CLOSE WINDOW

D4027
བོད་ཡིག

@##/ /rgya gar skad du/ ma d+h+yAn ta bi b+ha ga TI ka /bod skad du/ dbus dang mtha' rnam par 'byed pa'i 'grel pa/ bam po dang po/ 'jam dpal gzhon nur gyur pa la phyag 'tshal lo/ /bstan bcos 'di ni rab mdzad pa//bde gshegs nyid skyes bdag sogs la/ /'chad pa la yang mngon mchod nas/ /don rnams dbye phyir 'bad par bya/ /de la thog ma kho nar bstan bcos kyi lus rnam par gzhag ste/ mtshan nyid sgrib pa de kho na//gnyen po dag ni bsgom pa dang / /de yi gnas dang 'bras bu thob/ /theg pa bla na med pa'o/ /zhes bya ba don bdun po 'di dag bstan bcos 'di las 'chad do/ /'di lta ste/ mtshan nyid dang /sgrib pa dang / de kho na dang / gnyen po bsgom pa dang / gnyen po bsgom pa de nyid kyi gnas dang / 'bras bu thob pa dang / theg pa bla na med pa ste don bdun pa'o/ /de la mtshan nyid las brtsams nas/ / yang dag ma yin kun rtog yod/ /de la gnyis po yod ma yin/ /stong pa nyid ni 'di la yod/ /de la yang ni de yod do/ /zhes bya ba gsungs so/ /de la yang dag pa ma yin pa'i kun tu rtog pa'i ni gzung ba dang 'dzin par rnam par rtog pa'o//gnyis po ni gzung ba dang 'dzin pa'i dngos po dang bral ba'o/ /stong pa nyid ni yang dag pa ma yin pa'i kun tu rtog pa de gzung ba dang 'dzin pa'i dngos po dang bral ba nyid do/ /de la yang ni de yod do/ /zhes bya ba ni yang dag pa ma yin pa kun tu rtog pa'o//de ltar gang na gang med pa de ni des stong par yang dag pa ji lta ba bzhin du yang dag par rjes su mthong ngo / /'di la lhag ma yod pa gang yin pa de ni 'dir yod par yang dag pa ji lta ba bzhin du rab tu shes te/de ltar stong pa nyid kyi mtshan nyid phyin ci ma log par bstan pa yin no/ /stong pa ma yin mi stong min/ /de lta bas na thams cad bshad/ /yod pas med pas yod pas na/ /de ni dbu ma'i lam yin no/ /stong pa ma yin zhes bya ba ni stong pa nyid dang yang dag pa ma yin pa kun tu rtogs pas so//mi stong min zhes bya ba ni/ /gnyis pa ste/ gzung ba dang 'dzin pas so/ /thams cad ces bya ba ni yang dag pa ma yin pa kun tu rtog pa zhes bya ba 'dus byas dang stong pa zhes bya ba 'dus ma byas so//bshad ces bya ba ni bstan pa'o/ /yod pas na zhes bya ba ni yang dag pa ma yin pa kun tu rtog pa'o/ /med pas zhes bya ba ni gnyis pa'o/ /yod pas na zhes bya ba ni yang dag pa ma yin kun tu rtog pa la stong pa nyid yod pa dang / de la yang yang dag pa ma yin pa kun tu rtog pa yod pa'o/ /de ni dbu ma'i lam yin no zhes bya ba ni thams cad gcig tu stong pa yang ma yin no/ /gcig tu mi stong pa yang ma yin pa gang yin pa'o/ /de ltar 'di ni shes rab kyi pha rol tu phyin pa la sogs pa'i nang nas 'di thams cad ni stong pa yang ma yin/mi stong pa yang ma yin zhes 'byung ba dang mthun par byas pa yin no/ /de ltar yang dag pa ma yin pa kun tu rtog pa yod pa'i mtshan nyid dang med pa'i mtshan nyid brjod nas/ da ni rang gi mtshan nyid brjod do/ /don dang sems can bdag rnam rig /snang ba'i rnam par shes pa ni/ /rab tu skye'o de'i don med//de med pas na de yang med/ /de la don du snang ba ni gzugs la sogs pa'i dngos por snang ba gang yin pa'o/ /sems can du snang ba ni dbang po lngar bdag dang gzhan gyi rgyud la snang ba gang yin pa'o/ /bdag tu snang ba ni bdag tu rmongs pa la sogs pa dang mtshungs par ldan pa'i phyir nyon mongs pa can gyi yid do//rnam par rig par snang ba ni rnam par shes pa drug rnams so/ /de'i don med ces bya ba ni don dang sems can du snang ba rnams med pa dang / bdag dang rnam par rig par snang ba ni log par snang ba'i phyir ro/ /don med pas 'dzin pa'i rnam par shes pa de yang med do//yang dag ma yin kun rtog pa/ /de ni de phyir grub pa yin/ /de bzhin ma yin ye med min/ /'di ltar ji ltar snang ba 'byung ba de ni de bzhin du yod pa ma yin no/ /'khrul pa tsam du 'byung ba'i phyir ye med pa yang ma yin no/ /ci'i phyir de ye med pa nyid du mi 'dod ce na/ 'di ltar/ de zad nas ni grol bar 'dod//gzhan du na bcings pa dang thar par mi 'grub ste/ kun nas nyon mongs pa dang / rnam par byang ba la skur pa 'debs pa'i nyes par 'gyur ro/ /de ltar yang dag pa ma yin pa kun tu rtog pa'i rang gi mtshan nyid bstan nas yang dag pa ma yin pa kun tu rtog pa tsam du zad na ngo bo nyid gsum du ji ltar bsdu bar 'gyur ba'i bsdu ba'i mtshan nyid ston te/brtags pa dang ni gzhan dbang dang / /yongs su grub pa nyid kyang ngo / /don phyir yang dag min rtog phyir/ /gnyis po med pa'i phyir bshad do/ /zhes bya ba'o/ /de la don ni kun tu brtags pa'i ngo bo nyid do//yang dag pa ma yin pa kun tu rtog pa ni gzhan gyi dbang gi ngo bo nyid do/ /gzung ba dang 'dzin pa med pa nyid ni yongs su grub pa'i ngo bo nyid do/ /da ni yang dag pa ma yin pa kun tu rtog pa de nyid kyi med pa'i mtshan nyid la 'jug pa'i thabs kyi mtshan nyid yongs su ston te/ dmigs pa la ni brten nas su/ /mi dmigs pa ni rab tu skye/ /mi dmigs pa la brten nas su/ /mi dmigs pa ni rab tu skye/ /zhes bya ba'o/ /rnam par rig pa tsam du dmigs pa la brten nas don mi dmigs pa skye'o/ / don mi dmigs pa la brten nas rnam par rig pa tsam yang mi dmigs pa skye ste /de ltar gzung ba dang 'dzin pa dag med pa'i mtshan nyid la 'jug go/ /de yi phyir na dmigs pa ni/ /mi dmigs ngo bo nyid du grub/ /dmigs par bya ba'i don med na dmigs pa mi rung ba'i phyir ro/ /de lta bas na dmigs pa dang / /mi dmigs mnyam par shes par bya//dmigs pa ni dmigs pa nyid du ma grub pa'i phyir ro/ /mi dmigs pa'i ngo bo nyid yin yang yang dag pa ma yin pa'i don du snang bas dmigs pa zhes bya'o/ /da ni yang dag pa ma yin pa kun tu rtog pa nyid kyi rab tu dbye ba'i mtshan nyid ston te/ yang dag ma yin kun rtog ni/ / sems dang sems byung khams gsum pa/ /zhes bya ba'o/ /'dod pa dang / gzugs dang / gzugs med pa na spyod pa tha dad pas so/ /rnam grangs kyi mtshan nyid kyang ston te/ de la don mthong rnam par shes/ /de yi khyad par sems las byung / /zhes bya ba'o/ / don tsam mthong ba ni rnam par shes pa'o//don gyi khyad par mthong ba ni sems las byung ba rnams te tshor ba la sogs pa'o/ /'jug pa'i mtshan nyid kyang ston te/ gcig ni rkyen gyi rnam par shes/ /gnyis pa nye bar spyod pa can/ /nye bar spyod pa dang yongs gcod dang / /de yi 'jug byed sems las byung / / zhes bya ba'o/ / kun gzhi rnam par shes pa ni rnam par shes pa gzhan dag gi rkyen yin pas rkyen gyi rnam par shes pa'o/ /de las byung ba 'jug pa'i rnam par shes pa ni nye bar spyod pa can no/ /nye bar spyod pa ni tshor ba'o/ /yongs su spyod pa ni 'du shes/ /rnam par shes pa 'jug par byed pa dag ni 'du byed rnams te/sems pa dang yid la byed pa la sogs pa'o/ /kun nas nyon mongs pa'i mtshan nyid kyang ston te/ sgrib pa'i phyir dang 'debs pa'i phyir/ /khrid pa'i phyir dang kun 'dzin phyir/ /rdzogs byed phyir dang gsum gcod phyir/ /nye bar gcod phyir sdud pa'i phyir//sbyor ba'i phyir dang mngon du'i phyir/ /sdug bsngal phyir ni 'gro nyon mongs/ /rnam gsum rnam gnyis kyang nyon mongs/ /rnam bdun yang dag min rtog las/ /zhes bya ba'o/ /de la sgrib pa'i phyir ni ma rig pas yang dag pa ji lta ba bzhin du mthong ba la bgegs byed pa'i phyir ro//'debs pa'i phyir ni 'du byed rnams kyis rnam par shes pa la las kyi bag chags 'jog pa'i phyir ro/ /khrid pa'i phyir ni rnam par shes pas skye ba'i gnas su phyin par byed pa'i phyir ro/ /kun 'dzin phyir ni ming dang gzugs kyi lus so/ /rdzogs byed phyir ni skye mched drug gis so//gsum gcod phyir ni reg pas so/ /nye bar spyod pa'i phyir ni tshor bas so/ /sdud pa'i phyir ni las kyis btab pa'i yang srid pa sred pas so/ /sbyor ba'i phyir ni len pa rnams kyis rnam par shes pa skye ba dang mthun par 'dod pa la sogs pa rnams su'o/ /mngon du'i phyir ni las byas pa'i rnam par smin pa srid pas yang srid par 'byin par mngon par byed pa'i phyir ro//sdug bsngal phyir ni skye ba dang / rga shis 'gro ba rnams nyon mongs par byed pa'o/ /de yang / rnam gsum rnam gnyis kyang nyon mongs/ /rnam bdun yang dag min rtog las/ /rnam gsum ni nyon mongs pa'i kun nas nyon mongs pa dang /las kyi kun nas nyon mongs pa dang / skye ba'i kun nas nyon mongs pa'o/ /de la nyon mongs pa'i kun nas nyon mongs pa ni ma rig pa dang sred pa dang len pa rnams so/ /las kyi kun nas nyon mongs pa ni 'du byed rnams dang sred pa'o/ /skye ba'i kun nas nyon mongs pa ni yan lag lhag ma rnams so//kun nas nyon mongs pa rnam pa gnyis ni rgyu'i kun nas nyon mongs pa dang / 'bras bu'i kun nas nyon mongs pa'o/ /de la rgyu'i kun nas nyon mongs pa ni nyon mongs pa dang / las kyi ngo bo nyid kyi yan lag rnams kyis so/ /'bras bu'i kun nas nyon mongs pa ni yan lag lhag ma rnams kyis so//kun nas nyon mongs pa rnam pa bdun ni rgyu rnam pa bdun te/ ma rig pa ni phyin ci log gi rgyu'o/ /'du byed rnams ni 'bebs pa'i rgyu'o/ /rnam par shes pa ni nye bar khrid pa'i rgyu'o/ /ming dang gzugs dang skye mched drug ni kun 'dzin pa'i rgyu'o/ / reg pa dang tshor ba ni nye bar spyod pa'i rgyu'o/ /sred pa dang / len pa dang / srid pa ni sdud pa'i rgyu'o/ /skye ba dang / rga shi ni skyo ba'i rgyu'o/ /kun nas nyon mongs pa 'di dag thams cad ni yang dag pa ma yin pa kun tu rtog pa las 'byung ba'o/ /yang dag pa ma yin pa kun tu rtog pa'i don bsdus pa ni yod pa'i mtshan nyid dang /med pa'i mtshan nyid dang / rang gi mtshan nyid dang / bsdu ba'i mtshan nyid dang / med pa'i mtshan nyid la 'jug pa'i thabs kyi mtshan nyid dang / rab tu dbye ba'i mtshan nyid dang / rnam grangs kyi mtshan nyid dang / 'jug pa'i mtshan nyid dang / kun nas nyon mongs pa'i mtshan nyid de/mtshan nyid rnam pa dgu bstan pa'o/ /de ltar yang dag pa ma yin pa kun tu rtog pa brjod nas/ stong pa nyid ji ltar shes par bya ba de ston te/ stong pa nyid ni mdor bsdu na/ /mtshan nyid dang ni rnam grangs dang / /de yi don dang dbye ba dang / /sgrub pa dag ste shes par bya/ /zhes bya ba'o//mtshan nyid ji ltar shes par bya zhe na/ gnyis dngos med dang dngos med pa'i/ /dngos po stong pa'i mtshan nyid do/ /gnyis po gzung ba dang 'dzin pa'i dngos po med pa dang / dngos po med pa de'i dngos po ni stong pa nyid kyi mtshan nyid do/ /de ltar dngos po med pa'i ngo bo nyid ni stong pa nyid kyi mtshan nyid du yongs su bstan pa yin no//dngos po med pa'i ngo bo nyid gang yin pa de ni/ yod pa ma yin med pa'ang min/ /ji ltar yod pa ma yin zhe na/ 'di ltar gnyis po de'i dngos po med pa'o/ /ji ltar med pa yang ma yin zhe na/ 'di ltar gnyis po'i dngos po med pa'i dngos po de ni stong pa nyid kyi mtshan nyid de /de bas na yang dag pa ma yin pa kun tu rtog pa dang / tha dad gcig pa'i mtshan nyid min/ /tha dad pa yin na ni chos la chos nyid gzhan ma yin pa mi rung ste/ mi rtag pa nyid dang / sdug bsngal ba nyid bzhin no/ /gcig pa yin du zin na ni rnam par dag pa'i dmigs pa dang / spyi'i mtshan nyid du mi 'gyur te/des de nyid dang gzhan las rnam par grol ba stong pa nyid kyi mtshan nyid yongs su bstan pa yin no/ /rnam grangs ji ltar rig par bya zhe na/ stong pa nyid ni mdor bsdu na/ /de bzhin nyid dang yang dag mtha'/ /mtshan ma med dang don dam dang / / chos kyi dbyings ni rnam grangs so/ /rnam grangs kyi don ji ltar shes par bya zhe na/gzhan min phyin ci log ma yin/ /de 'gog 'phags pa'i spyod yul dang / /'phags pa'i chos kyi rgyu yi phyir/ /rnam grangs don de go rims bzhin/ /gzhan ma yin pa'i phyir de bzhin nyid de/ rtag tu de bzhin pa'i phyir ro/ /phyin ci log ma yin pa'i phyir yang dag pa'i mtha' ste/phyin ci log gi gzhi ma yin pa'i phyir ro/ /mtshan ma 'gog pa'i phyir mtshan ma med pa ste/ mtshan ma thams cad med pa'i phyir ro/ /'phags pa'i ye shes kyi spyod yul yin pas don dam pa ste/ ye shes dam pa'i yul yin pa'i phyir ro/ /'phags pa'i chos kyi rgyu yin pas chos kyi dbyings te/'phags pa'i chos rnams ni de la dmigs pas 'byung ba'i phyir ro/ /'dir dbyings kyi don ni rgyu'i don to/ /stong pa nyid kyi rab tu dbye ba ji ltar shes par bya zhe na/ kun nas nyon mongs rnam par dag /ces bya ba ste/ de'i rab tu dbye ba ste / /gang gi tshe kun nas nyon mongs pa la/ gang gi tshe rnam par dag ce na/ de ni dri bcas dri ma med/ /gang gi tshe dri ma dang bcas par de'i tshe kun nas nyon mongs pa gnas pa'o/ /gang gi tshe dri ma spangs pa de'i tshe rnam par dag pa'o/ /gal te dri ma dang bcas par gyur la dri ma med par yang 'gyur na 'gyur ba'i chos can yin pas ji ltar mi rtag par mi 'gyur zhe na/ de ni 'di ltar/chu khams gser dang nam mkha' rnams/ /dag pa bzhin du dag par 'dod/ /glo bur gyi dri ma dang bral ba la bya'i de'i ngo bo nyid gzhan du 'gyur ba ni ma yin no/ /gzhan yang rab tu dbye ba ni stong pa nyid rnam pa bcu drug po 'di lta ste/ nang stong pa nyid dang / phyi stong pa nyid dang / phyi nang stong pa nyid dang / chen po stong pa nyid dang /stong pa nyid stong pa nyid dang / don dam pa stong pa nyid dang / 'dus byas stong pa nyid dang / 'dus ma byas stong pa nyid dang / mtha' las 'das pa stong pa nyid dang / thog ma dang tha ma med pa stong pa nyid dang / dor ba med pa stong pa nyid dang / rang bzhin stong pa nyid dang / chos thams cad stong pa nyid dang /rang gi mtshan nyid stong pa nyid dang / dngos po med pa stong pa nyid dang / dngos po med pa'i ngo bo nyid stong pa nyid do / /de yang mdor bsdu na zhes bya bar rig par bya'o/ /za ba bza' dang de yi lus / /gnas kyi gzhi yi stong pa nyid/ /de yang gang gis ji ltar mthong / /gang phyir de yang stong pa nyid//dge gnyis thob par bya ba'i phyir/ /rtag tu sems can phan bya'i phyir/ /'khor ba gtang bar mi bya'i phyir/ /dge ba mi zad bya ba'i phyir/ /rigs kyang rnam par dag bya'i phyir/ /mtshan dang dpe byad thob bya'i phyir/ /sangs rgyas chos rnams dag bya'i phyir/ /byang chub sems dpa' sgrub par byed/ / de la za ba stong pa nyid ni nang gi skye mched rnams las brtsams so/ /bza' ba stong pa nyid ni phyi rol gyi rnams so/ /de'i lus ni za ba dang bza' ba de gnyis kyi gnas gang yin pa ste khog pa'o/ /de'i stong pa nyid ni phyi nang stong pa nyid ces bya'o/ /gnas kyi gzhi ni snod kyi 'jig rten te/ de rgya che ba'i phyir de'i stong pa nyid ni chen po stong pa nyid ces bya'o//nang gi skye mched la sogs pa de yang gang gis stong par mthong zhe na/ stong pa nyid shes pas te/ de'i stong pa nyid ni stong pa nyid stong pa nyid do/ /ji ltar don dam pa'i rnam par mthong ba de'i stong pa nyid ni don dam pa stong pa nyid do/ /gang gi phyir byang chub sems dpa' sgrub par byed pa de yang stong pa nyid do//ci'i phyir sgrub par byed ce na/ dge gnyis thob par bya ba'i phyir/ /zhes bya ba ste/ dge ba gnyis ni 'dus byas dang 'dus ma byas so/ /rtag tu sems can phan bya'i phyir/ /zhes bya ba ni sems can la gtan du phan par bya ba'i phyir ro/ /'khor ba gtang bar mi bya'i phyir/ /zhes bya ba ni 'khor ba thog ma dang tha ma med pa stong pa nyid du ma mthong na skyo ste 'khor ba yongs su gtong ngo //dge ba mi zad bya ba'i phyir/ /zhes bya ba ni phung po lhag ma med pa'i mya ngan las 'das pa na yang mi gtong zhing mi 'dor ba gang yin pa'o/ /rigs kyang rnam par dag bya'i phyir/ /zhes bya ba la/ rigs ni rang bzhin te ngo bo nyid kyi phyir ro/ / mtshan dang dpe byad thob bya'i phyir/ /zhes bya ba ni/ skyes bu chen po'i mtshan rnams dang / dpe byad bzang po rnams dang bcas pa thob par bya ba'i phyir ro/ /sangs rgyas chos rnams dag bya'i phyir/ /byang chub sems dpa' sgrub par byed/ /ces bya ba ni stobs dang mi 'jigs pa dang ma 'dres pa la sogs pa'o/ /de ltar re zhig stong pa nyid bcu bzhi rnam par gzhag par shes par bya'o//'di la stong pa nyid gang yin zhe na/ gang zag dang ni chos rnams kyi/ /dngos po med 'dir stong pa nyid/ /de dngos med pa'i dngos yod pa / /de ni de las stong nyid gzhan/ /zhes bya ba'o / /gang zag dang chos kyi dngos po med pa ni stong pa nyid do//dngos po med pa de'i dngos po yod pa yang yin no / /za ba la sogs pa stong pa nyid ces gong du ji skad smos pa der stong pa nyid kyi mtshan nyid bstan pa'i phyir/ dngos po med pa stong pa nyid dang / dngos po med pa'i ngo bo nyid stong pa nyid dang / stong pa nyid rnam pa gnyis tha mar rnam par 'jog ste/ gang zag dang chos su sgro 'dogs pa dang / de'i stong pa nyid la skur pa 'debs pa bsal ba'i phyir go rims bzhin no/ /de ltar stong pa nyid kyi rab tu dbye ba shes par bya'o/ /sgrub pa ji ltar shes par bya zhe na/ gal te nyon mongs de ma gyur//lus can thams cad grol bar 'gyur/ /gal te rnam dag de ma gyur/ /'bad pa 'bras bu med par 'gyur/ /gal te gnyen po ma skyes par yang chos rnams kyi stong pa nyid kyis glo bur gyi nye ba'i nyon mongs pa rnams kyis kun nas nyon mongs par mi 'gyur na ni kun nas nyon mongs pa med pas 'bad pa med par sems can thams cad grol bar 'gyur ro//ci ste gnyen po skyes kyang rnam par dag par mi 'gyur na ni thar par bya ba'i phyir rtsom pa 'bras bu med par 'gyur ro/ /de ltar na/ nyon mongs ma yin mi mongs min/ /de ni dag dang ma dag min//ji ltar nyon mongs par gyur pa ma yin la ma dag pa yang ma yin zhe na sems rang bzhin gyis 'od gsal ba'i phyir ro/ /ji ltar nyon mongs par gyur pa ma yin pa yang ma yin la dag pa yang ma yin zhe na/ glo bur gyi nyon mongs pa'i phyir ro/ /de ltar stong pa nyid kyi rab tu dbye ba bstan pa bsgrubs pa yin no//de yang stong pa nyid kyi don bsdus pa ni mtshan nyid rnam par gzhag par rig par bya'o/ /de la mtshan nyid ni dngos po med pa'i mtshan nyid dang / dngos po'i mtshan nyid do/ /dngos po'i mtshan nyid kyang dngos po yod pa dang dngos po med pa las rnam par grol ba'i mtshan nyid dang /de nyid dang gzhan las rnam par grol ba'i mtshan nyid do/ /rnam par gzhag pa ni rnam grangs la sogs pas rnam par gzhag par rig par bya'o/ /de la rnam pa bzhi po 'di dag bstan pas ni rnam par rtog pa dang /skrag pa dang / le lo dang / the tshom nye bar zhi bar bya ba'i phyir stong pa nyid rang gi mtshan nyid dang / las kyi mtshan nyid dang / kun nas nyon mongs pa dang / rnam par byang ba'i mtshan nyid dang / rigs pa'i mtshan nyid brjod pa yin no/ / bstan bcos dbus dang mtha' rnam par 'byed pa las mtshan nyid kyi le'ur bcad pa zhes bya ba ste dang po'i 'grel pa'o// //sgrib pa'i dbang du mdzad de/ khyab dang nyi tshe lhag pa dang / /mnyam dang len dang spong ba ni/ /gnyis kyi sgrib par bstan pa yin/ /zhes bya ba gsungs so//de la khyab pa ni byang chub sems dpa'i rigs can rnams kyi nyon mongs pa dang shes bya'i sgrib pa ste/ mtha' dag la sgrib pa'i phyir ro/ /nyi tshe ba ni nyan thos la sogs pa'i rigs can rnams kyi nyon mongs pa'i sgrib pa'o/ /lhag ma ni de dag nyid kyi sgrib pa ste/'dod chags la sogs pa'i spyod pa rnams kyi sgrib pa'o/ /mnyam pa ni cha mtshungs par spyod pa rnams kyi sgrib pa'o/ /'khor ba len pa dang spong ba'i sgrib pa ni byang chub sems dpa'i rigs can rnams kyi sgrib pa ste/ mi gnas pa'i mya ngan las 'das pa la sgrib pa'i phyir ro//de ltar 'di dag ni ci rigs par byang chub sems dpa'i rigs can rnams dang / nyan thos la sogs pa'i rigs can rnams dang gnyi ga'i sgrib par bstan to/ /yang / nyon mongs mtshan nyid rnam dgu'o/ /kun tu sbyor rnams sgrib pa yin/ /kun tu sbyor ba dgu ni nyon mongs pa'i sgrib pa'o//de dag gang la gang sgrib ce na/ skyo ba dang ni btang snyoms dang / /de kho na ni mthong ba dang / /rjes su chags pa'i kun tu sbyor ba ni kun tu skyo ba la sgrib pa'o/ /khong khro ba'i kun tu sbyor ba ni btang snyoms la sgrib ste/ des ni mi mthun pa la khong khro ba'i gzhi la btang snyoms su byed mi nus so//lhag ma rnams ni de kho na mthong ba la/ ji lta zhe na/ de dag ni go rims bzhin du/ 'jig tshogs lta dang de'i gzhi dang / /'gog dang lam dang dkon mchog dang / /rnyed pa dang ni bkur sti dang / /yo byad bsnyungs pa yongs shes la//sgrib pa yin no/ /nga rgyal gyi kun tu sbyor ba ni 'jig tshogs la lta ba yongs su shes pa la sgrib pa ste/ mngon par rtogs pa'i dus na nga'o snyam pa'i nga rgyal bar chad dang bcas pa dang bar chad med par kun tu 'byung ba'i dbang gis de ma spangs pa'i phyir ro/ / ma rig pa'i kun tu sbyor ba ni 'jig tshogs la lta ba'i gzhi yongs su shes pa la sgrib ste/ des nye bar len pa'i phung po rnams yongs su mi shes pa'i phyir ro/ /lta ba'i kun tu sbyor ba ni 'gog pa'i bden pa yongs su shes pa la sgrib ste/ 'jig tshogs dang mthar 'dzin par lta ba gnyis kyis de la skrag pa dang /log par lta bas de la skur pa 'debs pa'i phyir ro/ /mchog tu 'dzin pa'i kun tu sbyor ba ni lam gyi bden pa yongs su shes pa la sgrib ste/ rnam pa gzhan gyis mchog gi dag par mchog tu 'dzin pa'i phyir ro/ /the tshom gyi kun tu sbyor ba ni dkon mchog gsum yongs su shes pa la sgrib ste/de'i yon tan la mngon par yid mi ches pa'i phyir ro/ /phrag dog gi kun tu sbyor ba ni rnyed pa dang / bkur sti yongs su shes pa la sgrib ste/ de'i nyes pa mi mthong ba'i phyir ro/ /ser sna'i kun tu sbyor ba ni yo byad bsnyungs pa yongs su shes pa la sgrib ste/yo byad la lhag par zhen pa'i phyir ro/ /dge la sogs pa bcu la gzhan/ /dge ba la sogs pa rnam pa bcu la sgrib pa gzhan du rig par bya'o/ /sgrib pa de ni gang / dge ba la sogs pa ni gang zhe na/ sbyor ba med dang skye mched min//rnal 'byor min pas gang bskyed dang / /skye ba med dang yid mi byed/ /tshogs ni rab tu ma rdzogs dang / /rigs dang bshes gnyen mi ldan dang / /sems ni yongs su skyo ba dang / /sgrub pa dang yang mi ldan dang / /skye bo ngan dang 'grogs pa dang / / rang gi gnas ngan len gsum las/ /lhag ma shes rab ma smin dang / /rang bzhin gyis ni gnas ngan len/ /le lo dang yang bdag med dang / /srid dang longs spyod chags pa dang / /sems ni zhum par gyur pa dang / /ma dad pa dang ma mos dang //sgra bzhin du ni dpyod pa dang / /dam chos ched cher mi 'dzin dang / /rnyed la gdu dang snying rje med/ /thos pas phongs dang nyung ba dang / /ting 'dzin sbyangs pa ma byas pa'o/ /de dag ni sgrib pa'o/ /dge ba la sogs pa gang zhe na/ /dge dang byang chub yang dag 'dzin//blo ldan 'khrul med sgrib pa med/ /bsngo dang mi skrag ser sna med/ /dbang ni dge la sogs pa'o/ /zhes bya ba'o/ /dge ba la sogs pa 'di dag la gang gang la sgrib pa du yod par shes par bya zhe na/ de dag gi ni sgrib pa rnams/ /gsum gsum dag tu shes par bya//zhes gsungs so/ /dge ba la sgrib pa gsum ni sbyor ba med pa dang / skye mched ma yin pa la sbyor ba dang / tshul bzhin ma yin pa la sbyor ba'o/ /byang chub kyi sgrib pa gsum ni dge ba mi bskyed pa dang / yid la mi byed pa dang / tshogs yongs su ma rdzogs pa'o/ /yang dag par 'dzin pa ni byang chub tu sems bskyed pa ste/ de'i sgrib pa gsum ni rigs dang mi ldan pa dang / dge ba'i bshes gnyen dang mi ldan pa dang / sems yongs su skyo ba'o/ /blo dang ldan pa ni byang chub sems dpa' nyid de/de'i rab tu shes pa la sgrib pa gsum ni sgrub pa dang mi ldan pa dang / skye bo ngan pa dang 'grogs pa dang / skye bo sdang ba dang 'grogs pa'o/ /de la skye bo ngan pa ni skye bo blun pa'o/ /skye bo sdang ba ni zhe 'gras pa rnams so/ /'khrul pa med pa la sgrib pa gsum ni phyin ci log gi gnas ngan len dang /nyon mongs pa la sogs pa'i sgrib pa gsum las lhag ma gang yang rung ba dang / rnam par grol ba yongs su smin par byed pa'i shes rab yongs su ma smin pa'o/ /sgrib pa spangs pa ni sgrib pa med pa ste/ de la sgrib pa gsum ni lhan cig skyes pa'i gnas ngan len dang /le lo dang bag med pa'o/ /yongs su bsngo ba'i sgrib pa gsum ni gang dag gis sems gzhan du yongs su sngo bar byed kyi/ bla na med pa yang dag par rdzogs pa'i byang chub tu ni yongs su mi bsngo ba ste/ srid pa la chags pa dang /longs spyod la chags pa dang / sems zhum pa'o/ /mi skrag pa'i sgrib pa gsum ni gang zag la mi srid snyam pa dang / chos la mi mos pa dang / don la sgra ji bzhin du dpyod pa'o/ /ser sna med pa'i sgrib pa gsum ni dam pa'i chos la ched cher mi 'dzin pa dang / rnyed pa dang / bkur sti dang / mchod pa la ched cher 'dzin pa dang / sems can rnams la snying rje med pa'o/ /dbang gi sgrib pa gsum ni/ gang dag gis dbang byed pa mi 'thob pa ste/ chos kyis phongs par 'gyur ba'i las bskyed pas thos pas phongs pa dang / thos pas nyung ba dang / ting nge 'dzin yongs su sbyang ba ma byas pa'o/ /sgrib pa 'di ni dge ba la sogs pa don gang la byed rgyu bcur 'gyur ba don de'i skabs kyis rig par bya ste/ byed rgyu bcu la 'byung ba'i byed rgyu ni dper na mig gi rnam par shes pa la sogs pa'i mig la sogs pa lta bu'o//gnas pa'i byed rgyu ni dper na sems can rnams kyi zas bzhi lta bu'o/ /rten pa'i byed rgyu ni gang gi gnas su gang gyur pa ste/ dper na sems can gyi 'jig rten gyi khams kyi snod kyi 'jig rten lta bu'o/ /gsal ba'i byed rgyu ni dper na gzugs kyi snang ba lta bu'o//'gyur ba'i byed rgyu ni dper na btso ba la sogs pa'i me la sogs pa lta bu'o/ /'bral ba'i byed rgyu ni dper na brda bar bya ba la sogs pa'i zor ba la sogs pa lta bu'o/ /sgyur ba'i byed rgyu ni dper na gser la sogs pa'i gser mgar la sogs pa lta bu ste/gang bu la sogs pa'i dngos por bsgyur ba'o/ /yid ches pa'i byed rgyu ni dper na me la sogs pa'i du ba la sogs pa lta bu'o/ /yid ches par byed pa'i byed rgyu ni dper na dam bcas pa dang gtan tshigs lta bu'o/ /'thob pa'i byed rgyu ni dper na mya ngan las 'das pa la sogs pa'i lam la sogs pa lta bu'o//de bzhin du skye ba la sgrib pa ni dge ba la sgrib pa ste de bskyed par bya ba'i phyir ro/ /gnas pa la sgrib pa ni byang chub la sgrib ste de mi 'khrugs pa'i phyir ro/ /rten gyi sgrib pa ni yang dag par 'dzin pa la sgrib ste/byang chub kyi sems gzhir gyur pa'i phyir ro/ /gsal ba la sgrib pa ni blo dang ldan pa la sgrib ste/ de bstan par bya ba'i phyir ro/ /'gyur ba la sgrib pa ni 'khrul pa med pa la sgrib ste/ de ni 'khrul pa ldog pas 'gyur ba'i phyir ro/ /'bral ba la sgrib pa ni sgrib pa med pa la sgrib ste/de'i sgrib pa dang bral ba'i phyir ro/ /sgyur ba la sgrib pa ni bsngo ba la sgrib ste/ byang chub tu sems yongs su bsngo ba'i mtshan nyid kyi phyir ro/ /yid ches pa la sgrib pa ni mi skrag pa la sgrib ste/ yid mi ches pas skrag pa'i phyir ro/ / yid ches par byed pa la sgrib pa ni ser sna med pa la sgrib ste/ chos la ser sna med pas gzhan yid ches par byed pa'i phyir ro/ /thob pa la sgrib pa ni dbang la sgrib ste/ dbang byed pa thob pa'i mtshan nyid kyi phyir ro/ /byed rgyu bcu ni skye ba dang / /gnas pa rten dang bstan bya dang //'gyur dang 'bral dang gzhan du dang / /yid ches go 'byed 'thob rnams la/ /mig dang zas sa mar me dang / /me la sogs pa de yi dpe/ /zor ba bzo shes du ba dang / /rgyu dang lam la sogs pa gzhan/ /dge ba la sogs pa'i go rims ni 'di yin te/byang chub thob par 'dod pas thog ma nyid du dge ba'i rtsa ba bskyed par bya'o/ /de'i 'og tu dge ba'i rtsa ba'i stobs bskyed na byang chub thob par bya'o/ /dge ba'i rtsa ba bskyed pa de'i gnas ni byang chub kyi sems so/ /byang chub kyi sems de'i gnas ni byang chub sems dpa'o//byang chub kyi sems bskyed de/ dge ba'i rtsa ba'i stobs bskyed pa thob pa'i byang chub sems dpa' des phyin ci log spang ba'i phyir phyin ci ma log pa bskyed par bya'o/ /de'i 'og tu mthong ba'i lam la phyin ci ma log pas bsgom pa'i lam gyi sgrib pa thams cad spang bar bya'o//sgrib pa spangs nas dge ba'i rtsa ba thams cad bla na med pa yang dag par rdzogs pa'i byang chub tu yongs su bsngo bar bya'o/ /de'i 'og tu bsngo ba'i stobs bskyed nas chos zab cing rgya che ba bstan pa dag la mi skrag par bya'o//de ltar mi skrag pa'i yid kyis chos rnams kyi yon tan mthong nas gzhan dag la chos de dag rgya cher yang dag par bstan par bya'o/ /de'i 'og tu byang chub sems dpa' de ltar yon tan sna tshogs kyi stobs bskyed pa thob pa de myur du bla na med pa yang dag par rdzogs pa'i byang chub thob nas chos thams cad la dbang 'thob bo//phyogs dang pha rol phyin sa la/ /sgrib pa dag ni gzhan yin no/ /byang chub kyi phyogs kyi chos rnams la sgrib pa ni/ gzhi la mi mkhas le lo dang / /gnyis kyis ting 'dzin nyams pa dang / / mi skyed pa dang nyam chung dang / /lta dang gnas ngan len skyon chags/ /gzhi la mi mkhas pa ni dran pa nye bar gzhag pa rnams la sgrib po/ /le lo ni yang dag par spong ba rnams la sgrib po/ /gnyis kyi ting nge 'dzin nyams pa ni 'dun pa dang / brtson 'grus dang sems pa dang /dpyod pa rnams las gang yang rung ba zhig ma tshang bas yongs su ma rdzogs pa dang / spong ba'i 'du byed bsgom pa ma tshang bas rdzu 'phrul gyi rkang pa rnams la sgrib po/ /thar pa'i cha dang mthun pa rnams mi skyed pa ni dbang po rnams la sgrib po/ /dbang po de dag nyam chung ba ni stobs rnams la sgrib ste/mi mthun pa'i phyogs dang 'dres pa'i phyir ro/ /lta ba'i nyes pa ni byang chub kyi yan lag rnams la sgrib ste/ de dag mthong ba'i lam gyis rab tu phye ba'i phyir ro/ /gnas ngan len gyi nyes pa ni lam gyi yan lag rnams la sgrib ste/de dag bsgom pa'i lam gyis rab tu phye ba'i phyir ro/ /pha rol tu phyin pa rnams la sgrib pa ni/ phyug po dang ni bde 'gro dang / /sems can mi gtong sgrib pa dang / /nyes pa dag dang yon tan rnams/ /'bri dang 'phel dang 'dzud pa dang / /grol bar byed dang mi zad dang //dge ba rgyun mi 'chad pa dang / /nges par byed dang chos rnams la/ /longs par spyod dang yongs smin byed/ /'di la pha rol tu phyin pa bcu po dag ni pha rol tu phyin pa gang gi 'bras bu gang yin pa de la sgrib pas de'i sgrib pa zhes brjod pa yin no/ / de la sbyin pa'i pha rol tu phyin pa'i 'bras bu phyug po dang / bdag po la sgrib pas sgrib pa'o/ /tshul khrims kyi pha rol tu phyin pa'i 'bras bu bde 'gro la sgrib bo/ /bzod pa'i pha rol tu phyin pa'i 'bras bu sems can yongs su mi gtong ba la sgrib po/ /brtson 'grus kyi pha rol tu phyin pa'i 'bras bu nyes pa dang yon tan 'bri zhing 'phel ba la sgrib po//bsam gtan gyi pha rol tu phyin pa'i 'bras bu gdul bya 'jud pa la sgrib po/ /shes rab kyi pha rol tu phyin pa'i 'bras bu rnam par grol bar byed pa la sgrib po/ /thabs kyi pha rol tu phyin pa'i 'bras bu sbyin pa la sogs pa mi zad pa la sgrib ste/byang chub tu yongs su bsngos pas de mi zad pa'i phyir ro/ /smon lam gyi pha rol tu phyin pa'i 'bras bu tshe rabs thams cad du dge ba rgyun mi 'chad par 'byung ba la sgrib ste/ smon lam gyi dbang gis de dang mthun pa'i skye ba yongs su 'dzin pa'i phyir ro//stobs kyi pha rol tu phyin pa'i 'bras bu dge ba de nyid nges par byed pa la sgrib ste/ so sor brtags pa dang bsgoms pa'i stobs kyis mi mthun pa'i phyogs kyis zil gyis mi gnon pa'i phyir ro/ /ye shes kyi pha rol tu phyin pa'i 'bras bu bdag dang gzhan chos la longs spyod pa dang /yongs su smin par byed pa la sgrib ste/ thos pa'i don sgra ji bzhin ma yin par khong du chud pa'i phyir ro/ /sa rnams la yang go rims bzhin te/ kun tu 'gro don mchog gi don/ /rgyu mthun don gyi mchog nyid dang / /yongs su 'dzin pa med don dang //rgyud rnams tha dad med don dang / /nyon mongs rnam dag min don dang / /tha dad med pa'i don nyid dang / /bri med 'phel ba med don dang / /dbang ni rnam pa bzhi yi gnas/ /chos kyi dbyings la ma rig pa/ /nyon mongs can min sgrib pa bcu/ /sa bcu'i mi mthun phyogs rnams kyi//gnyen po dag ni sa yin no/ /kun tu 'gro ba'i don la sogs pa'i chos kyi dbyings rnam pa bcu la nyon mongs pa can ma yin pa'i mi shes pa gang yin pa de ni byang chub sems dpa'i sa bcu la go rims bzhin du sgrib ste/ de'i mi mthun pa'i phyogs su gyur pa'i phyir ro//'di lta ste/ sa dang po la ni chos kyi dbyings kun tu 'gro ba'i don la kun tu 'gro ba'i don du rtogs te/ des bdag dang gzhan mnyam pa nyid rab tu 'thob bo/ /gnyis pa la ni mchog gi don du rtogs te/ des 'di snyam du sems te/ de lta bas na bsgrub tu mtshungs pa la bdag gis rnam pa thams cad du yongs su sbyong ba mngon par bsgrub pa nyid la mngon par brtson par bya'o snyam mo//gsum pa la ni de'i rgyu mthun pa don gyi mchog tu rtogs te/ des chos kyi dbyings kyi rgyu mthun pa thos pa mchog tu rig nas/ de'i phyir me'i 'obs stong gsum gyi stong chen po'i tshad tsam du yang bdag nyid mchod do//bzhi pa la ni yongs su 'dzin pa med pa'i don du rtogs te/ 'di ltar chos la sred pa la yang ldog go/ /lnga pa la ni rgyud tha dad pa med pa'i don du rtogs te/ sems dang bsam pa rnam par dag pa mnyam pa nyid rnam pa bcus rtogs so//drug pa la ni kun nas nyon mongs pa dang / rnam par dag pa ma yin pa'i don du rtogs te/ rten cing 'brel bar 'byung ba'i don la gang kun nyon mongs par 'gyur ba'am rnam par dag par 'gyur ba'i chos de gang yin yang med par rab tu rtogs pa'i phyir ro//bdun pa la ni tha dad pa med pa'i don du rtogs te/ mtshan ma med pas mdo la sogs pa'i chos kyi mtshan ma tha dad par mi 'byung ba'i phyir ro/ /brgyad pa la ni bri ba med cing 'phel ba med pa'i don du rtogs te/ mi skye ba'i chos la bzod pa thob pas kun nas nyon mongs pa'am/rnam par byang ba na yang bri ba'am 'phel ba mi mthong ba'i phyir ro/ /dbang rnam pa bzhi ni rnam par mi rtog pa la dbang ba dang / zhing yongs su dag pa la dbang ba dang / ye shes la dbang ba dang / las la dbang ba'o/ /de las brgyad pa nyid la chos kyi dbyings la dbang ba dang po dang /'og gi gnas nyid du rab tu rtogs so/ /dgu pa la ni ye shes la dbang ba'i gnas nyid du rtogs te/ so so yang dag par rig pa thob pa'i phyir ro/ /bcu pa la ni las la dbang ba'i gnas nyid du rtogs te/ ji ltar bzhed pa bzhin du sprul pa rnams kyis sems can gyi don mdzad pa'i phyir ro//mdor bsdu na/ nyon mongs pa yi sgrib pa dang / shes bya'i sgrib pa nyid du bstan/ /der ni sgrib pa thams cad de/ /de zad nas ni grol bar 'dod/ /sgrib pa rnam pa gnyis po 'di zad na sgrib pa thams cad las grol bar 'dod do//sgrib pa rnams kyi don bsdus pa ste/ sgrib pa chen po ni khyab pa gang yin pa'o/ /sgrib pa chung ngu ni nyi tshe ba gang yin pa'o/ /sbyor ba'i sgrib pa ni lhag pa gang yin pa'o/ /thob pa la sgrib pa ni mnyam pa gang yin pa'o/ /'thob pa khyad par can la sgrib pa ni len pa dang spong ba gang yin pa'o//yang dag par sbyor ba la sgrib pa ni nyon mongs pa'i sgrib pa rnam pa dgu gang yin pa'o/ /rgyu la sgrib pa ni dge ba la sogs pa rnam pa bcu la sgrib pa gang yin pa ste/ rgyu'i don gyi skabs kyi phyir ro/ /de kho na la 'jug pa la sgrib pa ni byang chub kyi phyogs rnams la sgrib pa gang yin pa'o//dge ba bla na med pa la sgrib pa ni pha rol tu phyin pa rnams la sgrib pa gang yin pa'o/ /de khyad par du 'gro ba la sgrib pa ni sa rnams la sgrib pa gang yin pa'o/ /bsdus pa'i sgrib pa ni mdor bsdus pa rnam pa gnyis po gang yin pa'o//bstan bcos dbus dang mtha' rnam par 'byed pa las sgrib pa'i le'ur bcad pa zhes bya ba gnyis pa'i 'grel pa'o// //de kho na'i dbang du mdzad de gsungs pa/ rtsa ba mtshan nyid de kho na/ /phyin ci ma log mtshan nyid dang / / 'bras bu rgyu yi de kho na/ /rags pa dang ni phra ba dang / /grags dang rnam par dag yul dang / /bsdu dang dbye ba'i mtshan nyid dang / /mkhas de kho na rnam bcu ni/ /bdag tu lta ba'i gnyen po'o/ /zhes bya ba 'di dag ni de kho na rnam pa bcu ste/ 'di lta ste/ rtsa ba'i de kho na dang /mtshan nyid kyi de kho na dang / phyin ci ma log pa'i de kho na dang / 'bras bu dang rgyu'i de kho na dang / rags pa dang phra ba'i de kho na dang / grags pa'i de kho na dang / rnam par dag pa'i spyod yul gyi de kho na dang / bsdu ba'i de kho na dang / rab tu dbye ba'i de kho na dang / mkhas pa'i de kho na ste/rnam pa bcu po de yang bdag tu 'dzin pa rnam pa bcu'i gnyen por rig par bya'o/ /'di lta ste/ phung po la mkhas pa dang / khams la mkhas pa dang / skye mched la mkhas pa dang / rten cing 'brel bar 'byung ba la mkhas pa dang / gnas dang gnas ma yin pa la mkhas pa dang /dbang po la mkhas pa dang / dus la mkhas pa dang / bden pa la mkhas pa dang / theg pa la mkhas pa dang / 'dus byas dang 'dus ma byas kyi chos la mkhas pa'o/ /de la rtsa ba'i de kho na ni ngo bo nyid rnam pa gsum ste/ kun brtags pa dang /gzhan gyi dbang dang / yongs su grub pa ste/ de la de kho na gzhan rnam par gzhag pa'i phyir ro/ /de ci'i phyir 'dir ngo bo nyid gsum la de kho na zhes bya bar 'dod ce na/ ngo bo nyid gsum rtag med dang / /yod kyang kho na ma yin dang / /yod dang med de kho na ste/ / ngo bo nyid ni gsum du 'dod/ /kun tu brtags pa'i mtshan nyid ni rtag tu med pa'o/ /de ni kun tu brtags pa'i ngo bo nyid la de kho na zhes bya ste/ phyin ci ma log pa'i phyir ro/ /gzhan gyi dbang gi mtshan nyid ni yod kyang yang dag pa ma yin te 'khrul pa'i phyir ro/ /de lta bas na gzhan gyi dbang gi ngo bo nyid la de kho na zhes bya'o//yongs su grub pa'i mtshan nyid ni yod pa dang med pa'i de kho na ste/ de bas na 'di ni yongs su grub pa'i ngo bo nyid la de kho na'o/ /mtshan nyid kyi de kho na gang zhe na/ 'di la chos dang gang zag dang / /gzung ba dag dang 'dzin pa dang //yod dang med par sgro 'dogs pa dang / /skur ba 'debs par lta ba dang / /gang shes nas ni mi 'byung ba/ /de de kho na'i mtshan nyid do/ /gang shes nas gang zag dang chos gnyis la sgro 'dogs pa dang / skur pa 'debs par lta ba mi 'byung ba de ni kun brtags pa'i ngo bo nyid kyi de kho na'i mtshan nyid do//gang shes nas gzung ba dang / 'dzin pa gnyis la sgro 'dogs pa dang / skur pa 'debs par lta ba mi 'byung ba de ni gzhan gyi dbang gi ngo bo nyid kyi de kho na'i mtshan nyid do/ /gang shes nas dngos po dang dngos po med par sgro 'dogs pa dang /skur pa 'debs par lta ba mi 'byung ba de ni yongs su grub pa'i ngo bo nyid kyi de kho na'i mtshan nyid do/ /rtsa ba'i de kho na la mtshan nyid kyi de kho na phyin ci ma log pa 'di ni mtshan nyid kyi de kho na zhes bya'o/ /phyin ci ma log pa'i de kho na ni rtag pa la sogs par phyin ci log pa'i gnyen por mi rtag pa dang /sdug bsngal ba dang / stong pa dang / bdag med pa nyid do/ /rtsa ba'i de kho na der ji ltar na mi rtag pa la sogs pa nyid rig par bya zhe na/ mi rtag don ni med don dang / /skye zhing 'jig pa'i mtshan nyid dang / / dri bcas dri ma med don te/ /rtsa ba'i kho nar go rims bzhin/ /mi rtag pa'i don ni rnam pa gsum ste/ med pa'i don dang / skye zhing 'jig pa'i don dang / dri ma dang bcas shing dri ma med pa nyid kyi don ni rtsa ba'i de kho nar ngo bo nyid gsum po dag dang go rims bzhin no/ /sdug bsngal len dang mtshan nyid dang //'brel ba gzhan du 'dod pa yin/ /gang zag dang chos la mngon par zhen pa nye bar len pa'i phyir/ nye bar len pa'i sdug bsngal ba dang / sdug bsngal ba nyid gsum gyi mtshan nyid yin pas mtshan nyid dang / sdug bsngal dang 'brel pa'i phyir 'brel ba yang ste/rtsa ba'i de kho na nyid kyi nang du go rims bzhin no/ /dngos med de dngos ma yin dang / /rang bzhin gyis ni stong par 'dod/ /kun brtags pa'i mtshan nyid ni rnam pa gang gis kyang yod pa ma yin te/ dngos po med pa nyid pas de'i stong pa nyid do//gzhan gyi dbang gi mtshan nyid ni ji ltar kun brtags pa de ltar med kyi/ ye shes med pa sa ni ma yin te/ de ma yin pas de'i stong pa nyid do/ /yongs su grub pa'i mtshan nyid ni/ stong pa nyid kyi ngo bo nyid kho na yin pas rang bzhin kho nas de'i stong pa nyid do/ /mtshan nyid med pas bdag med dang //de dang mi mthun mtshan nyid dang / /rang gi mtshan nyid bstan pa yin/ /kun brtags pa'i ngo bo nyid ni mtshan nyid kyis med pa'i phyir ro/ /mtshan nyid de'i bdag med pa nyid do/ /gzhan gyi dbang gi mtshan nyid ni yod kyang ji ltar kun tu brtags pa bzhin du med pas de dang mi mthun pa'i mtshan nyid kyis de'i bdag med pa'o//yongs su grub pa ni ngo bo nyid kyis bdag med pa nyid pas rang gi mtshan nyid kyis de'i bdag med pa'o/ /rtsa ba de kho na rnam pa gsum la mi rtag pa nyid rnam pa gsum yongs su bstan to/med pa'i don mi rtag pa nyid dang / skye zhing 'jig pa mi rtag pa nyid dang / dri ma dang bcas shing dri ma med pa mi rtag pa nyid do/ /sdug bsngal nyid rnam pa gsum ste/ nye bar len pas sdug bsngal nyid dang / mtshan nyid kyis sdug bsngal nyid dang /'brel bas sdug bsngal nyid do/ /stong pa nyid rnam pa gsum ste/ dngos po med pas stong pa nyid dang / de ma yin pas stong pa nyid dang / ngo bo nyid kyis stong pa nyid do/ /bdag med pa rnam pa gsum ste/ mtshan nyid med pas bdag med pa dang / mi mthun pa'i mtshan nyid kyis bdag med pa dang / rang gi mtshan nyid kyis bdag med pa'o/ /'bras bu dang rgyu'i de kho na ni rtsa ba'i de kho na nyid la sdug bsngal dang / kun 'byung ba dang / 'gog pa dang / lam gyi bden pa nyid do/ /ji ltar rtsa ba'i de kho na rnam pa gsum las sdug bsngal la sogs pa'i bden pa zhes bya zhe na/'di ltar de mi rtag pa la sogs pa'i mtshan nyid kyis te/ de'i phyir sdug bsngal bden par 'dod/ /kun 'byung ba'i don rnam pa gsum gyis kun 'byung ba'i bden pa ste/ kun 'byung ba'i don rnam pa gsum ni/bag chags dang ni kun nas 'byung / /ma bral ba yang de bzhin no/ /bag chags kyi kun 'byung ba ni/ kun brtags pa'i ngo bo nyid la mngon par zhen pa'i bag chags so/ /kun nas 'byung ba'i kun 'byung ba ni las dang nyon mongs pa rnams so/ /ma bral ba'i kun 'byung ni de bzhin nyid sgrib pa dang ma bral ba'o//'gog pa rnam pa gsum gyis 'gog pa'i bden pa ste 'gog pa rnam pa gsum mo/ /'gog pa rnam pa gsum ni/ /ngo bo nyid dang gnyis mi skye/ /dri ma zhi ba gnyis su 'dod/ /ngo bo nyid kyis mi skye ba dang /gzung ba dang 'dzin pa gnyis mi skye ba dang / dri ma zhi ba gnyis kyang ste/ so sor brtags pa'i 'gog pa dang / de bzhin nyid ces bya'o/ /'di ni 'gog pa rnam gsum ste/ /'di lta ste/ ngo bo nyid kyis 'gog pa dang / gnyis po 'gog pa dang / rang bzhin gyis 'gog pa'o/ /lam gyi bden pa rtsa ba'i de kho na rnam pa gsum du ji ltar gzhag ce na/ yongs su shes dang spang ba dang / /thob par mngon sum bya bas ni/ /lam gyi bden pa yang dag bshad/ /kun brtags pa ni yongs su shes par bya'o/ / gzhan gyi dbang ni yongs su shes par bya ba dang spang ba'o/ /yongs su grub pa ni yongs su shes par bya ba dang / thob par mngon sum du bya'o/ /de ltar 'dir yongs su shes par bya ba dang / spang bar bya ba dang / mngon sum du byas pas lam gyi bden pa rnam par gzhag par rig par bya'o//rags pa dang phra ba'i de kho na ni kun rdzob dang don dam pa'i bden pa'o/ /de rtsa ba'i de kho nar ji ltar rig par bya zhe na/ brtags pa dang ni shes pa dang / /de bzhin brjod pa rags pa yin/ /kun rdzob pa ni rnam pa gsum ste/ brtags pa'i kun rdzob dang /shes pa'i kun rdzob dang / brjod pa yang dag pa'i kun rdzob bo/ /des kun rdzob kyi bden pa nyid de rtsa ba'i de kho nar go rims bzhin du rig par bya'o/ /dam pa'i don ni gcig pu'o/ /don dam pa'i bden pa ni yongs su grub pa'i ngo bo nyid gcig pur rig par bya'o//de yang ji ltar don dam pa yin zhe na/ don dang thob dang sgrub pa ni/ /don dam rnam pa gsum du 'dod/ /don dam pa ni de bzhin nyid de ye shes dam pa'i don yin pa'i phyir ro/ /thob par bya ba'i don dam pa ni mya ngan las 'das pa ste don gyi dam pa yin pa'i phyir ro//sgrub pa don dam pa ni lam ste de'i don ni dam pa yin pa'i phyir ro/ /'dus ma byas dang 'dus byas yongs su grub pa'i ngo bo nyid du ji skad du brjod ce na/ 'gyur med phyin ci ma log pa/ /yongs su grub pa rnam pa gnyis/ /'dus ma byas ni 'gyur ba med par yongs su grub pas yongs su grub pa'o//'dus byas 'di lam gyis bsdus pa ste/ phyin ci ma log pas yongs su grub pa ste/ shes bya'i dngos po la phyin ci log med pa'i phyir ro/ /grags pa de kho na rtsa ba'i de kho na la blo ji ltar rnam par gzhag ce na/ grags pa'i de kho na ni rnam pa gnyis te/'jig rten gyi grags pa dang / rigs pa'i grags pa'o/ /de la/ gcig gis 'jig rten grags pa ste/ /kun brtags pa'i ngo bo nyid kyis te/ 'jig rten pa thams cad kyi brda la 'dris pa'i rjes su zhugs pa'i blos dngos po gang la 'di ni sa yin gyi me ma yin no zhes bya ba dang /'di ni gzugs yin gyi sgra ma yin no zhes bya ba la sogs par lta ba mthun pa yin no/ /gsum gyis rigs pa'i grags pa'o/ /gang zag dam pa rigs pa'i don la mkhas pa rtog ge pa spyod yul can dag tshad ma gsum la brten nas 'thad pas sgrub pa'i rigs pas grags pa'i dngos po'o//rnam par dag pa'i spyod yul gyi de kho na nyid rnam pa gnyis te/ nyon mongs pa'i sgrib pa rnam par dag pa'i ye shes kyi spyod yul dang / shes bya'i sgrib pa rnam par dag pa'i ye shes kyi spyod yul lo//rnam dag spyod yul rnam gnyis te/ /gcig pu kho nar brjod pa yin/ /yongs su grub pa'i ngo bo nyid du brjod de ngo bo nyid gzhan ni rnam par dag pa'i ye shes rnam pa gnyis kyi spyod yul ma yin no/ /bsdu ba'i de kho na rtsa ba'i de kho nar ji ltar rig par bya zhe na/rgyu dang rnam par rtog pa dang / /ming ni rnam pa gnyis su bsdu / /ci rigs su sbyar ro/ /dngos po lnga las brtsams te/ rgyu dang rnam par rtog pa gnyis ni gzhan gyi dbang du bsdu'o/ /ming ni kun brtags par bsdu'o/ /yang dag ye shes rab kho na/ /gcig pu kho nas bsdus pa yin//de bzhin nyid dang yang dag pa'i mtha'i ye shes ni yongs su grub pa'i ngo bo nyid kyis bsdus so/ /rab tu dbye ba'i de kho na rtsa ba'i de kho nar ji ltar rig par bya zhe na/ rab tu dbye ba'i de kho na rnam pa bdun te/ 'jug pa'i de kho na dang / mtshan nyid kyi de kho na dang /rnam par rig pa'i de kho na dang / gnas pa'i de kho na dang / log par sgrub pa'i de kho na dang / rnam par dag pa'i de kho na dang / yang dag par sgrub pa'i de kho na ste/ dgongs pa nges par 'grel pa'i mdo las/ de bzhin nyid rnam pa bdun 'byung ba gang yin pa de dag nyid do//de la/ 'jug de kho na rnam pa gnyis/ /rtsa ba'i de kho na kun brtags pa dang / gzhan gyi dbang gi mtshan nyid du rig par bya'o/ /'jug pa'i de kho na ji lta ba bzhin du/ gnas pa dang ni ngan par zhugs/ / gnas pa dang log par sgrub pa'i de kho na yang de bzhin du rtsa ba'i de kho na rnam pa gnyis su rig par bya'o/ /mtshan nyid rnam par rig dang dag /yang dag sgrub pa gcig pu'o/ /mtshan nyid kyi de kho na la sogs pa bzhi ni rtsa ba'i de kho na gcig ste/ yongs su grub pa'i mtshan nyid do//mkhas de kho na rnam bcu ni/ /bdag tu lta ba'i gnyen po'o/ /zhes gsungs na phung po la sogs pa la bdag tu lta ba rnam pa bcu po de dag ji lta zhe na/ gcig dang rgyu dang za ba dang / /byed pa dang ni dbang sgyur dang / /bdag po'i don dang rtag pa dang / / nyon mongs pa dang dag pa'i gnas/ /rnal 'byor can dang ma grol grol/ /'di dag la ni bdag tu lta/ /bdag med pa la 'dzin pa rnam pa 'di bcu ni/ phung po la sogs pa la 'jug ste/ de'i gnyen por mkhas pa rnam pa bcu'o/ /'di lta ste/ gcig pur 'dzin pa dang /rgyur 'dzin pa dang / za bar 'dzin pa dang / byed par 'dzin pa dang / rang dbang du 'dzin pa dang / bdag por 'dzin pa dang / rtag par 'dzin pa dang / kun nas nyon mongs pa dang / rnam par byang bar 'dzin pa dang / rnal 'byor can du 'dzin pa dang / ma grol ba dang grol bar 'dzin pa'o//mkhas pa'i de kho na rnam pa bcu po 'di dag rtsa ba'i de kho nar ji ltar 'dus she na/ 'di ltar ngo bo nyid gsum du phung po la sogs pa de dag 'dus so/ /ji ltar 'dus she na/ kun du rtog dang rnam rtog don/ /chos nyid don gyis de dag der/ / zhes bya'o / /gzugs la sogs pa rnam pa gsum ste/ kun brtags pa'i gzugs ni gang gzugs kyi kun brtags pa'i ngo bo nyid do/ /rnam par brtags pa'i gzugs ni gang gzugs kyi gzhan gyi dbang gi ngo bo nyid de / de la gzugs su rnam par rtog par byed do/ / chos nyid kyi gzugs ni gang gzugs kyi yongs su grub pa'i ngo bo nyid do/ /gzugs la ji lta ba bzhin du tshor ba la sogs pa'i phung po rnams dang / khams dang / skye mched la sogs pa la yang sbyar bar bya'o/ /de ltar na ngo bo nyid gsum du phung po la sogs pa 'dus pa'i phyir mkhas pa'i de kho na rnam pa bcu ni rtsa ba'i de kho na nyid du blta'o//ji ltar bdag tu lta ba rnam pa bcu'i gnyen por phung po la sogs pa la mkhas pa 'di bshad na/ phung po la sogs pa'i don ma bshad pas de da brjod par bya ste/ thog ma du ma nyid dang ni//bsdus dang yongs su phye ba'i don/ /thog ma kho nar phung po de dag don rnam pa gsum du rig par bya ste/ du ma'i don ni gzugs gang ci yang rung ste/ 'das pa dang ma 'ongs pa zhes rgya cher 'byung ba'o/ /bsdus pa'i don ni de dag thams cad gcig tu bsdus te zhes 'byung ba'o//yongs su phye ba'i don ni gzugs la sogs pa'i mtshan nyid tha dad du rnam par gzhag pa'i phyir ro/ /phung po'i don ni spungs pa'i don te/ de ltar 'jig rten na spungs pa'i don mthong ngo / /'dzin dang gzung dang de 'dzin pa/ /sa bon don te gzhan du 'dod//gzhan gang zhe na/ khams so/ /de la 'dzin pa'i sa bon gyi don ni mig gi khams la sogs pa'o/ /gzung ba'i sa bon gyi don ni gzugs kyi khams la sogs pa'o/ /de 'dzin pa'i sa bon gyi don ni mig gi rnam par shes pa'i khams la sogs pa'o//tshor dang don rnams yongs gcod kyi/ /nyer spyod 'byung sgo gzhan yin no/ /gzhan gang yin zhe na/ skye mched do/ /de la nang gi skye mched drug po dag ni tshor ba nye bar spyod pa'i skye ba'i sgo'i phyir ro/ /phyi'i drug po dag ni don yongs su spyod pa'i nye bar spyod pa'i skye ba'i sgo'i phyir ro//rten cing 'brel bar 'byung ba'i don ni/ rgyu dang 'bras bu rtsol ba la/ /sgro 'dogs med cing skur 'debs med/ /rgyu dang 'bras bu dang byed pa rnams la sgro 'dogs pa med pa dang / skur pa 'debs pa med pa'i don ni rten cing 'brel bar 'byung ba'i don to //de la rgyu la sgro 'dogs pa ni 'du byed la sogs pa'i mi mthun pa'i rgyu la rtog pa'i phyir ro/ /rgyu la skur pa 'debs pa ni rgyu med pa can du rtog pa'i phyir ro/ /'bras bu la sgro 'dogs pa ni bdag dang bcas pa'i 'du byed la sogs pa ni ma rig pa la sogs pa'i rkyen las 'byung bar rtog pa'i phyir ro//'bras bu la skur [(]pa [,]ba [)]'debs pa ni 'du byed la sogs pa ma rig pa la sogs pa'i rkyen gyis 'byung ba med par rtog pa'i phyir ro/ /byed pa la sgro 'dogs pa ni 'du byed la sogs pa skye ba la ma rig pa la sogs pa la byed par rtog pa'i phyir ro//byed pa la skur [(]pa [,]ba [)]'debs pa ni nus pa med par rtog pa'i phyir ro/ /de med pa'i phyir sgro 'dogs pa med pa dang / skur [(]pa [,]ba [)]'debs pa med par rig par bya'o/ /mi 'dod 'dod dang rnam dag dang / /mnyam du 'byung dang dbang byed dang / /'thob dang kun tu spyod pa dag /gzhan dbang nyid kyi don te gzhan/ /gnas dang gnas ma yin pa ni gzhan gyi dbang nyid rnam pa bdun gyi don gyis rig par bya ste/ de la mi 'dod pa gzhan gyi dbang nyid ni nyes par spyod pas mi 'dod bzhin du yang ngan 'gror 'gro ba'i phyir ro/ /'dod pa gzhan gyi dbang nyid ni legs par spyod pas bde 'gror 'gro ba'i phyir ro//rnam par dag pa gzhan gyi dbang nyid ni sgrib pa lnga ma spangs la byang chub kyi yan lag bdun gyi bar du ma bsgoms na sdug bsngal gyi mthar mi byed pa'i phyir ro/ /mnyam du 'byung ba gzhan gyi dbang nyid ni/ de bzhin gshegs pa dang /'khor los sgyur ba gnyis gnyis snga phyi med par 'jig rten gyi khams gcig tu mi 'byung ba'i phyir ro/ /dbang du byed pa gzhan gyi dbang nyid ni/ bud med 'khor los sgyur ba la sogs pa mi byed pa'i phyir ro/ /'thob pa gzhan gyi dbang nyid ni bud med kyis rang byang chub dang /bla na med pa'i byang chub mngon par rdzogs par byang chub par mi 'gyur ba'i phyir ro/ /kun tu spyod pa gzhan gyi dbang nyid ni/ lta ba phun sum tshogs pa bsod pa la sogs pa kun tu mi spyod pas so/ /so so'i skye bo ni kun tu spyod pa'i phyir te/ rgya cher ni khams mang po can gyi mdo las 'byung ba bzhin du khong du chud par bya'o //dbang po ni rnam pa nyi shu rtsa gnyis te/ 'dzin dang gnas dang rgyun mi 'chad/ /spyod dang dag pa gnyis kyi phyir/ /'dzin pa'i phyir nas rnam par dag pa gnyis kyi bar du ste/ de dag la de dbang byed pa'i phyir ro//gzugs la sogs pa yul 'dzin pa la ni mig la sogs pa drug po dag dbang byed do/ /gnas par bya ba la ni srog gi dbang po dbang byed de / de'i dbang gis mi 'chi ba'i phyir ro/ /rigs 'tsho ba la ni pho dang mo'i dbang po gnyis dbang byed de/ bu 'byung bar dbang byed pa'i phyir ro/ /nye bar spyod pa la ni tshor ba'i dbang po rnams te/ dge ba dang mi dge ba'i las kyi 'bras bu la nye bar spyod pa'i phyir ro/ /'jig rten pa'i rnam par dag pa ni dad pa la sogs pa'o/ /'jig rten las 'das pa'i rnam par dag pa ni kun shes par byed pa'i dbang po la sogs pa'o//'bras bu rgyu rnams spyad zin dang / /de bzhin ma spyad gzhan yin no/ /gzhan gang zhe na/ dus gsum mo/ /ci rigs su sbyar te/ 'bras bu dang rgyu spyad zin pa'i phyir 'das pa'i dus so/ /'bras bu dang rgyu ma spyad pa'i phyir ma 'ongs pa'i dus so//rgyu spyad pa la 'bras bu ma spyad pa'i phyir da ltar 'byung ba'i dus su rig par bya'o/ /tshor ba rgyu dang bcas pa'i don/ /de yi rgyu ni sgrub pa yin/ /de zhi ba dang gnyen po'i don/ /ldan pa'i phyir na gzhan du 'dod/ /bden pa bzhi po de la sdug bsngal gyi bden pa ni tshor ba rgyu dang bcas pa'i don te/gang ci tshor yang rung de ni 'dir sdug bsngal lo zhes bya ba'i phyir ro/ /tshor ba'i rgyu ni tshor ba'i gnas kyi chos rnams su rig par bya'o/ /de yi rgyu ni sgrub pa yin/ /kun 'byung ba yi bden pa ste//sdug bsngal gyi rgyu ni sgrub pa gang yin pa'o/ /de gnyis zhi ba'i phyir 'gog pa'i bden pa'o/ /gnyen po'i phyir lam gyi bden pa'o/ /yon tan skyon dang rnam mi rtog /shes pas gzhan las bdag gis ni/ /nges par 'byung phyir gzhan zhes bya/ / theg pa gsum ste ci rigs su sbyar bar bya'o/ /de la mya ngan las 'das pa dang / 'khor ba la yon tan skyon du shes shing gzhan las thos nas nges par 'byung ba'i phyir nyan thos kyi theg pa'o/ /gzhan las ma thos par de nyid kyis bdag gis nges par 'byung ba'i phyir/ rang sangs rgyas kyi theg pa'o/ /bdag gis rnam par mi rtog pa'i ye shes kyis nges par 'byung ba'i phyir theg pa chen por rig par bya'o/ /btags bcas rgyur bcas rgyu mtshan dang / /rab tu zhi ba'i don bcas ni/ /tha ma nyid du bshad pa yin/ /'dus byas dang 'dus ma byas so//de la btags pa ni ming gi tshogs la sogs pa'o/ /rgyu ni sa bon du bsdus pa'i kun gzhi rnam par shes pa'o/ /rgyu mtshan ni gnas dang lus dang longs spyod du bsdus pa dang / 'jug pa'i rnam par shes par bsdus pa yid dang / 'dzin pa dang /rnam par rtog pa ste/ btags pa dang bcas shing rgyu dang bcas pa'i rgyu mtshan mtshungs par ldan pa dang bcas pa 'di ni 'dus byas su rig par bya'o/ /de la yid ni gang rtag tu rlom sems pa ni rnam pa'o/ /'dzin pa ni rnam par shes pa'i tshogs lnga'o/ / rnam par rtog pa ni yid kyi rnam par shes pa ste/ de ni rnam par rtog par byed pa'i phyir ro/ /'dus ma byas ni rab tu zhi ba 'gog pa dang / rab tu zhi ba'i don de bzhin nyid de lam gyi dmigs pa yin pa'i phyir ro/ /lam yang rab tu zhi ba nyid do/ /des rab tu zhi bar byed pa'i phyir ro//de ltar don 'dis phung po la sogs pa shes pa ni phung po la sogs pa la mkhas par rig par bya'o/ /de kho na'i don bsdus pa ni mdor bsdu na de kho na rnam pa gnyis te/ me long lta bu'i de kho na dang / snang ba'i de kho na'o/ /de la me long lta bu'i de kho na ni rtsa ba'i de kho na ste/lhag ma rnams der snang ba'i phyir ro/ /snang ba'i de kho na ni rnam pa dgu ste/ nga rgyal med pa'i snang ba'i de kho na dang / phyin ci log gi gnyen po'i snang ba'i de kho na dang / nyan thos kyi theg pas nges par 'byung ba snang ba'i de kho na dang / rags pas yongs su smin par byed cing phra bas rnam par grol bar byed pa'i phyir theg pa chen pos nges par 'byung ba snang ba'i de kho na dang /dpe la brten te rigs pas tshar gcod pa'i phyir phas kyi rgol ba tshar gcod pa snang ba'i de kho na dang / theg pa chen po mngon par brjod pa snang ba'i de kho na dang / shes bya'i rnam pa thams cad la 'jug pa snang ba'i de kho na dang /ma nor ba'i de bzhin nyid mngon par brjod pa snang ba'i de kho na dang / bdag tu 'dzin pa'i gzhi la dgongs pa thams cad rtogs pa snang ba'i de kho na'o/ /bstan bcos dbus dang mtha' rnam par 'byed pa las de kho na zhes bya ba'i le'ur bcad pa gsum pa'i 'grel pa'o// // bstan bcos dbus dang mtha' rnam par 'byed pa'i 'grel pa/ bam po gnyis pa ste tha ma / /gnyen po bsgom pa ni byang chub kyi phyogs bsgom pa ste/ de da brjod par bya'o/ /de la re zhig dang por/ gnas ngan len phyir sred rgyu'i phyir/ /gzhi yi phyir dang ma rmongs phyir/ /bden pa bzhi la 'jug bya bas/ /dran pa nye bar gzhag pa bsgom/ /lus kyis ni gnas ngan len rab tu ston te/ de yang yongs su brtags pas sdug bsngal gyi bden pa la 'jug go/ / de'i mtshan nyid ni gnas ngan len dang bcas pa'i 'du byed yin pa'i phyir ro/ /gnas ngan len ni 'dud byed kyi sdug bsngal nyid de des zag pa dang bcas pa'i dngos po thams cad 'phags pas sdug bsngal du gzigs so/ /sred pa'i rgyu ni tshor ba ste/ de la yongs su brtags pas kun 'byung gi bden pa la 'jug go//bdag tu mngon par zhen pa'i gzhi ni sems te/ de la yongs su brtags pas 'gog pa'i bden pa la 'jug ste/ bdag chad par dogs pa'i 'jigs pa med pa'i phyir ro/ /chos la yongs su brtags pas kun nas nyon mongs pa dang rnam par byang ba'i chos la rmongs pa med pa'i phyir lam gyi bden pa la 'jug go//de bas na bden pa bzhi la 'jug par bya ba'i phyir thog mar dran pa nye bar gzhag pa bsgom pa rnam par gzhag go/ /de'i 'og tu yang dag par spong ba bsgom pa ste/'di ltar mi mthun phyogs dang gnyen po rnams/ /rnam pa thams cad yongs shes na / de dag spang phyir brtson 'grus ni/ /rnam pa bzhi dag rab tu 'byung / /dran pa nye bar gzhag pa bsgoms pas mi mthun pa'i phyogs dang gnyen po rnam pa thams cad du yongs su shes na /mi mthun pa'i phyogs gsal zhing gnyen po bskyed pa'i phyir brtson 'grus rnam pa bzhi rab tu 'byung ste/ sdig pa mi dge ba'i chos skyes pa rnams spang ba'i phyir zhes rgya cher 'byung ba'o/ /der gnas las su rung ba nyid/ /don rnams thams cad 'byor par 'gyur//nyes pa lnga spong 'du byed brgyad/ /brten pa'i rgyu las byung ba'o/ /de spang ba'i phyir brtson 'grus rtsom pa de la sems gnas pa'i las su rung ba nyid ni rdzu 'phrul gyi rkang pa bzhi po dag ste/ don thams cad 'byor ba'i rgyu yin pa'i phyir ro/ /gnas pa ni 'dir sems gnas pa ste ting nge 'dzin du rig par bya'o//de'i phyir yang dag par spong ba'i 'og tu rdzu 'phrul gyi rkang pa rnams so/ /las su rung ba de yang nyes pa lnga spang ba'i phyir spong ba'i 'du byed brgyad bsgom pa'i rgyu las byung bar rig par bya'o/ /nyes pa lnga po de dag gang zhe na/gsungs pa/ le lo dang ni gdams ngag rnams/ /brjed dang bying dang rgod pa dang / /'du mi byed dang 'du byed de / /'di dag nyes pa lngar 'dod do / /de la bying ba dang rgod pa ni nyes pa gcig tu bsdu'o/ /bying ba dang rgod pa rab tu zhi bar bya ba'i dus na mngon par 'du mi byed na nyes pa'o//rab tu zhi ba'i tshe ni mngon par 'du byed pa'o/ /de dag spang ba'i phyir spong ba'i 'du byed brgyad ji ltar rnam par gzhag ce na/ le lo spang ba'i phyir bzhi ste/ 'dun pa dang / rtsol ba dang / dad pa dang / shin tu sbyangs pa'o/ /de dag kyang go rims bzhin du rig par bya ste/gnas dang de la gnas pa dang / rgyu dang 'bras bu nyid du'o/ /rtsol ba'i gnas ni 'dun pa'o/ /gnas pa ni rtsol ba'o/ /gnas 'dun pa de'i rgyu ni dad pa ste/ yid ches par gyur na mngon par 'dod pa'i phyir ro/ /gnas rtsol ba de'i 'bras bu ni shin tu sbyangs pa ste/brtson 'grus brtsams pas ting nge 'dzin gyi khyad par thob pa'i phyir ro/ /spong ba'i 'du byed lhag ma bzhi ni dran pa dang / shes bzhin dang / sems pa dang / btang snyoms te nyes pa bzhi'i gnyen por grangs bzhin no/ /de dag kyang dran pa la sogs par rig par bya ste go rims bzhin no//dmigs pa brjed par ma gyur dang / /bying dang rgod pa rtogs pa dang / /de spong mngon par 'du byed dang / /zhi tshe rnal du 'jug pa'o/ /dran pa ni dmigs pa ma brjed pa'o/ /shes bzhin ni dran pa ma brjed par gyur na bying ba dang rgod pa rtogs pa'o//rtogs nas de dang 'bral ba'i phyir mngon par 'du byed pa ni sems pa'o/ /bying ba dang rgod pa de nye bar zhi bar gyur pa na rnal du 'jug pa ni sems btang snyoms su byed pa'o/ /rdzu 'phrul gyi rkang pa'i 'og tu dbang po rnams te dad pa la sogs pa'o//de dag las ji ltar rnam par gzhag ce na/ thar pa'i cha dang mthun bskyed nas/ /'dun dang sbyor ba dbang byed dang / /dmigs pa brjed par ma gyur dang / /mi 'phro rnam par 'byed kyang ngo / /dbang byed pa zhes bya bar snyegs so/ /rdzu 'phrul gyi rkang pa rnams kyi sems las su rung ba dang /thar ba'i cha dang mthun pa'i dge ba'i rtsa ba bskyed nas/ 'dun pa ni dbang byed pa/ sbyor ba ni dbang byed pa/ dmigs pa ma brjed pa ni dbang byed pa/ mi 'phro ba ni dbang byed pa/ /rab tu rnam par 'byed pa ni dbang byed pa ste/ dad pa la sogs pa dbang po lnga dag dang go rims bzhin du rig par bya'o/ /dad pa la sogs pa de dag nyid stobs dang ldan par 'gyur ba la stobs rnams zhes bya ste/ de dag mi mthun phyogs ni srab pa'i phyir / stobs ldan gang gi tshe de dag nyid ma dad pa la sogs pa mi mthun pa'i phyogs dang mi 'dre ba na'o//ci'i phyir dad pa la sogs pa snga phyir bstan zhe na/ 'di ltar snga ma'i 'bras bu phyi ma yin/ rgyu dang 'bras bu la dad par gyur ba'i rgyus 'bras bu la brtson 'grus rtsom mo/ /brtson 'grus brtsams pas ni dran pa nye bar gnas so//dran pa nye bar gnas pas ni sems mnyam par 'jog go/ /sems mnyam par gzhag pas ni yang dag pa ji lta ba bzhin du rab tu shes so/ /thar pa'i cha dang mthun pa bskyed zin nas dbang po rnams bstan na/ nges par 'byed pa'i cha dang mthun pa rnams ci dbang po'i dus la rig par bya'am/'on te stobs kyi dus la rig par bya zhe na/ dbang po rnams dang stobs rnams la/ /nges 'byed cha mthun gnyis gnyis so/ / dro bar gyur pa rnams dang rtse mo dag gi tshe ni dbang po rnams so/ /bzod pa dag dang 'jig rten pa'i chos kyi mchog rnams kyi tshe ni stobs rnams so//stobs kyi 'og tu byang chub kyi yan lag rnams te/ de dag ji ltar rnam par gzhag ce na/ rang bzhin yan lag gnas yan lag /gsum pa nges 'byung yan lag ste/ /bzhi pa phan yon yan lag yin/ /rnam gsum nyon mongs med yan lag /mthong ba'i lam la byang chub kyi yan lag tu gyur pa dag ni byang chub kyi yan lag rnams so/ /de la dran pa ni byang chub kyi gnas kyi yan lag go/ /chos rnam par 'byed pa ni rang bzhin gyi yan lag go/ / brtson 'grus ni nges par 'byung ba'i yan lag go/ /dga' ba ni phan yon gyi yan lag go//rnam pa gsum ni kun nas nyon mongs pa med pa'i yan lag ste/ shin tu sbyangs pa dang / ting nge 'dzin dang / btang snyoms so/ /ci'i phyir kun nas nyon mongs pa med pa'i yan lag rnam pa gsum du bstan zhe na/ 'di la gzhi dang gnas dang ni/ / ngo bo nyid du bstan pa yin/ /kun nas nyon mongs pa ni gnas ngan len gyi rgyu las byung ba'i phyir ro/ /shin tu sbyangs pa ni kun nas nyon mongs pa med pa'i gzhi ste/ de ni de'i gnyen po yin pa'i phyir ro/ /ting nge 'dzin ni gnas so/ /btang snyoms ni ngo bo nyid do/ /byang chub kyi yan lag gi 'og tu lam gyi yan lag rnams te/de dag ji ltar rnam par gzhag ce na/ yongs su gcod dang go byed dang / /rnam gsum gzhan yid ches par byed/ /mi mthun phyogs kyi gnyen por ni/ /lam gyi yan lag de brgyad do/ /yang dag pa'i lta ba ni bsgom pa'i lam gyi tshe mthong ba'i lam la yongs su gcod pa'i yan lag ste/'jig rten las 'das pa'i rjes las thob pa 'jig rten pa des rang gi rtogs pa yongs su gcod do/ /yang dag pa'i rtog pa dang / yang dag pa'i ngag ni gzhan go bar byed pa'i yan lag ste/ kun slong ba dang bcas pas ngag gi de go bar byed pa'i phyir ro/ /gzhan yid ches par byed pa'i yan lag ni rnam pa gsum ste/ yang dag pa'i ngag dang / las kyi mtha' dang / 'tsho ba'o/ /de dag kyang go rims bzhin du/ lta dang tshul khrims yo byad bsnyungs/ /gzhan la rnam par rig byed 'dod//yang dag pa'i ngag gis bsnyad pa dang / 'brel pa'i gtam rnam par nges pas shes rab la yid ches par 'gyur ro/ /yang dag pa'i las kyi mtha' ni tshul khrims la ste/ bya ba ma yin pa mi byed pa'i phyir ro/ /yang dag pa'i 'tsho bas ni yo byad bsnyungs pa la ste/chos kyis gas la sogs pa tshod zin par tshol ba'i phyir ro/ /mi mthun pa'i phyogs kyi gnyen po'i yan lag ni rnam par gsum ste/ yang dag pa'i rtsol ba dang / dran pa dang / ting nge 'dzin to/ /de dag ni go rims bzhin du/ nyon mongs nye ba'i nyon mongs dbang / /mi mthun phyogs kyi gnyen po'o / /mi mthun phyogs ni rnam pa gsum ste/ bsgom pas spang bar bya ba'i nyon mongs pa dang / nye ba'i nyon mongs pa bying ba dang / rgod pa'i dbang gis mi mthun pa'i phyogs te/ yon tan khyad par can mngon par sgrub pa'i gegs su gyur pa'o//de la dang po'i gnyen po ni yang dag pa'i rtsol ba ste/ des lam bsgom pa'i phyir ro/ /gnyis pa ni yang dag pa'i dran pa ste/ zhi gnas la sogs pa'i rgyu rnams la dran pa shin tu nye bar gnas pas bying ba dang rgod pa med pa'i phyir ro//gsum pa ni yang dag pa'i ting nge 'dzin te/ bsam gtan la gnas nas mngon par shes pa la sogs pa yon tan mngon par bsgrub pa'i phyir ro/ /gnyen po bsgom pa de mdor bsdu na rnam pa gsum du rig par bya ste/rjes su mthun la phyin ci log /rjes su 'brel bcas bzlog pa dang / /phyin ci ma log phyin ci log /rjes su 'brel med bsgom pa'o/ /phyin ci ma log pa'i rjes su mthun la phyin ci log pa dang / phyin ci log med la phyin ci log rjes su 'brel pa dang /phyin ci log kyang med la phyin ci log rjes su 'brel ba yang med pa ste/ so so'i skye bo dang / slob pa dang / mi slob pa dang / go rims bzhin no/ /byang chub sems dpa' rnams kyi ni / /dmigs dang yid la byed pa dang / /thob pas de ni khyad par 'phags te/nyan thos dang rang sangs rgyas rnams ni rang gi rgyud du gtogs pa'i lus la sogs pa la dmigs so/ /byang chub sems dpa' rnams ni bdag dang gzhan gyi rgyud du gtogs pa rnams so/ /nyan thos dang rang sangs rgyas rnams ni lus la sogs pa mi rtag pa la sogs pa'i rnam par yid la byed do//byang chub sems dpa' rnams ni mi dmigs pa'i tshul rnam par yid la byed do/ /nyan thos dang rang sangs rgyas rnams ni ci nas kyang lus la sogs pa dang bral bar bya ba'i phyir dran pa nye bar gzhag pa la sogs pa bsgom mo//byang chub sems dpa' rnams ni 'bral bar bya ba'i phyir yang ma yin/ mi 'bral bar bya ba'i phyir yang ma yin gyi / ci nas kyang mi gnas pa'i mya ngan las 'das pa'i phyir bsgom mo/ /gnyen po bsgom pa bshad zin to/ /de'i gnas gang zhe na/ rgyu yi gnas dang zhugs pa dang / /sbyor dang 'bras bu brjod pa dang / /bya dang bya med khyad par dang / /de ni bla ma bla na med/ /mos pa dang ni 'jug pa dang / /nges par 'byung dang lung bstan dang / /brjod pa dang ni dbang bskur dang / /phyin pa dang ni phan yon dang //bya ba bsgrub pa bstan pa'o/ /de la rgyu'i gnas ni gang rigs la gnas pa'i gang zag go/ /zhugs pa'i gnas ni sems bskyed pa'o/ /sbyor ba'i gnas ni sems bskyed nas 'bras bu ma thob tshun chad do/ /'bras bu'i gnas ni thob pa'o/ /bya ba bcas pa'i gnas ni slob pa'o//bya ba med pa'i gnas ni mi slob pa'o/ /khyad par gyi gnas ni mngon par shes pa la sogs pa'i yon tan gyi khyad par dang ldan pa'o/ /bla ma'i gnas ni nyan thos la sogs pa bas sar zhugs pa'i byang chub sems dpa'o / /bla na med pa'i gnas ni sangs rgyas te/de'i gong na gnas med pa'i phyir ro/ /mos pa'i gnas ni byang chub sems dpa' rnams kyi mos pas spyod pa'i sa thams cad do/ /'jug pa'i gnas ni sa dang po'o/ /nges par 'byung ba'i gnas ni de'i gong mas drug po dag go/ /lung bstan pa'i gnas ni sa brgyad pa'o//brjod pa'i gnas ni sa dgu pa'o/ /dbang bskur ba'i gnas ni sa bcu pa'o/ /phyin pa'i gnas ni sangs rgyas kyi chos kyi sku'o/ /phan yon gyi gnas ni longs spyod rdzogs pa'i sku'o/ /bya ba sgrub pa'i gnas ni sprul pa'i sku'o//gnas rnam pa mang po 'di dag thams cad kyang mdor bsdu na/ chos kyi dbyings la rnam gsum ste/ /zhes bya bar rig par bya ste/ ma dag ma dag dag pa dang / /rnam par dag par ci rigs sbyar/ /de la ma dag pa'i gnas ni rgyu'i gnas nas nye bar bzung ste/sbyor ba pa'i bar du'o/ /ma dag pa dang dag pa'i gnas ni slob pa rnams so/ /rnam par dag pa'i gnas ni mi slob pa rnams so/ /'di las ji ltar 'os 'os su/ /gang zag rnam par gzhag par 'dod/ /gnas rab tu dbye ba 'di las ci rigs par gang zag rnams rnam par gzhag par rig par bya ste/'di ni rigs la gnas pa'o/ /'di ni zhugs pa'o zhes bya ba la sogs pa'o/ /gnas bshad zin to/ /'bras bu thob pa gang zhe na/ snod gyur rnam par smin brjod dang / /de yi dbang gis stobs dang ni//'dod dang 'phel dang rnam dag ste/ /de dag 'bras bu go rims bzhin/ /snod du gyur pa de ni gang dge ba dang rjes su mthun pa'i rnam par smin pa'o/ /stobs ni gang snod du gyur pa'i dbang gis dge ba shas cher gyur pa'o/ /'dod pa ni sngon goms par byas pas dge ba 'dod pa'o//'phel ba ni gang da ltar byung ba na dge ba'i chos la goms par byas pas dge ba'i rtsa ba rgyas pa'o/ /rnam par dag pa ni gang sgrib pa spangs pa'o/ /'di dag ni 'bras bu rnam pa lnga dang go rims bzhin te/ rnam par smin pa'i 'bras bu dang / bdag po'i 'bras bu dang / rgyu mthun pa'i 'bras bu dang / skyes bu byed pa'i 'bras bu dang / bral ba'i 'bras bu'o/ /phyi ma phyi ma thog ma dang / /de goms byas dang rdzogs pa'o/ /rjes su mthun dang mi mthun phyogs/ /bral ba dang ni khyad par dang / /bla ma dang ni bla na med//'bras bu gzhan te mdor bsdus pa'o/ /phyi ma phyi ma'i 'bras bu ni rigs las sems bskyed pa zhes bya ba de lta bu la sogs pa'o/ /gcig nas gcig tu brgyud par rig par bya'o/ /thog ma'i 'bras bu ni dang por 'jig rten las 'das pa'i chos thob pa'o//goms par byas pa'i 'bras bu ni de'i pha rol slob pa'i gnas so/ /rdzogs pa'i 'bras bu ni mi slob pa'i chos rnams so/ /rjes su mthun pa'i 'bras bu ni rgyu'i dngos pos phyi ma 'bras bu nyid du rig par bya'o/ /mi mthun pa'i phyogs kyi 'bras bu ni spong ba'i lam ste/thog ma'i 'bras bu gang yin pa de nyid de/ de ni mi mthun pa'i phyogs gnyen po la bya bar 'dod do/ /bral ba'i 'bras bu ni goms par byas pa'i 'bras bu dang rdzogs pa'i 'bras bu ste/ nyon mongs pa dang bral bar ni slob pa dang mi slob pa dang go rims bzhin no//khyad par gyi 'bras bu ni mngon par shes pa la sogs pa yon tan gyi khyad par ro/ /bla ma'i 'bras bu ni byang chub sems dpa'i sa rnams te/ de ma yin pa'i theg pa las bla mar gyur pa'i phyir ro/ /bla na med pa'i 'bras bu ni sangs rgyas kyi sa'o/ / bzhi po 'di dag ni goms par byas pa dang / rdzogs pa'i 'bras bu'i rab tu dbye ba nyid do/ /'bras bu gzhan 'di dag ni mdor bstan pa ste/ rgyas par bya ba dpag tu med do/ /de la gnyen po sgom pa'i don bsdus pa ni byang bar bya ba'i sgom pa dang / bsrabs pa'i sgom pa dang /yongs su sbyang bar bya ba'i sgom pa dang / gong ma yang dag par rtsom pa'i sgom pa dang / mthong ba'i lam dang 'dre ba'i phyir 'dre ba'i sgom pa dang / zhugs pa'i sgom pa dang / mchog gi sgom pa dang / thog ma'i sgom pa dang / bar ma'i sgom pa dang / mtha'i sgom pa dang / bla ma dang bcas pa'i sgom pa dang / bla na med pa'i sgom pa ste/ gang dmigs pa dang / yid la byed pa dang / thob pa khyad par du 'phags pa'o/ /gnas rnams kyi don bsdus pa ni rigs la gnas pa'i skal ba yod pa'i gnas dang / sems bskyed nas bzung ste/ sbyor ba'i bar du rtsom pa'i gnas dang / ma dag pa dag pa'i gnas dang / shin tu dag pa'i gnas dang / rgyan dang bcas pa'i gnas dang / sa bcu khyab pa'i phyir khyad par bya ba'i gnas dang / bla na med pa'i gnas so/ /'bras bu rnams kyi don bsdus pa ni bsdus pa dang /de'i bye brag dang / sngon goms par byas pa dang / gong nas gong du bsgrub pa dang / bstan pa dang / bshad pa'o/ /de la bsdus pa ni 'bras bu lnga'o/ /de'i bye brag ni lhag ma rnams so/ /sngon goms par byas pa ni rnam par smin pa'i 'bras bu'o//de gong nas gong du bsgrub pa ni de ma yin pa gzhan bzhi'o/ /bstan pa ni phyi ma phyi ma'i 'bras bu la sogs pa bzhi'o/ /bshad pa ni rjes su mthun pa'i 'bras bu la sogs pa drug ste/ de dag nyid bshad pa'i phyir ro/ /bstan bcos dbus dang mtha' rnam par 'byed pa las gnyen po bsgom pa zhes bya ba'i le'ur bcad pa bzhi pa'i 'grel pa'o// //da ni theg pa bla na med pa bshad dgos pas de brjod do/ /bla med nyid ni sgrub pa dang / /dmigs pa dang ni yang dag 'grub/ /bstan pa yin par 'dod pa'o//theg pa chen po bla na med pa nyid rnam pa gsum ste/ des bla na med pa nyid du 'gyur ro/ /sgrub pa bla na med pa nyid dang / dmigs pa bla na med pa nyid dang / yang dag par 'grub pa bla na med pa nyid do/ /de la sgrub pa bla na med pa nyid ni pha rol tu phyin pa bcu bsgrub par rig par bya'o//sgrub pa dag ni rnam drug ste/ /pha rol tu phyin pa de dag la'o/ /dam pa dang ni yid byed dang / /rjes mthun chos mtha' spangs pa dang / /khyad par can dang khyad par med/ /rnam pa drug po 'di dag ni sgrub pa ste/ 'di ltar dam par sgrub pa dang / yid la byed pa la sgrub pa dang /rjes su mthun pa'i chos sgrub pa dang / /mtha' gnyis rnam par spangs pa sgrub pa dang / khyad par can sgrub pa dang / khyad par med pa sgrub pa'o/ /de la/ dam pa bcu gnyis bdag nyid de/ /rgya che ba dang yun ring dang / /ched du bya dang mi zad dang / /rgyun mi 'chad dang tshegs med dang //dbang 'byor pa dang yongs gzung dang / /rtsom dang thob dang rgyu mthun dang / /'grub pa dam par 'dod pa yin/ /rnam pa bcu gnyis po 'di dag ni dam pa ste/ 'di ltar rgya che ba dam pa dang / yun ring ba dam pa dang / ched du bya ba dam pa dang / zad mi shes pa dam pa dang / rgyun mi 'chad pa dam pa dang / tshegs med pa dam pa dang / dbang 'byor pa dam pa dang / yongs su gzung ba dam pa dang / rtsom pa dam pa dang / rab tu thob pa dam pa dang / rgyu mthun pa dam pa dang / 'grub pa dam pa'o/ /de la rgya che ba dam pa ni/ 'jig rten gyi phun sum tshogs pa thams cad mi 'dod pa dang mchog tu rig par bya'o//yun ring pa dam pa ni bskal pa grangs med pa gsum du yongs su bsgoms pa'i phyir ro/ /ched du bya ba dam pa ni sems can thams cad kyi don bya ba'i ched kyi phyir ro/ /zad mi shes pa dam pa ni byang chub chen por yongs su bsngos pas gtan du yongs su gtugs par mi 'gyur ba'i phyir ro//rgyun mi 'chad pa'i dam pa ni bdag gzhan mnyam pa nyid du mos pa'i phyir te/ sems can thams cad la sbyin pa la sogs pas pha rol tu phyin pa rnams yongs su rdzogs par byed pa'i phyir ro/ /tshegs med pa dam pa ni gzhan gyi sbyin pa la sogs pa la rjes su yi rang ba tsam gyis pha rol tu phyin pa yongs su rdzogs par byed pa'i phyir ro//dbang 'byor pa dam pa ni nam mkha' mdzod kyi ting nge 'dzin la sogs pa sbyin pa la sogs pa yongs su rdzogs par byed pa'i phyir ro/ /yongs su gzung ba dam pa ni rnam par mi rtog pa'i ye shes kyis yongs su bzung ba'i phyir ro//rtsom pa dam pa ni mos pas spyod pa'i sa la bzod pa cher gyur pa'o/ /'thob pa dam pa ni sa dang po la'o/ /rgyu mthun pa dam pa ni de ma yin pa gzhan brgyad po dag la'o/ /'grub pa dam pa ni sa bcu pa dang / de bzhin gshegs pa'i sa la byang chub sems dpa' 'grub pa dang /sangs rgyas 'grub pa'i phyir ro/ /de'i phyir dam pa'i don gyis ni / /pha rol phyin pa bcur 'dod do/ /'di ltar dam pa rnam pa bcu gnyis po 'di dag ni de dag la yod pa'i phyir dam pa zhes bya ste/ don 'dis pha rol tu phyin pa bcu po dag tu 'dod do//kha cig bcu gang yin snyam du sems pa la de dag gi ming bstan par bya ba'i phyir/ sbyin dang tshul khrims bzod brtson 'grus/ /bsam gtan dang ni shes rab thabs/ /smon lam stobs dang ye shes dang / /'di dag pha rol phyin pa bcu / /zhes bya ba brjod do/ / 'di dag gis so so'i las ci zhe na/ las ni rjes su 'dzin byed dang / /gnod mi byed dang de la bzod/ /yon tan 'phel dang 'dzud nus dang / /rnam par grol bar bya ba dang / /mi zad pa dang rtag 'jug dang / /nges par longs spyod smin par byed/ /'di dag ni go rims bzhin du de dag gi las te/byang chub sems dpa'i sbyin pas ni sems can rnams rjes su 'dzin to/ /tshul khrims kyis ni de dag la gnod par mi byed do/ /bzod pas ni gzhan dag gis gnod par byas pa la ci mi snyam par byed do/ /brtson 'grus kyis ni yon tan rnams 'phel bar byed do/ /bsam gtan gyis ni rdzu 'phrul la sogs pas mgu bar byas te 'dzud do//shes rab kyis ni yang dag pa'i gdams ngag byin pas rnam par grol bar byed do/ /thabs la mkhas pa'i pha rol tu phyin pas ni byang chub chen por yongs su bsngos pas sbyin pa la sogs pa mi zad par byed do/ / smon lam gyi pha rol tu phyin pas ni mthun pa'i skye ba yongs su 'dzin pas tshe rabs thams cad du sangs rgyas 'byung ba la mnyes par byed cing sbyin pa la sogs pa la rtag tu 'jug go/ /stobs kyi pha rol tu phyin pas ni so sor rtog pa dang / bsgom pa'i stobs gnyis kyis mi mthun pa'i phyogs kyis zil gyis mi non pa'i phyir sbyin pa la sogs pa la nges par 'jug go//ye shes kyi pha rol tu phyin pas ni chos la sgra ji bzhin du rmongs pa dang bral bas sbyin pa la sogs pa'i dbang du mdzad pa'i chos la longs spyod pa myong ba dang / sems can rnams kyang yongs su smin par byed do//dam pa bsgrub pa bshad zin to/ /yid la byed pa bsgrub pa gang zhe na/ theg pa chen por ci lta bur/ /chos rnams btags par mdzad pa dang / /byang chub sems dpa' rtag par yang / /shes rab gsum gyis yid byed pa'o/ /sbyin pa la sogs pa'i dbang du mdzad nas theg pa chen por mdo la sogs pa ji ltar btags pa'i chos rnams thos pa dang /bsams pa dang / bsgoms pa las byung ba'i shes rab kyis rgyun du yid la byed pa ni yid la byed pa bsgrub pa'o/ /shes rab rnam pa gsum gyis yid la byed pa des yon tan ci zhig thob ce na/ khams brtas byed dang 'jug byed dang //de ni don rnams 'grub par 'gyur/ /thos pa las byung ba'i shes rab kyis yid la byed pas khams brtas par 'gyur ro/ /bsams pa las byung bas ni thos pa de'i don la snying nas 'jug par byed do/ /bsgoms pa las byung bas ni don 'grub par 'gyur te/ sa la 'jug pa yongs su sbyong ba'i phyir ro//de ni chos spyod rnam bcu dang / /yang dag ldan par shes par bya/ /yid la byed pa sgrub pa ste / /de yang chos spyod pa rnam pa bcus yongs su gzung bar rig par bya'o/ /chos spyod rnam pa bcu gang zhe na/ yi ge 'dri mchod sbyin pa dang / /nyan dang klog dang len pa dang //'chad dang kha ton byed pa dang / /de sems pa dang sgom pa'o / /theg pa chen po'i yi ge 'dri ba dang / mchod pa dang / gzhan dag la sbyin pa dang / gzhan klog pa la nyan pa dang / bdag nyid klog pa dang / len pa dang / tshig dang don 'chad pa dang / kha ton byed pa dang / sems pa dang sgom pa'o//spyod pa de bcu'i bdag nyid ni/ /bsod nams phung po dpag tu med/ /ci'i phyir mdo dag las theg pa chen po nyid kyi chos spyod pa ni shin tu 'bras bu che bar bstan gyi/ nyan thos kyi theg pa la ni ma yin zhe na/ rnam pa gnyis kyi phyir te/ khyad par phyir dang mi zad phyir/ /khyad par phyir ni ci lta bu//mi zad pa'i phyir ci lta bu zhe na/ gzhan la phan 'dogs ma zhi'i phyir/ /gzhan la phan 'dogs par zhugs pa'i phyir khyad par du 'phags so/ /yongs su mya ngan las 'das pa na yang zhi ba med cing rgyun mi 'chad pa'i phyir mi zad par rig par bya'o/ /yid la byed pa bsgrub pa bshad zin to//rjes su mthun pa'i chos bsgrub pa gang zhe na/ mi g.yeng phyin ci ma log par/ /gyur pa rjes su mthun pa'i chos/ /rnam pa 'di gnyis ni rjes su mthun pa'i chos sgrub pa ste/ 'di ltar rnam par mi g.yeng ba dang phyin ci ma log par gyur pa'o/ /de la rnam par mi g.yeng ba rnam pa drug med pa'i phyir mi g.yeng ba'o//g.yeng ba rnam pa drug ni/ rang bzhin gyis rnam par g.yeng ba dang / phyi rol tu rnam par g.yeng ba dang / nang gi rnam par g.yeng ba dang / mtshan ma'i rnam par g.yeng ba dang / gnas ngan len gyi rnam par g.yeng ba dang / yid la byed pa'i rnam par g.yeng ba'o/ /'di dag gi mtshan nyid ci lta bur rig par bya zhe na/ldang dang yul la 'jug pa dang / /de bzhin ro myang bying dang rgod/ /yid ches pa yi bsam pa dang / /yid la byed pa ngar 'dzin dang / /chung ngu'i sems ni g.yeng ba ste/ /blo ldan rnams kyis shes par bya/ /rnam par g.yeng ba rnam pa drug gi mtshan nyid ni de lta bu yin te/ de byang chub sems dpas yongs su shes par bya'o/ /de la ldang ba ni rnam par shes pa'i tshogs lnga rnams kyis ting nge 'dzin las ldang ba ste/ rang bzhin gyis rnam par g.yeng ba'o/ /yul la 'jug pa ni phyi rol tu rnam par g.yeng ba'o/ /ting nge 'dzin gyi ro myang ba dang / bying ba dang / rgod pa ni nang gi rnam par g.yeng ba'o//yid ches pa'i bsam pa ni mtshan ma'i rnam par g.yeng ba ste/ de mtshan mar byas nas sbyor ba'i phyir ro/ /ngar 'dzin pa dang bcas pa'i yid la byed pa na gnas ngan len gyi rnam par g.yeng ba ste/ gnas ngan len gyi dbang gis nga'o snyam pa'i nga rgyal kun tu 'byung ba'i phyir ro //dman pa'i sems ni yid la byed pa'i rnam par g.yeng ba ste/ theg pa dman pa yid la byed pa kun tu 'byung ba'i phyir ro/ /de la phyin ci ma log pa'i dngos po ni rnam pa bcus rig par bya ste/ 'di lta ste/ yi ge don dang yid byed dang / /mi 'phro ba dang mtshan nyid gnyis/ / ma dag dag dang glo bur dang / /mi sdang ba dang khengs pa med/ /de la/ 'brel ba'i phyir dang 'dris phyir dang / /ma 'brel phyir dang ma 'dris phyir/ /don yod pa dang med pa ste/ /de ni yi ge ma log pa'o/ /yi ge rnams dang 'brel te rgyun mi 'chad par brjod pa dang / 'di'i ming ni 'di zhes bya'o zhes 'dris pas don yod pa nyid do//bzlog pa ni don med pa nyid do zhes de ltar mthong ba gang yin pa de ni yi ge la phyin ci ma log par rig par bya'o/ /don la phyin ci ma log pa ji lta bu zhe na/ gnyis su snang bar gyur pa ni/ /de ltar yod pa ma yin te/ /de ni don la ma log pa/ /yod dang med pa rnam par spangs//gnyis ni gzung ba dang 'dzin par snang ba ste de'i rnam par 'byung ba'i phyir ro/ /ji ltar snang ba de ltar ni yod pa ma yin te/ de ltar don la mthong ba gang yin pa de ni de la phyin ci ma log pa'o/ /don gyi yod pa spangs pa ni gzung ba dang 'dzin pa dngos po med pa'i phyir ro/ /med pa spangs pa ni der snang ba'i 'khrul pa yod pa'i phyir ro// rtog pa de yis bsgos pa yi/ /rtog pa yid byed de'i gnas ni/ /yid la byed pa ma log pa/ /gnyis su snang ba'i rgyu la'o/ /gzung ba dang 'dzin par rtog pas yongs su bsgos pa ni rtog pa'i yid la byed pa ste/ gzung ba dang 'dzin pa rnam par rtog pa de'i rten yin pas/'di ni yid la byed pa la phyin ci ma log pa'o/ /yid la byed pa gang la phyin ci ma log ce na/ gzung ba dang 'dzin pa gnyis su snang ba'i rgyu la ste/ rtog pa yid la byed pa de ni brjod pa'i 'du shes kyis yongs su bsgos pa'i phyir ro/ /don gyi med dang yod pa ste/ /sgyu ma la sogs bzhin du 'dod/ / de ni mi 'phro ma log ste/ /yod dang med pa mi 'phro'i phyir/ /don gyi med pa dang yod pa gong du bshad ma thag pa gang yin pa de ni sgyu ma la sogs pa bzhin du 'dod de/ dper na sgyu ma'i glang po che la sogs pa'i dngos por yod pa yang ma yin la/ de'i 'khrul pa tsam du yod pa'i phyir med pa yang ma yin no//de bzhin du don kyang ji ltar gzung ba dang 'dzin par snang ba ltar yod pa ma yin la/ de la 'khrul pa tsam du yod pa'i phyir med pa yang ma yin no/ /sogs pa zhes bya ba'i sgras ni smig rgyu dang / rmi lam dang / chu zla la sogs pa'i dpe rnams te ci rigs su rig par bya'o/ /de ltar don la sgyu ma la sogs pa lta bur mthong nas sems mi 'phro bar mthong ba gang yin pa de ni mi 'phro ba la phyin ci ma log pa ste/des yod pa dang med pa la sems 'phro ba med pa'i phyir ro/ /rtog pa thams cad mi 'jug phyir/ /thams cad ming tsam kho na ste/ /rang gi mtshan nyid ma log pa'o/ /gang 'di mig dang gzugs rnams nas/yid dang chos rnams zhes bya ba'i bar 'di dag thams cad ni ming tsam mo zhes de ltar gang shes pa ni rnam par rtog pa thams cad kyi gnyen po yin pas 'di ni rang gi mtshan nyid la phyin ci ma log pa'o/ /rang gi mtshan nyid gang la zhe na/ don dam rang gi mtshan nyid la'o/ /kun rdzob tu ni 'di ming tsam mo zhes 'dzin pa med do//chos kyi dbyings ni ma gtogs par/ /'di ltar chos yod ma yin te/ /de'i phyir spyi yi mtshan nyid der/ /de ni phyin ci ma log pa'o/ /chos la bdag med pa las ma gtogs par chos gang med de/ de bas na chos kyi dbyings ni chos thams cad kyi spyi'i mtshan nyid do zhes de ltar shes pa gang yin pa de ni spyi'i mtshan nyid la phyin ci ma log pa'o//phyin ci log gi yid la byed/ /ma spangs pa dang spangs pa las/ /de ni ma dag rnam dag ste/ /de yang de la ma log pa'o/ /phyin ci log gi yid la byed pa ma spangs pa ni chos kyi dbyings de rnam par ma dag pa'o//spangs pa ni rnam par dag pa'o zhes de ltar shes pa gang yin pa de ni rnam par ma dag pa dang / rnam par dag pa la phyin ci ma log pa ste go rims bzhin no/ /chos kyi dbyings ni rang bzhin gyis/ /rnam par dag phyir nam mkha' bzhin/ /gnyis ni glo bur byung ba ste/ /de yang de la ma log pa'o//chos kyi dbyings ni nam mkha' bzhin du rang bzhin gyis rnam par dag pa'i phyir rnam par ma dag pa dang / phyis rnam par dag ces bya ba 'di gnyis kyang glo bur yin par de ltar shes pa gang yin pa de ni glo bur du byung ba nyid la phyin ci ma log pa'o/ /chos rnams dang ni gang zag gi /kun nas nyon mongs rnam dag med/ /med phyir de bas skrag dang nga / /med de de 'dir ma log pa'o / /gang zag gi kun nas nyon mongs pa med pas rnam par dag pa med do/ /chos kyi yang med de/ 'di ltar gang zag med cing chos med pa'i phyir ro/ /gang gi phyir kun nas nyon mongs pa gang yang med cing rnam par byang ba yang med pa de'i phyir kun nas nyon mongs pa'i phyogs la su yang 'grib pa yang med la/rnam par byang ba'i phyogs la su'i khyad par du 'gyur ba'ang med na/ de'i phyir skrag pa'am nga rgyal du gyur te/ 'di ni skrag pa med pa dang / /khengs pa med pa la phyin ci ma log pa'o//phyin ci ma log pa bcu po 'di dag ni rdo rje'i tshig bcu po dag dang go rims bzhin du sbyar bar bya ste/ rdo rje'i tshig bcu po 'di dag ni/ yod pa dang med pa dang / phyin ci ma log pa dang / gnas dang / sgyu ma lta bu nyid dang / rnam par mi rtog pa nyid dang / rang bzhin gyis 'od gsal ba nyid dang /kun nas nyon mongs pa dang / rnam par byang ba dang / nam mkha' lta bu dang / 'grib pa med pa dang / khyad par du 'phags pa med pa'o/ /rdo rje'i tshig rnams kyi lus rnam par gzhag pa ni ngo bo nyid de ngo bo nyid rnam pa gsum dang dmigs pa dang / rnam par mi rtog pa nyid dang /brgal ba dang / lan te/ rdo rje'i tshig lhag ma rnams so/ /lus rnam par gzhag pa gnyis pa ni/ gang la gang zhig gang gis 'khrul/ /ma 'khrul gang zhig gang la dang / /'khrul dang ma 'khrul 'bras bu nyid/ /de gnyis kyi ni mtha' ma'o/ /rdo rje'i tshig rnams kyis bsdus pa'i don ni ngo bo nyid gsum ni dmigs pa ste/yongs su grub pa dang / kun brtags pa dang / gzhan gyi dbang zhes bya ba dag ste/ tshig dang po gsum dang go rims bzhin no/ /rnam par mi rtog pa nyid ni gang gis rnam par mi rtog ce na/ rnam par mi rtog pa'i ye shes kyis so/ /gang la rnam par mi rtog ce na/rang bzhin gyis 'od gsal ba nyid la'o/ /de bas na 'dis shes pa dang / shes pa rnam par gzhag pa 'di lta ste/ ngo bo nyid gsum dang / rnam par mi rtog pa nyid dang go rims bzhin du rig par bya'o/ /brgal ba dang / lan ni lhag ma rnams so zhes bya ba de la brgal ba ni 'di yin te/gal te kun brtags pa dang / gzhan gyi dbang gi mtshan nyid kyi chos de dag med na ji ltar dmigs par 'gyur/ ci ste yod na de lta na go chos rnams rang bzhin gyis 'od gsal ba nyid du mi rung ngo zhe na/ de'i lan ni sgyu ma lta bu nyid yin te/ dper na sgyu ma byas pa ni med kyang dmigs pa lta bu'o//gal te chos rnams rang bzhin gyis 'od gsal ba nyid yin na ji ltar sngar kun nas nyon mongs pa phyis rnam par byang zhe na/ de'i lan ni kun nas nyon mongs pa dang / rnam par byang ba nam mkha' lta bur reg pa bya ba yin te/ dper na nam mkha' rang bzhin gyis rnam par dag pa la kun nas nyon mongs so//rnam par byang ngo zhes bya ba lta bu'o/ /gal te sangs rgyas dpag tu med pa byung ste/ sems can dpag tu med pa dag gi kun nas nyon mongs pa bsal na/ de'i phyir ci ltar 'khor ba rgyun chad par mi 'gyur zhing mya ngan las 'das pa 'phel bar mi 'gyur zhe na/de'i lan ni 'grib pa med pa dang / khyad par du 'phags pa med pa nyid yin te/ sems can gyi khams dang / rnam par byang ba'i phyogs dpag tu med pa'i phyir ro/ /yod med phyin ci ma log dang / /gnas dang sgyu ma lta bu nyid/ / mi rtog pa dang rang bzhin gyis/ /rtag par 'od gsal nyid dang ni/ /kun nas nyon mongs rnam byang dang / /de bzhin nam mkha' lta bu nyid/ /'grib pa med dang lhag med pa/ /rdo rje'i tshig ni bcu zhes bya/ /rjes su mthun pa'i chos sgrub pa bshad zin te / /mtha' gnyis spang ba bsgrub pa gang zhe na/gang dkon mchog brtsegs pa las dbu ma'i lam bshad pa'o/ /mtha' gang dang gang spangs pas de rig par bya zhe na/ tha dad pa dang gcig mtha' dang / /mu stegs nyan thos gnyis ka dang / /gang zag chos la sgro 'dogs dang / /skur 'debs mtha' rnams gnyis gnyis dang //mi mthun phyogs dang gnyen po'i mtha'/ /rtag dang chad par 'du shes dang / /gzung dang 'dzin dang kun nyon mongs / /rnam par byang la gnyis dang gsum/ /rnam par rtog pa gnyis kyi mtha'/ /de ni rnam pa bdun du 'dod/ /dngos yod dngos med zhi byed dang //zhi byed skrag bya de la 'jigs/ /gzung dang 'dzin dang yang dag nyid/ /log pa nyid dang byed dang min/ /skye ba med dang mnyam pa'i dus/ /de ni rnam rtog gnyis kyi mtha'/ /de la gzugs la sogs pa dang bdag tha dad ces bya ba yang mtha'o/ /gcig ces bya ba yang mtha'o//de yongs su spang ba'i phyir dbu ma'i lam ste/ gang bdag med par so sor rtog pa nas shed bu med par so sor rtog pa'i bar du'o/ /bdag tu lta ba ni srog kyang gzhan la lus kyang gzhan pa dang / srog de nyid lus de yin zhes bya bar lta ba yin no/ /gzugs la sogs pa rtag go zhes bya ba ni mu stegs can gyi mtha'o//mi rtag go zhes bya ba ni nyan thos kyi mtha'o/ /de yongs su spang ba'i phyir dbu ma'i lam ste/ gang gzugs la sogs pa la rtag par yang mi rtog /mi rtag par yang mi rtog pa'o/ /bdag ces bya ba ni gang zag tu sgro 'dogs pa'i mtha'o//bdag med ces bya ba ni skur ba 'debs pa'i mtha' ste/ brtags pa'i yod pa la skur pa 'debs pa'i phyir ro/ /de yongs su spang ba'i phyir dbu ma'i lam ste/ gang bdag dang bdag med pa gnyis kyi dbus ni rnam par mi rtog pa nyid do/ /sems yang dag pa'o zhes bya ba ni chos la sgro 'dogs pa'i mtha'o//sems yang dag pa ma yin no zhes bya ba ni skur pa 'debs pa'i mtha'o/ /de yongs su spang ba'i phyir dbu ma'i lam ste/ gang la sems med pa dang / sems pa med pa dang / yid med pa dang / rnam par shes pa med pa'o/ /mi dge ba la sogs pa'i chos rnams ni kun nas nyon mongs pa'o zhes bya ba ni mi mthun pa'i phyogs kyi mtha'o//dge ba la sogs pa ni rnam par byang ba'o zhes bya ba ni gnyen po'i mtha'o/ /de yongs su spang ba'i phyir dbu ma'i lam ste/ gang mtha' de gnyis khas mi len zhing mi brjod cing mi smra ba'o/ / gang zag dang chos yod do zhes bya ba ni rtag pa'i mtha'o/ /med do zhes bya ba ni chad pa'i mtha'o/ /de yongs su spang ba'i phyir dbu ma'i lam ste/ mtha' de gnyis kyi dbus gang yin pa'o/ /ma rig pa la gzung ba'o/ /'dzin pa'o zhes bya ba ni mtha' ste/ de bzhin du rig pa dang 'du byed rnams dang /de'i gnyen po 'dus ma byas dang / rga shi'i bar la gzung ba'o/ /'dzin pa'o zhes bya ba yang mtha'o/ /de 'gog pa la gzung ba'o/ /'dzin pa'i zhes bya ba yang mtha' ste/ lam gang gis de 'gag pa'o/ /de bzhin du nag po dang dkar po'i phyogs kyi bye brag gis gzung ba dang 'dzin pa'i mtha' rnam pa gnyis so//de yongs su spang ba'i phyir dbu ma'i lam ste/ rig pa dang ma rig pa 'di ni gnyis su med ces rgya cher 'byung ste/ rig pa dang ma rig pa la sogs pa la gzung ba dang / 'dzin pa'i dngos po med pa'i phyir ro/ / kun nas nyon mongs pa rnam pa gsum ste/ nyon mongs pa'i kun nas nyon mongs pa dang / las kyi kun nas nyon mongs pa dang / skye ba'i kun nas nyon mongs pa'o / /de la nyon mongs pa'i kun nas nyon mongs pa yang rnam pa gsum ste/ lta ba dang / 'dod chags dang / zhe sdang dang / gti mug gi rgyu dang / yang srid pa la smon pa'o/ /de'i gnyen po ni stong pa nyid shes pa dang / mtshan ma med pa'i shes pa dang / smon pa med pa'i shes pa'o/ /las kyi kun nas nyon mongs pa ni dge ba dang mi dge ba'i las mngon par 'du byed pa'o/ / de'i gnyen po ni mngon par 'du mi byed pa shes pa'o/ /skye ba'i kun nas nyon mongs pa ni yang srid par skye ba dang / skyes pa'i sems dang sems las byung ba rnams skad cig re re la byung ba dang / yang srid pa'i rgyun to/ /de'i gnyen po ni skye ba med pa shes pa dang / 'byung ba med pa shes pa dang /ngo bo nyid med pa shes pa'o/ /kun nas nyon mongs pa rnam pa de gsum dang bral ba ni rnam par byang ba'o/ /de la stong pa nyid shes pa la sogs pas shes bya stong pa nyid la sogs pa'i chos rnams kun nas nyon mongs pa rnam pa gsum po de dag dang ci rigs par stong pa nyid la sogs pa'i bar du mi byed kyi/rang bzhin gyis stong pa nyid la sogs te/ chos kyi dbyings rang bzhin gyis kun nas nyon mongs pa can du ma gyur pa'i phyir ro/ /gal te chos kyi dbyings kun nas nyon mongs par gyur pa'am/ rnam par dag par 'gyur ba'o snyam du rnam par rtog pa 'di ni mtha' ste/rang bzhin gyis kun nas nyon mongs pa can ma yin pa la ni kun nas nyon mongs pa dang / rnam par byang ba med pa'i phyir ro/ /mtha' de gnyis yongs su spang ba'i phyir dbu ma'i lam ste/ gang stong pa nyid kyis chos rnams stong par mi byed kyi chos rnams nyid kyis stong pa'o zhes 'byung ba la sogs pa'o//gzhan yang rnam par rtog pa'i mtha' gnyis rnam pa bdun te/ 'di lta ste/ dngos po yod par rnam par rtog pa yang mtha'o/ /dngos po med par rnam par rtog pa yang mtha'o// gang zag yang de de gzhig pa'i phyir stong pa nyid do/ /yang na bdag med pa yang med do snyam du rtog pa'i phyir te/ rnam par rtog pa'i mtha' 'di gnyis spang ba'i phyir dbu ma'i lam ste/ 'di lta ste/ gang zag rnam par gzhig pa'i phyir stong pa nyid ma yin gyi stong pa nyid kyis stong ste/sngon gyi mtha' stong pa dang / phyi ma'i mtha' stong pa zhes bya ba la sogs pa rgya cher 'byung ba'o/ /zhi bar bya ba rnam pa yang mtha'o/ /zhi bar byed pa rnam par rtog pa yang mtha' ste/ spang bar bya ba dang / spong bar byed pa rnam par rtog pas stong pa nyid kyis skrag pa'i phyir ro//rnam par rtog pa'i mtha' de gnyis yongs su spang ba'i phyir dpe nam mkha'o/ /skrag par bya bar rnam par rtog pa yang mtha'o/ /skrag par bya ba de las 'jigs par rnam par rtog pa yang mtha' ste/ sdug bsngal gyis khong dngangs pas kun brtags pa'i gzugs la sogs pa la skrag pa'i phyir ro//rnam par rtog pa'i mtha' de gnyis yongs su spang ba'i phyir dpe ni ri mo mkhan no/ /dpe snga ma ni nyan thos rnams las brtsams pa'o/ /'di ni byang chub sems dpa' rnams las brtsams pa'o/ /gzung bar rnam par rtog pa yang mtha'o//'dzin par rnam par rtog pa yang mtha'o/ /rnam par rtog pa'i mtha' de gnyis yongs su spang ba'i phyir dpe sgyu ma mkhan no/ /rnam par rig pa tsam du shes pas don dngos po med par byas nas/ /don dngos po med par shes pa des kyang rnam par rig pa tsam du shes pa de nyid rnam par bzlog go//don dngos po med na rnam par rig pa mi srid pa'i phyir te/ de ltar na 'di ni 'dir mtshungs so/ /yang dag pa nyid du rnam par rtog pa yang mtha'o/ /log pa nyid du rnam par rtog pa yang mtha' ste/ yang dag par so sor rtog pa na yang dag pa nyid du'am/log pa nyid du rtog pa'o/ /mtha' de gnyis yongs su spang ba'i phyir dpe shing gnyis las me 'byung ba ste/ dper na me'i mtshan nyid ma yin pa shing gnyis las me 'byung ste/ byung nas kyang shing gnyis tshig par byed do/ /de bzhin du yang dag pa nyid kyi mtshan nyid ma yin pa yang dag pa ji lta ba bzhin du so sor rtog pa las yang dag pa nyid kyi mtshan nyid 'phags pa'i shes rab kyi dbang po skye ste/skyes nas kyang yang dag par so sor rtog pa de nyid rnam par 'jig par byed de/ de lta bas na 'di ni 'dir mtshungs so/ /yang dag par so sor rtog pa yang dag pa nyid kyi mtshan nyid ma yin kyang log pa nyid kyi mtshan nyid kyang ma yin te/yang dag pa nyid kyi rjes su mthun pa'i phyir ro/ /byed pa rnam par rtog pa yang mtha'o/ /mi byed par rnam par rtog pa yang mtha' ste/ ye shes ni blo sngon du 'gro bas byed pa'am mthu med par rtog pa'o//rnam par rtog pa'i mtha' de gnyis yongs su spang ba'i phyir dpe mar me'o/ /skye ba med par rnam par rtog pa yang mtha'o/ /dus mnyam pa nyid du rnam par rtog pa yang mtha' ste/ gal te gnyen po ma skyes pa'am/ kun nas nyon mongs pa yun ring ba nyid du rtog pa'o//rnam par rtog pa'i mtha' de gnyis spang ba'i phyir mar me'i dpe gnyis pa'o/ /mtha' gnyis spang ba'i sgrub pa bshad zin to/ /khyad par can dang khyad par med pa sgrub pa gang zhe na/ khyad par can dang khyad med ni/ /sa bcu dag tu shes par bya//sa gang la pha rol tu phyin pa gang gi shas che ba de ni khyad par can no/ /thams cad du thams cad la yang dag par bsgrub pa ni khyad par med pa'o/ /bsgrub pa bla na med pa nyid bshad zin to/ /dmigs pa bla na med pa nyid gang zhe na/ rnam par gzhag dang de bzhin dbyings//bsgrub dang sgrub dang 'dzin pa dang / /nges par 'dzin dang rab tu 'dzin/ /rab tu rtogs dang rab rgyas dang / /rnam par rtog dang rnal 'dug dang / /phul du byung ba'i dmigs par 'dod/ /dmigs pa ni rnam pa bcu gnyis po 'di dang ste/ 'di ltar chos brtags pa rnam par gzhag pa'i dmigs pa dang /chos kyi dbyings kyi dmigs pa dang / bsgrub bya'i dmigs pa dang / sgrub pa'i dmigs pa dang / 'dzin pa'i dmigs pa dang / nges par 'dzin pa'i dmigs pa dang / rab tu 'dzin pa'i dmigs pa dang / rab tu rtogs pa'i dmigs pa dang / rab tu rgyas pa'i dmigs pa dang /rnam par khong du chud pa'i dmigs pa dang / rnal du 'dug pa'i dmigs pa dang / phul du byung ba'i dmigs pa'o / /de la dang po ni pha rol tu phyin pa la sogs pa'i chos gang dag rnam par 'jog pa'o/ /gnyis pa ni de bzhin nyid do/ /gang gsum pa dang bzhi pa de dag nyid la go rims bzhin te/chos kyi dbyings rab tu rtogs pas pha rol tu phyin pa la sogs pa'i chos rnams khong du chud pa'i phyir ro/ /lnga pa ni thos pa las byung ba'i shes pa'i dmigs pa'o/ /drug pa ni bsams pa las byung ba'i ste rtogs nas 'dzin pa'i phyir ro/ /bdun pa ni bsgoms pa las byung ba'i ste/so so rang gis 'dzin pa'i phyir ro/ /brgyad pa ni sa dang po la mthong ba'i lam gyi'o/ /dgu ba ni bsgom pa'i lam gyi ste/ sa bdun pa'i bar du'o/ /bcu pa ni de nyid la 'jig rten pa dang 'jig rten las 'das pa'i lam gyi ste/ chos rnam par khong du chud pa'i phyir ro//bcu gcig pa ni sa brgyad pa la'o/ /bcu gnyis pa ni sa dgu pa la sogs pa gsum la'o/ /dang po'i gnyis po de dag ni de dang de'i dus na de dang de'i dmigs pa'i ming 'thob po/ /dmigs pa bshad zin to/ /yang dag par 'grub pa gang zhe na/ ma tshang med dang mi spong dang / /mi g.yeng ba dang rab rdzogs pa dang //yang dag skyed dang 'phel ba dang / /las su rung dang mi gnas dang / /sgrib pa med pa nyid dang de/ /rgyun mi gcod pa yang dag 'grub/ /yang dag par 'grub pa ni rnam pa bcu po 'di dag ste/ de la rkyen ma tshang ba med pa ni rigs yang dag par 'grub pa'o/ / theg pa chen po mi spang ba ni mos pa yang dag par 'grub pa'o/ /theg pa dman par mi g.yeng ba ni sems bskyed pa yang dag par 'grub pa'o/ /pha rol tu phyin pa yongs su rdzogs pa ni bsgrub pa yang dag par 'grub pa'o/ /'phags pa'i lam bskyed pa ni skyon med par 'jug pa yang dag par 'grub pa'o//dge ba'i rtsa ba 'phel ba ni yun ring po nas 'dris par bya ba'i phyir sems can yongs su smin par byed pa yang dag par 'grub pa'o/ /sems las su rung ba ni zhing yongs su dag pa yang dag par 'grub pa'o/ /'khor ba dang mya ngan las 'das pa la mi gnas pa ni phyir mi ldog pa'i sa la lung bstan pa 'thob pa yang dag par 'grub pa ste/'khor ba dang mya ngan las 'das pa gnyis las mi ldog pa'i phyir ro/ /sgrib pa med pa ni sangs rgyas kyi sa yang dag par 'grub pa'o/ /de rgyun mi gcod pa ni byang chub kun du ston pa yang dag par 'grub pa'o/ /de ltar na 'di ni/dbus rnam 'byed pa'i bstan bcos te/ /dbu ma'i lam rab tu ston pa'i phyir ro/ /'di ni dbus dang mtha' rnam par 'byed pa yang yin te/ dbus dang mtha' gnyis rab tu ston pa'i phyir ro/ /yang na thog ma dang mtha' ma spangs pa'i dbus rab tu ston pa'i phyir ro/ /rtog par dka' dang snying po'i don//rtog ge'i spyod yul ma yin pa dang / phas kyi rgol ba dag gis mi shigs pa'i phyir te go rims bzhin no/ /don chen ni bdag dang gzhan gyi don gyi ched kyi phyir ro/ /de bzhin kun gyi don ni theg pa gsum char gyi dbang du byas pa'i phyir ro/ /don med thams cad sel ba'o zhes bya ba ni nyon mongs pa dang shes bya'i sgrib pa spong bar byed pa'o//bla na med pa nyid kyi don bsdus pa ni mdor bsdu na bla na med pa nyid rnam gsum ste/ sgrub pa dang / bsgrub pa'i gzhi dang / bsgrub pa'i 'bras bu'o/ /bsgrub pa de yang ji lta bu zhe na/ dam pa'o/ /gang gis she na/ theg pa chen por ji lta bur/ / chos rnams rab tu bzhag pa dag /ces bya ba la sogs pas so/ /ji lta bur zhe na/ rnam pa gang gis zhi gnas bsgom pa la g.yeng ba med par gyur pa dang / lhag mthong bsgom pa la phyin ci ma log par gyur pa'o/ /gang gi don du zhe na/ dbu ma'i lam gyis nges par 'byung bar bya ba'i don du'o//gang du zhe na/ sa bcu dag tu ste/ khyad par can dang / khyad par med pa'o zhes bya ba'o/ /phyin ci ma log pa rnams kyi don bslus pa ni/ yi ge la phyin ci ma log pas zhi gnas kyi mtshan ma rab tu rtogs pa dang / don la phyin ci ma log pas lhag mthong gi mtshan ma rab tu rtogs pa dang /yid la byed pa phyin ci ma log pas phyin ci log gi gzhi yongs su spong ba dang / mi 'phro ba la phyin ci ma log pas de'i mtshan ma legs par rtogs par byed pa dang / rang gi mtshan nyid phyin ci ma log pas de'i gnyen po rnam par mi rtog pa'i lam bsgoms pa dang /spyi'i mtshan nyid la phyin ci ma log pas rnam par byang ba'i rang bzhin du rab tu rtogs pa dang / ma dag pa dang dag pa yid la byed pa la phyin ci ma log pas de'i sgrib pa ma spangs pa dang / spangs pa rab tu shes pa dang / de'i glo bur du byung ba la phyin ci ma log pas kun nas nyon mongs pa dang rnam par byang ba yang dag pa ji lta ba bzhin du rab tu shes pa dang /mi skrag pa dang / khengs pa med pa la byin ci ma log pas sgrib pa med par nges par 'byung ba'o/ /bshad pa 'di byas pa yi bsod nams gang yod des/ /'gro ba bsod nams 'byung ba che dang ye shes kyang //'byung bar gyur cig de las mngon mtho chen po dang / /byang chub gsum yang 'gro bas myur du thob gyur cig /bstan bcos dbus dang mtha' rnam par 'byed pa las theg pa bla na med pa zhes bya ba'i tshig le'ur bcad pa lnga ba'i 'grel ba'o// //bstan bcos dbus dang mtha' rnam par 'byed pa'i 'grel pa slob dpon dbyig gnyen gyis mdzad pa rdzogs so// //rgya gar gyi mkhan po dzi na mi tra dang / shI len+d+ra bo d+hi dang / zhu chen gyi lo tsA ba ban+de ye shes sdes bsgyur cing zhus te gtan la phab pa'o// //