CLOSE WINDOW

D4040
བོད་ཡིག

@##/ /rnal 'byor spyod pa'i sa las 'dul ba bsdu ba/ 'phags pa 'jam dpal gzhon nur gyur pa la phyag 'tshal lo/ /'dul ba ma mo'i sdom ni/ phan yon sde tshan sdud pa dang //rjes spyod mi mthun mthun pa dang / /nyer zhi yongs shes rnam lnga dang / /dad 'gyur 'phel bar 'gyur ba dang / /stobs lnga po ni tha ma yin/ /'di man chad ni 'dul ba bsdu ba'i tshig le'ur byas pa ste/rigs ni bsdu bar bya ba dang / /gzhi bcas la sogs yod pa yis/ /dge 'dun bsdu dang legs par 'gyur/ /de yi bder gnas rnam lnga ste//chos gos la sogs yod pa dang / /mi mthun pa ni bskrad pa dang / /'gyod pa sel dang nyon mongs gnan/ /bag la nyal yang spong ba yin/ /ma 'ongs 'jug par 'gyur ba'i phyir//yun ring gnas pa nyid du bzhed/ /dang po bsdu dang legs par dang / /bsdus pa ci bder bya ba dang / /gzhan dag bde bar 'jug 'gyur ba/ /kun gyis bsgrags pa shes bya ste//de ni phan yon rnam dag gi /ci rigs par ni bsdu ba yin/ /ltung ba sde tshan rnam lnga ste/ /de las bslab bya rnam pa bzhi/ /nyes pa rnam pa bco lnga yis/ / ltung ba thams cad rnam par gzhag /dngos ci kun dkris drag po dang / /'bral dang chog mi shes pa dang / /gnas skabs dag ni byed pa dang / /ma dad dad pa gzhan 'gyur dang / /bya ba mang po'i nyes pa dang //lhag par chags dang gzhan la yang / /tho 'tshams gnod pa kun slong dang / /bde 'gro dge sbyong tshul bgegs dang / /spang dang gnas dang bsnyen bkur dang / /de las bzlog la rig pa dang / / gsang la sogs dang 'chab pa dang / /rten dang bsten bya ma yin pa'o/ /'dul ba sdud par byed pa yi/ /chos ni mdor na rnam lnga ste/ /rang bzhin kha na ma tho dang / /bcas pa'i kha na ma thor bcas/ /dgag pa dang ni gnang ba dang //sgrub pa yin te dang por ni/ /rang bzhin mi dge rnam pa bzhir/ /rig par bya ste thub pa yis/ /rtags mi mthun pa nyid dang ni/ /dam pa'i chos la gus bya dang / /rang bzhin ma tho bcas mthun dang //gzhan gyi sems kyang bsrung ba dang / /bde 'gro srog dang dge sbyong gi /tshul gyi bar chad yin pa'i phyir/ /spangs pa de la spyod pa gang / /de ni bcas pa'i ma tho bcas/ /ngan 'gror 'gro bar 'gyur ba dang / /bde 'gro chos kyi rnyed pa dang / /srog dang dge sbyong tshul gyi ni//bar du spyod pa gang yin pa/ /de ni sangs rgyas 'gog par mdzad/ /gnang ba de las bzlog pa yin/ /bsgrub pa rnam pa gsum yin te/ /ltung dang ltung ba med pa dang / /bslang ba yin te rnam pa gnyis/ /bya ba mi byed pa dang ni/ /mi bya ba ni byed pa'i phyir//mi sbyor ba dang sbyor bcas las/ /ltung ba'i nyes pa 'byung bar 'gyur/ /de yi rgyu yang rnam bzhi ste/ /mi shes pa dang bag med dang / /nyon mongs mang dang ma gus pa'o/ /ltung ba rnams kyi chung la sogs/ /rnam pa lngas ni rig par bya'o/ /ngo bo nyid dang byed pa dang / /bsam dang gzhi dang tshogs pa'o//tshogs bya rnam dag bya ba dang / /grong bya dge phyogs bya ba dang / /gtsug lag khang du 'phral gyi ni/ /bya ba dag ni rnam pa lnga/ /bsdams sogs blta sogs bya nyung dang / /'dres par gnas pa med sogs dang / /las dang po la sogs pa yis//ltung ba 'byung ba med pa yin/ /'gyod pa rnam pa lnga bskyed dang / /bag yod rnam pa lnga dang ni/ /rnam lngas 'gyod pa bsal ba la / /brten nas ltung las ldang bar 'gyur/ /de la bdag nyid la sogs pas/ /smad la sogs pa mthong nas ni/ /de ni 'gyod pa skyed par byed//bag yod pa ni snga ma bzhin/ /nges 'byung bcas pa bshad pa dang / /gzhi dang bral zhing mi bya bar/ /lhag pa'i bsam bas sems bskyed dang / /bshags pa bya dang 'gyod pa yi/ /rgyun ni sgrib pa yin pa'i phyir/ /'gyod pa skyes pa sel bar byed/ /'dul ba'i rjes su spyod pa yi//chos lnga dge slong 'dul brtson pa/ /de dag la ni spyod byed de/ /gnas pa gnas dang rten dang ni/ /longs spyod dang ni las yin te/ /dge slong 'dul ba'i bslab pa la/ /brtson pa de ni 'du shes kyis / /gnas pa rnam pa lnga yin te/ /grong du 'jug par byed pa na//btson rar 'jug pa'i 'du shes dang / /gtsug lag khang na mdo sde bzhin/ /rtag tu dge sbyong 'du shes dang / /zas la rtag par nad kyi ni/ /gnyen po nyid du 'du shes dang / /rab dben shes bya rnam gnyis la/ /long ba 'on lkugs 'du shes dang / / nyal na dgon pa'i ri dgas ltar/ /thum phras kyi ni 'du shes dang / /de ltar gnas pa'i dge sbyong ni/ /rgyal la 'os pa'i longs spyod la/ /gnas kyang 'dod pa bsod nyams kyi/ /rjes su sbyor bar mi 'gyur ro/ /gnas lngar bzhed de dge slong dang / /dge slong ma dang mu stegs gnas//nyon mongs can dang nyon mongs med/ /gnas bya dang po tha ma yin/ /de ltar dogs med gnas rnams su/ /gnas pa la ni dogs med 'gyur/ /rten yang lnga ste grong mtshams dang / /gnas dang gang zag rnams dang ni/ /yo byad gsum dang spyod lam ste/ /rten de dag la brten pa ni//bdag la bdag nyid sdug bsngal ba/ /don med ldan pas gnod mi 'gyur/ /longs spyod mi rung rnam lnga ste/ /mchod rten gyi ni gal te na/ /nad tshabs che ba ma yin zhing / /rten gzhan yod na mi rung ngo / /dge 'dun gyis ni ma bsgo dang / /lhung bzed ma chud ma rtogs yin//gang zag gzhan gyi ma byin dang / /rjes su ma gnang mi bcug pa'o/ /rang gi bshad sogs 'dres pa ste/ /brten pa'i dge ba nyams 'gyur zhing / /mi dge mngon par 'phel ba dang / /brten na 'jig rten 'khrugs 'gyur ba'o/ /de las bzlog lnga rung ba ste//de dag rnam par spong ba dang / /rjes su rten par byed pa ni/ /dad pas sbyin pa sbyong bar 'gyur/ /gsol ba'i las dang gsol ba dang / /gnyis dang gsol dang bzhi dang ni/ /las gsum brjod yin de dag gi /rten gyi gzhi ni rnam gnyis te/ /sems can sems can min ston yin//de ni bya yin las yin te/ /tshogs gnyis bzhi lnga tshogs bcu dang / /nyi shu dang ni bzhi bcu dang / /dge 'dun mthun pas bya ba ste/ /de ltar shes pa las rnams la/ /spyod pa ltung dang bslang ba yang / /mkhas shing kha na ma tho med//'dul ba'i bslab dang ma'i mthun pa'i/ /chos ni rnam lngar rig par bya/ /bar du gcod dang dam chos ltar/ /bcos dang ldog pa'i grogs po dang / /glen zhing nyon mongs mang ba dang / /sngon gyi tshogs stobs chung ba yin/ /bar chad lnga ste bslab rnams dang / /bde 'gro rnyed la sogs pa'o//dam pa'i chos ltar bcos pa ni/ /bshad dang bsgrub ces bya ba yin/ /mdo sogs lhad 'jug spang ba dang / /mtha' gnyis gang zag ston pa dang / /kun rdzob yod pa rdzas ston dang / /mya ngan 'das la yod med dang / /mi lta ba ni bla ba dang / /bsngags dang mi bsngags brjod pa dang //mi smra'i brtul zhugs len pa dang / /zas med la sogs legs pa dang / /bas mthar rtsom pa med pa dang / /rnam shes de nyid 'khor ba dang / /de dag mi gcod dgra bcom med/ /de bzhin bdag tu smra ba dang / /mos pa yid la byed pa yis//zhi gnas la sogs ston pa dang / /gnas ma yin la 'gyod byed cing / /des ni de nyid rloms pa dang / /gong ma'i mthu ni yod bzhin du/ /zhal ta dga' zhing ston pa dang / /ltung bas nyams shing sbyin pa dang / /thos pas rtsod cing rnyed bcas la/ /bsnyen bkur byed cing gtam 'dre dang //gsang tshig mang pos mkhas snyems dang / /drag shul la sogs gnod byed dang / /tshul 'chos spyod lam gang yin dang / /rgyang 'phen tshig gis shes khengs dang / /kha na ma tho bcas dge byed/ /de dag ston par byed pa ste/ /bslab dang mthun pa'i chos lnga ni//de las bzlog par shes par bya/ /de dang ldan pa'i chos lnga ni/ /tshul khrims phung po srung 'gyur te/ /legs par nges 'byung gang yin dang / /'dri dang so sor rtog pa dang / /gnyen po sgom par byed pa dang / /dad pa yin te de la yang / / dang po la brten gzhan dag byed/ /de dag ltung ba mi 'byung ste/ /mi shes la sogs go rims bzhin/ /'dul ba nyer zhi chos lnga ste/ /des pa dang ni spang ba dang / /spong ba'i yan lag bsnyen bkur dang / /rtsod pa nye bar zhi ba yin/ /lus sogs mi 'dod spyod pa dang / /dge 'dun mi mnyam spyod pa dang //tshul khrims lta ba mi mthun phyir/ /sdug bsngal gnas pas de bzlog drug /gnas dang gdams ngag sgrub pa dang / /tshogs rnams phun sum tshogs pa las/ /brtsams nas 'khor lo bzhi gsungs te/ /yang dag smon lam rnam pa lnga//mthun par 'dzin pa nyid dang ni/ /mi mthun sgrub pa ma yin dang / /bdag nyid smra dang chog shes dang / /spong la sogs pa dga' sgom yin/ /sngon du bsod nams byas pa dang / /'bras bu'i phan yon rnam lnga ste/ /rnam smin gnyis la gnas pa dang / /de yang rnam brgyad rnam pa gcig /gdugs sogs bar chad mi byed dang / /rang bzhin gyis ni dge rnams la/ /sems ni 'jug par 'gyur ba dang / /sdig las 'dzem par byed pa dang / /las mtha' legs par grub pa ste/ /zhi gnas dang ni lhag mthong gi /shing rta'i 'khor lo bzhi yin te/ /de dag med na bsrung mi 'gyur//spong ba'i yan lag rnam lnga ste/ /thob par bya ba yid ches dang / /bdag nyid smra la spro gnyis dang / /don shes nus pa nyid rnams so/ /yon tan phan yon yid ches dang / /rjes su mthun pas bsgrub pa dang / /rgyal mtshan ba dan gdugs sogs kyis//bsnyen bkur rnam gsum rig par bya/ /rtsod pa de yang rnam bzhi ste/ /gzhan gyis gleng zhes bya ba dang / /phan tshun the tshom za ba dang / /bdag dang phan tshun gleng ba'o/ /de dag nyer zhi rnam bzhi ste/ /dge 'dun rten dang dag sbyin dang / /ngo bo nyid mang tshol ba dang / /yang dag bshags pa 'chags pa yin//'dul ba'i bslab pa brtson pa yis/ /gnas lnga yongs su shes bya ste/ /dngos po dang ni ltung ba dang / /gang zag rdzas blang gnod pa'o/ /dngos po phung sogs shes par bya/ /ltung ba rnam pa lnga yod de/ /gzhi dang kun nas slong ba dang / / dngos dang sbyor dang mtha' las so/ /ltung ba lhag bcas la sogs pa/ /rnam pa bcu gnyis shes par bya/ /gang zag rnam lngar shes bya ste/ /de ni dpyad pa'i dbye ba dang / /rigs kyi de ni dbye ba dang / /sde pa mtho dman dbye ba dang / /'thob pa dang ni rtag pa yin/ /rdzas blang ba ni rnam gsum ste//rnyed dang bslang dang bskrad pa'o/ /smyon pa'i spyod dang 'dra ba yi/ /gnod pa rnam lngar shes bya ste/ /shi ba'i rjes su mya ngan dang / /ser snas bdag nyid gdung byed cing / /ser sna'i dri ma rnam brgyad dang / /yan lag 'chag pas gdung ba dang / /mtho ris rnam dag 'dod pa yis//lus gdung byed pa gang yin pa'o/ /dad 'gyur 'phel bar 'gyur ba yi/ /phun sum tshogs pa'i chos lnga ste/ /tshul khrims la sogs rnam bzhi dang / /phan tshun rtsod pa med pa yin/ /lta ba phun tshogs sgro 'dogs dang / /skur 'debs mchog 'dzin rnam gnyis dang //dge mtshan bden dang gtsang sogs pa'i/ /lta la sogs pa spangs pa'o/ /rtsod med rtsa drug spangs pa yin/ /rtsod pa'i gzhi yang rnam drug ste/ /gnod pa byed du dogs pa'i phyir/ /rang gi nyes pa 'chab byed cing / /nga rgyal gyis ni tshar bcad nas/ /rnyed dang bkur sti rgyu bag spyod//lhag khrims lhag pa'i sems la sogs/ /rgud cing gzhan du 'gyur ba yin/ /sbyor ba dang ni bsam pa dang / /rtogs pa dang ni shes pa dang / /gnas par gyur pa'i stobs kyis ni/ /yang dag sbyor ba phun tshogs 'gyur/ /gzhi bsdu ba las 'dul pa'i tshig le'ur byas pa'i mdo rdzogs so// //@#/ /da ni de nyid kyi bshad pa brtsam par bya ste / /sdom ni/ /phan yon sde tshan sdud pa dang / /rjes spyod mi mthun mthun pa dang / /nyer zhi yongs shes rnam lnga dang / /dad 'gyur 'phel bar 'gyur ba dang / /stobs lnga po ni tha ma yin//'dul ba gang zhe na/ mdo sde rnam pa bzhi po de dag nyid las so so thar pa'i mdo'i ma mor rgya cher brgyud de 'ongs pa/ de bzhin gshegs pas gsungs pa/ bsngags pa bstod pa gang yin pa de ni 'dul ba zhes bya ste/ de'i mtshan nyid tsam bsdus te brjod par bya'o/ /de bzhin gshegs pa ni phan yon bcu yang dag par gzigs nas 'dul ba la nyan thos pa rnams kyi pa'i gzhi 'cha' bar mdzad de/'di lta ste/ dge 'dun bsdu ba'i phyir dang / dge 'dun legs par bya ba'i phyir dang / dge 'dun bde bar gnas par bya ba'i phyir dang / gnod mi bkur ba'i gang zag rnams tshar gcad pa'i phyir dang /ngo tsha shes pa rnams bde bar gnas pa'i phyir dang / mngon par ma dad pa rnams dad par bya ba'i phyir dang / mngon par dad pa rnams phyir zhing dad par bya ba'i phyir dang / tshe 'di'i zag pa rnams bsdam par bya ba'i phyir dang //tshe rabs phyi ma'i zag pa rnams gzhom pa'i phyir dang / nga'i tshangs par spyod pa yun ring du gnas par 'gyur ba'i phyir ro zhes rnam par bshad pa bsdu ba las rgya cher 'chad pa bzhin du rig par bya'o/ /de la dge 'dun bsdu ba'i phyir zhes bya ba ni rigs bzhi po dad pas legs pa kho nar khyim nas khyim med par rab tu 'byung ba rnams bsdu ba las brtsams pa yin no//de ltar rab tu byung ba rnams la gzhi dang bcas/ nges par 'byung ba dang bcas/ pha rol gnon pa dang bcas/ cho 'phrul dang bcas pa'i chos bstan pas rjes su 'jug pas dge 'dun legs par 'gyur bar rig par bya'o//gzhi dang bcas pa la sogs pa'i tshig rnams kyi rnam par dbye ba ni 'di lta ste/ byang chub sems dpa'i sar bstan pa bzhin du rig par bya'o/ /dge 'dun bde bar gnas pa bya ba ni rnam pa lngas rig par bya ste/ yo byad rkyen du 'bab pa dag yod pa dang /chos mi mthun pa'i gang zag rnam par bskrad pa dang / 'gyod pa skyes pa sel ba dang / nyon mongs pa'i kun nas dkris pa rnam par gnon pa dang / nyon mongs pa'i bag la nyal spong bas so/ /de la bde bar gnas par bya ba dang po'i dbang du mdzad nas ni/ mngon par ma dad pa rnams mngon par dad par bya ba'i phyir dang /mngon par dad pa rnams phyir zhing dad par bya ba'i phyir zhes bya ba gsungs so/ /gnyis pa'i dbang du mdzad nas ni gnong mi bkur ba'i gang zag rnams tshar gcad pa'i phyir zhes bya'o/ /gsum pa'i dbang du mdzad nas ni/ngo tsha shes pa rnams bde ba la gnas par bya ba'i phyir zhes bya'o/ /bzhi pa'i dbang du mdzad nas ni tshe 'di'i zag pa rnams bsdam pa'i phyir zhes bya'o/ /lnga pa'i dbang du mdzad nas ni tshe rabs phyi ma'i zag pa rnams gzhom pa'i phyir zhes bya'o/ /thob pa rnams bde bar gnas par 'gyur ba dang /ma thob pa la zhugs pa rnams bde bar 'jug par 'gyur ba'i phyir nga'i tshangs par spyod pa skye ba mang po la phan pa dang / yangs par 'gyur ba dang / lha dang mi rnams kyi bar la yang dag par rab tu bstan pa yun ring du gnas par 'gyur ba'i phyir zhes bya ba gsungs so//de dag thams cad mdor bsdu na/ dang po bsdu ba dang / legs par bsdu ba dang / bsdus pa rnams bde bar gnas par bya ba dang / ma 'ongs pa ma bsdus pa rnams bde bar 'jug par 'gyur ba'i thabs yongs su bstan pa yin te/ de ni rnam grangs gzhan yin no/ /ltung ba'i sde tshan ni mdor bsdu na rnam pa lnga ste/lnga gang zhe na/ pham pa dang / dge 'dun lhag ma dang / ltung byed dang / so sor bshags par bya ba dang / nyes byas so/ /nyes pa spom po gang yin pa dang / ma nges pa gang yin pa de ni de dag nyid du 'dus par ci rigs par bya'o/ /ltung ba las bslang ba'i sde tshan ni rnam pa bzhi ste/bzhi gang zhe na/ pham pa ma gtogs pa de las gzhan pa'i ltung ba bzhi po dag las bslang ba de dag ni bslang ba'i sde tshan bzhi po dag yin no/ /ltung ba'i sde tshan dang po las kyang bslang ba yod mod kyi de ni gang zag gi bye brag tsam nyid la brten pa yin gyi thams cad khyad par med pa ma yin pas de'i phyir de la bslang ba'i sde tshan ni mgo gcig tu rnam par mi gzhag go//de la ltung ba'i sde tshan thams cad la mdor bsdu na/ nyes pa bco lngas ltung ba thams cad rnam par gzhag par rig par bya'o / /bcu lnga gang zhe na/ dngos po lci ba'i nyes pa dang mi ldan pa dang chog mi shes pa'i nyes pa dang / gzhan dag dang gnas skabs byed pa'i nyes pa dang / ma dad pa dad par mi 'gyur zhing dad pa gzhan du 'gyur ba'i nyes pa dang / don mang zhing bya ba mang ba'i nyes pa dang / lhag par chags pa'i nyes pa dang / gzhan la tho 'tshams pa'i nyes pa dang / gnod pa kun nas slong ba'i nyes pa dang / bde 'gror 'gro ba'i bar du gcod pa'i nyes pa dang / dge sbyong gi tshul gyi bar du gcod pa'i nyes pa dang / spang bar bya ba dang / spang bar bya ba ma yin pa legs par mi spong ba dang / spong ba'i nyes pa dang /gnas par bya ba ma yin pa dang / gnas par bya ba dang gnas pa dang mi gnas par byed pa'i nyes pa dang / bsnyen bkur bya ba dang bsnyen bkur mi bya ba la bsnyen bkur mi byed pa dang / bsnyen bkur byed pa'i nyes pa dang / gsang bar bya ba dang gsang bar mi bya ba sgrogs pa dang 'chab pa'i nyes pa dang /bsten par bya ba dang bsten par mi bya ba mi bsten pa dang bsten pas so/ /de la las dang po pa ni pham pa bzhi po dag la dngos po lci ba'i nyes pa yod kyang las dang po pas gal te 'di ltar chos 'di ni dge sbyong gi tshul gyi bar du gcod par byed pa yin no//zhes bya ba kho na shes par gyur na/ srog gi phyir yang 'gal bar mi byed na/ 'di lta ste/ dge sbyong gi tshul la mi lta ba nyid la brten pa'i bsam pa skyon chags pa med pa'i phyir kun nas dkris pa drag po'i nyes pa ni med pa yin no/ /gang la bsam pa ches stobs dang ldan pa la dngos po de lta ma yin na de la ni ltung ba med pa kho na yin no//gang la bsam pa stobs dang ldan pa kho na'i phyir ltung ba dang bcas pa la nyes pa byung yang 'chab pa'i sems cig kyang skyed par mi byed na de yang ldang zhing dge sbyong gi 'bras bu rnams kyi skal ba dang ldan pa yin no/ / de las gzhan pa ni nyes pa lci ba dang / ngo tsha med pa dang / khrel med pa'i kun nas dkris pa drag po'i nyes pa dang ldan par rig par bya ste/ /lci ba gnyis dang ldan pa'i phyir bslang bar mi rung ba'i chos can dang / yongs su mya ngan las mi 'da' ba'i chos can yin no/ /de la bcom ldan 'das kyis gnang ba'i chos gos dang /lhung bzed la sogs pa byin gyis brlabs pa dang / brtags te yongs su longs spyad par bya ba gang dag yin pa de dag dang thams cad kyi thams cad du 'bral ba dang / brtag pa med par yongs su longs spyod par byed pa las de lta bu dang ldan pa'i ltung ba gang yin pa de ni mi ldan pa dang chog mi shes pa'i nyes pa la brten te/bca' ba mdzad do/ /nye du ma yin pa'i dge slong la las chos gos len pa dang sbyin pa dang gcig dang lhan cig 'dug pa dang / dus ma yin pa dang / dge slong gi dge 'dun gyis ma bskos par ston pa dang /de bzhin du lam grogs med par bud med dang lhan cig gzhan du lam du 'jug pa dang / de lta bu dang mthun pa dag la ni gzhan dag dang gnas skabs byed pa'i nyes pa yin par rig par bya'o/ /grong gi nye 'khor du cho ga tshul dang mi mthun pas bsod snyoms yongs su longs spyod par byed pa dang /'dug pa dang / lag pa dang / lhung bzed bkru ba dang / mgron du bos nas zas kyi snga rol dang / zas zos kyi 'og tu khyim pa 'dug pa la ma bsgo bar khyim rnams su rgyu bar byed pa dang / de lta bu dang mthun pa dag la ni mi dad pa dad par mi 'gyur zhing dad pa gzhan du 'gyur ba'i nyes pa yin par rig par bya'o//gser dngul la 'dzin pa dang / nyo tshong rnam pa sna tshogs pa dang / zong sgyur gyi tshong pa dang / mon dar sar pa'i stan byed pa la sogs pa la ni don mang zhing bya ba mang ba'i nyes pa yin par rig par bya'o/ /nyams shing gyur pa'i sems kyis bsams bzhin du khu ba 'byin pa dang /bud med kyi lag pa dang dpung pa la sogs pa nas 'dzin pa dang / smyan byed pa dang / de bzhin du bzang po 'dod pa'i phyir nye du ma yin pa dag las chos gos la sogs pa lhag pa dang / bzang po yongs su tshol ba la sogs pa la ni lhag par chags pa'i nyes pa yin par rig par bya'o//rtsa ba med pa dang / de las gzhan pa bag tsam gyi cha dang mthun pa'i chos kyis gzhan la skur pa 'debs pa dang / dge slong phra ma zer ba dang / mi la smod pa la sogs pa la ni gzhan la tho 'tshams pa'i nyes pa yin par rig par bya'o/ / dpag tshad gsum las lhag par lug gi bal dag khur du khyer ba dang / khur ha cang lci ba khyer ba dang / shing la mi gang tsam las mthor 'dzeg pa la sogs pa la ni gnod pas kun nas slong ba'i nyes pa yin par rig par bya'o/ /dge 'dun mthun pa dbye ba'i phyir rtul pa la sogs pa la ni bde 'gror 'gro ba'i bar du gcod pa'i nyes pa yin par rig par bya'o//bdag la tshig ma smra shig ces zer ba la sogs pa la ni dge sbyong gi tshul gyi bar du gcod pa'i nyes pa yin par rig par bya'o/ /dge 'dun gyi mal stan bla gab med par bting nas yal bar bor te 'gro ba la sogs pa dang /log pas yongs su longs spyod pa la sogs pa ni spang bar bya ba dang spang bar bya ba ma yin pa legs par mi spong ba dang / spong ba'i nyes pa yin par rig par bya'o/ /dge slong dang dge tshul lta ba log pa dang / lhan cig gnas pa dang gnas sbyin pa la sogs pa la ni gnas par mi bya ba dang gnas par bya ba dang gnas pa dang mi gnas par byed pa'i nyes pa yin par rig par bya'o//bsgo ba bcag pa dang / 'phya ba'i mtshan nyid dang / bsnyen bkur mi byed pas so sor thar pa nyan pa la sogs pa dag ni bsnyen bkur bya ba dang / bsnyen bkur mi bya ba la sogs bsnyen bkur mi byed pa dang bsnyen bkur byed pa'i nyes pa yin par rig par bya'o/ /gang zag bsnyen par ma rdzogs pa la mi'i chos bla ma yang dag par sgrogs pa dang / dge slong gi gnas ngan len dang ltung ba 'chags pa la sogs pa la ni gsang bar bya ba dang / gsang bar mi bya ba sgrogs pa dang / 'chab pa'i nyes pa yin par rig par bya'o/ /chos gos la sogs pa ma brtags par yongs su longs spyod pa la sogs pa la ni bsten par bya ba dang bsten par mi bya ba mi bsten pa dang bsten pa'i nyes pa yin par rig par bya'o/ /nyes pa bco lnga po 'di dag ltung ba kha cig la ni rab tu mang la/kha cig la ni gnyis yod/ kha cig la ni gcig yod par rig par bya'o/ /'dul ba sdud pa byed pa'i chos ni lnga po 'di dag yin te/ lnga gang zhe na/ rang bzhin gyis kha na ma tho ba dang bcas pa dang / bcas pa'i kha na ma tho ba dang bcas pa dang /dgag pa dang / gnang ba dang / sgrub pa'o/ /de la rang bzhin gyis kha na ma tho ba dang bcas pa gang zhe na/ rang bzhin gyis mi dge ba gang yin pa ste/ bdag kun nas nyon mongs shing gzhan la nyam nga ba dang / gzhan kun nyon mongs pa dang / gzhan la gnod par 'gyur ba dang / bdag la kun nas nyon mongs pas gnod par 'gyur ba bdag la kun nas nyon mongs shing gnod par 'gyur ba dang / bdag dang gzhan la kun nas nyon mongs shing gnod par 'gyur ba gang yin pa ste/ ma bcad pa la spyod pa ngan 'gror 'gro bar 'gyur ba dang / bcad pa la spyod pa dge sbyong gi tshul gyi bar du gcod par 'gyur ba'o//bcas pa'i kha na ma tho ba dang bcas pa gang zhe na/ bcom ldan 'das kyis rtags mi mthun pa nyid kyi phyir dang / dam pa'i chos la gus par byas pa dang / rang bzhin gyis kha na ma tho ba dang bcas pa dang mthun pa dang / gzhan gyi sems bsrung ba dang / bde 'gro dang / srog dang / dge sbyong gi tshul gyi bar du gcod pa nyid yin pa'i phyir spangs pa gang yin pa de la spyod pa ni bcas pa'i kha na ma tho ba dang bcas pa zhes bya'o/ /dgag pa gang zhe na/ ngan 'gror 'gro bar 'gyur ba dang / bde 'gror 'gro ba'i bar du gcod par 'gyur ba dang / chos kyi rnyed pa'i bar du gcod pa dang /srog gi bar du gcod pa dang / dge sbyong gi tshul gyi bar du gcod pa gang yin pa de la spyod pa de bzhin gshegs pas dgag pa mdzad pa'o/ /gnang ba ni de las bzlog pa yin par rig par bya'o/ /sgrub pa gang zhe na/ sgrub pa ni mdor bsdu na rnam pa gsum ste/ ltung ba dang ltung ba med pa dang /ltung ba las bslang ba'o/ /de dag kyang mdor bsdu na rnam pa gnyis te/ log par sgrub pa dang / yang dag par sgrub pa'o/ /de la ltung ba ni log par sgrub pa yin la/ ltung ba med pa dang ltung ba las bslang ba ni yang dag par sgrub pa yin par rig par bya'o/ /de la ltung ba ji ltar 'byung zhe na/ bya ba mi byed pa'i phyir mi sbyor ba dang / mi bya ba byed pa'i phyir sbyor ba dang bcas pa'i ltung ba 'byung ngo / /de dag kyang rgyu rnam pa bzhis 'byung ste/ mi shes pa dang / bag med pa dang / nyon mongs pa mang ba dang / ma gus pa las so/ /ji ltar mi shes pa las 'byung zhe na/ 'di ltar 'di na la las ltung ba ma thos shing ma rtogs pas de blo ma byang ba'i phyir mi shes pa las ltung ba la ltung ba med par 'du shes pas ltung ba 'byung bar 'gyur te/de ltar na mi shes pas 'byung ba yin no/ /ji ltar na bag med par 'byung zhe na/ 'di ltar 'di na la la ltung ba la blo byed ba kho na yin yang brjed ngas par gnas shing shes bzhin ma yin par gnas pas de dran pa nye bar mi gnas pas ltung ba 'byung bar 'gyur te/de ltar na bag med pas 'byung ba yin no/ /ji ltar na nyon mongs pas 'byung zhe na/ 'di ltar 'di na la la ltung ba la blo byang ba kho na yin yang / de ni 'dod chags dang /zhe sdang dang / gti mug shas che ba'i rang bzhin can yin pas/ de 'dod chags dang / zhe sdang dang / gti mug shas chen po des 'di ni bya ba ma yin no/ /zhes bya bar shes kyang rang dbang med pas nyon mongs pa rnams kyi ltung ba 'byung bar 'gyur te/ de ltar na nyon mongs pa mang bas 'byung ba yin no/ /ji ltar na ma gus pas 'byung zhe na/ 'di ltar 'di na la la ltung ba la blo byang ba yin yang dman pa la mos shing sngon rgyu ma spyad pa yin pas de dman pa la mos pa'i phyir dge sbyong gi tshul la mi lta zhing mya ngan las 'das pa dang / chos dang dge 'dun la gus pa med pa dang /rjes med pa dang / ngo tsha med pa dang / bslab pa mi 'dod pa dang / ma gus pas ci 'dod dgur ltung ba 'byung bar 'gyur ro/ /de la mi shes pa dang bag med pa gnyis kyis ni nyon mongs pa can ma yin la/ nyon mongs pa mang ba dang ma gus pa gnyis kyis ni nyon mongs pa can gyi ltung ba yin par rig par bya'o//ltung ba rnams kyi chung ngu dang / 'bring dang / chen po nyid ni rnam pa lngas rig par bya ste/ lnga gang zhe na/ ngo bo nyid dang / byed pa dang / bsam pa dang / gzhi dang / tshogs pa'o/ /de la pham pa ni ltung ba chen po yin no/ /dge 'dun lhag ma ni 'bring ngo //de las gzhan pa ni ltung ba chung ngu yin no/ rnam grangs gzhan yang pham pa dang / dge 'dun lhag ma rnams ni lci ba'o/ /ltung byed dang so sor bshags par bya ba ni 'bring ngo / /nyes byas ni yang ba yin par rig par bya ste/ de ltar ngo bo nyid las chung ngu dang 'bring dang chen po nyid yin par rig par bya'o//de las mi shes pas byas pa gang yin pa dang / bag med pa gang yin pa de ni ltung ba chud pa yin no/ /nyon mongs pa mang bas byas pa gang yin pa de ni ltung ba 'bring yin no/ /ma gus pas byas pa gang yin pa de ni ltung ba chen por rig par bya ste/ de ltar na byed pa las chung ngu dang /'bring dang / chen po nyid yin par rig par bya'o/ /de las 'dod chags dang / zhe sdang dang / gti mug gis kun nas dkris pa chung ngus byas pa gang yin pa de ni chung ngur rig par bya'o/ /'bring gis byas pa gang yin pa de ni 'bring ngo / /chen pos byas pa gang yin pa de ni chen po yin te/de ltar na bsam pa las chung ngu dang / 'bring dang / chen po nyid yin par rig par bya'o/ /bsam pa mtshungs pas gzhi rang bzhin gcig pa la byas kyang chung ngu dang / 'bring dang / chen po nyid du 'gyur ba yang yod pa nyid du rig par bya'o/ /'di lta ste/ zhe sdang gis kun nas dkris pa mtshungs pas dud 'gro'i skye gnas su skyes pa'i srog chags bsams bzhin du bsad na ni ltung byed yin la/mi'am mir chags pa pha yang ma yin ma yang ma yin pa bsad na ni pham pa yin la/ mtshams med par ni mi 'gyur ro/ /zhe sdang gis kun nas dkris pa mtshungs pa pha'am ma bsad na ni pham pa yang yin la mtshams med par 'gyur bar yang rig par bya ste/de ltar na gzhi'i rnam pa las ltung ba chung ngu dang 'bring dang chen po nyid yin par rig par bya'o/ /de la sogs pa las ni 'di ltar 'di na la la ltung ba gcig dang gnyis dang gsum nas lnga'i bar du byung yang chos bzhin du phyir mi byed pa de ni tshogs pa las ltung ba chung ba yin no//de yan chad ltung ba bcu'am/ nyi shu'am/ sum cu'am/ shes par bya bar nus pa'i bar du byung ba la chos bzhin du phyir mi byed pa de ni tshogs pa las ltung ba 'bring yin par rig par bya'o/ /ltung ba dpag tu med pa byung ba bdag la ltung ba 'di snyed cig byung ngo zhes shes par bya bar mi nus pa gang yin pa de ni tshogs pa las ltung ba chen po yin par rig par bya'o//bya ba gang zhe na/ gang mi byed pa'i phyir mi sbyor ba las ltung ba 'byung ba ste/ mdor bsdu na bya ba ni rnam pa lnga ste/ tshogs kyi bya ba dang /rnam par dag pa'i bya ba dang / grong gi bya ba dang / dge ba'i phyogs kyi bya ba dang / 'phral gyi bya ba'o/ /de la tshogs kyi bya ba ni 'di lta ste/ nyan thos kyi sar tshogs rnam pa bcu gsum bstan pa yin no/ /rnam par dag pa'i bya ba yang 'di lta ste/ nyan thos kyis nyid du yid la byed pa bsgom pa'i skabs su bstan pa bzhin du rig par bya'o//grong gi bya ba ni bdag nyid kyi chos gos la sogs pa'i phyir grong du 'jug pa dang / sangs rgyas dang chos dang dge 'dun dang / tshangs pa mtshungs par spyod pa'i phyir ram/ ma dad pa rnams dad par bya ba dang / dad pa rnams phyir zhing 'byung bar bya ba'i phyir grong du 'jug pa'o//dge ba'i phyogs kyi bya ba ni tshogs kyi bya ba'am/ rnam par dag pa'i bya ba gang yin pa de nyid las brtsams nas dge ba'i phyogs rnams la chos kyi rjes su mthun pa'i chos sgrub pa la yang dag par 'jug pa'o/ /'phral gyi bya ba ni lhung bzad dang chos gos kyi las dang /mkhan po dang / slob dpon dang / tshangs pa mtshungs par spyod pa dang / nad pa la sogs pa'i bya ba dag yin par rig par bya'o/ /de dag las bzlog par bya ba lnga po de nyid kyis mi mthun pa rnam pa lngas ni bya ba ma yin pa lnga po dag ci rigs par rig par bya'o//ltung ba med pa gang zhe na/ rgyu lnga kho nas ltung ba mi 'byung ste/ lnga gang zhe na dbang po rnams kyi sgo bsdams te gnas pa dang / zas kyi tshod rig pa dang / nam gyi cha stod dang cha smad la mi nyal bar sbyor ba'i rjes su brtson pa dang / shes bzhin du spyod pa de ni rgyu gcig yin no//gzhan yang dge sbyong gi tshul la shas cher lta ba dang / ston pa dang / tshangs pa mtshungs par spyod pa rnams la dad pa dang gus pa chen po dang / kha na ma tho ba kun tu spyod pa shas cher ngo tsha shes pa dang / khrel yod pa dang ldan pa de ni gnyis pa yin no/ /gzhan yang bya ba nyung ba dang / don nyung ba dang / las kyi mtha' nyung ba dang / 'du 'dzi nyung ba de ni rgyu gsum pa yin no/ /gzhan yang khyim pa dang rab tu byung ba rnams dang mi 'dre bar gnas pa dang / bag yod pas ltung ba dang / ltung ba med pa la mkhas pa dang / dge ba'i phyogs la gcig tu nges par byed pa de ni rgyu bzhi pa yin no//gzhan yang las dang po pa dang / smyos pa dang / sems 'khrugs pa dang / tshor bas nyen pa de ni rgyu lnga pa yin par rig par bya ste/ rgyu lnga po de dag gi dang po nyid la ltung ba mi 'byung ngo / /ltung ba las bslang ba gang zhe na/ rgyu gsum gyis ldang ste/ gsum gang zhe na/'gyod pa lnga bskyed pa dang / yan lag lngas bsdus pa'i bag yod pa dang / rnam pa lngas 'gyod pa bsal ba'o/ /'di ltar 'di na la la ltung ba gang yang rung ba zhig byung na rgyu lngas 'gyod pa skyed par byed de/ bdag nyid la gzhi 'dis tshul khrims dag gis smad par 'gyur ro snyam nas 'gyod pa skyed par byed pa dang /gzhan dang lha dag gis smad par 'gyur ro snyam nas 'gyod pa skyed par byed pa dang / ston pa dang / tshangs pa mtshungs par spyod pa mkhas pa rnams kyis smad par 'gyur ro snyam nas 'gyod pa skyed par byed pa dang / phyogs dang phyogs mtshams rnams su sdig pa can gyi mi bsngags pa'i grags pa dang /sgra dang tshigs su bcad pa mngon par 'phel bar 'gyur ro snyam nas 'gyod pa skyed par byed pa dang / gzhi 'dis bdag lus zhig nas ngan song rnams su skyes par gyur na mi rung ngo snyam nas 'gyod pa skyed par byed pa'o/ /yan lag lngas bsdus pa'i bag yod pa ni 'di lta ste/nyan thos kyi sar sngon gyi mtha' dang ldan pa dang / phyi ma'i mtha' dang ldan pa dang / dbus kyi mtha' dang ldan pa dang / dus snga nas bya ba dang / lhan cig rjes su spyod pa zhes bstan pa bzhin du rig par bya'o/ /rnam pa lnga po dag gis 'gyod pa sel bar byed ce na/ bcom ldan 'das kyis gzhi dang bcas/nges par 'byung ba dang bcas pa'i chos bstan pas ltung ba las ldang ba'i skabs yod do snyam nas 'gyod pa skyes pa sel bar byed pa dang / mi shes pa dang / bag med pa dang / nyon mongs pa mang ba dang / ma gus pa gang gis ltung ba 'byung ba mi shes pa dang /ma gus pa'i bar de ni spangs shing shes pa dang / gus pa'i bar de ni yang dag par skyes so snyam nas 'gyod pa skyes pa sel bar byed pa dang / ltung ba la yang ltung ba mi 'byung bar bya ba'i phyir lhag pa'i bsam pa thag pa nas sems skyes so snyam nas 'gyod pa skyes pa sel bar byed pa dang /tshangs pa mtshungs par spyod pa mkhas pa rnams kyi mdun du so sor bshags zin to snyam nas 'gyod pa skyes pa sel bar byed pa dang / bdag legs par gsungs pa'i chos 'dul ba la rab tu byung nas bslab pa dang 'gal na 'gyod par byed pa gang yin pa de ni bdag la dge ba dang legs pa yin gyi/bcom ldan 'das kyis 'gyod pa'i rgyun sgrib pa'i gnas lta bu rnam grangs du mar smad pa/ bar du gcod par byed pa gang yin pa des mang du gnas shing dang du len par byed pa sel bar mi byed pa gang yin pa de ni bdag la dge ba dang legs pa ma yin no snyam du rig nas 'gyod pa skyes pa sel bar byed pa yin te/de ltar ltung ba las ldang bar byed do/ /'dul ba'i rjes su spyod pa'i chos ni lnga po 'di dag yin par rig par bya ste/ /dge slong 'dul ba la brtson pa ni de dag la rjes su spyod par byed do / /lnga gang zhe na/ gnas pa dang /gnas dang / rten dang / longs spyod dang / las ni lnga pa yin no/ /de la gnas pa gang zhe na/ dge slong 'dul ba'i bslab pa la brtson pa ni 'du shes kyi gnas pa lngas gnas par byed do/ /lnga gang zhe na/ grong du 'jug pa na btson rar 'jug pa'i 'du shes dang / gtsug lag khang na rtag tu dge sbyong gi 'du shes dang ldan/de la dge sbyong gi 'du shes ni 'di yin te/ bdag ni khyim pa'i cha lugs spangs shing kha dog ngan pa khas blangs pas gzugs mi sdug pa yin no zhes bya ba la sogs pa rgyas par mdo las gnas nyi shu rtsa gnyis ji skad gsungs pa dag la so sor rtog pa yin no//zas la rtag par nad kyi gnyen po'i 'du shes dang / rab tu dben pa na mig gis rnam par shes par bya ba'i gzugs dang / rna bas rnam par shes par bya ba'i sgra rnams las brtsams te/ long ba dang / 'on pa dang / lkugs par 'du shes pa dang / nyal ba na dgon pa'i ri dgas ltar thum phras su nyal ba'i 'du shes kyis te/dge slong 'dul ba'i bslab pa la brtson pa ni 'du shes kyi gnas lnga po de dag gis gnas par byed do/ /'du shes kyi gnas pa de dag gis gnas pa ni rgyal po la 'os pa'i gos dang zas dang mal stan gyi longs spyod la gnas par gnang yang 'dod pa'i bsod snyoms kyi rjes su sbyor bar mi 'gyur ro//gnas gang zhe na/ gnas lnga ste/ dge slong gi gnas dang / dge slong ma'i gnas dang / mu stegs can gyi gnas dang / kun nas nyon mongs pa can gyi gnas dang / kun nas nyon mongs pa can ma yin pa'i gnas so//de la dge slong gi gnas ni gang na dge slong gsar bu dang / bar ma dang gnas brtan dag gnas pa'o/ /dge slong ma'i gnas kyang gang na dge slong ma snga ma lta bu dang / rnam pa gsum po dag gnas pa'o/ /mu stegs can gyi gnas ni gang na mu stegs can gcer bu dang / 'tsho ba pa dang / phyugs bdag pa dang / de dag la sogs pa rnam pa sna tshogs dag gnas pa'o/ /kun nas nyon mongs pa can gyi gnas ni gang na las thams cad med pa'am / de dag las kha cig med pa'o/ /kun nas nyon mongs pa can ma yin pa'i gnas ni gang na las thams cad yod pa'o//de la dge slong gi gnas kun nas nyon mongs pa can ma yin pa ni 'khor snying po can gnas la/ kun nas nyon mongs pa can ni 'khor snyigs ma can gnas par rig par bya'o/ /de la dge slong dge slong nyid 'dod pas ni dge slong gi gnas kun nas nyon mongs pa can brtags te/ bkur sti rab tu spangs nas gnas par mi byed do //gnod pa byung na re zhig pa'i tshul dang 'gron lam du zhugs na re zhig pa'i tshul dang / dge slong de dag nyid mi dge ba'i gnas nas bslangs te/ dge ba'i gnas su dgod par bya ba'i phyir gnas pa ni ma gtogs so/ /dge slong ma'i gnas su ni gnas par mi bya ba kho na yin te/sngar smos pa'i rkyen rnams ma gtogs pa ni snga ma bzhin no/ /mu stegs can gyi gnas su yang de bzhin no/ /dge slong gi gnas kun nas nyon mongs pa can ma yin par ni ji srid 'tsho'i bar du brtags te tha na 'tsho ba tsam gyi phyir yang gnas par bya'o/ de ltar dogs par 'gyur ba dang / rtog par 'gyur ba med pa'i gnas pa dag tu ni dge slong de gnas na tshangs pa mtshungs par spyod pa mkhas pa rnams dogs pa dang rtog par mi 'gyur ro/ /rten gang zhe na/ rten kyang lnga ste/ lnga gang zhe na/ grong sogs la brten pa dang / gnas la brten pa dang /gang zag la brten pa dang / chos gos la sogs pa yo byad la brten pa dang / spyod lam la brten pa'o/ /de la grong ngam grong khyer la brten te yul gyi phyogs gang na gnas pa de ni de'i grong tshigs la brten pa yin no/ /dge 'dun gyi kun dga' ra ba'am gtsug lag khang ngam khang khyim mam/'chag sa las nye bar brten cing gnas pa de ni de'i gnas la brten pa yin no/ /sbyin bdag gam/ slob dpon nam mkhan po'am/ gleng ba po'am/ dran par byed pa'am/ 'doms par byed pa'am/ rjes su ston par byed pa'am/ chos ston pa la nye bar brten cing gnas pa de ni de'i gang zag la brten pa yin no//chos gos la sogs pa'i yo byad ngan pa'am/ bzang po ji lta bu la brten cing gnas pa de ni de'i chos gos la sogs pa'i yo byad la brten pa yin no/ /de de na dus dus su spyod lam rnam pa bzhis ci bde bar go rims bzhin du gnas pa de ni de'i spyod lam la brten pa yin te/rten de dag la brten cing gnas na bdag la bdag nyid sdug bsngal ba don med pa dang ldan pas gnod par mi 'gyur ro/ /longs spyod gang zhe na/ longs spyod mi rung ba lnga dang / rung ba lngar rig par bya ste/ longs spyod mi rung ba lnga ni mchod rten gyi ni nad tshabs che ba ma yin pa dang /rton pa gzhan yod pa la mi rung ngo / /dge 'dun ni ma bsgo ba dang / lhung bzed du ma chud pa dang / ma gtogs pa la mi rung ngo / /gang zag gzhan gyi ni ma byin pa dang / rjes su ma gnang ba dang / yid mi gcugs pa la mi rung ngo //rang gi gang zag ni bshad pa la sogs pa las byas pa'am/ de dang 'dres pa thams cad kyi thams cad du longs spyod du mi rung ngo / /bsten na de'i dge ba'i chos rnams yongs su nyams par 'gyur zhing mi dge ba'i chos rnams mngon par 'phel bar 'gyur ba gang yin pa dang / bsten na 'jig rten 'khrug par 'gyur ba dang /'jig rten gyis smad pa'am/ ma dad pa rnams dad par mi 'gyur zhing dad pa rnams gzhan du 'gyur ba yang mi rung ste/ lnga po de dag ni longs spyod mi rung ba yin pas dge sbyong 'dul ba'i bslab pa la brtson pas de dag yongs su spang bar bya'o/ / longs spyod rung ba lnga ni de dag las bzlog pa yin par rig par bya ste/ dge slong 'dul ba'i bslab pa la brtson pas de dag ni yongs su spyad par bya'o/ /de ltar longs spyod mi rung ba yongs su spong ba'i dge slong dang / longs spyod rung ba la rjes su 'jug pa'i dge slong ni dad pas byin pa yongs su sbyong bar byed do//las gang zhe na/ las ni mdor bsdu na bzhi ste/ gsol ba'i las dang / gsol ba dang gnyis kyi las dang / gsol ba dang bzhi'i las dang / lan gsum brjod pa'i las so/ /las bzhi'i de dag kyang gzhi gnyis la brten pa yin te/ sems can du bgrang ba dang /sems can du bgrang ba ma yin no/ /de la sems can du bgrang ba'i gzhi las ni rab tu dbyung ba dang / bsnyen par rdzogs pa dang / gang zag yid mthun par bya ba dang / ltung ba las bslang ba dang / dgar ba dang / bskrad pa dang / dbyar gnas par khas blangs pa dang / zhag bdun dang / nyi shu dang / bzhi bcur byin gyis brlab pa dang / sems can la phan gdags pa dang / chad pas bcad pa'i las gang yin pa de ni sems can du bgrang ba'i gzhi'i las zhes bya'o/ /sems can du bgrang ba ma yin pa'i gzhi las ni chos gos dang lhung bzed byin gyis brlabs pa dang / sra brkyang byin gyis brlabs pa dang /chos gos rnams dang mi 'bral bar bsdam pa dang / mtshams bcad pa dang / khyim rung bar yid mthun par bya ba gang yin pa dang / de lta bu dang mthun pa'i gzhi las gang yin pa de ni sems can du bgrang ba ma yin pa'i gzhi las yin par rig par bya'o/ /las de dag kyang tshogs gnyis kyis bya ba dang /tshogs bzhis bya ba dang / tshogs lngas bya ba dang / tshogs bcus bya ba dang / tshogs nyi shus bya ba dang / tshogs bzhi bcus bya ba dang / dge 'dun mthun pas bya ba yin par rig par bya'o/ /de la tshogs gnyis kyis bya ba 'di lta ste/ dge slong gis dge slong gi mdun du lan gsum brjod cing bshags pa'o//las kyi ltung byed dam nyes byas kyi nyes pa 'chags par byed pa'o/ /tshogs bzhis bya ba ni 'di ltar 'di na la la nyes pa sbom po byung ba bzhi'i mdun du 'chags par byed pa'o/ /tshogs lngas bya ba ni mtha' 'khob tu bsnyen par rdzogs par bya ba'i las so//tshogs bcus bya ba yul dbus su bsnyen bar rdzogs pa'i las yin par blta bar bya'o/ /tshogs nyi shus bya ba ni 'di lta ste/ dge 'dun lhag ma las dbyung ba'i las yin par blta bar bya'o/ /tshogs bzhi bcus bya ba ni dge slong ma bsnyen par rdzogs pa'i las yin par rig par bya'o//dge 'dun mthun pas bya ba ni 'di lta ste/ mtshams kyi las dang / gso sbyong gi las dang / dgag dbye'i las dang / gzhan yang de lta bu dang mthun pa gang yin pa'o/ /las rnam pa bzhi po de dag kyang gzhi'i rab tu dbye bas rnam pa du ma yod par rig par bya'o//'di lta ste/ 'dul ba'i ma mo las 'byung ba bzhin no/ /dge slong 'dul ba'i bslab pa la brtson pa de ltar las shes pa ni las rnams la rjes su spyod pa ni/ ltung ba la yang mkhas pa yin/ ltung ba las nges par 'byung ba la yang mkhas pa yin la/ bdag nyid kyang dag pa dang gtsang bar yongs su srung zhing kha na ma tho ba med pa yin no//dge slong 'dul ba'i bslab pa la brtson pa'i bslab pa dang mi mthun pa'i chos ni lngar shes par bya ste/ des de dag yongs su spang bar bya'o/ /bslab pa dang mthun pa yang lnga ste/ de dag gi bslab pa yang dag par sgrub par byed do//bslab pa dang mi mthun pa lnga gang zhe na/ bar du gcod pa dang / dam pa'i chos ltar bcos pa dang / sdig pa'i grogs po dang / glen zhing nyon mongs pa mang ba dang / sngon gyi tshogs stobs chung ba ni lnga pa yin no/ /bar du gcod pa lnga gang zhe na/ lhag pa'i tshul khrims kyi bar du gcod pa dang /lhag pa'i sems kyi bar du gcod pa dang / lhag pa'i shes rab kyi bar du gcod pa dang / bde 'gror 'gro ba'i bar du gcod pa dang / rnyed pa dang srog dang 'phral gyi bya ba'i bar du gcod pa'o/ /lhag pa'i tshul khrims kyi bar du gcod pa gang zhe na/ 'di ltar 'di na la la dran nam/rnyed btson nam/ brjod pa yod pa'am/ rgyas par rab tu 'byung ba'i bar du gcod pa'i chos rnams dang ldan pa de ni lhag pa'i tshul khrims kyi bar du gcod pa zhes bya'o/ /lhag pa'i sems kyi bar du gcod pa gang zhe na/ bar chad bcu gcig ni lhag pa'i sems kyi bar du gcod pa zhes bya'o//yang dang yang du tshogs 'dul ba la sogs pa nas yul ngan par gnas pa'i mthar thug pa'i bar dag go/ /lhag pa'i shes rab kyi bar du gcod pa gang zhe na/ chos dang chos smra ba la mi gus pa nyid dang / de bzhin gshegs pa dang chos smra ba dag la khyad du gsod pa nyid dang /bdag nyid la khyad du gsod pa nyid dang / chos la ser sna byed pa nyid dang / gzhan dag gi chos la bar chad byed pa dang / dam pa'i chos las 'dun pa bzlog pa dang / dam pa'i chos la skur pa 'debs pa dang / de ltar de lta bu la sogs pa ni lhag pa'i shes rab kyi bar du gcod pa yin par rig par bya'o//bde 'gror 'gro ba'i bar du gcod pa gang zhe na/ 'di ltar 'di na la la sdig pa 'dod pa dang / log par lta ba dang / khro ba dang / khon du 'dzin pa dang / rgyas par de lta bu'i ngan song gi rgyu yang dag par blang ba de lta bu la 'jug pa de ni bde 'gror 'gro ba'i bar du gcod pa zhes bya'o//rnyed pa'i bar du gcod pa ni 'di lta ste/ ma dad pa rnams dad par mi 'gyur ba dang / dad pa rnams gzhan du 'gyur zhing dad par mi 'gyur ba'i phyir zhugs pa dang / bsod nams mi 'dod pa dang / dus dang dus su sbyin pa las byung ba'i bsod nams bya ba'i dngos bos gzhan dag la phan pa nye bar sgrub par mi byed pa dang /de ltar de lta bu la sogs pa yin no/ /srog gi bar du gcod pa ni glang po che gtum po thag ring du spong bar mi byed pa dang / rgyas par yams kyi nad dang bcas pa dang / gnod pa dang bcas pa'i yul yongs su spong bar mi byed pa dang / rgyu gang dag dang rkyen gang dag gis tshe ma zad par 'chi ba'i dus byed par 'gyur ba de dag yongs su spong bar mi byed pa dang / de ltar de lta bu la sogs pa yin no/ /'phral gyi bya ba'i bar du gcod pa ni chos gos dang lhung bzed la sogs pa'i las gang dag yin pa de dag la brtson par mi byed pa ste/de dag gcig tu bsdus pa ni rnyed pa dang srog dang 'phral gyi bya ba'i bar du gcod pa yin par rig par bya'o/ /dam pa'i chos ltar bcos pa gang zhe na/ dam pa'i chos ltar bcos pa ni mdor bsdu na rnam pa gnyis su dgongs par rig par bya ste/ bshad pa dam pa'i chos ltar thos pa dang / sgrub pa dam pa'i chos ltar bcos pa'o/ /chos ma yin pa la chos su 'du shes shing / chos ma yin pa la chos su ston pa dang / gzhan dag kyang de la chos bstan to snyam du chos su 'du shes pa dang ldan par 'gyur la/ de yang yang dag pa dang bden par chos ma yin zhing chos lta bur snang ba yin pa de'i phyir bshad pa dam pa'i chos ltar bcos pa zhes bya'o//de gzhan dag la yang de ltar 'chad cing 'dzin du 'jug par byed la/ bdag nyid kyang de ltar zhugs shing chos su 'du shes pas log pa kho nar zhugs bzhin du bdag ni yang dag par zhugs pa yin no snyam du bdag nyid kyis kun du shes par byed pa 'di ni bsgrub pa dam pa'i chos ltar bcos pa yin par rig par bya'o//dam pa'i chos ltar bcos pa brgyad pa rnams kyi bar sdom ni/ chos la sogs pa rnam lnga dang / /dbang po la sogs rnam lnga dang / /gnas ma yin pas 'gyod sogs dang / / drag shul khrims 'chal tha ma yin/ /de bzhin gshegs pas gsungs pa'i mdo sde la tshig 'bru bcos pa dag gis mdo sde la lhad 'jug pa'i spong ba dang / 'dul ba la lhad 'jug cing spong ba ni dam pa'i chos ltar bcos pa yin no/ /sgro 'dogs pa'i lta bas med pa la sgro 'dogs pa dang / skur ba 'debs pa'i lta bas yod pa'i dngos po 'jig pa'i tshul gyis mi rtag pa la sogs pa'i don gzhan dag la ston pa dang /'chad pa dang bdag nyid de lta de ltar sgrub pa yang dam pa'i chos ltar bcos pa yin no/ /gang zag dang ldan pa bshad pa'i mdo sde la log par 'dzin pa'i gang zag yod pa nyid du ston pa yang dam pa'i chos ltar bcos pa yin no//rtags su yod pa'i chos rnams rdzas su yod pa nyid du yongs su ston pa yang dam pa'i chos ltar bcos pa yin no/ /mya ngan las 'das pa spros pa med pa la dngos po dang dngos po med par rtog pa dang / yod pa dang med par ston pa yang dam pa'i chos ltar bcos pa yin no//gang zag la la 'di skad ces bcom ldan 'das kyis dbang po rnams kyi sgo bsdam pa nyid bstod cing bsngags te/ rab tu bstod pas na gzugs rnams la mi lta ba ni bla'i dran pa nye bar bzhag ste lta ba ni de lta ma yin la yid kyis rnam par shes par bya ba'i chos rnams kyi bar du yang de bzhin du rig par bya'o zhes zer ba de yang dam pa'i chos ltar bcos pa yin no//gang 'di skad ces bcom ldan 'das kyis snying las chung ngur gnas pa nyid bstod cing bsngags pas na rnam par bsngags par 'os pa la rjes su mi brtag kun du mi dpyad par mi bsngags pa mi brjod pa nyid bla'i/bsngags pa brjod pa dang mi bsngags pa brjod pa ni de lta ma yin zhes zer na de yang dam pa'i chos ltar bcos pa yin no/ /gang 'di skad ces bcom ldan 'das kyis tshig ran par bstod cing bsngags pas na kye ma gang thams cad kyi thams cad du mi smra ba'i brtul zhugs yang dag par len pa de ni legs pa yin no zhes zer na de yang dam pa'i chos ltar bcos pa yin no// gang 'di skad ces bcom ldan 'das kyis zas nyung ba nyid dang / chos gos nyung ba nyid bstod cing bsngags pas na kye ma gang thams cad kyi thams cad du zas mi za bar gnas pa dang / gcer bu 'phyan pa de ni legs pa yin no zhes zer na/ de yang dam pa'i chos ltar bcos pa yin no/ /gang 'di skad ces bcom ldan 'das kyis 'du 'dzi med pa dang / tha snyad dang las kyi mtha' thams cad rgyun chad pa bstod cing bsngags pas na/ kye ma gang bas mtha'i gnas mal du gnas bar rtsom pa med pa nyid de ni legs pa yin no zhes zer ba de yang dam pa'i chos ltar bcos pa yin no//la la 'jig rten 'di ni sems kyis khrid cing drangs pas sems skyes so cog gi dbang gis 'gyur ro zhes bya ba dang / de lta bu dang mthun pa'i mdo sde dag yang dag pa ji lta ba bzhin mi shes pas nges par gzung ba yin pas/'di skad ces rnam par shes pa 'di nyid kyis mtshams sbyor bar byed 'khor bar byed la bdag kyang gzhan ma yin no zhes zer na/ de yang dam pa'i chos ltar bcos pa yin no/ /la la bcom ldan 'das kyis skyes bu gang zag tshul khrims dang ldan pa la kha zas ro brgya dang ldan pa dang /gos brgya stong rjes su gnang ba las na/ bar du gcod par byed pa'i 'dod pa gang dag yin pa de dag ni rnam pa nges na nyes par spyad kyang bar du gcod par mi 'gyur ro snyam du nges par gzung ba 'dzin pas 'di skad ces kye ma bcom ldan 'das kyis 'dod pa gang dag gis bar du gcod par gsungs pa de ni bsten kyang bar du gcod par mi 'gyur ro zhes zer na/de yang dam pa'i chos ltar bcos pa yin no/ /la la dgra bcom pa tshe 'di nyid la zas dang tha snyad dang phung po dang khams dang skye mched dag la khas len pa dang / khas mi len pa nyid yang dag pa ji lta ba bzhin du mi shes pas 'di skad ces bcom ldan 'das kyis chos bstan pa ni bdag gis 'di ltar shes te/'di ltar dge slong dgra bcom pa ni shi phan chad khas mi len pa yin no zhes zer na/ de yang dam pa'i chos ltar bcos pa yin no/ /la la kun rdzob dang don dam pa'i [(]bdan [,]bden [)]pa yang dag pa ji lta ba bzhin du mi shes pas tshul rnam pa gnyis las shin tu 'das shing /'di skad ces bdag med pa'i sems can yod na bdag med pas byas pa'i las bdag la ji ltar reg par 'gyur zhes zer na/ de yang dam pa'i chos ltar bcos pa yin par rig par bya'o/ / la la rang bzhin gyis kun tu rmongs pas 'doms par byed de/ de nang gi sems gnas pa gang rnam pa dgu yang dag pa ji lta ba bzhin mi shes la bden pa rnam par dpyad pa dang / dran pa nye bar gzhag pa rnam par dpyad pa yang dag pa ji ltar bzhin mi shes te/ de de ltar mi shes pas mos pa las byung ba'i yid la byed pa kho na zhi gnas kyi phyogs ston par byed pa dang mos pa las byung ba'i yid la byed pa kho nas lhag mthong gi phyogs ston par byed pa dang /mos pa las byung ba'i yid la byed pa kho nas mthar thug pa ston par byed cing bdag nyid kyang de ltar zhugs par gyur na/de yang dam pa'i chos ltar bcos pa yin no/ /la la gnas ma yin pa la 'gyod bar byed cing des rlom par byed na/ de yang dam pa'i chos ltar bcos pa yin no/ /la la lung nod pa dang / kha ton bya ba dang / rnal 'byor yid la bya ba'i mthu yod bzhin du zhal ta bya ba la mos par byed na de la yon tan du lta zhing gzhan dag la yang ston par byed na/de yang dam pa'i chos ltar bcos pa yin no/ /la la tshul khrims las byung ba dang / bsgoms pa las byung ba la spyod pa'i mthu yod bzhin du sbyin pa las byung ba la yon tan du lta zhing yul rgyu bas ltung ba'i gnas mang po dag gis bdag nyid smas shing nyams par byas nas sbyin par bya ba'i dngos po yang dag par bsgrubs te/sangs rgyas dang / chos dang / dge 'dun la 'bul bar byed na/ de yang dam pa'i chos ltar bcos pa yin no/ /legs par gsungs pa'i chos 'dul ba la rab tu byung nas thos pas phan tshun du rtsod par byed na/de yang dam pa'i chos ltar bcos pa yin no/ /dge slong 'dod pa chung ba la sogs pa spangs nas dge slong gang dag bsod nams che bar shes pa nas chos gos la sogs pa rnyed pa de dag la bsnyen bkur byed cing gtam 'dre bar byed/ phebs par smra bar byed/so sor kun dga' bar byed bag 'bebs par byed cing dge slong lag gi bla dag la sems log par mngon par 'du byed par 'gyur na/ de yang dam pa'i chos ltar bcos pa yin no/ /de bzhin gshegs pas gsungs pa'i mdo sde zab mo stong pa nyid dang ldan pa gang yin pa de dag spangs nas/'jig rten rgyang 'phen pa'i gsang tshig dka' ba dag gis mkhas par rlom zhing gzhan dag la yang mkhas pa yin par yid ches par byed na/ de yang dam pa'i chos ltar bcos pa yin no/ /drag shul can dang tshul khrims 'chal pa dag tshar bcad par mi bya ba yin na/ drag shul can dang tshul khrims 'chal pa dag la gnod par bya ba'i phyir sems par byed na/de yang dam pa'i chos ltar bcos pa yin no/ /tshul 'chos pa'i spyod lam rnam par sgrub par byed na/ de yang dam pa'i chos ltar bcos pa yin no/ /'jig rten rgyang 'phen pa'i gsang tshig dag gis shes kyi khe rgya chen po 'thob par byed na/de yang dam pa'i chos ltar bcos pa yin no/ /gzhan dag la gnod par byas te chos ma yin pas longs spyod dag bsgrubs nas kha na ma tho ba dang bcas pa'i dge ba byed na/ de yang dam pa'i chos ltar bcos pa yin no/ /dam pa'i chos ltar bcos pa de dag nyid bstan pa'i rgyu dang byed pa'i rgyu don med pa dang ldan pa gang gis 'jog par byed na/de yang dam pa'i chos ltar bcos pa yin no/ /de ltar dam pa'i chos ltar bcos pa de dag thams cad ni bslab pa dang mi mthun pa yin par rig par bya'o/ /sdig pa'i grogs po ni rgya cher 'di lta ste/ nyan thos kyi sa dang byang chub sems dpa'i sar bstan pa bzhin du rig par bya'o//mdor bsdu na bag med pa dang / nyes par spyod pa dang / dge ba dang yon tan dman pa yang dag par 'dzin du 'jug par byed pa gang yin pa de ni sdig pa'i grogs po yin par rig par bya'o/ /dman zhing rmongs pa'i rang bzhin can gyi nyon mongs pa shas che ba gang yin pa de ni glen zhing nyon mongs pa mang ba yin par rig par bya'o//sngon dad pa la sogs pa dge ba'i chos rnams ma bsgoms pa tshe 'di la dad pa la sogs pa dman pa nyid dang / tshe 'di la mya ngan las 'da' ba'i phyir brtson du zin kyang bsgom mi nus pa gang yin pa de ni sngon gyi tshogs med pas tshe 'di la stobs chung ba yin par rig par bya ste/chos lnga po de dag ni bslab pa dang mi mthun pa yin no/ /de las bzlog pa'i chos lnga ni bslab pa dang mthun pa yin par rig par bya ste/ de dag dang ldan pa'i dge slong 'dul ba la brtson/ pa ni bslab pa yang dag par sgrub par byed do/ /rjes su mthun pa'i chos de dag dang ldan pa de'i chos lnga ni tshul khrims kyi phung po srung bar byed pa yin te/ legs par mngon par 'byung ba dang / yongs su 'dri ba dang / so sor rtog pa dang / gnyen po sgom pa dang / dad pa'o/ /de la bu lon gyis nyam thag nas rab tu byung ba ma yin pa zhes bya ba nas/rgyas par de snga ma bzhin du mya ngan las 'das pa'i bsam pa dang / bslab pa 'dod pas rab tu byung ba de ni legs par mngon par 'byung ba yin no/ /de de ltar mngon par byung nas ltung ba dang ltung ba med pa dang ltung ba las bslangs pa las brtsams nas dge slong mdo sde dang 'dul ba dang ma mo 'dzin pa gang dag yin pa de dag la yongs su 'dri bar byed cing de dag kyang de la ston par byed pa de ni yongs su 'dri ba zhes bya'o//dus gsum du bdag nyid kyi tshul khrims dag las so sor rtog par byed cing gal te snga dro'i dus kyi tshe nyes pa med par mthong na mchog tu dga' ba de nyid kyis nyin mtshan du rjes su slob cing gnas pa dang /gal te nyes pa mthong na yang chos bzhin phyir byed pa de ni so sor rtog pa zhes bya'o/ /de dus dus su ni nam gyi cha stod dang / nam gyi cha smad dag la nyin mo yang rung ste/ 'dod chags la sogs pa nyon mongs pa rnams kyi gnyen po yid la byed cing sgom pa dang /tshul khrims dang smra ba dang / sgra tsam gyis chog par mi 'dzin pa de ni gnyen po sgom pa yin par rig par bya'o/ /de ltung ba'i 'bras bu phyi ma la mi 'dod pa yin par yid ches pa ni dad pa yin par rig par bya'o/ / de la legs par mngon par 'byung ba yod pa la brten nas ni de las gzhan bzhi po dag gi bya ba byed do/ /yongs su 'dri bas ni mi shes pas ltung ba 'byin par mi byed do/ /so sor rtog pas ni bag med pas ltung ba 'byin par mi byed do/ /gnyen po bsgoms pas ni nyon mongs pa mang bas ltung ba 'byin par mi byed do//dad pas ni ma gus pas ltung ba 'byin par mi byed do/ /de ltar na chos de la brten nas tshul khrims kyi phung po kun tu bsrungs pa dang / legs par bsrungs pa yin no/ /dge slong 'dul ba'i bslab pa la brtson pa'i chos lnga ni nye bar zhi ba dang / dul ba dang / zhi bar 'gyur ba yin te/lnga gang zhe na/ des shing 'grogs na bde ba nyid dang / spong ba dang / spong ba'i yan lag dang / bsnyen bkur dang / rtsod pa nye bar zhi ba'o/ /des shing 'grogs na bde ba nyid gang zhe na/ yang dag par mgu bar 'gyur ba'i chos drug ste/ mdo las ji skad gsungs pa bzhin no/ /spong ba gang zhe na/lha dang mi rnams kyi 'khor lo bzhi'o/ /spong ba'i yan lag ni spong ba'i yan lag lnga'o/ /bsnyen bkur ni ston pa la bsnyen bkur byed pa na rgyas par bag yod pa'i bar ro/ /rtsod pa nye bar zhi bar byed pa ni rtsod pa nye bar zhi bar byed pa'i chos bdun no/ /de la lus la sogs pas tshangs pa mtshungs par spyod pa rnams la mi 'dod pa kun tu spyod pa las brtsams pa dang /de la lus la sogs pa las mi mnyam par yongs su longs spyod pa las brtsams pa dang / tshul khrims dang lta ba mi mthun pa'i chos las brtsams nas sdug bsngal bar gnas shing phan tshun 'khu ba'i sems ni yang dag par mgu bar 'gyur ba'i chos kyi mi mthun pa'i phyogs yin no//de las bzlog pa dkar po'i phyogs kyi rgyu gsum gyis ni yang dag par mgu bar 'gyur ba'i chos drug rnam par gzhag par rig par bya ste/ dang pos ni gsum rnam par gzhag go/ /gnyis pas ni bzhi pa'o //gsum pas ni lnga pa dang drug pa'o/ /de la gzhan dag la 'dod pa dang phan pa dang / bde ba dang nye bar gnas pa'i lus la sogs pa'i las ci yang rung ba de byams pa zhes bya'o/ /de la chos dang ldan pa'i rnyed pa la ni longs spyod du rung ba gang yin pa'o/ /chos kyi rnyed pa la ni log pas 'tsho bar byed pa'i chos la brten te bsgrubs pa ma yin pa gang dag yin pa'o//lhung bzed du chud pa ni lhung bzed du blugs pa gang dag yin pa'o/ /lhung bzed du gtogs pa ni ma blugs kyang blugs par phyogs pa gang dag yin pa'o/ /chos bzang ba dang lhag par mi za ba gang yin pa de ni thun mong du za ba nyid yin no//mi sbed par za ba ni mngon par za ba nyid yin par rig par bya ste/ tha na lto 'grangs tsam gyi zas de las kyang bgo bsha' byed do / 'di las gzhan la cung zad sbyin dgos par gyur na gnod par 'gyur ro snyam nas ched du sgo bcad de dben pa'i phyogs su za bar mi byed pa'o//'phags pa dgyes pa'i tshul khrims kyi rnam grangs dag rnam par dbye ba ni 'di lta ste/ rnam grangs bsdu ba las 'byung ba bzhin du rig par bya'o/ /'jig rten las 'das pa'i lta ba'i rnam grangs dag gi rnam par dbye ba ni 'di lta ste/ gzhi bsdu ba las 'byung ba bzhin du rig par bya'o//rgyu gnyis kyis ni dga' ba nyid du 'gyur te/ yon tan la yid ches pas bla ma nyid dang / phan 'dogs pas yid du 'ong ba nyid kyis so/ /dga' ba nyid de'i 'phel ba ni rnam pa gnyis te/ ma skyes pa skyed par byed pa dang skyes pa phyir 'byung ba 'phel zhing rgyas par 'gyur ba'o//de la bla ma nyid kyi dbang gis ni yid ches par byed pa'o/ /yid du 'ong ba'i dbang gis ni chos dang zang zing dag gis sdud par byed do/ /de gnyis ka'i dbang gis na mthun par 'gyur ro/ /mthun pa'i dbang gis na sems kun du mi 'khrug pa dang ngag kun du mi 'khrug pa ni 'thab pa med pa dang / rtsod pa med pa yin no//don gcig gi bya ba byed pa'i tshul gyis chu dang 'o ma gcig tu 'dres par gyur pa lta bu ni rgyu gcig tu gyur pa yin no/ /'khor lo bzhi ni gnas phun sum tshogs pa dang / gdams ngag phun sum tshogs pa dang / sgrub pa phun sum tshogs pa dang / tshogs phun sum tshogs pa las brtsams te rnam par gzhag par rig par bya'o//de la mthun pa'i yul du gnas pa ni gnas phun sum tshogs pa lngas rig par bya ste/ 'di lta ste/ nyan thos kyi sar bstan pa bzhin no/ /skyes bu dam pa ni dge ba'i bshes gnyen yin par rig par bya ste/ 'di lta ste/ nyan thos kyi sa dang / byang chub sems dpa'i sar bstan pa bzhin no/ /bdag nyid kyi yang dag pa'i smon lam ni rnam pa lngar rig par bya ste/ yang dag pa'i gdams ngag la mthun par 'dzin cing ma nor bar 'dzin pa dang / chos kyi rjes su mthun pa'i chos sgrub pa la mthun par sgrub pa dang / bla ma'i gdams ngag la bdag nyid ji lta ba bzhin du smra ba dang /chos gos dang / bsod snyoms dang / mal cha dang / stan ngan pa bzang po gang yang rung ba dag gis chog shes pa dang / rgyun du byed pa dang / gus par byed pa'i sbyor bas 'di lta ste/ bden pa mngon par rtogs pa dang / bsgom pas spang bar bya ba'i nyon mongs pa sred pa dang len pa la sogs pa lhag ma rnams kyi gnyen por spong ba la dga' ba dang /sgom pa la dga' ba yin no/ /gang zag sngon bsod nams byas shing dge ba byas pa'i 'bras bu'i phan yon gyi rtags ni rnam pa lngar rig par bya ste/ sngon bsod nams byas pa'i rnam par smin pa'i 'bras bu 'dod pa rnam pa gnyis la gnas pa yin te/nang gi dang phyi rol gyi'o/ /de la nang gi rnam par smin pa'i 'bras bu 'dod pa ni tshe ring zhing yun ring du gnas pa dang / gzugs bzang zhing blta na sdug pa dang / gnod pa nyung zhing nad nyung ba'i rang bzhin can dang /bran ma yin ba dang / bud med ma yin pa dang / za ma ma yin pa dang / shes rab dang ldan pa dang / tshig btsun pa dang / dbang che bar grags pa yin no/ /de la phyi rol gyi rnam par smin pa'i 'bras bu 'dod pa ni/ dge ba'i rtsa ba gzhan gang yin pa de dag dang zhes bya ba rgyas par mdo las longs spyod che ba dang /rtsa 'jing che ba dang / g.yog 'khor mang bzhes ji skad gsungs pa yin te/ de ni sngon bsod nams byas pa'i 'bras bu'i phan yon gyi rtags dang po yin par rig par bya'o/ /gzhan yang sngon bsod nams byas pa ni rab tu bag med par gyur kyang gnod sbyin dang mi ma yin pa gdug pa gnyug mar gnas pa dag gis 'di lta ste/longs spyod kyi bar chad dam srog gi bar chad bya bar mi nus te/ de ni 'bras bu'i phan yon gyi rtags gnyis pa yin no/ /gzhan yang sngon bsod nams byas pa ni rang bzhin gyis dge ba'i chos rnams bsgom pa'i phyir sems 'jug par 'gyur te/de ni 'bras bu'i phan yon gyi rtags gsum pa yin no/ /gzhan yang sngon bsod nams byas pa ni rang bzhin gyis sdig pa'i spyod pas gdung zhing 'dzem la/ sdig pa byas na yang dus dus su 'gyod pa'i sems drag po 'thob cing 'gyod pa byas pa des sdig pa srab mor byed pa phyis kyang sdig pa spong bar byed de/de ni 'bras bu'i phan yon gyi rtags bzhi pa yin no/ /gzhan yang sngon bsod nams byas pa la ni las kyi mtha'i sbyor ba thams cad dang bsam pa'i skyes bu'i bye brag thams cad mang zhing mthun pa dang tshegs chung ngus 'grub par 'gyur te/de ni gang zag sngon bsod nams byas pa'i 'bras bu'i phan yon gyi rtags lnga pa yin par rig par bya'o/ /de dag ni lha rnams kyi nang nas lhar gyur pa rnams dang / mi rnams kyi nang nas mir gyur pa rnams kyi zhi gnas dang / lhag mthong gi shing rta'i 'khor lo bzhi ste/ gang yang rung ba zhig med na ni shing rta de 'gro bar mi 'gyur ro/ /spong ba'i yan lag lnga ni thob par bya ba'i don la mngon par yid ches pa dang / bla ma rnams la bdag nyid ji lta ba bzhin smra ba dang / lus spro ba dang / sems spro ba dang / legs par gsungs pa dang / nyes par bshad pa'i chos rnams kyi don shes par nus pa nyid las brtsams te go rims bzhin du rnam par gzhag par rig par bya'o//de dag las gang yang rung ba ma tshang na spong ba 'grub par mi 'gyur ro/ /bsnyen bkur las brtsams te dang po kho nar lhag pa'i tshul khrims las brtsams pa dang /lhag pa'i sems dang lhag pa'i shes rab la brtsams nas chos ston par mdzad pa gang yin pa'i ston pa la bsnyen bkur bya'o/ /de'i 'og tu gang bstan par bya ba'i chos de la yang bsnyen bkur bya'o/ /de'i 'og tu chos dang rjes su mthun pas chos 'grub pa'i dus na lhag pa'i tshul khrims las brtsams te/'dul ba dang ldan pa'i bslab pa'i gzhi rnams la bsnyen bkur bya'o/ /de'i 'og tu lhag pa'i sems dang shes rab las brtsams te gdams ngag dang rjes su bstan pa la bsnyen bkur bya'o/ /de'i 'og tu dus dus su chos kyi bgo bsha' dang / zang zing gi bgo bsha' la bsnyen bkur bya'o/ /de la bgo bsha' ni 'di yin te chos dang zang zing dag la thun mong du gnas pa nyid dang thun mong du longs spyod pa nyid gang yin pa'o/ /de'i 'og tu bsam gtan rnams dang ting nge 'dzin dang snyoms par 'jug pa dang rnam par thar pa dag la bsnyen bkur bya'o//de'i 'og tu ro myang ba med pa'i rjes su 'brang bas bden pa rab tu rtogs par bya ba dang / zag pa zad par bya ba dang / bag yod pa la bsnyen bkur bya ba ste/ de ni bsnyen bkur rnam pa bdun gyi go rims yin par rig par bya ste/ /de la bsnyen bkur ni rnam pa gsum gyis rig par bya'o//yon tan dang phan yon la yid ches pas bla mar bya ba dang yid ches pa dang / rjes su mthun pa'i lus dang ngag dang yid kyis thun mong du legs par bsgrubs pas ri mor bya ba dang / gdugs dang / rgyal mtshan dang ba dan dag gis mchod par bya'o/ /rtsod pa nye bar zhi ba la brtsams nas tshangs pa mtshungs par spyod pa la ltung ba byung ba nyid kyi tshe na mig bzhis mngon sum du bden pas ltung ba gleng bar byed cing mi bden pas ma yin zhes rgyas par bya ba ste/de yang ma rtogs pa las rtogs pa dang dus mnyam pa kho nar ltung ba 'byin par mi byed cing ltung ba ma byung ba las dge slong rnams kyi gzhi des mthong ba dang thos pa dang dogs pas gleng bar mi byed de/de ltar na de'i rtsod pa de nye bar zhi bar 'gyur ro/ /dge slong ltung ba byed par dge slong rnams kyis mthong la/ ltung ba byung ba gang yin pa des ni ltung ba brjed par 'gyur/ gang dag gis mthong ba de dag gis ni ma brjed na de la ltung ba dran nam zhes gzhi des gleng bar byed pa na mi dran no zhes zer na/de mi dran pa des dran gyis bshags par bya'o zhes bya bar yang mi bde la gzhan gyis glengs pa so sor ma bshags na 'gyod pa med par yang mi 'gyur bas de'i phyir des gzhan la yid ches pa des dge slong la dran pas 'dul ba zhes bya bas yongs su dag pa gsol bar bya zhing dge 'dun gyis kyang dge slong de dag nyid de la yid ches pas yongs su dag par brjod par bya ste/de lta na de'i rtsod pa nye bar zhi bar 'gyur zhing de yang 'gyod pa med par 'gyur la dge 'dun rnams kyis kyang gzhi des gleng bar mi byed do//dge slong sems 'khrugs pa la sogs pa rmongs pa byung na dge slong gi tshul dang mi mthun pa mang po kun du spyad par gyur na de la ni gzhi des ltung ba med kyang kha cig gis de la ltung ba med par mi shes nas 'di ltar gnas ma yin par gleng bar mi byed de dge slong rnams kyis de la ma 'ongs pa spangs pa'i phyir rang gi sems la rag las pa dge 'dun la ma smyos pas 'dul ba gsol bar gyis zhes slob par byed dran par byed na/des kyang de dag la thos nas gsol bar bya'o/ /dge 'dun gyis kyang gang zag 'di ni ltung ba med pa yin no//zhes dge 'dun mthun par gnas pas de dag la rnam par dag par smos par byed de thos nas dge slong ma gtogs pa de dag gis kyang gzhi des de la yang gleng bar mi byed de de ltar na de'i rtsod pa de nye bar zhi bar 'gyur ro/ /de dge 'dun gyi nang du dge slong gis dge slong la ltung ba gleng bar byed pa gang yin pa des ni ltung ba yod par 'du shes la gleng bar bya ba gang yin pa de ni ltung ba med par 'du shes shing bdag la ltung ba byung na med do zhes rlom par byed la gleng ba po yang tshe dang ldan pas 'di dang 'di ltar ma byas sam zhes smra zhing des kyang byas so zhes rab tu shes par byed la gleng ba po yang de ni ltung ba yin na glengs pa'i tshe ltung ba med do zhes rlom par byed ces zer na de la dge 'dun gyis ci ltung ba yod dam 'on te med ces gzhi de'i ngo bo nyid brtsal bar bya zhing de bzhin du yang dag par lan gdab par yang bya ste/de ltar na de'i rtsod pa de nye bar zhi bar 'gyur ro//gnas gang yang rung ba zhig na dge slong rab tu mang po dag ltung ba byung du dogs pa las brtsams nas ltung ba yod do/ /ltung ba med do/ /lci ba yin no/ /yang ba yin no zhes rtsod par 'gyur na de la gnas gzhan la rgya che zhing mang ba gang dag yin pa dag dang / de dag pas ches byang ba mdo sde dang / 'dul ba dang / ma mo 'dzin pa gang yin pa de dag la de dag gis bstan par bya ste/ de ltar de'i rtsod pa de mjug tu nye bar zhi bar 'gyur ro/ /dge slong ltung ba byung na rang gis 'gyod pa'i kun nas dkris pas gleng bar byed sel bar byed cing gzhan dag gis gleng gi dogs pas chos bzhin du phyir byed de des na rtsod pa de nyid nye bar zhi bar 'gyur ro//dge slong rab tu mang po dag phan tshun ltung bas gleng bar byed cing de dag kyang nga rgyal gyis mngon par tshar bcad pa sha stag yin la phan tshun de dag 'chags par mi 'dod cing bye ba dang tha dad du gyur pa dang /gnyis su gyur cing gnas la/ gcig gi phyogs kyang 'di snyam du 'di dag bdag cag la 'chags par mi byed la / bdag cag gis kyang ci'i phyir 'di dag la bshags par bya snyam du sems shing phyogs cig shos kyang de kho na snyam du sems par gyur na de la phyogs gnyis kar gtogs pa'i gang zag gtso bo'i tshig gzung ba gnyis gzhan gyi phyogs gcig tu dong la/de dag gi rjes su gnas pas ltung ba de dag bshags par bya ste/ de ltar na de'i rtsod pa nye bar zhi bar 'gyur ro/ /de dag kyang mdor bsdu na rtsod pa rnam pa bzhi dang / de nye bar zhi ba rnam pa bzhir 'gyur te/rtsod pa rnam bzhi gang zhe na/ gzhan gyis glengs pas rtsod pa dang / phan tshun the tshom za bas rtsod pa dang / bdag nyid glengs pas rtsod pa dang / phan tshun glengs pas rtsod pas so/ /nye bar zhi ba rnam pa bzhi gang zhe na/ bsams pa'i ltung ba dge 'dun la ston pas nye bar zhi ba dang /yongs su dag pas sbyin pas nye bar zhi ba dang / de'i ngo bo nyid dang gang mang ba tshol ba dang yang dag pa ji lta ba bzhin 'gro bas nye bar zhi ba dang / bshags pas nye bar zhi ba'o/ /dge slong 'dul ba'i bslab pa la brtson pas yongs su shes par bya ba'i gnas ni lnga ste/ lnga gang zhe na/ dngos po yongs su shes par bya ba dang /ltung ba yongs su shes par bya ba dang / gang zag yongs su shes par bya ba dang / rdzas blang ba yongs su shes par bya ba dang / gnod pa yongs su shes par bya ba'o/ /de la dngos po yongs su shes par bya ba gang zhe na/ phung po'i dngos po la sogs pa lnga ste/ 'di lta ste/ nyan thos kyi sar bstan pa bzhin no//gzhan yang mdor bsdu na dngos po gnyis te/ sems can du ston pa dang / sems can du mi ston pa'o/ /ltung ba yongs su shes par bya ba gang zhe na/ dge slong 'dul ba'i bslab pa la brtson pas rnam pa lngas ltung ba yongs su shes par bya ste/ gzhi dang / kun nas slong ba dang / dngos po dang / sbyor ba dang / mtha' yas so/ /de la gzhi las ltung ba yongs su shes par bya ba ni 'dod chags kyi gzhi'am/ zhe sdang gi gzhi las so/ /kun nas slong ba las ni ltung ba gang lus kyis kun nas slong bar byed la ngag gis kyang ma yin/sems kyis kyang ma yin pa yang yod do/ /ngag gis kun nas slong bar byed la lus kyis kyang ma yin sems kyis kyang ma yin pa yang yod do/ /sems kyis kun nas slong bar byed la lus kyis kyang ma yin/ ngag gis kyang ma yin pa yang yod do//lus dang ngag dag gis kyang kun nas slong bar byed la sems kyis kyang ma yin pa yang yod do/ /ngag dang sems kyis kun nas slong bar byed la lus kyis kyang ma yin pa yang yod do/ /lus dang ngag gis kun nas slong bar byed la/ sems kyis ma yin pa yang yod do/ /ngag dang sems kyis kun nas slong bar byed la lus kyis ma yin pa yang yod do//lus dang ngag dang sems kyis kun nas slong ba yang yod do/ /sems 'ba' zhig gis gang zag gzhan dag gi mdun du bshags par bya dgos pa'i ltung ba kun nas slong ba med kyi bdag nyid kyis bsdam par bya ba kho na yin no//'o na ji lta zhe na 'di lta ste/ dper na/ dge slong 'dod pa'i rnam par rtog pa la sogs pa mi dge ba'i rnam par rtog pa dag la rnam par rtog pa byed pa lta bu'o/ /dngos po las ni mdor bsdu na dngos po rnam pa gnyis te/ sems can du bgrang ba dang / sems can du bgrang ba ma yin pa'o//sbyor ba yang rnam pa gnyis te/ bya ba ma yin pa byed pa'i sbyor ba dang / bya ba mi byed pa'i sbyor ba'o/ /mtha' ni gang las brtsams par gyur pa de la mthar thug par 'gro zhing bar nas phyir mi ldog pa ste/ des na de'i ltung ba yongs su rdzogs par 'gyur ro/ / nyes pa sbom po'i ltung ba ni pham pa dang dge 'dun lhag ma'i sbyor ba las 'byung ngo / /ltung byed dang nyes byas ni de dag gi sbyor ba dang rang gi sde tshan mthar thug pa las so/ /nyes byas ni ltung byed kyi sbyor ba las byung ngo / /de la ltung ba lhag ma dang bcas pa ni ltung ba'i sde tshan bzhi po dag go//lhag ma med pa ni pham pa rnams so/ /spyad pa ni yang dag par byas pa'o/ /ma spyad pa ni de las bzlog pa yin no/ /smras pa ni gzhan dag gi mdun du bshags pa'i tshul gyis chos bzhin phyir byas pa'o/ /ma smras pa ni de las bzlog pa yin no/ /bsams pa ni bshags par byas pa'i nyes byas phyir byin gyis brlabs pa gang yin pa'o//ma bsams pa ni de las bzlog pa yin no/ /bcas pa ni bcom ldan 'das kyis so sor thar pa dang / 'dul bar ltung ba las rnam par gzhag pa yin no/ /ma bcas pa ni de las bzlog pa yin no/ /phyir bzhag pa ni gang zag gcig gam/dus las brtsams pa mgo gcig tu ma byas par sngon khyad par med par bcas pa gang yin pa'o/ /spyir bzhag pa ma yin pa de ni de las bzlog pa las rig par bya'o/ /de la gang zag yongs su shes par bya ba ni rnam pa lngas rig par bya ste/dpyad pa'i dbye ba dang / ris kyi dbye ba dang / mtho dman gyi dbye ba dang / 'thob pa'i dbye ba dang / brtag pa'i dbye bas so/ /de la dpyad pa'i dbye ba ni/ 'di lta ste/ nyan thos kyi sar bstan pa bzhin du rig par bya'o/ /ris kyi dbye bas yang dge slong dang dge slong ma la sogs pa ris bdun gyi dbye ba yin par rig par bya'o//de la mtho dman gyi dbye ba ni 'di lta ste/ gang zag la la rigs mthon po las rab tu byung ba dang / phyug po'i khyim nas rab tu byung ba dang / gzugs bzang ba yin la/ la la ni de lta ma yin pa ste/ de ltar yongs su shes pa gang yin pa de ni mtho dman gyi dbye ba yongs su shes pa zhes bya'o//'thob pa'i dbye ba ni dad pas rjes su 'brang ba nas bzung ste/ gnyis ka'i cha las rnam par grol ba'i mthar thug pa'i bar du bcu bdun dang rgyun du zhugs pa'i 'bras bu'i phyir zhugs pa nas bzung ste/ dgra bcom pa nyid kyi bar dag ste/ gang zag de dag gi rnam par dbye ba ni 'di lta ste/ nyan thos kyi sar bstan pa bzhin no/ /brtag pa'i dbye ba ni gang zag gleng ba pos 'di ltar gang zag yongs su brtags nas gleng bar bya ste/ ji gang zag 'di bdag la byams pa gus pa yod dam zhes bya ba la sogs pa rgyas par mdo las ji skad gsungs pa bzhin du rig par bya'o//gang zag gang gleng bar bya ba gang yin pa las kyang gang zag gleng ba po la 'di ltar brtag par bya ste/ kye ma gang zag 'di byis pa rmongs pa chos ma yin pas gleng zhing bdag nyid smas pa dang / nyams par byed pa zhig gam zhes bya ba la sogs pa rgyas par mdo las ji skad gsungs pa kho na bzhin no//'on te mkhas pa gsal ba chos bzhin du gleng zhing bdag nyid smras pa dang nyams par mi byed pa zhig ces bya ba la sogs pa dkar po'i phyogs kyang rgyas par mdo las ji skad gsungs pa kho na bzhin du rig par bya ste/des gang zag gleng bar 'os pa yin nam ma yin/ legs pa kho nar yongs su brtags na skabs dbye bar bya ba'am mi dbye bar bya ba de ni brtags pa'i dbye bas gang zag yongs su shes par bya ba yin par rig par bya'o/ /rdzas blang ba yongs su shes par bya ba gang zhe na/rdzas blang ba ni mdor bstu na rnam pa gsum du rig par bya ste/ bdag nyid dang gzhan dag gi rnyed pa'i rdzas blang ba dang / ltung ba las bslang ba'i rdzas blang ba dang / dge 'dun bde bar bya ba'i phyir tshul khrims 'chal pa bskrad pa'i rdzas blang ba'o/ /de la rnyed pa'i rdzas rung ba gang yin pa de ni yang dag pa yin no//rung ba dgos pa dang bcas pa 'di lta ste/ snod spyad dang yo byad mang po'i phyir ma yin pa de ni don dang ldan pa yin no/ /longs spyod pa'i phyir mtshams las 'das pa gang yin pa de ni dus su yin no/ /de las gzhan pa'i dge slong rnams kyis rnyed pa'i rdzas blang ba yang yin par yang dag par bstan pa'i phyir phyogs dang bcas pa yin no//phyogs dang bcas pa des dge 'dun gyi dbyen du mi 'gyur ba'i phyir dge 'dun gyi dbyen dang bral ba yin te/ yan lag lnga po de dag dang ldan pa'i rnyed pa'i rdzas de yang dag par blangs nas dran pa nye bar gzhag pa dang /kun nas nyon mongs pa can ma yin pa'i sems kyis yongs su spyad par bya ste/ de ltar na de'i rdzas blang ba de kha na ma tho ba med pa yin no/ /ltung ba las bslang ba'i rdzas blang ba la ni de dang ldan pa'i ltung ba lhag par spyod pa gang yin pa de ni yang dag pa yin no//bdag gis 'di mi dge ba'i gnas nas blang ste/ dge ba'i gnas su gnas par nus so snyam du shes pa gang yin pa de ni don dang ldan pa yin no/ /gzhan dag chos smra ba'am/ bla ma la bsnyen bkur byed pa'am/ nad g.yog la sogs pa las sbyor ba'i dus dag tu gleng bar mi byed pa gang yin pa de dus dus su yin par rig par bya'o//gleng ba de la de las gzhan pa'i dge slong dag grogs su gyur pa gang yin pa de ni phyogs dang bcas pa yin no/ /gzhi des dge 'dun gyi dbyen du mi 'gyur ba de ni yongs su dag pa lnga pa yin te/des de ltar dran pa nye bar gzhag pa kun nas nyon mongs pa can ma yin pa'i sems dang / mdza' bshes kyi dngos po nyid dang / ngang 'jam pas rdzas de blang bar bya'o/ /ltung ba las bslang ba'i rdzas blangs pa ji lta ba bzhin du bde bar bya ba'i phyir tshul khrims 'chal pa bskrad pa'i rdzas blang ba yang de bzhin du ci rigs par rig par bya'o//de la bye brag ni 'di yod de/ gal te bskrad pa des skrod par byed pa de'i srog gi bar chad dam/ dge 'dun gyi kun dga' ra ba la gnod pa'am/ mchod rten la gnod pa'am/ de las gzhan pa'i tshangs pa mtshungs par spyod pa dag la gnod pa byed par 'gyur ba gang yin pa de ni 'dir don dang ldan pa yin la/de las bzlog pa ni don dang mi ldan pa yin par rig par bya'o/ /gnod pa yongs su shes par bya ba gang zhe na/ lnga po 'di dag ni tshe 'di la gnod pa byas pas bgrod par bya ba dam pa rnams kyis rnam par spangs pa/ma smyos pa rnams kyis smyos pa'i spyod pa dang 'dra ba 'di lta ste/ slu bar 'gyur ba yin la don 'ga' yang rgyas par mi 'gyur ba dag ste/ lnga gang zhe na/ shi ba'i rjes su mya ngan byed pa dag ni shi ba'i rjes su mya ngan byed pa na bdag nyid rnam grangs du ma nas kun du gdung bar byed pa de ni tshe 'di la gnod pa rgyas pa dang po yin no//gzhan yang brkam chags dang ldan pa ser sna can ser sna'i dri mas zil gyis non pa dag 'tsho ba'i yo byad dag yod bzhin du tshegs chen pos 'tsho bar byed pa de ni tshe 'di la gnod pa rgyas pa gnyis pa yin no//de la ser sna'i dri ma gang zhe na/ ser sna'i dri ma brgyad de/ sngon ser sna la goms shing gtong ba la ma goms par ser sna'i dri ma dang / tshe 'di la lus dang srog la shas cher blta ba dang de dang skal ba mnyam pa'i mdza' bshes rnams dang 'grogs shing rjes su 'jug pa dang /sems can rnams la snying rje ma goms shing snying rje chung ba dang / zhing mi mthun pa la sogs par sgrub pa kun tu ston pa dang / tshegs chen pos longs spyod 'thob cing tshegs chen pos 'thob par goms pa'i 'du shes dang / dus gsum du yid mi bde zhing 'gyod pa dang /gcig tu longs spyod rnams la yon tan du lta zhing nyes dmigs su mi lta la/ log par len cing yongs su bsngo ste/ brgyad po de dag ni ser sna'i dri ma yin par rig par bya'o/ /gzhan yang yan lag 'tsheg pa dag 'tsho ba'i thabs gzhan yod bzhin du yan lag 'tsheg pa'i rigs pas 'tsho bar byed pa'i thabs gzhan bdag nyid kyi lus la nyon mongs pa rnam pa gsum gyis nyon mongs par byed pa de ni tshe 'di la gnod pa rgyas pa gsum pa yin no//gzhan yang mtho ris 'dod pa kha cig mtho ris don du gnyer ba na mtho ris mi shes pas zas mi za ba dang /mer 'jug pa dang / lhun po las g.yang du mchong ba la sogs pas bdag nyid la gnod par byed pa de ni tshe 'di la gnod pa rgyas pa bzhi pa yin no/ /gzhan yang rnam par dag pa 'dod pa kha cig rnam par dag pa'i lam mi shes shing sdug bsngal gyi chos kyi gnod pas rnam par dag par rtogs pas rnam grangs du mas bdag nyid la kun tu gdung bar byed/yang dag par gdung bar byed pa de ni tshe 'di la gnod pa rgyas pas byis pas bgrod par bya ba zhes rgyas par bya ba lnga pa yin no/ /de ltar na gnod pa lnga po de dag ni dge slong 'dul ba'i bslab pa la brtson pas yongs su spang par bya'o/ /dge slong 'dul ba'i bslab pa la brtson pa'i chos lnga ni ma dad pa rnams dad pa dang dad pa rnams phyir zhing 'phel bar 'gyur te/lnga gang zhe na/ tshul khrims phun sum tshogs pa dang / lta ba phun sum tshogs pa dang / cho ga phun sum tshogs pa dang / 'tsho ba phun sum tshogs pa dang / phan tshun 'thab pa dang rtsod pa med pa'o/ /de la tshul khrims phun sum tshogs pa ni rnam pa bcu ste/ 'di lta ste/ nyan thos kyi sa dang po nas legs par blangs pa dang / ha cang zhum pa ma yin pa dang / ha cang thal ba ma yin pa dang / zhes bya ba la sogs pa rgyas par bstan pa bzhin no//lta ba phun sum tshogs pa ni mdor bsdu na rnam pa lnga ste/ sgro 'dogs pa 'jig tshogs la lta ba mthar 'dzin pa'i lta ba spangs pa dang / skur pa 'debs pa log pa'i lta ba spangs pa dang / de dang 'brel ba lta ba mchog tu 'dzin pa spangs pa dang / tshul khrims dang brtul zhugs mchog tu 'dzin pa'i lta ba spangs pa dang /dge mtshan dang / bden pa dang / gtsang sbra la sogs pa'i lta ba spangs pa'i phyir ro/ /cho ga phun sum tshogs pa la yang rnam pa lnga ste/ 'phral gyi bya ba dang / dge ba'i phyogs kyi bya ba'am/ spyod lam gyi bya ba la brten nas 'jig rten dang 'dul ba dang mi 'gal ba'i cho ga gang yin pa la sogs pa 'di lta ste/nyan thos kyi sar bstan pa bzhin no/ /'tsho ba phun sum tshogs pa yang rnam pa lnga ste/ tshul 'chos pa la sogs pas 'tsho ba'i chos rnam par spangs pa'i phyir te/ 'di lta ste/ nyan thos kyi sar bstan pa bzhin no//phan tshun 'thab pa dang / rtsod pa med pa'i rtsa ba drug yongs su spangs pa'i phyir te/ de la rtsod pa'i rtsa ba drug ni khro ba dang 'khon du 'dzin pa la sogs pa rgyas par mdo las ji skad gsungs pa bzhin no/ /rtsod pa'i rtsa ba drug kyang gnas drug la brten te/ rnam par gzhag par rig par bya'o//drug gang zhe na/ gnod pa byed du dogs pa'i phyir rang gi nyes pa 'chab par 'dod pa nga rgyal gyis mngon par tshar bcad pa'i gang zag de la dus gzhan zhig na tshangs pa mtshungs par spyod pa rnams kyis gzhi des gcig gam gnyis sam rab tu mang po'i mdun du gleng bar byed cing / de la yang de gcig tu yid du mi 'ong ba'i phyir lus kyis kyang yongs su gdung bar byed/ sems kyis kyang yongs su gdung bar byed de/ de ltar nga rgyal gyis mngon par tshar bcad pa'i phyir gzhan dag gi mdun du bdag la smod par byed na mi rung ngo snyam pa de ni yongs su gdung ba yin la ltung ba snga ma 'chab pa ni 'chab pa yin te/de ltar nga rgyal gyis mngon par tshar bcad pa'i phyir rang gi nyes pa de 'chab par 'dod pa de gnyis ka yang rtsod pa'i rtsa ba yin no/ /dge slong sgyu bag tu kun du spyod cing gzhan dag la yang brten pa'i rang bzhin can yin te/ 'di lta ste/ bsod nams che bar shes pa la rnyed pa'i phyir gus par byas te/ bsnyen bkur byed la byams pas ma yin/ gus pas ma yin/ chos 'dod pas ma yin pa de yang yin no/ /de bzhin du gnas sbyin pa'i slob dpon drang ba bzad pa'i rang bzhin can la ci 'dod pa bzhin gnas par bya zhing /de nyid bdag gir byed par 'gyur ba bdag gis ni 'ga' yang bya mi dgos so snyam du brtags nas len par byed pa de yang yin no/ /de bzhin du tshangs pa mtshungs par spyod pa mkhas pa'i rang bzhin can bsod nams che la/ dam pa'i chos la bsnyen bkur bya ba dag 'phral gyi bya ba gzhan dag la bdag nyid snying las chung ngur gnas shing /de thams cad byed par 'gyur ro snyam du brtags nas grogs su len par byed pa yang de yin no/ /de bzhin du ltung ba byung yang tshangs pa mtshungs par spyod pa dag gis bskul zhing dris na gzhan dang gzhan du bsgyur zhing smra bar byed pa yang yin te/sgyu bag tu spyod pa sgyu dang g.yo la gnas pa ni gzhi des rtsod par 'gyur te/ lhag ma ni ci rigs par rig par bya'o/ /de las bzlog pa'i chos lnga ni ma dad pa rnams dad pa dang / dad pa rnams 'phel bar 'gyur ba yin par rig par bya'o/ /dge slong 'dul ba'i bslab pa la brtson pa'i stobs lnga dang ldan pa'i yang dag pa'i sbyor ba ni rnam pa thams cad du phun sum tshogs pa yin par rig par bya ste/lnga gang zhe na/ sbyor ba'i stobs dang / bsam pa'i stobs dang / rtogs pa'i stobs dang / shes pa'i stobs dang / gnas pa'i stobs so/ /bslab pa 'dod pa kho nas snying thag pa nas bslab pa thams cad la mchog tu gus pas bdag nyid dul bar bya ba dang /bdag nyid zhi bar bya ba dang / bdag nyid yongs su mya ngan las 'da' bar bya ba'i phyir slob par byed pa de ni sbyor ba'i stobs yin no/ /ltung ba byung ba na bsam pa thag pas slong bar byed pa de ni bsam pa'i stobs yin no//stobs lhag ma rnams ni ci rigs par rig par bya'o/ /'dul ba ma mo rdzogs te/ 'dul ba bsdu ba rdzogs so// //rgya gar gyi mkhan po pradz+nyA warma dang / dzi na mi tra dang / zhu chen gyi lo tsA ba ban de ye shes sde la sogs pas bsgyur cing zhus te gtan la phab pa// //