bsdu ba'i phyir ro/ /de la nye bar ston par byed pa ni ston pa phun sum tshogs pa yin te/tshig gcig gis bstan to/ /de dag brjod nas phrin las gang yin zhe na/ sems can thams cad kyi don thams cad mdzad pa ste/ phun sum tshogs pa de yang tshig gcig gis so/ /phan 'dogs pa phun sum tshogs pa yang tshig gcig gis te/gang gi phyir der nyon mongs pa yang mi 'byung sdug bsngal yang mi 'byung ba'o/ /gang la dgra med pa de ni 'jigs pa med pa yin te/ bdud bzhi med pa'i phyir ro/ /yang de ni sangs rgyas kyi zhing de na phung po'i bdud yod pa ma yin/ nyon mongs pa'i bdud yod pa ma yin/'chi bdag gi bdud yod pa ma yin na/ lha'i bu'i bdud yod pa ma yin te/ de'i phyir 'jigs pa med pa phun sum tshogs pa zhes bya ba ste/ de yang tshig gcig gis bstan to/ /gnas phun sum tshogs pa yang gcig gis bstan to/ /yang lam gang gis sangs rgyas kyi zhing yongs su dag pa der de 'jug ce na/theg pa chen po thos pa dang / bsams pa dang / bsgoms pa'i shes rab kyis te/ dran pa dang / blo gros dang / rtogs pa chen po dang go rims bzhin du sbyar ro/ /lam phun sum tshogs pa de yang tshig gcig gis bstan to/ /bzhon pa ni zhi gnas dang lhag mthong ste/des 'gro ba yin pa'i phyir ro/ /phun sum tshogs pa de yang gcig gis bstan to/ /sgo gang nas der 'jug ce na/ stong pa nyid dang / mtshan ma med pa dang / smon pa med pa nyid ni sgo phun sum tshogs pa ste/ de yang tshig gcig gis bstan to/ / gzhi phun sum tshogs pa yang tshig gcig gis bstan te/ ji ltar sa gzhi rlung gi dkyil 'khor la rab tu brten cing gnas pa de bzhin du sangs rgyas kyi zhing yongs su dag pa de gang la brten cing gnas she na/ yon tan gyi tshogs tshad med pas brgyan pa'i rin po che'i pad+ma'i rgyal po chen po bkod pa la brten pa na zhes bya'o //yongs su dag pa de'i longs spyod ni shin tu gtsang ba zhes bya ba la/ gang gi phyir de'i gtsang ba nyid ni de na phyi sa la sogs pa mi gtsang ba med pa nyid do/ /shin tu bde ba ni gang tshor ba bde ba 'ba' zhig dang ldan gyi sdug bsngal yang med cing btang snyoms kyang med pa'o//shin tu kha na ma tho ba med pa zhes bya ba ni/ 'di ltar de ni mi dge ba'am/ lung du ma bstan pa med pa'o/ /shin tu dbang sgyur ba zhes bya ba ni/ des rang gi sems la dbang sgyur ba yin pa'i phyir gang rkyen gzhan la ni mi ltos pa'o/ /yang sangs rgyas rnams kyi chos kyi dbyings de ni zhes bya ba ni chos kyi sku'o//de yang phrin las lnga dang ldan par rig par bya'o/ /sems can thams cad kyi gnod pa las yongs su skyong ba'i phrin las can zhes bya ba ni gang gis khams gsum las shin tu 'da' bar byed pa'i lam de 'jig rten la ston pa'o/ /khams gsum ni 'dir 'jig tshogs smos pas bstan pa yin no//tshig lhag ma rnams kyi don ni go sla'o/ /sangs rgyas thams cad phrin las lnga po 'di dag gis phrin las mnyam pa yin par blta bar bya'o/ /'dir don 'di dag gi tshigs su bcad pa ni/ rgyu dang gnas dang bya ba dang ni bsam pa dang / /zhes bya ba la sogs pas ni gang sangs rgyas rnams kyi phrin las mnyam pa nyid de rgyu gang gis yin pa rgyas par bstan to//gang yang 'jig rten pa rnams kyi yul gyi las nyid gang yin pa de ni tshigs su bcad pa 'di dag gis bstan te/ 'jig rten pa rnams kyi rgyu tha dad pa yin pa de'i phyir 'di ltar dmyal ba yang rgyu gzhan las/mi rnams kyang rgyu gzhan las de bzhin du yi dags kyi bar du yang ste/ de'i phyir rgyu tha dad pa des na/ 'jig rten rnams kyi las ni tha dad gyur par 'dod/ gnas tha dad pa nyid ni 'di ltar 'di dag gis gnas tha dad pa ste lus so/ /des na las kyang tha dad do/ /bya ba tha dad pa zhes bya ba ni 'di ltar gzhan dag ni tshong byed/gzhan dag ni gar byed pa la sogs pa'i las tha dad pa dang rab tu ldan pa ste/ de'i phyir bya ba tha dad pas kyang 'jig rten pa rnams kyi las tha dad pa yin no/ /bsam pa tha dad pa zhes bya ba la/ bsam pa ni 'dir mos pa ste/ de lta bas na bsam pa tha dad pa'i phyir yang 'jig rten pa rnams kyi las tha dad do//'du byed rnams kyang 'di ltar tha dad pa nyid du 'jug pa ste/ gang 'du byed pa rnams kyi bya ba tha dad pa gang yin pa de yin no/ /gang dag gi zhe na/ 'jig rten pa rnams kyi'o/ /sangs rgyas rnams kyi ni lhun gyis grub par mdzad pa'i bya ba yin pas de dag thams cad med pa'i phyir sangs rgyas rnams kyi rgyu la sogs pa tha dad pa med pas de'i phyir de dag rnams kyi phrin las kyi mdzad pa la tha dad pa med do//theg pa gcig nyid du bstan pa dgongs pa can du gsungs pa yin par ston pa'i tshigs su bcad pa ni/ kha cig dag ni drang phyir dang //zhes bya ba la/ nyan thos rigs ma nges pa rnams theg pa chen por drang bar bya ba'i ched du ste/ ma nges pa de ci nas kyang theg pa chen por mya ngan las 'da' bar bya'o zhes bya'o/ /gzhan yang kun tu gzung ba'i phyir/ /zhes bya ba ni byang chub sems dpa' rigs ma nges pa gang yin pa de dag ci nas theg pa chen po la thun mong du 'gyur ba dang /theg pa chen po bor nas nyan thos kyi theg pas mya ngan las 'da' bar ma gyur cig ces bya bas so/ /don de dag gi phyir theg pa gcig nyid du bstan pa yin no/ /yang ma nges pa rnams kyi don ni go sla'o/ /chos dang bdag med grol mthun phyir//zhes bya ba la sogs pa rgyas par 'byung ba la/ 'dir yang dgongs pa'i dbang gis theg pa gcig nyid du gcig par bstan to/ /yang 'di'i dgongs pa gang yin zhe na/ chos mthun pa'i phyir dang / bdag med pa mthun pa'i phyir dang grol ba mthun pa'i phyir ro/ /de la chos mthun pa nyid ni re zhig 'dir chos ni de bzhin nyid do//de ni mthun pa nyid de/ nyan thos la sogs pa thams cad 'dir 'gro bar bya ba yin pas na theg pa chen po zhes byas nas so/ /de mthun pa nyid yin pa'i phyir theg pa gcig nyid do/ /bdag med pa mthun pa nyid ni bdag dang gang zag med pas de'i phyir med pa 'di la 'di ni nyan thos so//'di ni byang chub sems dpa'o zhes brjod par mi rigs te/ de'i phyir na yang bdag med pa la dgongs nas theg pa gcig nyid do/ /grol ba mthun pa nyid ces bya ba ni nyan thos la sogs pa rnams kyang nyon mongs pa las grol ba mthun pa nyid yin te/ de'i phyir 'di la dgongs nas kyang theg pa gcig nyid du bstan te/de'i phyir bcom ldan 'das kyis kyang rnam par grol ba dang / rnam par grol ba ni tha dad du bya ba med do zhes gsungs so// //bam po brgyad pa'o / /rigs ni tha dad ces bya ba ni gang la rigs tha dad pa yod pa ste/ rigs ma nges pa'i nyan thos dag sangs rgyas su 'gyur ba la dgongs nas kyang theg pa gcig nyid du bstan te/bsam gnyis rnyed phyir zhes bya ba ni bsam pa gnyis thob pa'i phyir te/ gcig ni mnyam pa nyid kyi bsam pa ste/ gang gis sems can thams cad gang yin pa nyid ni bdag yin la/ bdag kyang de dag nyid yin no zhes de ltar 'dzin pa ste/de ltar 'dzin pas kyang de mngon par rdzogs par sangs rgyas par gyur pas de dag kyang mngon par rdzogs par sangs rgyas par gyur pa yin te/ dgongs pa de'i phyir yang theg pa gcig nyid do/ /yang bsam pa gnyis pa ni gang dam pa'i chos pad+ma dkar po las nyan thos lung bstan pa de dag gis ni sangs rgyas kyis kyang chos nyid mnyam pa nyid la dgongs nas/chos kyi sku thob pa nyid yin no zhes bsams nas mnyam pa nyid la dgongs pa dang / mthun pa'i bsam pa thob pa ni sangs rgyas kyi chos nyid yang dag par thob pa yin no zhes bya ba'o/ / don gzhan yang de lta bu'i ming can gyi byang chub sems dpa'i 'khor de lung bstan pa yin pas sprul pa'i phyir yang zhes bya ba smos te/ ji ltar ngas mngon par shes te/ da nyid lan brgya stong du mar nyan thos kyi theg par mya ngan las 'das par gyur to zhes pa de lta bu la dgongs nas theg pa gcig nyid du bstan te/gang nyan thos kyi theg pas gdul ba'i sems can rnams mya ngan las bzla ba'i phyir bstan pa yin no/ /mthar phyin pas na zhes bya ba ni 'di ltar theg pa 'dis mthar phyin par grol bar bya ba'i theg pa gzhan ni med pas sangs rgyas kyi theg pa 'di ni nyan thos la sogs pa de dag las khyad par du 'phags pa yin pas de las dgongs nas kyang theg pa gcig nyid du bstan te /da ni sangs rgyas thams cad chos kyi sku mnyam pa nyid yin na/ yang rgyu gang gis gcig nyid dam mang po nyid du blta bar bya ba de bstan par bya ste/ de la re zhig gcig nyid du blta bar bya ba ni de dag gcig nyid ni mnyam pa nyid yin la sangs rgyas kyang de'i rang bzhin yin pas de'i phyir de ni gcig nyid yin te/chos kyi dbyings gcig pa nyid du blta bar bya'o/ /yang gcig nyid du blta bar bya ste/ gang dus gcig la 'jig rten gyi khams gcig tu sangs rgyas gnyis 'byung ba ni mi srid pas de'i phyir yang gcig nyid du blta bar bya'o//yang mang po nyid dang gcig nyid tshigs su bcad pas bstan pa ni/ khams gcig na ni zhes bya ba la sogs pa rgyas par 'byung ste/ khams gcig na ni gnyis med phyir/ /zhes bya ba'i tshig gis ni gcig pa nyid du bstan pa'i don te/gang 'jig rten gyi khams gcig tu sangs rgyas gnyis 'byung ba ni mi srid do zhes bya ba'i tha tshig go/ /lhag mas ni mang po nyid du bstan te/ dpag med cig car tshogs bsags phyir/ /zhes bya ba ni gang dus gcig tu byang chub sems dpa' mang po rnams tshogs yongs su bsags par 'gyur la/gal te de dag gis bsod nams dang ye shes kyi tshogs bsags kyang sangs rgyas nyid thob par mi 'gyur na tshogs bsags pa don med pa nyid du 'gyur ro/ /de'i phyir na mang po rnams kyis tshogs yongs su rdzogs par 'grub pas sangs rgyas mang po nyid du blta bar bya'o//rim gyis 'byung bar mi rigs phyir/ /zhes bya ba ni rim gyis mngon par rdzogs par byang chub par yang mi 'grub ste/ gal te gang gi phyir tshogs yongs su rdzogs par gyur pa rnams rim gyis gzhes par gyur na/ de dag nyid kyi rjes su rim gyis thob par 'gyur te/gzhan dag kyang mngon par rdzogs par byang chub par 'gyur ba yin no zhes bya ba ste/ de dag mang ba nyid kyi phyir rim gyis rigs pa ma yin te/ gzhan dag kyang mngon par rdzogs par 'tshang rgya bar 'gyur bas so/ /de'i phyir na yang /sangs rgyas nyid mang po yin no/ /yang kha cig ni sangs rgyas rnams la gtan du yongs su mya ngan las 'da' ba med do zhes zer la/ nyan thos kyi theg pa pa'i sde pa gzhan dag ni gtan du yongs su mya ngan las 'da' ba yin no zhes zer te/ 'di ltar de dag gnyi ga'i dgongs pa tshigs su bcad pas ston pa ni/sgrib pa kun las nges grol phyir/ /zhes bya ba la sogs pa rgya cher 'byung ste/ de la gang gi phyir sangs rgyas ni nyon mongs pa dang shes bya'i sgrib pa thams cad las rnam par grol ba yin pa'i phyir des na gtan du mya ngan las 'das par 'gyur ba yin te/dgongs pa de'i phyir ro/ /yang gang gi phyir mdzad pa rnams kyang yongs su ma rdzogs pa ste ma smin pa rnams smin par bya ba dang / smin pa rnams rnam par grol bar bya ba dgongs pa'i phyir de'i mdzad pa de la dgongs nas gtan du yongs su mya ngan las 'da' ba ma yin na / /de lta ma yin te/ nyan thos bzhin du gtan du yongs su mya ngan las 'da' ba ma yin na smon lam btab pa 'bras bu med par 'gyur ro/ /da ni gang las dgongs nas ngo bo nyid kyi sku longs spyod rdzogs pa'i sku ma yin zhe na/ de bstan par bya ste/ de gzugs kyi skur snang ba dang zhes bya ba la/ sangs rgyas ni chos kyi sku yin la/de ni gzugs su mthong ba'i phyir/ chos kyi sku ma yin te/ de lta bu ni chos kyi sku ma yin pas/ de'i phyir na chos kyi sku ma yin no/ /longs spyod rdzogs pa'i sku de ni sangs rgyas kyi 'khor gyi dkyil 'khor tshad med pa dag na tha dad par snang la/ chos kyi sku la ni tha dad pa med do/ /de'i phyir tshul 'dis kyang longs spyod rdzogs pa'i sku ngo bo nyid kyi sku ma yin no//mos pa ji lta ba bzhin du longs spyod rdzogs pa mthong bas kyang / ji ltar mdo las/ kha cig ni kha dog ser po/ kha cig ni kha dog sngon po zhes bya ba la sogs pa rgyas par 'byung ba'i phyir ro/ /de bzhin du longs spyod rdzogs pa'i sku ni ma nges pa'i ngo bo nyid du snang ba yin gyi/ngo bo nyid kyi sku ni ma nges pa'i ngo bo nyid du mi rigs te/ de'i phyir na yang ngo bo nyid kyi sku ma yin no/ /yang longs spyod rdzogs pa de ni gcig nyid yin na yang gzhan dang gzhan du mthong bar 'gyur la/ yang de nyid kho na de las kyang gzhan du mthong bar 'gyur bas de ni g.yo ba'i ngo bo'i ngo bo nyid yin pa'i phyir ngo bo nyid kyi sku yin par mi rigs te/de'i phyir na yang ngo bo nyid kyi sku ma yin no/ /yang longs spyod rdzogs pa de ni lha la sogs pa'i 'khor dang rtag tu 'dres shing bskor nas gnas pa yin gyi/ ngo bo nyid ni 'dres par mi 'gyur te/de'i phyir na yang ngo bo nyid kyi sku ma yin no/ /gang yang kun gzhi rnam par shes pa yongs su gyur pa ni ngo bo nyid yin la/ gal te de dag ngo bo nyid gcig pa nyid yin na de ni longs spyod rdzogs pa yang yin pas 'jug pa rnam par shes pa yongs su gyur pa las sku gang mngon par 'grub par 'gyur/de'i phyir na yang longs spyod rdzogs pa ni ngo bo nyid ma yin te/ rnam pa drug po de dag mi rigs pa'i phyir na yang mi rung ngo / /da ni gang gi phyir sprul pa'i sku ngo bo nyid kyi sku ma yin pa'i tshul de bstan par bya ste/ rgyu brgyad kyi phyir ro/ /de la re zhig mi rigs pa dang po ni byang chub sems dpa' yun ring po nas bskal pa du mar yang mi mnyam pa'i ting nge 'dzin thob pa rnams ni dga' ldan gyi lha rnams kyi nang du yang skye bar mi rigs na mi rnams kyi nang du lta smos kyang ci dgos te/sprul pa de ni yang 'jig rten pa yang yin no/ /yang byang chub sems dpa' skye pa dran pa rnams ni yi ge dang /rtsis dang / grangs la sogs pa mi mkhyen pa ni mi rigs te/ de'i phyir na yang sprul pa nyid sems can de rnams gdul ba'i don du byung ba yin no/ /yang bskal pa grangs med pa gsum du byang chub sems dpa' bsgrubs par gyur kyang nyes par bshad pa dang /legs par bshad pa'i chos de dag rnam par ma mkhyen na yang / de las gzhan pa mngon par rdzogs par byang chub pa'i dus na mkhyen par 'gyur bas de'i phyir na yang sprul pa ni ngo bo nyid kyi sku ma yin no/ /yang 'dzam bu'i gling bye ba phrag brgya bor te/ gcig tu mngon par rdzogs par byang chub pa dang /chos kyi 'khor lo bskor bar mi rigs pas/ sprul pa yin par mi rigs te/ gang gi phyir de dag thams cad kyis sprul pa mthong bar mthun pa'i phyir ro/ /gal te gcig tu mngon par rdzogs par byang chub nas gzhan dag tu sprul pa rnams 'byung bar mdzad pa yin no zhes bya ba'i phyogs len par byed pa yin na yang /de lta na dga' ldan nyid na gnas bzhin du/ gling bzhi pa thams cad du sprul pa 'gyed par ci'i phyir mi 'dod/ yang la la 'di skad du/ sangs rgyas kyi zhing du gtogs pa'i gling bzhi pa la la na sangs rgyas ma mthong ngo zhes zer na/gling bzhi pa thams cad na mngon par rdzogs par byang chub pa med pa la ni yang lung dang rigs pa med do/ /gal te de lta yin na mdo dang 'gal te/ mdo las kyang / sangs rgyas gnyis 'byung bar mi 'gyur te/ 'khor los sgyur ba'i rgyal po gnyis mi 'byung ba yin no//zhes gsungs pas so zhe na/ gang gi phyir 'di ltar 'khor los sgyur ba'i rgyal po gnyis mi 'byung ngo zhes 'byung ba de ni/ gling bzhi pa gcig tu mi 'byung ba yin gyi/ yang sangs rgyas kyi zhing du ni ma yin no/ /de bzhin du sangs rgyas gnyis mi 'byung ba yang gling bzhi pa gcig tu mi rigs kyi/'di ltar 'jig rten gyi khams gcig tu ni 'dod do/ /da ni mngon par rdzogs par byang chub pa tshigs su bcad pas bstan par bya ba ni/ sangs rgyas rnam 'phrul zhes bya ba la sogs pa rgyas par 'byung ba ste/ don ni dus gang gi tshe dga' ldan na bzhugs pa las/sangs rgyas mngal du gshegs pa de bzhin du dus de nyid kyi tshe na/ gnas brtan shA ri'i bu la sogs pa 'khor 'di dag kyang de bzhin du sprul pa'i gnas skabs kyis de dang der bzhugs par blta bar bya'o/ /de dag rnam par gzhag pas kyang de ltar byas na rnam pa thams cad mngon par rdzogs par byang chub par bstan par bya'o//da ni gtan du yongs su mya ngan las 'da' ba mi rigs par bstan par bya ste/ sems can thams cad kyi don du smon lam btab par byas pa dang / sems can gyi don du sgrub pa nyid byas pa ji ltar sems can gyi don bya'o zhes bya ba lta bur byas pa'o//gal te gtan du mya ngan las 'da' bas mya ngan las 'das pa yin na gang smon lam btab pa dang / sgrub pa dag 'bras bu med par 'gyur ro/ /gang yang de bzhin gshegs pa'i rtag pa'i sku yin no zhes bya ba de longs spyod rdzogs pa dang /sprul pa dag mi rtag pa yin pa'i phyir/ ji ltar rtag pa'i sku yin zhe na/ de bsgrub par bya ste/ de dag nyid rtag pa nyid yin te/ gang gi phyir rtag pa'i sku chos kyi sku la brten pa'i phyir des na rtag pa yin no/ /yang longs spyod rdzogs pa ni rdzogs pa'i longs spyod de la rgyun chad pa med pa'i phyir rtag pa yin no//sprul pa yang mngon par rdzogs par byang chub pa dang / yongs su mya ngan las 'da' ba ston pa'i rgyun chad pa med pas rtag pa yin no/ /de dag gnyi ga yang rtag pa nyid yin pa'i dpe bstan pa ni/ji ltar na 'jig rten na rtag tu bde ba la spyod do zhes brjod pa lta bu ste/ de ni rtag tu rgyun mi 'chad par byed par 'gyur ba ni ma yin no/ /'on kyang rtag tu bde ba la spyod do zhes ni rjod par byed do/ /yang gang dag 'di ni rtag tu slong mo sbyin pa yin no zhes zer na/yang de ni rtag tu sbyin pa ni ma yin te/ res 'ga' zhig sbyin par byed pa yin na yang / 'on kyang rtag tu slong mo sbyin pa po yin no zhes rjod par byed pa ltar rtag pa de dag kyang de bzhin no/ /'dir rgol bar byed do / yang gal te sangs rgyas rnams kyi chos kyi sku thog ma med pa'i dus nas bye brag med pa dpag tu med pa de dag nyid sems can gyi don bya ba la nus pa yod pa'i phyir/yang ci'i phyir sems can gyi don du 'bad par byed ce na/ lan tshigs su bcad pas bstan pa yin no/ /gal te sangs rgyas brnyes pa khyad par med dpag med pa/ /zhes bya ba'i rgyu 'di nyid kyis 'bad par mi bya'o zhes zer na/de'i phyir sangs rgyas rnams thog ma med pa'i dus can yin pa'i phyir/ skyon thams cad 'byung bar thal bar 'gyur ba thob pa'am/ thams cad rgyu med pa nyid du 'gyur ba'am/ rgyu rgyun chad pa med par 'gyur ro zhes bya ba'o/ /gzhan yang snying rjes rgyud bsgos pa'i byang chub sems dpa' rnams sems can thams cad la bu gcig pa bzhin du brtse ba 'byung bas/sems can gyi don la gzhan byed par 'gyur gyi zhe'am / gzhan byed kyang rung / mi byed kyang rung / bdag gis ni mi bya'o zhes bya ba mi rigs so/ /theg pa chen po bsdus pa'i 'grel pa/theg pa chen po la rab tu gnas pa/ bstan bcos phul du byung ba du ma mdzad pa'i slob dpon dbyig gnyen gyis mdzad pa rdzogs so// //rgya gar gyi mkhan po dI paM ka ra shrI dz+nyA na dang / lo ts+tsha ba dge slong tshul khrims rgyal bas/ yul brag dmar lha sdings/ri khas po ri'i rtsa/ chu bo lo hi ta'i 'gram/ dpal bsam yas lhun gyis grub pa'i gnas/ dbyig 'dul pe kar gling du bsgyur cing zhus te gtan la phab pa'o/ / 'di la shA+o ka nyis stong tshig brgya brgyad cu yod de/ bam po ni brgyad du byas so// //