CLOSE WINDOW

D4021
བོད་ཡིག

@#/ /dbus dang mtha' rnam par 'byed pa'i tshig le'ur byas pa bzhugs so/ / @##/ /rgya gar skad du/ ma d+h+yAn+ta bi b+haM ga kA ri kA/ bod skad du/ dbus dang mtha' rnam par 'byed pa'i tshig le'ur byas pa/ 'jam dpal gzhon nur gyur pa la phyag 'tshal lo/ /mtshan nyid sgrib pa de kho na/ /gnyen po dag ni bsgom pa dang / /de yi gnas dang 'bras bu 'thob//theg pa bla na med pa'o/ /yang dag ma yin kun rtog yod/ /de la gnyis po yod ma yin/ /stong pa nyid ni 'di la yod/ /de la yang ni de yod do/ /stong pa ma yin mi stong min/ /de lta bas na thams cad bshad/ /yod pas med pas yod pas na//de ni dbu ma'i lam yin no/ /don dang sems can bdag rnam rig /snang ba'i rnam par shes pa ni/ /rab tu skye'o de'i don med/ /de med pas na de yang med/ /yang dag ma yin kun rtog pa/ /de ni de phyir grub pa yin/ /de bzhin ma yin ye med yin//de zad nam ni grol bar 'dod/ /brtags pa dang ni gzhan dbang dang / /yongs su grub pa nyid kyang ngo / /don phyir yang dag min rtog phyir/ /gnyis po med pa'i phyir bshad do/ /dmigs pa la ni brten nas su/ /mi dmigs pa ni rab tu skye/ / mi dmigs pa la brten nas su/ /mi dmigs pa ni rab tu skye/ /de yi phyir na dmigs pa ni/ /mi dmigs ngo bo nyid du grub/ /de lta bas na dmigs pa dang / /mi dmigs mnyam par shes par bya/ /yang dag ma yin kun rtog ni/ /sems dang sems byung khams gsum pa//de la don mthong rnam par shes/ /de yi khyad par sems las byung / /gcig ni rkyen gyi rnam par shes/ /gnyis pa nye bar spyod pa can/ /nye bar spyod dang yongs gcod dang / /de yi 'jug byed sems las byung / /sgrib pa'i phyir dang 'debs pa'i phyir/ /khrid pa'i phyir dang kun 'dzin phyir//rdzogs byed phyir dang gsum gcod phyir/ /nye bar gcod phyir sdud pa'i phyir/ /sbyor ba'i phyir dang mngon du'i phyir/ /sdug bsngal phyir ni 'gro nyon mongs/ /rnam gsum rnam gnyis kyang nyon mongs/ /rnam bdun yang dag min rtog las/ /stong pa nyid ni mdor bsdu na//mtshan nyid dang ni rnam grangs dang / /de yi don dang dbye ba dang / /sgrub pa dag ste shes par bya/ /gnyis dngos med dang dngos med pa'i/ /dngos po stong pa'i mtshan nyid do/ /yod pa ma yin med pa'ang min/ /tha dad gcig pa'i mtshan nyid min//stong pa nyid ni mdor bsdu na/ /de bzhin nyid dang yang dag mtha'/ /mtshan ma med dang don dam dang / /chos kyi dbyings ni rnam grangs so/ /gzhan min phyin ci log ma yin/ /de 'gog 'phags pa'i spyod yul dang / /'phags pa'i chos kyi rgyu yi phyir//rnam grangs don te go rims bzhin/ /kun nas nyon mongs rnam par dag /de ni dri bcas dri ma med/ /chu khams gser dang nam mkha' rnams/ /dag pa bzhin du dag par 'dod/ /za ba bza' dang de yi lus/ /gnas kyi gzhi yi stong pa nyid/ /de yang gang gis ji ltar mthong //gang phyir de yang stong pa nyid/ /dge gnyis thob par bya ba'i phyir/ /rtag tu sems can phan bya'i phyir/ /'khor ba gtang bar mi bya'i phyir/ /dge ba mi zad bya ba'i phyir/ /rigs kyang rnam par dag bya'i phyir/ /mtshan dang dpe byad thob bya'i phyir//sangs rgyas chos rnams dag bya'i phyir/ /byang chub sems dpa' sgrub par byed/ /gang zag dang ni chos rnams kyi/ /dngos po med 'dir stong pa nyid/ /de dngos med pa'i dngos yod pa/ /de ni de las stong nyid gzhan/ /gal te nyon mongs de ma gyur/ /lus can thams cad grol bar gyur//gal te rnam dag de ma gyur/ /'bad pa 'bras bu med par 'gyur/ /nyon mongs ma yin mi rmongs min/ /de ni dag dang ma dag min/ /bstan bcos dbus dang mtha' rnam par 'byed pa las/ mtshan nyid kyi le'ur bcad pa zhes bya ba ste dang po'o// //khyab dang nyi tshe lhag pa dang / /mnyam dang len dang spong ba ni/ /gnyis kyi sgrib par bstan pa yin/ /nyon mongs mtshan nyid rnam dgu'o/ /kun tu sbyor rnams sgrib pa yin/ /skyo ba dang ni btang snyoms dang / /de kho na ni mthong ba dang / /'jig tshogs lta dang de'i gzhi dang //'gog dang lam dang dkon mchog dang / /rnyed pa dang ni bkur sti dang / /yo byad bsnyungs pa yongs shes la/ /dge la sogs pa bcu la gzhan/ /sbyor ba med dang skye mched min/ /rnal 'byor min pas gang bskyed dang / /skye ba med dang yid mi byed//tshogs ni rab tu ma rdzogs dang / /rigs dang bshes gnyen mi ldan dang / /sems ni yongs su skyo ba dang / /sgrub pa dang yang mi ldan dang / /skye bo ngan sdang 'grogs pa dang / /rang gi gnas ngan len gsum las/ /lhag ma shes rab ma smin dang //rang bzhin gyis ni gnas ngan len/ /le lo dang yang bag med dang / /srid dang longs spyod chags pa dang / /sems ni zhum par gyur pa dang / /ma dad pa dang ma mos dang / /sgra bzhin du ni spyod pa dang / /dam chos ched cher mi 'dzin dang / /rnyed la gdu dang snying rje med//thos pas phongs dang nyung ba dang / /ting 'dzin sbyangs pa ma byas pa'o/ /dge dang byang chub yang dag 'dzin/ /blo ldan 'khrul med sgrib pa med/ /bsngo dang mi skrag ser sna med/ /dbang ni dge la sogs pa'o/ /de dag gi ni sgrib pa rnams/ / gsum gsum dag tu shes par bya/ /byed rgyu bcu ni skye ba dang / /gnas pa rten dang bstan bya dang / /'gyur dang 'bral dang gzhan du dang / /yid ches go 'byed 'thob rnams la/ /mig dang zas sa mar me dang / /me la sogs pa de yi dpe/ /zor ba bzo shes du ba dang //rgyu dang lam la sogs pa gzhan/ /phyogs dang pha rol phyin sa la/ /sgrib pa dag ni gzhan yin no/ /gzhi la mi mkhas le lo dang / /gnyis kyis ting 'dzin nyams pa dang / /mi skyed pa dang nyam chung dang / /lta dang gnas ngan len skyon chags/ /phyug po dang ni bde 'gro dang //sems can mi gtong sgrib pa dang / /nyes pa dag dang yon tan rnams/ /'bri dang 'phel dang 'dzud pa dang / /grol bar byed dang mi zad dang / /dge ba rgyun mi 'chad pa dang / /nges par byed dang chos rnams la/ /longs par spyod dang yongs smin byed//kun du 'gro don mchog gi don/ /rgyu mthun don gyi mchog nyid dang / /yongs su 'dzin pa med don dang / /rgyud rnams tha dad med don dang / /nyon mongs rnam dag min don dang / /tha dad med pa'i don nyid dang / /bri med 'phel ba med don dang //dbang ni rnam pa bzhi yi gnas/ /chos kyi dbyings la ma rig pa/ /nyon mongs can min sgrib pa bcu/ /sa bcu'i mi mthun phyogs rnams kyi/ /gnyen po dag ni sa yin no/ /nyon mongs pa yi sgrib pa dang / /shes bya'i sgrib pa nyid du bstan/ / der ni sgrib pa thams cad de/ /de zad nas ni grol bar 'dod/ /bstan bcos dbus dang mtha' rnam par 'byed pa las/ sgrib pa'i le'ur bcad pa zhes bya ba ste gnyis pa'o// //rtsa ba mtshan nyid de kho na/ /phyin ci ma log mtshan nyid dang / /'bras bu rgyu yi de kho na//rags pa dang ni phra ba dang / /grags dang rnam par dag yul dang / /bsdu dang dbye ba'i mtshan nyid dang / /mkhas de kho na rnam bcu ni/ /bdag tu lta ba'i gnyen po 'o/ /ngo bo nyid gsum rtag med dang / /yod kyang kho na ma yin dang / /yod dang med de kho na ste//ngo bo nyid ni gsum du 'dod/ /'di la chos dang gang zag dang / /gzung ba dag dang 'dzin pa dang / /yod dang med par sgro 'dogs dang / /skur ba 'debs par lta ba dag /gang shes nas ni mi 'byung ba/ /de de kho na'i mtshan nyid do/ /mi rtag don ni med don dang //skye zhing 'jig pa'i mtshan nyid dang / /dri bcas dri ma med don te/ /rtsa ba'i kho nar go rims bzhin/ /sdug bsngal len dang mtshan nyid dang / /'brel pa gzhan du 'dod pa yin/ /dngos med de dngos ma yin dang / /rang bzhin gyis ni stong par 'dod//mtshan nyid med pas bdag med dang / /de dang mi mthun mtshan nyid dang / /rang gi mtshan nyid bstan pa yin/ /de phyir sdug bsngal bden par 'dod/ /bag chags dang ni kun nas 'byung / /ma bral ba yang de bzhin no/ /ngo bo nyid dang gnyis mi skye/ /dri ma zhi ba gnyis su 'dod//yongs su shes dang spang ba dang / /thob par mngon sum bya bas ni/ /lam gyi bden pa yang dag bshad/ /btags pa dang ni shes pa dang / /de bzhin brjod pa rags pa yin/ /dam pa'i don ni gcig pu'o/ /don dang thob dang sgrub pa ni//don dam rnam pa gsum du 'dod/ /'gyur med phyin ci ma log pa/ /yongs su grub pa rnam pa gnyis/ /gcig gis 'jig rten grags pa ste/ /gsum gyis rigs pa'i grags pa'o/ /rnam dag spyod yul rnam gnyis te/ /gcig pu kho nar brjod pa yin//rgyu dang rnam par rtog pa dang / /ming ni rnam pa gnyis su bsdu/ /yang dag ye shes rab kho na/ /gcig pu kho nas bsdus pa yin/ /'jug de kho na rnam pa gnyis/ /gnas pa dang ni ngan par zhugs/ /mtshan nyid rnam par rig dang dag /yang dag sgrub pa gcig pu'o//gcig dang rgyu dang za ba dang / /byed pa dang ni dbang bsgyur dang / /bdag po'i don dang rtag pa dang / /nyon mongs pa dang dag pa'i gnas/ /rnal 'byor can dang ma grol grol/ /'di dag la ni bdag tu lta/ /kun tu rtog dang rnam rtog don/ /chos nyid don gyis de dag der//thog ma du ma nyid dang ni/ /bsdus dang yongs su phye ba'i don/ /'dzin dang gzung dang de 'dzin pa/ /sa bon don te gzhan du 'dod/ /tshor dang don rnams yongs gcod kyi/ /nyer spyod 'byung sgo gzhan yin no/ /rgyu dang 'bras bu rtsol ba la/ / sgro 'dogs med cing bskur 'debs med/ /mi 'dod 'dod dang rnam dag dang / /mnyam du 'byung dang dbang byed dang / /'thob dang kun tu spyod pa dag /gzhan dbang nyid kyi don te gzhan/ /'dzin dang gnas dang rgyun mi 'chad/ /spyod dang dag pa gnyis kyi phyir/ / 'bras bu rgyu rnams spyad zin dang / /de bzhin ma spyad gzhan yin no/ /tshor ba rgyu dang bcas pa'i don/ /de yi rgyu ni sgrub pa yin/ /de zhi ba dang gnyen po'i don/ /ldan pa'i phyir na gzhan du 'dod/ /de yi rgyu ni sgrub pa yin/ /kun 'byung ba yi bden pa ste/ /yon tan skyon dang rnam mi rtog /shes pas gzhan las bdag gis ni/ /nges par 'byung phyir gzhan zhes bya/ /btags bcas rgyur bcas rgyu mtshan dang / /rab tu zhi ba don bcas ni/ /tha ma nyid du bshad pa yin/ /bstan bcos dbus dang mtha' rnam par 'byed pa las/de kho na'i le'ur bcad pa zhes bya ste gsum pa'o// //gnas ngan len phyir sred rgyu'i phyir/ /gzhi yi phyir dang ma rmongs phyir/ /bden pa bzhi la 'jug bya bas/ /dran pa nye bar gzhag pa bsgoms/ /mi mthun phyogs dang gnyen po rnams//rnam pa thams cad yongs shes na/ /de dag spong phyir brtson 'grus ni/ /rnam pa bzhi dag rab tu 'byung / /der gnas las su rung ba nyid/ /don rnams thams cad 'byor par 'gyur/ /nyes pa lnga spang 'du byed brgyad/ /bstan pa'i rgyu las byung ba'o//le lo dang ni gdams ngag rnams/ /brjed dang bying dang rgod pa dang / /'du mi byed dang 'du byed de/ /'di dag nyes pa lngar 'dod do/ /gnas dang de la gnas pa dang / /rgyu dang 'bras bu nyid du'o/ /dmigs pa brjed par ma gyur dang / /bying dang rgod pa rtogs pa dang //de spong mngon par 'du byed dang / /zhi tshe rnal du 'jug pa'o/ /thar pa'i cha dang mthun bskyed nas/ /'dun dang sbyor ba dbang byed dang / /dmigs pa brjed par ma gyur dang / /mi 'phro rnam par 'byed kyang ngo / /mi mthun phyogs ni srab pa'i phyir//stobs ldan 'bras bu phyi ma yin/ /dbang po rnams dang stobs rnams la/ /nges 'byed cha mthun gnyis gnyis so/ /rang bzhin yan lag gnas yan lag /gsum pa nges 'byung yan lag ste/ /bzhi pa phan yon yan lag yin/ /rnam gsum nyon mongs med yan lag /'di la gzhi dang gnas dang ni/ /ngo bo nyid du bstan pa yin/ /yongs su gcod dang go byed dang / /rnam gsum gzhan yid ches par byed/ /mi mthun phyogs kyi gnyen por ni/ /lam gyi yan lag de brgyad do/ /lta dang tshul khrims yo byad bsnyungs//gzhan la rnam par rig byed 'dod/ /nyon mongs nye ba'i nyon mongs dbang / /mi mthun phyogs kyi gnyen po'o/ /rjes su mthun la phyin ci log /rjes su 'brel bcas bzlog pa dang / /phyin ci ma log phyin ci log /rjes su 'brel med bsgom pa'o//byang chub sems dpa' rnams kyi ni/ /dmigs dang yid la byed pa dang / /'thob pas de ni khyad par 'phags/ /rgyu yi gnas dang zhugs pa dang / /sbyor dang 'bras bu brjod pa dang / /bya dang bya med khyad par dang / /de ni bla ma bla na med//mos pa dang ni 'jug pa dang / /nges par 'byung dang lung bstan dang / /brjod pa dang ni dbang bskur dang / /phyin pa dang ni phan yon dang / /bya ba bsgrub pa bstan pa'o/ /chos kyi dbyings la rnam gsum ste/ /ma dag ma dag dag pa dang / / rnam par dag par ci rigs sbyar/ /'di las ji ltar 'os 'os su/ /gang zag rnam par gzhag par 'dod/ /snod gyur rnam par smin brjod dang / /de yi dbang gis stobs dang ni/ /'dod dang 'phel dang rnam dag ste/ /de dag 'bras bu go rims bzhin/ /phyi ma phyi ma thog ma dang //de goms byas dang rdzogs pa'o/ /rjes su mthun dang mi mthun phyogs/ /bral ba dang ni khyad par dang / /bla ma dang ni bla na med/ /'bras bu gzhan te mdor bsdus pa'o/ /bstan bcos dbus dang mtha' rnam par 'byed pa las/ gnyen po bsgom pa'i le'ur bcad pa zhes bya ste bzhi pa'o// //bla med nyid ni sgrub pa dang / /dmigs pa dang ni yang dag 'grub/ /bstan pa yin par 'dod pa'o/ /sgrub pa dag ni rnam drug ste/ /pha rol phyin pa de dag la'o/ /dam pa dang ni yid byed dang / / rjes su mthun chos mtha' spangs dang / /khyad par can dang khyad par med/ /dam pa bcu gnyis bdag nyid de/ /rgya che ba dang yun ring dang / /ched du bya dang mi zad dang / /rgyun mi 'chad dang tshegs med dang / /dbang 'byor ba dang yongs gzung dang / /rtsom dang 'thob dang rgyu mthun dang //'grub pa dam par 'dod pa yin/ /de phyir dam pa'i don gyis ni/ /pha rol phyin pa bcur 'dod do/ /sbyin dang tshul khrims bzod brtson 'grus/ /bsam gtan dang ni shes rab thabs/ /smon lam stobs dang ye shes dang //'di dag pha rol phyin bcu'o/ /las ni rjes su 'dzin byed dang / /gnod mi byed dang de la bzod/ /yon tan 'phel dang 'dzud nus dang / /rnam par grol bar byed pa dang / /mi zad pa dang rtag 'jug dang / /nges par longs spyod smin par byed//theg pa chen por ji lta bur/ /chos rnams btags par mdzad pa dag /byang chub sems dpa' rtag par yang / /shes rab gsum gyis yid byed pa'o/ /khams rtas byed dang 'jug byed dang / /de ni don rnams 'grub par 'gyur//de ni chos spyod rnam bcu dang / /yang dag ldan par shes par bya/ /yi ge 'dri mchod sbyin pa dang / /nyan dang klog dang len pa dang / /'chad dang kha don byed pa dang / /de sems pa dang bsgom pa'o/ /spyod pa de bcu'i bdag nyid ni//bsod nams phung po dpag tu med/ /khyad par phyir dang mi zad phyir/ /gzhan la phan 'dogs ma zhi'i phyir/ /mi g.yeng phyin ci ma log par/ /gyur pa rjes su mthun pa'i chos/ /ldang dang yul la 'jug pa dang / /de bzhin ro myang bying dang rgod/ / yid ches pa yi bsam pa dang / /yid la byed pa ngar 'dzin dang / /chung ngu'i sems ni g.yeng ba ste/ /blo ldan rnams kyis shes par bya/ /yi ge don dang yid byed dang / /mi 'phro ba dang mtshan nyid gnyis/ /ma dag dag dang glo bur dang / /mi sdang ba dang khengs pa med//'brel pa'i phyir dang 'dris phyir dang / /ma 'brel phyir dang ma 'dris phyir/ /don yod pa dang med pa ste/ /de ni yi ge ma log pa'o/ /gnyis su snang bar gyur pa ni/ /de ltar yod pa ma yin te/ /de ni don la ma log pa/ /yod dang med pa rnam par spangs//rtog pa de yis bsgos pa yi/ /rtog pa yid byed de'i gnas ni/ /yid la byed pa ma log pa/ /gnyis su snang ba'i rgyu la'o/ /don gyis med dang yod pa ste/ /sgyu ma la sogs bzhin du 'dod/ /de ni mi 'phro ma log ste//yod dang med pa mi 'phro phyir/ /rtog pa thams cad mi 'jug phyir/ /thams cad ming tsam kho na ste/ /rang gi mtshan nyid ma log pa'o/ /don dam rang gi mtshan nyid la'o/ /chos kyi dbyings ni ma gtogs par/ /'di ltar chos yod ma yin te//de phyir spyi yi mtshan nyid der/ /de ni phyin ci ma log pa'o/ /phyin ci log gi yid la byed/ /ma spangs pa dang spangs pa las/ /de ni ma dag rnam dag ste/ /de yang de la ma log pa'o/ /chos kyi dbyings ni rang bzhin gyis/ /rnam par dag phyir nam mkha' bzhin//gnyis ni glo bur byung ba ste/ /de yang de la ma log pa'o/ /chos rnams dang ni gang zag gi/ /kun nas nyon mongs rnam dag med/ /med phyir de bas skrag dang nga / /med de de 'dir ma log pa'o/ /gang la gang zhig gang las 'khrul//ma 'khrul gang zhig gang la dang / /'khrul dang ma 'khrul 'bras bu nyid/ /de gnyis kyi ni mtha' ma'o/ /yod med phyin ci ma log dang / /gnas dang sgyu ma lta bu nyid/ /mi rtog pa dang rang bzhin gyis/ /rtag par 'od gsal nyid dang ni//kun nas nyon mongs rnam byang dang / /de bzhin nam mkha' lta bu nyid/ /'grib pa med dang lhag med pa/ /rdo rje'i tshig ni bcu zhes bya/ /tha dad pa dang gcig mtha' dang / /mu stegs nyan thos gnyi ga dang //gang zag chos la sgro 'dogs dang / /skur 'debs mtha' rnams gnyis gnyis dang / /mi mthun phyogs dang gnyen po'i mtha'/ /rtag dang chad par 'du shes dang / /gzung dang 'dzin dang kun nyon mongs/ /rnam par byang la gnyis dang gsum//rnam par rtog pa gnyis kyi mtha'/ /de ni rnam pa bdun du 'dod/ /dngos yod dngos med zhi bya dang / /zhi byed skrag bya de la 'jigs/ /gzung dang 'dzin dang yang dag nyid/ /log pa nyid dang byed dang min//skye ba med dang mnyam pa'i dus/ /de ni rnam rtog gnyis kyi mtha'/ /khyad par can dang khyad med ni/ /sa bcu dag tu shes par bya/ /rnam par gzhag dang de bzhin dbyings/ /sgrub dang sgrub dang 'dzin pa dang / /nges par 'dzin dang rab tu 'dzin//rab tu rtogs dang rab rgyas dang / /rnam par rtog dang rnal 'dug dang / /phul du byung ba'i dmigs par 'dod/ /ma tshang med dang mi spong dang / /mi g.yeng ba dang rab rdzogs dang / /yang dag skyed dang 'phel ba dang / /las su rung dang mi gnas dang //sgrib pa med pa nyid dang de/ /rgyun mi gcod pa yang dag 'grub/ /dbus rnam 'byed pa'i bstan bcos te/ /rtogs par dka' dang snying po'i don/ /don chen de bzhin kun gyi don/ /don med thams cad sel ba'o/ / bstan bcos dbus dang mtha' rnam par 'byed pa las/ theg pa bla na med pa'i le'ur bcad pa zhes bya ba ste lnga pa'o// //bstan bcos dbus dang mtha' rnam par 'byed pa zhes bya ba'i tshig le'ur byas pa 'phags pa byams pas mdzad pa rdzogs so// //rgya gar gyi mkhan po dzi na mi tra dang / shI len+d+ra bo d+hi dang / zhu chen gyi lo tsA ba ban+de ye shes sdes bsgyur cing zhus te gtan la phab pa'o// //