CLOSE WINDOW

D4036
བོད་ཡིག

@##/ /rnal 'byor spyod pa'i sa las nyan thos kyi sa/ bam po dang po/ dkon mchog gsum la phyag 'tshal lo/ /nyan thos kyi sa thams cad kyi bsdus pa'i sdom gyi tshigs su bcad pa ni/rigs dang gang zag rnams dang ni/ /nges par sbyor dang 'jig rten pa/ /'jig rten 'das pa 'di la ni/ /mdor na sa ni 'di dag go/ /sdom ni/ rigs dang 'jug dang nges 'byung ba'i / /ming du byas pa'i sa gsum mo/ /de dag rnams ni mdor bsdu na/ /nyan thos kyi ni sa zhes bya/ /rigs kyi sa gang zhe na/ smras pa/ rigs gang yin pa dang /rigs kyi rnam par gzhag pa gang yin pa dang / rigs la gnas pa'i gang zag rnams kyi rtags gang yin pa dang / rigs la gnas pa'i gang zag gang dag yin pa de dag thams cad gcig tu bsdus pa ni rigs kyi sa zhes bya'o//de la rigs gang zhe na/ smras pa/ rigs la gnas pa'i gang zag gi sa bon gyi chos gang yin pa ste/ gang yod cing med pa ma yin la rigs la gnas pa'i gang zag rnams kyi rkyen yang rnyed na/mya ngan las 'das pa thob pa dang / reg par nus shing mthu yod par 'gyur ba'o/ /rigs de'i ming gi rnam grangs dag gang zhe na/sa bon dang / khams dang / rang bzhin zhes bya ba ni ming gi rnam grangs dag yin no/ /'o na rigs de'i rang bzhin ji lta bu zhe na/ de ni lus las khyad par du gyur pa dang /skye mched drug gis zin pa dang / chos nyid kyis 'thob pa dang / thog ma med pa'i dus nas brgyud de 'ongs pa de lta bu yin te/ gang la 'di lta ste/ rigs dang / sa bon dang / khams dang / rang bzhin zhes bya ba'i ming gi rnams grangs 'di dag yod pa de ni rigs zhes bya'o//rigs kyi rnam par gzhag pa ni gang / rigs de phra ba'am/ rigs pa zhes brjod par bya zhe na/ smras pa/ phra ba zhes brjod par bya'o//ci'i phyir zhe na/ sa bon des 'bras bu ma bskyed cing 'bras bu ma grub na ni des na de phra ba zhes bya'o/ /gang gi tshe 'bras bu bskyed cing 'bras bu grub par gyur pa de'i tshe na ni sa bon gang yin pa de dang 'bras bu gang yin pa de gcig tu bsdus nas de'i phyir rigs de rags pa zhes bya bar rtogs par 'gyur ro//'o na ci rigs de rgyud gcig tu gtogs pa zhig gam/ 'on te rgyud du mar gtogs par brjod par bya zhe na/ smras pa/ rgyud gcig tu gtogs par brjod par bya'o/ / ci'i phyir zhe na/ smras pa/ chos gang dag mtshan nyid tha dad pa dang dngos po tha dad par 'jug pa de dag ni so sor rang gi rgyud sna tshogs dang 'jug pa sna tshogs su ston par 'gyur gyi/ sa bon de ni skye mched drug po de dag las logs shig na tha dad pa'i mtshan nyid med de thog ma med pa'i dus nas brgyud de 'ongs pa dang /chos nyid kyis thob pa'i skye mched drug po de lta bur gyur pa'i gnas skabs de la rigs dang / sa bon dang / khams dang / rang bzhin zhes bya ba'i ming dang / tha snyad de dag btags par zad pas/ de'i phyir de ni rgyud gcig tu gtogs pa zhes bya'o//smras pa/ gal te rigs la gnas pa'i gang zag rnams ni yongs su mya ngan las 'da' ba'i chos can yin la/ rigs la gnas pa ma yin pa rnams ni/ yongs su mya ngan las 'da' ba'i chos can ma yin par lta na/ 'o na ci'i phyir yongs su mya ngan las 'da' ba'i chos can rnams sngon gyi mtha' nas yun ring por 'khor bar gyur cing /yongs su mya ngan las ma 'das she na/ smras pa/ rgyu bzhis yongs su mya ngan las ma 'das te/ bzhi gang zhe na/ mi khom par skyes pa dang / bag med pa'i nyes pa dang / log par zhugs pa dang / sgrib pa'i nyes pas so//de la mi khom par skyes pa gang zhe na/ smras pa/ gang du 'khor bzhi po rnams dang / dam pa rnams dang / yang dag par song ba rnams dang / skyes bu dam pa rnams mi 'gro ba'i mtha' 'khob kyi mi rkun ma rnams dang / kla klo rnams su skyes pa yin te/ de mi khom par skyes pa zhes bya'o//bag med pa gang zhe na/ smras pa/ de gang du 'khor bzhi po rnams dang / dam pa rnams dang / yang dag par song ba rnams dang / skyes bu dam pa rnams 'gro ba 'di dus kyi mi rkun ma ma yin pa rnams dang / kla klo ma yin pa rnams su skyes shing /rigs mthon po longs spyod phun sum tshogs pa dag tu skyes su zin kyang / 'dod pa dag la lhag par chags shing yongs su longs spyod par byed de/ nyes dmigs su mi lta zhing nges par 'byung bar rab tu mi shes pa yin te/ de ni bag med pa zhes bya'o//log par zhugs pa gang zhe na/ smras pa/ 'di ltar dbus kyi mi rnams su skyes pa'i bar du rgyas par gyur kyang mu stegs can gyi lta ba dang ldan par gyur nas sbyin pa med do zhes bya ba nas 'di las srid pa gzhan mi shes so/ /zhes bya ba med do zhes bya ba'i bar du rgyas par de ltar lta zhing de skad smra ba yin te/mu stegs can gyi lta ba de yang des sangs rgyas rnams 'byung ba med pa dang / dam pa'i chos ston pa'i dge ba'i bshes gnyen rnams med pa'i tshe na rnyed par 'gyur te/ de ni log par zhugs pa zhes bya'o/ /sgrib pa gang zhe na/ smras pa/'di ltar dbus kyi mi rnams su skyes pa'i bar du rgyas par snga ma bzhin du gyur cing sangs rgyas 'jig rten du byung ba dang / dam pa'i chos ston pa'i dge ba'i bshes gnyen dag rnyed par gyur kyang / de glen pa dang / dig pa dang / lkugs pa dang / lag pas brda byed par 'gyur zhing legs par gsungs pa dang /nyes par bshad pa'i chos rnams kyi don kun shes par mi nus pa dang / mtshams med pa'i las rnams byed par 'gyur ba dang / nyon mongs pa yun ring ba yin te de ni sgrib pa zhes bya'o/ rgyu gang dag gis yongs su mya ngan las 'da' ba'i chos can rnams yongs su mya ngan las 'das pa'i rgyu ni bzhi po de dag yin no//de dag kyang gang gi tshe sangs rgyas 'byung ba dang / dam pa'i chos nyan pa dang rjes su mthun pa'i gdams ngag rjes su bstan pa rnyed cing / rgyu de dag kyang med par gyur pa de'i tshe na dge ba'i rtsa ba dag yongs su smin cing rim gyis yongs su mya ngan las 'da' bar yang 'gyur ro//yongs su mya ngan las mi 'da' ba'i chos can rnams ni nges pa'i tshogs la gnas pa yin pas/ de dag ni rkyen rnyed kyang rung ma rnyed kyang rung ste/ rnam pa thams cad kyi thams cad du yongs su mya ngan las 'da' ba'i skal ba med pa kho na yin no//de la yongs su mya ngan las 'da' ba'i chos can rnams kyi gang dag ma tshang zhing med la nye bar ma gyur na yongs su mya ngan las mi 'da' ba'i rkyen rnams gang zhe na/ smras pa/ rkyen gnyis te/ gnyis gang zhe na/ gtso bo dang / dman pa'o/ / rkyen gtso bo gang zhe na/ smras pa/ 'di lta ste/ dam pa'i chos kyi dbang du byas pa'i gzhan gyi sgra dang / nang gi tshul bzhin yid la byed pa'o/ /rkyen dman pa gang zhe na/ smras pa/ rkyen dman pa ni mang ste/ 'di lta ste/ bdag gi 'byor pa dang / gzhan gyi 'byor pa dang / dge ba'i chos la 'dun pa dang / rab tu byung ba dang / tshul khrims kyi sdom pa dang / dbang po sdom pa dang / zas kyi tshod rig pa nyid dang / nam gyi cha stod dang nam gyi cha smad la mi nyal bar sbyor ba'i rjes su brtson pa nyid dang / shes bzhin du spyod pa nyid do/ / rab tu dben par gnas pa dang /sgrib pa rnam par dag pa dang / ting nge 'dzin la yang dag par gnas pa'o/ /de la bdag gi 'byor pa gang zhe na/ mir gyur pa dang / yul dbus su skyes pa dang / dbang po ma tshang ba med pa dang / gnas la dad par gyur pa dang / las kyi mtha' ma log pa gang yin pa'o/ / de la mir gyur pa gang zhe na/ 'di ltar 'di na la la mi rnams dang skal ba mnyam par skyes pa / skyes pa'i dbang po dang ldan pa'am/ bud med du skyes pa yin te/ de ni mir gyur pa zhes bya'o/ /yul dbus su skyes pa gang zhe na/ 'di ltar 'di na la la snga ma bzhin du gong du skyes bu dam pa'i bar dag 'gro ba'i yul dbus kyi mi rnams su skyes pa yin te/de ni yul dbus su skyes pa zhes bya'o/ /dbang po ma tshang ba med pa gang zhe na/ 'di ltar 'di na la la glen pa ma yin zhing dig pa dang lkugs pa ma yin pa'i bar du rgyas par gyur pa dang / yan lag dang nying lag ma tshang ba med par gyur cing rna ba ma tshang ba med pa la sogs pa yan lag dang nying lag ma tshang ba med pa gang gis dge ba'i phyogs yang dag par bsgrub pa'i skal pa yod pa yin te/de ni dbang po ma tshang ba med pa zhes bya'o/ /gnas la dad par gyur pa gang zhe na/ /'di ltar 'di na la las de bzhin gshegs pas gsungs pa'i chos 'dul ba la dad pa dang /sems dang ba thob par gyur pa yin te/ de ni gnas la dad par gyur pa zhes bya'o/ /de la gnas zhes bya ba ni de bzhin gshegs pas gsungs pa'i chos 'dul ba la bya ste/ 'jig rten dang 'jig rten las 'das pa'i dkar po'i chos thams cad skye ba'i gnas yin pa'i phyir ro//des sngon du drangs pa'i dbang gis de la dad pa gang yin pa de ni gnas la dad par gyur pa yin te/ nyon mongs pa'i dri ma dang rnyog pa thams cad dang bral ba'i phyir ro/ /las kyi mtha' ma log pa gang zhe na/ gang gi tshe 'di nyid la mtshams med pa'i las lnga po 'di lta ste/ma gsod pa dang / pha gsod pa dang / dgra bcom pa gsod pa dang / dge 'dun gyi dbyen byed pa dang / de bzhin gshegs pa la ngan sems kyis khrag 'byin pa dag las mtshams med pa'i las gang yang rung ba ma byas shing byed du ma bcug pa yin te/de ni las kyi mtha' ma log pa zhes bya'o/ /tshe 'di nyid la mtshams med pa'i las lnga po de dag byas shing bsags la yongs su ma spangs na yongs su myang ngan las 'da' zhing 'phags pa'i lam skyed pa'i skal ba med pas na de'i phyir de dag ni las kyi mtha' log pa zhes bya'o//des bdag nyid kyi lus yin te yan lag lnga po de dag gis 'byor par byed pas na de'i phyir bdag gi 'byor pa zhes bya'o/ /gzhan gyi 'byor pa gang zhe na/ 'di lta ste sangs rgyas rnams 'byung ba dang / dam pa'i chos ston pa dang / chos bstan pa rnams gnas pa dang /chos gnas pa rnams rjes su 'jug pa dang / gzhan gyi phyir rjes su snying brtse bar byed pa'o/ /de la sangs rgyas rnams 'byung ba gang zhe na/ 'di ltar 'di na la la sems can thams cad la dge legs dang phan pa'i bsam pa bskyed nas/ dka' ba stong phrag mang po dang / bsod nams dang ye shes kyi tshogs chen pos bskal pa grangs med pa gsum gyis tha ma'i lus phyi ma thob nas byang chub kyi snying po la 'dug ste/ sgrib pa lnga spangs nas/ dran pa nye bar gzhag pa bzhi la sems legs par gnas te/ byang chub kyi phyogs kyi chos sum cu rtsa bdun bsgoms nas/bla na med pa yang dag par rdzogs pa'i byang chub mngon par rdzogs par 'tshang rgya ba yin te/ des ni sangs rgyas rnams 'byung ba zhes bya'o/ /'das pa dang / ma 'ongs pa dang / da ltar byung ba'i dus rnams su yang sangs rgyas bcom ldan 'das thams cad de kho na bzhin du 'byung ba yin no//dam pa'i chos ston pa gang zhe na/ sangs rgyas bcom ldan 'das de dag nyid dang / de dag nyid kyis nyan thos rnams 'jig rten du byung nas/ 'jig rten la rjes su thugs brtse ba'i phyir/ 'phags pa'i bden pa bzhi po sdug bsngal dang / kun 'byung ba dang /'gog pa dang / lam rnams las brtsams nas 'di lta ste/ mdo'i sde dang / dbyangs kyis bsnyad pa'i sde dang / lung bstan pa'i sde dang / tshigs su bcad pa'i sde dang / ched du brjod pa'i sde dang / gleng gzhi'i sde dang / rtog pa brjod pa'i sde dang / de lta bu'i byung ba'i sde dang /skyes pa'i rabs kyi sde dang / shin tu rgyas pa'i sde dang / rmad du byung ba'i chos kyi sde dang / gtan la phab par bstan pa'i sde'i chos ston par mdzad pa yin te/ de ni dam pa'i chos ston pa zhes bya'o/ /chos 'di ni dam pa yang sangs rgyas rnams dang sangs rgyas kyi nyan thos rnams kyis brtags shing bstan pa'am bsngags pa yin pas de'i phyir dam pa'i chos te/de bshad pa gang yin pa de ni dam pa'i chos ston pa zhes bya'o/ /chos bstan pa rnams gnas pa gang zhe na/ sangs rgyas bcom ldan 'das rnams 'tsho zhing gzhes la/ chos kyi 'khor lo bskor te dam pa'i chos bstan pa nas/sangs rgyas bcom ldan 'das yongs su mya ngan las 'das pa'i bar gyi dus ji srid par sgrub pa mi nyams pa dang / dam pa'i chos mi nub pa yin te/ de ni dam pa'i chos gnas pa zhes bya'o/ /gnas pa de yang don dam pa'i chos mngan sum du bya ba'i tshul gyis yin par rig par bya'o//chos gnas pa rnams rjes su 'jug pa gang zhe na/ dam pa'i chos rtogs pa gang yin pa de nyid kyis skye bo rnams la dam pa'i chos mngon sum du bya ba'i skal ba dang mthu yod par rig nas/ ji ltar rtogs pa kho na dang rjes su mthun pas gdams shing rjes su bstan pa la rjes su 'jug par byed pa yin te/de ni chos gnas pa rnams rjes su 'jug pa zhes bya'o/ /gzhan gyi phyir rjes su snying brtse bar byed pa gang zhe na/ gzhan zhes bya ba ni sbyin pa po dang sbyin bdag rnams te/ de dag gis 'tsho ba'i yo byad rkyen du babs pa 'di lta ste/chos gos dang / bsod snyoms dang / mal cha dang / stan dang / nad kyi gsos sman dang / yo byad gang yang rung ba de dag gi phyir rje su snying brtse bar byed pa yin te/ de ni gzhan gyi phyir rjes su snying brtse bar byed pa zhes bya'o/ /dge ba'i chos la 'dun pa gang zhe na/'di ltar 'di na la la de bzhin gshegs pa'am/ de bzhin gshegs pa'i nyan thos dag las chos thos shing dad pa thob par gyur la des de thos nas 'di ltar khyim na gnas pa ni gnod pa dang nyon mongs pa'i gnas yin gyi / rab tu byung ba ni mngon par skabs yod pa yin pas/'di ltar bdag gis bud med kyi tshogs dang nor dang 'bru dang dbyig thams cad spangs la/ legs par gsungs pa'i chos 'dul ba la khyim med par legs pa kho nar rab tu 'byung bar bya zhing / rab tu byung nas kyang nan tan gyis bsgrub par bya'o zhes de ltar yang dag par slob par byed pa yin te/de ltar dge ba'i chos rnams la 'dun pa skyes pa gang yin pa de ni dge ba'i chos la 'dun pa zhes bya'o/ /rab tu byung ba gang zhe na/ dge ba'i chos la 'dun pa de nyid kyi dbang du byas nas gsol ba dang bzhi'i las kyis bsnyen par rdzogs par byas pa dang /dge slong gi tshul khrims yang dag par blangs pa gang yin pa ste de ni rab tu byung ba zhes bya'o / /tshul khrims kyi sdom pa gang zhe na/ de ltar rab tu byung ba de tshul khrims dang ldan par gnas pa dang / so sor thar pa'i sdom pas bsdams pa dang / cho ga phun sum tshogs pa dang /spyod yul phun sum tshogs pa dang / kha na ma tho ba phra rab tsam dag la yang 'jigs par lta ba dang / bslab pa'i gzhi rnams yang dag par blangs shing slab par byed pa yin te/ de ni tshul khrims kyi sdom pa zhes bya'o/ /dbang po sdom pa gang zhe na/ de tshul khrims kyi sdom pa de nyid la brten nas/dran pa kun tu bsrungs pa dang / dran pa la rtag 'grus byed pa dang / dran pas yid kun tu bsrungs pa dang / gnas skabs mnyam pa la 'jog par byed cing des mig gis gzugs rnams mthong ba na mtshan mar mi 'dzin cing mngon rtags su mi 'dzin la/gzhi gang kho na las de'i sems kyi rjes su sdig pa mi dge ba'i chos rnams zag par gyur pa de dag bsdam par bya ba'i phyir sgrub par byed cing / mig gi dbang po yang srung bar byed la/ mig gi dbang pos kyang sdom pa sgrub par byed pa dang / de rna bas sgra dag dang / snas dri dag dang / lces ro dag dang / lus kyis reg bya dag dang / yid kyis chos rnams rnam par shes pa na yang mtshan mar mi 'dzin cing / mngon rtags su mi 'dzin la/ gzhi gang kho na las de'i sems kyi rjes su sdig pa mi dge ba'i chos rnams zag par 'gyur ba de dag bsdam par bya ba'i phyir sgrub par byed cing /yid kyi dbang po yang srung bar byed la/ yid kyi dbang pos kyang sdom pa sgrub par byed pa yin te/ de ni dbang po sdom pa zhes bya'o/ /zas kyi tshod rig pa nyid gang zhe na/ de ltar dbang po bsdams pa de so sor brtags shing / zas za bar byed la/rnam par rtog pa'i phyir ma yin/ rgyags pa'i phyir ma yin/ sgeg pa'i phyir ma yin/ brgyan pa'i phyir ma yin gyi / 'di lta ste/ lus 'di ni gnas par bya ba dang / 'tsho bar bya ba dang / bkres pa bsal bar bya ba dang / tshangs par spyad pa la phan bar bya ba dang / tshor ba rnying pa rnams spang bar bya ba dang / gsar pa rnams mi skye bar bya ba'i phyir dang / bdag 'tsho zhing stobs dang bde ba dang / kha na ma tho ba med pa dang / bde ba la reg par gnas par yang 'gyur ro snyam du sems pa yin te/ de ni zas kyi tshod rig pa nyid ces bya'o/ /nam gyi cha stod dang nam gyi cha smad la mi nyal bar sbyor ba'i rjes su brtson pa nyid gang zhe na/de ltar zas kyi tshod rig par gyur pa de nyin mo 'chag pa dang 'dug pa dag gis sgrib par 'gyur ba'i chos rnams las sems yongs su sbyong bar byed cing mtshan mo'i thun dang po la yang 'chag pa dang 'dug pa dag gis sgrib par 'gyur ba'i chos rnams las sems yongs su sbyong bar byed la/de yongs su sbyangs nas de'i 'og tu gtsug lag khang nas phyir byung ste/ gtsug lag khang gi phyi rol du rkang pa bkrus nas gtsug lag khang gi nang du zhugs te/ glo g.yas pa phab nas rkang pa rkang pa'i steng du bzhag ste/ snang ba'i 'du shes dang / dran pa dang shes bzhin dang / ldang ba kho na'i 'du shes yid la byed bzhin du nyal bar byed pa dang / de mtshan mo'i thun tha ma la yang myur ba myur ba kho nar sad par byas nas/ 'chag pa dang / 'dug pa dag gis sgrib par gyur ba'i chos rnams las sems yongs su sbyong bar byed pa yin te/de ni nam gyi cha stod dang nam gyi cha smad la mi nyal bar sbyor ba'i rjes su brtson pa nyid ces bya'o/ /shes bzhin du spyod pa nyid gang zhe na/ de ltar mi nyal bar sbyor ba'i rjes su brtson par gyur pa de 'gro ba dang ldog pa la shes bzhin du spyod par byed pa dang /cung zad bltas pa dang / rnam par bltas pa dang / bskum pa dang / brkyang ba dang / snam sbyar dang / chos gos dang / lhung bzed bcang ba dang / zos pa dang / 'thungs pa dang / 'chos pa dang / myangs pa dang / song ba dang / sdod pa dang / 'dug pa dang / nyal ba dang / mi nyal ba dang / smra ba dang / mi smra ba dang / gnyid kyis snyom pa bsang ba la yang shes bzhin du spyod pa yin te/ de ni shes bzhin du spyod pa nyid ces bya'o/ /rab tu dben par gnas pa gang zhe na/ de chos de dag gis yongs su sbyong bar bya ba'i sbyangs nas gnas mal dben pa dgon pa dag gam/shing drung dag gam/ khang stong dag gam/ ri khrod dam/ ri phug gam/ rtswa khang ngam/ bla gab med pa'am/ dur khrod dam/ nags 'dab bam/ bas mtha'i gnas mal dag tu gnas par byed pa yin te/de ni rab tu dben bar gnas pa zhes bya'o/ /sgrib pa rnam par dag pa gang zhe na/ de dgon pa na 'dug kyang rung / shing drung na 'dug kyang rung / khang stong na 'dug kyang rung ste / sgrib pa lnga po 'dod pa la 'dun pa dang / gnod sems dang / rmugs pa dang /gnyid dang / rgod pa dang / 'gyod pa dang / the tshom dag las sems rnam par sbyong bar byed cing / de sgrib pa de dag las sems rnam par sbyangs na / sgrib pa med pas ting nge 'dzin gyi nyams bde ba la nye bar gnas pa yin te/ de ni sgrib pa rnam par dag pa zhes bya'o/ / ting nge 'dzin la yang dag par gnas pa gang zhe na/ de sgrib pa lnga pos sems nye bar nyon mongs par byed la/ shes rab nyam chung bar byed pa rgud pa'i phyogs su gyur la kun nas nyon mongs pa 'phel bar gyur pa dag spangs nas/ 'dod pa dag la dben pa/ sdig pa mi dge ba'i chos rnams las dben pa rtog pa dang bcas pa/dpyod pa dang bcas pa/ dben pa las skyes pa'i dga' ba dang / bde ba can bsam gtan dang po bsgrubs te gnas pa dang / de rtog pa dang dpyod pa dang bral zhing nang yongs su dang ste/ sems kyi rgyud gcig tu gyur pas rtog pa med pa dpyod pa med pa ting nge 'dzin las skyes pa'i dga' ba dang bde ba can/bsam gtan gnyis pa bsgrubs te gnas pa dang / de dga' ba'i 'dod chags dang bral bas btang snyoms la gnas shing / dran pa dang shes bzhin can yin te/ bde ba lus kyis myong la/ 'phags pa rnams kyis gang de dran pa dang ldan pa/bde ba la gnas pa btang snyoms pa'o zhes brjod pa ste/ dga' ba med pa'i bsam gtan gsum pa bsgrubs te gnas pa dang / de bde ba yang spangs te/ snga nas sdug bsngal ba yang spangs shing yid bde ba dang / yid mi bde ba yang nub pas/ bde ba yid ma yin sdug bsngal yang ma yin pa btang snyoms dang dran pa yongs su dag pa/bsam gtan bzhi pa bsgrubs te gnas pa yin te/ de ni ting nge 'dzin la yang dag par gnas pa zhes bya'o/ /de rim pa 'dis dang po bdag gi 'byor pa nas tha ma ting nge 'dzin la yang dag par gnas pa'i mthar thug pa'i bar gyi rkyen khyad par can dang /shin tu khyad par can dang / mchog tu khyad par can rnams gong nas gong du yang dag par bsgrub par byed do/ /de de ltar sems yongs su dag pa yongs su byang ba/ nyon mongs pa med pa/ nye ba'i nyon mongs pa dang bral ba/ drang por gyur pa/las su rung ba/ mi g.yo bar gyur pa la gnas na/ gal te 'phags pa'i bden pa bzhi las brtsams te/ de dag yongs su shes par bya ba dang / spang bar bya ba dang / mngon sum du bya ba dang / bsgom par bya ba'i phyir gzhan las gdams shing rjes su bstan pa'i sgra thos par gyur nas /de lta na de ni rigs pas bskyed pa'i yid la byed pa dang / de sngon du btang ba'i yang dag pa'i lta ba bskyed par bya ba'i skal ba dang mthu yod pa yin te/ des 'phags pa'i bden pa bzhi po dag mngon par rtogs par byed cing / rnam par grol ba yang yongs su rdzogs par byed la/phung po'i lhag ma med pa'i mya ngan las 'das pa'i dbyings su yongs su mya ngan las 'da' bar yang byed do/ /de la yang dag pa'i lta ba la brten nas rnam par grol ba yongs su rdzogs pa dang / phung po lhag ma med pa'i mya ngan las 'das pa gang yin pa de ni rigs yang dag par grub pa yin par rig par bya'o//de la bdag gi 'byor pa nas bzung ste / ting nge 'dzin la yang dag par gnas pa'i bar gang yin pa de ni yang dag par 'grub pa'i rkyen dman pa yin par rig par bya'o/ /de la 'phags pa'i bden pa bzhi ston pa'i gdams ngag gi dbang du byas pa'i gzhan gyi sgra gang yin pa dang /nang gi tshul bzhin yid la byed pa gang yin pa de ni yang dag par 'grub pa'i rkyen gtso bo yin par rig par bya ste/ de ni rigs kyi rnam par gzhag pa zhes bya'o/ /rigs la gnas pa'i gang zag gi rtags rnams gang zhe na/ smras pa/ yongs su mya ngan las mi 'da' ba'i chos can gyi rtags gang yin pa de dag las bzlog pa ni rigs la gnas pa'i gang zag gi rtags rnams yin par rig par bya'o/ /gang dag dang ldan na yongs su mya ngan las mi 'da' ba'i chos can gyi gang zag la/ /'di ni yongs su mya ngan las mi 'da' ba'i chos can yin no zhes shes par 'gyur ba'i yongs su mya ngan las mi 'da' ba'i chos can gyi rtags rnams gang zhe na/smras pa/ yongs su mya ngan las mi 'da' ba'i chos can gyi rtags ni mang du yod mod kyi/ phyogs tsam zhig brjod par bya'o/ /'di la yongs su mya ngan las mi 'da' ba'i chos can gyi gang zag gi lus la gzhi'i sred pa'i dang po nyid nas kun tu zhen pa/sangs rgyas thams cad kyis kyang / thams cad kyi thams cad dang / rnam pa thams cad kyi thams cad du spang bar mi spyod pa'i chos can ma bshig pa/ ring du song ba rab tu dam por kun tu zhen pa yod pa /de ni rigs med pa la gnas pa'i gang zag gi rtags dang po yin no/ /gzhan yang rigs med pa la gnas pa'i gang zag ni 'khor ba'i skyon sna tshogs dang / rab tu mang po dag rnam grangs du mar thos kyang des 'das pa'i dus la brten te/ 'khor ba'i spros pa las skyon du lta ba dang /nyes dmigs su lta ba dang / skyo ba cung zad tsam yang ma bskyed cing / ma 'ongs pa'i dus la brten te skyed par yang mi 'gyur/ da ltar gyi dus la brten te skyed par yang mi byed la/ 'das pa dang ma 'ongs pa dang da ltar byung ba'i dus rnams la brten pa/ mya ngan las 'das pa sred pa zad pa/'dod chags dang bral ba dang / 'gog pa la yon tan du lta ba dang / phan yon du lta ba dang / dad pa cung zad tsam dang / cha cung zad tsam dang / ngan ngon tsam yang ma bskyed bskyed par mi 'gyur/ skyed par mi byed de/ de ni rigs med pa la gnas pa'i rtag gnyis pa yin no//gzhan yang rigs med pa la gnas pa'i gang zag ni dang po nyid nas ngo tsha med pa dang / khrel med pa chen po dang ldan pa yin te/ des de snying rje med pa dang / bag tsha ba med pa'i sems dang / rab tu rangs pa'i sems kyis sdig pa thams cad la lhag par spyod par byed cing /gzhi des lan 'ga' 'ang 'gyod par mi byed la/ gzhi des tshe 'di'i zang zing dang bcas pa'i bdag nyid nyams pa kho na tsam du mthong bar zad de/ de ni rigs med pa la gnas pa'i rtags gsum pa yin no/ /gzhan yang rigs med pa la gnas pa'i gang zag ni sdug bsngal lam/kun 'byung ba'am/ 'gog pa'am/ lam las brtsams te/ rnam pa thams cad yongs su rdzogs pa gsal ba rigs pa sna tshogs pa go sla ba'i dam pa'i chos ston cing yang dag par ston pa na/ cung zad sems gtod pa tsam dang / mos pa tsam yang ma thob na/ 'das pa dang / ma 'ongs pa dang / da ltar byung ba'i dus rnams la brten te spu zing zhes byed pa'am/ mchi ma dkrug ces byed pa thob par gyur pa lta ci smos te/ de ni rigs med pa la gnas pa'i rtags bzhi pa yin no/ /gzhan yang rigs med pa la gnas pa'i gang zag ni gal te brgya la brgya lam na legs par gsungs pa'i chos 'dul ba la rab tu byung na yang deng rgyal pos gtses pa'am/chom rkun pas gtses pa'am/ bu lon gyis nyam thag pa'am/ 'jigs pas nyam thag pa'am/ mi 'tsho bas 'jigs shing skrag pa'i phyir yin gyi bdag nyid dul bar bya ba'i phyir ma yin no// bdag nyid zhi bar bya ba'i phyir ma yin/ bdag nyid yongs su mya ngan las 'da' bar bya ba'i phyir ma yin/ dge sbyong gi phyir ma yin/ bram ze'i phyir ma yin te/ de ltar rab tu byung nas kyang khom na gnas pa dang / rab tu byung ba dag dang 'dren mar gnas shing /lha'am lha gang yang rung ba dag tu smon pa'i phyir tshangs par spyad pa spyod par byed pa dang / bslab pa phul nas spangs pa la 'jug par 'gyur ba dang / tshul khrims 'chal pa dang / nang myags pa dang / nyes 'dzag tu gyur pa dang / shing rul pa lta bur gyur pa dang /lung bong ltar kun tu spyod cing dge sbyong ma yin par dge sbyong du khas 'che ba dang / tshangs par spyod pa ma yin par tshangs par spyod par khas 'che ba yin te/ rigs med pa la gnas pa'i gang zag ni 'das pa dang / ma 'ongs pa dang / da ltar byung ba'i dus rnams su yang de kho na bzhin du rab tu byung ba yin par rig par bya'o//bslab pa 'dod pa ma yin pa'i gang zag gi rab tu byung ba dang / bsnyen par rdzogs pa'i dge slong gi dngos po ma yin no/ / de'i phyir rnam grangs de dang bsam pa des na de'i de ni don gyi sgo nas rab tu byung ba ma yin gyi/ rab tu byung ba'i rtags dang cha lugs 'dzin pa tsam gyis rab tu byung ba zhes bya ba'i grangs su 'gro ba kho na zad de/de ni rigs med pa la gnas pa'i gang zag gi rtags lnga pa yin te / gzhan yang rigs med pa la gnas pa'i gang zag ni lus sam ngag gam yid kyi dge ba'i las gang cung zad ci byed kyang rung ste/de thams cad srid pa'i bsam pa'i phyir te phyi ma la yang 'byung ba'i srid pa khyad par du 'phags pa dag 'dod pa'i phyir ram/ longs spyod kyi bsam pa'i phyir te/ longs spyod khyad par du 'phags pa dag 'dod pa'i phyir byed pa yin te/ de ni rigs med pa la gnas pa'i gang zag gi rtags drug pa yin no//gang dag dang ldan na yongs su mya ngan las mi 'da' ba'i chos can gyi gang zag la 'di ni yongs su mya ngan las mi 'da' ba'i chos can gyi gang zag yin no zhes bya ba'i grangs su 'gro ba de'i rtags ni de lta bu dang mthun pa mang du yod do/ / de la rigs la gnas pa'i gang zag rnams gang zhe na/ smras pa/ rigs la gnas pa'i gang zag ni rigs la gnas pa kho na yin la/ ma zhugs shing nges par ma byung ba yang yod do/ rigs la gnas la zhugs shing nges par ma byung ba yang yod do/ /rigs la gnas la zhugs shing nges par 'byung ba yang yod do//dbang po rtul po dang / dbang po 'bring po dang / dbang po rnon po dang / 'dod chags spyad pa dang / zhe sdang spyad pa dang / gti mug spyad pa dang / mi khom par skyes pa dang / khom par skyes pa dang / bag med pa dang ldan pa dang /bag yod pa dang ldan pa dang / log par zhugs pa dang / log pa ma yin par zhugs pa dang / bsgribs pa dang / ma bsgribs pa dang / yun ring ba dang / thag nye ba dang / yongs su ma smin pa dang / yongs su smin pa dang / rnam par ma dag pa dang / rnam par dag pa dag kyang yod do//de la rigs la gnas pa'i gang zag rigs la gnas pa kho na yin na / ma zhugs shing nges par ma byung ba gang zhe na/ 'di ltar 'di na gang zag la la 'jig rten las 'das pa'i chos kyi sa bon dang ldan pa kho na yin na / da dung skyes bu dam pa la legs par brten pa'am/brten nas dam pa'i chos nyan pa'am/ de bzhin gshegs pas gsungs pa'i chos 'dul ba la dad pa thob pa ma yin zhing / tshul khrims yang dag par len par mi byed/ thos pa 'dzin par mi byed/ gtong ba spel bar mi byed/ lta ba sbyor bar mi byed pa yin te/de ni rigs la gnas pa kho na yin la/ ma zhugs shing nges par ma byung ba yin no/ /rigs la gnas la zhugs shing nges par ma byung ba gang zhe na/ sngar bshad pa'i nag po'i phyogs las bzlog pa dkar po'i phyogs la rigs la gnas la zhugs shing nges par ma byung ba yin par rig par bya ste/bye brag ni 'phags pa'i lam dang de'i 'bras bu nyon mongs pa dang bral ba ma thob pa yod do/ /rigs la gnas la zhugs shing nges par byung ba gang zhe na/ de dag gnyis brjod nas/ bye brag ni 'phags pa'i lam dang / de'i 'bras bu nyon mongs pa dang bral ba thob par bya ba de yod do//de la dbang po rtul po gang zhe na/ gang zag ces bya ba'i dngos po dmigs pa la 'di lta ste/ thos pa las byung ba dang / bsams pa las byung ba dang / bsgoms pa las byung ba'i yid la byed pa dang mtshungs par ldan pa'i dbang po dad pa dang /brtson 'grus dang / dran pa dang / ting nge 'dzin dang / shes rab dag shin tu bul bar 'jug cing dal bar 'jug la/ chos dang don rab tu 'byed pa dang / myur ba dang / de kho na rab tu 'byed par yang mi nus shing mthu med pa gang yin pa ste/ de ni gang zag dbang po rtul po zhes bya'o//de la dbang po 'bring gang zhe na/ shes bya'i dngos po dmigs pa la dbang po rnams shin tu bul shing dal bar 'jug pa ma yin par thams cad snga ma bzhin du rgyas par brjod par bya ba gang yin pa ste/ de ni gang zag dbang po 'bring zhes bya'o/ /gang zag dbang po rnon po gang zhe na/gang zag shes bya'i dngos po dmigs pa la 'di lta ste/ thos pa las byung ba dang / bsams pa las byung ba dang / bsgoms pa las byung ba'i yid la byed pa dang mtshungs par ldan pa'i dbang po/ /dad pa dang / brtson 'grus dang / dran pa dang / ting nge 'dzin dang / shes rab dag bu la ba ma yin par 'jug cing dal ba ma yin par 'jug la/ chos dang don rab tu 'byed pa dang / myur ba dang / de kho na rab tu 'byed par yang nus shing mthu yod pa gang yin pa ste/ de ni gang zag dbang po rnon po zhes bya'o/ /gang zag 'dod chags spyad pa gang zhe na/chags par 'gyur ba'i dmigs pa la 'dod chags drag po dang 'dod chags yun ring por 'byung bar 'gyur ba gang yin pa ste/ de ni gang zag 'dod chags spyad pa zhes bya'o/ /gang zag zhe sdang spyad pa gang zhe na/ zhe sdang bar 'gyur ba khong khro ba dang mthun pa'i dmigs pa la zhe sdang drag po dang zhe sdang yun ring po 'byung bar 'gyur ba gang yin pa ste/de ni gang zag zhe sdang spyad pa zhes bya'o/ /gang zag gti mug spyad pa gang zhe na/ shes bya'i dngos po la gti mug drag po dang gti mug yun ring po 'byung bar 'gyur ba gang yin pa ste/de ni gang zag gti mug spyad pa zhes bya'o/ /gang zag mi khom bar skyes pa dang / bag med pa dang ldan pa dang / log par zhugs pa dang / bsgribs pa rnams ni snga ma bzhin du rig par bya'o/ /de dag las bzlog pa ni khom par skyes pa dang / bag yod pa dang ldan pa dang /log pa ma yin par zhugs pa dang / ma bsgribs pa dag yin par rig par bya'o/ /gang zag yun ring ba gang zhe na/ gang zag dus ring bas mya ngan las 'da' ba yun ring ba yang yod do/ /sbyor ba yun ring bas mya ngan las 'da' ba yun ring ba yang yod do/ /de la dus yun ring bas mya ngan las 'da' ba yun ring ba gang zhe na/tshe rabs brgya phrag du ma dag dang / tshe rabs stong phrag du ma dag dang / tshe rabs 'bum phrag du ma dag gi 'og tu 'dod rkyen rnyed nas/ yongs su mya ngan las 'da' ba'i skal pa yod par 'gyur ro/ /sbyor ba yun ring pas mya ngan las 'da' ba yun ring ba gang zhe na/gang zag rigs la gnas pa kho na yin la/ ma zhugs pa gang yin pa ste/ de ni yongs su mya ngan las 'da' ba'i rkyen myur du 'thob pa'i skal pa yod pa yin no/ /de yang yongs su mya ngan las 'da' ba'i phyir sbyor ba ma brtsams pa tsam du zad pas sbyor ba yun ring ba'i phyir mya ngan las 'da' ba yun ring ba yin gyi /dus yun ring bas ni ma yin te/ de dag ni gang zag yun ring ba zhes bya'o/ /gang zag thag nye ba gang zhe na/ gang zag dus thag nye bas mya ngan las 'da' ba thag nye ba yang yod do/ /sbyor ba thag nye bas mya ngan las 'da' ba thag nye ba yang yod do//de la dus thag nye bas mya ngan las 'da' ba thag nye ba gang zhe na/ lus dang gnas kyi dngos po tha mal la gnas shing de lus de nyid kyis yongs su mya ngan las 'da' bar byed pa dang / skad cig de la bar chad med par nyon mongs pa spong ba mngon sum du byed pa gang yin pa ste/de ni dus thag nye bas mya ngan las 'da' ba thag nye ba yin no/ /sbyor ba thag nye bas mya ngan las 'da' ba thag nye ba gang zhe na/ de ni rigs la gnas shing zhugs pa gang yin pa ste/ de dag gcig tu bsdus pa ni gang zag thag nye ba zhes bya'o//gang zag yongs su ma smin pa gang zhe na/ gang zag gang la gnas nas yongs su mya ngan las 'da' ba dang / yang dag pa nyid du nges pa la 'jug par 'gyur ba'i tha ma'i lus phyi ma ma thob pa gang yin pa ste/ de ni gang zag yongs su ma smin pa zhes bya'o/ / gang zag yongs su smin pa gang zhe na/ gang zag gang la gnas nas yongs su mya ngan las 'da' ba dang / yang dag pa nyid du nges pa la 'jug par 'gyur ba'i tha ma'i lus phyi ma thob pa gang yin pa ste/ de ni gang zag yongs su smin pa zhes bya'o/ /gang zag rnam par ma dag pa gang zhe na/gang zag 'phags pa'i lam ma bskyed cing / de'i 'bras bu nyon mongs pa dang bral ba mngon sum du ma byas pa gang yin pa ste/ de ni gang zag rnam par ma dag pa zhes bya'o/ /gang zag rnam par dag pa gang zhe na/ de las bzlog pa yin par rig par bya'o/ /de dag ni rigs la gnas pa'i gang zag rnams zhes bya ste/'di lta ste/ ma zhugs pa rnams gzhug par bya ba dang / yongs su ma smin pa rnams yongs su smin par bya ba dang / rnam par ma dag pa rnams rnam par dag par bya ba gang dag gi don du sangs rgyas bcom ldan 'das rnams 'jig rten du 'byung zhing /chos kyi 'khor lo dag bskor bar mdzad pa dang / bslab pa'i gzhi rnams 'cha' bar mdzad pa dag yin no/ /bar gyi sdom ni/ rang bzhin dang ni de rnams gzhag /rtags rnams dang ni gang zag dag /de dag thams cad mdor bsdus te/ rigs kyi sar ni shes par bya//nyan thos kyi sa las rigs kyi sa rdzogs so// //de la 'jug pa'i sa gang zhe na/ smras pa/ 'jug pa'i rang bzhin gang yin pa dang / rnam par gzhag pa gang yin pa dang / zhugs pa'i gang zag gi rtags gang dag yin pa dang / zhugs pa'i gang zag gang dag yin pa de dag thams cad gcig tu bsdus pa ni 'jug pa'i sa zhes bya'o//de la 'jug pa'i rang bzhin gang zhe na/ 'di la rigs la gnas pa'i gang zag mya ngan las 'da' ba'i sa bon gyi chos dang ldan pa de ni/ gang gi tshe sangs rgyas 'byung ba yod cing / yul dbus kyi mi rkun ma ma yin pa dag dang / kla klo ma yin pa rnams su rgyas par snga ma bzhin du skyes par gyur na dang po kho na sangs rgyas rnams dang / sangs rgyas kyi nyan thos rnams la lta ba dang / drung du 'gro ba dang / bsnyen bkur bya ba rnyed par 'gyur zhing / de dag las chos thos nas dang por dad pa thob pa dang /tshul khrims yang dag par len pa dang / thos pa 'dzin pa dang / gtong ba spel ba dang / lta ba sbyong bar byed do/ /de'i 'og tu chos yang dag par blangs pa'i rgyu de dang rkyen des lus zhig cing tshe de yang dag par 'das nas kyang / rnam par smin pa'i skye mched drug gis zin pa'i dbang po khyad par du 'phags pa dag 'thob par 'gyur zhing /de'i de dag kyang dad pa shin tu mchog rnams dang / shin tu gtso bo dag skye ba'i rten du 'gyur ba dang / tshul khrims yang dag par blangs pa dang / thos pa gzung ba dang / gtong ba spel ba dang /lta ba sbyangs pa shin tu mchog dang / gtso bo dang / dam par gyur pa dag gi rten du gyur par yang 'gyur ro/ /dad pa la sogs pa'i chos shin tu mchog dang / gtso ba dang / dam par gyur pa gang dag yin pa de dag kyang yang rnam par smin pa gzhan gyi rten du 'gyur zhing /rnam par smin pa de yang 'jig rten las 'das pa'i chos dang rjes su mthun pa'i dge ba gzhan dag gi rten du 'gyur te/ de ltar gcig gi rgyu dang rten du gcig gyur pa'i sbyin pa'i stobs bskyed pas/ gong nas gong du gang la gnas na yongs su mya ngan las 'da' ba dang / yang dag pa nyid du nges pa la 'jug par 'gyur ba'i tha ma'i lus phyi ma thob pa'i bar gyi skye ba khyad par can du 'gro ba gang yin pa de ni 'jug pa zhes bya'o/ /de ci'i phyir zhe na/ de de'i tshe na mya ngan las 'da' ba thob par bya ba dang / mya ngan las 'da' bar 'gro bar bya ba dang /rim gyis 'gro bar bya ba dang / shin tu mthar thug par bya ba'i phyir/ lam gang yin pa dang / lam srang gang yin pa dang / sgrub pa gang yin pa der zhugs pa dang / yang dag par zhugs pa dang rab tu zhugs pa yin pas na de'i phyir zhugs pa zhes bya ste/ de ni 'jug pa'i rang bzhin zhes bya'o//'jug pa'i rnam par gzhag pa gang zhe na/ rigs yod pa dang / 'jug pa yod pa dang / yongs su smin par byed pa nyid yod pa dang / yongs su smin pa yod pa ste/ zhugs pa kho na yin la yongs su smin par byed pa nyid kyang ma yin yongs su smin pa yang ma yin pa yang yod do//zhugs pa yang yin/ yongs su smin par byed pa nyid kyang yin la/ yongs su smin pa ma yin pa yang yod do/ /zhugs pa yang yin/ yongs su smin pa yang yin la/ yongs su smin par byed pa nyid ma yin pa yang yod do/ /zhugs pa yang ma yin/yongs su smin par byed pa nyid kyang ma yin/ yongs su smin pa yang ma yin pa yang yod do/ /de la rigs gang zhe na/ smras pa/ snga ma bzhin no/ /de la zhugs pa gang zhe na/ rigs la gnas pa'i gang zag gis sngon de bzhin gshegs pas gsungs pa'i chos 'dul ba la dad pa ma thob pa las dang por thob par gyur cing tshul khrims yang dag par len pa dang /thos pa 'dzin pa dang / gtong ba spel ba dang / lta ba sbyong bar byed pa gang yin pa ste/ de ni zhugs pa zhes bya'o/ /yongs su smin par byed pa nyid gang zhe na/ de ltar zhugs pa'i gang zag de nyid gang la gnas na/yongs su mya ngan las 'das pa dang / yang dag pa nyid du nges pa la 'jug par 'gyur ba'i lus tha ma'i lus phyi ma thob pa ma gtogs pa/ zhugs pa'i gong yan chad nas skye ba gong nas gong ma dag tu dbang po shin tu mchog dang / gtso bo dang / dam pa dang / shin tu khyad par du 'phags pa dag yang dag par sgrub par byed pa gang yin pa ste/ de ni yongs su smin par byed pa nyid ces bya'o/ /de la yongs su smin pa gang zhe na/ des gang la gnas na yongs su mya ngan las 'da' ba dang / yang dag pa nyid du nges pa la 'jug par 'gyur ba'i tha ma'i lus phyi ma thob par gyur pa gang yin pa ste/de ni yongs su smin pa zhes bya'o/ /de la zhugs pa kho na yin la/ yongs su smin par byed pa nyid kyang ma yin la / yongs su smin pa yang ma yin pa gang zhe na/ de bzhin gshegs pas gsungs pa'i chos 'dul ba la dang por dad pa dang /lta ba sbyong bar byed pa'i bar ni thob par 'gyur la/ de'i gong du ni skye ba gcig tsam yang mngon par sgrub par mi byed pa gang yin pa ste/ de ni zhugs pa kho na yin la/ yongs su smin par byed pa nyid kyang ma yin/ yongs su smin pa yang ma yin pa zhes bya'o/ /de la zhugs pa yang yin/yongs su smin par byed pa nyid kyang yin la yongs su smin pa ma yin pa gang zhe na/ de bzhin gshegs pas gsungs pa'i chos 'dul ba la dang po dad pa dang / lta ba sbyong bar byed pa'i bar yongs su thob par gyur la/ de'i gong du ni skye ba gcig gam/ gnyis sam/ rab tu mang po dag kyang mngon par sgrub par byed mod kyi/ gang la gnas na yongs su mya ngan las 'da' ba dang / yang dag pa nyid du nges pa la 'jug par 'gyur ba'i tha ma'i lus phyi ma ma thob pa gang yin pa ste/ de ni zhugs pa yang yin/ yongs su smin par byed pa nyid kyang yin la/ yongs su smin pa ma yin pa zhes bya'o/ /de la zhugs pa yang yin/ yongs su smin pa yang yin la/ yongs su smin par byed pa nyid ma yin pa gang zhe na / 'di lta ste/ de ltar zhugs pa'i gang zag de nyid kyis/ gang la gnas na yongs su mya ngan las 'da' ba dang / yang dag pa nyid du nges pa la 'jug par 'gyur ba'i tha ma'i lus phyi ma thob cing rnyed par gyur pa gang yin pa ste/de ni zhugs pa yang yin/ yongs su smin pa yang yin la/ yongs su smin par byed pa nyid ma yin pa zhes bya'o/ /de la zhugs pa yang ma yin/ yongs su smin par byed pa nyid kyang ma yin/yongs su smin pa yang ma yin pa gang zhe na/ 'di lta ste/ yongs su mya ngan las 'da' ba'i chos can gyi gang zag rigs kho na la gnas la/ ma zhugs pa gang yin pa ste/ de ni gang zag zhugs pa yang ma yin/ yongs su smin par byed pa nyid kyang ma yin/yongs su smin pa yang ma yin pa zhes bya ste/ 'on kyang de ni 'jug pa dang / yongs su smin par 'gyur ba'i skal ba yod pa kho na yin no/ /gang zag gang 'jug pa dang / yongs su smin par 'gyur ba'i skal ba med pa kho na yin pa yang yod de/'di lta ste/ yongs su mya ngan las mi 'da' ba'i chos can gyi gang zag rigs med pa gang yin pa ste/ de ni 'jug pa dang / yongs su smin par 'gyur ba'i skal ba yang gtan med pa kho na yin la / yongs su mya ngan las 'da' bar 'gyur ba'i skal ba lta yod pa yin re skan// // nyan thos kyi sa/ bam po gnyis pa/ /de la gang zag de dag thams cad ni/ gnas drug gis bsdus pa yin te/ drug gang zhe na/ skal ba dang ldan pa dang / dge ba'i rtsa ba chung ngu dang ldan pa dang / dge ba'i rtsa ba 'bring dang ldan pa dang / dge ba'i rtsa ba chen po dang ldan pa dang /mthar thug pa'i sbyor ba la gnas pa dang / mthar thug par gyur pas so/ /de la gang zag skal ba dang ldan pa gang zhe na/ rigs la gnas pa ni yin la/ da dung de bzhin gshegs pas gsungs pa'i chos 'dul ba la dang por dad pa dang / lta ba sbyong bar byed pa'i bar dag ma thob pa gang yin pa ste/de ni gang zag skal ba dang ldan pa zhes bya'o/ /de la gang zag dge ba'i rtsa ba chung ngu dang ldan pa gang zhe na/ rigs la gnas pa des de bzhin gshegs pas gsungs pa'i chos 'dul ba la dang por dad pa dang / lta ba sbyong ba'i bar dag thob par gyur pa gang yin pa ste/ de ni gang zag dge ba'i rtsa ba chung ngu dang ldan pa zhes bya'o/ /de la gang zag dge ba'i rtsa ba 'bring dang ldan pa gang zhe na/ gang zag rigs la gnas pas des de bzhin gshegs pas gsungs pa'i chos 'dul ba la/ dang por dad pa thob cing lta ba sbyangs pa'i bar du yang byas la/ de'i 'og tu skye ba gcig gam/gnyis sam/ rab tu mang po dag mngon par sgrub par byed cing / khyad par du 'gro bar yang byed la/ gang la gnas na yongs su mya ngan las 'da' ba dang / yang dag pa nyid du nges pa la 'jug par 'gyur ba'i tha ma'i lus phyi ma ni ma thob pa gang yin pa ste/de ni gang zag dge ba'i rtsa ba 'bring dang ldan pa zhes bya'o/ /de la gang zag dge ba'i rtsa ba chen po dang ldan pa gang zhe na/ gang zag khyad par du 'gro ba de nyid kyis/ gang gi tshe gang la gnas na yongs su mya ngan las 'da' ba dang / yang dag pa nyid du nges pa la 'jug par 'gyur ba'i tha ma'i lus phyi ma thob par gyur pa gang yin pa ste/de ni gang zag dge ba'i rtsa ba chen po dang ldan pa zhes bya'o/ /de la gang zag mthar thug pa'i sbyor ba la gnas pa gang zhe na/ gang zag gang la gnas na yongs su mya ngan las 'da' ba dang / yang dag pa nyid du nges pa la 'jug par 'gyur ba'i tha ma'i lus phyi ma thob cing /zag pa zad par bya ba'i phyir/ yang dag pa'i gdams ngag dang rjes su bstan pa'i dam pa'i chos mnyan pa yang thob nas/ yang dag pa nyid du brtson par byed la/ da dung rnam pa thams cad kyi thams cad du zag pa zad pa ni ma thob cing /mthar thug par yang mi 'gro ba gang yin pa ste/ de ni gang zag mthar thug pa'i sbyor ba la gnas pa zhes bya'o/ /de la gang zag mthar thug par gyur pa gang zhe na/ 'di lta ste/ zag pa zad par bya ba'i phyir/ ji lta ji ltar yang dag par gdams shing rjes su bstan pa de lta de ltar sgrub par byed cing /rnam pa thams cad kyi thams cad du zag pa zad pa yang thob la/ bya ba byas shing mchog tu bsil ba'i dngos po thob par gyur pa gang yin pa ste/ de ni gang zag mthar thug par gyur pa zhes bya'o/ /de la gang zag skal ba dang ldan pa'i rang bzhin can ni rigs la brten cing gnas nas/dge ba'i rtsa ba chung ngu dag thob cing zhugs par yang 'gyur ro/ /de la zhugs par gyur nas/ dge ba'i rtsa ba chung ngu dag la brten cing gnas nas/ dge ba'i rtsa ba 'bring dag thob cing de dag gis kyang bdag nyid yongs su smin par byed do//de de ltar yongs su smin par byed pa na/ dge ba'i rtsa ba 'bring dag la brten cing gnas nas/ dge ba'i rtsa ba chen po dag 'thob cing yongs su smin par yang 'gyur ro/ /de dge ba'i rtsa ba chen po dag gi rgyus yang dag par bsgrubs pa'i lus thob pa nas/ gang gi tshe tshogs yang dag par sgrub par byed cing / sems rtse gcig pa nyid la yang reg par byed la/ yang dag pa nyid du nges pa la 'jug par byed de/ rgyun tu zhugs ba'i 'bras bu'am/ lan cig phyir 'ong ba'i 'bras bu'am/ phyir mi 'ong pa'i 'bras bu mngon sum du byed la/ 'bras bu'i mchog dgra bcom pa nyid ni mngon sum du mi byed pa de'i tshe ni/ /mthar thug pa'i sbyor ba la gnas pa zhes bya'o/ /gang gi tshe nyon mongs pa thams cad spangs pa'i dgra bcom pa nyid mngon sum du byed pa de'i tshe na ni mthar thug par gyur pa yin no/ /gang zag rnam par gzhag pa drug po de dag gis ni nyan thos kyi spyod pa thams cad kyi dang po dang /dbus dang / mtha' dag bstan te/ de la rigs kyis ni nyan thos kyi spyod pa dang po bstan to/ /mthar thug par gyur pas ni mtha' bstan to/ /de las gzhan pa dag gis ni dbus bstan to/ /de la ci zhugs pa'i gang zag thams cad kyi yongs su mya ngan las 'das pa dus kyi tshad nges shing mnyam pa yin nam/'on te thams cad kyi yongs su mya ngan las 'da' ba'i dus kyi tshad ma nges shing mi mnyam pa yin zhe na/ smras pa/ de dag thams cad kyi yongs su mya ngan las 'da' ba'i dus kyi tshad nges pa yang ma yin la mnyam pa yang ma yin no//'on kyang de dag ni ji ltar rigs pa dang / rkyen ji ltar rnyed pas yongs su mya ngan las 'da' bar rig par bya ste/ kha cig ni yun ring pos yongs su mya ngan las 'da' bar 'gyur ro/ /kha cig ni ha cang yun ring po ma yin pas so/ / kha cig ni myur ba kho nas so/ /de lta mod kyi rigs la gnas pa'i gang zag thams cad pas/ myur bar yongs su mya ngan las 'da' bar byed pa gang yin pa de yang / gdon mi za bar skye ba gsum mngon par sgrub par byed de/ skye ba gcig la ni 'jug par byed do/ /gcig la ni yongs su smin par byed do//gcig la ni yongs su smin par gyur pa yin te/ de nyid la yongs su mya ngan las 'da' bar byed do/ /gal te yongs su mya ngan las mi 'da' na ni/ de gdon mi za bar slob pas 'chi ba'i dus byed par 'gyur zhing / /re ltar thogs na yang srid pa bdun las lhag par mngon par sgrub par mi byed do/de ni 'jug pa'i rnam par gzhag pa zhes bya'o/ /zhugs pa'i gang zag gi rtags rnams gang zhe na/ 'di la rigs la gnas pa'i gang zag ni zhugs pa kho na tsam gyis gang gi tshe/ tshe gzhan du 'phos shing rang gi ston pa dang / chos 'dul ba dag brjed par gyur kyang /nyes par bshad pa dang / legs par gsungs pa'i chos 'dul ba dag yod cing med pa ma yin la/ nyes par bshad pa'i chos 'dul ba'i bsngags pa dang / bstod pa dang / phan yon dag rnam grangs du mar thos kyang / de la 'jug par mi byed cing rab tu 'byung bar mi byed do//zhugs shing rab tu byung na yang / dper na sbrang rtsi las skyes pa'i srog chags tshar bcug pa'am/ 'dod pa la longs spyod par byed pa ljan ljin gyi rdzab tu bcug pa bzhin du/ de yang 'di lta ste/ sngon gyi rgyu'i stobs bskyed pa kho nas de la rang bzhin gyis mi dga' bzhin du gnas shing myur ba myur ba kho nar phyir ldog par 'gyur ro//legs par gsungs pa'i chos 'dul ba'i bsngags pa dang / bstod pa dang / phan yon cung zad tsam dang ngan ngon tsam dag mnyan kyang rung ma mnyan kyang rung / thos kyang rung ma thos kyang rung ste/ myur ba myur ba kho nar de la 'jug cing /rab tu 'byung la/ de ltar zhugs shing rab tu byung nas kyang / dper na sbrang rtsi las skyes pa'i srog chags sbrang rtsir bcug pa'am/ 'dod pa la longs spyod par byed pa 'dod pa'i spyod pa gya nom pa dag la bkod pa bzhin du/ de yang 'di lta ste/ sngon gyi rgyu'i stobs bskyed pa kho nas/de la rang bzhin gyis dga' ba bzhin du gnas shing / phyir ldog par mi 'gyur te/ de ni zhugs pa'i gang zag gi rtags dang po yin no/ /gzhan yang zhugs pa'i gang zag ni/ re zhig ngan song dang / mi khom par 'gro bar 'gyur ba'i nyon mongs pa rnams dang bral ba ma yin na yang /mi khom pa rnams su skye bar mi 'gyur te/ bcom ldan 'das kyis zhugs pa'i gang zag la dgongs nas/ /gang la 'jig rten yang dag lta/ /chen po yod par gyur pa de/ /tshe rabs stong phrag rnams su yang / / ngan 'gror 'gro bar mi 'gyur ro/ /zhes gsungs pa lta bu'o/ /de yang gang gi tshe yongs su smin par 'gyur ba'i dge ba'i chos chen po dag la rim gyis zhugs par gyur pa de'i tshe/ mi khom pa rnams su skye bar mi 'gyur ba la bya'i/ /gzhan dag la zhugs pa ni ma yin te/ de ni zhugs pa'i gang zag gi rtags gnyis pa yin no//gzhan yang zhugs pa'i gang zag ni sangs rgyas sam/ chos sam/ dge 'dun gyi yon tan dag thos sam/ dran nas dge ba nges par 'byung ba dang ldan pa'i dad pa rgya chen po'i sems thob par 'gyur zhing / dmigs pa des yang dang yang du dad pas brlan pa'i sems kyis mchi ma khrug ces byed pa dang /spu zing zhes byed pa 'thob par 'gyur te/ de ni zhugs pa'i gang zag gi rtags gsum pa yin no/ /gzhan yang zhugs pa'i gang zag ni/ 'di lta ste/ kha na ma tho ba kun 'byung ba'i gnas thams cad la/rang bzhin gyis ngo tsha shes pa dang / khrel yod pa shas chen po dang ldan pa yin te/ de ni zhugs pa'i gang zag gi rtags bzhi pa yin no/ /gzhan yang zhugs pa'i gang zag ni/ lung nod pa dang / kha ton bya ba dang / yongs su zhu ba dang / rnal 'byor du bya ba dang / yid la bya ba dag la 'dun cing 'dun pa drag po dang ldan la/ dge ba gang yin zhes tshol bar byed de/ /de ni zhugs pa'i gang zag gi rtags lnga pa yin no/ /gzhan yang zhugs pa'i gang zag ni 'di lta ste/ yang dag par bsgrub par bya ba'i phyir/ las kyi mtha' kha na ma tho ba med pa thams cad dang /dge ba'i phyogs kyi sbyor ba yang dag par blangs pa thams cad la/ dam du rtsom pa dang / brtan par rtsom pa dang / shin tu nges par rtsom pa yin te/ de ni zhugs pa'i gang zag gi rtags drug pa yin no/ /gzhan yang zhugs pa'i gang zag ni rang bzhin gyis 'dod chags chung ba yin te/nyon mongs pa'i kun nas dkris pa chung ngu chung ngu ngag 'byung bar 'gyur zhing / rgyun gnas par mi byed la/ g.yo med pa dang / sgyu med pa dang / rgyags pa dang / nga rgyal dang / ngar 'dzin pa nges par bcom pa dang / yon tan la mngon par zhugs pa dang /skyon la sdang ba yin te/ de ni zhugs pa'i gang zag gi rtags bdun pa yin no/ /gzhan yang zhugs pa'i gang zag ni rtogs par bya ba'i gnas rgya chen po dag la sems kun tu zhum par mi 'gyur zhing / bdag nyid dpa' 'gong bar mi byed la/ mthu med pa la gnas par mi byed cing mos pa mang ba yin te/de ni zhugs pa'i gang zag gi rtags rnams brgyad pa yin no/ /zhugs pa'i gang zag rnams kyi rtags ni de lta bu dang mthun pa mang du yod par rig par bya ste/ /de dag las 'di ni phyogs tsam zhig brjod pa yin no/ /rtags de dag kyang zhugs pa'i gang zag dge ba'i rtsa ba chung ngu la gnas pa dag gis ni bar du 'chad pa dang /rgyun chags pa ma yin pa dang / rnam par ma dag pa ste chung ba yin no/ /dge ba'i rtsa ba 'bring la gnas pa dag ni 'bring yin no/ /dge ba'i rtsa ba chen po la gnas pa dag gi ni bar du chad pa med pa dang /rgyun chags pa dang / rnam par dag pa dang / che ba yin no/ /de dag ni zhugs pa'i gang zag gi rtags rnams yin no/ / zhugs pa'i rtags de dag dang ldan na zhugs pa zhes bya ba'i grangs su 'gro ba yin no/ /rigs la gnas pa dang zhugs pa'i gang zag rnams kyi rtags de dag ni rjes su dpag par bya ba yin par rig par bya'o//skyob pa sangs rgyas bcom ldan 'das rnams dang / nyan thos dam pa'i pha rol tu son pa rnams kyis ni de dag la ye shes dang gzigs pa rnam par dag pas 'di lta ste/ rigs dang zhugs pa dag /mngon sum du gzigs pa'o //zhugs pa'i gang zag rnams gang zhe na/ zhugs pa'i gang zag zhugs pa kho na yin la/ yongs su smin par byed pa yang ma yin/ yongs su smin pa yang ma yin/ nges par 'byung ba ma yin pa yang yod do/ /yongs su smin par byed pa yin la/ yongs su smin pa yang ma yin/nges par 'byung ba ma yin pa yang yod do/ /yongs su smin pa yin la/ nges par 'byung ba ma yin pa yang yod do/ /nges par byung ba yang yod de/ de dag gi rnam par dbye ba ni snga ma bzhin du rig par bya'o/ /gang dag de dag las gzhan pa gang zag dbang po rtul po la sogs pa'i dbye ba rigs kyi sa'i skabs su bstan pa de dag kyang 'dir ci rigs su rig par bya'o//de la 'jug pa'i rang bzhin gang yin pa de dang / rnam par gzhag pa gang yin pa de dang / zhugs pa'i gang zag gi rtags gang dag yin pa de dag dang /zhugs pa'i gang zag gang dag yin pa de dag thams cad gcig tu bsdus pa ni 'jug pa'i sa zhes bya'o/ bar gyi sdom ni/ /rang bzhin dag ni de dag gzhag /rtags rnams dang ni gang zag dag /de dag thams cad mdor bsdus te/ /'jug pa'i sar ni shes par bya//nyan thos kyis las 'jug pa'i sa rdzogs so// //de la nges par 'byung ba'i sa gang zhe na/ smras pa/ 'jig rten pa'i lam gyis 'dod chags dang bral bar 'gyur ba gang yin pa dang / 'jig rten las 'das pa'i lam gyis 'dod chags dang bral bar 'gyur ba gang yin pa dang /de dag nyid kyi tshogs gang yin pa de dag gcig tu bsdus pa ni nges par 'byung ba'i sa zhes bya'o/ /de la 'jig rten pa'i lam gyis 'dod chags dang bral bar 'gyur ba gang zhe na/ 'di ltar 'di na la la 'dod pa'i khams la rags par lta zhing snyoms par 'jug pa dang skye ba yod pa /dben pa las skyes pa'i dga' ba dang / bde ba can gyi bsam gtan dang po la ni zhi bar lta'o/ /de de ltar lta zhing de la lan mang du gnas pa na 'dod pa la 'dod chags dang bral ba thob cing / bsam gtan dang po la yang snyoms par 'jug go //de bzhin du bsam gtan dang po'i gong ma dag nas kyang / sa 'og ma thams cad la rags par lta zhing sa gong ma thams cad la ni zhi bar lta'o/ /de de ltar lta zhing de dag la lan mang du gnas pa na ci yang med pa'i skye mched kyi bar gyi 'dod chags dang bral ba thob cing /'du shes med 'du shes med min skye mched la yang snyoms par 'jug pa ste/ de ni 'jig rten pa'i lam gyis 'dod chags dang bral bar 'gyur ba zhes bya'o/ / de las gong na yang med la de las lhag pa yang med do/ /de la 'jig rten las 'das pa'i lam gyis 'dod chags dang bral bar 'gyur ba gang zhe na/'di ltar 'di na skyes bu dam pa rnams mthong ba/ 'phags pa'i chos rnams la mkhas pa/ 'phags pa'i chos rnams la bzo ba la la/ sdug bsngal la sdug bsngal ba dang / kun 'byung la kun 'byung ba dang / 'gog pa la 'gog pa dang /lam la lam du yang dag pa ji lta ba bzhin du rab tu shes shing slob pa'i ye shes dang mthong ba dang ldan par gyur na/ de'i gong du lam sgom par byed pa na/ khams gsum pa'i mthong ba dang / bsgom pas spang bar bya ba'i chos rnams la bdag nyid 'bral bar byed/ rnam par grol bar byed cing /de ltar de khams gsum pa las yang dag par 'da' bar 'gyur ba ste/ de ni 'jig rten las 'das pa'i lam gyis 'dod chags dang bral bar 'gyur ba zhes bya'o/ /de dag nyid kyi tshogs gang zhe na/ 'di lta ste/ bdag gi 'byor pa dang / gzhan gyi 'byor pa dang /dge ba'i chos la 'dun pa dang / tshul khrims kyi sdom pa dang / dbang po sdom pa dang / zas kyi tshod rig pa nyid dang / nam gyi cha stod dang / nam gyi cha smad la mi nyal bar sbyor ba'i rjes su brtson pa dang / shes bzhin du sbyor ba nyid dang / dge ba'i bshes gnyen dang /dam pa'i chos nyan pa dang / sems pa dang bar chad med pa dang / gtong ba spel ba dang / dge sbyong gi rgyan gang yin pa ste/ chos de dag ni 'jig rten pa dang 'jig rten las 'das pa'i lam gyis 'dod chags dang bral bar 'gyur ba'i tshogs zhes bya'o/ / de la bdag gi 'byor pa dang / gzhan gyi 'byor pa dang / dge ba'i chos la 'dun pa gang yin pa de dag gi rnam par dbye ba ni sngar sa bon yang dag par 'grub pa'i rkyen sman pa bshad pa'i skabs kyis bstan pa bzhin du rig par bya'o/ /de la tshul khrims kyi sdom pa gang zhe na/'di ltar 'di na la la tshul khrims dang ldan par gnas pa dang / so sor thar pa'i sdom pas bsdams pa dang / cho ga phun sum tshogs pa dang / spyod yul phun sum tshogs pa dang / kha na ma tho ba phra rab tsam dag la yang 'jigs par lta ba dang /bslab pa'i gzhi rnams yang dag pas blangs shing slob par byed pa yin no/ /de la ji ltar na tshul khrims dang ldan par gnas pa yin zhe na/ bslab pa'i gzhi ji ltar yang dag par blangs pa dag la/ lus kyi las kyi mtha' ma log pa dang / ngag gi las kyi mtha' ma log par gyur cing /ma nyams par byed pa dang / skyon med par byed pa yin te/ de ltar na tshul khrims dang ldan par gnas pa yin no/ /ji ltar na so sor thar pa'i sdom pas bsdams pa yin zhe na / sde tshan bdun po dag gi tshul khrims ni so sor thar pa'i sdom pa zhes bya ste/ sde tshan de dag gi bye brag las sdom pa yang mang por gyur pa yin no/ /skabs 'dir ni dge slong gi sdom pa la brten nas/ so sor thar pa'i sdom pas bsdams pa zhes bya'o/ /ji ltar na cho ga phun sum tshogs pa yin zhe na/ 'di lta ste spyod lam mam/ 'phral gyi bya ba 'am/dge ba'i phyogs kyi sbyor ba la brten nas/ 'jig rten dang rjes su mthun zhing 'jig rten dang mi 'gal ba dang / 'dul ba dang rjes su mthun zhing 'dul ba dang mi 'gal ba'i cho ga dang ldan pa yin no/ /de la ji ltar na spyod lam la brten pa'i cho ga 'jig rten dang mi 'gal zhing 'dul ba dang mi 'gal ba yin zhe na/'di lta ste gang du bcag par bya ba dang / ji ltar bcag par bya ba der/ gang gis 'jig rten gyi dam pa rnams dang / yang dag par song ba rnams dang / skyes bu dam pa rnams kyis smad par mi 'gyur ba dang / chos mthun pa rnams dang /'dul ba 'dzin pa rnams dang 'dul ba la slob pa rnams kyis smad cing bshung bar mi 'gyur ba de ltar 'chag par byed pa ste/ 'chag pa ji lta ba bzhin du 'greng ba dang / 'dug pa dang / nyal ba rnams kyang de bzhin du rig par bya'o/ /de la ji ltar na 'phral gyi bya ba la brten pa'i cho ga 'jig rten dang mi 'gal zhing 'dul ba dang mi 'gal ba yin zhe na/'phral gyi bya ba zhes bya ba ni chos gos bgo ba dang / bshang ba dang / gci ba dang / chu 'thung ba dang / so shing za ba dang / grong du 'jug pa dang / bsod snyoms bsgrub pa dang / bza' ba dang / lhung bzed bkru zhing gzhag pa dang / rkang pa bkru ba dang / mal dang / stan bshams pa dang / de dag nyid bsdu ba dang / lhung bzed kyi las dang / chos gos kyi las dang / chung zad de lta bu dang mthun pa gang yin pa rnams ni 'phral gyi bya ba zhes bya ba ste/de dag kyang ji ltar rigs pa dang / gang du bya ba dang / ji ltar bya ba der / gang gis 'jig rten pa rnams dang rtsod par mi 'gyur zhing smad par mi 'gyur ba dang / 'dul ba 'dzin pa rnams dang 'dul ba la bslab pa rnams kyis smad par mi 'gyur ba dang /dam pa rnams dang / yang dag par song ba rnams dang / chos mthun pa rnams kyis smad par mi 'gyur ba de ltar byed pa ste/ de ltar nas 'phral gyi bya ba la brten pa'i cho ga 'jig rten dang mi 'gal zhing 'dul ba dang mi 'gal ba yin no/ /de la ji ltar na dge ba'i phyogs kyi sbyor ba la brten pa'i cho ga 'jig rten dang mi 'gal zhing 'dul ba dang mi 'gal ba yin zhe na/dge ba'i phyogs zhes bya ba ni 'di lta ste/ kha ton bya ba dang / bla ma rnams la 'dud pa dang / ldang ba'i las bya ba dang / de bzhin du gcig la gcig rjes su snying brtse ba'i sems nye bar gzhag ste/nad g.yog bya ba dang / 'dun pa sbyin pa dang / lung 'bogs pa dang / rab tu sbyor ba dang / yongs su zhugs pa dang / chos mnyan pa dang / tshangs pa mtshungs par spyod pa mkhas pa rnams las mkhas shing le lo med pa rnams la lus kyi zhal ta bya ba dang /gzhan dag kyang dge ba'i phyogs yang dag par 'dzin du 'jug pa dang / chos bstan pa dang / nang du yang dag 'jog pa dang / 'jug pa dang skyil mo krung bca' ba dang / 'dug pa dang gzhan yang de lta bu dang mthun pa'i chos gang yin pa de ni dge ba'i phyogs kyi sbyor ba zhes bya ba ste/dge ba'i phyogs kyi sbyor ba ji skad smos pa de dag ci rigs par gang du bya ba dang / ji ltar bya ba der gang gis 'jig rten pa rnams dang / 'dul ba 'dzin pa rnams dang / 'dul ba la bslab pa rnams dang /dam pa rnams dang / yang dag par song ba rnams dang / skyes bu dam pa rnams dang chos mthun pa rnams dang / mi rtsod cing smad par mi 'gyur ba de ltar byed pa ste/ de ni dge ba'i phyogs kyi sbyor ba la brten pa'i cho ga 'jig rten dang mi 'gal zhing 'dul ba dang mi 'gal ba zhes bya'o//cho ga'i rnam pa de lta bu dag dang ldan pa gang yin pa de ni cho ga phun sum tshogs pa zhes bya ste/ de ltar na cho ga phun sum tshogs pa yin no/ /ji ltar na spyod lam phun sum tshogs pa yin zhe na/ dge sbyong gi spyod yul ma yin pa ni lnga ste/lnga gang zhe na/ 'di lta ste/ shan pa'i gnas dang / smad 'tshong ma'i gnas dang / chang tshong gi gnas dang / rgyal po'i pho brang dang / lnga pa gdol pa'i khyim kho na ste/ de bzhin gshegs pas smad pa spyod yul ma yin pa de dag spangs nas/ spyod yul kha na ma tho ba med pa gzhan dag tu spyod par byed cing / de yang dus su spyod par byed pa gang yin pa ste/ de ltar spyod yul phun sum tshogs pa yin no/ /ji ltar na kha na ma tho ba phra rab tsam dag la yang 'jigs par lta ba yin zhe na/ kha na ma tho ba phra rab tsam dag ces bya ba ni/bslab pa'i gzhi phra ba dang shin tu phra ba gang dag la ltung ba byung ba dang / bslang bar bya ba yod pa de dag gi ltung ba 'byung ba gang yin pa de ni kha na ma tho ba phra rab tsam dag ces bya'o/ /yang 'di ltar ltung ba 'byung ba de las tshegs chung ngus ldang bar 'gyur bas/de'i phyir yang de ni kha na ma tho ba phra rab tsam zhes bya'o/ /de la ji ltar na 'jigs par lta ba yin zhe na/ bdag ltung ba 'byung ba 'di'i rgyus ma thob pa thob par bya ba dang / ma rtogs pa rtogs par bya ba dang / mngon sum du ma byas pa mngon sum du bya ba'i skal ba med par 'gyur ba'am/ngan song du nye bar 'gro bar bya ba'i ngan song du 'gro bar 'gyur ba'am/ bdag la bdag nyid dam/ ston pa 'am/ lha rnams kyis smad par 'gyur ba'am/ tshangs pa mtshungs par spyod pa mkhas pa rnams kyis chos nyid kyis smad par 'gyur ba'am/phyogs dang phyogs mtshams rnams su bdag gi sdig pa can gyi snyan pa bsngags pa ma yin pa'i sgra'i tshogs grags par gyur na mi rung ngo snyam nas de de'i rgyur gyur pa tshe 'di dang tshe phyi ma la mi 'dod par 'gyur ba'i chos de dag la 'jigs par lta zhing des na srog gi phyir yang bslab pa'i gzhi phra ba dang shin tu phra ba de dag la bsams bzhin du ltung ba 'byin par yang mi byed do//brgya la brgya lam na/ brjed ngas pas ltung ba 'byung bar gyur na yang / myur ba myur ba kho nar chos bzhin du phyir byed cing slong bar byed de/ de ltar na kha na ma tho ba phra rab tsam dag la yang 'jigs par lta ba yin no//ji ltar na bslab pa'i gzhi rnams yang dag par blangs shing slob par byed pa yin zhe na/ smras pa/ des sngon so sor thar pa'i sdom pa yang dag par len pa'i tshe gsol ba dang bzhi'i las kyis bsnyen par rdzogs par byed pa na/ bslab pa'i gzhi kha cig gi rang bzhin thos shing /de las gzhan pa bslab pa'i gzhi lhag ma so sor thar pa'i mdo las gsungs pa nyis brgya lnga bcu po dag kyang / zla ba phyed phyed cing so sor thar pa'i mdo 'don pa'i tshe/ mkhan po 'am/ slob dpon nam/ gtam 'dres pa 'am/ phebs par smra ba dang / smos 'drin nam/ grogs bshes po dag las thos nas/ thams cad la bslab par bya'o zhes dam bca' ba kho nar khas blangs pas de'i phyir/ des bslab pa'i gzhi thams cad yang dag par blangs pa'i rgyus so sor thar pa'i sdom pa thob po/ /dus de phyin chad ni bslab pa'i gzhi gang dag la mkhas par gyur pa/de dag la ni re zhig lhung ba mi 'byung ste/ /ltung ba na chos bzhin du phyir byed do/ /sngon dam bcas pa yang dag par blangs pas yang dag par blangs pa'i bslab pa'i gzhi gang dag la mi mkhas shing blo byang bar ma gyur pa de dag ni/da ltar mkhan po'am/ slob dpon nam/ snga ma bzhin du sngar ji skad bstan pa'i gnas de las byed brag tu bshad pa la mkhas pas yang dag par len par byed do/ /bye brag tu bshad pa la mkhas pas yang dag par blangs nas kyang / ji ltar rjes su bstan pa bzhin du lhag chad med par slob par byed cing /bla ma dang bla ma lta bu dag gis bstan pa'i bslab pa'i gzhi de dag la don dang tshig 'bru phyin ci ma log par yongs su 'dzin par byed do/ /de ltar na bslab pa'i gzhi rnams yang dag par blangs shing slob par byed pa yin te/ de ni re zhig tshul khrims kyi sdom pa'i rnam par dbye ba rgya cher byas pa yin no/ /de la don mdor bsdu ba gang zhe na/ de la bcom ldan 'das kyis tshul khrims kyi phung po'i mtshan nyid gsum yongs su bstan pa gang yin pa de ni don mdor bsdu ba yin te/ 'di lta ste/ chud mi za ba'i mtshan nyid dang //rang bzhin gyi mtshan nyid dang / rang bzhin gyi yon tan gyi mtshan nyid do/ /de yang gang zhe na/ tshul khrims dang ldan par gnas pa zhes gang gsungs pa de ni tshul khrims kyi sdom pa'i chud mi za ba'i mtshan nyid bstan to/ /so sor thar pa'i sdom pas bsdams pa zhes gang gsungs pa des ni rang bzhin gyi mtshan nyid bstan to//cho ga phun sum tshogs pa dang / spyod yul phun sum tshogs pa zhes gang gsungs pa des ni/ pha rol la brten nas de ltar yang dag par blangs pa'i so sor thar pa'i sdom pa'i yon tan gyi mtshan nyid bstan te/'di ltar gzhan gyis cho ga dang spyod yul phun sum tshogs pa de dag mthong na/ ma dad pa rnams kyang dad par 'gyur la/ dad pa rnams kyang phyir zhing 'phel bar 'gyur ba dang / dad pa rnams lhag par dad par bya ba dang / yid la 'khrug par mi byed cing mi len pa brjod par mi byed do//gzhan du na tshul khrims dang ldan du zin kyang / cho ga dang spyod yul phun sum tshogs pa ma yin na/ de la ni gzhan gyi dbang gis byung ba'i yon tan dang / rjes su bsngags pa dag 'byung bar mi 'gyur zhing / de la de las bzlog pa'i skyon 'ba' zhig 'byung ba'i phyir ro//kha na ma tho ba phra rab tsam dag la yang 'jigs par lta ba dang / bslab pa'i gzhi rnams yang dag par blangs shing slob par byed pa zhes gang gsungs pa des ni/ bdag gi dbang gis byung ba kho na'i yon tan dang / rjes su bsngags pa'i mtshan nyid bstan to//de ci'i phyir zhe na/ 'di ltar cho ga dang spyod yul phun sum tshogs shing gzhan gyi dbang gis byung ba'i yon tan dang / rjes su bsngags pa thob tu zin kyang / tshul khrims nyams par byas nas / rgyu de dang rkyen des ngan song rnams su yang skye bar 'gyur na/snga ma bzhin du ma thob pa thob par bya ba'i skal ba med par 'gyur ba lta ci smos te/ gang kha na ma tho ba phra rab tsam dag la yang 'jigs par lta ba dang / bslab pa'i gzhi chen po dag yang dag par blangs shing / slob par byed pa ni/ de'i phyir rgyu de dang rkyen des ngan song rnams su skye bar mi 'gyur zhing bde 'gro lha dang mi rnams skye bar 'gyur ba dang /snga ma bzhin du ma thob pa thob par bya ba'i skal ba yod par 'gyur ba'i phyir te/ rgyu des na bdag gi dbang gis byung ba 'di ni tshul khrims kyi sdom pa'i yon tan dang / rjes su bsngags pa zhes bya'o/ /rnam grangs gzhan yang mdor bsdu na/bcom ldan 'das kyis tshul khrims yang dag par blangs pa dang / nges par 'byin pa'i tshul khrims dang tshul khrims bsgoms pa zhes gsungs pa yin te/ de la re zhig tshul khrims dang ldan par gnas pa zhes gang gsungs pa des ni/ tshul khrims yang dag par blangs pa bstan to//so sor thar pa'i sdom pas bsdams pa zhes gang gsungs pa des ni/ nges par 'byin pa'i tshul khrims bstan te/ 'di ltar so sor thar pa'i sdom pas yang dag par bsdus pa'i tshul khrims ni lhag pa'i tshul khrims kyi bslab pa zhes bya'o/ / lhag pa'i tshul khrims kyi bslab pa la brten nas/ lhag pa'i sems dang lhag pa'i shes rab kyi bslab pa sgom par byed do/ /de ltar na de ni 'di lta ste/ sdug bsngal thams cad zad par bya ba'i phyir lhag pa'i tshul khrims la gnas pa'i sngon du btang nas nges par 'byung bar 'gyur ba'i phyir te/de'i phyir so sor thar pa'i sdom pas ni nges par 'byin pa'i tshul khrims zhes bya'o/ /cho ga dang spyod yul phun sum tshogs pa dang / kha na ma tho ba phra rab tsam dag la yang 'jigs par lta ba dang / bslab pa'i gzhi rnams yang dag par blangs shing slob par byed pa zhes gang gsungs pa des ni/tshul khrims bsgoms pa bstan te/ rnam pa de dag gis so sor thar pa'i sdom pa'i tshul khrims de bsgom par bya'o/ /de ltar bsgoms na legs par bsgoms pa'i phyir te / tshul khrims kyi sdom pa gcig pu la yang bshad pa so sor gnas pa rnam pa drug yod par rig par bya'o//tshul khrims kyi sdom pa de yang rgyu rnam pa bcus nyams pa yin la/ de las bzlog pa rnam pa bcus ni phun tshogs pa yin par rig par bya'o/ /nyams par 'gyur ba'i rgyu rnam pa bcu gang zhe na/ dang po nyid nas nyes par blangs pa dang /ha cang zhum pa dang / thal ches pa dang / bag med pa dang / le los yongs su zin pa dang / log par smon pa dang / cho ga nyams pas yongs su zin pa dang / 'tsho ba nyams pas yongs su zin pa dang / mtha' gnyis su lhung ba dang / nges par 'byung ba ma yin pa dang /yang dag par blangs pa yongs su nyams par gyur pa'o/ /de la ji ltar na dang po nyid nas tshul khrims nyes par blangs pa yin zhe na/ 'di ltar 'di na la la rgyal pos gtses pa'am/ chom rkun las gtses sam / /bu lon gyis nyam thag pa 'am/'jigs pas nyam thag pa'am/ mi 'tsho bas 'jig shing skrag pa'i phyir rab tu byung gi /dge sbyong gi phyir ma yin/ /bram ze'i phyir ma yin/ bdag gdul bar bya ba'i phyir ma yin/ bdag gdul bar bya ba'i phyir ma yin/ bdag zhi bar bya ba'i phyir ma yin/ /bdag yongs su mya ngan las 'da' bar bya ba'i phyir ma yin pa ste/de ltar na dang po nyid nas nyes bar blangs pa yin no/ /ji ltar na ha cang zhum pa yin zhe na/ 'di ltar 'di na la la bslab pa'i gzhi rnams la ngo tsha med pa dang / 'gyod pa chung ba dang lhod cing g.yel bar byed pa yin te/ de ltar na ha cang yang zhum pa ma yin no/ / ji ltar na thal ches pa yin zhe na/ 'di ltar 'di na la la nyes par gzung ba 'dzin cing gnas ma yin pa 'gyod par byed de/ /de 'gyod par byed pa'i gnas ma yin pa dag la 'gyod par byed pa na gnas ma yin pa gzhan dag la mnar ba'i sems sam/ kun nas mnar sems kyi sems skyed par byed pa dang /go bar byed pa yin te/ de ltar na thal ches pa yin no/ /ji ltar na bag med pa dang le los yongs su zin pa yin zhe na/ 'di ltar 'di na la la 'das pa'i dus la brten nas/ ltung ba 'byung ba gang yin pa de yang / de brjed ngas par gyur pas 'ga' yang chos bzhin du phyir ma byas pa dang /'das pa'i dus la brten nas ji lta ba de bzhin du ma 'ongs pa dang / da ltar gyi dus la brten nas ltung ba byung ba gang yin pa de yang brjed ngas par gyur pas/ 'ga' yang chos bzhin du phyir ma byas pa dang / ltung ba ma byung ba'i snga rol nas kyang phyis ltung ba mi 'byung bar bya ba'i phyir//bdag gis ji lta ji ltar spyad cing / ji lta ji ltar gnas na/ phyis ltung ba 'byung bar mi 'gyur ba de lta de ltar spyod cing de ltar gnas par bya'o zhes spro ba shas che ba skye bar mi 'gyur ba dang / ci nas kyang ltung ba 'byung bar 'gyur ba/ de ltar spyod cing gnas par byed cing /de sngon gyi mtha' dang ldan pa dang / phyi ma'i mtha' dang ldan pa dang / dbus kyi mtha' dang ldan pa dang / sngon gyi dus su bya ba dang / rjes su 'jug pa des bag med pa dang ldan pa yin zhing / gnyid kyi bde ba dang / nyal ba'i bde ba dang / glos 'bebs pa'i bde ba bdag gir byed pa dang /mi mkhas pa dang le lo can dang / sgrub mi phod pa yin zhing / tshangs pa mtshungs par spyod pa mkhas pa rnams la/ lus kyi zhal ta bya ba'i byed pa lo ma yin pa ste/ de lta de ltar na bag med pa dang le los yongs su zin pa yin no/ /ji ltar na log par smon pa yin zhe na/'di ltar 'di na la la bdag tshul khrims sam/ brtul zhugs dang / dka' thub dang / tshangs par spyod pa la gnas pa 'dis lha'am/ lha gang yang rung ba dag tu gyur cig ces smon nas/ tshangs par spyod pa spyod par byed pa dang / rnyed pa dang bskur sti 'dod de/gzhan dag las rnyed pa dang bskur sti sgrub par byed cing / rnyed pa dang bkur sti la dga' bar byed pa yin te/ de ltar na log par smon pa yin no/ /ji ltar na cho ga nyams pas yongs su zin pa yin zhe na/ 'di ltar 'di na la la spyod lam mam/'phral gyi bya ba'am/ dge ba'i phyogs kyi sbyor ba la brten nas/ 'jig rten dang 'gal ba dang 'dul ba dang 'gal ba'i cho ga sngar bshad pa lta bu dang ldan pa ste/ de ltar na cho ga nyams pas yongs su zin pa yin no/ /ji ltar na 'tsho ba nyams pas yongs su zin pa yin zhe na/'di ltar 'di na la la 'dod chen che ba dang / cho ga mi shes pa dang / gso dka' ba dang / dgang dka' ba'i rang bzhin can yin la/ de la chos ma yin pas chos gos yongs su tshol bar byed cing / chos kyi ma yin pa dang / chos ma yin pas bsod snyoms dang mal cha dang /stan dang / nad kyi gsos sman dang / yo byad yongs su tshol bar byed cing / chos kyi ma yin pa ste/ de chos gos dang bsod snyoms dang / mal cha dang / stan dang / nad kyi gsos sman dang / yo byad kyi ched du bdag nyid la yon tan yod par bstan pa'i phyir/spyod lam rang bzhin ma yin par/ gzhan du bsgyur ba dang gzhan dag la dbang po rgod pa ma yin pa nyid dang / dbang po g.yo ba ma yin pa nyid dang / dbang po zhi ba nyid du ston par byed de/ des de la yon tan yod par shes nas gzhan dag kyang 'di lta ste/ chos gos dang / bsod snyoms dang / mal cha dang / stan dang / na ba'i gsos sman dang yo byad dag sbyin zhing bya'o snyam du sems pa dang / gtser ba dang / mu cor smra ba dang / /spyi brtol che ba dang / kha 'jam zer ba dang / ming rus sgrog par byed pa dang / yang na mang du thos shing chos 'dzin pa zhig yin par gyur na/rnyed pa'i phyir kho nar gzhan dag la nyan thos kyis bshad pa'am/ sangs rgyas kyis gsungs pa'i chos dag kun tu rjod par byed pa dang / bdag nyid kyi yon tan yang dag pa'am/ cung zad tsam sgro btags te bdag nyid kyis rjod par byed pa'am/gzhan dag sgrogs su 'jug pa dang / mtshan ma gzhan dag gis ston par byed pa dang / chos gos 'dod pa 'am/ dge sbyong gi yo byad mang po dang / bzang po gang yang rung ba dag 'dod pa dang / phongs pa med bzhin du yang 'di ltar bram ze dang / khyim bdag dad pa can gyis //bdag chos gos kyis phongs par shes nas/ chos gos mang po dang / bzang po dag sbyin pa'am/ bya bar sems par bya ba'i phyir/ /chos gos ngan pa ston par byed pa dang / chos gos la ji lta ba bzhin du dge sbyong gi 'tsho ba'i yo byad gang yang rung ba dag la yang de bzhin no//bram ze dang / khyim bdag dad pa can dag las ji ltar 'dod pa bzhin ma thob pa dang / longs spyod med cing mi bdog pa las ji ltar 'dod pa bzhin ma thob pa na yang 'di ltar nan gyis thob kyis 'jal zhing / de dag gshe bzhin du slong bar byed pa dang / longs spyod yod cing bdog pa dag las ngan pa zhig thob na yang rnyed pa de la mi stod cing smod par byed la/ sbyin pa po dang / sbyin bdag gi mngon sum du 'di skad ces/ /kye rigs kyi bu gang dag khyod pas shin tu rigs dman zhing / shin tu dbul bas rigs kyi bu dang / rigs kyi bu mo kha cig kyang yod de//de dag kyang 'di dang 'di lta bu'i gya nom pa sbyin par byed pa dang / yid du 'ong ba sbyin par byed pa yin na/ khyod de dag bas shin tu rigs mtho zhing shin tu phyug pa yin na/ ci'i phyir 'di ltar yid du mi 'ong ba sbyin par byed cing / ngan pa dang chung ngu sbyin par byed ces kyang zer te/rnam pa de dag gis tshul 'chos pa dang / kha gsag dang / gzhogs slong dang / thob kyis 'jal ba dang / rnyed pas rnyed par byed 'dod pa la brten nas/ gzhan dag las chos gos dang / bsod snyoms dang / mal cha dang / stan dang nad kyi gsos sman dang yo byad dag yongs su tshol bar byed pa gang yin pa de ni/chos ma yin pas yongs su tshol bar byed pa yin te/ chos kyis ni ma yin no/ /gang chos kyis ma yin pa de ni de'i log pas tshol ba yin te/ de ltar na tshul khrims de ni 'tsho ba nyams pas yongs su zin pa yin no/ / ji ltar na mtha' gnyis su ltung ba yin zhe na/ 'di ltar 'di na la la 'dod pa'i bsod snyoms la rjes su brtson par byed de/ chos sam chos ma yin pas gzhan dag las thob pa'i chos gos dang bsod snyoms dang / mal cha dang / stan dang / nad kyi gsos sman dang / yo byad de dag la lhag par chags pa yongs su spyod par byed cing / nyes dmigs su mi lta la/ nges par 'byung ba rab tu mi shes pa yin te/ de ni mtha' gcig ces bya'o/ /gzhan yang 'di na la la bdag nyid ngal ba la rjes su brtson par byed de/ rnam grangs du mar bdag nyid kun tu gdung bar byed cing yongs su gdung bar byed la/ dka' thub drag po dag kyang yang dag par len par byed de/ 'di lta ste tsher ma'i nang na nyal ba'am/ thal ba'i nang na nyal ba'am/ gtun bu la snyes pa'am/ spang leb kyi stengs su nyal ba'am/tsog pur 'dug cing tsog bu ni spong ba'i sbyor ba yin no zhes rjes su brtson par byed pa'am/ me la yongs su spyod par byed de/ lan gsum gyi bar du yang me la yongs su spyod par byed pa'am/ chur lhag par 'jug par byed de/ lan gsum gyi bar du yang chur lhag par 'jug par byed pa'am/rkang pa ya gcig gis 'greng zhing nyi ma gang na ba de logs su yongs su 'gyur bar byed pa'am/ gang de lta bu la sogs pas bdag nyid ngal ba la rjes su brtson par byed pa de ni mtha' gnyis pa zhes bya ste/ 'di ltar na mtha' gnyis su ltung ba yin no//ji ltar na nges par 'byung ba ma yin zhe na/ 'di ltar 'di na la la dag tshul khrims sam/ brtul zhugs 'di kho nas dag pa dang grol ba dang / nges par 'byung bar 'gyur ro zhes tshul khrims sam/ brtul zhugs kyi lta ba mchog tu 'dzin par byed de/ 'di las phyi rol pa rnams kyi tshul khrims thams cad ni de lta bu'i rnam par dag pas shin tu bsrungs shing / shin tu rnam par dag kyang nges par 'byung ba ma yin pa zhes bya ste/ de ltar na nges par 'byung ba ma yin pa yin no/ji ltar na yang dag par blangs pa yongs su nyams pa yin zhe na/ 'di ltar 'di na la la rnam pa thams cad kyi thams cad du ngo tsha med cing dge sbyong la mi lta ba yin te/ de yang tshul khrims 'chal pa dang / sdig pa'i chos can dang / nang myags pa dang / nyes 'dzag du gyur pa dang / shing rul pa lta bur gyur pa dang / lung bong lta bur kun tu spyod pa dang / dge sbyong ma yin par dge sbyong du khas 'che ba dang / tshangs par spyod pa ma yin par tshangs par spyod par khas 'che ba yin te/ de ltar yang dag par blangs pa yongs su nyams pa yin no/ /rgyu bcu po de dag gis tshul khrims nyams pa ni/bcom ldan 'das kyis tshul khrims nyams pa yin no zhes gsungs te/ bcom ldan 'das kyis tshul khrims rgud pa yin no zhes kyang gsungs so/ /de yang rgyu de dag la nges par 'byung ba ma yin pa gang yin pa dang / yang dag par blangs pa yongs su ma nyams pa gang yin pa'i rgyu gnyis kyis rig par bya'o//de las gzhan pa'i rgyu rnams kyis ni tshul khrims nyams pa kho na yin par rig par bya ste/ nag po'i phyogs kyi rgyu rnam par gzhag pa de dag nyid las bzlog par dkar po'i phyogs kyi rgyu rnams kyi ni /tshul khrims phun sum tshogs pa dang / tshul khrims rnam par dag pa yin par rig par bya'o/ /bcom ldan 'das kyis la lar tshul khrims rtsa ba'i don du gsungs te/ rtsa ba shin tu brtan pa dang / /zhi ba'i sems la dga' ba dang / 'phags pa'i lta dang sdig pa'i lta//ldan par bya zhing 'bral bar bya/ /zhes tshigs su bcad pa las ji skad gsungs pa lta bu'o/ /la lar ni rgyan gyi sgrar yang gsungs te/ tshul khrims kyi rgyan dang ldan pa'i dge slong dang / dge slong ma ni sdig pa spong bar byed cing / dge ba sgom par byed do zhes ji skad gsungs pa lta bu'o//la lar ni byug pa'i sgrar yang gsungs te/ de las tshul khrims kyi byug pa dang ldan pa'i dge slong dang / dge slong ma ni snga ma bzhin no zhes gsungs pa lta bu'o/ /la lar ni spos kyi rnam pa'i sgrar yang gsungs te/ de las kun dga' bo spos kyi rnam pa de yod na de'i dri ni rdzi phyogs su yang dang ldang ba'o//de'i dri ni rdzi phyogs ma yin pa dang / rdzi phyogs dang rdzi phyogs ma yin par yang ngad ldang ngo zhes gsungs pa lta bu'o/ /la lar ni legs par spyad pa'i sgrar yang gsungs te/ de las lus kyis legs par spyad pa ni/tshe 'di dang phyi ma la rnam par smin pa 'dod pa yin te/ ngag gis legs par spyad pa yang de bzhin no zhes gsungs pa lta bu'o/ /la lar ni sdom pa'i sgrar yang gsungs te/ de las sbyin pa po dang sbyin bdag ni tshul khrims dang ldan zhing sdom pa la gnas pa dang /ma 'ongs pa la lta ba dang / lung las gsungs pa'i 'bras bu mthong zhing thos par 'gyur ro zhes gsungs pa dang / gzhan yang tshul khrims dang ldan par gnas pa ni/ so sor thar pa'i sdom pas bsdams pa yin no zhes rgya cher gsungs pa lta bu'o/ /de la ci'i phyir bcom ldan 'das kyis tshul khrims rtsa ba'i don du gsungs she na/rtsa ba'i don ni gzhi'i don dang rten gyi don yin te/ de yang tshul khrims de ni 'jig rten dang 'jig rten 'das pa'i yon tan kha na ma tho ba med pa/ mchog gtso bo dam pa bde bar 'dren par byed pa / thams cad skye ba dang 'thob par 'gyur ba'i gzhi de lta bu dang rten de lta bu yin pas/de'i phyir rtsa ba'i sgrar yang gsungs te/ 'di lta ste dper na sa gzhi ni rtswa dang gel ba dang / sman dang nags tshal rnams skye ba'i gzhi dang rten du gyur pa de bzhin du tshul khrims kyang sngar bshad pa bzhin du rgya cher brjod par bya'o //ci'i phyir tshul khrims rgyan gyi sgrar gsungs she na/ smras pa gang dag de las gzhan pa'i rgyan 'di lta ste/ mgul rgyan nam/ gdu bu rgyan can nam/ dpung rgyan nam/ sor gdu brgyan nam/ gser dngul gyi phreng ba'i rgyan de dag ni ji tsam du byis pa gzhon nu skra gnag pa lang tsho la gsar du bab pa dang ldan pa de la btags na/re zhig mdzes par 'gyur ba tsam du zad kyi/ lo brgyad cu lon pa'am/ lo dgu bcu lon pa'i rgan po rnyis pa 'khogs pa so ltung ba mgo skya ba la rgyan de dag btags na ni/ de lta ma yin zhing de la co 'dri ba kho na lta bur yang 'gyur ba dang /nad kyis rgud pa dang / longs spyod kyis rgud pa dang / nye dus rgud par gyur pa dag la yang mdzes pa ma yin gyi/ tshul khrims ni thams cad du mdzes par byed pa yin pas de'i phyir rgyan gyi sgrar yang gsungs so/ /ci'i phyir tshul khrims byug pa'i sgrar gsungs she na/dge ba kha na ma tho ba med pa'i tshul khrims de yang dag par blangs nas / dpyid ka shin tu tsha ba'i dus la bab pa'i tshe/ /tsha bas mngon par gdungs pa la tsan+dan gyi byug pa'am ga bur gyi byug pas byugs pa bzhin du/ tshul khrims 'chal pa yang dag par blangs pa'i rgyu las byung ba'i lus kyi yongs su gdung ba dang / sems kyi yongs su gdung ba thams cad yongs su sel bar byed pas na/ de'i phyir tshul khrims byug pa'i sgrar gsungs so/ /ci'i phyir tshul khrims spos kyi rnam pa'i sgrar gsungs she na/tshul khrims dang ldan pa'i skyes bu gang zag ni/ rtsa ba'i spos sam/ snying po'i spos sam/ me tog gi spos kyi rnam pa sna tshogs rlung gis bskyod pa las phyogs dang phyogs mtshams rnams su spos kyi ngad yid du 'ong ba dag ldang ba bzhin du/ phyogs dang phyogs mtshams rnams su dge ba snyan pa bsngags pa grags pa'i sgra sna tshogs grags par 'gyur bas na de'i phyir tshul khrims ni spos kyi rnam pa'i sgrar yang gsungs so/ /ci'i phyir tshul khrims legs par spyad pa'i sgrar gsungs she na/ spyad pa de ni bde bar 'gro ba yin pa dang /spyad pa de ni mtho ris su 'gro ba yin pa dang / bde 'gror 'gro ba yin pas na/ de'i phyir legs par spyad pa zhes bya'o/ /ci'i phyir tshul khrims sdom pa'i sgrar gsungs she na/ chos de ni ldog pa'i rang bzhin pa dang / ldog pa'i mtshan nyid yin pa dang /spong ba'i rang bzhin yin pas na de'i phyir sdom pa'i sgrar yang gsungs so// //nyan thos kyi sa bam po gsum pa/ tshul khrims kyi sdom pa de yang yongs su dag par bya ba'i phyir/ rnam pa gsum la so sor rtog par byed do/ rnam pa gsum gang zhe na/'di lta ste/ lus kyi las la so sor rtog pa dang / ngag gi las la so sor rtog pa dang / yid kyi las la so sor rtog pa'o/ /ji ltar na las de dag la so sor rtog pa na/ tshul khrims kyi sdom pa yongs su sbyong bar byed ce na/ las gang bsams nas lus kyi bya bar 'dod pa de nyid la 'di ltar ci bdag gi lus kyi las 'di bdag dang /gzhan dag la gnod par 'gyur zhing mi dge bas / sdug bsngal 'byung ba rnam par dag pa sdug bsngal ba zhig yin nam/ 'on te bdag gi lus kyi las 'di bdag dang gzhan dag la gnod par mi 'gyur zhing /dge bas bde ba 'byung ba rnam par smin pa bde ba zhig yin zhes so sor rtog par byed do/ /de de ltar so sor rtog pa na/ gal te bdag gi lus kyi las de bdag dang gzhan dag la gnod par 'gyur zhing / mi dge ba sdug bsngal 'byung ba rnam par smin pa sdug bsngal bar shes na/de las de phyir ldog cing mi byed la rjes su 'jug par mi byed do / /de de ltar so sor rtog pa na gal te bdag gi lus kyi las de gnod par mi 'gyur zhing dge ba yin par snga ma bzhin du shes par gyur na/ de las de lus kyis byed cing phyir mi ldog la rjes su 'jug par byed do//des 'das pa'i dus la brten te lus kyi las gang byas par gyur pa de las yang 'di ltar ci bdag gis lus kyi las kyi de gnod par 'gyur ba zhig gam zhes snga ma bzhin du yang dang yang du so sor rtog par byed do/ /de de ltar so sor rtog pa na gal te bdag gi lus kyi las de gnod par gyur pa'o zhes snga ma bzhin du shes na de tshangs pa mtshungs par spyod pa mkhas pa dag gi mdun du so sor 'chags shing /chos bzhin du phyir byed do / /de de ltar so sor rtog pa na/ gal te bdag gi lus kyi las de gnod par gyur pa ma yin no zhes snga ma bzhin du shes na/de dga' ba dang / mchog tu dga' ba de nyid kyis nyin mtshan du rjes su slob cing lan mang du gnas par byed de/ de ltar na de 'di lta ste/ 'das pa dang ma 'ongs pa dang / da ltar byung ba'i dus rnams su lus kyi las de la so sor rtog cing shin tu sbyong bar byed pa yin no//lus kyi las ji lta ba bzhin du ngag gi las kyang de bzhin du rig par bya'o/ /yid ni 'das pa'i 'du byed la brten te/ skye zhing yid ni ma 'ongs pa dang / da ltar byung ba'i 'du byed la brten te/ skye bas yid de la yang 'di ltar ci bdag gi yid 'di gnod par 'gyur ba zhig yin nam zhes snga ma bzhin du yang dang yang du so sor rtog par byed pa nas yid kyi las de skyed par mi byed cing phyir ldog par byed la rjes su 'jug par mi byed pa dang /dkar po'i phyogs kyi yid kyi las de ni skyed par byed cing phyir ldog par mi byed la rjes su 'jug pa'i bar du byed de/de ltar na de 'di lta ste/ 'das pa dang ma 'ongs pa dang da ltar byung ba'i dus rnams su yid kyi las de la so sor rtog cing / shin tu yongs su sbyong bar byed pa yin no/ /de ci'i phyir zhe na/ 'das pa dang ma 'ongs pa dang da ltar byung ba'i dus rnams su dge sbyong ngam bram ze gang la las/lus kyi las dang / ngag gi las dang yid kyi las la so sor brtags shing yid la yongs su sbyangs la/ yongs su sbyangs nas lan mang du gnas par gyur pa de dag thams cad kyis kyang de bzhin du so sor brtags shing yongs su sbyangs pa'i phyir ro/ /bcom ldan 'das kyis kyang tshe dang ldan pa sgra gcan zin las brtsams te/sangs rgyas bstan pa dran byed na/ /lus las de bzhin ngag las dang / /yid kyi las la yang yang du/ /so sor rtogs shig sgra gcan zin/ /de la khyod ni slob byed na/ /legs pa sdig med kho na ste/ /de ni dge sbyong las yin te /'di la slobs shig sgra gcan zin/ /zhes ji skad gsungs pa lta bu'o/ /de la de ltar ci bdag gi lus kyi las dang / ngag gi las dang / yid kyi las 'di gnod par 'gyur ba zhig yin nam zhes snga ma bzhin du rgyas par rnam par 'byed pa gang yin pa de ni so sor rtog pa yin no//la la las phyir ldog cing so sor 'chags par byed pa dang / la la'i rjes su 'jug cing dga' ba dang / mchog tu dga' ba de nyid kyis nyin mtshan du rjes su slob cing / lan mang du gnas par byed pa gang yin pa de ni yongs su sbyong ba zhes bya'o/ / de la de ltar tshul khrims kyi sdom pa yongs su dag pa la phan yon bcu yod par rig par bya ste/ bcu gang zhe na/ 'di la skyes bu gang dag tshul khrims dang ldan pa ni/ bdag nyid kyi tshul khrims rnam par dag pa la so sor rtog pa na 'gyod pa med pa thob par 'gyur ro//'gyod pa med na mchog tu dga' bar 'gyur ro/ /sems mchog tu dga' ba la dga' ba skye'o/ /yid dga' bas lus shin tu sbyangs par 'gyur ro/ /lus shin tu sbyangs pas bde ba myong bar byed do/ /bde bar gyur pa'i sems mnyam par 'jog go/ / sems mnyam par gzhag na yang dag pa ji lta ba bzhin du rab tu shes so/ /yang dag pa ji lta ba bzhin du rab tu mthong ngo / /yang dag pa ji lta ba bzhin du rab tu shes/ /yang dag pa ji lta ba bzhin rab tu mthong na skyo bar 'gyur ro/ /skyo na 'dod chags dang bral bar 'gyur ro/ / 'dod chags dang bral na rnam par grol bar 'gyur ro/ /rnam par grol ba la bdag rnam par grol lo snyam pa'i ye shes dang / mthong ba 'byung ba dang / phung po lhag ma med pa'i mya ngan las 'das pa'i dbyings su yongs su mya ngan las 'das pa'i bar du 'gyur te/ skyes bu gang zag tshul khrims dang ldan pa/tshul khrims rnam par dag pa'i dbang gis byung la / 'gyod pa med pa'i rim gyis mya ngan las 'da' bar 'gyur ba'i bar dag thob par 'gyur ba gang yin pa de ni tshul khrims kyi phan yon dang po yin no/ /gzhan yang skyes bu gang zag tshul khrims dang ldan pa ni/'chi ba'i dus la bab par gyur pa de'i tshe/ kye ma bdag gi lus dang ngag dang yid kyis legs par spyad pa ni byas so/ /kye ma bdag gi lus dang ngag dang yid kyis nyes par spyad par ni ma byas te/ de'i phyir bdag shi 'phos nas kyang / bsod nams byas pa rnams dang /dge ba byas pa rnams dang / 'jigs shing skrag par 'gyur ba'i skyabs byas pa rnams kyang / 'gro ba gang yin pa'i 'gro ba der 'gro bar 'gyur ro snyam nas/ bde 'gror 'gro ba'i phyir 'gyod pa med pa gnyis pa yang thob par 'gyur ro/ / skyes bu gang zag 'gyod pa med par 'gyur ba'i 'chi ba ni bzang ba yin/dus byed pa yang bzang ba yin/ /tshe phyi ma yang bzang ba yin te / de ni tshul khrims kyi phan yon gnyis pa yin no/ /gzhan yang skyes bu gang zag tshul khrims dang ldan pa ni phyogs dang phyogs mtshams rnams su dge ba bsngags pa snyan pa grags pa'i sgra'i tshogs grags par 'gyur te/de ni tshul khrims kyi phan yon gsum pa yin no/ /gzhan yang skyes bu gang zag tshul khrims dang ldan pa ni yongs su gdung ba med pa'i lus dang sems kyis bde bar gnyid kyis log cing / bde bar sad par 'gyur te/de ni tshul khrims kyi phan yon bzhi pa yin no/ /gzhan yang skyes bu gang zag tshul khrims kyi phan yon dang ldan pa ni/ /gnyid log pa na yang lha rnams srung bar 'gyur te/ de ni tshul khrims kyi phan yon lnga pa yin no/ /gzhan yang skyes bu gang zag tshul khrims dang ldan pa ni/gzhan yang sdig pa'i bag tsha ba med cing / 'jigs pa yang med/ yid kun tu dngang ba yang med de/ de ni tshul khrims kyi phan yon drug pa yin no/ /gzhan yang skyes bu gang zag tshul khrims dang ldan pa ni/ gsod pa rnams dang phyir rgol ba rnams dang /dgra bo rnams kyis glags shig rnyed par gyur na yang / kye ma skyes bu gang zag 'di ni tshul khrims dang ldan pa yin no snyam du rig nas srung bar byed cing / mdza' bshes nyid dang / tha mal par gnas pa nyid du 'gyur te/ de ni tshul khrims kyi phan yon bdun pa yin no//gzhan yang skyes bu gang zag tshul khrims dang ldan pa ni/ gnod sbyin dang mi ma yin pa gdug pa gnyug mar gnas pa rnams kyis glags rnyed cing skabs shig rnyed par gyur na yang / 'di lta ste/ tshul khrims de nyid kyi dbang du byas nas bsrung bar 'gyur te/de ni tshul khrims kyi phan yon brgyad pa yin no/ /gzhan yang skyes bu gang zag tshul khrims dang ldan pa ni 'di lta ste/ tshul khrims kyi gzhi'i rgyus gzhan dag las 'di lta ste/ chos gos dang / bsod snyoms dang / mal cha dang / stan dang / nad kyi gsos sman dang /yo byad kyi rnyed pa dag chos kyi tshegs chung dus 'thob par 'gyur zhing / rgyal po rnams dang / blon po rnams dang / grong mi rnams dang / ljongs kyi mi rnams dang / phyug po rnams dang / tshong dpon rnams dang / ded dpon rnams kyang bkur stir byed/bla mar byed par 'gyur te/ de ni tshul khrims kyi phan yon dgu pa yin no/ /gzhan yang skyes bu gang zag tshul khrims dang ldan pa dag 'di lta ste/ tshul khrims dag rnam par dag par gyur pa'i phyir/ smon lam thams cad yang dag par 'grub par 'gyur te/ gal te 'dod pa'i khams su rgyal rigs shing sA la chen po lta bu rnams sam/bram ze'i rigs shing sA la chen po lta bu rnams sam/ khyim bdag gi rigs shing sA la chen po lta bu rnams sam/ rgyal chen bzhi'i ris kyi lha rnams sam/ sum cu rtsa gsum pa rnams sam/ 'thab bral ba rnams sam/dga' ldan pa rnams sam/ 'phrul dga' rnams sam/ gzhan 'phrul dbang byed kyi lha rnams dang skal ba mnyam pa nyid du skye bar 'dod na yang / 'di lta ste/ tshul khrims rnam par dag pa'i phyir skye bar 'gyur ro/ /gal te e ma ho / /kye ma bdag bsam gtan rnams la snyoms par zhugs te/tshe 'di la bde bar gnas par bya zhing gzugs su nye bar 'gro ba'i lha rnams dang skal ba mnyam pa nyid du skye bar bya'o zhes 'dod par gyur na yang gnas shing skye bar 'gyur te/ de yang tshul khrims dang ldan zhing 'dod chags dang bral ba'i smon lam ni yang dag par 'grub po//gal te gzugs las yang dag par 'das te/ gzugs med pa'i zhi ba'i rnam par thar pa gang yin pa ste gnas par bya zhing gzugs med par nye bar 'gro ba'i lha rnams dang skal ba mnyam pa nyid du skye bar bya'o zhes 'dod par gyur na yang gnas shing skye bar 'gyur ro//gal te shin tu mthar thug pa'i mya ngan las 'das pa'i dbyings rtogs par gyur cig ces 'dod par gyur na yang rtogs par 'gyur te/ de yang tshul khrims rnam par dag cing thams cad du 'dod chags dang bral ba ste / de ni tshul khrims kyi phan yon bcu pa yin par rig par bya'o//tshul khrims kyi phung po'i rnam par dbye ba bstan pa dang / nyams pa dang / phun sum tshogs pa bstan pa dang / ming gi rnams grangs dag bstan pa dang / yongs su dag pa dang / so sor rtog pa bstan pa dang / phan yon bstan pa de ni rnam pa thams cad yongs su rdzogs pa'i tshul khrims kyi sdom pa tshogs su gtogs pa yin par bstan te/gsal bar byas/ rnam par phye/ rab tu bshad pa yin te/ rigs kyi bu bdag la phan par 'dod pa dang / dge sbyong gi lam dang / bram ze'i lam 'dod pa rnams kyis de la bslab par bya'o//bar gyi sdom ni/ rnam dbye rnam gsum shes par bya/ /phun sum tshogs pa rnam bcur 'gyur/ /rnam grangs rnam pa drug yin te/ /rnam dag rnam pa gsum du 'dod/ /phan yon rnam pa bcu yin te/ /de ni tshul khrims sdom pa yin/ /dbang po'i sdom pa gang zhe na/'di ltar 'di na la la dbang po rnams kyi sgo bsdams pa dang / dran pa kun tu bsrungs pa dang / dran pa la rtag 'grus byed pa dang / dran pas yid kun tu bsrungs pa dang / gnas skabs mnyam pa la 'jog par byed cing gnas pa yin no zhes bya ba la sogs pa rgyas par snga ma bzhin no//de la ji ltar na dbang po rnams kyi sgo bsdams pa yin zhe na/ dran pa kun tu bsrungs pa dang / dran pa la rtag 'grus byed pa nas yid kyi dbang po yang srung bar byed la/ yid kyi dbang pos kyang sdom pa sgrub par byed pa yin te zhes bya ba'i bar du rgyas par bya ste/de ltar na dbang po rnams kyi sgo bsdams te gnas pa yin no/ /de la ji ltar na dran pa kun tu bsrung ba yin zhe na/ 'di ltar 'di na la la/ dbang po rnams kyi sgo bsdams pa nyid kyi dbang du byas te/ thos pa bzung ba dang / bsams pa dang / yang dang yang du bsgoms par gyur nas/de thos pa dang bsams pa dang bsgoms pa'i dbang gis dran pa thob par gyur cing / dran pa thob pa de nyid mi brjed par bya ba dang / mi nyams par bya ba dang / chud mi za bar bya ba'i phyir/ thos pa de nyid la dus dus su sbyor bar byed de/ goms par byed cing / bsams pa dang bsgoms pa la yang sbyor bar byed de/ goms par byed/ sbyor ba lhod pa dang sbyor ba gtong bar yang mi 'gyur ro/ /de ltar des thos pas yang dag par bsgrub pa'i dran pa ste / thos pa dang bsams pa dang / bsgoms pa la sbyor ba'i bya bas/dus dus su kun tu bsrungs pa yin te/ de ltar na dran pa dang kun tu bsrungs pa yin no/ /ji ltar na dran pa la rtag 'grus byed pa yin zhe na/ de dran pa de nyid la rtag tu byed pa dang 'grus par byed pa yin te/ de la rtag tu byed pa gang yin pa de ni rgyun du byed pa zhes bya'o//de la 'grus par byed pa gang yin pa de ni 'grus par byed pa zhes bya ste/ de ltar rgyun du byed pa dang gus par byed pa de ni dran pa la rtag 'grus byed pa zhes bya'o/ /des ji tsam du dran pa kun tu bsrungs pa de tsam du dran pa de brjed par mi 'gyur la/ de ji tsam du dran pa la rtag 'grus byed pa de tsam du dran pa ma brjed pa de nyid la stobs skyed pa thob par 'gyur zhing /des gzugs rnams zil gyis gnon pa dang / sgra rnams dang / dri rnams dang / ro rnams dang / reg bya rnams dang / chos rnams zil gyis gnon par nus shing mthu yod par yang 'gyur ro//ji ltar na dran pas yid kun tu bsrungs pa yin zhe na/ mig dang gzugs rnams la brten nas/ mig gi rnam par shes pa skye la/ mig gi rnam par shes pa'i mjug thogs su rnam par rtog par byed pa yid kyi rnam par shes par 'byung ste/ yid kyi rnam par shes pa de la yang tshul bzhin ma yin pa rnam par rtog pa dang ldan pa kun nas nyon mongs pa kun nas slong bar byed pa yod de/rnam par rtog par byed pa yid kyi rnam par shes pa des gzugs kyi rang bzhin sdug gu dag la ni kun tu chags par byed/ gzugs kyi rang bzhin mi sdug pa dag la ni khong khro bar byed pas na des dran pa de nyid kyi dbang du byas te/ci nas kyang kun nas nyon mongs pa de 'byung bar mi 'gyur bar tshul bzhin ma yin par rnam par rtog pa kun nas nyon mongs pa kun nas slong bar byed pa las/ yid de kun tu srung bar byed do/ /de bzhin du rna ba dang /sna dang / lce dang / lus dang / yid dang chos rnams la brten nas/ yid kyi rnam par shes pa skye ste yid kyi rnam par shes pa de la yang tshul bzhin ma yin par rnam par rtog pa dang ldan pa/ kun nas nyon mongs pa kun nas slong bar byed pa yod de/ des chos kyi rang bzhin sdug gu dag la ni kun tu chags par byed/chos kyi rang bzhin mi sdug pa dag la ni khong khro bar byed pas na / des dran pa de nyid kyi dbang du byas te/ ji nas kyang kun nas nyon mongs pa de 'byung bar mi 'gyur bar tshul bzhin ma yin par rnam par rtog pa kun nas nyon mongs pa kun nas slong bar byed pa de las yid de kun tu srung bar byed de/de ltar dran pas yid kun tu bsrungs pa yin no/ /ji ltar na gnas skabs mnyam pa la 'jog par byed pa yin zhe na/ gnas skabs mnyam pa zhes bya ba ni dge ba'am lung du ma bstan pa'i btang snyoms la bya ste/des tshul bzhin ma yin par rnam par rtog pa kun nas nyon mongs pa kun nas slong bar byed pa de las yid kun tu bsrungs nas dge ba'am/ lung du ma bstan pa'i btang snyoms la 'jog par byed pas na/ de'i phyir gnas skabs mnyam pa la 'jog par byed pa zhes bya ste/de ltar na gnas skabs mnyam pa la 'jog par byed pa yin no/ /ji ltar na tshul bzhin ma yin par rnam par rtog pa kun nas nyon mongs pa kun nas slong bar byed pa de las yid kun tu srung bar byed pa yin zhe na/ bzhi gang kho na las sems kyi rjes su sdig pa mi dge ba'i rnam par rtog pa zag par 'gyur ba'i gzugs dang /sgra dang / dri dang / ro dang / reg bya de dag la mtshan mar mi 'dzin cing / mngon rtags su mi 'dzin pa dang / gal te mtshan mar 'dzin pa dang / mngon rtags su 'dzin pa rnam par spangs su zin kyang brjed ngas pa dang / kun nas nyon mongs pa mang bas/sems kyi rjes su sdig pa mi dge ba'i chos zag par 'gyur ba dag 'byung bar 'gyur na de dag bsdams pa'i phyir yang sgrub par byad de/ rnam pa de gnyis kyis tshul bzhin ma yin par rnam par rtog pa kun nas nyon mongs pa kun nas slong bar byed pa de las yid de kun tu srung bar byed pa yin no//ji ltar na yid de rnam pa gnyis kyis kun tu bsrungs nas dge ba'am/ lung du ma bstan pa'i btang snyoms la 'jog par byed pa yin te / rnam pa gnyis kho na ste/ gnyis gang zhe na/ mig gi dbang po yang srung bar byed la/mig gi dbang pos kyang sdom pa sgrub par byed pa dang / mig gi dbang pos ji lta ba de bzhin du rna ba dang / sna dang / lce dang / lus dang / yid kyi dbang po yang srung bar byed la/ yid kyi dbang pos kyang sdom pa sgrub par byed pa yin no zhes gang gsungs pa ste/ rnam pa de gnyis kyis yid de dge ba'am/lung du ma bstan pa'i btang snyoms la 'jog par byed pa yin no/ /ji ltar na mig gi rnam par shes par bya ba'i gzugs rnams la mtshan mar mi 'dzin pa yin zhe na/ mtshan mar 'dzin pa zhes bya ba ni mig gi rnam par shes pa'i spyod yul gyi gzugs gang yin pa'i spyod yul de la/mig gi rnam par shes pas 'dzin par byed pa yin te/ de lta bu'i mig gi rnam par shes par bya ba'i gzugs rnams la mtshan mar 'dzin pa yin no/ /gal te mig gi rnam par shes pa'i spyod yul de / yongs su spong bar byed na/ de ni mig gi rnam par shes par bya ba'i spyod yul la mtshan mar mi 'dzin pa yin no//mig gi rnam par shes par bya ba'i gzugs rnams la ji lta ba bzhin du/ rna ba dang / sna dang / lce dang / lus dang / yid kyi rnam par shes par bya ba'i chos rnams la/ mtshan mar mi 'dzin pa yang de bzhin no/ /ji ltar na mig gi rnam par shes par bya ba'i gzugs rnams dang /yid kyi rnam par shes par bya ba'i chos rnams kyi bar la mngon rtags su mi 'dzin pa zhes bya / mngon rtags su 'dzin pa zhes bya ba ni mig gi rnam par shes par bya ba'i gzugs de dag nyid la/ mig gi rnam par shes pa kho na'i rjes la mjug thogs su byung ba rnam par rtog par byed pa'i yid kyi rnam par shes par kun tu chags par 'gyur ba dang /kun tu zhe sdang bar 'gyur ba dang / kun tu gti mug par 'gyur ba'i spyod yul gang yin pa de la yid kyi rnam par shes pas 'dzin par byed pa yin te/ spyod yul de yongs su spong bar byed cing /dmigs pa de la yid kyi rnam par shes pa de skyed par mi byed na/ de ni 'di lta ste/ mig gis rnam par shes par bya ba'i gzugs rnams la mngon rtags su mi 'dzin pa yin te/ rna ba dang / sna dang / lce dang / lus dang / yid kyis rnam par shes par bya ba'i chos rnams la yang de bzhin no//mtshan mar 'dzin pa dang / mngon rtags su 'dzin pa'i rnam grangs gzhan yang yod do/ / de la mtshan mar 'dzin pa ni mig gis gzugs snang bar gyur pa rnam pa de dang 'byung ba yid la byed pa mngon sum du byas nas mthong ba gang yin pa'o//de la mngon rtags su 'dzin pa ni mig gis gzugs de dag nyid snang bar ma gyur cing / de dang 'byung ba yid la byed pa mngon sum du byas nas/ mthong ba ma yin mod kyi 'on kyang gzhan las rjes su mnyam pa sngon du btang nas/ mig gi rnam par shes par bya ba'i gzugs 'di lta bu dang /'di lta bu dag yod do zhes thos shing / de dang rjes su 'brel pa'i ming dang tshig dang mngon rtags gang dang gang dag yin pa de dang de dag gi dbang du byas te/ de dag la brten cing de dag la gnas nas/ skyes bu gang zag de mig gis rnam par shes par bya ba'i gzugs ji lta ba thos pa dag la rnam par rtog par byed pa ste/de ni mngon rtags su 'dzin pa zhes bya'o/ /mig gis rnam par shes par bya ba'i gzugs rnams la ji lta ba bzhin du/ rna ba dang / sna dang / lce dang / lus dang / yid kyis rnam par shes par bya ba'i chos rnams la yang de bzhin du rig par bya'o//mtshan mar 'dzin pa dang / mngon rtags su 'dzin pa de yang / rgyu de dang / gzhi de dang / dbang des de'i sems kyi rjes su sdig pa mi dge ba'i chos rnams zag par 'gyur ba yang yod do/ /rgyu de med pa dang / gzhi de med pa dang / dbang de med pas/ de'i sems kyi rjes su sdig pa mi dge ba'i chos rnams zag par mi 'gyur ba yang yod do/ / de la mtshan mar 'dzin pa dang / mngon rtags su 'dzin pa gang yin pa de ni tshul bzhin ma yin pa ste/ rgyu de dang / gzhi de dang / dbang des de'i sems kyi rjes su sdig pa mi dge ba'i chos rnams zag par 'gyur bas na/des mtshan mar 'dzin pa dang / mngon rtags su 'dzin pa'i rang bzhin de yongs su spong bar byed de / sdig pa mi dge ba'i chos rnams gang zhe na/ 'dod chags dang 'dod chags kyis kun nas bslang ba/ lus kyis nyes par spyad pa dang / ngag gis nyes par spyad pa dang / yid kyis nyes par spyad pa dang / zhe sdang ba dang / gti mug pa dang / gti mug gis kun nas bslang ba/ lus kyis nyes par spyad pa dang / ngag gis nyes par spyad pa dang / yid kyis nyes par spyad pa rnams te/ de dag ni sdig pa mi dge ba'i chos rnams zhes bya'o/ /ji ltar na de dag sems kyi rjes su zag par 'gyur zhe na/ dmigs pa gang dang gang dag la/ sems dang yid rnam par shes pa skye zhing 'gro la 'brang bar 'gyur ba'i dmigs pa de dang de dag la sems dang yid rnam par shes pa de dang mtshungs par ldan pa /lus dang ngag dang yid kyis nyes par spyad pa kun nas slong bar byed la/ 'dod chags dang zhe sdang dang gti mug de dag kyang skye zhing 'gro la 'brang bar 'gyur bas na/ de'i phyir sems kyi rjes su zag par 'gyur bar zhes bya'o/ /mtshan mar 'dzin pa dang / mngon rtags su 'dzin pa yongs su spong bar byed pa de la ni/ de ltar mig gis rnam par shes par bya ba'i gzugs rnams dang / yid kyis rnam par shes par bya ba'i chos rnams kyi bar la/ mtshan mar 'dzin pa dang / mngon rtags su 'dzin pa las byung ba'i kun nas nyon mongs pa gang yin pa de dag 'byung bar mi 'gyur ro/ /gal te brjed ngas pa'am/ nyon mongs pa mang bas/ gcig pur gnas pa na mig gis rnam par shes par bya ba'i gzugs rnams sngon mthong ba rnams kyi dbang du byas shing /rna ba dang / sna dang / lce dang / lus dang / yid kyi rnam par shes par bya ba'i chos sngon nyams su myong ba rnams kyi dbang du byas te/ sdig pa mi dge ba'i chos rnams 'byung bar 'gyur na/ de dag byung yang dang du mi len cing sdong bar byed/sel bar byed/ byang bar byed pas na de'i phyir de dag bsdam par bya ba'i phyir de sgrub par byed pa zhes bya'o/ /de mig gis rnam par shes par bya ba'i gzugs gang dag la mig gtad par bya ba dang / rna ba dang / sna dang / lce dang / lus dang / yid kyis rnam par shes par bya ba'i chos gang dag la yid gtad par bya ba de dag la yang gtod par byed cing /ci nas kyang kun nas nyon mongs par mi 'gyur ba de ltar gtod par byed de/ de ltar na des nyon mongs pa de dag las dbang po kun tu bsrungs pa yin pas na/ de'i phyir mig gi dbang po yang srung bar byed la yid kyi dbang po'i bar du srung bar byed pa zhes bya'o//de mig gis rnam par shes par bya ba'i gzugs gang dag la mig gi dbang po gtad par bya ba ma yin pa dang / rna ba dang / sna dang / lce dang / lus dang / yid kyis rnam par shes par bya ba'i chos gang dag la/yid kyi dbang po gtad par bya ba ma yin pa de dag la ni rnam pa thams cad kyi thams cad du gtod par mi byed pas na/ de'i phyir/ mig gi dbang pos kyang sdom pa sgrub par byed pa dang / yid kyi dbang po'i bar gyis kyang sdom pa sgrub par byed pa zhes bya ste/de ni re zhig dbang po sdom pa'i rnam par dbye ba rgyas pa yin par shes par bya'o/ /don mdor bsdu ba gang zhe na/ de la don mdor bsdu ba ni 'di yin te/ gang gis sdom par byed pa dang / gang zhig sdom par byed pa dang / gang las sdom par byed pa dang / ji ltar sdom par byed pa dang / sdom pa de gang yin pa de dag thams cad gcig tu bsdus pa ni dbang po sdom pa zhes bya'o/ /de la gang gis sdom par byed ce na/ dran pa kun tu bsrungs pa dang / dran pa la rtag 'grus byed pa bsgoms pa gang yin pa ste/ des sdom par byed do/ / gang zhig sdom par byed ce na/ mig gi dbang po sdom par byed pa dang / rna ba dang / sna dang / lce dang / lus dang / yid kyi dbang po sdom pa ste de sdom par byed do/ /gang las sdom par byed ce na/ gzugs dang / sgra dang / chos kyi rang bzhin sdug pa dang mi sdug pa'i bar dag las te/de las sdom par byed do/ /ji ltar sdom par byed ce na/ mtshan mar mi 'dzin cing mngon rtags su mi 'dzin pa dang / gzhi gang kho na las de'i sems kyi rjes su sdig pa mi dge ba'i chos rnams zag par 'gyur ba de dag bsdam pa'i phyir sgrub par byed pa dang /dbang po yang srung bar byed pa dang / dbang pos kyang sdom pa sgrub par byed pa yin te/ de ltar sdom par byed do/ /sdom pa de gang yin zhe na/ dran pas yid kun tu bsrungs pa dang / gnas skabs mnyam pa las 'jog par byed pa gang yin pa ste/de ni sdom pa zhes bya'o/ /don mdor bsdus pa gzhan yang sdom pa'i thabs gang yin pa dang / bsdam par bya ba'i gzhi gang yin pa dang / sdom pa gang yin pa de dag gcig tu bsdus pa ni/ dbang po sdom pa zhes bya'o/ /de la sdom pa'i thabs gang zhe na/dran pa kun tu bsrungs pa dang / dran pa la rtag 'grus byed pa dang / mig gis gzugs rnams mthong ba na / mtshan mar mi 'dzin cing mngon rtags su mi 'dzin pa dang / yid kyis chos rnams rnam par shes pa na/ mtshan mar mi 'dzin cing mngon rtags su mi 'dzin pa'i bar dang /gzhi gang kho na las de'i sems kyi rjes su sdig pa mi dge ba'i chos rnams zag par 'gyur ba de dag bsdam pa'i phyir/ sgrub par byed pa dang / dbang po yang srung bar byed la/ dbang pos kyang sdom pa sgrub par byed do zhes gang gsungs pa ste/ de ni sdom pa'i thabs zhes bya'o//bsdam par bya ba'i gzhi gang zhe na/ mig dang gzugs rnams dang / de bzhin du yid dang / chos rnams kyi bar dag ste/ de ni bsdam par bya ba'i gzhi zhes bya'o/ /de la sdom pa gang zhe na/ dran pas yid kun tu bsrungs pa dang / gnas skabs mnyam pa la 'jog par byed pa zhes gang gsungs pa ste/de ni sdom pa zhes bya'o/ /dbang po sdom pa 'di yang mdor bsdu na/ rnam pa gnyis te/ so sor rtog pa'i stobs kyis zin pa dang / bsgoms pa'i stobs kyis zin pa'o/ /de la so sor rtog pa'i stobs kyis zin pa ni/gang gis yul rnams la nyes dmigs su mthong ba nyes dmigs de yang sel ba dang / spong bar ni mi byed pa'o/ /de la bsgoms pa'i stobs kyis zin pa ni/ gang gi yul rnams la nyes dmigs su mthong la nyes dmigs de yang sel ba dang / spang bar bya ba ni/de la so sor rtog pa'i stobs kyis zin pa'i dbang po sdom pas ni/ yul la dmigs pa'i nyon mongs pas kun nas dkris pa skyed par mi byed cing / mngon sum du mi byed par zad kyi lus la zhen pa'i bag la nyal spong ba dang / 'joms par ni mi byed do/ /de la bsgoms pa'i stobs kyis zin pa'i dbang po sdom pas ni/yul la dmigs pa'i nyon mongs pas kun nas dkris pa yang skyed par mi byed cing / mngon sum du mi byed la lus la zhen pa'i bag la nyal yang dus thams cad kyi thams cad du spong zhing 'joms par byed de/ so sor rtog pa'i stobs kyis zin pa dang /bsgoms pa'i stobs kyis zin pa'i dbang po sdom pa'i bye brag ni de yin/ bsam pa ni de yin/ tha dad du bya ba ni de yin no/ /de las so sor rtog pa'i stobs kyis zin pa'i dbang po sdom pa gang yin pa dang / lam gyi tshogs su gtogs pa yin no//bsgoms pa'i stobs kyis zin pa'i dbang po sdom pa gang yin pa de ni 'dod chags dang bral ba'i sar gtogs pa yin par rig par bya'o/ /zas kyi tshod rig pa nyid gang zhe na/ 'di ltar 'di na la las so sor brtags shing zas za bar byed la/ bsgom par rtog pa'i phyir ma yin/rgyags pa'i phyir ma yin/ sgeg pa'i phyir ma yin/ brgyan pa'i phyir ma yin/ 'di lta ste lus 'di gnas par bya ba dang / 'tsho bar bya ba dang / bkres pa bsal bar bya ba dang / tshangs par spyod pa la phan par bya ba dang / tshor ba rnying pa rnams spang bar bya ba dang /gsar pa rnams mi skye bar bya ba'i phyir dang / bdag 'tsho zhing stobs dang bde ba dang / kha na ma tho ba med pa dang / bde ba la reg par gnas par yang 'gyur ro snyam du sems pa yin no/ /de la ji ltar so sor brtags shing zas za bar byed pa yin zhe na/ so sor rtog pa zhes bya ba ni shes rab ste/ shes rab kyis kham gyi zas kyi nyes dmigs yang dag par rjes su mthong zhing / nyes dmigs su mthong bas sun phyung ste zas za bar byed pa'o/ /nyes dmigs su mthong ba de yang gang zhe na/ 'di lta ste/ kham gyi zas de nyid la yongs su longs spyod pa'i rgyu las byung ba dang / yongs su 'ju ba'i rgyu las byung ba dang / yongs su tshol ba'i rgyu las byung ba'o/ /de la yongs su longs spyod pa'i rgyu las byung ba'i nyes dmigs gang zhe na/ 'di ltar na la la gang gi tshe zas kha dog phun sum tshogs pa dang /dri phun sum tshogs pa dang / ro phun sum tshogs pa dang / shin tu bsod pa dag za bar byed cing / gang gi tshe kham gyi zas de de'i khar bcug ma thag kho nar so'i 'khrul 'khor gyis bldad cing / mchil ma'i tshogs kyis brlan la/ bad kan gyis yongs su dkris shing /de mid pa'i sbubs su zhugs par gyur la/ de sngon gyi yid du 'ong ba gang zhe na / rnam pa thams cad kyi thams cad du nyams shing lhag par mi sdug par 'gyur la/ de mi sdug par gyur pa na/ skyugs pa lta bur gyur pa'i gnas skabs su gyur pa'i tshe/ za ba po'i skyes bu gang zag des gal te de'i rnam pa'i sgo nas yid la byas shing rjes su dran par byas nas /de re zhig zas yongs su ma gyur pa bzang po gzhan dag la yang rnam pa thams cad kyi thams cad du za bar mi 'dod cing / 'dug par gyur na de lta bu'i gnas skabs su gyur pa de la lta smos kyang ci dgos te/de lta bu'i rnam pa du ma'i rim pa des/ zas la yongs su longs spyod ba'i dbang du byas te/ kha dog bzang po'i mdog gang yin pa de nub cing mi gtsang bas zin pa'i nyes dmigs 'byung bar 'gyur ba gang yin pa de ni/ 'di lta ste/ zas la yongs su longs spyod pa'i rgyu las byung ba'i nyes dmigs zhes bya'o//de la zas yongs su 'ju ba'i rgyu las byung ba'i nyes dmigs gang zhe na/ des zas de zos shing mid par gyur nas/ gang gi tshe mtshan mo thun bar ma'am / thun tha ma la yongs su 'ju bar 'gyur ba'i tshe/ des de'i lus de la sha dang khrag dang /chu rgyus dang / rus pa dang / pags pa la sogs pa mi gtsang ba'i rdzas rnam pa du ma rnam pa mang po sna tshogs du ma dag rnam par 'phel zhing skye la brta bar 'gyur ba dang / de dag las la la ni bshang ba dang / gci ba'i dngos por yongs su 'ju bar 'gyur zhing /yongs su zhu nas kyang smad kyi cha logs su gnas par 'gyur la/ de yang des nyin gcig mi chad par bsal bar bya dgos par 'gyur ba dang / des lag pa'am/ rkang pa'am/ yan lag dang / nying lag gang yang rung ba la reg par gyur pa gang yin pa de yang bdag dang gzhan dag gis shin tu smad par 'os par 'gyur ba dang /gzhi de las de'i lus la lus kyi nad rnam pa mang po 'di lta ste/ 'bras dang / phol mig dang / shu ba dang / rkong shu dang / g.ya' ba dang / mdze dang / 'brum bu phra mo dang / sha bkra dang / rims dang / lud pa dang / skrang ba dang / skem pa dang / slong ba dang / bkres nga ba dang / skya rbab dang / khrag nad dang / mkhris nad dang / mtshan par rdol ba dag 'byung bar 'gyur zhing / de dag dang gzhan yang de lta bu dang mthun pa'i lus kyi nad mang po dag lus la 'byung bar 'gyur ba dang /des zos nas mi 'ju zhing / des de'i lus la gsud par 'gyur ba ste/ de ni 'di lta ste/ zas yongs su 'ju ba'i rgyu las byung ba'i nyes dmigs zhes bya'o/ /de la zas yongs su tshol ba'i rgyu las byung ba'i nyes dmigs gang zhe na/ yongs su tshol ba'i rgyu las byung ba'i nyes dmigs ni rnam pa mang ste/bsgrubs pa las byung ba dang / kun tu bsrungs pa las byung ba dang / mdza' ba yongs su nyams pa las byung ba dang / ngoms mi shes pa las byung ba dang / rang dbang med pa las byung ba dang / nyes par spyad pa las byung ba'o//de la zas bsgrubs pa las byung ba'i nyes dmigs gang zhe na/ 'di ltar 'di na la la zas kyi rgyu dang / zas kyi gzhi'i phyir grang ba'i tshe yang grang bas nyen bzhin/ tsha ba'i tshe yang tsha bas gdungs bzhin du zhing las sam/ phyugs btsal ba'am/ tshong bya ba'am/ yi ge dang / bgrang ba dang / shod dgod pa dang / brtsi ba dang / lag rtsis bya ba dang / gzo'i gnas dang / las kyi gnas rnam pa sna tshogs dang de dang de dag gi phyir ram/ zas ma thob pa thob par bya ba dang / bsags par bya ba'i phyir brtson par byed/ 'bad par byed/ rtsol bar byed cing zas kyi phyir ji lta ba bzhin du zas kyi rgyu'i phyir yang de bzhin te/ de de ltar brtson pa dang / 'bad pa dang / rtsol bar byed na/ gal te las kyi mtha' de dag rgud par gyur na/ de gzhi de las kye ma bdag gi 'bad pa ni don med cing 'bras bu med do/ / zhes mya ngan byed/ gdung bar byed/ smre sngags 'don par byed/ brang rdung bar byed/ cho nges 'debs par byed cing / kun tu rmongs par 'gyur ba yin te/ de ni 'di lta ste/ zas sgrub pa'i mdo las skyes pa'i nyes dmigs yin no/ /gal te 'byor na yang de 'di snyam du ma la bdag gi longs spyod rgyal po'am/chom rkun gyis phrogs pa'am/ mes tshig pa'am/ chus khyer ba'am/ gter ngan pa dag tu sbas pa chud za ba'am / las kyi mtha' legs par ma byas pas nyams pa'am/ rigs brgyud sdang ba dag gis dbang du byas pa'am/ rigs kyi nang na pha tshan gyi dkrugs ma byed pa gang yin pa dag gis longs spyod 'di dag tshul bzhin ma yin pas phung bar byed pa'am gcig tu mi 'gyur grangs snyam na/ de kun bsrung ba'i gzhi las rtsol ba drag po 'byung bar 'gyur te/ de ni 'di lta ste/ zas kun tu bsrung ba'i mdo las skyes pa'i nyes dmigs yin no//mdza' ba yongs su nyams pa las byung ba'i nyes dmigs gang zhe na/ 'di lta ste zas kyi rgyu dang / zas kyi gzhi las/ ma ni bu la bu yang ma la/ pha yang bu la bu yang pha la/ ming po yang sring mo la sring mo yang ming po la/ grogs kyang grogs la mi snyan par rjod par byed na/skye bo skye bo la lta smos kyang ci dgos te/ de dag phan tshun 'thab cing rtsod par gyur pa dang / de bzhin du bram ze dang / rgyal rigs dang / khyim bdag rgya che ba shing sA la chen po lta bu dag kyang zas kyi gzhi'i phyir kho nar/ phan tshun 'thab cing rtsod par byed /lag pas kyang rdeg par byed/ bong ba dang / dbyug pa dang / mtshon gyis kyang 'debs par byed pa lta bu ste/ de ni 'di lta ste / zas la mdza' ba yongs su nyams pa las byung ba'i nyes dmigs shes par bya'o/ /de la ngoms mi shes pa las byung ba'i nyes dmigs gang zhe na/'di lta ste/ rgyal po rgyal rigs spyi bo nas dbang bskur ba dag rang rang gi grong dang / grong khyer dang / grong rdal dang yul 'khor dang rgyal po'i pho brang 'khor dag la / chog mi shes par gnas pa na phan tshun nas g.yul gyi bkod pa dag bshams te/ dung dag 'bud/rnga pa Ta ha dag brdung / mda' sna tshogs dag 'phen bzhin du chas shing de dag dang rta rgyags pa dang lhan cig tu 'du bar byed/ glang po che dang / shing rta dang / dpung bu chung rgyags pa dag dang lhan cig 'du bar byed pa'i tshe mda' dag dang / mdung thung rnams kyis lus dag gtsags shing 'chi ba'am/'chi ba la thug pa tsam gyi sdug bsngal 'thob par 'gyur ba lta bu dang / gzhan yang gang de lta bu dang mthun pa de ni ngoms mi shes pa'i nyes dmigs zhes bya'o/ /de la rang dbang med pa las byung ba'i nyes dmigs gang zhe na/ 'di lta ste/rgyal po la zho shas 'tsho ba'i mi dag grong khyer bsrungs pa dag tu 'jug pa na/ 'bru mar bskol ba'am/ zhag bskol ba dang / ba lang gi lci ba'i thug ba bskol ba dang / zangs khu bskol ba dang / khro chu bskol ba dag gis gtor cing / mda' dag dang mdung thung dag gis lus gtsags te 'chi ba'am/'chi ba la thug pa'i sdug bsngal 'thob par 'gyur ba lta bu dang / gzhan yang gang de lta bu dang mthun pa ni rang dbang med pa las byung ba'i nyes dmigs zhes bya'o/ /de la nyes par spyad pa las byung ba'i nyes dmigs gang zhe na/ 'di lta ste/la las zas kyi rgyu dang zas kyi phyir lus kyis nyes par spyad pa mang po byas shing bstsags pa dang / lus kyis ji lta ba bzhin du ngag dang yid kyis kyang de bzhin no/ / de gang gi tshe nad kyis btab cing sdug bsngal bar gyur cing nad tshabs che ba'i tshe na/ sngon lus kyis nyes par spyod pa dang /ngag dang / yid kyis nyes par spyad pa de dag de la phye ma red kyi ri'i rtse mo'i grib ma bzhin du gzhol ba dang / rab tu gzhol ba dang / mngon par rab tu gzhol bar gyur pa na/ de 'di snyam du sems te/ kye ma bdag gis lus dang ngag dang / yid kyis sdig pa ni byas la/ kye ma bdag gis bsod nams ni ma byas pas/ bdag shi 'phos nas kyang / sdig pa byas pa rnams kyi 'gro ba gang yin pa der 'gro bar 'gyur ro snyam nas/ 'gyod bzhin du 'chi ba'i dus byed par 'gyur te/ shi ba'i dus byas nas kyang / ngan song 'di lta ste/sems can dmyal ba rnams dang / dud 'gro rnams dang / yi dags rnams su skye bar 'gyur ba lta bu ste/ de ni nyes par spyad pa las byung ba'i nyes dmigs zhes bya'o/ /de 'di snyam du sems te/ de ltar zas 'di ni yongs su tshol ba na yang nyes dmigs dang bcas pa yin te/yongs su spyod pa na yang nyes dmigs dang bcas pa yin / yongs su longs spyad pa dang / yongs su 'ju ba na yang nyes dmigs pa dang bcas pa kho na yin mod kyi/ 'on kyang zas 'di la phan yon 'ga' tsam yang yod de/ de 'ang gang zhe na/ lus 'di ni zas kyis gnas pa yin te/zas la brten nas gnas par 'gyur gyi/ zas med na ni ma yin te de ni phan yon yin no/ /de ltar zas kyis gnas pa'i lus 'di yang / shin tu yun ring bar gnas pa yang / lo brgya'am/ legs par yongs su srung na/ de bas cung zad ring du gnas par zad de/'di la sngar 'chi ba yang yod do/ /de la gang dag lus gnas pa tsam la zhugs pa de dag ni legs par zhugs pa ma yin la/ gang dag lus gnas pa tsam gyis chog par 'dzin pa dag kyang legs par chog shes pa ma yin te/ de dag gi ni zas las byung ba'i phan yon kha na ma tho ba med pa dag yongs su rdzogs par nyams su myong bar mi 'gyur ro//gang dag lus gnas pa tsam gyis chog par mi 'dzin cing lus gnas pa tsam la zhugs pa yang ma yin la/ lhag par yang lus gnas par gyur pa de nyid la brten nas/ tshangs par spyod pa yang dag par sgrub pa'i phyir zhugs pa de dag ni legs par zhugs pa yin no// de dag nyid kyi zas las byung ba'i phan yon kha na ma tho ba med pa dag yongs su rdzogs par nyams su myong bar 'gyur bas na/ de'i phyir bdag zas kyi phan yon ngan ngon tsam gyis chog par 'dzin cing gnas pa de ni bdag gi tshul dang mthun pa ma yin zhing /bdag byis pa dang skal ba mnyam pa rnams kyi byis pa'i chos dang mthun par byed pa de yang bdag gi tshul dang mthun pa ma yin no snyam du sems shing / de ltar zas kyi nyes dmigs rnam pa thams cad du rdzogs par shes nas/ de de las so sor brtags te/nyes dmigs su lta zhing / nges par 'byung ba yongs su tshol la/ zas las nges par 'byung bar bya ba kho na'i don du/ /bu'i sha lta bu'i zas dag za bar byed do/ /de 'di snyam du yang sems te/ de ltar sbyin pa po dang sbyin bdag de dag gis longs spyod dag dka' bas yang dag par bsgrubs shing yongs su tshol ba las byung ba'i nyes dmigs mang po dag nyams su myong bar 'gyur te/pags pa dang / sha dang / khrag rab tu btsir zhing / 'di lta ste/ 'bras bu khyad par can 'dod pas/ rjes su snying brtse ba'i phyir sbyin par byed pas na/ bdag gis kyang de ltar thob pa'i bsod nams de las ci nas kyang de dag gi bya ba byas pa de dag shin tu 'bras bu che ba dang / phan yon che ba dang / snang ba che ba dang / rgya che bar 'gyur ba dang / zla ba ltar khyim rnams su rgyu zhing lus dben pa dang / sems dben pa dang / ngo tsha dang ldan pa dang /spyi brtol med pa dang / bdag la mi stod pa dang / gzhan la mi smod pa dang / ji ltar rang gi sa thob na dga' zhing yid bde bar gyur pa de bzhin du gzhan gyis thob na yang dga' zhing yid bde bar 'gyur ba dang / rab tu byung nas gzhan gyi khyim dag tu bdag la gzhan gyis ster bar 'gyur gyi/mi ster bar mi 'gyur ba dang / bsnyen bkur byed par 'gyur gyi/ bsnyen bkur mi byed par mi 'gyur ba dang / mang po ster gyi nyung du ma yin pa dang / bzang po ster gyi ngan pa ma yin pa dang / myur bar ster gyi 'gyangs te ma yin pa de lta bu lta ga la rnyed snyam pa de lta bu'i sems kyis kyang /khyim rnams su rgyu bar 'gyur zhing / bdag de lta bu'i sems kyis khyim rnams su rgyu ba na/ gal te gzhan dag gis ma byin na yang / des bdag de dag la kun nas mnar sems kyi sems dang / khong khro ba'i sems kyis rnam par 'byed par mi 'gyur zhing /'di lta ste kun nas mnar sems kyi sems dang / khong khro ba'i sems de nyid kyi dbang du byas nas gzhi des lus zhig ste/ ngan song du skyes pas nyam thag par mi 'gyur ba dang / gal te bsnyen bkur ma yin pa byas la/ bsnyen bkur ma byas pa dang /gal te nyung [(]ngu [,]du [)]ster gyi mang po ma yin pa dang / gal te ngan pa ster gyi bzang po ma yin pa dang / gal te 'gyangs te ster gyi myur ba ma yin par sbyin par 'gyur na yang / des bdag de dag la snga ma bzhin du rgyas par kun nas mnar sems kyi sems dang / khong khro ba'i sems kyis rnam par 'byed par mi 'gyur ba de ltar bdag nyid bzhag ste/yongs su longs spyod par byed na/ de ltar yongs su longs spyod par byed pa de ni/ bdag gi tshul dang mthun pa yin te/ bdag gis kham gyi zas 'di la brten nas bdag gi srog gi dbang po 'gag par yang mi 'gyur la/zas kyis rmya bar mi 'gyur zhing / bdag gis tshangs par spyod pa la yang phan par 'gyur ba de lta de ltar de dag gi tshod rig pa bsgrub par bya ste / de ltar na dge sbyong gi dngos po dang / rab tu byung ba'i dngos po la gnas pa / bdag gis bsod snyoms yongs su longs spyod pa 'di ni tshul dang mthun pa dang yongs su dag pa dang kha na ma tho ba med pa yin no snyam du sems te/de rnam pa de dag gis so sor brtags shing zas za bar byed do// //nyan thos kyi sa/ bam po bzhi pa/ de la zas gang zhe na/ zas ni bzhi ste/kham gyi zas dang / reg pa dang / yid la sems pa dang / rnam par shes pa'i zas so/ /don gyi skabs 'dir ni/ kham gyi zas la zas su dgongs te/ de yang gang zhe na/ 'di lta ste/ lde gu dang / snum khur dang / 'bras chan dang / zan dron dang / zhun mar dang /'bru mar dang / sbrang rtsi dang / bu ram gyi dbu ba dang / sha dang / sha skam dang / nya sha dang / lan tshwa dang / 'o ma dang / zho dang / mar dang gzhan yang de lta bu'i yo byad gang dag kham du byas te/ bzar rung ba dag ste/ de'i phyir kham gyi zas zhes bya'o//za bar byed la zhes bya ba ni/ za bar byed pa dang / so sor sten par byed pa dang / ldad par byed pa dang / 'cha' bar byed pa dang / mur bar byed pa dang / myong bar byed pa dang / 'thung bar byed pa dang / 'jib par byed pa zhes bya ba ni rnam grangs yin no/ /rnam par rtog pa'i phyir ma yin zhes bya ba ni/ji ltar 'dod pa la longs spyod par byed pa dag 'di ltar bdag cag zas kyis lus dag brtas shing tshim par byas la/ phye ma red kyi dus tshod la bab cing nam sros pa'i tshe/ bud med cod pan can lag ngar ku ba'i spu 'dra la / nu ma pho long 'dra ba 'khor dang bcas pa rnams dang lhan cig tu rtse bar byed dga' bar byed/dga' mgur spyod par byed pa na/ dgod pa dang / rnam par rtog par bya'o snyam nas de'i don du zas za bar byed de/ 'phags pa'i chos 'dul ba'i skabs su 'di lta ste/ 'dod pa'i 'dod chags dang ldan pa dang / 'khrig pa dang ldan pa / sdig pa mi dge ba'i rnam par rtog pa de dag ni rnam par rtog pa zhes bya'o/ /de dag gis de za bar byed cing gnod par byed pa na/ dbang po rgod pa dang / dbang po 'dom bu ltar mtho ba dang / yid g.yeng ba dang / yid 'phyar ba dang / yid mi gnas pa dang / yid nye bar ma zhi bar 'gyur te/ de dag de'i don du zas za bar byed pa ni/ rnam par rtog pa'i phyir zas za bar byed pa zhes bya'o/ /'phags pa nyan thos thos pa dang ldan pa/ so sor rtog pa'i stobs dang ldan pa nyes dmigs su lta ba/ nges par 'byung ba rab tu shes pa ni yongs su longs spyod par byed kyang /ji ltar 'dod pa la longs spyod pa de dag longs spyod par byed pa de lta ma yin pas/ de'i phyir rnam par rtog pa'i phyir ma yin zhes gsungs so/ /rgyags pa'i phyir ma yin/ sgeg pa'i phyir ma yin/ brgyan pa'i phyir ma yin gyi zhes bya ba ni 'di lta ste/ 'dod pa la longs spyod par byed la / de dag nyid ltar bdag cag deng 'di lta ste/ zas snum pa 'dod pa'i 'dod chags skyed pa/ 'phel bar byed pa/ bsod pa/ kha dog phun sum tshogs pa/ dri phun sum tshogs pa/ ro phun sum tshogs pa mang po dag g.yos drod kyis ci nus su zos te/tshim par byas na sang nam langs par gyur pa na mthu dang ldan par 'gyur zhing 'di lta ste/ gzhu dgang ba'am/ lus mnye ba'am/ rdo gdeg pa'am/ dril ba'am/ sa brko ba'am/ stobs brgal ba'am/ rkang 'khyog bya ba'am/ rgyug pa'am/ rkyal ba'am/mchong ba'am/ 'khor lo 'phang ba'i brtsal ba byed nus par 'gyur te/ brtsal ba de la brten nas mthu dang ldan pa dang / lus shin tu bcags pa dang / yun ring du nad rnams med par 'gyur ba dang / bdag cag gi lang tsho yun ring du rjes su 'jug par 'gyur ba dang /mi sdug par byed pa'i rga bas lus myur du zil gyis mi non par 'gyur ba dang / shin tu yun ring du 'tsho bar 'gyur ba dang / mang du zos na yang shin tu stobs dang ldan par 'gyur ba dang / zos so cog kyang legs par yongs su 'ju bar 'gyur ba dang / skyon rnams kyang sel bar byed par 'gyur ro zhes de'i don du zas za bar byed pa de ni/nad med pas rgyags pa dang / lang tshos rgyags pa dang / gson pas rgyags pa'i don du za ba yin no/ /de dag yang 'di snyam du sems te/ bdag cag gis brtsal bar byas zin pas/ khrus kyi cho ga dag byas te/'di lta ste/ chu gtsang mas lag pa dag bkru bar bya zhing / lus dag bkrus nas skra dag kyang bcos par bya/ byug pa sna tshogs kyis lus dag byugs la/ gos sna tshogs dang / me tog phreng ba sna tshogs dang / rgyan sna tshogs dag gis lus brgyan par bya'o snyam du sems te/de la khrus dang / bcos pa dang / byug pa gang yin pa de ni de dag gi sgeg pa yin no/ /de ltar sgeg par gyur pa dag gos dang / me tog phreng dang / rgyan dag thogs pa gang yin pa de ni brgyan pa zhes bya ste/ de ltar na sgeg pa'i don dang brgyan pa'i don du za bar byed pa yin te /de dag de ltar rgyags pas rgyags shing sgeg par gyur la/ lus dag brgyan nas dro ba'i dus sam/ dgongs kyi dus su zas kyi dus la bab par gyur pa de'i tshe/ skom pa dang / bkres par gyur nas/ shin tu rangs pa dang / shin tu 'dun pa dang / shin tu dga' bas nyes dmigs su mi lta zhing nges par 'byung ba rab tu mi shes bzhin du/ 'di lta ste/ yang dang yang du rnam par rtog pa'i don dang / rgyags pa'i don dang / sgeg pa'i don / brgyan pa'i don du zas ci 'byor pa dag za bar byed do/ /'phags pa nyan thos thos pa dang ldan pa/so sor rtogs pa'i stobs dang ldan pa/ nyes dmigs su lta ba nges par 'byung ba rab tu shes pa ni/ yongs su longs spyod par byed kyang / ji ltar 'dod pa la longs spyod pa de dag yongs su longs spyod par byed pa de lta ma yin gyi/ zas 'di ni bdag gis bsten pas spang bar bya ba yin te/bsten pa kho nas spong bar 'gyur ro snyam du sems so/ /'di ltar lus 'di gnas par bya ba'i phyir zhes bya ba ni zos na 'tsho bar 'gyur gyi/ ma zos na ma yin la/ 'tsho ba gang yin pa de ni de'i lus gnas pa zhes bya'o/ /bdag gis zas 'di zos na 'tsho bar 'gyur zhing 'chi bar mi 'gyur ro snyam nas zas za bar byed pa ste/de'i phyir 'di ltar lus 'di gnas par bya ba'i phyir zhes gsungs so/ /ji ltar na 'tsho bar bya ba'i phyir zas za bar byed pa yin zhe na/ 'tsho ba ni rnam pa gnyis te/ dka' bas 'tsho ba yang yod/ dka' ba ma yin pas 'tsho ba yang yod do//de la dka' bas 'tsho ba gang zhe na/ zas ci lta bu zos na bkres pa'am/ nyam chung ba'am/ gnod par 'gyur ba'am/ sdug bsngal ba'am/ nad tshabs che bar 'gyur ba'am/ chos ma yin pas bsod snyoms yongs su slong zhing / chos kyis ma yin pa'am/ chags pa'am / zhen pa'am / chums pa dang / mdud pa bor ba dang / brgyal ba dang / lhag par chags pa dang / lhag par chags par gyur pas yongs su longs spyod par byed pa'am/ de'i lus lci zhing las su mi rung ba'am/ spong mi bzod par 'gyur zhing des de'i sems bul bar mnyam par 'jog pa'am/tshegs chen pas dbugs rngub pa dang / dbugs 'byung bar 'gyur ba'am / rmugs pa dang gnyid kyis sems kun nas dkris par 'gyur te/ de ni dka' bas 'tsho ba zhes bya'o//dka' ba ma yin pas 'tsho ba gang zhe na/ 'di lta ste/ zas ci lta bu zos na bkres pa'am/ nyam chung bar mi 'gyur ba'am/ gnod pa'am/ sdug bsngal ba'am/ nad tshabs che bar mi 'gyur ba dang / chos kyis bsod snyoms yongs su tshol zhing / chos ma yin pas ma yin pa'am/chags pa med pa dang / zhen pa med pa dang / chums pa med pa dang / mdud pa bor ba med pa dang / brgyal ba med pa dang / lhag par chags pa med pa dang / lhag par chags par gyur pa med pas yongs su longs spyod par byed pa'am/ de'i lus mi lci zhing las su rung ba'am/spong bzod par 'gyur zhing / des de'i sems myur du mnyam par 'jog pa'am/ tshegs chung ngus dbugs rngub pa'am/ dbugs 'byung bar 'gyur ba'am/ rmugs pa dang gnyid kyis sems kun nas dkris par mi 'gyur ba ste/ de ni dka' ba ma yin pas 'tsho ba zhes bya'o//de la dka' bas 'tsho ba gang yin pa des ni lus kyi srog gnas par byed la/ de yang kha na ma tho ba dang bcas pa dang / kun nas nyon mongs pa can yin no/ /de la dka' ba ma yin pas 'tsho ba gang yin pa des ni/ lus kyi srog kyang gnas par byed la/de yang kha na ma tho ba med pa dang / kun nas nyon mongs pa med pa yin no/ /de la 'phags pa nyan thos thos pa dang ldan pa ni/ kha na ma tho ba dang bcas pa dang / kun nas nyon mongs pa can gyis 'tsho ba yongs su spong zhing / kha na ma tho ba med pa dang / kun nas nyon mongs pa med pa'i 'tsho ba len cing so sor sten par byed pas na/de'i phyir 'tsho bar bya ba'i phyir zhes gsungs so/ /kha na ma tho ba med pa dang / kun nas nyon mongs pa med pa'i 'tsho bar sngar smos pa de yang ji ltar byed ce na/ smras pa/ bkres pa bsal bar bya ba dang / tshangs par spyod pa la phan par bya ba dang /tshor ba rnying rnams spang bar bya ba dang / gsar rnams mi skye bar bya ba'i phyir dang / bdag 'tsho zhing stobs dang / bde ba dang / kha na ma tho ba med pa dang / bde ba la reg par gnas par yang 'gyur ro snyam du sems pa yin zhes gsungs pa ste/ de ltar so sor sten par byed pa na/ 'tsho ba kha na ma tho ba med pa dang / kun nas nyon mongs pa med par byed pa yin no/ /de la ji ltar na bkres pa bsal ba'i phyir zas za bar byed pa yin zhe na/ gang gi tshe zas kyi dus la bab cing bkres par gyur pa'i tshe/ bkres pa'i kun nas dkris pa bru ba tsha zhing /nyam chung ba de nyid bsal ba'i phyir za bar byed pa dang / de yang ji ltar zos na 'di lta ste/ phye ma red kyi dus sam/ nam sros par gyur pa'am/ sang gi zas kyi dus la ma bab pa'i bar du/ dus ma yin par bkres shing nyam chung bas de la gnod par mi 'gyur ba'i tshod tsam du za bar byed pa yin te/de ltar na bkres pa bsal bar bya ba'i phyir zas za bar byed pa yin no/ /ji ltar na tshangs par spyad pa la phan par bya ba'i phyir zas za bar byed pa yin zhe na/ zas de lta bu za zhing tshod ran par za ba ste/ des dge ba'i phyogs la brtson pa ste/ zos ma thag pa de kho na'i tshe'am/de nyid kyi nyin mo lus mi lci zhing / las su rung ba dang spong bzod par 'gyur te/ des na de'i sems myur du mnyam par 'jog pa dang / tshegs chung ngus dbugs rngub pa dang / dbugs dbyung bar 'gyur ba dang / gnyid dang rmugs pas sems kun nas dkris par mi 'gyur zhing /des na de myur ba kho nar ma thob pa thob par bya ba dang / ma rtogs pa rtogs par bya ba dang / mngon sum du ma byas pa mngon sum du bya ba'i skal ba yod cing mthu dang ldan par 'gyur te/ de ltar na tshangs par spyad pa la phan par bya ba'i phyir zas za par byed pa yin no//ji ltar na tshor ba rnying rnams spang bar bya ba'i phyir zas za bar byed pa yin zhe na/ 'di lta ste/ des 'das pa'i dus su zas kyi tshod ma ran pa'am/ mi 'phrod pa'am/ ma zhu bar zos pas/ des de'i lus la lus kyi nad rnam pa sna tshogs 'di lta ste/ g.ya' ba dang / mdze dang / phol mig dang / sha bkra la sogs pa rgyas par sngar bstan pa lta bu dag dang / nad de'i rgyu las byung ba'i lus kyi tshor ba sdug bsngal mi bzad pa/ rtsub pa/ tsha ba/ yid du mi 'ong ba dag byung bar gyur na/ des nad de dag zhi bar bya ba dang /de dag gi rgyu las byung ba sdug bsngal gyi tshor ba dag zhi bar bya ba'i phyir/ sman pas bstan pa'i sman phan pa mthun pa 'phrod pa dang / rjes su mthun pa sna tshogs dag la so sor bsten cing / zas 'phrod pa dag kyang za bar byed do/ /des na de'i nad dang / de'i rgyu las byung ba sdug bsngal gyi tshor ba skyes pa de dag spang bar 'gyur te/ de ltar na tshor ba rnying rnams spang bar bya ba'i phyir zas za bar byed pa yin no/ /ji ltar na tshor ba gsar rnams mi skye bar bya ba'i phyir zas za bar byed pa yin zhe na/ de da ltar byung ba'i dus na bde zhing nad med la stobs dang ldan pa'i tshe/zas kyi tshod ma rig pa dang / mi 'phrod pa dang / ma zhu bar mi zabs des de la ma 'ongs pa'i dus sang ngam/ gnangs dag tu de'i lus la gsud pa'am/ lus kyi nang gang yang rung ba 'di lta ste/ g.ya' ba dang / phol mig dang / mdze dang / sha bkra la sogs te/rgyas par sngar bstan pa lta bu dag dang / nad de'i rgyu las byung ba lus kyi tshor ba snga ma lta bu dag lus la 'byung bar mi 'gyur te/ de ltar na tshor ba gsar rnams mi skye bar bya ba'i phyir zas za bar byed pa yin no/ /ji ltar na bdag 'tsho zhing / stobs dang / bde ba dang /gzhan kha na ma tho ba med pa dang / bde ba la reg par gnas par yang 'gyur ro snyam nas zas za bar byed pa yin zhe na/ re zhig zos na 'tsho bar 'gyur ba gang yin pa de 'tsho ba yin no/ /bkres pa dang nyam chung ba sel bar byed pa gang yin pa de ni de'i stobs yin no/ /tshor ba rnying rnams spong ba dang /gsar rnams mi skye bar phyed pa gang yin pa de ni de'i bde ba yin no/ /chos kyis bsod snyoms yongs su blangs nas/ rgyas par snga ma bzhin du chags pa med pa dang / zhen pa med pas yongs su longs spyod par byed pa gang yin pa de ni de'i kha na ma tho ba med pa yin no//zos nas rgyas par snga ma bzhin du lus lci bar mi 'gyur zhing / las su rung ba dang / spong bzod par 'gyur ba gang yin pa de ni de'i bde ba la reg par gnas pa yin no/ /de'i phyir so sor brtags shing zas za bar byed la/ rnam par rtog pa'i phyir ma yin/rgyags pa'i phyir ma yin/ sgeg pa'i phyir ma yin/ brgyan pa'i phyir ma yin gyi zhes bya ba la sogs pa rgyas par snga ma bzhin du gsungs te/ de ni re zhig zas kyi tshod rig pa nyid kyi rnam par dbye ba rgyas pa yin no/ /don mdor bsdu ba gang zhe na/ smras pa/ gang la yongs su longs spyod pa dang /ji ltar yongs su longs spyod pa de ni don mdor bsdu ba yin no/ /de la gang la yongs su longs spyod par byed pa yin zhe na/ 'di lta ste/ kham gyi zas lde gu dang / snum khur dang / 'bras chan dang / zan dron dag la sogs pa rgyas par sngar bstan pa dag la'o//ji ltar yongs su longs spyod par byed ce na/ so sor brtags shing zas za bar byed la/ rnam par rtog pa'i phyir ma yin/ /rgyags pa'i phyir ma yin/ sgeg pa'i phyir ma yin/ /brgyan pa'i phyir ma yin zhes bya ba la sogs pa rgyas par sngar bstan pa ltar ro/ / don mdor bsdu ba gzhan yang gnyen pos yongs su zin pa dang / 'dod pa'i bsod snyoms kyi mtha' rnam par spangs pa dang / bdag nyid dub pa'i mtha' rnam par spangs pa dang / tshangs par spyad pa la phan par bya ba'i phyir yongs su longs spyod par byed pa yin no/ /ji lta ji ltar na gnyen pos yongs su zin pa yin zhe na/so sor brtags shing zas za bar byed la zhes gang gsungs pa'o/ /ji ltar na 'dod pa'i bsod snyoms kyi mtha' rnam par spangs pa yin zhe na/ rnam par rtog pa'i phyir ma yin/ rgyags pa'i phyir ma yin/ sgeg pa'i phyir ma yin/ brgyan pa'i phyir ma yin zhes gang gsungs pa'o/ /ji ltar na bdag nyid ngal ba'i mtha' rnam par spangs pa yin zhe na/ bkres pas bsal bar bya ba dang / tshor ba rnying rnams spang bar bya ba'i phyir dang / tshor ba gsar rnams mi skye bar bya ba'i phyir dang / bdag 'tsho zhing stobs dang / bde bar yang 'gyur ro zhes gsungs pa'o/ /ji ltar na tshangs par spyad pa la phan par bya ba'i phyir yongs su longs spyod par byed pa yin zhe na/ tshangs par spyad pa la phan par bya ba'i phyir dang / bdag kha na ma tho ba med pa dang / bde ba la reg par gnas par yang 'gyur ro zhes gang gsungs pa'o//don mdor bsdu ba gzhan yang / 'di ni gnyis te zas med pa dang / zas yod pa'o/ /de la zas med pa ni rnam pa thams cad kyi thams cad du chung zad kyang yongs su longs spyod par mi byed pa dang / yongs su longs ma spyad na 'chi bar 'gyur ba'o//de la zas yod pa ni rnam pa gnyis te/ zas ran pa dang / zas ran pa ma yin pa'o/ /de la zas ran pa ni ha cang nyung ba ma yin pa dang / ha cang mang ba ma yin pa dang / yongs su ma zhu ba ma yin pa dang / mi 'phrod pa ma yin pa dang / kun nas nyon mongs pa can ma yin pa gang yin pa'o//de la zas ran pa ma yin pa ni ha cang nyung ba dang / ha cang mang ba dang / yongs su ma zhu ba dang / mi 'phrod pa dang / kun nas nyon mongs pa can la yongs su longs spyod pa gang yin pa'o/ /de la zas ha cang nyung ba ma yin pa'i zas ran pas ni/ bkres pa dang nyam chung ba ma skyes pa mi skyed cing /skyes pa spong bar byed pa'o / /de la zas ha cang mang ba ma yin pa'i zas ran pas ni rgyas par snga ma bzhin du/ lus lci ba dang las su mi rung ba dang / spong mi bzod par mi 'gyur ro/ /de la zas yongs su zhu ba dang / zas 'phrod pa'i zas ran pas ni/tshor ba rnying rnams spong ba dang / gsar rnams mi skye bar byed de/ de ltar na de 'tsho zhing stobs dang bde bar 'gyur ro/ /de la zas kun nas nyon mongs pa can ma yin pa'i zas ran bas ni/ kha na ma tho ba med pa nyid dang / bde ba la reg par gnas pa nyid du 'gyur ro/ / de la zas ha cang nyung ba'i zas ran pa ma yin pa des ni/ 'tsho bar byed cing bkres pa dang / nyam chung ba dang ldan par yang 'gyur ro/ /de la zas ha cang mang ba'i zas ran pa ma yin pa des ni/ de'i lus khur thogs pa lta bur 'gyur zhing / zas dus su yongs su 'ju bar yang mi byed do//de la zas yongs su ma zhu ba'i zas ran pa ma yin pas ni de'i lus gsud par 'gyur zhing / lus la lus kyi nad gang yang rung bdag 'byung bar yang 'gyur ro/ /zas yongs su ma zhu ba'i zas ran pa ma yin pa ji lta ba bzhin du/ zas mi 'phrod pa'i zas ran pa ma yin pa yang de dang 'dra ste/de la khyad par du na zas ni 'phrod pa'i zas ran pa ma yin pas ni/ nyes pa rnams 'phel bar 'gyur ba dang / nad drag pos 'debs par 'gyur ro/ /de la zas kun nas nyon mongs pa can gyis zas ran pa ma yin pas ni rgyas par snga ma bzhin du chos ma yin pas bsod snyoms blangs nas/chags pa dang zhen pa dang / 'chums pa dang mdud pa bor bas yongs su longs spyod par byed do/ /de la zas ran par yongs su longs spyod par byed cing / zas ran pa ma yin pas yongs su longs spyod par mi byed pas na/ /de'i phyir zas la ran par byed pa zhes bya ste/'di lta ste so sor brtags shing zas za bar byed la/ rgyas par snga ma bzhin du rnam par rtog pa'i phyir ma yin/ /rgyags pa'i phyir ma yin/ sgeg pa'i phyir ma yin/ brgyan pa'i phyir ma yin gyi zhes bya ba la sogs pa'i rnam pa de dag gis ni/zas la ran par byed pa de bstan cing / gsal bar byas/ rnam par phye/ rab tu bshad pa yin no/ /de la so sor brtags shing zas za bar byed la/ rnam par rtog pa'i phyir ma yin/ rgyags pa'i phyir ma yin/ sgeg pa'i phyir ma yin/ brgyan pa'i phyir ma yin gyi/'di lta ste/ lus 'di gnas par bya ba dang / 'tsho bar bya ba'i phyir zhes gsungs pa des ni/ re zhig zas med pa spong bar byed do/ /bkres pa bstsal bar bya ba dang / tshangs par spyad pa la phan par bya ba'i phyir zhes bya ba nas/ bde ba la reg par gnas par yang 'gyur ro snyam du sems pa yin no zhes bya ba'i bar du rgyas par gang gsungs pa des ni/zas ran pa ma yin pa spong bar byed de / ji ltar na zas ran pa ma yin pa de spong bar byed pa yin zhe na/ bkres pa bstsal par bya ba'i phyir zhes gang gsungs pa des ni/ re zhig zas ha cang chung ba'i zas ran pa ma yin pa spong bar byed do//tshangs par spyad pa la phan pa'i phyir zhes gang gsungs pa des ni/ zas ha cang mang ba'i zas ran pa ma yin pa spong bar byed do/ /tshor ba rnying rnams spang bar bya ba dang / gsar rnams mi skye bar bya ba'i phyir zhes gang gsungs pa des ni/zas yongs su ma zhu ba dang / mi 'phrod pa'i zas ran pa ma yin pa spong bar byed do/ /bdag 'tsho zhing stobs dang ldan par 'gyur zhes gang gsungs pa des ni/ zas ha cang nyung ba ma yin pa dang / zas ha cang mang ba ma yin pa nyid ston to//bdag bde bar 'gyur ro zhes gang gsungs pa des ni/ zas yongs su zhu ba nyid dang / zas 'phrod pa nyid ston to/ /bdag kha na ma tho ba med pa dang / bde ba la reg par gnas par yang 'gyur ro snyam du sems pa yin te zhes gang gsungs pa des ni/zas kun nas nyon mongs pa can ma yin pa nyid ston te/ 'di ltar gang chos ma yin pas bsod snyoms yongs su blangs te/ rgyas par snga ma bzhin du chags pa dang / zhen pas yongs su longs spyod par byed pas ni/ kun nas nyon mongs pa dang bcas pa dang / kha na ma tho ba dang bcas pa nyid du yongs su longs spyod par byed pa yin pas nang du yang dag 'jog dang / rnal 'byor dang / yid la byed pa dang / lung nod pa dang / kha ton dang / don sems pa'i dge ba'i phyogs la brtson pa de nyid kyis sems kyi rjes su sdig pa mi dge ba'i rnam par rtog pa de dag nyid zag par 'gyur zhing /de dag de la gzhol ba dang / de la bab pa dang / de la 'bab pa de'i sems kyi rgyud la 'jug par byed de/ des na des bde ba la reg par gnas par mi 'gyur ba'i phyir ro/ /bde ba la reg par gnas pa de yang rnam pa gnyis te/zas ha cang mang ba yongs su spangs pa'i phyir/ des rgyas par snga ma bzhin du de'i lus lci ba dang / las su mi rung ba dang / spong mi bzod par mi 'gyur ba dang / zas la ro myong bar mi byed pa'i phyir/ des de rnam par rtog pas kun nas dkrugs pa las byung ba'i bde ba la reg par gnas pa ma yin par mi 'gyur ba yin no//de'i phyir de ltar na tshig de dag thams cad kyis ni zas la ran par byed pa nyid bstan pa yin no/ / de ni zas kyi tshod rig pa nyid kyi rgyas pa dang mdor bsdus pa zhes bya'o/ /nam gyi cha stod dang / nam gyi cha smad la mi nyal bar sbyor ba'i rjes su brtson pa nyid gang zhe na/de la nam gyi cha stod ni gang / nam gyi cha smad ni gang / mi nyal bar sbyor ba ni gang / mi nyal bar sbyor ba'i rjes su brtson pa nyid ni gang zhe na/ de la nam gyi cha stod ni 'di yin te/ phye ma red nyid ma nub pa'i dus nas bzung ste/ nam gyi srod kyi cha mel tshe thun gcig lhag tsam gyi bar gang yin pa'o//de la nam gyi cha smad ni 'di yin te/ nam gyi tho rangs kyi cha la mel tshe thun gcig lhag tsam gang yin pa'o/ /de la mi nyal bar sbyor ba ni 'di yin te/ nyin mo 'chags pa dang / 'dug pa dag gis sgrib par 'gyur ba'i chos rnams las sems yongs su sbyong bar byed cing /mtshan mo'i thun dang po la yang 'chag pa dang / 'dug pa dag gis sgrib par 'gyur ba'i chos rnams las sems yongs su sbyong bar byed la/ yongs su sbyangs nas de'i 'og tu gtsug lag khang nas phyir phyung ste/gtsug lag khang gi phyi rol du rkang pa bkrus nas/ gtsug lag khang gi nang du zhugs te/ glo g.yas pa phab nas/ rkang pa rkang pa'i steng du bzhag ste/ snang ba'i 'du shes dang / dran pa dang shes bzhin dang ldang ba kho na'i 'du shes yid la byed bzhin du nyal par byed pa dang /de mtshan mo'i thun tha ma la yang myur ba myur ba kho nar sad par byas nas 'chag pa dang 'dug pa dag gis sgrib par 'gyur ba'i chos rnams las sems yongs su sbyong bar byed pa yin te zhes gang gsungs pa'o/ /de la mi nyal bar sbyor ba'i rjes su brtson pa nyid ni 'di yin te/'di lta ste/ sangs rgyas bcom ldan 'das kyi nyan thos kyi mi nyal bar sbyor ba thos nas/ de la slob par 'dod cing / de de ltar gyur nas/ mi nyal ba de nyid las brtsams te/ sangs rgyas kyis rjes su gnang ba'i mi nyal bar sbyor ba bsgrub par bya'o zhes de'i rjes su 'dun pa dang /brtson pa dang / 'bad pa dang / rtsol ba dang / sgrim pa dang / mthu skyed pa dang / rtsom pa dang / dga' ba dang / spro ba dang / phyir mi ldog pa dang sems rab tu 'dzin cing / rgyun du chud par byed pa gang yin pa'o//de la ji ltar na nyin mo 'chag pa dang / 'dug pa dag gis sgrib par 'gyur ba'i chos rnams las sems yongs su sbyong bar byed pa yin zhe na/ nyin mo zhes bya ba ni nyi ma 'char ka'i dus nas bzung ste/ nyi ma nub ka'i bar gyi dus gang yin pa'o/ /'chag pa zhes bya ba ni 'chags dkyus ring zhing /zheng ha cang mi che bar byas pa'i sa phyogs su 'gro ba dang / ldog pa dang ldan pa'i lus kyi las gang yin pa'o/ /'dug pa zhes bya ba ni 'di ltar 'di na la la khri'am khri'u'am/ rtswa bting ba'i steng du skyil mo krung bcas te/ lus drang por bsrangs nas/ dran pa phyogs par gzhag ste/ 'dug pa gang yin pa'o/ /sgrib pa rnams zhes bya ba ni sgrib pa lnga po dag go/ /sgrib par 'gyur ba'i chos rnams zhes bya ba ni/ sgrib pa dang mthun pa'i chos rnams te/ sgrib pa 'dren par byed pa gang yin pa'o/ / de dag kyang gang zhe na/ 'dod pa la 'dun pa dang / gnod sems dang / rmugs pa dang gnyid dang / 'gyod pa dang / rgod pa dang / the tshom dang / sdug pa nyid dang / khong khro ba'i rgyu dang / mun pa dang / nye du dang / ljongs dang / mi 'chi ba'i rnam par rtog pa dang / sngon bgad pa dang / rtses pa dang / dga' ba dang / dga' mgur spyad pa rjes su dran pa dang / dus gsum dang / dus gsum du gtogs pa'i tshul bzhin ma yin pa'i chos rnams la sems pa gang yin pa'o/ /ji ltar na 'chags pas de dag la sems yongs su sbyong bar byed cing /ji snyed cig las yongs su sbyong bar byed pa yin zhe na/ rmugs pa dang / gnyid dang / rmugs pa dang gnyid 'dren par byed pa'i sgrib pa las yongs su sbyong bar byed do/ /des snang ba'i mtshan ma legs par shin tu rab tu bzung zhing / legs par yid la byas/legs par bsten / legs par so sor brtags te/ de snang ba dang ldan pa dang / de 'od dang ldan pa'i sems kyis g.yogs pa'am/ bla gab med pa'i 'chags na 'chags pa'i tshe 'di lta ste/ sangs rgyas rjes su dran pa'am/ chos sam/ dge 'dun nam/tshul khrims sam/ gtong ba'am/ lha rjes su dran par gyur nas / dang bar gyur pa'i dmigs pa gang yang rung bas sems yang dag par ston/ yang dag par 'dzin du gzhug /yang dag par gzengs bstod/ yang dag par rab tu dga' bar byed pa'am/ des gnyid dang rmugs par 'gyur ba'i nyes dmigs ston pa'i chos 'di lta ste/ mdo'i sde dang / dbyangs kyis bsnyad pa'i sde dang / lung du bstan pa'i sde dang / tshigs su bcad pa'i sde dang / ched du brjod pa'i sde dang / gleng gzhi'i sde dang / rtogs pa brjod pa'i sde dang /de lta bu byung ba'i sde dang / skyes pa'i rabs kyi sde dang / shin tu rgyas pa'i sde dang / rmad du byung ba'i chos kyi sde dang / gtan la dbab par bstan pa'i sde gang dag thos shing bzung la bstan par byas pa la de dag las rnam grangs du mar rmugs pa dang / gnyid rnam par smad cing /rnam par skyon du bgrang ba dang / rmugs pa dang gnyid spong ba bstod cing bsngags pa de dag rgya cher dbyangs kyis kha ton byed pa'am/ gzhan dag la yang dag par ston tam/ don sems shing 'jal la rnam par rtog par byed pa'am/ phyogs su rnam par lta ba'am/zla ba dang / rgyu skar dang / gza' dang / skar ma dag la lta ba gtod par byed pa'am/ chus gdong 'khru bar byed na/ des de'i rmugs pa dang / gnyid kyis kun nas dkris pa ma skyes pa de ni mi skyed la/ skyes pa ni sangs par 'gyur te/ de ltar na des sgrib par 'gyur ba'i chos de las yongs su sbyong bar byed pa yin no//de la sdug pas sgrib par 'gyur ba'i chos gang dag la sems yongs su sbyong bar byed cing / ji ltar yongs su sbyong bar byed ce na/ smras pa sgrib par 'gyur ba'i chos bzhi po 'dod pa la 'dun pa dang / gnod sems dang / rgod pa dang / 'gyod pa dang / the tshom dag dang de dag 'dren par byed pa'i chos rnams las yongs su sbyong bar byed do/ /'dod pa la 'dun pa'i kun nas dkris pa skyes pa gsal bar bya ba dang / ma skyes pa thag ring du byas pa'i phyir skyil mo krung bcas te/lus drang por bsrangs nas dran pa phyogs par bzhag ste/ 'dug nas rnam par bsngos pa'am/ rnam par rnags pa 'am/ rnam par 'bus gzhigs pa'am/ rnam par bam pa 'am/ rnam par zos pa'am/ rnam par dmar pa'am/ rnam par 'thor ba'am/ rus gong ngam/ keng rus sam/ rus pa'i keng rus sam/ ting nge 'dzin bzang po'i mtshan ma gang yang rung ba dag yid la byed pa'am/ des 'dod pa la 'dod chags spang ba'am/ 'dod pa la 'dun pa spang bar bya ba'i phyir/ 'di lta ste/ mdo'i sde dang / dbyangs kyis bsnyad pa'i sde dang / lung du bstan pa'i sde dang / rgyas par snga ma bzhin du chos gang dag thos shing bzung la bstan par byas pa'am/ /kha ton bya ba'am/ yid kyis brtags pa dang / mthong bas shin tu rtogs par byed pa de dag las rnam grangs du mar 'dod pa la 'dod chags dang /'dod pa la 'dun pa dang / 'dod pa la zhen pa dang / 'dod pa la 'chums pa dang / 'dod pa la lhag par zhen pa la rnam par smad pa dang / rnam par mi snyan par brjod pa dang / rnam par skyon du bgrang ba dang / 'dod pa la 'dod chags dang /'dod pa la 'dun pa spong ba rnam grangs du mar bstod pa dang / bsngags pa dang rab tu bsngags pa'i chos de dag de ltar 'du gnas tshul bzhin du yid la byed pa yin te/ de ltar na de 'dod pa la 'dun pa'i kun nas dkris pa ma skyes pa mi skyed cing / 'dod pa la 'dun pa'i kun nas dkris pa skyes pa dang bral bar 'gyur ro//de la gnod sems la khyad par 'di yod de/ de ltar 'dug nas byams pa dang ldan pa'i sems kho na med la / 'gran zla med pa/ gnod pa med pa/ yangs pa/ rgya chen por gyur pa/ mi gnyis pa/ tshad med pa/shin tu bsgoms pas phyogs su mos te/ khyab par byas nas bsgrubs te gnas pa dang / de bzhin du gnyis pa dang / de bzhin du gsum pa dang / de bzhin du bzhi pa dang / bla dang / 'og dang / thad kar mtha' yas pa'i 'jig rten thams cad khyab par byas nas bsgrubs te gnas pa yin te/lhag ma ni snga ma bzhin no/ /de la rgod pa dang 'gyod pa la ni khyad par 'di yod de / de ltar 'dug nas sems nang kho nar yang dag par 'jog par byed cing / sgrub par byed la rgyud gcig tu byed cing ting nge 'dzin du byed pa yin te/ lhag ma ni snga ma bzhin no/ /de la the tshom gyi sgrib pa la ni khyab par 'di yod de/ de ltar 'dug nas ci bdag 'das pa'i dus su byung bar gyur tam/ 'on te bdag 'das pa'i dus su ma byung bar gyur pa zhig yin/ /bdag 'das pa'i dus su ci 'dra bar 'gyur / ji lta bur gyur pa zhig yin/bdag ma 'ongs pa'i dus na/ ci zhig tu 'gyur/ ma 'ongs pa'i dus na ji lta bu zhig tu 'gyur/ ci zhig yod/ cir 'gyur/ sems can 'di ga las 'ongs/ 'di nas shi 'phos nas ni gang du 'gro bar 'gyur zhes/ 'das pa'i dus la tshul bzhin ma yin pa yid la byed cing /ma 'ongs pa dang da ltar byung ba'i dus la yang tshul bzhin ma yin pa yid la mi byed de/ de de ltar 'das pa'i dus dang / ma 'ongs pa'i dus dang / da ltar byung ba'i dus la tshul bzhin ma yin pa yid la byed pa spangs shing tshul bzhin yid la byed do/ / des chos tsam dang / dngos po tsam dang / rgyu tsam dang / 'bras bu tsam dang / yod pa'ang yod par/ med pa yang med par mthong zhing / dngos po med pa la yang sgro 'dogs par mi byed la/ dngos po yod pa la yang skur pa 'debs par mi byed cing / 'jigs par mi byed de/ 'di lta ste/ mi rtag pa dang / sdug bsngal ba dang / stong pa dang / bdag med pa'i chos yang dag pa dag kyang mi rtag pa dang / sdug bsngal ba dang / stong pa dang / bdag med pa yang dag pa'i sgo nas rab tu shes so/ /de de ltar tshul bzhin yid la byed pa na/sangs rgyas la yang nem nur med cing the tshom med la/ chos dang / dge 'dun dang / sdug bsngal dang / kun 'byung ba dang / 'gog pa dang / lam dang / rgyu dang / rgyus bskyed pa'i chos rnams la yang nem nur med cing /the tshom med pa yin te/ lhag ma ni snga ma bzhin no/ /de la gnod sems la yang des khong khro ba dang / khong khro ba'i rgyu las brtsams te/ de dag spang bar bya ba'i phyir/ chos gang dag thos shing bzung la zhes bya ba rgyas par snga ma bzhin du brjod par bya'o/ /rgod pa dang /'gyod pa la yang des rgod pa dang / 'gyod pa las brtsams te/ de spang bar bya ba'i phyir chos gang dag thos shing bzung la zhes bya ba rgyas par snga ma bzhin du brjod par bya'o/ /the tshom la yang des the tshom las brtsams te/ de spang bar bya ba'i phyir chos gang dag thos shing bzung la zhes bya ba rgyas par snga ma bzhin du brjod par bya ste/lhag ma ni snga ma bzhin no/ /de ltar na des 'dod pa la 'dun pa dang / gnod sems dang / rmugs pa dang / gnyid dang / rgod pa dang / 'gyod pa dang / the tshom gyi sgrib pa rnams dang / de dag 'dren par byed pa'i sgrib par 'gyur ba'i chos rnams las/sems yongs su sbyong bar byed pa yin te/ de'i phyir chags pa dang / 'dug pa dag gis sgrib par 'gyur ba'i chos rnams las/ sems yongs su sbyong bar byed cing zhes bya ba gsungs so/ /de yang chos kyi dbang du byas te sgrib par 'gyur ba'i chos rnams las sems yongs su sbyong bar byed pa de bstan pa yin no//bdag gi dbang du byas pa dang / 'jig rten gyi dbang du byas nas/ sgrib par 'gyur ba'i chos rnams las sems yongs su sbyong bar byed pa yang yod do/ /de la bdag gi dbang du byas pa gang zhe na/'di lta ste/ sgrib pa gang yang rung ba zhig skyes par gyur na/ skyes ma thag tu sgrib pa de skyes pa des/ sems nye bar nyon mongs par byed pa dang / shes rab nyam chung bar byed pa dang / dge ba'i phyogs la gnod par byed pas bdag gis tshul dang mthun pa ma yin par rig nas/ngo tsha bar byed cing sgrib pa skyes pa de dang du mi len par spong bar byed/ sel bar byed/ byang bar byed pa ste/ de ltar na de bdag gi dbang du byas nas/ sgrib par 'gyur ba'i chos rnams las sems yongs su sbyong bar byed pa yin no//ji ltar na 'jig rten gyi dbang du byas nas/ sgrib par 'gyur ba'i chos rnams las sems yongs su sbyong bar byed pa yin zhe na/ 'di la de'i sgrib pa skyes pa'am/ skye ba'i dus nye bar gnas par gyur pa na/ 'di snyam du sems te/ gal te bdag gi sgrib pa ma skyes pa skyes par gyur na/bdag ston pas smad par 'gyur zhing lha rnams dang tshangs pa mtshungs par spyod pa mkhas pa rnams kyis kyang chos nyid kyis rnam par smad par 'gyur ro snyam nas/ 'jig rten kho na'i dbang du byas nas/ sgrib pa ma skyes pa mi skyed cing skyes pa spong bar byed pa ste/de ltar na 'jig rten gyi dbang du byas nas/ sgrib par 'gyur ba'i chos rnams pas sems yongs su sbyong bar byed pa yin no/ /de ltar mtshan mo'i thun dang po la yang 'chags pa dang / 'dug pa dag gis sgrib par 'gyur ba'i chos rnams las sems yongs su sbyong ba'i bar du byed cing /sgrib par 'gyur ba'i chos rnams las/ sems yongs su sbyangs nas/ gnas mal rim gro bya ba dang / 'jig rten gyi cho ga rjes su mthun par bya ba'i phyir/ de'i 'og tu gtsug lag khang nas phyir phyung ste/ gtsug lag khang gi phyi rol du rkang pa 'khru zhing /bkrus nas gtsug lag khang gi nang du zhugs te/ 'di ltar gnyid kyis brta bar bya ba'i 'byung ba chen po rnams brta bar bya ba'i phyir nyal bar byed do/ /lus de brtas na dge ba'i phyogs kyi sbyor ba rgyun tu chud par bya ba dang / rtag 'grus su byas la shin tu las su rung zhing /shin tu phan par yang 'gyur ro/ /ci'i phyir glo g.yas pas phab ste nyal bar byed ce na/ srog chags seng ge dang chos mthun par bya ba'i phyir te/ 'dir ni ji star chos mthun pa yin zhe na/ srog chags seng ge ni dud 'gro'i skye gnas su skyes pa'i srog chags thams cad kyi nang na rtsal che ba dang /gzengs mtho ba dang / brtan pas pha rol gnon pa bzhin du/ dge slong mi nyal bar sbyor ba'i rjes su brtson pa brtson 'grus brtsams shing gnas pa yang / rtsa la che ba dang / gzengs mtho ba dang / brtan pas pha rol gnon pa yin pas/de'i phyir seng ge bzhin du nyal ba ni de'i tshul dang mthun pa yin gyi/ yi dags kyi nyal stangs dang / lha'i nyal stangs dang / 'dod pa la longs spyod pa dag gi nyal stangs ni de lta ma yin gyi / 'di ltar de dag thams cad ni le lo can dang / brtson 'grus zhan pa/stobs dang / pha rol gnon pa chung ba ma yin pa'i phyir ro/ /gcig tu na glo g.yas pas seng ge bzhin du nyal ba gang yin pa de ni chos nyid kyis 'di ltar lus dag lhod par mi 'gyur zhing gnyid log nas yang dran pa brjed par mi 'gyur ba dang / gnyid stug por mi 'gyur ba dang /rmi lam na sdig pa rmi bar mi 'gyur ba yin gyi/ de lta ma yin par nyal na ni de las bzlog pa'i nyes pa thams cad 'byung bar rig par bya ste/ de'i phyir glo g.yas pas phab nas rkang pa rkang pa'i steng du bzhag ste/ nyal bar byed do zhes gsungs so/ /ji ltar na snang ba'i 'du shes kyis nyal bar byed pa yin zhe na/des snang ba'i mtshan ma legs par shin tu bzung zhing legs par yid la byas/ legs par bsten / legs par so sor brtags te/ de de nyid yid la byed bzhin du de 'od dang ldan pa'i sems kyis nyal bar byed cing / des na de gnyid log na yang sems la mun pa nyid du mi 'gyur ste/de ltar na snang ba'i 'du shes kyis nyal bar byed pa yin no/ /ji ltar na dran pas nyal bar byed pa yin zhe na/ des chos dge ba don dang ldan pa gang dag mnyan pa dang bsams pa dang / bsgoms pa'i rgyu las byung ba'i dran pa nyal ka'i bar du rjes su 'brang bar 'gyur zhing /des na de gnyid kyis log na yang chos de dag gnyid ma log pa bzhin du mngon par rjod par byed la/ chos de dag nyid la sems de lan mang du rjes su 'jug par byed de/ de ltar na ji ltar dran pas dge ba'i sems sam/ lung du ma bstan pa'i sems dran pa de bzhin du nyal bar byed pa yin te/ de ltar na dran pas nyal bar byed pa yin no/ /ji ltar na shes bzhin gyis nyal bar byed pa yin zhe na/ de ltar na dran par gyur pa ste / gang gi tshe nyal ba na/ nye ba'i nyon mongs pa gang yang rung bas sems kun nas nyon mongs par gyur na/des kun nas nyon mongs pa skyes pa de nyid legs pa kho nar rab tu shes shing / da dung mi len pa stong par byed/ rtog par byed/ sems phyir zlog par byed de/ de'i phyir shes bzhin du nyal bar byed pa zhes bya'o/ /ji ltar na ldang ba kho na'i 'du shes yid la byed bzhin du nyal bar mi byed cing /de brtson 'grus kyis yang dag par rab tu zin pa'i sems su byas nas/ myur ba myur ba thums phras kyis nyal bar byed de/ 'di lta ste dper na dgon pa'i ri dgas bzhin du rnam pa thams cad gyi thams cad du gnyid kyis non pa la sems gzhol bar mi byed cing /de la 'bab par mi byed/ bab par mi byed pa dang / gzhan yang de 'di snyam du sems te/ e ma ho kye ma bdag gis sangs rgyas kyis rjes su gnang ba'i mi nyal ba rnam pa thams cad kyis thams cad du bsgrub par bya'o snyam nas/ des de bsgrub pa'i phyir shin tu 'bad pa chen po dang / mngon par brtson pa'i sbyor bas mthun pa skyed de/ gnas par byed pa dang / gzhan yang de 'di snyam du sems te/ ji ltar bdag gis deng mi nyal ba dang dge ba'i chos rnams bsgom pa'i phyir/ mkhas shing le lo med la/sgrub phod pas brtson 'grus brtsams te/ gnas bzhin du sang nam langs pa'i nang par yang sgrub phod pas/ rgya cher brtson 'grus brtsams te gnas par bya'o snyam du sems pa'o/ /de la ldang ba'i 'du shes gcig gis ni gnyid stug por mi byed de/ des ni de ldang ba'i dus su myur ba myur ba kho nar ldang zhing dus las mi yol bar sad par nus so/ /ldang ba'i 'du shes gnyis pas ni sangs rgyas kyis rjes su gnang ba'i seng ge'i nyal stangs las lhag chad med par nyal bar byed do/ /ldang ba'i 'du shes gsum pas ni 'dun pa rgyun mi chad par byed do// brjed pas na yang gong nas gong du yang dag par bsgrub pa'i phyir rab tu brtson par byed do/ / de ltar na ldang ba kho na'i 'du shes yid la byed bzhin du nyal bar byed pa yin no/ /de mtshan mo'i thun tha ma la yang myur ba myur ba kho nar sad par byas nas/'chag pa dang / 'dug pa dag gis sgrib par 'gyur ba'i chos rnams las/ sems yongs su sbyong bar byed pa yin te zhes bya ba la/ mtshan mo'i thun tha ma zhes bya ba ni/ nam gyi tho rangs kyi cha las mel tshe thun gcig lhag tsam gang yin pa'o/ / de yang snang ba'i 'du shes dang dran pa dang shes bzhin dang ldan pa kho na'i 'du shes yid la byed bzhin du mtshan mo'i gung tshigs kyi thun la mel tshe thun gcig lhag tsam gnyid bsad par byas nas gang gi tshe ldang ba de'i rmugs pa dang gnyid kyi kun nas bkris pa chen pos zil gyis non cing / des ldang ba na bul ba nyid dam/ zhen pa nyid dang / le lo dang snyom par 'gyur ba med cing ldang ba la lus las su rung bar 'gyur ro/ /bul ba nyid dang / zhan pa nyid dang / le lo dang / snyom pa de dag med na brtsal ba tsam nyid kyis myur ba myur ba kho nar ldang bar 'gyur ro/ / 'chag pa dang 'dug pa dag gis sgrib par 'gyur ba'i chos rnams las sems yongs su sbyong bar byed pa yin te zhes bya ba ni snga ma bzhin du rig par bya ste/ de ni re zhig nam gyi cha stod dang / nam gyi cha smad la mi nyal bar sbyor ba'i rjes su brtson pa de nyid kyi rnam par dbye ba rgyas pa yin no//don mdor bsdu ba gang zhe na/ 'di la nam gyi cha stod dang / nam gyi cha smad la mi nyal bar sbyor ba'i rjes su brtson pa'i skyes bu gang zag gis yang dag par bya ba ni rnam pa bzhi ste/ bzhi gang zhe na/ ji srid du mi nyal ba de srid du dge ba'i phyogs mi spong zhing /dge ba'i chos bsgom pa la brtson pa dang / rgyun du chud pa dang / rtag 'grus su byed pa dang / dus su nyal bar byed cing dus ma yin par ma nyal ba dang / nyal na yang kun nas nyon mongs pa med pa'i sems kyis gnyid 'da' bar byed cing / sems kun nas nyon mongs par mi 'gyur ba dang /dus su sad par 'gyur zhing / ldang ba'i dus las mi yol ba ste/ nam gyi cha stod dang / nam gyi cha smad la mi nyal bar sbyor ba'i rjes su brtson pa'i skyes bu gang zag gis yang dag par bya ba ni bzhi po de dag yin no/ /bcom ldan 'das kyis kyang yang dag par bya ba bzhi po de dag las brtsams nas/nyan thos rnams las nam gyi cha stod dang / nam gyi cha smad la mi nyal bar sbyor ba'i rjes su brtson pa bstan to/ /ji ltar na bstan zhe na/ nyin mo 'chag pa dang / 'dug pa dag gis sgrib par 'gyur ba'i chos rnams las sems yongs su sbyong bar byed cing /mtshan mo'i thun dang po la yang 'chag pa dang 'dug pa dag gis sgrib par 'gyur ba'i chos rnams las sems yongs su sbyong bar byed la/ zhes gang gsungs pa des ni/ re zhig 'di lta ste/ ji srid du mi nyal ba de srid du dge ba'i phyogs mi spong zhing /dge ba'i chos bsgom pa la brtson zhing rgyun du chud pa pa dang / rtag 'grus su byed pa zhes bya ba yang dag par bya ba dang po bstan to/ /yongs su sbyangs nas de'i 'og tu gtsug lag khang nas phyir byung ste/ gtsug lag khang gi phyi rol du rkang pa bkrus nas/gtsug lag khang gi nang du zhugs te/ glo g.yas pas phab nas rkang pa rkang pa'i steng du bzhag ste nyal bar byed do zhes gang gsungs pa des ni 'di lta ste/ dus su nyal bar byed cing dus su ma yin par mi nyal ba zhes bya ba yang dag par bya ba gnyis pa bstan to/ /snang ba'i 'du shes dang /dran pa dang shes bzhin dang / ldang ba kho na'i 'du shes yid la byed bzhin du nyal bar byed pa dang zhes gang gsungs pa des ni 'di lta ste/ nyal na yang kun nas nyon mongs pa med pa'i sems kyis gnyid 'da' bar byed cing / sems kun nas nyon mongs par mi 'gyur ba zhes bya ba yang dag par bya ba gsum pa bstan to//de mtshan mo'i thun tha ma la yang myur ba myur ba kho nar sad par byas nas/ 'chag pa dang 'dug pa dag gis sgrib par 'gyur ba'i chos rnams las sems yongs su sbyong bar byed pa yin te zhes gang gsungs pa des ni/'di lta ste/ dus su sad par 'gyur zhing / ldang ba'i dus las mi yol ba ste zhes yang dag par bya ba bzhi pa bstan to/ /de la snang ba'i 'du shes dang / dran pa dang shes bzhin dang / ldang ba kho na'i 'du shes yid la byed bzhin du nyal bar byed pa dang zhes gang gsungs pa des ni/rgyu gnyis kyis ni kun nas nyon mongs pa med pa'i sems kyis gnyid 'da' bar byed pa yin te/ 'di lta ste/ dran pa dang shes bzhin gyis so/ /yang rgyu gnyis kyis ni dus su de sad par 'gyur zhing / ldang ba'i dus las mi yol bar 'gyur te/'di lta ste/ snang ba'i 'du shes dang / ldang ba'i 'du shes kyis so/ /ji lta zhe na/ de la dran pas ni dge ba'i dmigs pa yongs su bzung ste nyal bar byed la shes bzhin gyis ni dge ba'i dmigs pa de las nyams shing / sems kun nas nyon mongs par gyur pa na/myur ba myur ba kho nar yang dag par rab tu shes par bya ba'i phyir te/ de ltar na rgyu de gnyis kyis ni kun nas nyon mongs pa med pa'i sems kyis nyal bar byed pa yin no/ /de la snang ba'i 'du shes dang / ldang ba kho na'i 'du shes kyis ni gnyid stug por mi nyal ba dang /de'i gnyid kyis kun nas dkris pa de yun ring du 'gro bar mi 'gyur ba'i phyir ro/ /de ltar rgyu de gnyis kyis ni de dus su sad par 'gyur zhing ldang ba'i dus las mi yol bar 'gyur ro/ /de ni nam gyi cha stod dang / /nam gyi cha smad la mi nyal bar sbyor ba'i rjes su brtson pa'i don mdor bsdus pa yin te/rnam par dbye ba rgyas par snga ma gang yin pa dang / don mdor bsdus pa 'di gang yin pa de ni nam gyi cha stod dang / nam gyi cha smad la mi nyal bar sbyor ba'i rjes su brtson pa nyid ces bya'o// //nyan thos kyi sa bam po lnga pa/ shes bzhin du spyod pa nyid gang zhe na/'di ltar 'di na la la 'gro ba dang / ldog pa la shes bzhin du spyod par byed pa dang / chung zad bltas pa dang / rnam par bltas pa dang / bskum pa dang / brkyang ba dang / snam sbyar dang / chos gos dang / lhung bzed 'chang ba dang / zos pa dang / 'thungs pa dang / 'chos pa dang / myangs pa dang / song ba dang / sdod pa dang / 'dug pa dang / nyal ba dang / mi nyal ba dang / smra ba dang / mi smra ba dang / gnyid kyis snyom pa bsang ba la yang shes bzhin du spyod pa yin no/ /de la 'gro ba ni gang / ldog pa ni gang / 'gro ba dang / ldog pa la shes bzhin du spyod pa nyid gang zhe na/ de la 'gro ba ni 'di ltar 'di na la la grong ngam/ grong gzhan nam/ khyim mam/ khyim gzhan nam/ gtsug lag khang ngam/ gtsug lag khang gzhan du phar 'gro ba'o/ /de la ldog pa ni 'di ltar 'di na la la grong ngam/grong gzhan nam/ khyim mam/ khyim gzhan nam/ gtsug lag khang ngam/ gtsug lag khang gzhan nas phyir ldog pa'o/ /de la shes bzhin du spyod pa nyid ni gang gis 'gro ba na yang 'gro'o snyam du yang dag pa kho nar rab tu shes pa dang / ldog pa na yang ldog go snyam du yang dag pa kho nar rab tu shes pa dang / 'dir ni bdag 'gro bar bya ba yin no/ /'dir ni 'gro bar bya ba ma yin no zhes yang dag pa kho nar rab tu shes pa dang / 'dir ni bdag gi 'gro bar bya ba'i dus yin no/ /'di ni 'gro bar bya ba'i dus ma yin no zhes yang dag pa kho nar rab tu shes pa dang /bdag 'gro ba na 'di dang 'di ltar ni 'gro bar bya'o/ /'di dang 'di ltar ni 'gro bar mi bya'o zhes yang dag pa kho nar rab tu shes pa gang yin pa de ni/ de'i shes bzhin zhes bya'o/ /de shes bzhin de dang ldan pas gal te 'gro ba na 'gro'o zhes bya bar yang dag pa kho nar rab tu shes shing /de gang du 'gro bar bya ba der 'gro ba dang / dus su 'gro zhing dus ma yin par mi 'gro ba dang / ji ltar 'gro bar bya ba'i spyod yul dang / spyod pa dang / cho ga dang / spyod lam brtags pas de lta bus de ltar 'gro bar byed pa gang yin pa de ni de'i shes bzhin du spyod pa nyid ces bya'o//de sngar yongs su bstan pa'i gnas rnams su 'gro ba dang ldog pa dang / blo sngon du ma btang ba dang / brtsal ba sngon du ma btang ba dang / 'dun pa sngon du ma btang bar bar ma dor mig gis gzugs rnams mthong ba gang yin pa de ni chung zad bltas pa zhes bya'o//de dag tu 'gro ba dang / ldog pa na blo sngon du btang ba dang / brtsal ba sngon du btang ba dang / 'dun pa sngon du btang ste/ mig gis 'di lta ste/ rgyal po dag gam/ blon po chen po dag gam/ grong rdal gyi mi dag gam/ ljongs kyi mi dag gam/ bram ze dag gam/ khyim bdag dag gam/ phyug po dag gam/ tshong dpon dag gam/ ded dpon dag gam/ de las gzhan pa'i phyi rol gyi khang khyim dag gam/ yang tog dag gam/ gnas khang dag gam/ khang bzangs dag gam/ bu shu'i steng dag gam gzhan yang 'jig rten gyi sna tshogs kyi gzugs dag mthong ba gang yin pa de ni rnam par bltas pa zhes bya'o//cung zad bltas pa'am / rnam par bltas pa dag rang gi mtshan nyid kyi sgo nas yang dag pa kho nar rab tu shes pa dang / cung zad blta bar bya ba gang yin pa dang rnam par blta bar bya ba gang yin pa de yang yang dag pa kho nar rab tu shes pa dang /gang gi tshe cung zad blta bar bya ba dang / gang gi tshe rnam par blta bar bya ba de yang yang dag pa kho nar rab tu shes pa dang / ji ltar cung zad blta bar bya ba dang / ji ltar rnam par blta bar bya ba de yang / yang dag pa kho nar rab tu shes pa gang yin pa de ni de'i shes bzhin zhes bya'o/ /de shes bzhin de dang ldan pas/ cung zad lta bar byed pa dang / rnam par lta bar byed pa na/ gal te cung zad lta bar byed pa dang / rnam par lta bar byed do zhes yang dag pa kho nar rab tu shes shing / cung zad blta bar bya ba gang yin pa dang / rnam par blta bar bya ba gang yin pa de la cung zad lta bar byed cing / rnam par lta bar byed pa dang / gang gi tshe cung zad blta bar bya ba dang / rnam par blta bar bya ba de'i tshe cung zad lta bar byed cing / rnam par lta bar byed pa dang / ji ltar cung zad blta bar bya ba dang /rnam par blta bar bya ba de ltar cung zad lta bar byed cing / rnam par lta bar byed pa gang yin pa de ni 'di lta ste/ cung zad bltas pa dang / rnam par bltas pa la de'i shes bzhin du spyod pa nyid ces bya'o/ /de la bskum pa ni gang / brkyang ba ni gang / bskum pa dang / brkyang ba la shes bzhin du spyod pa nyid ni gang zhe na/ de de ltar 'gro ba sngon du btang ba dang / ldog pa sngon du btang ste/ cung zad blta ba dang / rnam par blta ba'i tshe/ rkang pa dag skum par byed pa'am / rkyong bar byed pa'am/ lag pa dag skum par byed pa'am/ rkyong bar byed pa'am/ lag pa dag skum par byed pa'am/ rkyong bar byed pa'am/ yan lag dang nying lag gang yang rung ba dag skum par byed pa'am/ rkyong bar byed pa gang yin pa de ni bskum pa dang / brkyang ba zhes bya'o/ /gal te bskum pa dang brkyang ba de dag rang gi mtshan nyid kyi sgo nas yang dag pa kho nar rab tu shes shing /bskum par bya ba gang yin pa dang / brkyang bar bya ba gang yin pa de yang / yang dag pa kho nar rab tu shes pa dang / gang gi tshe bskum par bya ba dang / gang gi tshe brkyang bar bya ba de yang yang dag pa kho nar rab tu shes pa dang / ji ltar bskum par bya ba dang /ji ltar brkyang bar bya ba de yang / yang dag pa kho nar rab tu shes pa gang yin pa de ni de'i shes bzhin zhes bya'o/ /shes bzhin de dang ldan pas skum par byed pa dang / rkyong bar byed pa'i tshe/ gal te skum par byed do/ /rkyong bar byed do zhes yang dag pa kho nar rab tu shes shing /gang bskum par bya ba dang / brkyang bar bya ba de skum par byed cing rkyong bar byed pa dang / gang gi tshe bskum par bya ba dang / brkyang bar bya ba de'i tshe/ skum par byed cing / rkyong bar byed pa dang / ji ltar bskum par bya ba dang / brkyang bar bya ba de ltar skum par byed cing / rkyong bar byed pa gang yin pa de ni/ 'di lta ste/ bskum pa dang / brkyang ba la de'i shes bzhin du spyod pa nyid ces bya'o/ /de la snam sbyar 'chang ba ni gang / chos gos 'chang ba ni gang / lhung bzed 'chang ba ni gang / snam sbyar dang chos gos dang / lhung bzed 'chang ba la shes bzhin du spyod pa nyid ni gang zhe na/de'i chos gos chen po dum bu bdun pa dang / dum bu dgu pa nyis sbyar du btsems pa gang yin pa de ni/ snam sbyar zhes bya'o/ /de bgo zhing yongs su longs spyod pa dang / legs pa kho nar sba ba ni bcang ba zhes bya'o/ /de'i chos gos byin gyis brlabs pa 'bring ngam/chung ngu'am/ gos lhag brtag par 'os pa'am/ brtags zin pa gang yin pa de ni chos gos zhes bya'o/ /de bgo zhing yongs su longs spyad pa dang / legs pa kho nar sba ba ni 'chang ba zhes bya'o/ /de'i zas kyi snod byin gyis brlabs pa lcags las byas pa'am/sa las byas pa gang yin pa de ni lhung bzed ces bya'o/ /de yongs su longs spyod pa dang / legs pa kho nar sba ba ni 'chang ba zhes bya'o/ /gal te snam sbyar dang chos gos dang / lhung bzed 'chang ba de dag rang gi mtshan nyid kyi sgo nas yang dag pa kho nas rab tu shes shing /snam sbyar dang / chos gos dang / lhung bzed 'chang ba rung ba dang / rung ba ma yin pa gang yin pa de yang yang dag pa kho nar rab tu shes pa dang / snam sbyar dang / chos gos dang / lhung bzed 'chang ba gang gi tshe bcang bar bya ba de'i dus kyang yang dag pa kho nar rab tu shes pa dang /ji ltar bcang bar bya ba de yang yang dag pa kho nar rab tu shes pa gang yin pa de ni/ de'i shes bzhin zhes bya'o/ /de shes bzhin de dang ldan pas/ snam sbyar dang / chos gos dang / lhung bzed 'chang ba na/ gal te 'chang ngo zhes yang dag pa kho nar rab tu shes shing /gang bcang bar bya ba de 'chang bar byed pa dang / gang gi tshe bcang bar bya ba de'i tshe 'chang bar byed pa dang / ji ltar bcang bar bya ba de ltar 'chang bar byed pa gang yin pa de ni 'di lta ste/ snam sbyar dang / chos gos dang / lhung bzed 'chang ba la de'i shes bzhin du spyod pa nyid ces bya'o//de la zos pa ni gang / 'thungs pa ni gang / 'chos pa dang myangs pa ni gang / zos pa dang / 'thungs pa dang / 'chos pa dang / myangs pa shes bzhin du spyod pa nyid ni gang zhe na/ zas kyi yongs su longs spyod pa gang ci yang rung ba de dag thams cad ni zos pa zhes bya'o//de yang dbye na rnam pa gnyis te/ 'chos pa dang / myangs pa'o/ /de la 'chos pa gang zhe na/ 'di lta ste/ lde gu dang / snum khur dang / 'bras chan dang / zan dron dang / gzhan yang gang g.yos su byas shing / zas kyi rnam par gyur pa'i bza' ba srog 'dzin par byed pa gang yin pa de ni 'chos ba zhes bya ste/zos pa yang de nyid yin no/ /myangs pa yang gang zhe na/ 'di lta ste/ 'o ma dang / zho dang / mar dang / zhun mar dang / 'bru mar dang / sbrang rtsi dang / bu ram gyi dbu ba dang / sha dang / nya sha dang / sha skam dang / lan tshwa dang /nags tshal gyi shing tog dang / bza' ba'i rnam pa gang yin pa de ni myangs pa zhes bya ste/ zos pa de yang de nyid yin no/ /hwags kyi ro dang / sha kha ra'i ro dang / rtsa ba mo dang / zho ga chu dang / tshwa dang / dar ba dang / tha na chu yang rung ste/ btung bar bya ba gang yin pa de ni 'thungs pa zhes bya'o//gal te zos pa dang / 'thungs pa dang / 'chos pa dang / myangs pa dag rang gi mtshan nyid kyi sgo nas yang dag pa kho nar rab tu shes shing / ji ltar bza' bar bya ba dang / btung bar bya ba dang / bca' bar bya ba dang / myang bar bya ba gang yin pa de yang yang dag pa kho nar rab tu shes pa gang yin pa de ni de'i shes bzhin zhes bya'o//des shes bzhin de dang ldan pas/ za bar byed pa dang / 'thung bar byed pa dang / 'cha' bar byed pa dang / myong bar byed pa na/ gal te za bar byed do/ /'thung bar byed do/ /'cha' bar byed do//myong bar byed do zhes yang dag pa kho nar rab tu shes shing / bza' bar bya ba dang / btung bar bya ba dang / bca' bar bya ba dang / myang bar bya ba gang yin pa des za bar byed cing myong ba'i bar du byed pa dang / gang gi tshe bza' bar bya ba dang / myang ba'i bar du byed pa de'i tshe za bar byed cing /myang ba'i bar du byed pa dang / ji ltar bza' bar bya ba dang / myang ba'i bar du bya ba de ltar za bar byed cing / myong ba'i bar du byed pa gang yin pa de ni/ 'di lta ste/ zos pa dang / 'thungs pa dang / 'chos pa dang / myangs pa la de'i shes bzhin du spyod pa nyid ces bya'o//de la song ba ni gang / sdod pa ni gang / 'dug pa ni gang / nyal ba ni gang / mi nyal ba ni gang / smra ba ni gang / mi smra ba ni gang / gnyid kyis snyom pa bsang ba ni gang / song ba dang / sdod pa dang / 'dug pa dang / nyal ba dang / mi nyal ba dang / smra ba dang / mi smra ba dang / gnyid kyis snyom pa bsang ba la shes bzhin du spyod pa nyid ni gang zhe na/'di ltar 'di na la la 'chags na 'chag pa'am chos mthun pa rnams kyi gan du 'gro ba'am/ lam du zhugs pa gang yin pa de ni song ba zhes bya'o/ /'di ltar 'di na la la 'chags na sdod pa'am chos mthun pa rnams sam/mkhan po rnams dang / slob dpon rnams sam/ bla ma rnams sam/ bla ma lta bu rnams kyi mdun na sdod pa gang yin pa de ni sdod pa zhes bya'o/ /'di ltar 'di na la la khri 'am/ khri'u 'am/ rtswa bting ba'i steng du skyil mo krung bcas te lus drang por bsrangs nas dran pa phyogs par bzhag ste/'dug pa'am / 'dug par byed pa gang yin pa de ni 'dug pa zhes bya'o/ /'di ltar 'di na la la gtsug lag khang gi phyi rol du rkang pa bkrus nas/ gtsug lag khang gi nang du zhugs sam/ dgon pa'am/ shing drung ngam/ khong stong dag tu khri 'am/ khri'u 'am/ rtswa bting ba'i steng du glo g.yas pa phab ste/ rkang pa rkang pa'i steng du bzhag ste/ nyal bar byed pa gang yin pa de ni nyal ba zhes bya'o/ /'di ltar 'di na la la nyin mo 'chag pa dang 'dug pa dag gis sgrib par 'gyur ba'i chos rnams las sems yongs su sbyong bar byed cing /mtshan mo'i thun dang po dang tha ma la yang shes bzhin du byed pa gang yin pa de ni mi nyal ba zhes bya'o/ /'di ltar 'di na la la de ltar mi nyal bar sbyor ba'i rjes su brtson zhing / lung mnos pa'i chos 'di lta ste/ mdo'i sde dang / dbyangs kyis bsnyad pa'i sde dang /lung bstan pa'i sde la sogs pa rgyas par sngar smos pa dag gis lung nod cing / kun chub par byed pa dang / rgyas par kha ton byed pa'i bya bas / kha ton byang bar byed pa dang / gzhan dag la yang rgya cher yang dag par ston par byed pa dang / tshangs pa mtshungs par spyod pa mkhas pa rnams sam/de las gzhan pa khyim na gnas pa rnams dang lhan cig tu 'di lta ste/ brtson 'grus bskyed pa'i yo byad kyi don du dus dus su gtam 'dre bar byed/ phebs par smra bar byed/ so sor kun dga' bar byed pa gang yin pa de ni smra ba zhes bya'o/ /'di ltar 'di na la la gcig pu dben par song ste/ji ltar thos pa dang / ji ltar kun chub par byas pa dang / kha ton byang bar byas pa'i chos rnams kyi don sems par byed/ 'jal bar byed/ nye bar rtog par byed cing nang du yang dag par 'jog par byed de/ sems nang du kho nar 'jog par byed/bsdus te 'jog par byed/ yang dag par 'jog par byed/ nges par 'jog par byed/ nye bar 'jog par byed/ dul bar byed/ zhi bar byed/ nye bar zhi bar byed/ rgyud gcig tu byed/ ting nge 'dzin du byed pa'am/ lhag mthong la rnal 'byor du byed pa gang yin pa de ni mi smra ba zhes bya'o //'di ltar 'di na la la dpyid ka'i dus su nye bar gnas par gyur cing / dpyid ka'i mchog tu yongs su tsha ba'i dus la bab pa'i tshe tsha bas gnod pa dang / chad pa dang / ngal ba skye zhing / dus ma yin par gnyid kyis snyom zhing / nyal 'dod pa nyid gang yin pa de ni gnyid kyis snyom pa zhes bya'o//gal te song ba dang / gnyid kyis snyom pa bsang ba'i bar de dag rang gi mtshan nyid kyi sgo nas yang dag pa kho nar rab tu shes shing / gang du 'gro bar bya ba dang / gang du gnyid kyis snyom pa bsang bar bya ba'i bar de yang yang dag pa kho nar rab tu shes pa dang /gang gi tshe 'gro bar bya ba dang / gang gi tshe gnyid kyis snyom pa bsang bar bya ba'i bar de yang yang dag pa kho nar rab tu shes pa dang / ji ltar 'gro bar bya ba dang / ji ltar gnyid kyis snyom pa bsang bar bya ba'i bar de yang yang dag pa kho nar rab tu shes pa gang yin pa de ni de'i shes bzhin zhes bya'o//de shes bzhin de dang ldan pas/ song ba dang gnyid kyis snyom pa bsang ba'i bar du byed pa na/ gal te song ngo zhes bya ba dang / gnyid kyis snyom pa bsang ngo zhes bya ba'i bar du yang yang dag pa kho nar rab tu shes shing / gang du 'gro bar bya ba dang /gang du gnyid kyis snyom pa bsang bar bya ba'i bar du der 'gro zhing der gnyid kyis snyom pa bsang ba'i bar du byed pa dang / gang gi tshe 'gro ba dang / gang gi tshe gnyid kyis snyom pa bsang ba'i bar du bya ba de'i tshe 'gro zhing de'i tshe gnyid kyis snyom pa bsang ba'i bar du byed pa dang /ji ltar 'gro bar bya ba dang / ji ltar gnyid kyis snyom pa bsang ba'i bar du bya ba de ltar 'gro zhing / de ltar gnyid kyis snyom pa bsang ba'i bar du byed pa gang yin pa de ni/ 'di lta ste/ song ba dang / sdod pa dang / 'dug pa dang / nyal ba dang /mi nyal ba dang / smra ba dang / mi smra ba dang / gnyid kyis snyom pa bsang ba la de'i shes bzhin du spyod pa nyid ces bya'o/ /shes bzhin du spyod pa de'i go rims ni gang / gzhi rnam par dbye ba ni gang zhe na/ 'di ltar 'di na la la grong ngam/ grong rdal gang yang rung ba dag la brten te spyod par byed pa na/de 'di snyam du sems te/ bdag bsod snyoms kyi phyir grong ngam/ grong rdal 'dir 'gro bar bya zhing bsod snyoms brgyus nas kyang phyir gtsug lag khang du ldog par bya ste/ grong ngam/ grong rdal 'di na gang dag tu bdag 'gro bar bya ba ma yin pa'i khyim dag kyang yod de/de dag kyang gang zhe na/ 'di lta ste/ shan pa'i gnas dang / smad 'tshong ma'i gnas dang / chang 'tshong gi gnas dang / rgyal po'i pho brang dang / gdol pa'i khyim dang / gzhan yang zhe 'gras par 'gyur ba dang / phyir bzlog tu mi rung ba'i khyim gang yin pa dag go//gang dag tu bdag 'gro bar bya ba'i khyim dag kyang yod de/ de dag kyang gang zhe na/ 'di lta ste/ rgyal rigs shing sA la chen po lta bu rnams kyi khyim dag dang / bram ze'i rigs shing sA la chen po lta bu rnams kyi khyim dag dang / khyim bdag gi rigs shing sA la chen po lta bu rnams kyi khyim dag dang /grong mi rnams kyi khyim dag dang / ljongs kyi mi rnams kyi khyim dag dang / phyug po rnams kyi khyim dag dang / tshong dpon rnams kyi khyim dag dang / ded dpon rnams kyi khyim dag ste/ gang dag tu bdag 'gro bar bya ba'i khyim de dag tu yang ha cang phyi dror gyur na mi 'gro bar bya'o//ha cang nam sros na ma yin/ sbyin pa po dang / sbyin bdag bya bas brel ba dag tu ma yin/ rtsed mo dang dga' ba dang / rgyan po'i sbyor ba la rjes su zhugs pa dag tu ma yin/ grong pa'i chos kyi phyir zhugs pa dag tu ma yin/ 'khrugs pa dag tu ma yin te/ 'gro ba na ci nas kyang bdag glang po che 'khrul pa dang 'phrad par mi 'gyur ba dang / shing rta dang 'khrul pa ma yin pa dang / rta dmu rgod dang ma yin pa dang / ba brdung kus ma dang ma yin pa dang / khyi za ba dang ma yin pa dang / tsher thags stug pos mi bshud pa dang /ngam grog dang / gcong rong dang / g.yang sar yang g.yang du mi ltung ba dang / ljan ljin gyi nang du mi song ba dang / mi gtsang ba'i khung du mi song ba dang / zla ba ltar khyim rnams su 'gro bar bya zhing ngo tsha dang ldan pa dang / spyi rtol med pa dang / lus dben pa dang / sems dben pa dang / rnyed pa 'dod pa ma yin pa dang / bkur sti 'dod pa ma yin pa dang / ji ltar rang gis thob na dga' zhing yid bde bar 'gyur ba de bzhin du gzhan gyis thob na yang dga' zhing yid bde bar 'gyur ba dang / bdag la mi bstod pa dang / gzhan la mi smod pa dang / snying rje'i sems dang ldan pa dang / snying brtse ba'i sems dang ldan pa de ltar 'gro bar bya zhing / rab tu byung bas gzhan gyi khyim dag tu bdag la gzhan gyis ster bar 'gyur gyi/ mi ster bar mi 'gyur ba dang / rgyas par snga ma bzhin du myur ba yin gyi/ 'gyangs te ma yin pa'i bar de lta bu lta ga la rnyed snyam pa dang /song nas kyang bdag gis blang ba'i tshod ran par bya zhing / rnyed pa'i phyir ma yin pa dang / tshul 'chos par mi bya zhing kha gsag dang / gzhog slongs dang / thob kyis 'jal ba dang / rnyed pas rnyed par byed 'dod par mi bya ba dang / rnyed pa de yang chags pa med pa dang /zhen pa med pa dang / 'chums pa med pa dang / mdud pa bor ba med pa dang / brgyal ba med pa dang / lhag par chags pa med pa dang / lhag par chags par gyur pa med pas yongs su longs spyad par bya'o snyam pa/ de lta bu'i sems kyis kyang 'gro bar bya'o snyam pa dang /der 'gro ba dang / ldog pa'i tshe gzugs gang dag blta bar bya ba de dag las kyang / kha cig la ni blta bar bya/ kha cig la ni blta bar mi bya'o/ /de la gang dag la blta bar mi bya ba de dag la ni dbang po legs par bsdams te/ mig gis mi brtag par bya'o//gang dag la blta bar bya ba de dag la ni dran pa nye bar gzhag ste/ mig gis brtag par bya ba'o / /de dag la gzugs ji lta bu dag blta bar mi bya ba yin zhe na 'di lta ste / zlos gar mkhan dang / bro gar mkhan dang / bzhad gad mkhan dang / 'jo sgeg mkhan dang / gzhan yang rol mo'i rnam pa bro gar glu dang rol mo'i sgra la 'jug pa gang yin pa dag dang / de bzhin du bud med rnams dang / bud med gzhon nu kha dog bzang ba chags par 'gyur ba khyad par can dag dang / gzugs gang dag mthong na tshangs par spyod pa la gnod pa dang /tshangs par spyod pa'i bar chad dang / sdig pa mi dge ba'i rnam par rtog pa kun 'byung bar 'gyur ba/ de lta bu'i gzugs de dag ni chung zad blta bar yang mi bya/ rnam par blta bar yang mi bya ba yin no/ /gzugs ci lta bu dag la blta bar bya ba yin zhe na/'di lta ste/ rgas pa dang / rnyis pa dang / 'khogs pa dang / lus dbugs ngar ngar pos brdzangs pa dang / lus mdun du dbyibs sku ba dang / lus 'khar ba la rten cing 'dar ba dang / na ba dang / sdug bsngal ba dang / nad tshabs che ba dang /rkang pa skrangs pa dang / lag pa skrangs pa dang / lto ba skrangs pa dang / gdong skrangs pa dang / pags pa'i mdog skya ba dang / shu ba can dang / khyi rngo can dang / mdze can dang / snad pa dang / lus la rma yod pa dang / lus smin pa dang / dbang po nyams pa dang /shi ba'i dus byas pa dang / shi nas zhag gcig lon pa dang / shi nas zhag gnyis lon pa dang / shi nas zhag bdun lon pa dang / khwa ngag dang / chun lag rnams kyis btogs pa dang / bya rgod dag dang / khyi dag dang / wa dag dang / dud 'gro'i skye gnas su skyes pa'i srog chags sna tshogs dag gis bza' ba dang /khri'i steng du bzhag ste/ steng du bla re bres la/ mdun dang rgyab na skye bo phal po che skra bshig cing thal bas gtor la du bar byed/ cho nges 'debs par byed cing de bzhin du mya ngan skyes pa dang / sdug bsngal skyes pa dang /smre sngags 'don pa skyes pa dang / yid mi bde ba skyes pa dang / la zug pa skyes pa dag gis phyir 'byin par byed pa de lta bu dag dang / gzhan yang de lta bu dang mthun pa'i gzugs gang dag tshangs par spyod pa la phan pa dang / tshangs par spyod pa la bar chad med pa dang /dge ba'i rnam par rtog pa kun 'byung bar gyur pa de dag ni bdag gis blta bar bya ba yin no snyam pa dang / lus mi bsgyur ba dang / lag pa mi kyog pa dang / mgo mi bsgyur ba dang / rta skad mi dbyung ba dang / lag pa mi sbrel ba dang / lag pa mi sprad par 'gro bar bya zhing /ma bsgo bar stan la 'dug par mi bya ba dang / stan la ma brtags par ma yin pa dang / lus thams cad kyi ljid kyis mi dbab pa dang / rkang pa mi bsnol ba dang / brla mi bsnol ba dang / rkang pa ha cang mi dgug pa dang / rkang pa ha cang mi gdangs par stan la 'dug par bya'o snyam pa dang /mgo mi g.yogs pa dang / phrag pa la mi gzar ba dang / mdun mi brdze ba dang / phrag pa gnyi ga la mi gzar bar chos gos zlum por bgo bar bya zhing / ha cang rtsengs pa ma yin pa dang / ha cang 'jol ba ma yin pa dang / glang po che'i sna ltar nar ba ma yin pa dang / ta la'i lo ma ltar bltabs pa ma yin pa dang / sbrul mgo'i gdengs ka ltar ma yin pa dang / 'bru'i phur ma ltar ma yin par chos gos bgo bar bya'o snyam pa dang / bza' ba dang / bca' ba ma 'ongs par lhung bzed mi bzed par bya zhing /bza' ba dang bca' ba'i steng du gzung bar mi bya ba dang / 'og gzhi med pa'i sa phyogs dang / gad ka dang g.yang sar lhung bzed mi gzhag par bya'o snyam pa dang / bsod snyoms mthar chags kyis yongs su longs spyod par bya zhing / 'bras chan gyis tshod ma mi dgab pa dang /tshod mas 'bras chan mi dgab par bya ba dang / 'phya smod med pa dang / 'phya smod la rjes su zhugs pa med pas yongs su longs spyad par bya ba dang / kham ha cang chen po yang ma yin/ ha cang chung ba yang ma yin par kham ran par bza' bar bya ba dang /lag pa mi bldags pa dang / lhung bzed mi byog pa dang / lag pa mi sbrug pa dang / lhung bzed mi bskyam pa dang / kham 'phror mi bcad par bsod snyoms yongs su longs spyad par bya'o snyam pa dang / bdag khyim de dag nas ldog cing phyir 'ongs te/gtsug lag khang du song nas kyang nyin mo dang mtshan mo yid mi gcugs pa dang / skabs ma phye ba dang / ma bskos pa gzhan dag gi ma yin pa/ gang zag so so'i 'chags sar lus mi ngal ba dang / lus mi dub pa dang / g.yeng ba tshar gcod pa dang / dge ba'i phyogs la brtson pa dang / mi dge ba yid la byed pa dang mi ldan pas sems kyi dbang po rnams nang du bsdus pa dang / yid phyi rol du ma song ba dang / ha cang ring ba ma yin pa dang / ha cang brtad pa ma yin pa dang / gcig tu 'gro ba dang / ldog pa la sbyor ba yin par skabs skabs su 'gro ba dang /skabs skabs su sdod cing bcag par bya'o snyam pa dang / de bzhin du yid mi gcugs pa dang / skabs ma phye ba dang / ma bskos pa gzhan dag gis ma yin par rang gi gtsug lag khang ngam/ /rang gi khang khyim mam/ rang gi skab mo'am/ gang zag so so'i gnas su bskos pa'am/ de bzhin du dgon pa'am/ shing drung ngam/ khang stong du khri'am/ khri'u'am/ rtswa bting ba'i steng du skyil mo krung bcas te/ lus drang por bsrangs nas/ dran pa phyogs par bzhag ste 'dug par bya'o snyam pa dang /mtshan mo'i thun par ma la nyal bar bya zhing / nyal ba yang 'di ltar snang ba'i 'du shes dang / dran pa dang / shes bzhin dang / ldang ba kho na'i 'du shes yid la byed bzhin du nyal bar bya'o snyam pa dang / nyin mo dang / mtshan mo'i thun dang po la mi nyal bar dge ba'i phyogs kyis 'da' bar bya'o snyam pa dang /mtshan mo'i thun tha ma la yang myur ba myur ba kho nar sad par byas nas/ smra ba kha ton gyi las sam/ spong bal nang du yang dag par 'jog gam/ chos bsam pa la brtson par byas te/ gang dag mngon par shes pa'i phyir 'jug pa ma yin pa dang /rdzogs par byang chub pa'i phyir ma yin pa dang / yongs su mya ngan las 'da' ba'i phyir ma yin pa dang / 'jig rten pa la grags pa'i gsang tshig dang / yig 'bru sna tshogs dang / tshig sna tshogs dang / yi ge sna tshogs dang / don dang mi ldan pa dag rnam par spang bar bya zhing de bzhin gshegs pas gsungs pa'i chos 'dul ba zab pa zab par snang ba dang /stong pa nyid dang ldan pa/ rkyen 'di pa nyid de'i rten cing 'brel par 'byung ba dang rjes su mthun pa gang yin pa de dag gus par byas te/ gzung bar bya zhing / dam po dang brtan par yang bya'o//legs par bzung nas kyang rnyed pa dang / bkur sti'i phyir ma yin gyi/ nan tan gyis bsgrubs pas chud mi za bar bya zhing chos de dag kyang kha ton shin tu byang bar bya ba dang / 'du 'dzi'i gtam dang las la dga' ba dang / smra ba la dga' bas 'da' bar mi bya bar dus dus su dran pa nye bar gzhag ste/tshangs pa mtshungs par spyod pa mkhas pa rnams dang gtam 'dre bar bya/ phebs par smra bar bya/ so sor kun dga' bar bya zhing skyon 'dogs pa med pa'i sems kyis yongs su 'dri ba'i rang bzhin can dang / dge ba gang yin zhes btsal ba dang /gzhan dag dang chos kyi gtam smra bar 'dod pas ran par smra ba dang / rigs par smra ba dang / gnas par smra ba dang / zhi bar smra bas gzhan dag las chos kyi gtam smra bas 'dod par bya'o snyam pa dang / bdag gis mi smra bas sdig pa mi dge ba'i rnam par rtog pa dag rnam par brtag par mi bya zhing /tshul bzhin ma yin pa'i chos sems pa la mi sbyor bar bya ba dang / mngon pa'i nga rgyal can du mi bya ba dang / khyad par rtogs pa cung zad tsam dang / ngan ngon tsam gyis bar ma dor sgyid lug par mi bya ba dang / bsam par mi bya ba'i gnas rnams yongs su spang bar bya ba dang /dus dus su zhi gnas dang / lhag mthong la brtson par bya ba dang / spong ba la dga' ba dang / rgyun du chud par bya ba la brtson pa dang / gus par bya ba la brtson par bya'o snyam pa dang / bdag dpyid ka'i tsha bas gdungs pa dang / de ltar brtson pa dang /'bad pa dang / rtsol ba'am/ rung ba'i bya ba cung zad byed pas yongs su ngal ba'i rgyu dang / yongs su ngal ba'i gzhi las dus ma yin par gnyid kyis snyom pa skye bar gyur na/ de'i don du ci nas kyang myur ba myur ba kho nar de med par 'gyur zhing dus yun ring por dge ba'i phyogs nyams par mi bya ba dang /dge ba'i phyogs kyi bar chad du mi 'gyur bar bya ba'i phyir / yud tsam zhig gnyid bsang bar bya ste/ der yang bdag gis sgo bcad pa'am/ dge slong yod na ltar gzhug pa'am/ 'dul ba'i bsrung ba dang / 'dul ba'i cho gas chos gos kyis bcings la/gnas dben par 'dug ste/ gnyid bsang bar bya'o snyam du sems pa yin te/ des na de'i gnyid kyis snyom pa rnam pa thams cad kyi thams cad du med par 'gyur ro/ /des ni 'di lta ste/ rgyu ba dang spyod lam las brtsams nas/ shes bzhin du spyod pa nyid kyi go rims yin te/de khyim du 'gro ba na dang po kho nar de ltar tshul bzhin yid la byed pa dang / shes rab dang ldan pa'i sems mngon par 'du byed pa gang yin pa de ni de'i shes bzhin zhes bya'o/ /de ltar shes bzhin dang ldan pas rgyu ba dang / sbyong ba thams cad mi nyung bar sgrub par byed pa gang yin pa de ni shes bzhin du spyod pa nyid ces bya'o//de la 'gro ba dang / ldog pa dang / chung zad bltas pa dang / rnam par bltas pa dang / bskum pa dang / brkyang ba dang / snam sbyar dang / chos gos dang / lhung bzed bcad ba gang yin pa dang /zos pa dang / 'thungs pa dang / 'chos pa dang / myangs pa gang yin pa de la shes bzhin du spyod pa gang yin pa de ni/ grong du rgyu ba dang ldan pa la shes bzhin du spyod pa nyid ces bya'o/ /de la song ba dang / sdod pa dang / 'dug pa dang / nyal ba dang /mi nyal ba dang / smra ba dang / mi smra ba gang yin pa dang / gnyid kyis snyom pa bsang ba gang yin pa de la shes bzhin du spyod pa gang yin pa de ni gtsug lag khang na spyod pa dang ldan pa la shes bzhin du spyod pa nyid ces bya ste/ de ni re zhig shes bzhin du spyod pa nyid kyi rnam par dbye ba rgyas pa yin par rig par bya'o//don mdor bsdu ba gang zhe na/ rgyu ba dang ldan pa'i las rnam pa lnga dang / spyod pa dang ldan pa'i las rnam pa lnga dang / rgyu ba dang ldan pa dang / spyod pa dang ldan pa'i las la shes bzhin du spyod pa rnam pa bzhi gang yin pa de ni don mdor bsdu ba zhes bya'o//de la rgyu ba dang ldan pa'i las rnam pa lnga gang zhe na/ 'di lta ste/ lus kyi las dang / mig gi las dang / yan lag dang / nying lag thams cad kyi las dang / chos gos dang / lhung bzed kyi las dang / bsod snyoms kyi las te/ de ni rgyu ba dang ldan pa'i las rnam pa lnga zhes bya'o/ /de la re zhig ldog pa dang 'gro ba zhes bya ba gang gsungs pa des ni rgyu ba dang ldan pa'i lus kyi las bstan to/ /chung zad bltas pa dang / rnam par bltas pa zhes gang gsungs pa des ni rgyu ba dang ldan pa'i mig gi las bstan to/ / bskum pa dang /brkyang ba zhes bya ba gang gsungs pa des ni rgyu ba dang ldan pa'i yan lag dang nying lag thams cad kyi las bstan to/ /snam sbyar dang / chos gos dang / lhung bzed bcang ba zhes gang gsungs pa des ni rgyu ba dang ldan pa'i chos gos dang / lhung bzed kyi las bstan to/ / zos pa dang / 'thungs pa dang / 'chos pa dang / myangs pa zhes gang gsungs pa des ni rgyu ba dang ldan pa'i bsod snyoms kyi las bstan to/ /spyod pa dang ldan pa'i las rnam pa lnga gang zhe na/ 'di lta ste/ lus kyi las dang / ngag gi las dang / yid kyi las dang / nyin mo'i las dang /mtshan mo'i las te / de ni spyod pa dang ldan pa'i las rnam pa lnga zhes bya'o/ /de la re zhig song ba dang / sdod pa dang / 'dug pa zhes gang gsungs pa des ni spyod pa dang ldan pa'i lus kyi las bstan to/ /smra ba zhes gang gsungs pa des ni spyod pa dang ldan pa'i ngag gi las bstan to//nyal ba dang / mi smra ba dang / gnyid kyis snyom pa bsang ba zhes gang gsungs pa des ni spyod pa dang ldan pa'i yid kyi las bstan to/ /mi nyal ba zhes gang gsungs pa des ni spyod pa dang ldan pa'i nyin mo'i las dang / mtshan mo'i las dang / lus kyi las dang / ngag gi las kyang bstan to/ /nyal ba zhes gang gsungs pa des ni spyod pa dang ldan pa'i mtshan mo'i las dang yid kyi las kho na yang bstan te/ de ni spyod pa dang ldan pa'i las rnam pa lnga yin par rig par bya'o/ /de la rgyu ba dang ldan pa dang /spyod pa dang ldan pa'i las la shes bzhin du spyod pa rnam pa bzhi gang zhe na/ dang po kho nar las 'di lta bu zhig brtsam mo zhes rgyu ba'i las sam/ spyod pa'i las shig rtsom par byed pa na/ las de nyid la dran pa nye bar gzhag cing / bag yod par spyod la/ las de dran pas yongs su zin cing bag yod pas kyang yongs su zin pas/ gzhi gang la/ phyogs gang du/ dus gang gi tshe/ ji snyed cig /rnam pa gang gis/ ji ltar brtag par bya ba'i gzhi de la/ phyogs der dus de'i tshe/ de snyed cig /rnam pa des/ de ltar rtog par byed cing rab tu shes par byed pa ste/ de ltar rtog par byed cing / rab tu shes par byed pa ni tshe 'di nyid la kha na ma tho ba med pa dang / ltung ba med pa dang / 'gyod pa med pa dang / yid la gcags pa med pa dang /rjes su gdung ba med par 'gyur ba dang / tshe phyi ma la yang kha na ma tho ba med cing lus zhig ste/ shi ba'i 'og tu ngan song ngan 'gro log par ltung ba sems can dmyal ba rnams su skye bar mi 'gyur ba dang / ma thob pa thob par bya ba'i tshogs kyi rgyu byas par 'gyur ba yin no/ / de ni shes bzhin du spyod pa nyid kyi don mdor bsdus pa yin te/ rnam par dbye ba rgyas par snga ma gang yin pa dang / don mdor bsdu ba gang yin pa de ni shes bzhin du spyod pa nyid ces bya'o/ /de la dge ba'i bshes gnyen gang zhe na/ rgyu rnam pa brgyud kyis rnam pa thams cad yongs su rdzogs pa'i dge ba'i bshes gnyen yin par rig par bya'o//brgyad gang zhe na/ 'di ltar 'di na la la dang po kho nar tshul khrims la gnas pa yin pa dang / mang du thos pa yin pa dang / rtog pa dang ldan pa yin pa dang / rjes su snying brtse ba dang ldan pa yin pa dang /yid yongs su mi skyo ba yin pa dang / bzod pa dang ldan pa yin pa dang / mi 'jigs pa dang ldan pa yin pa dang / tshig gi bya ba dang ldan pa yin no/ /de la ji ltar na tshul khrims la gnas pa yin zhe na/ rgyas par snga ma bzhin du tshul khrims dang ldan par gnas pa dang /so sor thar pa'i sdom pas bsdams pa dang / dge sbyong gi lam 'dod pa dang / bram ze'i lam 'dod pa dang / bdag dul bar bya ba dang / bdag zhi bar bya ba dang / bdag yongs su mya ngan las 'da' bar bya ba'i phyir zhugs pa yin te/ de ltar na tshul khrims la gnas pa yin no//ji ltar na mang du thos pa yin zhe na/ des chos tshangs par spyod pa dang / thog mar dge ba/ bar du dge ba/ tha mar dge ba/ don bzang po/ /tshig 'bru bzang po/ /ma 'dres pa/ yongs su rdzogs pa/ yongs su dag pa/ yongs su byang ba gang dag yin pa de dag mngon par brjod pas mngon par rjod par byed pa dang / de lta bu'i chos chos mang po dag legs par bzung zhing bstan par byas pa dang / kha ton byas pa dang / yid kyis brtags pa dang / mthong bas shin tu rtogs par byas pa yin te/ de ltar na mang du thos pa yin no/ /ji ltar na rtog pa dang ldan pa yin zhe na/ mi rtag pa'i 'du shes dang / mi rtag pa la sdug bsngal ba'i 'du shes dang / sdug bsngal ba la bdag med pa'i 'du shes dang / zas la mi mthun pa'i 'du shes dang / 'jig rten thams cad la mngon par mi dga' ba'i 'du shes dang /nyes dmigs kyi 'du shes dang / spong ba'i 'du shes dang / 'dod chags dang bral ba'i 'du shes dang / 'gog pa'i 'du shes dang / 'chi ba'i 'du shes dang / mi sdug pa'i 'du shes dang / rnam par bsdos pa'i 'du shes dang /rnam par rnags pa'i 'du shes dang / rnam par 'bus gzhig pa'i 'du shes dang / rnam par bam pa'i 'du shes dang / rnam par zos pa'i 'du shes dang / rnam par dmar ba'i 'du shes dang / rnam par 'thor ba'i 'du shes dang / rus gong gi 'du shes dang /stong pa nyid la so sor rtog pa'i 'du shes thob par gyur cing / bsam gtan dang po dang / gnyis pa dang / gsum pa dang / bzhi pa dang / nam mkha' mtha' yas skye mched dang / rnam shes mtha' yas skye mched dang /ci yang med pa'i skye mched dang / 'du shes med 'du shes med min skye mched dang / byams pa dang / snying rje dang / dga' ba dang / btang snyoms dang / rgyun tu zhugs pa'i 'bras bu dang / lan cig phyir 'ong ba'i 'bras bu dang / phyir mi 'ong ba'i 'bras bu dang / rdzu 'phrul gyi yul shes pa dang / sngon gyi gnas rjes su dran pa dang / lha'i rna ba dang / 'chi 'pho ba dang / skye ba shes pa dang / sems kyi rnam grangs shes pa dang / rnam par thang ba brgyad bsgom pa'i dgra bcom pa nyid kyang thob par 'gyur la/ gzhan dag la yang cho 'phrul gsum po rdzu 'phrul gyi cho 'phrul dang /kun brjod pa'i cho 'phrul dang / rjes su bstan pa'i cho 'phrul dag gis 'doms pa'i mthu yod cing nus pa yin te/ de ltar na rtog pa dang ldan pa yin no/ /ji ltar na rjes su snying brtse ba dang ldan pa yin zhe na/ gzhan dag la snying rje ba dang ldan zhing /snying brtse bar zhugs pa dang / don du 'dod pa dang / phan par 'dod pa dang / bde bar 'dod pa dang / bde ba la reg par 'dod pa dang / grub pa dang bde bar 'dod pa yin te/ de ltar na rjes su snying brtse ba dang ldan pa yin no/ /ji ltar na yid yongs su mi skyo ba yin zhe na/yang dag par ston par byed pa dang / yang dag par 'dzin du 'jug par byed pa dang / yang dag par gzengs stod par byed pa dang / yang dag par rab tu dga' bar byed pa dang / 'khor bzhi po dag la chos ston pas ngal ba med pa dang / mkhas pa dang / le lo med pa dang / sgrub phod pa dang / brtson 'grus brtsams pa'i rang bzhin can yin te/ de ltar na yid yongs su mi skyo ba yin no/ /ji ltar na bzod pa dang ldan pa yin zhe na/ gshe yang phyir mi gshe ba dang / khros kyang phyir mi khro ba dang / brdegs kyang phyir mi brdeg pa dang / mtshung brus kyang phyir mtshang mi 'dru ba dang / brdung ba dang / yang dang yang du brdung ba dang / bzod pa dang / bcings pa dang / go rar bcug pa dang / btsog pa dang / smad pa dang / bsdigs pa dang / bcad pa rab tu dam po dag la yang bdag nyid kyi nyes pa yin par sems shing /las kyi rnam par smin pa'i rjes su 'jug par byed la/ gzhan dag la 'khrug par mi byed cing / khon du 'dzin par mi byed pa dang / brnyas pa dang / mi snyan par brjod pa dang / rnam par smad na yang / rnam par 'gyur ba med cing / phan pa 'ba' zhig tu sems pa dang / grang ba dang / tsha ba dang / bkres pa dang / skom pa dang / sha sbrang dang / sbrang bu mchu rings pa dang / rlung dang / nyi ma dang / sdig sbrul gyi reg pa rnams dang / gzhan dag las ngan du brjod pa dang /ngan pa ma 'ongs pa'i tshig gi lam dag bzod pa dang / lus las tshor ba sdug bsngal mi bzad pa/ rtsub pa/ tsha ba/ yid du mi 'ong ba srog 'phrog par byed pa skyes pa dag kyang bzod cing / dang du len pa'i rang bzhin can yin te/ de ltar na bzod pa dang ldan pa yin no//ji ltar na mi 'jigs pa dang ldan pa yin zhe na/ sems kun tu zhum pa med pa dang / skad 'dar 'dar po med pa dang / brjed pa med pa'i spobs pas 'khor rnams la chos ston par byed pa dang / 'jigs pa'i rgyu dang / 'jigs pa'i gzhi de la skrag pa mi 'byung mi skye zhing /mchan khung dang / spu'i khung bu dag nas kyang rdul 'byung bar mi 'gyur ba yin te/ de ltar na mi 'jigs pa dang ldan pa yin no/ /ji ltar na tshig gi bya ba dang ldan pa yin zhe na/ 'khor du grags pa dang / snyan cing 'jebs pa dang / rnam par gsal ba dang /rnam par rig par bya ba dang / mnyan par 'os pa dang / mi mthun pa med pa dang / rten pa med pa dang / phyir mi zlogs pa'i tshig dang ldan pa yin te/ de ltar na tshig gi bya ba dang ldan zhing tshig dge ba yin no/ /de rgyu brgyad po de dag dang ldan pas na skul bar byed pa dang / dran par byed pa dang / 'doms par byed pa dang / rjes su ston par byed pa dang / chos ston par byed pa yin no/ /de la ji ltar na skul bar byed pa yin zhe na/ 'di lta ste/ lhag pa'i tshul khrims la tshul khrims nyams pa dang / lhag pa'i cho ga la cho ga nyams pas mthong ba dang /thos pa dang / dogs pa'i sgo nas bden pas yin gyi mi bden pas ma yin pa dang / dus su yin gyi dus su ma yin par ma yin pa dang / don dang ldan pas yin gyi don dang mi ldan pas ma yin pa dang / tshig 'jam pos yin gyi rtsub mos ma yin pa dang /mdza' bshes kyi dngos pos yin gyi zhe sdang gi skabs kyis ma yin par skul bar byed pa yin gyi / de ltar na skul bar byed pa yin no/ /ji ltar na dran par byed pa yin zhe na/ ltung ba dang / chos dang / don dran par bya ba yin te/ ji ltar na ltung ba dran par byed pa yin zhe na/'di lta ste/ ltung ba byung ba mi dran na/ de la tshe dang ldan pa la yul che ge mo zhig tu gzhi mang ge mo zhig la/ dus ga ge mo zhig gi tshe ltung ba 'di dang 'di lta bu zhig byung ngo zhes dran par byed pa yin te/ de ltar na ltung ba dran par byed pa yin no/ /ji ltar na chos dran par byed pa yin zhe na/'di ltar rgyas par snga ma bzhin du/ 'di lta ste/ mdo'i sde dang / dbyangs kyis bsnyad pa'i sde dang / lung bstan pa'i sde'i chos nyan cing rjes su bzung ba rnams gcig pus mi dran nam/ dran par 'dod pa las mi dran na de la dran par byed pa'am/ dran pa brjed pa phyir dran par bya ba dang / kun dri ba dang / yongs su dri ba rjes su sbyin par byed pa yin te/ de ltar na chos dran par byed pa yin no/ /ji ltar na don dran par byed pa yin zhe na/ 'di lta ste/ don thos pa brjed na/ de la dran par byed cing / yang dang yang du sad par byed/gsal bar byed/ ston par byed/ yang dag par ston par byed pa dang / dge ba don dang ldan pa tshangs par spyod pa dang ldan pa byas nas yun ring du lon pa dang / smras nas yun ring du lon pa gang yin pa de dag kyang dran par byed pa yin te/ de ltar na dran par byed pa yin no//ji ltar na 'doms par byed pa yin zhe na/ rab tu dben pa dang / nang du yang dag 'jog dang / rnal 'byor dang / yid la byed pa dang / zhi gnas dang / lhag mthong la dus dus su rjes su mthun pa'i gdams ngag sbyin par byed pa dang / dus dus su de dang ldan pa'i gtam zer te/'di lta ste/ sems kyi sgrib pa spong ba dang mthun par 'gyur ba'i gtam mam/ tshul khrims kyi gtam mam/ ting nge 'dzin gyi gtam mam/ shes rab kyi gtam mam/ rnam par grol ba'i gtam mam/ ye shes mthong ba'i gtam mam/ 'dod pa chung ba'i gtam mam/ chog shes pa'i gtam mam/ spong ba'i gtam mam/ 'dod chags dang bral ba'i gtam mam/ 'gog pa'i gtam mam/ mi stsogs pa'i gtam mam/ 'du 'dzi med pa'i gtam mam/ rkyen 'di pa nyid kyi rten cing 'brel par 'byung ba dang rjes su mthun pa'i gtam zer ba yin te/de ltar na 'doms par byed pa yin no/ /ji ltar na rjes su ston par byed pa yin zhe na/ ston pa'i bstan pa'i chos 'dul bas yang dag par rjes su ston par byed pa dang / mkhan po'am/ slob dpon nam/ chos mthun pa'i bla ma'am/bla ma lta bur gyur pas rtsod pa gang yang rung ba zhig byung zhing 'das par rig nas/ de la dus dus su smod par byed/ chad pas gcod par byed/ spong bar byed pa dang / yang chos dang mthun pas longs spyod mnyam par blon gdab pa 'dzin du 'jug cing sdud par byed pa dang /bya ba dang bya ba ma yin pa lhag par spyad par bya ba dang / lhag par spyad par mi bya ba'i phyir / lhag par spyad pa dang / lhag par ma spyad pa yang ston cing / rjes su ston par byed pa yin te/ de ltar na rjes su ston par byed pa yin no/ /ji ltar na chos ston par byed pa yin zhe na/sems can yongs su smin par bya ba dang / sems can rnam par byang bar bya ba dang / dam pa'i chos yun ring du gnas par bya ba'i phyir dus dus su sngon gyi dus su brjod par bya ba'i gtam 'di lta ste/ sbyin pa'i gtam mam/ tshul khrims kyi gtam dang /mtho ris kyi gtam dang / 'dod pa dag gi ro myong ba'i nyes dmigs las/ nges par 'byung bar 'gyur ba rnam par byang ba'i phyogs kyi chos rnams rgya cher yang dag par rab tu ston par byed pa dang / dus dus su sdug bsngal lam/ kun 'byung ba'am/'gog pa'am/ lam las brtsams te/ yang dag par 'dren par byed pa 'phags pa'i bden pa bzhi dang ldan pa'i gtam tshig 'bru 'byor pa dang / 'brel pa dang / rjes su mthun pa dang / rjes su 'phrod pa dang / thabs dang ldan pa dang / 'tsham pa dang /mthun pa dang / 'grus skyong gi yan lag gi tshogs dang ldan pa dag zer zhing gtam de yang dus la babs pa dang / gus par byas pa dang / snga phyi 'tsham pa dang / mtshams sbyor ba dang / rjes su 'brel ba dang / rangs par 'gyur ba dang / dga' bar 'gyur ba dang /mgu bar 'gyur ba dang / spro bar 'gyur ba dang / sgyid lug par mi 'gyur ba dang / byams pa'i sems dang / phan pa'i sems dang / rjes su snying brtse ba'i sems dang / rnyed pa dang / bkur sti dang / grags pa la mi brten pa dang / bdag la mi bstod pa dang /gzhan la mi smod pas rigs pa dang / 'brel ba dang / ma 'dres pa dang / chos dang ldan pa dang / 'khor rnams la mthun par zer ba yin te/ de ltar na chos ston par byed pa yin no/ /yan lag brgyad po de dag dang ldan pa gang yin pa de ni de ltar dus dus su skul bar byed pa dang /dran par byed pa dang / 'doms par byed pa dang / rjes su ston par byed pa dang / chos ston par byed pa yin pas na de'i phyir dge ba'i bshes gnyen zhes bya ste/ de ni re zhig dge ba'i bshes gnyen gyi rnam par dbye ba rgyas pa yin no/ /don mdor bsdus pa gang zhe na/gal te mdza' bshes dang / mdza' bo dang / rjes su snying brtse ba dang ldan pa yin la/ dang po kho nar phan par 'dod pa dang / bde bar 'dod pa yin pa dang / phan pa dang bde ba de yang phyin ci ma log cing lta ba ma log par yang dag pa ji lta ba bzhin du rab tu shes pa yin pa dang /'di lta ste phan pa dang / bde ba de nyid yang dag par sgrub pa dang / nye bar bsdu ba'i mthu yod cing thabs la mkhas pa yin pa dang / 'di lta ste phan pa dang bde ba nyid nye bar bsdu ba las brtsams te/ mkhas pa dang le lo med pa dang / sgrub phod pa dang /brtson 'grus brtsams pa'i rang bzhin can yin par gyur na/ rgyu bzhi po de dag gis mdor bsdu na/ rnam pa thams cad yongs su rdzogs pa'i dge ba'i bshes gnyen yin par rig par bya'o/ /de ni dge ba'i bshes gnyen gyi don mdor bsdus pa yin te/ rnam par dbye ba rgyas pa snga ma gang yin pa dang / don mdor bsdu ba 'di gang yin pa de ni dge ba'i bshes gnyen zhes bya'o// //nyan thos kyi sa bam po drug pa/ dam pa'i chos nyan pa dang / sems pa gang zhe na/ dam pa'i chos zhes bya ba ni sangs rgyas dang / sangs rgyas kyi nyan thos dam pa rnams dang / yang dag par song ba rnams dang / skyes bu dam pa rnams kyis bstan pa dang / bshad pa dang / gsal bar byas pa dang / rnam par phye ba dang / yang dag par bshad pa yin te/ de yang gang zhe na/ gsung rab yan lag bcu gnyis po 'di lta ste/mdo'i sde dang / dbyangs kyis bsnyad pa'i sde dang / lung bstan pa'i sde dang / tshigs su bcad pa'i sde dang / ched du brjod pa'i sde dang / gleng gzhi'i sde dang / rtogs pa brjod pa'i sde dang / de lta bu byung ba'i sde dang / skyes pa rabs kyi sde dang / shin tu rgyas pa'i sde dang / rmad du byung ba'i chos kyi sde dang / gtan la phab par bstan pa'i chos kyi sde dag ste/ de dam pa'i chos zhes bya'o/ /de la mdo'i sde gang zhe na/ bcom ldan 'das kyis de dang de dag tu gdul ba de dang de dag dang gdul ba'i spyod pa rnams las brtsams nas phung po dang ldan pa'i gtam dang /skye mched dang ldan pa dang / rten cing 'brel bar 'byung ba dang ldan pa dang / zas dang / bden pa dang / khams dang ldan pa dang / nyan thos dang rang sangs rgyas dang de bzhin gshegs pa dang ldan pa dang / dran pa nye bar gzhag pa dang / yang dag par spong ba dang / rdzu 'phrul gyi rkang pa dang / dbang po dang / stobs dang / byang chub kyi yan lag dang / lam gyi yan lag dang ldan pa dang / mi sdug pa dang / dbugs rngub pa dang / dbugs 'byung ba dang / bslab pa dang / /shes nas dad pa dang ldan pa'i gtam gsungs pa gang yin pa dag yang dag par sdud par byed pa rnams kyis yongs su bzung nas/bstan pa yun ring du gnas par bya ba'i don du 'di lta ste/ dge ba don dang ldan pa/ tshangs par spyod pa dang ldan pa de dang de dag bstan par bya ba'i phyir/ ming gi tshogs dang / tshig gi tshog dang / yi ge'i tshogs mthun pa dag gis ci rigs par rim gyis bkod cing / rim gyis sbyor ba gang yin pa de ni mdo'i sde zhes bya'o/ /dbyangs kyis bsnyad pa'i sde gang zhe na/ gang gi tha ma'i mjug tu tshigs su bcad pa mngon par brjod pa dang / bkri ba'i don gyi mdo sde gang yin pa de ni dbyangs kyis bsnyad pa'i sde zhes bya'o/ /lung bstan pa'i sde gang zhe na/ gang las nyan thos shi 'phos pa dang / dus byas pa dang / skye ba lung ston pa dang / nges pa'i don gyi mdo sde gang yin pa de ni lung bstan pa'i sde zhes bya'o/ /tshigs su bcad pa'i sde gang zhe na/rkyang pas bshad pa ma yin pa ste/ 'di ltar rtsa ba gnyis pa'am/ rtsa ba gsum pa'am/ rtsa ba bzhi pa'am/ rtsa ba lnga pa'am / rtsa ba drug par rtsa ba bsdebs te bshad pa gang yin pa de ni tshigs su bcad pa'i sde zhes bya'o/ /ched du brjod pa'i sde gang zhe na/gang zag gi ming dang ris yongs su ma brjod ma bstan par/ phyis dam pa'i chos yun ring du gnas par bya ba dang / bstan pa yun ring du gnas par bya ba'i phyir bshad pa gang yin pa de ni ched du brjod pa'i sde zhes bya'o/ /gleng gzhi'i sde gang zhe na/ gang zag gi ming dang rigs yongs su brjod cing bstan te/bshad pa dang / chung zad 'dul ba dang ldan pa'i byung ba dang bcas/ gleng gzhi dang bcas pa so sor thar pa'i mdo sde gang yin pa de ni gleng gzhi'i sde zhes bya'o/ /rtogs pa brjod pa'i sde gang zhe na/ dpe dang bcas par bstan pa ste/ dpe des don gyi rang bzhin de rnam par gsal bar 'gyur ba gang yin pa de ni rtogs pa brjod pa'i sde zhes bya'o//de lta bu byung ba'i sde gang zhe na/ chung zad sngon gyi sbyor ba dang ldan pa gang yin pa de ni de lta bu byung ba'i sde zhes bya'o/ /skyes pa'i rabs kyi sde gang zhe na/ 'das pa'i dus la brten te/ bcom ldan 'das kyis 'chi 'pho dang skye ba de dang de dag tu byang chub sems dpa'i spyod pa dang /dka' ba spyad pa bstan pa gang yin pa de ni skyes pa'i rabs kyi sde zhes bya'o/ /shin tu rgyas pa'i mdo gang zhe na/ gang las bla na med pa'i yang dag par rdzogs pa'i byang chub dang / stobs bcu dang / sgrib pa med pa'i ye shes yang dag par bsgrub pa'i phyir/byang chub sems dpa' rnams kyi lam bstan pa gang yin pa de ni shin tu rgyas pa'i sde zhes bya'o/ /rmad du byung ba'i chos kyi sde rnams gang zhe na/ gang las sangs rgyas rnams dang / sangs rgyas kyi nyan thos dge slong rnams dang / dge slong ma rnams dang / dge slob ma rnams dang / dge tshul rnams dang / dge tshul ma rnams dang / dge bsnyen rnams dang / dge bsnyen ma rnams kyi thun mong dang thun mong ma yin pa dang / de las gzhan pa khyad par du 'phags pa'i yon tan khyad par can ngo mtshar rmad du byung bar grags pa dag bstan pa gang yin pa de ni rmad du byung ba'i chos kyi sde rnams zhes bya'o//gtan la phab par bstan pa'i sde rnams gang zhe na/ mdo sde dran par byed cing / mdo sde rnam par 'chad par byed pa ma lta bu'i chos mngon pa thams cad ni gtan la phab par bstan pa'i sde zhes bya'o//gsung rab yan lag bcu gnyis po de dag la mdo sde yang yod/ 'dul ba yang yod/ chos mngon pa yang yod de/ de la re zhig mdo'i sde dang / dbyangs kyis bsnyad pa'i sde dang / lung du bstan pa'i sde dang / tshigs su bcad pa'i sde dang / ched du brjod pa'i sde dang / rtogs pa brjod pa'i sde dang / de lta bu byung ba'i sde dang / skyes pa rabs kyi sde dang / shin tu rgyas pa'i sde dang / rmad du byung ba'i chos kyi sde zhes gang gsungs pa de ni mdo sde yin no/ /gleng gzhi'i sde zhes gang gsungs pa de ni 'dul ba zhes bya'o/ /gtan la phab par bstan pa'i sde zhes gang gsungs pa de ni chos mngon pa zhes bya ste/dam pa rnams dang / yang dag par song ba rnams kyis bstan pa gsung rab yan lag bcu gnyis sde snod gsum gyis bsdus pa de dag ni dam pa'i chos zhes bya'o/ /de nyan pa ni dam pa'i chos nyan pa ste/ de yang gang zhe na/'di ltar 'di na la la mdo sde 'dzin pa'am/ 'dul ba 'dzin pa'am/ ma mo 'dzin pa'am/ mdo sde dang 'dul ba 'dzin pa'am/ mdo sde dang ma mo 'dzin pa'am/ 'dul ba dang ma mo 'dzin pa'am/ mdo sde dang 'dul ba dang ma mo 'dzin pa yin te/ de ni dam pa'i chos nyan pa zhes bya'o//nyan pa de yang rnam pa gnyis te/ tshig 'bru nyan pa dang / don nyan pa'o/ /sems pa gang zhe na/ 'di ltar 'di na la la gcig pu dben par song ste/ bsam gyis mi khyab pa'i gnas drug po 'di lta ste/ bdag la sems pa dang / sems can la sems pa dang /'jig rten pa la sems pa dang / sems can rnams kyi las kyi rnam par smin pa la sems pa dang / bsam gtan pa rnams kyi bsam gtan gyi yul dang / sangs rgyas rnams kyi sangs rgyas kyi yul rnam par sbyangs nas/ ji ltar thos pa'i chos de dag nyid rang gi mtshan nyid dang /spyi'i mtshan nyid kyi sgo nas sems par byed pa yin no/ /sems pa de yang rnam pa gnyis te/ bgrang ba'i rnam pas chos rnams la bgrang ba'i tshul gyis sems par byed pa dang / gzhal ba'i rnam pas rig pas yon tan dang skyon nye bar brtag pa'i tshul gyis sems par byed pa yin no//gal te phung po dang ldan pa bstan pa la sems par byed dam/ gal te de las gzhan pa sngar bstan pa gang yang rung ba bstan pa la sems par byed na yang rnam pa de gnyis kyis sems par byed pa yin te/ de yang ji ltar zhe na/ gzugs zhes bya ba ni skye mched gzugs can bcu dang /chos kyi skye mched du gtogs pa'i gzugs gang yin pa ste/ de ni gzugs kyi phung po yin no/ /tshor ba rnam pa gsum ni tshor ba'i phung po yin no/ / 'du shes kyi tshogs drug ni 'du shes kyi phung po yin/ 'du byed kyi tshogs drug ni 'du byed kyi phung po yin/ rnam par shes pa'i tshogs drug ni rnam par shes pa'i phung po yin te/de ltar na bgrang ba dang / grangs kyi rnam par phung po bstan pa la sems par byed pa dang / gong nas gong du rab tu dbye ba'i tshul gyis grangs dang / bgrang ba'i rnam pa sems pa de la tshad med pa'i sgo nas 'jug pa'i tshul du rig par bya'o//ji ltar na rigs pas nye bar brtags pa'i sems pas phung po bstan pa la sems par byed pa yin zhe na/ rigs pa bzhis nye bar rtog par byed de/ bzhi gang zhe na/ 'di lta ste/ ltos pa'i rigs pa dang / bya ba byed pa'i rigs pa dang / 'thad pa sgrub pa'i rigs pa dang /chos nyid kyi rigs pas so/ /de la ltos pa'i rigs pa gang zhe na/ ltos pa ni rnam pa gnyis te/ skye ba'i ltos pa dang / gdags pa'i ltos pa'o/ /de la skye ba'i ltos pa ni rgyu gang dag dang / rkyen gang dag gis phung po rnams skye bar 'gyur ba'i phung po'i skye ba de ni rgyu de dag dang /rkyen de dag las ltos pa yin no/ /ming gi tshogs dang / tshig gi tshogs dang / yi ge'i tshogs gang dag gi phung po rnams gdags par 'gyur ba'i phung po gdags pa de ni ming gi tshogs dang / tshig gi tshogs dang / yi ge'i tshogs de dag la ltos pa yin te/de ni phung po rnams kyi skye ba'i ltos pa dang / gdags pa'i ltos pa zhes bya'o/ /skye ba'i ltos pa gang yin pa dang / gdags pa'i ltos pa gang yin pa de ni phung po skye ba dang / phung por gdags pa'i rigs pa dang / sbyor ba dang thabs yin pas na de'i phyir ltos pa'i rigs pa zhes bya'o//bya ba byed pa'i rigs pa gang zhe na/ phung po rang gi rgyu dang / rang gi rkyen gyis bskyed pa gang yin pa rnams ni rang gi bya ba byed pa de dang de dag la sbyor bar byed pa yin te/ 'di lta ste/ dper na mig gis gzugs rnams la lta bar byed pa dang / rna bas sgra rnams nyan par byed pa dang /yid kyis chos rnams shes par byed pa'i bar lta bu dang / gzugs kyis mig gi spyod yul du gnas par byed pa dang / sgras rna ba'i spyod yul du gnas par byed pa dang / de bzhin du chos rnams kyis yid kyi spyod yul du gnas par byed pa'i bar dag lta bu dang /gzhan yang de lta bu dang mthun pa'i chos rnams de dang de dag gcig la gcig bya ba byed pa'i rigs pa dang / sbyor ba dang / thabs su 'gyur ba gang yin pa de ni bya ba byed pa'i rigs pa zhes bya'o/ /'thad pa sgrub pa'i rigs pa gang zhe na/ phung po rnams mi rtag pa'am/rten cing 'brel par 'byung ba'am/ sdug bsngal ba'am/ stong pa'am/ bdag med pa'o zhes tshad ma gsum po 'di lta ste/ yid ches pa'i lung dang / mngon sum du rjes su dpag pa dag gis nye bar rtog par byed cing 'thad pa'i rigs pa dam pa rnams kyi snying 'phrog par byed pa'i tshad ma gsum po de dag gis 'di lta ste/phung po rnams mi rtag pa nyid dam / rten cing 'brel bar 'byung ba nyid dam / sdug bsngal ba nyid dam/ stong pa nyid dam/ bdag med pa nyid du rnam par 'jog par byed cing / sgrub par byed pa yin te/de'i 'thad pa sgrub pa'i rigs pa zhes bya ba'o / /chos nyid kyi rigs pa gang zhe na/ ci'i phyir phung po rnams de lta bur gyur pa yin/ 'jig rten gnas pa de lta bur gyur pa yin/ ci'i phyir sa'i mtshan nyid sra ba yin/ chu'i mtshan nyid gsher ba yin/ me'i mtshan nyid tsha ba yin/rlung gi mtshan nyid g.yo ba yin/ ci'i phyir phung po rnams mi rtag pa yin/ ci'i phyir mya ngan las 'das pa zhi ba yin/ de bzhin du ci'i phyir gzugs kyi mtshan nyid gzugs su rung ba yin/ tshor ba'i mtshan nyid myong ba yin/ 'du shes kyi mtshan nyid kun shes par byed pa yin/'du byed rnams kyi mtshan nyid mngon par 'du byed pa yin/ rnam par shes pa'i mtshan nyid rnam par shes par byed pa yin zhe na/ de ni chos nyid yin te/ chos de dag gi rang bzhin de yin zhing / de dag gi ngo bo nyid de lta bu yin pas chos nyid de gang kho na yin pa de nyid 'dir rigs pa dang /sbyor ba dang / thabs yin no/ /de bzhin du de lta bu'am/ gzhan nam/ gzhan du mi 'gyur ba ni sems la gzhag par bya ba dang / sems la go bar bya ba'i phyir thams cad du yang chos nyid kho na la brten pa dang / chos nyid kho na'i rigs pa yin te/de ni chos nyid kyi rigs pa zhes bya'o/ /de ltar na rigs pa bzhis phung po bstan pa dang / gzhan gang yang rung ba bstan pa la nges par rtogs par byed pa yin te/ de ltar rnam pa gnyis po bgrang ba dang / grangs kyi rnam pa dang / rigs pas nye bar rtog pa'i rnam pa de dag gis bstan pa de dang /de dag la yang dag par rtog par byed pa gang yin pa de ni sems pa yin te/ de ni dam pa'i chos nyan pa dang sems pa zhes bya'o/ /bar chad med pa gang zhe na/ bar chad ni rnam pa gnyis te/ nang la brten pa dang / phyi rol la brten pa'o/ /de la nang la brten pa dang /phyi rol la brten pa'i bar chad bshad par bya ste/ de las bzlog pa ni bar chad med pa yin par rig par bya'o/ /de la nang la brten pa'i bar chad gang zhe na/ 'di ltar 'di na la la sngon bsod nams ma byas pas des bsod nams ma byas pa'i phyir/ 'tsho ba'i yo byad rkyen du bab pa 'di lta ste/chos gos dang / bsod snyoms dang / mal cha dang / stan dang / nad kyi gsos sman dang / yo byad dag dus dus su rnyed par mi 'gyur ba dang / 'dod chags shas che ba dang / 'dod chags yun ring ba dang / zhe sdang shas che ba dang / zhe sdang yun ring ba dang /gti mug shas che ba dang / gti mug yun ring bar 'gyur ba dang / des sngon nad mang bar 'gyur ba'i las dag byas pas de'i rgyus nad mang ba dang / tshe 'di nyid la mi mthun par spyad pas de'i lus la yang dang yang du rlung dang / mkhris pa dang / bad kan 'khrug cing gsud pa dang /zas la gdu ba dang / don mang ba dang / bya ba mang ba dang / tshogs 'du ba mang ba dang / las la dga' ba dang / smra ba la dga' ba dang / gnyid la dga' ba dang / bre mo'i gtam la dga' ba dang / 'du 'dzi la dga' ba dang / bdag nyid kun tu 'dzin pa dang /mi brtan pa dang / bag med pa dang / yul ngan pa la gnas pa'am/ gzhan yang gang dag de lta bu dang mthun pa de dag ni nang la brten pa'i bar chad yin par rig par bya'o/ /phyi rol la brten pa'i bar chad rnams gang zhe na/ 'di lta ste skyes bu dam pa ma yin pa la brten cing de la rjes su mthun pa'i gdams ngag dang /rjes su bstan pa dus dus su mi thob pa dang / yul ngan par gnas shing de de na gnas pas nyin mo 'khrug long mang ba dang / mtshan mo skye bo mang po rtag tu sgra 'byin cing ca co mang la/ klag cor che ba dang /rlung dang nyi ma'i reg pa grang zhing tsha ba dang / mis 'jigs pa dang / mi ma yin pas 'jigs pa'am/ gzhan yang gang dag de lta bu dang mthun pa de dag ni/ phyi rol la brten pa'i bar chad yin par rig par bya ste/ de ni re zhig bar chad kyi rnam par dbye ba rgyas pa yin no//don mdor bsdu ba gang zhe na/ bar chad ni mdor na rnam pa gsum ste/ sbyor ba'i bar chad dang / rab tu dben pa'i bar chad dang / nang du yang dag 'jog pa'i bar chad do/ /de la sbyor ba'i bar chad gang zhe na/ bar chad gang dang phrad cing mngon sum du gyur na rnam pa thams cad kyi thams cad du dge ba'i phyogs la sbyor ba'i mthu med cing mi nus pa yin no//de yang gang zhe na/ nad kyis btab pa dang / sdug bsngal ba dang / nad tshabs che ba dang / de'i lus la yang dang yang du rlung dang / mkhris pa dang / bad kan 'khrug cing gsud pa dang / de la sbrul lam/sdig pa'am/ srin gyi med kyis zin pa dang / de mi'am mi ma yin pas gtses pa dang / des chos gos dang / bsod snyoms dang / mal cha dang / stan dang / nad kyi gsos sman dang / yo byad ma rnyed pa'am / de lta bu dang mthun pa gang yin pa de ni sbyor ba'i bar chad yin par rig par bya'o//rab tu dben pa'i bar chad gang zhe na/ zas la gdu ba dang / don mang ba dang / bya ba mang ba dang / byed pa mang ba dang / las la dga' ba'i dga' ba la dga' ste/ 'phral gyi bya ba mang ba de dang de dag la yid gzhungs par gyur pa dang / smra ba la dga' ba ste/rab tu dben pa dang / spong ba dang / nang du yang dag 'jog la sgom pa'i mthu yod cing nus kyang lung nod pa dang / kha ton tsam gyis chog par 'dzin pa dang / gnyid la dga' ba ste/ rmugs pa dang / gnyid kyis kun nas dkris shing le lo'i rang bzhin can du gyur la gnyid kyi bde ba dang /gros 'bebs pa'i bde ba dang / nyal ba'i bde ba bdag gir byed pa dang / bre mo'i gtam la dga' ste/ khyim pa dang rab tu byung ba dag dang lhan cig tu rgyal po'i gtam mam/ rkun po'i gtam mam/ zas kyi gtam mam/ skom gyi gtam mam/ gos kyi gtam mam/smad 'tshong ma'i gtam mam/ lam srang gi gtam mam/ ljongs kyi mi dang chags 'og gi rgyal phran gyi gtam rgyud kyi gtam mam/ 'jig rten gyi gtam rgyud kyi gtam mam / rgya mtsho'i gtam rgyud kyi gtam zer ba'am/ de lta bu dang mthun pa'i gtam don med pas dus yol bar byed cing /de la dga' ba dang / yang dang yang du tshogs 'du ba mang ste/ rtsod pa de dang de dag la yid rnam par g.yengs shing / yid g.yen sbyor bar 'gyur ba dang / 'du 'dzi la dga' ste/ khyim na gnas pa dang rab tu byung ba ma phrad pa rnams mthong bar 'dod cing / phrad pa rnams dang 'bral bar mi 'dod pa dang /spros pa la dga' ste/ spros pa la dga' zhing / bgrod par bya ba la dang por 'gro ba dang / rab tu dben pa la brtson pa btang ba dang / de lta bu dang mthun pa'i chos gang dag yin pa de dag ni rab tu dben pa'i bar chad yin par rig par bya ste/ de dag dang phrad cing mngon sum du gyur nas /dgon pa dag gam/ shing drung dag gam/ khang stong gi gnas mal dgon pa'am nags 'dab bam/ bas mtha' dag tu gnas par sla ba ma yin no/ /nang du yang dag 'jog gi bar chad gang zhe na/ 'di lta ste/ nang du yang dag 'jog ces bya ba ni zhi gnas dang lhag mthong ngo //de la zhi gnas kyi bar chad kyang yod do/ /lhag mthong gi bar chad kyang yod do / /de la zhi gnas kyi bar chad gang zhe na/ bag med pa dang / yul ngan par gnas pa'o/ /de la bag med pa ni 'di lta ste/ bag med par gyur pa de rmugs pa dang gnyid kyis sems kun nas 'khri bar byed pa dang /zhi gnas tsam gyi ro myong bar byed pa dang / zhum pa nyid kyi phyir sems gtod par byed pa dang / sems mun pa nyid du gyur pa'o/ /yul ngan par gnas pa ni yul ji lta bur gnas na mi'am mi ma yin pa gzhan gyis gnod par byed cing / des de'i sems phyi rol du rnam par g.yeng bar 'gyur ba ste/ de ni zhi gnas kyi bar chad de nang du yang dag 'jog gi bar chad yin par rig par bya'o/ /lhag mthong gi bar chad gang zhe na/ 'di lta ste bdag nyid rab tu 'dzin pa dang / mi brtan pa'o/ /de la bdag nyid rab tu 'dzin pa ni 'di lta ste/bdag ni rigs mthon po las rab tu byung ba dang / zhum pa ma yin gyi/ dge slong gzhan dag ni de lta ma yin no zhes bdag la stod par byed/ rab tu 'dzin par byed cing gzhan la smos par byed pa dang / de bzhin du bdag ni phyug po las rab tu byung ba ste/zhan pa ma yin no snyam pa dang / de bzhin du bdag ni gzugs bzang ba dang / blta na sdug pa dang / mdzes pa yin no snyam pa dang / de bzhin du bdag ni mang du thos pa dang / thos pa 'dzin pa dang / thos pa bstsags pa yin no snyam pa dang / de bzhin du bdag ni tshig dge zhing /tshig gi bya ba dang ldan pa yin gyi dge slong gzhan dag ni de lta ma yin no zhes bdag la stod par byed pa dang / rab tu 'dzin par byed cing gzhan la smod par byed la de bdag nyid rab tu 'dzin par byed pa na/ dge slong gnas brtan rgyal tshabs lta bu/ tshangs par spyod pa spyad pa gang dag 'khod pa de dag la/dus dus su yongs su 'dri bar mi byed yongs su zhum par mi byed pas de dag kyang de la dus dus su rnam par ma phye ba'i gnas rnams ni rnam par 'byed par mi byed la/ rnam par phye ba'i gnas rnams kyang gsal bar mi byed cing / 'di lta ste/ ye shes dang mthong ba rnam par dag par bya ba'i phyir/zab mo'i don dang tshig shes rab kyis legs par rab tu rtogs par byas nas/ yang dag par ston par yang mi byed de/ de ltar na de 'di lta ste/ lhag mthong gi bar chad bdag nyid rab tu 'dzin pa dang ldan pa yin no/ /gzhan yang de ye shes dang /mthong ba dang / bde ba la reg par gnas pa cung zad tsam dang ngan ngon tsam zhig thob par gyur cing / de ye shes tsam dang / mthong ba tsam dang / bde ba la reg par gnas pa tsam des bdag la stod par byed cing rab tu 'dzin par byed la/ de bdag nyid rab tu 'dzin par byed pa na de tsam gyis chog par 'dzin cing /gong du rtsol bar mi byed de/ de ltar na bdag nyid rab tu 'dzin pas 'di lta ste/ de'i lhag mthong gi bar chad byas pa yin no/ /mi brtan pa gang zhe na/ de dbang po ma zhi zhing / dbang po rgod pa dang / dbang po 'dam bu ltar mtho bar gyur pas/nyes par bsam pa sems pa dang / nyes par smra ba brjod pa dang / nyes par bya ba'i las byed cing / chos brtan par sems par mi byed/ dam por sems par mi byed pas/ des na lhag mthong yongs su 'dzin par mi 'gyur zhing / rnam par dag par mi 'gyur te/ de ltar na mi brtan pa ni 'di lta ste/ de'i lhag mthong gi bar chad yin no/ /zhi gnas kyi bar chad kyi chos ni gnyis te/ 'di lta ste bdag med pa dang / yul ngan par gnas pa'o/ /lhag mthong gi bar chad kyi chos kyang gnyis te/ 'di lta ste bdag nyid rab tu 'dzin pa dang / mi brtan pa'o//zhi gnas kyi bar chad gang yin pa dang / lhag mthong gi bar chad gang yin pa de ni nang du yang dag 'jog gi bar chad ces bya'o/ /de ni bar chad kyi don mdor bsdu ba yin te/ rnam par dbye ba rgyas pa snga ma gang yin pa dang / don mdor bsdu ba ni gang yin pa de dag gcig tu bsdus pa ni bar chad ces bya'o//bar chad de las bzlog pa bar chad de dag med pa dang / bral ba dang mi ldan pa dang / mi 'grogs pa gang yin pa ni bar chad med pa yin par rig par bya ste/ de ni bar chad med pa zhes bya'o/ /gtong ba spel ba gang zhe na/ sems kyi rgyun dang /sems kyi yo byad dang / rnal 'byor gyi tshogs dang / don gyi mchog thob par bya ba'i phyir/ kha na ma tho ba med pa'i sbyin pa sbyin par byed pa gang yin pa'o/ /de la sus sbyin par byed/ su la sbyin par byed/ ci zhig sbyin par/ cis sbyin par byed/ ji ltar sbyin par byed/ /ci'i phyir sbyin par byed cing /gang gis de'i sbyin pa kha na ma tho ba med par 'gyur ba yin zhe na/ smras pa / sbyin pa po dang / sbyin bdag gis sbyin par byed de/ de la sbyin pa po ni gang / sbyin bdag ni gang zhe na/ rang kho na'i lag nas sbyin par byed pa gang yin pa de ni sbyin pa po zhes bya'o/ / gang gis rang gis sbyin par byed cing de yang sbyin par 'dod pa yin gyi/ sbyin par mi 'dod pa ma yin pa gang yin pa de ni sbyin bdag ces bya'o/ /de la su la sbyin pa byed ce na/ smras pa/ gzhi la ste/ sdug bsngal ba dang / phan 'dogs pa dang / sdug pa dang /khyad par can la sbyin par byed do/ /de la sdug bsngal ba rnams gang zhe na/ yo byad med pa rnams dang / bkren pa rnams dang / sdug phongs pa rnams dang / lam du zhugs pa rnams dang / slong mo pa rnams dang / long ba rnams dang / 'on pa rnams dang / mgon med pa rnams dang /rten med pa rnams dang / gzhan yang gang dag de lta bu dang mthun pa de ni sdug bsngal ba rnams zhes bya'o/ /phan 'dogs pa rnams gang zhe na/ 'di lta ste/ pha dang / ma dang / snun par byed pa dang / gso bar byed pa dang / skyed par byed pa dang /'brog dgon pa dang / mu ge dang / pha rol gyi dmag tshogs dang / bcings pa dang / nad kyi 'jigs pa las sgrol bar byed pa rnams dang / de la phan pa ston pa rnams dang / bde ba ston pa rnams dang / phan pa dang bde ba nye bar sgrub pa rnams dang / rtsod pa byung ngo cog la grogs byed pa rnams dang / lhan cig dga' ba rnams dang / lhan cig mya ngan byed pa rnams dang / de nyam thag par gyur ba'i tshe yongs su mi gtong ba rnams dang / gzhan yang gang dag de lta bu dang mthun pa de dag ni phan 'dogs pa rnams zhes bya'o/ /sdug pa rnams gang zhe na/smos 'drin gang dag de la byams pa'am/ byams shing gus pa'am/ gcugs pa smra ba rnams dang / gtam 'dres pa rnams dang / phebs par smra ba rnams dang / grogs bshes rnams sam/ gzhan yang gang dag de lta bu dang mthun pa de dag ni sdug pa rnams zhes bya'o//khyad par can rnams gang zhe na/ dge sbyong dang bram ze rang bzhin dge bar grags pa gnod sems med pa dang / gnod sems med pa la dga' ba rnams dang / 'dod chags dang bral ba rnams dang / 'dod chags 'dul ba'i phyir zhugs pa rnams dang / zhe sdang dang bral ba rnams dang /zhe sdang 'dul ba'i phyir zhugs pa rnams dang / gti mug dang bral ba rnams dang / gti mug 'dul ba'i phyir zhugs pa rnams dang / gzhan yang gang dag de lta bu dang mthun pa de dag ni khyad par can rnams zhes bya'o/ /de la ci zhig sbyin par byed ce na/ smras pa/ mdor bsdu na/ sems can du bgrang ba dang / sems can du bgrang ba ma yin pa'i dngos po sbyin par byed de/ de la sems can du bgrang ba'i dngos po gang zhe na 'di lta ste/ bu dang chung ma dang bran dang / bran mo dang / las mi dang / zho shas 'tsho ba dang / glang po che dang / rta dang / ba lang dang / lug dang / bya gag dang / skyes pa dang / bud med dang / khye'u dang / bu mo'am/ gzhan yang gang dag de lta bu dang mthun pa'i dngos po rnams dang / nang la brten te/ lag pa dang / rkang pa dang / mgo dang / sha dang / khrag dang / zhag la sogs pa gang la byang chub sems dpa' rnams yang dag par snang ba sbyin par byed pa de yang /sems can du bgrang ba'i sbyin pa yin te/ don gyi skabs 'dir ni sbyin pa de dag las dgongs pa ma yin no/ /sems can de dag la/ de dbang phyug dang / dbang dang / skyong bar byed pa yin na/ sems can de dag gzhan dag la sbyin par yang rigs la/byin na yang bdag nyid kha na ma tho bar mi byed cing / rgyu de dang / rkyen des gzhan dag gi yid rab tu 'khrug par yang mi 'gyur la/ sems can gang dag gzhan dag la byin pa de dag la yang gnod par mi 'gyur ba de ni sems can du bgrang ba'i dngos po sbyin pa kha na ma tho ba med pa zhes bya'o//sems can du bgrang ba ma yin pa'i dngos po gang zhe na/ 'di lta ste/ nor gyi dngos po dang / 'bru'i dngos po dang / yul gyi dngos po'o/ /de la nor gyi dngos po gang zhe na/ 'di lta ste/ nor bu dang / mu tig dang / bai DUr+ya dang / rin po che shang ka shi la dang /byi ru dang / rdo'i snying po dang / spug dang / gser dang / dngul dang / rin po che dmar po dang / g.yas su 'khyil tam/ gzhan yang gang dag de lta bu dang mthun pa'i rin po che'am/ dbyig gam/ stang zil lam/ gos sam/ snod spyad dam/ spos kyi rnam pa'am/ me tog phreng gi rnam pa gang yin pa de ni nor gyi dngos po zhes bya'o/ /'bru'i dngos po gang zhe na/ gang chung zad bza' ba dang / btung bar bya ba 'di lta ste/ nas dang / gro dang / 'bras sA lu dang / mon sran dang / rgya sran dang / til dang /mon sran gre'u dang / bu ram shing gi ro dang / dar ba dang / rgun chang gi ro dang / gzhan yang gang dag de lta bu dang mthun pa de dag ni 'bru'i dngos po zhes bya'o/ /yul gyi dngos po gang zhe na/ 'di lta ste/ zhing gi gzhi dang / khang khyim gyi gzhi dang / /tshong khang gi gzhi dang / bsod nams kyi gnas dang / gtsug lag khang gi gzhi'am/ gzhan yang gang dag de lta bu dang mthun pa de dag ni yul gyi dngos po zhes bya ste/ de ltar na sems can du bgrang ba'i dngos po gang yin pa dang / sems can du bgrang ba ma yin pa'i dngos po gang yin pa de sbyin par byed do//de la cis sbyin par byed ce na/ smras pa/ sems mngon par 'du byed pa yid kyi las chags pa med pa dang ldan pa'i sems gang yin pa dang / sbyin par bya ba'i dngos po yongs su gtong bar bya ba'i phyir/ rang gi rgyud dang / gzhan gyi rgyud la des kun nas bslang ba'i lus kyi las dang /ngag gi las gang yin pa des ni sbyin par byed do/ /de la ji ltar sbyin par byed ce na/ smras pa/ ma 'ongs pa la lta ba dang / 'bras bu mthong ba'i dad pas sbyin par byed pa dang / 'dod pa'i sems kyis gus par sbyin par byed pa dang / brnyas pa med par rang gi lag nas sbyin par byed pa dang /ci nas kyang de gzhan dag la mkho bar 'gyur ba'i dus su sbyin par byed pa dang / chos dang mthun pa dang / gzu lums ma yin pas legs par bsgrubs te/ gzhan la mi gnod par sbyin par byed pa dang / gtsang ba sbyin par byed pa dang / bzang po sbyin par byed pa dang /gdams te sbyin par byed pa dang / gang gi bdag dang gzhan la kha na ma tho ba dang bcas par mi 'gyur ba'i rung ba sbyin par byed pa dang / yang dang yang du sbyin par byed pa dang / ser sna'i dri ma dang / gsog 'jog gi dri ma bstsal te sbyin pa sbyin par byed cing / sbyin pa'i snga rol du yang yid dga' la/sbyin pa'i tshe yang rab tu dang bar byed cing / byin nas kyang 'gyod pa med par 'gyur ba de ltar sbyin par byed do/ /de la ci'i phyir sbyin par byed ce na/ smras pa/ 'di lta ste/ sdug bsngal ba rnams la snying rje'i phyir sbyin par byed pa dang / 'di lta ste phan 'dogs pa rnams la byas pa gzo ba'i phyir sbyin par byed pa dang /'di lta ste/ sdug pa rnams la byams pa dang / gus pa dang / gcugs pa'i phyir sbyin par byed pa dang / 'di lta ste/ khyad par can rnams la 'jig rten dang / 'jig rten las 'das pa'i khyad par 'dod pa'i phyir sbyin par byed de/de'i phyir sbyin par byed pa zhes bya'o/ /de sems kyi rgyan dang / sems kyi yo byad dang / rnal 'byor gyi tshogs dang / don gyi mchog thob par bya ba'i phyir/ rnam pa de dag gis khyim pa'am/ rab tu byung ba dag la sbyin par byed pa nas / sbyin pa de ni kha na ma tho ba med pa yin te/ de ni gtong ba spel ba zhes bya'o/ /dge sbyong gi rgyan gang zhe na/ 'di ltar 'di na la la dad pa dang ldan pa dang / g.yo med pa dang / nad nyung ba dang / brtson 'grus brtsams pa'i rang bzhin can dang / shes rab rno ba dang / 'dod pa nyung ba dang / cho ga shes pa dang / gso sla ba dang / dgang sla ba dang /sbyangs pa'i yon tan dang ldan pa dang / mdzes pa dang / drod rigs pa dang / skyes bu dam pa'i chos dang ldan pa dang / mkhas pa'i rtags dang ldan pa dang / bzod pa che ba dang / des pa dang / gya nom pa yin no/ /de la ji ltar na dad pa dang ldan pa yin zhe na/ dad pa mang ba dang nges par rtogs pa mang ba dang /mos pa mang ba dang / dge ba'i chos rnams la 'dun pa yin zhing / de ston pa la dang bar byed cing / yid gnyis mi byed/ the tshom mi za la/ ston pa la bkur sti byed/ bla mar byed/ ri mor byed/ mchod par byed cing / bsnyen bskur byas/ bla mar byas/ ri mor byas/ mchod par byas nas nye bar brten te gnas pa dang / ston pa la ji lta ba bzhin du/ chos dang / tshangs pa mtshungs par spyod pa dang / bslab pa dang gdams shing rjes su bstan pa dang / bgo bsha' dang / bag yod pa dang / ting nge 'dzin la yang de bzhin te/de ltar na dad pa dang ldan pa yin no/ /ji ltar na g.yo med pa yin zhe na/ drang po dang / drang po'i rang bzhin can yin zhing / ston pa dang tshangs pa mtshungs par spyod pa mkhas pa rnams la/ bdag nyid ji lta ba bzhin du smra bar byed pa yin te/ de ltar na g.yo med pa yin no//ji ltar na nad nyung ba yin zhe na/ nad med pa'i rang bzhin can yin zhing / pho ba'i drod snyoms shing 'ju bar byed pa dang / ha cang mi tsha ba dang / ha cang mi grang ba dang / gnod pa med pa dang / dus tshigs bde ba dang ldan la/ des na des zos pa dang / 'thungs pa dang / 'chos pa dang / myangs pa rnams legs par bde bar 'ju bar 'gyur ba yin te/ de ltar na nad nyung ba yin no/ /ji ltar na brtson 'grus brtsams pa'i rang bzhin can yin zhe na/ dge ba'i chos rnams la mthu dang ldan pa dang / brtson 'grus dang ldan pa dang / spro ba dang ldan pa dang / pha rol gnon pa brtan pa dang /brtson pa ma btang bar gnas shing / tshangs pa mtshungs par spyod pa mkhas pa rnams la lus kyi zhal ta byed pa la mkhas pa dang / le lo med pa dang / sgrub phod pa yin te/ de ltar na brtson 'grus brtsams pa'i rang bzhin can yin no/ /ji ltar na shes rab rno ba yin zhe na/lo ba skyen pa dang / dran pa dang / blo dang ldan zhing / dbang po rtul ba ma yin la/ dig pa dang / lkugs pa ma yin zhing / lag pas brda byed pa ma yin la/ legs par gsungs pa dang / nyes par bshad pa'i chos rnams kyi don kun shes par nus pa dang / lhan cig skyes pa'i blo dang yang ldan la/sbyong ba las byung ba'i blo dang ldan pa yang yin te/ de ltar na shes rab rno ba yin no/ /ji ltar na 'dod pa chung ba yin zhe na/ 'dod pa chung ba nyid la sogs pa'i yon tan ji snyed pa dag dang ldan na yang / bdag 'dod pa chung ba'am/ yon tan ji lta bu dag dang ldan par gzhan gyis shes par bya'o zhes gzhan las shes pa kun tu mi tshol ba yin te/de ltar na 'dod pa chung ba yin no/ /ji ltar chog shes pa yin zhe na/ chos gos dang / bsod snyoms dang / mal cha dang / stan ngan ngon tsam gyis dga' zhing chog shes pa dang / de chos gos ngan pa'am/bzang po ma rnyed na yang 'dod par mi byed cing / gdung bar mi byed la/ rnyed na yang rgyas par snga ma bzhin du chags pa med pa dang / zhen pa med pas yongs su longs spyod par byed pa dang / chos gos la ji lta ba bzhin du bsod snyoms dang / mal cha dang / stan la yang de bzhin te/de ltar na chog shes pa yin no/ /ji ltar na gso sla ba yin zhe na/ de bdag gcig pu gso bar byed kyi/ pha rol po gang dag gi don du des rim gro bya dgos pa 'di lta ste/ khye'u 'am/ mi'am/ gzhan gang yang rung ba dag gso bar mi byed pa dang / de la sbyin pa po dang /sbyin bdag gzhan dag gso dka'o snyam du mi sems pa yin te/ de ltar na gso sla ba yin no/ /ji ltar na dgang sla ba yin zhe na/ chung ngus kyang 'tsho bar 'gyur la/ ngan pas kyang 'tsho bar 'gyur ba yin te/ de ltar na dgang sla ba yin no/ /ji ltar na sbyangs pa'i yon tan dang ldan pa yin zhe na/rnyed pas chog pa'i bsod snyoms pa dang / mthar gyis slong ba'i bsod snyoms pa dang / stan gcig pa dang / zas phyis mi len pa dang / chos gos gsum pa dang / phying pa pa dang / phyag dar khrod pa dang / dgon pa pa dang / shing drung pa dang / bla gab med pa dang /dur khrod pa dang / cog pu pa dang / gzhi ji bzhin pa yin te/ de dag kyang bsod snyoms dang / chos gos dang / gnas mal las brtsams nas/ sbyangs pa'i yon tan bcu gnyis sam bcu gsum du 'gyur ro/ /de la bsod snyoms pa las dbye na rnam pa gnyis te/rnyed pas chog shes pa'i bsod snyoms pa dang / mthar gyis slong ba'i bsod snyoms pa'o/ /de la rnyed pas chog shes pa'i bsod snyoms pa gang zhe na/ 'di lta ste/ 'dris pa'i khyim dag nas ci thob pa dang / ci rnyed tsam bza' bar byed pa'o/ /mthar gyis slong ba'i bsod snyoms pa gang zhe na/khyim rnams su khang khyim nas khang khyim du bslangs shing brgyus te/ bsod snyoms ji thob pa dang / ji snyed pa za bar byed kyi bdag gis 'di nas bza' ba dang / bca' ba bzang po ci tsam 'dod pa thob par 'gyur ro snyam nas mgo 'phang bstod de/ khyim rnams su mi 'gro ba gang yin pa'o/ /de la bsod snyoms pa nyid bye brag tu ma phye ba las brtsams nas ni/ sbyangs pa'i yon tan bcu gnyis su 'gyur ro/ /bye brag tu phye ba las brtsams na ni bcu gsum mo/ /de la stan gcig pa gang zhe na/ stan gcig la 'dug nas ci tsam bza' bar bya ba de tsam du bza' bar byed kyi/stan de las langs nas bza' bar mi byed pa ste/ de ni stan gcig pa nyid ces bya'o/ /zas phyis mi len pa gang zhe na/ zas kyi phyir 'dug nas/ ji srid du ji tsam gyis bdag 'tsho bar shes pa'i zas thams cad ma mnos pa de srid du za bar mi byed cing /gang las bdag gi zas kyi bya ba de las lhag pa mi blang ngo snyam du shes par 'gyur ba de'i 'og tu thams cad blangs nas za bar rtsom pa ste/ de ltar na zas phyis mi len pa yin no/ /ji ltar na chos gos gsum pa yin zhe na/ chos gos gsum po snam sbyar dang / bla gos dang /mthang gos kyis 'tsho bar byed cing / chos gos gsum las lhag pa'i gos gzhan mi 'chang ba yin te/ de ltar na chos gos gsum pa yin no/ /ji ltar na bying pa pa yin zhe na/ chos gos gsum pa'am/ gos lhag gang cung zad ci 'chang ba de dag thams cad bal las byas ba sha stag 'chang gi /gzhan ni ma yin pa ste/ de ltar na phying ba pa yin no/ /ji ltar na phyag dar khrod pa yin zhe na/ gzhan dag gis lam po che'am/ lam srang ngam/ gzhi mdo'am/ sum mdo'am/ lam ka'am/ lam gol bar bor ba'am / spangs pa dang / btang ba'i gos bshad pas reg pa'am/gci bas reg pa'am/ bshang gci dang / rnag dang khrag dang / mchil mas reg pa gang yin pa de las mi gtsang ba gang yin pa de bor la/ tha gi blangs te/ bkrus la drubs te/ kha dog bsgyur zhing 'chang ba yin te/ de ltar na phyag dar khrod pa yin no/ /ji ltar na dgon pa pa yin zhe na/grong dang grong rdal las dben pa'i gnas mal dgon pa dang / nags 'dab dang / bas mtha' gang dag yin pa dag tu gnas par byed pa yin te/ de ltar na dgon pa pa yin no/ /ji ltar na shing drung pa yin zhe na/ shing drung du gnas 'cha' zhing / shing drung la brten pa yin te/de ltar na shing drung pa yin no/ /ji ltar na bla gab med pa yin zhe na/ ma bkab pa dang / ma g.yogs pa'i phyogs bla gab med par gnas 'cha' bar byed pa yin te/ de ltar na bla gab med pa yin no/ /ji ltar na dur khrod pa yin zhe na/ gang du skye bo'i tshogs shi'o cog 'dor ba'i dur khrod du gnas 'cha' bar byed pa yin te/de ltar na dur khrod pa yin no/ /ji ltar na cog pu pa yin zhe na/ khri'am/ khri'u'am/ rtswa bting ba'i steng du tsog pur 'dug ste/ dus yol bar byed cing / khri'am/ khri'u'am/ rtsig pa'am/ shing ngam/ rtswa bting ba la rgyab bam glos mi brten pa yin te/de ltar na cog pu pa yin no/ /ji ltar na gzhi ji bzhin pa yin zhe na/ gang du rtswa bting ba'am/ lo ma bting ba'i steng du mal 'cha' bar byed cing / rtswa bting ba'am/ lo ma bting ba de yang lan cig ji ltar bting ba de kho na'i steng du mal 'cha' bar byed kyi yang dang yang du mi brje mi 'chos pa yin te/de ltar na gzhi ji bzhin pa yin no/ /ci'i phyir de dag la sbyangs pa'i yon tan zhes bya zhe na/ 'di lta ste/ dper na/ bal lam/ shing bal ni gang gi tshe ma bstsal / ma bshig ma rmel ba de'i tshe na/ 'dzings shing mi 'jam mi yang la/'di lta ste/ skud par bkal ba'am/ 'da' bar bya ba'i las su mi rung ngo / /de bzhin du 'di na la la bsod snyoms la chags pas bsod snyoms la sems zhen cing kun tu zhen pa dang / chos gos la chags pas chos gos la sems zhen cing kun tu zhen pa dang / gnas mal la chags pas gnas mal la sems zhen cing kun tu zhen pa de sbyangs pa'i yon tan de dag gis 'di lta ste/tshang par spyod pa la gnas par bya ba'i phyir/ sems rnam par sbyong bar byed/ drang por byed/ mnyen par byed/ las su rung bar byed/ gnam par byed/btub par byed pas na/ de'i phyir sbyangs pa'i yon tan zhes bya'o/ /de la bsod snyoms la chags pa ni/ bar chad rnam pa gnyis yin te/ zas bzang po la chags pa dang / zas mang po la chags pa'o/ /de'i phyir zas bzang po la chags pa spang ba'i phyir/ bsod snyoms pa yin no//zas mang po la chags pa spang ba'i phyir/ stan gcig pa dang / zas phyis mi len pa yin no/ /de la chos gos la chags pa ni bar chad rnam pa gsum yin te/ chos gos mang po la chags pa dang / 'jam zhing reg na bde ba la chags pa dang /bzang po la chags pa'o/ /de la chos gos mang po la chags pa spang ba'i phyir/ chos gos gsum pa yin no/ /chos gos 'jam zhing reg na bde ba la chags pa spang ba'i phyir/ phying pa pa yin no/ /chos gos bzang po la chags pa spang ba'i phyir/ phyag dar khrod pa yin no//gnas mal la chags pa ni bar chad rnam pa bzhi yin te/ 'di lta ste/ 'du 'dzi la chags pa dang / gnas la chags pa dang / glos 'bebs pa'i bde ba dang nyal ba'i bde ba la chags pa dang / stan dang gding ba dang / dgab pa la chags pa'o/ /de la 'du 'dzi la chags pa spang ba'i phyir/dgon pa pa yin no/ /gnas la chags pa spang ba'i phyir/ shing drung pa dang / bla gab med pa dang / dur khrod pa yin no/ /dur khrod pa ni 'khrig pa la chags pa spang ba'i phyir yang yin no/ /glos 'bebs pa'i bde ba dang nyal ba'i bde ba spang ba'i phyir/ cog pu pa yin no//stan dang / gding ba dang dgab pa la chags pa spang ba'i phyir/ gzhi ji bzhin pa yin te/ de ltar na sbyangs pa'i yon tan dang ldan pa yin no/ /ji ltar na mdzes pa yin zhe na/ mdzes par 'gro ba dang / ldog pa dang / cung zad blta ba dang / rnam par blta ba dang / bskum pa dang /brkyang ba dang / snam sbyar dang / chos gos dang / lhung bzed bcang ba dang ldan pa yin te/ de ltar na mdzes pa yin no/ /ji ltar na drod rigs pa yin zhe na/ 'di na bram ze dang / khyim bdag dad pa rnams kyis 'di lta ste/ chos gos dang / bsod snyoms dang / mal cha dang /stan dang / nad kyi gsos sman dang / yo byad rnams kyis legs par mgron du gnyer ba na/ de la slong ba'i chog shes pa yin te/ de ltar na drod rig pa yin no/ /ji ltar na skyes bu dam pa'i chos dang ldan pa yin zhe na/ rigs mthon po las rab tu byung ba'am/ phyug po'i khyim nas rab tu byung ba'am/gzugs bzang ba'am/ blta na sdug pa'am/ mdzes pa dang / mang du thos pa'am/ tshig gi bya ba dang ldan pa yin nam/ ye shes tsam mam/ mthong ba tsam mam/ bde ba la reg par gnas par 'gyur ba tsam gang yang rung ba zhig thob par gyur pa yin na yang /des bdag la stod par mi byed cing / gzhan la smod par mi byed la/ chos dang rjes su mthun pa'i chos 'ba' zhig bsgrub par bya ba kho na yin par rig nas/ chos dang rjes su mthun pa'i chos la zhugs pa yin te/ de ltar na skyes bu dam pa'i chos dang ldan pa yin no/ /ji ltar na mkhas pa'i rtags dang ldan pa yin zhe na/las kyi mtshan nyid kyis byis pa yin la/ las kyi mtshan nyid kyis mkhas pa yin te/ de yang ji lta zhe na/ byis pa ni nyes par bsam pa sems pa dang / nyes par smra ba brjod pa dang / nyes par bya ba'i las byed pa yin gyi/ mkhas pa ni legs par bsam pa sems pa dang /legs par smra ba brjod pa dang / legs par bya ba'i las byed pa yin te/ de ltar na mkhas pa'i rtags dang ldan pa yin no/ /ji ltar na bzod pa che ba yin zhe na/ gshe yang phyir mi gshe ba dang / khros kyang phyir mi khro ba dang / brdegs kyang phyir mi brdeg pa dang /mtshang brus kyang phyir mtshang mi 'bru zhing / tshe dang ldan pa de grang ba dang / tsha ba dang / bkres pa dang / skom pa dang / sha sbrang dang / sbrang bu mchu rings dang / rlung dang / nyi ma dang / sdig sbrul gyi reg pa rnams dang / gzhan las ngan du brjod pa dang / ngan pa 'ongs pa'i tshig gi lam dag bzod pa dang /lus kyi tshor ba sdug bsngal mi bzod pa rtsub pa tsha ba yid du mi 'ong ba/ srog 'phrog par byed pa dag kyang bzod cing / dang du len pa'i rang bzhin can yin te/ de ltar na bzod pa che ba yin no/ /ji ltar na des pa yin zhe na/ 'di lta ste ston pa dang / tshangs pa mtshungs par spyod pa mkhas pa rnams la byams pa'i lus kyi las dang ldan pa dang / byams pa'i ngag gi las dang ldan pa dang / byams pa'i yid kyi las dang ldan pa dang / chos dang ldan zhing chos kyis thob pa'i rnyed pa lhung bzed du blugs shing / lhung bzed du chud zin pa rnams kyang /thun mong du yongs su longs spyod par byed cing / zas mi bsri ba dang / tshul khrims mthun par zhugs pa dang / lta ba mthun par zhugs pa yin te/ de yang yang dag par dga' bar 'gyur ba/ sdug par byed pa/ bla mar byed pa/ rtsod par mi byed pa'i chos drug po de dag dang ldan pas/'grogs na bde zhing rnam par tho 'tshams pa med pa'i rang bzhin can yin la/ tshangs pa mtshungs par spyod pa mkhas pa rnams kyang de dang lhan cig gnas par dga' ba yin te/ de ltar na des pa yin no/ /ji ltar na gya nom pa yin zhe na/ khro gnyer med pa dang /bzhin gyi mdog gsal ba dang / 'dzum pa sngar gtong ba dang / gsong por smra ba dang / dga' bar smra ba dang / sdud pa'i ngang tshul can dang / rgyud rab tu dang ba yin te/ de ltar na gya nom pa yin no/ /de chos de dag dang ldan pas chos 'dod pa dang / yon tan 'dod pa dang /rnyed pa dang / bkur sti dang / snyan pa'i sgra'i tshogs mi 'dod pa yin zhing / sgro 'dogs pa dang / skur pa 'debs pa'i log pa'i lta ba dang mi ldan la/ de med pa'i chos la yang sgro 'dogs par mi byed cing / yod pa'i chos la yang skur pa 'debs par mi byed pa dang / de 'jig rten la grags pa dang ldan pa'i rang bzo dang /snyan dngags su byas pa yig 'bru sna tshogs dang / tshig sna tshogs dang / yi ge sna tshogs gang yin pa de don med pa yin par rig nas/ thag ring du spong bar byed cing / des spyod par mi byed/ des bdag dga' bar mi byed pa dang / lhung bzed dang chos gos lhag pa mi 'chang ba dang / khyim na gnas pa dang / rab tu byung ba rnams dang lhan cig 'grogs pa'i 'du 'dzi nyon mongs pa 'phel bar 'gyur ba yongs su spong bar byed pa dang / 'phags pa rnams dang / lhan cig 'grogs pa'i tshogs pa ye shes rnam par sbyong bar byed pa dang /gang gi gzhi las 'khrug long dang gnod sems skye zhing / de dag rnam par gyur cing / gzhan du gyur pa las/ mya ngan dang smre sngags 'don pa dang / sdug bsngal ba dang / yid mi bde ba dang / 'khrug pa skye bar 'gyur ba mdza' sde dag mi byed pa dang / nyon mongs pa dang / nye ba'i nyon mongs pa skyes so cog la yang / gzhi 'dis bdag la tshe 'di dang phyi mar sdug bsngal skye bar gyur na mi rung ngo zhes dang du mi len cing spong bar byed/ sel bar byed/ byang bar byed pa dang / dad pas byin pa chud mi gson pa dang / tshul khrims ma nyams pa dang /brtul zhugs ma zhig pas dad pas byin pa yongs su longs spyod par byed pa dang / dad pas byin pa spong bar mi byed pa dang / bslab pa 'bul bar mi byed pa dang / bdag nyid kyi nyes pa'i skabs dang / 'khrul pa tshol zhing dge ba mi spyoms la/ sdig pa 'chags par byed pa dang /gzhan dag gi nyes pa'i skabs dang / 'khrul pa la lhug par 'jog pa dang / bsams bzhin du srog gi phyir yang ltung ba mi 'byin cing / byung na yang myur ba myur ba kho nar chos bzhin du phyir byed pa dang / 'phral gyi bya ba dag la yang mkhas shing le lo med pa dang / rang nyid kyis byed cing gzhan las lus kyi bsnyen bkur yongs su mi tshol ba dang /sangs rgyas rnams dang sangs rgyas kyi nyan thos rnams kyi mthu bsam gyis mi khyab pa dang / zab mo bstan pa dag la 'di ni de bzhin gshegs pa rnams kyis mkhyen cing gzigs pa yin gyi/ bdag gis ni ma yin no snyam du rig nas/de la mos pa spyod cing sbong bar mi byed pa dang / rang gi lta ba mchog tu 'dzin pa la gnas par ma byed cing / cal col du 'dzin pa dang / spang dka' bar mi smra ba yin te/ de yon tan de dag dang ldan zhing de ltar spyod do/ /de ltar bslab pa na / dge sbyong gi rgyan gyis brgyan cing mdzes pa yin no//'di lta ste dper na 'dod pa la longs spyod pa'i skyes bu long tshol bab pa/ cha ba'i rang bzhin can la la zhig khrus byas shing byug pas byugs te/ gos dkar po bgos la / rgyan sna tshogs 'di lta ste/ mgul gdub dag dang / gdu bu rgyan can dag dang / dbung rgyan dag dang / sor gdub dag dang / rgyan dag dang / gser dang dngul gyi phreng ba dag gis brgyan na mdzes pa de bzhin du/ de yang dge sbyong gi yon tan gyi rgyan sna tshogs de dag gis brgyan na mdzes shing lham me/ lhan ne/ lhang nger 'gyur bas na/ de'i phyir dge sbyong gi rgyan zhes bya ste/de ni dge sbyong gi rgyan zhes bya'o// // bar gyi sdom ni/ /dad ldan g.yo med nad nyung dang / brtson 'grus shes rab 'dod chung dang / chog shes gso sla dgeng sla dang / /sbyangs dang mdzes dang drod rig dang / /skyes bu dam chos mkhas rtags dang //bzod dang des dang gya nom yin/ /sdom ni/ bdag dang gzhan gyi 'byor pa dang / /mdun dang tshul khrims dbang po dang / /de bzhin zas dang mi nyal dang / /shes bzhin du ni spyod pa dang / /de bzhin dge ba'i bshes gnyen dang / /dam chos nyan dang sems pa dang //bar chad med dang gtong ba dang / /dge sbyong rgyan ni tha ma yin/ /bsdus pa'i sdom ni/ /'jig rten pa yi chags bral dang / /de bzhin 'jig rten 'das pa dang / /de dag nyid tshogs nges 'byung ba'i/ /sa yi ming du byas pa yin/ /rnal 'byor spyod pa'i sa nyan thos kyi sar gtogs pa las/rnal 'byor gyi gnas dang po rdzogs so// //bam po bdun pa/ /'jig rten pa yi chags bral dang / /de bzhin 'jig rten 'das pa dang / /de dag nyid tshogs nges 'byung ba'i/ /sa yi ming du byas pa yin/ /zhes nges par 'byung ba'i sa ji skad bstan cing /ji skad yongs su bsgrags pa de la/ gang dag nges par 'byung ba'i gang zag rnams ni du/ gang zag rnams kyi rnam par gzhag pa ni ji lta bu yin/ dmigs pa ni gang / gdams ngag ni gang / bslab pa ni gang / bslab pa dang rjes su mthun pa'i chos rnams ni gang / rnal 'byor nyams pa ni gang / rnal 'byor rnams ni gang / yid la byed pa ni gang / rnal 'byor gyi rnal 'byor du bya ba dag ni gang / rnal 'byor spyod pa rnams ni gang / rnal 'byor bsgom pa ni gang / bsgoms pa'i 'bras bu ni gang / gang zag gi rnams grangs dag ni du/ bdud dag ni du/ bdud kyi las dag ni du/ rtsom pa 'bras bu yod pa ni ji lta bu yin zhe na/ smras pa/ de la gang zag ni nyi shu rtsa brgyad yod de/ nyi shu rtsa brgyad gang zhe na/ 'di lta ste/ dbang po rtul po dang / dbang po rnon po dang / 'dod chags shas che ba dang / zhe sdang shas che ba dang / gti mug shas che ba dang /nga rgyal shas che ba dang / rnam par rtog pa shas che ba dang / cha mnyam par gyur pa dang / nyon mongs pa chung ba'i rang bzhin can dang / zhugs pa dang / 'bras bu la gnas pa dang / dad pas rjes su 'brang ba dang / chos kyi rjes su 'brang ba dang / dad pas mos pa dang /mthong bas thob pa dang / lus kyi mngon du byed pa dang / re ltar thogs na srid pa lan bdun pa dang / rigs nas rigs su skye ba dang / bar chad gcig pa dang / bar ma dor yongs su mya ngan las 'da' ba dang / skyes nas yongs su mya ngan las 'da' ba dang / mngon par 'du byed pa med par yongs su mya ngan las 'da' ba dang / mngon par 'du byed pa dang bcas pas yongs su mya ngan las 'das pa dang / gong du 'pho ba dang / dus kyis rnam par grol ba dang / mi g.yo ba'i chos can dang / shes rab kyis rnam par grol ba dang / gnyi ga'i cha las rnam par grol ba'o//de la gang zag dbang po rtul po gang zhe na/ gang zag dbang po rtul po rnams rtul zhing snga ma bzhin du shes bya'i dngos po la bul bar 'jug pa dang dal bus 'jug pa yin no/ /de yang rnam pa gnyis su rig par bya ste/ dang po nyid nas dbang po rtul ba'i rigs yin pa dang /dbang po yongs su ma bsgoms pa'o/ /gang zag dbang po rnon po gang zhe na/ gang zag gang dbang po rnams rno zhing snga ma bzhin du shes bya'i dngos po la bul bar 'jug pa ma yin zhing / dal bus 'jug pa ma yin pa'o/ / yang rnam pa gnyis su rig par bya ste/dang po nyid nas dbang po rnon po'i rigs gang yin pa dang / dbang po yongs su bsgoms pa'o/ /gang zag 'dod chags shas che ba gang zhe na/ gang zag gang gis sngon tshe rabs gzhan dag tu 'dod chags kun du bsten cing / goms par byas lan mang du byas pas/ de rgyu de dang rkyen des da ltar chags par 'gyur ba'i dngos po la 'dod chags shas chen po dang /'dod chags yun ring por skye bar 'gyur ba ste/ de ni gang zag 'dod chags shas che ba zhes bya'o/ /gang zag zhe sdang shas che ba gang zhe na/ gang zag gang gis sngon tshe rabs gzhan dag tu zhe sdang kun du bsten cing goms par byas//lan mang du byas pas/ de rgyu de dang rkyen des da ltar zhe sdang bar 'gyur ba'i dngos po la zhe sdang shas chen po dang / zhe sdang yun ring por skye bar 'gyur ba ste/ de ni gang zag zhe sdang shas che ba zhes bya'o/ /gang zag gti mug shas che ba gang zhe na/gang zag gang gis sngon tshe rabs gzhan dag tu gti mug kun du bsten cing goms par byas/ lan mang du byas pas/ de rgyu de dang rkyen des da ltar rmongs par 'gyur ba'i dngos po la gti mug shas chen po dang / gti mug yun ring por skye bar 'gyur ba ste/de ni gang zag gti mug shas che ba zhes bya'o/ /gang zag nga rgyal shas che ba gang zhe na/ gang zag gang gis sngon tshe rabs gzhan dag tu nga rgyal kun du bsten cing / goms par byas lan mang du byas pas/ de rgyu de dang rkyen des da ltar khengs par 'gyur ba'i dngos po la/nga rgyal shas chen po dang / nga rgyal yun ring por skye bar 'gyur ba ste/ de ni gang zag nga rgyal shas che ba zhes bya'o/ /gang zag rnam par rtog pa shas che ba gang zhe na/ gang zag gang gis sngon tshe rabs gzhan dag tu rnam par rtog pa kun du bsten cing / goms par byas/lan mang du byas pas/ de rgyu de dang rkyen des da ltar rnam par rtog pa dang mthun pa'i dngos po la rnam par rtog pa shas chen po dang / rnam par rtog pa yun ring po skye bar 'gyur ba ste/ de ni gang zag rnam par rtog pa shas che ba zhes bya'o/ /gang zag cha mnyam par 'gyur ba gang zhe na/gang zag gang gis sngon tshe rabs gzhan dag tu/ 'dod chags dang / zhe sdang dang / gti mug dang / nga rgyal dang / rnam par rtog pa kun du ma bsten cing / goms par ma byas pas/ lan mang du ma byas kyang / chos de dag nyes dmigs su ma mthong zhing /sun ma phyin/ yang dag par ma rtogs pas/ de rgyu de dang rkyen des da ltar chags par 'gyur ba dang / zhe sdang bar 'gyur ba dang / rmongs par 'gyur ba dang / khengs par 'gyur ba dang / rnam par rtog pa dang mthun pa'i dngos po la/ 'dod chags shas chen po dang /'dod chags yun ring po skye bar mi 'gyur yang / 'di lta ste/ dngos po des de la 'dod chags kun du mi 'byung ba ma yin pa dang / 'dod chags ji lta ba bzhin du zhe sdang dang / gti mug dang / nga rgyal dang / rnam par rtog pa rnams kyang de bzhin te/ de ni gang zag cha mnyam par 'gyur ba zhes bya'o//gang zag nyon mongs pa chung ba'i rang bzhin can gang zhe na/ gang zag gang gis sngon tshe rabs gzhan dag tu 'dod chags kun du ma bsten cing goms par ma byas/ lan mang du ma byas la/ nyes dmigs su yang lan mang du mthong zhing sun yang phyin/ yang dag par yang rtogs pas/ de rgyu de dang rkyen des da ltar chags par 'gyur ba'i dngos po chen po dang / mang po dang / lhag pa dang phrad cing mngon du gyur pa la ni 'dod chags bul bar skye la/ 'bring dang chung ngu la ni gtan mi skye ba dang / 'dod chags la ji lta ba bzhin du zhe sdang dang / gti mug dang / nga rgyal dang / rnam par rtog pa yang de bzhin du rig par bya ste/ de ni gang zag nyon mongs pa chung ba'i rang bzhin can zhes bya'o/ /gang zag zhugs pa gang zhe na/ smras pa/ gang zag zhugs pa ni rnam pa bzhi ste/ bzhi gang zhe na/ 'di lta ste/ rgyun du zhugs pa'i 'bras bu'i phyir zhugs pa dang /lan cig phyir 'ong ba'i 'bras bu'i phyir zhugs pa dang / phyir mi 'ong ba'i 'bras bu'i phyir zhugs pa dang / dgra bcom pa nyid kyi 'bras bu'i phyir zhugs te / de ni gang zag zhugs pa zhes bya'o/ /gang zag 'bras bu la gnas pa gang zhe na/ smras pa/ gang zag 'bras bu la gnas pa yang rnam pa bzhi ste/ rgyun du zhugs pa'i 'bras bu la gnas pa dang / lan cig phyir 'ong ba'i 'bras bu la gnas pa dang / phyir mi 'ong ba'i 'bras bu la gnas pa dang / dgra bcom pa nyid kyi 'bras bu la gnas pa ste/ de ni gang zag 'bras bu la gnas pa zhes bya'o//gang zag dad pas rjes su 'brang ba gang zhe na/ smras pa/ gang zag gang gzhan las gdams shing rjes su bstan pa yongs su tshol zhing / de de'i stobs kyis 'di lta ste/ 'bras bu rtogs par bya ba'i phyir sgrub par byed cing / gzung ba dang / kun chub par bya ba dang /bsams pa dang / gzhal ba dang / nye bar brtags pa'i chos rnams la bdag nyid kyis chos de dag bsgom pa'i rnam pas rjes su 'jug pa'i mthu med cing mi nus la/ gang zag gi rjes su 'brang ba'i dad pas sgrub par byed pa kho na yin te/ de ni gang zag dad pas rjes su 'brang ba zhes bya'o//gang zag chos kyis rjes su 'brang ba gang zhe na/ smras pa/ gang zag gang ji ltar thos pa dang / kun chub par byas pa dang / bsams pa dang / gzhal ba dang / nye bar brtags pa'i chos rnams la bdag nyid kyis chos de dag bsgom pa'i rnam pas 'di lta ste/'bras bu rtogs par bya ba'i phyir/ rjes su 'jug pa'i mthu yod cing nus la/ gzhan gyis gdams shing rjes su bstan pa yongs su mi tshol ba yin te/ de ni gang zag chos kyi rjes su 'brang ba zhes bya'o/ /gang zag dad pas mos pa gang zhe na/ smras pa/ gang zag dad pas rjes su 'brang ba de nyid gang gi tshe gzhan gyis gdams shing rjes su bstan pa las rjes su bsten te/ dge sbyong gi 'bras bu rtogs par byed/ reg par byed/ mngon sum du byed pa de'i tshe na/ de ni gang zag dad pas mos pa zhes bya'o/ /gang zag mthong bas thob pa gang zhe na/smras pa/ gang zag chos kyi rjes su 'brang ba de nyid gang gi tshe gzhan gyis gdams shing rjes su bstan pa las ma bsten par dge sbyong gi 'bras bu rtogs par byed/ reg par byed/ mngon sum du byed pa de'i tshe na/ de ni gang zag mthong bas thob pa zhes bya'o/ /gang zag lus kyis mngon sum du byed pa gang zhe na/smras pa/ gang zag gang rnam par thar pa brgyad la rjes su mthun pa dang / rjes su mthun pa ma yin par snyoms par 'jug cing ldang bar byed pa dang / lus kyis mngon sum du byas nas/ lan mang du gnas par yang byed la/ thams cad kyi thams cad du zag pa zad pa ni rjes su ma thob pa ste/de ni gang zag lus kyis mngon sum du byed pa zhes bya'o/ /gang zag re ltar thogs na srid pa lan bdun pa gang zhe na/ smras pa/ gang zag gang kun tu sbyor ba gsum po 'jig tshogs la lta ba dang / tshul khrims dang / brtul zhugs mchog tu 'dzin pa dang /the tshom rnams spangs nas/ log par mi ltung ba'i chos can rdzogs pa'i byang chub tu nges par gzhol ba/ re ltar thogs na srid pa lan bdun pa'i rgyun tu zhugs par gyur cing / lha dang mir lan bdun bdun mtshams sbyar zhing 'khor nas sdug bsngal mthar byed pa ste/de ni gang zag re ltar thogs na srid pa lan bdun pa zhes bya'o/ /gang zag rigs nas rigs su skye ba gang zhe na/ smras pa/ rigs nas rigs su skye ba ni gnyis te/ lha'i rigs nas rigs su skye ba dang / mi'i rigs nas rigs su skye ba'o/ /de la lha'i rigs nas rigs su skye ba ni/lha rnams kyi rigs nas rigs su mtshams sbyar zhing / 'khor nas sdug bsngal mthar byed pa gang yin pa'o/ /de la mi'i rigs nas rigs su skye ba ni/ mi rnams kyi rigs nas rigs su mtshams sbyar zhing / 'khor nas sdug bsngal mthar byed pa gang yin pa ste/gnyi ga yang gang zag rgyun du zhugs pa yin par rig par bya'o/ /de la gang zag bar chad gcig pa gang zhe na/ smras pa / gang zag lan cig phyir 'ong ba phyir mi 'ong ba'i 'bras bu'i phyir zhugs pa/ 'dod pa na spyod pa'i nyon mongs pa rnams las/ nyon mongs pa chen po dang 'bring ni spangs la/lhag ma chung ngu gcig pu las 'dod pa na spyod pa'i lha'i gnas su lan cig skyes nas de nyid du yongs su mya ngan las 'da' zhing / 'jig rten 'dir lan cig phyir mi 'ong ba gang yin pa ste/ de ni gang zag bar chad gcig pa zhes bya'o/ /gang zag bar ma dor yongs su mya ngan las 'da' ba gang zhe na/smras pa/ gang zag bar ma dor yongs su mya ngan las 'da' ba ni rnam pa gsum ste/ de la gang zag bar ma dor yongs su mya ngan las 'da' ba gcig ni/ shi 'phos ma thag kho nar bar ma dor srid pa mngon par grub pa'i tshe/ bar ma dor srid pa mngon par 'grub par byed cing mngon par 'grub pa dang dus mnyam pa kho nar yongs su mya ngan las 'da' ba ste/'di lta ste/ dper na bur ma'i me stag byung ma thag kho nar 'chi ba lta bu'o/ /gang zag bar ma dor yongs su mya ngan las 'da' ba gnyis pa ni/ bar ma do'i srid pa mngon par 'grub par byed cing /bar ma dor srid pa mngon par 'grub pa de la gnas pa'i dus gzhan gyis yongs su mya ngan las 'da' zhing / skye ba'i srid pa gal ba der ni da dung mi gzhol ba ste/ 'di lta ste/ dper na lcags kyi thu lum mam / lcags glegs pa mer bsregs shing rab tu 'bar ba dag lcags kyi tho ba dag gis brdungs pa na/lcags kyi tsha tsha gnam du yar ba kho nar 'chi ba lta bu ste / gang zag bar ma dor yongs su mya ngan las 'da' ba gsum pa ni/ bar ma do'i srid pa mngon par 'grub par byed cing / mngon par grub nas kyang /skye ba'i srid pa ga la ba der gzhol bar byed la/ gzhol nas kyang ma skyes pa kho nar yongs su mya ngan las 'da' bar byed pa ste/ 'di lta ste dper na/ lcags kyi tsha tsha gnam du yar nas phyir log ste sa lam lhung ba kho nar 'chi ba lta bu'o/ /gang zag bar ma dor yongs su mya ngan las 'da' ba gsum po de dag gcig tu bsdus pa ni/gang zag bar ma dor yongs su mya ngan las 'da' ba zhes bya'o/ /gang zag skyes nas yongs su mya ngan las 'da' ba gang zhe na/ smras pa/ skyes ma thag kho nar yongs su mya ngan las 'da' ba gang yin pa ste/de ni gang zag skyes nas yongs su mya ngan las 'da' ba zhes bya'o/ /gang zag mngon par 'du byed pa med par yongs su mya ngan las 'da' ba gang zhe na/ smras pa/ mngon par 'du byed pa med pa dang / 'bad pa med pa dang ngal ba med pas lam mngon du byas shing der skyes nas yongs su mya ngan las 'da' ba gang yin pa ste/de ni gang zag mngon par 'du byed pa med par yongs su mya ngan las 'da' ba zhes bya'o/ /gang zag mngon par 'du byed pa dang bcas pas yongs su mya ngan las 'da' ba gang zhe na/ smras pa/ mngon par 'du byed pa dang / 'bad pa dang /ngal bas lam mngon du byas shing / der skyes nas yongs su mya ngan las 'da' ba gang yin pa ste/ de ni gang zag mngon par 'du byed pa med par yongs su mya ngan las 'da' ba zhes bya'o/ /gang zag gong du 'pho ba gang zhe na/ smras pa/ gang zag phyir mi 'ong ba bsam gtan dang por skyes pa ni de nyid du yongs su mya ngan las mi 'da' bar des na shi 'phos nas gong nas gong du 'og min gyi bar gyi lhar 'gro ba'am//'du shes med 'du shes med min gyi skye mched kyi bar gyi skye ba'i gnas mngon par sgrub par byed pa gang yin pa ste/ de ni gang zag gong du 'pho ba zhes bya'o//gang zag dus kyis rnam par grol ba gang zhe na/ smras pa/ gang zag dbang po rtul po'i rigs can 'jig rten pa'i tshe 'di la bde bar gnas pa dag las yongs su nyams par 'gyur ba dang / 'chi bar sems pa dang / rnam par grol ba rjes su srung ba dang /'di lta ste/ de nyid yongs su nyams par mi 'gyur ba'i dbang du byas nas/ shin tu bag yod pa'i spyod pa la sbyor ba'i rjes su brtson par byed pa dang / de ji srid du shin tu mngon par brtson par mi byed pa de srid du de ni dge ba'i phyogs de tsam zhig byed kyi/ shin tu khyad par du 'gyur bar bya ba'i phyir nyin mo dang /mtshan mo dang / skad cig dang / thang cig dang / yud tsam de dang de dag 'da' bar mi byed pa gang yin pa ste/ de ni gang zag dus kyis rnam par grol ba zhes bya'o/ /gang zag mi g.yo ba'i chos can gang zhe na/ smras pa/ de las bzlog pa ni gang zag mi g.yo ba'i chos can yin par rig par bya'o//gang zag shes rab kyis rnam par grol ba gang zhe na/ smras pa/ gang zag thams cad kyi thams cad du zag pa zad pa yang rjes su thob cing / rnam par thar pa brgyad kyang lus kyi mngon sum du byas nas bsgrubs te gnas pa ni ma yin pa ste/de ni gang zag shes rab kyis rnam par grol ba zhes bya'o/ /gang zag gnyi ga'i cha las rnam par grol ba gang zhe na/ smras pa/ gang zag gang thams cad kyi thams cad du zag pa zad pa yang rjes su thob cing / rnam par thar pa brgyad kyang lus kyi mngon sum du byas nas bsgrubs te gnas la/de'i sems nyon mongs pa'i sgrib pa dang / rnam par thar pa'i sgrib pa las rnam par grol bar 'gyur ba ste/ de ni gang zag gnyi ga'i cha las rnam par grol ba zhes bya'o/ /gang zag rnams kyi rnam par gzhag pa ji lta bu yin zhe na/ rab tu dbye ba bcu gcig gang zag rnams rnam par gzhag par rig par bya ste/bcu gcig gang zhe na/ 'di lta ste/ dbang po'i rab tu dbye ba dang / sde ba'i rab tu dbye ba dang / spyad pa'i rab tu dbye ba dang / smon lam gyi rab tu dbye ba dang / lam gyi rab tu dbye ba dang / lam dang 'bras bu'i rab tu dbye ba dang / sbyor ba'i rab tu dbye ba dang / snyoms par 'jug pa'i rab tu dbye ba dang / skye ba'i rab tu dbye ba dang / yongs su nyams pa'i rab tu dbye ba dang / sgrib pa'i rab tu dbye bas so/ /de la re zhig dbang po rab tu dbye bas ni/ gang zag dbang po rtul po dang /dbang po rnon po dag rnam par gzhag go/ /de la sde pa'i rab tu dbye ba ni gang zag rnam pa bdun rnam par gzhag ste/ dge slong dang / dge slong ma dang / dge slob ma dang / dge tshul dang / dge tshul ma dang / dge bsnyen dang / dge bsnyen ma rnams so/ /de la spyod pa'i rab tu dbye ba ni gang zag bdun rnam par gzhag ste/gang zag 'dod chags shas che ba gang yin pa de ni 'dod chags spyad pa'o/ /zhe sdang shas che ba gang yin pa de ni zhe sdang spyad pa'o/ /gti mug shas che ba gang yin pa de ni gti mug spyad pa'o/ /nga rgyal shas che ba gang yin pa de ni nga rgyal spyad pa'o//rnam par rtog pa shas che ba gang yin pa de ni rnam par rtog pa spyad pa'o/ /cha mnyam par gyur pa gang yin pa de ni cha mnyam par spyad pa'o/ /nyon mongs pa chung ba'i rang bzhin can gang yin pa de ni/ nyon mongs pa chung ngu spyad pa yin par rig par bya'o/ /de la gang zag 'dod chags spyad pa'i rtags rnams gang zhe na/'di na gang zag 'dod chags spyad pa ni chags par 'gyur ba'i dngos po chung ngu dang / ngan pa thams cad la yang 'dod chags kyi kun nas dkris pa chen po stug po dang chen po skyed par byed na/ 'bring dang bzang po dag la lta smos kyang ci dgos te/'dod chags kyi kun nas dkris pa de yang yun ring du sems kyi rgyud la gnas par byed cing / 'dod chags kyi kun nas dkris pa de dang yun ring du rjes su 'brel bar 'gyur ba dang / de chags par 'gyur ba'i chos rnams kyis zil gyis non par 'gyur zhing chags par 'gyur ba'i chos rnams zil gyis gnon par mi rigs pa dang /dbang po mnyen pa dang / dbang po 'jam pa dang / dbang po mi rtsub pa dang / dbang po mi brlang ba dang / gzhan dag la 'di lta ste/ lus dang ngag gis shin tu rnam par tho 'tshams pa'i rang bzhin can ma yin pa dang / 'bral bar dka' ba dang / yid 'byung bar dka' ba dang / dman pa la mos pa dang / las kyi mtha' dam pa dang / las kyi mtha' brtan pa dang / brtul zhugs dam pa dang / brtul zhugs brtan pa dang / spro ring ba dang / 'tshog chas dang / yo byad dag la brkam pa'i rang bzhin can yin zhing /de la gdu ba dang / yid bde ba mang ba dang / kun dga' ba mang ba dang / khro gnyer med pa dang / bzhin gyi mdog gsal ba dang / 'dzum pa sngar gtong ba yin te/ de lta bu dang mthun pa dag ni gang zag 'dod chags spyad pa'i rtags rnams yin par rig par bya'o/ / de la gang zag zhe sdang spyad pa'i rtags rnams gang zhe na/ 'di ni gang zag zhe sdang spyad pa ni/ zhe sdang bar 'gyur ba'i dngos po la khong khro ba'i rgyu mtshan chung ngus kyang khong khro ba'i kun nas dkris pa sdug pa dang mang po skye bar byed na/ 'bring bo dang chen po dag gis lta smos kyang ci dgos te/ khong khro ba'i kun nas dkris pa de yang yun ring du sems kyi rgyud la gnas par byed cing / khong khro ba'i kun nas dkris pa de dang yun ring du rjes su 'brel par 'gyur ba dang / de khong khro bar 'gyur ba'i chos rnams kyis zil gyis non par 'gyur zhing / khong khro bar 'gyur ba'i chos rnams zil gyis non par mi nus pa dang /dbang po mi mnyen pa dang / dbang po mi 'jam pa dang / dbang po rtsub pa dang / dbang po brlang ba dang / gzhan dag la 'di lta ste/ lus dang ngag gis shin tu rnam par mtho btsams pa'i rang bzhin can yin pa dang / 'bral bar sla ba dang / yid 'byung bar sla ba dang /gcor ba dang / mu cor smra ba dang / spyi rtol che ba dang / mi mos pa mang ba dang / las kyi mtha' dam pa dang / las kyi mtha' brtan pa dang / brtul zhugs dam pa dang / brtul zhugs brtan pa dang / yid mi bde ba mang ba dang / 'khrug pa mang ba dang / bzod pa med pa dang / spro thung ba dang / mi mthun pa'i rang bzhin can yin pa dang / mthun par 'dzin pa ma yin pa dang / khro ba mang ba dang / bzlog dka' ba'i rang bzhin can dang / 'khrug pa mang ba dang / bsam pa khro zhing gtum pa dang / 'tshig cing brlang por smra ba dang /de chung zad tsam zhig smras na yang nong zhing 'khrug la gnod sems skyed pa dang / gnod bzhin du gnas pa dang / 'khrug pa skyed pa dang / khro gnyer dang ldan pa dang / bzhin gyi mdog mi gsal ba dang / gzhan gyi 'byor pa la zhe sdang zhing phrag dog mang ba yin te/de lta bu dang mthun pa dag ni gang zag zhe sdang spyad pa'i rtags rnams yin par rig par bya'o/ /de la gang zag gti mug spyad pa'i rtags rnams gang zhe na/ 'di na gang zag gti mug spyad pa rnams ni rmongs par 'gyur ba'i dngos po chung ngu la yang gti mug gi kun nas dkris pa stug po dang mang po skyed par byed na/'bring dang chen po dag la lta smos kyang ci dgos te/ gti mug gi kun nas dkris pa de yang yun ring du sems kyi rgyud la gnas par byed cing / gti mug gi kun nas dkris pa de dang yun ring du rjes su 'brel bar 'gyur ba dang / de rmongs par 'gyur ba'i chos rnams kyis zil gyis non par 'gyur zhing /rmongs par 'gyur ba'i chos rnams zil gyis gnon par mi nus pa dang / dbang po bul ba dang / dbang po blun pa dang / dbang po zhan pa dang / lus kyi las kyi mtha' lhod pa dang / ngag gi las kyi mtha' lhod pa dang / nyes par bsams pa sems pa dang /nyes par smra ba brjod pa dang / nyes par bya ba'i las byed pa dang / le lo che ba dang / sgrub mi phod pa dang / smra ba zhan pa dang / yid mi gzhungs pa dang / brjed ngas pa dang / shes bzhin du mi spyod pa dang / log par 'dzin pa dang / 'bral bar dka' ba dang /yid 'byung bar dka' ba dang / dman pa la mos pa dang / glen pa dang / dig pa dang / lkugs pa dang / lag pas brda byed pa dang / legs par gsungs pa dang / nyes par bshad pa'i chos rnams kyi don kun shes par mi nus pa dang / rkyen gyis phrogs pa dang /gzhan gyis phrogs pa dang / gzhan gyi dring 'jog pa yin te/ de lta bu dang mthun pa dag ni gang zag gti mug spyad pa'i rtags rnams su rig par bya'o/ /de la gang zag nga rgyal spyad pa'i rtags rnams gang zhe na/ 'di na gang zag nga rgyal spyad pa ni khengs par 'gyur ba dang / mthun pa'i dngos po chung ngu la yang nga rgyal gyi kun nas dkris pa stug po dang / mang po skyed par byad na/ 'bring dang chen po dag la lta smos kyang ci dgos te/ nga rgyal gyis kun nas dkris pa de yang yun ring du sems kyi rgyud la gnas par byed cing / nga rgyal gyi kun nas dkris pa de yang yun ring du rjes su 'brel bar 'gyur ba dang /de khengs par 'gyur ba dang mthun pa'i chos rnams kyis zil gyis non par 'gyur zhing / khengs par 'gyur ba dang mthun pa'i chos rnams zil gyis gnon par mi nus pa dang / dbang po rgod pa dang / dbang po 'dam bu ltar mtho ba dang / dbang po khengs pa dang / lus cher brgyan pa la sbyor ba'i rjes su brtson pa dang / btsan ngag tu smra zhing mi 'dud pa dang / pha ma dang / nye du dang / bla ma dang / bla ma lta bu dag la dus dus su rkyen du bab pa'i mchod pa mi byed pa dang / khengs pa dang / lus mi 'dud pa dang / gsong por smra ba dang /phyag 'tshal ba dang / mngon du ldang ba dang / thal mo sbyor ba dang / 'dud par byed pa'i ngang tshul can ma yin pa dang / bdag nyid kun tu 'dzin pa dang / bdag la stod pa dang / gzhan la smod pa dang / rnyed pa 'dod pa dang / bkur sti 'dod pa dang / grags pa'i sgra'i tshogs 'dod pa dang /tham thom gyi snod du gyur pa dang / dbral bar dka' ba dang / yid 'byung bar dka' ba dang / rgya chen po la mos pa dang / snying rje chung ba dang / bdag dang / sems can dang / srog dang / gso ba dang / gang zag tu lta ba shas che ba dang / khro gtum che ba dang / 'khrug pa dang ldan pa yin te/ de lta bu dang ldan pa dag ni gang zag nga rgyal spyad pa'i rtags rnams yin par rig par bya'o/ /de la gang zag rnam par rtog pa spyad pa'i rtags rnams gang zhe na/ 'di na gang zag rnam par rtog pa spyod pa ni rnam par rtog pa dang mthun pa'i dngos po chung ngu la yang rnam par rtog pa'i kun nas dkris pa stug po dang mang po skyed par byed na/'bring dang chen po dag la lta smos kyang ci dgos te/ rnam par rtog pa'i kun nas dkris pa de yang yun ring du sems kyi rgyud la gnas par byed cing / rnam par rtog pa'i kun nas dkris pa de dang yun ring du rjes su 'brel bar 'gyur ba dang / de rnam par rtog pa dang mthun pa'i chos rnams kyis zil gyis gnon par 'gyur zhing / rnam par rtog pa dang mthun pa'i chos rnams zil gyis non par mi nus pa dang / dbang po mi brtan pa dang / dbang po g.yo ba dang /dbang po 'gyur ba dang / dbang po 'khrug pa dang / lus kyi las kyi mtha' brtad pa dang / ngag gi las kyi mtha' brtad pa dang / dbral bar dka' ba dang / yid 'byung bar dka' ba dang / spros pa 'dod pa dang / spros pa la dga' ba dang / nem nur mang ba dang / the tshom mang ba dang / 'dun pa dang ldan pa dang / brtul zhugs mi brtan pa dang / brtul zhugs ma nges pa dang / las kyi mtha' mi brtan pa dang / las kyi mtha' ma nges pa dang / dogs pa mang ba dang / brjed ngas pa dang / dben pa la mngon par mi dga' ba dang / rnam par g.yeng ba mang ba dang /'jig rten gyi sna tshogs pa dag la 'dun pa'i 'dod chags rjes su 'jug pa dang / mkhas pa dang / le lo med pa dang / sgrub phod pa yin no/ /de lta bu dang mthun pa dag ni gang zag rnam par rtog pa spyad pa'i rtags rnams yin par rig par bya ste/ de ni spyad pa'i rab tu dbye bas gang zag rnam par gzhag pa yin par rig par bya'o//de la ji ltar na smon lam gyi rab tu dbye bas gang zag rnam par gzhag pa yin zhe na/ gang zag nyan thos kyi theg par smon lam btab pa yang yod/ rang sangs rgyas kyi theg par smon lam btab pa yang yod/ theg pa chen por smon lam btab pa yang yod do/ /de la gang zag gang nyan thos kyi theg par smon lam btab pa de ni nyan thos kyi rigs su 'gyur ba'am/ rang sangs rgyas kyi rigs su 'gyur ba'am/ theg pa chen po'i rigs su 'gyur ba yin no/ /de la gang zag gang rang sangs rgyas kyi theg par smon lam btab pa de yang nyan thos kyi rigs su 'gyur ba'am/rang sangs rgyas kyi rigs su 'gyur ba'am/ theg pa chen po'i rigs su 'gyur ba yin no/ /de la gang zag gang theg pa chen por smon lam btab pa de yang / nyan thos kyi rigs su 'gyur ba'am/ rang sangs rgyas kyi rigs su 'gyur ba'am/ theg pa chen po'i rigs su 'gyur ba yin no/ /de la gang zag nyan thos kyi rigs can gang yin pa de ni rang byang chub bam/ bla na med pa yang dag par rdzogs pa'i byang chub tu smon lam btab tu zin kyang / de nyan thos kyi rigs can yin pa'i phyir dus kyi mthar gdon mi za bar smon lam de las phyir log ste/nyan thos kyi theg pa'i smon lam kho na la gnas par 'gyur ro/ /rang sangs rgyas kyi theg pa'i rigs can dang / theg pa chen po'i rigs can de yang de bzhin du rig par bya'o/ /de la gang zag de dag gi smon lam 'pho zhing / smon lam 'dre bar 'gyur yang rigs 'pho ba dang rigs 'dre ba ni mi 'gyur ro/ /don gyi skabs 'dir ni gang zag nyan thos kyi theg par smon lam btab pa dang / nyan thos kyi rigs can de dag yin par rig par bya ste/ de ltar na smon lam gyi rab tu dbye bas gang zag rnam par gzhag pa yin no//de la ji ltar na lam gyi rab tu dbye bas gang zag rnam par gzhag pa yin zhe na/ gang zag ji skad bstan cing ji skad yongs su bsgrags pa de dag ni/ lam bzhis nges par 'byung ba yin te/ bzhi gang zhe na/ mngon par shes pa bul ba dka' ba'i lam yang yod/ mngon par shes pa myur ba dka' ba'i lam yang yod/ /mngon par shes pa bul ba sla ba'i lam yang yod/ /mngon par shes pa myur ba sla ba'i lam yang yod do/ /de la gang zag dbang po rtul po bsam gtan gyi dngos gzhi ma thob pa'i lam gang yin pa de ni mngon par shes pa bul ba dka' ba zhes bya'o//de la gang zag dbang po rnon po bsam gtan gyi dngos gzhi ma thob pa'i lam gang yin pa de ni/ mngon par shes pa myur bar dka' ba zhes bya'o/ /de la gang zag dbang po rtul po bsam gtan gyi dngos gzhi thob pa'i lam gang yin pa de ni/ mngon par shes pa bul ba sla ba zhes bya'o//de la gang zag dbang po rnon po bsam gtan gyi dngos gzhi thob pa'i lam gang yin pa de ni/ mngon par shes pa myur ba sla ba zhes bya ste/ de ltar na lam gyi rab tu dbye bas gang zag rnam par gzhag pa yin par rig par bya'o/ /de la ji ltar na lam dang 'bras bu'i rab tu dbye bas gang zag rnam par gzhag pa yin par rig par bya zhe na/'di lta ste/ zhugs pa bzhi po rgyun du zhugs pa'i 'bras bu'i phyir zhugs pa dang / lan cig phyir 'ong ba'i 'bras bu'i phyir zhugs pa dang / phyir mi 'ong ba'i 'bras bu'i phyir zhugs pa dang / dgra bcom pa nyid kyi 'bras bu'i phyir zhugs pa dang / 'bras bu la gnas pa bzhi po rgyun du zhugs pa'i 'bras bu la gnas pa dang / lan cig phyir 'ong ba'i 'bras bu la gnas pa dang / phyir mi 'ong ba'i 'bras bu la gnas pa dang / dgra bcom pa nyid kyi 'bras bu la gnas pa dag gi ste/zhugs pa'i lam du zhugs pa gang dag yin pa'i zhugs pa de dag ni de dag gi zhugs pa'i lam gyi rnam par gzhag pa yin no/ /de dag gi 'bras bu'i dge sbyong gi 'bras bu la gnas pa gang dag yin pa de dag ni de dag gi lam gyi 'bras bu rnam par gzhag pa yin te/ de ltar na lam dang 'bras bu'i rab tu dbye bas gang zag rnam par gzhag pa yin par rig par bya'o//ji ltar na sbyor ba'i rab tu dbye bas gang zag rnam par gzhag pa yin zhe na/ 'di lta ste/ gang zag dad pas rjes su 'brang ba dang / chos kyi rjes su 'brang ba dag gi ste/ gang zag dad pas rjes su 'brang bas zhugs pa gang yin pa de ni dad pas rjes su 'brang ba yin no//chos rnams la gzhan gyi dring mi 'jog cing / rnam par 'byed pa'i rjes su 'brang bas zhugs pa gang yin pa de ni chos kyi rjes su 'brang ba yin te/ de ltar na sbyor ba'i rab tu dbye bas gang zag rnam par gzhag pa yin par rig par bya'o//de la ji ltar na snyoms par 'jug pa'i rab tu dbye bas gang zag rnam par gzhag pa yin zhe na/ 'di lta ste/ gang zag lus kyis mngon du byed pa rnam par thar pa brgyad po gzugs can gzugs rnams la lta ba dang / nang gzugs med par 'du shes pas phyi rol gyi gzugs rnams la lta ba dang /sdug pa'i rnam par thar pa lus kyis mngon sum du byas nas bsgrubs te gnas pa dang / nam mkha' mtha' yas skye mched dang / rnam shes mtha' yas skye mched dang / ci yang med pa'i skye mched dang / 'du shes med 'du shes med min skye mched dang / 'du shes dang tshor ba 'gog pa dag lus kyi mngon sum du byas nas bsgrubs te gnas shing /rjes su mthun pa dang / rjes su mthun pa ma yin par snyoms par 'jug pa dang ldang bar mi byed la/ thams cad kyi thams cad du zag pa zad pa rjes su thob pa ni ma yin pa ste/ de ltar na snyoms par 'jug pa'i rab tu dbye bas gang zag rnam par gzhag pa yin no//de la ji ltar skye ba'i rab tu dbye bas gang zag rnam par gzhag pa yin zhe na/ 'di lta ste/ gang zag re ltar thogs na srid pa lan bdun pa dang / rigs nas rigs su skye ba dang / bar chad gcig pa dang / bar ma dor yongs su mya ngan las 'da' ba dang /skyes nas yongs su mya ngan las 'da' ba dang / mngon par 'du byed pa med par yongs su mya ngan las 'da' ba dang / mngon par 'du byed pa dang bcas pas yongs su mya ngan las 'da' ba dang / gong du 'pho ba dag gi skye bas de dag nyid rnam par gzhag pa yin te/de ltar na skye ba'i rab tu dbye bas gang zag rnam par gzhag pa yin no/ /de la ji ltar na yongs su nyams pa'i rab tu dbye bas gang zag rnam par gzhag pa yin zhe na/ 'di lta ste/ dus kyis rnam par grol ba'i dgra bcom pa tshe 'di la bde bar gnas pa dag las yongs su nyams pa'i skal ba can gyi gang yin pa dang /yongs su mi nyams pa'i rab tu dbye bas mi g.yo ba'i chos can gyi dgra bcom pa tshe 'di la bde bar gnas pa dag las yongs su nyams par mi 'gyur ba'i skal ba can du rnam par gzhag pa gang yin pa ste/ de ltar na yongs su nyams pa'i rab tu dbye bas gang zag rnam par gzhag pa yin no//de la ji ltar na sgrib pa'i rab tu dbye bas gang zag rnam par gzhag pa yin zhe na/ 'di lta ste/ shes rab kyis rnam par grol ba dang / gnyi ga'i cha las rnam par grol ba'i dgra bcom pa dag gi ste/ de la shes rab kyis rnam par grol ba'i dgra bcom pa ni nyon mongs pa'i sgrib pa las ni rnam par grol la/snyoms par 'jug pa'i sgrib pa las ni rnam par grol ba ma yin no/ /gnyi ga'i cha las rnam par grol ba'i dgra bcom pa ni nyon mongs pa'i sgrib pa las kyang rnam par grol la / snyoms par 'jug pa'i sgrib pa las kyang rnam par grol ba yin pas/de'i phyir gnyi ga'i cha las rnam par grol ba zhes bya'o/ /de ltar na sgrib pa'i rab tu dbye bas gang zag rnam par gzhag pa yin te/ ji skad bstan pa'i rab tu dbye ba de dag gis ji skad bstan pa'i gang zag rnams go rims bzhin du rnam par gzhag pa yin par rig par bya'o//de la dmigs pa gang zhe na/ smras pa/ de yang rnam pa bzhi ste/ bzhi gang zhe na/ 'di lta ste/ khyab pa'i dmigs pa dang / spyad pa rnam par sbyong ba'i dmigs pa dang / mkhas pa'i dmigs pa dang / nyon mongs pa rnam par sbyong ba'i dmigs pa'o//de la khyab pa'i dmigs pa gang zhe na/ smras pa/ de yang rnam pa bzhi ste/ bzhi gang zhe na/ 'di lta ste/ rnam par rtog pa dang bcas pa'i gzugs brnyan dang / rnam par rtog pa med pa'i gzugs brnyan dang / dngos po'i mtha' dang / dgos pa yongs su grub pa'o//de la rnam par rtog pa dang bcas pa'i gzugs brnyan gang zhe na/ 'di ltar 'di na la la dam pa'i chos thos pa'am/ gdams shing rjes su bstan pa la brten nas/ mthong ba'am/ thos pa'am/ bye brag phyed pa'am/ yongs su brtag pa nye bar bzung ste/ shes par bya ba'i dngos po dang cha mthun pa'i gzugs brnyan la mnyam par gzhag pa'i sa pa'i lhag mthong gi rnam pa dag gis rnam par lta bar byed cing /rnam par 'byed par byed/ rab tu rnam par 'byed par byed/ yongs su rtog par byed/ yongs su dpyod par byed pa ste/ de la shes bya'i dngos po gang zhe na/'di lta ste/ mi sdug pa'am/ byams pa'am/ rkyen 'di pa nyid kyis rten cing 'brel par 'byung ba'am/ khams rab tu dbye ba'am/ dbugs rngub pa'am / dbugs 'byung ba dran pa'am/ phung po la mkhas pa'am/ khams la mkhas pa'am/ skye mched la mkhas pa'am/rten cing 'brel bar 'byung ba la mkhas pa'am/ gnas dang gnas ma yin pa la mkhas pa'am/ sa 'og ma dag gi rags pa nyid dam/ sa gong ma dag gi zhi ba nyid dam/ bden pa sdug bsngal ba'am/ bden pa kun 'byung ba'am/ bden pa 'gog pa'am/ bden pa lam gang yin pa ste/ de ni shes bya'i dngos po zhes bya'o/ /shes bya'i dngos po de'i gdams shing rjes su bstan pa'am/ dam pa'i chos thos pa la brten cing / de la brten nas mnyam par gzhag pa'i sa pa'i yid la byed pa mngon du byas te/ chos de dag nyid la mos par byed cing /shes bya'i dngos po de nyid la mos par byed do/ /de de'i tshe na shes bya'i dngos po la mngon sum du mthong ba dang 'dra ba'i mos pa skye bar 'gyur gyi/ shes bya'i dngos po de mngon sum du gyur cing phrad pa'am/ mngon sum du gyur pa ni ma yin no/ /de dang 'dra ba'i rdzas gzhan yang ma yin mod kyi 'on kyang mos pa'i mthu yin te/mnyam par gzhag pa'i sa pa'i yid la byed pa'i mthus na de de 'dra'o/ /des de shes bya'i dngos po de dag dang 'dra bar snang bas de'i phyir de ni shes bya'i dngos po dang cha mthun pa'i gzugs brnyan zhes bya ste/ rnal 'byor pa de brtag par bya ba shes bya'i dngos po'i rang bzhin de la yang dag par rtog par byed pa na/yon tan dang skyon nges par rtog par byed pa gang yin pa de ni/ rnam par rtog pa dang bcas pa'i gzugs brnyan zhes bya'o/ /rnam par rtog pa med pa'i gzugs brnyan gang zhe na/ 'di ni rnal 'byor ba des gzugs brnyan gyi mtshan ma bzung nas rnam par lta bar mi byed cing /rnam par 'byed par mi byed rab tu rnam par 'byed par mi byed/ yongs su rtog par mi byed/ yongs su dpyod par mi byed mod kyi/ 'on kyang dmigs pa de nyid ma btang ba'i sems de zhi gnas kyi rnam pas yang dag par zhi bar byed de/ 'di lta ste/sems gnas par byed pa rnam pa dgus sems nang kho nar 'jog par byed/ yang dag par 'jog par byed/ bsdus te 'jog par byed/ nye bar 'jog par byed/ dul bar byed/ zhi bar byed/ nye bar zhi bar byed/ rgyud gcig tu byed cing / ting nge 'dzin du byed do/ /de de'i tshe na rnam par rtog pa med pas gzugs brnyan de la dmigs par mi byed cing de dmigs pa de la phyogs gcig kho nar dran pa rtse gcig tu 'jog par byed kyi/rnam par lta bar mi byed cing / rnam par 'byed par mi byed/ rab tu rnam par 'byed par mi byed/ yongs su rtog par mi byed/yongs su dpyod par mi byed pa yin no/ /gzugs brnyan de yang gzugs brnyan zhes kyang bya/ ting nge 'dzin gyi mtshan ma dang / ting nge 'dzin gyi spyod yul dang / ting nge 'dzin gyi thabs dang / ting nge 'dzin gyi sgo dang / yid la byed pa'i rten dang / nang du rnam par rtog pa'i lus dang /snang brnyan zhes kyang bya ste/ de dag ni shes bya'i dngos po dang cha mthun pa'i gzugs brnyan de'i ming gi rnam grangs yin par rig par bya'o/ /dngos po'i mtha' gang zhe na/ dmigs pa'i ji snyed yod pa nyid dang / ji lta ba bzhin du yod pa nyid gang yin pa'o/ /de la ji snyed yod pa nyid gang zhe na/de phan chad gzugs kyi phung po dang / tshor ba'i phung po dang / 'du shes kyi phung po dang / 'du byed kyi phung po dang / rnam par shes pa'i phung po med do zhes chos lngas 'dus byas kyi dngos po thams cad bsdus pa dang / khams rnams dang / skye mched rnams kyis chos thams cad bsdus pa dang /'phags pa'i bden pa rnams kyis shes bya'i dngos po thams cad bsdus pa gang yin pa de ni ji snyed yod pa nyid ces bya'o/ /de la ji lta ba bzhin du yod pa nyid gang zhe na/ dmigs pa'i yang dag pa nyid dang / de bzhin nyid rigs pa bzhi po 'di lta ste/ ltos pa'i rigs pa dang /bya ba byed pa'i rigs pa dang / 'thad pa sgrub pa'i rigs pa dang / chos nyid kyi rigs pa'i rigs pa dang ldan pa gang yin pa ste/ de ltar dmigs pa'i ji snyed yod pa nyid gang yin pa dang / ji lta ba bzhin du yod pa nyid gang yin pa de dag nyag gcig tu bsdus pa gang yin pa de ni dngos po'i mtha' zhes bya'o//de la dgos pa yongs su grub pa gang zhe na/ rnal 'byor pa de'i zhi gnas dang / lhag mthong gi gzugs brnyan la dmigs pa'i yid la byed pa gang yin pa de kun tu bsten cing goms par byas/ lan mang du byas pa'i rgyus yongs su rdzogs par gyur cing /de yongs su rdzogs pas gnas ngan len thams cad shin tu ma byang zhing / gnas yongs su 'gyur la/ gnas yongs su gyur pas/ gzugs brnyan las yang dag par 'das nas/ bsam gtan dang po la snyoms par 'jug pa/ bsam gtan dang po thob pa'i bsam gtan dang po'i spyod yul lam/bsam gtan gnyis pa dang / bsam gtan gsum pa dang / bsam gtan bzhi pa la snyoms par 'jug pa bsam gtan bzhi pa thob pa'i bsam gtan bzhi pa'i spyod yul lam/ nam mkha' mtha' yas skye mched dang / rnam shes mtha' yas skye mched dang /ci yang med pa'i skye mched dang / 'du shes med 'du shes med min skye mched la snyoms par 'jug pa de thob pa'i de'i spyod yul gyi shes bya'i dngos po de nyid la rnam par rtog pa med pa'i ye shes dang / mthong ba mngon sum du 'byung bar 'gyur te/ de ni dogs pa yongs su grub pa zhes bya'o//dmigs pa'i dngos po bzhi po de dag ni thams cad du 'gro zhing / dmigs pa thams cad kyi rjes su song ba dang / 'das pa dang / ma 'ongs pa dang / da ltar byung ba'i yang dag par rdzogs pa'i sangs rgyas rnams kyis bshad pa yin pas na/ de'i phyir de dag ni khyab pa'i dmigs pa zhes bya'o//gzhan yang de dag ni zhi gnas kyi phyogs dang / lhag mthong gi phyogs dang / dngos po thams cad dang ldan pa dang / yang dag pa'i dngos po dang ldan pa dang / rgyu dang 'bras bu'i dngos po dang ldan pa'i dmigs pa yin pas na de'i phyir yang de dag ni khyab pa'i dmigs pa zhes bya ste de la re zhig rnam par rtog pa dang bcas pa'i gzugs brnyan zhes gang gsungs pa de ni 'dir lhags thong gi phyogs kyi dmigs pa yin no//rnam par rtog pa med pa'i gzugs brnyan zhes gang gsungs pa de ni 'dir zhi gnas kyi phyogs kyi dmigs pa yin no//dngos po'i mtha' zhes gang gsungs pa de ni 'dir dngos po thams cad dang ldan pa dang / yang dag pa'i dngos po dang ldan pa'i dmigs pa yin no/ /dgos pa yongs su grub pa zhes gang gsungs pa de ni 'dir rgyu dang 'bras bu'i dngos po dang ldan pa'i dmigs pa yin no// // nyan thos kyi sa/ bam po brgyad pa/ bcom ldan 'das kyis tshe dang ldan pa nam gru las brtsams te de skad gsungs so zhes 'di skad kyang grag ste / bcom ldan 'das la tshe dang ldan pa nam grus zhu ba zhus pa/ btsun pa dge slong rnal 'byor spyod pa dmigs pa ji snyed cig la ni sems nye bar gtod par bgyid lags/dmigs pa gang la ni sems nye bar gtod par bgyid pa lags/ ji ltar dmigs pa la sems nye bar gtod par bgyid na legs par nye bar gtad pa lags/ bcom ldan 'das kyis bka' stsal pa/ nam gru legs so legs so//nam gru khyod don 'di yongs su 'dri bar sems pa ni yang legs so/ /de'i phyir legs par rab tu nyon la yid la gyis shig dang bshad par bya'o/ /nam gru 'di la dge slong rnal 'byor pa rnal 'byor spyod pa spyad pa rnam par byang bar 'dod pa'am/ mkhas par bya bar 'dod pa'am/ zag pa rnams las sems rnam par grol ba 'dod pa ni rjes su mthun pa'i dmigs pa dang / gzugs brnyan gyi dmigs pa la sems nye bar gtod par byed cing yang dag pa nyid du yang nye bar gtod par byed na/ de la rtag 'grus pa'i bsam gtan pa yin no/ /de la ji ltar na rjes su mthun pa'i dmigs pa la sems nye bar gtod par byed pa yin zhe na/nam gru gal te dge slong rnal 'byor pa rnal 'byor spyod pa de 'dod chags spyad pa kho na zhig yin na ni/ dmigs pa mi sdug pa la sems nye bar gtod par byed do/ /zhe sdang spyad pa zhig yin na ni byams pa la'o/ /gti mug spyad pa zhig yin na ni rkyen 'di pa nyid kyi rten cing 'brel par 'byung ba la bya'o//nga rgyal spyad pa zhig yin na ni/ khams rab tu dbye ba la sems nye bar gtod par byed de/ de ltar na de rjes su mthun pa'i dmigs pa la sems nye bar gtod par byed pa yin no/ /nam gru gal te dge slong rnal 'byor pa rnal 'byor spyad pa ste /rnam par rtog pa spyad pa kho na zhig yin na ni/ dbugs rngub pa dang / dbugs 'byung ba dran pa la sems nye bar gtod par byed de/ de ltar na de rjes su mthun pa'i dmigs pa la sems nye bar gtod par byed pa yin no/ /nam gru gal te dge slong rnal 'byor pa rnal 'byor spyod pa de 'du byed rnams kyi rang gi mtshan nyid la kun tu rmongs pa'am/bdag dang sems can dang / srog dang / skye ba po dang / gso ba po dang / gang zag gi dngos po la kun tu rmongs pa zhig yin na ni/ phung po la mkhas pa la sems nye bar gtod par byed do/ / rgyu la kun tu rmongs pa zhig yin na ni khams la mkhas pa la'o/ /rkyen la kun tu rmongs pa zhig yin na ni/ skye mched la mkhas pa la'o/ /mi rtag pa dang / sdug bsngal ba dang / bdag med pa la kun tu rmongs pa zhig yin na ni/ rten cing 'brel par 'byung ba la mkhas pa dang / gnas dang gnas ma yin pa la mkhas pa la sems nye bar gtod par byed do//'dod pa'i khams kyi 'dod chags dang bral bar 'dod pa zhig yin na ni/ 'dod pa rnams kyi rags pa nyid dang / gzugs rnams kyi zhi ba nyid la'o/ /gzugs rnams las 'dod chags dang bral bar 'dod pa zhig yin na ni/gzugs rnams kyi rags pa nyid dang / gzugs med pa rnams kyi zhi ba nyid la sems nye bar gtod par byed do/ /'jig tshogs thams cad las skyob par 'dod cing / rnam par grol bar 'dod pa zhig yin na ni/ bden pa sdug bsngal dang / bden pa kun 'byung ba dang /bden pa 'gog pa dang / bden pa lam la sems nye bar gtod par byed do/ nam gru de ltar na dge slong rnal 'byor pa rnal 'byor spyod pa rjes su mthun pa'i dmigs pa la sems nye bar gtod par byed pa yin no/ /nam gru ji ltar na dge slong rnal 'byor pa [(]rnam [,]rnal [)]'byor spyod pa gzugs brnyan gyi dmigs pa la sems nye bar gtod par byed pa yin zhe na/nam gru 'di la dge slong rnal 'byor pa rnal 'byor spyod pa de shes bya'i dngos po de dang de kho na dag rnam par 'byed par 'dod/ rab tu rnam par 'byed par 'dod/ yongs su rtog par 'dod/ /yongs su dpyod par 'dod la /des de dag dang po nyid nas mthong ba'am/ thos pa'am/ bye brag phyed pa'am/ rnam par rig par yang gyur na/ de mthong ba de nyid kyi dbang du byas sam/ thos pa'am bye brag phyed pa'am/ rnam par rig pa de nyid kyi dbang du byas nas/ mnyam par gzhag pa'i sa pa'i yid la byed pas yid la byed cing /rnam par rtog par byed/ mos par byed do/ /des shes bya'i dngos po nye bar gyur cing / mngon du gyur pa de nyid mi mthong mod kyi/ 'on kyang de la de'i gzugs brnyan dang / de'i snang brnyan ye shes tsam mam/ mthong ba tsam mam/ rjes su dran pa tsam 'byung bar 'gyur te/ dge slong rnal 'byor pa rnal 'byor spyod pa de dus dus su dmigs pa de dang ldan pa'i sems yang dag par zhi bar byed cing / dus dus su lhag pa'i shes rab chos rnam par 'byed pa la yang rnal 'byor du byed de/ nam gru de ltar na dge slong rnal 'byor pa/rnal 'byor spyod pa/ gzugs brnyan gyi dmigs pa sems nye bar gtod par byed pa yin no/ /nam gru ji ltar na dge slong rnal 'byor pa rnal 'byor spyod pa dmigs pa la sems yang dag pa nyid du nye bar gtod par byed pa yin zhe na/ nam gru gal te dge slong rnal 'byor pa rnal 'byor spyod pa de dmigs pa la sems nye bar gtod par byed pa na/des shes bya ji snyed shes par bya ba de snyed shes shing de yang yang dag pa ji lta ba bzhin du phyin ci log par gyur na/ nam gru de ltar na dge slong rnal 'byor pa rnal 'byor spyod pa de dmigs pa la sems yang dag pa nyid du nye bar gtod par byed pa yin no//nam gru ji ltar na dge slong rnal 'byor pa rnal 'byor spyod pa rtag 'grus pa'i bsam gtan pa yin zhe na/ nam gru gal te dge slong rnal 'byor pa rnal 'byor spyod pa de de ltar dmigs pa la sems nye bar gtod par byed pa na/ rtag tu sbyor ba dang gus par byas te/sbyor bar byed cing / dus dus su zhi gnas kyi mtshan ma sgom par byed pa dang / rab tu 'dzin pa'i mtshan ma dang / btang snyoms kyi mtshan ma kun tu bstan cing goms par byas lan mang du byas pa'i rgyus gnas ngan len thams cad shin tu sbyangs pa'i phyir/ gnas yongs su dag pa rjes su thob par reg par byed/mngon sum du byed cing / shes bya'i dngos po mngon sum du gyur pas/ dmigs pa yongs su dag pa dang / 'dod chags dang bral bas sems yongs su dag pa dang / ma rig pa dang bral bas ye shes yongs su dag pa rtog par byed reg par byed/mngon sum du byed na/ nam gru de ltar na dge slong rnal 'byor pa rnal 'byor spyod pa rtag 'grus pa'i bsam gtan pa yin no/ /nam gru gang gi phyir dge slong rnal 'byor pa rnal 'byor spyod pa dmigs pa de nyid la sems nye bar gtod par byed cing / dmigs pa la de ltar sems nye bar gtod par byed na/de ltar na de'i sems de dmigs pa la legs par nye bar gtod pa yin zhes gsungs so zhes grag go/ /de la/ /mtshan ma spyod pa'i rnal 'byor pa/ /kun tu yang dag don rtogs shing / /rtag 'grus gzugs brnyan bsam gtan pa/ yongs su dag pa rtog par byed/ /ces tshigs su bcad pa de yang yod de/ de la re zhig mtshan ma spyod pa'i rnal 'byor pa zhes gang gsungs pa des ni/ zhi gnas kyi mtshan ma dang / rab tu 'dzin pa'i mtshan ma dang / btang snyoms kyi mtshan ma dang / rtag tu byed pa nyid dang / gus par byas te byed pa nyid bstan to//kun dang yang dag don rtogs shing / /zhes gang gsungs pa des ni/ dngos po'i mtha' bstan to/ /rtag 'grus gzugs brnyan bsam gtan pa/ /zhes gang gsungs pa des ni rnam par rtog pa dang bcas pa'i gzugs brnyan dang / rnam par rtog pa med pa'i gzugs brnyan bstan to//yongs su dag pa rtog par byed/ /ces gang gsungs pa des ni dgos pa yongs su grub pa bstan to/ /gzhan yang bcom ldan 'das kyis/ sems kyi mtshan ma mkhas pa dang / /rab tu dben pa'i nyams thob dang / /rtag 'grus dran ldan bsam gtan pa//dga' bde zang zing med par spyod/ /ces kyang gsungs te/ de la re zhig /sems kyi mtshan ma mkhas pa dang / /zhes gang gsungs pa des ni mtshan ma'i sgras ni rnam par rtog pa dang bcas pa'i gzugs brnyan dang / rnam par rtog pa med pa'i gzugs brnyan bstan la/ mkhas pa'i sgras ni dngos po'i mtha' bstan to/ /rab tu dben pa'i nyams thob dang / /zhes gang gsungs pa des ni dmigs pa la yang dag pa nyid du gtod par byed pa'i spong ba la dga' ba nyid dang / bsgom pa la dga' ba nyid bstan to/ /rtag 'grus dran ldan bsam gtan pa/zhes gang gsungs pa des ni zhi gnas dang / lhag mthong gi bsgom pa rtag tu byed pa bstan to/ /dga' bde zang zing mid pa spyod/ /ces gang gsungs pa des ni dgos pa yongs su grub pa bstan to/ /de'i phyir de ltar na khyab pa'i dmigs pa de ni yid ches pa'i lung gi dag pa dang /rigs pa dang ldan pa yin par rig par bya ste/ de ni khyab pa'i dmigs pa zhes bya'o/ /de la spyad pa rnam par sbyong ba'i dmigs pa gang zhe na/ 'di lta ste/ mi sdug pa dang / byams pa dang / rkyen 'di pa nyid kyi rten cing 'brel par 'byung ba dang /khams rab tu dbye ba dang / dbugs rngub pa dang / dbugs 'byung ba dran pa'o/ /de la mi sdug pa gang zhe na/ smras pa/ mi sdug pa ni rnam pa drug ste/ drug gang zhe na/ 'di lta ste/ mi gtsang pa'i mi sdug pa nyid dang / sdug bsngal gyi mi sdug pa nyid dang / ngan pa'i mi sdug pa nyid dang /ltos pa'i mi sdug pa nyid dang / nyon mongs pa'i mi sdug pa nyid dang / rab tu 'jig pa'i mi sdug pa nyid do/ /de la mi gtsang ba'i mi sdug pa nyid gang zhe na/ smras pa/ mi gtsang ba'i mi sdug pa nyid kyang rnam pa gnyis te/ nang la brten pa dang / phyi rol la brten pa yin par rig par bya'o//de la nang la brten pa'i mi gtsang ba'i mi sdug pa nyid gang zhe na/ 'di lta ste/ skra dang / spu dang / sen mo dang / so dang / glog pa dang / dri ma dang / pags pa dang / sha dang / rus pa dang / chu rgyus dang / rtsa dang / mkhal ma dang / snying dang /mchin pa dang / glo ba dang / rgyu ma dang / gnye ma dang / pho ba dang / long ka dang / mcher ba dang / phyi sa dang / mchi ma dang / rdul dang / mchil ma dang / snabs dang / zhag dang / chu sar dang / rkang dang / tshil dang / mkhris pa dang / bad kan dang / rnag dang / khrag dang / glad spri dang / glad rgyas dang / gcin dang / de lta bu dang mthun pa dag ni nang la brten pa'i mi gtsang ba'i mi sdug pa nyid yin par rig par bya'o/ /de la phyi rol la brten pa'i mi gtsang ba'i mi sdug pa nyid gang zhe na/ 'di lta ste/ rnam par bsngos pa dang / rnam par rnags pa dang /rnam par 'bus gzhigs pa dang / rnam par bam pa dang / rnam par zos pa dang / rnam par dmar ba dang / rnam par 'thor ba dang / rus gong dang / keng rus dang / rus pa'i keng rus dang / bshang bas gos pa dang / gci bas gos pa dang / mchil mas gos pa dang /snabs kyis gos pa dang / khrag gis gos pa dang / rnag gis gos pa dang / chab khung dang / ljan ljin dang / de lta bu dang mthun pa dag ni phyi rol la brten pa'i mi gtsang ba'i mi sdug pa nyid yin par rig par bya ste/ nang la brten pa'i mi sdug pa nyid gang yin pa dang / phyi rol la brten pa'i mi sdug pa nyid gang yin pa de ni mi gtsang ba'i mi sdug pa nyid ces bya'o/ /de la sdug bsngal gyi mi sdug pa nyid gang zhe na/ sdug bsngal gyi tshor ba 'byung bar 'gyur ba'i rig pa la brten te byung ba'i tshor ba'i rnam pa lus dang sems kyi tshor bas sdug bsngal ba gang yin pa ste/ de ni sdug bsngal gyi mi sdug pa nyid ces bya'o/ /de la ngan pa'i mi sdug pa nyid gang zhe na/ thams cad shin tu dman pa'i gzhi dang / thams cad shin tu dman pa'i khams gang yin pa ste/ 'di lta ste/ 'dod pa'i khams lta bu ste/ de bas kyang shin tu dman pa dang / shin tu ngan pa dang / shin tu tha chad yin pa'i khams gzhan med pas/de ni ngan pa'i mi sdug pa nyid ces bya'o/ /de la ltos pa'i mi sdug pa nyid gang zhe na/ 'di lta ste/ de'i dngos po 'ga' zhig sdug pa yin yang de las gzhan pa'i shin tu sdug pa dag la ltos na mi sdug pa nyid du snang ste/'di ltar gzugs med pa dag la ltos nas/ gzugs kyi khams mi sdug pa nyid du snang ba dang / 'jig tshogs 'gog pa'i mya ngan las 'das pa la ltos na srid pa'i rtse mo man chad kyang mi sdug pa nyid kyi grangs su 'gro ba dang / de lta bu dang mthun pa dag ni ltos pa'i mi sdug pa nyid ces bya'o//de la nyon mongs pa'i mi sdug pa nyid gang zhe na/ khams gsum na spyod pa'i kun tu sbyor ba dang / 'ching ba dang / bag la nyal dang / nye ba'i nyon mongs pa dang / kun nas dkris pa thams cad du 'gro ba dag ste/ de ni nyon mongs pa'i mi sdug pa nyid ces bya'o/ /de la rab tu 'jigs pa'i mi sdug pa nyid gang zhe na/nya bar len pa'i phung po lnga dag gi mi rtag pa nyid dang / mi brtan pa nyid dang / yid brtan du mi rung ba nyid dang / rnam par 'gyur ba'i chos nyid gang yin pa de ni rab tu 'jig pa'i mi sdug pa nyid ces bya ste/ mi sdug pa de dag ni 'dod chags spyad pa'i rnam par sbyor ba'i dmigs pa yin no//de la 'dod chags gang zhe na/ 'dod chags ni rnam pa lnga ste/ 'di lta ste/ nang gi 'dod pa rnams kyis 'dod pa la 'dun pa 'dod pa'i 'dod chags dang / phyi rol gyi 'dod pa rnams kyis 'khrig pa la 'dun pa 'khrig pa'i 'dod chags dang /yul la 'dun pa yul gyi 'dod chags dang / gzugs la 'dun pa gzugs kyi 'dod chags dang / 'jig tshogs la 'dun pa 'jig tshogs kyi 'dod chags so/ /'dod chags rnam pa lnga po de dag spang ba dang / bsal ba dang / kun mi 'byung bar bya ba'i phyir/mi sdug pa rnam pa drug pa dmigs te/ de la nang la brten pa'i mi gtsang ba'i mi sdug pa nyid la dmigs pas ni/ nang gi 'dod pa rnams kyi 'dod pa la 'dun pa'i 'dod pa'i 'dod chags las sems rnam par sbyong bar byed do/ /de la phyi rol la brten pa'i mi gtsang ba'i mi sdug pa nyid la dmigs pas ni/phyi rol gyi 'dod pa rnams kyis 'khrig pa la 'dun pa/ 'khrig pa'i 'dod chags rnam pa bzhi dang ldan pa/ kha dog gi 'dod chags dang / dbyibs kyi 'dod chags dang / reg pa'i 'dod chags dang / nye bar spyod pa'i 'dod chags dang ldan pa las sems rnam par sbyong bar byed de/de la gang gi tshe rnam par bsngos pa dang / rnam par rnags pa dang / rnam par 'bus gzhigs pa dang / rnam par bam pa dang / rnam par zos pa yid la byed pa de'i tshe ni/ kha dog gi 'dod chags las sems rnam par sbyong bar byed do/ /gang gi tshe rnam par dmar ba yid la byed pa de'i tshe na/dbyibs kyi 'dod chags las sems rnam par sbyong bar byed do/ /gang gi tshe rus gong dang / keng rus dang / rus pa'i keng rus yid la byed pa de'i tshe na reg pa'i 'dod chags las sems rnam par sbyong bar byed do/ /gang gi tshe rnam par 'thor ba yid la byed pa de'i tshe ni/nye bar spyod pa'i 'dod chags las sems rnam par sbyong bar byed de/ de ltar na 'khrig pa'i 'dod chags las sems rnam par sbyong bar byed pa yin no/ /de lta bas na bcom ldan 'das kyis kyang / phyi rol la brten pa'i mi gtsang ba'i mi sdug pa nyid gang yin pa de ni /dur khrod pa rnam pa bzhir rnam par gzhag ste/ des shi nas zhag gcig lon pa'am/ shi nas zhag gnyis lon pa'am/ shi nas zhag gsum lon pa'am/ shi nas zhag bdun lon pa'i bar gyi dur khrod gang dag bya rog dang / chun lag dang / bya rgod dang / khyi dang wa dag gis zos pa de mthong na/ bdag gi lus 'di yang 'di lta bur 'gyur zhing / 'di lta bur gyur pa ste/ chos nyid 'di las ma 'das pa yin no snyam du/ de dag dang lus 'di nyid nye bar sbyor bar byed do zhes gsungs pa de ni/ rnam par bsngos pa dang / rnam par zos pa'i bar dag bstan to/ /des bags pa dang / sha dang / khrag dang / chu rgyus kyi zungs dang bral ba'i dur khrod gang dag mthong na zhes gang gsungs pa des ni rnam par dmar ba bstan to/ /des dur khrod kyi rus pa gang dag mthong na zhes gang gsungs pa des ni rus gong dang /keng rus dang / rus pa'i keng rus bstan to/ /des lag pa'i rus pa dag kyang logs shig /rkang pa'i rus pa dag kyang logs shig /long bu'i rus pa dag kyang logs shig /pus mo'i rus pa dag kyang logs shig la/ rtsib logs kyi rus pa dag dang / dpung pa'i rus pa dag dang / lag ngar gyi rus pa dag dang / sgal tshigs dang / 'gram sbang dang / so rgyun dang / mgo thod dag kyang so sor 'thor ba'i dur khrod gang dag mthong zhing / de bzhin du lo gcig gam/ lo gnyis sam/ lo gsum mam/ lo bdun gyi bar tsam lon pa'i rus pa dung ltar dkar ba'am/thi ba'i mdog 'dra bas rdul gyi phye ma dang 'dres pa dag mthong na zhes gang gsungs pa des ni rnam par 'thor ba bstan te/ de ltar na phyi la brten pa'i mi gtsang ba'i mi sdug pa nyid la dmigs pas ni/ 'khrig pa'i 'dod chags las sems rnam par sbyong bar byed do//de la sdug bsngal gyi mi sdug pa nyid la dmigs pa dang / ngan pa'i mi sdug pa nyid la dmigs pas ni yul la 'dun pa yul gyi 'dod chags las sems rnam par sbyong bar byed do/ /de la ltos pa'i mi sdug pa nyid la dmigs pas ni/ gzugs la 'dun pa gzugs kyi 'dod chags las sems rnam par grol bar byed do//de la nyon mongs pa'i mi sdug pa nyid la dmigs pa dang / rab tu 'jig pa'i mi sdug pa nyid la dmigs pas ni srid pa'i rtse mo man chad kyi 'jig tshogs la 'dun pa'i 'jig tshogs kyi 'dod chags las sems rnam par sbyong bar byed do//de ni re zhig 'dod chags spyad pa'i spyad pa rnam par sbyong ba'i dmigs pa yin no/ /dmigs pa mi sdug pa srid do cog gi thams cad rnam pa thams cad bsdus pa'i phyir de skad brjod par zad kyi/ don gyi skabs 'dir ni mi gtsang ba'i mi sdug pa de nyid las dgongs pa yin te/de las gzhan pa'i mi sdug pa rnams ni/ de las gzhan pa'i spyad pa dag rnam par sbyong ba'i dmigs pa yang yin par rig par bya'o/ /de la byams pa gang zhe na/ mdza' bshes kyi phyogs dang / dgra bo'i phyogs dang / tha mal pa'i phyogs la mnyam par gzhag pa'i sa pa'i phan pa'i bsam pa nye bar gzhag ste/bde ba chung ngu dang / 'bring dang / chen po nye bar bsgrub pa'i phyir mos pa gang yin pa'o/ /de la mdza' bshes kyi phyogs dang / dgra bo'i phyogs dang / tha mal pa'i phyogs gang yin pa de ni dmigs pa yin no/ /de la mnyam par gzhag pa'i sa pa'i phan pa'i bsam pa dang /bde ba nye bar bsgrub ba'i phyir mos pa gang yin pa'o/ / dmigs par byed pa yin te/ de ltar na dmigs pa gang yin pa de dang / dmigs par byed pa gang yin pa de dag gcig tu bsdus pa ni byams pa zhes bya'o/ /de la byams pa dang ldan pa'i sems zhes gang gsungs pa de ni/re zhig phyogs gsum po mdza' bo'i phyogs dang / dgra bo'i phyogs dang / tha mal pa'i phyogs dag la phan pa'i lhag pa'i bsam pa bstan to/ /kho na med pa/ 'gran zla med pa/ gnod pa med pa zhes gang gsungs pa des na phan pa'i lhag pa'i bsam pa de nyid kyi mtshan nyid rnam pa gsum bstan te/de la kho na med pas ni phan pa'i lhag pa'i bsam pa yin te/ de yang tshig 'og ma gnyis po 'gran zla med pa dang / gnod pa med pa la zhes bya ba dag gis rnam par bshad do/ /de la phas kyi dgra'i dngos por gnas pa med pa'i don gyis ni 'gran zla med pa nyid yin no//gnod pa byed pa rnam par spyod pa med pa'i don gyis ni gnod pa med pa nyid yin no/ /yangs pa dang rgya chen por gyur pa dang / tshad med pa zhes gang gsungs pa des ni 'dod pa na spyod pa dang / bsam gtan dang po dang /gnyis pa'i sa pa dang / bsam gtan gsum pa'i sa pa'i bde ba nye bar bsgrub pa chung ngu dang / 'bring dang / chen po bstan to/ /mos te khyab par byas nas bsgrubs te gnas so zhes gang gsungs pa de sa ni mnyam par gzhag pa'i sa pa'i bde ba nye bar bsgrub pa'i phyir mos pa bstan te/bde ba nye bar bsgrub pa de yang phan pa'i lhag pa'i bsam pas yongs su zin pa dang / mos pa yid la byed pa dang ldan pa dang / sdug bsngal yang ma yin bde ba yang ma yin pa'i mdza' bshes kyi phyogs dang / dgra bo'i phyogs dang / tha mal pa'i phyogs la bde bar 'dod pa yin par rig par bya'o//sdug bsngal ba dang / bde bar gyur pa'i mdza' bshes kyi phyogs dang / dgra bo'i phyogs dang / tha mal pa'i phyogs gang yin pa de dag las sdug bsngal bar gyur pa gang yin pa de ni/ snying rje'i dmigs pa yin no/ /bde bar gyur ba gang yin pa de ni dga' ba'i dmigs pa yin te/de ni bsams pa zhes bya'o/ /de ni gang zag gnod sems spyad pa / sems can rnams la byams pa sgom par byed na/ gnod sems gang yin pa de srab mor byed cing / gnod sems spyad pa las sems rnam par sbyong bar byed do //de la rkyen 'di ba nyid kyi rten cing 'brel bar 'byung ba gang zhe na/ dus gsum du 'di lta ste/ ltos pa'i rigs pa dang / bya ba byed pa'i rigs pa dang / 'thad pa sgrub pa'i rigs pa dang / chos nyid kyi rigs pa'i rigs pa dang ldan pa'i 'du byed tsam dang / chos tsam dang / dngos po tsam dang / rgyu tsam dang / 'bras bu tsam gang yin pa ste/ chos rnams kho nas chos rnams 'dren par byed pa nyid du zad kyi/ byed pa po dang / tshor ba po de nyid med pa de ni/ rkyen 'di pa nyid kyi rten cing 'brel bar 'byung ba'i dmigs pa zhes bya ste/gang zag gti mug spyad cing / gti mug che ba dmigs pa de yid la byed na/ gti mug sra ba mor byed cing / gti mug spyad pa las sems rnam par sbyong bar byed do/ /de la khams rab tu dbye ba gang zhe na/ khams drug po dag ste/ 'di lta ste/ sa'i khams dang / chu'i khams dang / me'i khams dang / rlung gi khams dang / nam mkha'i khams dang / rnam par shes pa'i khams so/ /de la sa'i khams gang zhe na/ sa'i khams ni rnam pa gnyis te/ nang gi dang / phyi rol gyi'o/ /de la nang gi sa'i khams gang zhe na/ nang gi so so'i lus zin pa dang /zin par gyur pa la sra ba dang / sra bar gyur pa yod pa gang yin pa'o/ /phyi rol gyi sa'i khams gang zhe na/ phyi rol ma zin pa dang / ma zin par gyur pa la sra ba dang / sra bar gyur pa yod pa gang yin pa'o/ /de la nang gi sa'i khams de yang gang zhe na/ 'di lta ste/ skra dang /spu dang / sen mo dang / so dang / glog pa dang / dri ma dang / pags pa dang / sha dang / rus pa dang / chu rgyus dang / rtsa dang / mkhal ma dang / snying dang / mchin pa dang / glo ba dang / rgyu ma dang / gnye ma dang / pho ba dang / long ka dang / mcher pa dang / phyi sa dag ste/ de ni nang gi sa'i khams zhes bya'o/ /phyi rol gyi sa'i khams de yang gang zhe na/ /'di lta ste/ shing dang / bong ba dang / gseg ma dang / gyo mo dang / shing ljon pa dang / ri'i rtse mo dang / gzhan yang de lta bu dang mthun pa dag ste / de ni phyi rol gyi sa'i khams zhes bya'o//de la chu'i khams gang zhe na/ chu'i khams kyang rnam pa gnyis te/ nang gi dang / phyi rol gyi'o/ /de la nang gi chu'i khams gang zhe na/ nang gi so so'i lus zin pa dang / zin par gyur pa 'di la gsher ba dang / gsher bar gyur pa dang / rlan pa dang / rlan par gyur pa yod pa gang yin pa ste/ de yang 'di lta ste/ mchi ma dang / rdul dang / mchil ma dang / snabs dang / zhag dang / chu ser dang / rkang dang / tshil dang / mkhris pa dang / bad kan dang / rnag dang / khrag dang / glad spri dang / glad rgyas dang / gcin dag ste/ de ni nang gi chu'i khams zhes bya'o//phyi rol gyi chu'i khams gang zhe na/ phyi rol ma zin pa dang / ma zin par gyur pa la gsher ba dang / gsher bar gyur pa dang / rlan pa dang / rlan par gyur pa yod pa gang yin pa ste/ de yang 'di lta ste/ rdzing bu dang / mtsho dang / lteng ka dang / chu klung dang /'bab chu dang / gzhan yang de lta bu dang mthun pa dag ste/ de ni phyi rol gyi chu'i khams zhes bya'o/ /de la me'i khams gang zhe na/ me'i khams kyang rnam pa gnyis te/ nang gi dang / phyi rol gyi'o/ /de la nang gi me'i khams gang zhe na/ nang gi so so'i lus la zin pa dang / zin par gyur pa la tsha ba dang / tsha bar gyur pa dang / dro ba dang / dro bar gyur pa yod pa gang yin pa ste/ de yang 'di lta ste/ lus 'di la me yod cing / des lus 'di gdung bar byed/ kun du gdung bar byed/ yongs su gdung bar byed pa dang / gang gis des zos pa dang / 'thungs pa dang /'chos pa dang / myangs pa rnams legs par bde bar 'ju bar 'gyur ba dang / gang gi shas che bar gyur na/ rims kyis btab po zhes bya ba'i grangs su 'gro ba gang yin pa ste/ de ni nang gi me'i khams zhes bya'o/ /phyi rol gyi me'i khams gang zhe na/ phyi rol ma zin pa dang / ma zin par gyur pa la tsha ba dang / tsha bar gyur pa dang / dro ba dang / dro bar gyur pa yod pa gang yin pa ste/ de yang 'di lta ste/ me gtsub shing thogs pa dag las lci pa'i phye ma brtsal te/ gang byung ba na grong yang sreg par byed/ grong gi nyen kor dang / grong khyer dang / grong khyer gyi nyen kor dang /ljongs dang / ljongs kyi nyen kor dang / gling dang / ldam ldum dang / nags tshal dang / shing dang / rtsa dang / lci ba dag kyang sreg par 'gyur ba dang / gzhan yang de lta bu dang mthun pa dag ste/ de ni phyi rol gyi me'i khams zhes bya'o/ /de la rlung gi khams gang zhe na/ rlung gi khams kyang rnam pa gnyis te/ nang gi dang / phyi rol gyi'o/ /de la nang gi rlung gi khams gang zhe na/ nang gi so so'i lus zin pa dang / zin par gyur pa la rlung dang / rlung du gyur pa dang / yang ba nyid dang / g.yo ba nyid yod pa gang yin pa ste/ de yang 'di lta ste/lus 'di nyid la gyen du 'gro ba'i rlung dang / thur du 'gro ba'i rlung dang / thad kar 'phres pa'i rlung dang / ltor 'khyil pa'i rlung dang / rgyab tu 'khyil pa'i rlung dang / rlung skran sra ba'i rlung dang / rlung skran gyi rlung dang / spu gri lta bu'i rlung dang / shing pib pa la'i lo ma lta bu'i rlung dang /mtshon cha lta bu'i rlung dang / gsud par byed pa'i rlung dang / dbugs rngub pa dang / dbugs rngub pa'i rlung dang / yan lag dang nying lag gi nang du 'jug pa'i rlung dag yod pa ste/ de ni nang gi rlung gi khams zhes bya'o/ /phyi rol gyi rlung gi khams gang zhe na/ phyi rol rol ma zin pa dang /ma zin par gyur pa la rlung dang / rlung gi gyur pa dang / yang ba nyid dang / g.yo ba nyid yod pa gang yin pa ste/ de yang 'di lta ste/ phyi rol na shar gyi rlung dang / lho'i rlung dang / nub kyi rlung dang / byang gi rlung dang / rlung dmar dang / rlung dmar ma yin pa dang / rlung chung ngu dang / rlung chen po dang / khyab pa'i rlung dang / rnam par 'thor ba'i rlung dang / rlung gi dkyil 'khor dang / rlung gi tshogs chen po langs pa'i dus dang / shing ljon pa'i rtse mo 'dud par byed pa dang / rtsig pa'i rtse mo 'gul bar byed pa dang / ri'i rtse mo 'gul bar byed pa dang /'gul bar byas nas kyang phyir mi 'ong bar 'gro ba dag dang / sems can dag gi gos dang / ta la'i lo ma dang / rlung yab kyi g.yab mos brtsal bar bya ba'i rlung dang / gzhan yang gang dag de lta bu dang mthun pa'i rlung dang yod pa gang yin pa ste/ de ni phyi rol gyi rlung gi khams zhes bya'o//de la nam mkha'i khams gang zhe na/ mig sbubs yod pa dang / rna ba'i sbubs yod pa dang / sna sbubs yod pa dang / kha sbubs yod pa dang / mgrin pa sbubs yod pa dang / gang gis mid par byed pa dang / gang du mid par byed pa dang / gang gis mid pa na smad kyi char 'dzag par byed pa dang /gzhan yang gang dag de lta bu dang mthun pa dag ste/ de ni nam mkha'i khams zhes bya'o/ /de la rnam par shes pa'i khams gang zhe na/ mig gi rnam par shes pa dang / rna ba dang / sna dang / lce dang / lus dang / yid kyi rnam par shes pa gang yin pa'o//de yang sems dang / yid dang / rnam par shes pa yin te/ de ni rnam par shes pa'i khams zhes bya'o/ /de la gang zag nga rgyal spyad pa khams rab tu dge ba 'di dag yid la byed na/ lus la ril por 'du shes pa rnam par 'jig par byed cing / mi sdug pa'i 'du shes kyang 'thob par 'gyur la/des khengs par yang mi 'gyur zhing / nga rgyal yang srab mor byed la/ nga rgyal spyad pa de las kyang sems rnam par sbyong bar byed do/ /de ni khams rab tu dbye ba zhes bya ste/ gang zag nga rgyal spyad pa'i spyad pa rnam par sbyong ba'i dmigs pa yin no/ / de la dbugs rngub pa dang / dbugs 'byung ba gang zhe na/ dbugs rngub pa dang / dbugs 'byung ba'i dmigs pa dran pa gang yin pa ste/ de la dbugs rngub pa dang / dbugs 'byung ba dran pa zhes bya'o/ /de la dbugs rngub pa yang rnam pa gnyis te/ gnyis gang zhe na/ dbugs rngub pa dang / bar du dbugs rngub pa'o/ /dbugs 'byung ba yang rnam pa gnyis te/ gnyis gang zhe na/ dbugs 'byung ba dang / bar du dbugs 'byung ba'o/ /de la dbugs rngub pa ni/ dbugs byung ba'i 'jug thogs su kha nang du bltas pa'i rlung lte ba'i phyogs yan chad du nang du 'jug pa gang yin pa ste/de ni dbugs rngub pa zhes bya'o/ /de la bar du dbugs rngub pa ni/ dbugs rngub pa de chad nas/ re zhig dbugs 'byung bam byung gi bar du/ dus chung ngu zhig ngal bso ba dang ldan pa'i gnas skabs na de dang 'dra ba'i rlung nang du 'jug pa gang yin pa ste/de ni bar du dbugs rngub pa zhes bya'o/ /dbugs rngub pa dang / bar du dbugs rngub pa ji lta ba bzhin du/ dbugs 'byung ba dang / de ni dbugs rngub pa zhes bya'o/ / bar du dbugs 'byung ba yang de bzhin du rig par bya'o/ /de la bye brag ni 'di yod de/ kha phyir bltas pa'i rlung lte ba'i phyogs yan chad nas kha'am/sna'i rtse mo'am/ de las phyi rol tshun chad kyi bar du phyir 'byung ba yin no zhes brjod par bya'o/ /dbugs rngub pa dang / dbugs 'byung ba dag gi rgyu ni rnam pa gnyis te/ gnyis gang zhe na/ de la 'phen par byed pa'i las dang /lte ba'i phyogs sbubs yod pa'am/ lus la bde bas lhag pa'i sbubs yod pa'o/ /dbugs rngub pa dang / dbugs 'byung ba dag gi rten ni rnam pa gnyis te/ gnyis gang zhe na/ lus dang / sems so/ /de ci'i phyir zhe na/ lus la yang brten/ sems la yang brten nas dbugs rngub pa dang /dbugs 'byung ba dag 'byung ba'i phyir ro/ /de yang ci rigs su sbyar ro/ / gal te lus la brten pa kho na las 'byung bar gyur na ni/ 'du shes med pa la snyoms par zhugs pa dang / 'gog pa la snyoms par zhugs pa dang / 'du shes med pa'i sems can lha rnams kyi nang du skyes pa rnams la yang 'byung bar 'gyur ro//gal te sems can la brten pa kho na las 'byung bar 'gyur na ni des na gzugs med pa la snyoms par zhugs pa dang / skyes pa'i sems can rnams la yang 'byung bar 'gyur ro/ /gal te lus la yang brten/sems la yang brten nas 'byung bar gyur na ni de yang ci rigs pa ma yin te/ des na bsam gtan bzhi pa la snyoms par zhugs pa dang / skyes pa'i sems can dang / mer mer por gyur pa dang / nur nur por gyur pa dang / ltar ltar por gyur pa'i sems can rnams la yang 'byung bar 'gyur ba zhig na/'byung bar yang mi 'gyur te/ de lta bas na dbugs rngub pa dang / dbugs 'byung ba dag ni lus la yang brten/ sems la yang brten nas 'byung bar 'gyur te/ de yang ci rigs su sbyar ro/ /dbugs rngub pa dang / dbugs 'byung ba dag gi bgrod pa ni rnam pa gnyis te/gnyis gang zhe na/ dbugs rngub pa dag gi bgrod pa ni thur du'o/ /dbugs 'byung ba dag gi bgrod pa ni gyen du'o/ /dbugs rngub pa dang / dbugs 'byung ba dag ni sems can rnam pa gnyis te/ gnyis gang zhe na/ sbubs rags pa yod pa dang / sbubs phra ba yod pa'o//de la sbubs rags pa yod pa gang zhe na/ lte ba'i phyogs yan chad nas kha dang sna'i bar ram/ kha dang sna man chad nas lte ba'i phyogs kyi bar yan chad sbubs rags pa yod pa'o/ /sbubs phra ba yod pa gang zhe na/ lus thams cad dang ldan pa'i spu'i khung bu rnams so/ / dbugs rngub pa dang / dbugs 'byung ba dag gi ming gi rnam grangs 'di ni rnam pa bzhi ste/ bzhi gang zhe na/ rlung dang / dbugs 'ong ba dang / dbugs 'gro ba dang / dbugs rngub pa dang / dbugs 'byung ba dang / lus kyi 'du byed dag go/ /de la 'di lta ste/ rlung zhes bya ba ni rlung gzhan dag dang ming gi rnam grangs gcig ste/thun mong ba yin no/ /de las gzhan pa gsum po dag gi thun mong ma yin pa'o/ /dbugs rngub pa dang / dbugs 'byung ba dag la brtson pa'i skyon ni rnam pa gnyi ste/ gnyis gang zhe na/ sbyor ba ha cang lhod pa dang / sbyor ba ha cang dam pa'o//de la sbyor ba ha cang lhod pas ni le lo dang ldan pa'i sems rmugs pa dang / gnyid kyis kun nas dkris pa'am/ sems phyi rol du rnam par g.yeng bar byed do/ /de la sbyor ba ha cang dam pas ni lus la gnod pa'am/ sems la gnod pa skyed par byed do/ /de la ji ltar na lus la gnod pa skyed par byed ce na/mthu kar bor te/ dbugs rngub pa dang / dbugs 'byung ba dag gis gnod par 'gyur ba'i lus la rlung mi mnyam pa dag 'jug par 'gyur zhing / de dag gis dang po kho nar de'i yan lag dang / nying lag de dang de dag khyab par byed de/ de dag ni khyab byed ces bya'o/ /rlung khyab byed de dag rnam par 'phel ba na nad byed ces bya ba dag tu 'gyur zhing / de dag gis de'i yan lag dang nying lag de dang de dag la nad skyed par byed de/ de ni lus la gnod pa zhes bya'o/ /ji ltar na sems la gnod pa skyed par byed ce na/ de'i sems rnam par g.yeng bar byed pa'am/yid mi bde ba'am/ 'khrug pa rab tu mang po dag gis zil gyis gnon par byed de/ de ltar na sems la gnod pa skyed par byed pa yin no/ /dbugs rngub pa dang / dbugs 'byung ba 'di la yongs su sbyang ba rnam pa lnga yod par rig par bya ste/lnga gang zhe na/ 'di lta ste/ bgrang bas yongs su sbyang ba dang / phung po la 'jug pas yongs su sbyang ba dang / rten cing 'brel bar 'byung ba la 'jug pas yongs su sbyang ba dang / bden pa la 'jug pas yongs su sbyang ba dang / rnam pa bcu drug gis yongs su sbyang ba'o//de la bgrang bas yongs su sbyang ba gang zhe na/ bgrang bas yongs su sbyang ba ni rnam pa bzhi ste/ mdor bsdu na rnam pa bzhi ni 'di lta ste/ re re nas bgrang ba dang / zung du bgrang ba dang / rjes su mthun par bgrang ba dang / rjes su mi mthun par bgrang ba'o//de la re re nas bgrang ba gang zhe na/ dbugs rngub pa dang / dbugs 'byung ba la dmigs pa dang ldan pa'i dran pas/ gang gi tshe dbugs rngub pa brngubs pa de'i tshe/ gcig ces bgrang bar byed pa dang / gang gi dbugs rngub pa 'gags te/ dbugs 'byung ba 'thon zhing byung bar gyur pa de'i tshe na /gnyis zhes bgrang bar byed cing de ltar bgrang ba'i grangs de dag ha cang yang mi nyung / ha cang yang mi mang bar bcu'i bar du bgrang bar byed pa de ni/ re re las bgrang ba zhes bya'o/ /zung du bgrang ba gang zhe na/ gang gi tshe dbugs rngub pa brngubs te 'gags par gyur nas/dbugs 'byung ba 'thon zhing byung bar gyur pa de'i tshe na/ gcig ces bgrang bar byed cing bgrang ba'i tshul des bcu'i bar du bgrang bar byed pa de ni zung du bgrang ba zhes bya ste/ dbugs rngub pa dang / dbugs 'byung ba de gnyis gcig tu bsdus nas gcig ces bgrang bar byed pa nas /de'i phyir zung du bgrang ba zhes bya'o/ /rjes su mthun par bgrang ba gang zhe na/ re re nas bgrang ba'am/ zung du bgrang ba 'dis gcig nas bcu'i bar du grangs kyi lugs bzhin du bgrang ba ste/ de ni rjes su mthun par bgrang ba zhes bya'o/ /rjes su mi mthun par bgrang ba gang zhe na/bcu nas bzung ste dgu dang / brgyad dang / bdun dang / drug dang / lnga dang / gcig gi bar du grangs gcig gi lugs dang mi mthun par bgrang ba ste/ de ni rjes su mi mthun par bgrang ba zhes bya'o/ /de gang gi tshe re re nas bgrang ba'am/ zung du bgrang ba la brten nas rjes su mthun par bgrang ba dang /rjes su mi mthun par bgrang ba la yongs su sbyang bar gyur cing / bar du de'i sems rnam par mi g.yeng la/ sems rnam par g.yeng ba med pas bgrang bar byed pa de'i tshe na/ de la gong du bgrang ba'i khyad par brjod par bya ste/ de la bgrang ba'i khyad par gang zhe na/re re nas bgrang ba'am/ zung du bgrang bas gnyis gcig tu byas te bgrang bar byed pa'o/ /de la zung du bgrang bas gnyis gcig tu byas te/ bgrang ba ni dbugs rngub pa dang / dbugs 'byung ba bzhi la gcig tu 'gyur ro/ /re re nas bgrang bas gnyis gcig tu byas te/bgrang na ni dbugs rngub pa dang / dbugs 'byung ba gnyis la gcig tu 'gyur te/ de lta bus bcu'i bar bu bgrang bar byed do/ /de ltar gong nas gong du bskyed nas brgya'i bar du yang gcig tu byas te/ bgrang bar byed cing brgya gcig tu bgrang ba des rim gyis bcu'i bar du yang bgrang bar byed do//de ltar bgrang ba la brtson pa bcu bcu'i bar du gcig tu byas te/ bgrang bar byed pa de'i bcu tshang gi bar du bcu gcig tu bgrang ba des de'i sems bar du rnam par g.yeng bar mi 'gyur na de tsam gyis na de bgrang bas yongs su sbyang ba byas pa yin no/ /bgrang ba la brtson pa de gal te bar du sems rnam par g.yengs par gyur na/de'i tshe phyir yang gzhi nas bslangs te / rjes su mthun pa'am/ rjes su mi mthun pa'i dang po nas bzung ste/ bgrang ba rtsom par byed do/ /gang gi tshe ba grang ba yongs su byang bas de'i sems de rang gi ngang kho nas phyi rol gyi lam du ma 'jug cing /dbugs rngub pa dang / dbugs 'byung ba'i dmigs pa dang / 'phral la bar chang med par rgyun du 'jug par 'gyur zhing / dbugs rngub pa dang 'jug par yang 'jug par 'dzin la dbugs rngub pa ldog pa na yang ldog par 'dzin cing / dbugs 'byung bas stong pa'i gnas skabs su 'dzin pa dang /dbugs 'byung ba 'jug pa na yang 'jug par 'dzin cing / ldog pa na yang ldog par 'dzin cing / dbugs rngub pas stong pa'i gnas skabs su 'dzin pa mi g.yo mi 'gyur zhing / rnam par g.yeng ba med pa'i rnam pa dang / mngon par dga' ba dang bcas pas 'jug par gyur na/de tsam gyis na bgrang ba'i sa las yang dag par 'das pa yin te/ des yang bgrang bar bya ba med pa yin pas/ dbugs rngub pa dang / dbugs 'byung ba'i dmigs pa la sems nye bar gtod pa 'ba' zhig byed do/ / dbugs rngub pa dang /dbugs 'byung ba'i bar skabs su dbugs 'byung ba dang / dbugs rngub pa 'jug pa dang / ldog pa'i gnas skabs dag rjes su rtogs par bya zhing / nye bar shes par bya ba kho nar zad de/ de ni bgrang bas yongs su sbyang ba zhes bya'o/ /bgrang bas yongs su sbyang ba de yang dbang po rtul po rnams la bstan pa yin te/de ni de dag gi sems gnas par bya ba dang / sems mngon par dga' bar bya ba la rnam par mi g.yeng ba'i gnas yin gyi/ gzhan du na bgrang ba med na de dag gi sems rmugs pa dang / gnyid kyis kun nas dkris pa'am/ sems phyi rol du rnam par g.yeng bar 'gyur bas/bgrang ba la brtson pa de dag ni de mi 'byung ngo / /dbang po rnon po blo gsal ba gang yin pa de dag ni bgrang ba'i sbyor bas dga' zhing 'jug pa ma yin te/ bgrang ba'i sbyor ba lung phog pa nyid kyis myur ba myur ba kho nar rtogs par 'gyur bas des mngon par dga' bar mi byed do//de dag ni dbugs rngub pa dang / dbugs 'byung ba'i dmigs pa la dran pa nye bar gtad nas/ gang du 'jug pa dang / ci tsam du 'jug pa dang / ji ltar 'jug pa dang / gang gi tshe 'jug pa de dag thams cad dran pa nye bar gzhag pas rjes su rtogs par byed/nye bar shes par byed de/ de lta bu de ni de dag gi sbyor ba yin no/ /sbyor ba de la kun tu bsten cing goms par byas/ lan mang du byas pa'i rgyus lus shin tu sbyangs pa dang / sems shin tu sbyangs pa yang skye bar 'gyur zhing rtse gcig pa nyid la yang reg par 'gyur/ dmigs par mngon par dga' ba yang thob par 'gyur ro//de ltar lus yongs su sbyang ba byas pa ste/ de ni gzung ba dang 'dzin pa'i dngos po yid la byed pas phung po rnams la 'jug par byed de/ ji ltar 'jug par byed ce na/ dbugs rngub pa dang / dbugs 'byung ba gang dag yin pa de dag gi rten gyi lus gang yin pa de yid la byed pa na/gzugs kyi phung po la 'jug pa yin no/ /dbugs rngub pa dang / dbugs 'byung ba de dag la/ der 'dzin pa'i dran pa dang mtshungs par ldan pa'i ro myang ba gang yin pa de ni/ tshor ba'i phung po yin no zhes 'jug par byed do/ /kun shes par byed pa gang yin pa de ni 'du shes kyi phung po yin no zhes 'jug par byed do//dran pa gang yin pa de dang / sems pa gang yin pa de dang / de la shes rab gang yin pa de ni 'du byed kyi phung po yin no zhes 'jug par byed do/ /sems dang / yid dang rnam par shes pa gang yin pa de ni rnam par shes pa'i phung po yin no zhes 'jug par byed do//de ltar phung po rnams la zhugs pa de la lan mang du gnas pa gang yin pa de ni phung po la 'jug pas yongs su sbyang ba zhes bya'o/ /gang gi tshe des phung po tsam dang / 'du byed tsam dang / dngos po tsam du mthong zhing yongs su shes par gyur pa de'i tshe/ 'du byed de dag nyid kyi rten cing 'brel par 'byung ba la 'jug par byed de/ji ltar 'jug par byed ce na/ de 'di ltar dbugs rngub pa dang / dbugs 'byung ba de dag gi rten ni gang yin/ rkyen ni gang yin zhes yang dag par tshol zhing yongs su tshol bar byed pa na/ de 'di snyam du sems te/ dbugs rngub pa dang / dbugs 'byung ba 'di dag ni lus la brten zhing lus kyi rkyen dang / sems la brten zhing sems kyis rkyen du byas pa yin no snyam du sems shing / de lus dang sems kyi rkyen yang gang yin zhe na/ lus dang sems kyi rkyen ni srog gi dbang po yin no zhes 'jug par byed pa dang /de srog gi dbang po'i rkyen gang zhe na/ srog gi dbang po'i rkyen ni sngon gyi 'du byed yin no zhes 'jug par byed pa dang / de sngon gyi 'du byed kyi rkyen gang zhe na/ sngon gyi 'du byed kyi rkyen ma rig pa yin no zhes 'jug par byed de/ de ltar na ma rig pa'i rkyen gyis sngon gyi 'du byed sngon gyi 'du byed kyi rkyen gyis srog gi dbang po//srog gi dbang po'i rkyen gyis lus dang sems/ lus dang sems kyi rkyen gyis dbugs rngub pa dang / dbugs 'byung ba dag yod pas/ de la ma rig pa 'gags pas 'du byed 'gag /'du byed 'gags pas srog gi dbang po 'gag /srog gi dbang po 'gags pas lus dang sems 'gag /lus dang sems 'gags pas dbugs rngub pa dang / dbugs 'byung ba 'gag go snyam du sems te de ltar na rten cing 'brel bar 'byung ba la 'jug pa yin no/ /de de la lan mang du gnas pas na rten cing 'brel bar 'byung ba la 'jug pas yongs su sbyong ba byas pa zhes bya ste/de ni rten cing 'brel bar 'byung ba la 'jug pas yongs su sbyang ba zhes bya'o// //nyan thos kyi sa/ bam po dgu pa/ de de ltar rten cing 'brel bar 'byung ba la yongs su sbyang ba byas pas 'du byed gang dag rten cing 'brel bar 'byung ba de dag ni mi rtag pa yin no//mi rtag pa'i phyir sngon ma byung ba las byung ba dang / byung nas kyang 'jig par 'gyur ba yin te/ gang dag sngon ma byung ba la byung zhing byung nas kyang 'jig par 'gyur ba de dag ni skye ba'i chos can dang /rga ba'i chos can dang / na ba'i chos can dang / 'chi ba'i chos can yin no/ /gang dag skye ba dang / rga ba dang / na ba dang / 'chi ba'i chos can yin pa de dag ni sdug bsngal ba yin no/ /gang dag sdug bsngal ba de dag gi bdag med pa dang / rang dbang med pa dang / bdag po dang bral ba yin no zhes 'jug par byed de/ de ltar na de mi rtag pa dang / sdug bsngal ba dang / stong pa dang / bdag med pa'i rnam pa dag gis bden pa sdug bsngal la zhugs pa yin no/ /de 'di snyam du sems te/ 'du byed de dag gis sdug bsngal bar gyur pa dang / nad du gyur pa dang / 'bras su gyur pa gang cung zad mngon par grub pa de dag thams cad ni srid pa'i rkyen las byung ba yin pas sdug bsngal skyed par byed pa'i sred pas gang yin pa 'di ma lus par spangs pa de ni zhi ba/ de ni gya nom pa ste/ bdag gis de ltar shes shing / de ltar mthong la de ltar lan mang du gnas par byas na sred pa ma lus par zad par 'gyur ro snyam du sems te/de ltar na de bden pa kun 'byung ba dang / bden pa 'gog pa dang / bden pa lam la zhugs pa yin no/ /de gang gi tshe de la lan mang du gnas par byed cing / bden pa rnams mngon par rtogs par byed pa de ni/de'i bden pa la 'jug pas yongs su sbyang ba zhes bya'o/ /de ltar bden pa dag la yongs su sbyang ba byas pa de'i mthong bas spang bar bya ba'i nyon mongs pa rnams spangs pa na/ bsgom pas spang bar bya ba rnams ma lus pas de dag spang bar bya ba'i phyir rnam pa bcu drug gis yongs su sbyong bar byed do//rnam pa bcu drug gang zhe na/ 'di lta ste/ dran bzhin du dbugs brngubs na dran bzhin du dbugs brngubs so snyam du slob par byed la/ dran bzhin du dbugs phyung na dran bzhin du dbugs phyung ngo snyam du slob par byed pa dang / dbugs ring ba dang /thung ba dang / lus kyi thams cad yang dag par myong zhing dbugs brngubs na/ lus kyi thams cad yang dag par myong zhing dbugs brngubs so snyam du slob par byed la/ dbugs ring ba dang / thung ba dang / lus kyi thams cad yang dag par myong zhing phyung na/ lus kyi thams cad yang dag par myong zhing dbugs phyung ngo snyam du slob par byed pa dang /lus kyi 'du byed shin tu sbyangs nas/ dbugs brngubs na lus kyi 'du byed shin tu sbyangs nas dbugs brngubs so snyam du slob bar byed pa la/ lus kyi 'du byed shin tu sbyangs nas dbugs phyung na lus kyi 'du byed shin tu sbyangs nas dbugs phyung ngo snyam du slob par byed pa dang /dga' ba yang dag par myong ba dang / bde ba yang dag par myong ba dang / sems kyi 'du byed yang dag par myong ba dang / sems kyi 'du byed shin tu sbyangs nas dbugs brngubs na/ sems kyi 'du byed shin tu sbyangs nas dbugs brngubs so snyam du slob par byed la/dga' ba yang dag par myong ba dang / bde ba yang dag par myong ba dang / sems kyi 'du byed yang dag par myong ba dang / sems kyi 'du byed shin tu sbyangs nas dbugs phyung na sems kyi 'du byed shin tu sbyangs nas dbugs phyung ngo snyam du slob par byed pa dang /sems yang dag par myong ba dang / sems mngon par rab tu dga' ba dang / sems ting nge 'dzin du gzhag pa dang / sems rnam par grol zhing dbugs brngubs na sems rnam par grol zhing dbugs brngubs so snyam du slob par byed la/sems yang dag par myong ba dang / sems mngon par rab tu dga' ba dang / sems ting nge 'dzin du gzhag pa dang / sems rnam par grol zhing dbugs phyung na/ sems rnam par grol zhing dbugs phyung ngo snyam du slob par byed pa dang / mi rtag par rjes su lta ba dang /spang bar rjes su lta ba dang / 'dod chags dang bral bar rjes su lta ba dang / 'gog par rjes su lta zhing dbugs brngubs na 'gog par rjes su lta zhing dbugs brngubs so snyam du slob par byed la/ mi rtag par rjes su lta ba dang / spong bar rjes su lta ba dang / 'dod chags dang bral bar rjes su lta ba dang /'gog par rjes su lta zhing dbugs phyung na/ 'gog par rjes su lta zhing dbugs phyung ngo snyam du slob par byed pa'o/ /de la rnam pa bcu drug po de dag gi rnam par dbye ba ji lta bu yin zhe na/ slob pa bzhi mthong na/ dran pa nye bar gzhag pa bzhi thob pa de kun du sbyor ba lhag ma rnams spang bar bya ba'i phyir/dbugs brngubs pa dang / dbugs 'byung ba'i dmigs pa yid la byed pa rtsom pas na/ de'i phyir dran bzhin du dbugs brngubs na/ dran bzhin du dbugs brngubs so snyam du slob par byed la/ dran bzhin du dbugs phyung na/ dran bzhin du dbugs phyung ngo snyam du slob par byed do zhes bya ba gsungs so/ /gang gi tshe dbugs brngubs pa dang / dbugs 'byung ba la dmigs par byed pa de'i tshe ni dbugs ring du brngubs na/ dbugs ring du brngubs so snyam du slob par byed la/ dbugs ring du phyung na/ dbugs ring du phyung ngo snyam du slob par byed pa yin no/ /gang gi tshe bar du dbugs brngubs pa dang / bar du dbugs 'byung ba la dmigs par byed pa de'i tshe ni / dbugs thung ngu brngubs na/ brngubs so snyam du slob par byed la/ dbugs thung ngu phyung na/ dbugs thung ngu phyung ngo snyam du slob par byed pa yin no// 'di ltar dbugs brngubs pa dang / dbugs 'byung ba dag ni ring du 'jug pa yin la/ bar du dbugs brngubs pa dang / bar du 'byung ba dag ni thung ngur 'jug pa yin pas na/ de dag ji ltar 'jug pa de ltar nye bar mtshon par byed cing shes par byed pa'i phyir ro//gang gi tshe dbugs brngubs pa dang / dbugs 'byung ba dag lus la spu'i khung bu'i sbubs phra ba dag yod pa'i rjes su zhugs par mos shing dmigs par byed pa de'i tshe ni/ lus kyi thams cad yang dag par myong zhing dbugs brngubs na/ lus kyi thams cad yang dag par myong zhing brngubs so snyam du slob par byed la/ lus kyi thams cad yang dag par myong zhing dbugs phyung na lus kyi thams cad yang dag par myong zhing dbugs phyung ngo snyam du slob par byed pa yin no/ /gang gi tshe dbugs brngubs pa dang / bar du dbugs 'byung ba dag 'gags shing dbugs brngubs pa dang / dbugs 'byung ba dag gis stong la/ dbugs brngubs pa dang dbugs 'byung ba dag med pa'i gnas skabs la dmigs par byed pa dang / dbugs 'byung ba dang / bar du dbugs 'byung ba dag 'gags shing /dbugs brngubs pa dang / bar du dbugs brngubs pa dag ma byung la/ dbugs 'byung ba dang / dbugs brngubs pa dag gis stong zhing / de dag med pas de dag gis mchod pa'i gnas skabs stong pa la dmigs par byed pa de'i tshe ni / lus kyi 'du byed shin tu sbyangs nas dbugs brngubs na/lus kyi 'du byed shin tu sbyangs nas dbugs brngubs so snyam du slob par byed la/ lus kyi 'du byed shin tu sbyangs nas/ dbugs phyung na lus kyi 'du byed shin tu sbyangs nas dbugs phyung ngo snyam du slob pa yin no/ /gzhan yang des kun tu bsten cing goms par byas/lan mang du byas pa'i rgyus sngon yongs su sbyangs par ma byas pa'i dbugs brngubs pa dang / dbugs 'byung ba rtsub pa reg na sdug bsngal ba gang dag 'byung bar 'gyur ba de dag shin tu sbyangs par gyur cing yongs su sbyangs par byas pa'i dbugs brngubs pa dang /dbugs 'byung ba 'jam pa reg na bde ba gzhan dag 'byung bar 'gyur bas/ de'i phyir lus kyi 'du byed shin tu sbyangs nas dbugs brngubs na/ lus kyi 'du byed shin tu sbyangs nas dbugs brngubs so snyam du slob par byed la/ lus kyi 'du byed shin tu sbyangs nas dbugs phyung na/lus kyi 'du byed shin tu sbyangs nas dbugs phyung ngo snyam du slob par byed do zhes bya ba gsungs so/ /de ltar dbugs rngub pa dang / dbugs 'byung ba dran pa'i sbyor bas rab tu brtson pa des/ gal te bsam gtan dang po'am/bsam gtan gnyis pa thob par gyur na/ de de'i tshe na dga' ba yang dag par myong zhing dbugs brngubs na dga' ba yang dag par myong zhing dbugs brngubs so snyam du slob par byed la/ dga' ba yang dag par myong zhing dbugs phyung na/ dga' ba yang dag par myong zhing dbugs phyung ngo snyam du slob par byed pa yin no//gal te des dga' ba med pa'i bsam gtan gsum pa thob par gyur na/ de'i tshe na de bde ba yang dag par myong zhing dbugs brngubs na/ bde ba yang dag par myong zhing dbugs brngubs so snyam du slob par byed la/ bde ba yang dag par myong zhing dbugs phyung na/ bde ba yang dag par myong zhing dbugs phyung ngo snyam du slob par byed pa yin no/ /bsam gtan gsum pa yan chad la ni dbugs brngubs pa dang / dbugs 'byung ba dran pa'i sbyor ba med pas na/ de'i phyir bsam gtan gsum pa yan chad du yongs su bsgrags shing bsdus pa yin no//de ltar dga' ba yang dag par myong ba'am/ bde ba yang dag par myong ba de/ gal te brgya la brgya lam na brjed ngas pas bdag go zhe'am/ 'di ni bdag gi bdag go zhe'am/ bdag 'byung bar 'gyur ro zhe'am/ 'byung bar mi 'gyur ro zhe'am/gzugs can du 'gyur ro zhe'am/ gzugs can ma yin par 'gyur zhe'am/ 'du shes can nam/ 'du shes med pa'am/ 'du shes yod pa yang ma yin/ 'du shes med pa yang ma yin par 'gyur ro snyam pa 'byung zhing / de ltar sems pa dang ldan pa'i 'du shes kun tu rmongs pa g.yos pa/bsams pa spros pas mngon par 'dus byas pa sred pa'i rnam par skye bar gyur na/ des na de skyes pa na myur ba myur ba kho nar shes rab kyis so sor rtogs shing dang du mi len par spong bar byed/ sel bar byed/ byang bar byed pa de'i tshe ni/sems kyi 'du byed yang dag par myong ba dang / sems kyi 'du byed shin tu sbyangs nas dbugs brngubs na/ sems kyi 'du byed shin tu sbyangs nas dbugs brngubs so snyam du slob par byed la/ sems kyi 'du byed yang dag par myong ba dang / sems kyi 'du byed shin tu sbyangs nas dbugs phyung na/sems kyi 'du byed shin tu sbyangs nas dbugs phyung ngo snyam du slob par byed pa yin no/ /gal te des bsam gtan dang po dang / gnyis pa dang / gsum pa dag gis dngos gzhi dag ma thob par gyur kyang / de bsam gtan dang po'i nyer bsdogs mi lcogs pa med pa gdon mi za bar thob pa yin pas/de de la brten nas rang gi sems 'dod chags dang bcas pa'am/ 'dod chags dang bral ba'am/ zhe sdang dang bcas pa'am/ zhe sdang dang bral ba'am/ gti mug dang bcas pa'am/ gti mug dang bral ba'am/bsdus pa'am/ rnam par g.yeng ba'am / zhum pa'am/ rab tu bzung ba'am/ rgod pa'am/ rgod pa ma yin pa'am/ nye bar zhi ba'am/ nye bar zhi ba ma yin pa'am/ mnyam par bzhag pa'am/ mnyam par bzhag pa ma yin pa'am/ legs par bsgoms pa'am/ legs par bsgoms pa ma yin pa'am/ sems rnam par grol ba'am/ sems rnam par grol ba ma yin par byung ngo cog la so sor rtog par byed cing / yang dag pa ji lta ba bzhin du rab tu shes par byed/ yang dag par myong bar byed pas na/de'i phyir sems yang dag par myong zhing / dbugs brngubs na/ sems yang dag par myong zhing dbugs brngubs so snyam du slob par byed la/ sems yang dag par myong zhing dbugs phyung na sems yang dag par myong zhing dbugs phyung ngo snyam du slob par byed do zhes bya ba gsungs so//de gang gi tshe nang du yang dag par zhi bar byed pa na rmugs pa dang / gnyid kyi sgrib pas sems bsgribs par gyur pa de'i tshe/ rab tu dang bar gyur pa'i dmigs pa gang yang rung bas yang dag par ston par byed/ yang dag par 'dzin du 'jug par byed/ yang dag par gzengs stod par byed/ yang dag par rab tu dga' bar byed pas na/ de'i phyir sems mngon par rab tu dga' zhing dbugs brngubs na/ sems mngon par rab tu dga' zhing dbugs brngubs so snyam du slob par byed la/ sems mngon par rab tu dga' zhing dbugs phyung na/sems mngon par rab tu dga' zhing dbugs phyung ngo snyam du slob par byed do zhes bya ba gsungs so/ /de gang gi tshe mngon par rab tu 'dzin par byed pas na/ rgod pa'i sgrib pa dang / 'gyod pa'i sgrib pas sems bsgribs par mthong ba de'i tshe/sems nang kho nar 'jog par byed cing / zhi bar byed/ ting nge 'dzin gyi bar du byed pas na/ de'i phyir sems ting nge 'dzin du gzhag cing dbugs brngubs na/ sems ting nge 'dzin du gzhag cing dbugs brngubs so snyam du slob par byed la/ sems ting nge 'dzin tu gzhag cing dbugs phyung na sems ting nge 'dzin du gzhag cing dbugs phyung ngo snyam du slob par byed do zhes bya ba gsungs so//de gang gi tshe sems kun tu bsten cing goms par byas/ lan mang du byas pa'i rgyus sgrib pa kun 'byung ba dag las ring du byas shing /sgrib pa dag las rnam par sbyangs pas na/ de'i phyir sems rnam par grol zhing dbugs brngubs na/ sems rnam par grol zhing dbugs brngubs so snyam du slob par byed la/ sems rnam par grol zhing dbugs phyung na/ sems rnam par grol zhing dbugs phyung ngo snyam du slob par byed do zhes bya ba gsungs so//sgrib pa dag las sems rnam par grol ba de'i lam sgom pa'i bar du gcod pa dag gi bag la nyal gyi lhag ma spang bar bya ba dag yod pas/ de dag spang bar bya ba'i phyir 'di lta ste/ 'du byed rnams kyi mi rtag pa nyid la tshul bzhin du legs par rab tu so sor rtog par byed cing lam mngon du byed pas na/de'i phyir mi rtag par rjes su lta zhing dbugs brngubs na mi rtag par rjes su lta zhing dbugs brngubs so snyam du slob par byed la/ mi rtag par rjes su lta zhing dbugs phyung na/ mi rtag par rjes su lta zhing dbugs phyung ngo snyam du slob par byed do zhes bya ba gsungs so//des sngar ni bsam gtan dang po dang / gnyis pa dang / gsum pa dag la brten tam/ mi lcogs pa med pa la brten nas zhi gnas la rnal 'byor du byas so/ /de ltar ni mi rtag par rjes su lta bas lhag mthong la rnal 'byor du byed de/de ltar zhi gnas dang lhag mthong yongs su bsgoms pas de'i sems de dbyings rnams su 'di lta ste/ bag la nyal dag las rnam par grol lo/ /dbyings de dag kyang gang zhe na/ 'di lta ste spong ba'i dbyings gang yin pa dang /'dod chags dang bral ba'i dbyings gang yin pa dang / 'gog pa'i dbyings gang yin pa'o/ /de la 'du byed thams cad kyi mthong bas spang bar bya ba rnams spangs pa'i phyir spong ba'i dbyings so/ /'du byed thams cad kyi bsgom pas spang bar bya ba rnams spangs pa'i phyir 'dod chags dang bral ba'i dbyings so//phung po thams cad 'gag pa'i phyir 'gog pa'i dbyings te/ de de ltar dbyings gsum po dag zhi ba dang / bde ba dang / nad med pa'i sgo nas yid la byed pas na zhi gnas dang / lhag mthong sgom par byed cing kun tu bsten / goms par byas/lan mang du byas pa'i rgyu des na/ bsgom pas spang bar bya ba'i nyon mongs pa lhag ma rnams las de'i sems rnam par grol bas na/ de'i phyir spong bar rjes su lta ba dang / 'dod chags dang bral bar rjes su lta ba dang / 'gog par rjes su lta zhing dbugs brngubs na/'gog par rjes su lta zhing dbugs brngubs so snyam du slob par byed la/ spong bar rjes su lta ba dang / 'dod chags dang bral bar rjes su lta ba dang / 'gog par rjes su lta zhing dbugs phyung ngo snyam du slob par byed do zhes bya ba gsungs so/ /de ltar des mthong ba dang /bsgom pas spang bar bya ba'i nyon mongs pa rnams spangs pa na/ dgra bcom pa zag pa zad par 'gyur te/ de la de las gong du bya ba med cing / rab tu rnam par dbye ba yang byas zin pa yin te/ de ni rnam pa bcu drug gis yongs su sbyang ba zhes bya'o/ /yongs su sbyang ba rnam pa lnga po gang yin pa de ni dbugs rngub pa dang /dbugs 'byung ba dran pa zhes bya ste/ gang zag rnam par rtog pa spyad pas/ de la rab tu sbyor bar byed cing / nang gi so so'i dmigs pa bya ba dang bcas pa/ rnam par g.yeng ba dang bcas pa/ nye ba de la dga' ba skyed de/rab tu sbyor bar byed na des de la rab tu sbyor bar byed pa de'i rnam par rtog pa kun tu 'khrug pa gang yin pa de 'byung bar mi 'gyur zhing / myur ba myur bar dmigs pa la de sems kun tu gnas pa dang / mngon par dga' ba yang dag par skye bar 'gyur te/ de ni gang zag rnam par rtog pa spyad pa'i spyad pa rnam par sbyong ba'i dmigs pa lnga po yin no//de la mkhas pa'i dmigs pa gang zhe na/ 'di lta ste/ phung po la mkhas pa dang / khams la mkhas pa dang / skye mched la mkhas pa dang / rten cing 'brel bar 'byung ba la mkhas pa dang / gnas dang gnas ma yin pa la mkhas pa'o//de la phung po rnams ni gang / phung po la mkhas pa ni gang zhe na/ smras pa phung po lnga ste/ gzugs kyi phung po dang / tshor ba'i phung po dang / 'du shes kyi phung po dang / 'du byed kyi phung po dang / rnam par shes pa'i phung po'o/ /de la gzugs kyi phung po gang zhe na/gzugs gang yin pa ci yang rung ste/ de thams cad 'byung ba chen po bzhi dag dang / 'byung ba chen po bzhi dag rgyur byas pa yin no/ / de yang 'das pa dang / ma 'ongs pa dang / da ltar byung ba dang / nang gi dang / phyi rol gyi dang / rags pa dang /phra ba dang / ngan pa dang / bzang po dang / thag ring ba dang / thag nye ba dag go/ /de la tshor ba'i phung po gang zhe na/ bde bar tshor ba dang / sdug bsngal bar tshor ba dang / bde ba yang ma yin/ sdug bsngal yang ma yin par tshor ba'i reg pa la brten te/ 'byung ba tshor ba'i tshogs drug po dag ste/mig gi 'dus te reg pa las byung ba'i tshor ba dang / rna ba dang / sna dang / lce dang / lus dang / yid kyi 'dus te reg pa las byung ba'i tshor ba rnams so/ /de la 'du shes kyi phung po gang zhe na/ 'di lta ste/ mtshan ma'i 'du shes dang / mtshan ma med pa'i 'du shes dang /chung ngu'i 'du shes dang / chen por gyur pa'i 'du shes dang / tshad med pa'i 'du shes dang / chung zad kyang med do zhes ci yang med pa'i skye mched kyi 'du shes so/ / 'du shes kyi tshogs drug po dag ste/ mig gi 'dus te reg pa las byung ba'i 'du shes dang /rna ba dang / sna dang / lce dang / lus dang / yid kyi 'dus te reg pa las byung ba'i 'du shes rnams so/ /de la 'du byed kyi phung po gang zhe na/ sems pa'i tshogs drug po dag ste/ mig gi 'dus te reg pa las byung ba'i sems pa dang / rna ba dang / sna dang / lce dang / lus dang / yid kyi 'dus te reg pa las byung ba'i sems pa rnams dang / tshor ba dang 'du shes ma gtogs pa gang dag de las gzhan pa'i sems las byung ba'i chos rnams so/ /de la rnam par shes pa'i phung po gang zhe na/ sems dang / yid dang rnam par shes pa gang yin pa'o //de yang rnam par shes pa'i tshogs drug po dag ste/ mig gi rnam par shes pa dang / rna ba dang / sna dang / lce dang / lus dang / yid kyi rnam par shes pa dag go/ /tshor ba dang / 'du shes dang / 'du byed de dag dang / rnam par shes pa de yang 'das pa dang / ma 'ongs pa dang /da ltar byung ba dang / nang gi dang / phyi rol gyi dang / rags pa dang / phra ba dang / ngan pa dang / bzang po dang / thag ring ba dang / thag nye ba dag yin te/ de ni phung po rnams zhes bya'o/ /de la phung po la mkhas pa gang zhe na/ ji skad bstan pa'i chos de dag bdag nyid tha dad pa dang / bdag nyid mang por shes shing de las lhag par mi dmigs shing / rnam par rtog pa mi byed pa gang yin pa ste/ de ni mdor bsdu na phung po la mkhas pa zhes bya'o/ /de la phung po rnams kyi bdag nyid tha dad pa gang zhe na/ gzugs kyi phung po yang gzhan/ tshor ba'i phung po yang gzhan la/de bzhin du rnam par shes pa'i phung po'i bar yang gzhan pa ste/ de ni bdag nyid tha dad pa yin no/ /de la bdag nyid dang mang po gang zhe na/ gzugs kyi phung po yang 'byung ba dang / 'byung ba las gyur pa'i bye brag dang / 'das pa dang / ma 'ongs pa dang / da ltar byung ba la sogs pa'i phung po'i rnam pa'i bye brag gi rnam pa du ma dang /rnam pa mang po sna tshogs yod pa gang yin pa ste/ de ni gzugs kyi phung po'i bdag nyid mang po zhes bya'o/ /de bzhin du phung po lhag ma rnams la yang ci rigs par rig par bya'o/ /de las lhag pa ci zhig mi dmigs shing rnam par rtog par mi byed ce na/phung po tsam dang dngos po tsam du dmigs par zad kyi phung po las lhag pa'i bdag dang / rtag pa dang / brtan pa dang / ther zug dang / rnam par mi 'gyur ba'i chos can mi dmigs shing bdag gir bya ba yang ci yang med pa ste/de las lhag pa de mi dmigs shing rnam par rtog par mi byed pa yin no/ /de la khams rnams ni gang / khams la mkhas pa ni gang zhe na/ smras pa/ khams ni bco brgyad de/ mig gi khams dang / gzugs kyi khams dang / mig gi rnam par shes pa'i khams dang /rna ba'i khams dang / skra'i khams dang / rna ba'i rnam par shes pa'i khams dang / sna'i khams dang / dri'i khams dang / sna'i rnam par shes pa'i khams dang / lce'i khams dang / ro'i khams dang / lce'i rnam par shes pa'i khams dang / lus kyi khams dang /reg bya'i khams dang / lus kyi rnam par shes pa'i khams dang / yid kyi khams dang / chos kyi khams dang / yid kyi rnam par shes pa'i khams te/ de ni khams rnams zhes bya'o/ /de la khams la mkhas pa gang zhe na/ chos bco brgyad po de dag rang rang gi khams dang /rang rang gi sa bon dang / rang rang gi rigs las skye ba dang / 'jug pa dang / 'byung bar shes shing dga' la nges par rtog pa gang yin pa ste/ de ni khams la mkhas pa zhes bya'o/ /'di lta ste/ khams la mkhas pas chos bco brgyad po rnams rang rang gi khams las byung bar shes pa gang yin pa de ni rgyu'i rkyen la mkhas pa nyid yin no//de la skye mched rnams ni gang / skye mched la mkhas pa ni gang zhe na/ smras pa/ skye mched ni bcu gnyis te/ mig gi skye mched dang / gzugs kyi skye mched dang / rna ba'i skye mched dang / sgra'i skye mched dang / sna'i skye mched dang / dri'i skye mched dang / lce'i skye mched dang / ro'i skye mched dang / lus kyi skye mched dang / reg bya'i skye mched dang / yid kyi skye mched dang / chos kyi skye mched de/ de ni skye mched rnams zhes bya'o/ /de la skye mched la mkhas pa gang zhe na/ de la mig ni mig gi rnam par shes pa mtshungs par ldan pa dang bcas pa skye ba'i bdag po'i rkyen yin no//gzugs rnams ni dmigs pa'i rkyen yin no/ /'gags ma thag pa'i yid ni mtshungs pa de ma thag pa'i rkyen yin no/ /de la rna ba ni rna ba'i rnam par shes pa mtshungs par ldan pa dang bcas pa skye ba'i bdag po'i rkyen yin no//sgra ni dmigs pa'i rkyen yin no/ /'gags ma thag pa'i yid ni mtshungs pa de ma thag pa'i rkyen yin no/ /de bzhin du yid kyi bar la yang de dang 'byung ba yid la byed pa ni/ yid kyi rnam par shes pa mtshungs par ldan pa dang bcas pa skye ba'i bdag po'i rkyen yin no//chos ni dmigs pa'i rkyen yin no/ /'gags ma thag pa'i yid ni mtshungs pa de ma thag pa'i rkyen yin te/ de ltar na rkyen gsum po mtshungs pa de ma thag pa'i rkyen dang / dmigs pa'i rkyen dang / bdag po'i rkyen gyis rnam par shes pa'i tshogs drug po mtshungs par ldan pa dang bcas pa rnams 'byung bar 'gyur te/de ltar na nang dang phyi rol gyi skye mched rnams kyi rkyen la mkhas pa gang yin pa ste/ skye mched la mkhas pa zhes bya'o/ /de la rten cing 'brel bar 'byung ba ni gang / rten cing 'brel bar 'byung ba la mkhas pa ni gang zhe na/ smras pa/ rten cing 'brel bar 'byung ba ni 'di lta ste/ ma rig pa'i rkyen gyis 'du byed rnams/ 'du byed kyi rkyen gyis rnam par shes pa/ rnam par shes pa'i rkyen gyis ming dang gzugs/ ming dang gzugs kyi rkyen gyis skye mched drug /skye mched drug gi rkyen gyis reg pa/ reg pa'i rkyen gyis tshor ba/tshor ba'i rkyen gyis sred pa/ sred pa'i rkyen gyis len pa/ len pa'i rkyen gyis srid pa/ srid pa'i rkyen gyis skye ba/ skye ba'i rkyen gyis rga shi dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnam pa 'byung bar 'gyur te/de ltar na sdug bsngal gyi phung po chen po 'ba' zhig po 'di 'byung bar 'gyur ro zhes bya ba ste/ de ni rten cing 'brel bar 'byung ba zhes bya'o/ /de la rten cing 'brel bar 'byung ba la mkhas pa gang zhe na/ chos rnams kho nas chos rnams mngon par skyed par byed cing /chos rnams kho na yongs su skyed par byed la/ 'du byed rnams kho na 'du byed rnams 'dren par byed de/ de dag kyang rgyu las yang dag par byung ba dang / rten cing 'brel bar 'byung ba'i phyir sngon ma byung ba las byung ba dang / byung nas kyang 'jig rten 'gyur ba yin pas de'i phyir 'du byed de dag ni mi rtag pa yin no//gang dag mi rtag pa de dag ni skye ba'i chos can dang / rga ba'i chos can dang / na ba'i chos can dang / 'chi ba'i chos can dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa'i chos can yin te/de dag kyang skye ba'i chos can dang / 'khrug pa'i bar gyi chos can yin pa'i phyir sdug bsngal ba yin no/ /gang dag sdug bsngal ba dang / rang dbang med pa dang / nyam chung ba de dag ni bdag med pa yin no zhes rnam pa de dag gis rten cing 'brel par 'byung ba'i chos rnams la ni mi rtag par shes pa dang /sdug bsngal bar shes pa dang / bdag med par shes pa la mkhas pa gang yin pa de ni rten cing 'brel par 'byung ba la mkhas pa zhes bya'o/ /gnas dang gnas ma yin pa la mkhas pa ni rten cing 'brel par 'byung ba la mkhas pa'i bye brag nyid yin par rig par bya'o//de la bye brag ni 'di yod de/ gnas dang gnas ma yin pa la mkhas pas ni mi 'dra ba'i rgyu shes par bya'o/ /dge ba dang mi dge ba'i las rnams kyi rnam par smin pa'i 'bras bu yod de/ dge ba'i las rnams kyi rnam par smin pa'i 'bras bu ni 'dod pa yin no/ /mi dge ba'i las rnams kyi rnam par smin pa'i 'bras bu ni mi 'dod pa yin no zhes de ltar shes pa gang yin pa de ni/gnas dang gnas ma yin pa la mkhas pa zhes bya'o/ /gnas lnga po de dag la mkhas pa de yang mdor bsdu na/ rang gi mtshan nyid la mkhas pa dang / spyi'i mtshan nyid la mkhas pa yin ta/de la phung po la mkhas pas ni rang gi mtshan nyid la mkhas pa bstan to/ /lhag ma rnams kyis ni spyi'i mtshan nyid la mkhas pa bstan te/ de ni mkhas pa'i dmigs pa zhes bya'o/ /de la nyon mongs pa rnam par sbyong ba'i dmigs pa gang zhe na/ smras pa/ 'di lta ste/ 'dod pa'i khams dang bsam gtan dang po dang / 'du shes med 'du shes med min skye mched kyi bar gyi sa 'og ma rnams kyi rags pa nyid dang / sa gong ma rnams kyi zhi ba nyid gang yin pa'o/ /de la rags pa nyid gang zhe na/ de la rags pa nyid ni rnam pa gnyis te/ rang bzhin rags pa nyid dang /grangs rags pa nyid do/ /de la rang bzhin rags pa nyid gang zhe na/ 'dod pa'i khams rnams dang / bsam gtan dang po na yang phung po lnga yod mod kyis/ 'dod pa na spyod pa gang dag yin pa de dag ni ches kha na ma thob dang bcas pa dang / ches sdug bsngal bar spyod pa dang /ches dus yun thung ngu gnas pa dang / ches dman pa dang / ches tha chad yin te/ de ni de dag gi rang bzhin rags pa nyid yin no/ /bsam gtan dang po la ni de lta ma yin te/ des na de dag ches zhi ba dang / ches gya nom pa zhes bya'o/ /de la grangs rags pa nyid gang zhe na/'dod pa na spyod pa'i gzugs kyi phung po yongs su shes par bya ba dang / spang bar bya ba ni ches mang ba yin la/ rnam par shes pa'i phung po'i bar yang de bzhin te/ de ni grangs rags pa nyid ces bya'o/ /de bzhin du sa gong ma dag la yang rang bzhin rags pa nyid dang /grangs rags pa nyid ci rigs par rig par bya ste/ rags pa nyid de yang ci yang med pa'i skye mched man chad kyis sa gong ma rnams la yang sa 'og ma man chad ches kha na ma tho ba dang bcas pa dang / ches sdug bsngal bar spyod pa dang / ches yun thung ngu gnas pa dang / ches dman pa dang /ches tha chad yin par rig par bya'o/ /'du shes med 'du shes med min skye mched 'ba' zhig zhi ba nyid yin te/ gong na ches khyad par du 'phags pa'i sa gzhan med pa'i phyir ro/ /de la mdor bsdu na/ rags pa'i don ni nyes dmigs kyi don yin te/ sa gong dang gang dag la nyes dmigs ches mang du yod pa de dang de dag ni nyes dmigs kyi sgo nas rags pa nyid ces bya'o//sa gang dang gang dag las ches nyes dmigs chung ba de dang de dag ni nyes dmigs chung ba'i sgo nas zhi ba nyid ces bya'o/ /de ni 'jig rten pa rnams kyi 'jig rten pa'i lam gyis nyon mongs pa rnam par sbyong ba'i dmigs pa yin te/'di ltar sa 'og ma dag la nyes dmigs dang / nad dang / grub pa dang / bde ba ma yin par lta zhing sa gong ma la zhi bar lta ba de'i 'dod pa'i khams yan chad nas ci yang med pa'i skye mched kyis pa'i bar gyis 'og ma ba'i nyon mongs pa gang dag yin pa de dag spangs su zin kyang gtan du spangs pa ma yin te/yang de dag dang phyir mtshams sbyor bar 'gyur ba'i phyir ro/ /'jig rten las 'das pa'i lam gyis nyon mongs pa rnam par sbyong ba'i dmigs pa ni rnam pa bzhi ste/ bzhi gang zhe na/ 'di lta ste/ 'phags pa'i bden pa sdug bsngal dang / 'phags pa'i bden pa kun 'byung ba dang / 'phags pa'i bden pa 'gog pa dang / 'phags pa'i bden pa la ma mo/ /de la 'phags pa'i bden pa sdug bsngal gang zhe na/ skye ba'i sdug bsngal dang / rga ba'i sdug bsngal dang /na ba'i sdug bsngal dang / 'chi ba'i sdug bsngal dang / mi sdug pa dang phrad pa'i sdug bsngal dang / sdug pa dang bral ba'i sdug bsngal dang / 'dod pas phongs pa'i sdug bsngal dang / mdor na nye bar len pa'i phung po lnga sdug bsngal ba'o/ /de la 'phags pa'i bden pa kun 'byung ba gang zhe na/yang srid pa 'byung bar byed pa dang / dga' ba'i 'dod chags dang ldan pa dang / de dang de dag la mngon par dga' ba'i sred pa'o/ /de la 'phags pa'i bden pa sdug bsngal 'gog pa gang zhe na/ de'i sred pa ma lus pa kho nar spangs pa gang yin pa'o/ / de la 'phags pa'i bden pa lam gang zhe na/ 'phags pa'i lam yan lag brgyad pa'o/ /de la nag po'i phyogs dang / dkar po'i phyogs la brten pa'i rgyu dang 'bras bu rnam par gzhag pas/ bden pa bzhi rnam par gzhag ste/ de la bden pa sdug bsngal ni 'bras bu yin/ bden pa kun 'byung ni rgyu yin no/ /bden pa 'gog pa ni 'bras bu yin/ bden pa lam ni thob par bya ba dang / reg par bya ba'i rgyu yin no/ /de la bden pa sdug bsngal ni nad kyi gnas lta bu ste/ de ni dang po kho nar yongs su shes par bya ba yin no/ /bden pa kun 'byung ba ni nad kyi gzhi ci las gyur pa'i gnas skabs lta bu ste/de ni de'i 'og tu yongs su spang bar bya ba yin no/ /bden pa 'gog pa ni nad med pa'i gnas lta bu ste/ de ni reg par bya ba dang / mngon sum du bya ba yin no/ /bden pa lam ni sman gyi gnas lta bu ste/ de ni bsten par bya ba dang / bsgom par bya ba dang /lan mang du bya ba yin no/ /de dag ni sdug bsngal yang sdug bsngal ba'i don dang / lam gyi bar la yang lam gyi bar gyi don gyis yang dag pa de bzhin pa/ ma nor ba de bzhin pa ste/ phyin ci ma log cing ma bslad pa yin pas na/ de'i phyir bden pa zhes bya'o/ /rang gi mtshan nyid kyis mi slu ba dang /de mthong na phyin ci ma log pa'i blo dag skye bar 'gyur bas na/ de'i phyir yang bden pa zhes bya'o/ /ci'i phyir de dag 'phags pa rnams kho na'i bden pa dag yin zhe na/ 'phags pa rnams kyi bden pa de dag de kho na lta bu yin par bden pa'i sgo nas yang dag pa ji lta ba bzhin du mkhyen cing gzigs kyi/byis pa rnams kyis yang dag pa ji lta ba bzhin du mi shes mi mthong bas na/ de'i phyir 'phags pa'i bden pa rnams zhes bya'o/ /byis pa rnams la yang de dag chos nyid kyis bden mod kyi rtogs pas ma yin gyi 'phags pa rnams la ni gnyi gas bden pa yin no/ / de la skye ba'i sdug bsngal zhes bya ba ni skye ba'i tshe na lus dang sems kyi sdug bsngal gyi tshor ba 'byung ba la bya'i skye ba nyid ni sdug bsngal la ma yin te/ sdug bsngal gyi gzhi ni de yin no/ /de bzhin du 'dod pas phongs pa'i bar gyi sdug bsngal zhes bya ba yang 'dod pas phongs pa'i lus dang sems kyi sdug bsngal gyi tshor ba 'byung ba la bya'i 'dod pas phongs pa nyid ni sdug bsngal ma yin te/sdug bsngal gyi gzhi ni de yin no zhes snga ma bzhin du sbyar ro/ /mdor na nye bar len pa'i phung po lnga sdug bsngal ba zhes bya ba ni skye ba la sogs pa de dag ni rnam grangs dag gis sdug bsngal gyi sdug bsngal kho na yin par yongs su bstan to//de la lhag ma 'gyur ba'i sdug bsngal dang / 'du byed kyi sdug bsngal gang yin pa de ni nye bar len pa'i phung po lnga sdug bsngal ba nyid kyis yongs su bstan pa yin te/ 'di ltar nye bar len pa'i phung po lnga po tshor ba rnam pa gsum dang ldan pa de dag ni sdug bsngal gyi sdug bsngal ji skad bstan pa de'i snod du gyur pa yin la/'gyur ba'i sdug bsngal dang / 'du byed kyi sdug bsngal ma bstan pa gang yin pa de yang de dag nyid du blta bar bya ba yin pa'i phyir ro/ /ci'i phyir zhe na/ bcom ldan 'das kyis sdug bsngal gyi sdug bsngal ni rang gi sgra kho nas yongs su bstan la/'gyur ba'i sdug bsngal dang / 'du byed kyi sdug bsngal ni rnam grangs kyis bstan pa'i phyir te/ 'di ltar sdug bsngal gyi sdug bsngal la ni 'phags pa dang byis pa rnams mtshungs par sdug bsngal gyi blo 'jug par 'gyur ba dang / sdug bsngal gyi sdug bsngal ni sngon shes rab ma sbyangs pa rnams kyi skyo ba skyed par byed pa'i don yin pa dang / de ltar bstan na 'dul ba rnams bden pa dag la bde blag tu 'jug par 'gyur ba'i phyir ro/ /de la sdug bsngal rnam pa gsum po dag gi rnam par gzhag pa ji lta bu yin zhe na/ skye ba'i/ sdug bsngal dang / 'dod pas phongs pa'i bar gyi sdug bsngal zhes gang gsungs pa des ni sdug bsngal gyi tshor ba rten dang bcas pa bstan te/ de yang sdug bsngal gyi sdug bsngal yin pas de ni sdug bsngal gyi sdug bsngal rnam par gzhag pa yin no/ /de'i mi mthun pa'i phyogs kyi chos 'di lta ste/rga ba'i mi mthun pa'i phyogs lang tsho dang / na ba'i nad med pa dang / 'chi ba'i gson po dang / mi sdug pa dang phrad pa'i sdug pa dang phrad pa dang / sdug pa dang bral ba'i mi sdug pa dang mi bral ba dang / 'dod pas phongs pa'i 'dod pa phun sum tshogs pa gang dag yin pa rnams dang /sdug bsngal gyi tshor ba rten dang bcas pa la zhugs pa'i nyon mongs pa gang dag yin pa rnams dang / nad med pa la sogs pa bde ba dang mthun pa'i chos rnams la zhugs pa'i nyon mongs pa gang dag yin pa rnams dang / de las skyes pa'i tshor ba la zhugs pa'i nyon mongs pa gang dag yin pa de dag ni 'gyur ba'i sdug bsngal zhes bya'o//de la bde ba'i tshor brten dang bcas pa ni mi rtag pa nyid kyis rnam par 'gyur zhing gzhan du 'gyur ba'i dbang gis na sdug bsngal bar 'gyur ro/ /nyon mongs pa rnams ni thams cad du zhugs pa yin pas kun nas dkris pa'i sgo kho na nas sdug bsngal ba yin no//'gyur ba ni sems pa dang bcas pa'i yin pas de'i phyir 'gyur ba'i sdug bsngal zhes bya ste/ bcom ldan 'das kyis kyang / nyams shing gyur pa'i sems kyis bud med kyi lag pa nas bzung ngam zhes rgya cher ji skad gsungs pa lta bu dang /yang bcom ldan 'das kyis 'dod pa la 'dun pas kun nas dkris pa ni 'dod pa la 'dun pas kun nas dkris pa'i rkyen gyis de dang 'byung ba'i sems las byung ba sdug bsngal ba dang / yid mi bde ba so sor myong bar 'gyur ro/ /gnod sems dang / rmugs pa dang / gnyid dang /rgod pa dang / 'gyod pa dang / the tshom gyis kun nas dkris pa yang de dang 'dra'o zhes ji skad gsungs pa lta bu ste/ yid ches pa'i lung mchog tu yid ches pa des ni nyon mongs pa rnams la sdug bsngal gyi don dang / 'gyur ba'i don kyang snang ba yin te/ de'i phyir nyon mongs pa dang /kun nas nyon mongs pa de ni 'gyur ba'i sdug bsngal gyi rnam par gzhag pa yin no/ /'du byed kyi sdug bsngal ni nye bar len pa'i phung po rnams la thams cad du 'gro ba yin te/ de yang mdor bsdu na sdug bsngal gyi sdug bsngal gang yin pa dang / kun nas nyon mongs pas yongs su zin pa'i 'gyur ba'i sdug bsngal gang yin pa dang /bde ba'i tshor ba rten dang bcas pas yongs su zin pa'i 'gyur ba'i sdug bsngal gang yin pa de dag ma gtogs pa de las gzhan pa'i phung po sdug bsngal yang ma yin bde ba yang ma yin pa de dang ldan pa de las nges par skyes pa/ de 'byung ba'i rkyen du gyur pa/ de byung ba gnas pa'i gzhi gang dag yin pa de dag ni 'du byed kyi sdug bsngal zhes bya ste/ phung po gang dag mi rtag pa 'byung ba dang / 'jig pa dang ldan pa len pa dang bcas pa/ tshor ba gsum dang rjes su 'brel ba gnas ngan len dang ldan pa/ grub pa dang bde bar gtogs pa ma yin pa sdug bsngal gyi sdug bsngal dang /'gyur ba'i sdug bsngal las rnam par ma grol ba/ rang gis dbang sgyur ba med pa de dag ni 'du byed kyi sdug bsngal gyi sdug bsngal zhes bya ste/ de ni 'du byed kyi sdug bsngal gyi rnam par gzhag pa yin no/ / de la sred pa dang / 'dod pa dang / mngon par 'dod pa dang / mngon par dga' ba zhes bya ba de dag ni rnam grangs yin no/ /'dod pa de yang sgo gsum gyis zhugs pa yin te/ 'di lta ste/ yang 'byung ba'i srid pa 'dod pa dang / yul 'dod pa'o/ /de la yang 'byung ba'i srid pa 'dod pa gang yin pa de ni yang srid pa 'byung bar sred pa yin no//yul 'dod pa ni rnam pa gnyis te/ yul thob pa rnams la yid bde zhing lhag par chags pa dang ldan pa dang / yul ma thob pa rnams la kun du sbyor bar 'dod pa dang ldan pa'o/ /de la yul thob pa rnams la yid bde zhing lhag par chags pa dang ldan pa gang yin pa de ni dga' ba'i 'dod chags dang ldan pa zhes bya'o//yul ma thob pa rnams la kun du sbyor bar 'dod pa dang ldan pa gang yin pa de ni de dang de dag la mngon par dga' ba zhes bya'o/ /'gog pa yang rnam pa gnyis te/ nyon mongs pa'i 'gog pa dang /nye bar zhi ba'i 'gog pa'o/ /lam yang rnam pa gnyis te/ slob pa'i lam dang / mi slob pa'i'o/ /de ni 'jig rten las 'das pa'i lam gyi nyon mongs pa rnam par sbyong ba'i dmigs pa yin par rig par bya ste/ de'i phyir dmigs pa rnam pa bzhi po khyab pa'i dmigs pa dang / spyad pa rnam par spyod pa'i dmigs pa dang / mkhas pa'i dmigs pa dang / nyon mongs pa rnam par spyod ba'i dmigs pa zhes bya ba gsungs so/ /de la gdams ngag gang zhe na/ gdams ngag ni rnam pa bzhi ste/ phyin ci ma log pa'i gdams ngag dang / go rims kyi gdams ngag dang / lung gi gdams ngag dang / rtogs pa'i gdams ngag go/ /de la phyin ci ma log pa'i gdams ngag gang zhe na/ phyin ci ma log pa'i chos dang don ston par byed cing / yang dag par 'dzin du 'jug pa gang yin pa dang / sdug bsngal yang dag par zad par bya ba dang / sdug bsngal mthar phyin par bya ba'i phyir/de nges par 'byin par byed pa gang yin pa ste/ de ni phyin ci ma log pa'i gdams ngag ces bya'o/ /go rims kyi gdams ngag gang zhe na/ dus su chos ston par byed pa gang yin pa ste/ dang po kho nar gsal ba gsal ba'i gnas dag tu 'dzin du 'jug cing / klog tu 'jug la de'i 'og tu zab mo dag 'dzin du 'jug cing klog tu 'jug pa dang / dang po kho nar bden pa sdug bsngal mngon par rtogs par bya ba'i phyir 'doms par byed la/ de'i 'og tu bden pa kun 'byung ba dang / 'gog pa dang lam mngon par rtogs par bya ba'i phyir 'doms par byed ba dang /dang po kho nar bsam gtan dang po la snyoms par 'jug pa 'doms par byed la/ de'i 'og tu bsam gtan gzhan dag la snyoms par 'jug pa 'doms par byed pa dang / de lta bu dang mthun pa gang yin pa ste/ de ni go rims kyi gdams ngag ces bya'o/ /de la lung gi gdams ngag gang zhe na/des bla ma rnams sam/ bla ma lta bu rnams sam/ rnal 'byor shes pa rnams sam/ slob dpon rnams sam/ mkhan po'am/ de bzhin gshegs pa'am de bzhin gshegs pa'i nyan thos rnams las ji ltar lung mnos pa de bzhin du/ des lhag chad med par byas shing /gzhan la 'doms par byed pa ste/ de ni lung gi gdams ngag ces bya'o/ /de la rtogs pa'i gdams ngag gang zhe na/ ji ltar des gcig pu dben par gnas pas chos de dag rtog pa dang / reg pa dang / mngon sum du byas pa de bzhin du/ /gzhan dag la yang rtog pa dang /reg pa dang / mngon sum du bya ba'i phyir 'doms par byed pa ste/ de ni rtogs pa'i gdams ngag ces bya'o/ /yang rnam pa thams cad yongs su rdzogs pa'i gdams ngag kyang yod do/ /de yang gang zhe na/ cho 'phrul gsum po rdzu 'phrul gyi cho 'phrul dang / kun brjod pa'i cho 'phrul dang /rjes su bstan pa'i cho 'phrul gyis 'doms par byed pa gang yin pa ste/ de la rdzu 'phrul gyi cho 'phrul gyis ni rdzu 'phrul gyi yul rnam pa du ma ston par byed cing / bdag la gzhan dag rim gro cher skyed par byed pa dang / de ltar rim gro cher skyed pa de dag kyang rna blags te mnyan pa dang /rnal 'byor dang yid la byed pa la gus pa skyed par byed do/ /de la kun du brjod pa'i cho 'phrul gyis ni sems kyi spyod pa yang dag par rjes su btsal nas so/ /rjes su bstan pa'i cho 'phrul gyis ni dbang po ji lta ba dang / spyad pa'i lta ba dang / 'jug pa ji lta ba bzhin du chos bstan pa ston par byed cing sgrub pa la rjes su ston par byed de/ /de'i phyir cho 'phrul gsum gyis yang dag par zin pa de ni rnam pa thams cad yongs su rdzogs pa'i gdams ngag yin no// //nyan thos kyi sa/ /bam po bcu pa/ de la bslab pa gang zhe na/smras pa/ bslab pa ni gsum ste/ lhag pa'i tshul khrims kyi bslab pa dang / lhag pa'i sems kyi bslab pa dang / lhag pa'i shes rab kyi bslab pa'o/ /de la lhag pa'i tshul khrims kyi bslab pa gang zhe na/ 'di lta ste/ tshul khrims dang ldan par gnas pa dang zhes bya ba la sogs pa rgyas par snga ma bzhin no//de la lhag pa'i sems kyi bslab pa gang zhe na/ 'dod pa dag las dben pa sdig pa mi dge ba'i chos rnams las dben pa rtog pa dang bcas pa/ dpyod pa dang bcas pa/ dben pa las skyes pa'i dga' ba dang / bde ba can bsam gtan dang po dang /bsam gtan bzhi pa'i bar dag bsgrubs te gnas pa ste/ de ni lhag pa'i sems kyi bslab pa yin no/ /gzhan yang gzugs dang / gzugs med pa dang / de las gzhan pa'i ting nge 'dzin dang / snyoms par 'jug pa thams cad kyang lhag pa'i sems kyi bslab pa zhes bya ste/de lta mod kyi 'on kyang bsam gtan rnams la brten nas dang po kho nar bden pa mngon par rtogs shing / skyon med pa la 'jug par 'gyur gyi/ /bsam gtan rnams thams cad kyi thams cad du med na ma yin pas/ de'i phyir bsam gtan rnams gtso bor byas te/lhag pa'i sems kyi bslab pa bstan to/ /de la lhag pa'i shes rab kyi bslab pa gang zhe na/ bden pa bzhi po dag la yang dag pa ji lta ba bzhin du shes pa gang yin pa ste/ de ni lhag pa'i shes rab kyi bslab pa zhes bya'o/ /ci'i phyir bslab pa gsum po kho nar zad la/ de las lhag pa med ce na/ smras pa/ ting nge 'dzin gyi gnas kyi don dang / ye shes kyi rten gyi don dang / bya ba byas pa'i don gyi phyir te/ de la ting nge 'dzin gyi gnas kyi don ni lhag pa'i tshul khrims kyi bslab pa yin te/ 'di ltar lhag pa'i tshul khrims la gnas na sems rtse gcig pa'i sems kyi ting nge 'dzin la reg par 'gyur ba'i phyir ro//de la ye shes kyi rten gyi don ni lhag pa'i sems kyi bslab pa yin te/ 'di ltar sems mnyam par gzhag pa'i dran pa rtse gcig pas/ shes bya'i dngos po la yang dag pa ji lta ba bzhin du ye shes dang mthong ba 'jug par 'gyur pa'i phyir ro//de la bya ba byas pa'i don ni/ /lhag pa'i shes rab kyi bslab pa yin te/ 'di ltar ye shes dang mthong ba shin tu rnam par dag pas nyon mongs pa spong ba mngon sum du byed pa'i phyir ro/ /de ni rang gi don yin te/ 'di lta ste/ nyon mongs pa spong ba de ni bya ba'i mchog yin pas/de'i gong du bya ba gzhan med pa'i phyir te// de'i phyir bslab pa ni de gsum kho nar zad do/ /bslab pa de dag gi go rims ji lta bu yin zhe na/ tshul khrims shin tu rnam par dag pa ni 'gyod pa med do/ /'gyod pa med na dga' ba dang / mchog tu dga' ba dang /shin tu sbyangs pa dang bde bar 'gyur ro/ /bde bar 'gyur ba'i sems mnyam par 'jog go/ /sems mnyam par bzhag na yang dag pa ji lta ba bzhin du rab tu shes/ /yang dag pa ji lta ba bzhin du rab tu mthong ngo / /yang dag pa ji lta ba bzhin du rab tu shes/ /yang dag pa ji lta ba bzhin du rab tu mthong ba na skyo bar 'gyur ro//skyon 'dod chags dang bral bar 'gyur ro/ /'dod chags dang bral na rnam par grol bar 'gyur ro/ /rnam par grol na len pa med par yongs su mya ngan las 'das te / de ltar na tshul khrims de dag goms par byas na/ 'di lta ste/len pa med par yongs su mya ngan las 'da' ba'i mchog nyid thob par 'gyur bas/ de ni bslab pa de dag gi go rims yin no/ /de la ci'i phyir na lhag pa'i tshul khrims kyi bslab pa la lhag pa'i tshul khrims zhes bya/ ci'i phyir na lhag pa'i sems kyi bslab pa dang / lhag pa'i shes rab kyi bslab pa la lhag pa'i sems dang /lhag pa'i shes rab ces bya zhe na/ dbang du bya ba'i don dang / lhag pa'i don gyi phyir te/ de la dbang du bya ba'i don ji lta bu yin zhe na/ lhag pa'i sems kyi dbang du byas pa'i tshul khrims gang yin pa de ni lhag pa'i tshul khrims kyi bslab pa yin no//lhag pa'i shes rab kyi dbang du byas pa'i sems kyi ting nge 'dzin gang yin pa de ni lhag pa'i sems kyi bslab pa yin no/ /nyon mongs pa spong ba'i dbang du byas pa'i ye shes dang / mthong ba gang yin pa de ni lhag pa'i shes rab kyi bslab pa yin te/de ni dbang du byas pa'i don yin no/ /lhag pa'i don ji lta bu yin zhe na/ lhag pa'i tshul khrims kyi bslab pa gang yin pa dang / lhag pa'i sems kyi bslab pa gang yin pa dang / lhag pa'i shes rab kyi bslab pa gang yin pa'i bslab pa de dag ni bstan pa 'di kho na la yod kyi/'di las phyi rol pa rnams dang thun mong ma yin pa ste/ 'di ni lhag pa'i don yin no/ lhag pa'i sems kyi bslab pa gang yin pas lhag pa'i shes rab kyi bslab pa skyed par byed pa yang yod/ /lhag pa'i shes rab kyi bslab pa gang yin pas lhag pa'i sems kyi bslab pa skyed par byed pa yang yod de/'di lta ste/ 'phags pa nyan thos slob pa bzhi mthong ba/ bsam gtan rnams kyi dngos gzhi ma thob pa de'i 'og tu bsgom pas spang bar bya ba'i nyon mongs pa rnams spang ba'i phyir brtson par byed pa na/ dran pa yang dag byang chub kyi yan lag sgom par byed pa dang / btang snyoms yang dag byang chub kyi yan lag gi bar dag sgom par byed pa'i lhag pa'i shes rab kyi bslab pa de ni lhag pa'i sems kyi bslab pa skyed par byed pa yin no/ /lhag pa'i sems kyi bslab pas lhag pa'i shes rab kyi bslab pa skyed par byed pa de ni sngar bstan pa kho na bzhin no/ /de la lhag pa'i tshul khrims kyi bslab pa yod la/lhag pa'i sems med pa dang / lhag pa'i shes rab med pa yang yod/ lhag pa'i tshul khrims dang / lhag pa'i sems yod la/ lhag pa'i shes rab med pa yang yod / lhag pa'i shes rab yod la/ lhag pa'i tshul khrims dang / lhag pa'i sems med pa ni mi srid de/ de'i phyir gang na lhag pa'i shes rab kyi bslab pa yod pa de na bslab pa gsum char yod par rig par bya'o/ /de ni re zhig gang la rnal 'byor ba rnal 'byor la brtson pas/ bslab par bya ba'i bslab pa rnam par gzhag pa yin no/ /de la bden pa rnams mngon par rtogs par byed pa'i gang zag ni rnam pa gsum ste/gsum gang zhe na/ 'di lta ste/ 'dod chags dang ma bral ba dang / 'dod chags dang shas cher bral ba dang / 'dod chags dang bral ba'o/ /de la thams cad kyi thams cad du 'dod chags dang ma bral bas bden pa rnams mngon par rtogs na/bden pa rnams mngon par rtogs ma thag tu rgyun du zhugs par 'gyur ro/ /'dod chags dang shas cher bral bas bden pa mngon par rtogs na bden pa rnams mngon par rtogs ma thag tu lan cig phyir 'ong bar 'gyur ro/ /'dod chags dang bral bas bden pa rnams mngon par rtogs na/bden pa rnams mngon par rtogs ma thag tu phyir mi 'ong bar 'gyur ro/ /de la dbang po ni gsum ste/ mi shes pa kun shes par byed pa'i dbang po dang / kun shes pa'i dbang po dang / kun shes pa dang ldan pa'i dbang po'o//dbang po de dag gi rnam par gzhag pa ji lta bu yin zhe na/ bden pa rnams mngon par ma rtogs pa mngon par rtogs par bya ba'i phyir brtson pa la ni mi shes pa kun shes par byed pa'i dbang po rnam par gzhag go/ /slob pa bden pa mngon par rtogs pa dang ldan pa la ni kun shes pa'i dbang po rnam par gzhag go//mi slob pa dgra bcom pa bya ba byas pa la ni kun shes pa dang ldan pa'i dbang po rnam par gzhag go/ /de la rnam par thar pa'i sgo ni gsum ste/ 'di lta ste/ stong pa nyid dang / smon pa med pa dang / mtshan ma med pa'o/ /rnam par thar pa'i sgo gsum po de dag gi rnam par gzhag pa ji lta bu yin zhe na/smras pa/ 'di ni gnyis yin te/ 'dus byas dang / 'dus ma byas so/ /de la 'dus byas ni khams gsum pa dang ldan pa'i phung po lnga'o/ /'dus ma byas ni mya ngan las 'das pa'o/ /'dus byas gang yin pa dang /'dus ma byas gang yin pa de gnyis ni yod pa zhes bya'o/ /bdag dang / sems can dang / srog dang / skye ba po zhes bya ba gang yin pa de ni med pa zhes bya'o/ /de la 'dus byas la skyon du mthong ba dang / nyes dmigs su mthong ba'i phyir smon par mi byed do//mi smon pa'i phyir rnam par thar pa'i sgo smon pa med pa rnam par gzhag go/ /mya ngan las 'das pa de la smon pa dang ldan pas zhi bar lta/ gya nom par lta/ nges par 'byung bar lta zhing smon par byed de/ de la nges par 'byung bar lta ba'i phyir/ rnam par thar pa sgo mtshan ma med pa rnam par gzhag go//med cing yod pa ma yin pa de la smon pa yang med smon pa med pa yang med do zhes ji lta bu kho nar med pa de lta bu kho nar med pa yin no zhes shes shing mthong ba'i sgo nas rnam par thar pa'i sgo stong ba nyid rnam par gzhag ste/ de ni rnam par thar pa'i sgo gsum po de dag gi rnam par gzhag pa yin no//de la bslab pa dang rjes su mthun pa'i chos rnams gang zhe na/ smras pa/ bslab pa dang mi mthun pa'i chos bcu yod de / de dag gi gnyen po bcu ni bslab pa dang rjes su mthun pa yin par rig par bya'o/ /de la bslab pa dang rjes su mi mthun pa'i chos bcu gang zhe na/'di lta ste/ bud med gzhon nu kha dog bzang ba chags par 'gyur ba ni rigs kyi bu bslab pa la brtson pa'i bar chad byed cing / lam 'gog par byed pa chen po yin pa dang / 'jig tshogs su gtogs pa'i 'du byed rnams la 'chums par byed pa dang / le lo dang /snyom las byed pa dang / 'jig tshogs la lta ba dang / khams kyi zas la brten te ro la chags pa dang / 'jig rten gyi gtam rgyud kyi gtam rnam pa du ma rnam pa mang po sna tshogs bkram pa dag la 'dun pa'i 'dod chags kyi rjes su chags pa dang / chos sems shing rnal 'byor yid la byed pa'i skyon te/de yang gang zhe na/ 'di lta ste/ dkon mchog dang / bden pa dang / phung po dang / las dang 'bras bu dag la nem nur dang / yid gnyis dang / the tshom za ba dang / spong ba la brtson pa'i lus kyi gnas ngan len pa dang / lhod pa'i zhi gnas dang /lhag mthong gi skyon yid la byed pa dang / rmugs pa dang / gnyid kyis sems zil gyis non cing sems mngon par bsdus pa dang / ha cang brtsal drags pas lus ngal zhing sems 'khrugs pa dang / brtson 'grus ha cang zhan pas khyad par mi 'thob cing dag pa'i phyogs gtugs pa dang /rnyed pa dang / grags pa dang / bsngags pa dang / bde ba gang yang rung ba chung zad tsam gyis dga' zhing / yid bde ba dang / rgod cing nye bar ma zhi ba dang / 'phyar zhing g.yeng bar byed pa dang / 'jig tshogs 'gog pa'i mya ngan las 'das pa la skrag cing dngang bar byed pa dang /drod mi 'dzin par smra ba la brtson zhing ha cang mang du smra la/ chos dang ldan pa'i gtam zer na rtsod pa'i gtam dang / nyes rtsom gyi rjes su brtson pa dang / sngon mthong ba dang / thos pa dang / nyams su myong ba dang / rnam par shes pa rnam pa du ma rnam pa mang po sna tshogs dag la sems 'phro zhing sems g.yeng bar byed pa dang /bsam gyis mi khyab pa'i gnas gzhan dag la nges par rtog par byed pa nyid yin te/ chos sems shing rnal 'byor yid la byed pa'i skyon yin par rig par bya ba de dag dang / bsam gtan dang snyoms par 'jug pa'i bde ba'i ro myong bar byed pa dang /mtshan ma med pa la snyoms par 'jug par 'dod pa 'du byed kyi mtshan ma'i rjes su 'brang ba dang / lus kyi reg pa sdug bsngal ba dag dang / srog 'phrog par byed pa'i bar dag gis reg par 'gyur ba srog la 'chums shing srog la re la/de la re ba dang ldan pa'i mya ngan dang / dal ba dang / smre sngags 'don pa ste/ bcu po de dag ni bslab pa dang mi mthun pa'i chos rnams yin no/ /bslab pa dang mi mthun pa de dag gi gnyen po bslab pa dang rjes su mthun pa bcu gang zhe na/ 'di lta ste/mi sdug pa'i 'du shes dang / mi rtag pa la sdug bsngal ba'i 'du shes dang / sdug bsngal ba la bdag med pa'i 'du shes dang / zas la mi mthun pa'i 'du shes dang / 'jig rten thams cad la mngon par mi dga' ba'i 'du shes dang /snang ba'i 'du shes dang / 'dod chags dang bral ba'i 'du shes dang / 'gog pa'i 'du shes dang / 'chi ba'i 'du shes te / 'du shes bcu po de dag kun du bsten cing goms par byas/ lan mang du byas bslab pa'i bar chad rnam pa bcu po bslab pa dang mi mthun pa'i chos bcu po de dag spong bar 'gyur ro//de la don gyi skabs 'dir snang ba'i 'du shes ni chos sems shing rnal 'byor yid la byed pa'i bar du gcod pa spong ba'i phyir chos kyi snang ba dang / don gyi snang ba dang / zhi gnas kyi snang ba dang / lhag mthong gi snang ba ste/snang ba de dag gi dbang du byas pa yin par dgongs so/ /de las gzhan yang bslab pa dang rjes su mthun pa'i chos bcu yod par rig par bya ste/ bcu gang zhe na/ 'di lta ste/ sngon gyi rgyu dang / rjes su mthun pa'i lung dang / tshul bzhin la rab tu sbyor ba dang / rtag tu gus par byas te byed pa dang /'dun pa drag po dang / rnal 'byor gyi stobs skyed pa dang / lus dang sems kyi gnas ngan len shin tu sbyangs pa dang / yang dang yang du so sor rtog pa dang / yongs su gdung ba med pa dang / mngon pa'i nga rgyal med pa'o/ /de la sngon gyi rgyu gang zhe na/sngon dbang po yongs su smin pa la brtson par byas pa dang / dbang po yang dag par bsgrubs pa gang yin pa'o/ /de la rjes su mthun pa'i lung gang zhe na/ phyin ci ma log pa dang / go rims su bab pa'i lung ngag gang yin pa'o/ /de la tshul bzhin la rab tu sbyor ba gang zhe na/ ji ltar gdams pa de kho na bzhin du rab tu sbyor bar byed cing / de ltar rab tu sbyor ba na yang dag pa'i lta ba skyed par byed pa'o/ /de la rtag tu gus par byas te byed pa gang zhe na/ dge ba'i phyogs kyi sbyor ba ji lta bus dus 'bras bu yod par byed pa dang / myur ba kho nar dge ba'i phyogs yang dag par sgrub par byed pa'o//de la 'dun pa drag po gang zhe na/ 'di lta ste/ nam zhig na bdag gis 'phags pa'i gnas gang yin pa bsgrubs te/ gnas par 'gyur ba'i gnas de bsgrubs te gnas par 'gyur zhig gu snyam nas rnam par thar pa gong ma la dga' ba skyed par byed pa'o//de la rnal 'byor gyi stobs skyed pa gang zhe na/ rgyu gnyis kyis rnal 'byor gyi stobs skyed pa thob par 'gyur te/ gnyis gang zhe na/ rang bzhin gyis dbang po rno ba dang / yun ring po nas goms shing yongs su byang bar byas pas so/ /de la lus dang sems kyi gnas ngan len shin tu sbyangs pa gang zhe na/'di lta ste/ lus dub cing lus ngal ba las/ lus kyi gnas ngan len dang / sems kyi gnas ngan len skye ba de dag spyod lam gzhan gyis brtags pas shin tu sbyong bar byed pa dang / ha cang rnam par rtog pa dang / ha cang rnam par dpyod pa las lus dang sems kyi gnas ngan len skye ba de dag sems nang du zhi gnas su bya ba'i tshul gyis shin tu sbyong bar byed pa 'am/rang bzhin gyis shin tu sbyong bar byed pa dang / rmugs pa dang gnyid kyi kun nas dkris pas sems mngon par bsdus shing sems zhum par gyur pa las/lus dang sems kyi gnas ngan len skye ba de dag lhag pa'i shes rab chos rnam par 'byed pa dang / rab tu dang bar 'gyur ba yid la byed pas shin tu sbyong bar byed pa'am/ rang bzhin gyis shin tu sbyong bar byed pa dang / nyon mongs pa ma spangs pa las nyon mongs pa'i phyogs kyi lus dang /sems kyi gnas ngan len dang ma bral zhing rtag tu rjes su 'brel ba de dag yang dag pa'i lam bsgoms pas shin tu sbyong bar byed pa'o/ /de la yang dang yang du so sor rtog pa gang zhe na/ tshul khrims dag las brtsams te/ yang dang yang du nyes par byas pa dang /legs par byas pa la so sor rtog par byed pa dang / ma byas pa dang byas pa la so sor rtog par byed cing nyes par byas pa dang ma byas pa las ldog par byed pa dang / legs par byas pa dang / byas pa las ldog par mi byed de/ ma byas pa las ldog cing byas pa las mi ldog pa de la de ltar nyon mongs pa spangs pa dang ma spangs pa la dpyod pa'i yid la byed pa'i dbang du byas nas/yang dang yang du so sor rtog par byed pa ste/ de la spangs par shes nas / yid bde bar 'gyur la/ ma spangs par shes na yang dang yang du lam de nyid la sgom par byed pa'o//de la yongs su gdung ba med pa gang zhe na/ dus gzhan gyis shes par bya ba dang / mthong bar bya ba dang / rtogs par bya ba gang yin pa ste/ ma shes pa dang / ma mthong ba dang / ma rtogs pa'i sgo nas sems ngal ba dang / sems la gnod pa'i yongs su gdung ba skye ste/de dag skyes pa na dang du mi len cing spong bar byed pa'o/ /de la mngon pa'i nga rgyal med pa gang zhe na/ rtogs pa dang / thob pa dang / reg pa la mngon pa'i nga rgyal med cing phyin ci ma log par 'dzin pa ste/ thob pa la thob par 'du shes pa dang / rtogs pa la rtogs par 'du shes pa dang / mngon sum du byas pa la mngon sum du byas par 'du shes pa'o/ /chos bcu po de dag ni dang po dang bar pa dang tha ma la brten te/ rnal 'byor pa bslab pa 'dod pa'i bslab pa dang rjes su mthun par byed pa yin pas/ de'i phyir bslab pa dang rjes su mthun pa rnams zhes bya'o//de la rnal 'byor nyams pa gang zhe na/ smras pa/ rnal 'byor nyams pa ni rnam pa bzhi ste/ bzhi gang zhe na/ rnal 'byor nyams pa gtan du ba yang yod/ re zhig pa yang yod/ thob pa las yongs su nyams pa yang yod//log par sgrub pas byas pa yang yod do/ /de la rnal 'byor nyams pa gtan du ba gang zhe na/ gang zag rigs med pa la gnas pa rnams kyi yin par rig par bya ste/ de dag ni yongs su mya ngan las mi 'da' ba'i chos can yin pa'i phyir/ rnal 'byor las gtan du nyams pa kho na yin no/ /de la re zhig pa gang zhe na/ 'di lta ste/ gang zag rigs la gnas pa yongs su mya ngan las 'da' ba'i chos can rkyen dang mi ldan pa rnams kyi yin te/ de dag ni shin tu ring du song yang gdon mi za bar rkyen bsgrub par 'gyur zhing / rnal 'byor yang mngon du byas/ goms par byas nas yongs su mya ngan las 'da' par 'gyur te/ de'i phyir de ni de dag gi rnal 'byor nyams pa re zhig pa yin no/ /de la thob pa las yongs su nyams pa'i rnal 'byor nyams pa ni 'di ltar 'di na la la thob pa dang / rtogs pa dang /ye shes dang / mthong ba dang / reg pa las yongs su nyams pa yin no/ /de la log par sgrub pas byas pa'i rnal 'byor nyams pa ni 'di ltar 'di na la la tshul bzhin ma yin pa la rab tu brtson par byed pa na/ rnal 'byor thob par mi 'gyur zhing rigs pa'i chos dge ba thob par mi 'gyur ba ste/'di ltar 'di na la la nyon mongs pa mang ba dang / 'dod chags che ba'i rang bzhin can yin la/ rnam par shes pa sgrin pa dang / blo rno ba dang / lhan cig skyes pa'i blo dang ldan pa yin te/ de thos pa nyung ngu'am/ mang po yang 'dzin par byed cing /thos pa kun chub par yang byed la/ dgon par gnas pa na khyim pa dang / rab tu byung ba drang po dang / drang po'i rang bzhin can dag 'ongs shing lhags pa rnams la chos ston pa dang / tshul 'chos pa'i rjes su spyod pa'i lus dang ngag dang ldan pa'i spyod pas sems mgu bar byed de/rgyu de dang rkyen des de la rnyed pa dang / bkur sti'i tshogs 'byung zhing / de bsod nams che ba dang / chos gos dang / bsod snyoms dang / mal cha dang / stan dang / nad kyi gsos sman dang / yo byad rnams rnyed pa yin par shes shing / rgyal bo dang /blon po chen po dang / ded dpon gyi bar dag la yang dgra bcom pa yin par grags shing bkur stir byed/ bla mar byed pa dang / nyan thos kyi khyim pa dang / rab tu byung ba dag kyang de'i rjes su 'brang bar 'gyur te/ rjes su lhags pa dag la zhen pa skyed cing mang po bsdu ba'i phyir 'jug par byed pas de 'di snyam du sems te/bdag gi nyan thos kyi khyim pa dang / rab tu byung ba gang dag bdag dgra bcom par grags pa yin par yid ches pa de dag lhags te/ gal te bdag la rnal 'byor dang / yid la byed pa dang / zhi gnas dang / lhag mthong gi dri ba 'dri bar gyur na/de dag la bdag gis mi shes so zhes dris pa'i lan btab par gyur na/ de ltar na bdag dgra bcom par grags pa yin no snyam du yid ches pa gang yin pa de nyams par 'gyur bas/ bdag gis rang nyid kyis bsams shing gzhal la nye bar brtags te rnal 'byor rnam par gzhag par bya'o snyam nas de rnyed pa dang bkur sti la chags pas don de nyid kyi dbang du byas te/gcig pu dben par song nas rang nyid kyis bsams shing gzhal la nye bar brtags te rnal 'byor rnam par 'jog par byed de / de'i rnal 'byor de yang mdo sde la mi 'jug /'dul ba la yang dag par mi snang zhing / chos nyid dang 'gal ba yin te/ de dge slong mdo sde 'dzin pa dang / 'dul ba 'dzin pa dang / ma mo 'dzin pa gang dag yin pa de dag la yang rnal 'byor gyi gnas de 'chab par byed cing / ston par mi byed do/ /de nyan thos kyi khyim pa dang /rab tu byung ba gang dag yin pa de dag la yang rnal 'byor de gsang ngo zhes sgo bar byed do/ /de ci'i phyir zhe na/ mdo sde 'dzin pa dang / 'dul ba 'dzin pa dang / ma mo 'dzin pa de dag gis rnal 'byor gyi gnas de thos nas mdo sde la 'jug par gyur na/ de yang 'jug par 'gyur ba ma yin pa dang /'dul ba la yang dag par lta bar gyur na de yang yang dag par snang bar 'gyur ba ma yin pa dang / chos nyid kyis nye bar rtogs par gyur na de yang chos nyid dang 'gal bar 'gyur bas/ gzhi de dag mi dga' bar 'gyur zhing mi dga' ba'i tshig gis bdag la bskul bar 'gyur zhing rtsod pa skyed par 'gyur te/de ltar na bdag la rgyal po dang / blon po chen po dang / phyug po dang / tshong dpon dang / ded dpon gyi bar dag gis bsnyen bkur byas par mi 'gyur/ bla mar byas par mi 'gyur zhing chos gos dang / bsod snyoms dang / mal cha dang /stan dang / nad kyi gsos sman dang / yo byad dag kyang rnyed par mi 'gyur na mi rung ngo snyam pa'i phyir te/ de rnyed pa dang bkur sti 'dod pa de nyid kyi dbang du byas nas/ chos ma yin pa la chos ma yin par 'du shes bzhin du/ 'du shes dang / 'dod pa bsgyur nas chos ma yin pa chos kyi sgo nas ston cing yang dag par ston par byed do//de la de'i lta ba dang mthun par sgrub par byed pa gang dag yin pa de dag ni chos ma yin pa la chos su 'du shes pa yin te/ de dag ni dman pa dang rmongs pa yin pa'i phyir chos ma yin pa la chos su 'du shes pa yin pas/ji ltar gtams pa bzhin sgrub par byed na yang log par sgrub pa kho na yin par rig par bya ste/ log par sgrub pas byas pa'i rnal 'byor nyams pa de lta bu de ni dam pa'i chos nub par bya ba'i phyir/ dam pa'i chos ltar bcos pa yin gyi dam pa'i chos ni ma yin no/ / de ltar na rnal 'byor nyams pa bzhi po de dag ni dge slong bsam gtan pa rnal 'byor spyod pas yongs su shes par bya ba dang / yongs su spang bar bya ba yin no/ /de la rnal 'byor rnams gang zhe na/ smras pa/ rnal 'byor ni rnam pa bzhi ste/ 'di lta ste/ dad pa dang / 'dun pa dang /brtson 'grus dang / thabs so/ /de la dad pa ni rnam pa gnyis dang / gzhi rnam pa gnyis te/ mngon par yid ches pa'i rnam pa dang / rab tu dang ba'i rnam pa dang / chos dang rigs pa rnam par dpyod pa'i gzhi dang / gang zag gi mthu la mos pa'i gzhi'o/ / 'dun pa yang rnam pa bzhi ste/ 'di lta ste/ 'thob pa'i phyir 'dun pa ni 'di ltar 'di na la la rnam par thar pa gong ma la dga' ba skyed par byed pa'o zhes rgyas par sngar bstan pa bzhin no/ yongs su dri ba'i phyir 'dun pa ni 'di ltar 'di na la la ma thos pa mnyan par bya ba dang / thos pa yongs su byang bar bya ba'i phyir kun dga'i ra bar tshangs pa mtshungs par spyod pa mkhas pa rnal 'byor shes pa rnams kyi drung du 'gro bar dga' ba skyed par byed pa'o//tshogs yang dag par sgrub pa'i phyir 'dun pa ni 'di ltar 'di na la la tshul khrims kyi sdom pa yongs su dag par bya ba'i phyir zas kyi tshod rig pa nyid dang /mi nyal bar sbyor ba'i rjes su brtson pa dang / shes bzhin du spyod pa nyid la gong nas gong du dga' ba skyed par byed pa'o/ /rjes su brtson pa'i phyir 'dun pa ni 'di ltar 'di na la la rtag tu sbyor ba dang / gus par byas te sbyor ba dang / lam bsgom pa la dga' ba skyed par byed cing /'dod pa dang / byed 'dod pa ste/ de ltar na 'dun pa de yang rnam pa bzhi ste/ 'di lta ste/ 'thob pa'i phyir dang / yongs su dri ba'i phyir dang / tshogs yang dag par bsgrub pa'i phyir dang / rjes su brtson pa'i phyir 'dun pa'o/ /de la brtson 'grus kyang rnam pa bzhi ste/'di lta ste/ mnyan pa'i phyir dang / bsam pa'i phyir dang / bsgom pa'i phyir dang / sgrib pa yongs su dag par bya ba'i phyir brtson pa'o/ /de la mnyan pa'i phyir brtson pa ni ma thos pa mnyan par byed pa dang / thos pa yongs su byang bar byed pa na sems mngon par spro zhing sbyor ba mi gtong ba gang yin pa'o//de la bsam pa'i phyir brtson pa ni ji ltar thos pa'i chos rnams kyi don gcig pu dben par song ste/ sems par byed/ 'jal bar byed/ de nye bar rtog par byed pa na/ sems mngon par spro zhing sbyor ba mi gtong ba gang yin pa'o/ / de la bsgom pa'i phyir brtson pa ni nang du yang dag 'jog la zhugs te/ dus dus su zhi gnas dang / lhag mthong sgom par byed pa na/ sems mngon par spro zhing sbyor ba mi gtong ba gang yin pa'o/ /de la sgrib pa yongs su dag par bya ba'i phyir brtson pa ni nyin mtshan du brtson par byed cing /'chag pa dang 'dug pa dag gis sgrib par 'gyur ba'i chos rnams las sems yongs su sbyong bar byed pa na sems mngon par spro zhing sbyor ba mi gtong ba gang yin pa'o/ /de la thabs kyang rnam pa bzhi ste/ 'di lta ste/ tshul khrims kyi sdom pa dang / dbang po'i sdom pa'i dbang du byas te/dran pa shin du nye bar gzhag pa dang / de ltar dran pa nye bar gzhag pa de bag yod par sems kun du bsrung zhing dge ba'i chos rnams la brten par byed pa dang / de ltar bag yod par gyur pas sems nang du zhi gnas su bya ba la sbyor ba dang / lhag pa'i shes rab kyi chos rnam par 'byed par byed pa ste/rnal 'byor rnam pa bzhi po de la yang rnam pa bcu drug yod do/ /de la dad pas ni 'thob par bya ba'i don la mngon par yid ches par byed pa dang / 'thob pa la mngon par yid ches pa'i phyir dge ba'i chos rnams la byed 'dod ba skyed par byed ba dang /de de ltar byed 'dod pas nyin mtshan du brtson par gnas shing spro ba dang ldan pa dang / pha rol gnon pa brtan par byed pa dang / brtson 'grus de yang thabs kyis yongs su zin na ma thob pa thob par bya ba dang / ma rtogs pa rtogs par bya ba dang / mngon sum du ma byas pa mngon sum du bya ba'i phyir 'jug par 'gyur ba'i de'i phyir chos bzhi po de dag ni rnal 'byor zhes bya'o// de la yid la byed pa gang zhe na/ yid la byed pa ni rnam pa bzhi ste/ bzhi gang zhe na/ 'di lta ste bsgrims te 'jug pa dang / skabs su 'chad cing 'jug pa dang /skabs su 'chad pa med par 'jug pa dang / rtsol ba med par 'jug pa'o/ /de la bsgrims te 'jug pa'i yid la byed pa gang zhe na/ 'di lta ste/ las dang po pa sems nang kho nar 'jog par byed cing / yang dag par 'jog par byed pa'am/ chos rab tu rnam par 'byed par byed na ji srid du yid la byed pa ma thob pa de srid du de bsgrims te de yid la byed pa la 'jug cing /bsgrims pa la brten cing / sems rtse gcig pa nyid du 'jog par byed pas na/ de'i phyir bsgrims te 'jig pa zhes bya'o/ /de la skabs su 'chad cing 'jug pa'i yid la byed pa gang zhe na/yid la byed pa thob pa'i 'og tu 'jig rten pa dang / 'jig rten las 'das pa'i lam gyis 'gro ba na mtshan nyid so sor rig pa'i yid la byed pa gang yin pa ste/ 'di ltar de la bsam pa dang / ting nge 'dzin rnam par 'dre bar byed cing bsgom pa'i rnam pas gcig tu 'jug par mi byed pa'i phyir ro//de la skabs su 'chad pa med par 'jug pa'i yid la byed pa gang zhe na/ mtshan nyid so sor rig pa'i yid la byed pa'i 'og tu sbyor ba mthar thug pa'i yid la byed pa man chad kyi bar gyi gang yin pa'o/ /de la rtsol ba med par 'jug pa'i yid la byed pa gang zhe na/sbyor ba mthar thug pa'i 'bras bu'i yid la byed pa gang yin pa'o/ /gzhan yang yid la byed pa ni rnam pa bzhi ste/ 'di lta ste/ mthun pa las byung ba dang / gnyen po las byung ba dang / dad par bya bar 'os pa dang / so sor brtag par 'os pa'o/ /de la mthun pa las byung ba'i yid la byed pa ni gang gis dmigs pa sun 'byin par byed cing /yang dag pa'i sbyor ba yang rtsom par byed la/ nyon mongs pa spong bar ni mi byed pa'o/ /de la gnyen po las byung ba'i yid la byed pa ni gang gis nyon mongs pa spong bar byed pa'o/ /de la dad bar bya bar 'os pa'i yid la byed pa ni gang gis rab tu 'dzin par byed pa'i mtshan ma dag gis sems zhum pa mngon par rab tu dga' bar byed de /yang dag par rab tu dga' bar byed cing rab tu 'dzin par byed pa'o/ /de la so sor brtag par 'os pa'i yid la byed pa ni/ 'di lta ste/dpyod pa'i yid la byed pa ste/ de'i dbang du byas nas nyon mongs pa spangs pa dang ma spangs pa dag la so sor rtog par byed pa'o/ /de la dmigs pa yid la byed pas/ mtshan ma du zhig yid la bya ba yin zhe na/ smras pa/ bzhi ste/ bzhi gang zhe na/ 'di lta ste/ dmigs pa'i mtshan ma dang / gzhi'i mtshan ma dang / yongs su spang bar bya ba'i mtshan ma dang / so sor ston par bya ba'i mtshan ma'o/ /de la dmigs pa'i mtshan ma ni shes bya'i dngos po dang cha mthun pa'i gzugs brnyan dang / snang brnyan gang yin pa'o/ /da la gzhi'i mtshan ma ni 'di lta ste/ting nge 'dzin gyi tshogs bsags pa dang / rjes su mthun pa'i lung dang / sgom pa dang ldan pa'i 'dun pa drag po dang / skyo bar bya ba'i chos rnams la skyo ba dang / rnam par g.yeng ba dang / rnam par g.yeng ba med pa yongs su shes par bya ba la sems gtod pa dang /gzhan las g.yo bar 'gyur ba mis byas pa'am/ mi ma yin pas byas pa'am/ sgras byas pa'am brtsal bas byas pa med pa dang / de bzhin du sems nang du mngon par bsdus pa lhag mthong gi sngon du btang ba ni phyis lhag mthong gsal bar 'gyur ba'i gzhi'i mtshan ma yin pa dang /de bzhin du lhag mthong zhi gnas kyi sngon du btang ba ni phyis zhi gnas gsal bar 'gyur ba'i gzhi'i mtshan ma yin no/ /de la yongs su spang bar bya ba'i mtshan ma ni rnam pa bzhi ste/ 'di lta ste/ bying ba'i mtshan ma dang / rgod pa'i mtshan ma dang /chags pa'i mtshan ma dang / rnam par g.yeng ba'i mtshan ma'o/ /de la bying ba'i mtshan ma ni dmigs pa'i mtshan ma dang / gzhi'i mtshan ma gang gis sems bying ba nyid du 'gyur ba'o/ /de la rgod pa'i mtshan ma ni dmigs pa'i mtshan ma dang / gzhi'i mtshan ma gang gis sems rgod par 'gyur ba'o//de la chags pa'i mtshan ma ni dmigs pa'i mtshan ma dang / gzhi'i mtshan ma gang gis sems dmigs pa la chags par byed/ kun du chags par byed cing kun du nyon mongs par byed pa'o/ /de la rnam par g.yeng ba'i mtshan ma ni dmigs pa'i mtshan ma dang / gzhi'i mtshan ma gang gis sems phyi rol du rnam par g.yeng bar byed pa ste/mtshan ma de dag ni mnyam par gzhag pa'i sa las ji skad bstan pa bzhin du rig par bya'o/ /yid la byed pa de dag gis dmigs pa la mos par byed pa la mos pa du yod ce na/ smras pa/ mos pa ni dgu ste/ dgu gang zhe na/ 'di lta ste/ 'od gsal ba dang 'od gsal ba ma yin pa dang /blun pa dang / sgrin pa dang / chung ngu dang / chen por gyur pa dang / tshad med pa dang / yongs su dag pa dang / yongs su dag pa ma yin pa'o/ /de la mos pa 'od gsal ba ni snang ba'i mtshan legs par bzung ba na/ snang ba dang ldan pa gang yin pa'o/ /de la mos pa 'od gsal ba ma yin pa ni 'di lta ste/snang ba'i mtshan ma bzung ba na mun pa dang ldan pa gang yin pa'o/ /de la mos pa blun pa ni dbang po rtul po'i rgyud du gtogs pa gang yin pa'o/ /de la mos pa sgrin pa ni dbang po'i rno ba'i rgyud du gtogs pa gang yin pa'o/ /de la mos pa chung ngu ni dad pa dang 'dun pa chung ngu dang ldan pa dang / dmigs pa chung ba gang yin pa ste/de ltar yid la byed pa chung ngu dang / dmigs pa chung ba'i phyir mos pa chung ngu yin no/ /de la mos pa chen por gyur pa ni dad pa dang 'dun pa chen por gyur pa dang ldan pa dang / dmigs pa chen por gyur pa la mos pa'i mos pa gang yin pa ste/ de ltar yid la byed pa chen por gyur pa dang / dmigs pa chen por gyur pa'i phyir mos pa chen por gyur pa yin no//de la mos pa tshad med pa ni dad pa dang 'dun pa tshad med pa dang ldan pa dang / dmigs pa mtha' yas mu med pa la mos pa'i mos pa gang yin pa ste/ de ltar yid la byed pa tshad med pa dang / dmigs pa tshad med pa'i phyir mos pa tshad med pa yin no/ /de la mos pa yongs su dag pa ni legs par bsgoms pa dang /yongs su grub pa dang / mthar thug par gyur pa gang yin pa'o/ /de la mos pa yongs su dag pa ma yin pa ni legs par bsgoms pa ma yin pa dang / yongs su grub pa ma yin pa dang / mthar thug par gyur pa ma yin pa gang yin pa'o/ /de la rnal 'byor gyi rnal 'byor du bya ba dag du zhe na/smras pa/ bzhi ste/ bzhi gang zhe na/ 'di lta ste/ gzhi 'gag pa dang / gzhi 'pho ba dang / dmigs pa yongs su shes pa dang / dmigs pa la mngon par dga' ba'o/ /de la gzhi 'gag pa ni rnal 'byor dang yid la byed pa bsgom pa la rjes su brtson pa'i gnas ngan len dang ldan pa'i gzhi gang yin pa de ni rim gyis 'gag pa'o//shin tu sbyangs pa dang ldan pa ni gzhi 'pho ba ste/ gzhi 'gag pa de dang / gzhi 'pho ba de ni rnal 'byor du bya ba yin no/ /de la dmigs pa yongs su shes pa dang /dmigs pa la mngon par dga' ba zhes bya ba la dmigs pa yongs su shes pa dang / dmigs pa la mngon par dga' ba ni gzhi 'gag pa dang / gzhi 'pho ba'i sngon du 'gro zhing dmigs pa yongs su shes pa dang / dmigs pa la mngon par dga' ba gang yin pa'i dbang du byas nas/gzhi 'gag cing 'pho ba yang yod do/ /dmigs pa yongs su shes pa dang / dmigs pa la mngon par dga' ba ni gzhi rnam par dag pa gang yin pa sngon du btang bas gzhi rnam par dag pa'i dbang du byas te/ dgos pa yongs su grub pa'i dus na dmigs pa la shes pa shin tu rnam par dag pa dang mngon par dga' ba'i 'jug pa yang yod de/de'i phyir gzhi bzhi po de dag ni rnal 'byor gyi rnal 'byor du bya ba dag ces bya'o/ / de la rnal 'byor spyod pa rnam pa du zhe na/ smras pa/ gsum ste/ gsum gang zhe na/ 'di lta ste/las dang po pa dang / yongs su sbyangs pa byas pa dang / yid la byed pa las 'das pa'o/ /de la rnal 'byor spyod pa las dang po pa ni rnam pa gnyis te/ yid la byed pa'i las dang po pa dang / nyon mongs pa rnam par sbyong ba'i las dang po pa'o/ /de la yid la byed ba'i las dang po pa ni rtse gcig tu bya ba nyid la/ji srid du yid la byed pa ma thob cing sems rtse gcig pa nyid la ma reg gi bar du las dang po pa nyid yin no/ /de la nyon mongs pa rnam par sbyong ba'i las dang po pa ni yid la byed pa thob pa nyon mongs pa rnams las sems sbyong bar 'dod pa'i mtshan nyid so sor rig pa'i yid la byed pa gang yin pa la brtsams shing len pa la goms pa ste/de ni nyon mongs pa rnam par sbyong ba'i las dang po pa yin no/ /de la yongs su sbyong ba byas pa gang zhe na/ mtshan nyid so sor rig pa'i yid la byed pa ma gtogs pa de las gzhan pa sbyor ba mthar thug pa'i bar gyi yid la byed pa lnga po dag la shin tu yongs su sbyangs pa byas pa yin no//de la yid la byed pa las 'das pa gang zhe na/ sbyor ba mthar thug pa'i 'bras bu'i yid la byed pa yin par rig par bya ste/ de ni sbyor ba'i sgom pa yid la byed pa las shin tu 'das pa dang /bsgoms pa'i 'bras bu la gnas pa yin pas na/ de'i phyir yid la byed pa las 'das pa zhes bya'o/ /gzhan yang dge ba'i chos la 'dun pa nas bzung ste/ rab tu brtson par byed pa ni ji srid du nges par 'byed pa'i cha dang mthun pa'i dge ba'i rtsa ba dag skyed par mi byed pa de srid du ni las dang po pa yin no//gang gi tshe nges par 'byed pa'i cha dang mthun pa 'di lta ste/ dro bar gyur pa dang / rtse mo dang / bden pa dang rjes su mthun pa'i bzod pa dang / /'jig rten pa'i chos kyi mchog dag skyed par byed pa de'i tshe na ni yongs su sbyangs pa byas pa yin no//gang gi tshe yang dag pa nyid du skyon med pa la 'jug cing / bden pa rnams mngon par rtogs par byed la/ ston pa'i bstan pa la gzhan gyi dring mi 'jog cing / gzhan gyis bslur mi zug pa de'i tshe na ni yid la byed pa las 'das pa yin te/ gzhan gyi dring mi 'jog cing yid la byed pa las shin tu 'das shing /gzhan gyi dring mi 'jog pa la gnas pa yin pas na/ de'i phyir yid la byed la las 'das ba zhes bya'o/ / de la rnal 'byor bsgom pa gang zhe na/ smras pa/ rnam pa gnyis te/ gnyis gang zhe na/ 'di lta ste/ 'du shes bsgom pa dang / byang chub kyi phyogs bsgom pa'o/ /de la 'du shes bsgom pa gang zhe na/ 'di lta ste/ 'jig rten pa'i lam la brtson pa ni sa 'og ma thams cad la nyes dmigs kyi 'du shes sgom par byed do/ /mya ngan las 'das pa la brtson pa spong ba'i dbyings dang / 'dod chags dang bral ba'i dbyings dang /'gog pa'i dbyings la zhi bar lta ba ni spang pa'i 'du shes dang / 'dod chags dang bral ba'i 'du shes dang / 'gog pa'i 'du shes sgom par byed do/ /zhi gnas la brtson pa ni zhi gnas kyi phyogs stod dang / smad kyi 'du shes sgom par byed do//lhag mthong la brtson pa ni lhag mthong gi phyogs rgyab dang / mdun gyi 'du shes sgom par byed do/ /de la stod dang smad kyi 'du shes zhes bya ba ni lus 'di nyid la rkang pa'i mthil nas stod kyi bar dang / skra dang glad pa nas smad kyi bar du mi gtsang ba rnam pa sna tshogs kyis gang ba ji ltar gnas pa dang /ji ltar grub pa bzhin du lus 'di la skra dang spu la sogs pa yod do zhes rgyas par snga ma bzhin du so sor rtog par byed pa'o/ /de la rgyab dang mdun gyi 'du shes zhes bya ba ni 'di lta ste/ la la zhig gis so sor rtog pa'i mtshan nyid shin tu legs par rab tu bzung zhing shin tu yid la byas shin tu bsten /shin tu so sor brtags pa yin te/ 'di lta ste/ dper na 'greng bas 'dug pa la so sor rtog pa dang / 'dug pas nyal ba la so sor rtog pa dang / mdun du 'gro ba la phyi nas 'ong bas so sor rtog pa bzhin no/ /de yang dus gsum gyi 'du byed rten cing 'brel par 'byung ba rnams la lhag mthong gi rnam pas so sor rtog par byed pa yin par yongs su bstan te/de la 'greng bas 'dug pa la so sor rtog par byed pa zhes gang gsungs pa de ni da ltar gyi yid la byed pas ma 'ongs pa'i shes bya la so sor rtog par byed pa bstan te/da ltar gyi yid la byed pa'i gnas skabs ni skyes pa yin pa'i phyir 'greng ba zhes bya'o/ /ma 'ongs pa'i shes bya'i gnas skabs ni ma skyes pa dang / skye ba la mngon du phyogs pa yin pa'i phyir 'dug pa zhes bya'o/ /'dug pas nyal ba la so sor rtog par byed pa zhes gang gsungs pa des ni da ltar byung ba'i yid la byed pas 'das pa'i shes bya'i dngos po la so sor rtog par byed pa bstan te/da ltar byung ba'i yid la byed pa'i gnas skabs ni 'gag pa la mngon du phyogs pa yin pa'i phyir 'dug pa zhes bya'o/ /'das pa'i shes bya'i gnas skabs ni 'gags pa yin pa'i phyir/nyal ba zhes bya'o/ /mdun du 'gro ba la phyi nas 'ong bas so sor rtog par byed pas zhes gang gsungs pa des ni da ltar byung ba'i yid la byed pa 'gag ma thag pa la so sor rtog par byed pa bstan to/ / de la yid la byed pa byung zhing byung zhing 'gag ma thag pa gang yin pa de ni mdun du 'gro ba yin no//de la yid la byed pa mjug thogs mjug thogs su skyes pa/ gsar du gsar du 'gags ma thag go cog la 'dzin par byed pa gang yin pa de ni phyi nas 'ong ba yin te/ de la zhi gnas dang lhag mthong sgom par byed pa na/ snang ba'i 'du shes kyi phyogs de gnyi ga sgom par byed de/de ni 'du shes bsgom pa yin no// //nyan thos kyi sa/ bam po bcu gcig pa/ de la byang chub kyi phyogs bsgom pa gang zhe na/ byang chub kyi phyogs sum cu rtsa bdun po 'di lta ste/ dran pa nye bar gzhag pa bzhi dang /yang dag par spong ba bzhi dang / rdzu 'phrul gyi rkang pa bzhi dang / dbang po lnga dang / stobs lnga dang / byang chub kyi yan lag bdun dang / 'phags pa'i lam yan lag brgyad pa ste/ lus dran pa nye bar gzhag pa dang / tshor ba dang / sems dang / chos dran pa nye bar gzhag pa dang /yang dag pa'i spong ba'i sdig pa mi dge ba'i chos ma skyes pa rnams mi skyed pa dang / sdig pa mi dge ba'i chos skyes pa rnams spang ba'i phyir 'dun pa skyed par byed/ 'bad par byed/ brtson 'grus rtsom par byed cing / sems rab tu 'dzin par byed/ rab tu 'jog par byed pa dang / yang dag pa'i spong pa dge ba'i chos ma skyes pa rnams skyed pa dang / dge ba'i chos skyes pa rnams gnas pa dang / mi brjed pa dang / bsgom pa yongs su rdzogs pa dang / phyir zhing 'byung ba dang / 'phel ba dang / rgyas par bya ba'i phyir 'dun pa skyed par byed/'bad par byed/ brtson 'grus rtsom par byed cing / sems rab tu 'dzin par byed/ rab tu 'jog par byed pa dang / 'dun pa'i ting nge 'dzin spang ba'i 'du byed dang ldan pa'i rdzu 'phrul gyi rkang pa dang / brtson 'grus dang / sems dang / dpyod pa'i ting nge 'dzin spang pa'i 'du byed dang ldan pa'i rdzu 'phrul gyi rkang pa dang /dad pa dang / brtson 'grus dang / dran pa dang / ting nge 'dzin dang / shes rab kyi dbang po dang / dad pa dang / brtson 'grus dang / dran pa dang / ting nge 'dzin dang / shes rab kyi stobs dang / dran pa yang dag byang chub kyi yan lag dang / chos rnam par 'byed pa dang / brtson 'grus dang / dga' ba dang / shin tu sbyangs pa dang / ting nge 'dzin dang / btang snyoms yang dag byang chub kyi yan lag dang / yang dag pa'i lta ba dang / yang dag pa'i rtog pa dang / yang dag pa'i ngag dang /yang dag pa'i las kyi mtha' dang / yang dag pa'i 'tsho ba dang / yang dag pa'i rtsol ba dang / yang dag pa'i dran pa dang / yang dag pa'i ting nge 'dzin la goms pa dang / yongs su 'dris pa dang / kun du bsten pa dang / sgom pa dang / lan mang du byed pa gang yin pa de ni byang chub kyi phyogs bsgom pa zhes bya'o//de la lus ni gang / lus la lus kyi rjes su lta ba ni gang / dran pa ni gang / dran pa nye bar gzhag pa ni gang zhe na/ smras ba/ lus ni rnam pa sum cu rtsa lnga yod de/ 'di lta ste/ nang gi dang / phyi rol gyi dang / dbang pos zin pa dang /dbang pos zin pa ma yin pa dang / sems can du bgrang ba dang / sems can du bgrang ba ma yin pa dang / gnas ngan len dang ldan pa dang / shin tu sbyangs pa dang ldan pa dang / 'byung ba'i lus dang / 'byung ba las gyur pa'i lus dang / ming gi lus dang / gzugs kyi lus dang / sems can dmyal ba pa dang / dud 'gro'i skye gnas pa dang / yi dags kyi yul pa dang / mi'i dang / lha'i dang / rnam par shes pa dang bcas pa dang / rnam par shes pa med pa dang / nang gi lus dang / phyi rol gyi lus dang / yongs su gyur pa dang /yongs su ma gyur pa dang / bud med kyi lus dang / skyes pa'i lus dang / ma ning gi lus dang / mdza' bshes kyi lus dang / dgra bo'i lus dang / tha mal pa'i lus dang / lus ngan pa dang / lus 'bring dang / lus bzang po dang / gzhon nu'i lus dang / lang tsho'i lus dang / rgan po'i lus te/ de ni re zhig lus kyi rab tu dbye ba yin no/ /de la rjes su lta ba ni rnam pa gsum ste/ lus kyi dbang du byas nas thos pa las byung ba dang / bsams pa las byung ba dang / bsgoms pa las byung ba'i shes rab gang yin pa ste/ shes rab des lus thams cad la rnam pa thams cad du yang dag pa kho nar nye bar rtog par byed cing /kun du rtog par byed/ rjes su 'jug par byed/ rjes su rtog par byed pa'o/ /de la dran pa ni des lus kyi dbang du byas nas/ chos gang dag gzung ba'i chos de dag kho na'i don bsams pa gang yin pa dang /gang dag bsgoms bas mngon sum du byas pa'i tshig 'bru dang / don dang mngon sum du byas pa de sems kyis mi brjed pa gang yin pa'o/ /de la dran pa nye bar gzhag pa ni bdag gis chos de dag legs par bzung ngam/ 'on te ma yin/ shes rab kyis de dang de dag la legs par brtags sam/'on te ma yin/ rnam par grol bas de dang de dag la legs par reg par byas sam/ 'on te ma yin zhes dran pa nye bar gzhag pa yin te/ de ni dran pa nye bar gzhag pa yin no/ /gzhan yang dran pa kun du bsrung ba dang / yul gyis kun nas nyon mongs pa med pa dang / dmigs pa la nye bar gtod pa'i phyir/ dran pa nye bar 'jog pa yin te/ de la dran pa kun du bsrung ba ni dran pa kun du bsrungs pa dang / dran pa la rtag 'grus byed pa yin no zhes sngar ji skad bstan pa kho na bzhin no/ /de la yul gyis kun nas nyon mongs pa med pa ni dran pas yid kun tu bsrungs pa dang /gnas skabs mnyam pa la 'jog par byed pa dang mtshan mar mi 'dzin pa dang / mngon rtags su mi 'dzin pa dang / yid kyi dbang po bsrungs pa dang / yid kyi dbang pos kyang / sdom pa sgrub par byed pa yin te/zhes bya ba'i bar du rgyas par ji skad sngar bstan pa bzhin no/ /de la dmigs ba la nye bar gtod pa ni dmigs pa rnam pa bzhi po 'di lta ste/ khyab pa'i dmigs pa dang / spyad pa rnam par sbyong ba'i dmigs pa dang / mkhas pa'i dmigs pa dang / nyon mongs pa rnam par spyod pa'i dmigs pa la dran pa nye bar gtod pa yin no/ /zhes ji skad sngar bstan pa yin te/ rgyu gsum po de dag gis dran pa legs par nye bar gzhag pa nyid gang yin pa de ni dran pa nye bar gzhag pa zhes bya'o/ /de la tshor ba gang zhe na/'di lta ste/ bde ba dang / sdug bsngal ba dang / sdug bsngal ba yang ma yin ba de ba yang ma yin par tshor ba'o/ /de la bde ba dang / sdug bsngal ba dang / sdug bsngal ba yang ma yin bde ba yang ma yin pa yang lus kyi'o/ /lus kyi ji lta ba bzhin du sems kyi yang de dang 'dra'o//bde ba dang sdug bsngal ba dang / sdug bsngal yang ma yin bde ba yang ma yin pa yang zang zing dang bcas pa'o/ /zang zing med pa yang de dang 'dra'o/ /bde ba dang sdug bsngal dang / sdug bsngal yang ma yin bde ba yang ma yin pa'i tshor ba zhen pa la brten pa dang / nges par 'byung ba la brten pa yang de dang 'dra ste/de dag ni tshor ba rnam pa nyi shu rtsa gcig gam/ rnam pa dgur 'gyur ro/ /de la sems gang zhe na/ 'di lta ste/ sems 'dod chags dang bcas pa dang / 'dod chags dang bral ba dang / zhe sdang dang bcas pa dang / zhe sdang dang bral ba dang /gti mug dang bcas pa dang / gti mug dang bral ba dang / kun du bsdus pa dang / rnam par g.yengs pa dang / zhum pa dang / rab tu bzung ba dang / rgod pa dang / rgod pa ma yin pa dang / nye bar zhi ba dang / nye bar zhi ba ma yin pa dang / mnyam par gzhag pa dang / mnyam par gzhag pa ma yin pa dang / legs par bsgoms pa dang / legs par bsgoms pa ma yin pa dang / sems shin tu rnam par grol ba dang / sems shin tu rnam par grol ba ma yin pa ste/ de dag gcig tu bsdus pa ni sems rnam pa nyi shu yin no/ /de la chos rnams gang zhe na/'di lta ste/ 'dod chags dang / 'dod chags 'dul ba dang / zhe sdang dang / zhe sdang 'dul ba dang / gti mug dang / gti mug 'dul ba dang / kun du bsdus pa dang / rnam par g.yeng ba dang / zhum pa dang / rab tu 'dzin pa dang / rgod pa dang /rgod pa ma yin pa dang / nye bar zhi ba dang / nye bar zhi ba ma yin pa dang / legs par mnyam par gzhag pa dang / legs par mnyam par gzhag pa ma yin pa dang / lam legs par bsgoms pa dang / lam legs par bsgoms pa ma yin pa dang / shin tu rnam par grol ba dang /shin tu rnam par grol ba ma yin pa ste/ de dag ni nag po dang / dkar po'i phyogs rnam par gzhag pa kun nas nyon mongs pa dang / rnam par byang ba'i phyogs kyi chos nyi shu yin par rig par bya'o/ /de la bde bar tshor ba ni bde ba myong bar 'gyur ba'i reg pa la brten te/skyes pa'i tshor ba'i rnam pa ste/ bde bar tshor ba gang yin pa'o/ /de yang rnam par shes ba'i tshogs lnga dang / mtshungs par ldan pa gang yin pa de ni lus kyi'o/ /yid kyi rnam par shes pa dang mtshungs par ldan pa gang yin pa de ni sems kyi'o/ /bde ba myong bar 'gyur ba las ji lta ba bzhin du/sdug bsngal myong bar 'gyur ba dang / sdug bsngal yang ma yin bde ba yang ma yin pa myong bar 'gyur ba'i reg pa la brten te/ skyes pa'i tshor ba'i rnam pa bde ba yang ma yin/ sdug bsngal yang ma yin pa'i tshor ba yang de dang 'dra ste/ de ni sdug bsngal ba dang /sdug bsngal yang ma yin no/ / bde ba yang ma yin pa'i tshor ba zhes bya'o/ /de yang rnam par shes pa'i tshogs lnga dang mtshungs par ldan pa gang yin pa de ni lus kyi'o/ /yid kyi rnam par shes pa dang mtshungs par ldan pa gang yin pa de ni sems kyi'o/ / mya ngan las 'das pa dang mthun pa nges par 'byed pa las byung ba/ shin tu mthar thug pa dang shin tu dri ma med pa dang / shin tu tshangs par spyod pa la gnas pa'i phyir 'jug par 'gyur ba gang yin pa de ni zang zing med pa yin no/ /khams su gtogs pa gang yin pa de ni zang zing dang bcas pa yin no//gzugs dang / gzugs med pa dang ldan pa dang / 'dod chags dang bral ba dang rjes su mthun pa gang yin pa de ni nges par 'byung ba la brten pa yin no/ /'dod pa dang ldan pa dang / 'dod chags dang bral ba dang / rjes su mi mthun pa gang yin pa de ni zhen pa la brten pa yin no//de la sems 'dod chags dang bcas pa ni chags par 'gyur ba'i dngos po la 'dod chags kyis kun nas dkris pa gang yin pa'o/ /'dod chags dang bral ba ni 'dod chags kyis kun nas dkris pa dang bral ba gang yin pa'o//zhe sdang dang bcas pa ni zhe sdang bar 'gyur ba'i dngos po la zhe sdang gis kun nas dkris pa'i gang yin pa'o/ /zhe sdang dang bral ba ni zhe sdang gis kun nas dkris pa dang bral ba gang yin pa'o/ /de la gti mug dang bcas pa ni rmongs par 'gyur ba'i dngos po la gti mug gis kun nas dkris pa gang yin pa'o//gti mug dang bral ba ni gti mug gis kun nas dkris pa dang bral ba gang yin pa'o/ /sems drug po de dag ni rgyu ba dang ldan pa dag yin par rig par bya ste/ de la gsum ni kun nas nyon mongs pa'i phyogs yin no/ /gsum ni kun nas nyon mongs ba'i gnyen po'i phyogs yin no//de la sems kun du bsdus pa ni zhi gnas kyi rnam pas nang gi dmigs pa la nye bar gtod pa gang yin pa'o/ /rnam par g.yeng ba ni phyi rol gyi 'dod pa'i yon tan lnga po dag gis rjes su zhugs pa gang yin pa'o/ /de la sems zhum pa ni rmugs ba dang gnyid dang ldan pa gang yin pa'o//rab tu bzung ba ni dang bar 'gyur ba'i dmigs pa la yang dag par rab tu dga' bar byas pa gang yin pa'o/ /sems rgod pa ni ha cang yang dag par gzung ba'i phyir rgod pas kun nas dkris pa gang yin pa'o/ /sems rgod pa ma yin pa ni rab tu 'dzin pa'i dus dang /kun du sdud pa'i dus la btang snyoms su 'gyur ba gang yin pa'o/ /de la sems nye bar zhi ba ni sgrib pa dag las rnam par grol ba gang yin pa'o/ /nye bar zhi ba ma yin pa ni rnam par ma grol ba gang yin pa'o/ /de la sems mnyam par gzhag pa ni sgrib pa dag las rnam par grol ba'i phyir bsam gtan gyi dngos gzhi la zhugs pa gang yin pa'o//mnyam par gzhag pa ma yin pa ni ma zhugs pa gang yin pa'o/ /de la sems legs par bsgoms pa ni yun ring po nas ting nge 'dzin de nyid la yongs su sbyang ba byas pa'i phyir myur du snyoms par 'jug pa ci 'dod pa bzhin thob pa dang /dka' ba med par thob pa dang / tshegs med par thob pa gang yin pa'o/ /de la sems legs par bsgoms pa ma yin pa ni de las bzlogs pa yin par rig par bya'o/ /de la sems shin tu rnam par grol ba ni thams cad dang gtan du rnam par grol ba gang yin pa'o//sems shin tu rnam par grol ba ma yin pa ni thams cad dang gtan du rnam par grol ba ma yin pa gang yin pa ste/ sems bcu bzhi po de dag ni spyod par gtogs pa yin par rig par bya'o/ /de la sgrib pa rnam par dag pa'i sa las brtsams pa'i spyod par gtogs pa'i sems ni brgyad de/kun du bsdus pa dang / rnam par g.yengs pa dang / nye bar zhi ba dang / nye bar zhi ba ma yin pa'i bar dag go/ /nyon mongs pa rnam par dag pa las brtsams pa'i spyod par gtogs pa'i sems ni drug ste/ shin tu rnam par grol ba dang /shin tu rnam par grol ba ma yin pa'i bar dag go/ /nang na sgrib pa yod pa na yang bdag la sgrib pa yod do zhes rab tu shes pa dang / sgrib pa med na yang bdag la sgrib pa med do zhes rab tu shes pa dang / sgrib pa ma skyes pa ji ltar skye bar 'gyur ba de yang rab tu shes pa dang / skyes pa dang ji ltar 'bral bar 'gyur ba de yang rab tu shes par 'gyur ba gang yin pa dang /de la mig gi kun du sbyor ba dang / yid kyi bar gyi kun du sbyor ba yod na yang bdag la yid kyi bar gyi kun du sbyor ba yod do zhes rab tu shes pa dang / yid kyi bar gyi kun du sbyor ba med na yang bdag la yid kyi bar gyi kun du sbyor ba med do zhes rab tu shes pa dang /de'i yid kyi bar gyi kun du sbyor ba ma skyes pa ji ltar skye bar 'gyur ba de yang rab tu shes pa dang / skyes pa ji ltar 'gag par 'gyur ba de yang rab tu shes pa gang yin pa dang / nang na dran pa yang dag byang chub kyi yan lag yod na yang bdag la dran pa yang dag byang chub kyi yan lag yod do zhes rab tu shes pa dang /med na yang bdag la med do zhes rab tu shes pa dang / dran pa yang dag byang chub kyi yan lag ma skyes pa ji ltar skye bar 'gyur ba de yang rab tu shes pa dang / skyes pa ji ltar gnas pa dang / mi brjed pa dang / bsgom pa yongs su rdzogs pa dang / phyir zhing 'byung ba dang / 'phel ba dang rgyas par 'gyur ba de yang rab tu [(]shas [,]shes [)]pa dang / dran pa yang dag byang chub kyi yan lag ji lta ba bzhin du chos rnam par 'byed pa dang / brtson 'grus dang / dga' ba dang / shin tu sbyangs pa dang / ting nge 'dzin dang / btang snyoms yang dag byang chub kyi yan lag kyang de dang 'dra bar rig par bya ste/ de ltar ngo bo nyid dang / gzhi dang / nyes dmigs dang / gnyen po'i rnam pa dag gis kun nas nyon mongs pa'i chos yongs su shes pa gang yin pa de ni chos dran pa nye bar gzhag pa'i lus yin no//lus la lus kyi rjes su lta zhing dran pa nye bar gzhag pa ji skad bstan pa de bzhin du/ tshor ba dang / sems dang / chos rnams la yang ci rigs su rig par bya'o/ /de la ji ltar na nang gi lus la lus kyi rjes su lta zhing gnas pa yin/ji ltar na phyi rol gyi lus la lus kyi rjes su lta zhing gnas pa yin/ ji ltar na nang dang phyi rol gyi lus la lus kyi rjes su lta zhing gnas pa yin zhe na/ gang gi tshe sems can du bgrang ba nang gi lus la lus kyi rjes su lta zhing gnas pa de ni nang gi lus la lus kyi rjes su lta zhing gnas pa yin no//gang gi tshe sems can du bgrang ba ma yin pa'i phyi rol gyi gzugs la dmigs par byed pa de ni phyi rol gyi lus la lus kyi rjes su lta zhing gnas pa yin no/ /gang gi tshe sems can du bgrang ba'i phyi rol gzhan gyi gzugs la dmigs par byed pa de ni nang dang phyi rol gyi lus la lus kyi rjes su lta zhing gnas pa yin no//de la sems can du bgrang ba rang gi nang gi gzugs la brten te skyes pa'i tshor ba dang / sems dang chos gang dag yin pa de dag la dmigs par byed pa ni nang gi tshor ba dang / sems dang chos rnams la chos kyi rjes su lta zhing gnas pa yin no//sems can du bgrang ba ma yin pa phyi rol gyi gzugs la brten te/ skyes pa'i tshor ba dang / sems dang chos gang dag yin pa de dag la dmigs par byed pa ni phyi rol gyi tshor ba dang sems dang chos rnams la chos kyi rjes su lta zhing gnas pa yin no//sems can du bgrang ba'i phyi rol gyi gzhan gyi gzugs la brten te skyes pa'i tshor ba dang sems dang chos gang dag yin pa de dag la dmigs par byed pa ni nang dang phyi rol gyi tshor ba dang sems dang chos rnams la chos kyi rjes su lta zhing gnas pa yin no//rnam grangs gzhan yang dbang pos zin pa'i gzugs la dmigs par byed pa ni nang gi lus la lus kyi rjes su lta zhing gnas pa yin no/ /dbang pos ma zin pa zin pa ma yin zhing ma zin pa'i gzugs la dmigs par byed pa ni/ phyi rol gyi lus la lus kyi rjes su lta zhing gnas pa yin no//dbang pos zin pa kho na yin la/ zin cing zin par gyur pa'i nang gi gzugs la dmigs par byed pa ni nang dang phyi rol gyi lus la lus kyi rjes su lta zhing gnas pa yin no/ /de bzhin du gzugs gsum po de dag la brten te skyes pa'i tshor ba dang sems dang chos gang dag yin pa de dag la ci rigs par dmigs par byed pa ni de ltar rjes su lta zhing gnas pa yin no//zhes snga ma bzhin du rig par bya'o/ /rnam grangs gzhan yang mnyam par gzhag pa'i sa pa'i gzugs shin tu sbyangs pa dang ldan pa la dmigs par byed pa gang yin pa de ni nang gi lus la lus kyi rjes su lta zhing gnas pa yin no//nang gi rang kho na'i gzugs mnyam par gzhag pa'i sa pa ma yin pa gnas ngan len dang ldan pa la dmigs par byed pa gang yin pa de ni phyi rol gyi lus la lus kyi rjes su lta zhing gnas pa yin no/ /gzhan gyi gzugs shin tu sbyangs pa dang ldan pa dang /gnas ngan len dang ldan pa la dmigs par byed pa gang yin pa de ni nang dang phyi rol gyi lus la lus kyi rjes su lta zhing gnas pa yin no/ /de bzhin du de dag la brten te skyes pa'i tshor ba dang / sems dang chos gang dag yin pa de dag la yang ci rigs par rig par bya'o//rnam grangs gzhan yang nang gi 'byung ba'i gzugs la dmigs par byed pa ni nang gi lus la lus kyi rjes su lta zhing gnas pa yin no/ /phyi rol gyi 'byung ba'i gzugs la dmigs par byed pa ni phyi rol gyi lus la lus kyi rjes su lta zhing gnas pa yin no//'byung ba'i gzugs de la brten nas dbang po dang yul du bsdus pa rgyur byas pa'i gzugs skyes pa gang yin pa de la dmigs par byed pa ni nang dang phyi rol gyi lus la lus kyi rjes su lta zhing gnas pa yin no/ /de bzhin du de dag la brten te skyes pa'i tshor ba dang sems dang chos gang dag yin pa de dag la yang ci rigs par rig par bya'o//rnam grangs gzhan yang / gang gi tshe nang gi rnam par shes pa dang bcas pa'i lus la dmigs par byed pa de ni nang gi lus la lus kyi rjes su lta zhing gnas pa yin no/ / sems can du bgrang ba'i gzugs rnam par shes pa med pa/ rnam par bsngos pa la sogs pa'i gnas skabs su gyur pa la dmigs par byed pa de ni phyi rol gyi lus la lus kyi rjes su lta zhing gnas pa yin no/ /rnam par shes pa med pa'i gzugs 'das pa'i dus na rnam par shes pa dang bcas pa dang /rnam par shes pa dang bcas pa'i gzugs ma 'ongs pa'i dus na rnam par shes pa med par 'gyur bar chos mtshungs pa nyid dang / chos mnyam pa nyid la dmigs par byed pa de ni nang dang phyi rol gyi lus la lus kyi rjes su lta zhing gnas pa yin no/ /de bzhin du de dag la brten te skyes pa'i tshor ba dang sems dang chos gang dag yin pa de dag la yang ci rigs par rig par bya'o//rnam grangs gzhan yang bdag nyid kyi nang gi lus la skra dang spu dang sen mo la sogs pa'i rnam pa dag gis dmigs par byed pa ni nang gi lus la lus kyi rjes su lta zhing gnas pa yin no//gzhan dag gi nang gi lus la skra dang spu dang sen mo la sogs pa'i rnam pa dag gis dmigs par byed pa ni phyi rol gyi lus la lus kyi rjes su lta zhing gnas pa yin no / /bdag nyid kyi phyi rol gyi lus rnam par bsngos pa la sogs pa'i rnam pa dag gis ma nyams pa dang /gzhan dag gi phyi rol gyi lus rnam par bsngos pa la sogs pa'i rnam pa dag gis nyams kyang rung / ma nyams kyang rung ba la chos nyid mtshungs pas dmigs par byed pa de ni nang dang phyi rol gyi lus la lus kyi rjes su lta zhing gnas pa yin no/ /de dag la brten te skyes pa'i tshor ba dang sems dang chos gang dag yin pa de dag la yang ci rigs par rig par bya'o//lus dang / tshor ba dang / sems dang / chos kyi rab tu dbye bas de lta bu dang mthun pa'i rnam grangs mang po dag kyang yod par rig par bya ste/ rnam grangs nyung shas shig yang dag par bstan pa ni de dag yin no//de la bcom ldan 'das kyis dran pa nye bar gzhag pa bzhi ni phyin ci log bzhi'i gnyen por rnam par gzhag pa yin no/ /de la lus dran pa nye bar gzhag pa ni mi gtsang ba la gtsang bar phyin ci log pa'i gnyen por rnam par gzhag pa yin te/ 'di ltar bcom ldan 'das kyis lus dran pa nye bar gzhag pa bsgom pa la mi sdug pa dang /ldang ba'i dur khrod rnam pa bzhi bstan pa des de dag lan mang du yid la byed pa na mi gtsang ba la gtsang bar phyin ci log pa gang yin pa de spong bar 'gyur ba'i phyir ro/ /de la tshor ba dran pa nye bar gzhag pa ni sdug bsngal la bde bar phyin ci log pa'i gnyen por rnam par gzhag pa yin te/'di ltar tshor ba dag la tshor ba'i rjes su lta zhing gnas pa ni gang cung zad ci tshor yang rung ste/ de dag de la sdug bsngal ba yin no zhes yang dag pa ji lta ba bzhin du rab tu shes pas na de'i phyir de'i sdug bsngal la bde bar phyin ci log pa gang yin pa de spong bar 'gyur ba'i phyir ro//de la sems dran pa nye bar gzhag pa ni mi rtag pa la rtag par phyin ci log pa'i gnyen por rnam par gzhag pa yin te/ 'di ltar de'i sems 'dod chags dang bcas pa la sogs pa'i rab tu dbye bas nyin mo dang mtshan mo dang skad cig dang thang cig dang /yud tsam de dang de dag 'das par gyur pa'i phyir sems rnam pa du ma rnam pa mang po sna tshogs mthong nas mi rtag pa la rtag par phyin ci log pa gang yin pa de spong bar 'gyur ba'i phyir ro/ /de la chos dran pa nye bar gzhag pa ni bdag med pa la bdag tu phyin ci log pa'i gnyen por rnam par gzhag pa yin te /'di ltar de la bdag tu lta ba la sogs pa'i nyon mongs pa gang dag yin pa rnams ni yod la/ bdag med par lta ba la sogs pa dge ba'i chos de dag ni med pa'i phyir/ phung po rnams la bdag tu lta bar 'gyur bas des de ltar rang gi mtshan nyid dang spyi'i mtshan nyid kyi sgo nas chos la chos kyi rjes su bltas shing /yang dag pa ji lta ba bzhin du mthong na bdag med pa la bdag tu phyin ci log pa gang yin pa de spong bar 'gyur ba'i phyir ro/ /rnam grangs gzhan yang 'jig rten ni phal cher 'di ltar zhugs pa yin te/phung po rnams la phung po tsam dang chos tsam du yang dag pa ji lta ba bzhin du rab tu mi shes pas/ 'di ltar bdag ni lus la brten pa yin te/ de la brten nas bde ba dang sdug bsngal myong bar 'gyur la/ bde ba dang sdug bsngal myong ba na chos dang chos ma yin pa dag gis kun nas nyon mongs pa dang /rnam par byang bar 'gyur ro/ /zhes de ltar zhugs pa yin pas/ de la bdag nyid kyi lus kyi dngos po la kun tu rmongs pa bsal bar bya ba'i phyir ni lus dran pa nye bar gzhag pa rnam par gzhag go/ / bdag nyid kyis myong ba'i dngos po la kun du rmongs pa bsal bar bya ba'i phyir ni tshor ba dran pa nye bar gzhag pa rnam par gzhag go/ /de dag sems dang yid dang / rnam par shes pa gang kho na la bdag tu 'dzin pas kun tu rmongs par 'gyur ba'i bdag gi gzhi la kun tu rmongs pa bsal bar bya ba'i phyir ni sems dran pa nye bar gzhag pa rnam par gzhag go//sems de kho na'i kun nas nyon mongs pa dang / rnam par byang ba'i dngos po la kun du rmongs pa bsal bar bya ba'i phyir ni/ chos dran pa nye bar gzhag pa rnam par gzhag go/ /rnam grangs gzhan yang gang la las byed pa dang /gang gi don du byed pa dang / gang zhig las byed pa dang / gang gis byed pa de dag thams cad gcig tu bsdus nas dran pa nye bar gzhag pa bzhi rnam par gzhag pa yin te/ de la gang la las byed ce na lus la byed do/ /gang gi don du byed ce na tshor ba'i don du byed do//gang zhig las byed ce na/ sems kyis byed do/ /gang gis byed ce na/ dge ba dang mi dge ba'i chos rnams kyis byed do/ /rnam grangs gzhan yang gang la kun nas nyon mongs pa dang rnam par byang bar 'gyur ba dang / gang las dang / gang zhig dang / gang gis kun nas nyon mongs pa dang / rnam par byang bar 'gyur ba de dag thams cad gcig tu bsdus nas dran pa nye bar gzhag pa bzhi rnam par gzhag pa yin te/ de la gang la zhe na/ lus la kun nas nyon mongs pa dang / rnam par byang bar 'gyur ro/ / gang las she na / tshor ba dag las so/ /gang zhig ce na/ sems kyis so/ /gang gis she na/ chos rnams kyi kun nas nyon mongs pa dang rnam par byang bar 'gyur ro/ /de la dran pa nye bar gzhag pa zhes bya ba'i don gang zhe na/ smras pa/ gang la dran pa nye bar 'jog par byed pa dang /gang gis dran pa nye bar 'jog par byed pa de ni dran pa nye bar gzhag pa zhes bya'o/ /de la gang la dran pa nye bar 'jog par byed ce na/ de ni dmigs pa la dran pa nye bar gzhag pa yin no/ /gang gis dran pa nye bar 'jog par byed ce na/ de la shes rab dang ting nge 'dzin yang dag par sdud par byed pa'i dran pa gang yin pa ste/de ni ngo bo nyid kyi dran pa nye bar gzhag pa yin no/ /de las gzhan pa de dag dang mtshungs par ldan pa'i sems dang / sems las byung ba'i chos rnams ni mtshungs par ldan pas dran pa nye bar gzhag pa yin no/ /gzhan yang lus dang /tshor ba dang / sems dang / chos rnams kyi dbang gis dge ba zag pa dang bcas pa dang / zag pa med pa'i lam yang dag par skyes pa gang yin pa de ni dran pa nye bar gzhag pa yin te/ de yang thos pa las byung ba dang / bsams pa las byung ba dang / bsgoms pa las byung ba yin no/ /de la thos pa dang bsams pa las byung ba ni zag pa dang bcas pa kho na yin no/ /bsgoms pa las byung ba ni zag pa dang bcas pa yang yod/ /zag pa med pa yang yod do/ /de de ltar dran pa nye bar gzhag pa bzhi po dag la yongs su sbyong ba byas shing phyin ci log rags pa rags pa dag bsal te/dge ba dang mi dge ba'i chos rnams mngon par shes pa ni de'i 'og tu sdig pa mi dge ba'i chos ma skyes pa rnams mi skyed pa dang / skyes pa rnams spang pa nas/ dge ba'i chos ma skyes pa rnams skyes pa dang / skyes pa rnams gnas pa dang /mi brjed pa dang / bsgom pa yongs su rdzogs pa dang / phyir zhing 'byung ba dang / 'phel ba dang / rgyas par bya ba'i phyir 'dun pa skyed par byed/ 'bad par byed/ brtson 'grus rtsom par byed cing / sems rab tu 'dzin par byed/ rab tu 'jog par byed pa'i bar du rgyas par snga ma bzhin du byed do//de la sdig pa mi dge ba'i chos rnams gang zhe na/ 'dod pa na spyod pa'i lus kyi las dang / ngag gi las dang / yid kyi las nyon mongs pa can rnams te/ lus dang ngag dang yid kyis nyes par spyad par bsdus pa gang dag yin pa dang /de dag kun nas slong bar byed pa'i nyon mongs pa rnams gang dag yin pa'o/ /de dag kyang gang dag phrad par ma gyur cing mngon du ma gyur pa de dag ni ma skyes pa yin no/ /gang dag phrad par gyur cing mngon du gyur pa de dag ni skyes pa yin no/ /de la dge ba'i chos rnams zhes bya ba ni gang dag de dag gi gnyen por gyur pa'i chos rnams te/nyes par spyad pa'i gnyen por gyur pa dang / sgrib pa'i gnyen por gyur pa dang / kun du sbyor ba'i gnyen por gyur pa rnams so/ /de dag ma skyes pa dang / skyes pa yang sdig pa mi dge ba'i chos rnams ji lta ba de kho na bzhin du rig par bya'o//de la gang gi tshe sdig pa mi dge ba'i chos ma skyes pa rnams mi skyed pa dang / rnam pa thams cad kyi thams cad du bskyed par mi bya ba dang / skyes shing phrad pa rnams rnam pa thams cad kyi thams cad du dang du mi blang zhing spang ba dang bstsal bar bya'o zhes spro ba skyed par byed cing smon lam 'debs par byed pa de ni 'dun pa skyed par byed pa yin no//sdig pa mi dge ba'i chos ma skyes pa rnams dang po nyid nas mi skyed pa'i phyir spro ba skyed par byed/ smon lam 'debs par byed cing dang du len par mi 'dod pa gang yin pa de ni ma skyes pa rnams mi skyed pa'i phyir 'dun pa yin no//skyes pa rnams dang du mi len cing spang bar byed pa gang yin pa de ni spang ba'i phyir 'dun pa yin no/ /sdig pa mi dge ba'i chos de dag kyang 'das pa'i dngos po la dmigs pa dang / ma 'ongs pa'i dngos po la dmigs pa dang / da ltar byung ba'i yul la dmigs te skye'o//de dag kyang lkog tu gyur pa'i yul la dmigs pa dang / mngon sum gyi yul la dmigs pa yin te/ gang dag 'das pa dang / ma 'ongs pa'i dngos po la dmigs pa de dag ni lkog tu gyur pa'i yul la dmigs pa yin no/ /gang dag da ltar byung ba'i yul la dmigs pa de dag ni mngon sum gyi yul la dmigs pa yin te/de la lkog tu gyur pa'i yul la dmigs pa'i sdig pa mi dge ba'i chos ma skyes pa rnams mi skyed pa dang / skyes pa rnams spang ba'i phyir ni 'bad par byed pa yin no/ /mngon sum gyi yul la dmigs pa ma skyed pa rnams mi skyed pa dang /skyes pa rnams spang ba'i phyir ni brtson 'grus rtsom par byed pa yin te/ 'di ltar de dag ni brtson 'grus brtsams pa shin tu brtan pos mi skyed pa dang / spang bar bya ba yin pa'i phyir ro/ /gzhan yang kun nas dkris pa chung ngu dang / 'bring po ma skyes pa rnams mi skyed pa dang /skyes pa rnams spang ba'i phyir ni 'bad par byed pa yin no/ /kun nas dkris pa chen po ma skyes pa rnams mi skyed pa dang / skyes pa rnams spang ba'i phyir ni brtson 'grus rtsom par byed pa yin no/ /gal te 'das pa'i dmigs pa la spyod par byed na yang de la dmigs pa des ci nas kyang nyon mongs pa skye bar mi 'gyur ba de ltar spyod par byed do//gal te brjed ngas pa'i phyir skye bar 'gyur na yang de dang du mi len cing spong bar byed/ sel bar byed/ byang bar byed do/ /'das pa'i dmigs pa la ji lta ba bzhin du ma 'ongs pa'i dmigs pa la yang de bzhin du rig par bya ste/de ltar na de sdig pa mi dge ba'i chos ma skyes pa rnams mi skyed pa dang / skyes pa rnams spang ba'i phyir 'bad par byed pa zhes bya'o/ /gal te da ltar byung ba'i dmigs pa la spyod par byed na yang de la dmigs pa des ci nas kyang nyon mongs pa skye bar mi 'gyur ba de ltar spyod par byed do//gal te brjed ngas pa'i phyir skye bar 'gyur na yang skyes pa de dang du mi len cing / spong bar byed/ sel bar byed/ byang bar byed de/ de ltar na de sdig pa mi dge ba'i chos ma skyes pa rnams mi skyed pa dang / skyes pa rnams spang pa'i phyir brtson 'grus rtsom par byed pa zhes bya'o//gzhan yang sdig pa mi dge ba'i chos gang dag kun du rtog pa'i dbang kho nas skye la/ yul gyi stobs kyis ma yin pa yang yod/ /gang dag kun du rtog pa'i dbang dang / yul gyi stobs kyis skye ba yang yod do/ /de la kun du rtog pa'i dbang kho na skye la/yul gyi stobs kyis ma yin pa ni 'di lta ste/ gnas pa na gang dag 'das pa dang / ma 'ongs pa'i dmigs pa las skyes pa rnams so/ /de la kun du rtog pa'i dbang dang yul gyi stobs kyis skye ba ni 'di lta ste/ rgyu ba na gang dag da ltar byung ba'i dmigs pa las skye ba rnams te /de la ni tshul bzhin ma yin pa'i kun du rtog pa yang gdon mi za bar yod pa'i phyir ro/ /de la kun du rtog pa'i dbang gis skye ba dang / ma skyes pa gang dag yin pa de dag mi skyed pa dang / skyes pa rnams spang ba'i phyir ni 'bad par byed pa yin no/ /de la kun du rtog pa'i dbang dang /yul gyi stobs kyis skye ba ma skyes pa gang dag yin pa de dag mi skyed pa dang / skyes pa rnams spang ba'i phyir ni brtson 'grus rtsom par byed pa yin no/ /de la dge ba'i chos ma skyes pa rnams skyed pa'i phyir 'dun pa skyed par byed ces bya ba ni dge ba'i chos gang dag ma thob pa dang /mngon du ma gyur pa de dag thob par bya ba dang / mngon du bya ba'i phyir spro ba skyed par byed/ sems kyis smon par byed cing / de shas cher thob par 'dod pa dang / mngon du bya bar 'dod pa la nye bar gnas pa yin te/ de ni dge ba'i chos ma skyes pa rnams skyed pa'i phyir 'dun pa yin no//dge ba'i chos skyes pa rnams gnas pa dang / mi brjed pa dang / bsgom pa yongs su rdzogs par bya ba'i phyir 'dun pa skyed par byed ces bya ba la/ dge ba'i chos skyes pa rnams zhes bya ba ni gang dag thob pa dang / mngon du gyur pa rnams te/ de la thob pa dang mi 'bral zhing thob pa yongs su mi nyams par bya ba'i dbang du mdzad nas/gnas par bya ba'i phyir zhes bya ba gsungs so/ /mngon du gyur pa nyid gsal bar bya ba'i dbang du mdzad nas mi brjed par bya ba'i phyir zhes bya ba gsungs so/ /de dge ba'i chos thob pa dang / mngon du gyur pa de dag nyid kun du bsten pa'i rgyus yongs su grub pa dang / mthar phyin par bya ba'i dbang du mdzad nas/ sgom pa yongs su rdzogs par bya ba'i phyir zhes bya ba gsungs so/ /de yang spro ba skyed par byed/ sems kyis smon par byed cing / de shas cher gnas par 'dod pa dang /mi brjed par 'dod pa dang / bsgom pa yongs su rdzogs par 'dod pa la nye bar gnas pa yin te/ de dag ni dge ba'i chos skyes pa rnams gnas pa dang / mi brjed pa dang / bsgom pa yongs su rdzogs par bya ba'i phyir 'dun pa yin no/ /de la 'bad par byed ces bya ba ni/thob pa rnams mngon sum du bsgom par bya ba'i phyir ro/ /brtson 'grus rtsom par byed ces bya ba ni ma thob pa rnams thob par bya ba'i phyir te / de la 'bad par byed ces bya ba ni skyes pa rnams gnas pa dang / mi brjed par bya ba'i phyir ro/ /brtson 'grus rtsom par byed ces bya ba ni bsgom pa yongs su rdzogs par bya ba'i phyir ro//gzhan yang dge ba'i chos chung ngu dang / 'bring po ma skyes pa rnams skyed pa dang / skyes pa rnams gnas pa dang / mi brjed par bya ba'i phyir ni 'bad par byed pa yin no/ /dge ba'i chos chen po ma skyes pa rnams skyed pa dang / skyes pa rnams gnas pa dang mi brjod pa dang / bsgom pa yongs su rdzogs par bya ba'i phyir ni brtson 'grus rtsom par byed pa yin no/ /de la sems rab tu 'dzin par byed ces bya ba ni gang gi tshe sems de zhi gnas bsgom pa dang / rtse gcig tu bya ba nyid la rab tu brtson par byed pa dang / sdig pa mi dge ba'i chos ma skyes pa rnams mi skyed pa dang /de bzhin du rgyas par snga ma bzhin du dge ba'i chos skyes pa rnams gnas pa dang / mi brjed pa dang / bsgom pa yongs su rdzogs par bya ba'i phyir rab tu brtson par byed cing / de yang de ltar nang du mngon par bsdus pa ni/ de zhum par 'gyur ba'am/ zhum par dogs par mthong ba de'i tshe na/ rab tu 'dzin pa'i mtshan ma dang bar 'gyur ba gang yang rung bas rab tu 'dzin par byed cing rab tu dga' bar byed pa ste/ de ni sems rab tu 'dzin par byed pa yin no/ /ji ltar na rab tu 'jog par byed pa yin zhe na/ rab tu 'dzin pa'i dus na/ sems rgod pa'am / rgod par dogs par mthong ba de'i tshe na yang sems nang du mngon par sdud par byed cing zhi gnas la rab tu 'jog par byed pa yin no/ /yang dag par spong ba bzhi po dag kyang nag po'i phyogs kyi chos ma skyes ba rnams mi skyed pa dang /skyes pa rnams spang ba'i phyir 'dun pa skyed par byed 'bad par byed/ brtson 'grus rtsom par byed cing / sems rab tu 'dzin par byed/ rab tu 'jog par byed pa ste/ de dag kyang yang dag par spong ba gnyis yin no/ /dkar po'i phyogs kyi chos ma skyes pa rnams skyed pa dang /rgyas par ji ltar na nag po'i phyogs rnams ci lta bu de dag kyang yang dag par spong ba gnyis yin par rig par bya'o/ /de la gcig ni bsdoms pas spong ba yin te/ sdig pa mi dge ba'i chos ma skyes pa rnams spang ba'i phyir 'dun pa skyed par byed ces rgyas par bstan pa gang yin pa'o//gnyis pa ni spang bas spong ba yin te/ sdig pa mi dge ba'i chos ma skyes pa rnams mi skyed pa'i phyir 'dun pa skyed par byed ces rgyas par bstan pa gang yin pa ste/ sdig pa'i dngos po skyes pa rnams ni bsdam par bya zhing dang du mi blang bar bya ba yin la/ma skyes pa gang yin pa de ni kun du mi spyad pa'i sgo nas spang zhing de ni mngon du mi bya ba'i sgo nas spang par bya ba yin pas/ spang bas spong ba zhes bya'o/ /de la bsgoms pas spong ba ni gcig ste/ dge ba'i chos ma skyes pa rnams skyed pa'i phyir zhes bya ba nas/sems rab tu 'dzin par byed/ rab tu 'jog par byed ces bya ba'i bar du rgyas par gang gsungs pa ste/ 'di ltar dge ba'i chos rnams la kun du sten par byed cing sgom par byed na ma thob pa thob par 'gyur zhing / thob pa yang mngon du byed par 'gyur ba'i phyir ro/ /de la rjes su bsrung bas spong ba ni gcig ste/dge ba'i chos skyes pa rnams gnas pa dang / sems rab tu 'dzin par byed/ rab tu 'jog par byed ces bya ba'i bar du rgyas par gang gsungs pa ste/ 'di ltar dge ba'i chos thob cing mngon du byas pa dag la bag med pa spangs te/bag yod pas sten par byed pa gang yin pa de ni dge ba'i chos rnams la gnas pa dang / mi brjed pa dang / bsgom pa yongs su rdzogs par 'gyur bas/ de ltar na dge ba'i chos skyes pa rnams rjes su bsrung ba yin pa'i phyir te/ de ni re zhig yang dag pa'i spong ba'i rnam par dbye ba rgyas pa yin no//don mdor bsdu ba gang zhe na/ smras pa/ nag po dang dkar po'i phyogs kyi dngos po btang ba dang blang ba'i bsam pa phun sum tshogs pa dang / sbyor ba phun sum tshogs pa yongs su bstan pa yin no/ /de la bsam pa phun sum tshogs pa ni 'dun pa skyed par byed ces bya bas bstan to//sbyor ba phun sum tshogs pa ni 'bad par byed/ brtson 'grus rtsom par byed cing sems rab tu 'dzin par byed/ rab tu 'jog par byed ces bya ba dag gis bstan te/ rnal 'byor pas bya ba ni 'di tsam du zad de/ spang bar bya ba'i dngos po gang yin pa spang par bya ba dang /thob par bya ba'i dngos po gang yin pa thob par bya ba'i phyir dang po kho nar spro ba bskyed par bya ba dang / kun nas dkris pa spang par bya ba'i phyir brtson 'grus brtsam par bya ba dang / bag la nyal spang bar bya ba'i phyir dus dus su zhi gnas dang rab tu 'dzin pa dang /btang snyoms kyi mtshan ma dag bsgom par bya ba dang / kun nas dkris pa spang ba dang / bag la nyal ba spang bar bya ba'i phyir gnyen po'i phyogs kyi dge ba gang yin pa de dag yang dag par bsgrub par bya ba ste/ de dag thams cad yang dag par spong ba bzhi po dag gis yongs su bstan pas na de ni don mdor bsdus pa yin no//de la ting nge 'dzin ni bzhi ste/ 'di lta ste/ 'dun pa'i ting nge 'dzin dang / brtson 'grus kyi ting nge 'dzin dang / sems kyi ting nge 'dzin dang / dpyod pa'i ting nge 'dzin to/ /de la 'dun pa'i dbang du byas nas/ting nge 'dzin thob pa gang yin pa de ni 'dun pa'i ting nge 'dzin yin no/ /brtson 'grus dang / sems dang / dpyod pa'i dbang du byas nas ting nge 'dzin thob pa gang yin pa de ni dpyod pa'i ting nge 'dzin te / gang gi tshe de re zhig 'dun pa kho na nyi tshe skyed par byed cing / 'dun pa skyes nas sdig pa mi dge ba'i chos de dag thams cad la ngo bo nyid dang /gzhi dang / nyes dmigs dang / gnyen po'i sgo nas legs pa kho nar nges par rtog par byed cing / dran pa rtse gcig tu 'jug par byed pa dang / de bzhin du dge ba'i chos rnams la yang ngo bo nyid dang /gzhi dang / phan yon dang / nges par 'byung ba'i sgo nas legs pa kho nar nges par rtog par byed cing / dran pa rtse gcig tu 'jug par byed pa dang / de la lan mang du byas pas kun nas dkris pa'i rgyu ba thag ring du byed pa'i tshul gyis rtse gcig pa nyid la reg par byed cing /da dung sdig pa mi dge ba'i chos rnams kyi bag la nyal yang dag par 'joms par ni mi byed pa gang yin pa de ni/ de'i 'dun pa'i dbang du byas pa'i ting nge 'dzin ces bya'o/ /'das pa dang ma 'ongs pa dang / da ltar byung ba'i dmigs pa sdig pa mi dge ba'i chos dang mthun pa nyon mongs pa'i kun nas dkris pa chung ngu dang /'bring dang / chen po dang mthun pa ma skyes pa mi skyed pa dang / skyes pa spang ba'i phyir 'bad par byed cing brtson 'grus rtsom par byed pa'i tshe/ dmigs pa de la spyod pa na dmigs pa de'i ngo bo nyid dang / gzhi dang / nyes dmigs dang / gnyen po'i sgo nas legs pa kho nar nges par rtog par byed cing / dran pa rtse gcig tu 'jog par byed pa dang / de la lan mang du gnas par byed pa na/ kun nas dkris pa'i rgyu ba thag ring du byed pa'i tshul gyis sems rtse gcig pa nyid skye bar 'gyur zhing / da dung sdig pa mi dge ba'i chos rnams kyi bag la nyal yang dag par 'joms pa ni med pa gang yin pa de ni de'i brtson 'grus kyi dbang du byas pa'i ting nge 'dzin zhes bya'o//sems bying ba rab tu 'dzin par byed cing / sems rab tu bzung nas ting nge 'dzin du byed pa dang / dus dus su lhag par btang snyoms su byed pa dang /sdig pa mi dge ba'i chos rnams dang sdig pa mi dge ba'i chos rnams dang mthun pa'i chos dang / dge ba dang / mi dge ba'i chos dang / dge ba dang / mi dge ba'i chos dang mthun pa'i chos gang dag yin pa dag la ngo bo nyid dang / gzhi dang / nyes dmigs dang / phan yon dang / gnyen po dang / nges par 'byung ba'i sgo nas legs pa kho nar nges par rtog par byed cing / dran pa rtse gcig tu 'jog par byed pa dang / de la lan mang du gnas par byed pa la kun nas dkris pa'i rgyu ba thag ring du byed pa'i tshul gyis sems rtse gcig pa nyid skye bar 'gyur zhing / da dung sdig pa mi dge ba'i chos rnams kyi bag la nyal yang dag par 'joms par ni mi byed pa gang yin pa de ni de'i sems kyi dbang du byas pa'i ting nge 'dzin zhes bya'o//de la tshul bzhin ma yin pa yid la byed pa'i sdig ba mi dge ba'i chos dang mthun pa'i chos rnams gang dag yin pa de dag nyid ni tshul bzhin yid la byed pa'i dge ba'i chos dang mthun pa'i chos rnams yin pas na/de ltar de'i kun nas dkris pa thag ring du byas pa rnams dang / kun nas dkris pa'i gnyen po ting nge 'dzin la sogs pa dge ba'i chos skyes pa rnams la/ sdig pa mi dge ba'i chos de dag kun du mi 'byung ba na/de 'di snyams du sems te/ ci sdig pa mi dge ba'i chos rnams yod cing med pa ma yin pa las myong bar mi 'gyur ram/ 'on te med cing yod pa ma yin te/ myong bar mi 'gyur ba bdag gis yongs su dpyad par bya'o snyam nas/ de dpyod pa yid la byed pa'i dbang du byas te/spangs pa dang ma spangs pa la spyod par byed/ legs pa kho nar nges par rtog par byed cing / dran pa rtse gcig tu 'jog par byed pa dang / de la lan mang du gnas par byed pas/ sems rtse gcig pa nyid la reg par 'gyur te/ des na bdag gi sems ni kun nas dkris pa tsam las rnam par grol bar zad kyi bag la nyal thams cad kyi thams cad las ni ma yin no zhes bya ba dang /bdag gis de dag gi gnyen po ting nge 'dzin la sogs pa dge ba'i chos rnams thob cing bsgom pa tsam du zad kyi/ bag la nyal gyi gnyen po rnams ni ma yin no zhes yang dag pa ji lta ba bzhin du rab tu shes shing mngon pa'i nga rgyal med pa gang yin pa de ni/de'i dpyod pa'i dbang du byas pa'i ting nge 'dzin zhes bya'o// //nyan thos kyi sa/ bam po bcu gnyis pa/ de ting nge 'dzin rnam pa bzhi po de dag gi dbang du byas te/kun nas dkris pa rnams thag ring du byas pa na/ sdig pa mi dge ba'i chos rnams kyi bag la nyal rnam pa thams cad kyi thams cad du yang dag par gzhom pa dang / de'i gnyen po dge ba'i chos rnams yang dag par bsgrub pa'i phyir yang rgya cher 'dun pa skyed par byed/'bad par byed cing / yang dag pa'i spong ba bzhi po dag gis rab tu brtson par byed do/ /de ltar rab tu brtson zhing de ltar gyur pa de la spang ba'i 'du byed brgyad 'byung bar 'gyur ro/ /de dag gis de'i bag la nyal yang dag par 'joms pa dang /ting nge 'dzin yongs su rdzogs par 'gyur te/ 'di lta ste/ 'dun pa ni nam zhig na bdag gi ting nge 'dzin yongs su rdzogs par 'gyur zhing / sdig pa mi dge ba'i chos rnams kyi bag la nyal spong bar 'gyur zhig gu snyam du sems pa'o/ /rtsol ba ni gnyen po bsgom pa la sbyor ba mi gtong ba nyid gang yin pa'o//dad pa ni sbyor ba ma btang bar gnas pa'i gong du rtogs par bya ba la dad cing mngon par yid ches pa gang yin pa'o/ /de la shin tu sbyangs pa ni/ dad pa dang dang ba sngon du btang ba'i mchog tu dga' ba dang dga' ba ste/ yid dga' bar 'gyur ba'i rim gyis sdig pa mi dge ba'i chos kyi phyogs kyi gnas ngan len shin tu sbyangs pa gang yin pa'o//de la dran pa ni zhi gnas kyi phyogs kyi sems gnas pa dgu yang dag par 'dzin par byed pa gang yin pa'o/ /de la shes bzhin ni lhag mthong gi phyogs kyi shes rab gang yin pa'o//de la sems pa ni sems mngon par 'du byed pa ste/ spangs pa dang / ma spangs pa la dpyod par byed pa'i sems mngon par 'du byed pa gang yin pa dang / zhi gnas dang / lhag mthong dang / rjes su mthun pa'i lus kyi las dang ngag gi las kun nas slong bar byed pa gang yin pa'o//de la btang snyoms ni 'das pa dang / ma 'ongs pa dang / da ltar byung ba'i sdig pa mi dge ba'i chos dang mthun pa dag la spyod pa'i sems kun nas nyon mongs pa med cing / sems mnyam pa nyid du byed pa gang yin pa ste/ rgyu 'di gnyis kyis na bag la nyal spangs pa yongs su gcod par byed cing shes par byed de/'di lta ste/ yul lkog tu gyur pa la sems pa dang / yul lkog tu ma gyur pa la btang snyoms su 'jog pa ste/ de dag ni spang ba'i 'du byed brgyad po dag yin no/ /spang ba'i 'du byed brgyad po de dag ni bag la nyal yang dag par 'joms pa'i sbyor ba yin te/de la 'dun pa ni 'dun pa kho na yin no/ rtsol ba gang yin pa de ni brtson 'grus yin no/ /dad pa gang yin pa de yang dad pa kho na yin no/ /shin tu sbyangs pa gang yin pa dang / dran pa gang yin pa dang / shes bzhin gang yin pa dang /sems pa gang yin pa dang / btang snyoms gang yin pa de ni thabs yin te/ 'dun pa la sogs pa'i ting nge 'dzin snga ma gang dag yin pa dang / spang ba'i 'du byed 'di dag gang dag yin pa de dag thams cad gcig tu bsdus te/ bag la nyal dag spangs shing ting nge 'dzin yongs su grub pa ni/'dun pa'i ting nge 'dzin spang ba'i 'du byed dang ldan pa'i rdzu 'phrul gyi rkang pa zhes bya ba dang / brtson 'grus dang / sems dang / dpyod pa'i ting nge 'dzin spang ba'i 'du byed dang ldan pa'i rdzu 'phrul gyi rkang pa zhes bya'o/ /ci'i phyir rdzu 'phrul gyi rkang pa zhes bya zhe na/smras pa/ 'di lta ste/ dper na gang la rkang pa yod pa des 'gro ba dang / ldog pa dang / pha rol gnon par nus pa de bzhin du/ gang la chos de dag kyang yod la/ ting nge 'dzin de dag kyang yongs su rdzogs par yod cing / de de ltar sems yongs su dag pa dang /yongs su byang ba dang / nyon mongs pa med pa dang / nye ba'i nyon mongs pa dang bral ba dang / drang por gyur pa dang / las su rung bar gnas pa dang / mi g.yo ba thob par gyur na/ 'jig rten las 'das pa'i chos rnams thob par bya ba dang / rig par bya ba'i phyir/'gro ba dang ldog pa dang / pha rol gnon par nus te/ 'di lta ste/ 'jig rten las 'das pa'i chos de dag ni rdzu 'phrul dam pa dang 'byor pa dam pa yin pas na/ de'i phyir na rdzu 'phrul gyi rkang pa zhes bya'o/ /de ltar ting nge 'dzin la gnas pa de ting nge 'dzin la gnas shing /ting nge 'dzin la brten nas/ lhag pa'i sems kyi bslab pa dang / lhag pa'i shes rab kyi bslab pa la rnal 'byor du byed do/ /de de la rnal 'byor du byed pa na ston pa dang / nyan thos gzhan dag gi rtogs pa la mngon par yid ches pa dang /rab tu dang ba dang / dad pa gang yin pa de ni dbang byed pa'i don gyis dad pa'i dbang po zhes bya'o/ /gang la dbang byed ce na/ smras pa/ 'jig rten las 'das pa'i chos skye ba dang / brtson 'grus dang / dran pa dang / ting nge 'dzin dang / shes rab la sogs pa skye ba la dbang byed pa yin no//brtson 'grus la sogs pa gang dag yin pa de dag kyang 'jig rten las 'das pa'i chos dang / gong ma dag skye ba la dbang byed cing / bsgrub pa'i bar la dbang byad pa yin no/ /shes rab kyi bar ni 'jig rten las 'das pa'i chos skye ba la dbang byed pa yin pas na /de'i phyir dad pa la sogs pa de dag ni dbang po lnga yin no/ /snga mas phyi ma'i khyad par rtogs pa shes shing / de'i rjes su 'brang bas de'i gong du 'jig rten las 'das pa'i chos rtogs par bya ba'i phyir/ mngon par yid ches pa dang / rab tu dang ba dang /dad pa gang yin pa de ni mi choms pa'i don gyis dad pa'i stobs zhes bya'o/ /ci zhig gis choms par mi nus pa yin zhe na/ smras pa/ dad pa de ni lha'am/ bdud dam/ tshangs pa'am/ sus kyang 'jig rten na chos dang mthun pas mi 'phrogs pa dang / nyon mongs pa'i kun nas dkris pas mi 'phrogs pa na de'i phyir de ni mi choms pa zhes bya'o//des thog drangs shing mdun du btang ba'i brtson 'grus la sogs pa gang dag yin pa de dag kyang stobs rnams zhes bya ste/ de stobs de dag gis stobs dang ldan par gyur bas bdud kyi stobs thams cad las rnam par rgyal bar byas te/zag pa rnams zad par bya ba'i phyir rab tu brtson par byed pas na de'i phyir stobs rnams zhes bya'o/ /de la dad pa'i dbang po gang yin pa dang / dad pa'i stobs gang yin pa de ni shes nas dad pa bzhi po dag tu blta bar bya'o/ /de ci'i phyir zhe na/yang dag pa nyid du skyon med par zhugs pa shes nas dad pa gang dag yin pa de dag ni/ de'i rgyu las byung ba dang / de'i rkyen las byung ba dang / de'i gzhi las byung ba yin pas na de'i phyir rgyu dang 'bras bu'i 'brel pas de dag de'i bdag po'i 'bras bu yin pa'i dbang du mdzad nas/ bcom ldan 'das kyis kyang de de dag tu blta bar bya'o zhes gsungs kyi/ de dag gi lus dang de dag gi mtshan nyid ni ma yin no/ /de la brtson 'grus kyi dbang po ni yang dag pa'i spong ba bzhi bo dag tu blta bar bya ste/ yang dag pa'i spong bde dag kyang gang zhe na/ mthong bas spang bar bya ba'i nyon mongs pa spang ba'i phyir/sbyor ba las byung ba'i yang dag pa'i spong ba gang dag yin pa de dag ni 'dir/ yang dag pa'i spang pa rnams yin par dgongs te/ 'di ltar de dag ni sdig pa mi dge ba'i chos rnams gtan du spong ba'i phyir 'jug pa yin pa'i phyir ro/ /de la dran pa'i dbang po ni dran pa nye bar gzhag pa bzhi po dag tu blta bar bya'o zhes gsungs pa ni phyin ci log ma lus par spang ba'i phyir 'jug par 'gyur ba ni dran pa nye bar gzhag pa bzhi po gang dag yin pa rnams so//de la ting nge 'dzin gyi dbang po ni bsam gtan pa bzhi po dag tu blta bar bya'o zhes gsungs pa ni/phyir mi 'ong ba nyid du sbyor ba las byung ba'i bsam gtan gang dag yin pa rnams so/ /de la shes rab kyi dbang po ni bden pa bzhi po dag tu blta bar bya'o zhes gsungs pa ni bden pa shes pa ste/ 'phags pa'i bden pa bzhi po dag mngon par rtogs par bya ba dang / dge sbyong gi 'bras bu thob par bya ba'i phyir 'jug pa gang yin pa'o//dbang po rnams ji lta ba bzhin du/ stobs rnams kyang de bzhin du rig par bya'o/ /de dbang po de dag dang / stobs de dag kun du bsten cing goms par byas/ lan mang du byas pa'i rgyus nges par 'byed pa'i cha dang mthun pa'i dge ba'i rtsa ba bzhi po 'di lta ste/dro bar gyur pa dang / rtse mo dang / bden pa dang rjes su mthun pa'i bzod pa dang / 'jig rten pa'i chos kyi mchog chung ngu dang / 'bring dang / chen po dag skyed par byed de/ 'di lta ste dper na/ mes me'i bya ba byed par 'dod cing me don du gnyer ba'i mi la la zhig gis gtsug gtan gyi steng du gtsub shing gtsubs te/mngon par gtsubs shing 'bad par byed/ sgrim par byed/ rtsol bar byed na/ de'i 'bad pa dang / sgrim pa dang / rtsol ba'i sgo nas dang po kho nar gtsub gtan las drod skye bar 'gyur ro/ /drod de nyid mngon par 'phel ba na rtse mor 'byung zhing /du ba 'thul bar 'gyur ro/ / rgya cher mngon par 'phel bar 'gyur ba na/ me lce med pa'i me 'byung bar 'gyur ro/ /me 'byung ma thag kho nar me lce 'byung bar 'gyur te/ me lce byung zhing 'bar ba des me'i bya ba byed do/ /de bzhin du ji ltar mngon par gtsubs shing 'bad pa dang /sgrim pa dang / rtsol bar byed pa de ltar ni/ dbang po lnga po dag la kun du bsten cing goms par byed/ lan mang du byed pa lta bar bya'o/ /ji ltar dang po kho nar gtsub gtan las drod skye bar 'gyur ba de ltar ni me lta bu'i zag pa med pa'i chos nyon mongs pa yongs su sreg par byed pa rnams skye ba'i sngon du 'gro zhing rgyur gyur ba'i dro bar gyur pa dag blta bar bya'o//ji ltar drod de nyid mngon par 'phel ba na/ rtse mor 'byung bar 'gyur ba de ltar ni rtse mo dag blta bar bya'o/ /ji ltar du ba 'thul bar 'gyur ba de ltar ni bden pa dang rjes su mthun pa'i bzod pa rnams blta bar bya'o//ji ltar rgya cher mngon par 'phel bar gyur pa na me lce med pa'i me 'byung bar 'gyur ba de ltar ni 'jig rten pa'i chos kyi mchog rnams blta bar bya'o/ /ji ltar me byung ma thag kho nar me lce 'byung bar 'gyur te/ me lce byung zhing 'bar ba des me'i bya ba byed pa de ltar ni gang dag 'jig rten pa'i chos kyi mchog gis yang dag par zin pa'i dbang po lnga po dag gi mjug thogs su byung ba/'jig rten las 'das pa'i zag pa med pa'i chos rnams blta bar bya'o/ /de dag kyang gang zhe na/ smras pa/ byang chub kyi yan lag bdun po dag ste/yang dag pa nyid du skyon med par zhugs pa'i gang zag gi yang dag pa ji lta ba bzhin du rtogs pa gang yin pa de'i yan lag rnams so/ /yang dag pa ji lta ba bzhin du rtogs pa de yang lan lag bdun po zhi gnas kyi phyogs gsum dang / lhag mthong gi phyogs gsum dang /gnyi ga'i phyogs gcig gis yongs su bsdus pa yin te/ de la chos rnam par 'byed pa gang yin pa dang / brtson 'grus gang yin pa dang / dga' ba gang yin pa gsum po de dag ni lhag mthong gi phyogs yin no/ /de la shin tu sbyangs pa gang yin pa dang / ting nge 'dzin gang yin pa dang / btang snyoms gang yin pa gsum po de dag ni zhi gnas kyi phyogs yin no/ /dran pa ni gnyi ga'i phyogs yin te/ kun du 'gro ba zhes bya'o/ /de la byang chub kyi yan lag rnams thob pa'i phyir/ de'i tshe na slob pa bzhi mthong ba yin te/ de'i mthong bas spang bar bya ba'i nyon mongs pa rnams ni spangs zin gyi/bsgom pas spang par bya ba'i nyon mongs pa rnams lus pa na/ de dag spang bar bya ba'i phyir phung po gsum po 'phags pa'i lam yan lag brgyad pa sgom par byed do/ /de la yang dag pa'i lta ba gang yin pa dang / yang dag pa'i rtog pa gang yin pa dang / yang pa'i rtsol ba gang dag yin pa de ni shes rab kyi phung po yin no//de la yang dag pa'i ngag dang / las kyi mtha' dang / 'tsho ba gang dag yin pa de ni tshul khrims kyi phung po yin no/ /de la yang dag pa'i dran pa gang yin pa dang / yang dag pa'i ting nge 'dzin gang yin pa de ni ting nge 'dzin gyi phung po yin no//ci'i phyir 'phags pa'i lam yan lag brgyad pa zhes bya zhe na/ smras pa/ yan lag brgyad kyis yang dag par bsdus pa de ni 'phags pa'i slob pa gzhi mthong ba'i nyon mongs pa thams cad ma lus par spang par bya ba dang / rnam par grol ba mngon sum du bya ba'i lam yin zhing de ni sgrub pa yin pas na/de'i phyir 'phags pa'i lam yan lag brgyad pa zhes bya'o/ /de la byang chub kyi yan lag gi dus na de kho na rtogs shing thob pa gang yin pa dang / thob nas ji ltar rtogs shing khong du chud pa de nyid shes rab kyis rnam par 'jog par byed pa gang yin pa de gnyis gcig tu bsdus pa ni yang dag pa'i lta ba zhes bya'o//yang dag pa'i lta ba de nyid kyi dbang du byas nas/ nges par 'byung ba'i rtog pa dang / gnod sems med pa'i rtog pa dang / rnam par 'tshe ba med pa'i rtog pa la yang dag par rtog par byed pa gang yin pa de ni yang dag pa'i rtog pa yin te/gal te re zhig rnam par rtog pa dag la sems 'jug par gyur na ni de lta bu'i rnam par rtog pa dag la rtog par byed do/ /gal te gtam la sems 'jug par 'gyur na/ de lta ba de nyid kyi dbang du byas te/ dge ba'i rtog pa de dag nyid kyis chos dang ldan pa'i gtam zer ba de ni de'i yang dag pa'i ngag yin no//de gal te chos gos dang / bsod snyoms dang / mal cha dang / stan dang / nad kyi gsos sman dang / yo byad dag 'dod cing / de dag la yongs su tshol bar byed pa dang / de 'gro ba dang ldog pa dag la shes bzhin du spyod par byed pa dang / chung zad bltas pa dang / rnam par bltas pa dang / bskum pa dang / brkyang pa dang / snam sbyar dang / chos gos dang / lhung bzed bcangs pa dang / zos pa dang / 'thungs pa dang / 'chos pa dang / myangs pa dang / gtsug lag khong du 'gro ba'am / chos gos la sogs pa yongs su tshol ba'am/ 'gro ba'am/ sdod pa dang / 'dug pa dang nyal ba dang / gnyid kyi snyom pa bsang ba'i bar dag la yang shes bzhin du spyod par byed pa gang yin pa de ni de'i yang dag pa'i las kyi mtha' zhes bya'o//de chos gos dang / nad kyi gsos sman dang / yo byad kyi bar dag chos kyis yongs su tshol bar byed pa de dang / log par 'tsho bar byed pa'i chos rnams rnam par spangs pa'i bar gang yin pa de ni de'i yang dag pa'i 'tsho ba zhes bya'o/ /spong bas yang dag par bsdus pa yang dag pa'i dag dang /las kyi mtha' dang / 'tsho ba gang dag yin pa de ni/ des dang po kho nar zag pa med pa'i yid la byed pa thob pa na/ byang chub kyi yan lag rnams dang / lhan cig kho nar thob pa yin te/ de dag ni de'i 'phags pa dgyes pa'i tshul khrims zhes bya'o//de ci'i phyir zhe na/ 'di ltar de ni 'phags pa dam pa yang dag par song ba rnams kyis ci nas kyang bdag gi ngag gis nyes par byas pa dang / lus kyis nyes par spyad pa dang / log pa'i 'tsho ba dag mi bya bas bsdams pa de thob par bya'o zhes yun ring po nas dgyes pa dang /sdug pa dang / phangs pa dang / thugs su 'thad par mdzad pa yin te/ de dag gi yun ring po nas dgyes pa dang / sdug pa dang / phangs pa dang / thugs su 'thad par mdzad pa gang yin pa des de'i tshe na thob pas na/ de'i phyir 'phags pa dgyes pa zhes bya'o/ / 'di ltar 'phags pa dgyes pa'i tshul khrims dag thob na/ shes bzhin du brdzun gyi tshig smra bar mi byed/ bsams bzhin du srog chags kyi srog gcod par mi byed/ ma byin par len par mi byed/ 'dod pas log par g.yem par mi byed cing / chos ma yin pas chos gos la sogs pa yongs su tshol bar yang mi byed pas na/de ltar 'phags pa dgyes pa'i tshul khrims de dag nyid kyi dbang du byas te/ lam bsgom pa'i tshe ngag 'jug pa gang yin pa dang / lus kyi las gang yin pa dang / 'tsho ba gang yin pa de dag kyang yang dag pa'i ngag dang / las kyi mtha' dang /'tsho ba dag ces bya'o/ /yang dag pa'i lta ba dang / yang dag pa'i rtog pa dang / yang dag pa'i ngag dang / las kyi mtha' dang / 'tsho ba dag la brten te/ bsgom pa la zhugs pa de'i 'dun pa dang / brtson 'grus dang / rtsol ba dang / nges par 'byung bar byed pa dang /pha rol gnon par byed pa dang / mthu dang / rtsol ba dang / sems yang dag par rab tu 'dzin par byed pa dang / rtag 'grus gang yin pa de ni/ de'i yang dag pa'i rtsol ba zhes bya'o/ /de ltar yang dag pa'i rtsol ba dang ldan pa'i dran pa nye bar gzhag pa bzhi'i dbang du byas nas/phyin ci ma log pas yang dag par bsdus pa'i dran pa/ sems gnas pa rnam pa dgu po dag yang dag par 'dzin par byed pa gang yin pa de dag ni de'i yang dag pa'i dran pa dang / yang dag pa'i ting nge 'dzin ces bya'o/ /'phags pa'i lam yan lag brgyad po de dag thams cad kyang mdor bsdu na/rgyu ba'i tshe na bya ba dang / gnas pa'i tshe na bya ba dag yin te/ de la yang dag pa'i ngag dang / las kyi mtha' dang / 'tsho ba dag ni rgyu ba'i tshe na bya ba yin no/ /gnas pa'i tshe na bya ba ni rnam pa gnyis te/ zhi gnas dang / lhag mthong ngo //de la yang dag pa'i lta ba gang yin pa dang / yang dag pa'i rtog pa gang yin pa dang / yang dag pa'i rtsol ba gang yin pa de ni lhag mthong yin no/ /de la yang dag pa'i dran pa gang yin pa dang / yang dag pa'i ting nge 'dzin gang yin pa de ni zhi gnas yin no//de ltar yang dag pa'i ngag dang / las kyi mtha' dang / 'tsho ba yongs su dag pa la brten nas dus dus su zhi gnas dang / lhag mthong sgom par byed pa ni/ kun du sbyor ba ma lus par spangs pa mngon sum du byed cing 'bras bu'i mchog dgra bcom pa nyid kyang thob par 'gyur ro//bsgom pa'i lam ni dus gzhan nas kun du bsten nas nyon mongs pa rnams spong bar byed pa yin pas na yun ring bas yin no/ /mthong ba'i lam ni shes pa skyes pa tsam gyis nyon mongs pa rnams spong bar byed pa yin pas na shes pa tsam la rag las pa yin te/rgyu des na yang dag pa'i ngag dang / las kyi mtha' dang / 'tsho ba ni bsgom pa'i lam du rnam par gzhag pa yin no/ /de ltar byang chub kyi phyogs kyi chos sum cu rtsa bdun po de dag la rim pa des goms pa dang / yongs su byang bar byed pa gang yin pa de ni byang chub kyi phyogs bsgom pa zhes bya'o// de la bsgoms pa'i 'bras bu gang zhe na/ smras pa/ dge sbyong gi 'bras bu bzhi ste/ rgyun du zhugs pa'i 'bras bu dang / lan cig phyir 'ong ba'i 'bras bu dang / phyir mi 'ong ba'i 'bras bu dang / 'bras bu'i mchog dgra bcom pa nyid do/ / de la dge sbyong ni gang / 'bras bu ni gang zhe na/ smras pa/ lam ni dge sbyong yin no/ /nyon mongs pa spangs pa ni 'bras bu yin no/ /gzhan yang lam sngar skyes pa'i 'og tu lam 'bring dang khyad par du 'phags pa dang 'dra ba skyes pa ni 'bras bu yin no/ /de la ci'i phyir 'bras bu bzhi rnam par gzhag ce na/smras pa/ nyon mongs pa spangs pa'i gnyen po rnam pa bzhi'i phyir te/ 'di lta ste/ nyon mongs pa dngos po med pa ngan song du 'gro bar 'gyur la / ngan song du 'gro ba'i rgyur gyur pa rnams spangs pa dang / gnyen po bskyed pa'i phyir rgyun du zhugs pa'i 'bras bu rnam par gzhag go//bcom ldan 'das kyis kyang kun du sbyor ba gsum ni lam bskyed pa'i bar du gcod par byed pa yin pa'i phyir/ phyogs gsum po khyim pa'i phyogs dang / nyes par bshad pa'i chos 'dul ba'i phyogs dang / legs par gsungs pa'i chos 'dul ba'i phyogs la kun du sbyor ba gsum spangs pa'i phyir rnam par gzhag ste/de la khyim pa'i phyogs la ni 'jig tshogs la lta ba ste/ des de dang po nyid nas brtson par mi byed pas 'jig tshogs la lta bas ni dang po nyid nas skrag par byed do/ / nyes par bshad pa'i chos 'dul ba la ni tshul khrims dang brtul zhugs mchog tu 'dzin pa ste/ bskyod du zin kyang log par bsgrub pa'i phyir/ des ni 'phags pa'i lam skyed par mi byed do/ /legs par gsungs pa'i chos 'dul ba la ni the tshom ste/ de las g.yo bar yang 'gyur la/log par zhugs pa ma yin du zin kyang / ma goms pa'i phyir/ de ji srid du shes bya'i dngos po yang dag pa ji lta ba bzhin du mthong bar ma gyur pa de srid kyi bar du lam skye ba la nem nur dang yid gnyis dag gis bar du gcod par byed pas na/ rgyu des re zhig rgyun du zhugs pa'i 'bras bu rnam par gzhag go//rgyun du zhugs pa de yang re ltar thogs pa srid pa'i lhag ma bdun yod pa yin no/ /de skye ba'i rgyun yang gang gi tshe/ lha'i srid par bsdus pa dang / mi'i srid par bsdus pa'i skye ba'i rgyun gyi nyon mongs pa spong bar byed cing / de dag spangs pa'i phyir lha'i srid pa lan cig dang /mi'i srid pa lan cig mngon par sgrub par byed pa de'i tshe ni/ lan cig phyir 'ong ba'i 'bras bur rnam par gzhag go/ /gang gi tshe 'dir skye zhing phyir 'ong ba'i 'bras bu nyon mongs pa spangs nas lha'i srid pa nyi tshe kho na mngon par sgrub par byed pa de'i tshe na/phyir mi 'ong ba'i 'bras bur rnam par gzhag go/ /srid par skye bar 'gyur ba'i nyon mongs pa thams cad spangs na ni/ 'bras bu'i mchog dgra bcom pa nyid du rnam par gzhag go/ /bcom ldan 'das kyis lan cig phyir 'ong ba'i 'bras bu de yang kun du sbyor ba gsum spangs pa dang /'dod chags dang / zhe sdang dang / gti mug bsrabs pa'i phyir rnam par gzhag go/ /phyir mi 'ong ba'i 'bras bu ni tha ma'i cha dang mthun pa'i kun du sbyor ba lnga spangs pa'i phyir rnam par gzhag go/ /dgra bcom pa nyid kyi 'bras bu ni nyon mongs pa thams cad yongs su gtugs par spangs pa'i phyir rnam par gzhag ste/de ni bsgoms pa'i 'bras bu zhes bya'o/ /de la gang dag 'dod chags dang / zhe sdang dang / gti mug dang / nga rgyal dang / rnam par rtog pa spyad pa de dag gis ni/re zhig dang po kho nar spyad pa rnam par sbyor ba'i dmigs pa la spyad pa rnam par sbyong bar bya ste/ de'i 'og tu sems gnas pa rtogs par 'gyur zhing / de dag gi dmigs pa de yang so sor nges pa kho nar 'gyur bas na/ de dag gis ni gdon mi za bar dmigs pa des brtson par bya'o//cha mnyam par spyad pa des ni sems gnas pa nyi tshe tsam gyi phyir gang la dga' bar 'gyur ba de la brtson par bya'i/ spyad pa rnam par sbyang ba'i phyir ni ma yin no/ /cha mnyam par spyad pa ji lta ba bzhin du nyon mongs pa chung ba yang de bzhin du rig par bya'o/ /de dag gi khyad par ni 'di yin te/'dod chags la sogs pa spyad pa ni rab tu brtson par byed pa na/ yun ring pos rtogs par 'gyur ro/ /cha mnyam par spyad pas ni ha cang yun ring po ma yin pas so/ /nyon mongs pa chung bas ni dus nye bar myur ba myur bar sems gnas pa rtogs par 'gyur ro//de la gang zag 'dod chags la sogs pa spyad pa dag gi rtags rnams ni sngar bstan zin na/ gang zag cha mnyam par spyad pa dang nyon mongs pa chung ba dag gi rtags rnams gang zhe na/ smras pa/ gang zag cha mnyam par spyad pa la ni/ 'dod chags la sogs pa spyad pa dag gi rtags gang dag yin pa de dag thams cad kyang yod mod kyis/de dag ji ltar 'dod chags la sogs pa spyad pa dag gi ltar che ba dang /[ (]brtsan [,]brtson [)]pa ni ma yin te/ de dag kyang rkyen de dag yod na cha mnyam par gyur pa yin par mngon no/ /de la gang zag nyon mongs pa chung ba'i rtags rnams ni ma bsgribs pa dang /dang po dag pa dang / tshogs bsags pa dang / dad pa che ba dang / yid gzhungs pa dang / bsod nams byas pa dang / yon tan dang ldan pa yin no/ /de lam bsgribs pa ni sgrib pa gsum po dag las kyi sgrib pa dang //nyon mongs pa'i sgrib pa dang / rnam par smin pa'i sgrib pa dag gis ma bsgribs pa ste/ de la las kyi sgrib pa ni mtshams med pa lnga'i las dag dang / gzhan yang bsams bzhin du byas pa'i las lci ba / las kyi rnam par smin pa ma skyes pa/ lam skyed pa'i bar chad byed pa gang yin pa'o/ /de la nyon mongs pa'i sgrib pa ni nyon mongs pa shas chen po dang /nyon mongs pa yun ring po gang dag yin pa ste/ tshe 'di la spyad pa rnam par sbyong ba'i dmigs pas rnam par sbyang bar mi nus pa gang yin pa'o/ /de la rnam par smin pa'i sgrib pa ni skye ba'i gnas gang du 'phags pa'i lam mi 'jug cing mi rgyu ba dang /gang 'phags pa'i lam 'jug cing rgyu ba der rnam par smin pa mngon par grub na yang / der skyes pa'i tshe glen pa dang / dig pa dang / lkugs pa dang / lag pas brda byed par 'gyur zhing legs par gsungs pa dang / nyes par bshad pa'i chos rnams kyi don kun du shes par mi nus par 'gyur ro //de la dang po dag pa ni tshul khrims shin tu rnam par dag pa dang / lta ba drang ba'o/ /de la tshul khrims shin tu rnam par dag pa ni/ snga ma bzhin du rnam pa bcur rig par bya'o/ /de la lta ba drang ba ni dad pa dang mtshungs par ldan pa dang /mos pa dang mtshungs par ldan pa dang / sgyu dang g.yo dang bral ba dang / legs par bsams pa'i chos kyi don la nem nur med cing the tshom med pa'i sbyor ba dang ldan pa'i phyir te/ lta ba dad pa dang mtshungs par ldan pa gang yin pa ni chos 'dul ba 'di las mi 'phrogs par 'gyur ro//mos pa dang mtshungs par ldan pa ni/ sangs rgyas dang / sangs rgyas kyi nyan thos rnams kyi mthu bsam gyis mi khyab pa dang / skye ba'i gnas bsam gyis mi khyab pa dag dang / zab mo bstan pa dang / lung du ma bstan pa'i dngos po dag la mos shing mi skrag mi dngang bar 'gyur ro//sgyu dang g.yo dang / bral ba'i lta ba ni des na drang po dang drang po'i rang bzhin can dang / ji ltar rjes su gtams pa bzhin sgrub par byed pa dang / bdag nyid ji lta ba bzhin du ston par byed do/ /chos rnams la mi rtag pa dang / sdug bsngal ba dang /stong pa dang / bdag med pa las brtsams te/ don legs par bsams/ legs par gzhal/ legs par nye bar brtags pa'i rgyu des na/ de nem nur med cing the tshom med la/ lam gnyis dang bral zhing khyad par du 'gro ba yin te/ ji skad smos pa'i lta ba rnam pa bzhi po de dag ni lta ba drang ba zhes bya'o//de la tshogs bsags pa ni rgyas par sngar bstan pa kho na lta bu'i tshogs dang ldan pa'o/ /yang don mdor bsdu na/ rnam pa bzhi ste/ bsod nams kyi tshogs dang / ye shes kyi tshogs dang / sngon gyi dang / tshe 'di'o / / de la bsod nams kyi tshogs ni/ gang gis da ltar de la yo byad rkyen du 'bab cing mthun par rab tu mang po dag bgos pa dang / dge ba'i bshes gnyen dag rnyed pa dang / rab tu brtson pa na bar chad med pa gang yin pa'o/ /de la ye shes kyi tshogs ni gang gis yid gzhungs par 'gyur ba dang /legs par gsungs pa dang / nyes par bshad pa'i chos rnams kyi don kun shes par nus pa dang / rjes su mthun pa'i chos bstan pa dang / don bstan pas gdams shing rjes su bstan pa thob par 'gyur ba'o/ /de la sngon gyi ni sngon dge ba'i rtsa ba nye bar bsags pas des de ltar dbang po yongs su smin pa dag thob pa'o//de la tshe 'di'i ni/ 'di lta ste/ dge ba'i chos la 'dun pa dang / de bzhin du dbang po yongs su smin pa dang / tshul khrims kyi sdom pa dang / dbang po sdom pa la sogs pa ste/ rgyas par snga ma bzhin no/ /de la dad pa che ba ni ston pa la nem nur med cing /the tshom med la/ dad par byed cing mos par byed pa dang / ston pa la ji lta ba bzhin du chos dang / bslab pa la yang de bzhin no zhes bya ba la sogs pa ste/ rgyas par snga ma bzhin no/ /de la yid gzhungs pa ni / gang gis chos rnams myur du 'dzin par byed pa dang /chos dang don rnams yun ring por yang mi brjed par byed pa dang / chos dang don rnams myur du rtogs par byed pa'o/ /de la bsod nams byas pa ni/ gang gis gzugs bzang ba dang / blta na sdug pa dang / mdzes pa dang / tshe ring ba dang / tshig btsun pa dang /dbang che bar grags ba dang / grags pa dang ldan pa dang / bsod nams che ba dang / chos gos la sogs pa rnyed pa dang / rgyal po la sogs pas bsnyen bskur byas/ bla mar byas pa'o/ /de la yon tan dang ldan pa zhes bya ba la yon tan ni 'dod pa chung ba la sogs pa yin par rig par bya ste/de ni rang bzhin gyis dge sbyong gi rgyan ji skad bstan pa de dag dang ldan pa dang / de lta bu dang mthun pa de dag ni gang zag 'dod chags chung ba'i rtags rnams yin par rig par bya'o/ /de la gang zag gi rnam grangs dag du zhe na/ de la gang zag gi rnam grangs ni drug ste/drug gang zhe na/ 'di lta ste/ dge sbyong dang / bram ze dang / tshangs par spyod pa dang / dge slong dang / sdom brtson dang / rab tu byung ba'o/ /de la dge sbyong ni rnam pa bzhi ste/ lam rgyal ba dang / lam ston pa dang / lam gyis 'tsho ba dang / lam sun par byed pa'o/ /de la bde bar gshegs pa gang yin pa de ni/ lam rgyal ba'o/ /chos smras pa gang yin pa de ni lam ston pa'o/ /legs par zhugs pa gang yin pa de ni las kyis 'tsho ba'o/ /log par zhugs pa gang yin pa de ni lam sun 'byin par byed pa'o/ /de la bde bar gshegs pa zhes bya ba ni/'dod chags dang / zhe sdang dang / gti mug ma lus par zad pa rjes su brnyes pa gang yin pa'o/ /chos smra ba zhes bya ba ni/ 'dod chags dang / zhe sdang dang / gti mug 'dul ba'i phyir chos ston pa gang yin pa'o/ /legs par zhugs pa zhes bya ba ni 'dod chags dang /zhe sdang dang / gti mug gdul ba'i phyir zhugs pa gang yin pa'o/ /log par zhugs pa zhes bya ba ni tshul khrims 'chal ba dang / sdig pa'i chos can gang yin pa'o/ /gzhan yang slob pa dang / mi slob pa dag ni mthong ba dang / bsgom pas spang par bya ba'i nyon mongs pa dag las rnam par rgyal ba'i phyir lam rgyal ba zhes bya'o//de la de bzhin gshegs pa dang / byang chub sems dpa' phyis byang chub kyi phyir 'jug pa dang / nyan thos mdo sde 'dzin pa dang / 'dul ba 'dzin pa dang / ma mo 'dzin pa rnams dang /gang dag brdar btags pa'i chos 'dul ba 'dzin cing / chos kyi tshul la 'jug pa de dag ni lam ston pa zhes bya'o/ /de la so so'i skye bo dge ba bdag la phan pa'i phyir/ zhugs pa ngo tsha dang ldan pa/ 'gyod pa dang ldan pa/ bslab pa 'dod pa/ ma thob pa thob par bya ba dang /ma rtogs pa rtogs par bya ba dang / mngon sum du ma byas pa mngon sum du bya ba'i phyir/ rab tu brtson pa mngon sum du ma byas pa mngon sum du bya ba'i bar gyi skal ba dang / mthu yod pa gang dag yod pa de dag ni lam gyis 'tsho ba zhes bya ba ste/ de dag la drod yod pa'i phyir des de dag 'phags pa'i shes rab kyi dbang po bskyed pa'i phyir/ ma shi zhing gson pa zhes bya ba ste/ de'i phyir lam gyis 'tsho ba zhes bya'o/ /de la gang zag tshul khrims 'chal pa sdig pa'i chos can/ tshangs par spyod pa ma yin par tshangs par spyod pa khas 'che ba'i bar gang yin pa de ni/lam sun par byed pa zhes bya ste/ des ni lam bzhi dang po nas sun par byas pas/ des na de lam bskyed par bya ba dang / lam bstan pa yod cing med pa ma yin la rtogs par bya ba yod cing / med pa ma yin na yang / skal ba dang mthu med la/snod du gyur pa ma yin pas na de'i phyir lam sun par byed pa zhes bya'o/ /bcom ldan 'das kyis kyang de las dgongs nas/ 'di la dge sbyong gi dang po dang bzhi pa'i bar yang yod kyi/ phas kyi rgol ba dag la ni/ dge sbyong dang / bram ze dag gis stong ngo / / gang la 'phags pa'i lam yan lag brgyad pa yod pa de la ni dge sbyong gi dang po yang yod la/ de la ni bzhi pa'i bar yang yod do zhes gsungs so/ /de la bram ze ni rnam pa gsum ste/ 'di lta ste/ rigs bram ze dang / ming bram ze dang / sgrub pa bram ze'o/ /de la rigs bram ze zhes bya ba ni bram ze'i rigs su skyes pa/skye gnas nas skyes shing ma las byung la pha ma dang ldan pa gang yin pa'o/ /de la ming bram ze zhes bya ba ni 'jig rten na bram ze zhes ming dang 'du shes dang / brdar btags shing tha snyad du brjod pa gang yin pa'o/ /de la sgrub pa bram ze zhes bya ba ni/shin tu mthar thug cing don byas pa ste/ des sdig pa mi dge ba'i chos rnams bsal ba gang yin pa ste/ ji skad du/ /don byas bram zer 'dod pa'i phyir/ /bram ze la ni bya ba med/ /ces gsungs pa lta bu'o/ /de la tshangs par spyod pa yang rnam pa gsum ste/'di lta ste/ spangs shing yang dag par blangs pa dang / de la bar chad med pas spangs pa dang / de gtan spangs pa'o/ /de la spangs shing yang dag par blangs pa zhes bya ba ni/ mi tshangs par spyod pa 'khrig pa'i chos spangs shing / bslab pa yang dag par blangs pa gang yin pa'o//de la bar chad med par spangs pa zhes bya ba ni so so'i skye bo'i 'jig rten pa'i lam gyis 'dod pa'i 'dod chags dang bral ba gang yin pa'o/ /de la de gtan spangs pa zhes bya ba ni phyir mi 'ong ba'am/ dgra bcom pa nyid gang yin pa'o/ /de la dge slong ni rnam pa lnga ste/ 'di lta ste/slong ba'i phyir dge slong dang / khas 'che ba'i dge slong dang / ming gi dge slong dang / nyon mongs pa bcom pa'i phyir dge slong dang / gsol ba dang bzhi'i las kyis bsnyen par rdzogs pa'i dge slong ngo / /de la sdom brtson pa ni rnam pa gsum ste/ 'di lta ste/ tshul khrims 'chal pa yang dag par sdom pa'i phyir sdom brtson pa ni/ lus dang ngag gi las mi dge ba spangs pa gang yin pa'o/ /yul yang dag par sdom pa'i phyir sdom brtson pa ni/ dbang po rnams kyi sgo bsdams pa dang / dran pa kun du bsrungs pa dang / dran pa la rtag 'grus byed pa zhes bya ba la sogs pa ste/rgyas par snga ma lta bu gang yin pa'o/ /nyon mongs pa yang dag par sdom pa'i phyir sdom brtson pa ni/ gang gis mthong ba dang / bsgom pas spang bar bya ba'i nyon mongs pa rnams spangs pa ste/ 'dod pa'i rnam par rtog pa dang / gnod sems kyi rnam par rtog pa dang /rnam par 'tshe ba'i rnam par rtog pa byung ngo cog dang / brnab sems dang / gnod sems dang / log par lta ba dang khong khro ba dang / 'khon du 'dzin pa dang / 'chab pa dang / 'tshig pa la sogs pa ngan song dang mthun pa sems can dmyal bar 'gro ba/ngan 'gror 'gro ba/ dge sbyong byed pa ma yin pa byung ngo cog dang du mi len cing spong bar byed/ sel bar byed/ byang bar byed pa gang yin pa'o/ /nyon mongs pa yang dag par sdom pa de yang rnam pa gnyis te/ kun nas dkris pa yang dag par sdom pa dang /bag la nyal yang dag par sdom pa'o/ /de la rab tu byung ba ni rnam pa gnyis te/ legs par gsungs pa'i chos 'dul ba dang ldan pa dang / nyes par bshad pa'i chos 'dul ba dang ldan pa'o/ /de la legs par gsungs pa'i chos 'dul ba dang ldan pa ni/dge slong dang / dge slong ma dang / dge slob ma dang / dge tshul dang / dge tshul ma'o/ /gzhan yang bdag nyid sdig pa mi dge ba'i chos rnams las rab tu byung bar byed pa gang yin pa de ni don dam pa'i sgo nas rab tu byung bzhes bya'o/ /de la nyes par bshad pa'i chos 'dul ba dang ldan pa ni/'di lta ste/ mu stegs can gyi rab tu byung ba gcer bu pa'am/ kun du rgyu'am / thal ba can nam/ dka' thub chen po'am / gzhan yang gang dag de lta bu dang mthun pa rnams so/ /de'i phyir dge sbyong dang / bram ze dang / tshangs par spyod pa dang / dge slong dang /sdom brtson pa dang / rab tu byung ba zhes bya bas gang zag gi rnam grangs dag bstan to/ /de la gang zag brgyad rnam par gzhag pa'i rgyu ni gang zag bzhi rnam par gzhag pa yin te/ de la gang zag brgyad gang zhe na/ 'di lta ste/ nus pa dang / mi nus pa dang / thabs la mkhas pa dang /thabs la mi mkhas pa dang / rgyun du byed pa dang / rgyun du mi byed pa dang yongs su sbyang ba byas pa dang / yongs su sbyang ba ma byas pa'o/ /de la gang zag rnam pa bzhi rnam par gzhag pa ni gang zag brgyad po de dag nyid rnam par gzhag pa'i rgyu yin te/ rab tu dbye ba rnam pa bzhis rgyur 'gyur ro//'di lta ste/ dbang po'i rab tu dbye ba ni dbang po yongs su smin pa dang / dbang po yongs su ma smin pa'o/ /rnal 'byor gyi rab tu dbye ba ni rnal 'byor shes pa dang / rnal 'byor ma shes pa'o/ /sbyor ba rab tu dbye ba ni rtag tu byed pa dang / rtag tu mi byed pa dang /gus par byed pa dang / gus par mi byed par sbyor ba'o/ /dus kyi rab tu dbye ba ni yun ring po nas lam bsgoms pa dang / yun ring po na lam ma bsgoms pa'o/ /rab tu dbye ba rnam pa bzhi po de dag ji ltar na gang zag brgyad rnam par gzhag pa'i rgyur gyur pa yin zhe na/de la dbang po yongs su smin pa gang yin pa de ni nus pa yin no/ /dbang po yongs su ma smin pa ni mi nus pa yin no/ /rnal 'byor shes pa ni thabs la mkhas pa yin no/ /rnal 'byor mi shes pa ni thabs la mi mkhas pa yin no/ /rtag tu byed pa dang gus par byas te sbyor ba ni rgyun du byed pa ste/rtag 'grus zhes bya'o/ /rtag tu mi byed pa dang / gus par mi byed par sbyor ba ni rgyun du mi byed pa ste/ rtag 'grus med pa zhes bya'o/ /yun ring po nas lam bsgoms pa ni yongs su sbyong ba byas pa yin no/ /yun ring po nas lam ma bsgoms pa ni yongs su sbyong ba ma byas pa yin te/de ltar dbang po'i rab tu dbye ba dang / rnal 'byor dang / sbyor ba dang / dus kyi rab tu dbye bas gang zag brgyad rnam par gzhag pa yin no/ /gang zag gang ji srid du dbang po yongs su ma smin pa de ni/ de srid du thabs la mkhas pa dang / rgyun du byed pa dang / yongs su sbyang ba byas pa yin yang rigs pa'i chos dge ba thob par mi 'gyur ro/ /de la dbang po yongs su smin pa yin yang / gal te thabs la mi mkhas na thob par mi 'gyur ro/ /dbang po yongs su smin pa dang / thabs la mkhas pa yin yang / gal te rgyun du mi byed na/ mngon par shes pa myur bar mi 'gyur ro/ /de la dbang po yongs su smin pa dang / thabs la mkhas pa dang / rgyun du byed pa yin yang / gal te yongs su sbyang ba ma byas na/ rang gi don byas pa dang / bya ba byas pa ma yin no/ /de'i phyir dbang po yongs su smin pa dang / thabs la mkhas pa dang /rgyun du byed pa dang / yongs su sbyang ba byas pa yin na/ de ltar na de ni thob par 'gyur ba dang / mngon par shes pa myur ba dang / rang gi don byas pa dang / bya ba byas pa yin no/ / de la bdud dag ni du/ bdud kyi las dag ni du zhe na/ rnal 'byor pa rnal 'byor la brtson pa las bdud bzhi dang bdud kyi las rab tu mang po dag yod par rig par bya ste/ de dag kyang yongs su shes nas yongs su spang bar bya'o/ /de la bdud bzhi gang zhe na/ phung po'i bdud dang / nyon mongs pa'i bdud dang / 'chi ba'i bdud dang / lha'i bu'i bdud do/ /de la phung po'i bdud ni nye bar len pa'i phung po lnga'o/ /nyon mongs pa'i bdud ni khams gsum na spyod pa'i nyon mongs pa rnams so/ /'chi ba'i bdud ni sems can de dang de dag sems can gyi ris de dang de dag nas 'chi ba'i dus byed pa gang yin pa'o/ /lha'i bu'i bdud ni phung po dang nyon mongs pa dang 'chi ba'i bdud las yang dag par 'da' bar bya ba'i phyir dge ba'i phyogs la rab tu brtson pa de la bar chad bya ba dang /rnam par g.yeng bar bya ba'i phyir 'dod pa'i khams su skyes pa'i lha'i bu dbang phyug thob pa dag nye bar 'ong ba gang yin pa ste/ de ni lha'i bu'i bdud ces bya'o//de la gang du 'chi ba dang / gang gis 'chi ba dang / 'chi ba de gang yin pa dang / bar chad kyi dngos po gang gis 'chi ba las yang dag par mi 'da' bar byed pa de dag gi dbang du byas nas/ bdud bzhi rnam par gzhag pa yin te/ de la nye bar len pa'i phung po lnga skyes shing byung ma thag tu 'chi'o//nyon mongs pa dag gis phyi mar skye bar byed cing skyes nas 'chi'o/ /'chi zhing 'chi 'pho ba na/ sems can rnams kyi 'tsho ba'i dbang po 'gag cing 'chi ba'i dus byed pa'i ngo bo nyid gang yin pa de ni 'chi ba yin no/ /lha'i bu'i bdud ni 'chi ba las yang dag par 'da' bar bya ba'i phyir/rab tu brtson par byed pa la bar chad bya ba'i phyir nye bar 'ong zhing des ni 'chi ba'i chos nyid las yang dag par 'da' bar mi nus pa kho na'am/ dus gzhan gyis yang dag par 'da' bar byed pa yin no/ /de la cung zad bdud kyi dbang du song ba zhes bya ba ni/so so'i skye bo'i 'jig rten pa'i lam gyis 'dod chags dang bral ba 'di na gnas pa'am / der skyes pa gang yin pa'o/ /dbang du song ba zhes bya ba ni/ 'dod chags dang ma bral ba gang yin pa'o/ /de la 'dod chags dang ma bral ba gang yin pa de ni/ lag tu song zhing ji ltar 'dod pa bzhin du bya ba kho na yin no//'dod chags dang bral ba ni bdud kyi 'ching ba dag gis bcings pa dang / bdud kyi zhags pa dag las yongs sum grol ba yin te/ de'i phyir de ni khams 'dir yang phyir 'ong bar 'gyur ba yin no/ /de la bdud kyi las dag ni gang la la nges par 'byung ba dang ldan pa dang dge ba'i chos la 'dun pa skyes nas 'dod pa la zhen pa'i dbang du byas nas/yang phyir ldog par byed na/ de'i bdud kyi las su rig par bya'o/ /dbang po'i sgo bsdams te gnas pa gang yin pa chags par 'gyur ba'i gzugs dang / sgra dang / dri dang / ro dang / reg bya dang / chos rnams dang mtshan mar 'dzin pa dang / mngon rtags su 'dzin pa dag la sems 'jug par byed na/ de yang bdud kyi las su rig par bya'o/ /de bzhin du zas kyi tshod rig pa la gnas pa zhig 'dun pa'i 'dod chags kyi rjes su chags pas ro zhim po mi mthun pa dag la sems 'jug par byed na/de yang bdud kyi las su rig par bya'o/ /de bzhin du nam gyi cha stod dang / nam gyi cha smad la mi nyal bar sbyor ba'i rjes su brtson pa la gnas pa zhig gnyid kyi bde ba dang / nyal ba'i bde ba dang / glos 'bebs pa'i bde ba la sems 'jug par byed na/de yang bdud kyi las su rig par bya'o/ /de bzhin du shes bzhin du spyod pa la gnas pa zhig 'gro ba dang / ldog pa la sogs pa dag gi tshe/ bud med gzhon nu kha dog bzang ba chags par 'gyur ba dag mthong na/ tshul bzhin ma yin pa mtshan mar 'dzin pas sems 'jug par byed pa dang /'jig rten gyi sna tshogs dag mthong na/ sems 'jug par byed pa dang / don mang po dang / bya ba mang po dag la sems 'jug par byed pa dang / de bzhin du khyim na gnas pa dang / rab tu byung ba dag dang /'dre ba la dga' ba dang / sdig pa'i grogs po dag dang lhan cig gnas shing lta ba mthun par bya ba'i phyir/ sems 'jug par byed na/ de yang bdud kyi las su rig par bya'o / /de bzhin du sangs rgyas dang / chos dang / dge 'dun dang / sdug bsngal dang / kun 'byung ba dang / 'gog pa dang / lam dang / 'jig rten 'di dang / 'jig rten pha rol la yid gnyis dang nem nur dag skyed par byed na/ de yang bdud kyi las su rig par bya'o/ /de bzhin du dgon pa na 'dug kyang rung / shing drung na 'dug kyang rung ste /khang stong na 'dug kyang rung / 'jigs pa dang / 'jigs su rung ba chen por snang ba/ dngang bar byed pa/ spu zing zhes byed pa/ bram ze'i cha lugs sam/ mi'i cha lugs sam/ mi ma yin pa'i cha lugs can la la zhig nye bar 'ongs nas tshul bzhin ma yin pas/ dkar po'i phyogs las 'dun pa bzlog par byed cing nag po'i phyogs yang dag par 'dzin du 'jug par byed na/ de yang bdud kyi las su rig par bya'o/ /gang gi tshe rnyed pa dang / bkur sti dag la sems 'jug par byed pa dang / ser sna dang / 'dod chen che ba dang / chog mi shes pa dang /khro ba dang / khon du 'dzin pa dang / tshul 'chos pa dang / kha gsag la sogs pa dge sbyong gi rgyan gyi mi mthun pa'i phyogs kyi chos rnams la sems 'jug par byed na/ de yang bdud kyi las su rig par bya'o/ /de lta bu dang mthun pa de dag ni bdud kyi las su rig par bya ste/de dag kyang bdud bzhi po dag dang ci rigs su sbyar ro/ /de la rtsom pa 'bras bu yod pas ji lta bu yin zhe na/ rgyu gsum gyis na yang dag par rab tu brtson pa yang rtsom pa 'bras bu med par 'gyur la/ de las bzlog pas ni 'bras bu yod par 'gyur la / 'di lta ste/ dbang po yang dag par mi 'grub pa dang /rjes su mthun pa'i gdams ngag med pa dang / ting nge 'dzin mthu chung bas so/ /de la gal te dbang po rnams yang dag par mi 'grub na/ rjes su mthun pa'i gdams ngag yod cing ting nge 'dzin mthu dang ldan du zin kyang / de lta na de'i rtsom pa 'bras bu med par 'gyur ro//gal te dbang po rnams yang dag par 'grub la/ rjes su mthun pa'i gdams ngag med na/ ting nge 'dzin mthu dang ldan du zin kyang / de ltar na de'i rtsom pa 'bras bu med par 'gyur ro/ /gal te dbang po rnams yang dag par 'grub cing / rjes su mthun pa'i gdams ngag yod du zin kyang /ting nge 'dzin mthu chung bar gyur na/ de ltar na de'i rtsom pa 'bras bu med par 'gyur ro/ /gal te dbang po rnams kyang yang dag par 'grub la/ rjes su mthun pa'i gdams ngag kyang yod/ ting nge 'dzin kyang mthu dang ldan par gyur na/ de lta na de'i rtsom pa 'bras bu yod par 'gyur te/rgyu gsum po de dag gis ni 'bras bu med par 'gyur gyi/ rgyu gsum po kho nas ni 'bras bu yod par 'gyur ro/ /sdom ni/ /gang zag rnams dang de rnams gzhag /de bzhin dmigs pa dag dang ni/ /gdams ngag dang ni bslab pa dang //de bzhin bslab pa'i rjes mthun dang / /rnal 'byor nyams dang rnal 'byor dang / /yid la byed dang bya ba dang / /rnal 'byor pa dang bsgom pa dang / /'bras bu gang zag rnam grangs dang / /bdud dang bdud kyi las rnams dang / /rtsom pa 'bras bu yod pa yin/ /rnal 'byor spyod pa'i nyan thos kyi sar gtogs pa las/rnal 'byor gyi gnas gnyis pa rdzogs so// //nyan thos kyis/ bam po bcu gsum pa/ de ltar gang zag rnam par gzhag pa dang / dmigs pa rnam par gzhag pa dang / rtsom pa'i 'bras bu rnam par gzhag pa'i bar du byas pa la/gang zag las dang po ba las thog ma pa/ bdag la phan par 'dod pa/ bdag gi don rjes su thob par 'dod pas/ gnas bzhi po kun shes par 'dod cing / klan ka'i sems med pa dang / gus pa dang bcas shing nga rgyal gyi khengs pa med pa dang / dge ba gang yin zhes tshol zhing bdag nyid sgrogs pa'i phyir ma yin pa dang / bdag dang gzhan dag dge ba'i rtsa ba la nges par sbyar bar bya zhing / rnyed pa dang bkur sti don du gnyer ba med pa dag la dran pa nye bar gzhag nas/ mkhan po'am/ slob dpon nam/ bla ma'am/ bla ma lta bu rnal 'byor shes pa gang yin pa'i drung du 'gro bar bya'o//de ltar dus su song nas kyang skabs su bab par byas te/ stan shin tu dma' ba la 'dug nas/ bla gos phrag pa gcig tu gzar te/ pus mo g.yas pa'i lha nga sa la btsugs nas/ zhes dang bcas pa/gus pa dang bcas pas/ btsun pa bdag ni rnal 'byor don du gnyer ba lags na/ bdag la rjes su thugs brtse ba'i slad du rnal 'byor bstan du gsol/ zhes rnal 'byor gsol bar bya'o/ /de ltar gsol ba btab pa'i rnal 'byor pa/ rnal 'byor shes pa des kyang gang zag las dang po pa/las thog ma pa/ rnal 'byor yid la bya ba la rab tu brtson par 'dod pa de la/ bzhin bzangs khyod skye dgu bag med pa dang ldan pa/ yul la gzhol ba/ yul la lhag par zhen par gyur pa/ bag yod pa la rab tu sbyor bar 'dod pa dang / ngan song gi btson ra nas gdon par 'dod pa dang /'dod chags dang / zhe sdang dang / gti mug gi lcags sgrog gis bcings pa'i 'ching ba dag gcod par 'dod pa dang / 'khor ba'i 'brog dgon pa chen po bgrod dka' ba'i lam du zhugs pa/ 'brog dgon pa chen po bgrod dka' ba'i lam las nges par bsgral bar 'dod pa dang /nyon mongs pa dang / mi dge ba'i rtsa ba'i mu ge chen po byung ba la/ dge ba'i rtsa ba'i lo legs par 'byung bar 'dod pa dang / nyon mongs pa'i chom rkun gyi 'jigs pa chen po dang phrad pas/ mya ngan las 'das pa'i bde ba rjes su thob par 'dod pa dang /nyon mongs pa'i nad chen pos thebs pas/ shin tu nad med pa'i mya ngan las 'das pa rjes su thob par 'dod pa dang / chu bo bzhis rgyun phyogs su bdas pa chu bo las bsgral bar 'dod pa dang / ma rig pa'i mun pa chen por zhugs pas/ ye shes kyi snang ba chen po rjes su thob par 'dod pa ni legs so legs so//tshe dang ldan pa khyod de ltar yang dag par rab tu brtson par byed pa na/ gdon mi za bar yul 'khor gyi bsod snyoms 'bras bu yod par za ba dang / ston pa'i bka' lung bzhin du byed pa dang / rtag 'grus pa'i bsam gtan la lhag mthong dang ldan pa dang /khyim stong pa dag rgyas par byed cing / bdag gi don gyi rjes su brtson pa dang / tshangs pa mtshungs par spyod pa/ mkhas pa rnams kyis ma smad pa dang / bdag la phan pa dang / gzhan la phan pa dang / skye bo mang po la phan pa dang / skye bo mang po la bde ba dang /'jig rten la rjes su snying brtse ba dang / lha dang mi rnams la phan pa dang bde ba'i phyir zhugs par 'gyur ro zhes tshig gi lam 'jam po 'jam po dag gis yang dag par gzeng bstod par bya/ yang dag par rab tu dga' bar bya zhing spong ba'i phan yon yang brjod par bya'o//de ltar de lta bu dang mthun pa'i tshig gi lam 'jam po 'jam po dag gis yang dag par gzeng bstod par bya / yang dag par rab tu dga' bar byas shing spong ba'i phan yon yang dag par bstan nas/ yongs su dri bar bya ba'i gnas kyi chos bzhi po dag yongs su dri bar bya ste/ ci tshe dang ldan pa khyod gcig tu sangs rgyas dang / chos dang / dge 'dun la skyabs su song zhing / 'di las phyi rol pa'i ston pa'am/ sbyin gnas gzhan dag yang dag par mi 'dod pa yin nam/ ci khyod tshangs par spyod pa bsgom par bya ba'i phyir khyod kyis dang por yongs su sbyong ba tshul khrims shin tu rnam par dag pa dang /lta ba drang po yin nam/ ci khyod 'phags pa'i bden pa mdo dang rnam par dbye ba las brtsams te/ chos nyung ngu'am/ mang po dag mnyan cing bzung ba yin nam/ ci khyod mya ngan las 'das pa la sems mos shing mya ngan las 'da' bar 'dod pas rab tu byung ba yin nam zhes yongs su dri bar bya ba'i gnas kyi chos bzhi po dag yongs su dri bar bya'o//de ltar dris par gal te/ de lta bu lags so zhes dam bca' bar byed na/ de'i 'og tu gnas bzhi po dag rgyu rnam pa bzhi legs par rdzas su brtag par bya ste/ smon lam legs par rjes su brtag par bya/ rigs dang / dbang po dang / spyad pa legs par rjes su brtag par bya'o/ /dri bas legs par rjes su brtag par bya/ gtam dang / spyod pa dang / sems kyi rnam grangs shes pas legs par rjes su brtag par bya'o/ / de la ji ltar na dri bas smon lam legs par rjes su brtag par bya zhe na/ 'di skad yongs su dri bar bya ste/ tshe dang ldan pa khyod kyis nyan thos kyi theg pa'am/ rang sangs rgyas kyi theg pa'am/ theg pa chen po'am/ gang du smon lam btab ces yongs su dri bar bya'o//de yang gang dang gang du smon lam btab pa de bzhin du/ bdag nyid lan 'debs par 'gyur te/ de ltar dri bas smon lam legs par rjes su btab par bya'o/ /ji ltar na dri bas rigs dang / dbang po dang / spyad pa dag legs par rjes su brtag par bya zhe na/ des 'di skad dri bar bya ste/tshe dang ldan pa khyod kyis bdag gi rigs gang yin pa dang / bdag gi dbang po rnams rtul ba'am/ 'bring ngam/ rno ba'am/ ci lta bu yin pa dang / ci bdag 'dod chags spyad pa'am/ 'on te zhe sdang spyad pa'am/ de bzhin du rnam par rtog pa spyad pa'i bar zhig yin zhes bdag nyid kyi rigs dang /dbang po dang / spyad pa dag shes sam zhes dri bar bya'o/ /gal te de shes rab can zhig yin na ni des rim gyis bdag nyid kyi rigs dang / dbang po dang spyad pa dag nye bar brtags shing mtshan mar gzung ba de bzhin du lan 'debs par byed do//gal te dman pa zhig yin na ni des rim gyis bdag nyid kyi rigs dang / dbang po dang / spyad pa dag nye bar ma rtogs shing mtshan mar ma zin pas de dris kyang lan 'debs par mi byed pas/ de la de'i 'og tu re zhig gtam gyis de gsum legs par rjes su brtag par bya ste/de'i mdun du tshig gi lam gsal ba/ 'brel pa/ sna tshogs pa/ snyan pa go sla ba dag gis nyan thos kyi theg pa dang ldan pa'i gtam bya'o/ /de gal te nyan thos kyi rigs can zhig yin na ni gtam de byas pa na / gtam des shin tu dga' ba dang / rangs pa dang / kun du dga' ba skye ba dang / yid bde ba skye ba dang / rab tu dang ba dang / mos par 'gyur ro/ /gal te de rang sangs rgyas kyi rigs can nam/ theg pa chen po'i rigs can zhig yin no/ gtam des shin tu dga' ba dang / rangs pa dang / kun tu dga' ba skye ba dang / yid bde ba skye ba dang / rab tu dang ba dang / mos par mi 'gyur ro/ /theg pa chen po'i rigs can gang yin pa de ni/ theg pa chen po dang ldan pa'i gtam byas pa na/ gtam des shin tu dga' ba dang / rangs pa dang / kun du dga' ba skye ba dang / yid bde ba skye ba dang / rab tu dang ba dang /mos par 'gyur ro/ /nyan thos dang / rang sangs rgyas kyi rigs can ni de lta ma yin no/ /gal te de dbang po rtul po zhig yin na ni/ gsal ba'i gtam byas na yang / chos kyi don nye bar brtag pa dang / gzung ba dang / so sor rtog par bya ba la shin tu mong rtul bar 'gyur ro//gal te dbang po 'bring zhig yin na ni de lta ma yin no/ /gal te dbang po rnon po zhig yin na ni/ dbang po rtul po la gsal ba'i gtam byas pa las bzlog pa/ zab mo'i gtam byas na yang / chos kyi don myur du nye bar rtogs pa dang / gzung ba dang / so sor rtog par byed do//gal te de 'dod chags spyad pa zhig yin na ni/ dang bar 'gyur ba'i gtam byas pa na/ gtam des shin tu rab tu dang ba dang / dga' ba dang / dgongs pa'i rjes su 'jug pa dang / spu zing zhes byed pa dang / mchi ma 'khrug ces byed pa dang / sems kyi rgyud snum pa dang sems 'jam pa ston par byed do//gal te de zhe sdang spyad pa zhig yin na ni/ de las bzlog pa yin par rig par bya'o/ /gal te de gti mug spyad pa zhig yin na ni/ nges par 'byed pa'i gtam mya ngan las 'das pa dang ldan pa/ zang zing med par byas pa na/ skrag pa dang /dngang ba dang / kun du skrag par 'gyur te/ ji ltar dbang po rtul po bstan pa de bzhin du de yang rig par bya'o/ /gal te de nga rgyal spyad pa zhig yin na ni/ shin tu gus pas nyan par mi byed cing rna gtod par yang mi byed la/ de bzhin du kun shes par bya ba'i sems nye bar 'jog par mi byed cing /dad par gyur na yang de bzhin du bsnyen bkur dang / legs so zhes bya ba sbyin par mi byed do/ /gal te de rnam par rtog pa spyad pa zhig yin na ni/ legs par rna blags te/ nyan par byed kyang sems rnam par g.yeng bar 'gyur zhing log par bzung ste/ 'dzin par yang 'gyur la/mi brtan zhing mi dam par 'dzin par yang 'gyur/ bzung na yang chud za bar 'gyur zhing / yang dang yang du phyi phyir yongs su 'dri bar byed par yang 'gyur te/ de ltar gtam gyis rigs dang / dbang po dang / spyad pa dag legs par rjes su brtag par bya'o//ji ltar na spyod pas rigs dang dbang po dang / spyad pa dag legs par rjes su brtag par bya zhe na/ gang zag nyan thos kyi rigs can dang / 'dod chags la sogs pa dpyad pa dag gi rtags gang dag sngar bstan pa de dag ni spyod pa zhes bya ste/ spyod pa des rigs dang /dbang po dang / spyad pa dag ci rigs par legs par rjes su brtag par bya'o/ /de la ji ltar na sems kyi rnam grangs shes pas rigs dang / dbang po dang / spyad pa dag legs par rjes su brtag par bya zhe na/ gal te rnal 'byor pa rnal 'byor shes pa de sems kyi rnam grangs shes pa thob pa zhig yin na /des pha rol gyi sems shes pa des de'i rigs dang / dbang po dang / spyad pa dag yang dag pa ji lta ba bzhin du rab tu shes pas legs par rjes su brtag par bya'o/ /gnas bzhi po de dag rgyu bzhi po de dag gis legs par rjes su brtags na /gnas lnga po 'di lta ste/ ting nge 'dzin gyi tshogs bsrung zhing bsags pa dang / rab tu dben pa dang / sems rtse gcig pa nyid dang / sgrib pa rnam par sbyong ba dang / yid la byed pa bsgom pa dag la nges par sbyar bar bya'o / /de la ting nge 'dzin gyi tshogs bsrung zhing bsags pa ni tshul khrims kyi sdom pa ji snyed pa dang ldan pa yin te/de la yang sangs rgyas kyis rjes su bstan pa dang / sangs rgyas kyis rjes su gnang ba'i tshul khrims kyi phung po yongs su rdzogs pa/ yongs su mi nyams par bya ba'i phyir/ bag yod par gnas shing bslab pa'i gzhi bsgrubs pas brtson 'grus mi gtong ba yin te/de lta na yang de tshul khrims dang yang dag par ldan pa'i bslab pa'i lam thob pa las yongs su mi nyams shing / bslab pa'i lam thob pa yang thob par 'gyur ba dang / tshul khrims kyi sdom pa la ji lta ba bzhin du dbang po sdom pa dang / zas kyi tshod rig pa nyid dang / nam gyi cha stod dang / nam gyi cha smad la mi nyal bar sbyor ba'i rjes su brtson pa dang / shes bzhin du spyod pa nyid dang / dge sbyong gi rgyan gyi bar la yang de bzhin te/ tshogs kyis yongs su zin pa gang dang gang yin pa'i chos rab tu rnam par dbye ba dag thob pa dang /de dag rjes su srung bar byed pa dang / rab tu rnam par dbye ba'i phyir zhing yongs su rdzogs par bya ba dang / ji skad gsungs pa bzhin lhag chad med par spyad par bya ba'i phyir 'dun pa skyed/ spro ba skyed de/ brtson 'grus brtsams shing gnas pa dag yin pa de ni ting nge 'dzin gyi tshogs bsrungs shing stsogs pa zhes bya'o//de de ltar nyams par gyur pa'i cha dang mthun par chos rnams yongs su spong zhing khyad par du 'gyur ba'i cha dang mthun pa'i chos rnams la so sor rten par byed pa na/ rab tu dben par gnas pa yin no/ /rab tu dben par gnas pa gang zhe na/gnas phun sum tshogs pa dang / spyod lam phun sum tshogs pa dang / dben pa phun sum tshogs pa gang yin pa'o/ /de la gnas phun sum tshogs pa ni 'di lta ste/ dgon pa dang / shing drung dang / khyim gyis stong pa dag ste/ de la gnas mal bla gab med pa dang / dur khrod dang /bas mtha' ni dgon pa zhes bya'o/ /de la nags 'dab ni shing drung zhes bya'o/ /de la ri khrod dang ri phug dang / rtswa khang dag ni khyim gyis stong pa zhes bya ste/ 'di lta ste/ dgon pa dang / shing drung dang / khang stong gi gnas mal bla gab med pa dang / dur khrod dang / bas mtha' dang / nags 'dabs dang / ri khrod dang / ri phug dang / rtswa khang de dag gcig tu bsdus pa ni gnas yin par rig par bya'o/ /gnas phun sum tshogs pa ni rnam pa lnga ste/ 'di la dang po kho nar gnas yibs su shis pa/ lta na sdug pa/ mdzes pa/ kun dga' ra ba phun sum tshogs pa/nags tshal phun sum tshogs pa/ rdzing bu phun sum tshogs pa/ gtsang ba nyams dga' ba/ shang shong med pa/ sdong dum dang / tsher ma'i gzhi ma yin pa/ rdo ba dang / gseg ma dang / gyo mo mi mang ba/ gang des mthong na sbong ba la brtson par gnas pa'i phyir/sems mngon par rab tu dang bar 'gyur zhing sems rangs shing rab tu dga' bas spong ba la rab tu stod par byed pa gang yin pa ste/ de ni gnas phun sum tshogs pa dang po yin no/ /gzhan yang nyin mo mi sdug pa nyung la/ mtshan mo sgra chung zhing klag cor nyung ba dang /sha sbrang dang / sbrang bu mchu rings dang / rlung dang / nyi ma dang / sdig sbrul gyis reg pa nyung ba gang yin pa de ni gnas phun sum tshogs pa gnyis pa yin no/ /gzhan yang gang na/ seng ge dang / stag dang / gung dang / chom rkun dang / pha rol gyi dmags tshogs dang /mi dang mi ma yin pa'i 'jigs pa dang / 'jigs su rung ba med la/ yid brtan zhing bag tsha ba med pa dang / bde ba la reg par gnas par 'gyur ba gang yin pa de ni/ gnas phun sum tshogs pa gsum pa yin no/ /gzhan yang gang du chos gos la sogs pa 'tsho ba'i yo byad rkyen du babs pa gang yin pa de dag tshegs chung ngus 'grub cing bsod snyoms la sogs pa de dag gis lus ngal ba med par 'tsho bar 'gyur ba gang yin pa de ni gnas phun sum tshogs pa bzhi pa yin no//gzhan yang gang du dge ba'i bshes gnyen gyis yongs su zin par 'gyur zhing gang dag de la ma phye ba'i gnas rnams 'byed par byed cing /phye ba rnams kyang gsal bar byed pa dang / ye shes dang mthong ba rnam par dag par bya ba'i phyir zab mo'i don dang tshig shes rab kyis so sor brtags nas/ legs par rab tu ston par byed pa de lta bu'i tshangs pa mtshungs par spyod pa mkhas pa dag gnas pa gang yin pa de ni gnas phun sum tshogs pa lnga pa yin no//de la spyod lam phun sum tshogs pa gang zhe na/ nyin mo 'chag pa dang / 'dug pa dag gis 'da' bar byed cing / mtshan mo'i thun dang po la yang de bzhin byed pa dang /thun bar ma la glo g.yas pa phab ste nyal bar byed pa dang / thun tha ma la myur ba myur ba kho nas langs te/ 'chag pa dang / 'dug pa dag gis 'da' bar byed pa dang / de ltar gnas mal phun sum tshogs pa de nyid du sangs rgyas kyis rjes su gnang ba'i khri'am/khri'u'am/ rtswa bting ba'i steng du skyil mo krung bcas te 'dug par byed pa'o/ /ci'i phyir zhe na/ rgyu rnam pa lnga yang dag par rjes su mthong ba'i phyir te/ lus legs par bsgrims na/ spyod lam de shin tu sbyangs pa skye ba dang / rjes su mthun pa yin pa'i phyir/myur ba myur ba kho nar shin tu sbyangs pa skye bar 'gyur ba dang / de bzhin du 'dug pas dus yun ring po 'da' bar byed nus shing / spyod lam des de'i lus shin tu ngal bar mi 'gyur ba dang / de bzhin du spyod lam de ni gzhan mu stegs can dang / phas kyi rgol ba dag dang / thun mong ma yin pa dang / de bzhin du gzhan dag gis spyod lam des 'dug pa mthong na shin tu dang ba skye bar 'gyur ba dang / de bzhin du spyod lam de ni sangs rgyas rnams dang / sangs rgyas kyi nyan thos rnams kyis rjes su gnang zhing bstan pa yin pa'i phyir te/ rgyu de lnga yang dag par rjes su mthong ba'i phyir/skyil mo krung bcas te lus drang por bsrangs nas 'dug go/ /de la lus drang por gang zhe na/ lus gsal bar bsang ste bzhag pa dang / sems la g.yo med cing tshul 'chos pa med par drang por bzhag pa'o/ /de la lus drang pos rab tu zin pas ni/rmugs pa dang / gnyid kyi sems yang dag par blangs te gnas par mi byed do/ /sems la g.yo med cing tshul 'chos pa med pas ni phyi rol du rnam par g.yeng ba yang dag par blangs te gnas par mi byed do/ /dran pa phyogs par gzhag ste zhes bya ba de la dran pa phyogs par bzhag ste/gnas par byed pa de gang zhe na/ tshul bzhin yid la byed pa dang / mtshungs par ldan pa'i dran pa ni nag po'i phyogs thams cad las phyir phyogs shing mi mthun pa yin pa'i phyir/ dran pa phyogs pa zhes bya'o/ /gzhan yang ting nge 'dzin gyi mtshan ma la dmigs pa dang /gzugs brnyan gyi mtshan ma la dmigs pa'i dran pa ni mnyam par gzhag pa'i sa pa'i dmigs pa thams cad la phyogs pa yin pa'i phyir dran pa phyogs pa zhes bya ste/ de ni spyod lam phun sum tshogs pa zhes bya'o/ /dben pa phun sum tshogs pa gang zhe na/ smras pa/ rnam pa gnyis te/ lus dben pa dang / sems dben pa'o/ /de la lus dben pa ni khyim na gnas pa dang / rab tu byung ba rnams dang / gnyis lhan cig na mi gnas pa gang yin pa'o/ /de la sems dben pa ni nyon mongs pa can dang / lung du ma bstan pa'i yid la byed pa spangs te/mnyam par gzhag pa'i sa pa'am/ ting nge 'dzin gyi tshogs kyi sbyor ba las byung ba'i yid la byed pa dga' ba'i don dang ldan pa sgom par byed pa gang yin pa ste/ de ni sems dben pa zhes bya'o/ /de la gnas phun sum tshogs pa gang yin pa dang / spyod lam phun sum tshogs pa gang yin pa dang /lus dben pa gang yin pa dang / sems dben pa gang yin pa de dag gcig tu bsdus pa ni rab tu dben pa zhes bya'o/ /de la sems rtse gcig pa nyid gang zhe na/ smras pa/ yang dang yang du rjes su dran pa dang / cha mthun pa la dmigs pa dang / rgyun dang / kha na ma tho ba med pa dang / dga' ba dang ldan pa'i sems kyi rgyun gang yin pa ste/ de ni ting nge 'dzin zhes kyang bya/ dge ba'i sems rtse gcig pa nyid ces kyang bya'o/ /de la ci zhig yang dang yang du rjes su dran par byed ce na/ smras pa/ chos gang dag bzung zhing mnyan pa dang /bla ma dag las gdams shing rjes su bstan pa thob pa gang yin pa de'i dbang du byas nas/ mnyam par gzhag pa'i sa pa'i mtshan ma mngon du byas te/ dmigs pa de la rgyun dang ldan pa'i dran pa rjes su 'jug par byed cing / nye bar stod par byed do / /de la cha mthun pa la dmigs pa gang zhe na/mnyam par gzhag pa'i sa pa'i dmigs pa rnam pa du ma rnam pa mang po sna tshogs gang yin pa ste/ gang gis dmigs pa de la sems 'jug par byed pa ni mnyam par gzhag pa zhes bya ste/ de ni cha mthun pa la dmigs pa zhes bya'o/ /de gang dang cha mthun zhe na/ smras pa/ de ni shes bya'i dngos po'i gzugs brnyan yin pas na de'i phyir cha mthun pa zhes bya'o/ /dmigs pa des dran pa rnam par g.yeng ba med pa'i rnam pa dang / bar du chad pa med pa dang / rgyun chags pa dang / rtag tu dang / gus par 'jug pa gang yin pa de ni rgyun dang ldan pa yin no//dmigs pa de nyid la mngon par dga' ba nyon mongs pa med cing / reg par gnas pa'i dran pas lam du zhugs pa gang yin pa de ni kha na ma tho ba med pa dang / dga' ba dang ldan pa yin gyi / de'i phyir yang dang yang du rjes su dran pa dang / cha mthun pa la dmigs pa dang /rgyun dang / kha na ma tho ba med pa dang / dga' ba dang ldan pa'i sems kyi rgyun ni ting nge 'dzin zhes bya'o zhes gsungs so/ /sems rtse gcig pa nyid de yang zhi gnas kyi phyogs dang / lhag mthong gi phyogs yod de/ de la sems gnas pa rnam pa dgu gang yin pa de ni zhi gnas kyi phyogs yin no//de la shes rab kyis dpyod pa rnam pa bzhi po gang yin pa de ni lhag mthong gi phyogs yin no/ /de la sems gnas pa rnam pa dgu gang zhe na/ 'di la dge slong sems nang kho nar 'jog par byed pa dang / yang dag par 'jog par byed pa dang / bsdus te 'jog par byed pa dang /nye bar 'jog par byed pa dang / dul bar byed pa dang / zhi bar byed pa dang / nye bar zhi bar byed pa dang / rgyud gcig tu byed pa dang / ting nge 'dzin du byed pa'o/ /de la ji ltar na 'jog par byed pa yin zhe na/ phyi rol gyi dmigs pa thams cad las yang dag par bsdus te/rnam par mi g.yeng bar bya ba'i phyir nang du nye bar gtod par byed pa ste/ rnam par g.yeng ba med par bya ba'i phyir dang por nye bar gtad pa gang yin pa de ni 'jog par byed pa yin no/ /ji ltar na yang dag par 'jog par byed ba yin zhe na/ dang po nye bar gtod pa'i sems gang yin pa de/g.yo ba dang / rags pa dang / yang dag par mi gnas pa dang / yongs su mi gnas par gyur na/ de dmigs pa de nyid la gtad pa'i tshul dang / dang bar bya ba'i tshul gyis mngon par tshar bcad pa dang bcas pas/ phra bar byed cing mngon par g.yeng bar mi byed pa gang yin pa de ni yang dag par 'jog par byed pa yin no//ji ltar na bsdus te 'jog par byed pa yin zhe na/ de ltar de'i sems gzhag pa dang yang dag par gzhag pa de gal te brjed ngas pas phyi rol du rnam par g.yeng bar gyur na/ des yang phyir de nyid la sdud par byed de/ de ltar na bsdus te 'jog par byed pa yin no//ji ltar na nye bar 'jog par byed pa yin zhe na/ dang po kho nar de lta de ltar dran pa nye bar gzhag ste/ gnas shing sems de yang dag par 'jog par byed pa na/ ji nas kyang de'i sems de'i phyi rol du mi 'phro bar byed de/ de ltar na nye bar 'jog par byed pa yin no//ji ltar na dul bar byed pa yin zhe na/ /'di lta ste/ gzugs dang / sgra dang / dri dang / ro dang / reg bya'i mtshan ma dag gam/ 'dod chags dang / zhe sdang dang / gti mug dang / bud med dang skyes pa'i mtshan ma gang dag gis/de'i sems rnam par g.yengs par gyur na/ de la des dang po nyid nas nyes dmigs kyi 'du shes bzung ba nyid kyi dbang du byas nas/ mtshan ma de dag la de'i sems 'phror mi ster bar byed de/ de ltar na dul bar byed pa yin no/ /ji ltar na zhi bar byed pa yin zhe na/ 'dod pa'i rnam par rtog pa la sogs pa rnam par rtog pa gang dag dang / 'dod pa la 'dun pa'i sgrib pa la sogs pa nye ba'i nyon mongs pa gang gis de'i sems kun du 'khrugs par gyur na/ de la des dang po nyid nas nyes dmigs kyi 'du shes su gzung ba de nyid kyi dbang du byas nas de'i sems de rnam par rtog pa gang dag dang /nye ba'i nyon mongs pa de dag la 'phror mi ster bar byed do/ / de ltar na zhi bar byed pa yin no/ /ji ltar na nye bar zhi bar byed pa yin zhe na/ de brjed ngas pa'i phyir rnam par rtog pa dang / nye ba'i nyon mongs pa de gnyi ga kun 'byung bar gyur na/byung ngo cog dang du mi len cing spong bar byed de/ de ltar na nye bar zhi bar byed pa yin no/ ji ltar na rgyud gcig tu byed pa yin zhe na/ mngon par 'du byed pa dang bcas pas bar du chad pa med pa dang / rgyun chags par ting nge 'dzin gyi rgyun la 'jog par byed de/ de ltar na rgyud gcig tu byed pa yin no//ji ltar na ting nge 'dzin du byed pa yin zhe na/ kun du bsten cing goms par byas lan mang du byas pa'i rgyus lhun gyis grub par 'jug pa dang / rang gi ngang gis 'jug pa'i lam thob cing mngon par 'du byed pa med pa dang / lhun gyis grub pa de nyid kyis/ de'i sems rnam par g.yang ba med pa'i ting nge 'dzin gyi rgyun la 'jug par 'gyur te/de ltar na ting nge 'dzin du byed pa yin no/ /de la stobs rnam pa drug gis ni sems gnas pa rnam pa dgu po dag 'grub ste/ 'di lta ste/ thos pa'i stobs dang / bsam pa'i stobs dang / dran pa'i stobs dang /shes bzhin gyi stobs dang / brtson 'grus kyi stobs dang / yongs su 'dris pa'i stobs kyis so/ /de la thos pa dang bsams pa'i stobs kyis ni re zhig thos pa gang yin pa dang / bsam pa gang yin pa'i dbang du byas nas/ dang po kho nar sems dmigs pa la 'jog par byed cing /de nyid la gtod pa'i tshul gyis yang dag par 'jog par yang byed do/ /de ltar sems gtad pa la dran pa'i stobs kyis yang dag par sdud cing rnam par g.yeng par mi byed pas bsdus te 'jog par byed pa dang / nye bar 'jog par byed do/ /de nas shes bzhin gyi stobs kyis ni rnam par rtog pa dang /nye ba'i nyon mongs pa'i mtshan ma dag la 'phro par mi byed pas dul bar byed pa dang / zhi bar byed pa'o/ /brtson 'grus kyi stobs kyis ni de gnyi ga kun du 'byung ba dang du mi len cing / rgyud gcig tu yang byed do/ /yongs su 'dris pa'i stobs kyis ting nge 'dzin du byed do//de la sems gnas pa dgu po dag la yid la byed pa bzhi yod par rig par bya ste/ bsgrims te 'jug pa dang / skabs su 'chad cing 'jug pa dang / skabs su 'chad pa med par 'jug pa dang / rtsol ba med par 'jug pa'o/ /de la 'jog par byed pa dang /yang dag par 'jog par byed pa la ni bsgrims te 'jug pa'i yid la byed pa yod do/ /bsdus te 'jog par byed pa dang / nye bar 'jog par byed pa dang / dul bar byed pa dang / zhi bar byed pa dang / nye bar zhi bar byed pa la ni/ skabs su 'chad cing 'jug pa'i yid la byed pa yod do//rgyud gcig tu byed pa la ni skabs su chad pa med par 'jug pa yid la byed pa yod do/ /ting nge 'dzin du byed pa la ni rtsol ba med par 'jug pa yid la byed pa yod do/ /de ltar na yid la byed pa de dag ni sems gnas pa rnam pa dgu po dag gi rgyud la zhi gnas kyi phyogs yin no//de ltar nang gi sems kyi zhi gnas thob pa gang yin pa lhag mthong la rab tu brtson par byed pa de la ni yid la byed pa bzhi po de dag nyid ni lhag mthong gi phyogs yin no/ /de lhag mthong rnam pa bzhi gang zhe na/ 'di la dge slong 'di lta ste/nang gi sems kyi zhi gnas la brten nas chos rnams rnam par 'byed par byed pa dang / rab tu rnam par 'byed par byed pa dang / yongs su rtog par byed pa dang / yongs su dpyod par byed pa'o/ /de la ji ltar rnam par 'byed par byed ce na/ spyad pa rnam par sbyong ba'i dmigs pa dang /mkhas pa'i dmigs pa dang / nyon mongs pa rnam par sbyong ba'i dmigs pa dag la/ ji snyed yod pa nyid kyis rnam par 'byed par byed do/ /ji lta ba bzhin du yod pa nyid kyis ni rab tu rnam par 'byed par byed do/ /shes rab dang ldan pa'i yid la byed pa rnam par rtog pa dang bcas pas/mtshan mar 'dzin par byed pa'i tshe na ni yongs su rtog par byed do/ /yang dag par rtog par byed pa'i tshe na ni/ yongs su dpyod par byed do/ /lhag mthong de yang sgo gsum dang ldan zhing / gzhi rab tu dbye ba rnam pa drug la dmigs pa yin par rig par bya ste/ lhag mthong gi sgo gsum gang zhe na/mtshan ma tsam gyi rjes su zhugs pa'i lhag mthong dang / yongs su btsal ba'i rjes su zhugs pa dang / yongs su btsal ba la so sor rtog pa'i rjes su zhugs pa'o/ /de la mtshan ma tsam gyi rjes su zhugs pa ni gang gis thos pa dang / bzung ba'i chos sam/gdams ngag la mnyam par gzhag pa'i sa pa'i yid la byed pas/ yid la byed cing sems par mi byed/ rtog par mi byed/ 'jal bar mi byed/ nye bar rtog par mi byed pa ste/ de ni mtshan ma tsam gyi rjes su zhugs pa yin no/ /gang gi tshe sems par byed/ rtog par byed/'jal bar byed/ nye bar rtog par byed pa de'i tshe na ni/ yongs su btsal ba'i rjes su zhugs pa yin no/ /gang gi tshe bsams shing brtags la/ gzhal zhing nye bar brtags nas/ ji ltar rnam par gzhag pa de bzhin du so sor rtog par byed pa de'i tshe na ni/ yongs su btsal ba la so sor rtog pa'i rjes su zhugs pa yin te/ de ni lhag mthong gi sgo gsum yin no/ /de la gzhi rab tu dbye ba rnam pa drug la dmigs pa gang zhe na/ de yongs su tshol bar byed pa na/ gzhi rnam pa drug po yongs su tshol bar byed de/ don dang / dngos po dang /mtshan nyid dang / phyogs dang / dus dang / rigs pa yongs su tshol bar byed cing / yongs su btsal nas kyang de dag la so sor rtog par byed do/ /de la ji ltar don yongs su tshol bar byed ce na/ smras pa 'di'i don ni 'di yin no zhes de ltar don yongs su tshol bar byed do//ji ltar dngos po yongs su tshol bar byed ce na/ dngos po rnam pa gnyis po nang gi dang / phyi rol gyi ste/ de ltar dngos po yongs su tshol bar byed do/ /ji ltar mtshan nyid yongs su tshol bar byed ce na/ mtshan nyid rnam pa gnyis po rang gi mtshan nyid dang / spyi'i mtshan nyid de/de ltar mtshan nyid yongs su tshol bar byed do/ /ji ltar phyogs yongs su tshol bar byed ce na/ phyogs rnam pa gnyis po nag po'i phyogs dang / dkar po'i phyogs te/ nag po'i phyogs ni skyon dang nyes dmigs kyi sgo nas so/ /dkar po'i phyogs ni yon tan dang phan yon gyi sgo nas te/de ltar phyogs yongs su tshol bar byed do/ /ji ltar dus yongs su tshol bar byed ce na/ dus rnam pa gsum po 'das pa dang / ma 'ongs pa dang / da ltar byung ba'i dus ste / 'di ltar 'das pa'i dus na 'di lta bu zhig byung bar gyur to/ /'di ltar ma 'ongs pa'i dus na 'di lta bu zhig byung bar 'gyur ro//'di ltar da ltar byung ba'i dus na 'di lta bu zhig da ltar yod do zhes de ltar dus yongs su tshol bar byed do/ /ji ltar rigs pa yongs su tshol bar byed ce na/ rigs pa bzhi po ltos pa'i rigs pa dang / bya ba byed pa'i rigs pa dang / 'thad pa sgrub pa'i rigs pa dang /chos nyid kyi rigs pa ste/ de la ltos pa'i rigs pas ni kun rdzob kyang kun rdzob kyi sgo nas/ don dam pa yang don dam pa'i sgo nas/ gzhi yang gzhi'i sgo nas yongs su tshol bar byed do/ /bya ba byed pa'i rigs pas ni/ chos rnams kyi byed pa yongs su tshol bar byed de/'di ni chos so/ /'di ni byed pa'o/ /'di ni 'di'i byed pa'o zhes yongs su tshol bar byed do/ /'thad pa sgrub pa'i rigs pas ni tshad ma gsum po yid ches pa'i lung dang / mngon sum dang / rjes su dpag pa dag yongs su tshol bar byed de/ ci 'di la yid ches pa'i lung yod dam med/ ci mngon sum du dmigs sam 'on te ma yin/ ci rjes su dpag pas rigs sam/ 'on te ma yin zhes yongs su tshol bar byed do/ /de la chos nyid kyi rigs pas ni/ chos rnams kyi de ltar gyur pa nyid dang / grags pa'i chos nyid dang / bsam gyis mi khyab pa'i chos nyid dang / gnas pa'i chos nyid la mos par byed cing / sems par mi byed/ rnam par rtog par mi byed de/ de ltar rigs pa yongs su tshol bar byed do/ /de ni lhag mthong gi sgo gsum dang /gzhi rab tu dbye ba rnam pa drug la dmigs pa yin te/ mdor bsdus na de ni lhag mthong thams cad yang dag par bsdus pa yin no/ /ci'i phyir gzhi rab tu dbye ba rnam pa drug rnam par gzhag ce na/ smras pa/ rtogs pa rnam pa gsum gyi dbang du byas pa'i phyir te/ smras pa'i don rtogs pa dang / dngos po'i mtha' rtogs pa dang / yang dag pa ji lta ba bzhin du rtogs pa'o/ /de la don yongs su tshol bas smras pa'i don rtogs pa yin no/ /dngos po yongs su tshol ba dang / rang gi mtshan nyid yongs su tshol bas ni dngos po'i mtha' rtogs pa yin no//de la spyi'i mtshan nyid yongs su tshol ba dang / phyogs yongs su tshol ba dang / dus yongs su tshol ba dang / rigs pa yongs su tshol bas ni/ yang dag pa ji lta ba bzhin du rtogs pa yin te/ rnal 'byor pas shes par bya ba ni/ 'di lta ste/ smras pa'i don dang / shes bya'i dngos po ji snyed yod pa nyid dang /ji lta ba bzhin du yod pa nyid gang yin pa de tsam du zad pa'i phyir ro/ /de la mi sdug pa la brtson pa'i rnal 'byor pa rnam par 'byed par byed pa na/ ji ltar gzhi rnam pa drug yongs su tshol bar byed ce na/ smras pa mi sdug pa'i dbang du byas pa'i chos thos shing bzung ba'i dbang du byas nas/mnyam par gzhag pa'i sa pa'i yid la byed pas/ don 'di ltar so sor rtog par byed de mi sdug pa 'di ni mi sdug pa yin no/ /'di ni mi mthun pa yin no/ /'di ni rul pa dang / dri mi zhim pa dang / dri nga ba yin no zhes des rnam pa de dag dang / de lta bu dang mthun pa gang dag gis mi sdug pa'i dbang du byas pa'i chos sngon thos pa de nyid kyi don so sor rtog par byed de/de ltar mi sdug pa nyid kyi don yongs su tshol bar byed do/ / ji ltar dngos po yongs su tshol bar byed ce na/ de ltar don so sor rtog pa de mi sdug pa de nyid la nang dang phyi rol gyi cha gnyis su rnam par gzhag par lta ba yin no// ji ltar rang gi mtshan nyid yongs su tshol bar byed ce na/ nang la yang re zhig lus 'di la skra dang / spu dag dang / glad pa dang / glad rgyas dang / bshang ba'i bar du rgyas par yod do zhes nang gi lus su gtogs pa la/ rul pa dang mi sdug pa nyid du mos par byed do//nang gi lus su gtogs pa'i mi sdug pa rnam pa du ma de dag kyang / khams gnyis po sa'i khams dang / chu'i khams gnyis kyis bsdus pa yin par mos par byed de/ de la skra dang / spu dag nas brtsams te/ mcher pa dang / bshang ba'i bar dag ni sa'i khams yin par mos par byed do//mchi ma dang / rngul dag nas brtsams te/ gci ba'i bar dag ni chu'i khams yin par mos par byed do/ /phyi rol la yang phyi rol du gtogs pa'i rnam par bsngos pa la sogs pa'i rnam pa dag gis mi sdug pa nyid du mos par byed de/ de la rnam par bsngos par mos par byed pa ni/des bud med da ma/ skyes pa'am/ mdza' bshes dang / tha mal pa'am/ ngan pa'am/ 'bring ngam/ bzang po'am/ byis pa'am/ bar ma'am/ rgan po shi ba'i ro bdag nyid kyis mthong ngam/ gzhan las thos sam/ yongs su brtags kyang rung ste/ de'i mtshan ma bzung nas shi nas zhag gcig lon pa khrag zags la/rul par ma gyur pa gang yin pa de la ni/ rnam par bsngos par mos par byed do/ /shi nas zhag gnyis lon pa rul par gyur la/ 'bu ma zhugs pa la ni rnam par rnags par mos par byed do/ /shi nas zhag bdun lon pa 'bu zhugs shing bam pa la ni/rnam par 'bus gzhig pa dang / rnam par bam par mos par byed do/ /khwa dang chun lag dang / bya rgod dang / khyi dang / wa dag gis bza' ba la ni/ rnam par zos par mos par byed do/ /zos pa pags pa dang / sha dang / khrag med cing chu rgyus tsam gyis 'brel ba la ni/rnam par dmar bar mos par byed do/ /yan lag dang nying lag phyogs phyogs su rnam par 'thor zhing ma 'brel la/ sha dang bcas pa'am/ sha med pa'am/ sha'i lhag rol cung zad yod pa dag la ni rnam par 'thor bar mos par byed do/ /lag pa'i rus pa dag kyang logs shig /rkang pa'i rus pa dag kyang logs shig /pus mo'i rus pa dag kyang logs shig /brla'i rus pa dag dang / dpung pa'i rus pa dag dang / lag ngar gyi rus pa dag kyang logs shig /sgal tshigs dang / 'gram slang dang / so rgyun dang / mgo thod dag kyang logs shig na 'dug pa mthong ba la ni/rus gong du mos par byed do/ /gang gi tshe khog pa'i rus pa 'brel zhing yan lag gi rus pa ma gyes par yid la byed la/ mtshan ma nyi tsher 'dzin cing / yan lag dang nying lag de dag la mngon rtags su 'dzin par mi byed pa de'i tshe na keng rus su mos par byed pa yin no//gang gi tshe mngon rtags su 'dzin par byed pa de'i tshe na ni/ rus pa'i keng rus su mos par byed pa yin no/ /gzhan yang keng rus ni rnam pa gnyis te/ lus kyi keng rus dang / yan lag gi keng rus so/ /de la lus kyi keng rus ni mjug do'i sbubs yan chad nas/ sgal tshigs kyi sbubs dang /mgo'i thod pa'i bar du 'brel pa yin no/ /yan lag gi keng rus ni lag ngar gyi rus pa dang 'brel ba'am/ brla dang rje ngar gyi rus pa dag 'brel pa yin no/ /de la lus kyi keng rus gang yin pa de ni keng rus zhes bya'o/ /yan lag gi keng rus gang yin pa de ni rus pa'i keng rus zhes bya'o//gzhan yang keng rus kyi mtshan mar bzung ba ni rnam pa gnyis te/ ri mor bris pa'am/ rdo ba'am/ shing ngam/ 'jim pa las byas pa dang / keng rus yang dag pa'o/ /de la gang gi tshe keng rus yang dag pa ma yin pa'i mtshan ma yid la byed pa de'i tshe na ni/ keng rus kho nar mos par byed pa yin te /rus pa'i keng rus su ni ma yin no/ /gang gi tshe keng rus yang dag pa'i mtshan ma yid la byed pa de'i tshe na ni/ rus pa'i keng rus su mos par byed pa yin no/ /phyi rol gyi kha dog lta bu rgyur byas pa'i gzugs su gtogs pa de dag gis rnam par 'gyur ba ni rnam pa gsum ste/ rang gi ngang gis rnam par 'gyur ba dang /gzhan gyis byas pa dang / de gnyi ga'i phyogs so/ /de la rnam par bsngos pa nas bzung ste/ rnam par bam pa'i bar dag ni rang gi ngang gis rnam par 'gyur ba yin no/ /de rnam par zos pa nas bzung ste/ rnam par 'thor ba'i bar dag ni gzhan gyis byas pas rnam par 'gyur ba yin no//de la rus gong dang / keng rus dang / rus pa'i keng rus dag ni de gnyi ga'i phyogs kyis rnam par 'gyur ba yin te/ de ltar phyi rol gyi mi sdug pa nyid rnam pa de lta bu'i sgo nas yang dag pa ji lta ba bzhin du rab tu shes par byed pa de ni phyi rol gyi mi sdug pa'i rang gi mtshan nyid yongs su tshol bar byed pa yin no//ji ltar mi sdug pa'i spyi'i mtshan nyid yongs su tshol bar byed ce na/ nang gi lus kyi phyi rol sdug cing / kha dog lta bu rnam par ma nyams pa gang yin pa dang / phyi'i lus kyi phyi rol mi sdug cing / kha dog lta bu rnam par gyur pa gang yin pa de ni/ nang gi sdug pa kha dog lta bu ma nyams pa 'di dang /chos nyid 'dra zhing chos nyid mtshungs pa yin te/ bdag gi sdug pa dang kha dog lta bu 'di yang 'di lta bu'i chos can yin la/ sems can gang su dag sdug pa dang / kha dog lta bu 'di lta bu dang ldan pa de dag ni sdug pa dang / kha dog lta bu de yang 'di lta ste/ phyi rol gyi 'di'i 'di lta bu'i chos can yin no zhes mos par byed do// de ltar spyi'i mtshan nyid yongs su tshol bar byed pa yin no / /ji ltar phyogs yongs su tshol bar byed ce na/ de 'di snyam du sems te/ bdag gis sdug pa dang / kha dog lta bu 'di'i mi sdug pa'i chos nyid de dag yang dag pa ji lta ba bzhin du rab tu ma shes pa nas /nang dang phyi rol gyi sdug pa dang kha dog lta bu la kun du 'dod chags skyed par byed pa gang yin pa de ni/ nag po'i phyogs su gtogs pa phyin ci log yin te/ chos de ni nyon mongs pa dang bcas pa/ sdug bsngal ba dang bcas pa/ rnam par smin pa dang bcas pa/ gnod pa dang bcas pa/yongs su gdung ba dang bcas pa yin pas gzhi de las phyi ma la skye ba dang / rga ba dang / na ba dang / 'chi ba dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams 'byung bar 'gyur ro/ /sdug pa dang kha dog lta bu 'di la mi sdug pa'i chos nyid dang ldan par yang dag pa ji lta ba bzhin du rjes su mthong ba gang yin pa de ni dkar po'i phyogs yin te /chos de ni nyon mongs pa med pa / sdug bsngal med pa/ rnam par smin pa med pa/ gnod pa med pa/ yongs su gdung ba med pa yin pas gzhi des phyi ma la 'khrug pa'i bar dag 'gag par 'gyur te/de lta bas na bdag gi nag po'i phyogs gang yin pa de ni dang du blang bar mi bya zhing / spangs par bya/ bstsal bar bya'i/ dkar po'i phyogs ni ma skyes pa yang bskyed par bya / skyes pa yang gnas pa dang / 'phel ba dang / rgyas par bya'o snyam du sems te/ de ltar phyogs yongs su tshol bar byed do/ /ji ltar dus yongs su tshol bar byed ce na/ de 'di snyam du sems te/ nang gi sdug pa dang / kha dog lta bu gang yin pa 'di yang da ltar byung ba'i dus la brten pa yin la/ phyi rol gyi mi sdug pa dang / kha dog lta bu ma yin pa gang yin pa 'di yang da ltar byung ba'i dus la brten pa yin te/'di yang 'das pa'i dus na sdu gur gyur cing / 'das pa'i dus na sdu gur gyur pa de yang / 'di lta ste/ dper na/ da ltar byung ba'i dus la brten pa'i bdag gi 'di dang 'dra ba yin pa las/ de ltar rim gyis da ltar byung ba'i dus la brten na mi sdug par gyur ba yin no//da ltar byung ba'i dus la brten na sdug pa'i bdag gi sdug pa dang / kha dog lta bu 'di yang ma 'ongs pa'i dus na 'di lta ste/ dper na da ltar byung ba'i dus la brten pa phyi rol gyi de bzhin du mi 'gyur ba de ni gnas med de/ de lta bas na bdag gi lus 'di yang 'das pa dang / ma 'ongs pa dang /da ltar byung ba'i dus rnams su 'di ltar 'byung zhing / 'di ltar gyur pa yin te/ 'di'i chos nyid las ma 'das pa yin no snyam du sems te/ de ltar dus yongs su tshol bar byed do/ /ji ltar rigs pa yongs su tshol bar byed ce na/ 'di snyam du sems te/ nang dang phyi rol gyi gang sdug pa'am/mi sdug par 'gyur ba'i bdag gam/ sems can 'ga' yang med kyi/ gang la sdug pa'am/ mi sdug pa zhes ming dang / brda dang / gdags pa dang / tha snyad du brjod pa de ni gzugs tsam du zad / de ni lus tsam du zad de/ 'di ltar/ tshe dang drod dang rnam par shes//de yis gang tshe lus bor te/ /spangs pa de tshe shing 'dra bar/ /sems pa med cing nyal bar 'gyur/ /zhes gsungs pa lta bu ste/ shi ba'i dus byas pa de la rim gyis rnam par gyur pa'i gnas skabs 'di lta ste/ rnam par bsngos pa dang / rus pa'i keng rus kyi bar dag kyang yod pa dang /bdag gi lus 'di ni sngon gyi las dang / nyon mongs pas 'phangs pa dang / pha ma'i mi gtsang ba'i mer mer po las byung ba dang / 'bras chan dang / zan dron gyis brtas pa yin te/ rgyu de dang gzhi des na sdug pa dang / kha dog lta bu yod pa 'di yang brnyan ma yin no/ / nang dang phyi rol gyi lus kyi nang na yang rtag pa rtag pa'i dus su mi gtsang ba kho na yin no snyam du sems te/ de ltar kun rdzob dang / don dam pa dang / gzhi'i sgo nas ltos pa'i rigs pa yongs su tshol bar byed do/ /de 'di snyam du sems te/ mi sdug pa 'di nyid kun du bsten cing goms par byas/lan mang du byas na / de 'dod pa'i 'dod chags spong bar 'gyur la/ 'dod pa'i 'dod chags kyang spang par bya ba yin no snyam du sems te/ de ltar bya ba byed pa'i rigs pa yongs su tshol bar byed do/ /de 'di snyam du sems te/ bcom ldan 'das kyis kyang mi sdug pa kun du bsten cing /goms par byas la / lan mang du byas na 'dod pa'i 'dod chags spong bar 'gyur ro zhes gsungs te/ de ni re zhig bdag gi yid ches pa'i lung yin na / /bdag ji lta ji ltar mi sdug pa goms shing yid la byed pa de lta de ltar 'dod chags kyi kun nas dkris pa ma skyes pa/mi skye zhing skyes pa dang 'bral bar 'gyur bar bdag la bdag nyid kyi ye shes dang / mthong ba dang 'jug pa yang yod do/ /rjes su dpag pa'i bya ba 'di lta bu yod de / de ltar mi mthun pa'i phyogs kyi chos yid la byed pa'i mi mthun pa'i phyogs kyi dmigs pa ste / nyon mongs pa ji ltar skye bar 'gyur snyam du sems te/de ltar 'thad bsgrub pa'i rigs pa yongs su tshol bar byed do/ de 'di snyam du sems te/ mi sdug pa sgom pa gang yin pa de ni 'dod chags spong ba'i gnyen por 'gyur ba de ni grags pa'i chos nyid dang / bsam gyis mi khyab pa'i chos nyid yin te/de ni bsam par mi bya/ rnam par brtag par mi bya'i mos par bya ba yin no snyam du sems te/ de ltar chos nyid kyi rigs pas mi sdug pa nyid yongs su tshol bar byed de / de ni re zhig mi sdug pa la rab tu brtson pa'i lhag mthong sgo gsum dang ldan pa dang / gzhi rab tu dbye ba rnam pa drug la dmigs pa yin no// //nyan thos kyi sa/ bam po bcu bzhi pa/ ji ltar na byams pa la dmigs pa'i lhag mthong la rab tu brtson pa gzhi rnam pa drug yongs su tshol bar byed ce na/ byams pa'i dbang du byas pa'i chos thos pa dang / bsams pa'i dbang du byas nas/sems can rnams la bde ba nye bar sgrub par mos pa'i mtshan nyid ni phan pa dang / bde ba'i lhag pa'i bsams pa dang ldan pa'i byams pa yin no zhes de ltar don so sor rig par byed pa de ni/ don yongs su tshol bar byed pa yin no/ /de ltar don so sor rig pa de yang 'di ni mdza' bshes kyi phyogs so//'di ni dgra bo'i phyogs so/ /'di ni tha mal pa'i phyogs so zhes rnam par 'byed par byed do/ / phyogs de dag thams cad kyang gzhan gyi rgyud du gtogs pa yin pa'i phyir phyi rol yin pas/ phyi rol gyi dngos po la mos par byed pa yin no/ /yang na mdza' bshes kyi phyogs ni nang yin no//dgra bo'i phyogs dang tha mal pa'i phyogs ni phyi rol yin te/ de ltar dngos po la byams pa yongs su tshol bar byed do/ /de yang phyogs gsum po sdug bsngal yang ma yin bde ba yang ma yin pa/ bde ba 'dod pa gang dag yin pa de dag bde bar gyur cig ces rnam par 'byed par byed de / de la phan 'dogs par byed pa'i mtshan nyid ni mdza' bshes so//gnod par byed pa'i mtshan nyid ni dgra'o / /de gnyis las bzlog pa'i mtshan nyid ni tha mal pa'i phyogs so/ /sdug bsngal yang ma yin/ bde ba yang ma yin pa'i phyogs bde ba 'dod pa gang dag yin pa de dag gi bde ba 'dog pa nyid kyang rnam pa gsum yod de/kha cig ni 'dod pa'i bde ba 'dod do/ /kha cig ni gzugs na spyod pa'i dga' ba dang bcas pa'i bde ba 'dod do/ /kha cig ni dga' ba med pa'i bde ba 'dod do/ /de la gang dag 'dod pa'i bde bas phongs pa de dag ni kha na ma tho ba med pa des bde bar gyur cig /dga' ba dang bcas pa'i bde ba dang / dga' ba med pa'i bde ba yang de bzhin du rig par bya ste / de ltar rang gi mtshan nyid kyi sgo nas byams pa yongs su tshol bar byed do/ /yang de mdza' bshes kyi phyogs gang yin pa dang / dgra bo'i phyogs gang yin pa dang / tha mal pa'i phyogs gang yin pa de la bdag gis sems mnyam pa dang /sems snyoms par bya'o zhes rab tu rnam par 'byed par byed do/ /de ci'i phyir zhe na/ bdag gi mdza' bshes kyi phyogs gang yin pa de la/ bde ba nye bar bsgrub pa yang dka' ba med la/ bdag gi tha mal pa'i phyogs gang yin pa de la yang dka' ba med kyi/dgra bo'i phyogs yin pa de la ni shin tu dka' yang / bdag gis de la bde ba nye bar bsgrub par bya dgos na/ mdza' bshes kyi phyogs dang tha mal pa'i phyogs la lta smos kyang ci dgos snyam du sems pa'i phyir ro/ /de ci'i phyir zhe na/ 'di la gshe bar byed pa dang / gshe bar bya ba dang / khro bar byed pa dang / khro bar bya ba dang / mtshang 'bru bar byed pa dang / mtshang 'bru bar bya ba dang / rdeg par byed pa dang / brdeg par bya ba 'ga' yang med de/ de dag ni yi ge de dag gis brjod par bya ba kho nar zad pas/ de dag ni sgra tsam dang / skad tsam du zad pa'i phyir dang /gzhan yang bdag gang la gnas pa'i lus 'di la/ 'di lta ste/ sgra'i reg pa dang / lag pa dang / bong ba dang / dbyug pa dang / mtshon cha'i reg pa'i reg pa de lta bu dag 'ong bar 'gyur ba'i lus 'di ni/ gzugs can rags pa 'byung ba chen po bzhi las gyur pa de lta bu yin te/bdag gi lus 'di yang mi rtag pa yin la reg pa de dag dang gnod pa byed pa gang dag yin pa de dag kyang mi rtag pa yin pa'i phyir dang / gzhan yang sems can thams cad ni skye ba dang / rga ba dang / na ba dang / 'chi ba'i chos can yin te de dag ni rang bzhin gyis sdug bsngal bar gyur pa yin pas/sems can de dag bdag nyid kyis bdag nyid la byed pa ltar ni/ dgra bo yang dgra bo la ni byed pas/ de'i phyir bdag gis rang bzhin gyis sdug bsngal bar gyur pa'i sems can rnams la yang sdug bsngal nye bar sgrub par byed cing / bde ba nye bar sgrub par mi byed pa ni bdag gi tshul dang mthun pa ma yin gyis /bcom ldan 'das kyis kyang / yun ring po 'das pa nas/ gang dag khyed kyi pha ma dang phu nu dang / bu sring dang / mkhan po dang / slob dpon dang / bla ma dang / bla ma lta bur ma gyur pa'i sems can de lta bu ni/ 'ga' yang yang dag par rjes su ma mthong ngo zhes gsungs pa'i phyir te/de'i phyir rnam grangs des kyang mdza' bshes kyi phyogs nyid kyang dgra bo'i phyogs yin la/ dgra bo'i phyogs nyid kyang mdza' bshes kyi phyogs yin pas/ 'di la mdza' bshes dang dgra bo'i dngos po 'ga' yang yongs su grub pa med de/ mdza' bshes kyang dus la lar dgra bor 'gyur la/ dgra bo yang mdza' bshes su 'gyur bas/ de'i phyir bdag gis sems can thams cad la sems mnyam pa nyid dang / lta ba mnyam pa nyid dang / phan pa'i bsam pa dang / bde ba'i bsam pa dang / bde ba nye bar sgrub pa dang / bde ba nye bar bsgrub par mos pa mnyam pa nyid du bya'o snyam du sems te/de ltar spyi'i mtshan nyid kyi byams pa yongs su tshol bar byed do/ /de yang rgyas par snga ma bzhin du gnod pa byed pa'i sems can rnams la/ bdag gi gnod sems gang yin pa'i chos de ni nyon mongs pa dang bcas pa yin no/ / rgyas par snga ma bzhin du de dag la da ltar bdag gi gnod sems med pa gang yin pa'i chos de ni nyon mongs pa med pa yin no zhes rab tu rnam par 'byed par byed de de ltar na byams pa'i nag po'i phyogs dang / dkar po'i phyogs yongs su tshol bar byed do/ /yang de gang dag 'das pa'i dus la brten te/bde ba 'dod pa'i sems can de dag ni 'das pa yin pas/ de dag la ni bde ba ci yang nye bar bsgrub tu mad kyis/ da ltar gyi sems can gang dag yin pa de dag /da ltar gyi dus nas bzung ste/ ma 'ongs pa'i dus kyi bar du rtag par bde bar gyur cig ces rab tu rnam par 'byed par byed de / de ltar byams pas dus yongs su 'tshol bar byed de/ yang de bde ba 'dod pa dang / bde ba nye bar sgrub par byed pa gang yin pa de la/ bdag gam sems can ni 'ga' yang med kyi/ gang la ming dang / brda dang / gdags pa dang / tha snyad du brjod pa de ni phung po tsam du zad/ de ni 'du byed tsam du zad de/'du byed de dag kyang las dang nyon mongs pa'i rgyu las byung ba yin no zhes rab tu rnam par 'byed par byed de/ de ltar ltos pa'i rigs pas byams pa yongs su tshol bar byed do/ /byams pa kun du brten cing goms par byas la / lan mang du byas na/ gnod sems spong bar 'gyur la/gnod sems kyang spang bar bya ba nyid yin no zhes/ de ltar bya ba byed pa'i rigs pas byams pa yongs su tshol bar byed do/ /yid ches pa'i lung yang de yin la bdag la bdag nyid kyi ye shes dang mthong ba 'jug pa yang yod de / rjes su dpag par bya ba de lta bu yang yod do zhes de ltar 'thad pa bsgrub pa'i rigs pas byams pa yongs su 'tshol bar byed do//byams pa bsgom pa gang yin pas gnod sems spong bar 'gyur ba de ni grags pa'i chos nyid dang / bsam gyis mi khyab pa'i chos nyid yin no zhes de ltar chos nyid kyi rigs pas byams pa yongs su tshol bar byed do//de la rkyen 'di pa nyid kyi rten cing 'brel par 'byung ba la dmigs pa'i lhag mthong la rab tu brtson pa ji ltar yongs su tshol bar byed ce na/ smras pa/ de'i dbang du byas pa'i chos thos pa dang / bsam pa'i dbang du byas nas chos de dang de dag skyes pas chos de dang de dag skye zhing /chos de dang de dag 'gags pas/ chos de dang de dag 'gag par zad kyi/ 'di la chos rnams kyi dbang phyug dang / byed pa po dang / 'byin pa po dang / sprul pa po yang med la/ chos rnams 'jug par byed pa'i rang bzhin dang / skyes bu gzhan 'ga' yang med do zhes de ltar don so sor rig par byed pa de ni don yongs su tshol bar byed pa yin no//yang de sred pa'i yan lag bcu gnyis po dag ni nang gi dang phyi rol gyi yin par mos shing / rab tu rnam par 'byed par byed de/ de ltar dngos po yongs su tshol bar byed do/ /yang de ma rig pa gang yin pa de ni sngon gyi mtha' mi shes pa'o zhes bya ba la sogs pa rgyas par rten cing 'brel bar 'byung ba rnam par dbye ba ji lta ba bzhin du rab tu rnam par 'byed par byed de/de ltar rang gi mtshan nyid yongs su tshol bar byed do/ /yang de ltar rten cing 'brel par 'byung ba'i 'du byed de dag thams cad ni ma byung ba las 'byung ba dang /byung nas kyang 'jig par 'gyur ba'i rim gyis mi rtag pa dang / skye ba dang / rga ba dang / na ba dang / 'chi ba'i chos can yin pa'i phyir sdug bsngal ba dang / rang dbang med pa dang / nang na skyes bu dmigs pa med pa'i phyir stong pa dang / bdag med pa yin no zhes rab tu rnam par 'byed par byed do//de ltar spyi'i mtshan nyid yongs su tshol bar byed do/ /yang de mi rtag pa dang / sdug bsngal ba dang / stong pa dang / bdag med pa'i 'du byed 'di dag yang dag pa ji lta ba bzhin du shes par bya ba la/ bdag kun du rmongs pa gang yin pa'i chos de ni nyon mongs pa dang bcas pa ste/nag po'i phyogs yin no/ /rmongs pa med pa gang yin pa de ni nyon mongs pa med pa ste/ dkar po'i phyogs yin no zhes rgyas par rab tu rnam par 'byed par byed de/ de ltar phyogs yongs su tshol bar byed do/ /yang de 'das pa'i dus la brten te//rtag pa dang / yang dag pa de bzhin du gnas pa gang yin pa'i lus thob pa 'gal yang med la/ da ltar gyi dus la brten te/ mi gnas pa dang / ma 'ongs pa'i dus su yang gnas par mi 'gyur bar rab tu rnam par 'byed par byed de/ de ltar dus yongs su tshol bar byed do//yang de las kyang yod/ rnam par smin pa yang yod la/ chos kyi brdar btags pa ma gtogs par byed pa po'am/ myong ba po gang yin pa'i byed pa po mi dmigs pa dang / ma rig pa'i rkyen gyis 'du byed rnams dang / skye ba'i rkyen gyis rga shi'i bar de dag la ming ni 'di zhes bya/ rigs ni 'di zhes bya/ rus ni 'di zhes bya/ zas ni 'di lta bu zhig za za/ bde ba dang sdug bsngal ni 'di lta bu zhig myong / tshe ni 'di ltar ring por gyur/ yun ni de srid cig tu gnas gnas/ tshe'i mtha' ni 'di lta bur gyur to zhes ming dang brdar tha snyad gdags pa tsam du zad do zhes bya ba dang /gzhan yang de la 'bras bu rnam pa gnyis dang / rgyu rnam pa gnyis yod de/ lus kyi 'bras bu dang / yul la longs spyod pa'i 'bras bu dang / 'phen pa'i rgyu dang / mngon par grub pa'i rgyu'o/ /de la lus kyi 'bras bu ni rnam par smin pa las skyes pa dang / da ltar gyi skye mched drug po gang yin pa'o//yul la longs spyod pa'i 'bras bu ni reg pa drug las byung ba 'dod pa dang / mi 'dod pa'i las kyi dbang gis tshor ba gang yin pa'o/ /de la 'phen pa'i rgyu ni 'bras bu rnam pa gnyis las/ kun du rmongs pa dang / kun du rmongs pa sngon du btang ba'i bsod nams dang bsod nams ma yin pa dang /mi g.yo ba'i 'du byed rnams dang 'du byed rnams kyis yang srid par rnam par shes pa'i myu gu 'byung bar 'gyur ba de'i sa bon yongs su zin pa dang / rnam par shes pa yang srid par 'byung ba'i ming dang gzugs kyi sa bon dang / skye mched drug gi sa bon dang /reg pa dang tshor ba'i sa bon yongs su zin pa ste/ de ltar phyi ma la skye ba'i ming can gyi rnam par shes pa dang / ming dang gzugs dang / skye mched drug dang / reg pa dang / tshor ba rnams skyed par byed pa'i phyir/ rim gyis dang po kho nar sa bon yongs su zin pa gang yin pa de ni 'phen pa'i rgyu yin no//mngon par 'grub pa'i rgyu ni ma rig pa'i 'dus te reg pa las byung ba'i tshor ba myong bar byed pa na/ de la dmigs pa'i sred pas yang 'byung ba'i sred pa'i srid par skyed par byed cing / sred pa'i phyogs dang / gti mug gi phyogs kyi nye bar len pa yang yongs su 'dzin par byed la/de'i stobs dang / de'i mthus las de'i rnam par smin pa skyed par nus pa gang yin pa ste/ de ni mngon par 'grub pa'i rgyu yin no/ /rgyu de gnyis kyi dbang du byas nas sdug bsngal gsum dang 'brel ba'i sdug bsngal gyi phung po 'ba' zhig po 'di 'byung bar 'gyur ro zhes rab tu rnam par 'byed par byed de /de ltar ltos pa'i rigs pa yongs su tshol bar byed do/ /rkyen 'di pa nyid kyis rten cing 'brel par 'byung ba kun du bsten cing goms par byas lan mang du byas na/ gti mug spong bar 'gyur ba dang / yid ches pa'i lung yang de yin la/ bdag nyid kyi so so rang gi rig pa dang /rjes su dpag pa'i bya ba yang de yin la/ grags pa'i chos nyid kyang de yin te/ de ltar bya ba byed pa'i rigs pa dang / 'thad pa sgrub pa'i rigs pa dang / chos nyid kyi rigs pas yongs su tshol bar byed do/ /de la khams rab tu dbye ba la dmigs pa lhag mthong la rab tu brtson pa/ji ltar don yongs su tshol bar byed ce na/ khams kyi don ni rigs kyi don dang / sa bon gyi don dang / rgyu'i don dang / rang bzhin gyi don to zhes don so sor rtog par byed de/ de ltar don yongs su tshol bar byed do/ /sa la sogs pa khams drug po dag /nang gi dang phyi rol gyi yin par mos par byed pa ni dngos po yongs su tshol bar byed pa yin no/ /sa'i mtshan nyid ni sra ba'o zhes bya ba nas/ rlung gi mtshan nyid ni yang zhing g.yo ba'o/ /rnam par shes pa'i mtshan nyid ni rnam par shes par byed pa'o/ /nam mkha'i khams ni sbubs can gyi mtshan nyid dang /gzugs kyi rnam pa gsal ba'i mtshan nyid do zhes bya ba'i bar du de ltar rang gi mtshan nyid yongs su tshol bar byed do/ /khams de dag thams cad ni mi rtag pa nyid dang / bdag med pa nyid kyi bar gyis mnyam zhing mtshungs pa yin no zhes de ltar spyi'i mtshan nyid yongs su tshol bar byed do//khams sna tshogs mi shes shing ril por 'du shes pa/ khams sna tshogs can gyi lus 'dis khengs shing rlom sems su byed pa gang yin pa'i chos de ni/ nyon mongs pa dang bcas pa ste/ nag po'i phyogs yin no/ /de las bzlog pa ni nyon mongs pa med pa ste/dkar po'i phyogs yin no zhes de ltar phyogs yongs su tshol bar byed do/ /'das pa dang / ma 'ongs pa dang / da ltar byung ba'i dus rnams su khams drug po dag la brten te/ ma'i lto bar mngal du 'jug par 'gyur ro zhes de ltar dus yongs su tshol bar byed do//'di lta ste/ dper na/ rtswa dang / shing gi rkyen la brten te/ nam mkha' kun nas dkris na/ khang pa khang pa zhes bya ba'i grangs su 'gro ba de bzhin du/ khams drug po dag la yang brten/ rus pa dang / chu rgyus dang / pags pa dang / sha dang / khrag gi rkyen la yang brten te/nam mkha' kun nas dkris pa sngon gyi las dang nyon mongs pa'i sa bon dang ldan pa'i gzhi de dag la/ lus lus zhes bya bar ming dang / brda dang / tha snyad du rjod par byed do zhes de ltar ltos pa'i rigs pa yongs su tshol bar byed do/ /khams rab tu dbye ba kun du bsten cing goms par byas/lan mang du byas na/ nga rgyal spong bar 'gyur te/ yid ches pa'i lung yang de yin/ bdag nyid kyis so so rang gi ye shes mthong ba dang / rjes su dpag pa'i bya ba yang de yin/ grags pa'i chos nyid dang / bsam gyis mi khyab pa'i chos nyid kyang de yin no zhes de ltar bya ba byed pa'i rigs pa dang /'thad pa sgrub pa'i rigs pa dang / chos nyid kyi rigs pa yongs su tshol bar byed do/ /de la dbugs rngub pa dang dbugs 'byung ba dran pa'i dmigs pa rnam par dbye ba la rab tu brtson pa/ ji ltar don yongs su tshol bar byed ce na/ dbugs rngub pa dang / dbugs 'byung ba ni dmigs pa la sems nye bar gtad pas/ brjed pa med cing mngon par brjod pa ni dbugs rngub pa dang / dbugs 'byung ba dran pa yin no zhes de ltar don yongs su tshol bar byed do/ /dbugs rngub pa dang / dbugs 'byung ba dag ni lus dang 'brel pa'i phyi nang gi yin pa dang /phyi rol gyi skye mched kyis zin pa yang yin par dmigs par byed de/ de ltar na dngos po yongs su tshol bar byed do/ /dbugs rngub pa ni gnyis so/ /dbugs dbyung ba yang gnyis so/ /rlung nang du 'jug pa gang yin pa de ni dbugs rngub pa'o/ /phyir 'thon pa gang yin pa de ni dbugs 'byung ba'o//'di dag ni dbugs ring du rngub pa dang 'byung ba'o/ /'di dag ni thung ba'o/ /'di ni lus thams cad so sor myong ba'o/ /'di ni ma yin no zhes de ltar rang gi mtshan nyid yongs su tshol bar byed do/ /dbugs rngub pa 'gags na dbugs 'byung ba 'byung ngo //dbugs 'byung ba 'gags na dbugs rngub pa 'byung ngo / /dbugs rngub pa dang 'byung ba'i 'jug pa ni srog gi dbang po dang / rnam par shes pa dang bcas pa'i lus 'di dang 'brel ba yin te/ dbugs rngub pa dang / dbugs 'byung ba rten dang bcas pa ni mi rtag pa yin no zhes de ltar spyi'i mtshan nyid yongs su tshol bar byed do//de ltar dbugs rngub pa dang / dbugs 'byung ba dag la dran pa nye bar ma bzhag pa'i rnam par rtog pas byas pa'i sems kun du g.yeng ba'i chos gang yin pa de ni nyon mongs pa dang bcas pa ste/ nag po'i phyogs yin no //de las bzlog pa ni nyon mongs pa med pa ste/ dkar po'i phyogs yin no zhes rgya cher de ltar phyogs yongs su tshol bar byed do/ /dbugs rngub pa dang / dbugs 'byung ba dag ni 'das pa dang ma 'ongs pa dang / da ltar byung ba'i dus rnams su lus dang sems la rag las pa yin la/lus dang sems kyang dbugs rngub pa dang / dbugs 'byung ba dag la rag las pa yin no zhes de ltar dus yongs su tshol bar byed do/ /'di la dbugs rngub par byed pa dang / dbugs 'byung bar byed pa'am/ gang gi dbugs rngub pa dang / dbugs 'byung ba de dag ni 'ga' yang med mod kyi/'on kyang rgyu las byung ba'i 'du byed dang rten cing 'brel par 'byung ba 'di dag la/ ming dang brda dang / tha snyad du brjod par zad do zhes de ltar ltos pa'i rigs pa yongs su tshol bar byed do/ /dbugs rngub pa dang / dbugs 'byung ba dran pa kun du brten cing goms par byas/lan mang du byas na rnam par rtog pa rgyun chad par 'gyur te/ yid ches pa'i lung yang de yin/ bdag nyid kyi so so rang gi ye shes dang / mthong ba dang / rjes su dpag pa'i bya ba dang / grags pa'i chos nyid kyang de yin / bsam gyis mi khyab pa'i chos nyid kyang de yin no zhes de ltar bya ba byed pa'i rigs pa dang /'thad pa sgrub pa'i rigs pa dang / chos nyid kyi rigs pa yongs su tshol bar byed do/ /de ltar dpyad pa rnam par sbyong ba'i dmigs pas gzhi drug yongs su btsal nas/ sems yang dang yang du nang du zhi bar byed cing lhag mthong gi rnam pa dag gis ji ltar btsal ba de dag nyid la yang dang yang du so sor rtog par yang byed de/de'i zhi gnas la brten nas lhag mthong rnam par dag par byed cing / lhag mthong la brten nas kyang zhi gnas 'phel zhing rgyas par 'gyur ro/ /mkhas pa'i dmigs pa dang / nyon mongs pa rnam par sbyong ba'i dmigs pa dag la lhag mthong gis dngos po drug yongs su tshol bar byed pa gang yin pa de dag ni phyis rang gi gnas skabs su brjod par bya'o//de la rnal 'byor pas dkar po'i phyogs kyis bsdus pa'i sbyor ba rnam pa dgu dang / de las bzlog pa ni nag po'i phyogs kyis bsdus pa rnam pa dgu yod par rig par bya ste/'de lta ste mthun pa'i sbyor ba dang / goms pa'i sbyor ba dang / phyin ci ma log pa'i sbyor ba dang / mi lhod pa'i sbyor ba dang / dus kyi sbyor ba dang / nye bar rtog pa'i sbyor ba dang / chog mi shes pa'i sbyor ba dang / mi 'gal ba'i sbyor ba dang /yang dag pa'i sbyor ba'o/ /dkar po'i phyogs kyis bsdus pa rnam pa dgu po 'di dag gis ni myur ba myur bar sems ting nge 'dzin du 'jog par byed cing / ting nge 'dzin gyi khyad par du yang 'gro bar 'gyur la/ des bgrod par bya zhing / thob par bya ba'i sa ji snyed yod pa de dag tu yang thags thogs med par myur ba myur ba kho nar phyin cing thob par 'gyur ro//nag po'i phyogs kyi sbyor ba rnams kyis ni/ myur ba myur bar sems ting nge 'dzin du 'jog par byed cing / ting nge 'dzin gyi khyad par du yang 'gro bar mi 'gyur la/ des bgrod par bya zhing thob par bya ba'i sa ji snyed yod pa de dag tu yang thags thogs med par myur ba myur ba kho nar phyin cing thob par mi 'gyur ro//de la mthun pa'i sbyor ba gang zhe na/ gal te 'dod chags spyad pa zhig yin na ni mi sdug pa la sems nye bar gtod par byed do/ /zhe sdang spyad pa zhig yin na ni byams pa la'o/ /rnam par rtog pa'i bar du spyad pa zhig yin na ni/dbugs rngub pa dang / dbugs 'byung ba dran pa'i bar la'o/ /cha mnyam par spyad pa dang / nyon mongs pa chung ba'i rang bzhin can zhig yin na ni/ dmigs pa gang la dga' ba skye bar 'gyur ba des rab tu brtson par byed pa ste/ de ni mthun pa'i sbyor ba yin no//de la goms pa'i sbyor ba gang zhe na/ des zhi gnas dang lhag mthong la tha na cung zad tsam yang goms par byas shing thams cad kyi thams cad du las dang po pa nyid ma yin pa ste/ /'di ltar las dang po pa ni mthun pa'i dmigs pas rab tu brtson par byed kyang /sgrib pa rnams dang lus dang sems kyi gnas ngan len dag yang dang yang du kun du 'byung zhing des de'i sems myur bar ting nge 'dzin du 'jog par mi 'gyur ba'i phyir te/ de ni goms pa'i sbyor ba yin no/ /de la mi lhod pa'i sbyor ba gang zhe na/ rtag tu sbyor bar byed pa dang / gus par byas shing sbyor bar byed pa yin te/ gal te bsod snyoms kyi phyir ram/ bla ma la rje sa dang bsnyen bkur bya ba'i phyir ram/ nad pa'i nad g.yog bya ba'i phyir ram/ phyag bya ba'i las kyi phyir ram/ de lta bu dang mthun pa'i 'phral gyi bya ba gang yang rung pa'i phyir ram ting nge 'dzin las langs na yang /rnam par g.yeng ba med cing / de la gzhol ba dang / de la 'bab pa dang / de la bab pa'i sems kyis thams cad byed cing / myur ba myur ba kho nar byas shing mjug brtul nas kyang yang phyir 'dug ste nang du yang dag par 'jog pa la rab tu brtson par byed pa dang /gal te dge slong dang / dge slong ma dang / dge bsnyen dang / dge bsnyen ma dang / rgyal rigs dang / bram ze'i 'khor dag lhan cig lhags na yang / 'du 'dzis dus yun ring du 'da' bar mi byed par drod ran par smra bar byed cing / gtam mang po'i gleng slong bar mi byed par dben pa 'ba' zhig tu byed pa dang /'di ltar brtson 'grus brtsams pa yang yin te/ bdag gis thob par bya ba ni deng kho nas thob par bya'o/ /de ci'i phyir zhe na/ bdag la 'chi bar 'gyur ba'i rkyen mang ste/ bdag la rlung ngam/ mkhris pa'am/ bad kan 'khrug par 'gyur ba'am/zas zos pa mi 'phrod cing / des bdag gi lus gsud par 'gyur ba'am/ bdag sbrul lam/ sdig pa'am/ srin gyi med kyis zin par 'gyur ba'am/ bdag la mi dang mi ma yin pa'i 'jigs pa dag 'byung bar 'gyur ba'i phyir ro zhes gnas de dag rtag tu yid la byed cing / bag yod par gnas pa dang /yang 'di ltar bag yod par yang gnas par byed de/ e ma kye ma'o/ bdag zhag bdun nam/ drug gam/ lnga'am/ bzhi'am/ gsum mam/ gnyis sam/ gcig gam/ mel tshe thun gcig gam/ thun phyed dam/ yud tsam gcig gam/ yud tsam phyed tsam zhig gson na yang tsam rung /e ma kye ma'o/ /bdag zan gcig bza' ba'i bar tsam mam/ dbugs rngubs nas dbugs 'byung ba'i bar tsam mam/ dbugs phyung nas dbugs rngub pa'i bar tsam zhig gson na yang ci ma rung ste/ ji srid gson pa de srid du rnal 'byor yid la byed pa ston pa'i bstan pa la rnal 'byor du byed par 'gyur bas/de tsam gyis na bdag gis 'di lta ste/ ston pa'i bstan pa la bya ba mang du byas par 'gyur ro zhes bag yod par gnas par byed pa ste/ de ni mi lhod pa'i sbyor ba yin no/ /de la phyin ci ma log pa'i sbyor ba gang zhe na/ rnal 'byor pa rnal 'byor shes pas ji skad gtams shing rjes su bstan pa de kho na bzhin du rab tu brtson par byed cing /don dang tshig 'bru phyin ci ma log par 'dzin par byed pa dang / bdag nyid nga rgyal med cing / rang gi lta ba mchog tu 'dzin pa la gnas pa ma yin pa dang / bab col du 'dzin pa ma yin pa dang /bla ma'i lung la khyad du gsod pa med par 'gyur ba yin te/ de ni phyin ci ma log pa'i sbyor ba yin no/ /de la dus kyi sbyor ba gang zhe na/ dus dus su zhi gnas kyi mtshan ma dang / lhag mthong gi mtshan ma dang / rab tu 'dzin pa'i mtshan ma dang / btang snyoms kyi mtshan ma sgom par byed cing /zhi gnas dang / zhi gnas kyi mtshan ma dang / zhi gnas kyi dus dang / lhag mthong dang / lhag mthong gi mtshan ma dang / lhag mthong gi dus dang / rab tu 'dzin pa dang / rab tu 'dzin pa'i mtshan ma dang / rab tu 'dzin pa'i dus dang / btang snyoms dang / btang snyoms kyi mtshan ma dang /btang snyoms kyi dus kyang shes pa'o/ /de la zhi gnas gang zhe na/ sems gnas pa rnam pa dgu ste/ de la sems de mtshan ma med cing rnam par rtog pa med pa dang / zhi ba dang / rab tu zhi ba dang / zhi ba la gnas shing nges par ma 'dres par gyur pa yin pas na/ de'i phyir zhi gnas zhes bya'o//de la zhi gnas kyi mtshan ma gang zhe na/ rnam pa gnyis te/ dmigs pa'i mtshan ma dang / gzhi'i mtshan ma'o/ /de la dmigs pa'i mtshan ma ni/ zhi gnas kyi phyogs kyi shes bya'i dngos po dang cha mthun pa dang / gzugs brnyan la dmigs pa'i mtshan ma ste/ dmigs pa des sems de zhi bar byed do//de la gzhi'i mtshan ma ni zhi gnas kyi sems yongs su bsgoms nas de'i 'og tu zhi gnas yongs su dag par bya ba'i phyir sems kyi lhag mthong la sbyor ba gang yin pa ste/ de ni gzhi'i mtshan ma yin no/ /de la zhi gnas kyi dus gang zhe na/smras pa/ sems rgod par gyur pa'am/ rgod par dogs pa'i tshe ste/ bsgom pa'i phyir zhi gnas kyi dus yin no/ /de bzhin du lhag mthong gi sems yongs su bsgom pa na rnam par rtog pas nyams pa'am/ 'phral gyi bya ba'i rnam par g.yeng bas nyams pa'i tshe yang yin te/ bsgom pa'i 'phyir zhi gnas kyi dus yin no//de la lhag mthong gang zhe na/ lhag mthong ni rnam pa bzhi dang / sgo gsum dang / gzhi rab tu dbye ba rnam pa drug la dmigs shing rnam par dpyod par byed pa yin no/ /de la lhag mthong gi mtshan ma gang zhe na/ rnam pa gnyis te/ dmigs pa'i mtshan ma dang / gzhi'i mtshan ma'o/ /de la dmigs pa'i mtshan ma ni lhag mthong gi phyogs kyi shes bya'i dngos po dang cha mthun pa dang /gzugs brnyan la dmigs pa'i mtshan ma ste/ dmigs pa des shes rab rnam par dpyod par byed do/ /de la gzhi'i mtshan ma ni lhag mthong gi sems yongs su bsgoms nas/ de'i 'og tu lhag mthong yongs su dag par bya ba'i phyir/sems kyi zhi gnas la sbyor ba gang yin pa ste/ de ni gzhi'i mtshan ma yin no/ /de la lhag mthong gi dus gang zhe na/ zhi gnas kyi sems yongs su bsgom pa'i tshe'am/ dang po kho na'i tshe ste/ shes bya'i dngos po yang dag pa ji lta ba bzhin du rtogs par bya ba'i phyir lhag mthong bsgom pa'i dus yin no//de la rab tu 'dzin pa gang zhe na/ dang bar 'gyur ba'i dmigs pa gang yang rung ba bzung bas/ sems yang dag par gzengs stod par byed pa dang / yang dag par dga' bar byed pa dang / yang dag par ston par byed pa dang / yang dag par 'dzin du 'jug pa gang yin pa'o/ / de la rab tu 'dzin pa'i mtshan ma gang zhe na/ dang bar 'gyur ba'i dmigs pa gang gis sems rab tu 'dzin par byed pa dang / de dang rjes su mthun par brtson 'grus rtsom pa gang yin pa'o/ /de la rab tu 'dzin pa'i dus gang zhe na/ sems bying bar 'gyur ba'i tshe'am/ bying du dogs pa'i tshe ste/bsgom pa'i phyir rab tu 'dzin pa'i dus yin no/ /de la btang snyoms gang zhe na/ zhi gnas dang / lhag mthong gi phyogs kyi dmigs pa la sems kun nas nyon mongs pa med pa'i sems mnyam pa nyid dang / rnal du bab pa dang / rang gi ngang gis 'jug pa dang / sems nyams bde ba dang /sems las su rung ba'i rjes su rtsol ba med pa'i bya bas gtod pa gang yin pa'o/ /de la btang snyoms kyi mtshan ma gang zhe na/ dmigs pa gang gis sems btang snyoms su byed pa dang / dmigs pa de nyid la brtson 'grus ha cang lhag par brtson par mi byed pa gang yin pa'o//de la btang snyoms kyi dus gang zhe na/ zhi gnas dang lhag mthong gi phyogs la sems bying ba dang / rgod ba med pa'i tshe ste/ bsgom pa'i phyir btang snyoms kyi dus yin te de ni dus kyi sbyor ba yin no/ /de la nye bar brtag pa'i sbyor ba gang zhe na/ mtshan ma de dag nyid legs par bzung zhing legs par brtags pa yin te/de la legs par bzung zhing legs par brtag pa'i phyir gang gi tshe 'dod pa de'i tshe snyoms par 'jug pa dang / ji snyed 'dod pa de snyed la snyoms par zhugs shing gnas pa dang / gang gi tshe ldang bar 'dod pa de'i tshe/ ting nge 'dzin gyi spyod yul gyi gzugs brnyan spangs te/mnyam par ma bzhag pa'i sa pa'i rang bzhin gyi dmigs pa yid la byed pas ldang bar byed pa ste/ de ni nye bar brtag pa'i sbyor ba yin no/ /de la chog mi shes pa'i sbyor ba gang zhe na/ dge ba'i chos rnams kyis chog mi shes shing spong ba las kyang phyir mi ldog la/ gong nas gong du gya nom pa las kyang ches gya nom pa'i gnas dag mngon par 'dod pa'i tshul gyis lan mang du gnas pa dang /gong du bya ba yod na cung zad tsam dang / ngan ngon tsam dang / zhi gnas tsam gyis bar ma dor sgyid lug par mi byed pa ste/ de ni chog mi shes pa'i sbyor ba yin no/ /de la mi 'gal ba'i sbyor ba gang zhe na/bslab pa'i gzhi yang dag par blangs pa nyams par mi byed cing 'dral bar mi byed pa dang / bud med gzhon nu ma kha dog bzang ba chags par 'gyur bar mthong na yang mtshan mar mi 'dzin cing mngon rtags su mi 'dzin pa dang / zas la ran par byed pa dang / mi nyal ba'i rjes su brtson pa dang /don nyung ba dang / bya ba nyung ba dang / g.yeng ba nyung ba dang / yun ring po nas byas pa dang / yun ring po nas smras pa rjes su dran zhing dran par byed pa dang / de lta bu dang mthun pa'i chos rnams ni mi 'gal ba'i sbyor ba zhes bya ste/ chos de dag ni sems rtse gcig pa nyid dang /rjes su mthun zhing mi 'gal la/ sems rnam par g.yeng ba'i phyir 'jug par yang mi 'gyur/ phyi rol du rnam par g.yeng ba'i phyir yang ma yin/ nang gi sems las su mi rung zhing dran pa'i phyir yang 'jug par mi 'gyur ba yin te/ de ni mi 'gal ba'i sbyor ba zhes bya'o//de la yang dag pa'i sbyor ba gang zhe na/ mos par byas shing mos par byas nas/ dmigs pa rnam par bsgom pa ni yang dag pa'i sbyor ba zhes bya ste/ gal te mi sdug pa la rab tu brtson par byed na/ yang mtshan ma tsam du rjes su 'brang ba'i lhag mthong gis mi sdug pa'i rnam pa dag gis/mi sdug pa yid la byed de des dmigs pa yid la byed pa de myur ba myur bar rnam par bsgom par bya zhing / myur ba myur bar mngon sum du bya'o/ /rnam par bsgom pa yang rnam pa lnga ste/ sems nang du mngon par sdud par byed pa dang / dran pa med cing yid la byed pa med pa dang / de las gzhan pa yid la byed pa dang / gnyen po yid la byed pa dang / mtshan ma med pa'i dbyings yid la byed pa'o/ /de la lhag mthong sngon du btang ba'i sems gnas pa rnam pa dgus ni/ sems nang du mngon par sdud par byed do/ / mtshan ma thams cad la mi phyogs shing rnam par g.yeng ba med par bya ba'i phyir dang po nas nye bar gtod pas ni/ dran pa med cing yid la byed pa med par rig par byed do/ /mnyam par gzhag pa'i sa pa'i dmigs pa las mnyam par gzhag pa'i sa'i chos nyid kyi dmigs pa gzhan dag yid la byed pa ni/de las gzhan pas yid la byed pa yin no/ /sdug pa'i gnyen po mi sdug pa nas rnam par rtog pa'i gnyen po dbugs rngub pa dang / dbugs 'byung ba dran pa dang / gzugs kyi gnyen po nam mkha'i khams kyi bar dag yid la byed pa ni/ gnyen po yid la byed pa yin no//mtshan ma thams cad yid la mi byed pa dang / mtshan ma med pa'i dbyings yid la byed pa ni/ mtshan ma med pa'i dbyings yid la byed pa yin no/ /dmigs pa rnam par bsgom pa de dag ni khyab pa'i dmigs pa'i mtshan nyid du rnam par gzhag pa yin mod kyi/ don gyi skabs 'dir ni sems nang du mngon par sdud par byed pa dang /dran pa med cing yid la byed pa med pa yin par dgongs so/ /de la las dang po pa las thog ma pas ni dang po kho nar mi sdug pa'am/ de las gzhan pa'i dmigs pa gang la yang sems nye bar gtad par mi bya bar rnam par g.yeng ba med par bya ba'i phyir/ji bdag gi sems mtshan ma med pa dang / rnam par rtog pa med pa dang / zhi ba dang / rab tu zhi ba dang / 'gul ba med pa dang / g.yo ba med pa dang / 'bad pa med pa dang / rtsol ba med par nang du mngon par dga' ba yin nam zhes rab tu brtson par bya ste/de ltar rab tu brtson par byed pa na / phyi rol gyi mtshan ma byung ngo cog thams cad la dran pa med pa dang / yid la byed pa med par byed de/ de ni de'i dran pa med pa dang / yid la byed pa med pas dmigs pa rnam par sgom par byed pa yin no/ /de de la rnal 'byor du byed pa na/ dga' ba skyed par byed cing / mi sdug pa la sogs pa'i dmigs pa mtshan ma dang bcas shing rnam par rtog pa dang bcas pa dag la spyod par byed do/ /ji ltar spyod par byed ce na/ mtshan ma'i rjes su 'jug pa dang / yongs su tshol ba'i rjes su 'jug pa dang / so sor rtog pa'i rjes su 'jug pa'i lhag mthong gis spyod par byed de /lhag mthong la gcig tu brtson pa ni ma yin te/ yang lhag mthong gi mtshan ma las phyir bzlog nas/ zhi gnas kyi rnam pas dmigs pa de nyid yid la byed do/ /des de'i tshe na dmigs pa de ma btang ma bzung ba yin te/ gang gi phyir dmigs pa de la zhi gnas su 'jug par byed pa de'i phyir ni ma btang ba yin no//gang gi phyir mtshan mar mi byed cing / rnam par rtog par mi byed pa de'i phyir ni ma bzung ba yin te/ de ltar na sems nang du mngon par sdud pa'i sgo nas dmigs pa rnam par sgom par byed pa yin no/ /de la lhag mthong gi mtshan ma ma bzung ba dang ldan pa'i dmigs pa ni rnam par g.yeng ba med pa yin no//zhi gnas kyi mtshan ma bzung ba dang ldan pa'i dmigs pa ni shes bya'i dngos po'i mtshan ma yin no/ /gal te de gcig tu dmigs pa la mos par byed la/ yang dang yang du rnam par sgom par mi byed na/ de'i mos pa ni 'di lta ste shes bya'i dngos po mngon sum du rtogs par bya ba'i phyir gong nas gong du yongs su dag pa dang yongs su byang bar mi 'gyur ro//gang gi phyir mos par yang byed la/ yang dang yang du rnam par sgom par byed na ni/ de'i phyir de'i mos pa 'di lta ste/ shes bya'i dngos po mngon sum du rtogs par bya ba'i phyir gong nas gong du ches yongs su dag pa dang /ches yongs su byang bar 'gyur ro/ /'di lta ste/ dper na ri mo mkhan gyi slob ma zhig dang po kho nar ri mo'i las la brtson par gyur na/ de slob dpon las bslab pa sngar byas shing dpe blangs pa las bltas shing bltas shing ri mo 'dri bar byed do//bris shing bris shing rnam par dpyod par byed/ phyir 'byed par byed cing yang 'dri bar byed do/ /de ji lta ji ltar phyis shing phyis shing 'dri bar byed pa de lta de ltar gong nas gong du ri mo ches yongs su dag pa dang / ches yongs su byang bar snang ste/ de ltar legs par brtson par byed pa ni dus gzhan na ni/slob dpon dang 'dra ba'am/ de bas kyang khyad par du 'phags par 'gyur ro/ /gal te ri mo de ma phyis par de nyid kyi steng du yang dang yang du 'dri bar byed na ni de'i ri mo de nam du yang yongs su byang bar mi 'gyur ba de bzhin du/ 'di la yang tshul bzhin de dang 'dra bar rig par bya'o//de la dmigs pa ji tsam la mos par byed pa de tsam rnam par sgom par byed kyi ji tsam rnam par sgom par byed pa de tsam la mos par byed pa ni ma yin te/ chung ngu la mos par byed pa na yang chung ngu nyid rnam par sgom par byed la chen por gyur pa dang tshad med pa la yang de bzhin no//rnam par bsgoms nas kyang lan 'ga' ni chung ngu nyid la mos par byed do/ /lan 'ga' ni chen por gyur pa dang / tshad med pa la mos par byed de/ chen por gyur pa dang tshad med pa la yang de bzhin du rig par bya'o/ /de la gzugs can gyi chos rnams kyi mtshan ma dang / gzugs brnyan dang / snang brnyan gang yin pa de ni rags pa ste/ sprul pa lta bu yin no/ /gzugs can ma yin pa'i chos rnams kyi ni ji ltar nyams su myong ba dang / snang ba'i dbang du byas pa'i ming dang brda sngon du btang ba tsam du zad de de ni yang dag pa'i sbyor ba zhes bya'o/ /dkar po'i phyogs kyi sbyor ba rnam pa dgu po de dag ni zhi gnas dang /lhag mthong dang / rjes su mthun pa yin par rig par bya'o/ /de las bzlog pa rnam pa dgu po ni mi mthun pa yin no/ /de dag ni nag po dang dkar po'i phyogs rnam par gzhag pa'i sbyor ba rnam pa bco brgyad yin te/ de ni sems rtse gcig pa nyid ces bya'o//de la sgrib pa rnam par sbyong ba gang zhe na/ smras pa/ de ltar yang dag par rab tu brtson par byed pa'i rnal 'byor pa ni/ rgyu rnam pa bzhi po ngo bo nyid yongs su shes pa dang / gzhi yongs su shes pa dang / nyes dmigs yongs su shes pa dang / gnyen po bsgom pa dag gis sgrib pa dag las sems rnam par sbyong bar byed do//de la sgrib pa'i ngo bo nyid gang zhe na/ smras pa/ sgrib pa'i ngo bo nyid ni rnam pa bzhi ste/ yongs su gdung ba dang / sgrib pa dang / rnam par rtog pa dang / bdag nyid rab tu 'dzin pa'o/ /de la yongs su gdung ba ni nges par 'byung ba dang /rab tu dben pa la brtson pa'i nyon mongs pa can gyi 'dod pa dang / mi dga' ba dang / spro ba dang / yid mi bde ba dang / 'khrug pa gang yin pa'o/ /de la sgrib pa ni 'dod pa la 'dun pa la sogs pa'i sgrib pa lnga po dag go/ /de la rnam par rtog pa ni 'dod pa'i rnam par rtog pa la sogs pa'i nyon mongs pa can gyi rnam par rtog pa rnams so//de la bdag nyid rab tu 'dzin pa ni/ ye shes dang / mthong ba dang / reg par gnas pa cung zad tsam dang / ngan ngon tsam gyis bdag ni thob pa yin gyi gzhan dag ni de lta ma yin no zhes rgyas par snga ma bzhin du nga rgyal byed pa yin par rig par bya ste/de ni sgrib pa'i ngo bo nyid yin no/ de la yongs su gdung ba'i gzhi ni rnam pa drug ste/ 'di lta ste/ sngon gyi las kyi dbang dang / nad kyis yongs su nyon mongs pas lus nyam chung ba dang / ha cang brtson pa dang / ngan pas brtson pa dang / dang po brtson pa dang / nyon mongs pa mang ba dang / dben pa la ma goms pa'o/ /sgrib pa dang rnam par rtog pa dang / bdag nyid rab tu 'dzin pa'i gzhi ni sgrib pa dang mthun pa dang / rnam par rtog pa dang mthun pa dang / bdag nyid rab tu 'dzin pa dang mthun pa'i chos rnams la tshul bzhin ma yin pa yid la byed cing lan mang du byed pa ste/ de ni sgrib pa dang rnam par rtog pa dang / bdag nyid rab tu 'dzin pa'i gzhi yin no/ /'dir tshul bzhin ma yin pa zhes bya ba ni mi sdug pa yid la ma byas pas sdug pa yid la byed pa gang yin pa'o// de bzhin du byams pa yid la ma byas pas khong khro ba'i mtshan ma dang / snang ba'i 'du shes yid la ma byas pas mun ma'i mtshan ma dang / zhi gnas yid la ma byas pas nye du'i rnam par rtog pa dang ljongs kyi rnam par rtog pa dang / sngon rtses pa dang bgad pa dang /dga' bar byas pa dang / dga' mgur spyad pa dag yid la byed pa dang / rkyen 'di pa nyid kyis rten cing 'brel bar 'byung ba'i dbang du byas nas dus gsum gyi 'du byed rnams la nga'o zhe'am bdag go zhes rigs pa ma yin pas bskyed pa'i 'du shes yid la byed pa de ni 'dir tshul bzhin ma yin pa zhes bya'o//de la nyes dmigs gang zhe na/ sgrib pa rnam pa bzhi bo de dag nyid yod cing med pa ma yin na/ ma rtogs pa mi rtogs pa dang / rtogs pa las nyams pa dang / rnal 'byor gyi sbyor ba nyams pa dang / kun nas nyon mongs pa can du gnas pa dang /sdug bsngal bar gnas pa dang / de bdag nyid kyis smad pa dang / gzhan gyis smad pa dang / lus zhig ste shi ba'i 'og tu ngan song rnams su skye bar 'gyur te/ de ni nyes dmigs yin no// //nyan thos kyi sa bam po bco lnga pa/ de la gnyen po bsgom pa gang zhe na/de la yongs su gdung ba'i gnyen po ni rjes su dran pa dag ste/ rjes su dran pa yid la byed pas de'i sems yang dag par rab tu dga' bar byas nas / yongs su gdung ba skyes pa ni sel bar byed la/ ma skyes pa ni mi skye bar byed pa'i phyir ro/ /de la lus nyam chung ba gang yin pa dang /ha cang brtson pa gang yin pa dang / dang po brtson pa gang yin pa'i gnyen po ni de la brtson 'grus ran par brtson pa yin no/ /ngan pas brtson pa gang yin pa'i gnyen po ni de la gus par yongs su 'dri ba yin no/ /nyon mongs pa mang ba gang yin pa de'i gnyen po ni mi sdug pa la sogs pa'i dmigs pa dag la ji rigs par rab tu sbyor ba yin no//dben pa la ma goms pa gang yin pa de'i gnyen po ni 'di ltar so sor rtog par byed pa yin te/ bdag gis sngon yang goms par ma byas pas des na/ da ltar bdag dben pa la rab tu brtson pa na/ yongs su gdung ba skye bar 'gyur te/ gal te da ltar dben pa la goms par ma byas na de phyi ma la yang yang srid pa 'di lta bu 'byung bar 'gyur bas/ bdag gis so sor brtags nas mi dga' ba spang bar bya zhing dga' bar bya'o zhes rnam pa de ltar so sor rtog pa yin no/ /sgrib pa lhag ma rnams kyi gnyen po ni/tshul bzhin ma yin pa yid la byed pa las bzlog pa/ tshul bzhin yid la byed pa sgom pa yin par rig par bya'o/ /de la ngo bo nyid yongs su shes nas sgrib pa dang / kun nas nyon mongs pa dang / nag po'i phyogs kyi sgo nas/ 'di ni yongs su spang bar bya ba yin no zhes gzhi yongs su spangs nas/de yang yongs su spong bar 'gyur ro zhes gzhi yongs su tshol bar byed do/ /yongs su ma spangs na/ yongs su spang bar bya ba de la nyes pa ci yod ces de'i phyir nyes dmigs yongs su tshol bar byed do/ /yongs su spangs pa de la phyis ji ltar mi skye bar 'gyur zhes de'i phyir gnyen po sgom par byed de/de ltar na nges sgrib pa dag las sems rnam par sbyang ba yin no/ /de la de ji tsam du lhag mthong dang rjes su mthun pa'i bshad pa mang po de tsam du ni lhag mthong mang ba yin no/ de ji tsam du lhag mthong mang ba de tsam du ni zhi gnas kyang mang ba yin no/ /lhag mthong de yang shes bya mtha' yas pa'i phyir mtha' yas par rig par bya ste/'di lta ste/ sgo gsum dang / gzhi rab tu dbye ba drug po de dag re re'i rnam pa dang / rab tu dbye ba dag la 'jug pa'i tshul gyis so/ /ji lta ji ltar yang dag par rab tu brtson pa'i lhag mthong goms pa dang / yongs su dag pa'i stobs kyi dbang du byas te/yangs pa dang / 'phel ba dang / rgyas par gyur pa de lta de ltar lus dang sems shin tu sbyangs pa skyed par byed pa zhi gnas kyi phyogs kyang yangs pa dang / 'phel ba dang / rgyas par 'byung bar rig par bya'o/ /ji lta ji ltar de'i lus dang sems shin tu sbyangs pa de lta de ltar dmigs pa la sems rtse gcig pa nyid rnam par 'phel bar 'gyur la/ji lta ji ltar sems rtse gcig pa nyid rnam par 'phel ba de ltar de ltar lus dang sems shin tu sbyangs ba yang rnam par 'phel bar 'gyur te / chos gnyis po 'di lta ste/ sems rtse gcig pa nyid dang /shin tu sbyangs pa de dag ni gcig la gcig brten pa dang / gcig la gcig rag las pa yin no/ /'di lta ste sems rtse gcig pa nyid dang / shin tu sbyangs pa'i chos de gnyis kyi mtha' ni 'di yin te/ 'di lta ste gnas yongs su gyur pa yin no/ de yongs su gyur pa na shes bya'i dngos po la mngon sum gyi shes pa skye'o//de la ji tsam gyis na mi sdug pa thob pa dang / de bzhin du sbyar te/ ji tsam gyis na dbugs 'byung ba dang / dbugs rngub pa dran pa'i bar dag thob pa yin zhe na/ 'di ltar rnal 'byor pa des mi sdug pa'i sbyor ba kun du bsten cing goms par byas/ lan mang du byas pa'i rgyus na/rgyu yang rung / gnas kyang rung ste/ yul mngon du gyur cing mtshan mar so sor brtags su zin kyang / mngon par 'du byed pa med par rang bzhin gyis mi sdug pa nyid du ches mang du snang ste/ 'di lta ste/ mi sdug pa shin tu goms par bya ba'i phyir / 'dod pa'i 'dod chags dang mthun pa'i chos rnams la sems 'jug par mi 'gyur/dga' bar mi 'gyur/ mos par mi 'gyur zhing btang snyoms dang / yid 'byung ba dang mi mthun par kun du gnas na/ rnal 'byor pas bdag ni mi sdug pa thob pa yin no/ /bdag ni bsgoms pa'i 'bras bu thob pa yin no zhes rig par bya ste/de tsam gyis na mi sdug pa thob pa yin no/ de las bzlog pa ni ma thob pa yin par rig par bya'o/ /mi sdug pa ji lta ba bzhin du/ byams pa dang rkyen 'di pa nyid kyi rten cing 'brel par 'byung ba dang / khams rab tu dbye ba dang / dbugs 'byung ba dang /dbugs rngub pa dran pa yang de bzhin du rig par bya'o/ /de la bye brag ni 'di yod de/ byams pa'i sems ches mang du snang la/ khong khro ba'i sems med pa dang / gnod sems dang ldan pa'i chos rnams la sems mi 'jug go zhes rgyas par bya ba dang / mi rtag pa dang / sdug bsngal ba dang / bdag med par chos mang du snang la/ rtag pa dang / bde ba dang / 'jig tshogs la lta ba dang ldan pa med pa dang / kun du rmongs par 'gyur ba'i mtshan ma dang / kun du rmongs par 'gyur ba dang mthun pa'i chos rnams la sems mi 'jug go zhes rgyas par bya ba dang /khams sna tshogs pa dang / khams du ma pa'i lus la ril por rab tu 'byed pa'i 'du shes ches mang du snang la/ ril po'i 'du shes nyid med pa dang / nga rgyal gyi kun nas dkris pa dang mthun pa'i chos rnams la sems mi 'jug go zhes rgyas par bya ba dang / nang nye bar zhi ba'i 'du shes dang /zhi gnas kyi 'du shes ches mang du snang la/ spros pa'i 'du shes med pa dang / rnam par rtog pa'i kun nas dkris pa dang mthun pa'i chos rnams la sems mi 'jug go zhes rgyas par bya ba'o/ / de la ji tsam gyis na zhi gnas dang lhag mthong gnyis 'dres par gyur cing / mnyam par zung du 'jug pa dang /gang gis na zung du 'brel bar 'jug pa'i lam zhes bya zhe na/ smras pa/ sems gnas pa rnam pa dgu po dag la 'di lta ste/ mnyam par gzhag pa'i rnam pa dgu po gang yin pa de thob par gyur cing de ting nge 'dzin yongs su grub pa de la brten nas lhag pa'i shes rab chos rnam par 'byed par byed pa la rab tu brtson par byed do//de'i tshe ni chos rnam par 'byed par byed pa de'i lam rang gi ngang gis 'jug pa dang rtsol ba med par 'jug par 'gyur zhing / zhi gnas kyi lam ji lta ba bzhin du mngon par 'du byed pa med pas/ lhag mthong yongs su dag pa dang / yongs su byang ba dang / zhi gnas kyi rjes su song ba dang / nyams bde bas yongs su zin par 'gyur te/ de'i phyir de'i zhi gnas dang lhag mthong gnyis 'dres par gyur cing mnyam par zung du 'jug pa dang / zhi gnas dang lhag mthong zung du 'brel bar 'jug pa'i lam zhes bya'o/ /bar gyi sdom ni/mtshan ma tsam dang yongs btsal dang / so sor rtog pa'i sgo dang ldan/ /don dang dngos po mtshan nyid dang / /phyogs dang dus dang rigs pa dang / /mthun dang goms dang ma nor dang / /mi lhod dus dang nyer brtags dang / /chog mi shes dang mi 'gal dang / / yang dag sbyor ba nyid rnams ni/ /rnam pa dgu po gnyis su 'dod/ /ngo bo nyid dang gzhi dang ni/ /nyes dmigs gnyen po bsgom pa ni/ /sgrib pa rnam par sbyong ba yin/ /de la yid la byed pa bsgom pa gang zhe na/ smras pa/ de ltar khyab pa'i mtshan nyid rnam par gzhag pa la/ sems rtse gcig pa nyid dang /sgrib pa rnam par sbyong ba'i log par sbyor ba spong bar byed cing / yang dag pa'i sbyor ba la slob par byed pa'i las dang po las thog ma pa ste/ dang por sems rtse gcig pa nyid dang / spong ba la mngon par dga' ba thob par bya'o zhes yid la byed pa rnam pa bzhis rab tu brtson par byed do/ /bzhi gang zhe na/sems kun du gdung bar 'gyur ba'i yid la byed pa dang / sems mngon par brlan par 'gyur ba'i yid la byed pa dang / shin tu sbyangs pa skyed pa'i yid la byed pa dang / ye shes dang mthong ba rnam par sbyong ba'i yid la byed pas so/ /de la sems kun du gdung bar 'gyur ba'i yid la byed pa gang zhe na/smras pa/ yid la byed pa gang gis de kun du skyo bar 'gyur ba dang mthun pa'i chos rnams la sems kun du skyo bar byed pa ste/ de ni sems kun du gdung bar 'gyur ba'i yid la byed pa yin no/ /de la sems mngon par brlan par 'gyur ba'i yid la byed pa gang zhe na/ smras pa/ yid la byed pa gang gis de mngon par dga' bar 'gyur ba dang mthun pa'i chos rnams la sems mngon par dga' bar byed pa ste/de ni sems mngon par brlan par 'gyur ba'i yid la byed pa yin no/ /de la shin tu sbyangs pa skyed pa'i yid la byed pa gang zhe na/ smras pa/ yid la byed pa gang gis de dus dus su kun du skyo bar 'gyur ba dang mthun pa'i chos rnams la sems kun du skyo bar byas shing /dus dus su mngon par dga' bar 'gyur ba dang mthun pa'i chos rnams la sems mngon par dga' bar byas nas/ sems nang du zhi bar byed cing / mtshan ma med pa dang rnam par rtog pa me dang la nye bar 'jog par yang byed la/dran pa rtse gcig pa la yang 'jug par byed de/ rgyu de dang rkyen des de'i lus dang sems kyi gnas ngan len gyi gnyen po lus dang sems rab tu tshim par byed pa/ lus shin tu sbyangs pa dang / sems shin tu sbyangs pa skyed par byed pa ste/ de ni shin tu sbyangs ba skyed pa'i yid la byed pa zhes bya'o//de la ye shes dang mthong ba rnam par sbyong ba'i yid la byed pa gang zhe na/ smras pa/ 'di lta ste/ nang gi sems kyi zhi gnas de nyid la brten na / de ltar sems nang du yang dag par rab tu zhi ba'i yid la byed pa des/ dus dus su lhag pa'i shes rab chos rnam par 'byed pa la yang dang yang du phyir zhing phyir zhing rnal 'byor du byed pa ste/de ni ye shes dang / mthong ba rnam par sbyong ba'i yid la byed pa zhes bya'o/ /de de ltar dus dus su kun du skyo bar 'gyur ba dang / mthun pa'i chos rnams la sems kun du skyo bar byed pas na/ de'i sems de 'di lta ste/zag pa rnams zag pa dang mthun pa'i chos rnams la gdung ba dang / kun du gdung ba dang / skyo ba dang / kun du skyo bar 'gyur ro/ /de la kun du skyo bar 'gyur ba dang mthun pa'i chos rnams gang zhe na/ smras pa bzhi ste/ 'di lta ste/ bdag gi rgud pa ste / gzhan gyi rgud pa nye bar gyur cing mngon sum du gyur pa na/tshul bzhin yid la byed pa'i rgyus kun du skyo bar 'gyur ba dang / mthun pa'i gnas yin pa dang / bdag gi 'byor ba dang gzhan gyi 'byor ba mngon par 'das pa dang / zag pa dang 'gags pa dang bral ba dang rnam par gyur pa na/ tshul bzhin yid la byed pa'i rgyus kun du skyo bar 'gyur ba dang /mthun pa'i gnas yin pa'o/ /de de ltar dus dus su mngon par dga' bar 'gyur ba dang mthun pa'i chos rnams la sems mngon par dga' bar byed pa na/ mngon par dga' bar gyur ba de'i sems de 'di lta ste/ mngon par dga' bar 'gyur ba dang mthun pa'i chos rnams la/'jam pa dang / snum pa dang / gsher ba dang / rlan pa dang / shin tu dang ba dang / rab tu gsal bar 'gyur ro/ /de la mngon par dga' bar 'gyur ba dang mthun pa'i chos rnams gang zhe na/ smras pa/ mngon par dga' bar 'gyur ba dang mthun pa'i gnas ni rnam pa gsum ste/dkon mchog rnams dang / bslab pa'i gzhi yongs su dag pa dang / bdag nyid la khyad par rtog pa 'byung zhing skye ba yod pas sems kun du 'khrug pa med pa'o/ /de dkon mchog dag rjes su dran pa dang / 'di ltar sems mngon par dga' bar byed do//bdag gi ston pa de bzhin gshegs pa dgra bcom pa yang dag par rdzogs pa'i sangs rgyas yin pa ni bdag gis rnyed pa legs par rnyed do/ /bdag legs par gsungs pa'i chos 'dul ba la rab tu byung ba yang bdag gis rnyed pa legs par rnyed do/ /bdag gis tshangs pa mtshungs par spyod pa dag tshul khrims dang ldan pa/yon tan dang ldan pa/ des pa/ dge ba'i chos can sha stag yin pa yang bdag gis rnyed pa legs par rnyed pa yin te/ bdag gi 'chi ba ni bzang po yin no/ /'chi ba'i dus byed pa yang bzang ba yin no/ /tshe phyi ma yang bzang ba yin no zhes de ltar dkon mchog dag rjes su dran pa na/sems mngon par dga' bar byed do/ /bslab pa'i gzhi yongs su dag pa dang tshul khrims yongs su dag pa rjes su dran pa na/ ji ltar sems mngon par dga' bar byed ce na/ bdag ston pa de bzhin gshegs pa dgra bcom pa yang dag par rdzogs pa'i sangs rgyas dang / de'i legs par gsungs pa'i chos 'dul ba dang /de la legs par zhugs pa nyan thos kyi dge 'dun tshangs pa mtshungs par spyod pa de dag dang / tshul khrims mtshungs par gyur cing bslab pa'i gzhi mtshungs par gyur pa dang / lta ba mtshungs par 'gyur ba dang / rnyed pa mtshungs shing rnyed pa thun mong du longs spyod pa dang /byams pa'i lus kyi las dang / ngag gi las dang / yid kyi las dang ldan pa ni bdag gis rnyed pa legs par rnyed do zhes de ltar bslab pa'i gzhi yongs su dag pa dang / tshul khrims yongs su dag pa rjes su dran pa na/ 'di lta ste/ 'gyod pa med pa dang mchog tu dga' ba'i rim gyis sems mngon par dga' bar byed do//de la ji ltar na bdag nyid la khyad par rtogs par 'byung zhing skye ba yod pa la brten te sems mngon par dga' bar byed ce na bdag de ltar tshul khrims yongs su dag pa dang / mthu yod cing snod du gyur pa dang / tshangs pa mtshungs par spyod pa dam pa yang dag par song ba skyes bu dam pa de dag dang tshul khrims mtshungs par gyur pa dang /lta ba mtshungs par gyur pa dang / rnyed pa thun mong du longs spyod par gyur pa'i skal ba yod pa dang / bdag de ltar gyur cing de ltar zhugs pas na/ tshe 'di nyid la ma thob pa thob par bya ba dang / ma rtogs pa rtogs par bya ba dang / mngon sum du ma byas pa mngon sum du bya ba'i skal ba yod pa yin no zhes mchog tu dga' ba skyed par byed do/ / de ltar bdag nyid la khyad par rtogs par 'byung zhing skye ba yod pa la brten te/ sems mngon par dga' bar byed do/ /gzhan yang des snga phyir brtson 'grus brtsams te gnas pa na khyad par thob par byas pa gang yin pa rjes su dran pa na/de'i gang du yang khyad par thob par bya ba la mngon par dad cing / sems mngon par dga' bar byed pa ste/ de ni rnam grangs gzhan yin no/ /de de ltar kun du skyo bar 'gyur ba dang mthun pa'i chos rnams la sems mngon par gdung bar byed pa na/zag pa rnams dang zag pa dang mthun par 'gyur ba'i chos rnams la sems mi phyogs par byed cing / mi mthun par byed/ phyir phyogs par 'jog par byed/ rnam par 'bral bar byed do/ /mngon par dga' bar 'gyur ba dang mthun pa'i chos la mngon par byed pa dang / mngon par rlan par byed na ni nges par 'byung ba dang rab tu dben pa las skyes pa'i chos rnams la sems snum pa dang bcas pas mngon sum du byed cing / nye bar sbyor bar byed dga' bar byed/ kun du sbyor bar byed de/ de ltar na de'i sems de chos gnyis po 'di lta ste/ kun du sbyor bar 'gyur ba dang / mngon par dga' bar 'gyur ba de gnyis kyis nag po'i phyogs thams cad la mi phyogs pa dang / dkar po'i phyogs thams cad la mngon du phyogs pa la 'jug par 'gyur ro/ /des de ltar sems de sems kun du gdung bar 'gyur ba'i yid la byed pas na nag po'i phyogs thams cad la mi phyogs par byas shing /sems mngon par brlan par 'gyur ba'i yid la byed pas dkar po'i phyogs thams cad la mngon du phyogs par byas nas/ dus dus su 'di lta ste/ shin tu sbyangs pas skyed pa'i yid la byed pas nang gi sems kyi zhi gnas la rab tu 'jog par byed cing dus dus su 'di lta ste/ye shes dang mthong ba rnam par sbyor ba'i yid la byed pas/ chos rnams rnam par 'byed par byed/ rab tu rnam par 'byed par byed/ yongs su rtog par byed/ yongs su dpyod par byed de/ de ltar na de'i sems zhi gnas dang / lhag mthong gis yongs su zin cing /rnam pa thams cad du yon tan thams cad kyi rgyur nye bar song ba yin pas/ dus dus su nyin mo dang / mtshan mo dang / skad cig dang / thang cig dang / yud tsam de dang / de dag 'das nas khyad par du 'gro bar 'gyur ro/ /'di lta ste/ dper na mgar ba'am/ mgar ba'i slob ma mkhas pa zhig gis/gang gi tshe gser ram/ dngul zhig dri ma dang snyigs ma thams cad sbyangs pa'i phyir/ dus dus su mer bsregs shing chus bkrus na/ rgyan de dang de dag tu bya ba la mnyen zhing las su rung ba'i tshul gyis mngon sum du byas par 'gyur te/ de la mgar ba'am mgar ba'i slob ma mkhas pa de dang mthun pa'i bzo shes pa des mgar spyad kyis rgyan gyi rnam pa ci 'dod pa der sgyur bar byed pa de bzhin du/rnal 'byor pas kyang gang gi tshe sems de brnab sems la sogs pa'i dri ma dang snyigs ma la mi phyogs pa nyid kyis sbyor bar byas la/ nyon mongs pa can gyi yid mi bde ba la mi phyogs pa nyid dang /dge ba'i phyogs la mngon par dga' ba la mngon du phyogs pa nyid kyis mngon par dga' bar byas na/ rnal 'byor ba des sems de zhi gnas kyi phyogs sam/ lhag mthong gi phyogs gang dang gang dag la nges par sbyor bar byed pa de dang de dag la shin tu nye bar 'byor ba dang / shin tu rnal 'byor du 'bab pa dang /mi g.yo ba dang / mi 'gul bar 'gyur zhing / ji ltar bsams pa'i don yang dag par 'grub pa'i phyir 'gro bar yang 'gyur ro/ /de la ji ltar na las dang po pa las thog ma ba de yid la byed pa bsgom pa la nges par sbyor bar byed ce na/ de de ltar nges par sbyor bar byed cing sgrub par byed pa'i tshe/dang por spong ba la mngon par dga' ba dang / sems rtse gcig pa nyid la reg par byed pa na/ rnal 'byor pa rnal 'byor shes pa des/ las dang po pa rnal 'byor la brtson pa de la dang por 'di skad gdams par bya ste/ bzhin bzangs tshur shog /khyod kyi mtshan mar 'dzin pa'i rgyu gsum po 'di lta ste/mthong ba'am/ thos pa 'am/ sems kyi rjes su dpag pa'i dbang gis yongs su brtags pa la brten la/ mtshan ma lnga po 'di lta ste/ kun tu skye bar 'gyur ba dang / dang bar 'gyur ba dang / nyes dmigs kyi mtshan ma dang / snang ba'i mtshan ma dang / dngos po la brtag pa'i mtshan ma dag zung shig ces gdams par bya'o/ de la gal te las dang po pa rnal 'byor la brtson pa de 'dod chags spyad pa zhig yin te/ mi sdug pas 'dul ba zhig yin na/ des mtshan ma lnga po dag gzung ba'i phyir/ ji skad gdams par bya zhe na/ de la 'di skad gdams par bya ste/bzhin bzangs tshur shog/ khyod grong ngam/ grong rdal gang dang gang dag la brten cing / gnas pa'i grong dang / grong rdal gang yang rung ba gzhan zhig tu skyes pa'am/ bud med gang yang rung ba zhig nad kyis btab ste/ sdug bsngal zhing nad tshabs che ba'am/ shi zhing 'chi ba'i dus las 'das par thos kyang rung skyes pa'am/bud med de de ltar ma gyur na yang / skyes pa'am bud med de'i mdza' bshes sam/ blon po'am/ nye du'am/ snag gi gnyen mtshams gang yang rung ba zhig de ltar thos par gyur kyang rung / grong ngam/ grong rdal der gtogs pa'i skye bo'i tshogs kyi longs spyod pha rol gyi dmag tshogs kyis phung bar byas sam/mes tshig gam/ chus khyer ram/ gter ngan par spas pas chud zos sam/ las kyi mtha' legs par ma byas pas nyams sam/ rigs rgyud sdang ba dag gi dbang du byas sam/ rigs kyi nang na pha tshan gyi dkrugs ma byed pas chud gsan te/phung par byas pa thos kyang rung / gal te ma thos na mngon sum du mthong yang rung / gal te grong ngam/ grong rdal gzhan du ma yin gyi/ /grong ngam/ gong rdal de nyid du de ltar gyur kyang rung / gal te grong ngam/ grong rdal de nyid du yang ma byung / gzhan dag tu yang ma byung mod kyi/'on kyang bdag nyid la rgyas par snga ma bzhin du lus kyi tshor ba sdug bsngal ba mi bzad pa rtsub pa/ tsha ba drag po dag gis reg par gyur kyang rung ste/ khyod kyis de dag mthong ngam thos na 'di ltar sems kun du skyo bar gyis shig /kye ma 'khor ba 'di ni sdug bsngal ba yin no/ /lus 'thob pa yang dka' ba yin te/gang la bdag dang gzhan gyi rgud pa 'di lta ste/ nad med pas rgud pa dang / nye dus rgud pa dang / longs spyod kyis rgud pa dang / nad dang na ba'i chos can nyid dang / 'chi ba dang / 'chi ba'i chos can nyid de/ de lta bu dag yod pa dang / gzhan yang kha cig tshul khrims kyis rgud pa dang /lta bas rgud pa dag kyang yod de/ gzhi de dag gis sems can rnams tshe 'di la yang sdug bsngal bar gnas par 'gyur la/ tshe phyi ma la yang ngan 'gror 'gro bar 'gyur ba dang / tshe 'di la bde bar gnas par 'gyur ba dang / tshe phyi ma la yang bde 'gror 'gro bar 'gyur ba'i 'byor pa gang dag yin pa de dag kyang mi rtag pa yin pas/mi rtag pa de dag yod pa dang / gal te rgud pa mngon sum du gyur tam/ bral bar gyur kyang / de'i tshe 'byor ba mngon sum du gyur ba ma yin pas/ 'byor ba dkon pa de ni chud za ba'i chos can yin no zhes de ltar kun du skyo bar gyis shig /de ltar sems skyo bar byas nas yang tshul bzhin yid la byed pa la 'di ltar sems legs par rab tu gtad par gyis shig/ bdag 'khor ba na 'khor zhing yongs su mya ngan las ma 'das la/ sems rnam par ma grol gyi bar du bdag rgud pa dang / 'byor pa de dag dang bral ba dang /mngon sum du mi 'gyur ba dang / gzhi des bdag la sdug bsngal mi bzad pa rtsub pa tsha ba drag po yid du mi 'ong ba skye bar mi 'gyur ba mi thob pa'i gnas gang yin pa'i gnas de ni yid brtan tu mi rung zhing yid brtan par bya ba ma yin te/ de'i phyir bdag gis don de nyid kyi dbang du byas nas/ bag yod pas spong ba'i dga' ba la dga' bar bya ste/bdag de ltar lan mang du gnas na gnod pa de nyid mthar byed par 'gyur ro zhes de ltar tshul bzhin la legs par rab tu gtad par gyis shig/ de ltar khyod kyis kun du skyo bar 'gyur ba'i mtshan ma bzung nas yang dang por 'gyur ba'i mtshan ma gzung bar bya ste/ ci bdag gi tshul khrims yongs su dag pa yin nam/ 'on te yongs su ma dag pa yin nam / bdag brjed ngas pa'am/ ma gus pa'am/ nyon mongs pa mang ba'am/ ma byang ba'am/ gcig gis bslab pa las 'gal bar gyur pa lta med grang / bslab pa las 'gal na yang bdag gis chos bzhin du phyir byas shing /lhag pa'i bsam pas yang mi bya bar sems bskyed dam ma bskyed/ ci bdag gis bya ba dag byas shing mi bya ba dag ma byas pa yin nam ma yin/ mdor na bdag 'di lta ste/ bslab pa'i gzhi rnams la lhag pa'i bsam pa phun sum tshogs pa dang / sbyor ba phun sum tshogs pa yin nam ma yin zhes bdag nyid kyi tshul khrims la so sor rtogs shing /khyod de ltar so sor rtogs pa na gal te tshul khrims kyi phung po yongs su dag pa yin na khyod kyis ci bdag la 'gyod pa med pa skye bar 'gyur ram zhes yang bsam par mi bya ste/ 'di ltar gang de ltar tshul khrims rnam par dag pa la 'gyod pa med pa skye bar 'gyur ba de ni/chos nyid kho na yin pa'i phyir ro/ /de ltar 'gyod pa med par gyur na khyod kyis bdag la mchog tu dga' ba skye bar 'gyur ram zhes yang bsam par mi bya ste/ 'di ltar gang de ltar 'gyod pa med la mchog tu dga' ba skye bar 'gyur ba de ni chos nyid kho na yin pa'i phyir te/khyod kyis re zhig mchog tu dga' ba'i gnas de gcig pus 'gyod pa med pa sngon du btang ba'i mchog tu dga' ba bskyed par bya'o/ /bskyed nas kyang phyis yang dag par rab tu dga' ba'i gnas kyis dga' ba bskyed par bya ste/ bdag de ltar bcom ldan 'das kyi bslab pa dag la tshul khrims yongs su dag par gnas pas ni tshe 'di nyid la ma thob pa thob par bya ba dang /ma rtogs pa rtogs par bya ba dang / mngon sum du ma byas pa mngon sum du bya ba'i skal ba yod cing mthu dang ldan pa yin no zhes gnas des kyang yid rab tu dga' bar gyis shig / gal te khyod kyis rim gyis khyad par rtogs pa chung ngu zhig thob na yang de'i dbang du byas nas 'di lta ste/ de bzhin gshegs pa 'am/ de bzhin gshegs pa'i nyan thos gzhan dag gi khyad par rtogs pa yongs su rdzogs pa de la bdag gis kyang phyis de lta bu'i khyad par rtogs par 'gyur ro zhes yid ches pa bskyed cing yid rab tu dga' bar gyis shig /de ltar rnam pa de dag gis khyod kyi yid rab tu dga' ba snga ma gang yin pa de ni rab tu dga' ba yin no/ /da ltar gyis ni yid dga' ba zhes bya'o zhes de ltar dang bar 'gyur ba'i mtshan ma 'dzin du 'jug par byed do/ /'dzin du bcug nas yang 'di ltar rjes su ston par byed de/bzhin bzangs tshur shog/ /khyod kyis kun du skyo bar 'gyur ba'i mtshan mas sems gdung bar byas shing dang bar 'gyur ba'i mtshan mas sems mngon par brlan par byas zin pas/ 'jig rten pa brnab sems dang / yid la mi bde ba spangs pa'i phyir lan mang du gnas par gyis shig dang zhi gnas kyi phyogs sam/lhag mthong gi phyogs kyi dmigs pa gang dang gang la rab tu sbyor bar byed pa'i dmigs pa de dang de la/ khyod kyi sems gnas pa dang / nang du yang dag par gnas par 'gyur zhing lus dang sems shin tu sbyangs pa dang / sems rtse gcig pa nyid kyang thob par 'gyur ro//de ltar 'di lta ste/ kun du sbyor ba dang / mngon par brlan pas nag po'i phyogs la mi phyogs par byas shing / dkar po'i phyogs la mngon du phyogs par byas nas yang khyod kyis 'di lta ste/ mtshan ma dang / rnam par rtog pa dang / nye ba'i nyon mongs pa dag la nyes dmigs kyi mtshan ma nye bar zung shig /de la mtshan ma ni gzugs kyi mtshan ma la sogs pa bcu'o/ /rnam par rtog pa ni 'dod pa'i rnam par rtog pa la sogs pa brgyad do/ /nye ba'i nyon mongs pa ni 'dod pa la rab tu 'dun pa la sogs pa lnga ste/ de dag la 'di ltar mtshan ma 'di dag ni sems g.yeng bar byed pa yin no//rnam par rtog pa 'di dag ni sems spro ba dang / kun du 'khrug par byed pa yin no/ /nye ba'i nyon mongs pa 'di dag ni sems nye bar ma zhi bar byed pa yin te/ mtshan mas sems g.yeng bar byas pa gang yin pa dang / rnam par rtog pas spro ba dang / kun du 'khrug par byas pa gang yin pa dang /nye ba'i nyon mongs pas nye bar ma zhi bar byas pa gang yin pa de ni/ sems sdug bsngal bar gnas pa yin pas/ de'i phyir mtshan ma dang rnam par rtog pa dang / nye ba'i nyon mongs pa 'di dag ni/ sdug bsngal ba 'phags pa ma yin pa gnod pa dang ldan pa ste/ sems rnam par g.yeng ba dang /kun du 'khrug pa dang / kun nas nyon mongs par byed pa yin no zhes nyes dmigs su nye bar zung shig /de ltar nyes dmigs kyi mtshan ma bzung nas/ sems rtse gcig pa nyid dang / sems gnas pa dang / sems rnam par mi g.yeng ba la 'du shes rnam pa drug po 'di lta ste/mtshan ma med pa'i 'du shes dang / mtshan ma med pa la g.yeng ba med pa'i 'du shes dang / rnam par rtog pa med pa'i 'du shes dang / de ltar rnam par rtog pa med pa la spros pa med pa dang / kun du 'khrug pa med pa'i 'du shes dang / nye bar zhi ba'i 'du shes dang /nye bar zhi ba la yongs su gdung ba med pa dang / yid brtan du rung ba dang / sdug pa'i 'du shes kyi mtshan mar zung shig /de ltar mtshan mar bzung nas/ gzhan yang 'di lta ste/ mar me'i 'od las sam/ me'i phung po'i 'od las sam/ nyi ma'i dkyil 'khor las snang ba'i mtshan ma zung shig /de ltar snang ba'i mtshan ma bzung nas/ dur khrod du song la phyin pa dang / 'di lta ste/ rnam par bsngos pa las sam/ rus pa'i keng rus kyi bar dag las mi sdug ba'i mtshan ma zung shig /gal te dur khrod las ma yin na yang ri mor bris pa las sam/ shing ngam/ 'jim pa las byas pa las mi sdug pa'i mtshan ma zung shig /de ltar mi sdug pa'i mtshan ma bzung nas gnas mal du song la phyin pa dang / dgon pa na 'dug kyang rung / shing drung na 'dug kyang rung / khyim gyis stong pa na 'dug kyang rung ste/ rkang pa bkrus la khri'am/ khri'u'am/ rtswa bting ba'i steng du skyil mo krung bcas te/lus drang por bsrangs nas dran pa phyogs par gzhag ste/ 'dug shig /de ltar 'dug nas kyang dang po kho nar sems rtse gcig pa nyid dang / sems rnam par mi g.yeng ba nyid la dran pa nye bar gtad par gyis shig /der yang 'du shes rnam pa drug po mtshan ma med pa'i 'du shes dang /rnam par rtog pa med pa'i 'du shes dang / nye bar zhi ba'i 'du shes dang / g.yeng ba med pa'i 'du shes dang / spros pa med pa dang / kun du 'khrug pa med pa'i 'du shes dang / yongs su gdung ba med pa dang yid brtan du rung ba dang / sdug pa'i 'du shes yid la gyis shig /der khyod kyis rnam par g.yeng ba dang / rnam par g.yeng ba med pa yongs su shes pa la sems gtod cing nye bar gnas par gyis shig /rnam par g.yeng ba dang / rnam par g.yeng ba med pa yongs su shes pa la sems gtod pa des mtshan ma dang / rnam par rtog pa dang /nye ba'i nyon mongs pa de dang de dag la rnam par g.yeng ba dang / sems rtse gcig pa nyid dang / 'du shes drug po bsgom pa dang ldan pa la rnam par g.yeng ba med pa yang yongs su shes par gyis shig /rnam par g.yeng ba dang / rnam par g.yeng ba med pa la khyod kyis ci nas kyang rtse gcig pa nyid la nye bar gtod pa dang nang gi sems kyi zhi gnas la nye bar gtod pa'i rim gyis sems kyi rgyud dang /sems kyi rnam pa thams cad mtshan ma med pa dang / rnam par rtog pa med pa dang / nye bar zhi bar 'gyur ba de lta de ltar sems gtad par gyis shig /de ltar zhi gnas kyi sems thob pa na/gal te brjed ngas pa dang / ma goms pa'i nyes pas/ mtshan ma dang / rnam par rtog pa dang / nye ba'i nyon mongs pa dag gis snang bar 'gyur/ sgo ston par 'gyur/ dmigs par byed par gyur na de dag byung ngo cog la 'di lta ste/ nyes dmigs sngar mthong ba de nyid kyi dbang du byas te /dran pa med pa dang / yid la byed pa med par bya ste/ 'di ltar dran pa med pa dang / yid la byed pa med pas dmigs pa de rnam par bshig cing rnam par btsal na/ snang ba med pa nyid la nye bar gzhag par 'gyur ro/ /bzhin bzangs dmigs pa de ni phra ba dang rtogs par dka' ba yin pas/khyod kyis de rtogs par bya ba'i phyir 'dun pa dang / 'bad pa drag tu bya'o/ /bcom ldan 'das kyis kyang dmigs pa de la dgongs nas/ dge slong dag yul gyi bzang mo yul gyi bzang mo zhes bya ba ni/ skye bo mang po 'du bar 'gyur ba yin no/ / yul gyi bzang mo de yang gar dang /glu dang / rol mo mchog tu mkhas par gyur na/ skye bo mang po dag rgya cher 'du bar 'gyur ro/ /der skyes bu byis pa'i rang bzhin can ma yin pa zhig 'ongs par gyur pa de la la la zhig gis/ 'di skad du kye skyes bu khyod snod 'bru mar gyis kha da cad du gang ba 'di ma bor bar yul gyi bzang mo'i bar dang /skye bo mang po'i bar du khyer cig /khyod kyi phyi bzhin du gshed ma'i mi ral gyi gzas pa thogs pa 'di yang 'brang bar 'gyur te/ gal te khyod kyis snod 'bru mar gyis gang ba 'di las thigs pa gcig tsam zhig sa la bo bar gyur na/ de'i phyir gshed ma'i mi ral gri gzas pa thogs pa 'dis khyod kyi mgo mgrin pa nas gcod par 'gyur ro zhes bsgo na/dge slong dag 'di ji snyam du sems/ skyes bu de snod 'bru mar gyis gang ba de yid la mi byed cing / gshed ma'i mi ral gyi gzas pa thogs pa de yang yid la mi byed par yul gyi bzang mo'am/ skye bo mang po de dag yid la byed par 'gyur snyam mam/gsol pa btsun pa ma lags so/ /de ci'i slad du zhe na/ 'di ltar des gshed ma'i mi sug pa na ral gri gzas pa thogs pa 'dis / slad bzhin du 'brang ba mthong lags pas/ de 'di snyam du sems te/ gal te bdag gis snod 'bru mar gyis gang ba 'di las thigs pa gcig tsam zhig sa la bo bar gyur na/de'i phyir gshed ma'i mi ral gri gzas pa thogs pa 'dis bdag gi mgo bo mgrin pa nas gcod par 'gyur ro snyam du sems pa'i slad du ste/ skyes bu de ni yul gyi bzang mo'am skye bo mang po dag yid la byed la mi bgyid cing snod 'bru mar gyis bltams pa de nyi tshe la sems thams cad kyis bsams te/legs pa kho nar 'tshal te/ 'chi ba 'ba' zhig tu bgyid lags so/ /bka' stsal pa/ dge slong dag de bzhin du gang la la dag dran pa nye bar gzhag pa bzhi po dag la sems thams cad kyis bsams te/bsti stang du byas/ bla mar byas nas/ sgom par byed na/ de dag ni nga'i nyan thos yin no zhes gsungs so/ /de la yul gyi bzang mo zhes bya ba de ni 'dod pa la 'dun pa la sogs pa nye ba'i nyon mongs pas kun nas dkris pa dang mthun pa'i chos rnams kyi tshig bla dgas yin no/ / gar dang glu dang / rol mo mchog tu mkhas pa zhes bya ba de ni rnam par rtog pa dang / spros pa dang / kun du 'khrug pa dang mthun pa'i chos rnams kyi tshig bla dgas yin no/ /skye bo mang po dag ces bya ba de ni gzugs kyi mtshan ma la sogs pa mtshan ma bcu po dag gi tshig bla dgas yin no//skyes bu byis pa'i rang bzhin can ma yin pa zhes bya ba de ni/ rnal 'byor spyod pa'i rnal 'byor pa'i tshig bla dgas yin no/ /snod 'bru mar gyis kha da cad du gang ba zhes bya ba de ni/ lus dang sems shin tu sbyangs pa'i snum pa'i don gyis zhi gnas la nye bar gtad pa'i sems kyi tshig bla dgas yin no//gshed ma'i mi ral gri gzas pa thogs pa zhes bya ba de ni mtshan ma dang / rnam par rtog pa dang / nye ba'i nyon mongs pa dag la sngon nyes dmigs kyi mtshan mar bzung ba'i tshig bla dgas yin no/ /thigs pa gcig tsam yangs la mi bo bar legs pa kho nar khyer te zhes bya ba de ni/rnam par g.yeng ba dang / rnam par g.yeng ba med pa yongs su shes pa la sems gtad pas/ yongs su zin pa'i zhi gnas kyi lam gyi tshig bla dgas yin te/ des na de'i sems kyi rgyud dang / sems kyi rgyun thams cad brtson 'grus kyi stobs kyis rim gyis mthar chags su mtshan ma med pa dang /rnam par rtog pa med pa dang / nye bar zhi bar 'gyur zhing / mtshan ma la dmigs pa'am/ rnam par rtog pa la dmigs pa'am/ nye ba'i nyon mongs pa la dmigs pa'i sems 'ga' tsam yang bskyed par mi bya'o / /rnal 'byor pa des zhi gnas la rab tu brtson pa'i las dang po pa de la 'di skad rjes su 'doms par yang byed de/bzhin bzangs khyod ni ci tsam du de ltar thabs kyis yongs su zin cing dran pa dang / shes bzhin dang ldan pa'i zhi gnas kyi lam la rab tu brtson par byed cing / sems mngon par dga' ba dang bcas par 'gyur ba de tsam du/khyod kyis zhi gnas kyi lam nyid bsgom par bya'o/ /gal te ma goms pa'i nyes pas mngon par mi dga' zhing 'khrug pa dang bcas pa la bsgrims te/ bya dgos par snang na/ de'i tshe myur ba myur ba kho nar rnam par rtog pa med pa'i dmigs pa de las langs te/rnam par rtog pa dang bcas pa'i dmigs pa la dran pa nye bar gtad par bya ste/ khyod kyis sngar mi sdug pa'i mtshan ma 'di lta ste/ rnam par bsdos pa'am/ rnam par rnags pa nas rus pa'i keng rus kyi bar dag bzung ba gang yin pa de nyid la dang po kho nar mtshan ma tsam gyi rjes su 'brang ba'i lhag mthong gis yid la gyis shig /de ltar rab tu brtson par byed pa na/ dang po kho nar rnam par bsngos pa gcig la mos par gyis shig dang / des na de la khyod kyi sems yongs su sbyang ba byas pa dang / 'od gsal bar 'gyur zhing dmigs pa de la mos par yang 'gyur ro//des na rnam par bsdos pa gnyis dang / gsum dang / bzhi dang / lnga dang / bcu dang / nyi shu dang / sum cu dang / bzhi bcu dang / lnga bcu dang / brgya dang / stong nas rnam par bsdos pa'i rnam pa tshad med pas phyogs dang / phyogs mtshams thams cad 'dab chags su yongs su gang ste/de dag gi bar skabs tha na khar ba'i rtse mo gzugs pa'i gtos tsam yang med par mos par gyis shig /rnam par bsngos pa la ji lta ba bzhin du rus pa'i keng rus kyi bar dag la yang de bzhin du mos par gyis shig/ // nyan thos kyi sa bam po bcu drug pa/ khyod kyis mos pa yid la byed pa de nyid la brten la yang dag pa yid la byed pa la yang 'jug par bya ste/ 'di ltar zhugs shig /bdag gis rnam par bsngos pa dang rus pa'i keng rus kyi bar dag ji snyed cig la mos par byed pa de bas ni/ bdag gi sngon gyi mtha' las brtsams te/srid pa dang / 'gro ba de dang de dag tu bdag 'chi 'pho zhing skye ba dag na/ shi zhing dus la 'das par gyur pa'i rnam par bsngos par gyur pa gang dag yin pa dang / rus pa'i keng rus kyi bar du gyur pa gang yin pa de dag ches tshad med pa yin te/ de dag gi sngon gyi mtha' ni mi mngon no//gal te de ltar gyur pa de dag la la zhig gis bsdus shing bsdus nas kyang zhig par ma gyur/ rul bar ma gyur du zin na/ gang du de dag shong bar 'gyur ba'i sa phyogs kyang med do/ /bskal pa gcig gis rnam par bsngos pa nas ras pa'i keng rus kyi bar de dag kyang sdud par byed pa 'ga' zhig yod par gyur na/de dag bsdus pa'i phung po yang ri ngos tsam mo/ /sngon gyi mtha' las brtsams pa ji lta ba bzhin du ji srid sdug bsngal mthar phyin par ma gyur gyi bar du phyi ma'i mtha'i yang de dang 'dra ste/ de ltar khyod kyis mos pa yid la byed pa la brten nas yang dag pa yid la byed pa la 'jug par 'gyur ro//lhag mthong la rab tu brtson pas rnam par bsngos pa dang / rus pa'i keng rus kyi bar de dag la lan cig rnam par blta bar bya ba ma yin gyi/ rnam par bsngos pa gcig kho na la mos par byas nas/ yang sems zhi bar byas te/ ji srid du dmigs pa de nyid du mngon par dga' ba dang / 'od gsal ba dang / 'khrug pa med pa dang / kun nas dkris pa med pa dang / bsgrims te bya mi dgos pa de srid du rnam par bsngos pa de la mos par bya'o/ /de nas ji srid du dmigs pa de la bsgrims te/bya dgos pa'i bar du sems nang du yang dag par zhi bar byas te/ rnam par bsngos pa la ji lta ba bzhin du rus pa'i keng rus kyi bar cig dang / tshad med pa'i bar dag la yang tshul 'di nyid kyis de bzhin du rig par bya'o/ /sems nang du zhi bar byas shing yang dag par zhi bar byas nas yang mos par bya ste/des na thams cad kyi tha mar sems nang du mngon par bsdus pas rnam par bsngos pa tshad med pa dang / rus pa'i keng rus tshad med pa'i bar dag rnam par 'jog par byed cing / snang ba med pa nyid la 'jog par byed la/ rnam par rtog pa dang bcas pa'i mtshan ma de dag kyang spong bar mi byed cing rnam par rtog par yang mi byed la/dmigs pa de nyid la sems mtshan ma med pa dang / rnam par rtog pa med pa dang / nye bar zhi bar 'jog par byed do/ /de la yang lung 'bogs par byed do/ /bzhin bzangs khyod kyis dang po kho nar snang ba'i mtshan ma gzung ba gang yin pa la/khyod kyis zhi gnas kyi phyogs kyi sbyor ba dang / lhag mthong gi phyogs kyi sbyor ba yid la gyis shig /snang ba dang ldan pa dang / 'od dang ldan pa dang / 'od gsal ba dang / mun pa med pa'i sems kyis zhi gnas dang lhag mthong yang sgoms shig/khyod de ltar zhi gnas dang / lhag mthong gi lam la snang ba'i 'du shes sgom pa na/ gal te dang po nyid nas dmigs pa la mos pa rnam par mi gsal zhing snang ba mtshungs par gyur na yang / bsgom pa goms par byed pa'i rgyu de dang / rkyen des dmigs pa la mos pa rnam par gsal ba dang /snang ba chen po nyid du 'gyur ro/ /gal te dang po nyid nas rnam par gsal ba dang / snang ba chen por gyur ba yin na ni/ de'i phyir zhing rgya cher shin tu rnam par gsal ba dang / shin tu snang ba chen po nyid du yang 'gyur ro/ /khyod kyis de ltar kun du skyo bar 'gyur ba'i mtshan ma legs par bzung ba dang /rab tu dang bar 'gyur ba'i mtshan ma dang / zhi gnas kyi mtshan ma dang / lhag mthong gi mtshan ma dang / snang ba'i mtshan ma legs par bzung bas dus dus su sems nang du yang dag par zhi bar gyis shig /mtshan ma tsam gyis rjes su 'brang ba'i lhag mthong gi chos rnams rab tu rnam par dbye bar yang gyis shig /'di lta ste/ mi sdug pa'i sbyor ba nyid kyi dbang du byas nas/ dran pa nye bar gzhag pa dag la yang 'jug par bya ste/ 'di ltar 'jug par gyis shig /phyi rol gyi lus la skra la sogs pa nas bshad ba'i mthar thug pa'i bar du mi sdug pa'i rdzas sum cu rtsa drug gi mtshan ma bzung nas rang gi lus la yang mi sdug pa'i rdzas kyi mtshan ma de dag thams cad mos par gyis shig /mos par byas shing mos par byas nas kyang sems nang du yang dag par zhi bar gyis shig dang /de ni 'di lta ste/ bdag nyid kyi nang gi lus las brtsams nas/ khyod kyi nang gi lus la lus kyi rjes su lta ba'i dran pa nye bar gzhag pa la 'jug par 'gyur ba yin no/ /yang khyod kyis phyi rol gyi lus kyi mi sdug pa'i mtshan ma bzung bas/ rnam par bsngos pa dang /rus gong dang / rus pa'i keng rus chung ngu dang / chen por gyur pa dang / tshad med pa'i bar dag la mos par gyis shig /mos par byas shing mos par byas nas kyang sems nang du yang dag par zhi bar byos shig dang / de ni 'di lta ste/ gzhan gyi rgyud du gtogs pa'i phyi rol gyi lus las brtsams nas/khyod kyi phyi rol gyi lus la lus kyi rjes su lta ba'i dran pa nye bar gzhag pa la 'jug par 'gyur ba yin no/ /yang khyod kyis bdag nyid kyi nang gi lus la mi sdug pa nyid du yongs su bsgoms pa'i sems dang / gzhan gyi nang dang phyi rol gyi lus la mi sdug pa nyid du yongs su bsgoms pa'i sems kyis bdag nyid 'chi bar mos par gyis shig /shi nas kyang dur khrod du khyer ba dang / khyer nas kyang dur khrod du bor ba dang / bor nas kyang rnam par bsngos pa'i gnas skabs dang / rnam par rnags pa'i gnas skabs dang /rus pa'i keng rus kyi gnas skabs kyi bar du gyur par mos par gyis shig dang / de ni 'di lta ste/ bdag dang gzhan gyi lus las brtsams nas/ khyod kyi nang dang phyi rol gyi lus la lus kyi rjes su lta ba'i dran pa nye bar gzhag pa la 'jug pa yin no//yang khyod kyis phung po gzugs can ma yin pa bzhi po dag la thos pa dang / bsams pa'i dbang gis byung ba yongs su rtog pa'i mtshan mar 'dzin pas/ cha gsum po zhi gnas kyi phyogs dang / rnam par g.yeng ba'i phyogs dang / lhag mthong gi phyogs rnams su mos par gyis shig /de la zhi gnas kyi phyogs la ni gang gi tshe sems nang du mngon par sdud par byed pa na de la mtshan ma med pa dang / rnam par rtog pa med pa dang / nye bar zhi ba'i rnam pa dang / g.yeng ba med pa dang / spro ba med pa dang / kun du 'khrug pa med pa dang /yongs su gdung ba med pa dang / yid brtan du mi rung ba dang / sdug pa'i 'du shes kyi rnam pa dang / rnam par g.yeng ba med pa la dmigs pa'i tshor ba la sogs pa phung po gzugs can ma yin pa bzhi ni/ skad cig re re dang / skad cig re re la gzhan dang / gzhan du sar pa sar pa dang /rnying pa ma yin pa dang / rnying pa ma yin par 'jug par 'gyur ba yin no zhes mos par gyis shig dang / de ni khyod kyi nang gi tshor ba rnams dang / sems dang chos rnams la chos kyi rjes su lta ba'i dran pa nye bar gzhag pa la 'jug par 'gyur ba yin no/ / khyod kyis sngon yul nye bar len par byed pa/ yul la dmigs par byed pa mnyam par ma bzhag pa'i sa par rtogs pa'i tshor ba la sogs pa ming gi phung po gzugs can ma yin pa bzhi po mngon par 'dus shing zad pa gang dag yin pa rnams dang / da ltar brjed ngas pas sems rnam par g.yeng ba na mtshan ma dang /rnam par rtog pa dang nye ba'i nyon mongs pa la dmigs pa'i dbang gis byung ba'i tshor ba la sogs pa phung po gzugs can ma yin pa bzhi po gang dag yin pa de dag ni byung nas/ 'jig pa nyid dang / dus yun mi ring ba nyid dang / ngan par gnas pa nyid dang / nyes dmigs dang bcas pa nyid dang mi brtan pa nyid dang / yid brtan du mi rung ba nyid yin par mos par gyis shig /de ni khyod kyi phyi rol gyi tshor ba rnams dang / sems dang / chos rnams la chos kyi rjes su lta ba'i dran pa nye bar gzhag pa la 'jug pa yin no/ /yang khyod kyis lhag mthong gi mtshan ma bzung nas/mtshan ma dang bcas pa dang / rnam par rtog pa dang bcas pa'i yid la byed pa la gnas te/ rnam par rtog pa dang bcas pa dang / mtshan ma dang bcas pa'i dmigs pa'i dbang gis byung ba nang gi tshor ba la sogs pa phung po gzugs can ma yin pa bzhi po gang dag yin pa de dag la skad cig re re dang /skad cig re re la gzhan dang gzhan du sar pa sar pa dang / rnying pa ma yin pa dang / rnying pa ma yin par 'jug par 'gyur ba yin no zhes snga ma bzhin du mos par gyis shig dang de ni khyod kyi nang dang / phyi rol gyi tshor ba rnams dang / sems dang /chos rnams la chos kyi rjes su lta ba'i dran pa nye bar gzhag pa la rjes su 'jug par 'gyur ba yin te/ de ltar na khyod mi sdug pa'i sbyor ba'i dbang du byas nas dran pa nye bar gzhag pa bzhi po dag la zhugs par 'gyur ro/ /khyod dran pa nye bar gzhag pa la rab tu sbyor bar byed pa na/ dus dus su zhi gnas dang lhag mthong la yang rab tu brtson par bya'o//khyod de ltar dran pa nye bar gzhag pa bzhi po dag la dran pa nye bar gzhag pas grong ngam/ grong rdal gang yang rung ba dag la brten cing gnas pa na khyod grong ngam/ grong rdal de nyid na de la gzhol ba dang / de la 'bab pa dang / de la babs pa'i sems kyis dmigs pa dang / dmigs pa'i mtshan ma ma spangs par bsod snyoms kyi phyir zhugs pa'i tshe na / glang po che dmu rgod dang / rta dmu rgod dang / ba lang rdung rgus dang / khyi za ba dang / sprul dang / ngam grog dang / sdong du ma dang / tsher ma dang / 'dam rdzab dang /g.yang sa dang / ljan ljin dang / mi gtsang ba'i khung bu dang / spyod lam dang / spyod pa dang / gnas mal sdig pa can dag yongs su spang zhing khyod kyis bdag nyid kyi lus legs par bsrung bar gyis shig /khyod kyis yul gyi mtshan ma gang dag la dbang po rnams gtad par mi bya ba de dag la yang brtsal ba med pas/dbang po rnams legs par bsdam par gyis shig /khyod kyi mtshan ma gang dag la dbang po rnams gtad par bya ba de dag la yang 'di lta ste/ nyon mongs pa kun du mi rgyu bar bya ba'i phyir dran pa shin tu nye bar gzhag par gyis shig/ khyod kyis de ltar lus legs par bsrungs ba dang /dbang po rnams legs par bsdams pa dang / dran pa shin tu nye bar gzhag pas de dang 'brel ba'i yid kyis zas kyi tshod rig par zo shig /khyim na gnas pa dang / rab tu byung ba rnams dang / lhan cig ran par smra ba dang / rigs par smra ba dang /dus su smra ba dang / gnam por smra ba dang / rab tu zhi bar smra bar gyis shig /khyod kyis chos ma yin pa'i gtam ni rnam pa thams cad kyi thams cad yongs su spang bar bya'o/ /khyod kyis chos kyi gtam zer ba na yang rtsod pa'i gtam mi bya ba'o / /de ci'i phyir zhe na/ skyes bu gang zag rtsod pa'i gtam gyi tshogs kyi rjes su sbyor ba la brtson par gnas pa ni smra ba mang po la sems kun du gnas par 'gyur ba dang /smra ba mang na rgod par 'gyur ba dang / rgod na nye bar mi zhi bar 'gyur ba dang nye bar ma zhi na sems ting nge 'dzin las thag ring du 'gyur ba'i phyir ro/ /khyod de ltar rgyu ba na dmigs pa ma btang bas myur ba myur bar 'dug la zhi gnas dang lhag mthong la mtshan ma ji lta bzung ba de nyid kyis rgyun du byed pa dang /legs par byed pas rnal 'byor du gyis shig /gtsub gtan las me 'byung ba'i sbyor ba'i tshul gyis rtag tu byed pa dang / gus par byed pa'i sbyor bas rgyun du gyis shig /'di ltar sems rab tu gtad par yang gyis shig /gal te 'dzam bu'i gling na 'dzam bu'i gling ba'i mi thams cad kyi tshe ji srid du thub par gyur pa de dag thams cad gcig tu bsdus te nga bdag gcig pu'i tshe tshad du gyur kyang / bdag gis 'di lta ste/ rnal 'byor la rab tu brtson pa 'di nyid kyi 'bras bu che ba nyid dang /phan yon che ba nyid rig pas na tshe dpag tu med pas spong ba dang / rnal 'byor yid la byed pa dang / zhi gnas dang / lhag mthong la rnal 'byor mi gtang bar bya ba na tshe thung zhing srog myur na shin tu yun ring du zin kyang lo brgya las mi thub cing yongs su brtsis na yud tsam cig las med pa 'dis lta smos kyang ci dgos zhes de ltar sems rab tu gtad par gyis shig /de ltar khyod ji skad rjes su bstan pa bzhin du rgyun du byed cing legs par byed na gang gi don du spong bar khas blangs pa'i don ni 'grub par 'gyur te/ dang po kho nar lus shin tu sbyangs pa dang / sems shin tu sbyangs pa dang / sems rtse gcig pa chung ngu la reg par 'gyur ro/ /de'i 'og tu 'jig rten dang 'jig rten las 'das pa'i phun sum tshogs pa rgya chen po dag kyang thob par 'gyur ro zhes 'doms par byed do/ /de ltar slob dpon rnal 'byor pa rnal 'byor shes pa des slob ma las dang po pa las thog ma pa mi sdug pa la rab tu brtson pa de las 'doms pa na yang dag pa kho nar gtams pa yin la/de ltar sgrub pa na yang yang dag par zhugs pa yin no/ /mi sdug pas 'dul ba la mi sdug pas gdams pa ji lta ba bzhin du byams pas 'dul ba las dbugs rngub pa dang / dbugs 'byung ba dran pa la sogs pa'i mthar thug pa'i bar gyis 'dul ba la yang de bzhin du ci rigs su sbyar bar rig par bya'o/ /de las gzhan pa dag gi sgor 'jug pa dag gi khyad par gang yin pa de ni rnam par dbye bar bya ste/ de la las dang po pa byams pa bsgom pa la brtson pa phyi rol gyi mdza' bshes kyi phyogs dang /tha mal pa'i phyogs la mtshan ma bzung ste/ gnas mal tshul dang mthun par song ste / mnyam par gzhag pa'i sa'i yid la byed pa phan pa dang / bde ba'i lhag pa'i bsam pa dang ldan pas/ dang po kho nar mdza' bshes kyi phyogs gcig dang / dgra bo'i phyogs gcig dang /tha mal pa'i phyogs gcig la mos par byas te / phyogs gsum po de dag la phan pa dang / bde ba'i lhag pa'i bsam pa dang ldan pa'i yid la byed pas/ kye ma sems can bde ba 'dod pa 'di dag 'di lta ste/ 'dod pa'i bde ba kha na ma tho ba med pa dang / dga' ba dang bcas pa'i bde ba kha na ma tho ba med pa dang /dga' ba med pa'i kha na ma tho ba med pas bde bar gyur cig ces mtshungs par nye bar bsgrub par bya'o/ / de'i 'og tu mdza' bshes kyi phyogs gcig dang gnyis dang / gsum dang / bzhi dang / lnga dang / bcu dang / nyi shu dang / sum cu dang / bzhi bcu dang / lnga bcu nas snga ma bzhin du phyogs dang / phyogs mtshams thams cad kyi bar dag mdza' bshes kyis 'dab chags su gang ste/ gang du 'dab chags su ma gyur ba'i go skabs su ni tha na 'khar ba'i rtse mo gzugs pa'i gtos tsam yang med par mos par bya'o/ /mdza' bshes kyi phyogs la ji lta bzhin du dgra bo'i phyogs dang /tha mal pa'i phyogs la yang de bzhin du rig par bya'o/ /byams pa'i sbyor ba de yang mi spong bar byams pa bsgom bzhin du dran pa nye bar gzhag pa dag la 'jug pa kho nar yang byed de/ ji ltar 'jug par byed ce na/ 'di ltar mos par byed pa na 'jug par byed de /'di lta ste/ bdag kyang gzhan dag gi mdza' bshes su grags pa yang yin/ dgra bor gyur pa yang yin/ tha mal par grags pa yin la/ bdag kyang bde bar 'dod pa dang / sdug bsngal dang / mi mthun pa yin no zhes de ltar mos par byed pa de ni de'i nang gi lus la lus kyi rjes su lta ba'i byams pa bsgom pa yin no//sems can 'di dag kyang bdag ji lta ba bzhin du gzhan dag gi mdza' bshes su gyur ba yang yin/ dgra bor gyur pa yang yin/ tha mal par gyur pa yang yin la/ sems can 'di dag kyang bde bar 'dod pa dang / sdug bsngal dang mi mthun pa yin no zhes de ltar mos par byed pa de ni de'i phyi rol gyi lus la lus kyi rjes su lta ba'i byams pa bsgom pa yin no//sems can 'di dag kyang bdag ji lta ba de lta bu yin pas/ ji ltar kho bo bdag bde ba tshol ba de bzhin du sems can 'di dag kyang bdag dang mnyam zhing bdag dang mtshungs pas na/ bdag gis sems can 'di dag la yang bde ba nye bar bsgrub par bya'o zhes de ltar mos par byed pa de ni de'i nang dang /phyi rol gyi lus la lus kyi rjes su lta ba'i byams pa bsgom pa yin no/ /dran pa nye bar gzhag pa bzhi po dag las chos dran pa nye bar gzhag pa ni phung po 'dren ma la dmigs pa'i phyir 'dren ma la dmigs pa'i dran pa nye bar gzhag pa yin no//rnal 'byor pas gzugs kyi mtshan ma kha dog dang dbyibs kyi mtshan ma dang / rnam par rig byed kyi mtshan ma bzung nas mdza' bshes dang / dgra bo dang / tha mal pa'i phyogs la mos par byed pas na de'i phyir de ni lus dran pa nye bar gzhag pa kho na yin par rnam par gzhag go//de la mos pa yid la byed pa la brten nas/ yang dag pa yid la byed pa la yang 'jug ste/ ji ltar 'jug ce na/ 'di ltar mos par byed pa na 'jug par byed de/ bdag gis phan pa dang bde ba dang ldan pa'i lhag pa'i bsam pas sems can tshad med pa'i bar de dag la mos par byas pa de bas ni/bdag gis sngon gyi mtha' las brtsams te sems can gang dag bdag gi mdza' bshes su gyur pa las dgra bo dang / tha mal par song ba dang / dgra bor gyur pa las mdza' bshes dang / tha mal par song ba dang / tha mal par gyur pa las mdza' bshes dang /dgra bor song ba'i mdza' bshes dang / dgra bo dang tha mal pa'i phyogs mngon par 'das pa'i sems can de dag ches tshad med pa yin pas de'i phyir na rnam grangs des na/ sems can 'di dag thams cad ni mnyam zhing mtshungs pa yin te/ 'di la mdza' bshes dang / dgra bo dang / tha mal pa yin zhes bya bar yongs su grub pa ni 'ga' yang med pas na/ rnam pa de nyid kyis kyang phyogs gsum po thams cad la sems mnyam pa nyid dang / phan pa dang / bde ba nye bar bsgrub pa la yang mnyam pa nyid du bya'o/ /sngon gyi mtha' las brtsams nas ji lta ba bzhin du phyi ma'i mtha' las brtsams nas kyang 'khor ba na 'khor ba yod kyi bar du de bzhin du rig par bya'o//bdag gis sngon gyi mtha' las brtsams te/ sems can gang dag la byams pa'i sems kyis rjes su snying brtse bar ma byas par de dag mngon par 'das su zin gyis kyang / 'on kyang de dag la bdag gis 'di lta ste/rang gi sems la rtog pa med pa dang / gnod sems su gyur pa med pa nye bar bzung ste/ kye ma 'das pa'i sems can 'di dag kyang bde bar gyur cig ces rjes su snying brtse bar bya'o/ /gang dag ma 'ongs pa'i dus kyi sems can ma 'das pa de dag kyang / bde bar gyur cig ces de ltar mos par byed pa na 'jug par byed do//da ltar yang dag pa yid la byed pa rjes su zhugs pa'i byams pa la gnas pa de'i bsod nams kyi rgyun dang / dge ba'i rgyun gang yin pa de'i gnan mos pa las byung ba'i byams pa la gnas pa de'i bsod nams kyi phung po gang yin pa de ni brgya'i char nye bar mi 'gro'o//stong gi cha dang grangs dang cha dang bgrang ba dang / dpe dang / rgyur yang nye bar mi 'gro ste/ lhag ma ni snga ma bzhin no/ /de la rkyen 'di pa nyid rten cing 'brel par 'byung ba la rab tu brtson pa'i las dang po pa ni thos pa dang bsams pa'i dbang gis byung ba'i yongs su rtog pas mtshan ma 'dzin par byed do// sems can 'di dag la ni mi shes pas kun du rmongs pa yod de/ des ni 'di dag mngon sum du mi rtag pa la ni rtag par rtog par byed/ mngon sum du mi sdug pa la ni sdug par/ sdug bsngal ba ni bde bar/ bdag med pa la ni bdag du rtog par byed pas na/sems can 'di dag ni phyin ci log gis bslad pa yin te/ bslad pa'i rgyus tshe 'di la tshor ba rnams dang / tshe phyi ma la lus mngon par 'grub pa la srid pa skyed par byed do/ /sred par gyur pas skye ba'i rtsa ba'i las rnams byas pas na/ des na phyi ma la las dang / nyon mongs pa'i rgyu las byung ba sdug bsngal gyi phung po 'ba' zhig po 'di mngon par 'grub par byed do zhes mtshan mar 'dzin par byed do//de ltar mtshan ma bzung nas kyang / bdag gi sdug bsngal gyi phung po 'ba' zhig po 'di yang de kho na lta bur gyur pa yin no zhes nang la mos par byed do/ /lus gang dag mtha' yas mu med pa'i sngon gyi mtha' nas brtsams pa de dag ni sngon gyi mtha' mi mngon te/de dag kyang de lta bur gyur ba yin la/ sems can 'di dag gi 'das pa dang / ma 'ongs pa dang / da ltar byung ba'i lus sdug bsngal gyi phung pos kun du zin pa de dag thams cad kyang de lta bu kho nar mngon par grub pa dang / phyis kyang skye bar 'gyur ba yin no zhes mos par byed do/ /rkyen 'di pa nyid kyi rten cing 'brel par 'byung ba yid la byed pa 'di dag thams cad ni yang dag pa nyid yid la byed pa las byung ba yin gyi mos pa las byung ba ni med do/ /de la yang gang gi tshe bdag nyid kyi da ltar gyi phung po rten cing 'brel bar 'byung ba dag yid la byed pa de'i tshe na ni/nang gi lus dang chos rnams kyi bar la chos kyi rjes su lta zhing gnas pa yin no/ /gang gi tshe gzhan dag gi da ltar gyi phung po rten cing 'brel bar 'byung ba dag yid la byed pa de'i tshe na ni phyi rol gyi lus dang chos rnams kyi bar la chos kyi rjes su lta zhing gnas pa yin no//gang gi tshe bdag dang gzhan dag gis 'das pa dang ma 'ongs pa'i phung po rten cing 'brel ba 'byung ba dag yid la byed pa de'i tshe na ni/ nang dang phyi rol gyi lus dang / chos rnams kyi bar dag la chos kyi rjes su lta zhing gnas pa yin te/ lhag ma ni snga ma bzhin no/ /de la khams rab tu dbye ba la rab tu brtson pa'i las dang po pa ni phyi rol gyi sa'i khams 'di lta ste/sa dang / ri dang / rtswa dang / nags tshal dang / gseg ma dang / gyo mo dang / nor bu dang / mu tig dang / bai DUr+ya dang / rin po che shang ka shi la dang / byi ru la sogs pa thams cad la sra ba'i mtshan ma bzung nas/nang gi sra ba nyid la mos par byed do/ /phyi rol gyi chu'i phung po 'di lta ste/ chu klung dang / 'bab chu dang / mtsho dang / lteng ka dang / khron pa la sogs pa dag la gsher ba'i mtshan ma bzung zhing de bzhin du phyi rol gyi me 'di lta ste/ me'i phung po chen po dang / dpyid ka'i nyi ma'i 'od zer gyis gdungs pa dang /sems can rims kyis btab pa dang / khyim me chen pos tshig pa la sogs pa dang / de bzhin du phyi rol gyi rlung gi phung po 'di lta ste/ shar dang lho dang / nub dang / byang gi rlung la sogs pa dang / de bzhin du phyi rol gyi rlung gi dkyil 'khor gyi bar dag dang / de bzhin du gang dag yul gyis ma khyab pa dang /gzugs kyi rnam pas khyab par bya ba ma yin pa dang / bu gu dang bcas pa dang / sbubs yod pa dang / go skabs yod pa'i nam mkha'i khams de dag las mtshan ma bzung nas/ nang gi chu'i khams dang / me'i khams dang / rlung gi khams dang / nam mkha'i khams la mos par byed do/ /de bzhin du thos pa dang bsams pa'i dbang gis byung ba'i yongs su rtog pas 'di ltar rnam par shes pa'i khams kyi mtshan ma 'dzin par yang byed do/ /gal te nang gi skye mched mig yongs su ma nyams shing gzugs snang bar gyur du zin kyang / de dang 'byung ba yid la byed pa nye bar gnas par ma gyur na/de dang 'byung ba'i mig gi rnam par shes pa 'byung bar mi 'gyur gyi/ de las bzlog na 'byung bar 'gyur ro/ /yid dang chos rnams dang / yid kyi rnam par shes pa'i bar la yang de bzhin du rig par bya'o zhes de ltar rnam par shes pa'i khams kyi mtshan ma 'dzin par byed do//des de ltar mtshan ma bzung nas kyang 'byung ba chen po bzhi las gyur pa'i lus 'di la ni rnam par shes pa de dag thams cad kyi sa bon dang / khams dang / rigs dang / rang bzhin yod do zhes mos par byed do/ /'byung ba chen po bzhi po de dag kyang dang po kho nar yan lag dang /nying lag dag la rags par yod do zhes mos par byed do/ /de'i 'og tu cha shas kyi rab tu dbye bas shin tu phra bar mos par byed do/ /de bzhin du nyi zer gyi nang na yod pa'i rdul dang mnyam pa'i bar dang / de bzhin du khad kyis khad kyis rdul phra rab kyi bar du mos par byed do//de yan lag dang / cha shas re re la yang rdul phra rab kyi tshogs tshad med pa dag yod par mos par byed na/ lus thams cad lta smos kyang ci dgos te/ de ni re zhig khams rab tu dbye ba la rab tu brtson pa'i khams gzugs can rnams kyi rab tu dbye ba'i mtha' yin no/ /nam mkha'i khams la ni dang po kho nar mig sbubs yod pa dang /rna ba dang / sna dang / mid pa sbubs yod pa dang / gang gis mid par byed pa dang / gang du mid par byed pa dang / gang gis de'i mid pa smad kyi char 'dzag par byed pa de ni/ nam mkha'i khams rags pa yin no zhes mos par byed do/ /de'i 'og tu khad kyis khad kyis spu'i khung bu thams cad kyi bar du sbubs dang ldan par mos par byed do//rnam par shes pa'i khams la ni khad kyis khad kyis gnas pa dang / dmigs pa dang / yid la byed pa dang / dus dang / rnam pa'i bar du dbye ba tshad med pa yod par mos par byed do/ /rnam par shes pa'i khams kho na la mos par byed pa na/gnas dang dmigs pa la mos pas rnam par shes pa'i khams de nyid kyi rgyur byas pa'i gzugs rnam pa bcu po dag la yang mos par byed de/ /de dag kyang ji ltar gyur pa de lta bu kho na yin no/ /de gal te bdag nyid kyi nang gi khams la mos par byed pas na/de nang gi dran pa nye bar gzhag pa rnams la spyod pa yin no/ /gal te sems can du bgrang ba ma yin pa gzhan dag gi khams la mos par byed na ni phyi rol gyi dran pa nye bar gzhag pa rnams la spyod pa yin no/ /gal te sems can du bgrang ba gzhan dag gi khams la mos par byed na ni/nang dang phyi rol gyi dran pa nye bar gzhag pa rnams la spyod pa yin no/ / gzhan yang bdag nyid kyi lus 'di 'chi ba dang / snga ma bzhin du rnam par rnags pa'i gnas skabs su gyur pa'i bar du mos par byed de/ rnam par rnags pa yang rnag rab tu 'dzag par mos par byed cing /de khad kyis khad kyis rnag gi rgyun des rgya mtsho'i mthar thug pa'i bar gyis gzhi chen po rnag gis yongs su gang bar mngon par spel zhing mos par yang byed do/ /lus de rnam pa mtha' yas par mos par byas nas me'i phung po chen po mtha' yas mu med pa'i mes tshig par yang mos par byed cing /me zhi nas kyang rus pa'i lhag rol dang / thal ba'i lhag rol tsam zhig lus la mos pa mtha' yas mu med pas mos par byed do/ /rus pa de dag kyang rlung gi phung po tshad med pas phye mar lhags te/ phyogs phyogs su gtor zhing khyer bar yang mos par byed do/ /khyer nas kyang rus pa de dag dang /thal ba de dag dang / rlung de dag mi snang bar lhag ma nam mkha'i khams tsam zhig lus par snang bar mos par byed de/ de ltar na re zhig nang dang / phyi rol gyi mi sdug pa'i sbyor ba la brten pa'i mos pa yid la byed pas khams rab tu dbye ba la 'jug pa'i phyir lus la lus kyi rjes su lta zhing gnas par byed do//de ltar mos par byed pa na yang dag pa'i yid la byed pas kyang 'di ltar nang dang / phyi rol gyi lus la lus kyi rjes su lta zhing gnas par byed de/ bdag gi chu'i khams dang / me'i khams dang / sa'i khams dang / rlung gi khams dang /nam mkha'i khams kyi bar tshad med pa de dag la mos par byas pa de bas ni/ bdag 'khor ba na 'khor ba'i tshe/ ma shi ba dang / pha shi ba dag dang / phu nu dang / bu srid dang / nye du shi ba dag dang / longs spyod zad pa dang / nor zad pa dag na mchi ma rab tu zags shing mchi ma rgyud blags pa dang /ma'i nu zho 'thungs pa dang / rkun po dang / lam 'gog pa dang / khyim 'bugs pa dang / mdud pa 'grol ba dag 'byung bas de lag pa bcad pa dang / rkang pa bcad pa dang / mgo bcad pa dang / sna bcad pa dang / yan lag dang / nying lag rnam pa sna tshogs dpag tu med pa dag bcad pa nyams su myong bar gyur pa des na/khrag dpag tu med pa dag byung zhing rab tu zags par gyur ba gang yin pa de dag ches dpag tu med de/ mchi ma dang / 'o ma dang / khrag gis yongs su zin pa'i chu'i khams kyi chu'i phung po gang yin pa de'i gan na/ rgya mtsho chen po bzhi chus yongs su gang bas ni brgya'i char yang nye bar mi 'gro'o zhes bya ba nas rgyas par snga ma bzhin no/ /srid pa dang 'gro ba de dang de dag tu 'chi 'pho ba dang / skye ba dag na lus rnams mes bsregs par gyur pa'i me'i phung po gang yin pa de yang ches tshad med de/ de la ni dpe yang tshad med do/ / sa'i khams kyi rus pa zhigs par gyur pa dag kyang ches tshad med do/ /gang gi lus de dag rab tu g.yo bar byed pa'i rlung gi khams de yang ches tshad med do/ /lus de dag gi mig la sogs pa sbubs yod pa'i nam mkha'i khams kyang ches tshad med do/ /da ltar gyi tha ma'i lus 'di la thug pa'i bar gyi lus sar pa sar pa dag yang dang yang du len par byed pa'i rnam par shes pa'i rgyun de yang ches tshad med de/de'i rnam par shes pa'i rgyun la gnas pa'i 'gro ba de yang phyi ma'i mthar ni ma nges te/ de ltar rnam par shes pa'i khams kyi bar 'di ni tshad med pa yin no zhes de ltar mos par byed do//de la dbugs rngub pa dang / dbugs 'byung ba dran pa'i rnal 'byor la rab tu brtson pa'i las dang po pa ni/ gnas khang g.yas g.yon gyi sgo'i rnam pa las sam/ lcags mgar gyi spud pa dag las sam/ gser mgar gyi shing sbud las sam/ phyi rol gyi rlung gi phung po dag las rlung phyir 'byung ba dang / nang du 'jug pa dang / 'ong ba dang / 'gro ba'i mtshan ma bzung nas nang gi dbugs rngub pa dang / dbugs 'byung ba'i dmigs pa dran pas/ dbugs rngub pa dang / dbugs 'byung ba la mos par byed do/ /de dang po kho nar kha dang sna'i phyogs su sbubs rags pa nas/'gro ba dang ldog pa'i rlung shin tu phra zhing chung ba la mos par byed do/ /de nas khad kyis khad kyis rlung de ches che ba dang / ches mang bar mos par byed cing spu'i khung bu thams cad kyi bar du zhugs par mos par byed de/ 'di ltar lus thams cad rlung gi phung po dang 'brel pa dang /rlung gi phung pos yongs su bskor ba dang / rlung gi phung pos nye bar dkris pa dang / rlung gi phung po tshad med pa'i nang na 'dug cing 'di lta ste/ dper na/ shing bal gyi 'da' ba dang / ras bal gyi 'da' ba ltar yang ba nyid du mos par yang byed do//de gang gi tshe dbugs rngub pa dang / dbugs 'byung ba'i rgyun 'jug pa ma nyams pa yid la byed pa de'i tshe na ni/ nang gi lus la lus kyi rjes su lta zhing gnas pa yin no/ /gang gi tshe gzhan dag gi shi ba'i lus rnam par bsngos pa la sogs pa'i gnas skabs su gyur cing dbugs rngub pa dang /dbugs 'byung ba'i rgyun 'jug pa ma nyams pa yid la byed pa de'i tshe na ni/ phyi rol gyi lus la lus kyi rjes su lta zhing gnas pa yin no/ /gang gi tshe bdag nyid 'chi ba'am/ shi bar mos par byed cing dbugs rngub pa dang / dbugs 'byung ba'i rgyun 'jug pa dang bral bar mos par byed pa de'i tshe na ni/nang dang phyi rol gyi lus la lus kyi rjes su lta zhing gnas pa yin no/ /sbyor ba thams cad la yang zhi gnas kyi phyogs dang ldan pa dang / zhi gnas kyi phyogs kyis yongs su zin par mos par byed de/ lhag ma gzhan thams cad ni snga ma bzhin du rig par bya'o//de ltar las dang po pa yang dag par gtams pa de yang dag pa nyid du sgrub par byed pa na/ brtun pa dang / shes bzhin dang / dran pa dang ldan zhing 'jig rten la brnab sems dang yid mi bde ba rnam par bsal te gnas pa yin no/ /de la re zhig sbyor ba de la rgyun du byed pa dang / legs par byed cing yid la byed pa yang dag par thob pa bre mo gtam la sogs pas spong bar mi byed pa gang yin pa de ni de'i brtun pa yin no/ /de'i zhi gnas dang lhag mthong sgom pa'i sbyor ba de la rnam par g.yeng ba dang / rnam par g.yeng ba med pa yongs su shes pa la sems gtod pa gang yin pa de ni/de'i shes bzhin dang dran pa dang ldan pa yin no/ /kun du skyo bar 'gyur ba'i mtshan ma dang / dang bar 'gyur ba'i mtshan ma legs par rab tu gzung ba gang yin pa de ni de'i 'jig rten la brnab sems dang / yid mi bde ba rnam par bsal ba yin no/ /de ltar brtun pa dang 'jig rten la brnab sems dang yid mi bde ba rnam par bsal ba'i bar la gnas pa de'i dang po kho nar yang dag pa'i sbyor ba la brtson pa'i che sems shin tu sbyangs pa dang lus shin tu sbyangs pa dang /sems dang lus las su rung ba 'byung ba ni phra ba ste/ brtag par dka' ba yin no/ /de la zhi gnas dang lhag mthong bsgom pa na sems shin tu sbyangs pa dang /lus shin tu sbyangs pa dang / sems dang lus las su rung ba gang yin pa de ni lus dang sems shin tu sbyangs pa yin no/ /de ni sems rtse gcig pa nyid dang / sems dang lus shin tu sbyangs pa de nyid mngon par 'phel ba na/ 'di lta ste/ rgyu gcig nas gcig tu brgyud de len pa'i tshul gyis rags shing brtag par sla ba'i sems rtse gcig pa nyid dang / sems dang lus shin tu sbyangs pa 'dren par byed de/ ji tsam na de'i rags shing brtag par sla ba'i sems rtse gcig pa nyid dang / sems dang lus shin tu sbyangs pa yang ring por mi thogs par skye bar 'gyur ba'i snga ltas su de'i sra ba lci bar snang ba skye bar 'gyur te/de yang gnod pa'i mtshan nyid ni ma yin no/ /de skyes ma thag tu spong ba la dga' ba'i bar chad byed pa nyon mongs pa rnams kyi phyogs su gyur pa sems kyi gnas ngan len gang yin pa de spong bar 'gyur zhing de'i gnyen po sems las su rung ba dang /sems shin tu sbyangs pa yang skye bar 'gyur ro/ /de skyes pas lus shin tu sbyangs pa skye ba dang mthun pa/ 'byung ba chen po'i rlung dag lus la rgyu bar 'gyur te/ de dag kyang rgyu ba'i rgyus na spong ba la dga' ba'i bar chad byed pa'i nyon mongs pa'i phyogs su gyur pa lus kyi gnas ngan len gang yin pa de dang 'bral bar 'gyur zhing /de'i gnyen po lus shin tu sbyangs pas lus thams cad rgyas te gang ba bzhin du snang bar 'gyur ro/ /dang por de skyes par gyur pa de'i tshe na sems dga' ba dang / sems shin tu nyams bde ba dang /sems mchog tu dga' ba dang ldan pa la dmigs pa dang / mngon par dga' ba dang bcas pa yang snang bar 'gyur ro/ /de'i 'og tu shin tu sbyangs pa'i shugs dang po skyes pa gang yin pa de khad kyis khad kyis shin tu phra bar 'gyur zhing / lus la shin tu sbyangs pa grib ma lta bu dang ldan par 'gyur ro//sems dga' ba gang yin pa de yang spong bar 'gyur zhing / sems zhi gnas kyis nye bar brtan zhing rab tu zhi ba'i rnam pas dmigs pa la 'jug par 'gyur ro/ /de'i 'og tu rnal 'byor ba las dang po pa de yid la byed pa dang bcas pa yin te/ yid la byed pa dang bcas pa zhes bya ba'i grangs su 'gro'o//de ci'i phyir zhe na/ des dang por gzugs na spyod pa mnyam par gzhag pa'i sa pa'i yid la byed pa chung ngu thob pa'i phyir te/ des na yid la byed pa dang bcas pa zhes bya'o/ /las dang po pa yid la byed pa dang bcas pa de'i rtags ni 'di dag yin te/ des gzugs na spyod pa'i sems chung ngu thob pa dang /lus shin tu sbyangs pa dang / sems shin tu sbyangs pa dang / sems rtse gcig pa chung ngu thob pa dang / nyon mongs pa rnam par sbyong ba'i dmigs pa la sbyor ba'i skal pa yod cing nus pa dang / de'i sems kyi rgyud 'jam par 'gyur ba dang / zhi gnas kyis nye bar dkris pa dang / des spyad pa rnam par sbyong ba yang spyad zin pa yin te/gal te chags par 'gyur ba'i yul la spyod par gyur kyang / 'dod chags kyi kun nas dkris pa drag po skye bar mi 'gyur zhing / gnyen po cung zad tsam dang ngan ngon tsam la brten cing cung zad brtsal ba tsam gyis sel nus par 'gyur ba dang / zhe sdang bar 'gyur ba dang /gti mug par 'gyur ba dang / khengs par 'gyur ba dang / mthun pa dang / rnam par rtog par 'gyur ba dang / mthun pa'i yul rnams la yang de bzhin du rig par bya'o/ /de nang du yang dag 'jog la 'dug ste/ sems gtod par byed pa na/ myur ba myur bar sems dang lus shin tu sbyangs par 'gyur ba dang /lus kyi gnas ngan len dag gis shin tu gnod par mi 'gyur ba dang / sgrib pa rnams shas cher kun du mi rgyu ba dang / 'dod pa dang dga' ba dang / yongs su gdung ba dang ldan pa'i 'du shes yid la byed pa shas cher kun du mi 'byung ba dang /langs te rgyu ba na yang lus dang sems la shin tu sbyangs pa kha cig dang ldan par 'gyur ba dang / de lta bu dang mthun pa dag ni yid la byed pa dang bcas pa'i rtags dang / mtshan ma yongs su byang ba dag yin par rig par bya'o/ /bsdus pa'i sdom ni/ 'gro ba dang ni gsol ba dang //gzengs bstod dri dang brtag pa dang / /bsrung zhing bsags dang rab dben dang / /rtse gcig sgrib pa rnam spyod dang / /yid la byed pa bsgom pa la/ /nges par sbyar bar bya ba yin/ /rnal 'byor spyod pa'i sa nyan thos kyi sar gtogs pa las/ rnal 'byor gyi gnas gsum pa rdzogs so// //nyan thos kyi sa bam po bcu bdun pa/ de ltar yid la byed pa thob pa'i rnal 'byor ba spong ba'i dge ba chung ngu la zhugs pa de'i grong du bgrod par bya ba ni gzhan med de gnyis po kho nar zad do/ /gnyis gang zhe na/ 'di lta ste/ 'jig rten pa'i dang / 'jig rten las 'das pa'i'o/ /de la las dang po pa'i rnal 'byor ba yid la byed pa dang bcas pa de ni/ bdag 'jig rten pa'am/ 'jig rten las 'das pa'i bgrod pas 'gro bar bya'o snyam nas/ yid la byed pa de nyid la lan mang du byed do/ /ji lta ji ltar lan mang du byed pa de lta de ltar nyin mtshan de dang de dag 'das pas de'i lus shin tu sbyangs pa dang sems rtse gcig pa nyid de 'phel zhing rgyas pa dang /yangs par 'gyur ro/ gang gi tshe de'i yid la byed pa dam zhing brtan la sra ba dang / dmigs pa yongs su dag pa la mos pa 'jug par 'gyur ba dang /zhi gnas dang / lhag mthong gi phyogs kyi mtshan ma rnams kyang yongs su zin par gyur pa de'i tshe na de la 'jig rten pa'i lam mam/ 'jig rten las 'das pa'i lam gang gis 'gro bar 'dod pa de la sbyor ba brtson par byed do/ /de la gang dag tshe 'di la 'jig rten pa'i lam kho nas 'gro bar 'gyur zhing /'jig rten las 'das pa'i lam gyis ma yin pa'i gang zag du yod ce na/ smras pa/ bzhi ste/ 'di lta ste/ 'di las phyi rol pa thams cad dang / chos 'di ba yin yang sngon zhi gnas spyod spyod pa dbang po rtul ba dang / de bzhin du dbang po rno yang dge ba'i rtsa ba yongs su ma smin pa dang / byang chub sems dpa' phyi ma la byang chub thob par 'dod cing tshe 'di la ma yin pa ste /gang zag de bzhi ni tshe 'di nyid la 'jig rten pa'i lam gyis 'gro bar 'gyur ba yin no/ /'jig rten pa'i lam gyis 'gro ba de yang rnam pa gnyis te/ 'ching ba mtha' dag yod pa so so'i skye bo rnams dang / 'ching ba ma tshang ba'i slob ma rnams so//de dag kyang gang zhe na/ 'dod pa rnams la rags par lta zhing snyoms par 'jug pa dang / skye ba dang bcas pa'i bsam gtan dang po la zhi bar lta bar 'dod pa'i 'dod chags dang bral bar 'gro ba gang yin pa dang / de bzhin du ci yang med pa'i skye mched kyi bar gyi 'dod chags dang bral par bya ba dang /de bzhin du 'du shes med pa la snyoms par 'jug pa dang / bsam gtan la brten nas mngon par shes pa lnga mngon par sgrub par byed pa rnams yin par rig par bya'o/ /de la 'dod pa'i 'dod chags dang bral bar bya ba'i phyir rab tu brtson pa'i rnal 'byor pa ni yid la byed pa rnam pa bdun gyis 'dod pa'i 'dod chags dang bral ba rjes su 'thob po//bdun po de dag kyang gang zhe na/ smras pa/ mtshan nyid so sor rig pa dang / mos pa las byung ba dang / rab tu dben pa dang / dga' ba sdud pa dang / spyod pa'i yid la byed pa dang / sbyor ba mthar thug pa'i 'bras bu yid la byed pa'o//de la mtshan nyid du so sor rig pa'i yid la byed pa gang zhe na/ smras pa/ yid la byed pa gang gis 'dod pa rnams la rags pa'i mtshan nyid du so sor rig par byed cing / bsam gtan dang po la zhi ba'i mtshan nyid du so sor rig par byed pa'o/ /ji ltar na 'dod pa rnams la rags pa'i mtshan nyid du so sor rig par byed ce na/smras pa/ 'dod pa rnams kyi gzhi drug po don dang / dngos po dang / mtshan nyid dang / phyogs dang / dus dang / rigs pa yongs su tshol ba na rags pa'i mtshan nyid du so sor rig par byed de/ de la re zhig rags pa'i don yongs su tshol ba ni/'di ltar 'dod pa 'di dag ni nyes dmigs dang bcas pa'o/ /gnod pa mang ba'o/ /yams kyi nad lta bu mang ba'o/ /'go ba'i nad lta bu mang ba'o zhes/ rags pa'i don yongs su tshol bar byed pa ste/ 'dod pa de dag la nyes dmigs mang po dang / 'go ba'i nad lta bu mang po'i bar dag yod pa gang yin pa de dag ni rags pa'i don yin no//de la dngos po yongs su tshol ba ni nang gi 'dod pa dag la 'dod pa la 'dun pa yod pa dang / phyi rol gyi 'dod pa dag la yang 'dod pa la 'dun pa yod do zhes yongs su tshol bar byed pa'o/ /de la rang gi mtshan nyid yongs su tshol ba ni 'di dag ni nyon mongs pa'i 'dod pa'o//'di dag ni dngos po'i 'dod pa'o/ /de dag kyang bde ba'i gnas dang mthun pa dag dang / sdug bsngal gyi gnas dang mthun pa dag dang / sdug bsngal yang ma yin/ bde ba yang ma yin pa'i gnas dang mthun pa dag ste/de la bde ba'i gnas dang mthun pa dag ni 'dod pa'i 'dod chags kyi gnas dang / 'du shes phyin ci log dang / sems phyin ci log gi gnas dag yin no/ /sdug bsngal gyi gnas dang mthun pa dag ni/ zhe sdang gi gnas dang / khro ba dang khon du 'dzin pa'i gnas dag yin no/ /sdug bsngal yang ma yin/bde ba yang ma yin pa'i gnas dang mthun pa dag ni/ 'chab pa dang / 'tshig pa dang / sgyu dang / g.yo dang / ngo tsha med pa dang / khrel med pa'i gnas dang / lta ba phyin ci log gi gnas dag yin te/ de ltar na 'dod pa 'di dag ni rab tu gnod pa'i tshor ba dang ldan pa dang /rab tu gnod pa'i nyon mongs pa dang ldan pa yin no zhes de ltar 'dod pa rnams kyi rang gi mtshan nyid yongs su tshol bar byed do/ /de la ji ltar na spyi'i mtshan nyid yongs su tshol bar byed ce na/ 'dod pa 'di dag thams cad ni skye ba'i sdug bsngal dang / rga ba'i sdug bsngal dang / 'dod pas phongs ba'i sdug bsngal gyi bar dang / mnyam zhing mtshungs par rjes su 'brel zhing gnas pa yin te/ gang dag 'dod pa la longs spyod pa'i / 'dod pa'i 'byor pa chen po dang ldan pa de dag kyang skye ba la sogs pa'i chos nyid las rnam par ma grol bas de dag gi 'byor ba de yang brnyan ma yin no zhes de ltar 'dod pa rnams kyi spyi'i mtshan nyid yongs su tshol bar byed do//ji ltar na phyogs yongs su tshol bar byed ce na/ 'dod pa 'di dag ni nag po'i phyogs kho nar gtogs pa te / rus pa'i keng rus lta bu dang / sha'i kham tshad lta bu dang / rtswa'i sgron ma lta bu dang / me mdag gi dong lta bu dang /sbrul gdug pa lta bu dang / rmi lam lta bu dang / brnyan po'i rgyan lta bu dang / shing ki ma pa ka'i 'bras bu lta bu yin te/ sems can rnams 'dod pa yongs su tshol bar byed pa na yang 'dod pa yongs su tshol ba las byung ba'i sdug bsngal du ma nyams su myong bar 'gyur ba dang / kun du bsrung ba las byung ba dang / mdza' ba yongs su nyams pa las byung ba dang / ngoms mi shes pa las byung ba dang / rang dbang med pa las byung ba dang / nyes par spyad pa las byung ba'i sdug bsngal nyams su myong bar 'gyur te/ de dag thams cad ni snga ma bzhin du rig par bya'o//bcom ldan 'das kyis kyang de ltar 'dod pa la brten pa'i nyes dmigs lnga gsungs te/ 'dod pa rnams ni mnog chung la sdug bsngal mang zhing nyes dmigs mang ba dang / 'dod pa rnams la brten pa na ngoms mi myong / chog mi shes shing snying tshim pa'i mtha' med pa dang / dam pa rnams dang /yang dag par song ba rnams dang / skyes bu dam pa rnams kyis 'dod pa rnams rnam grangs du mas smad pa dang / 'dod pa rnams la brten pa na kun du sbyor ba rnams nye bar stsogs par 'gyur ba dang / des sdig pa mi dge ba'i chos mi bya ba cung zad kyang med do zhes gsungs so/ /de lta bas na 'dod pa de dag ni mi ngoms par byed pa dang /mang po dang thun mong yin pa dang / chos ma yin pa dang / spyod pa ngan pa'i rgyur 'gyur ba dang / 'dod pa dang / sred pa 'phel bar byed pa dang / dam pa rnams kyis spang ba'i 'os su gyur pa dang / myur du 'jig par gyur pa dang / rkyen la brten pa dang / bag med pa'i sa yin te/ mi rtag pa dang / gsog dang / gsob dang / brdzun pa dang / slu ba'i chos can dang / sgyu ma lta bu dang / byis pa 'drid pa yin pas tshe 'di'i 'dod pa gang dag yin pa dang / tshe phyi ma'i 'dod pa gang dag yin pa dang / lha'i 'dod pa gang dag yin pa dang /mi'i 'dod pa gang dag yin pa de dag ni bdud kyi spyod yul lo/ /de dag ni bdud kyi gzan ma ste/ de dag la ni 'di lta ste/ brnab sems dang / gnod sems dang / nyes rtsom dang / sdig pa mi dge ba'i las rnams rnam pa du ma dag 'byung zhing 'phags pa nyan thos gang dag 'di la slob pa de dag gi bar chad byed pa yin te/'dod pa 'di dag ni shas cher de ltar rnam grangs du mar nag po'i phyogs kho nar gtogs pa yin no zhes de ltar phyogs su yongs su tshol bar byed do/ /ji ltar na dus yongs su tshol bar byed ce na / 'dod pa de dag ni 'das pa dang /ma 'ongs pa dang / da ltar byung ba'i dus rnams su yang rtag pa rtag pa'i dus dang ther zug ther zug gi dus su de ltar gnod pa mang ba dang / 'go ba'i nad lta bu'i bar mang ba dang / nyes dmigs mang ba yin no zhes de ltar dus yongs su tshol bar byed do//ji ltar na rigs pa yongs su tshol bar byed ce na/ 'dod pa rnams ni brtsal ba chen po dang / yongs su brtsal ba chen po dang / ngal ba chen po dang / las dang bzo'i gnas rnam pa sna tshogs dag gis sdud par byed/ sgrub par byed cing / nye bar stsogs par byed pa de dag legs par bsdus/legs par bsgrubs/ nye bar bsags nas kyang 'di lta ste/ pha ma dang / bu dang / chung ma dang / bran pho dang / bran mo dang / las mi dang / zho shas 'tsho ba dang / mdza' bshes dang / blon po dang / nye du dang / snag gi gnyen mtshams rnams kyi phyi rol gyi yongs su bzung ba'i dngos po rnams dang /nang gi lus gzugs can rags pa 'byung ba chen po'i rgyu las byung ba 'bras chan dang / zan dron gyis nye bar gsos pa rtag tu bsku ba dang / bkru ba dang / mnye bas nye bar brten pa dang / 'bral ba dang / 'thor ba dang / 'jig pa'i chos can 'di byung ngo cog ni sdug bsngal sel ba tsam du 'gyur bar zad de/bkres pa'i sdug bsngal sel ba ni kha zas yin no/ /grang ba'i sdug bsngal sel ba dang / ngo tsha ba'i gnas pa car gyis g.yogs pa ni gos yin no/ /gnyid kyi snyoms pa'i sdug bsngal sel ba dang / chags pa dang / sdod pa'i sdug bsngal sel ba ni mal cha dang stan yin no/ /nad kyi sdug bsngal sel ba ni na ba'i gsos sman yin te/ de ltar 'dod pa 'di dag ni sdug bsngal sel bar byed pa tsam du zad pas/ 'di dag la chags pas yongs su longs spyad par mi bya zhing zhen pas kyang ma yin te/ nad kyis btab pa'i nad pas nad zhi bar bya ba tsam gyi phyir sman pa bsten pa lta bu yin pas/yid ches pa'i lung yang de nyid yin la/ 'dod pa de dag ji lta ji ltar rags pa yin pa de lta de ltar bdag nyid la ye shes dang / mthong ba 'jug pa yang yod/ rjes su dpag pa'i bya ba yang de nyid yin te/'dod pa 'di dag gi rang bzhin ni thog ma med pa'i dus nas grags pa'i chos nyid dang / bsam gyis mi khyab pa'i chos nyid yin pas/ de dag ni bsam par mi bya zhing / rnam par brtag par mi bya'o zhes de ltar rigs pa yongs su tshol bar byed do/ /des 'di lta ste/ gzhi drug po dag gis de ltar 'dod pa rnams la rags pa'i mtshan nyid du so sor rtogs pa nas bsam gtan dang po la zhi ba'i mtshan nyid du so sor rtog par byed de/bsam gtan dang po la ni 'dod pa'i khams kyi rags pa gang yin pa de lta bu rnam pa thams cad kyi sgo nas med do zhes/ des bsam gtan dang po ni rigs pa nyid dang bral ba'i phyir zhi ba yin no zhes de ltar bsam gtan dang po la zhi ba'i mtshan nyid du so sor rtog par byed do /mnyam par gzhag pa'i sa pa'i yid la byed pa gang gis 'dod pa rnams la rags pa'i mtshan nyid dang / bsam gtan dang po la ni zhi ba'i mtshan nyid du so sor rtog par byed pa de ni/mtshan nyid so sor rig pa'i yid la byed pa zhes bya ste/ yid la byed pa de yang thos pa dang / bsam pa dang / 'dres pa yin par rig par bya'o/ /des de ltar 'dod pa rnams yongs su shes nas bsam gtan dang po la yongs su tshol ba dang / rags pa'i zhi ba'i mtshan nyid ji lta ba bzhin gyis thos pa dang bsam pa las yang dag par 'das nas/gcig tu bsgom pa'i rnam pas mos par byed cing / mtshan ma de nyid la dmigs pa'i zhi gnas dang / lhag mthong sgom par byed do/ /sgom par byed pa la ji ltar yongs su tshol ba dang / rags pa zhi ba'i mtshan nyid de dag la yang dang yang du zhi bar byed de/de ni mos pa las byung ba'i yid la byed pa zhes bya'o/ /de kun du bsten cing goms par byas/ lan mang du byas pa'i rgyus dang po kho nar nyon mongs pa spong ba'i lam skye bar 'gyur zhing / nyon mongs pa spong ba'i lam yang dag par skyes pa gang yin pa de dang ldan pa'i yid la byed pa de ni rab tu dben pa'i yid la byed pa zhes bya'o//des dang po 'dod pa na spyod pa'i nyon mongs pa spangs pa dang / de'i phyogs kyi gnas ngan len dang bral ba'i phyir de'i 'og tu spong ba la dga' ba dang / rab tu dben pa la dga' bar 'gyur zhing / spong ba de la phan yon du mthong ba dang / rab tu dben pa las skyes pa'i dga' ba dang / bde ba chung ngu la reg nas 'di lta ste/ rmugs pa dang / gnyid dang / rgod pa spang ba'i phyir dang / dus dus su rab tu dang bar 'gyur ba'i yid la byed pas yang dag par rab tu dga' bar byed cing /kun du skyo bar 'gyur ba'i yid la byed pas kun du sbyor bar byed pa de ni dga' ba sdud pa'i yid la byed pa zhes bya'o/ /de ltar spong ba'i dga' ba dang / sgom pa'i dga' ba la yang dag par rab tu brtson pa na rgyu'am gnas kyang rung ste/ de la dge ba'i phyogs la sbyor ba la/ bgegs byed par 'dod pa dang ldan pa'i nyon mongs pas kun nas dkris pa kun du 'byung bar mi 'gyur ba na/ de 'di snyam du sems te/ ci bdag la 'dod pa rnams la 'dod pa la 'dun pa yod bzhin du mi myong ngam/ 'on te med pas so sor mi myong snyam du sems shing de yongs su dpyod par 'dod pas rab tu dang bar 'gyur ba'i mtshan ma sdu gu gang yang rung ba yid la byed de/de'i bag la nyal thams cad kyi thams cad du ma spangs pa'i phyir mtshan ma de yid la byed pa na/ bsten pa la gzhol ba dang / bsten pa la 'bab pa dang / bsten pa la bab pa'i sems 'byung bar 'gyur zhing /btang snyoms su mi gnas la yid 'byung ba dang / smon pa dang / phyir ldog pa dang / mi mthun pa gnas na/ de 'di snyam du sems te/ bdag gi sems ni 'di lta ste/ 'dod pa rnams las yang dag par 'dod chags dang bral zhing rnam par grol ba ma yin no snyam nas/des bag la nyal de'i lhag ma ma lus par rgya cher spangs pa'i phyir/ bdag gi sems mngon par 'du byed pas/ mngon par zin pa dang / chu bzhin du bcus pa dang / chos nyid kyis mngon par zin pa des spong ba la dga' ba dang / bsgom pa la dga' ba rgya cher gnas par bya'o snyam pa de ni dpyod pa'i yid la byed pa zhes bya'o//de de ltar spang ba la dga' ba dang / sgom pa la dga' bar rgya cher gnas shing zhi gnas dang / lhag mthong bsgom pa la rab tu brtson par byed pa na/ yang dang yang du dpyod par byed cing de'i gnyen po sgom par byed de/ dus dus su spangs pa dang /ma spangs pa nyid la dpyod par byed pa na/ 'dod pa na spyod pa'i nyon mongs pa thams cad las re zhig tsam gyi tshul gyis sems 'bral bar byed cing / sa bon gtan bcom pa ni ma yin te/ de'i tshe na bsam gtan dang po la sbyor ba'i lam gyi mthar thug pa nyon mongs pa thams cad kyi gnyen por gyur pa'i yid la byed pa yang dag par skyes pa de ni sbyor ba mthar thug pa'i yid la byed pa zhes bya'o//de'i mjug thogs kho nar rgyu de dang rkyen des bsam gtan dang po'i dngos gzhi la snyoms par 'jug cing bsam gtan gyi dngos gzhi dang ldan pa'i yid la byed pa skyes pa de ni/ sbyor ba mthar thug pa'i 'bras bu yid la byed pa zhes bya'o//de la rab tu dben pa yid la byed pa dang / dga' ba sdud pa yid la byed pa skyes par gyur pa de'i tshe ni dben pa las skyes pa'i dga' ba dang / bde bas lus yongs su tshim par byed do/ /sbyor ba mthar thug pa'i yid la byed pa de'i tshe na ni/lan 'ga' lan 'ga' ni bde ba'i dngos po chung ngu'i tshul gyis khyab par byed do/ /lan 'ga' lan 'ga' ni bde ba'i dngos po shin tu mang po dang / shin tu rgya chen po'i tshul gyis khyab par byed do/ /sbyor ba mthar thug pa'i 'bras bu'i yid la byed pa skyes pa'i tshe na ni/ 'di lta ste/ lus thams cad dben pa las skyes pa'i dga' ba dang / bde bas ma khyab pa dang / khyab par bya ba cung zad kyang med do/ /de de'i tshe na 'dod pa dag las dben pa'i sdig pa mi dge ba'i chos rnams la dben pa/ rtog pa dang bcas pa/ dpyod pa dang bcas pa/ dben pa las skyes pa'i dga' ba dang bde ba can/bsam gtan dang po'i yan lag lnga bsgrubs te gnas pa dang / 'dod pa na spyod pa'i gnyen po'i lam bsgoms pa'i 'bras bu la gnas pa dang / 'dod pa rnams la 'dod chags dang bral ba thob pa zhes bya'o/ /de la mtshan nyid so sor rig pa'i yid la byed pas ni spang bar bya ba gang yin pa de yang /yongs su shes par byed/ thob par bya ba gang yin pa de yongs su shes par byed cing / spang bar bya ba spang ba dang / thob par bya ba thob par bya ba'i phyir sems gtod par yang byed do/ /mos pa las byung ba'i yid la byed pas ni spang bar bya ba dang /thob par bya ba'i phyir yang dag par sbyor ba rtsom par byed do/ /rab tu dben pa'i yid la byed pas ni nyon mongs pa chen po spong bar byed do/ /dga' ba sdud ba'i yid la byed pas ni nyon mongs pa'i rnam pa 'bring po spong bar byed do/ /dpyod pa'i yid la byed pas ni/thob pa la mngon pa'i nga rgyal med pa la sems 'jog par byed do/ /sbyor ba mthar thug pa'i yid la byed pas ni/ nyon mongs pa'i rnam pa chung ngu spong bar byed do/ /sbyor ba mthar thug pa'i 'bras bu yid la byed pas ni/ yid la byed pa'i rnam pa de dag bsgoms pa'i 'bras bu nyams su myong bar byed do//gzhan yang mtshan nyid so sor rig pa yid la byed pa gang yin pa dang / mos pa las byung ba'i yid la byed pa gang yin pa de ni sun 'byin pa'i gnyen po dang ldan pa ste/ rjes su mthun pa'i yid la byed pa yin no/ /rab tu dben pa'i yid la byed pa gang yin pa dang /sbyor ba mthar thug pa'i yid la byed pa gang yin pa de ni spong ba'i gnyen po dang ldan pa ste/ gnyen po yid la byed pa yin no/ /de la dga' ba sdud pa'i yid la byed pa gang yin pa de ni/ gnyen po yid la byed pa dang / dang bar 'gyur ba'i yid la byed pa yin no/ /de la spyod pa'i yid la byed pa gang yin pa de ni/so sor rtog pa'i yid la byed pa zhes bya ste/ de ltar na yid la byed pa drug po de dag du ni/ yid la byed pa bzhi po 'di lta ste/ rjes su mthun pa dang / gnyen po dang / dang bar 'gyur ba dang / so sor rtog pa dag 'dus par rig par bya'o/ /ji ltar yid la byed pa bdun gyis bsam gtan dang po la snyoms par 'jug pa de bzhin du/bsam gtan gnyis pa dang / gsum pa dang / bzhi pa la snyoms par 'jug pa dang / nam mkha' dang / rnam shes dang / ci yang med pa dang / 'du shes med 'du shes med min skye mched la snyoms par 'jug pa yang yid la byed pa bdun gyis yin par rig par bya'o//de la bsam gtan gnyis pa la snyoms par 'jug pa'i phyir/ gang gis rtog pa dag la rags pa'i mtshan nyid du so sor rtog par byed cing / rtog pa med pa bsam gtan gnyis pa la zhi ba'i mtshan nyid du so sor rtog par byed pa de ni/ mtshan nyid du so sor rtog pa'i yid la byed pa zhes bya'o/ /de la bsam gtan dang po la snyoms par zhugs pa/ bsam gtan dang po thob pa/ rtog pa dag la rags par lta zhing mnyam par gzhag pa'i sa pa'i dmigs pa la mi brtan par spyod pa dang po skyes pas/ dmigs pa yid la rjod pa rags pa skye ba gang yin pa de ni rtog pa zhes bya'o//dmigs pa la mi brtan par spyod pa de dang 'brel ba'i rjes su spyod pa'i yid la rjod pa shin tu phra ba gang yin pa de ni dpyod pa zhes bya ste/ rtog pa dang / dpyod pa de dag kyang sems las byung ba ste/ sems skyes na skye bar 'gyur zhing lhan cig 'byung ba na mtshungs par ldan pa dus gcig tu 'jug pa yin no//de ltar na de dag ni nang nas skyes pa dang / phyi rol gyi skye mched du rtogs pa yin te/ de dag thams cad ni 'das pa dang / ma 'ongs pa dang / da ltar byung ba'i dus rnams su yang / rgyu las byung brten cing 'bral par 'byung ba byung nas 'jig pa kun mi ring ba/yun ring du mi gnas pa/ sems kun du 'khrug par byed pa/ g.yo bar byed pa/ rab tu ma zhi ba'i rnam pas 'jug pa yin no/ /sa de'i rang bzhin ni sa gong ma la ltos na/ sdug bsngal bar gnas pa'i phyir nag po'i phyogs yin la/ 'dod pa dag las dben pa las skyes pa'i bde ba'i phan yon chung zad dang ldan pa yang yin te/de la gnas pa la rtag pa rtag pa'i dus dang / ther zug ther zug gi dus su sems kyi spyod pa rtog pa dang bcas pa dang / dpyod pa dang bcas pa 'byung bar 'gyur bas zhi ba bas rab tu zhi ba lta bu ma yin te/ de ltar rnam pa de dag gis rtog pa dag la rags pa'i mtshan nyid du so sor rtog par byed do//rtog pa med pa'i bsam gtan gnyis pa la ni rnam pa thams cad du rags pa'i mtshan nyid de lta bu med de/ de'i phyir bsam gtan gnyis pa ni rags pa de nyid dang bral ba'i phyir zhi ba yin no/ /bsam gtan gnyis pa la snyoms par 'jug pa yid la byed pa lhag ma rnams ni snga ma bzhin du ci rigs par rig par bya ste/yod min med min skye mched kyi bar gyi sa dang sa dag la snyoms par 'jug pa'i yid la byed pa bdun po dag kyang de bzhin du ci rigs par bya'o/ /ci yang med pa'i skye mched man chad kyi sa 'og ma thams cad la rags pa'i mtshan nyid ni mdor bsdu na rnam pa gnyis su rig par bya ste/sa 'og ma rnams ni ches sdug bsngal bar gnas shing ches rab tu ma zhi bar gnas pa dang / ches tshe thung bar gnas pa ste/ de ltar rags pa'i mtshan nyid gnyis po de dag gzhi drug po de dag gis ci rigs par yongs su tshol bar byed do//sbyor ba mthar thug pa'i 'bras bu'i yid la byed pa man chad kyi sa gang dang gang dag las 'dod chags dang bral bar 'dod pa'i sa gong ma rnams la ni ci rigs par zhi ba'i mtshan nyid du so sor rtog par byed do/ /'dod pa dag las dben pa sdig pa mi dge ba'i chos rnams las dben pa rtog pa dang bcas pa/dpyod pa dang bcas pa dben pa las skyes pa'i dga' ba dang bde ba can bsam gtan dang po bsgrubs te gnas so zhes gsungs pa de la/ 'dod pa dag ces bya ba ni rnam pa gnyis te/ nyon mongs pa'i 'dod pa dang / dngos po'i 'dod pa'o/ /'dod pa dag las dben pa zhes bya ba yang rnam pa gnyis te/mtshungs par ldan pa las dben pa dang / dmigs pa las dben pa'o/ /sdig pa mi dge ba'i chos rnams las dben pa zhes bya ba ni 'dod pa'i rgyu las byung ba ste/ nye ba'i nyon mongs pa mi dge ba'i chos 'di lta ste/ lus kyis nyes par spyad pa dang / ngag gis nyes par spyad pa dang / yid kyis nyes par spyad pa dang / mtshon 'byin pa dang / dbyig pa 'byin pa dang / 'thab mo dang / mtshang 'dru ba dang / rtsod pa dang / 'gyed pa dang / g.yo byed pa dang / slu ba dang / snying rje med pa dang / brdzun du smra ba kun du 'byung ba gang dag yin pa de dag ste/ de dag spangs pa'i phyir sdig pa mi dge ba'i chos rnams las dben pa zhes bya'o/ /rtog pa dang bcas pa/ dpyod pa dang bcas pa zhes bya ba ni rtog pa dang dpyod pa dag la skyon du mi lta ba'i phyir 'dod pa'i gnyen po rang gis pa'i rtog pa dang / dpyod pa dge ba dag dang ldan pas na/ rtog pa dang bcas pa dpyod pa dang bcas pa zhes bya'o//dben pa las zhes bya ba ni 'dod pa gang dag las dben pa sbyor ba mthar thug pa'i yid la byed pa las so/ /skyes pa zhes bya ba ni/ rgyu de dang rkyen des de'i mjug thogs kho nar yang dag par skyes pa la bya ste/ de'i phyir dben pa las skyes pa zhes bya ba gsungs so//dga' ba dang bde ba can zhes bya ba de ni 'dod pa dang re ba'i don thob cing dga' ba la skyon du mi lta ba'i phyir dang / gnas ngan len thams cad dang bral zhing / sems dang lus las su rung ba rgya chen po dang ldan pas na / dga' ba dang bde ba can zhes bya'o/ /bsam gtan zhes bya ba ni dmigs pa la yang dag par nye bar gtod pa dang /dran pa rtse gcig tu nye bar gtod pa'i phyir bsam gtan zhes bya'o/ /dang po zhes bya ba ni dang por 'dod pa'i khams nas bskyod pa'i go rims bzhin du bgrangs pa'i phyir dang po zhes bya'o/ /bsgrubs te zhes bya ba ni sbyor ba mthar thug pa'i 'bras bu yin pa'i phyir bsgrubs te zhes bya'o//gnas so zhes bya ba ni phyis bsgom pa lan mang du bsgrubs pas ci 'dod pa bzhin thob pa dang / dka' ba med par thob pa dang / tshegs med par thob pa'i phyir/ bsam gtan gyi snyoms par 'jug pa des mtshan mo dang / nyin mo dang / nyin mtshan dang / nyin mtshan bdun gyi bar ram/ ji srid 'dod pa'i bar du 'da' bar byed pas na gnas so zhes bya'o/ /de rtog pa dang dpyod pa dang bral zhing nang yongs su dang ste/ sems kyi rgyud gcig tu gyur pas/ rtog pa med pa / dpyod pa med pa/ ting nge 'dzin las skyes pa'i dga' ba dang bde ba can bsam gtan gnyis pa bsgrubs te gnas so zhes gsungs pa de la rtog pa dang /dpyod pa dang bral zhing nang yongs su dang ste zhes bya ba ni rtog pa dang bcas pa/ dpyod pa dang bcas pa'i ting nge 'dzin gyi mtshan ma dag las sems rnam par bzlog nas/ rtog pa med pa dang / dpyod pa med pa'i ting nge 'dzin gyi mtshan ma dag la legs par gtod cing /dmigs pa la mi brtan par spyod pa las rnam par phral te/ dmigs pa la brtan par spyod pa la dang gcig gis sems zhi ba dang dang bar 'jug par byed cing rnam par 'jog par byed pas na/ de'i phyir de rtog pa dang dpyod pa dang bral zhing nang yongs su dang ste zhes bya ba gsungs so//sems kyi rgyud gcig tu gyur pas zhes bya ba ni/ des bsgom pa yongs su goms par bya ba'i phyir/ rtog pa dang dpyod pa med pa'i ting nge 'dzin de nyid la rtog pa dang dpyod pas bar du gcod cing skabs su 'chad pa'i gnas skabs las yang dag par 'das te bar du gcod pa med pa dang /skabs su 'chad pa med pa'i gnas skabs thob pas na/ de'i phyir sems kyi rgyud gcig tu gyur pas zhes bya ba gsungs so/ /rtog pa med pa dpyod pa med pa zhes bya ba ni/ /rtog pa dang dpyod pa dag rnam pa thams cad kyi thams cad du spangs pa'i phyir rtog pa med pa dang /dpyod pa med pa zhes bya'o/ ting nge 'dzin las zhes bya ba ni sbyor ba mthar thug pa yid la byed pa'i ting nge 'dzin las so/ /skyes pa zhes bya ba ni rgyu de dang rkyen des de'i mjug thogs kho nar yang dag par skyes pa la bya ste/ de'i phyir ting nge 'dzin las skyes pa zhes bya ba gsungs so//dga' ba dang / bde ba can zhes bya ba ni 'dod pa dang re ba'i don thob cing dga' ba la skyon du mi lta bas/ yang dag par rab tu dga' ba dang ldan zhing / yid bde ba dang ldan pa'i phyir dang bsam gtan dang po'i rtog pa dang / dpyod pa dang /nyon mongs pa'i phyogs gnas ngan len thams cad dang bral bas de'i gnyen po sems dang lus shin tu sbyangs shing las su rung ba'i bde ba dang ldan pa'i phyir/ dga' ba dang bde ba can zhes bya'o/ /bsam gtan gnyis pa bsgrubs te gnas so zhes bya ba la gnyis pa zhes bya ba ni go rims bzhin du bgrang ba'i phyir ro//lhag ma thams cad ni snga ma bzhin du rig par bya'o/ /de dga' ba'i 'dod chags dang bral bas btang snyoms la gnas shing dran pa dang shes bzhin can yin te/ bde ba lus kyis myong la/ 'phags pa rnams kyis gang de la dran pa dang ldan pa bde ba la gnas pa/btang snyoms pa'o zhes brjod pa ste/ dga' ba med pa bsam gtan gsum pa bsgrubs te gnas so zhes gsungs pa de la/ de dga' ba'i 'dod chags dang bral bas zhes bya ba ni/ dga' ba'i mtshan ma dag la skyon du lta ba'i phyir / de'i phyir de dga' ba'i 'dod chags dang bral bas zhes bya ba gsungs so//btang snyoms la gnas shing zhes bya ba ni dga' ba med pa bsam gtan gsum pa la sems gtod par byed pa de'i tshe na / de'i sems kun du 'khrug par byed pa'i skyon rnam pa gnyis po bsam gtan gnyis pa la rtog pa dang / dpyod pa dang / da ltar gyi dga' ba dag dang bral bas na/de'i phyir btang snyoms la gnas shing zhes bya ba gsungs te/ sems kun du 'khrug par byed pa'i chos de gnyis ni / sems rgyun du btang snyoms su gzhag pa la gegs byed pa yin pas na/ sems kun du 'khrug par byed pa zhes bya'o/ /de la bsam gtan dang po la ni rtog pa dang /dpyod pa yod pas des na rgyun du btang snyoms la 'jug par mi 'gyur ro/ /bsam gtan gnyis pa la ni dga' ba yod pas/ des na der yang rgyun du btang snyoms la 'jug par mi 'gyur te/ de lta bas na bsam gtan dang po dang / bsam gtan gnyis pa de dag la btang snyoms shas cher med pas de'i phyir bsam gtan gsum pa la snyoms par zhugs pa'i bsam gtan pa de ni btang snyoms la gnas pa zhes bya'o//dran pa dang shes bzhin can yin te zhes bya ba ni de btang snyoms la gnas pa na ji lta ji ltar dga' ba dang ldan pa'i 'du shes yid la byed pa de dag kun du 'byung bar mi 'gyur ba de lta de ltar dran pa nye bar bzhag ste gnas par byed do//gal te bsam gtan gsum pa legs par goms par ma byas pas brjed ngas pa'i phyir/ brgya la brgya lam na/ dga' ba dang ldan pa'i 'du shes yid la byed pa de dag kun du 'byung bar gyur na/ myur ba myur ba kho nar de dag la shes rab kyis so sor rtog par byed/ legs pa kho nar rab tu shes par byed cing byung ngo cog dang du mi len par spong bar byed/ sel bar byed/ byang bar byed cing sems btang snyoms su byed pas na/ de'i phyir dran pa dang shes bzhin can yin te zhes bya ba gsungs so//bde ba lus kyis myong ba zhes bya ba ni/ de de'i tshe na gzugs kyi lus dang / yid kyi lus kyis tshor ba'i bde ba dang / shin tu sbyangs ba'i bde ba so sor myong bar byed pas na/ de'i phyir bde ba lus kyis myong ba zhes bya ba gsungs so/ /'phags pa rnams kyis gang de la dran pa dang ldan pa bde ba la gnas pa btang snyoms pa'o zhes brjod pa ste zhes bya ni bsam gtan gsum pa man chad la ni/bde ba de lta bu yang med la rgyun du btang snyoms la gnas pa med do/ /bsam gtan gsum pa'i gong ma dag la ni btang snyoms yod kyang bde ba de lta bu med de/ de ltar 'og ma dag la bde ba dang btang snyoms med pa dang /gong ma dag la bde ba med pa'i phyir 'di lta ste/ bsam gtan gsum pa 'di ni de dag gi gnas yin pas na/ 'phags pas kyang de la dmigs te gnas pa'i gang zag gang yin pa de'i dbang du mdzad nas/ gang de dran pa dang ldan pa bde ba la gnas pa btang snyoms pa'o zhes brjod de/'phags pa zhes bya ba ni sangs rgyas dang sangs rgyas kyi nyan thos rnams so/ /dga' ba med pa zhes bya ba ni de ltar btang snyoms la gnas pa des de'i tshe dran pa dang shes bzhin kun du bsten cing goms par byas/ lan mang du byas pa'i rgyus/dga' ba dang ldan pa'i tshor bas sems dga' bar byed pa de spong bar byed cing / dga' ba'i gnyen po dga' ba med pa zhi ba dang / rab tu zhi ba'i tshor ba'i sems las skyes par 'gyur bas na/ de'i phyir dga' ba med pa zhes bya ba gsungs so/ /bsam gtan gsum pa bsgrubs te gnas so zhes bya ba ni snga ma bzhin du rig par bya'o//de bde ba yang spangs te/ snga nas sdug bsngal yang spangs shing yid bde ba dang / yid mi bde ba yang nub pas bde ba yang ma yin/ sdug bsngal yang ma yin/ btang snyoms dang / dran pa yongs su dag pa bsam gtan bzhi pa bsgrubs te/gnas so zhes gsungs pa de la/ de bde ba yang spangs te zhes bya ba ni/ bde ba'i gnyen po ni rigs 'dra ba'i phyir/ spong ba'i gnyen po ma bstan par de'i gnyen pos byas pa bde ba spangs pa gang yin pa de nyid brten te/ de'i gnyen po yang gang zhe na/'di lta ste/ btang snyoms dang / dran pa dang / shes bzhin yin no/ /de dag la brten cing goms par byas pas/ bsam gtan gsum pa las bskyod cing / bsam gtan gsum pa'i sa pa'i bde ba gang yin pa de spong bar byed pas na/ de'i phyir de bde ba yang spangs te zhes bya ba gsungs so//snga nas sdug bsngal yang spangs shing yid bde ba dang / yid mi bde ba yang nub pas zhes bya ba ni/ de'i tshe na bsam gtan pa des bde ba dang / sdug bsngal las yang dag par 'das pa'i rjes su thob cing / des sngon spangs pa gang yin pa dang / da ltar spong bar byed pa gang yin pa de dag gcig tu bsdus pas na /de'i phyir snga nas sdug bsngal yang spangs shing yid bde ba dang / yid mi bde ba yang nub pas zhes bya ba gsungs so/ /de la bsam gtan bzhi pa la snyoms par 'jug pa'i tshe na ni bde ba spangs so/ /bsam gtan gnyis pa la snyoms par 'jug pa'i tshe na ni sdug bsngal spangs so//bsam gtan gsum pa la snyoms par 'jug pa'i tshe na ni yid bde ba nub po/ /bsam gtan dang po la snyoms par 'jug pa'i tshe na ni yid mi bde ba nub po/ /bde ba yang ma yin sdug bsngal yang ma yin pa zhes bya ba ni/ des re zhig bde ba dang sdug bsngal spangs pa'i phyir de la tshor ba'i lhag ma bde ba yang ma yin/sdug bsngal yang ma yin pa nyi tshe yod pas na/ de'i phyir bde ba yang ma yin/ sdug bsngal yang ma yin pa zhes bya ba gsungs so/ /btang snyoms dang dran pa yongs su dag pa zhes bya ba ni/ des de'i tshe na bsam gtan dang po yan chad kyi sa 'og ma'i skyon 'di lta ste/rtog pa dang / dpyod pa dang / dga' ba dang / dbugs rngub pa dang / dbugs 'byung ba thams cad spangs par gyur cing / de dag spangs pa'i phyir de la btang snyoms dang dran pa gang yod pa de yongs su dag pa dang / yongs su byang bar 'gyur te/ des na bsam gtan bzhi pa la snyoms par zhugs pa de'i sems de mi g.yo bar gnas shing / g.yo ba thams cad dang bral bas na/ de'i phyir btang snyoms dang dran pa yongs su dag pa zhes bya ba gsungs so/ /de la bsam gtan bzhi pa bsgrubs te gnas so zhes bya ba ni/bsam gtan dang po la sogs pa snga ma dag la ji lta ba bzhin du rig par bya'o// //nyan thos kyi sa bam po bco brgyad pa/ de rnam pa thams cad du gzugs kyi 'du shes rnams las yang dag par 'das te/ thogs pa'i 'du shes rnams nub par gyur cing /sna tshogs kyi 'du shes rnams yid la mi byed pas/ nam mkha' mtha' yas so snyam nas/ nam mkha' mtha' yas skye mched bsgrubs te gnas so zhes gsungs pa de la/ de rnam pa thams cad du gzugs kyi 'du shes rnams las yang dag par 'das te zhes bya ba ni nam mkha' mos par byed pa'i phyir/kha dog sngon po dang / ser po dang / dmar po dang / dkar po dang ldan pa'i 'du shes de dag ni mi snang zhing skyo la 'dod chags dang bral bas yang dag par 'das pas na/ de'i phyir de rnam pa thams cad du gzugs kyi 'du shes rnams las yang dag par 'das te zhes bya ba gsungs so//thogs pa'i 'du shes rnams nub par gyur cing zhes bya ba ni/ de de dag las yang dag par 'das shing mi snang bar gyur pa'i rgyus kha dog bsags pa'i rgyur gyur pa'i sgrib pa'i 'du shes rnam pa du ma rnam pa sna tshogs mang po dag dang bral bas na/ de'i phyir thogs pa'i 'du shes nub par gyur cing zhes bya ba gsungs so/ /sna tshogs kyi 'du shes rnams yid la mi byed pas zhes bya ba ni/ de de dag dang bral bas thogs pa khyad par can rnam pa sna tshogs pa de dag nyid la 'di lta ste/ zas dang / skom dang / bzhon pa dang / gos dang / rgyan dang /gnas dang / skyed mos tshal dang / nags tshal dang / dmag dang / ri la sogs par nye bar 'dogs pa'i 'du shes 'jug pa gang yin pa'i 'du shes de dag de rnams la gtad kyang rnam pa thams cad kyi thams cad du de la 'byung bar mi 'gyur bas na/ de'i phyir sna tshogs kyi 'du shes rnams yid la mi byed pa zhes bya ba gsungs so//nam mkha' mtha' yas so snyam nas zhes bya ba ni des de ltar gzugs dang / thogs pa dang sna tshogs kyi 'du shes dag rnam par bshig nas/ nam mkha' mtha' yas pa'i rnam pas mos par byed pas na/ de'i phyir nam mkha' mtha' yas so snyam nas zhes bya ba gsungs so//nam mkha' mtha' yas skye mched bsgrubs te/ gnas so zhes bya ba ni/ de nyer bsdogs las yang dag par 'das shing / sbyor ba mthar thug pa'i yid la byed pas gong ma sbyor ba mthar thug pa'i 'bras bu'i dngos gzhi la snyoms par 'jug par byed pas na/ de'i phyir nam mkha' mtha' yas skye mched bsgrubs te gnas so zhes bya ba gsungs so/ /de ji srid du dngos gzhi la snyoms par mi 'jug pa'i bar du ni/ de nam mkha' kho na la dmigs par byed do/ /snyoms par zhugs nas kyang nam mkha' de nyid dang de las gzhan pa rang gi sa pa'i phung po rnams la dmigs par byed do//nyer bsdogs kyi tshe na ni sa 'og ma'i phung po rnams la yang dmigs par byed do/ /de rnam pa thams cad du nam mkha' mtha' yas skye mched las yang dag par 'das te/ rnam par shes pa mtha' yas so snyam nas/ rnam shes mtha' yas skye mched bsgrubs te gnas so zhes gsungs pa de la/de rnam pa thams cad du nam mkha' mtha' yas skye mched las yang dag par 'das te/ rnam par shes pa mtha' yas so zhes bya ba ni/ de rnam par shes pa dag gis nam mkha' mtha' yas par mos par byed pa/ nam mkha' la mtha' yas pa'i rnam par mos par byed pa'i rnam par shes pa de nyid kyis rnam shes mtha' yas skye mched la snyoms par 'jug par 'dod pas/nam mkha' mtha' yas skye mched kyi 'du shes las bzlog ste/ rnam par shes pa de nyid la mtha' yas pa'i rnam pas mos par byed cing /nam mkha' mtha' yas skye mched kyi dngos gzhi nyer bsdogs dang bcas pa las yang dag par 'das pas na/ de'i phyir de rnam pa thams cad du nam mkha' mtha' yas skye mched las yang dag par 'das te/ rnam par shes pa mtha' yas so snyam nas zhes bya ba gsungs so//rnam par shes pa mtha' yas so snyam nas rnam shes mtha' yas skye mched bsgrubs te gnas so zhes bya ba ni/ rnam shes mtha' yas skye mched kyi nyer bsdogs las yang dag par 'das shing / sbyor ba mthar thug pa'i bar du yid la byed pas/ sbyor ba mthar thug pa'i 'bras bu'i dngos gzhi la snyoms par 'jug par byed pa na de'i phyir rnam shes mtha' yas skye mched bsgrubs te gnas so zhes bya ba gsungs so//de rnam pa thams cad du rnam shes mtha' yas skye mched las yang dag par 'das te/ ci yang med do snyam nas ci yang med pa'i skye mched bsgrubs te gnas so zhes bya ba gsungs pa ni/de rnam shes mtha' yas skye mched las bskyod cing rnam par shes pa las gzhan pa'i dmigs pa ci dang yang ldan pa/ gzugs can nam/ gzugs can ma yin pa yongs su tshol bar byed pa na ma rnyed de/ des dmigs pa de ma rnyed pa na/ rnam shes mtha' yas skye mched kyi dngos gzhi nyer bsdogs dang bcas pa las yang dag par 'das te/dmigs pa gzhan ci yang med do zhes mos par byed cing / de ci yang med pa'i 'du shes kho na la mos par 'gyur te/ des 'du shes la mos pa de lan mang du byas pa'i rgyus ci yang med pa'i skye mched kyi nyer bsdogs las yang dag par 'das te/sbyor ba mthar thug pa'i bar du yid la byes pas/ sbyor ba mthar thug pa'i 'bras bu'i dngos gzhi la snyoms par 'jug par byed pas na/ de'i phyir de rnam pa thams cad du rnam shes mtha' yas skye mched las yang dag par 'das te ci yang med do snyam nas/ci yang med pa'i skye mched bsgrubs te gnas so zhes bya ba gsungs so/ /de rnam pa thams cad du ci yang med pa'i skye mched las yang dag par 'das nas/ 'du shes med 'du shes med min skye mched bsgrubs te gnas so zhes bya ba gsungs pa de la/de rnam pa thams cad du ci yang med pa'i skye mched las yang dag par 'das nas zhes bya ba ni/ de ci yang med pa'i skye mched las bskyod cing / ci yang med pa'i skye mched kyi 'du shes la rags par 'du shes shing / nyes dmigs su 'du shes pas ci yang med pa'i skye mched kyi 'du shes las zlog par byed pas na/de'i phyir de rnam pa thams cad du ci yang med pa'i skye mched las yang dag par 'das nas zhes bya ba gsungs so/ /'du shes med ces bya ba ni/ de sngon ci yang med pa'i skye mched la snyoms par 'jug pa'i tshe na ni ci yang gi 'du shes las yang dag par 'das la/da ltar ni ci yang med pa'i 'du shes las yang dag par 'das pas na/ de'i phyir 'du shes med ces bya ba gsungs te/ 'di lta ste/ ci yang gi 'du shes dang / ci yang med pa'i 'du shes med pa la bya'o//'du shes med min zhes bya ba ni/ de'i 'du shes 'di lta ste/ dper na 'du shes med pa'am/ 'gog pa'i snyoms par 'jug pa dag gi ltar rnam pa thams cad kyi thams cad du 'gags pa ma yin te/ 'du shes de phra zhing dmigs pa la mtshan ma med par 'jug pa kho na yin pas na/de'i phyir 'du shes med min zhes bya ba gsungs so/ /skye mched bsgrubs te gnas so zhes bya ba ni/ de de ltar skye mched de la mos par byed pa na/ ci yang med pa'i skye mched kyi dngos gzhi nyer bsdogs dang bcas pa las yang dag par 'das shing / 'du shes med 'du shes med min skye mched nyer bsdogs dang bcas pas sbyor ba mthar thug pa'i bar du yid la byas pas/ sbyor ba mthar thug pa'i 'bras bu'i dngos gzhi la snyoms par 'jug par byed pas na/ de'i phyir de rnam pa thams cad du ci yang med pa'i skye mched la yang dag par 'das nas/'du shes med 'du shes med min skye mched bsgrubs te gnas so zhes bya ba gsungs so/ /de la bsam gtan rnams la snyoms par 'jug pa'i tshe na ni/ lus sa'i 'og tu 'bying bar snang ba lta bu'i rtags 'byung ngo / /gzugs med pa dag la snyoms par 'jug pa'i tshe na ni/lus nam mkha' la 'phar ba ltar snang ba'i rtags 'byung te/ de dag la zhi gnas kyi rnam pas btang snyoms su gzhag na yang dag pa'i rab tu sbyor ba yin no/ /de la sems med pa'i snyoms par 'jug pa ni rnam pa gnyis te/ 'du shes med pa'i snyoms par 'jug pa dang /'gog pa'i snyoms par 'jug pa'o/ /de la 'du shes med pa'i snyoms par 'jug pa la ni so so'i skye bo kho na snyoms par 'jug par byed do/ /'gog pa'i snyoms par 'jug pa la ni/ 'phags pa kho na snyoms par 'jug par mdzad do/ /de la yid la byed pa rnam pa gnyis kyi ni / snyoms par 'jug pa de gnyis la snyoms par 'jug par 'gyur te/ 'di lta ste/ 'du shes la mi phyogs pa'i yid la byed pas ni/ 'du shes med pa'i snyoms par 'jug pa la snyoms par 'jug par byed do/ /'du shes med 'du shes med min skye mched las bskyod cing dmigs pa yang dag par 'gags pa'i yid la byed pas ni 'gog pa'i snyoms par 'jug pa la snyoms par 'jug par byed do//de la 'du shes ni nad do/ /'du shes ni 'bras so/ /'du shes ni zug rngu'o/ /'di lta ste/ 'du shes med pa 'di ni zhi ba'o/ /'di ni gya nom pa'o zhes bya ba ni/ 'du shes la mi phyogs pa'i yid la byed pa yongs su bzung nas/'du shes byung ngo cog la dran pa med pa dang / yid la byed pa med par byed pa ste/ des de bsgoms pa'i rgyus na/ sbyor ba'i lam la ni sems dang bcas pa'i gnas skabs su 'gyur la/ snyoms par zhugs ma thag tu ni sems 'byung bar mi 'gyur bas/de ltar nges par 'byung ba'i 'du shes sngon du btang ba yid la byed pas/ dge rgyas kyi 'dod chags dang bral la / 'bras bu che ba dag gi 'dod chags dang ma bral ba'i sems dang / sems las byung ba'i chos rnams su 'gog pa gang yin pa de ni/ 'du shes med pa'i snyoms par 'jug pa zhes bya ste/ de ni de ltar 'thob par 'gyur ro/ /de la 'du shes med 'du shes med min skye mched thob pa'i 'phags pa mchog tu zhi ba'i gnas pas gnas par 'dod pa/ 'du shes med 'du shes med min skye mched las sems bskyod par byed cing /de'i sems de de las bskyod pa na dmigs pa mi rnyed de / ma rnyed na 'gag cing 'byung bar mi 'gyur ro snyam nas/ de ltar ci yang med pa'i skye mched kyi 'dod chags dang bral ba'i slob pa'am dgra bcom pa yang rung ste/ gnas pa'i 'du shes sngon du btang ba'i yid la byed pas sems dang sems las byung ba'i chos rnams 'gog pa gang yin pa de ni 'gog pa'i snyoms par 'jug pa zhes bya ste/de ni 'di ltar thob par 'gyur ro/ /de la bsam gtan la brten nas mngon par shes pa lnga mngon par 'grub par 'gyur te/ ji ltar 'grub ce na/ 'di lta ste/ bsam gtan pa bsam gtan yongs su dag pa thob pa de bsam gtan yongs su dag pa de la brten nas des 'di lta ste/ rdzu 'phrul gyi yul lam/ sngon gyi gnas rjes su dran pa'am/ lha'i rna ba'am/ 'chi 'pho dang skye ba shes pa'am/ sems kyi rnam grangs shes pa las brtsams te/mngon par shes pa'i dbang du byas pa'i chos thos pa dang / bzung ba dang / kun chub par byas pa gang yin pa de nyid mnyam par gzhag pa'i sa pa'i yid la byed pas yid la byed pa na/ don so so yang dag par rig pa dang / chos so so yang dag par rig par 'gyur te/ don so so yang dag par rig pa dang /chos so so yang dag par rig par gyur pa des/ de lta de ltar sems mngon par 'dus byas shing lan mang du byas pa'i rgyus na/ de'i bsgoms pa'i 'bras bu mngon par shes pa lnga 'byung bar 'gyur ba'i dus kyang yod skabs kyang yod par 'gyur ro/ /gzhan yang de ltar don so so yang dag par rig pa dang /chos so so yang dag par rig par gyur pa de/ mngon par shes pa thams cad mngon par bsgrub pa'i phyir 'du shes rnam pa bcu gnyis sgom par byed de/ 'di lta ste/ yang ba'i 'du shes dang / 'jam pa'i 'du shes dang / nam mkha'i khams kyi 'du shes dang /sems dang lus phrad pa'i 'du shes dang / mos pa'i 'du shes dang / sngon spyad pa nyams su myong ba'i go rims rjes su dran pa'i 'du shes dang / rnam pa sna tshogs 'dus pa'i sgra skad kyi 'du shes dang / snang ba'i gzugs kyi mtshan ma'i 'du shes dang / nyon mongs pas byas pa'i gzugs rnam par 'gyur ba'i 'du shes dang / rnam par thar pa'i 'du shes dang / zil gyis gnon pa'i skye mched kyi 'du shes dang / zad par gyi skye mched kyi 'du shes so/ /de la yang ba'i 'du shes ni 'du shes gang gis bdag nyid kyi lus 'di lta ste dper na shing bal gyi 'da' ba'am /ras bal gyi 'da' ba'am / rlung gi dkyil 'khor ltar yang bar mos par byed pa ste/ de de ltar mos par byed pa na/ mos pa las byung ba kho na'i yid la byed pas bdag nyid kyi lus 'di lta ste/ khri'i steng nas khri'u'i steng du'am/ khri'u'i steng nas khri'i steng du'am/de bzhin du khri'i steng nas rtswa bting ba'i steng du'am/ rtswa bting ba'i steng nas khri'i steng de dang de dag tu 'dong bar byed do/ /de la 'jam pa'i 'du shes ni / 'du shes gang gis bdag nyid kyi lus 'di lta ste/ dper na/ shing bal lam/ srin bal lam/ dar ltar 'jam par mos par byed pa ste/de ltar na 'dzam pa'i 'du shes 'di ni yang ba'i 'du shes gso bar byed pa dang / rjes su 'dzin par byed pa yin pas des rjes su zin na yang ba'i 'du shes kyang 'phel zhing rgyas pa dang yangs par 'gyur ro/ /de la nam mkha'i khams kyi 'du shes ni/ 'du shes gang gis bdag nyid kyi lus yang ba nyid dang / 'jam pa nyid du mos par byas nas/ gal te gang du 'gro 'dod pa'i bar de na 'gro ba la bar chad byed pa'i gzugs kyi rnam pas chod pa de la mos pa las byung ba kho na'i yid la byed pas nam mkhar mos par byed pa'o//de la sems dang lus phrad pa'i 'du shes ni/ 'du shes gang gis sems la lus gnas par gtod pa dang / lus la sems gnas par gtod par byed pa ste/ des ni de'i lus shin tu yang ba dang / shin tu 'jam pa dang / shin tu las su rung ba dang / shin tu 'od gsal ba dang /sems kyi rjes su 'gro ba dang / sems dang 'brel ba dang / sems la rten cing 'jug par 'gyur ro/ /de la mos pa'i 'du shes ni/ 'du shes gang gis rgyang ring po la thag nye ba dang / thag nye ba la rgyang ring po dang / phra mo la rags pa dang / rags pa la phra mo dang /sa la chu dang / chu la sa dang / de bzhin du 'byung ba chen po re re yang gcig la gcig 'khrul par rgya cher mos par byed pa dang / de bzhin du sprul pa gzugs sprul pa dang / sgra sprul pa dang / sprul pa'i sgra la mos par byed pa ste/ 'du shes rnam pa lnga po de dag bsgoms shing yongs su grub pa dag gis rdzu 'phrul gyi yul rnam pa du ma nyams su myong bar 'gyur te/'di lta ste/ sprul pa la mos pa'i 'du shes kyis ni bdag nyid gcig tu gyur nas mang por 'gyur bar ston par byed do/ /'di lta ste/ sprul pa sdud pa la mos par byed pa'i 'du shes kyis ni bdag nyid mang por bsten nas gcig tu 'gyur bar ston par byed do//'di lta ste/ yang ba dang / 'jam pa dang / nam mkha'i khams dang / sems dang lus phrad pa'i 'du shes kyis yongs su zin par mos pa'i 'du shes kyis ni/ lus kyis thogs pa med par rtsig pa la yang thad kar 'gro ba dang / ra ba la yang thad kar 'gro ba dang / ril yang thad kar 'gro ba dang / sa la yang 'di lta ste/ dper na chu la bya ba bzhin du steng du 'byung ba dang / bye'u zul byed pa dang / chu la yang 'di lta ste/ dper na sa la bya ba bzhin du mi nub par rgyun phyogs su 'gro ba dang / nam mkha' la 'di lta ste/dper na 'dab chags bya bzhin du skyil mo krung gis 'gro ba dang / nyi ma dang zla ba 'di ltar rdzu 'phrul che ba/ 'di ltar mthu che ba / 'di ltar gzi brjid che ba 'di gnyis la yang lag pas 'dzin cing / kun du nyug par byed pa dang / tshangs pa'i 'jig rten gyi bar du lus kyis dbang sgyur bar byed pa de dag thams cad ci rigs par byed par rig par bya'o//de la tshangs pa'i 'jig rten gyi bar du lus kyis dbang sgyur ba ni rnam pa gnyis te/ 'gro bas dbang sgyur bar byed pa dang / tshangs pa'i 'jig rten man chad kyi 'byung ba chen po bzhi dang / rgyur byas pa'i gzugs rnams pa ji ltar 'dod pa bzhin du mos pas dbang sgyur bar byed pa'o//de la sngon spyad pa nyams su myong ba'i go rims rjes su dran pa'i 'du shes ni/ 'du shes gang gis gzhon nu'i gnas skabs nas bzung ste/ de la de'i dran pas 'jug cing mi brjed par byed pa dang / gang du de song ba dang / 'greng ba dang / 'dug pa dang / nyal ba dang / sngon nyams su myong ba'i spyod pa rags pa go rims ma 'khrugs shing thod rgal du ma gyur pa thams cad rgya cher yang dag par rjes su dran zhing yang dag par rab tu shes pa ste/ de goms par byas pa'i rgyus bsgoms pa'i 'bras bu sngon gyi gnas rnam pa du ma rnam pa dang bcas yul phyogs dang bcas pa'i bar du rgya cher yang dag par rjes su dran no//de la rnam pa sna tshogs 'dus pa'i sgra skad kyi 'du shes ni grong ngam/ grong rdal lam/ bzo sbyangs kyi gnas sam/ 'dren ma'i nang ngam/ 'khor gyi nang ngam/ khang khyim chu zheng gab pa'am/gnas khang gang du skye bo'i tshogs rnam pa sna tshogs 'dus te 'khod pa de dag gi sgra skad 'dren ma sna tshogs 'byung ba gang yin pa ste/ de ni klag cor gyi sgra zhes kyang bya'o/ /yang na chu klung chen po 'bab pa'i sgra yang rung ste/ de la 'du shes bsgom pa gang yin pa'i mtshan ma bzung nas/mnyam par gzhag pa'i sa pa'i yid la byed pa des dbus dang / mtha' 'khob pa dang / lha dang / mi'i sgra rgyang ring po dag dang / thag nye ba dag la sems gtod par byed do/ /de lan mang du byas pa'i rgyus bsgoms pa'i 'bras bu lha'i rna ba thob par 'gyur te/des ni lha dang mi'i sgra rgyang ring po gang dag yin pa dang / thag nye ba gang dag yin pa rnams kyang thos par 'gyur ro/ /de la snang ba'i gzugs kyi mtshan ma'i 'du shes ni/ snga ma bzhin du snang ba'i mtshan ma bzung nas/ mtshan ma de nyid yid la byed pa dang / dge ba dang mi dge ba'i las byed pa la sogs pa bye brag gi sems can sna tshogs su gyur pa dag las mtshan ma bzung nas/mtshan ma de nyid yid la byed pa gang yin pa de ni snang ba'i gzugs kyi mtshan ma'i 'du shes zhes bya ste/ de goms par byas pa'i rgyus bsgoms pa'i 'bras bu 'chi 'pho dang skye ba shes pa thob par 'gyur te/lha'i mig rnam par dag pa des ni lus zhig ste shi ba'i 'og tu bde 'gro mtho ris kyi 'jig rten du lha rnams kyi nang du skye bar 'gyur ro zhes bya ba'i bar du rgya cher mthong bar 'gyur ro/ /de la nyon mongs pas byas pa'i gzugs rnam par 'gyur ba'i 'du shes ni/'du shes gang gis chags pa dang / zhe sdang dang / rmongs pa dang / khro ba dang / khon du 'dzin pa dang / 'chab pa dang / yongs su gdung ba dang / sgyu dang / g.yo dang / ngo tsha med pa dang / khrel med pa la sogs pa nyon mongs pa dang / nye ba'i nyon mongs pa kun nas dkris pa'i sems dang ldan pa'i sems can rnams kyi gzugs kyi gnas skabs la nye bar rtog par byed cing yongs su gcod par byed pa ste/chags par byed pa'i gzugs rnam par gyur pa'i gzugs kyi gnas skabs ni 'di lta bu yin te/ 'di lta ste/ dbang po rgod pa dang /dbang po 'dam bu ltar mthong ba dang / bzhin 'dzum par byed pa yin no/ /zhe sdang bar gyur pa'i gzugs rnam par gyur pa'i gzugs kyi gnas skabs ni 'di lta bu yin te / 'di lta ste/ bzhin gyi mdog gyur pa dang / skad 'dar 'dar por gyur pa dang / khro gnyer 'dus par gyur pa yin no//rmongs par gyur pa'i gzugs rnam par gyur pa'i gzugs kyi gnas skabs ni 'di lta bu yin te/ 'di lta ste/ lkugs pa dang / don nges par brtags pa brda mi phrad pa dang / phal ba'i tshig rjod par byed pa yin no zhes de ltar de lta bu dang mthun pa'i rnam pa dag dang / ngo tsha med pa dang /khrel med pa'i bar gyis kun nas dkris par gyur pa'i gzugs rnam par gyur pa/ gzugs kyi gnas skabs gang dag yin pa de dag las mtshan ma bzung nas/ mtshan ma de nyid yid la byed cing / de la lan mang du byas pa'i rgyus bsgoms pa'i 'bras bu sems kyi rnam grangs shes pa 'byung ba 'gyur te/des ni sems can pha rol dang gang zag pha rol rnams kyi rnam par rtog pa dang / rnam par dpyod pa'i yid kyis yang dag pa ji lta ba bzhin du rab tu shes so/ /de la rnam par thar pa dang / zil gyis gnon pa'i skye mched dang / zad par gyi skye mched kyi 'du shes bsgom pa ni/'di lta ste/ sngar mnyam par bzhag pa'i sa pa'i skabs su bstan pa bzhin du rig par bya ste de dag bsgoms pas ni/ 'phags pa'i rdzu 'phrul dngos po sgyur ba dang / sprul pa dang / mos pa dang / 'di lta ste/ nyon mongs pa med pa dang / smon nas shes pa dang / so so yang dag par rig pa bzhi po 'di lta ste/ chos so so yang dag par rig pa dang / don so so yang dag par rig pa dang / nges pa'i tshig so so yang dag par rig pa dang / spobs pa so so yang dag par rig pa dag mngon par 'grub par 'gyur ro//de la 'phags pa dang / 'phags pa ma yin pa'i rdzu 'phrul la bye brag ni 'di yod do/ /'phags pa'i rdzu 'phrul ni 'di lta ste/ dngos po gang dang gang sgyur bar mdzad pa dang / sprul pa gang dang / gang sprul par mdzad pa dang / gang dag gang la mos par mdzad pa de dang de dag thams cad gzhan du mi 'gyur zhing de lta bu kho na yin te/de dag gis bya ba byed nus pa yin no/ /'phags pa ma yin pa'i rdzu 'phrul ni de lta ma yin te/ sgyu ma mkhan gyis sprul pa bzhin du snang ba tsam du ston par zad do/ /de ltar 'du shes bcu gnyis po de dag kun du brten cing goms par byas/lan mang du byas na/ 'di lta ste mngon par shes pa lnga po dag ci rigs par 'thob pa dang / 'phags pa rnams kyi yon tan so so skye bo dang thun mong ma yin pa dag kyang ci rigs pa mngon par 'grub par rig par bya'o/ /de la bsam gtan dang po dang chung ngu dang / 'bring dang / chen por bsgoms na/ tshangs rigs dang / tshangs pa'i mdun na 'don dang / tshangs chen gyi lha rnams dang ci rigs par skal ba mnyam par skye'o/ /bsam gtan gnyis pa chung ngu dang / 'bring dang chen por bsgoms na/ 'od chung dang / tshad med 'od dang /'od gsal gyi lha rnams dang ci rigs par skal pa mnyam par skye'o/ /bsam gtan gsum pa chung ngu dang / 'bring dang / chen por bsgoms na/ dge chung dang / tshad med dge dang / dge rgyas kyi lha rnams dang ci rigs par skal pa mnyam par skye'o/ /bsam gtan bzhi pa chung ngu dang / 'bring dang / chen por bsgoms na/ sprin med dang / bsod nams skyes dang / 'bras bu che ba'i lha rnams dang ci rigs par skal pa mnyam par skye'o/ /gal te 'phags pa'i phyir mi 'ong bas zag pa med pa'i bsam gtan bzhi dang / zag pa dang bcas pa spel mar bsgom zhing de la yang / chung ngu dang /'bring dang / chen po dang / ches che ba dang / shin tu che bar bsgoms na/ 'di lta ste gnas gtsang ma lnga po mi che ba dang / mi gdung ba dang / shin tu mthong dang / gya nom snang dang / 'og min gyi lha rnams dang ci rigs par skal ba mnyam par skye'o/ /nam mkha' dang / rnam shes dang /ci yang med dang / 'du shes med 'du shes med min skye mched chung ngu dang / 'bring dang / chen por bsgoms na yang nam mkha' dang / rnam shes dang / ci yang med dang / 'du shes med 'du shes med min skye mched du nye bar 'gro ba'i lha rnams dang skal pa mnyam par skye ste/ lha de dag ni gzugs med pas na de'i phyir de dag la gnas gzhan bye brag tu dbye ba ni med kyi/ gnas pa'i bye brag ni yod do/ / 'du shes med pa'i snyoms par 'jug pa bsgoms na ni/ 'du shes med pa'i sems can lha rnams dang skal pa mnyam par skye'o/ /de la 'dod chags dang bral ba'i rtags gang zhe na smras pa/lus kyi las kyi mtha' brtan pa dang / dbang po mi g.yo ba dang / de'i spyod lam myur du mi 'jig pa dang / spyod lam gcig gis kyang yongs su skyo ba med cing / dus yun ring du 'da' bar byed pa dang / spyod lam gzhan la myur du dga' bar mi byed pa dang /tshig nyung ngu smra ba dang / rab tu zhi bar smra ba dang / bre mo gtam la mi dga' ba dang / 'du 'dzi la mi dga' ba dang / de'i tshig brtan par 'byung ba dang / mig gis gzugs rnams mthong nas gzugs so sor yang dag par rig par byed cing gzugs la 'dod chags kun du mi 'byung ba dang /de bzhin du sgra dang / dri dang / ro dang / reg bya so sor yang dag par rig par byed cing / reg bya'i bar la 'dod chags kun du mi 'byung ba dang / 'jigs pa med pa dang / blo zab pa dang / shin tu sbyangs pa chen pos lus dang sems nye bar bskang pa dang / brnab sems med pa dang /'khrug pa med pa dang / bzod pa dang ldan pa dang / de'i sems la 'dod pa'i rnam par rtog pa la sogs pas kun nas 'khrug pa med pa dang / de lta bu dang mthun pa dag ni 'dod chags dang bral ba'i rtags rnams yin par rig par bya ste/ de ni re zhig 'jig rten pa'i lam gyis 'gro ba'i rnam pa dbye ba yin no//gal te de 'jig rten las 'das pa'i lam gyis 'gro bar 'dod na ni/ 'phags pa'i bden pa bzhi po dag las brtsams nas dgra bcom pa nyid thob kyi bar du de la mtshan nyid so sor rig pa'i yid la byed pa la sogs pa nas sbyor ba mthar thug pa'i 'bras bu yid la byed pa'i bar gyi yid la byed pa bdun po dag rim gyis 'byung bar 'gyur te/de la 'phags pa'i bden pa bzhi po mdor bstan pa dang / rgyas par bshad pa dang bcas pa thos shing bzung la legs par bsgoms shing yid la byed pa'am/ bsam gtan dang gzugs med pa'i dngos gzhi thob pa'i rnal 'byor spyod pa la ni rnam pa bzhi po 'di lta ste/mi rtag pa'i rnam pa dang / sdug bsngal ba'i rnam pa dang / stong pa'i rnam pa dang / bdag med pa'i rnam pas bden pa sdug bsngal gyi mtshan nyid so sor rig par byed do/ /rnam pa bzhi po 'di lta ste/ rgyu'i rnam pa dang /kun 'byung ba'i rnam pa dang / rab tu skye ba'i rnam pa dang / rkyen gyi rnam pas bden pa kun 'byung ba'i mtshan nyid so sor rig par byed do/ /rnam pa bzhi po 'di lta ste/ 'gog pa'i rnam pa dang / zhi ba'i rnam pa dang / gya nom pa'i rnam pa dang / nges par 'byung ba'i rnam pas bden pa 'gog pa'i mtshan nyid so sor rig par byed do//rnam pa bzhi po 'di lta ste/ lam gyi rnam pa dang / rigs pa'i rnam pa dang / sgrub pa'i rnam pa dang / nges par 'byin pa'i rnam pas bden pa lam gyi mtshan nyid so sor rig par byed pa ste/de ni de'i mtshan nyid so sor rig pa'i yid la byed pa yin no/ /de la rnam pa bcus bden pa sdug bsngal la yongs su rtog par byed pa na/ rnam pa bzhi po dag gis rjes su 'jug par 'gyur te/ bcu gang zhe na/ 'di lta ste/ 'gyur ba'i rnam pa dang / 'jig pa'i rnam pa dang /bral ba'i rnam pa dang / chos nyid kyi rnam pa dang / nye ba'i rnam pa dang / kun du sbyor ba dang 'ching ba'i rnam pa dang / mi sdug pa'i rnam pa dang / grub pa dang bde ba med pa'i rnam pa dang / dmigs su med pa'i rnam pa dang / rang dbang med pa'i rnam pas so/ /rnam pa bcu po de dag kyang 'thad pa sgrub pa'i rigs pas nye bar brtag par bya ste/de la re zhig yid ches pa'i lung ni/ bcom ldan 'das kyis 'du byed thams cad ni mi rtag pa'o zhes ji skad gsungs pa ste/ 'du byed de dag kyang mdor bsdu na/ rnam pa gnyis te/ sems can gyi 'jig rten dang /snod kyi 'jig rten no/ /de la bcom ldan 'das kyis sems can gyi 'jig rten gyi dbang du mdzad nas/ dge slong dag ngas lha'i spyan rnam par dag pa mi'i las shin tu 'das pas sems can 'chi 'pho ba dang / skye ba dag nas lus zhig ste shi ba'i 'og tu bde 'gro mtho ris kyi 'jig rten lha rnams kyi nang du skye ba'i bar dag kyang gzigs so zhes gsungs pa'i rnam grangs des ni/bcom ldan 'das spyan dang ldan pa mngon sum gyis gzigs pa mnga' bas re zhig sems can gyi 'jig rten la mi rtag pa nyid bstan pa yin no/ /bcom ldan 'das kyis snod kyi 'jig rten gyi dbang du mdzad nas/'di lta ste nyi ma bdun lta bu zhes bya ba'i mdo las/ dge slong dag dus yun ring po 'das pa'i 'og tu 'jig rten du rim gyis nyi ma bdun 'char ba'i bar dag 'byung ba dang / sa chen po 'di dang / ri'i rgyal po ri rab dang / tshangs pa'i 'jig rten gyi bar gyi snod kyi 'jig rten thams cad bsregs shing gzhob tu brlags nas/du ba yang med/ thal ba'i lhag ma yang med par 'gyur ba'i dus kyang yod/ skabs kyang yod par 'gyur ro zhes gsungs pa'i rnam grangs des ni/ bcom ldan 'das spyan dang ldan pa mngon sum du gzigs pa mnga' bas/snod kyi 'jig rten gyi mi rtag pa nyid bstan pa yin pas na rnal 'byor pa des re zhig yid ches pa'i lung de la brten nas dad pa'i dbang du byas te/ 'du byed thams cad kyi mi rtag pa nyid la nges pa thob par 'gyur ro/ /des de ltar nges pa thob nas dad pa'i dbang du byas te/mi rtag pa nyid la mngon sum nyid dang lkog tu ma gyur ba nyid dang / gzhan gyi dring mi 'jog pa nyid yang dang yang du yongs su tshol bar byed do/ /ji ltar yongs su tshol bar byed ce na/ smras pa dngos po gnyis rnam par 'jog par byed de/ gnyis gang zhe na/ nang gi dngos po dang /phyi rol gyi dngos po'o/ /de la nang gi dngos po ni skye mched drug po gang yin pa dag go/ /phyi rol gyi dngos po ni dngos po rnam pa bcu drug ste/ bcu drug gang zhe na/ sa gzhi'i dngos po 'di lta ste/ grong dang / grong rdal dang / khang khyim dang / tshong khang la sogs pa dang / kun dga' ra ba'i dngos po 'di lta ste/ shing ljon pa dang / rtswa dang / sman dang / nags tshal la sogs pa dang / ri'i dngos po 'di lta ste/ ri rnam pa sna tshogs su gnas pa rnams dang / chu'i dngos po 'di lta ste/ chu mig dang / mtsho dang / mtshe'u dang / chu klung la sogs pa dang /las kyi mtha'i dngos po 'di lta ste/ zhing la sogs pa dang / sog 'jog gi dngos po mdzod la sogs pa dang / zas kyi dngos po dang / skom gyi dngos po dang / bzhon pa'i dngos po dang / gos kyi dngos po dang / rgyan gyi dngos po dang / bzhad gad dang / glu bro dang / rol mo'i sgra'i dngos po dang / spos dang / me tog phreng dang / phyug pa'i dngos po dang / snod spyad kyi dngos po dang / snang ba dang / mun pa'i dngos po dang / pho mos dga' dgur spyod pa'i dngos po ste/ de dag ni phyi rol gyi dngos po bcu drug yin no/ /des de ltar nang dang phyi rol gyi dngos po rnam par bzhag nas/re zhig mngon sum gyi dbang du byas pa'i yid la byed pas nang gi dngos po'i 'gyur ba'i mi rtag pa nyid yongs su tshol bar byed do/ de la nang gi dngos po'i 'gyur ba ni rnam pa bco lnga dang / 'gyur ba'i rgyu rnam pa brgyad yod do/ de la nang gi dngos po'i 'gyur ba rnam pa bco lnga gang zhe na/'di lta ste/ gnas skabs las gyur pa dang / kha dog las gyur pa dang / dbyibs las gyur pa dang / 'byor pa dang rgud pa las gyur pa dang / yan lag dang nying lag tshang ba dang ma tshang ba las gyur pa dang / yongs su ngal ba las gyur pa dang /gzhan gyi gnod pa byas pa las gyur pa dang / grang ba dang dro ba las gyur pa dang / spyod lam las gyur pa dang / reg pa las gyur pa dang / kun nas nyon mongs pa las gyur pa dang / na ba las gyur pa dang / 'chi ba las gyur pa dang / rnam par bsngos pa la sogs pa las gyur pa dang / rnam pa thams cad kyi thams cad du mi snang zhing yongs su zad pa las gyur pa'i 'gyur ba'o/ /de la 'gyur ba'i rgyu rnam pa brgyad gang zhe na/ smras pa 'di lta ste/ dus kyis yongs su 'gyur ba dang / gzhan gyis gnod pa byas pa dang /longs spyad pa dang / dus tshigs 'gyur ba dang / mes tshig pa dang / chus khyer ba dang / rlung gis bskams pa dang / rkyen gzhan dang phrad pa'o/ /de la dus kyis yongs su 'gyur ba zhes bya ba ni/ 'di lta ste/ dngos po gzugs can gang dag gnas bzang por bzhag kyang dus gzhan na rnyings pa dang /gzugs gyur par snang ba lta bu'o/ /de la gzhan gyis gnod pa byas pa zhes bya ba ni/ 'di lta ste/ gzhan gyi gzugs sna tshogs dag dang / mtshon cha sna tshogs dag dang / gnod pa bya ba'i khyad par sna tshogs dag gis 'gyur ba sna tshogs skyed par byed pa lta bu'o//de la longs spyod pa zhes bya ba ni 'di lta ste/ so so'i bdag po gzugs sna tshogs la longs spyod par byed pa dag gis longs spyod pa'i dbang gis 'gyur ba skyed par byed pa lta bu'o/ /de la dus tshigs 'gyur ba zhes bya ba ni 'di lta ste/ dgun ni rtswa dang / sman dang /nags tshal la sogs pa skya ba dang / lhags par 'gyur la/ dpyid dang / dbyar dag ni sngo zhing rgyas pa dang / de bzhin du 'bras bu rgyas pa dang / me tog rgyas par 'gyur ba lta bu ste/ de la de dag gi 'byor ba dang rgud par gyur pa yang de nyid yin no/ /de la mes tshig pa zhes bya ba ni 'di lta ste/me shor na grong dang / grong rdal dang / rgyal po'i pho brang dang / yul 'khor gyi gnas dag tsheg par 'gyur ba lta bu'o/ /de la chus khyer ba zhes bya ba ni/ 'di lta ste/ chu'i 'jigs pa chen po byung na/ grong dang / grong rdal dang / rgyal po'i pho brang dang / yul 'khor gyi gnas dag khyer bar 'gyur ba lta bu'o//de la rlung gis bskams pa zhes bya ba ni/ 'di lta ste/ rlung gi phung po chen pos sa phyogs gsher ba dag dang / de bzhin du gos gsher ba dag dang / 'bru'i rnam pa gsher bdag myur ba myur ba kho nar bskams par 'gyur ba lta bu'o/ / de la rkyen gzhan dang phrad pa zhes bya ba ni/ 'di lta ste/ bde ba'i tshor ba myong bar 'gyur ba'i reg pa la brten te/ bde ba'i tshor ba myong ba na sdug bsngal gyi tshor ba myong bar 'gyur ba'i reg pa dang phrad pa dang / de bzhin du sdug bsngal gyi tshor ba myong bar 'gyur ba'i reg pa la brten te/sdug bsngal gyi tshor ba myong ba na/ bde ba'i tshor ba myong bar 'gyur ba'i reg pa dang / phrad pa dang / sdug bsngal yang ma yin bde ba yang ma yin pa'i tshor ba myong bar 'gyur ba'i reg pa la brten te/ sdug bsngal yang ma yin bde ba yang ma yin pa'i tshor ba myong ba na/ bde ba'i tshor ba'am/sdug bsngal gyi tshor ba myong bar 'gyur ba'i reg pa dang phrad pa dang / de bzhin du chags par 'gyur ba na/ khong khro ba'i rgyu mtshan dang phrad na/ de dang phrad pa'i phyir 'dod chags kyis kun nas dkris pa dang 'bral zhing / khong khro ba'i kun nas dkris pa skye bar 'gyur ba dang /zhe sdang bar 'gyur ba dang / rmongs par 'gyur ba na mi 'dra ba'i nyon mongs pa skye ba'i rgyu mtshan dang phrad pa yang de bzhin du rig par bya'o/ /gzhan yang 'di lta ste/ mig gi rnam par shes pa mngon sum du gyur pa na/ yul sgra dang phrad pa dang / dri dang / ro dang / reg bya dang / chos kyi mtshan ma dang phrad dang / yul gzhan gyi rkyen de dag gis rnam par shes pa mi 'dra ba dag skye bar 'gyur ba lta bu'o/ /brgyad po de dag ni 'gyur ba'i rgyu yin te / gzugs can nam gzugs can ma yin pa'i chos can gang dag 'gyur ba de dag thams cad kyi rgyu ni brgyad po de dag yin te/de las gong na yang med la de las lhag pa yang med do// //nyan thos kyi sa bam po bcu dgu pa/ de la ji ltar na nang gi dngos po'i gnas skabs las gyur pa'i 'gyur ba'i mi rtag pa nyid yongs su tshol bar byed ce na/ 'di ni des bdag nyid dam/gzhan dag gis gzhon nu'i gnas skabs nas bzung ste/ rgas pa'i bar gyi gnas skabs dag mthong bar gyur cing / 'du byed kyi rgyun snga phyi mi 'dra ba dang / shin tu tha dad pa dang / rnam par 'gyur ba de dag mthong nas kyang de 'di snyam du sems te/ 'di ltar nang gi 'du byed 'di dag gi gnas skabs las gyur pa'i 'gyur ba 'di lta bu dag mngon sum kho nar snang ba las na/kye ma 'du byed 'di dag ni mi rtag pa yin no snyam du sems te/ de ltar na nang gi dngos po'i gnas skabs las gyur pa'i 'gyur ba'i mi rtag pa nyid yongs su tshol bar byed do/ / de la ji ltar na nang gi dngos po'i kha dog las gyur pa'i 'gyur ba'i mi rtag pa nyid yongs su tshol bar byed ce na/ 'di na des bdag nyid dam/ gzhan dag gi sha mdog sngon kha dog bzang ba nyid dang / mdangs bzang ba nyid dang / mdog yongs su dag pa nyid du mthong la/ phyis kha dog ngan pa nyid dang /mdangs ngan pa nyid dang / mdog rtsub pa nyid du mthong ste/ mthong nas kyang yang phyir bzlog ste/ dus gzhan gyi tshe na sha mdog de nyid kha dog bzang ba nyid dang / mdangs bzang ba nyid dang / mdog yongs su dag pa nyid du mthong nas/ de 'di snyam du sems te/ 'di ltar nang gi 'du byed 'di dag gi kha dog las gyur pa'i 'gyur ba 'di lta bu dag mngon sum kho nar snang ba las na / kye ma 'du byed 'di dag ni mi rtag pa yin no snyam du sems te/ de ltar na nang gi dngos po'i kha dog las gyur pa'i 'gyur ba'i mi rtag pa nyid yongs su tshol bar byed do/ /de la ji ltar na nang gi dngos po'i dbyibs las gyur pa'i 'gyur ba'i mi rtag pa nyid yongs su tshol bar byed ce na/kha dog ji skad bstan pa de bzhin du dbyibs kyang chung ngu dang / chen po pa 'gyur ba'i mi rtag pa nyid du rig par bya ste/ 'di na des bdag nyid dam/ gzhan dag gi dbyibs chen po dang / chung ngu de lta bu dag mthong nas/ de 'di snyam du sems te/ 'di ltar nang gi 'du byed 'di dag gi dbyibs las gyur pa'i 'gyur ba 'di lta bu dag mngon sum kho nar snang ba las na/ kye ma 'du byed 'di dag ni mi rtag pa yin no snyam du sems te/ de ltar nang gi dngos po'i dbyibs las gyur pa'i 'gyur ba'i mi rtag pa nyid yongs su tshol bar byed do//de la ji ltar na nang gi dngos po'i 'byor ba dang / rgud pa las gyur pa'i 'gyur ba'i mi rtag pa nyid yongs su tshol bar byed ce na/ 'byor pa zhes bya ba ni 'di lta ste/ nye du'i 'byor pa dang / longs spyod kyi 'byor ba dang / tshul khrims dang lta ba'i 'byor ba'o//de las bzlog pa ni rgud pa ste/ 'di na des bdag nyid dam/ gzhan dag gi 'byor pa dang / rgud pa 'di lta bu dag mthong nas/ de 'di snyam du sems te/ 'di ltar nang gi 'du byed 'di dag gi 'byor ba dang rgud pa las gyur pa'i 'gyur ba 'di lta bu dang / mngon sum kho nar snang ba las na/ kye ma 'du byed 'di dag ni mi rtag pa nyid yin no snyam du sems te/ de de ltar nang gi dngos po'i 'byor pa dang / rgud pa las gyur pa'i 'gyur ba'i mi rtag pa nyid yongs su tshol bar byed do/ /de la ji ltar na nang gi dngos po'i yan lag dang nying lag tshang ba dang /ma tshang ba las gyur pa'i 'gyur ba'i mi rtag pa nyid yongs su tshol bar byed ce na/ 'di na des bdag nyid dam/ gzhan dag gi yan lag dang / nying lag sngon tshang bar mthong la phyis dus gzhan gyi tshe na/ rgyal po'am/ rkun po'am/ mi'am mi ma yin pa dag gis ma tshang bar byas pa yang mthong ste/mthong nas kyang de 'di snyam du sems te/ 'di ltar nang gi 'du byed 'di dag gi yan lag dang nying lag tshang ba dang / ma tshang ba las gyur pa'i 'gyur ba 'di lta bu dag mngon sum kho nar snang ba las na/ kye ma 'du byed 'di dag ni mi rtag pa yin no snyam du sems te/de ltar nang gi dngos po'i yan lag dang / nying lag tshang ba dang / ma tshang ba las gyur pa'i 'gyur ba'i mi rtag pa nyid yongs su tshol bar byed do/ /de la ji ltar na nang gi dngos bo yongs su ngal ba las gyur ba'i 'gyur ba'i mi rtag pa nyid yongs su tshol bar byed ce na/'di na des bdag nyid dam gzhan dag gi lus sngon brgyugs pa'am/ rgyal ba'am/ mchongs pa'am/ 'dzegs pa'am/ las sna tshogs rings par byas pas yongs su ngal ba dang lus yongs su dung bar mthong la/ des dus gzhan gyi tshe na/ yongs su ngal ba dang / yongs su dub pa med par mthong ste/ mthong nas kyang de 'di snyam du sems te/ 'di ltar nang gi 'du byed 'di dag gi yongs su ngal ba las gyur pa'i 'gyur ba 'di lta bu dag mngon sum kho nar snang ba las na/ kye ma 'du byed 'di dag ni mi rtag pa yin no snyam du sems te/ de ltar nang gi dngos po yongs su ngal ba las gyur pa'i 'gyur ba'i mi rtag pa nyid yongs su tshol bar byed do/ /de la ji ltar na nang gi dngos po gzhan gyis gnod pa byas pa las gyur ba'i 'gyur ba'i mi rtag pa nyid yongs su tshol bar byed ce na/ 'di ni des bdag nyid dam/ gzhan dag gi lus la gzhan gyis gnod pa byas pa 'di lta ste/lcug lcag gam/ rta lcag gam/ sba lcag gam/ 'breng lcag dag gis gzhus pa'am/ de bzhin du sha sbrang dang sbrang bu mchu rings dang / sdig sbrul la sogs pa'i reg pa sna tshogs dag gis rnam par gyur par mthong la/ de dus gzhan gyi tshe na rnam par gyur pa de dag med pa mthong ste/ mthong nas kyang de 'di snyam du sems te/ 'di ltar nang gi 'du byed 'di dag gi gzhan gyis gnod pa byas pa las gyur pa'i 'gyur ba 'di lta bu dag mngon sum kho nar snang ba las na / kye ma 'du byed 'di dag ni mi rtag pa yin no snyam du sems te/de ltar nang gi dngos po gzhan gyis gnod pa byas pa las gyur pa'i 'gyur ba'i mi rtag pa nyid yongs su tshol bar byed do/ /de la ji ltar na nang gi dngos po grang ba dang / dro ba las gyur pa'i 'gyur ba'i mi rtag pa nyid yongs su tshol bar byed ce na/ 'di na des grang ba'i dus la bab pa'i tshe na/bdag nyid dam gzhan dag gi lus sbre bas pa dang / lus zhum pa dang / grang ba'i kun nas dkris pas nyen pas dro ba 'dod par mthong na / dro ba'i dus la bab pa'i tshe na ni lus sbrebs pa med pa dang / lus zhum pa med pa dang / lus rngul ba dang / lus gdung ba dang /kha skams pa dang / skom gyis gdungs shing bsil ba'i reg pa 'dod par mthong ste/ mthong nas kyang yang phyir bzlog ste/ grang ba'i dus la bab pa'i tshe na sngar bshad pa'i rnam pa kho na lta bu dag mthong ste/ mthong nas kyang de 'di snyam du sems te/ 'di ltar nang gi 'du byed 'di dag gi grang ba dang /dro ba las gyur pa 'gyur ba 'di lta bu dag mngon sum kho nar snang ba las na/ kye ma 'du byed 'di dag ni mi rtag pa yin no snyam du sems te/ de ltar nang gi dngos po'i grang ba dang / dro ba las gyur pa'i 'gyur ba'i mi rtag pa nyid yongs su tshol bar byed do/ /de la ji ltar na nang gi dngos po'i spyod lam las gyur pa'i 'gyur ba'i mi rtag pa nyid yongs su tshol bar byed ce na/'di na des bdag nyid dam/ gzhan dag gis 'chag pa dang / 'dug pa dang / 'greng ba dang / nyal ba'i spyod lam dag las lan 'ga' ni bdag nyid dam gzhan dag la spyod lam gang yang rung ba bdag gis gnod pa mthong la/lan 'ga' ni de dag nyid kyis phan par mthong ste/ mthong nas kyang de 'di snyam du sems te/ 'di ltar nang gi 'du byed 'di dag gi spyod lam las gyur pa'i 'gyur ba 'di lta bu dag mngon sum kho nar snang ba las na/ kye ma 'du byed 'di dag ni mi rtag pa yin no snyam du sems te/de ltar nang gi dngos po'i spyod lam las gyur pa'i 'gyur ba'i mi rtag pa nyid yongs su tshol bar byed do/ /de la ji ltar na nang gi dngos po'i reg pa las gyur pa'i 'gyur ba'i mi rtag pa nyid yongs su tshol bar byed ce na/ 'di na des bde ba'i tshor ba myong bar 'gyur ba'i reg pas reg pa'i tshe bde ba'i tshor ba myong bar 'gyur ba'i reg pa la brten te skyes pa'i bde ba'i tshor ba myong ba na/bdag nyid kyis bde bar tshor ba'i gnas skabs yongs su gcod par byed pa dang / bde bar tshor ba'i gnas skabs la ji lta ba bzhin du sdug bsngal dang / sdug bsngal yang ma yin/ bde ba yang ma yin par tshor ba'i gnas skabs kyang de dang 'dra de / tshor ba de dag kyang snga phyir sar pa sar pa dang / rnying pa ma yin pa rnying pa ma yin pa dang / byung nas 'jig pa dang / re zhig pa dang / yun ring du mi gnas pa dang /gzhan du 'gyur ba mthong ngo / /mthong nas kyang de 'di snyam du sems te/ 'di ltar nang gi 'du byed 'di dag gi reg pa las gyur pa'i 'gyur ba 'di lta bu dag mngon sum kho nar snang ba las na / kye ma 'du byed 'di dag ni mi rtag pa yin no snyam du sems te/ 'di ltar nang gi dngos po'i reg pa las gyur pa'i 'gyur ba'i mi rtag pa nyid yongs su tshol bar byed do//de la ji ltar na nang gi dngos po'i kun nas nyon mongs pa las gyur pa'i 'gyur ba'i mi rtag pa nyid yongs su tshol bar byed ce na/ 'di na des bdag nyid dam/ gzhan dag gi sems 'dod chags dang bcas pa dang /'dod chags dang bral ba dang / zhe sdang dang bcas pa dang / zhe sdang dang bral ba dang / gti mug dang bcas pa dang / gti mug dang bral ba byung ngo cog yongs su shes shing sems nye ba'i nyon mongs pa gang yang rung ba dag gis nye bar nyon mongs par gyur na yang nye bar nyon mongs so zhes bya bar yongs su shes la nye bar nyon mongs pa med pa na yang /nye bar nyon mongs pa med do zhes bya bar yongs su shes te/ nyon mongs pa dang / nye ba'i nyon mongs pa de dag gis snga phyir sems kyi rgyud nyon mongs shing rnam par gyur pa dang /rnam par ma gyur pa de dag mthong nas kyang / de 'di snyam du sems te/ de ltar na nang gi 'du byed 'di dag gis kun nas nyon mongs pa las gyur pa'i 'gyur ba 'di lta bu dag mngon sum kho nar snang ba las na/ kye ma 'du byed 'di dag ni mi rtag pa yin no snyam du sems te/ de ltar nang gi dngos po'i kun nas nyon mongs pa las gyur pa'i 'gyur ba'i mi rtag pa nyid yongs su tshol bar byed do/ /de la ji ltar na nang gi dngos po'i na ba las gyur pa'i 'gyur ba'i mi rtag pa nyid yongs su tshol bar byed ce na/ 'di na des lan 'ga' ni bdag nyid dam/ gzhan dag nad med pa dang /bde ba dang / stobs dang ldan par mthong la/ des dus gzhan gyi tshe na ni/ bdag nyid dam/ gzhan dag na ba dang / sdug bsngal ba dang / na tshabs che ba dang / lus kyi tshor ba sdug bsngal mi bzad pa/ rtsub pa tsha ba yid du mi 'ong ba dag gis rgyas par snga ma bzhin du reg par yang mthong ngo //des yang dus gzhan gyi tshe na/ nad med pa dang / bde ba dang / stobs dang ldan par yang mthong ste/ mthong nas kyang de 'di snyam du sems te/ 'di ltar nang gi 'du byed 'di dag gi na ba las gyur pa'i 'gyur ba 'di lta bu dag mngon sum kho nar snang ba las na/kye ma 'du byed 'di dag ni mi rtag pa yin no snyam du sems te/ de ltar nang gi dngos po'i na ba las gyur pa'i 'gyur ba'i mi rtag pa nyid yongs su tshol bar byed do/ /de la ji ltar na nang gi dngos po'i 'chi ba las gyur pa'i 'gyur ba'i mi rtag pa nyid yongs su tshol bar byed ce na/'di na des sngon gson zhing 'tsho la/ 'dug cing sdod pa gang yin pa de yang mthong la/ de dus gzhan gyi tshe na/ shi zhing dus las 'das la rnam par shes pas stong ba'i lus gang yin pa yang mthong ngo / /mthong nas kyang de 'di snyam du sems te/ 'di ltar nang gi 'du byed 'di dag gi 'chi ba las gyur pa'i 'gyur ba 'di lta bu dag mngon sum kho nar snang ba las na/kye ma 'du byed 'di dag ni mi rtag pa yin no snyam du sems te/ de ltar nang gi dngos po'i 'chi ba las gyur pa'i 'gyur ba'i mi rtag pa nyid yongs su tshol bar byed do/ /de la ji ltar na nang gi dngos po'i rnam par bsngos pa la sogs pa las gyur pas 'gyur ba'i mi rtag pa nyid yongs su tshol bar byed ce na/des shi ba'i ro de nyid lan 'ga' ni rnam par bsngos pa'i gnas skabs su mthong la lan 'ga' ni rnam par rnags pa'i gnas skabs su mthong ngo / /de bzhin du lan 'ga' ni rus pa'i keng rus kyi gnas skabs kyi bar du mthong ste/mthong nas kyang de 'di snyam du sems te/ 'di ltar nang gi 'du byed 'di dag gi rnam par bsngos pa la sogs pa las gyur pa'i 'gyur ba 'di lta bu dag mngon sum kho nar snang ba las na/ kye ma 'du byed 'di dag ni mi rtag pa yin no snyam du sems te/de ltar na nang gi dngos po'i rnam par bsngos pa la sogs pa las gyur pa'i 'gyur ba'i mi rtag pa nyid yongs su tshol bar byed do/ /de la ji ltar na nang gi dngos po'i thams cad kyi thams cad du mi snang zhing yongs su zad pa las gyur pa'i 'gyur ba'i mi rtag pa nyid yongs su tshol bar byed ce na/des dus gzhan gyi tshe na/ rus pa'i keng rus kyi gnas skabs de nyid kyang thams cad kyi thams cad du zhigs shing zhu ste/ mi snang ba thams cad kyi thams cad du mig sngar mi snang bar mthong ste/ mthong nas kyang de 'di snyam du sems te/ 'di ltar nang gi 'du byed 'di dag gi thams cad kyi thams cad du mi snang zhing yongs su zad pa las gyur pa'i 'gyur ba dang / rnam par 'gyur ba 'di lta bu dag snga phyir mngon sum kho nar snang ba las na/ kye ma 'du byed 'di dag ni mi rtag pa yin no snyam du sems te/ 'di ltar nang gi dngos po'i thams cad kyi thams cad du mi snang zhing yongs su zad pa las gyur ba'i 'gyur ba'i mi rtag pa nyid yongs su tshol bar byed do//de re zhig de ltar mngon sum gyi dbang du byas pa'i yid la byed pas/ 'gyur ba rnam pa bco lngas nang gi dngos po'i 'gyur ba'i mi rtag pa nyid rnam par dpyod par byed do//des de ltar yongs su dpyod nas phyi rol gyi dngos po'i 'gyur ba'i rnam pa bcu drug po dag gi mi rtag pa nyid la rnam par dpyod par byed de/ des sa gzhi'i dngos po'i sa'i phyogs gang dag tu sngon khang khyim gyi dngos po dang / tshong khang gi dngos po dang / bsod nams byas pa'i gnas dang / gnas khang dang / lha khang dang / gtsug lag khang gi dngos po'i rnam pa dag mngon par 'dus byas pa ma mthong la/ phyis mngon par 'dus byas shing mngon par gsar pa dang / legs par byas pa dang / legs pa byugs pa yang mthong / des dus gzhan gyi tshe ni de dag rnyings pa dang / gas pa dang / ral ba dang / zhigs pa dang / rul ba dang / rdib pa dang / ser ga dang / rnga rngo dang / mes tshig pa'am/ chus khyer bar yang mthong ste/ mthong nas kyang de 'di snyam du sems te/ 'di ltar phyi rol gyi dngos po 'di dag gi 'gyur ba dang /rnam par 'gyur ba 'di lta bu dag snga phyir mngon sum kho nar snang ba las na/ kye ma 'du byed 'di dag ni mi rtag pa yin no snyam du sems te/ de ltar phyi rol gyi sa gzhi'i dngos po'i 'gyur ba'i mi rtag pa nyid rnam par dpyod par byed do/ /de bzhin du des kun dga'i ra ba'i dngos po shing ljon pa dang /rtswa dang / sman dang / nags tshal dang / skyed mos tshal la sogs pa dag kyang lan 'ga' ni me tog dang 'bras bu rgyas shing sngo ba dang / mdzes pa dang / mngon par dga' bar snang la/ dus gzhan gyi tshe na ni/ skams shing me tog dang 'bras bu yal ba dang /mes tshig pa'am/ chu khyer ba la sogs par snang ba dang / de bzhin du ri'i dngos po ri rnam pa sna tshogs su gnas pa rnams kyang lan 'ga' ni rdo la sogs pa phun sum tshogs par snang la/ lan 'ga' ni rdo med pa dang / rtse mo bsnyil ba dang / ngos chad pa dang / mes tshig pa'am/ chus brlan pa la sogs par snang ba dang / de bzhin du chu'i dngos po chu mig dang / mtsho dang / mtshe 'u dang / chu klung dang / khron pa la sogs pa dag kyang lan 'ga' ni chus rgyas par snang la/ lan 'ga' ni chu yongs su zad pa dang / thams cad kyi thams cad du skams pa dang /thal bar gyur pa dang / stong pa la sogs par snang ba dang / de bzhin du las kyi mtha'i dngos po 'di lta ste/ zhing las dang / gru'i las dang / nyo tshong gi las dang / bzo'i las kyi gnas sna tshogs dag kyang lan 'ga' ni 'byor bar snang la/ lan 'ga' ni rgud par snang ba dang /de bzhin du gsog 'jog gi dngos po mdzod la sogs pa rnam pa sna tshogs rnam pa mang po dag kyang lan 'ga' ni 'phel bar snang la/ lan 'ga' ni 'grib par snang ba dang / de bzhin du zas kyi dngos po dang / skom gyi dngos po dag kyang lan 'ga' ni legs par sbyar ba'i gnas skabs su snang la/lan 'ga' ni legs par ma sbyar ba'i gnas skabs su snang ba dang / de bzhin du lan 'ga' ni kha chu'i tshogs kyis brlan pa dang / lan 'ga' ni bshang ba dang / gci pa'i gnas skabs su gyur pa'i bar du snang ba dang / de bzhin du bzhon pa'i dngos po rnam pa sna tshogs dag kyang lan 'ga' ni legs par mdzes par byas pa dang /legs par brgyan pa dang / sar ba dag tu snang la/ lan 'ga' ni mdzes pa med pa dang / rgyan med pa dang / rnyings pa dag tu snang ba dang / de bzhin du gos kyi dngos po rnam pa sna tshogs dag kyang lan 'ga' ni sar pa sar par snang la/lan 'ga' ni rnyings pa dang / dengs par snang ba dang / lan 'ga' ni gtsang bar snang la/ lan 'ga' ni dri ma can du snang ba dang / de bzhin du rgyan gyi dngos po rnam pa sna tshogs dag kyang lan 'ga' ni legs par mdzes par snang la/lan 'ga' ni mi mdzes par snang ba dang / lan 'ga' ni brling por snang ba dang / lan 'ga' ni chag pa dang / grugs pa dang / yongs su zad par snang ba dang / de bzhin du bzhad gad dang / glu bro dang / rol mo'i sgra'i dngos po'i sil snyan gyi 'byor ba sna tshogs 'dus pa las byung ba dag kyang lan 'ga' ni 'byor par snang la/lan 'ga' ni 'jig par snang ba dang / de bzhin du spos dang / me tog phreng ba dang / byug pa'i dngos po dag kyang lan 'ga' ni gsar pa dang dri zhim par snang la/ lan 'ga' ni rnyings pa dang / dri nga bar snang ba dang /lan 'ga' ni ha cang dri zhim pa dang / dri nga ba dang / brlan pa dang / skams pa ma yin par snang ba dang / de bzhin du snod spyad kyi dngos po rnam kyang lan 'ga' ni byi dor ma byas par snang la/ lan 'ga' ni byi dor byas par snang ba dang / lan 'ga' ni brling bang snang la/ lan 'ga' ni chag par snang ba dang /de bzhin du snang ba dang / mun pa'i dngos po yang lan 'ga' 'byung ba dang / lan 'ga' 'jig par snang ba dang / de bzhin du pho mos dga' mgur spyod pa'i dngos po yang mi brtan zhing lan 'ga' 'byung ba dang / lan 'ga' 'jig par snang bar mthong ste/ mthong nas kyang de 'di snyam du sems te/ 'di ltar phyi rol gyi 'du byed yongs su bzung ba'i dngos po drug dang / lus kyi yo byad bcu bo de dag gi 'gyur ba dang / rnam par 'gyur ba 'di lta bu dag snga phyir mngon sum kho nar snang ba las na/ kye ma 'du byed 'di dag ni mi rtag pa yin no snyam du sems te/mngon sum gyi dbang du byas pa'i yid la byed pas/ nang dang phyi rol gyi dngos po'i 'gyur ba'i rgyu rnam pa brgyad po sngar bstan pa de dag gis thams cad la yang ci rigs par de bzhin du sbyar bar rig par bya ste/ de ltar na 'gyur ba'i rnam pas mi rtag pa nyid rnam par dpyod par byed pa yin no// des ji ltar 'gyur ba'i mi rtag pa nyid gang yin pa de mngon sum du mthong zhing nyams su myong la gzhan gyi dring mi 'jog par gyur cing / gzhan gyis bkrir mi zug par gyur pa de la de ltar rnam par dpyod cing rjes su dran par byed pas na/ shin tu rnam par nges pa skye bar 'gyur bas na/de'i phyir mngon sum gyi dbang du byas pa'i yid la byed pa zhes bya'o/ /des de ltar mngon sum gyi dbang du byas pa'i yid la byed pas 'gyur ba'i mi rtag pa nyid rnam par dpyad nas/ 'du byed gzugs can gang dag gi skad cig la 'byung zhing / 'jig pa dang med par 'gyur ba yod cing med pa ma yin pa bzhin du mi mthong ba de la mngon sum gyi dbang du byas pa'i yid la byed pa la brten nas rjes su dpog par byed de/'di ltar rjes su dpog par byed do/ /'di ltar snga phyir gyur pa de lta bu dag ni 'du byed skad cig la 'byung zhing 'jig pa dang / med par 'gyur ba 'di dag la rigs kyi/ de kho na bzhin du gnas pa dag la ni mi rigs pas de phyir 'du byed rnams ni skad cig pa ste/rkyen de dang de dag yod na de lta de ltar 'byung bar 'gyur la/ byung nas kyang 'jig pa'i rkyen la mi ltos par rang gi ngang gis 'jig par 'gyur ro/ /'gyur ba'i rgyu rnam pa brgyad po gang dag yin pa de dag ni gzhan du 'gyur ba dang /rnam par 'gyur ba skye ba'i rgyur 'gyur ba yin gyi 'jig pa'i rgyu ni ma yin no/ /de ci'i phyir zhe na/ 'jig pa'i rgyu de dang 'du byed zhigs pa rnams ni lhan cig pa nyid yin pas/ de'i phyir mi 'dra bar 'byung bar snang ba yin gyi/ thams cad kyi thams cad du mi 'byung ba nyid ni ma yin no//'du byed gang dag thams cad kyi thams cad du mi 'byung bar snang ba yang yod de/ 'di lta ste/ dper na/ chu bskol na mjug tu thams cad kyi thams cad du yongs su zad par 'gyur ba lta bu dang snod kyi 'jig rten bskal pa'i mes bsregs pa na mjug tu du ba yang med/thal ba'i lhag ma yang med par 'gyur ba lta bu'o zhe na/ de dag ni rgyu phyi ma phyi ma dag yongs su zad nas/ mjug tu thams cad kyi thams cad du med par 'gyur ba yin gyi / me ni de ltar mi byed pas de'i phyir brgyad po ji skad smos pa de dag ni 'gyur ba'i rgyu yin gyi/'jig pa ni rang gi dang kho nas 'jig pa yin no/ /des de ltar rjes su dpag pa las byung ba'i yid la byed pas/ 'du byed skad cig la byung zhing 'jig pa dang / med par 'gyur ba de nyid la nges pa thob par 'gyur ro/ /nges pa thob nas kyang mngon sum ma yin pa'i 'jig rten pha rol du 'du byed 'jug par rjes su dpog par byed de/'di ltar rjes su dpog par byed do/ /sems can gang dag kha dog bzang ba dang / kha dog ngan pa dang / rigs mtho ba dang / rigs dma' ba dang / phyug po'i khyim du skyes pa dang / dbul po'i khyim du skyes pa dang / dbang chung bar grags pa dang /dbang che bar grags pa dang / tshe ring ba dang / tshe thung ba dang / tshig gzung bar 'os pa dang / tshig gzung bar 'os pa ma yin pa dang / dbang po rno ba dang / dbang po rtul ba dag kyang yod de/ sems can sna tshogs de dag la ni/ las sna tshogs kyang yod par rigs la/med par mi rigs pas/ sems can de lta bu dag gis ni/ sngon dge ba dang / mi dge ba'i las de lta bu sna tshogs dag gdon mi za bar byas shing bsags pa yin te/ rgyu de dang rkyen des na de dag gi lus de lta bu sna tshogs dag mngon par grub pa yin no/ /de ni dbang phyug gis sprul pa'i rgyu las byung ba yin par yang mi rigs te/gal te dbang phyug gis sprul pa'i rgyu las byung ba zhig yin par gyur na/ de dbang phyug gi rkyen kho na las byung ba zhig gam/ 'on te dbang phyug gis sprul pa'i rkyen gzhan zhig las byung ba yin grang na/ gal te dbang phyug gi rkyen kho na las byung ba yin na ni/de na dbang phyug dang 'du byed de dag go mnyam du 'byung bar 'gyur bas mi rung ngo / /ji ste dbang phyug snga la 'du byed rnams phyis 'byung na ni/ des na dbang phyug 'du byed rnams kyi rkyen ma yin pas mi rung ngo / /ji ste dbang phyug gi 'dod pa dang / rtsol ba dang / smon lam dang / sprul pa'i rgyu las byung ba yin na ni des na dbang phyug kho na las byung ba ma yin pas mi rung ngo / /'dod pa la sogs pa de dag kyang rgyu dang bcas pa yin nam 'on te rgyu med pa zhig yin/ gal te rgyu dang bcas pa zhig yin na ni/ rgyu dbang phyug kho na yin pas des na skyon snga ma dang 'dra bas mi rung ngo / / ji ste rgyu gzhan zhig yin na ni/ des na ji ltar 'dod pa dang / rtsol ba dang / smon lam dang / sprul pa dag gi rgyu dbang phyug ma yin pa chos gzhan zhig yod pa de bzhin du 'du byed thams cad kyang chos gzhan gyi rgyu las byung ba yin pa kho nar 'gyur bas/ dbang phyug yin par brtags pa don med pa des ci zhig bya/de ltar rjes su dpag pa las byung ba'i yid la byed pa de dag la sogs pa de lta bu dang mthun pa dag gis 'jig rten pha rol du 'du byed rnams la 'jug par 'gyur ba la nges par 'thob par 'gyur te/ de de ltar yid la byed pa rnam pa gsum po dad pa'i dbang du byas pa dang /mngon sum gyi dbang du byas pa dang / rjes su dpag pa'i dbang du byas pa'i dbang gis mi rtag pa nyid la rnam par dpyod par byed do/ /de la sngar bsgoms pa rnam pa lnga dang ldan pa'i mi rtag pa rnam pa lnga bstan pa gang yin pa de la 'gyur ba'i rnam pa dang / 'jig pa'i rnam pa ni bstan zin na/bral ba'i rnam pa'i mi rtag pa gang zhe na/ de yang nang dang phyi rol la brten pa yin par rig par bya ste/ de la nang la brten pa gang zhe na/ 'di lta ste la la zhig sngon gzhan dag gi rje bor gyur cing bran ma yin pa dang / mngag gzhug ma yin pa dang / rang dbang can dang /las mi ma yin par gyur pa las/ de dus gzhan gyi tshe na/ rje bo'i dngos po dang / bran ma yin pa'i dngos po dang bral zhing gzhan dag gi bran nyid du gyur nas/ rje bo'i dngos po dang bral ba lta bu dang / de bzhin du longs spyod yod cing bdog pa ma nyams shing chud ma zos pa las/rgyal po'am/ chom rkun nam/ rigs rgyud sdang ba dag gis phrogs pa'am/ gter ngan par sbas pa las chud zos pa'am/ brtsal ba las ma rnyed pa'am/ de lta bu dang mthun pa dag ni bral ba'i rnam par mi rtag pa nyid yin par rig par bya'o/ /de la chos nyid kyi rnam pa'i mi rtag pa nyid gang zhe na/'di lta ste/ 'gyur ba'i mi rtag pa nyid dang / 'jig pa'i mi rtag pa nyid dang bral ba'i mi rtag pa nyid gang yin pa de dag nyid da ltar byung ba'i dus su nye bar ma gyur du zin kyang 'du byed 'di dag ni ma 'ongs pa'i dus su de lta bu'i chos nyid dang / de lta bu dang mthun par 'gyur ba yin no zhes ma 'ongs pa'i dus na rnam par 'jig par 'gyur ba'i chos nyid yin par so sor rtog par byed do//de la nye ba'i rnam pa'i mi rtag pa nyid gang zhe na/ 'gyur ba'i mi rtag pa nyid dang / 'jig pa'i mi rtag pa nyid dang / bral ba'i mi rtag pa nyid gang yin pa de dag nyid mngon sum du gyur pa la kun du rtog par byed pa'o//des de ltar nang dang phyi rol gyi 'du byed rnams kyi mi rtag pa nyid rnam pa lnga po dag la/ rnam pa lnga po de dag gis ci rigs par yid la byas shing lan mang du byas pa dang / 'thad pa bsgrub pa'i rigs pa'i dbang du byas pas nges pa thob nas de'i 'og tu sdug bsngal gyi rnam pa la 'jug par byed de /de 'di snyam du sems te/ 'du byed mi rtag pa gang yin pa de dag gi mi rtag pa nyid ni skye ba'i chos nyid yin par rigs te/ de ltar na 'du byed 'di dag ni skye ba'i chos can yin la/ skye ba ni sdug bsngal ba yin pa dang / skye ba ji lta ba bzhin du rga ba dang / na ba dang / 'chi ba dang / mi sdug pa dang phrad pa dang / sdug pa dang bral ba dang / 'dod pas phongs pa dag kyang de bzhin du rig par bya'o snyam du sems te/ de ltar re zhig mi rtag pa'i rnam pas/ sdug bsngal gyi rnam pa la 'jug par byed do/ /de kun du sbyor ba dang / 'ching ba'i rnam pas ni bde ba'i tshor ba dang /mthun pa'i phung po zag pa dang bcas pa dang / nye bar len pa dang bcas pa gang yin pa de dag la sdug bsngal gyi rnam par 'jug par byed de/ 'di ltar de dag ni sred pa'i kun du sbyor ba'i gnas yin la/ sred pa'i kun du sbyor ba yang skye ba dang / rga ba dang / na ba dang /'chi ba dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa'i 'ching ba dang / 'dod chags dang / zhe sdang dang / gti mug gi 'ching ba'i gnas yin pa'i phyir ro/ /mi sdug pa'i rnam pas ni sdug bsngal ba dang mthun pa'i phung po rnams la sdug bsngal gyi rnam par 'jug par byed do// 'di ltar sdug bsngal dang mthun pa'i chos rnams ni zag pa dang bcas pa dang / nye bar len pa dang bcas pa dang / yid mi bde ba dang ldan pa dang / gnas ngan len dang ldan pa dang / sdug bsngal ba nyid las rnam par ma grol ba dang /mi rtag pa dang / 'gog pa'i chos can yin pa'i phyir ro/ /de la grub pa dang / bde ba med pa'i rnam pas ni sdug bsngal yang ma yin/ bde ba yang ma yin pa dang / mthun pa'i phung po rnams la sdug bsngal gyi rnam par 'jog par byed de 'di ltar sdug bsngal yang ma yin/bde ba yang ma yin pa dang / mthun pa'i phung po rnams ni zag pa dang bcas pa dang / nye bar len pa dang bcas pa dang / gnas ngan len dang ldan pa dang / bde ba dang sdug bsngal gyi sa bon dang ldan pa dang / sdug bsngal dang ldan pa dang / sdug bsngal gyi sdug bsngal dang /'gyur ba'i sdug bsngal las rnam par ma grol ba dang / mi rtag pa dang / 'gog pa'i chos can yin pa'i phyir ro/ /de ltar na rnal 'byor pa de 'di lta ste/ kun du sbyor ba dang / 'ching ba'i rnam pas bde ba dang mthun pa'i 'du byed rnams dang / bde ba'i tshor ba las 'gyur ba'i sdug bsngal nyid du zhugs pa dang /'di lta ste/ mi sdug pa'i rnam pas sdug bsngal dang mthun pa'i 'du byed rnams dang / sdug bsngal gyi tshor ba la sdug bsngal nyid du zhugs pa dang / 'di lta ste/ grub pa dang bde ba med pa'i rnam pas sdug bsngal yang ma yin/ bde ba yang ma yin pa dang mthun pa'i 'du byed rnams dang /sdug bsngal yang ma yin bde ba yang ma yin pa'i tshor ba la/ 'du byed kyi sdug bsngal nyid du zhugs pa yin no/ /de 'di snyam du sems te/ kun du sbyor ba dang / 'ching ba'i rnam pa dang / mi sdug pa'i rnam pa dang / grub pa dang bde ba med pa'i rnam pa'i dbang du byas nas/tshor ba gsum po gang cung zad ci tshor yang rung ste/ de dag ni 'dir sdug bsngal ba yin no snyam du sems te/ de ltar na de mi rtag pa'i rnam pa sngon du btang ba'i yid la byed pas/ sdug bsngal gyi rnam pa la zhugs pa yin no/ /de 'di snyam du sems te/ bdag gis dbang po tsam dang /yud tsam dang / de las byung ba'i tshor ba tsam dang / sems tsam zhig mthong bar zad kyi/ bdag dang bdag gi zhes bya ba ni ming tsam dang / snang ba tsam dang / nye bar btags ba tsam du zad de/ de las gong na yang med la/ de las lhag pa yang med do//de ltar yod pa de yang phung po tsam du zad de/ phung po de dag la ni gang skye bar 'gyur ba'am/ rga bar 'gyur ba'am/ na bar 'gyur ba'am/ 'chi bar 'gyur ba'i bdag gam/ sems can rtag pa dang brtan pa dang / ther zug dang / bdag por gyur pa de dang /de dag tu las byas shing / byas pa'i rnam par smin pa'i 'bras bu so sor myong bar 'gyur ba ni 'ga' yang med pas de'i phyir 'du byed 'di dag ni stong pa dang / bdag med pa yin no snyam du sems te/ de ltar dmigs su med pa'i rnam pas stong pa'i rnam pa la 'jug par byed do//de 'di snyam du sems te/ rang gi mtshan nyid dang / spyi'i mtshan nyid dang / sdug bsngal gyi mtshan nyid dang ldan pa'i 'du byed gang dag yin pa de dag kyang rten cing 'brel par 'byung ba yin pa'i phyir rang dbang med pa yin no/ /rang dbang med pa gang dag yin pa de dag ni bdag med pa yin no snyam du sems te/de ltar rang dbang med pa'i rnam pas bdag med pa'i rnam pa la 'jug par byed do/ /de ltar na rnal 'byor pa des rnam pa bcus yang dag par bsdus pa'i rnam pa bzhi po dag gis bden pa sdug bsngal gyi mtshan nyid so sor rig par gyur pa yin no//de la mi rtag pa'i rnam pa ni rnam pa lngas yang dag par bsdus pa yin te/ 'di lta ste/ 'gyur ba'i rnam pa dang / 'jig pa'i rnam pa dang / bral ba'i rnam pa dang / chos nyid kyi rnam pa dang / nye ba'i rnam pa dag gis so/ /sdug bsngal gyi rnam pa ni rnam pa gsum gyis yang dag par bsdus pa yin te/'di lta ste/ kun du sbyor ba dang 'ching ba'i rnam pa dang / mi sdug pa'i rnam pa dang / grub pa dang / bde ba med pa dag gi rnam pas so/ /stong pa'i rnam pa ni rnam pa gcig gis yang dag par bsdus pa yin te/ 'di lta ste/ dmigs su med pa'i rnam pas so//bdag med pa'i rnam pa yang rnam pa gcig gis yang dag par bsdus pa yin te/ 'di lta ste/ rang dbang med pa'i rnam pas so/ /de de ltar rnam pa bzhi'i rjes su zhugs pa'i rnam pa bcu po dag gis sdug bsngal gyi mtshan nyid so sor rig nas gang zhig spangs na sdug bsngal 'di spong bar 'gyur bar /sdug bsngal gyi rgyu dang / kun 'byung ba dang / rab tu skye ba dang / rkyen gang yin zhes rnam pa bzhis bden pa kun 'byung ba'i mtshan nyid so sor rig par byed do/ /de la rgyu ni srid pa ste / sdug bsngal 'phen par byed pa yin pa'i phyir ro/ / kun 'byung ba ni 'phangs nas mngon par 'grub par byed cing kun 'byung bar byed pa'i phyir ro/ /rab tu skye ba ni sdug bsngal mngon par grub pa de de las rab tu skyes pa'i phyir ro/ /rkyen ni ma 'ongs pa'i sdug bsngal gyi sa bon yongs su 'dzin pa dang / rim gyis sdug bsngal yang dag par 'gyur bar byed pa'i phyir ro//rnam grangs gzhan yang sred pa ni len pa'i rgyur gyur pa yin pa dang / len pa dang len pa'i rgyu las byung ba'i srid pa yang dag par 'grub par byed pa yin pa dang / srid pa sngon du btang ba'i skye ba rab tu skye bar byed pa yin pa dang / skye ba'i rkyen gyi sa rga ba dang /na ba dang / 'chi ba dang / mya ngan la sogs pa mngon par 'grub par byed pa'i phyir rgyu dang / kun 'byung ba dang / rab tu skye ba dang / rkyen yin te go rims bzhin du sbyar bar rig par bya'o/ /rnam grangs gzhan yang sred pa'i bag la nyal ba la sogs pa nyon mongs pa'i bag la nyal lus la zhen pa gang yin pa de ni phyi ma la /yang srid pa mngon par 'grub pa'i rgyu yin no/ /de las skyes pa'i kun nas dkris pa ni kun 'byung ba dang / rab tu skye ba dang / rkyen yin par ci rigs par sbyar te/ de la yang 'byung ba'i srid pa'i sred pa yang dag par 'grub par byed pa'i phyir kun 'byung ba yin no//yang 'byung ba srid pa'i sred pa de dag dga' ba'i 'dod chags dang ldan pa'i sred pa rab tu skyed par byed pa yin no/ /dga' ba'i 'dod chags dang ldan pa'i sred pa skyes pa de ni/ de dang de dag tu mngon par dga' ba'i sred pa'i rkyen yin te/de ltar de'i bag la nyal gyi rnam pa dang / kun nas dkris pa'i sred pa rnam pa gsum la brten nas/ phyi ma la yang 'byung ba'i srid pa mngon par grub cing 'byung bar 'gyur bas na/ de'i phyir rgyu dang / kun 'byung ba dang / rab tu skye ba dang / rkyen ces bya ba gsungs te/de ltar rnal 'byor pa de rnam pa bzhi po de dag gis bden pa kun 'byung ba'i mtshan nyid so sor rig par byed do// //nyan thos kyi sa bam po nyi shu pa ste tha ma/ de ltar des bden pa kun 'byung ba'i mtshan nyid so sor rig nas/ bden pa kun 'byung ba de ma lus par zad pa'i phyir/'gog pa la 'gog pa dang / bden pa dang / sdug bsngal ma lus par zad pa'i phyir zhi ba dang / mchog dang gtso bo dang / bla na med pa yin pa'i phyir gya nom pa dang / rtag pa'i phyir nges par 'byung ba'i sgo nas kun du rtog par byed do/ /de ltar rnal 'byor pa de rnam pa bzhi po de dag gis bden pa 'gog pa'i mtshan nyid so sor rig par byed do//de ltar bden pa 'gog pa'i mtshan nyid so sor rig nas shes bya yongs su tshol ba'i don dang / yang dag pa yongs su tshol ba'i don dang / sgo bzhis rjes su 'jug pa'i don dang / mya ngan las 'da' bar 'gro ba'i phyir bgrod pa gcig pa'i don gyis lam la lam dang /rigs pa dang / sgrub pa dang / nges par 'byin pa'i sgo nas kun du rtog par byed de/ de de ltar rnam pa bzhi po de dag gis bden pa lam gyi mtshan nyid so sor rig par byed de/ de ni de'i nang gi so so rang gi 'phags pa'i bden pa bzhi po dag la mtshan nyid so sor rig pa'i yid la byed pa zhes bya'o//des de ltar bdag nyid kyi phung po rnams la bden pa'i tshul gyis nye bar brtags shing rnam par dpyad nas/ khams mi 'dra ba'i phung po lkog tu gyur pa rnams la rjes su dpag pa'i sgo nas de dag kyang 'di lta bu'i chos nyid dang /'di lta bu'i tshul du rtogs pa yin no zhes rtogs par byed de/ 'dus byas gang yin pa ci yang rung ste/ de dag thams cad ni thams cad du rnam pa thams cad kyi sgo nas de lta bu'i rang bzhin can yin pas de dag 'gog pa ni zhi ba yin la/ de spong ba'i lam ni nges par 'byin pa yin par so sor rtog par byed do//de la bdag nyid kyi phung po lkog tu ma gyur pa rnams la bden par shis pa gang yin pa dang / khams mi 'dra ba'i phung po lkog tu gyur pa rnams la rjes su dpag pa'i sgo nas shes pa gang yin pa de ni/ chos shes pa dang / rjes su shes pa dag skye ba'i sa bon lta bu yin te/mtshan nyid so sor rig pa'i yid la byed pa de yang thos pa dang / bsam pa dang / 'dres pa yin par rig par bya'o/ /rnal 'byor pa des de ltar legs par dpyad pa'i rgyus/ gang gi tshe 'di lta ste/ 'thad pa bsgrub pa'i rigs pas 'di lta ste/bden pa ji snyed yod pa nyid dang / ji lta ba bzhin du yod pa nyid las brtsams te/ rnam pa bcu drug po de dag gis 'phags pa'i bden pa bzhi po dag la nges pa 'thob par 'gyur ba de'i tshe na ni/ thos pa dang bsams pa las byung ba dang 'dres pa'i yid la byed pa las yang dag par 'das nas/gcig tu bsgom pa'i rnam pas mos par byed do/ /de ni de'i mos pa las byung ba'i yid la byed pa yin te/ bden pa la dmigs pa dang / gcig tu mnyam par gzhag pa yin no/ /des de kun du bsten pa'i rgyus bden pa sdug bsngal ba dang / bden pa kun 'byung ba'i bden pa gnyis kyi dbang du byas nas shes pa mtha' yas pa thob par 'gyur te/des mi rtag pa la mi rtag pa yin no zhes mi rtag pa mtha' yas pa nyid du mos par byed de / /de bzhin du sdug bsngal mtha' yas pa nyid dang / stong pa mtha' yas pa nyid dang / bdag med pa mtha' yas pa nyid dang /kun nas nyon mongs pa mtha' yas pa nyid dang / nyes par spyad pa mtha' yas pa nyid dang / ngan song du 'gro ba mtha' yas pa nyid dang / 'byor pa rnams kyi rgud pa mtha' yas pa nyid dang / skye ba mtha' yas pa nyid dang / rga ba dang / na ba dang / 'chi ba dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa mtha' yas ba nyid du mos par byed do/ /de la mtha' yas pa zhes bya ba ni/ 'khor ba na 'khor ba'i chos de dag la mtha' med pa dang / mu med pa yin te/ 'khor ba ji srid yod kyi bar du chos de dag kyang 'byung bar 'gyur la/'khor ba ma lus par zad par gyur na/ de dag kyang zad par 'gyur gyi/ gzhan du na zad par 'gyur ba med do zhes de ltar srid pa dang / 'gro ba dang / 'chi 'pho ba dang / skye ba thams cad la / smon pa med pa'i rnam pa dang / rten pa med pa'i rnam pa dang /mi mthun pa'i rnam pas mos par byed pa na/ mos pa las byung ba'i yid la byed pa sgom par byed do/ /des de ltar srid pa dang / 'gro ba dang / 'chi 'pho dang / skye ba thams cad las sems skyo bar byas shing skrag par byas nas/ lhag pa'i bsam pas mya ngan las 'das pa la rnam pa gang yang rung bas sems gtod par byed pa na/de'i sems de yun ring po nas gzugs la dga' ba dang / sgra dang / dri dang / ro dang / reg bya la dga' zhing / gzugs dang / sgra dang / dri dang / ro dang / reg bya dag gis kun du bsags shing nye bar bsags par gyur pas/ des na lhag pa'i bsam pas mya ngan las 'das pa la sems gtad du zin kyang zhi ba'i dbyings nyid mi 'dod cing yongs su gdung bar byed pa'i phyir sems 'jug par mi 'gyur/dang bar mi 'gyur/ gnas par mi 'gyur/ mos par mi 'gyur zhing / yid phyir ldog par gyur na/ des sems de bden pa sdug bsngal dang /bden pa kun 'byung ba dag la yang dang yang du skyo bar byed cing skrag par byed de/ skyo bar byas shing skrag par byas nas kyang / lhag pa'i bsam pas yang dang yang du mya ngan las 'das pa la/ sems gtod par byed mod kyi/ 'on kyang 'jug par mi 'gyur ro/ /de ci'i phyir zhe na/'di lta ste/ de la mngon par rtogs pa'i bar du gcod par byed pas bdag 'khor bar 'khor bar 'gyur ro/ /bdag yongs su mya ngan las 'da' bar 'gyur ro/ /bdag gis yongs su mya ngan las 'da' bar bya ba'i phyir dge ba'i chos rnams bsgom par bya'o/ /bdag gis sdug bsngal sdug bsngal gyi sgo nas mthong bar bya'o//kun 'byung ba kun 'byung ba'i sgo dang / 'gog pa 'gog pa'i sgo dang / lam lam gyi sgo nas mthong bar bya'o/ /bdag gis stong pa nyid stong pa nyid kyi sgo dang / smon pa med pa smon pa med pa'i sgo dang / mtshan ma med pa mtshan ma med pa'i sgo nas mthong bar bya ste/chos de dag ni bdag gi yin no snyam du sems pa'i nga rgyal rags pa yod pa de yid la byed pa'i rjes su zhugs pas na/ bar du gcod cing sgrib pa dang bcas bzhin du 'jug pa'i phyir te/ rgyu de dang rkyen des na lhag pa'i bsam pas mya ngan las 'das pa la sems gtad du zin kyang /de'i sems 'jug par mi 'gyur ro/ /des bar du gcod par byed pa nga'o snyam pa'i nga rgyal de nyid bar du gcod par byed pa yin no zhes shes rab kyis myur ba myur ba kho nar rtogs par byas nas/ rang gi ngang gis 'jug pa'i yid la byed pa spangs shing / phyi rol gyi shes bya'i dmigs pa las rnam par bzlog nas yid la byed pa la zhugs pa dang yid la byed pa dang ldan pa'i bden pa rnam par gcod pa la rtsom par byed de des sems byung zhing 'gags pa na mjug thogs su skye ba'i sems kyis rgyun dang rjes su 'brel pa'i tshul gyis 'jig par mthong zhing /de ci nas kyang bar du gcod par byed pa nga'o snyam pa'i nga rgyal yid la byed pa'i rjes su 'jug pa gang yin pa de skye ba'i skabs med par bya ba'i phyir de ltar sems kyis sems la dmigs par byed cing nges par 'dzin par byed do/ /rnal 'byor pa de de ltar brtson par byed pa na/ rim gyis de'i sems kyi rgyud de dag gzhan dang gzhan du sar pa sar pa dang /rnying pa ma yin pa rnying pa ma yin pa dang / byung nas 'jig pa dang / re zhig pa dang / yun ring du mi gnas pa nyid du mthong bar 'gyur te/ de ni de'i mi rtag pa nyid kyis yid la byed pa yin no/ /sems kyi rgyud de nye bar len pa'i phung po rnams kyi rjes su zhugs par mthong ba gang yin pa de ni de'i sdug bsngal ba yid la byed pa yin no//de la sems las gzhan pa'i chos gnyis pa mi dmigs pa gang yin pa de ni de'i stong pa nyid kyi yid la byed pa yin no/ /de la sems kyi rgyud de nyid rten cing 'brel bar 'byung ba nyid dang /rang dbang med pa nyid mthong ba gang yin pa de ni de'i bdag med pa'i yid la byed pa yin te/ de ltar na re zhig bden pa sdug bsngal la zhugs pa yin no/ /'di snyam du sems te/ sems kyi rgyud 'di yang sred pa'i rgyu las byung ba dang / sred pa las kun du 'byung ba dang /sred pa las rab tu skyes pa dang / sred pa'i rkyen las byung ba yin te/ sems kyi rgyud de'i 'gog pa gang yin pa de ni zhi ba yin no/ /de'i 'gog par 'gro ba'i lam gang yin pa de ni nges par 'byin pa yin no snyam du sems te/ de ltar na shes rab phra bas ma brtags pa'i yid la byed pa la rtog pa'i tshul gyis 'phags pa'i bden pa bzhi po dag la zhugs pa yin no//des shes rab de kun du bsten cing goms par byas lan mang du byas pa'i rgyus dmigs par bya ba dang / dmigs par byed pa mnyam zhing mtshungs pa'i ye shes skye bar 'gyur te/des de'i mya ngan las 'das pa la mngon par dga' ba'i bar du gcod par byed pa nga'o snyam pa'i nga rgyal rags pa gang yin pa de kun du spyod pa'i sgo nas spong bar 'gyur zhing / mya ngan las 'das pa la lhag pa'i bsam pas sems gtad pa 'jug par 'gyur zhing / yongs su gdung bas yid phyir ldog pa yang med par 'gyur la lhag pa'i bsam pas mngon par dga' ba yang yid la 'dzin par byed do//de'i dmigs par bya ba dang / dmigs par byed pa mnyam zhing mtshungs ba'i ye shes bzod pa chung ngu dang ldan pa de lta bur gyur pa gang yin pa de ni dro bar gyur pa zhes bya'o//bzod pa 'bring gis yang dag par bsdus pa gang yin pa de ni rtse mo zhes bya'o/ /bzod pa chen pos yang dag par bsdus pa gang yin pa de ni bden pa dang rjes su mthun pa'i bzod pa zhes bya'o/ /des de ltar bar du gcod par byed pa'i nga'o snyam pa'i nga rgyal spangs shing lhag pa'i bsam pas mya ngan las 'das pa la mngon par dga' ba yongs su bzung nas gong nas gong du sems brtag par bya ba la mngon par 'du byed pa gang yin pa'i mngon par 'du byed pa de spangs te/mngon par 'du byed pa med pa la rnam par rtog pa med pa'i sems 'jog par byed do//de'i tshe na de'i sems de 'gags pa lta bur yang snang mod kyi/ de 'gags pa ni ma yin no/ /de dmigs pa med pa lta bur yang snang mod kyi/ de dmigs pa med pa yang ma yin no/ /de'i sems de rab tu zhi zhing med pa lta bur yang snang mod kyi de med pa yang ma yin no//de'i tshe na sbrang rtsi byed pa'i sbrang bu gnyid kyis log par 'gyur ba lta bu yang ma yin te/ rnam par gsal zhing zhi gnas kyi rnam pa las mi mtho mi dma' ba kho na yin no/ /shes rab zhen pa mong rtul bar mngon par rtogs pas mngon pa'i nga rgyal byed pa gang yin pa la la'i sems ni sbrang rtsi byed pa'i sbrang bu gnyid kyis log pa bzhin du 'gags par snang ba lta bu yang yod mod kyi de yang 'gags pa ni ma yin no//sems de ni mngon par rtogs pa kho na yin te/ sems kyi gnas skabs 'di lta bur gyur ba gang yin pa de ni de ring bo mi thogs par yang dag pa nyid du nges pa la 'jug par 'gyur ro//de'i thams cad kyi tha ma rnam par mi rtog pa'i sems de'i mjug thogs su sngar dpyad pa'i bden pa dag la bdag nyid rtsol bar byed pa gang yin pa de dag ni 'jig rten pa'i chos kyi mchog rnams yin te/ de yan chad 'jig rten las 'das pa'i sems kho na skye bar 'gyur gyi 'jig rten pa'i sems mi skye ba dang /de dag ni 'jig rten pa'i 'du byed rnams kyi mtshams dang mthar thug pa kho na yin pas na/ de'i phyir 'jig rten pa'i chos kyi mchog rnams zhes bya'o/ /de dag gi rjes la sngar dpyad pa'i bden pa dag la rtsol bar byed de/brtsal ma thag tu ji ltar sngar go rims bzhin du dpyad pa'i bden pa mngon sum dang lkog tu gyur pa dag la rim gyis rnam par mi rtog pa shin tu nges pa'i ye shes dang / mngon sum gyi ye shes skye bar 'gyur ro/ /de skyes pas khams gsum na spyod pa mthong bas spang bar bya ba'i nyon mongs pa rnams kyi phyogs su gyur pa'i gnas ngan len lus la gnas shing /zhen pa gang yin pa de spong bar byed do/ /gal te dang po nyid nas 'dod pa rnams las 'dod chags dang bral ba zhig yin na ni/ de spangs nas bden pa mngon par rtogs ma thag tu de'i tshe phyir mi 'ong pa zhes bya ste /de'i rtags ni 'dod chags dang bral ba'i rtags sngar bstan pa dag nyid yin par rig par bya'o/ /de la bye brag ni 'di yod de/ de'i der rdzus te skyes nas phyis 'jig rten 'dir phyir mi 'ong bar yongs su mya las 'da' bar 'gyur ro//gal te de shas cher 'dod chags dang bral ba zhig yin na ni/ bden pa mngon par rtogs ma thag tu/ lan cig phyir 'ong bar 'gyur te/ 'jig rten 'dir lan cig phyir 'ongs nas/ sdug bsngal mthar phyin par byed do//gal te 'dod chags dang ma bral ba zhig yin na ni/ gnas ngan lan shin tu sbyangs nas rgyun du zhugs par 'gyur ro/ /de la mngon par rtogs pas zhes bya ba ni mngon sum du shes bya dang ye shes dang phrad par gyur pas na/ de'i phyir mngon par rtogs pa zhes bya ste/'di lta ste dper na/ rgyal rigs dang rgyal rigs lhan cig mngon du gyur pa la phrad pa zhes bya ba dang / bram ze la sogs pa la yang de bzhin du rig par bya ba lta bu'o/ /de'i rtags ni 'di dag yin te/ des shes pa bzhi po rgyu ba dang / gnas pa dang yid la byed pa thams cad la nges par rtogs pa'i sgo nas chos tsam du shes pa dang /chad pa ma yin par shes pa dang / rtag pa ma yin par shes pa dang / rten cing 'brel par 'byung ba'i 'du byed sgyu ma lta bur shes pa de dag thob pa dang / de yul rnams la spyod pa na gal te brjed ngas pas nyon mongs pa'i kun nas dkris pa shin tu chen po dag byung bar gyur na yang des brtsal ba tsam gyis de dag myur ba myur ba kho nar med par 'gyur ba dang /de bzhin du ngan song rnams su 'gro bar mi 'gyur ba dang / bsams bzhin du bslab pa rnams las 'da' bar mi byed pa dang / dud 'gro'i skye gnas su skyes pa'i srog chags rnams kyi srog gcod par mi byed pa dang / bslab pa rnams phul nas spangs pa la 'jug par mi byed pa dang / mtshams med pa lnga'i las byed par 'gyur mi srid pa dang / bde ba dang / sdug bsngal rang gis byas par khas ma len pa dang /gzhan gyis byas par khas mi len pa dang / rang gis byas pa dang / gzhan gyis byas par khas mi len pa dang / rang gis byas pa dang / gzhan gyis byas pa yang ma yin la/ rgyu med pa las byung bar yang khas mi len pa dang / 'di las phyi rol pa'i ston pa gzhan yongs su mi tshol ba dang / sbyin gnas gzhan yongs su mi tshol ba dang / dge sbyong dang / bram ze gzhan dag gi ngor mi lta zhing ngor yongs su mi rtog pa dang / chos mthong ba dang / chos thob pa dang / chos rig pa dang / chos kyi gting rnyed pa dang /nem nur las rgal ba dang / the tshom las rgal ba dang / gzhan gyi dring la mi 'jog pa dang / gzhan gyis bkrir mi zug pa dang / ston pa'i bstan pa'i chos rnams la mi 'jigs pa thob pa kho na yin te/ de ni dag pa'i mtshan dang / bkra shis dag gis dag par mi 'dod pa dang /srid pa brgyad pa mngon par sgrub par mi byed pa dang / shes nas dad pa bzhi po dag dang ldan pa yin no/ /de la 'jig rten pa'i chos kyi mchog rnams kyi bar du ni de'i mos pa las byung ba'i yid la byed pa yin no/ / bden pa rnams mngon par rtogs nas mthong bas spang bar bya ba'i nyon mongs pa rnams spangs pa dag la ni/ rab tu dben pa'i yid la byed pa yin no/ /de'i gong du nyon mongs ba spang ba'i phyir lam ji ltar thob pa goms shing byang bar byas pa'i sgo nas/ 'dod pa na spyod pa'i nyon mongs pa chen po dang 'bring po rnams spang ba'i phyir/lan cig phyir 'ong bar 'gyur te/ /de'i rtags rnams kyang / rgyun du zhugs pa'i rtags rnams gang dag yin pa de dag thams cad yin par rig par bya'o/ /de la bye brag ni 'di yod de/ nyon mongs pa'i kun nas dkris pa chen po dang mthun pa'i yul rnams la spyod par byed kyang nyon mongs pa'i kun nas dkris pa dal bus skye zhing myur du spong bar byed pa dang /'jig rten 'dir lan cig 'ongs nas sdug bsngal mthar phyin par byed pa yin no/ /phyir mi 'ong ba dang phyir 'ong ba'i rtags rnams ni sngar bstan pa dag kho na yin no//de la bsgom pa'i lam thams cad la ni dpyod pa'i yid la byed pas spangs pa dang / ma spangs ba la so sor brtags shing so sor brtags nas lam ji ltar thob pa goms par byas pas rab tu phye ba yin no/ /de la bsgom pa'i rang bzhin ni gang /las ni gang / rnam par dbye ba ni gang zhe na/ 'jig rten pa dang / 'jig rten las 'das pa'i mnyam par gzhag pa'i sa pa'i yid la byed pas 'dus byas kyi dge ba'i chos goms par byas pa dang / yongs su 'dris par byas pa dang /rtag tu byas pa dang / gus par byas pa de dag las byung ba'i bsgom pa sems kyi rgyud la 'jog par byed pa gang yin pa de dag ni bsgom pa'i rang bzhin zhes bya'o/ /de la bsgom pa'i las ni rnam pa brgyad de/ bsgom pas chos kha cig thob par byed pa dang /bsgom pas chos kha cig rten par byed pa dang / chos kha cig rnam par sbyong bar byed pa dang / chos kha cig sel bar byed pa dang / chos kha cig yongs su shes par byed pa dang / chos kha cig spong bar byed pa dang / chos kha cig mngon sum du byed pa dang / chos kha cig thag ring du byed pa'o/ /de la re zhig dge ba'i chos khyad par can ma thob pa gang dag yin pa de dag ni thob par byed do/ /thob cing mngon sum du gyur pa gang dag yin pa de dag ni sten par byed do/ /de la thob pa mngon du gyur pa ma yin pa gang dag yin pa de dag ni de dang rigs mthun pa'i chos rnams bstan pa dag gis phyis mngon sum du byed pa na shin tu yongs su dag pa dang /shin tu yongs su byang ba skye bar byed do/ /de la brjed ngas pas nyon mongs pa can gyi chos kun du 'byung ba gang dag yin pa de dag ni dge ba'i chos la goms par byas pa'i stobs kyis dang du mi len cing spong bar byed/sel bar byed/ byang bar byed do/ /de la spang bar bya ba'i chos ma skyes pa gang dag yin pa de dag la ni nad lta bur yongs su shes par byed cing sun 'byin par byed pa dang / 'bras lta bu dang / zug rngu lta bu dang / sdig pa dang / mi rtag pa dang / sdug bsngal ba dang / stong pa dang / bdag med par yongs su shes par byed cing sun 'byin par byed do/ /de yongs su shes shing goms par byas pas nyon mongs pa rnams spang ba'i phyir/ bar chad med pa'i lam skye bar byed cing des spong bar byed do//spangs pas na rnam par grol ba mngon sum du byed do/ /ji lta ji ltar sa gong ma dag gnon par byed pa de lta de ltar mthar thug gyi bar du sa 'og ma pa'i chos spangs pa rnams thag ring du byed pa ste/ de ni bsgom pa'i las rnam pa brgyad yin par rig par bya'o//de la bsgom pa'i rnam par dbye ba ni rnam pa bcu gcig yod par rig par bya ste/ 'di lta ste/ zhi gnas bsgom pa dang / lhag mthong bsgom pa dang / 'jig rten pa'i lam bsgom pa dang / 'jig rten las 'das pa'i lam bsgom pa dang / lam chung ngu bsgom pa dang / lam 'bring po bsgom pa dang / lam chen po bsgom pa dang / sbyor ba'i lam bsgom pa dang / bar chad med pa'i lam bsgom pa dang / rnam par grol ba'i lam bsgom pa dang / khyad par gyi lam bsgom pa'o/ /de la zhi gnas bsgom pa ni/sems gnas pa rnam pa dgu ste snga ma bzhin no/ /lhag mthong bsgom pa yang snga ma kho na bzhin no/ /de la 'jig rten pa'i lam bsgom pa ni sa 'og ma pa rnams la rags par lta ba dang / sa gong ma pa rnams la zhi bar lta ba nyid kyis ci yang med pa'i skye mched kyi bar gyi 'dod chags dang bral bar gyur pa gang yin pa'o//de la 'jig rten las 'das pa'i lam bsgom pa ni sdug bsngal la sdug bsngal gyi sgo nas yid la byed pa dang / lam gyi bar la lam gyi sgo nas yid la byed pa'i yang dag pa'i lta ba la sogs pa zag pa med pa'i lam gyis yod min med min skye mched kyi bar gyi 'dod chags dang bral bar 'gyur ba gang yin pa'o//de la lam chung ngu bsgom pa ni gang gis nyon mongs pa rags pa dang chen po spong bar byed pa'o/ /de la lam 'bring po bsgom pa ni gang gis nyon mongs pa 'bring po spong bar byed pa'o //de la lam chen po bsgom pa ni gang gis thams cad kyi tha mar spang bar bya ba'i nyon mongs pa'i rnam pa chung ngu spong bar byed pa'o/ /de la sbyor ba'i lam bsgom pa ni/ gang gis nyon mongs pa spang ba'i phyir sbyor ba rtsom par byed pa'o/ /de la bar chad med pa'i lam bsgom pa ni gang gis nyon mongs pa spong bar byed pa'o//de la rnam par grol ba'i lam bsgom pa ni gang gis nyon mongs pa spangs ma thag tu rnam par grol ba mngon sum du byed pa'o/ /de la khyad par gyi lam bsgom pa ni gang gis de'i gong du sa gzhan gyi sbyor ba brtsam par bya ba'i bar la rtsom par mi byed pa dang /mthar thug pa la rtsom par mi byed pa ste/ de ni bsgom pa'i rnam par dbye ba rnam pa bcu gcig yin par rig par bya'o/ /de ltar bsgom pa la brtson pa'i dus dus su nyon mongs pa spangs pa dang /ma spangs pa rnams la yongs su dpyod par byed pa dang / dus dus su kun du skyo bar 'gyur ba'i chos rnams la sems kun du skyo bar byed pa dang / dus dus su mngon par dga' bar 'gyur ba'i chos rnams la sems mngon par dga' bar byed pa de ni de'i dga' ba sdud pa'i yid la byed pa yin no//des dga' ba bsdus pa'i yid la byed pa de kun du bsten cing goms par byas la lan mang du byas pa'i rgyus bsgom pas spang bar bya ba'i nyon mongs pa ma lus pa spang bar bya ba'i phyir/ thams cad kyi tha mar slob pa'i rdo rje lta bu'i ting nge 'dzin skye bar 'gyur te/de skyes pas bsgom pas spang bar bya ba'i nyon mongs pa thams cad spong bar byed do/ /ci'i phyir rdo rje lta bu'i ting nge 'dzin ces bya zhe na/ 'di lta ste/ dper na rdo rje ni de las gzhan pa'i nor bu dang / mu tig dang / bai DUr+ya dang / rin po che shang ka shi la dang /byi ru la sogs pa nor bu thams cad kyi nang na mchog dang gtso bo yin te/ thams cad pas sra ba dang / thams cad pas brtan pa yin la/ de las gzhan pa thams cad 'bigs par byed cing / de las gzhan pa'i nor bu dag gis mi phigs pa de bzhin du ting nge 'dzin de yang /slob pa'i ting nge 'dzin thams cad kyi nang na mchog dang gtso bo yin te/ thams cad pas sra ba dang / thams cad pas brtan pa yin la nyon mongs pa thams cad zil gyis gnon par byed cing / nyon mongs pa gzhan dag gis zil gyis gnon par mi nus pas na/de'i phyir rdo rje lta bu'i ting nge 'dzin ces bya'o/ /rdo rje lta bu'i ting nge 'dzin de skyes ma thag tu nyon mongs pa'i phyogs su gyur pa gnas ngan len gyi sa bon thams cad yang dag par bcom pa'i phyir sems shin tu rnam par grol ba dang / rigs yongs su dag pa thob pa dang /nyon mongs pa zad pa rnams la zad pa shes pa skye ba dang / rgyu zad pa'i phyir phyis thams cad kyi thams cad du sdug bsngal skye bar mi 'gyur bas/ mi skye bar shes pa yang skye bar 'gyur te/ de de'i tshe na dgra bcom pa/ zag pa zad pa/ bya ba byas pa/ byed pa byas pa/ khur bor ba/ bdag gi don rjes su thob pa/ srid pa kun du sbyor ba yongs su zad pa/ yang dag pa'i shes pas sems shin tu rnam par grol ba mi slob pa'i chos bcu po/ mi slob pa'i yang dag pa'i lta ba dang / yang dag pa'i rtog pa dang / yang dag pa'i ngag dang / yang dag pa'i las kyi mtha' dang / yang dag pa'i 'tsho ba dang / yang dag pa'i rtsol ba dang / yang dag pa'i dran pa dang / yang dag pa'i ting nge 'dzin dang / mi slob pa'i yang dag pa'i rnam par grol ba dang / yang dag pa'i ye shes dang ldan pa dang /'di lta ste/ gnas pa dang / yid la byed pa dag la rang gi sems kyis dbang sgyur bar byed cing / de 'phags pa'am lha 'am/ tshangs pa'i gnas pa gang dang gang dag gis gnas par 'dod pa de dang de dag gis gnas par byed pa dang / 'jig rten pa dang /'jig rten las 'das pa'i chos dge ba don dang ldan pa gang dang gang dag yid la byed par 'dod pa de dang de dag yid la byed par 'gyur te/ de la 'phags pa'i gnas pa zhes bya ba ni stong pa nyid dang / mtshan ma med pa la gnas pa dang / smon pa med pa la gnas pa dang /'gog pa'i snyoms par 'jug pa la gnas pa'o/ /lha'i gnas pa zhes bya ba ni bsam gtan dang / gzugs med pa'i snyoms par 'jug pa la gnas pa'o/ /tshangs pa'i gnas pa zhes bya ba ni byams pa dang / snying rje dang / dga' ba dang / btang snyoms la gnas pa'o/ /shin tu mthar thug pa dang / shin tu dri ma med pa dang / tshangs par spyod pa shin tu mthar phyin pa dang / gtan pa med pa dang / 'obs dral ba dang / 'obs las rgal ba dang /shing thags bcom pa dang / 'phags pa dang / rgyal mtshan bsnyal ba dang / yan lag lnga spangs pa dang / yan lag drug dang ldan pa dang / rten gzhi la gnas pa dang / so so'i bden pa bstsal ba dang / tshol ba spangs pa dang /yang dag pa'i rtog pa dri ma med pa dang / lus kyi 'du byed shin tu sbyangs pa dang / sems shin tu rnam par grol ba dang / shes rab shin tu rnam par grol ba dang / ma 'dres pa dang / bsnyen pa dang ldan pa dang / gang zag bla na med pa zhes bya ste/bde bar gnas pa rnam pa drug po 'di lta ste/ mig gis gzugs rnams mthong na yid bde bar mi 'gyur/ yid mi bde bar yang mi 'gyur/ btang snyoms dang dran pa dang / shes bzhin du gnas pa dang / de bzhin du rna bas sgra rnams dang /snas dri rnams dang / lces ro rnams dang / lus kyis reg bya rnams dang / yid kyis chos rnams rnam par shes na yid bde bar mi 'gyur/ yid mi bde bar mi 'gyur bar btang snyoms dang dran pa dang / shes bzhin du gnas pa dang ldan pa yin no//des de'i tshe na 'dod chags ma lus par zad pa yang dag par myong zhing / zhe sdang ma lus par zad pa dang / gti mug ma lus par zad pa yang dag par myong bar 'gyur te/ de'i 'dod chags dang / zhe sdang dang / gti mug ma lus par zad pa'i phyir sdig pa gang yin pa de dag mi byed cing /dge ba rnams la rten par byed pa dang / nam mkha' dang lag mthil du mnyam pa dang / tsan dan dang ste'u mtshungs pa'i sems dang ldan pa dang / dbang po dang / nye dbang dang bcas pa'i lha rnams kyis phyag bya bar 'os shing mchod par 'os pa dang /phung po'i lhag ma dang bcas pa'i mya ngan las 'das pa'i dbyings la gnas pa yin te/ rgal ba dang / pha rol tu phyin pa dang / lus tha mar 'dzin pa zhes kyang bya'o//sngon gyi las dang nyon mongs pas 'phangs pa'i phung po rnams rang gi ngang gis 'gags pa dang / de las gzhan pa'i nye bar len pa med pa dang / nying mtshams sbyor ba med pa'i phyir phung po lhag ma med pa'i phyir mya ngan las 'das pa'i dbyings su yongs su mya ngan las 'da' bar yang 'gyur te/de la ni yongs su mya ngan las 'das pa yang 'ga' yang med la 'khor bar 'khor ba yang 'ga' yang med de / sdug bsngal gang yin pa de 'gags pa dang / nye bar zhi ba dang / de bsil bar gyur pa dang /de nub par gyur pa kho nar zad do/ /'di lta ste/ phung po kun spangs pa/ sred pa zad pa/ 'dod chags dang bral ba/ 'gog pa/ mya ngan las 'das pa'i go 'phang de ni zhi ba yin no/ /de'i rtags ni 'di lta bu dag yin par rig par bya ste/dge slong dgra bcom pa zag pa zad pa ni gnas lnga la brten par mi srid pa yin te/ bsams bzhin du srog chags rnams kyi srog gcod pa dang / ma byin pa len pa dang / mi tshangs par spyod pa 'khrig pa'i chos la brten pa dang /shes bzhin du brdzun gyi tshig smra bar mi srid pa dang / 'dod pa rnams stsogs shing longs spyod par mi srid pa'o/ /de bzhin du bde ba dang / sdug bsngal rang gis byas par khas len par mi srid pas na/snga ma bzhin du rang gis kyang ma byas / gzhan gyis kyang ma byas la rgyu med pa las byung ba'i bar du yang khas len par mi srid pa dang / lung du ma bstan pa'i dngos po rnams kyis 'jig pa skye bar mi srid pa dang / 'brug sgra drag po dang /gnam lcags drag po 'bab pa dang / 'jigs pa dang / 'jigs su rung ba gang yang rung ba dag mthong yang skrag par ma 'gyur ba dang / de lta bu dang mthun pa dag yin par rig par bya'o/ /de la rdo rje lta bu'i ting nge 'dzin gang yin pa de ni sbyor ba mthar thug pa'i yid la byed pa yin no//'bras bu'i mchog dgra bcom pa nyid kyis yang dag par bsdus pa'i yid la byed pa gang yin pa de ni sbyor ba mthar thug pa'i 'bras bu yid la byed pa yin te/ de ltar 'jig rten las 'das pa'i lam gyis yang dag par bsdus pa'i yid la byed pa bdun po de dag gis ni shin tu mthar thug pa nyid thob par 'gyur ro//de ni nyan thos kyis zhes bya ste/ 'di lta ste dper na/ ming gi tshogs dang / tshig gi tshogs dang / yi ge'i tshogs dang / rang bzo dang /gsang tshig gi bstan bcos thams cad kyi ma mo yi ge'i phyi mo yin pa dang 'dra bar yang dag par rdzogs pa'i sangs rgyas thams cad kyi nyan thos kyi theg pa dang ldan pa mtha' dag gi ma lta bu yin no/ /sdom ni/ mtshan nyid so sor rig pa dang / /de bzhin mos pa las byung dang //rab tu dben dang dga' sdud dang / /de bzhin dpyod pa'i yid byed dang / /gzhan yang sbyor ba mthar thug dang / /de yi 'bras bu tha ma yin/ /bsam gtan gzugs med rnams dbye dang / /snyoms par 'jug dang mngon shes dang / /skye ba dang ni rtags rnams dang //bden pa dpyad dang rtogs pa dang / /de bzhin bsgom pa'i rnam dbye dang / /mthar thug gyur pa tha ma yin/ /rnal 'byor spyod pa'i sa nyan thos kyi sar gtogs pa las/ rnal 'byor gyi gnas bzhi pa rdzogs te/ nyan thos kyi sa rdzogs s+ho// //rgya gar gyi mkhan po dzi na mi tra dang / zhu chen gyi lo tsA ba ban de ye shes sde la sogs pas bsgyur cing zhus te gtan la phab pa// // 'di la sh+lo ka drug stong yod do// //