CLOSE WINDOW

D4023
བོད་ཡིག

@##/ /rgya gar skad du/ d+harmA d+harma tA bi b+haM ga kA ri kA/ bod skad du/ chos dang chos nyid rnam par 'byed pa'i tshig le'ur byas pa/ /mgon po byams pa la phyag 'tshal lo/ /shes nas gang zhig yongs su spang bya zhing / /gzhan 'ga' zhig ni mngon sum nyid du bya//des na de dag mtshan nyid rnam dbye ba/ /byed par 'dod nas bstan bcos 'di brtsams so/ /'di dag thams cad mdor bsdu na/ /rnam pa gnyis su shes bya ste/ /chos dang de bzhin chos nyid kyis/ /thams cad bsdus pa nyid phyir ro//de la chos kyis phye ba ni/ /'khor ba yin te chos nyid kyis/ /rab tu phye ba theg gsum gyi/ /mya ngan las ni 'das pa'o/ /de la chos kyi mtshan nyid ni/ /gnyis dang ji ltar mngon brjod par/ /snang ba yang dag ma yin pa'i/ /kun rtog pa ste med snang phyir//des na yang dag ma yin pa'o/ /de yang thams cad don med cing / /rtog tsam yin pas kun rtog pa'o/ /gzhan yang chos nyid mtshan nyid ni/ /gzung ba dang ni 'dzin pa dang / /brjod par bya dang rjod par byed/ /khyad med de bzhin nyid yin no/ /med pa snang phyir 'khrul pa ni//kun nas nyon mongs rgyu yin te/ /sgyu ma'i glang chen sogs snang zhing / /yod pa'ang snang ba min phyir ro/ /med snang dag las gang rung zhig /med na 'khrul dang ma 'khrul dang / /de bzhin kun nas nyon mongs dang / /rnam par byang ba mi 'thad do//gnyis po dag ni gcig nyid dang / /so so ba yang ma yin te/ /yod pa dang ni med pa dag /khyad par yod dang med phyir ro/ /rnam pa drug gis chos dag la/ /'jug pa bla na med pa ste/ /mtshan nyid dang ni grub pa dang / /gcig dang tha dad ma yin zhing //gnas ni thun mong thun mong min/ /gzung dang 'dzin par snang ba ni/ /med la rab tu 'jug pas so/ /de la mtshan nyid grub pa dang / /gcig dang tha dad ma yin pa/ /ji ltar mdor bstan bzhin du'o/ /gang zhig gang du 'khor ba na/ /de ni kun tu gnas pa ste//sems can khams dang snod kyi khams/ /snod kyi khams ni thun mong ltar/ /rnam par rig pa thun mong yin/ /sems can khams ni thun mong dang / /yang na thun mong ma yin pa'o/ /de yang skye dang tha snyad dang / /rjes su gzung dang tshar gcad dang //phan pa dang ni gnod pa dang / /yon tan skyon ni phan tshun du/ /bdag po nyid kyi phan tshun rgyu/ /yin pa'i phyir na thun mong ba'o/ /gnas dang rnam par rig pa dang / /bde sdug las dang 'chi 'pho dang / /skye ba dang ni bcings pa dang / / grol ba thun mong ma yin phyir/ /de gnas thun mong ma yin pa'o/ /phyi rol gzung ba thun mong bar/ /snang ba 'dzin pa'i rnam rig pa'o/ /rnam par shes las phyi rol du/ /gyur pa'i don yod ma yin te/ /thun mong ba nyid yin phyir ro/ /cig shos thun mong ma yin pa'i//gzung ba rnam par rig pa'i don/ /gzhan gyi sems la sogs pa ni/ /mnyam par ma bzhag mnyam gzhag pa'i/ /'dzin pa'i rnam par rig pa la/ /phan tshun yul gyur ma yin te/ /mnyam par ma bzhag dag la ni/ /rang gi rnam rtog snang phyir dang //mnyam par gzhag pa dag la ni/ /ting 'dzin de yi spyod yul de'i/ /gzugs brnyan rab tu snang phyir ro/ /gzung bar snang ba med grub na/ /'dzin par snang ba med grub po/ /de las kyang ni gzung ba dang / /'dzin par snang ba med pa la/ /'jug pa grub ste thog med pa'i/ /kun nas ldang ba grub pas so//gnyis su yongs su ma grub par/ /rab tu grub pa yin phyir ro/ /rnam pa drug gis chos nyid la/ /'jug pa bla na med pa ste/ /mtshan nyid kun tu gnas pa dang / /nges par 'byed dang reg pa dang / /rjes su dran dang de'i bdag nyid/ /nye bar son la 'jug pas so//mtshan nyid mdo ni ji lta bzhin/ /gnas ni chos rnams thams cad dang / /gsung rab mdo sde thams cad do/ /de la nges par 'byed pa ni/ /theg pa chen po'i mdo sde la/ /brten pa'i tshul bzhin yid byed pas/ /bsdus pa'i sbyor lam thams cad do//reg pa yang dag lta thob phyir/ /mthong ba'i lam gyis mngon sum gyi/ /tshul du de bzhin nyid thob cing / /nyams su myong ba gang yin pa'o/ /rjes su dran pa rig pas ni/ /mthong ba'i don la bsgom lam gyi/ /byang chub phyogs kyis bsdus pa ste/ /de ni dri ma sel ba'i phyir//de la de yi bdag nyid du/ /nye bar son pa de bzhin nyid/ /dri ma med par gyur pa na/ /thams cad de bzhin nyid tsam du/ /snang ba de yang gnas gyur pa/ /grub pa yin no rnam pa bcus/ /gnas yongs gyur la 'jug pa ni/ /bla na med pa nyid yin te//ngo bo rdzas dang gang zag dang / /khyad par dgos pa gnas dang ni/ /yid la byed dang sbyor ba dang / /nyes dmigs phan yon 'jug pas so/ /de la ngo bor 'jug pa ni/ /glo bur ba yi dri ma dang / /de bzhin nyid mi snang ba dang / /snang ba'i don du de bzhin nyid//dri ma med pa gang yin pa'o/ /dngos po rdzas la 'jug pa ni/ /thun mong snod kyi rnam rig pa/ /de bzhin nyid du gyur pa dang / /mdo sde chos kyi dbyings nyid kyi/ /de bzhin nyid du gyur pa dang / /thun mong min pa sems can gyi/ /khams kyi rnam par rig pa yi//de bzhin nyid du gyur pa'o/ /gang zag dag la 'jug pa ni/ /dang po gnyis ni sangs rgyas dang / /byang chub sems dpa' rnams kyi ni/ /de bzhin nyid yongs gyur pa ste/ /phyi ma nyan thos rnams dang ni/ /rang sangs rgyas kyi yang yin no/ /khyad par can la 'jug pa ni//sangs rgyas byang chub sems dpa' rnams/ /zhing yongs dag pa'i khyad par dang / /chos sku longs spyod rdzogs pa dang / /sprul sku thob pas gzigs pa dang / /'doms pa dang ni dbang 'byor nyid/ /thob pa'i khyad par las yin no/ /dgos pa rtogs la 'jug pa ni//sngon gyi smon lam khyad par dang / /theg pa chen po ston pa yi/ /dmigs pa'i khyad par sa bcu la/ /rab tu sbyor ba'i khyad par ro/ /gnas sam rten la 'jug pa ni/ /rnam par mi rtog ye shes la/ /'jug pa rnam pa drug gis te/ /dmigs dang mtshan ma spangs pa dang //yang dag pa yi sbyor ba dang / /mtshan nyid dang ni phan yon dang / /yongs su shes la 'jug pas so/ /de la dang po dmigs pa la/ /'jug pa rnam pa bzhir shes bya/ /theg pa chen po ston pa dang / /de la mos dang nges pa dang //tshogs ni yongs su rdzogs pas so/ /gnyis pa mtshan ma spangs pa la/ /'jug pa yang ni rnam bzhi ste/ /mi mthun ba dang gnyen po dang / /de bzhin nyid dang rtogs pa yi/ /mtshan ma dag ni spangs pas so/ /'dis ni rim pa ji lta bzhin/ / rags dang 'bring dang phra mo dang / /ring du rjes su 'brel pa yi/ /mtshan ma yongs su spangs pa yin/ /yang dag pa yi sbyor ba la/ /'jug pa yang ni rnam bzhi ste/ /dmigs pa yi ni sbyor ba dang / /mi dmigs pa yi sbyor ba dang / /dmigs pa mi dmigs sbyor ba dang //mi dmigs dmigs pa'i sbyor ba'o/ /de la mtshan nyid 'jug pa ni/ /rnam pa gsum gyis shes bya ste/ /chos nyid gnas pa nyid las ni/ /gnyis su med cing brjod med pa'i/ /chos nyid rab tu gnas phyir ro/ /snang ba med las gnyis dang ni/ /ji ltar mngon par brjod pa dang / / dbang po yul dang rnam rig dang / /snod kyi 'jig rten snang med phyir/ /des na 'dis ni rtag med pa/ /bstan du med pa gnas med pa/ /snang ba med cing rnam rig med/ /gnas med pa zhes bya ba ste/ /rnam par mi rtog ye shes kyi/ /mtshan nyid mdo bzhin brjod pa yin//snang ba las ni chos thams cad/ /nam mkha'i dkyil mnyam snang phyir ro/ /'du byed thams cad sgyu ma sogs/ /lta bur snang ba yin phyir ro/ /phan yon 'jug pa rnam bzhi ste/ /chos sku rdzogs par thob pa dang / /gong na med pa'i bde thob dang //gzigs pa dbang 'byor thob pa dang / /ston la dbang 'byor thob pa'o/ /yongs su shes la 'jug pa ni/ /rnam pa bzhi ru shes bya ste/ /gnyen po yongs su shes pa dang / /mtshan nyid yongs su shes pa dang / /khyad par yongs su shes pa dang / / las lnga yongs su shes pa 'o/ /de la gnyen po shes pa ni/ /rnam par mi rtog ye shes te/ /chos dang gang zag 'dzin pa dang / /yongs gyur ba dang tha dad dang / /skur pa 'debs pa nyid yin te/ /med pa 'dzin pa rnam pa lnga'i/ /gnyen po bstan pa yin phyir ro//mtshan nyid yongs su shes pa ni/ /yid la mi byed yang dag 'das/ /nye bar zhi dang ngo bo'i don/ /mngon rtags 'dzin pa rnam pa lnga/ /spangs pa'i rang gi mtshan nyid do/ /khyad par yongs su shes pa ni/ /rnam par mi rtog pa nyid dang / /nyi tshe ba ni ma yin dang //gnas med pa dang gtan du dang / /gong na med pa'i rnam pa ste/ /khyad par rnam pa lnga yin no/ /tha ma las yongs shes pa ni/ /rnam rtog ring du byed pa dang / /bla na med pa'i bde ster dang / /nyon mongs pa dang shes bya yi/ /sgrib pa bral bar byed pa dang //de yi rjes las thob pa yi/ /ye shes shes bya'i rnam pa ni/ /thams cad la ni 'jug pa dang / /sangs rgyas zhing ni sbyong ba dang / /sems can yongs su smin byed dang / /rnam pa thams cad mkhyen pa nyid/ /gtod cing ster bar byed pa ste/ /rnam lnga las kyi khyad par ro//yid la byad la 'jug pa ni/ /rnam par mi rtog ye shes la/ /'jug par 'dod pa'i gang zag ni/ /byang chub sems dpa' gang yin pa/ /'di ltar yid la byed pa ste/ /de bzhin nyid ni mi shes pas/ /mi bden par ni yongs brtags pa'i/ /sa bon thams cad pa zhes pa//med pa gnyis su snang ba'i rgyu/ /de la brten pa'i tha dad rgyu/ /des na rgyu dang 'bras bur bcas/ /snang du zin kyang med pa'o/ /de snang chos nyid mi snang zhing / /de mi snang bas chos nyid snang / /de ltar tshul bzhin yid byed na/ /byang chub sems dpa' mi rtog pa'i//ye shes la ni 'jug pa'o/ /de ltar dmigs las rnam rig tsam/ /dmigs las don rnams mi dmigs dang / /don rnams mi dmigs pa las ni/ /rnam par rig tsam mi dmigs dang / /de mi dmigs las gnyis po ni/ /khyad par med pa'i dmigs la 'jug /de gnyis khyad par mi dmigs pa/ /de ni rnam par mi rtog pa'i/ /ye shes yul med dmigs med pa/ /mtshan ma thams cad mi dmigs pas/ /rab phye ba ni yin phyir ro/ /sbyor bas sa la 'jug pa ni/ /rnam pa bzhi ru shes bya ste/ / mos pa'i rab tu sbyor bas ni/ /mos pas spyod pa'i sa la ste/ /nges par 'byed pa'i gnas skabs so/ /so sor rab tu rtogs pa yi/ /sbyor bas sa ni dang po ste/ /de nyid reg pa'i gnas skabs so/ /bsgom pas rab tu sbyor bas ni/ /ma dag pa yi sa drug dang / / dag pa'i sa ni gsum po ste/ /de ni rjes dran gnas skabs so/ /mthar phyin pa la sbyor bas ni/ /lhun gyis grub par sangs rgyas kyi/ /mdzad pa rgyun mi 'chad phyir te/ /de ni de yi bdag nyid du/ /nye bar 'gro ba'i gnas skabs so/ /nyes dmigs dag la 'jug pa ni//gnas yongs gyur pa med pa yi/ /nyes dmigs bzhi ste nyon mongs pa/ /mi 'jug rten med nyes pa dang / /lam 'jug rten med nyes pa dang / /mya ngan 'das pa'i gang zag rnams/ /gdags pa'i gzhi med nyes pa dang / /byang chub gsum gyi khyad par dag /gdags pa'i gzhi med nyes pa'o/ /bzlog nas phan yon 'jug pa ni/ /rnam pa bzhi ru shes par bya'o/ /med pa'i chos rnams snang ba'i dpe/ /sgyu ma rmi lam sogs pa bzhin/ /gnas yongs gyur pa dper bya na/ /nam mkha' gser dang chu sogs bzhin//chos dang chos nyid rnam par 'byed pa'i tshig le'ur byas pa/ mgon po byams pas mdzad pa rdzogs so// //kha che'i mkhan po ma hA dza na dang / lo tsA ba dge slong seng ge rgyal mtshan gyis bsgyur cing zhus te gtan la phab pa'o// mang+ga laM/ //