CLOSE WINDOW

D4029
བོད་ཡིག

/ //kha che'i paN+Di ta ma hA dza na dang / lo tsA ba blo ldan shes rab kyis bsgyur ba'o// //[# ]@##/ /rgya gar skad du/ ma hA yA na sU tra a laM ka ra TI ka /bod skad du/ theg pa chen po'i mdo sde'i rgyan gyi rgya cher bshad pa/sangs rgyas dang byang chub sems dpa' thams cad la phyag 'tshal lo/ /dkon mchog gsum po yon tan gter gyur pa/ /shAkya thub pa'i sras kyi thu bo dang / /rgyal ba'i sras gzhan de dang de dag dang / /thogs med zhal snga nas dang de'i gcung dang //bla ma gang las bdag gis skye bo la/ /gsal zhing snang byed bstan bcos 'di thos te/ /kun la bdag rtag mgo bos ra gtugs nas/ /zhe sa dang bcas yang dag gus phyag 'tshal/ /don bsam rnams la blo rtul bstan bcos 'di//tshig don zab par rnam bsams bshad sbyar dag /bya ba'i bsams pa'ang bdag la 'ga' yang med/ /de ltas rang la phan phyir cung zad bya/ /theg pa chen po'i mdo sde'i rgyan gyi lus ni byang chub sems dpa'i rigs la gnas pa dag bla na med pa yang dag par rdzogs pa'i byang chub tu sems bskyed nas byang chub sems dpa'i spyod pa la slob po//byang chub sems dpa'i spyod pa gang yin zhe na/ byang chub sems dpa'i spyod pa ni mdor bsdu na/ rnam pa gsum po de gang la slob pa dang /ji ltar slob pa dang / gang dag slob pa yin te/ de dag thams cad gcig tu bsdus nas/ byang chub sems dpa'i spyod pa zhes bya'o/ /yang byang chub sems dpa' dag gang la slob ce na/ gnas bdun la slob bo/ /gnas bdun po gang dag yin zhe na/rang gi don dang / gzhan gyi don dang / de kho na nyid kyi don dang / mthu dang / bdag nyid kyi sangs rgyas kyi chos yongs su smin pa dang / sems can yongs su smin pa dang / gnas bdun pa ni bla na med pa yang dag par rdzogs pa'i byang chub bo//rang gzhan don dang de nyid don/ /mthu dang rang gi sangs rgyas kyi/ /chos dang sems can yongs smin dang / /bdun pa byang chub mchog yin no/ /byang chub sems dpas gang la bslab par bya ba de ni bstan zin to/ /ji ltar bslab par bya ba de bstan par bya ste/'di la byang chub sems dpa'i bslab pa rnams la slob par 'dod pa'i byang chub sems dpas dang po kho nar theg pa chen po'i chos la mos pa mang bar bya ba dang / chos tshol ba dang / chos ston pa dang / chos dang mthun pa'i chos sgrub pa dang /yang dag pa'i gdams ngag rjes su ston pa la gnas pa dang / lus dang / ngag dang / yid kyi las thabs kyis zin par bya ste/ rim pa 'dis gang dag slob pa yin zhes bya ba'i bar de kho na khong du chud par bya'o/ /de ltar slob pa'i byang chub sems dpa' ni bla na med pa yang dag par rdzogs pa'i byang chub mngon par rdzogs par 'tshang rgya'o//sdom ni/ mos pa mang ba nyid dang ni/ /chos tshol ba dang ston pa dang / /de bzhin sgrub dang yang dag pa'i/ /gdams ngag rjes su ston pa dang / / lus dang ngag dang yid kyi las/ /thabs kyis zin pa tha ma yin/ /gang dag slob pa yin zhes bshad pa gang dag cig slob ce na/ byang chub sems dpa' dag slob bo/ /de ltar slob na bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ba'i byang chub sems dpa' mtshan nyid ji lta bu dag cig yin zhe na/de dag ni mdor bsdu na bcur rig par bya ste/ rigs la gnas pa dang / zhugs pa dang / bsam pa ma dag pa dang / bsam pa dag pa dang / bsam pa yongs su ma smin pa dang / bsam pa yongs su smin pa dang / ma nges par rtogs pa dang / skye ba gcig gis thogs pa dang / sred pa tha ma pa'o/ /yang byang chub sems dpa' 'di dag thams cad kyi ming bye brag med par ni de lta bu'i cha dang mthun pa 'di dag yin par rig par bya ste/'di lta ste/ byang chub sems dpa' sems dpa' che/ /blo dang ldan pa gsal ba'i mchog /ces bya ba la sogs pa yin no/ /'di'i lus ni de yin te/ de ni phyogs yin no/ /phyogs des gzhan yang khong du chud par bya'o//de la bsdus te bshad pa ni/ tshigs su bcad pa dang po gsum gyis ji lta ba bzhin du yod pa dang / ji snyed yod pa bstan te/ ji lta ba bzhin yod pa'i bshad pa ni/ ci zhes bstan pas ston to/ /ji lta ba zhe na/ byed pa po dang / las dang / byed pa dang /de'i phyir dang / rgyu'i don dang / yan lag gi don dang / ched kyi don te/ rnam par dbye ba bdun po 'di dag dang / don shes don ston rab tu byed pa zhes bya ba nas bzung ste/ de yi 'gro ba sems can la zhes bya ba'i bar dang / go rims bzhin no/ / ji snyed yod pa'i bshad pa ni/ grangs bstan pas rnam pa ji snyed yod pa'o/ /de yang rnam pa du zhig ce na/ rnam pa lnga ste/ 'byor pa'i don tshul bla na med gyur pa/ /lnga'i bdag nyid ces bya ba 'di nas bzung ste/ gser las brdungs byas pa la sogs pa lta bu dpe lngas bstan pa'i bar yin no//gzugs brnyan gyi dpes ni don 'di kho na rgyan nyid du ston par byed do/ /de ltar na bsdus te bshad pa/ rnam pa thams cad kyi don dang ldan pa'i phyir phyin ci ma log pa yin la/ rnam pa thams cad yongs su rdzogs pa'i phyir rgyas pa yang yin no//de la grong khyer la sogs pa'i ngag ni yan lag brgyad dang ldan pa yin par rig par bya ste/ grong khyer pa dang / snyan cing 'jebs pa dang / rnam par gsal ba dang / rnam par rig par byed pa dang / mnyan par 'os pa dang / brten pa med pa dang / mi mthun pa med pa dang / gtugs pa med pa'o/ /de la grong khyer pa ni mya ngan las 'das pa'i grong khyer gyi dbang du byas pa'i phyir ro/ /snyan cing 'jebs pa ni gdangs snyan pa'i phyir ro/ /rnam par gsal ba ni nges pa'i tshig dang / yi ge bzang ba'i phyir ro/ / rnam par rig par byed pa ni go bar byed pa yin pa'i phyir ro/ /mnyan par 'os pa ni chos kyi don dang ldan pa'i phyir ro/ /rten pa med pa ni rab tu dang ba lhag pa'i rten yin pa'i phyir ro/ /mi mthun pa med pa ni mngon par 'dod pa brjod pa'i phyir ro/ /gtugs pa med pa ni rgya chen po la mkhas pa'i phyir ro//rnam pa brgyad dang ldan pa'i ngag 'di ni mdor bsdun yon tan gsum dang ldan par rig par bya ste/ dbang du bya ba'i sgo nas ni rnam pa dang po gcig gis so/ /ngo bo nyid kyi sgo nas ni rnam pa gnyis kyis so/ /sbyor ba'i sgo nas ni rnam pa lhag ma rnams kyis so//tshig dri ma med pas zhes bya ba ni tshig dang yi ge rigs pa dang 'brel pa zhes bya ba ni tshig dang yi ge rigs pa zhes bya ba nas 'grus skyong gi yan lag gi tshogs zhes bya ba'i bar yin te/ tshig dang yi ge rigs pa dang / 'brel pa dang / mthun pa dang / rung ba dang / 'byor pa dang / 'phrod pa dang / 'tsham pa dang / 'grus skyong gi yan lag gi tshogs so/ /de la rigs pa ni ming dang / tshig dang / yi ge'i tshogs rnams go rims su legs par bkod pa'i phyir ro/ /yang rigs pa rnam pa bzhi la brten pa'i phyir rigs pa yin no//'brel pa ni sgrub pa dang 'byor pa'o/ /mthun pa ni rnam par bshad pa dang 'byor pa'o/ /rung ba ni tshig dang yi ge gsal ba'o/ /'byor pa ni snying la 'bab pa'i phyir ro/ /'phrod pa ni 'khor ji lta ba bzhin du'o/ /'tsham pa ni chos dang mthun pa dang /don dang ldan pa dang / dus dang 'tsham pa yin no/ /'grus skyong gi yan lag gi tshogs zhes bya ba la/ 'grus skyong zhes bya ba ni mkhas par byed pa dang / rtag tu byed pa ste/ de'i yan lag ni yang dag pa'i lta ba la sogs pa yin no//gser las brdungs byas zhes bya ba'i tshigs su bcad pa 'dis ni dpe lngas theg pa chen po'i chos de don rnam pa lnga'i dbang du byas nas bstan pa yin te/ bsgrub par bya ba dang / bye brag tu shes par bya ba dang / bsam par bya ba dang / bsam gyis mi khyab pa dang /yongs su grub pa rtogs pa'i don so so rang gis rig par bya ba dang / byang chub kyi phyogs dang mthun pa'i ngo bo nyid do/ /'di ni theg pa chen po dngos po lnga po dang / ngo bo nyid gsum dang / gang zag rnam par gzhag pa ste/ rnam pa gsum gyis 'grel to//de la dngos po lnga gang zhe na/ ming dang / rgyu mtshan dang / rnam par rtog pa dang / de bzhin nyid dang / rnam par mi rtog pa'i ye shes so/ /de la ming ni brdar tha snyad gdags pa mngon par brjod pa'i rang bzhin yin te/ de yang 'jig rten ni chos 'di dag ji ltar ming gis mngon par brjod pa de kho na bzhin du ngo bo nyid du yod do zhes ming gi sgo nas chos thams cad la mngon par zhen to//ming gis mngon par brjod pa gang yin pa de ni med de/ bcom ldan 'das kyis ji skad du/ming ni gang dang gang dag gis/ /chos ni gang dang gang brjod pa/ /de ni de la yod min de/ /'di ni chos rnams chos nyid yin/ /zhes gsungs pa lta bu'o/ /ming gi sgo nas chos rnams la ngo bo nyid du mngon par zhen pa de dag la ming gis mngon par brjod pa gang yin pa de ni ngo bo nyid kyis med do zhes bya ba 'di shes par bya dka' ba'i phyir bsgrub par bya ba yin no//de dang chos mthun par gser las brdungs byas pa dang 'dra ste/ dper na bsreg pa dang / chus gdab pa dang / brdung ba la sogs pa 'bad pa chen pos gser las su rung par byas pa rgyan la sogs par brdungs na rnam par mdzes pa de bzhin du theg pa chen po 'di yang ming gis ngo bo nyid du mngon par zhen pa rnams la ming gis mngon par brjod pa gang yin pa de ni ngo bo nyid med do zhes rang gi phyogs sgrub pa dang /gzhan gyi phyogs sun dbyung ba la sogs pas bsgrubs na gsar las brdungs su byas pa bzhin dga' ba'i mchog skyed pas sgrub pa zhes bshad do//rgyu mtshan ni gang la rten nas mi 'jug pa ste/ mngon par brjod pa'i bdag nyid kyi ming de nyid kyi rten gyi dngos po gzhan gyi dbang gi ngo bo nyid gzung ba'i cha yin no//dngos po de yang rten cing 'brel bar 'byung ba snang ba tsam gyi rang rig pa yin te/ de ni bye brag tu shes par bya ba 'ba' zhig tu zad do/ /rang rig pa de la ni 'jig rten mtshar cig log par rtogs pa med pas bye brag tu shes par bya ba 'ba' zhig tu zad do//de dang chos mthun par dpe pad+ma ste/ dper na 'bad pa med par nyi ma'i 'od zer gyis kha bye ba'i pad+ma dga' ba'i mchog bskyed pa de bzhin du rten cing 'brel bar 'byung ba'i dngos po 'bad pa med par shes par byas pa yang dga' ba'i mchog skyed pas bye brag tu shes par bya ba zhes bshad do//rnam par rtog pa ni rten cing 'brel bar 'byung ba dngos po tsam de nyid sems dang sems pas byung ba 'dzin pa'i char rab tu skye ba yin te/ tshul bzhin tu rnam par rtog pa dam pa'i chos nyan pa'i rgyu las byung ba bdag gis bsam par bya ba yin no//ji skad du chos mngon pa kun las btus pa las chos la rab tu brtson pa chos rnams dpyod par byed pa na/ rigs pa du zhig gis dpyod par byed ce na/ ltos pa'i rigs pa dang / bya ba byed pa'i rigs pa dang / 'thad pa sgrub pa'i rigs pa dang / chos nyid kyi rigs pa ste/ rigs pa bzhis so/ /rigs pa 'di bzhis tshul bzhin du rnam par brtags na kun nas nyon mongs pa spong ba dang / rnam par byang ba dang / mthun par yang 'gyur ro zhes bshad pa lta bu'o/ /de dang chos mthun par dpe g.yos legs pa'i kha zas te/dper na g.yos legs pa'i kha zas kha dog dang ro la sogs pa phun sum tshogs pa bkres pas nyen pa rnams kyis zos na dga' ba'i mchog bskyed pa de bzhin du/ theg pa chen po'i chos bdud rtsi dang 'dra ba 'di yang dam pa'i chos nyan pas bkres pa tshul bzhin du rnam par rtog pa rnams kyis dpyad na dga' ba'i mchog skyed pas bsam par bya ba zhes bshad do//de bzhin nyid ni bsam gyis mi khyab pa yin te/ bsam pa'i spyod yul las yang dag par 'das pa'i phyir dang so so rang gis rig par bya ba yin pa'i phyir ro//ji skad du theg pa chen po bsdus pa las/ chos kyi sku ni bsam gyis mi khyab pa'i mtshan nyid do zhes bshad pa lta bu ste/ de bzhin nyid rnam par dag pa de 'jig rten na dpe med pa dang / rtog ge'i spyod yul ma yin pas so so rang gis rig par bya ba yin pa'i phyir ro//de dang chos mthun par dpe phrin yig ste/ dper na phrin yig legs par mkhas pa rnams kyi lag tu son na don log pa'i rnam par rtog pa spangs pa'i sgo nas mchog tu dga' ba skyed pa de bzhin du/ de bzhin nyid so so rang gis rig par bya ba rtog ge'i spyod yul las yang dag par 'das pa yang sangs rgyas dang byang chub sems dpa' rnams la sa dang po thob pa'i dus nas bzung ste/dga' ba zag pa med pa dpe med pa skyed par byed de/ byis pa de kho na nyid ma rtogs pa rnams kyi bsam pa'i yul las yang dag par 'das pa'i phyir bsam gyis mi khyab pa zhes pa bshad do//rnam par mi rtog pa'i ye shes byang chub kyi phyogs dang mthun pa'i ngo bo ni yongs su grub pa rtogs pa'i don so so rang gis rig par bya ba byang chub kyi phyogs dang mthun pa'i ngo bo nyid yin no//yang ci'i phyir yongs su grub pa'i ngo bo nyid du 'dra ba las/ de bzhin nyid ni bsam gyis mi khyab par bshad la/ rnam par mi rtog pa'i ye shes la sogs pa/ byang chub kyi phyogs dang mthun pa'i chos rnams ni ma yin zhe na/de ni de ltar bden mod kyi/ de bzhin nyid ni nam yang de kho na nyid ma rtogs pa rnams kyis rang gis rig par bya ba ma yin no/ /byang chub kyi phyogs dang mthun pa'i sems dang sems las byung ba'i ngo bo nyid dag ste/ zag pa med pa de dag de kho na nyid rtogs pa rnams kyi so so rang gis rig par bya ba yin mod kyi/de yang thos pa dang bsam pa'i gnas skabs na de kho na nyid ma rtogs kyang chos kyi sku'i rgyu mthun pa theg pa chen po'i dam pa'i chos mnyam pas tshul bzhin rab tu sbyor ba rnams kyis so so rang gis rig par bya ba dang mthun par 'gyur ro//ji skad du theg pa chen po bsdus pa las yongs su grub pa'i ngo bo nyid du ji lta bu yin par rig par bya zhe na/ rnam par byang ba'i chos rnam pa bzhi bstan pas rig par bya'o/ /rnam par byang ba'i chos rnam pa bzhi bstan pa la rang bzhin gyis rnam par byang ba ni de bzhin nyid la sogs pa'o//dri ma dang bral bas rnam par byang ba ni 'di lta ste/ de nyid sgrib pa thams cad dang bral ba'o/ /de 'thob pa'i lam gyis rnam par byang ba ni byang chub kyi phyogs dang mthun pa'i chos thams cad do/ / de skye ba'i dmigs pa ni rnam par byang ba ni 'di lta ste/ theg pa chen po'i dam pa'i chos bstan pa'o zhes bshad pa lta bu ste/ 'di ltar de ni rnam par byang ba'i rgyu mtshan yin pa'i phyir/ kun brtags pa yang ma yin la/ chos kyi dbyings shin tu rnam par dag pa'i rgyu mthun pa yin pa'i phyir/gzhan gyi dbang yang ma yin no/ /de'i phyir thos pa dang bsam pa'i gnas skabs na byang chub kyi phyogs dang mthun pa zag pa med pa dang / mthun pas zag pa med pa bzhin nye bar gdags te/ 'di ni khyad par yin par mngon no/ /de ltar re zhig theg pa chen po dngos po lnga dang chos mthun par bsgrub par bya ba la sogs pa'i dngos po lnga gser las brdungs byas pa la sogs pa'i dpe lnga dang bcas te bshad pa yin no//rnam pa gcig tu ngo bo nyid gsum du bshad do/ /ji lta zhe na/ re zhig bsgrub par bya ba zhes smos pa gang yin pa de'i bshad pa ni ji skad du theg pa chen po bsdus pa las sangs rgyas bcom ldan 'das rnams kyis theg pa chen po shin tu rgyas pa bstan pa gang yin pa'i bstan pa de la kun brtags pa'i ngo bo nyid ji lta bu yin par rig par bya zhe na/rab 'byor sangs rgyas med do//chos med do/ /dge 'dun med do zhes bya ba de lta bu la sogs pa bstan pas so zhes bshad pa lta bu ste/ tshig dang yi ge skrag pa skyed par byed pa 'di dag ni 'jig rten gyis thos na skrag par 'gyur ro/ /kun brtags pa'i ngo bo nyid de ni bsgrub par bya'o zhes bshad de/chos 'di dag ni rnam pa thams cad du med pa kho na ma yin no/ /'on kyang byis pa'i skye bos kun brtags pa'i bdag nyid du med de/ ji skad du bcom ldan 'das kyis/ chos kun med phyir rnam dag gang / /kun nas nyon mongs med de gang //ji ltar mthong ba de ltar med/ /de dag med na kho na'ang min/ /zhes gsungs pa lta bu'o/ /de dang chos mthun par dpe gser te/ dper na gser bsregs pa dang / brdungs pa la sogs pa 'bad pa chen pos las su rung bar byas pa gdu bu dang dpung rgyan la sogs pa'i ngo bor brdungs su byas pa dga' ba bskyed pa de bzhin du kun brtags pa'i ngo bo nyid kyang bsgrubs na yang dag pa ji lta ba bzhin rtogs pa'i sgo nas skye bo ya rabs kyi dga' ba'i mchog bskyed pas bsgrub par bya'o zhes bshad do//gzhan gyi dbang gi ngo bo nyid ni rten cing 'brel par 'byung ba bde ba dang / sdug bsngal la sogs pa so so rang gis rig par bya ba yin te/ theg pa chen po las kun brtags pa'i ngo bo nyid bsgrubs na gzhan gyi dbang gis bsdus pa'i chos rnams bye brag tu shes par bya sla bas bye brag tu shes par bya'o zhes bshad do//de dang chos mthun par dpe pad+ma ste/ snga ma dang mthun par khong du chud par bya'o/ /gzhan gyi dbang gi ngo bo nyid kho na nyid bsam par bya ba yin te/ sems dang sems las byung ba'i ngo bo nyid de ni 'dod chags la sogs pa mi dge ba'i chos bsal ba dang /dad pa la sogs pa dge ba'i chos la goms pas tshul bzhin du bsam par bya ba yin no/ /de dang chos mthun par dpe kha zas te/ snga ma dang mthun par khong du chud par bya'o/ /yongs su grub pa'i ngo bo nyid ni rnam pa gnyis te/de bzhin nyid kyi ngo bo nyid dang / rnam par mi rtog pa'i ye shes byang chub kyi phyogs dang mthun pa'i ngo bo nyid do/ /de la de bzhin nyid ni bsam gyis mi khyab pa yin te/ ji skad du sngar bshad pa yin no/ /'phags pa dkon mchog sprin gyi mdo las kyang /byang chub sems dpa' sgrib pa thams cad rnam par sel bas gsol pa/ bcom ldan 'das de kho na nyid ces bgyi ba 'di ci lags/ bcom ldan 'das kyis bka' stsal pa/ /rigs kyi bu 'di lta ste/ de kho na nyid ces bya ba ni/yang dag pa'i don gyi tshig bla dgas yin no/ /gsol pa/ bcom ldan 'das yang dag pa zhes bgyi ba 'di ci lags/ bcom ldan 'das kyis bka' stsal pa/ rigs kyi bu mi slu ba gang yin pa de ni yang dag pa yin no/ /gsol pa/bcom ldan 'das mi slu ba zhes bgyi ba 'di ci lags/ bcom ldan 'das kyis bka' stsal pa/ de bzhin nyid dang / phyin ci ma log pa de bzhin nyid dang / gzhan ma yin pa de bzhin nyid gang yin pa'o/ /gsol pa/ bcom ldan 'das de bzhin nyid ces bgyi ba de ci lags/bcom ldan 'das kyis bka' stsal pa/ rigs kyi bu chos 'di ni so so rang gis rig par bya ba yin gyi/ chos 'di yi ge dag gis gdags par ni mi nus so/ /de ci'i phyir zhe na/ chos 'di ni yi ge thams cad las yang dag par 'das pa'o//chos 'di ni mngon par brjod pa thams cad las yang dag par 'das pa ste/ ngag gi spyod yul las yang dag par 'das pa/ ngag gi lam thams cad las yang dag par 'das pa/ spros pa thams cad dang bral ba'o/ /rtog ge thams cad dang bral pa ste/brtag par bya ba ma yin pa/ rtog ge'i spyod yul ma yin pa/ rtog ge'i spyod yul las yang dag par 'das pa'o/ /byis pa'i yul las yang dag par 'das pa ste/ byis pa'i spyod yul las yang dag par 'das pa'o/ /rnam par shes pa'i spyod yul las yang dag par 'das pa ste/chos kyi dbyings bsam gyis mi khyab pa zhes bya'o zhes gsungs so/ /de ltar na de bzhin nyid ces bya ba'i chos 'di ni spros pa dang / rtog ge dang / rnam par shes pa'i spyod yul thams cad las yang dag par 'das pa'i phyir byis pa rnams kyis bsam gyis mi khyab pa zhes bya'o//de dang chos mthun par dpe phrin yig kyang snga ma dang mthun par khong du chud par bya'o/ /rnam par mi rtog pa'i ye shes byang chub kyi phyogs dang mthun pa'i ngo bo nyid so so rang gis rig par bya ba rtogs pa'i don de dang chos mthun par dpe rin po che'i sgrom ste/dper na rin po che'i sgrom kha gab phye na dga' ba'i mchog bskyed pa de bzhin du/ 'di yang byang chub sems dpa' de kho na nyid kyi don rtogs pa byang chub kyi phyogs dang mthun pa rnam par mi rtog pa la sogs pas rgyud gsal bar byas pa rnams la dga' ba chen po bskyed pas yongs su grub pa rtogs pa'i don so so rang gis rig par bya ba byang chub kyi phyogs dang mthun pa'i ngo bo nyid du bshad do//ngo bo nyid gsum du bshad pa ni de lta bu yin no/ /de nas gang zag rnam par gzhag pas bshad pa ji lta bu zhe na/'di na gang zag rnam pa gsum zhig snang ste/ mi shes pa dang / the tshom can dang / log par shes pa rnams so/ /de la log par 'dzin pa la mngon par zhen pa rnams dang the tshom can rnams la ni log par 'dzin pa dang the tshom bsal ba'i phyir 'di kho na theg pa chen po yin gyi/gzhan gyi ni ma yin no zhes theg pa chen po'i chos bsgrub par bya ba yin no/ /de dang chos mthun par dpe gser te/ snga ma bzhin du rig par bya'o/ /mi shes pa rnams la ni bye brag tu shes par bya ba yin pas de dang chos mthun par dpe pad+ma ste snga ma bzhin du rig par bya'o//de ltar zhugs pa'i gang zag de dag nyid kyis bsam gyis mi khyab pa'i gnas rnams spang bar bya ste/ ji skad du sangs rgyas kyi bya ba sgrub pa'i phrin las bsam gyis mi khyab po/ /phyi rol gyi dngos po thams cad sna tshogs mngon par 'grub par byed pa'i las bsam gyis mi khyab bo//nor bu dang / sman dang / mkhyud dpyad kyi sbyor ba dang ldan pa'i las bsam gyis mi khyab bo zhes gsungs pa lta bu ste/ de la sogs pa bsam gyis mi khyab pa'i gnas rnams la sems na sems bslad pa'i gnas dag tu 'gyur bas bsam gyis mi khyab par bshad do//de'i phyir bsam gyis mi khyab pa'i gnas spong ba'i phyir ro/ /bsam par bya ba'i gnas sems pa'i phyir dga' ba chen po skye bas dpe phrin yig dang kha zas te/ snga ma dang mthun par khong du chud par bya'o/ /gang zag de dag nyid tshul bzhin du rab tu sbyor na yongs su grub pa rtogs pa'i don so so rang gis rig par bya ba byang chub kyi phyogs dang mthun pa'i ngo bo nyid rtogs par 'gyur ro/ /de dang chos mthun par dpe rin po che'i sgrom ste/dper na rin po che'i sgrom kha gab phye ste/ rin po che dag snang na dga' ba bskyed pa de bzhin du/ byang chub kyi phyogs dang mthun pa'i chos rnams kyis theg pa chen po'i chos sa dang pha rol tu phyin pa zhes bya ba'i mi mthun pa'i phyogs su gyur ba'i chos nyon mongs pa dang /shes bya'i sgrib pa'i gnas lta bu gang dag yin pa de dag bsal bas dga' ba chen po yang skye la/ rgyud kyang gsal bar 'gyur ro/ /de'i phyir don lnga pa yongs su grub pa byang chub kyi phyogs kyi ngo bo nyid so so rang gis rig par bya ba zhes bya ste/de ni gang zag rnam par gzhag pas bshad pa yin no/ /theg pa chen po las ni gdul ba'i skye bo la ltos te/ bsgrub par bya ba la sogs pa'i don gyi khyad par de dag tsam zhig ston te/ ngo bo nyid med pa la sogs pa'i don ni sgrub par byed do//gzhan gyi dbang gi ngo bo nyid du bsdus pa sems dang sems las byung ba'i rang bzhin dang ni bye brag tu shes par bya ba yin no/ /de dag nyid mi dge ba'i chos yongs su spangs pa dang / dge ba'i chos sgom pas bsam par bya ba yin pas na bsam par bya ba dag tu bstan to//sangs rgyas kyi bya ba bsgrub pa dang / phyi rol gyi dngos po sna tshogs mngon par 'grub par byed pa dag ni bsam gyis mi khyab pa'i gnas su gyur ba'i phyir bsam gyis mi khyab pa zhes bshad do/ /yongs su grub pa rtogs pa'i don so so rang gis rig par bya ba byang chub kyi phyogs dang mthun pa'i chos rnams yin te/mdo sde'i rgyan 'dis rnam par bkrol lo/ /chos lnga po 'di dag gis ni chos thams cad yang dag par bsdus par bstan la/ 'di dag yang dag par rnam par bkrol bas gser la sogs pa dang chos mthun par mkhas pa rnams dga' ba bskyed de/de ni bsdus pa'i don yin no/ /don shes pa don ston par ni chos de brgyan par byed kyi/ gzhan gdu bu dang dpung rgyan la sogs pas ma yin pas de'i phyir phyogs snga ma gang gi tshe chos de rang bzhin gyis yon tan dang ldan pa yin na/ji ltar de brgyan par byed ces bya ba gleng bar byed do/ /de yongs su spang ba'i phyir tshigs su bcad pa rtsom par byed de/ gzugs rgyan ces ba bya la sogs pa ni ji ltar gdong gi gzugs bzang po brgyan pa me long gi nang du song na/shin tu dga' ba bskyed pa de bzhin du/ theg pa chen po'i chos kyi gzugs sa dang pha rol tu phyin pa la sogs pa thun mong ma yin pa bstan pa rang bzhin gyis yon tan dang ldan pa 'di yang don bstan pa'i me long shin tu dri ma med pa'i nang du snang na dga' ba skyed pas brgyan pa yin no//da ni sman la sogs pa'i dpe gsum gyis chos kyi bsngags pa ston par byed do/ /sman gyi rigs la la 'di 'dra ste/ gang gi tshe ba snam sa na ni sna'i dbang po tshim par mi byed cing skyo ba skyed la/ sman de nyid gang gi tshe lce'i dbang pos myangs na ni ro phun sum tshogs pas lce'i dbang po tshim par byed cing dga' ba yang skyed/spyad de 'ju ba na rim gyis lus la yod pa'i nad thams cad kyang sel bar byed do/ /de bzhin du theg pa chen po'i chos gnyis su gnas pa yang go rims bzhin du sman dku la zhim pa dang 'dra bar mi dga' ba skyed par byed pa dang dga' bskyed par byed pa yin te/rab 'byor sangs rgyas med do/ /chos med do/ /dge 'dun med do zhes bya ba de lta bu la sogs pa'i ming dang / tshig dang / yi ge dag thos nas bsnams na rab tu dku ba'i sman bzhin du skyo ba skyed do//gang gi tshe dge ba'i bshes gnyen dang 'phrad nas/ ming dang / tshig dang / yi ge 'di dag gi don ni sgra ji bzhin pa ma yin no zhes bya ba de lta bu la sogs pa theg pa chen po'i don rtogs pa de'i tshe myangs na zhim pa'i sman myangs pa bzhin du dga' ba skyed la/thos pa dang / bsam pa dang / bsgom pa'i rim gyis bsgoms na nyon mongs pa dang shes bya'i sgrib pa'i nad nye bar zhi bar byed pas sgrib pa spang ba'i rgyu nyid du bstan to/ /rgyal po mnyes par dka' ba zhes bya ba ni/ yab dang sras mjal ba'i mdo las/ 'char byed kyis ji skad du/ rgyal po rnams ni bsnyen par dka' ba lags te/ mnyes par bgyid dka' ba lags so/ /nam zhig mnyes par bgyis na ji ltar 'dod pa'i don stsol bar bgyid pa lags so zhes bshad pa lta bu'o//de bzhin du theg pa chen po'i chos kyang mnyes par dka' ba yin te/ ji skad du 'phags pa blo gros rgya mtsho'i mdo las/ blo gros rgya mtsho sangs rgyas su 'gyur bar bya'o zhes bya ba 'di ni rnyed par sla'o/ /tshogs rnams yang dag par bsgrub par bya ba ni dka'o zhes gsungs pa lta bu yin no//gang gi tshe go cha'i brtson 'grus la sogs pa'i brtson 'grus las brtsams pas mgu bar byed pa de'i tshe yon tan khyad par can mngon par shes pa dang / stobs dang mi 'jigs pa la sogs pa'i yon tan rnams kyis dbang phyug rnyed par 'gyur bas dbang 'byor ba'i rgyu nyid du bstan to//rin po che rigs dang ldan pa ni rang bzhin gyis 'od gsal zhing dbyibs kyi tshad la sogs pa phun sum tshogs pa yin te/ rin po che de lta bu skye bo lta mi shes pa'i lag tu son na skye bo lta mi shes pa de'i sems yongs su mgu bar mi 'gyur gyi/de nyid skye bo lta shes pa'i lag tu son na skye bo de rab tu dga' ba mchog gis mgu bar byed cing gser la sogs pa gzhan mang po'i rgyur yang 'gyur ro/ /de bzhin du theg pa chen po'i chos 'di yang skye bo lta mi shes pa don mngon par mi shes pa'i lag tu son na dga' ba mi skyed kyi/gang gi tshe 'di nyid skye bo lta shes pa'i lag tu son par gyur pa de'i tshe dga' ba dang rab tu dga' ba'i mchog kyang skyed la/ 'phags pa'i nor dad pa dang / tshul khrims dang / thos pa dang / gtong ba dang / shes rab dang /ngo tsha shes pa dang / khrel yod pa la nye bar spyod pa'i rgyu mtshan yin pas 'phags pa'i nor la spyod pa'i rgyu nyid du bstan to/ /da ni chos kyi yon tan brjod pa sgrub pa'i skabs yin te/ spyod yul ma yin zhes bya ba ni la la 'di snyam du theg pa chen po 'di ni rtog ge pa rnams kyis gzhan dag bslu bar bya ba'i phyir bkod pa yin te/'di ltar de dag la yang tshul 'di lta bu dmigs so/ /de bas na kho bo ni der dogs so zhes bya bar sems na/ de ltar dogs par byar mi rung ba de nyid de/ sa dang pha rol tu phyin pa la sogs pa'i tshul zab cing rgya che ba dang ldan pa de lta bu ni mu stegs can gyi bstan bcos dag la mi dmigs so//gzhan yang khyod pha rol tu phyin pa bstan pa la dad pa yin na/ ji ltar 'phags pa blo gros mi zad pa dang / blo gros rgya mtsho dang / dkon mchog sprin dang /lag bzangs la sogs pa'i mdo las/ pha rol tu phyin pa bstan pa thos nas 'di ni rtog ge pas bkod pa yin no zhes bya bar sems dad par 'gyur ro/ /bdag med pa la sogs pa'i tshig gi don gang yin pa dag la ma mos pa de dag ni gang zag la sogs pa bstan pa bzhin du sgra ji bzhin pa'i don ma yin te/de dag byis pa'i skye bos kun brtags pa'i bdag nyid du ngo bo nyid med pa yin gyi/ 'phags pa'i ye shes dang de'i rjes la thob pa'i ye shes kyi yul nyid du ni ma yin pas gnas ma yin par dogs par ma byed cig /yod dang med na yod med dang / /zhes bya ba la/ yod pa dang med pa ni yod dang med do/ /de yod dang med na go rims bzhin du yod pa'i phyir dang / med pa'i phyir te/ gal te theg pa chen po cung zad gcig yod na ni/ de yod dang 'di sangs rgyas kyi bka' yin par grub ste/'di las gzhan pa'i theg pa chen po med pa'i phyir ro zhes bya ba 'di ni yod na yod pa'i rnam par bshad pa yin no/ /'on te med na ni de med dang nyan thos kyi theg pa yang med de/ sangs rgyas kyi theg pa med par nyan thos kyi theg pa med do//'di ni med na med pa'i rnam par bshad pa yin no/ /bsod nams dang ye shes kyi tshogs kyis bsdus pa'i ston pa yang chung la zhes bya ba ni gzar bu gang tsam byin pas gang zag la bdag med pa yongs su 'dzin pa yin no/ /rang gi theg pa chen po'i mdo sde la yang 'jug pa kho na'o zhes bya ba 'di'i sbyar ba gang yin zhe na/nyan thos kyi theg pa pa rnams na re sangs rgyas bcom ldan 'das kyi gsung gi mtshan nyid ni nag po bstan pa dang / chen po bstan pa las gang mdo sde la yang 'jug /'dul ba la yang snang / chos nyid dang yang mi 'gal ba'o zhes bstan te/ de ni sangs rgyas kyi bka' yin na theg pa chen po 'di ni chos thams cad ngo bo nyid med par ston pa'i phyir mdo sde la yang mi 'jug la/ sangs rgyas med do/ /chos med do/ /dge 'dun med do zhes bya ba de lta bu la sogs pa 'don na ltung byed dang bcas par 'gyur bas 'dul ba la yang mi snang ngo zhes zer ba la sogs pa ni de dag gi tshig gi skabs yin no//de dag la 'di 'dri bar bya ste/ theg pa chen po'i mdo sde ni gang la mi 'jug /'dul ba ni gang la mi snang / re zhig gal te 'phags pa thams cad yod par smra ba'i lung gi mdo sde la yang mi 'jug go//'dul ba la yang mi snang ngo zhe na/ de ni sde pa bcwa brgyad kyi mdo sde mang po rnams phan tshun 'gal te/ 'phags pa mang pos bkur ba'i sde pa rnams ni stong pa nyid dang ldan pa'i mdo sde rnams mi brjod do//'phags pa dge 'dun phal chen sde pa rnams ni srid pa bar ma ston pa'i mdo sde rnams spong ngo / /de bzhin du mdo sde gzhan dang gzhan dag kyang sde pa tha dad pa rnams kyi phan tshun 'gal bas de dag kyang sangs rgyas kyi bka' ma yin pa nyid du 'gyur la/ 'dul ba dang / chos mngon pa cho ga tha dad pa dang / gzhung lugs tha dad pas phan tshun 'gal ba de dag kyang phan tshun 'gal ba'i phyir sangs rgyas kyi bka' ma yin pa nyid du 'gyur ro/ /'on te bdag nyid kyi sde pa rnams la rang gi sde pa'i mdo sde la 'jug pa yin no zhe na/ theg pa chen po yang rang gi theg pa chen po'i mdo sde la yang 'jug pa kho na'o//nyon mongs pa 'dul ba la sogs pa la yang snang ngo / /zab cing rgya che ba'i chos nyid dang yang mi 'gal te/ byang chub chen po 'thob par 'gyur ba'i chos nyid ni 'di kho na yin na/ ji ltar sangs rgyas kyi bka' nyid ma yin/'on te sde pa thams cad kyis bsdus pa gang yin pa de sangs rgyas kyi bka' yin no zhe na ni sde pa thams cad bsdus pa'i phyir theg pa chen po kho na sangs rgyas kyi bka' yin par 'gyur gyi/ nyan thos kyi theg pa ni ma yin no/ /de bas na mtshan nyid dang mi 'gal ba'i phyir theg pa chen po sangs rgyas kyi bka' yin no zhes bya ba 'di ni 'thad pa yin no//de las gzhan dang gzhan med ces bya ba ni de las gzhan pa'i theg pa chen po yang med pa'i phyir la/ nyan thos dang rang sangs rgyas kyang med pa'i phyir ro/ / gzhan dang gzhan zhes smos pa ni theg pa chen po dang / nyan thos dang / rang sangs rgyas dag dang sbyar bar bya'o/ /sangs rgyas bcom ldan 'das rnams kyi dgongs pa ni shin tu zab ces bya ba la dgongs pa ni bsam pa ste/ sangs rgyas bcom ldan 'das rnams ni bsam pa dang /bag la nyal yongs su mkhyen pa'i phyir dgongs pa mang pos chos ston pas sangs rgyas bcom ldan 'das rnams kyi dgongs pa ni zab ces bya'o/ /ring du rjes su zhugs pa'i ye shes kyi spyod yul ni ring du rjes su zhugs pa'i ye shes kyi spyod yul te/ gang la thams cad du thogs pa med pa'i ye shes 'jug pa yod pa de spang bar bya bar rigs na de med pa na go ji ltar spang bar bya'o//de las de'i 'bras bu chos 'thob bo zhes bya ba'i yang dag pa'i lta ba'i 'bras bu rnam par grol ba dang / rnam par grol ba'i ye shes te de dag 'thob bo//re zhig gal te bdag gis 'di mi shes pas skrag pa'i gnas yin no zhe na/ de ni rigs pa ma yin no/ /ci'i phyir zhe na/ 'di ni dge ba'i rtsa ba ma bsags pa dge ba'i bshes gnyen la bsnyen bkur ma byas pa rnams kyis rtogs par mi nus so/ / rtogs par dka' ba 'di nyid sems la bzhag nas sems dang bcas pas theg pa chen po rtogs par byed pa'i phyir/ mgo dang gos la me 'bar ba bzhin du dge ba'i bshes gnyen la bsnyen bkur bya ba la 'bad par bya'o/ /'dir tshigs su bcad pa/ gal te thabs tshul mkhas pas blo rnams ma dub na//skye bo thabs la mkhas pa'i spyod pa'i rjes su 'brangs/ /gal te de yang mi 'dod mchog dga' bral ba yin/ /phongs pa mang du yongs su spyod pa lta gon gyis/ /'on te sangs rgyas kyang tshig gi don zab mo thugs su chud pa ma yin na/de ci'i phyir zab mo ston par 'gyur zhes skrag pa'i gnas yin no zhe na/ de yang rigs pa ma yin no/ /ci'i phyir zhe na/ bcom ldan 'das kyi mtshan nyid 'di ni don dang mthun pa yin te/ nyon mongs pa dang shes bya'i sgrib pa bag chags dang bcas te spangs pa'i phyir dang /shes bya thams cad la rnam par mi rtog pa'i ye shes kha bye ba'i phyir sangs rgyas yin no/ /gal te sems can 'di lta bus kyang khyad par dag thugs su ma chud na bdag cag la sogs pas lta smos kyang ci dgos te/ de la yang skrag par rigs pa ma yin gyi/dge ba'i bshes gnyen la bsnyen bkur bya ba kho na la 'bad par gyis shig dang / de nas ci sangs rgyas kyis zab mo thugs su chud dam 'on te ma yin zhes bya ba bdag nyid kyis shes par 'gyur ro/ /'on te ci'i phyir zab mo rtog ge pa'i spyod yul ma yin zhes skrag pa'i gnas yin no zhe na/de yang rigs pa ma yin no/ /ci'i phyir zhe na/ rtog ge gsal ba la 'bad par bya'i skrag par bya ba ni ma yin no/ /de ltar na theg pa chen po'i chos 'di ni rtog ge pa rnams kyi spyod yul yang ma yin no/ / gang gi phyir de ltar yin pas na/ bcom ldan 'das la byang chub sems dpa' dang / nyan thos la sogs pas bstod pa/ thub pa skyes mchog dgongs pa ni/ /rtog ge pa yi yul ma lags/ /byis pa'i spyod yul ma lags te/ /sems dang sems byung rnams las 'das//slob dpon ma khol gyi zhal snga nas kyis kyang bdag ni rtog ge pa yin na/ nyan thos rtog pa po gang dag yin pa de dag kyang stobs dang mi 'jigs pa la sogs pa nus pa rdugs so snyam nas/ bcom ldan 'das la bstod pa/ gal te skal chen de dag kyang ni khyod la mthu rdugs na//bdag 'dra srid pa'i phyi sa'i srin bus bsam skabs ga la mchis/ /yid kyi nyes pa rang bzhin gdug pa ste/ /mi rigs pa yi gzugs la'ang mi rigs na/ /zhes bya ba ni mi rigs pa'i gzugs phan pa ma yin pa la sogs pa byed pa sgra la sogs pa gang yin pa de la yang khong khro ba bskyed par rigs pa ma yin no//ci'i phyir zhe na/ chos mngon pa kun las btus pa las/ ji skad du nyon mongs pa'i skabs nas/ mtshan nyid kyis ji lta bu zhe na/ chos gang zhig skye ba na rab tu ma zhi bar skye la/gang zhig skyes nas kyang sems kyi rgyud rab tu ma zhi bar 'byung ba de ni nyon mongs pa'i mtshan nyid do/ /de lta bas na gang zhig skyes na sems kyi gnas skabs 'di 'dra bar 'gyur ba khong khro ba ni dgra la sogs pa phan pa ma yin pa la sogs pa la zhugs pa dag la yang bskyed par mi bya'o zhes bshad pa lta bu'o//bcom ldan 'das kyis kyang mdo sde de dang de dag las lhangs por bkag ste/ bcom ldan 'das kyis sog le lta bu la sogs pa'i mdo las/ sdong dum tshig pa la yang zhes bya ba rgyas par gsungs so//gang the tshom za ba de la sems dang bcas pas ji ltar khong khro ba bskyed par rigs/ de nyid kyi phyir mkhas pa rnams/ /grog mkhar du ni lag bcug nas/ /yon tan cung zhig rnyed mi 'gyur/ /gal te sbrul zhig yod gyur na/ /byis pa dag ni phung bar 'gyur//zhes gdon to/ /gzhan dag kyang / 'jig rten pha rol the tshom yang / /mdzangs pa rnams kyis sdig pa spang / /brgya la med na'ang der zad mod/ /gal te yod na med lta brlag /ces zer ro/ /re zhig mkhas pas ni gzu bo'i gzhung bzung la skye bo mkhas pa mgu bar 'gyur ba'i rigs pa 'di khong du chud par byas pa dang /ci 'di khong khro ba'i gzhi yin nam/ 'on te dad pa'i gzhi yin zhes bya ba 'di bdag nyid kyis shes par 'gyur ro/ /rigs pa khas mi len na ni blo the tshom can rang bzhin gyis kha na ma tho ba dang bcas pa khong khro ba spang bar 'dod pas btang snyoms su bya'o//theg pa chen po sgrub pa'i skabs so// //don shes pa don ston pas chos brgyan par byed do zhes bshad pa dang / gang gi tshe chos de rang bzhin gyis yon tan dang ldan pa yin na ji ltar brgyan par byed ces bya ba'i klan ka 'di yongs su spang ba'i phyir/gzugs rgyan rang bzhin yon tan ldan pa me long nang song na/ /zhes bya ba smos te/ 'di kho nas 'di rgyan nyid yin par bstan to/ /chos kyi bsngags pa ni sman la sogs pa'i dpe gsum gyis bshad do//de'i 'og tu kha cig theg pa chen po 'di sangs rgyas kyi bka' yang ma yin na/ de la yon tan 'di lta ga la yod ces log par zhugs pa la chos la dbang ba bsngags par yon tan brjod pa bsgrub pa'i skabs su ji ltar theg pa chen po 'di kho na yin gyi gzhan ni ma yin no zhes bya ba de ltar theg pa chen po bsgrub par bya'o//theg pa chen po bsgrubs pa dang sangs rgyas nyid thob par byed pa'i lam ni 'di kho na yin gyi gzhan ni ma yin no zhes rangs par gyur pa gang dag sangs rgyas nyid don du gnyer ba de dag la theg pa chen po'i mchog bstan pas ji ltar na sangs rgyas la sogs pa dkon mchog dag la skyabs su 'gro bar 'gyur ba de ltar skyabs su 'gro ba'i dbang du byas te/rang dang gzhan la legs par byed pa sangs rgyas nyid don du gnyer bas chos la 'dzud do/ /nges pa zhes bya ba'i sgra ni smon lam yin par bshad do//theg pa mchog la skyabs su 'gro ba ni/ 'jig rten pa dang / 'jig rten las 'das pa'i grags pa dag gi rgyu yin no/ /de dag gi nyes pa dang / yon tan la rnam par mi rtog pa'i phyir/ /de la 'khor ba dang mya ngan las 'das pa la bye brag med do zhes bya ba ni shes rab kyis 'khor ba'i nyes pa dang /snying rjes mya ngan las 'das pa'i yon tan la mi rtog go/ /de kho na'i dngos po don du gnyer ba ste zhes bya ba ni skyabs 'os kyi dngos po ste/ bdag kyang sangs rgyas su gyur cig ces bya ba yin no/ / 'khor los sgyur ba'i bu mtshan nyid ji lta bu dang ldan pa zhig 'khor los sgyur ba'i rigs rgyud mi gcod par rung zhe na/ gal te 'khor los sgyur ba kho na btsun mo dam pa la sa bon 'jog par byed kyi/ ngan pa dang bran mo la sogs pa la ma yin pa dang /pha dang ma phun sum tshogs pa'i sa bon de yang gal te mngal gyi gnas su son pa na rlung dang / mkhris pa dang / bad kan la sogs pa'i gnod pas ma nyams pa yin/ gang gi tshe 'khor los sgyur ba'i bu de zla ba tshang nas bde blag tu legs par btsas pa de'i tshe yang ma ma bzang mo'i lag tu son pa yin te/de ltar rim gyis bskyed pa ni 'khor los sgyur ba'i rigs rgyun mi gcod par byed pa yin no/ /de bzhin du 'di la yang theg pa chen po'i chos la brten nas byang chub sems dpa' rnams kyis sems bskyed pa ni sangs rgyas kyi gdung mi 'chad par byed pa'i sa bon yin no//de yang gal te sangs rgyas kyi rigs can kho na zhig sems skyed par byed kyi rigs med pa dang ma nges pa'i rigs can yang ma yin pa dang / sa bon de'i ma yang gal te shes rab kyi pha rol tu phyin pa yin gyi gzhan ma yin pa dang /gal te yang bsod nams dang ye shes kyi tshogs dang ldan pa mngal gyi gnas yin pa dang / de la yang gal te mi mthun pa'i phyogs su gyur pa'i chos rnams kyis bar chad ma byas te/ de ltar ma nyams pa yin pa dang / skye gnas kyang gal te snying rje ma ma yin pa de yang mya ngan las 'das pa'i mthar thug par skyong ba'i phyir skyed par byed pa yin na/ de ltar na byang chub sems dpa' legs par skyes pa nyid kyis sangs rgyas kyi gdung mi 'chad par byed pa yin no/ /sna tshogs zhes smos pa ni 'khor los sgyur ba la sogs pa'i mtshan pas ches gsal bar bstan pa'i phyir ro//stsogs pa zhes smos pa ni brgya byin dang tshangs pa la sogs pa bsdu'o/ /blon po chen po zhes smos pa ni blon po chen po'i khyad par bstan pas byang chub sems dpa'i khyad par ston par byed do//rtag tu rgyun mi 'chad par sems can mang po'i don zhes bya ba la/ rtag tu zhes bya ba ni skye ba brgyud pa'o/ /rgyun mi 'chad ces bya ba ni skad cig ma brgyud pa ste/ dper na smra ba po nyin re zhing lan re sbyin pa sbyin pa la rtag tu sbyin pa'o zhes bya'o/ / gzhan zhig gis nyin re zhing lan cig ma yin gyi rgyun chags su yang dang yang sbyin pa sbyin na rgyun mi 'chad par sbyin pa sbyin pa'o zhes bya'o zhes zer ba lta bu'o/ /sems can mang po'i don byed pa ni sems can rgya chen po'i don byed pa'o/ /mang po zhes bya ba'i sgra 'di ni mtha' yas pa dang /yangs pa dang / rgya chen po'i rnam grangs yin par blta bar bya ste/ sems can mang po rnams kyi don byed pa'i phyir ro/ /mngon par rtogs pa'i dus na sems can thams cad bdag nyid du khas blangs pas sdug bsngal gyi phung po chen po rab tu zhi ba zhes bya ba ni 'di ltar sa dang po thob pa'i dus na chos kyi dbyings kun tu 'gro ba rtogs so//de rtogs pas sems can thams cad dang bdag mnyam pa nyid 'thob bo/ /de nyid kyi phyir sa dang po'i nges pa'i tshig ci'i phyir sa dang po rab tu dga' ba zhes bya zhe na/des dang por rang dang gzhan gyi don phun sum tshogs pa thob pa'i phyir ro zhes 'chad par gyur te/ rtogs pa des bdag dang sems can thams cad kyi sdug bsngal rab tu zhi bar byed do/ /rtogs pa'i 'dis bdag dang gzhan dag gi sdug bsngal rab tu zhi bar byed pas na rab tu zhi ba zhes bya'o//de nyid kyi phyir sa dang po la sdug bsngal gyi phung po nye bar zhi bas 'jigs pa lnga las yang dag par 'das pa yin te/ sa dang po la ji ltar bdag gi sdug bsngal rab tu zhi bar byas pa de bzhin du sems can thams cad kyi don bya'o snyam pa lhag pa'i bsam pa 'thob pa'o//mi skye ba'i chos la bzod pa thob pa'i dus na blo mchog gi bde ba'o zhes bya ba ni sa brgyad pa la rnam par mi rtog pa'i ye shes lhun gyis grub pa thob pa'i phyir/ blo mchog gi bde ba zhes bya ste/ de nyid kyi phyir mchog ces bya ba smos so/ /sa de la mngon par 'du byed pa med par rang gi ngang gis 'byung ba nyid kyi phyir dpe gru bo che 'byung ngo //srid pa dang zhi ba dag las rnam par grol zhes bya ba la/ srid pa las rnam par grol ba ni/ 'di ltar 'khor ba'i skyon gyis mi gos pa'o/ /zhi ba las rnam par grol ba ni 'di ltar nyan thos bzhin du mya ngan las 'das pa la gzhol ba ma yin pa'o//dge ba dang dge ba'i rtsa ba zhes bya ba ni don gzhan ma yin no/ /dge ba'i rtsa ba rgya che ba nyid dang zhes bya ba la sogs pa bstan pa gang yin pa dge ba rnam pa bzhi bshad pa gang yin pa de yang 'jig rten dang 'jig rten ma yin pa la sogs pa yin te/dge ba'i rtsa ba rgya che ba nyid ni 'jig rten pa'o/ /don che ba nyid ni 'jig rten las 'das pa'o/ /tshad med pa nyid ni yongs su smin par byas pa ste/ byang chub sems dpa' rnams kyis dge ba yongs su smin par byed pa de ni sa dang /pha rol tu phyin pa dang / stobs dang / mi 'jigs pa la sogs pa yon tan gyi khyad par gyis tshad med pa'i phyir tshad med pa yin no/ /zad mi shes pa nyid kyis so zhes bshad pa gang yin pa de ni dbang 'byor pa yin par rig par bya ste/phung po'i lhag ma med pa'i mya ngan las 'das pa na yang mi zad pa'i phyir ro/ /sangs rgyas nyid 'dod pas khas len pa ni skyabs su 'gro ba'i ngo bo nyid yin no zhes bya ba ni skyabs 'os su khas len pa nyid kyis bdag kyang skyabs 'os su gyur cig /sems can thams cad kyi sdug bsngal thams cad nye bar zhi bar bya'o zhes bya ba yin gyi/ nyan thos ltar dkon mchog gsum la skyabs su song bas 'khor ba las grol bar gyur kyang ci ma rung zhes bdag nyid bskyab pa'i phyir skyabs su 'gro ba ni ma yin no//sems can rnams la phan pa dang / bde bar byed ces bya ba la/ phan pa byed pa ni tshe phyi ma pa'i lha la sogs pa'i bde ba la sbyor ba'o/ /bde ba byed pa ni mthong ba'i chos kho na la bde ba la sbyor ba'o/ /nges par 'byung bar bya ba la theg pa thams cad kyis ston pa'i yon tan dang ldan pa ni ldan pa'o zhes bya ba ni theg pa gsum ston par byed pas sems can thams cad kyi ston par 'gyur pa yin no zhes bya ba'i tha tshig go//brdar btags pa'i skyabs su 'gro ba ni/ dge ba'i bshes gnyen dang phrad nas 'byung ba gang yin pa'o//chos nyid kyis thob pa ni rtogs pa'i dus na ste/ de nyid kyi phyir rags pa dang / phra ba'i khyad par ro/ /gzhan gyi don sgrub pa yang bsam pa'i sgo nas ni snying rjes khyab pas so zhes bya ba ni snying rje chen pos 'gro ba khyab par byed do zhes bya ba'i tha tshig go//sbyor ba'i sgo nas ni theg pa chen po'i chos rgyas par byed pa'i phyir zhes bya ba ni gdul ba'i rgyud byang chub sems dpa'i rigs can dag la bsnyad pa'i phyir rgyas par byas pa yin te/ rgya bskyed ces bya ba'i don to/ /theg pa chen po ni 'phags pa chen po rnams kyi chos yin no zhes bya ba la 'phags pa ni sangs rgyas dang byang chub sems dpa' rnams so//nyan thos rnams kyang 'phags pa yin pas de las khyad par du bya ba'i phyir chen po zhes bya ba ni sgrar sbyar ro/ /'phags pa che ba ni 'phags pa chen po ste/sangs rgyas dang byang chub sems dpa' rnams so zhes bya ba'i tha tshig go/ /theg pa chen po ni de dag gi chos yin pas/ byang chub sems dpa' chen po rnams kyi/ theg pa chen po kho na yin gyi chung ngu ni ma yin no/ /skyabs su 'gro ba'i skabs so// //skyabs su 'gro ba'i 'og tu rigs kyi skabs yin te/ 'di'i 'brel ba gang yin zhe na/ skyabs su 'gro ba 'dir song don chen te/ /de ni tshad med yon tan tshogs 'phel 'gyur/ /'gro ba 'di la snying rje bsam pas khyab//mtshungs med 'phags chen chos kyang rgyas par byed/ /ces bshad ma thag pa'i tshigs su bcad pa 'dis ni skyabs su 'gro ba don che ba nyid rang dang gzhan gyis don bsgrub pa dag bstan to/ /rang dang gzhan gyi don phun sum tshogs pa de lta bu de ni nges pa med par sangs rgyas nyid don du gnyer ba thams cad kyi yin nam/'on te nges pa ci zhig yod ce na/ smras pa/ yod do/ /nges pa gang yin zhe na/ gzhan gyi don phun sum tshogs pa yon tan gyi tshogs 'byor pa dang ldan pa 'di ni sangs rgyas kyi rigs can yin gyi/gzhan gyi ni ma yin pas de'i phyir skyabs su 'gro ba'i 'og tu rigs kyi skabs yin no/ /ma nges pa'i rigs can gyi ni gal te na yin la/ /gal te na ma yin pas gdon mi za bar ma smos so/ /sangs rgyas nyid de'i skal ba yod pa na rigs yin te/rigs ni sangs rgyas kyi chos thams cad kyi sa bon yin no/ /sa bon med par yang 'bras bu ma mthong ste/ de'i phyir de 'thob pa'i skal ba dang ldan pa'i don du skyabs su 'gro ba'i 'og tu rigs yin no/ /sems can rnams ni khams sna tshogs pa yin pa'i phyir ro//khams kyi dbye ba dpag tu med de/ ji skad du ba ru ra'i mdo las bshad pa lta bu'o zhes bya ba ni/ de las/ bcom ldan 'das kyis dge slong dag /dper na ba ru ra'i phung po 'phang du dpag tshad tsam/ rgyar yang dpag tshad tsam zhig yod par gyur la/ba ru ra'i phung po de las 'ga' zhig gis lo brgya 'das shing ba ru ra re re zhig blangs te/ ba ru ra 'di ni khams che ge mo zhig tu dor ro/ /ba ru ra 'di ni khams che ge mo zhig tu dor ro zhes de skad zer na/ ba ru ra'i phung po de ni myur ba kho nar zad pa dang yongs su gtugs par 'gyur gyi/khams ni de ltar yongs su gtugs pa ma yin no zhes bshad do/ /gsung rab las byung ba'i khams kyi don gang yin zhe na/ mig la sogs pa'i khams kyi dbye ba bstan pa dang / khams mang po'i mdo dang sbyar na ni/ khams kyi dbye ba rnam pa mang po zhig yod do/ /rigs kyi skabs 'dir ni rigs sa bon yin te/ khams dang rgyu zhes bya ba ni rnam grangs so/ /ji ltar sems can rnams la 'dod chags la sogs pa spyad pa'i bye brag gis 'dod chags la sogs pa'i chos skye ba'i rgyur 'gyur ba gang yin pa so so rang rang gi rgyud kyi khyad par chos du ma'i nus pa dang ldan pa dag yod pa de bzhin du theg pa gsum gyi rigs kyi khyad par yang yod par 'gyur te/rigs tha dad pa med par ni theg pa tha dad par 'os pa ma yin pas theg pa gsum gyi rigs tha dad pa yod do//rang bzhin du gnas pa'i rigs ni yang dag par bsgrubs pa gang yin pa ste/ skye mched drug gi khyad par thog ma med pa'i dus can gdon mi za bar bla na med pa yang dag par rdzogs pa'i byang chub mngon par rdzogs par 'tshang rgya ba'i skal ba can gang yin pa de lta bu yod do//rang bzhin gyi rigs de lta bu la gnas pa'i byang chub sems dpa' rnams gang gi tshe dge ba'i bshes gnyen dag gis bla na med pa yang dag par rdzogs pa'i byang chub yang dag par len du bcug pa de'i tshe rigs de yang dag par bsgrubs pa zhes bya'o//rang bzhin du gnas pa gang yin pa de ni yang dag par bsgrub pa'i rten du gyur pa yin no/ /yang dag par bsgrubs pa ni rten pa'i ngo bo nyid yin no/ /de ni rgyu'i dngos por yod do/ /'bras bu'i dngos por med do zhes bya ba'i rang bzhin gyi rigs de'i 'bras bu ni yang dag par bsgrubs pa'i rigs yin no//de'i phyir de ni rgyu'i dngos por yod la/ 'bras bu'i dngos por med ces bya ste/ rgyur gyur pa'i rigs de ni nam yang 'bras bur 'gyur ba 'os pa ma yin no/ / 'di ltar de dag la brten nas 'bras bur gyur pa stobs dang mi 'jigs pa la sogs pa yon tan thams cad 'grub par 'gyur ro/ /rigs nges pa ni nyan thos dang / rang sangs rgyas dang / sangs rgyas kyi rigs su nges par gnas pa gang yin pa ste/nyan thos nyid thob par nges pa'i rigs gang yin pa de ni nam yang rang sangs rgyas dang sangs rgyas nyid 'thob pa'i rgyur mi 'gyur ro/ /de bzhin du rang sangs rgyas dang / sangs rgyas kyi rigs dag kyang sbyar bar bya'o/ /ma nges pa'i rkyen gyi dbang gis nyan thos dang rang sangs rgyas dang /sangs rgyas kyi rigs rnams kyi rgyur 'gyur te/ dper na ri'i phyogs gang dag las gdon mi za bar gser 'ba' zhig 'byung gi/ /dngul 'ba' zhig kyang ma yin la/ zangs 'ba' zhig kyang ma yin pa de lta bu yang yod la/phyogs gang zhig 'jim gong dril ba la sogs pa'i bcos legs bya ba'i dbang gis gdon mi za bar res 'ga' gser 'byung la/ res 'ga' dngul la sogs pa 'byung bar yang yod pa de lta bu'o/ /de nyid kyi phyir rigs nges pa ni/rkyen rnams kyis mi 'phrogs la ma nges pa ni 'phrogs pa yin no/ /yo byad kyis phongs pa zhes bya ba ni dbul na sbyin pa la sogs pa byang chub sems dpa'i spyod pa la mi 'jug go/ /gzhan gyi dbang du gyur pa ni bran la sogs par gyur pa'o//der skyes pa'i sems can rnams zhes bya ba ni ngan song du skyes pa rnams zhes bya ba'i tha tshig go/ /'od gsal ba dang dri ma med pa'i gnas su 'gyur la/ 'od gsal ba ni gsal ba la bya'o/ /la la ni dri ma cung zad chags kyang 'od gsal bas gang la dri ma cung zad kyang chags pa med pa de ni dri ma med pa zhes bya'o//yang na gser 'od gsal ba kha cig bsregs na kha dog ngan par 'gyur bas gang la bsregs kyang kha dog ngan par 'gyur ba med pa de ni dri ma med pa zhes bya'o/ /nyon mongs pa'i dri ma med pa 'thob pa'i gnas zhes bya ba ni rigs de nyon mongs pa'i gnas ngan len dang bral zhing mi ldan pa thob pa'i gnas yin pa'am/yang na rigs de nyon mongs pa spangs na zag pa med pa'i chos dri ma med pa rnams kyis 'thob pa gang dag yin pa de dag gi gnas yin pas na nyon mongs pa'i dri ma med pa 'thob pa'i gnas zhes bya'o//byang chub chen po'i rgyu mtshan yin pa'i phyir ro zhes bya ba ni mthar thug pa'i gnas skabs byang chub chen po ni rin po che dri ma med pa lta bu yin te/ de ni rdo rje lta bu'i ting nge 'dzin gyi mjug thogs su 'byung ba yin no/ /ye shes shes chen po ni bya ba sgrub pa'i ye shes la sogs pa'o//don 'di la ni rigs med pa la gnas pa yongs su mya ngan las mi 'da' ba'i chos can yin par bshad do zhes bya ba na med pa zhes bya ba 'di la lar ni smad pa la mthong ste/ chung ma ngan pa la chung ma med do zhes bya ba dang /bu ngan pa la bu med do zhes bya ba lta bu'o/ /la lar ni cung zad yod pa'i don la ste/ bu mo lto med ces bya ba lta bu'o/ /la lar ni med pa la mthong ste/ rnyed pa med ces bya ba lta bu'o/ /med ces bya ba 'di ni smad pa dang med pa la blta bar bya ste/ la la gcig tu nyes par spyod nges yod//ces bya ba nas bzung ste/ dge ba'i rtsa ba dman pa yod pa tshogs yongs su ma rdzogs pa'o zhes bya ba'i bar 'di ni/ de'i dus su yongs su mya ngan las mi 'da' ba'i phyir rig med par bshad pa yin pas med pa zhes bya ba 'di ni smad pa la blta bar bya'o//la la gcig tu nyes par spyod nges yod/ /ces bya ba ni las byed par nges pa'i dbang du byas nas bshad pa yin te/ gcig tu las byed par nges pa gang gis gdon mi za bar ma la sogs pa gsod par 'gyur ba de ni/ gnas skabs de na rigs yod du zin kyang ma la sogs pa bsad pa'i las smad pas rigs med pa zhes bya'o//dkar po'i chos kun tu bcom pa la sogs pa yang de bzhin du ci rigs par sbyar bar bya'o/ /rgyu dang bral ba'i yongs su mya ngan las mi 'da' ba'i chos can zhes bya ba'i med pa zhes bya ba 'di ni med pa la blta bar bya'o//zab cing rgya che ba'i don mi shes pa bzhin du mos pa rgya chen po 'byung zhes bya ba ni sgra tsam thos pa kho nas mos kyi/ don yongs su shes pa las ni ma yin pa'o/ /rnam pa gnyis kyi mchog ces bya ba ni 'jig rten pa dang / nyan thos kyi phun sum tshogs pa bas sangs rgyas dang byang chub sems dpa' rnams kyi phun sum tshogs pa mchog dang / phul dang / rab dang / rab mchog yin no/ /byang chub gang la yon tan shin tu rgya chen po yod pa de ni yon tan shin tu rgya che ba'i byang chub bo/ /yon tan shin tu rgya che ba'i byang chub nyid shing yin pas na/yon tan shin tu rgya che byang chub shing ngo / /yang na byang chub nyid shing yin pas byang chub shing ngo / /yon tan shin tu rgya che ba rnams kyi byang chub kyi shing yin pas na yon tan shin tu rgya che byang chub kyi shing ngo //de bskyed pa ni yon tan shin tu rgya che ba byang chub kyi shing bskyed pa'o/ /de'i phyir te/ yon tan shin tu rgya che byang chub shing bskyed phyir ro/ /ci zhe na/ 'og nas rigs de rtsa ba yin no zhes 'chad par 'gyur ro/ /bde dang sdug bsngal chen po zhi ba thob bya'i phyir//zhes bya ba ni 'dir go rims ji lta ba bzhin blta bar bya ba ma yin no/ /'on kyang de ni bde ba chen po thob par bya ba'i phyir dang / sdug bsngal chen po zhi bar bya ba'i phyir rtsa ba yin no/ /de lta bas na rigs 'di byang chub kyi shing de lta bu'i rtsa ba yin pa dang /rang gi don dang gzhan gyi don sgrub par byed pas/ bdag dang gzhan la phan bde byed pa 'bras bu zhes bshad de/ yon tan shin tu rgya che byang chub shing bskyed phyir/ /zhes bya ba ni rang gi don to/ /gzhan ni gzhan gyi don to/ /rigs kyi skabs so// // rigs kyi 'og tu sems bskyed pa'i skabs yin te/ 'di'i 'brel pa gang yin zhe na/ yon tan shin tu rgya che byang chub shing bskyed phyir/ /bde dang sdug bsngal chen po zhi ba thob bya'i phyir/ /bdag dang gzhan la phan bde byed pa 'bras bu'i phyir/ /rigs mchog de ni rtsa ba bzang po lta bu yin//zhes bshad ma thag pa yin te/ ji ltar shing ljon pa rtsa ba bzang po zug na rang gi don phun sum tshogs pa yal ga dang / lo ma dang / me tog dang / 'bras bu la sogs pa phal mo che 'byung la/ phun sum tshogs pa de lta bu de ni skye bo phal po ches longs spyod par yang 'gyur bas gzhan gyi don phun sum tshogs pa zhes bya ba de bzhin du byang chub sems dpa' la rang bzhin gyi rigs la gnas pa yod na gnyis 'grub par 'gyur ro//gnyis 'grub pa de yang sems bskyed pa la sogs pa'i rim gyis 'gyur gyi gzhan du ni ma yin no//byang chub kyi sems bskyed pa la sogs pa yang rigs yod na 'gyur te/ gang la byang chub sems dpa'i rigs yod pa de bla na med pa yang dag par rdzogs pa'i byang chub tu sems skyed par byed pas de'i phyir rigs kyi 'og tu sems bskyed pa'i skabs yin no//yang na sems bskyed pa ni don du gnyer ba yin no/ /gang zhig don du gnyer zhe na/ byang chub chen po ste/ sems can gyi don byed par 'dod pa ni des de'i thabs su 'gyur ba byang chub chen po 'dod la/ rigs kyi stobs kyis sems bskyed pa yang mi zlogs pa'i chos can du 'gyur bas don 'di yang dag par bstan pa'i phyir rigs kyi 'og tu sems bskyed pa'i skabs yin no//sems 'byung ba zhes bya ba la/ 'byung ba dang bskyed pa zhes bya ba ni don tha dad pa ma yin no/ /sems pa'i mtshan nyid kyi sems bskyed pa ste/ sems pa'i ngo bo nyid ces bya ba'i tha tshig go//sems bskyed pa rnam par gtan la dbab pa zhes bya ba ni/ sems bskyed pa dri ba sngon du btang ba'i rnam par gtan la dbab pa la sems bskyed pa rnam par gtan la dbab pa zhes bya'o/ /dri ba sngon du btang ba ji lta bu zhe na/ byang chub sems dpa' rnams kyi sems bskyed pa rnam pa bzhi pa 'di'i rtsa ba ni gang /bsam pa ni gang / mos pa ni gang zhes bya ba la sogs pa yin no/ /snying rje chen po ni sems bskyed pa'i rtsa ba'o zhes bya ba ni/ de ni 'gro ba 'khyud de 'dug pa yin no/ /gal te snying rje chen po rtsa ba yin par ma gyur na/byang chub sems dpa' rnams nam yang bla na med pa yang dag par rdzogs pa'i byang chub tu sems bskyed par mi 'gyur gyi/ sems can la mi lta bas nyan thos dag bzhin du mya ngan las 'das pa la gzhol bar 'gyur ro/ /so so rang gi sa la sbyor bas gang zhig sa gang la zhugs pa'i sa de ni de'i mthar thug pa yin no zhes bya ba ni sa dang sa la sbyor ba nas bzung ste bsgom pa mthar thug par 'gro ba'i phyir mthar thug pa zhes bya ste/de dang mtshungs par ldan pa sems pa'i khyad par gyi mthar thug pa ni sa yin par brjod do/ /yang dag par blangs pa brda las byung ba'i sems bskyed pa zhes bya ba ni dge ba'i bshes gnyen la sogs pas smras pa bzlas pa'i tshul gyis mnos pa'o//sangs rgyas nyid la sems mnyam pa nyid ni/ de'i chos kyi dbyings dang bdag dbyer med par rtogs pa'i phyir ro zhes pa ni chos kyi sku dang tha mi dad pa thob pa'i phyir ro zhes bya ba'i tha tshig go//ji skad du sa dang po la bdag ni sangs rgyas kyi sa dang nye bar gyur to zhes 'byung ba lta bu yin te/ nye ba nyid du rtogs pa'i phyir tha mi dad par mos par 'gyur ro/ /sangs rgyas nyid mchog ces smos pas ni rang sangs rgyas bsal ba'i phyir ro//de la skye ba ni sa bon dang / ma dang / mngal dang / ma ma'i bye brag las rig par bya'o zhes bya ba la/ de la zhes bya ba'i bdun pa ni dmigs kyis dbye ba'i don yin te/ skye ba rgya che ba la sogs pa don drug sngar bstan pa de dag las skye ba bkar te sa bon la sogs pa'i khyad par gyis khyad par du ston to//chos la mos pa sa bon dang / /zhes bya ba ni theg pa chen po'i chos la mos pa chen po gang yin pa de ni sa bon no/ /pha rol tu phyin pa'i mchog shes rab kyi pha rol tu phyin pa ni ma yin no//bsam gtan las byung bde ba mngal/ /zhes bya ba ni gnas pas gnas bstan pa yin te/ mngal gyi gnas ni bsam gtan dag yin no/ /rgya chen po ni smon lam chen po bcu mngon par bsgrub pa'i phyir ro zhes bya ba ni/ ji skad du 'phags pa sa bcu pa las 'di lta ste/sangs rgyas ma lus pa las mchod pa dang / rim gro lhag ma med pa mtha' dag bya ba'i phyir/ rnam pa thams cad kyi mchog dang ldan pa/ mos pa rgya chen pos rnam par dag pa/ chos kyi dbyings ltar rgya che ba/ nam mkha'i khams kyi mthas gtugs pa/phyi ma'i mtha'i mur thug pa/ bskal pa grangs med par sangs rgyas 'byung ba/ bgrangs pa thams cad la mchod pa dang / rim gro chen po bya ba rgyun mi 'chad pa'i smon lam dang po mngon par bsgrub bo zhes gsungs pa lta bu yin te/sa dang po la de lta bu la sogs pa smon lam bcu 'byung ngo / /bsam pa dag pa ni byang chub dang nye bar shes pa'i phyir zhes bya ba ni sa dang po rtogs pa'i dus na bsam pa dag pa thob ste/ de thob pas de 'di snyam du bdag ni sangs rgyas kyi sa dang nye bar gyur to snyams du sems so//byang chub sems dpa' rnams kyi sems bskyed pa dang po ni sa dang mtshungs te/ sangs rgyas kyi chos thams cad dang / de'i tshogs 'phel ba'i rten du gyur pa'i phyir ro zhes bya ba ni/ sangs rgyas kyi chos rnams ni sangs rgyas kyi sa la mchog tu mthar phyin par gyur pa yin te/de dag dang de dag gi tshogs rnams thob par bya ba'i phyir ro/ /'di ltar gang gi tshe byang chub sems dpa' mos pas spyod pa'i sa la sems skyed par byed pa'i sems bskyed pa de ni rten du gyur pa yin te/ gang gi phyir sa la brten nas rtswa dang / gel pa dang / sman dang / nags tshal dag bzhin du de la brten nas sangs rgyas kyi chos rnams dang de dag gi tshogs rnams yongs su rdzogs par 'gyur ba de'i phyir sems bskyed pa dang po ni sa dang mtshungs pa zhes bya'o/ /phan pa'i bsam pa ni gang gis tshe rabs gzhan du yang phan pa dang sprod par byed pa'o//bde ba'i bsam pa ni gang gis tshe 'di kho na la bde ba dang sprod par byed pa'o/ /gser bzang po dang 'dra ste/ 'gyur ba mi rten pa'i phyir ro zhes bya ba ni gser bzang po bsregs pa dang / bcad pa dang / bdar ba la sogs pas brtags na 'gyur ba mi brten pa de bzhin du byang chub sems dpa'i sems bskyed pa phan pa dang bde ba'i bsam pa can yang gnas skabs thams cad du 'gyur ba mi rten to//sbyin pa'i pha rol tu phyin pa dang ldan pa'i sems bskyed pa ni gter chen po bzhin zhes bya ba ni ji ltar mdo dag las dung la sogs pa gter chen po bzhi 'byung ba de dag ni byin te bor yang zad par mi 'gyur zhing 'jig rten yang tshim par byed pa de bzhin du/byang chub sems dpa' rnams kyang chos dang zang zing la sogs pa'i longs spyod kyis sems can dpag tu med pa tshim par byed cing sbyin pa de yang phung po'i lhag ma med pa'i mya ngan las 'das pa'i dbyings su zad par yang mi 'gyur bas mi zad pa zhes bya'o//mi shigs pa nyid kyis sra ba'i phyir ro zhes bya ba ni le los mi shigs pa nyid kyis so/ /sman gyi rgyal po lta bu zhes bya ba ni/ ji ltar sman gyi rgyal po mthong ba na/ bsnams pa dang / myangs pa dang / reg pa la sogs pas nad thams cad nye bar zhi bar byed pa de bzhin du/ shes rab kyi pha rol tu phyin pa dang ldan pa'i sems bskyed pa yang mnyen pa dang / bsam pa dang / bsgom pa la sogs pas rnam par sun 'byin pa dang /rnam par gnon pa dang spong ba la sogs pas nyon mongs pa dang / shes bya'i sgrib pa'i nad thams cad rab tu zhi bar byed pas/ sman gyi rgyal po lta bu zhes bya'o/ /tshad med pa dang ldan pa ni mdza' bo chen po dang 'dra zhes bya ba ni/byams pa dang ldan/ snying rje dang / dga' ba dang / btang snyoms dag gnas skabs thams cad du sems can 'ga' yang yal bar 'dor bar mi 'gyur te/ bde ba dang / sdug bsngal ba dang / bde ba yang ma yin/ sdug bsngal ba yang ma yin pa'i gnas skabs thams cad du dmigs pa'i phyir ro//ston pa dang ldan pa ni rgyal po chen po lta bu ste/ chud mi za ba'i rgyu yin pa'i phyir ro zhes bya ba ni/ dper na rgyal po rang gi rigs su gtogs pa la/ bsnyen bkur legs pa nyid dang legs pa nyid ma yin par byed pa dag go//rim bzhin du chud mi za ba dang chud za ba'i rgyu yin pa de bzhin du/ /rton pa dang ldan pa'i sems bskyed pa yang chud za ba'i rgyu dang chud mi za ba'i rgyu yin no/ /ji ltar na chud za ba'i rgyu yin/ ji ltar na chud mi za ba'i rgyu yin zhe na/ gal te gang zag dang /tshig 'bru dang / drang ba'i don gyi mdo dang / rnam par shes pa la rton par gyur na chud za ba'i rgyu yin no/ /bzlog na chud mi za ba'i rgyur 'gyur bas chud mi za ba'i rgyu zhes bya'o/ /zhi gnas dang lhag mthong dang ldan pa ni theg pa lta bu zhes bya ba ni gang gi tshe sems pa'i khyad par zung du 'brel bar 'byung bas zhi gnas dang lhag mthong dang ldan pa yin pa de'i tshe byang chub sems dpa' 'dis sems can gyi khur bde blag tu khyer bde bas na theg pa lta bu zhes bya'o//gzungs dang spobs pa dang ldan pa ni bkod ma lta bu ste/ chu 'dzin cing mi zad par 'byin pa dang /chos mthun par thos pa dang / ma thos pa'i chos dang / don 'dzin cing mi zad par 'byin pa'i phyir zhes bya ba ni gzungs kyi stobs kyis thos pa'i chos dang don 'dzin par byed la spobs pa'i stobs kyis ma thos pa'i chos dang don 'dzin par byed pas na bkod ma lta bu zhes bya ste/stod phyogs na chu'i dong dag la bkod ma zhes bya'o/ /chos bshad pa dang ldan pa ni kun dga' ba'i sgra dang 'dra ste/ thar pa 'dod pa'i gdul ba rnams la snyan pa thos par byed pa'i phyir ro zhes bya ba ni 'du byed thams cad ni mi rtag pa'o/ /sdug bsngal ba'o//bdag med pa'o/ /mya ngan las 'das pa ni zhi ba'o zhes bya ba thos nas thar pa 'dod pa rnams bdud rtsis tshim par 'gyur ba dang 'dra bas kun dga' ba'i sgra dang 'dra zhes bya'o/ /mi skye ba'i chos la bzod pa thob pa na/ rang gi ngang gis 'byung ba'i phyir ro zhes bya ba ni sa brgyad pa la byang chub sems dpa' chos thams cad ma skyes pa'o zhes bya bar rnam par smin pa las byung ba'i ye shes rang gi ngang gis 'byung bas chos thams cad shes so//sa dang po rtogs pa'i dus na yang 'dis de ltar shes mod kyi sa brgyad pa la ni rgya mtshor btang ba'i gru bo che dang chos mthun par rang gi ngang gis 'byung ba'i lam thob pa'i phyir mi skye ba'i chos la bzod pa zhes bya'o//ji ltar snod kyi 'jig rten gyi rnam pa 'byor ba thams cad sprin las 'byung ba ltar zhes bya ba ni ji ltar snod kyi 'jig rten sa la 'bru dang / sman dang / nags tshal la sogs pa 'byor pa thams cad sprin las 'byung ba de bzhin du/sems can gyi 'jig rten gyi 'byor pa mtho ris dang byang grol gyis phyug pa thams cad kyang shes rab dang snying rje'i thabs la mkhas pa dang ldan pa'i sems bskyed pa las byung bas sprin lta bu zhes bya'o//dpe nyi shu rtsa gnyis dang ldan pa'i sems bskyed pa 'di ni 'phags pa blo gros mi zad pas bstan pa'i mdo las mi zad pa nyid du 'byung ba dang sbyar bar khong du chud par bya'o zhes bya ba ni 'phags pa blo gros mi zad pas bstan pa'i mdo las/ sems bskyed pa dang / bsam pa dang / sbyor ba dang / lhag pa'i bsam pa dang / pha rol tu phyin pa dang / tshad med pa dag dang / mngon par shes pa dang / bsdu ba'i dngos po dang / so so yang dag par rig pa dang / rton pa dang / bsod nams dang /ye shes kyi tshogs dang / byang chub kyi phyogs dang mthun pa dang / zhi gnas dang / lhag mthong dang / gzungs dang / spobs pa dang / chos bshad pa dang / bgrod pa gcig pa'i lam dang / thabs la mkhas pa dang / de la sogs pa go rims bzhin du 'byung ste/ji skad du bshad pa'i sems bskyed pa 'di dag kyang go rims 'di kho nas sbyar bar bya'o/ /ngan 'gro dang yongs su skyo bas 'jigs pa med pa'i phyir sems bskyed pa bsngags par tshigs su bcad pa zhes bya ba ni sems bskyed pa dang dus mnyam pa nyid na sems de 'gro ba thams cad kyis bsngags par bya ba yin te/ji skad du/ gang gi tshe na khyod kyi thugs/ /dang po skyes pa de'i tshe/ /khyod ni 'jig rten 'di dag gi/ /mchod gnas bla na bzhugs pa lags/ /zhes bya ba la sogs pa 'byung ba lta bu'o/ /sems bskyed pa bsngags par bya ba la/de yod na rab tu bsdams pa'i sems dang ldan pa sa dang po rtogs pa'i dus nas bzung ste ngan song dag gis 'jigs par mi 'gyur ro/ /byang chub sems dpa' brtse ba dang ldan pa'i phyir sems can gyi bya ba mang pos yongs su skyo bas 'jigs par mi 'gyur bas ngan song dang yongs su skyobs 'jigs pa med pa zhes bya'o//skye ba skyed mos tshal du 'gro ba lta bur mthong ba'i phyir rgud pa'i dus na sdug bsngal gyis mi 'jigs pa zhes bya ba ni don gyi rnam pa phun sum tshogs pa dag la gang gi tshe/ chom rkun dang / chu dang me la sogs pas rgud par byas pa de'i tshe de dag rgud na rgud pas 'jigs pa med do//yo byad kyis phongs na 'chi bar 'gyur na gang zhig legs par byed pa'i las byas pas skye ba skyed mos tshal gyi dga' ston lta bur lta ba de ji ltar sdug bsngal dag gis 'jigs par 'gyur ro/ / nyan thos kyi brtson 'grus pas brtson 'grus brgya 'gyur du bya ba'i rigs zhes bya la/ brgya zhes smos pa ni grangs bstan pa'i phyir te/ des brtson 'grus tshad med pa bya dgos so/ /bdag dang gzhan gyi 'ching ba rnam pa sna tshogs pa nyon mongs pa dang / las dang skye ba'i ngo bo nyid dag gis shin tu bcings pa yin no zhes bya ba ni/mtshams med pa yi las rnams dang / /nyon mongs drag dang ngan 'gro dang / /sgra mi snyan dang 'du shes med/ /sems can sgrib pa gsum du 'dod/ /ces bya ba yin te/ 'di dag ni 'phags pa'i lam la sgrib pa'i phyir 'jig rten 'khor bar 'khyam par byed pas 'ching ba dag ces bya'o//sems bskyed pa'i skabs so// //sems bskyed pa'i 'og tu sgrub pa'i skabs yin te/ 'di'i 'brel pa gang zhe na/ byang chub sems dpas mgo la sems can gyi khur chen po thogs nas pha rol gnon pa ngal ba ni mi mdzes kyi/des nyan thos kyi brtson 'grus brgya 'gyur du bya ba'i rigs zhes bshad ma thag pa yin te/ sgrub pa med par sems bskyed pa tsam kho nas ni bla na med pa yang dag par rdzogs pa'i byang chub 'thob pa ma yin no//de'i phyir sems bskyed nas gdon mi za bar bsgrubs pas bsgrub par bya dgos pas sems bskyed pa'i 'og tu bsgrub pa'i skabs yin no/ /de nyid kyi phyir sgrub pa'i gnas chen po ni sems bskyed pa la gnas pa'i phyir ro zhes bshad do//byang chub sems dpa' rnams bla na med pa yang dag par rdzogs pa'i byang chub tu sems bskyed nas de la brten te bsgrub pa la rab tu sbyor ba'o/ /sems bskyed pa yod du zin kyang bsgrub pa dang ldan pas gzhan gyi don 'grub kyi/ sgrub pa dang mi ldan pas ni ma yin pas sems bskyed pa'i 'og tu sgrub pa'i skabs yin no//yang na byang chub kyi sems bskyed nas bslab par bya'o zhes mjug thogs su bslab pa bstan pa de dmigs pa gang gis 'jug pa de brjod dgos pas de'i phyir mjug thogs su bslab pa'i dmigs pa khyad par can no//bslab pa'i dmigs pa khyad par can yang gang zhe na/ gzhi lnga'o/ /gzhi lnga gang zhe na/ rang dang / gzhan gyi don dang / de kho na nyid kyi don dang / mthu dang / yongs su smin par byed pa dang / bla na med pa yang dag par rdzogs pa'i byang chub po//ji ltar na 'di ni nyan thos kyi theg pa las khyad zhugs pa yin zhe na/ nyan thos la sogs pa'i bslab pa'i dmigs pa ni/ rang gi don dang / de kho na nyid kyi don gang zag la bdag med pa dang / mthu chung ba dang / bdag yongs su smin par byed pa dang /de'i 'bras bu byang chub dman pa yin no/ /byang chub sems dpa' rnams kyi bslab pa'i dmigs pa ni de las bzlog pa rang dang gzhan gyi don la sogs pa'i khyad par du 'phags pa yin par shes par bya'o/ /yang gzhi lnga po 'di dag la ji ltar dmigs she na/bzhi pa la ni rgyu nyid du'o/ /lnga pa la ni 'bras bu nyid du'o/ /yang na byang chub sems dpa' rnams kyis sems bskyed nas/ bslab par bya'o zhes bya ba gang la bslab par bya ba de bstan/ rang dang gzhan gyi don la sogs pa la bslab par bya ba yin pas/de'i phyir sems bskyed pa'i 'og tu bsgrub pa'i skabs yin te/ rang dang gzhan gyi don la sogs pa 'di dag kyang sgrub pa dang ldan pa yin gyi gzhan gyi ni ma yin no/ /de dag nyid kyi go rims bzhin du zhes bya ba ni/ gnas rtsom 'bras bu 'byung ba che bdag nyid/ / ces bya ba tshig gsum po 'di dag /rtag tu len pa che dang bzod pa che/ /don chen yang dag bsgrub pa'i bya ba byed/ /ces bya ba'i tshig rnams dang sbyar bar bya'o/ /len pa chen po ste sems can thams cad nye bar len pa'i phyir ro zhes bya bas ni 'di ltar sems bskyed pas sems can thams cad nye bar len par byed de/sems can 'di rnams bdag gis bskyab bo snyam du sems so zhes zer ba'i phyir ro/ /gzhan gyi don du bdag nyid la shin tu gdung bar byed pa'i phyir ro zhes bya ba ni gzhan dag la phan pa dang bde ba'i don du bdag nyid la shin tu gdung bar byed do zhes bya ba'i tha tshig go//rjes su bstan pa dang / kun brjod pa'i cho 'phrul dag gis legs par ston pa zhes bya ba ni kun brjod pa'i cho 'phrul gyis khyod kyi sems ni 'di lta bu yin no/ /khyod kyi sems ni 'di snyam pa yin no zhes bya ba la sogs pas sems kun brjod nas rjes su bstan pa'i cho 'phrul gyis gdams ngag thun mong ma yin pa de kho na nyid rtogs pa'i shes rab phyin ci ma log pa dang ldan pas rjes su ston to//de la yon tan khyad par can yang dag par 'grub pa'i bar ni gzhan gyi don bya ba nyan thos la sogs pa dang thun mong ba yin no//de bzhin gshegs pa'i rigs su skye ba la sogs pa ni byang chub sems dpa'i don thun mong ma yin pa yin no/ /gal te rigs la gnas pa'i skye bo dang mthun zhing phyin ci ma log par 'chad par 'gyur ba zhes bya ba la/ rigs zhes smos pas ni nyan thos la sogs pa'i rigs can gyi skye bo bzung ngo //phyin ci ma log par 'chad par 'gyur ba zhes smos pas ni nyan thos la sogs pa de dag nyid las 'dod chags la sogs pa spyad pa spyod pa'i bye brag gis mi sdug pa la sogs pa 'chad par 'gyur ba ston te/ bzlog pa ni phyin ci log tu 'chad pa yin no//zhugs pa rnams la bdag gi bar 'dzin pa med pa zhes bya ba ni bdag gi bar 'dzin na khong khro ba dang rjes su chags pa dag tu 'gyur ro/ /don rnam par nges par bya ba la mkhas pa'i sgrub pa yin zhes bya ba ni mi shes pa dang / the tshom can dang /log pa'i shes pa la mngon par zhen pa rnams kyis mi shes pa la sogs pa sel ba'i phyir ro/ /rigs su skye ba la sogs pa shin tu ring du song ba'i sgrub pa yin zhes bya ba ni gal te 'di sa dang po la rtogs pa thob pa'i phyir ro/ /de bzhin gshegs pa'i rigs su skye ba yin/ sa brgyad pa yan la sogs par lung bstan pa thob pa'i phyir lam mngon par 'du bya ba med par rang gi ngang gis 'byung bas byang chub sems dpa'i spyod pa la mkhas pa yin/sa bcu pa la 'od zer dag gis dbang bskur pa thob pa'i phyir dbang bskur ba yin na de lta na gzhan dag rigs su skye ba la sogs par bya bar nus so//mi rtag pa nyid kyi phyir zhes bya ba la bde ba'i tshor ba ni skye ba'i dus na phan 'dogs pa yin la 'jig pa'i dus na gnod par byed pa yin te/ de bas na mi rtag pa'i phyir sdug bsngal ba zhes bya ba'o/ /zhi dga' rang gi len pa rab zhi la//zhes bya ba ni nyan thos rnams ni so so rang gi bdag nyid kyis len pa nyon mongs pa nye bar zhi bar byed de/ nyon mongs pa nyid len pa yin pas na len pa nyon mongs pa'o/ /ji skad du shes rab kyi pha rol tu phyin pa las/ rab 'byor gal te gzugs dngos por 'gyur gyi dngos po med pa ma yin na/shes rab kyi pha rol tu phyin pa 'dis lha dang / mi dang / lha ma yin du bcas pa'i 'jig rten zil gyis mnan nas nges par 'byung bar mi 'gyur zhes bya ba ni 'di skad du bshad pa yin te/ gal te gzugs la sogs pa'i chos 'di dag ji ltar byis pa rnams kyis mngon par brjod cing 'dzin pa de kho na ltar 'di dag yongs su grub pa nyid du gyur cing dngos por gyur gyi zhes bya ba'i tha tshig go//dngos po med pa ma yin na shes rab kyi pha rol tu phyin pa 'dis lha dang mi la sogs pa dang bcas pa'i 'jig rten zil gyis mnan cing nges par 'byung bar mi 'gyur ro//ci'i phyir zhe na/ byis pa dang mkhas pa dag la khyad par med pa'i phyir thams cad de kho na nyid mthong ba kho nar 'gyur te de ji skad du bcom ldan 'das kyis/ dngos po rnams kyi yod pa nyid/ / ji ltar byis pas rnam brtags shing / /de ltar mthong de gal te yin/ /thams cad de nyid mthong bar 'gyur/ /zhes gsungs pa lta bu'o/ /gang gi phyir gzugs la sogs pa'i chos 'di dag byis pas kun brtags pa'i bdag nyid kyis med pa'i ngo bo yin pa de'i phyir sangs rgyas dang byang chub sems dpa' tshul bzhin rab tu sbyor ba rnams la rnam par mi rtog pa'i ye shes skye la/rnam par mi rtog pa'i ye shes kyang theg pa chen po yin te/ rgyu 'di nyid kyis lha dang / mi dang / lha ma yin du bcas pa'i 'jig rten zil gyis mnan nas nges par 'byung bar 'gyur ro//sgrub pa'i 'og tu de kho na nyid kyi skabs yin te/ 'di'i 'brel pa gang yin zhe na/ sgrub pa 'di ni srid dang 'gro ba kun/ /zil gyis mnan 'gro zhi ba mchog dang ldan/ /zhes bya ba la sogs pa bshad ma thag pa yin te/ che ba nyid de rnam pa bzhi char yang sgrub pa dang ldan pa de kho na nyid mthong ba yin gyi/ gzhan gyi ni ma yin pas/ rang dang gzhan gyi don bsgrub pa ni bshad ma thag pa yin no/ /rang dang gzhan gyi don la zhugs pa yang kun nas nyon mongs pa med par bya dgos pas de'i phyir mjug thogs su kun nas nyon mongs pa med pa'i thabs de kho na nyid kyis ston to//kun brtags pa dang gzhan gyi dbang gi mtshan nyid dag gis ni yod pa ma yin no zhes bya ba ni chos kyi dbyings kyi dbang du byas nas bshad pa yin te/ de ni bslab pa'i dmigs pa nyid du bshad do//rnam par mi rtog pa'i ye shes kyang lam gyi ngo bo nyid yin pa'i phyir yongs su grub pa'i ngo bo nyid yin mod kyi/ de ni tshigs su bcad pa 'dir ma smos te/ de'i mtshan nyid ni logs shig tu 'chad par 'gyur ro/ /kun brtags pa dang gzhan gyi dbang dag dang yongs su grub par gcig pa nyid med pas de bzhin ma yin no zhes bya ba ni kun brtags pa'i chos rnams ni yod pa ma yin pa las yang dag pa ma yin pa nyid du snang ba yin la/yongs su grub pa'i ngo bo nyid ni bden pa yang dag pa phyin ci ma log pa yin te/ des na 'di kun brtags pa'i ngo bo nyid ma yin no/ /gzhan gyi dbang gi ngo bo nyid kyang kun brtags pa de'i gzhir gyur pa rten cing 'brel bar 'byung ba kun nas nyon mongs pa'i bdag nyid du snang ba yin la/ chos kyi dbyings ni de las bzlog pa yin te/ de lta bas na gzhan gyi dbang gi ngo bo nyid kyang ma yin no//de dag kho na dang gzhan pa nyid med pas gzhan ma yin no zhes bya ba ni gang gi phyir gzhan gyi dbang gi ngo bo nyid kun brtags pa'i ngo bo nyid dang bral ba ni yongs su grub pa'i ngo bo nyid yin pa de'i phyir gzhan nyid du yang rnam par mi gzhag ste/mi rtag pa nyid la sogs pa bzhin no/ /'gag pa dang skye ba na de bzhin gnas pa'i phyir zhes bya ba ni chos kyi dbyings ni 'dod chags la sogs pa kun nas nyon mongs pa'i chos 'gag pa na yang nyams pa med la/ rnam par byang ba lam gyi ngo bo nyid kyi chos skye ba na yang 'phel ba med de/nam mkha' la sprin dang khug rna glo bur pa 'ongs pa dang bral ba bzhin no/ /bdag tu lta ba'i phyin ci log dgag par zhes bya ba ni gang zag la bdag med pa'i dbang du byas pa yin no/ /re zhig bdag tu lta ba nyid ni bdag gi mtshan nyid ma yin no//ci'i phyir zhe na/ bdag ni rtag pa dang thams cad na yod pa zhes bya ba de lta bu la sogs pa yin la/ bdag tu lta ba ni 'jig tshogs la lta ba ste/ sems las byung ba'i chos thams cad ni yod pa ma yin pa mi rtag pa bdag nyid thob pa'i dus na yang byed pa dang bcas pa lta bur snang bas bya ba dang bcas pa yin te/de lta bas na bdag tu lta ba nyid ni bdag gi mtshan nyid ma yin no/ /rnam pa 'di nyid kyis ngan par gnas pa yang bdag gi mtshan nyid ma yin te/ ngan par gnas pa zhes smos pas ni nye bar len pa'i phung po lnga gzung ngo / /'di gnyis las gzhan pa'i bdag gi mtshan nyid kyang mi dmigs zhes bya ba ni dngos po yod pa gang dag yin pa de dag ni mngon sum gyi tshad ma'am rjes su dpag pas dmigs te/gzugs la sogs pa ni mngon sum gyis so/ /mig la sogs pa ni rjes su dpag pas so/ / bdag ni mngon sum dang rjes su dpag pa dag gis mi dmigs te/ de lta bas na bdag ni med kyi/ sems kho na la bdag tu 'dogs par zad do/ /bdag tu lta ba gang yin pa de ni nor pa skyes pa yin no zhes bya ba de ni thag pa la sbrul du 'khrul pa bzhin no/ /thag pa yang nor pa tsam zad pa yin zhes bya ba de ni thag pa la sbrul du 'khrul pa dang bral bas lus dang sems nyam nga ba med pa dang 'dra'o//tsam zhes smos pa ni bdag gi dngos po med pa'i phyir nor pa tsam kho na yod kyi/ bdag ni ma yin no zhes bya ba yin no/ /sdug bsngal la rang bzhin rgyun chags rtogs mi 'gyur//zhes bya ba ni sdug bsngal gyi rang bzhin nye bar len pa'i phung po lnga po 'jig tshogs la lta ba dang bcas pa'i ma rig pas bsgribs pa rtogs par mi 'gyur zhes bya ba yin no/ /rig min zhes bya ba ni zag pa med pa'i ye shes kyis so/ /rig nyid ces bya ba ni zag pa dang bcas pa'i shes pas nyams su myong ba'i rnam pa can gyis so//de ji ltar mthong ba la sogs pa ni gzhan gyi byas zhes bya ba'i lta ba 'di la brten zhes bya ba ni mthong ba dang / thos pa dang / snom pa dang / myong ba dang / reg pa dang / rnam par shes pa gang yin pa de ni dbang phyug la sogs pas byas so zhes pa ste/mdzangs shing mkhas pa su zhig rten cing 'brel bar 'byung ba mthong nas dbang phyug la sogs pas byas par lta ba 'di la brten/ bdag med par zhi ba rung bar tshigs su bcad pa zhes bya ba ni/ bdag ces bya ba'i sgra ni gang zag la sogs pa'i rnam grangs la yang mthong ste/bdag dang / sems can dang / srog dang / skye ba po zhes bya ba la sogs pa'i rnam grangs dag la'o/ /chos dag la yang mthong ste/ chos ngo bo nyid dang bcas pa zhes bya ba ni bdag dang bcas pa zhes bya bar shes so//'di las phyi rol pa phyin ci log tu gyur pa dag ni bdag med pa las bdag tu mngon par zhen la/ nyan thos kyi theg pa pa rnams ni chos 'di dag ji ltar byis pa so so'i skye bo dag gis dmigs pa de kho na bzhin du 'di dag bdag gi ngo bo nyid yod do zhes chos rnams la phyin ci log ste/phyin ci log tu gyur pa bdag tu lta ba dang chos su lta ba la gnas par dmigs pa de dag gal te bdag gam chos shig med na ji ltar na thar/ su zhig ni thar zhes phyir rgol bar byed de/ de dag la byis pa so so'i skye bos kun brtags pa'i bdag dang chos rnams med na thar gyi yod na ni ma yin no zhes bshad do//'di la don dam tshul gyis zhi ba dang / /skye ba de gnyis khyad par ci yang med/ /ces bya ba ni don dam pa'i tshul bdag med par mnyam pa nyid kyis ni ji ltar 'khor ba gang zag dang byis pa'i skye bos kun brtags pa'i chos rnams kyi stong pa ltar mya ngan las 'das pa yang de dang 'dra la/chos dang gang zag la bdag med pa de yang 'khor ba dang mya ngan las 'das pa dag la mnyam pa nyid du ldan te/ 'khor ba'i de bzhin nyid gang yin pa de nyid mya ngan las 'das pa'i yang yin pas rgyu 'dis na 'khor ba dang mya ngan las 'das pa dag la khyad par ci yang med do//skye ba ni 'khor ba yin te/ de ni phyin ci log tshul bzhin ma yin pa yid la byed pa'i rgyu las byung ba la sogs pas skye ba yin no/ /skye ba de zad pa ni thar pa thob pa yin la/ de yang dge ba byed pa tshul bzhin yid la byed pa'i rgyus lam bsgom pa rnams kyi yin pas skye ba zad pa ni thar pa zhes bya'o//don dam pa'i ye shes la 'jug pa'i tshigs su bcad pa bzhi ste zhes bya ba ni rnam par mi rtog pa'i ye shes la 'jug pa thun mong ma yin pa'i dbang du byas pa ste/ byang chub sems dpa' rnams kyis ji ltar chos la bdag med par rtogs par 'gyur ba de'i dbang du byas nas tshigs su bcad pa yin no/ /sngar ni gang zag la bdag med par bshad pa yin no/ /da ni chos la bdag med pa'o/ /don gyi rnam par brjod pa'i rgyu can rtogs/ / zhes bya ba ni sna tshogs 'di ni yid la brjod pa tsam kho nar zad kyi/ 'di la phyi rol gyi gzugs la sogs pa'i don ni yod pa ma yin no zhes bya ba ste/ dro bar gyur pa'i gnas skabs snang ba thob pa'i ting nge 'dzin yin no/ /mtha' yas pha rol zhes bya ba ni bskal pa grangs med pa dang po'i pha rol tu phyin nas sa dang po rtogs par 'gyur ro zhes bya ba'i don to//de yis brjod pa tsam du don rig nas/ /zhes bya ba ni dro bar gyur pa'i rab kyi mthar phyin te/ rtse mo la 'jug pa'i gnas skabs snang ba mched pa'i ting nge 'dzin ces bya'o/ /der snang sems tsam la ni yang dag gnas//zhes bya ba ni de kho na'i don gyi phyogs gcig la zhugs pa'i ting nge 'dzin te/ bzod pa'i gnas skabs yin no/ /de nas chos dbyings gnyis kyi mtshan nyid dang / /bral ba mngon sum nyid du rtogs par 'gyur/ /zhes bya ba ni bar chad med pa'i ting nge 'dzin te/'jig rten pa'i chos kyi mchog gi gnas skabs so/ /gnyis kyi mtshan nyid dang bral ba ni gzung ba dang 'dzin pa'i mtshan nyid dang ngo / /de nas ni mthong ba'i lam gyi gnas skabs su 'gyur ro/ /gong du de yis brjod pa tsam du don rig nas//der snang sems tsam la ni yang dag gnas/ /zhes bshad pa de ni gzung ba med par bstan to/ /sems las gzhan med par ni blos rig nas/ /de nas sems kyang med pa nyid du rtogs/ /zhes bya bas ni 'dzin pa med par bstan to/ / bzod pa chen po'i gnas skabs na ni gzung ba ma lus par med par rtogs so/ /de'i mjug thogs su 'jig rten pa'i chos kyi mchog gi gnas skabs na ni/ gzung ba med na gang la 'dzin/ /zhes 'dzin pa med par rtogs te/ rim pa 'dis gzung ba dang 'dzin pa med par ston to//de la brten pa'i nyes tshogs tshang tshing dag /dug sman chen pos dug bzhin sel bar byed/ /ces bya ba la/ de la brten pa'i zhes bya ba ni byang chub sems dpa' gang la brten nas rnam par mi rtog pa'i ye shes skyes pa de la brten nas skyes pa rnam par mi rtog pa'i ye shes dug sman lta bu de la brten nas skyes pa nyes pa'i tshogs tshang tshing ring nas zhugs pa gang yin pa de sel bar byed pa yin no//byang chub sems dpa' don dam pa'i ye shes la zhugs pa des sangs rgyas kyis gsungs pa'i dam pa'i chos legs par gzhag pa rtsa ba'i sems bsdus pa'i chos la dmigs pa'i chos kyi dbyings la blo gros gzhag ste zhes bya ba la rtsa ba'i sems bsdus pa'i chos la dmigs pa zhes ji ltar shes she na/mdo sde'i rgyan 'di nyid las shes te/ 'di ltar 'di nyid las gdams ngag rjes su bstan pa'i le'u las/de nas mdo la sogs pa'i chos/ /mi gnyis don ston byed pa la/ /thog ma kho nar sdom brtson te/ /mdo sogs ming la sems 'jog go/ /de nas tshig rab dbye rnams la/ /rim gyis rnam par dpyod par byed/ /ces 'chad par 'gyur te/de la sogs pa'i tshigs su bcad pa gsum gyis sems drug po rtsa ba'i sems dang rjes su dpyod pa'i sems dang / rnam par dpyod pa'i sems dang / nges par 'dzin pa'i sems dang / sdom pa'i sems dang / re ba'i sems zhes 'chad par 'gyur ro//de la rtsa ba'i sems ni mdo la sogs pa'i chos rnams kyi ming la dmigs pa gang yin pa ste/ mdo'i sde dang dbyangs kyis bsnyad pa'i sde la sogs pa'i chos la mdo'i sde zhes bya ba ni sa bcu pa yin no zhes bya ba la sogs pa lta bu'o/ /yang na theg pa chen po'i chos mtha' dag la sems gang gis dmigs pa de ni rtsa ba'i sems yin no//tshig rab tu dbye ba dag las drangs te bsdus pa'i chos la dmigs pa'i sems gang yin pa de ni las su rung ba yin no zhes rnal 'byor spyod pa rnams 'chad do/ /bsdus pa'i chos la dmigs pa de'i chos kyi dbyings la blo gros bzhag nas dran pa gang dang gang skye ba'i dran pa 'jug pa de dag thams cad rtog pa tsam du khong du chud de/de ltar na myur du yon tan rgya mtsho'i pha rol sangs rgyas nyid du 'gro bar 'gyur te/ tshigs su bcad pa 'dis ni ji ltar na bsgom pa'i lam gyi mthar thug par gyur pa sangs rgyas kyi sa la 'jug pa de bzhin du bstan to//tshigs su bcad pa 'di rnams kyi bsdus pa'i don ni dang pos ni tshogs kyi lam bstan to/ /gnyis pa'i phyed kyis ni sbyor ba'i lam mo/ /gnyis pa'i phyed 'og mas ni mthong ba'i lam mo/ / bzhi bas ni bsgom pa'i lam mo/ /lnga pas ni mthar thug pa'i lam mo/ /de kho na nyid kyi skabs so// //de kho na nyid kyi skabs kyi 'og tu mthu'i skabs yin te/ 'di'i 'brel pa gang zhe na/ byang chub sems dpas ni rang gi don dang gzhan gyi don gnyis bya dgos so//de la sangs rgyas kyi chos yongs su rdzogs pa ni rang gi don yin no/ /sems can yongs su smin par byed pa ni gzhan gyi don yin no/ /de kho na nyid rtogs pa las ni sangs rgyas kyi chos yongs su rdzogs par 'gyur la/ de'i 'og tu de kho na nyid rtogs pas sems can yongs su smin par bya ba la/yon tan khyad par can mngon par bsgrubs pas sems can yongs su smin par byed do/ /mngon par shes pa la sogs pa yon tan khyad par can de dag kyang rjes la mngon par rtogs pa dang / mthar thug pa'i mngon par rtogs pas grub pas de kho na nyid kyi skabs kyi 'og tu mthu'i skabs yin no//yang na kun nas nyon mongs pa med pa'i thabs su de kho na nyid kyi don bshad do/ /kun nas nyon mongs pa med pa yang ji srid du 'dul ba dag la dbang ma thob pa de srid du gdul ba bsgo pa mi nyan pas yongs su skyo bar 'gyur te/de dag dad par byed mi nus pa'i phyir ro/ /de'i phyir de kho na nyid kyi 'og tu yongs su mi skye ba'i thabs mthu'i skabs yin no/ /gzhan dag gi skye ba shes pa ni 'chi 'pho dang / skye ba mngon par shes pa yin no zhes bya ba ni gzhan dag gi skye ba shes pa 'ba' zhig tu ma zad kyi/des ni 'chi 'pho yang shes te/ du ba las me bzhin du gang na skye bshes pa yod pa de na 'chi 'pho shes pa yang gdon mi za bar yod pas skye ba shes pa kho na bshad do/ /de dang de dag tu skyes pa rnams ji skad du smra ba'i tshig ces bya ba ni sems can rnams kyi tshig gang smra ba de dag byang chub sems dpa'i lha'i rna bas thos so//sngon dge ba dang mi dge ba bskyed pa shes pa ni sngon gyi gnas mngon par shes pa'o zhes bya ba ni gang zag gi tshe rabs snga ma gzhan dag la dge ba'am mi dge ba'i las gang zhig byas pa'i las bag chags kyi gnas skabs de shes pa ni dge ba dang mi dge ba skyed pa shes pa'o//ji ltar rnam par gnas pa yid la byed pa ni mngon par shes pa gang dang gang rnam pa gang gis skye bar 'gyur ba 'di lta ste/ rdzu 'phrul gyi mngon par shes pa'i lus yang bar mos pa la sogs pa lta bu de lta de ltar yid la byed pa las tshul bzhin yid la byed pa skye la/de las rnam par mi rtog pa'i ye shes skye bas/ ji ltar rnam gnas yid la byed pa las/ /zhes bya ste/ rim pa 'dis dang / rgyu 'di dang byed rgyu 'dis mthu 'grub par 'gyur ro zhes bya ba'i tha tshig go//gang gis 'phags dang lha dang tshangs pa yi/ /gnas pa zhes bya ba ni bshad ma thag pa'i mthu gang gis gnas pa dang / yang dag par 'chos par byed pa dang / rnam par dag pa skyed par byed pa zhes bya bar sbyar ro//'phags pa la sogs pa'i bde bar gnas pa zhes bya ba la/ 'phags pa'i gnas pa ni stong pa nyid dang / mtshan ma med pa dang / smon pa med pa dang / 'phags pa'i bden pa bzhi dang / sa dang pha rol tu phyin pas bsdus pa'o/ /lha'i gnas pa ni bsam gtan dang gzugs med pa'o//tshangs pa'i gnas ni byams pa dang / snying rje dang / dga' ba dang / btang snyoms so/ /'jig rten gyi khams rnams sgyu ma lta bu nyid du mthong la zhes bya ba ni ji ltar sgyu ma la yang dag pa ma yin pa glang po che dang / rta la sogs pa skye ba yang snang /'jig pa yang snang ba de bzhin du byang chub sems dpas kyang 'jig rten gyi khams gzhan dag ni 'chags par mthong la/ gzhan dag ni 'jig par mthong ngo / /sangs rgyas kyi 'khor gyi dkyil 'khor gyi nang du ting nge 'dzin dpag tu med pas rnam par rol ba kun tu ston pa'i phyir zhes bya ba ni ji ltar byang chub sems dpa' 'phags pa 'jam dpal bcom ldan 'das kyi 'khor gyi nang du ting nge 'dzin la snyoms par zhugs pa byang chub sems dpa' gang gis kyang ting nge 'dzin de las bslang bar ma nus pa las bu mo blo gros bzang mos bslang ba lta bu ste/de lta bu la sogs pa ting nge 'dzin gyis rnam par rol pa theg pa chen po'i mdo sde las 'byung ba dag yin no/ /mngon par shes pa ni drug ste/ 'pho ba dang / mthun par thos pa dang / sems kyi spyod pa dang / 'jug pa dang / 'gro ba dang / 'ong ba dang / des par 'byung ba'i sgo nas rig par bya'o/ /rig pa ni gsum ste/ sngon gyi mtha' la sogs pa la ma rig pa bzlog pa'i phyir ro/ /rnam par thar pa ni brgyad de/ gzugs can gzugs rnams la lta ba ni rnam par thar pa dang po'o/ /nang gzugs med par 'du shes pas phyi rol gyi gzugs rnams la lta ba ni/rnam par thar pa gnyis pa'o/ /sdug pa'i rnam par thar pa lus kyis mngon sum du bya ba nas rdzogs par byas te/ gnas pa ni gsum pa'o/ /nam mkha' mtha' yas skye mched ni bzhi pa'o/ /rnam shes mtha' yas skye mched ni lnga pa'o//ci yang med pa'i skye mched ni drug pa'o/ /yod min med min skye mched ni bdun pa'o/ /'gog pa'i snyoms par 'jug pa ni brgyad pa'o/ /zil gyis gnon pa'i skye mched ni brgyad de/ nang gzugs su 'du shes pas phyi rol gyi gzugs chung ngu kha dog bzang po dang /kha dog ngan pa rnams la lta zhing gzugs de dag zil gyi mnan nas shes/ zil gyis mnan nas mthong ste/ de ltar 'du shes pa 'di ni zil gyis gnon pa'i skye mched dang po'o/ /gzugs chen po la yang de dang 'dra ste/ 'di ni gnyis pa'o//nang gzugs med par 'du shes pas phyi rol gyi gzugs chung ngu kha dog bzang po dang / kha dog ngan pa rnams la lta zhing gzugs de dag zil gyis mnan nas shes/ zil gyis mnan nas mthong ste/ de ltar 'du shes pa de ni zil gyis mnan pa'i skye mched gsum pa'o//nang gzugs med par 'du shes pas phyi rol gyi gzugs chen po kha dog bzang po dang / kha dog ngan pa rnams la lta zhing zhes bya ba la sogs pa 'di ni bzhi pa'o/ /bzhi ni sngon po dang / ser po dang / dmar po dang / dkar po dag go/ / zad par gyi skye mched ni zad par sa dang / chu dang / me dang / rlung dang / sngon po dang / ser po dang / dmar po dang / dkar po dang / nam mkha' mtha' yas skye mched dang / rnam shes mtha' yas skye mched dag go/ /ting nge 'dzin ni dpa' bar 'gro ba la sogs pa dpag tu med pa'o//mthu dang che ba'i bdag nyid la khyad par ci yod ce na/ mthu ni rang gi rten la yod pa'o/ /che ba'i bdag nyid ni mthu dang ldan pa gzhan dag la phan par byed pa'o/ /mthu'i skabs rdzogs so// // mthu'i 'og tu yongs su smin pa'i skabs yin te/ de'i 'brel pa gang yin zhe na/ sngar/ rgya che'i phyir dang zab pa'i phyir/ /yongs su smin dang rnam mi rtog/ /de phyir 'di las gnyis bstan te/ /de ni bla na med pa'i thabs/ /zhes bshad pas mthu rgya chen po bstan pa mthong bas ni sems can rnams yongs su smin par 'gyur te/byang chub sems dpa'i mthu mthong nas de la mos pa rnams de thob par bya ba'i phyir 'bad do/ /zab mo bstan pas ni rnam par mi rtog ste/ de dag gis go rims bzhin du sems can rnams yongs su smin pa dang /bdag nyid kyis sangs rgyas kyi chos yongs su smin par byed do zhes de skad du bshad do/ /de'i phyir mthu'i 'og tu yongs su smin pa'i skabs yin no/ /rnam pa gcig tu na yongs su mi skyo ba'i thabs mthu bshad ma thag pa yin te/ 'khor ba'i log par bsgrub pa dang /sdug bsngal dag gis mi skyo ba'i dus ring por sangs rgyas kyi chos dang / sems can yongs su smin par byed pa na dag pa'i chos rnams kyis 'phel bar 'gyur bas de'i 'og tu dge ba 'phel ba'i thabs yongs su smin pa'i skabs yin no//spong ba'i yan lag rnams dang ldan pa nyid do zhes bya ba la/ spong ba'i yan lag ni lnga ste/ dad pa dang / g.yo med pa dang / sgyu med pa nyid dang / nad nyung ba dang / shes rab bsgom pa'o/ /nyon mongs pa sel ba ni byang chub sems dpa'i zhi ba zhes bya ba ni sdom pa nod pa'i dus nas bzung ste/dbang po'i sgo bsdams pa la sogs pas tshogs kyi lam dang / sbyor ba dang / mthong ba dang / sgom pa dang / mthar thug pa'i lam dag gis 'dod pa'i gnod sems la sogs pa nyon mongs pa rnams rab tu zhi ba ste/ byang chub sems dpa' rnams kyi nyon mongs pa ni rnam par rtog pa yin pas dngos po dang dngos po med pa la sogs pa rnam par rtog pa'i nyon mongs pa rnams spangs pa la rab tu zhi ba zhes bya'o//rang bzhin snying brtse ba zhes bya ba la/ rang bzhin zhes bya ba'i sgras ni rigs bzung ste/ji skad du byang chub sems dpa'i sa las/ rigs dang khams dang sa bon dang / /rang bzhin zhes bya ba ni rnam grangs so zhes bshad pa lta bu'o/ /rang bzhin brtan pa zhes bya ba 'dir yang rang bzhin zhes smos pas ni bzod pa'i rigs bzung ste/las dang po pa bzod pa dang ldan pa'i chos dag ma thos par gnod pa byed pa la ji mi snyam pa'i bzod pa la sogs pa 'jug pa gang yin pa de ni rigs kyi stobs kyis yin no/ /so sor brtags pa ni shes rab ste/ shes rab kyis bzod pa dang ldan pa'i chos rnams dpyad cing dpyad nas de'i 'og tu sems can dag las mi 'dod pa 'bab pa la sogs pa bzod pa gang yin pa de ni shes rab kyi stobs kyis yin no//de'i 'og tu mnyam par gzhag pa'i gnas skabs na bsgom pa'i stobs kyis so/ /dran pa dang shes rab mtshungs par ldan pa la yid gzhungs pa zhes bya ba'i chos gdags so//yang na 'di ltar gsung rab las yid gzhungs pa zhes bya ba ni shes rab kyi rnam grangs su 'byung bas yid gzhungs pa zhes bya ba 'di ni shes rab kyi rnam grangs kho na yin te/ ji skad du bcom ldan 'das kyis mdo gzhan las shes rab kyi dbang du mdzad nas shes rab dang /shes rab gsal ba dang / yid gzhungs pa dang / mkhas pa zhes gsungs pa lta bu'o/ /'jig rten las 'das pa'i shes rab skye bar rung ba nyid ni yid gzhungs pa'i las so zhes brjod pa gang yin pa der ni de kho na nyid ma rtogs pa'i shes rab bskal pa grangs med pa dang po la nges par skyes pa gang yin pa de la yid gzhungs pa zhes bya'o//yid gzhungs pa'i rang bzhin gyi shes rab de yang 'jig rten las 'das pa'i shes rab skye bar rung ba yin pas de ni de'i las su bstan te chos de nyid//chos de nyid kyi las su ji ltar 'gyur zhe na/ tshul 'dis nyes pa med do/ /nam bdud kyis bar chad bya mi nus zhes bya ba ni thos pa dang / bsam pa dang / bsgom pa'i gnas skabs na byang chub sems dpa' shes rab can chos kyi rjes su 'brang ba la/gang gi tshe bdud byang chub sems dpa' dang skal ba 'dra ba lta bu nye bar 'ong bas bar chad bya bar mi nus pa de'i tshe mi 'phrogs pa nyid yin te/ rang bzhin gyis yongs su smin pa yin no/ /byang chub sems dpa' yongs su smin pa'i skabs so// //byang chub sems dpa' yongs su smin pa'i 'og tu sems can yongs su smin pa ste/ 'di'i 'brel pa yang de nyid yin la/ bdag yongs su smin pas kyang / sems can yongs su smin par byed par rung ba yin no/ / de bzhin rten 'dir phyogs gnyis zhi ba dang / /de bzhin spyad pa nyid du smin pa bstan/ /zhes bya ba ni go rims bzhin du mi mthun pa zhi ba dang / gnyen po sbyar ba'o/ /phyi rol pa'i yongs su smin pa las khyad par du 'phags pa'i phyir mchog tu smin par byed pa ni rab tu smin par byed pa'o zhes bya ba ni mu stegs can gyi yongs su smin pa la yongs su smin pa khyad par du 'phags pa yin no//'tsham par smin par byed pa zhes bya ba ni 'dod chags la sogs pa spyod pa rnams la mi sdug pa la sogs pa ston pas so/ /rtogs pas smin par byed pa ni rtogs pa smin par byed pa'o zhes bya ba ni ched kyi don du gsungs pa yin te/dper na zas kyi snod do zhes bya ba lta bu'o/ /yang na byang chub sems dpa' de kho na nyid rtogs pas smin par byed pa ni rtogs pa smin par byed pa zhes bya'o/ /phyin ci ma log pa'i don gyis rtag tu smin par byed pa ni rtag tu smin par byed pa'o zhes bya ba ni ming gi tshogs dang /tshig gi tshogs dang / yi ge'i tshogs rnams kyi don phyin ci ma log par ston pa ste/ 'das pa dang / da ltar byung ba'i sangs rgyas bcom ldan 'das rnams kyis chos bstan pa gang yin pa de la ming gi tshogs la sogs pa gang dag yod pa de dag gi don gdul ba'i skye bo la ltos nas phyin ci ma log par bstan pa gang yin pa'i don de rtag tu de kho na bzhin du rab tu bstan pas sems can rnams yongs su smin par 'gyur ba gang yin pa de ni rtag tu smin par byed pa'o//rnam pa gcig tu na mi rtag pa dang / sdug bsngal ba dang / stong pa dang / bdag med pa'i ngo bo nyid kyi chos rnams la nam yang rtag pa dang bde ba la sogs par mngon par zhen nas phyin ci log tu ston par mi byed kyi//rtag tu mi rtag pa la sogs pa phyin ci ma log pa'i don rab tu ston pas sems can rnams yongs su smin par byed pas rtag tu smin par byed pa zhes bya'o/ /yongs su nyams par mi 'gyur ba'i don gyis gong nas gong du rim gyis smin par byed pa ni gong du smin par byed pa zhes bya ba ni byang chub sems dpa' sa dang po la gnas pa dang /nyan thos rgyun du zhugs pa yongs su smin par bya ba dag sangs rgyas nyid dang / dgra bcom pa nyid 'thob pa ste/ de dag gis yongs su smin pa gang yin pa de ni gong du 'gro ba'i phyir gong du smin par byed pa zhes bya'o//de bzhin pha dang ma dang gnyen bshes rnams/ /bu dang gnyen pa rnams la legs mi gnas/ /zhes bya ba 'di ni ji ltar byang chub sems dpa' sems can rnams la legs par gnas pa de ltar pha dang ma dag kyang bu rnams la legs par mi gnas la/de ltar gnyen bshes rnams kyang gnyen pa dag la legs par mi gnas so zhes de skad du sbyar bar bya'o/ /'jig rten bdag la byams pa ni bdag nyid la phan pa ma yin pa dang bde ba ma yin par sbyar ro zhes bya ba ni rmongs pa ni bdag nyid bde bar bya'o snyam nas ma byin par len pa la sogs pa la rab tu sbyar ro//de'i ma byin par len pa la sogs pa de yang tshe phyi ma la ngan 'gror khrid par byed pa yin pas phan pa ma yin par 'gyur te/ de ltar na 'jig rten ni bdag nyid phan pa ma yin pa la sbyor ro/ / de'i rkyen gyis 'di nyid la gsad pa dang / bcing ba dang / brdeg pa la sogs pa'i sdug bsngal gang yin pa de ni de'i bde ba ma yin pa'o/ /yang na mu stegs can gyi lta ba brten pa'i phyir te/ kun tu gdung ba dang / yongs su gdung ba dang / mer 'jug pa dang / /zas mi za ba la sogs pa bsten pas 'di nyid la sdug bsngal 'thob po//de'i phyir bde ba ma yin pa la sbyor ro/ /de'i rkyen gyis ngan 'gror 'gro ba gang yin pa de ni phan pa ma yin pa la sbyor ba'o/ /byang chub sems dpa' ni pha dang / ma dang / gnyen bshes kyi bsam pa bas khyad par du 'phags pa'i bsam pas bkres pa dang /skom pa dang / grang ba dang / tsha ba la sogs pa srog la 'bab pa'i sdug bsngal yang brtsis la ma chags par go cha dang / sbyor ba dang / mi 'gong ba dang / mi 'khrug pa dang / chog mi shes pa'i brtson 'grus kyis bdag la mi lta ba sbyin pa dang /snyan par smra ba la sogs pas sems can rnams kyis ji ltar bsams pa'i don yongs su rdzogs par byed pa'i phyir bde ba'i bsam pa can zhes bya'o/ /de'i 'og tu bsdu ba'i dngos po rnams kyis bsdus nas bstan pa la 'dzud pa dang / rab tu byung ba la sogs pa phan pa la sbyor ba'i phyir phan pa'i bsam pa can zhes bya'o//rang gi lus dang longs spyod thams cad sbyin pa zhes bya ba ni/ mgo dang / rkang pa dang / lag pa dang / mig dang / sha dang / khrag dang / tshil dang / rkang la sogs pa sbyin pa'i phyir/ rang gi lus thams cad sbyin pa yin no/ / nor dang / 'bru dang / mdzod dang / bang mdzod dang / nor bu dang / mu tig dang / rgyan dang / glang po che dang / rta dang / bu dang / bran la sogs pa sbyin pa'i phyir longs spyod thams cad sbyin pa yin no/ /mi mnyam pa med pa'i sbyin pa dang ngoms pa med par sbyin pas so zhes bya ba tshigs su bcad pa las tshig gang dang gang gis bstan zhe na/mnyam par sbyin pa'i yon tan ngoms par mi 'gyur ro zhes bya ba ste/ mi mnyam pa med par sbyin pa nyid dang / ngoms pa med par sbyin pa nyid gang dag yin pa de dag ni sbyin pa'i yon tan yin no/ /mi mnyam pa med par sbyin pa ni snying rjes snod kyi khyad par la mi lta ba'i phyir ro//tshe 'di dang tshe phyi ma la phan 'dogs pas te zhes bya ba ni tshigs su bcad pa'i tshig /phan 'dogs rnam pa gnyis kyis gzhan smin byed/ /ces bya ba 'dis bstan to/ /rtag pa zhes bya bas ni brtan pa'i tshul khrims ston te/ yang dag par blang ba len pa gang yin pa de dus thams cad du rjes su 'jug cing srog la bab kyang yongs su mi gtong bas de'i phyir bstan pa'i tshul khrims zhes bya'o//rang bzhin gyi tshul khrims zhes bya ba ni tshul khrims la shin tu goms pa'i phyir rang bzhin gyis tshul khrims can du 'gyur ba ste/ so sor brtags shing so sor brtags nas tshul khrims yang dag par len pa la 'jug pa ni ma yin no//gzhan la tshe phyi ma la phan 'dogs pa ni rnam par smin pa dang rgyu mthun pa'i yon tan dag brgyud pas byed de/ de'i rnam par smin pa dang rgyu mthun pa dag phan tshun mthun pas rgyun mi 'chad pa'i phyir ro zhes bya ba ni 'di ltar tshul khrims dang ldan pa de bde 'gror skye ba ni rnam par smin pa'i 'bras bu'o//de sngon goms pa'i dbang gis yang dang yang du tshul khrims yang dag par blangs pa la 'jug pa ni rgyu mthun pa'i 'bras bu ste/ rgyu mthun rgyu dang 'dra ba'o zhes 'byung ba'i phyir ro/ /de nas shi 'phos nas yang goms pa'i dbang gis tshe rabs gzhan dag tu de kho na bzhin du 'jug pa'i phyir brgyud pas zhes bya ste/rnam par smin pa dang rgyu mthun pa dag phan tshun mthun pas rgyun mi 'chad pa'i phyir ro/ /brtson 'grus mchog la zhes bya ba ni/ brtson 'grus chen po la zhes bya ba'i don ston to/ / gzhan gyi sems dge ba gcig gi phyir yang zhes bya ba ni gal te gzhan bskal pa bye ba stong gis dge ba'i sems gcig skyed par byed na yang des kyang byang chub sems dpa' la skyo ba med pa'o/ /zang zing med pa gzhan gyis mchod 'dod pa/ /thams cad nges par bcom pa zhes bya ba ni 'di snyam du gzhan dag bdag la mchod pa dang bkur sti la sogs pa byed par 'gyur bas de'i phyir bdag gis bsgrim par bya'o snyam du mi sems kyi/zang zing med pa'i sems mchod pa dang bkur sti 'dod pa dang bral bas yongs su smin par byed do/ /de nyid kyi don gyi tshul ni don dam pa'i tshul lo//dgongs don tshul ni dgongs pa'i don gyi tshul lo/ /yongs su smin pa'i skabs so// //yongs su smin pa'i 'og tu thams cad mkhyen pa nyid de/ de'i 'brel pa gang yin zhe na/ byang chub sems dpa' de ltar dge ba'i rtsa ba'i tshogs yongs su smin pa ni bla na med pa yang dag par rdzogs pa'i byang chub la reg par 'gyur bas de'i phyir de'i 'og tu byang chub kyi skabs yin no//rnam pa gcig tu na bslab pa'i dmigs pa rang dang gzhan gyi don la sogs pa dngos po bdun pa bshad de/ 'di ltar byang chub kyi sems kyis byang chub don du gnyer ro//de yang ci'i phyir zhe na/ bdag dang gzhan la phan par bya ba'i phyir te/ de'i phyir rang dang gzhan gyi don gyi skabs yin no/ /rang dang gzhan gyi don la zhugs pa ni kun nas nyon mongs pa med par bya dgos pas de'i 'og tu kun nas nyon mongs pa med pa'i thabs de kho na nyid kyi skabs bshad do//de'i 'og tu gdul ba'i sems can gyi don du yongs su mi skyo ba'i thabs mthu'i skabs bshad do/ /de kho na nyid dang mthu 'di dag kho nas go rims bzhin du byang chub sems dpa'i sangs rgyas kyi chos yongs su smin pa dang / sems can yongs su smin par 'gyur te/ 'di ltar byang chub sems dpa' de kho na nyid rtogs pa'i bdag yongs su smin pa dga' ba la sogs pa rnam pa dgu po shin tu chen por 'gyur gyi/ de kho na nyid ma rtogs pa ma yin no/ /mthu dang ldan pa yongs su skyo ba med pas sems can yongs su smin par 'gyur gyi mthu dang mi ldan pas ni ma yin pas de'i phyir yongs su skyo ba med pa'i thabs mthu bshad do//de ltar bdag dang sems can yongs su smin par byas nas tshogs yongs su rdzogs pa de de'i rjes la bde blag tu bla na med pa yang dag par rdzogs pa'i byang chub tu mngon par rdzogs par 'tshang rgya bas yongs su smin pa'i 'og tu byang chub kyi skabs so//rang dang gzhan gyi don la sogs pa dngos po bzhi ni rgyur gyur pa yin no/ /byang chub ni 'bras bur gyur pa yin no/ /de nyid kyi phyir byang chub sems dpa' rnams dngos po bzhi pa la ni rgyu nyid du dmigs la/ lnga pa ni 'bras bu nyid du dmigs te/ de bas na go rims kha na ma tho ba med pa yin no//bskal mchog dus ring 'gro ba zhes bya ba la/ mchog ces bya ba'i sgra ni bskal pa chen po bzung ba'i phyir ro/ /bskal pa mchog de dag dus ring por 'gro ba ste/ bskal pa grangs med pa gsum gyis zhes bya ba'i tha tshig go/ /ring zhes bya ba ni bskal pa grangs med pa gsum bzung ba'i phyir ro//gnyis su med pa'i mtshan nyid mthu dang bcas pa la zhes bya ba ni/ sangs rgyas nyid ni kun brtags pa'i ngo bo nyid kyis yod pa'i mtshan nyid kyang ma yin la/ yongs su grub pa'i ngo bo nyid kyis med pa'i mtshan nyid kyang ma yin no//rin po che'i 'byung gnas lta bu nyid ni mthu yin no/ /de bzhin nyid tha dad pa'i rang bzhin ma yin pa'i phyir dang / sangs rgyas nyid kyang de rnam par dag pas rab tu phye ba'i phyir chos thams cad kyang sangs rgyas nyid yin zhes bya ba ni de bzhin nyid ni chos thams cad kyi rjes su song ba yin la/chos dang chos can dag kyang tha mi dad pas de'i phyir chos thams cad sangs rgyas nyid du brjod do/ /de dag gis de bstan par bya ba yang ma yin zhes bya ba ni pha rol tu phyin pa la sogs pa kun brtags pa'i ngo bo yongs su ma grub pa'i phyir ro/ /gdul ba'i rgyud kyi zhing la dge ba'i lo thog rnams zhes bya ba ni der rab tu bskrun pa'i phyir ro zhes bya bar sbyar ro//sangs rgyas nyid de ni gdul ba'i zhing dag la dge ba'i chos kyi lo thog mngon par 'phel ba gang yin pa de'i rgyu yin te/ dge ba'i lo thog 'phel ba de ni de las rab tu skye'o/ /skye dgu rnams la legs par bshad pa mi zad pa'i chos kyi char chen po 'bebs pas na zhes bya bar 'dir tshig rnam par sbyar bar rig par bya'o zhes bya ba ni tshigs su bcad pa las/skye dgu rnams la legs par bshad pa mi zad pa'i chos kyi char chen 'bebs pas na/ zhes gang bshad pa'i tshigs su bcad pa'i bzhi cha 'di las chos kyi char zhes bya ba'i sgra dang /'bebs pa zhes bya ba'i sgra ni dang por 'byung la/ legs bshad dang mi zad pa zhes bya ba'i sgra ni mjug nas 'byung ngo / /de la legs bshad dang / mi zad ces bya ba'i tshig dag ni dang por rig par bya la/ chos kyi char dang 'bebs pa zhes bya ba'i sgra dag ni tha mar rig par bya'o//de ltar na skye dgu rnams la legs par bshad pa mi zad pa'i chos kyi char chen po 'bebs pas na zhes bya ba yin te/ tshig rnam par sbyar ba 'dis mthun par 'gyur ro/ /de bzhin du/ rin chen chos rab che yangs 'byung phyir zhes bya ba de la yang sbyar bar bya'o// //sangs rgyas nyid kyi ngo bo'i 'og tu skyabs bla na med pa'i khyad par ste/ 'di'i 'brel pa gang yin zhe na/ 'di skad du bshad pa yin te/ mthu'i khyad par 'di lta bu dang ldan pa'i bcom ldan 'das ni skyabs bla na med pa yin pas bla na med pa'i skyabs so//gong du/ theg pa mchog phyir dkon mchog skyabs rab song ba gang / /de nyid skyabs su song ba rnams kyi mchog ces bya/ /zhes bya ba ni gang zag gi khyad par gyi sgo nas skyabs su 'gro ba bshad pa yin te/ gang zag 'jigs pas skrag pa gang dag ri la sogs pa la skyabs su 'gro ba dang /nyan thos la sogs pa'i gang zag 'khor ba'i 'jigs pas skrag pa gang dag bdag nyid bskyab pa'i phyir dkon mchog gsum la skyabs su 'gro ba'i gang zag de dag pas byang chub sems dpa'i gang zag bdag nyid sangs rgyas kyi don du gnyer ba gang zhig bdag kyang sangs rgyas nyid thob nas skyabs su 'gro bar bya'o zhes de snyam du bsams nas dkon mchog gsum la skyabs su 'gro ba 'di nyid mchog yin no//skyabs kyi don ni skyob pa'i don yin pas/ bcom ldan 'das 'tshe ba gang dag las skyob pas skyabs bla na med pa yin pa dang / rgyu gang dag gis na skyabs ri la sogs pa bas skyabs bla na med pa yin pa de ston par byed do//sngar ni skyabs su 'gro ba'i skabs kyis bsams so/ /de ni byang chub kyi skabs kyis bsams te/ sangs rgyas nyid ni byang chub bla na med pa yin la/ de yang skyabs thams cad pas skyabs gtso bo yin no/ /rga dang 'chi ba dag las kyang //zhes bya ba ni skye ba med par rga ba dang 'chi ba med do/ /rga ba dang 'chi ba zhes bya ba'i sgras ni skye ba'i kun nas nyon mongs pa bshad do/ /sna tshogs 'jig gyur 'jig tshogs kun dang theg pa dang / /ngan song rnam mang sdug bsngal thabs min song ba rnams/ /zhes bya ba ni long ba la sogs pa 'tshe ba sna tshogs dag dang /'jigs pa'i bdag nyid lha dang mi la sogs pa thams cad las ni theg pa gnyis kyis yongs su skyob bo/ /ma nges pa'i rigs can rnams ni theg pa dman pa las yongs su skyob bo/ /ngan song dag ni sdug bsngal rnam pa mang po yod pa gang dag yin pa de dag las yongs su skyob pas na/ngan song rnam mang sdug bsngal las yongs su skyob pa'o/ /thabs min song zhes bya ba ni thabs ma yin pa las yongs su skyob pa ste/ thabs ma yin pa las yongs su skyob pa nyid kyang mu stegs can gyi lta ba las slong ba'i phyir ro//dam pa'i chos la sems can gdul ba'i thabs mkhyen pa'i phyir zhes bya ba ni legs par gsungs pa'i chos 'dul ba la sems can rnams 'dod chags spyod pa la sogs pa la mi sdug pa bstan pa la sogs pa rnam pa gang dang gang gis gdul bar bya ba de thams cad dang ji lta ba bzhin mkhyen to//thugs rjes pha rol tu phyin pa'i phyir ro zhes bya ba ni thugs rjes bskul bas sangs rgyas kyi yon tan thams cad kyi pha rol tu phyin pa yin no/ /yang na bla na med pa yang dag par rdzogs pa'i byang chub brnyes pa'i phyir thugs rje'i pha rol tu phyin pa yin te/ mthar phyin pa brnyes so zhes bya ba'i tha tshig go//'jig rten ji srid ces bya ba ni/ 'jig rten khams kyi mthar thug pa'i mtha' gang yin pa de skyabs sangs rgyas kyi mtha' yang de yin no/ /'jig rten gyi khams kyi mtha' la ni mthar thug pa med pa la skyabs la yang mthar thug pa med pas sangs rgyas nyid de ni skyabs dpe med cing mchog yin par 'dod do//de ni mi rtog ye shes lam gyis 'thob/ /ces bya ba ni 'jig rten las 'das pa'i ye shes shin tu rnam par dag pa'i lam thob pas so/ /shin tu yul chen ye shes lam gyis thob/ /ces bya ba ni de'i rjes la 'thob pa shes bya mtha' yas pa'i yul can gyi ye shes kyi lam thob pas te/'di gnyis bshad par bya ba'i tshig yin par sbyar ro/ /sangs rgyas kyi sems can gyi tshogs kun tu song ba nyid ni sems can thams cad bdag nyid du zhal gyis bzhes pa yongs su grub pa las rig par bya'o zhes bya ba ni des sa dang po la chos kyi dbyings thams cad du 'gro ba'i don du rtogs pas bdag gang yin pa de nyid sems can rnams yin zhes sems can thams cad dang mnyam pa nyid 'thob bo//sems can thams cad bdag nyid du khas blangs pa de sangs rgyas kyis la yongs su grub ste/de bzhin nyid ni thams cad du song ba nyid du rab tu grub pas 'di ni khyad par gzhan yin no/ /ji ltar rnga dag ma brdungs par/ /zhes bya ba ni ji ltar sems can rnams kyi sngon gyi dge ba'i rtsa ba'i dbang gis rnga dag ma brdungs pa las gzas pa med par grogs po dag 'dod pa rnams ni mi rtag pa/mi brtan pa/ yid brtan du mi rung ba ste/ ngan 'gro'i rgyu yin no zhes bya ba de lta bu la sogs pa'i sgra 'byung ba de bzhin du/ sangs rgyas bcom ldan 'das rang bzhin gyi sku la bzhugs pa rnams kyang sngon gyi smon lam gyi stobs kyis lhun gyis grub par chos 'chad pa 'byung ngo //de bzhin du ji ltar nor bu 'bad pa med par rang gi 'od ston pa lta bu ste/ nor bu ni 'di snyam du bdag gis 'od kyis bya ba bya'o snyam du mi sems mod kyi/ 'on kyang rtog pa med par 'od ston par 'gyur la/ yid bzhin gyi nor bu yang mthu ston to//de bzhin du sangs rgyas bcom ldan 'das rnams kyang lhun gyis grub pa'i gnas skabs na bza' ba mi mnga' bar rnam par mi rtog pa bzhin du sangs rgyas kyi mdzad pa mdzad par 'gyur ro/ /tshigs su bcad pa 'di gnyis kyis ni lhun gyis grub pa nyid bstan to//da ni tshigs su bcad pa gnyis kyis sangs rgyas kyi mdzad pa rgyun mi 'chad pa nyid ston par byed de/ ji ltar nam mkha' la 'jig rten gyi bya ba rgyun mi 'chad par snang ba lta bu'o/ /ji ltar 'jig rten gyi khams thams cad du rgyun mi 'chad ce na/ 'jig rten gyi khams gzhan zhig ste/stong pa dag tu 'jig rten gyi bya ba rnams mi snang mod kyi/ 'on kyang gang dag chags pa de dag na 'jig rten gyi bya ba rnams rgyun mi 'chad par snang ngo / /de bzhin du zag pa med pa'i dbyings nam mkha' ltar chad pa med pa la yang sangs rgyas kyi mdzad pa rgyun mi 'chad par 'byung ngo / /ji ltar nam mkha' la rtag tu bya ba rnams skye zhing 'jig par 'byung ba de bzhin du zag pa med pa'i dbyings la sangs rgyas kyi phrin las skye zhing 'bri ste/sems can gang dag skal ba dang ldan pa de dag la ni skye la/ skal ba dang mi ldan pa de dag la ni 'bri'o/ /snga ma dang phyi ma khyad par med pa'i phyir dag pa yang ma yin zhes bya ba ni gang gi phyir sngar yang kun nas nyon mongs pa ma yin la/phyis kyang ma yin pa de'i phyir dag pa ma yin te/ gang la dri ma yod pa de dag par 'gyur na chos kyi dbyings de ni sngar ram phyis kyang dri ma can ma yin no/ /glo bur gyi sgrib pa thams cad kyi dri ma dang bral ba'i phyir ma dag pa yang ma yin no//bdag med pa'i mchog ni de bzhin nyid rnam par dag pa'o/ /de yang ngo bo nyid kyi don gyis sangs rgyas rnams kyi bdag yin no zhes bya ba la bdag ces bya ba'i sgra 'di ni brtags pa'i bdag la mthong ngo / /chos kyi ngo bo nyid la yang mthong ste/ dper na sa ni sra ba'i bdag nyid do zhes bya ba sra ba'i ngo bo nyid do zhes bya bar shes pa dang /me ni dro ba'i bdag nyid do zhes bya ba ni dro ba'i ngo bo nyid do zhes bya bar shes pa ltar 'dir yang de dang 'dra ste/ bdag med pa'i mchog ni de bzhin nyid rnam par dag pa yin la/ sangs rgyas bcom ldan 'das rnams kyang de rnam par dag pa'i ngo bo nyid yin pas de'i phyir bdag ces bya ba'i sgra ni bdag med pa'i mchog gi ngo bo nyid yin pas blta bar bya'o//de'i phyir sangs rgyas yod min zhing / /med par yang ni mi brjod do/ /zhes bya ba ni rgyu de nyid kyi phyir sangs rgyas ni yod pa zhes kyang mi brjod de/ de bzhin nyid kun brtags pa'i gang zag dang chos med pa'i mtshan nyid yin pa'i phyir ro/'di ltar de bzhin nyid ni gang zag gi ngo bo nyid kyi mtshan nyid kyang ma yin la/ chos kyi ngo bo nyid kyi mtshan nyid kyang ma yin te/ kun brtags pa'i gang zag ni ri bong gi rwa dang 'dra la/ kun brtags pa'i chos kyang de kho na dang 'dra bas so//dgongs pa 'dis ni sangs rgyas nyid ni yod pa yang ma yin no/ /de bzhin nyid kyi mtshan nyid du yod pa'i phyir med pa yang ma yin no/ /ji ltar lcags la tsha ba zhi ba dang / mig la rab rib zhi ba ni gdung ba dang / rab rib med pa'i mtshan nyid yin pa'i phyir yod pa yang ma yin zhes bya ba ni 'di ltar tsha ba med pa dang /rab rib med pa ni yod pa yang ma yin te/ rims nad med pa bzhin no/ /ji ltar rims nad dang bral ba yod pa ma yin pa de bzhin du tsha ba dang rab rib dang bral ba yang yod pa ma yin no/ /zhi ba'i mtshan nyid du yod pa'i phyir med pa yang ma yin no zhes bya ba ni tsha ba zhi ba ste/lcags grang mor gyur na lcags kyis lcags kyi bya ba mi byed pa yang ma yin la/ mig la rab rib zhi na yang mig gis mthong ba'i bya ba mi byed pa yang ma yin no/ /gal te med pa tsam zhig yin par gyur na ni gzugs med pa'i phyir lcags kyis kyang lcags kyi bya ba mi byed la/mig gis kyang mig gi bya ba mi byed par 'gyur ro/ /ji ltar rims nad nye bar zhi ba med pa tsam kho na ma yin gyi/ rims nad nye bar zhi na lus la nad sos pa gzhan 'byung ba de bzhin du/ sangs rgyas bcom ldan 'das rnams kyi sems dang ye shes la gdung ba dang rab rib lta bu 'dod chags dang ma rig pa dag zhi ba ni yod par mi brjod do//sems dang shes rab rnam par grol ba dag ni des rab tu phye ba'i phyir ro zhes bya ba ni 'dod chags med pa dang / ma rig pa med pa dang / 'gags pa dang /nye bar zhi ba dang / nub pa ni yod pa ma yin no/ /med pa yang ma yin te/ rnam par grol ba'i mtshan nyid de lta bur yod pa'i phyir ro zhes bya ba la/ rnam par grol ba'i mtshan nyid ni gang rnam par grol ba la bdag ni rnam par grol lo snyam pa'i ye shes bdag nyid kyis so sor rang gis rig pa 'byung ba 'di yin te/ji ltar rims nad nub ste nye bar zhi na so so rang gis rims nad sos pa so sor nyams su myong ba de bzhin du 'dod chags kyi rims nad dang / ma rig pa'i rab rib dag nub ste nye bar zhi na so so rang gis rnam par grol ba'i mtshan nyid kyi nad sos pa so so rang gis nyams su myong bar 'gyur ro//tshigs su bcad pa snga ma rnams ni de bzhin nyid kyi gnas su gyur pa'i mtshan nyid do/ /tshigs su bcad pa 'di ni gdung ba dang rab rib zhi ba lta bu gnas ngan len gyi lam gyi rten gyur pa'i mtshan nyid do/ /nam mkha' ltar lus med pas na mang po nyid kyang ma yin no zhes bya ba ni 'di ltar bdag tu 'dzin pa med pa'i phyir rten tha dad par brjod par mi nus te/bdag tu 'dzin pa yod na ni 'di ni bdag go/ /lhas byin ni gzhan no snyam pa de lta bur 'gyur gyi bdag tu 'dzin pa med pa la ni de lta bur mi 'gyur ro/ /de bas na bdag tu 'dzin pa med pa'i phyir sangs rgyas bcom ldan 'das chos kyi sku la gnas pa rnams nam mkha' bzhin du tha dad par bya bar mi nus so//byang chub sems dpa'i spyod pa la gnas pa chos kyi sku yongs su ma rdzogs pa rnams la ni tha dad du mi bya ba ma yin no/ /ye shes snang ba byed pa'i phyir/ nyi ma chen po 'dra bar 'dod//ces bya ba la/ nyi ma chen po ni kun brtag par bya ba yin te/ gang stong gsum gyi stong chen po'i 'jig rten snang bar byed pa'i nyi ma chen po de lta bu 'ga' zhig yod par gyur na'o/ /sprul pa la sogs pa'i mdzad pa la 'dres pa'i mdzad pa gcig pa nyid ston to zhes bya ba la sogs pa zhes smos pas ni byin gyi rlabs kyi mdzad pa la sogs pa bsdu bar rig par bya ste/sangs rgyas bcom ldan 'das rnams kyi mdzad pa ni 'dres pa yin pa'i phyir sangs rgyas gcig gi sprul pa la sogs pa sangs rgyas kyi mdzad pa gang yin pa de de las gzhan pa dag gis kyang mdzad pa yin no//sangs rgyas thams cad kyi ye shes dus gcig tu 'jug par ston to zhes bya ba ni sangs rgyas bcom ldan 'das rnams ni rtag tu mnyam par gzhag pa yin pa'i phyir lhun gyis grub par 'jug pa la sangs rgyas thams cad kyi ye shes dus gcig tu 'jug ste mdzad pa gcig pa'i phyir ro//nyi ma'i 'od zer stong pa rnam par rtog pa med par 'char ba ni 'od zer kha cig sngar 'char la/ gzhan dag phyis 'char ba ma yin gyi thams cad du dus gcig kho nar 'byung ngo / /de bzhin du sangs rgyas bcom ldan 'das mdzad pa tha mi dad pa rnams kyang ngar 'dzin pa dang nga yir 'dzin pa dang bral ba'i phyir gang gi tshe de kho na gcig gi ye shes 'byung ba de'i tshe kho na sangs rgyas thams cad kyi 'byung ngo //ji ltar nyi ma'i nyi zer dag /'jug la bdag gir bya ba med/ /ces bya ba ni rnam par rtog pa med pa'i phyir ro/ / nyi ma ni 'od zer rnams 'jug pa la bdag gir bya ba med de/ lhun gyis grub par 'jug pa'i phyir ro/ /nyi ma ni 'di snyam du bdag ni bsreg pa dang skem pa la sogs pa'i las la zhugs pa yin pas bdag gis bsreg par bya'o snyam du mi sems mod kyi/ 'on kyang rnam par mi rtog pa bzhin du bdag gir bya ba med par 'od zer 'gyed par 'gyur ro//de bzhin du sangs rgyas bcom ldan 'das chos kyi sku la gnas pa nyon mongs pa dang shes bya'i sgrib pa bag chags dang bcas te spangs pa ngar 'dzin pa dang nga yir 'dzin pa spangs pa rnams kyi ye shes me long lta bu la sogs pa gang dag yin pa de dag 'jug pa la yang bdag gir 'dzin pa mi mnga'i/nga yir 'dzin pa mi mnga' bar shes bya thams cad la 'jug go/ /snyigs ma lnga shas che ba zhes bya ba la/ snyigs ma lnga ni nyon mongs pa dang / lta ba dang / sems can dang / bskal pa dang / tshe'i snyigs ma dag yin te/ snyigs ma zhes bya ba ni snyigs ma ngan pa dang tha shal yin no/ /lhag ma rnams kyis ni phrin las zab pa'o zhes bya ba la/ stobs sogs sangs rgyas chos rnams la/ /byang chub rin chen 'byung gnas 'dra/ /zhes bya ba 'dis ni byang chub kyi phyogs la sogs pa rin po che'i gnas nyid kyi phrin las bstan to//'gro ba'i dge ba'i lo thog la/ /sprin chen dang yang 'dra bar 'dod/ /ces bya ba phyed 'dis ni sems can yongs su smin par mdzad pa'i phrin las bstan to/ /bsod nams ye shes rab rdzogs phyir//zla ba nya ba lta bur 'dod/ /ces bya ba 'dis ni mthar thug par gshegs pa'i phrin las brjod do/ /ye shes snang ba byed pa'i phyir/ /nyi ma chen po 'dra bar 'dod/ /ces bya ba 'dis ni chos ston pa'i phrin las brjod do/ /ji ltar nyi ma'i dkyil 'khor gyi/ /'od zer dpag tu med 'dres shing //zhes bya ba 'di dang / de bzhin zag med dbyings na yang / /sangs rgyas dpag tu med 'dres shing / /zhes bya ba'i tshigs su bcad pa gnyis po 'di thams cad kyis ni sprul pa la sogs pa mdzad pa'i phrin las bstan to/ /dper na nyi ma'i 'od zer gcig /ces bya ba'i tshigs su bcad pa 'dis ni ye shes 'jug pa'i phrin las bstan to//ji ltar nyi ma'i 'od zer dag /ces bya ba 'dis ni rnam par mi rtog pa'i phrin las brjod do/ /nyi ma'i 'od zer gcig btang bas/ /zhes bya ba 'dis ni ye shes rnam pa sna tshogs pa'i phrin las bstan to/ /ji ltar nyi ma'i 'od zer rnams//zhes bya ba 'dis ni ye shes mi 'jug pa'i phrin las brjod do/ /nyan thos dang rang sangs rgyas rnams kyi shes pa ni sna tshogs pa ma yin te/ shes bya'i sgrib pa ma spangs pa'i phyir shes bya sna tshogs bdag la shes bya mi 'jug go/ /dri med dbyings la sangs rgyas kyi/ / mtshan nyid dang ni gnas pa dang / phrin las zab pa 'di bshad pa/ /mkha' la tshon gyis ri mo 'dri/ /zhes bya ba ni dper na 'ga' zhig nam mkha' la ni ri mo 'dri bar dka' ba byed pa de bzhin du/ sangs rgyas bcom ldan 'das rnams so so rang gis rig pa'i chos bsnyad pa'i rnam par stan pa mdzad pa gang yin pa de ni dka' ba mdzad pa yin no//gos bkra ba nyid dang nam mkha' la ri mo 'dri ba nyid ni rgya mtsho'i blo gros kyi mdo'i rjes su 'brang bar khong du chud par bya'o/ /'byor pa rnam par dbye ba la zhes bya ba ni nyan thos dang rang sangs rgyas dang sangs rgyas rnams kyi 'byor pa tha ma dang / 'bring dang /mchog tu rnam par dbye bas so/ /de nyid kyi phyir rim gyis gzhan dang gzhan zil gyis gnon to/ /rnam pa'i rab tu dbye ba'i khyad par dang / zab pa'i khyad par gyis 'byor pa ston to zhes bya ba sbyar te/ dpag tu med pa nyid kyis ni rnam pa'i rab tu dbye ba'i khyad par bstan la/ bsam gyis mi khyab pa nyid kyis zab pa'i khyad par bstan to/ /ji ltar bsam gyis mi khyab pa yin/ ji ltar tshad med pa yin zhe na/ smras pa/ de gang zag dang gang gi don dang / 'jig rten gyi khams gang du dang / rnam pa ci 'dra ba dag dang / bskal pa ci tsam du byang chub kyi ched du zhugs nas 'jug pa ste/don de lta bu la sogs pa la sangs rgyas bcom ldan 'das rnams ji ltar 'jug pa de tshad gzung ba dang bsam par mi nus so/ /dbang po lnga gzhan du gyur na 'byor pa dam pa rnam pa gnyis 'thob po zhes bya ba gzugs med na ji ltar dbang po gzhan du 'gyur bar 'dod ce na/rang gi sa bon gang las su/ /rnam rig snang ba gang byung ba/ /de dang de yi skye mched ni/ /rnam pa gnyis su thub pas gsungs/ /rang gi sa bon yongs su gyur pa'i khyad par thob pa gang las gzugs su snang ba'i rnam par rig pa 'byung ba'i sa bon gang yin pa de dang snang ba gang yin pa de ste/de dag ni bcom ldan 'das kyis go rims bzhin du de'i mig dang gzugs kyi skye mched nas lus dang reg bya'i skye mched kyi bar du gsungs so/ /gang gi tshe byang chub sems dpa' rnams khams gsum pa 'di sems tsam mo zhes bya bar thos pa dang bsam pa dang bsgom pa'i rim gyis gzugs kyi 'du shes zil gyis mnan te/gzugs su phyin ci log spong bar byed pa de'i tshe skye mched nyid du phyin ci log par gyur pa'i rnam par rig pa gang dag yin pa de dag yongs su gyur na phyin ci log spang ba'i phyir dbang po lnga gzhan du 'gyur ba rnam par gzhag go//'byor pa rnam pa gnyis la dbang po lnga po thams cad don lnga po thams cad la 'jug pa zhes bya ba ni mig gis gzugs mthong ba nas reg bya la reg pa'i bar du ste/ dbang po re re la yang 'byor ba de lta bu dang gzugs la sogs pa mthong bas yon tan brgya phrag bcu gnyis 'thob pa'o//gzugs la sogs par mngon par zhen pa yod na don thams cad la 'jug pa 'gal gyi/ de mngon par zhen na spang ba'i phyir nyes pa med de/ don 'di ni 'phags pa gzungs kyi dbang phyug gi rgyal po dang / dam pa'i chos pad+ma dkar po la sogs pa'i mdo las khong du chud par bya'o//yid gzhan du 'gyur na 'byor pa dang mthun pa spyod pa rnam par mi rtog pa'i ye shes shin tu rnam par dag pa la 'byor ba'i mchog rnyed par gyur te zhes bya ba ni nyon mongs pa can gyi yid gzhan du gyur na'o/ /rnam par mi rtog pa'i ye shes ni yid kyi rnam par shes pa dang mtshungs par ldan par 'jug la/de'i rten ni yid yin te/ mig gi rnam par shes pa la sogs pa'i mig la sogs pa lta bu'o/ /ji srid du nyon mongs can gyi yid de gzhan du ma gyur pa'i bar du 'jig tshogs la lta ba la sogs pa nyon mongs pa bzhi dang mtshungs par ldan par kun gzhi rnam par shes pa la dmigs nas phyin ci log tu 'jug pa de srid du de la brten pa yid kyi rnam par shes pa yang gzugs la sogs pa'i yul la ci rigs par gzugs la sogs pa'i yul med bzhin du yod pa yang dag par bzung nas phyin ci log tu 'jug go//nyon mongs pa can gyi yid de gzhan du gyur na de la brten pa rnam par mi rtog pa'i ye shes la 'byor ba 'thob ste/byang chub sems dpa' rnams kyi 'byor pa de la rag las pa dang / de'i rjes la 'thob pa'i ye shes la rag las pas ni de dang mthun par spyod pa yin no/ /don gzhan du gyur pa ni gzugs la sogs pa yul lnga gzhan du gyur pa'o//'dzin pa gzhan du gyur pa ni mig gi rnam par shes pa la sogs pa lnga gzhan du gyur pa ste/ ji ltar rnam par ma dag pa'i gnas skabs na yul lnga po sna tshogs su dmigs pa de bzhin du/ gzhan du gyur ba'i gnas skabs na bai DUr+ya la sogs pa'i zhing sna tshogs su snang ba rnam par dag pa yin no//rnam par rtog pa gzhan du gyur na zhes bya ba ni yid kyi rnam par shes pa gzhan du gyur pa ston to/ /ye shes thams cad ces bya ba ni/ me long lta bu'i ye shes la sogs pa lta bu'o/ /phrin las thams cad la zhes bya ba ni sprul pa'i phrin las sogs pa la ste/dus thams cad du thogs pa med pa la 'byor pa'i mchog thob par 'gyur ro zhes bya ba yin no/ /rten ni gzhan du gyur pa na zhes bya ba la rten du gyur pa ni sa ste/ de gzhan du gyur na mi gnas pa'i mya ngan las 'das pa la 'byor pa thob par 'gyur ro/ /'di ni kun gzhi rnam par shes pa'i dmigs pa gzhan du gyur pa yin te/'di ltar/ kun gzhi rnam par shes pa ni/ /de ni len pa dag dang gnas/ /rnam par rig pa mi rig pa/ /zhes bya ba 'byung ba yin no/ /rten de gzhan du gyur pa ni gnas ngan len gyi rten gyi dmigs pa gzhan du gyur pa rnam par gzhag go/ / 'khrig pa gzhan du gyur pa ni lus kyi dbang po'i phyogs gcig go/ /de ltar sangs rgyas dri med pa'i/ /gnas na gzhan gyur dpag med pas/ /zhes bya ba ni dbang po lnga gzhan du gyur pa la sogs pa ji skad bshad pa 'di ni sgo tsam du zad kyi/ rgyas par ni chos mang po gzhan du gyur pa theg pa chen po'i mdo dag las khong du chud par bya'o//'byor ba'i skabs kyi 'og tu sangs rgyas nyid kyis sems can yongs su smin par mdzad pa'i skabs yin te/ 'di'i 'brel ba gang yin zhe na/ de ltar 'byor pa brnyes pa rang gi don gyi mthar phyin pa'i sangs rgyas bcom ldan 'das rnams ni 'di ltar rtsol ba mi mnga' bar rnam par mi rtog pa bzhin du/sems can yongs su smin par mdzad pas 'di'i dbang du byas nas yongs su smin par mdzad pa'i skabs yin no/ /sngar ni byang chub sems dpa'i spyod pa la gnas pa'i yongs su smin pa yin no/ / da ni mthar phyin pa brnyes pa sangs rgyas kyis la bzhugs pa yin no/ /ma smin pa ni smin par 'gro la/ smin pa ni rnam par dag par 'gro ste/ de ltar dus rtag tu 'gro yang zhes bya ba ni 'jig rten dang sbyar ro/ /de ltar thob dka' zhes bya ba ni tshegs chen pos 'thob pas na thob dka' ste/ thob par dka' ba de'o//la lar skye ba mi snang zhes bya ba ni skye ba dang mi snang ba ni skye ba mi snang ba'o/ /yang na skye ba mi snang ba ni skye ba mi snang ba'o/ /ji ltar gang na gnas te sems can rnams 'dul ba'o zhes bya ba ni de ni cig car la lar sgo mang brgya nas chos kyi 'khor lo dang zhes bya ba de lta bu la sogs pa'i rnam pas 'dul ba ni ji ltar 'dul ba yin no//chos kyi sku las ma g.yos par 'dul ba ni/ gang la gnas te 'dul ba zhes bya'o/ /yongs su smin par mdzad pa'i 'og tu chos kyi dbyings rnam par dag pa'i skabs te/ 'di'i 'brel ba gang yin zhe na/ 'di ni byang chub kyi skabs yin no/ / sngar ni/ ngal rgyas rmad byung dka' spyad dge kun bsags/ /bskal mchog dus ring 'gro ba sgrib kun zad/ /sar gtogs sgrib pa phra bcom sangs rgyas te/ /de ni mthu chen rin chen snod phye bzhin/ /zhes bya ba la sogs pa ni rnam pas byang chub spyir bsams so/ /de'i 'og tu ni sangs rgyas nyid brnyes pa'i gnas skabs na sems can yongs su smin par mdzad pa bsams so//da ni ngo bo nyid dang / rgyu dang / 'bras bu dang / phrin las dang ldan pa dang / 'jug pa'i rab tu dbye bas bsam mo/ /yang na 'di ni byang chub kyi skabs yin no/ /sngar ni byang chub sems dpa' dag gang la slob ce na/gnas bdun po rang dang gzhan gyi don nas bzung ste byang chub kyi bar la slob bo zhes bshad do/ /byang chub kyang mdo dag las rnam pa mang po zhig 'byung bas sngar byang chub bsams pa ni ji ltar mdo gzhan dang gzhan dag las 'byung ba de ltar bsam mo//de bas na 'di'i dbang du byas nas chos kyi dbyings rnam par dag pa'i skabs yin te/ 'dir ni go rims 'di nyid legs so/ /sangs rgyas kyi sa'i mdo las/ sangs rgyas kyi sa ni chos lnga po chos kyi dbyings dang / me long lta bu'i ye shes dang / mnyam pa nyid kyi ye shes dang /so sor rtog pa'i ye shes dang / bya ba sgrub pa'i ye shes kyis bsdus par 'byung bas/ sangs rgyas kyi sa'i dbang du byas nas/ chos lnga po go rims bzhin du rnam par gtan la dbab po/ /de las kyang chos kyi dbyings dang por bstan pas de'i phyir dang por chos kyi dbyings rnam par dag pa'i skabs so// //de'i 'og tu ye shes bzhi sems par 'gyur ro/ /chos lnga po 'di dag gis rnam par gtan la dbab par rab tu dbye ba rgyas par ni theg pa chen po sangs rgyas kyi sa'i mdo kho na las blta bar bya'o/ /chos thams cad kyi de bzhin nyid nyon mongs pa dang / shes bya'i sgrib pa gnyis rnam par dag pa'i mtshan nyid ces bya ba ni nyon mongs pa dang shes bya'i sgrib pa dag las rnam par dag pas na nyon mongs pa dang shes bya'i sgrib pa rnam par dag pa'o/ /gang zhig rnam par dag ce na/ chos thams cad kyi de bzhin nyid de/ 'dis ni de bzhin nyid kyi gnas yongs su gyur pa bstan to//dngos po shes pa ni rjes la thob pa'i ye shes so/ /dngos po zhes bya ba'i sgras ni kun gzhi rnam par shes pa zhes bya ba gzhan gyi dbang gi ngo bo nyid bzung ste/ 'dis ni gnas ngan len gyi gnas yongs su gyur pa bstan to/ /gzhan gyi dbang gi ngo bo nyid yongs su gyur na rnam par mi rtog pa'i rjes la thob pa'i ye shes kyi spyod yul du 'gyur gyi/gzhan gyi ni ma yin no/ /de la dmigs/ dbang zad mi shes mtshan nyid do/ /zhes bya ba 'di ni lam gyi gnas yongs su gyur pa bstan to/ /de zhes bya ba'i sgra ni bshad ma thag pa chos kyi dbyings bzung ngo //dbang zad mi shes mtshan nyid do/ /zhes bya ba ni rnam par mi rtog pa'i ye shes ni de bzhin nyid la dbang zad mi shes pa 'thob ste/ bzhed dgur mnyam par 'jog pa'i phyir ro/ /de'i rjes la thob pa'i ye shes ni phyin ci ma log pa'i don gyis/ gzhan gyi dbang gi ngo bo nyid la dbang zad mi shes pa thob po//de bzhin nyid shes thams cad nas/ /bsgom pa pa las zhes bya ba la/ de bzhin nyid shes pa ni rnam par mi rtog pa'i ye shes te/ sa dang po rtogs pa'i dus na thob pa yin no/ /de bsgom pa ni sa lhag ma rnams su ste/ shes pa de ji lta ji ltar thos pa dang /bsam pa dang / bsgom pa la sogs pa'i rim gyis sbyor ba la sogs pa'i gnas skabs na chos kyi rnam grangs kyi sgo thams cad nas sgom pa de lta de ltar chos kyi dbyings rnam par dag pa'i rgyur 'gyur ba de ni bsgom pa yin no/ /de'i stobs kyis sems can thams cad la phan pa bskyed pa dang /bde ba bskyed pa dang / gnyis mdzad pa gang yin pa de ni de'i 'bras bu yin no/ /sku la sogs pa rnam pa gsum sprul pa ni phrin las so zhes bya ba la/ gsung sprul pa ni nam mkha' dang / shing dang / nags tshal dang / rtsig pa la sogs pa las chos ston pa'i sgra grag pa gang yin pa'o//thugs sprul pa ni gang gis na des rtogs par 'gyur bar gzhan gyi sems sprul nas chos ston par mdzad pa gang yin pa'o/ /rnam pa gcig tu na gzhan gyi sems ji ltar gnas brtan rab 'byor la sogs pa theg pa chen po 'chad pa de ltar sprul par mdzad de/de lta bu la sogs pa gzhan yang blta bar bya'o/ /sprul pa'i sbyor ba'i thabs kyi phrin las can te zhes bya ba ni sprul pa'i sbyor ba'i thabs gang yin pa ste/ thabs de mkhyen pa'i phyir de'i phrin las can zhes bya'o/ /chos kyi dbyings rnam par dag pa de nyid sku gsum gyi bye brag gis tha dad du 'jug pa yin no//chos kyi dbyings de ni/ chos rnams kun gyi de bzhin nyid/ /sgrib gnyis dag pa'i mtshan nyid de/ /zhes bya ba nas bzung ste/ ngo bo nyid dang / rgyu dang / 'bras bu dang / las dang / ldan pa dang / 'jug pa'i don gyis bstan pa yin no//'khor yongs su sdud pa'i bye brag ni 'khor gyi dkyil 'khor gyi bye brag go/ /zhing gi bye brag ni longs spyod rdzogs pa'i sku la la'i sangs rgyas kyi zhing ni shel gyi rang bzhin yin la/ la la'i sangs rgyas kyi zhing ni bai DUr+ya'i rang bzhin yin pa de lta bu la sogs pa'o/ / mtshan gyi bye brag ni dper na 'od dpag med ces bya ba dang / rnam par snang mdzad ces bya ba de lta bu la sogs pa'o/ /sku'i bye brag ni la las shel la sogs pa'i rang bzhin gyi bye brag gis sam/ sku chung ngu dang sku chen po'i bye brag gis rnam pa 'ga' zhig tu mthong ba'o/ /chos la longs spyod rdzogs pa'i bye brag ni sa bcu pa dang /blo gros mi zad pas bstan pa la sogs pa'i chos kyi rnam grangs kyi sgo tha dad pas so/ /mdzad pa'i bye brag ni byang chub sems dpa' 'dus pa'i bsam pa la ltos nas mdzad pa yin no/ /longs spyod rdzogs pa'i sku de dang / /'brel pa zhes bya ba la/'di'i 'brel ba nyid gang yin zhe na/ de'i rgyur gyur pa nyid de/ 'di ltar chos kyi sku ni longs spyod rdzogs pa'i sku'i rgyu yin no/ /longs spyod rdzogs pa ni de'i rgyu mthun pa'i 'bras bur gyur pa'i phyir 'khor gyi dkyil 'khor dag tu byang chub sems dpa' sar chud pa rnams la theg pa chen po'i chos thun mong ma yin pa ston pas de'i phyir longs spyod rdzogs pa'i sku ni chos kyi sku dang 'brel ba zhes bya'o//yang na longs spyod rdzogs pa'i sku ni rnam par mi rtog pa'i rjes la thob pa'i ngo bo nyid yin la/ rnam par mi rtog pa'i rjes la thob pa de yang rtogs pa dang / rjes su dran pa dang /rnam par 'jog pa dang / 'dres pa dang / nges par spyod pa'i ngo bo nyid dang rnam pa lngar bstan te/ de'i phyir yang longs spyod rdzogs pa'i sku ni chos kyi sku dang 'brel ba zhes bya'o/ /longs spyod rdzogs pa'i sku ni rang gi don phun sum tshogs pa'i mtshan nyid do zhes bya ba ni byang chub sems dpa' sar chud pa rnams dang thabs cig tu theg pa chen po'i chos thun mong ma yin pa'i longs spyod rdzogs par sku nyams su bstar ba'i phyir ro//phun sum tshogs pa de ni chos kyi sku la brten pa yin no/ /gzhan gyi don phun sum tshogs pa de ni longs spyod rdzogs pa'i sku la brten pa yang yin la/sprul pa'i sku la brten pa yang yin te/ de dag ni sku gsum yin no/ /sangs rgyas thams cad kyi sku gsum po de dag ni go rims bzhin du rnam pa gsum gyis khyad par med de zhes bya ba la 'jig rten gyis ni sangs rgyas thams cad kyi chos kyi sku tha mi dad do/ /ji ltar tha mi dad ce na/de'i phyir smras pa/ chos kyi dbyings tha mi dad pa'i phyir ro/ /dgongs pas ni longs spyod rdzogs pa'o/ /sangs rgyas kyi dgongs pa tha dad pa med pa'i phyir te/ longs spyod rdzogs pa'i sku ni 'ga' la yang dgongs pa mthon dman gyi bye brag tha dad pa mi mnga'o/ / phrin las kyis ni sprul pa'i sku'o/ /phrin las thun mong pa'i phyir te/ ji ltar sprul pa'i sku gcig gi sprul pas phrin las mdzad pa de bzhin du gzhan dag kyang mdzad pas gcig gis mdzad pa gang yin pa de thun mong yin pa'i phyir gzhan gyis kyang mdzad pa kho na yin no/ /sku gsum gyi skabs kyi 'og tu ye shes kyi skabs te/'di'i 'brel pa gang yin zhe na/ 'di ni byang chub kyi skabs yin no/ /sangs rgyas kyi sa ni chos lnga po chos kyi dbyings dang / me long lta bu'i ye shes la sogs pa bzhis bsdus so/ /de la chos kyi dbyings rtogs pa'i skabs kyi chos kyi dbyings ni/rang bzhin chos rdzogs longs spyod dang / /sprul pa dag gis tha dad 'jug /ces dbye ba'i dbang du byas nas chos kyi dbyings la sku gsum gsal ba byas so/ /da ni ye shes kyi dbang du byas nas sangs rgyas kyi ye shes me long lta bu la sogs pa bzhi bsam mo/ /me long ye shes nga yi med//yongs su ma chad ces bya ba ni ngar 'dzin pa dang / nga yir 'dzin pa dang / gzung ba dang 'dzin pa med pa'i phyir nga yi ba med pa yin no/ /yul gyi sgo nas yongs su ma chad pa zhes bya ba ni 'di la shar la sogs pa'i yul tha dad par yongs su chad pa med pa'o/ /rtag tu sgrib pa dang bral ba'i phyir shes bya thams cad la ma rmongs pa yang yin zhes bya ba ni 'di la 'di ltar de ni dus thams cad du nyon mongs pa dang /shes bya'i sgrib pa dang bral bas so/ /rnam pa med pa'i phyir chos de dag la mngon du phyogs pa yang ma yin no zhes bya ba de ni shes bya dag la gzugs la sogs pa la dmigs pa bzhin du dmigs pa'i bye brag gam/sngon po la sogs pa'i rnam pa'i bye brag gis 'jug pa ma yin pa'o/ /de ni dmigs par bya ba dang / dmigs par byed pa mnyam pas mnyam pa rnam par mi rtog pa de bzhin nyid la dmigs pa'i ngo bo nyid de/ de nyid kyi phyir mi g.yo ba yin no/ /mnyam pa nyid kyi ye shes la sogs pa de dag gi rnam pa thams cad kyi rgyu yin pa'i phyir ye shes thams cad kyi 'byung gnas lta bu'o zhes bya ba ni 'dir de bzhin gshegs pa skye ba 'byung ba bstan pa'i mdo las/ sangs rgyas bcom ldan 'das rnams ni rnam pa thams cad mkhyen pa'i rten gyi ye shes dang ldan pa'i phyir ye shes kyi 'byung gnas chen po'o zhes 'byung ba'i mdo'i dum bu 'di dang sbyar bar bya'o//de ni longs spyod rdzogs pa'i sangs rgyas kyang yin la zhes bya ba ni longs spyod rdzogs pa'i sangs rgyas kyi rgyu yin pa'i phyir/ longs spyod rdzogs pa'i sangs rgyas zhes bya'o//ye shes kyi gzugs brnyan 'byung ba'i phyir de zhes bya ba la/ de zhes bya ba'i sgra ni me long lta bu'i ye shes dang sbyar bar bya'o/ /dus thams cad du byams pa chen po dang / thugs rje chen po dang ldan pa zhes bya ba mnyam pa nyid kyi ye shes 'di la dpe ni mdo las/sangs rgyas bcom ldan 'das rnams ni mthong na sems can thams cad dga' ba'i phyir/ ye shes chen po'i zla ba yin no zhes 'byung ba yin no/ /so sor rtog pa'i ye shes ni/ /shes bya kun la rtag mi thogs/ /zhes bya ba ni chos thams cad la rnam pa thams cad kyi khyad par gyi 'jug pa'i phyir shes bya thams cad la thogs pa mi mnga' ba yin no//'khor gyi dkyil 'khor rnams su ni/ /'byor ba thams cad ston mdzad pa/ /the tshom thams cad gcod pa yi/ /chos chen char ni rab tu 'bebs/ /zhes bya ba 'di la ni dpe mdo las/ sangs rgyas bcom ldan 'das rnams ni rnam pa thams cad du shes bya yang dag par rab tu gsal bar mdzad pa'i phyir/ye shes chen po'i nyi ma yin no zhes 'byung ba 'di sbyar bar bya'o/ /bya ba sgrub pa'i ye shes ni/ /zhes bya ba 'di la ni dpe mdo las/ sangs rgyas bcom ldan 'das rnams ni nyon mongs pa'i nad thams cad rab tu zhi bar mdzad pa'i phyir/ye shes chen po'i sman yin no zhes 'byung ba 'di yin no/ /'dzin pa'i phyir ni thos pa'i chos rnams so zhes bya ba ni/ rgyu 'di dang rim pa 'dis me long lta bu'i ye shes yang dag par 'grub par 'gyur ro/ /sems mnyam pa'i phyir ni sems can thams cad la bdag dang gzhan mnyam pa nyid kyi phyir mnyam pa nyid kyi ye shes yang dag par 'grub ste/'di ltar de ni sems can thams cad la byams pa chen po mnyam pa nyid bsgoms pas yang dag par 'grub po/ /so sor rtog pa'i ye shes ni chos yang dag par rab tu ston pa'i rgyu las 'byung ba yin no//bya ba sgrub pa'i ye shes ni bya ba thams cad bsgrub pa'i rgyu las 'byung ba yin te/ sbyor ba la sogs pa'i gnas skabs 'di dag yongs su dag na me long lta bu'i ye shes la sogs pa mthar phyin par 'gyur ro/ /sangs rgyas kyi sa'i skabs kyis ci sangs rgyas gcig kho nar zad dam/'on te mang mo zhig ce na/ de la re zhig kha cig na re ji srid du 'jig rten gyi khams gcig na yod pa de srid du 'jig rten gyi khams gzhan dag tu sangs rgyas mi 'byung ngo zhes zer ro/ /gzhan dag na re 'jig rten gyi khams thams cad na sangs rgyas gcig kho na zhig lcags sdong bzhin du bzhugs shing sangs rgyas kyi mdzad pa mdzad kyi/mang po mngon par rdzogs par 'tshang rgya ba ni med do zhes zer ro/ /gzhan dag na re sangs rgyas ni mang po zhig yin na chos kyi sku la bzhugs pa ngar 'dzin pa dang / nga yir 'dzin pa dang / nyon mongs pa dang / shes bya'i sgrib pa bag chags dang bcas te spangs pa de dag kyang mang po nyid yin no zhes zer te/de dag 'gags pa'i phyir sangs rgyas gcig pa nyid dang mang po nyid ma yin pa'i skabs so/ /tha dad rigs don med phyir dang / /rdzogs dang thog ma med pa'i phyir/ /sangs rgyas gcig pa ma yin no//dri med gnas te zag pa med pa'i dbyings na chos kyi sku tha dad min te mang po nyid ma yin gyi gcig pa nyid do/ /sangs rgyas nyid de la ji ltar 'jug pa de'i thabs kyi dbang du byas nas tshigs su bcad pa bzhi'o/ /bsgom pa mi dmigs pa gang yin pa de nyid bsgom pa dam pa yin zhes bya ba ni gang gi tshe kun brtags pa gzung ba dang 'dzin pa dang ngar 'dzin pa dang /nga yir 'dzin pa thams cad dang rnam par rtog pa thams cad dang bral ba bsgom pa ste/ sa dang po thob pa nas bzung ste mthar thug pa'i bar gyi lam bsgom pa de ni sgom pa'i dam pa zhes bya'o/ /don 'di nyid ni don gyi ngo bo nyid yongs su gcod par byed pa 'phags pa shes rab kyi pha rol tu phyin pa lnga brgya pa las blta bar bya'o//gang dag sangs rgyas nyid la bla ma ya mtshan gyi chos dang ldan par lta ba zhes bya ba la/ ya mtshan gyi chos dang ldan pa ni sangs rgyas nyid do/ /thob par bya'o zhes de ltar rnam par brtags nas khengs par 'gyur ba ste/sangs rgyas nyid ni brtson 'grus chen po yun ring po nas goms pas dka' ba spyad pa mang po phul du phyin pas thob par bya ba yin la/ bdag kyang byang chub tu smon lam btab pa yin pas rnam pa de lta bus sangs rgyas nyid thob par bya'o zhes de snyam du bsams nas gzhan dag khyad du bsad de gyong bar 'gyur ba de dag ni de ltar nga rgyal kun tu spyod pa'i phyir sangs rgyas nyid las thag ring bar 'gyur ro//yang na nga rgyal zhes bya ba'i sgra ni 'dir dmigs pa'i rnam par rtog pa'i rnam grangs yin par blta bar bya'o/ /'di dag thams cad ni rtog pa tsam mo zhes bya ba ni/ bla ma ring dang mtshan ma dang //zhes bya ba de lta bu la sogs pa bshad ma thag pa gang yin pa'o/ /mi skye ba'i chos la bzod pa thob pa'i gnas skabs na zhes bya ba ni sa brgyad pa la lam mngon par 'du bya ba med par 'byung ba'i phyir ro/ /bslab pa'i dmigs pa'i khyad par bshad zin to/ /da ni ji ltar bslab pa yin pa de brjod par bya'o//de ji ltar bslab pa yin zhe na/ sbyor ba'i sa la rnam pa gang dag gis de slob pa ste/ bsam pa'i khyad par dang / sbyor ba dang / gzhan la phan pa sgrub pa dang / rang la phan pa sgrub pa dang / rang dang gzhan la phan pa rnam par dag pa nges par 'byung ba'i khyad par gyi sgo nas so//bsam pa'i sgo nas ji ltar slob ce na/ dam pa'i chos la mos pa rgyu dang 'bras bus 'tsham zhing phyin ci ma log par rang dang gzhan gyi don la sogs pa gzhi lngas bsdus pa mthong ba des dang po kho nar chos zab cing rgya che ba la nges par brtag pa lhur blang ba bya dgos pas de'i phyir byang chub kyi 'og tu mos pa'i skabs so//yang na byang chub sems dpa' dag gis gang la bslab par bya ba rang dang gzhan gyi don nas bzung ste/ byang chub kyi bar gzhi bdun po de ni bshad zin to/ /da ni ji ltar te byang chub sems dpa' rnams rnam pa gang gis slob pa de ston to/ / ji ltar slob ce na/ mos pa dang chos yongs su tshol ba la sogs pa'i rim gyis so/ /ji ltar phung po'i don las brtsams te gzugs gang ci yang rung 'das pa'am/ ma 'ongs pa'am/ da ltar byung ba'am/ nang gi'am/ phyi'i 'am/ rags pa'am/ phra ba 'am/ngan pa'am/ gya nom pa'am/ nye ba na 'dug pa gang yin pa'am/ thag ring po na 'dug pa gang yin pa zhes bya ba'i rim pa 'dis gzugs kyi phung po la sogs pa'i rab tu dbye ba bstan pa de bzhin du mos pa yang mdo dag las 'das pa la sogs pa'i bye brag gis dbye ba bstan to//gzung bar gyur pa ni phyi rol gyi ste gang la dmigs pa nyid du mos pa'o zhes bya ba ni mos pa ni sems las byung ba'i chos yin te/ gang gi tshe de theg pa chen po'i chos la dmigs te skye ba de'i tshe ni 'dzin pa nyid du bstan to/ /gang gi tshe de nyid 'das pa la ro myang ba'am/ rjes su yi rang ba'am/ma 'ongs pa la mngon par dga' ba la sogs par dmigs pa de'i tshe ni gzung ba nyid du bstan to/ /yang na sems nyid thams cad du gnyis kyi rnam pa can du 'jug pas mos pa rnam pa gnyis su brjod do/ /log par mos pa'i phyir ro zhes bya ba ni dper na nyan thos kyi theg pa pa rnams nyan thos kyi theg pa cher bsgom pa kho nas sangs rgyas nyid thob par 'gyur ro zhes bya bar mos pa lta bu ste/dgongs pa can gyi don la sgra ji bzhin du mos na log par mos pa'i phyir nor pa zhes bya'o/ /mngon sum pa ni nye ba ste/ rkyen nye ba'i phyir ro zhes bya ba ni dge ba'i bshes gnyen la sogs pa rkyen nyen de las de thos ma thag tu mos pa skye ba'o//'phrogs dang 'dres dang mi mthun phyogs ma 'dres/ /zhes bya ba la mos pa'i rab tu dbye ba 'di ni mdo las chung ngu dang / 'bring dang / chen po dang / dman pa dang / rgya chen po dang / bsgribs pa dang / ma bsgribs pa dang /brtson pa dang / ma brtson pa dang / bsags pa dang / ma bsags pa dang / bstan pa dang ring du zhugs pa'i bye brag gis brjod pa ste gzhan yin no/ /'dres pa ni 'bring po'o zhes bya ba ni res 'ga' mos res 'ga' mi mos pa ste/ ma mos pa dang mos pa 'dre ba'i phyir 'dres pa zhes bya'o//ma mos pa ni 'dun pa med pa dang / le lo la sogs pa'o/ /bsgribs pa ni khyad par du 'gro bar bya ba la sgrib pa dang bcas pa'o zhes bya ba ni mos pa yod du zin kyang bya ba ngan pas 'brel pas khyad par mi 'thob ste/ de'i phyir sgrib pa zhes bya'o/ /yang na gang gis na tshe phyi ma la ma mos par 'gyur ba dam pa'i chos kyis phongs par 'gyur ba'i las byas pa'i phyir sgrib pa dang bcas pa zhes bya'o//rtag tu zhes bya ba ni rtag tu rgyun ma chad par ro/ /rtag tu yin yang la la bsam pa drag pos mi byed pas de yongs su spangs pa'i phyir gus par byas te zhes bya ba smos so/ / bsags pa ni de rtogs par rung ba'o zhes bya ba ni bsod nams dang ye shes kyi tshogs bskal pa grangs med pa dang pos bsdus pa tsam gyis so/ /gzung ba dang 'dzin par gyur pa la ni rnal 'byor 'khrugs pa zhes bya ba ni las dang po pa la gzung ba dang / 'dzin pa'i dngos po sngar bshad pa'i tshul du bden par rnam par 'jog go//gang gi tshe thams cad du gzung ba dang 'dzin pa la gzhol bar gyur na de ni rnal 'byor 'khrugs pa zhes bya'o/ /su'i 'khrugs she na/ rnal 'byor pa'i ste/ rnam par mi rtog pa'i ye shes gzung ba dang 'dzin pa dang bral ba la gnyis su mngon par zhen pa'i phyir ro/ / bdag nyid mos pa la ni dge ba'i rtsa ba nyam chung ba'o zhes bya ba ni dad pa dang ma chags pa la sogs pa dge ba'i rtsa ba dag yang dang yang du ma goms par gyur pa'o/ /nor ba'i mos pa'i bar du gcod pa ni bsam par mi bya ste/ de nyid bar du gcod pa yin pas so/ /dkar po'i phyogs kyi mos pa kho na'i bar du gcod pa bsam par bya ba yin pas mngon sum pa ma yin pa'i bar du gcod pa yang bsam par mi bya ste/rang nyid bar du gcod pa'i ngo bo nyid yin pa'i phyir ro/ /zhi gnas tsam gyis mngon pa'i nga rgyal byed pa'o zhes bya ba ni lhag mthong la mngon par brtson par mi byed pa ste/ gang gi tshe zhi gnas dang lhag mthong dag mnyam par 'jug pa de'i tshe zung du 'brel ba'i lam thob pa'i phyir mos pa gegs med par 'gyur ro//ma bsgribs pa la ni sgrib pa'o zhes bya ba ni gang gi tshe le lo la sogs pa mi mthun pa'i phyogs dag gis don dan pa la 'brel ba'i bya bas gong nas gong du khyad par du 'gro bar mi 'gyur ro//skyes pa da ltar byung ba'i ni bsod nams chen po'o zhes bya ba ni sngar mos pa skyes pa ni 'das pa dang / da ltar byung ba rnam pa gnyis su bshad do/ /de la da ltar byung ba'i phan yon ni bsod nams chen po yin no/ /'das pa ni mngon par dga' ba la sogs pa'i mos pas yang dang yang du goms par byas pa la 'gyod pa med pa phan yon yin te/yid la gcags pa med pa'i phyir ro/ /'dzin pa dang gzung bar gyur pa'i ni yid bde ba chen po ste/ ting nge 'dzin dang yang ldan pa'i phyir ro zhes bya ba ni gang gi tshe gzung ba dang 'dzin par 'gyur ba'i mos pa de la mngon par zhen par mi byed kyi gzung ba dang 'dzin pa nyid rnam par 'jig par byed pa de'i tshe mngon par zhen pa bor bas ting nge 'dzin 'thob po//rgya chen po'i ni gzhan gyi don thob pa'i mchog go zhes bya ba ni sangs rgyas nyid thob pa'o zhes bya ba'i tha tshig go/ /phan yon ni mngon par shes pa myur ba nyid do zhes bya ba la/mngon par shes pa myur ba nyid ni dbang po rnon po nyid de/ mgo smos pas go ba'i phyir chos myur du rab tu shes pa yin no/ /'jig rten pa'i ting nge 'dzin dang ldan pa rnams kyi ni rus sbal bzhin no zhes bya ba ni chos thams cad kyi rang gi mtshan nyid dang /spyi'i mtshan nyid khong du ma chud pa'i phyir mos pa 'khums pa zhes bya'o/ /yang na bsam gtan dang / ting nge 'dzin dang / snyoms par 'jug pa thob pa tsam gyi phyir dang / de tsam gyis chog par 'dzin pa'i phyir dang / de kho na nyid ma rtogs pa'i phyir dang / yon tan khyad par can ma thob pa'i phyir 'khums pa zhes bya'o//rang gi don dang ldan pa nyan thos rnams kyis ni gang zag la bdag med pa rtogs pa'i phyir chos thams cad spyi'i rnam par shes so/ /de gnyis kyi phyir de dag gi mos pa rus sbal lta bu ni ma yin no/ /'on kyang rang gi don lhur len pa'i phyir 'khor bas skrag pas skyo ste/bran bzhin du 'jigs shing skrag pa'i lus kyis rnam par rgyu bas de'i phyir bran dang 'dra'o zhes bya'o/ /don de nyid gzhan gyis bstan nas zhes bya ba ni/ ji ltar khyi ni rtag tu ltogs shing sdug bsngal gyis nyen chog mi shes/ /zhes bya ba'i tshigs su bcad pa 'di ni tshigs su bcad pa dang po las gzhan yin no//'dis bstan nas de'i 'og tu gsum pas theg pa chen po la mos pa yang dag par len du 'jug pa yin te/ theg pa chen po de la de mchog tshul bzhin rig nas ni/ /'di na bstan pas de la de nyid rtag par rab tu tshol/ /zhes de skad du theg pa chen po la mos pa yang dag par len du 'jug go//bdag nyid za ba ma yin pa zhes bya ba ni rang gi don gyi dbang du byas nas zhes bya bar sbyar ro/ /re zhig gang zhig brtse ba'i don dang / rgyags pa dang / cha ba la sogs pa'i don du za ba de'i zas de ni bsod nams ma yin pa kho nar 'gyur ro/ /gang zhig lung du ma bstan par za ba de'i zas de ni bsod nams kyang ma yin/bsod nams ma yin pa yang ma yin no/ /gang zhig rgyags pa la sogs pa'i don du mi za'i/ 'on kyang khal dgal ba'i don du shing rta'i srog shing skud pa lta bu'i tshul du lus 'tsho bas dge ba'i phyogs la rung bar 'gyur zhing dge sbyong gi tshul du 'bras bu 'thob par 'gyur ro snyam nas lus 'tsho bar bya ba'i don du za ba'i zas de ni bsod nams su 'gyur gyi bsod nams 'byung ba chen por ni mi 'gyur ro//de bzhin du nyan thos kyi theg pa'i chos la mos pa las kyang gzhan gyi don gyi rten theg pa chen po'i chos bstan pa tshigs su bcad pa gcig mnyan pa dang /bton pa la sogs pa las phan yon ji skad du theg pa chen po'i mdo de dang de dag las 'byung ba ci 'dra ba de 'dra bar bsod nams 'byung ba chen po ma yin no/ /de ltar 'phags pa chen po'i chos ni yangs gyur la/ /zhes bya ba la/ yangs par gyur pa ni theg pa chen po ste/mdo sde 'bum pa du ma bstan pa'i phyir ro/ /gang la dang gang zhig dang mos pa ji lta bus 'bras bu gang yongs su 'dzin pa zhes bya ba la/ gang la zhes bya ba ni theg pa chen po'i chos yangs pa la'o/ /gang zhig ces bya ba ni byang chub sems dpa' blo dang ldan pa'o//mos pa ji lta bu zhes bya ba ni mos pa yongs su nyams par mi 'gyur ba rgya chen pos te/ mos pa che zhes gang bshad pa yin no/ /'bras bu gang yongs su 'dzin pa zhes bya ba ni bsod nams rgya chen po 'phel ba la sogs pa 'bras bu rnam pa gsum yongs su 'dzin pa'o// // mos pa'i skabs kyi 'og tu chos yongs su tshol ba'i skabs te/ 'di'i 'brel pa gang yin zhe na/ de ltar smos pa mang po'i byang chub sems dpa' ni chos yongs su tshol lo/ /chos yongs su tshol ba de'i dmigs pa ci zhig yin zhe na/ de'i phyir/ sde snod dag ni gsum mam gnyis kyang rung zhes bya ba smos so//de la gsung rab kyi yan lag tu gtogs pa bcu gnyis las shin tu rgyas pa'i sde dang / skyes pa'i rabs kyi sde gang yin pa de ni byang chub sems dpa'i sde snod yin no/ /lhag ma ni phal cher nyan thos kyi sde snod yin no/ /phal cher zhes smos pa ni yan lag kha cig ni theg pa chen po dang nyan thos kyi theg pa thun mong yin pas so//de yang gsum mam gnyis yin no/ /ci'i phyir sde snod ces bya zhe na/ smras pa/ bsdus pa'i phyir te/ don thams cad bsdus pa'i phyir ro zhes bya ba ni dper na gnas gzhan kha cig na bre bcu shong ba la bre bcu bsdus pa'i phyir sde snod ces bya ba de bzhin du 'dir yang shes bya'i don thams cad bsdus pa'i phyir sde snod ces bya'o//ci'i phyir gsum yin zhe na/ rgyu dgus zhes bya ba ni mdo sde dang / chos mngon pa dang / 'dul ba rnams la so sor the tshom dang mtha' gnyis dang / lta ba mchog tu 'dzin pa la sogs pa ste/ re re la'ang rgyu gsum yod pas rgyu dgur 'gyur ro/ /the tshom gyi gnyen por ni mdo sde gang zhig don gang la the tshom za ba de la de nges par bya ba'i ched du bshad pa'i phyir ro/ /zhes bya ba ni gang zhig don gang la the tshom za ba de bstsal ba'i phyir te/ phung po dang khams dang skye mched dang /rten cing 'brel bar 'byung ba dang / bden pa dang / sa dang / pha rol tu phyin pa la sogs pa'i rang dang spyi'i mtshan nyid dag la the tshom za ba rnams la the tshom spang ba'i phyir de dang 'tsham par bshad pa smos pa'i tshul du mdo sde bshad pa de'i phyir the tshom gyi gnyen por mdo sde bshad do//mtha' gnyis la sbyor ba'i gnyen por ni 'dul ba ste kha na ma tho ba dang bcas pa'i yongs su spyad dka' ba'i sgo nas/ zhes bya ba la mtha' gnyis la sbyor ba ni 'dod pa'i bsod nyams dang bdag nyid dub pa la sbyor ba dag go/ /'dod pa'i bsod nyams la sbyor ba dag ni dper na 'dod pa can yongs su spyod pa lta bur bcom ldan 'das kyis bslab pa'i gzhi bcas pa de las 'das te/gsog 'jog byas pa la sogs pa yongs su spyod pas bdag nyid cha ba la sogs pa'i don du yongs su spyod pa gang yin pa ste/ de'i gnyen po'o/ /ji lta zhe na gang zhig yongs su spyod pa dgag pa mdzad pa de lta bu de thag bsrings te yongs su spong ba ni gus pa drag pos bslab pa'i gnas ji ltar bcas pa dag la gus par byed pas de ltar kha na ma tho ba dang bcas pa'i yongs su spyod pa bkag pa yin no//bdag nyid dub pa la sbyor ba'i mtha'i gnyen por ni kha na ma tho ba med pa'i yongs su spyod pa'o//kha na ma tho ba med pa bcom ldan 'das kyis ji ltar gnang ba de yongs su spyod kyi/ bdag nyid nub gsum dang nub drug tu gdung ba dang yongs su gdung ba la sogs pas dub par mi byed pa ste ji skad du bcom ldan 'das kyis dge slong tshul khrims dang ldan pa yon tan dang ldan pa la ni ngas zas ro brgya dang ldan pa dang /gos 'bum ri ba yang gnang ngo zhes gsungs pa lta bu'o/ /zas de yang za ba na ma chags shing rgyags pa la sogs pa'i don du ma yin par za na de lta na kha na ma tho ba med pa'i yongs su spyad pa bdag nyid dub pa la sbyor ba'i mtha'i gnyen por 'gyur ro//'dul bas ni chos dang don 'grub pa ste/ nyon mongs pa 'dul ba la rab tu brtson pas de gnyis rtogs pa'i phyir ro zhes bya ba la nyon mongs pa 'dul ba ni 'dod chags la sogs pa nyon mongs pa rnams la mi sdug pa la sogs pa sgom pa gang yin pa'o/ /chos dang don dag ji ltar rtogs she na/chos ni ming gi tshogs la sogs pas bsdus pa'o/ /don ni de dag gis brjod par bya'o/ /gal te ming de yang don la glo bur ba yin la don yang ming la glo bur yin par lta'i don yang ming gi ngo bo nyid ma yin la ming yang don gyi ngo bo nyid ma yin par 'dzin na de ltar tshul bzhin rab tu brtson pas chos dang don rtogs par 'gyur ro//yang na tshul khrims dang ldan pa 'gyod pa med pa la sogs pa'i rim gyis de kho na nyid rtogs pa'i phyir yang dag pa ji lta ba bzhin gyi don du chos dang don rtogs par 'gyur bas chos dang don 'grub ces bya'o/ /thos pas ni sems las bag chags kyi sgo nas so//zhes bya ba ni chos kyi dbyings shin tu rnam par dag pa'i rgyu mthun pa thob pa'i bag chags kyi sgo nas so/ /bsams pas rtogs par byed pa'i sgo nas so/ /zhes bya bas ni ji lta ji ltar bsams pa de lta de ltar rtogs par 'gyur ro/ / rtogs nas shes rab dang ldan pa sgom pa la rab tu brtson pa zhi gnas thob par 'gyur bas bsam gtan gyi stobs kyis nyon mongs pa rnams zhi bar byed do/ /mnyam par bzhag na lhag mthong gi yang dag pa ji lta ba bzhin rab tu shes pa de kho na nyid rtogs par te/ de ltar na sems can rnams kyang rnam par grol bar byed pa la sangs rgyas nyid kyang 'thob po//gnas ni yul gang du gang gis gang gi phyir bshad pa'o zhes bya ba ni gnas rnam pa gsum bshad pa'o/ /de la gang du zhes bya ba ni ji skad du mdo gzhan de dang de dag las/ 'di skad bdag gis thos pa dus gcig na bcom ldan 'das rgyal po'i khab na bzhugs zhes gsungs pa lta bu ste/rgyal po'i khab la sogs pa'i gnas nyid du bstan to/ /gang gis zhes bya ba ni bcom ldan 'das gnas nyid du bstan pa'o/ /gang gi phyir zhes bya ba ni gang zag gang gi phyir chos 'chad pa'i gang zag gnas nyid du bstan pa yin no//kun rdzob kyi bden pa'i mtshan nyid dang / don dam pa'i bden pa'i mtshan nyid do zhes bya ba ni bum pa dang ras yug dang / gang zag la sogs pa bshad pa ni kun rdzob kyi bden pa ste/ brjod pa dang de las gzhan pa la ltos pa'am dbang po'i spyod yul gang yin pa de ni kun rdzob kyi bden pa'o//don dam pa'i bden pa ni rnam par mi rtog pa'i ye shes kyi spyod yul lo/ /mdor bsdu na kun nas nyon mongs pa'i dmigs pa phyin ci log gi spyod yul gang yin pa de ni kun rdzob kyi bden pa yin la/ bzlog pa ni don dam pa'i bden pa yin no//zas ni bzhi ste/ kham dang / reg pa dang / yid la sems pa dang / rnam par shes pa'o/ /bden pa dang byang chub kyi phyogs dang / mthun pa dang / rnam par thar pa'i sgo la sogs pa ston pa'i phyir ro/ /mya ngan las 'das pa la mngon du phyogs pa'o zhes bya bar sbyar ro//ltung ba'i rigs lnga ni phas pham pa dang / dge 'dun lhag ma dang / nyes pa sbom po dang / ltung byed dang / so sor bshags pa'i ltung ba'o/ /bag med na shes su zin kyang khye'u dang bu mo dang khyim la 'dris pa la sogs pas bya ba ngan pa la 'brel ba'i phyir ltung ba dang bcas par 'gyur ro//ma gus pa las ni 'tsho ba med pa la sogs pa'i 'jigs pas rab tu byung ba ni bslab pa dag la ma gus pa 'byung ngo / /rab tu 'byung ba'i bsam pas rab tu byung yang le lo la sogs pas bslab pa dag la ma gus par byed do/ /bslab pa byin pa la sogs pa chad pa'i las khas len pa ni khas len pa ste/gang zag gang zhig phas pham pa'i ltung ba byung yang kha na ma tho ba gcig kyang bcab pa'i sems med pa de la chad pa'i las 'di lta ste/ gang zag bsnyen par rdzogs pa rnams kyi mjug tu bza' bar bya ba dang / tha mar bkad par bya ba des bsnyen par rdzogs pa rnams kho na la drang bar bya ba dang /de bdag nyid kyis kyang dge sbyong la sogs pas drangs la bza' bar bya ba gang yin pa chad pa'i las de lta bu la sogs pa khas blangs pas ltung ba las 'byung bar 'gyur ro/ /dge 'dun tshogs pas bslab pa'i gzhi bag yangs su byas pa'i phyir bag yangs su byas zhes bya ba ni bcom ldan 'das kyis 'phags pa kun dga' bo la nga yongs su mya ngan las 'da' ba'i tshe skul cig dang /bslab pa'i gzhi ji ltar bcas pa dag las bslab pa'i gzhi phran tshegs phra mo kha cig bag yangs su bya'o zhes bka' stsal pa dang /yongs su mya ngan las 'da' ba'i tshe 'phags pa kun dga' bo mya ngan gyis non pas brjed de/ bcom ldan 'das yongs su mya ngan las 'das pa dang / 'phags pa 'od srungs chen po la sogs pa yang dag par sdud par byed pa rnams kyis gzhi de las 'phags pa kun dga' bo la/bcom ldan 'das kyis ni yongs su mya ngan las 'da' ba'i tshe bslab pa'i gzhi phran tshegs phra mo kha cig bag yangs su mdzad do snyam pa'i dgongs pa 'dis bka' stsal na/ ci'i phyir khyod kyis bcom ldan 'das la ma bskul zhes chad pa'i las byed du bcug go//'phags pa thams cad yod par smra ba'i sde pa la ni bslab pa'i gzhi phran tshegs phra mo kha cig gal te dge 'dun tshogs pas bag yangs su byas na bag yangs yin no zhes grag go/ /'di yang grags pa tsam du zad kyi bslab pa'i gzhi 'ga' yang dge slong gi dge 'dun gyis bag yangs su byas pa'am byed pa ni med kyi/bye brag tu smra ba 'dul ba 'dzin pa dag ltung ba las ldang ba de lta bu 'dod do zhes grag go/ /ltung ba thun mong ma yin pa zhes bya ba ni dge slong la mo'i mtshan dod na dge slong gi ltung ba thun mong ma yin pa'i ltung ba gang yin pa'i ltung ba de las ni dge slong mtshan du gyur na bshags pa la sogs pa'i bya ba med par langs par 'gyur la/dge slong ma'i ltung ba thun mong ma yin pa las ni mo'i mtshan nub nas pho'i mtshan skyes na ci rigs par ltung ba slar bcos pa med par ldang bar 'gyur ro//chos kyi sdom gyi rnam par so sor rtog pa'i khyad par te/ yang dag par so sor rtog pa zhes bya ba ni gang gi tshe chos rnams la chos kyi sdom pa stong pa nyid dang / mtshan ma med pa dang / smon pa med pa dag tu tshul bzhin du so sor rtog pa de'i tshe ltung ba phra mo'i yang phra mo dag las ldang bar 'gyur ro//rab tu dbye ba las zhes bya ba ni dper na rtswa sngon po dang chu la sogs par bshang ba dang gci ba mi bya'o zhes bslab pa'i gzhi bcas pa 'di'i rab tu dbye ba drug ste rgyal po'i skyed mos tshal du dong bdag gis rol pa'i ne'u gsing dang chu la sogs par bshang ba dang gci ba la sogs pa byas pa de'i phyir bslab pa'i gzhi bcas pa yin pa lta bu ste/de bzhin du bslab pa'i gzhi gzhan dag la yang shes par bya'o// //chos kyi dmigs pa yongs su tshol ba'i skabs kyi 'og tu/ dmigs pa rnyed pa yongs su tshol ba ste/ dmigs pa nyes par bzung nas de'i 'og tu ji ltar 'di rnyed par 'gyur zhes dmigs pa rnyed pa yongs su tshol ba'i skabs yin no//de la dmigs pa ni rnam pa bzhi ste/ dmigs pa chos ni bshad pa gang yin pa'o zhes bya ba ni theg pa chen po'i chos mdo'i sde dang / dbyangs kyis bsnyad pa'i sde la sogs pa ste/de ni byang chub sems dpa' shes rab rnon po'i dmigs pa yin gyi thams cad kyi ni ma yin pa nyid do/ /lus la sogs pa ni nang ste zhes bya ba ni dmigs pa gnyis pa'o/ /stsogs pa zhes smos pa ni tshor ba dang sems dang chos rnams bsdu'o/ /yang na dmigs pa chos so zhes smos pa ni skye ba na yang kun nas nyon mongs pa dang /rnam par byang ba'i chos rnams kho na skye la 'gag pa na yang 'gag gi gzhan nang gi byed pa'i skyes bu ni 'ga' yang med do zhes bya ba yin no/ /de la nang gi dmigs pa 'dzin par gyur pa ni dbang po'i gzugs can mig la sogs pa dang yid do//phyi rol gyi dmigs pa gzung ba ni 'dzin pa'i spyod yul gyi don nyid dam/ gzugs la sogs pa ste gsum pa yin no/ /nang dang phyi de dag nyid kyi de bzhin nyid gnyis ni dmigs pa bzhi pa yin te/ 'di ni tshigs su bcad pa las/ / dmigs pa chos dang nang dang ni/ /phyi dang gnyis ni yin par 'dod/ /ces dmigs pa rnam pa bzhi bshad pa gang yin pa rnam par phye ba yin no/ /de la nang gi dmigs pa la sogs pa ni 'dzin pa la sogs pa'i bye brag gis rtsa ba'i gzhung nyid las shin tu rnam par phye bar yang zad na dmigs pa de dag nyid kyi de bzhin nyid gnyis so zhes bya ba de bzhin nyid la ni tha dad pa yod pa ma yin no zhe na/nang gi la sogs pa'i dbye bas de bzhin nyid kyi dmigs pa tha dad par rnam par gzhag ste/ dper na bum pa'i nam mkha' dang gnas khang gi nam mkha' zhes bya ba dang 'dra bar chos can gyi bye brag gis tha dad par rnam par gzhag gi rang gi ngo bos ni ma yin no//de la chos kyi dmigs pa dang por bstan pa dang de ni brjod par bya ba mang ba'i phyir tshigs su bcad pa gnyis pa dang gsum pa dag gis rgyas par 'chad par 'gyur ro/ /nang gi dmigs pa la sogs pa ni brjod par bya ba nyung ba de dag gi dmigs pa rnyed pa dang po brjod do//de la nang dang phyi'i dmigs pa gnyis ni don gnyis kyis go rims bzhin du rnyed de/ gal te gzung ba'i don las 'dzin pa'i don tha mi dad par mthong ba'am/ zhes bya ba ji ltar tha mi dad par mthong zhe na/gnyis su snang ba 'di yang rnam par shes pa kho na snang bar zad kyi dmigs pa gzugs la sogs pa rnam par shes pa las ma gtogs par rang gi ngo bor gnyis su yongs su grub pas grub pa ni med do zhes bya bar sbyar te/ b+ha dri ha ris ji skad du/ / nam mkha' sa rlung nyi ma dang / /rgya mtsho rlung dang phyogs rnams ni/ /nang gi shes pa'i ngo bo yi/ /cha las phyi rol lta bur 'dug /ces bshad pa lta bu yin no/ /'dzin pa'i don las gzung ba'i don tha mi dad par mthong na'o zhes bya ba ni gzung ba dang 'dzin pa ni rnam par shes pa kho nar zad kyi rnam par shes pa las ma gtogs pa byis pas kun brtags pa mig la sogs pa 'dzin pa'i don ni yod pa ma yin no zhes bya ba ste/de'i phyir don du snang ba thams cad sems kho na yin par blta'i/ don sems las gzhan par ni mi blta'o/ /de'i tshe ni 'di'i gzung ba la rnam par g.yeng ba spangs la 'dzin pa'i rnam par rtog pa 'ba' zhig bsdus te/de ni bzod pa'i gnas skabs yin no/ /de nas myur du bar chad med pa'i ting nge 'dzin thob ste/ de ni 'di'i 'jig rten pa'i chos kyi mchog gi gnas skabs yin no/ /de ltar na nang dang phyi'i dmigs pa thob pa yin no//phyi dang nang gi dmigs pa gnyis po thams cad kyi de bzhin nyid rnyed pa ni gzung ba dang 'dzin pa de gnyis nyid mi dmigs pa las rig par bya'o zhes pa ni ji skad du/ de nas de ni 'jig rten las 'das pa'i ye shes bla na med pa'o/ /rnam par mi rtog ye shes dri ma med/ / 'dzin pa gnyis dang bral ba 'thob/ /ces 'chad par 'gyur ba lta bu yin no/ /nang dang phyi dang phyi nang gi de bzhin nyid kyi dmigs pa rnyed pa bshad zin to/ /da ni chos kyi dmigs pa ji ltar rnyed pa de bzhin du skabs dang sbyar ro/ /de la mnyam par gzhag pa'i sems kyis zhes bya ba ni sems rnam par g.yeng bas ma yin pa ste/gang gi tshe chos dag nyan pa na sems rtse gcig pas nyan pa'o/ /sems mnyam par gzhag pa nyid ni 'dir rna gtod pa yin no/ /yid kyi brjod pa dag gis zhes bya ba ni yang dag par rtog pa dag gis te/rna ba'i rnam par shes pa rnam par rtog pa med pas ni don nges par 'dzin par byed nus pa ma yin gyi/ rna ba'i rnam par shes pa'i rjes la yid kyi brjod pa rnam par rtog pa dang bcas pa dag gis mdo dang dbyangs kyis bsnyad pa'i sde la sogs pa'i chos kyi don ji skad bshad pa nges par 'dzin par byed do//de ltar na re zhig thos pa las byung ba'i shes pas chas kyi dmigs pa rnyed pa yin no/ /dmigs pa gnyis rnyed pa las ji skad bshad pa ltar yid kyi brjod pa las gzhan pa ni ma yin no zhes bya bar mthong na'o/ /zhes bya ba ni gal te gzung ba'i don las 'dzin pa'i don tha mi dad par mthong ba'am zhes bya ba yin no//'di skad du chos 'chad pa na sems kho na ming gi tshogs dang tshig gi tshogs dang yi ge'i tshogs nyid du snang gi/ sems las ma gtogs pa don gzhan ni yod pa ma yin no zhes bya bar mthong na'o zhes bya bar bshad par 'gyur te/de ltar na bsam pa las byung ba'i shes pas chos kyi dbyings kyi dmigs pa rnyed pa yin no/ /sems ni ming la gnas pa'i phyir bsgoms pa las byung ba'i shes pas zhes bya ba la/ ming ni gzugs can ma yin pa'i phung po bzhi'o/ /de la ji ltar gnas she na/ming gi de bzhin nyid la gnas pa'i phyir ming la gnas pa yin te/ chos dang chos can dag tha mi dad pa'i phyir ro/ /de nyid kyi phyir mjug thogs su bsgoms pa las byung ba'i shes pas de rnyed par rig par bya'o zhes bshad do gnyis mi dmigs pas rnyed pa las ji skad bshad pa ltar gnyis mi dmigs pa'i phyir ro zhes bya ba ni sngar phyi nang gi dmigs pa gnyis po thams cad kyi de bzhin nyid rnyed pa ni gzung ba dang 'dzin pa de gnyis nyid mi dmigs pa las rig par bya'o zhes gnyi ga'i dmigs pa rnyed pa lta bu bshad pa yin te/de ltar na bsgoms pa las byung ba'i shes pas chos kyi dmigs pa rnyed par bya'o//de nyid kyi phyir dmigs pa rnam pa gsum rnyed pa sngar bshad pa de ni chos kyi dmigs pa rnyed pa las yang dag par rten pa yin par rig par bya'o zhes bya ba ni chos kyi dmigs pa rnyed pa kho nas nang gi dmigs pa la sogs pa sngar bshad pa'i dmigs pa rnam pa gsum rnyed par 'gyur ro//de nyid kyi phyir chos kyi dmigs pa rnyed pa ni dmigs pa rnyed pa thams cad kyi nang na gtso bo yin la gsum pa ni de la brten pa yin no/ /dmigs pa rnyed pa'i 'og tu yid la byed pa yongs su tshol ba'i skabs yin te/de ji ltar bshad pa'i dmigs pa rnyed pa las yid la byed pa rnyed pa ni rnal 'byor pa zhes bya'o/ /yang na yid la byed pa'i khyad par ji lta bu dag gis dmigs pa rnyed par 'gyur ba de ltar rnam par gtan la dbab pa brtsam par bya'o/ / de la rigs nges pa ni nyan thos la sogs pa'i rigs su nges pa gang yin pa'o zhes bya ba ni yid la byed pa spyir bsam pa yin no/ /tshogs bsags pa'i bya ba byed pa zhes bya ba ni rtogs pa'i gnas skabs na'o/ /mi gnod rten bcas gzhan yin te/ /zhes bya ba ni gnod pa'i rten dang gnod pa med pa'i rten dang bcas pa ste/khyim na gnas pa'i rten can dang rab tu byung ba'i rten can zhes bya ba'i tha tshig go/ /mos pa 'jog par byed pa ni sangs rgyas rjes su dran pa dang ldan pa gang yin pa'o zhes bya ba ni theg pa chen po bsdus pa la sogs pa las ji skad du/byang chub sems dpa' rnams ni mdor bsdu na/ rnam pa bcu bdun gyis sangs rgyas rjes su dran pa sgom par byed do zhes sangs rgyas rjes su dran pa bshad pa lta bu ste/ sangs rgyas rjes su dran pa dang ldan pa yid la byed pa 'di ni/ sangs rgyas dkon mchog la sogs pa la mos pa drag po 'jog par byed pa yin no//'dun pa skyed par byed pa ni de la yid ches pa dang ldan pa gang yin pa'o zhes bya ba ni sangs rgyas dkon mchog la sogs pa la dad pa rab tu dang ba dang ldan pa gang yin pa de ni 'dun pa skyed par byed pa ste/ de nyid kyi phyir dad pa ni 'dun pa skyed pa'i las can yin no//ting nge 'dzin la brten pa ni nyer bsdogs dang dngos gzhi'i ting nge 'dzin dang ldan pa gang yin pa ste zhes bya ba ni dman pa'i rten can ni nyer bsdogs kyi ting nge 'dzin dang ldan pa yin no/ /rdzogs pa'i rten can ni dngos gzhi'i bsam gtan dang ldan pa yin no//brjod pa dang bcas pa ni nyer bsdogs dang bsam gtan dang po dang bsam gtan khyad par can la sogs pa na'o/ /brjod pa med pa ni bsam gtan gnyis pa la sogs pa na'o/ /shes pa dang mtshungs par ldan pa'i yid la byed pa ni rnal 'byor gyi rgyu dang bcas pa zhes bya ba ni thos pa'i gnas skabs dang /bsam pa'i gnas skabs na yid la byed pa gang yin pa ste/ 'di ltar thos pa'i gnas skabs dang bsam pa'i gnas skabs ni rnal 'byor gyi rgyur pa yin no/ /rnal 'byor gyi shes pa dang bcas pa gang yin pa zhes bya ba ni bsgom pa'i gnas skabs na ste/gnas skabs de na zhi gnas dang lhag mthong gi lam rnal 'byor yin no/ /'dres pa la dmigs pa ni mdo dang sdom gyi tshigs su bcad pa la sogs pa la dmigs pa zhes bya ba ni mdo thams cad las don gyi khyad par gsungs pa gang dag yin pa de dag tshig rab tu dbye ba'i sgo nas bsdoms te dpyod par byed cing so so rang gis tshul bzhin du yongs su brtags nges par bzung nas don de dag chos la sdom par byed de/mdo 'di ni sa bcu pa yin no zhes der don thams cad nye bar sdud par byed do/ /de bzhin du sdom gyi tshigs su bcad pa la sogs pa las don rgyas par bstan pa dag kyang gcig tu sdom par byed do//ma 'dres pa la dmigs pa zhes bya ba ni tha dad pa rnam pa du mar dmigs pa zhes bya ba'i tha tshig ste/ ming la dmigs pa las kyang tshig la dmigs pa tha dad pa la/ tshig la dmigs pa las kyang yi ge la dmigs pa tha dad do//gang zag la bdag med pa la dmigs pa las kyang chos la bdag med pa la dmigs pa tha dad la/ de bzhin du gzugs can dang gzugs can ma yin pa dag kyang tha dad pa yin no/ /mthong ba'i rnam pa bsgom pa'i yid la byed pa ni mthong ba'i lam gyi gnas skabs na'o//shes pa'i rnam pa bsgom pa ni bsgom pa'i gnas skabs te/ 'di ltar bsgom pa'i gnas skabs na ni shes pa dag kho na 'thob bo/ /yang na mthong ba'i rnam pa bsgom pa ni bzod pa'i gnas skabs na'o/ /shes pa'i rnam pa bsgom pa ni shes pa'i gnas skabs na'o//zhi gnas dang lhag mthong gis byas pa'i khyad par yod do/ mthong ba'i rnam pa bsgom pa ni zhi gnas kyi gnas skabs na'o/ /shes pa'i rnam pa bsgom pa ni lhag mthong gi gnas skabs na'o/ /sdug bsngal gyi rnam pa bsgom pa ni tshor ba dang ldan pa ste/tshor ba ni sdug bsngal ba'i phyir ro/ /bsal ba'i rnam pa bsgom pa ni sdig pa mi dge ba'i chos skyes pa rnams spong bar byed pa yin no/ /ji ltar na sdig pa mi dge ba'i chos skyes zin pa rnams spong bar 'gyur zhe na/ mi dge ba'i chos rgyun gyis skye ba rnams rnam par gcod par byed pa gang yin pa'am sa bon spangs pa'i sgo nas spong ba yin no//de lta ma yin na chos skyes pa rnams ni rang gi ngang gis skad cig mar 'jig pas 'gag par 'gyur ro/ /gnyen po'i rnam pa bsgom pa ni sdig pa mi dge ba'i chos ma skyes pa rnams mi skyed pa'i phyir gnyen po'i thob pa yin no//gnyen po thob nas ni sa bon kun nas 'joms par byed la/ de kun nas bcom pas kyang sdig pa mi dge ba'i chos ma skyes pa rnams mi skye ste/ de ltar na sdig pa mi dge ba'i chos ma skyes pa rnams mi skye bar 'gyur ro/ /chog par 'dzin pa'i gnyen po yid la byed pa bsgom pa ni gang gi tshe 'dun pa skyed par byed pa na'o zhes bya ba ni dge ba'i chos bsgom pa cung zad tsam gyis chog par 'dzin pa gang yin pa de'i gnyen por 'dun pa skyed par byed pa yin no//rnam par g.yeng ba'i gnyen po ni/ 'bad pa dang ldan pa'i yid la byed pa yin no/ /the tshom gyi gnyen po ni brtson 'grus dang ldan pa'i yid la byed pa yin no//rgod pa'i gnyen po ni zhi gnas dang ldan pa'i yid la byed pa yin no/ /zhum pa'i gnyen po ni lhag mthong dang ldan pa'i yid la byed pa yin no/ /sems gnas pa zhes bya ba ni 'jig rten pa'i ting nge 'dzin la gnas pa'o/ / 'jig rten las 'das pa'i phun sum tshogs pa la yid ches pa'i rnam pa bsgom pa zhes bya ba ni 'jig rten las 'das pa'i lam mngon sum du bya ba la dad pa'i dbang po dang ldan pa ste/ dad pa ni yid ches pa'i rnam pa yin no/ /rdzogs pa'i byang chub rab tu snang ba'i rnam pa bsgom pa zhes bya ba ni byang chub mi brjed pa'i rnam pa bsgom pa zhes bya ba'i don to//de nyid la rnam par 'byed pa zhes bya ba ni ma brjed pa'i rnam par 'byed pa gang yin pa'o/ /mthong ba'i lam gyi gnas skabs na rnam par 'byed pa gang yin zhe na/ /de kho na nyid yang dag par rtogs pa gang yin pa'o//yongs su sbyang ba'i sa shes pa'i rnam pa bsgom pa zhes bya ba ni rnal 'byor pa des thos pa dang / bsam pa dang bsgom pa'i rim gyis de kho na nyid rtogs te langs pa dang bdag gis rim pa 'dis de kho na nyid rtogs so zhes yongs su sbyong ba'i sa de ji lta ba bzhin shes par byas nas de'i rjes la de kho na nyid rtogs pa rnams de kho na bzhin du yang dag pa'i rtogs pas ston par byed pa yin no//yang dag pa'i ngag dang yang dag pa'i las kyi mtha' dag ni 'phags pa rnams dgyes pa dang bzhed pa dang thugs su byon pa'i tshul khrims yin no/ /yo byad bsnyungs pa'i tshul kun tu spyod pa'i rnam pa bsgom pa'i yid la byed pa ni yang dag pa'i 'tsho ba yin no//sngon bsgoms pas thob pa'i lam goms pa'i rnam pa bsgom pa zhes bya ba ni mthong ba'i lam la brtson 'grus kyi khyad par thob pa gang yin pa ste/ de'i phyir sngon bsgoms pas thob pa'i lam goms pa'i rnam pa bsgom pa zhes bya'o//chos gnas pa'i rgyu mtshan rnal 'byor pas shes pa gang dag yin pa de dag la dran pas mi brjed pa yin te/ de dag kyang gang zhe na/ zhi gnas dang rab tu 'dzin pa dang / btang snyoms kyi rgyu mtshan dag yin no/ /mtshan ma med pa la sems gnas pas gnas yongs su gyur pa'i rnam pa bsgom pa zhes bya ba ni rnam par g.yeng ba'i rgyu mtshan gang dag yin pa de dag la mtshan mar mi 'dzin pa yin te des na sems gnas pa 'thob po//sems gnas na gnas yongs su 'gyur ro/ /zhi gnas dang lhag mthong bsgom pa lam gyi rang bzhin dag la bshad pa gang yang med do zhes bya ba ni 'di ltar zhi gnas dang lhag mthong gi lam dag ni yid la byed pa thams cad sdud par byed pa yin par rig par bya'o//phan yon yid la byed pa ni rnam pa gnyis te/ gnas ngan len sel ba dang zhes bya ba ni gang gi lus kyi gnas ngan len dang /sems kyi gnas ngan len sel bar byed pas te/ lus kyi gnas ngan len srog gcod pa la sogs pa mi dge ba'i las la 'jug pa'o/ /sems kyi gnas ngan len ni de kun nas slong bar byed pa'i nyon mongs pa kun tu spyod pa'o//lta ba'i mtshan ma sel ba'o zhes bya ba ni lta ba nyid mtshan ma yin pas lta ba'i mtshan ma ste/ 'jig tshogs la lta ba la sogs pa'o/ /lta ba'i mtshan ma de yid la byed pa gang gis sel bar byed pa'i yid la byed pa de ni lta ba'i mtshan ma sel ba yin no/ / ting nge 'dzin gyi spyod yul la grangs nye bar rtog pa sbyor ba zhes bya ba ni sbyor ba'i dus na ting nge 'dzin la dmigs pa'i sems kyis yid la byed pa gang yin pa'o/ /gnas pa nye bar rtogs pa sbyor ba pa ni gang gi sa na gnas pa rnam pa gnyis nye bar rtog par byed pa ste zhes bya ba la/ tshad yod par gnas pa ni yi ge rnams so zhes bya ba ni 'di ltar yi ge rnams ni/a A zhes bya ba nas bzung ste/ k+Sha zhes bya ba la thug pa'i bar yi ge bzhi bcu rtsa brgyad yod pas tshad yod pa yin te/ de ltar na yi ge rnams ni tshad yod par gnas pa yin no/ / tshad med par gnas pa ni ming dang tshig dag go/ /zhes bya ba ni mdo sde 'bum pa du ma dmigs pa'i phyir te/ mdo sde de dang de dag la ming dang tshig dpag tu med pa dag yod do/ /yi ge ni kun brtags par bya ba ma yin no zhes bya ba ni yi ge gcig ni ming ma yin la/ ming med par yang don kun tu rtog par mi 'gyur bas so//gang yang ka zhes bya ba ni skye dgu'i bdag por bstan to/ /ko zhes bya ba ni rlung yin par brjod do zhes bya ba de lta bu la sogs pa de yang a dang ldan pa'i phyir dang / tsheg gis bcad par bya ba yin pa'i phyir yi ge gcig pa ma yin no//rim pa nye bar rtog pa sbyor ba pa ni gang gis ming 'dzin pa sngon du 'gro ba can gyis don 'dzin pa la 'jug pa nye bar rtog par byed pa'o zhes bya ba ni 'di ltar 'jig rten ni dang po nyid du tha snyad du bya ba'i phyir don de dang de dag la lhas byin zhes bya ba dang / bum pa zhes bya ba dang / ras yug ces bya ba la sogs pa de lta bur ming 'dogs so/ /gang gi tshe ming 'dis ni don 'di ston to zhes ming de la brdar btags la de'i tshe rim pa 'dis ming 'dzin pa sngon du 'gro ba can gyi don 'dzin pa la 'jug pa nye bar rtog pa/ des na don de dang de dag gi tha snyad la mkhas par 'gyur ro//rtogs pa sbyor ba pa zhes bya ba ni lnga pa yin no/ /de ni rnam pa bcu gcig ste/ glo bur ba nyid rtogs pa zhes bya ba ni ming yang don la glo bur ba yin la don yang ming la glo bur ba yin te/ ming gi sngon rol na don gyi blo med pa'i phyir ro/ /snang ba'i rgyu mtshan rtogs pa zhes bya ba la/don du snang ba'i rgyu mtshan ni sems dang sems las byung ba 'khrul pa gzung ba dang / 'dzin par snang ba dag ste/ 'di ni drod dang rtse mo'i gnas skabs na rtogs so/ /don mi dmigs pa rtogs pa'o zhes bya ba ni bzod pa'i gnas skabs na'o/ /dmigs pa mi dmigs par rtogs pa ni 'jig rten pa'i chos kyi mchog gi gnas skabs na ste/de med pas ni de yang med ces bya ba'i phyir ro/ /gzung ba'i don med na 'dzin pa'i sems gang gis dmigs pa de yang mi dmigs par 'gyur bas de'i 'og tu gzung ba dang 'dzin pa med na chos kyi dbyings rtogs pa yin no//bsam pa dman pa rtogs pa zhes bya ba ni nyan thos kyi theg pa pa rnams kyi'o/ /ji ltar rtogs pa'i chos rnam par gzhag par rtogs pa zhes bya ba ni yang dag pa'i lta ba'i gnas skabs na'o/ /chos rnam par gzhag pa rtogs pa zhes bya ba ni bsgom pa'i lam la yang dag par rtog pa'i gnas skabs na'o//yon tan mngon par bsgrub pa shin tu rnam par dag pa'o zhes bya ba yid la byed pa gang gis yon tan khyad par can mngon par sgrub pa byed pa'o/ /yid la byed pa rnyed pa'i 'og tu chos kyi de kho na nyid kyi don yongs su tshol ba'i skabs yin te/'di ltar sems rtse gcig pa nyid rnyed pas chos rnams kyi de kho na nyid rtogs par 'gyur ro/ /de kho na nyid kyi mi bslu ba dang / phyin ci ma log pa gang yin pa'o/ /de 'jig rten las 'das pa'i ye shes thob pas dmigs pa gang yin pa de kho na nyid yin te/kun nas nyon mongs pa dang rnam par byang ba'i chos thams cad kyi de kho na nyid spyir brtag pa yin no/ /kun brtags pa'i ngo bo nyid kyi de kho na nyid ni gnyis dang bral ba yin la/ gnyis su snang ba nyid ni 'khrul pa yin te/ ji srid du 'di 'khrul pas dmigs pa de srid du de'i yang dag pa dmigs pa med do//des der kun rtog pa'i phyir ro zhes bya ba ni gzhan gyi dbang gi ngo bo nyid 'khrul pas gnyis po der kun rtog ste/ thag pa la sbrul bzhin no/ /chos nyid dang chos tha mi dad pa'i phyir ro zhes bya ba ni gang gi phyir chos kyi dbyings ni spyi'i rnam par chos thams cad kyi rjes su zhugs pa yin pa de'i phyir/chos thams cad chos kyi dbyings las tha dad pa ma yin no/ /yod pa kun nas spangs te med la mngon zhen gang yin pa/ /'jig rten rmongs pa'i rnam pa tshabs chen 'di go ji lta bu//zhes bya ba la/ yod pa kun nas spangs te zhes bya ba ni chos kyi dbyings yod pa yin na 'jig rten gnyis su 'dzin pas de la rmongs nas chos kyi dbyings de spangs te gzugs la sogs pa yod pa ma yin pa gzhan kho na la mngon par zhen to/ /med pa ni byis pas kun brtags pa'i gzugs la sogs pa ste/'jig rten ni thog ma med pa'i dus nas gzugs la sogs pa 'di dag yod pa las yang dag pa nyid du snang ba yin no zhes de la rmongs pas 'jug cing de dag la yang dag pa nyid du mngon par zhen to/ /yang / 'gro ba dag na de las gzhan yang cung zad yod min la//zhes bya ba ni ngo bo nyid gsum las te/ 'gro ba na ngo bo nyid gsum las ma gtogs pa gzhan ni cung zad kyang yod pa ma yin la/ 'gro ba ma lus pa yang de la kun tu rmongs te phyin ci log tu 'dzin pa la mngon par zhen pa'i phyir ro/ /de kho na nyid sgyu ma lta bu yongs su tshol ba zhes bya ba de kho na nyid ni yang dag pa nyid ma yin pa'am yang dag pa nyid du'ang rung /gang gi ngo bo nyid gang yin par phyin ci ma log pa ste/ yang dag pa nyid ma yin pa la yang dag pa ma yin pa nyid du yongs su shes pa gang yin pa de yang de kho na nyid yin no/ /yang dag pa la yang dag pa nyid du yongs su shes pa gang yin pa de yang de kho na nyid yin te/rtag tu gnyis bral 'khrul pa'i rten gang yin dang gang zhig rnam kun tu/ /brjod par nus ma yin zhing spros pa med pa'i bdag nyid de kho na/ /zhes bshad ma thag pa yang yin no/ /kun brtags pa dang gzhan gyi dbang dang yongs su grub pa'i ngo bo nyid gsum ni go rims bzhin du gnyis dang bral ba dang /'khrul pa'i rten dang brjod du med cing spros pa med pa'i bdag nyid du bstan te/ 'di ni go rims bzhin du de dag gi de kho na nyid yin no/ /'di ni de kho na nyid de la rnam pa gang gi sgyu ma lta bu nyid yin pa de'i dbang du byas pa yin te/gtsug lag gi mdo de dang de dag las kyang chos rnams ni sgyu ma lta bu'o zhes 'byung ngo / /de la 'khrul pa'i rgyu mtshan shing dang bong ba la sogs pa sgyu ma'i sngags kyis btab pa ji lta ba de bzhin du yang dag pa ma yin pa'i kun tu rtog pa gzhan gyi dbang gi ngo bo nyid rig par bya'o zhes bya ba ni sems dang sems las byung ba rten cing 'brel bar 'byung ba rnams la rig par bya ba ste/de dag ni shing dang bong ba la sogs pa sgyu ma'i sngags kyis btab pa lta bu yin par rig par bya la/ gzugs la sogs pa ni sgyu ma byas pa rta dang glang po che la sogs pa lta bu yin par rig par bya'o//ji ltar de la de med pa ste/ sgyu ma byas pa de la glang po che la sogs pa med pa de bzhin du gzhan gyi dbang de la kun brtags pa gnyis kyi mtshan nyid med pa don dam par 'dod do zhes bya ba ni ji ltar thag pa la sbrul med par mthong ba de bzhin du gzhan gyi dbang gi ngo bo nyid la gnyis su med par mthong ngo //gnyis dang bral ba nyid mthong bas gnyis su 'khrul pa dang bral ba'o/ /gnyis su 'khrul pa dang bral ba'i rnam pa can gyis yongs su grub pa'i ngo bo nyid mthong bar 'gyur ro/ /gang gi tshe 'jig rten las 'das pa'i rjes la thob pa dag 'jig rten pa phyin ci ma log pas gzhan gyi dbang de mthong ba de'i tshe yang gnyis su 'khrul pa de mi 'byung ba kho na'o//ji ltar sgyu ma byas pa de glang po che la sogs pa'i ngo bor dmigs pa de bzhin du yang dag pa ma yin pa las kun brtags pa de kun rdzob kyi bden par dmigs so zhes bya ba ni de ltar na de ni yang dag pa ma yin pa nyid du snang ba na kun nas nyon mongs pa'i dmigs par 'gyur ro//gang yang de dang de las bden pa ni gnyis te/ kun rdzob kyi bden pa dang / don dam pa'i bden pa'o zhes 'byung ba de yang yang dag pa ma yin pa'i kun tu rtog pa'i ngo bo nyid kho na la de ltar rnam par gzhag go//de bzhin du gnas gzhan du gyur na gnyis su 'khrul pa med pa'i phyir yang dag pa ma yin pa'i kun tu rtog pa'i don yang dag pa dmigs so zhes bya ba ni gnyis su 'khrul pa med pa'i phyir yongs su grub pa'i ngo bo nyid dmigs par 'gyur ro/ / de mthong na phyin ci ma log pa rnam par mi rtog pa'i rjes su thob pa'i ye shes kyi gzhan gyi dbang gi ngo bo nyid gnyis dang bral ba mthong ste/ de ltar na de'i don yang dag pa dmigs par 'gyur la/ gnyis su 'khrul pa dang bral bas kyang rnal 'byor pa'i gnas gzhan du 'gyur ro/ /de lta bu ni de la yod//de yi dngos po yod ma yin/ /de ltas sgyu ma la sogs la/ /yod dang med pa nyid du brjod/ /tshigs su bcad pa 'di ni don go bar zad do/ /ji ltar don go zhe na/ ji ltar sgyu ma de la sgyu ma byas pa glang po che la sogs pa'i gzugs de'i ngo bor te/ glang po che la sogs pa gzugs nyid du snang ba'i glang po che'i gzugs de ni glang po che nyid du yod pa ma yin pa kho na yin la/sems dang sems las byung ba'i phyin ci log rnams ni glang po che la sogs pa lta bu nyid du yod pas de lta bas na yod pa nyid dang med pa nyid du brjod de/ de lta bu nyid du yod pa la yang dag pa'i don du ni med do zhes bya ba de bzhin du/yang dag pa ma yin pa'i kun du rtog pa de la gnyis su 'khrul pa'i gzugs la sogs pa gzung ba dang 'dzin pa nyid du snang ba de ni yod do zhes bya'o/ /ji ltar sgyu ma yongs su shes nas glang po che la sogs pa mi snang ba'i phyir glang po che la sogs pa med do zhes bya ba de bzhin du rnam par mi rtog pa'i ye shes thob nas gnyis po mi snang ba'i phyir med do zhes bya'o//de la yod pa med pa yin/ /zhes bya ba ni sgyu ma'i glang po che lta bu yod pa ni med par mi 'dod de/ /yang dag pa ma yin pa kun rtog pa nyid du yod pa'i phyir ro/ / med pa yod pa nyid ma yin/ /zhes bya ba ni byis pa rnams kyis yang dag pa nyid du kun brtags pa'i glang po che la sogs pa med pa gang yin pa de ni don dam par dpyad na yod pa nyid ma yin no/ /'o na ci zhe na med pa yin no/ /sgyu ma dag la sogs pa la/ /yod med khyad par med pa'ang brjod//ces bya ba ni de la de lta bu yod pa ste/ glang po che lta bu yod pa gang yin pa de nyid glang po che la sogs pa med pa yin no/ /de la 'dra ba tsam dang 'khrul pa tsam yod kyi/ yang dag pa nyid du glang po che yod pa ni ma yin pas gang gi tshe de ltar shes pa de'i tshe glang po cher 'dzin pa ldog ste/glang po che lta bu tsam du snang ba gang yin pa de nyid glang po che med pa yin no/ /de ltar na 'di mnyam pa nyid du 'gyur te/ dbus dang mtha' rnam par 'byed pa las ji skad du/ de yi phyir na dmigs pa dang / /mi dmigs mnyam par shes par bya/ /zhes bshad pa lta bu yin no//rim pa 'dis na yod pa dang med pa dag khyad par med par mthong ste/ dper na gang gi tshe kho na nye bar len pa'i phung po lngar ma mthong ba de kho na'i tshe bdag yod par lta ba la/ gang gi tshe kho na bdag med par mthong ba de'i tshe kho na phung po tsam du lta ba dang 'dra'o//de ltas gzugs la sogs pa la/ /yod dang med pa nyid du brjod/ /ces bya ba ni yang dag pa ma yin pa'i kun tu rtog pa'i ngo bo nyid la kun rdzob tu gzugs la sogs pa yod pa nyid du brjod par bya ste/ dbus dang mtha' rnam par 'byed pa las ji skad du/ yang dag ma yin kun rtog yod//de la gnyis po yod ma yin/ /zhes bshad pa lta bu ste/ de la ni gnyis po gzung ba dang 'dzin pa kun rdzob tu yod kyi/ don dam par ni ma yin no/ /gang gi tshe rnam par mi rtog pa'i ye shes mi mthun pa'i phyogs bsal zhing spros pa thams cad dang bral bas byis pas kun brtags pa'i gzugs la sogs pa chos su gzung ba med par mthong ba de'i tshe med do zhes bya'o//med pa ni yod pa nyid ma yin te/ gnyis kyi dngos po med pa nyid gang yin pa'o zhes bya ba ni gnyis kyi dngos po med pa gang yin pa de ni don dam par yod pa nyid ma yin no/'o na ci zhe na/ med pa ma yin no/ /gnyis po snang bar 'gyur ba gang yin pa de nyid gnyis kyi dngos por med pa yin pas so zhes bya ba la/ gnyis po snang ba ni yang dag pa ma yin pa'i kun tu rtog pa'i ngo bo nyid ma yin no/ /gang gi tshe yang dag pa ma yin pa'i kun tu rtog pa ste/mig dang gzugs la sogs pa gnyis dang bral zhing sems dang sems las byung ba'i ngo bo nyid du shes pa de'i tshe 'di gnyis su 'dzin pa ldog cing / 'di la sems dang sems las byung bar snang ba nyid du 'gyur te/ de ltar na gnyis po snang ba gang yin pa de nyid gnyis kyis dngos po med pa yin pas yod pa dang med pa dag mnyam pa nyid du 'gyur ro//theg pa dman pas 'gro ba dgag pa'i phyir zhes bya ba la/ theg pa dman pas 'gro ba ni theg pa dman pas 'gro ba'o/ /theg pa dman pas 'gro ba de dgag pa'i phyir yod pa dang med pa dag kyang khyad par med par bsgom pa yin te/yod pa dang med par khyad par med pa nyid du rig nas yod pas yid 'byung bar mi 'gyur ro/ /ji ltar na sgro 'dogs pa bkag pa yin/ ji ltar na skur pa 'debs pa bkag pa yin no/ /ji ltar na yod pa dang med pa dag khyad par med par bsgom pa yin te/de la yod pa med pa yin zhes bya ba ni gnyis su snang ba gang yin pa ste/ gnyis su snang ba yod pa gang yin pa de ni med pa ma yin no/ /'o na ci zhe na/ de ni yod pa kho na'o/ /de ltar bzod pa'i gnas skabs na rnam par shes pa 'di nyid gnyis su snang bar rab tu 'byung gi/phyi rol gyi don ni med do zhes phyi rol gyi don rnam par rig pas sems tsam du rtogs par 'gyur te/ de'i tshe yod pa la yod par rig nas skur pa 'debs par mi byed do/ /med pa yod pa nyid ma yin/ /zhes bya ba ni kun brtags pa gnyis kyi dngos po med pa nyid gang yin pa ste/med pa ni yod pa nyid ma yin no/ /'o na ci zhe na/ de ni rtag tu med pa kho na yin te/ de ltar na med pa la med par rig nas sgro 'dogs par mi byed do/ /ji ltar na de dag khyad par med pa yin zhe na/ gzhan gyi dbang gi gnyis su snang ba gang yin pa de nyid rnam par shes pa las ma gtogs pa'i phyi rol gyi gzugs la sogs pa yod pa nyid du kun brtags pa'i bdag nyid kyis med pa yin la/phyi rol gyi gzugs la sogs pa kun brtags pa'i bdag nyid kyis med pa gang yin pa de nyid rnam par rig pa tsam yin te/ de ltar na mthong ba de ni byis pas kun brtags pa yod pa la mngon par zhen pa las yid 'byung bar mi 'gyur ro//nyan thos ni gzugs la sogs pa la yod pa nyid du kun brtags nas/ 'di dag la skye ba dang 'jig pas sdug bsngal gyi rang bzhin yin par dmigs pa na 'khor ba'i ngo bo nyid las yid 'byung bar 'gyur ro//yid 'byung na 'dod chags dang bral bas de'i phyir nyan thos kyi theg pas nges par 'byung gi /byang chub sems dpa' ni ji skad bshad pa'i tshul 'dis yod pa dang med pa dag khyad par med par rig nas 'khor ba las yid 'byung bar mi 'gyur ro/ / yid mi 'byung na nyan thos mgo dang gos la me 'bar ba ltar byed pa bzhin du mya ngan las 'das pa la gzhol bar mi 'gyur bas de'i phyir nyan thos kyi theg pas nges par mi 'byung ngo / /'khrul pa'i rgyu dang 'khrul pa ni/ /zhes bya ba ni byis pa rnams kyi rnam par rig pa 'di ni rnam pa gnyis su 'byung ste/'di lta ste 'khrul pa'i rgyu dang / 'khrul pa'o/ /de la 'khrul pa'i rgyu ni gzugs kyi rnam par rig pa yin par 'dod de/ gzugs zhes smos pas ni mig dang gzugs la sogs pa gzugs kyi phung po bsdu'o/ /'di lta ste byis pa rnams ni thog ma med pa'i dus nas goms pas bdag med bzhin du gzugs la sogs pa nye bar len pa'i phung po rnams bdag nyid du snang ngo //de ltar byis pas kun brtags pa mig dang gzugs la sogs pa'i don dag med bzhin du thog ma med pa'i dus nas goms pa'i dbang gis byis pa rnams la yang dag pa ma yin pa'i kun tu rtog pa mig dang gzugs la sogs pa nyid du snang ba gzugs kyi rnam par rig pa 'di ni 'khrul pa'i rgyu yin no//mig gi rnam par shes pa la sogs pa de ni 'di yin no zhes 'dzin pa'i rnam par 'jug pa gang yin pa gzugs can ma yin pa'i rnam par rig pa 'di ni 'khrul pa'i ngo bo nyid yin no//'khrul pa'i rgyur gyur cing gzhir gyur pa gzugs su snang ba'i rnam par rig pa de med pa'i phyir cig shos mig gi rnam par shes pa la sogs pa gzugs can ma yin pa rnam par rig pa yang med par 'gyur ro/ /rgyu med pa'i phyir ro zhes bya ba la/rgyu ni ming dang gzugs la sogs pa ste/ rgyu de med pa'i phyir 'bras bur gyur pa'i rnam par rig par mig gi rnam par shes pa la sogs pa yang med par 'gyur ro/ /de la gnyis po ji lta bar med kyang gnyis su yang dmigs so zhes bya ba ni sgyu ma'i glang po che'i gzugs su 'khrul pa la yang dag pa nyid du glang po che la sogs pa gzung ba dang 'dzin pa med mod kyi/'on kyang byis pa ma rig pas ldongs pa rnams glang po che'i gzugs su 'khrul pa'i sgo nas 'di dag ni glang po che la sogs pa'o/ /bdag ni 'di dag 'dzin pa'o zhes bya bar gnyis su mngon par zhen to//keng rus kyi ni gzugs 'dzin pa/ /'khrul phyir gnyis su brjod pa ste/ /zhes bya ba ni ting nge 'dzin gyi gnas skabs las dang po pa'i rnal 'byor can rus pa'i keng rus sgom par byed pa'i ting nge 'dzin gyi me long la keng rus kyi gzugs brnyan snang la/ keng rus kyi gzugs su 'khrul pa de las gzung ba dang 'dzin pa gnyis su brjod do//de la ni yang dag pa nyid du na rus pa'i keng rus kyang med la de med na 'dzin pa yang med mod kyi/ 'on kyang de bzhin du yang snang ngo / /yod pa dang med pa de dag kyang khyad par med pa'i phyir ro/ /yang yod pa yang yin la med pa yang ma yin no//sgyu ma'i mtshan nyid kyang de dang 'dra ste/ de lta bas na sgyu ma lta bu yin no zhes bya ba ni de la glang po che'i gzugs yod pa gang yin pa de nyid glang po che nyid la sogs par med pa yin la/ glang po che nyid la sogs par med pa gang yin pa de nyid glang po che'i gzugs su yod pa yin no//de lta bas na sgyu ma la yod pa dang med pa nyid du khyad par med de/ sgyu ma la yod pa nyid gang yin pa de ni kun rdzob du'o/ /med pa nyid gang yin pa de nyid don dam par ro/ /sgyu ma la yod pa dang med pa dag khyad par med par bshad pa ji lta bar gzugs la sogs pa'i chos rnams la yang de dang 'dra ste/ji skad du/ de bzhin nyid snang de la yod/ /de yi dngos po yod ma yin/ /de ltas gzugs la sogs pa la/ /yod dang med pa nyid du brjod/ /ces bshad pa lta bu yin no/ /yang dag pa ma yin pa'i kun tu rtog pa'i ngo bo nyid de la rnam par shes pa'i gnyis su snang ba gang yin pa de ni de la yod la/rnam par shes pa snang ba gsal te yang dag pa nyid du gzugs la sogs pa'i don gyis gnyis kyi ngo bo gang yin pa de ni de la med do/ /yang dag pa ma yin pa'i kun tu rtog pa de la gnyis su snang ba gang yin pa de nyid gnyis med pa yin la gnyis med pa gang yin pa de nyid gnyis su snang ba yin te/de ltar na yod pa dang med pa dag khyad par med pa yin no/ /de lta bas na chos 'di dag sgyu ma bzhin du yod pa nyid dang med pa nyid yin pas de'i phyir sgyu ma lta bu brjod do/ /kun nas nyon mongs pa 'grub pa la dbang byed pa'i phyir ro zhes bya ba ni kun nas nyon mongs pa'i chos rnams kun tu spyod pa dang ldan pa yin na kun nas nyon mongs pa rnams yang dang yang du 'grub par 'gyur bas so//mig yor lta bu ni nang gi skye mched rnams kyi grib ma lta bu yin pa'i phyir phyi'i skye mched drug kho na ste/de'i dbang gis 'byung bas so zhes bya ba ni ji ltar gdugs la sogs pa'i dbang gis grib ma 'byung ba de bzhin du nang gi skye mched gdugs lta bu rnams kyi dbang gis phyi'i skye mched kyi grib ma lta bu rnams 'byung ngo / /brag ca lta bu ni bshad pa'i chos rnams so zhes bya ba ni ji ltar brag ca yod pa ma yin mod kyi/'on kyang grag pa ltar bshad pa'i chos rnams kyang de dang 'dra'o/ /'di dag la ma rig pa dang nyon mongs pa rnams dang lhan cig 'jug pa yod pas yod pa ni 'di dag ni ma rig pa dang nyon mongs pa dang lhan cig 'jug pa yin no zhes bya ba la/ma rig pa ni ma rig pa nyid do/ /nyon mongs pa ni 'dod chags la sogs pa ste drug gam bcu'o/ /ma rig pa logs shig tu smos pa ni dbang byed pa'i don te/ ma rmongs pa la gzhan mi 'byung ba'i phyir ro/ /nyon mongs pa smos pas ni khro ba dang khon du 'dzin pa la sogs pa nye ba'i nyon mongs pa rnams kyang bsdus par rig par bya'o//gzugs dang sgra la sogs pa'i rnam par rtog pa 'di dag la ma rig pa dang nyon mongs pa dang nye ba'i nyon mongs pa rnams dang lhan cig 'jug pa yod pas na 'di dag ni ma rig pa dang nyon mongs pa dang /lhan cig 'jug pa yin te/ rnam par rtog pa gang dang gang kun du 'byung ba na kun gzhi rnam par shes pa la bag chags 'jog pa'i bag chags de nyid rnam par rtog pa de dang de'i rgyur 'gyur ro/ /de ni sngar bshad zin to zhes bya ba ni thos pa la sogs pa'i shes pa gsum gyis/chos kyi dmigs pa rnyed par 'gyur zhes bya ba de lta bu la sogs pa'i gzhung gis so/ /rang gi dbyings ni rnam par mi rtog pa rnams kyi de bzhin nyid do zhes bya ba 'di ni rnam par byang ba'i skabs kyis 'ongs pa yin pas rang gi dbyings ni rnam par byang ba tshul bzhin rnam par rtog pa rnams kyi chos kyi dbyings yin te/'di ni de bzhin nyid kyi rnam grangs kyi ming yin no/ /de bzhin nyid kyi phyir dbus dang mtha' rnam par 'byed pa dang / chos mngon pa kun las btus pa la sogs pa las chos kyi dbyings kyi nges pa'i tshig nyan thos dang /rang sangs rgyas dang / sangs rgyas kyi chos thams cad kyi rgyu mtshan nyid kyi phyir chos kyi dbyings zhes bya'o zhes 'byung ngo / /ming la sems gnas pa'i phyir ro zhes bya ba la/ ming ni gzugs can ma yin pa'i phung po bzhi ste/ de la spyi'i rnam par gnas pa'i phyir ming la gnas pa yin no//rnam par mi rtog pa'i ye shes rnyed nas ming la gnas par 'gyur te/ de'i phyir sangs rgyas kyi chos rnams rnam par byang bar 'gyur ro/ /zhi gnas bsgom pa chu lta bus ni tshul bzhin ma yin pa'i rnam par rtog pa dag gis khengs par byas pa'i sems de gnyen por 'gyur ro//lhag mthong pa sgom pa me long lta bus ni las dang po pa'i gnas skabs na lta ba ngan pa la sogs pas yon por gyur pa'i shes rab mda' yon po lta bu gang yin pa de mnyam par gzhag pa'i gnas skabs na lhag mthong goms pas mda' mes bsros pa bzhin du drang por 'gyur ro//de'i phyir sems dang shes rab 'dod chags dang ma rig pa'i nyon mongs pa dag dang tshul bzhin ma yin pa'i rnam par rtog pa rnams las rnam par grol bar 'gyur zhing / gnas yongs su gyur pa la khengs pa dang yon po nyid du byed pa'i rnam par rtog pa de dag nyid kyang gnyis su snang bar mi 'jug go//rnam par rig pa tsam yongs su tshol ba zhes bya ba la/ tsam zhes smos pa ni don dgag pa'i ched yin no/ /sems 'ba' zhig gzung ba ni ma yin te/ sems de yang 'dir mtshungs par ldan pa dang bcas par blta bar bya'o zhes bya ba'i phyir 'dir ni sems las byung ba rnams kyang gzung ngo //sems tsam po 'di gzung bar snang ba dang 'dzin par snang ba dang gnyis su snang bar 'dod de/ zhes bya ba ni phyi rol gyi don med do zhes bya ba'i tha tshig go/ /de bzhin du de bzhin nyid 'dod chags la sogs pa nyon mongs pa snang ba'am dad pa la sogs pa nyon mongs pa snang ba'am dge ba'i chos su snang bar 'dod la zhes bya ba ni gang gi tshe 'dod chags la dmigs pa'am/dad pa la dmigs pa skye ba de'i tshe sems de nyid de ltar snang gi 'dod chags la sogs pa dmigs pa nyid du yod pa ni ma yin la/sems la 'dod chags la sogs pa dang mtshungs par ldan par mi 'dod pa yang ma yin no/ /dper na gnyis su snang ba las gzhan pa gnyis kyi mtshan nyid med pa bzhin no zhes bya ba ni sems snang ba las ma gtogs pa mig dang /gzugs la sogs pa gzung ba dang 'dzin pa'i mtshan nyid kyi don dmigs pa nyid du med pa ltar 'dod chags la sogs pa yang de dang 'dra'o/ /sems 'di nyid rnam grangs kyis 'dod chags su snang ba'am/ zhe sdang du snang ba'am/ de las gzhan pa'i chos su snang ba sna tshogs su snang ba can du 'jug go zhes bya ba ni 'di skad du bshad pa yin te/'dod chags la sogs pa'i dmigs pas rnam grangs kyi 'dod chags la sogs par snang ba'i sems skye ba gang yin pa de ni sems nyid sems las byung ba rnams dang lhan cig skye ba yin gyi 'dod chags la sogs pa ni ma yin no ji ltar gzugs la sogs pa don gzhan du gyur pa dmigs pa nyid du yod pa ma yin pa ltar 'dod chags la sogs pa yang de dang 'dra ste/ji skad du slob dpon gyi zhal snga nas kyis/ rnam par rig pa tsam las sems kyang sems gzhan gyis dmigs par yod pa ma yin no zhes bshad pa lta bu'o//cig car dad pa dang brtson 'grus la sogs pa'i rnam pa ste/ rnam pa sna tshogs can du 'jug go zhes bya ba ni 'di nyid kyis sems las byung ba dag yod kyi de dag sel ba ni ma yin no zhes bya bar shes te/ sems las byung ba dag yod na de dag gi rnam par skye bas rnam pa sna tshogs nyid srid kyi med par ni ma yin no/ /gal te sems kho na rnam grangs kyis skye bas na sems las byung ba zhes bya bar 'gyur ro zhe na/ sems las byung ba bdag med par gang zhig cig car sna tshogs kyi rnam pa nyid du 'gyur ro//de lta bas na sems las byung ba dag ni yod do/ /nyon mongs pa dang dge ba'i gnas skabs kyi sems la snang ba yod pa dang / med pa zhes bya ba ni sems dang sems las byung bar snang ba nyid yod pas yod pa'o/ /de las ma gtogs pa gzhan gzung ba dang 'dzin par gyur pa'i chos dag med pas na med pa'o//gang dag sems las byung ba yod par mi 'dod pa de dag gi ltar na ni tshigs su bcad pa dag gis don go bar zad do/ /mtshan gzhi ni mtshon par bya ba yin pas na mtshan gzhi'o/ /mtshan nyid ni ngo bo nyid gsum mo/ /de bas na mtshan gzhi dang mtshan nyid 'di ni las lta bu yin la/mtshon pa ni byed pa po lta bu yin te/ 'di ltar des mtshan gzhi dang mtshan nyid de mtshon par byed do zhes 'chad par 'gyur ro/ /sems ni ltar bcas gang yin dang / /zhes bya ba la/ sems zhes smos pas ni gnyis su snang ba'i sems gzung bar snang ba dag/'dzin par snang ba gzung ba ste/ de la sems ni rnam par shes pa dang gzugs sogs zhes bya bas so/ /lta ba ni sems las byung ba'i chos rnams so zhes bya ba ni gsal ba'i phyir thams cad lta ba yin par tha snyad gdags so//de'i rnam par rig pa rtag tu de bzhin du 'jug pa'i phyir ro zhes bya ba ni nam mkha' la sogs pa'i rnam par rig pa la 'gyur ba med pas rtag pa'o/ /bag chags de las kyang zhes bya ba ni bag chags la gnas pa'i phyir brjod pa de las kyang zhes bya ba'i tha tshig go/ / tha snyad la mi mkhas pa rnams la don du snang ba gang yin pa'o/ /zhes bya ba ni byis pa chung ngu rnams la'o/ /brjod pa'i don gyi 'du shes med par zhes bya ba ni byis pa chung ngu la sogs pa la bum pa zhes bya ba'i sgras ni brjod par bya ba'i don lto yangs pa dang / mgrin pa phra ba gang yin pa brjod do zhes bya bar bye brag tu rtogs pa de med de/brjod pa'i don gyi 'du shes med bzhin du ci zhig tu rnam par rtog par byed do/ /brjod pa ji lta ba bzhin du don du 'du shes pa zhes bya ba ni bum pa la sogs pa'i mngon par brjod pa ci 'dra ba de 'dra ba'i sems las byung ba mtshan mar 'dzin pa'i bdag nyid ni 'du shes so//sems las byung ba zhes smos pas ni lhas byin zhes bya ba lta bu ming bsal ba yin no/ /'du shes de'i dmigs pa sngon po dang ser po dang skyes pa dang bud med la sogs pa gang yin pa de ni rgyu mtshan yin te/ rgyu mtshan des 'du shes de 'jug go//de ltar na tha snyad la mkhas pa'am tha snyad la mi mkhas pas brtag par bya ba bum pa la sogs pa don gang yin pa dang rgyu gang las yin pa zhes bya ba ni bag chags gang las yin pas te/ de dag ni kun brtags pa'i mtshan nyid yin par rig par bya'o/ / gal te ming ji lta bar don du snang ngam zhes bya ba la sogs pa ni gang zhig don ming gi ngo bo nyid kho na yin pa'am/ ming don gyi ngo bo nyid yin par kun rtog par byed pa ste/ gang dag ming dang / don dag glo bur pa nyid yin pa bsam nas don ming gi rang bzhin yin pa'am/ ming don gyi rang bzhin yin par rtog par byed na/ de yang kun brtags pa'i mtshan nyid do/ /gnas su snang ba zhes bya ba ni sa la sogs par snang ba ste/ kun gzhi rnam par shes pa gnas kyi rnam par rig pa la der snang ba nyid du ston to/ /don du snang ba zhes bya ba ni gzugs la sogs pa yul rnams so//lus su snang ba ni mig la sogs pa dbang po rnams so/ /yod pa dang med pa de dag tha mi dad pa'i phyir yod pa dang med pa mnyam pa nyid kyang yin no zhes bya ba ni de bzhin nyid ni sangs rgyas nyid yin pas ji skad du sangs rgyas nyid la 'jug pa'i thabs kyi skabs nas/med pa gang yin de nyid ni/ /yod pa yi ni dam pa yin/ /zhes bshad pa lta bu ste/ kun brtags pa'i mtshan nyid gnyis po med pa gang yin pa de nyid de bzhin nyid yod pa yin la/ de bzhin nyid yod pa gang yin pa de nyid kun brtags pa'i mtshan nyid med pa yin no//rnal 'byor gyi sa ni zhi gnas dang lhag mthong zung du 'brel ba'i lam ste/ de yang rnam pa lnga'o/ /me long lta bu ni sems kyi dbyings la gnas pa'i ting nge 'dzin te/ gong du ming la gnas par bshad pa gang yin pa nyid do zhes bya ba gong du ji skad bshad ce na/sems ming la gnas pa'i phyir bsgoms pa las byung ba'i shes pas de rnyed par rig par bya ste/ gnyis mi dmigs pa rnyed pa las ji skad bshad pa lta bur gnyis mi dmigs pa'i phyir ro zhes bshad do/ /gzung ba dang 'dzin pa mi dmigs pa'i phyir ro zhes bya ba'i tha tshig go//'di ni mthong ba'i lam gyi gnas skabs yin no/ /rten ni gnas gzhan du gyur pa'o zhes bya ba ni med na med pa yin pa'i phyir rten smos kyi/ tshigs su bcad pa las ni rten smos pa med de/ rnal 'byor gyi sa thob pa 'dis na mnyam pa nyid du 'gyur ba la sogs pa yin no//rnal 'byor gyi sa des mtshan gzhi lnga dang mtshan nyid de mtshon par byed do/ /mtshan gzhi de gang zhe na/ gzugs dang / sems dang / sems las byung ba dang / sems dang ldan pa ma yin pa'i 'du byed dag dang /'dus ma byas zhes bya ba rnam pa lngas bshad pa gang yin pa'o/ /mtshan nyid ni kun brtags pa dang / gzhan gyi dbang du yongs su grub pa'i mtshan nyid rnams so/ /mtshon bya ni rnam pa lnga yin pas gzhi dang skyed pa dang me long lta bu dang snang ba dang rten gyi bye brag gis tha dad pa lam rnam pa lnga'i ngo bo nyid du rig par bya ste/tshogs dang sbyor ba dang / mthong ba dang / bsgom pa dang / mthar thug pa'i lam gyi ngo bo nyid dang go rims bzhin no/ /mtshon pa shes rab kyi ngo bo nyid des mtshon gzhi dang mtshan nyid de mtshon par byed de/thos pa dang bsams pa dang bsgoms pa la sogs pa'i rim gyis yang dag par shes par byed do zhes bya ba'i don to/ /mnyam pa nyid du 'gyur ba ni zag pa med pa'i dbyings na zhes bya ba ni zag pa med pa'i dbyings na dmigs par bya ba dang / dmigs par byed pa mnyam pa dang mnyam pa'i ye shes thob pa'i phyir 'gyur ro//de nyid kyi phyir mjug thogs su/ /'phags rigs shin tu dri med pa/ /zhes bshad do/ /de ltar na rnal 'byor gyis rnam pa lnga po 'di zhes bya ba ni mnyam pa nyid du 'gyur ba la sogs pa dang bcas pa'o/ / sa bon gzhan du gyur pa'i phyir/ /gnas don lus su snang ba dag /gzhan du gyur pa zag med dbyings/ /de ni rten kun 'gro ba can/ /zhes bya ba ni tshigs su bcad pa 'di las dbyings zhes bya ba'i sgra rkang pa gsum pa'i dang po nas 'byung ba dang zag pa med pa zhes bya ba'i sgra rkang pa gnyis pa nas 'byung ba dang lhan cig sbyar bar bya ste/ji skad du/ gzhan du gyur pa zag med dbyings/ /zhes bshad pa yin no/ /gnas dang don dang lus su snang ba'i rnam par shes pa rnams gzhan du gyur pa zhes bya ba la/ gnas ni rten yin pas gnas smos pas yul du gyur pa la sogs pa bzung ste/de dag gzhan las gyur pa zhes bya ba'i tha tshig go/ /gzugs la sogs pa don gyi rnam par rig pa dang mig la sogs pa lus kyi rnam par rig pa gzhan du gyur pa ni zag pa med pa'i dbyings yin no/ /yid dang 'dzin dang rnam par rtog /gyur phyir zhes bya ba ni dbang rnam pa bzhi 'thob po zhes bya bar sbyar ro/ /nyon mongs pa can gyi yid gzhan du gyur na rnam par mi rtog pa gang la dbang 'thob ste/ 'di ltar gong du/ yid ni gzhan du gyur pa na/ /'byor dang mthun spyod mi rtog pa'i/ / ye shes shin tu dri med la/ /'byor pa dam pa thob par 'gyur/ /zhes bshad pa yin no/ /'dzin pa gzhan du gyur na zhing la dbang 'byor pa thob ste/ don bcas 'dzin pa gzhan gyur na/ /ji ltar 'dod bzhin longs spyod dag / bstan phyir zhing ni dag pa la/ /'byor pa dam pa thob par 'gyur/ /zhes bshad pa yin no/ /rnam par rtog pa ni yid kyi rnam par shes pa'o/ /de bzhin du gyur na ye shes dang las la dbang ba nyid 'thob ste/ ji skad du/ rnam rtog gzhan du gyur na ni/ /dus rnams rtag tu ye shes dang //las rnams kun la thogs med la/ /'byor pa dam pa 'thob par 'gyur/ /zhes bshad pa lta bu yin no/ /bdag med pa rnams gnyis po de yang mnyam par shes nas bya ba la/ bdag ces bya ba'i sgra ni kun brtags pa'i gang zag la sogs pa la yang blta bar bya'o//chos rnams kyi ngo bo nyid la yang blta bar bya ste/ me ni tsha ba'i ngo bo nyid do zhes bya ba/ tsha ba'i bdag nyid do zhes bya ba'i tha tshig go/ /de ni ji ltar kun brtags pa'i gang zag bdag med pa ltar kun brtags pa'i chos bdag med par shes te/de ltar na bdag med pa rnam pa gnyis shes so/ /'di ni 'dzin pa tsam mo zhes bya ba la/ tsam zhes bya ba'i sgra ni don gsal ba'i phyir te/ phyi rol gyi don dang bral ba 'dzin pa tsam sems dang / sems las byung ba tsam mo zhes bya ba'i tha tshig go//de kho na nyid rnam par rig pa tsam zhes bya ba ni ji ltar rnam par rig pa tsam de kho na nyid yin zhe na/ 'di ltar rnam par rig pa tsam nyid la zhugs na bzod pa'i gnas skabs na gzung ba'i don mi dmigs par 'gyur la/ de yang de kho na'i don gyi phyogs gcig la zhugs pa dang ldan pa'i ting nge 'dzin yin pas de kho na nyid ces bya'o//sngon gyi tshogs kyi stobs kyis so zhes bya ba ni tshe rabs gzhan dag la bsod nams dang ye shes kyi tshogs yang dag par bsgrubs pa gang dag yod pa yin pa'o/ / ming tsam du mthong bar 'gyur ro zhes bya ba ni mngon par brjod pa tsam du ste zhes bya ba ni mngon par brjod pa ni yid kyi brjod pa tsam zhes bya ba'i don te/ de nyid kyi phyir mjug thogs su don dang bral bar ro zhes bshad do/ /don med na ni de'i rnam par rig pa mi mthong ba'i phyir ro zhes bya ba ni gzung ba'i don med na 'dzin pa yang mi mthong bas so//bdag tu lta ba'i zhags pas zin pa zhes bya ba ni bdag tu lta bas bcings pa zhes bya ba'i don to/ /bdag tu lta ba'i 'ching ba de ni gnas ngan len yin te/ len ces bya ba'i skad kyi dbyings 'di ni len par byed pa'i don las 'byung ngo //sems de ni ji lta ji ltar phyin ci log tu gyur nas bdag tu lta ba len pa de lta de ltar 'gro ba lnga'i 'khor ba na sdug bsngal mang po la brten par 'gyur ro/ /de ltar na ngo bo nyid med pa rnam pa gsum po 'di ni 'dus byas kyi mtshan nyid gsum po la 'di dang sbyar bar rig par bya'o zhes bya ba la/'dus byas kyi mtshan nyid ni gsum ste/ skye ba dang 'jig pa dang gnas pa gzhan du 'gyur ba'o/ /'dus byas kyi mtshan nyid gsum po 'di ni/ dus gsum dang sbyar bar bya ste/ rang med pa'i phyir ngo bo nyid med pa zhes bya ba ni ma 'ongs pa'i dus nas chos rnams ma byung ba las 'byung ba gang yin pa de ni skye ba yin gyi grangs can pa rnams kyi ltar gtso bo las yod pa kho na skye ba ni ma yin no//rang gi bdag nyid ni med pa'i phyir ngo bo nyid med pa zhes bya ba ni chos 'gag pa de dag grangs can pa rnams kyi ltar mi snang bar gyur cing rang gi ngo bor gnas pa ni ma yin no//de'i phyir yang ngo bo nyid med pa yin te/ 'di ni 'dus byas kyi mtshan nyid gnyis pa 'jig pa yin no/ /rang gi ngo bo la mi gnas pa'i phyir zhes bya ba ni skyes pa skad cig las phyin chad mi gnas pa'i phyir te/ de ltar byung ba rnams skad cig las phyin chad gnas pa ni med do//de'i phyir yang ngo bo nyid med de/ /'di na 'dus byas kyi mtshan nyid gsum pa yin no/ /'dzin pa bzhin ni de med phyir/ /zhes bya ba ni ji ltar byis pa rnams chos rnams la rtag pa dang / bde ba dang gtsang ba dang bdag tu 'dzin pa'am/ ji ltar gzugs la sogs pa'i chos rnams la/gnyis su mngon par zhen par 'dzin pa de ltar med pa'i phyir ngo bo nyid med de/ de skad du bcom ldan 'das kyis/ chos kun gal te byis pa yis/ /ji ltar rnam brtags mthong ba bzhin/ /de dag yod par gyur na ni//thams cad de nyid mthong bar 'gyur/ /zhes bshad pa lta bu yin no/ /phyi ma phyi ma'i rten yin pas/ /ngo bo nyid ni med pa yis/ /skye med 'gag med gzod nas zhi/ /rang bzhin mya ngan 'das pa grub/ /ces bya ba ni snga ma snga ma phyi ma phyi ma'i rten yin te/ gzhi snga ma ngo bo nyid med pa ni phyi ma ma skyes pa'i rten yin no/ /ji ltar na ngo bo nyid med pas grub ce na/ ji ltar rang med pa'i phyir dang / rang gi bdag nyid du med pa'i phyir dang / rang gi ngo bo nyid la mi gnas pa'i phyir dang 'dzin pa bzhin du de med pa'i phyir ngo bo nyid med pa de bzhin du rang ma skyes pa'i phyir dang /rang gi bdag nyid du ma skyes pa'i phyir dang / rang gi ngo bo la mi gnas pa'i phyir zhes bya ba de lta bu la sogs pa'i rim gyis ngo bo nyid med pa la brten nas chos rnams ma skyes pa yin no/ /gang dag ma skyes pa de dag ni ma 'gags pa yin no/ /byis pas kun brtags pa'i ngo bo nyid ma skyes pa dang /ma 'gags pa gang yin pa de ni gzod ma nas zhi ba yin no/ /de lta bas na ma skyes pa dang ma 'gags pa'i gzhi de dag kho na la brten nas gzod ma nas zhi ba nyid 'grub ste/ 'du byed skye ba dang 'gag pa g.yen spyo ba sog le bsregs pas gshags pa lta bur mi bzad pa lcags kyi gar bu rab tu 'bar bas reg pa lta bus rab tu ma zhi ba rnams ni 'phags pa rnams kyis mchog tu yid byung bar bya ba yin la/skye ba dang 'gag pa spangs pa bdud rtsi'i dbyings ni 'phags pa rnams shin tu dgyes pa yin pas so/ /gzod ma nas zhi ba de nyid la brten nas chos thams cad rang bzhin gyis yongs su mya ngan las 'das pa yongs su grub pa'i mtshan nyid yin par rig par bya ste/gang zhig gzod ma nas zhi ba de ni rang bzhin gyis yongs su mya ngan las 'das pa rab tu skyid pa'i mtshan nyid yin gyi/ 'phags pa rnams kyis lam bsgom pas yongs su mya ngan las 'das par bya ba ni ma yin no//de ltar na ngo bo nyid med pa la sogs pa 'di dag ni phyi ma phyi ma'i rten yin pas 'grub par reg par bya'o/ /thog ma ni 'khor ba la ste de la thog ma skye ba med do zhes bya ba ni gang dag 'khor ba thog ma dang ldan par rtog par byed pa'i 'khor ba'i thog ma kun brtags pa de la mi skye ba'i chos la bzod pa thob pa ste/'khor ba ni thog ma med pa can yin gyi/ 'di la dang po 'byin pa dang dbang phyug la sogs pa ni 'ga' yang med do zhes de ltar bzod pas/ de'i phyir 'khor ba la skye ba med par bzod pa thob po zhes bya'o//de nyid dang gzhan nyid ni snga ma dang phyi ma rnams la sde zhes bya ba la de'i ngo bo nyid ni de nyid do/ /'khor ba na chos gang dag sngar skyes pa de dag nyid skye ba ni med de/ de'i ngo bor mi skye ba'i phyir ro zhes bya ba ni chos sngar skyes pa rnams de'i ngo bo nyid kho nar mi skye bar bzod pa'i phyir bzod pa thob pa zhes bya'o//phyis ma 'ongs pa'i dus nas skye ba gang dag yin pa de dag kyang sngon med pa mi skye ste phung po dang khams dang skye mched la sogs pa chos grags pa gang dag yin pa de kho na skye ba/ sngon med pa'i sems can 'byung ba ni med pas gzhan dag kyang sngon med pa skye ba med par bzod pa'i phyir bzod pa thob pa zhes bya'o//gzhan gyi dbang la ni rang skye ba med par bzod pa'i phyir ro/ /yongs su grub pa la ni gzhan du 'gyur ba med par bzod pa'i phyir te/ 'dus ma byas yin pa'i phyir de la gzhan du 'gyur bar skye ba med do//zad par shes pa thob pa'i dgra bcom pa la kun nas nyon mongs pa skye bar mi blta'o zhes de ltar bzod pa'i phyir skye ba med pa la bzod pa thob pa zhes bya'o/ /theg pa gcig pa nyid yongs su tshol ba la chos kyi dbyings mtshungs pa'i phyir dang / bdag med pa mtshungs pa'i phyir dang /rnam par grol ba mtshungs pa'i phyir ro/ /de la chos kyi dbyings mtshungs pa'i phyir zhes bya ba ni nyan thos la sogs pa'i chos kyi dbyings ni mtshungs te/ nam mkha' bzhin no/ /nam mkha' la ni gang du yang mi mtshungs pa med pa ltar chos kyi dbyings kyang de dang 'dra'o//bgrod par bya bas na theg pa yin pas so zhes bya ba ji ltar na de bgrod par bya ba yin zhe na/ 'di ltar chos kyi dbyings la brten cing chos kyi dbyings thob nas nyan thos la sogs pa nyan thos la sogs pa'i chos 'byung bar 'gyur bas so/ / bdag med pa 'dra bas na zhes bya ba ni 'gro ba po'i gang zag nyan thos gang dag yin pa de dag kyang bdag med la/ sangs rgyas bcom ldan 'das kyang bdag med do/ /de'i phyir bdag med pa mtshungs pa nyid kyis gang zag la theg pa nye bar btags pa'i phyir theg pa gcig pa nyid do/ / 'gro bas ni theg pa ma yin pas so zhes bya ba ni rnam par grol ba dang rnam par grol ba la tha dad du bya ba med pas rnam par grol ba la theg pa nye bar btags pa'i phyir te/ ngo bo nyid sgrub pas so/ /rigs tha dad pa'i phyir theg pa gcig pa nyid ces bya ba ni rigs nges pa tha dad pa'i phyir dang /ma nges pa'i rigs tha dad pa'i phyir te/ ma nges pa'i rigs can gang dag yin pa de dag nyan thos kyi spyod pa spyad nas de nas dus phyis dge ba'i bshes gnyen sangs rgyas dang byang chub sems dpa' dang phrad pa'i sgo nas nyan thos kyi spyod pa bor te/ theg pa chen pos nges par 'byung ngo //de bas na nyan thos kyi spyod pa spyad pa rnams theg pa chen pos nges par 'byung bas theg pa gcig pa nyid de/ rigs la theg pa nye bar btags pa'i phyir ro/ /bsam pa gnyis thob pa'i phyir theg pa gcig pa nyid de/ sangs rgyas rnams kyis sems can thams cad la bdag nyid kyi dgongs pa brnyes pa'i phyir zhes bya ba ni byang chub sems dpas sa dang po thob pa'i dus na sems can rnams la bdag dang gzhan mnyam pa nyid kyi bsam pa thob pa gang yin pa de sangs rgyas pa'i gnas skabs na shin tu rnam par dag par 'gyur te/bdag gang yin pa de nyid sems can rnams yin no snyam pa'i phyir ro/ /nyan thos de'i rigs su nges pa sngon byang chub kyi tshogs bsags pa rnams zhes bya ba ni nyan thos kyi rigs can sngon byang chub sems dpa'i spyod pa spyad pa rnams te/ nyan thos kyi rigs su nges pa'i phyir byang chub sems dpa'i spyod pa bor nas nyan thos nyid du nges par 'byung ba de dag la sangs rgyas bcom ldan 'das rnams kyis 'di dag ni sngon byang chub sems dpa'i spyod pa la spyad pa yin no zhes bya bar rnam par gzigs te/thob pa gang zhig sangs rgyas dang rgyud tha mi dad par mos pa nyid kyis 'thob par 'gyur bas sangs rgyas kyi dgongs pa thob pa la sbyor bar mdzad do//de bzhin gshegs pas rjes su gzung ba'i khyad par phyogs tsam thob par bya ba'i phyir zhes bya ba ni sangs rgyas kyi dgongs pa thob pa gang zhig rgyud tha mi dad par mos pa'i sgo nas thob pa'i dgongs pa thob pa de phyogs tsam zhig thob kyi dus gtan du thob pa ni ma yin no zhes bya ba'i tha tshig go//phyogs tsam thob par bya ba'i phyir zhes bya ba ni de'i ched kyi bzhi pa yin te/ sangs rgyas bcom ldan 'das rnams sangs rgyas kyi dgongs pa thob pa 'dzin du 'dzud pa mdzad do/de bas na sangs rgyas bcom ldan 'das de'i nyan thos rnams bsam pa gcig pa nyid rnyed pa'i phyir theg pa gcig pa nyid do/ /mthar thug pa'i phyir yang theg pa gcig pa nyid de/ /gang phan chad bgrod par bya ba med pa de ni theg pa yin pas sangs rgyas nyid kho na theg pa gcig yin no zhes bya ba ni dper na/sgra ngan rgya mtshos klas pa can/ /gzhu bdung mi ni ji snyed pa/ /gzhu mchog can gyi gan na ni/ /bud med yin par shes par gyis/ /zhes bya ba lta bu ste/ 'di skad du/ mi pho ni de gcig kho nar zad kyi de las rtsal che ba gzhan na med do zhes smras pa yin no/de bzhin theg pa thams cad kyi mthar thug pa ni theg pa chen po yin te/ de'i pha rol na theg pa khyad par can gzhan med pas theg pa gcig pa nyid do/ /nyan thos kyi rigs can ma nges pa gang dag yin pa'o zhes bya ba ji ltar na nyan thos kyi rigs can yang yin la ma nges pa yin zhes kyang bya zhe na/de dag ni nyan thos kho na ma yin pa'o/ /'o na ci zhe na/ ma nges pa'i rigs can dag cig nyan thos kyi spyod pa la spyad pas na de'i phyir nyan thos kyi rigs can zhes bya ste/ byang chub sems dpa'i rigs can ma nges pa dag la yang de bzhin du sbyar bar bya'o/ /yang ci'i phyir sangs rgyas dang byang chub sems dpa' rnams kyis ma nges pa'i rigs can dag yal bar dor/gang gis na nyan thos kyi spyod pa la rab tu sbyor gyi byang chub sems dpa'i spyod pa la ma yin zhe na/ gnas skabs nges pa'i phyir btang snyoms su 'jog go/ / gnas skabs der ma phyin par ma nges pa'i rigs can rnams byang chub sems dpa'i spyod pa la spyad par ni mi nus te/ ji skad du 'phags pa ma khol gyi zhal snga nas kyis/ 'di ni g.yang sa'i yul gyi mur ma phyin par nor can nyid mi 'gyur zhes bya ba la sogs pa bshad pa lta bu yin no/ / nyan thos ma nges pa yang rnam pa gnyis te/ theg pa'i don mthong ba dang theg pa'i don ma mthong ba'o zhes bya ba ni bden pa mthong ba dang bden pa ma mthong ba'o zhes bya ba'i don to/ /'phags pa'i lam de skye bar bsgyur ba ni bsam gyis mi khyab ste zhes bya ba ni/ 'phags pa'i lam gyi skye ba la sdang ba yin na ji ltar na skye bar sgyur bar byed ce na/de ni bden na de 'phags pa'i lam kho nas skye ba ni ma yin no/ /'o na ci zhe na/ nyon mongs pa lhag ma ma spangs pa rnams kyis te/ sangs rgyas bcom ldan 'das rnams ni ma nges pa'i rigs can gyi nyan thos de dag la sangs rgyas nyid thob par bya ba'i phyir ci nas kyang lhag mthong lhur len cing thar pa la smon pa'i lam 'dor zhing 'khor ba la mngon du phyogs pa snying rje bsgom pa'i lam la sbyor ba de ltar 'doms la/snying rje'i dbang gis na 'phags pa'i lam srid pa la sdang ba de ci nas kyang srid pa la rgyab kyis phyogs te mi gnas pa dang mya ngan las 'das pa la gzhol bar mi 'gyur ba dang /sems can gyi don du yang dang yang du skye ba lon pa de ltar nges par byed de/ de ltar na skye bar bsgyur ba yin no/ /de nyid kyi phyir skye ba de ni bsam gyis mi khyab par bsgyur ba yin no/ /gcig ste 'dod chags dang ma bral ba gang yin pa de ni smon lam gyi dbang gis ji ltar 'dod pa bzhin du skye ba 'dzin to//zhes bya ba ni bsam gyis mi khyab pa'i skye ba yongs su 'dzin pa'i sgo nas yin gyi/ las dang nyon mongs pa'i dbang gis skye ba ni ma yin no/ /zhes bya ba'i tha tshig go/ / de ni 'dod chags dang bral ba yin te/ gang dang gang du sems can gyi don mthong ba de dang der skye bar smon lam 'debs so/ /'dod pa las 'dod chags dang bral ba gang yin pa ni phyir mi 'ong pa dang ldan pa'i stobs kyis/ zhes bya ba ni bsam gtan gyi stobs kyis zhes bya ba'i don te//bsam gtan gyi stobs kyis sprul pa rnams sprul nas de dang de dag tu skye ba kun du bstan pas sems can gyi don byed do/ /bden pa mthong ba 'dod chags dang ma bral ba'i don ma byas pa slob pa gang yin pa de zhes bya ba ni slob pa dang 'dod chags dang ma bral ba ste/ 'dod pa na spyod pa'i lha tshe ring po rnams kyi nang du skye la/'dir ni bstan pa nub par 'gyur ba dang de'i 'og tu shi 'phos nas sangs rgyas med pa'i yul du skyes te bsam gtan gyi don du brtson par 'gyur ro/ /ci'i phyir bsam gtan gyi don du brtson zhe na/ sprul pa'i don du gnyer bas te/de ni sngon 'phags pa'i lam thob pa'i stobs kyis 'dod pa'i khams kyang rnam par sun 'byin par byed la de'i sems yul dag la yang mngon par mi dga'o/ /de nas sngon goms pa'i stobs kyis slob dpon med par 'phags pa'i lam mngon sum du byed cing bsam gtan dag skyed par byed do//de nas rdzu 'phrul gyi rkang pa bzhi bsgoms pas rang gi lus yun ring por gnas par bya ba'i phyir sprul par byed de/ 'di ni de'i rang sangs rgyas kyi gnas skabs yin no/ /tshogs yongs su rdzogs par bya ba'i phyir sprul pa gzhan dang gzhan dag kyang sprul te/de nas rim gyis shes bya'i sgrib pa spangs nas bla na med pa yang dag par rdzogs pa'i byang chub 'thob po/ /me'i dpe zhes bya ba ni dper na lci ba'i me las rtswa'i mer 'gyur la/ rtswa'i me las shing gi mer 'gyur ba ltar zhes bya ba yin no/ /gang gi tshe sngon bden pa mthong ba'i gnas skabs dang /gang gi tshe sangs rgyas med pa'i dus su bdag nyid kyis yongs su bsam gtan bskyed nas skye ba'i lus bor te zhes bya ba ni 'dis dus 'di srid cig thub po zhes bya ba ste/ rdzu 'phrul gyi rkang pa bzhi bsgoms pas gnas skabs de bor nas sprul pa'i lus yongs su 'dzin te/de'i 'og tu bla na med pa'i byang chub 'thob po/ /rten la de rjes su dran pa yid la byed pa zhes bya ba ni de dag rjes su dran pa ni de rjes su dran pa ste/ pha rol tu phyin pa rjes su dran pa zhes bya ba'i tha tshig go/ /rjes su dran pa zhes bya ba'i sgras ni mthong ba'i bya ba ston te/de nyid kyi phyir 'grel pa byed pas/ rten du gyur pa byang chub kyi sems yang dag par rjes su mthong ba dang zhes bshad do/ /yang na pha rol tu phyin pa rnams kyi rten ni byang chub kyi sems so/ /pha rol tu phyin pa'i rten du gyur pa byang chub kyi sems de yang dag par rjes su mthong ba dang zhes bya bas ni dran pa shes rab dang bcas pa ston te/shes rab kyis byang chub kyi sems yang dag par rjes su mthong zhing dran pas bshad ma thag pa'i rigs yang dag par rjes su dran zhing ngo / /ji ltar byang chub pa ni pha rol tu phyin pa'i de kho na nyid thugs su chud pa ste/ de nyid kyi phyir mjug thogs su//ji ltar mngon par rdzogs par sangs rgyas pa dang zhes bya ba la sogs pa smos so/ /mthu rnam pa bzhi yang dag par mthong nas dga' ba'i phyir zhes bya ba la/ mthu ni mthu stobs so/ /mthu stobs med par sems can gyi don bya ba mi 'grub pas kun nas nyon mongs pa med pa'i thabs de kho na nyid kyi don rtogs pa la mos nas mthu stobs dang ldan pa'i yid la byed pa yongs su tshol te/mi mthun pa'i phyogs spong ba la sogs pa mthu yid la byed pa rnam pa bzhi'o/ /rnam par smin pa dang rgyu mthun pa'i 'bras bu 'byin pa nyid do zhes bya ba ni sbyin pa'i pha rol tu phyin pa'i rnam par smin pa ni dbang phyug go//tshul khrims kyi pha rol tu phyin pa'i ni bde 'gro'o/ /bzod pa'i pha rol tu phyin pa'i ni 'khor to/ /brtson 'grus kyi pha rol tu phyin pa'i ni las kyi mtha' grub pa nyid do/ /bsam gtan gyi pha rol tu phyin pa'i ni gnod pa chung ngu nyid do//shes rab kyi pha rol tu phyin pa'i ni rig pa'i gnas thams cad la mkhas pa'o/ /rgyu mthun pa'i 'bras bu ni sbyin pa la sogs pa gong nas gong du bya ba kun tu spyod pa gang yin pa'o/ /sems can dang rang gi sangs rgyas kyi chos yongs su smin pa las brtsams te zhes bya ba ni sems can yongs su smin pa las brtsams pa dang /rang gi sangs rgyas kyi chos yongs su smin pa las brtsams pa ste/ sems can yongs su smin par bya ba la sems can thams cad kyi log par bsgrub pas skyo ba med la/ rang gi sangs rgyas kyi chos yongs su smin par bya ba la phyi dang nang gi sdug bsngal 'bab pa thams cad kyis skyo ba med do/ /sgrub pa rnam pa bzhi yid la byed pa la mdo'i tshig bzhi ste/ sdig pa thams cad 'chags so/ /bsod nams thams cad kyi rjes su yi rang ngo / /sangs rgyas thams cad la gsol ba 'tshal lo//bdag gi ye shes bla na med pa'i mchog tu gyur cig ces bya ba yin no/ /rab tu dang ba yid la byed pa'o zhes bya ba ni dad pas mos pa dang bcas pa yongs su gzung ngo / /chos de nyid la mi smod pa'i tshul gyis zhes bya ba la/ mi smod pa ni mi spong ba ste/pha rol tu phyin pa zhes bya ba'i chos la gus pas yang dag par nod cing len ces bya ba'i tha tshig go/ /yid la byed pa gsum po 'di dag kho na gdams ngag rjes su ston pa dang sbyar bar bya'o zhes bya ba ni go cha dang smon lam dang mngon par dga' ba yid la byed pa rnams te/ 'di ltar/de bzhin bsgrub dang yang dag pa'i/ /gdams ngag rjes su ston pa dang / /zhes 'byung ba'i phyir bsgrub pa'i 'og tu gdams ngag rjes su ston pa yin pas so/ /gdams ngag gi don du go cha gyon par byed/ smon lam 'debs/ mngon par dga' ste/ a la la bdag ni 'doms pa por 'gyur ro//sangs rgyas bcom ldan 'das rnams kyang bdag la 'doms par 'gyur ro snyam nas mngon par dga'o/ /gdams ngag rjes su ston pa'i skabs kyi 'og tu thabs dang ldan pa'i las kyi skabs yin pas de'i phyir de yid la byed pa'i 'og tu sbyin pa'i pha rol tu phyin pa'i skabs so/sbyin pa'i sbyin pa zhes bya ba la/ sbyin pa ni dge ba'i phung po lnga'o/ /sbyin pa'i ngo bo nyid de dag gis gang gi tshe gzhan la nang dang phyi'i sbyin pa sbyin par byed pa ni sbyin pa'i sbyin pa yin no/ /yang na nang dang phyi'i nor dang 'bru la sogs pa gang yin pa de ni sbyin pa zhes bya'o//de ni sbyin pa'i phyir sbyin pa'i sbyin pa yin no/ /tshul khrims la sogs pa'i sbyin pa ni gang gi tshe gzhan gyi rgyud la tshul khrims la sogs pa 'jog pa'am ston pa'o/ /pha rol tu phyin pa dag kho nas bsdu ba'i dngos po'i sbyor bas sems can yongs su smin pa zhes bya ba ni spro ba yid la byed pa zhes bya bar sbyar te/nam zhig na bdag bsdu ba'i dngos po dag gis sems can rnams yongs su smin par byed pa gang yin pa der 'gyur snyam nas/ de nas pha rol tu phyin pa dang ldan pa'i sbyin pas sems can rnams rjes su 'dzin to/ / snyan par smra ba ni pha rol tu phyin pa ston pa kho na yin no/ /don spyod pa ni pha rol tu phyin pa yang dag par len du 'jug pa'o/ /don mthun pa nyid ni gang la gzhan yang dag par len du 'jug pa de la bdag rjes su 'jug pa'o/ /lhag ma rnams kyis bsgrub pa'i mchod pa dang zhes bya ba ni tshul khrims dang /bzod pa dang / brtson 'grus dang / bsam gtan dang / shes rab kyi pha rol tu phyin pa dag gis sgrub pas mchod pa'o/ /sbyin pa la sogs pa sgrub pas byams pa zhes bya ba la/ byams pa ni bde ba dang phrad par 'dod pa ste byang chub sems dpa' ni bde ba dang 'dod pa 'ba' zhig tu ma zad kyi bde ba dang sbyor bar yang byed do//ser sna la sogs pa dang 'grogs pa'i sems can rnams la snying rje ba zhes bya ba la/ snying rje ba ni sdug bsngal dang bral bar 'dod pa'i rnam pa'o/ /ser sna la sogs pa dang 'grogs pa'i rnam pa ni sems can rnams kyi sdug bsngal gyi rgyu yin pa'i sdug bsngal yin te/de'i phyir sems can ser sna can rnams la snying rje'o/ /snying rje 'ba' zhig tu ma zad kyi ser sna 'dor du yang 'jug go/ /de dag la kun nas nyon mongs pa med par mos pa'i sgo nas btang snyoms su byed ces bya ba ni sems can bde ba dang ldan pa rnams la ni sems can 'di dag bde ba la sogs pa la rjes su chags par ma gyur cig /de 'phrog par byed pa rnams la ni kun nas nyon mongs pa/ khro bar ma gyur par btang snyoms su gyur cig ces de dag la kun nas nyon mongs pa med par mos par byed do//sbyin pa la sogs pa ma byas pa'am/ yongs su ma rdzogs pa'am/ log par byas pa dag la zhes bya ba ni mi byed pa ni sbyin pa la sogs pa la mi 'jug pa gang yin pa'o/ /yongs su ma rdzogs par byed pa ni chos kyi sbyin pa dang / zang zing gi sbyin pa dang / mi 'jigs pa sbyin pa dag las gang yang rung ba zhig la 'jug pa dang / gang la 'jug pa de yang yongs su rdzogs par mi byed pa'o/ /log par byed pa ni bcos pa byed pa gang yin pa'o/ /ngo tsha nas ni 'jug pa dang ldog par bya ba'i phyir yun mi ring bar 'gyed pa byed do zhes bya ba la/yun ring po ni rtag tu rjes su 'brel ba'o/ /gang gi tshe sbyin pa la sogs pa ma byas pa la 'gyod pa ni rgyun chags su rjes su 'brel par 'gyod par ni mi byed de/ 'di ltar rgyun chags par 'gyod na dge ba la 'jug pa nyid du yang mi 'gyur ro/ /de bas na sbyin pa la sogs pa ma byas pa'am/ngan par byas pa gang yin pa de la yud tsam zhig byang chub sems dpa' sbyin pa la sogs pa mi byed pa'am ngan par byed pa ni rigs pa ma yin no snyam du sems la bsams nas de'i 'og tu sbyin pa la sogs pa ma byas pa'am yongs su rdzogs par ma byas pa dag la 'gyod pa bzlog pa'i phyir ma byas pa gang yin pa de la ni bya ba'i phyir 'jug la/rdzogs par ma byas pa gang yin pa de la ni rdzogs par bya ba'i phyir rtag tu bya ba dang gus par byas te 'jug go/ /sbyin pa la sogs pa log par byas pa dag la ni phyin chad log par mi 'jug go zhes log par byed pa ldog par byed do//de ltar na 'di'i 'gyod pa de las ldog go/ /yul la dga' ba zhes bya ba ni sbyin pa la sogs pa yul la ste/ sbyin pa la sogs pa dmigs pa la zhes bya ba'i don to/ /pha rol tu phyin pa dang ldan pa'i bstan bcos 'god par mngon par 'du byed pa'i phyir ro zhes bya ba ni ji ltar mdo sde rgyan 'di nyid las grangs dang de'i mtshan nyid go rims dang zhes bya ba'i rim pa pha rol tu phyin pa 'god pa mngon par 'du byed pa ltar pha rol tu phyin pa rnams 'god par mngon par 'du byed pa yin no//snod ji lta ba bzhin du brjod pa zhes bya ba la ni kha cig ni sbyin pa'i pha rol tu phyin pa'i chos bstan du rung ba nas shes rab kyi pha rol tu phyin pa'i chos bstan du rung ba'i bar yin no//rten ni sbyin pa la sogs pa yin gyi/ dbang phyug la sogs pa ma yin pa'i phyir ro zhes bya ba ni pha rol tu phyin pa ma gtogs par dbang phyug la sogs pa ni rdzogs pa'i byang chub kyi rten du mi 'gyur ba'o//ser sna la sogs pa la ni skyon nyid du so so yang dag pa nyid du rig la/ sbyin pa la sogs pa ser sna la sogs pa'i gnyen po la ni yon tan nyid du so so yang dag par rig go//sbyin pa la sogs pa byang chub kyi phyogs dang mthun pa'i ngo bo nyid kyis byang chub chen po 'thob pa'i don du yang dag par mthong ba'i phyir zhes bya ba la/ byang chub chen po ni byang chub sems dpa' rnams kyi rnam par mi rtog pa'i ye shes te/ pha rol tu phyin pa 'di dag bsgoms na byang chub chen po de'i phyogs dang mthun pa'i ngo bor gnas so//tshogs kyi 'og tu yang byang chub kyi phyogs dang mthun par bsgom pa 'byung ste/ 'di dang ldan pa'i yid la byed pa ni don chen po yin no/ /rnam par mi rtog pa 'dod pa yid la byed pa ni pha rol tu phyin pa yongs su rdzogs par bya ba'i don du thabs la mkhas pa 'dod pa'i phyir ro zhes bya ba ni pha rol tu phyin pa yongs su rdzogs par bya ba'i thabs ni rnam par mi rtog pa'i ye shes te/de la 'dod pa yid la bya ba byed do/ /yang na sbyor ba'i gnas skabs nyid na rtog pa med cing rnam par rtog pa med par sbyin pa la sogs pa 'jug par 'gyur bar mngon par 'du byed do//de nas rnam par mi rtog pa'i ye shes thob nas ni rnam par mi rtog pa kho nar sbyin pa la sogs pa 'jug par 'gyur ro/ /'dzin pa 'dod pa yid la byed pa zhes bya ba ni gzungs kyi dbang du byas nas/rnam smin thos la goms pa dang / /ting nge 'dzin gyi gzungs dag ni zhes bya ba la sogs pa 'byung ba lta bu yin no/ /rkyen dang phrad pa 'dod pa yid la byed pa zhes bya ba ni sbyin pa'i pha rol tu phyin pa la sogs pa yongs su rdzogs par bya ba'i phyir de skye ba thams cad du dge ba'i bshes gnyen dang phrad pa la sogs pa dang ldan par gyur cig ces rkyen tshogs par smon lam 'debs pa yin no//med pa la yod par 'dzin pa zhes bya ba ni bdag med pa'am/ kun brtags pa'i chos rnams la yod pa nyid du 'dzin pa ste/de'i gnyen por stong pa nyid kyi ting nge 'dzin to/ /nyes pa dang ldan pa la yon tan dang ldan pa nyid du 'dzin pa zhes bya ba ni 'khor ba'i nyes pa dang ldan pa yin na de rtag pa dang bde ba dang gtsang ba la sogs par yon tan dang ldan pa nyid du 'dzin te/ de'i gnyen por smon pa med pa'i ting nge 'dzin to//yon tan dang ldan pa la yon tan dang ldan pa ma yin pa nyid du 'dzin pa zhes bya ba ni mya ngan las 'das pa ni yon tan thams cad phun sum tshogs pa yin no/ /de la byis pa rnams chad pa'i 'jigs pas yon tan dang ldan pa ma yin par 'dzin to//'du byed thams cad ni mi rtag pa'o zhes bya ba ni zag pa dang bcas pa dang zag pa med pa rnams so/ /'du byed thams cad ni sdug bsngal ba'o zhes bya ba ni zag pa dang bcas pa dag kho na ste/ thams cad ces bya ba'i sgra phyogs gcig brjod pa yin par blta'o/ / chos thams cad ni bdag med pa'o zhes bya ba ni zag pa dang bcas pa dang zag pa med pa dang / 'dus byas dang 'dus ma byas rnams te/ thams cad ces bya ba'i sgra 'dir ni ril brjod pa yin par blta'o/ /ngo mtshar la 'du shes rnam pa bzhi yid la byed pa ni pha rol tu phyin pa rnams la rgya che ba'i 'du shes dang zhes bya ba ni 'di la ngo mtshar che ba de ci zhig ce na/re zhig sbyin pa'i pha rol tu phyin pa la ni rang gi lus gtong ba ngo mtshar che'o/ /tshul khrims la ni sdom pa'i phyir phun sum tshogs pa rgya chen po gtong ba ni ngo mtshar che'o/ / bzod pa la ni mthu med pa dag la bzod pa ste/ ma rabs bkren pa gdol pa'i bu la sogs pas lan cig ma yin par gnod pa byas kyang bu gcig pa la byams pa bzhin du bzod pa ngo mtshar che'o/ /bsam gtan la ni bde ba'i bdag nyid kyi bsam gtan dag la yang ro myang ba med pa ngo mtshar che'o//shes rab la ni mi rtog pa ngo mtshar che ba ste/ de ltar na 'di dag ni ngo mtshar che ba nyid kyis rgya che ba yin no/ /yun ring ba'i 'du shes zhes bya ba ni de ltar ngo mtshar che ba nyid kyis/ rgya che ba'i pha rol tu phyin pa rnams kyang bskal pa grangs med pa gsum du kun tu spyod de/'di yang ngo mtshar che ba yin no/ /sems can gang dag la pha rol tu phyin pa rnams kyis phan 'dogs par byed pa yang len la re ba med par byed pa 'di yang ngo mtshar che ba yin no/ /rnam par smin pa la mi lta ba'i 'du shes so zhes bya ba ni sbyin pa la sogs pa tshe phyi ma'i dbang phyug la sogs pa la mi lta ba'o//ngo mtshar med pa la yang 'du shes rnam pa bzhi yid la byed de zhes bya ba la/ ngo mtshar med pa rnam pa bzhi ni pha rol tu phyin pa rnams rgya che ba dang yun ring ba nyid yin na ni 'bras bu sangs rgyas nyid mngon par 'grub pa dang zhes bya ba ni rgyu 'di lta bu'i 'bras bu sangs rgyas nyid yin no zhes bya ba la ngo mtshar che ba med do//gnyis po de nyid yod na zhes bya ba ni rgya che ba dang yun ring ba nyid do/ /rang dang gzhan la sems mnyam par 'jog pa gang yin pa de ngo mtshar che ba med do zhes bya ba ni byang chub sems dpa' ni sems can phal pa bzhin du gzhan la gnod pas rang gi don bsgrub pa'am/gzhan la mi lta bar bdag nyid kho na'i don byed pa ma yin gyi 'di ltar de ni rang gi lus yongs su gtong ba la sogs pa byed la/ rang gi lus yongs su gtong ba la sogs pa de yang bskal pa mi nyung bar kun du spyod de rgya che ba dang yun ring ba nyid 'dis rang dang gzhan la sems mnyam par 'gyur ba la ngo mtshar che ba med do//de dag pas khyad par du 'phags pa zhes bya ba ni sems can skye bo sdug bsngal bar gyur pa dag pas khyad par du 'phags pa ste/brgya byin la sogs pa ni byang chub sems dpa' sems can sdug bsngal bar gyur pa gang dag la sbyin pa la sogs pas phan 'dogs par byed pa de dag la ltos na khyad par du 'phags pa yin no/ /brgya byin la sogs pa las mchod pa la sogs pa rnyed du zin kyang lan la mi lta na/gang dag la sbyin par bya ba nyid kyang med pa'i sems can sdug bsngal bar gyur pa rnams la lta smos kyang ci dgos zhes bya ba la ngo mtshar che ba med de/ gang zhig brgya byin la sogs pa ches khyad par du 'phags pa la yang lan la mi lta ba de ji ltar skye bo gzhan la yang lan re bar 'gyur ro//'jig rten thams cad la mngon par 'phags pa'i lus dang longs spyod 'thob tu zin kyang rnam par smin pa la mi lta ba nyid do/ /zhes bya ba ni gang zhig sbyin pa la sogs pa'i 'bras bu dbang phyug la sogs pa'i bdag nyid mi 'dod bzhin du 'jig rten thams cad las mngon par 'phags pa'i lus kyang 'thob la/longs spyod rnam pa sna tshogs kyang 'thob pa de rnam par smin pa las mi lta'o zhes bya ba 'di ni ngo mtshar che ba med do snyam pa yid la byed pa ni sbyin pa la sogs pas sems can thams cad la mnyam pa nyid 'jug par mngon par 'du byed pa'i phyir ro zhes bya ba ni byang chub sems dpa'i sbyin pa la sogs pa'i bya ba la zhugs pa la ni 'di snyam du sems can 'di dag ni gnyen po la sogs pa ste/bdag la byams pa yin pas 'di dag ni sbyin pa la sogs pa rab tu sbyin par bya'o/ /'di dag ni gnyen pa ma yin te/byams pa ma yin pa 'di dag la ni rab tu sbyin par mi bya'o snyam du sems pa'i ma snyoms par 'gyur ba med do/ /'o na ci zhe na/ khyad par med par sems can thams cad la sbyin pa la sogs pa la 'jug go/ /bdag nyid chen po mthong ba yid la byed pa ni pha rol tu phyin pa rnams la sems can la phan pa nyid du yang dag par mthong ba'i phyir ro zhes bya ba ni sbyin pas ni sems can rnams dge ba bya ba'i snod nyid la 'god par byed do//'di ni sbyin pa'i pha rol tu phyin pa'i phan pa nyid yin no/ /tshul khrims kyi pha rol tu phyin pa'i phan pa nyid ni gzhan dag sdom pa la sogs pa tshul khrims gsum la 'god pa yin no//bzod pas phan pa nyid ni gnod pa byed pa la bzod pa yin no/ /brtson 'grus kyis ni don byed par 'gyur ba nyid yin no/ /bsam gtan gyis ni mthu'i khyad par dang ldan pa'i phyir dang bar byed pa yin no/ /shes rab kyis ni the tshom can rnams kyi the tshom gcod pa yin no//lan re yid la byed pa ni gzhan dag la sbyin pa la sogs pa'i yon tan la 'jug pas so zhes bya ba ni gal te gzhan dag la sbyin pa la sogs pa rab tu sbyor na de ltar na de dag gis byang chub sems dpa' la lan du phan btags par 'gyur ro//smon pa yid la byed pa ni sems can dag la pha rol tu phyin pa rnams gnas gsum du smon pa'i phyir te zhes bya ba ni/ rtag tu 'phel dang nyams pa dang / /sems can rab tu smin pa dang / /sa la khyad par 'gro ba dang / /bla na med pa'i byang chub 'dod/ /ces 'byung ba lta bu yin no//rgyun du yid la byed pa ni sbyin pa la sogs pas dus don yod par byed par mngon par 'du byed pa'i phyir ro zhes bya ba ni/ 'jigs spangs yang dag bskyed pa dang / /the tshom dag ni gcod pa dang / /zhes bya ba la sogs pa lta bus dus don yod par byed par mngon par 'du byed do/ / yang dag pa'i sbyor ba yid la byed pa ni phyin ci ma log par bsgrub pa yid la byed pa dang / tshu rol du mi gnas pa'i yid la byed pas de ston par byed de/ ji skad du 'phags pa dkon mchog brtsegs pa'i mdo las/ rnam par smin pa la re ba med pa'i sbyin pas zhes bya ba la sogs pas ji srid kyis thob par bya ba'i don mthar phyin pa de srid du phyin ci ma log pa'i sbyor bas rab tu sbyor ro//ji srid du thob par bya ba'i don de ma thob pa de srid du rnam pa gang gis kyang tshu rol du mi gnas so zhes 'byung ba lta bu ste/ yang dag pa'i sbyor ba yid la byed pa ni de lta bu yin par rig par bya'o//ma dad pa zhes bya ba ni pha rol tu phyin pa ltar bcos pa la ma dad pa zhes bya bar sbyar ro/ /yang dag pa la ni dad pa ste/ re ba med pa'i sbyin pa dang / /yang srid mi 'dod tshul khrims dang / /zhes bya ba la sogs pa 'byung ba lta bu yin no/ /dang du mi len pa yid la byed pa zhes bya ba ji ltar na dang du len par mi byed ce na/'di ltar ser sna la sogs pa mi mthun pa'i phyogs 'dul bar mngon par 'du byed pas te/ mi mthun pa'i phyogs de dag ci nas kyang yang mi 'byung ba de ltar 'dul bar byed do/ /dga' ba yid la byed pa ni rnam pa gnyis te/pha rol tu phyin pa yongs su rdzogs pa lung bstan pa thob par dga' ba yid la byed pa dang zhes bya ba ni/ gang zag dus kyi bye brag gis/ /blo ldan lung bstan rnam pa gnyis/ /byang chub dang ni lung bstan par/ /zhes bya ba la sogs pa 'byung ba lta bu yin no//dga' ba yid la byed pa ni pha rol tu phyin pa yongs su rdzogs pa lung bstan pa thob par bya ba'i ched du ste/ dus 'di srid cig na pha rol tu phyin pa rnams yongs su rdzogs par 'gyur ro zhes de ltar lung ston pa'i phyir ro/ /byang chub sems dpa' la ni lung ston pa de lta bu la dga' ba yid la byed pa 'byung ngo //pha rol tu phyin pa nges pa'i sa la gnas pa 'thob par dga' ba yid la byed pa'o/ /zhes bya ba ni bdag nam zhig pha rol tu phyin pa rnams nges pa'i sa la gnas pa 'thob par 'gyur ba gang yin pa der 'gyur snyam du de ltar dga' ba yid la byed pa bskyed pa'o//pha rol tu phyin pa rnams nges pa'i sa la gnas 'thob pa ni sa thob pa'i dus nas bzung ste/ blo ldan rnam pa thams cad du/ /phun sum tshogs dang skye ba nges/ /zhes bya ba la sogs pa nges par 'gyur ba rnam pa drug 'chad par 'gyur ba lta bu yin no/ / phun sum tshogs pa nges par gyur pa ni rtag tu longs spyod phun sum tshogs pa rgya chen po thob pa'i phyir ro/ /de bzhin du tshul khrims kyi pha rol tu phyin pa la sogs pa'i'o/ /skye ba la sogs pa nges par 'gyur ba ni ji ltar 'dod pa bzhin du skye ba yongs su 'dzin pa la sogs pa yin par rig par bya'o//tshe phyi ma la mthong ba'i phyir 'jug pa yid la byed pa ni byang chub sems dpa' yin phan chad 'gro ba gang du son yang sbyin pa la sogs pa gdon mi za bar bya dgos so snyam du mngon par 'du byed pa'i phyir ro zhes bya ba ni byang chub sems dpa'i rigs la gnas pa ni 'di ltar byang chub sems dpa' ni nam yang rung ste/gdon mi za bar pha rol tu phyin pa rnams la gnas par bya dgos so/ /'di dag la mi gnas phan chad byang chub sems dpa' nyid kyang ma yin no zhes de ltar lta ste/ mchod bslab yang dag blang ba dang / / snying rje dge ba bsgom pa dang / /zhes bya ba la sogs 'byung ba lta bu yin no/ /mnyam pa nyid du lta ba yid la byed pa ni de las gzhan pa'i byang chub sems dpa' rnams bdag dang lhan cig pha rol tu phyin pa rtag tu bya bar mos pa'i phyir ro zhes bya ba ni bdag gang yin pa de nyid byang chub sems dpa' gzhan dag kyang yin no zhes mnyam pa nyid du lta ba'i phyir te/de dag pha rol tu phyin pa rnams la kun tu spyod pa gang yin pa de bdag gi yang yin la/ bdag la bdag pha rol tu phyin pa rnams la sbyor ba byed pa gang yin pa de la gzhan dag kyang sbyor ba yin no zhes de ltar mos pa'i phyir rtag tu byed pa nyid du 'gyur te/'di ltar 'jig rten gyi khams mtha' yas mu med pa dag na byang chub sems dpa' rnams skad cig re re rtag tu gus par byas te/ sbyor bas pha rol tu phyin pa rnams la rab tu sbyor ro/ /bdag nyid mchog tu nges par 'dzin pa yid la byed pa ni pha rol tu phyin pa mchog gis chos la zhugs pas bdag nyid gtso bo'i ngo bor yang dag par mthong ba'i phyir ro zhes bya ba ni byang chub sems dpa' gang gi tshe pha rol tu phyin pa rnams la 'jug pa de'i tshe pha rol tu phyin pa rnams la sbyor ba ni 'jig rten gyi chos dag pas mchog gtso bo dam pa yin no zhes pha rol tu phyin pa la sbyor ba mchog nyid du 'dzin to//yang na pha rol tu phyin pa rnam pa gsum po dag la chos kyi sbyin pa dang / zang zing dang mi 'jigs pa sbyin pa rnams kyi nang na ni chos kyi sbyin pa gtso bo yin la/ tshul khrims rnam pa gsum la ni zlog pa'i tshul khrims gtso bo yin no zhes bya ba de lta bu la sogs par ro//pha rol phyin bcu'i rgyus byung ba/ /dge ba yid byed 'di dag ni/ /zhes bya ba ni pha rol tu phyin pa bcu dang ldan pa'i phyir rgyu las byung ba zhes bya'o/ /rtag tu byang chub sems dpa' yi/ / khams ni brtas par byed pa yin/ /zhes bya ba ni pha rol tu phyin pa'i rigs brtas par byed pa yin no zhes bya ba'i don to/ /chos yongs su tshol ba'i rab tu dbye ba la tshigs su bcad pa gnyis te/ zhes bya ba ni chos yongs su tshol ba'i rab tu dbye ba gang dag yin pa de dag gi dbang du byas te/tshigs su bcad pa gnyis so/ /thos pa la mos pa rgyas pas so zhes bya ba ni las dang po'i gnas skabs na theg pa chen po la mos pa skye ba gang yin pa'o/ /lhag pa'i bsam pa ni chos kyi sgo'i rgyun gyis so zhes bya ba la/ bsam pa lhag pa ni lhag pa'i bsam pas te sa dang po thob pa'i dus kyi na'o//lhag pa'i bsam pa de ni chos kyi rgyun gyis 'thob ste/ 'di ltar chos kyi rgyun gyi ting nge 'dzin ni mos pas spyod pa'i sa'i rtser phyin pa las 'byung la de'i mjug thogs su ni sa thob po/ /de nyid kyi phyir spang ba med pa ni gnyis pa'o zhes 'chad par 'gyur ro//chen po ni dbang 'byor pa thob pa rnams kyi'o zhes bya ba la/ dbang 'byor pa ni brgyad pa la sogs pas chen po la zhugs pa rnams kyi yin no/ /sku dang bcas pa ni mos pas spyod pa ni bsgoms pa las byung ba'o zhes bya ba ni mos pas spyod pa'i gnas skabs na'o//sa dang po ma thob par ji ltar sku dang bcas pa yin zhe na/ gzung ba dang 'dzin pa'i don 'jig pas cung zad cig thob pa'i phyir sku dang bcas pa yin no/ /sa dang po la sogs pa la ni mthong ba'i lam gyis spang bar bya ba 'jig tshogs la lta ba la sogs pa spangs pa'i phyir dang gnyis su 'dzin pa dang bral ba'i phyir sku thob pa zhes bya'o//rgyu nyid kyi chos yongs su tshol ba la tshigs su bcad pa zhes bya ba ni 'di ltar chos yongs su btsal na mtshan dang dpe byad bzang po la sogs pa'i rgyur 'gyur bas so/ /chos ni gzugs la ni mtshan gyi rgyu'o zhes bya ba ni gzugs kyi phung po la mtshan rnams gsal gyi tshor ba la sogs pa gzugs can ma yin pa la ni ma yin pas/de'i phyir chos ni gzugs la ni mtshan gyi rgyu'o zhes bshad do/ /gzugs can ma yin pa la ni nad med pa'i rgyu zhes bya ba la chos gzugs can ma yin pa la ni sems dang sems las byung rnams te/'dod chags la sogs pa kun nas nyon mongs pa gang gis sems kun nas nyon mongs par byed pa de dag nye bar zhi bar byed pas de'i phyir chos ni nad med pa'i rgyur bshad do/ /de dag zad mi shes pa nyid kyi rgyu yin pa'i phyir mya ngan las 'das par 'du shes zhes bya ba la/de dag ces bya ba'i sgras ni mngon par shes pa la sogs pa'i nor bzung ste/ sangs rgyas dang byang chub sems dpa' rnams kyi mya ngan las 'das pa la ni rnam pa gang gis kyang zad pa med pas de'i phyir mya ngan las 'das pa bzhin du mngon par shes pa la sogs pa'i nor yang yongs su zad par mi 'gyur ro//'jig rten ni nor zad pas 'jigs par 'gyur na/ sangs rgyas dang byang chub sems dpa' rnams kyi mngon par shes pa la sogs pa'i nor la ni zad pa med pas de'i phyir 'jigs pa med do//rnam par rtog pa ni dang po med pa dang yod par rnam par rtog pa de dag ni gang zag la bdag med pa'i mi mthun pa'i phyogs su gyur pa yin no/ /gnyis pa dag ni chos la bdag med pa'i mi mthun pa'i phyogs su gyur pa yin no/ /gzugs nyid stong pa nyid ces bya ba ni chos dang chos can gzhan ma yin pa'i phyir te/stong pa nyid gzugs so zhes bya ba yang de dang 'dra'o/ /thabs kyi che ba nyid ni brtson 'grus drag po nyid kyi phyir zhes bya ba ni brtson 'grus mi dman pa dang mi 'khrug pa dang chog par mi 'dzin pas te/ brtson 'grus drag po de yang thabs kyis yongs su zin pa yin gyi/gzu lums kyi brtson 'grus kyis ni ma yin no/ /de bzhin nyid bcas gnyis kyi chos nyid yongs btsal ba/ /zhes bya ba ni kun rdzob kyi bden pa'i chos nyid dang / don dam pa'i bden pa'i chos nyid do/ /de yongs su tshol ba ni gnyis kyis yongs su tshol ba ste/'di skad du kun rdzob kyi bden pa'i chos la mkhas pa dang / don dam pa'i bden pa'i chos la mkhas pa zhes bshad pa yin no/ /chos yongs su tshol ba'i skabs rdzogs so// //chos yongs su tshol ba'i skabs kyi 'og tu chos ston pa'i skabs te/ gong du rnam pa gang dag gi de'i sbyor ba'i sa la slob pa de dag ni slob pa'i rnam pa'i khyad par yin te/ de dag kyang bsam pa'i khyad par la sogs pa'o zhes bshad pa la bsam pa dang sbyor ba'i khyad par dag ni mos pa yongs su tshol ba'i skabs su bshad zin to//da ni gzhan la phan pa bsgrub pa'i khyad par gyi skabs la bab pas de brjod do/ /ji ltar na gzhan la phan pa sgrub pa yin zhe na/ gzhan dag la dam pa'i chos yang dag par rab tu ston pa'i phyir te/ de bas na chos yongs su tshol ba'i skabs kyi 'og tu chos ston pa'i skabs yin no//chos ston pa la ser sna dgag pa'i tshigs su bcad pa zhes bya ba ni ji ltar na chos ston pa la byang chub sems dpa' rnams kyi ser sna'i skabs nyid med pa de ston par byed pa'o/ /byang chub sems dpa' rnam pa ni snying rjes srog dang longs spyod tshegs chen pos rnyed cing zad par 'gyur bas snying po med pa dag kyang sems can sdug bsngal bar gyur pa rnams la sbyin par byed pa na zhes bya ba ni yo byad zad na'ang sdug bsngal bar 'gyur la/srog zad na yang 'chi bar 'gyur bas gang zhig zad par 'gyur ba de ni sbyin par mi nus kyi/ gang zhig sbyin yang zad pa med pa de la ni sems zhum par mi 'gyur ro//chos ni byin yang zad par mi 'gyur gyi/ mar me las mar gyi me spar ba de bzhin du 'phel bar 'gyur ro/ /longs spyod kyang tshegs chen pos bsgrub par bya ba yin la/ mi nyid kyang yid la smon pa brgya phrag mang pos 'thob ste/ gang zhig de ltar tshegs chen pos rnyed pa'i lus dang longs spyod de dag kyang yongs su gtong ba de ji ltar tshegs chen pos rnyed pa ma yin pa chos yongs su gtong bar mi byed/chos ni srog dang longs spyod dag pas kyang chos shin tu rnyed par dka' bas tshigs su bcad pa phyed tsam gyi phyir yang byang chub sems dpa' bdag nyid yongs su btang ste/ji skad du/ legs gsungs tshigs bcad phyed tsam yang / /nyid kyi sku yi drin gyis bsgrubs/ /zhes bya ba la sogs pa bshad pa lta bu dang / ji skad du bdag ni tshigs bcad gcig gi phyir yang bdag nyid tshangs pa'i 'jig rten nas me'i 'obs su 'dor bar spro'o zhes gsungs pa lta bu'o//de lta bas na gang zhig de ltar rnyed dka' ba de la 'di skad du/ rnyed par sla ba zhes ji skad du brjod ce na/ de ni de ltar mi gzung gi/ /sangs rgyas byung ba nas bzung ste/ /ji srid du bstan pa gnas pa de'i bar du ni dam pa'i chos tshegs chen pos rnyed pa ma yin te/'di ltar sangs rgyas bcom ldan 'das rnams ni gdul ba'i skye bo'i thad du gshegs shing gshegs nas yul dang dus la sogs pa la ltos te/ sems can dag la ni mi 'dod bzhin du yang ston par mdzad pas de'i phyir tshegs chen pos rnyed pa ma yin pa zhes bya'o//chos yangs pa ni theg pa chen po'i chos so/ /gang phyir rang rig chos pas bcom ldan 'das kyis ma bstan zhes bya ba ni gang gi phyir chos ni so so rang gis rig par bya ba yin pas/ bcom ldan 'das kyis ma bstan pa de'i phyir chos bstan pa don med de/sangs rgyas bcom ldan 'das rnams kyi thugs su chud pa'i chos so so rang gis rig par bya ba'i gnas skabs gang yin pa'i so so rang gis rig par bya ba de ni gzhan dag la bstan par mi nus so/ /me zhes bya ba'i sgras ni me'i rang gi ngo bo brjod par mi nus te/gal te me zhes bya ba'i sgras me'i rang gi ngo bo brjod na ni me zhes bya ba'i sgras brjod pa'i dus na kha tshig par 'gyur ro zhe na/ tshig gis chos rnams kyi ngo bo nyid brjod par mi nus mod kyi/ 'on kyang sangs rgyas bcom ldan 'das rnams ni de dang mthun pa'i gtam bsnyad pa chos bstan pas so so rang gis rig par bya ba la gdul ba rnams kyi rtogs pa skyed par mdzad do//de'i phyir 'di skad du/ rigs pa bshad pa chos rnams kyis/ /skye bo nyid kyi chos la kun nas drangs/ /zhes bya ba smos so/ /'di ltar rigs par bshad pa'i chos bstan pas 'jig rten nyid kyi chos la kun nas drangs te/rgyu 'dis na chos bstan pa don med pa ma yin no/ /nyid kyi chos ni bcom ldan 'das kyi bka' ste/ chos bstan pa de la 'god par mdzad do/ /yang na nyid kyi chos ni bstan pa la 'jug pa ste/ zhugs na thos pa dang bsam pa dang bsgom pa'i rim gyis rtogs pa 'thob pas chos bstan pa don med par mi 'gyur ro//ji ltar na chos bstan pa don med par mi 'gyur ba ni tshigs su bcad pa gnyis pa'i phyed kyis ston to/ /gal te thos pa tsam gyis don mthong 'gyur na bsgom pa don med 'gyur/ /zhes bya ba la/ gal te don mthong ba zhes bya ba ni don rtogs pa gang yin pa zhes bya ba'i tha tshig go//gal te don gang zhig rtogs pas mngon sum du bya ba de thos pa tsam kho nas mngon du byed cing rtogs par 'gyur na ni de'i phyir bsgom pa don med par yang 'gyur ba zhig na/ gang gi phyir don de bsgoms pas mngon sum du byed pa de'i phyir bsgom pa don med par mi 'gyur ro//de ltar bde bar gshegs kyi bstan pa gang yin de yang don med min/ /zhes bya ba ji ltar bstan pa don med par mi 'gyur ba de ni rkang pa tha ma/ gal te ma thos par yang bsgom 'jug 'gyur na bstan pa don med 'gyur//zhes bya bas ston te/ mnyam pa med par ni bsgom par mi 'gyur ro/ /de lta bas na chos bstan pa don med pa ma yin te/ ji skad du chos mngon pa kun las btus pa las/ gnyis la brten nas gnyi gar gnas par 'gyur ro zhes bshad pa lta bu yin no/ /ston pa rnam par dbye ba la tshigs su bcad pa zhes bya ba ji ltar na lung la sogs pas ston pa rnam par dbye ba yin zhe na/lung las rnam par dbye ba ni 'di ltar byang chub sems dpa' rnams sangs rgyas dag las chos thos nas gzhan dag la ston par byed de/ de lta bas lung las kyang chos rnam par dbye ba byas pa yin no//rtogs pa las kyang zhes bya ba ni/ chos rtogs nas de nyid sems can dag la ston par byed de/ /de ltar na rtogs pa las kyang rnam par phye ba yin no/ /gzugs las kyang zhes bya ba ni chos gzugs can shing dang sil snyan la sogs pa las chos ston pa 'byung ba gang yin pa'o//dam pa'i chos yongs su 'dzin pas ni don sna tshogs kyang rtogs par 'gyur la/ mang du thos pa yang 'phel bar 'gyur te/ de bas na ston pa rgya chen por 'gyur ro/ /skyes bu dam pa'i las byed pa zhes bya ba ni gal te kha na ma tho ba med pa'i las byed pas kha na ma thob med pa'i las can sgrub pa la gnas pa zhig chos ston na des na ston pa phun sum tshogs par 'gyur te/de ltar na tshig bzung bar 'os par 'gyur ro/ /chos kyi sbyin pa chen po rnam par 'byed do zhes bya ba ni gzhan dag la rnam par 'byed cing tshig dang don rgyas par ston pa yin no//rgyags pa dang bral ba ni bstod dam grub na rgyags par mi 'gyur ba'i phyir ro zhes bya ba ni bshad pa des rangs par byas pa gang yin pas bstod na yang rgyags pa'am khengs par mi 'gyur la/ gang gi tshe don rtogs par dka' ba gang yin pa de bshad pas gsal bar byed sgrub par byed la/de grub na de 'di snyam du a la la bdag gis don rtogs par dka' ba bsgrubs so snyam du rgyags par mi 'gyur ba yin no/ /mi skyo ba ni dub pa med pa'i phyir ro zhes bya ba la dub pa ni skyo ba yin te/ byang chub sems dpa' chos ston pa la dub pa nyid med pa'i phyir ston pa mi skyo ba zhes bya'o//zang zing med pa ni dad pa'i lhag par bya ba don du mi gnyer ba'i phyir ro zhes bya ba ni byang chub sems dpa' ni sems la 'di snyam du 'jig rten gyi chos thos te yi rangs nas rnyed pa dang bkur sti la sogs pas mchod pa byed par 'gyur ro snyam du bsams nas/chos ston par mi byed kyi/ 'on kyang zang zing med pa'i sems kyis rnyed pa dang bkur sti la sogs pa don du mi gnyer bar snying rjes chos ston to/ /grong khyer pa'i gsung dang / snyan cing 'jebs pa dang / rnam par gsal ba dang / rnam par rig par byed pa dang /mnyan par 'os pa dang / brten pa med pa dang / mi mthun pa med pa dang / gtugs pa med pas chos ston to zhes bya ba'i mdo'i tshig 'di dag /rgyal sras tshig ni mi zhan pa/ /snyan cing legs bshad grags pa dang / /zhes bya ba'i tshigs su bcad pa'i tshig 'di dag gi 'grel pa las sbyar bar shes par bya ste/snyan cing 'jebs pa ni bzang po'o zhes bya ba'i tha tshig go/ /ran pa ni mi mthun pa med pa ste/ ji ltar mi mthun pa med ce na/ de ston te/ tshig ran pa la mi skyo ba'i phyir ro/ /'di ltar bshad pa'i tshad nges pa med pa ni 'jig rten dang mi mthun par 'gyur ro//mi mthun pa'i phyir skyo ba skye'o/ /de nyid kyi phyir slob dpon gyis 'grel pa las ran pa la mi skyo ba'i phyir ro zhes bstan te/ yi ge mdor bsdus te bstan na dga' bar 'gyur zhing skyo ba mi skye'o/ /yangs pas ni gtugs pa med pa'o zhes bya ba ni tshig 'di la gtugs shing yongs su zad pa med pas gtugs pa med pa zhes bya'o//tshig dang yi ge rigs pa dang / 'brel pa dang / mthun pa dang / rung ba dang / 'byor pa dang / 'phrod pa dang / 'tsham pa dang / 'grus skyong gi yan lag gi tshogs dag gis zhes bya ba'i mdo'i tshig 'di dag gis slob dpon gyi zhal snga nas kyis/bstan dang de bzhin bshad pa dang / /zhes bya ba'i tshigs su bcad pa 'di'i 'grel pa las sbyar bar shes par bya'o/ /rtag tu mkhas par skyong ba'i phyir 'grus skyong ste slob pa la bya'o/ /de mdor sems dpa' mchog rnams kyi/ /yi ge phun tshogs yin zhes bya//bde gshegs gsung ni mtha' yas te/ /yan lag drug cu bsam mi khyab/ /byang chub sems dpa' rnams kyi yi ge phun sum tshogs pa de rnam par sbyangs na/ sangs rgyas kyi gnas skabs na gsung rnam pa drug cu dang ldan pa bsam gyis mi khyab par 'gyur ro/ / mnyen pa ni sems can gyi khams kyi dge ba'i rtsa ba ston pa'i phyir ro zhes bya ba ni dper na chu mnyen po rtswa dang / gel ba dang / sman dang / nags tshal rnams kyi rtsa ba nye bar ston par byed cing / de dag nye bar bstan na 'phel zhing rgyas pa nyid du 'gyur ba de bzhin du sangs rgyas bcom ldan 'das rnams kyi gsung mnyen pa de thos pa'i sgo nas sems can dge ba'i rtsa ba ma bsags pa rnams dge ba'i rtsa ba bsogs par 'gyur zhing /de dag nye bar bsags na dge ba'i chos 'phel bar 'gyur ro/ /'jam pa ni mthong ba'i chos kho na la reg na bde ba'i phyir ro zhes bya ba ni dar dang / ras bal gyi 'da' ba dang / ka tsa lin di ka'i ras la sogs pa 'jam pa'i phyir lus kyi dbang po reg pa tsam kho nas bde ba skyed par byed pa de bzhin du sangs rgyas bcom ldan 'das rnams kyi gsung 'jam po yang mthong ba'i chos kho na la mnyan pa'i dus nyid na bde ba'i reg pa bskyed do/ /yid du 'ong ba ni don bzang po'i phyir ro zhes bya ba ni 'di ltar yid kyis don rnams bye brag tu shes kyi/rna ba'i rnam par shes pas ni don nges par gzung bar bya mi nus pas so/ /dag pa ni 'jig rten las 'das pa gong na med pa'i rjes la thob pa'i phyir ro zhes bya ba ni nyan thos rnams kyang 'jig rten las 'das pa yin mod kyi/nyan thos rnams kyang 'jig rten las 'das pa nyid yin du zin kyang sangs rgyas dang byang chub sems dpa' la ltos na gong ma dang bcas pa yin no/ /de bas na sangs rgyas rnams kyi bka' ni 'jig rten las 'das pa gong na med pa yin te/ de bas ches gong mar gyur pa'i tshig med pas na 'jig rten las 'das pa gong na med pa zhes bya'o//mu stegs can blo gros ngan pa thams cad kyi lta ba 'joms par byed pa'i stobs ni mu stegs can blo gros ngan pa thams cad kyi lta ba 'joms pa'i stobs so/ /stobs nyid yon tan yin pas na stobs kyi yon tan no//de dang ldan pa'i phyir stobs kyi yon tan dang ldan pa zhes bya ste/ ldan pa'i phyir snyan cing 'jebs pa yin no/ /mnyan par 'os pa ni bsgrubs pas nges par 'byung ba'i phyir ro zhes bya ba ni de mnyan pa'i sgo nas nyan pa po sgrub pa dang ldan par 'gyur zhing de'i 'og tu nges par 'byung bar 'gyur ro//mi tshugs pa ni phas kyi rgol ba thams cad kyis mi brdzi ba'i phyir ro zhes bya ba ni 'di ltar/ bung ba'i sbrang rtsi gnod med pa/ /bdud rtsi lta bu 'dod pa ltar/ /phas kyi rgol ba thams cad kyis/ /brdzi zhing gnod par mi nus so/ /mi rtsub pa ni bslab pa bca' ba'i thabs bde ba'i phyir ro zhes bya ba ni bcom ldan 'das kyis bslab pa bca' ba gang yin pa de ni de kho na nyid rtogs par byed pa'i thabs bde ba yin gyi/dge sbyong gcer bu pa la sogs pa lta bur gdung ba dang / yongs su gdung ba dang / skra 'bal ba dang / ri dang g.yang sa nas mchong ba dang /me dang chur 'jug pa la sogs pas tshe 'di dang phyi ma'i sdug bsngal nyams su myong bar 'gyur ba ni ma yin no/ /yang na bslab pa'i gzhi 'cha' ba'i dus na 'di ni khyed la phan par 'gyur ba dang / bde bar 'gyur ba yin no zhes de skad du snyan par brjod pa'i phyir mi rtsub pa yin no//mi brlang ba ni de las 'das na nges par 'byung ba'i thabs yang dag par ston pa'i phyir ro zhes bya ba ni 'di ltar bslab pa las 'das na nges par 'byung ba'i thabs yang dag par ston pas de'i phyir mi brlang bzhes bya'o/ /lus tshim par byed pa ni ting nge 'dzin bskyed pa'i phyir ro zhes bya ba ni 'di ltar zhi gnas kyi lam bskyed pas so//yongs su gdung ba med pa ni sgrub pa la 'gyod pa med pa'i phyir ro zhes bya ba ni/ de'i tshe de mnyan pa'i sgo nas sgrub pa la sbyor zhing bsgrubs nas mjug tu mngon sum du mthong na 'gyod pa med par 'gyur ro/ /kun shes par byed pa ni bsam gyis mi khyab pa'i phyir chos yang dag par ston pa'i phyir ro zhes bya ba la bsam gyis mi khyab pa'i chos ni so so rang gis rig par bya ba sa dang pha rol tu phyin pa dang dbang bcu la sogs pa'o//yang na chos nyid gang zhig bsams na smyo ba dang / khrag tu skyugs pa la sogs par 'gyur ba phyi rol gyi dngos po rnam pa sna tshogs 'grub par byed pa'i las ni bsam gyis mi khyab pa yin te/chos de lta bu la sogs pa ci nas kyang bsam gyis mi khyab pa de dag la nyan pa po mngon par mi brtson zhing yongs su spang bar bya ba'i gnas rnams yongs su sdong bar 'gyur bar yang dag par ston to//zlos pa'i skyon med pa ni don med pa ma yin pa'i phyir zhes bya ba la/ ma rig pa gang zhe na/ kun tu rmongs pa'o zhes bya ba'i tshig de lta bu dag ni zlos pa'i skyon med pa yin te/ 'di ltar 'dul ba mang po nye bar gnas nal la rnam grangs 'ga' zhig gis go bar 'gyur ro/ / de bas na sangs rgyas bcom ldan 'das rnams ni ston pa don yod par mdzad pa yin no/ /gzhan dag gi so so yang dag par rig pa'i sa bon skyed pa'i phyir yang rnam grangs brjod de/ rnam grangs rnams kyi dgongs pa rgyas par ni rnam par bshad pa'i rigs pa las blta bar bya'o/ / glang po che'i sgra skad ni rgya che ba'i phyir ro zhes bya ba la/ glang po che ni glang po che sa srung gi bu la sogs pa gzung ngo / /de dag gi sgra ni rgya che ba dang / brjid che ba yin no/ /klu'i dbang po'i sgra ni gzung bar 'os pa'i phyir ro zhes bya ba ni klu'i rgyal po rnams ni klu'i gnas dag na tshig mnyan pa yin te/klu gzhan dag de dag gi tshig las mi 'da'o/ /ka la ping ka'i sgra dbyangs ni rno ba dang 'jig pa'i phyir ro zhes bya ba ni ka la ping ka'i sgra ni zhen par 'jug pa dang / 'jig pa'i ngang can yin la yid du 'ong ba nyid kyis zhig na/ yang mnyan par bya ba'i dga' ba chen po skye ba de bzhin du sangs rgyas bcom ldan 'das kyi gsung yang nyan pa po rnams kyi snying la 'bab cing gsung dbyangs zhig na yang de nyan par bya ba'i dga' ba 'byung ngo //gzhan dag ni yang dang yang du 'jig pa'i phyir ro zhes bya bar 'don te/ de dag gi ltar na ba dan bzhin du yang dang yang du 'jig pa yin te/yang dang yang du gzhan rnam pa sna tshogs 'byung ba'i phyir ro/ /sgra thams cad kyi rjes su zhugs pa ni thams cad lung bstan pa'i mtshan nyid la rnam pa thams cad du rjes su zhugs pa'i phyir ro zhes bya ba la/ thams cad du lung bstan pa zhes bya ba ni nyan thos dang byang chub sems dpa' rnams lung bstan pa gang dag yin pa ste ji ltar nyan thos rnams skye bar lung ston pa dang ji ltar byang chub sems dpa' rnams sangs rgyas nyid du lung ston pa zhes bya ba de'i sgra la zhugs pa'i phyir sgra thams cad kyi rjes su zhugs pa zhes bya'o//thab dang bcas pa'i ched ni sems can rnams kyi de dag gi don thams cad sgrub par byed pa'i phyir ro zhes bya ba ni sems can tha ba can dang bcas pa'i don sgrub par byed pa'i phyir te/sems can dge ba'i rtsa ba ma bskyed pa rnams ni tha bar gyur ba yin no/ /dge ba'i rtsa ba bskyed pa rnams ni tha ba ma yin pa'o/ /de dag gi don thams cad sgrub par byed pa'i phyir tha ba dang bcas pa'i ched ces bya'o//sgra thams cad rdzogs par byed pa ni gsung gcig las sgra'i rnam par rig pa rnam pa du ma nye bar gnas pa'i phyir ro zhes bya ba ni bcom ldan 'das kyi gsung ngo bo nyid gcig ston pa yin yang gsung gis bsnyad par bya ba lha dang /klu dang / gnod sbyin dang / dri za dang / lha ma yin dang / yi dags dang / ri khrod pa dang / gdol pa dang / kla klo la sogs pa gang zhig sgra'i khyad par ji lta bu mngon par shes pa des de kho na bzhin du thos so/ /gcig las don du ma'i rnam par rig pa nye bar gnas pa'i phyir ro zhes bya ba ni gang zhig don gyi rnam par rig pa ji lta bu la yid ches par 'gyur ba de la de bzhin du gcig yin pa las gdul ba thams cad kyi don rtogs pa'i phyir dbang po thams cad tshim par byed pa yin/yang na dad pa'i dbang po la sogs pa'i don tshim par byed pa yin no/ / ma smad pa ni dam bcas pa ji lta ba bzhin pa'i phyir ro zhes bya ba ni ji ltar dam bcas pa de kho na bzhin du mang pos sgrub par byed pas de'i phyir ma smad pa zhes bya'o/ /mi 'gyur ba ni dus la bab par rab tu sbyor ba'i phyir ro zhes bya ba ni gang zhig dus gang du dge ba'i phyogs la yang rung bar 'gyur ba de la de'i dus kho nar dge ba'i rtsa ba bskyed pa la sogs pas so sor thar pa byed pa'i phyir te/ji skad du/ la lar zhus kyang mi gsung la/ /ched kar yang ni gsung bar mdzad/ /ces bshad pa lta bu yin no/ /brjod do/ /'dogs so/ /rab tu 'jog go/ /rnam par 'byed do/ / rnam par 'grel to/ /gsal bar byed do/ /ston to/ /yang dag par rab tu ston to zhes bya ba'i mdo'i tshig 'di dag slob dpon gyis/ ngag tshig shin tu rigs pa dang / /bstan dang rnam 'byed the tshom gcod/ /ces bya ba'i tshigs su bcad pa 'di'i 'grel pa las sbyar bar shes par bya ste/'dogs pa ni tshig shin tu rigs pa dag gis so zhes bya ba ni rigs pa'i don rjod par byed pa dag gis so/ /'khor gsum gyis dag pa zhes bya ba la/ /'khor zhes bya ba'i sgra ni rnam par dag pa brjod pa yin par blta bar bya'o/ /gang gis ston pa ste/ ngag dang tshig dag dang zhes bya ba'i ngag dag pa dang /tshig dag pa ni 'khor ba dag pa gcig yin no/ /ji ltar ston pa ni bstan pa dang rnam par 'byed pa dang / the tshom gcod pa dang / lan mang du byed pa dag tu ste/ bstan pa dag dang / rnam par 'byed pa dag dang / the tshom gcod pa dag dang /lan mang du byed pa dag dang / dag pa bzhi dag pa gcig tu bya'o/ /'di ltar rnam pa 'di bzhis ston par byed pas 'di ni ston pa dag pa yin te/ de ni 'khor dag pa gnyis pa yin no/ /mgo smos pa dang rnam par spros pa na go ba rnams la don ston pa ni 'khor dag pa gsum pa yin te/gang zhig glengs pa tsam gyis go ba de ni mgo smos pas go ba yin no/ /sangs rgyas bcom ldan 'das kyi chos thog mar dge ba/ bar du dge ba/ tha mar dge ba/ don bzang po/ /tshig 'bru bzang po/ ma 'dres pa/ yongs su rdzogs pa/ yongs su dag pa/ yongs su byang ba ston to zhes bya ba mdo'i tshig 'di dag/dad dang dga' dang blo rnams kyi/ /rgyu phyir chos 'di dge ba yin/ /zhes bya ba'i tshigs su bcad pa 'di las sbyar bar shes par bya'o/ /chos thog ma dang / bar dang / tha mar dge ba yin no zhes bya ba la//thos pas ni thog mar dge ste/ 'di ltar thos nas 'di la yid ches pa las skyes pa'i mos pa 'byung ste/ thos pa de ni 'di'i mos pa'i rgyu yin no/ /bsams pas ni bar du dge ste rigs pas nges pa brtags pa las skyes pa'i shes rab kyis rnam par dpyad na thob par nus pas dga' ba'i rgyur 'gyur ro//bsgoms pas ni tha mar dge ba yin te/ sems mnyam par gzhag na yang dag pa ji lta ba bzhin yongs su shes pa'i phyir ro/ /yongs su byang ba ni dri ma rnam par dag pa'i sgo nas zag pa zad pa rnams kyi rgyu rnam par dag pa'i phyir ro zhes bya ba ni sngon zag pa dang bcas pa'i chos dang ldan pas rgyud dri ma dang bcas par gyur ba las zag pa med pa'i chos dang ldan pas dri ma yongs su byang ba zhes bya'o//gzhug pa la ldem por dgongs pa ni nyan thos rnams la blta bar bya ste/ bstan pa la 'jug par bya ba'i don du mi skrag par bya ba'i phyir gzugs la sogs pa yod pa nyid du bstan pa'i phyir ro zhes bya ba ni nyan thos rnams kyi gzugs la sogs pa'i chos rnams yod do zhes chos yod pa nyid du zhal gyis bzhes nas gang zag la bdag med par gzud par spyod do//de lta ma yin na gang zag kyang med la gzugs la sogs pa'i chos rnams kyang med do snyam nas/bcom ldan 'das kyis bstan pas dang zhing 'jug par mi 'gyur ro/ /de bas na bstan pa la 'dzud pa la ltos nas gzugs la sogs pa yod pa nyid du ston par mdzad de/ /mtshan nyid la ldem por dgongs pa ni kun brtags pa la sogs pa ngo bo nyid gsum las blta bar bya ste zhes bya ba ni gang du med par bshad pa bstan pa de ni kun brtags pa'i ngo bo nyid du shes par bya'o//gang du sgyu ma dang smig rgyu dang rmi lam la sogs pa lta bur bshad pa de ni gzhan gyi dbang gi ngo bo nyid bshad pa yin par shes par bya'o/ /gang dus dang / pha rol tu phyin pa dang / byang chub kyi phyogs dang mthun pa la sogs pa'i chos bshad pa de ni yongs su grub pa'i ngo bo nyid yin par rig par bya'o/ /gnyen po la ldem por dgongs pa ni nyes pa rnams gdul ba la blta bar bya ste/ gang du mi sdug pa bshad pa de ni 'dod chags kyi gnyen por bshad par shes par bya'o//de bzhin du ci rigs par zhe sdang la sogs pa byams pa la sogs par bshad pa ni gnyen por bshad pa yin par khong du chud par bya'o/ /phyin ci log par legs par gnas/ /zhes bya ba ni rtag pa dang bde ba dang gtsang ba dang bdag tu 'dzin pa las bzlog pa ste/phyin ci log mi rtag pa la sogs pa la yongs su mi nyams pa'i sgo nas legs par gnas pa yin no zhes bya ba ni bzlog ste gnas pa'i phyin ci log go/ /mi rtag pa la sogs pa ni rtag pa la sogs pa las bzlog pa yin te/ mi rtag pa la sogs pa de dag la yongs su mi nyams pa'i sgo nas gnas pa ni phyin ci log la legs par gnas zhes bya'o//yang na phyin ci log la legs par gnas zhes bya ba ni rtag pa la sogs pa la phyin ci log kho na la legs par gnas pa yin no/ /ji ltar legs par gnas she na/de'i blo la 'di snyam du dngos po rtag pa la sogs pa ni dus rtag tu phyin ci log tu gyur pa kho na yin gyi de dag nam yang phyin ci log tu ma gyur pa ni ma yin no snyam du mi g.yo ba yin no/ /'dod chags spyod pa'i sgrib pa'i gnyen por gsungs pa ni gang du bcom ldan 'das kyis sangs rgyas kyi zhing gi 'byor pa shin tu bsngags pa lta bu'o zhes bya ba ni/gang dag la khams gsum pa'i 'dod chags mngon par zhen na khams gsum pas bsdus pa'i phun sum tshogs pa gang yin pa nyid mchog dang gtso bo yin no snyam pa yod pa de'i gnyen por sangs rgyas kyi zhing gi 'byor ba bsngags so//nga rgyal spyod pa'i sgrib pa'i gnyen por gsungs pa ni gang du bcom ldan 'das kyis sangs rgyas kyi zhing la la'i phun sum tshogs pa lhag par bsngags pa lta bu'o zhes bya ba la/ nga rgyal gang zhe na/ 'jig tshogs la lta ba la brten nas nye bar len pa'i phung po lnga la sems khengs pa gang yin pa'o//lha dang / /klu dang / gnod sbyin dang / dri za la sogs pa kha cig bdag ni gzugs dang ldan pa ste/ blta na sdug pa dang ldan pa mthu dang ldan pa yin no/ /bdag pas mthu la sogs pas ches khyad par du 'phags pa gzhan ni med do snyam nas/gzugs dang mthu dang yangs pa dang dbang phyug la sogs pas sems khengs par 'gyur ro/ /rgyags pas gos pa de lta bu de dag gi khengs pa spang ba'i phyir ro/ /sangs rgyas bcom ldan 'das rnams kyi phun sum tshogs pa ni lha dang mi dang lha ma yin la sogs pa thams cad las khyad par du 'phags te/bsam gyis mi khyab po zhes sangs rgyas la la'i phun sum tshogs pa lhag par bsngags te/ des na gzugs dang / na tshod dang / dbang phyug dang / rigs la sogs pas dregs pa yongs su 'dor bar 'gyur ro//'gyod pa'i sgrib pa'i gnyen por gsungs pa ni gang dag sangs rgyas dang byang chub sems dpa' rnams la gnod pa byed pa de dag thams cad ni mtho ris su 'gro bar 'gyur ro zhes bya ba de lta bu'o zhes bya ba ni gang dag mi shes pas sangs rgyas dang byang chub sems dpa' rnams la gnod pa byed pa de dag dge ba'i bshes gnyen dang phrad nas 'gyod pa chen po skyes te/bsod nams phung po 'di lta bu la bdag gis gnod pa byas so snyam nas rtag tu 'gyod pa rgyun chags pa kho nar 'gyur zhing / dge ba'i las la yang mi spyor/ / 'gyod pa'i gnyen po yang mi bsten pas/ de dag gi ched du 'di skad du/ gang dag sangs rgyas dang byang chub sems dpa' rnams la gnod pa byed pa de dag thams cad ni mtho ris su 'gro bar 'gyur ro zhes gsungs so/ /de skad du bshad na de'i tshe sems can de dag 'di ltar sangs rgyas dang byang chub sems dpa' rnams la gnod pa byas pas kyang mtho ris su 'gro bar 'gyur na phan pa byas pas lta smos kyang ci dgos zhes rjes su 'brel ba'i 'gyod pa yongs su 'dor ro//de nas gnyen po bsten cing sangs rgyas dang byang chub sems dpa' rnams la bkur sti rnam pa mang po byed par 'gyur ro//de bas na gnod par byed pa sngon du 'gro ba'i phan pa byed pas mtho ris su 'gro bar 'gyur bas gnod pa byed pas mtho ris su 'gro'o zhes bya ba tha snyad 'thob po/ /ma nges pa bzlog pa sgrib pa'i gnyen por gsungs pa ni de la ma nges pa la bzlog pa ni byang chub sems dpa' ma nges pa rnams theg pa chen po las bzlog pa ste/byang chub sems dpa' ma nges pa'i rigs can gang dag byang chub sems dpa'i spyod pa spyad pa de dag mi dge ba'i grogs po dang phrad pas byang chub sems dpa'i spyod pa de yongs su por nas nyan thos kyi theg pas mya ngan las 'da' bar 'dod do//de dag gi theg pa dman par 'gro zhing lhung ba de ni sgrib pa yin te/ de'i gnyen por 'phags pa dam pa'i chos pad+ma dkar po la sogs pa las theg pa ni gcig kho na ste/ gnyis pa med do zhes theg pa yang gcig tu bshad la/ nyan thos chen po rnams kyang sangs rgyas nyid du lung bstan to//nyan thos lung bstan pa dag theg pa gcig bshad pa de thos nas kyang byang chub sems dpa' ma nges pa'i rigs can de dag nyan thos kyi theg pa yongs su bor nas theg pa chen po kho na bsten cing de kho na la sbyor bar byed do/ /rgyu lnga ni gang gis phyin ci ma log par 'chad pa zhes bya ba ni de ltar blo bzang zhes bya ba'i tshig 'dis ston te/byang chub sems dpa' blo bzang pos phyin ci ma log par 'chad pa yin no/ /yang dang yang du 'chad pa zhes bya ba ni skyo ba med ldan zhes bya ba'i tshig 'dis so/ /zang zing med pa'i sems kyis 'chad pa ni brtse ba can zhes bya ba'i tshig 'dis so//tshig gzung bar 'os pas 'chad pa zhes bya ba ni snyan par rab grags zhes bya ba'i tshig 'dis so/ /gdul ba dang 'tsham par 'chad pa zhes bya ba ni/ chog bzang shes ldan pa yi/ /zhes bya ba'i tshig 'dis so/ /chos ston pa'i 'og tu sgrub pa'i skabs te/'di'i 'brel ba gang yin zhe na/ gzhan la phan bsgrub pa ni chos bshad pa yin no/ /bdag la phan pa bsgrub pa ni bdag nyid de'i don spyod pa yin no/ /gzhan dag la chos yang dag par ston pa yang mang du thos pas bya dgos la rang gi don yang bsgrubs pas bsgrub dgos pas chos ston pa'i 'og tu sgrub pa'i skabs yin no//ji skad du don kun shes shing chos kun shes nas chos dang mthun pa'i chos la zhugs pa yin/ mthun par zhugs pa yin/ mthun pa'i chos la spyod pa yin zhes bya ba mdo'i tshig 'di dag ni sgrub pa rnam par dbye ba la tshigs su bcad pa drug ste zhes bya ba de la mdo'i tshig bzhin du ni tshigs su bcad pa bzhi dang /go rims bzhin du sbyar ro/ /tshig tha ma mthun pa'i chos la spyod pa yin zhes bya ba 'di ni tshigs su bcad pa gnyis dang sbyar bar bya'o/ /gang zag dang chos la bdag med par shes pa ji ltar rnam pa gnyis yin zhe na/de ston par byed do/ /gzung ba dang 'dzin pa med pa'i phyir ro/ /gang zag kyang gzung ba nyid 'dzin pa nyid du med la/ byis pas kun brtags pa'i chos rnams kyang de dang 'dra ba 'di ni bdag med pa rnam pa gnyis yin no/ /gang la shes she na/med pa dang yod pa gnyis la ste/ de la kun brtags pa'i ngo bo nyid med pa la ni stong pa nyid kyi ting nge 'dzin te/ stong pa nyid kyi ting nge 'dzin gyi kun brtags pa'i gang zag med pa dang chos med par shes so/ /yod pa la ni smon pa med pa dang / mtshan ma med pa'i ting nge 'dzin dag yin te/gzhan gyi dbang la ni smon pa med pa'o/ /yongs su grub pa la ni mtshan ma med pa ste/ smon pa med pa'i ting nge 'dzin gyis ni yang dag pa ma yin pa'i kun tu rtog pa gzhan gyi dbang zhes bya ba nyes pa mang pos skyon can du gyur pa la smon par mi byed do/ / mtshan ma med pa'i ting nge 'dzin gyis ni mtshan ma'i nyes pa thams cad dang bral ba yongs su grub pa'i ngo bo nyid shes so/ /ting nge 'dzin gsum po de ji ltar yang dag pa nyid dam log pa nyid ma yin zhe na/ de'i phyir smras pa/ 'jig rten dang 'jig rten las 'das pa'i gnas skabs la ltos pa'i phyir ro//de ltar na thos pa dang bsams pa las byung ba'i shes pas don shes pa yin no/ /de ltar don shes pa ni chos thams cad gzings lta bur shes shing zhes bya ba ni 'di skad du bsams pa las byung ba'i shes rab la gus pa skye bar 'gyur gyi/ thos pa las byung ba la ni ma yin no//de nyid kyi phyir thos pa tsam gyis chog par 'dzin pa spong bar byed de zhes smos pa yin te/ de ltar na chos shes pa yin no zhes bshad pa yin no/ /de ltar thos pa'i gnas skabs dang / bsams pa'i gnas skabs na so so'i skye bo'i shes pas don dang chos shes nas so so'i skye bo'i shes pa de rnam par dag par bya ba'i phyir chos kyi rjes su mthun pa'i chos sgrub po//'di skad du don dang chos de ji lta ba bzhin du thos pa dang bsams pas shes nas de'i 'og tu bsgrub pa ste/ bsgoms pas chos dang mthun pa'i chos sgrub cing ting nge 'dzin 'thob ste/ de ltar na chos dang mthun pa'i chos la zhugs pa yin no zhes bshad pa yin no//'di ni nges par 'byed pa'i cha dang mthun pa'i gnas skabs yin te/ de'i 'og tu ni bsgom pa la rab tu sbyor ro/ /rnam par 'jog par byed pa'i ye shes kyis zhes bya ba ni 'jig rten las 'das pa'i rjes la thob pa gang gis sa na rnam par gzhag pa shes nas de'i 'og tu rnam par mi rtog pa'i ye shes kyis sa de yongs su sbyong bar byed cing sa ma thob pa rnams kyang thob par byed de/de ltar mthun pa'i chos la spyod pa yin no/ /lhan cig spyod pa yis zhes bya ba ni rjes su 'brel bar spyod pa ste zhes bya ba ni rnam par mi rtog pa dang rnam par mi rtog pa'i rjes la thob pa'i ye shes bar du chod pa dang bcas pa dang /bar du chod pa med par kun tu 'byung bas so/ /'khor lo bzhis bag yod pa'i shing rta 'gro bar 'gyur te/ 'khor lo bzhi ni mthun pa'i yul du gnas pa dang / skyes bu dam pa la brten pa dang / bdag nyid kyi yang dag pa'i smon lam dang /sngon bsod nams byas pa nyid do/ /mdo'i tshig 'di dag ni sgrub pa la bag yod par bya ba'i tshigs su bcad pa bzhi dang go rims bzhin du sbyar bar bya'o/ /grogs bzang po ni grogs tshul khrims dang / lta ba mthun pa'i phyir ro zhes bya ba ni gal te yul de na rnal 'byor pa de la grogs bzang po tshul khrims dang mthun pa dang lta ba mthun pa dag yod na de lta na yul grogs bzang po can yin par rig par bya'o//rnal 'byor bde ba ni nyin par 'du 'dzi nyung zhing ljan ljin nyung ba'i phyir zhes bya ba la/ rnal 'byor ni zhi gnas dang lhag mthong gis bsdus pa'i lam zung du 'brel par 'byung ba yin no//gal te zhi gnas dang lhag mthong gi mi mthun pa'i phyogs spangs par gyur na de lta na yul de rnal 'byor bde ba can yin te/ des na rnal 'byor pa de yul der sems mnyam par 'jog pa yin no/ /de'i mi mthun pa'i phyogs ni khye'u dang bu mo'i 'du 'dzi dang skye bo khyim pa dang 'dra ste/de nyin ljan ljin te lang long yin no/ /yang na phyag dar la sogs pa yin no/ /mtshan mo sgra chung ba la sogs pa'i phyir ro zhes bya ba la/ sogs pa zhes smos pas ni sbrang bu mchu rings dang / sha sbrang dang / rlung dang / nyi ma dang / sdig sbrul la sogs pa shes par bya ste/ sgra ni bsam gtan gyi tsher ma yin pa'i phyir ro/ /de las bzlog na yul rnal 'byor bde ba can yin par bshad pa yin no/ /zhi gnas la sogs pa'i rgyu mtshan dus su bsgom pa zhes bya ba la/ 'di dag dus su bsgom pa gang yin zhe na/ gang gi tshe sems rgod par 'gyur ba de'i tshe zhi gnas kyi rgyu mtshan bsgom pa la rab tu sbyor ro//gang gi tshe zhum pa de'i tshe lhag mthong gi rgyu mtshan bsgom pa la rab tu sbyor ro/ /gang gi tshe mnyam par 'dug pa de'i tshe btang snyoms su 'jug go/ /de ltar na de thabs bzang po can du bstan pa yin te/ yang dag pa'i smon lam dang sbyar ro//nges par 'byung ba bzang ba nyid kyis ni gang du bya ba yod pas cung zad tsam gyis chog par mi 'dzin pa yin no/ /sbyor ba zhes bya ba'i sgras ni rtag tu gus par byas te/ sbyor ba nyid ston to/ /dga' ba'i rgyu nyid ces bya ba ni 'dis sngon gyi mi mthun pa'i yul na gnas na yang dga' ba'i rgyur 'gyur ba gang yin pa de lta bu'i rgyu bsod nams byas pa yin no//tshad med pa dang ting nge 'dzin dang shes rab kyi rgyu ni 'dis sngon gang gis na yang dag par 'jog pa'i rgyur 'gyur ba de lta bu bstsags pa yin te/ yang dag par 'jog pa ni don thams cad 'grub po/ /ma rig pa dang byang chub kyi chos nyid de dag la nye bar brtags pa'i phyir ro zhes bya ba ni ma rig pa dang /byang chub kyi chos nyid gang yin pa'i chos nyid de la ma rig pa gang yin pa de nyid byang chub yin no zhes ma rig pa dang byang chub nye bar brtags te chos dang chos can dag tha mi dad pa'i phyir ro/ /'dod chags la sogs pa de dag kho na la tshul bzhin du 'jug na de dag las rnam par grol bar 'gyur ro zhes bya ba la/ji ltar tshul bzhin du 'jug ce na/ 'dod chags la sogs pa kun nas nyon mongs pa'i chos rnams ni mi dge ba/ sdug bsngal gyi rtsa ba/ rims nad dang bcas pa/ 'khrug pa dang bcas pa ste/ 'dod chags la sogs pa kun 'byung ba'i bden pa'i gnas lta bu dag yod na skye ba la sogs pa'i sdug bsngal 'byung bas 'di dag ni spang bar bya zhing dor bar bya ba dge ba'i chos rnams kyi mi mthun pa'i phyogs su gyur pa yin no zhes bya bar shes par byas nas tshul bzhin yid la byed pa la sogs pa yang dag par bsgrubs na spong ste des na rnam par grol bar 'gyur ro//byang chub dri med yangs pa'i bar du gcod byed min/ /zhes bya ba la/ dri ma med pa ni nyon mongs pa dang shes bya'i sgrib pa bag chags dang bcas te spangs pa'i phyir ro/ /yangs pa ni shes bya thams cad yul yin pa'i phyir ro/ /gzhan gyi dbang gi sems ni rtag tu rang bzhin gyis 'od gsal bar rung ba ma yin te/gang gi phyir sems de ni skad cig gcig la 'dod chags dang dad pa la sogs pa zag pa dang bcas pa'i chos rnams dang lhan cig skye ba dang 'gag pa nyid kyis kun nas nyon mongs pa la thog ma med pa'i dus nas zag pa dang bcas pa'i chos rnams dang 'brel ba yang yin pa de'i phyir gzhan gyi dbang gi sems ni rtag tu 'od gsal ba nyid du mi 'thad do//sems kyi chos nyid ni rtag tu 'od gsal ba ste/ der ni res 'ga' yang 'khor ba pa'i chos zag pa dang bcas pa dag gis lhan cig skye ba dang 'gag pa'i rims kyis ma rnyogs pa yin no//de lta bas na de kho na rtag tu 'od gsal ba nyid du brjod do/ /sems can rnams la phan byed phyir/ /de la chags skyes ltung mi 'gyur/ /zhes bya ba la/ byang chub sems dpa' sems can rnams la byams pa gang yin pa ni 'dir 'dod chags su dgongs te zhes bya ba ni 'di ltar byang chub sems dpa' sems can rnams la byams shing dga' ba gang yin pa de ni sems can yongs su smin par bya ba'i phyir phan pa yin te/des na de dag la des byas pa'i ltung ba dgag go/ /khong khro ba las skyes pa'i ltung ba ni nyes pa mang ste/ 'di ltar yid kyi nyes pa ni rang bzhin gyis skyon chags pa yin no//de ltar re zhig byang chub sems dpa' rab tu byung ba la sems can thams cad las 'dod chags las skyes pa'i ltung ba rnam par mi gzhag go/ /byang chub sems dpa' khyim pa'i bu dang chung ma la sogs pa la byams pas byas pa'i 'dod chags gang yin pa de yang ha cang nyes pa mang ba ma yin te/'dod chags kyis ni sems can yongs su gtang ba med la/ khong khro ba ni yongs su gtang ba'i mtshan nyid yin no/ /de lta bas na byang chub sems dpa' la ni khong khro bas byas pa kho na'i ltung ba rnam par gzhag gi 'dod chags las skyes pa ni ma yin no//gang gi phyir don byed de/ phyir sgyu sems 'gal zhes bya ba la/ sgyu ni g.yo yin te/ 'di ltar don bsgrub par 'dod la de g.yo dang sgyu dang dor dang thabs la sogs pas gzhan slu bar byed do zhes bya ba de ni 'gal lo/ /ji ltar nad pa sman bzang po kha zhing tsha ba la sogs pa la yang so sor brtags shing so sor brtags nas 'jug pa de bzhin du byang chub sems dpa' yang 'khor ba la so sor brtags nas yongs su mi 'dor bar 'jug go zhes bya bar sbyar ro//ji ltar sman pa phan par 'dod pas nad pa la bsgrubs pa de bzhin du byang chub sems dpa' phan par 'dod pa sman pa lta bu yang sems can nad pa lta bu rnams la bsgrub po//ji ltar na rje bo bran ma grub pa la grub par bya ba'i phyir bsgrubs pa de bzhin du byang chub sems dpa' yang bdag nyid la sgrub par byed de/ sems la bdag nyid ces nye bar btags so/ /sems ma grub pa la grub par bya ba'i phyir sgrub ste/ji skad du 'phags pa dkon mchog brtsegs pa las/ 'od srungs 'di lta ste/ rta mkhan mkhas pas ni gang dang gang du rta 'brum pa'am/ mi srun par gyur pa de dang der de tshar gcod par byed do/ /de bzhin du dge slong rnal 'byor spyod pa yang gang dang gang kho nar sems 'gyur bar mthong ba de dang de kho nar de tshar gcad pa'i phyir sgrub ste/de ni ci nas kyang phyis 'khrug par mi 'gyur ba de lta de ltar sems tshar gcod do zhes gsungs pa lta bu'o/ /de ltar byang chub sems dpa' de bdag nyid la sgrub pa yin te/ 'di ni rang gi sems legs par 'chos pa'i phyir zhes bya ba 'dis rnam par bshad do//ji ltar tshong pa zong la bsgrubs pa bzhin te/ tshong pa rnams ni zong 'dis dar bar bya'o zhes dar bar bya ba'i don du zong sgrub par byed do/ /tshong pa rnams rang dar bar bya ba'i phyir dang / bu dang chung ma'i don du sred pas kyang zong sgrub par byed pas de ni 'dir mi sbyar gyi/ 'dir ni dar ba tsam zhig chos dang mthun pa yin te/de dang 'dra bar ro/ /yul gzugs dang sgra dang dri dang ro dang reg bya rnams ni 'dod pa zhes bya ste/ ji skad du bcom ldan 'das kyis/ 'dod pa 'dod rnams zhes bya ba'i 'dod pa 'di ni yul lnga'i tshig bla dgas yin no zhes gsungs pa lta bu'o/ /byang chub sems dpa' ni sems can rnams kyi longs spyod 'phel bar bya ba'i phyir yul de dag sgrub po//ji ltar btso blag mkhan gos la gos dag par bya ba'i phyir bsgrubs pa de bzhin du byang chub sems dpa' yang lus la sogs pa'i las yongs su dag par bya ba'i phyir bsgrub po/ /yid brtan pa ni 'dir dkor gyi bla lta bu ste dkor spyan zhes bya ba'i tha tshig go//ji ltar rgyal po'i dkor spyan gtsang ma rgyal po'i dkor la rnam pa gang gis kyang sred pa mi skye/ rang gir bya bar mi snom na de lta na 'di yid brtan par 'os pa yin no/ /byang chub sems dpa' yang bsam gtan gyi pha rol tu phyin pa la rab tu sbyor ba na sred pa'i ro myang ba la sogs pa'i nyes pa dang bral bas rab tu sbyor ro//rtag tu brtson 'grus dang ldan pa nyid ni rtag tu rgyun chags pas so/ /brtson 'grus rgya chen po dang ldan pa nyid ni theg pa chen po las bstan te/ brtson 'grus rgya chen po'i tshul gyis so/ /sgrub pa'i skabs rdzogs so// //sgrub pa'i skabs kyi 'og tu gdams ngag rjes su bstan pa'i skabs te/ de'i 'brel pa gang yin zhe na/ 'di ni bslab pa'i rnam pa bshad par bya ba'i skabs yin no/ /bslab pa'i rnam pa'i khyad par yang mos pa'i skabs nas bzung ste/ gdams ngag rjes su bstan pa'i skabs kyi bar 'di dag yin te/de la mos pa 'di la skabs la sogs pa la ni bsam pa dang sbyor ba'i khyad par la sogs pa rnam par bshad zin to/ /da ni rang dang gzhan la phan pa rnam par dag pa'i mthar thug par nges par 'byung ba'i khyad par gyis gdams ngag rjes su bstan pa'i skabs rnam par bshad de/byang chub sems dpa' sgrub pa dang ldan pas ni mthong ba dang bsgom pa'i lam dag gis rnam par dag pa'i mthar thug par bya ba'i phyir gdams ngag rjes su bstan pa btsal ba dang / gzhan dag la yang gdams ngag bya dgos so/ /de bas na bsgrub pa'i 'og tu gdams ngag rjes su bstan pa'i skabs yin no//de nyid kyi phyir 'og nas/ de tshe chos kyi rgyun la ni/ /sangs rgyas rnams las zhi gnas dang / /ye shes yangs pa thob bya'i phyir/ /gdams ngag rgya chen rnyed par 'gyur/ /zhes 'chad par 'gyur ro/ /bskal pa grangs med nges 'byung zhing //zhes bya ba ni bskal pa grangs med pa dang po byang chub sems dpa'i spyod pa spyad pa zhes bya ba'i tha tshig go/ /de'i tshe chos kyi rgyun la sangs rgyas rnams las gdams ngag 'thob po zhes bya ba gdams ngag ji lta bu zhig 'thob ce na/ /rgya chen po ste/ sar gtogs par btub pa yin no/ / 'dis ni nyan thos kyi gdams ngag bsal bar byas pa yin no/ /ci'i phyir 'doms she na/ zhi gnas dang ye shes yangs pa thob par bya ba'i phyir te/ zhi gnas yangs pa thob par bya ba'i phyir dang / lhag mthong yangs pa thob par bya ba'i phyir ro/ /de nas dang por sdom brtson de/ /mod yi sde la sogs pa'i chos//mi gnyis don ni rnam 'byed pa/ /zhes bya ba la/ gnyis su med pa'i chos gzung ba dang / 'dzin pa dang bral ba rnam par 'byed pa ni theg pa chen po'i chos mdo'i sde dang / dbyangs kyis bsnyad pa'i sde la sogs pa yin no/ /sems drug ni rtsa ba'i sems dang / rjes su spyod pa'i sems dang /rnam par dpyod pa'i sems dang / nges par 'dzin pa'i sems dang / sdom pa'i sems dang / smon pa'i sems so/ /de la rtsa ba'i sems ni mdo'i sde la sogs pa'i chos rnams kyi ming la dmigs pa gang yin pa ste/ gdams ngag thob nas sam/ bdag nyid kyis brtags nas 'di lta ste/'di ni sa bcu pa'i mdo sde yin no snyam pa yin no/ /la sogs pa zhes bya ba smos pas ni tshigs su bcad pa'i sde dang gleng gzhi'i sde la sogs pa bzung ngo / /rjes su spyod pa'i sems ni gang gis mdo'i sde la sogs pa ming gi sgo nas dmigs pa rnams kyi tshig gi don gyi rjes su 'gro ba'o//rnam par dpyod pa'i sems ni gang gis na don dang yi ge dpyod par byed pa'o/ /de la don ni rnam pa bzhis spyod par byed de/ bgrang ba dang / 'jal ba dang / rtog pa dang / so sor rtog pas so/ /de la bgrang ba ni grangs 'dzin pa ste/ dper na gzugs kyi skye mched bcu dang /gcig gi phyogs so/ /tshor ba ni tshor ba drug gi tshogs so/ /zhes bya ba de lta bu la sogs pa'o/ /'jal ba ni grangs dang ldan pa'i chos kyi mtshan nyid la sgro 'dogs pa dang skur pa 'debs pa med par 'tsham par 'dzin pa'o/ /rtog pa ni tshad mas rtog pa'o/ /so sor rtog pa ni bgrang ba dang /gzhal ba dang brtags pa'i don la blta ba'o/ /rnam par dpyod pa'i sems gnyis pa ni yi ge ni rnam pa gnyis kyis dpyod par byed de/ yi ge tshogs pa rnams don dang bcas pa nyid dang / sil bu rnams don med pa nyid kyis so/ /nges par 'dzin pa'i sems ni gang gis ji ltar rjes su dpyad pa'am/rnam par dpyad pa de'i rgyu mtshan nges par 'dzin pa'o/ /sdom pa'i sems ni ji ltar rnam par dpyad pa'i don ni rtsa ba'i sems la bsdus te kun nas sdom pa'i rnam par 'byung ba'o/ /smon pa'i sems ni ting nge 'dzin gyi don tam/ de yongs su rdzogs par bya ba'i don tam/dge sbyong gi tshul gyi 'bras bu'i don tam/ sa la 'jug pa'i don tam/ khyad par du 'gro ba'i don kyang rung / gang gi don du rab tu brtson pa de la 'dun pa dang lhan cig 'byung ba'o/ /'di sems kho na dmigs par snang bar 'byung gi /sems las ma gtogs pa'i dmigs pa ni med do zhes sems tsam du shes kyang rung ma shes kyang rung ste/dmigs pa ni sems yin gyi gzhan ni ma yin pas sems rnam pa drug po dmigs par snang bar rnam par gzhag go/ /btsal bya zhes bya ba 'dis ni rtog pa dang bcas shing dpyod pa dang bcas pa'i yid la byed pa bshad do//tshol ba zhes bya ba 'di ni kun tu tshol ba'i rnam par rtog pa'i ming gi rnam grangs yin te/ rtog pa'i mtshan nyid las ji skad du/ rtog pa gang zhe na/ sems pa'am shes rab la brten nas kun tu tshol ba yid kyi brjod pa ste/ sems rags pa gang yin pa'o zhes bshad pa lta bu'o//'dod chags dang ma bral ba ni/ gang la rtog pa yod pa de la gdon mi za bar dpyod pa yod pas tshol ba zhes bya ba'i sgras gnyi ga yang bsdus so/ /so sor brtag par bya zhes bya ba 'dis ni rtog pa med pa la dpyod pa tsam gyi yid la byed pa bstan to//so sor rtog pa zhes bya ba'i sgras dpyod pa bstan par cis mngon zhe na/ dpyod pa'i mtshan nyid las ji skad du dpyod pa gang zhe na/ sems pa'am shes rab la brten nas so sor rtog pa yid kyi brjod pa ste/ zhes ji skad du bshad pa lta bu ste/ 'di las mngon no/ /yid la byed pa brjod med pa//ro gcig pas kyang dpyad par bya/ /zhes bya ba 'dis ni rtog pa yang med dpyod pa yang med pa bstan to/ /chos kyi ming ni bsdoms pa'ang 'di/ /zhes bya ba ni ming gang gis bsdoms pa'i chos 'dzin par byed pa bsdoms pa'i chos la dmigs pa'i ming de la sems nye bar gtod pa yin te/'ang zhes bya ba'i sgras ni gtod pa 'dren to/ /dmigs pa la ni sems gtad nas/ /zhes bya ba ni sems 'jog pa yin no/ /de'i rgyun rnam par g.yeng mi bya/ /zhes bya ba ni kun tu 'jog pa yin no/ /rnam g.yeng myur du rtogs byas nas/ /de la slar ni blan par bya//zhes bya ba ni sems nges par gnas pa yin te/ myur du rtogs par byas nas zhes bya ba ni myur du shes par bya ba nas zhes bya ba'i don to/ /de bas na g.yeng ba rtogs par byas nas sems de nges par 'jog par byed do/ /gang gi tshe rnal 'byor pa'i sems de rnam bar g.yeng ba de'i tshe rnam par g.yeng ba de la skyon du blta bar 'gyur ro//rnam par g.yengs na yang sems de dmigs pa de la mi dga'o/ /gnyen po bsgoms pas rnam par g.yeng ba dang bral ba'i phyir mi dga' ba de zhi bar byed de/ de bas na zhi gnas kyi rnam par sems gnas pa zhes bya'o//de nas de yi lus dang sems/ /shin tu sbyangs pa che thob nas/ /yid la byed dang bcas shes bya/ /yid la byed pa thob ces bya ba'i tha tshig ste/ de'i tshe rnal 'byor pa de yid la byed pa thob pa zhes bya'o/ /de yis de ni 'phel byas nas/ /zhes bya ba ni rnal 'byor pa des yid la byed pa bshad ma thag pa bcu gcig po 'phel bar byas na'o//'phel ba'i ring du 'gro ba yis/ /dngos gzhi'i gnas pa des 'thob po/ /de nyer bsdogs las dngos gzhi'i bsam gtan la 'jug ste/ de ni dngos gzhi'i gnas pa yin no/ /mngon shes don du gnyer bas de//sbyangs na las su rung ba'i mchog /bsam gtan las 'thob ces bya ba ni dngos gzhi'i bsam gtan de thob nas/ de'i 'og tu sbyangs na las su rung ba'i mchog 'thob po/ gang las 'thob ce na/ bsam gtan las te/ mngon par shes pa bsgrub pa'i bsam gtan la las su rung ba'i mchog 'thob po//de nas rnal 'byor ba de 'jig rten gyi khams rnams su 'gro'o/ /ci'i phyir 'gro zhe na/ sangs rgyas dpag tu med pa la mchod pa'i phyir dang / theg pa chen po'i chos mnyan pa'i phyir ro/ /lhag pa'i bsam pa dag pa'i sa ni sa dang po ste/ji srid du sa de ma thob pa de mngon par rtogs pa'i sngon rol du lus la gnas ngan len gyi lus kun zad par 'gyur ba la sogs pa phan yon lnga 'thob po/ /'di'i lus gnas ngan len lus kun/ /skad cig re re la zad 'gyur/ /zhes bya ba ni zhi gnas ni chu lta bu ste/des gnas ngan len de bul tog gi chus gos kyi dri ma bzhin du lus las 'dag par byed do/ /lus dang sems ni kun tu yang / /shin tu sbyangs pas gang bar 'gyur/ /zhes bya ba ni lus dang sems shin tu sbyangs pas rab tu gang ba ste/ gnas ngan len 'dag pa dang / phan yon 'di gsum ni zhi gnas kyi phyogs dang mthun pa yin par rig par bya'o/ /yongs su chad pa med pa dang / /yang dag pa yi mtshan ma ni/ /ma brtags pa dag rab tu mthong / /zhes bya ba sa thob pa'i dus na lus las srin bu phyir 'byung bar mthong ba dang / lus mi gtsang bas spags pa sbyong bar mthong ba dang /de lta bu la sogs pa brtags pa ma yin pa'i mtshan ma dag mthong ba ste/ rgyas par ni 'phags pa blo gros mi zad pa'i mdo chung ngu las mtshan ma kun tu 'byung ba bzhin blta bar bya'o/ /'di dag ni yongs su chad pa med pa dang / ma brtags pa'i phan yon yin te/'di gnyis ni lhag mthong gi phyogs dang mthun pa yin par rig par bya'o/ /rang gi mtshan nyid dang spyi'i mtshan nyid du snang bar zhes bya ba la gzugs ni gzugs su rung ba'i mtshan nyid do/ /tshor ba ni myong ba'i mtshan nyid do zhes bya ba de lta bu la sogs pa ni chos rnams kyi rang gi mtshan nyid do//chos zag pa dang bcas pa dang / chos zag pa med pa rnams dang / 'dus byas rnams dang / 'dus ma byas rnams dang / gzugs can rnams dang / gzugs can ma yin pa rnams zhes bya ba ni chos rnams kyi spyi'i mtshan nyid yin no/ /mi rtag pa dang sdug bsngal ba la sogs pa yang spyi'i mtshan nyid yin no//snang ba zhes bya ba 'di ni chos la nges par brtags pa'i bzod pa'i tshig bla dgas so zhes bya ba ni de ltar ji skad bshad pa'i tshul gyis gzung ba'i don rnam par gzhig pa'i sgo nas chos thams cad sems tsam mo zhes bya bar bzod pa'i phyir chos la nges par rtog pa'i bzod pa zhes bya ste/de nyid chos rnams kyi snang ba yin no/ /'di dag sems yin par rtogs pa'i phyir de'i tshe de la mnyam par gzhag pa'i gnas skabs na 'di'i sems kho nar zad do snyam pa'i shes pa yang dag pa 'byung ngo / /gzung ba'i rnam par rtog pa rnam par bshig ste gzung ba med na gang la 'dzin zhes de'i 'og tu 'dzin pa'i rnam par rtog pa rnam par 'jig par byed de//'di ni 'jig rten pa'i chos kyi mchog gi gnas skabs yin no/ /de nas des ni 'jig rten las/ /'das pa'i ye shes bla med pa/ /rnam par mi rtog dri ma med/ /'dzin pa gnyis pa bral ba 'thob//gzung ba dang 'dzin pa'i rdul dang bral ba'i phyir rdul dang bral ba'o/ /mthong bas spang bar bya ba'i nyon mongs pa spangs pa'i phyir dri ma dang bral ba'o/ /rang dang gzhan gyi rgyud dag la bdag med pa dang sdug bsngal ba dag khyad par med pa'i phyir ro zhes bya ba ni ji ltar bdag la bdag med pa ltar sems can thams cad kyang de dang 'dra la/ji ltar rang gis bdag nyid kyi sdug bsngal nye bar zhi bar bya dgos pa ltar sems can thams cad kyi yang de dang 'dra bas so/ /rnam pa gcig tu na ji ltar rang gi 'du byed zag pa dang bcas pa rnams sdug bsngal yin pa ltar sems can thams cad kyi yang de dang 'dra bas so//sdug bsngal gyi rnam pa ni rgyu mi rtag pa'i rnam pas 'dren te/ de bas na sdug bsngal gyi rnam pa kho na smos so/ /bdag med pa'i rnam pa ni stong pa nyid kyi rnam pas 'dren te/ de bas na bdag med pa'i rnam pa kho na smos te/ de'i phyir mtshungs pa nyid gnyis kho na smos pa yin no//des ni khams gsum pa'i 'dus byas rnams yang dag pa ma yin pa'i kun tu rtog pa tsam du mthong zhes bya ba ni khams gsum pa ni sems tsam mo zhes bya ba de ltar phyin ci ma log pa ni bsgom pa'i lam la rnam par mi rtog pa'i rjes la thob pa'i ye shes kyis sgyu ma mkhan gyis sgyu ma lta bur gzhan gyi dbang gi ngo bo nyid mthong ngo //med pa'i stong pa nyid shes shing / /zhes bya ba ni kun brtags pa'i ngo bo nyid kyi'o/ /de bzhin yod pa'i stong nyid dang / /zhes bya ba ni gzhan gyi dbang gi ngo bo nyid kyi ste/ gzhan gyi dbang gi ngo bo nyid ni byis pa phyin ci log gi blo can gzung ba dang 'dzin pa la mngon par zhen pa rnams kyis ji ltar bzung ba de ltar stong ngo //rang bzhin stong pa nyid shes nas/ /zhes bya ba ni yongs su grub pa'i ngo bo nyid de/ stong pa nyid kyi ngo bo nyid yin pa'i phyir ro/ /stong pa nyid de'i ngo bo nyid de bzhin nyid kyi mtshan nyid gang yin pa'i de bzhin nyid de shes nas so//de'i ngo bo nyid kyang gang zhe na/ kun brtags pa'i gnyis med pa'i ngo bo gang yin pa sangs rgyas dang byang chub sems dpa' rnams kyi so so rang gis rig par bya ba'i gnas skabs bstan du med cing bsam gyis mi khyab pa rtog ge'i spyod yul las yang dag par 'das pa ste/ji skad du theg pa chen po bsdus pa las/ chos kyi sku de bzhin nyid kyi mtshan nyid ni bsam gyis mi khyab pa'i mtshan nyid de/ de bzhin nyid de ni 'jig rten na dpe med pa'i phyir dang / rtog ge'i spyod yul ma yin pa'i phyir so so rang gis rig par bya ba yin no zhes bshad pa lta bu dang /'phags pa dkon mchog sprin la sogs pa'i mdo las don dam pa bstan pa'i skabs nas ji ltar bstan pa lta bu yin no/ /mtshan med gzhi ni rnam rtog rnams/ /yang dag zad pa yin zhes bya/ /zhes bya ba la/ rnam par rtog pa yang dag par zad pa ni rnam par rtog pa 'gags pa'o//gang du rnam par rtog pa yang dag par zad pa de ni gzhi zhes bya ste/ ji skad du chos mngon pa kun las btus pa las/ 'gog pa'i bden pa'i mtshan nyid las ji ltar shes par bya zhe na/ gang du 'gog par 'gyur ba de bzhin nyid dang /gang gis 'gag par 'gyur ba lam dang / 'gag pa gang yin pa nyon mongs pa mi skye ba'o zhes bshad pa lta bu ste/ de bzhin nyid gang du rnam par rtog pa zad pa de ni mtshan ma med pa'i ting nge 'dzin gyi dmigs pa zhes bya'o/ /smon pa med pa'i ting nge 'dzin gyi de/ yang dag ma yin kun rtog go//gzhi ste dmigs pa'i zhes bya ba'i tha tshig go/ /de zhes bya ba'i sgras ni gzhi ste/ dmigs pa bzung ngo / /sdug bsngal rgyas pa tsam shes te/ zhes bya ba ni 'di ni 'du byed tsam ste kun brtags pa'i gang zag dang chos dang bral ba sdug bsngal rgyas shing rgya che bar shes so//sems can thams cad la bdag dang mtshungs pa'i sems rnyed pa'i phyir/ bdag tu lta ba rnam par mi rtog pa'i ye shes 'thob ste/ de thob pas na sems can thams cad la bdag dang mtshungs pa'i lta ba can du 'gyur ro/ /'di na 'jig rten tshe gcig rang sdug bkur mi nus/ /'jig rten gnas pa srid du gzhan sdug bsngal//bsdoms pa smos ci dgos te bsam du med/ /ces bya ba ni 'jig rten ni tshe gcig rang gi sdug bsngal bkur bar yang mi nus na/ 'jig rten ji srid pa de srid du rang gi sdug bsngal bkur zhes bya ba 'di la lta bsam du yang med pa nyid do/ /byang chub sems dpa' ni 'jig rten de la de las bzlog pa yin pas 'jig rten ji srid pa de srid du sdug bsngal bsdoms pa thams cad bkur bar nus te/byang chub sems dpa' phan pa dang bde ba bzhed pas/ ba be'u la byams pa bzhin du sems can de dag byams pas len to/ /de nas 'di ni lhag ma yi//sa rnams bsgom pa'i lam 'di la/ /zhes bya ba ni sa dang po la yang mthong ba'i lam gyi 'og tu bsgom pa'i lam yod mod kyi/ sa ma lus par yongs su dag pa las sa gnyis pa la sogs pa'i bsgom pa'i lam gang yin pa de'i dbang du mdzad nas/ 'di skad du/ de nas 'di ni lhag ma yi//sa rnams bsgom pa'i lam 'di la/ /zhes bshad do/ /gang gi phyir/ de nas des ni 'jig rten las/ /'das pa'i ye shes bla med pa/ /rnam par mi rtog dri ma med/ /'dzin pa gnyis dang bral ba 'thob/ /de 'di'i gnas yongs gyur pa ste/ /sa ni dang po yin par 'dod//'di'i de bskal pa dpag med kyis/ /shin tu rnam par dag par 'gyur/ /zhes bshad pa 'di lta bu las kyang sa dang po la yang bsgom pa'i lam yod par mngon te/ sa thob pa de bskal pa dpag tu med pas yongs su sbyong ba gang yin pa yang nas yang du goms par byed pa de ni bsgom pa'i lam zhes bya'o//rnam par rtog pa'i bag la nyal gyis mi shigs pa'i don gyis zhes bya ba ni rnam par rtog pa'i bag chags las rnam par rtog pa gang dag 'byung ba'i rnam par rtog pa de dag gis rdo rje lta bu'i ting nge 'dzin de gzhig par mi nus la/ des ni rnam par rtog pa'i bag chags thams cad ma lus par shigs pas so//de'i 'og tu gnas gzhan du 'gyur ba'i mthar phyin pa 'thob po zhes bya ba ni kun gzhi rnam par shes pa la gnas ngan len ma lus par spangs pas rdo rje lta bu'i ting nge 'dzin gyi mjug thogs su gnas gzhan du gyur pa mthar thug pa 'thob po/ / thams cad mkhyen pa nyid kyi go 'phang bla na med pa nyon mongs pa dang / shes bya'i sgrib pa thams cad kyi dri ma med pa 'thob po zhes bya ba ni lam gyi gnas yongs su gyur pa thob pa'o/ /sangs rgyas rnams ni rtag tu rang don yang dag par sbyor la legs par bsngags pa dang / zhes bya ba ni gdams ngag rjes su bstan pa mdor bsdus nas tshigs su bcad pa gcig gis ston te/lhag pa'i tshul khrims kyi dbang du mdzad nas/ rang don yang dag par sbyor la zhes bya ba gsungs so/ /lhag pa'i tshul khrims kyi bslab pa ni byang chub sems dpa'i sdom pa ste/ byang chub sems dpa'i rang gi don yin no//de la yang dag par sbyor ba'i byang chub sems dpa' la sangs rgyas bcom ldan 'das rnams legs so legs so/ /zhes yang dag par gzengs stod cing bsngags pa mdzad do/ /log par sbyar ba le lo can rab tu mi sbyar ba rnams la ni smod par mdzad do/ /lhag pa'i sems dang lhag pa'i shes rab kyi dbang du mdzad nas/gnas dang rnam 'byed lhur len zhes bya ba gsungs te/ zhi gnas dang / gnas pa dang / ting nge 'dzin zhes bya ba ni rnam grangs so/ /rnam par 'byed pa ni lhag mthong gi rnam grangs so/ /gang zhig spangs pa dang brten pas zhes bya ba ni bar chad dang bcas pa'i chos rnams ni spong la mthun pa ni brten to//de ni mthong ba rab dag ces bya ba ni me long lta bu'i ye shes la sogs pa'o/ /mi rtog byang chub kyis zhes bya ba ni rtog pa med pa'i ye shes kyis zhes bya ba'i tha tshig ste/ me long lta bu'i ye shes la sogs pa rtog pa dang bral ba de dag gis so//mun pa chen po zhes bya ba la/ mun pa chen po ni shes bya'i tshogs chen po la sgrib pa'i phyir shes bya'i sgrib pa yin te/ mun pa de ye shes 'di dag gis bsal nas so/ /nyi ma chen po dag shar ba bzhin du 'gro ba rnams la lam me'o/ / zhes bya ba ni nyi ma brtags par byas pa ste/ nyi ma gang zhig stong gsum gyi stong chen po'i 'gro ba thams cad snang bar yang byed la rtag tu yang snang bar byed cing / nub par yang mi 'gyur ba de lta bu 'ga' zhig yod par gyur na de dang 'dra bar byang chub sems dpa' mun pa chen po shes bya'i sgrib pa bsal nas ye shes kyi 'od zer dag gis 'gro ba thams cad la snang bar byed do//gdams ngag rjes su bstan pa'i skabs rdzogs so// //gdams ngag rjes su bstan pa'i skabs kyi 'og tu thabs dang ldan pa'i las kyi skabs te/ 'di 'brel pa gang yin zhe na/ 'di skad du/ bslab pa gang yin pa dang zhes bshad pas de'i phyir da ni dmigs pa gang la rnam pa 'di dag gis 'jug pa de brjod dgos pas mjug thogs su bslab pa'i khyad par brjod par bya'o/ /de la bslab pa ni gang yin/ de'i khyad par ni gang yin zhe na/ bslab pa ni rang gi bya ba sgrub pa yin no//de'i khyad par ni thun mong ma yin pa nyid yin no/ /rang gi bya ba sgrub pa ni 'dir thun mong dang khyad par te/ de la thun mong ni las mngon par 'du bya ba phyin ci ma log par byed pa ste/ thabs dang ldan pa'i las zhes gang bshad pa yin no/ /de'i thun mong ni las mngon par 'du byed pa dge ba thams cad la kun tu 'gro ba'i phyir ro//khyad par ni pha rol tu phyin pa 'chad par 'gyur ba dag lta bu yin no/ /thabs dang ldan pa'i las rnam par dbye ba zhes bya ba la/ thabs dang ldan pa'i las rnam par dbye ba ni 'di ltar 'jug nas/ des na 'di ni de'i thabs yang dag gzung ba'i phyir/ / las rnams dag pa mtha' yas de yi pha rol 'gro/ /zhes 'chad par 'gyur ba lta bu yin no/ /dper na sems can dang sems can ma yin par bgrang ba'i rten sa yin pa lta bu ste/ sems can smos pas ni sems can du bgrang ba ji snyed pa thams cad bsdus te/ de dag kyang nye bar spyod pa po nyid du bstan to//sems can ma yin par bgrang ba ni nags tshal dang / ri dang / chu bo zhes bya ba la sogs pa lta bu ste/ nye bar spyad par bya ba nyid du bstan to/ /brtan pa ni ri la sogs pa'o/ /mi brtan pa ni chu bo la sogs pa'o/ 'di dag thams cad kyi rten sa yin pa de bzhin du/ sbyin pa la sogs pa'i dge ba pha rol tu phyin pa dang /byang chub kyi phyogs dang mthun pa la sogs pa'i rten kyang lus la sogs pa'i las gsum yin no/ /'di ni las dge ba'i thabs yin te/ ji ltar sa la brten nas nags tshal la sogs pa skye ba de bzhin du dge ba'i chos thams cad kyang lus la sogs pa'i las gsum la brten pa yin gyi/lus la sogs pa'i las gsum med par ni dge ba'i chos 'ga' yang kun nas ldang ba med do zhes de ltar thabs yin par khong du chud nas/ byang chub sems dpa' las gsum yongs su sbyong ba'i phyir 'jug pas na/ kun nas slong ba'i thabs zhes bya'o//shin tu dka' ba'i las ni ngo bo sna tshogs pa/ /bskal pa mang pos mthar phyin sngon brtson bdag nyid can/ /zhes bya ba la/ byang chub sems dpa' rnams kyi las shin tu dga' ba ngo bo sna tshogs pa ni sbyin pa'i pha rol tu phyin pa la sogs pa dang las bsdus pa rnams so/ / sbyin pa la sogs pa'i las yan lag gi dam pa mgo dang lag pa dang rkang pa dang mig la sogs pa yongs su gtong bas lhag par spyod pa gang yin pa sna tshogs pa de dag nyid bskal pa mang pos yongs su rdzogs par 'gyur te/ bskal pa rdzogs pa ni tshar phyin pa zhes bya'o/ /de ltar rab tu sbyor ba'i byang chub sems dpa' rnams la lus la sogs pa'i las la skyo ba med do//ci'i phyir zhe na/ yun ring po nas 'dris pa'i phyir ro/ /des ni yun ring po nas theg pa chen po'i chos la goms pa ngang du gyur pa yin te/ ji skad du/ dge ba'i chos 'di dag nyid goms pa la brten nas gang gis na so sor ma brtags par de dag kho na la dga' bar 'gyur ba de lta bu'i rnam par smin pa mngon par 'grub par byed do zhes gsungs pa lta bu'o//de ltar bskal pa mang po tshar phyin pas byang chub sems dpa' theg pa chen bo la skyo ba 'byung bar mi 'gyur te/ngang du gyur pa ni rmi lam na yang kun tu spyod do/ /'di ltar bdag la phan par 'dod cing gson par 'dod pa ni dug dang mtshon dang gnam lcags chen po dang / dgra las bdag nyid skyob par byed do/ /de bzhin du byang chub sems dpa' yang lus la sogs pa'i las nyan thos dang rang sangs rgyas kyi theg par ltung ba las skyob par byed cing nyan thos kyi theg par yongs su mi bsngo'o//byang chub sems dpa' byang chub sems dpa'i spyod pa la rab tu zhugs pa de yongs su bor nas theg pa dman pa la brten pa ni 'chi ba yin pas byang chub sems dpa'i lus la sogs pa'i las dge ba theg pa dman par yongs su bsngos pa ni dug dang mtshon dang gnam lcags chen po dang dgra dang 'dra'o zhes bya bar rig ste/byang chub tu sems bskyed la/ yang de yongs su dor ba ni rigs pa ma yin no snyam nas theg pa dman par yongs su bsngos pa'i sems de de las bslang ste theg pa chen po kho na la 'jug par byed pas na ldang ba'i thabs zhes bya'o//theg pa chen po la dge ba'i rtsa ba gcod pa'i phyir dang / dge ba ma skyes pa mi skyed cing zhes bya ba ni ji ltar mtshon la sogs pas shing la sogs pa'i rtsa ba bcad na/ yal ga dang lo ma dang /me tog la sogs pa ma skyes pa rnams mi skye ba de bzhin du byang chub sems dpa'i lus la sogs pa'i las theg pa dman par yongs su bsngos pas mtshon la sogs pa dang 'dra bas de bzhin gshegs pa'i ljon shing skye bar 'dod pa'i rtsa ba kun chad par 'gyur ro/ /des na sa dang pha rol tu phyin pa dang stobs dang mi 'jigs pa la sogs pa yal ga dang lo ma dang me tog dang 'bras bu lta bu dag skye bar mi 'gyur ro//dge ba'i lo tog skyes pa 'joms pa ni gnam lcags dang chos mthun pas so/ /sangs rgyas nyid phun sum tshogs pa 'thob pa'i gags su gyur pa ni dgra dang chos mthun pas so//rtag tu rnam par mi rtog las can las min zhing / /las kyi bya ba dang rnam gsum la mi lta ste/ /zhes bya ba ni byang chub sems dpa' rtag tu rnam par mi rtog pa ni/ byed pa por yang mi rtog/ las su yang ma yin/ las kyi bya bar yang ma yin no//las mngon par 'du byed pa ni dge ba'i chos thams cad la kun tu 'gro ba yin pa'i phyir bslab pa'i phyir bstan to/ /da ni khyad par brjod dgos te/ de bsnyad do/ /las ni rang gi sangs rgyas kyi chos kyi tshogs pha rol tu phyin pa dang rjes su 'dzin pa'i bya ba dge ba'i las kun tu 'gro ba'i phyir gtso bo yin te/de'i phyir 'di dang por smos so/ /rang la phan pa phun sum tshogs na gzhan la phan pa sgrub par bzod par 'gyur bas de'i phyir dang por rang la phan pa sgrub pa'i phyir pha rol tu phyin pa rnams so/ /de'i 'og tu gzhan rjes su gzung ba'i phyir bsdu ba'i dngos po rnams 'byung ngo //sbyin pa dang tshul khrims dang bzod pa dang brtson 'grus kyi pha rol tu phyin pa dag gis ni mngon par mtho ba rnam pa bzhi bstan zhes bya ba ni de dag bstan pas tshe phyi ma la phun sum tshogs pa'i longs spyod dang lus khyad par du 'phags pa 'thob pa la sogs pa las gang yin pa de dag bstan to//shes rab kyi pha rol tu phyin pas ni bya ba brtsam pa la phyin ci ma log par bstan to/ /mngon par mtho ba dang nges par legs pa thams cad ni 'di tsam du zad la/ de dag kyang pha rol tu phyin pa drug po kho nas 'gyur gyi/ nyung ngus kyang ma yin la mang pos kyang ma yin no//rnam par mi 'tshe ba zhes bya ba ni bdag nyid rnam par 'tshe bar mi byed pa'o/ /rnam par 'tshe ba bzod pa zhes bya ba ni gzhan dag gis dbyug pa dang / mtshon la sogs pas rnam par gtses pa thams cad bzod pa'o/ /sems can dang sems can ma yin pas byas pa'i sdug bsngal zhes bya ba la/sems can gyis byas pa'i sdug bsngal ni mi la sogs pas byas pa gang yin pa'o/ /sems can ma yin pas byas pa ni rlung dang nyi ma dang char pa dang ser ba la sogs pas byas pa gang yin pa'o/ /tshul khrims ni de thob pa'i rnam par g.yeng ba yang dag par sdom pa rnams kyi lam ste zhes bya ba la de zhes bya ba'i sgras ni yul gzung ngo //de dag thob pa ni de thob pa'o/ /de thob par bya ba'i phyir rnam par g.yeng ba ni de thob pa'i rnam par g.yeng ba'o/ /de thob pa'i rnam par g.yeng ba yang dag par sdom pa ni de thob pa'i rnam par g.yeng bar yang dag par sdom pa ste/dge slong gi sdom pa la gnas pa la yul thob par bya ba'i phyir rnam par g.yeng ba gang dag yin pa de dag mi 'byung ngo / /de gnyis kyis nyon mongs pa dang / shes bya'i sgrib pa rnam par sbyong ba'i phyir ro zhes bya ba ni bsam gtan gyi pha rol tu phyin pas ni nyon mongs pa'i sgrib pa la sogs pa rnam par gnon par byed do//shes rab kyi pha rol tu phyin pas ni ma lus par rtsa nas 'don par byed do/ /dang po gsum zhes bya ba la bslab pa dang po ni lhag pa'i tshul khrims kyi bslab pa ste/ sbyin pa dang tshul khrims dang bzod pa dag ni lhag pa'i tshul khrims kyi bslab pa'o//tshogs dang bcas pa dang 'khor dang bcas pa bzung ba'i phyir ro zhes bya ba ni lhag pa'i tshul khrims kyi bslab pa'i tshogs ni sbyin pa'i pha rol tu phyin pa'o/ /de'i ngo bo nyid ni tshul khrims kyi pha rol tu phyin pa'o/ / 'khor ni bzod pa'i pha rol tu phyin pa'o/ /sbyin pa ni mi mthun pa'i phyogs ser sna nyams pa dang / rnam par mi rtog pa'i ye shes dang ldan pa dang 'dod pa thams cad yongs su rdzogs par byed pa dang / sems can yongs su smin par byed pa ste/ mtshan nyid rnam pa 'di bzhi dang ldan pa'i sbyin pa ni sbyin pa'i pha rol tu phyin pa zhes bya ba'i ming 'thob kyi/gzhan du ni ma yin no/ /gzhan dag la lus dang ngag thams cad yang dag par sdom pas 'dod pa yongs su rdzogs par byed pa'i phyir ro zhes bya ba ni gal te gzhan 'di snyam du/ kye ma bdag la lus dang ngag dang yid kyis rnam par mi 'tshe yang ci ma rung snyam na/byang chub sems dpa' thams cad kyis kyang gzhan la rnam par 'tshe ba mi skyed do/ /gnod pa byed pa la bzod pas gzhan dag gi 'dod pa yongs su rdzogs pa ni gal te gzhan dag lus la sogs pas byang chub sems dpa' la gnod pa rnam pa sna tshogs byed cing gnod pa byed pa de dag kyang 'di snyam du/kye ma bdag gi lus la sogs pas gnod pa byas pa bzod do snyam du sems la byang chub sems dpa' yang bu gcig pa la byams pa lta bus thams cad bzod de/ lan mang po zhig tu rnam par gtses kyang gzhan dag la gnod pa bya ba'i phyir mi 'jug go//de bzhin du brtson 'grus la sogs pas grogs byed par 'dod pa la sogs pa la yang sbyar bar bya'o/ /sbyin pa ni nyon mongs pa mang ba nyid kyis dman la tshul khrims ni mchog yin te/ lus dang ngag dang yid bsdams pa la nyon mongs pa nyung ba'i phyir ro//sbyin pa ni 'jug sla ba'i phyir zhes bya ba ni sbyin pa la ni 'jug par yang sla la bya bar yang sla ste/ 'di ltar sbyin pa ni kla klo dang gdol pa la sogs pa yang sbyin par byed la/ de dag tshul khrims yang dag par blang bar ni rnam pa gang gis kyang mi bzod do//pha rol tu phyin pa bsgom pa rnam pa bzhi zhes bya ba ni dngos po la brten pa ni rnam pa bzhi'o/ /yid la byed pa la brten pa yang rnam pa bzhi'o/ /bsam pa la brten pa yang rnam pa drug go/ /thabs la brten pa ni rnam pa gsum mo/ /dbang 'byor pa nyid la brten pa yang rnam pa gsum kho na ste/'di dag gi rnam par dbye ba ni 'grel pa kho na la legs par rnam par phye ba yin no/ /dngos po la brten pa zhes bya ba la/ dngos po ni gzhi zhes bya ba la don tha dad pa ma yin pas gzhi la brten pa zhes bya ba'i tha tshig ste/ ji skad du/ dngos po las byung ba'i bsod nams bya ba'i gzhi bdun po 'di dag dang ldan pa'i dad pa'i rigs kyi bu zhes bya ba la sogs pa 'byung ba gzhi dang bcas pa'i bsod nams bya ba'i gzhi zhes bya bar mngon pa lta bu'o//rgyu la brten pa ni rigs kyi stobs kyis pha rol tu phyin pa rnams la bsgrub pa goms pa gang yin pa'o zhes bya ba ni dge ba'i bshes gnyen la brten pa la sogs pa med par skye mched drug gi khyad par thog ma med pa nas brgyud de 'ongs pa chos nyid kyis thob pa kho na de 'dra ste/de'i stobs kho nas pha rol tu phyin pa rnams la 'jug pa gang yin pa de ni rgyu la brten pa zhes bya'o//rnam par smin pa la brten pa ni lus phun sum tshogs pa'i stobs kyis gang yin pa'o zhes bya ba ni sngon sbyin pa la sogs pa la gang gis na tshe rabs gzhan dag na so sor brtag pa med par yang sbyin pa la sogs pa la dga' ba 'byung bar 'gyur ba de lta bu'i rnam par smin pa mngon par 'grub par 'gyur ba de ltar shin tu goms pa yin no//smon lam gyi stobs kyis zhes bya ba ni sngon sbyin pa la sogs pa la goms pa med kyi smon lam btab pa 'ba' zhig tu zad pa ste/ nga dang nga yi zhes bya bral/ /dngos po kun la mi brten zhing / / ser sna med par sems can dag/ /kun la phan phyir sbyin pa sbyin/ /zhes bya ba la sogs pa de lta bu'i smon lam gyi stobs kyis sbyin pa la sogs pa la 'jug pa gang yin pa de ni smon lam gyi stobs kyis zhes bya'o/ /so sor rtog pa'i stobs la brten pa ni shes rab kyi stobs kyis pha rol tu phyin pa rnams la sgrub pa goms pa gang yin pa'o zhes bya ba ni shes rab kyi stobs kyis yul gyi nye bar spyad pa rnams ni rmi lam gyi nye bar spyad pa lta bu ste/mi brtan pa/ yid brtan du mi rung ba/ 'jig pa'i chos can yin no zhes de ltar yongs su dpyad nas sbyin pa la sogs pa la 'jug pa gang yin pa de ni so sor rtog pa'i stobs la brten pa zhes bya'o//mos pa yid la byed pa ni pha rol tu phyin pa dang ldan pa'i mdo sde thams cad la mos pa yin no zhes bya ba ni ji lta ji ltar mos pa de lta de ltar pha rol tu phyin pa'i khams brtas par 'gyur ba'o/ /ngoms mi shes pa'i bsam pa rnam pa bzhi la dngos pos ngoms mi shes pa'i bsam pa ni 'jig rten gyi khams gang gA'i klung gi bye ma snyed rin po che sna bdun gyis bkang ba sbyin par byed ces gang bshad pa yin no//bdag nyid yongs su gtang ba yin pas ngoms mi shes pa'i bsam pa ni lus gang gA'i klung gi bye ma snyed sbyin par byed cing zhes gang bshad pa yin no//dus kyis ngoms mi shes pa'i bsam pa ni de bzhin du bskal pa gang gA'i klung gi bye ma snyed du skad cig ma re re la sbyin par byed ces gang bshad pa yin no/ /sems can rnams la ngoms mi shes pa'i bsam pa ni sems can gcig la ji lta ba bzhin du bla na med pa yang dag par rdzogs pa'i byang chub tu yongs su smin par bya ba'i sems can gyi khams ji snyed pa de dag la rnam grangs 'dis sbyin par byed kyang /byang chub sems dpa' sbyin pa'i bsam pa la ngoms pa med pa nyid ces bshad pa yin te/ de ni mdor bsdu na dngos pos ngoms mi shes pa'i bsam pa dang /bdag nyid yongs su gtang ba ngoms mi shes pa'i bsam pa dang / dus kyis ngoms mi shes pa'i bsam pa dang / sems can rnams la ngoms mi shes pa'i bsam pa yin no/ /nyams par mi byed ces bya ba ni skad cig ma 'dab chags su zin kyang gal te na dus cung zad cig 'jug srid pas de yongs su spang ba'i phyir byang chub kyi snying po la 'dug gi bar du rgyun gcod par mi byed ces bya ba smos so//de dag ni bla na med pa yang dag par rdzogs pa'i byang chub nye bar ston pa yin pa'i phyir ro zhes bya ba ni sems can de dag la de ltar phan btags na byang chub nye bar ston par 'gyur ba'o//lus gcig gis sdug bsngal nyams su myong ba ni ha cang dka' ba ma yin pas de'i phyir byang chub sems dpa'i lus gang gA'i klung gi bye ma snyed kyis zhes bya ba smos te mang ba nyid du ston to/ /lus mang du zin kyang tshe'i tshad lo brgya la sogs par sdug bsngal nyams su myong ba ni ha cang dka' ba ma yin pas de'i phyir/tshe'i tshad bskal pa gang gA'i klung gi bye ma snyed du zhes bya ba smos so/ /rtag par yo byad thams cad kyis phongs bzhin du stong gsum gyi stong chen po'i 'jig rten gyi khams me ma mur gyis rab tu gang bar zhes bya ba ni mes bsregs pa la me zhi bar byed pa'i yo byad chu dang /tsan+dan dang byug pa la sogs pa thams cad kyis phongs pa ste/ sreg pa la gnyen por gyur pa chu la sogs pa de dag med par ro/ /de ltar sreg kyang gal te spyod lam 'ga' zhig gis ta/'dug pa'am nyal ba la me'i tsha ba ha cang bya dka' ba ma yin pa de'i phyir/ spyod lam rnam pa bzhi byed cing zhes bya ba la sogs pa smos so/ /spyod lam bzhi la zhugs pa'i yang tshul khrims kyi phung po la sogs pa mtha' dag yongs su rdzogs par gyur na ni ha cang bya dka' ba ma yin pas de'i phyir/tshul khrims kyi pha rol tu phyin pa la sogs pa'i skad cig ma gcig sgom par byed cing zhes bya ba smos te/ rnam grangs 'dis na byang chub sems dpa'i ngoms mi shes pa'i bsam pa nyid yin no//tshul khrims kyi pha rol tu phyin pas sems can rnams rjes su 'dzin pa na zhes bya ba ji ltar na tshul khrims kyi pha rol tu phyin pas sems can rjes su 'dzin ce na/ sdom pa'i tshul khrims kyis sems can rnams la srog gcod pa la sogs pa lhag par mi spyod de/de ltar na de dag rjes su bzung ba yin no/ /byang chub sems dpa' rnams kyi dge ba'i chos sdud pa'i tshul khrims kyang sems can gyi don kho na yin no/ /sems can gyi don byed pa'i tshul khrims ni des dngos po kho nar sems can rnams rjes su 'dzin te/ de ltar tshul khrims rnam pa gsum gyis kyang rjes su bzung ba yin no//pha rol tu phyin pa bsgom pa thabs la brten pa ni rnam pa gsum ste zhes bya ba ni 'khor gsum yongs su dag par so sor rtog pa ste/ sbyin pa po mi dmigs zhes bya bas ni gang zag la bdag med par ston to/ / 'dis ni bdag mngon par zhen pa gang yin pa de mi 'byung ngo / /sbyin par bya ba dang len pa po mi dmigs zhes bya ba 'dis ni chos la bdag med par ston te/ rnam par mi rtog pa'i ye shes yongs su bzung bas dngos po la mngon par zhen pa dang / 'di la ni sbyin no zhes 'di la ni mi sbyin no zhes bya ba de lta bu la sogs pa len pa po la mngon par zhen pa gang yin pa de mi 'byung ngo //yang na rnam par mi rtog pa'i ye shes thob pa'i phyir de gsum char yang mi 'byung bas yongs su 'dzin pa med pa nyid mchog yin no/ /sku la dbang 'byor pa nyid ni de bzhin gshegs pa'i sku gnyis po ngo bo nyid kyi dang /longs spyod rdzogs pa'i yin par blta bar bya'o zhes bya ba ni de bzhin gshegs pa rnams kyi sku 'di gnyis ni dbang 'byor pa thun mong ma yin pa brnyes pa ste/ de bzhin gshegs pa rnams kyi ngo bo nyid kyi sku ni so so rang gis rig par bya ba thams cad du thogs pa med pa'i phyir nam mkha' lta bu dbang 'byor pa brnyes pa yin no//longs spyod rdzogs pa'i sku ni sangs rgyas kyi 'khor gyi dkyil 'khor du theg pa chen po'i chos thun mong ma yin pa la rdzogs par longs spyod pa dang / sangs rgyas kyi 'byor pa ston pas dbang 'byor pa brnyes pa yin no//rgyu ni ma chags pa la sogs pa dang lhan cig skyes pa'i sems pa'o zhes bya ba ni ma chags pa dang zhe sdang med pa dang gti mug med pa dang lhan cig skyes pa'i sems pa gang yin pa de ni rgyu yin te/ rgyu 'dis sbyin pa la 'jug go//gnas lnga pa'i mdo las byung ba bzhin no zhes bya ba ni gzhan dag la zas byin na gnas lnga 'thob par 'gyur te/ tshe dang kha dog dang stobs dang bde ba dang lnga pa ni spobs pa yin no zhes 'byung ba lta bu ste/ de ni 'bras bu yin no/ /gnyis rjes su 'dzin pa zhes bya ba ni rang dang gzhan rjes su 'dzin pa'o//rdzogs par byed pa zhes bya ba ni byang chub chen po'i tshogs yongs su rdzogs par byed pa ste/ 'di ni las yin no/ /de yang ser sna med pa dang ldan zhes bya ba ni sems can ser sna med pa dag las yod de 'di ni ldan pa yin no/ /chos dang zang zing dang mi 'jigs pa la mthong zhes bya ba'i bdun pa ni gsum pa'i don yin no//yan lag drug ni tshul khrims dang ldan par gnas pa dang / so sor thar pa'i sdom pas bsdams pa dang / cho ga phun sum tshogs pa dang / spyod yul phun sum tshogs pa dang / khan ma thob phra rab tsam dag la yang 'jigs par lta ba dang /bslab pa'i gzhi rnams la yang dag par bslangs te slob pa yin no/ /mya ngan las 'das pa'i bsams pas yang dag par len pa'i phyir ro zhes bya ba ni mya ngan las 'das pa'i rgyu can gyi tshul khrims yang dag par len par byed de/dper na zas kyi gnas so/ /rig pa gnas so zhes bya ba ni zas kyi rgyu can dang rig pa'i rgyu can du gnas pa yin par khong du chud pa de bzhin du mya ngan las 'das pa'i rgyu can gyi tshul khrims yang dag par len pa yin no/ /nyon mongs pa'i yongs su gdung ba zhi bas zhi ba'o zhes bya ba ni tshul khrims yang dag par blangs pas nyon mongs pa rnams rnam par gnon par byed do//de nas tshul khrims la legs par brten nas bsam gtan thob pa re zhig tsam spong la/ 'phags pa'i shes rab kyi sa bon kun nas bcom pas bcom pa'i sgo nas de gtan du spong ste/de ltar na nyon mongs pa'i yongs su gdung ba zhi bas zhi ba zhes bya'o/ /srog gcod pa la sogs pa'i rkyen can gyis 'jigs pa dang / kha na ma tho ba dang khon rnams mi 'byung ba'i phyir 'jigs pa med pa'o zhes bya ba ni tshul khrims yang dag par blangs pas srog gcod pa dang ma byin par len pa la sogs pa'i rkyen can gang dag yin pa ste/de'i rgyu can zhes bya ba'i tha tshig go/ /de dag kyang gang zhe na/ 'jigs pa dang mya ngan la sogs pa mi 'byung ba ste/ de dag ni de'i rtsa ba can yin pas de dang bral ba'i phyir de dag kyang med de/de bzhin du srog gcod pa la sogs pas sems can dmyal ba la sogs par 'gro ba gang yin pa de yang mi 'byung ngo / /mi dge ba byed pa srog gcod pa pa de nyid la sha khon du 'dzin pa rnams tshul khrims yang dag par blangs pa'i phyir de la mi 'byung ste/ de ltar na/ rten dang gzhi dang 'jigs pa med/ /ces bya'o/ /rab tu dbye ba rnam pa gsum gyis 'jug pa'i phyir ro zhes bya ba ni so sor thar pa'i sdom pas bsdus pa dang / bsam gtan gyi sdom pas bsdus pa dang / zag pa med pa'i sdom pas bsdus pa'o/ /mi mjed ji mi snyam shes dang //zhes bya ba ni bzod pa rnam pa gsum gyi ngo bo nyid yin no zhes bya ba ni gnod pa byed pa la mi mjed pa'i bzod pa ni mi mjed pa zhes bya ba'i sgrar bshad de/ mi mjed pa ni mi mthong ba yin pa'i phyir ro/ /sdug bsngal la ji mi snyam pa'i bzod pa ni ji mi snyam pa zhes bya ba'i sgrar bshad de/ji mi snyam pa ni dang du len pa yin pa'i phyir ro/ /chos la nges par rtog pa'i bzod pa ni shes pa zhes bya ba'i sgrar bshad de/ mi rtag pa dang sdug bsngal ba la sogs pa byis pas kun brtags pa'i chos rnams la gang gi tshe shes pas chos ngo bo nyid med par bzod pa de ni chos la nges par rtog pa'i bzod pa zhes bya ste/mi mjed pa dang ji mi snyam pa dang shes pa zhes bya ba 'di ni bzod pa rnam pa gsum char gyi ngo bo nyid yin no/ /snying rje dang chos la brten pa ni rgyu'o/ /zhes bya ba ni snying rje chen po bzod pa'i rgyu yin te/ snying rje dang ldan pa ni bzod pa byed do/ / chos la brten pa ni tshul khrims yang dag par len pa dang thos pa chub pa'o zhes bya ba ni tshul khrims yang dag par len pa'i rgyu can gyi bzod pa byed kyi/ byang chub sems dpa' lus dang ngag dang yid bsdams pa gzhan dag la mi bzod pa ni cha ma yin no/ /thos pa chub pa'i rgyu can gyi bzod par yang byed de/thos pa'i stobs kyis bzod pa'i pha rol tu phyin pa dang ldan pa'i theg pa chen po'i chos tshig dang don gyi sgo nas thos nas de'i stobs kyis bzod par byed de/ de bas na/ snying rjes chos la brten pa'i phyir/ /zhes bya ba ni rgyu yin no/ /bzod pa dang / mi mjed pa dang ji mi snyam pa dang /shes pa zhes bya ba'i dbang du byas pa'o zhes bya ba ni de ni zhes bya ba'i dbang du byas pa yin no/ /dad dang 'dun pa brten pa dang / /zhes bya ba ni rgyu ste/ zhes bya ba ni dad pa dang 'dun pa ni brtson 'grus kyi rten yin te/ 'di ltar dad pa dang don du gnyer ba brtson 'grus rtsom par byed do//ma chags la sogs yon tan ldan/ /zhes bya ba ldan pa'o zhes bya ba ni 'di ltar ma chags pa la sogs pa ni dge ba'i rtsa ba yin te/ gang gi tshe dge ba'i chos dag la nges par brtson 'grus dang ldan par gnas pa de'i tshe/ ma chags pa la sogs pa dang ldan pa yin no//lus kyi brtson 'grus ni rnam par shes pa lnga dang mtshungs par ldan pa ste/ de ni dang po'i sgo bsdams te gnas pa nyid kyis lhag pa'i tshul khrims zhes bya'o/ /lhag pa'i sems ni rnam pa drug pa'o/ /lhag pa'i shes rab ni rnam pa bdun pa'o/ / de nyid kyi phyir 'grel pa las/ lus dang sems kyis zhes ston to/ /lus kyi rnam pa lnga dang / sems kyi rnam pa gnyis so/ /dga' ba dang ldan pa ni bsam gtan gnyis kyi'o/ /sim pa dang ldan pa ni bsam gtan gsum pa'i ste/ sems kyi tshor ba la ni sim pa zhes bya'o//btang snyoms dang ldan pa ni bsam gtan bzhi pa la sogs pa'i'o/ /shes bya zhes bya ba ni 'jig rten pa'i bya ba yang dag par rab tu rnam par 'byed pa bsal ba'i phyir ro zhes bya ba ni 'di las phyi rol pa rnams kyi shes bya ltar snang ba gang yin pa de ni phyin ci log dang ldan pa'i phyir yang dag pa'i shes bya ma yin no//bden pa bzhis bsdus pa dang / byang chub sems dpa'i theg pa gsum la mkhas pa dang / khyad par du na theg pa chen po gang yin pa ni shes bya yin te/ rig pa'i gnas lnga ni de dag gi khongs su 'dus pa nyid do/ /kun nas nyon mongs shin tu grol//zhes bya ba ni shes rab rab tu rnam par 'byed pa zhes bya ba'i skabs dang sbyar ro/ /byang chub sems dpa' rnams kyi shes rab rab tu rnam par 'byed pa ni shin tu rnam par grol ba'i ched yin te/ des nyon mongs pa las shin tu rnam par grol bar 'gyur ro/ / ji ltar shin tu rnam par grol zhe na/ 'jig rten pa la sogs pa'i shes rab rab tu rnam par 'byed pas zhes bya bas de ston par byed do/ /bshad pas ni chos yang dag par 'chad par byed do/ /shes rab ni chos thams cad kyi mchog go zhes bya ba ni shes rab ni chos rnams kyi mchog ste/shes rab ni gtso bo yin no/ /sbyin pa dang yang dag par blangs pa'i tshul khrims dag ni mnyam par gzhag pa ma yin pa'i phyir ro zhes bya ba ni sbyin pa ni rnam pa gsum char yang mnyam par gzhag pa ma yin no/ /tshul khrims ni so sor thar pa'i sdom pas bsdus pa rnam par gzhag pa ma yin te/'di ltar bsam gtan dang zag pa med pa'i sdom pa'i tshul khrims dang / dge ba'i chos sdud pa'i tshul khrims ni mnyam par gzhag pa yin par 'dod do/ /bsam gtan dang yang dag pa ji lta ba bzhin gyi shes rab dag ni mnyam par gzhag pa yin pa'i phyir ro zhes bya ba la yang dag pa ji lta ba bzhin zhes smos pa ni thos pa las byung ba dang bsams pa las byung ba'i shes rab gsal ba'i phyir te/de dag ni mnyam par gzhag pa ma yin pas de dag mnyam par ma bzhag pa'i phyogs kho nar brlan to/ /bzod pa dang brtson 'grus ni mnyam par gzhag pa'i gnas skabs na yang yod la mnyam par ma bzhag pa'i gnas skabs na yang yod do//de'i mi mthun pa'i phyogs chags pa'i bag la nyal yang dag par ma bcom pa'i phyir zhes bya ba ni ji srid du chags pa'i bag la nyal yang dag par ma bcom pa de srid du yo byad rnams la chags par 'gyur/de yang dag par bcom pas chags pa med de/ ji skad du/ chos mngon pa kun las btus pa las nyon mongs pa'i bag la nyal yang ma spangs pa yin la/ nyon mongs pa'i gnas lta bu'i chos rnams kyang snang bar 'gyur na/ de lta na nyon mongs pa skye bar 'gyur ro zhes bshad pa lta bu'o//tshul khrims kyi pha rol tu phyin pa la 'chal ba'i tshul khrims la chags pa ni/ srog gcod pa la sogs pa la yang chags pa gang yin pa'o/ /la la ni 'dod chags kyi sgo nas chags la/ la la ni zhe sdang gi sgo nas/ la la ni gti mug gi sgo nas te/'di ltar mi dge ba'i las kyi lam gyi bcu char yang rnam pa gsum gsum du 'dod pas srog gcod pa yang 'dod chags las skyes pa dang / zhe sdang las skyes pa dang / gti mug las skyes pa yin no/ /tshul khrims la bshol ba la chags pa ni tshul khrims yang dag par blang ba la mod la mi 'jug pa'am/gsad par bya ba la sogs pa bya ba bzung nas bshol te gtong ba yin no/ /tshul khrims la lan du re ba la chags pa ni 'dis bdag la phan pa byas pa'am byed par 'gyur ro zhes lan la lta bas srog chags mi gsod pa dang / ma byin par len pa la sogs pa mi spyod pa yin no/ /tshul khrims la mi mthun pa'i phyogs la chags pa ni 'dod chags dang zhe sdang dang gti mug rnams yang dag par ma bcom pa gang yin pa'o/ /bzod pa'i chags pa ni zhe sdang la chags pa gang yin pa ste/ rtag tu sems can rnams la sdang ba yin no//bzod pa'i bshol ba la chags pa ni/ bshol zhing bzod par byed kyi myur du ma yin pa dang / bsdigs nas bzod pa byed pa gang yin pa'o/ /mi mthun pa'i phyogs la chags pa ni zhe sdang yang dag par ma bcom pa'i phyir ro//brtson 'grus kyi mi mthun pa'i phyogs ni le lo'o/ /de la chags pa gang yin pa de ni brtson 'grus kyi mi mthun pa'i phyogs la chags pa ste/ de la chags pa yang rtag tu le lo can las ngan pa'i mtha' la sbyor zhing 'dug pa yin no/ /bshol ba la chags pa ni dge ba'i chos rnams la myur du mi 'jug pa yin no//mi mthun pa'i phyogs la chags pa ni le lo rab tu mi spong ba yin no/ /bsam gtan gyi mi mthun pa'i phyogs ni rnam par g.yeng ba'o/ /rnam par g.yeng ba la chags pa gang yin pa de ni bsam gtan gyi mi mthun pa'i phyogs la chags pa ste/ji srid du rnam par g.yengs zhing kha phyir bltas pa de srid du mnyam par gzhag pa mi 'thob po/ /shes rab kyi mi mthun pa'i phyogs ni 'chal ba'i shes rab ste/ shes rab 'phel bar bya ba'i phyir/ dge ba'i bshes gnyen la bsnyen bkur bya ba la brtson par mi byed pa gang yin pa 'di ni shes rab kyi mi mthun pa'i phyogs la chags pa yin no//de las bzlog pa ni ma chags pa ste/ ji skad du/ gang zhig 'don dang 'bri dang spyod pa dang / /gzhan la 'dri zhing thos pa 'dzin byed pa/ /de yi blo ni nyi ma'i 'od zer gyis/ /pad+ma bzhin du rnam par kha phye'o//zhes gsungs pa lta bu'o/ /rab tu dbye ba'i 'og tu yon tan gyi skabs te/ sbyin pa la sogs pa'i pha rol tu phyin pa rnams so so la yon tan rnam pa bzhi'o/ /yon tan rnam pa bzhi ni rgya che ba nyid dang / zang zing med pa nyid dang / don chen po nyid dang /mi zad pa nyid do/ /de la rtsa ba dang pos ni sbyin pa'i pha rol tu phyin pa'i rgya che ba nyid bshad do/ /ji lta zhe na/ sangs rgyas sras rnams slong dang phrad nas rang gi srog kyang rtag tu gtong / /zhes bya bas de ston to/ /rang gi srog sbyin par yongs su bsgrags pas phyi rol gyi dngos po lta smos kyang ci dgos te/ji skad du slob dpon ma khol gyi zhal snga nas kyis/ nyid kyi sha yang btang gyur na/ /dngos po gzhan lta smos ci 'tshal/ /zhes bshad pa lta bu'o/ /rang gi srog de yang res 'ga' zhig yongs su gtong ba ma yin gyi/ slong ba po gang gi tshe srog don du gnyer ba de kho na'i tshe/dpyad pa med par sbyin par byed do/ /rang gi srog sbyin pa smos pas/ yan lag dang nying lag sbyin pa ni dpyad du yang med pa nyid de/ 'dis ni sbyin pa'i rgya che ba nyid bshad do/ /snying rjes gzhan las lan kyang mi re 'dod pa'i 'bras bu don mi gnyer//zhes bya ba 'dis ni sbyin pa'i zang zing med pa nyid bstan te/ rgyud snying rjes brlan pa ni slong ba po rnams la rang gi srog kyang sbyin par byed cing de dag las lan kyang mi re la/ 'bras bu dbang phyug la sogs pa yang don du mi gnyer ro/ /sbyin pa gang zhig lan la lta ba'am/'bras bu la lta bas sbyin par byed pa de ni srid pas bdag gir byas pa yin no/ /des bdag gir byas pa'i sbyin pa ni 'khor bar ltung ba kha na ma tho ba dang bcas pa ste/ de ni byang chub sems dpa'i gos pa dang bcas pa yin no/ /de las bzlog pa ni kha na ma tho ba med pa ste/rtsa ba gnyis pa 'dis ni snying rjes yongs su zin pa'i phyir sbyin pa'i zang zing med pa nyid bshad do/ /sbyin pa de nyid kyis kyang skye bo thams cad byang chub gsum la bkod/ /ces bya ba 'dis ni sbyin pa'i don chen po nyid bstan te/ skye bo thams cad skal ba ji lta ba bzhin byang chub gsum la bkod pa'i phyir ro//theg pa gang yang rung ba zhig yongs su btang ba'am/ sems can gang yang rung ba zhig yongs su btang bas ni/ don chen po nyid du mi 'gyur bas de'i phyir skye bo thams cad kyang smos la/ theg pa sum char yang smos so/ /'jig rten dag na mi zad bzhag /ces bya ba 'dis ni sbyin pa mi zad pa nyid yongs su bstan to/ /ji lta zhe na/ re zhig ji ltar 'jig rten pa dag sbyin pa sbyin pa ltar gal te byang chub sems dpa' yang de kho na ltar sbyin par byed na ni dbang phyug dang / mtho ris dang / gzugs bzang po la sogs pas kyang bdag gir byas pa'i phyir 'khor bar ltung bas te/de ni rnam par smin pa zad pas zad par 'gyur ro/ /'on te nyan thos lta bur 'khor bas 'jigs shing 'khor ba la rgyab kyis phyogs la mya ngan las 'das pa la gzhol bas rang grol bar bya ba'i phyir sbyin par byed na de yang phung po lhag ma med pa'i mya ngan las 'das par zad pas zad par 'gyur ro//de bas na byang chub sems dpa' rnams ni de gnyis ka yongs su spangs nas rnam par mi rtog pa'i ye shes kyis yongs su zin pas sbyin pa sbyin par byed do/ /de nyid kyi phyir 'khor ba dang / mya ngan las 'das pa la mi gnas pa'i sgo nas/ mi zad pa nyid du bstan te/ tshul khrims la sogs pa la yang de bzhin du sbyar bar bya'o/ /sangs rgyas sras rnams shin tu bya dka' de bzhin mi yi gnod kun bzod/ /ces bya ba ni sdug bsngal la ji mi snyam pa'i bzod pa ste/ sems can gyi don la rab tu sbyor ba la sdug bsngal gang dag 'byung ba de dag la ji mi snyam par byed cing sdug bsngal de rtsis la ma chags par byas nas sems can gyi don bya ba dag la 'jug go/ /de bzhin mi yi gnod kun bzod ces bya ba ni gnod pa byed pa la mi mjed pa'i bzod pa ste/ sems can gang dag dbyug pa dang / mtshon cha dang bong pa la sogs pas snun par byed pa de dag thams cad la bu gcig pa la byams pa lta bus bzod do/ /chos la nges par rtog pa'i bzod pa ni 'di'i khongs su 'dus pa kho nar blta bar bya'o/ /rgyal ba'i sras rnams go cha sbyor ba'i bdag nyid brtson 'grus dpe med byas//zhes bya ba 'dis ni go cha'i brtson 'grus ston te/ 'di nyid kyis brtson 'grus kyi rgya che ba nyid ston to/ /dpe med pa nyid kyis ni 'jig rten pa dang nyan thos dang / rang sangs rgyas kyi brtson 'grus dag las byang chub sems dpa'i brtson 'grus khyad par du byed do//byang chub sems dpa'i go cha'i brtson 'grus ji ltar na dpe med pa yin zhe na/ ji skad du 'phags pa blo gros mi zad pa'i mdo las/ btsun pa shA ri'i bu de la byang chub sems dpa'i go cha mi zad pa gang zhe na/ 'khor ba na yongs su mi skyo ba gang yin pa ste/de ni bskal pa 'di snyed cig tu go bgo'o zhes bskal pa bgrang bas byang chub tshol bar mi byed kyi/ 'on kyang bsam gyis mi khyab pa kho nar go gyon par byed do zhes bya ba de lta bu la sogs pa gsungs pa lta bu ste/ 'di ni brtson 'grus kyi rgya che ba nyid bshad do//rang dang gzhan gyi nyon mongs tshogs gzhom byang chub dam pa 'thob par byed/ /ces bya ba 'dis ni zang zing med pa nyid kyi sbyor ba'i brtson 'grus ston to/ /ji ltar zang zing med pa yin zhe na/ rang dang gzhan gyi nyon mongs pa yang dag par gzhom pa'i phyir dang / bla na med pa'i byang chub kyi phyir brtson 'grus rtsom par byed do//de ni sred pas bdag gir ma byas pa'i phyir nyon mongs pa gtan du yang dag par 'joms pas zang zing med pa yin no/ /brtson 'grus gang zhig bdag gis dngos po dang / lta ba sred pas bdag gir byas pa de ni zang zing dang bcas pa yin no//'di ji ltar sbyor ba'i brtson 'grus yin zhe na/ ji skad du 'phags pa blo gos mi zad pa'i mdo kho na las sbyor ba'i brtson 'grus kyi dbang du mdzad de/ de la byang chub sems dpa'i pha rol gnon pa mi zad pa gang zhe na/ gang stong gsum gyi stong chen po'i 'jig rten gyi khams mes yongs su gang ba yang brgal nas de bzhin gshegs pa la blta bar spro ba ni byang chub sems dpa'i pha rol gnon pa yin no//dam pa'i chos mnyan pa'i rgyu can gyi spro ba ni byang chub sems dpa'i pha rol gnon pa yin no/ /sems can yongs su smin par byed pa'i rgyu can gyi spro ba ni byang chub sems dpa'i pha rol gnon pa mi lhod pa/mi zhan pa/ brtan pa/ mi bzlog pa/ dge ba'i bsam pa can/ snying rje chen po la brten pa zhes bya ba de lta bu la sogs pa yin te/ des na pha rol gnon pa zhes bya'o zhes gsungs pa lta bu yin no/ /rgyal ba'i sras rnams ting 'dzin mang ldan bsam gtan rnam pa thams cad bsgrubs//zhes bya ba 'dis ni ting nge 'dzin mang ba nyid dang / rnam pa thams cad mkhyen pa nyid kyi bsam gtan gyi rgya che ba nyid ston te/ ji skad du chos mngon pa kun las btus pa las 'di lta ste/ sangs rgyas dang byang chub sems dpa' rnams bsam gtan gyi pha rol tu phyin pa la brten nas bsam gtan dang pos bsdus pa'i ting nge 'dzin ji snyed pa la snyoms par zhugs pa de dag ni nyan thos dang /rang sangs rgyas rnams kyi ming yang shes par mi 'gyur te/ bsam gtan dang pos bsdus pa ji lta bar bsam gtan lhag ma dang /gzugs med pas bsdus pa rnams kyang de dang 'dra'o zhes bshad pa lta bu'o/ /rgyal ba'i sras rnams de nyid shes bya gang yin mtha' dag rnam kun shes/ /zhes bya ba 'dis ni shes rab kyi rgya che ba nyid bstan te/ de nyid ces bya ba ni bzang po zhes bya ba'i don to//gzhan dag na re de nyid ces bya ba ni spyi'i mtshan nyid kyis bsdus pas te/ gnyis la bdag med pa yin no zhes zer ro/ /rang gi brda la sogs pa'i mtshan nyid kyi dbye ba mtha' yas pas tha dad pa'i shes bya gang yin pa de yin no zhes bya ba ni ri khrod pa dang kla klo la sogs pa'i yul gang dang gang dag na rang gi brda'i mtshan nyid kyi dbye bas tha dad pa'i shes bya de sgyu ma mkhan la sogs pa sgyu ma byas pa la sogs pa la mngon par zhen pa med pa ltar/zag pa dang bcas pa dang zag pa med pa dang 'dus byas dang 'dus ma byas la sogs pa'i chos rnams la kun tu ma rmongs pas 'jig rten pa la tha snyad du bya ba'i phyir rnam par mi rtog pa'i rjes la thob pa'i ye shes kyis sgyu ma dang smig rgyu dang chu zla'i tshul du tha snyad 'dogs shing thams cad ji lta ba bzhin du yang shes so//ye shes sems can yongs su bzung bas 'jig rten dag na mi zad gzhag/ / ces bya ba 'dis ni ye shes mi zad pa nyid ston te/ snying rjes yongs su bzung ba'i rnam par mi rtog pa'i ye shes ni mi zad par 'gyur ro/ /snying rjes ni sems can yongs su mi gtong ste/ des na nyan thos bzhin du mya ngan las 'das pa la gzhol bar mi 'gyur ro/ /rnam par mi rtog pa'i ye shes kyis ni 'jig rten pa dag ltar 'khor ba la gnas par mi 'gyur bas de ni mi zad pa yin no//de bas na 'khor ba dang mya ngan las 'das pa la mi gnas pa'i phyir ye shes de phung po lhag ma med pa'i mya ngan las 'das pa na yang mi zad par 'gyur ro/ /byang chub sems dpa' rnams kyi phung po'i lhag ma med pa'i mya ngan las 'das pa'i ni sprul pa'i skus ston pa gang yin pa'o//slong ba po'i sbyin pa po mthong bas dga' ba gang yin pa dang / mthong nas re ba yongs su rdzogs pas dga' ba gang yin pa dang / slong ba po'i sbyin pa po ma mthong bas mi dga' ba gang yin pa dang /slong ba po'i yid la re ba yongs su ma rdzogs pas yongs su mi dga' ba gang yin pa dang / slong ba po'i smon pa po gang yin pa ste/ sbyin pa po mthong ba dang / yid la re ba yongs su rdzogs par smon pa gang yin pa dga' ba dang mi dga' ba dang smon pa de dag thams cad ni byang chub sems dpa' brtse ba dang ldan pas snying rje lhag par ldan pa'i sgo nas zil gyis mnan te/byang chub sems dpa'i rgyud snying rjes brlan pas slong ba po mthong ba dang / de'i yid la re ba yongs su rdzogs pas slong ba po bas lhag par dga' ba skye la/ byang chub sems dpa' slong ba po mthong ba dang /de'i yid la re ba yongs su ma rdzogs pas kyang slong ba po bas lhag par mi dga' ba skye'o/ /byang chub sems dpa' slong ba po mthong bar smon pa dang / de'i yid la re ba yongs su rdzogs par smon pa yang slong ba po bas lhag par skye bas de'i phyir zil gyis gnon to//'di ni sbyin pa'i pha rol tu phyin pa'i yon tan gyi khyad par te/ tshigs su bcad pa gcig gis bstan pa yin no/ /byang chub sems dpa'i tshul khrims ni/ /dge ba bcu'i las kyi lam gyis bsdus pa yin pas/ de la bsam par bya ste/ byang chub sems dpa' sems can rnams la srog dang longs spyod dang chung ma dag gtong zhing shin tu dga' bar byed pas te/rab tu zhes bya ba'i tha tshig ste/ de ji ltar srog gcod pa dang / ma byin par len pa dang / 'dod pas log par g.yem pa spyod par 'gyur/ byang chub sems dpa' ni gnod pa byed pa la yang phan pa'i 'du shes 'thob la/gzhan la phan par bya ba la brtson pa la rlung dang nyi ma dang sdig sbrul la sogs pa las sdug bsngal skyed pa gang yin pa de la yang byang chub sems dpa' mchog tu dga' ba rnyed par 'gyur te/ bzod pa'i tshogs yongs su rdzogs pa'i rgyu mtshan yin pa'i phyir gnod pa byed pa gang yin pa la yang phan pa'i 'du shes thob la gzhan la phan par brtson pa la sdug bsngal skye ba gang yin pa de la yang dga' ba 'thob na gang la dgra la sogs pa la yang gnod pa byed pa'i 'du shes mi 'byung la/gzhan gyi don la brtson pa la sdug bsngal la yang sdug bsngal gyi blo mi 'byung ba des gang la ci zhig bzod par bya/'di dag gis ni go rims bzhin du gnod pa byed pa la mi mjed pa dang / sdug bsngal la ji mi snyam pa'i bzod pa dag bshad do/ /bdag pas ches lhag gzhan la rtag byams dang //zhes bya ba ni ji skad du sgrub pa'i skabs nas/ ji ltar snying rje'i bdag nyid gzhan gyi don gyi phyir/ /bdag la sdug bsngal mi bzad gdung ba rab byed pa/ /de ltar 'jig rten gdung ba'i las kyis gzhan dgra la/ /shin tu brtse ba med par rab tu 'jug ma yin//zhes bshad pa lta bu'o/ /ji ltar mun khung lag nom dag gis shes pa yul chung ba/ /zhes bya ba ni lag pa la sogs pas mnams nas de'i rjes la dran pas 'di ni bum pa'o/ /'di ni ras yug go zhes bya bar shes pa de ni shes pa yul chung ngu can yin no//mngon sum ma yin pa zhes bya ba ni dngos po de mig gis mngon sum du ma gyur pa'i phyir te/ lag nom gyis bzung ba'i kha dog la sogs pa yongs su gcad par ni mi nus so/ /shin tu dri ma med pa ma yin pa ltar zhes bya ba ni/ nyan thos rnams kyi shes pa de ni bag chags dang ldan pa'i phyir bag chags dang bcas pa yin no//yang na byis pas kun brtags pa'i chos la 'dzin pa ma spangs pa'i phyir ro/ /mi 'jigs pa sbyin pa ni ngan song dang 'khor bas 'jigs pa dag la de dag gis mi 'jigs pa zhes bya ba ni so so'i skye bo rnams kyi rgyud la 'phags pa'i lam bskyed pas ngan song las yongs su skyob la/bden pa mthong ba ni 'jigs pa lnga las yang dag par bzla bas skyob po/ /rgyun du zhugs pa la sogs pa ni dgra bcom pa nyid la 'god pas 'khor ba las yongs su skyob po/ /rgyu mtshan ni snying rje'o zhes bya ba ni/ snying rjes yongs su zin pa'i sbyin pa ni sbyin pa mchog yin te/snying rjes yongs su zin pas sbyin pa gzhan dag las khyad par du 'phags so/ /rgyu ni sngon gyi sbyin pa'i pha rol tu phyin pa la goms pa'i bag chags so zhes bya ba ni tshe rabs gzhan dag na ma chags pa la sogs pa'i dge ba'i rtsa ba dang mtshungs par ldan pa'i sems pa kun tu spyad pas bag chags gzhan pa gang yin pa'i bag chags de'i stobs kyis sbyin pa la sogs pa'i pha rol tu phyin pa la 'jug pa de ni rgyu ste/des na mchog tu 'dod do/ /gong du ni snying rje'i rgyu mtshan can gyi sbyin pa gang yin pa de ni rgyu mtshan gyi sgo nas mchog yin no zhes bshad do//da ni sngon sbyin pa'i pha rol tu phyin pa la goms pa'i bag chags las rgyu'i sgo nas mchog yin no zhes bshad na/ rgyu dang rgyu mtshan la khyad par ci zhig yod ce na/ rgyu ni thun mong ma yin pa'i rgyu ste/ dper na myu gu'i sa bon lta bu'o/ /rgyu mtshan ni lhan cig byed pa'i rgyu mtshan te/dper na myu gu de nyid kyi byed rgyu sa dang chu la sogs pa lta bu'o/ /de ltar na grangs bzhin du sbyin pa la sogs pa'i dge ba la goms pa'i bag chags ni rgyu lta bu ste/ thun mong ma yin pa'i rgyu yin no/ /snying rje ni thun mong gi rgyu ste/ sa dang chu la sogs pa lta bu'o/ / zhing ni rnam pa lnga ste/ slong ba dang / sdug bsngal ba dang / rten med pa dang / nyes par spyad pa spyod pa dang / yon tan dang ldan pa'o zhes bya ba gong du rnam par mi rtog pa'i ye shes kyis yongs su zin pas sbyin pa po dang / sbyin par bya ba dang len pa po rnam par mi rtog pa'i phyir sbyin pa khyad par du 'phags so zhes bshad ma thag ma yin nam/da ni don la sogs par rnam par rtog pa'i phyir ji ltar snga phyi mi 'gal zhe na/ 'gal ba med de/ 'di ltar 'di ni sbyin pa'i pha rol tu phyin pa yongs su ma rdzogs pa'i gnas skabs na so so'i skye bo'i gnas skabs nyam nga bar 'gyur ba yin no/ / rnam par mi rtog pa'i gnas skabs ni sbyin pa'i pha rol tu phyin pa yongs su rdzogs pa'i gnas skabs te/ de'i tshe ni 'di gang zhig gang slong ba de la de sbyin par byed do/ /don la sogs par rnam par rtog pa'i gnas skabs ni byang chub sems dpa'i dbul ba'i gnas skabs yin pas slong ba po thams cad la sbyin pa sbyin par nus par 'gyur ba gang yin pa 'di mi srid do//rnam par mi rtog pa'i ye shes kyi stobs kyis ni/ de la sbyin pa po dang sbyin par bya ba dang len pa por mngon par zhen pa mi 'byung ste/ 'dir yang mngon par zhen pa 'gog par zad pas 'gal ba med do//mos pa dang yid la byed pa dang ting nge 'dzin gyi sgo nas sbyin pa mchog tu 'dod de/ mos pa'i sgo nas ji lta bu zhe na/ sbyin pa'i pha rol tu phyin pa dang ldan pa'i mdo sde thams cad la bsam pa thag pa'i bar du dang bas mos pa'o/ /yid la byed pa'i sgo nas ji lta bu zhe na/ro myang ba yid la byed pas pha rol tu phyin pa thob pa rnams la yon tan du lta ba'i tshul gyis ro myong bar byed pa dang / rjes su yi rang ba yid la byed pas 'jig rten thams cad na sems can thams cad kyi sbyin pa la sogs pa la rjes su yi rang ba dang / mngon par dga' ba yid la byed pas bdag nyid dang sems can rnams kyi pha rol tu phyin pa'i khyad par ma 'ongs pa rnams la mngon par dga' ba yin no//ting nge 'dzin la brten pas sbyin pa mchog yin no/ ting nge 'dzin ni nam mkha' mdzod la sogs pas te/ sa brgyad pa la sogs pa la byang chub sems dpa'i lam mngon par 'du byed pa med pa'i gnas skabs na nam mkha' nyid mdzod du gyur te/gang dang gang la ci dang ci dgos pa de dang de la nam mkha' kho na las thams cad sbyin par byed cing nam mkha' mdzod la sogs pa ting nge 'dzin gyi rnam pa du ma yang ston to/ /ji skad du de nyid las dbang 'byor pa bshad pa lta bu'o zhes bya ba gang nas bshad ce na/bsgom pa rnam par dbye ba las so/ /ji skad du bshad ce na/ pha rol tu phyin pa bsgom pa dbang 'byor pa nyid la brten pa ni rnam pa gsum ste/ sku la dbang 'byor pa nyid dang / spyod pa la dbang 'byor pa nyid dang / ston pa la dbang 'byor pa nyid do zhes bshad do//de la sku la dbang 'byor pa nyid ni/ de bzhin gshegs pa'i sku gnyis po ngo bo nyid kyi dang / longs spyod rdzogs pa'i yin par blta ste/ sku 'di gnyis ni chos dkar po thams cad kyi tshogs yin no/ /chos dkar po'i tshogs nyid yin du zin kyang /ting nge 'dzin smos pas dbang 'byor pa'i phyogs gcig bzung ste/ nam mkha' mdzod kyi ting nge 'dzin la sogs pa gzung ngo / /de ltar na ting nge 'dzin la brten pas sbyin pa mchog yin par 'dod do/ /rnam pa ji snyed sbyin pa ni sbyin pa yin no zhes bya ba de ni mos pa dang / yid la byed pa dang /ting nge 'dzin la brten pa'i rnam pa'i dbye bas rnam pa'i bye brag shes par bya ba yin no/ /tshul khrims kyi rten ni byang chub sems dpa'o/ /gzhi mchog ni byang chub sems dpa'i sdom pa'o zhes bya ba ni byang chub sems dpa'i sdom pas tshul khrims rnam pa gsum po sdom pa dang /dge ba'i chos su sdud pa dang / sems can gyi don byed pa'i tshul khrims zhes bya ba la bsdus so/ /bzod pa ni ngan pa stobs chung ngus gsod pa dag go zhes bya ba ni lag dbyug dang / thal lcag la sogs pa bzod pa gang yin pa de ni ngo mtshar mi che'i/ rje dpon yin la gsod pa ngan pa bran dang gdol pa la sogs pa'i bzod pa gang yin pa 'di ni rab tu ngo mtshar che'o//ngan du zin kyang gal te stobs dang ldan pa yin na stobs dang ldan pa bzod pa gang yin pa de yang tshar gcig ngo mtshar mi che'o/ /gal te ngan pa stobs kyang chung na ngo mtshar che ste/ de'i bzod pa gang yin pa de ni gzhi mchog tu gyur pas bzod pa khyad par du 'phags so//yang na ngan pa yang gzhan kho na yin la/ stobs chung ngu yang gzhan yin te/ ngan pa ni bran la sogs pa'o/ /de las gzhan pa rigs mthun zhing / dbang phyug la sogs pa dang bral bar bya ba'i mthu med pa de ni stobs chung ba'o//shes rab kyi gzhi mchog ni/ de bzhin nyid do zhes bya ba la/ de bzhin nyid ni gnyis la bdag med pa'o/ /de la dmigs pa'i shes rab gang yin pa de ni mchog yin te/ gzhi zhes bya ba'i sgra ni dmigs par bshad do/ /tshul khrims la sogs pa'i pha rol tu phyin pa'i zhing ni theg pa chen po zhes bya ba ni nyan thos dang /rang sangs rgyas rnams kyi de dag gi theg pa'i zhing gis bsdus pa'i tshul khrims la sogs pa gang yin pa de ni mchog ma yin gyi/ theg pa chen po bstan pas theg pa chen po la zhugs pa rnams kyi gang yin pa de ni theg pa dman pa'i zhing mchog tu 'dod do//gnas ni mos pa la sogs te/ mos pa'i tshul khrims kyi pha rol tu phyin pa la sogs pa dang ldan pa'i chos la mos pa'o/ /de ltar mos na mos pa la brten pa'i tshul khrims la sogs pa mchog ces bya'o//yid la byed pa ni/ ro myang ba dang rjes su yi rang ba dang / mngon par dga' ba'i yid la byed pa'i sgo nas ro myang ba yin la byed pa la sogs pas tshul khrims kyi pha rol tu phyin pa la sogs pa la ro myong bar byed pa dang rjes su yi rang bar byed pa dang / mngon par dga' bar byed pa yin no//ting nge 'dzin la brten pas tshul khrims kyi pha rol tu phyin pa la sogs pa mchog tu 'dod de/ tshul khrims ni dge ba'i chos sdud pa gang yin pa de'i phyogs gcig bzung ngo / /de bzhin du bzod pa la sogs pa la yang sbyar bar bya ste/ ting nge 'dzin 'grub par bya ba'i phyir sbrang bu mchu rings dang /sha sbrang la sogs pa'i phyi dang nang gi sdug bsngal bzod pa dang / ting nge 'dzin dang ldan pa'i chos bshad na/ chos la nges par rtog pa'i bzod pas bzod pa gang yin pa'i bzod pa de ni ting nge 'dzin pas mchog yin par 'dod de/ 'di ltar bzod pa la brten nas ting nge 'dzin de dag 'grub pas so//'di ni pha rol tu phyin pa rnams kyi yon tan gyi gnas skabs yin pas yon tan gyi skabs nyid kyis sbyin pa dang / brtson 'grus kyi pha rol tu phyin pa dag gi yon tan lhag par bsngags te/ byang chub sems dpa'i sbyin pa ni/ /sems can gcig bde bskal mang du//gnod pa byed kyang dga' 'gyur na/ /zhes bya ba la sogs pa'i tshigs su bcad pas sbyin pa dang / brtson 'grus kyi pha rol tu phyin pa dag gi yon tan lhag par brjod do/ /de tshe rdzas ngan lta la smos kyang ci zhig dgos/ /zhes bya ba ni lus las gzhan pa'i rdzas ni ngan pa ste/mchog ma yin no zhes bya ba'i tha tshig go/ /btang dga' longs spyod can zhes bya ba ni btang ba nyid longs spyod yin la/ dga' ba nyid longs spyod yin te/ de gang la yod pa de ni btang dga' longs spyod can yin no/ /byang chub sems dpa' kho na la yon tan 'di dag yod kyi mi gzhan la ni med do//yang na btang ba la dga' ba ni btang dga'o/ /dga' ba nyid longs spyod yin pas na btang dga' longs spyod do/ /gtso bo la sogs pa'i bye brag gis brtson 'grus kyi pha rol tu phyin pa'i yon tan lhag par bsngags so/ /brtson 'grus kyis ni srid spyod 'dod pa thob//ces bya ba ni 'dod pa'i srid par gtogs pa'i longs spyod ni srid spyod do/ /brtson 'grus kyis ni dag pa rab 'gyur ldan/ /zhes bya ba ni gzugs dang gzugs med pa'i dag pa ste/ 'jig rten pa'i bsam gtan dang gzugs med pas bsdus pa yin no//brtson 'grus kyis ni 'jig tshogs gnas nas grol/ /zhes bya ba ni nyan thos dang / rang sangs rgyas rnams gang zag la bdag med par mthong bas so/ /brtson 'grus kyis ni byang chub mchog sangs rgyas/ /zhes bya ba ni byang chub sems dpa' rnams kyi brtson 'grus gang yin pa'o//gzhan yang nyams dang 'phel ba'i brtson 'grus dang / /zhes bya ba la sogs pa tshigs su bcad pa gnyis kyis ni yang dag par spong ba dang / dbang po dang / stobs dang / byang chub kyi yan lag dang / 'phags pa'i lam rnams brtson 'grus kyi rnam pas dbye ba bstan to//rdzu 'phrul gyi rkang pa rnams ni bsam gtan gyi ngo bo nyid yin pas de dag tu brtson 'grus ma bstan to/ nyan thos rnams kyi ni bsam pa dang / blo zhan pa dang ldan pa'i phyir ro/ /byang chub sems dpa' rnams kyi ni bsam pa dang blo rgya chen po dang ldan pa'i phyir ro/ /longs spyod la chags pa ni de kun tu 'dzin pa'i phyir ro zhes bya ba ni longs spyod gzugs la sogs pa'i yul bsgrub pa dag la chags pa gang yin pa mi spyod pa dang mi brtan pa bar du gcod pa de'i gnyen por/brtson 'grus ldan pa longs spyod kyis pham med/ /ces brjod de spyad par bya ba ni longs spyod yin pa'i phyir ro//nyon mongs pa ni de yongs su spyod pa la lhag par zhen pa'i phyir ro zhes bya ba ni longs spyod dag spyod pa la lhag par chags shing sred pa gang yin pa bar du gcod pa de'i gnyen por/ /brtson 'grus ldan pa nyon mongs kyis pham med/ /ces bya ste/ brtson 'grus dang ldan pa dge ba'i chos la brtson pa ni nyon mongs rnams kyis pham par mi 'gyur ro//yon tan gyi skabs rdzogs so// //mi 'jigs pa'i sbyin pa ni tshul khrims dang bzod pas bsdus te/ de ltar 'di gnyis kyis mi 'jigs pa sbyin par byed do zhes bya ba ni tshul khrims yang dag par len pa ni sems can thams cad la mi 'jigs pa sbyin par byed cing gzhan gshe ba dang brdeg pa la sogs pas rnam pa du mar 'tshe ba yang thams cad bzod cing dang du len te/'di ltar tshul khrims yang dag par blangs pas ni gshes kyang slar mi gshe bar bya/khros kyang slar mi khro bar bya/ brdeg kyang slar mi brdeg par bya/ mtshang 'bru yang slar mtshang 'bru bar mi bya'o snyam du de ltar so sor brtags nas bzod pa ni gzhan dag la mi 'jigs pa sbyin par byed pas/ mi 'jigs pa sbyin pas ni tshul khrims dang bzod pa bsdus par rig par bya'o//chos sbyin pas ni bsam gtan dang shes rab dag ste/ 'di ltar de nyid kyis chos sbyin par byed do zhes bya ba ni bsam gtan gyis rdzu 'phrul dang kun brjod pa la sogs pas kun mgu bar byas te/ snod du rung bar byas nas chos ston to/ /gnyi gas ni brtson 'grus te/'di ltar des gnyi ga sbyin par byed do zhes bya ba ni mi 'jigs pa sbyin pa'i dus dang chos sbyin pa'i dus na brtson 'grus gdon mi za bar yod pas so/ /dge ba'i chos sdud pa'i tshul khrims kyis ni sbyin pa la sogs pa thams cad bsdus te zhes bya ba ni 'di ltar sbyin pa dang / tshul khrims dang / bzod pa dang / brtson 'grus dang / bsam gtan dang / shes rab kyi pha rol tu phyin pa rnams ni dge ba'i chos kyi phyogs yin pas de bas na dge ba'i chos sdud pa'i tshul khrims kyis thams cad bsdus so/ /de bzhin du gzhan dag kyang sbyar bar bya'o zhes bya ba ni gnod par byed pa la mi mjed pa'i bzod pas ni mi 'jigs pa sbyin pa dang /tshul khrims dag bsdus te/ 'di ltar de gnyis kyis ni gnod par byed pa la mi mjed par byed do/ /chos la nges par rtogs pa'i bzod pas ni bsam gtan dang shes rab dag bsdus te/ 'di ltar de gnyis kyi go rims bzhin du sems mnyam par gzhag pas yang dag pa ji lta ba bzhin du rab tu shes so//gnyi gas ni brtson 'grus te/ 'di ltar des gnyi ga sbyin par byed do/ /brtson 'grus kyis ni thams cad bsdus so/ /mngon par bsgrub pa dang bya ba sgrub pa'i bsam gtan gyis kyang thams cad bsdus te/sbyin pa la sogs pa'i dus na nam mkha' mdzod la sogs pa'i mngon par bsgrub pa'i phyir ro/ /shes rab kyis kyang thams cad bsdus te/ 'di ltar shes rab kyis rnam par dpyad nas sbyin pa la sogs pa la rab tu sbyor bas so/ /sbyin pa'i sbyin pa dang /tshul khrims kyi sbyin pa nas shes rab kyi sbyin pa'i bar yin no zhes bya ba la/ sbyin pa'i sbyin pa gang zhe na/ gzhan dag la nor dang 'bru la sogs pa'i dngos po sbyin pa gang yin pa de ni sbyin pa'i sbyin pa zhes bya'o/ /tshul khrims kyi sbyin pa ni gzhan gyi rgyud dag la sdom pa'i tshul khrims la sogs pa 'god pa ste/shes rab kyi sbyin pa'i bar du yang de dang 'dra bar rig par bya'o/ /yang na de dag dang ldan pa'i chos ston pa yin no/ /chos nyid kyis rnam par nges pa ni sbyin pa la sogs pa'i don gang dag la mdo la sogs pa snang ba gang dag yin pa dang /mdo la sogs pa'i chos gang dag la sbyin pa la sogs pa snang ba gang dag yin pa de dag ni phan tshun bsdus pa yin par rig par bya'o zhes bya ba ni rjod pa dang brjod par bya ba bsdus pa zhes bya ba'i don to/ /sbyin pa ni tshul khrims la sogs pa'i rgyu mtshan yin te/ longs spyod la mi lta na tshul khrims la sogs pa la 'jug pa'i phyir ro zhes bya ba ni 'di ltar longs spyod la mi lta na/tshul khrims kyang yang dag par len la/ gzhan dag gis phrogs na yang de la mi lta bas bzod do/ /longs spyod la kun tu chags pa'i le lo dge ba'i chos rnams la mi 'jug pa gang yin pa de yang mi lta ba la mi 'jug ste/rnam par g.yeng ba dang 'chal ba'i shes rab kyang de dang 'dra'o/ /tshul khrims kyang sbyin pa la brtson pa'i rgyu mtshan yin te/ dge slong gi sdom pa yang dag par blangs na yongs su 'dzin pa thams cad gtong ba'i phyir dang / tshul khrims la gnas na bzod pa la sogs pa dang ldan pa'i phyir ro zhes bya ba'i tshul khrims yang dag par blangs pa ni gzhan dag las lus dang ngag las byung ba'i mi 'dod pa 'ongs pa thams cad bzod do//tshul khrims yang dag par blangs pa ni dge ba'i chos rnams la spro ba 'phel bar 'gyur zhing 'gyod pa med pa'i rim gyis sems rtse gcig pa nyid du yang 'gyur la/de nas yang dag pa ji lta ba bzhin du yang yongs su shes so/ /bzod pa dang ldan pa ni sbyin pa la sogs pa'i dus na nyes par smras shing mi snyan par gyur pa'i tshig gi lam dang brdegs pa la sogs pa thams cad bzod do//de bzhin du tshul khrims mnyam pa yin zhing brtson 'grus dang ldan pa yin pa sems rtse gcig pa nyid las yongs su 'thob pas bzod pa yang pha rol tu phyin pa thams cad kyi rgyu yin no/ /de bzhin du brtson 'grus dang bsam gtan dang shes rab kyang sbyar bar bya'o/ / pha rol tu phyin pa'i skabs rdzogs so// //pha rol tu phyin pa'i skabs kyi 'og tu bsdu ba'i dngos po'i skabs yin te/ 'di'i 'brel pa gang yin zhe na/ pha rol tu phyin pa la sbyor ba ni byang chub sems dpa'i sangs rgyas kyi chos yongs su rdzogs par byed pa yin pas rang gi don to/ /bsdu ba'i dngos po rnams ni gzhan gyi don to//de'i phyir bsdu ba'i dngos po'i skabs te/ bsdu ba'i dngos po bzhis gzhan gyi don byed do/ /sbyin mtshungs zhes bya ba ni/ grangs dang de'i mtshan nyid go rims dang zhes bya ba la sogs pas ji skad du bstan pa lta bu yin no/ /don spyod pa ni de yang dag par len du 'jug pa'o zhes bya ba ni pha rol tu phyin pa yang dag par len du 'jug pa ni don spyod pa zhes bya'o//de la bdag nyid rjes su 'jug pa'o zhes bya ba ni sbyin pa la sogs pa gang la gzhan yang dag par len du 'jug pa de nyid la bstan par bya ba'i phyir bdag nyid kyang 'jug pa yin/ de ltar na de dag sbyin pa la sogs pa la brtan por 'gyur te/'di ltar gang la bdag cag btsud pa de nyid la bdag nyid kyang 'jug pa dang sbyar na 'di ni bdag cag la slu bar byed pa ma yin gyi/ sbyin pa la sogs pa 'di ni gdon mi za bar bzang ngo snyam du sems so/ /don mthun pas ni yun ring por sgrub pa'i phyir/sgrub pa de rnam par sbyong bar byed cing bya ba yang dag par len du 'jug pa po ni ji skad smra ba de bzhin byed pa yin no zhes bya bar rig nas yun ring por gus pas sgrub pa de sbyor bar byed do/ /gang yang bcom ldan 'das kyis gdul ba mdor bsdus pa la dad pa la ltos nas/ bsdu ba gzhan gnyis gsungs pa'i bsdu ba gnyis po des kyang bsdu ba bzhi po 'di dag bsdus so//dmigs pa'i chos ni pha rol tu phyin pa'i chos so/ /dmigs pa'i chos des snyan par smra ba bsdus te/ 'di ltar byang chub sems dpa' pha rol tu phyin pa'i chos la dmigs nas gzhan dag la bye brag tu shes par yang byed/the tshom gcod par yang byed do/ /sgrub pa'i chos kyis ni don spyod pa bsdus te/ sgrub pas pha rol tu phyin pa rnams la rab tu sbyor ba na don spyod pa la rab tu brtson pa yin no/ /de rnam par sbyong ba'i chos kyis ni don mthun pa bsdus te/ don mthun pas sgrub pa de rnam par sbyong bar byed do/ /phal cher don med pa ni mos pas spyod pa'i sa la'o zhes bya ba ni gdul ba rnams kyi bsam pa dang bag la nyal ba yang dag pa ji lta ba bzhin yongs su mi shes pa'i phyir de kho na nyid ma mthong ba'i phal cher don med pa yin no//phal cher zhes smos pas rnam pa thams cad du don med pa ni ma yin no/ /de ltar rtag tu longs spyod ma chags blo//zhes bya ba ni sbyin pa'i pha rol tu phyin pas longs spyod dag la ma chags pa ston to/ /zhi zhes smos pas ni tshul khrims kyi pha rol tu phyin pa ston te/ lus dang ngag dang yid kyi las mi dge ba nye bar zhi bar byed pa'i phyir ro/ /sdom zhes smos pas ni bzod pa'i pha rol tu phyin pa ston to/ /'di ltar sdom pa zhes bya ba'i skad kyi byings ni nye bar zhi ba'i don du 'don te/bzod pa dang ldan pa ni gshe ba dang brdeg pa thams cad bzod do/ /srid yul mtshan ma rnam par mi rtog pa/ /zhes bya ba la/ srid pa zhes smos pas ni nang gi chos rnams gzung ngo / /yul zhes smos pas ni phyi rol gyi dngos po rnams bzung ste/byang chub sems dpa' ni rnam par mi rtog pa'i ye shes thob pa'i phyir de dag la rnam par rtog par mi byed do/ /de ni sems can tshogs sdud byed pa yin/ /zhes bya ba ni bsdu ba'i dngos po bzhis sems can gyis tshogs sdud par byed do/ /bsdu ba'i dngos po'i skabs rdzogs so// // 'di man chad ni sangs rgyas la mchod pa dang / dge ba'i bshes gnyen la brten pa dang / tshad med pa rnams te/ 'di dag gi 'brel pa gang yin zhe na/ rang la phan pa bsgrub pa'i phyir sngar pha rol tu phyin pa rnams bstan to/ /gzhan la phan par bya ba bsgrub pa'i phyir/bsdu ba'i dngos po rnams bstan to/ /rang la phan pa phun sum tshogs pa la bde ba la lhag par zhen pa srid pas de'i phyir de'i 'og tu bde ba la lhag par zhen pa'i gnyen por sangs rgyas la mchod pa dang / bshes gnyen la brten pa ste/ sangs rgyas la mchod pa'i phyir/ sgrub pa'i dngos po yongs su gtong ba la goms pas longs spyod kyi bde ba la lhag par zhen par mi 'gyur la/ lus dang srog la mi lta zhing bshes gnyen mgu bar bya ba la rab tu zhugs pa yang bdag nyid bde ba la longs spyod par mi 'gyur bas sangs rgyas la mchod pa dang /dge ba'i bshes gnyen la brten pa 'di gnyi ga la yang bde ba la lhag par zhen pa'i gnyen por bshad do/ /bsdu ba'i dngos po rnams kyis gzhan la phan pa la 'jug par rab tu sbyor ba la de'i log par bsgrubs pas sdug bsngal yal bar 'dor te/ji lta ji ltar sems can de dag yongs su smin par byed pa ni log par sgrub cing 'dul ba la mi gnas pa de lta de ltar byang chub sems dpa' de dag yal bar 'dor bar 'gyur ba de'i gnyen por tshad med pa rnams so/ /byang chub sems dpa' sems dpa' byams pa la sogs pas yongs su bsgom pas ni gnas skabs gang du yang sems can rnams yal bar mi 'dor bas de'i phyir tshad med pa dag bstan to//yongs su bsngo ba ni bsod nams dang ye shes kyi tshogs yongs su rdzogs par byed pa'o zhes bya ba ni mchod pa 'dis ring por mi thogs par bsod nams dang ye shes kyi tshogs yongs su rdzogs par gyur cig ces bcom ldan 'das la mchod pa de'i bsod nams dang ye shes kyi tshogs yongs su rdzogs par bya ba'i don du yongs su sngo bar byed pa'o//rgyu ni sngon gyi smon lam mo/ /zhes bya ba ni tshe rabs gzhan dag na smon lam btab pa gang yin pa de rgyu yin te/de nyid kyi phyir mjug thogs su/ bdag la sangs rgyas 'byung ba don yod par gyur cig ces bya ba smos so/ /zhing ni sems can tshad med pa rnams te/ de yongs su smin par bya ba'i phyir zhes bya ba ni sems can yongs su smin par bya ba'i don du zhes bya ba'i tha tshig go//de dag gis de la rab tu sbyar bas zhes bya ba'i ni sems can de dag gis mchod pa de la rab tu sbyor bar byed do/ /de dag gis rab tu sbyar bas sems can zhing lta bu de dag la mchod pa sa bon la sogs pa lta bu ma 'ongs pa na sangs rgyas la mchod pa'i me tog skye bar bya ba'i don du zhes bya ba'i phyir btab par 'gyur ro//mos pa la sogs pa zhes bya ba ni mos pa dang / bsam pa dang / dbang 'byor pa nyid do/ /de la mos pa ni 'di lta ste mchod pa dang ldan pa'i theg pa chen po'i chos la mos pa'o//bsam pa ni bsam pa dgu po ro myang ba dang / rjes su yi rang ba dang / mngon par dga' ba'i bsam pa dag pa dang / ngoms mi shes pa dang / rgya chen po dang / dga' ba dang / phan pa dang / ma gos pa dang / dge ba'i bsam pa dag go/ / dbang 'byor ba nyid ni nam mkha' mdzod la sogs pa'i ting nge 'dzin te/ 'di ni sems la brten pa'i mchod pa yin no/ /byang chub tu sems bskyed pa ste/ 'dir tshigs su bcad pa sbyar ba'i dor smon lam nyid smon par bshad pa dang zhes bya ba ni 'di ltar tshigs su bcad pa ni smon pa zhes sbyar ro//smon lam gang yin pa de sems bskyed pa yin no zhes sems bskyed pa'i rnam grangs su yang ston te/ 'di yang sems la brten pa'i mchod pa kho na yin la/ sems can la brtse ba'i mchod pa gang yin pa de yang sems la brten pa kho na yin par blta'o//gzhi la gtod dang rtogs pa dang / /zhes bya ba ni gzhi la gtod pa dang / gzhi rtogs pa ste/ tshul bzhin yid la byed pa dang / yang dag pa'i lta ba yin par ston te/ de bzhin nyid kyi sgo nas ni byang chub chen po 'thob pa zhes bya ba ni sangs rgyas nyid 'thob pa zhes bya ba'i tha tshig ste/byang chub sems dpa' sangs rgyas la mchod pa la sogs pa'i rim gyis 'jug pa rnams sangs rgyas nyid 'thob pa gang yin pa 'di ni sangs rgyas bcom ldan 'das rnams la mchod pa'i mchog yin no/ / rgyu dang 'bras bu nyid dang ni/ zhes bya ba nas bzung ste da ni/ 'das pa dang / ma 'ongs pa dang / da ltar byung ba dang / nang dang phyi dang / rags pa dang phra ba dang / dman pa dang / gya nom pa'i dbye bas mchod pa shes par bya ste/ rnyed pa dang bkur sti'i sgo nas mchod pa la rnyed pa ni chos gos la sogs pa'o//bkur sti ni bstod pa dang phyag bya ba dang / thal mo sbyar ba la sogs pa'o/ /yang nga rgyal dang bcas pa ni dman pa'o/ /nga rgyal med pa ni gya nom pa ste zhes bya ba ni tshigs su bcad pa las de rnam gnyis zhes bshad pa gang yin pa de yang zhes bya ba'i sgras rnam pa gnyis nyid ston to//sgrub pa de'i dman pa nyid chung ngu'i dbye ba dang nga rgyal gyi dbye bas rnam pa gnyis su ston te/ sgrub pa chung ngu yang dman pa yin la/ nga rgyal dang bcas pa yang dman pa yin no/ /sgrub pa'i gya nom pa nyid kyang rnam pa gnyis su ston te/sgrub pa chen po yang gya nom pa yin la/ nga rgyal med pa yang gya nom pa yin no/ /sbyor ba zhes bya ba ni dus gzhan dang / de'i dus su sbyor ba'i bye brag gis so/ /'gro ba rnams bar chad pas ni ring po'o zhes bya ba ni tshe rabs gzhan mang po zhig 'das nas bcom ldan 'das la mchod pa thob par 'gyur ba gang yin pa'o//de ma thag pa'i nye ba'o/ /zhes bya ba ni da ltar gyi dus kyi mchod pa gang yin pa ste/ de ni thob ma thag tu bcom ldan 'das la mchod pa la 'jug pa gang yin pa'o/ / don thams cad ni 'dres pa nye bar 'dres pa yin pa'i phyir ro zhes bya ba ni 'dres pa phul du byung bar ston to/ /dge ba'i bshes gnyen la brten pa'i gnas skabs su bde ba la lhag par zhen pa'i gnyen po ni bshad ma thag pa kho na sbyar bar bya'o/ /dul ba ni tshul khrims dang ldan pa'i phyir dbang po dul bas so zhes bya ba ni kun tu chags par gyur pa'i dngos po dag la mtshan mar 'dzin par mi byed/mngon rtags su 'dzin par mi byed par mi dbang po rnams kyi sgo bsdams te/ gnas pa yin no/ /zhi ba'i ting nge 'dzin dang ldan pa'i phyir/ sems nang du zhi bar gnas pa'o//zhes bya ba ni gang gi tshe sems phyi rol du 'phros pa zhi gnas kyi stobs kyis dmigs pa gcig la 'jug pa de'i tshe zhi ba zhes bya'o/ /nye bar zhi ba ni shes rab dang ldan pa'i phyir nyon mongs pas nye bar gnas pa nye bar zhi bas so zhes bya ba ni gang gi tshe 'di'i sems rnam pa 'ga' zhig gis phyi rol du 'phro zhing nyon mongs pa rnams kyis dmigs pa las rab tu bskyod pa de'i tshe yang shes rab kyi gnyen po'i stobs kyis myur ba myur ba kho nar nye bar zhi bar byed pas so//bkur sti rnyed pa dag dang rim gro dang / /zhes bya ba la/ bkur sti ni yang dag pa'i yon tan bsgrags pa dang phyag 'tshal ba dang / ldang ba dang thal mo sbyar ba la sogs pa'o/ /rnyed pa ni chos gos dang bsod snyoms la sogs pa ste/ 'di dag gis dge ba'i bshes gnyen mchod par byed do/ /rim gro ni bsku ba dang / phyi ba dang / bkru ba la sogs pa'o/ /sgrub pa ni dge ba'i bshes gnyen gyis ji skad gdams pa de kho na bzhin du bsgrubs pas sgrub par byed pa ste/ bsgrubs pas dge ba'i bshes gnyen mchod par 'gyur ro/ /de bzhin blo ldan chos la ni/ /shes sam dus su 'dud pas bshes gnyen bgrod//ces bya ba ni kun shes par 'dod pa nyid ston te/ kun shes par 'dod pa'i bsam pas dge ba'i bshes gnyen bgrod kyi/ rnam par mtho 'tsham pa'i bsam pas kyang ma yin la/ chos brku ba'i phyir yang ma yin no/ /dus su zhes bya ba ni dus shes pa nyid ston te/dus su dge ba'i bshes gnyen gyi drung du 'gro'i/ zan za ba la sogs pa'i dus su ni ma yin no/ /'dud pas zhes bya ba ni nga rgyal bcag cing dman pa'i sems kyis nye bar 'gro ba'o/ /de ni bsnyen bkur rnyed la 'dod pa med/ /bsgrub par bya phyir de yongs sngo bar byed//ces bya ba ni bsgrub par bya ba'i don du dge ba'i bshes gnyen brten gyi/ rnyed pa dang bkur sti'i don du ni ma yin pa ste/ bdag dge ba'i chos rnams la sgrub par gyur cig /rnyed pa dang bkur sti dang tshigs su bcad pa la sogs pa'i don du ni/ma gyur cig ces bya ba yin no/ /zhing dag pa yang sbyang bar bya ba'i phyir zhes bya ba ni zhing dag pa sbyang ba ma yin no/ /'o na ci zhe na/ sangs rgyas kyi zhing yongs su dag pa ci 'dra ba de lta bur bdag gis kyang yongs su sbyang bar bya'o/ /zhes bya ba yin no/ /blo ldan rgyu dang 'bras bu dang //zhes bya ba ni dge ba'i bshes gnyen la brten pa dad pas ni da ltar byung ba'i rgyu yin no/ /da ltar byung ba ni 'bras bu yin no/ /de nyid ma 'ongs pa'i rgyu yin te/ 'di ni rgyu dang 'bras bur rnam par gzhag pa'o/ /chos kyi sgo'i rjes su 'gro bas bshes gnyen la brten ces bya ba la/chos kyi sgo'i rjes su 'gro ba ni chos kyi sgo'i rgyun gyi ting nge 'dzin te/ gang gi tshe dge ba'i bshes gnyen dang phrad nas ting nge 'dzin de thob la/ chos kyi rgyun de yang dang yang du sgom par byed na/ de ltar na dge ba'i bshes gnyen la bsnyen bkur byas par 'gyur ro//blo ldan sbyor dang 'gro ba dang / mos pa'i sgo nas ring ba dang nye ba'i dbye ba ste/ snga ma bzhin du sbyar bar bya'o/ /zhes bya ba ni 'gro ba rnam par chad pa'i ni ring ba'o/ /de ma thag pa'i ni nye ba'o/ /dus gzhan na sbyar bar bya ba'i ni ring ba'o/ / de'i dus su sbyar bar bya ba ni nye ba'o/ /dge ba'i bshes gnyen la brten pa gang zhig rab tu sbyar bar smon lam 'debs pa de ni ring ba'o/ /gang zhig bya bar smon lam 'debs pa ni nye ba'o/ /bshes gnyen dam pa la brten pa'i mchog ni snga ma bzhin no zhes bya ba ni rnam pa lngas rang gi sems kyis dge ba'i bshes gnyen rnams la brten pa mchog tu rig par bya'o//'di lta ste bstan pa dang ldan pa'i theg pa chen po'i chos la mos pa dang bsam pa ste/ bsam pa dgu po ro myang ba dang / rjes su yi rang ba dang / mngon par dga' ba'i bsam pa dag pa dang /ngoms mi shes pa dang / rgya chen po dang / dga' ba dang / phan pa dang / ma gos pa dang / dge ba'i bsam pa rnams dang / dbang 'byor pa nyid de/ nam mkha' mdzod la sogs pa'i ting nge 'dzin dang / rnam par mi rtog pa'i ye shes kyi thabs yongs su bzung ba dang /byang chub sems dpa' chen po thams cad dang / don gcig pa nyid la 'jug pa'i sgo nas te/ don thams cad ni 'dres pa nye bar 'dres pa yin pa'i phyir ro/ /de nyid sems kyi rnal 'byor yin no zhes bya ba ni bsam pa dang bsgom pa gang yin pa'o//tshad med pa rnam par dbye ba ni gzhan gyi don bya ba dag la mi skyo ba'i thabs te/ byang chub sems dpa' tshangs pa'i gnas dag gis gnas pa ni gzhan gyi don bya ba dag la skyo bar mi 'gyur ro/ /btang snyoms ni tshor ba de dag la sems can rnams kyi kun nas nyon mongs pa med par sgrub pa'i rnam pa yin no zhes bya ba ni kun nas nyon mongs pa med par sgrub pa'i rnam pa ni kun nas nyon mongs pa med pa sgrub pa'i rnam pas te/sems can 'di rnams tshor ba 'di dag la rjes su chags pa dang / khong khro ba'i nyes pa 'byung bar ma gyur cig snyam pa'o//dmigs pa med pa ni de bzhin nyid la 'jug pa ste/ de dag tu rnam par mi rtog pa'i phyir/ dmigs pa med pa dang 'dra bas na dmigs pa med pa'o zhes bya ba ni kye ma bde ba'o/ /sdug bsngal ba'o/ /dga' bar gyur cig ces bya ba dang / sems can rnams so zhes bya bar rnam par mi rtog par ro gcig pa'i phyir gnas skabs de na sems dang sems las byung ba'i tshogs kyi rnam pa de'i rnam pa so sor nges pa'i mtshan nyid ma yin pas dmigs pa med pa zhes bya'i//de dag la gnas skabs de na de bzhin nyid la dmigs pa med pa ni ma yin pas/rnam par shes pa lnga rnam par mi rtog pa lta bur rnam par mi rtog pa dag ces bya'o/ /khams rgyas pas de dag rnam par dag pa zhes bya ba ni chos dkar po 'phel bar gyur pas sdang ba la sogs pa mi mthun pa'i phyogs spangs pa'i phyir byams pa la sogs pa'i sa bon rgyas pa ni khams rgyas pa zhes bya'o//khams rgyas pas byams pa la sogs pa de dag sa brgyad pa la sogs pa la rnam par dag cing lhun gyis grub par 'jug ste/ de'i phyir gnas skabs de na dmigs pa med pa zhes bya'o/ /las gnyis te lus dang ngag gi las byams pa'i rgyu mthun pas bsdus pa gang yin pa zhes bya ba ni byams pas kun nas bslang ba'i lus dang ngag gi las zhi ba gang yin pa de ni byams pa'i rgyu mthun pa zhes bya ste/lus dang ngag gi las de yang gzugs kyi phung pos bsdus pa'i phyir dmigs pa med pa yin no//de bas na de la byams pa nye bar brtags nas byams pa dmigs pa med pa zhes bya'o/ /nyon mongs pa zad pas tshad med pa rnams dmigs pa med pa'o/ /ji ltar shes she na/ 'di ltar nyon mongs pa ni dmigs par bshad de/ yid kyi mdud pa rnams spangs pa'i phyir dmigs pa 'chad do zhes 'byung ba'i phyir ro zhes bya ba mdo'i dum bus de ston par byed do//nyon mongs pa ni dmigs par bshad pas nyon mongs pa spangs pa'i phyir/ byams pa la sogs pa dmigs pa med pa yin no/ /nyon mongs pa 'gags pa ni med pa'i phyir dmigs pa med pa ste/'gags pa de nub pa yin pa'i phyir ro/ /gnas pa dang khyad par du 'gyur ba'i skal ba can zhes bya ba ni gnas pa'i skal ba can dang khyad par du 'gyur ba'i skal ba can no/ /de la chung ngu ni rnam pa drug ste/ zhes bya ba rnam pa drug gang zhe na/mnyam par ma bzhag pa dang / chung ngu dang / 'bring dang / dman pa'i sa pa dang / bsam pa dman pa dang / nga rgyal dang bcas pa rnams so/ /rnam pa drug po 'di dag ni dman pa ste/ chung ngu dag yin no/ /gzhan nyid lhag pa'o zhes bya ba gzhan ji lta bu zhe na/mnyam par ma bzhag pa las bzlog pa mnyam par gzhag pa rnams ni mnyam par ma bzhag pa dag las lhag pa'o/ /chen po rnams ni chung ngu dag pas lhag pa'o/ /mchog gi sa pa dag ni dman pa'i sa dag pas lhag pa ste/ mos pas spyod pa'i sa la ni chung ngu dag yin no//rab tu dga' ba la ni chen po dag yin no/ /de la ni chung ngu dag yin no/ /dri ma med pa la ni chen po dag yin te/ de bzhin du sa gong nas gong du sa 'og ma la ltos nas lhag pa dag yin no/ /nyan thos dang rang sangs rgyas rnams kyi ni dman pa'o/ /sangs rgyas dang byang chub sems dpa' rnams kyi ni lhag pa'o//nga rgyal dang bcas pa ni sa bdun pa la mi skye ba'i chos la bzod pa dang bral ba dag go/ /de yan chad ni mi skye ba'i chos la bzod pa thob pas lhag pa yin no/ /tshangs pa'i gnas pa dag gis gnas pa ni rgyu'o zhes bya ba gang gi rgyu yin zhe na/rnam par smin pa la sogs pa'i ste/ 'di ltar byang chub sems dpa' bsam gyis mi khyab pa'i bsam gtan gyis gnas pa ni tshangs pa'i gnas pa bsgoms pas gzugs kyi khams su skye ba'i rigs pa las 'dul ba'i skye bo la ltos nas 'dod pa'i khams su skye ste/'di ni de'i rnam par smin pa'i 'bras bu yin no/ /tshogs rnams rdzogs par byed do zhes bya ba'i bdag po'i 'bras bu'o zhes bya ba ni tshangs pa'i gnas pa'i dbang gis tshogs rnams yongs su rdzogs par byed pa gang yin pa de ni bdag po'i 'bras bu'o zhes bya'o/ /sems can dag yongs su smin par byed do zhes bya ba ni skyes bu byed pa'i 'bras bu'o//zhes bya ba ni skyes bu byed pa yang brtson 'grus kyi khyad par las 'gyur la/ sems can yongs su smin pa yang brtson 'grus kyi khyad par med par mi 'byung bas de'i phyir skyes bu byed pa las 'byung ba gang yin pa de ni skyes bu byed pa'i 'bras bu zhes bya'o//rkyen mi bzad pas kyang mi 'gyur ro zhes bya ba ni rtags so zhes bya ba ni gnod sems la sogs pa'i gnas lta bu'i yul mi bzad pa mthong bas kyang 'gyur ba med de/ rtags 'dis ni gzhan dag gis 'di ni byams pa la sogs pa thob pa yin no zhes bya bar shes so//gnod sems dang 'dod pa'i 'dod chags dag ni btang snyoms kyi yin no zhes bya ba ni rjes su chags pa dang / khong khro ba ste/ 'dod chags kyis ni rjes su chags la gnod sems kyis ni khong khro bar byed do/ /tshul khrims 'joms pas gnyig la yang gnod par byed ces bya ba ni tshul khrims 'joms pa ni ji lta bu/de bcom pas ni ji ltar na gnyi ga la gnod par byed ce na/ gnyen po stobs chung ba ni gnod sems dang rnam par 'tshe ba la sogs pas kun tu spyod pas tshul khrims yang dag par blangs pa ni dge ba'i chos lhag par spyod pas 'joms so//de bcom pas 'di nyid la gsad pa dang bcing ba dang brdeg pa la sogs pa'i sdug bsngal nyams su myong ba dang / pha rol tu yang sems can dmyal bar 'gro ba la sogs pa'i gang yin pa de ni bdag nyid la gnod pa yin no/ /rang nyams can tshul khrims nyams pas srog gcod pa la sogs pa la 'jug pa gang yin pa de ni gzhan la gnod pa zhes bya ste/de ltar na gnyis ka gnod par byed pa zhes bya'o/ /nyams bcas zhes bya ba ni tshul khrims nyams pa ste/ tshul khrims ral ba zhes bya ba'i don to/ /'di la bdag nyid smod ces bya ba ni sems la bdag tu nye bar 'dogs te/'chal ba'i tshul khrims la gnas pa ni sems bdag nyid kyi ngo bo nyid kyis sems nyid la smod par byed de/ dge ba'i lam 'jigs pa med pa bor nas mi dge ba'i lam 'jigs pa dang bcas pa mkhas pa rnams kyis smad pa rnams la brten pa gang yin pa de ni ngan to zhes de ltar smod pa'i phyir ro//rnyed pas dman zhes bya ba ni 'di la gzhan dag smod pa yin te/ chos gos dang bsod snyoms kyang mi rnyed la/ mthong na yang 'di skad du tshe dang ldan pa 'di ni 'di lta bu byed pa 'di lta bur spyod pa mi gtsang ba ste/ grong gi tsher ma yin no//zhes smra'o/ /srung bas smod pa ni 'di tshul khrims dang ldan pa'i tshe bsrung ba byas pa'i lha gang dag yin pa de dag kyang smod cing srung bar mi byed do/ /de bzhin ston pas smad ces bya ba ni ston pa bcom ldan 'das kyis bong bu ltar kun tu spyod ces bya ba la sogs pas smod cing tshul khrims nyams pas 'dor ba mdzad do//rtsod bcas zhes bya ba ni 'di la tshangs pa mtshungs par spyod pa mkhas pa gzhan dag kyang chos nyid kyis rnam par smod do zhes bya ba'o/ /mi snyan zhes bya ba ni phyogs dang phyogs mtshams su yang 'di'i sgra dang tshigs su bcad pa mi snyan pa dag 'byung ba'o//de ni gzhan du mi khom rnams su skye/ /zhes bya ba ni tshe phyi ma'i kha na ma tho ba 'phel bar 'gyur ro zhes ston to/ /thob pa las nyams pa zhes bya ba ni byams pa la sogs pa thob pa las yongs su nyams pa gang yin pa ste/ 'di ni tshe kho na'i kha na ma tho ba yin no//ma tho ba nyams pas zhes pa 'dis ni tshe phyi ma'i kha na ma tho ba 'phel bar ston te/ 'di ltar ngo tsha ba rnam par dbye ba las slob dpon gyis thob pa dang ma thob pa las yongs su nyams pa ni tshe 'di dang tshe phyi ma'i kha na ma tho ba dang sbyor bar 'gyur ro/ /yid la sdug bsngal chen po 'thob//ces bya ba ni de las skyes pa sems kyi sdug bsngal dang yid mi bde ba lus kyi dang sems kyi tshe 'di dang tshe phyi ma la 'thob pa ste/ 'di ni tshad med pa rnams spyir bsam pa yin no/ /da ni khyad par te tshad med pa rnams kyi nang na snying rje mchog yin pas de dmigs pa la sogs pa'i dbye bas phal cher bsams te/rab 'bar dgra yi dbang du song / /zhes bya ba la sogs pa'i rab tu dbye bas de brtsam par bya'o/ /dgra'i dbang du song ba ni gang gi tshe bdud kyis dge ba la bar du gcod par byed pa'o/ /bgrod dka' lam la kun du zhugs/ /zhes bya ba la bgrod dka' ba ni 'khor ba ste/der 'gro ba'i lam la kun tu zhugs pa ni bgrod dka' ba'i lam la kun tu zhugs pa zhes bya'o/ /de dag kyang gang zhe na/ de dag bstan pa'i phyir/ yongs su mya ngan las mi 'da' ba'i chos can rnams te/ zhes bya ba smos so/ /lam rab tu stor ba ni mngon pa'i nga rgyal can rnams te/thar pa'i lam nor ba'i phyir ro zhes bya ba ni de dag yongs su mya ngan las 'da' ba'i chos can yin pa las mngon pa'i nga rgyal can du gyur pa'i phyir yun ring mo zhig tu thogs te/ de dag ni de kho na nyid ma rtogs pa rtogs par nga rgyal byed do//de ltar na de dag ji srid du nga rgyal kun tu spyod pa de srid du 'phags pa rnams kyi las stor bar 'gyur bas lam stor ba zhes bya'o/ /byang chub mchog gi sa bon nyid kyis ni bdag po'i 'bras bu'o zhes bya ba ni 'di ltar snying rje ni byang chub mchog sangs rgyas kyi ngo bo nyid kyi sa bon yin no//ji ltar sa bon yin zhe na/ 'di ltar de'i dbang gis de 'thob par 'gyur ro/ /go rims bzhin du gzhan dag bdag nyid la bde ba skyed pa dang / gdung bar byed pa nyid kyis ni skyes bu byed pa'i 'bras bu'o zhes bya ba ni skyes bu byed pas ni sems can rnams kyi bde ba mtho ris dang byang grol gyi ngo bo nyid bskyed la/bde ba skyed pa de la yang nang dang phyi'i dngos po yongs su gtong bar 'gyur ro/ /chos la brten pa'i zhes bya ba ni ji skad bshad pa'i 'bras bu lnga dang ldan pa'i snying rje'i chos la brten pa'i zhes bya ba'i tha tshig go//byang chub sems dpa' 'khor bar gtogs pa thams cad yang dag pa ji lta ba bzhin yongs su shes nas snying rje dang ldan pa'i phyir/ yongs su skyo bar yang mi 'gyur la/ zhes bya ba 'dis ni mya ngan las 'das pa la mi gnas pa nyid ston te/ snying rje'i stobs kyis nyan thos bzhin du mya ngan las 'das pa la gzhol bar mi 'gyur ro//blo mchog dang ldan pa'i phyir nyes pa dag gis gnod par yang mi 'gyur ro zhes bya ba 'dis ni 'khor ba la mi gnas pa nyid ston te/ shes rab kyi stobs kyis 'jig rten pa bzhin du 'khor ba la gzhol bar mi 'gyur ro//de ltar na shes rab kyi stobs kyis so so'i skye bo bzhin du 'khor ba la yang mi gnas la/ snying rje'i stobs kyis nyan thos bzhin du mya ngan las 'das pa la yang mi gnas pa'i mya ngan las 'das pa zhes bya'o/ /'jig rten sdug bsngal bdag nyid lta ba yi/ /zhes bya ba ni sdug bsngal gyi ngo bo nyid ces bya ba'i tha tshig go//snying rje'i bdag nyid can gyi brtse ba 'di/ /rang bzhin dang zhes bya ba la/ rang bzhin gyi sgras ni brtse ba'i rigs bstan to/ /so sor brtags pa zhes bya ba ni yon tan dang skyon yongs su rtog pas so/ /de sngon goms par byas dang ldan pa dang //zhes bya ba ni tshe rabs gzhan na yongs su bsgom pas so/ /mi mthun phyogs nyams rnam dag thob pas zhi/ /zhes bya ba ni 'dod chags dang bral ba thob pa'i sgo nas te/ de'i mi mthun pa'i phyogs rnam par 'tshe ba spangs na snying rje rnam par dag pa thob par 'gyur ro/ / mnyam pa ma yin pa gang yin pa de ni brtse ba ma yin no zhes bya ba ni 'jig rten pa dang nyan thos dang / rang sangs rgyas rnams kyi brtse ba ni sems can sdug bsngal zhing sdug bsngal gyi tshor bas nyen pa dag kho na la brtse bas mnyam pa ma yin gyi/ sangs rgyas dang byang chub sems dpa' rnams kyi brtse ba ni gang ci tshor ba de ni 'dir sdug bsngal ba'o zhes bya bas khams gsum du skyes pa'i sems can rnams la mnar med pa dag la ji lta bar srid pa'i rtse mor skyes pa rnams la yang de dang 'dra bar brtse ste/de bas na sems can thams cad la mnyam pa zhes bya'o/ / ji ltar nyan thos rnams kyi phung po'i lhag ma med pa'i mya ngan las 'das pa zad pas zad par 'gyur ba lta bu rtag tu ma yin pa de yang brtse ba ma yin te/ sangs rgyas bcom ldan 'das rnams kyi brtse ba ni rtag tu ste/ phung po'i lhag ma med pa'i mya ngan las 'das pa'i yang zad par mi 'gyur ro//de bzhin du lhag pa'i bsam pa la sogs pa thams cad la yang sbyar bar bya'o/ /'dod chags dang bral bas ni de'i mi mthun pa'i phyogs rnam par 'tshe ba spangs pa'i phyir ro zhes bya ba ni bag chags dang bcas te spangs pa'i phyir ro zhes bya ba'i don te/ de ltar na nyan thos de dag las kyang khyad par du 'phags so//mi skye ba'i chos la bzod pa thob pa'i phyir ro zhes bya ba ni sa brgyad pa la sogs pa la lam mngon par 'du bya ba med pa'i phyir ro/ /de'i rtsa ba ni snying rje'o zhes bya ba ni snying rje'i shing gi zhes bya ba'i tha tshig ste/ shing la ni rtsa ba med na sdong po med do//sdong po med na yal ga med do/ /yal ga med na lo ma med do/ /lo ma med na me tog med do/ /me tog med na 'bras bu med do/ /de bzhin du snying rje'i shing la rtsa ba snying rje med na sdong po bzod pa med do/ sdong po bzod pa med na sems can gyi don sems pa yal ga lta bu med do//de med na skye ba bzang po yongs su gzung ba'i don du smon pa lo ma lta bu med do/ /de med na skye ba bzang po me tog lta bu med do/ /de med na sems can yongs su smin pa 'bras bu lta bu med do/ /snying rje'i shing 'di ji ltar 'phel bar 'gyur ba de bsam par bya ste/ snying rje ni rtsa ba bshad do/ /rtsa ba de'i chu lta bu ni byams pa ste/ des rtsa ba 'chu bar byed do/ /snying rje'i sdug bsngal las bde ba skye ba gang yin pa'i bde ba des ni shing de'i sdong po bzod pa rgyas par byed do/ /snga ma dang phyi ma 'gag pa dang skye ba'i rim gyis smon lam gyi rgyun ma bcad pas smon lam rnams lo ma 'dor ba dang len pa dang chos mthun par rig par bya'o//zhes bya ba ni dper na shing ni lo ma rnying pa yongs su 'dor zhing sar pa yongs su len par byed pa de bzhin du byang chub sems dpa' yang sngon gyi smon lam chung ngu yongs su btang nas smon lam chen po mchog 'dzin par byed de/de ltar na gong nas gong du bya bas smon lam chung ngu rnams ni yongs su btang la/ chen po mchog rnams ni 'dzin par byed do/ /dper na dus bzang po las skyes pa'i shing dus dus su bcus pa las gdon mi za bar me tog la sogs pa 'byung ba de bzhin du nang gi rkyen grub ste rang gi rgyud yongs su smin pa las me tog la sogs pa lta bu'i skye ba la sogs pa khyad par du 'phags par 'gyur ro//de dag la chags par 'gyur ba lta smos kyang ci dgos zhes bya ba ni 'jig rten pa'i bde ba dang rang gi srog la'o//'jig rten pa'i snying rjes gnas pa rnams kyi ni kha na ma tho ba med kyang 'jig rten pa yin no/ /zhes bya ba ni gang zag pa dang bcas pa'o zhes bya ba'i tha tshig go/ /'dren pa'i thabs gang yin pa zhes bya ba ni snying rjes byams pa'i rang bzhin gyi thabs so/ /sems can rnams la sdug bsngal med par bya ba'i phyir ro zhes bya ba ni sems can rnams kyi sdug bsngal bsal ba'i rgyu mtshan du zhes bya ba'i tha tshig go//bdag dang gzhan mnyam pa nyid kyis sdug bsngal la yang dag pa nyid ji lta ba bzhin ma reg pa'i phyir ro zhes bya ba ni 'dir ji srid dus dang po ma thob pa de srid du bdag dang gzhan mnyam pa nyid 'thob par mi 'gyur gyi/sa dang po thob na chos kyi dbyings kun tu 'gro ba rtogs pa'i phyir sdug bsngal gyi chos nyid rtogs pa'i sgo nas/ sems can thams cad kyi rgyud la yod pa'i sdug bsngal la reg par 'gyur ro/ / byang chub sems dpa' rnams kyi snying rjes bskyed pa'i sdug bsngal nyid 'di ltar 'jig rten pa'i bde ba gang yin pa thams cad zil gyis gnon pa de lta bu'i bde bar 'gyur zhing zhes bya ba ni byang chub sems dpa' sems can skye ba la sogs pa'i sdug bsngal gyis g.yen spyo ba rnams kyis de las yongs su bskyab pa'i phyir zhugs pa rnams la ni/sems can dmyal ba ba'i sdug bsngal skye ba gang yin pa de yang sems can yongs su bskyab pa la ltos nas de dag gi bde ba chen po yin te/ 'jig rten pa'i bde ba gang yin pa de dag thams cad zil gyis gnon pa zhes bya ba ni snying rjes bskyed pa'i bde ba des so//dgra bcom pa don byas pa rnams kyang bde ba de dang mi ldan na zhes bya ba ni snying rjes sdug bsngal las skyes pa'i bde ba gang yin pa de ni nyan thos rang gi don lhur len pa rnams la med pas de dag de dang mi ldan pa yin no//gzhan dag lta smos kyang ci dgos zhes bya ba ni 'jig rten pa rnams so/ /tshigs su bcad pa 'dis las ni sdug bsngal gyi bde ba nyams su myong ba skad du bshad la/ 'grel pa las ni snying rjes drangs pa'i bde bas bde ba nyams su myong bar bshad pa ni 'di ltar rung ngo //de lta ma yin na ji ltar don byas pa rnams kyang de dang mi ldan zhes brjod de/ bde ba de lta bu gang yin pa de dang nyan thos rnams mi ldan gyi sdug bsngal dang ni ma yin no/ /'jig rten gsum gyi bde ba nye bar spyad pa rnams kyis bde ba byas pa gang yin pa des kyang zhes bya ba la/kyang zhes bya ba'i sgras ni/ brtse bas sbyin pa dang ldan pa'i bde ba gang yin pa des kyang zhes bya bar sbyar ro/ /gsum dang de dag gi 'bras bu 'phel ba'i zhes bya ba ni gsum 'phel ba dang / gsum po de las 'bras bu bde ba rnam pa gsum po de 'phel ba'i tshigs su bcad pa'o//de'i rjes su 'dzin par byed pa'i mthus byas pa'o/ /zhes bya ba ni sems can rjes su 'dzin par byed pa'i mthus byas pa zhes bya ba'i tha tshig ste/ byang chub sems dpa'i sbyin pa sbyin pa ni yo byad kyis phongs par mi 'gyur ro/ /yo byad kyis phongs pa med pa'i phyir sbyin pa'i dus na byang chub sems dpa' sbyin pa ji ltar 'dod pa bzhin sbyin pa'i mthu thogs pa med par 'gyur te 'di ni 'bras bu gsum pa yin no//ngo bo nyid rgyas pa zhes bya ba ni byang chub sems dpa'i sbyin pa sbyin pa'i snying rje rgyas par 'gyur ba 'di ni ngo bo nyid rgyas pa yin no//'phel ba zhes bya ba ni brtse bas sbyin pa sbyin pa'i byang chub sems dpa' la brtse ba'i khyad par gyis sbyin pa chung ngu yang 'phel bar 'gyur te/ de bas na longs spyod dag gis snying rje 'phel bar byed do/ /sbyin pa yongs su smin bya zhes bya ba ni gsum pa'i don du bdun pa yin te/de nyid kyi phyir 'grel pa las sbyin pas sems can yongs su smin par bya ba dang zhes bshad do/ /tshogs kun du 'dren pa zhes bya ba ni sbyin pa dang tshul khrims la sogs pa'o/ /snying rje can ni rtag tu rang sbyin la/ /ston dang 'dra ste zhes bya ba ni sbyin pa ni phyi'i dngos po yin pa'i phyir de ni sems pa med pa yin pas de la bstan du ci zhig yod/de bas na ston dang 'dra zhes bya ste/ ji ltar sems pa dang bcas pa la rjes su ston pa de bzhin du de la rjes su ston pa yin no/ /rang bde mi 'dod pa zhes bya ba ni bdag nyid bde bar mi 'dod kyi rnam pa thams cad du sems can rnams kho na la bde bar 'dod pa'o//yang na tha dad min bde bdag la'ang min/ /zhes bya ba ni sems can rnams dang tha dad pa ma yin pa'i bde ba zhes bya ba'i tha tshig go/ /sems can rnams la bde ba gang yin pa de nyid byang chub sems dpa'i bde ba yin te/'di ni bdag nyid kyi bde ba sems can rnams kyi dang tha dad par mi 'dod pas tha dad pa ma yin pa'i bde ba'o/ /bdag gis sbyin pa dang sbyin pa'i 'bras bu gang yin pa thams cad sems can rnams kho na la sbyin na/ ji ltar na bdag gi bde ba tha dad pa yin par sems/de dag bde ba nyid bdag gi bde ba yin pas zhes bya ba ni de dag gi bde ba ni de dag bde ba ste/ sems can bde ba zhes bya ba'i don to/ /gang la de dag bde bas bde ba yod pa de ni de dag bde bas bde ba ste/ de bas na de dag bde ba'i bde bas bdag bde'o zhes bya bar ston to//bdag ni longs spyod dag de ltar nye bar gnas pa'i bde ba gang yin pa de mi 'dod ces bya ba ni longs spyod la rgyab kyis phyogs pa la longs spyod shin tu mang por 'gyur ba gang yin pa zhes bya ba'i tha tshig go/ gzhan yang gal te bdag cung zad cig yongs su gtong zhing cung zad cig bdag gir byed na ni/de la 'di snyam du 'di ni bdag nyid kyang sbyin pa'i 'bras bu don du gnyer zhing longs spyod 'dod pas sbyin pa sbyin no zhes bya bar dogs par yang 'gyur na/ gang gi tshe bdag bdog pa thams cad yongs su gtong zhing de yang brtse bas te/ lan dang rnam par smin pa la mi lta bar zhugs pa de nyid kyi phyir khyod kyis bdag la sbyin pa'i 'bras bu don du gnyer ba med pa nyid du shes par bya'o zhes byang chub sems dpa' sbyin pa la rjes su ston par byed do//khyod kyi lan la lta dang bral bas na/ /'bras bu shin tu gzhan la gtong ba yin//zhes bya ba ni khyod ni thams cad du lan la lta bas 'bras bu 'byin te/ bdag ni khyod kyi lan la lta ba dang bral bas 'bras bu gzhan la gtong ngo zhes de skad du byang chub sems dpa' sbyin pa la rjes su ston to/ /tshol ba med pa zhes bya ba ni gzhan gyis ma btsal ba ste/don du ma gnyer ba gzhan gyi tshul tsam gyis byang chub sems dpa' sems shes pa sbyin pa sbyin par byed do/ /dga' ba ni so sor brtags pa med par rab tu dga' bas sbyin pa'i phyir ro zhes bya ba ni shes rab kyis ser sna'i sems tshar bcad nas sbyin pa ma yin pa zhes bya ba'i tha tshig go//sbyin pa'i sgo nas dga' ba ni sbyin pas dga' ba'o/ /'di ltar snying rjes pha rol tu phyin pa rnams mngon par bsgrub par 'gyur ba de lta tshigs su bcad pa'o/ /snying rjes ji ltar pha rol tu phyin pa mngon par bsgrub par 'gyur zhe na/ de'i mi mthun pa'i phyogs rnam par sun 'byin pa'i phyir de ser sna dang 'chal ba'i tshul khrims la sogs pa rnam par sun 'byin pa'i phyir zhes bya ba'i tha tshig go//de ltar na de'i mi mthun pa'i phyogs rnam par sun phyung bas snying rje de ni pha rol tu phyin pa mngon par sgrub pa byed par 'gyur te/de bas na pha rol tu phyin pa mngon par sgrub pa'i snying rje zhes bya'o/ /snying rje'i rkyen bstan pa'i tshigs su bcad pa zhes bya ba ni mdo las/ rkyen nyid bzhir gsungs te/ dmigs pa dang / bdag po dang / mtshungs pa de ma thag pa dang / rgyu'i rkyen nyid do/ /snying rje'i dmigs pa la sogs pa'i rkyen ji lta bu yin zhe na/ de bsam par bya ste/ tshor ba rnam pa gsum car yang dmigs pa'i rkyen yin te/ bde ba'i tshor ba ni 'gyur ba'i sdug bsngal nyid kyis dmigs pa yin no/ /sdug bsngal ni sdug bsngal gyi ngo bo nyid kyis so//sdug bsngal yang ma yin bde ba yang ma yin pa'i tshor ba ni 'du byed kyi sdug bsngal nyid kyis dmigs pa yin no/ /'di ni bde ba dang sdug bsngal dag gi rgyu yin te/ yang de dag 'dren pa'i phyir ro/ /zhes bya ba ni 'di ltar sdug bsngal yang ma yin bde ba yang ma yin pa'i tshor ba'i mtshan nyid ni 'di yin te/de gnyi ga'i gnas ngan len yongs su 'dzin pas gnyis las rnam par ma grol ba dang mi rtag pa nyid dang rjes su 'brel ba'i phyir sdug bsngal yang ma yin/ bde ba yang ma yin pa'i tshor ba tshor bar bshad do//de bas na bde ba dang sdug bsngal ba nyid kyi gnas ngan len pa dang rjes su 'brel ba'i phyir/ sdug bsngal yang ma yin/ /bde ba yang ma yin pa'i tshor ba dmigs pa nyid du bstan to/ /rgyu'i rkyen ni snying rje'i bag chags gang yin pa ste/ snying rje kun tu spyad pas rnam par smin pa'i rnam par shes pa la bag chags gzhag pa de ni rgyu'i rkyen to//dge ba'i bshes gnyen gyi dbang gis snying rje kun tu spyod pa gang yin pa de ni bdag po'i rkyen to/ /sems dang sems las byung ba'i tshogs sngar byung ba ni snying rje skye bar 'gyur ba'i mtshungs pa de ma thag pa'i rkyen to//de'i bsam pa'i phyir zhes bya ba de sems pa'i phyir yin par shes par bya'o/ /mi dmigs pa'i phyir ni bdag dang gzhan dang snying rjer mi dmigs pa'i phyir ro/ /zhes bya ba ni rnam par mi rtog pa'i gnas skabs na'o/ /rang gi sems kyis byams pa la sogs bsgom pa mchog /ces bya ba ni sems can gyi khams la khyim dang grong dang grong khyer la sogs pa'i dbye bas nyi tshe ba'i yo byad kyi rdzas kyis byams par byed pa gang yin pa de ni mchog ma yin gyi/ /rang gi sems kyis byams pa la sogs pa bsgom pa gang yin pa de ni 'dir mchog dang gtso bo yin no//rang gi sems kyis ji lta bu zhe na/ de ston te chos la mos pa'i sgo nas ni mdo la sogs pa las tshad med pa'i dbang du byas pa'i chos gang yin pa thos nas chos de la shin tu snying nas mos shing sems can thams cad la dmigs nas byams pa la snyoms par 'jug pa yin no//bsam pa'i sgo nas ni ro myang ba la sogs pa'i bsam pa dgus so/ /dbang 'byor pa nyid kyis ni sems can tshad med pa la byams pa'i'o/ /rnam par mi rtog pa'i ye shes kyi thabs yongs su gzung ba dang / byang chub sems dpa' thams cad dang don byed pa'i khyad par gyi sgo nas ni don thams cad 'dres shing nye bar 'dres pa'i phyir ro//rdzas chen pos zhes bya ba ni mu tig dang / be+e DUr+ya dang / chos gos dang / bsod snyoms la sogs pa rnyed pa'i gya nom pa dag gis so/ /bkur sti chen pos shin tu mchod pa dang ldan pa zhes bya ba ni yang dag par sgrub pa'i don du mchod pa'i phyir ro//rgyun ces bya ba ni rtag tu zhes bya ba'i tha tshig ste/ rtag tu bcom ldan 'das la mchod pa la sogs pa la 'jug pa yin pas tshigs su bcad pa phyed po 'dis ni mchod pa bstan to//yon tan mang ldan phan byed bshes la rtag brten pa/ /zhes bya ba ni dge ba'i bshes gnyen la brten pa bshad do/ /'gro la rjes su brtse ba grub pa kun thob 'gyur/ /zhes bya ba ni rjes su brtse bar byed pa nyid kyis tshad med pa rnams ston to/ /de bas na tshigs su bcad pa 'dis ji skad bshad pa'i mchod pa dang /brten pa dang tshad med pa rnams kyi go rims dang yon tan mdor bsdus nas bstan to zhes bya ba la/ go rims ni bshad ma thag pa'i tshul gyis bstan to/ /yon tan ni rdzas dang bkur sti chen pos zhes bya ba la sogs pas bstan to//yon tan mang po dang ldan pa ni de las gzhan pa dag dang ngo zhes bya ba ni/ bshes gnyen dul ba zhi zhing nyer zhi ba/ /yon tan lhag pa brtson byas lung gis phyug /de nyid rab tu rtogs pa smra mkhas ldan/ /brtse ba'i bdag nyid skyo ba spangs la brten//zhes bya ba la sogs pa'i yon tan dang ldan pa ste/ snying rje'i skabs yin pa'i phyir de las gzhan pa zhes bya ba smos so/ /mchod pa dang brten pa dang tshad med pa'i skabs rdzogs so// //tshad med pa'i 'og tu ngo tsha ba'i skabs te/ / 'di'i 'brel ba gang yin zhe na/ 'di ltar rang dang gzhan la phan pa la zhugs pa de bsgrub pa'i don du de dang rjes su mthun pa'i lam sgom par byed pas/ de'i 'og tu byang chub kyi phyogs dang mthun pa'i skabs so/ /byang chub sems dpa' rnams kyi bslab pa'i dmigs pa rnam pa 'di ni ngo bo nyid dang /khyad par gyi sgo nas bslab pa'i lam gyi rnam pa thams cad yin pas ngo tsha ba'i skabs nas bzung ste/ gang zag la bdag med pa'i skabs kyi bar thams cad ni byang chub kyi phyogs dang mthun pa'i skabs yin par rig par bya'o/ /ngo tsha mi mthun phyogs spangs dang //zhes bya ba ni ngo tsha ba'i ngo bo nyid kyis bstan pa ste/ mi mthun pa'i phyogs ngo tsha mi shes pa dang / khrel med pa spangs pa'i phyir ngo tsha ba mi mthun pa'i phyogs med par 'gyur bas ngo tsha ba'i ngo bo nyid du bshad do/ /grogs ni rnam par mi rtog pa'i ye shes so/ / yul kha na ma tho ba med cing dman pa ni nyan thos dang / rang sangs rgyas kyi theg pas te/ zag pa med pa'i phyir kha na ma tho ba med pa yin la/ nyan thos kyi theg pa yin pa'i phyir dman pa'o/ /bsten rnams pha rol phyin pa drug /bsten pa las ni le lo las ngo tsha bar 'gyur ro zhes bya ba ni byang chub sems dpa' gang gi tshe bsten par 'os pa pha rol tu phyin pa nams le lo byed cing sten par mi byed/pha rol tu phyin pa rnams la rab tu mi sbyor na des na ngo tsha bar 'gyur ro/ /'di ni sbyor ba dang mi sbyor bas ngo tsha ba yin no zhes bya ba ni sbyar ba ma yin pa la sbyor ba gang yin pa'o//sbyar ba ma yin pa la sbyor ba gang zhe na/ gang gi tshe le los nyon mongs pa dang mthun pa'i chos rnams la sbyor ba'o/ /'di ni ngo tsha ba chung ngu dang chen po ste/ sngar bshad pa'i rjes su 'brangs nas khong du chud par bya'o zhes bya ba ni mnyam par ma bzhag pa'i sa pa'i ngo tsha ba dang /mnyam par ma bzhag pa'i sa pa yang chung ngu dang 'bring dang dman pa dang nyan thos kyi theg pa mtshungs par ldan pa'i ngo tsha ba gang yin pa dang sa bdun po dag la nga rgyal dang bcas pa ste/ ngo tsha ba ji skad bstan pa de dag thams cad ni dman pa'o/ / sa las ngo tsha ba ltos na ni dman pa yang yin la/ lhag pa yang yin no/ /de las bzlog pa ni lhag pa ste/ mnyam par gzhag pa'i sa pa gang yin pa dang mnyam par ma bzhag pa'i sa pa las kyang chung ngu dang / 'bring ma gtogs pa ngo tsha ba chen po dang / sa brgyad pa la sogs pa'i ngo tsha ba ni lhag pa yin par rig par bya'o//blo ldan ngo tsha med pa ni/ /tshul bzhin min pas nyon mongs dag /dang du len zhes bya ba ni tshul bzhin ma yin pa yid la byed pa kun tu spyod pas bdag nyid la gnod par byed pa yin no/ /khong khro bas ni gzhan la gnod par byed do//yal bar 'dor ba dang nga rgyal dag gis ni gnyi ga la gnod par byed do/ /de nyid kyi phyir yal bar 'dor ba dang / nga rgyal gyi mjug thogs su/ sems can rnams dang tshul khrims 'joms/ /zhes bshad de/ yal bar 'dor bas ni sems can gyi don la bag med par 'gyur la/nga rgyal gyis ni sems can gdol pa yan chad kyi drung du song nas dge ba'i chos la sbyor bar mi byed do/ /de ltar na sems can la gnod pa yin no/ /bdag nyid la yang 'di ltar yal bar 'dor bas dge ba'i chos la 'jug pa yal bar 'dor zhing mi dge ba'i chos la 'jug pa dang du len to//nga rgyal gyis kyang khengs pa nyid kyis dge ba'i bshes gnyen gyi drung du 'gro zhing bsnyen bkur bya ba dang chos mnyan pa la sogs pa la mi 'jug go/ /de bas na mi dge ba'i bshes gnyen dang phrad pas na 'di'i tshul khrims la gnod par 'gyur ro//nga rgyal gyis nyams pa ni gang cung zad shes pa yang gzhan dag la mi ston zhing song zhing song nas sems can gyi don bya ba dag la yang mi 'jug ste/ de ltar na bdag nyid dang gzhan la gnod pa yin no//'gyod pas bdag nyid la gnod par byed ces bya ste/ 'di ltar bshad ma thag pa'i khong khro ba la sogs pa kun tu spyod pas 'gyod pa dang bcas par 'gyur ro/ /de bas na 'gyod par byed pas ni bdag nyid la smod do/ /bkur stis dman pa'i phyir gzhan dag smod do/ / dad ldan mi min tshogs dang ni/ /zhes bya ba ni lta'o/ /ston pas btang snyoms su mdzad pa'i phyir ston pas bong bu ltar spyod pa zhes bya ba la sogs pas smod de/ bcom ldan 'das kyis 'di ni 'phags pa'i chos rnams kyi snod ma yin no zhes bya bar mkhyen nas btang snyoms su mdzad do//tshangs pa mtshungs par spyod pa mkhas pa dag chos nyid kyis rnam par smod pa'i phyir zhes bya ba'i ni chos mthun pa'i rnam par smad pa'i phyir ro/ /phyogs dang phyogs mtshams su yang 'di mi snyan pa 'byung ba'i phyir/ 'jig rten las mi snyan pa 'thob po zhes bya ba'i tha tshig go//de las skyes pa'i sems la 'byung ba'i sdug bsngal dang yid mi bde ba so sor myong bar 'gyur ro zhes bya ba la/ sdug bsngal ni rnam par shes pa lnga dang mtshungs par ldan pa'o/ /yid mi bde ba ni yid kyi rnam par shes pa dang mtshungs par ldan pa'o//ngo tsha bas tshogs yongs su rdzogs par byed do zhes bya ba 'dis ni bdag po'i 'bras bu'o zhes bya ba ni ngo tsha ba ni yon tan thams cad kyi rtsa ba yin te/ de'i dbang gis tshogs yongs su rdzogs par 'gyur ro/ /'dis ni ngo tsha med pa ni de las gzhan pa'i gos gyon yang nyes pas dri ma can yin pa'i phyir ro//ngo tsha ba ni gos khyad par du 'phags pa yin no zhes bya ba ni/ byis pas gos kyis g.yogs pa ni lus la sa'i rdul la sogs pa dri ma mi 'byung mod kyi/ 'on kyang nang gi 'dod chags la sogs pa'i dri ma dang ldan pas gos dang bcas kyang dri ma can yin pa'i phyir dri ma dang bcas pa zhes bya'o//byang chub sems dpa' ngo tsha shes pa'i gos kyis g.yogs pa ni gos med kyang nang gi 'dod chags la sogs pa'i dri ma med pa'i phyir ro/ /de kho na'i lus dri ma dang bral ba yin pas/ de kho na gos dang bcas pa yin gyi/gzhan ni ma yin no/ /de nyid kyi phyir/ rgyal sras ngo tsha shes pa'i gos can ni/ /dgab pa med kyang nyes pa'i dri ma bral/ /zhes bya ba bshad do/ /nam mkha' dang rgyan dang 'dra ba nyid du ston to zhes bya ba ni/ nam mkha' dang 'dra ba nyid dang rgyan dang 'dra ba nyid do//'di skad du bshad pa yin te/ ji ltar nam mkha' rang bzhin gyis dri ma med pa la sprin dang khug rna la sogs pas mi gos pa de bzhin du/ byang chub sems dpa' ngo tsha dang ldan pa yang 'jig rten gyi chos rnyed pa dang mi rnyed pa la sogs pas mi gos so//ji ltar rgyan dang chos mthun pa yin zhe na/ ji ltar phal pa 'ga' zhig rgyan sna tshogs kyis brgyan te mi dag gi nang du song na mdzes pa ltar byang chub sems dpa' ngo tsha shes pa'i rgyan gyis brgyan pa yang de bzhin du mdzes so/ /bskyab par bya ba'i sems can yal bar bor nas ngo tsha ba'i phyir ro zhes bya ba ni byang chub sems dpa' ni ma lta bur byams pa dang ldan pas 'khor ba'i sdug bsngal las yongs su bskyab pa'i phyir/bdag gis yal bar bor nas sems can 'ga' zhig log par ltung bar song na mi rung ngo zhes sems can gyi don du rtag tu bag tsha ba kho nar gnas pas so//rta dang glang po che'i tshogs la sogs pa 'dra ba'i phyir ro zhes bya ba ni ji ltar rgyal po glang po che dang / rta dang shing rta la sogs pas phyir rgol ba dag las bsrungs pa de bzhin du ngo tsha ba yang sems can 'khor ba pa rnams kyi nyes pa thams cad las kun tu srung bar byed pa yin no//gos la sogs pa'i dpe 'di rnams kyis ni ngo tsha bas gnas pa na/ nyon mongs pa'i gnyen po nyid ces bya ba ni/ rgyal sras ngo tsha shes pa'i gos can ni/ /dgab pa med kyang nyes pa'i dri ma bral//zhes gang bshad pa yin te/ gnas pa ni skyil mo krung bcas nas bsam gtan byed pa'i nang du yang dag par 'jog pa'i gnas skabs yin te/ 'chag pa dang / nyal ba dang / 'greng ba dag na yang de dang 'dra'o/ /rgyu ba na 'jig rten gyi chos kyi gnyen po nyid ces bya ba ni/rgyal ba'i sras ni khrel dang ldan gyur pa/ /nam mkha' bzhin du chos kyis mi gos 'gyur/ /zhes gang bshad pa yin te/ rgyu ba ni bsod snyoms byed pa'i gnas skabs so/ /chos mthun pa dang / gnas pa dang mthun pa nyid ces bya ba ni//rgyal sras rnams kyi nang du 'dus gyur pa/ /ngo tsha shes pas brgyan pa mdzes pa yin/ /zhes bya ba la sogs pa'o/ /sems can yongs su smin par byed pa dang mthun pa nyid ni/ byang chub sems dpa' rnams kyi ngo tsha bas/ gdul ba rnams la ma bzhin byams pa nyid//ces bya ba 'di ston to/ /nyon mongs pa can ma yin par 'khor ba dang mthun pa nyid ni/ ngo tsha ba ni nyes pa thams cad las/ 'khor ba kun tu srung bar byed pa'ang yin/ /zhes bya ba 'dis bstan to/ /ngo tsha shes pa bsgom pa ni snga ma bzhin du rig par bya'o//zhes bya ba ji ltar snga ma bzhin zhe na/ ji ltar dri dang phreng ba dang byug pa la sogs pas mchod pa gtso bo ma yin gyi/ rang gi sems kyis mchod pa gtso bo yin pa de bzhin du/ gzhan la ltos nas ngo tsha ba byed pa'i ngo tsha ba ni chung la rang gi sems kyis ngo tsha ba ni gtso bo yin no/ /rang gi sems kyis ngo tsha ba de yang rnam pa lngas mchog tu rig par bya ste/'di lta ste/ ngo tsha shes pa dang ldan pa'i theg pa chen po'i chos la mos pa dang bsam pa ste/ bsam pa dgu po ro myong bar byed pa dang / rjes su yi rang ba dang / mngon par dga' ba'i bsam pa dag dang /ngoms mi shes pa dang / rgya chen po dang / dga' ba dang / phan pa dang / ma gos pa dang / dge ba'i bsam pa rnams dang / dbang 'byor pa ste/ sa chen po la zhugs pa rnams kyi ngo tsha ba gang yin pa dang / rnam par mi rtog pa'i ste rnam par mi rtog pa'i ye shes kyi thabs yongs su gzung ba dang gcig pa nyid de/don thams cad 'dres pa nye bar 'dres pa'i phyir byang chub sems dpa' thams cad dang don gcig pa nyid la 'jug pas so/ /ngo tsha ba'i skabs rdzogs so// //ngo tsha ba'i 'og tu bstan pa rnam par dbye ba ste/'di'i 'brel ba gang yin zhe na/ byang chub kyi phyogs dang mthun pa'i chos rnams kyi gtso bor gyur pa ni ngo tsha ba yin pas sngar bstan to/ /de ltar khrel dang ldan pas byang chub kyi phyogs dang mthun pa bsgom pa la rab tu sbyor ba ni le lo dang / rnam par g.yeng ba dang /'chal ba'i shes rab bsal nas brtan pa phun sum tshogs par 'gyur ro/ /de nyid kyi phyir chos gsum po brtson 'grus dang / ting nge 'dzin dang / shes rab la snying stobs dang sran thub pa dang / brtan pa zhes bya ba'o/ /chos de dag kyang khrel dang ldan pa la 'grub pas de'i phyir ngo tsha shes pa'i 'og tu brtan pa rnam par dbye ba yin no//brtson 'grus la sogs pa'i mtshan nyid do zhes bya ba ni brtson 'grus dang ting nge 'dzin dang / shes rab ces bya ba 'di ni brtan pa'i mtshan nyid de/ brtson 'grus la sogs pa'i chos gsum po 'di la snying stobs dang sran thub pa dang brtan pa zhes ming du gdags so//lhag ma ni sgrub pa'o zhes bya ba ni/ gang phyir gsum gyis byang chub sems/ /'jigs pa med par rab tu 'jug /ces bya ba yin te/ gang gi phyir chos gsum po 'di dag gis 'jig pa med par 'gyur ba de'i phyir brtan pa zhes bya ba'i ming 'thob po zhes bya ba ni de ltar sgrub par byed do//de la mi spro ba'i phyir zhes bya ba ni zhum pa'i sems kyis bya ba dag la mi spro ba gang yin pa'o/ /yang na ni rmongs pas te/ de'i thabs mi shes pa'i phyir ro zhes bya ba ni kun tu rmongs pa'i sems kyis bya ba sgrub pa'i shes pa gang yin pa'o//so sor brtags pa med par byed pa'o zhes bya ba ni brtson 'grus la sogs pa rab kyi mthar phyin cing rang gi ngang gis 'jug pa'o zhes bya ba'i tha tshig go/ /rang bzhin zhes bya ba ni rigs so//smon lam zhes bya ba ni sems bskyed pa'o/ /lta ba med pa nyid ni rang gi don to/ /sems can log par sgrub pa nyid ni gzhan gyi don to/ /zab mo thos pa nyid ni de kho na nyid kyi don to/ /rgya che ba thos pa nyid ni mthu'o/ /gdul bar bya ba gdul dka' ba nyid ni sems can yongs su smin par byed pa'o//sku bsam gyis mi khyab pa ni byang chub mchog gi sgo nas te/ 'di ni brtan pa'i rab tu dbye ba yin no/ /yang bya dka' ba la zhes bya ba de lta bu la sogs pas kyang brtan pa rab tu dbye ba'o/ / ji ltar phye ma leb dag gis ri rab bskyod par mi nus pa de bzhin du byang chub sems dpa' yang grogs po ngan pa dag gis byang chub sems dpa'i spyod pa las g.yos par mi nus so/ /grogs po ngan pa byang chub sems dpa' la phye ma leb ltar yang bar snang ngo / / ji ltar nam mkha' lding la sogs pa bya gzhan thams cad kyi 'dab lcag gis ri rab bskyod par mi nus pa de bzhin du phyi dang nang sdug bsngal 'bab pa dag gis byang chub sems dpa' byang chub sems dpa'i spyod pa las g.yos par mi nus so/ /ji ltar rgya mtsho dag gis ri rab bskyod par mi nus pa de bzhin du/byang chub sems dpa' yang theg pa chen po shin tu rgyas pa'i sde zab cing rgya cher bar thos nas de las mi g.yo'o/ /de nyid kyi phyir dpe gsum po 'dis ni byang chub sems dpa'i brtan pa'i mi 'gyur ba nyid bshad do zhes smos so// //brtan pa'i 'og tu mi skyo ba'i skabs te/byang chub sems dpa' de ltar brtan pa dang ldan pa'i byang chub sems dpa'i spyod pa dag la skyo bar mi 'gyur bas mi skyo ba brjod do/ /de dag gis skyo ba skyes na ngo tsha zhing mi skyo bar yang byed do zhes bya ba ni khrel yod pa dang ngo tsha la brten pas ni skyo ba mi skyed do/ / byang chub chen po la 'dun pa drag po ni ngo bo nyid do zhes bya ba ji ltar ngo bo nyid yin zhe na/ 'dun pa log na skyo bar 'gyur bas so zhes bya bas de ston te/ 'dir ni brtson 'grus dang ldan pa'i 'dun pa gzung ngo / /mi skyo ba ni brtson 'grus kyi ngo bo nyid do/ /de nyid kyi phyir brtson 'grus rtsom pa'i rten byed pa'i las can no zhes 'byung ngo //'dun pa yang mi skyo ba'i rgyu yin pas rgyu las 'bras bu btags nas rgyu ngo bo nyid du bstan to/ /mi skyo ba'i 'og tu bstan bcos shes pa nyid de/ /mi skyo ba dang ldan pa ni bstan bcos mnyan pa'i phyir rab tu sbyor ro//bstan bcos shes pa nyid kyi gzhi ni rig pa'i gnas lnga ste zhes bya ba la/ gzhi zhes bya ba ni dmigs pa zhes bya ba'i tha tshig go/ /ched du bya ba ni rang dang gzhan gyi don bya'o zhes bya ba ni 'di ltar byang chub sems dpa' rnams ni rang gi don dang gzhan gyi don gyi ched du rig pa'i gnas dag la rab tu sbyor ro//gnyis pa la de'i skyon yongs su shes shing zhes bya ba ni brtsad pa'i skyon yongs su shes pa zhes bya ba'i tha tshig go/ /gzhan yid ches par byed pa zhes bya ba 'di ni bstan bcos shes pa yin no/ /zhes bya bar gzhan dag yid ches par byed pa'o//yang na bstan bcos shes par sngar tshig gi mtshams bcad nas/ de'i 'og tu tshig bsdu ba zhes bya ba de lta bu la sogs pa'i rnam pas gzhan dag la don gtan la 'bebs pas yid ches pa skyed par byed do/ /des na yid ches par 'gyur na byang chub sems dpa'i dbang du 'gro bar 'gyur ro//thos nas go rims bzhin du zhes bya ba ni spyir thos pa'o/ /'dzin pas ni 'dzin par 'gyur ro/ /kha ton byed pas ni gzhung la zhugs pa'i sgo nas tshig gis byang bar 'gyur ro/ /yid kyis legs par brtags pa zhes bya ba ni rab tu dad pa'i yid kyis don phyin ci ma log par sems pa'i sgo nas so//ji ltar don phyin ci ma log par sems pa'i sgo nas yin zhe na/ ci rigs par de dag gi skyon dang yon tan khong du chud pa'i sgo nas so/ /ji ltar mthong bas legs par rtogs pa dag yin no zhe na/ bshad pa/legs par bshad pa dang / nyes par bshad pa dmigs pa'i phyir te/ gsung rab kyi lugs kyis legs par bshad pa dag yin no/ /'di las phyi rol pa rnams kyi ni nyes par bshad pa dag yin no/ /yang na zang zing med pa'i sems kyis gzhan dag la rig pa'i gnas lnga po 'di dag yang dag par rab tu ston pas legs par bshad pa yin no//bzlog pa ni nyes par bshad pa yin no/ /yang na don bzang po sems nyid kyis yon tan du mthong ba yin no/ /bzlog pa ni skyon du mthong ba yin no/ /tshig 'bru bzang po rtogs pa'i phyir legs par bshad pa yin no//tshig 'bru phyin ci log tu gzung ba'i phyir nyes par bshad pa yin no/ /ting nge 'dzin gyi sgo dag nas de'i bya ba bsgrub pa'i phyir ro zhes bya ba ni sems can gyi bya ba bsgrub pa'i phyir te/ rdzu 'phrul dang kun brjod pa'i cho 'phrul la sogs pas snod du byas nas/skal ba ji lta ba bzhin du rig pa'i gnas ston pa'i phyir ro/ /dam pa'i chos 'dzin par byed pa yang yin te/ gzungs dag gis de 'dzin pa'i phyir ro zhes bya ba ni gzungs dag gis theg pa chen po la sogs pa'i rig pa'i gnas rnams bde blag du 'dzin pa yin no//bstan bcos shes pa nyid kyi 'og tu 'jig rten shes pa nyid do/ /byang chub sems dpa' bstan bcos dag khong du chud nas bstan bcos thams cad la 'jigs pa med par 'gyur ro/ /bstan bcos shes pa ni 'jig rten shes par 'gyur la/'jig rten shes pa yang gang la gang zhig ji ltar bstan par bya ba de shes pa'i phyir/ de la de kho na bzhin du ston to/ /de'i phyir bstan bcos shes pa nyid kyi 'og tu/ 'jig rten shes pa nyid de/ bstan bcos shes pa nyid de ni 'jig rten shes pas gsal bar byed do//gang 'byung ba ni sdug bsngal gyi bden pa'o/ /gang dag gis 'byung ba ni kun 'byung ba'i bden pa'o/ /nub pa gang yin pa zhes bya ba ni/ 'gog pa'i bden pa ste/ nyon mongs pa rnams nub pa ni 'gog pa'i bden pa yin no/ /gang gis nub par 'gyur ba zhes bya ba ni lam gyi bden pas so// //'jig rten shes pa nyid kyi 'og tu ston pa rnams te/ de ltar 'jig rten shes pa dang bstan bcos shes pa ni 'jig rten gyi ston par 'gyur ro/ /gtsug lag bstan pa'i chos dang ni/ /zhes bya ba ni drang srong gis bshad pa'i chos ni ston pa yin no//drang srong ni sangs rgyas dang byang chub sems dpa' rnams te/ gzhan dag ni ma yin no/ /de dag gis bshad cing bstan pa'i chos ni ston pa yin gyi/ gang zag phyin ci log pas bshad pa ma yin no/ /de'i don dgongs pa can dang ni/ /zhes bya ba ni gtsug lag gi chos dag gi dgongs pa can ni ston pa yin gyi//pha dang ma ni gsad bya zhing / /zhes bya ba la sogs pa lta bu'i tshig 'bru ni ma yin no/ /gsum pa la ni log par bsams pa'i don phyin ci log tu drangs pa'o zhes bya ba ni ji skad du kha cig gang zag gcig 'byung ba na 'byung ngo zhes bya ba'i tshig 'dis na/gang zag yod do zhes zer zhing mngon par zhen pa lta bu'o/ /don de lta bu ni brten par mi bya ste/ 'di ltar bstan pa de lta bu la sogs pa ni bcom ldan 'das kyis mdo gzhan las rnam par phye ste/ mig dang gzugs rnams la brten nas mig gi rnams par shes pa skye'o zhes bya ba la sogs pa rgyas par gsungs nas/de'i 'og tu 'di la sems can dang / mi dang gang zag dang shed las skyes dang shed bu zhes ming du 'dogs so zhes bya ba la sogs pa gsungs pa de lta bu nges pa'i don la brten par bya'o//brjod pa dang bcas pa'i shes pa zhes bya ba ni brjod pa dang bcas pa'i shes pa gzung ba dang 'dzin pa dang ldan pa sngon po dang ser po la sogs pa'i rnam pa can/ shes bya sna tshogs kyi rnam pa can/ zag pa dang bcas pa gang yin pa de ni ston pa yin no/ /gsum pa ni gzhan las de'i don gyi tshul phyin ci ma log par thos pa las so zhes bya ba ni ston pa tshad mar gyur pa'am/des tshad mar mdzad pa nyan thos la sogs pas nges par byas shing rnam par phye ba gang yin pa de las nyams par mi 'gyur ba yin no/ /ston pa'i 'og tu so so yang dag par rig pa rnams te/de ltar yang dag par rab tu rnam par 'byed pa dang ldan pa ston par 'gyur ba ni chos dang / don dang / nges pa'i tshig dang / spobs pa so so yang dag par rig pa thob pas sems can rnams la chos ston par byed de/ de bas na ston pa'i 'og tu so so yang dag par rig pa rnams so//rnam grangs shes pa de don re re'i ming gi rnam grangs ji snyed pa shes pa yin no zhes bya ba ni dper na/ ma rig pa dang mun nag dang kun tu rmongs pa dang mun pa zhes bya ba de lta bu la sogs pa'o/ /mtshan nyid shes pa zhes bya ba ni rang dang spyi'i mtshan nyid shes pa gang yin pa'o//gsum pa ni tshig shes pa ste/ yul mi so so'i skad gang dag yin pa de dag la thogs pa med par shes pa ni nges pa'i tshig so so yang dag par rig pa zhes bya'o/ /bzhi pa ni ye shes zhes bya ba ni bdag nyid kyi spobs pa zhes bya ba gang yin pa'i ye shes shes pa gang yin pa zhes bya ba'i tha tshig ste/byang chub sems dpa' ni gang gis na chos ston 'di'i zag pa dang bcas pa dang / zag pa med pa dang / 'dus byas dang / 'dus ma byas la sogs pa'i chos rab tu rnam par dbye ba la spogs pa zad mi shes pa de lta bu'i spobs pa la dbang ba nyid 'thob po//de la chos dang don dag ston pa ni chos ston pa dang / bshad pa'i phyir ro zhes bya ba ni/ gang gi tshe chos bstan nas tshig dang don gyi sgo nas 'chad par byed pa yin no/ / 'dis ni so so yang dag par rig pa rnams kyi nges pa'i tshig bstan no zhes bya ba ni so so rang gis zhes bya ba'i sgras ni so so zhes bya ba bsdus so/ /mnyam pa nyid de kho na nyid rig nas zhes bya ba ni yang dag par zhes bya ba bsdus so/ /rnam grangs la sogs pa rab tu shes pa zhes bya ba ni rig pa zhes bya ba bsdus te/'di ni so so yang dag par rig pa zhes bya ba'i nges pa'i tshig yin no// //so so yang dag par rig pa'i 'og tu tshogs kyi skabs te/ de ltar so so yang dag par rig pa thob pa'i bsod nams dang ye shes kyi tshogs yongs su rdzogs par 'gyur bas tshogs kyi skabs yin no//kun nas nyon mongs pa med par 'khor bar 'gyur ro zhes bya ba ni ye shes kyi tshogs kyi stobs kyis ni kun nas nyon mongs pa med par 'khor bar 'gyur te/ sems can gyi don du ched du bsams bzhin du srid par skye ba yongs su 'dzin pa'i phyir 'khor ba'i nyes pa dag gis mi gos shing las dang nyon mongs pa'i dbang du 'gro bar mi 'gyur ro//bzod pa dang / brtson 'grus dang / bsam gtan gyi stobs kyis ni gnyi ga byed do zhes bya ba ni/ gnod pa byed pa dang du len pa dang / sdug bsngal la ji mi snyam pa'i bzod pa dag ni bsod nams kyi tshogs kyis bsdus so//chos la nges par rtog pa'i bzod pa ni ye shes kyi tshogs kyis bsdus so/ /'jig rten pa'i bsam gtan dang / gzugs med pa'i snyoms par 'jug pa dag dang / sems can la phan pa byed pa gang dag yin pa de dag ni bsod nams kyi tshogs kyis bsdus so//ting nge 'dzin gang zhig la brten nas rnam par mi rtog pa'i ye shes sgrub par byed pa de ni ye shes kyi tshogs kyis bsdus te/ brtson 'grus kyang de dang 'dra bar shes par bya'o/ /sbyin pa'i pha rol tu phyin pa la sogs pa lnga car yang ye shes kyi tshogs yin par 'dod de/sbyin pa la sogs pa bla na med pa yang dag par rdzogs pa'i byang chub tu yongs su bsngos pa'i phyir ro/ /tshogs kyi nges pa'i tshig la rgyun tu zhes bya ba ni/ sam zhes bya ba 'di bsdus so/ /bsgom pa thos nas zhes bya ba ni/b+hA zhes bya ba 'dis bsdus te/ de lta bu'i tshogs kyi nges pa'i tshig yin no/ /sa drug po dag gi ni mtshan ma med pa zhes bya ba ni mtshan ma med pa'i don du yin pas/ mtshan ma med par bya zhing sa bdun pa la 'jug pa'i phyir yin te/ de mtshan ma kun tu mi spyod pa'i phyir ro//gnyen pos ji lta bu zhe na/ lus la sogs pa'i chos la bdag med par 'jug pa'i sgo nas phyin ci log bzhi'i gnyen po mi gtsang ba dang / sdug bsngal ba dang / mi rtag pa dang / bdag med pa'i 'du shes rnams kyi yang gnyen po yin pa'i phyir ro zhes bya ba ni 'di ltar 'di skad du bshad pa yin no//nyan thos rnams kyi gtsang ba la sogs par phyin ci log pa'i gnyen por gyur pa mi gtsang ba la sogs pa'i rnam pa gang dag yin pa de dag kyang byang chub sems dpa'i mi mthun pa'i phyogs su gyur pa yin te/ 'di ltar lus la sogs pa ni byis pas kun brtags pa'i bdag nyid du med do/ /de med pa'i phyir/ mi rtag pa la sogs pa'i rnam pa yang gzung ba dang / 'dzin pa'i dngos por ma grub pa ste/ de bas na mi rtag pa la sogs pa'i rnam pa'i yang gnyen po yin pa'i phyir/byang chub sems dpa' rnams kyi dran pa nye bar gzhag pa dag ni/ nyan thos rnams dang thun mong ma yin zhes bya'o/ /dbus dang mtha' rnam par 'byed pa las ji skad bshad pa lta bu yin no zhes bya ba ni lus kyi ni gnas ngan len rab tu ston te/ de la rab tu brtags pas sdug bsngal gyi bden pa la 'jug go//de'i mtshan nyid ni gnas ngan len dang bcas pa'i 'du byed yin pa'i phyir ro/ /gnas ngan len ni 'du byed kyi sdug bsngal nyid de/ des zag pa dang bcas pa'i dngos po thams cad 'phags pas/ sdug bsngal du gzigs so//sred pa'i rgyu ni tshor ba ste/ de yongs su brtags pas kun 'byung ba'i bden pa la 'jug go/ /bdag tu mngon par zhen pa'i gzhi ni sems te/ de la yongs su brtags pas 'gog pa'i bden pa la 'jug ste/ bdag chad par dogs pa'i 'jigs pa med pa'i phyir ro//chos la yongs su brtags pas kun nas nyon mongs pa dang rnam par byang ba'i chos la rmongs pa'i phyir lam gyi bden pa la 'jug go zhes bya ba yin no/ /sems can thams cad kyi lus la sogs pa la dmigs pa'i phyir ro/ /zhes bya ba ni bdag gis sems can thams cad kyi lus la sogs pa dran pa nye bar gzhag pa bsgom pa la sbyar bar bya'o snyam pa yin no//yid la byed pas ji lta bu zhe na/ lus la sogs par mi dmigs pa'i phyir ro zhes bya ba ni byang chub sems dpa' ni ji ltar byis pa rnams kyis lus la sogs pa la gzung ba dang 'dzin pa nyid du dmigs pa de ltar dran pa nye bar gzhag pa bsgom pa yid la mi byed kyi/'o na ci zhe na/ chos la bdag med par yid la byed do/ /thob pas ji lta bu zhe na/ lus la sogs pa dang bral bar bya ba'i phyir yang ma yin/ mi bral bar bya ba'i phyir yang ma yin pa'o zhes bya ba ni chos kyi sku dang ni bral bar bya ba'i phyir yang ma yin la kun nas nyon mongs pa can gyi lus la sogs pa dag ni mi bral bar bya ba'i phyir yang ma yin pa'o//mthun pas ji lta bu zhe na/ pha rol tu phyin pa dang mthun pas/ de'i mi mthun pa'i phyogs kyi gnyen po yin pa'i phyir ro zhes bya ba ni byang chub sems dpa' lus la sogs pa dran pa nye bar gzhag pa bsgom pas lus 'di ni mi rtag pa la sogs pa yin no snyam nas nang dang phyi'i dngos po la lhag par ma zhen pas nang dang phyi'i dngos po thams cad yongs su btang ngo //de bzhin du srog gi phyir yang srog gcod pa la sogs pa la mi 'jug go/ /gshe ba dang spyo ba dang dbyug pa dang mtshon gyis bsnun pa la sogs pa thams cad kyang bzod do/ /le lo spangs pas sems can de dang de dag gi grogs kyi ngo bor yang 'gro'o/ /lus la sogs pa dran pa nye bar gzhag pa bsgoms pas rnam par g.yeng ba dang 'chal ba'i shes rab kyang rab tu spong ste/de ltar na de'i mi mthun pa'i phyogs kyi gnyen po yin pa'i phyir pha rol tu phyin pa dang mthun par dran pa nye bar gzhag pa bsgom pa yin no/ /de dag la de bstan pa'i phyir de dang ldan pa'i dran pa nye bar gzhag pa bsgom pa'i phyir ro zhes bya ba ni byang chub sems dpa' ni/de bstan pa'i phyir mdo sde la sogs pa las 'jig rten pa dang / nyan thos rnams kyi dran pa nye bar gzhag pa bsgom pa bshad pa gang yin pa de la mkhas par byed do/ /de kho na bzhin du yang dag pa ma yin pa'i ngo bor snang ba'i phyir ro zhes bya ba ni ji ltar sgyu ma la sgyu ma byas pa'i glang po che la sogs pa yang dag pa ma yin pa ltar lus kyang de dang 'dra'o//sems ni nam mkha' bzhin du rang bzhin gyis 'od gsal ba yongs su shes pas so zhes bya ba la sems zhes bya ba'i sgras ni sems kyi chos nyid bzung ste/de ni nam mkha' bzhin du gcig tu 'od gsal bas so/ /chos rnams ni glo bur nyid du yongs su shes pas so zhes bya ba ni chos dran pa nye bar gzhag pas bsdus pa'i chos kun nas nyon mongs pa dang rnam par byang ba gang dag yin pa de dag ni kun brtags pa ste/dper na nam mkha' la glo bur gyi rdul dang du ba dang sprin dang khug rna lta bu yin no/ /'dres pa nye bar 'dres pa bsgom pa'i phyir ro zhes bya ba ni sa brgyad pa la sogs pa la'o/ /sa bcu pa dang sangs rgyas kyis la ni ma lus par yang dag par 'grub pa nyid kyis yang dag par 'grub par 'gyur ro//dran pa nye bar gzhag pa'i 'og tu yang dag par spong ba bsgom pa ste/ dran pa nye bar gzhag pa bsgom pa ji snyed bshad pa de dag gi mi mthun pa'i phyogs nyes pa rnams kyi gnyen por yang dag par spong ba bsgom mo zhes bya ba ni rten la sogs pas dran pa nye bar gzhag pa bsgom pa bshad pa la theg pa chen po thos pa dang bsams pa dang bsgoms pa las byung ba'i shes rab la brten nas bsgom pa bshad pa shes rab de gsum char gyi mi mthun pa'i phyogs mi mnyan pa la sogs pa gang yin pa de'i gnyen por yang dag par spong ba bsgom ste/de bzhin du mi mthun pa'i phyogs lhag ma rnams kyi gnyen por yang dag pa spong ba bsgom pa yang sbyar bar bya'o/ /'khor ba'i phun sum tshogs pa rnams kun nas nyon mongs pa med par yongs su longs spyad pa zhes bya ba ni byang chub sems dpa' yang dag par spong ba bsgoms pas 'khor ba'i phun sum tshogs pa thams cad la kun nas nyon mongs pa med par yongs su spyod do//'dun pa la brten nas zhi gnas dang lhag mthong zhes bya ba'i rnal 'byor bsgom zhing 'bad do zhes bya ba ni yang dag par spong ba bsgom pa yang brtson 'grus kyi ngo bo nyid yin la/'bad pa dang brtson 'grus rtsom pa zhes bya ba la sogs pa yang brtson 'grus kyi ngo bo nyid yin na/ de ji ltar 'bad do zhes bya zhe na/ de bstan par bya ste/ re zhig dang po kho nar rnal 'byor pa byed 'dod pa nyid du 'gyur ro//de la brten nas 'di nyon mongs pa dag dang lhan cig 'gyed par bya ba'i phyir zhi gnas dang lhag mthong zhes bya ba bsgom pa la rab tu brtson pa 'bad par byed do/ /'bad par byed pa de la nyon mongs pa'i dgra rnams bar chad byed de/ zhi gnas kyi mi mthun pa'i phyogs ni zhum pa'o/ /lhag mthong gi ni rgod pa'o/ /de dag bsal ba'i phyir rnal 'byor pa 'di brtson 'grus rtsom pas 'bad pas brtson 'grus kyi gnas skabs ches khyad par du 'phags so/ /brtson 'grus bsgom pa des sems de zhum pa yang rab tu 'dzin la rgod pa yang yang dag par rab tu 'jog ste/de nyid kyi phyir zhum pa dang rgod pa dag gi gnyen por brtson 'grus rtsom mo zhes bshad do/ /gang gi tshe sems de la zhi gnas dang lhag mthong bsgom pa la mnyam pa thob par gyur pa de'i tshe ni btang snyoms su 'jog ste rab tu 'dzin par yang mi byed/rab tu 'jog par yang mi byed do/ /yang dag par spong ba'i rab tu dbye ba ji skad bshad pa thams cad la gnyen po zhes bya'o zhes bya ba ni/ 'dun pa la ni brten nas su/ /rnal 'byor rgyu mtshan bcas bsgom pa/ /zhes bshad ma thag pa gang yin pa'o//dad cing don du gnyer na 'bad pa'i phyir ro zhes bya ba ni dad na byed 'dod pa nyid du 'gyur te/ de nyid kyi phyir dad pa ni 'dun pa'i rten byed pa'i las can no zhes 'byung ngo / /byed 'dod na brtson 'grus rtsom ste/ de nyid kyi phyir 'dun pa yang brtson 'grus kyi rten byed pa'i las can du bstan to//gcig gis ni sems dmigs pa las mi 'phro bar byed pa'i phyir ro zhes bya ba ni de dran pas so/ /gnyis pas 'phro ba rab tu shes pa'i phyir ro zhes bya ba ni shes bzhin gyis so/ /shes bzhin shes rab kyi ngo bo nyid kyi chos te gang gi tshe sems de dmigs pa las gud du 'phro ba de'i tshe shes bzhin gyis myur ba kho nar bdag gi sems rnam par g.yengs so zhes bya bar yongs su gcod do//sems dang btang snyoms ni gnyen po'i thabs zhes bya ba ni shes bzhin gyis ni sems de rnam par g.yeng bas so zhes bya ba de tsam zhig shes pa 'ba' zhig tu zad do//sems pa ni sems kyi byed pa yin te/ des sems de dge ba la gtod par byed do/ /gang gi phyir sems pas zhum pa ni rab tu 'dzin la rgod pa ni rab tu 'jog pa de'i phyir sems la gnyen po zhes bya'o/ / btang snyoms ni shes rab kyi khyad par te des nye ba'i nyon mongs pa rnams rab tu spong bas de'i phyir btang snyoms la gnyen po zhes bya'o/ /sha'i spyan zhes bya ba ni rdzu 'phrul gyi rkang pa bsgoms pas byang chub sems dpa' gang gis na stong gsum la sogs pa'i 'jig rten gyi khams su gtogs pa'i gzugs kyi dbye ba shin tu phra ba yang mthong ba de lta bu'i rnam par smin pa la byung ba'i mig mngon par 'grub te/'phags pa shes rab kyi pha rol tu phyin pa las ji skad 'byung ba lta bu yin no/ /lha'i spyan ni bsam gtan gyis mngon par 'dus byas pa ste/sha'i spyan pas ches khyad par du 'phags pa yin no/ /shes rab kyi spyan 'phags pa ni/ rnam par mi rtog pa'i ye shes de bzhin nyid spyod yul pa yin no/ /chos kyi spyan ni mdo'i sde dang dbyangs kyis bsnyad pa'i sde la sogs pa'i chos thams cad du thogs pa med pa yin no//gnas pas rnam par brtse ba zhes bya ba'i ting nge 'dzin gyis rnam par brtse ba ste/ ting nge 'dzin ni gnas pa'i sgrar brjod do/ /ting nge 'dzin gyi dbang po'i dmigs pa ni zhi gnas yin no zhes bya ba ni gang la brten na byang chub sems dpa'i yon tan thams cad phun sum tshogs par 'gyur ba zhi gnas khyad par can bzung ste/ting nge 'dzin ni 'jig rten pa'i sems rtse gcig pa tsam thob pa'o/ /shes rab kyi dbang po'i gzhi ni lhag mthong ngo / /zhes bya ba ni 'dir yang mnyam par ma bzhag pa'i gnas skabs sam/ 'jig rten pa'i mnyam par gzhag pa'i gnas skabs kyi shes rab kyi dbang po yin par gzhag go//lhag mthong ni rnam par mi rtog pa'i ye shes te/ de bas na shes rab kyi dbang po de'i dmigs pa ni rnam par mi rtog pa'i ye shes yin no/ /de dag gi don gyi skabs kho nas dad pa la sogs pa 'di dag dbang byed pa'i don gyis dbang po rnams zhes bya'o zhes bya ba ni dad pa la sogs pa'i dmigs pa byang chub la sogs pa'i don gang dag yin pa de dag la de rnams dbang byed do//sa la zhugs pa'i gnas skabs ni go rims bzhin du chos la bdag med pa dang bdag dang gzhan mnyam pa nyid kyis chos thams cad dang /sems can thams cad mnyam pa nyid du rtogs pa'i phyir ro zhes bya ba ni chos la bdag med pas ni chos thams cad mnyam pa nyid du rtogs so/ /gang zag la bdag med pas ni sems can thams cad mnyam pa nyid du rtogs so//yang na byang chub sems dpas sa dang po thob pa'i dus na chos kyi dbyings kun tu 'gro ba rtogs pas sems can thams cad bdag tu mnyam pa nyid 'thob ste/ sa dang po thob pa'i dus na bdag gang yin pa de nyid sems can rnams yin pas ji ltar bdag gis bdag nyid kyi sdug bsngal nye bar zhi bar bya ba de bzhin du sems can thams cad kyi bya'o//zhes sems can thams cad dang khyad par med pa nyid 'thob pas bdag dang gzhan mnyam pa nyid kyis sems can thams cad la mnyam pa nyid rtogs so zhes bya'o/ /shes bya ma rgyal rgyal bya'i phyir//zhes bya ba ni byang chub sems dpa'i mos pas spyod pa'i sa la gnas pa ni sa dang po ma rgyal ba yin te/ de rgyal bar bya ba'i phyir dran pa kun tu spyod de/ ma rtogs pa rtogs pa gang yin pa de ni shes bya ma rgyal ba rgyal ba yin no/ /'di yi rnam 'byed rtog pa yi//mtshan ma thams cad 'joms par byed/ /ces bya ba ni chos rnam par 'byed pa yang dag byang chub kyi yan lag ni gang zag dang chos su 'dzin pa'i rnam par rtog pa rnams 'joms par byed pa yin no/ /de'i rjes la thob pa'i gnas pas gzhan dag 'bul zhes bya ba ni rnam par mi rtog pa'i rjes la thob pa'i ye shes kyis ma rtogs pa gang yin pa de 'bul ba yin no//gzhan 'dor ba'i phyir zhes bya ba ni rtogs pa gang yin pa de 'dor ba yin no/ /rnam par mi rtog pa'i gnas pas de la rtsol ba med par gnas par byed pa'i phyir te zhes bya ba ni rnam par mi rtog pa'i ye shes kyi btang snyoms shes bya thams cad la phyin ci ma log pa des rgyal ba gang yin pa de la gnas par byed do//shin tu sbyangs pa dang ting nge 'dzin dang btang snyoms ni kun nas nyon mongs pa med pa'i yan lag ste zhes bya ba la/ gang gis kun nas nyon mongs pa med pa ni shin tu sbyangs pas gnas ngan len dang bral ba'i phyir ro//gang la brten nas kun nas nyon mongs med par byed pa ni ting nge 'dzin la brten nas rnam par g.yeng ba dang bral ba'i phyir ro/ /kun nas nyon mongs pa med pa gang yin pa zhes bya ba ni btang snyoms so//rtog pa de nyid kyi rnam par gzhag pa yongs su gcod pa ni yang dag pa'i rtog pa'o zhes bya ba ni yang dag pa'i rtog pas ni bdag gi rnam pa 'dis kho na nyid 'di lta bu zhig rtogs so zhes de kho na nyid rtogs pa gang yin pa ste/ rnam par 'jog par byed cing de kho na bzhin du gzhung du yang byed la gzhan du ga la yang ston to//de rnam par gzhag pa mdo'i sde la sogs pa bcom ldan 'das kyis gsungs pa la 'jug pa yang de nyid yin te/ des de'i don rtogs pa'i phyir ro zhes bya ba la/ de rnam par gzhag pa zhes bya ba ni rtogs pa rnam par bzhag pa zhes bya ba'i tha tshig go//mdo'i sde la sogs pa bcom ldan 'das kyis gsungs pa la zhes bya ba ni/ gsung rab yan lag bcu gnyis po bcom ldan 'das kyis gsungs pa la zhes bya ba'i don to/ /'jug pa yang de nyid yin te zhes bya ba ni bdag ji ltar zhugs pa ltar ro//des de'i don rtogs pa'i phyir ro zhes bya ba ni rtogs pa sngon du 'gro ba can gyi yang dag par rtog pa des de'i don te gsung rab kyi don rtogs pa'i phyir ro zhes bya ba'i tha tshig ste/ gsung rab la mngon sum pa'i blo dang don phyin ci ma log par mthong ba yin no/ /las gsum rnam par dag pa ni yang dag pa'i ngag dang las kyi mtha' dang 'tsho ba ste zhes bya ba ni ngag rnam par dag pa dang /lus rnam par dag pa'o/ /gnyi ga rnam par dag pa ni de nyid gnyi ga rnam par dag pa yin te/ 'tsho ba rnam par dag pa'o/ /'di ni las gsum rnam par dag pa yin te/ngag gi kha gsag dang gcam bu la sogs pa'am/ lus kyi spyod lam bcos ma la sogs pas log par 'tsho bar byed na rnal 'byor pa 'di la ni mthong ba'i lam thob pa'i phyir de gnyi ga yang med la/ ngag gi las kha gsag dang gcam bu la sogs pa'am/lus kyi las spyod lam bcos ma la sogs pa la mi bya ba'i sdom pa 'thob po/ /de thob pas log pas chos gos la sogs pa tshol bar mi byed de/ de nyid kyi phyir gnyi ga rnam par dag pas yang dag pa'i 'tsho ba rnam par dag pa yin no/ /zhi gnas dang lhag mthong gi chos 'di dag kyang byang chub kyi phyogs dang mthun pa'i ngo bo nyid yin pas/de'i phyir zhi gnas dang lhag mthong rnam par dbye ba brtsam ste/ zhi gnas dang lhag mthong ni byang chub kyi phyogs dang mthun pa bsgom pa'i thabs yin no/ /yang dag pa'i ting nge 'dzin la brten nas zhes bya ba ni zhi gnas kyi ngo bo nyid kyi yang dag pa'i ting nge 'dzin de la brten nas so//sems la sems 'jog pa'i phyir zhes bya ba ni 'di lta ste khams gsum pa 'di ni sems tsam mo zhes bya ba ste/ gang gi tshe de ltar sems la sems 'jog par gyur pa de'i tshe zhi gnas kyi ting nge 'dzin grub pa thob po//zhi gnas thob pas mnyam par bzhag na yang dag pa ji lta ba bzhin du rab tu shes so/ /chos rab tu rnam par 'byed pa thob pas lhag mthong thob pa ni rnam par mi rtog pa'i ye shes te/ 'di ni byang chub sems dpa'i zhi gnas dang lhag mthong gi lam thun mong ma yin pa yin no//zhi gnas dang lhag mthong cha gcig pa ni gang gi tshe zhi gnas sgom par byed pa zhes bya ba ni gang gi tshe zhi gnas shas che ba gzugs med pa dag yin pa de'i tshe ni zhi gnas sgom pa kho na rab tu shes so/ /bsam gtan gsum gyi gnas skabs na ni lhag mthong gsal ba yin no//gnyi ga'i cha ni gang gi tshe cig car gnyi ga sgom par byed pa'o zhes bya ba ni bsam gtan bzhi pa la'o/ /byang chub sems dpa' rnams kyi zhi gnas dang lhag mthong de ni mos pas spyod pa'i sa la rgyu yin par 'dod do zhes bya ba ni ji ltar rgyu yin par 'dod ce na/'di ltar zhi gnas dang lhag mthong dang ldan pas sa dang po rtogs pa dang nges par 'byung ba'i lam la sogs pa 'gyur bas zhi gnas dang lhag mthong ni don de dag gi rten yin no/ /rten du gyur pa'i phyir rgyu yin no/ /zhi gnas dang lhag mthong gi rnal 'byor 'di ni thams cad sgrub par byed pa'i thabs yin no//zhi gnas dang lhag mthong bsgom pa la rab tu zhugs pa thabs mkhas pas de theg pa chen por yongs su sngo bar byed pas de'i phyir thabs la mkhas pa rnam par dbye ba yin no//sangs rgyas kyi chos rnams rdzogs par bya ba'i thabs gang yin zhe na/ rnam par mi rtog pa'i ye shes so/ /myur du mngon par rdzogs pa'i byang chub pa'i thabs gang zhe na/ sdig pa thams cad so sor bshags so/ /bsod nams thams cad kyi rjes su yi rang ngo //sangs rgyas thams cad la gsol ba 'debs so/ /bdag gi ye shes rdzogs par byang chub par gyur cig ces bya ba ste/ gtsug lag gi tshig bzhi po 'di dag gi don ni go rims bzhin du so sor bshags pa dang rjes su yi rang ba dang gsol ba dang yongs su bsngo ba yin no//'di ni myur du mngon par rdzogs par byang chub pa'i thabs yin te/ de la mkhas pa gang yin pa'o/ /lam rgyun mi gcod pa'i thabs ni mi gnas pa'i mya ngan las 'das pa yin no zhes bya ba ni de la mkhas pa ni shes rab kyi stobs kyis 'khor bar yang 'khor la chu yi pad+ma bzhin du 'khor ba pa'i nyes pa dag gis kyang mi gos so//snying rje'i stobs kyis nyan thos bzhin du mya ngan las 'das pa la yang mi gnas te/ 'di ni mi gnas pa'i mya ngan las 'das pa la mkhas pa yin no/ /byang chub sems dpa'i gzungs rnams kyang byang chub kyi phyogs dang mthun pa zhes bya ba'i ming thob pas de'i phyir gzungs bsam ste/de ltar thabs la mkhas pa la rab tu zhugs pa'i byang chub sems dpa' ni gzungs kyi stobs kyis sangs rgyas dang byang chub sems dpa' thams cad kyi bshad pa yang 'dzin par byed la/'di la sngon ma thos pa'i chos dag kyang rnam pa thams cad snang ngo / /gzungs kyi rab tu dbye ba las bstan gyi ngo bo nyid ma bshad pa/ /gzungs ni shes rab dang dran pa'i ngo bo nyid yin te/ shes rab dang dran pa'i khyad par du 'phags pa ni gzungs zhes bya ba'i ming thob po//sngon gyi las kyi rnam par smin pa zhes bya ba ni 'dis tshe rabs gzhan dag na yi ger 'dri ba dang mchod pa la sogs pa gzungs mngon par grub par byed pa'i las bsags par gyur pa gang yin pa de'i dbang gis gang gis na lan cig gis len cing 'dzin par byed pa de lta bu'i rnam par smin pa thob ste/ji skad du chos mngon pa kun las btus pa las/ skye bas thob pa'i dge ba gang yin zhe na/ dge ba'i chos rnams la sngon goms pa la brten nas gang gis na so sor brtags pa med par dge ba'i chos rnams la 'dod pa goms pa kun tu gnas pa de lta bu'i rnam par smin pa mngon par 'grub pa yin no zhes bshad pa lta bu'o//sa la ma zhugs pa rnams kyi ni chung ngu'o zhes bya ba ni mos pas spyod pa'i sa la gnas pa rnams kyi'o/ /gzhi ni ye shes so zhes bya ba ni sems pa ye shes su yongs su bsngos pa'i phyir ro//sems las mod la 'bras bur 'gyur ba yang sems tsam las ji ltar 'dod pa'i don 'grub pa'i sgo nas rig pas bya'o/ /zhes bya ba ni ji ltar 'dod pa'i don 'grub pa ni mod kyi 'bras bu ste/ de ltar gyur cig snyam pa de'i mjug thogs su de kho na ltar 'gyur ba yin no//lus brgya la sogs pa ni sa dang po nas bzung ste ston par byed do/ /gzungs dang smon lam phun sum tshogs pa de rnam par thar pa'i sgo gsum gyi sgrib pa thams cad spang ba'i phyir sgrub par byed do/ /de la sgrub pa na bdag nyid dang gzhan dag gi phyin ci log gi nga rgyal spang ba'i phyir zhugs pa yin no//ting nge 'dzin rnam pa gsum gyi spyod yul rnam pa gsum du shes par bya'o zhes bya ba ni dmigs pa rnam pa gsum du zhes bya ba'i tha tshig go/ /de gnyi ga la bdag tu 'dzin pa'i rten nye bar len pa'i phung po lnga zhes bya ba ni kun brtags pa'i gang zag la bdag tu 'dzin pa dang kun brtags pa'i chos la bdag tu 'dzin pa ste/chos dag la bdag ces byu ba'i sgras smos pa ni ngo bo nyid kyi don du blta bar bya'o/ /bdag tu 'dzin pa gnyis po 'di'i rten nye bar len pa'i phung po lnga ni smon pa med pa'i ting nge 'dzin gyi dmigs pa yin no//rten de nye bar zhi ba zhes bya ba ni mya ngan las 'das pa thob na nye bar len pa'i phung po lnga nye bar zhi zhing nye bar len pa med par 'gyur ba med pas mtshan ma med pa'i ting nge 'dzin gyi dmigs pa ni nye bar len pa'i phung po lnga nye bar zhi ba ste/mya ngan las 'das pa'o zhes bya ba'i tha tshig go/ /gzung ba rnam pa gsum zhes bya ba ni/ bdag med pa rnam pa gnyis dang / nye bar len pa'i phung po lnga dang mya ngan las 'das pa ste gsum po dag la 'dzin pa stong pa nyid la sogs pa'i ting nge 'dzin gsum du shes par bya'o//smon pa med pa ni bdag tu 'dzin pa'i rten de la rgyab kyis phyogs pa yin no zhes bya ba la/ bdag tu 'dzin pa'i rten ni nye bar len pa'i phung po lnga'o/ /smon pa med pa'i ting nge 'dzin ni de dag la rgyab kyis phyogs pa yin te/sdug bsngal gyis bdag nyid de la smon par mi byed do/ /smon pa med pa'i ting nge 'dzin ni de dag tu 'dzin pa'i rten spang ba'i phyir yin no zhes bya ba ni nye bar len pa'i phung po lnga ni spang bar bya ba yin te/ de spang ba'i phyir smon pa med pa'i ting nge 'dzin to/ / 'du byed thams cad ni mi rtag pa'o/ /'du byed thams cad ni sdug bsngal ba'o/ /zhes bya ba ni smon pa med pa'i ting nge 'dzin gyi rgyu'i dngos por bstan to/ /zhes bya ba ni 'du byed thams cad mi rtag cing sog le bsregs pa lta bur sdug bsngal bar rig nas de dag la smon par mi byed do//de'i phyir chos kyi sdom 'di gnyis smon pa med pa'i ting nge 'dzin gyi rgyu'i dngos po gnas zhes bya'o/ /byang chub sems dpa' rnams kyi mi rtag pa'i don ni med pa'i don ces bya ba ni/ mi zhes bya ba ni dgag par brjod pa yin la/ rtag pa zhes bya ba'i sgra ni rtag pa brjod pa yin pas mi rtag pa zhes bya ba ni gang dus rtag tu med pa'o zhes bya ba'i tha tshig ste/'di ni mi rtag pa'i don rnam grangs med pa yin no/ /rtag tu med pa gang yin pa de ni mi rtag pa yin pas de dag gi kun brtags pa'i mtshan nyid gang yin pa'o zhes bya ba ni 'du byed de dag gi kun brtags pa'i gang zag dang chos kyi mtshan nyid gang yin pa de ni rtag tu med pa yin no//sdug bsngal ba'i don yang dag pa ma yin pa'i rnam par rtog pa'i don te/ gzhan gyi dbang gi mtshan nyid gang dag yin pa'o zhes bya ba ni 'di ltar sems dang sems las byung ba phyin ci log dag ni yang dag pa ma yin pa dag ni rtog par byed do//yang dag pa ma yin pa gang yin pa de ni slu ba'i bdag nyid kyi phyir sdug bsngal yin te/ 'di skad du sems dang sems las byung ba'i phyin ci log pa rnams yang dag pa ma yin pa gang zag dang chos rnams su kun rtog par byed kyi 'di la gang zag dang chos yod pa ni ma yin no zhes bshad pa yin no//yang na sems dang sems las byung ba/ zag pa dang bcas pa'i phyin ci log pa rnams kyi skyes ma thag tu 'jig pa gang yin pa de la ni sdug bsngal ba yin no/ / de nyid kyi phyir mi rtag pa rnam pa lnga ste/ mi rtag pa'i rnam pa ni sdug bsngal gyi rnam pa 'dren par byed do/ /'dis ni 'du byed thams cad ni sdug bsngal ba'o zhes bya ba ni chos kyi mdo 'di ston to/ /bdag med pa'i don ni kun tu rtog pa tsam gyi don te/ zhes bya ba 'dis ni chos thams cad ni bdag med pa'o zhes bya ba'i chos kyi mdo 'di ston te/'di skad du kun tu rtog pa tsam dang tha snyad tsam yod kyi don dam par ni chos thams cad kun brtags pa'i gang zag dang chos med pa'i phyir bdag med pa'o zhes bshad pa yin no/ /de nyid kyi phyir kho na zhes bya ba'i sgras nges par gzung ba'i phyir kun brtags pa'i bdag ni med kyi kun tu rtog pa tsam zhig yod pas/gang zag dang chos med pa'i don ni bdag med pa'i don to zhes bshad pa yin no zhes bya ba smos so/ /zhi ba'i don ni rnam par rtog pa nye bar zhi ba'i don to//yongs su grub pa'i mtshan nyid mya ngan las 'das pa yin no zhes bya ba 'dis ni mya ngan las 'das pa ni zhi ba'o zhes bya ba ni chos kyi mdo 'di ston te/ sems dang sems las byung ba'i phyin ci log pa sdug bsngal gyi ngo bo nyid rnams so sor brtags pas 'gog pa'i phyir zhi ba ni mya ngan las 'das pa'o zhes bya'o//mi rung ba'i phyir zhes bya ba ni 'jug pa mi rung ba'i phyir ro/ /de'i mjug thogs su 'jug par mi 'gyur te zhes bya ba ni dus gzhan gyi bar du gnas nas/ 'gag par 'gyur ba'i bar du'o/ / ci'i phyir zhe na/ de bstan par rgyun med pa'i phyir ro zhes bya ba smos te/ gnas pa'i ngo bo nyid la ni rgyun rung ba ma yin no/ /rgyu las skyes pa'i phyir te zhes bya ba 'dis ni skad cig ma nyid du bsgrub pa'i gtan tshigs gnyis pa yin no/ /de lta bas na gdon mi za bar skad cig re re la snga ma'i rgyun can gzhan zhig yod do zhes bya ba ni skad cig ma dang po ni rgyu yin la phyi ma ni 'bras bu yin pa'o//dus gzhan na 'gag pa nyid kyang 'gal ba'i phyir ro zhes bya ba ni lung dang yid la byed pa dang 'gal ba ston te/ de la lung dang 'gal ba ni chos thams cad ni skad cig pa ste/dus re zhig pa yun thung ngu gnas pa'o zhes 'byung bas te/ dus re zhig smos pa ni skad cig tsam gnas pa'i phyir ro/ /yun thung ngu zhes bya ba ni skad cig ma las phyin chad du mi gnas pa zhes bya ba'i tha tshig go/ /skye ba dang 'jig pa dag tu yid la byed pa zhes bya ba ni yid la byed pa dang 'gal ba ston pa yin no//'chi ba'i dus la sogs pa ni 'gag par mthong ba gzhan dag ji lta bar zhes bya ba ni chos mi mthun pa'i dpe ste/ 'di skad du rnal 'byor pa yid la byed pa thob pa skad cig ma re re la skye ba dang 'jig par lta ba rnams yid byung ba dang 'dod chags dang bral ba dang rnam par grol ba dag tu 'gyur gyi/gang dag skad cig re re la skye ba dang 'jig par lta ba med cing yun ring mo zhig na 'chi bar lta ba de dag ni yid byung ba la sogs par mi 'gyur ro zhes bshad pa yin no/ /de'i mthu ni mi 'dra bar skye ba la rab tu grub ces bya ba ni sngon po nyid ni mtshan nyid kyis 'jig pa'i ngang can yin pa'i phyir rang nyid 'gags la me dang 'brel bas ni dmar po nyid du 'gyur te/'di ni mi 'dra ba skye ba yin no/ /'di ltar de dang 'brel pa las sngon po nyid kyi rgyun mi 'dra bar 'dzin gyi rnam pa thams cad du mi 'jug pa nyid ni ma yin no zhes bya ba ni 'di ltar lcags kyi thu lum bsregs pa slar sngon po nyid du 'gyur ba yang lcags kyi thu lum de la sngon po nyid kyi sa bon yod pas yang sngon po nyid du 'gyur te/de lta bas na rnam pa thams cad du mi 'jug pa nyid du rab tu shes pa ni ma yin no zhes bya'o//'on te chu shin tu 'dus pa rnams rnam pa thams cad du mi 'jug pa nyid ma yin nam snyam du sems na/ de dag kyang rang gi ngang kho nas 'jig ste/ me ni de dag gi rgyun 'dra ba skye ba'i rgyu yin no/ gal te me dang 'brel ba las 'jig par gyur na ni de'i mod kho na la 'gyur ro//'dra ba'i phyir de'i blo 'byung gi de yod pa'i phyir ni ma yin no zhes bya bar ci mngon zhes bya ba ni gnas pa ni de kho na bzhin du 'dug pa'i phyir ro zhes bya ba'i tha tshig go/ /skad cig ma dang po dang khyad par med pa'i phyir zhes bya ba ni gal te skyes ma thag tu mi 'jig go//yun ring mo zhig gnas nas 'jig go/ /zhes bya bar bzung na/ de la gang gis na khyad par khas blangs na/ khyad par 'dis na yun ring mo zhig gnas nas phyis 'jig go zhes bya ba skad cig ma dang po nas khyad par 'ga' zhig yod dam/des rjes su zin par 'jug pa'i sgo nas zhes bya ba ni sems kyis rjes su zin par 'jug pa'i sgo nas te/ sems kyis yongs su zin pa'i 'du byed rnams sems de'i rjes su 'jug pas de lta bas na de ni sems kyi 'bras bu yin no/ /de bzhin du rnam par shes pa'i rkyen gyis ming dang gzugs zhes kyang gsungs pa lta bu zhes bya ba ni rnam par shes pa ni ming dang gzugs kyi bdag po'i rkyen te rnam par shes pa'i dbang gis de 'grub pa'i phyir ro//de lta bas na sems kyi 'bras bu zhes bya'o/ /phyi'i dngos po rnams ngan par 'gyur zhes bya ba ni sa yang tsha sgo dang sdong dum dang tshor ma la sogs pas gang bar 'gyur la/gzugs dang sgra dang dri dang ro dang reg bya la sogs pa ngan par 'gyur ro/ /bzlog pa dge ba byed pa rnams la ni gya nom pa bdag yin no/ /dang po zhes bya ba ni dang por skye ba ste/ 'di ltar 'og nas/ gzugs brnyan du ni skye ba ste/ /zhes 'chad par 'gyur ba yin no/ /dang por skye ba ni dang po nyid du bdag gi dngos po mngon par 'grub pa gang yin pa'o zhes bya ba ni rnam par shes pa brgyal ba'i dus na nying mtshams sbyor ba'i skad cig ma gang yin pa'o//'dod pa gzhan gyis sprul pa ni lha dag cig ste/ de dag ni bud med gang la dga' bar 'dod pa de la rang 'dod pa'i gos dang rgyan dang me tog dang sgral sogs pa sprul par byed do/ /bud med dag kyang skyes pa gang la dga' bar 'dod pa de la de kho na bzhin du rang 'dod pa'i gos dang rgyan la sogs pa sprul par byed do//de ltar na 'dod pa gzhan dag gis sprul pa rnams zhes bya'o/ /'od mi gsal ba nyid du ni de las gzhan du skye ba rnams kyi gang yin pa'o zhes bya ba ni dga' ldan dang / 'thab bral dang sum cu rtsa gsum pa dang /rgyal chen bzhi pa rnams dang / de bzhin du 'dzam bu'i gling la sogs par mi khyad par du 'phags pa gang yin pa'o/ /rgyu dang tshad kyi khyad par dang / /zhes bya ba ni rgyu'i khyad par dang tshad kyi khyad par ste/ tshad kyi khyad par ni nur nur po la sogs pa'i gnas skabs so//gal te de zhes bya ba ni dang por skye ba'o/ /rgyu nyid kyis khyad par du ma gyur na zhes bya ba ni rgyu'i khyad par las skye ba khyad par can du ma gyur na zhes bya ba'i tha tshig go/ /de nyid kyi phyir des na rgyu khyad par med pa'i phyir 'du byed kyi 'jug pa phyi ma'i khyad par phyi ma phyi ma dmigs par mi 'gyur ro//khyad par yod na ni de'i phyi ma phyi ma dag las de gzhan yin pa'i phyir zhes bya ba ni khyad par phyi ma phyi ma dag las skye ba de gzhan yin pa'i phyir skad cig ma nyid du 'grub po/ /skad cig re re la gzhan du gyur pa med par tshad khyad par yod par mi 'gyur ro zhes bya ba ni nur nur po dang mar mer po dang gor gor po dang rkang lag ma 'gyus pa'i gnas skabs so//rten gnas bzhin du de la brten pa mi gnas par ni rung ba ma yin/ zhes bya ba ni mi gnas bzhin du mig gi rnam par shes pa 'gro bar ni rigs pa ma yin te/ mig gi rnam par shes pa skad cig ma nyid yin la/ mig skad cig ma nyid ma yin no zhes bya ba'i tha tshig go/ /gal te 'gro ba skyes pas chos yul gzhan du khyer ro zhe na/ des na 'gro ba'i dus na gang du yang ma song bas/ gnas pa kho na la 'gro ba 'thad pa ma yin no zhes bya ba ni ji skad du ji srid du 'gro ba'i bdag gi ngo bo ma thob pa de srid du 'du byed rnams la yul gzhan du 'gro ba'i bya ba med do zhes bshad pa yin no//gnas pa ni yul gzhan du ma phyin pa'i phyir 'du byed yul de na gnas pa bzhin du 'gro bas khyer ro zhes bya ba ji ltar rung / skad cig ma tha ma la sa bon med pa nyid du rung ba ma yin no/ /zhes bya ba ni de bzhin du gnas pa ni dus gzhan na sa bon med pa nyid du mi 'thad de/ gal te skad cig ma re re la 'du byed rnams gzhan nyid du 'gyur na ni des na nyon mongs pa skye bar 'dod pa rnams kyi nyon mongs pa 'gags pas tha ma nyid du 'gyur ro//de med na tha ma nyid mi srid pa'i phyir ro zhes bya ba gang med na zhe na/ skad cig re re la 'dus byas rnam pa gzhan nyid du 'gyur ba med na ste/ skad cig la 'jig pa'i dang can yin na ni der 'gyur ro/ /de gnyi ga la yang skad cig re re la yongs su 'gyur ba med pa mi 'gyur te zhes bya ba la/gnyi ga ni 'phel ba dang 'bri ba ste/ gal te chu de dag 'jig pa'i ngang can zhig yin na ni/ des na chu mig dang mtsho dang mtshe'u la sogs pa yang gang bar 'gyur la/ dral na 'bab pa yang 'gyur gyi/ de bzhin du gnas pa la ni 'bab pa med do/ /skam pa yang de kho na dang 'dra ste/ gal te de dag dang po nyid nas skad cig la 'jig pa'i dang can gyis rnam par 'jig na ni des na 'grib par 'gyur gyi gnas pa rnams la ni ma yin no/ /phyis kyang khyad par gyi rgyu med pa'i phyir ro zhes bya ba ni rim pa'i rgyu skad cig la ngang gis 'jig pa ma gtogs par chu mig dang mtsho dang mtshe'u la sogs pa gang ba'am skams pa'i khyad par gyi rgyu gzhan ni med do//dus kyis byas pa ni dus gzhan gyi bar du yongs su gnas pas so/ /zhes bya ba ni dus gzhan gyi bar du yongs su gnas pas yul dang gnas grong dang grong khyer la sogs pa dgon par 'gyur ba'o//kha dog dang dri dang ro dang reg bya rnams ni sa la sogs pa dang rgyu 'dra ba'i phyir de kho na bzhin du skad cig ma nyid du rig par bya'o zhes bya ba ni skam pa dang 'phel ba ba dang rang bzhin gyis g.yo ba dang 'phel ba dang 'grib pa srid pa'i phyir dang /yongs su 'gyur ba bzhi la sogs pa'i rgyus te/ 'di ltar rgyud byas pa'i gzugs ni 'byung ba la brten pa yin pas/ de ltar skom pa dang 'phel ba la sogs pa'i rgyus 'byung ba rnams skad cig ma nyid du bstan pa ltar kha dog la sogs pa yang de kho na dang 'dra bar shes par bya'o//me 'byung na me dang lhan cig byung ba'i bud shing de kho na bzhin du gnas pa ni med do zhes bya ba ni me byung na bud shing 'jig ste/ bud shing zhig pa las byung ba'i me gang yin pa de ji ltar brtan pa nyid du 'gyur/mjug du bud shing med pa yang gnas par 'gyur du 'ong bas bud shing tshig pa'i me yang gnas par nus pa ma yin no zhes bya ba la/ bud shing med pa'i gnas skabs ni thal ba'i gnas skabs te/ mdag me'i gnas skabs kyi me la ni bud shing phra mo yod do//de med pas thal bar 'gyur te de'i me'o/ /gal te de de kho na bzhin du gnas par gyur na rang gi ngang gis 'jigs pas/ rnam par 'jig par mi 'gyur te/ mjug tu thal bar mi 'gyur ro zhes bya ba'i tha tshig go/ /gal te 'di snyam du mar me la sogs pa ni de dag las gzhan pa'i 'du byed rnams dang mtshan nyid mi 'dra ba'i phyir ro zhes bya ba ni mar me la sogs pa ni skad cig ma yin la/ri la sogs pa ni brtan pa yin te/ 'di ni mi 'dra ba yin no/ /de nyid kyi phyir mar me la sogs pa skad cig ma nyid du rab tu grub pa rnams te/dper rjod par byed do/ /de dag rab tu grub na mar me la sogs pa rab tu grub pa dag gis ri la sogs pa 'du byed gzhan rab tu ma grub pa gang dag yin pa skad cig ma nyid du sgrub par byed do/ /mi 'dra ba rnam pa gnyis la ngo bo nyid mi 'dra ba ni sa dang chu dang me dang rlung la sogs pa'i sra ba la sogs pa phan tshun rang gi mtshan nyid kyis mi 'dra ba yin no//'jug pa mi 'dra ba zhes bya ba ni mar me la sogs pa'i 'jug pa yang gzhan la/ ri la sogs pa'i yang gzhan no/ /'jug pa ni tshul te ji ltar mar me la sogs pa'i rgyun mi 'jug pa skad cig ma nyid du mngon pa ltar/ri la sogs pa'i ni de lta ma yin no/ /de'i rgyun gyis zhes bya ba ni mar me'i rgyun gyis so/ /snying po skad cig re re la 'gyur ba skye ba'i phyir ro zhes bya ba ni snying po yang skad cig re re la mar me 'gyur bas skye bar shes so//'du byed thams cad ni mi rtag pa'o zhes bya ba la/ mi rtag pa ni rnam pa gnyis te/ mi rtag pa'i don med pa'i don zhes bya ba ni shin tu med pa'i mi rtag pa nyid yin no/ /skad cig la 'jig pa'i don yang mi rtag pa'i don du rig par bya ba yin pas/skad cig la 'jig pa'i mi rtag pa nyid bsgrubs pa yin no/ /da ni chos thams cad ni bdag med pa'o zhes bya ba gang zag la bdag med pa sgrub po/ /ji ltar mgo gcig tu ma yin pa'i smra ba yongs su gzung na zhes bya ba ni mgo gcig tu gang zag yod do zhe'am/med do zhes smra ba yongs su gzung bar mi bya ste/ de'i phyir mgo gcig tu ma yin pa'i smra ba yongs su 'dzin par byed do/ /dmigs pa zhes bya ba ni blos rtogs pa yin na/ gang zag ni gang zag tu smra ba rnams kyis blos mi rtogs pa yang ma yin la zhes bya ba 'di ni gang zag tu mngon par zhen pa'i tshig yin no//de nyid kyi phyir mjug thogs su bcom ldan 'das kyis kyang mthong ba'i chos kho na la bdag tu dmigs shing 'dogs par byed do zhes gsungs na/ ji ltar mi dmigs pa yin zhes lung gis gang zag dmigs par ston to//gcig dang gzhan du brjod bya min/ /zhes bya ba ni gcig pa nyid dang gzhan nyid du brjod par bya ba ma yin no zhes bya ba'i tha tshig go/ /gzhan nyid yin na ni gang zag rdzas su yod pa nyid du thal bar 'gyur ro zhes bya ba ni bdag gi rang bzhin gang yin pa de phung po dag gi rang bzhin yin par zhes bya ba'i tha tshig go//gal te rdzas yod brjod min pa'i/ /dgongs pa yang ni brjod dgos so/ /zhes bya ba ni ci'i phyir rdzas su yod pa yang yin la/ brjod par bya ba yang ma yin no zhes bya ba'i dgongs pa brjod dgos so//'di ltar me rlung gis khyer ba ni 'bar ba bzhin du rgyang bcad par yang 'gro'o zhes bya ba la me zhes smos pas ni me lce bzung ste bud shing med bzhin du rlung gis me 'bar ba bzhin du rgyang bcad par 'gro'o/ /rnam par shes pa 'di lta bur gyur cig ces bya ba de la bdag po yin no//de'i rkyen can zhes bya ba ni gang zag gi rkyen can zhes bya ba'i tha tshig go/ /nyes pa gsum 'byung ba'i phyir byed pa rang byung ba yang ma yin la/ byed pa po ma yin pa la sogs pas nyes pa 'chad par 'gyur ba gsum po de nyid kyi phyir gang zag gi rkyen can yang ma yin no//lta sogs byed pa med pa yin/ /zhes bya ba ni byed pa med par yang rkyen tshogs na mthong ba dang thos pa la sogs pa 'di thams cad du 'gyur te/ gang gi phyir rkyen tshogs na 'di thams cad du 'gyur ba de'i phyir gang zag la byed pa med pas lta ba la sogs pa la lta ba po nyid med pa nas rnam par shes pa po nyid kyi bar med do//'on te byed pa gang zag gi rkyen can yin no zhe na zhes bya ba ni gang zag gis byed pa byed pa'am/ de la brten nas byed pa skye na zhes bya ba'i tha tshig go/ de bzhin du gnas pa de ni rkyen nyid du rung ba ma yin te/ snga na med pa'i phyir ro zhes bya ba ni rtag tu nye ba'i phyir ro zhes bya ba'i tha tshig go/ /snga na med pa'i phyir zhes bya ba ni/ byed pa skyes pa'i sngon rol byed pa skyes par ma gyur pa gang yin pa de ni sngon gyi gnas skabs yin no/ /'on te de'i tshe gang zag med de des na byed pa skyes par ma gyur to zhes zer na/de la nyes pa 'dir 'gyur te/ zhig pa yang rkyen nyid du mi rung ngo / /ci'i phyir zhe na/ de'i phyir smras pa/ gang zag mi rtag pa nyid du thal bar 'gyur ba'i phyir te/ de yang gang zag tu smra ba rnams mi 'dod do/ /lnga pa las ni bdag tu dmigs pa la nyes dmigs lnga bstan to zhes bya ba ni gcig las 'phros pa'i lung las chos lnga lnga'i dbang du byas nas chos bshad pa ni lnga pa zhes bya ste/bdag tu lta ba dang srog tu lta bar 'gyur zhes bya ba ni gcig tu ba lta'o/ /stong pa nyid la yang 'di'i sems 'jug par mi 'gyur/dad par mi 'gyur/ yang dag par gnas par mi 'gyur mos par mi 'gyur zhes bya ba yang gcig tu bya'o/ /bcom ldan 'das kyis kun shes pa dang ldan pa'i gang zag dang / khur khyer ba'i gang zag dang / dad pas rjes su 'brang ba dang / chos kyis rjes su 'brang ba'i gang zag ces bya ba de lta bu la sogs pa'i bar du dbye bas/gang zag kyang de dang des las bshad de/ zhes zer ba ni bdag tu smra ba'o/ /kun nas nyon mongs pa'i chos dang ldan pa'i phyir kun nas nyon mongs pa'i gnas skabs na ni kun nas nyon mongs pa'i gang zag ces bya ba la/rnam par byang ba'i chos dang ldan pa'i phyir rnam par byang ba'i gnas skabs na ni rnam par byang ba'i gang zag go zhes bya ba ni gnas skabs kyi bye brag gis kun nas nyon mongs pa dang rnam par byang bar byed pa yin no/ /kun nas nyon mongs pa dang rnam par byang ba de dag kho na la 'di ni kun nas nyon mongs pa'o//'di ni rnam par byang ba'o zhes bya ba ni gcod pa'i bye brag ste/ gnas skabs kyi bye brag dang / gcod pa'i bye brag 'di dag thams cad kyang tha snyad gdags pa'i don du gang zag gi tha snyad kyis ston to/ /de la gnas skabs kyi bye brag ni kun nas nyon mongs pa yang chung ngu dang 'bring dang chen po'i gnas skabs kyi bye brag gis te/rnam par byang ba yang de kho na dang 'dra'o/ /gang zag kyang 'di ni 'dod chags chung ngo / /'di ni 'dod chags 'bring ngo / /'di ni 'dod chags chen po'o zhes bya ba dang /rnam par byang ba la yang gang zag 'di ni lam chung ngu thob pa'o/ /'di ni lam 'bring dang chen po thob pa'o zhes bya ba ni gnas skabs kyi bye brag yin no/ /kun nas nyon mongs pa dang / rnam par byang ba dag gis gcod pa'i bye brag ni gang zag gang zhig gcig tu mi dge ba'i las byed pa de ni kun nas nyon mongs pa yin par gcod pa'i bye brag dang gang zhig gcig tu rnam par byang ba'i las byed pa de ni rnam par byang ba yin par gcod pa'i bye brag go//de dag gi 'jug pa'i bye brag dang / rgyun gyi bye brag ces bya ba ni kun nas nyon mongs pa dang rnam par byang ba dag ge'o//'jug pa ni 'jug pa yin te/ tha snyad pa'i gang zag gang zhig la kun nas nyon mongs pa med pa'am/ rnam par byang ba rab tu 'jug pa de ni 'jug pa'i bye brag yin la/ rgyun gyis 'jug pa de ni/ rgyun gyi bye brag yin no//yongs su shes par bya ba'i chos rnams ni kun nas nyon mongs pa'o zhes bya ba ni sdug bsngal dang kun 'byung gi bden pa dag go/ /yongs su shes pa ni rnam par byang ba'o zhes bya ba ni 'gog pa dang lam gyi bden pa dag ste/ 'gog pa dang bden pa la yongs su shes pa nyid ces bya ba ni yongs su shes pa'i 'bras bu yin pas 'bras bu las rgyu nye bar brtags pa'i phyir ro//khur ni sdug bsngal gyi bden pa'o/ /khur khyer ba ni kun 'byung ba'i bden pa'o/ /khyar 'dor ba ni rnam par byang ba'o zhes bya ba ni 'gog pa dang lam gyi bden pa dag ste/ ji ltar de gnyis khur 'dor ba yin zhe na/ 'phags pa'i ye shes kyi sdug bsngal yongs su shes pa'i phyir dang / kun 'byung spong pa'i phyir ro/ /gzugs la sogs pa'i phung po la kun shes pa dang / ldan pa zhes bya ba dang khur khyer ba zhes bya bar tha snyad gdags par mi nus kyi kun nas nyon mongs pa dang rnam par byang ba'i gang zag brtags pa ni tha snyad gdags par bya bas de'i phyir tha snyad kyi don du gang zag gdags pa mdzad do//de ltar yon tan de dag dang / /rtag ldan zhes bya ba ni ngo tsha shes pa la sogs pa'i yon tan dang ldan pa zhes bya ba'i tha tshig go//byang chub kyi phyogs dang mthun pa'i skabs rdzogs so// //'di ni byang chub sems dpa' rnams kyi bslab pa'i dmigs pa dang / rnam pa dang / ngo bo nyid kyi khyad par gyi sgo nas bslab pa'i lam rnam pa thams cad bstan pa yin te/ de la slob pa rnams bsgrub pa'i yon tan dang rab tu bsngags pa'i yon tan dang ldan par 'gyur bas/ de'i phyir byang chub kyi phyogs dang mthun pa'i 'og tu yon tan gyi skabs so/ /de la sgrub pa'i yon tan ni rnam pa gsum ste/ rgyu mthun pa'i yon tan dang / bral ba'i yon tan dang /sems can la mngon du phyogs pa'i yon tan no/ /de la rgyu mthun pa'i yon tan ni/ yun ring po nas bslab pa'i lam la goms pa'i phyir/ dge ba'i tshogs dang nye bar gyur pa'i lam phyi phyir zhing gzhan du mi 'gyur bar bstan pa dang / nges pa dang yun ring bar 'jug pa nyid yin te/brtson 'grus rtsom pa dang bsam gtan gyi/ bde la ro myong med/ ces bya ba'i tshigs su bcad pa 'di gnyis kyis ni rgyu mthun pa'i yon tan bshad do/ /bral ba'i 'bras bu ni mthong ba dang / bsgom pa'i lam dag gis de dag gis spang bar bya ba'i gnas ngan len spangs pa'i phyir gnas dri ma med pa nyid yin te/de bzhin gshegs rigs skye ba dang / /zhes 'chad par 'gyur ba 'di ni mthong ba'i lam mo/ /de yan chad sa brgyad pa la lung bstan pa thob pa dang / sa bcu pa la dbang bskur ba thob pa zhes bya ba'i bar 'di ni bsgom pa'i lam mo//byang chub thob pa ni sangs rgyas kyis la'o/ /de ltar yon tan phul du byung ba dang ldan pa'i phyir ngo mtshar mi che ba'i yon tan thob par 'gyur ro/ /sems can thams cad la bdag dang / sems mnyam pa'i skabs nas/ ji ltar blo ldan sems can la//zhes bya ba la sogs pa 'chad par 'gyur ba lta bu yin no/ /sems mnyam pa ni rtag tu phan par bya ba la rab tu 'jug ste/ phan 'dogs pa nyid rnam par dbye ba las/ snod nyid du ni byed pa dang / /zhes bya ba la sogs pa tshigs su bcad pa bcu drug 'byung ba lta bu yin te/phan 'dogs pa nyid kyi yon tan 'di ni sems can la mngon du phyogs pa'i yon tan yin par shes par bya'o/ /lan du phan 'dogs pa yang 'dod de/ lan du phan 'dogs pa rnam par dbye ba las/ longs spyod rnams la ma chags dang / /zhes bya ba la sogs pa 'chad par 'gyur ba lta bu'o//de ltar rab tu brtson pa ni rtag tu de dag la phan pa dang bde bar 'dod do/ /smon pa rnam par dbye ba las/ /rtag tu 'phel dang nyams pa dang / /zhes bya ba la sogs pa 'chad par 'gyur ba lta bu yin no/ / de ltar phan pa dang bde ba'i bsam pa can ni de dag la sbyor ba chud mi za bar byed do/ /chud mi za ba nyid rnam par dbye ba las/ 'jigs spangs yang dag bskyed pa dang / /zhes bya ba la sogs pa 'chad par 'gyur ba lta bu yin te/ 'di ni sgrub pa'i yon tan gyi khyad par gong nas gong du sgrub pa yin no//de la byang chub sems dpa' phan yon gyi yon tan gyi khyad par gyi sgo nas lung bstan pa 'thob kyi/ nyan thos dang rang sangs rgyas kyi ni ma yin no/ /lung bstan pa ni phyir mi ldog pa'i sa la gnas par 'gyur ro/ /de la gnas pa ni gdon mi za bar bya dgos pa la mi brjed pa'i chos nyid thob po//de ltar mi brjed pa'i chos can ni sangs rgyas dang byang chub sems dpa' rnams kyis sems can thams cad kyi mchog tu gdags pa rnams kyi nang du 'dogs pa mdzad cing bya ba thams cad kyang yongs su nyams par mi 'gyur/ mi thob pa las yongs su nyams pas kyang yongs su nyams par mi 'gyur ro//yongs su mi nyams pa ni zla ba yar gyi ngo la skye ba bzhin du rtag tu rgyun mi 'chad par dge ba'i chos rnams kyis 'phel bas/ byang chub sems dpa' chen por 'gyur gyi/ bcos ma ni ma yin no/ / yang dag pa'i byang chub sems dpa' ni sems can gdul ba'i thabs rnam pa thams cad shes so/ /de shes pa ni de rnam par gzhag pa la mkhas par 'gyur te/ gang dang ji ltar brtsal bar bya ba de dag rnam par 'jog par byed do/ /rnam par gzhag pa la mkhas pa ni gdams ngag la mkhas par 'gyur ro//gdams ngag la mkhas pa ni tshad med pa la dmigs pa'i ting nge 'dzin gyi rgyal po 'thob po/ /ting nge 'dzin de 'thob pa ni chos bshad pa don yod par 'gyur te/ rnam pa sna tshogs kyis bshad pa 'bras bu dang bcas par yang byed/ theg pa chen po la nges par 'byung ba yang 'gyur ro/ /chen po nyid du nges par 'byung ba ni theg pa chen po bsdus pa la mkhas par 'gyur te/ de ltar na rgyu mthun pa dang bral ba dang / sems can la mngon par phyogs pa'i yon tan gsum po 'di dag ni ngo mtshar che ba dang ngo mtshar mi che ba rab tu dbye ba nas bzung ste/theg pa chen po bsdu ba'i skabs kyi bar gyis shes par bya'o/ /de'i 'og tu ni byang chub sems dpa'i yon tan bstan pas rab tu bsngags pa'i yon tan 'chad par 'gyur ro/ /tshigs su bcad pa las/ sdom pa'i phyir/ phun sum tshogs pa yongs su gtong ba dang //zhes bshad pa gang yin pa 'di ni/ ched kyi 'dun par bstan pa'i phyir bshad pa yin te/ sdom pa'i ched du phun sum tshogs pa gtong pa 'di ni tshul khrims kyi pha rol tu phyin pa la ngo mtshar che ba yin no/ /lus dang srog la mi lta bar brtson 'grus rtsom pa gang yin pa de ni brtson 'grus kyi pha rol tu phyin pa la ngo mtshar che ba yin no//'dod chags dang bral ba la brten nas sbyin pa la sbyor ba ngo mtshar mi che'o zhes bya ba ni byang chub sems dpa' dngos po srang stong ri ba gang yin pa de la 'dod chags dang bral ba bskyed nas yongs su gtong ngo zhes bya ba 'di ni ngo mtshar mi che'o//snying rje ni sdug bsngal dang bral ba'i rnam pa yin te/ snying rje la brten nas byang chub sems dpa' rnams gzhan la sdug bsngal skyed par mi byed do zhes bya ba ni tshul khrims kyi pha rol tu phyin pa la ngo mtshar mi che'o/ / snying rje ba yang gzhan dag las lus dang ngag gi mi 'dod pa 'byung ba thams cad bzod pas bzod pa'i pha rol tu phyin pa la ngo mtshar mi che'o/ /sems mnyam pa nyid kyang bslab pa'i phan yon yin pa kho na ste/ sems can rnams ni bdag nyid la sogs pa la byams pa mnyam pa nyid dang /ldan pa yang ma yin zhes bya ba ni bdag nyid la byams pa yang gzhan du yin la/ bu dang bshes dang chung ma la sogs pa la yang gzhan du ma yin pas so/ /gtan du ba yang ma yin zhes bya ba de bstan pa'i phyir 'di ltar res 'ga' bdag nyid kyang gsod par byed do zhes bya ba smos so//tshul khrims la ni rtag tu phra ba rab tsam yang mi nyams pa'i phyir ro zhes bya ba ni ji ltar rang bzhin gyis kha na ma tho ba'i bslab pa'i gzhi 'dral bar mi byed pa ltar bcas pa'i kha na ma tho ba rtswa gcod pa la sogs pa yang de dang 'dra ste/ de ltar na mnyam pa nyid yin no//rang dang gzhan gyi don dang dge ba thams cad kyi don du mnyam par sbyor ba'i phyir ro zhes bya ba ni brtson 'grus dang sbyor ro/ /sems can la mngon par phyogs pa'i yon tan ni ma la sogs pa dang 'dra ba nyid kyis ston par byed do/ /khong na 'dzin par byed ces bya ba ni lto na 'dzin par byed ces bya ba'i tha tshig ste/lto yang kha cig tu khong zhes bya ba'i sgrar brjod do/ /bsam pa ni khong lta bu ste/ bsam pa mnyam zhing mtshungs pas sems can la 'dzin par byed pas na/ bsam pa mnyam pas sems can rnams 'dzin par byed ces bya'o//'phags pa'i sa ni 'phags pa'i chos yin zhes bya ba ni zag pa med pa'i chos te/ nyan thos rnams kyi ni 'jig rten pa'i chos kyi mchog gi rjes la sdug bsngal la chos shes pa'i bzod pa la sogs pa slob pa dang / mi slob pa'i lam dang / de dag gis thob par bya ba so sor brtags pa'i 'gog pa'o//byang chub sems dpa' rnams kyis dang po thob pa'i dus nas bzung ste/ rnam par mi rtog pa'i ye shes dang / de'i spyod yul/ de bzhin nyid do/ /snun par byed/ gso bar byed/ kun tu skyed par byed ces bya ba ni las gcig ste/ snun pa ni nu ma snun pa'o//gso ba ni zhun mar dang mar dkar la sogs pas gso ba gang yin pa'o/ /kun tu skyed par byed pa ni byis pa la bsku mnye la sogs pas yan lag dang nying lag rnams bskyed pa gang yin pa'o/ /byang chub sems dpa' yang sems can rnams bza' ba dang btung ba la sogs pa bsdu ba'i dngos po bzhis bsdus nas gsos te/'jig rten dang 'jig rten las 'das pa'i dge ba'i chos rnams kyis kun tu skyed par byed do/ /bshes gnyen dam pa dag la 'doms par byed ces bya ba ni/ sangs rgyas la gsol ba 'debs pa'i sgo nas te/ bshes gnyen dam pa ni sangs rgyas dang byang chub sems dpa' rnams so//chags nyen med par byed ces bya ba ni sgrib pa spong ba'i phyir ro/ /'os pa ma yin pa dag la zab mo bshad pa gsang ba'i phyir ro zhes bya ba ni thos pa nyung ngu ni chos zab mo bshad par 'os pa ma yin no/ /'jig rten pa'i phun sum tshogs pa ni bde ba ste zhes bya ba ni 'khor los sgyur ba dang /brgya byin dang tshangs pa nyid la sogs yongs su bsdus pa de ni 'jig rten pa'i phun sum tshogs pa yin no/ /byang chub sems dpa' snying rje'i bsam pas yongs su zin pa rnams ni skyo ba med pa'i phyir byang chub sems dpa'i bya ba las mi byed par 'gyur ro//byang chub sems dpa' rnams ni bran lta bu yin te/ byang chub sems dpa' rnams yang dag pa'i nges par 'byung ba smra ba nyid kyis mi slu ba yin no/ /phun sum tshogs pa gnyis ni 'jig rten pa dang 'jig rten las 'das pa yin no zhes bya ba ni byang chub sems dpa' rnams phun sum tshogs pa gnyis sbyin par byed pa gnyis kyis bzod pa yin te/sems can rnams kyis thams cad bye pa'i phyir ro/ /bdag nyid legs par bslabs pa yin zhes bya ba ni sa brgyad pa la mi skye ba'i chos la bzod pa mngon par 'du byed pa med pa'i lam thob pa'i phyir ro//rnal 'byor grub par sbyor ba dang / /zhes bya ba la/ rnal 'byor grub pa ni zhi gnas dang lhag mthong gi rnal 'byor te/ nyan thos sam byang chub sems dpa' las dang po pas/ zhi gnas dang lhag mthong la ji ltar sbyar bar bya ba'i sbyor ba de ston pa'i phyir/byang chub sems dpa' rnams ni rnal 'byor grub pa ston par byed pa zhes bya'o/ /nges pa'i rang bzhin can ni tshig snyan pa sbyin pa la sogs pas khro gnyer dang bral ba yin no/ /byang chub sems dpa' shin tu brtson pa rnams ni tshogs thams cad yongs su rdzogs par byed de/tshogs rdzogs pa ni rab tu byung ba dang chos mthun pa yin no/ /tshogs bsags myur du grol bar byed/ /ces bya ba ni bsnyen par rdzogs pa dang chos mthun pa yin te/ gang zag bsnyen par rdzogs pa ni bslab pa'i/ gzhi nyis brgya lnga bcu bsrung ba'i sgo nas bya ba ma yin pa'i chos dag las grol bar 'gyur bas/ de'i phyir tshogs bsags pa dag myur du grol bar byed pa zhes bya'o/ /sbyor ba chud mi za ba nyid rnam par dbye ba'i tshigs su bcad pa zhes bya ba ni srog gcod pa spang ba la sogs pa'i don du zhugs pa'i byang chub sems dpa' rnams kyi sbyor ba chud mi za ba yin no//nga rgyal ni bzod pa'i yongs su nyams par 'gyur ba'i skal ba can gyi chos yin no zhes bya ba ni nga rgyal gyis mi bzod pa'i phyir ro/ /bcos ma'i yon tan rnam par dbye ba'i tshigs su bcad pa zhes bya ba la sogs ni sprul pa la sogs pa sgrub pa dang bral ba ni byang chub sems dpa' rnams kyi yon tan bcos ma yin la/de dag nyid sgrub pa dang ldan pa ni yang dag pa'i yon tan yin no/ /byang chub tu lung ston pa zhes bya ba ni gang gi tshe byang chub sems dpa' dag sangs rgyas bcom ldan 'das rnams kyis bla na med pa yang dag par rdzogs pa'i byang chub tu lung ston par mdzad pa yin no//lung ston par lung ston pa zhes bya ba ni nyid du lung mi ston gyi gzhan 'di skad du lung ston to zhes bya ba ste/ de nyid kyi phyir/ 'di'i dus che ge mo zhig na de bzhin gshegs pa mtshan 'di zhes bya bas lung ston par 'gyur ro zhes bya ba smos so//mi skye ba'i chos la bzod pa thob par lung bstan pas nga rgyal spangs pa dang mtshan ma'i rtsol ba thams cad spangs par 'gyur te/ de'i phyir/ mi skye bzod pa thob pa yi/ /nga rgyal dang rtsol ba spangs pa'i sgo nas lung bstan pa zhes bya'o//pha rol tu phyin pa kun tu spyod pas phun sum tshogs pa dang skye ba la sogs pa la gdon mi za bar 'gyur ba ni des nges par 'gyur ba'o/ /rtag tu lhun gyis grub par rnam par mi rtog pa'i ye shes kyis gnas pa'i phyir ro zhes bya ba ni sa brgyad pa la sogs pa la shes rab kyi pha rol tu phyin pa yongs su rdzogs pas lhun gyis grub par rnam par mi rtog pa'i ye shes kyis gnas par 'gyur ro//rtag tu bya ba ni rgyun du bya ba nyid yin gyis gdon mi za bar bya dgos pa ni rtag par rgyun chags su gdon mi za bar bya dgos pa ma yin no//'dod pa'i nyes dmigs shes pa dang / /zhes bya ba la gzugs la sogs pa'i yul rnams ni 'dod par byed par 'dod pa dag ste/ de dag ni rus gong gi dum bu dang / sha'i kham tshad la sogs pa lta bu dang chos mthun pa dang ldan pa'i phyir nyes dmigs dang bcas pa yin no//byang chub sems dpa' ni nyes dmigs dang bcas pa'i shes pa skyes pas gnas skabs gang du yang nam yang 'dod pa rnams la chags par mi 'gyur bas 'dod pa rnams la nyes dmigs su lta ba zhes bya'o/ /bde la ro myang med nyid dang / /zhes bya ba ni bsam gtan dag la ro myang bar mi byed pa nyid yin no//so so thar pa'i sdom pas bsdus pa dang / bsam gtan gyi sdom pas bsdus pa'i tshul khrims gang dag yin pa de dag pas ni zag pa med pa'i sdom pas bsdus pa'i tshul khrims gtso bo yin no/ /sdug bsngal la ji mi snyam pa'i bzod pa dang /gnod par byed pa dang du len pa'i bzod pa dang / chos la nges par rtog pa'i bzod pa yang / sgra'i rjes su 'gro ba'i bzod pa gang yin pa de rnam pas ni de kho na'i don gyi phyogs gcig gi rjes su zhugs pa dang ldan pa'i ting nge 'dzin dang mtshungs par ldan pa'i bzod pa gang yin pa 'di dag gtso bo yin no//chos gdags pa rnam par gzhag pa dang / bden pa dang rig pa dang theg pa gdags pa rnam par gzhag pa zhes bya ba la/ mdo'i sde dang dbyangs kyis bsnyad pa'i sde la sogs pa'i rnam pa'i bye brag gis rig pa'i gnas lnga rnam par gzhag pa ni chos rnam par gzhag pa yin par rig par bya'o//de las gzhan pa'i rig pa'i gnas rnams ni de'i khongs su 'dus pa kho na ste/ theg pa chen po las byang chub sems dpa' rnams la bshad do zhes bya ba ni nang rig pa ni theg pa chen po ste rig pa'o//gnas gzhan bzhi po gso ba dang / gtan tshigs dang / sgra dang / bzo'i las kyi rig pa'i gnas rnams ni de'i khongs su 'dus pa yin no/ /'jug pa'i de bzhin nyid ces bya ba ni/ 'jug pa'i ngo bo nyid ni 'khor ba ste/ 'di ni 'khor ba'i bden pa yin no/ /de'i ngo bo ni de bzhin nyid de/ 'di lta ste 'jug pa'i ngo bo nyid du phyin ci ma log pa nyid yin no/ /mtshan nyid kyi de bzhin nyid ni ngo bo nyid gsum mo/ /rnam par rig pa'i de bzhin nyid ni 'di lta ste/ khams gsum pa 'di ni rnam par rig pa tsam mo zhes bya ba lta bu ste/'di lta ste chos thams cad ni rnam par rig pa tsam mo zhes bya ba 'di ni 'dir bden zhing phyin ci ma log pa yin no/ /gnas pa'i de bzhin nyid ni sdug bsngal gyi bden pa'o/ /log par sgrub pa'i de bzhin nyid ni kun 'byung gi bden pa ste/las dang nyon mongs pa'i mtshan nyid kyi kun 'byung ba'i bden pa'o/ /log par sgrub pa ni nyon mongs pa rnams dang / de dag gis rab tu bcug pa'i las te/ 'di lta ste/ log par bsgrub pa 'di ni kun 'byung ba'i bden pa de bzhin nyid phyin ci ma log pa yin no//rnam par dag pa'i de bzhin nyid ni 'gog pa'i bden pa ste/ rnam par dag pa'i ngo bo nyid kyis 'gog pa'i bden pa'o/ /'di ni 'di'i phyin ci ma log pa yin te/ de bzhin nyid kyi dmigs pa der sdug bsngal rgyu dang bcas pa 'gog pa'i phyir ro//yang dag pa'i sgrub pa'i de bzhin nyid ni lam gyi bden pa ste/ lam 'dis 'phags pa rnams thar pa sgrub pa'i phyir 'di ni phyin ci ma log pa'i de bzhin nyid yin no/ /de la ltos nas rkyen des 'jig rten las 'das pa'i yang dag pa'i lta ba skye ba'i phyir ro zhes bya ba ni tshul bzhin yid la byed pa la ltos nas yang dag pa'i lta ba skye ba yin no//bya ba byed pa'i rigs pa ni yang dag pa'i lta ba 'bras bu dang bcas pa'o zhes bya ba la/ yang dag pa'i lta ba'i bya ba byed pa ni 'di lta ste/ rjes su mthun pa'i 'bras bu sgrub pa 'di yin no//de'i 'bras bu gang zhig ce na/ rnam par grol ba yin no/ /'thad pa sgrub pa'i rigs pa ni mngon sum la sogs pa'i tshad mas yongs su rtog pa'o zhes bya ba ni mig la sogs pas gzugs la sogs pa dang / du bas me dang / byas pa nyid la sogs pas sgra mi rtag par yongs su rtog pa gang yin pa 'di ni 'thad pa kho na yin no//bsam pa ji lta ba dang 'dod pa ji lta bar chos bshad pa yin no zhes bya ba ni gdul ba rnams kyi bsam pa dman pa dang 'bring dang mchog de kho na ji lta ba bzhin du shes nas chos 'chad pa yin no/ / de gnyis 'brel ba la zhes bya ba ni/ rjod pa dang brjod par bya ba 'brel pa la ste/ rjod pa ni ming ngo / /brjod par bya ba ni dngos pa'o/ /de dag 'brel pa ni de gnyis 'brel pa'o/ /ngo bo nyid 'dogs pa ni gzugs ni gzugs su rung ba'i mtshan nyid do/ /tshor ba ni nyams su myong ba'i mtshan nyid do//zhes bya ba de lta bu la sogs pa'o/ /khyad par 'dogs pa yongs su tshol ba ni gzugs ni mi rtag pa dang / sdug bsngal ba dang / stong pa dang / 'dogs par gtogs pa dang / 'dus byas dang / zag pa dang bcas pa dang / zag pa med pa'o zhes bya ba lta bu ste/tshor ba la sogs pa la yang de bzhin du sbyar bar bya'o/ /ngo bo nyid dang khyad par 'dogs pa yongs su tshol ba gang yin pa 'di ni brtag pa tsam du yongs su tshol ba yin no/ /de la rten rgyu mtshan ni/ snod kyi 'jig rten no zhes bya ba ni de ni kun gzhi rnam par shes pa'i rgyu mtshan dmigs pa yin no zhes bya ba'i tha tshig ste/'di ltar kun gzhi rnam par shes pa ni gnas rnam par rig pa 'byung ba yin no/ /longs spyod kyi rgyu mtshan ni gzugs la sogs pa yul lnga'o zhes bya ba la/ longs spyod ni mig gi rnam par shes pa la sogs pa rnam par shes pa drug go//de dag gi rgyu mtshan te dmigs pa ni/ gzugs la sogs pa yul rnams yin no/ /sa bon rgyu mtshan ni de dag gi sa bon kun gzhi rnam par shes pa gang yin pa zhes bya ba ni rnam par shes pa bshad ma thag pa rnams kyi sa bon 'jog pa dang ldan pa'i phyir ro//rgyu mtshan zhes bya ba'i sgra ni rten rgyu mtshan dang longs spyod rgyu mtshan dang sa bon rgyu mtshan zhes re re la sbyar bar bya'o/ /de la rten nyid rgyu mtshan yin pas na rten rgyu mtshan te/ las 'dzin par tshig bsdu'o/ /longs spyod kyi rgyu mtshan yin pas na longs spyod rgyu mtshan te/de'i skyes bur tshig bsdu'o/ /sa bon nyid rgyu mtshan yin pas na sa bon rgyu mtshan no/ /rten ni mig la sogs pa yin zhes bya ba ni mig gi rnam par shes pa la sogs pa rnam par shes pa lnga'i rten ni mig la sogs pa'o//yid kyi rnam par shes pa ni nyon mongs pa can gyi yid do/ /bdag nyid 'dug pa ni sa dang ka ba dang bum pa la sogs pa gang yin pa'o/ /de ltar mi rtog pa'i rim pa de lta bus zhes brjod par bya ste zhes bya ba ni thams cad la mi rtog pa'i rnal 'byor gyis byang chub mchog thob po//rim gyis sgom par byed pa'i rnal 'byor gyis byang chub kyi mchog thob po zhes bya ba ste/ de ni 'di skad du rten dang longs spyod dang sa bon la sogs pa'i 'ching ba yongs su shes par byas nas mdun du gzhan la sogs pa'i rim gyis thar pa la 'jug pa de ltar na yang dag pa ji lta ba bzhin du yongs su shes pa yin no zhes bya bar sbyar ro//mtshan ma'i gnyen po ni rnam par mi rtog pa'i ye shes te/ de thob pas mtshan ma thams cad dang bral bar 'gyur ro/ /sngar ni bzhag pa rus gong la sogs pa'i mtshan ma mi mthong la/phyis ni bdag nyid 'dug pa ka ba dang bum pa la sogs pa ste/ 'di skad du/ ji ltar rus pa'i rus gong la sogs pa dmigs pa nyid du yongs su ma grub kyi rang gi sems 'di nyid rus gong la sogs pa nyid du snang ba ltar ka ba dang bum pa la sogs pa yang de dang 'dra'o zhes bshad pa yin no//de zad mi byed par zhes bya ba ni rgyu mtshan gyi 'dun pa yin te/ zad par byed cing de zad par byed pa'i ched yin no/ /rnam pa tha dad pa med pa bsgoms pa ni mtshan ma dang de bzhin nyid dag tha mi dad pa nyid du thob pa'i phyir ro zhes bya ba mtshan ma'i ngo bo nyid ni 'khor ba ste/byang chub sems dpa' rnams ni rnam par mi rtog pa ye shes thob pa'i phyir mtshan ma dang de bzhin nyid dag la tha dad pa nyid du mi lta'o/ /de nyid kyi phyir mjug thogs su/ /byis pa yang dag nyid bsgribs nas/ /yang dag ma yin kun tu snang / /zhes bya ba la sogs pa 'chad par 'gyur ro//de dag ni mtshan ma dang mtshan ma med pa dag tha dad pa nyid du mthong bas zhes bya bas ni nyan thos rnams so/ /ji ltar tha dad pa nyid du mthong zhe na/ mtshan ma'i rang bzhin ni 'khor ba ste/ de la ni ma zhi ba nyid du rtog go/ /mtshan ma med pa ni mya ngan las 'das pas te/de la ni zhi ba nyid du rtog go/ /rnam par rtog pa ji lta ba bzhin du don thams cad sgrub pa'i sgo nas zhes bya ba ni gang dang gang la rnam par rtog pa'i don de dang de 'grub par 'gyur ro/ /gzhan dang gzhan 'byung ba de bzhin nyid 'di yin no zhes bya bar rigs mthun par snang ngo zhes bya ba ni sa dang ri la sogs pa ste/ji srid du snod kyi 'jig rten skad cig gcig 'jigs pas rnam par rig pa tsam nyid du ma mthong ba de srid du/ phyin ci log tu gyur pa'i sangs rgyas kyi zhing yongs su dag par mi 'gyur ro/ /gzhan dang gzhan zhes bya ba ni/gzhan dang gzhan zhes bya ba'i tha tshig go/ /yongs su smin par byar rung ba ni gdul ba'i khams so zhes bya ba ni gdul bar 'os pa gang yin pa de ni gdul bar rung ba yin no/ /gang du bye brag tu ma phye ba yongs su smin par bya ba'i dngos po ni sems can gyi khams khyad par med pa'o zhes bshad mod kyi/'on kyang de la gdul ba nyid du 'os pa gang yin pa de kho na gdul bar rung ba yin te/ nyi ma shar bas pad+ma smin pa kha 'byed pa bzhin no/ /yang dag par bshad pa'i dngos po ni gdul ba'i khams kyi thabs so zhes bya ba ni byang chub sems dpa' rnams ni thabs gang dang gang gis 'dod chags spyod pa la sogs pa gdul bar 'gyur ba mi sdug pa bshad pa la sogs pa thabs de dang des sems can rnams 'dul bar byed do//dngos po zhes bya ba'i sgra ni lnga po re re la sbyar ro/ /brgyud de 'dzin pas dam pa'i chos kyang yun ring du gnas par 'gyur ro zhes bya ba ni byang chub sems dpa' gang dag la dam pa'i chos bshad pa de dag gis kyang thos nas/mar mes mar me sbar ba'i tshul du gzhan dag la 'chad par byed pa yin no/ /gnyis sgrub pa'i phyir ro zhes bya ba ni gnyis sgrub pa'i sgo nas zhes bya ba'i tha tshig go//thabs la mkhas pa chen po nyid ni/ 'khor ba yongs su mi gtong zhing kun nas nyon mongs pa med pa'i phyir ro zhes bya ba ni snying rje dang rnam par mi rtog pa'i ye shes dang ldan pa'i phyir te/ snying rjes ni 'khor ba yongs su mi gtong la rnam par mi rtog pa'i ye shes kyis ni der kun nas nyon mongs par mi 'gyur ro//dngos po rnam pa bcu po 'dis theg pa chen po mtha' dag bsdus te zhes bya ba ni rigs nas bzung nas byang chub mchog sangs rgyas kyi sa'i bar gyi bcu tshan 'dis rgyu dang 'bras bu bsdus te/theg pa chen po ni 'di tsam du zad do/ /de la byang chub sems dpa' rnams kyi rigs ni skye mched drug gi khyad par chos nyid kyis thob pa thog ma med pa'i dus nas brgyud de 'ongs pa nyid de 'dra ba yin no/ /rigs kyi stobs kyis theg pa chen po'i chos zab cing rgya che ba bshad pa la mos pa gang yin pa de ni mos pa'o//de'i 'og tu bla na med pa yang dag par rdzogs pa'i byang chub tu sems skyed par byed do/ /de nas sbyin pa la sogs pa'i pha rol tu phyin pa drug la 'jug go/ /de nas bskal pa grangs med pa dang po la bsod nams dang ye shes kyi tshogs yang dag par bsgrubs pas sa dang po thob par 'gyur ro//lhag ma ni gzhung gi gzhi nyid las legs par bris par zad do/ /da ni rab tu bsngags pa'i yon tan la brten nas/ byang chub sems dpa'i yon tan bsngags pa bstan pas ston te/ mos pa dang ldan pa'i mos pas spyod pa'i sa la'o//lhag pa'i bsam pa dag pa ni sa bcu pa dag la'o/ /de nyid zab mo mthong ba ni bdag med pa gnyis kyi rnam par mi rtog pa'i ye shes thob pa yin te/ 'dis ni shes rab kyi pha rol tu phyin pa sgrub pa ston to/ /byang chub sems dpa' dga' ldan zhes bya ba la/dga' ba ni 'dod pa ste/ 'dis ni byang chub chen por smon pa ston to/ /phan 'dogs byed pa ni sbyin pa'i pha rol tu phyin pas so/ /gnod pa med par lta ba ni tshul khrims kyi pha rol tu phyin pas so/ /gzhan gyi gnod pa dang du len pa ni bzod pa'i pha rol tu phyin pas so//sbyin pa'i pha rol tu phyin pa la goms pas rang gi yongs su gzung ba la nyes dmigs su blta bar 'gyur ro/ /longs spyod la ma chags pa ni longs spyod rnams spongs nas tshul khrims yang dag par len to/ /rnal 'byor zhes bya ba ni brtson 'grus kyi pha rol tu phyin pa dang ldan pas rnal 'byor zhes bya'o//lta ngan med pa ni shes rab kyi pha rol tu phyin pa dang ldan pa'i phyir ro/ /nang du rab gnas pa ni smon lam chen po dang ldan pa'i phyir ro/ /brtse ba dang ldan pa ni sbyin pa'i pha rol tu phyin pas so/ /ngo tsha ba ni yon tan gyi chos dang ldan pa'i phyir kha na ma tho ba phra rab tsam la yang 'jigs par ldan pas/tshul khrims dang ldan par 'gyur ro/ /theg pa mi 'khrugs pa ni smon lam chen po dang ldan pa'i phyir ro/ /sdug bsngal khas len pa ni smon lam chen po dang ldan pa'i phyir ro//chos la mi dga' ba ni sbyin pa'i pha rol tu phyin pas so/ /rang bzhin chos la dga' ba ni rang bzhin gyi tshul khrims kyis so/ /longs spyod bag yod pa ni sbyin pa'i pha rol tu phyin pas so/ /chags pa dang bral ba'i phyir bde la bag yod pa ste/ bsam gtan gyi bde ba dag la ma chags pa'i phyir ro//lta ba chung ngus ngo tsha ba zhes bya ba ni chos su 'dzin pa'i lta ba chung ngus kyang ngo tsha ba'i phyir ro/ /tshul khrims kyis ni skye ba khyad par can thob nas/ gzhan du sems can rnams la phan 'dogs par 'jug go/ /dbang 'byor pa nyid thob pas ni/bsam gtan gyi pha rol tu phyin pas 'bar ba dang / chu 'bebs pa dang / kun brjod pa'i cho 'phrul la sogs pa'i dbang 'byor pa nyid kyis ni sems can gyi don byed pa'i phyir ro/ /bdag rjes rtogs zhes bya ba ni kun gzhi rnam par shes pa ni chu bo'i rgyun bzhin du rgyun chags su 'jug pa ni byis pa rnams thog ma med pa'i dus nas bdag tu 'dzin pa la mngon par zhen pas/bdag nyid du mngon par chags shing de la bdag tu nye bar 'dogs pas de rtogs pa'i phyir/ bdag rjes su rtogs pa zhes bya'o/ /lta ba phra rtogs zhes bya ba ni nyon mongs pa can gyi yid rtogs pa'i phyir te/nyon mongs pa can gyi yid ni 'jig tshogs la lta ba la sogs pa'i nyon mongs pa bzhi dang ldan pas kun gzhi rnam par shes pa la bdag nyid du mngon par zhen pa ni lta ba'i ngo bo nyid ces bya'o/ /de rnams kyang yang dag pa ma yin pa'i kun tu rtog pa nyid du rtogs pa'i sgo nas zhes bya ba ni byang chub sems dpa'i kun gzhi rnam par shes pa dang /nyon mongs pa can gyi yid dang 'jug pa'i rnam par shes pa drug po dag log par kun tu rtogs pa la goms pas yang dag pa ma yin pa'i kun tu rtog pa'i ngo bo nyid du rtogs pa'i phyir byang chub sems dpa' zhes bya'o//dngos med rtogs zhes bya ba ni kun brtags pa'i ngo bo nyid rtogs pa'i phyir ro zhes bya ba'i don to/ /ma rtogs pa nyid du rtogs pa so sor rtogs pa zhes bya ba ni/ 'jig rten gzung ba dang 'dzin pa la mngon par zhen pa'i gzugs la sogs pa'i yul rnams la yang dag pa nyid du rtogs par mngon par zhen pa gang yin pa byis pas kun brtags pa'i ma rtogs pa'i de la byis pa rnams kyis gzung ba dang 'dzin par mngon par zhen pas rtogs pas gang yin pa 'di ni ma rtogs pa yin no zhes bya bar so sor rtogs pa'i phyir te/de ltar na byang chub sems dpa' 'dis gnyis su 'dzin pa las rnam par grol ba yang / yongs su dag par rtogs pa'i phyir/ byang chub sems dpa' zhes bya'o/ /don med rtogs zhes bya ba ni log par kun nas rtogs pa la goms pa'i bag chags dang ldan pa'i phyir gzhan gyi dbang gi ngo bo nyid ni don med par gyur pa ste/de rtogs pa'i phyir byang chub sems dpa' zhes bya'o/ /don rtogs kun zhes bya ba ni/ skye mched bcu gnyis po byis pa rnams kyis gzung ba dang / 'dzin pa nyid du kun brtags pa de dag rtogs pa'i phyir kun brtags pa'i mtshan nyid ni rtogs pa yin no//rtogs bya rtogs gzhi rtogs pa rtogs pa'i rgyu/ /zhes bya ba la/ rtogs par bya ba'i don to/ /rtogs pa ni de'i yul can gyi shes pa'o/ /rtogs pa'i gzhi ni skye mched drug ste/ rtogs par bya ba dang / rtogs pa po dang /rtogs pa rnams kun brtags pa yin pa'i phyir/ 'khor gsum yongs su dag pa zhes bya'o/ /gnas rtogs pa zhes bya ba ni kun tu ston par byed pa rtogs pa'o/ /rtogs pa ma thob pa ni ma 'ongs pa'i dus so/ /rtogs pa ma thob pa ji ltar rtogs pa rnam par gzhag ce na/'di dge ba'i chos la rtag tu gus par byas te sbyor bas ma 'ongs pa na rtogs par nus te rtogs par bya ba'i mthu thob par bya ba'i phyir byang chub sems dpa' zhes bya'o/ /so sor 'chad par byed pa'i rtogs pa ni rags pa'o zhes bya ba ni thos pa'i gnas skabs na bshad pa'i chos kyis rjes su 'brangs te/rtogs pa gang yin pa'o/ /yon tan gyi skabs rdzogs so// //yang byang chub sems dpa' yon tan de lta bu dang ldan pa de dag gi ming yang dag pa'i don dang mthun pa'i phyir rab tu rnam par dbye bas de dag la bstod pa bsgrags pas de ltar rnam par 'phel ba'i yon tan rgya chen po sna tshogs dang /bsam pa bzang po dang / spyod pa'i bsam pa'i rnam pa dag gis byang chub sems dpa' rnams yin no/ /zhes bya bar yongs su gcod pa de rab tu dbye ba'i phyir yon tan gyi skabs kyi 'og tu brtags te/ gang gis na byang chub sems dpa' rnams su mngon par byed cing mtshon par byed pa zhes bya ba'i tha tshig go/ /brtse ba ni byang chub tu sems kyis sems can yongs su gzung ba'i phyir ro/ /zhes bya ba ni sems can yongs su gzung ba'i ched du ste/ sems can yongs su gzung ba'i phyir/sems can rnams 'khor ba'i rgya mtsho las bsgral bar bya'o zhes byang chub tu sems skyed par byed do/ /brtan pa nyid kyi rtags don gang la yin pa bstan pa'i phyir/ dka' ba spyod pa la sogs pas mi skyo ba'i phyir ro/ /yongs su gzung ba la sogs pa ni brtse ba la sogs pa'i las dang mdor bsdu ba yin no//brtse ba ni bsam pa'i sgo nas rig par bya'o/ /lhag ma ni sbyor ba'i sgo nas so zhes bya ba ni/ bcom ldan 'das kyi bstan pa la mos pa thob pa la sogs par bya ba'i phyir snyan par smra ba la sogs pas rab tu sbyor te/brtse ba ni bsam pa'i sgo kho na nas yin gyi/ sbyor ba'i sgo nas ni ma yin no/ /rtags de yang khyim pa dang / dge sbyong la brten nas 'jug ste/ de'i phyir de'i 'og tu de'i rten rab tu rnam par dbye ba'o/ /yang dag par len pas thob pa'i rab tu byung ba ni slob ma dang /slob dpon du 'brel pa'i gsol ba dang bzhi'i las kyis kyang gang yin pa'o/ /chos nyid kyis thob pa ni rtog pa'i dus na mi byed pa'i sdom pa thob pa'i phyir te/ de kho na nyid rtogs pa gang zhig 'di snyam du bdag gi dmyal ba yang zad/ dud 'gro yang zad/ yi dwags kyang zad de/de bdag ni yang sdig pa'i las byas nas/ ngan song rnams su rnam par smin pa mngon par 'grub pa'i skal ba can ma yin no snyam du sems pa yin no/ /de ltar phyogs gnyis la bslab pa yongs su rdzogs par byed pa ni dka' ba spyod pa la bsam pa brtan po 'thob par 'gyur bas/de'i phyir de'i 'og tu bsam pa'i khyad par te/ bsam pa'i stobs can ni gzhan gyi don la zhum par mi 'gyur ro/ /mya ngan las 'das par 'dod pa ni de gnyi ga'i lhag pa'i bsam pa kho na yin pas zhes bya ba ni phan pa dang bde ba'i lhag pa'i bsam pa ste/ sems can phung po'i lhag ma dang bcas pa'i mya ngan las 'das pa thob pa rnams ni nyon mongs pa thams cad spangs pas 'di nyid la phan pa dang ldan par 'gyur ro/ /phung po lhag ma med pa'i mya ngan las 'das pa 'thob pa rnams ni phyi ma la skye ba la sogs pa'i sdug bsngal dang bral bas bde bar 'gyur ba'i phyir/mya ngan las 'das par 'dod pa ni de gnyi ga'i lhag pa'i bsam pa yin zhes bya'o/ /gzhan dag na re bdag gi lhag pa'i bsam pa ni mthong ba'i chos la bde ba la sbyor ba'i phyir ro/ /phan pa'i lhag pa'i bsam pa ni tshe phyi ma la bde ba la sbyor ba'i phyir ro zhes zer ro//phyir mi ldog pa'i sa ni mi g.yo ba la sogs pa gsum ste/ mngon par 'du byed pa med pa'i lam las mi ldog pa'i phyir ro/ /de ltar lhag pa'i bsam pa'i stobs dang ldan pa ni gzhan gyi don la zhum par mi 'gyur bas de'i 'og tu sems can nye bar len pa ste/sems can yongs su 'dzin pa zhes bya ba'i tha tshig go/ /bdag pos yongs su 'dzin pa ni rje bor gyur pa ni 'di gang dag gi rje bo yin pa'o zhes bya ba ni 'khor los sgyur ba la sogs pa rje bor gyur pa gling bzhi pa'i dbang phyug nyid yin pas gling bzhi pa la sogs pa'i sems can yongs su 'dzin pa yin no//de ltar smon lam la sogs kyis yongs su bzung bas mi gtang ba'i bsam pa yongs su 'dzin pa rnams kyang tshe gcig pa'i lus re zhig pas 'di dag gi don bsgrub par mi nus pas/ de'i phyir de'i 'og tu srid par skye ba'i khyad par te/las kyi dbang gis 'dod pa'i gnas su skye ba zhes bya ba ni mos pas spyod pa'i sa la las dkar po yongs su gzung ba'i dbang gis so/ /sems can yongs su smin par bya ba'i phyir dud 'gro la sogs pa'i gnas dman par yang skye zhes bya ba ni rtogs pa'i dus na/ byang chub sems dpa'i ngan 'gro rnams ldog ste/ log kyang smon lam gyi stobs kyis ngan 'gror skye'o/ /ting nge 'dzin gyi dbang gis ni bsam gtan rnams bzlog nas 'dod pa'i khams su skye ba gang yin pa'o zhes bya ba ni/ mdo sde dag las byang chub sems dpa' rnams kyi bsam gtan bzlog pa la mkhas pa 'byung na/bsam gtan ldog pa ci bsam gtan yongs su gtong ba yin nam zhe na/ smras pa/ ma yin no/ /bsam gtan gyi 'bras bu ldog pa ni bsam gtan bzlog pa ste/ bsam gtan gyi 'bras bu gzugs kyi khams su skye ba de bzlog nas/'dod pa'i khams su skye ba yin no/ /'phags pa rnams kyi skye ba bshad ma thag pa de yang skyes pa'i rabs kyi dbye bas mtha' yas te/ sems can rnam par dag pas che chung gi rnam pa gang dag la rnam par gzhag pa brjod dgos pas de'i phyir de'i 'og tu rnam par dag pa'i gnas skabs kyi sa bcu'o//bzhi pa ni byang chub kyi phyogs dang mthun pas mang du gnas kyang / byang chub kyi phyogs dang mthun pa rnams 'khor bar yongs su bsngo ba yin no zhes bya ba ni byang chub kyi phyogs dang mthun pa'i chos rnams ni gcig tu 'khor ba la sdud pa yin na/ byang chub sems dpa' thabs la mkhas pas byang chub kyi phyogs dang mthun pa sgom pa snying rje chen pos yongs su zin pa'i phyir ro/ /de ni 'gro ba la 'khyud nas 'dug pa lta bu yin pas snying rje chen pos yongs su zin pa'i phyir 'khor bar yongs su bsngos pa rna bas sems can la phan par byed kyi gtan du 'khor ba la rgyab kyis phyogs te 'dug pa ni ma yin no//lnga pa ni 'phags pa'i bden pa bzhis mang du gnas pas kun nas nyon mongs par mi 'gyur ro/ /des na sems la kun nas nyon mongs pa med pas sems can rnams yongs su smin par byed de/'di ni sa lnga pa'i mtshan nyid yin no/ /der kun nas nyon mongs pa rjes su sgrub pa yin no zhes bya ba ni 'di'i ched du bsams nas srid par skye ba gang yin pa der rten cing 'brel par 'byung bas lan mang du gnas pa nyid kyis kun nas nyon mongs par mi 'gyur ba yin no//bdun pa ni 'dres pa nye bar 'dres pa nyid kyis bgrod pa gcig pa'i lam gnas brgyad dang 'brel pa/ mtshan ma med par gcig tu nges pa'i lam yin no zhes bya ba de la/ 'dres pa ni byang chub sems dpa' mtshan ma med par gnas pa sa bdun pa la gnas pa rnams dang ngo //nye bar 'dres pa ni byang chub sems dpa' mngon par 'du byed pa med pa'i lam thob pa sa brgyad pa la gnas pa rnams dang ngo / /brgyad pa ma thob na ji ltar nye bar 'dres pa yin zhe na/ nye ba zhes bya ba'i nye bar gyur pa 'di ni khad nye ba la bya ste de lta bas na byang chub sems dpa'i 'di ni mtshan ma med par gnas pa'i mthar thug par gyur pa'i spyi bo la gnas pa mngon par 'du byed pa med par gnas par gyur pa dang /khad nye bar gnas shing bar chad med par thob pa yin pas nye bar 'dres pa zhes bya'o/ /yang na mngon par 'du byed pa dang bcas pa'i lam bsgom pa'i phyir 'dres pa nye bar 'dres pa zhes bya'o//gang zag dang chos su lta ba'i gnyen po'i ye shes thob pa'i phyir zhes bya ba ni rnam par mi rtog pa'i ye shes thob pa'i phyir ro/ /gsum pa la ni mi nyams pa'i bsam gtan dang ting nge 'dzin thob pa'i phyir mnyam par gzhag pa yin no zhes bya ba ni tshe rabs gzhan gyi gnas skabs na yang bsam gtan dag las nyams par mi 'gyur ro//bzhi pa la ni mdo sde la sogs pa'i chos la tha dad pa nyid kyi nga rgyal spangs pa'i phyir/ chos la nga rgyal spangs pa yin no zhes bya ba ni sa gsum pa la byang chub sems dpa'i chos la gus pa dang /chos rin che bar byed pa bdag gis chos kyi tshig gcig gi don du yang stong gsum gyi stong chen po mes rab tu gang bar tshangs pa'i 'jig rten nas bdag nyid dor bar spro na/ me'i 'obs tha mal ba lta smos kyang ci dgos snyam pa gang yin pa des/sa bzhi pa la ldog go/ /ji ltar ldog ce na/ de 'di snyam du gcig tu chos tshol ba gang yin pa 'di ni sems g.yeng bar 'gyur te/ de bas na chos tshol ba btang la byang chub kyi phyogs dang mthun pa bsgom pa la 'jug go snyam du sems so/ /lnga pa la ni sems dang bsam pa rnam par dag pa bcus rgyud tha dad par nga rgyal med pa yin no//bcu gang zhe na/ 'di lta ste/ 'das pa'i sangs rgyas kyi chos rnam par dag pa la bsam pa mnyam pa nyid dang / de bzhin du ma 'ongs pa dang / da ltar byung ba'i sangs rgyas kyi chos rnam par dag pa la bsam pa mnyam pa nyid dang /tshul khrims rnam par dag pa la bsam pa mnyam pa nyid dang / sems rnam par dag pa la bsam pa mnyam pa nyid dang / lta ba dang / the tshom dang / yid gnyis dang / 'gyod pa sel bas rnam par dag pa la bsam pa mnyam pa nyid dang / lam dang lam ma yin pa shes pa rnam par dag pa la bsam pa mnyam pa nyid dang /lam shes pa rnam par dag pa la bsam pa mnyam pa nyid dang / byang chub kyi phyogs dang mthun pa'i chos thams cad gong ma gong mas rnam par 'jig pa rnam par dag pa la bsam pa mnyam pa nyid dang / sems can thams cad yongs su smin par byed pa rnam par dag pa la bsam pa mnyam pa nyid kyis so/ /sems dang bsam pa rnam par dag pa mnyam pa nyid bcu po 'di dag gis sa lnga pa la 'jug ste/ byang chub sems dpa' sa lnga pa thob pas ji ltar 'das pa la sogs pa'i sangs rgyas bcom ldan 'das rnams kyis sangs rgyas kyi chos rnam par dag pa de kho na bzhin du bdag gi sangs rgyas kyi chos rnams kyang ring po mi thogs par rnam par dag par 'gyur ro snyam pa de lta bu'i bsam pa thob par 'gyur ro//rten cing 'brel par 'byung ba'i de bzhin nyid de ni rang bzhin kho nas rnam par dag pa ste/de la ma rig pa'i rkyen can la sogs pa kun nas nyon mongs pa'i rten cing 'brel bar 'byung ba glo bur bas dri ma can du gyur pa gang yin pa'am/ ma rig pa 'gags pa la sogs pa dkar po'i phyogs kyi rten cing 'brel par 'byung bas rnam par dag pa gang yin pa 'di ni de'i ngo bo nyid ma yin no//de bas na nag po dang dkar po'i phyogs dag gis/ de bzhin nyid la kun nas nyon mongs pa dang / rnam par byang bar mi lta ba'i phyir rten cing 'brel bar 'byung ba'i de bzhin nyid kyis mang du gnas pas kun nas nyon mongs pa dang /rnam par byang ba tha dad pa'i nga rgyal dang 'brel bar 'gyur te/ de bzhin nyid rang bzhin gyis rnam par dag pa'i phyir ro/ /bdun pa la ni skad cig gcig dang ldan pa'i blo thob pa yin no zhes bya ba ni sa de kho na las ji skad bshad pa lta bu ste/ sa bdun pa 'di nyid la sangs rgyas kyi chos thams cad kun nas slong bas/skad cig skad cig la lhag par byang chub kyi yan lag thams cad yongs su rdzogs par 'gyur ro/ /dgu pa la ni sems can yongs su smin par byed pa la mkhas pa ste/ snga ma bzhin no zhes bya ba ni so so yang dag par rig pa shin tu rnam par dag pa thob pas sems can yongs su smin par 'grub pa ste/rnam pa thams cad du sems can yongs su smin par byed pa mthu rnyed pa'i phyir ro/ /sa bcu po dag la bslab pa gsum rnam par gzhag ste/ sa dang po la chos nyid de bzhin nyid rtogs nas/gnyis pa la lhag pa'i tshul khrims la slob po zhes bya ba ni dang po la yang lhag pa'i tshul khrims kyi bslab pa yod mod kyi/ de rnam par dag par ni sa gnyis pa la 'gyur ro/ /gang gi phyir rmi lam na yang kha na ma tho ba dang bcas pa'i lam la mi 'jug pas de la bslab pa de rnam par dag par 'gyur ba de'i phyir gnyis pa la lhag pa'i tshul khrims la slob po zhes bya'o//gsum pa la ni lhag pa'i sems kyi bslab pa mnyam par gzhag go/ /bzhi pa la ni byang chub kyi phyogs dang mthun pa bsgoms pas lhag pa'i shes rab kyi bslab pa'o/ / shes rab de yang spyod yul gnyis pa can de zhes bya ba ni dmigs pa gnyis pa can zhes bya ba'i tha tshig go/ /de mi shes pa dang shes pa la sogs pa'i 'jug pa rten cing 'brel bar 'byung ba lugs dang mthun pa dang / lugs dang mi mthun pa'o zhes bya ba la/ de zhes bya ba'i sgras ni/bden pa bzhi bzung ste/ ma rig pa'i rkyen can la sogs pa'i rten cing 'brel bar 'byung ba ni de mi shes pa la sogs pa'i ngo bo nyid yin no/ /rig pa la sogs pa ni shes pa la sogs pa'i ngo bo nyid yin te/ de lta bas na sa gnyis ka la yang chos kyi de kho na nyid dang / de mi shes pa dang shes pa la dmigs pa nyid kyis lhag pa'i shes rab kyi bslab pa rnam par gzhag go/ /bslab pa rnams dang bslab pa bsgoms pa'i 'bras bu bzhi ni sa ring du song ba la sogs pa bzhi la rnam par gzhag ste/ de ltar na bslab pa gsum po 'di dag rgyu dang 'bras bur bcas te sa bcu la rnam par gzhag go//'di man chad ni zag pa med pa'i phung po sa bcu la ji ltar rnam par gzhag pa de bsam par bya ste/ sa dang po la chos nyid rab tu rtogs nas gnyis pa la tshul khrims kyi phung po sbyong ngo / /sa dang po la yang chos kyi dbyings rtogs pa na tshul khrims kyi phung po thob pa yod mod kyi/yongs su dag pa ni ma yin te/ gnyis pa la de yongs su dag par 'gyur ro/ /ting nge 'dzin gyi phung po ni sa gsum pa la rnam pa dag go/ /shes rab kyi phung po ni sa bzhi pa la byang chub kyi phyogs dang mthun pa bsgoms pas rnam par dag go//lnga pa la bden pa bsgoms pas so/ /drug pa la rten cing 'brel bar 'byung ba lugs dang mthun pa dang lugs dang mi mthun pa bsgoms pas so/ /rnam par grol ba dang rnam par grol ba'i ye shes kyi phung po gnyis ni sa bdun pa nas bzung ste/ de bzhin gshegs pa'i sa'i bar la rnam par dag go/ /rnam par grol ba de yang 'bras bu rnam pa bzhi'i sgrib pa la rig par bya'o/ /sangs rgyas kyi sa la ni thogs pa'i sgrib pa las te zhes bya ba la/ 'bras bu rnam pa bzhi ni bshad ma thag pa ste/ mtshan ma med pa 'du byed dang bcas pa ni sa bdun pa'i 'bras bu'o//'bras bu gnyis pa de nyid mngon par 'du byed pa med pa dang / sangs rgyas kyi zhing yongs su dag pa ni sa brgyad pa'o/ /'bras bu gsum pa sems can rnams yongs su smin pa 'grub pa ni sa dgu pa'i'o/ /'bras bu bzhi pa ting nge 'dzin dang gzungs 'grub pa ni sa bcu pa'i ste/'bras bu rnam pa bzhi po 'di'i sgrib pa mtshan ma dang / mngon par 'du byed pa la sogs pa dang bral ba'i phyir/ rnam par grol ba'i phung po rnam par dag pa yin no/ /rnam par grol ba'i ye shes kyi phung po ni/sangs rgyas kyi sa la'o/ /de ji ltar de bzhin gshegs pa'i sa la rnam par dag ce na/ de bstan pa'i phyir/ sangs rgyas rnams ni gang gis na/ gzhan dag shes pa thogs par 'gyur ba de las rnam par grol bas thams cad la ye shes thogs pa mi mnga'o zhes bya ba smos so//rnam par grol ba ni/ 'gog pa'i ngo bo nyid yin te/ 'gog pa yang 'dus ma byas yin la/ phung po'i don yang spungs pa'i don yin na/ ji ltar 'dus ma byas phung por rnam par gzhag ste/ bstan bcos gzhan dag las kyang / phung po dag tu 'dus ma byas//don du mi rung phyir ma bshad/ /ces bshad do zhe na/ 'dus ma byas kyi rnam par grol ba ni phung po nyid du rnam par mi 'jog go/ /rnam par grol ba ni rnam pa gnyis te/ nyon mongs pa spangs pa'i mtshan nyid dang / mos pa'i mtshan nyid do/ /de la mos pa'i mtshan nyid ni 'dus byas yin pa'i phyir rnam par grol ba'i phung por rnam par 'dog pas nyes pa med do//de lta ma yin na rnam par grol ba'i phung po 'du byed kyi phung pos bsdus par mi 'gyur ro/ /mos pas spyod pa'i sa la ni sa rnams ma grub pa ste/ gnas skabs de na gcig kyang ma thob na thams cad ma grub pa kho nar brjod do//lhag ma rnams ni grub pa ste zhes bya ba ni de dag gis thob pa'i phyir ro/ /grub pa dag la yang bdun ni ma grub pa yin no zhes bya ba ni lam mngon par 'du byed pa dang bcas par 'jug pa'i phyir/ sa brgyad pa la sogs pa la ltos nas ma grub pa zhes bya'o//gang dag gong du sa rab tu dga' ba grub pa bshad pa zhes bya ba ni mthong bas spang bar bya ba'i nyon mongs pa dang bral ba'i phyir dang / chos kyi dbyings rtogs pa'i gags gzung ba dang / 'dzin pa dang bral ba'i phyir grub pa zhes bya ba yin no/ /gang gi tshes rnam par gzhag pa de rtog pa tsam du shes shing zhes bya ba ni ming gi tshogs dang /tshig gi tshogs dang / yi ge'i tshogs rnam par gzhag pas/ sa rnam par bzhag pa gang yin pa de la/ sems 'di nyid sa rnam par gzhag par snang gi/ /sems las gzhan pa phyi'i don ni med do zhes sems tsam du shes shing de'i 'og tu gzung ba med na gang la 'dzin par byed ces gzung ba med pa ni 'dzin par byed pa rtog pa tsam de la yang rtog par mi byed pa yin te/de bas na/ de nas de ni 'jig rten las/ 'das pa'i ye shes bla med pa/ /rnam par mi rtog dri ma med/ /'dzin pa gnyis dang bral ba 'thob//de 'di'i gnas yongs gyur pa ste/ /sa ni dang po yin par 'dod/ /ces bya ba de lta bur sa yongs su grub pa zhes bshad do/ /sa la bzhugs pa'i rtags rnam par 'byed pa las thams cad rab tu rtogs pa ni de dag la mngon par bsgrub pa la mkhas pa'i phyir ro zhes bya ba ni sa mngon par bsgrub pa la mkhas pa'i phyir te/sa dang po thob pa ni don gyis thams cad rab tu rtogs pa yin te/ sa dang po las ji skad bshad pa lta bu yin no/ /chos kyi dbyings rab tu rtogs pa na chos thams cad rtogs pa'i phyir te/ 'di ltar de'i rjes la thob pa'i ye shes kyis mngon par bsgrub pa la mkhas pa thob pa'i phyir thams cad la phyin ci ma log par 'gyur ro//bkrir mi btub pa nyid ni snyan pa dang mi snyan pa'i sgra dag gis so zhes bya ba la/ snyan pa ni yon tan sgrogs pa ste/ yon tan bsgrags pas sa dag las bkrir mi btub cing / rnam par mi g.yos pas so zhes bya ba'i tha tshig go//bstod pa ni yon tan bsngags pa ste/ 'di las phyi rol pa dag gis bstod kyang sa dag las rnam par g.yos par mi 'gyur ro/ /thabs la mkhas pa ni rnam par mi rtog pa'i ye shes te mi dmigs pa'o/ / 'di dag ni rtags gzhan yin no zhes bya ba ni 'di ltar gong du yang spyir/ brtse dang snyan par smra ba dang / /zhes bya ba la sogs pa rtags bshad pas/ de la ltos nas gzhan zhes bya ba smos so/ /rtag tu pha rol tu phyin pa rnams la sgrub pa'i 'dun pa dang bral ba nyid ces bya ba ni bsgrub pas sbyin pa la sogs pas rab tu sbyor ba yin no//chags dang khu ba'i snying med khro min le lo med/ /byams dang snying rje min pa'i bsam pa med/ /blo gros ngan rtog rnam rtog 'phrogs pa med/ /ces bya ba 'di dag ni pha rol tu phyin pa drug gi mi mthun pa'i phyogs su gyur pa'i chos te/de dag dang rtag tu bral ba yin no/ /byams dang snying rje min pa'i bsam pa med/ /ces bya ba ni byams pa ma yin pa'i bsam pa med pa dang / snying rje ma yin pa'i bsam pa med pa'o/ /byams pa dang snying rje dang ldan pa ni bsam gtan bzhi pa yin par shes te/ byams pa dang snying rje dang ldan pa'i phyir/bsam gtan gyi pha rol tu phyin pa ni mi mthun pa'i phyogs gnod sems dang rnam par 'tshe ba spangs pa bshad pa yin no/ /blo gros ngan rtog rnam rtog 'phrogs pa med/ /ces bya ba 'di ni shes rab kyi pha rol tu phyin pa thob pa'i rtags yin no/ /theg pa gzhan yid la byed pas sems rnam par ma g.yengs pa nyid ces bya ba ni 'di'i sems theg pa gzhan gyis rnam par mi g.yengs pa yin no//sna tshogs kyi 'du shes dang bral ba'i chos dga' ba la dga' ba yang thob par 'gyur zhes bya ba ni gzugs can dang gzugs can ma yin pa'i chos kyi mtshan ma'am/'dus byas dang 'dus ma byas kyi chos kyi mtshan ma yang rung / de lta bu la sogs pa'i mtshan ma thams cad yid la mi byed pas spangs nas/ mtshan ma med pa'i rnam pas chos kyi dga' ba 'thob ste/ zhi gnas 'thob pas rnam par mi g.yeng ngo zhes bya ba'i tha tshig go//thams cad du rnam par yongs su ma chad pa'i chos kyi snang ba tshad med pa yang yang dag par shes par 'gyur zhes bya ba ni gzugs can dang gzugs can ma yin pa'i chos rnams kyi rnam pa yongs su ma chad pa'i chos kyi snang ba yang dag par shes so zhes bya ba yin no/ /yang na thams cad du rnam pa yongs su ma chad pa zhes bya ba ni phyogs bcur rnam pa yongs su ma chad pa'i chos kyi snang ba yang dag par shes so zhes bya ba yin te/gzhung la legs par zhugs pa gsal ba bzhin no/ /sa'i nges pa'i tshig rnam par dbye ba la/ byang chub la ni nye ba dang / /zhes bya ba ni byang chub sems dpa' sa dang po thob pa na 'di snyam du sems te/bdag ni sangs rgyas kyi sa dang nye bar gyur to zhes 'byung ba'i phyir ro/ /sems can don sgrub mthong ba la/ /zhes bya ba ji ltar sems can gyi don sgrub pa mthong zhe na/ rnam par mi rtog pa'i ye shes thob pa'i phyir dang / sbyin pa'i pha rol tu phyin pa yongs su rdzogs pa'i phyir te/de nyid kyi phyir dga' bar 'gyur la/ de nyid kyi phyir sa rab tu dga' ba zhes kyang bya'o/ /theg pa gzhan yid la byed pa'i dri ma las 'das pa'i khungs su mdo sde'i dum bu de lta bas na bdag gis sgrub tu mtshungs pa la rnam pa thams cad yongs su sbyang ba mngon par bsgrub pa kho na la brtson par bya'o zhes bya ba ni sbyin par byed de/nyan thos kyis mngon par bsgrub pa la ma yin no zhes bya ba'i tha tshig go/ /bgrod pa gcig pa'i lam ni sngar bstan pa yin no zhes bya ba ni 'dun pa'i ni 'dres pa nye bar 'dres pa nyid kyis bgrod pa gcig pa'i lam gnas pa brgyad dang 'brel pa mtshan ma med par gcig tu nges pa'i lam zhes bya ba ste/sbyor ba'i mthar thug par 'gro ba'i phyir ro/ /ji ltar sprin gyis nam mkha' khyab pa de bzhin du/ ting nge 'dzin dang gzungs kyi sprin gyis thob pa'i chos rten la yod pa nam mkha' lta bu la khyab pa'i phyir te/sngar sa dgu pa la gnas pas sangs rgyas bcom ldan 'das rnams las thos pa'i chos rten la gnas pa gang yin pa de ni sa bcu la ltos na chung ngu yin no/ /ting nge 'dzin dang gzungs kyi sgo'i sprin gyis khyab pa ni de dag gi stobs kyis sangs rgyas bye ba khrag khrig mang po dag las chos nyan pa'i phyir ro//sa de dag nyid dge ba sna tshogs mngon par bsgrub pa nyid kyis gnas pa zhes bya'o/ /dge ba bsgrub pa rnam pa sna tshogs kyi phyir zhes bya ba ni dge ba bsgrub pa rnam pa sna tshogs kyi ched du ste 'di ni ched kyi bdun pa yin te/'di ni sa rnams kyi gnas pa rnam par dbye ba'i don gyis nges pa'i tshig yin no/ /sa rnam par dbye ba'i don gyis nges pa'i tshig ni/ 'byung po dpag med 'jigs med phyir/ /dpag tu med pa de dag la/ /phyi phyir gong du 'gro ldan phyir/ /zhes bya ba la sogs pas bstan to//re re la yang tshad med pa'i phyir zhes bya ba ni nges pa'i tshig gi tshul gyis sa rnams kyi nges pa'i tshig yin no/ /sdom pa'i tshigs su bcad pa las/ nges pa'i tshig dang thob pa yis/ /gnas pa dang ni sa nyid do/ /zhes bshad pa gang yin pa der ni gnas pa'i nges tshig dang sa'i nges pa'i tshig ces go rims bzhin du sbyar bar yang blta bar bya ste/sa rab tu dga' ba la sogs pa'i nges pa'i tshig so so ba yang yin la/ spyir yang / dpag tu med pa de dag la/ /phyi phyir gong du 'gro ldan phyir/ /zhes 'byung ba'i phyir ro/ /de'i 'og tu/ thob pa rnam par dbye ba la mos pas thob pa ni mos pas spyod pa'i sa la ji skad bshad pa la mos pas so//zhes bya ba ni/ ji skad du/ bskal pa grangs med nges 'byung zhing / /mos pa rnam par 'phel byed pa/ /zhes bya ba la sogs pa'i gzhung gis bstan pa lta bu yin no/ 'di man chad ni mthar thug pa'i skabs te/de ltar rang gi rgyud kyi gnas skabs rnam pa thams cad du yongs su byang zhing nor bu rin po che ltar sems can thams cad kyi don gyi ston par 'gyur ba'i byang chub sems dpa' 'di ni rnam pa thams cad du 'jig rten pa dang / 'jig rten las 'das pa'i rnam par dag pas nges par 'byung ba la 'doms par bzod pa yin pas/de'i 'og tu theg pa thams cad kyis nges par 'byung ba'i spyod pa ste/ spyod pa rnam par dag pa bzhi ni 'phags pa gtsug na rin chen gyi mdo las ji skad 'byung ba lta bu yin no/ /byang chub kyi phyogs dang mthun pa'i spyod pa ni/nyan thos dang / rang sangs rgyas kyi theg pa la mos pa rnams kyi phyir ro zhes bya ba ni gtso bo smos nas brjod pa ste/ byang chub sems dpa' rnams la byang chub kyi phyogs dang mthun pa'i spyod pa med pa ma yin mod kyi/ byang chub kyi phyogs dang mthun pa'i bsgoms pas ni gtsor nyan thos rnams rnam par grol lo//byang chub sems dpa' rnams la yang pha rol tu phyin pa kun tu spyod pa gtso bor gyur pa yin te/ de nyid kyi phyir pha rol tu phyin pa spyod pa ni theg pa chen po la mos pa rnams kyi phyir bshad do zhes bya ba smos so/ /sems can yongs su smin par byed pa'i spyod pa ni gnyis po nyid kyis yongs su smin par bya ba'i phyir zhes bya ba ni gtso bor ni byang chub sems dpa' rnams kyis sems can yongs su smin par byed pa yin no//nyan thos rnams la yang sbyin pa dang snyan par smra ba la sogs pa bsdu ba'i dngos po dag yod pas gnyi ga'i yang bshad do//bsam pa bzang po de lta bu dang ldan pa ni yang dag pa'i sbyor ba dang ldan pa'i lam gyis rnam pa thams cad du byang chub sems dpa' kun tu bzang po'i spyod pa mthar thug pa thob nas/ de bzhin gshegs pa rnams kyi rnam par dag pa mthar thug pa rjes su thob par 'os pas/ de'i 'og tu bla na med pa yang dag pa rdzogs pa'i byang chub kyi yon tan thun mong ma yin pa gang dag yin pa de dag gis ston to/ /'dir sems can rnams la snying brtse ba nyid ni phan pa dang bde ba'i dgongs pa nyid kyis bstan to zhes bya ba ni tshad med pa gsum gyis bde ba'i bsam pa nyid bstan to//bzhi pas ni phan pa'i bsam pa nyid do/ /de yang kun nas nyon mongs pa med pa nyid kyi dgongs pa'i mtshan nyid du rig par bya'o zhes bya ba ni sems can rnams kyi kun nas nyon mongs pa ni rnam pa gnyis te/ rjes su chags pa dang / khong khro ba'o/ /btang snyoms kyis ni 'di ltar sems can rnams bde ba'i tshor ba la rjes su chags pa dang /sdug bsngal la khong khro bar mi 'gyur bar chags pa med cing zhen pa med pa dang sdang ba med par gyur cig ces mos par byed do/ /rnam par thar pa ni brgyad de/ gzugs can gzugs rnams la lta ba 'di ni rnam par thar pa dang po'o//nang gzugs med par 'du shes pas phyi rol gyi gzugs rnams la lta ba 'di ni rnam par thar pa gnyis pa'o/ /sdug pa ni rnam par thar pa lus kyis mngon sum du byas te/ rdzogs par byas nas gnas pa 'di ni rnam par thar pa gsum pa'o/ /de la rnam pa thams cad du/gzugs kyi 'du shes rnams las yang dag par 'das te/ thogs pa'i 'du shes rnams nub par gyur cing / sna tshogs kyi 'du shes rnams yid la mi byed pas nam mkha' mtha' yas so snyam nas/ nam mkha' mtha' yas skye mched rdzogs par byas te gnas pa 'di ni rnam par thar pa bzhi pa'o//de rnam pa thams cad du nam mkha' mtha' yas skye mched las yang dag par 'das te rnam par shes pa mtha' yas so snyam nas/ rnam shes mtha' yas skye mched rdzogs par byas te gnas pa 'di ni rnam par thar pa lnga pa'o/ /de rnam pa thams cad du rnam shes mtha' yas skye mched las yang dag par 'das te ci yang med do snyam nas ci yang med pa'i skye mched rdzogs par byas te gnas pa 'di ni rnam par thar pa drug pa'o//de rnam pa thams cad du ci yang med pa'i skye mched las yang dag par 'das nas 'du shes med/ 'du shes med min skye mched rdzogs par byas te/gnas pa 'di ni rnam par thar pa bdun pa'o/ /de rnam pa thams cad du 'du shes med 'du shes med min skye mched las yang dag par 'das te/ 'du shes dang tshor ba 'gog pa lus kyis mngon sum du byas nas rdzogs par byas te gnas pa 'di ni rnam par thar pa brgyad pa'o/ /zil gyis gnon pa'i skye mched brgyad de/nang gzugs su 'du shes pas phyi rol gyi gzugs chung ngu kha dog bzang po dang kha dog ngan pa rnams la lta zhing / gzugs de dag zil gyis mnan nas shes zil gyis mnan nas mthong ste/ de lta bur 'du shes par gyur pa 'di ni zil gyis gnon pa'i skye mched dang po'o//nang gzugs su 'du shes pas phyi rol gyi gzugs chen por gyur pa kha dog bzang po dang kha dog ngan pa rnams la lta zhing gzugs de dag zil gyis mnan nas mthong ste/ de lta bur 'du shes par gyur pa 'di ni zil gyis gnon pa'i skye mched gnyis pa'o/ /nang gzugs med par 'du shes pas phyi rol gyi gzugs rnams la de kho na bzhin du chung ngu dang chen por rim gyis lta ba 'di ni zil gyis gnon pa'i skye mched gsum pa dang bzhi pa'o//nang gzugs med par 'du shes pas phyi rol gyi gzugs sngon po dang kha dog sngon po sngon po lta bur ston pa 'od sngon po 'byung ba rnams la lta ste/dper na zar ma'i me tog gam/ yul bA rA Na sI'i ras phun sum tshogs pa sngon po kha dog sngon po sngon po lta bur ston pa 'od sngon po 'byung ba de bzhin du nang gzugs med par 'du shes pas phyi rol gyi gzugs sngon po kha dog sngon po sngon po lta bur ston pa/ 'od sngon po 'byung ba rnams la lta ba 'di ni zil gyis gnon pa'i skye mched lnga pa'o//nang gzugs med par 'du shes pas phyi rol gyi gzugs ser po kha dog ser po/ /ser po lta bur ston pa 'od ser po 'byung ba rnams la lta ste/ dper na dong ka'i me tog gam/ yul bA rA Na sI'i ras phun sum tshogs pa ser po kha dog ser po ser po lta bur ston pa/'od ser po 'byung ba de bzhin du nang gzugs med par 'du shes pas phyi rol gyi gzugs ser po kha dog ser po ser po lta bur ston pa/ 'od ser po 'byung ba rnams la lta ba 'di ni zil gyis gnon pa'i skye mched drug pa'o/ /nang gzugs med par 'du shes pas phyi rol gyi gzugs dmar po kha dog dmar po//dmar po lta bur ston pa/ 'do dmar po 'byung ba rnams la lta ste/ dper na ban du dzi ba ka'i me tog gam/ yul bA rA Na sI'i ras phun sum tshogs pa dmar po/ kha dog dmar po dmar po lta bur ston pa/ 'od dmar po 'byung ba de bzhin du/nang gzugs med par 'du shes pas phyi rol gyi gzugs dmar po/ /kha dog dmar po dmar po lta bur ston pa/ 'od dmar po 'byung ba rnams la lta ba 'di ni zil gyis gnon pa'i skye mched bdun pa'o/ /nang gzugs med par 'du shes pas phyi rol gyi gzugs dkar po kha dog dkar po dkar po lta bur ston pa/'od dkar po 'byung ba rnams la lta ste/ dper na skar ma bsangs kyi mdog gam/ yul bA rA Na sI'i ras phun sum tshogs pa dkar po kha dog dkar po/ /dkar po lta bur ston pa/ 'od dkar po 'byung ba de bzhin du nang gzugs med par 'du shes pas phyi rol gyi gzugs dkar po kha dog dkar po dkar po lta bur ston pa/'od dkar po 'byung ba rnams la lta ba 'di ni zil gyis gnon pa'i skye mched brgyad pa'o/ /zad par gyi skye mched ni bcu ste/ la la zad par sa'o/ /zad par chu'o/ /zad par me'o/ /zad par rlung ngo / /zad par sngon po'o//zad par ser po'o/ /zad par dmar po'o/ /zad par dkar po'o/ /zad par nam mkha' mtha' yas skye mched do zhes steng dang 'og dang thad kar gnyis su med cing tshad med par 'du shes par byed do/ /la la zad par rnam shes mtha' yas skye mched do zhes steng dang 'og dang thad kar gnyis su med cing tshad med par 'du shes su byed do//nyan thos rnams ni rnam par thar pa gsum gyis mya ngan las 'das pa'i sgrib pa las rnam par grol bar byed do/ /nam mkha' mtha' yas skye mched la sogs pa ni rnam par thar pa bzhis zhi ba'i rnam par thar pa la ma chags pa'i sgrib pa 'joms so/ /'du shes dang tshor ba 'gog pa'i rnam par thar pa de'i sgrib pa thag sring bar byed do//sangs rgyas bcom ldan 'das rnams kyi ni nyon mongs pa dang shes bya'i sgrib pa thams cad las nges par grol ba nyid kyis khyad par du 'phags te/ rnam par thar pa rnams kyis ni dmigs pa la mos pa mdzad do/ /nyan thos ni zil gyis gnon pa'i skye mched rnams kyis dmigs pa zil gyis mnan to//sangs rgyas bcom ldan 'das rnams ni 'jig rten thams cad zil gyis gnon pa dang / nyid kyi thugs las mnga' bsgyur bas ji ltar bzhed pa las dmigs pa dang sprul pa la sogs pa sprul par mdzad pas 'di ni khyad par yin no//nyan thos rnams ni zad par gyi skye mched dag gis rten dang bcas pa'i gzugs zad par sa la sogs par rgyas par byed do/ /sangs rgyas bcom ldan 'das rnams ni ye shes kyis shes bya thams cad khyab pa nyid kyis khyad par du 'phags so/ /nyon mongs pa med pa gang zhe na/ bsam gtan la brten nas gzhan gyi nyon mongs pa skye ba'i rkyen rjes su srung ba'i rgyu mtshan gyi ting nge 'dzin dang /shes rab gang yin pa de dag mtshungs par ldan pa'i chos rnams so/ /smon nas shes pa'i chos gang zhe na/ bsam gtan la brten nas 'di shes par bya'o snyam pa'i smon lam 'grub pa'i ting nge 'dzin dang shes rab gang yin pa dang /de dag la mtshungs par ldan pa sems dang sems las byung ba'i chos rnams so/ /so so yang dag par rig pa bzhi ni chos so so yang dag par rig pa dang / nges pa'i tshig dang / spobs pa so so yang dag par rig pa/ chos rnams kyi rnam grangs dang / rang gi mtshan nyid dang /nges pa'i tshig dang rnam par dbye ba las 'phags pa rnams kyi ye shes thogs pa mi mnga' zhing / ma chags pa dang yin pa ste/ 'di dag ni rnam grangs bzhin du chos dang / don dang / nges pa'i tshig dang / spobs pa so so yang dag par rig pa yin no/ /mngon par shes pa drug ni rdzu 'phrul gyi yul dang lha'i mig dang /lha'i rna ba dang / gzhan gyi sems shes pa dang / sngon gyi gnas rjes su dran pa dang / zag pa zad par shes pa ste/ 'di dag ni mngon par shes pa drug go/ /skyes bu chen po'i mtshan sum cu rtsa gnyis la/ skyes bu chen po zhabs shin tu gnas pas sa la mnyam par gshegs pa 'di ni/skyes bu chen po'i mtshan yin no/ /zhabs gnyis kyi mthil la 'khor lo rtsibs stong pa mu khyud dang bcas shing rnam pa thams cad yongs su rdzogs pa mnga' ba zhes bya ba de lta bu la sogs pa ni mtshan yin no/ /dpe byad bzang po brgyad cu la/ phyag dang zhabs dag gi sor mo nyi shu'i tshigs legs pa dang sen mo bzang ba ni dpe byad bzang po nyi shu ste/de lta bu la sogs pas/ mtshan dang dpe byad bzang po rgyas par ni/ theg pa chen po'i mdo sde dag dang / byang chub sems dpa'i sa las shes par bya'o/ /yongs su dag pa bzhi ni rten yongs su dag pa dang / dmigs pa yongs su dag pa dang / thugs yongs su dag pa dang ye shes yongs su dag pa'o//de bzhin gshegs pa'i stobs bcu ni/ gnas dang gnas ma yin pa mkhyen pa'i stobs dang / las bdag gir bya ba mkhyen pa'i stobs dang / bsam gtan dang / rnam par thar pa dang / ting nge 'dzin dang / snyoms par 'jug pa mkhyen pa'i stobs dang / dbang po mchog dang mchog ma yin pa mkhyen pa'i stobs dang /mos pa sna tshogs mkhyen pa'i stobs dang / khams sna tshogs mkhyen pa'i stobs dang / thams cad du 'gro ba'i lam mkhyen pa'i stobs dang / sngon gyi gnas rjes su dran pa mkhyen pa'i stobs dang / 'chi 'pho dang skye ba mkhyen pa'i stobs dang / zag pa zad pa mkhyen pa'i stobs te/'di dag ni de bzhin gshegs pa'i stobs bcu yin no/ /rgyas par ni stobs bcu'i mdo las rig par bya'o/ /bde 'gro dang ngan 'gro'i thabs la rab tu slu bzhes bya ba ni/ bdud ni phyugs gsod pa dang / mer 'jug pa la sogs pas bde 'gror 'gro ba'i thabs su ston par byed pa'i phyir bde 'gro'i thabs la rab tu slu bar byed pa yin no//bzlog pas ni ngan 'gror 'gro bar 'gyur ro zhes de ltar lung 'bogs pa'i phyir/ de ltar bdud ni ngan 'gro'i thabs la yang rab tu slu bar byed pa yin no/ /bcom ldan 'das kyis stobs gang gis bde 'gro dang ngan 'gro'i thabs la rab tu slu bar byed pa'i bdud bcom pa de bstan pa'i phyir/gnas dang gnas ma yin pa mkhyen pa'i stobs kyis ni bcom ldan 'das don dang po la bdud 'joms par mdzad pa yin par rig par bya'o zhes bya ba smos te/ bcom ldan 'das ni gnas dang gnas ma yin pa mkhyen pa'i stobs kyis srog gcod pa la sogs pas dmyal ba la sogs par skye ba gang yin pa de ni gnas yod do//bde 'gror skye ba gang yin pa de ni gnas ma yin zhing go skabs med do zhes rgyu la yang rgyur/ 'bras bu la yang 'bras bur/ yang dag pa ji lta ba bzhin du mkhyen cing / rgyu med pa dang mi mthun pa'i rgyur smra ba'i dge sbyong dang bram ze dag kyang tshar gcod par mdzad do//lha la sogs pa skyabs ma yin pa la skyabs su rab tu slu ba zhes bya ba ni/ lha rnams ni nges par 'byung ba'i lam mngon par mi shes pa'i phyir skyabs ma yin no/ /skyabs kyi don ni skyob pa'i don yin na/ de rnams ni thabs mi shes pa'i phyir/ 'khor ba dang ngan 'gro'i 'jigs pa thams cad las sems can rnams skyob par mi nus so//bdud ni de dag kyang 'jig rten gyi skyabs nyid du ston pa na skyabs su rab tu slu bar byed pa zhes bya ste/ lha rnams ni thabs ma yin pa rdzu 'phrul dang / dam pa sbyin pa la sogs pas 'jig rten la rab tu slu bar byed do/ /bcom ldan 'das ni las bdag gir bya ba mkhyen pa'i stobs kyis bdud las rgyal ba'i phyir bdud 'joms par mdzad pa zhes bya'o//theg pa chen pos nges par 'byung ba la rab tu slu bar byed pa'o zhes bya ba ni bdud ni las dang po pa'i byang chub sems dpa' rnams la/ de'i bsngags pa ma yin pa bsgrags pas byang chub sems dpa'i spyod pa las 'dun pa bzlog nas nyan thos kyi theg pa la sbyor bar byed do//sangs rgyas bcom ldan 'das rnams ni stobs lhag ma dbang po mchog dang mchog ma yin pa mkhyen pa la sogs pas theg pa chen pos nges par 'byung ba la rab tu slu bar byed pa'i bdud bcom nas/ byang chub sems dpa' rnams byang chub sems dpa'i spyod pa la sbyor zhing 'doms par mdzad do//'di'i phyir yang bcom ldan 'das kyang bdud 'joms par mdzad pa zhes bya'o/ /mi 'jigs pa bzhi ni kye ma nga mngon par rdzogs par sangs rgyas par zhal gyis 'che ba la/ lha dang bcas/ bdud dang bcas/ tshangs pa dang bcas/ dge sbyong dang bram ze'i skye dgur bcas/lha dang / mi dang lha ma yin du bcas pa'i 'jig rten 'di ni chos 'di dag mngon par rdzogs par sangs rgyas so zhes nga la 'ga' yang chos dang mthun pas gleng bar byed pa'i rgyu mtshan yang dag par rjes su ma mthong ngo / /rgyu mtshan yang dag par rjes su ma mthong bas 'di na nga bde ba thob pa dang / 'jigs pa med par gyur cing gnas te/ khyu mchog gi gnas rlabs po che zhal gyis 'che zhing tshongs pa'i 'khor lo sngon 'jig rten na dge sbyong dang bram ze sus kyang chos dang mthun par ma bskor ba bskor ba mdzad do/ /kye ma nga zag pa zad par zhal gyis 'che ba la 'di na zag pa 'di dag yongs su ma zad do zhes 'ga' yang zhes bya ba snga ma bzhin no//ngas par du gcod pa'i chos gsungs pa gang dag yin pa de dag bsten na bar du gcod par mi 'gyur ro zhes bya ba thams cad do/ /ngas nges par 'byin pa'i chos su bshad pa gang dag yin pa de dag bsten na de byed pa'i sdug bsngal yang dag par zad par byed par nges par 'byung ba yin no zhes 'di na nga la 'ga' yang zhes bya ba snga ma bzhin du rig par bya ste/'di dag ni mi 'jigs pa bzhi yin no/ /bsrung ba med pa gsum ni/ de bzhin gshegs pa'i sku'i phrin las dang gsung dang thugs kyi phrin las bsrung ba med pa ste/ bsrung ba med pa gsum gyis ni de bzhin gshegs pa'i nyes pa mdzad pa 'chab pa rnam pa thams cad spangs pa 'di yongs su bstan to//gang yang dgra bcom pa la brgya lam na res 'ga' zhig brjed nas ngan par byas pa/ lung du ma bstan pa cung zad tsam yod pa de yang / de bzhin gshegs pa la thams cad kyi thams cad du mi mnga' bas de'i phyir de bzhin gshegs pa ni ji ltar zhal gyis 'che ba de lta bu'i ngo bo nyid yin no//nyan thos rnams tshar bcad cing tshar bcad nas ngor lhangs por 'doms shing de dag kha cig ni brgyad/ kha cig ni skrod pas brlang por mdzad kyang 'di la ni 'di dag la bdag nyan thos rnams dang gnas pa'i rgyus/ sku dang gsung dang thugs yongs su ma dag pa kun tu spyod pa rig nas gzhi des yi ma rangs shing ma mgu ba rnams gleng bar 'gyur zhing gzhan dag la yang sgrogs par gyur na mi rung ngo snyam pa'i bsrung ba mi 'byung ngo //ma 'dres pa'i dran pa nye bar gzhag pa gsum gang zhe na/ 'di ni ston pa thugs brtse ba thugs rje can don bzhed pa phan par bzhed pa nyan thos rnams la kye dge slong dag 'di ni khyed la phan par byed pa/'di ni khyod la bde bar byed pa/ 'di ni khyed la phan pa dang bde bar byed pa'o zhes 'khor gyi nang du chos ston par mdzad cing de na nyan thos rnams de la gus par byas te nyan par byed/ rna gtod par byed/ kun shes pa'i sems nye bar 'jog par byed na/des de bzhin gshegs pa dgyes pa yang mi mnga'/ thugs ya yo por yang mi 'gyur ba 'di ni dran pa nye bar gzhag pa dang po yin no/ /gzhan yang ston pa zhes bya ba nas phan pa dang bde bar mdzad pa'o zhes 'khor gyi nang du chos ston par mdzad cing zhes bya ba ni snga ma bzhin te/ de la nyan thos rnams de la gus par byas te nyan par mi byed/rna gtod par mi byed/ kun shes pa'i sems nye bar 'jog par mi byed na/ des de bzhin gshegs pa mi bzod par mi 'gyur/ thugs ma rangs par mi 'gyur ba 'di ni dran pa nye bar gzhag pa gnyis pa'o/ /gzhan yang ston pa zhes bya ba nas phan pa dang bde bar byed pa'o zhes 'khor gyi nang du chos ston par mdzad cing zhes bya ba'i bar snga ma bzhin no//de la nyan thos kha cig ni de la gus par byas te nyan par byed/ rna gtod par byed/ kun shes pa'i sems nye bar 'jog par byed/ kha cig ni gus par byas nas nyan par mi byed/ rna gtod par mi byed/ kun shes pa'i sems nye bar 'jog par mi byed na/de la gang dag de la gus par byas te/ nyan par byed/ rna gtod par byed/ kun shes pa'i sems nye bar 'jog par byed pa des kyang de bzhin gshegs pa dgyes par yang mi 'gyur/ thugs ya yo por yang mi 'gyur ro/ /gang dag de la gus par byas te nyan par yang mi byed/rna gtod par yang mi byed/ kun shes pa'i sems nye bar 'jog par yang mi byed na des kyang de bzhin gshegs pa mi bzod par yang mi 'gyur/ thugs ma rangs par yang mi 'gyur ba 'di ni dran pa nye bar gzhag pa gsum pa yin no/ /dran pa nye bar gzhag pa gsum gyis ni mdor na de bzhin gshegs pa yun ring po nas 'di snyam du/gdul ba rnams bdag gis legs par bshad pa'i chos la sgrub pa ji lta ba bzhin du nan tan du byed kyang ji ma rung snyam du dgongs pa yun ring po nas de ltar dgongs pa chos kyi rje 'khor yongs su sdud pa de'i bzhed pa de phun sum tshogs pa dang rgud pa dag gis kun nas nyon mongs pa med par rab tu 'byed do//de dag kyang 'khor gsum gyi bye brag gis gsum du rnam par gzhag ste/ 'khor gsum po gang zhe na/ thams cad gcig tu yang dag bsgrub pa 'di ni 'khor gcig pa yin no/ /thams cad gcig tu log par bsgrub pa 'di ni 'khor gnyis pa yin no/ /gsum pa ni de dag kha cig ni yang dag par bsgrub la/de dag kha cig ni log par bsgrub pa yin no/ /bag chags yang dag par bcom pa gang zhe na/ de la de bzhin gshegs pa la reg pa'am gzigs pa'am bzhugs pa la nyon mongs pa yod pa lta bu'i g.yo ba kun tu spyod pa rab tu rgyu ba gang yin pa de de bzhin gshegs pas bag chags dang bcas te yang dag par bcom mo//dgra bcom pa rnams ni nyon mongs pa spangs kyang g.yo ba dang bltas pa dang smras pa dang / gnas pa dag la nyon mongs pa yod pa dang 'dra ba'i g.yo ba yod pa kho na'o/ /bsnyel ba mi mnga' ba nyid gang zhe na/ de la de bzhin gshegs pa ni gang zhig bsgrub par bya ba yin pa dang /gang du yin pa dang / ji ltar yin pa dang / gang gi tshe yin pa de der de'i tshe de bzhin du legs par bsgrub pa'i phyir te/ 'di ni de bzhin gshegs pa'i bsnyel ba mi mnga' ba'i chos nyid yin no/ /'di la de bzhin gshegs pa'i mdzad pa thams cad dang / yul thams cad dang / mdzad pa thams cad kyi thabs rnams la bsnyel ba mi mnga' zhing rtag tu dgongs pa nye bar gnas pa gang yin pa 'di ni der bsnyel ba mi mnga' ba'i chos nyid du blta bar bya'o//thugs rje chen po gang zhe na/ khams gsum na spyod pa'i sems can thams cad la rtag tu sdug bsngal gyi rnam pa thams cad la dmigs pa'i thugs rjes gnas pa 'grub pa'i ting nge 'dzin dang /shes rab gang yin pa dang / de dag dang mtshungs par ldan pa'i chos rnams so/ /rnam pa thams cad mkhyen pa nyid gang zhe na/ thams cad du ye shes thogs pa mi mnga' ba'i phyir gang gis sems can thams cad kyi the tshom thams cad gcod par mdzad cing de dang der gdul ba'i the tshom gcod pa'i phyir/chos kyi tshul yang yun ring du gnas par mdzad/ bstan bcos pa'i chos de la brten nas sems can yongs su ma smin pa yang yongs su smin par mdzad/ smin pa rnams kyang rnam par grol bar mdzad pa yin no/ /pha rol tu phyin pa yongs su rdzogs pa gang zhe na/sbyin pa la sogs pa pha rol tu phyin pa drug shes rab dang snying rje'i thabs la mkhas pas yongs su zin pas sa gong nas gong du 'dzeg pa'i rim gyis bskal pa chen po grangs med pa gsum gyis ser sna la sogs pa sgrib pa thams cad bag chags dang bcas te spangs pa'i phyir bla na med pa yang dag par rdogs pa'i byang chub mngon par rdzogs pa'i sangs rgyas pa'i sbyin pa la sogs pa'i pha rol tu phyin pa phun sum tshogs pa rnam pa thams cad yongs su rdzogs la/yid bzhin gyi nor bu lta bur lhun gyis grub par sangs rgyas kyi mdzad pa rgyun mi gcod pa gang yin pa ste/ de bzhin gshegs pa bla na med pa brnyes pa rnams kyi pha rol tu phyin pa yongs su rdzogs pa zhib tu ni 'phags pa gtsug na rin po che'i mdo la sogs pa las blta bar bya'o//byang chub sems dpa'i sa thams cad las nges par 'byung ba nyid ni rgyu'o zhes bya ba ni byang chub sems dpa'i sa rab tu dga' ba la sogs pa bcu ni sems can thams cad kyi mchog thob par byed pa'i rgyur gyur pa yin te/de nyid kyi phyir/ sems can thams cad kyi mchog tu gyur pa nyid ni 'bras bu'o zhes bya ba smos so/ /rnam pa thams cad du mi snang ba nyid ni chos kyi sku ste zhes bya ba ni ji skad du chos kyi sku ni so so rang gis rig par bya ba yin pa'i phyir bsam gyis mi khyab pa'i mtshan nyid do/ /rtog ge'i spyod yul ma yin pa'i phyir/'jig rten na dpe med pa nyid do zhes bshad pa lta bu'o/ /theg pa chen po'i mdo sde'i rgyan gyi rgya cher bshad pa/ slob dpon ngo bo nyid med pas mdzad pa rdzogs so// //rgya gar gyi mkhan po shAkya siM ha dang / zhu chen gyi lo tsA ba ban+de dpal brtsegs kyis bsgyur cing zhus te gtan la phab pa'o// //