CLOSE WINDOW

D4032
བོད་ཡིག

/[ ]@#/ /rgya gar skad du/ ma ng+h+yan+na ta bi b+haM ga TI kA/ bod skad du/ dbus dang mtha' rnam par 'byed pa'i 'grel bshad/ 'jam dpal gzhon nur gyur pa la phyag 'tshal lo/ /ya rabs dag ni phal cher bla ma dang / dad pa'i lha la mchod nas las rnams la 'jug ste/ dbus dang mtha' rnam par 'byed pa'i mdo rnam par bshad par 'dod pas/ bdag la yang 'di ni ya rabs kyi tshul can no zhes shes par bya ba'i phyir/ de mdzad pa dang 'chad pa la mchod nas/ de'i don rnam par dbye bar zhugs so zhes rab tu bstan pa'i phyir/bstan bcos 'di ni rab mdzad pa/ /zhes bya ba la sogs pa smos so/ /de ltar byas na yon tan ci zhig thob ce na/ yon tan dang ldan pa dang / phan 'dogs 'dogs pa la mchod na bsod nams 'phel bar 'gyur ro/ /bsod nams 'phel na yang dag par rtsom pa la bar chad dang bgegs kyis mi tshugs par tshogs chung ngu rdzogs par 'gyur ro//yang na mdzad pas gsungs pa dang / 'chad pas bshad pa yang dag par byin par bsnyad pas/ mdzad pa dang / 'chad pa dang / mdo dang 'brel pa la gus pa bskyed par bya ba'i phyir/bstan bcos 'di ni rab mdzad pa/ /zhes bya ba thams cad smos so/ /de la mdzad pas bshad par bstan pas mdo la gus pa skye ste/ 'di ltar bstan bcos tshig le'ur byas pa'i mdzad pa po ni 'phags pa byams pa ste/ de yang skye ba gcig gis thogs pa'i phyir/ byang chub sems dpa'i mngon par shes pa dang gzungs dang so so yang dag par rig pa dang /ting nge 'dzin dang / dbang dang bzod pa dang / rnam par thar pa thams cad kyi dam pa'i pha rol tu son pa/ byang chub sems dpa'i sa thams cad la sgrib pa yang ma lus par spangs pa'o/ / 'chad pas yang dag par byin pa'i sgo nas 'grel pa la gus pa skye bar 'gyur te/ 'di la 'chad pa ni slob dpon thogs med do/ /de las slob dpon btsun pa dbyig gnyen gyis gsan nas 'di'i 'grel pa mdzad de/ de gnyis kyang shes rab mchog dang ldan pas ma nor bar rtogs pa dang /bzung ba dang ston nus pas 'dir mdo'i don ma nor ba bstan to zhes 'grel pa la gus pa skye ste/ de ltar gang dag gang zag tshad mar byed pa de dag ni/ mdo dang 'grel pa la gus pa skye'o/ /gang yang chos la ston pa de dag ni mdo dang 'grel pa'i don bzang po khong du chud de/nges pa skyes na 'di mdzad pa dang 'chad pa yang rtogs pas rab tu phye ba yin gyi/ rtog ge dang lung tsam gyis rab tu phye bar ni zad do zhes mdzad pa dang / 'chad pa la gus pa skye'o/ /da ni bstan bcos kyi rang bzhin ci 'dra ba dang / ci'i phyir bstan bcos zhes bya ba 'di bshad par bya'o//ming dang tshig dang yi ge'i tshogs su snang ba'i rnam par rig pa rnams ni bstan bcos so/ /yang na 'jig rten las 'das pa'i ye shes thob par byed pa'i sgra'i khyad par du snang ba'i rnam par rig pa rnams bstan bcos so/ /rnam par rig pa rnams ji ltar mdzad cing brjod ce na/mdzad pa dang 'chad pa'i rnam par rig pa las nyan pa'i rnam par rig pa rnams skye bas 'di la nyes pa med do/ /slob ma 'chos pa'i phyir bstan bcos te/ slob ma 'chos pa ni tshul khrims dang / ting nge 'dzin dang / shes rab kyi khyad par bskyed pa'i phyir/lus dang ngag dang yid tshogs par mi 'byung ba'i las las bzlog pa dang / tshogs par 'byung ba'i las la 'jug pa'o/ /yang na bstan bcos kyi mtshan nyid du 'thad pa'i phyir bstan bcos te/ lung mnos pa goms par byas pas bag chags dang bcas pa'i nyon mongs pa spong bar 'gyur ba dang /bar chad med pa yun ring ba'i sdug bsngal drag po sna tshogs kyis 'jigs pa'i ngan song rnams dang / srid pa las skyob pa gang yin pa de ni bstan bcos kyi mtshan nyid do/ /de'i phyir nyon mongs pa'i dgra 'chos pa dang / ngan 'gro dang srid pa las skyob pas bstan bcos kyi mtshan nyid de/de gnyis kyang theg pa chen po thams cad dang / de bshad pa thams cad la yod kyi gzhan la med de de'i phyir 'di ni bstan bcos so/ /de la smras pa/ nyon mongs dgra rnams ma lus 'chos pa dang / /ngan 'gro srid las skyob pa gang yin pa//chos skyob yon tan phyir na bstan bcos te/ /gnyis po 'di dag gzhan gyi lugs la med/ /'di ni zhes bya ba ni/ theg pa gsum gyi sgo nas dngos po bdun du bsdus pa/ nyon mongs pa dang shes bya'i sgrib pa spong ba thob pa dang / bstan bcos dbus dang mtha' rnam par 'byed pa'i tshig le'ur byas pa 'di ni sems la gnas pa'i phyir dang 'di zhes mngon sum du bstan to//rab mdzad pa zhes bya ba ni byed pa po'o/ /skad kyi dbyings 'di thob par byed pa yin mod kyi/ 'on kyang rab kyi sgra dang sgrogs na byed par lta ste/ skad dbyings don gyi stobs ldan yang //nye bar bsgyur bas zil non 'gyur/ /gang+gA'i chu ni mngar mod kyi/ /rgya mtsho'i chu ni ji bzhin no/ /zhes bshad do/ /bde gshegs nyid skyes zhes bya ba ni/ bag chags dang bcas pa'i nyon mongs pa'i sgrib pa dang / shes bya'i sgrib pa las mi gnas pa'i mya ngan las 'das par shin tu gshegs pas bde bar gshegs pa'o//de yang bag chags kyi sgrib pa thams cad spangs pa/ chos thams cad rnam pa thams cad du thugs su chud pa'i rang gi ngo bo 'byor ba thams cad kyi gnas su gyur pa/ yid bzhin gyi nor bu rin po che ltar bsam gyis mi khyab pa'i mthu mnga' ste/sems can thams cad kyi don thams cad lhun gyis grub par mdzad par spyod pa/ rnam par mi rtog pa'i ye shes kyi khyad par gyi bdag nyid ni bde bar gshegs pa'o/ /de'i bdag nyid ni rnam par dag pa'i de bzhin nyid de/ de las rnam par mi rtog pa'i ye shes rab tu byung ba'i phyir de las sam/der skye bas na bde gshegs nyid skyes so/ /yang na bde bar gshegs pa nyid du skyes pas/ bde gshegs nyid skyes te/ mdo gzhan las de'i bdag nyid kyi chos rab tu rnyed pas/ de bzhin gshegs pa'i gdung du skyes pa yin no zhes ji skad gsungs pa lta bu'o//de lta bas na byang chub sems dpa' sa bcu pa la rab tu gnas pa ni/ shes bya'i dngos po'i rnam pa thams cad skyu ru ra lag mthil du gzhag pa/ dar lwa srab mos g.yogs pa'i mig la snang ba bzhin no/ /bcom ldan 'das kyi ni mig gi sgrib pa bsal ba bzhin te/'di ni khyad par ro/ /'dir ni bde bar gshegs pa'i bdag nyid las skyes pas/ bstan bcos mdzad pa de kho na thugs su chud pa phun sum tshogs par bstan pa dang / rnyed pa dang bkur sti la mi lta bar bstan bcos mdzad pas/thugs rje phun sum tshogs pa dang / shes rab phun sum tshogs par bstan pa'o/ /'chad pa ni bshad par byed pa ste/ mngon par mchod ces bya ba dang sbyar ro/ /kha cig na re bde gshegs nyid las skyes pa zhes kyang bya'o zhe'o/ /de ni 'phags pa thogs med do/ / de la ni 'phags pa byams pa'i byin rlabs kyis na/ chos kyi rgyun gyis bstan bcos 'di mngon du gyur cing bshad do/ /su la 'chad pa zhe na/ bdag sogs la zhes bya ba ste/ bdag thog mar byas pa gang yin pa de dag ni bdag la sogs pa ste/ 'di ni bdag nyid kyi mi slu ba las lung mnos par ston to//yang zhes bya ba ni bsdu ba'am/ /rtsa ba bskangs pa'am/ lhag pa'i tshig ste/ mdzad pa dang / 'chad pa nyi tshe la ma yin gyi/ sangs rgyas dang byang chub sems dpa' gang yang rung ba dag la mchod par bya'o/ /mngon mchod ces bya ba ni rjed pa'o/ /mngon par zhes bya ba ni mdun nam mngon sum dang 'dra bar gnas pa'o//mchod pa ni lus dang ngag dang yid kyis rjed pa'o/ /bstan bcos mdzad pa dang 'chad pa la mngon par mchod nas ci zhig bya zhe na/ don rnams dbye phyir 'bad par bya/ /zhes bya ba smos so/ /don dbye ba'i phyir ram/don dgrol ba'i phyir ram/ so sor dbye ba'i phyir bsgrim par bya ba'i phyir zhes bya ba 'di ni rgyu'i don te/ don rnam par dbye ba'i rgyur zhes bya ba'i tha tshig go/ /don ni 'dir bstan bcos kyi lus yin te zhes bya ba don bdun po 'di dag bstan bcos 'di las 'chad do zhes 'byung ba'i phyir ro//ci'i phyir bstan bcos 'di bshad ce na sangs rgyas bcom ldan 'das rnams kyi rnam par mi rtog pa'i ye shes bskyed pa'i phyir te/ chos la bdag med pa bstan pas rnam par mi rtog pa'i ye shes bskyed pa dang / de goms pas bag chags dang bcas pa'i nyon mongs pa dang /shes bya'i sgrib pa ma lus par spangs pa thob par 'gyur ro/ /chos la bdag med pa yang chos thams cad med pa nyid chos la bdag med pa dang / nang na byed pa'i skyes bu med pa nyid chos rnams la bdag med pa'o zhes mi mthun par smra ba de dag bkag pas/ chos la bdag med pa yang dag pa ji lta ba bzhin du bstan par bya ba'i phyir bstan bcos brtsam mo/ /gzhan dag na re mtshan nyid dang sgrib pa la sogs pa ma rtogs pa dang / log par rtogs pa rnams yang dag par rtogs pa skyed pas ma rtogs pa rnams dang / log par rtogs pa bsal ba'i phyir ro zhe'o//yang na 'jig rten gyi khams dang sems can dang chos dang 'dul ba dang / thabs kyi bdag nyid de/ shes bya rnam lnga re re la yang rab tu dbye ba mtha' yas pa'i phyir shes par bya dka'o snyam du/ byang chub sems dpa' rnams kyi sems zhum pa gang yin pa de bstsal ba'i phyir/mtshan nyid dang sgrib pa dang / de kho na zhes bya ba dag smos so/ /de la thog ma kho nar bstan bcos kyi lus rnam par gzhag ste zhes bya ba la/ de la zhes bya ba ni bstan bcos kyi don rnam par 'byed pa de la 'am/ bstan bcos la'o//thog ma kho nar zhes bya ba ni/ dang po kho nar ro/ /bstan bcos ni bshad par zad do/ /de'i lus ni mdor bsdus pa'am/ don bsdus pa'o/ /gnas kyi don ni lus so/ /dper na phyi dang nang gi skye mched kyi gnas ni khog pa ste/ lus zhes bya ba de bzhin du/don gang dag la gnas te/ bstan bcos la 'jug pa'i don de rnams ni de'i lus so/ /de dag kyang don bdun po dag ste/ mtshan nyid la sogs pa dag go/ /rnam par gzhag ces bya ba ni bcas pa ste/ bshad ces bya ba'i tha tshig go/ /bstan bcos khong du chud pa nyid kyis de'i lus shes par mi 'gyur ram/de bas na thog ma de rnam par gzhag pa ni don med do/ /slob ma rnams la phan gdags pa'i phyir don med pa ma yin no/ /slob mas don khong du chud na rgyas par brjod kyang bde blag tu khong du chud par 'gyur te dkyus kyis bstan pa'i rta thags thogs med par rgyug pa bzhin te/gzhan du ma yin no zhes bya ba don bdun po 'di dag bstan bcos 'di las 'chad do zhes bya ba la zhes bya ba ni/ bstan bcos kyi lus rdzogs so zhes bya ba ni tha tshig go/ /shes par bya ba yin pas don de khong du chud par bya ba zhes bya ba'i tha tshig go//bdun po zhes bya ba ni grangs so/ /'di dag ces bya ba ni mtshan nyid la sogs pa smos pa gang yin pa rnams so/ /bstan bcos 'di las zhes bya ba ni dbus dang mtha' rnam par 'byed pa zhes bya'o/ /'chad ces bya ba ni bstan pa'am gtan la 'bebs pa'o//'di lta ste zhes bya ba ni de'i don khong du chud par byed pa'i tshig gi phrad do/ /mtshan nyid ces bya ba ni/ 'dis mtshon par byed pas mtshan nyid do/ /de yang rnam pa gnyis te/ kun nas nyon mongs pa'i mtshan nyid dang / rnam par byang ba'i mtshan nyid do/ /de la kun nas nyon mongs pa'i mtshan nyid ni rnam pa dgu ste/yang dag ma yin kun rtog yod/ /ces bya ba nas bzung ste/ rnam bdun yang dag min rtog las/ /zhes bya ba'i bar du'o/ /lhag ma ni rnam par byang ba'i mtshan nyid du bstan to/ /gal te 'dis mtshon par byed pas mtshan nyid ces bya na/de lta na ni mtshan nyid kun nas nyon mongs pa dang / rnam par byang ba dang tha dad par 'gyur ro zhe na/ de ni de lta ma yin te dngos po rnams kyi rang bzhin nyid mtshan nyid de/ dper na sa'i khams kyi mtshan nyid ni sra ba ste/ sra ba nyid las sa'i khams gud na med pa lta bu'o//yang na des mtshon par bya bas mtshan nyid de/ /de ltar kun nas nyon mongs pa dang / rnam par byang ba yang kun nas nyon mongs pa dang / rnam par byang ba'i bdag nyid kyis mtshon par bya bas mtshan nyid du 'gyur ro/ /yang na kun nas nyon mongs pa dang rnam par byang ba gnyis las mtshan nyid rnam pa gnyis te/rang gi mtshan nyid dang spyi'i mtshan nyid do/ /sgrib pa zhes bya ba ni dge ba'i chos rnams la sgrib par byed pa'am/ 'dis dge ba'i chos rnams bsgrib pas sgrib pa ste/ skye ba la bgegs byed pa'i phyir sgrib pa'o/ /de yang lnga bcu rtsa gsum mo//de kho na zhes bya ba ni 'di nyid de yin pas de'o/ /de'i dngos po ni de kho na ste/ phyin ci ma log ces bya ba'i tha tshig go/ /de yang rnam pa bcu'o/ /mi mthun pa'i phyogs spangs pa'i phyir/ phyogs ni gnyen po ste de ni lam mo/ /de goms par bya ba ni bsgom pa'o//gnas skabs ni de nyid rgyun gyis skye ba'i khyad par ro/ /de yang rnam pa bcu dgu ste/ rigs kyi gnas la sogs pa'o/ /'bras bu thob pa ni 'bras bu rnyed pa'o/ de yang rnam pa bco lnga ste/ rnam par smin pa'i 'bras bu la sogs pa'o/ /theg pa bla na med pa zhes bya ba ni 'dis 'gro bas theg pa ste/de ni theg pa yang yin la bla na med pa yang yin pas theg pa bla na med pa'o/ /de yang rnam pa gsum ste/ bsgrub pa bla na med pa la sogs pa'o/ /don bdun pa zhes bya ba ni/ nges pa'i don dang go rims kyi don du smos pa ste/ don 'di rnams 'dir bshad kyi de las gzhan ma yin no//yang go rims 'di ni 'jig rten las 'das pa'i ye shes dang mthun pa'i phyir te/ 'di ltar byang chub sems dpa' mos pas spyod pa la gnas pa/ tshul khrims la rab tu gnas pas/ thog mar kun nas nyon mongs pa dang rnam par byang ba la mkhas par bya'o//de'i 'og tu dge ba'i chos rnams kyi gang gis sgrib pa gang yin pa de shes par bya ste/ de ma spangs na rnam par grol mi srid la/ rnam par mi shes na yang nyes pa ma mthong bas spong mi nus so/ /de'i 'og tu sgrib pa de las dmigs pa gang gis sems rnam par grol bar 'gyur ba de ni de kho na yin par khong du chud par bya'o//de'i 'og tu dmigs pa des sgrib pa de sbyor ba gang gis zad par 'gyur ba de gnyen po bsgom par shes par bya'o/ /de'i 'og tu gnyen po bsgom pa ni de'i mi mthun pa'i phyogs 'bri ba dang gnyen po 'phel ba la gnas skabs su shes par bya ste/rigs kyi gnas skabs la sogs pa'o/ /de'i 'og tu 'jig rten las 'das pa'i chos mngon du gyur pa ni 'bras bu rnams te/ rgyun du zhugs pa'i 'bras bu la sogs par shes par bya'o/ / de dag thams cad kyang bla ma dang bcas pas byang chub sems dpa' rnams dang nyan thos la sogs pa dang thun mong ste/ mdo las ji skad du/ rab tu byung ba de nyan thos kyi bslab pa dang / cho ga dang spyod yul dang / yang dag par spyod pa la yang slob po/ /rang sangs rgyas kyi bslab pa dang /cho ga dang / spyod yul dang / yang dag par spyod pa la slob po/ /byang chub sems dpa'i bslab pa dang / cho ga dang / spyod yul dang / yang dag par spyod pa la yang slob po zhes gsungs pa lta bu'o/ /byang chub sems dpa' rnams kyi ni bla na med pa thun mong ma yin pa ste don bdun pa bla na med pa'o//gzhan na re kun nas nyon mongs pa dang / rnam par byang ba'i mtshan nyid la mkhas par bya ba bskyed pa'i phyir thog mar mtshan nyid do/ /de la kun nas nyon mongs pa gang yin pa de ni/ sgrib pa'o/ /rnam par byang ba gang yin pa de ni de kho na'o/ /de kho na nyid khong du chud pas sgrib pa spong bar 'gyur te/de'i phyir sgrib pa dang de kho na'o/ /de spang ba'i thabs bstan pa'i phyir/ /de'i 'og tu gnyen po 'khor dang bcas pa ni lam mo/ /lam de'i thog ma dang bar ma dang tha mal chung ngu dang 'bring dang chen po rab tu dbye bar bstan pa'i phyir de'i gnas skabs so//gnas skabs dang mthun pa'i 'bras bu thob par byed pas/ de'i 'og tu 'bras bu'o/ /de dag thams cad kyang byang chub sems dpa' dang / nyan thos la sogs pa dang thun mong ste/ de bas na thun mong ma yin pa dang theg pa chen po'i tshul rab tu bstan pa'i phyir bla na med pa zhes bya'o zer ro//gzhan dag na re yod pa dang med pa'i mtshan nyid shes par bya ba'i phyir thog mar mtshan nyid bshad do/ /mtshan nyid shes nas sgrib pa spang bar bya ba dang / de kho na mngon sum du bya bas de'i 'og tu sgrib pa dang de kho na'o/ /de gnyis spang ba dang mngon du bya ba'i thabs ni 'di yin te/gnyen po bsgom pa'o/ /de'i 'bring dang mchog ni gnas skabs kyi khyad par ro/ /des spang bar bya ba ni 'bras bu'o/ /de'i 'og tu theg pa bla na med pa'o zhes bya bar rab tu bstan pa'i phyir 'di ni go rims so zhes zer ro/ /gzhan yang sems pa yod pa dang med pa'i chos la rmongs nas/skur pa 'debs pa dang / sgro 'dogs pa spang ba'i phyir mtshan nyid bshad do/ /rmongs pa spangs nas sgrib pa la mkhas par bya ba'i phyir sgrib pa'o/ /des de kho na bsgribs pas de kho na la mkhas par bya ba'i phyir de'i 'og tu de kho na'o/ /de kho na rab tu rtogs pa bsgoms pas sgrib pa spong bar 'gyur bas de kho na'i 'og tu gnyen po bsgom pa'o//de'i dbye ba la mkhas par bya ba'i phyir gnas skabs so/ /gnas skabs kyis 'bras bu rab tu phye bas de la mkhas par bya ba bskyed pa'i phyir gnas skabs kyi 'og tu 'bras bu'o//de dag thams cad kyang theg pa chen po la brten pas theg pa bla na med pa tha mar bshad do snyam mo/ /de la mtshan nyid las brtsams nas/ yang dag ma yin kun rtog yod/ /de la gnyis po yod ma yin/ /stong pa nyid ni 'di la yod/ /de la yang ni de yod do/ /zhes bya bar gsungs so zhes bya ba la/de la zhes bya ba ni mtshan nyid dang / sgrib pa la sogs pa dngos po bdun smos pa dag gi nang nas mtshan nyid las brtsams nas de'i dbang du mdzad de/ de'i phyir/ yang dag ma yin kun rtog yod/ /ces bya ba la sogs pa gsungs so/ /ji ltar bstan pa de bzhin du bshad de/thog mar mtshan nyid bstan pas de'i phyir lhag ma rnams pas de nyid bshad pa sngar brtsam mo/ /la la dag chos thams cad ri bong gi rwa ltar rang bzhin ye med do/ /snyam du sems pa de'i phyir thams cad la skur pa dgag pa'i don du/ yang dag ma yin kun rtog yod//ces bya bar gsungs te/ rang bzhin gyi zhes bya ba tshig gi lhag ma'o/ /de ltar na mdo las chos thams cad stong pa'o zhes bshad pas/ mdo dang mi 'gal lam zhe na/ mi 'gal te 'di ltar/ de la gnyis po yod ma yin/ /yang dag pa ma yin pa kun rtog pa gzung ba dang 'dzin pa'i ngo bo dang bral bas stong pa zhes bya ba'i rang bzhin ye med pa ni ma yin te/de'i phyir mdo dang mi 'gal lo/ /gal te de ltar gnyis po ni ri bong gi rwa ltar ye med la/ yang dag pa ma yin pa kun tu rtog pa ni/ don dam par rang bzhin gyis yod na/de lta na ni stong pa nyid med par 'gyur ro zhe na/ de ni de lta ma yin te 'di ltar/ stong pa nyid ni 'di la yod/ /yang dag ma yin pa kun rtog pa la gzung ba dang 'dzin pa med pa nyid gang yin pa de stong pa nyid yin pas stong pa nyid med par mi 'gyur ro/ / gal te gnyis po med pa stong pa nyid yin la/ de yang yang dag pa ma yin pa kun tu rtog pa la yod na/ ci'i phyir bdag cag ma grol/ yod na yang ci'i phyir ma rtogs snyam pa'i dogs pa bsal ba'i phyir/ de la yang ni de yod do/ /zhes bya ba gsungs te/ 'di ltar stong pa nyid la yang yang dag pa ma yin pa kun rtog pa yod pas de'i phyir khyed ma grol lo//de bas na dri ma dang bcas pas chu'i khams dngas pa bzhin rtogs par mi rung ngo / /yang na sems dang sems las byung ba rnams dang / gzugs dang rdzas nyid du yod par gang dag lta ba de dgag pa'i phyir/yang dag ma yin kun rtog yod/ /ces gsungs te de nyid rdzas su yod do/ /gzugs ni de las logs shig na yang med la/ /rdzas su yang med do/ /ci'i phyir zhe na/ 'di ltar de la gnyis po yod ma yin/ yang dag pa ma yin pa kun rtog pa ni ci la yang 'dzin pa ma yin/sus kyang gzung bar bya ba ma yin gyi/ gzung ba dang 'dzin pa dang bral ba'i dngos po tsam nyid de/ 'di ltar rnam par shes pa las phyi rol na gzugs la sogs pa gzung ba med par rmi lam la sogs pa bzhin du/ gzugs la sogs par snang ba'i rnam par shes pa 'byung ngo //gal te rgyu yin na de med par de 'byung bar mi rung ngo / /de'i phyir dmigs pa med pa nyid de/ da rmi lam la sogs pa bzhin no/ /gzhan la yang rang gi sa bon yongs su smin pa las don du snang ba'i rnam par shes pa 'byung bar shes par bya'o/ / gzung ba med na 'dzin pa med par 'gyur bas gzung ba med na 'dzin pa yod par mi rung ste/ de bas na gzugs ni yang dag pa ma yin pa kun tu rtog pa las gud na yod pa ma yin no/ /gal te gzung ba med na de'i phyir rnam par dag pa'i dmigs pa med pas thar pa yang med par 'gyur ro zhe na/de ni de lta ma yin te/ 'di ltar/ stong pa nyid ni 'di la yod/ /ni zhes bya ba'i sgra ni gang gi phyir zhes bya ba'i tha tshig go/ /stong pa nyid ni rnam par dag pa'i dmigs pa ste/ gzung ba dang 'dzin pa dang bral ba nyid de/ de yang yang dag pa ma yin pa kun rtog pa la yod pas thar pa med par mi 'gyur ro//gal te yang dag pa ma yin pa kun du rtog pa la yod na/ de yod pas ci'i phyir mi rtogs she na/ yang dag pa ma yin pa kun rtog pas bsgribs pas nam mkha' dri ma med pa bzhin du rtogs par mi rung gi med pa ni ma yin no zhes bstan pa'i phyir/de la yang ni de yod do zhes bya ba gsungs so/ /yang na thams cad la skur pa 'debs pa dgag pa'i phyir/ /yang dag ma yin kun rtog yod/ /ces bya ba gsungs te/ rnam par shes pa gyur pa'i bdag nyid yod pas/ thams cad med pa yang ma yin bdag nyid yod pa yang ma yin no//gang dag sems pa gzugs la sogs pa ji ltar snang ba de ltar yang dag pa ma yin pa kun rtog pa las logs shig na rang bzhin du yod do zhes/ yod pa ma yin pa la sgro 'dogs pa dgag pa'i don du de'i phyir/ /de la gnyis po yod ma yin/ /zhes bya ba gsungs so//yang dag pa ma yin pa kun rtog pa tsam yod par dgongs pa'o/ /kha cig gnyis po med pa ni mo gsham gyi bu bzhin du dngos po med de zhes chad pa'i dngos po'i ngo bor 'dzin pa dang / gzhan dag nang na byed pa'i skyes bu med pa nyid ni/ chos rnams kyi stong pa nyid do zhes smra ba de'i phyir/stong pa nyid la skur pa 'debs pa dgag pa'i don dang / bdag med pa yang dag par bstan pa'i phyir/ stong pa nyid ni 'di la yod ces bya ba gsungs so/ /gal te yang dag pa ma yin pa kun rtog pa la stong pa nyid yod na de lta na ni/ bsgrim mi dgos par srog chags thams cad thar bar 'gyur ro zhe na/de lta ma yin te 'di ltar/ de la yang ni de yod do/ /stong pa nyid kyang rnam par ma sbyangs kyi bar du thar pa med pa'i phyir te/ kun nas nyon mongs par gyur pa ni/ 'bad pa chen pos rnam par sbyang dgos pas 'bad pa ma byas par thar pa med do//yang na kun nas nyon mongs pa dang rnam par byang ba dag gi mtshan nyid brjod pa las gzhan med pas de'i phyir kun nas nyon mongs pa dang / rnam par byang ba'i mtshan nyid bstan pa'i don du/ yang dag ma yin kun rtog yod/ /ces rgya cher gsungs so//'khrul pa'i mtshan nyid kyi phyir/ yang dag pa ma yin pa kun rtog pa'i rang bzhin ni kun nas nyon mongs pa'o/ /'di 'khrul pa'i mtshan nyid du ji ltar shes par bya zhe na/ 'di ltar de la gnyis po yod ma yin/ /bdag nyid du med par gzung ba dang 'dzin pa'i rnam par snang bas 'khrul pa'i ngo bo nyid du mngon no//da ni rnam par byang ba'i ngo bo brtag pa'i phyir/ stong pa nyid ni 'di la yod/ /ces bya ba gsungs so/ /gnyis po med pa'i rang bzhin yin pa'i phyir/ /stong pa nyid kyi rang bzhin ni rnam par byang ba'o/ /stong pa nyid kyis rab tu phye bas lam dang 'gog pa dag kyang 'dir bsdu bar rig par bya'o//kun nas nyon mongs pa'i phyogs nyid las rnam par byang ba'i phyogs nyid btsal bar bya ba'i rang gi rgyud gud na med par rab tu bstan pa'i phyir 'di la zhes bya ba gsungs so/ /gal te gnyis po med na ci'i phyir de yod par 'jig rten 'khrul par gyur zhes dris pa dang /de'i phyir de la yang ni de yod do zhes bya ba gsungs te/ gzung ba dang 'dzin pa'i rnam par rtog pa'o/ /sgyu ma ni gang po che la sogs pas stong yang / glang po che la sogs par snang ba lta bu'o/ /yang dag pa ma yin pa gnyis po de la'am/des yongs su rtog pas yang dag pa ma yin pa gnyis por yongs su rtog pas yang dag ma yin kun rtog pa'o/ /yang dag pa ma yin pa'i tshig gis ni/ /ji ltar 'di la gzung ba dang 'dzin par kun rtog pa de bzhin du med par ston to/ /kun rtog pa'i tshig gis ni don ji lta bur kun rtog pa don de lta bur yod pa ma yin zhes ston te//de ltar gzung ba dang 'dzin pa las rnam par grol ba de'i mtshan nyid bshad pa yin no/ /de yang gang yin zhe na sems dang sems las byung ba 'das pa dang ma 'ongs pa dang / da ltar gyi dang rgyu dang 'bras bur gyur pa dang / khams gsum pa dang / thog ma med pa'i dus can dang mya ngan las 'das pa'i mthar thug pa dang / 'khor ba'i rjes su mthun pa dag ni/ /khyad par med par yang dag pa ma yin pa kun rtog pa'o/ /khyad par ni gzung ba dang 'dzin par rnam par rtog pa'o/ /de la gzung bar rnam par rtog pa ni/don dang sems can du snang ba'i rnam par shes pa'o/ /'dzin par rnam par rtog pa ni bdag dang rnam par rig par snang ba'o/ /gnyis po ni gzung ba dang 'dzin pa'o zhes bya ba de la gzung ba ni gzugs la sogs pa'o/ /'dzin pa ni mig gi rnam par shes pa la sogs pa'o/ / gzung ba dang 'dzin pa'i dngos po dang bral ba nyid de/ dben pa nyid ni yang dag pa ma yin pa kun rtog pa'i stong pa nyid yin gyi/ /yang dag pa ma yin pa kun rtog pa yang med pa ni ma yin te/ dper na thag pa ni sbrul gyi dngos pos stong ste/ de'i rang bzhin ma yin pas dus thams cad du stong pa nyid yin gyi/thag pa'i dngos po ni ma yin te/ 'dir yang de bzhin no/ /de la yang ni de yod do zhes bya ba ni yang dag pa ma yin pa kun rtog pa ste/ de ltar glo bur gyi sgrib pas nyon mongs pa'i phyir/ de chu khams la sogs pa bzhin du rtogs par mi rung ngo zhes bstan pa yin no//de ltar gang na gang med pa de ni/ /des stong par yang dag par rjes su mthong ngo zhes bya ba la/ ci zhig gang na med ce na/ yang dag pa ma yin pa kun rtog pa la gnyis po ste/ de'i phyir yang dag pa ma yin pa kun rtog pa la gnyis kyis stong par mthong ngo / /'di la lhag ma gang yin pa de ni yod pa de 'di la lhag ma gang yin zhe na//yang dag ma yin pa kun rtog pa dang stong pa nyid do/ /de gnyi ga yang 'dir yod par ma skur ba dang / sgro btags pa med par mthong na yang dag pa ji lta ba bzhin du rab tu shes so/ /de la yang dag pa ma yin pa kun rtog pa la gnyis po med par mthong ba'i phyir sgro mi 'dogs so//yang dag pa ma yin pa kun rtog pa dang stong pa nyid yod par mthong ba'i phyir te/ skur pa mi 'debs te/ stong pa nyid gang yin pa de yod pa dang gang gis stong pa de de la med pa'i phyir/ stong pa nyid kyi mtshan nyid phyin ci ma log par bstan pa yin no//thams cad med pa'am thams cad yod pa ni stong pa nyid kyang mtshan nyid phyin ci log yin te/ stong pa nyid med par 'gyur ro/ /stong pa zhes bya ba med na stong pa nyid du mi rung ste/ chos nyid ni dngos po la rag lus pa'i phyir mi rtag pa nyid la sogs pa bzhin no//gnyis po yod do zhe na/ stong pa nyid med par 'gyur ro/ /gal te gnyis po ni ri bong gi rwa dang 'dra na yang ji ltar des yang dag pa ma yin pa kun rtog pa stong ste/ dper na dge slong rnams kyis gtsug lag khang bzhin du gzhan gyis gzhan stong par mthong zhe na/dper na thag pa la'am sgyu ma la bdag nyid kyis med par sbrul gyi rnam pa dang skyes bu la sogs pa lta bur snang ba de la kha cig 'dzin pa bzlog pa'i phyir/ sbrul dang skyes bu la sogs pas stong ngo zhes brjod pa de bzhin du/ yang dag pa ma yin pa kun du rtog pa la yang bdag nyid kyis med par gzung ba dang 'dzin pa'i rnam par snang ba de la byis pa rnams 'dzin cing mngon par zhen pa dor bar bya ba'i phyir gnyis kyis stong zhes bshad do//stong pa ma yin mi stong min/ /zhes bya ba'i tshigs su bcad pa 'di ci'i phyir brtsams she na/ 'dus byas dang 'dus ma byas thams cad gnyis dang bral ba nyid du shes par bya ba'i phyir ro//de ltar mtha' gcig bkag pas 'di thams cad stong pa yang ma yin mi stong pa yang ma yin pa zhes shes rab kyi pha rol tu phyin pa'i nang nas bshad pa'i dgongs pa bstan pa yin no/ /gzhan du na ltag 'og 'gal bar 'gyur ro//gzhan yang dbu ma'i lam rab tu bstan pa'i phyir te/ gzhan du na ni gcig tu stong pa kho na'am/ mi stong pa'i mthar 'gyur ro/ /yang na skur pa 'debs pa dang sgro 'dogs pa dgag pa bshad ma thag pa mjug bsdu ba'i don du de brtsams so/ /rgyu dang rkyen dang 'brel pa las skyes pa'i phyir/ yang dag pa ma yin pa kun rtog pa ni 'dus byas te/ de la mi ltos pa'i phyir stong pa nyid ni 'dus ma byas so/ /bshad pa ni shes rab kyi pha rol tu phyin pa la sogs pa'i nang nas 'byung ba'o/ /yod pas zhes bya ba ni yang dag pa ma yin pa kun rtog pa ste/ yang dag pa ma yin pa kun rtog pa'i bdag nyid kyis 'dus byas stong pa ma yin no//med pas zhes bya ba ni gnyis po ste/ gzung ba dang 'dzin pa'i bdag nyid kyis stong pa'o/ /stong pa nyid ni yang dag pa ma yin pa kun rtog pa la de'i chos nyid du yod de/ stong pa nyid la yang yang dag pa ma yin pa kun rtog pa chos can gyi ngo bor yod do//de ltar 'dus ma byas kyang chos nyid kyi ngo bos stong pa ma yin te/ dngos po med ces bya ba gnyis kyi ngo bos stong pa'o/ /de ni dbu ma'i lam yin no zhes bya ba ni dkon mchog brtsegs pa la sogs pa'i nang nas/ 'od srungs yod ces bya ba 'di ni mtha' gcig go//med ces bya ba 'di ni mtha' gnyis te/ 'od srungs mtha' gnyis po 'di dag gi dbus gang yin pa 'di ni chos rnams la yang dag par so sor rtog pa'o zhes 'byung ba gang yin pa ste/ de ltar dbu ma'i lam de dang mthun par byas pa yin no/ /thams cad ces bya ba ni 'dus byas dang 'dus ma byas so//gcig tu stong pa yang ma yin zhes bya ba ni/ yang dag pa ma yin pa kun rtog dang / de la stong pa nyid kyang yod pa'i phyir ro/ /gcig tu mi stong pa yang ma yin pa ni gnyis po med pa'i phyir ro/ /thams cad yod pa'am thams cad med pa ni mtha' nyid du 'gyur gyi/dbu ma'i lam ma yin no/ /de ltar yang dag pa ma yin pa kun rtog pa'i yod pa'i mtshan nyid dang / med pa'i mtshan nyid brjod nas zhes bya ba 'di/ yod par nye bar mtshon pas yod pa nyid/ yod pa'i mtshan nyid de/ yang dag pa ma yin pa kun rtog pa yod ces bya ba des yang dag pa ma yin pa kun rtog pa yod par ston zhes bya ba'i tha tshig go//de bzhin du med par nye bar mtshon pas med pa nyid med pa'i mtshan nyid de/ de yang gzung ba dang 'dzin pa'i dngos po med pa ste/ 'di ltar yang dag pa ma yin pa kun rtog pa la gnyis po med pas de'i phyir yang dag pa ma yin pa kun rtog pa yang gnyis kyi bdag nyid kyis yod pa ma yin no zhes bstan pa yin no//rang gi mtshan nyid brjod de zhes bya ba la yod pa'i mtshan nyid dang / rang gi mtshan nyid gnyis khyad par ci yod ce na/ yod pa'i mtshan nyid ni spyi'i'o//rang gi mtshan nyid ni bye brag yin no/ /gal te rang gi mtshan nyid ma bshad na ci zhig tu 'gyur zhe na/ yang dag pa ma yin pa kun rtog pa'i lus ma bshad par 'gyur te/ de bas na de'i lus khong du chud par bya ba'i phyir/ don dang sems can bdag rnam rig /snang ba'i rnam par shes pa ni//rab tu skye'o de'i don med/ /de med pas na de yang med/ /ces bya ba gsungs so/ /yang na gzung ba dang 'dzin pa med pa'i yang dag pa ma yin pa kun rtog pa tsam nyid yod do zhes bstan pa yang dag pa ma yin pa kun rtog pa tsam de la/ dbang po dang yul dang / rnam par shes pa ji ltar rnam par gzhag pa mi shes pas yang dag pa ma yin pa kun rtog pa'i snang ba tha dad pa de la rnam par gzhag go zhes shes par bya ba'i phyir/yang dag pa ma yin pa kun rtog pa'i rang gi mtshan nyid bshad de/ don dang sems can bdag rnam rig /snang ba'i zhes rgya cher 'byung ba'o//yang na yang dag pa ma yin pa kun rtog pa yod ces bya ba des de yod pa tsam du shes par byed kyi/ de'i rang bzhin ni ma yin pa dang gnyis po med par yang gzung ba dang 'dzin pa la mngon par zhen pa'i rgyu gang yin pa rnam par mi shes pa dang / gang gi phyir gnyis po med par yid ches par bya ba de yang ma bshad pas de bstan pa'i phyir/don dang sems can bdag rnam rig /snang ba'i zhes rgya cher gsungs so/ /de la yang dag pa ma yin pa kun rtog pa ni rnam par shes pa'i rang bzhin no/ /rnam par shes pa de yang 'dir mtshungs par ldan pa dang bcas par dgongs te/gtso bor ni rnam par shes pa gzung ngo / /gzung ba dang 'dzin pa la mngon par zhen pa de nyid kyi rgyu ni don dang sems can la sogs par snang ba'o/ /de'i don med de med pas na de yang med ces bya ba ni gnyis po med pa'i rgyu'o/ /de la don dang sems can du snang ba'i kun gzhi rnam par shes pa mtshungs par ldan pa dang bcas pa ste/de yang rnam par smin pa'i phyir lung du ma bstan pa nyid do/ /bdag tu snang ba ni nyon mongs pa can gyi yid mtshungs par ldan pa dang bcas pa'o/ /de yang bsgribs la lung du ma bstan pa ste/ nyon mongs pa dang mtshungs par ldan pa'i phyir bstan pa'o//rnam par rig par snang ba ni/ mig gi rnam par shes pa la sogs pa drug po mtshungs par ldan pa dang bcas pa dge ba dang mi dge ba dang lung du ma bstan pa'o/ /don dang sems can dang bdag dang rnam par rig par snang ba rnam par shes pa brgyad po mtshungs par ldan pa dang bcas pa de dag ni kun 'byung ba'i bden par bsdus pa/lhan cig byed pa'i rkyen la ltos pa'i kun gzhi rnam par shes pa las ji ltar mthun mthun du 'gro ba lnga rnams su rab tu 'byung ngo / /kun gzhi rnam par shes pa la dge ba dang / mi dge ba dang / lung du ma bstan pa'i chos kyis bag chags 'gyur ba'i khyad par 'ga' zhig yod de/ de dbang gis phan tshun tha dad par snang ba'i rnam par shes pa rab tu skye'o/ /don la sogs pa med pa der snang ba'i rnam par shes pa ji ltar skye ste/ mi med na sdong po mi snang bar mi 'gyur ba lta bu'o zhe na/de ni nyes pa ma yin te/ don la sogs par snang ba'i rnam par shes pa la byas pa rnam par shes pa las don gud na yod par mngon par zhen te/ rab rib can la skra shad 'dzings pa la sogs pa bzhin no/ /de'i phyir de la mngon par zhen pa spangs pa'i phyir/ rnam par shes pa 'di nyid don la sogs par snang bar 'byung ste/rab rib can la skra shad 'dzings pa la sogs pa snang ba de bzhin du med par yang don dang / sems can la sogs par snang ngo zhes brjod do/ /de ltar na rnam par shes pa brgyad kyi dngos po can/ gzhan gyi dbang ni yang dag pa ma yin pa kun du rtog par bshad pa yin no//gzugs la sogs pa'i dngos por zhes bya ba ni gzugs dang / sgra dang / dri dang / ro dang / reg pa dang / chos kyi ngo bor snang ba ni de'i rnam par 'byung ba'i phyir ro/ /sems can du snang ba'i dbang po lngar bdag dang gzhan gyi rgyud la gang yin pa'o zhes bya ba ni/snang ba zhes bya ba dang sbyar ro/ /dbang po lnga la sems can zhes bya bar lhag par chags pa'i gnas su gyur pa ste/ de dag gis sam/ de dag la chags pas sems can te/ de'i rnam par 'byung ba'i phyir/ de snang ba'i rnam par shes pa zhes bya'o//bdag tu snang ba zhes bya ba dang / bdag tu snang ba ni bdag tu rmongs pa la sogs pa dang mtshungs par ldan pa'i phyir/ nyon mongs pa can gyi yid do zhes bya ba la nyon mongs pa can gyi yid ni bdag tu rmongs pa dang bdag tu lta ba dang bdag la chags pa dang / nga'o snyam pa'i nga rgyal dang rtag tu mtshungs par ldan pa dang /de dag kyang bdag tu dmigs pa'i phyir nyon mongs pa can gyi yid ni bdag tu snang bar rigs so/ /rnam par rig par snang ba ni rnam par shes pa drug rnams so zhes bya ba ni yul 'dzin pa'i ngo bor snang bas de'i rnam par 'byung ba'i phyir rnam par rig pa snang ngo //de'i don med ces bya ba ni rnam pa bzhi char gyi'o/ /don dang sems can du snang ba rnam pa med pa dang / bdag dang rnam par rig par snang ba ni log par snang ba'i phyir ro zhes bya ba ni don dang sems can du snang pa gnyis gzung ba'i ngo bor snang bas/ log par snang ba mi srid pa'i phyir/ rnam pa med pa nyid ni don med pa'i rgyu'o/ /gzhan dag ni 'dzin pa'i ngo bor snang bas rnam pa med pa ma yin te/ log par snang ba nyid ni don med pa'i rgyu'o zhes bshad do/ /rnam pa ni dmigs pa la mi rtag pa la sogs pa'i ngo bor 'dzin pa'i rnam pa yin na/ de yang de dag la med de/ gzung ba'i ngo bor snang bas de'i phyir rnam pa med pa ni 'dzin pa ma yin no zhes bya ba'i tha tshig go/ /yang na dmigs pa yang dag par tshor ba la rnam pa zhes bya ste/ de yang de dag la med pas dmigs pa med pa'i phyir rnam pa med do/ /gal te gnyis ka yang rnam pa med pa dang / phan tshun tha dad pa'i ngo bo yin te/gzugs la sogs pa dang mig la sogs pa bzhin no/ /de lta yin na ni 'jig rten dang bstan bcos las grags pa'i gzugs la sogs pa dang / mig la sogs pa las rnam par shes pa rang bzhin bye brag tu gyur pa ci yod na/ 'di ltar de dag ni gsal la/de dag dang tha dad pa med pa'i ngo bo rnam par shes pa ni yongs su bzung zhe na/ de las lhag pa'i don mi srid pa'i phyir ro/ /de ni 'di ltar rnam par gzhag ste/ 'di ltar tha dad pa'i don gyi ngo bo med kyang sems kyi rgyud so sor nges pas/ rnam par shes pa nyid so sos zin pa tha dad pa'i don la sogs par snang bar rang gi sa bon las rab tu 'byung ste/'di ltar yi dwags rnams kyis chu rnag dang phyi sa dang / gcin la sogs pas gang ba dang / skyes bu lag na dbyig pa thogs pa rnams kyis dogs gnyis bsrung bar mthong la/ mi la sogs pas ni chu dang ba dang bsil ba dang bkrur rung ba dang btung du rung ba dang /'jug tu rung bas gang zhig bgegs byed pa med par shes so/ /rnal 'byor pa mi sdug pa yid la byed pa la sogs pa goms pas ni/ rgyun mi 'chad par sa la keng rus kyis gang bar mthong ngo / /de bzhin du sa la sogs pa zad par la thams cad sa la sogs pas khyab par mthong ngo //don la rag las te bdag nyid thob pa ni don med par ram/ don gyi rang gi ngo bo tha dad pa'i rnam pa'i rnam par shes pa 'byung bar mi rigs so/ /de bas na don med par yang don dang sems can la sogs pa thams cad du snang ba'i rnam par shes pa nyid rab tu 'byung ngo zhes bya bar nges so//gzung ba med par bdag dang rnam par rig par snang ba gnyis 'dzin pa'i rnam par snang bas log par snang ba nyid do/ /yang na ji ltar rnam par shes pas don yongs su brtags pa de bzhin du bdag dang rnam par rig par don med de stag la sogs pa thob pa ltar/log par dmigs pa'i phyir/ log par snang ba nyid do/ /'di ltar rnam par rig pa yang rnam par rig pa gzhan gyis kun brtags pa'i bdag nyid kyis stong ngo zhes grub pa'i mtha' las 'byung ngo / /de'i phyir don dang sems can du snang ba bzhin du/ bdag dang rnam par rig par snang ba'i don yang med do/ /don med pas rnam par shes pa de yang med do/ /rnam par rig pas na rnam par shes pa ste/ de yang gzung ba med na rnam par shes pa por mi rigs te/ de lta bas na don med pa'i phyir rnam par shes pa kho nar rnam par shes pa med kyi don dang sems can dang bdag dang rnam par rig par snang bas na med pa ma yin no//de med du zin na de ma gtogs par rnam par shes pa'i rang bzhin ma bstan pa'i phyir ye med par thal bar 'gyur ro/ /de dang tha dad pa'i rang bzhin yin na ni de ji ltar rnam par shes par rung / ji ltar phan tshun tha dad par 'gyur/ de ltar gzung ba dang 'dzin pa ni med la de snang ba'i rnam par shes pa ni yod pas/ yang dag pa ma yin pa kun rtog pa ni yod/ gnyis po ni de na yod pa ma yin par sngar dam bcas pa de grub po zhes rab tu bstan pa'i phyir/ yang dag ma yin kun rtog pa//de ni de phyir grub pa yin/ /zhes bya ba gsungs so/ /rnam par shes pa bzhi po de yang yang dag pa ma yin pa kun du rtog pa grub pa yin no/ /de phyir zhes bya ba ni bshad ma thag pa'i rgyu de'i phyir te/ don med pas na de yang med ces bya'o/ /yang yang dag pa ma yin pa kun rtog pa yod par bsgrub pa dang /gnyis po med par rab tu bsgrub pa'i phyir/ de bzhin ma yin ye med min/ /zhes bya ba la sogs pa gsungs so/ /yang na de'i phyir zhes bya ba ni 'og nas 'byung ba'i phyir ro/ /de nyid rab tu bstan pa'i phyir/ /de bzhin ma yin ye med min/ /zhes bya ba gsungs te/de bzhin du yod pa ma yin pa dang ye med pa ma yin pa'i phyir ro/ /gang gi phyir gzung ba dang 'dzin par snang ba de skye ba ste/ de la rnam pa bzhi po de yang rnam pa med pa dang / log par snang ba'i phyir ji ltar mthun par 'dzin pa nyid du med do/ /rnam par rig pa gzhan gyis kun brtags pa'i bdag nyid kyis thams cad stong bas gzung ba nyid du med do//'khrul pa tsam 'byung ba'i phyir ye med pa yang ma yin no zhes bya ba ni bdag nyid kyis med kyang / rnam par snang ba gang yin pa de ni 'khrul pa zhes bya ste sgyu ma bzhin no/ /tsam zhes bya ba'i sgra ni de las lhag ma rnam bar gcad pa'i tha tshig ste/de ni 'di skad du 'khrul pa'i rnam par shes pa yod do/ /ye med pa ma yin no zhes bstan par 'gyur ro/ /'khrul pa'i rnam par shes pa de gzung ba dang 'dzin pa med pa bzhin du med pa nyid du ci'i phyir mi 'dod/ rnam par shes pa thams cad kyi yul las 'das pa'i phyir/sus kyang de yod pa nyid du brtag par mi nus so zhes bsams pa'o zhe na 'di ltar/ de zad nas ni grol bar 'dod/ /de'i phyir de med pa nyid du mi 'dod do/ /de ji lta zhe na kun nas nyon mongs pa dang rnam par byang ba'i phyogs kyi mthus de yod par rjes su dpag go/ /gzhan du na zhes bya ba ni gal te ye med pa nyid du 'dod na ni bcings pa yang med ces bya ste/'khrul pa tsam yang med du zin na/ kun nas nyon mongs pa med pas bcings pa yang med do/ /sngar bcings pa las grol lo zhes bya na grol ba yang med par 'gyur/ yang na de ji ltar snang ba de bzhin du yod pa'am/yang na ye med par ci'i phyir mi 'dod ces gzhan de snyam du sems pa bsal ba'i phyir/ de zad nas ni grol bar 'dod/ /ces gsungs te/ de ma zad na bcings pa zhes bya ba'i tha tshig go/ /de gzhan du na bcings pa dang grol ba med do zhes de skad bshad par 'gyur te/ kun nas nyon mongs pa dang mya ngan las 'das pa la skur ba 'debs pa'i nyes par 'gyur ro/ /gal te ji ltar gzung ba dang 'dzin pa nyid du phyugs yan chad la snang ba yang gal te de bzhin du don dam par 'gyur na ni/ de lta yin du zin na rtag par kun nas nyon mongs par 'gyur te/ de ltar na mya ngan las 'das pa yang med par 'gyur ro//de ltar 'khrul pa tsam med na yang kun nas nyon mongs pa med par 'gyur te/ rtag tu rnam par byang bar 'gyur ro/ /de ltar na gnyi gar yang thar pa tshol ba rnams kyi 'bad pa don med par 'gyur bas de'i phyir yang dag pa ma yin pa kun rtog pa yod pa dang gnyis po med par gdon mi za bar khas blang bar bya'o//bsdu ba'i mtshan nyid ston te zhes bya ba ni/ bsdu ba nyid mtshan nyid do/ /yang na gang gis bsdu bar mtshon pa de bsdu ba'i mtshan nyid do/ /de yang ci'i phyir bshad ce na/ 'dir ni gzung ba dang 'dzin pa dang bral ba yang dag pa ma yin pa kun rtog pa tsam nyid yod do zhes smras la/mdo gzhan dag las ni/ ngo bo nyid gsum gsungs pas mdo dag dang mi 'gal bar rab tu bstan pa'i phyir de dag 'dir bsdu bar brjod de/ de lta bas na 'grel pa mdzad pas/ yang dag pa ma yin pa kun rtog pa tsam du zad na zhes bya ba rgya cher smos so//brtags pa dang ni gzhan dbang dang / /yongs su grub pa nyid kyang ngo / /don phyir yang dag min rtog phyir/ /gnyis po med pa'i phyir bshad do/ /zhes bya ba ni/ gzung ba dang 'dzin pa rang bzhin gyis stong pa las yang dag pa ma yin par yang yod par yongs su rtog pas kun brtags pa zhes bya'o//de ni rdzas su med kyang tha snyad du yod pas ngo bo nyid ces bya'o/ /gzhan gyi dbang ni rgyu dang rkyen la rag las te skye bas gzhan gyi kha na las pa'o/ /smras pa/ brtags min rkyen las skyes pa dang / /rnam pa kun tu brjod med pa//gzhan gyi dbang gi ngo bo nyid/ /'jig rten pa yi spyod yul lo/ /yang dag pa ma yin pa kun rtog pa nyid gnyis dang bral ba nyid gang yin pa de ni yongs su grub pa'i ngo bo nyid de/ de ni 'dus ma byas pas mi 'gyur bar yongs su grub pa'o/ /brtags pa'i ngo bo nyid kyis te//shin tu stong nyid gang yin pa/ /yongs su grub pa'i ngo bo ste/ /mi rtog ye shes spyod yul lo/ /don phyir zhes bya ba ni don gyi dbang du mdzad nas bshad pa ste/ de ltar yang dag pa ma yin pa kun rtog pa'i phyir dang gnyis po med pa'i phyir ro zhes brjod par bya'o/ /don ni kun brtags pa'i ngo bo nyid do zhes bya la/don ni 'dir gzugs la sogs pa dang / mig la sogs pa dang / bdag dang rnam par rig pa rnams te/ de yang rnam par brtags pa'i rang bzhin du yang dag pa ma yin pa kun rtog pa la med pas/ med pa la kun brtags pa'i ngo bo nyid ces bya'o//yang smras pa/ rnam rtog rnam par mi rtog ni/ /rnam rtog gzhan gyis brtags pa ste/ /rnam rtog gzhan gyis brtags de yi/ /rang bzhin de ni yod ma yin/ /yang dag pa ma yin pa kun rtog pa ni gzhan gyi dbang gi ngo bo nyid do zhes bya ba la rgyu dang rkyen gzhan dag gi dbang byed pa dang /skyed pa ste/ rang mi 'byung bas gzhan gyi dbang ngo / /gzung ba dang 'dzin pa med pa ni yongs su grub pa'i ngo bo nyid ces bya ba ni mi 'gyur bar yongs su grub pa dang / phyin ci ma log par yongs su grub pas yongs su grub pa'i phyir/ yongs su grub pa'o zhes bya'o/ / 'dir ni yang dag pa ma yin pa kun rtog pa gnyis dang bral ba nyid gzung ba dang 'dzin pa med par bstan pa yin gyi/ gnyis po med pa tsam gyis ni ma yin no/ /de ltar na yang dag pa ma yin pa kun rtog pa nyid rgyu dang rkyen gzhan gyi kha na las pas gzhan gyi dbang ngo / /de nyid gzung ba dang 'dzin pa'i ngo bor bdag nyid kyis med kyang snang ba'i phyir kun brtags pa'o//de nyid gzung ba dang 'dzin pa dang bral ba'i phyir yongs su grub pa'o/ /de ltar na yang dag pa ma yin pa kun rtog pa la ngo bo nyid gsum 'dus so/ /de ltar byas na yang dag pa ma yin pa kun rtog pa yongs su shes par bya ba dang /spang bar bya ba dang / yongs su shes par bya ba mngon du bya ba'i dngos po yang bstan pa yin no/ /yang dag pa ma yin pa kun rtog pa med pa'i mtshan nyid yongs su ma shes pa'i phyir/ nyon mongs pa dang las dang che'i kun nas nyon mongs par gyur to/ /de lta bas na med pa'i mtshan nyid yongs su shes par bya ba dang /de'i thabs bstan pa'i phyir/ dmigs pa la ni brten nas su/ /zhes rgya cher gsungs so/ /yang dag ma yin kun rtog pa la de mtshon pa'am/ yang dag pa ma yin pa kun rtog pa'o/ /gzung ba dang 'dzin pa gnyis med pa nyid ni med pa'i mtshan nyid do//de la 'jug pa ni de khong du chud pa'o/ /de'i thabs ni thabs gang gis de'i med pa'i mtshan nyid kyi rjes su 'jug pa'o/ /de yang chos kyi dbyings kun tu 'gro ba'i don rab tu rtogs par bya bar sbyor ba ni/ gnas kyi khyad par mkhas pa rnam pa gnyis so/ / de nye bar mtshon pa'i don du tshigs su bcad pa 'di gsungs so/ /rnam par rig pa tsam du dmigs pa la brten nas don mi dmigs pa skye'o zhes bya ba ni/ dmigs pa'i don dang bral ba 'di ni rnam par rig pa tsam nyid de/ rang gi sa bon yongs su smin pa las gzugs la sogs par snang ba'i rnam par shes pa skye ba yin gyi/gzugs la sogs pa'i don ni yod pa ma yin no zhes de ltar 'dzin pa dmigs pa la gnas te/ gzung ba mi dmigs par rab tu 'jug go/ /des 'di ltar brtag par bya ste/ rnam par shes pa skye ba'i tshe'am/ skyes zin pas yul la dmigs par 'gyur grang na/de la skye ba'i tshe ni med pas skye ba'i tshe yul la dmigs par mi rung ngo / /yul du snang ba'i bdag nyid du skyes pa'i phyir/ skyes pas kyang ma yin te/ yul du snang ba'i bdag nyid du skye ba ma gtogs par/ gang byed na rnam par shes pa yul la dmigs pa'o zhes bya'o zhes bya ba'i rnam par shes pa'i bya ba gzhan med do//gal te yang da ltar gyi rnam par shes pa nyid kyi dmigs pa byed pa yin gyi/ skye ba'i tshe ni ma yin no zhe na/ de lta na ni dmigs pa'i rkyen rnam par shes pa'i skye ba ma yin te/ der yongs su rtog pa don med do/ /da ltar gyi dmigs pa 'dzin na ni skad cig pa 'jig pa'i gnod par 'gyur ro//rang bzhin bye brag tu gyur pa yang med pas snga ma bzhin te/ rnam par shes pas dmigs pa 'dzin par mi rung ngo / /'on te dmigs pa 'dzin pa'i dus na/ de la rang bzhin bye brag tu gyur par 'dod na/ de lta na yang rang bzhin bye brag tu gyur pa gzhan nyid du snang bas/byung ba gzhan nyid kyis dmigs pa 'dzin par thal bar 'gyur ro/ /gzhan ni 'gag pa'i tshe'i don nyid skye ba'i tshe'i rnam par shes pa'i dmigs pa'i rkyen nyid yin te/ de yang rang gi rnam par snang ba'i rnam par shes pa'i rgyu yin pas rkyen lhag ma rnams las khyad par can no snyam du sems te/des kyang gzugs la sogs pa'i rdul phra rab bam/ de 'dus pa la dmigs pa kho nar kun tu brtag grang na/ de gnyi ga yang dmigs par mi 'gyur te/ rnam par shes pa thams cad ni bum pa dang / snam bu la sogs par snang ba 'byung gi /rdul phra rab tu snang ba ni ma yin no/ /don gyi rnam pa gzhan du snang ba'i rnam par shes pa'i dmigs pa ni gzhan ma yin te/ mig la sogs pa yang dmigs pa nyid du thal bar 'gyur ta re/ gang gzhan yang rdul phra rab sil bu so so la dmigs pa yin pa snyam du sems pa de'i 'di yang lan du mi rung ste/sil bu de ni de dag so so nyid la dmigs par 'dod kyi/ de dag gi 'dus pa la ni ma yin no/ /der rdul phra rab so sor snang ba'i rnam par shes pa ni mi 'byung gi/ /'di ltar de dag gi 'dus par snang ba ste/ de bas na rdul phra rab rnams la dmigs pa mi srid do/ / brtags par yod pa ni rgyur mi srid pa'i phyir/ rdul phra rab 'dus pa yang dmigs pa ma yin na/ de ma thag pa la sogs pa'i rkyen ltar dmigs pa'i rkyen yang dag par shes pa'i rgyur 'dod de/ de'i phyir 'gag pa'i tshe yang dmigs pa'i rkyen du mi srid do/ /ji ste yang 'gag pa nyid dmigs pa yin na/de lta na ni 'das pa dang ma 'ongs pa yul du 'gyur ba dang / rmi lam la sogs pa la yang rnam par shes pa dmigs pa med par grub po/ /la lan re rmi lam la sogs pa'i rnam par shes pa yang mtshan ma la dmigs pa'i phyir dmigs pa med pa ma yin no/ / mtshan ma ni don gyi gzugs brnyan te ldan pa ma yin pa'i 'du byed kyi rang bzhin no zhe'o/ /rmi lam la sogs pa don med pa la de'i mtshan ma mi rung ste/ bzhin la sogs pa med par de'i gzugs brnyan mi 'grub pa bzhin no/ /'byung ba'i tshe'am byung zin pa'i rnam par shes pas kyang mtshan ma la dmigs pa ma yin te/med pa dang dgag pa sngar bstan pa'i phyir ro/ /de'i phyir ldan pa ma yin pa'i 'du byed kyi rang bzhin mtshan mar mi rung bas/ rnam par shes pa nyid don du snang ba don gyi gzugs brnyan te/ rnam par shes pa nyid don gyi rnam par gdon mi za bar khas blang dgos so//rnam pa med na ni de la gzung ba dang 'dzin pa nges pa nyid du mi 'gyur ro/ /gzhan ni thogs pa med pa'i gzugs nyid rmi lam dang / rnal 'byor pa rnams kyi mi sdug pa la sogs par dmigs pa'o snyam du sems te/ de'i yang kha dog dang dbyibs la sogs pa'i bdag nyid yin pas/thogs pa med pa nyid dang yid 'ba' zhig gi yul du 'gal lo/ /rnam par rig byed ma yin pa tsam ma gtogs par yang thogs pa med pa'i gzugs gzhan bstan bcos las mi bshad pas/ de'i phyir de nyid kyang rtog pa tsam nyid do/ /gzhan dag ni dmus long gi rmi lam na sngon po la sogs pa'i gzugs mi 'dzin pa'i phyir/don myong ba ni rmi lam gyi rnam par shes pa'i yul nyid du 'dod do/ /dmus long gi rmi lam na gzugs mi 'dzin pa ma yin te/ brda mi shes pas ming rnam par mi shes pa'i phyir gzhan la bsnyad mi nus so/ / gal te yang myong ba nyid rmi lam du mthong na de lta na dmus long gis kyang gzugs mthong bar ci'i phyir mi 'dod/ /des kyang tshe rabs snga ma dag la gzugs dmigs pa nyid do/ /de ltar gyi tshe la dmigs pa nyid rmi lam du snang ba yang ma yin te/ 'das pa dang ma 'ongs pa dang da ltar gyi 'dzin par yang rmi lam dang gnyid kyis ma log par khyad par med do//de lta bas na don myong ba de ni rmi lam gyi rnam par shes pa'i yul lo zhes bya ba ni kun rtog pa tsam nyid do/ /'das pa yang med par yul med par rnam par shes pa nyid rmi lam du don du snang ba 'byung bar nges so/ / de ltar rnam par rig pa tsam du dmigs pas yul mi dmigs par bsgom mo/ /don mi dmigs pa la brten nas/ rnam par rig pa tsam yang mi dmigs pa skye ste zhes bya ba ni/ ji ltar rnam par shes pa las phyi rol na kun brtags pa'i gzung ba med pas rnam par rig pa tsam nyid kyi stobs kyis gzung ba med par 'jug pa de ltar gzung ba med pa'i stobs kyis rnam par rig pa tsam yang med par khong du chud do//gzung ba nyid la ltos te de 'dzin par rnam par gzhag pa'i phyir/ /gzung ba med na 'dzin par mi rung ngo / /de ltar gzung ba dang 'dzin pa kun brtags pa'i rang gi ngo bo dag gi med pa'i mtshan nyid la 'jug gi//yang dag pa ma yin pa kun rtog pa ni ma yin no zhes bstan pa yin no/ /ci'i phyir thog ma nyid du rnam par rig pa tsam nyid med par rnam par mi gzhag ce na/ 'dzin pa ni gzung ba la rag las pa'i phyir dmigs par bya ba'i don med na/ dmigs pa'i ngo bo'i dngos po 'jig pas bde blag tu 'jug par 'gyur gyi/gzhan du na gzung ba dang 'dzin pa gnyis phan tshun ltos pa med pa'i phyir/ dngos po la skur pa 'debs pa nyid du 'gyur ro/ /rgyun mi 'chad par tshogs rnams la zhugs te/ bskal pa grangs med pa dang po yongs su rdzogs na/gzung ba dang 'dzin pa'i rnam par rtog pa las 'das pa'i ye shes kyis 'dir chud de/ 'di ltar rnam par rig pa tsam 'di la brten nas/ gzugs la sogs pa med par bsgom pa ni 'jig rten las 'das pa'i lam gyi thog ma'i rang bzhin dro bar gyur pa zhes bya ba'i ting nge 'dzin 'khor dang bcas pa mngon du 'gyur ro//de'i 'og tu rtse mo zhes bya ba'o/ /de'i 'og tu gzung ba ma lus par mi dmigs pas 'dzin pa mi dmigs pa dang mthun pa bzod pa zhes bya ba'i ting nge 'dzin to/ /de'i 'og tu don mi dmigs pa la brten te/ rnam par shes pa tsam yang mi dmigs par bsgom zhing 'jig rten gyi chos kyi mchog ces bya ba shes rab la sogs pa dang bcas pa'i ting nge 'dzin 'khor dang bcas pa mngon du 'gyur ro//de'i 'og tu mthong ba'i lam ste/ de nyid la yang chos kyi dbyings kun tu 'gro bar rtog pas sa dang po la 'jug ces bya'o/ /'di ni de kho na yid la byed pa yin gyi/tshad med pa la sogs pa bzhin du mos pa yid la byed pa ni ma yin te/ dmigs pa mi dmigs pa'i rang bzhin gyi phyir ro zhes rab tu bstan pa'i phyir/ de yi phyir na dmigs pa ni/ /mi dmigs ngo bo nyid du grub/ /ces bya ba gsungs so/ /yang na rnam pa 'dis so so rang gis rig pa'i phyir/yang dag pa ma yin pa kun rtog pa la gnyis med do zhes gang sngar dam bcas pa de grub po zhes rab tu bstan pa'i phyir/ de yi phyir na dmigs pa ni/ /mi dmigs ngo bo nyid du grub/ /ces bya ba gsungs so/ /de'i phyir zhes bya ba ni/ dmigs par bya ba'i don gyi dngos po med pa'i phyir ro//dmigs pa zhes bya ba ni dngos po dang byed pa po dang byed pa gang yang rung ba zhig tu brtag grang na/ las med pas de gsum char yang mi rung ste/ de'i phyir dmigs pa mi dmigs pa'i ngo bo nyid du grub po/ /de nyid kyi phyir 'grel pa mdzad pas dmigs par bya ba'i don med na dmigs par mi rung ba'i phyir ro zhes bya ba smos so//de lta bas na dmigs pa dang mi dmigs pa mnyam par shes par bya/ 'di ltar dmigs pa ni mi dmigs pa'i ngo bo nyid du gyur te/ de'i phyir mnyam mo/ /don mi dmigs pa dang rnam par rig pa tsam du dmigs pa yang med par bye brag med pa'i phyir mtshungs pa nyid du shes par bya'o//dmigs pa dang mi dmigs pa'i sgra dag phan tshun 'gal ba bsal ba'i phyir/ yang dag pa ma yin pa'i don du snang bas dmigs pa zhes bya'o zhes bya ba smos te/ don med pas 'dis ni ci yang mi dmigs so//de'i phyir don dam par mi dmigs pa'i ngo bo nyid kyang yin pas 'gal ba med do/ /gzhan dag na re byis pa rnams don med pa la don du dmigs pa gang yin pa dang / 'phags pa rnams don mi dmigs pa gang yin pa de gnyis mtshan nyid mtshungs pas mnyam par shes par bya ste/sbrul du 'khrul pa mi dmigs pa bzhin no/ /de nyid kyi phyir sbrul du 'khrul pa mi dmigs par bshad pa bzhin du/ mi dmigs pa'i ngo bo nyid yin yang / yang dag pa ma yin pa'i don du snang ba'i phyir dmigs pa zhes bshad do zhes zer ro//gzhan dag na re byis pa rnams kyis 'dzin par dmigs pa gang yin pa dang / don med pa'i phyir 'phags pa rnams kyis 'dzin pa mi dmigs pa gang yin pa dang / dmigs pa dang mi dmigs pa de gnyis ni gnyi ga yang gzung ba med na/ 'dzin pa med par bye brag med pa'i phyir mnyam par shes par bya ste/de'i phyir yang dag pa ma yin pa'i don du snang bas zhes rgya cher smos so zhe'o/ /yang kha cig sems pa sgro 'dogs pa dang / skur pa 'debs pa'i gnyen por de lta bas na dmigs pa dang / mi dmigs mnyam par shes par bya/ /zhes gsungs so snyam ste/ don med pa'i phyir dmigs pa ni dmigs pa'i rang bzhin du med pas/ ngo bo nyid kyis de med pa zhes bya ste/ dmigs pa la dmigs pa'i rang bzhin bsal bar bya ba'am/ mi dmigs pa'i rang bzhin yang gzhag par bya ba med de/ de gnyis ka yang rnam par brtag tu med pas mnyam pa nyid do//de lta bas na sgro 'dogs pa dang skur pa 'debs pa la mi ltos par dmigs pa dang / mi dmigs pa gnyis so so rang gis mnyam pa nyid du shes par bya'o/ /smras pa/ 'di las bsal bya gang yang med/ /gzhag par bya ba'ang ci yang med/ /yang dag nyid la yang ngag lta/ yang dag mthong ba rnam par grol//gal te de lta na ci'i phyir rnam par rig pa tsam la dmigs pa zhes bya zhe na/ mi dmigs pa'i rang bzhin yin yang / yang dag pa ma yin pa'i don du snang bas/ 'jig rten dang bstan bcos las kyang de bzhin du grags pa'i phyir ro/ /rab tu dbye ba'i mtshan nyid ston te zhes bya ba la/'dod pa dang gzugs dang gzugs med pa'i khams kyi bdag nyid ni yang dag pa ma yin pa kun rtog pa'i rab tu dbye ba ste/ rnam pa tha dad pa nyid do/ /rab tu dbye ba nyid mtshan nyid yin pas/ rab tu dbye ba'i mtshan nyid de/ rab tu dbye ba 'dis yang dag pa ma yin pa kun rtog pa mtshon pa'i phyir ro//rab tu dbye ba'i mtshan nyid kyang ci'i phyir bshad ce na/ yang dag pa ma yin pa kun rtog pa tsam la 'dod pa dang / gzugs kyi khams mi rigs te/ khams tha dad pas mi mthun pa'i phyogs dang gnyen po tha dad pa'i phyir 'phags pa'i gang zag la sogs par tha dad pa gang yin pa de thob par mi 'gyur te/de bas na bstan pa la nyes pa chen por 'gyur ro snyam pa'i dogs pa bsal ba'i phyir rab tu dbye ba'i mtshan nyid bshad do/ /yang na/ gang rtog pa dang dpyod pa yod pa de nyid na/ yang dag pa ma yin pa kun rtog pa yod kyi gzhan ni ma yin no snyam ste/de bas na de bsal ba'i phyir/ yang dag ma yin kun rtog ni/ /sems dang sems byung khams gsum pa/ /zhes rab tu dbye ba'i mtshan nyid brjod de gang na rtog pa dang dpyod pa yod pa nyi tshe la ni ma yin no/ /dper na gzugs ni 'byung ba rnams dang 'byung ba las gyur pa yin pa bzhin du/yang dag pa ma yin pa kun rtog pa yang sems dang sems las byung ba yin gyi/ sems 'ba' zhig ni ma yin no/ /de dag kyang khams gsum pa'i ngo bo nyid de/ 'dod pa dang gzugs dang gzugs med pa na spyod pa tha dad pas khams gsum pa rnams so/ / de la yang dag pa ma yin pa kun tu rtog pa de las sems can dmyal ba la sogs pa'i rnam pa nyi shu gang dag 'byung ba de ni 'dod pa'i khams so/ /tshangs rigs la sogs pa'i rnam pa bcu bdun gang yin pa de dag ni gzugs kyi khams so/ /nam mkha' mtha' yas la sogs pa'i rnam pa bzhi po gang yin pa de dag ni gzugs med pa'i khams so//gzhan na re 'dod pa la 'dod chags ma spangs pa dang gzugs kyi 'du shes dang ma bral ba rnams ni 'dod pa na spyod pa'o/ /'dod pa la 'dod chags spangs la gzugs kyi 'du shes dang ma bral ba rnams ni gzugs kyi khams so//'dod pa dang gzugs la 'dod chags spangs shing gzugs kyi 'du shes dang yang bral ba rnams ni gzugs med pa na spyod pa'o zhes zer ro/ /gzhan dag ni 'dod pa la 'dod chags rgyas par gyur pa rnams ni 'dod pa'i khams so/ / gzugs la 'dod chags rgyas par gyur pa rnams ni gzugs kyi khams so/ /gzugs med pa la 'dod chags rgyas par gyur pa rnams ni/ gzugs med pa'i khams so zhes smra'o/ /kha cig ni rtag tu g.yeng ba dang sems las byung ba'i sdug bsngal gyi rnam pa'i gnas su gyur pa rnams ni 'dod pa'i khams so//mnyam par gzhag pa la sems las byung ba'i sdug bsngal gyi rnam pa dang bral ba rnams ni gzugs kyi khams so/ /mnyam par gzhag la bde ba dang sdug bsngal gyi rnam pa spangs pa rnams ni/ gzugs med pa'i khams so zhes smra'o/ / kha cig ni dri dang ro dang de dag tu snang ba'i rnam par shes pa ma spangs pa rnams ni 'dod pa'i khams so/ /dri dang ro dang de dag tu snang ba'i rnam par shes pa spangs pa rnams ni gzugs kyi khams so/ /khams bco lngar snang ba spangs pa rnams ni gzugs med pa'i khams so zhes smra'o/ / bshad pa de dag thams cad la de dag gang yin zhe na/ thog mar bshad pa las brjod pa nyid bshad par bya ba ste/ de ltar na bshad pa 'di dag ni ltos pa dang bcas pa nyid do/ /yang dag pa ma yin pa kun rtog pa'i skabs yin bzhin du yang / yang dag pa ma yin pa kun rtog pa smos pa ni mi dmigs pas bar du bcad pa'i phyir ro//rnam grangs kyi mtshan nyid kyang ston te zhes bya ba ni/ sems dang sems las byung ba rnams kyi bye brag rab tu bstan pas/ yang dag pa ma yin pa kun rtog pa'i rnam grangs kyi mtshan nyid kyang ston to/ /ji lta zhe na/ sems dang sems las byung ba rnams yang dag pa ma yin pa kun rtog pa'i dngos po'i rang bzhin dang /khyad par la rtog par zhugs pa'i phyir ro/ /don gyi rang gi ngo bo dang bye brag mthong ba sems dang sems las byung ba rnams dang / yang dag pa ma yin pa kun rtog pa zhes bya ba ni rnam grangs su gtogs pa ste/don la ni khyad par med do/ /de la don tsam mthong ba ni rnam par shes pa'o zhes bya ba la tsam zhes bya ba'i sgra ni/ khyad par sel ba'i phyir te khyad par mi 'dzin gyi dngos po'i rang gi ngo bo tsam dmigs so zhes bya ba'i tha tshig go/ /don gyi khyad par mthong ba ni sems las byung ba rnams te tshor ba la sogs pa'o zhes bya ba ni khyad par gyi ngo bo de dang des der mngon par 'jug pa'i phyir ro//de la gang dngos po de'i khyad par sim pa dang / gdung ba nyid yid bde ba la sogs pa'i gnas pa gang yin pa de 'dzin pa ni tshor ba'o/ /bud med dang skyes pa la sogs par tha snyad gdags pa'i mtshan ma don gyi khyad par gang yin pa de 'dzin pa ni 'du shes so//de bzhin du gzhan yang ci rigs su sbyar bar bya'o/ /de ltar de dag kyang gnas pa dang dmigs pa dang / dus dang rdzas mtshungs pa nyid kyis mtshungs par ldan pa yin gyi/ rnam par shes pa dang khyad par med par thal bar 'gyur bas rnam par mtshungs pas ni ma yin no//kha cig ni 'dir sems kyi bye brag nyid sems las byung bar dgongs par shes te/ rma bya'i mdongs ltar rnam par shes pa de nyid/ de lta bu'i ngo bo la sogs par snang ba sna tshogs su 'byung ngo zhe'o/ /ji ltar na gcig pu yang yin la sna tshogs kyang yin/gcig pu du ma'i ngo bo nyid du 'gyur du 'ong zhes/ 'jig rten ni gcig la mi mthun pa'i mtshan nyid sna tshogs su mi 'dod do zhe na/ gal te chos kyi ngo bo nyid yongs su grub par gyur na ni/ 'di yang nyes par 'gyur ro/ /nor ba tsam la ni nyes pa 'di med de/ de bzhin ma yin ye med min//zhes bshad pa'i phyir ro/ /de ni de lta ma yin te/ mdo las tshor ba gang yin pa dang / 'du shes gang yin pa dang / sems gang yin pa dang / rnam par shes pa gang yin pa ste chos 'di rnams ni 'dres pa ste/ ma yin no zhes 'byung ba dang 'gal ba'i phyir ro/ /'dres pa zhes bya ba ni yod pa rnams cig car phrad par 'gyur ba la bya'o//gang chos kyi ngo bo nyid yongs su ma grub par 'dod pa de la/ mdo de ni don 'dir khungs su mi rung ngo / /yang dag pa ma yin pa kun rtog pa tsam du zad la gzhan yang med pas rgyu dang 'bras bu rab tu dbye ba rnam par mi shes pas de rab tu bstan pa'i phyir 'jug pa'i mtshan nyid kyang ston te/'dis yang dag pa ma yin pa kun rtog pa rgyu dang 'bras bu'i dngos por mtshon pa'o/ /'jug pa nyid mtshan nyid yin pas 'jug pa'i mtshan nyid de/ 'jug pa yang rnam pa gnyis so/ /skad cig brgyud mar 'jug pa ste/de'i dbang gis da ltar byung ba'i nye bar spyod pa'i kun nas nyon mongs pa dang / tshe rabs gzhan du 'jug ste/ de'i dbang gis tshe phyi ma'i nyon mongs pa dang las dang tshe'i kun nas nyon mongs pa'o/ /'dir ni skad cig brgyud mar 'jug pa 'jug pa'i mtshan nyid du bshad pa'o/ /tshe rabs gzhan du 'jug pa ni kun nas nyon mongs pa'i mtshan nyid du 'og nas 'chad do//gcig ni rkyen gyi rnam par shes/ /zhes rgya cher 'byung ba de la/ gcig ces bya ba de ni kun gzhi rnam par shes pa ste/ rnam par shes pa lhag ma bdun rnams kyi rgyu'i rkyen gyi dngos po'i rgyu yin pas rkyen gyi rnam par shes pa'o//gnyis pa nye bar spyod pa can zhes bya ba ni/ rnam par shes pa zhes bya bar snyegs te/ de'i 'bras bu zhes bya ba tshig gi lhag ma'o/ /de yang rnam pa bdun no/ /nye bar spyod pa ni 'jug pa'i rnam par shes pa'i dgos pa yin pas nye bar spyod pa can no/ /rnam par shes pa de la sems las byung ba nye bar spyod pa dang /yongs su gcod pa dang 'jug par byed pa gang yin pa dag kyang de'i 'bras bu zhes bya bar sbyar te/ rnam par shes pa dang / grub pa dang bde ba gcig pa'i phyir ro/ /kun gzhi rnam par shes pa ni rnam par shes pa gzhan dag ni rgyu'i rkyen yin pas rkyen gyi rnam par shes pa'o zhes bya ba la/zag pa dang bcas pa'i chos thams cad der 'bras bu'i dngos por sbyor ba dang / de yang de dag la rgyu'i dngos por sbyor bas kun gzhi'o/ /sems can dang snod kyi 'jig rten de ltar snang bas rnam par rig par byed pa'i phyir rnam par shes pa'o/ /de yang gcig tu rnam par smin pas lung du ma bstan pa nyid do//zag pa dang bcas pa'i chos thams cad kyi sa bon rjes su 'brel pa dang / 'jug pa'i rnam par shes pa gzhan dag gi rgyu'i rkyen yin pas rkyen gyi rnam par shes pa'o/ /de las byung ba 'jug pa'i rnam par shes pa ni nye bar spyod pa can no zhes bya ba ni/ kun gzhi rnam par shes pa de las byung ba ste/ de'i rkyen gyis skye zhes bya ba'i tha tshig go/ /ji ltar 'byung zhe na/ 'jug pa'i rnam par shes pa 'byung ba na de dang rigs gcig pa 'jug pa'i rnam par shes pa ma byung ba 'byung bar byed pa'i sa bon kun gzhi rnam par shes pa la brtas par byed de/ sa bon brtas nas 'gyur ba'i bye brag rnyed pa de las yang de dang rigs gcig la 'jug pa'i rnam par shes pa 'byung ste/de ltar na de'i rkyen gyis 'jug pa'i rnam par shes par 'gyur ro/ /bde ba yang ma yin sdug bsngal ba yang ma yin pa'i tshor ba'i nye bar spyod pa'i gnas su gyur pa dang / kun kun gzhi rnam par shes pa la bag chags bsgo ba'i phyir/kun gzhi'i rnam par shes pa yang nye bar spyod pa can du 'gyur la/ 'jug pa'i rnam par shes pa yang rkyen gyi rnam par shes par 'gyur bar thal bar mi 'gyur ram/ rkyen gyi dngos po ma gtogs par bag chags bsgo ba gzhan med de/ chos mngon pa'i mdo las tshigs su bcad pa las ji skad du/ phan tshun 'bras bu'i dngos po dang / /rgyu yi dngos por rtag tu yang / /rnam par shes la chos kun sbyor/ /de yang de bzhin de dag la'o/ /zhes gsungs pa lta bu'o zhe na/ thal bar mi 'gyur te ci'i phyir zhe na/ de'i tshor ba shes par dka' bas 'jug pa'i rnam par shes pa bzhin du nye bar spyod pa can du mi shes so//yang na nyi ma ltar khyad zhugs par shes par bya ste/ 'di ltar nye bar spyod pa tshor ba rnam pa gsum po'i gnas ni 'jug pa'i rnam par shes pa nyid yin gyi/ kun gzhi rnam par shes pa ni ma yin no//'dir ni rgyu'i rkyen du 'dod kyi rkyen tsam du ni ma yin te/ 'di ltar kun gzhi rnam par shes pa ni dge ba dang mi dge ba'i chos kyi dbang gis rnam par smin pa dang / rgyu mthun pa'i 'bras bu'i bag chags dang / lung du ma bstan pa'i chos kyi dbang gis rgyu mthun pa'i 'bras bu'i bag chags yongs su 'dzin to//de'i phyir kun gzhi rnam par shes pa ni zag pa dang bcas pa'i chos ma lus pa rnams kyi rgyu'i rkyen to/ /'jug pa'i rnam par shes pa ni kun gzhi rnam par shes pa'i bdag po'i rkyen te/ rgyu'i rkyen ma yin pas 'jug pa'i rnam par shes pa'i rkyen du thal bar 'gyur ba med do//nye bar spyod pa ni tshor ba'o zhes bya ba la/ rnam pa gsum char yang nye bar spyod pas nye bar spyod pa ste/ myong bar byed ces bya ba'i tha tshig go/ /srid pa'i ro bro ba'i snying po 'dra ba ni tshor ba ste/ de'i phyir byis pa rnams de kun tu myong bar bya ba'i phyir yul rnams la chags so//kha cig na re tshor ba 'ba' zhig tu ma zad kyi don la dmigs pa yang nye bar spyod pa zhes bya'o zhes zer te/ bshad pa las nye bar spyod pa ni tshor ba zhes 'byung ba dang 'gal bas de ni ma yin no/ /don la dmigs pa ni rnam par shes pa las gzhan ma yin pas de sems las byung bar mi rung ngo //bde ba la sogs pa'i bye brag 'dzin pa'i bdag nyid kyi phyir tshor ba yongs su spyod pa ni 'du shes nye bar spyod pa dang / 'du shes la rnam par shes pa 'jug par byed pa dag ni 'du byed rnams te/ sems pa dang yid la byed pa la sogs pa'o//yang na nye bar spyod pa ni tshor ba'o zhes bya ba ni/ rang gi dmigs pa ji lta ba bzhin du myong ba'am/ bde ba la sogs pa myong bar 'gyur ba'i las myong ba'i phyir ro/ /de ltar yul dang las la spyod pa ni tshor ba ste/ de'i phyir nye bar spyod pa zhes bya'o/ /yul gyi don rtags tha snyad kyi mtshan ma yongs su gcod par byed pas yongs gcod ni 'du shes so//rnam par shes pa dmigs pa gzhan la 'jug par byed pa dag ni 'du byed rnams te/ de ltar na sems pa la sogs pa'i dbang gis rnam par shes pa dmigs pa gzhan la brten to/ /sogs pa'i sgras ni 'dun pa la sogs pa bsdu'o//gang nas ci 'dra gang gi phyir 'jug pa ni bshad zin to/ /kun nas nyon mongs pa'i mtshan nyid kyang ston to zhes bya ba ni nyon mongs pa dang las dang che'i kun nas nyon mongs pa rnams ji ltar 'byung ba na/ 'gro ba yongs su nyon mongs par 'gyur ba de ni kun nas nyon mongs pa'i mtshan nyid do//de ni bdag med par yang yang dag pa ma yin pa kun rtog pa tsam las 'khor ba rgyas par 'gyur ba/ rab tu bstan pa'i phyir bshad de/ sgrib pa'i phyir dang 'debs pa'i phyir/ /khrid pa'i phyir dang kun 'dzin phyir/ /zhes rgya cher gsungs so/ /rten cing 'brel par 'byung ba yan lag bcu gnyis pa 'di yang 'jug pa'i phyogs kyi dbang du mdzad do//de la sgrib pa'i phyir te/ 'gro ba nyon mongs par byed do zhes tha mar smos pa ni thams cad dang sbyar ro/ /gang gis sgrib pa dang ji ltar sgrib pa'i phyir nyon mongs par byed ce na/ de'i phyir ma rig pas yang dag pa ji lta ba bzhin du mthong ba la bgegs byed pa'i phyir ro zhes bya ba smos so//ma rig pa ni mi mthong ba'i bdag nyid yin pas yang dag pa mthong ba'i yul la rab tu sgrib pa'i phyir/ yang dag pa mthong ba mi skye ste/ de'i phyir yang dag pa mthong ba skye ba la bgegs byed pas ma rig pa ni yang dag pa mthong ba la bgegs byed pa'o//yang dag pa mthong ba yang dngos su ni 'jig rten las 'das pa'i shes rab po/ /de'i rjes las byung ba'i phyir de'i rjes las thob pa dang / de'i rtogs pa'i phyir de sbyong bar byed pa thos pa dang / sems pa dang bsgom pa las byung ba yang yang dag pa mthong ba zhes bya'o//yang dag pa mthong ba'i bgegs su gyur pas/ ma rig pa ni 'du byed rnams kyi rkyen zhes bya ste/ de ltar sgrib pa'i phyir ma rig pas 'gro ba nyon mongs par byed do/ /'debs pa'i phyir zhes bya ba yang 'gro ba nyon mongs par byed ces bya ba dang sbyar ro/ /gang gis gang du ci 'debs she na/de'i phyir 'du byed rnams kyis rnam par shes pa la las kyi bag chags zhes bya ba smos so/ /de la 'du byed rnams ni lus dang ngag dang yid kyi las bsod nams dang / bsod nams ma yin pa dang / mi g.yo ba'i ngo bo nyid gang yin pa'o/ /de ni yang srid pa mngon par 'du byed pas 'du byed de/ma btab pa 'debs zhes bya ba'i tha tshig go/ /de nyid 'du byed kyi sgrar bshad kyi thams cad ni ma yin no/ /de yang ma rig pa'i dbang gis yang srid pa 'debs nus par 'gyur gyi/ yod pa tsam gyis ni ma yin pas/ ma rig pa'i rkyen gyis 'du byed rnams zhes bya ste/ 'di ltar ma rig pa ma skyes na de dag yang srid pa 'du byed kyi/rig pa skyes na ni ma yin no/ /bdag po tsam gyis ni ma rig pa 'du byed kyi rkyen zhes mi bya'i/ /spyi'i rkyen yin pas kun nas 'byung ba na yang yin te/ 'di ltar ma rig pa ni nyon mongs pa thams cad dang mtshungs par ldan pa'i phyir/ ji ltar nyon mongs pa kun nas 'byung ba rnams kyi spyi'i rkyen yin pa de bzhin du de las byung ba'i sems pa rnams kyi yang yin no//bsod nams kyi 'du byed srid pa dang longs spyod bye brag can la smon pa'i rjes su 'gro ba rnams kyi yang yin te/ kun nas 'byung ba ni de dang lhan cig 'byung ba'i ma rig pa ni spyi'i rkyen yin no//mi g.yo ba de la nges par 'byung bar lta ba kun 'byung ba rnams kyi yang yin te/ de dang lhan cig 'byung ba'i ma rig pa ni spyi'i rkyen yin pas/ 'du byed kyi rkyen zhes bshad do/ /rnam par shes pa la zhes bya ba ni/ 'dir kun gzhi rnam par shes pa la dgongs pa yin gyi/'jug pa'i rnam par shes pa ni ma yin te/ rgyun chad pa dang 'jug pa'i rnam par shes pas skye ba'i gnas su khrid mi srid pa dang / dge ba dang nyon mongs pa can gnyis 'grogs mi srid pas/ 'du byed rnams kyis de la las kyi bag chags gzhom mi srid pa'i phyir ro//las kyi bag chags zhes bya ba la las kyi bag chags zhes bya ba 'di gang yin zhe na/ ma 'ongs pa'i sa bon te rgyu'i dngos po'o/ /dper na 'bru'i 'bras bu sa dang thal ba dang / lung la sogs pa rkyen gyi bye brag la ltos te/ 'gyur ba las myu gu 'byung ba'i rgyu'i dngos po ni sa bon zhes bya ba lta bu'o//'jog pa'i phyir zhes bya ba ni 'debs pa nyid kyi rnam grangs gzhan bshad pa'o/ /'jog pa yang rnam par shes pa'i rgyud 'di la des thog ma kho na'i sa bon de rgyas par byed pa yin te/ zag pa med pa'i ltar zag pa dang bcas pa'i chos ni 'ga' tsam gyis kyang sa bon sngon ma bskyed pa med de/'di ltar 'du byed rnams kyis rnam par shes pa la yang srid pa'i sa bon skyed pa'i phyir 'gro ba nyon mongs par byed do/ /khrid pa'i phyir 'gro ba nyon mongs par byed do zhes bya ba gang gis gang du gang khrid pa mi shes nas/ de'i phyir rnam par shes pas skye ba'i gnas su phyin par byed pa'i phyir ro zhes bya ba smos so//las kyis yongs su bsgos pa'i rnam par shes pa rgyun chags su 'jug pas 'chi'o/ /gnas nas skye ba'i gnas su yang srid pa'i sa bon du gyur pa'i bag chags phyin par byed/ khrid par byed do/ /de ltar byas na nying mtshams sbyor ba'i rnam par shes pa'i rkyen ni 'du byed ma yin gyi/sngon gyi dus kyi srid pa'i rnam par shes pa nyid kyi rkyen 'du byed yin par rab tu bstan pa yin te/ rgyu zhig pa las 'bras bu 'byung bar mi rung ngo / /gzugs med pa'i snyoms par 'jug pa rnyed pa rnams ni gang shi ba de nyid du skye bas gzugs med pa rnams su ji ltar skye ba'i gnas su phyin par byed ce na/de ni ci rigs par shes par bya ste/ ming dang gzugs bzhin no/ /kun 'dzin phyir 'gro ba nyon mongs par byed do zhes bya ba gang gis gang du gang yongs su 'dzin zhe na/ de'i phyir ming dang gzugs kyi lus so zhes bya ba smos te/ ming dang gzugs ni phung po lnga'o//de dag kyang nying mtshams sbyor ba nas bzung ste/ nur nur po dang mer mer po dang / nar nar po dang gor gor po dang / rkang lag 'gyus pa'i dus dang / skye mched drug ma dod kyi bar du rnam par shes pa'i rkyen gyis ming dang gzugs zhes bya ste/ 'di ltar de la bsgos pa'i bye brag gis rigs mthun pa gzhan dag tu de bye brag can du grub po//de skyes nas kyang mi dang dud 'gro la sogs pa'i rigs mthun pa tha dad pa'i phyir lus kyang tha dad pas ming dang gzugs kyis lus yongs su 'dzin zhes bya'o/ /yang na 'chi ba la thug gi bar du lus thams cad yongs su 'dzin pa ste/de thog ma kho nar thams cad kyi rgyu'i dngos por rnam par gnas pa'i phyir ro/ /yang na dbyer med kyang ming dang gzugs kyis lus yongs su 'dzin to zhes 'di tha dad par ston to/ /dper na 'dus byas thams cad phung po lnga rnams kyis kun bsdus so zhes bya ba lta bu'o//rdzus te skye ba rnams ni rnam par shes pa'i rkyen gyis skye mched drug nyid do/ /de'i phyir rnam par shes pa'i rkyen gyis ming dang gzugs ci rigs par shes par bya'o/ /rdzogs byed phyir 'gro ba nyon mongs par byed do zhes bya ba gang gis gang du gang rdzogs par byed pa'i phyir zhe na/ skye mched drug gis ming dang gzugs su bsdus pa'i lus te 'di ltar ming dang gzugs kyi tshe ni/mig la sogs pa'i skye mched med pa'i phyir lus ma rdzogs pa zhes bya'o/ /de'i tshe na lus kyi skye mched dang yid kyi skye mched yod mod kyi 'on kyang brten pa dang / gnas yongs su rdzogs par med pa'i phyir yongs su ma rdzogs pa nyid do//skye mched drug gi dus na ni mig la sogs pa mngon par grub pas gnas yongs su rdzogs pa yin no/ /mig la sogs pa de la brten pa rnams yongs su rdzogs pas lus kyi skye mched kyang yongs su rdzogs pa yin no/ /ji ltar mig la sogs pa la brten zhe na de la rag las te 'byung ba'i phyir ro//yid kyi skye mched ni rnam par shes pa drug gis bsdus pa ste/ de'i tshe gnas ma lus par yongs su rdzogs pa'i phyir yongs su rdzogs pa yin no/ /yan lag dang nying lag yongs su rdzogs pa'i phyir skye mched drug gi dus nyid na/ gnas yongs su rdzogs pas skye mched drug gis 'gro ba nyon mongs par byed ces bya'o/ /gsum gcod phyir 'gro ba nyon mongs par byed do zhes bya ba dang sbyar ro/ /gsum ni dbang po dang yul dang rnam par shes pa 'dus so/ /bde ba la sogs pa'i tshor ba 'byung ba dang mthun pa dbang po'i 'gyur ba rnam pa gsum gang yin pa de yongs su gcod pa ni reg pa'o//de bas na dbang po'i 'gyur ba gang yin pa de'i rnam pa dang 'dra bar reg par byed pas reg pa zhes bya'o/ /yang na skye mched drug gi rkyen gyis reg pa ni bde ba la sogs par tshor ba dang mthun pa dbang po'i 'gyur ba rnam pa gsum skyed do//nye bar spyod pa ni tshor bas so zhes bya ba la/ tshor ba ni sred pas nye bar spyad pa ste/ ro myong bar byed ces bya ba'i tha tshig go/ /yang na bsod nams la sogs pa'i las la nye bar spyod pas tshor ba ni nye bar spyod pa zhes bya'o/ /yang na 'dir nye bar spyod pa zhes bya ba ni tshor ba myong ba ste/ bde ba la sogs pa myong ba na der bde ba la sogs pa rgyas par gyur pa'i phyir/ rjes su chags pa dang khong khro ba dang gti mug rnams kyis 'gro ba nyon mongs par byed do/ /sdud pa'i phyir zhes bya ba gang gis gang sdud pa mi shes so/ /de'i phyir las kyis btab pa'i yang srid pa sred pas so zhes bya ba smos so//'du byed rnams kyis yang srid pa'i sa bon rnam par shes pa la gso ba'i phyir btab pa/ yang srid par 'gyur ba'i sa bon chu dang 'dra ba'i sred pa/ 'gro ba thams cad du bye brag med par lus 'dod pa zhes bya bas brlan nas yang srid pa 'byung bar nye bar sbyor zhing 'byung ba nges par 'jog pa gang yin pa de ni sdud pa'o//sbyor ba'i phyir zhes bya ba la gang gis gang du gang zhig sbyor ba dri bar bya ba'i skabs su bdag nyid kyis len pa rnams kyis rnam par shes pa skye ba dang / mthun pa 'dod pa la sogs pa rnams su'o zhes bya ba smos so/ /mngon par zhen pa dang 'dun pa'i 'dod chags kyi mtshan nyid nye bar len pa bzhi po dag gis las kyis btab pa'i rnam par shes pa skye ba dang mthun pa 'dod pa dang lta ba dang /tshul khrims dang brtul zhugs dang / bdag tu lta ba dag tu sbyor bar byed 'jog par byed de/ 'di ltar 'dun pa'i 'dod chags kyi dbang gis rnam par shes pa der gnas so//mngon du'i phyir zhes bya ba 'dir yang gzhan gyis yongs su dri bar bya ba'i skabs su bdag nyid kyis las byas pa'i rnam par smin pas yang srid par 'byin par mngon par byed pa'i phyir ro zhes bya ba smos te/ ji ltar sngon byas pa'i las rnam par shes pa'i rgyu yang 'byung bas bag chags kyi dus su gyur pa rnam par smin pa'i 'bras bu'i phyir/'jug pa rnyed pas srid pa yod par gyur cing srid pa btab pa 'grub par mngon du gyur pa ste/ de ltar na srid pas mngon du'i phyir 'gro ba nyon mongs par byed do/ /sdug bsngal phyir ni skye ba dang rga shis 'gro ba nyon mongs par byed pa'o zhes bya ba ni/de ltar srid pa las yang srid pa mngon par 'grub pa yod pa thog ma nyid du mngal du zhugs pa na khu ba dang khrag gi nang na rnam par shes pa myos pas nyon mongs par byed do/ /de bzhin du ma'i mngal du zhu ba dang ma zhu ba'i gnas kyi bar na 'gre ldog pas nyon mongs par byed do//yang de ltar ma'i kha zas dang spyod pa nyam nga ba dang / ya nga ba ma spangs pas kyang nyon mongs par byed do/ /de bzhin du dog pa mi gtsang ba'i lam nas 'byung bas nyon mongs par byed do/ /skyes nas kyang spyi cer dang skra skya ba la sogs pa rga ba'i mtshan nyid dang ming dang gzugs 'jig pa'i 'chi ba'i mtshan nyid dang /lang tsho dang srog phangs pa las nyams pas 'gro ba nyon mongs par byed do/ /'gro bar byed pas na 'gro ba ste/ rigs mthun pa'i gnas skabs nas skad cig gi gnas skabs su rab tu 'gro zhes bya ba'i tha tshig go/ /nyon mongs par byed ces bya ba ni/ skye ba dang rga ba dang na ba dang 'chi ba la sogs pas khams gsum du skad cig gcig nas gcig tu brgyud pa 'ong zhing 'gro bar gyur pas nyen zhes bya ba'i tha tshig go/ /kha cig na re rnam par byang ba'i ma yin pas nyon mongs pa zhes bya zhe'o/ /de ltar kun nas nyon mongs pa'i mtshan nyid rten cing 'brel bar 'byung ba yan lag bcu gnyis pa 'di ni sgrib pa'i phyir zhes bya ba la sogs pa don rnam pa bcu gcig gis rnam par byang ba'i mi mthun pa'i phyogs su 'gyur ro//ma rig pa la sogs pa'i go rims ni snga ma snga mas phyi ma phyi ma skyed pa'i phyir ro/ / rten cing 'brel par 'byung ba yan lag bcu gnyis pa 'dis yang mdor bsdu na nyon mongs pa rnam pa du bstan zhe na/ de'i phyir 'di skad ces rten cing 'brel par 'byung ba yan lag bcu gnyis pa/ de yang rnam gsum rnam gnyis kyang / /nyon mongs rnam bdun zhes bya ba smos so/ / kyang zhes bya ba'i sgra ni bsdu ba dang go bsnor ba'i tha tshig go/ /nyon mongs pa nyid kun nas nyon mongs pa yin pas nyon mongs pa'i kun nas nyon mongs pa ste/ las kyi kun nas nyon mongs pa dang tshe'i kun nas nyon mongs pa yang de bzhin no/ /nyon mongs pa 'byung ba na bdag dang gzhan la gnod pa byed pa'i phyir kun nas nyon mongs pa ste/mdo las kyang ji skad du chags pa'i 'dod chags kyis kun nas dkris pa bdag la yang gnod par sems/ gzhan la yang gnod par sems/ gnyi ga la yang gnod par sems so/ /de bzhin du zhe sdang dang rmongs pa yang shes par bya'o zhes gsungs pa lta bu'o//las dang tshe'i kun nas nyon mongs pa 'byung ba'i phyir yang kun nas nyon mongs pa ste/ 'di ltar nyon mongs pa'i dbang gis na las kyis tshe 'phen te/ bden pa mthong ba las yod kyang srid pa 'phen pa med pa dang / nyon mongs pa kun tu 'byung bas yang srid pa'i sa bon srid par byed pa'i phyir nyon mongs pa can gyi sems kyang yang srid pa'i nying mtshams sbyor ba'i phyir/ tshe'i kun nas nyon mongs pa'i rgyu yang yin no/ /de bas na dgra bcom pa la nyon mongs pa can gyi sems med pa'i phyir/nying mtshams sbyor ba med do/ /las kyang dge ba dang mi dge ba ste/ de nyid kyi tshe na lus dang sems sdug bsngal ba'i rgyur gyur pa dang / ma 'ongs pa na rnam par smin pa yang 'byin pas kun nas nyon mongs pa'o/ /tshe yang gnod pa thams cad kyi gnas su gyur pas nyon mongs pa'o//rgyu rnam pa gnyis su bye ba'i phyir kun nas nyon mongs pa gsum mo/ /nyon mongs pa'i kun nas nyon mongs pa ni ma rig pa dang sred pa dang / len pa rnams te/ gsum char yang nyon mongs pa'i bdag nyid yin pa'i phyir ro/ /las kyis kun nas nyon mongs pa ni 'du byed rnams dang srid pa la bya ste/gnyi ga yang las kyi bdag nyid yin pa'i phyir ro/ /'di ni bye brag yin te/ rang gi ngo bor gnas pa'i las ni 'du byed rnams so/ /sa bon du gnas pa ni srid pa'o/ /tshe'i kun nas nyon mongs pa ni/ rnam par shes pa dang ming dang gzugs dang / skye mched drug dang reg pa dang tshor ba dang / skye ba dang rga shi zhes bya ba yan lag lhag ma rnams te/ de dag ni tshe'i nang du 'dus pa'i phyir ro/ /kun nas nyon mongs pa rnam gnyis ni rgyu mi dbye bar byas pa ste/ rgyu'i kun nas nyon mongs pa ni nyon mongs pa dang / las kyi ngo bo nyid kyi yan lag rnams kyis so//'bras bu'i kun nas nyon mongs pa ni yan lag lhag ma rnams kyis so/ /de la las dang nyon mongs pa rnams ni rnam par shes pa la sogs pa tshor ba la thug pa skye ba'i bdag nyid can dang / rga shi'i nyes dmigs can gyi tshe skyed par rab tu zhugs pa'i phyir ro//'bras bu'i kun nas nyon mongs pa ni lhag ma rnam par shes pa la sogs pa rnams kyis te/ las dang nyon mongs pa'i 'bras bu yin pa'i phyir ro/ /rten cing 'brel bar 'byung ba de nyid kun nas nyon mongs pa rnam pa bdun zhes bya ste/ phyin ci log dang 'debs pa dang / nye bar khrid pa dang kun 'dzin pa dang / nye bar spyod pa dang / sdud pa dang / skyo ba'i rgyu'i phyir ro/ /rgyu bdun po de lta ma rig pa ni phyin ci log gi rgyu'o zhes bya ba la/ ma rig par gyur pa ni de kho na nyid la rmongs pa'i phyir/ mi rtag pa la sogs pa la rtag pa'i ngo bor mthong bas phyin ci log ces bya'o//'du byed rnams ni 'debs pa'i rgyu'o zhes bya ba la/ rnam par shes pa la yan lag bzhi'i bdag nyid kyi tshe'i sa bon 'jog pa'i phyir ro/ /rnam par shes pa ni nye bar khrid pa'i rgyu'o zhes bya ba la 'dir shi 'phos nas skye ba'i yul du nye bar khrid pa'i phyir ro//ming dang gzugs dang skye mched drug ni kun 'dzin pa'i rgyu'o zhes bya ba ni khrid par gyur pa ming dang gzugs dang / skye mched drug gi ris mthun pa kun 'dzin pa'i phyir ro/ /sngar mngal nas skye ba la sogs pa'i skye gnas la dgongs nas ming dang gzugs kyis kun 'dzin par bshad do//da ni brdzus te skye ba'i dbang du mdzad de skye mched drug gis kyang 'dzin to zhes bshad do/ /yang na ming dang gzugs kyis thog ma nyid du lus tsam 'dzin par brjod par bzhed pa'o/ /'dir ni yongs su ma rdzogs pa dang / yongs su rdzogs pa 'dzin pas 'gal ba med do//reg pa dang tshor ba ni nye bar spyod pa'i rgyu'o zhes bya ba la/ rgyu dang bcas pa'i myong bas dge ba dang mi dge ba'i las kyi rnam par smin pa la nye bar spyod pa'i phyir ro/ /sred pa dang len pa dang srid pa ni sdud pa'i rgyu'o zhes bya ba la/ byis pa las kyi rnam par smin pa la spyod pa de tshor ba de dang de la sred par byed de sred pa 'phel nas/yang de dang ldan zhing mi 'bral bar sred pas 'dod pa la sogs pa len to/ /de blangs pas kyang de'i las sngon byung ba yang srid pa/ bag chags su gnas pa yongs su gyur na ji ltar btab pa bzhin du rnam par smin pa 'byin pa'i phyir/'jug pa rnyed nas srid par 'gyur ro/ /de yang 'du byed kyis btab pa'i yang srid pa mngon par grub par bya ba'i phyir/ srid pa dang len pa dang srid pa rnams kyis sdud cing mngon par 'du byed ces bya bas/ sred pa dang len pa dang srid pa rnams ni sdud pa'i rgyu'o/ /yang na sred pa'i dbang gis 'dun pa'i 'dod chags dang mthun pa gang yang rung ba'i las kyi bag chags mngon du byed pa'i phyir/sred pa dang len pa dang srid pa ni bsdus pa'i rgyu'o/ /skye ba dang rga shi ni skye ba'i rgyu'o zhes bya ba ni/ de ltar 'di ni tshe drangs bas sems can gyi rigs de dang der skye ba dang rga shi'i sdug bsngal dang mya ngan dang smre sngags 'don pa dang /sdug bsngal ba dang yid mi bde ba dang / 'khrugs pa'i sdug bsngal rab tu dbye ba mtha' yas pa gzhan yang myong bar 'gyur ro/ /de la kun nas nyon mongs pa rnam pa gsum du brjod pas nyon mongs pa dang las ni/ tshe'i rgyu thun mong dang thun mong ma yin pa rab tu bstan to/ /nyon mongs pa ni sa la sogs pa ltar tshe'i myu gu'i thun mong gi rgyu'o/ /las ni thun mong ma yin te/ myu gu'i sa bon ltar de tha dad pas tshe tha dad pa'i phyir ro/ /yang na 'dir sngon gyi mtha' dang / phyi ma'i mtha' dang / bar gyi mtha' zhes bya ba rabs gsum du ni ma yin gyi/las dang nyon mongs pa dang 'bras bu yid zhes rab tu ston to/ /rnam pa gnyis su brjod pas 'di nyid rgyu dang 'bras bu tsam du zad de/ 'di la byed pa po'am/ tshor ba po kun nas nyon mongs pa gzhan med do zhes rab tu ston to/ /yang na 'dir las dang nyon mongs pa tsam nyid rgyu ste/de dag yod pa dang med pas tshe yod pa dang med par snang ba'i phyir ro/ /de'i phyir tshe ni de'i 'bras bu nyid do/ /de lta bas na 'di la rgyu 'am 'bras bu ni med kyi dus skabs thams cad du yang phung po lnga nyid do zhes rab tu ston to/ /rgyu rnam pa bdun bshad pas ni 'phen pa'i mtshan nyid dang /mngon par 'grub pa'i mtshan nyid du yang rten cing 'brel par 'byung ba rnam pa gnyis su rab tu bstan to/ /de la 'phen pa'i mtshan nyid ni gang gis 'phen pa dang / ji ltar 'phen pa dang / gang 'phen pa de rab tu bstan pa'i phyir/ rten cing 'brel par 'byung ba'i yan lag bdun gyis bstan to//mngon par 'grub pa'i mtshan nyid ni 'phangs pa de gang gis mngon par 'grub pa dang / ji ltar mngon par 'grub pa dang / gang mngon par 'grub pa dang / de'i nyes pa bstan pa'i phyir yan lag lngas so/ /gang gis 'phen zhe na ma rig pa las byung ba'i 'du byed rnams kyis te/ji ltar de kho na la rmongs nas phyin ci log tu shes te/ dge ba dang mi dge ba dang / mi g.yo ba'i 'du byed rnams mngon par 'du byed do/ /'du byed de dag gis ji ltar 'phen zhe na/ rnam par shes pa las sa bon gsos pas skye bar nus par gnas pa'i phyir ro/ /ci zhig 'phen zhe na/ yang srid pa ba'i ming dang / gzugs dang / skye mched drug dang / reg pa dang / tshor ba ste ji ltar mthun mthun du sbyar ro/ /de ltar 'phangs pa de gang gis mngon par 'grub par byed ce na/ ji skad bshad pa'i rim gyis snga ma 'phangs pas 'dir skyes pa'i tshor ba la brten nas sred pa skyed pa gang yin pa de dag byung ba'i len pas so//ji ltar des mngon par 'grub ce na/ rnam par shes pa la bag chags su gnas pa'i las de/ des srid par byed pa'i phyir ro/ /'du byed sna tshogs kyis yongs su bsgos pa'i phyir/ rnam par shes pa la las kyi bag chags rnam pa mang po gnas te/len pa'i bye brag gis yongs su gzung ba'i phyir/ gang gis 'di las yang srid pa gnyis par 'gyur ba de ni 'dir srid pa zhes bya'o/ /mngon par 'grub pa de gang yin zhe na/ ming dang gzugs la sogs pa 'phangs pa des phyis skye ba gang yin pa'o/ /de yod pas nyes par 'gyur ba gang yin zhe na/rga shi de lang tsho dang srog phangs pa 'jig pa'i phyir ro/ /'dir nye bar khrid pa'i rgyu ni don med do zhe na don med pa ma yin te/ 'chi ba'i srid pa chad nas skye ba'i srid pa 'byung bar rtog pa bsal ba'i phyir ro/ /kun nas nyon mongs pa 'di dag thams cad ni yang dag pa ma yin pa kun rtog pa las 'byung ngo zhes bya ba ni/sems dang sems las byung ba rnams ni kun nas nyon mongs pa'i gnas yin pa'i phyir te/ de yang / yang dag ma yin kun rtog ni/ /sems dang sems byung khams gsum pa/ /zhes bshad pa yin no/ /yang dag pa ma yin pa kun rtog pa'i don bsdus pa ni zhes bya ba ni/don rgyas par bshad pa bde blag tu khong du chud par bya ba dang / mi brjed par bya ba'i phyir don bsdus pa bstan to/ /de'i phyir 'dir ni don gnyi ga yang bshad do/ /yod pa'i mtshan nyid ni/ yang dag ma yin kun rtog yod/ /ces bya'o/ /med pa'i mtshan nyid ni/ de la gnyis po yod ma yin//zhes bya ba'o/ /rang gi mtshan nyid ni/ don dang sems can bdag rnam rig /snang ba'i rnam par shes pa ni/ /rab tu skye'o zhes bya ba'o/ /bsdu ba'i mtshan nyid ni/ rtag pa dang ni gzhan dbang dang / /yongs su grub pa nyid kyang ngo / /zhes bya'o/ /med pa'i mtshan nyid la 'jug pa'i thabs kyi mtshan nyid ni/dmigs pa la ni brten nas su/ /mi dmigs pa ni rab tu skye/ /zhes bya ba la sogs pa'o/ /rab tu dbye ba'i mtshan nyid ni/ /yang dag ma yin kun rtog ni/ /sems dang sems byung khams gsum pa/ /zhes bya ba'o/ /rnam grangs kyi mtshan nyid ni/de la don mthong rnam par shes/ /de yi bye brag sems las byung / /zhes bya'o/ /'jug pa'i mtshan nyid ni/ gcig ni rkyen gyi rnam par shes/ /gnyis pa nye bar spyod pa can/ /zhes bya'o/ /kun nas nyon mongs pa'i mtshan nyid ni/ sgrib pa'i phyir dang 'debs pa'i phyir/ / khrid pa'i phyir dang kun 'dzin phyir/ /zhes bya ba la sogs pa'o/ /de ltar yang dag pa ma yin pa kun rtog pa'i mtshan nyid rnam pa dgur brjod nas stong pa nyid ji ltar shes par bya ba de ston te zhes bya ba 'dir ji ltar sbyar zhe na/ 'dis yang dag pa ma yin pa kun rtog pa dang / stong pa nyid dang / sngar kun nas nyon mongs pa la rnam par byang ba dang /chos khong du chud pa la brten nas chos nyid nges par 'dzin par 'gyur ba gnyis dam bcas pa yin te/ de'i phyir yang dag pa ma yin pa kun rtog pa bshad pa'i 'og tu/ stong pa nyid ji ltar shes par bya ba de ltar 'chad de/ mtshan nyid dang ni rnam grangs dang //zhes rgya cher ro/ /de la mtshan nyid ni dngos po dang dngos po med pa dgag pa'i bdag nyid de/ stong pa nyid kyis rab tu dbye ba thams cad la khyab pa'i phyir ro/ /ming gzhan ni rnam grangs so/ /rnam grangs dang mthun pa rnam grangs 'jug pa'i rgyu ni rnam grangs kyi don to/ /nam mkha' ltar tha mi dad pa'i mtshan nyid kyi phyir/rnam par mi rtog kyang glo bur gyi nye ba'i nyon mongs pa dang phrad pa dang / bral ba'i dus tha dad pas dbye ba'o/ /gzhan yang gang zag dang chos su sgro 'dogs pa tha dad pas dbye ba rnam pa bcu drug go/ /sgrub pa ni stong pa nyid kyi rab tu dbye ba ston par byed pa'i rigs pa'o//ci'i phyir rnam pa de dag gis stong pa nyid shes par bya zhe na/ rnam par dag pa'i dmigs pa yin pas na/ rnam par dag pa 'dod pa rnams kyi mtshan nyid shes par bya'o/ /mdo gzhan dag las rnam grangs bshad pa rnams la mi rmongs par bya ba'i phyir rnam grangs so/ /rnam grangs kyi don khong du chud par gyur na stong pa nyid la rnam par dag pa'i dmigs pa nyid du nges pa'i phyir rnam grangs kyi don to//kun nas nyon mongs pa bsal na/ de rnam par dag go zhes kun nas nyon mongs pa de spangs pa'i phyir 'bad pa skyed pa'i don du dbye ba'o/ /dbye ba'i sgrub pa khong du chud na/'gyur ba med kyang dbye ba bde blag tu rig pa'i phyir dbye ba'i sgrub pa yang shes par bya'o/ /mtshan nyid ji ltar shes par bya zhe na zhes bya ba ni/ mtshan nyid sngar smos pas de'i phyir de nyid dang por 'dri ste/ gnyis dngos med pa'i dngos po yi/ /dngos po stong pa'i mtshan nyid do/ / zhes bya bar shes par bya'o/ /gnyis ni gzung ba dang 'dzin pa'o zhes bya ba la/ yang dag pa ma yin pa kun rtog pa la'am/ yang dag pa ma yin pa kun rtog pas kun brtags pa'i bdag nyid yin pas dngos po'i ngo bor med do/ /gnyis pa dngos po med pa de'i dngos po gang yin pa de ni stong pa nyid kyi mtshan nyid do//tshig le'ur byas pa dang mthun par byas pa'i phyir 'dir yang dngos po'i rkyen ma smos par bstan par lta ba'o/ /dngos po med pa'i dngos po zhes bya ba de dag gang yin/ dngos po med pa'i bdag nyid ni yod pa nyid do/ /gzhan du na de'i dngos po med pa'i dngos po stong pa med pa'i phyir ro//gnyis kyi dngos po yod pa nyid du 'gyur ro/ /de'i phyir de ltar dngos po med pa'i ngo bo nyid stong pa nyid kyi mtshan nyid du yongs su bstan pa yin no zhes bya ba smos te/ dngos po'i ngo bo'i mtshan nyid du ni ma yin no/ /dngos po med pa'i sgra ni dngos po dgag pa'i tshig yin na/dngos po'i sgra med kyang don 'di khong du chud par 'gyur bas/ dngos po'i sgra ni 'dir lhag go/ /lhag ma ma yin te gnyis kyi dngos po med pa stong pa'i mtshan nyid do zhes de tsam zhig bshad na/ gtsor gnyis kyi dngos po med pa nyid du ri bong gi rwa dngos po med pa dang 'dra bar khong du chud de/sdug bsngal nyid la sogs pa ltar chos nyid kyi ngo bor mi rung ngo / /de lta bas na 'di skad ces bya ste/ gnyis kyi dngos po med pa ni stong pa nyid do/ /dngos po med pa de ni yang dag pa ma yin pa kun rtog pa la yod de/ stong pa nyid ces bya ba ste dngos po med pa'i dngos po'i mtshan nyid yongs su gzung ba'i phyir chos nyid kyi ngo bor bstan pa yin no//yang na gnyis kyi dngos po med pa stong pa nyid ces bya ba la/ med pa'i sgra ni thun mong yin pas 'dir med pa zhes bya ba gang las dgongs pa mi shes pas/ gtan med par rab tu bstan pa'i phyir yang dag pa ma yin pa kun rtog pa la/gnyis po'i dngos po med pa'i dngos bo zhes bya ba brjod do/ /snga na med pa dang zhig nas med pa gnyis ni rang gi nye bar len pa las gzhan du bshad par mi rigs so/ /gcig la gcig med pa yang gnyi ga gnas yin pa'i phyir/ gcig tu gnas par mi rigs so/ /de'i phyir dngos po'i dngos po med pa'i mtshan nyid nye bar bzung bas/gzung ba dang 'dzin pa dag gtan dngos po med pa nyid stong pa nyid ces bya bar de shes par byas pa yin no/ /gal te med pa'i bdag nyid stong pa nyid yin na/ don dam pa zhes ji skad du bya zhe na/ ye shes dam pa'i yul yin pas mi rtag pa nyid bzhin du ste/dngos po'i phyir ni ma yin no/ /de lta mod kyi de ni dngos po med pa'i ngo bo nyid kyang ma yin te/ 'di ltar de'i dngos po med pa'i ngo bo nyid gang yin pa de ni/ yod pa ma yin med pa'ang min/ /ji ltar yod pa ma yin zhe na/ 'di ltar gnyis po'i dngos po med pa ste/ yod pa ni gnyis kyi dngos po gtan med par yang mi 'gyur la/yang dag pa ma yin pa kun rtog pa'i chos nyid du yang mi 'gyur ro/ /ji ltar med pa'ang ma yin zhe na/ 'di ltar gnyis po'i dngos po med pa'i dngos po ste/ gnyis kyi dngos po med pa ni gnyis kyi dngos po med pa'i ngo bor med pa ma yin te/ de med du zin na gnyis yod pa nyid du 'gyur zhing /yang dag pa ma yin pa kun rtog pa'i chos nyid du yang mi 'gyur te/ dper na mi rtag pa nyid dang sdug bsngal ba nyid bzhin no/ /sems can phyin ci log tu gyur pas sgro btags pa'i rtag pa dang / bde ba'i dngos po'i dngos po med pa'i ngo bo nyid yin pas/ yod pa yang ma yin med pa yang ma yin zhes bya'o/ /gal te yang dag pa ma yin pa kun rtog pa'i stong pa nyid chos nyid yin na/ ci ste de las gzhan zhes bya ba'am/ 'on te gzhan ma yin zhe na/ de'i phyir de ni stong pa nyid kyi mtshan nyid do zhes bya ba smos te/ dngos po med pa'i ngo bo nyid kho na'o/ / yang na dngos po kho na dngos po med pa dgag pa'i bdag nyid kho na'o/ /de lta bas na yang dag pa ma yin pa kun rtog pa dang tha dad gcig pa'i mtshan nyid min/ tha dad pa yin na ni chos nyid las chos nyid gzhan yin pa mi rung ste/ ji ltar mi rung zhe na chos las mtshan nyid tha dad pas chos nyid chos gzhan nyid du 'gyur te/de las gzhan pa'i chos bzhin no/ /chos gzhan ni chos gzhan gyi chos nyid du mi rung ste/ de la yang chos gzhan btsal dgos pas thug pa med par 'gyur ro/ /mi rtag pa nyid dang sdug bsngal ba nyid bzhin no zhes bya ba ni/ ji ltar mi rtag pa nyid mi rtag pa rnams las gzhan ma yin pa dang /sdug bsngal ba nyid kyang sdug bsngal ba las gzhan ma yin pa de ltar stong pa nyid kyang stong pa las gzhan ma yin pa zhes bya'o/ /gcig pa yin du zin na ni rnam par dag pa'i dmigs pa dang / spyi'i mtshan nyid du mi 'gyur ro/ /'dis rnam par dag par byed pas rnam par dag pa ni lam mo//chos kyi rang gi mtshan nyid las gzhan ma yin pa'i phyir ro/ /chos kyi rang gi mtshan nyid bzhin du lam gyi dmigs par mi 'gyur ro/ /de'i phyir rang gi mtshan nyid las gzhan ma yin pa'i phyir/ /spyi'i mtshan nyid du yang mi rung ngo / /de yang chos kyi rang gi ngo bo dang 'dra bar phan tshun tha dad pas mnyam pa nyid nyams par 'gyur ro//yang na rang gi mtshan nyid de las gzhan ma yin pas dngos po'i rang gi ngo bo tha dad pa med do/ /de'i phyir spyi yang med par 'gyur te/ spyi'i mtshan nyid ni tha dad pa la ltos pa'i phyir ro/ /yang na rnam par dag par bya ba'i phyir dmigs pa ni rnam par dag pa'i dmigs pa'o//dngos po ni rang gi mtshan nyid la dmigs pas rnam par dag pa thob pa med de/ sems can thams cad rnam par dag par thal bar 'gyur ro/ /gal te gzhan dang gzhan ma yin par mi brjod na/ gcer bu pa smra ba la 'chel bar de ltar mi 'gyur/dngos po yod pa la de nyid dam gzhan du lung mi ston pa gang yin pa de gcer bu pa'i smra ba la 'chel bar 'gyur ro/ /stong pa nyid ni dngos po med pas skyon du 'gyur ba 'di med do/ /de ltar stong pa nyid 'di ni med pa'i mtshan nyid dang dngos po med pa'i ngo bo nyid kyi mtshan nyid dang / mi gnyis pa'i mtshan nyid de/de nyid dang gzhan las rnam par grol ba'i mtshan nyid yongs su bstan pa yin no/ /stong pa nyid kyi mtshan nyid bshad zin to/ /de ni rnam grangs brjod par bya'o/ /stong pa nyid ni mdor bsdu na/ /de bzhin nyid dang yang dag mtha'/ /mtshan ma med dang don dam dang / /chos kyi dbyings ni rnam grangs so//zhes bya ba la/ rnam grangs zhes bya ba ni don gcig la sgra tha dad par grag pa ste rnam grangs kyi don brjod pas rnam grangs zhes bya'o/ /brjod pa de rnams ni mdo gzhan dag las stong pa nyid du ston to/ /rnam grangs lnga po de dag gtso bo yin par tshigs su bcad pa las ji skad smos pa de bzhin du rnam grangs gzhan 'dir ma smos te/gsung rab las khong du chud par bya ba ni 'di lta ste/ mi gnyis pa nyid dang / rnam par mi rtog pa'i dbyings dang / chos nyid dang / brjod du med pa nyid dang / mi 'gag pa nyid dang / 'dus ma byas pa dang / mya ngan las 'das pa la sogs pa'o/ / rnam grangs kyi don ji ltar shes par bya zhe na/ de ston te sgra de dag ni brtags pa ma yin gyi/ don dang ldan pa rnams zhes bya ste/ gzhan min phyin ci log ma yin/ /de 'gag 'phags pa'i spyod yul dang / /'phags pa'i chos kyi rgyu yi phyir/ /rnam grangs don de go rims bzhin/ /zhes bya'o//de la gzhan ma yin pa'i phyir de bzhin nyid de zhes bya ba ni mi 'gyur ba'i don to zhes bya ba'i tha tshig go/ /de nyid bstan pa'i phyir rtag tu de bzhin pa'i phyir ro zhes bya ba smos te/ rtag par dus thams cad 'dus ma byas pa yin pas mi 'gyur zhes bya ba'i tha tshig go/ /phyin ci log ma yin pa'i phyir yang dag pa'i mtha' ste zhes bya ba la yang dag pa ni bden pa dang ma nor ba zhes bya ba'i tha tshig go//mtha' zhes bya ba ni mu med pa ste/ gang phan chad nas shes par bya ba gzhan med pa'i phyir yang dag pa'i mtha' ste/ yang dag pa'i mu zhes bya'o/ /ji ltar de bzhin nyid shes par bya ba mu zhes bya zhe na/shes bya'i sgrib pa rnam par dag pa'i ye shes kyi spyod yul yin pa'i phyir ro/ /phyin ci log ma yin pa'i phyir zhes bya ba ni/ sgro 'dogs pa dang skur pa 'debs pa med pa'i phyir ro/ /'dir rgyu smos pa phyin ci log gi gzhi ma yin pa'i phyir ro zhes bya ba ste/ phyin ci log ni rnam par rtog pa'o//rnam par rtog pa'i dmigs pa ma yin pas phyin ci ma log pa'o/ /mtshan ma 'gog pa'i phyir mtshan ma med pa ste zhes bya ba ni/ 'dir mtshan ma med pa la mtshan ma 'gog pa zhes bya ba'o/ /'dir rab tu bstan pa'i phyir mtshan ma thams cad med pa'i phyir ro zhes bya ba smos te/'dus byas dang 'dus ma byas kyi mtshan ma thams cad kyi stong pa nyid stong pas mtshan ma med pa zhes bya'o/ /mtshan ma thams cad med pa'i phyir mtshan ma med pa ste/ mtshan ma med pa nyid mtshan ma med pa'o/ /'phags pa'i ye shes kyi spyod yul yin pas don dam pa ste zhes bya ba la/dam pa ni 'jig rten las 'das pa'i ye shes te/ de'i don ni don dam pa'o/ /'phags pa'i chos kyi rgyu yin pas chos kyi dbyings te zhes bya ba la/ chos kyi sgra ni 'dir 'phags pa'i chos rnams te/ yang dag par lta ba la sogs pa dang / yang dag par rnam par grol ba dang / ye shes la thug pa rnams la bya ste/de dag gi rgyu yin pas dbyings so/ /de nyid bstan pa'i phyir 'phags pa'i chos rnams ni de la dmigs pas byung ba'i phyir ro zhes bya ba smos so/ /rang gi mtshan nyid dang rgyur byas pa'i gzugs 'dzin pa la yang khams kyi sgra 'di 'jug pa de'i phyir/ 'dir dbyings kyi don ni rgyu'i don to zhes bya ba smos te/dper na gser khung dang zangs khung bzhin no/ /mdo gzhan las rnam grangs gsungs pa gzhan dag kyang 'di'i tshul du don bdag gis brtag par bya'o/ /stong pa nyid ni gzung ba dang 'dzin pa med pa'i ngo bo yin pas tha dad pa mi srid de/ 'dri ba'am yang na rnam grangs kyi don gyi 'og tu dbye ba shes par bya bar bstan pas/de'i phyir de bshad pa'i 'og tu stong pa nyid kyi rab tu dbye ba ji ltar shes par bya zhe na zhes dris so/ /yang dag pa ma yin pa kun rtog pa ni kun nas nyon mongs pa'o/ /de spangs na rnam par dag pa zhes bya ste/ kun nas nyon mongs pa dang rnam par dag pa'i dus na yang stong pa nyid ma rtogs par gang kun nas nyon mongs par 'gyur ba'am/rnam par byang bar 'gyur ba gzhan med do/ /de lta bas na kun nas nyon mongs pa dang rnam par dag pa gnyis kyi dus na yang / stong pa nyid kun nas nyon mongs pa dang rnam par dag pa'o zhes rab tu bstan pa'i phyir ro/ /kun nas nyon mongs rnam par dang //ces bya ba ste/ de'i rab tu dbye'o zhes bya ba smos so/ /gang gi tshe nyon mongs la/ gang gi tshe dri ma med pa khong du ma chud nas/ gang gi tshe kun nas nyon mongs la/ gang gi tshe rnam par dag ce na zhes dris pa dang / de ni drir bcas dri ma med/ /ces rgya cher ro/ /gnas gyur pa dang ma gyur pa la ltos pas/dri ma dang bcas pa dang dri ma spangs par rnam par gzhag go/ /ma rtogs pa dang log par rtogs pa'i nyes pas mi mkhas pa gang dag gzung ba dang 'dzin pa la mngon par zhen cing / 'dod chags la sogs pa'i nyon mongs pas sems kyi rgyud dri ma can du gyur pa la/ stong pa nyid mi snang ba de dag dri ma dang bcas pa'o zhes rnam par gzhag go/ /'phags pa gang dag de kho na mkhyen pas phyin ci log gi sems med pa la stong pa nyid nam mkha' ltar rdul med pa ste rgyun mi 'chad par snang ba de dag ni dri ma spangs pa zhes bya'o/ /de ltar stong pa nyid ni nyon mongs pa dang rnam par dag pa la ltos pa can yin par blta ste/rang bzhin gyis 'od gsal ba'i phyir ngo bo nyid dri ma can du ni ma yin no/ /gal te dri ma dang bcas par gyur la zhes bya ba rgya cher 'byung ba ni/ 'gyur ba med par gnas skabs tha dad pa ma mthong la/ 'gyur ba ni skye ba dang 'jig pa dang rjes su 'brel ba ste/de'i phyir 'gyur ba'i chos can yin pas ji ltar mi rtag par mi 'gyur zhe na zhes bya ba la sogs pa smos so/ /kun nas nyon mongs pa'i gnas skabs las stong pa nyid rnam par dag pa'i gnas skabs su 'gyur ba gzhan med kyi/ de kho na nyid du gnas par rang bzhin gzhan du 'gyur ba med pa ste/glo bur gyi dri ma dang bral ba'i phyir 'di ltar/ chu khams gser dang nam mkha' rnams/ /dag pa bzhin du dag par 'dod/ /de'i phyir mi rtag par mi 'gyur ro/ /dper na chu'i khams dang gser dang / nam mkha' rnams de'i rang bzhin ma yin pa'i phyir/ dri ma'i ngo bo nyid yin par ma gyur kyang /glo bur gyi dri mas dri ma can kho na dang glo bur gyi dri ma dang bral na yang rang bzhin gzhan du 'gyur ba med bzhin du rnam par dag pa nyid do/ /de bzhin du stong pa'i glo bur gyi dri ma rnams kyis kun nas nyon mongs par gyur yang / 'gyur ba med pa'i rang gi ngo bo yin la/ de dang bral na rnam par dag pa zhes bya'o//dngos po de nyid sngar kun nas nyon mongs pa'i mtshan nyid dang / phyis rnam par dag pa'i rang bzhin du gang rnam par 'jog pa de ni/ rang bzhin gzhan du gyur pas 'gyur ba'i chos bzlog par ma gyur gyi/ gang la de gnyi ga yang glo bur yin pa la ni ma yin te/de lta bas na de 'gyur ba'i chos nyid la reg pa med do/ /rab tu dbye ba'i skabs yin pas stong pa nyid kyi rab tu dbye ba thams cad brjod dgos te/ de'i phyir gzhan yang rab tu dbye ba ni stong pa nyid rnam pa bcu drug po 'di lta ste zhes bya ba smos so/ /dngos po tha dad pas rnam pa bcu drug tu 'gyur te/gnyis kyi dngos po med pa'i rang gi ngo bo la ni tha dad pa med do/ /nang stong pa nyid ces bya ba nas dngos po med pa'i ngo bo nyid ces bya ba'i bar du stong pa nyid rnam pa bcu drug po de ni shes rab kyi pha rol tu phyin pa las byung ngo / /de yang mdor bsdu ba zhes bya bar rig par bya'o//za ba bza' dang de yi lus/ /gnas kyi gzhi yi stong pa nyid/ /ces bya ba la sogs pa la/ chos thams cad gnyis med pa'i ngo bo nyid kyi phyir stong pa nyid ni spyi'i mtshan nyid do/ /gzhan du na de ni tha dad par bstan par mi nus te/ de'i phyir gzhi tha dad pas de tha dad par ston to/ / gzhan du na de ni tha dad par bstan par mi nus so/ /de la chags pa dang mngon par zhen pa de spangs pa'i phyir/ thog mar za ba gzhig par bya'o/ /de la chags pa dang mngon par zhen pa de ni sangs rgyas su 'grub pa dang / rnam par thar pa thob pa'i bgegs su gyur pa'o/ /de'i 'og tu de'i bza' ba'o//de'i 'og tu de gnyis kyi gnas te lus so/ /de'i 'og tu za ba la phan 'dogs pa'i phyir/ bdag gir chags pa dang 'dzin pa bzlog pa'i phyir/ de'i gnas te lus kyi rten snod kyi 'jig rten gzhig par bya'o/ /gzhi rnam pa bzhi po 'di'i stong pa nyid de ni gzhi stong pa nyid ces bya'o//de la za ba stong pa nyid ni nang gi skye mched rnams las brtsams so zhes bya ba ni/ de dag kyang mig la sogs pa nas yid la thug pa'i bar du'o/ /za ba de las gzhan med pas mig la sogs pa yul la nye bar spyod par 'jug par mthong nas mig la sogs pa nyid kyis za bar 'jig rten mngon pa'i nga rgyal byed pas de'i phyir/mig la sogs pa'i skye mched stong pa nyid la za ba stong pa nyid ces bshad do/ /bza' ba stong pa nyid ni phyi rol gyi rnams so zhes bya ba la/ gzugs la sogs pa nas chos la thug pa'i bar du'o/ /de dag la yul gyi dngos por bza' bar bya bas na bza' ba ste/de'i phyir phyi rol gyi skye mched stong pa nyid ni bza' ba stong pa nyid ces bshad do/ /za ba dang bza' ba de gnyis ni lus dang phan tshun tha dad du mi 'jug par gnas/ de'i lus ni khog pa'o zhes bya ste/ de bas na de'i stong pa nyid ces bya'o/ /gnas kyi gzhi ni snod kyi 'jig rten te/thams cad du sems can rnams kyi gnas kyi gzhi rab tu 'dogs pas/ de nyid kyi phyir de rgya che ba'i phyir de stong pa nyid ni chen po stong pa nyid ces bya'o zhes bya ba smos so/ /gzhi'i sgra ni re re dang yang sbyar bar bya'o/ /de ltar shes bya'i dngos po rnams gzhi'i stong pa nyid la rtog pa dang bcas pa'i tshul bzhin yid la byed pas yid la byed pa na/byang chub sems dpa' rnal 'byor pa de la mtshan mar 'dzin pa gzhan 'di nye bar gnas par 'gyur ro/ /stong pa nyid shes bya gang gis nang dang phyi'i skye mched la sogs pa 'di stong par mthong ba de la/ gang gzung ba dang 'dzin par mngon par zhen pa dang /ji ltar de'i stong pa nyid shes pas mthong ba 'di nyid kyang 'dir don dam pa'i rnam pa'o snyam du rnam par rtog pa la rnal 'byor gyi sa'i 'khrul pa'i mtshan ma'i rnam par rtog pa rnam pa de gnyis gzhig pa'i phyir/ stong pa nyid stong pa nyid dang don dam pa stong pa nyid de go rims bzhin no//shes pa dang rnam pa ni ma smos par byas te bshad do/ /yang na stong pa nyid yul yin pas shes pa dang stong pa zhes bshad pa yin no/ /gzung ba dang 'dzin pa'i dngos pos de stong pa nyid ni stong pa nyid do/ /nang gi skye mched la sogs pa yang stong pa nyid shes pa des ji ltar mthong ba de/'dir don dam pa'o snyam pa'i rnam pa des stong pa nyid ni don dam pa stong pa nyid do/ /ci'i phyir zhe na/ stong pa nyid ni don dam pa ste kun brtags pa'i rang bzhin gyis stong pa zhes bya'o/ /mtshan mar 'dzin pa gzhan 'di ni stong pa nyid bsgom pa'i nyes par gyur pa ste/ gang gi phyir byang chub sems dpa' stong pa nyid sgrub pa de yang dngos po'i ngo bor sgro btags pa ste/de gzhig pa'i phyir 'dus byas stong pa nyid ces bya ba nas chos thams cad stong pa nyid ces bya ba la thug pa'i bar gyi stong pa nyid bshad do/ /ci'i phyir sgrub par byed ce na/ dge ba gnyis thob par bya ba'i phyir zhes bya ba nas/sangs rgyas chos rnams dag bya'i phyir/ /zhes bya ba'i bar dag gis stong pa nyid la sgrub par byed de/ stong pa nyid bsgom mo zhes bya ba'i tha tshig go/ /dge ba ni 'dus byas dang 'dus ma byas te lam dang mya ngan las 'das pa'o/ /de gnyis ni 'dus byas stong pa nyid dang / 'dus ma byas stong pa nyid dang go rims bzhin du sbyar ro/ /rtag tu sems can phan bya'i phyir/ /zhes bya ba la/ rnam pa thams cad du rtag par bdag gis sems can la phan par bya'o snyam pa de'i stong pa nyid ni mtha' las 'das pa stong pa nyid do/ /'khor ba mi gtang bya ba'i phyir/ /zhes bya ba ni sems can gyi don du bdag gis 'khor ba yongs su gtang bar mi bya ste/'khor ba yongs su btang na byang chub ma rnyed par/ nyan thos kyi sar gnas par 'gyur bas/ de'i stong pa nyid ni thog ma dang tha ma med pa stong pa nyid do/ /ci'i phyir de'i stong pa nyid bshad ce na/ de'i phyir 'khor ba thog ma dang tha ma med pa stong pa nyid du ma mthong na skyo ste/'khor ba yongs su gtong ngo zhes bya ba smos so/ /dge ba mi zad bya ba'i phyir/ /zhes bya ba ni/ phung po lhag ma med pa'i mya ngan las 'das pa na yang bdag gis dge ba'i rtsa ba rnams mi zad par bya'o snyam pa ste/ mi gtong zhes bya ba ni de mi 'dor bar bshad pa'o//gal te de lta na ji ltar phung po'i lhag ma med pa'i mya ngan las 'das pa'i dbyings grub par 'gyur zhe na/ zag pa dang bcas pa'i chos kyi rnam par smin pa'i lus ni med kyi sangs rgyas bcom ldan 'das rnams kyi zag pa med pa'i dngos po'i chos kyi sku ni phung po'i lhag ma med pa'i mya ngan las 'das pa'i dbyings na yang rgyun chad par mi 'gyur ro zhes grub pa'i mtha' las 'byung ngo //de'i phyir de'i stong pa nyid ni dor ba med pa stong pa nyid ces bya'o/ /rigs kyang rnam par dag bya'i phyir/ /zhes bya ba la/ de'i stong pa nyid ni rang bzhin stong pa nyid de/ de nyid kyi phyir rigs ni rang bzhin zhes bshad do//'di ji lta bu zhe na de'i phyir ngo bo nyid kyi phyir ro zhes bya ba smos so/ /ngo bo nyid ni thog ma med pa'i dus can te/ glo bur du byung ba ma yin no zhes bya ba'i tha tshig go/ /ji ltar thog ma med pa can gyi 'khor ba na la la ni sems dang bcas/ la la ni sems med pa de bzhin du 'dir yang skye mched drug po kha cig ni sangs rgyas kyi rigs/kha cig ni nyan thos la sogs pa'i rigs zhes bya'o/ /rigs ni thog ma med pa nas gcig nas gcig tu 'ongs pas sems dang sems med pa'i bye brag bzhin te/ glo bur du byung ba ma yin no/ /gzhan dag na re sems can thams cad de bzhin gshegs pa'i rigs yin pas/'dir rigs zhes bya ba ni de bzhin du shes par bya'o zhe'o/ /mtshan dang dpe byad thob bya'i phyir/ /zhes bya ba ni/ de'i phyir skyes bu chen po'i mtshan rnams dpe byad bzang po rnams dang bcas pa'i stong pa nyid ni mtshan nyid stong pa nyid ces bya'o/ /gzhan yang / sangs rgyas chos rnams dag bya'i phyir/ /byang chub sems dpa' sgrub par byed/ /sgrub par byed pa tha mar brjod/ /dge gnyis thob par bya ba'i phyir/ /byang chub sems dpa' sgrub par byed/ /rtag tu sems can phan bya'i phyir/ /byang chub sems dpa' sgrub par byed/ /ces thams cad dang sbyar ro//sangs rgyas kyi chos de gang dag yin zhe na/ de'i phyir stobs dang mi 'jigs pa dang ma 'dres pa la sogs pa'o zhes bya ba smos so/ /mdor na sangs rgyas kyi chos thams cad thob par bya ba'i phyir bdag gis 'bad par bya'o zhes sgrub par byed pas de'i phyir rnam par bsgom pa zhes bya ste/de'i stong pa nyid ni chos thams cad stong pa nyid ces bya'o/ /'dir rnam par bsgom pa zhes bya ba ji lta bu zhe na/ shes par bya ba la shes pa bar chad med par 'jug pa ste/ de ltar re zhig nang stong pa nyid la sogs pa nas/ chos thams cad stong pa nyid la thug gi bar du stong pa nyid bcu bzhi rnam par gzhag par shes par bya'o//za ba po la sogs pa 'di la stong pa nyid gang yin/ ngo bo nyid ni ji lta bu zhe na/ de'i phyir/ gang zag dang ni chos rnams kyi/ /dngos po med 'dir stong pa nyid/ /de dngos med pa'i dngos yod pa/ /de la de nyid stong nyid gzhan/ /zhes bya ba gsungs so/ / de la ji skad de bshad pa'i zab po la sogs pa la gang zag dang chos kyi dngos po med pa ni stong pa nyid do/ /dngos po med pa de'i dngos po yod pa yang stong pa nyid do/ /de la gang zag dang chos dngos po med pa ni dngos po med pa stong pa nyid do/ /dngos po med pa de'i dngos po yod pa ni dngos po med pa'i ngo bo nyid stong pa nyid do//'di dag gi nang nas stong pa nyid rnam pa gnyis ci'i phyir tha mar rnam par gzhag ce na/ de'i phyir stong pa nyid kyi mtshan nyid bstan pa'i phyir zhes bya ba smos so/ /stong pa nyid bstan pa yang ci'i phyir zhe na/ de'i phyir gang zag dang chos su sgro 'dogs pa dang / de'i stong pa nyid la skur pa 'debs pa bsal ba'i phyir go rims bzhin zhes bya ba smos te/ gang zag dang chos su sgro 'dogs pa bsal ba'i don du dngos po med pa stong pa nyid rnam par gzhag go/ /de'i stong pa nyid la skur pa 'debs pa bsal ba'i phyir/ dngos po med pa'i ngo bo nyid stong pa nyid do/ / gal te dngos po med pa stong pa nyid ma brjod na/ kun brtags pa'i ngo bo chos dang gang zag gnyis yod par 'gyur ro/ /gal te dngos po med pa'i ngo bo nyid stong pa nyid ma bshad na/ stong pa nyid kyi dngos po med par 'gyur ro/ /de med na yang gang zag dang chos gnyis snga ma bzhin du dngos por 'gyur ro//de la rnam par smin pa'i rnam par shes pa'i rang bzhin nang gi skye mched byis pa rnams kyis za bar bsams pa rnams la/ za ba'i gang zag dang / brtags pa'i mtshan nyid mig la sogs pa rnams med pa dang de'i dngos po med pa'i dngos po yod pa ni nang stong pa nyid do/ /phyi'i skye mched gzugs la sogs pa rnam par rig pa snang ba'i ngo bo nyid byis pa rnams kyis spyad par bya bar bsams pa rnams la bdag gis za ba dang /yongs su brtags pa'i mtshan nyid gzugs la sogs pa'i dngos po med pa dang / de'i dngos po med pa'i dngos po yod pa ni phyi stong pa nyid do/ /de'i lus te khog pa la za ba'i gang zag dang /byis pa'i skye bos kun brtags pa'i gzugs la sogs pa dang / lus kyi dngos po med pa dang / de'i dngos po med pa'i dngos po yod pa ni phyi nang stong pa nyid do/ /snod kyi 'jig rten la sems can gyi 'jig rten gyi dngos po med pa dang / kun brtags pa de rang gi ngo bos dngos po med pa dang /de'i dngos po med pa'i dngos po yod pa ni chen po stong pa nyid do/ /stong pa nyid shes pa dang don dam pa'i rnam pa la yang / shes pa po dang rnam pa 'dzin pa po'i gang zag dang / kun brtags pa'i mtshan nyid stong pa nyid shes pa dang / don dam pa'i rnam pa'i dngos po med pa dang /de'i dngos po med pa'i dngos po yod pa ni stong pa nyid stong pa nyid dang / don dam pa stong pa nyid de go rims bzhin no/ /de ni gang gi phyir byang chub sems dpa' sgrub par byed pa 'dus byas la sogs pa nas/ sangs rgyas kyi chos thams cad la thug gi bar du byang chub sems dpa' bsgrub dgos pa rnams la/gang zag dang kun brtags pa'i mtshan nyid chos rnams kyi dngos po med pa dang / de'i dngos po med pa'i dngos po yod pa ni 'dus pas stong pa nyid nas/ chos thams cad stong pa nyid ces bya ba'i bar du go rims bzhin te/ 'di ltar 'dus byas la bdag po'am sbyor ba po'i gang zag kyang med de/'dus byas kyang byis pa'i skye bos kun brtags pa'i bdag nyid du med do/ /mdor bsdus na rnam par rtog pa'i 'dzin pa thams cad kyi gnyen po dang / mdo sde'i dgongs pa thams cad lung bstan pa'i phyir/ nyan thos dang thun mong ma yin pa/ byang chub sems dpa' rnams kyi stong pa nyid bcu drug po 'di dag bshad do//'dir ni bcom ldan 'das kyis stong pa nyid kyi yul dang / stong pa nyid kyi rang bzhin dang stong pa nyid bsgom pa'i dgos pa yang rab tu bstan to/ /de la stong pa nyid kyi yul ni za ba la sogs pa'i don nas sangs rgyas kyi chos la thug gi bar du'o/ /de rab tu bstan pa yang stong pa nyid kyis chos thams cad la khyab par shes par byed pa'i phyir ro//stong pa nyid kyi rang bzhin ni dngos po med pa'i ngo bo nyid dang / dngos po med pa'i dngos po'i ngo bo nyid do/ /stong pa nyid kyi rang bzhin rab tu bstan pa yang sgro 'dogs pa dang skur pa 'debs pa'i gnyen por lta ba thams cad las nges par 'byung ba'i bdag nyid du shes par byed pa'i phyir ro//stong pa nyid bsgom pa'i dgos pa ni dge ba gnyis thob par bya ba nas brtsams te/ sangs rgyas kyi chos thob par bya ba'i bar du'o/ /de bstan pa yang bdag dang gzhan gyi gzugs dang / chos kyi sku phun sum tshogs pa'i mchog ni stong pa nyid bsgom pa las 'thob po zhes rab tu bstan pa'i tha tshig go//de ltar stong pa nyid kyi rab tu dbye ba shes par bya'o zhes bya ba ni dri ma dang bcas pa'i dus na kun nas nyon mongs pa dang / dri ma med pa'i dus na rnam par dag go zhes bya ba dang / nang stong pa nyid la sogs pa bcu drug tu gyur pa'i dbye ba bshad ma thag pa'i rnam pa yin par shes par bya'o//dbye ba smos pa'i 'og tu de sgrub pa smos pas dbye ba bshad pa'i 'og tu/ sgrub pa ji ltar shes par bya zhe na zhes dris so/ /'dir ci zhig pa sgrub par bya zhe na/ glo bur gyi nye ba'i nyon mongs pas kun nas nyon mongs pa nyid dang / rang bzhin gyis rnam par dag pa nyid do/ /de la kun nas nyon mongs pa nyid bsgrub pa'i dbang du mdzad de/ gal te nyon mongs de ma gyur/ /lus can thams cad grol bar 'gyur/ /zhes bya ba gsungs so/ /rnam par grol ba ni kun nas nyon mongs pa spangs pa'o/ /kun nas nyon mongs pa spangs pa de yang lam bsgoms pas so//de la gal te gnyen po ma skyes par yang chos rnams kyi stong pa nyid glo bur gyi nye ba'i nyon mongs pa rnams kyis zhes bya ba la/ yang gi sgra ni skyes pa dang 'dra bar kun nas nyon mongs par mi 'gyur na/ de ltar gyur na ni kun nas nyon mongs pa med pas 'bad pa med par sems can thams cad grol bar 'gyur ro//'bad pa med par zhes bya ba ni gnyen po med pa nyid du ste/ gnyen po med par ni srog chags rnams thar pa med do/ /de'i phyir so so'i skye bo'i dus na/ de bzhin nyid la glo bur gyi dri ma rnams kyis kun nas nyon mongs pa nyid du gdon mi za bar khas blang dgos te/de ltar stong pa nyid kyi rab tu dbye ba kun nas nyon mongs pa bsgrubs pa yin no/ /da ni rab tu dbye ba rnam par dag pa sgrub pa'i phyir/ gal te rnam dag de ma gyur/ /'bad pa 'bras bu med par 'gyur/ /zhes bya ba gsungs so/ /lus can rnams dang sbyar bar bya'o/ / ci ste gnyen po skyes kyang zhes bya ba la/ kyang gi sgra ni ma skyes pa dang 'dra bar rnam par dag par mi 'gyur na/ de ltar gyur na ni thar par bya ba'i phyir rtsom pa 'bras bu med par 'gyur te/ gnyen po bsgoms kyang dri ma de dang bral bar mi 'gyur ba dang / dri ma dang bcas pa ni grol bar mi 'thad pa'i phyir ro//thar par bya ba'i phyir 'bras bu med par mi 'dod pas/ de'i phyir gnyen po goms par byas na/ glo bur gyi nye ba'i nyon mongs pa dang bral bas/ stong pa nyid kyi rnam par dag pa gdon mi za bar khas blang dgos te/ de ltar stong pa nyid kyi rab tu dbye ba rnam par dag pa bsgrubs pa yin no//'dir kun nas nyon mongs pa'i chos nye bar bzung bas kun nas nyon mongs pa la/ rnam par dag pa'i chos nye bar bzung ba rnam par dag gi/ stong pa nyid la mngon du kun nas nyon mongs pa'am/ rnam par dag par ni mi 'dod de/ /chos nyid ni chos kyi kha na las pas/ de'i phyir/ lus can thams cad grol bar 'gyur/ /zhes gsungs te/ 'dir lus can zhes bya ba ni de'i rgyu nyid du bshad pa yin no/ /gzhan du na gal te stong pa nyid la mngon du kun nas nyon mongs pa'am/ rnam par dag par gyur du zin na ni/ de'i phyir lus can rnams dang 'brel pa ci yod na/ 'di ltar stong pa nyid rnam par dag pas lus can rnams rnam par dag pa dang /stong pa nyid kun nas nyon mongs pas kyang / kun nas nyon mongs pa zhes bya/ gal te so so'i skye bo'i dus na/ stong pa nyid nyon mongs la/ 'phags pa'i dus na dag pa yin na ni/ de'i phyir/ nyon mongs ma yin mi mongs min//de ni dag dang ma dag min/ /zhes bya ba 'di grub pa yin no/ /ji ltar nyon mongs par gyur pa ma yin la ma dag pa yang ma yin zhe na/ dgag pa gnyis kyis skabs su khong du chud par byed pas dag pa nyid de/ 'dir lus dang sems rang bzhin gyis 'do gsal ba'i phyir ro zhes 'byung ngo / / 'dir ni sems kyi chos nyid la sems kyi sgar bshad de/ sems nyid ni dri ma'i mtshan nyid kyi phyir ro/ /ji ltar nyon mongs par ma gyur pa ma yin pa yang ma yin la rnam par dag pa yang ma yin zhe na/ nyon mongs pa nyid yin par dgag pa gnyis kyis khong du chud par byed do/ /de yang glo bur gyi nyon mongs pas nyon mongs pa yin gyi rang bzhin gyis ni ma yin zhes ston to//de yang lung las glo bur gyi nye ba'i nyon mongs pa rnams kyis nye bar nyon mongs so zhes 'byung ngo / /kun nas nyon mongs pa dang rnam par dag pa gnyis su phye ste bshad na/ ci'i phyir dbye ba rnam pa bzhir bshad ce na/ kha cig na re 'jig rten pa dang 'jig rten las 'das pa'i lam las khyad par du bstan pa'i phyir te/ 'jig rten gyi lam ni rang gi sa'i dri ma rnams kyi nyon mongs kyi/ de'i gnyen po'i phyir 'og mas ni ma yin no/ /'jig rten las 'das pa'i lam ni chung ngu dang /'bring po la sogs pa'i bye brag gis ni ma dag gi/ zag pa med pas ni dag pa ste/ stong pa nyid ni de lta ma yin no zhe'o/ /kun nas nyon mongs pa ma yin no zhes bshad pa la/ gzhan dag na re mig la sogs pa dang bye brag yod pas ma dag pa yin no/ /mig la sogs pa ni ma bsgribs pa'i lung du ma bstan pa yin pas nyon mongs pa ma yin la/de dag gi zag pa dang bcas pas rang bzhin gyis rnam par dag pa ma yin pas/ ma dag pa yang ma yin zhes bshad do/ /de bzhin du nyon mongs pa med pa yang ma yin zhes bshad pa la/ dag pa ma yin no zhes bya ba ni zag pa dang bcas pa'i dge ba dang bye brag yod pa'i phyir te/zag pa dang bcas pa'i dge ba ni 'khor bar gtogs pas nyon mongs pa med pa ma yin la/ rnam par smin pa yid du 'ong bas dag pa ste/ chos nyid ni de lta ma yin no/ /de ni nyon mongs pa'i dus na nyon mongs pa can yin la ma dag pa nyid ces bshad do//de ltar stong pa nyid kyi rab tu dbye ba kun nas nyon mongs pa dang / rnam par dag pa bstan pa 'di bsgrubs pa yin no/ /stong pa nyid kyi don bsdus pa ni/ mtshan nyid dang rnam par gzhag par rig par bya'o/ /de la mtshan nyid ni dngos po med pa'i mtshan nyid dang dngos po'i mtshan nyid do zhes bya ba la gnyis kyi dngos po med do zhes bshad pas dngos po med pa'i mtshan nyid do//dngos po med pa'i dngos po zhes bshad pas dngos po'i mtshan nyid do/ /dngos po'i mtshan nyid kyang yod pa ma yin med pa'ang ma yin zhes bshad pas/dngos po yod pa dang dngos po med pa las rnam par grol ba'i mtshan nyid dang / de nyid dang gzhan la rnam par grol ba'i mtshan nyid de 'di ni stong pa nyid kyi mtshan nyid do/ /de bas na yang dag pa ma yin pa kun rtog pa dang tha dad gcig pa'i mtshan nyid min zhes bshad do/ /de ltar na mtshan nyid kyi don bsdus pa'o//rnam par gzhag pa'i don bsdus pa ji ltar gzhag par bya zhe na/ de'i phyir rnam par gzhag pa ni rnam grangs la sogs pa rnam par gzhag par rig par bya'o zhes bya ba smos te/ rnam grangs dang de'i don dang de'i dbye ba dang de sgrub pa zhes bya ba'i tha tshig go/ /mtshan nyid la sogs pa rnam pa bzhi po 'di dag bstan pas nye ba'i nyon mongs pa rnam pa bzhi'i gnyen por/rang gi mtshan nyid dang / las kyi mtshan nyid dang / kun nas nyon mongs pa dang / rnam par byang ba'i mtshan nyid dang / rigs pa'i mtshan nyid brjod pa yin no/ /de la rnam par rtog pa'i gnyen por rang gi mtshan nyid de/de ni dngos po dang / dngos po med pa dang gnyi ga dang / tha dad gcig pa nyid du 'dzin pa'i bdag nyid do/ /stong pa nyid kyi mtshan nyid thos nas ma mos pa rnams kyis skrag par 'gyur ba de'i gnyen por las kyi mtshan nyid de/ ma nor ba de bzhin nyid kyi las dang /phyin ci ma log pa'i las dang / mtshan ma thams cad spangs pa'i las dang / 'jig rten las 'das pa'i ye shes thams cad kyi yul nyid du gnas pa'i las dang / dmigs na 'phags pa'i chos kyi rgyu'i dngos po'i las so/ /de ltar stong pa nyid kyi rang gi ngo bo dang las thos pa tsam gyis chog par 'dzin pa le lo can rnams kyi le lo bsal ba'i phyir//rab tu dbye ba'i mtshan nyid do/ /de ji ltar kun nas nyon mongs par 'gyur rnam par dag par 'gyur snyam pa'i som nyi za ba rnams kyi the tshom bsal ba'i phyir rigs pa'i mtshan nyid do/ / bstan bcos dbus dang mtha' rnam par 'byed pa las mtshan nyid kyi le'ur bcad pa ste dang bo'i 'grel bshad do// //mtshan nyid bshad pa'i 'og tu sgrib pa bshad pa'i skabs yin te/ de'i 'og tu snos pas de'i phyir sgrib pa'i dbang du mdzad de zhes bya ba smos so/ / khyab dang nyi tshe lhag pa dang / /mnyam dang len dang spong ba ni/ /gnyis kyi sgrib par bstan pa yin/ /gnyis po dag gi sgrib pa ni byang chub sems dpa'i rigs can rnams dang / nyan thos la sogs pa'i rigs can rnams kyi sgrib pa'o/ /bsgrib par bya ba'i don tha dad pas sgrib pa tha dad par rab tu bstan pa'i phyir le'u 'di brtsams so//de la khyab pa ni byang chub sems dpa'i rigs can rnams kyi nyon mongs pa dang shes bya'i sgrib pa ste zhes bya ba ni khyab par byed pas khyab pa ste/ don mtha' dag la sgrib pa'i phyir ro/ /don mtha' dag gi don dang gzhan gyi don to//yang na nyon mongs pa dang shes bya'i sgrib pa rnam gnyis btags pas byang chub sems dpa' rnams kyi sgrib pa la khyab par byed pas khyab pa zhes bya'o/ /nyon mongs pa nyid sgrib pas ni sgrib pa'o/ /nyon mongs pa nyid kyi chos kho nar 'dra bas/ 'dir ni nye ba'i nyon mongs pa yang nyon mongs pa'i sgrar gzung ngo //gzhan du na ni nyon mongs pa'i mtshan nyid rnam pa dgu zhes bya bar phrag dog dang ser sna gnyis gzung bar mi 'gyur te/ de gnyis nye ba'i nyon mongs pa yin pa'i phyir ro/ /shes bya la sgrib pas shes bya'i sgrib pa ste/ des shes bya rab tu bsgribs pas shes pa'i yul du mi 'gyur ro//yang na shes bya la ye shes kyi sgrib pa yin te/ shes par bya ba la ye shes skye ba'i bgegs byed pa'i phyir ro/ /shes bya dang sgrib pa'i bar gyi tshig ma smos par mar gyi bum pa bzhin no/ /de yang nyon mongs pa can ma yin pa'i mi shes pa'o//byang chub sems dpa'i rigs can rnams kyis/ bdag dang gzhan gyi don phul du byung ba thob pas sangs rgyas nyid thob par bya ba'i phyir bsod nams dang ye shes kyi tshogs rnam pa thams cad kun la nan tan du bya ba de la gnyi ga yang bgegs su gyur pas de'i phyir de byang chub sems dpa'i rigs can rnams kyi sgrib par rnam par gzhag go//de la khyab pa ni thams cad yul yin la mtha' dag ces bya ba ni rnam pa thams cad la bya na/ ji ltar mtha' dag gis khyab par shes par byed par 'gyur zhe na/ mtha' dag gi phyir de khyab pa'i sgrib par brjod de rgyur bstan pas 'gyur ro//yang na khyab pa'i sgra ni ma lus pa'i don du bstan pa'i phyir mtha' dag gi phyir ro zhes smos so/ /nyi tshe ba ni nyan thos la sogs pa'i rigs can rnams kyi nyon mongs pa'i sgrib pa'o zhes bya ba ni/ bdag gi don tsam la sgrib pas sgrib par btags pa dang khyab pa ma yin pa'i phyir nyi tshe ba zhes bya'o//nyan thos dang rang sangs rgyas rnams la nyon mongs pa can ma yin pa'i mi shes pa med dam zhe na/ 'di ltar de dag la nyon mongs pa'i sgrib pa nyid rnam par gzhag ce na/ yod mod kyi de ni de dag gi sgrib pa ma yin te/ de yod bzhin du nyan thos dang rang sangs rgyas kyi byang chub 'thob pa'i phyir ro//mi shes pa ni sdug bsngal la sogs pa'i bden pa'i yul la/ nyan thos la sogs pa'i shes pa skye ba'i bgegs su gyur pa yang ma yin nam/ de bas na de dag la yang sgrib pa gnyi ga yod par 'gyur ro/ /de'i phyir nyan thos la sogs pa la ni nyon mongs pa'i sgrib pa kho na'o zhes brjod par mi bya'o zhe na/de ni de lta ma yin te ma rig pa ni nyon mongs par gyur pa dang / rig pa'i mi mthun pa'i phyogs su gyur pa dang / 'khor ba'i rtsa bar gyur pa'i phyir/ nyon mongs pa'i sgrib pa nyid du rnam par gzhag gi /shes bya'i sgrib pa ni ma yin te/som nyi bzhin no/ /dper na sdug bsngal gyi bden pa la sogs pa'i yul la som nyi za ba ni the tshom dang nyon mongs pa zhes bya'i yul gzhan la ni ma yin no/ /yul gzhan la ni som nyi nyid de/ nyon mongs pa yang ma yin the tshom yang ma yin no/ /de bzhin du sdug bsngal gyi bden pa la sogs pa'i yul nyid la mi shes pa ni ma rig pa dang nyon mongs pa zhes bya'i yul gzhan la ma yin no//yul gzhan la ni mi shes pa nyid yin te/ ma rig pa'ang ma yin nyon mongs pa'ang ma yin no/ /de lta bas na de ni shes par bya ba la ye shes tsam 'jug pa la sgrib pa'i phyir/shes bya'i sgrib pa zhes bya ste/ ma rig pa ltar nyon mongs pa dang las dang tshe rnams kyang 'byung ba ni ma yin no/ /gal te de lta na byang chub sems dpa' rnams kyi sgrib par rnam par mi gzhag go zhe na/ de ni de lta ma yin te/ byang chub sems dpa' rnams ni thos pa'i tshogs kyis rab tu phye ba'i phyir/de dag gi sgrib pa ni shes bya'i sgrib pa ste/ de skad du/ rig pa'i gnas lnga dag la brtson par ma byas par/ /'phags mchog cis kyang thams cad mkhyen nyid mi 'gyur te/ /de bas gzhan dag tshar gcod rjes su gzung phyir ram/ /rang gis shes par bya phyir de la de brtson byed//ces bshad do/ /lhag pa ni 'dod chags la sogs pa'i dngos po chung yang byang chub sems dpa'i rigs can dang / nyan thos la sogs pa'i rigs can de dag la shas che ba dang rgyun du 'byung ba'o/ /'dod chags la sogs pa spyod pa rnams kyi sgrib pa'o zhes bya ba ni/su dag yul ngan pa la yang 'dod chags la sogs pa gang yang rung ba shas che ba dang / rgyun du 'byung ba de dag ni 'dod chags la sogs pa spyod pa'o/ /mnyam pa ni byang chub sems dpa'i rigs can dang / nyan thos la sogs pa'i rigs can de dag nyid kyi sgrib pa ste/mnyam pa ni de gnyi ga'i rnam pa yang med pa'i phyir ro/ /cha mtshungs par spyod pa rnams kyi sgrib pa'o zhes bya ba ni/ su dag yul dang 'dra bar nyon mongs pa skye'i/ rgyun du ni ma yin pa de dag ni cha mtshungs par spyod pa'o/ /'khor ba len pa dang gtong ba'i sgrib pa ni zhes bya ba la sogs pa ni/byang chub sems dpa'i snying rje'i dbang gis 'khor ba nye bar len pa dang / shes rab kyi dbang gis 'khor ba'i nyes pa yang dag pa ji lta ba bzhin du mthong ste/ stong pas de'i phyir nyon mongs pa med par sems can la lta bas skye ba yongs su 'dzin pa ni/ mi gnas pa'i mya ngan las 'das pa ste/ 'khor ba dang mya ngan las 'das pa gnyis la mi gnas pa'i phyir ro/ /de'i sgrib pa ni nyon mongs pas non bzhin du 'khor ba nye bar len pa dang / nyes pa yang dag pa ji lta ba bzhin du mthong nas snying rje med par 'khor ba yongs su gtong ba'o/ / gzhan dag na re snying rje dang shes rab gnyis kyi bgegs su gyur pa'i phyir mi shes pa ni 'dir sgrib pa zhes bya'o zhe'o/ /yang na ji ltar dkon mchog brtsegs pa chen po las/ de'i bsam pa mya ngan las 'das pa la yang gnas la/ 'khor ba na yang sbyor bar gnas pa zhes bstan pa lta bu ste/'di ni byang chub sems dpa' rnams kyi mi gnas pa'i mya ngan las 'das pa'o/ /de la mya ngan las 'das pa la rgyab kyis bltas pa'i phyir/ bsam pa dang sbyor bas 'khor ba la len te/ rigs med pa'i sems can bzhin no/ /de bzhin du 'khor ba la rgyab kyis bltas pa'i phyir/mya ngan las 'das par song ba'i bsam pa dang / sbyor ba gnyis kyis 'khor ba yang yongs su gtong ste/ nyan thos la sogs pa'i rigs can rnams ji lta ba bzhin no/ /de ltar 'khor ba len pa dang de gtong ba yang byang chub sems dpa' rnams kyi mi gnas pa'i mya ngan las 'das pa la sgrib pa ste/'khor ba dang mya ngan las 'das pa gnyis las mtha' gcig tu ltung ba'i phyir ro/ /byang chub sems dpa' rnams de bzhin gshegs par gyur pa'i dus na nyon mongs pa dang shes bya'i sgrib pa spangs pa'i 'khor ba la mi gnas pa dang / phung po'i lhag ma med pa'i mya ngan las 'das pa na yang chos kyi sku rgyun mi 'chad pa'i phyir/nyan thos la sogs pa bzhin du mya ngan las 'das pa la mi gnas te/ de ltar na 'khor ba dang mya ngan las 'das pa gnyi ga la yang mi gnas so/ /'dir byang chub sems dpa' dang nyan thos la sogs pa'i lam dang /de gnyis kyi sbyor ba dang / 'bras bu dang mi gnas pa'i mya ngan las 'das pa la bgegs byed pa'i phyir sgrib pa rnam pa lnga po 'di dag grangs bzhin no/ /de ltar 'di dag ni ci rigs par zhes bya ba ni ji ltar mthun mthun du'o/ /de la dang po dang tha ma ni byang chub sems dpa'i rigs can rnams kyi sgrib pa'o//dang 'og ni nyan thos la sogs pa'i rigs can rnams kyi sgrib pa'o/ /gzhan gnyis ni gnyi ga'i sgrib pa'o/ /de la shes bya'i sgrib pa ni byang chub sems dpa' rnams kyi sgrib par bshad de/ de yang nyon mongs pa can ma yin pa'i mi shes pa'o zhes bya bar shes so//gnyi ga'i sgrib pa'i nyon mongs pa'i sgrib pa la rnam pa du yod pa dang / rang bzhin ji lta bu dang gang gi bgegs su gyur pa mi shes te/ de'i phyir/ nyon mongs mtshan nyid rnam dgu'o/ /zhes bya ba gsungs te/ sgrib ces bya ba dang sbyar ro//nyon mongs pa'i mtshan nyid ni nyon mongs pa'i rang bzhin no/ /rnam pa dgu po de ji lta bu zhe na/ de'i phyir kun du sbyor rnams zhes bya ba gsungs so/ /sdug bsngal sna tshogs la kun du sbyor bas kun du sbyor ba rnams so/ /sdug bsngal sna tshogs kyang 'dod pa dang / gzugs dang gzugs med par gtogs pa'i lus te/sdug bsngal gyi sdug bsngal nyid dang 'gyur ba'i sdug bsngal nyid dang / 'du byed kyi sdug bsngal nyid de khams gsum dang ci rigs su sbyar ro/ /de yang rjes su chags pa'i kun du sbyor ba nas/ ser sna'i kun du sbyor ba'i bar du'o//de la khong khro ba ni zhe sdang ngo / /phrag dog ni gzhan gyi phun sum tshogs pa la mi bzod pa'o/ /ser sna ni yo byad kun 'dzin pa ste/ de gsum ni 'dod par gtogs pa'o/ /rjes su chags pa'i kun du sbyor ba ni khams gsum gyi sred pa'o/ /de bzhin du nga rgyal dang ma rig pa dang lta ba dang /mchog tu 'dzin pa dang / the tshom gyi kun du sbyor ba rnams ni khams gsum pa dag nyid do/ /'jig tshogs dang mthar 'dzin pa'i lta ba dang / log par lta ba rnams ni lta ba'i kun du sbyor ba'o/ /lta ba dang tshul khrims dang brtul zhugs mchog tu 'dzin pa ni/mchog tu 'dzin pa'i kun du sbyor ba'o/ /the tshom ni bden pa dang dkon mchog rnams la yid gnyis za ba'o/ /gzhan khong khro ba la sogs pa nye ba'i nyon mongs pa gang yin pa de dag kyang nyon mongs pa'i rgyu mthun pa dang / nyon mongs par gyur pa'i phyir/ nyon mongs pa'i sgrib pa nyid do//phrag dog dang ser sna ni gtso bo yin pas kun du sbyor bar bzung ngo / /mdo sde las kyang 'di skad ces/ kau shi ka lha dang mi rnams ni phrag dog dang ser sna'i kun du sbyor ba'o zhes gsungs so/ /de dag kyang gang la sgrib pa yin zhe na de'i phyir/ skyo ba dang ni btang snyoms dang / de kho na ni mthong ba dang / /zhes bya ba gsungs so/ /skyo ba ni yid 'byung ba'i rnam grangs su gtogs pa ste/ de bas na rjes su chags pa'i kun du sbyor ba ni kun du skyo ba la sgrib po zhes bya ba smos te/ des lus dang 'tsho ba dang / longs spyod dang bu smad la sogs pa dang / bsam gtan dang gzug med pa rnams la yang rjes su chags pas/ 'khor ba'i sdug bsngal rnams kyis nyen yang khams gsum la mi skyo'o/ /khong khro ba'i kun du sbyor ba ni btang snyoms la sgrib ste/ ji lta zhe na de'i phyir/ des ni mi mthun pa zhes rgya cher smos so/ /yid mi bde ba'i rgyu yin pas mi mthun pa'o//khong khro ba'i gzhi ste khong khro ba'i rgyu la btang snyoms su byed cing mngon du mi byed par mi nus so/ /rjes su chags pa'i gzhi ni mi mthun pa med pas btang snyoms su mi nus pa ni/ rigs kyi khong khro ba'i gzhi ni mi mthun pa la yang khong khro ba ste/btang snyoms su byed mi nus pas de'i phyir/ rjes su chags pa bas sdig che bar bstan pa'i phyir yang zhes bya ba smos so/ /mnyam par 'jog pa na gal te 'du byed kyi btang snyoms thob na/ de ltar de'i sems mnyam par 'gyur ro/ /gal te de'i khong khro ba'i kun du sbyor ba shas che bar 'gyur na ni/de'i dbang gis khong khro ba'i rgyu de la btang snyoms mi thob ste/ de byung na bdag gi dmigs pa la gdon mi za bar dmigs par 'gyur ro/ /de ltar rjes su chags pa'i kun du sbyor bas ni dben pa nyid mi 'thob po/ /khong khro ba'i kun du sbyor bas ni dben par gyur kyang ting nge 'dzin mi 'thob po//lhag ma bdun po ni de kho na mthong ba la sgrib ces bya ba ni/ ma nor bar mthong ba la sgrib po/ /ji lta zhe na zhes bya ba ni mi shes te dri ba'o/ /de'i phyir de dag ni go rims bzhin du/ 'jig tshogs lta dang de'i gzhi dang / /zhes bya ba rgya cher gsungs so//nga rgyal gyi kun du sbyor ba ni 'jig tshogs la lta ba yongs su shes pa la bsgrib pa yin no/ /de la 'jig tshogs la lta ba la brten nas sems khengs pa ni nga rgyal te/ de yang nga rgyal las kyang nga rgyal la sogs pa rnam pa bdun no/ /'jig tshogs la lta ba la bdag dang bdag gi dang gzung ba dang 'dzin pa las dben pa dang /byis pa'i skye bos kun brtags pa'i chos kyi rang bzhin gyis dben par mthong ba gang yin pa de ni/ 'jig tshogs la lta ba yongs su shes pa'o/ /de'i sgrib pa ni nga rgyal gyi kun du sbyor ba yin te/ de skye ba la bgegs byed pa'i phyir ro//de yang gang gi tshe ji lta zhe na de'i phyir/ mngon par rtogs pa'i dus na nga'o snyam pa'i nga rgyal bar chad dang bcas pa dang / bar chad med par kun du 'byung ba'i dbang gis de ma spangs pa'i phyir ro zhes bya ba smos so/ /bden pa mngon par rtogs pa'i dus ni/nges par 'byed pa'i cha dang mthun pa'i dus so/ /de la bar chad dang bcas pa ni gnyen pos bar du chod pa'o/ /bar chad med pa ni gnyen pos bar du ma chod pa ste/ de yang gnyen po che ba dang chung bar rig par bya'o/ /ji srid du nga'o snyam pa'i nga rgyal bar chad dang bcas pa dang /bar chad med pa kun du 'byung ba de srid du 'jig tshogs la lta ba spong ba med de/ 'jig tshogs la lta ba'i stobs kyis nga'o snyam pa'i nga rgyal 'byung ba'i phyir ro/ /ma rig pa'i kun du sbyor ba ni/ 'jig tshogs la lta ba'i gzhi yongs su shes pa la sgrib po//'jig tshogs la lta ba'i gzhi ni nye bar len pa'i phung po lnga rnams te/ de la dmigs pa las byung ba'i phyir ro/ /mdo'i sde las kyang ji skad du/ dge sbyong bram ze gang la la bdag dang bdag gi rjes su lta ba na/ nye bar len pa'i phung po lnga po 'di dag nyid la brten nas rjes su blta'o//mngon par zhen pa na mngon par zhen to zhes gsungs so/ /yongs su shes pa de yang ji lta bu zhe na/ phung po rnams la bdag dang bdag gis stong pa nyid dang / byis pa'i skye bos kun brtags pa'i chos kyi rang bzhin gyis stong pa nyid du mthong ba gang yin pa dang /mi rtag pa nyid dang / sdug bsngal ba nyid dang / bdag med pa nyid dang / kun 'byung ba la sogs par mthong ba gang yin pa de ni de dag yongs su shes pa'o/ /'dir rgyu smos pa des nye bar len pa'i phung po rnams yongs su mi shes pa'i phyir ro zhes bya ba'o/ /ma rig pas brtag pa la sogs pa'i rnam pa rnams kyis bsgribs pa'i phung po rnams la de yongs su shes pa med pa'i phyir/ma rig pa ni phung po yongs su shes pa la sgrib po/ /lta ba'i kun du sbyor ba ni/ 'gog pa'i bden pa yongs su shes pa la sgrib po/ /lta ba'i kun du sbyor ba ni lta ba la gsum ste/'jig tshogs dang / mthar 'dzin pa dang / log par lta ba rnams so/ /de la 'jig tshogs la lta ba ni/ nye bar len pa'i phung po lnga rnams la bdag gam bdag gir lta ba'o/ /mthar 'dzin par lta ba ni bdag tu mngon par brtag pa'i dngos po de nyid la rtag par lta ba'am/ chad par lta ba'o/ /lta ba gang gi rgyu'am 'bras bu'am byed pa'am/ yod pa'i dngos po la skur pa 'debs pa dang / log par kun du rtog pa de ni log par lta ba'o/ /'gog pa'i bden pa yongs su shes pa ni zhi ba la sogs pa'i rnam pa rnams so/ /ji ltar de ni de la sgrib can/ de'i phyir 'jig tshogs dang / mthar 'dzin par lta ba gnyis kyis de la skrag pa dang / log par lta bas de la skur pa 'debs pa'i phyir ro zhes bya ba smos so/ /de la 'jig tshogs dang mthar 'dzin par lta ba dag gis bdag der med par 'gyur ro zhes 'gog pa la skrag par 'gyur ro//log par lta bas kyang 'gog pa med do zhes skur pa 'debs so/ /de la 'jig tshogs dang mthar 'dzin par lta bdag gis zhi ba dang / gya nom pa dang / nges par 'byung bar yongs su mi shes la/ log par lta bas 'gog par yongs su mi shes te de ltar lta ba'i kun du sbyor ba ni 'gog pa yongs su shes pa la sgrib po//mchog tu 'dzin pa'i kun du sbyor ba ni/ lam gyi bden pa la yongs su shes pa la sgrib ste zhes bya ba de la mchog tu 'dzin pa'i kun du sbyor ba ni/ lta ba mchog tu 'dzin pa dang tshul khrims dang brtul zhugs mchog tu 'dzin pa'o//de la lta ba mchog tu 'dzin pa ni/ lta ba dang lta ba'i gnas nye bar len pa'i phung po lnga rnams la mchog la sogs par lta ba gang yin pa'o/ /tshul khrims dang brtul zhugs mchog tu 'dzin pa ni/ tshul khrims sam/ brtul zhugs sam/ de gnyi ga'am/ de dag gi gnas nye bar len pa'i phung po lnga rnams la/ dag pa dang grol ba dang / nges par 'byin par yang dag par rjes su lta ba'i lta ba gang yin pa de ni tshul khrims dang / brtul zhugs mchog tu 'dzin pa'o/ /lam yongs su shes pa yang nges par 'byin pa la sogs pa'i rnam pa rnams su shes pa'o//ji ltar na mchog tu 'dzin pa'i kun du sbyor ba lam yongs su shes pa la sgrib ce na/ de'i phyir rnam pa gzhan gyis dag par mchog tu 'dzin pa'i phyir ro zhes bya ba smos te/ tshul khrims dang brtul zhugs tsam gyis sam/ 'dod pa'i bde ba'i gnas kyis sam/dka' ba spyod pas sam/ grangs can la sogs pa'i shes pas dag par mchog tu 'dzin pa'i phyir ro/ /lta ba la mchog tu 'dzin pas kyang gang gis dag par yid ches pa de nyid dam par mchog tu 'dzin to/ /de ltar na mchog tu 'dzin pa'i kun du sbyor bas lam bor te rnam pa gzhan gyis dag par mchog tu 'dzin to//the tshom gyi kun du sbyor ba ni dkon mchog gsum yongs su shes pa la sgrib ste/ ji lta zhe na de'i phyir/ de'i yon tan la mngon par yid mi ches pa'i phyir ro zhes bya ba smos so/ /the tshom gyi kun du sbyor ba ni bden pa de dang dkon mchog rnams la yid gnyis za ba ste/sangs rgyas dkon mchog la yon tan dang nyes pa thams cad phul du phyin pa dang / bsal ba'i mthar thug pa'i gnas su yongs su shes pa'o/ /chos dkon mchog la 'khor ba'i rgya mtsho las sgrol ba dang /rgyu dang bcas pa'i sdug bsngal dang gtan du bral ba'i bdag nyid de/ de khong du chud par byed par yongs su shes pa'o/ /dge 'dun dkon mchog la dge sbyong gi 'bras bu la gnas pa dang / der zhugs pa dang / bla na med pa'i sbyin gnas kyi zhing yin par yongs su shes pa'o//bden pa dang mthong ba dang the tshom spang ba'i phyir shes nas dad pa rnyed pas dkon mchog gsum gyi yon tan la mngon par yid ches kyi the tshom ma spangs pa ni ma yin no/ /de'i phyir the tshom gyi kun du sbyor ba ni dkon mchog gsum yongs su shes pa la sgrib ces bya'o//phrag dog gi kun du sbyor ba ni rnyed pa dang bkur sti yongs su shes pa la sgrib ces bya'o/ /'dir rgyu smos pa/ de'i nyes pa mi mthong ba'i phyir ro zhes bya'o/ /phrag dog gi kun du sbyor ba ni rnyed pa dang / bkur sti la chags pa ste/ gzhan gyi phun sum tshogs pa la zhe sdang gi char gtogs pas sems khong nas 'khrug pa'o//rnyed pa dang bkur sti la gnod pa thams cad kyi gnas yin par khong du chud pa ni yongs su shes par bya'o/ /phrag dog gis ni rnyed pa dang bkur sti yon tan thams cad kyi mi mthun pa'i phyogs su gyur pa dang / gnod pa sna tshogs kyi rtsa bar gyur par mi shes pas/de'i phyir phrag dog gi kun du sbyor ba ni rnyed pa dang bkur sti yongs su shes pa la sgrib po/ /ser sna'i kun du sbyor ba ni yo byad bsnyungs pa yongs su shes pa la sgrib po/ /ji lta zhe na de'i phyir yo byad la lhag par zhen pa'i phyir ro zhes bya ba smos so//ser sna ni yo byad rnams la lhag par chags pa ste/ 'dod chags kyi char gtogs pas 'tshog chas rnams la sems kun du 'dzin pa'o/ /yo byad bsnyungs pa ni yo byad rnams las lhag par dben pa'o/ /de la yon tan thams cad kyi gnas kyi dngos por yongs su rtogs pa ni yongs su shes pa'o//ser sna ni yo byad rnams la lhag par chags pas/ yon tan thams cad kyi gnas su yongs su mi shes te/ de'i phyir yo byad bsnyungs pa la sgrib po zhes bshad do/ /de la rjes su chags pa dang khong khro ba'i kun du sbyor ba ni de kho na rtogs par byed par sbyor ba ni sgrib kyi/lhag ma rnams ni ma yin no/ /lhag ma rnams ni de kho na rtogs par byed par zhugs par byed pa la sgrib po/ /de nyid kyi phyir de dag gi go rims ni 'di lta ste/ thar pa 'dod pas thog ma nyid du gdon mi za bar 'khor ba la sems skyo bar bya'o//de nas thams cad la btang snyoms su bya'o/ /de nas gnod pa thams cad kyi rtsa ba yin pas 'jig tshogs la lta ba yongs su shes par bya'o/ /de'i 'og tu de'i gzhi la sdug bsngal dang kun 'byung ba'i bdag nyid du yongs su shes par bya'o/ /de nas de 'gog pa shes par bya'o//de'i 'og tu thob pa'i lam shes par bya'o/ /de nas bden pa mthong ba dang yon tan de dag rtog pa'i phyir dkon mchog la shes nas dad pa 'thob po/ /bden pa mthong ba'i stobs nyid kyis kyang rnyed pa dang bkur sti dang / yo byad bsnyungs pa gnyis kyi nyes pa dang yon tan mthong ba yin no//de ltar bsgrib par bya ba'i chos kyi go rims kyi rgyus de'i sgrib pa'i go rims kyang rig par bya'o/ /thams cad la yang thams cad sgrib pa nyid du srid pa'i phyir/ gzhi so sor nges pas sgrib par bshad pa ni mi rigs pa ma yin nam zhe na/ 'dir gzhi so sor nges par bya ba ni ma yin gyi/ so sor nye bar gnas pa'i phyir gtso bor byas te 'di bstan to/ /ci sgrib pa de zad dam zhe na/ de ni byang chub sems dpa' dang nyan thos la sogs pa'i spyi thun no/ /byang chub sems dpa' rnams kyi sgrib pa ni/dge ba la sogs pa bcu la gzhan sgrib pa gang yin pa dang / dge ba la sogs pa yang gang yin mi shes te/ de'i phyir/ sbyor ba med dang skye mched min/ /rnal 'byor min pas gang bskyed dang / /zhes gsungs pa la sogs pa ni sgrib pa'o/ / dge ba la sogs pa ni/ dge dang byang chub yang dag 'dzin/ /zhes bya ba la sogs pa don bcu'o/ /de la dge ba ni byang chub kyi rgyur gyur pa ste dge ba'i rtsa ba thams cad do/ /byang chub ni de'i 'bras bu'o/ /de la dge ba ni spyir bstan pas rab tu dbye ba dang / rang bzhin mi shes nas de'i phyir de khong du chud par bya ba'i phyir rtsom ste/yang dag 'dzin/ blo ldan 'khrul med sgrib pa med/ /bsngo dang mi skrag ser sna med/ /ces bya ba de dag ni dge bzhes bya'o/ /byang chub kyang smos pa tsam gyis rang bzhin mi shes te/ de'i phyir de ni dbang ngo zhes ston to//kha cig na re dge ba dang byang chub dang / yang dag par 'dzin pa la sogs pa bzhin du sgrib pa rang gi rgyud yod par bshad pas/ 'dir rang gi rgyud yod pa nyid du shes kyi/ bstan pa dang bshad pa'i dngos por ni ma yin no zhe'o/ /skye ba la sgrib pa ni dge ba la rnam par gzhag go//de yang byang chub kyi sems la sogs pa rnams kyi spyi thun yin gyi/ dge ba ni bskyed par bya ba'i phyir ro/ /yang dag par 'dzin pa la sogs pa la sgrib pa dang rten la sogs pa la sgrib pa ni yang dag par 'dzin pa la sogs pa rnams kyi sgrib pa ste tha dad do//byang chub ni mi 'khrug pa dang / thob par bya ba yin pas de'i phyir/ de'i gnas pa la sgrib pa dang / thob par bya ba la sgrib pa rnam par gzhag ste/ de bas na de rang gi rgyud du yod par mi 'gyur ro/ /de dag gi go rims kyang mdor na dge ba'i rtsa ba ma lus par bsgrubs nas byang chub thob par bya'o//rgyas par ni thog ma nyid du byang chub kyi sems bskyed par bya ste/ bdag dang gzhan gyi don phun sum tshogs pa'i gzhir gyur ba'i phyir ro/ /de nas sems bskyed pa dang mthun par sbyin pa la sogs pa bsgrub par bya ste/ des byang chub sems dpar mngon no//de nas bskal pa grangs med par goms par byas te/ bsod nams dang ye shes kyi tshogs bsags pas bsam pa rnam par sbyang ba'i phyir/ gang zag dang chos la nor ba'i gnyen por ma nor ba'i bdag nyid mthong ba'i lam bskyed par bya'o/ /de nas rnam par dag pa'i khyad par dang ldan par bya ba'i phyir sgrib pa dang bral bas rab tu phye ba bsgom pa'i lam mthar phyin par bya'o//de nas nyan thos la sogs pa las 'da' bar sbyor bas 'jig rten dang 'jig rten las 'das pa'i dge ba'i rtsa ba ji ltar bsags pa de dag thams cad byang chub tu yongs su bsngo bar bya'o//de nas gnas de thob pa dang / byang chub chen por bsam par mi byed pas/ sangs rgyas dang byang chub sems dpa' rnams kyi bstan pa zab cing rgya che ba rnams la skrag par mi 'gyur ro/ /de nas mang du thos pa dang / rtogs pa dang ldan nas sems can yongs su smin par bya ba'i phyir chos rgya cher ston to//de nas 'dul ba yongs su smin nas de dag rnam par dgrol ba'i phyir dbang ste/ sangs rgyas nyid thob po/ /'dir sgrib pa sum cu dang / bsgrib par bya ba dge ba la sogs pa'i don bcu bshad pas de'i phyir dge ba la sogs pa de rnams la gang la sgrib pa du yod pa mi shes nas dris pa dang de'i phyir/de dag gi ni sgrib pa rnams/ /gsum gsum dag tu shes par bya/ /zhes bya ba gsungs so/ /de la sgrib pa gsum zhes bya ba la sbyor ba med pa ni rtsom pa med pa'o/ / 'di la sgrib pa gang zhe na/ bag med pa'ang le lo'i nyon mongs pa gang gis mi sbyor ba ste/ nyon mongs pa'i sa bon dang ldan pa lung du ma bstan pa'am/ nyon mongs par gyur pa'i gnas skabs kyi bye brag gang du mi sbyor ba'o/ /rgyun du ma chud pa'am gus par mi sbyor ba ste/chung bas na sbyor ba med pa zhes bya'i/ /sbyor ba med pa ni ma yin te/ de la sgrib par mi 'thad pa'i phyir ro/ /skye mched ma yin pa la sbyor ba ni/ byang chub dang byang chub thob par byed pa'i dge ba'i rtsa ba rnams skye ba'i sgo gsung rab gang yin pa de skye mched de/de las gzhan pa ni skye mched ma yin no/ /der sbyor ba ni 'di las phyi rol pa rnams skye mched ma yin pa la sbyor ba'o/ /de la sgrib pa gang zhe na/ mi shes pa'am lta ba'i nyon mongs pa gang gis skye mched ma yin pa la sbyor ba ste/ sbyor ba de nyid la ni sgrib pa'o//tshul bzhin ma yin pa la sbyor ba'o zhes bya ba la tshul bzhin ni thabs te/ gang gi thabs gang yin pa de las gzhan du sbyor ba ni/ tshul bzhin ma yin pa la sbyor ba'o/ /bstan pa 'di nyid las 'di lta ste/ 'dod chags spyod pa la byams pa bsgom pa ni 'dod chags spong ba'i thabs ma yin pa dang /zhe sdang spyod pa la mi sdug pa bsgom pa zhes 'byung ba'o/ /'dir yang tshul bzhin ma yin pa yid la byed pa'am/ de'i rgyu ni sbyor ba'i sgrib pa'o/ /byang chub kyi sgrib pa gsum ni zhes bya ba/ byang chub ni don ji lta ba bzhin du thugs su chud pa'o//dge ba mi skye ba zhes bya ba ni gong du bshad pa nyid do/ /mi skye ba ji ltar sgrib ce na/ dge ba med na byang chub tu mi 'gyur te/ de'i phyir dge ba mi skye ba ni byang chub kyi sgrib pa'o/ /yang na gnas skabs kyi bye brag gi tshe dge ba la skye ba la sgrib pa'i nyon mongs pa gang yin pa de nyid byang chub kyi sgrib pa yang yin te/gang tshogs gang gis sgrib par nges pa de ni de'i 'bras bu'i sgrib pa yang yin no/ /skyes zin pa yang yid la mi byed pa ni mi bsgom pa ste/ spel bar mi byed ces bya ba'i tha tshig go/ /le lo la sogs pa'i nyon mongs pa gang gis gnas skabs kyi bye brag gang la dge ba skyes kyang yang dang yang yid la mi byed pa de ni 'dir sgrib pa'o//tshogs yongs su ma rdzogs pa'o zhes bya ba ni/ tshogs ji snyed kyis byang chub thob par 'gyur ba'i bsod nams dang / ye shes kyi tshogs de snyed ma rdzogs pa dang /gong ma lta bu'i gnas skabs kyi nyon mongs pa'am tshogs chung ba'o/ /gzhan dag na re bye brag tu ma bshad kyang nges par 'byed pa'i cha dang mthun pa rnams kyi sgrib pa ni 'dir mi skye ba la bya bar 'dod de/ gzhan dag gi ni ma yin no/ / de dag skyes pa yid la mi byed pa dang / yid la byed kyang tshogs ma bsags pa ni sgrib pa zhes bya'o zhe'o/ /yang dag par 'dzin pa ni byang chub kyi sems bskyed pa ste zhes bya ba ni/ bsod nams dang ye shes kyi tshogs ma lus pa dang / de'i 'bras bu sangs rgyas nyid dang /sems can thams cad kyang phung po'i lhag ma med pa'i mya ngan las 'das pa'i dbyings bla na med par gzhag par bya ba nyid du 'dis yang dag par 'dzin cing yongs su len pas na/ yang dag par 'dzin pa ni byang chub kyi sems bskyed pa'o/ / de yang bdag dang gzhan la phan par byed pa'i bsam pa ste/ sems pa 'dun pa dang bcas pa'o/ /de'i sgrib pa gsum la rigs dang mi ldan pa ni rigs med pa'am/ nyan thos la sogs pa'i rigs so/ /dge ba'i bshes gnyen dang mi ldan pa zhes bya ba ni rigs yod kyang de gang dag byang chub kyi sems bskyed pa yang dag par 'dzin du 'jug pa de dag dang mi phrad pa ste/gang la brten nas byang chub las rnam par ldog pa'am/ dge ba'i chos rnams kyis mi 'phel ba'o/ /dge ba'i bshes gnyen dang phrad du zin kyang 'khor ba'i sdug bsngal rnams kyis sems yongs su skyo ste/sems can log par zhugs pa rnams la sems skyo nas myur du mya ngan las 'da' bar sems so/ /'di la sgrib pa gang zhe na/ rgyu dang mi ldan pa dang rkyen dang mi ldan pa dang / sems can rnams la snying mi rje ba dang le lo ste/snying rje med pa ni sems can gyi don gyis skyo bar 'gyur ba'am sgyid lug par 'gyur ro/ /blo dang ldan pa ni byang chub sems dpa' nyid de zhes bya ba ni/ rang bzhin gyis nyan thos la sogs pa'i rigs can rnam pas dbang po rno ba dang / shes par bya ba thams cad kyi rnam pa thams cad la nye bar rtog pa'i skabs yin pa dang chos zab cing rgya che ba la mos pas/byang chub sems dpa' nyid blo ldan yin gyi gzhan ni ma yin no/ /byang chub sems dpa' nyid ni gzhan gyi don phyin ci ma log par sgrub pa'o//sgrub pa dang mi ldan zhes pa ni pha rol tu phyin pa la sogs pa la mi 'jug pa'o/ /sgrub pa la gnas pa ni byang chub sems dpar shes so/ /skye bo ngan pa ni skye bo blun po'o zhes bya ba ni yongs su mi rtog pa'i skye bo zhes bya ba'i tha tshig ste/ skye bo ngan pa ni sgrub pa dang ldan pa'i byang chub sems dpa' la 'di'o zhes mi shes pa'o//skye bo sdang ba ni zhe 'gras pa rnams so zhes bya ba ni/ byang chub sems dpa' la zhe sdang ba rnams te/ de dag glags tshol bas byang chub sems dpa'i yon tan yang dag pa rnams ni mi mthong la/ nyes pa med pa ni mthong ba'am zhe sdang gis gnod par sems pas yon tan yang dag pa rnams bcabs te/sgro btags nas med pa'i nyes pa sgrogs pa'o/ /'di la sgrib pa gang zhe na/ sbyin pa'i pha rol tu phyin pa la sogs pa'i mi mthun pa'i phyogs dang mi shes pa dang zhe sdang ba'o//'khrul pa med pa'i sgrib pa gsum ni zhes bya ba ni/ sgro 'dogs pa dang skur pa 'debs pa'i phyir 'khrul pa'o/ /gnyen po ni 'khrul pa med pa ste/ mthong ba'i lam mo/ /kha cig na re phyin ci log gi gnas ngan len ni gzung ba dang 'dzin pa la mngon par zhen pa'i bag chags brtas pa'o zhe'o//gzhan dag na re mthong bas spang bar bya ba'i bag la nyal thams cad dam/ chos kyi dbyings thams cad du 'gro bar khong du chud par bya ba'i gegs su gyur pa nyon mongs pa can ma yin pa'i mi shes pa'i sa bon kun gzhi rnam par shes pa la gnas pa yongs su gsos pa'o zhe'o//gzhan dag na re bdag la sogs pa med par bdag la sogs par rnam par rtog pa ni phyin ci log go zhe'o/ /nyon mongs pa la sogs pa'i sgrib pa gsum las lhag ma gang yang rung ba zhes bya ba de la/ nyon mongs pa'i sgrib pa ni shas che ba dang yun ring po nas 'dod chags la sogs pa kun du 'byung ba ste/ de'i gnyen po la sbyor ba'i skabs mi 'byed pas 'khrul pa med pa la sgrib po/ /las kyi sgrib pa ni mtshams med pa la sogs pa'i las ngan song du nges pa gang yin pa'o/ / rnam par smin pa'i sgrib pa ni ngan song la sogs pa ste/ der skyes pa la 'phags pa'i chos skye ba'i skal ba med do/ /nyon mongs pa dang las dang tshe de dag las lhag ma gang yang rung ba zhig sgrib pa yin gyi zad par ni ma yin no/ /rnam par grol ba'i yongs su smin par byed pa'i shes rab yongs su ma smin pa'o zhes bya ba ni/rnam par grol ba thob par byed pa'i shes rab las su mi rung ba'o/ /kha cig na re de ni nges par 'byed pa'i cha dang mthun pa'i gnas ma thob pa'i phyir zhe'o/ /gzhan dag na re rnam par mi rtog pa dang de la sbyor ba can gnyis ni/ 'dir rnam par grol ba yongs su smin par byed pa'i shes rab po//de gnyis yongs su ma smin pa ni tshogs yongs su ma rdzogs pa'i phyir de kho na rtogs pa'i 'os ma yin pa dang / de'i rgyu'i dngos po'i 'os ma yin pa ste go rims bzhin no zhe'o/ /'di la sgrib pa gang zhe na/ mthong bas spang bar bya ba'i nyon mongs pa'i bag chags brtas pa dang / nyon mongs pa'i sgrib pa la sogs pa'i lhag ma gzhan gang yang rung ba dang / shes rab yongs su smin pa'i gegs su gyur pa mi shes pa dang tshogs yongs su ma rdzogs pa'o/ /sgrib pa spangs pa ni sgrib pa med pa zhes bya ba ni 'dis sgrib pa spong bar byed pas sgrib pa spong ba ste/sgrib pa'i gnyen po yin pas sgrib pa med pa ni bsgom pa'i lam mo/ /de'i sgrib pa gsum ni lhan cig skyes pa'i gnas ngan len zhes bya ba ni/ bsgom pas spang bar bya ba'i nyon mongs pa'i bag la nyal lo//yang na bdag tu lta ba la sogs pa lhan cig skyes pa rnams dang / chos kyi dbyings mchog gi don la sogs pa rtogs pa'i gegs byed pa nyon mongs pa can ma yin pa'i mi shes pa'i sa bon kun gzhi rnam par shes pa la gnas pa yongs su gsos pa'o//le lo ni snyom las te gti mug gi char gtogs pas sems mngon par mi spro ba'o/ /bag med pas ni yul la rnam par chags pa dang / dge ba la mi 'jug pa'o/ /kha cig na re ting nge 'dzin gyi ro myang ba ni bag med pa'o zhe'o/ / de la gnas ngan len dang le los ni lam mi bsgom mo/ /bag med pas ni mi dge ba las sems mi srung ba'o/ /'di la sgrib pa gang zhe na/ gsum po de nyid do/ /yongs su bsngo ba'i sgrib pa gsum ni gang dag gis sems gzhan du sngo bar byed kyi bla na med pa yang dag par rdzogs pa'i byang chub tu mi bsngo zhes bya ba de la bsngo ba de ni dge ba'i rtsa ba skyes shing byung ba rnams sangs rgyas nyid du sems kyis nges par byed pa'o//de la sgrib pa gsum ste/ gsum gang zhe na/ gang dag gis sangs rgyas nyid las gzhan du 'khor ba'am/ nyan thos la sogs pa'i byang chub tu sems yongs su sngo bar byed kyi/bla na med pa yang dag par rdzogs pa'i byang chub tu mi bsngo'o/ /de dag kyang srid pa la chags pa dang / longs spyod la chags pa dang / sems zhum pa dang / /srid pa ni nye bar len pa'i phung po lnga rnams so/ /spyad par bya ba na/longs spyod de gzugs la sogs pa yul rnams so/ /de dag la rnam par chags pa ni chags pa'o/ /sems zhum pa ni sems rgya chung ba ste/ sangs rgyas nyid du ga la 'grub/ bdag lta bus ga la zhig ces bdag la mi srid par sems so/ /de la srid pa la chags pa dang /longs spyod la chags pas ni bde 'gror sems sngo bar byed do/ /sems zhum pas ni nyan thos kyi theg par sngo bar byed do/ /'di la sgrib pa gang zhe na/ srid pa dang / longs spyod la sred pa dang / le lo dang snying rje med pa'o/ /mi skrag pa'i sgrib pa gsum ni zhes bya ba la/mi skrag pa gang zhe na/ stong pa nyid dang sangs rgyas dang byang chub sems dpa'i chos zab cing rgya che ba la mos shing mi 'jigs pa'o/ /gang zag la mi srid snyam pa ni theg pa chen po'i tshul mngon par brjod pa'i gang zag la ma nor bar khong du chud cing 'chad pa dang /tshul khrims dang ting nge 'dzin dang / shes rab la sogs pa yon tan la yid mi ches pa'o/ /chos la mi mos pa ni sangs rgyas kyi gsung rab la tshul zab cing rgya che ba khong du chud par byed pa dang / don ma log pa'o zhes yid mi ches pa'o/ /don la sgra bzhin du spyod pa ni ma skyes pa dang /ma 'gags pa dang / gzod ma nas zhi ba la sogs pa'i don la sgra ji bzhin kho nar rtog par byed cing dgongs pa'i don gyi de kho na khong du mi chud pa ste/ de'i phyir ma skyes pa la sogs pa'i don la mi mos so/ /'di la sgrib pa gang zhe na/the tshom dang / shes rab dang / ting nge 'dzin gyi mi mthun pa'i phyogs su gyur pa mi shes pa dang / dgongs pa'i don la spyod pa mi mthun pa'i phyogs su gyur pa'o/ /ser sna med pa'i sgrib pa gsum ni zhes bya ba la/ ser sna med pa ni gang gis dam pa'i chos gnas par bya ba'i phyir ram/gzhan rjes su gzung ba'i phyir chos ston par byed pa'o/ /dam pa'i chos la ched cher mi 'dzin pa ni gces su mi 'dzin pa ste/ des gzhan gyi sems kyi rgyud la go bar mi byed pa dang / dam pa'i chos yun ring du gnas par mi byed pa'o//rnyed pa dang bkur sti dang mchod pa la ched cher mi 'dzin pa ni gces su mi 'dzin pa'o/ /dam pa'i chos la ched cher 'dzin kyang / bdag dang gzhan mtshungs sam lhag gi dogs te/ de'i phyir rnyed pa la sogs pa'i bar chad du 'gyur bas 'jigs nas chos mi 'chad pa'o//rnyed pa dang bkur sti la lhag par zhen pa med kyang sems can rnams la snying rje med pa zhes bya ba ni/ sems can rnams la snying rje med pas chos mi 'chad de/ snying rje med pa ni sems can gyi sdug bsngal gyi gnod par mi 'gyur ro/ /'di la sgrib pa gang zhe na/ched cher mi 'dzin pa dang / rnyed pa dang bkur sti la chags pa dang snying rje med pa'o/ /dbang gi sgrib pa gsum ni zhes bya ba la/ dbang ni sems kyi dbang rnam pa thams cad thob pas sangs rgyas nyid dbang ngo / /de'i sgrib pa gsum po dag mi shes pas de'i phyir/gang dag gis dbang byed pa mi 'thob pa ste zhes bya ba smos so/ /dbang byed pa ni sems kyi dbang la rag lus pa'i phyir/ /gang dag gis dbang byed pa mi 'thob pa de nyid dbang gis sgrib pa'o zhes brjod do/ /dbang byed pa ni ye shes dang spong ba dang mthu phun sum tshogs pa'o//yang na gang dag gis dbang byed pa mi 'thob pa zhes bya ba ni dbang gi rnam grangs su bstan pa ste/ sangs rgyas nyid mi 'thob ces bya ba'i tha tshig go/ /thos pas phongs pa ni dam pa'i chos nyan pa dang gtan du bral ba ste/ rtsa lag rnams dang gtan du bral ba la rtsa lag gis phongs pa'o zhes bya ba lta bu'o//thos pas phongs pa de yang chos kyis phongs par 'gyur ba'i las skyes pas 'gyur te/ rang gi lta ba mchog tu 'dzin pa la gnas pa'i phyir ram/ mi dge ba'i bshes gnyen la brten pa'i phyir/ 'gyod pa med pa gang dag gis theg pa chen po'i mdo sde la/'di ni bdud kyis smras pa dang / ngan song gi rgyu ste/ 'di ni sangs rgyas kyis gsungs pa ma yin no zhes spong ba dang / gzhan dag kyang de la mos pa bzlog pa dang / yi ger bris pa 'phyi ba dang / sreg pa dang chur skyur ba la sogs pa'i rnam pa rnams kyis dam pa'i chos nyan pa dang mi ldan pa'i las kyi sa bon yongs su gsos pas/dam pa'i chos kyis phongs par 'gyur ba'i las rab tu skye'o/ /thos pas phongs par ma gyur na yang thos pa nyung ste/ ye shes kyi tshogs yongs su ma rdzogs pas sgrib po zhes sbyar ro//thos pa nyung ba ni chos rab tu rnam par 'byed mi nus so/ /mang du thos par gyur kyang ting nge 'dzin yongs su sbyong ba ma byas pa nyid kyang sgrib po zhes sbyar ro/ /'dun pa la sogs pa las gang yang rung ba zhig med pa'i phyir ram/ spong ba'i 'du byed brgyad po dag las gang yang rung ba zhig med pas/bsgom pa yongs su ma rdzogs pa'i phyir ting nge 'dzin yongs su sbyang ba ma byas pa'o/ /yang na sangs rgyas kyi ting nge 'dzin rdo rje lta bu la sogs pa yongs su mi sgrub pa ni yongs su sbyang ba ma byas pa'o/ /'di la sgrib pa gang zhe na/chos kyis phongs par gyur pa'i las dang thos pa nyung ste/ 'chal pa'i shes rab dang ting nge 'dzin dang mi mthun pa'i bying ba dang rgod pa la sogs pa nye ba'i nyon mongs pa'o/ /sgrib pa 'di ni zhes bya ba ni sbyor ba med pa la sogs pa'o/ /dge ba la sogs pa zhes bya ba ni/dbang la thug gi bar du dngos po rnam pa bcu'o/ /don gang la byed rgyu rnam pa bcur 'gyur ba zhes bya ba ni skye ba la sogs pa nas/ 'thob pa la thug gi bar gyi don gang la sgrib pa de bzlog na/ sbyor ba la sogs pa nas ting nge 'dzin yongs su sbyang ba byas pa la thug pa rnams ni byed rgyu bcur 'gyur ro//'dir ni so so tha dad kyang skye ba la sogs pa'i rgyu nyid du khyad par med pa'i phyir bye brag med par bstan to/ /don de'i skabs kyis zhes bya ba ni skye ba la sogs pa'i don gyi dbang du byas zhes bya ba'i tha tshig ste/ 'di ltar dge ba la sogs pa de dag skye ba la sogs pa'i rgyu la gegs su gyur pa'i tshe na/skye ba la sogs pa la sgrib po zhes bya ste/ dper na rtsig pa la sogs pas snang ba bsgribs na/ de'i 'bras bu mig gi rnam par shes pa la yang sgrib po zhes bya ba lta bu'o/ /de ltar byas na chos bcu po de dag gi sgrib pa sum cu po bzlog na byed rgyu sum cu bstan pa yin no//de la dge ba skye ba'i byed rgyu gsum ni sbyor ba dang / skye mched la sbyor ba dang / tshul bzhin la sbyor ba'o/ /'di lta ste/ mig la sogs pa zhes bya ba ni 'dir dpe ste/ mig la sogs pa ni rnam par shes pa 'byung ba'i byed rgyu nyid yin gyi//gnas pa la sogs pa'i byed rgyu ni ma yin no/ /de la sbyor ba med pa la sogs pa sbyor ba la sogs pa la mngon du gegs su gyur pa na gcig nas gcig tu brgyud de dge ba skye ba la yang gegs byed pas de bzhin du skye ba la sgrib pa ni dge ba la sgrib pa ste/de'i phyir de bskyed par bya ba'i phyir ro zhes bya ba smos so/ /dge ba la gnas pa la sogs pa mi srid pas skye ba'i sgrib pa nyid yin no zhes ston to/ /byang chub la ni gnas pa'i byed rgyu yod de/ byang chub ni gnas gyur pa'o/ /de bzhin nyid dri ma med pa ni gnas pa'o//'dir rgyu smos pa/ mi 'khrugs pa'i phyir ro zhes bya ba'o/ /'jig rten ji srid pa de srid du gnas pas mi 'khrugs pa ste/ gzhan du mi 'gyur ba dang rnam par mi ldog pa'o/ /nyan thos la sogs pa'i byang chub ni bdag gi rgyu nyid kyi don byas nas rnam par ldog go//byang chub sems dpa' ni sems can thams cad la phan pa dang / bde bar bya ba'i lhag pa'i bsam pas tshogs rnams la 'jug pa na/ gnas par gyur pa'i mtshan nyid byang chub sems ji srid pa de srid du gnas par smon te/ nyan thos la sogs pa ltar mi skye ba tsam gyi phyir ni ma yin no/ /gnas pa ni skye ba med par mi 'gyur bas 'dir yang skye ba yod par 'gyur ro/ /de bas na byang chub kyi gnas pa'i byed rgyu nyid brjod kyi skye ba'i byed rgyu ni ma yin no/ /de ma gtogs par gzhan gnas pa'i byed rgyu med pas de'i phyir de nyid bshad do//yang na de bzhin nyid rnam par dag pa ni byang chub ste/ de bzhin nyid ngo bo nyid kyis rnam par dag pas skye ba med de/ glo bur gyi dri ma med par gyur na byed rgyu de dag gis gtan du gnas pa nyid ces brjod kyi skye ba ni ma yin no/ /byang chub kyi gnas pa'i byed rgyu ni dge ba'i rtsa ba skye ba dang /yid la byed pa dang tshogs yongs su rdzogs pa'o/ /'dir yang dge ba la mi skye ba la sogs pa ni/ dge ba skye ba la sogs pa'i gegs su gyur pas byang chub kyi gnas pa la gnod pa byed pa'i phyir gnas pa'i sgrib pa zhes bshad do//gnas pa'i byed rgyu ni dper na sems can rnams kyi zas gzhi lta bu'o zhes bya ba ni/ 'dir dpe'o/ /kham gyis za ba'i zas la sogs pa sngan med pa'i sems can skyed par byed pa ni ma yin gyi/ sngar skyes pa rnams gnas par byed pa nyid do/ /rten pa'i byed rgyu zhes bya ba la rten ni byang chub kyi sems te/dge ba'i chos thams cad kyi gzhir gyur pa'i phyir ro/ /gang gi gnas su gang gyur pa de ni de'i rten te/ 'dis 'dzin pas dper na sems can gyi 'jig rten gyi snod kyi 'jig rten lta bu'o zhes bya ba ni 'dir dpe'o/ /de'i byed rgyu ni rigs dang bshes gnyen phun sum tshogs pa dang /sems yongs su mi skyo ba'o/ /de la rigs dang mi ldan pa la sogs pa ni rten pa'i byed rgyu dang 'gal bas rten la yang sgrib par bshad do/ /de'i phyir rten gyi sgrib pa ni yang dag par 'dzin pa la sgrib ste/ byang chub kyi sems rgyur gyur pa'i phyir ro zhes bya ba smos so//gsal ba'i byed rgyu ni blo ldan byang chub sems dpa'i sgrib pa ste/ rab tu bstan par bya ba'i phyir ro/ /de yang sgrub pa phun sum tshogs pa dang / skye bo rung ba dang 'grogs pa dang / skye bo gnod par mi sems pa dang 'grogs pa'o//'dir sgrub pa dang mi ldan pa la sogs pa ni blo ldan gsal ba'i byed rgyu dang 'gal bas gsal ba'i sgrib pa zhes bya ste/ de'i phyir gsal ba la sgrib pa ni blo dang ldan pa la sgrib pa ste/ de bstan par bya ba'i phyir ro zhes bya ba smos so/ /dper na gzugs kyi snang ba lta bu'o zhes bya ba ni 'dir dpe'o//snang ba ni gzugs 'ba' zhig gsal ba'i byed rgyu nyid yin te/ skye ba la sogs pa'i byed rgyu ni ma yin no/ /'gyur ba'i byed rgyu ni 'khrul ba med pa'i rgyu ste/ sgro 'dogs pa dang skur pa 'debs pa 'khrul pa ldog pa'i bdag nyid yin pas 'khrul pa med pa ni mthong ba'i lam mo//'khrul pa med pa'i 'gyur ba zhes bya ba ste/ dper na shing sha pa la sogs pa'i thal ba la sogs pa lta bu'o/ /de'i byed rgyu gsum ni phyin ci log gi gnas ngan len bcom ba dang / nyon mongs pa la sogs pa'i sgrib pa gsum med pa dang /rnam par grol ba yongs su smin par byed pa'i shes rab yongs su smin pa'o/ /dper na btso ba la sogs pa'i me la sogs pa lta bu'o zhes bya ba ni 'bras chan la sogs pa dang mi 'dra ba ste/ de'i rgyud du gtogs pa'o/ / 'bras la sogs par 'gyur ro zhes bya ba de'i byed rgyu ni me la sogs pa'o/ /'bral ba'i byed rgyu ni sgrib pa med pa'i rgyu ste/ mthong ba'i lam gyis spang bar bya ba'i sgrib pa las lhag ma dag 'dis spong bas sgrib pa med pa ni bsgom pa'i lam mo/ /de'i byed rgyu gsum ni lhan cig skyes pa'i gnas ngan len bcom pa dang /brtson 'grus dang bag yod pa'o/ /de dag kyang 'bral ba'i byed rgyu ste/ mi 'bral ba'i byed rgyu'i gnyen po yin pa'i phyir ro/ /de'i phyir 'bral ba la sgrib pa ni sgrib pa med pa la sgrib ste zhes bya ba smos so//de yang 'bral ba'i byed rgyu'i gnyen po'i dngos por sgrib ste/ 'dir rgyu smos pa/ de sgrib pa dang bral ba'i phyir ro zhes bya ba'o/ /'dis 'bral bar byed pas 'bral ba'o/ /bsgyur ba'i byed rgyu ni bsngo ba'i rgyu ste/ des dge ba'i rtsa ba byang chub chen por sbyor ba'i mtshan nyid kyi phyir ro//de yang srid pa dang longs spyod las phyir phyogs pa dang sems zhum pa med pa'o/ /de'i phyir bsgyur ba ni byed rgyu'i gegs ni bsngo ba'i sgrib par blta bar bya'o/ /ci'i phyir zhe na bsngo ba ni byang chub chen por sems yongs su bsngo ba'i mtshan nyid kyi phyir ro zhes bya ba ni/yid ches pa'i byed rgyu ni mi skrag pa'i rgyu ste/ de yang gang zag la srid do snyam pa dang / chos la mos pa dang / dgongs pa'i don khong du chud pa'o/ /chos de rnams kyi yid ches par 'gyur bas de'i phyir yid ches pa'i byed rgyu'i gegs yin pas yid ches pa la sgrib pa ni mi skrag pa la sgrib ste/'dir rgyu smos pa/ yid mi ches pas skrag pa'i phyir ro zhes bya'o/ /yid mi ches pas ni chos la skrag par 'gyur ro/ /yid ches par byed pa'i byed rgyu ni/ ser sna med pa'i rgyu ste/ de ni dam pa'i chos cher 'dzin pa dang rnyed pa dang bkur sti dang /mchod pa la mi lta ba dang / sems can rnams la snying rje ba'o/ /yid ches par byed pa'i rgyu dang 'gal bas yid ches par byed pa la sgrib pa ni/ ser sna med pa la sgrib par rnam par gzhag ste/ 'dir rgyu smos pa chos la ser sna med pas gzhan yid ches par byed pa'i phyir ro zhes bya ba'o//dam pa'i chos ched cher mi 'dzin pa la sogs pas chos la ser sna byed par 'gyur ro/ /chos la ser sna byed pas kyang gzhan rnams la chos 'chad par mi byed pas de'i phyir/ yid ches par byed pa la sgrib pas ni ser sna med pa la sgrib pa'o//'thob pa'i byed rgyu gsum ni chos kyis phongs par 'gyur ba'i las med pa dang / mang du thos pa dang ting nge 'dzin yongs su sbyong bar byas pa'o/ /de dang 'gal bas thos pas phongs pa la sogs pa ni dbang gi sgrib par rnam par gzhag ste/ 'dir rgyu smos pa/ dbang de la dbang byed pa 'thob pa'i mtshan nyid kyi phyir ro zhes bya ba'o/ /kha cig na re dge ba la sogs pa'i go rims kyi rgyu ni 'di lta bu ste/ dge ba'i chos kyi sems kyi rgyud nye bar bstan pas byang chub 'thob pa'i skal ba yod de/ de'i phyir thog mar dge ba bshad do/ /de'i 'og tu byang chub bshad do//byang chub kyi sems ni chos dge ba'i chos thams cad kyi gzhir gyur pas byang chub kyi sems la brten nas/ byang chub la thug gi bar du de gnyi ga sgrub nus par 'gyur te/ de'i phyir de'i 'og tu byang chub kyi sems bshad do/ /byang chub kyi sems bskyed nas pha rol tu phyin pa drug la rab tu sbyor ba dang /skye bo ngan pa dang skye bo sdang ba yongs su spong ste/ de ltar 'di'i byang chub sems dpa'i dngos po bstan pa yin no/ /de'i phyir yang dag par 'dzin pa'i 'og tu blo dang ldan pa bshad do/ /de ltar rab tu sbyor ba na phyin ci log spong zhing phyin ci log med pa'i ye shes kyang skyed par byed de/de'i phyir blo ldan gyi 'og tu 'khrul pa med pa bshad do/ /de ni mthong ba'i lam ste/ de la goms pas sgrib pa rnams spong bas de'i phyir/ de'i 'og tu sgrib pa spong ba'i sgrib pa med pa bshad do//sgrib pa med na srid pa dang longs spyod la chags pa med pa'i phyir/ sangs rgyas nyid du yid kyis yongs su sngo bar byed kyi gzhan du ma yin no/ /de'i phyir de'i 'og tu bsngo ba bshad do/ /de lta bur ni sangs rgyas kyi chos shin tu zab mo rnams la mchog tu dga' ba skye ste/mi skrag pas de'i phyir de'i 'og tu mi skrag pa bshad do/ /de ltar chos mngon sum du gyur pa thabs gang dang gang gis sems can 'dul bar mthong ba'i thabs de dang de la brten pas/ de la ser sna 'byung bar ga la 'gyur bas/ mi skrag pa'i 'og tu ser sna med pa bshad do//de ltar sgrib pa spangs pa dang dkar po'i chos rnams yongs su rdzogs pa'i byang chub sems dpa' ni sems la dbang bar 'gyur bas de'i phyir de'i 'og tu dbang bshad de/ go rims ni 'di'o zhe'o/ /le'ur bcad pa 'dir sgrib pa'i skabs yin pas de'i phyir dge ba la sogs pa'i skye ba'i byed rgyu rnams ni/sgrib pa bzhin du mdor mdzad pas skabs nas 'byung ba rnams bar gyi tshigs su bcad pas sdud par mdzad do/ /byed rgyu bcu ni skye ba dang / /gnas pa brten dang bstan bya dang //'gyur dang 'bral dang gzhan du dang / /yid ches go byed 'thob rnams la/ /de ni dper brjod bsdu ba'i phyir/ /bar gyi tshigs bcad gnyis pa ste/ /mig dang zas sam mar me dang / /me la sogs pa de yi dpe/ /zor ba bzo shes du ba dang / /rgyu dang lam la sogs pa gzhan//zhes bya ba'o/ /phyogs dang pha rol phyin sa la/ /sgrib pa dag ni gzhan yin no/ /sngar ni dge ba dang de'i sgrib pa bye brag tu ma phye bar bshad do/ /da ni phyogs dang zhes bya ba la sogs pa'i bye brag dang thun mong dang thun mong ma yin pa'i bye brag gis ni dge ba bshad do//gzhi la mi mkhas le lo dang / /zhes bya ba la sogs pa'i bye brag gis ni phyogs la sogs pa'i dge ba la sgrib pa bshad do/ /der gtogs pas nyan thos dang byang chub sems dpa' gnyi ga'i bya ba bye brag med pa'i phyir/ de la byang chub kyi phyogs ni thun mong ba'o//pha rol tu phyin pa dang sa rnams ni byang chub sems dpa' rnams kyi bya ba thun mong ma yin pa ste/ byang chub sems dpa' rnams nyid de la lhag par byed pa'i phyir ro/ /sngar ni dge ba la sogs pa'i rgyu la sgrib pa'i sgo nas 'bras bu la sgrib par bshad do//'dir ni 'bras bu la dngos su sgrib pa nyid de/ de bas na snga ma las gzhan zhes bya ba'o/ /yang na sbyor ba med pa la sogs pa las gzhi la mi mkhas pa la sogs pa gzhan nyid de/ de gzhan zhes bya ba'o/ /yang na dge ba dang byang chub ces bya ba ni/'dir byang chub sems dpa' nyid kyi thabs dang bcas pa'i spyod pa dang / 'bras bu la sbyor ba med pa la sogs pa sgrib po zhes bshad do/ /'dir ni byang chub kyi phyogs la sogs pa rnam par 'byed pas/ gzhi la mi mkhas pa la sogs pa ni/ sbyor ba med pa la sogs pa las/dge ba thun mong dang thun mong ma yin pa'i sgrib pa gzhan du rig par bya'o/ /de la nyan thos la sogs pa tha dad pas byang chub gsum ste/ de dag dang mthun pas dran pa nye bar gzhag pa la sogs pa nas lam la thug gi bar dag ni byang chub kyi phyogs rnams zhes bya'o//pha rol tu phyin pa bcu dang / sa bcu rnams ni mdo las ji skad 'byung ba bzhin no/ /gzhi la mi mkhas pa ni dran pa nye bar gzhag pa rnams la sgrib po zhes bya ba la/ de dag ni lus dang / tshor ba dang / sems dang / chos dran pa nye bar gzhag pa dang bzhi'o//de dag gi gzhi ni lus dang tshor ba dang sems dang chos rnams te/ de'i yul yin pa'i phyir ro/ /de la gnas su mngon par zhen pa'i gzhi ni lus so/ /bdag gi longs spyod du mngon par zhen pa'i gzhi ni tshor ba'o/ /bdag tu mngon par zhen pa'i gzhi ni sems so//bdag kun nas nyon mongs pa dang rnam par byang bar mngon par zhen pa'i gzhi ni chos rnams so/ /lus la sogs pa'i rang dang spyi'i mtshan nyid khong du ma chud pa gang yin pa de ni de la mi mkhas pa'o/ /de la lus kyi rang gi mtshan nyid ni mi gtsang ba du ma'i rdzas 'dus pa'i bdag nyid do//tshor ba'i ni bde ba la sogs pa'i rang bzhin no/ /rnam par shes pa ni yul las so sor rnam par rig pa'o/ /chos rnams kyi ji ltar mthun mthun du sbyar ro/ /spyi'i mtshan nyid ni mi rtag pa dang sdug bsngal ba dang / stong pa dang bdag med pa'i rnam pa'o//yang na lus la sogs pa la mi gtsang ba dang / sdug bsngal ba dang mi rtag pa dang / bdag med pa'i rnam par ma rtogs pa'am/ gtsang ba dang bde ba dang rtag pa dang / bdag gi rnam par rtog pa ni gzhi la mi mkhas pa ste/ 'di ltar mi shes pa'am/lta ba ni dran pa nye bar gzhag pa rnams la sgrib pa'o/ /dran pa nye bar gzhag pa rnams ni shes rab dang dran pa'i rang bzhin yin na/ ci'i phyir gzhi la mi mkhas pa ni sgrib pa zhes brjod kyi/ gzhi mi dran pa ni ma yin zhe na/ shes rab kyi kha na las te 'byung ba'i phyir ro//'di ltar shes rab ni mthong ba'i bdag nyid kyi phyir te/ shes rab kyi rjes las thob pa'i dmigs pa la dran pa la sogs pa rab tu 'jug gi/ shes rab bzhin du rang gi rgyud yod pa ni ma yin te/ de'i phyir mi dran pa ni sgrib pa zhes mi bshad do/ / le lo ni yang dag par spong ba rnams la sgrib bo/ /brtson 'grus kyi mi mthun pa'i phyogs skyes pa dang ma skyes pa spong ba dang / mi skyed pa dang / gnyen po skyes pa dang / ma skyes pa phyir zhing 'byung ba dang / skyed pa'i phyir 'jug pa ni yang dag par spong ba zhes bya ba'i ming 'thob bo//de ni dbyer med kyang 'bras bu tha dad pa'i phyir rnam pa bzhir gzhag go/ /de bas na yang dag par spong ba rnams brtson 'grus kyi bdag nyid yin pas le lo ni sgrib par bshad do/ /gnyis kyis ting nge 'dzin nyams pa dang zhes bya ba ni/ rdzu 'phrul gyi rkang pa rnams la sgrib po/ / 'dis rdzu 'phrul byed pas rdzu 'phrul te/ de yang 'dun pa dang / brtson 'grus dang / sems dang / dpyod pa'i ting nge 'dzin to/ /de nyid rdzu 'phrul gyi rkang pa ste/ nam mkha' la 'gro ba dang / sprul pa la sogs pa rdzu 'phrul gyi gnas su gyur pa'i phyir ro/ /yang na 'gro bas rdzu 'phrul te/nam mkha' la 'gro ba la sogs pa 'byor pa zhes bya ba'i tha tshig go/ /de'i rkang pa ni rdzu 'phrul gyi rkang pa ste/ de'i gzhi yin pa'i phyir ro/ /'dun pa'i ting nge 'dzin la sogs pa rnam pa bzhi po de nyid ni ting nge 'dzin to/ /de la 'dun pa'i ting nge 'dzin la 'dun pa gtso bo ste/de'i sgo nas ting nge 'dzin 'thob pa'i phyir ro/ /brtson 'grus la sogs pa yang de na med pa ni ma yin te/ 'dun pa'i grogs byed pa'i phyir/ de dag ni der gtso bo ma yin pas de dag mi bshad do/ /de bzhin du brtson 'grus dang / sems dang dpyod pa'i ting nge 'dzin rnams kyang brjod par bya'o//gnyis kyis ting nge 'dzin nyams pa sgrib par bshad pa de mi shes te/ de'i phyir 'dun pa dang / brtson 'grus dang sems dang / dpyod pa rnams las gang yang rung ba zhig ma tshang ba yongs su ma rdzogs pa dang / spong ba'i 'du byed bsgom pa ma tshang bas zhes bya ba smos so//de la 'dun pa dang brtson 'grus dang / sems dang / dpyod pa de dag las gang yang rung ba zhig ma tshang bas yongs su bskang ba nyams te/ de'i dbang gis ting nge 'dzin med pa'i phyir ro/ /sgom pa nyams pa ni spong ba'i 'du byed brgyad po dag las ma tshang ba'i phyir ro//de dag ni dad pa dang / 'dun pa dang / brtson 'grus dang / shin tu sbyangs pa dang / dran pa dang / shes bzhin dang / sems pa dang / btang snyoms kyi bdag nyid do/ /spong ba'i 'du byed 'di dag bsgoms na ting nge 'dzin la dbang thob ste/gzhan du ma yin no/ /de bas na de dag ma tshang na sgom pa nyams pa zhes bya ste/ ting nge 'dzin la dbang mi thob po/ /'di la sgrib pa gang zhe na/ 'dun pa la sogs pa'i mi mthun pa'i phyogs dang spong ba'i 'du byed kyi mi mthun pa'i phyogs nye ba'i nyon mongs pa'o/ / 'di lta ste/ le lo dang / dmigs pa brjed pa dang / bying ba dang / rgod pa dang / 'du mi byed pa dang / 'du byed pa'o/ /thar pa'i cha dang mthun pa rnams mi skyed pa ni dbang po rnams la sgrib po zhes bya ba ni 'khor bas skrag ste/ thar pa'i dbang du byas nas dge ba'i rtsa ba gang mngon par 'du byed pa des thar pa rnyed par nges pas/thar pa'i cha dang mthun pa zhes bya'o/ /de bskyed na dad pa la sogs pa dbang po'i ming 'thob par 'gyur te/ gzhan du ma yin pas thar pa'i cha dang mthun pa mi skyed pa ni dbang po rnams la sgrib par bshad do/ /de la sgrib pa gang zhe na/nye ba'i nyon mongs pa gang gis thar pa'i cha dang mthun pa mi skyed pa ste/ de ni yang srid pa la chags pa dang / mya ngan las 'das pas 'jigs pa'o/ /dbang po de dag gi nyam chung ba ni stobs rnams la sgrib po/ /dbang po rnams kyi nyam chung ba ji lta bu zhe na/de'i phyir mi mthun pa'i phyogs dang 'dre ba'i phyir ro zhes bya ba smos te/ mi mthun pa'i phyogs ma dad pa dang / le lo dang / brjed ngas pa dang / g.yeng ba dang 'chal ba'i shes rab kyi bdag nyid kyis zil gyis mi gnon zhes bya ba'i tha tshig go/ /dro bar gyur pa dang /rtse mos rab tu phye ba dag ni dbang po rnams so/ /nges par 'byed pa'i cha dang mthun pa rnam pa gnyis po 'di ni mi mthun pa'i phyogs ma dad pa la sogs pas zil gyis non pa'i phyir nyam chung ba ste/ de'i phyir 'di las yongs su nyams pa srid do/ /mi mthun pa'i phyogs thul bas bzod pa dang 'jig rten pa'i chos kyi mchog gi dus na dad pa la sogs pa stobs kyis ming 'thob po//de'i phyir dad pa la sogs pa de dag nyid dro bar gyur pa dang / rtse mo'i dus na mi mthun pa'i phyogs kyis zil gyis non nas nyam chung ba gang yin pa de ni stobs rnams la sgrib ste/de yod na stobs kyi bye brag mi srid do/ /'di la sgrib pa gang zhe na/ ma dad pa la sogs pa mi mthun pa'i phyogs de nyid do/ /lta ba'i nyes pa ni byang chub kyi yan lag rnams la sgrib po/ /byang chub ni 'dir mthong ba'i lam la dgongs pa ste/ de'i dran pa dang /chos rnam par 'byed pa dang / brtson 'grus dang / dga' ba dang / shin du sbyangs pa dang / ting nge 'dzin dang / btang snyoms kyi bdag nyid byang chub kyi yan lag bdun po de dag ni mthong bas spang bar bya ba'i nyon mongs pa spong ba'i dus na 'byung bas yan lag rnams zhes bya'o//gal te byang chub dang mthun pas yan lag tu 'gyur ro zhe na/ de lta na ni dran pa nye bar gzhag pa rnams kyang byang chub kyi yan lag nyid du thal bar 'gyur ro/ /lta ba'i nyes pa ni byang chub kyi yan lag rnams la sgrib po zhes bya ba de ji lta zhe na/ de'i phyir de dag mthong ba'i lam gyis rab tu phye ba'i phyir ro zhes bya ba smos te/mthong ba'i lam du rnam par gzhag pa'i phyir ro zhes bya ba'i tha tshig go/ /lta ba'i nyes pa 'di gang zhe na/ kun brtags pa'i lta ba rnam pa lnga dang / the tshom dang ma rig pa dang / de la dmigs pa'i 'dod chags la sogs pa nyon mongs pa dang nye ba'i nyon mongs pa mtshungs par ldan pa dang bcas pa rnams so//the tshom la sogs pa yang 'dir sgrib pa ma yin nam zhe na/ sgrib pa yin du zin kyang 'dir gtso bor brjod par bzhed pas lta ba'i skyon smos pa'i phyir de dag ma smos kyang 'gal ba med do/ /lta ba la sogs pa de rnams kyi sa bon kun gzhi rnam par shes pa la gnas pa nyid mthong ba'i lam gyis spong ba'i phyir de'i sgrib pa zhes bya'o//gnas ngan len gyi nyes pa ni lam gyi yan lag yang dag par lta ba dang / rtog pa dang / ngag dang / las kyi mtha' dang / 'tsho ba dang /rtsol ba dang / dran pa dang / ting nge 'dzin rnams la sgrib ste/ 'dir rgyu smos pa/ lam gyi yan lag de dag bsgom pa'i lam gyis rab tu phye ba'i phyir ro zhes bya ba ste/ bsgom pa'i lam la rnam par gzhag pa'i phyir ro/ /gnas ngan len gyi nyes pa de gang zhe na/ rgyas par bya ba na ni 'jig tshogs dang mthar 'dzin pa'i lta ba lhan cig skyes pa mtshungs par ldan pa dang bcas pa dang de la yang dmigs pa yul la yang dmigs pa 'dod chags la sogs pa nyon mongs pa dang nye ba'i nyon mongs pa mtshungs par ldan pa dang bcas pa rnams te/de dag gi sa bon kun gzhi rnam par shes pa la gnas pa gang yin pa de ni gnas ngan len to//mdor bsdu na ni mthong bas spang bar bya ba las gzhan pa zag pa dang bcas pa ste/ de'i nus pa kun gzhi rnam par shes pa la gnas pa ni gnas ngan len to/ /de ni bsgom pa'i lam gyis spang bar bya ba yin pas lam gyi yan lag gi sgrib par rnam par gzhag go//byang chub kyi phyogs rnams la sgrib pa ni bshad zin to/ /de'i 'og tu pha rol tu phyin pa rnams kyi bshad dgos pas de'i phyir/ pha rol tu phyin pa rnams la sgrib pa ni/ phyug po dang ni bde 'gro dang / /sems can mi gtong sgrib pa dang //zhes rgya cher smos so/ /'di la pha rol tu phyin pa bcu po dag gi pha rol tu phyin pa gang gi 'bras bu gang yin pa de la sgrib pas de'i sgrib pa zhes brjod pa yin no/ /'di la ser sna la sogs pa sbyin pa la sogs pa la dngos su gegs byed pa bzhin du ci'i phyir de'i 'bras bu la sgrub par brjod la/pha rol tu phyin pa rnams la sgrib par ni ma bshad ce na/ de'i 'bras bu'i don du sbyin pa la sogs pa la thams cad 'jug ste/ de bas na ser sna la sogs pa spang bar nan tan bskyed pa'i phyir 'bras bu la sgrib par bshad de/pha rol tu phyin pa rnams la sgrib par ni ma yin no/ /yang na ser sna la sogs pa sgrib pa phyug po la sogs pa'i mi mthun pa'i phyogs su gyur pa dbul po la sogs pa'i 'bras bu bskyed pa na phyug po la sogs pa'i 'bras bu la gegs byed pas de'i sgrib pa zhes bya'o//de dag gi 'bras bu gang zhe na/ de la sbyin pa'i pha rol tu phyin pa'i 'bras bu ni gtso bor ni phyug po dang bdag po'o/ /tshul khrims kyi pha rol tu phyin pa'i 'bras bu ni bde 'gro'o/ /bzod pa'i pha rol tu phyin pa'i 'bras bu ni sems can yongs su mi gtong ba'o/ / brtson 'grus kyi pha rol tu phyin pa'i 'bras bu ni nyes pa dang yon tan 'bri ba dang 'phel ba'o/ /bsam gtan gyi pha rol tu phyin pa'i 'bras bu ni bstan pa la sems can 'dzud pa'o/ /shes rab kyi pha rol tu phyin pa'i 'bras bu ni btsud pa de rnams rnam par grol bar byed pa'o/ / thabs la mkhas pa'i pha rol tu phyin pa'i 'bras bu ni byang chub tu yongs su bsngo bas dge ba mi zad pa'o/ /smon lam gyi pha rol tu phyin pa'i 'bras bu ni dge ba rgyun mi 'chad pa'o/ /stobs kyi pha rol tu phyin pa'i 'bras bu ni dge ba'i chos nges par 'byed pa'o/ /ye shes kyi pha rol tu phyin pa'i 'bras bu ni chos la longs spyod pa dang sems can yongs su smin par byed pa'o//phyug po dang bdag po la sgrib ces bya ba la/ de la phyug po ni nor dang yo byad mang ba'o/ /bdag po ni longs spyod de la dbang ba'o/ /de gnyi ga la sgrib pa ni sbyin pa'i pha rol tu phyin pa'i sgrib pa ste/ de'i 'bras bu yin pa'i phyir ro//de gang zhe na ser sna'o/ /bde 'gro la sgrib ces bya ba la/ mdzes par 'gro ba ni bde 'gro ste mi dang lha'o/ /de la sgrib pa ni tshul khrims kyi pha rol tu phyin pa'i sgrib pa ste/ de'i 'bras bu yin pa'i phyir ro/ /de ni 'chal ba'i tshul khrims te/ lus dang ngag gi las ngan pa'o//sems can yongs su mi gtong ba zhes bya ba ni sems can gnod par byed pa la yang phan 'dogs pa bzhin du 'dzin pa ste/ de yang bzod pa'i pha rol tu phyin pa'i 'bras bu'o/ /de'i sgrib pa ni khro ba'o/ /nyes pa dang yon tan 'bri zhing 'phel ba zhes bya ba la/ bdag dang gzhan la gnod pa rab tu zhugs pa skyes pa rnams spong ba dang /ma skyes pa rnams mi skyed pa ni nyes pa rnams 'bri ba'o/ /bdag dang gzhan la phan par zhugs pa skyes pa rnams phyir zhing 'byung ba dang / ma skyes pa rnams skyed pa ni yon tan rnams 'phel ba'o/ /'di la sgrib pa gang zhe na le lo'o//'dul ba 'dzud pa la sgrib ces bya ba la/ 'dul ba rnams bstan pa la 'dzud pa ni mtho ris dang / byang grol rnyed pa'i rgyur khas len pa'i phyir ro/ /nye bar zhi bas gus pa skye ste sems can kun brjod pa dang / rdzu 'phrul gyis bsgrib mi dgos par bstan pa rtogs par byed do//'di la sgrib pa ni g.yeng ba'o/ /rnam par grol bar byed pa la sgrib ces bya ba la rnam par grol bar byed pa ni nyon mongs pa spong ba ste/ de yang rjes su bstan pas 'gyur ro/ /rjes su bstan pa ni shes rab kyis te/ gzhan gyis ma yin no/ /de'i phyir shes rab kyi pha rol tu phyin pa'i 'bras bu ni rnam par grol bar byed pa'o//de'i sgrib pa ni nyon mongs pa can gyi shes rab bam/ gti mug gam/ 'chal pa'i shes rab po/ /sbyin pa la sogs pa mi zad pa la sgrib ste zhes bya ba ni sbyin pa dang / tshul khrims la sogs pa mi zad pa la sgrib pa gang yin pa de ni/thabs kyi pha rol tu phyin pa'i sgrib pa'o/ /sbyin pa la sogs pa de yang ji ltar mi zad par 'gyur zhe na/ de'i phyir/ byang chub tu yongs su bsngo bas de mi zad pa'i phyir ro zhes bya ba smos so/ /byang chub chen por yongs su bsngos pa'i sbyin pa la sogs pa'i dge ba'i rtsa ba ni sangs rgyas nyid bzhin du zad par mi 'gyur ro//kha cig na re de'i sgrib pa ni byang chub chen por yongs su bsngo ba'i mtshan nyid kyi thabs mi shes pa'o zhe'o/ /gzhan dag na re thabs mi mkhas pa 'khor gsum du 'dzin pa ni de'i sgrib pa'o zhe'o/ /tshe rabs thams cad du dge ba rgyan mi 'chad par 'byung ba la sgrib ces bya ba la/dge ba rgyun mi 'chad pa ni nyin re'am skad cig re re la ste/ de yang smon lam gyi pha rol tu phyin pa'i 'bras bu'o/ /ji lta zhe na/ de'i phyir smon lam gyi dbang gis de dang mthun pa'i skye ba yongs su 'dzin pa'i phyir ro zhes bya ba smos so//smon lam gyi dbang gis sbyin pa la sogs pa rgyun mi 'chad par 'byung ba dang mthun pa'i skye ba yongs su 'dzin to/ /de la sgrib pa ni sbyin pa la sogs pa dang mthun par smon lam mi 'debs pa'o/ /dge ba de nyid nges par byed pa la sgrib ces bya ba ni nyin re'am skad cig re re la gcig tu byed pa ni nges par byed pa'o//'dir rgyu smos pa/ so sor brtags pa dang bsgoms pa'i stobs kyis mi mthun pa'i phyogs kyis zil gyis mi gnon pa'i phyir ro zhes bya ba'o/ /de la so sor brtags pa'i stobs ni bstan pa dang ldan pa'i shes rab bo/ /brtan pa ni btags pa'i chos te/brtson 'grus dang / ting nge 'dzin dang / shes rab gsum lhan cig skyes pa la btags pa'i phyir ro/ /bsgom pa'i stobs ni goms pa dang ldan pas bsgrim mi dgos par sbyin pa la sogs pa la 'jug pa'i phyir/ de'i gnyen po ser sna la sogs pas zil gyis mi non pa'i phyir ro//'di la sgrib pa gang zhe na/ so sor ma brtags pa dang bsgom pa nyam chung ba'o/ /bdag dang gzhan chos la longs spyod pa dang yongs su smin par byed pa la sgrib ces bya ba ni longs spyod pa'i 'khor gyi dkyil 'khor du rnam par gnas te/ theg pa chen po'i chos zab cing rgya che ba la longs spyod pa dang /sprul pa rnam pa sna tshogs kyi las kyis chos ston pas sems can yongs su smin par byed pa ni 'bras bu'o/ /de'i sgrib pa ni thos pa'i don la sgra ji bzhin du spyod pa dang / shes rab chung ba ni sgrib po zhes bya'o/ /'di la rdzas su ni pha rol tu phyin pa drug go/ming du ni bcu ste/ pha rol tu phyin pa bzhi ni shes rab kyi pha rol tu phyin pa las rab tu phye ba'i phyir ro/ /de la shes rab kyi pha rol tu phyin pa ni 'jig rten las 'das pa rnam par mi rtog pa'i ye shes te/ ye shes des sgrib pa thams cad rim gyis spang ngo / /thabs dang / smon lam dang / stobs dang / ye shes kyi pha rol tu phyin pa ni 'jig rten las 'das pa'i lam gyi rjes las thob pa'i ye shes kyis bsdus so/ /ye shes kyi pha rol tu phyin pa mchog yin na ji ltar rnam par mi rtog pa ma yin zhe na/ ye shes kyi pha rol tu phyin pa na rnam par mi rtog pa'i ye shes kyi rjes las thob pa'i ye shes te/ye shes des khong du chud pa yongs su bcad nas bdag nyid kyang chos la longs spyod pa rab tu myong la/ gzhan dag kyang yongs su smin par byad pa yin te/ 'di gnyi ga yang rnam par mi rtog pa la med pas de'i phyir ye shes kyi pha rol tu phyin pa ni rnam par mi rtog pa ma yin no//pha rol tu phyin pa rnams kyi sgrib pa ni bshad zin to/ /de'i 'og tu sa rnams kyi brjod dgos pas de'i phyir/ sa rnams la yang go rims bzhin te/ kun du 'gro don mchog gi don/ /zhes rgya cher smos so/ /de la sa ni bcu ste/rab tu dga' ba dang / dri ma med pa dang / 'od byed pa dang / 'od 'phro can dang / shin tu sbyang dka' dang / mngon du gyur pa dang / ring du song ba dang / mi g.yo ba dang / legs pa'i blo gros dang / chos kyi sprin no/ /de la chos kyi dbyings la kun tu 'gro ba la sogs pa'i don du khong du chud pa'i gnas skabs kyi khyad par rnams ni gong nas gong du khong du chud pa'i gnas pa'i tshul dang /de las skyes pa'i yon tan gyi gzhi'i tshul gyi sa rnams zhes bya'o/ /gzhan dag na re chos kyi dbyings kun du 'gro ba la sogs pa'i don la gnas pa gang dang gang gis byang chub sems dpa' mang du gnas pa'i gnas pa de dang de la gnas pa'i phyir sa zhes bya'o zhe'o//sa rnams kyi rnam par gzhag pa ni rab tu dga' ba la mthong ba'i lam skye ba'i phyir byang chub sems dpa' chos mngon par rtogs so/ /chos mngon par rtogs nas dri ma med pa la rang gi ngang gis 'byung ba lhag pa'i tshul khrims bslab pa'i khyad par sgrub ste/ltung ba phra mo'i 'chal ba'i tshul khrims thams cad dang bral ba'i phyir ro/ /'od byed pa la ni tshe rabs gzhan du yang chos las mi nyams pa lhag pa'i sems bslab pa'i khyad par sgrub po//'od 'phro can dang / shin tu sbyang dka' dang / mngon du gyur la ni byang chub kyi phyogs dang bden pa dang / rten cing 'brel par 'byung ba la dmigs pa lhag pa'i shes rab bslab pa'i khyad par sgrub pa'o/ /sa lhag ma rnams la ni bslab pa de dag nyid kyi 'bras bu rnam pa bzhir rig par bya'o//de la ring du song ba rnams la ni 'bad pa dang bcas par mtshan ma med pa'i ye shes la gnas pa sgrub po/ /mi g.yo ba la ni lhun gyis grub par mtshan ma med pa'i ye shes la gnas pa zhing rnam par dag pa dang lhan cig sgrub bo//legs pa'i blo gros la ni so so yang dag par rig pa yon tan gyi khyad par gang gis chos smra bar 'gyur ba sgrub po/ /chos kyi sprin la ni ting nge 'dzin dang / gzungs kyi yon tan gyi khyad par sgrub po/ /kun du 'gro ba la sogs pa chos kyi dbyings rnam pa bcu la zhes bya ba ni chos kyi dbyings la byang chub sems dpa'i sa bcu rnams kyis kun du 'gro ba la sogs pa'i don gang yin pa khong du chud par byed pa'o//de la nyon mongs pa can ma yin pa'i mi shes pa gang yin pa de ni byang chub sems dpa'i sa bcu la rnam pa bcur go rims bzhin du sgrib ste/ de'i mi mthun pa'i phyogs su gyur pa'i phyir ro zhes bya ba ni sa'i mi mthun pa'i phyogs yin pa'i phyir ro/ /sa rnams ni 'jig rten las 'das pa'i ting nge 'dzin dang / shes rab la sogs pa'i gnas skabs kyi khyad par gyi bdag nyid de/ de dag skye ba'i gegs byed pa'i phyir nyon mongs pa can ma yin pa'i mi shes pa ni mi mthun pa'i phyogs so//de la nyon mongs pa can ma yin pa'i mi shes pa kho na sgrib par ma zad kyi/ nyon mongs pa dang nye ba'i nyon mongs pa dag kyang yin no/ /'di ltar rab tu dga' ba la ni mthong ba'i lam gyis spang bar bya ba thams cad sgrib ste/'di ltar kun du 'gro ba'i don khong du chud par byed pa mthong ba'i lam gyi bden pa rnams la log par rtog pa'i bag la nyal ba thams cad spong ba'i phyir ro/ /bsgom pas spang bar bya ba rnams ni sa lhag ma rnams kyis spong ngo / /de dag ni ma spangs kyang spangs pa bzhin te/ byang chub sems dpa' rnams la kun nas nyon mongs par byed pa ma yin no/ /don de nyid kyi dbang du mdzad de tshigs su bcad de gsungs pa/ thabs chen rnams dang ldan pa la/ /nyon mongs byang chub yan lag 'gyur/ /'khor ba'ang zhi ba'i bdag nyid de/ /de phyir de bzhin gshegs bsam yas//she'o/ /sa bcu rnams la pha rol tu phyin pa bcu go rims bzhin du lhag par che ba yin no zhes 'byung ba'i phyir de'i mi mthun pa'i phyogs ser sna la sogs pa go rims bzhin du spong bar mngon no/ /gal te nyon mongs pa gzhan yang sgrib na ci'i phyir sa rnams la nyon mongs pa can ma yin pa'i mi shes pa kho na sgrib par bshad ce na/thun mong ma yin pa'i phyir te/ de ni byang chub sems dpa' rnams kho na la mya ngan las 'das pa thob par bya ba'i gegs su 'gyur gyi/ nyan thos la sogs pa la ni ma yin te/ 'di ltar nyan thos dang rang sangs rgyas rnams la de yod kyang grol bar 'gyur la/byang chub sems dpa' rnams ni ma yin pas de'i phyir thun mong ma yin no/ /de sa rnams la sgrib par bshad kyang / sa rnams la sgrib pa de kho nar ma zad de/ nyon mongs pa'i nyan thos la sogs pa dang / byang chub sems dpa' rnams la 'dra bas byang chub sems dpa'i sa rnams la de'i sgrib par gzhag pa yang med bkag pa yang med de/de ma bshad kyang sgrib pa las ldog par mi 'gyur ro/ /gzhan na re nyan thos la sogs pa dang / byang chub sems dpa' rnams la 'dra bas nyon mongs pa can ma yin pa'i mi shes pa ni sa rnams la sgrib pa khyad par du bshad kyi/nyon mongs pa ni zhar la yod pas ma smos so zhes zer te/ nyon mongs pa yang nyan thos la sogs pa dang / byang chub sems dpa' rnams la 'dra ba nyid yin pas de zhar la yod ces bya bar mi rung ngo / /gzhan na res rnams kyi mi shes pa'i sgrib pa gang yin pa de nyan thos rnams kyi nyon mongs pa can ma yin pa'i mi shes pa yin yang thar pa la gegs mi byed de/'di ltar nyan thos dag la sa rnams la mi shes pa yod bzhin du rnam par 'grol lo/ /byang chub sems dpa' rnams la ni mya ngan las 'das pa thob par bya ba la gegs kyi rgyur gyur pa'i phyir nyon mongs pa can no zhe'o//de ni de lta ma yin te/ nyon mongs can min sgrib pa bcu/ /zhes bshad pa'i phyir ro zhe'o/ /sa dang po la ni chos kyi dbyings kun du 'gro ba'i don du rtogs te zhes bya ba de la/sa dang po ni 'jig rten las 'das pa'i shes rab 'khor ba dang bcas pa dang po pa ste/ mthong ba'i lam gyis bsdus pa'o/ /chos kyi dbyings ni stong pa nyid de/ spyi'i mtshan nyid pas gcig la ji lta bar thams cad la yang de bzhin no/ /thams cad du song bas kun du 'gro ba ste/chos kyi dbyings ni ma rtogs par/ /'di ltar chos ni yod ma yin/ /zhes 'byung ba ni chos kyi dbyings kun du 'gro ba'i khungs yin no/ /rtogs zhes bya ba ni mngon du byed ces bya ba'i tha tshig ste/ /rtogs pa des bdag gang yin pa de gzhan la/ gzhan gang yin pa de bdag go zhes bdag dang gzhan mnyam pa nyid rab tu thob nas gzhan dang bdag gis stong pa nyid tha dad par ma mthong bas bdag dang gzhan du bye brag gis rlom sems su med do//de'i phyir de la sbyin pa'i pha rol tu phyin pa lhag par che ba yin te/ de'i phyir 'di la byang chub sems dpa' bdag gi don bzhin du gzhan gyi don la rab tu 'jug go//'di ni rtogs pa dang gnyen po dang gnyen po'i 'bras bu bstan pa yin te/ de gsum ni sa gzhan dag tu yang shes par bya'o/ /gnyis pa la ni mchog gi don du ste/ rang bzhin gyis 'od gsal bar mthong ba'i phyir chos kyi dbyings rab tu rtogs so zhes bya bar sbyar ro//des de 'di snyam du sems te/ de lta bas na bsgrub du mtshungs pa la bdag gis rnam pa thams cad du yongs su sbyong ba mngon par bsgrub pa nyid la brtson par bya'o snyam mo zhes lung las bshad do//mdo las kyang 'di skad ces de bas na dge ba bcu'i las kyi lam de dag shes rab kyi rnam par yongs su bsgoms na nyan thos kyi theg pa'i bar du 'gyur ro/ /de bas gong du yongs su sbyangs pas rang sangs rgyas kyi theg pa'i bar du 'gyur ro/ /de bas gong du yongs su sbyangs pas byang chub sems dpa'i sa yongs su dag pa dang /pha rol tu phyin pa yongs su dag pa dang / spyod pa rgyas pa'i bar du 'gyur ro/ /de bas gong du yongs su dag pas stobs bcu'i bar du 'gyur ro/ /de lta bas na bsgrub tu mtshungs pa la bdag gis zhes rgya cher bshad do/ /gang gis 'di ltar de 'di snyam du sems te/sa gnyis pa la de lta bas na zhes bya ba la sogs pa ste/ de bas na gnyis pa la mchog gi don du rab tu rtogs par mngon no/ /mngon par bsgrub pa ni 'bad pa'am bya ba'o/ /rnam pa thams cad du yongs su sbyang ba ni chos kyi dbyings la nyon mongs pa can dang /nyon mongs pa can ma yin pa'i rmongs pa sel ba'o/ /de bas na sa de la tshul khrims kyi pha rol tu phyin pa lhag par che ba yin te/ khyad par du 'phags pa'i don la smon pas bdag shin tu rnam par dag pa'i snod du byed pa'i phyir ro/ /gsum pa la ni de'i rgyu mthun pa don gyi mchog tu rtogs te/sangs rgyas kyi gsung ni chos kyi dbyings rab tu rtogs pas rab tu phye ba'i phyir ro/ /'di ltar rnam pa thams cad du yongs su dag pa chos kyi sku zhes bya ba'i chos kyi dbyings kyi dbang gis chos kyi dbyings kyi rgyu mthun pa mdo la sogs pa bstan pa'i chos rab tu byung ba'i phyir ro//chos kyi dbyings mchog yin pas de'i rgyu mthun pas bstan pa'i chos kyang mchog yin pa dang / chos kyi dbyings yongs su dag par bya ba'i rgyu yin pa'i phyir ro/ /des chos kyi dbyings kyi rgyu mthun pa thos pa mchog tu rig nas shes pa rgya cher 'byung ba la/des zhes bya ba ni chos kyi dbyings rab tu rtogs pas so/ /thos pa zhes bya ba ni mdo la sogs pa'i chos thos pa'o/ /de la mchog tu rig nas zhes bya ba ni rnam par mi rtog pa'i ye shes kyis de bzhin du so sor rang gis shes zhes bya ba'i tha tshig go/ /de'i phyir zhes bya ba ni sangs rgyas kyi gsung mnyan pa'i phyir ro//me'i 'obs stong gsum gyi stong chen po'i tshad tsam du yang bdag nyid mchong zhes bya ba ni mdo las gsungs pa/ gal te la la zhig de la 'di skad ces zer te/ gal te khyod me'i 'obs chen po 'bar ba/ kun du 'bar ba/ kun du rab tu mched cing 'bar ba/me lce gcig tu gyur pa'i nang du bdag rab tu mchong zhing sdug bsngal gyi tshor ba chen po myong bar 'gyur ba rang gi lus kyis nyams su len na ngas khyod la chos kyi tshig yang dag par rdzogs pa'i sangs rgyas kyis bstan pa byang chub sems dpa'i spyod pa yongs su sbyong ba 'di bshad par bya'o zhe na yang de 'di snyam du sems te/yang dag par rdzogs pa'i sangs rgyas kyis bstan pa/ byang chub sems dpa'i spyod pa yongs su sbyong ba'i chos kyi tshig gcig gi don du yang stong gsum gyi stong chen po'i 'jig rten gyi khams mas rab tu gang bar tshangs pa'i 'jig rten nas bdag gis bdag dor bar mos na me'i 'obs tha mal par bdag dor ba lta ci smos/sems can dmyal ba'i sdug bsngal thams cad nyams su bab kyang bdag gis sangs rgyas kyi chos thams cad btsal bar bya na/ mi'i sdug bsngal dang 'grogs pa lta ci smos kyi snyam nas zhes bya ba'o//de bas na sa de la bzod pa'i pha rol tu phyin pa lhag par che ba yin te/ thos pa'i ched du nyon mongs pa thams cad la mi 'byed pa'i phyir ro/ /bzhi pa la ni yongs su gzung ba med pa'i don du ste/ chos kyi dbyings rab tu rtogs so zhes bya bar sbyar ro//sa bzhi pa la ni mnyam pa'i phyir chos kyi dbyings bdag gi ba med par rab tu rtogs te/ 'di ltar chos kyi dbyings la bdag gang yang med pa'i phyir ro/ /yang na phyin ci log thams cad kyi yul ma yin pa'i phyir su'i yongs su bzung ba yang ma yin no//bdag nyid kyis phyin ci log ma yin pas 'di la yongs su bzung ba gang yang med de/ 'di ltar chos la sred pa yang ldog go zhes lung las 'byung ngo / /de ltar 'od 'phro ba can ni spros pa med pa'i ye shes kyi dbyings khong du chud pa'i phyir byang chub kyi phyogs kyi chos thob ste/byang chub sems dpa' mdo sde la sogs pa'i chos la sred pa snga nas yod pa gang yin pa de yang ldog go/ /gzhan dag na re bsam gtan dang ting nge 'dzin dang snyoms par 'jug pa ni chos la sred pa'o zhe'o/ /de bas na sa de la brtson 'grus kyi pha rol tu phyin pa lhag par che ba yin te/lus dang ngag dang yid kyi spyod pa las 'das par rgyun du byang chub kyi phyogs rnams kyis gnas pa'i phyir ro/ /lnga pa la ni rgyud tha dad pa med pa'i don du ste/ chos kyi dbyings rab tu rtogs zhes bya ba dang sbyar ro/ /'das pa dang ma byon pa dang da ltar gyi sangs rgyas bcom ldan 'das thams cad nang dang /byang chub sems dpa'i rgyud rnams dang bdag tha mi dad cing mtshungs par mthong ngo / /sems dang bsam pa rnam par dag pa mnyam pa nyid bcus zhes bya ba ni lung gis ston te/ /'das pa'i sangs rgyas kyi chos rnam par dag pa la bsam pa mnyam pa nyid dang /ma byon pa'i sangs rgyas kyi chos rnam par dag pa la bsam pa mnyam pa nyid dang / da ltar byung ba'i sangs rgyas kyi chos rnam par dag pa la bsam pa mnyam pa nyid dang / tshul khrims rnam par dag pa la bsam pa mnyam pa nyid dang / sems can rnam par dag pas bsam pa mnyam pa nyid dang /lta ba dang the tshom dang yid gnyis dang 'gyod pa sel bas rnam par dag pa la bsam pa mnyam pa nyid dang / lam dang lam ma yin pa shes pa rnam par dag pa la bsam pa mnyam pa nyid dang / lam shes pa rnam par dag pa la bsam pa mnyam pa nyid dang / byang chub kyi phyogs kyi chos thams cad gong nas gong du rnam par 'jig pa rnam par dag pa la bsam pa mnyam pa nyid dang / sems can thams cad yongs su smin par byed pa rnam par dag pa la bsam pa mnyam pa nyid ces bya ba ste/ mnyam pa nyid 'di dag gis sangs rgyas thams cad kyi rgyud tha mi dad par rab tu rtogs te/kun gzhi rnam par shes pa gnas gyur pa'i mtshan nyid chos kyi sku tha mi dad pa'i phyir ro/ /de bas nas de la bsam gtan gyi pha rol tu phyin pa lhag par che ba yin te/ don dam par bden pa'i rnam par bsgoms pa mang ba'i phyir ro/ /drug pa la ni kun nas nyon mongs pa dang / rnam par byang ba ma yin pa'i don du ste/ chos kyi dbyings rab tu rtogs zhes bya bar sbyar ro/ /rten cing 'brel par 'byung ba'i mtshan nyid kun nas nyon mongs pa ni de la glo bur du 'byung ba'i phyir rang bzhin gyis kun nas nyon mongs pa ma yin no/ /rang bzhin gyis rnam par dag pas rnam par dag par 'gyur ba ma yin no//de ltar rang gis rig pa'i tshul gyis rnam par mi rtog pa'i ye shes kyis chos kyi dbyings rab tu rtogs so zhes lung de nyid las ston te/ rten cing 'brel bar 'byung ba la gang kun nas nyon mongs par 'gyur ba'am/ rnam par dag par 'gyur ba'i chos de gang yang med par rab tu rtogs pa'i phyir ro//sa drug pa la ni byang chub sems dpa' rten cing 'brel par 'byung ba la rnam par rtog ste/ chos kyi dbyings rang bzhin gyis 'od gsal ba'i phyir de la yang chos gang la kun nas nyon mongs pa'am/ rnam par byang ba med par rtogs so/ / rten cing 'brel par 'byung ba'i yan lag rnams ni kun nas nyon mongs pa tsam du zad pa'i phyir gang la kun nas nyon mongs pa'am/ rnam par dag par kun du rtogs pa de la gtogs par bdag gam bdag gi med do/ /de'i phyir sa de la shes rab kyi pha rol tu phyin pa lhag par che ba yin te/kun nas nyon mongs pa dang / rnam par dag pa med pa'i don du rten cing 'brel par 'byung ba zab mo khong du chud pa'i phyir ro/ /bdun pa la ni tha dad pa med pa'i don du ste/ chos kyi dbyings rab tu rtogs zhes bya bar sbyar ro/ /sa de la byang chub sems dpa' mtshan ma thams cad mi 'byung bas zil gyis non te/mtshan ma 'byung ba'i sgo nas tha dad pa 'byung ba'i phyir ro/ /de bas na mtshan ma med pa'i phyir bdun pa la tha dad pa med pa'i don rab tu rtogs so zhes bya'o/ /don de nyid rab tu bstan pa'i phyir mtshan ma med pas mdo la sogs pa'i chos kyi mtshan nyid tha dad pa mi 'byung ba'i phyir ro zhes bya ba smos so//sa drug pa'i bar du ni mdo la sogs pa'i chos kyi mtshan ma gang gis chos kyi dbyings la 'jug pa de dag shugs kyis de la 'jug pa dang / de'i rjes las thob pa'i shes pa gnyis kyis tha dad pa nyid du mngon du 'gyur ro/ /sa bdun pa la ni mtshan ma thams cad ro gcig pa'i rnam pa'i ye shes kyis chos kyi dbyings mtshan ma med par rab tu rtogs pas mtshan ma de dag mi 'byung ngo //de'i phyir sa de la thabs kyi pha rol tu phyin pa lhag par che ba yin te/ 'di ltar mtshan ma thams cad mtshan ma med pa nyid du yang rab tu rtogs la/ mtshan mar byas pa'i tha snyad kyang mi 'gog ste/de rab tu rtogs pas kyang de nyid la dbang byed pa rab tu thob pa'i phyir ro/ /brgyad pa la ni bri ba med cing 'phel ba med pa'i don du ste/ chos kyi dbyings rab tu rtogs so zhes bya bar sbyar ro/ /chos kyi dbyings rang bzhin gyis rnam par dag pa'i phyir dri ma dang bcas pa dang /dri ma med pa'i dus na yang khyad par med pa'i phyir ro/ /de bas na rtag tu de bzhin kho na bas de bzhin nyid ces bya'o/ /mtshan ma dang bral ba na gang la yang bri ba yang med la/ mtshan ma yod pa na yang gang la yang 'phel ba yang med do/ /la lan re 'di ltar mtshan ma nyid mtshan ma med pa'o zhe'o/ / 'dir rgyu smos pa/ mi skye ba'i chos la bzod pa thob pas zhes bya ba'o/ /sa brgyad pa la byang chub sems dpa' mi skye ba'i chos la bzod pa thob pas chos kyi dbyings la bri ba med pa dang / lhag ma med pa nyid du de ltar rab tu rtogs so/ /kun nas nyon mongs pa ni bri ba med pa'am/ /rnam par byang bas na 'phel ba'i chos gang yang med de/sngon med pa'i chos mi skye ba'i phyir ro/ /dbang rnam pa bzhi ste/ rnam par mi rtog pa la dbang ba dang / zhing yongs su dag pa la dbang ba dang / ye shes la dbang ba dang / las la dbang ba'o/ /de la lhun gyis grub par mtshan ma thams cad mi 'byung bas chos kyi dbyings ni rnam par mi rtog pa'i ye shes la dbang ba'i gnas su rig par bya'o//bdun pa la yang mtshan ma mi 'byung ba yod mod kyi/ /mngon par 'du byed pas yin gyi/ /'dir ni lhun gyis grub pa yin pas bye brag yod do/ /ji ltar bzhed pa bzhin du sangs rgyas kyi zhing dang 'khor gyi dkyil 'khor kun du bstan pa'i mthu brnyes pas chos kyi dbyings ni zhing yongs su dag pa la dbang ba'i gnas su rig par bya'o//de bas na sa de la smon lam gyi pha rol tu phyin pa lhag par che ba yin te/ rnam par mi rtog pa dang zhing la dbang ba thob pas dge ba la bar chad med par sbyor ba'i phyir ro//dgu pa la ni ye shes la dbang ba'i gnas nyid du ste/ ci zhe na/ chos kyi dbyings rab tu rtogs zhes bya bar sbyar ro/ /dgu pa la ni ye shes la dbang ba'i gnas te/ rab tu rtogs so zhes bya bar ci mngon zhe na/ de'i phyir so so yang dag par rig pa thob pa'i phyir ro zhes bya ba smos so//sa 'di la chos dang / don dang / nges pa'i tshig dang / spobs pa so so yang dag par rig pa gzhan dag gis mi 'jigs pa rab tu thob po/ /de bas na 'dir ni chos kyi dbyings ye shes la dbang ba'i gnas te/ rab tu rtogs so zhes bya bar mngon no/ /de'i phyir sa de la stobs kyi pha rol tu phyin pa lhag par che ba yin te/ shes rab kyi stobs kyi khyad par dang ldan pa'i phyir ro/ /sa bcu pa la ni las la dbang ba'i gnas nyid du rtogs so/ /de ci mngon zhe na/ de'i phyir ji ltar bzhed pa bzhin du sprul pa rnams kyis sems can gyi don mdzad pa'i phyir ro zhes bya ba smos so//'di ni sa bcu pa la chos kyi dbyings las la dbang ba'i gnas su rab tu rtogs so/ /des de bzhin gshegs pa'i phrin las rnams la dbang byed pa rab tu brnyes te/ 'di ltar bde bar gshegs pa bzhin du phyogs bcu'i 'jig rten gyi khams mtha' yas pa na gnas pa'i sems can dag la sprul pa'i sku rnams kyis ji ltar 'dod pa bzhin du gang la ji ltar gang gi tshe gang bya ba la/de ltar de'i tshe de mdzad do/ /de bas na sa 'di la ye shes kyi pha rol tu phyin pa lhag par che ba yin te/chos la longs spyod pa dang / sems can yongs su smin par mdzad pa'i khyad par dang ldan pa'i phyir ro/ /de ltar byang chub sems dpa'i sa bcu ji skad du bshad pa de dag la chos kyi dbyings rnam pa bcu rab tu rtogs pa rnam pa thams cad du yongs su sbyang ba la gegs su gyur pa/nyon mongs pa can ma yin pa'i mi shes pas re re la yang sgrib pa gang yin pa de'i gnyen por byang chub sems dpa'i sa bcu rnam par gzhag go/ /sa dgu pa dang sa bcu pa dag gi khyad par ni 'bras bus bstan pa yin gyi/ dmigs pa tha dad pa rab tu rtog pa'i khyad par gyis ni ma yin te/gnas pa cir yang dpyad du med pa'i gnas su phyin pa'i phyir ro/ /kun du 'gro ba la sogs pa'i don du rtogs pa'i dgongs pa ni sa bcu rnams su pha rol tu phyin pa bcu go rims bzhin du khyad par du 'gro ba'o/ /de'i phyir 'di skad ces sa la sgrib pa ni pha rol tu phyin pa rnams khyad par du 'gro ba la sgrib pa'o zhes bshad do//yang na mdo las ting nge 'dzin brgya la snyoms par 'jug pa la sogs pas gong nas gong du khyad par du 'phags pa mchog rnams kyi ye shes kyi mthar thug pa'i 'bras bu gsung pa nyid kun du 'gro ba la sogs pa'i don du rab tu rtogs pa'i dgongs pa zhes bya'o//sgrib pa rnam pa du ma gong du ma bshad pa thams cad ni sgrib pa gnyis kyi nang du 'dus par rab tu bstan pa'i phyir mdor bsdu na/ nyon mongs pa'i sgrib pa dang / shes bya'i sgrib pa nyid du bstan zhes bya ba smos so//mdor bsdun gnyis kho na ste/ gsum du med do zhes bya ba de ci mngon zhe na/ de'i phyir/ der ni sgrib pa thams cad de/ /zhes bya ba gsungs te/ nang du 'dus so zhes bya ba ni tshig gi lhag ma'o/ /sgrib pa thams cad sgrib pa gnyis kyi nang du 'dus pas gsum pa gzhan med par mngon no//gang gi phyir sgrib pa thams cad 'di nyid kyi nang du 'dus pa de'i phyir sgrib pa thams cad sdud pa nyon mongs pa dang shes bya'i sgrib pa rnam pa gnyis po 'di zad na/ sgrib pa thams cad las grol bar 'dod de/ sgrib pa thams cad spong zhes bya ba'i tha tshig go//sangs rgyas kyi sa'i sgrib pa ma bshad par de nyid kyi nang du 'dus par ji ltar 'gyur/ brjod pas de'i nang du gtogs par 'gyur ba yang ma yin te/ rang bzhin gyis 'dus so/ /de lta mod kyi khyab pa'i sgrib pa bshad pa'i phyir de nyid bshad zin to/ / gzhan du na ni nyi tshe ba'i sgrib pa nyid du 'gyur ro/ /yang na sangs rgyas kyi sa'i sgrib pa bsdu ba'i don du/ der ni sgrib pa thams cad de/ /de zad nas ni grol bar 'dod/ /ces bya ba gsungs so/ /sangs rgyas kyi sa'i sgrib pa ma zad par grol ba med de/ de'i phyir sgrib pa lhag ma ltar de'i sgrib pa yang bstan pa yin no//nyon mongs pa can ma yin pa'i mi shes pa rab tu phra ba'i gnas skabs dang / nyon mongs pa'i bag chags ni sangs rgyas kyi sa'i sgrib pa zhes bya ste/ de bas na shin tu phra ba'i phyir gzhan du brtag mi nus pas de skad ces bshad par 'gyur ro//sgrib pa chen po ni khyab pa gang yin pa'o zhes bya ba ni byang chub sems dpa'i rigs can rnams kyi nyon mongs pa dang shes bya'i sgrib pa'o/ /sgrib pa chung ngu ni nyi tshe ba gang yin pa'o zhes bya ba ni nyan thos la sogs pa'i rigs can rnams kyi nyon mongs pa'i sgrib pa nyid do//sbyor ba'i sgrib pa ni lhag ma gang yin pa'o zhes bya ba ni 'dod chags la sogs pa spyod pa de dag nyid kyi ste/ des sbyor ba nyid mi 'thob po/ /'thob pa la sgrib pa ni mnyam pa gang yin pa'o zhes bya ba ni cha mtshungs par spyod pa rnams kyi ste/de 'thob pa'i bgegs su 'gyur ba'i phyir ro/ /thob pa khyad par can la sgrib pa ni len pa dang spong ba gang yin pa'o zhes bya ba ni/ byang chub sems dpa'i rigs can rnams kyi ste/ thob par bya ba khyad par can la sgrib pa'i phyir ro/ /mi gnas pa'i mya ngan las 'das pa ni thob par bya ba khyad par can te/de nyid 'bras bu'i khyad par du yang rig par bya'o/ /yang dag par sbyor ba la sgrib pa ni nyon mongs pa'i mtshan nyid rnam pa dgu gang yin pa'o zhes bya ba ni kun du sbyor ba dgu ni sgrib po zhes bshad pa'i phyir ro/ /de dag yang dag par sbyor ba la ji ltar sgrib pa de bzhin du bshad zin to//rgyu la sgrib pa ni dge ba la sogs pa rnam pa bcu la sgrib pa gang yin pa ste/ rgyu'i don gyi skabs kyi phyir ro zhes bya ba ni dge ba la sogs pa'i rgyu la gegs byed pa'i sgo nas sgrib par 'gyur bas rgyu la sgrib pa zhes bya'o/ /de kho na la 'jug pa la sgrib pa ni byang chub kyi phyogs rnams la sgrib pa gang yin pa'o zhes bya ba ni de dag gis de kho na la 'jug par byed do//dge ba bla na med pa la sgrib pa ni/ pha rol tu phyin pa rnams la sgrib pa gang yin pa'o zhes bya ba ni de'i bla na dge ba med pa'i phyir ro/ /de khyad par du 'gro ba la sgrib pa ni sa rnams la sgrib pa gang yin pa'o zhes bya ba la/pha rol tu phyin pa nyid 'jig rten las 'das pa'i khyad par gyi gnas su gyur pa ni sa rnams zhes bya'o/ /bsdus pa'i sgrib pa ni mdor bsdus pa rnam pa gnyis po gang yin pa'o zhes bya ba ni nyon mongs pa'i sgrib pa dang / shes bya'i sgrib pa ste/de dag gis sgrib pa thams cad bsdus pa'i phyir ro/ /des bde blag tu len pa dang / 'dzin par bya ba'i phyir don bsdus pa bshad do/ /bsdu ba byas pas bde blag tu len to/ /'dzin to/ /bstan bcos dbus dang mtha' rnam par 'byed pa las sgrib pa'i le'ur bcad pa ste gnyis pa'i 'grel bshad do// //sgrib pa bshad pa'i 'og tu de kho na bshad pa'i skabs yin te/ de'i 'og tu smos pa'i phyir ro/ /de bas na de kho na'i dbang du mdzad de gsungs pa zhes bya ba smos so/ /de kho na yang rnam pa du ma yod de/ de'i phyir de'i dbye ba khong du ma chud par de kho na'i rang gi ngo bo khong du chud par dka' bas de'i phyir de kho na'i dbye ba nyid dang por bstan pa'i phyir/rtsa ba mtshan nyid de kho na/ /zhes de kho na bcu rgya cher gsungs so/ /kha cig na re rtsa ba'i de kho na de la de kho na gzhan 'dus par bstan pa'i phyir rtsa ba'i de kho na bshad do//rtsa ba'i de kho na la yongs su shes par byed pa dang spong ba dang mngon sum du byed pa la zhugs pa'i nyes pa gzhom pa'i phyir mtshan nyid kyi de kho na bshad do/ /'khor ba la skyo bar bya ba'i thabs rab tu bstan pa'i phyir phyin ci ma log pa'i de kho na bshad do//skyo nas nyan thos kyi theg pas nges par 'byung ba bstan pa'i phyir 'bras bu dang rgyu'i de kho na bshad do/ /nyan thos ni 'phags pa'i bden pa bzhi rab tu rtogs pa dang / bsgom pa gnyis kyis nges par 'byung ngo / /rnam pa thams cad shes pa bsgrub pa'i thabs bstan pa'i phyir rags pa'i de kho na bshad do//sgrib pa thams cad spang ba'i thabs bstan pa'i phyir phra ba'i de kho na bshad do/ /legs par gnas pa'i chos bstan pa'i thabs bstan pa dang / phas kyi rgol ba thams cad tshar gcod pa'i thabs bstan pa'i phyir grags pa'i de kho na bshad do//chos kyi dbyings su mtshungs kyang rigs dang dbang po dang bsam pa'i bye brag gis rnam par dag pa tha dad pa bstan pa'i phyir rnam par dag pa'i spyod yul gyi de kho na bshad do/ /rnam pa thams cad du kun nas nyon mongs pa dang rnam par byang ba la 'jug pa'i thabs bstan pa'i phyir bsdu ba'i de kho na bshad do//de bzhin nyid las brtsams te som nyi thams cad rnam par ldog pa'i mthu bstan pa'i phyir rab tu dbye ba'i de kho na bshad do/ /bdag tu 'dzin pa rnam pa thams cad bzlog ste/ bdag med pa rab tu gzhag pa'i thabs bstan pa'i phyir mkhas pa'i de kho na bshad do zhe'o//gzhan dag na re rtsa ba'i de kho na ni byang chub sems dpa'i ste/ thun mong ma yin pa'o/ /de kho na gnyis pa ni de nyid la log par sbyor ba'i gnyen po'o/ /de kho na gsum pa ni yang dag pa'i rnal 'byor dang mthun pa'o//de kho na bzhi ba ni nyan thos dang rang sangs rgyas dang mthun pa'o/ /de kho na lnga pa ni sgrib pa'i thabs so/ /de kho na drug pa ni 'jig rten dang thun mong ngo / /de kho na bdun pa ni de dang thun mong ba yin pa'o/ /de kho na brgyad pa ni shes bya mdor bsdu ba'o/ /de kho na dgu pa ni rang bzhin no//de kho na bcu pa ni nyon mongs pa'i rtsa ba 'joms pa'o zhe'o/ /mdor bsdus pa de kho na bcu po de dag ni de bzhin gshegs pa rnams kyis ldem por dgongs te gsungs pa'i gnas su gyur pa'o/ /rgyas par bya na de kho na dpag tu med do/ /kha cig na re 'di la de kho na dang mthun pas kun rdzob kyang de kho na zhes bstan zhe'o//gzhan dag na re de dag thams cad ni ji skad bshad pa'i rnam pa rnams kyis mi bslu ba'i phyir de kho na rnams zhes bya ba ste/ gang rnam pa gang gis slu bar mi byed pa de ni de bzhin bas de kho na zhes bya'o zhe'o/ /de la rtsa ba'i de kho na ni ngo bo nyid rnam pa gsum ste zhes bya ba de ma grags pas de'i phyir/kun brtags pa dang gzhan gyi dbang dang / yongs su grub pa ste zhes bya ba smos so/ /ci'i phyir ngo bo nyid gsum la rtsa ba'i de kho na zhes brjod ce na/ de rab tu bstan pa'i phyir de la de kho na gzhan rnam par gzhag pa'i phyir ro zhes bya ba smos te/der mtshan nyid la sogs pa'i de kho na gzhan 'dus so zhes bya ba'i tha tshig go/ /ci'i phyir ngo bo nyid rnam pa gsum nye bar gzung zhe na/ kha cig na re tha snyad dang don dam pa dang de'i gnas rab tu bstan pa'i phyir ro zhe'o/ /gzhan dag na re phyin ci log dang de'i rgyud dang de'i gnyen po'i dmigs pa rab tu bstan pa'i phyir ro zhe'o//gzhan dag na re byang chub sems dpa' rnams kyi sgrib pa dang bral bar bya ba'i phyir spang ba dang / yongs su shes par bya ba dang mngon sum du bya ba'i dngos po rab tu bstan pa'i phyir ro zhe'o/ /gzhan dag na re shes rab kyi pha rol tu phyin pa'i tshul rang bzhin gyis zab pa ngo bo nyid gsum gyi sgo nas ma nor bar rtogs par bya ba'i phyir ro zhe'o//de skad du chos mngon pa'i mdo'i nang nas tshigs su bcad pa gnyis las/ byung rten sgyu ma la sogs bstan/ /rtags la brten nas med pa bstan/ /rnam dag rnam pa bzhir brten nas/ / yongs su grub pa bstan pa yin/ dag pa de ni rang bzhin dang / /dri ma med dang lam dang dmigs/ /rnam par dag pa'i chos kyi rnams/ /rnam pa bzhi pos bsdus pa yin/ /zhes gsungs so/ /byung ba gzhan gyi dbang gi ngo bo nyid la ltos nas mdo las sgyu ma la sogs pa bstan te/de ni sgyu ma la sogs pa bzhin du log par snang ba'i phyir ro/ /med pa kun brtags pa'i ngo bo nyid la ltos nas med pa bstan to/ /rnam par dag pa rnam pa bzhi la ltos nas yongs su grub par bstan to/ /rnam par dag pa rnam pa bzhi la rang bzhin gyis rnam par dag pa ni dri ma dang bcas pa'i dus kyi de bzhin nyid la sogs pa'o//dri ma med pas rnam par dag pa ni de dag nyid dri ma med pa'i dus na'o/ /stong pa nyid la sogs pa 'thob pa'i lam rnam par dag pa ni byang chub kyi phyogs la sogs pa'o/ /lam skyed pa'i phyir dmigs pa rnam par dag pa ni chos kyi dbyings kyi rgyu mthun pa bstan pa'i chos mdo'i sde la sogs pa ste/de la brten nas lam skye ba'i phyir ro/ /'di ltar rnam par dag pa 'di bzhis rnam par byang ba'i chos thams cad bsdus te tshigs su bcad pa gnyis kyi don mdor bsdus pa'o/ /gzhan dag na re 'jig rten pa dang 'jig rten las 'das pa dang /de'i rjes las thob pa'i ye shes kyi yul yin par rab tu bstan pa'i phyir ci rigs par ngo bo nyid gsum gzung ngo zhe'o/ /ci'i phyir 'dir ngo bo nyid gsum la de kho na zhes bya bar 'dod ce na zhes bya ba ni de kho na'i don ni ma nor ba'i don yin na/ci'i phyir 'dir ngo bo nyid gsum la ma nor ba zhes bya/ 'di ltar ngo bo nyid gsum la de kho na zhes bya snyam du dri bar bsams pa'o/ /ngo bo nyid gsum rtag med ces bya ba la sogs pa rgya cher smos pa la/ kun du brtags pa'i mtshan nyid ni rtag tu med pa'o zhes bya ba la/gang la byis pa rnams kyis gzung ba dang 'dzin pa dang / smra ba dang smra bar bya bar mngon par zhen pa'i rmi lam ltar rab tu 'byung ba de ni rang gi ngo bor med pa'i phyir brtags pa'i ngo bo nyid do/ /de'i phyir med pa'i bdag nyid yin pa dang / 'khrul pa med pa'i phyir med pa nyid kun brtags pa'i mtshan nyid do//de'i phyir kun brtags pa'i ngo bo nyid la med pa nyid kyi de kho na zhes brjod do/ /phyin ci ma log pa'i phyir ro zhes bya ba la phyin ci ma log pa'i don ni 'dir de kho na'i don du ston to/ /gzhan gyi dbang gi mtshan nyid ni yod kyang yang dag par na ma yin te zhes bya ba la/gzung ba dang 'dzin pa la sogs pa brtags pa'i mtshan nyid de tha snyad kyi gnas yin pas yod do/ /gzung ba dang 'dzin pa la sogs pa'i bdag nyid du med pas yang dag par na de bzhin du ma yin no/ /de nyid bstan pa'i phyir 'khrul pa'i phyir ro zhes bya ba smos so//de ni 'di skad du sgyu ma'i rgyu ltar snang ba gang yin pa de ni yod do/ /ji ltar gzung ba dang 'dzin pa'i rnam par snang ba de ni de lta ma yin te/ sgyu ma'i skyes bu la sogs pa bzhin no/ /de'i phyir 'khrul pa zhes bstan par 'gyur ro/ /de ni gzhan gyi dbang gi ngo bo nyid la de kho na ste/gzhan du yod pa bdag nyid la med pa'i rnam par snang ngo / /skabs yin pas 'dir yang phyin ci ma log go zhes bya bar sbyar ro/ /yongs su grub pa'i mtshan nyid ni/ /yod dang med pa kho na ste/ /zhes bya ba ni yod pa dang med pa dang de kho na ni yongs su grub pa'i mtshan nyid de/gnyis pa med pa yod pa'i bdag nyid yin pas yod pas so/ /gnyis po med pa'i bdag nyid yin pas med pa'o/ /rnam par dag pa'i dmigs pa yin pas de kho na'o/ /'dir ni yongs su grub pa'i ngo bo nyid la de kho na ste/ phyin ci ma log pa'i phyir ro zhes bya ba dang sbyar ro//ngo bo nyid gsum gyi de kho na ni bshad na/ mtshan nyid ma bshad de/ de'i phyir dris pa'am yang na rtsa ba'i de kho na'i 'og tu mtshan nyid kyi de kho na bshad la/ de yang ma grags pas na mtshan nyid kyi de kho na gang zhe na zhes dris te/ de'i phyir/ 'di la chos dang gang zag dang / /zhes rgya cher gsungs so//gang shes nas gang zag dang chos gnyis la sgro 'dogs pa dang skur pa 'debs par lta ba mi 'byung ba de ni kun brtags pa'i ngo bo nyid kyi de kho na'i mtshan nyid do zhes bya ba la/ bdag dang gzugs la sogs pa'i chos rnams de dag tu snang ba'i rnam par shes pa ma gtogs par de'i dmigs par gyur pa don dam par yod do zhes mngon par zhen pa ni sgro 'dogs par lta ba'o//tha snyad du yang med do zhes bya ba ni skur pa 'debs par lta ba'o/ /gzhan dag na re gang zag dang chos su snang ba'i rnam par shes pa spong ba ni skur pa 'debs par lta ba'o zhes zer te/'dzin pa spong ba 'di ni bsam dgos pa'o/ /mtshan nyid gang yongs su gcad pas gang zag dang chos gnyis la sgro 'dogs pa dang / skur pa 'debs par lta ba de ni kun brtags pa'i ngo bo nyid kyi de kho na'i mtshan nyid de/ sgro 'dogs pa dang skur pa 'debs pa spangs par rig par bya'o//de'ang tha snyad du de kho na yin gyi ngo bo nyid kyis ni ma yin no/ /gang gi phyir kun brtags pa khong du chud na gang zag dang chos gnyis la sgro 'dogs pa dang skur pa 'debs par lta ba mi 'byung ba zhes bya ba ni mi skye'i zhes bya ba'i tha tshig go/ /gzung ba dang 'dzin pa gnyis la sgro 'dogs pa dang skur pa 'debs par lta ba zhes rgya cher 'byung ba la/gzung ba dang 'dzin par snang ba'i 'khrul pa gang la chos dang gang zag tu 'dzin pa de gal te de kho na nyid du yod do zhes mngon par zhen na de lta bu ni gzung ba dang 'dzin par sgro 'dogs pa'o/ /ji ste gzung ba bzhin du 'dzin pa yang med do zhes mngon par zhen na/de lta bu ni gzung ba dang 'dzin pa la skur pa 'debs pa'o/ /mtshan nyid gang shes nas gzung ba dang 'dzin pa gnyis la sgro 'dogs pa dang skur pa 'debs par lta bar mi 'byung ba de ni gzhan gyi dbang gi ngo bo nyid kyi mtshan nyid de/ sgro 'dogs pa dang skur pa 'debs pa spangs par shes par bya'o/ /de yang brtags pa ste gzung ba dang 'dzin pa'i bdag nyid du med pa'o/ /de'i tha snyad kyi gnas yin pa'i phyir yod pa'o/ /de ltar yongs su shes na gzhan gyi dbang la sgro 'dogs pa dang skur pa 'debs par lta ba mi 'byung ngo //dngos po dang dngos po med par sgro 'dogs pa dang skur pa 'debs par lta ba zhes rgya cher 'byung ba la kha cig na re/ gal te stong pa nyid dngos po yod pa nyid do zhes yang dag par rjes su lta na/ de lta bu ni dngos por sgro 'dogs par lta bar 'gyur ro//ji ste med pa nyid do zhe na/ de lta bu ni dngos po med par lta ba'o/ /mtshan nyid gang shes nas dngos po dang dngos po med par lta ba de gnyis mi 'byung ba ni yongs su grub pa'i ngo bo nyid kyi de kho na'i mtshan nyid do/ /kha cig na re de yang dngos po dang dngos po med pa las rnam par grol ba'i ngo bo nyid yin la/de shes nas yongs su grub pa'i ngo bo nyid la dngos po dang dngos po med par lta ba mi 'byung ngo zhe'o/ /gzhan na re dngos po dang dngos po med pa las rnam par grol ba'i bdag nyid can la/ dngos po'i ngo bor sgro 'dogs pa'i phyir gnyis po med pa ni rang gi ngo bos stong pa nyid do zhe na/dngos por sgro 'dogs pa'i mthar 'gyur ro/ /de dngos po dang dngos po med pa las rnam par grol ba gnyis su med pa'i rang bzhin rnam par mi rtog pa'i ye shes kyi spyod yul du yang med do zhe na/ dngos po med par skur pa 'debs pa'i mthar 'gyur ro zhes zer ro//gzhan na re dngos po dang dngos po med pa gnyis la so sor sgro 'dogs pa dang skur pa 'debs par lta ba dang sbyar bas bshad pa 'di gnyis kyang bsam dgos pa'o zhe'o/ /'dir dngos po ni gnyis po med pa'i dngos po ste/ gal te de la dngos po nyid du 'dzin na de lta na ni dngos por sgro 'dogs par 'gyur ro//ji ste dngos po med pa nyid du 'dzin na de lta na ni skur pa 'debs par 'gyur ro/ /'dir ni dngos po med pa na ni gnyis po'i dngos po med pa ste/ gal te de la chad pa nyid du na de lta na ni dngos po med pa'ang shin tu med pa nyid pas sgro 'dogs par 'gyur ro//ji ste gnyis po nyid du 'dzin na de lta na ni skur par 'gyur te/ 'di ltar de ni gnyis kyi dngos po med pas rab tu phye ba yin no/ /yang na gal te dngos po'i ngo bor 'dzin na de lta na ni sgro btags par 'gyur ro/ /ji ste dngos po med pa nyid du 'dzin na de lta na ni kun nas nyon mongs pa dang /rnam par byang ba la yang skur par 'gyur te/ mtha' gnyis spangs pa 'di ni yongs su grub pa nyid kyi de kho na'i mtshan nyid do/ /don phyir yang dag min rtogs phyir/ /gnyis po med pa'i phyir bshad do/ /zhes ngo bo nyid gsum gyi mtshan nyid sngar yang bshad ma zin nam zhe na/der ni ngo bo nyid kyi mtshan nyid do/ /'dir ni gang shes nas mi 'byung ba de ni de kho na'i mtshan nyid do/ /zhes bya ba'i mtshan ma yin pas zlos pa med do/ /gang shes nas gang zag la sogs par sgro 'dogs pa dang skur pa 'debs par lta ba mi 'byung ba de ni rtsa ba'i de kho na'i mtshan nyid do//de'i 'og tu bshad pa'i phyir mtshan nyid kyi de kho na'i 'og tu phyin ci ma log pa'i de kho na brjod par bya ste/ de'i phyir phyin ci ma log pa'i de kho na ni zhes rgya cher smos so/ /mi rtag pa dang sdug bsngal ba dang stong pa dang bdag med pa ni rtag pa dang bde ba dang gtsang ba dang bdag tu phyin ci log pa'i gnyen po yin pas phyin ci ma log pa'i de kho na zhes bya'o//rtsa ba'i de kho na'i nang du de kho na gzhan 'dus so zhes sngar dam bcas pas de'i phyir/ rtsa ba'i de kho na der ji ltar zhen zhes rgya cher dris so/ /mi rtag pa la sogs pa nyid ces bya ba ni mi rtag pa la sogs pa gang dag yin pa mi rtag pa dang sdug bsngal ba dang stong pa dang bdag med pa'i rnam pa de dag mi rtag pa la sogs pa'o//de'i dngos po ni mi rtag pa la sogs pa nyid do/ /rtsa ba'i de kho na'i nang du phyin ci ma log pa'i de kho na 'dus par bstan pa'i phyir/mi rtag don ni med don dang / /zhes rgya cher gsungs so/ /mi rtag pa'i don ni rnam pa gsum ste/ med pa'i don dang / skye zhing 'jig pa'i don dang / dri ma dang bcas shing dri ma med pa'i don to/ /gang dus thams cad du de bzhin du yod pa de ni rtag pa ste/de las bzlog pa ni mi rtag pa ste/ de dag tu go rims bzhin no zhes bya ba ni de la dus thams cad du med pa'i don mi rtag pa'i don gyis kun brtags pa'i ngo bo nyid ni mi rtag pa'o/ /gzhan dag na re nges pa'i tshig gi tshul du na rtag pa med pa ni mi rtag par rig par bya'o zhe'o//gzhan gyi dbang gi ngo bo nyid ni skad cig re re la skye zhing 'jig pa'i mtshan nyid yin te/ mi rtag pa'i phyir mi rtag pa'o/ /de ni rkyen las byung ba dang 'jig pa la rgyu med pa'i phyir ro/ /yongs su grub pa'i ngo bo nyid mi 'gyur ba'i chos yin du zin kyang dri ma dang bcas pa dang dri ma med pa nyid kyi don gyi mtshan nyid glo bur gyi don mi rtag pa'o//sdug bsngal len dang mtshan nyid dang / /zhes rgya cher 'byung ba la sdug bsngal ba la yang rnam pa gsum ste/ nye bar len pas sdug bsngal ba dang / mtshan nyid kyis sdug bsngal ba dang /'brel pas sdug bsngal ba'o/ /de la brtags pa'i ngo bo nyid ni nye bar len pas sdug bsngal te/ yongs su ma shes pas 'di'am gzhan na sdug bsngal nye bar len pas sdug bsngal lo/ /ji ltar na de yongs su ma shes pas sdug bsngal nye bar len pa de bstan pa'i phyir/gang zag dang chos la mngon par zhen pa nye bar len pa'i phyir zhes bya ba smos te/ des dngos por 'dzin pa'i sgo nas gang zag dang chos su mngon par zhen pas na gang zag dang chos la mngon par zhen pa'o/ /de yang gnyis su lhung ba'i phyir kun brtags pa'i ngo bo nyid de/kun brtags pa'i ngo bo nyid la mngon par zhen pa ni sdug bsngal gyi rgyun gyi rgyu yin pas de skad bshad kyi/ kun brtags pa nyid ni sdug bsngal ma yin te/ de med pa'i phyir ro/ /yang na kun brtags pa'i ngo bo nyid gang zag dang chos la mngon par zhen nas dngos po'i ngo bor nye bar len pa ste/de ltar nye bar len pas brtags pa'i ngo bo nyid la mngon par zhen pa ni sdug bsngal lo/ /gzhan gyi dbang gi ngo bo nyid ni mtshan nyid kyi sdug bsngal zhes bya ba dang sbyar ro/ /mtshan nyid kyi sdug bsngal ba ni sdug bsngal nyid rnam pa gsum ste/sdug bsngal gyi sdug bsngal nyid dang / 'gyur ba'i sdug bsngal nyid dang / 'du byed kyi sdug bsngal nyid do/ /sdug bsngal rnam pa gsum po de dag ni gzhan gyi dbang gi sdug bsngal te/ mtshan nyid kyi sdug bsngal ba'o/ /yongs su grub pa'i ngo bo nyid ni 'brel pas sdug bsngal ba'o//yang zhes bya ba'i sgra ni bsdu ba'i don to/ /ji lta zhe na/ 'brel pa'i phyir te/ de'i phyir sdug bsngal dang 'brel pa'i phyir bya ba smos so/ /gzhan gyi dbang gi ngo bo nyid ni sdug bsngal te/ de'i chos nyid yongs su grub pa yang sdug bsngal dang 'brel pa'i phyir sdug bsngal zhes bya'o//rtsa ba'i de kho na nyid kyi nang du go rims bzhin no zhes bya ba de la/ nye bar len pas sdug bsngal ni kun brtags pa'o/ /mtshan nyid kyis ni gzhan gyi dbang ngo / /'brel pas ni yongs su grub pa'o/ /dngos med de yi dngos ma yin/ /rang bzhin gyis ni stong par 'dod//ces bya ba la stong pa nyid ni rnam pa gsum ste/ dngos po med pas stong pa nyid dang / de ma yin pas stong pa nyid dang / rang bzhin gyis stong pa nyid do/ /de la dngos po med pas stong pa nyid ni kun brtags pa'i ngo bo nyid de/ /de nyid bstan pa'i phyir/ kun brtags pa'i mtshan nyid ni ri bong gi rwa la sogs pa'i rang bzhin ltar mngon sum dang rjes su dpag pa rnam pa gang gis kyang yod par gzung du med de/ dngos po med pa nyid pas de'i stong pa nyid do zhes bya ba smos so/ /de ma yin pas stong pa nyid ni gzhan gyi dbang gi ngo bo nyid de/de nyid bstan pa'i phyir/ gzhan gyi dbang gi mtshan nyid ni ji ltar byis pa rnams kyis gnyis kyi bdag nyid du kun brtags pa de ltar med kyi/ ji ltar dag pa 'jig rten pa'i ye shes kyis rtog par 'gyur ba lta bu yang ye med pa ni ma yin te/ de bas na de ma yin pas de'i stong pa nyid do zhes bya ba smos so//rang bzhin gyis stong pa nyid ni yongs su grub pa'i ngo bo nyid de/ de'i phyir yongs su grub pa'i mtshan nyid ni gnyis po med pa'i dngos po'i ngo bo 'di yin pa'i phyir stong pa nyid kyi ngo bo nyid do/ /de bas na rang bzhin kho na ste ngo bo nyid kho nas de'i stong pa nyid do zhes bya ba smos so//mtshan nyid med pas bdag med dang / /zhes rgya cher 'byung ba la bdag med pa yang rnam pa gsum ste/ mtshan nyid med pas bdag med pa dang mi mthun pa'i mtshan nyid kyis bdag med pa dang / rang gi mtshan nyid kyis bdag med pa'o//de la kun brtags pa'i ngo bo nyid ni mtshan nyid kyis dngos po med pas mtshan nyid med pa nyid bdag med pa ste/ de'i phyir kun brtags pa'i ngo bo nyid ni mtshan nyid kyis med pa'i phyir mtshan nyid med pa nyid de'i bdag med pa zhes bya ba smos te/ rnam pa gzhan gyis ni ma yin par ston to//gzhan gyi dbang ni mi mthun pa'i mtshan nyid kyis bdag med pa ste/ 'di ltar gzhan gyi dbang gi mtshan nyid ni dngos po'i ngo bor yod kyang des byis pa rnams kyis gnyis su ji ltar kun brtags pa de ltar ni yod pa ma yin no/ /de dang mi mthun pa'i mtshan nyid ces bya ba ni kun brtags pa'i mtshan nyid dang mi 'dra ba ste/gzhan gyi dbang gi mtshan nyid de'i bdag med pa'o/ /de ltar na kun brtags pa'i bdag nyid kyis de'i bdag med par bstan pa yin no/ /rang gi mtshan nyid kyis bdag med pa ni yongs su grub pa ste/ 'di ltar yongs su grub pa ni ngo bo nyid gzung ba dang 'dzin pa'i dngos po med pa'i rang bzhin yin pa'i phyir bdag nyid med pas de bas na rang gi mtshan nyid de'i bdag med pa'o zhes bya ba ni yongs su grub pa'i chos la bdag med pa'i ngo bo nyid du ston to//stong pa nyid dang bdag med pa 'di gnyis la khyad par ci yod ce na/kha cig na re gang na gang med pa de ni des stong la/ gang zhig gang gis bdag ste ngo bo nyid ma yin pa de ni bdag med pa ste/ 'di gnyis kyi khyad par ni 'di yin no zhe'o/ /kha cig na re don du khyad par gang yang med mod kyi rnam par gzhag pa'i bye brag gis tha dad de/'di ltar gang na gang med pa des de'i ngo bo nyid med pa'i phyir bdag med pa dang / cig shos ni de la yongs su ma grub pa'i ngo bo nyid kyi phyir stong pa nyid do zhe'o/ /sgro 'dogs pa dang skur pa 'debs pa'i mtha' gnyis kyi gnyen po dang glo bur gyi dri ma bstan pa'i phyir ro/ / rtsa ba'i de kho na rnam pa gsum la go rims bzhin du mi rtag pa nyid rnam pa gsum yongs su bstan te/ med pa'i don mi rtag pa nyid dang / skye zhing 'jig pa mi rtag pa nyid dang / dri ma dang bcas shing dri ma med pa'i mi rtag pa nyid do/ /de bzhin du bdag med pa rnam pa gsum gyi bar du bstan pa ni phyin ci ma log pa'i de kho na'o//de'i 'og tu 'bras bu dang rgyu'i de kho na brjod dgos te/ de'i phyir 'bras bu dang rgyu'i de kho na nyid la zhes rgya cher smos so/ /de la kun nas nyon mongs pa'i phyogs kyi dbang du mdzad de/ sdug bsngal gyi bden pa ni 'bras bu'i de kho na'o/ / kun 'byung gi bden pa ni rgyu'i de kho na'o/ /rnam par byang ba'i phyogs la yang 'gog pa'i bden pa ni 'bras bu'i de kho na'o/ /lam gyi bden pa ni rgyu'i de kho na'o/ /de ltar sdug bsngal la sogs pa bden pa rnam pa bzhi ni 'bras bu dang rgyu'i de kho na'o/ /rtsa ba'i de kho na nyid la sdug bsngal dang kun 'byung ba dang 'gog pa dang lam gyi bden pa rnams so zhes bshad na/de yang ji ltar na rtsa ba'i de kho na sdug bsngal la sogs pa bden pa'i ngo bo nyid yin pa mi shes na/ de'i phyir/ ji ltar rtsa ba'i de kho na rnam pa gsum la sdug bsngal la sogs pa'i bden pa zhes bya zhe na zhes bya ba dris pa dang /de'i phyir 'di ltar de mi rtag pa la sogs pa'i mtshan nyid kyis te/ de'i phyir sdug bsngal bden par 'dod ces bya ba smos te/ mi rtag pa dang sdug bsngal ba dang / stong pa dang bdag med pa nyid ni sdug bsngal gyi bden pa'i mtshan nyid pas de dag thams cad kun brtags pa la sogs pa re re la yod par rgyas par bstan te/de'i phyir kun brtags pa la sogs pa re re la sdug bsngal gyi bden pa nyid du 'dod do/ /kun 'byung ba'i don rnam pa gsum gyis rtsa ba'i de kho nar kun 'byung ba'i bden pa'i go rims bzhin no/ /kun 'byung ba'i de nyid mi shes pas de'i phyir/kun 'byung ba'i don rnam pa gsum ni/ bag chags dang ni kun nas byung / /ma bral ba yang de bzhin no/ /zhes bya ba smos te/ rnam pa gsum ni bag chags kyi kun 'byung ba dang / kun nas byung ba'i kun 'byung ba dang / ma bral ba'i kun 'byung ba'o/ /de la bag chags kyi kun 'byung ba ni kun brtags pa'i ngo bo nyid du shes par bya ste/de'i phyir kun brtags pa'i ngo bo nyid la mngon par zhen pa'i bag chags so zhes bya ba smos te/ kun brtags pa'i ngo bo nyid med par yod do zhes mngon par zhen pa nye bar bzung nas 'jig rten gyi chos rnam par rtog pa'i bag chags 'jog par byed kyi/mngon par zhen pa med pa 'jig rten las 'das pa dag ni ma yin te/ de bas na kun brtags pa'i ngo bo nyid la bag chags kyis kun 'byung ba zhes bya'o/ /kun nas byung ba'i kun 'byung ni gzhan gyi dbang gi ngo bo nyid do//kun nas byung ba zhes bya ba ni bdag thob pa ste/ de gang las byung ba de ni de las 'byung ngo zhes bya ba'i phyir kun nas 'byung ba'o/ /de yang rang bzhin ji lta bu zhe na de'i phyir las dang nyon mongs pa rnams so zhes bya ba smos te/ de dag kyang dngos po'i rang bzhin yin pas gzhan gyi dbang gi ngo bo nyid do//ma bral ba'i kun 'byung ba ni de bzhin nyid la bya ste/ ji lta zhe na de'i phyir/ sgrib pa dang ma bral zhes bya ba smos te/ de ni 'di skad du/ de bzhin nyid ji srid du sgrib pa rnams dang ma bral ba de srid du sdug bsngal kun 'byung zhes bya ba'am/ sgrib pa rnams dang ma bral ba'i de bzhin nyid ni kun 'byung ba'i chos nyid yin pas kun 'byung ba'i ming 'thob po zhes bya bar bstan par 'gyur ro/ /'gog pa rnam pa gsum gyis rtsa ba'i de kho nar 'gog pa'i bden pa yin na de yang mi shes nas de'i phyir/ 'gog pa rnam pa gsum ni/ngo bo nyid dang gnyis mi skye/ /dri ma zhi ba gnyis su 'dod/ /ces bya ba smos so/ /de la ngo bo nyid kyis mi skye ba ni kun brtags pa ste/ de ni mo gsham gyi bu bzhin du ngo bo nyid med pas gtan du mi skye ste/ gzung ba dang 'dzin pa gnyis mi skye ba ni gzhan gyi dbang ste/ de yang gzung ba dang 'dzin pa gnyis kyi rang bzhin dang gtan bral ba'i phyir 'khrul pa gnyis kyi bdag nyid du mi skye ba'o/ /dri ma zhim pa gnyis ni yongs su grub pa'o/ /kyang zhes bya ni bsdu ba'i don to/ /de yang mi shes nas de'i phyir so sor brtags pa'i 'gog pa dang / de bzhin nyid ces bya ba'o zhes bya ba smos so//dri ma ni rnam pa gnyis te/ 'dod chags la sogs pa'i sgrib pa dang kun brtags pa'o/ /de la zag pa med pa'i ye shes kyi sa bon gnas nas bton te/ 'dod chags la sogs pa'i dri ma rnams gtan mi skye ba'i bdag nyid kyis zhi ba ni so sor brtags pa'i 'gog pa'o//de bzhin nyid du spyod yul pa gnyis su med pa'i ye shes kyis kun brtags pa'i dri ma mi skye ba'i bdag nyid kyis zhi ba ni de bzhin nyid do/ /'di gnyis ni yongs su grub pa'i ngo bo nyid do/ /'gog pa rnam pa 'di gsum ni brtags pa la sogs pa rtsa ba'i de kho nar go rims bzhin du shes par bya'o//gzhan dag na re de bzhin nyid rab tu rtogs pas nyon mongs pa dang kun brtags pa'i dri ma gnyis zhi ba ni de bzhin nyid ces brjod do/ gnyis 'gog pa dang rang bzhin 'gog pa zhes 'byung ba'i phyir ro/ /rang bzhin zhes bya ba ni sems rang bzhin gyis 'od gsal ba'i phyir de bzhin nyid la bya'o//de'i phyir de bzhin nyid la dmigs pas 'gog pa gang yin pa de ni rang bzhin gyis 'gog pa zhes bya ste/ 'gag pa tsam la so sor brtags pa'i 'gog pa zhes bya'o zhe'o/ /kha cig na re 'dir 'gags pas 'gog pa ni de bzhin nyid do//'gog pa ni mi skye ba'i bdag nyid pas ngo bo nyid kyis mi skye ba la sogs pa thams cad bsdus te 'gog pa'i bden pa zhes bya'o/ /'gog pa'i bden pa rtsa ba'i de kho nar bsdus pa bshad zin to/ /de'i 'og tu lam gyi bden pa bsdu bar bya ste/de'i phyir lam gyi bden pa rtsa ba'i de kho nar rnam pa gsum du ji ltar rab tu gzhag ce na zhes dris pa dang de'i phyir/ yongs su shes par bya ba la sogs pa gsungs so/ /kun brtags pa ni yongs su shes par bya ba'o zhes bya ba la/ kun brtags pa ni gtan med pa nyid pas de ni yongs su shes par bya bar zad kyi spang du med de med pa ni spang bar mi rung ngo //gzhan gyi dbang ni yongs su shes par bya ba dang spang ba'o zhes bya ba la/ gzhan gyi dbang ni ji ltar snang ba de ltar med par shes par bya'i/ brtags pa bzhin du thams cad kyi bdag nyid kyis med par ni ma yin no//las dang nyon mongs pa ni dngos po'i bdag nyid yin pas spang bar bya ba yang yin no/ /yongs su grub pa ni yongs su shes par bya ba dang thob par mngon sum du bya ba'o zhes bya ba la/ yongs su grub pa ni dngos po dang dngos po med pa las rnam par grol ba'i mtshan nyid dang gnas gyur pa nyid du yongs su shes par bya zhing /gnas par gyur pa nyid rnam par grol ba chos kyi skur mngon sum du bya ba yin pas stong pa nyid ni yongs su shes par bya ba'o/ /'gog pa ni thob par mngon sum du byas pas mngon sum du bya ba'o//kha cig na re gnyis la rnam pa gnyis gnyis te yongs su shes pa rnam gnyis ni shes pa'i yongs su shes pa dang / spong ba'i yongs su shes pa'o/ /de la dngos po dang gsum pa ni shes pa'i yongs su shes pas yongs su shes par bya ba'o/ /gnyis pa ni gnyis kas yongs su shes par bya'o//mngon sum du bya ba rnam pa gnyis ni/ shes par mngon sum du bya ba dang / thob par mngon sum du bya'o/ /de la shes par mngon sum du bya bas ni gsum char yang mngon sum du bya'o/ /thob par mngon sum du bya bas ni gsum pa nyid do zhe'o/ / de ltar rtsa ba'i de kho na 'dir yongs su shes par bya ba dang / spang bar bya ba dang / mngon sum du bya ba rnams kyis lam gyi bden pa rnam par gzhag par rig par bya'i/ de'i khongs su gtogs par bsdu ba ni ma yin no/ /de la bden pa bzhis ni kun nas nyon mongs pa gang yin pa dang /gang las byung ba dang / de gnyis rnam par dag pa gang yin pa dang gang las 'gyur bde rnams yongs su brjod do/ /de dag gi go rims ni ji ltar mngon par rtogs pa bzhin du'o/ /rags pa dang phra ba'i de kho na ni zhes bya ba la/ rags pa'i de kho na ni kun rdzob kyi bden pa'o//phra ba'i de kho na ni don dam pa'i bden pa ste/ 'di ltar dang por rags pas sems can rnams yongs su smin par byed do/ /yongs su smin par gyur nas phra bas rnam par grol bar byed de/ de'i phyir dang por ni rags pa'o/ /phyis ni phra ba'o/ /tshig le'ur byas pa dang mthun par bya ba'i phyir bzlog ste gsungs so//de la mnyam par ma bzhag pa'i shes pa'i yul yin pas kun rdzob kyi bden pa ni rags pa'i de kho na'o/ /mnyam par bzhag pa'i shes pa'i yul yin pas don dam pa'i bden pa ni phra ba'i de kho na'o/ /yang na rnam par shes pa'i yul yin pas na rags pa'o//ye shes kyi yul yin pas na phra ba'o/ /de kho na thams cad rtsa ba'i de kho nar bsdu bar dam bcas pas na/ de'i phyir de rtsa ba'i de kho nar ji ltar rig par bya zhe na zhes dris te de'i phyir/ brtags pa dang ni shes pa dang / /de bzhin brjod pa rags pa yin//zhes bya ba gsungs so/ /brtags pa dang shes pa dang brjod pa rnams ni rags pa'i de kho nar rig par bya'o/ /de nyid bstan par bya ba'i phyir kun rdzob ni rnam pa gsum ste zhes rgya cher smos so/ /don med pa la gzugs dang bum pa dang snam bu zhes bya bar rnam par gzhag pa ni brtags pa'i kun rdzob bo//kha cig na re gzugs dang tshor ba dang / 'du shes la sogs pa'i rang bzhin dang bye brag gi ming gis brjod pa ni brtags pa'i kun rdzob bo zhe'o/ /kha cig na re brjod pa la ltos nas gzugs dang tshor ba zhes bya bar tha snyad 'dogs pa gang yin pa de ni brtags pa'i kun rdzob bo zhe'o//sems dang sems las byung ba bzhin du med pas na kun brtags pa'i ngo bo nyid do/ /shes pa'i kun rdzob ni rnam par rtog pa gang gis gzugs la sogs pa dang bum pa la sogs pa rnam par shes pa snang ba las/pha rol na med kyang phyi rol na yod pa bzhin du ji ltar rnam par gnas pa ltar dngos po'i ngo bor mngon par zhen pa'i rnam par rtog pa ni shes pa'i kun rdzob bo/ /brjod pa yang kun rdzob bo zhes bya ba la/ yang zhes bya ba'i sgra ni bsdu bar bya ba'i don te/ yongs su grub pa ni rnam par rtog pa dang brjod pa las 'das kyang stong pa nyid dang /de bzhin nyid dang / dri ma dang bcas pa dang / dri ma med pa la sogs pa'i rnam grangs kyis bstan pa ni brjod pa'i kun rdzob bo/ /kun rdzob rnam pa gsum po des kun rdzob kyi bden pa nyid de/ rtsa ba'i de kho nar go rims bzhin du rig par bya'o//kun rdzob ni tha snyad do/ /btags pa zhes bya ba ni brjod pa ste/ don med par brjod pa tsam gyis tha snyad du bya ba ni btags pa'i kun rdzob bo/ /de bas na don med pa'i phyir btags pa'i kun rdzob kyis kun brtags pa kun rdzob kyi bden pa'o//don med bzhin du don du mngon par zhen nas shes pa des tha snyad 'dogs pa de ni shes pa'i kun rdzob ste/ de ni mngon par zhen pa'i rnam par rtog pa'o/ /de bas na shes pa'i kun rdzob kyi gzhan gyi dbang kun rdzob kyi bden pa'o/ /chos kyi dbyings brjod du med pa la de bzhin nyid la sogs pa'i sgras brjod pa gang yin pa de ni brjod pa ste/des chos kyi dbyings la tha snyad 'dogs pa ni brjod pa'i kun rdzob bo/ /de bas na brjod pa'i kun rdzob kyis yongs su grub pa kun rdzob kyi bden pa'o/ /de la brtags pa dang brjod pa'i kun rdzob gnyis ni skabs su bsdus nas rnam par gzhag par rig par bya'i/rang bzhin gyis ni ma yin no/ /kun rdzob kyi bden pa bshad zin to/ /de ni don dam pa'i bden pa brjod par bya ste/ de'i phyir/ dam pa'i don ni gcig pu'o/ /zhes bya ba gsungs so/ /brtags pa dang ni gzhan dbang gnyis ni don dam par mi srid pa'i phyir don dam pa'i bden pa ni yongs su grub pa'i ngo bo nyid gcig pur rig par bya'o//yongs su grub pa de yang ci'i phyir don dam pa zhes bya zhe na/ de'i phyir/ don dang thob dang sgrub pa ni/ /don dam rnam pa gsum du 'dod//ces bya ba gsungs so/ /don dam pa ni rnam pa gsum ste/ don dam pa dang / thob par bya ba don dam pa dang / sgrub pa don dam pa'o/ /de la don dam pa de bzhin nyid de/ dam pa ni 'jig rten las 'das pa'i ye shes so/ /de'i yul yin pas don te/ dbang po rnams kyi don bzhin du/ /de bzhin nyid ni dam pa'i don/ /zhes bya'o/ /de nyid bstan pa'i phyir ye shes dam pa'i don yin pa'i phyir ro zhes bya ba smos te/ dmigs pa'i dngos por rnam par gzhag pa'i phyir ro zhes bya ba'i tha tshig go/ /ye shes dang tha mi dad pa'i phyir de'i tshe dmigs par 'gyur ba ni ma yin gyi/rnam par rig pa tsam snang ba bzhin te/ dper na gang dag rnam par rig pa tsam du bzod pa de dag gzugs la sogs pa rnam par rig pa tsam ma gtogs par gzugs la sogs par snang ba ni med pa lta bu'o/ /thob par bya ba don dam pa ni mya ngan las 'das pa ste/shin tu dri ma med pa'i de bzhin nyid gnas gyur pa'i mtshan nyid do/ /ji ltar na don dam pa zhes bya zhe na/ de'i phyir don gyi dam pa yin pa'i phyir ro zhes bya ba smos so/ /de ni dam pa yang yin la don yang yin pas na don dam pa ste/ de 'dus byas dang 'dus ma byas kyi chos rnams kyi mchog yin pas dam pa'o/ /lam gyi dgos pa yin pas na don to/ /'di ltar mya ngan las 'das pa thob par bya ba ni lam gyi dgos pa ste/ gnod pa'i nyes pa thams cad dang bral ba'i phyir mya ngan las 'das pa ni don to/ / 'di ltar nyes pa dang bcas pa la ni don med pa zhes bya'o/ /sgrub pa don dam pa ni lam ste/ ci'i phyir zhe na/ de'i don ni dam pa yin pa'i phyir ro/ /don ni yul lam dgos pa ste/ yul ni de bzhin nyid do/ /dgos pa ni mya ngan las 'das pa'o/ /yul gyi sgo nas dam pa zhes bya na/ ji ltar na gcig la gcig brten par mi 'gyur/gcig la gcig brten par gyur na ci nyes she na/ gtan la bab pa med par 'gyur ro/ /gcig la gcig brten du zin kyang de ltar mi 'gyur te/ seng ge dang nags bzhin no/ /don dam pa'i bden pa ni yongs su grub pa'i ngo bo nyid du bstan la/ lam la ni snga ma dang phyi ma'i cha med pa ma yin pas yongs su grub par mi rung ste/de bas na lam ni don dam pa'i bden pa ma yin la/ yongs su ma grub pas kyang don dam pa'i bden par bsdur mi rung na 'dus ma byas dang 'dus byas yongs su grub pa'i ngo bo nyid du ji skad brjod ce na/de'i phyir/ 'gyur med phyin ci ma log pa/ /yongs su grub pa rnam pa gnyis/ /zhes bya ba gsungs so/ /yang na yongs su grub pa ni de bzhin nyid de/ de yang gzhan gyi dbang gi mtshan nyid gnyis dang bral ba nyid pas mya ngan las 'das pa dang lam gnyis yongs su grub pa nyid du mi rung na mya ngan las 'das pa zhes bya ba 'dus ma byas dang /lam zhes bya ba 'dus byas gnyis yongs su grub pa'i ngo bo nyid do zhes ji skad du bya zhe na/ 'di ni klan kar mi rung ste/ 'di ltar de la gnyis po med pa ni yongs su grub pa nyid de/gnyis po med pa nyid yongs su grub pa zhes de las gzhan dgag par mi byed de/ de bas na de las gzhan yang ste/ 'gyur ba med pa dang / phyin ci ma log par yongs su grub pa gnyis kyang yongs su grub pa zhes sbyar ro/ /'dus ma byas ni mya ngan las 'das pa dang de bzhin nyid de/'dus ma byas ni gzhan du 'gyur ba med pa'i phyir 'gyur ba med par yongs su 'grub pas yongs su grub pa'o/ /'dus byas ni lam gyis bsdus pa la bya'i gzhan la ma yin te/ phyin ci ma log par yongs su grub pas yongs su grub pa zhes bya bar sbyar ro/ /ji lta zhe na/de'i phyir/ shes bya'i dngos po la phyin ci log med pa'i phyir ro zhes bya ba smos te/ gang gi phyir shes par bya ba la phyin ci log tu mi 'gyur ba de'i phyir lam yongs su grub pa yin te/ de bas na bsam pa tha dad pa'i phyir 'dus byas dang 'dus ma byas gnyi ga yang yongs su grub pa yin pas 'gal ba med do//de la/ gcig gis 'jig rten grags pa ste/ /zhes bya ba ni ji ltar brjod pa bzhin du med pa kun brtags pa'i ngo bo nyid kyis te/ de gzhan gyis ni ma yin no/ /de'i rang gi ngo bo mi shes pas de'i phyir/ dngos po gang la zhes bya ba rgya cher smos so//brda ni ming dang ming can 'brel par shes pa'o/ /'dris pa ni de la yang dang yang du sbyor zhing lta ba'o/ /de la rjes su zhugs pa'i blo zhes bya ba la/ brda la 'dris pa'i rjes la zhugs pa'i blo gang zhe na/ de dag dran pa ste/ de ni 'di skad du brda la 'dris pa'i dran pa'i rjes su song ba'i blos 'jig rten pa bstan bcos shes pa dang /de mi shes pa thams cad kyis tha snyad du btags pa'i dngos po gang la la 'di ni sa yin no zhes bya ba la sogs par lta ba mthun pa yin no zhes bstan par 'gyur ro/ /de ni de kho na bzhin du 'jig rten du grags pa'i phyir de ni 'jig rten gyi grags pa'i de kho na zhes bya'o//gsum gyis rigs pa'i grags pa'o/ /zhes bya ba ni ngo bo nyid rnam pa gsum gyi dbang du mdzad de rigs pa zhes bya bas na de'i phyir ngo bo nyid gsum gyis rigs pa'i grags pa'i de kho nar rnam par gzhag go/ /de yang mi shes te/de bas na de bstan pa'i phyir/ gang zag dam pa rigs pa'i don la mkhas pa zhes bya ba la sogs pa smos so/ /de la dam pa dag ni gang dag rigs pa'i don la mkhas pa dag go/ /rtog ge pa dag ni gang dag dpyod pa can dag ste/ snga ma bshad par bsams nas tshig phyi ma brjod do//yang na dam pa dag ni dge ba ci zhes tshol ba can dag go/ /rigs pa'i don la mkhas pa dag ni ltos pa dang / bya ba byed pa dang / 'thad pa dang / chos nyid kyi rigs pa bzhi dang mi 'gal ba'i don la mkhas pa dag go/ /rtog ge pa dag ni rtog pa dang sel nus pa dag dang de bzhin gshegs pa'i gsung rab la brten nas bstan bcos phyin ci ma log par byed pa'o//dpyod pa can dag ni bdag dang gzhan gyi bstan bcos la mkhas par gyur pa dang / legs pa dang nyes pa dpyod pa dag go/ /kha cig las ni dpyod pa can//zhes mi 'byung ste/ de dag 'di skad du/ dam pa zhes brjod pa'i dam pa de gang zhe na/ de'i phyir/ rigs pa'i don la mkhas pa dag /ces bya ba smos so/ /de dag kyang rtog ge pa'i sa dang / bsgom pa'i sa la gnas pa'i phyir rnam pa gnyis te/ de'i phyir rtog ge pa dag ces bya ba smos so zhes zer ro//de dag las kyang kha cig ni 'jig rten gyi grags pa'i rjes su 'brang bas na/ de'i phyir tshad ma gsum la brten nas zhes bya ba smos te/ tshad ma gsum dang mi 'gal bar zhes bya ba'i tha tshig go/ /tshad ma gsum ni mngon sum dang / rjes su dpag pa dang /lung ngo / /de la mngon sum ni dbang po lnga las skyes pa dang / bde ba dang sdug bsngal la sogs pa myong ba'i yid do/ /tshul gsum pa'i rtags kyi rjes su dpag par bya ba'i don la shes pa ni rjes su dpag pa'o/ /yid ches pas bstan pa ni lung ste/ yid ches pas ni brdzun du smra ba'i rgyu dang mi ldan pa dag go//yang na mngon sum dang rjes su dpag pa dang lung gis rab tu grub pa'i gtan tshigs dang / dpes bsgrub par bya ba sgrub pa de nyid gzhan la sgrub par byed pas tshad ma gsum la brten nas zhes bya ba smos te/ 'thad pa sgrub pa'i rigs pas grags pa'i dngos po'o zhes bya ba la/'thad pa ni bsgrub par bya ba rtogs par byed pa'i thabs yin pas tshul gsum pa'i rtags so/ /'thad pa'i sgrub pa ni 'thad pa sgrub pa ste/ des rtogs par bya ba'i phyir tshul gsum pa'i rtags brjod pa'o/ /rigs pa ni thabs te/sbyor ba nges pa gang gi rtags kyi tshul gsum brjod pa'o/ /yang na 'thad pa ni gzhan du mi srid pa'o/ /sgrub pa'i rigs pa ni cha'i sbyor ba ste/ 'thad pa sgrub pa'i rigs pa'o zhes tshig rnam par sbyar ba'o/ /yang na 'thad pa nyid sgrub pa'i rigs pa yin par tshig rnam par sbyar bar bya'o//sgrub pa'i rigs pa gzhan dag las dbye ba'i phyir 'thad pa smos te/ de ltar na tshad ma gsum la brten nas 'thad pa sgrub pa'i rigs pas gang grags pa'i dngos po ngo bo nyid gsum gyi nang nas gang yang rung ba ste rigs pas grags pa zhes bya'o/ /grags pa'i de kho na bshad zin to//de'i 'og tu rnam par dag pa'i spyod yul brjod dgos te/ de'i phyir/ rnam par dag pa'i spyod yul gyi de kho na rnam pa gnyis te zhes bya ba smos so/ /de yang ji ltar rnam pa gnyis su 'gyur ba de bstan pa'i phyir/ nyon mongs pa'i sgrib pa rnam par dag pa'i ye shes kyi spyod yul dang shes bya'i sgrib pa rnam par dag pa'i ye shes kyi spyod yul lo zhes bya ba smos so//nyon mongs pa'i sgrib pa rnam par dag pa ni nyon mongs pa'i sgrib pa spangs pa ste/ nyon mongs pa'i sgrib pa rnam par dag par bya ba'i phyir ram/ nyon mongs pa'i sgrib pa rnam par dag par byed pa'i ye shes ni nyon mongs pa'i sgrib pa rnam par dag pa'i ye shes te/nyon mongs pa'i sgrib pa rnam par dag par bya bar dgos pa'am/ de'i rgyu zhes bya ba'i tha tshig go/ /nyon mongs pa'i sgrib pa rnam par dag pa'i ye shes de'i spyod yul zhes bya ba ni yul zhes pa'i tha tshig go//de bzhin du shes bya'i sgrib pa rnam par dag pa'i ye shes kyi spyod yul la yang brjod par bya'o/ /de la nyon mongs pa'i sgrib pa ni mthong ba dang bsgom pa'i lam gyis spang bar bya ba'i nyon mongs pa dang nye ba'i nyon mongs pa thams cad do/ /de bas na mthong ba dang bsgom pa dang de dang nye bar spyod pa'i ye shes kyi yul ni nyan thos dang rang sangs rgyas rnams kyi de kho na gang yin pa sdug bsngal dang /kun 'byung ba dang / 'gog pa dang lam rnams kyi bden pa zhes bya ba ste/ de ni nyon mongs pa'i sgrib pa rnam par dag pa'i ye shes kyi spyod yul lo/ /shes par bya ba ni shes bya ste/de ni mdor na rig pa'i gnas lnga dag go/ /de dag ni nang dang / brda sprod pa dang / gtan tshigs dang / gso ba dang / bzo dang las kyi gnas zhes bya ba thams cad do/ /de la ye shes kyi gegs su gyur pa nyon mongs pa can ma yin pa'i mi shes pa ni shes bya'i sgrib pa'o//de rnam par sbyong ba ni 'jig rten las 'das pa'i ye shes kyi rjes su mthun pa'i mos pas spyod pa'i sar bsdus pa dang / rab tu dga' ba la sogs pa sa bcu gcig tu bsdus pa dang / de'i rjes las thob pa'i ye shes so/ /de yang byang chub sems dpa' dang / de bzhin gshegs pa'i thugs kyi rgyud la mnga' ba ste/de ni kun du 'gro ba'i don la sogs pa'i sgo nas de bzhin nyid la dmigs pas de'i phyir/ shes bya'i sgrib pa rnam par dag pa'i ye shes kyi spyod yul gyi de kho na ni de bzhin nyid do/ /'bras bu dang rgyu'i de kho na bshad pa dang / phra ba'i de kho na bshad pas rnam par dag pa'i spyod yul rnam pa gnyis kyang bshad zin na/'di brjod pa don med par mi 'gyur ram zhe na/ don med par mi 'gyur te/ 'di ltar 'bras bu dang rgyu'i de kho na dang phra ba'i de kho na ni dngos po rnam par gzhag pa'i phyir bshad do/ /'dir ni sgrib pa ji ltar rnam par dag par 'gyur ba ste/de'i phyir de skad bstan to/ /rnam par dag pa'i spyod yul 'di rnam pa gnyis ni yongs su grub pa'i ngo bo nyid gcig pus brjod de/ 'dir rgyu smos pa/ ngo bo nyid gzhan ni rnam par dag pa'i ye shes rnam pa gnyis kyi spyod yul ma yin no zhes bya ba'o//ci'i phyir zhe na yang dag pa ma yin pa kun rtog pa ni gnas ngan len gyi dri ma gnyis kyis dri ma can du gyur pa'i phyir ro/ /kun brtags pa ni med pa'i phyir ro/ /ye shes rnam pa gnyis kyi yul ni chos nyid yin pas rnam par dag pa'i spyod yul gyi de kho na ni yongs su grub pa nyid kyis rnam par gzhag go//rnam par dag pa'i spyod yul gyi de kho na bshad zin to/ /de'i 'og tu bsdu ba'i de kho na brjod dgos te/ de'i phyir rtsa ba'i de kho na rnam pa gsum du bsdu ba'i de kho na ji ltar rig par bya zhe na zhes dris pa dang / rtsa ba'i de kho na rnam pa gsum du bsdu ba'i de kho na 'dus par bstan pa'i phyir/rgyu dang rnam par rtog pa dang / /ming ni rnam pa gnyis su bsdu/ /zhes rgya cher gsungs te/ gzhan gyi dbang dang kun brtags pa gnyis su bsdu'o/ /de la bsdu ba'i de kho na ci rigs su sbyar ro zhes bya ba ni gar 'os par rtsa ba'i de kho nar dngos po lnga dag 'dus par rig par bya ba'i go rims bzhin du ni ma yin no//dngos po lnga ni rgyu mtshan dang / ming dang / rnam par rtog pa dang / de bzhin nyid dang / yang dag pa'i ye shes te/ shes par bya ba thams cad dngos po rnam pa lnga po 'dir bsdu ba'i phyir dngos po rnam pa 'di lnga la bsdu ba'i de kho na zhes bya'o//kha cig na re de la rgyu mtshan ni kun gzhi rnam par shes pa dang / nyon mongs pa can gyi yid dang / 'jug pa'i rnam par shes pa rnams te/ phan tshun rgyu'i dngos po yin pas rgyu mtshan no/ /ming ni rgyu mtshan gang yin pa de nyid brjod du med du zin kyang mig brda bzhin du go bar brjod pa'o//ji skad du smras pa'i rgyu mtshan gyi rang bzhin dang bye brag tu rnam par rtog pa khams gsum pa dang ldan pa'i sems dang sems las byung ba ni rnam par rtog pa'o/ /stong pa nyid ni de bzhin nyid do/ /yang dag pa'i ye shes ni 'jig rten las 'das pa ste/de bzhin nyid la dmigs pa'o/ /de dag gi go rims ni de la kun nas nyon mongs par gdags pa'i dngos po yin pas na dang por rgyu mtshan no/ /kun nas nyon mongs pa zhes btags pa'i phyir de'i 'og tu ming ngo / /ming ji lta ba de bzhin du kun nas nyon mongs par gdags pa'i dngos po la rnam par rtog pa'i phyir de'i 'og tu rnam par rtog pa'o//kun nas nyon mongs pa de yang de bzhin nyid dang yang dag pa'i ye shes kyis 'gag par 'gyur bas na de'i 'og tu de bzhin nyid dang yang dag pa'i ye shes so zhe'o//gzhan dag na re/ 'khrul pa'i rgyu ni 'khrul pa ste/ /de yi rgyu ni gnas ngan len/ /de bas 'khrul pa de yi rgyu/ /rang bzhin zhi bde shes pa/ /zhes bya ba'i tshigs su bcad pa 'dis dngos po lnga'i don to zhe'o/ /de la nang gi mig la sogs pa'i rnam par shes par bsdus pa rnams kyi 'khrul pa'i rgyu ni phyi nang gi gzugs la sogs pa dang /mig la sogs par bsdus pa'i 'khrul pa'o/ /phyi nang gi 'khrul pa de dag gi rgyu ni gnas ngan len te/ de yang kun gzhi rnam par shes pa'i bag chags so/ /bag chags de'i rgyu ni phyi nang gi 'khrul pa de nyid do//de lta bas na de la brjod pa 'jug go/ /brjod pa'i dbang gis kun gzhi rnam par shes pa la bag chags gnas so/ /rang bzhin gyis zhi ba zhes bya ba ni de bzhin nyid de/ rang bzhin gyis kun nas nyon mongs pa med pa'i phyir chos kyi dbyings so/ /de shes pa zhes bya ba ni de bzhin nyid la dmigs pa lam du gtogs pa'i ye shes gang yin pa'o//de la rgyu dang rnam par rtog pa gnyis ni rgyu dang rkyen gyis bskyed pa'i phyir gzhan gyi dbang du bsdu'o/ /ming ni kun brtags par zhes bya ba la ming ji lta ba bzhin du don med pas ming ni kun brtags par bsdu'o//de ltar na skabs yin pa'i phyir kun brtags par ming bsdus kyi/ ngo bo nyid kyis bsdus pa ni ma yin no/ /ngo bo nyid med par grub pa las kun brtags pa'i ngo bo nyid ni rgyu la sogs pa dngos po lngas ma bsdus so zhes gang bshad pa dang 'gal ba med do/ /der ni ngo bo nyid bsdu bar 'dod pa'i phyir ro//yang dag ye shes rab kho na/ /zhes bya ba ni/ rtag tu'am mdzes pa'i de kho na ste de bzhin nyid do/ /stong pa nyid la dmigs pa gnyis su med pa'i ye shes dang / de'i rjes las thob pa dag pa 'jig rten pa ni yang dag pa'i ye shes so/ /de bzhin nyid dang yang dag pa'i ye shes de gnyis ni 'gyur ba med pa dang /phyin ci log med pa'i yongs su grub pas go rims bzhin du yongs su grub pa'i phyir yongs su grub pa'i ngo bo nyid gcig pus bsdus so/ /bsdu ba'i de kho na bshad zin to/ /rab tu dbye ba'i de kho na la rnam pa du ma yod pa dang /de rtsa ba'i de kho nar ji ltar bsdu ba mi shes nas de'i phyir/ rab tu dbye ba'i de kho na rtsa ba'i de kho nar ji ltar rig par bya zhe na zhes dris pa dang de'i phyir/ rab tu dbye ba'i de kho na rnam pa bdun te zhes bya ba smos so/ /gang zhe na de'i phyir/ 'jug pa'i de kho na dang mtshan nyid kyi de kho na zhes bya ba rgya cher smos te/dgongs pa nges par 'grel pa las 'jug pa'i de bzhin nyid nas yang dag par sgrub pa'i de bzhin nyid kyi bar du de bzhin nyid rnam pa bdun bka' stsal pa gang yin pa de nyid 'dir 'jug pa'i de kho na nas/ yang dag par sgrub pa'i de kho na'i bar du rab tu dbye ba'i de kho na rnam pa bdun du bshad do//de la 'jug pa'i de kho na ni gang 'khor ba la thog ma dang tha ma med pa'o/ /de nyid 'jug pa'i de bzhin nyid de/ 'di ltar de ni nam yang thog ma dang ldan par mi 'gyur ro/ /mtshan nyid kyi de kho na ni gang zag dang chos la bdag med pa ste/ gzhan du mi 'gyur ba'i phyir de nyid mtshan nyid kyi de bzhin nyid do//rnam par rig pa'i de kho na ni chos rnams kyi rnam par rig pa tsam nyid do/ /kha cig na re rnam par mi rtog pa'i ye shes sam/ rnam par rig pa'i gnas 'di ni rnam par rig pa'i de kho na'o zhe'o/ /rnam par rig pa'i de kho na ni gzhan du 'gyur ba med pa'i phyir rnam par rig pa'i de bzhin nyid ces bya'o//gnas pa'i de kho na ni sdug bsngal gyi bden pa ste/ 'du byed rnams sdug bsngal bar gnas pa'i phyir ro/ /de nyid rtag par de bzhin pas na de bzhin nyid do/ /log par sgrub pa'i de kho na ni kun 'byung ba'i bden pa ste/ de yang gang 'du byed de dag la yon tan du lta bas 'jug pa'i phyir ro//rnam par dag pa'i de kho na ni nyon mongs pa'i sgrib pa rnam par dag pa ste/ de ni de bzhin nyid dang 'gog pa'i bden pa'o/ /kha cig na re gnas gyur pa'i bdag nyid 'gog pa'i bden pa nyid do zhe'o/ /yang dag par sgrub pa'i de kho na ni lam gyi bden pa'o//gzhan dag na re rnam par rig pa'i de kho na ni tshul bzhin du sbyor ba ste/ yang dag par sgrub pa'i de kho na dang / rnam par rig pa'i de kho na yang lam gyi bden pa nyid do zhe'o/ /de kho na gsum po 'di dag kyang rtag tu de bzhin bas de bzhin nyid ces bya bar 'gyur ro/ / de la 'jug pa de kho na rnam pa gnyis/ rtsa ba'i de kho na kun brtags pa dang / gzhan gyi dbang gi mtshan nyid du rig par bya'o zhes bya ba de la 'jug pa ni tshe'i rgyun thog ma med pa can te/ de ni med pas kun brtags pa'i ngo bo nyid do/ /rgyun de su dag gi yin pa de dag ni rgyus rab tu phye ba'i phyir gzhan gyi dbang gi ngo bo nyid de/de ltar gang dag gis yin pa dang / 'jug pa gang yin pa de ni 'jug pa'i de kho na zhes bstan pa yin no/ /yang na nyon mongs pa dang las dang tshe rnams kyi 'byung ba thog ma med pa can ni 'khor bar 'jug pa zhes bya'o/ /de yang kun brtags pa'i ngo bo nyid la mngon par zhen pas rab tu phye ba ste/de'i phyir/ 'jug ste kho na rnam pa gnyis/ /rtsa ba'i de kho na zhes bya ba smos so/ /de bzhin du/ gnas pa dang ni ngan par zhugs/ /zhes bya ba la log par sgrub pa ni ngan par zhugs pa'o/ /de bzhin du rtsa ba'i de kho na rnam pa gnyis su'o zhes bya ba ni sdug bsngal dang kun 'byung ba gnyis rgyu dang rkyen gyis rab tu phye ba dang /kun rtog pa'i yul yin pa'i phyir gnas pa dang / log par sgrub pa'i de kho na rnam pa gnyis su bsdu ba'o/ /mtshan nyid rnam par rig dang dag /yang dag sgrub pa gcig pu'o/ /zhes bya ba ni mtshan nyid kyi de kho na dang /rnam par rig pa'i de kho na dang / rnam par dag pa'i de kho na dang / yang dag par sgrub pa'i de kho na ste/ de kho na 'di bzhi ni rtsa ba'i de kho na gcig kho na ste/ 'di ltar yongs su grub pa'i ngo bo nyid do/ /de la mtshan nyid kyi de kho na dang rnam par dag pa'i de kho na gnyis ni gzhan du 'gyur ba med par yongs su grub pas yongs su grub pa'o//rnam par rig pa'i de kho na dang / yang dag par sgrub pa'i de kho na gnyis ni phyin ci ma log par yongs su grub pas yongs su grub pa'o/ /'di la 'jug pa dang gnas pa dang / log par sgrub pa'i de kho na gsum gyis ni sems can rnams mnyam par bstan to//mtshan nyid dang rnam par rig pa'i de kho na gnyis kyis ni chos mnyam pa'o/ /rnam par dag pa'i de kho nas ni byang chub mnyam pa'o/ /yang dag par sgrub pa'i de kho nas ni shes rab mnyam par bstan to//smras pa/ sems can mnyam par gsum gyis brjod/ /chos rnams mnyam pa gnyis kyis te/ /de ltar byang chub blo mnyam par/ /re re rab tu bstan pa yin/ /rab tu dbye ba'i de kho na'i 'og tu mkhas pa'i de kho na bshad de/ de bas na de bstan pa'i phyir/ mkhas de kho na rnam bcu ni//bdag tu lta ba'i gnyen po'o/ /zhes gsungs zhes bya ba smos so/ /phung po la sogs pa la bdag tu lta ba rnam pa bcu po de yang ji lta bu yin pa de mi shes nas/ de'i phyir phung po la sogs pa la bdag tu lta ba rnam pa bcu po de dag ji lta zhe na zhes dris pa dang / de'i phyir/ gcig dang rgyu dang za ba dang / /byed pa dang ni dbang sgyur dang / /bdag po'i don dang rtag pa dang / /nyon mongs pa dang dag pa'i gnas/ /rnal 'byor can dang ma grol grol/ /de dag la ni bdag tu lta/ /zhes bya ba gsungs te/ phung po la sogs pa la zhes bya bar sbyar ro/ /bdag med pa la 'dzin pa rnam pa 'di bcu ni zhes bya ba ni bdag med pa'i phyir med pa la 'dzin pa zhes bya ba smos so//gal te bdag med na gzung ba'i gzhan gyi dbang du gyur pa'i 'dzin pa ji ltar yul med pa la 'jug ce na/ 'di ni yul med pa ma yin te/ phung po la sogs pa la 'jug go//de'i phyir de dag gi gnyen por phung po la sogs pa la mkhas pa rnam pa bcu bshad do/ /ji ltar na 'di phung po la sogs pa la bdag tu 'dzin gyi bdag ni yod pa ma yin par nges she na/ 'di ltar phung po la sogs pa ma gtogs par bdag ces bya ba rigs pas yongs su brtags na dmigs su med do//bdag tu smra ba dag bdag gi bya ba dang rang bzhin gang yin pa de dag thams cad kyang phung po la sogs pa la 'jug ste/ de'i phyir phung po la sogs pa nyid bdag tu 'dzin pa'i gzhi yin par mngon no/ /bdag tu mngon par zhen pa rnams ni rnam pa 'di bcus bdag tu 'dzin pa 'byung gi gzhan dag gis ni ma yin te/de'i phyir phung po la sogs pa la mkhas pa ni bdag tu 'dzin pa thams cad kyi gnyen por rig par bya'o/ /'di lta ste/ gcig pur 'dzin pa zhes bya ba ni nye bar len pa'i phung po lnga po dag la ril po'i bdag tu 'dzin pa ste/ de'i gnyen por phung po la mkhas pa'o//rgyur 'dzin pa zhes bya ba ni mig la sogs pas bsgo ba'i phyir bdag la rgyur 'dzin pa ste/ de'i gnyen por khams la mkhas pa'o/ /de bzhin du gzhan dag la yang mi mthun pa'i phyogs dang gnyen po brjod par bya'o/ /yang na bdag nyid las thams cad 'byung ngo snyam pa 'di ni rgyud 'dzin pa ste/las dge ba dang mi dge ba gang yin pa de'i 'bras bu tshe 'di la 'dod pa dang / mi 'dod pa'i rgyu bdag yin par sems pa ni rgyur 'dzin pa'o/ /za bar 'dzin pa zhes bya ba ni sems yin pa'i phyir bdag ni za ba'o/ /gsal ba dang mi gsal ba ni sems med pa'i phyir bza' ba'o//yang na dge ba dang mi dge ba'i las rnams kyi bar du skye ba gang yin pa de nyid de'i 'bras bu la za bar byed do snyam pa ni za bar 'dzin pa'o/ /byed par 'dzin pa zhes bya ba ni legs par byas pa dang / nyes par byas pa'i las rnams bdag nyid kyis byed par 'dzin pa gang yin pa'o//yang na byed pa dang ldan pa gang zhig bya ba de dang de dag byed pa ni bdag go zhes byed par 'dzin pa'o/ /rang dbang du 'dzin pa zhes bya ba ni rang dgar dbang byed pa gang yin pa de ni bdag go/ /dbang du bya ba gang yin pa de ni bdag go zhes bya bar 'dzin pa gang yin pa'o//yang na rgyu dang 'bras bu 'byung ba la dbang byed do snyam pa ni rang dbang du 'dzin pa'o/ /bdag por 'dzin pa zhes bya ba ni bdag po dang rje bo dang dbang phyug gang yin pa de ni bdag go snyam du sems pa'o/ /yang na 'bras bu dang mthun par de la spyod pa'i bdag po ni bdag go snyam du sems pa ni bdag por 'dzin pa'o//rtag par 'dzin pa zhes bya ba ni rgyu la sogs pa dngos po rnam pa lngas rnam par ma dag kyang bdag rtag pa kho na'o/ /gzhan du nam byas pa dang phrad pa dang / byas pa chud zos pa dang / de bzhin du dran pa dang / so sor ngo shes pa yang med par 'gyur ro//kun nas nyon mongs pa dang rnam par byang bar 'dzin pa zhes bya ba ni kun nas nyon mongs pa dang rnam par byang ba'i rten yin pa'i phyir ro/ /rnal 'byor can du 'dzin pa zhes bya ba la/ bdag la yid 'dzin pa ni rnal 'byor ro/ /yang na dbugs dang yid 'gog pa'o//bdag dang yid sbyor ba'i khyad par ni rnal 'byor te/ de la 'di yod pa ni rnal 'byor can no/ /ma grol ba dang grol ba 'dzin pa zhes bya ba ni bdag sngar bcings pa las grol lo snyam du rnam par rtog pa gang yin pa'o/ /mkhas pa rnam pa bcu po 'di dag rtsa ba'i de kho nar ji ltar 'du shes na zhes bya ba la/mkhas pa zhes bya ba ni phung po la sogs pa la mkhas pa yin na/ de ngo bo nyid gsum po dag tu ji ltar 'dus te/ mi srid do snyam nas dris pa'o/ /'di ltar ngo bo nyid gsum du phung po lnga la sogs pa de dag 'dus so zhes bya ba ni mkhas pa'i yul la 'dir mkhas pa zhes bya ba'i sgrar brjod kyi mkhas pa de nyid ma yin te/de lta bas na mkhas pa'i de kho na skabs kyis der bsdu ba'i dngos po ni ma yin par rig par bya ste/ 'di lta ste dper na 'bras bu dang rgyu'i de kho na lam gyi bden pa gsum du 'dus par bshad pa lta bu'o//de nyid ji lta 'dus pa'ang ma shes nas/ ji ltar 'dus shes na zhes dris pa dang / de'i phyir/ kun du rtog dang rnam rtog don/ /chos nyid don gyi de dag der/ /zhes bya ba gsungs te/ ngo bo nyid gsum du phung po la sogs pa de dag 'dus so zhes bya ba'i skabs yin no//de la khams la sogs pa bas sngar bstan pa'i phyir phung po rnams thog mar bsdus la bshad par bya'o/ /de dag las kyang gzugs su bsdu bar bya ste/ de'i phyir gzugs la rnam pa gsum ste/ gang zhe na kun brtags pa'i gzugs dang /rnam par brtags pa'i gzugs dang / chos nyid kyi gzugs so/ /de la kun brtags pa'i gzugs gang zhe na/ gang gzugs kyi kun brtags pa'i ngo bo nyid do zhes bya ba ni da'ang gang ming du dmigs pa ma gtogs par de la yul gyi ngo bo dngos por yongs su rtog pa ste/de gtan med pa'i phyir kun brtags zhes bya'o/ /rnam par brtags pa'i gzugs ni gang gzugs gzhan gyi dbang gi ngo bo nyid do zhes bya ba ni rgyu dang rkyen la rag las zhes bya ba'i tha tshig go/ /ci'i phyir 'di rnam par brtags pa'i gzugs zhes bya zhe na/ de'i phyir de la gzugs su rnam par rtog par byed do zhes bya ba smos te/'di ltar de kho na ma mthong ba rnams kyis yongs su ma shes te/ gzugs su snang ba'i rnam par shes pa la gzugs su 'du shes nas gzugs la mngon par zhen par byed de/ dper na phung po la bdag tu 'dzin pa bzhin no/ /de bas na gzhan gyi dbang la rnam par brtags pa'i gzugs zhes bya'o//chos nyid kyi gzugs ni gang gzugs kyis yongs su grub pa'i ngo bo nyid do zhes bya ba de ni rnam par brtags pa'i gzugs dang kun brtags pa'i gzugs de dag dang bral ba'i bdag nyid stong pa nyid do/ /gzugs ji lta ba zhes bya ba ni gzugs la gsum du phye ste ngo bo nyid gsum du bsdus pa de bzhin du tshor ba la sogs pa'i phung po rnams dang /khams dang skye mched la sogs pa la yang sbyar bar bya'o zhes bya ba ni tshor ba dang 'du shes dang 'du byed dang rnam par shes pa'i phung po dang / khams dang /skye mched rnams dang / rten cing 'brel bar 'byung ba'i yan lag rnams dang / gnas dang gnas ma yin pa dang / dbang po rnams dang / dus gsum dang / bden pa bzhi dang / theg pa gsum dang / 'dus byas dang / 'dus ma byas te tshor ba la sogs pa dang / khams la sogs pa de dag kyang kun brtags pa dang / rnam par brtags pa dang / chos nyid kyi ngo bo nyid kyi bye brag gis rnam pa gsum gsum du phye ste/ ngo bo nyid gsum du bsdu bar bya'o/ /de la gzugs su snang ba rnams la gzung ba'i dngos por rtog pa bzhin du tshor ba la sogs par snang ba de la/gzung ba dang 'dzin pa'i dngos po gtan med pa bzhin du yang kun rtog pa gang yin pa de kun brtags pa'i tshor ba nas kun brtags pa'i rnam par shes pa'i bar du'o/ /gang la gzung ba dang 'dzin par rtog par byed pa de ni rnam par brtags pa'i tshor ba nas rnam par brtags pa'i rnam par shes pa'i bar du'o//chos nyid kyi tshor ba ni gang tshor ba'i yongs su grub pa'i ngo bo nyid de/ chos nyid kyi rnam par shes pa'i bar du de bzhin du brjod par bya'o/ /de bzhin du khams dang skye mched rnams la yang ci rigs par rgyas par brjod par bya'o//gzugs dang tshor ba nas 'dus byas dang 'dus ma byas zhes bya ba'i bar du ming gis brjod par bya ba'i dngos po gang yin pa de yang kun brtags pa dang / gzhan gyi dbang dang / yongs su grub pa'i ngo bo nyid du rig par bya'o/ /ji lta zhe na/ de la gzugs la sogs pa'i ngo bo nyid du brtags pa'i phyir kun brtags pa'o//gdags pa'i gnas kyi dngos po yin pas gzhan gyi dbang ste/ de nyid rkyen gzhan la rag las pa'i phyir ro/ /gzugs la sogs pa'i dngos po dang gtan dang bral ba nyid yongs su grub pa'o//gzhan gyi dbang nyid gzugs la sogs pa'i dngos por ming du brjod kyi kun brtags pa'i ni ma yin no/ /kun brtags par rnam par rtog pa don med pa nyid du mi 'gyur ram zhe na/ don med pa ma yin te/ de la gzugs la sogs pa'i ngo bo nyid du sgro btags pa'i phyir ro/ / ji lta ji lta bur don la ming 'jug pa de lta de lta bur med mod kyi byis pa rnams de'i ngo bo nyid du mngon par zhen to/ /de'ang log par mngon par zhen pa yin gyi yang dag pa'i don du ma yin par ci mngon zhe na/ mthun nam mi mthun yang rung ste/ ming dang don gnyis kyis brjod par bya ba dang /rjod pa'i dngos po ldog pa'i phyir ro/ /gal te shing la sogs pa'i sgra dang de dag gi don rnams tha dad pa'i ngo bo ma yin du zin na/ de lta na ni ming dang de dag gi don gyi ngo bo tha mi dad pa'i phyir don bzhin du brjod pa ldog par 'gyur ro/ /don kyang ming gi ngo bo dang tha mi dad na brjod par bya ba las nyams par 'gyur te nges pa'i rgyu med pa'i phyir ro//yang na ming gis brjod pa yang gzhan la don gyi brjod par bya ba yang gzhan du 'gyur bas thug pa med par 'gyur ro/ /don gcig la ming mang po'am/ ming gcig la yang don mang por gyur na du ma'i ngo bor 'gyur te/gcig ni du ma'i ngo bor mi rung ngo / /dngos po med pa'i brjod pa dag kyang don bzhin du med par 'gyur te/ de'i don dngos po med pa'i phyir ro/ /yang na ming yod pa'i phyir de'i don kyang yod par 'gyur ro/ /mi mthun pa yang sgra dang mthun par don shes pa med de/de la shing ni sgra nyid de don ni ma yin no/ /don ni shing yang ma yin shing ma yin pa'ang ma yin no/ /de'i phyir shing gi sgra'i don ni shing zhes pa'i yul du mi 'gyur te/ de'i don ni shing gi bdag nyid ma yin pa'i phyir ro/ /de ltar sgra dang don gnyis rjod pa dang brjod par bya ba'i dngos po las ldog go//mi mthun na yang nges pa'i rgyu med pa'i phyir rjod pa dang brjod par bya ba nges pa med par 'gyur ro/ /ming gis don bskyed dam gsal bar byed grang na/ de la skyed par byed pa ni ma yin te/ skyes zin pa'i don la ming 'dogs pa'i phyir ro//yang dang yang ming 'dogs pas skyes zin pa yang yang dang yang bskyed dgos par thal bar yang 'gyur ro/ /gsal bar byed pa yang ma yin te/ 'di ltar don rtogs nas ming 'dogs na rtogs zin pa la ni gsal bar bya ba mi rigs so/ /ming de nyid kyis don de nyid yin par su de mi shes pa gzhan dag gis ni mi rtogs so//de nyid don de nyid gsal bar byed pa yang yin/ gsal bar mi byed pa yang yin zhes bya bar ni mi rung ste/ gsal bar byed pa sgron ma la sogs pa dag ni gsal bar bya ba'i don shes pa la ltos nas gsal bar byed pa ma yin no//gsal bar bya ba bum pa dang snam bu la sogs pa la gsal bar byed pa nges pa yang ma mthong bas don thams cad la ming thams cad kyis gsal bar byed par 'gyur du 'ong ngo / /dri la sogs pas nges pa yang ma yin te/ 'di ltar ste'u dang chu la sogs pa ni dri la sogs pa'i skyed pa por 'dod kyi gsal bar byed pa ni ma yin no//de bas na rjod pa dang brjod par bya ba la mngon par zhen pa ni gzung ba dang 'dzin pa la mngon par zhen pa bzhin du don med pa nyid du mngon no/ /de ltar na ngo bo nyid gsum du phung po la sogs pa 'dus pa'i phyir mkhas pa'i de kho na rnam pa bcu ni rtsa ba'i de kho na nyid du blta'o//bdag tu lta ba'i gnyen por phung po la sogs pa'i don ni bshad de/ don gang la phung po la sogs pa la mkhas pa'i mi mthun pa'i phyogs bdag tu lta ba phung po la sogs pa'i don ni ma bshad pas de brjod par bya ste/thog mar du ma nyid dang ni/ /bsdus dang yongs su phye ba'i don/ /zhes bya ba smos so/ /thog mar zhes bya ba ni dang por brjod do zhes bya bar sbyar ro/ /de la thog ma kho nar phung po bshad de/ de dag kyang don rnam pa gsum du rig par bya ste/ du ma'i don ni gzugs gang ci'ang rung ste/'das pa dang ma 'ongs pa dang da ltar byung ba 'am nang gi 'am phyi'i 'am rags pa 'am phra ba 'am ngan pa 'am gya nom pa 'am rgyang ring po 'am thag nye ba de lta bu dag ni du ma'i don te/ 'das pa la sogs pa'i rdzas mang po dag la phung po zhes brjod pa'i phyir ro//bsdus pa'i don ni phung po ste/ bsdus nas gcig tu byas pa'o/ /yongs su phye ba'i don yang phung po zhes bya ba dang sbyar te/ kyang zhes bya ba'i sgra ni du ma'i don dang bsdus pa'i don gnyis kyang bsdu ba'i don to/ /'dir rgyu smos pa/ gzugs kyi mtshan nyid kyi phung po ni tshor ba la sogs pa'i mtshan nyid las tha dad du rnam par gzhag pa'i phyir ro zhes bya ba'o//tha dad pa yang yongs su phye ba ni rnam grangs su gtogs pa'o/ /'dir ci'i phyir na yan lag 'di gsum gyi phung po'i don rnam par gzhag ce na/ phung po'i don ni spungs pa'i don te zhes bya bas na de'i phyir de ltar rnam par gzhag ste/'jig rten na yang mthong ba'i phyir ro/ /de ltar 'jig rten na yang du ma dang bsdus pa dang yongs su phye ba gang yin pa de dag ni spungs pa zhes brjod par mthong ngo / /gzugs kyi phung po ji lta ba de bzhin du tshor ba'i phung po la sogs pa yang rig par bya'o//de la ji ltar byung ba gang yin pa dang 'byung bar 'gyur ba gang yin pa la sogs pa 'di dag thams cad ni skyes bu yin no zhes bdag gcig pur 'dzin pa gang yin pa de'i gnyen por ji nas phung po'i don la mkhas par bya ba bshad de/ji lta zhe na/ 'das pa la sogs pa tha dad pa'i gzugs la sogs par gcig tu bsdus pa rnams la gzugs la sogs pa'i phung por gdags pa'i phyir ro/ /de yang rmongs pa rnam pa gsum gyi gnyen por phung po rnam gsum gzhag ste/ rmongs pa rnam pa gsum ni gcig tu rmongs pa dang /bzlum pa la rmongs pa dang / mtshan nyid 'dres pa la rmongs pa'o/ /phung po'i 'og tu khams rnams bstan te/ de bas na phung po'i don gyi 'og tu khams kyi don gsungs pa/ 'dzin dang gzung dang de 'dzin pa/ /sa bon don de gzhan du 'dod//ces bya ba'o/ /gzhan zhes bya ba'i sgra ni khams nyid dang sbyar te phung po'i 'og tu bstan pa'i phyir ro/ /de'i phyir bshad pa byed pas kyang / gzhan gang zhe na/ khams so zhes bya ba smos so/ /sa bon gyi don ni khams kyi don te/ dper na gser yod pa'i rdo rje la gser gyi khams zhes bya ba ste/gser gyi sa bon zhes bya bar mngon pa lta bu'o/ /de yang 'bras bu tha dad pas rnam pa gsum du dbye ste/ 'dzin pa'i khams dang / gzung ba'i khams dang / de 'dzin pa'i khams so/ /de la 'dzin pa'i sa bon gyi don ni mig gi khams la sogs pa ste/gang dag mig gi khams nas yid kyi khams la thug gi bar gyi khams de dag mig gi khams la sogs pa'o/ /de dag kyang gzugs la sogs pa yul 'dzin pa'i gnas su gyur pa'i phyir 'dzin pa dag go/ /rigs mthun pa'i mig la sogs pa dag gi rgyu yin pa'i phyir khams rnams zhes bya'o//gzung ba'i sa bon gyi don gzugs kyi khams la sogs pa nas chos kyi khams la thug gi bar dag go/ /mig la sogs pa'i rnam par shes pa'i yul yin pa'i phyir gzung ba dag go/ /de dag kyang de bzhin du gzugs la sogs pa mtshungs pa rnams kyi rgyu'i dngos po yin pas khams rnams zhes bya'o//de 'dzin pa'i sa bon gyi don ni mig gi rnam par shes pa'i khams la sogs pa ste/ gzugs la sogs pa la shes pa'i ngo bo nyid yin pas gzugs la sogs pa la 'dzin pa mig gi rnam par shes pa nas yid kyi rnam par shes pa la thug gi bar dag go//de dag kyang mig gi rnam par shes pa la sogs pa mtshungs pa rnams kyi rgyur gyur pa'i phyir khams rnams zhes bya ste/ mig gi rnam par shes pa'i khams nas yid kyi rnam par shes pa'i khams kyi bar dag go//kha cig na re mig la sogs pa la mngon par zhen pa'i las kyi bag chags bsgos pa'i kun gzhi rnam par shes pa ni mig la sogs pa'i sa bon te go rims bzhin no/ /de bzhin du gzugs la sogs pa la mngon par zhen pa'i las kyi bag chags bsgos pa'i kun gzhi rnam par shes pa ni gzugs la sogs pa'i sa bon te go rims bzhin no//de bzhin du mig la sogs pa'i rnam par shes pa la mngon par zhen pa'i las kyi bag chags bsgos pa'i kun gzhi rnam par shes pa ni mig gi rnam par shes pa'i sa bon te go rims bzhin no//de ltar na kun gzhi rnam par shes pa nyid la khams zhes bya ba'i sgrar brjod kyi/ mig la sogs pa la ni mi bya'o zhes te/ 'di ni bsam dgos pa'o/ /byed pa dang bya ba dang / las rnams la rmongs pa ldog par bya ba'i phyir sa bon gyi don rnam pa gsum la khams rnam par gzhag go//'di la mig la sogs pa snga ma ni mig la sogs pa phyi ma dag gi rgyur gyur pa yin gyi/ 'di la rgyu bdag ces bya ba gzhan gang yang med do/ /de ltar na khams la mkhas na bdag la rgyur 'dzin pa ldog par 'gyur ro/ /khams kyi don gyi 'og tu skye mched rnams kyi don brjod par bya ste/de'i phyir/ tshor dang don rnams yongs gcod kyi/ /nyer spyod 'byung sgo gzhan yin no/ /zhes bya ba gsungs so/ /khams rnams las gzhan pa ni skye mched dang rten cing 'brel par 'byung ba la sogs pa mang zhig kyang yod la/ gzhan zhes bya ba'i sgra ni spyir brjod pa'i phyir/ gzhan gang yin zhes dris pa dang / khams rnams kyi 'og tu bshad pa'i phyir don gyis na skye mched rnams las gzhan zhes bya ba'i sgra 'di gnas par bstan pa'i phyir/ skye mched do zhes bya ba smos so/ /de la nang gi skye mched drug po dag ni tshor ba'i nye bar spyod pa skye ba'i sgo'i phyir ro//phyi'i drug po dag ni don yongs su gcod pa'i nye bar spyod pa skye ba'i sgo'i phyir ro zhes bya ba la sogs pa la/ skye ba'i sgo'i don ni skye mched kyi don to/ /skye ba ni 'byung ba ste tshor ba dang don yongs su gcod pa'i nye bar spyod pa gnyis kyi skye ba de mched par byed pas skye mched do//tshor ba dang 'du shes kyi nye bar spyod pa skye ba'i sgo'i bye brag gis phyi dang nang du dbye ste/ tshor ba ni bde ba dang sdug bsngal dang / bde ba yang ma yin sdug bsngal yang ma yin pa'o/ /de nyid nye bar spyod pas na nye bar spyod pa ste/ myong ba zhes bya ba'i tha tshig go//nang gi skye mched rnams ni tshor ba'i nye bar spyod pa de skye ba'i sgor bshad do/ /yul rnams kyang de skye ba'i sgo yin mod kyi gnas mig la sogs pa ni phan 'dogs pa dang / gnod pa byed pa dang / de la yang rab tu shes pa dang / thun mong ma yin pas gnas su gyur pa'i phyir mig la sogs pa yod na de'i sgo nas tshor ba las spyod par 'gyur gyi/med na ni ma yin pa'i phyir ro/ /don yongs su gcod pa ni 'du shes te/ don la mtshan mar 'dzin pa'i bdag nyid kyi phyir ro/ /de nyid don rtogs pa'i bdag nyid yin pas yul rnams la nye bar spyod do//de skye ba'i dngos po'i sgo yin pas ni phyi rol gyi skye mched rnams bshad kyi/ nang gi rnams ni ma yin te/ skye ba'i sgo yin du zin kyang 'di ltar yul gyi dngos po med na nang gi mig la sogs pa'i skye mched yod kyang don yongs su gcod pa la nye bar spyod pa med par 'gyur ro//tshor ba dang don yongs su gcod pa mtshungs par ldan pa dang bcas pa dag skye ba'i sgo'i dngos po yin pa'i phyir skye mched 'di dag rig par bya ste/ gtso bor ni gnyis gzung ngo / /gtso bor gzung ba ni las kyi 'bras bu la spyod pa dang / don yongs su gcod pa'i bdag nyid yin pa'i phyir ro//tshor ba dang don yongs su gcod pa la nye bar spyod pa'i sgo nas za ba por rnam par rtog pa 'byung ste/ de'i phyir don gnyis kyis skye mched rnam par gzhag pa byas so/ /de ltar skye mched la mkhas pa za ba po ni nang gi skye mched rnams yin la/bza' bar bya ba ni phyi'i rnams yin te/ za ba po'i bdag med do snyam nas bdag za pa por 'dzin pa ldog par 'gyur ro/ /mig la sogs pa'i skye mched la phan pa dang / gnod pa'i phyir de'i gnas nyid za ba por tha snyad btags so zhes gang bshad pa de mi rigs te/gzugs bkag pa'i phyir bdag bzhin du mig la sogs pa'i skye mched rnams kyang med pa'i phyir ro zhe na/ 'di ni klan kar mi rung ste/ 'di ltar kun brtags pa'i gzugs kho na 'dir dgag par bya'i/ rnam par brtags pa'i gzugs ni ma yin no//de la mig la sogs par spros pas bsgos pa'i las kyis 'phangs pas kun gzhi rnam par shes pa 'gyur ba'i khyad par rnyed pa ni nang gi skye mched do/ /rgyu de las byung ba 'jug pa'i rnam par shes pa la gzugs la sogs par snang ba ni phyi'i skye mched do/ / kun gzhi rnam par shes pa thun mong gi don du snang ba gang yin pa dang / sems can du snang ba gang yin pa de yang gzung ba dang 'dzin par snang ba 'jug pa'i rnam par shes pa skye ba'i bdag po'i rkyen yin pa'i phyir phyi'i skye mched ces bya'i/ de yul du gyur pa'i phyir ni ma yin no/ /de ltar na go mdo sde las gnyis la brten nas mig gi rnam par shes pa la sogs pa skye'o zhes 'byung ba dang mi 'gal lam/gzugs la sogs par snang ba ni rnam par shes pa las tha dad na de nyid skye ba'i rkyen du de nyid 'gyur bar ni mi rigs te/ skyes pa dang ma skyes pa'i dus na yod pa dang med pa'i phyir ro//bdag nyid la 'jug pa 'gal ba'i yang phyir ro/ /de lta bas na gdon mi za bar rnam par shes pa snang ba las tha dad par gyur pa gzugs la sogs par khas blang bar bya'o zhe na/ 'di yang klan kar mi rung ste/ 'di ltar gzugs la sogs pa'i snang ba'i rnam par shes pa ni 'dra ba'i rnam par shes pa skye bar bya ba'i phyir rkyen gyis rnam par shes pa la bag chags 'jog go//bag chags yongs su gyur nas yang gzugs la sogs par snang ba'i rnam par shes pa skye ste/ de ltar rnam par shes pa gzugs la sogs par snang ba'i bdag nyid kyi bag chags bskyed pa rnam par shes pa'i rkyen yin par bshad pas na mdo sde dang 'gal bar 'gyur ba med do//de ltar na rang snang ba'i rnam par shes pa'i rkyen yin pa'i phyir gzugs la sogs par snang ba ni dmigs pa'i don du 'thad do/ /yang na ji ltar phyi'i don du smra ba dag gis bskyed par bya ba dang /skyed pa po lta bur med kyang de yod pa dang med pa las rnam par shes pa yod pa dang med par 'gyur ba'i dbang du byas nas/ rnam par shes pa dang lhan cig skyes pa ni dmigs pa'i rkyen du 'jog pa de bzhin du 'dir yang gzugs la sogs pa snang ba'i rnam par shes pa bskyed par bya ba dang skyed pa po'i dngos por med kyang de yod pa dang med pa las rnam par shes pa yod pa dang med par 'gyur ba 'khrul pa med pa'i phyir rkyen dang rkyen can du rnam par gzhag go//gzugs su snang ba dang rnam par shes pa gnyis tha mi dad pa'i phyir/ dpe dang dngos su mi 'dre'o zhe na/ma yin te/ tha dad par gdags pa'i phyir ro/ /dper na rmi lam dang sgyu ma dang dri za'i grong khyer la sogs pa'i rnam par shes pa don dam par tha mi dad mod kyi/ gzung ba dang 'dzin pa'i rnam par rtog pa'i gnas yin pa'i phyir gzung ba dang 'dzin pa'i rnam par tha snyad kyi tha dad pa lta bur dmigs par bya ba dang dmigs par byed pa'i dngos por rnam par gzhag pa de bzhin du gzhan la yang 'gal ba med do//gzhan yang dmigs par bya ba dang dmigs par byed pa'i dngos po ni thams cad du yang gdags pa nyid du zad kyi dngos su med de/ rnam par shes pa ni skyes pa'am ma skyes pas kyang yul la dmigs par mi 'gyur te/skyes ma thag tu zhig pa'i phyir dmigs par byed pa'i tshe mi sdod pa dang med pa'i phyir ro/ /yul yang skyes pa dang ma skyes pa gnyis ka la yang dmigs su mi rung ste/ skyes pa ni gnas pa med pa dang / ma skyes pa ni med pa'i phyir te/gzhi med pa la ni dmigs par byar mi rung ngo / /gang gi ltar yod pa tsam gyis rgyu dang 'bras bu'i dngos po de nyid dmigs par bya ba dang dmigs par byed par 'jog pa de'i ltar na yang da ltar gyi rnam par shes pa'i dmigs pa ni don med par 'gyur te/ de'i bdag nyid du grub zin pa'i phyir ro//skye ba'i tshe'ang don med par 'gyur te/ med pa'i phyir ro/ /skye ba'i tshe don med par mi 'gyur te/ 'di ltar yul gyi dngos po yod na rnam par shes pa der snang ba'i bdag nyid 'thob pa'i phyir ro zhe na/ gal te yul du snang ba'i rnam par shes pa'i rgyu phyi rol gyi don yin te/de lta na 'das pa dang ma 'ongs pa dang rmi lam la sogs pa'i rnam par shes pa rnam pa med par 'gyur ro/ /yang na de'i don med pas med pa nyid du 'gyur ro/ /rkyen ma tshang ba ni 'bras bu 'byung bar mi rung ste/ ha cang thal bar 'gyur ba'i phyir ro//med pa ni rkyen du mi rung ngo / /phyi'i don yang rnam par shes pa'i dmigs pa'i rkyen du mi 'gyur te/ de med kyang 'byung ba'i phyir ro/ /de bas na rab rib can la sogs pa'i rnam par shes pa thams cad phyi'i don dmigs pa la mi ltos pa nyid khas blang bar bya'o/ / skye mched kyi don gyi 'og tu rten cing 'brel par 'byung ba'i don brjod dgos te/ de'i phyir rten cing 'brel par 'byung ba'i don te/ rgyu dang 'bras bu rtsol ba la/ /sgro 'dogs med cing skur 'debs med/ /ces bya ba smos so/ /g.yo ba med pa dang mi rtag pa dang nus pa'i rkyen las byung ba'i don to//mdo sde las kyang 'di skad du/ 'di yod pas 'di 'byung / 'di skyes pa'i phyir 'di skye ba ste/ 'di ltar ma rig pa'i rkyen gyis 'du byed rnams zhes bya ba rgya cher gsungs pa lta bu'o/ /'di yang rten cing 'brel par 'byung ba'i rgyu dang 'bras bu dang byed pa rnams la sgro 'dogs pa dang skur pa 'debs pa dgag par 'dod pa bstan pa'i phyir/rgyu dang 'bras bu dang byed pa rnams la sgro 'dogs pa med pa dang / skur pa 'debs pa med pa'i don ni rten cing 'brel par 'byung ba'i don to zhes bya ba smos so/ /rtsol ba zhes bya ba'i sgra ni byed par bshad do/ /de la rgyu la sgro 'dogs pa ni ma rig pa la sogs pa bor nas skyes bu dang dbang phyug dang bdag dang gtso bo la sogs pa la rgyu nyid du rtog pa'i phyir ro//de bstan par bya ba'i phyir/ 'du byed la sogs pa tha ma rga shi la thug pa dag gi mi mthun pa'i rgyu la rtog pa'i phyir ro zhes bya ba smos so/ / 'du byed la sogs pa mi rtag pa rnams kyi rgyu skyes bu la sogs pa rtag pa ni mi mthun pa ste/ mi 'dra ba zhes bya ba'i tha tshig go/ /yang na rgyu'i rang bzhin 'gyur ba la ltos nas sa bon la sogs pa la myu gu la sogs pa mthong ste/ rang bzhin rtag pa la ni 'gyur ba med do/ /mi mthun pa'i rgyu nyid la rgyur rtog pa'i phyir rgyu la sgro 'dogs pa'o//rgyu la skur pa 'debs pa ni rgyu med pa can du rtog pa'i phyir ro zhes bya ba ni 'du byed la sogs pa rgyu med par skye bar khas blangs pas 'du byed la sogs pa'i rgyu ma rig pa la sogs pa gsal ba yin no/ /'bras bu la sgro 'dogs pa ni bdag dang bcas pa'i 'du byed la sogs pa ma rig pa la sogs pa'i rkyen las 'byung bar rtog pa'i phyir ro zhes bya ba la/kha cig na re bdag yod na ni 'du byed la sogs pa ma rig pa la sogs pa'i rkyen rnams las 'byung gi/ med na ni ma yin no zhes 'bras bu 'du byed la sogs par bdag sgro 'dogs na 'bras bu la sgro 'dogs pa zhes bya'o zhe'o//gzhan dag na re bdag gi rdzas dang ldan pas sam/ de phan pa dang gnod pa byed pas bdag dang bcas pa'i 'du byed la sogs pa ni ma rig pa la sogs pa'i rkyen las 'byung bar rtog pa'i phyir 'bras bu la sgro 'dogs pa zhes bya'o//'bras bu la skur pa 'debs pa ni 'du byed la sogs pa ma rig pa la sogs pa'i rkyen gyis 'byung ba med par rtog pa'i phyir ro zhes bya ba ni 'di lta ste/ legs par spyad pa yang med/ nyes par spyad pa yang med/ 'jig rten pha rol yang med do zhes med pa rnams legs par spyad pa dang /nyes par spyad pa dang 'jig rten pha rol la skur pa 'debs par smra ba'o/ /byed pa la sgro 'dogs pa ni 'du byed la sogs skye ba la ma rig pa la sogs pa byed par rtog pa'i phyir ro zhes bya ba ni gal te 'du byed la sogs pa skye ba la ma rig pa la sogs pa dngos po'i rang bzhin don gzhan du gyur pa zhig byed par rtog pa de lta bu ni byed pa la sgro 'dogs pa'o//byed pa la skur pa 'debs pa ni nus pa med par rtog pa'i phyir ro zhes bya ba la/ ma rig pa la sogs pa yod pa tsam gyis 'du byed la sogs pa skye bar nus pa yin yang nus pa med par rtog pa'i phyir byed pa la skur pa 'debs pa'o//de med pa'i phyir sgro 'dogs pa dang skur pa 'debs pa med par rig par bya'o zhes bya ba ni rgyu dang 'bras bu dang byed pa rnams la sgro 'dogs pa dang skur pa 'debs pa de med pa'i phyir sgro 'dogs pa med pa dang skur pa 'debs pa med par rig par bya'o//de ltar rten cing 'brel par 'byung ba la mkhas pa 'di ni ma rig pa las gzhan pa bdag gam gzhan yang rung ste/ byed par 'dzin pa gang yin pa de'i gnyen po yin par rig par bya'o/ /'di la ma rig pa ma gtogs par dge ba dang mi dge ba'i las rnams byed pa ni bdag gam gzhan yang rung ste med do//'du byed rnams ma gtogs par rnam par shes pa'i byed pa gzhan med do/ /thams cad du yang ci rigs par brjod par bya ste/ ma rig pa la sogs pa g.yo ba med pa mi rtag pa la sogs pa nus pa yod pa dag las 'du byed la sogs pa 'byung ba'i phyir ro//rten cing 'brel par 'byung ba'i don gyi 'og tu gnas dang gnas ma yin pa'i don brjod dgos te/ de'i phyir/ mi 'dod 'dod dang rnam dag dang / /mnyam du 'byung dang dbang byed dang / / 'thob dang kun du spyod pa dag /gzhan dbang nyid kyi don de gzhan/ /zhes bya ba gsungs so/ /gnas dang gnas ma yin pa ni gzhan gyi dbang nyid rnam pa bdun gyi don gyis rig par bya ste zhes bya ba de la gnas ni rgyu yin no/ /gnas ma yin pa ni rgyu ma yin te/ ji skad du/ bden par smra zhing khro ba med//slong la chung yang sbyin par bya/ /rnam pa 'di gsum gnas kyis ni/ /lha yi nang du skye bar 'gyur/ /zhes tshigs su bcad pa las 'byung ba lta bu ste rgyu yin par mngon no/ /yang na gnas ni srid pa'o/ /gnas ma yin pa ni mi srid do/ /de la mkhas pa ni gnas dang gnas ma yin pa la mkhas pa'o//gzhan gyi dbang gi dngos po ni gzhan gyi dbang nyid de/ gzhan la rag las zhes bya ba'i tha tshig go/ /rnam pa de bdun yang las dang nyon mongs pa dang tshe'i gzhan gyi dbang nyid gsum du 'dus so/ /de la mi 'dod pa'i gzhan gyi dbang nyid ni zhes bya ba la/mi 'dod pa ni ngan 'gro rnams te/ der 'gro ba gzhan gyi dbang nyid du bstan pa'i phyir/ nyes par spyod pa srog gcod pa la sogs pa lus dang ngag dang yid kyi las su bsdus pa sbyor ba dang bcas pa dang mjug gis mi 'dod bzhin du yang ngan 'gror 'gro ba'i phyir ro zhes bya ba smos so//ngan 'gro dag ni sems can dmyal ba dang yi dwags dang dud 'gro'o/ /de dag ni shin tu sdug bsngal ba'i phyir der 'gro 'dod pa ni su yang med mod kyi/ las rnams stobs dang ldan la ngan 'gro'i rgyu yang yin pas nye bar spyod pa ni mi 'dod bzhin du las kyi dbang gis der 'gro bar 'gyur ro//'dod pa'i gzhan gyi dbang nyid ni legs par spyad pas bde 'gror 'gro ba'i phyir ro zhes bya ba la/ 'dod pa ni bde 'gror 'gro ba'o/ /bde 'gro ni lha dang mi'o/ /legs par spyod pa ni srog gcod pa la sogs pa sbyor ba dang bcas pa dang / 'jug pa rnams las log pa dang /ston pa dang / bla ma dang yon tan dang ldan pa la sogs pa la sbyin pa dang rim gro dang bkur sti la sogs pa byed pa dang byams pa dang snying rje la sogs pa yon tan gyi khyad par rnams so/ /gzhan gyi dbang nyid ni legs par spyad pa med par gzhan gyis ni 'dod du zin kyang bde 'gror 'gro ba med pa'i phyir te/bde 'gror skye ba ni legs par spyad pa la rag lus pa nyid do/ /rnam par dag pa'i gzhan gyi dbang nyid ni ches rgya cher 'byung ba la rnam par dag pa ni nyon mongs pa spangs pa'o/ /sgrib pa lnga ni 'dod pa la 'dun pa dang / gnod sems dang / rmugs pa dang /gnyid dang / rgod pa dang / 'gyod pa dang / the tshom mo/ /rmugs pa dang gnyid gcig tu bsdus/ rgod pa dang 'gyod pa gcig tu bsdus te lngar 'gyur ro/ /dge ba'i phyogs la sgrib par bye brag med pas sgrib pa rnams so/ /bye brag tu ni sgrib pa rnams zhes mngon par dga' ba dang / lus dang ngag gi las mi cha ba la tshangs pa mtshungs par spyod pa rnams kyis legs par blangs pa la legs par sgrub pa dang /zhi gnas kyi dus na ma bying ba dang / rab tu 'dzin pa'i dus na mi g.yeng ba dang / zhi gnas dang lhag mthong gi dus na rang gi ngang gis 'jug pa la rim pa bzhin du bsgribs pas na sgrib pa rnams zhes bya'o//de dag ma spangs lags zhes bya ba ni ma btang ba'o/ /byang chub kyi yan lag bdun gyi bar du ma bsgoms na zhes bya ba la/ bar du zhes bya ba ni mtha' brjod pa ste/ dran pa nye bar gzhag pa rnams dang / yang dag par spong ba rnams dang /rdzu 'phrul gyi rkang pa rnams dang / dbang po rnams dang / stobs rnams kyang bsdu'o/ /sdug bsngal gyi mtha' mi byed pa'i phyir ro zhes bya ba la/ sdug bsngal gyi mtha' ni gang na sdug bsngal med pa ste/ de ni mya ngan las 'das pa'o/ /de mi byed pa ni mi 'thob pa ste/mya ngan las 'das pa mi 'thob po zhes bya ba'i tha tshig go/ /yang na sdug bsngal gyi mtha' zhes bya ba ni sdug bsngal gzhan dang mtshams mi sbyor ba'o/ /de ni sdug bsngal de lta bu dang mtshams sbyor bar mi byed pa ste/ sdug bsngal du mi byed pa'i phyir ro/ / sgrib pa lnga spangs pa la rag lus pa'i phyir rnam par dag pa gzhan gyi dbang nyid do/ /mnyam du 'byung ba'i gzhan gyi dbang nyid ni de bzhin gshegs pa dang 'khor los sgyur ba gnyis gnyis snga phyi med par zhes bya ba ni lhan cig ces pa'i tha tshig go/ /de bzhin gshegs pa gnyis dang 'khor los sgyur ba gnyis 'jig rten gyi khams gcig tu mi 'byung zhes bya ba ni/kha cig na re de bzhin gshegs pa gnyis stong gsum gyi stong chen po'i 'jig rten gyi khams su mi 'byung bar 'dod kyi/ 'khor los sgyur ba ni gling bzhi par 'byung bar mi 'dod do zhe'o/ / gzhan dag na re de bzhin gshegs pa gnyis kyang gling bzhi pa nyid du mi 'byung ngo zhes zer te/ sangs rgyas bcom ldan 'das rnams ni chos kyi sku'i dbang gis stong gsum gyi stong chen po'i 'jig rten gyi khams su gling bzhi pa re rer yang sprul pa'i skus mngon par byang chub pa dang yongs su mya ngan las 'das pa yang ston to//'di ltar gling bzhi pa gcig tu dga' ldan dang / mi rnams kyi nang du yang tshe yongs su 'dzin pa ni byang chub sems dpa' rnams kyis dgongs pa ste/ de ni gling bzhi pa gzhan du'ang 'dra'o/ /de lta bas na 'og min gyi gnas nyid du bcom ldan 'das mngon par sangs rgyas nas sprul pa'i skus stong gsum gyi stong chen po'i 'jig rten gyi khams kyi khongs su gtogs pa'i gling bzhi pa re rer yang dga' ldan du skye ba dang /'chi 'pho dang / mi'i nang du tshe yongs su 'dzin pa la sogs pa thams cad ston to snyam du sems so//'di la sangs rgyas dang 'khor los sgyur ba 'byung ba ni mnyam par 'gyur ba ma yin pa'i las la rag lus pas lhan cig tu skye bar 'gyur ba gzhan gyi dbang nyid do/ /dbang byed pa'i gzhan gyi dbang nyid ni bud med 'khor los sgyur ba la sogs pa mi byed pa'i phyir zhes bya ba ni 'khor los sgyur bar 'gyur ba'i las kyi rnam par smin pa ni skyes pa'i lus kyis smin par nus te/bud med la ni bud med rin po che la spyod pa'i mthu med pa'i phyir ro/ /sogs pa zhes bya ba'i sgras ni brgya byin la sogs pa bsdu'o/ /'thob pa'i gzhan gyi dbang ni bud med kyis rang byang chub dang bla na med pa yang dag par rdzogs par byang chub par mi 'gyur ba'i phyir ro zhes bya ba la/'thob pa ni sangs rgyas dang rang byang chub nyid 'thob pa'o/ /de la gzhan gyi dbang nyid ni skyes pas 'thob par 'gyur gyi bud med kyis 'thob par mi 'gyur te/de ni go rims bzhin du bse ru lta bur 'dre ba med pa dang / sa gsum gyi ston par mi srid pa'i phyir te/ de'ang skye bo g.yon can thams cad kyi spyod yul yin pa dang / shes rab chung bas slob dpon med par mngon par rdzogs par byang chub pa'i 'os ma yin pa'i phyir ro//kun du spyod pa'i gzhan gyi dbang nyid ni lta ba phun sum tshogs pa gsod pa la sogs pa kun du mi spyod la/ so so'i skye bo ni kun du spyod pa'i phyir te zhes bya ba lta ba phun sum tshogs pa ni bden pa mthong ba'o/ /gsod pa ni srog gcod pa yin/sogs pa zhes bya ba'i sgras ni ma byin par len pa la sogs pa bsdus te/ gsod pa la sogs pa de dag ni lus dang ngag gi bya ba'i rang bzhin no/ /mthong ba'i lam nyid kyi gsod pa la sogs pa nyes par spyod pa kun nas slong ba'i nyon mongs pa spongs pa'i phyir lta ba phun sum tshogs pa dang ldan pa ni kun du mi spyod do//so so'i skye bo ni de ma spangs pa'i phyir kun du spyod do/ /de ma spangs pa yang de'i gnyen por lam ma skyes pa'i phyir ro/ /de ltar mi 'dod pa la sogs pa gzhan gyi dbang nyid kyi rjes su song ba/ gnas dang gnas ma yin pa la mkhas pa ni skyes bu dang /dbang phyug la sogs pa rang dbang can du 'dzin pa'i gnyen po'o/ /gal te rang dbang can 'ga' zhig yod na ni nyes par spyad pa las ngan 'gror 'gro bar mi 'gyur ro/ /de bzhin du gzhan dag la yang brjod par bya'o/ / gnas dang gnas ma yin pa'i don bstan pa'i 'og tu dbang po rnams kyi don brjod dgos pas de'i phyir dbang po ni rnam pa nyi shu rtsa gnyis te zhes bya ba smos te/ mig gi dbang po nas kun shes pa dang ldan pa'i dbang po la thug gi bar du'o/ /de la dbang po'i don ni dbang byed pa'i don to//gang zhig gang la dbang byed pa de mi shes nas/ de'i phyir/ 'dzin dang gnas dang rgyun mi 'chad/ /spyod dang dag pa gnyis kyi phyir/ /zhes bya ba gsungs te/ 'di la gnyis pa dbang byed pa'i phyir zhes bya ba rigs pa las tshig le'ur byas pa dang mthun par bya ba'i phyir dbang byed pa zhes bya ba'i sgra ni mi smos par blta'o//de bas na bshad pa byed pas/ de dag la de dbang byed pa'i phyir ro zhes bya ba smos so/ /'dzin pa'i phyir zhes bya ba la/ phyir zhes bya ba'i sgra ni 'dir dgos pa yin par brjod de/ 'dzin pa'i dgos pa ste ched yin la/ de bzhin du gzhan dag la yang ci rigs par brjod par bya'o/ /de dag la zhes bya ba ni don 'dzin pa la sogs pa la'o/ /dbang byed ces bya ba ni lhag par dbang bas na dbang byed pa ste rgyu zhes bya ba'i tha tshig go/ /gzugs la sogs pa chos la thug pa dag ni gzugs la sogs pa yul rnams te/de dag la 'dzin pa ni mig la sogs pa'i rnam par shes pa'o/ /de la mig la sogs pa dbang po drug dbang byed pa ni mig ni gzugs kyi bye brag ma lus pa'i rnam par shes pa'i rten yin pas gzugs la sogs pa la lhag par dbang byed pas na dbang po zhes bya ste/gzugs sngon po ni gzugs ser po la sogs pa'i rnam par shes pa'i dmigs par mi 'gyur ro/ /de bzhin du rna ba la sogs pa la yang ci rigs su rgyas par brjod par bya'o/ /gnas par bya ba la ni srog gi dbang po dbang byed de zhes bya ba la/srog gi dbang po ni sngon gyi las kyi bag chags kyis 'phangs pa'i rnam par smin pa'i rgyud la bar du gcod pa'i rkyen med na skad cig snga ma snga mas 'dra ba'i skad cig phyi ma phyi ma rnams su mtshams sbyor ba'i mthu yod pa'o/ /gnas par bya ba la ni srog gi dbang po dbang byed ces bya ba la rgyu smos pa/'di'i dbang gis mi 'chi ba'i phyir ro zhes bya ba ste/ mi 'chi ba ni sngon gyi las kyis 'phangs pa rigs mthun pa'i rjes su 'jug go/ /kha zas la sogs pa ni sems can gnas pa'i rgyu yin du zin kyang dbang po ma yin te/ de dag yod bzhin du tshe zad pa gnas pa med pa'i phyir ro//gzugs dang gzugs med pa'i khams na kham gyis za ba'i zas rnams med kyang srog gi dbang po nyid kyis gnas pa yod pa'i phyir ro/ /de na reg pa la sogs pa ni gnas par dbang byed par mi rung ste/ 'gog pa dang 'du shes med pa'i snyoms par 'jug pa'i gnas dang 'du shes med pa dag la reg pa la sogs pa med kyang sems can rnams gnas par srid pa'i phyir ro//rigs 'tshob pa la pho dang mo'i dbang po gnyis dbang byed de zhes bya ba la/ bu byung na rigs rgyun mi 'chad par 'gyur bas bu 'byung ba ni rigs 'tshob pa'o//de nyid bstan pa'i phyir 'byung bar dbang byed pa'i phyir ro zhes bya ba smos te/ lus kyi dbang po'i phyogs 'ga' nyid de/ dbang byed pa'i bye brag gis pho dang mo'i dbang po zhes bya ba 'thob po/ /gang na pho'i dbang po dang mo'i dbang po yod pa de na rigs rnam par gzhag pa yod de/de'i dbang gis rigs rgyun mi 'chad do/ /'dod pa na spyod pa'i lha rnams la ni pho'i dbang po dang mo'i dbang po yod pa la rigs rnam par gzhag gi med pa la ni ma yin no/ /dri za la sogs pa la dbang byed pa med de dri za la sogs pa yod du zin kyang /pho dang mo'i dbang po med pa ma ning la sogs pa la bu 'byung ba'i mthu med pa'i phyir ro/ /zas la sogs pa ni dbang byed pa yin yang sems can gyi grangs su ma gtogs pas dbang po zhes mi bya'o/ /nye bar spyod pa la ni tshor ba'i dbang po rnams te zhes bya ba ni dbang byed ces bya ba dang sbyar te/ji lta zhe na de'i phyir/ dge ba dang mi dge ba'i las kyi 'bras bu la nye bar spyod pa'i phyir ro zhes bya ba smos so/ /tshor ba'i dbang po ni lnga ste/ bde ba dang / sdug bsngal dang / yid bde ba dang / yid mi bde ba dang / btang snyoms so//de dag ni myong ba'i bdag nyid yin pas dge ba dang mi dge ba'i las kyi 'bras bu spyod kyi/ ming dang gzugs ni de la dbang byed pa ma yin te/ tshor ba'i rgyu yin pa'i phyir ro/ /de'i rgyu'i dngos po ni tshor ba rnam par smin pa'i gtso bo yin pa'i phyir ro/ /'jig rten pa'i rnam par dag pa ni 'jig rten pa'i nyon mongs pa rnams spang pa'o//de la dad pa la sogs pa'o zhes bya ba ni dad pa dang / brtson 'grus dang / dran pa dang ting nge 'dzin dang shes rab kyi dbang po dang lnga ste/ dbang byed ces bya bar snyegs so/ /de dag ni ma dad pa la sogs pa'i gnyen po yin pa dang 'jig rten pa'i lam gyis rab tu phye ba'i phyir ro//gzhan na re thar pa'i cha dang mthun pas rab tu phye ba'i phyir ro zhe'o/ /'jig rten las 'das pa'i rnam par dag pa ni kun shes par byed pa'i dbang po la sogs pa'o zhes bya ba ni dbang byed do zhes bya bar snyegs te/'jig rten las 'das pa'i lam gyis nyon mongs pa rnams spangs pa ni 'jig rten las 'das pa'i rnam par dag pa'o/ /de la kun shes par byed pa'i dbang po dang / kun shes pa'i dbang po dang / kun shes pa dang ldan pa'i dbang po gsum ni dbang byed pa ste/de dag mthong ba dang / bsgom pa dang / mi slob pa'i lam du rim pa bzhin du bsdus pa'i phyir ro/ /de la dad pa la sogs pa lnga dang / yid dang / bde ba dang / yid mi bde ba dang / btang snyoms rnams ni mi lcogs pa med pa la sogs pa la brten pa'i bye brag gis ci rigs pa'i dbang du byas te/dbang po dgu ni mthong ba'i lam la ni kun shes par byed pa'i dbang po'o/ /bsgom pa'i lam la ni kun shes pa'i dbang po'o/ /mi slob pa'i lam la ni kun shes pa dang ldan pa'i dbang po zhes bya'o/ /rnal 'byor pa rnams ni gzhan du rnam par 'jog ste/kun shes par byed pa'i dbang po dang / kun shes pa'i dbang po gnyis la ni dbang po bcu ste/ sngar smos pa dgu'i nang du yid mi bde ba bsnan na bcur 'gyur ro/ /kun shes pa dang ldan pa'i dbang po la ni dgu nyid do/ /de la nges par 'byed pa'i cha dang mthun pa'i bdag nyid sbyor ba'i lam dang /mthong ba'i lam skad cig bco lnga dag la ni yid kyi dbang po dang / dad pa la sogs pa lnga dang / mi lcogs pa med pa la sogs pa la brten pa'i bye brag gis ci rigs par bde ba dang / yid bde ba dang / yid mi bde ba dang / btang snyoms kyi dbang po rnams las gang yang rung ba'o/ /yid mi bde ba'i dbang po ni sbyor ba'i dus na nges par 'byed pa'i cha dang mthun pa'i 'og tu thar pa mchog 'dod pas bsdus par rig par bya'o/ /dbang po 'di bcu ni ci rigs par sbyar bar bya ste/ sngon kun mi shes pa'i de kho na kun shes par bya ba'i phyir zhugs pas mi shes pa kun shes par byed pa'i dbang po zhes bya'o//mthong ba'i lam skad cig ma bcu drug nas rdo rje lta bu'i ting nge 'dzin gyi bar du slob pa'i lam de la dbang po rnam pa bcu po de nyid kun shes pa'i dbang po zhes bya ba ste/ sngon mi shes pa shes par byar med pa'i phyir ro//mi slob pa'i lam la yid mi bde ba'i dbang po ma gtogs par lhag ma rnams kun shes pa dang ldan pa'i dbang po'i ming 'thob po/ /kun shes pa dang ldan pa'i dbang po yin pas kun shes pa dang ldan pa'i dbang po zhes bya'o/ /de ltar na dbang po la mkhas pa ni skyes bu dang /mthu bo che dang sred med kyi bu la sogs pa la dbang por 'dzin pa gang yin pa de ldog par 'gyur ro/ /dbang po'i don gyi 'og tu dus gsum gyi don brjod dgos pas/ de'i phyir/ 'bras bu rgyu rnams spyad zin dang / /de bzhin ma spyad gzhan yin no//zhes bya ba smos te/ de la rgyu ni skye bar byed pa'i rgyu'o/ /'bras bu ni tshes bsdus pa'o/ /rgyu spyad zin pa ni 'bras bu phyung zin pa'o/ /'bras bu spyad zin pa ni myong nas yongs su zad pa ste/ rnam pa de lta bu'i rgyu dang de'i 'bras bu ni 'das pa'o/ /de'i phyir 'bras bu dang de'i rgyu spyad zin pa'i phyir 'das pa'i dus so//rnam pa 'di nyid kyi 'bras bu dang / rgyu ma spyad pa'i phyir ma 'ongs pa'i dus so/ /da ltar byung ba'i dus ni da ltar gyi tshe'i rgyus 'bras bu byin pa'i phyir rgyu spyad pa'i don dang de'i 'bras bu ni da ltar gyi tshe rjes su 'brang ba nyid de/ 'bras bu ma spyad pa'i phyir da ltar byung ba'i dus su rig par bya'o/ /dngos po rnams kyi skad cig so so ni rgyu dang 'bras bu'i dngos po yin pas skad cig nyid kyi dbang du byas te dus rnam par gzhag par rig par bya'o/ /de la rgyu spyad zin pa ni rang gi 'bras bu bskyed pa'i phyir ro/ /'bras bu spyad zin pa ni 'bras bu skyes ma thag tu 'jig pa'i phyir ro//de ltar 'bras bu dang rgyu ma spyad pa'i phyir ma 'ongs pa'i dus te/ dgos pa ma bskyed pa dang ma skyes pa la zhig pa med pa'i phyir 'bras bu dang rgyu ma spyad par rig par bya'o/ /rgyu spyad la 'bras bu ma spyad pa'i phyir zhes bya ba ni dgos pa bskyed pa'i phyir rgyu spyad pa zhes bya'o//dgos pa ma zhig pa'i phyir 'bras bu ma spyad pa zhes bya'o/ /de ltar dus la mkhas pa ni dus ma gtogs par gzhan mi dmigs pa'i phyir bdag rtag par 'dzin pa ldog par 'gyur ro/ /dus gsum gyi don gyi 'og tu bden pa bzhi'i don brjod dgos pas/de'i phyir/ tshor ba rgyu dang bcas pa'i don/ /de yi rgyu ni sgrub pa yin/ /zhes rgya cher gsungs so/ /tshor ba ni sdug bsngal gyi don to zhes 'jig rten na grags so/ /bstan bcos las kyang gang ci tshor yang rung ste/ de ni 'dir sdug bsngal lo zhe'o//bden pa rnam par gzhag pa ni zag pa dang bcas pa'i bde ba dang / sdug bsngal dang bde ba yang ma yin sdug bsngal yang ma yin pa'i tshor ba rgyu dang bcas pa thams cad sdug bsngal gyi bden pa'i don yin no zhes bstan pa'i phyir bshad pa byed pas kyang /de la sdug bsngal gyi bden pa ni tshor ba rgyu dang bcas pa'i don zhes bya ba smos so/ /tshor ba thams cad sdug bsngal yin par ci mngon zhe na/ de'i phyir gang ci tshor yang rung ste/ de ni 'dir sdug bsngal lo zhes bya ba'i phyir ro zhes bya ba smos so/ /tshor ba de dag kyang sdug bsngal gyi sdug bsngal nyid dang /'gyur ba'i sdug bsngal nyid dang / 'du byed kyi sdug bsngal nyid rnams su ji ltar mthun mthun du sbyar te/ sdug bsngal ba'o/ /yang na 'du byed kyi sdug bsngal nyid kyi sdug bsngal ba'o/ /tshor ba'i rgyu ni tshor ba'i gnas kyi chos rnams su rig par bya'o zhes bya ba la/bde ba dang / sdug bsngal ba dang / sdug bsngal ba yang ma yin bde ba yang ma yin myong bar 'gyur ba'i chos rnams ni tshor ba'i gnas rnams so/ /de ltar phung po lnga po dag ni sdug bsngal gyi bden par bstan pa yin no/ /de'i rgyu ni sgrub pa yin//kun 'byung ba'i bden pa ste zhes bya ba la/ de'i zhes bya ba'i sgra ni sdug bsngal gyi bden pa dang sbyar ro/ /sgrub pa gang gis sdug bsngal skyed pa ni bsgrub pa ste kun 'byung ba'o/ /de yang tshor ba dang tshor ba'i gnas kyi chos rnams la sred pa'i rgyu sngon du song ba'i lus dang ngag dang yid rab tu g.yo ba'i ngo bo nyid do//mdor na yang srid pa kun nas slong ba'i las ni kun 'byung bar bstan pa yin no/ /de gnyis zhi ba'i phyir 'gog pa'i bden pa'o zhes bya ba la/ de gnyis zhes bya ba ni sdug bsngal dang kun 'byung ba'i bden pa gnyis so/ / zhi ba'i phyir zhes bya ba ni mi skye ba'i phyir ro/ /de ltar rgyu dang bcas pa'i sdug bsngal mi skye ba'i mtshan nyid yin pa'i phyir 'gog pa la rnam pa gnyis su bstan pa yin te/ kun 'byung ba zhi ba'i phyir phung po'i lhag ma dang bcas pa'o/ /sdug bsngal zhi ba'i phyir phung po'i lhag ma med pa'o//de nyid kyi dbang du byas nas sdug bsngal dang kun 'byung ba gnyis kyi gnyen po'i phyir sdug bsngal dang kun 'byung ba 'gog par 'gyur ba'i lam ni lam gyi bden pa'o/ /de ltar bden pa la mkhas pa ni kun nas nyon mongs pa dang rnam par byang ba tsam rtogs nas de dag las gzhan pa la kun nas nyon mongs pa dang /rnam par byang bar 'dzin pa ldog par 'gyur te/ de med pa'i phyir ro/ /bden pa rnams kyi don gyi 'og tu theg pa gsum gyi don bstan par bya ste/ de'i phyir/ yon tan skyon dang rnam mi rtog /shes pas gzhan las bdag gis ni//nges par 'byung phyir gzhan zhes bya/ /zhes bya ba gsungs so/ /shes pa zhes bya ba'i sgra ni yon tan dang skyon shes pa dang / rnam par mi rtog pa'i ye shes zhes bya ba gnyis ka dang sbyar bar bya'o/ /yang na bar du rnam par rtog /ces bya ba'i sgra zhig ma smos par blta bar bya'o//de la yon tan dang skyon shes pa ni gzhan las dang bdag gis zhes phye ste brjod par bya'o/ /rnam par mi rtog pa'i ye shes kyi ni bdag nyid kyis te/ de bas na 'grel pa las ci rigs su sbyar bar bya'o zhes bya ba smos so/ /de la mya ngan las 'das pa dang /'khor ba la yon tan dang skyon du shes zhes bya ba la/ mya ngan las 'das pa zhes bya ba'i sgra ni 'dir lam dang 'gog par gzung ste/ dper na rab tu zhi ba zhes bya ba'i sgra bzhin no/ /de la 'gog pa la ni zhi ba'i rnam pa la sogs pa dang / lam la nges par 'byin pa'i rnam pa la sogs par shes pa ni mya ngan las 'das pa la yon tan du shes pa'o//'khor ba ni sdug bsngal dang kun 'byung ba'i bdag nyid de/ /de yang mi rtag pa dang sdug bsngal ba'i rnam pa la sogs pa dang / kun 'byung ba dang rkyen gyi rnam pa la sogs par shes pa ni 'khor ba la skyon du shes pa'o//gzhan las thos zhes bya ba ni sangs rgyas dang byang chub sems dpa' la sogs pa las mya ngan las 'das pa dang 'khor ba gnyis kyi yon tan dang skyon ji skad du smos pa thos pa'o/ /nges par 'byung ba'i phyir zhes bya ba ni 'khor ba las byung ba'i phyir ro/ /nyan thos kyi theg pa zhes bya ba ni gzhan gyi sgra la brten nas nges par 'byung ba'i phyir ro//nyan thos kyi theg pa zhes bya bas ni rang sangs rgyas kyi theg pa las bye brag tu ston to/ /de nyid kyis zhes bya ba ni mya ngan las 'das pa dang / 'khor ba gnyis la yon tan dang skyon du shes nas sangs rgyas dang byang chub sems dpa' gzhan las ma thos par bdag gis nges par 'byung ba'i phyir rang sangs rgyas kyi theg pa'o//gzhan las ma thos par bdag gis shes par bya ba ni nyan thos kyi theg pa las bye brag tu bstan to/ /rnam par mi rtog pa'i ye shes kyis zhes bya ba ni 'khor ba dang mya ngan las 'das pa'i chos gnyis brjod du med par rtogs pa'i phyir rnam par mi rtog pa'i ye shes te/gzhan las ma thos par bdag nyid kyis nges par 'byung ba'i phyir theg pa chen po'i/ /'dir ni rang sangs rgyas kyi theg pa las ye shes kyis bye brag tu byas so/ / gzhan dag na re gzhan las thos nas gang zag la bdag med pa'i yul can yon tan dang skyon du rnam par mi rtog pa'i ye shes kyis nges par 'byung ba ni nyan thos kyi theg pa'o/ /mnyan pa la mi ltos par bdag nyid kyis nges par 'byung ba ni rang sangs rgyas kyi theg pa'o/ /mi gnas pa'i mya ngan las 'das pa thob par byed pa chos la bdag med pa'i yul can rnam par mi rtog pa'i ye shes kyi bdag nyid kyis nges par 'byung ba ni theg pa chen po zhes bya'o//rnam par bshad pa 'di ni 'grel pa dang 'gal lo/ /de ltar theg pa gsum la mkhas pa ni rnal 'byor tsam du zad par mthong bas bdag rnal 'byor can du 'dzin pa ldog par 'gyur ro//da ni 'dus byas dang 'dus ma byas kyi don bstan pa'i phyir/ btags bcas rgyur bcas rgyu mtshan dang / /rab tu zhi ba don bcas ni/ /tha ma nyid du bshad pa yin/ /zhes bya ba gsungs so/ /tha mar bshad pa de gang zhe na/de'i phyir/ 'dus byas dang 'dus ma byas so zhes bya ba smos te/ thams cad kyi tha mar bshad pa'i phyir ro/ /de la 'dus byas ni btags pa dang bcas shing rgyu dang bcas pa'i rgyu mtshan gyis rnam par gzhag go/ /'dus ma byas ni don dang bcas pa'i rab tu zhi bas rnam par gzhag go//btags pa dang rgyu dang rgyu mtshan yang mi shes nas de bstan par bya ba'i phyir/ de la btags pa ni ming gi tshogs la sogs pa'o zhes bya ba smos so/ /ming dang tshig gi tshogs kyi dngos po dag gi ngo bo nyid dang / khyad par gnyis btags pas na ming dang tshig gi tshogs gnyis ni btags pa'o//yi ge'i tshogs ni de gnyi ga gsal bar byed pa'i phyir btags pa'o/ /rgyu ni sa bon du bsdus pa'i kun gzhi rnam par shes pa'o zhes bya ba de yang zag pa dang bcas pa'i chos thams cad kyi bag chags kyi rjes su song ba 'bras bu ma byin pa kun 'byung ba'i bden par bsdus pa nyid de/'bras bu byin pa las rnam par dbye ba'i phyir/ sa bon du bsdus pa zhes bya ba smos so/ /rgyu mtshan ni gnas dang lus dang longs spyod du bsdus pa zhes bya ba ni kun gzhi rnam par shes pa zhes bya bar sbyar ro/ / 'jug pa ni rnam par shes par bsdus pa yid dang 'dzin pa dang rnam par rtog par bsdus pa'o zhes bya ba de la gnas ni snod kyi 'jig rten te/ der snang ba'i kun gzhi rnam par shes pa'o/ /gnas kyi bdag nyid du bsdus pas na gnas su bsdus pa'o/ /lus su snang ba'i rang bzhin la lus su bsdus pa zhes bya'o//lus ni dbang po dang bcas pa'i khog pa lus der snang ba'i kun gzhi rnam par shes pa'o/ /lus su bsdus pa ni lus kyi bdag nyid dang ldan pa zhes bya ba'i tha tshig go/ /longs spyod du bsdus pa ni gong du bshad pa de nyid de/ de gnyis la yang rnam par shes pa gzhan dag dbang byed pa'i dngos por longs spyod pas na longs spyod do//yang na bza' ba dang btung ba la sogs pa'i don la longs spyod pas na longs spyod de/ der snang ba'i rnam par shes pa ni longs spyod du bsdus pa'o/ /btags pa dang bcas shing rgyu dang bcas pa'i rgyu mtshan de ni mtshungs par ldan pa dang bcas pa gzhan gyi dbang gi ngo bo bsdus pa'i phyir 'dus byas su rig par bya'o//mtshungs par ldan pa dang bcas pa ni sems las byung ba ste/ 'dus byas de ni de nyid 'ba' zhig ma yin par bstan to/ /de yang gang gi rgyu mtshan zhe na/ ming gi tshogs la sogs pa'i rgyu mtshan te/de ni de dag gi ngo bo nyid dang khyad par rjod par byed pa'i phyir ro/ /de dag gi rjes su 'brang bas rang bzhin dang bye brag la mngon par zhen pa'i sems dang sems las byung ba yid dang 'dzin pa dang rnam par rtog pa zhes bya ba rnams kyi rgyu mtshan yang yin no//kha cig na re yid dang 'dzin pa dang rnam par rtog pa yang kun gzhi rnam par shes pa'i rgyu mtshan te/ de la bag chags brtas par byed pa'i phyir ro zhe'o/ /gzhan dag ni rang bzhin bye brag tu 'dogs pas na 'dogs pa'i mtshan ma ni 'du shes te/ mtshan mar 'dzin pa'i bdag nyid kyi phyir ro//gnas dang lus dang longs spyod du bsdus pa kun gzhi rnam par shes pa ni bag chags brtas par byed pa'i phyir gzhi'i rgyu mtshan no/ /yid dang 'dzin pa dang rnam par rtog pa rnams ni dmigs pa mtshan mar byed pa'i phyir dmigs pa'i rgyu mtshan yang yin la/gnyi ga mtshan mar byed pa'i phyir dmigs pa dang / dmigs par byed pa'i rgyu mtshan yang yin no snyam du sems so/ /de la yid ni gang rtag tu rlom sems pa'i rnam pa'o zhes bya ba la/ bdag gam bdag gi zhes gang rtag par rlom sems pa de ni yid ces bya ste/ de ni bdag tu rmongs pa dang / bdag tu lta ba dang / bdag la chags pa dang / nga'o snyam pa'i nga rgyal dang / kun du 'gro ba lnga po tshor ba dang / 'du shes dang / sems pa dang / reg pa dang / yid la byed pa dag dang mtshungs par ldan no/ /'dzin pa ni rnam par shes pa'i tshogs lnga po zhes bya ba ni yul gyi rang bzhin gyi ngo bo 'dzin pa'i mtshan nyid kyi phyir ro//rang rig pa yin pas brjod mi nus pa'i phyir 'dzin pa zhes bya'o/ /rnam par rtog pa ni yid kyi rnam par shes pa ste/ de ni chos rnams kyi rang dang spyi'i mtshan nyid la rnam par rtog pa can gyi phyir ro//btags pa dang bcas shing rgyu dang bcas pa'i rgyu mtshan 'di las nyon mongs pa gnyis kyis mngon par 'dus byas pa'i phyir 'dus byas so/ /'dus ma byas ni rab tu zhi ba'i 'gog pa dang rab tu zhi ba'i don de bzhin nyid de zhes bya ba la/ rgyu dang bcas pa'i sdug bsngal rab tu zhi ba'i mtshan nyid yin pa'i phyir 'gog pa ni rab tu zhi ba'i bar rung na/de bzhin nyid ji ltar rab tu zhi ba'i don ces bya zhe na/ rab tu zhi ba'i don yin pa'i phyir ro/ /'gog pa dang de bzhin nyid gnyis 'brel pa ci yang med pa snyam na/ ji ltar rab tu zhi ba'i don zhes bya zhe na/ de bzhin nyid ni lam gyi dmigs pa yin pa'i phyir ro/ /ji ltar na lam yang rab tu zhi ba nyid ces bya zhe na/ des rab tu zhi bar byed pa'i phyir ro/ /rab tu zhi ba'i phyir mya ngan las 'das pa ni rab tu zhi ba'o/ /'dis rab tu zhi bar byed pa'i phyir lam yang rab tu zhi ba'o//de ltar na tshig rnam par sbyar ba tha dad pa'i phyir brjod pa gcig gis mya ngan las 'das pa dang lam gnyi ga rab tu zhi ba zhes bya bar bzung ngo / /ci lam gyi bden pa 'dus byas sam 'on te 'dus ma byas she na/ bskyed par bya ba yin pas 'dus byas so/ /gal te las dang nyon mongs pas mngon par 'dus ma byas pa dang /'dus ma byas kyis rab tu phye ba'i phyir 'dus ma byas zhes brjod na nyes pa med do/ /de ltar don 'dis phung po la sogs pa shes pa ni phung po la sogs pa la mkhas par rig par bya'o zhes bya ba ni/ thog ma du ma nyid dang ni//bsdus dang yongs su phye ba'i don/ /zhes bya ba ste/ rgyas par thams cad la brjod par bya'o/ /de kho na'i don bsdus pa ni mdor bsdu na de kho na rnam pa gnyis so/ /rgyas par ni rnam pa bcur bshad do/ /de bas na mdor bsdu na rnam pa gnyis te zhes bya ba smos so/ / rnam pa gnyis po ji lta bu zhe na/ me long lta bu'i de kho na dang / snang ba'i de kho na'o zhes bya ba smos so/ /de la rtsa ba'i de kho na de ni me long lta bu'i de kho na ste/ de yang ngo bo nyid gsum mo/ /ci'i phyir de la me long lta bu'i de kho na zhes bya zhe na/ mtshan nyid kyi de kho na la sogs pa lhag ma rnams der snang ba'i phyir ro//snang ba'i de kho na ni mtshan nyid kyi de kho na la sogs pa sngar bstan pa rnam pa dgu gang yin pa'o/ /ci'i phyir de dag snang ba'i de kho na zhes bya zhe na/ rtsa ba'i de kho na la snang ba'i phyir ro/ /nga rgyal med pa snang ba'i de kho na ni mtshan nyid kyi de kho na ste/ gang zag dang / chos dang / gzung ba dang / 'dzin pa dang / dngos po dang / dngos po med pa la sgro mi 'dogs pa dang / skur pa mi 'debs pa'i phyir des nga rgyal med par 'gyur ro/ /phyin ci log gi gnyen po snang ba'i de kho na ni phyin ci ma log pa'i mtshan nyid de/ de ni rtag pa la sogs par phyin ci log gi gnyen por gyur pa'o//nyan thos kyi theg pas nges par 'byung ba snang ba'i de kho na ni 'bras bu dang rgyu'i de kho na ste/ 'phags pa'i bden pa bzhi rab tu rtogs shing bsgoms pas nyan thos nges par 'byung ngo / /theg pa chen pos nges par 'byung ba snang ba'i de kho na ni phra ba dang rags pa'i de kho na ste/rags pa kun rdzob kyi bden pas sems can rnams yongs su smin par byed pa dang / phra ba don dam pa'i bden pas rnam par grol bar byed pa'i phyir theg pa chen pos nges par 'byung ba'o/ /phas kyi rgol ba tshar gcod pa snang ba'i de kho na ni grags pa'i de kho na'o//ji lta zhe na/ de'i phyir/ dpe la brten te rigs pas tshar gcod pa'i phyir zhes bya ba smos te/ tshar gcad pa la dpe ni 'jig rten du grags pa'o/ /rigs pa ni rigs pas rab tu grub pa la brten pa'o/ /theg pa chen po mngon par brjod pa snang ba'i de kho na ni rnam par dag pa'i ye shes kyi spyod yul gyi de kho na ste/des ni nyon mongs pa dang shes bya'i sgrib pa rnam par dag pa'i ye shes kyi spyod yul gyi lung gzhan mngon par brjod pa ste/ de ni theg pa chen po'o/ /shes bya'i rnam pa thams cad la 'jug pa snang ba'i de kho na la bsdu ba'i de kho na dngos po lnga ste/de ni shes par bya ba thams cad la 'jug pa'i phyir ro/ /ma nor ba de bzhin nyid mngon par brjod pa snang ba'i de kho na ni rab tu dbye ba'i de kho na ste/ des dngos po rnams kyi ma nor ba de bzhin nyid dang gzhan ma yin pa de bzhin nyid mngon par brjod pa'i phyir ro//bdag tu 'dzin pa'i gzhi la dgongs pa thams cad rtogs par snang ba'i de kho na zhes bya ba ni mkhas pa'i de kho na ste/ des bdag tu 'dzin pa'i gzhi la dgongs pa thams cad kyi sgo nas rtogs te/ bsam pa bcu po dag gis phung po la sogs pa la bdag tu 'dzin pa 'jug par sngar ji skad du bstan pa'o//de kho na'i don bsdus pa smos pa ni bde blag tu 'dzin pa'i phyir te/ don gyis tshig 'dren pa'i phyir ro/ /rmongs pa med pa dang yongs su skyo ba yang med par bya ba'i phyir te/ skabs kyi mgo mjug yongs su mthong na yongs su skyo ba mi skye'o//ji ltar bstan pa bzhin du bshad pa rtogs pas rmongs pa yang mi 'byung ngo / /de kho na bshad zin to/ /bstan bcos dbus dang mtha' rnam par 'byed pa las de kho na'i le'ur bcad pa ste gsum pa'i 'grel bshad do// // de kho na bshad pa'i 'og tu gnyen po bsgom pa dang / de'i gnas dang 'bras bu thob pa bshad dgos te/ de bas na de bstan pa'i phyir le'ur bcad pa bzhi pa brtsams so/ /de kho na'i 'og tu bstan pa dang gnyen po bsgom pa la rag lus pa'i phyir de'i gnas dang 'bras bu thob pa gnyis kyang smos so//bstan pa'i mdor byas pa las gnyen po ni byang chub kyi phyogs su bzhed par bstan pa'i phyir/ gnyen po bsgom pa ni byang chub kyi phyogs bsgom pa ste zhes bya ba smos so/ /de dag bsgoms na mi mthun pa'i phyogs sgrib pa ji skad bstan pa rnams spang bar bya ba la mthu yod par 'gyur bas gnyen po rnams zhes bya'o//de rnams kyang sum cu rtsa bdun te/ dran pa nye bar gzhag pa bzhi nas 'phags pa'i lam yan lag brgyad pa'i bar du'o/ /de rnams bsgom pa ni spel ba dang / bskyed pa dang / goms par bya ba dang / lan mang du bya ba zhes bya ba'i rnam grangs so//de yang de kho na'i 'og tu bstan pa'i phyir de yang brjod par bya'o/ /byang chub kyi phyogs bsgoms pa la ci'i phyir dran pa nye bar gzhag pa bsgom pa nyid thog mar bshad kyi gzhan ni ma yin zhe na/ de la re zhig dang por/ gnas ngan len phyir sred rgyu'i phyir/ /zhes rgya cher smos so//de la zhes bya ba ni byang chub kyi phyogs bsgoms pa la'o/ /re zhig ces bya ba ni rim gyi don te/ thog mar dran pa nye bar gzhag pa bsgom pa ji bshad la/ gzhan yang phyis bshad do zhes bya bar 'gyur ro/ /mya ngan las 'das pa dang 'khor ba gnyis kyi yon tan dang nyes pa mo rtogs pa'i phyir 'du byed rnams la bde ba dang gtsang ba dang rtag pa dang bdag tu mngon par zhen pas byis pa rnams srid pa dang longs spyod la mngon par dga' zhing mya ngan las 'das pas skrag go//yon tan dang nyes pa ma rtogs pa dang / bde ba la sogs pa la mngon par zhen pa de yang bden pa mthong nas ldog par 'gyur te/de'i phyir 'khor ba la skyo bar bya ba'i don dang / mya ngan las 'das pa mngon sum du bya ba'i don du bden pa bzhi la 'jug par bya ba'i phyir dran pa nye bar gzhag pa bsgom pa nyid thog mar bshad do/ /lus kyis ni gnas ngan len rab tu ston zhes bya ba la/gnas ngan len ni ngan par gnas pa ste/ 'di ltar nyin gcig bzhin mngon par 'dus byas kyang lus 'gyur ba nyid pas lus kyis ni gnas ngan len rab tu ston to/ /de'i phyir lus la yongs su brtags pas sdug bsngal gyi bden pa la 'jug go/ / de ci'i phyir zhe na/ de'i mtshan nyid ni gnas ngan len dang bcas pa'i 'du byed yin pa'i phyir ro zhes bya ba ste/ 'di ltar sdug bsngal gyi bden pa'i mtshan nyid ngo bo nyid ni gnas ngan len dang bcas pa'i 'du byed rnams yin la/ lus kyis kyang gnas ngan len du rab tu ston pas/de'i phyir lus la yongs su brtags pas sdug bsngal gyi bden pa la 'jug go/ /gnas ngan len mi shes pas de'i phyir/ gnas ngan len ni 'du byed kyi sdug bsngal nyid de zhes bya ba smos so/ /'du byed ni dngos po rnams kyi skye ba'o/ /de yang gnod pa thams cad kyi gzhi yin pas gnas ngan len yin la/'phags pa rnams dang mi mthun pa'i phyir sdug bsngal nyid de/ ji skad du/ skye 'di gnod yin skye ba yod na rga dang 'chi ba dang / /nad dang phongs dang gsod dang 'ching ba la sogs dgra rnams yod/ /gal te 'jigs mang skye ba med gyur gnod pa de dag med//shing skyes med na me dang rlung dang nags mes 'gyel mi 'gyur/ /zhes bya ba lta bu'o/ /des zhes bya ba 'di 'du byed kyi sdug bsngal nyid kyis so/ /'gyur ba'i sdug bsngal dang / sdug bsngal gyi sdug bsngal nyid gnyis kyis ni ma yin te/de gnyis khyab pa ma yin pa dang 'du byed kyi sdug bsngal nyid rgyu yin pa'i phyir ro/ /zag pa dang bcas pa'i dngos po thams cad 'phags pas sdug bsngal du gzigs kyi zag pa med pa ni ma yin te/ lam gyi bden pa ni che'i gnyen po yin pa'i phyir ro/ /phyin ci log gi bsam pa nyams pa'i phyir so so'i skye bo rnams kyis ni ma yin no//mdo'i sde las kyang mdor na nye bar len pa'i phung po lnga ni sdug bsngal lo zhes gsungs so/ /gzhan dag na re 'du byed kyi sdug bsngal nyid ni las su mi rung ba'o zhes zer ro/ /gzhan na re las su mi rung ba ni gnas ngan len ma yin no//ci'i phyir zhe na/ las su mi rung ba'i zag pa dang bcas pa'i phyir nges par zag pa dang bcas pa ni sa bon gyi rgyu las byung bar khas blang dgos na/ de ni dgra bcom pa'i rgyud la sa bon med kyang res 'ga' kha zas dang gnas pa la sogs pa drags pa las 'byung ngo //de ni zag pa med pa yin pa'i phyir gnas ngan len zhes byar mi rung ngo zhes zer ro/ /de bas na kun gzhi rnam par shes pa la zag pa dang bcas pa'i chos kyis sa bon gnas pa ni 'dir gnas ngan len du 'dod do/ /bde ba dang / sdug bsngal dang / sdug bsngal ba yang ma yin bde ba yang ma yin pa dang lhan cig pa'i lus 'di ni de'i 'bras bu'o/ /de bas na bde ba la sogs pa'i gnas skabs dang lhan cig pa skad cig re re la 'byung ba'i lus kyi gnas ngan len de rab tu ston te/ shes par byed ces bya ba'i tha tshig go/ / dper na myu gus g.yul gyi ser ga'i nang du song ba'i sa bon mngon pa lta bu'o/ /de'i phyir lus la yongs su brtags pas sdug bsngal gyi bden pa la 'jug go/ /'dir rgyu smos pa/ de'i mtshan nyid ni gnas ngan len dang bcas pa'i 'du byed yin pa'i phyir ro zhes bya ba ste/ sa bon dang bcas pa'i 'du byed kyi bdag nyid yin pa'i phyir ro zhes bya ba'i tha tshig go//'du byed kyi sdug bsngal nyid ni 'gyur ba dang / sdug bsngal gyi sdug bsngal nyid ngag gnas ngan len gnyis kyi rjes su song ba dang / de'i rgyu yin pa'i phyir 'du byed kyi sdug bsngal du bshad do/ / de bas na 'du byed kyi sdug bsngal nyid kyis zag pa dang bcas pa'i dngos po thams cad 'phags pa rnams kyis sdug bsngal nyid du gzigs so/ /de ltar na lus dran pa nye bar gzhag pas sdug bsngal gyi bden pa la 'jug go/ /sred pa'i rgyu ni tshor ba ste/ /zhes bya ba ni ma rig pa'i 'dus te reg pa las byung bar dgos pa ste/zag pa med pa ni de'i rgyu ma yin pa'i phyir ro/ /de la bde ba'i tshor ba ni de dang ldan zhing mi 'bral bar sred pa'i rgyu'o/ /sdug bsngal ni de dang mi phrad pa dang bral bar sred pa'i rgyu'o/ /sdug bsngal yang ma yin bde ba yang ma yin pa ni snyoms par 'jug pa 'ga' zhig la de'i gnas skabs la mngon par dga' ba'i sred pa'i rgyu dang /de dang phrad cing mi 'bral bar sred pa'i rgyu yin no/ /de sdug bsngal gyi tshor bas reg na 'dod pa'i bde ba la mngon par dga'o zhes 'byung ba'i phyir/ sdug bsngal ba'i tshor ba yang bde ba la sred pa'i rgyur 'gyur te/ de la yongs su brtags pas kun 'byung ba'i bden pa la 'jug go/ /de la tshor ba rnams la rang bzhin dang 'bras bu dang mi rtag pa dang sdug bsngal ba nyid du nye bar yongs su rtog na kun 'byung ba'i bden pa la 'jug ste/sred pa ni de'i 'bras bur khong du chud do zhes bya ba'i tha tshig go/ /mdo sde las sred pa ni kun 'byung ba'i bden par gsungs te/ sdug bsngal kun 'byung ba gang zhe na/ yang 'byung ba'i sred pa dga' ba'i 'dod chags dang ldan pa'o zhes rgya cher 'byung ngo / /de ltar tshor ba dran pa nye bar gzhag pas kun 'byung ba'i bden pa la 'jug go//bdag tu mngon par zhen pa'i gzhi ni sems te zhes bya ba la/ rtag pa la sogs pa'i yon tan khyad par can gyi bdag gzhan med pas na bdag tu mngon par zhen pa'i dmigs pa ni sems nyid do/ /de bas na de yongs su brtags pas 'gog pa'i bden pa la zhi ba nyid du 'jug ste/'dir rgyu smos pa/ bdag chad par dogs pa'i 'jigs pa med pa'i phyir ro zhes bya ba ste/ sems la mi rtag pa la sogs par yongs su brtags pas bdag tu mngon par zhen pa ldog cing sdug bsngal du 'du shes 'byung ngo //de'i phyir bdag chad pa'i 'jigs pa med pas sdug bsngal ba tsam zhig gcod pa'i phyir 'gog pa'i bden pa la zhi ba nyid du 'jug ste/ de ltar sems dran pa nye bar gzhag pas 'gog pa'i bden pa la 'jug ces bya'o/ /chos la yongs su brtags pas kun nas nyon mongs pa dang rnam par byang ba'i chos la rmongs pa med pa'i phyir lam gyi bden pa la 'jug go zhes bya ba de la kun nas nyon mongs pa'i chos rnams ni nyon mongs pa dang nye ba'i nyon mongs pa rnams so//rnam par byang ba rnams ni nye ba'i gnyen por gyur pa rnams te/mi sdug pa dang byams pa la sogs pa'o/ /kun nas nyon mongs pa dang rnam par byang ba de rnams la gnyen po dang mi mthun pa'i phyogs kyi ngo bor shes nas gnod pa thams cad gtan du spang ba'i thabs lam gyi bden pa la mngon du phyogs par 'gyur te/ de ltar chos dran pa nye bar gzhag pas lam gyi bden pa la 'jug go/ /'jug pa ni 'dir bden pa so so la bden pa'i mtshan nyid du rtogs pa'o/ /de la lus dran pa nye bar gzhag pa bsgom pa ni mi rtag pa dang / sdug bsngal ba dang / stong pa dang / bdag med pa dang / mi gtsang ba du ma'i rdzas kyi rang bzhin dang /mi gtsang ba'i sa bon dang / mi gtsang ba'i rgyu mthun pa dang / mi gtsang ba gnas pa'i rgyu dang / mi gtsang bar 'gyur ba dang / dbu ba rdos pa bzhin du snying po med pa dang / 'gro ba dang skye gnas yin par bsgom mo/ /tshor ba dang sems dang / chos dran pa nye bar gzhag pa rnams bsgom pa yang mi rtag pa dang / sdug bsngal ba dang / stong pa dang / bdag med pa dang / spyi'i mtshan nyid dang / rang gi mtshan nyid dang / rgyu dang / 'bras bu dang / khams dang / sa dang / 'gro ba dang / dge ba dang / mi dge ba dang / lung du ma bstan pa dang /mi mthun pa'i phyogs dang / gnyen po yin par bsgom mo/ /byang chub sems dpa' rnams kyi dran pa nye bar gzhag pa bsgom pa ni 'di lta bu yang yin la rnam par rtog pa spangs pa'i phyir mi dmigs pa'i rnam par yang bsgom mo/ /dran pa nye bar gzhag pa rnams shes rab kyi rang bzhin yin du zin kyang dran pa nye bar gzhag pa'i tshig ni dran pa'i stobs kyis nye bar gnas pa'i phyir ram/'di dag gis dran pa nye bar gnas pas dran pa nye bar gzhag pa zhes bya'o/ /dran pa nye bar gzhag pa bsgom pa'i 'og tu yang dag par spong ba bsgom pa bshad de/ de ci'i phyir zhe na/de'i phyir 'di ltar/ mi mthun phyogs dang gnyen po rnams/ /rnam pa thams cad yongs shes nas/ /zhes rgya cher gsungs so/ /dran pa nye bar gzhag pa bsgoms nas zhes khyad par med par brjod kyang chos dran pa nye bar gzhag pa bsgom pa nyid yin par rig par bya'o/ / khams dang sa'i spangs pa dang / spyi'i mtshan nyid la sogs pa'i rnam pa dang / de bzhin du zag pa dang bcas pa dang / zag pa med pa dang / khams dang / sa dang / slob pa dang / mi slob pa la sogs pa'i bye brag gis mi mthun pa'i phyogs dang gnyen po rnam pa thams cad du yongs su shes na mi mthun pa'i phyogs gsal ba ni 'dir skyes pa rnams kyi rgyun chad pa dang /ma skyes pa rnams mi skyed pa'o/ /gnyen po bskyed pa'i phyir zhes bya ba la/ gnyen po bskyed pa ni skyes pa rnams kyi rgyun gyis rjes su 'jug pa dang ma skyes pa rnams skyed pa'o/ /brtson 'grus rnam pa bzhi rab tu 'byung zhes bya ba ni mi mthun pa'i phyogs dang gnyen po gnyis skyes pa dang ma skyes pa tha dad pas brtson 'grus rnam pa bzhi 'byung ste/sdig pa mi dge ba'i chos skyes pa rnams spang ba'i phyir zhes rgya cher 'byung ngo zhes bya ba 'dis ni lung gis brtson 'grus nyid rnam pa bzhi 'byung bar ston to//rgya cher zhes bya ba ni tshig lhag ma dang sbyar ba'o/ /de la 'di ni tshig lhag ma ste sdig pa mi dge ba'i chos skyes pa rnams spangs pa'i phyir 'dun pa skyed do/ /'bad do/ /brtson 'grus rtsom mo/ /sems rab tu 'dzin to/ /yang dag par rab tu 'jog go zhes bya ba dang / de bzhin du sdig pa mi dge ba'i chos ma skyes pa rnams mi bskyed pa'i phyir 'dun pa bskyed do zhes rgya cher 'byung ba'o//de bzhin du dge ba'i chos ma skyes pa rnams bskyed pa'i phyir 'dun pa bskyed do zhes rgya cher bya'o/ /dge ba'i chos skyes pa rnams gnas pa dang phyir zhing 'byung ba dang / yongs su rdzogs par bya ba'i phyir 'dun pa bskyed do//'bad do/ /brtson 'grus brtsam mo/ /sems rab tu 'dzin to/ /yang dag par rab tu 'jog go zhes bya ba'o/ /skyes pa rnams gnas pa ni yongs su mi nyams pa'o/ /phyir zhing 'byung ba ni rgyun du skye ba'o/ /yongs su rdzogs par bya ba ni phul du phyin par 'gyur ba'o//'dun pa skyed ces bya ba ni gus par brtson 'grus bsgom pa'i sbyor ba ston to/ /'bad ces bya ba ni le lo spangs te/ lus dang sems mngon du byed ces bya ba'i tha tshig go/ /brtson 'grus rtsom zhes bya ba ni bying ba dang rgod pa bsal ba'i phyir ro/ /ji ltar rtsom zhe na/yang dag par shes par bya ba dang / dga' bar bya ba'i chos yid la byed pas bying ba'i sems rab tu 'dzin to/ /sems rgod par gyur na dmigs pa de nyid la yang dag par rab tu 'jog ste/ 'dzin zhes bya ba'i tha tshig go/ /de ltar yang dag par spong ba rnams ni brtson 'grus kyi rang bzhin du bstan pa yin te/'di rnams kyis lus dang ngag dang yid yang dag par 'dzin pas na yang dag par 'dzin pa rnams so/ /der gnas las su rung ba nyid/ /ces rgya cher 'byung ba la der zhes bya ba ni mi mthun pa'i phyogs bsal ba'i phyir brtson 'grus rtsom pa de la'o/ /sems gnas pa'i las su rung ba nyid ni don thams cad 'byor par nus pa nyid de las su rung ba nyid do//las su rung ba de yang 'dun pa dang / brtson 'grus dang / sems pa dang / dpyod pa'i dbang gis byung bas na de'i phyir/ las su rung ba nyid ni rdzu 'phrul gyi rkang pa bzhi po dag ste zhes bya ba smos so//mngon par shes pa la sogs pa don thams cad 'grub par byed pa ni rdzu 'phrul lo/ /de'i gnas yin pa'i phyir rdzu 'phrul gyi rkang pa zhes bya ste/ rgyu zhes bya ba'i tha tshig go/ /de bas na don thams cad 'byor pa'i rgyu yin pa'i phyir ro zhes smos te/ de dag kyang 'dun pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa dang /brtson 'grus kyi ting nge 'dzin spong ba'i 'du byed dang ldan pa'i rdzu 'phrul gyi rkang pa dang / sems kyi ting nge 'dzin spong ba'i 'du byed dang ldan pa'i rdzu 'phrul gyi rkang pa dang / dpyod pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa zhes bya ba'o//de la 'dun pa'i ting nge 'dzin ni gang gi tshe 'dun pa'i dbang gis brtson 'grus rtsom pa la gus par 'jug pa na sems rtse gcig pa nyid la reg pa'o/ /brtson 'grus kyi ting nge 'dzin ni gang gi tshe brtson 'grus rtsom pa na rtag par sbyor bas sems rtse gcig pa nyid la reg pa'o//sems kyi ting nge 'dzin ni gang gi tshe sngon gyi ting nge 'dzin gyi sa bon la brten nas sems 'dzin cing gang sems rtse gcig pa nyid la reg pa'o/ /dpyod pa'i ting nge 'dzin ni gang gi tshe dmigs pa rab tu rnam par 'byed pa na sems rtse gcig pa nyid la reg pa'o/ / gnas pa ni 'dir sems gnas pa ste/ ting nge 'dzin du rig par bya'o zhes bya ba la/ ting nge 'dzin smos pa ni 'dus byas kyi mtshan nyid las dbye ba'i phyir ro/ /'di ltar brtson 'grus brtsams pa ni sems las su rung ba nyid rdzu 'phrul gyi rkang pa bzhir gyur pa de'i phyir yang dag par spong ba'i 'og tu rdzu 'phrul gyi rkang pa rnams bstan to//las su rung ba de yang dgos pa ni gang / rgyu ni gang zhe na de'i phyir/ nyes pa lnga spang ba'i phyir 'du byed bsgom pa'i rgyu las byung bar rig par bya'o zhes bya ba smos so/ /nyes pa lnga po de dag mi shes nas/ de'i phyir/ nyes pa lnga po de dag gang zhe na zhes dris pa dang / de dag bstan pa'i phyir/ le lo dang ni gdams ngag rnams/ /brjed dang bying dang rgod pa dang / /zhes rgya cher gsungs so/ /de dag ni nyes pa drug tu 'gyur ro snyam pa la/ de'i phyir/ de la bying ba dang rgod pa ni nyes pa gcig tu bsdu'o zhes bya ba smos te/ de'i phyir lngar 'gyur ro/ /de la le lo ni sbyor ba'i tshe na nyes pa ste/des mi sbyor ba'i phyir ro/ /brtson pa'i tshe gdams ngag brjed pa ni nyes pa ste/ des sems mnyam par gzhag pa med pa'i phyir ro/ /mnyam par gzhag pa la bying ba dang rgod pa ni nyes pa ste/ des sems las su rung ba med pa'i phyir ro/ /bying ba dang rgod par gyur pa'i tshe mngon par 'du mi byed pa nyes pa'o//mngon par 'du mi byed pa ni btang snyoms te/ des de gnyis rab tu zhi bar mi byed pa'i phyir ro/ /rab tu zhi ba'i tshe ni mngon par 'du byed pa'o zhes bya ba ni nyes pa zhes bya bar snyegs so/ /mngon par 'du byed pa ni sems pa'o/ /bying ba dang rgod pa dang bral bas mnyam pa nyid du gyur pa'i phyir rab tu zhi ba zhes bya'o//spang bar bya ba'i phyir 'du byed rnams ni spong ba'i 'du byed rnams so/ /gang spang ba'i phyir zhe na/ bshad ma thag pa'i nyes pa lnga rnams spang ba'i phyir ro/ /gal te de lta na des de dag spong ba'i 'du byed brgyad ji ltar rnam par gzhag pa brjod dgos so//de la le lo spang ba'i phyir bzhi ste/ 'dun pa dang / rtsol ba dang / dad pa dang / shin tu sbyangs pa'o/ /de la 'dun pa ni 'dod pa'o/ /rtsol ba ni brtson 'grus so/ /dad pa ni mngon par yid ches pa'o/ /shin tu sbyangs pa ni las su rung ba nyid do//ji ltar na le lo spang ba'i phyir de dag rnam par gzhag ce na/ de'i phyir/ de dag kyang go rims bzhin du rig par bya ste/ gnas dang de la gnas pa dang / /rgyu dang 'bras bu nyid du'o/ /zhes bya ba smos so/ /de dag gcig las gcig 'byung bas na le lo spong bar 'gyur ba ston to/ / rtsol ba'i gnas ni 'dun pa'o/ /gnas pa ni rtsol ba ste/ 'dod pa ni rtsol ba'i sngon du 'gro ba'i phyir ro/ /gnas 'dun pa'i rgyu ni dad pa ste/ ji lta zhe na/ de'i phyir/ yid ches par gyur na 'dod pa'i phyir ro zhes bya ba smos te/ rgyu dang 'bras bu la dad pa dang ldan pa ni bya ba la 'dod par 'gyur ro//gnas pa rtsol ba de'i 'bras bu ni shin tu sbyangs pa ste/ ji lta zhe na de'i phyir/ brtson 'grus brtsams na ting nge 'dzin gyi khyad par thob pa'i phyir ro zhes bya ba smos te/ ting nge 'dzin khyad par du 'gro ba ni shin tu sbyangs pa'i rgyu'o/ /de'i phyir/ brtson 'grus brtsams pa'i ting nge 'dzin khyad par du 'gro bas shin tu sbyangs pa ni rtsol ba'i 'bras bur bshad do//de ltar brtson 'grus brtsams pa gnas ngan len gyi rnam par rtog pa'i nyes pa dang bral bas dga' ba skye'o/ /yid dga' bas lus dang sems gnyis shin tu sbyangs te las su rung ba nyid kyi mtshan nyid do/ /de bas na ting nge 'dzin gyi khyad par thob pa'i phyir zhes bya ba'o//'dir ni brtson 'grus rgyu dang bcas shing 'bras bu dang bcas pa le lo'i gnyen por bshad do/ /nyes pa bzhi'i gnyen por grangs bzhin no zhes bya ba de la/ dran pa ni gdams ngag brjed pa'i gnyen po'o/ /shes bzhin ni bying ba dang rgod pa'i gnyen po'o//sems pa ni mngon par 'du mi byed pa'i gnyen po'o/ /btang snyoms ni mngon par 'du byed pa'i gnyen po ste/ 'dir 'du byed kyi btang snyoms su shes par bya'o/ /dran pa la sogs pa'i mtshan nyid brjod par 'dod pa'i phyir/ de dag kyang ngan pa la sogs pa rig par bya ste go rims bzhin zhes bya ba 'di smos so//dran pa ni dmigs pa ma brjed pa'o zhes rgya cher 'byung ba la/ dran pa ni dmigs pa ma brjed pa'o zhes bya ba ni sems gnas par bya ba'i gdams ngag yid kyis brjod ces bya ba'i tha tshig go/ /shes bzhin ni dran pa ma brjed par gyur na bying ba dang rgod pa rtogs pa'o zhes bya ba ni dran pa nye bar gnas pa shes bzhin dang ldan par 'gyur ro//de'i phyir dran pa ma brjed par gyur na zhes bya ba smos te/ bying ba dang rgod pa rtogs nas zhi gnas dang lhag mthong gnyis zung du 'brel par 'jug pa'i phyir bsgrim mi dgos par 'jug go zhes bya ba'i tha tshig go//btang snyoms zhes bya ba ni yul gzhan la mngon par 'du mi byed ces bya ba'i tha tshig ste/ de ni 'di skad du gdams ngag la dran pa shin tu nye bar gnas pa ni bying ba dang rgod pa'i sems yang dag pa ji lta ba bzhin du shes shing / bying ba dang rgod pa dang 'bral ba'i phyir de mngon par 'du byed la/bying ba dang rgod pa dang 'bral na yang btang snyoms su byed do zhes bstan par 'gyur ro/ /de ltar na de'i sems rnal du 'jug pa las su rung ba nyid yin no/ /rdzu 'phrul gyi rkang pa'i 'og tu dbang po lnga rnams te/ dad pa la sogs pa'o zhes bya ba ni bstan zhes bya bar sbyar ro//de dag ji ltar rnam par gzhag ce na zhes bya ba ni gang gi phyir zhes dgongs pa'o/ /de'i phyir/ thar pa'i cha dang mthun bskyed na/ /'dun dang sbyor ba dbang byed do/ /zhes rgya cher gsungs so/ /dbang byed pa zhes bya bar snyegs so zhes bya ba 'dis ni 'dun pa dang sbyor ba dbang byed ces bya ba'i sgra 'dir smos pa 'og ma rnams la yang snyegs so zhes ston to//rdzu 'phrul gyi rkang pa rnams kyis sems las su rung ba thar pa'i cha dang mthun pa'i dge ba'i rtsa ba bskyed nas zhes bya ba ni sems las su rung ba sems kyi rgyud la thar pa'i cha dang mthun pa'i dge ba'i rtsa ba rab tu 'jog pa 'thob ste/'dun pa ni dbang byed pa nas rab tu rnam par 'byed pa ni dbang byed pa'i bar du 'gyur gyi/ sems las su mi rung ba la ni ma yin no/ /sems las su rung ba nyid de yang rdzu 'phrul gyi rkang pa rnams kyis 'gyur ro/ / de bas na rdzu 'phrul gyi rkang pa'i 'og tu thar pa'i cha dang mthun pa'i dge ba'i rtsa ba bskyed pa la dbang byed pas dad pa la sogs pa dbang po lnga rnams rnam par gzhag go/ /'dun pa ni dbang byed pa zhes bya ba ni rgyu la 'bras bu btags nas dad pa nyid la 'dir 'dun pa'i sgrar bshad de/dper na zho dang ga gon la 'phral du rims zhes bya ba lta bu'o/ /yang na yod pa nyid dang yon tan can dang nus pa rnams la go rims bzhin du mngon par yid ches pa dang / dang ba dang 'dod pa rnams ni dad pa'i mtshan nyid do/ /de bas na 'dun pa smos pas 'dir 'dod pa'i mtshan nyid dad pa smos par 'gyur gyi 'dun pa ni ma yin no//sbyor ba ni dbang byed pa zhes bya ba ni 'dis sbyor bar byed pas na sbyor ba ste/ sbyor ba'i sgra ni brtson 'grus la bya bar dgongs pa'o/ /dmigs pa mi brjed pa ni dbang byed pa zhes bya ba ni dran pa'i dbang po dbang byed pa ste/ dmigs pa gsal ba'i mtshan nyid ni dran pa'i dbang po'o/ /mi 'phro ba ni dbang byed pa zhes bya ba ni ting nge 'dzin gyi dbang po dbang byed pa ste/ sems rtse gcig pa'i mtshan nyid yin pas mi 'phro ba ni ting nge 'dzin gyi dbang po'o/ /rab tu rnam par 'byed pa ni dbang byed pa zhes bya ba ni shes rab kyi dbang po dbang byed pa ste/shes rab kyi dbang po chos rnam par 'byed pa'i bdag nyid yin pa'i phyir ro/ /kyang zhes bya ba'i sgra ni thar pa'i cha dang mthun pa'i dge ba'i rtsa ba bskyed pa la dbang byed pas dad pa la sogs pa dbang po dag dang go rims bzhin du rig par bya'o zhes bya bar ston to//dad par gyur pa ni 'khor ba'i btson ra nas 'byung bar 'gyur bas de'i phyir brtson 'grus rtsom mo/ /brtson 'grus brtsams pa bslab pa gsum sgrub ste/ dran pa dang ting nge 'dzin dang shes rab kyi dbang po rnams go rims bzhin no/ /de ltar mthong ba'i lam la sbyor ba'i sa la dbang po 'di rnams gtso bor 'dod do//gzhan dag na re thar pa'i cha dang mthun pa'i dge ba'i rtsa ba bskyed pa la dbang byed pa la dad pa la sogs pa'i dbang po zhes mi bya'o/ /thar pa'i cha dang mthun pa'i dge ba'i rtsa ba bskyed nas 'dun pa la sogs pa la dbang byed pas na 'di dag dbang po zhes bya'o//de nyid bstan pa'i phyir 'dun pa ni dbang byed pa zhes bya ba smos te/ dad pa'i dbang po zhes bya ba dang sbyar ro/ /sbyor ba ni byed pa'o/ /mi brjed pa ni dmigs pa chud mi za ba'o/ /'phro ba med pas na mi 'phro ba'o/ /rab tu rnam par 'byed pas na rab tu rnam par 'byed pa'o//sbyor ba dang mi brjed pa dang mi 'phro ba dang rab tu rnam par 'byed pa de dag la brtson 'grus dang dran pa dang ting nge 'dzin dang shes rab ces bya ba'i sems las byung ba rnams dbang bas na/ dbang po rnams zhes bya bar gyur to zhes zer ro/ /'dir ni ji skad du bshad par bya ste/ thar pa'i cha dang mthun pa'i dge ba'i rtsa ba bskyed pa dang ma bskyed pa gnyis kyi dus na 'dun pa la sogs pa dbang byed pa dang / dad pa la sogs pa rang bzhin du bye brag tu gyur pa gang yang med de/ 'di ltar de'i dus na dbang byed pas de dag dbang por rnam par gzhag go/ /dad pa la sogs pa de dag nyid stobs dang ldan par gyur pa la stobs rnams zhes bya ste/dbang po'i 'og tu bshad pa'i phyir ro/ /de dag stobs ldan ji lta bu zhe na/ de'i phyir/ mi mthun phyogs ni bsrabs pa'i phyir/ /zhes bya ba gsungs te/ mi mthun pa'i phyogs srab mor gyur pa'i phyir ro//de nyid bstan pa'i phyir/ gang gi tshe de dag nyid ces bya ba smos te/ dad pa la sogs pa'i dbang po rnams so/ /ma dad pa la sogs pa mi mthun pa'i phyogs rnams zhes bya ba ni ma dad pa dang le lo dang brjed pa dang g.yeng ba dang shes bzhin med pa rnams so/ / mi mthun pa'i phyogs rnams dang / dad pa la sogs pa mi 'dre ba ni rab tu srab pa'i phyir te/ skabs skabs su kun du 'byung ba med pas na skabs mi thod ces bya ba'i tha tshig go/ /de'i tshe na stobs rnams zhes bya'o/ /de'i tshe na ni de dag gis mi mthun pa'i phyogs ma bsrabs pas dbang po de dag mi mthun pa'i phyogs rnams dang 'dre'o//gal te mi mthun pa'i phyogs rnams ma thul bar dbang po rnams zhes bya na/ /ji ltar mkhas pa'i de kho na nyid las 'jig rten pa'i rnam par dag pa'i dbang gis dad pa la sogs pa'i dbang por bshad ce na/ der ni dbang po rnams la bye brag med par dgongs pa'o//'dir ni nges par 'byed pa'i cha dang mthun pa'i dge ba'i rtsa ba'i bye brag bstan pa'i phyir bye brag yod de/ de bas na 'gal ba med do/ /de'i phyir/ 'dir dbang po de dag nyid stobs rnams zhes bya ba smos so/ /dad par gyur pa de rgyu dang 'bras bu la brtson 'grus rtsom ste/'bras bu 'di nyid kyi rgyu ni 'di'o/ /rgyu 'di nyid kyi 'bras bu ni 'di'o zhes de ltar dad par gyur pa ni 'bras bu la dad pas de'i rgyu la brtson 'grus rtsom mo/ /brtson 'grus brtsoms pa ni dran pa nye bar gnas so/ /dran pa nye bar gnas pa ni g.yeng ba med pa'i phyir sems mnyam par 'jog ste/rtse gcig par 'gyur ro/ /sems mnyam par gzhag pa ni yang dag pa ji lta ba bzhin du rab tu shes te/ ting nge 'dzin gyis rjes su bzung ba'i shes rab ni gsal bar 'gyur ro/ /thar pa'i cha dang mthun pa bskyed zin pa la dbang po rnams bstan na thar pa'i cha dang mthun pa'i 'og tu ni nges par 'byed pa'i cha dang mthun pa rnams dang dbang po rnams kyi 'og tu ni stobs rnams bstan na de'i phyir/nges par 'byed pa'i cha dang mthun pa rnams kyi dbang po'i dus na rig par bya ba'am/ 'on te stobs kyi dus la rig par bya/ de bzhin du nges par 'byed pa'i cha dang mthun pa rnams kyi dbang po dang stobs kyi rang bzhin nam/'on te de las gzhan pa'i rang bzhin yin pa brjod dgos te/ de'i phyir/ dbang po rnams dang stobs rnams la/ /nges 'byed cha mthun gnyis gnyis so/ /zhes bya ba gsungs so/ / yang na ji ltar thar pa'i cha dang mthun pa rnams gnyen po rnams bsgoms nas rab tu phye ba'am/ dad pa la sogs pas rab tu phye bar gyur pa de ltar nges par 'byed pa'i cha dang mthun pa rnams kyang ngo / /de'i phyir thar pa'i cha dang mthun pa bskyed zin nas dbang po rnams bstan na zhes bya bya rgya cher smos so//de'i phyir/ nges 'byed cha mthun gnyis gnyis so/ /zhes bya ba thams cad gsungs so/ /dro bar gyur pa rnams dang rtse mo dag gi tshe ni dbang po rnams so/ /dge ba'i rtsa ba de dag chung ba'i phyir te/ de dag rnams su mi rigs pas de dag dbang po nyid do/ /bzod da dag dang 'jig rten pa'i chos kyi mchog rnams kyi tshe ni stobs rnams so zhes bya ba ni de dag che ba'i phyir te/bzod pa dang 'jig rten pa'i chos kyi mchog de dag ni dbang po rnams su mi rigs kyi stobs rnams nyid do/ /chung ngu dang 'bring po dang chen po'i bye brag gis dang ba la sogs pa ni rnam pa gsum mo// /de la chung ngu dang 'bring po dag ni dbang po rnams so/ /chen po dag ni stobs rnams so/ /chung ngu gang yin pa dag ni dro bar gyur pa rnams so/ /'bring po dag ni rtse mo rnams so/ /chen po la yang bzhir dbye ste/ de la chung ngu dang 'bring po dang chen po rnams ni bzod pa chung ngu dang 'bring po dang chen po dag go rims bzhin no//chen po'i yang chen po dag ni 'jig rten pa'i chos kyi mchog rnams so/ /nges par 'byed pa'i cha dang mthun pa 'di dag thams cad ni ting nge 'dzin dang shes rab kyi rang bzhin te/ mtshungs par ldan pa dang bcas pa rnams so/ / de la dro ba'i rnam pa ni dro bar gyur pa ste/ dper na gtsub shing gtsubs pa las shing tshig par nus pa'i me'i mtshan ma thog mar byung ba ni dro bar 'byung ba'o/ /de bzhin du 'phags pa'i lam gyi mes nyon mongs pa thams cad kyi shing sreg par nus pa'i thog ma'i rang bzhin yin pas dro bar gyur pa zhes bya'o//dge ba'i rtsa ba g.yo ba rnams las rtse mor phyin pas na rtse mo'o/ /bden pa'i don la rab tu bzod pas na bzod pa'o/ /zag pa dang bcas pa yang yin la/ zag pa dang bcas pa'i chos gzhan pas dam pa yin pas na 'jig rten pa'i chos kyi mchog rnams zhes bya'o//de ma thag tu mthong ba'i lam skye bas na de dag mchog ces bya ste/ de dag ni skad cig pa'o/ /nges par 'byed pa'i cha dang mthun pa lhag ma rnams ni rgyun can no/ /de la thar pa'i cha dang mthun pa'i dge ba'i rtsa ba ni 'khor bar rab tu skye ba'i mthu 'joms pa'i tshul du rig par bya'o//nges par 'byed pa'i cha dang mthun pa'i zag pa med pa'i chos 'byung ba'i mthu skyed pa'i tshul du rig par bya ste/ chos kyi mchog gi 'og tu mthong ba'i lam 'byung ba'i phyir ro/ /de yang byang chub kyi yan lag gis rab tu phye ba'i phyir stobs kyi 'og tu byang chub kyi yan lag rnams bshad do//de dag ji ltar rnam par gzhag ce na zhes bya ba ni ci'i phyir rnam par gzhag ces bya bar dgongs pa'o/ /de'i phyir/ rang bzhin yan lag gnas yan lag /ces rgya cher gsungs so/ /mthong ba'i lam la byang chub kyi yan lag tu gyur pa dag ni byang chub kyi yan lag rnams so zhes bya ba ni de kho na nyid ma mthong ba las de thog ma nyid du mthong ba'i phyir mthong ba'o//'phags pa'i sar phyin par byed pa'i phyir lam zhes bya ba ste/ de'i phyir mthong ba'i lam zhes bya ba'o/ /nges par 'byed pa'i cha dang mthun pa'i tshe na ni dar las chod pa lta bur bden pa rnams rtogs so//mthong ba'i lam gyi tshe na ni de bsal ba lta bur rtogs so/ /de la de kho na mngon par rdzogs par byang chub pa ni rnam par mi rtog pa'i ye shes so/ /de la dran pa la sogs pa drug ni byang chub dang mthun pa'i phyir de'i yan lag rnams so/ /chos rnam par 'byed pa ni rtogs pa'i bdag nyid pas na byang chub ste/de dag gis grogs su gyur pas cha yan lag go/ /gzhan na re bar chad med pa'i lam du gtogs pa'i chos rab tu rnam par 'byed pa ni byang chub kyi yan lag go/ /rnam par grol ba'i lam du gtogs pa ni byang chub ces bya'o zhes zer ro//de la dran pa ni byang chub kyi gnas kyi yan lag ste/ dran pa'i stobs kyis dmigs pa de las mi g.yeng ba'i phyir ro/ /chos rnam par 'byed pa ni rang bzhin gyi yan lag ste/ /byang chub kyi ngo bo nyid yin pa'i phyir ro/ /brtson 'grus ni nges par 'byung ba'i yan lag ste/brtson 'grus kyis so so'i skye bo'i sa las shin tu 'da' ba'i phyir ro/ /dga' ba ni phan yon gyi yan lag ste/ des lus dang sems la phan 'dogs pa'i phyir ro/ /rnam pa gsum ni kun nas nyon mongs pa med pa'i yan lag ste/ shin tu sbyangs pa dang ting nge 'dzin dang btang snyoms so//de dag ni kun nas nyon mongs pa'i gnyen por gyur pa'i phyir ro/ /yang na nyon mongs pa med pa'i gzhi dang / gnas dang / ngo bo nyid tha dad pa'i phyir ro/ /ci'i phyir kun nas nyon mongs pa med pa'i yan lag rnam pa gsum bstan zhe na zhes bya ba ni ci'i phyir rnam pa gsum du bshad snyam du bsams pa ste/de'i phyir/ 'di la gzhi dang gnas dang ni/ /ngo bo nyid du bstan pa yin/ /zhes gsungs so/ /shin tu sbyangs pa ni kun nas nyon mongs pa med pa'i gzhi ste/ kun nas nyon mongs pa med pa ni rnam par dag pa'o/ /gzhi ni rgyu yin no/ /ji ltar gzhi zhes bya zhe na/de'i phyir/ kun nas nyon mongs pa ni gnas ngan len gyi rgyu las byung ba'i phyir de ni de'i gnyen po yin pa'i phyir ro zhes bya ba smos so/ /de ni 'di skad du kun nas nyon mongs pa'i gzhi'i gnyen por gyur pa'i phyir kun nas nyon mongs pa med pa'i gzhi yin no zhes bstan par 'gyur ro//lus dang sems las su mi rung ba nyid ni gnas ngan len zhes bya ste/ de yod na sems rtse gcig pa med pa'i phyir sems g.yengs par 'gyur ro/ /sems g.yengs pa la 'dod chags la sogs pa kun nas nyon mongs pa rnams 'byung ste/ de ltar gnas pa na len ni kun nas nyon mongs pa'i rgyu yin no//gnas ngan len de'i gnyen po ni shin tu sbyangs pa'o/ /ji ltar zhe na/ shin tu sbyangs pas na lus dang sems gnyis las su rung bar 'gyur te/ de ltar na shin tu sbyangs pa ni kun nas nyon mongs pa med pa'i gzhir rnam par gzhag go//ting nge 'dzin ni gnas so zhes bya ba ni lus dang sems gnyis shin tu sbyangs pas rjes su bzung bas na sems mnyam par 'jog go/ /sems mnyam par gzhag na yang dag pa ji lta ba bzhin du rab tu shes so/ /yang dag pa ji lta ba bzhin du mthong bas nyon mongs pa rnams spong ste/de ltar kun nas nyon mongs pa med pa'i gnas ni ting nge 'dzin to/ /btang snyoms ni ngo bo nyid do zhes bya ba ni gnas pa kun nas nyon mongs par gyur pa dang mthun pa'i sems mi mnyam pa dang / sems rnal du mi 'jug pa dang / sems rtsol ba dang bcas pa'i gnyen po yin pa'i phyir ro//de ltar na btang snyoms ni kun nas nyon mongs pa med pa'i ngo bo nyid do/ /gzhan na de spong ba'i lam rnams kyis mthong bas spang bar bya ba'i nyon mongs pa rnams spangs pas nyon mongs pa'i rjes su 'ching ba dang bral ba'i ngo bo nyid kyis rnam par dag pa'i rnam par grol ba'i lam du gtogs pa'i shes rab shes bya la nges pa skye ba de 'dir btang snyoms zhes bya ste/dgos pa byas pa'i phyir zad pa la zad do snyam du btang snyoms su byed pa'i phyir ro zhe'o/ /byang chub kyi yan lag gi 'og tu lam gyi yan lag rnams te/ de dag ji ltar rnam par gzhag ce na zhes bya ba ni mthong ba'i lam gyi 'og tu bsgom pa'i lam ste/de la lam gyi yan lag rnams zhes bya'o/ /de'i phyir byang chub kyi yan lag gi 'og tu lam gyi yan lag rnams brjod do/ /de dag gang gi don du rnam par gzhag ce na/ de'i phyir/ yongs su gcod dang go byed dang //zhes rgya cher gsungs so/ /mi mthun pa'i phyogs log par lta ba nas mi mthun pa'i phyogs log pa'i ting nge 'dzin gyi bar gyis yang dag par lta ba la sogs pa lam gyi yan lag brgyad po dag go rims bzhin du rnam par gzhag go/ /yang de dag gi go rims ni byed pa'i rim gyis te/bsgom pa'i lam zhes rgya cher 'byung ba'o/ /brten par bsgom pas bsgom par bya ba yin pas na bsgom pa'i lam mo/ /bsgom pa'i lam de la mthong ba'i lam thob par bsgom pas bsgom pa yongs su gcod pa'i yan lag ni yang dag pa'i lta ba'o//'jig rten pa zhes bya ba ni rnam par rtog pa dang bcas pa'i phyir 'jig rten pa'i/ /de 'byung ba'i mthu rnyed pas lam la mnyam par gzhag na yang de rnam par gzhag go/ /'jig rten las 'das pa ni rnam par mi rtog pa'o/ /rnam par mi rtog par gyur kyang yang dag par lta ba'i gnas su gyur pas na/yang dag par lta ba zhes bya'o/ /de'i phyir 'jig rten las 'das pa'i rjes las thob pa zhes smos te/ 'jig rten las 'das pa mthong ba'i lam gyi rjes las thob pa ni skyes zhes bya ba'i tha tshig go/ /de'i yul gang zhe na/ de'i phyir des rang gis rtogs pa zhes bya ba smos so//mthong ba'i lam gyis rtogs pa la bdag gis 'di lta bu rtogs so zhes yongs su gcod pa ste/ mthong ba'i lam gyi yul yin pas na yang dag par lta ba zhes bya'o/ /gzhan go bar byed pa'i yan lag ces bya ba rgya cher 'byung ba ni yang dag pa'i lta ba des yongs su bcad pa'i de kho na yang dag pa'i dag dang /yang dag pa'i rtog pas gzhan la go bar byed pa'i phyir/ yang dag pa'i rtog pa dang yang dag pa'i ngag ni gzhan yid ches par byed pa'i yan lag ste/ de'i phyir/ kun nas slong ba dang bcas pa'i ngag gis de go bar byed pa'i phyir ro zhes bya ba smos so//yang dag pa'i rtog pa ni ngag kun nas slong ba ste/ ma brtags ma dpyad par tshig mi smra'o zhes mdo las gsungs pa'i phyir ro/ /de 'byung ba'i mthu rnyed pa'i phyir mnyam par gzhag pa na yang de gnyis dang ldan par rig par bya'i/ mnyam par gzhag pa na yang dag par rtog par byed pa'am smra ba ni ma yin no//gzhan yid ches par byed pa'i yan lag ni rnam pa gsum ste/ yang dag pa'i ngag dang las kyi mtha' dang las kyi 'tsho ba'o/ /ji lta zhe na de'i phyir/ de dag go rims bzhin du/ lta dang tshul khrims yo byad bsnyungs//gzhan la rnam par rig byed 'dod/ /ces bya ba smos te/ yang dag pa'i ngag dang las kyi mtha' dang 'tsho ba dang go rims bzhin no/ /yang dag pa'i ngag gis zhes rgya cher 'byung ba la/ /bsnyad pa zhes bya ba ni chos bstan pa'o/ /'brel pa'i gtam rnam par nges pas zhes bya ba ni/mngon par rtogs pa las brtsams nas gzhan dag la rgol zhing lan 'debs pa ste/ bsnyad pa dang 'brel ba'i gtam rnam par nges pa 'dis ni 'di ltar 'di thogs pa med pa dang / don shin tu gtan la phab pa dang 'gal ba med pa dang don gsal ba brjod pa las na 'dis de kho na nges par rtogs so zhes shes rab la gzhan dag yid ches par 'gyur ro//yang dag pa'i las kyi mtha' ni tshul khrims la ste zhes bya ba ni yid ches par 'gyur ro zhes bya bar sbyar ro/ /ji lta zhe na de'i phyir/ bya ba ma yin pa mi byed pa'i phyir ro zhes bya ba smos so/ / yang dag pa'i las kyi mtha' ni nyes par spyod pa dang mi mthun pa ste/ de'i phyir de dang ldan na srog gi phyir yang bya ba ma yin pa mi byed do/ /de'i phyir 'dir ni 'phags pa dgyes pa'i tshul khrims dang ldan no zhes yid ches pa 'byung ngo / /yang dag pa'i 'tsho bas ni yo byad bsnyungs pa la ste zhes bya ba ni yid ches par 'gyur ro zhes bya bar sbyar ro//ji lta zhe na de'i phyir/ chos kyis gos la sogs pa tshod zin par tshol ba'i phyir ro zhes bya ba smos so/ /'tsho ba'i yo byad kyi phyir tshul 'chos pa la sogs pa'i nyes pa med pa'i lus dang ngag gis kun du spyod pa ni yang dag pa'i 'tsho ba ste/des 'di ltar 'di ni lus gnas pa tsam du bya ba'i phyir rigs pa dang tshod zin par chos gos la sogs pa tshol bas na gdon mi za bar 'di ni yo byad rnams la sred pa spangs so zhes yo byad bsnyungs par yid ches par 'gyur ro//de la yang dag pa'i lta bas ni mngon pa'i nga rgyal med par 'gyur te/ rang gi rtog pa yang dag pa ji lta ba bzhin du yongs su shes pa'i phyir ro/ /yang dag pa'i rtog pas kun nas bslang ba'i tshig gis ni seng ge'i sgra sgrog go/ /yang dag pa'i ngag dang / las kyi mtha' dang /'tsho ba rnams kyis ni rang gis dam bcas pa yang dag par brjod do/ /de la mi mthun pa'i phyogs kyi gnyen po'i yan lag rnam gsum mi shes nas de'i phyir/ yang dag pa'i rtsol ba dang dran pa dang ting nge 'dzin to zhes bya ba smos so/ /de dag kyang mi mthun pa'i phyogs gang gi gnyen po yin zhe na/de'i phyir de dag ni go rims bzhin du/ nyon mongs nye ba'i nyon mongs dbang / /mi mthun phyogs kyi gnyen po'o/ /zhes bya ba gsungs so/ /de la dang po'i gnyen po ni yang dag pa'i rtsol ba ste zhes bya ba la/ bsgom pas spang bar bya ba'i nyon mongs pa ni mi mthun pa'i phyogs dang po ste/de'i gnyen po ni yang dag pa'i rtsol ba'o/ /ji lta zhe na de'i phyir/ des zhes bya ba smos te/ yang dag pa'i rtsol bas lam bsgom pa'i phyir ro/ /bying ba dang rgod pa dang bral ba'i ting nge 'dzin gyi dus kyi brtson 'grus yang dag pa'i lta bas bsdus pa ni yang dag pa'i rtsol ba ste/des bsgom pas spang bar bya ba'i nyon mongs pa rnams spang bar bya ba'i phyir de'i gnyen po lam bsgom mo/ /de'i phyir yang dag pa'i ting nge 'dzin sgrub pas yang dag pa'i rtsol ba ni dang po'i gnyen po zhes bya'o/ /lam bsgom pa de nyid la gnyis pa nye ba'i nyon mongs pa bying ba dang rgod pa'i mtshan nyid ni yang dag pa'i dran pa ste zhes bya ba ni gnyen po zhes bya bar sbyar ro//ji lta zhe na de'i phyir/ zhi gnas la sogs pa'i rgyu rnams la dran pa shin tu nye bar gnas pas bying ba dang rgod pa med pa'i phyir ro zhes bya ba smos te/ sogs pa zhes bya ba'i sgras ni rab tu 'dzin pa'i rgyu dang /btang snyoms kyi rgyu yin par shes par bya'o/ /de la g.yeng ba'i rgyu nye bar zhi bar byed pas zhi gnas so/ /zhi gnas la sogs pa'i rgyu ni zhi gnas la sogs pa'i byed rgyu'o/ /de la sems rgod pa'am rgod du dogs pa zhig tu gyur na/ skyo bar 'gyur ba'i dngos po yid la byed pa ni zhi gnas kyi rgyu'o//sems bying ba'am/ bying du dogs pa zhig tu gyur na/ mngon par dga' bar gyur pa'i dngos po yid la byed pa ni rab tu 'dzin pa'i rgyu'o/ /zhi gnas la gcig tu nges pa'i lam mam/ lhag mthong la gcig tu nges pa'am/zung du 'brel bas 'jug pa'ang rung ste/ nye ba'i nyon mongs pa de gnyis kyis nye bar nyon mongs par gyur pa la lhun gyis grub pa yid la byed pa ni btang snyoms kyi rgyu'o/ /mngon par shes pa la sogs pa yon tan gyi rang bzhin gyi dbang 'byor pa'i mi mthun pa'i phyogs gang yin pa ni/ snyoms par 'jug pa'i sgrib pa'i rang bzhin nyon mongs pa can ma yin pa'i mi shes pa'o/ /gsum pa ni de'i yang dag pa'i ting nge 'dzin te gnyen po zhes bya bar sbyar ro/ /ji lta zhe na de'i phyir/ bsam gtan la gnas nas mngon par shes pa la sogs pa yon tan mngon par bsgrub pa'i phyir ro zhes smos so//bsam gtan ni yon tan khyad par can thams cad mngon par bsgrub pa'i gnas yin te/ de bas na mngon par shes pa la sogs pa yon tan mngon par sgrub pa'i mthun pa'i phyogs su gyur pa ni/ snyoms par 'jug pa'i sgrib pa'i gnyen po'o/ /de bas na de ltar yang dag pa'i rtsol ba ni nyon mongs pa'i sgrib pa dang bral ba ston to//yang dag pa'i dran pas ni ting nge 'dzin yongs su dag pa'o/ /yang dag pa'i ting nge 'dzin gyis ni snyoms par 'jug pa'i sgrib pa dang bral ba'o/ /gnyen po bsgom pa mdor bsdus na rnam pa gsum du rig par bya ste zhes bya ba ni/rtsom pa dang thob pa dang grub pa'i bye brag gis so/ /rgyas par byas na rnam pa du ma yod do/ /de ji lta zhe na/ rjes su mthun la phyin ci log /ces rgya cher 'byung ba de la/ phyin ci ma log pa'i rjes su mthun pa la phyin ci log pa zhes bya ba la/ phyin ci ma log pa ni mthong ba'i lam ste/ de kho na yul yin pa'i phyir ro/ /de'i rjes su mthun pa'i phyir phyin ci ma log pa'i rjes su mthun pa'o/ /'di ni so so'i skye bo'i sgom pa yin pas de kho na yul du ma gyur pa'i phyir phyin ci log ste/ so so'i skye bos nyon mongs pa rnams ma lus pa ma spangs pa'i phyir ro//ji ltar na phyin ci log tu gyur pa'i phyin ci log med pa'i rjes su mthun par 'gyur zhe na/ chos kyi dbyings shin tu rnam par dag pa'i rgyu mthun pa thos pa'i bag chags las byung ba'i phyir ro/ /de yang dran pa nye bar gzhag pa bsgom pa nas brtsams te/ stobs bsgom pa'i bar du'o//phyin ci log med la phyin ci log rjes su 'brel pa zhes bya ba 'di ni slob ma rnams kyi byang chub kyi yan lag bsgom pa dang / lam bsgom pa ste/ de kho na yul du gyur pas na phyin ci log med pa'o/ /bsgom pas spang bar bya ba'i nyon mongs pa yod pa'i phyir phyin ci log rjes su 'brel pa'o//phyin ci log kyang med la phyin ci log kyang rjes su 'brel ba yang med pa zhes bya ba 'di ni dgra bcom pa mi slob pa'i bsgom pa ste/ de kho na yul du gyur pas na phyin ci log med pa'o/ /dgra bcom pas ni dri ma rnams ma lus par spangs pa'i phyir phyin ci log rjes su 'brel ba med do//da ni nyan thos rnams las byang chub sems dpa' rnams kyi gnyen po bsgom pa khyad par bstan pa'i phyir/ byang chub sems dpa' rnams kyi ni/ /dmigs dang yid la byed pa dang / /'thob pas de ni khyad par 'phags/ /zhes bya ba smos te/ de la dmigs pa khyad par du 'phags pa ni/ nyan thos dang rang sangs rgyas rnams ni rang gi rgyud du gtogs pa'i lus la sogs pa zhes bya ba ste/ lus dang tshor ba dang sems dang chos rnams la dmigs so/ /byang chub sems dpa' rnams ni bdag dang gzhan gyi rgyud du gtogs pa rnams so zhes bya ba ni lus dang tshor ba dang sems dang chos rnams la dmigs so//ci'i phyir dmigs pa tha dad ce na/ 'di ltar nyan thos la sogs pa ni rang gi don gyi dbang du byas nas gnyen po bsgom pa la 'jug go/ /byang chub sems dpa' ni bdag dang gzhan gyi don gyi dbang du mdzad pa'i phyir ro//mi rtag pa la sogs pa'i rnam par zhes bya ba ni mi rtag pa dang / sdug bsngal ba dang / stong pa dang bdag med pa'i rnam par ro/ /ci'i phyir nyan thos dang rang sangs rgyas rnams la sogs pa de ltar yid la byed ce na/ de dag la skyo bar byed pa'i phyir te/ skyo bar ma gyur pa de dag 'bral bar mi 'gyur ro//byang chub sems dpa' rnams ni dmigs pa'i tshul du'o zhes bya ba ni brtags pa'i ngo bo nyid dmigs pa'i rnam par zhes bya ba'i tha tshig go/ /ci'i phyir de ltar yid la mdzad ce na/ rnam par rtog pa thams cad spang ba'i phyir te/ 'di ni de dag gi khyad par zhes bya'o//mi dmigs pa'i tshul 'ba' zhig tu yid la mdzad pa yang ma yin gyi/ mi rtag pa la sogs pa'i rnam par yang yid la mdzad de/ de ltar na yid la byed pa'i khyad par gyis khyad par du 'phags so/ /ci nas kyang lus la sogs pa dang 'bral bar bya ba'i phyir zhes bya ba ni lus la sogs pa dang bral ba ni/phung po lhag ma med pa'i mya ngan las 'das pa dang / de la dmigs pa'i nyon mongs pa spangs pa'o/ /byang chub sems dpa' rnams ni 'bral bar bya ba'i phyir yang ma yin/ mi 'bral bar bya ba'i phyir yang ma yin te/ de ci'i phyir zhe na/ lus la sogs pa dang shin tu bral ba dang ma bral na yang sems can gyi don bya bar mi nus par 'gyur te/nyon mongs pa zad pa dang / sems can phal pa bzhin no/ /gal te 'bral ba'i phyir yang ma yin mi 'bral ba'i phyir yang ma yin na ci'i phyir gnyen po rnams bsgom zhen de'i phyir/ ci nas kyang mi gnas pa'i mya ngan las 'das pa'i phyir bsgom mo zhes bya ba smos te/mi gnas pa'i mya ngan las 'das pa de gang zhe na/ byang chub sems dpa'i tshe na ni las dang skye ba la dbang ba la gnas nas snying rje dang ldan pa'i phyir 'khor bar skye ba yang shes rab kyi stobs kyis der kun nas nyon mongs par mi 'gyur te/'di ni byang chub sems dpa'i mi gnas pa'i mya ngan las 'das pa zhes brjod do/ /'khor ba na gnas kyang so so'i skye bo bzhin du nyon mongs par yang mi 'gyur la/ nyan thos la sogs pa bzhin du nye bar len pa med pa'i mya ngan las 'das par yang mi 'gyur ro//de bzhin gshegs pa'i dus na yang nyon mongs pa dang shes bya'i sgrib pa spangs pas 'khor ba la mi gnas la/ chos kyi sku rgyun mi 'chad cing longs spyod rdzogs pa dang / sprul pa'i sku gnyis kyis 'jig rten ji srid pa de srid du gzhan gyi don mdzad pa'i phyir/ phung po lhag ma med pa'i mya ngan las 'das pa la yang mi gnas so/ /de ltar na byang chub sems dpa' rnams kyi gnyen po bsgom pa 'di ni dmigs pa dang yid la byed pa dang 'bras bu'i khyad par rnams kyis nyan thos la sogs pa las khyad par du 'phags so/ /gnyen po bsgom pa bshad zin to//gnyen po bsgom pa'i 'og tu de'i gnas bshad de/ de'i phyir de'i gnas gang zhe na zhes dris so/ /de'i zhes bya ba ni gnyen po bsgom pa de'i ste/ de'i phyir/ rgyu yi gnas skabs zhugs pa dang / /zhes rgya cher gsungs so/ /de la rgyu'i gnas ni gang rigs la gnas pa'i gang zag go zhes bya ba la/rigs ni rgyu dang sa bon zhes bya ba'i tha tshig go/ /de la gang rigs nyid du gyur gyi sems bskyed pa la sogs pa la ma yin te/ de ni 'dir rigs la gnas par 'dod do/ /de ni gong ma'i gnas rnams su rjes su 'jug ste mi ldog go/ /kha cig na de rigs de yang dge ba'i rtsa ba'i rang bzhin no zhes zer te/dge ba'i rtsa ba nyid la kha cig ni nyan thos kyi rigs zhes bya ba nas de bzhin du byang chub sems dpa'i rigs kyi bar du'o zhe'o/ /kha cig na re so so'i skye bo'i gnas las brtsams te/ dbang po'i bye brag la rigs zhes bya ste/ sems kyi sa bon gyi mthu la rigs zhes de skad kyang zer te de yod na so so'i skye bo'i dus dang slob pa'i dus na nyan thos kyi rigs zhes bya ba nas byang chub sems dpa'i rigs kyi bar du'o zhe'o//mi slob pa'i dus na ni nyan thos she'am/ rang sangs rgyas she'am/ sangs rgyas zhes bya ste/ de ni gnas skabs kyi mthar thug pa'i phyir de ni rigs ma yin no//de yang nyan thos la sogs pa'i bye brag gis gsum du dbye'o/ /nges pa dang ma nges pa'i bye brag gis drug tu 'gyur ro/ /zhugs pa'i gnas ni sems bskyed pa'o zhes bya ba ni nyan thos dang rang sangs rgyas dang de bzhin gshegs pa'i rigs rnams dang go rims bzhin du/nyan thos dang rang sangs rgyas yang dag par rdzogs pa'i sangs rgyas kyi byang chub tu sems bskyed pas rnam pa gsum du 'gyur ro/ /de ni sbyor ba'i rtsa bar gyur pa'i phyir de byung na sbyor bar zhugs pa yin pas na/ de bskyed pa la sbyor bar zhugs pa'i gnas zhes bya'o//de'i phyir sbyor ba'i gnas ni sems bskyed nas 'bras bu ma thob tshun chad do zhes bya ba ste/ sems bskyed pa'i sbyin pa dang / tshul khrims la sogs pa nas stobs bsgom pa la thug gi bar du/ dge ba'i rtsa ba yang dag par brtsams shing thog ma'i 'bras bu thob par byed pa'i thabs yin pas de la sbyor ba zhes bya'o//ji ltar rgyun du zhugs pa'i gnas la byang chub kyi phyogs bsgom pa'i gnas zhes bshad ce na/ de'i rgyu yin pa'i phyir de bas na 'di skad du rigs nas sems bskyed pa zhes bya ba phyi ma phyi ma 'bras bu'o zhes bya ba la sogs pa bshad do//'bras bu'i gnas ni thob pa'o zhes bya ba ni dang po'i 'bras bu ste/ 'bras bu'i phyir sbyor ro/ /de bas na sbyor ba'i 'og tu 'bras bu'i gnas so/ /bya ba med pa'i gnas ni mi slob pa'o zhes bya ba'o/ /khams gsum gyi 'dod chags dang bral ba'i phyir mi slob pa ste/ de'i 'bras bu rnams yongs su rdzogs pas na/'bras bu gzhan thob par bya ba med pa'i phyir bya ba med pa'i gnas so/ /khyad par gyi gnas ni mngon par shes pa la sogs pa yon tan gyi khyad par gyi khyad par dang ldan pa'o zhes bya ba ni dgra bcom par mtshungs pa las mngon par shes pa la sogs pa yon tan gyi khyad par rnams dang ldan pas/gzhan las khyad zhugs par mngon par shes pa la sogs pa yon tan gyi khyad par bsgrub pa'i gnas la khyad par gyi gnas zhes bya'o/ /bla ma'i gnas ni nyan thos la sogs pa bas/ sar zhugs pa'i byang chub sems dpa'o zhes bya ba ni/bdag dang gzhan gyi don byed pa 'jig rten las 'das pa'i lam bdag med pa gnyis rtogs par byed pa thob pas/ de las gzhan pa'i theg pa'i bla mar gyur pas na/ gnas de la bla ma'i gnas zhes bya'o/ /bla na med pa'i gnas ni sangs rgyas te/ci'i phyir zhe na de'i phyir/ de'i gong na gnas med pa'i phyir ro zhes bya ba smos so/ /yon tan dang nyes pa thams cad phul du phyin pa dang brtsal ba'i mthar phyin pas na sangs rgyas su grub pa ste/ de'i gong du khyad par can gyi gnas gzhan med pas de nyid la bla na med pa zhes bya'o/ / de snyed du bshad pas gnas ma lus par yongs su rdzogs kyang byang chub sems dpa' rnams kyi sa bcu gcig tu rab tu dbye ba bstan pa'i phyir/ mos pas spyod pa la sogs pa'i gnas nas/ dbang bskur ba'i gnas la thug gi bar du yang bshad do/ /sangs rgyas rnams kyi sku gsum rab tu dbye ba bstan pa'i phyir/phyi ma'i gnas la sogs pa yang gsum du bstan te/ /de la rgyu dang zhugs pa'i gnas ni byang chub sems dpa' dang gzhan dag thun mong par rig par bya'o/ /de la mos pa'i gnas ni byang chub sems dpa' rnams kyi mos pas spyod pa'i sa thams cad do zhes bya ba ni sems bskyed nas sa la ma zhugs tshun chad de/bar der de kho na ma mthong yang de kho na mthong ba dang 'dra bar sangs rgyas dang byang chub sems dpa' rnams la mos pas ngo bo nyid gsum gyi sgo nas chos rnams sgrub cing / de las gzhan pa sems can rnams kyi bya dka' ba sbyin pa dang /tshul khrims la sogs pa sangs rgyas su 'grub pa'i tshogs rnams la 'jug pa ste/ de bas na gnas mos pas rab tu phye ba yin pas mos pas spyod pa zhes bya'o/ /de yang bskal pa grangs med pa'am de bas lhag pa'o/ /'jug pa'i gnas ni sa dang po'o zhes bya ba ni ngo bo nyid gsum la rnam par mi rtog pa'i ye shes kyis/dang po kho nar de kho na rang gis rig cing rtogs pas na 'jug pa'i gnas zhes bya ste/ 'di nyid ni byang chub sems dpa'i mthong ba'i lam mo/ /des par 'byung ba'i gnas ni de'i gong ma sa drug po dag go zhes bya ba ni bsgom pas spang bar bya ba'i mtshan ma rnam pa sna tshogs la mngon par zhen pa spangs pa'i mthar thug par 'gro ba dang rtsol ba dang bcas pa'i sbyor ba'i mthar thug par 'gro ba'i phyir/sa 'di dag la nges par 'byung ba'i gnas zhes bya'o/ /lung bstan pa'i gnas ni sa brgyad pa'o zhes bya ba ni mtshan ma thams cad la 'bad pa dang 'du shes rnam pa thams cad du bral bas sa brgyad pa ni sangs rgyas su 'grub par nges pa yin te/sangs rgyas bcom ldan 'das rnams kyis mngon sum du lung bstan pas lung ston to/ /brjod pa'i gnas ni dgu pa'o zhes bya ba ni sa dgu par nyan thos dang rang sangs rgyas rnam pas so so yang dag par rig pa bzhi khyad par du 'phags pa rnyed pas na bla na med pa'i chos chen po brjod pa yin no//dbang bskur ba'i gnas ni bcu pa'o zhes bya ba ni sa bcu pa la byang chub sems dpa'i lam gyi mthar phyin pas na/ phyogs bcu'i 'jig rten gyi khams na rnam par bzhugs pa'i sangs rgyas bcom ldan 'das rnams kyis 'od zer dag gis mngon par dbang bskur bas dbang bskur ba'o//phyin pa'i gnas ni sangs rgyas rnams kyi chos kyi sku'o zhes bya ba ni sgrib pa thams cad spangs pa dang / de'i gnyen po zag pa med pa'i chos kyi sa bon rab tu rgyas pas gnas gyur pa'i rang bzhin chos thams cad la dbang byed pa/kun gzhi med pa zhes bya ba sangs rgyas rnams kyi chos kyi sku'o/ /des na chos rtogs par bya ba'i mthar phyin pas na phyin pa'i gnas zhes bya'o/ /gzhan dag na re glo bur gyi dri ma ma lus par bstsal bas chos kyi dbyings rab tu rnam par dag pa nyid ni chos kyi sku yin pas chos kyi sku'o zhes zer ro//gzhan dag na re shes bya thams cad la yang chags pa med pa dang thogs pa med par 'jug pa'i ye shes khyad par can ni chos kyi sku'o/ /phan yon gyi gnas ni longs spyod rdzogs pa'i sku'o zhes bya ba ni ngo bo nyid kyi sku ste/sku gang la bzhugs nas mngon par rdzogs par byang chub ste/ sku de mthar phyin pa'i byang chub sems dpa' rnams dang lhan cig tu 'khor gyi dkyil 'khor rnams ni chos kyi 'gro ba myong bar 'gyur ba de ni longs spyod rdzogs pa'i sku'o/ / bya ba sgrub pa'i gnas ni sprul pa'i sku'o zhes bya ba ni ngo bo nyid kyi sku la brten nas sems can gyi bsam pa la gzigs te/ 'dul ba'i phyir bya ba la zhugs pa dang rab tu dbye ba mtha' yas pa ni sprul pa'i sku'o/ /gnas rnam pa mang po 'di thams cad kyang mdor bsdu na chos kyi dbyings la rnam pa gsum ste zhes bya bar rig par bya'o//ji lta zhe na de'i phyir/ ma dag ma dag dag pa dang / /rnam par dag pa ci rigs sbyar/ /zhes bya ba gsungs so/ /de la ma dag pa'i gnas ni rgyu'i gnas nas nye bar bzung ste sbyor ba'i bar du'o zhes bya ba ni rgyu dang zhugs pa dang sbyor ba dang mos pa'i gnas rnams bzung ngo //gnas de dag ni chos kyi dbyings dri ma ma lus par ma spangs pas na ma dag pa'i gnas zhes bya'o/ /ma dag pa dang dag pa'i gnas ni slob pa rnams so zhes bya ba ni 'dir yang 'bras bu'i khyad par dang bcas pa dang / khyad par can dang /bla ma dang bcas pa dang / 'jug pa dang / nges par 'byung ba dang / lung bstan pa dang / brjod pa dang / dbang bskur ba'i gnas rnams bzung ste/ gnas 'di dag na yang chos kyi dbyings la nyon mongs pa spangs pa dang / ma spangs pa'i phyir ma dag pa dang dag pa zhes bya'o//rnam par dag pa'i gnas ni mi slob pa rnams so zhes bya ba ni bya ba med pa dang / khyad par can dang / bla na med pa dang / phyin pa dang / phan yon dang / bya ba sgrub pa'i gnas rnams la rnam par dag pa'i gnas zhes bya ste/ mi slob pa rnams ni nyon mongs pa ma lus par spangs pa'i phyir ro//gnas 'di dag ni so so'i skye bo dang / slob pa dang mi slob pa rnams la rnam par gzhag go/ /de dag gi rnam par gzhag pa rnam pa mang po de ji ltar rnam par rig par bya zhe na de'i phyir/ 'di las ji ltar 'os 'os su/ /gang zag rnam par gzhag par 'dod//ces bya ba gsungs so/ /'di las zhes bya ba ni gnas rab tu dbye ba las zhes bya ba'i tha tshig go/ /ji ltar 'os 'os su zhes bya ba ni ji ltar mthun pa ste/ 'di ni rigs la gnas pa'o/ /'di ni zhugs pa'o zhes bya ba la sogs pa'o/ /sogs pa smos pas ni 'di ni sbyor ba'o//rgyun du zhugs pa'o/ /lan cig phyir 'ong ba'o/ /phyir mi 'ong ba'o/ /dgra bcom pa'o/ /rgyan dang bcas pa'o/ /byang chub sems dpa'o/ /de bzhin gshegs pa'o/ /mos pas spyod pa'o/ /lhag pa'i bsam pa dag pa la spyod pa'o/ /nges par 'byung ba'o//lung ston pa'o/ /chos brjod pa'o/ /dbang bskur ba'o/ /byang chub thob pa'o/ /longs spyod pa'o/ /gzhan gyi don mdzad pa'o zhes bya ba dag go/ /gnas bshad zin to/ /gnas ni 'bras bu'i sngon du 'gro bas gnas kyi 'og tu 'bras bu bshad pa'i phyir 'bras bu thob pa gang zhe na zhes dris pa dang /de'i phyir/ snod gyur rnam par smin brjod dang / /zhes rgya cher gsungs so/ /'dir mdor bsdu na 'bras bu rnam pa lnga ste/ snod du gyur pa dang / stobs dang / 'dod pa dang / 'phel ba dang / rnam par dag pa'o/ /de la snod du gyur pa ni gang dge ba dang rjes su mthun pa'i rnam par smin pa'o zhes bya ba ni de yang mi khom pa brgyad spangs pa'i skye mched drug khyad par can zag pa dang bcas pa'i byang chub kyi phyogs kyi chos kyi rnam par smin pa ste/dge ba'i chos thams cad skye ba'i gzhi yin pas snod ces bya'o/ / stobs ni gang snod du gyur pa'i dbang gis zhes bya ba ni lus las nyon mongs pa skye ba chung ba'i phyir/ dge ba shas cher gyur pa de rgyas pa'o zhes bya ba'i tha tshig go/ /'di ni stobs zhes bya'o/ /'dod pa ni gang sngon goms par byas pas dge ba 'dod pa'o zhes bya ba ni 'das pa'i tshe rabs rnams su dge ba'i chos goms pa'i phyir/da ltar gyi tshe dge ba'i chos la sems pa gang yin pa de ni 'dod pa'o/ /'phel ba ni gang da ltar byung ba dge ba'i chos la goms par byas pas sngon med pa'i dge ba'i chos khyad par can skye ba ste/ dge ba'i rtsa ba rgyas pa'o zhes bya bar dgongs pa'o//stobs dang 'phel ba'i khyad par ni 'di yin te/ stobs ni dge ba chung ngu'i rnam par smin pa la yang ltos nas mi 'gyur ba'o/ /'phel ba ni dge ba rnams gong nas gong du khyad par du 'gyur ba'o/ /gzhan dag ni dge ba'i rtsa ba rgyas zhes bya ba ni dge ba'i chos khyad par can gyi bag chags la 'dir rgyas pa zhes bya'o snyam du sems so//rnam par dag pa ni gang sgrib pa spangs pa'o zhes bya ba ni de la nyan thos dang rang sangs rgyas kyi rigs rnams ni nyon mongs pa'i sgrib pa spangs pas rnam par dag go/ / byang chub sems dpa'i rigs rnams kyi rnam par dag pa ni nyon mongs pa dang shes bya'i sgrib pa spangs pa'o/ /'di dag ni 'bras bu rnam pa lnga dang go rims bzhin te zhes bya ba la rnam par smin pa'i 'bras bu ni gang dge ba'i chos dang mthun par rnam par smin pa'o/ /bdag po'i 'bras bu ni gang snod du gyur pa'i dbang gis dge ba shas cher gyur pa'o//rgyu mthun pa'i 'bras bu ni gang sngon goms par byas pas dge ba 'dod pa'o/ /skyes bu byed pa'i 'bras bu ni gang da ltar byung ba na dge ba'i chos goms par byas pas dge ba'i rtsa ba rgyas pa'o/ /bral ba'i 'bras bu ni gang sgrib pa spangs pa'o//phyi ma phyi ma thog ma dang / /zhes rgya cher 'byung bas ni 'bras bu mdor bshad pa lnga po nyid kyi rab tu dbye ba mdor ston to/ /phyi ma phyi ma 'bras bu ni rigs las sems bskyed pa dang sems bskyed pa las sbyor ba dang / de lta bu la sogs pa ste/ gnas gcig nas gcig tu brgyud pa zhes ji skad du bshad pas/rig par bya'o/ /thog ma'i 'bras bu ni dang por 'jig rten las 'das pa'i chos thob pa'o zhes bya ba ni/ mthong ba'i lam thob pa'o/ /goms par bya ba'i 'bras bu ni de'i pha rol slob pa'i gnas so zhes bya ba ni/ mthong ba'i lam phan chad slob pa'i gnas la gang zag lngas rab tu phye ba lan cig phyir 'ong ba'i 'bras bu dang /phyir mi 'ong ba'i 'bras bu ste/ sbyor ba dang bcas pa'i rjes la bsgom pa'i lam gyi rang bzhin yin pas na/ goms par byas pa'i 'bras bu'o/ /rdzogs pa'i 'bras bu ni mi slob pa'i chos rnams so zhes bya ba ni/de dag kyang yang dag pa'i lta ba dang rtog pa dang / ngag dang / las kyi mtha' dang / 'tsho ba dang / rtsol ba dang / dran pa dang / ting nge 'dzin dang / rnam par grol ba dang / rnam par grol ba'i ye shes mthong ba'i zhes bya ba rnams te/ 'bras bu thams cad kyi mtha' la gnas pa'i phyir rdzogs pa'i 'bras bu zhes bya'o//rjes su mthun pa'i 'bras bu ni rgyu dngos pos phyi ma phyi mas 'bras bu nyid du rig par bya'o zhes bya ba de la sems bskyed pa ni rigs dang rjes su mthun pa'i phyir sems bskyed pa ni 'bras bu'o/ /phyi ma phyi ma 'bras bu la sogs pa dang rjes su mthun pa'i 'bras bu las/sogs pa so sor smos pa ni bstan pa dang bshad par rim bzhin du rig par bya'o/ /mi mthun pa'i phyogs kyi 'bras bu ni spong ba'i lam ste/ thog ma'i 'bras bu gang yin pa de nyid de/ mi mthun pa'i phyogs nyid 'bras bu yin pas na/mi mthun pa'i phyogs kyi 'bras bu ste/ spong ba'i lam des nyon mongs pa rnams dang 'bral lo/ /thog ma'i 'bras bu ni gong du bshad pa'i thog mar 'jig rten las 'das pa'i chos thob pa'o zhes bya ba gang yin pa'o/ /mi mthun pa'i phyogs kyi sgra ni gnyen po'i gegs yin pa'i phyir/sgrib pa la byar zin kyang / 'dir ni mi mthun pa'i phyogs gnyen po la bya bar 'dod do/ /sgrib pa gzhom pa'i phyogs yin pas na/ gnyen po zhes bya bar sbyor ro/ /bral ba'i 'bras bu ni goms par byas pa'i 'bras bu dang rdzogs pa'i 'bras bu ste/ nyon mongs pa dang bral ba ni slob pa dang / mi slob pa dang / rim bzhin no zhes bya ba la goms pas byas pa'i 'bras bu bral ba ni lan cig phyir 'ong ba'i 'bras bu la zhugs pa la sogs pa slob pa lnga rnams te/ nyon mongs pa'i lhag ma dang bcas pa'i phyir ro/ /rdzogs pa'i 'bras bu ni yongs su nyams pa'i chos can la sogs pa'i mi slob pa rnams yin te/de drug kyang khams gsum gyi nyon mongs pa rnams ma lus par spangs pa'i phyir ro/ /gong ma ni phye ste bshad pa'o/ /'dir ni ma phye ba ste khyad par ro/ /khyad par gyi 'bras bu ni mngon par shes pa la sogs pa yon tan gyi khyad par ro zhes bya ba 'di la yang goms par byas pa dang /rdzogs pa'i 'bras bu'i khyad par nyid du rig par bya'o/ /ci'i phyir zhe na/ phyir mi 'ong ba rnams dang / dgra bcom pa rnams yin te/ rang sangs rgyas rnams dang / byang chub sems dpa' rnams dang /de bzhin gshegs pa rnams kyi yon tan gyi khyad par can thob pa brjod par 'dod pa'i phyir ro/ /bla ma'i 'bras bu ni byang chub sems dpa'i sa rnams te/ 'dir rgyu smos pa/ de ma yin pa'i theg pa las bla mar gyur pa'i phyir ro zhes bya ba'o/ /byang chub sems dpa'i sa rnams ni/mthong ba dang bsgom pa'i lam gyi rang bzhin yin pas/ thog ma'i 'bras bu dang / goms par bya ba'i 'bras bu yin du zin kyang / nyan thos dang rang sangs rgyas kyi theg pa la ltos nas/ rnam par mi rtog pa dang / sangs rgyas kyi rigs yin pa dang /byang chub chen po'i 'bras bu yin pas byang chub sems dpa' rnams ni bla ma'i 'bras bu yin par rig par bya'o/ /bla na med pa'i 'bras bu ni sangs rgyas kyi sa'o zhes bya ba 'di yang rdzogs pa'i 'bras bu nyid yin du zin kyang / bag chags dang bcas pa'i nyon mongs pa dang nye ba'i nyon mongs pa thams cad spangs pa dang /nyon mongs pa can ma yin pa'i mi shes pa spangs pa'i phyir/ de'i gong na gzhan med pas bla na med pa'i 'bras bu zhes bya'o/ /'bras bu gzhan 'di dag ni mdor bstan te/ rgyas par bya na dpag tu med do zhes bya ba ni rgyas par bya na/ nyan thos dang rang sangs rgyas dang byang chub sems dpa' dang / yang dag par rdzogs pa'i sangs rgyas rnams kyi 'bras bu rnams rab tu phye ste/ bshad na tshad med par 'gyur ro/ /gnyen po bsgom pa'i don bsdus pa las byang bar bya ba'i phyir bsgom pa ni/ dran pa nye bar gzhag pa bsgom pa ste/'phags pa'i bden pa bzhi pa byang bar bya ba'i phyir ro/ /bsrab pa'i bsgom pa ni yang dag par spong ba bsgom pa ste/ mi dge ba'i chos rnams bsrab pa'i phyir ro/ /yongs su sbyang bar bya ba'i bsgom pa ni rdzu 'phrul gyi rkang pa bsgom pa ste/ de la ting nge 'dzin yongs su sbyang bar bya ba'i phyir nyes pa lnga spangs pa'i 'du byed brgyad brten pa'i phyir ro//gong ma yang dag par brtsam pa'i bsgom pa ni dbang po bsgom pa ste/ de ni thar pa'i cha dang mthun pa'i dge ba'i rtsa ba bskyed pa'i phyir ro/ /'dre ba'i bsgom pa ni stobs bsgom pa ste/ mthong ba'i lam dang 'dre ba'i phyir ro//zhugs pa'i bsgom pa ni byang chub kyi yan lag bsgom pa ste/ der de kho na la zhugs pa'i phyir ram/ 'jig rten las 'das pa'i chos la zhugs pa'i phyir ram/ 'phags pa'i lam la zhugs pa'i phyir ro/ /mchog gi bsgom pa ni lam bsgom pa ste/ mthong ba'i lam pas bsgom pa'i lam mchog tu gyur pa'i phyir ro/ /thog ma'i bsgom pa ni/ so so'i skye bo'i gnas skabs te/ rjes su mthun la phyin ci log pa'o/ /bar ma'i bsgom pa ni slob pa'i gnas skabs te/ phyin ci log med la phyin ci log rjes su 'brel pa'o/ / mtha'i bsgom pa ni mi slob pa'i gnas skabs te/ phyin ci log kyang med la phyin ci log rjes su 'brel pa yang med pa'o/ /bla ma dang bcas pa'i bsgom pa ni nyan thos la sogs pa'o/ /bla na med pa'i bsgom pa ni byang chub sems dpa' rnams kyi ste/ gang dmigs pa dang yid la byed pa dang thob pa khyad par du 'phags pa zhes bstan pa'o//gnas skabs rnams kyi don bsdus pa ni skal ba yod pa'i gnas skabs ni rgyu'i gnas skabs so/ /rtsom pa'i gnas skabs ni sems bskyed pa dang bcas pa'i sbyor ba'o/ /ma dag pa dang dag pa'i gnas skabs ni gnas gnyis te/ 'bras bu'i gnas dang / bya ba dang bcas pa'i gnas so/ /shin tu dag pa'i gnas skabs ni bya ba med pa'i gnas skabs so/ /rgyan dang bcas pa'i gnas skabs ni khyad par gyi gnas skabs so/ /khyad par bya ba'i gnas skabs ni bla ma'i gnas skabs te/ byang chub sems dpa'i sa bcus khyab pas na khyab par bya ba'i gnas skabs so zhes bya'o//bla na med pa'i gnas skabs ni sangs rgyas bcom ldan 'das rnams te/ de'i gong na gnas gzhan med pa'i phyir ro/ /de yang phyin pa'i gnas skabs dang / phan yon gyi gnas skabs dang / bya ba sgrub pa'i gnas skabs te/ gang sngar bshad pa'o/ /'bras bu rnams kyi don bsdus pa ni bsdus pa dang de'i bye brag dang / sngon goms par byas pa dang / gong nas gong du sgrub pa dang / bstan pa dang / bshad pa'o zhes bya ba 'di dag ni bshad pa byed pa nyid kyis bshad pa ste/ de la bsdus pa ni rnam par smin pa'i phyi ma phyi ma 'bras bu ni rigs las sems bskyed pa dang sems bskyed pa las sbyor ba dang de lta bu la sogs pa ste/gnas gcig nas gcig tu brgyud pa zhes ji skad du bshad pas rig par bya'o/ /thog ma'i 'bras bu ni dang por 'jig rten las 'das pa'i chos thob pa'o zhes bya ba ni mthong ba'i lam thob pa'o//goms par byas pa'i 'bras bus ni de'i pha rol slob pa'i gnas so zhes bya ba ni mthong ba'i lam phan chad slob pa'i gnas la/ gang zag lngas rab tu phye ba lan cig phyir 'ong ba'i 'bras bu dang / phyir mi 'ong ba'i 'bras bu ste/ sbyor ba dang bcas pa'i rjes la bsgom pa'i lam gyi rang bzhin yin pas goms par byas pa'i 'bras bu'o//rdzogs pa'i 'bras bu ni mi slob pa'i chos rnams so zhes bya ba ni de dag kyang yang dag pa'i lta ba dang / rtog pa dang / ngag dang / las kyi mtha' dang / 'tsho ba dang / rtsol ba dang / dran pa dang /ting nge 'dzin dang / rnam par grol ba dang / rnam par grol ba'i ye shes mthong ba zhes bya ba rnams te/ 'bras bu thams cad kyi mtha' la gnas pa'i phyir rdzogs pa'i 'bras bu zhes bya'o/ /rjes su mthun pa'i 'bras bu ni rgyu'i dngos pos phyi ma phyi ma 'bras bur rig par bya'o/ / zhes bya ba de la sems bskyed pa ni rigs dang rjes su mthun pa'i sems bskyed pa ni 'bras bu'o/ /phyi ma phyi ma 'bras bu la sogs pa dang / rjes su mthun pa'i 'bras bu la sogs pa so sor smos pa ni bstan pa dang bshad par rim bzhin du rig par bya'o/ /mi mthun pa'i phyogs kyi 'bras bu ni spong ba'i lam ste/thog ma'i 'bras bu gang yin pa nyid mi mthun pa'i phyogs nyid 'bras bu yin pas na mi mthun pa'i phyogs kyi 'bras bu ste/ spong ba'i lam des nyon mongs pa rnams dang 'bral lo/ /thog ma'i 'bras bu ni gong du bshad pa thog mar 'jig rten las 'das pa'i chos thob pa'o zhes bya ba gang yin pa'o//mi mthun pa'i phyogs kyi sgra ni gnyen po'i gegs yin pa'i phyir sgrib pa la byar zin kyang / 'dir ni mi mthun pa'i phyogs gnyen po la bya bar 'dod do/ /sgrib pa gzhom pa'i phyogs yin pas na gnyen po zhes bya bar sbyar ro/ / bral ba'i 'bras bu ni goms par byas pa'i 'bras bu dang rdzogs pa'i 'bras bu ste/ nyon mongs pa dang bral ba ni slob pa dang mi slob pa dang / rim bzhin no zhes bya ba la/ goms par byas pa'i 'bras bu bral ba ni/ lan cig phyir 'ong ba'i 'bras bu la zhugs pa slob pa lnga rnams te/ nyon mongs pa'i lhag ma dang bcas pa'i phyir ro//rdzogs pa'i 'bras bu ni yongs su nyams pa'i chos can la sogs pa mi slob pa rnams yin te/ drug car yang khams gsum gyi nyon mongs pa rnams ma lus par spangs pa'i phyir ro/ /gong ma ni phye ste bshad pa'o/ /'dir ni ma phye ba ste khyad par ro/ / khyad par gyi 'bras bu ni mngon par shes pa la sogs pa yon tan gyi khyad par ro zhes bya ba 'di yang goms par byas pa dang rdzogs pa'i 'bras bu'i khyad par nyid du rig par bya'o/ /ci'i phyir zhe na/ phyir mi 'ong ba rnams dang / dgra bcom pa rnams dang / rang sangs rgyas rnams dang / byang chub sems dpa' rnams dang / de bzhin gshegs pa rnams kyi yon tan khyad par can thob par brjod par 'dod pa'i phyir ro/ /bla ma'i 'bras bu ni byang chub sems dpa'i sa rnams te/ 'dir rgyu smos pa/ de ma yin pa'i theg pa las bla mar gyur pa'i phyir ro zhes bya'o/ /byang chub sems dpa'i sa rnams ni mthong ba dang bsgom pa'i lam gyi rang bzhin yin pas thog ma'i 'bras bu dang goms par byas pa'i 'bras bu zin kyang nyan thos dang rang sangs rgyas kyi theg pa la ltos nas rnam par mi rtog pa dang /sangs rgyas kyi rigs yin pa dang / byang chub chen po 'bras bu la sogs pa 'bras bu lnga ste/de dag tu 'bras bu thams cad bsdus pa'i phyir ro/ /de'i bye brag ni lhag ma rnams so zhes bya ba la/ 'bras bu lnga po de dag nyid kyi rab tu dbye ba'o/ /lhag ma rnams ni phyi ma phyi ma 'bras bu la sogs par rig par bya'o/ /sngon goms par byas pa ni rnam par smin pa'i 'bras bu'i zhes bya ba ni sngon gyi tshe rabs su dge ba bsags pa da ltar gyi tshe la rnam par smin pa ste/dge ba dang mthun par skye bas na/ de'i phyir sngon goms par byas pa zhes bshad do/ /gong nas gong du sgrub pa ni de ma yin pa gzhan bzhi'o zhes bya ba ni/ bdag po'i 'bras bu dang / rgyu mthun pa'i 'bras bu dang / skyes bu byed pa'i 'bras bu dang / bral ba'i 'bras bu'o/ /de la rnam par smin pas sgrub pa ni stobs so/ /stobs kyis sgrub pa ni 'dod pa'o/ /'dod pas sgrub pa ni 'phel ba'o/ /'phel bas sgrub pa ni rnam par dag pa pa'o//kha cig na re gong nas gong du bshad pas rab tu phye bas na gong nas gong du sgrub pa zhes bya'o zhe'o/ /bstan pa ni phyi ma phyi ma 'bras bu la sogs pa bzhi'o zhes bya ba ni phyi ma phyi ma 'bras bu dang / thog ma'i 'bras bu dang / goms par byas pa'i 'bras bu dang / rdzogs pa'i 'bras bu'o//bshad pa ni rjes su mthun pa'i 'bras bu la sogs pa drug ste/ bzhi po de dag nyid bshad pa'i phyir ro zhes bya ba de la/ rjes su mthun pa'i 'bras bu ni phyi ma phyi ma 'bras bu'i bshad pa'o/ /mi mthun pa'i phyogs kyi 'bras bu ni/ thog ma'i 'bras bu'i bshad pa'o/ / bral ba'i 'bras bu ni goms par byas pa dang / rdzogs pa'i 'bras bu'i bshad pa'o/ /khyad par gyi 'bras bu dang / bla ma'i 'bras bu dang / bla na med pa'i 'bras bu ni rdzogs pa'i 'bras bu nyid kyi bshad pa ste/ de nyid la rgyan dang bcas par brjod 'dod pa'i phyir ro/ /kha cig na re khyad par gyi 'bras bu ni goms par byas pa'i 'bras bu dang /rdzogs pa'i 'bras bu gnyis kyi bshad pa ste/ phyir mi 'ong ba la yang mngon par shes pa la sogs pa yon tan 'byung ba'i phyir ro/ /bla na med pa'i 'bras bu ni rdzogs pa'i 'bras bu'i bshad pa'o zhe'o/ /bstan bcos dbus dang mtha' rnam par 'byed pa las gnyen po bsgom pa'i le'ur bcad pa ste bzhi pa'i 'grel bshad do// //mtshan nyid la sogs pa dngos po drug bshad pa'i 'og tu theg pa bla na med pa bstan pas de'i phyir de dag bshad pa'i 'og tu theg pa bla na med pa bshad pa'i skabs su bab ste/de'i phyir/ de ni theg pa bla na med pa bshad dgos pas de brjod do zhes bya ba smos so/ /da ni zhes bya ba ni mtshan nyid la sogs pa drug bshad pa'i 'og tu zhes bya ba'i tha tshig go/ /de dag gi 'og tu bshad pa'i phyir ro snyam du dgongs pa'o/ /yang na gnyen po bsgom pa dang /gnas dang 'bras bu thob pa dag ni nyan thos la sogs pa dang / byang chub sems dpa' rnams kyi thun mong yin par bshad do/ /thun mong ma yin pa'i gnas skabs su bab pas na theg pa bla na med pa ni byang chub sems dpa' rnams dang / nyan thos la sogs par thun mong ma yin te/'dir gtso bor bshad do zhes bstan pa'i phyir/ da ni theg pa bla na med pa bshad dgos pas de la brjod do zhes bya ba smos so/ /'di las gong na med pas na bla na med pa zhes bya ba'i sgra ni khyad par du 'phags pa'i rnam grangs su gtogs pa'o/ /de yang gang zhe na theg pa chen po ste/ji ltar nyan thos dang / rang sangs rgyas kyi theg pa dag las theg pa chen po khyad par du 'phags pa de ltar theg pa chen po las ni khyad par du 'phags pa dam pa gzhan med de/ de la rgyu dang 'bras bu gnyis shin tu mchog tu gyur pa'i phyir ro/ /bla na med pa'i dngos po ni bla na med pa nyid do//de yang gang zhe na/ de'i phyir/ bla med nyid ni sgrub pa dang / /zhes rgya cher gsungs so/ /theg pa chen po ni bla na med pa nyid rnam pa gsum ste zhes bya ba la/ theg pa chen po zhes bya ba de gang zhe na/ rnam pa gsum po de dag nyid de/ sgrub pa dang / dmigs pa dang / yang dag par 'grub pa'o/ /de la sgrub pa bla na med pa nyid ni pha rol tu phyin pa bcu sgrub par byed pa nyid de/ pha rol tu phyin pa rnams sgrub pa la byang chub sems dpa' rnams kyi sgrub pa bla na med pa zhes bya'o/ /dmigs pa ni pha rol tu phyin pa la sogs pa'i chos rnams dang / chos kyi dbyings te/dmigs pa 'dis byang chub sems dpa' rnams gzhan gyi don ma lus par mdzad nus par 'gyur ro/ /de'i phyir gzhan gyi don byed nus pa'i rgyu'i dmigs pa ni dmigs pa bla na med pa nyid do/ /ci'i phyir zhe na/ de dang ldan pa'i phyir byang chub sems dpa' rnams kyi dmigs pa de bla na med pa zhes bya'o//yang dag par grub pa ni rigs dang mos pa dang sems bskyed pa la sogs pa rnams kyi 'bras bu ste/ de ni rigs la sogs pa las yang dag par 'grub par 'gyur/ 'thob par 'gyur bas na yang dag par 'grub pa zhes bya'o/ /de yang de las yang dag par 'grub pa khyad par du 'phags pa gzhan med pas na bla na med pa zhes bya'o//de bas na 'dir yang dag par 'grub pa de las khyad par du 'phags pa gzhan med pa'i dngos po nyid bla na med pa nyid do/ /'dir ni byang chub sems dpa' rnams kyi sgrub pa bzhi dang bcas pa 'bras bu dang bcas pa la theg pa chen po zhes bshad pa yin te/de yang bla na med pa nyid rnam pa gsum bshad ma thag pas bla na med pa zhes bya'o/ /yang na theg pa chen po ni rnam par rtog pa'i spros pa thams cad dang bral ba'i ye shes mtshungs par ldan pa dang bcas pa tshogs dang bcas pa/sbyor ba dang bcas pa/ rjes las thob pa'i ye shes dang bcas pa/ khyad par can gyi yon tan dang bcas pa/ dmigs pa dang bcas pa/ 'bras bu dang bcas pa'o/ /de la dmigs pa ni de bzhin nyid do/ /'bras bu ni mi gnas pa'i mya ngan las 'das pa'o//theg pa chen po 'di ston pa'i mdo sde la sogs pa bshad pa gang yin pa de dag kyang theg pa chen po yin no/ /tshig kyang gzhi dang 'dra bar gdags te/ dper na khar ba bsad pa dang rin po che phrogs pa lta bu'o/ /'dis theg chen mi gnas pa'i mya ngan las 'das pa thob par byed pas theg pa'o//de yang chen po rnam pa bdun dang ldan pas na chen po'o/ /de ni theg pa yang yin la chen po yang yin pas theg pa chen po'o/ /chen po rnam pa bdun ni dmigs pa dang / sgrub pa dang / ye shes dang / brtson 'grus dang / thabs mkhas pa dang /'thob pa dang / las chen po'o/ /de la dmigs pa chen po ni stong phrag brgya pa la sogs pa mdo sde mtha' yas pa'i chos rnams byang chub sems dpa'i lam gyi dmigs pa yin pa'i phyir ro/ /sgrub pa chen po ni bdag dang gzhan gyi don mtha' dag sgrub pa'i phyir ro/ / ye shes chen po ni gang zag dang / chos la bdag med par shes pa'i phyir ro/ /brtson 'grus chen po ni bskal pa grangs med pa gsum du bya dka' ba brgya stong phrag du ma la sbyor ba'i phyir ro/ /thabs mkhas pa chen po ni 'khor ba dang / mya ngan las 'das pa la mi gnas pa'i phyir ro/ / 'thob pa chen po ni stobs dang mi 'jigs pa dang / sangs rgyas kyi chos ma 'dres pa la sogs pa yon tan dpag tu med pa grangs med pa 'thob pa'i phyir ro/ /lam chen po ni 'khor ba ji srid pa de srid du byang chub mngon par ston pas sangs rgyas kyi mdzad pa sgrub pa'i phyir ro/ /'di dag nyid ni theg pa chen po bla na med pa ste/de las theg pa khyad par can gzhan med pa'i phyir ro/ /de yang sgrub pa dang dmigs pa dang yang dag par 'grub pa ste/ 'di ltar de dag dang ldan pas na theg pa chen po bla na med pa zhes bya'o/ /sgrub pa nyid bla na med pa yin pas sgrub pa bla na med pa nyid de/ de bzhin du dmigs pa dang yang dag par 'grub pa bla na med pa nyid kyang rig par bya'o//bla na med pa nyid de dag ni byang chub sems dpa'i lam dang / de'i gnas dang de'i 'bras bu'i dbang du byas te/ go rims bzhin du rnam par gzhag go/ /'di lta ste/ sangs rgyas kyi gsung rab kyis kyang sgrub pa dang dmigs pa dang de'i 'bras bu dang 'di rnams tsam zhig bshad par zad do//dmigs pa ni sgrub pa'i sngon du 'gro bas dmigs pa sngar bshad pa'i rigs pa las/ byang chub sems dpa' rnams la sgrub pa snying por bya ba bstan pa'i phyir sgrub pa sngar bshad do/ /de la ji ltar na sgrub pa bla na med pa nyid ces bya zhe na/de'i phyir/ sgrub pa bla na med pa ni pha rol tu phyin pa bcu la sgrub par rig par bya'o zhes bya ba smos so/ /pha rol tu phyin pa rnams sgrub pa ni pha rol tu phyin pa rnams la nan tan byed pa'o/ /pha rol tu phyin pa sgrub pa de yang theg pa chen po nyid du bshad kyi/gzhan ni ma yin pas na theg pa chen po nyid bla na med par ston to/ /sgrub pa de yang rnam pa gang gis pha rol tu phyin pa rnams la sbyor ba ni bla na med par 'gyur ba'i rnam pa de dag bstan pa'i phyir/ sgrub pa dag ni rnam drug ste/ /zhes bya ba gsungs so/ /pha rol tu phyin pa rnams la sgrub pa ji ltar na dam par 'gyur ba nas/ji ltar na khyad par can med pa'i bar du 'gyur ba mi shes nas/ de'i phyir de la/ dam pa bcu gnyis bdag nyid de/ /zhes bya ba smos so/ /dam pa ni rnam pa bcu gnyis te/ che ba dang bla na med ces bya ba'i tha tshig go//de'i rnam pa bstan pa'i phyir/ /rgya che ba dang yun ring dang / /zhes rgya cher gsungs so/ /rgya che ba dam pa nas 'grub pa dam pa zhes bya ba'i bar du rnam pa bcu gnyis pa de dag ni dam pa'o/ /de la rgya che ba dam pa ni 'jig rten gyi phun sum tshogs pa thams cad mi 'dod pa dang mchog tu rig par bya'o zhes bya ba la/phun sum tshogs pa zhes bya ba ni mngon par mtho ba'o/ /de yang rnam pa gnyis te/ rnyed pa dang ma rnyed pa'o/ /de la bdag gi bde ba la mi chags pa dang / gzhan gyi sdug bsngal ba bsal bar zhugs pa'i phyir rnyed pa la mi chags shing ma rnyed pa mi 'tshol ba'o//ji skad du/ dge ba khyod kyi bsod nams 'bras bu gang / /thams cad gzhan gyi don te bdag gi don rgyur min/ /zhes 'byung ba lta bu'o/ /spong ba dang ye shes dang mthu phun sum tshogs pa'i sangs rgyas nyid 'bras bu yin pa'i phyir mchog go//yang na 'jig rten na rgya che ba ni rnam pa gnyis su brjod de/ che bar mngon pa dang lan du phan 'dogs pa mi 'dod pa'o/ /de ltar na byang chub sems dpa' ni 'jig rten gyi phun sum tshogs pa thams cad mi 'dod kyang sbyin pa la sogs pa pha rol tu phyin pa rnams la je bas je cher sbyor te/de bas na de sgrub pa rgya che ba nyid ces bya'o/ /yun ring ba dam pa ni yun ring ba'i phyir mchog ste/ yun ring ba nyid kyang sbyin pa'i pha rol tu phyin pa la sogs pa la yun ring por goms par byed pa'o/ /de yang dus ji srid pa mi shes nas de'i phyir/bskal pa grangs med pa gsum du yongs su bsgom pa'i phyir ro zhes bya ba smos te/ byang chub sems dpa' rnams ni sbyin pa'i pha rol tu phyin pa la sogs pa bsgom pa bskal pa grangs med pa gsum gyi mthar thug par byed pas shin tu yun ring ba yin no/ /ched du bya ba dam pa ni sems can thams cad kyi don bya ba'i ched kyi phyir ro zhes bya ba la/byang chub sems dpa' bdag gi bde ba la mi chags pa rnams ni/ sems can la phan pa dang bde bar bya ba'i ched du sbyin pa la zhugs pas de'i phyir ched du bya ba dam pa zhes bya'o/ /zad mi shes pa dam pa ni mi zad pa'i phyir dam pa ste/zad mi shes pa gang zhe na/ de'i phyir/ byang chub chen por yongs su bsngos pas/ gtan du yongs su gtugs par mi 'gyur ba'i phyir ro zhes bya ba smos so/ /byang chub chen por yongs su bsngo ba'i sbyin pa la sogs pa ni/ skye ba'i gnas thams cad du rnam par smin pa'i 'bras bu byin yang gtan du rgyun chad par mi 'gyur te/gnas gyur pa'i mtshan nyid chos kyi sku sgrub pa dang / de yang mi zad pas phung po'i lhag ma med pa'i mya ngan las 'das par gtan du yongs su gtugs par mi 'gyur gyi/ nyan thos la sogs pa'i byang chub tu yongs su bsngos pa ni phung po lhag ma med pa'i mya ngan las 'das pa'i dbyings su lus rnam pa thams cad du rgyun chad pas rgyun chad par 'gyur ro/ /yang na byang chub chen por yongs su bsngo bas sbyin pa la sogs pa mi zad par 'gyur te/rnam par smin pa mang ba'i phyir ro/ /mang ba la yang mi zad pa zhes bya ste/ rnam par smin pa sbyin pas gtan du yongs su gtugs par mi 'gyur ba'i phyir ro/ /nyan thos la sogs pa'i byang chub tu yongs su bsngos pa la ni de ltar mi zad par mi 'gyur ro/ /yang na sems can rnams kyi don du byang chub sems dpa' rnams kyi dge ba'i rtsa ba byang chub chen por yongs su bsngos pa dang /sems can gyi khams bzhin du mi zad pa yin te/ de bas na sems can gyi khams bzhin du gtan du yongs su gtugs par mi 'gyur ro/ /rgyun mi 'chad pa dam pa ni bdag dang gzhan mnyam pa nyid du mos pa'i phyir te/sems can thams cad la sbyin pa la sogs pa pha rol tu phyin pa rnams yongs su rdzogs par byed pa'i phyir ro zhes bya ba ni/ sa rab tu dga' ba la byang chub sems dpas chos kyi dbyings kun du 'gro ba'i don rtogs pas bdag dang gzhan mnyam pa nyid du mos so//de bdag dang gzhan mnyam pa nyid du mos pa'i phyir bdag dang gzhan du rnam par rtog pa spangs pas/ rang gi sbyin pa la sogs pa bzhin du gzhan gyi sbyin pa la sogs pas kyang sems shin tu dga' ba thob po/ /de bas na skad cig re re'am yud tsam re re'am nyi ma re rer yang rgyun mi 'chad par de'i sbyin pa la sogs pa pha rol tu phyin pa rnams yongs su rdzogs par 'gyur ro//tshogs med pa dam pa ni gzhan gyi sbyin pa la sogs pa la rjes su yi rang ba tsam gyis pha rol tu phyin pa yongs su rdzogs par byed pa'i phyir ro zhes bya ba ni ci nas kyang de dag la rjes su yi rang ba tsam gyis sbyin pa la sogs pa pha rol tu phyin pa rnams yongs su rdzogs par 'gyur ba de ltar byang chub sems dpa' rnams sems can rnams kyi sbyin pa la sogs pa dge ba'i rtsa ba rnams la rab tu dga' ba'i yid kyis rjes su yi rang bar byed do//dbang 'byor ba dam pa ni nam mkha' mdzod kyi ting nge 'dzin la sogs pas sbyin pa la sogs pa yongs su rdzogs par byed pa'i phyir ro zhes bya ba ni/ byang chub sems dpa' rnams chos kyi dbyings rtogs pa bsgom pas/ting nge 'dzin nam mkha' mdzod ces bya ba 'thob ste/ de thob pas sems can rnams kyi bsam pa thams cad yongs su bskang ba'i phyir sbyin pa'i pha rol tu phyin pa yongs su rdzogs par 'gyur te/ de'i dbang gis nam mkha' nyid mdzod dam yang na nam mkha' la mdzod 'cha' ba'i ting nge 'dzin la nam mkha' mdzod ces bya bar brjod de/'di ltar ting nge 'dzin de'i mthus yo byad thams cad nam mkha' las 'byung bar 'gyur ro/ /sogs pa'i sgras ni shes rab kyi rol tu phyin pa la sogs pa mdo las 'byung ba'i ting nge 'dzin rnams bsdu'o/ /yongs su bzung ba dam pa ni/rnam par mi rtog pa'i ye shes kyis yongs su bzung ba'i phyir ro zhes bya ba ni/ byang chub sems dpa' rnams kyi rnam par mi rtog pa'i ye shes ni sbyin bdag dang sbyin par bya ba dang / len pa gsum ni dmigs pas rnam par mi rtog pa'i ye shes so/ /de bzhin du shes par byed pa dang /shes par bya ba dang / shes pa gsum gyis bar du mi dmigs pa'i phyir rnam par mi rtog pa'i ye shes te/ rnam par mi rtog pa'i ye shes dam pa des yongs su gzung ba'i sbyin pa la sogs pa sgrub po/ /ji lta zhe na de'i rjes su 'brang ba dang de la dmigs pa'i phyir te/de'i phyir dam pa zhes bya'o/ /rtsol ba dam pa ni mos pas spyod pa'i sa la bzod pa cher gyur pa'o zhes bya ba la/ bskal pa grangs med pa dang po ni mos pas spyod pa'i sa zhes bya ste/ rigs dang bshes gnyen gyi stobs kyis byang chub tu sems bskyed nas/ ngo bo nyid gsum gyi sgo nas chos thams cad la bdag med par shin tu mos pa'i bzod pa che ba ste/ma dad pa la sogs pa mi mthun pa'i phyogs las rgyal ba la bya'o/ /de ni byang chub sems dpa'i rtsom pa'i dus te/ de'i phyir bzod pa chen po ni rtsom pa dam pa zhes bya ste/ 'thob pa dam pa ni sa dang po'o zhes bya ba ni sa dang po la chos kyi dbyings kun du 'gro ba rtogs pas 'jig rten las 'das pa'i pha rol tu phyin pa rnams 'thob po/ /sngar sa dang po la sbyor bas bsdus pa ni 'jig rten pa nyid de/ de'i phyir sa dang po la 'thob pa dam pa zhes bya'o/ / rgyu mthun pa dam pa ni de ma yin pa gzhan brgyad po dag la'o zhes bya ba ni/ de ma yin pa gzhan sa brgyad po dag la gong nas gong du khyad par thob pa ni sa dang po la thob pa'i pha rol tu phyin pa rnams kyi rgyu mthun pa yin pas rgyu mthun pa dam pa'o/ /yang na mos pas spyod pa'i sa la pha rol tu phyin pa rnams bsgoms pa'i stobs kyis sa dang po 'thob pa ni 'thob pa dam pa ste/sa dang po byang chub sems dpa' rnams kyi mthong ba'i lam du bsdus pa der zhugs na/ de'i bdag nyid kyi chos rab tu thob pa'i phyir/ de bzhin gshegs pa'i rigs su skyes pa yin no zhes mdo las 'byung ngo //sa lhag ma rnams pha rol tu phyin pa rnams bsgom pa'i stobs kyis thob pa'i sa dang po'i rgyu mthun pa dam pa'o/ /yang na sa brgyad po 'di dag ni sa dang po la rab tu thob pa'i pha rol tu phyin pa rnams kyi rgyu mthun par gyur pas rgyu mthun pa dam pa'o//'grub pa dam pa ni sa bcu pa dang de bzhin gshegs pa'i sa la/ byang chub sems dpa' 'grub pa dang sangs rgyas 'grub pa'i phyir ro zhes bya ba la/ sa bcu pa la byang chub sems dpa' byang chub sems dpa'i spyod pa thams cad tshar phyin nas de bzhin gshegs pa rnams kyi rgyal chab tu dbang bskur te/bsod nams dang ye shes kyi tshogs bsam gyis mi khyab pa yongs su rdzogs pa dang / chos thams cad la rnam par rtog pa dang bral ba dang / rnam pa thams cad du bdag dang gzhan gyi don sgrub pa'i phyir/ sa bcu pa la byang chub sems dpa' rnams kyi 'grub pa dam pa'o/ /spong ba dang ye shes dang mthu khyad par can rnams thob pa'i phyir bcom ldan 'das ni 'gro ba thams cad kyi ston pa yin pas de'i phyir sangs rgyas su 'grub pas 'grub pa'o/ /'grub pa de yang gang zhe na/ byang chub sems dpa'i chos rnams dang /sangs rgyas kyi chos rnams rnam pa thams cad du mngon par sgrub pa'o/ /yang na slob pa'i sar bsdus pa'i pha rol tu phyin pa rnams kyi phul du byung ba ni sa bcu pa ste/ de bas na de la byang chub sems dpa' yongs su 'grub po/ /mi slob pa'i sar bsdus pa rnams kyi phul du byung ba ni sangs rgyas kyi sa ste/sa de na pha rol tu phyin pa rnams la slob pa med pa'i phyir/ sangs rgyas su yongs su 'grub pas 'grub pa ste/ de ltar sa bcur byang chub sems dpa'i yongs su 'grub pa dang / de bzhin gshegs pa'i sar sangs rgyas yongs su grub pas 'grub pa dam par rig par bya'o//de'i phyir dam pa'i don gyis na/ pha rol tu phyin pa bcur 'dod do zhes bya ba ni 'di ltar dam pa rnam pa bcu gnyis po 'di dag /byang chub sems dpa' rnams kyi sbyin pa la sogs pa la yod kyi/ nyan thos la sogs pa'i sbyin pa la sogs pa la ni med pa de'i phyir/dam pa zhes bya ste/ don 'dis byang chub sems dpa' rnams nyid kyi sbyin pa la sogs pa ye shes la thug pa rnams nges pa'i tshig gi tshul gyis pha rol tu phyin pa bcu po dag tu ston to/ /de bas na pha rol tu phyin pa rnams la sgrub pa gang yin pa de yang dam pa zhes bya'o//kha cig ces bya ba ni gang dag pha rol tu phyin pa rnams kyi ming tsam yang mi shes pa de rnams la de dag gi ming bstan par bya ba'i phyir/ sbyin dang tshul khrims bzod brtson 'grus/ /bsam gtan dang ni shes rab thabs/ /smon lam stobs dang ye shes dang / / 'di dag pha rol phyin bcu'o/ /zhes bya ba brjod de/ ched du bya ba dam pa ni sems can thams cad kyi don bya ba'i ched kyi phyir ro zhes bshad pa de'i phyir/ 'di dag gi so so'i las ci zhe na zhes dris pa de'i phyir/ las ni rjes su 'dzin byed dang / /gnod mi byed dang de la bzod/ /zhes rgya cher gsungs so//byang chub sems dpa'i sbyin pas ni sems can rnams rjes su 'dzin pa'o zhes bya ba ni de la mchod pa dang / phan gdags par 'dod pas/ phyi dang nang gi dngos po kha na ma tho ba med pas lan du phan 'dogs pa dang / rnam par smin pa la sogs pa la mi lta bar sems pa gang gis yongs su gtong zhing lus dang ngag gi las kyis kyang sgrub pa 'di ni/byang chub sems dpa'i zang zing gi sbyin pa ste/ 'dis bkres pa dang skom pa la sogs pa'i sdug bsngal sel bas sems can rnams rjes su 'dzin to/ /snying rje sngon du btang ste sems can rnams la mi gnod pa'i 'tsho ba dang /bstan bcos dang / sgyu rtsal dang / bzo rnams ston pa dang / bde 'gro dang thar pa'i lam ston pa ni chos kyi sbyin pa ste/ 'dis kyang 'tsho ba med pa dang / ngan 'gro 'khor ba'i sdug bsngal sel bas sems can rjes su 'dzin to/ /rgyal po dang chom rkun dang bgo skal la spyod pa dang /gcan gzan la sogs pas zin pa de dag las thar bar byed pa ni mi 'jigs pa sbyin pa ste/ 'dis kyang srog dang longs spyod dang / bu dang chung ma la sogs pas phongs pa'i 'jigs pa sel bas sems can rnams rjes su 'dzin to//tshul khrims kyis ni de dag la gnod par mi byed do zhes bya ba ni lus dang ngag gis nyes par spyod pa thams cad spyod pa dang / 'jig rten dang mthun pa'i bkag pa dang / bsgo bas lus dang ngag gi las ldog cing sgrub pa ni tshul khrims te/ tshul khrims de la rnam par gnas pas sems can la gnod pa dang mi bde bar sgrub pa srog gi phyir yang bdag nyid kyang mi byed cing gzhan la yang byed du mi 'jug pa'o//bzod pa ni gzhan dag gis gnod par byas pa la ji mi snyam par byed do zhes bya ba ni snying rje'i sems sngon du btang bas sdug bsngal gyi rnam pa thams cad la ji mi snyam par byed cing dang du len pa'i bdag nyid kyi bzod pa ste/des gzhan dag gis gsod pa dang 'ching ba dang rdeg pa la sogs pa byas pa la slar gnod pa mi byed pas ji mi snyam par byed pa'o/ /brtson 'grus kyis ni yon tan rnams 'phel bar byed do zhes bya ba ni sbyin pa la sogs pa'i phyir spro ba ni brtson 'grus te/des sbyin pa la sogs pa'i yon tan goms par byas pas yon tan khyad par du 'phags par 'grub pa ni 'phel ba'o/ /bsam gtan gyis ni rdzu 'phrul la sogs pas mgu bar byas te 'dzud do zhes bya ba la sogs pa zhes bya ba'i sgras ni/sems kyi rnam grangs shes pa bsdu'o/ /bsam gtan ni ting nge 'dzin la sems rtse gcig pa'o/ /rdzu 'phrul ni nam mkha' la 'gro ba la sogs pa'o/ /'dzud pa ni bstan pa'i chos nyid ston pa ste/ bsam gtan gyi 'bras bu rdzu 'phrul dang /kun brjod pa'i cho 'phrul gnyis kyis mgu bar byas na bstan pa la 'dzud nus par 'gyur ro/ /shes rab kyis ni yang dag pa'i gdams ngag byin pas rnam par grol bar byed do zhes bya ba la/ shes rab ni rnam pa thams cad du chos rab tu rnam par 'byed pa'i mtshan nyid do//de'i las ni yang dag pa'i gdams ngag sbyin pa ste/ nyon mongs pa spong ba yang phyin ci ma log par rjes su bstan pa la rag lus pa'o/ /de bas na shes rab kyis yang dag pa'i gdams ngag byin pas rnam par grol bar byed do/ /thabs la mkhas pa'i pha rol tu phyin pas ni/byang chub chen por yongs su bsngos pas/ sbyin pa la sogs pa mi zad par byed do zhes bya ba ni chos gang 'grub par bya ba dang / rnam par 'phel bar bya ba dang / 'thob par bya ba dang / spang bar bya ba'i phyir rigs pa gang yin pa de ni thabs yin no//de la mkhas pa ni thog tu phebs pa ste/ thabs la mkhas pa'o/ /de'i las ni sbyin pa la sogs pa byas shing bsags pa rnams byang chub chen por yongs su bsngos pas mi zad par byed pa'o/ /byang chub chen por yongs su bsngos pa'i dge ba'i rtsa ba rnams ni byang chub chen po bzhin du mi zad par 'gyur ro//smon lam gyi pha rol tu phyin pas ni mthun pa'i skye ba yongs su 'dzin pas tshe rabs thams cad du sangs rgyas 'byung ba mnyes par byed cing sbyin pa la sogs pa la rtag tu 'jug go zhes bya ba la/ smon lam ni rnam pa du mar smon pa'i bdag nyid yin mod kyi/'dir ni dge ba dang mthun pa'i skye ba la smon pas smon lam du 'dod do/ /de'i las ni tshe rabs tshe rabs su sangs rgyas 'byung ba mnyam par byed pa dang / sbyin pa la sogs pa la rtag tu 'jug pa'o/ /stobs kyi pha rol tu phyin pas ni so sor rtog pa dang / bsgom pa'i stobs gnyis kyis mi mthun pa'i phyogs kyis zil gyis mi non pa'i phyir sbyin pa la sogs pa la nges par 'jug go zhes bya ba la so sor rtog pa ni shes rab po//bsgom pa ni dge ba'i chos goms par byed pa ste/ de gnyis la mi mthun pa'i phyogs kyis zil gyis mi non pa ni/ stobs kyi pha rol tu phyin pa zhes bya'o//de'i las ni skad cig re re la yang gdon mi za bar sbyin pa la sogs pa la 'jug pa'o/ /nges pa zhes bya ba'i sgras ni rgyun mi 'chad pa'i rnam grangs so/ /so sor rtog pa dang bsgom pa'i stobs dang ldan pa'i sbyin pa la sogs pa'i dge ba la mi mthun pa'i phyogs rnams kyis zil gyis mi non to//ye shes kyi pha rol tu phyin pas ni/ chos la sgra ji bzhin du rmongs pa dang bral bas/ sbyin pa la sogs pa'i dbang du mdzad pa'i chos la longs spyod pa myong ba dang / sems can rnams kyang yongs su smin par byed do zhes bya ba ni theg pa chen po'i chos bstan pa thams cad la sgra ji bzhin du rmongs pa dang bral ba'i ye shes ni/ye shes kyi pha rol tu phyin pa'o/ /sgra ji bzhin du rmongs pa de yang gang zhe na/ gang gis dgongs pa'i don spangs te sgra ji bzhin nyid du rtog pa 'di ni sgra ji bzhin du rmongs pa'o/ /sbyin pa'i dbang du mdzad pa ni sbyin pa la dmigs nas/mdo la sogs pa'i chos bstan pa gang yin pa de sbyin pa'i dbang du mdzad pa'o/ /tshul khrims dang / bzod pa dang / brtson 'grus la sogs pa'i dbang du mdzad pa de yang de bzhin du blta bar bya'o/ /sangs rgyas dang byang chub sems dpa' rnams kyi theg pa chen po las brtsams te/phyin ci ma log pa 'brel pa'i gtam nges par mdzad pa dang / sems can rnams la phyin ci ma log pa'i chos bstan pas/ yongs su smin par mdzad pas chos la longs spyod pa myong ba dang / sems can yongs su smin par mdzad pa ni/ye shes kyi pha rol tu phyin pa'i las te/ mdo la sogs pa'i chos bstan pa ni/ ye shes kyi pha rol tu phyin pas rab tu phye ba'i phyir ro/ /dam pa sgrub pa bshad pa'i 'og tu yid la byed pa'i sgrub pa brjod dgos te/ de'i phyir/ yid la byed pa sgrub pa gang zhe na zhes dris pa dang /de'i phyir/ theg pa chen po ji lta bur/ /chos rnams btags pa mdzad pa dag /zhes rgya cher gsungs so/ /sbyin pa la sogs pa'i dbang du mdzad nas zhes bya ba ni sbyin pa dang / tshul khrims dang / bzod pa dang / brtson 'grus la sogs pa'i ched kyi phyir ro//mdo la sogs pa ji ltar btags pa'i chos rnams zhes bya ba ni/ bcom ldan 'das kyis rnam pa gang gis sbyin pa la sogs pa'i dbang du mdzad de/ mdo dang dbyangs kyis bsnyad pa dang / lung du bstan pa la sogs pa'i chos rnams gsungs pa de bzhin du de dag gi don dang /tshig 'bru la sgro 'dogs pa dang / skur ba 'debs pa med par yid la byed pa ni yid la byed pa sgrub pa ste/ gzhan du ma yin no/ /theg pa chen po zhes bya ba ni nyan thos kyi theg pa ma yin te/ nyan thos kyi theg pa bdag gi don nyid du sbyin pa la sogs pa bshad kyi/ji ltar theg pa chen por bdag dang gzhan gyi don byed pa lta bu ni ma yin te/ de bas na theg pa chen po nyid sbyin pa la sogs pa'i dbang du mdzad de/ mdo la sogs pa'i chos ji ltar btags pa rnams/ byang chub sems dpa' rnams sgrub pa yid la byed pa ni yid la byed pa sgrub pa'o//nyan thos kyi theg par sbyin pa la sogs pa'i dbang du mdzad de/ gsungs pa'i mdo la sogs pa yid la byed pa ni log par sgrub pa ste/ rang gi don tsam la brten pa'i phyir ro zhes bstan pa yin no/ /de dag kyang phal cher sems snyoms pa nyid dang /mi chags pa dang / ma khengs pa dang / mi dmigs pa rnams kyi dbang du mdzad de gzhag pa'o/ /de la gang yon tan can dang / yon tan med pa rnams la mtshungs par phan 'dogs par 'dod pa 'di ni sems snyoms pa nyid do/ /de la gang srid pa dang longs spyod la 'dod pa med par gzhan gyi don nyid du sbyin pa la sogs pa la sbyor ba 'di ni mi chags pa'o//de la gang sbyin pa la sogs pas bdag rlom sems su mi byed cing / gzhan la mi brnyas pa 'di ni ma khengs pa'o/ /de la gang sbyin pa dang sbyin bdag dang / len pa rnams mi dmigs pa'i tshul gyis 'khor gsum yongs su dag pa gang yin pa 'di ni mi dmigs pa'o//thos pa dang / bsams pa dang / bsgoms pa las byung ba'i shes rab kyis zhes bya ba de la yid ches pa'i gsung rab las skyes pa'i nges pa ni thos pa las byung ba'o/ /rigs pa dang nges par sems pa las skyes pa ni bsams pa las byung ba'i'o//bsgoms pa las skyes pa ni bsgoms pa las byung ba'i'o/ /rgyun du zhes bya ba 'di yang dang yang du'o/ /'jug pa thams cad ni 'bras bu'i phyir te/ de bas na shes rab rnam pa gsum gyis yid la byed pa de yon tan ci zhig byed ce na zhes dris pa dang / de'i phyir/khams brtas byed dang 'jug byed dang / /de yi don rnams 'grub par 'gyur/ /zhes gsungs so/ /khams ni rigs dang sa bon no/ /de'i brtas pa ni 'phel ba'o/ /khams brtas pas ni tshe phyi ma shes rab che zhing gsal bar 'gyur ro/ /thos pa de'i don la snying nas 'jug par byed do zhes bya ba ni mdo la sogs pa'i chos thos pa de'i don la rigs pa'i stobs skyed pas/bsams pa las byung ba'i shes rab kyis don yod pa phyin ci ma log pa la bsam pa thag pa nas 'jug pa'o/ /bsgoms pa las byung ba ni don 'grub par 'gyur te zhes bya ba la/ don grub pa ni de kho na khong du chud pa'o//ji lta zhe na/ de'i phyir/ sa la 'jug pa yongs su sbyong ba'i phyir ro zhes bya ba smos te/ dran pa nye bar gzhag pa la sogs pa yongs su dag pas sa la 'jug pa'i phyir ro/ /de'i phyir dran pa nye bar gzhag pa la sogs pa nyid kyis sa la 'jug par bstan to/ / de bas na dran pa nye bar gzhag pa la sogs pas sa la 'jug par gyur pa rnams bsgoms pa las byung ba'i shes rab kyis yongs su sbyong bas don 'grub par 'gyur te/ sa la 'jug go zhes bya ba'i tha tshig go/ /yid la byed pa sgrub pa 'di yang 'khor dang bcas par shes par bya ste/'ba' zhig ni ma yin no/ /de'i 'khor gang zhe na/ de ni chos spyod rnam bcu dang / /yang dag ldan par shes par bya/ /zhes gsungs so/ /yongs su zin par rig par bya ba ste zhes bya ba ni kun nas bskor ba zhes bya ba'i tha tshig go/ /chos kyi bdag nyid du'am chos kyi ched du spyod pa dag ni chos spyod pa dag go//de dag kyang mi shes nas/ de'i phyir/ chos spyod rnam pa bcu gang zhe na zhes dris pa dang / de'i phyir/ yi ge 'dri mchod sbyin pa dang / /zhes bya ba rgya cher gsungs so/ /de la yi ger 'dri ba ni theg pa chen po yun ring du gnas par bya ba'am/mnyan pa'am klag pa'i phyir bdag gam gzhan gyis so/ /mchod pa ni me tog dang / bdug pa dang / mar me dang / spos la sogs pas theg pa chen po la mchod pa'o/ /sbyin pa ni theg pa chen po la zhugs pa gzhan dag la yi ger bris pa'i glegs bam la sogs pa bsti stang du byas te sbyin pa'o//gzhan klog pa la nyan pa ni bsti stang du byas te nyan pa'o/ /bdag nyid klog pa ni gus pa cher byas te klog pa'o/ /len pa ni dang ba chen pos bdag la bdog par byed pa'o/ /tshig dang don 'chad pa ni 'bad pa chen pos 'os pa rnams la ston par byed pa'o//kha ton du byed pa ni blangs pa'i phyir zhing goms par byed pa'o/ /sems pa ni rigs pa'i don la de'i sgo nas spyod pa'o/ /bsgom pa ni mnyam par gzhag pa'i shes rab kyis goms par byed pa'o/ /dang zhes bya ba ni bsdu ba'i don to/ /de la yi ger 'dri ba dang / mchod pa dang / sbyin pa dang / nyan pa zhes bya ba'i tshig bzhi po 'di dag gis ni/ lus kyi las rab tu bstan to/ /klog pa dang / len pa dang / 'chad pa dang / kha ton du byed pa zhes bya ba'i tshig bzhi po 'di dag gis ni ngag gi las rab tu ston to/ /sems pa dang sgom pa zhes bya ba de dag gis ni yid kyi las rab tu ston to//spyod pa de bcu'i bdag nyid ni/ /bsod nams phung po dpag tu med/ /gang chos la spyod pa rnam pa bcu gsungs pa de la chos spyod pa gcig las bsod nams kyi phung po skye ba gang yin pa de yang shin tu mang ba'i phyir/ bdag gam gzhan gyis tshod bzung bar mi nus so//sbyin pa dang / tshul khrims dang / bsam gtan la sogs pa'i chos 'dra bar bstan pa las/ ci'i phyir mdo dag las theg pa chen po nyid kyi chos spyod pa shin tu 'bras bu che bar bstan gyi/ nyan thos kyi theg pa la ni ma yin zhe na zhes bya ba ni chos spyod pa 'bras bu che bar bstan zhes bya bar sbyar ro//rnam pa gnyis kyi phyir te zhes bya ba ni theg pa chen po'i chos spyod pa 'bras bu shin tu che bar bstan to zhes bya bar sbyar ro/ /rnam pa gnyis pa gang zhe na/ de'i phyir/ khyad par phyir dang mi zad phyir/ / zhes bya ba gsungs so/ /de nyid kyang mi shes nas de'i phyir khyad par gyi phyir ni ji lta bu/ mi zad pa'i phyir ni ji lta bu zhe na zhes dris pa dang / de'i phyir/ gzhan la phan 'dogs ma zhi phyir/ /zhes bya ba gsungs so/ /theg pa chen por ni byang chub sems dpa' rnams kyis sbyin pa la sogs pa sgrub pas sems can thams cad kyi don bya bar ro gcig par bstan gyi/nyan thos kyi theg pa las ni bdag gi don gtso bor bshad do/ /de bas na nyan thos kyi theg pa las theg pa chen po gzhan la phan 'dogs pa'i phyir khyad par du 'phags te/ de ltar rgyu brjod pas nyan thos kyi theg pa las theg pa chen po khyad par du 'phags so//bsod nams dang ye shes kyi tshogs bsam gyis mi khyab pa'i 'bras bu sku gsum du bsdus pa/ 'jig rten ji srid du yod pa de srid du sems can la phan par mdzad par zhugs pa/ phung po'i lhag ma med pa'i mya ngan las 'das pa na yang rgyun mi 'chad pa gnas gyur pa'i mtshan nyid bstan pas mi zad pa yin no//nyan thos kyi theg pa ni de lta ma yin te/ nyan thos kyi tshogs kyi 'bras bu ni phung po'i lhag ma med pa'i mya ngan las 'das pa rnam pa thams cad du rgyun mi 'chad pa'i phyir zad par bshad do//de ltar mya ngan las 'das pa na yang 'bras bu rgyun mi 'chad par bstan pas/ nyan thos kyi theg pa las theg pa chen po khyad par du 'phags so/ /yang na theg pa chen po'i don ni sbyin pa la sogs pa ste/ sems can thams cad la phan gdags par zhugs pa'o//nyan thos kyi theg pa'i don ni de lta ma yin te/ nyan thos rnams rang gi don la brtson pa'i phyir ro/ /sbyin pa la sogs pa byang chub sems dpa' dag gi chos rnams zag pa med pa'i lus su gyur pas/ mya ngan las 'das kyang rgyun 'chad par mi 'gyur gyi/nyan thos rnams kyi lam ni gzings lta bu yin pas yongs su mya ngan las 'das par rgyun 'chad par 'gyur te/ de dag gis ni mi zad pa ma yin no/ /de bas na theg pa chen po nyid kyi chos spyod pa 'bras bu chen por rigs kyi nyan thos kyi theg pa ni ma yin no//de la yid la byed pa sgrub pa'i 'og tu rjes su mthun pa'i chos sgrub pa brjod par bya ste/ de'i phyir rjes su mthun pa'i chos sgrub pa gang zhe na zhes dris pa dang / de'i phyir/ mi g.yeng phyin ci ma log par/ /'gyur bar rjes su mthun pa'i chos//zhes bya ba gsungs so/ /bsam gtan du bya ba dang / shes par bya ba'i chos kyi rjes su song ba rjes su zhugs pa'i zhi gnas dang lhag mthong bsgom pa'i bdag nyid kyi sgrub pa ni/ rjes su mthun pa'i chos sgrub pa'o/ /de la zhi gnas bsgom pa'i bdag nyid ni mi g.yeng ba'o//lhag mthong bsgom pa'i bdag nyid ni phyin ci ma log par gyur pa zhes bya ba ste/ 'di rnam gnyis ni rjes su mthun pa'i chos sgrub pa'o/ /mi zhes bya ba ni don mang zhig tu yang bsnyegs pas mi g.yeng ba zhes bya ba ji lta bu yin par mi shes nas/de'i phyir/ de la g.yeng ba rnam pa drug med pa'i phyir mi g.yeng ba'o zhes bya ba smos so/ /g.yeng ba rnam pa drug mi shes te/ ji lta bu zhig snyam pa la/ de'i phyir/ g.yeng ba rnam pa drug ni zhes rgya cher smos so/ /de ltar yang rab tu dbye ba tsam zhig bstan gyi g.yeng ba'i rang gi ngo bo ni ma bshad pas na/g.yeng ba rnam pa drug po 'di dag gi mtshan nyid ji lta bur rig par bya zhe na zhes dris pa dang / de'i phyir/ ldang dang yul la 'jug pa dang / /zhes rgya cher gsungs so/ /blo ldan zhes bya ba ni blo can te byang chub sems dpa'o//de la ldang ba ni rnam par shes pa lnga rnams kyi ting nge 'dzin las ldang ba ste/ zhes bya ba ni/ gang gi tshe mnyam par gzhag pa la mig la sogs pa'i rnam par shes pa lnga rnams las gang yang rung ba gcig cig 'byung ba de'i tshe ting nge 'dzin las langs par gyur pa 'di ni ngo bo nyid kyi g.yeng ba ste/phyi rol du bltas pa'i phyir ro/ /rnam par shes pa'i tshogs lnga rnams g.yeng ba'i bdag nyid yin pa'i phyir/ rnam par shes pa'i tshogs lnga rnams kyis ting nge 'dzin las ldang bar gyur pas na ngo bo nyid kyis g.yeng ba zhes bya'o/ /yul la 'jug pa ni phyi rol du g.yeng ba zhes bya ba ni/kha cig na re gang gi tshe mnyam par gzhag pa ting nge 'dzin la dmigs pa las/ mi 'dod bzhin du dmigs pa gzhan la yid kyi rnam par shes pa 'jug pa de'i tshe/ dmigs pa gzhan la 'phos pas phyi rol du g.yeng ba'o zhe'o/ / gzhan na re mnyam par gzhag pa'i ting nge 'dzin gyi dmigs pa spangs te/ yid kyi rnam par shes pa yul gzhan du 'phos pa ni phyi rol du g.yeng ba'o zhe'o/ /ting nge 'dzin gyi ro myang ba dang bying ba dang rgod pa ni nang gi g.yeng ba'o zhes bya ba la/ gal te mnyam par gzhag pas ting nge 'dzin de nyid la sred pa la sogs pa nyon mongs pas ro myangs na/nyon mongs pa can gyi ting nge 'dzin nye bar gnas pa'i phyir yang dag pa'i ting nge 'dzin de las g.yeng bar 'gyur ro/ /bying ba dang rgod pa dag gis kyang zhi gnas dang lhag mthong mnyam par 'jug pa'i ting nge 'dzin las g.yeng bar 'gyur ro//ro myang ba dang bying ba dang rgod pas ting nge 'dzin nyams par 'gyur bas na/ ro myang ba la sogs pa ni nang gi g.yeng ba'o/ /yid ches pa'i bsam pa ni mtshan ma'i g.yeng ba ste zhes bya ba ni/ bdag la 'di ni bsam gtan pa ste/che ba'i bdag nyid can no zhes de ltar yid ches par 'gyur ro snyam pa'i mtshan ma des/ ting nge 'dzin la brtson pa ni bsam pa log par zhugs pa'i phyir dge ba'i phyogs thob pa'am/ ma thob pa las g.yeng bas mtshan ma'i g.yeng ba zhes bya ste/'dir rgyu smos pa/ de la mtshan mar byas nas sbyor ba'i phyir ro zhes bya ba'o/ /shes kyi khe 'dod pas yid ches pa'i bsam pa de mtshan mar byas nas bdag la yid ches par 'gyur ro snyam ste/ ting nge 'dzin du zhugs pa'i phyir ro/ /ngar 'dzin pa dang bcas pa'i yid la byed pa ni gnas ngan len gyi g.yeng ba ste zhes bya ba ni snying nas ting nge 'dzin gyi yon tan 'dod kyang /bdag ni bsam gtan pa'o zhes nga'o snyam pa'i nga rgyal dang ldan te/ de'i phyir/ bdag la ni bstod gzhan la ni khyad du gsod pas na/ ngar 'dzin pa dang bcas pa'i yid la byed pa'o/ / ci'i phyir 'di la gnas ngan len gyi yid la byed pa zhes bya zhe na/ de'i phyir/ gnas ngan len gyi dbang gis nga'o snyam pa'i nga rgyal kun 'byung ba'i phyir ro zhes bya ba smos so/ /de ni 'di skad du/ g.yeng ba ni gnas ngan len gyis rab tu phye'o zhes ston par 'gyur ro/ /gnas ngan len ci zhe na/nga'o snyam pa'i nga rgyal gyi bag chags yongs su brtas pa ste/ des nga'o snyam pa'i nga rgyal kun du 'byung bas/ de'i dbang gis nga'o snyam pa'i nga rgyal kun du 'byung ba'i phyir ro/ /gzhan dag na re 'jig tshogs la lta ba ni gnas ngan len to zhe'o/ /dman pa'i sems ni yid la byed pa'i g.yeng ba ste zhes bya ba ni nyan thos la sogs pa'i rigs su ma nges pa theg pa chen po yid la byed pa dang ldan pa 'khor ba'i sdug bsngal gyis skrag pa dang /sems can log par zhugs pa dang / mi dge ba'i bshes gnyen gyis bsten pas na nyan thos dang rang sangs rgyas kyi sems bskyed par 'gyur te/rang gi don tsam 'dzin pa'i phyir de ni sems dman pa'o/ /nyan thos dang rang sangs rgyas kyi sems de ni/ theg pa chen po yid la byed pa las g.yeng bar byed pas yid la byed pa'i g.yeng ba zhes bya ste/ 'dir rgyu smos pa/ theg pa dman pa yid la byed pa kun du 'byung ba'i phyir ro zhes bya ba'o/ /theg pa dman pa ni nyan thos dang rang sangs rgyas kyi theg pa ste/ bdag yongs su mya ngan las 'da' bar bya ba'i ched du zhugs pa dang / yid la byed pa'i g.yeng ba kun du 'byung ba'i phyir theg pa chen po yid la byed pa las g.yeng bar byed pas na/dman pa'i sems ni yid la byed pa'i g.yeng ba zhes bya'o/ /de ltar na 'di ni byang chub sems dpa' g.yeng ba rnam pa drug gi skyon dang bral ba'i zhi gnas bsgom par rig par bya'o/ /de ltar g.yeng ba med pas ji ltar phyin ci ma log par gyur pa'i rjes su mthun pa'i chos sgrub pa bsgom par bya ba de ltar 'chad de/phyin ci ma log pa'i bdag nyid du zhugs pa ni phyin ci ma log par gyur pa'o/ /de la gang ji ltar gnas pa'i gzhi de la de bzhin du shes pa ni phyin ci ma log pa ste/ gzhi de yang rnam pa du yod mi shes nas/de'i phyir/ de la phyin ci ma log pa ni dngos po rnam pa bcur rig par bya ste zhes bya ba smos so/ /phyin ci ma log pa'i gzhi bstan pa'i phyir/ 'di lta ste/ yi ge don dang yid byed dang / /mi 'phro ba dang mtshan nyid gnyis/ /zhes bya ba smos so/ /da ni gzhi de dag la ji ltar phyin ci ma log par gyur pa de bstan pa'i phyir de la/'brel pa'i phyir dang 'dris phyir dang / /ma 'brel phyir dang ma 'dres phyir/ /don yod pa dang med pa ste/ /de ni yi ger ma log pa'o/ /zhes bya ba smos so/ /yi ge rnams 'brel te zhes bya ba la/ 'brel pa ni phan tshun 'byar ba yin na/cig car 'byung ba med pa'i phyir de yang yi ge rnams la med do/ /yi ge rnams la cig car brjod du mi rung ste/ sngar brjod pa rnams ni brjod ma thag tu zhig pas yi ge phyi ma brjod pa'i dus su mi sdod do snyam pa'i dogs pa bsal ba'i phyir/ rgyun mi 'chad par brjod pa zhes bya ba smos te/ de ni 'di skad du/ ma nor ba dang ma thogs par brjod pa la 'dir yi ge rnams 'brel par 'dod kyi/ yi ge rnams phan tshun 'byar ba ni ma yin no zhes bstan par 'gyur ro/ /'di'i ming ni 'di zhes bya'o zhes 'dris pas zhes bya ba ni dngos po 'di'i ming 'di'o zhes brda la goms par gyur pa ste/de ltar rnam pa 'di gnyis kyis yi ge rnams don yod pa nyid du khong du chud par byed do zhes bya ba'i tha tshig go/ /bzlog pa ni don med pa nyid do zhes bya ba ni gnyi ga med pa'am/ gang yang rung ba ma tshang ba med pa ni bzlog pa'o//de ltar bzlog pa gang yin pa zhes bya ba ni shes pa'o/ /de ni yi ge la phyin ci ma log par rig par bya'o zhes bya ba ni kun rdzob yin gyi/ don dam par ni ma yin te/ don dam par ni phyin ci ma log par rnam par mi rtog pa'i phyir ro/ /phyin ci ma log pa 'dis kyang byang chub sems dpa' sgra'i don dang bral ba'i chos thams cad rtogs par 'gyur ro//da ni yi ger 'dogs pa'i rgyu'i don la phyin ci ma log par bstan pa'i phyir/ gnyis su snang bar gyur pa ni/ /de ltar yod pa ma yin te/ /zhes rgya cher gsungs so/ /gnyis ni gzung ba dang 'dzin par snang ba ste zhes bya ba ni gang zhig ce na/gzhan gyi dbang gi ngo bo nyid do/ /ci'i phyir zhe na/ gzung ba dang 'dzin pa'i sa bon dang ldan pa'i phyir ro/ /'di la snang ba'i don gang zhe na/ de'i phyir de'i rnam par 'byung ba'i phyir ro zhes bya ba smos te/ gzung ba dang 'dzin pa'i rnam par 'byung bas gzung ba dang 'dzin par snang gi/shel sgong ltar nye bar gzhag par 'gyur ba lta bu ni ma yin no/ /de ltar yod pa ma yin te/ /zhes bya ba ni gnyis po med pa'i rang bzhin yin pas ji ltar snang ba'i rnam pa de ltar med pa'o/ /de ltar 'khrul pa'i rnam par shes pa 'byung ba'i rgyur gyur pa'i phyir/don la mthong ba gang yin pa de ni de la phyin ci ma log pa'o zhes bya ba ni yod pa dang med pa spangs pa'i phyir ro snyam du dgongs pa'o/ /don gyi yod pa spangs pa zhes bya ba la/ 'dir rgyu smos pa/ gzung ba dang 'dzin pa'i dngos po med pa'i phyir ro zhes bya ba'o//don gyi yod pa ni gzung ba dang 'dzin pa yod pa'o/ /de spangs pa ni gzung ba dang 'dzin pa'i rnam pas stong pa'i phyir ro/ /med pa spangs pa ci'i phyir zhe na/ der snang ba'i 'khrul pa yod pa'i phyir ro zhes bya ba ste/ gzung ba dang 'dzin par snang ba'i 'khrul pa yod do zhes bya ba'i tha tshig go//'di yang kun rdzob tu phyin ci ma log pa zhes bya'i don dam par ni ma yin te/ rnam par rtog pa dang bcas pa'i phyir ro/ /phyin ci ma log par shes pa 'dis byang chub sems dpa' chos thams cad gzung ba dang 'dzin pa'i ngo bo nyid dang bral bar rab tu rtogs so/ /da ni gzung ba dang 'dzin pa'i rgyu kun gzhi rnam par shes pa la phyin ci ma log par bstan pa'i phyir/rtog pa de yis bsgos pa yi/ /rtog pa yid byed de'i gnas ni/ /zhes rgya cher gsungs so/ /gzung ba dang 'dzin par rtog pas yongs su bsgos pa ni rtog pa'i yid la byed pa ste zhes bya ba ni gzung ba dang 'dzin pa'i rnam par snang ba'i mtshan nyid kyi don de la 'di ni gzung ba'o//'di ni 'dzin pa'o zhes ngag dang yid kyis brjod pa gang yin pa de ni rtog pa zhes bya'o/ /rtog pa des yongs su bsgos pa ni ma 'ongs pa na/ rigs 'dra ba'i rtog pa bskyed pa'i phyir/ sa bon yongs su brtas par byed pas na bsgos pa zhes bya'o/ /de ni rtog pa'i yongs su bsgos pa'i phyir/ 'bras bu la rgyu btags te rtog pa yid la byed pa zhes bya'o/ /rtog pa'i bag chags ni 'dir rtog pa ste/ de la rtog pa yod pas na rten dang brten pa dbye ba ma byas pa'i phyir ram/ yang na rten gyi sgra ma smos pa'i phyir rtog pa yid la byed pa zhes bya ba ste/ gzung ba dang 'dzin par rnam par rtog pa de'i sa bon gyi rten du gyur pa'i phyir ro/ /de la brten nas yang rtog pa 'byung ba'i phyir ro/ /rten yin pas 'di ni yid la byed pa la phyin ci ma log pa'o zhes bya ba ni/ phyin ci ma log par shes pa'o zhes bya ba'i tha tshig go//yid la byed pa gang la phyin ci ma log pa'i yid la byed pa de yang mi shes nas/ yid la byed pa gang la phyin ci ma log ce na zhes dris pa dang / de'i phyir yid la byed pa'i khyad par bstan pa'i phyir/ gzung ba dang 'dzin par snang ba'i rgyu la ste zhes bya ba smos te/kun gzhi rnam par shes pa'i khyad par gyi bdag nyid ces bya ba'i tha tshig go/ /ji ltar 'di gzung ba dang 'dzin par snang ba'i rgyur 'gyur ba de bstan pa'i phyir/ rtog pa yid la byed pa ni brjod pa'i 'du shes kyis yongs su bsgos pa'i phyir ro zhes bya ba smos te/ gzung ba dang 'dzin par snang ba'i rgyu yin no zhes bya bar sbyar ro//yang na rtog pa'i yid la byed pa zhes brjod pa 'jug pa'i rgyu yin par bstan pa'i phyir/ brjod pa'i 'du shes kyis yongs su bsgos pa'i phyir rtog pa yid la byed pa zhes bya'o zhes bya ba smos so/ /brjod pa las byung ba'am/brjod pa kun nas slong ba'i 'du shes pa ni brjod pa'i 'du shes te/ mtshungs par ldan pa dang ldan pa dang bcas pa des/ rtog pa'i yid la byed pa la rang gi sa bon yongs su gsos pas rtog pa yid la byed pa yongs su bsgos pa zhes bya'o/ /'di yang kun rdzob tu phyin ci ma log pa ste/don dam par ni ma yin no/ /phyin ci ma log pa 'dis byang chub sems dpa' phyin ci log gi gzhi gzung ba dang / 'dzin pa la mngon par zhen pa'i mtshan nyid yongs su spong ste/ de ltar na gnas ngan len de bde blag tu spong bar 'gyur ro/ /da ni mi 'phro ba la phyin ci ma log par bstan pa'i phyir/don gyi med dang yod pa ste/ /sgyu ma la sogs bzhin du 'dod/ /ces rgya cher gsungs so/ /don gyi yod pa dang med pa gong du bshad ma thag pa gang yin pa zhes bya ba la/ gong du bshad pa gang zhe na/ gnyis su snang bar gyur pa ni/ /de ltar yod pa ma yin te/ /de ni don la ma log pa//yod dang med pa rnam par spangs/ /zhes bya ba'o/ /de ni sgyu ma la sogs pa bzhin du 'dod de/ sgyu ma la sogs pa dang 'dra bas na/ sgyu ma la sogs pa bzhin no/ /de nyid bstan pa'i phyir/ dper na sgyu ma ni rang gi bdag nyid kyis med bzhin du/ glang po che la sogs pa'i bdag nyid du snang bas na/glang po che la sogs pa'i dngos por yod pa yin la zhes bya ba ni glang po che la sogs pa'i dngos por med pas/ rnam pa thams cad du med pa yang ma yin te/ de ni 'khrul pa tsam du yod pa'i phyir med pa'ang ma yin te/ glang po che la sogs pa'i rnam par snang ba de ni/'khrul pa tsam du yod pa'i phyir ye med pa'ang ma yin no/ /de bzhin du yod kyang ji ltar gzung ba dang 'dzin par snang ba ltar yod pa'ang ma yin la/ khams gsum pa'i sems dang sems las byung ba'i rang gi ngo bo de/ de lta bur snang ba de 'khrul pa tsam du yod pa'i phyir med pa'ang ma yin no//sogs pa zhes bya ba'i sgras ni smig rgyu dang rmi lam dang / chu zla la sogs pa chu dang skyes pa dang bud med kyi bdag nyid du ji ltar snang ba de bzhin du yod pa ma yin la/ de 'khrul pa tsam du yod pa'i phyir med pa'ang ma yin no/ /de bzhin du don la rgya cher so sor sbyar bar bya'o//'dir yang sogs pa'i sgras ni dri za'i grong khyer dang / brag ca la sogs par rig par bya'o/ /de ltar don la sgyu ma la sogs pa lta bur mthong nas/ yod pa dang med pa'i phyogs la sems mi 'phro ste/ g.yeng ba med par mthong ba gang yin pa de ni mi 'phro ba la phyin ci ma log pa'o//mi 'pho ba gang zhe na/ gzhan dag na re dbu ma'i lam gyi ting nge 'dzin to zhe'o/ /gal te de lta na ji ltar mi 'phro ba la phyin ci ma log par 'gyur zhe na/ de'i phyir/ des yod pa dang med pa la sems 'phro ba med pa'i phyir ro zhes bya ba smos so/ /phyin ci ma log pa 'dis byang chub sems dpa' yod pa dang med par rtog pa med pa'i phyir ro//stong pa nyid la dmigs pa las mi g.yeng ste/ de bas na mi 'phro ba la phyin ci ma log pa zhes bya'o/ /'di yang kun rdzob tu phyin ci ma log pa yin gyi/ don dam par ni ma yin te/ de ni rnam par mi rtog pa'i phyir ro/ / de ni rang gi mtshan nyid la phyin ci ma log pa bstan pa'i phyir/ rtog pa thams cad mi 'jug phyir/ /thams cad ming tsam kho na ste/ /zhes bya ba rgya cher gsungs so/ /gang 'di mig dang gzugs rnams nas/ /yid dang chos rnams zhes bya ba'i bar 'di dag thams cad ni ming tsam mo/ / zhes bya ba ni skye mched bcu gnyis kyi bdag nyid shes bya thams cad ni ming tsam mo/ /de la ming gi ngo bo nyid dang khyad par du 'dogs pa'o/ /gdags par bya ba'i don dang btags pa ni ngo bo nyid med de/ de'i bdag nyid du kun brtags pa'i phyir ro/ /kun brtags pa yang med pa'i phyir ro/ / gzhan du na ni ming la mi ltos par mig la sogs par 'dzin par 'gyur te/ brda la ma byang bar mi 'dzin pa med do/ /de bas na mig dang gzugs zhes bya ba de ni/ don gyi ngo bo nyid ma yin pas mig dang gzugs nas yid dang / chos rnams zhes bya ba'i bar dag ni ming tsam mo zhes/de ltar gang shes pa ni rnam par rtog pa thams cad kyi gnyen po yin pas 'di ni rang gi mtshan nyid la phyin ci ma log pa'o zhes bya ba ni kun brtags pa'i chos kyi sgo nas/ chos thams cad la rnam par rtog pa thams cad 'jug ste/ de bas na ming tsam du rtogs pa'i shes pa rnam par rtog pa thams cad kyi gnyen po ni/rang gi mtshan nyid la phyin ci ma log pa zhes bstan to/ /de'ang ci don dam pa'i rang gi mtshan nyid la'am 'on te kun rdzob kyi la bya ba mi shes nas/ de'i phyir/ rang gi mtshan nyid gang la zhe na zhes dris pa dang / de'i phyir don dam pa'i rang gi mtshan nyid la'o zhes bya ba gsungs te/'di ni phyin ci ma log pa'o/ /don dam pa'i rang gi mtshan nyid ni brjod du med pa'i phyir kun rdzob tu ni ma yin no/ /ci'i phyir zhe na/ 'di ltar kun rdzob tu ni ming 'di tsam mo zhes 'dzin pa med de/ brjod pa'i sgo nas chos kyi ngo bo nyid la kun du rtog pa 'jug pa'i phyir/'di ni kun rdzob nyid yin gyi don dam par ni ma yin te/ ming tsam du rnam par rtog pa'i phyir ro/ /phyin ci ma log pa 'dis byang chub sems dpa' kun rdzob dang don dam pa la mkhas par 'gyur ro/ /da ni spyi'i mtshan nyid la phyin ci ma log par bstan pa'i phyir/chos kyi dbyings ni ma rtogs par/ /'di ltar chos yod ma yin te/ /zhes rgya cher gsungs so/ /chos la dbang med pa ma rtogs pa'i chos/ gzugs can nam gzugs med pa gang yang med de/ chos thams cad ni brjod du med pa'i rang bzhin la/ gzung ba dang 'dzin pa'i dngos po dang bral ba'i phyir ro//de bas na chos kyi dbyings ni/ chos thams cad ni spyi'i mtshan nyid do zhes bya ba ste/ chos thams cad la bye brag med par de yod pa'i spyi'i mtshan nyid ces bya'o/ /de ltar shes pa gang yin pa de ni spyi'i mtshan nyid la phyin ci ma log pa ste/ kun rdzob tu yin gyi don dam par ni ma yin te de rnam par mi rtog pa'i phyir ro//phyin ci ma log pa 'dis byang chub sems dpa' rnam par dag pa'i dmigs pa la mkhas par 'gyur te/ rnam par mi rtog pa'i ye shes kyi yul yin pa'i phyir ro/ /rang dang spyi'i mtshan nyid gnyis la khyad par ci yod ce na/ brjod pa'i ngo bo nyid du sgro btags pa'i gnyen por brjod du med pa'i ngo bo nyid ni don dam pa'i mtshan nyid do//kun brtags pa'i ngo bo nyid kyi bdag med pa ni chos thams cad kyi rang bzhin te/ spyi'i mtshan nyid do/ /de ltar mthong ba tha dad pa'i dbang gis khyad par du gyur gyi/ don las ni ma yin no/ /da ni chos kyi dbyings rnam par ma dag pa dang /rnam par dag pa la phyin ci ma log par bstan pa'i phyir/ phyin ci log gi yid la byed/ /ma spangs pa dang spangs pa las/ /zhes rgya cher gsungs so/ /phyin ci log gi yid la byed pa ma spangs pa ni/ chos kyi dbyings de rnam par ma dag pa'o/ /spangs pa ni rnam par dag pa'o zhes bya ba de la/phyin ci log gi yid la byed pa ni kun gzhi rnam par shes pa'i rgyu phyin ci log tu rnam par rtog pa ste/ de ma spangs pa ni chos kyi dbyings rnam par ma dag pa'o/ /spangs pa ni rnam par dag pa ste/ de ltar shes pa gang yin pa de ni rnam par ma dag pa dang / rnam par dag pa la phyin ci ma log pa ste/go rims bzhin no zhes bya ba la/ phyin ci log gi yid la byed pa ma spangs pa ni chos kyi dbyings rnam par ma dag pa'o zhes bya ba ni chos kyi dbyings rnam par ma dag pa la phyin ci ma log pa'o/ /de spangs pa ni rnam par dag pa'o zhes bya ba ni rnam par dag pa la phyin ci ma log pa'o//ci'i phyir zhe na/ chos kyi dbyings la glo bur gyi nye ba'i nyon mongs pas nyon mongs par gyur pa'i phyir ro/ /'di yang kun rdzob tu phyin ci ma log pa ste/ don dam par ni ma yin no/ /phyin ci ma log pa 'dis byang chub sems dpa'i chos kyi dbyings la sgrib pa spangs pa dang / ma spangs pa rab tu shes so/ /da ni chos kyi dbyings rnam par dag pa dang / rnam par ma dag pa glo bur du 'byung ba la phyin ci ma log pa bstan pa'i phyir/ /chos kyi dbyings ni rang bzhin gyis/ /rnam par dag phyir nam mkha' bzhin/ /zhes rgya cher gsungs so/ /chos kyi dbyings nam mkha' bzhin du rang bzhin gyis rnam par dag pa'i phyir/rnam par ma dad pa dang phyis rnam par dag ces bya ba 'di gnyis kyang glo bur yin zhes bya ba de la/ chos kyi dbyings la yang dag pa ma yin pa'i rnam par rtog pa'i nye ba'i nyon mongs pas rnam par ma dag pa zhes bshad do/ /phyis gnyen po byung nas de spangs pas rnam par dag pa ste/de gnyi ga yang chos kyi dbyings la glo bur yin no/ /ci'i phyir zhe na/ nam mkha' bzhin du chos kyi dbyings rang bzhin gyis rnam par dag pa'i phyir ro/ /rang bzhin gyis rnam par dag pa la rnam par ma dag pa ni glo bur yin grang na rnam par dag pa ni rtag tu rnam par dag pa yin pas ji ltar glo bur du 'gyur zhe na/dri ma dang bral bas rnam par dag pa gang yin pa de 'dir brjod pas 'dod pas na nyes pa 'di med de/ de bas na 'di skad du rnam par dag pa ni phyis rnam par dag ces bshad do/ /de ltar shes pa gang yin pa de ni chos kyi dbyings la rnam par ma dag pa dang rnam par dag pa glo bur du byung ba nyid la phyin ci ma log pa'o//'di yang kun rdzob tu yin gyi don dam par ni ma yin no/ /phyin ci ma log pa 'dis byang chub sems dpa' chos kyi dbyings la kun nas nyon mongs pa dang / rnam par byang ba'i dus na bcos ma ma yin par rab tu shes so//da ni mi skrag pa dang ma khengs pa la phyin ci ma log par bstan pa'i phyir/ chos rnams dang ni gang zag gi/ /kun nas nyon mongs rnam dag med/ /ces rgya cher gsungs so/ /gang zag gis kun nas nyon mongs pa med/ rnam par dag pa med/ chos kyang med de/ kun nas nyon mongs pa dang / rnam par dag pa zhes bya bar bsnyegs so/ /'dir rgyu smos pa/ 'di ltar gang zag med cing chos med pa'i phyir ro zhes bya ba ste/ kun nas nyon mongs pa dang / rnam par byang ba gnyis kyi dus na/ kun nas nyon mongs pa dang rnam par byang ba ma gtogs par gang zhig yod na ni/ de'i kun nas nyon mongs pa'am rnam par byang bar yongs su brtag tu rung ste/ de tha dad pas 'grib pa dang 'phel bar yang 'gyur na/ de lta bu'i gang zag ni med de/ mngon sum dang rjes su dpag pa'i yul ma yin pa'i phyir ro/ /dngos po gcig la du mar yongs su rtog pa 'jug pa'i phyir kun brtags pa'i bdag nyid kyi chos kyang yod pa ma yin te/gcig ni du ma'i bdag nyid du mi rung ngo / /de bas na gang zag dang chos gnyis mo gsham gyi bu la sogs pa bzhin du med pas na/ kun nas nyon mongs pa dang rnam par byang ba med do/ /dag pa 'jig rten pa'i ye shes kyi spyod yul gzhan gyi dbang la ni/kun nas nyon mongs pa dang rnam par byang bar mi 'dod do/ /ci'i phyir zhe na/ brjod du med pa dang gnyis su med pa'i rang bzhin yin pa'i phyir ro/ /gal te gzhan gyi dbang gi yang ma yin par 'dod na go de dag gi yin te/ de med na kun nas nyon mongs pa spang ba dang / rnam par byang ba thob par bya ba'i phyir 'bad pa don med par 'gyur ro zhe na/chos kyi dbyings kun nas nyon mongs pa dang rnam par dag par 'gyur bas nyes pa 'di med de/ chos kyi dbyings de'i bdag nyid ma yin pa nyid la de dag rnam par gzhag ste/ chos kyi dbyings la de gnyi ga la yang glo bur yin la chos kyi dbyings kyang nam mkha' bzhin du 'gyur ba med pa'i phyir ro//de'i phyir/ kun nas nyon mongs pa'i phyogs la su'i 'grib pa yang med la/ rnam par byang ba'i phyogs la su'i khyad par du 'gyur ba yang med na/ gang gi phyir skrag pa'am nga rgyal du 'gyur te/ 'di ni skrag pa med pa dang khengs pa med pa la phyin ci ma log pa'o//gzhan dag na re kun nas nyon mongs pa'i phyogs la yang su'i 'grib pa yang med la/ rnam par byang ba'i phyogs la yang su'i khyad par du 'gyur ba yang med de/ de gnyi ga dang ldan pa su yang med pa'i phyir ro/ /gang gi phyir de dag ni de lta ma yin pas de la nga'i 'di med do zhes skrag par 'gyur du'ang ci yod/nga'i khyad par ni 'di yin no zhes nga rgyal du 'gyur du yang ci yod ces zer ro/ /gzhan dag ni 'di snyam du sems te/ gang zag ni med pa nyid do/ /gang gnas 'di gnyis myong ba dang 'di gnyis gang la brtag pa'i chos de yang med pa nyid do/ /kun nas nyon mongs pa dang rnam par byang ba 'di dag ni rten cing 'brel par 'byung ba nyid du zad do snyam mo//'di yang kun rdzob tu'o don dam par ni ma yin te/ de ni rnam par mi rtog pa'i phyir ro/ /phyin ci ma log pa 'dis chos kyi dbyings zad pa dang 'phel ba med pa'i phyir 'gyur ba med par rab tu rtogs par 'gyur ro//gzhan na re phyin ci ma log pa 'dis sgrib pa thams cad spangs te/ sgrib pa dang bral ba'i nges par 'byung ngo zhe'o/ /yang na kun rdzob kyi bdag nyid phyin ci ma log pa 'di bcus/ don dam pa'i phyin ci ma log pa 'di bstan te/ gzhan du ni bstan pa mi 'thad pa'i phyir ro/ /gzhan na re gang dag yi ge dang /don dang / yid la byed pa dang / mi 'phro ba dang / rang gi mtshan nyid dang / spyi'i mtshan nyid dang / ma dag pa dang / dag pa dang / glo bur dang / mi skrag pa dang / khengs pa med pa la phyin ci ma log pa de dag ngo bo nyid gsum gyi dbang du byas pa'o zhe'o//de la yi ge dang don la phyin ci ma log pa ni kun brtags pa'i ngo bo nyid kyi dbang du byas pa ste/ 'brel pa dang gnyis su ltung ba'i don ni brtags pa'i phyir ro/ /de kho na'i yul ma yin du zin kyang / de bzhin du phyin ci ma log pa de bzhin nyid kyi phyir te/ de gnyis phyin ci ma log pa nyid do//yid la byed pa la phyin ci ma log pa ni gzhan gyi dbang gi ngo bo nyid kyi dbang du byas pa ste/ rtog pa dang yid la byed pa gnyis rang bzhin gyis kun gzhi rnam par shes pa yin pa'i phyir ro/ /mi 'phro ba la phyin ci ma log pa ni yongs su grub pa'i ngo bo nyid kyi dbang du byas pa ste/ ci'i phyir zhe na/ rnam par mi rtog pa'i ye shes ni/ yod pa dang med pa la g.yeng ba dang bral ba'i phyir dang / phyin ci ma log par yongs su grub pas yongs su grub pa'i ngo bo nyid du bsdus pa'i phyir ro/ /rang dang spyi'i mtshan nyid la phyin ci ma log pa ni chos kyi dbyings nyid la ste/ rnam par rtog pa'i yul las 'das pa'i ngo bo nyid kyi phyir ro//ma dag pa dang dag pa la phyin ci ma log pa ni chos kyi dbyings nyid kyi gnas skabs kyi bye brag la'o/ /glo bur la phyin ci ma log pa ni chos kyi dbyings nyid la ste/ nam mkha' bzhin du rang bzhin gyis rnam par dag pa de la/ sems kun nas nyon mongs pa dang rnam par byang ba 'di gnyis ni glo bur yin par rnam par gzhag go//mi skrag pa dang khengs pa med pa la phyin ci ma log pa ni chos kyi dbyings nyid la ste/ de nam mkha' bzhin du bcos ma ma yin pa'i phyir 'bri ba dang khyad par du gyur pa med pa'i phyir ro/ /de ltar phyin ci ma log pa bcu po 'di dag ngo bo nyid gsum du rig par bya'o//bshad ma thag pa'i phyin ci ma log pa bcu po 'di dag ni mdo sde las gsungs pa'i rdo rje'i tshig bcu dag dang go rims bzhin du sbyar bar bya ste/ rdo rje'i tshig bcu po gang zhe na/ yod pa dang med pa dang / phyin ci ma log pa dang / gnas dang / sgyu ma lta bu nyid dang / rnam par mi rtog pa nyid dang / rang bzhin gyis 'od gsal ba nyid dang / kun nas nyon mongs pa dang / rnam par byang ba dang / nam mkha' lta bu dang / 'grib pa med pa dang / khyad par du 'phags pa med pa'o/ /de la phyin ci log thams cad 'joms pa dang / de dag gis mi choms pa'i phyir rdo rje dang 'dra bas na rdo rje zhes bya ba ste/bshad ma thag pa'i phyin ci ma log pa'i shes pa'o/ /rdo rje de ni 'di dag gis rtogs par byed/ khong du chud par byed pas rdo rje'i tshig rnams te/ rdo rje'i rnam par bshad pa zhes bya ba'i tha tshig go/ /ji ste na yang yi ge dang don dang yid la sogs pa nyid la tshig ces bya ba'i sgrar brjod de/de'i phyir rdo rje'i tshig rnams te/ dmigs pa zhes bya ba'i tha tshig go/ /yang rdo rje bzhin du mi choms pa'i tshig de dag ni rdo rje'i tshig rnams zhes bya'o/ /'dir phyin ci ma log pa rnams mdo sde dang sbyar bar bya ba'i phyir rdo rje'i tshig rnams bkod do/ /yang na rdo rje'i tshig rnams ni phyin ci ma log pa rnam pa bcu'i sgo nas bshad par bstan pa'o//de la yi ge rnams kyi don yod pa dang med pa ni yod pa dang med pa ste/ de bas na yi ge rnams la phyin ci ma log pa ni/ rdo rje'i tshig rnams kyi nang nas yod pa dang med par rig par bya'o/ /gnyis su snang ba kun brtags pa de ni 'dir don yin te/de yang de ltar yod pa ma yin zhes bya ba 'di ni 'dir phyin ci ma log pa ste/ de ltar don la phyin ci ma log pa ni rdo rje'i tshig rnams kyi nang nas phyin ci ma log pa dang sbyar bar bya'o/ /rtog pa'i yid la byed pa nyid 'dir gnas te/ de bas na yid la byed pa la phyin ci ma log pa ni rdo rje'i tshig rnams kyi nang nas gnas zhes bya ba dang sbyar ro//sgyu ma la sogs pa lta bur gang sems mi 'phro ba la phyin ci ma log pa 'di ni/ rdo rje'i tshig gi nang nas sgyu ma lta bu nyid dang sbyar ro/ /chos kyi dbyings kyi rang gi mtshan nyid ni rtog pa dang bral bas rnam par mi rtog pa ste/ de bas na rang gi mtshan nyid la phyin ci ma log pa ni rnam par mi rtog pa nyid du blta'o//chos kyi dbyings kyi spyi ni rang bzhin gyis 'od gsal ba ste/ de bas na spyi'i mtshan nyid la phyin ci ma log pa ni rang bzhin gyis 'od gsal bar bsdus so/ /chos kyi dbyings rnam par ma dag pa'i bye brag dang / rnam par dag pa'i bye brag ni kun nas nyon mongs pa dang /rnam par byang ba ste/ de'i phyir ma dag pa dang dag pa la phyin ci ma log pa ni kun nas nyon mongs pa dang rnam par byang ba'i nang du 'dus so/ /chos kyi dbyings la kun nas nyon mongs pa dang rnam par dag pa gnyis glo bur du byung ba la phyin ci ma log pa 'di yang nam mkha' lta bu nyid dang sbyar bar bya'o//kun nas nyon mongs pa dang rnam par byang ba'i dus gnyis na/ chos kyi dbyings zad pa dang 'phel ba med pas/ mi skrag pa dang khengs pa med pa la phyin ci ma log pa ni rdo rje'i tshig rnams kyi nang nas/ 'grib pa med pa dang /khyad par du 'phags pa med pa dang sbyar ro/ /de ltar phyin ci ma log pa bcu po 'di dag ni/ rdo rje'i tshig bcu po dang go rims bzhin du sbyar ro/ /rdo rje'i tshig rnams kyi lus rnam par gzhag pa zhes bya ba ni don gang dag gi dbang du byas te/ rdo rje'i tshig rnams 'jug pa'i don de rnams de dag gi lus so//de dag kyang rnam pa bzhir gzhag ste ngo bo nyid dang dmigs pa dang / rnam par mi rtog pa nyid dang / brgal ba dang / lan no/ /de la ngo bo nyid ni gsum ste yongs su grub pa dang / kun brtags pa dang / gzhan gyi dbang zhes bya ba dag ste/ tshig dang po gsum dang go rims bzhin no zhes bya ba de la/dang po ni yod pa dang / med pa dang / phyin ci ma log pa dang / gnas zhes bya ba'o/ /de la yongs su grub pa ni yod pa dang med par bshad do/ /kun brtags pa ni phyin ci ma log par bshad do/ /gzhan gyi dbang ni gnas su bshad do/ /ji ltar zhe na/kha cig na re yongs su grub pa ni yod pa dang med pa'i phyir yod pa dang med par bstan pa yin no zhe'o/ /ji ltar yod pa dang med pa'i mtshan nyid kyi phyir yongs su grub pa zhe na/ kha cig na re yod pa dang med par brjod pa'i phyir ro zhe'o/ /gzhan dag na re yi ge rnams 'brel pa dang 'dris pa'i phyir rnam par brtags pa'i don gyis don yod pa dang /bzlog na don med par mthong bas yongs su grub pa'i ngo bo nyid brjod du med par rtogs par 'gyur te/ de bas na de yod pa dang med pa ni yongs su grub pa'i ngo bo nyid du bshad do zhe'o/ /gzhan na re theg pa chen po bstan pa'i chos ni shin tu rnam par dag pa'i chos kyi dbyings kyi rgyu mthun pa dang /phyin ci log gi gnyen po'i dmigs pa yin pa'i phyir/ yongs su grub pa'i ngo bo nyid ces bya ste/ rnam par brtags pa'i ngo bo nyid kyi don yin du zin kyang kun brtags pa ma yin te/ de'i phyir yod pa dang med pa ni yongs su grub pa'i ngo bo nyid du bshad do zhe'o/ / gzhan dag na re yod pa dang med par phyin ci ma log pa'i phyir yongs su grub pa'i ngo bo nyid du bshad do zhe'o/ /phyin ci ma log pa ni kun brtags pa ste/ yod pa ma yin yang gnyis po med pa'i ngo bor snang ba'i mtshan nyid du gyur pa'i phyir ro/ /gnas ni gzhan gyi dbang ste/ de ni rgyu yin pas na gnas zhes bya'o//'bras bu yin pas na gzhan gyi dbang zhes bya'o/ /ngo bo nyid gsum po 'di dag nyid shes par bya ba yin pas dmigs pa'o/ /rnam par mi rtog pa nyid ces bya ba ni 'dir tshig rnam par sbyar ba'i bye brag gis na/ gang gis rnam par mi rtog ce na/ rnam par mi rtog pa'i ye shes kyis so/ /gang la rnam par mi rtog ce na/rang bzhin gyis 'od gsal ba la'o zhes bya ba smos so/ /de la tshig rnam par sbyar ba'i bye brag ni 'di yin te/ 'dis rnam par mi rtog pas na rnam par mi rtog pa dang / de rnam par rtog par bya ba ma yin pas na/ rnam par mi rtog pa ste/ de'i dngos po ni rnam par mi rtog pa nyid do//de ltar rnam par mi rtog pa nyid ni/ rdo rje'i tshig gnyis kyis brjod par bstan to/ /de bas na 'di shes bya dang / shes pa rnam par gzhag pa 'di lta ste/ /ngo bo nyid gsum dang / rnam par mi rtog pa nyid dang / go rims bzhin du rig par bya'o/ /de la ngo bo nyid gsum ni gzung ba yin pa'i phyir shes byar rnam par gzhag go//rnam par mi rtog pa nyid ni 'dzin pa yin pa'i phyir shes par rnam par gzhag go/ /brgal ba dang lan ni rdo rje'i tshig bshad zin pa'i lhag ma rnams so/ /'di la rdo rje'i tshig kha cig ni brgal ba'i lan nyid de/ 'di lta ste/ sgyu ma lta bu nyid dang / nam mkha' lta bu nyid dang /'grib pa med pa nyid dang / khyad par du 'phags pa med pa zhes bya'o/ /kha cig ni brgal ba nyid de/ 'di lta ste/ kun nas nyon mongs pa dang rnam par byang ba zhes bya'o/ /de bas na brgal ba'i lan dang brgal ba ni/ brgal ba dang lan te mi mthun pa gcig ma bcug pa'o/ /de la brgal ba ni gal te kun brtags pa dang gzhan gyi dbang gi mtshan nyid kyi chos de dag med na/gzung ba dang 'dzin pa nyid du zhes bya ba'i tshig gi lhag ma'o/ /ji ltar dmigs par 'gyur/ gzung ba dang 'dzin pa nyid du zhes bya bar dgongs so/ /ji ste yod na de lta na go chos rnams rang bzhin gyis 'od gsal ba nyid du mi rung ste/gzung ba dang 'dzin pa'i bdag nyid du yod pa'i phyir ro/ /'di ni brgal ba'o/ /de'i lan ni sgyu ma lta bu nyid yin te/ dper na sgyu ma byas pa lta bu ni med kyang dmigs pa lta bu'o zhes bya ba ste/ sgyu ma ni dmigs su yod kyang de'i phyir de bzhin du yod do zhes bya bar shes par mi nus so//gal te chos rnams rang bzhin gyis 'od gsal ba nyid yin na/ ji ltar sngar kun nas nyon mongs la phyis rnam par byang zhes brgal te/ rang bzhin gyis rnam par dag pa yin na/ nam du yang kun nas nyon mongs pa mi 'thad do zhes bya ba de'i lan ni kun nas nyon mongs pa dang rnam par byang ba nam mkha' lta bur rig par bya ba yin te/dper na nam mkha' rang bzhin gyis rnam par dag pa la/ glo bur gyi nye ba'i nyon mongs pas kun nas nyon mongs so/ /de dang bral ba rnam par byang ngo zhes pa de bzhin du chos kyi dbyings rang bzhin gyis rnam par dag pa yang glo bur gyi nye ba'i nyon mongs pa rnams kyis kun nas nyon mongs so//de dang bral na rnam par byang ngo / /gal te sangs rgyas dpag tu med pa byung ste/ sems can dpag tu med pa dag gi kun nas nyon mongs pa bsal te/ thog ma med pa'i 'khor bar sangs rgyas 'byung ba re res kyang sems can dpag tu med pa dag 'khor ba dang phral te/mya ngan las 'das par btsud na/ de'i phyir/ ji ltar 'khor ba rgyun chad par mi 'gyur zhing mya ngan las 'das pa 'phel bar mi 'gyur zhes brgal ba de'i lan ni 'grib pa med pa dang / khyad par du 'phags pa med pa nyid yin te/ sems can gyi khams dang rnam par byang ba'i phyogs dpag tu med pa'i phyir ro zhes bya ba ste/tshad dang ldan pa'i dngas po ni 'grib pa'am rgyun chad par sngon gyi sems can gyi khams dpag tu med pa de la ni/ 'grib par yang mi mngon na rgyun chad par ltag la mngon te nam mkha' bzhin no/ /rnam par byang ba yang dpag tu med pa'i phyir khyad par nyid kyang med na/de 'phel bar ji ltar 'gyur te/ nam mkha' sgrib pa dang bral ba dang sgrib pa 'byung ba bzhin no/ /lus rnam par gzhag pa gnyis ni zhes bya ba ni rdo rje'i tshig rnams kyi zhes bya bar sbyar ro/ /gang la gang zhig gang las 'khrul/ /ma 'khrul gang zhig gang la dang //'khrul dang ma 'khrul 'bras bu nyid/ /de nyid kyi ni tha ma'o/ /zhes bya ba ni rdo rje'i tshig rnams kyis 'khrul pa'i yul dang / 'khrul pa'i rang gi ngo bo nyid dang / 'khrul pa'i rgyu dang / 'khrul pa'i 'bras bu dang / 'khrul pa'i 'bras bu mthar phyin pa bstan to/ /de bzhin du ma 'khrul pa'i rang gi ngo bo dang /ma 'khrul ba'i yul dang / ma 'khrul pa'i 'bras bu dang / de'i mthar phyin pa yang bstan to/ /de la gang la 'khrul zhes bya ba ni/ yod pa dang med pa la ste/ yi ge rnams kyi don yod pa dang med pa'i mtshan nyid la rjod pa dang brjod par bya ba dang / de'i 'brel pa ni dngos po'i ngo bor kun brtags pa'i phyir ro//gang zhig 'khrul ces bya ba la/ /phyin ci log ni 'khrul pa ste/ /bdag nyid la yod pa ma yin par/ gnyis kyi rnam par snang ba'i phyir ro/ /gang las 'khrul zhes bya ba ni/ gnas las 'khrul pa ste/ gnas ni rtog pas yongs su bsgos pa'i yid la byed pa kun gzhi rnam par shes pa'i bdag nyid do//ma 'khrul gang zhig ces bya ba ni/ sgyu ma la sogs pa lta bur don gyi yod pa dang med par mi 'phro ba ni ma 'khrul pa'o/ /dngos po dang dngos po med pa la mngon par zhen pa 'khrul pa'i gnyen po yang ma 'khrul pa ste/ de ni sgyu ma lta bu nyid dang /rnam par mi rtog pa nyid du go rims bzhin du bstan to/ /gang la zhes bya ba ni gang la de sems ma 'khrul ba'o/ /de yang rang bzhin gyis 'od gsal ba nyid la ste/ yongs su grub pa'i ngo bo nyid mtshan nyid la'o/ /'khrul dang ma 'khrul 'bras bu nyid/ /ces bya ba de la/ 'khrul ba'i 'bras bu ni kun nas nyon mongs pa ste/ 'khrul pa'i rgyu mthun pa'i zhes bya ba'i tshig gi lhag ma'o/ /ma 'khrul ba'i rgyu mthun pa'i ma 'khrul ba ni/ ma 'khrul pa'i 'bras bu'i phyir ma 'khrul ba'i 'bras bu ni rnam par byang ba ste/ mtshungs par ldan pa dang bcas pa'i zhes bya ba'i tshig gi lhag ma'o//nyid ces bya ba brjod pas de'i 'bras bu kun nas nyon mongs pa dang rnam par byang ba zhes bya ba 'dis bshad de/ nam mkha' lta bu nyid ces bya bas ni chos kyi dbyings gang gis 'khrul ba dang / ma 'khrul pa'i 'bras bu de dag kun nas nyon mongs pa dang /rnam par byang ba'i bdag nyid yin gyi/ de de'i rang bzhin ni ma yin no zhes bstan pa'i phyir ro/ /de gnyis ni mtha' ma'o zhes bya ba ni/ kha cig na re kun nas nyon mongs pa dang / rnam par byang ba gnyis kyi mtha' ni mya ngan las 'das pa ste/ de yang 'grib pa med pa dang lhag pa med pas mthar thug pa med pa'i phyir bshad do zhe'o//gzhan dag na re 'khor ba dpag tu med pa'i phyir/ 'bri ba med pas 'grib pa med pa dang ldan pas ni kun nas nyon mongs pa'i mtha' ma'o/ /mya ngan las 'das pa dpag tu med pas 'phel ba med pa'i phyir/ khyad par du 'phags pa med pa dang ldan pa ni rnam par byang ba'i tha tshig go zhes zer ro//rdo rje'i tshig bcu po 'di dag ni phyin ci ma log pa'i zhar la bshad kyi mdor byas pa las ni mi 'byung ngo / /de bas na/ yod med phyin ci ma log dang / /gnas dang sgyu ma lta bu nyid/ /mi rtog pa dang rang bzhin gyis/ /rtag par 'od gsal nyid dang ni//kun nas nyon mongs rnam byang dang / /de bzhin nam mkha' lta bu nyid/ /'grib dang med pa lhag med pa/ /rdo rje'i tshig ni bcu zhes bya'o/ /zhes bya ba bar gyi tshigs su bcad pa gnyis kyis sdud do/ /'di la yongs su grub pa'i sgra dang don 'brel par lta ba'i phyin ci log dang /don rnams ji lta bur snang ba de lta bur ngo bo nyid du yod par mthong ba'i phyin ci log dang / don de 'byung ba'i rgyu la phyin ci log dang / don la sgro 'dogs pa dang skur pa 'debs par lta ba'i phyin ci log dang / ming ji lta ba bzhin du don gyi ngo bo nyid du lta ba'i phyin ci log dang / dngos po rnams kyi rang dang spyi'i mtshan nyid la dngos po nyid du phyin ci log dang /bkra shis pa dang bkra shis pa ma yin pa kun du spyod pas las rnam par dag pa dang rnam par ma dag par lta ba'i phyin ci log dang / gcig kho na la rnam par ma dag pa dang / rnam par dag par lta ba'i phyin ci log dang / kun nas nyon mongs pa dang rnam par byang ba spang ba dang /'thob pa dang 'grib pa dang khyad par du lta bas skrag pa dang brgyal ba 'byung ba'i phyin ci log ste/ 'di dag ni phyin ci log bcu'o/ /byang chub sems dpa' la de dag med pas/ ji skad bshad pa'i don rnams la phyin ci ma log par gnas pa ni lhag mthong bsgom pa yin par rig par bya'o//rjes su mthun pa'i chos sgrub pa bshad zin to/ /rjes su mthun pa'i chos sgrub pa'i 'og tu mtha' gnyis spang ba sgrub pa brjod par bya ste/ de'i phyir/ mtha' gnyis spang ba sgrub pa gang zhe na zhes dris pa dang / de'i phyir gang dkon mchog brtsegs pa zhes bya ba'i chos kyi rnam grangs las yang dag par sgrub pa'i ngo bo nyid bstan pa'i phyir/dbu ma'i lam bshad do zhes bya ba smos so/ /'od srungs 'di lta ste/ dkon mchog brtsegs pa chen po chos kyi rnam grangs la slob par 'dod pa'i byang chub sems dpas tshul bzhin du rab tu chos la sbyar bar bya'o//tshul bzhin du chos la sbyor ba gang zhe na 'di lta ste/ chos rnams la yang dag par so sor rtog pa ste/ gang bdag med par rtog pa dang / sems can med pa dang / srog med pa dang / gso ba med pa dang / skyes bu med pa dang / gang zag med pa dang / shed las skyes med pa dang / shed bu med par so sor rtog pa 'di ni/ 'od srungs dbu ma'i lam mo zhes bya ba nas/ mar me'i dpe gnyis pa la thug gi bar du rgya cher 'byung ngo / /mtha' gang spangs pas de rig par bya zhe na zhes bya ba ni mtha' gang spangs pas dbu ma'i lam shes par bya zhes bya ba'i tha tshig go/ /de'i phyir/ tha dad pa dang gcig mtha' dang / /mu stegs nyan thos gnyis ka dang / /zhes rgya cher gsungs so/ /bco lnga po 'di dag ni mtha' gnyis dbye ba ste/ 'di dag spangs pas de rig par bya'o/ /'dir tha dad pa la sogs par lta ba'i mtha' ni phyogs re re la mngon par zhen pa'i phyir 'bras bu la rgyu gdags par byas pa'o//de la gzugs la sogs pa dang bdag tha dad ces bya ba yang mtha'o/ /gcig ces bya ba yang mtha'o zhes bya ba de la/ gzugs la sogs pa phung po rnams dang / skye mched rnams dang khams rnams ni bdag rtag pa'i spyad par bya ba'i 'os su rtog pa gang yin pa de dag ni gzugs la sogs pa dang bdag tha dad do snyam pa'i mtha'o//nang gi 'du byed gzugs la sogs pa la bdag tu 'du shes nas gang mthong ba dang / thos pa dang / shes pa de ni bdag yin la/ phyi'i rnams ni bdag gi ba yin par rtog pa gang yin pa de ni gzugs la sogs pa dang bdag gcig go zhes bya ba'i mtha' ste/gang mdo sde las srog kyang gzhan la lus kyang gzhan pa dang srog de lus de yin zhes bya bar lta ba nyid 'dir mtha' zhes bya ba'i sgrar bstan to/ /de yongs su spang ba'i phyir zhes bya ba ni gzugs la sogs pa dang bdag de nyid dang gzhan gyi mtha' yongs su spang ba'i phyir ro//dbu ma'i lam gang chos tsam zhig yul du gyur pa'i ye shes so/ /de nyid bstan pa'i phyir gang bdag med par so sor rtog pa nas shed bu med par so sor rtog pa'i bar du'o zhes bya ba smos so/ /chos tsam du mthong bas ni bdag mo gsham gyi bu bzhin du med par khong du chud nas bdag med par so sor rtog ste/rjes su rtogs zhes bya ba'i tha tshig go/ /de dang gzugs la sogs pa de nyid dam gzhan du 'dzin par lta ga la 'gyur/ bdag ces bya ba'i sgra nyid kyis de'i don khong du chud par 'gyur na/ ci'i phyir sems can la sogs pa rnam grangs kyi bye brag smos she na/thams cad kyis rnam grangs thams cad khong du chud par mi 'gyur te/ de'i phyir thams cad kyis de'i don khong du chud par bya ba'i phyir rnam grangs gzhan bshad do/ /yang na de'i dus su g.yengs pa rnams la rnam grangs gzhan gyis de'i don rtogs par bya ba'i phyir te/ brjod par bya ba de nyid brjod na ni gzhan dag gis brnyas par 'gyur ba'i phyir ro//gzugs la sogs pa rtag go zhes bya ba ni mu stegs can gyi mtha' ste/ de dag ni rtag par phyin ci log gis non pa'i phyir kun brtags pa'i gzugs la sogs pa la dngos po kho nar mngon par zhen nas rtag pa nyid du rtog go/ /mi rtag go zhes bya ba ni nyan thos kyi mtha' ste/de dag kyang kun brtags pa'i ngo bo nyid kyi gzugs la sogs pa la dngos po'i ngo bor mi rtag pa nyid du sgro 'dogs pa'i phyir mtha' nyid de/ shin tu 'khor ba las skyo bar byed pa dang mya ngan las 'das pa'i mthar ltung bar byed pas mi rtag par lta ba'i mtha'o/ / de gnyi ga yongs su spang ba'i phyir zhes bya ba ni rtag pa dang mi rtag par lta ba yongs su spang ba'i phyir dbu ma'i lam ste/ gang gzugs la sogs pa la rtag par yang mi rtog/ /mi rtag par yang mi rtog pa'o/ /de yang gang zhe na/ rnam par mi rtog pa'i ye shes te/ gang gzugs la sogs pa la gzugs la sogs pa nyid du rtag pa'am/mi rtag par mi rtog pa'o/ /gzugs la sogs pa zhes bya ba la sogs pa'i sgras ni tshor ba dang / 'du shes dang / 'du byed dang / rnam par shes pa'i phung po rnams dang / sa dang / chu dang / me dang / rlung dang / nam mkha'i khams rnams dang / mig dang / rna ba dang / sna dang / lce dang / lus dang / yid kyi skye mched rnams bsdu'o/ /bdag yod ces bya ba'i sgras ni gang zag tu sgro 'dogs pa'i mtha'o zhes bya ba ni phung po dang / khams dang / skye mched rnams dang / tha dad pa'am/ tha dad pa ma yin pa'ang rung ste/ bdag mo gsham gyi bu bzhin du rdzas med par mthong yang /gang zag la bdag tu dngos po'i ngo bor sgro 'dogs pa'i phyir mtha'o/ /bdag med ces bya ba ni skur pa 'debs pa'i mtha' ste zhes bya ba ni yod pa la med par yongs su rtog pa ni skur pa 'debs pa zhes bya na/ bdag ni med pas ji ltar bdag med ces bya ba la skur pa 'debs pa'i mthar 'gyur zhe na/de'i phyir/ btags pa'i yod pa la skur pa 'debs pa'i phyir ro zhes bya ba smos te/ bdag med par skur pa 'debs pa'i mtha' zhes bya ba dang sbyar ro/ /de yang chos rnams kyi rgyun te/ gang la rgyu dang 'bras bu 'brel par mngon pa'o/ /yang na spyir gang du lha dang mir gdags pa'o//de yongs su spang ba'i phyir dbu ma'i lam ste zhes bya ba ni bdag yod pa dang med par lta ba yongs su spang pa'i phyir ro/ /da ni dbu ma'i lam gang yin pa brtag par bya ba'i phyir/ gang bdag dang bdag med pa de gnyis kyi dbus zhes bya ba smos so/ /de'i dbus ci zhig ce na/ rnam par mi rtog pa'i ye shes so//gzung ba'i don la rnam par rtog pa mtha'o nyid du bstan nas/ 'dzin pa'i don la rnam par rtog pa mtha' nyid du bstan pa'i phyir/ sems yang dag pa'o zhes bya ba la sogs pa smos so/ /yang na gang zag la sgro 'dogs pa dang skur pa 'debs pa'i mtha' bstan nas/ chos la sgro 'dogs pa dang skur pa 'debs pa'i mtha' bstan pa'i phyir/sems yang dag pa'o zhes bya ba ni zhes bya ba la sogs pa smos so/ /sems ji ltar snang ba dang ji ltar brjod pa de bzhin du yang dag par yod do zhes bya ba 'di ni/ chos la sgro 'dogs pa'i mtha' ste sems kyi ngo bo nyid yang dag pa ma yin pa la yang dag pa nyid du sgro 'dogs pa'i phyir ro//sems yang dag pa ma yin no zhes bya ba ni skur pa 'debs pa'i mtha'o/ /de ni gzung ba dang / 'dzin pa dang bral ba'i bdag nyid brjod du med par yod kyang med par mthong ste/ chos kyi ngo bo nyid la rnam pa thams cad du skur pa 'debs pas na skur pa 'debs pa'i mtha'o//de yongs su spang ba'i phyir zhes bya ba ni sgro 'dogs pa dang skur pa 'debs pa dang bral ba la chos bdag med par rtogs par bya ba'i phyir/ dbu ma'i lam ste/ de ni gang la sems med pa dang / yid med pa dang / rnam par shes pa med pa zhes bya ba ni mngon par zhen pa 'byung ba med do zhes bya ba'i tshig gi lhag ma'o//yang na yul gang la zag pa dang bcas pa'i bag chags bsags pa'i bdag nyid kyi sems mi 'jug pa dang / mngon par 'du byed pa med pa'i mtshan nyid kyi sems pa med pa dang / rlom sems kyi rnam pa'i yid med pa dang rnam par rtog pa'i rnam par shes pa med pa 'di ni dbu ma'i lam zhes bya'o//de la sems ni kun gzhi rnam par shes pa ste/ zag pa dang bcas pa'i chos thams cad kyi bag chags bsags pa'i phyir ro/ /sems pa ni yid kyi las te/ dge ba dang mi dge ba dang / lung du ma bstan pa rnams la sems 'jug par byed pa'i las can no//yid ni nyon mongs pa can gyi yid do/ /rnam par shes pa ni rnam par shes pa'i tshogs drug go/ /mi dge ba la sogs pa'i chos rnams ni/ kun nas nyon mongs pa'o zhes bya ba ni mi mthun pa'i phyogs kyi mtha'o/ /dge ba la sogs pa ni rnam par byung ba'o zhes bya ba ni gnyen po'i mtha'o zhes bya ba la sogs pa'i sgras ni/kha na ma tho ba dang bcas pa dang / 'jig rten pa dang / 'jig rten las 'das pa dang / zag pa dang bcas pa dang / zag pa med pa dang / 'dus byas dang / 'dus ma byas la sogs pa bstan par 'gyur ro/ /de la dge ba dang mi dge ba'i chos ji ltar snang ba dang brjod pa de bzhin du kun nas nyon mongs pa dang rnam par byang bar lta ba ni/mi mthun pa'i phyogs kyi mtha' dang / gnyen po'i mtha'o/ /de la mi dge ba ni mi bde ba'i don to/ /kha na ma tho ba dang bcas pa ni nyes par spyod pa kun nas slong ba'i phyir ro/ /'jig rten pa ni phyin ci log gi phyir ro/ / zag pa dang bcas pa ni zag pa rgyas par 'gyur ba'i phyir ro/ /'dus byas ni rkyen rnams kyis bskyed pa'i phyir ro/ /de las bzlog pa ni dge ba la sogs par rig par bya'o/ /de yongs su spang ba'i phyir dbu ma'i lam ste zhes bya ba la/ mi mthun pa'i phyogs dang gnyen po ni de zhes bya ba'i sgra dang sbyar ro/ / dbu ma'i lam mi shes nas/ de'i phyir/ gang mtha' de gnyis khas mi len cing mi brjod mi smra'o zhes bya ba smos so/ /de khas mi len pa ni mi mthun pa'i phyogs dang gnyen po la mngon par zhen pa med pa'o/ /mi brjod pa ni mi mthun pa'i phyogs dang gnyen po'i mtha' de la gzhan dag yang dag par 'dzin du mi 'jug pa'i phyir ro//mi smra ba ni mi mthun pa'i phyogs dang gnyen po gnyis mi brjod pa'i phyir ro/ /mu stegs can dang nyan thos kyi mtha'i gnyen por dbu ma'i lam bstan nas/ byang chub sems dpa'i mtha'i gnyen por dbu ma'i lam bstan pa'i phyir/ gang zag dang chos de gnyis yod do zhes bya ba ni rtag pa'i mtha'o//med do zhes bya ba ni chad pa'i mtha'o zhes bya ba smos te/ rang gi mtshan nyid la rtag par sgro 'dogs pa'i phyir/ yod do zhes bya ba ni rtag pa'i mtha'o/ /rang gi ngo bo la rnam pa thams cad du skur pa 'debs pa'i phyir med do zhes bya ba ni chad pa'i mtha'o/ /de yongs su spang ba'i phyir dbu ma'i lam ste/mtha' de gnyis kyi dbus gang yin pa'o zhes bya ba la/ kha cig na re mtha' gnyi ga dang bral ba ni 'dir dbu mar 'dod do zhe'o/ /gzhan dag na re 'di gnyi ga'i mtshan nyid ni 'dir mtha' gnyis kyi dbus so zhe'o/ /ji lta zhe na/ yang dag pa ma yin pa kun rtog pa lta bu'am/chos kyi dbyings lta bur shes bya dang brjod par bya ba'i dngos po rdzas nyid dang don dam par yod do zhes mngon par zhen pa de ni rtag pa'i mtha' ste/ de ni de bzhin du med pa'i phyir ro/ /de ltar ri bong gi rwa bzhin du med pa nyid du lta ba ni chad pa'i mtha' ste/ ci'i phyir zhe na/ de rtag par yod pa'i phyir ro//de bas na de bstsal bar bya ba'i phyir chad pa'i mtha' zhes bya'o/ /de'i phyir yod pa nyid dang med pa nyid kyi dbus rdzas nyid dang don dam par med pa la btags par yod do zhes bya ba ni gnyi ga'i mtshan nyid yin no/ /de mi mthun pa'i phyogs dang gnyen po la sgro 'dogs pa'i mtha'i dbang du mdzad de ma rig pa la gzung ba'o//'dzin pa'o zhes bya ba ni mtha' ste/ de bzhin du ma rig pa dang / 'du byed rnams dang / de'i gnyen po 'dus ma byas la gzung ba'o/ /'dzin pa'o zhes pa yang mtha' ste/ 'dir rga shi'i bar la zhes bya ba'i mtha' smos pa ni rnam par shes pa dang / ming dang gzugs la sogs pa yang bsdu'o//rnam par shes pa la gzung ba'o 'dzin pa'o zhes bya ba yang mtha'o/ /de bzhin du ming dang / gzugs dang / skye mched drug dang / reg pa dang / tshor ba dang / sred pa dang / len pa dang / srid pa dang / skye ba dang / rga shi la gzung ba'o 'dzin pa'o zhes bya ba yang mtha'o//de la ma rig pa ni bden pa dang dkon mchog mi shes pa'i bdag nyid do/ /'du byed rnams ni bsod nams dang / bsod nams ma yin pa dang / mi g.yo ba'i ngo bo nyid de/ zag pa dang bcas pa'i sems pas yang srid pa mngon par 'du byed pa'i phyir ro/ / de bzhin du kun nas nyon mongs pa'i mtshan nyid bshad pa'i tshul du rnam par shes pa la sogs pa yang rgya cher brjod par bya'o/ /rig pa ni zag pa med pa'i ye shes so/ /'du byed rnams kyi gnyen po ni 'dus ma byas kyi ye shes so/ /de nyid kyi phyir 'dus ma byas gzhan las dbye ba'i phyir gnyen po zhes bya ba smos so//gzhan dag ni mi skye ba can yin pas na/ 'dus ma byas rnam pa brgyad car yang 'dir 'dod do/ /gnyen po ni zag pa med pa'i sems pa ste/ yang srid pa mngon par 'du mi byed pa'i phyir ro snyam du sems so/ /de 'gog pa la gzung ba'o 'dzin pa'o zhes bya ba yang mtha' ste zhes bya ba la/de zhes bya ba'i sgras ni rnam par shes pa la sogs pa nas rga shi la thug gi bar du sbyar ro/ /'gog pa la yang ngo bo nyid dam rgyu yin pa mi shes nas/ de'i phyir/ lam gang gis ming dang gzugs 'gag pa'o zhes bya ba smos so/ /gang gis ming dang gzugs de 'gag par 'gyur zhe na/ming dang gzugs kyi gnyen po zag pa med pa'i lam gyis so/ /rig pa dang ma rig pa de ni gnyis su med de gnyis su byar med do zhes bya ba de ni/ 'dir ye shes 'khor dang bcas pa ste lam mo/ /de'i phyir 'dis 'gag par byed pas 'gog pa'o/ /de la mtha' gang zhe na/gzung ba dang 'dzin pa la mngon par zhen pa 'di nyid do/ /ci'i phyir zhe na/ ma rig pa la sogs pa gnyis med pa'i rang bzhin dag la med bzhin du gnyis su sgro 'dogs pa 'jug pa'i phyir ro/ /de bzhin du nag po dang dkar po'i phyogs kyi bye brag gis/ gzung ba dang 'dzin pa'i mtha' rnam pa gnyis so zhes bya ba de la/nag po'i phyogs ni ma rig pa nas rga shi'i bar srid pa'i yan lag bcu gnyis so/ /de bzhin du dkar po'i phyogs kyang ma rig pa la sogs pa 'gag pa'i bye brag gis ma rig pa 'gag pa nas/ rga shi 'gag pa'i bar rnam pa bcu gnyis so/ / de la 'dis ma rig pa la sogs pa 'gag par 'gyur bas na/ de'i gnyen por gyur pa lam nyid la 'gog pa'i sgrar brjod do/ /de yongs su spang ba'i phyir zhes bya ba ni gzung ba dang 'dzin pa'i mtha' yongs su spang ba'i phyir dbu ma'i lam bstan to zhes bya ba dang sbyar ro/ /de yang mi shes te/de'i phyir rig pa dang ma rig pa 'di ni gnyis su med ces bya ba smos so/ /ji ltar na rig pa dang ma rig pa nas/ rga shi dang rga shi 'gag pa'i bar du gnyis su med ce na/ de'i phyir rig pa dang ma rig pa la sogs pa gzung ba dang 'dzin pa'i dngos po med pa'i phyir ro zhes bya ba smos so/ / de'i dngos po med pa ni ma rig pa la sogs pa gnyis su med pa'i rang bzhin yin pa'i phyir ro/ /yang na rig pa dang ma rig pa ni kun brtags pa'i ngo bo nyid de/ de'i phyir kun brtags pa'i ngo bo nyid rig pa dang / ma rig pa dngos po med par mtshungs pas/ rig pa dang ma rig pa gnyis su med do//de bzhin du 'du byed rnams dang / 'dus ma byas dang / rnam par shes pa dang / de 'gog pa nas 'gog pa dang rga shi zhes bya ba'i bar du brjod par bya'o/ /'dir dbu ma'i lam gang zhe na/ rig pa dang ma rig pa 'di ni gnyis su med de gnyis su byar med par shes pa de nyid de'i rig pa bskyed par bya ba yang med cing ma rig pa dgag par byar yang med pa dang /'du byed rnams spang bar bya ba yang med la/ de 'gog pa thob par bya ba yang med pa de ltar shes pa gang yin pa de ni gnyis su dbyer med pa'o/ /kun nas nyon mongs pa ni rnam pa gsum ste zhes bya ba de la/nyon mongs pa rnams ni las dang tshe'i kun nas nyon mongs pa'i rgyu yin pa dang / bdag nyid kyang nyon mongs par gyur pas kun nas nyon mongs pa zhes bya'o/ /yang na bdag dang gzhan la gnod par byed pa'i rgyu yin pas kun nas nyon mongs pa zhes bya'o/ /las kyang nyon mongs pa'i dbang gis byung ba dang /tshe'i rgyur gyur pa dang / bdag nyid kyang kha cig nyon mongs par gyur pas kun nas nyon mongs pa zhes bya'o/ /tshe yang las dang nyon mongs pa'i dbang gis byung ba dang gnod pa thams cad kyi gnas su gyur pa'i phyir kun nas nyon mongs pa zhes bya'o/ /yang nyon mongs pa'i kun nas nyon mongs pa rnam pa gsum du dbye ba bstan pa'i phyir/kun nas nyon mongs pa yang rnam pa gsum ste zhes rgya cher smos so/ /de la lta ba ni lnga ste/ 'jig tshogs la lta ba la sogs pa'o/ /'dod chags dang / zhe sdang dang / gti mug nyid rgyu ste/ mya ngan la sogs pa'i rgyu dang yang srid pa'i rgyu yin pa'i phyir ro/ /gzhan dag na re 'dod chags la sogs pa'i rgyu ni de'i rjes su mthun pa dbang po dang / don dang tshul bzhin ma yin pa yid la byed pa dang / 'dod chags la sogs pa'i bag chags kun gzhi rnam par shes pa la gnas pa'o zhes zer ro//der snang ba ni 'dod chags la sogs pa'i rgyu'o zhes de skad kyang 'dzer to/ /yang srid pa la smon pa ni srid pa phyi ma 'dod pa'o/ /de'i gnyen po ni stong pa nyid shes pa zhes rgya cher 'byung ba de la lta ba rnams kyi gnyen po ni stong pa nyid shes pa ste/ stong pa nyid kyi yul la shes pa ni 'dir stong pa nyid shes pa'o//'dod chags la sogs pa'i rgyu'i gnyen po ni mtshan ma med pa shes pa ste/ mtshan ma thams cad dang bral pa'i phyir ram/ mtshan ma med pa yul du gyur pa'i shes pa ni mtshan ma med pa shes pa ste/ kun brtags pa 'dod chags la sogs pa'i stong pa nyid yul du gyur pa'i phyir ro//yang srid par smon pa'i gnyen po ni smon pa med pa shes pa ste/ yang srid par smon pa dang bral ba'am/ yang srid pa'i stong pa nyid yul du gyur pa shes pa ni smon pa med pa shes pa'o/ /las kyi kun nas nyon mongs pa ni dge ba dang mi dge ba'i las mngon par 'du byed pa'o zhes bya ba ni srid pa la 'phen pa'i las dge ba dang mi dge ba gnyis sogs pa dang mngon par 'grub pa mngon par 'du byed pa'o//de'i gnyen po ni mngon par 'du mi byed pa shes pa'o zhes bya ba ni/ shes pa gang gis las kyis de'i yang srid pa mngon par 'du mi byed pa shes pa ste/ de'ang de bzhin nyid yul du gyur pa'o//tshe'i kun nas nyon mongs pa ni yang srid par skye ba zhes bya ba ni nying mtshams sbyor ba'i sems so/ /skyes pa'i sems dang sems las byung ba rnams skad cig re re la 'byung ba zhes bya ba ni nying mtshams sbyor ba phan chad ma shi tshun chad do/ /yang srid pa'i rgyun to zhes bya ba ni nyon mongs pa dang bcas pa'i 'chi ba'i srid pa dang /de'i 'og tu bar ma do'i srid pa dang / de nas yang skye ba'i srid pa'o/ /gzugs med pa'i snyoms par 'jug pa thob pa rnams kyi ni 'chi ba'i srid pa de nyid kyi 'og tu skye ba'i srid pa'o/ /de'i gnyen po ni skye ba med pa shes pa dang /'byung ba med pa shes pa dang / ngo bo nyid med pa shes pa'o zhes bya ba de la chos thams cad kun brtags pa'i bdag nyid kyis ma skyes par shes pa dang / stong pa nyid yul du gyur pa'i shes pa gang yin pa de ni skye ba med pa shes pa'o/ /kun brtags pa'i chos rnams kyi stong pa nyid yul du gyur pa'i shes pa ni 'byung ba med pa shes pa ste/des de dag gis 'byung ba med pa rtog pa'i phyir ro/ /mo gsham gyi bu bzhin du med pa'i phyir dngos po'i rgyun ngo bo nyid med par shes pa gang yin pa de ni ngo bo nyid med pa shes pa'o/ /stong pa nyid shes pa la sogs pa shes pa rnam pa bdun po de dag ni ji skad du bshad pa mi mthun pa'i phyogs lta ba la sogs pa rnam pa bdun gyi gnyen po'o//nyon mongs pa dang las dang / che'i kun nas nyon mongs pa rnam pa de gsum/ rnam pa bdun du tha dad par gyur pa de dag dang bral ba ni rnam par byang ba ste/ bral ba ni spangs pa'o/ / gzhan dag ni de bzhin nyid dang / lam dang mya ngan las 'das pa ni rnam par byang ba ste/ 'di la lam 'dis bral ba ni bral ba ste/ de ltar tshig rnam par sbyar ba tha dad pa'i phyir/ de bzhin nyid la sogs pa ni rnam par byang ba'o snyam du sems so/ /de ltar stong pa nyid shes pa la sogs pas zhes bya ba la/sogs pa'i sgras ni stong pa nyid shes pa dang / mtshan ma med pa shes pa dang / smon pa med pa shes pa dang / mngon par 'du mi byed pa shes pa dang / skye ba med pa shes pa dang / 'byung ba med pa shes pa dang / ngo bo nyid med pa shes pa yongs su bsdu'o//shes bya stong pa nyid la sogs pa'i chos rnams zhes bya ba ni/ 'di la yang sogs pa'i sgras ni zhes bya ba stong pa nyid dang / shes bya mtshan ma med pa nyid dang / shes bya smon pa med pa nyid dang / shes bya mngon par 'du mi byed pa nyid dang / shes bya skye ba med pa dang / shes bya 'byung ba med pa dang /shes bya ngo bo nyid med pa yongs su grub pa'i mtshan nyid rnams yongs su bsdu'o/ /kun nas nyon mongs pa rnam pa gsum po de dag dang ci rigs par stong pa nyid la sogs pa'i bar du mi byed de zhes bya ba ni/ shes bya stong pa nyid la sogs pa'i chos rnams ni bshad ma thag pa'i nyon mongs pa dang /las dang tshe'i kun nas nyon mongs pa dag tha dad par gyur pa'o/ /rang bzhin gyis stong pa nyid la sogs pa'o zhes bya ba ni/ stong pa nyid shes pa la sogs pas stong pa nyid du mi byed pa'o/ /ci rigs par zhes bya ba la/ 'dir rigs pas ni 'di yin te/ stong pa nyid shes pa shes bya stong pa nyid lta ba'i kun nas nyon mongs pa dang mi ldan zhing bral bar mi byed de/lta ba'i stong pa nyid ni bdag nyid kyi lta ba'i ngo bo nyid ma yin pa'i phyir ro/ /de bzhin du mtshan ma med pa shes pas shes bya mtshan ma med pa 'dod chags la sogs pa'i mtshan ma rnams dang bral bar mi byed de/'dod chags la sogs pa'i mtshan ma'i stong pa nyid ni/ bdag nyid kyi mtshan ma med pa'i phyir ro/ /smon pa med pa shes pas shes bya smon par mi byed de/ smon pa'i stong pa nyid ni rang bzhin gyis smon pa med pa'i mtshan nyid yin pa'i phyir ro/ /mngon par 'du mi byed pa shes pas shes bya mngon par 'du mi byed par mi byed de/mngon par 'du byed pa'i stong pa nyid ni rang bzhin gyis mngon par 'du mi byed pa'i mtshan nyid yin pa'i phyir ro/ /skye ba med pa shes pas shes bya skye ba med par mi byed de/ skye ba stong pa nyid ni rang bzhin gyis skye ba med pa'i mtshan nyid yin pa'i phyir ro//'byung ba med pa shes pas shes bya 'byung ba med par mi byed de/ sems dang sems las 'byung ba skad cig re re la 'byung ba'i stong pa nyid ni/ rang bzhin gyis 'byung ba med pa'i mtshan nyid yin pa'i phyir ro/ /ngo bo nyid med par shes pas shes bya ngo bo nyid med par mi byed de/ yang srid pa'i ngo bo nyid ni rang bzhin gyis ngo bo nyid med pa'i phyir ro//yang na kun nas nyon mongs pa rnam pa gsum po de dag dang ci rigs par zhes rgya cher smos pa ni/ nyon mongs pa dang las dang tshe'i kun nas nyon mongs pa rnam pa bdun du phye ba dang / shes bya stong pa nyid la sogs pa'i chos rnams kyi nang nas/ chos gang kun nas nyon mongs pa tha dad pa gang dang sbyar bar rigs pa'i chos de ni/ stong pa nyid shes pa la sogs pas stong pa nyid du mi byed kyi shes par bya ba nyid do/ /de la lta ba'i kun nas nyon mongs pa ni stong pa nyid shes pa dang sbyar ro/ /de bzhin du yang srid pa'i rgyun ni ngo bo nyid med pa shes pa dang sbyar ba'i bar du'o//ci'i phyir mi byed ce na 'di ltar/ chos kyi dbyings rang bzhin gyis kun nas nyon mongs pa can du ma gyur pa'i phyir/ de dag rang bzhin gyis stong pa nyid la sogs pa'o/ /de la lta ba rnams ni stong pa nyid shes pas stong par mi byed de/ de dag ni rang bzhin gyis stong pa nyid kyi mtshan nyid yin pa'i phyir ro//'dod chags la sogs pa'i rgyu ni mtshan ma med pa shes pas mtshan ma med par mi byed de/ chos kyi dbyings rang bzhin gyis mtshan ma med pa'i phyir ro/ /de bzhin du yang srid pa'i rgyun ni ngo bo nyid med par shes pas ngo bo nyid med par mi byed pa'i bar du ste/ 'di ltar gnyen po ma skyes kyang kun brtags pa'i ngo bo nyid yod pa ma yin pa nyid do//de gang gi phyir de lta bur gyur pa de'i phyir/ gal te chos kyi dbyings kun nas nyon mongs par 'gyur ba'am rnam par dag par 'gyur ba'o snyam du rtog pa 'di ni mtha' ste/ ci'i phyir zhe na/ de'i phyir/ rang bzhin gyis kun nas nyon mongs pa can ma yin pa la ni nyon mongs pa dang /rnam par dag pa med pa'i phyir ro zhes bya ba smos te/ nam mkha' bzhin no/ /mtha' de gnyis yongs su spang bar bya ba'i phyir dbu ma'i lam ste gang stong pa nyid rig pa'i bdag nyid kyis shes bya stong pa nyid la sogs pa'i chos yongs su grub pa'i ngo bo nyid kyi bdag nyid rnams/de'i mi mthun pa'i phyogs gzhan gyi dbang gi ngo bo nyid lta ba la sogs pa dang bral bar stong par mi byed kyi/ rig pa ma skyes su zin kyang lta ba'i ngo bo nyid kyi chos rnams nyid kyis kun brtags pa'i ngo bo nyid kyis stong ngo //de bzhin du gang mtshan ma med pas chos rnams mtshan ma med par mi byed de/ chos rnams nyid kyis mtshan ma med pa nas/ ngo bo nyid med pas chos rnams ngo bo nyid med par mi byed de/ chos rnams nyid kyis ngo bo nyid med pa'i bar du'o/ /gang dag de ltar so sor rtog pa 'di ni 'od srungs chos rnams la yang dag par so sor rtog pa zhes bya'o//de bzhin du rig pa yod pa dang / de'i mi mthun pa'i phyogs yod pa yang kun brtags pa'i ngo bo nyid dang bral bar bstan pas/ sgro btags pa dang skur pa 'debs pa'i mtha' spangs pa yin no/ /gang rtag tu 'das pa'i rnam par rtog pa'i rab tu dbye ba de las 'di ni gzhan yin te rnam par rtog pa'i mtha' gnyis rnam pa bdun no//rnam par rtog pa'i rab tu dbye ba bstan pa'i phyir/ 'di lta ste/ dngos po yod par rnam par rtog pa yang mtha'o/ /dngos po med par rnam par rtog pa yang mtha'o zhes pa smos te/ ji lta zhe na de'i phyir/gang zag yod de de gzhig pa'i phyir stong pa nyid do/ /yang na bdag med pa yang med do snyam du rtog pa'i phyir te zhes bya ba smos so/ /gal te chos rnams rang bzhin gyis stong pa'i phyir stong pa nyid kyis stong par mi byed na/ des na gang zag yod de de gzhig pa'i phyir stong pa nyid do/ / yang na gang zag med pa'i phyir bdag med pa yang med par 'gyur te/ gnyen po ni mi mthun pa'i phyogs med pa ma yin no/ /de bas na gdon mi za bar gang zag yod pa'am/ bdag med pa yang med par shes par bya'o zhe na/ de med pa yang rnam par rtog pa'i mtha'o/ /yod pa dang med par rnam par rtog pa'i mtha'i 'di gnyis spang ba'i phyir dbu ma'i lam 'di lta ste/'od srungs gang zag rnam par gzhig pa'i phyir/ stong pa nyid ma yin gyi stong pa nyid kyis stong ngo zhes mdo las rgya cher 'byung ba'o/ /de la kun nas nyon mongs pa can gyi gang zag rnam par gzhig pa dang / rnam par byang ba'i gang zag bskyed par bya ba'i phyir stong pa nyid ma yin gyi gang zag bskyed par bya ba dang /gzhig par bya ba'i dngos po med pa'i phyir/ dmag la sogs pa bzhin btags par yod pas stong pa nyid kyis stong gi/ /'jig tshogs la lta bas gang zag tu sla btags pas ni ma yin te/ de ni gtan med pa'i phyir ro//de ltar byas na gang zag dang chos kyi bdag nyid kyis stong pa nyid dngos po ma yin gyi de dang bral ba'i phyir ro/ /yongs su grub pa'i bdag nyid kyis ni dngos po med pa ma yin no/ /stong pa de yongs su grub pa'i bdag nyid du bstan pa'i phyir/ sngon gyi mtha' stong pa/ phyi ma'i mtha' stong pa/da ltar byung ba stong pa zhes bya ba smos te/ dus gsum char du yang de bzhin du yod par bstan pa'o/ /yang na so so'i skye bo dang / slob pa dang / mi slob pa'i dus dag na'ang de bzhin du yod par bstan pa ste/ de la so so'i skye bo'i dus ni sngon gyi mtha'o/ /mi slob pa'i dus ni phyi ma'i mtha'o//slob pa'i dus ni da ltar byung ba'i mtha'o/ /gang gi phyir de ltar yod pa dang med pa'i ngo bo nyid stong pa nyid yin pa de'i phyir 'od srungs stong pa nyid la brten par bya'i zhes gsungs te/ rnam par mi rtog pa'i ye shes kyi yul yin par bstan to/ /gang zag la ni ma yin no zhes bya ba ni brjod pa tsam du zad pa'i phyir ro//zhi bar bya bar rnam par rtog pa yang mtha'o/ /ji lta zhe na de'i phyir/ spang bar bya ba dang spong bar byed par rtog pas stong pa nyid kyis skrag pa'i phyir ro zhes bya ba smos so/ /de la zhi bar bya ba ni spang bar bya ba'o/ /zhi bar byed pa ni spong bar byed pa ste/ chos rnams ni spang bar bya ba nyid/ stong pa nyid ni spong bar byed pa brtags nas stong pa nyid la skrag pa skye'o/ /ji lta zhe na/ kun nas nyon mongs pa rnam pa gsum ni spang bar bya ba yin na/ gal te de rang bzhin gyis stong pa lta na go/ /de'i phyir gang zag spang bar bya ba ma yin par 'gyur ro/ /spang bar bya ba med na spong bar byed pa yang med do zhes stong pa nyid kyi skrag pa skye ste 'di yang mtha' nyid du/ci'i phyir zhe na/ gzugs dang tshor ba la sogs pa'i chos ji ltar rnam par shes pa'i bdag nyid la snang ba de bzhin du de dag rdzas su yod do zhes mngon par chags te/kun brtags pa'i ngo bo'i gzugs la sogs pa de dag bdag bzhin du rang bzhin gyis med par ma shes nas stong pa nyid kyis skrag go/ /de bas na rnam par rtog pa'i mtha' de gnyis yongs su spang bar bya ba'i phyir/ dpe nam mkha' ste/ 'od srungs 'di lta ste/ dper na/ mi la la nam mkha' la skrag cing 'jigs nas brang rdung zhing ngu ste/nam mkha' ni sol zhes de skad zer na/ 'od srungs de ji snyam du sems/ nam mkha' de bsal bar nus sam/ gsol pa/ bcom ldan 'das de ni rngo mi thogs lags so/ /bcom ldan 'das kyis bka' stsal pa/ 'od srungs de bzhin du dge sbyong ngam bram ze gang dag stong pa nyid kyis skrag rab tu skrag na/de dag ni sems 'khrugs pa chen por gyur to zhes nga smra'o/ /de ci'i phyir zhe na 'od srungs de dag stong pa nyid la spyod na/ de nyid kyis 'jigs pa'i phyir ro zhes 'byung ba'o/ /de ni 'di skad du bstan par 'gyur te/ ji ltar nam mkha' gzugs thams cad kyi rjes su song bas bsal bar mi nus pa de bzhin du/chos thams cad la stong pa nyid dus thams cad du gnas par bsal bar mi nus te/ chos ma spangs pas stong pa nyid gnas pa las bsal bar yang mi nus la/ chos bsal bas stong pa nyid gzhag pa yang ma yin no/ /de'i phyir 'di ni skrag pa'i gnas ma yin no zhes ston to//skrag par bya bar rnam par rtog pa yang mtha'o/ /skrag par bya ba de las 'jigs par rnam par rtog pa yang mtha' ste/ gang la 'jigs par 'gyur ba de ni skrag par 'gyur ba'o zhes bya'o/ /de las 'jigs pa byung bas na 'jigs pa ste/ de las mi 'dod pa'i 'bras bu'o//skrag par bya ba de dang 'jigs pa de la gang rnam par rtog pa de ni mtha' ste/ ji lta zhe na de'i phyir/ sdug bsngal gyis khong sngangs pas kun brtags pa'i gzugs la sogs pa la skrag pa'i phyir ro zhes bya ba smos so/ /byis pa ni kun brtags pa'i ngo bo gzugs la sogs pa la dngos por kun brtags nas/de dag la mi 'dod pa'i 'bras bu 'jigs par rnam par rtog go/ /de'i phyir sdug bsngal gyis khong sdangs pas/ gzugs la sogs pa de dag dang / de'i mtshan ma rnams kyis 'jigs shing skrag par 'gyur ro/ /rnam par rtog pa'i mtha' de gnyis yongs su spang ba'i phyir dpe ri mo mkhan te/'od srungs 'di lta ste/ dper na ri mo mkhan zhig bdag nyid kyis gnod sbyin gyi gzugs 'jigs 'jigs lta zhig bris nas/ des 'jigs skrag ste/ kha bub tu 'gyel nas brgyal bar gyur pa de bzhin du 'od srungs byis pa so so'i skye bo rnams/gzugs dang / sgra dang / dri dang / ro dang / reg pa bdag nyid kyis byas pa de dag gis 'khor ba na 'khor yang / chos de dag yang dag pa nyid ji lta ba bzhin du rab tu mi shes so zhes 'byung ba'o/ /ji ltar ri mo mkhan zhig bdag nyid kyis gnod sbyin gyi gzugs 'jigs 'jigs lta zhig bris pa la log par rnam par rtog pas/gnod sbyin gyi dngos po yang dag pa'o snyam du sgro btags te/ des skrag nas brgyal bar 'gyur ba de bzhin du/ byis pa log par rnam par rtog pa la zhugs pa skad cig gi gnas skabs thams cad ni/ bdag nyid kyis byas pa zhes bya ba bdag nyid kyi rnam par rtog pa dag gis 'khor ba na 'khor te/ rigs mthun par skad cig kyang mi gnas pa'i phyir ro/ /dpe snga ma ni nyan thos la sogs pa las brtsams pa'o/ /'di ni byang chub sems dpa' rnams las brtsams pa'o zhes bya ba la/ kha cig na re nyan thos ni stong pa nyid yongs su 'dris par ma byas pas stong pa nyid kyis skrag go/ /byang chub sems dpa' ni kun brtags pa'i chos la rnam pa kun nas nyon mongs pa ste/ rnam par rtog pa ni nyon mongs pa'i phyir ro zhe'o/ /gzhan dag na re 'di gnyis la don du bye brag med mod kyi ris gnyis kyi dbang gis gnyis su brjod do zhe'o//gzhan dag na re nyan thos ni stong pa nyid kyis skrag pa'i phyir rtogs par bya ba ma rtogs so/ /byang chub sems dpa' rnams ni rnam par brtags pa'i chos kyis skrag pa'i phyir ro zhe'o/ /kha cig na re snga ma ni bdag tu 'dzin pa'i gnyen po'o//'di ni chos su 'dzin pa'i gnyen po'o zhe'o/ /gzung bar rnam par rtog pa yang mtha'o/ /'dzin par rnam par rtog pa yang mtha'o/ /gzung ba gzugs la sogs pa dang / de la 'dzin pa rnam par shes pa'i tshogs de dag rang gi mtshan nyid dang / 'bras bus shes par byar yod bzhin du/bdag la sogs pa dang 'dra bar sgro btags pa'i bdag nyid du ji ltar 'gyur zhes/ de ltar gzung ba dang 'dzin pa gnyis la dngos por yongs su rtog pa ni 'dir mthar 'dod do/ /rnam par rtog pa'i mtha' de gnyis yongs su spang ba'i phyir/ dpe sgyu ma bye ba pa ste/'od srungs 'di lta ste/ dper na sgyu ma byed pa'i mi zhig gis sgyu ma sprul pa sprul nas/ sgyu ma sprul pa des sgyu ma byed pa de nyid zos pa de bzhin du/ 'od srungs dge slong rnal 'byor spyod pa dmigs pa gang dang gang yid la byed pa de dag thams cad de la gsog tu snang ngo zhes rgya cher 'byung ba'o//ji ltar 'dis rnam par rtog pa'i mtha' 'di gnyis yongs su spong zhe na/ de'i phyir/ rnam par rig pa tsam du shes pas don dngos po med par shes par byas nas/ don dngos po med par shes pa des kyang rnam par rig pa tsam du shes pa de nyid rnam par bzlog go/ /don dngos po med na rnam par shes pa mi srid pa'i phyir te/de ltar na 'di ni 'dir mtshungs so zhes bya ba smos te/ sgyu ma byed pa lta bu ni rnam par rig pa tsam du shes pa'o/ /sprul pa'i gnod sbyin lta bu ni don dngos po med par shes pa ste/ don dngos po med par shes pa ni rnam par rig pa tsam du shes pas rab tu phye ba'i phyir ro//ji ltar sprul pa byed pa sprul pa zos pa de bzhin du/ don dngos po med par shes pas kyang rnam par rig pa tsam du shes pa de nyid zos te/ don la dmigs pa ni rnam par rig pa zhes bya bas/ don med na rnam par rig pa tsam yang med pa'i phyir ro/ /yang dag pa nyid du rnam par rtog pa yang mtha'o/ / log pa nyid du rnam par rtog pa yang mtha' ste/ nges par 'byed pa'i cha dang mthun pa'i dus na yang dag par so sor rtog pa na yang dag pa nyid du'am/ log pa nyid du rtogs pa'i mtha' gnyis so/ /ji lta zhe na/ yang dag pa nyid ni zag pa med pa'i chos rnams so/ /log pa nyid ni zag pa dang bcas pa'i chos rnams so//de la gal te yang dag par so sor rtog pa na dag pa nyid du chags na/ de lta na ni zag pa dang bcas pa'i dge ba dang / yang dag par so sor rtog par mi 'gyur ro/ /ji ste yang dag pa ma yin pa'i mtshan nyid kho na'o snyam na/ de lta yang khams gsum dang ldan pa'i dge ba bzhin du log pa nyid du 'gyur te/mtha' de gnyis yongs su spangs pa'i phyir/ dpe shing gnyis la me 'byung ba de/ 'od srungs 'di lta ste/ dper na shing gnyis rlung gis drud pa las me byung ste/ byung ma thag tu shing de gnyis tshig par byed pa de bzhin du/ 'od srungs yang dag par so sor rtog pa yod na 'phags pa'i shes rab kyi dbang po skye ste/skyes ma thag tu yang dag par so sor rtog pa nyid tshig par byed do zhes 'byung ngo / /de'i don ni 'di yin te/ dper na me'i mtshan nyid ma yin pa shing gnyis las me 'byung ste/ byung nas kyang shing gnyis tshig par byed do/ /de bzhin du yang dag pa nyid kyi mtshan nyid ma yin pa yang dag par so sor rtog pa las/yang dag pa nyid kyi mtshan nyid 'phags pa'i shes rab kyi dbang po skye ste/ skyes nas kyang yang dag par so sor rtog pa nyid tshig par byed de/ rnam par 'jig par byed ces bya ba'i tha tshig go/ /rnam par 'jig pa de yang tshig pa dang 'dra bar byed pas na tshig par byed ces bya ste/gyur par mthong ba'i phyir ro/ /yang dag par so sor rtog pa 'di zag pa dang bcas pa yin yang / yang dag pa nyid kyi rjes su mthun pa'i phyir yang dag par so sor rtog pa zhes bya bar ston to/ /byed par rnam par rtog pa yang mtha'o//mi byed par rnam par rtog pa yang mtha' ste/ ji lta zhe na de'i phyir/ ye shes ni blo sngon du 'gro bas byed pa'am/ mthu med par rtog pa'o zhes bya ba smos so/ /gal te ye shes 'dis mi shes pa spong ngo snyam du rtogs nas de spang ba'i phyir 'jug go zhes bya ba 'di ni byed pa'i rnam par rtog pa'i mtha'o//ye shes ni skad cig pa yin pas spyod pa byed pa'i dus na mi srid de/ de bas na mi shes pa spang ba'i mthu med do zhes bya ba 'di ni mi byed par rnam par rtog pa'i mtha'o/ /rnam par rtog pa'i mtha' de gnyis yongs su spang ba'i phyir dpe mar me ste/ 'od srungs 'di lta ste/dper na mar me byung na mun pa mun nag thams cad med par 'gyur yang / 'od srungs mar me 'di ltar bdag gis mun pa mun nag thams cad bsal lo snyam du mi sems mod kyi/ 'on kyang mar me la brten nas mun pa mun nag med par 'gyur ba de bzhin du 'od srungs ye shes skyes na ni mi shes pa med par 'gyur te/ye shes ni 'di snyam du bdag gis mi shes pa bsal lo snyam du mi sems mod kyi/ 'on kyang ye shes la brten nas/ mun pa med par 'gyur ro zhes 'byung ba'o/ /'di skad du bstan par 'gyur te/ dper na mar me ni byed pas stong zhing mun pa mun nag bsal bar bsam pa med kyang /phyogs gang du byung ba'i phyogs der mar me yod pa tsam gyis mun pa mun nag thams cad med par 'gyur ro/ /de bzhin du rgyud gang la rnam par mi rtog pa'i ye shes skyes par gyur na de yod pa tsam gyis rgyud de las mi shes pa med par 'gyur te/ye shes ni rnam par mi rtog pa dang / dpyod pa med pa'i phyir ro/ /de ltar ye shes ni byed pa'i mthu med la/ mar me bzhin du yod pa tsam gyis mi mthun pa'i phyogs sel to/ /skye ba med par rnam par rtog pa yang mtha'o/ /dus mnyam pa nyid du rnam par rtog pa yang mtha'o//ji lta zhe na de'i phyir/ gal te gnyen po ma skyes pa'am zhes bya ba smos te/ de ltar dus ji srid du sngon gnyen po ma skyes pa de bzhin du da yang mi skye'o snyam pa 'di ni skye ba med par rtog pa'i mtha'o/ /yang na kun nas nyon mongs pa yun ring ba nyid du rtog pa zhes bya ba ni mi shes pa dang /ye shes mi mthun par gnas pas ye shes 'byung ba'i mthu med do/ /ji ste brgya la skyes su zin na yang mi shes pa de yun ring po nas gnas gnas pa'i phyir/ ye shes skad cig pa des bsal bar bya mi nus so/ /de bas na nyon mongs pa dang rnam par byang ba gnyis dus mnyam pa nyid do snyam pa'i rnam par rtog pa'i mtha' de gnyis yongs su spang ba'i phyir mar me'i dpe gnyis pa ste/'od srungs 'di lta ste/ dper na khyim mam khang pa'am khang phran lo brgya stong 'das par sus kyang lan 'ga' yang mar me ma bus pa der mi la la zhig gis mar me bus na/'od srungs de ji snyam du sems/ mun pa mun nag de 'di ltar bdag ni lo brgya stong du bsags pa yin te/ bdag 'di nas mi 'gro'o snyam du sems sam/ gsol pa bcom ldan 'das mi sems te/ mar me byung na mun pa mun nag la mi mchi ba'i nus pa ma mchis kyi/ gdon mi 'tshal bar ma mchis par 'gyur ro/ /bcom ldan 'das kyis bka' stsal pa/ 'od srungs de bzhin du las dang nyon mongs pa bskal pa brgya stong du bsags pa yang tshul bzhin yid la byed pa'i so sor rtog pa gcig gis med par 'gyur ro/ /'od srungs mar me zhes bya ba de ni 'phags pa'i shes rab kyi dbang po'i tshig bla dgas so//'od srungs mun pa mun nag ces bya ba ni las dang nyon mongs pa'i tshig bla dgas so zhes 'byung ba'o/ /de lta bas na 'dis ni skye ba rkyen las rag las pa'i phyir gnyen po mi skye ba dang / kun nas nyon mongs pa'i phyogs dang / dus mnyam pa nyid kyi lan btab pa ste/ nag po'i phyogs stobs chung zhing gnyen po de stobs dang ldan pa'i phyir mun pa mun nag dang mar me bzhin no/ /mtha' gnyis spangs pa sgrub pa bshad zin to/ /mtha' gnyis spangs pa sgrub pa'i 'og tu khyad par can dang khyad par med pa sgrub pa smos pas/de'i phyir mtha' gnyis spangs pa sgrub pa bshad pa'i 'og tu khyad par can dang / khyad par med pa sgrub pa gang zhe na zhes dris pa dang / de'i phyir/ khyad par can dang khyad med ni/ /sa bcu dag tu shes par bya/ /zhes bya ba gsungs so/ /sa bcu po de dag re re la yang sgrub pa rnam pa gnyi ga'o//ji lta zhe na de'i phyir/ sa gang la pha rol tu phyin pa gang gi shas che ba zhes bya ba rgya cher smos so/ /byang chub sems dpa'i sa gang la gnas pa'i byang chub sems dpa' pha rol tu phyin pa gang la lhag par spyod pa de ni/ byang chub sems dpa' sa de la pha rol tu phyin pa/ gzhan dag pas shas cher gyur pas na khyad par can zhes bya ste/ 'di ltar sa dang po la sbyin pa'i pha rol tu phyin pa shas che ba yin te/ de la sgrub pa khyad par can zhes bya'o/ /de bzhin du sa bcu pa la ye shes kyi pha rol tu phyin pa'i bar du'o/ /sa de dang der pha rol tu phyin pa lhag ma thams cad la yang /khyad par med par yang dag par sgrub pa ni de dag la sgrub pa khyad par med pa zhes bya ste/ ji skad du sa rab tu dga' ba la sbyin pa'i pha rol tu phyin pa'i shas che ba yin te/ lhag ma rnams kyang ci nus kyi 'os su yang dag par mi sgrub pa ma yin no zhes gsungs pa lta bu'o//de bzhin du sa lhag ma rnams la yang mdo las ji skad bshad pa bzhin du rig par bya'o/ /sgrub pa bla na med pa nyid bshad zin to/ /da ni dmigs pa bla na med pa nyid bshad pa'i skabs su bab ste/ de'i phyir dmigs pa bla na med pa nyid gang zhe na zhes bya ba smos so//de'i 'og tu de dmigs kyis dbye ba'i phyir/ rnam par gzhag dang de bzhin dbyings/ /zhes rgya cher gsungs so/ /dmigs pa ni rnam pa bcu gnyis po 'di dag ste/ rnam par gzhag pa'i dmigs pa nas/ phul du byung ba'i dmigs pa'i bar du'o/ /de ma yin pa'i dmigs pa gzhan thams cad pas mchog yin pas na/dmigs pa bla na med pa nyid ces bya'o/ /de la dang po ni pha rol tu phyin pa'i chos gang dag ste/ de dag kyang sangs rgyas dang / byang chub sems dpa' rnams kyis sems can la phan gdags pa'i phyir/ rnam par gzhag pas na rnam par gzhag pa'o//de nyid bstan pa'i phyir 'grel pa byed pas kyang chos brtags pa rnam par gzhag pa'i dmigs pa zhes bya ba smos so/ /chos rnams ni pha rol tu phyin pa dang / byang chub kyi phyogs dang / phung po la sogs pa brtags pa ste/ 'dis rnam par gzhag pa'am yang na de 'dir gzhag pas na/chos brtags pa rnam par gzhag pa'o/ /mngon par rtogs pa dang mthun pa'i phyir/ 'dir rnam par gzhag pa'i dmigs pa la sogs pa'i go rims su blta'o/ /gnyis pa de ni de bzhin nyid de chos kyi dbyings kyi rnam grangs su gtogs pa'i phyir ro//gsum pa dang bzhi pa zhes bya ba de la/ gsum pa ni sgrub pa'i dmigs pa'o/ /bzhi pa ni sgrub pa'i dmigs pa'o/ /de dag nyid la zhes bya ba ni dang po dang gnyis pa'o/ /go rims bzhin te zhes bya ba la dang po ni sgrub pa'i dmigs pa'o/ /gnyis pa ni sgrub pa'i dmigs pa ste/'dir rgyu smos pa/ chos kyi dbyings rab tu rtogs pas/ pha rol tu phyin pa la sogs pa'i chos rnams khong du chud pa'i phyir ro zhes bya ba'o/ /chos kyi dbyings rab tu rtogs pas zag pa med pa'i pha rol tu phyin pa rnams mngon par khong du chud ces bya ba'i tha tshig ste dang po ni sgrub pa'i dmigs pa'o//gnyis pa ni sgrub pa'i dmigs pa'o/ /lnga pa ni 'dzin pa'i dmigs pa ste/ thos pa las byung ba'i shes pa'i dmigs pa'o/ /thos pa tsam gyis pha rol tu phyin pa la sogs pa'i chos rnams dang / chos kyi dbyings 'dzin pas na/ thos pa las byung ba'i shes pa ni 'dzin pa zhes bya'o//'dzin pa'i dmigs pa ni 'dzin pa'i dmigs pa ste/ de yang dang po dang gnyis pa de nyid de/ rnam par gzhag pa dang chos kyi dbyings kyi dmigs pa'o/ /drug pa ni bsam pa las byung ba ste/ rtogs nas 'dzin pa'i phyir ro zhes bya ba ni/ ltos pa dang bya ba byed pa dang / 'thad pa sgrub pa dang / chos nyid kyi rigs pa rnams kyis thos pa'i don khong du chud nas 'dzin pa'i phyir ro/ /nges par 'dzin pa ni bsams pa las byung ba'i shes pa ste/ de'i nges pa ni nges par 'dzin pa'i dmigs pa'o/ /bdun pa ni bsgoms pa las byung ba ste zhes bya ba ni dmigs pa zhes bya ba dang sbyar ro//so so rang gis rig pa'i phyir ro zhes bya ba ni/ so so rang gis don 'dzin pas na rab tu 'dzin pa ste/ sa dang po la 'jug par sbyor ba can bsgoms pa las byung ba'i shes pa'o/ /de yang dran pa nye bar gzhag pa nas brtsams nas stobs kyi bar du ste/de'i dmigs pa ni rab tu 'dzin pa'i dmigs pa'o/ /brgyad pa ni sa dang po la mthong ba'i lam gyi'o zhes bya ba ni/ so so rang gi chos kyi dbyings gnyis su med pa thams cad du song ba rtogs pa'o/ /yang na mthong bas spang bar bya ba'i nyon mongs pa rnams dang /thams cad du 'gro ba'i don gyi yul la nyon mongs pa can ma yin pa'i mi shes pa'i dgra bo rtogs pa ni rab tu rtogs pa ste/ de yang mthong ba'i lam mo/ /de'i dmigs pa ni rab tu rtogs pa'i dmigs pa'o/ /dgu pa ni bsgom pa'i lam gyi ste/ sa bdun pa'i bar du'o zhes bya ba ni/chos kyi dbyings rab tu rtogs pa de nyid goms par byas pas/ gong nas gong du khyad zhugs par 'gro bas rab tu rgyas pa ste/ bsgom pa'i lam sa bdun pa'i bar du'o/ /bsgom pa'i lam de'i dmigs pa ni rab tu rgyas pa'i dmigs pa'o/ /bcu pa ni de nyid na 'jig rten pa dang 'jig rten las 'das pa'i lam gyi ste zhes bya ba ni/dmigs pa'o zhes bya ba dang sbyar ro/ /chos rnam par khong du chud pa'i phyir ro zhes bya ba ni sa de nyid na mdo la sogs pa'i chos kyi mtshan ma'i rnam pa la sogs pa la mngon par zhen pa dang bral ba'i sgo nas chos rnam par khong du chud pas na rnam par khong du chud pa'o//de nyid ni bsgom pa'i lam zhes bya ste/ sa bdun pa nyid du'o/ /rnam par khong du chud pa'i dmigs pa ni/ rnam par khong du chud pa'i dmigs pa'o/ /bcu gcig pa ni sa brgyad pa la'o zhes bya ba ni/ mtshan ma dang 'bad pa'i yid la byed pa thams cad dang bral nas rang gi tshul gyis rnal du 'dug pas 'jug pa'i phyir te/bsgom pa'i lam de nyid la rnal du 'dug pa zhes bya'o/ /rnal du 'dug pa'i dmigs pa ni/ rnal du 'dug pa'i dmigs pa'o/ /bcu gnyis pa ni sa dgu pa la sogs pa gsum la'o zhes bya ba ni/sa dgu pa la so so yang dag par rig pa'i ye shes phul du byung ba thob pa'i phyir ro/ /sa bcu pa la ni las la dbang ba phul du byung ba thob pa'i phyir ro/ /sangs rgyas kyi sar ni nyon mongs pa dang / shes bya'i sgrib pa lhag ma rnam par dag pa phul du byung ba thob pa'i phyir te/ de ltar sa dgu pa la sogs pa gsum la ye shes dang /las dang / rnam par dag pa phul du byung bas sa de dag la gnas pa'i dmigs pa gang yin pa de dag ni/ phul du byung ba'i dmigs pa zhes bya'o/ /gzhan dag na re lam phul du byung ba nyid chung ngu dang / 'bring dang / chen por phye nas/ sa gsum po dag la phul du byung ba'i dmigs par bshad do zhe'o//dang po dang gnyis pa de dag ni de dang de'i dmigs pa'i ming 'thob po zhes bya ba ni/ dmigs pa de dag kyang 'di lta ste/ chos rnam par gzhag pa'i dmigs pa dang / chos kyi dbyings kyi dmigs pa'o/ /de la dmigs pa de nyid kyang ye shes de dang de dag tu na de dang de'i ming 'thob ste/thos pa las byung ba'i shes pa'i dus ni 'dzin pa'i dmigs pa ste/ 'dzin pa'i ye shes kyi yul ni thos pa yin pa'i phyir ro/ /de bas na 'dzin pa'i shes pa la 'dzin pa zhes bya'o/ /de bzhin du phul du byung ba'i dmigs pa'i rab tu brjod par bya'o/ /sa dgu pa dang bcu pa dang sangs rgyas kyi sar ni 'jig rten las 'das pa'i ye shes dang de'i rjes las thob pa dag pa 'jig rten pa phul du byung ba brnyes te/'di'i dmigs pa ni phul du byung ba'i dmigs pa'o/ /dmigs pa bla na med pa nyid bshad zin to/ /da ni yang dag par 'grub pa bra na med pa nyid kyi skabs su bab pas de bstan pa'i phyir/yang dag par 'grub pa gang zhe na zhes bya ba smos te/ sgrub pa de dang des yang dag par 'grub pas na yang dag par 'grub pa'o/ /de las gzhan pa'i yang dag par 'grub pa rnams las khyad par du 'phags pa dang / yang dag par 'grub pa khyad par can de las gzhan med pa'i phyir bla na med pa zhes bya'o//de bstan pa'i phyir/ ma tshang med dang mi spong dang / /mi g.yeng ba dang rab rdzogs dang / /zhes rgya cher gsungs so/ /de la rkyen ma tshang ba med pa nas brtsams te/ byang chub kun du ston pa zhes bya ba'i bar du rnam pa bcu po de lta bu ni yang dag par 'grub pa'o//de la rkyen ma tshang ba med pa ni rigs yang dag par 'grub pa'o zhes bya ba la/ rkyen rnams ma tshang ba med pa ni thams cad tshogs pa'o/ /de dag tshogs na rigs yang dag par 'grub ste/ rgyas pa dang / khyad par can du 'gyur zhes bya ba'i tha tshig go/ /de yang skyes bu dam pa la brten pa dang /dam pa'i chos nyan pa dang / tshul bzhin yid la byed pa la sogs pa'o/ /rigs dang / bshes gnyen la sogs pa de dag ma tshang bas ma tshang ba'o/ /theg pa chen po mi spong ba de ni mos pa yang dag par 'grub pa'o zhes bya ba ni/ gal te zab cing rgya che ba'i mtshan nyid theg pa chen po'i chos mi spong na/de ltar na de'i nges par 'dzin pa'i bdag nyid kyi mos pa rgyas par 'gyur ro/ /theg pa dman par mi g.yeng ba ni sems bskyed pa yang dag par 'grub pa'o zhes bya ba ni/ gal te byang chub tu sems bskyed la/ byang chub kyi sems las ldog pa'i rkyen yod du zin kyang / nyan thos kyi theg pa'am/ rang sangs rgyas kyi theg par des sems mi 'jug na/ de lta na byang chub kyi sems de brtas par 'gyur ro/ /pha rol tu phyin pa yongs su rdzogs pa ni 'grub pa yang dag par 'grub pa'o zhes bya ba la/ byang chub kyi sems bskyed pa dag de'i dbang gis sbyin pa la sogs pa pha rol tu phyin pa rnams yongs su rdzogs pas thams cad mkhyen pa nyid sgrub pa rgyas par 'gyur ro//'phags pa'i lam bskyed pa ni/ skyon med par 'jug pa yang dag par 'grub pa'o zhes bya ba ni/ thog ma nyid du sngon ma skyes pa'i 'phags pa'i lam bskyed pas skyon med pa la 'jug par 'gyur ro//skyon zhes bya ba ni nyes pa'am zag pa ste/ gang na de med pa de ni skyon med pa ste/ rlung med pa bzhin te zag pa med pa'i sa'o/ /nges par 'jug pa zhes 'byung ba yang nges pa nyid nges pa ste/ 'di ltar mthong ba'i lam skyes na/ bde 'gro dang mya ngan las 'das pa nyid du nges par 'gyur ro//dge ba'i rtsa ba 'phel ba ni yun ring po nas 'dris par bya ba'i phyir/ sems can yongs su smin par byed pa yang dag par 'grub pa'o zhes bya ba ni mthong ba'i lam thos nas/ de'i rjes las thob pa bsgom pa'i lam la yun ring por 'dris par byas goms par byas pas/dge ba'i rtsa ba 'grub pa ni dge ba'i rtsa ba 'phel ba'o/ /des sems can yongs su smin par byed nus par 'gyur te/ de'i phyir dge ba'i rtsa ba 'phel ba ni/ sems can yongs su smin par byed pa yang dag par 'grub pa'o/ /gzhan dag na re de'i sems can yongs su smin par byed pa yang dag par 'grub pa ni 'di lta bu yin te/'di ltar 'dis yun ring po nas goms par byed pa la brten nas/ sems can rnams kyi rgyud la dge ba'i rtsa ba brtan por byas par gyur pa'o zhes zer ro/ /sems las su rung ba ni zhing yongs su dag pa yang dag par 'grub pa'o zhes bya ba la/de ltar bsgoms pas/ dge ba'i rtsa ba rnams 'phel nas gcig tu bgrod pa'i lam gyis mi mthun pa'i phyogs mtshan ma dang 'bad pa dang bral ba'i phyir sems las su rung ste/ las su rung ba de'i dbang gis ji ltar 'dod pa bzhin du/ sangs rgyas kyi zhing shel la sogs pa lta bur ston te/de bas na sems las su rung ba ni zhing yongs su dag pa yang dag par 'grub pa'o/ /mdo gzhan las kyang sangs rgyas kyi zhing yongs su dag par 'dod pas/ rang gi sems yongs su dag par bya'o zhes gsungs so/ /'khor ba dang mya ngan las 'das pa la mi gnas pa ni/phyir mi ldog pa'i sa la lung bstan pa thos pa yang dag par 'grub pa ste zhes bya ba ji lta bu zhe na/ de'i phyir 'khor ba dang mya ngan las 'das pa gnyis las phyir mi ldog pa'i phyir ro zhes bya ba smos so/ /de ltar sems las su rung bas 'khor ba dang mya ngan las 'das pa gnyis la mi gnas par 'gyur te/sems can la lta ba'i phyir/ /sbyin pa la sogs pa pha rol tu phyin pa gsum gyi 'bras bu mngon par mtho ba yongs su 'dzin pas mya ngan las 'das pa la mi gnas so/ /brtson 'grus la sogs pa pha rol tu phyin pa gsum yongs su bzung bas/ 'khor ba'i nyon mongs pa rnams kyis nye bar nyon mongs par mi 'gyur te/de bas na 'khor ba la yang mi gnas so/ /yang na 'khor ba dang mya ngan las 'das pa la mi gnas pa ni/ de las mi ldog pa'o/ /de la sems can la lta ba'i phyir 'khor ba las mi ldog pa ste/ snying rjes 'khor ba len pa'i phyir ro/ /shes rab kyis mya ngan las 'das pa las mi ldog go//de ltar 'khor ba dang mya ngan las 'das pa la mi gnas pa'i byang chub sems dpa' ni/ phyir mi ldog pa'i sa mi g.yo ba la gnas pas/ sangs rgyas su lung bstan pa 'thob pa yang dag par 'grub pa yin no/ /yang na phyir mi ldog pa'i sa thob pa dang /lung bstan pa thob pa yang dag par 'grub pa yin no/ /sgrib pa med pa'i sangs rgyas kyi/ /sa yang dag par 'grub pa'o/ /zhes bya ba ni/ 'di ltar bag chags dang bcas pa'i nyon mongs pa dang / shes bya'i sgrib pa thams cad spangs pas sku gsum du bsdus pa'i sangs rgyas kyi sa yang dag par 'grub pa ste/de bas na sgrib pa med pa ni sangs rgyas kyis yang dag par 'grub pa'o/ /de rgyun mi gcod pa ni byang chub kun du ston pa yang dag par 'grub pa'o zhes bya ba ni/ sangs rgyas kyi byang chub de rgyun mi gcod pa ni thugs rje chen po'i dbang gis 'jig rten ji srid pa de srid du/ byang chub rab tu ston pa ni/ byang chub kun du ston pa yang dag par 'grub pa ste/ 'dir yang dga' ldan gyi gnas rab na bzhugs pa dang / lhums su zhugs pa dang / bltams pa dang / 'khrungs pa dang / 'dod pa la longs spyod pa dang / mngon par 'byung ba dang /dka' ba spyod pa dang / chos kyi 'khor lo chen po bskor ba dang / yongs su mya ngan las 'das pa chen po la sogs pa yang 'dir bstan pa yin te/ byang chub kun du ston pa ni de dag dang tha dad pa ma yin pa'i phyir ro/ /byang chub kun du ston pa zhes bya ba ni/ dpe tsam du smos su zad pas/lhag ma rnams kyang gzung ngo / /de ltar zhes bya ba ni/ 'dir tshig gi don dkyus ma rnams rdzogs pa la bya ste/ don dang mthun pa'i ming du brjod pa'am/ rab tu rtogs pa'i don du/ 'di ni dbus rnam par 'byed pa'i bstan bcos te zhes bya ba'o/ /'dir 'dzud pa 'jug pa'i rgyu smos pa/dbu ma'i lam rab tu ston pa'i phyir ro zhes bya ba smos te/ gang gi phyir bstan bcos 'dir 'di ltar rtag pa dang chad pa'i mtha' dang bral ba/ dbu ma'i lam rab tu bstan pas/ /de'i phyir bstan bcos 'di dbus rnam par 'byed pa zhes bya ste/ dbus rnam par 'grel pa dang / rab tu bshad ces bya ba'i tha tshig go//'di ni dbus ma dang mtha' rnam par 'byed pa yang yin te/ 'dir rgyu smos pa/ dbus dang mtha' gnyis rab tu ston pa'i phyir ro zhes bya ba ste/ de'i dbus dang mtha' rnam par 'byed pa zhes bya'o/ /de la dbus ni chos kyi dbyings gnyis su med pa'o/ /mtha' ni sgro 'dogs pa dang skur pa 'debs pa'o//yang na thog ma dang tha ma spangs pa'i dbus rab tu ston pa'i phyir ro zhes bya ba ni/ kha cig na re de bzhin nyid do zhe'o/ /gzhan dag na re yang dag pa ma yin pa kun rtog pa thog ma dang tha ma med pa ni/ 'dir dbus dang mtha' zhes bya ba dang sbyar te/ rab tu ston to zhe'o//rtogs par dka' dang snying po'i don/ /zhes bya ba dang go rims bzhin/ /zhes bya ba ni rtog ge'i spyod yul ma yin pa'i phyir rtogs par dka' ba'i don to/ /phas kyi rgol ba dag gis mi shigs pa'i phyir snying po'i don te/ rtog ge'i spyod yul ma yin pa ni 'di rnam par mi rtog pa'i ye shes kyi yul du rtog pa'i phyir ro//snying po'i don ni yang dag pa ji lta ba bzhin du rab tu bstan pa'i phyir ro/ /don chen ni bdag dang gzhan gyi don gyi ched kyi phyir ro zhes bya ba ni/ byang chub sems dpa'i spyod pa'i ched kyi phyir te/ byang chub sems dpa'i spyod pa de yang bdag dang gzhan gyi don sgrub par byed pa'i phyir ro//de bzhin du kun gyi don ni theg pa gsum char gyi dbang du byas pa'i phyir ro zhes bya ba ni/ nyan thos dang rang sangs rgyas dang byang chub sems dpa' rnams kyi lam bshad pa'i phyir ro/ /don med thams cad sel ba'o/ /zhes bya ba ni/ nyon mongs pa dang shes bya'i sgrib pa spong bar byed pa'o//bla na med pa nyid kyi don bsdus pa zhes bya ba la/ don bsdus pa brjod pa'i dgos pa ni sngar bshad zin to/ /mdor bsdu na bla na med pa nyid rnam pa gsum ste zhes bya ba ni/ rgyas par ni mtha' yas pa'o/ /sgrub pa ni bla med kyi sgrub pa dang zhes gang gsungs pa'o//sgrub pa'i gzhi ni dmigs pa zhes gang gsungs pa'o/ /sgrub pa'i 'bras bu yang dag 'grub/ /bstan pa nyid du 'dod pa yin/ /zhes gsungs pa'o/ /sgrub pa de yang ji lta bu zhe na dam pa'o zhes bya ba ni/ dam pa bcu gnyis bdag nyid de/ /zhes gsungs pa'o/ /gang gis she na/ theg pa chen por ji lta bur//chos rnams gdags par mdzad pa dag/ /ces bya ba la sogs pas so zhes bya bas ni/ byang chub sems dpas rtag par yang / /shes rab gsum gyis yid byed pa'o/ /zhes 'byung ba'i phyir ro/ /de bzhin du/ de ni chos spyod rnam bcu dang / /yang dag ldan par shes par bya//zhes bya ba'o/ /ji lta bur zhe na/ rnam pa gang gis zhi gnas bsgom pa la g.yeng ba med par gyur pa zhes bya ba ni g.yeng ba rnam pa drug med pa'i phyir ro/ /lhag mthong bsgom pa la phyin ci ma log par gyur pa'o zhes bya ba ni/ yi ge la sogs pa bcu la phyin ci log med pa'i phyir ro/ / gang gi don du zhe na/ dbu ma'i lam gyis nges par 'byung bar bya ba'i don du'o zhes bya ba ni/ mtha' gnyis spangs pa sgrub pa gang zhe na zhes 'byung ba'o/ /gang du zhe na/ sa bcu dag tu ste/ ji lta zhe na/ de'i phyir/ khyad par can dang khyad par med pa zhes gsungs so/ /ci zhig ce na/ sa bcu dag tu shes par bya//zhes 'byung ba ston to/ /phyin ci ma log pa rnams kyi don bsdus pa ni yi ge la phyin ci ma log pas zhi gnas kyi mtshan ma dang lhag mthong gi mtshan ma dmigs pa zhes bya ba 'brel pa'i rang bzhin dang bral ba mngon sum du byed pa dang / don la phyin ci ma log pas phyin ci log gi mtshan ma gnyis ka yang snang ba tsam du rab tu rtogs pa dang /yid la byed pa la phyin ci ma log pas phyin ci log gi gzhi kun gzhi rnam par shes pa la gnyis su mngon par zhen pa'i sa bon bsags pa yongs su spong ba dang / mi 'phro ba la phyin ci ma log pas phyin ci log gi mtshan ma la sgyu ma la sogs pa lta bur yod pa dang med par mngon par zhen pa med pas legs par rtogs par byed pa dang /rang gi mtshan nyid la phyin ci ma log pas de'i gnyen po rnam par mi rtog pa brjod pa dang bral ba chos kyi rang gi mtshan nyid kyi yul la lam bsgom pa dang / spyi'i mtshan nyid la phyin ci ma log pas chos thams cad spyir rnam par byang ba'i rang bzhin du rtogs pa dang /ma dag pa dang dag pa'i yid la byed pa la phyin ci ma log pas de'i sgrib pa ma spangs pa dang / spangs par rab tu shes te/ chos kyi dbyings rang bzhin gyis 'od gsal ba la glo bur gyi nyon mongs pas nye bar nyon mongs par gyur pa'i phyir ro//de'i glo bur du byung ba la phyin ci ma log pas kun nas nyon mongs pa dang rnam par byang ba yang dag pa ji lta ba bzhin rab tu shes pa zhes bya ba ni/ rang bzhin gyis 'od gsal ba la gzhan du na kun nas nyon mongs pa dang rnam par byang bar 'gyur mi srid pa'i phyir ro//mi skrag pa dang / khengs pa med pa la phyin ci ma log pas/ chos dang gang zag la mngon par zhen pa med de/ sgrib pa med par nges par 'byung ba'o/ /bstan bcos dbus dang mtha' rnam par 'byed pa las/ theg pa bla na med pa'i le'ur bcad pa lnga'i 'grel bshad de/slob dpon blo brtan gyis mdzad pa rdzogs so// //rgya gar gyi mkhan po dzi na mi tra dang / shI len+d+ra bo d+hi dang / zhu chen gyi lo tsA ba ban+de ye shes sde la sogs pas bsgyur cing zhus te gtan la bab pa'o// //