CLOSE WINDOW

D4017
བོད་ཡིག

@#/ /dam pa'i chos pad+ma dkar po'i 'grel pa bzhugs/ @##/ /dam pa'i chos puN+Da rI ka'i 'grel pa rgya las bsgyur ba/ bam po dang po/ mdo sde 'di bshad pa la don rnam pa bzhis dbye bar bya ste/ mdo sde bshad pa'i gleng gzhi dang / mdo sde 'di'i le'u rnams kyi don bstan pa dang / le'u rnams kyi go rims bstan pa dang /gzhung dgrol ba dang bzhi'o/ /mdo 'di'i gleng gzhi yang don rnam pa lnga ste/ gleng gzhi dang / gleng slong ba dang / the tshom du 'dzin pa bsal ba dang / lung ston pa'i spyod pa bstan pa dang / tshe 'di dang gzhan du phan gdags pa'i don bstan pa dang / dus dang dbang po bstan pa dang lnga'o/ / gleng gzhi la yang rnam pa lnga ste/ spyod pa dang / smon lam dang / tshol ba dang / 'dzin pa dang / ltas dang lnga'o/ /bla na med pa'i sangs rgyas su grub pa'ang spyod pa dam pa dang ldan pas gdod 'grub/ spyod pa'ang smon lam gyis bstang dgos/ spyod pa dang smon lam du ldan yang 'bad pa dang bcas pas tshol zhing 'dzin na gdod 'bras bu thob par 'gyur ro//'bras bu phun sum tshogs pas 'gro ba mang po'i don mdzad par dgongs te/ mdo sde zab mo 'di bshad pa'i ltas chen po ston to/ sangs rgyas bcom ldan 'das 'jig rten du 'byung ba yang don chen po gcig gi phyir 'byung zhes bya ba yang de'o/ /de la spyod pa'i gzhi yang thabs mkhas pa'i le'u las mdo sde 'di'i 'grel pa su ban d+hus zab mo brgyad bstan pa bzhin te/sngon sangs rgyas mang po grangs med pa la rim gro dang bsnyen bkur byas te/ sangs rgyas bcom ldan 'das kyis mdzad pa dang / spyod pa grangs med pa la brtson pa dang grags pa phun sum tshogs pas zab mo sngon ma byung ba'i chos chud par dka' ba de bzhin gshegs pa nyid kyis dgongs te/so so'i yid dang mthun par ston pa nyan thos dang rang sangs rgyas kyis shes par mi nus te/ de yang gzung ba dang 'dzin pa shin tu zab pa dang / klog cing 'don pa shin tu zab pa ste/ spyod pa shin tu zab pa dang / 'bras bu shin tu zab pa dang / bsod nams spel ba'i sems shin tu zab pa dang /don dam pa la mos pa'i sems shin tu zab pa dang / bla na med pa shin tu zab pa dang / 'jug pa shin tu zab pa dang / thun mong ma yin pa shin tu zab pa ste/ nyan thos dang rang sangs rgyas kyi spyod pa las khyad par du 'phags pa'i phyir shin tu zab pa 'di dag sangs rgyas bcom ldan 'das kyi spyod pa thams cad rdzogs par byed pa/theg pa gcig pa'i spyod pa dang ldan zhing rnam pa thams cad mkhyen pa'i rgyu grub pas bla na med pa'i 'bras bu thob par byed pa de'i gleng gzhi'i rgyu bstan pa'i phyir dam pa'i chos 'di ston to/ /de la smon lam gyi rgyu ni yang thabs mkhas pa'i le'u las/shA ri'i bu nga sngon gyi dus na sems can thams cad nga bzhin du bla na med pa yang dag par rdzogs pa'i sangs rgyas su grub par bya'o zhes smon lam btab pas/ smon lam de nyid grub ste/ sems can dgrol ba la mnga' brnyes pa dang / sngon gyi dus na dam bcas shing smon lam btab pa de nyid spyod pa dang 'bras bu mthun par gyur pa bzhin sems can thams cad kyang spyod pa de la gzud pa'i phyir don de bstan to//de la tshol ba'i rgyu ni mos par bya ba'i le'u las/ nga sngon 'das pa'i dus na dam pa'i chos 'di 'dod pa'i phyir bskal pa mang por skyo mi shes pas tshol zhing sngon rgyal po mdzad pa'i tshe phyogs bzhir dung bus rnga brdungs te chos tshol ba na drang srong las chos mnyan pa'i phyir rim gro bkur sti grangs med par byed pa ni dge ba'i bshes gnyen las chos thos par tshol ba'i rgyu dang gleng gzhir ston pa'o//de la 'dzin pa'i rgyu ni sngar smos pa'i shin tu zab pa brgyad las dang por sngon sangs rgyas bcom ldan 'das sangs rgyas brgya stong grangs med pa la rim gro dang bsnyen bkur byas pa ste/'di la byang chub sems dpa' chu bo gang gA'i bye ma snyed kyi sangs rgyas mchod par gyur pa nas/ rim gyis sangs rgyas mang po la bsnyen bkur byas pa dang / dge ba'i bshes gnyen dang yun ring du 'grogs pa'i phyir mdo 'dzin cing klog pas dbang po drug rnam par dag pa dang /sangs rgyas mang po la rtag tu bsnyen bkur byed par 'gyur ba'i phyir/ 'dzin cing klog pa nyid shin tu zab par bstan to/ /de la ltas ni sangs rgyas bcom ldan 'das bla na med pa'i 'bras bu brnyes nas mdo sde 'di bshad par dgongs te/sngar byang chub sems dpa' rnams la ltas bstan pa'i phyir lha'i me tog 'brul ba dang / sa rnam par g.yo ba dang / 'od kyis snang bar mdzad pas 'khor mang po zhal du lta zhing dga' ba dang spro ba'i sems kyis deng ni bcom ldan 'das kyis dam pa'i chos puN+Da rI ka bshad par dgongs pa'i ltas mang po ston par mdzad pa snyam du sems pa la sogs pa bsam pa bskyed pa'i ltas mdo sde gzhan bshad pa dang mi 'dra bar ston pa ni ltas chen po'o//de la bshad pa'i rgyu ni de bzhin gshegs pa 'jig rten du 'byung ba'ang don chen po gcig gi phyir zhes 'byung zhes bya ba nas gnas der nyan thos kyi 'khor rnams med de/byang chub sems dpa'i 'khor 'ba' zhig la chos ston te / rnam pa thams cad mkhyen pa'i ye shes thob pa'i bar du 'gyur ba la sogs pa'i bar du rgyas par bstan te/ dus gsum gyi sangs rgyas bcom ldan 'das kun gyis nges pa'i don theg pa chen po ston pa'ang dus dang dbang po smin par ston pa de ni bshad pa'o//de la bshad par gleng slong ba ji ltar mdo las gsungs pa bzhin te/ bcom ldan 'das dang po bltams pa'i tshe phyogs bzhir gom pa bdun bdun bor te/ 'od chen pos phyogs su snang bar mdzad nas kun la seng ge'i sgra sgrogs par dgongs pa mtha' yas pa'i sems can thams cad bsgral bar thugs dam bcas te/sku khad kyis skyes nas mkhar gyi sgo bzhir gshegs shing 'jig rten gdul ba'i ltas gzigs na bla na med pa'i lam tshol ba'i phyir khab nas byung zhing dka' thub rnam pa sna tshogs mdzad de/ mngon par rdzogs par sangs rgyas byang chub kyi shing drung du rdo rje gdan la bzhugs pa'i bar 'khor mang por dang po chos ston pa ste/dbang po ma smin pa rnams la bkri ba dang bcas pa'i chos ston pa dang / mdo sde 'di ston pa'i dus ni sems can dbang po smin pa rnams la nges pa'i don bstan par dgongs te/ 'phags pa shA ri'i bu dang /byams pa byang chub sems dpa' dang / 'jam dpal gzhon nur gyur pas gsol ba'i don rnams gcig tu nges par ston pa la sogs pa ni gleng bslang nas chos ston pa'o/ /the tshom bsal ba ni bcom ldan 'das mngon par rdzogs par sangs rgyas na byang chub sems dpa' rnams bla na med pa yang dag par rdzogs pa'i sangs rgyas su 'grub par lung ston pa mdzad kyi/nyan thos rnams nam du'ang bla na med pa'i byang chub thob par lung ma bstan pa'i phyir/ 'phags pa shA ri'i bu la sogs pa nyan thos rnams la bla na med pa'i byang chub kyi rgyu med do snyam du the tshom du gyur pa dang /byang chub sems dpa' rnams kyis kyang nyan thos rnams nam du yang sangs rgyas su grub pa'i rgyu med pa snyam du sems pa dang / kha cig ma nges pa'i rang bzhin can rnams kyang the tshom du gyur pa de bsal ba'i phyir mdo sde 'di las nyan thos dang byang chub sems dpa' la sogs te/mdo sde 'di la chung ngu na tshigs su bcad pa gcig thos pa tsam gyis kyang bla na med pa'i sangs rgyas su 'grub par lung bstan pas de dag gi the tshom bsal to/ /de la lung bstan pa dang spyod pa yang dang po mngon par sangs rgyas pa nas de'i bar du nyan thos kyi spyod pas mngon par rdzogs par 'tshang rgya bar lung ma bstan gyi /'dir thabs kyis drang ba'i dus la bab par lung bstan pa'i phyir ro/ /spyod pa ni byang chub sems dpa' theg pa gcig pa 'di'i nang nas 'chad pa'i phyir te/ mdo 'di nyid las kyang rgyal ba'i sras sems zhi ba dul ba dbang po rno ba sangs rgyas mang po la dge ba'i rtsa ba bskrun pa rnams la theg pa chen po'i spyod pa 'di bstan pa'i phyir mdo 'di gsungs so//de la tshe 'di la phan pa ni dam pa'i chos puN+Da rI ka 'di 'phags pa dang ma rabs su gyur pa gang gis thos kyang phan 'dogs par gyur pa'i phyir ro / /de la yang rnam pa gnyis te/ 'bras bu thob par lung ston pas phan 'dogs pa dang /'phral du mngon par grub par byed pas phan 'dogs pa'o/ /'bras bu thob par lung ston pa ni 'phags pa nyan thos lnga brgya bla na med pa'i byang chub tu lung bstan pas tshe 'di la phan 'dogs pa'o/ /de ston pa yang rnam pa drug ste/ shA ri'i bu la sogs pa nyan thos chen po bzhi mtshan mi mthun te so sor lung bstan pa rnam par phye ste/lung bstan pa dang / 'phags pa gang po la sogs pa nyan thos lnga brgya mtshan mthun par lung bstan pas spyir lung bstan pa dang / slob pa dang mi slob pa phal cher mang po gzhan rnams dbang po zhan pa'i phyir phyis lung bstan pa dang / lhas byin lung bstan pas byams sdang med par lung bstan pa dang /rab tu byung ba dang / khyim na gnas pa dang / lha'i bu mo la sogs pa lung bstan pa'i phyir dang / bkol ba med par ston pa ste / de ni mdo sde 'di bshad pa'i dus su de bzhin gshegs pa nyid kyis lung bstan pa'o/ /rtag tu mi brnyas par byang chub sems dpa' la sems can thams cad ni de bzhin gshegs pa'i rang bzhin can no zhes rgyu la dgongs shing ston pa ste/de la gong gi lnga ni tshe 'di la phan pa'i sgo nas lung bstan pa'o/ /'phral du mngon par 'gyur bar byed pas phan pa ni ji ltar mos par bya ba'i le'u las klu'i rgyal po'i bu mo dam pa'i chos 'di thos pa nyid kyis bla na med pa'i 'bras bu thob pa 'khor brgyad po thams cad kyis mngon du mthong ba'i phyir kun gyi dga' ba dang mgu ba grangs med pa thob pa lta bu ste/mdo sde 'di bshad pa'i tshe lha dang mi dang lha ma yin la sogs pas gzungs dang ting nge 'dzin grangs med pa thob pa dang /mig rnam par dag cing byang chub sems dpa' kun du bzang po'i spyod pa la 'jug pa la sogs pa phan 'dogs pa mang po ni tshe 'di nyid la phan pa'o/ /tshe rabs gzhan du phan pa ni mdo sde 'di bshad pa thos pa'i bsod nams kyi dge ba'i rtsa ba mang po 'phel ba'i tshe / tshe rabs gzhan du 'phel ba ste/ mdo sde 'di la rjes su yi rang ba'i bsod nams ni stong gsum gyi stong chen po'i 'jig rten gyi khams kyi sems can thams cad la rin po che sna bdun gyi sbyin pa byin pa dang / sems can thams cad dgra bcom pa'i 'bras bu la bkod pa bas bsod nams 'di che bar bstan pa dang /gzhan yang dam pa'i chos 'di 'don pa'i dge slong la rim gro byas pa tsam gyis kyang nam du yang 'on pa dang lkugs par mi skye ba dang / su 'bri ba dang / klog pa dang / dbang po rnam par dag pa'i bsod nams grangs med pa 'thob pa ni tshe rabs gzhan du phan pa'o/ /dus dang dbang po bstan pa ni/dus la yang rnam pa gnyis te/ sangs rgyas bcom ldan 'das chos ston pa yang cig car ston pa'i dus dang / rim gyis ston pa'i dus so/ /cig car ston pa ni dbang po rnon po'i ched du ston te/ sems can ma rabs kyis nas bla na med pa'i 'bras bu thob par stsol ba'i phyir ro//sangs rgyas bcom ldan 'das chos ston pa'i dus kyang rnam pa lnga ste/ dang por mngon par rdzogs par sangs rgyas nas tshong pa lnga brgya la skyabs gsum dang / dge ba bcu la sogs pa 'jig rten gyi bden pa'i phyir rtsa ba bstan/ de'i 'og tu mya ngan las 'das nas lo bcu gnyis kyi bar du yod pa can gyi bstan pa theg pa chung ngu'i mdo sde A ka ma la sogs pa bstan/de'i 'og tu mngon par byang chub nas lo sum cu'i bar du yod pa dang med pa'i phyogs las brtsams te chos bstan/ de'i 'og tu mngon par byang chub nas lo bzhi bcu'i bar du theg pa gcig pa las brtsams te/de bzhin gshegs pa'i rang bzhin rtag pa nyid du ston pa'i gzhung dam pa'i chos puN+Da rI ka nyid kyi gzhung bstan/ de'i 'og tu shing sA la'i drung du sems can thams cad la de bzhin gshegs pa'i rang bzhin yod pa nyid du bstan zhes kyang zer te/ de bzhin gshegs pa'i chos ston pa ni gsung rab tshig dbang po so sor smin par byed de/ji ltar ro gcig tu 'bab pa'i char pas shing rtsi sna tshogs so sor smin pa bzhin pas 'di skad du bstan par nges pa tsam ma yin no/ /ji ltar dgongs pa nges par 'grel pa las byang chub sems dpa' don dam yang dag 'phags kyis zhus pa las kyang / bcom ldan 'das mngon par byang chub nas dang po ri dwags ma'i tshal drang srong babs pa'i gnas su 'phags pa nyan thos pa rnams la bden pa bzhi las brtsams te chos kyi 'khor lo bskor ba yang ngo mtshar rmad du byung ba 'jig rten thams cad du mngon par byung ba'i chos kyi 'khor lo bskor to zhes bsgrags kyang de yang bla ma dang bcas pa skabs dang bcas pa/rtsod pa'i glags yod pa gcig tu nges pa ma yin no/ /de'i 'og tu byang chub sems dpa' rnams la theg pa chen po las brtsams te/ chos thams cad ma byung ba/ ma skyes pa/ thog ma nas zhi ba/ rang bzhin gyis mya ngan las 'das pa mi mngon pa'i tshul gyis bsgrags te/chos kyi 'khor lo bskor ba yang shin tu dkon pa rmad du byung ba la / sngon ma byung ba yin mod kyi/ de yang bla ma dang bcas pa skabs can gcig tu ma nges pa rtsod pa dang bcas pa yin no/ /de'i 'og tu bcom ldan 'das kyis theg pa thams cad pa las brtsams te/ chos thams cad rang bzhin gyis ma skyes pa/mya ngan las 'das pa ste mngon pa nyid du bsgrags te/ chos bstan pa ni bla na ma mchis pa/ skabs ma mchis pa/ rtsod pa'i glags ma mchis pa'o zhes gsungs te/ dang por nyan thos rnams la A ka ma'i gzhung bshad de/ yod par mngon pa nyid du ma bstan pa yang yod pa nyid rang bzhin mi 'grub pa/shes rab kyi pha rol tu phyin pa'i nang du stong pa nyid du bstan pa yang stong pa'i rang bzhin nyid grub pa med sdong pos brgyan pa la sogs par yod pa nyid du mngon par bsgrags pa la yang gzhan gyi dbang dang / yongs su grub pa'i mtshan nyid yod pa la brten te gsungs pa'i dper mya ngan las 'das pa chen po las kyang dper na sman pa mkhas pa zhig gis yul phyogs su 'o ma lus la gsol bar smras pas mi kun gyis 'o ma 'ba' zhig 'thungs pas nad du gyur te 'chi ba yang mang bar gyur to//de'i gnyen por 'o ma bcad pa'i phyir 'o ma ni dug yin gyi 'o ma ni su yang ma 'thung shig ces bsgo bas yul phyogs su nad nyung bar gyur to//de'i 'og tu yul de'i rgyal po la sman gtang ba'i phyir sman 'o ma dang sbyar ba dang / sman pa la rgyal pos bkyon te/ sngar 'o ma ni dug yin no zhes zer na/ da bza' ba'i sman 'o ma dang sbyar ram zhes zer ba la/ 'o ma 'ba' zhig 'thungs na ni de skad smras pa yang bden na/da sman dang sbyar te nad la phan pa'i dus su mi gtong ba yang ma yin te/ de bzhin gshegs pa'i bstan pa yang de bzhin du blta'o / /dbang po ni ji ltar mya ngan las 'das pa chen po'i mdo las sems can thams cad dbang po gcig pa ste/ kun kyang de bzhin gshegs pa'i rang bzhin can pas ji tsam du sems kyis zin pa de thams cad bla na med pa yang dag par rdzogs pa'i byang chub tu mngon par rdzogs par 'tshang rgya'o zhes gsungs so/ /yang mdo las kyang phyogs bcu'i de bzhin gshegs pa'i zhing thams cad ni theg pa gcig pa ste/gnyis dang / gsum du med pas thabs mkhas pas rol ba ni ma gtogs so zhes 'byung ngo / /mdo sde 'di'i nang nas kyang theg pa gcig bstan pa'i phyir rang bzhin yang gcig pa yin na/ yang rang bzhin la rnam pa gnyis te/ grub pa'i rang bzhin dang / sgrub pa'i rang bzhin no//grub pa'i rang bzhin ni mdo sde dag las sems can thams cad la de bzhin gshegs pa'i rang bzhin yod ces bya'o/ /sgrub pa'i rang bzhin ni bsgrubs na 'grub pa'i rang bzhin can no/ /yang sems can la rang bzhin dang / rang bzhin med pa gnyis te/ thog ma med pa nas gnas drug tu mtho dman du 'khor zhing gnas pa ni sgrub pa la brten pa'i sems can te rang bzhin can no//rang bzhin med pa ni ji ltar sems bskyed de brtson 'grus brtsams su zin kyang lha dang mi'i dge ba sman pa tsam las bla na med pa'i byang chub 'thob par mi nus so//'phags pa lang kar gshegs pa las ni rigs rnam pa lnga ste/ nyan thos pa'i rigs dang / rang sangs rgyas kyi rigs dang / de bzhin gshegs pa'i rigs dang / ma nges pa'i rigs dang / rigs med pa'o/ /rigs med pa yang rnam pa gnyis te/ dge ba'i rtsa ba thams cad bsregs pa'i sems can dang /byang chub sems dpa' thugs rje chen pos sems can gyi mtha' dang sbyar zhing mya ngan las mi 'da' ba dang gnyis so/ /de bas na mdo sde 'di bshad pa'i dgongs pa yang theg pa gcig tu bstan pa ni byang chub sems dpa'i rigs can rnams la bstan nas char pa'i ro gcig gis rtsi shing rnam pa gsum so sor smin pa ni nyan thos kyi ched du bstan pa yin no//'di man chad rtsis mgo gnyis pa ste/ mdo sde 'di nyid kyi gzhung bstan pa'o/ /yang mdo sde'o cog la spyir tshul rnam pa bzhir bstan te/ rang bzhin yod pa'i gzhung ste/ phung po lnga'i rang bzhin dngos por yod pa dang / rang bzhin gsal ba'i gzhung ste/ chos thams cad dngos pa can ma yin gyi/ mtshan nyid tsam du yod par smra ba dang / mtshan nyid 'jig pa'i gzhung ste/ shes rab kyi pha rol tu phyin pa lta bu chos kyi mtshan nyid kyang bsal nas stong pa nyid du bstan pa'i gzhung dang /yang dag pa nyid bstan pa'i gzhung ste/ sdong pos brgyan pa lta bu yang dag pa nyid mngon du bstan te/ dbu ma'i tshul bshad pa dang bzhi las/ mdo sde 'di ni bzhi pa'i gzhung du blta'o/ /yang nyan thos pa so so'i gzhung mi mthun pa ma hA sang gi ga la sogs pa gzhung mi mthun pa nyi shu rtsa gnyis su lta ba mi mthun pas so sor smos pa yang mang mod kyi mdor rnam pa gsum ste/yod par smra ba theg pa chung ngu'i gzhung A ka ma la sogs pa bstan pa yang mthar stong pa nyid kyi mtshan nyid dang tha dad pa ma yin shes rab kyi pha rol tu phyin pa'i gzhung lta bu stong pa nyid du bstan kyang yod pa las 'gal ba ma yin no//sdong pos brgyan pa dang / dgongs pa nges par 'grel pa la sogs par yod med gnyi ka'i mtha' bsal te bstan pa yang 'dus byas dang 'dus ma byas pa'i mtshan nyid ni yod par bstan/ bdag dang bdag gir 'dzin pa ni bsal ba tsam las 'das pa ma yin no//sdong pos brgyan pa las de bzhin gshegs pas tshig gcig gsungs pas sems can so so'i dbang po bzhin du go bar gyur pa dang / gzhan yang mdo dag las de bzhin gshegs pa mngon par byang chub nas lo bzhi bcu'i bar du rtag par chos thams cad ma byung ba mi skyes pa/'gro ba med pa/ 'ong ba med pa/ thob pa med pa/ nyams pa med pa/ mtshan nyid med pa / mtshan nyid gcig pa sha stag tu ston gyis kyang sems can rnams kyi go ba mi mthun par gyur pa yang so so'i dbang po las gyur pa yin te/ ji ltar lha'i yid bzhin gyi rnga brdungs pa'i sgra las chos thos pa mi mthun pa bzhin/ theg pa che chung la rim pa dang / cig car du chud pa yang de bzhin du blta'o/ /gnyis pa mdo sde 'di'i mtshan bshad pa ni mdo sde 'di dam pa'i chos pad+ma dkar po zhes bya ba'i mdo sde ste/ mdo sde 'di 'chad par dgongs pa'i ltas smin mtshams kyi mdzod spu nas 'od dkar pos snang bar mdzad de/glang dkar po'i shing rta la bcibs nas pad+ma dkar po la gzigs te/ chos ston pa yang dkor po ni kha dog thams cad kyi gzhi yin/ theg pa gcig pa yang theg pa thams cad kyi phyi mo yin par bstan pa'i phyir pad+ma dkar pos dpe bstan to//mdo sde 'di'i nang nas rgyu dang 'bras bu dang rigs pa dang ye shes gtso bor ston pa de nyid la dam pa'i chos pad+ma dkar po zhes bya ste/ de bzhin gshegs pa'i ye shes snang ba 'byed pa bla na med pa'i sku thob pa'i phyir ro/ /rigs ba dag ye shes la brten pas de bzhin gshegs pa'i spyod yul du 'jug pa ni rgyu yang theg pa gcig pu la gnas pa ste/bla na med pa'i gnas su phyin pa ni theg pa gcig po'i 'bras bu yin par blta'o / /yang chos 'di pad+ma zhes gdags pa yang don rnam pa gnyis te / chu las skyes pa dang kha 'bye ba'o//theg pa rnam gnyis kyi chu 'dam can las khyad par du 'phags pa'i phyir dang / gsung rab dam pa la brten nas yang dag pa'i don gyi sgo 'byed pa zhes bya'o/ /yang de bzhin gshegs pa'i dgongs pa bsam gyis mi khyab pa rigs pa dang chub par dka' ba de nyid la dam pa'i chos zhes bya ste/de yang rtogs pa shin tu zab pa dang gzhung shin tu zab pa'i phyir/ lung dang gzhung dang sgrub pa dang / 'bras bu kun kyang theg pa gcig po nyid yin pas dam pa'i chos pad+ma dkar po zhes bya ba yang de yin no/ /de la lung ni gzhung dam pa sgrogs pa'i las byed/ gzhung ni gdon par bya ba chu las 'byin pa'i mthu yod/ sgrub pa ni 'bras bu smin par byed pa'i mthu yod/ 'bras bu ni rgyus bsgrubs pa don yod par byed pa'o/ /mdo sde 'di'i nang nas le'u'i grangs dang ming bstan pa ni le'u nyi shu rtsa bdun zhig yod pa las/ dang po gleng gzhi'i le'u dang / thabs mkhas pa'i le'u dang / dpe'i le'u dang / dad pa'i le'u dang / sman gyi le'u dang / lung bstan pa'i le'u dang / sngon byung ba'i le'u dang / dge slong lnga brgya lung bstan pa'i le'u dang / dge slong gzhan nyis stong lung bstan pa'i le'u dang / chos smra ba'i le'u dang / mchod rten bstan pa'i le'u dang /mos pa bya ba'i le'u dang / bde ba la gnas pa'i le'u dang / byang chub sems dpa' sa'i rum nas 'thon pa'i le'u dang / de bzhin gshegs pa'i tshe'i tshad kyi le'u dang / bsod nams kyi gzhung gi le'u dang / rjes su yi rang ba'i bsod nams bstan pa'i le'u dang /skye mched drug rnam pa dag pa'i yon tan gyi le'u dang / rtag tu mi brnyas pa'i le'u dang / de bzhin gshegs pa'i rdzu 'phrul mngon par 'du byed pa'i le'u dang / gzungs sngags kyi le'u dang / sman gyi rgyal po'i sngon gyi tshul gyi le'u dang / sang sang po'i dbyangs kyi le'u dang / kun gyi sgo'i le'u dang /dge ba'i rgyan gyi sngon gyi tshul gyi le'u dang / kun du bzang po mos par bya ba'i le'u dang / yongs su gtad pa'i le'u'o/ /le'u de dag kyang chos kyi don las btags pa rnam pa bzhi dang / dpe las btags pa rnam pa gsum dang / byang chub sems dpa' gang gis gsol ba 'debs pa las btags pa rnam pa bzhi dang /don las btags pa rnam pa bzhi dang / don dang byang chub sems dpa' gnyis ka las btags pa rnam pa dgu dang / ma nges pa rnam pa gnyis te/ bde ba la gnas pa dang / mchod rten bstan pa gnyis ni rgyu dang 'bras bu gnyis kar 'brel pa'i phyir ma nges pa ste/spyir nyi shu rtsa bdun no/ /le'u nyi shu rtsa bdun gyi rim pa bshad pa ni/ de bzhin gshegs pas chos bshad par dgongs te/ 'gro ba mang po la gzigs nas gzengs bstod cing rmugs pa bsal te dbang po dang bar byas nas so so'i dbang po dang mthun par chos bstan pa'i phyir dang po gleng gzhi'i le'u bstan to//gleng gzhi'i le'u bstan nas yang dag pa'i gzhung nyid bstan par bzhed de/ theg pa gcig pa'i gzhung ston pa yang bkri ba dang nges pa'i don gyi dbang po rno rtul so sor phan btags pa'i phyir de'i 'og tu thabs mkhas pa'i le'u bstan to/ /dbang po rno rtul chos rim par phye ste bstan zin gyis kyang zab mo rtogs par mi nus pas dpes go bar bya ba'i phyir de'i 'og tu dpe'i le'u bstan to//dpes don zab mo mthong zhing dad pa bskyed pa'i phyir de'i 'og tu dad pa'i le'u bstan to/ /dad pa skyes su zin gyis kyang da dung nges pa tsam ma yin pas de brtan par bya ba'i phyir yang sman gyi dpe'i le'u bstan to//nyan thos chen po bzhi don zab mo mthong bas de'i 'bras bu bstan pa'i phyir de'i 'og tu lung bstan pa'i le'u bstan to/ /dbang po rnon po dang bar ma gnyis kyis shes pa skyes su zin kyang dbang po rtul ba rnams yang dang yang du bzlas shing chud par bya ba'i phyir sngon byung ba grong khyer gyi dpe'i le'u bstan to//dbang po rnon po rnams don glengs pa tsam gyis chud pa dang / dad pa skyes te lung bstan pa bzhin dbang po rtul po rnams kyang lan gnyis lan gsum du bzlas pas rtogs pa skyes te/ de'i lung bstan par dgongs pa'i phyir de'i 'og tu dge slong lnga brgya lung bstan pa'i le'u bstan to//dbang po'i rigs pa bzhin dge slong gzhan dag kyang rtogs pa skyes pa'i phyir de'i 'og tu slob pa dang mi slob pa rnams lung bstan pa'i le'u bkod do/ /dbang po rno rtul rim pa gsum po rnams so sor lung bstan te/ yun ring po ma 'ongs pa'i dus su chos bzang ba'i dpe lugs bzhag pa'i phyir de'i 'og tu chos smra ba'i le'u bzhag go//lung bzhin bsgrubs te yang dag pa nyid chud pa'i rtags gzhan dad pa bskyed pa'i phyir sngon gyi 'phags pa rnams 'byung ba'i mchod rten gyi le'u bstan to/ /don de bdag nyid kyis chud par ma zad kyi gzhan gyi don yang bya dgongs pas rgyal po'i lus su sprul te chos ston pa'i phyir de'i 'og tu sngon byung ba'i le'u bstan to//mdo sde 'di lta bu bdag dang gzhan gyi rin che ba dang gus par bya ba'i phyir byang chub sems dpa' rnams kyis rjes su 'dzin par gsol bas de'i 'og tu rjes su 'dzin pa'i le'u bstan to//ma 'ongs pa'i dus na chos sgrub pa'i spyod lam mi mthun par byed pa rnams kyi lus nyon mongs par skye ba la spyod lam gyi tshul bstan pas spyod lam bslab pa'i phyir de'i 'og tu bde ba la gnas pa'i le'u bstan to/ /chu bo gang gA'i bye ma snyed kyi byang chub sems dpa' rnams kyis dam pa'i chos 'di thos nas rjes su 'dzin cing slob par dga' ste smon pa las sangs rgyas bcom ldan 'das kyi sngon yang byang chub sems dpa' skyon gyi dri ma dang bral ba rnams langs nas 'di 'dzin par smon pa rnams la bstan pa'i phyir byang chub sems dpa' rnams sa'i 'og nas mang du 'thon pas de'i 'og tu byang chub sems dpa' sa'i rum nas 'thon pa'i le'u bzhag go//'khor mang po rnams kyi byang chub sems dpa' sa'i 'og nas 'thon pa mthong nas 'di ni de bzhin gshegs pa shAkya thub pa bas sngar grub pa sha stag ste/ 'di ni shAkya thub pas sprul pa ma yin no snyam pa'i dogs pa bsal ba'i phyir de bzhin gshegs pa rnams ni tshe mtha' yas pa ste/de'i 'og tu de bzhin gshegs pa'i sku tshe'i tshad kyi le'u bzhag go/ /de bzhin gshegs pa'i sprul pa'i sku'i tshe tshad de [(]ltan [,]lta na [)]chos dang longs spyod rdzogs pa'i sku'i yon tan dang tshe tshad kyang grangs med par thabs kyis bstan pas sems can rnams de la mos pa bskyed pa'i phyir de'i 'og tu bsod nams kyi rnam grangs dbye ba'i le'u bstan to//de ltar bsod nams kyi rnam grangs med par bstan pas sems can rnams pa bskyed pa'i phyir de'i 'og tu rjes su yi rang ba'i le'u bzhag go/ / gzhan byed pa la rjes su yi rang ba tsam gyis kyang bsod nams grangs med pa thob na/ dngos su 'chad pa dang 'don pa rnams lta smos kyang mi dgos par bstan pa'i phyir de'i 'og tu skye mched drug rnam par dag pa'i yon tan gyi le'u bzhag go/ /gang chos smra ba de bla na med pa'i byang chub tu 'gyur bas chos smra ba la smod pa kha na ma tho ba che bar bstan pa'i phyir de'i 'og tu rtag tu mi brnyas pa'i le'u bzhag go//de bzhin gshegs pas bsod nams che ba'i rim pa bstan kyang sems can mos pa chung ba rnams dogs pa skye ba yang yod de/ de bslu ba ma yin pa'i gtan tshigs su de bzhin gshegs pa'i rdzu 'phrul mngon par 'du byed pa'i le'u bzhag go//sman gyi rgyal po sngon dam pa'i chos 'di tshol ba la lus dang srog la mi phangs pas brtson par tshol ba sngon gyi tshul bstan pa'i phyir de'i 'og tu sman gyi rgyal po byang chub sems dpa'i le'u bzhag go/ /yang dag pa'i chos spyod pa 'jig rten 'di dang khams gzhan dag tu rgyas par bsgrags pa'i phyir dbyangs dam pa dang ldan pa'i byang chub sems dpa' sgrogs su gzhug pa'i phyir de'i 'og tu sang sang po'i dbyangs kyi le'u bzhag go//sems can rnams mdo 'di 'dzin pa la bgegs dang bar chad che bas thugs rje chen po dang ldan pa'i byang chub sems dpa' 'phags pa spyan ras gzigs la brten pa'i kun gyi sgo'i le'u bzhag go//bgegs dang bar chad zhi bar bya ba'i phyir gzungs kyi le'u bzhag go/ /sngon gyi gtan tshigs dang gleng gzhi la brten pa'i phyir de'i 'og tu dge ba'i rgyan gyi sngon gyi tshul gyi le'u bzhag go//yul khams thams cad du rgyas par bstan pa'i phyir de'i 'og tu byang chub sems dpa' kun tu bzang po'i le'u bzhag go/ /mdo sde 'di bshad pa'i gzhung rdzogs shing mthar phyin pas de'i 'og tu gdams shing gtad par 'os pa'i phyir de'i 'og tu yongs su gtad pa'i le'u bzhag go//de la mdo sde'i gzhung 'grel pa ni 'di skad bdag gis thos pa zhes pa la don rnam pa gsum ste/ de'i phyir bshad pa dang de cir dgongs pa dang / de'i gzhung dgrol ba dang rnam pa gsum mo/ /de la ci'i phyir bshad pa ni sangs rgyas bcom ldan 'das mya ngan las 'da' kar 'phags pa dga' bos don rnam pa bzhi zhig dris pa/bcom ldan 'das mya ngan las 'das pa'i 'og tu dge slong rnams ji ltar bcom ldan 'das la gnas 'cha' ba bzhin ma 'ongs pa na su la brten par bgyi/ ci la gnas par bgyi/dge slong ma rungs pa ni ji ltar gdul bar bgyi/ mdo sde thams cad kyi klad la ni tshig ji skad du smos zhes dris pa dang / bcom ldan 'das kyis bka' stsal pa/ mya ngan las 'das pa'i 'og tu so sor thar pa la ston par zung shig /tshul khrims la gnas shing dran pa nye bar gzhag pa bzhi la gnas 'cha' bar gyis shig /dge slong ma rungs pa rnams mi smra bas thul cig /mdo sde thams cad kyi klad la 'di skad bdag gis thos pa zhes bris shig ces gsungs pas de'i phyir 'dir yang 'di skad bdag gis thos pa zhes smos so/ / de skad smos pa de cir dgongs pa bstan pa'i phyir dad pa phun sum tshogs pa bstan te/ gzhung las kyang 'di skad bdag gis thos pa zhes smos pas dad pa skye bar gyur to/ /mngon par dga' zhes smos pas ye shes skye bar 'gyur ro zhes 'byung ste/ dad pas ni 'jug nus par 'gyur/ ye shes kyis ni 'byung nus par 'gyur te/dad pa ni dge ba'i chos thams cad kyi rtsa ba/ ye shes ni zab mo rtogs par 'gyur ba'i mtha'o/ /yang slob dpon gzhan gyis bshad pa las kyang 'di skad ces bya ba don rnam pa bzhi ste/ rnam thos bu bzhin phyug pa'i phyir dpe de kho na bzhin zhes bya ba dang / ji skad du bsgo ba de bzhin nyid du mnyan pa'i phyir de bzhin zhes bya ba dang / ji skad du dris pa de bzhin du lan btab pa'i phyir 'di skad ces bya ba dang / gzhan gyis smras pa de lhag chad med par zlos pa de la yang 'di skad ces bya ste/ mdo sde pa'i byang chub sems dpas sngon bcom ldan 'das kyis ji skad du bshad pa de bzhin du zlos pa'i phyir 'di skad ces bya'o//yang 'dul ba phran tshegs kyi nang nas 'phags pa dga' bo 'khor mang po la chos ston pa na 'khor rnams the tshom du gyur pa/ 'di gsum bsal ba'i phyir dga' bos 'di skad ces smras te/ dga' bo mtshan dang dpe byad du ldan pas chos ston pa la 'khor rnams bcom ldan 'das thugs rje dang ldan pas mya ngan las 'das pa las/slar bzhengs te 'khor rnams la chos ston pa zhig gam phyogs gzhan gyi de bzhin gshegs pa zhig 'dir chos ston cing byon pa zhig gam/ dga' bo 'di nyid mngon par sangs rgyas te chos ston pa zhig gam snyam pa'i the tshom de bsal ba'i phyir dga' bos 'di skad bdag gis thos pa zhes smras so//yang slob dpon gzhan na re dus gsum gyi sangs rgyas bcom ldan 'das lhag chad med par mthun par ston pa'i phyir de bzhin zhes bya'o/ yang na chos rnams kyi de kho na lugs gcig pas ma nyams pa nyid de bzhin zhes bya ba dang /yang na 'phags pa dga' bos bcom ldan 'das la ji skad thos pa de skad du bzlas pa'i phyir 'di skad ces bya'o/ /bdag gis thos pa ni chos 'di lta bu bdag nyid kyis mngon sum du thos kyi/ nyid nas nyid du brgyud de thos pa ma yin pa'i phyir bdag gis thos pa zhes smos so//bdag ces bya ba ni phung po lnga la 'jig rten pa'i tha snyad tsam du btags pa la bdag go zhes gdags kyi/ ji ltar mu stegs can gyis btags pa lta bu ni ma yin gyi/ lha sbyin dang mchod sbyin zhes btags pa la bdag ces gdags pa bzhin no//yang 'dir sus thos pa ming mi smos par spyir bdag gis thos zhes pa ci'i phyir zhes dris pa la/ dga' bos thos pa mang ba thos pa bsags pa/ thos pa rgya mtsho yin pas/ theg pa gsum gyi sde snod kun dga' bos bsdus pa'i phyir ming ma smos so//thos pa ni rna ba'i dbang po dang rnam par shes pa gcig tu bsdus pas thos pa'i nga rgyal skye ba'o/ /thos pa nyi tshe smos kyi mthong ba la sogs pa ma smos pa ni don zab mo rtogs pa la thos pa'i shes rab sngon du 'gro ba dang / khams 'dir sgras sangs rgyas kyi mdzad pa mdzad pa'i phyir thos pa zhes smos so//yang bdag gis thos pa zhes smos pas ji ltar de bzhin gshegs pas bshad pa de kho na bzhin smras te/ bskyed pa dang skur pa'i mtha' bsal ba'i phyir 'di skad bdag gis thos zhes smos so/ /dus gcig na zhes bya ba ni 'dir dus phun sum tshogs pa bstan te/de yang rnam pa gnyis so/ /chos kyi rgyal po thugs rjes 'gro ba'i don mdzad par dgongs pa dang / sems can skal ba can mang po smin pa'i dus dang mnyam pa dang 'chad pa bar chad med par dus gcig tu gyur pa'o/ /yang dus la rnam pa gnyis te/rigs pa'i dus dang / rnam par shes pa tsam gyi dus so/ /de la rigs pa'i dus ni 'chad pa dang nyan pa rnams 'du byed kyi phung po skad cig la skye zhing 'jig pa'i rang bzhin can snga ma ma 'das pa dang / phyi mas ma phul ba'i dus kyi cha ji tsam du rgyun du gnas pa de ltar gyi dus de la dus gcig ces gdags kyi skad cig ma gcig la skye zhing 'jig pa'i dus la mi bya'o//de la rnam par shes pa'i dus ni 'chad pa dang nyan pa rnams kyi yid la dus gsum lta bur snang zhing yun ring thung dang nyin mtshan du snang ba de'i dus te/ ji ltar rmi lam na yun ring du lon kyang sad na de lta ma yin pa bzhin no//yang dus gcig ces smos pa yang skad cig ma'i dus dang / dus bzhi dang drug dang brgyad la mi bya'i/ nam thugs rjes phan 'dogs pa dang / dbang po smin pa dus gcig tu gyur pa de la dus shes pa'o / / bcom ldan 'das zhes smos pa ni ston pa phun sum tshogs pa ste/ dbang phun sum tshogs pa la sogs pa'i yon tan drug dang ldan pa ni bcom ldan 'das zhes bya'o/ /rgyal po'i khab bya rgod phung po'i ri la bzhugs zhes pa ni gnas phun sum tshogs pa bstan te/ der gnas pa dang bzhugs pa dang bzhengs zhes pa'i don te/'phags pa dang lha dang tshangs pa'i bzhugs sa las khyad par du bstan pa'i phyir/ bcom ldan 'das der bzhugs zhes smos so/ /rgyal po'i khab ces smos pa ni sngon rgyal po gsal rgyal gyi pho brang 'bangs mang po dang 'dab chags su 'dug pa la rtag tu me shor bas bsnyengs te/rgyal khrims su bcas pas da slan chad su'i khyim na me shor ba de dur khrod gdon gyi gnas su gcig pur spyugs par byas pa las/ dang po rgyal po'i khab me shor bas rgyal po nyid dur khrod der 'phos te/ pho brang btab nas 'bangs der 'phos pa rnams kyang 'dre gdon gyis mi gtse ba'i phyir sgo sgo la rgyal po'i khab ces bris pas/de'i phyir yul 'khor de rgyal po'i khab tu chags so/ /rgyal po'i khab dang bya rgod phung po'i ri gnyi ga smos pa ni khyim na gnas pa dang rab tu byung ba gnyi ga la phan gdags pa'i phyir gnyi ga smos so/ /rgyal po'i khab de rin po che thams cad kyi 'byung khungs gnas gzhan thams cad las 'phags pa bzhin dam pa'i chos 'di der bshad pa yang mdo sde gzhan thams cad las khyad par du bstan pa dang /bya rgod phung po'i ri de yang ri gzhan thams cad las 'phags pa bzhin theg pa gcig pa'i theg pa 'di yang theg pa gnyis las khyad par du 'phags pa'i phyir gnas der bshad do//mdo las dge slong gi dge 'dun chen po dge slong stong phrag bcu gnyis zhes 'byung ba 'di ni 'khor phun sum tshogs pa'o/ /'khor phun sum tshogs pa de yang rnam pa lnga ste/ de'i gtan tshigs bstan pa dang / bkri ba dang nges pa'i don rnams gleng ba dang /grangs mang nyung gtan la dbab pa dang / 'khor rnams kyi rim pa bstan pa dang / 'grel pa'i don bstan pa'o/ /gtan tshigs bstan pa la yang rim pa lnga ste/ dad pa dang yid ches pa'i gtan tshigs su dga' bo 'dis rang bzor smras pa ni ma yin pa dang / gzhan las brgyud de smras pa ma yin pa dang /gzhan gyi tshig zlos pa ma yin par bstan pa'i phyir lhan cig tu thos pa yang mang du yod par bstan pas gzhan dag yid ches par 'gyur ba'i gtan tshigs dang gnyis su phye ba phun sum tshogs pa bstan pas gzhan yid ches par 'gyur ba'i gtan tshigs ste/lha'i rgyal po brgya byin dang / tshangs pa'i 'khor gyis bskor ba smos pa dang / yang shA ri'i bu dang 'jam dpal gzhon nur gyur pa dang / byams pa dang byang chub sems dpa' bkri ba dang nges pa'i don lan gnyis lan gsum du gsol te/ rgyu dang 'bras bu dang bslab pa'i mdo bstan pas 'khor rnams la phan pa dang bde bas yid ches par 'gyur ba dang /yang so so'i dbang po las theg pa gcig pa'i gzhung 'di lan gsum bzlas te bshad pa theg pa chen por sems skye ba dang mi skye ba'i chos la bzod pa thob pa la sogs pa dbang po gsum po rnams la chos 'di bstan pa dang /yang sngon gyi dus na byung ba bstan pas da ltar gyi sems can rnams dad pa bskyed pa ste/ de lta bu'i 'phags pa ste dam pa rnams dang thabs cig pa la zhes dad pa skye bar 'gyur ro/ /de la bkri ba dang nges pa'i don bstan pa ni ji ltar bcom ldan 'das sprul pa bzhugs pa'i zhing nyan thos rnams la nges pa'i don ston/byang chub sems dpa' rnams la bkri ba'i don ston/ rdzogs longs spyod pa'i sku ni byang chub sems dpa' la ni nges pa'i don ston/ nyan thos pa rnams la ni bkri ba'i don ston/ 'di ni bkri ba dang nges pa'i don gnyi ga ston pa'i sa bstan to//de la grangs mang nyung bstan pa yang sngar 'khor bco lnga ste/ yon tan che la ming yod pa rnams dang / yon tan che la ming med pa rnams dang / dge 'dun ma yon tan che ba rnams dang / dge 'dun ma nye ba'i 'khor rnams dang / yon tan 'phags pa bsam gyis mi khyab pa rnams dang /brgya byin lha'i dbang po rnams dang / rgyal chen bzhi'i lha rnams dang / dbang phyug lha'i bu rnams dang / gzugs kyi khams kyi lha'i bu rnams dang / klu'i rgyal po rnams dang / mi'am ci rnams dang / dri za rnams dang / lha ma yin rnams dang / nam mkha' lding rnams dang /mi'i rgyal po rnams so/ /yang 'khor rnam pa drug ste/ bcom ldan 'das rin chen mang gi 'khor dang / skus sprul pa'i 'khor dang / klu'i pho brang nas lhags pa dang / sa'i rum nas 'thon pa'i 'khor dang / byang chub sems dpa' sang sang po'i dbyangs dang /kun tu bzang po'i 'khor ro/ /'khor de dag kyang chos nyan pa dang / chos rtogs pa dang / chos spyod pa dang / chos 'dzin pa dang / chos 'chad pa dang / chos rig pa'i bye brag gis tha dad pa sha stag go/ /'khor 'dir rang sangs rgyas kyi 'khor ma smos pa ni rang sangs rgyas sangs rgyas 'jig rten na mi bzhugs pa'i tshe 'byung ba'i phyir ro//gzugs med pa'i khams kyi lha rnams kyang de bzhin gshegs pa'i 'od kyis reg pa rnams chos nyan cing 'khor du 'du ba yin na/ khams de dbang po ma smin pas 'od kyis snang bar mi mdzad de/ de nas 'dir ma smos so//sems can dmyal ba 'dir ma smos pa ni skal ba dang mi ldan pa'i phyir 'dir ma smos so/ /de bzhin gshegs pa'i byin gyi rlabs kyis gzungs kyi sgo 'chad pa'i tshe ngan song zhi bar mdzad pa'i phyir de dag tu smos pa yang yod do/ /'khor gong du ma smos pa rnams kyang 'og nas bstan pa yin no//'khor de dag gi rim pa ni spyir rnam pa bzhi ste/ nyan thos pa'i 'khor dang / byang chub sems dpa'i 'khor dang rgyal po dang rgyal po rnams kyi 'khor ro/ /de yang phyi nang du dbye na nyan thos dang byang chub sems dpa'i 'khor ni nang gi 'khor ro/ /lha ma srin 'khor brgyad po ni phyi'i 'khor ro/ / byang chub sems dpa'i nyan thos pa'i 'khor sngar smos pa ni rnam pa bzhi'i phyir te/ nyan thos pa rab tu byung bas de bzhin gshegs pa'i cha lugs dang mthun pa'i phyir nyan thos pa sngar smos pa dang / nyan thos pa rtag tu zhabs 'bring na mchis shing gnas te/ ring du ma gyur pa'i phyir sngar smos pa dang /rab tu byung ba tshul khrims bsrung ba'i sgo nas sngar smos pa dang / khyim pas rab tu byung ba la gus pa bstan pa'i phyir sngar smos so/ /yang 'khor phun sum tshogs pa la rnam pa bzhi ste/ grangs phun sum tshogs pa dang / sgrub pa phun sum tshogs pa dang / yon tan phun sum tshogs pa dang /spyod lam phun sum tshogs pa'o/ /grangs phun sum tshogs pa ni 'khor grangs med pa zhes smos pa'o/ /sgrub pa phun sum tshogs pa ni nyan thos pa rnams theg pa chung ngu sgrub pa dang / byang chub sems dpa' rnams ni theg pa chen po sgrub cing / gzhan gyi don byed pa'o/ /yon tan phun sum tshogs pa ni nyan thos pa rnams tshig gi don rnam pa bcu drug tu bstan pa dang /byang chub sems dpa' rnams tshig gi don rnam pa bcu gsum gyis ston pa'o/ /spyod lam phun sum tshogs pa ni bcom ldan 'das 'khor rnams kyis bskor te gus pa ri mo byed pa'i tshul gyis mdzes par gnas pa rnams so//de la dge slong zhes bya ba'i don rnam pa gsum ste/ bdud dang mu stegs 'jig par byed pa dang / slong ba dang tshul khrims bsrung bas dge 'dun gyi grangs su 'gro ba dang / 'tsho ba gtsang mas 'tsho zhing sgo gsum dag par gnas pa'o/ /dge 'dun gyi dge slong bzhi yan chad de mang ba mthun pa rigs dang gzhung ma 'dres pa'i don to//chen po ni chos dang grangs la sogs pa'i chen po rnams dang ldan pa dang / slob pa dang mi slob pa las 'phags pa'i phyir khyad par che ba dang / shes rab dang ye shes mthong ba'i phyir yon tan che ba dang /stong phrag bcu gnyis snyed bzhugs pa'i phyir grangs mang bas che ba'o/ /thabs cig ni gnas pa gcig pa'i tha tshig go/ /thams cad kyang dgra bcom pa sha stag go zhes bya ba nas/ dbang du gyur pa sha stag gi bar smos pa ni yon tan phun sum tshogs pa ste/ mdo sde las tshig gi don rnam pa bcu drug smos pa'o//de yang mdor rnam pa gsum du bsdu na/ tshig gong ma 'og mas bshad pa'i mdo dang / spyi dang dbye ba'i mtshan nyid bstan pa dang / don gyi mdo bsdu ba dang gsum mo/ /tshig gong mas 'og ma ston pa ni tshig gong mas tshig 'og ma bskyed pa dang / yang na tshig 'og ma gong mas bkrol ba ni zag pa zad pa nyid dgra bcom pa zhes bstan pa dang /nyon mongs pa thams cad zad pa nyid ni dgra bcom pa zhes bshad pa lta bu'o/ /zag pa zad pa zhes pa ni nyon mongs pa mngon du rgyu bas srid pa rnams su zag par byed pa'i phyir zag pa zhes bya'o/ /mngon du rgyu ba dang bag chags kyi tshul du gnas pa de gnyi ga yang spyir zag pa zhes bya ste/de yang 'dod pa'i zag pa dang / srid pa'i zag pa dang / ma rig pa'i zag pa dang gsum mo/ /bden pa bzhi mthong ba dang bsgom pas spang bar bya ba'i nyon mongs pa dang / bag la nyal ba rnams ni 'dod pa'i zag pa'o//gzugs dang gzugs med pa'i khams na khro ba bton pa'i nyon mongs pa lhag ma ni sred pa'i zag pa'o/ /khams gsum gyi ma rig pa bco lnga ni ma rig pa'i zag pa'o/ /de la 'dod pa'i khams kyi nyon mongs pa yang 'dod pas gzhi byas pa'i phyir 'dod pa'i zag pa'o/ /gzugs dang gzugs med pa'i khams na nyon mongs pa gzhan gyis mi skyed kyi srid par sbyor ba nyid nyon mongs pa yin pas srid pa'i zag pa'o//ma rig pa yang dngos su ma rig pa nyid kyis zag par byed pa'i phyir ma rig pa'i zag pa'o/ /tshig bzhi pas tshig gnyis pa dgrol ba ni dbang du gyur pas zag pa zad ces bya'o//tshig gnyis pa dang gsum pas bzhi pa dgrol ba ni zag pa zad pa dang nyon mongs pa med par gyur pas dbang yang dag pa thob ces bya ba'o/ /nyon mongs pa mngon du rgyu dang bag chags su gnas pa spangs pas dbang thob pa zhes bya'o / /tshig drug pas tshig bzhi pa dgrol ba ni shes rab dang sems shin tu rnam par grol bas dbang rab tu thob pa ste/ting nge 'dzin gyi sgrib pa spangs pas sems rnam par grol ba dang / rang bzhin sgrib pa spangs pas shes rab rnam par grol ba'o/ /ma rig pa dang sred pa la sogs pa spangs pas shes rab rnam par grol ba dang /de dang sbyor ba'i sems gnas 'phos pas sems rnam par grol ba dang / de gnyi ga'i skyon dang bral te 'dus ma byas nyid rtogs pa'i phyir dbang du gyur pa zhes bya'o/ /de dag gi 'ching ba mngon du rgyu dang bag chags kyi tshul du gnas pa yang spangs pa'i phyir nyon mongs pa med pa zhes bya'o//sems dang shes rab shin tu rnam par grol ba'i phyir rta cang shes bzhin du zhi zhing dul ba dang / glang po chen po zhes bya ba ni ji ltar mi bde ba'i gnas thams cad du song yang lam bde ba/ ma nyams pa la 'gro ba bzhin gang bgrod pa'i gnas su son pa dang thogs pa med par gyur pa ste/de'i phyir bya ba byas pa byed pa byas pa'o/ /bya ba byas pa byed pa byas pa'i phyir khur bor ba ste/ lam dang 'gog pa'i bden pa mngon du gyur pas srid pa phyi ma mi len zhes pa'i don to/ /srid par sbyor ba'i khur lci ba bor bas rang gi don thob pa yin te mya ngan las 'das pa'i bde ba thob ces pa'i don to//rang gi don bde ba thob pa yang nyon mongs pa'i rgyu spangs pas srid par sbyor ba thams cad yang mi len te/ khams gsum du mi skye zhes pa'i don to/ /zag pa zad pa nyid bka' yang dag pas sems shin tu rnam par grol ba ste/sems shin tu rnam par grol ba ni mthong bas spang ba yang bsgom pas spang ba'i nyon mongs pa thams cad bsal te sems kyi dbang thob pa dang / yon tan gyi mthar thug pas rdzu 'phrul dang mngon par shes pa la sogs pa rdzogs par gyur pa'o/ /dbye ba gnyis pa ste/spyi dang dbye ba bstan pa'i sgo ste kun kyang dgra bcom pa she dag go zhes bya ba ni spyi'i mtshan nyid do/ /tshig gi don bco lnga po gzhan ni dbye ba'i mtshan nyid do/ /dgra bcom pa'i don ni 'os pa'i don rnam pa bco lnga ste/ de la zag pa zad pa'i phyir zhal zas dang khri stan la sogs pa thams cad kyis mchod par 'os pas mchod pa'i zhing du mdzes pa'o//nyon mongs pa thams cad dang bral ba'i phyir ston pa la dbang du gyur pa ste/ khe dang grags pa tshol ba dang bral ba'i phyir ro/ /'jug par yang 'os pa ste/ grong dang grong khyer du 'jug na sems kyi dbang du gyur pas 'dod pa'i yul gyis mi bslu ba'i phyir ro//bdud dang mu stegs 'dul bar 'os pa ste/ sems shin tu rnam par grol ba'i ye shes kyi spobs pa dang ldan pa'i phyir ro/ /chos rnams la shes rab myur bar 'os pa ste/ shes rab shin tu rnam par grol ba'i phyir chos rnams kyi mtshan nyid la mkhas pa'o//chos 'chad pa la ha cang myur ba dang bul ba'i skyon dang bral bar 'os pa ste/ chos 'chad pa la mkhas pa 'brel pa skyo ba dang bral ba ji ltar rta cang shes bzhin sems shin tu dul ba'i phyir ro/ /gcig pu dben par 'os pa ste/ zas dang gos la sogs pa yo byad thams cad mi sog mi sdud pas chog shes par gnas pa ni ji ltar glang po che 'du 'dzi dang bral ba bzhin no//gcig tu na bsam gtan rnams la ma chags pa ste/ bya ba byas pas rtag tu bla ma'i sa la brtson pa'i phyir ro/ /rtag tu stong pa nyid kyi spyod pa'i phyir byed pa byas pas bdag dang bdag gir 'dzin pa dang bral ba'i phyir ro//rtag tu mtshan ma med pa'i spyod pa dang ldan pas khur lci ba bor ba'i phyir 'gog pa nyid la gnas pa'o/ /rtag tu smon pa med pa'i spyod pa dang ldan pas/ rang gi don bde ba thob pa'i phyir 'khor ba la smon pa med par gnas pa'o/ /'jig rten rnams kyi bsam gtan dga' ba'i ro la chags pa med pa'i phyir srid par sbyor ba yongs su spangs pa'o //chos rnams kyi yon tan khyad par can la/ rdzu 'phrul gyis rol pa'i phyir bka' yang dag pas sems shin tu rnam par grol ba'o/ /don dam pa nyid kyi yon tan la bde bar gnas pa ste/ sems kyi dbang po thob pas 'dus ma byas la reg pa'i phyir sems kyi dbang thob pa'o//yang dag pa ji lta ba bzhin du shes pa'i phyir sems can thams cad la phan pa'i yon tan thob par byed pa'i phyir ro/ /bsdu ba'i don ni gong du smos pa'i tshig bco lnga po yon tan bcur bsdu bar bya ste/ bstan du yod pa'i 'bras bu dang /bstan du med pa'i 'bras bu ste/ dgra bcom pa'i 'bras bu la 'dus byas ni bstan du yod pa 'dus ma byas ni bstan du med pa'i 'bras bu'o/ /yon tan rnam pa bcu la zag pa zad pa dang nyon mongs pa med pa ni 'ching ba dang bag la nyal ba gnyis spangs pa'i phyir ro/ /dbang du gyur pa dang / sems dang shes rab rnam par grol ba ni sems dbang du gyur pas 'jig rten gyi yon tan thams cad zil gyis mnan te/ 'khrug pa sna tshogs zhi ba'i phyir ro/ /de bzhin gshegs pa'i bstan pa'i rjes su zhugs pa'i phyir/ rta cang shes lta bu zhi zhing dul ba yid bzhin du dbang du gyur pa'o//yon tan khyad par can thob pa ni glang po che ltar gzi brjid che bas mthu dang rdzu 'phrul phun sum tshogs pa'o/ /bya ba byas pa yon tan khyad par can ni bcom ldan 'das la rim gro dang bsti stang byed pa ni yang dag pa'i chos kyi rim gro byed pa yin gyi nor rdzas kyis ni ma yin no/ /yon tan phun sum tshogs pa ni byed pa byas pa rdzogs pa ste/slob pa'i sa rnams rdzogs pas 'gog pa'i bden pa'i mthar phyin pa'i phyir ro/ /shin tu 'das par gyur pa'i yon tan ni khur bor ba rang gi don thob pa srid pa'i sbyor ba yongs su zad pa ste/ shi 'pho'i khur lci ba bor ba dang / log pa'i 'tsho ba spangs pas khe dang grags pa mi tshol ba dang /srid pa'i mdud pa gcod pa slob pa'i sa las 'das pa'i phyir ro/ /yon tan bla ma'i yang bla ma sdud pa ni yang dag pa'i ye shes kyi sems rnam par grol bas 'dus ma byas kyi 'bras bu la reg pa'i phyir ro/ /sems can la phan 'dogs pa'i yon tan sdud pa ni sems kyi dbang dam pa thob pa'i phyir rdzu 'phrul dang mngon par shes pa thob pa'i phyir ro//bla ma'i yang bla ma'i yon tan sdud pa'i yon tan thams cad kyi mthar phyin pa ste/ pha rol tu phyin pa rdzogs pa'i phyir ro/ /yang mdo las 'di lta bu zhes bya ba nas chu bo 'od srungs kyi bar du ste/ 'di man chad nyan thos chen po rnams kyi mtshan bshad pa la rnam pa gnyis te/sngar so so'i mtshan smos pa dang / yon tan bsdu ba'o/ /nyan thos de dag gi rim pa ni la la rab tu byung ba snga phyi las bkod pa dang / la la yon tan che bas sngar bzhag pa yang yod de/ de dag kyang bcom ldan 'das dang po mngon par rdzogs par sangs rgyas pa'i tshe nyan thos chen po lnga rab tu byung ngo //de'i 'og tu grags 'dzin gyi 'khor lnga bcu rab tu byung ngo / /de'i 'og tu lteng rgyas 'od srungs kyi 'khor lnga brgya dang / ga ya 'od srungs kyi 'khor sum brgya dang / chu bo 'od srungs kyi 'khor nyis brgya dang /shA ri'i bu'i 'khor brgya dang / maud gal gyi bu'i 'khor brgya rab tu byung ba dang / spyir stong nyis brgya lnga bcu rab tu byung ngo / /nyan thos chen po lnga yang dang po bcom ldan 'das mngon par byang chub nas chos kyi 'khor lo bskor ba'i tshe dang por cang shes kauN+Di n+yas bden pa dang por rtogs te ngas kun shes so zhes smras pa las rus kauN+Di n+ya kun shes su btags so//'od srungs chen po ni dang po drang srong 'od can gyi rigs te 'od srungs 'di nyid dang po btsas pa'i tshe yang 'od byung ba'i phyir 'od srungs zhes btags te 'od srungs gzhan las dkar ba'i phyir 'od srungs chen po zhes btags so//lteng rgyas 'od srungs dang gzhan ni chu dang ri dang shing gi 'bras bu las btags te ming tsam du zad do/ /mdo las shA ri'i bu nas ka pi na'i bar du ste so so'i ming bshad pa ni/ shA ri'i bu ni ma bya sha ri ka'i mig dang 'dra bar mig mdzes pa'i bu yin pas shA ri'i bu zhes btags so/ / maud gal chen po ni sngon drang srong nyid ri la gnas shing sran ma rmed pa las rus su chags te/ maud gal gyi ma de'i rgyud yin pas na maud gal zhes btags so / /rdzu 'phrul che ba'i phyir maud gal zhes btags so/ /kA t+yA ya na chen po ni sngon drang srong zhig tu skra bregs pa las rus su song ste / de'i rgyu las rus las ming du btags pa'o/ /'di man chad nyan thos kyi rnams la la ni skar ma las btags/ la la ni sngon gyi bram ze'i rus las btags/ la la ni dbyibs 'dra ba las btags te/ spyir ming tsam du zad do/ /mdo las slob pa dang mi slob pa zhes bya ba ni tshul khrims dang //ting nge 'dzin dang / /shes rab ni bslab par bya ba dang / /de gsum la gnas pa ni slob pa'o/ /de gsum rdzogs par gyur pa ni mi slob pa'o/ /mdo las byang chub sems dpa' sems dpa' chen po stong phrag brgyad cu zhes smos pa lnga pa ste/ /'phags pa'i yon tan bsam gyis mi khyab pa bstan pa de yang rnam pa gsum du dbye'o//de'i grangs dang de'i yon tan dang / /de dag gi mtshan so sor dbye ba'o/ /de la byang chub sems dpa' sems dpa' chen po zhes smos pa don rnam pa gnyis te/ ye shes chen po gtsor byas pas bdag gi don bstan pa dang thugs rje chen po gtsor byas pas gzhan gyi don bstan pa'o//byang chub ni rtogs pa'i don te bsgrub par bya ba'i 'bras bu'o/ /sems dpa' ni thugs rjes sems can sgrol ba la dpa' ba'o/ /yang na byang chub gsum pos bsgrub pa la yul dang dus kyis spa bkong ba med par brtson pa'i phyir byang chub sems dpa'o//yang na byang chub ni shes rab bo/ /sems dpa' ni thabs te/ chos de nyid kyis sems can rnams la phan pa dang bde ba stobs pa'i phyir ro/ /chen po ni sa brgyad pa yan chad chen po zhes bya ste/ byang chub sems dpa' gzhan dang theg pa gnyis pa dag dgar pa'i phyir chen po zhes smos so//mdo las bla na med pa yang dag pa'i byang chub phyir mi ldog pa she dag ces 'byung ba ni / man chad tshig bcu gsum gyis 'phags pa'i yon tan bstan te / de yang rnam pa gnyis su dbye'o/ /bla 'og gi yan lag tu dbye ba dang bsdus pa'i don bstan pa'o/ /yan lag ni cha ste cha snga mas ni spyi'i mtshan nyid bstan pa'o//cha 'og mas ni so so'i mtshan nyid bstan to/ /bla na med pa yang dag par rdzogs pa'i byang chub las phyir mi ldog pa she dag ces smos pa ni de spyi'i mtshan nyid/ /gzhan ni so so'i mtshan nyid do bla na med pa yang dag par rdzogs pa zhes pa ni chud pa rtogs pa'i don rnam pa bzhi'o//chos kyi dbyings rnam par dag pa rtogs pa nyid bla na med pa'i rtogs pa dang / phyi rol mu stegs can gyi rtogs pa las khyad par du bstan pa'i phyir yang dag pa'i rtogs pa dang / theg pa rnam gnyis kyi rtogs pa las khyad par du bstan pa'i phyir rdzogs par rtogs pa dang / byang chub sems dpa' yang spyod pa ma rdzogs pa dag la khyad par du bstan pa'i phyir yang dag par rdzogs pa'i byang chub ces bstan to/ /phyir mi ldog pa'ang mos pa phyir mi ldog pa dang / gral phyir mi ldog pa dang / chud pa phyir mi ldog pa dang / spyod pa phyir mi ldog pa'o//yang phyir mi ldog pa rnam pa gnyis te/ thos zin pa phyir mi ldog pa dang / thob par 'gyur ba phyir mi ldog pa'o/ /thob pa ni sa dang po pa'o/ /thob par 'gyur ba ni sa brgyad pa yan chad do/ /yang mdo las gzungs thob pa she dag ces pa nas phyir mi ldog pa'i chos kyi 'khor lo bskor ba she dag ces bya ba'i bar du ni 'di man chad tshig bcu gnyis kyis dbye ba'i cha bstan te/de la dbye ba rnam pa bcu ste/ tshig dang po dgus ni rang gi don bstan/ 'og ma gcig gis ni gzhan gyi don bstan/ dang po dgu la yang rnam pa gnyis te/ dang po brgyad kyis ni 'dus byas kyi yon tan bstan/'og ma gcig gis ni 'dus ma byas kyi yon tan bstan/ dang po la'ang rnam pa gnyis te/ dang po lngas ni bsod nams dang ye shes kyi tshogs bstan/ phyi ma gsum gyis ni thugs rje dang ye shes bstan to/ /dang po lnga la yang gnyis su dbye ste/ dang po gsum gyis ni nang gi spyod pa bstan/de'i 'og ma gnyis kyis ni dge ba la dmigs pa bstan to/ /dang po la yang rnam pa gsum ste/ bdag gi don bsgrub pa dang / gzhan gyi don bsgrub pa dang / dge ba'i chos la dmigs pa'i phan pa'o/ /dmigs pa yang rnam pa gnyis te/ spyod pa bsgrub pa la dmigs pa dang /the tsom bcad pa'o/ /thugs rje dang ye shes bshad pa yang sngar ni byams pa dang snying rje bstan/ de'i 'og tu ni shes rab dang ye shes bstan to/ /de yang rnam pa gsum mo/ /chos thos pa rnams las phyir mi ldog pa ni de kun kyang gzungs thob pa she dag gi phyir ro//gzungs ni 'dzin pa'i phyir gzungs te/ de yang rnam pa gnyis so / /bsdus pa 'dzin pa dang / spros pa 'dzin pa'o/ /yang 'dzin pa ni tshig dang don 'dzin pas chos thos pa rnams mi brjed par 'dzin pa'i phyir bsdus pa 'dzin pa'o/ /byang chub sems dpa' sa brgyad pa yan chad kyi chos thams cad la bzod par nus pa/sems par nus pa 'dzin par nus pa ste/ bzod pa ni thos pa'i shes rab/ sems ni bsam pa'i shes rab/ 'dzin pa ni bsgom pa'i shes rab po/ /de la yang spros pa 'dzin pa ni rnam pa bzhi ste/ chos spros pa 'dzin pa dang /don spros pa 'dzin pa dang / chos dga' ba bzod pa dang / rig sngags kyi gzungs rnams so/ /de yang rnam pa gnyis te/ dang po ni sgrub pa'o / /gsum pa ni bsgrub par bya ba'o/ /thos pa la sogs pa ni bdag gi don to/ /chos dang don la sogs pa ni gzhan gyi don te/ de yang rgyu dang 'bras bu'i tshul du dbye'o/ /chos ston pa la phyir mi ldog pa ni spobs pa chen po bzhi dang / bdun du ldan pa'i phyir dang / sa rnam pa gnyis la phyir mi ldog pa'i phyir ro/ /'khor lo yang rnam pa gsum ste/ 'phags pa'i lam yan lag brgyad la lte ba dang mu khyud la sogs pa tshang pa'i phyir yongs su rdzogs pa'i don dang 'gyur zhing 'pho ba'i don te/mthong ba'i lam gyis bsgom pa'i lam bskyod pa dang / bsgoms pas mi ldog pa'i lam la gnas te/ 'phags par gyur pa dang / bdag nyid 'phags pas don gzhan la ston pa bzhin gcig nas gcig tu brgyud cing 'pho ba'i don dang /ji ltar 'khor lo'i 'khrul bas gcog cing gnon pa bzhin 'phags pa'i lam la gnas pa'i sems kyi nyon mongs pa 'joms pa zhes bya ba'i don dang gsum mo/ /yang 'khor lo 'di'i don rnam pa lnga ste/chos rnam par 'byed pa'i yan lag dang yang dag pa'i lta ba la sogs pa 'khor lo'i rang bzhin du gnas pa dang / thos pa dang bsam pa la sogs pa 'phags pa'i lam bskyed pa rnams 'khor lo'i rgyu lta bur gnas pa dang / rnam par grol ba'i phung po lnga la sogs pa 'phags pa'i lam la stong pa 'khor lo'i yan lag tu gnas pa dang /'phags pa'i bden pa bzhi la sogs pa 'khor lo'i spyod yul du gnas pa dang / mya ngan las 'das pa dang / byang chub mngon du gyur pa rnams 'khor lo'i 'bras bur gnas pa ste/ chos de lnga yang lung dang gzhung dang spyod pa dang 'bras bur blta'o//mdo las/ sangs rgyas brgya stong mang po la bsnyen bkur byas pa dang sangs rgyas brgya stong mang pos yang dag par bstod pa'i bar du ste/ de la 'di ni dge ba'i bshes gnyen la brten pa'i phyir mi ldog pa yin te/ sangs rgyas brgya stong mang po la bsnyen bkur byed pa/ sangs rgyas brgya stong mang po la dge ba'i rtsa ba bskyed pa/ sangs rgyas brgya stong mang pos yang dag par bstod pa ni/ rang gi lus dang sems shin tu bsdus pas dge ba'i las thams cad kyis mchod cing rim gro byed pa'o/ /de rim gro byed pa yang rnam pa bcur dbye ste/de bzhin gshegs pa'i ring bsrel dang mchod rten mngon du bzhugs pa la mchod cing rim gro byed pa dang / yang na de bzhin gshegs pa gzhan gyi ring bsrel dang mchod rten mngon du byas te/ mchod cing rim gro byed pa'o/ /yang de bzhin gshegs pa gcig gi mchod rten la phyogs bcu dus gsum gyi de bzhin gshegs pa'i mchod rten du bsams te mchod cing rim gro byas na thams cad la rim gro dang mchod pa byas pa yin pa dang /de lta bu'i mtshan nyid du bdag nyid mchod par byed pa dang / yang snying rje'i sems kyis dbul phongs pa rnams la nyams kyis ci nus su sbyin par byas te/thams cad bde bar gyur cig ces spyod pa de gzhan la'ang bstabs shing mchod pa byed pa dang / bdag ji ltar mchod pa dang / rim gro byed pa bzhin gzhan yang byed du 'jug pa dang / spos dang me tog dang rin po che la sogs pa gus par 'bul bas mchod cing rim gro byed pa dang /rgya chen po'i rim gro dang mchod pa byed pa ni yun ring por mchod pa dang rim gro byed pa ste/ rnam par dag pa'i sems kyis byang chub chen por bsngos nas rang gi lus brgya stong du mas de bzhin gshegs pa grangs med pa la spos dang me tog tshad med pas mchod cing rim gro byas te/tshig snyan pa dang yid du 'ong ba grangs med pa phyogs bcur khyab par byas te mchod cing rim gro byed pa dang / yang nga rgyal dang dregs pa spangs te mchod pa rnam par dag pas rim gro byed pa dang / yang dag pa'i spyod pas mchod pa dang rim gro byed pa ni tshad med pa bzhi mngon du bsgoms te su ci 'dod pa rnams la de bzhin du ster ba dang /skad cig tsam yang yang dag pa nyid du bzod pa dang dad pa la gnas pa las mi g.yo bar mtshan ma med pa'i sems kyis byang chub sems dpa'i sdom pa mi gtong ba bsdu ba rnam pa bzhi'i spyod pa dam pas mchod cing rim gro byed pa ni snga ma'i mchod pa bskrun cing dper yang mi bzod do//bzang ba phul du gyur pa'i rim gro ste/ bsod nams dang yon tan tshad med pa'i phyir chos dang dge 'dun la yang de bzhin du mchod do/ /mdo las lus dang sems byams pas yongs su bsgoms pa nas pha rol tu phyin pa'i tshul rtogs pa dag ces pa ni chos de dang de dag la 'jug pa ni byams pa dang snying rje/lus dang sems bsgoms pa'i phyir gzhan la phan 'dogs pa ste sdug bsngal gyi gnas nas 'don pa dang / bde ba'i gnas la 'jig pa'o/ /yang dag pa'i dbyings nyid las ye shes phyir mi ldog par 'jug pa dang /bdag tu lta ba gnyis dang bral ba'i ye shes kyis shes rab chen po rtogs pa dang / de bzhin nyid kyi dbyings las phyir mi ldog pa'i phyir pha rol tu phyin pa'i tshul rtogs pa'o/ /mdo las 'jig rten gyi khams brgya stong mang por rnam par grags pa dag srog chags bye ba khrag khrig brgya stong mang po kun nas sgrol ba dag ces 'byung ba ni bya ba byas pas chos la gnas pa'i phyir mi ldog pa ste/de bzhin gshegs pa'i bstan pa 'dzin pas phyogs su rnam par grags shing / sems can brgya stong mang po sgrol bar byed pa'o//yon tan gyi khyad par bsdu ba ni ci la gnas pa dang / sems gang la gnas pa dang ye shes gang la gnas pa dang / spyod yul gang la gnas pa dang / spobs pa ci la gnas pa shes pa ni de bzhin gshegs pa brgya stong grangs med pa la mchod cing rim gro byed pas dge ba'i rtsa ba bskyed pa dang /dge ba'i bshes gnyen la gnas pa'o/ /sems ji lta bu la brten pa ni byams pa dang snying rje'i sems bsgom pa la gnas te mtha' yas pa'i sems can thams cad sgrol zhing phan 'dogs par sems pa'o/ /ye shes ji lta bu la gnas she na/ de bzhin gshegs pa'i ye shes la 'dzud pa/shes rab chen pos shes rab kyi pha rol tu phyin pa'i tshul rtogs pa ste/ ye shes kyang rnam pa gsum ste/ ye shes zab mo rnam par phye bas sems can rnams de bzhin gshegs pa'i ye shes la 'dzud pa dang / mngon par shes pa'i ye shes te/mthu dang rdzu 'phrul chen pos 'gro ba 'dren pas phan 'dogs pa'i ye shes so/ /shes rab chen pos yang dag pa'i mtha' rtogs pa'i ye shes ni shes rab kyi pha rol tu phyin pa'i tshul rtogs pa'i ye shes so/ /spyod yul ji lta bu la gnas she na/ 'jig rten gyi khams brgya stong mang por rnam par grags pa ste/snod dang sems can gyi 'jig rten ni byang chub sems dpa' rnams kyi sgrub pa'i spyod yul lo/ /spobs pa ci la gnas she na/ srog chags bye ba khrag khrig brgya stong mang po kun nas sgrol ba dag ste/ byang chub sems dpa' ye shes rnam pa gsum gyis sems can mang po sgrol zhing phan 'dogs pa'o//mdo las 'di lta ste 'jam dpal gzhon nur gyur pa byang chub sems dpa' sems dpa' chen po dang / spyan ras gzigs dbang phyug byang chub sems dpa' sems dpa' chen po dang / mthu chen thob pa byang chub sems dpa' sems dpa' chen po zhes pa ni 'di man chad byang chub sems dpa' rnams kyi mtshan so sor dbye ba la spyi'i mtshan dang so so'i mtshan no//byang chub sems dpa' 'di dag kun kyang sngon gyi smon lam dang spyod pa las mtshan btags pa ste/ dum bu bdun du phye ste bshad par bya'o//dang po'i byang chub sems dpa' 'di gsum ni sems can rnams sdug bsngal las 'don pa dang bde ba la 'jog pa'i mthu can te/ 'jam dpal gzhon nur gyur pa ni byang phyogs kyi de bzhin gshegs pa rin chen brtsegs pa ste/ de'i mtshan thos pa tsam gyis sdig pa thams cad byang bar 'gyur te/sangs rgyas phal po che'i mdo las kyang shar phyogs kyi spang ri rtse lnga la gnas shing byang chub sems dpa' khri dang lhan cig tu bzhugs par 'byung ngo / /byang chub sems dpa' spyan ras gzigs ni gzigs pa la mnga' brnyes pa ste/sems can la gzigs shing sdug bsngal gyis nas 'don pa la mnga' brnyes pa'o/ /lung bstan pa'i mdo las de bzhin gshegs pa snang ba mtha' yas mya ngan las 'das pa'i 'og tu 'phags pa spyan ras gzigs lung bstan/ de'i 'og tu 'phags pa mthu chen thob lung bstan te/byang chub sems dpa' mthu chen thob gang du byon pa'i 'jig rten gyi khams de g.yo ba la sogs te mthu chen po ston cing sems can gyi sdug bsngal zhi bar mdzad pa'i phyir mthu chen po thob pa zhes bya'o/ /mdo las rtag tu brtson pa byang chub sems dpa' dang / mi gtong brtson ba'i byang chub sems dpa' ni bdag gi don spyod pa dang /gzhan gyi don la brtson pa ste rim pa bzhin no/ /lag na rin chen dang rab tu sbyin pa'i byang chub sems dpa' dag ni sems can dbul ba dang nad kyis nyon mongs pa rnams la ci rigs par phan 'dogs pa'i phyir mtshan gsol ba'o/ / rin chen zla ba dang zla rgyal dag ni sems can rnams kyi ma rig pa'i mun pa sel ba'i sgo nas mtshan gsol ba'o/ /gnon pa chen po byang chub sems dpa' dag ni sems can 'dul ba dang mtha' yas pa'i sems can mthu che chung gis sgrol ba'o/ /'jig rten gsum gnon byang chub sems dpa' dang /bzang skyong byang chub sems dpa' ni 'jig rten sgrol ba dang / dam pa'i chos bsrung ba las mtshan gsol to/ /byams pa la sogs pa'i byang chub sems dpa' ni 'jig rten dang 'jig rten las 'das pa'i don las btags pa ste/ sdug bsngal gyis nas 'don pa'i byang chub sems dpa' rin po che sems can la bstabs shing mya ngan las 'das pa'i zhi ba la 'jog pa las btags so//de la sogs pa dang thabs cig tu bzhugs pa ni bsdus pa'i tshig go/ /mdo las brgya byin lha'i dbang po'i 'khor lha'i sras po stong phrag nyi shu ni gong du phyi'i 'khor dang nang gi 'khor du smos pa gnyis la/nang gi 'khor lnga ni gong du bstan pa yin/ phyi'i 'khor bcu la mi dang mi ma yin par dbye ba dang / mi ma yin pa la'ang lha dang / lha ma yin du dbye ba dang / lha la yang 'dod pa dang gzugs kyi lhar dbye ba dang / 'dod khams kyi lha la yang brgya byin dang /rgyal po chen po bzhi dang / dbang phyug dang gsum mo/ /de la 'di ni dang po ste/ sa la gnas pa dang nam mkha' la gnas par dbye'o/ sa la gnas pa ni brgya byin dang / rgyal po chen po bzhi ste/ brgya byin ni ri rab kyi rtse la gnas shing sum cu rtsa gsum lha'i rgyal po'o//mdo las zla ba lha'i sras po zhes pa nas/ stong phrag nyi shu dang thabs cig go zhes pa'i bar ni 'od can de gsum ni rgyal po chen po bzhi'i khams su gtogs te/ nyi ma lha'i sras po ni 'phags pa spyan ras gzigs/ zla ba lha'i sras po ni 'phags pa mthu chen po thob pa/nam mkha'i mdzod byang chub sems dpa' ni rin chen 'od byang chub sems dpa' yin par mdo las 'chad do/ /nyi ma ni dpag tshad lnga bcus 'khor/ zla ba ni de bzhin no/ /skar ma ni chu shel las byas te/ nang gi chen po la rgyang grags bco brgyad kyis 'khor/ nang gi chung ngu ni rgyang grags bzhis 'khor zhes 'chad de/ de dag thams cad kyang nam mkha' la rgyu zhing gling bzhi 'khor bar rgyu la rgyu ba'i sa ni ri rab kyi rked nas 'khor ro/ /mdo las lha'i dbang po chen po lha'i sras po'i 'khor dang thabs cig tu bzhugs zhes pa ni nam mkha' la gnas pa'i lha ste/mtshe ma rnams dang dga' ldan gyi lha ni dbang phyug lha'i sras po ste/ dge ba'i rnam par smin pa che ba'i phyir gong nas gong du 'bras bu dam pa 'byung ba'i lha'i yid bzhin gyi shing las ci 'dod pa len cing dbang sgyur bas bdag dang gzhan gyi longs spyod rdzogs pa'o/ /mdo las tshangs pa mi mjed kyi bdag po tshangs pa'i 'khor dang thabs cig ces pa ni de dag gzugs kyi khams kyi lha rnams te/bsam gtan gyi rim pas gnas shing lha'i rgyal po de gzhan la phan pa dang bde ba byed pas mi skyo zhing thub pa nyams su len pas mi mjed pa'o/ /mdo las klu'i rgyal po brgyad 'khor mang po dang thabs cig tu bzhugs pa'i bar du ni 'di man chad lha ma yin pa'i 'khor lnga las dang po ste klu'i 'khor ro//dga' bo dang bsnyen dga' bo ni sngon spun yin te/ dge ba'i sems kyis char dang rlung dus su 'bebs pa'i rgyal po ste/ gzhan yang so so'i yon tan dang mthu las ming du btags pa'o//mdo las mi'am ci'i rgyal po bzhi'i 'khor dang thabs cig tu bzhugs zhes pa ni sgra snyan pa'i yon tan dang ldan pa dag go/ /mdo las dri za'i rigs kyi 'khor rnams dang thabs cig tu bzhugs zhes pa ni de dag rgyu zhing gar dang rol mo'i sgra snyan pa 'byin cing dris 'tsho bar byed pa'o//mdo las lha ma yin gyi dbang po'i 'khor bzhi rnams dang thabs cig ces pa ni lha'i spyod pa med de/ g.yo dang sgyus spyod pa mang bas lha ma yin te/ ji ltar mi'i gzhung nyams pa la mi ma yin zhes bya ba bzhin no//rnal 'byor spyod pa'i gzhung las ni lha'i khams su bshad do/ /gzhan las ni yi dags dang byol song gi khams su gtogs par yang 'chad do/ /mdo las 'dab bzangs kyi dbang po 'khor bzhi dang thabs cig tu bzhugs zhes pa ni 'dab bzangs ni skye ba rnam pa bzhi las skye ste/klu'i rigs kyang rnam pa bzhi las skye ste/ 'dab bzangs 'di zas su klu za'o/ /za ba'i thabs ni 'dab bzangs 'di 'dab mas rgya mtsho la slebs pas klu rnams thon pa la za ste/ klu bsod nams dang ldan pa de bzhin gshegs pa'i 'khor du skyes pa rnams 'dab bzangs kyis mi gsod par tshad med pa bzhi'i sems kyis bskyab pa'i phyir te/dge slong dag su 'tshe ba thams cad las thar bar 'dod pa'i phyir tshad med pa bzhi la brten par bya'o zhes gsungs pa yin no/ /mdo las lus 'phags mo'i bu ma skyes dgra dang thabs cig go zhes pa ni mi'i rgyal pa'i 'khor bstan te rgyal po smos pa ni gtso bos bsdus pa'i phyir te/ma skyes dgra'i gleng gzhi ni ma btsas pa'i snga rol tu pha bsad pa'i bsam pa dang bcas pa'i phyir ma skyes par pha'i dgrar gyur pa ste/ des pha bsad pa de nyan thos pa'i gzhung du sdig pa bshags pas sems can dmyal bar pho long brdabs pa tsam zhig skyes te/phyis rang sangs rgyas kyi 'bras bu thob par yang 'chad theg pa chen po las ni chos zab mo rtogs pa'i bshags pas sems can dmyal bar ma lhung bar yang 'chad de/ zhib tu mya ngan las 'das pa chen po'i mdo las gsungs pa bzhin no//mdo las yang de'i tshe bcom ldan 'das 'khor bzhis bskor te/ mchod pa dang rim gro byas zhes pa'i bar du ni 'khor phun sum tshogs pa bzhir phye ba la/ gsum ni bstan zin/ 'di bzhi pa ste/ 'khor bzhi la bdud dang tshangs pa dang /dge slong dang bram ze'i 'khor zhes kyang 'chad/ yang 'khor rnam pa bzhi ste/ nyan thos pa'i 'khor shA ri'i bu dang / byang chub sems dpa' byams pa lta bu chos gleng ba'i 'khor dang / dbang po smin pa de chos rtogs pa'i 'khor dang / dge ba'i rgyu la sogs pa'i 'khor dang /ma 'ongs pa na chud par 'gyur ba'i 'khor ro/ /yang 'khor bzhi ste/ dge slong dang / dge slong ma dang / dge bsnyen dang / dge bsnyen ma'i 'khor ro/ /mdo las gdon mi za bar bstan pa chen po zhes bya ba chos kyi gzhung mdo sde shin tu rgyas pa chen po/ /byang chub sems dpa' rnams la gdams pa/sangs rgyas thams cad kyis yongs su zin pa bshad par bzhed de zhes pa ni de bzhin gshegs pa chos bshad par byed pa'i dus de yang rnam pa gsum ste/ sngar byang chub sems dpa' rnams la theg pa chen po mtha' yas gdon mi za ba bstan pa zhes bya ba'i chos kyi gzhung bstan/'og tu nyan thos pa rnams kyi ched du theg pa gcig pu bstan pa dang / gzhan gyi don du lung dang rigs pas byang chub sems dpa' rnams la theg pa gcig pu bstan/ de'i 'og tu bdag gi don du spyod pa dang / 'bras bu bstan/ gsum du sngar chos kyi mtshan nyid bstan/'og tu chos kyi mthu bstan pa'i phyir gdon mi za bar bya bas mdo 'di bstan to/ /theg pa chen po zhes bya ba ni don rnam pa drug ste/ theg pa rnam pa gnyis las 'das pa dang / sangs rgyas kyi sar 'dis phyin par byed pa dang / sangs rgyas kyi theg pa pas theg pa chen po yin pa dang /sdug bsngal chen po zhi bar byed cing bde ba chen po sbyin par byed pa dang / 'phags pa spyan ras gzigs la sogs te skyes bu chen po rnams kyi theg pa yin pa dang / chos rnams kyi mthar thug par byed pa'i phyir theg pa chen po bsdus pa las kyang theg pa yang yin la chen po yang yin pas theg pa chen po'o//'dis 'degs par byed pa'i phyir theg pa'o/ /chen po ni rnam pa bdun dang ldan pa'i phyir chen po ste/ spyad yul dang / sems dang ye shes dang brtson 'grus dang thabs dang / thob pa dang / las chen po'i phyir chen po zhes bya'o/ /mtha' yas gdon mi za bar bstan pa zhes pa ni mdo sde 'di'i rnam grangs kyi ming ste 'di'i 'grel pa las mdo sde'i ming gi rnam grangs bcu bdun yod de/mdo sde 'di byang chub sems dpa' theg pa chen po spyod pa rnams la bshad pas mtha' yas gdon mi za ba'i don to/ /byang chub sems dpa' rnams la bstan pa/de bzhin gshegs pa rnams kyis gzung ba/ de bzhin gshegs pa rnams kyi gsang ba/ de bzhin gshegs pa rnams kyi yon tan gyi mdzod/ de bzhin gshegs pa rnams kyi man ngag gi gnas/ de bzhin gshegs pa rnams bskyed pa/ de bzhin gshegs pa rnams kyi dbyings/de bzhin gshegs pa rnams kyi ring bsrel bstan par byed pa/ thabs mkhas pas theg pa gcig ston pa/ bla na med pa'i gnas dam pa'i chos puN+Da rI ka zhes bya ba chos rnams kyi dam pa'o/ /'grel pa las mtha' yas gdon mi za bar bstan pa zhes pa ni tshig dang don rdzogs pa ming gi rnam grangs bcu bdun te/chos kyi sgo mo 'dis chos kyi sgo mo zab mo gzhan yang ston par byed do/ /'chad pa'i lung dang bshad pa'i 'bras bu gnyi ga yang mtha' yas pa'i phyir ro/ /sems can rnams kyi rang bzhin mtha' yas pa'i phyir chos rnams kyang mtha' yas so/ /chos mtha' yas pa'i phyir don yang mtha' yas so//don mtha' yas pa ni chos gcig bskyed pa'o/ /chos gcig ni mtshan ma med pa'i chos te/ byang chub sems dpa' rnams kyis gnas par bya ba'o/ /de nyid yang dag pa ste/ byams pa dang snying rjer ldan pa/ sems can rnams sdug bsngal gyi sa nas 'dren pa/ bde ba'i gnas su 'jog pa'o//rigs kyi bu byang chub sems dpa' rnams mtha' yas pa'i chos kyi sgo de gcig bsgrubs pas myur du bla na med pa'i byang chub 'thob po/ /'di lta ste dper na sa bon gcig bskyed pas brgya stong mang po bskyed par 'gyur ro/ /brgya stong mang po las kyang de bzhin du bskyed de mtha' yas par 'gyur ba bzhin/mdo sde 'di yang de bzhin te/ chos gcig gis don brgya stong grangs med pa bskyed do/ /don de las kyang de bzhin du mang du bskyed pas don mtha' yas mu med par 'gyur ba'i phyir mdo sde 'di yang mtha' yas gdon mi za bar bstan pa zhes bya'o//yang na mdo sde 'di mchog gam ngam pa zhes bya ste/ sde snod gsum gyi nang nas mdzod 'di dam pa yin pa'i phyir ro/ /yang mdo sde 'di theg pa chen po shin tu rgyas pa chen po gdon mi za ba'i sgo yin te/ sems can rnams kyi dbang po dang mthun par 'dzin pa'i phyir 'dzin pa phun sum tshogs pa'o//yang 'di byang chub sems dpa' rnams la gdams pa'i chos te/ dbang po smin pa rnams la snod bzhin du chos ston pas theg pa rnam gnyis su mi 'gyur ba'i phyir ro/ /yang 'di de bzhin gshegs pa rnams kyis yongs su gzung ba ste/ gnas gzhan med pa'i phyir ro/ /yang 'di de bzhin gshegs pa rnams kyi gsang ba'i chos te/chos 'di shin tu zab pa'i phyir sangs rgyas nyag gcig gi mkhyen pa ste/ gsang ba ni mdzod ces pa'i don to/ /yang 'di de bzhin gshegs pa rnams kyi yon tan gyi mdzod de/ bsod nams dang ting nge 'dzin la sogs pa'i mdzod yin pa'i phyir ro// //dam pa'i chos puN+Da rI ka'i 'grel pa/ bam po gnyis pa/ yang 'di de bzhin gshegs pa rnams kyi gsang ba'i gnas te/ dbang po ma smin cing snod du ma gyur pa rnams la sbyin par bya ba ma yin pa'o/ /yang 'di de bzhin gshegs pa rnams bskyed pa ste/ chos kyi sgo 'di thos pas sprul pa dang rdzogs longs spyod pa'i sku thob par byed pa'o//yang 'di de bzhin gshegs pa rnams kyi dbyings te/ chos 'dis bla na med pa'i byang chub 'grub par byed kyi mdo sde gzhan gyis ma yin pas de bzhin gshegs pa'i chos kyi sku dang ye shes ston par byed pa'i phyir ro/ /yang 'di de bzhin gshegs pa rnams kyi chos kyi sku ste/chos kyis sgrib pa sbyong bar byed pa'i phyir ro/ /yang 'di dus gsum gyi de bzhin gshegs pa rnams kyi ring bsrel bstan par byed pa ste/ de yang de bzhin gshegs pa'i yon tan dang chos kyi sku 'di'i nang nas ston pa'i phyir ro/ /yang 'di thabs mkhas pa ste/chos kyi don 'di la brten pas mngon par rdzogs par 'tshang rgya ba'o/ /sangs rgyas nas kyang lha dang mi la sogs pa'i sems can rnams la theg pa rnam pa lnga'i chos kyis byang chub thob pa'i ye shes dang thabs ston pa'i phyir ro/ /yang 'di theg pa gcig po ston pas bla na med pa'i byang chub kyi ngo bo nyid ston pa yin gyi/nyan thos dang rang sangs rgyas kyis ni yang dag pa'i mtha' ma yin no/ /yang 'di don dam pa'i gnas te/ chos 'di de bzhin gshegs pa'i chos kyi sku yang dag pa'i gnas te/ chos kyi sku nyid dam pa yin pa'i phyir dam pa'i gnas zhes bya'o//yang 'di dam pa'i chos pad+ma dkar po zhes pa ni 'grel pa las rnam pa gnyis te/ chu las byung ba'i don dang / kha 'byed pa'i don to/ /chu las byung ba yang don rnam pa gnyis te/ theg pa rnam pa gnyis kyi chu rnyog pa can las byung ste/ cig car chud pa'i byang chub sems dpa' nyid pad+mo dang 'dra bar rnyog pa dang bral zhing chos nyid brtan pa'i tshul theg pa gcig pu'i gzhung rtogs zhes pa'i don ston to//yang na theg pa rnam pa gnyis chu rnyog pa can gyi nang nas byung ste de bzhin gshegs pa'i 'khor chen por zhugs pa ni byang chub sems dpa' pad+mo'i gdan la bzhugs shing mtha' yas gdon mi za ba'i ye shes rnam par dag pa'i spyod yul de bzhin gshegs pa'i gsang ba'i mdzod rtogs pa bzhin nyan thos pa rnams kyis kyang rim gyis lung yang dag pa dang /gzhung dang spyod pa dang 'bras bu la zhugs zhes pa'i don to/ /yang 'di bla na med pa'i chos kyi sgo ste/phun sum tshogs pa thams cad sdud pa'i phyir ro/ /sdud pa ni mtha' yas pa'i ming dang tshig dang 'bru'i tshogs thams cad sdud pa'i phyir bla na med pa ste/ bshad pa dang bshad par bya ba'i chos thams cad 'dir 'dus pa'i phyir ro/ /rnam grangs bcu bdun po 'di las 'di ni spyi'i tshig go//gzhan ni dbye ba'i tshig go/ /mdo sde 'di nyid kyi rnam grangs gsum zhig 'byung ste/ mtha' yas gdon mi za zhes pa ni byin gyi rlabs kyi khyad par bstan pa'o / /byang chub sems dpa' rnams la gdams pa ni dbang po smin pa rnams kyi ched du gsungs pa'i don to//sangs rgyas thams cad kyis yongs su zin pa ni sangs rgyas nyid la brten zhes pa'i don te/ 'di gsum gtso bo yin pa'i phyir smos so/ /mtha' yas pa ni rnam pa gnyis te/ don mtha' yas pa dang tshig mtha' yas pa'o/ /tshig mtha' yas pa ni ston pa'i chos so//don ni bstan par bya ba'i chos so/ /mdo las bcom ldan 'das chos kyi gdan de nyid la skyil mo krung bcas nas mtha' yas gdon mi za ba bstan pa zhes bya ba'i ting nge 'dzin la snyoms par zhugs te/ sku mi g.yo bar bzhugs shing sems mi g.yo bar gyur pa ni spyod lam phun sum tshogs pa'i chos dam pa ston pa ste/chos zab mo 'di ston pa la spyod lam dam pa la zhugs te chos ston par 'os pa'i phyir skyil mo krung bcas te bzhugs so/ /bzhugs pa'ang rnam pa gnyis te/ bdud 'dul ba'i bzhugs pa dang / bkra shis pa'i tshul du bzhugs pa las 'di ni dang po'i tshul du bzhugs pa'o//spyod lam dam pa yang rnam pa gsum ste/ ting nge 'dzin phun sum tshogs pa la bzhugs pas sku dang thugs mi g.yo bar gyur pa'o/ /yang na snod kyi 'jig rten na lha'i me tog 'bul ba dang / zhing rnam par g.yo ba la bzhugs pa'o//yang na bcud kyi 'jig rten na bzhugs pa ste/ 'khor bzhi dang brgyad kyis bskor cing ting nge 'dzin du bzhugs pa dang / chos zab mo rtogs par mdzad pas 'khor dga' zhing zhal du lta ba dang bzhugs pa'o/ /snyoms par zhugs zhes pa ni mtha' yas pa'i don zab mo la sems mnyam par gzhag ces pa'i don to//'grel pa las ting nge 'dzin la rnam pa gnyis te/ thugs dang sku la mnga' brnyes shing phun sum tshogs pas zab mo 'di bshad pa la ting nge 'dzin la ma zhugs na g.yo ba dang rtog pa 'byung ba'i phyir ting nge 'dzin du zhugs pa dang sgrib pa thams cad dang bral ba ni mnga' brnyes pa ste/ting nge 'dzin du zhugs pas ting nge 'dzin gyis sgrib pa thams cad bsal bas chos ston pa la mnga' brnyes zhes pa'i don to/ /'grel pa las mnga' brnyes pa yang rnam pa gnyis te/ sems can so so'i dbang po dang mthun par bstan pas byang chub kyi phyogs la 'dzud cing so so'i thabs dang gnyen po la sbyor bas zag pa med pa'i lam ston pa dang /gnyis su sems can rnams thog ma med pa'i dus nas nyon mongs pas dam du bcings pa rnams de'i gnyen por rnam par rtog pa dang g.yo ba dang / khro sems la sogs pa'i las zhi bar bya ba'i phyir/ting nge 'dzin de la zhugs shing mthus dbang sgyur ba'o/ /'grel pa las ting nge 'dzin du zhugs pa'i phyir sa g.yo ba dang / sngon bskal pa grangs med pa 'das pa'i don rnams zhes pa'ang ting nge 'dzin du zhugs pa las 'byung gi gzhan gyis ma yin no/ /bcom ldan 'das ting nge 'dzin du ma zhugs pa'i thugs dang spyod pa mi mnga' ste/dus thams cad du ting nge 'dzin gyi spyod pa dang ldan pa'o zhes 'byung na/ ci'i phyir bcom ldan 'das ting nge 'dzin du bzhugs zhes smos so/ /don rnam pa bcu'i phyir te/ ting nge 'dzin du zhugs pa dang / ting nge 'dzin las bzhengs pas 'gro ba la phan 'dogs pa'i phyir dang /bcom ldan 'das chos nyid kyi ting nge 'dzin du zhugs nas 'od gtong ba la sogs pa mdzad pa'i phyir ting nge 'dzin du ma zhugs na ltas de dag kyang bcom ldan 'das kyi ma yin par dogs pa bsal ba dang / yang na chos ston pa ting nge 'dzin gyi dbang po bsdu bar bstan pa dang /chos zab mo ni ting nge 'dzin du ma zhugs pas chud dka' ste gus pa skye bar bstan pa dang / shes rab ni ting nge 'dzin du zhugs pas gdod skye'i gzhan gyis ma yin zhes ting nge 'dzin bsgoms pa la gzung ba'i phyir dang / ting nge 'dzin dang shes rab rdzogs pas chos ston gyi ma rdzogs pas ni ma yin par bstan pa dang /ma 'ongs pa na chos ston pa rnams tshul de dang 'dra ba'i sems kyis chos ston cig par bstan pa dang / tshul 'di bstan pas gzhan dag kyang sems shin tu nges par byas pa ni thos pa 'dzin pa'i mtshan nyid pas gzhan dag kyang sems nges par bstan pa dang /ting nge 'dzin du zhugs te ltas mang po bstan pas 'phags pa byams pa la sogs pa chos gsol ba'i rtog pa skye'i gzhan gyis ma yin pa dang / yang gsang ba gsum bstan pa'i phyir te/ ting nge 'dzin du zhugs pas thugs gsang ba dang / 'od la sogs pa'i ltas kyis sku gsang ba dang /chos ston pas gsung gi gsang ba bstan pa'o/ /yang rtog pa na re dam pa'i chos puN+Da rI ka 'chad par dgongs na dam chos pad+ma dkar po'i ting nge 'dzin la 'jug par 'os kyi don mtha' yas pa'i ting nge 'dzin la 'jug par mi 'os so zhes pa la/de ni ji ltar rdo rje gcod pa las kyang / lus bsrang dran pa mngon du bzhag ste chos ston to zhes 'byung ba bzhin te/ sngar mtha' yas gdon mi za ba'i ting nge 'dzin la snyoms par zhugs te phyis dam pa'i chos puN+Da rI ka ston pa yang snga ma ni byang chub sems dpa'i ched du bstan/phyi ma ni nyan thos rnams kyi ched du bstan/ yang snga ma ni rang bzhin/ phyi ma ni byed pa'i las bstan te/ so so'i dbang po'i rim pa dang sbyar te ming du btags pas 'gal ba med do/ /mdo las bcom ldan 'das snyoms par zhugs ma thag tu zhes pa nas/me tog gi char mngon par bab cing 'brul lo zhes pa'i bar du ni snod kyi 'jig rten rnam pa gnyis la me tog brul ba dang sa g.yo ba ste/ da 'dir me tog 'brul ba ni me tog yid du 'ong ba dang / dga' bar byed pa dag yin pas chos 'di nyan pa rnams sems zhi zhing dga' ba bskyed pa'i phyir ro//me tog de dag gi yon tan yang rnam pa lnga ste/ kha bye zhing zum pa yang chos 'di thos pas nyon mongs pa'i dri ma bsal bar bstan pa dang / 'jig rten gyi rgyan du byed pa ni chos 'di thos pas yon tan mang pos lus rgyan du byed pa dang / kha 'bye bas ni theg pa rnam gcig don 'byed par ston pa dang /me tog gi rjes la 'bras bu 'byung ba bzhin chos 'di thos pas byang chub chen po'i 'bras bu thob pa dang / dri zhim po yid du 'ong ba ni chos 'di thos pas nang gi yon tan phun sum tshogs pas phyogs bcu'i 'jig rten gyi khams yon tan yid du 'ong bas khyab par gyur pa'o//lha'i me tog rnam pa bzhi smos pa ni 'khor rnam bzhis 'phags pa'i yon tan chos bzhi pa rdzu 'phrul gyi rkang pa bzhi la sogs pa thob pa dang / mdud pa la sogs pa spyod pa'i don du bstan to/ /mdo las sangs rgyas kyi zhing thams cad kyang rnam pa drug tu g.yos par gyur to zhes pa ni de bzhin gshegs pa shAkya thub pa'i zhing ni stong gsum gyi stong chen po'i 'jig rten gyi khams te/g.yo 'gul zhes pa'i don to/ /zhing thams cad ces pa ni zhing de g.yos pa la bya'i/ phyogs bcu'i 'jig rten gyi khams g.yo ba ni ma yin no/ /de g.yo ba yang rnam pa gsum ste/de bzhin gshegs pa yum gyi lhums su zhugs pa dang / bltams pa dang / rab tu byung ba dang / mngon par byang chub pa dang / chos kyi 'khor lo bskor ba dang / mya ngan las 'das pa'i dus su g.yo ste 'di ni chos kyi 'khor lo bskor ba dang sbyar ba'o/ /yang shes rab kyi pha rol tu phyin pa chen po'i mdo las rnam pa drug tu g.yo ba ste/shar phyogs dma' na nub phyogs mtho/ /mtha' dma' na dbus mtho ba'i bar du ste drug go/ /yang mtshan nyid drug tu g.yo ba ste/ shes rab kyi pha rol tu phyin pa las 'gul/ rab tu 'gul zhes bya ba nas 'khrugs rab tu 'khrugs pa'i bar du ste/'gul zhes pa ni chung ngu 'gul ba'o/ /rab tu 'gul ba ni phyogs thams cad 'gul ba ste/ 'og ma'i rnams kyang de bzhin du sbyor ro/ /de bsgul ba cir dgongs she na/ don rnam pa bdun gyi phyir te/ bdud dang mu stegs can rnams sdang ba dang /sems g.yeng ba'i 'khor rnams sems bsdu ba dang / yang dregs pa la gnas pa rnams chos la gzud pa'i phyir gzhan gdab pa dang / chos kyi mtshan nyid la sems su gzhug pa dang / rtogs pa'i gnas bstan pa dang / smin pa rnams grol ba thob par bya ba dang /yang dag pa'i don 'dri bar bskul ba'i phyir sa g.yo ba bstan to/ /mdo las yang de'i tshe 'khor der gang dge slong dang zhes pa nas/ bcom ldan 'das la lta zhing ngo mtshar du gyur rmad du gyur dga' bar gyur to zhes pa'i bar du ni 'di man chad bcud kyi 'jig rten bstan te/ de yang tshogs bzhir bsdu'o//'khor bzhi pa dang / 'khor brgyad pa dang / rgyal po gnyis dang mngon par dga' ba rnams so/ /mdo las bcom ldan 'das kyi smin mtshams kyi bar gyi mdzod spu nas 'od zer gcig byung zhes pa ni de man chad bshad pa'i rgyu phun sum tshogs pa bstan te/'grel pa las 'gro ba phal po che rnams de lta bu'i ltas ngo mtshar du gyur pa mthong na de bzhin gshegs pa de yang bdag cag la chos 'chad do snyam pa'i spro ba'i sems skye ba'i bshad pa'i rgyu phun sum tshogs pa ste/ 'od de btang bas 'jig rten gyi khams na don gyi rnam pa thams cad snang bar mdzad do//yang bcom ldan 'das chos ston pa ni 'gro ba mang po la phan pa'i ched pas nyan pa rnams spro zhing thos par dka' ba'i sems skye ba'i phyir bshad pa'i rgyu zhes bya bas de'i phyir 'od kyis rgyang ring po tshun chad snang bar mdzad do/ /rnam pa gnyis su rnam pa drug tu g.yo bar bstan nas/de'i 'og tu chos bstan par mdzad pa ni/ chos zab mo rang gi rig pa'i don yin pas sngar cho 'phrul bstan te gzod chos 'di ston par mdzad pas de'i phyir chos bshad pa'i rgyu zhes bya'o/ /sngar lha'i me tog 'brul ba dang sa rnam par g.yo ba bstan pa yang ngo mtshar du bya ba yin mod kyi 'od kyis snang bar mdzad pa 'di nyid chos zab mo rang gi rig pa bstan pa'i ltas bsam gyis mi khyab par kun gyis mthong bas bshad pa'i rgyu zhes bya'o//'od gtong ba dang yul snang bar mdzad pa mthong bar byed pa ste/ 'di ni dang po smin ma bzhin gyi rgyan yin pa bzhin theg pa chen po'i gzhung de yang gtsor yin par bstan pa dang /mtshams zhes bstan pas dbu ma'i don mtshon pa dang / dkar po zhes smos pas kha dog thams cad kyi gzhi yin te/ de bzhin du mdo sde 'di yang theg pa rnam gsum gyi gzhi yin par bstan pa'o//mdzod spu de yang shin tu dkar pa brkyang na ring pa/ bskum na thung ba'o/ /'od de yang rnam pa bdun te/ mi chen po'i cha yin pas 'gro ba dad pa skye bar 'gyur ba dang / mun pa sel bas ma rig pa'i sa 'joms pa dang / snang ba des mtshon pas 'jig rten nas 'dren ba dang nang gi bstan pa ye shes kyi 'od yin par mtshon pa dang /'od kyis reg pa rnams sdug bsngal zhi bar byed pa dang / 'od kyis reg pa rnams chos nyan par bskul ba dang / yul la chags pa rnams skyo ba bskyed pa'i phyir te bdun no/ /gcig tu rdzu 'phrul bshad pa'i skabs su bstan to//mdo las de shar phyogs su sangs rgyas kyi zhing stong phrag bco brgyad ces pa nas 'od kyis shin tu khyab par snang ngo zhes pa'i bar du ni yul snang bar mdzad pa bstan pa ste/ zhing ni stong phrag bco brgyad pa'o/ /shar phyogs zhes smos pa ni phyogs kyi gtso bo yin pa bzhin bstan pa 'di theg pa'i gtso bo yin pa'o//dang po der 'char ba yang dper nyi ma ri mtho mtho la dang por 'char ba bzhin mdo sde 'di yang dang por dbang po smin pa rnams la snang bar mdzad do/ /sems can dmyal ba snang bar mdzad pa ni sdug bsngal zhi bar mdzad pa/ lha'i khams snang bar mdzad pa ni theg pa chen po nyan par bskul ba ste/thugs rjes khyab par mdzad ces pa'i don to/ /sems can dmyal ba bstir med pa zhes pa ni sdug bsngal myong ba mnar ba'i skabs med pa'i phyir ro/ /mdo las sangs rgyas kyi zhing de dag gi 'gro ba drug na sems can gang yod pa de dag thams cad ma lus par snang ngo zhes pa ni 'di snang bar bya ba'i yul bstan te/de yang rnam pa bdun no/ /'gro ba drug dang sangs rgyas dang chos dang dge 'dun dang / byang chub sems dpa' dang mya ngan las 'das pa rnams dang / mchod rten rnams so/ /de yang dum bu gsum du dbye ste/ 'khor bar 'khor pa'i sems can rnams snang bar byas pa dang / dkon mchog gsum snang bar byas pa dang / mya ngan las 'das pa'i spyod pa bstan pa'o/ /'gro ba drug la yang drug tu dbye ste/ de'i ming bstan pa dang / bskyed pa'i rgyu dang / dbye ba dang bsdu ba bstan pa dang / gnas bstan pa dang /tshe'i tshad bstan pa dang / rgyu dang 'bras bu'i mtshan nyid bstan pa'o/ /ming bstan pa ni drug ces pa ni grangs so/ /'gro ba zhes pa ni nyon mongs pa dang / las kyis bskyed pa'i phung po lnga la gnas pa 'gro ba sna tshogs su 'gro zhes pa'i don to/ /rang gis byas pa'i las la spyod pa'i phyir lha'o//yang na 'dod pa dang rdzu 'phrul du ldan pa ni lha'o/ /sems pa mang ba ni mi'o/ /bkres pa'i sdug bsngal gyis mnar ba ni yi dags so/ /dud de 'gro bas dud 'gro'o/ /gtub pa dang gshegs pa la sogs pa'i gzhir gyur pa'i phyir dmyal ba'o/ /lha ma yin ni sngar bstan pa yin no//skyed pa'i rgyu ni 'gro ba drug po kun kyang rnam par smin pa'i rnam par shes pas bskyed pa'i rang bzhin can ma bsgribs la lung du ma bstan pa'o/ /bsdu ba dang dbye ba la/ 'gro ba drug ces pa ni bsdu ba'o/ /de yang dge ba bskyed pa dang / mi dge ba bskyed pa ni dbye ba'o//yang na 'khor ba zhes pa ni bsdu ba'o/ /srid pa gsum dang skye ba rnam bzhi ni dbye ba'o/ /gnas ni khams gsum pa'o/ /mdo las sangs rgyas kyi zhing de dag na sangs rgyas bcom ldan 'das bzhugs shing 'tsho skyong ba nas 'bras bu thob pa dang ma thob pa thams cad kyang snang ngo zhes pa ni 'di ni dkon mchog gsum 'byung ba bstan pa ste/sangs rgyas dang chos dang dge 'dun snang ba'o/ /dge 'dun la yang rnam pa gnyis te/ nyan thos kyi dge 'dun dang byang chub sems dpa'i dge 'dun no/ /nyan thos kyi dge 'dun la yang 'phags pa'i 'bras bu thob pa dang rnal 'byor pa lam la gnas shing 'bras bu ma thob pa dang rnam pa gnyis so//mdo las sangs rgyas kyi zhing de dag na byang chub sems dpa' sems dpa' chen po zhes pa nas spyod pa thams cad snang ngo zhes pa ni byang chub sems dpa'i dge 'dun te/'gro ba mang po sdug bsngal gyi sa nas 'don pa'i phyir dad pa dang thabs sna tshogs kyis byang chub kyi phyogs la 'dzud cing spyod pa dang sangs rgyas kyi zhing yongs su brgyan pa'i phyir bsdu ba rnam pa bzhi dang / pha rol tu phyin pa la sogs te byang chub kyi spyod pa sna tshogs spyod pa ni byang chub sems dpa'i spyod pa ste/dad pa ni mos pas spyod cing 'phags pa'i 'bras bu ma thob pa'i sa'o/ /'grel pa las kyang bsdu ba rnam pa bzhis sems can thams cad thabs su sdud cing bstan pa la 'jog pa ni byang chub sems dpa'i spyod pa ste/ sbyin pa dang tshig snyan pa dang don spyod pa dang don mthun pas 'dren pa'o//mdo las sangs rgyas kyi zhing de dag na ring bsrel gyi mchod rten rin po che las byas pa snang ngo zhes pa ni mya ngan las 'das pa'i 'og gi spyod pa bstan pa ste/ mya ngan las 'da' bar 'jug pa dang mchod rten bstan pa'o/ /mya ngan las 'das pa yang rnam pa drug ste/rang bzhin dang ming dang dus dang gang zag dang bstan pa dang / mya ngan las 'da' bar 'jug pa'i don to/ /rang bzhin la rnam pa bzhi ste/ rang bzhin gyis mya ngan las 'das pa dang / lhag ma dang bcas pa dang / lhag ma med pa'i mi gnas pa'i mya ngan las 'das pa'o/ /de bzhi spyir mya ngan las 'das pa ste yang dag pa nyid du don gcig pa'o//bcom ldan 'das mngon par byang chub nas sems can ma grol ba rnams grol bar mdzad do/ /rgyu yod pa rnams mya ngan las 'das pa'i 'og tu mchod rten bzhag pas grol bar 'gyur ba'i rgyu bstan to/ /mdo las de nas byang chub sems dpa' sems dpa' chen po byams pa 'di snyam du sems te/de bzhin gshegs pas cho 'phrul chen po mdzad pa 'di ci'i ltas zhes pa ni 'khor mang po rnams ltas de dag dbang po zhan pa rnams kyis ci'i ltas su bstan pa mi shes pas 'phags pa byang chub sems dpa' byams pas 'gro ba mang po'i the tshom bsal ba'i phyir 'dri bar brtsams so//mdo 'di'i don bdag gis su la dri/ lan ldon sus nus/ de yang 'di ltar zhes pa nas 'jam dpal gzhon nur gyur pa la don 'di 'dri'o snyam du bsams pa ni bcom ldan 'das kyis cho 'phrul bsam gyis mi khyab pa bstan pa 'di 'jam dpal gzhon nur gyur pa la 'dri'o zhes pa legs pa chen po 'jam dpal la yod pa bstan pa ste/sngon gyi rgyal ba la bya ba byas nas chos kyi rgyal tshab tu dbang bskur ba ste/ 'grel pa las kyang don zab mo gcig la dris dang mang po thos par 'gyur bas kun gyi the tshom gcod pa ni 'jam dpal gzhon nur gyur pa'o zhes 'byung /yang 'grel pa las kyang sangs rgyas dang byang chub sems dpa' dgongs pa mthun par gyur pas sgrub pa dang bshad pa'i chos gnyi ga 'grub par 'gyur ba'i phyir ltas chen po bstan pa'i don dam pa'i chos 'di nyid bshad pa'i gleng gzhi yin pa'i phyir ro//chos 'di the tshom ci'i phyir 'jam dpal gzhon nur gyur pa 'ba' zhig la dri zhe na/ don rnam pa gnyis kyi phyir te/ chos 'di nyid 'jam dpal gzhon nur gyur pa 'ba' zhig gis mngon du gyur pa'i phyir dang / rang gi sems kyis rtogs pa nyid yin gyi/gzhan la mnyan mi dgos pa'i phyir ro/ /yang 'grel pa las 'jam dpal gzhon nur gyur pas dris pa de'i lung bstan par nus pa ni 'jam dpal de phun sum tshogs pa gnyis dang ldan pa'i phyir te/ bsod nams phun sum tshogs pa dang ye shes phun sum tshogs pa'o//rgyu de gnyis phun sum tshogs pa'i phyir chos de ston par 'os pa'o/ /mdo las dge slong pha dang dge slong ma nas bdag cag gis su la dri snyam pa'i bar du ni don sla bas ma bshad do/ /de nas yang byang chub sems dpa' sems dpa' chen po byams pas 'jam dpal gzhon nur gyur pa la 'di skad ces smras so zhes pa ni don rnam pa gnyis kyis gleng gzhi chos 'dri ba la sngar ni tshig lhug pas bshad/de'i 'og tu ni tshigs su bcad pas bsdus te bstan pa'o/ / mdo las 'jam dpal la bcom ldan 'das kyis gang 'di lta bu'i ltas zhes pa nas 'di ci'i rgyu ci'i rkyen zhes pa'i bar du ni ltas dang cho 'phrul dri ba bsdu ba'o//zhing 'di dag sna tshogs blta na sdug pa zhes pa ni de bzhin gshegs pa'i zhing rnam pa sna tshogs te/ zhing yongs su dag pa dang ma dag pa rnams so/ /sangs rgyas thog mar bzhud pa ni byang chub sems dpa' rnams kyi 'dren pa yin pa'i phyir ro//mdo las tshigs su bcad pa 'di gsungs pa ni 'di tshigs bcad kyi bsdu ba ste dum bu bcur dbye'o/ /dbang po rno rtul gnyi ga la phan pa dang snga phyi rnam gnyis kyi 'khor ba la phan gdags pa dang / drang po dang de ma yin pa gnyis dga' bar bya ba dang /dka' sla gnyi ga'i ched dang don dam pa dang kun rdzob gnyi ga'i don dang / blang dor gnyi ga'i cha dang / gsal mi gsal dbye ba dang / shes pa dang spobs pa dbye ba dang / the tshom dang 'ching ba dbye ba dang / bshad pa dang spyod pa bstan pa'o/ / mdo las 'jam dpal zhes pa nas zhal gyi mdzod spu zhes pa'i bar du ni tshigs su bcad pa 'di dag la rtsa ba drug cu rtsa gnyis yod de/ dum bu gnyis su dbye'o/ /dang po rtsa ba lnga bcu rtsa bzhis ni ltas rnams kyi don bstan/ rtsa ba brgyad kyis ni don 'dri ba'o/ /dang po la yang rnam pa gsum ste/ tshigs bcad dang po gcig gis ni 'od kyis snang bar mdzad pa'i gleng gzhi ston to/ /de'i 'og ma rtsa ba gsum gyis ni me tog 'brul ba dang sa g.yo ba'i spyod lam bstan to/ /de'i 'og gi rtsa ba lnga bcus ni yul rnams snang bar mdzad pa'i gleng gzhi bstan te 'di ni dang po'o/ /mdo las/ me tog man dA ra ba'i char chen kyang /zhes pa nas gang gis de ni kun du mdzes pa zhes pa'i bar du de la rtsa ba gsum gyis ni spyod lam gsum gyi don bstan/ rtsa ba phyed dang gnyis kyis ni me tog gi char bab pa bstan/ rtsa ba phyed kyis ni sa g.yo ba bstan/ rtsa ba gcig gis ni 'khor bzhi rab tu dga' ba bstan/'di ni me tog gi char 'bab pa bstan to/ /me tog de dag tsan dan gyi dri bsung dang ldan zhing yid du 'ong bas zhing de mdzes par byed pa'o/ /mdo las/ 'khor bzhi de dag shin tu dga' ba 'thob/ /zhing 'di thams cad kun nas rab tu g.yos/ /zhes pa ni sa g.yo bas 'khor 'di rnams dga' ba bstan to//mdo las/ 'od zer de yis shar gyi phyogs logs su/ /zhes pa nas/ bstir med yan chad srid pa'i thog ma'i bar/ /zhes pa'i bar du ni tshigs su bcad pa'i rtsa ba bco lngas yul rnams snang bar mdzad pa bstan te/ de la rtsa ba phyed kyis ni snang ba'i yul bstan/gzhan gyis ni lta ba bstan te/ 'dis ni snod kyi 'jig rten snang bar byed pa bstan to/ /gser gyi kha dog du snang zhes pa ni theg pa gcig po 'di rin che bar bstan pa'o/ /mdo las/ de dag zhing gi ji snyed sems can dag/ /ces pa nas/ 'gro ba bde dang mi bde rnams kyang snang //zhes pa'i bar du ni snang bar bya ba rnams bstan te/ /dum bu drug tu dbye'o/ /tshigs bcad rtsa ba phyed dang gnyis kyis ni 'gro ba drug po rnams bstan/ rtsa ba phyed kyis ni sangs rgyas bcom ldan 'das bstan/ de'i 'og tu rtsa ba phyed dang bdun gyis ni chos thos pa bstan/ yang phyed dang gnyis kyis ni 'khor bzhi bstan/de'i 'og tu rtsa ba sum cu rtsa gcig gis ni byang chub sems dpa'i spyod pa bstan/ rtsa ba bdun gyis ni mya ngan las 'das pa dang mchod rten bstan te/ 'dis ni dang po las dge ba dang mi dge bas bskyed pa'i 'gro ba drug po rnams las dang nyon mongs pas bde ba dang mi bde ba rnam par smin pa myong bar byed pa rnams snang bar mdzad pa'o//yang mdo las/ bzang po ngan pa de bzhin bar ma yang / /zhes pa nas/ sangs rgyas chos 'di rab tu ston pa ni/ /zhes pa'i bar du ni bcom ldan 'das snang ba bstan te/ bcom ldan 'das nyid seng+ge bzhin bag tsha ba mi mnga' bar chos ston pa la mnga' brnyes pa'o//sangs rgyas chos ni rab tu ston pa ni / zhes pa ni/ chos thos pa bstan te/ spobs ba so so yang dag par rig pas dpe dang don gsal bar ston pa'o/ /mdo las/ sems can gang dag sdug bsngal gzir ba rnams/ zhes pa nas/de dag la ni byang chub phyir bsngags gsung / /zhes pa'i bar du ni theg pa che chung gsum gyi rim pa bstan te/ mdo las 'byung ba bzhin du chud par bya'o/ /mdo las/ shin tu mthong zhing thos so 'jam pa'i dbyangs/ /zhes pa las ni cha tsam smos par bya zhes pa'i bar du ni tshigs su bcad pa 'dis ni 'khor rnam bzhi snang bar bstan te/'khor de dag gis lam bsgrubs pa dang 'bras bu thob pa'ang snang zhes pa'i don te/ tshig gong mas ni nyan thos tshig 'og mas ni byang chub sems dpa'i theg pa bstan to/ /mdo las mthong zhing rnam pa mang po dag na yang / /zhes pa nas/brtson 'grus sna tshogs byang chub bskyed pa dag /ces pa'i bar du ni byang chub sems dpa'i spyod pa bstan te/ tshigs su bcad pa 'dis ni brtson 'grus sna tshogs bstan/ rtsa ba bdun gyis ni dngos po bstan/ yang rtsa ba phyed dang bcu bzhis ni mos pas spyod pa sna tshogs bstan to//gang gA zhes pa ni chu bo ma dros pa las chu bo bzhi 'byung ba'i gcig go/ /de bye ma mang ba'i phyir mang ba'i dper bstan to/ /mdo las/ la la sbyin pa sbyin pa'ang de bzhin te/ /zhes pa nas/ smon pa de bzhin gshegs kyi ye shes la/ /zhes pa'i bar du 'dis ni sbyin pa sna tshogs kyi mtshan nyid bstan te/'di la'ang rnam pa gnyis su dbye'o/ /dang po'i tshigs bcad bco lngas ni pha rol tu phyin pa drug bstan/ tshigs su bcad pa gnyis kyis ni rlung brgyad kyis mi bskyod par bstan/ tshigs su bcad pa drug gis ni sbyin pa bstan/ de'i 'og ma gnyis kyis ni tshul khrims bstan/de'i 'og ma gnyis kyis bzod pa dang brtson 'grus bstan/ de'i 'og ma gnyis kyis ni bsam gtan bstan/ de'i 'og ma gsum gyis ni shes rab bstan to/ /sbyin pa la yang rnam pa gsum ste/ rtsa ba bzhis ni phyi'i nor gyis phan gdags pa/ de'i 'og ma gcig gis ni nang gi pan gdags pa/de'i 'og ma gcig gis ni phyi nang gnyis ga'i phan gdags pa'o/ /dang po bzhi la yang rin po che bdun sbyin pa dang dbyig brgyad sbyin pa dang / theg pa sbyin pa dang / rdzas sna tshogs sbyin pa'o/ /rin po che bdun ni gser dang dngul la sogs pa bdun no//dbyig brgyad ni bran pho mo dang / shing rta dang / khyogs rin po ches spras pa la sogs pa'o/ /mdo las/ 'jam dpal bdag gis mthong ba la la na/ /zhes pa nas/ ngur smrig gos rnams rab tu gyon par byed/ /ces pa'i bar du 'dis ni rab tu 'byung ba'i mtshan nyid bstan te/gang rab tu byung nas 'dul ba la gnas pa de spyod pa thams cad kyi gzhi yin pa'i phyir ro/ /de rab tu byung ba'i yon tan yang rnam pa lnga ste/ de bzhin gshegs pa rnams kyis skyob pa dang / 'chi kar dga' ba bskyed pa dang / tshul khrims bsrungs pas bshes gnyen bzang ba dang /yon tan phun sum tshogs pa dang / skye ba thams cad du rab tu byung ba'i rgyu la sogs pa'o/ /mdo las/ bdag mthong byang chub sems dpa' la la dag /ces pa nas/ la la lung nod kha ton byed la dga'/ /zhes pa'i bar du 'dis ni mdo sde dka' ba 'don cing mdo zab mo la sems pa'i bzod pa dang ldan pas bzod pa dang ldan pa bstan to//yang mdo las/ bdag mthong byang chub sems dpa' la la dag /ces pa nas/ yongs su bsams pas nye bar rtogs par gyur/ /ces pa'i bar du 'dis ni go cha bgos pa dang dge ba sdud pa'i brtson 'grus bstan te/brtson 'grus rnam pa lnga dang ldan zhes pa'i don to/ /yang mdo las/ kha cig gis ni 'dod pa ma lus spangs/ /zhes pa nas/ /tshigs bcad stong gis rgyal ba rgyal po la'o/ /zhes pa'i bar du 'di gnyis kyis ni bsam gtan la gnas pa bstan to / / bsam gtan gyi mngon par shes pa la sogs pa bskyed pas de bzhin gshegs pa mang po la bstod pa'i spobs pa skye ba'o/ /mdo las/ dran dang ldan zhing dul ba mi 'jigs pa/ /zhes pa nas/ /thos nas de dag chos rnams 'dzin par 'gyur/ /zhes pa'i bar du ni shes rab kyi pha rol tu phyin pa spyod pa zab mo dang ldan zhing thos pa 'dzin par gyur pa'o//mdo las/ yongs su sgom pa bdag nyid rgyal dbang sras po rnams/ /zhes pa nas/ /chos kyi rnga ni shin tu rdung bar byed/ /ces pa'i bar du ni shes rab dang ting nge 'dzin dang ldan par gyur pa'o//chos ston pa ni rnam pa bzhi ste/ dga' bas phan 'dogs pa'i phyir ston pa dang / byang chub sems dpa' rnams kyi ched du ston pa dang / bdud rnams sdang bar byed pa dang / bkri ba dang nges pa'i don gyis brdung ba'o/ /mdo las/ mngon pa la las bde gshegs bstan pa la//zhes pa nas/ /bsnyems med zhi zhing rab tu zhi bar spyod/ /ces pa'i bar du ni 'jig rten gyi rlung brgyad kyis mi bskyod pa'i don te/ 'jig rten gyi chos brgyad ni bstod pa dang smad pa la sogs pa'o/ /mdo las/ mang du nags gnas de bzhin gzhan dag kyang //zhes pa nas/ /de dag rnams kyang byang chub phyir du 'jug /ces pa'i bar du 'dis ni thugs rjes 'dren par bstan te/ thugs rje'i 'od kyis sems can dmyal ba'i gnas rnams zhi bar byed pa'o/ /rgyal ba'i sras po la la brtson 'grus gnas / /zhes pa nas/ de dag brtson 'grus byang chub mchog la zhugs//zhes pa'i bar du ni sems can mos pas spyod pa'i sa na pha rol tu phyin pa drug tshol bar spyod pa bstan pa'i phyir 'di man chad tshigs bcad rtsa ba phyed dang bcu bzhis bstan to/ /de la dang po 'dis ni brtson 'grus bstan/ /de'i 'og ma gcig gis ni tshul khrims bstan/yang phyed dang gnyis kyis ni bzod pa bstan/ yang gnyis kyis ni bsam gtan bstan/ lngas ni sbyin pa bstan/ gsum gyis ni shes rab bstan te/ 'di ni dang po brtson 'grus rtsom pa yang sdig pa mi dge ba'i chos skyes pa bsal ba dang dge ba'i chos ma skyes pa bskyed par bya ba la sogs pa'o//mdo las/ la la srung ba rtag tu rnam dag pa/ /zhes pa nas/ de las spyod pa yongs su rdzogs par 'gyur/ /zhes pa'i bar du ni bslab pa la gnas shing sgo gsum la spyod pa skyon med par gyur pa'o/ /ji ltar rin po che phyi nang gsal ba 'od yod pa kun gyi yid du 'ong ba bzhin tshul khrims ma nyams pa skyon med par gyur pa'o//rgyal sras la la bzod pa'i stobs can te/ /zhes pa nas/ /bzod pa de dag byang chub mchog la zhugs/ /zhes pa'i bar du ni rdeg pa dang spyo ba dang smad pa la sogs pas sma dbab pa sna tshogs nyams su len cing bzod pa'o//de bzod pa yang rnam pa lnga'i tshul gyis bzod de/ thog ma med pa nas gnyen du gyur pa'i bsam pa dang / chos la bsam pa dang / sdug bsngal la bsam pa dang / mi rtag pa la bsam pa dang / sdug bsngal ba'i bsam pas bzod pa'o//mdo las/ bdag mthong byang chub sems dpa' la la ni/ /zhes pa nas/ de dag bsam gtan byang chub mchog la zhugs/ /zhes pa'i bar gyis ni bsam gtan la gnas pa bstan te/ g.yeng ba'i skyon 'di dag bstsal te gnas so/ / rnam par rtog pa dang rtsed mo'i dga' ba dang / byis po ma rabs spang ba dang / bshes gnyen ngan pa dang mi 'grogs shing sems sdud pa'o/ /yang mdo las/ la las de bzhin sbyin pa byin pa ni/ /zhes pa nas/ sbyin pa de dag byang chub mchog la zhugs/ /zhes pa'i bar du sbyin pa rnam pa sna tshogs bstan pa'o//sbyin pa de dag kyang rgya cher sbyin pa dang / mi skyo bar sbyin pa dang / dga' bar sbyin pa dang / chags pa med par sbyin pa dang / dge ba'i rgyur 'gyur ba'i sbyin pa'o/ /de la kha zas kyi sbyin pa byas na ni mu ge'i bskal par mi skye/ sman byin pas ni bla na med pa'i chos kyi sman dang ldan par 'gyur//gos byin pas ni rin po che sna bdun dang ldan zhing khrel dang ngo tsha yod par 'gyur/ khri stan la sogs pa byin pas ni bsod nams dang ye shes kyi tshogs dang ldan par 'gyur/ ra ba dang skyed mos tshal byin pas ni gzungs kyi skyed mos tshal dang ldan par 'gyur/me tog byin pas ni byang chub kyi yan lag bdun dang ldan par 'gyur/ 'bras bu byin pas ni 'phags pa'i 'bras bu bzhi dang ldan par 'gyur/ rdzing dang khron pa byin pas ni rnam par grol ba'i chu dri ma med pa dang ldan par 'gyur zhes gsungs so//mdo las/ de dag byang chub mchog zhugs ye shes kyi/ /zhes bya ba nas/ de dag shes rab byang chub mchog la zhugs/ /zhes pa'i bar du ni shes rab kyi mtshan nyid bstan te/ mtshan ma med pa gnyis su med pa nam mkha' dang mtshungs pa'o//mtshan ma yod pa dang mtshan ma med pa ni gzhan gyi don de dang bdag gi don la spyod pa'i ye shes so/ /mdo las/ gang gis gzhan yang mthong ba 'jam pa'i dbyangs/ /zhes pa nas/ rgyal ba'i ring bsrel dag la rim gro byed/ /ces pa'i bar du ni 'di man chad dum bu drug ste/tshigs bcad rtsa ba bdun gyis mchod rten slong ba bstan/ de la yang rnam pa gnyis te/ ring bsrel mchod pa dang mchod rten la mchod pa'o/ /yang byang chub sems dpa' la mchod pa dang 'khor brgyad la mchod pa'o/ /mdo las/ mchod rten bye ba stong phrag mi nyung ba//zhes bya ba nas/ /dril dang dril bu g.yer kha rtag tu 'khrol/ /zhes pa'i bar 'dis ni mchod rten slong ba bstan te/ bcom ldan 'das mya ngan las 'das pa'i 'og tu ring bsrel gyi mchod rten la mchod pa dang rim gro byas na bskal pa du mar ngan song du mi lhung byang chub chen po'i tshogs kyang rdzogs par 'gyur zhes bstan to//dpag tshad ces pa ni gzhu 'dam lnga brgya la rgyang grags gcig /rgyang grags brgyad la dpag tshad gcig go/ /mdo las/ me tog dri dang de bzhin sil snyan gyi/ /zhes pa nas/ 'di 'dra'i mchod rten rgyal ba'i ring bsrel la//zhes pa'i bar du ni 'khor brgyad kyis mchod pa bstan to/ /mdo las/ gang gis phyogs bcu'i de dag brgyan pa ni/ /zhes bya ba nas/ lha dang bcas pa'i 'jig rten rgyas pa 'di / /zhes pa'i bar du ni mchod rten de byas pas 'jig rten thams cad la mdzes pa ni dper na lha'i me tog pa ri ya ta rgyas pa bzhin du mdzes pa bstan to//mdo las/ rgyal bas 'od zer gcig pu 'di btang bas/ /zhes pa nas/ stong phrag mang po'i zhing rnams ston pa'o/ /zhes pa'i bar du tshigs bcad rtsa ba brgyad kyis ni gsol ba'i don bstan te/ rtsa ba bzhis ni lan btab pa'o//mdo las/ ltas rnams mthong nas bdag cag ngo mtshar thob/ /ces pa nas/ the tshom sol la dga' ba bskyed par gyis / /zhes pa'i bar du ni bdag dang gzhan gyi re ba skong bar bstan pa'o/ /mdo las/ bde gshegs sras po khyod kyis lung ston cig ces pa nas/'di 'dra'i rgya chen 'od kyang rab tu btang / /zhes pa'i bar du 'dis ni dris pa'i lan gsol ba'o/ /mdo las/ bde gshegs sras po khyod kyis lung ston la/ /zhes pa nas/ 'di yi rgyu ni chung bar mi 'gyur te/ /zhes pa'i bar du ni dris pa'i lan btab pa dang /lung bstan pa dang / don che ba bstan pa dang / zhing rnam par dag pa 'di'i don chung ba ma yin par bstan pa'o/ /mdo las/ zhing rnams stong phrag du ma gang bstan pa/ /zhes pa nas/ 'jam dbyangs 'di ru ci zhig lung ston ces/ /zhes pa'i bar du ni dris pa'i lan dngos su btab pa'o//mdo las de nas zhes pa nas rigs kyi bu rnams zhes pa'i bar du ni 'jam dpal gzhon nur gyur ba lan glon par nus pa ni 'grel pa las/ 'jam dpal sngon gyi gnas rjes su dran pa'i ye shes kyis 'das pa rgyu dang 'bras bu phun sum tshogs pa mngon du gzigs pa'i phyir lan glon nus pa ste/rjes su dpag pa'am yid tshod tsam gyis lan 'debs pa ma yin no/ /'jam dpal gyis rang gi sku sangs rgyas mang po la bya ba byas pa'i rgyu de da ltar gyi 'bras bu 'di nyid pas sngon dam pa'i 'od ces bya ba'i dge slong du gyur pa na/ de bzhin gshegs pa las chos 'di mngon du thos pa'i phyir/da 'gro ba mang po la ston nus te/ 'di man chad dum bu gsum du bcad de ston to/ /dang po ming smos te mdor bstan pa dang / dris pa'i lan gdab pa dang / 'og ma nyan pa rnams la gdams pa dang gsum mo/ /mdo las 'di ni bde bar gshegs pas chos chen po bsgrags shing yang dag par brjod par mdzad par dgongs pa zhes pa ni dris pa'i lan gdab pa ste/'di 'grel pa las lan gdab pa la don rnam pa bcu ste/ don chen po mngon du mthong ba'i rgyu ste 'di nyid yin pa dang / rigs kyi bu rnams nga sngon 'das pa'i dus 'jig rten gyi tshig dang 'bru dang le'u shin tu zab pa'i rgyu dang mthong ba dang / yang rigs kyi bu rnams sngon 'das pa grangs med dpag tu med pa nas ngo mtshar rmad du bya ba'i rgyu mthong ba sngon yang de bzhin gshegs pa nyi zla sgron ma zhes bya ba nas rgyu dam pa mthong ba dang /yang de bzhin gshegs pa nang gi tha ma khyim nas ma byung ba nas longs spyod pa'i rgyu chen po mthong ba dang / sangs rgyas mya ngan las 'das pa'i 'og tu dam pa'i 'od byang chub sems dpa' dam pa'i chos 'di 'dzin pa nas de bzhin gshegs pa rnams kyi chos sdud cing 'dzin pa'i rgyu mngon du mthong ba dang yang nyi zla sgron ma de bzhin gshegs pa'i sras brgyad po yang dam pa'i 'od la brten nas shin tu brtan pa'i de bzhin gshegs pa mngon du mthong ba'i rgyu dang rgyal bu de dag gis mchod pa dang rim gro grangs med par byas pas 'jug par nus pa'i rgyu mngon du mthong ba dang /de bzhin gshegs pa nang gi tha mar mngon par sangs rgyas pa sgron ma mdzad pa la mngon du dran pa'i rgyu mthong ba dang / byams pa khyod kyis shes par gyis shig/ /de'i tshe dam pa'i dbyangs byang chub sems dpa' dam pa'i 'od la bdag nyid kyis mngon du spyad pa spyad pa'i rgyu mthong ba ste/rgyu ni gtan tshigs kyi don to/ /'jam dpal gzhon nur gyur pas gtan tshigs de dag mngon du gyur pa las dpag nas 'phags pa byams pa la lan btab pa'o/ /rgyu de bcu yang don lngar bsdus te/ don bstan pa dang / ya mtshan du gyur pa dang /grol ba dang bcings pa dang / brtson 'grus bstan pa dang / bdag dang gzhan du sbyar ba'o/ /rgyu bcu po de dag kyang ltas las dpags te lan gdab pa dang / sngon gyi dang da ltar sbyar te lan gdab pa dang / don gzhan las gleng ste lan gdab pa dang / sngon gyi lugs dang sbyar te lan gdab pa'o//de la'ang dang po'i gnyis dang / tha ma'i gcig ni gong ma'i rim pa bzhin du sbyar/ bar gyi bdun po ni gzhan las glengs te lan gdab pa dang sbyar ro/ /'di ni ltas las dpags te lan gdab pa'o/ /'grel pa las don chen po mthong ba'i rgyu phun sum tshogs pa mthong ba ni ltas rnam pa brgyad do //chos chen po'i char 'bebs pa dang / /chos kyi rnga brdung ba dang dung 'bud pa la sogs pa'o/ /'grel pa las the tshom can rnams the tshom bsal ba'i phyir chos chen po 'chad de the tshom ma chod na ye shes kyi lus smin par bya ba'i phyir chos kyi char chen po phab pas dge ba'i myu gu skyes te 'phags pa'i gnas thob par 'gyur ro//dbang po smin pa rnams spyod yul gsang ba rnam pa gnyis ston to / /nyan thos rnams la ni chos kyi rnga chen po brdung ngo / /byang chub sems dpa' rnams la bla ma'i bla ma rnam par dag pa'i don bstan pa'i phyir chos kyi rgyal mtshan bsgreng ba/byang chub sems dpa' chos kyi ye shes rtogs pa'i phyir ye shes kyi sgron ma snang bar mdzad pas chos kyi sgron ma 'bar bar mdzad pa'o/ /ye shes thams cad mngon du gyur pa'i phyir tshig 'bru dang don bsgrags pa'i phyir chos kyi dung 'bud pa zhes pa'o//de dag kyang sdig pa spong zhing dge bar 'jug pa dang / drang ba'i don gyis nges pa'i don ston pa dang / shes rab kyis yang dag pa'i don chud pa dang / chos ston pas 'gro ba la phan pa'o/ /mdo dang 'brel pa las 'byung ba 'di dag ci rigs pa dang gar 'os su sbyar ro//mdo las rigs kyi bu 'di ni de bzhin gshegs pas chos chen po bshad par dgongs pa ste zhes pa ni 'jig rten gyi tshig 'bru'i don shin tu zab pa'i rgyu ston te/ de ni sngon gyi lugs las drang ste nga 'di lta'o zhes don sbyar ba'o/ /mdo las rigs kyi bu rnams bdag gis ji lta bur spobs pa dang /ji ltar sngon gyi de bzhin gshegs pa zhes pa nas 'od zer btang zhing snang ba thog ma mthong ba mngon par bstan to zhes pa'i bar du ni gzhung bzhin du chud par bya'o/ /mdo las rigs kyi bu rnams bdag gis dran pa 'das pa'i dus bskal ba grangs med pa'i yang grangs med pa zhes pa ni rgyu brgyad sbyar dum bu gnyis su phye ste/tshig lhug pa dang tshigs su bcad pas bsdu ba'o/ /sngar rgyun gyis na don gzhan las glengs te lan btab/ rgyu gcig gis sngon gyi lugs las dras te lan btab/ dang po la yang rnam pa gsum ste/ngo mtshar du gyur pa las bstod de lan btab pa dang / phyis khyad par du gyur pa las lan btab pa dang / phyi ma lngas ni don mthun pa las dras te lan btab/ ngo mtshar du gyur pa las bstod de lan btab pa ni 'grel pa las ya mtshan mngon du gyur pa'i rgyu dang sbyar ro//grangs med pa'i yang grangs med pa zhes pa ni bskal pa'i dus yun ring bas ste/ bskal pa grangs med pa zhes pa ni grangs kyi mtha' lnga bcu rtsa gnyis la grangs med pa zhes bya'o/ /yang na bskal pa zhes pa ni lha'i tshe dang sbyar ba'i bskal pa dang / lo dang dus mi mthun pa'i bskal pa zhes 'dir bskal pa zhes pa ni lo dang sbyar te/de bzhin gshegs pa rnams kyi bskal pa chen po na brgya lam na lan gcig 'byung bas/ 'jam dpal gyis thos pa'i dus ha cang yun ring ba'i phyir ro/ /mdo las rgyang ring ba dpag tu med pa bsam gyis mi khyab pa bskyang du med pa/tshad med pa de'i pha rol gyi yang ches pha rol tu gyur pa de'i dus de'i tshe na zhes pa nas sangs rgyas bcom ldan 'das 'jig rten du byung ste zhes pa'i bar du ni nyi zla sgron ma de bzhin gshegs pa ni nyi ma la don rnam pa gnyis te/ snang ba'i don dang smin pa'i don to/ /zla ba la don rnam pa gnyis te/ the tsom sel ba'i don dang bsil ba'i don to/ /sgron ma la yang rnam pa gnyis te mun pa sel ba dang / snang ba mched pa'i don no/ /de bzhin gshegs pa dgra bcom pa zhes pa ni de bzhin gshegs pa yon tan gyi mtshan rnam pa bcu'o/ /de bzhin gshegs pa ni sngon gyi de bzhin gshegs pa'i lugs bzhin du gshegs pa'i phyir de bzhin gshegs pa'o//yang de bzhin gshegs pa ni gang nas kyang ma byon/ gang du yang mi bzhud pa'i phyir de bzhin gshegs pa de chos kyi sku'o/ /yang na de bzhin nyid kyi bden pa las byung ba'i phyir de bzhin gshegs pa'o/ /dgra bcom pa zhes pa ni nyon mongs pa'i dgra thams cad bcom pa'i phyir dgra bcom pa'o//shes bya'i sgrib pa thams cad spangs pa'i phyir yang dag par rdzogs pa ste/ rig pa dang zhabs su ldan pa ni sngon gyi gnas dran pa'i rig pa dang 'chi 'pho shes pa dang / zag pa zad pa shes pa'i rig pa ni rig pa'o//bstan pa dang / spyod pa dang smon lam rnam par dag pas 'tsho ba dag par gyur pa ni zhabs te/ rig pa dang zhabs su ldan pa'o/ /bde bar gshegs pa ni bdag dang gzhan la phan 'dogs pa'i yon tan chen po dang ldan pas byang chub chen por gshegs pa'i phyir bde bar gshegs pa'o//'jig rten mkhyen pa zhes pa ni snod dang bcud kyi 'jig rten ma lus par mkhyen pa dang ci 'dul ba so sor mkhyen pa dang / sems can gyi spyod pa brgyad khri bzhi stong mi mthun pa so sor mkhyen pa dang / snod kyi 'jig rten 'jig pa dang chags pa mkhyen pa dang / sems can so so'i rang bzhin dang /rgyu rkyen la sogs pa kun mkhyen pa'o/ /bla na med pa skyes bu 'dul ba'i kha lo sgyur ba ni zla med pa'i phyir bla na med pa skyes bu chen po'i mtshan bzang po dang ldan pa phul du gyur pa'i phyir ro/ /lha dang mi'i mkhan po ni lha dang mis don zab mo chud pa'i skal ba dang ldan pas de'i mkhan po zhes bya'o//sgrib pa thams cad bsal te/ chos thams cad mngon du gyur pa ni sangs rgyas so/ /bcom ldan 'das zhes pa ni bdud rnam bzhi bcom la/ dbang phyug la sogs pa yon tan drug dang ldan pa'i phyir bcom ldan 'das so/ /mdo las des chos thams cad ces pa nas tshangs par spyod pa yang dag par ston pa zhes pa'i bar du ni chos khyad par can du bstan pa'i phyir te/thog mar dge ba ni thos pa tsam gyis dga' ba'o/ /bar du dge ba ni sgom pa la bar chad med cing mtha' gnyis spangs pa'i spyod yul dri ma dang bral bas 'jug pa'o/ /tha mar dge ba ni spyod pa dang sgrub pa'i mthar phyin pa'i 'bras bu la gnas pa'o//yang na thog mar dge ba ni sbyin pa/ bar du dge ba ni tshul khrims/ tha mar dge ba ni ting nge 'dzin to/ /yang na sdug bsngal shes pa dang kun 'byung spangs pa ni thog mar dge ba/ yang dag pa'i lam bsgom pa ni bar du dge ba/'gog pa mngon du gyur pa ni tha mar dge ba ste/ nyan thos pa dang sbyar ro/ /byang chub ni sems mi gtong ba dang / theg pa gnyis par mi bsngo bar bla na med pa'i ye shes thob pa ni byang chub sems dpa'i thog ma dang bar ma dang tha mar dge ba'o//'phags pa'i lam yan lag brgyad yang dag pa'i ngag la sogs pas tshig sbyar legs shing don zab mo dang ldan pas mang po la phan par 'gyur ba/ mu stegs kyi lam dang ma 'dres pa/ don dang tshig tshang ba khyad par du 'phags pa ni don bzang ba tshig 'bru bzang ba ma 'dres pa/yongs su rdzogs pa zhes bya'o/ /yongs su dkar pa ni rnam par grol bar 'gyur ba'o/ /tshangs par spyod pa ni 'phags pa'i yan lag brgyad dang 'gog pa'i bden pa dang / tshangs par spyod pa ste/ lam de gzhan dang ma 'dres pa'i phyir ma 'dres pa'o/ /mdo las 'di ltar nyan thos rnams la zhes pa nas ye shes kyi mtha'i bar du chos ston to zhes pa'i bar du ni 'gro ba la phan gdags pa'i phyir chos ston pa ste/de bzhin gshegs pa 'jig rten du byung nas theg pa rnam pa gsum gyis chos ston pa ni nyan thos pa rnams la bden pa bzhi bstan / rang sangs rgyas la rten cing 'brel par 'byung ba bcu gnyis bstan/byang chub sems dpa' rnams la pha rol tu phyin pa drug ston pa yang dbang po'i rim pa bzhin du gyur to/ /mdo las yang rigs kyi bu nyi zla sgron ma zhes pa nas 'di lta bar dwa dza'i rigs su mthun pa yang de bzhin gshegs pa stong phrag nyi shu byung zhes pa'i bar du ni phyir 'byung ba khyad par can las dpags te lan btab pa'o//'grel pa las rgyu khyad par can mngon du mthong ba'i rgyu ste/ rigs dam pa dang ming dam pa dang ldan par bstan pa'i gtan tshigs smos pa'o/ /mdo las de la ma pham pa de bzhin gshegs pa stong phrag nyi shu po de dag ces pa nas khab na gnas shing rab tu ma byung ba'i tshe sras brgyad yod do zhes pa'i bar du ni don mthun pa las dris te lan btab pa'o//yang rgyu rnam pa lnga ste longs spyod che ba'i rgyu dang / de bzhin gshegs pa rnams chos kyi 'khor lo bskor ba'i rgyu dang / de bzhin gshegs pa shin tu bstan pa'i chos kyi 'khor lo'i rgyu dang /'jug par 'gyur ba'i rgyu dang dran pa'i rgyu'o/ /de la yang rnam pa gnyis te/ rgyu dang po ni bcom ldan 'das chos ston pa'o/ /rgyu phyi ma ni mya ngan las 'das pa'i spyod pa'o/ /longs spyod pa'i rgyu chen po ni 'grel pa las sngon bcom ldan 'das rgyal bu mdzad pa nas longs spyod chen po spangs te/khab nas byung bar mdzad na 'gro ba ma rabs rnams kyis yun da srid du skyo ba'i sems mi skyed pa de ngo mtshar du bstan pa'o/ /longs spyod kyang rnam pa gnyis te/ khyim na gnas shing sdod pas longs spyod pa dang / khyim nas byung nas chos la longs spyod pa'o//bcom ldan 'das khab nas ma byung ba'i tshe sems can bsgral ba'i ched du 'dod pa la longs spyod pa dang sras mnga' bar yang bstan to/ /mdo las 'di lta ste blo gros zhes bya ba nas chos kyi blo gros kyi bar du gzhon nu de dag ni shes rab che ba dang / thugs rje che ba dang / yod pa dang med pa la mkhas pa dang / dge ba la 'jug cing sdig pa spong ba las mtshan du btags pa she dag go/ /mdo las ma pham pa bcom ldan 'das zhes pa nas longs spyod cing de dag rgyal po byed do zhes pa'i bar du ni go sla bas ma bshad do/ /mdo las de dag gis bcom ldan 'das de khab nas mngon par 'byung bar shes shing zhes pa nas dge ba'i rtsa ba bskyed par gyur to zhes pa'i bar du ni rab tu byung ba bstan te/rten dam pa dang 'grogs pa dang nyon mongs pa las 'byung bar rtsol ba rgyu dam pa la sbyor zhing bsod nams dang ye shes kyi tshogs bsgrub pa'o//mdo las ma pham pa de'i tshe na yang zhes pa nas sangs rgyas thams cad kyis yongs su zin pa bshad nas zhes pa'i bar du ni dus mthun par grub pa bstan to/ /de'i tshe skad cig yud tsam thang cig ces pa nas sems mi g.yo'o zhes pa'i bar du ni spyod lam mthun pa bstan [(]ta[,]to[)]/ting nge 'dzin du zhugs pa dang snod kyi 'jig rten dang bcud kyi 'jig rten te 'di dang po'o/ /mdo las me tog man dA ra ba nas rab tu 'khrug pa'i bar gyis ni snod kyi 'jig rten bstan to / /ma pham pa de'i tshe 'khor der zhes pa nas rmad du dga' bar gyur to zhes pa'i bar du 'dis ni bcud kyi 'jig rten bstan to//mdo las de nas de'i tshe bcom ldan 'das zhes pa nas shin tu khyab par snang ba'i bar du ni ston pa mthun pa'i rgyu ste 'od gtong pa dang snang bar bya ba dang srung bar byed pa bstan to/ /mdo las ma pham pa 'di lta ste zhes pa nas ngo mtshar du gyur rmad du gyur/ltad mo rab tu byung ngo zhes pa'i bar du ni de yang chos thos par dga' ba dang / sngon gyi rgyu bstan par 'dod pa'o/ /gzhan ni go sla bas ma bshad do/ /mdo las ma pham pa de'i tshe na yang bcom ldan 'das de'i bstan pa la 'od mchog ces bya ba'i byang chub sems dpa' zhes pa nas brgyad brgya yod do zhes pa'i bar du ni de dang mthun pas lan btab pa ste/snang bar byed pa'i 'khor mdo 'di las gleng ba dang yun ring ba dang 'khor skyid pa ste 'di ni dang po'o/ /mdo las bcom ldan 'das de yang zhes pa nas lus skyo ba yang med sems skyo ba yang med ces pa'i bar du 'di dag ni mdo 'di gleng ba dang dus ring thung dang 'khor bzhi dga' zhing mos pa go rims bzhin du sbyar te/gzhan ni go sla bas ma bshad do/ /mdo las de nas bcom ldan 'das nyi zla sgron ma zhes pa nas mya ngan las 'das so zhes pa'i bar du ni ltas kyi lugs mthun pa bstan pa ste/sangs rgyas mya ngan las 'das pa ni theg pa rnam pa gnyis las khyad par du bstan pa'i phyir lhag ma ma lus pa'i mya ngan las 'das pa'o/ /mdo las de nas ma pham pa zhes pa nas lung bstan nas zhes pa'i bar ni dge ba'i rtsa ba smin pa'i phyir lung bstan pa yin no//mdo las dge slong rnams dpal gyi snying po byang chub sems dpa' zhes pa nas sangs rgyas su gyur to zhes pa'i bar du ni yang sangs rgyas 'jig rten du byung ba don rnam pa lnga'i phyir te/ chos kyi 'khor lo bskor ba dang pha ma byang chub la dgod pa dang / ma dad pa rnams dad par bya ba dang byang chub tu sems ma bskyed pa rnams sems bskyed pa dang /lung ma bstan pa rnams lung bstan pa'o/ /mdo las dge slong rnams dpal gyi snying po zhes pa nas dgra bcom pa yang dag par rdzogs pa'i sangs rgyas su 'gyur ro zhes pa'i bar du ni de bzhin gshegs pa shin tu bstan pas chos 'dzin pa'i rgyu'o//'grel pa las bcom ldan 'das de mya ngan las 'das nas bskal pa grangs med pa'i 'og tu de bzhin gshegs pas shin tu bstan pa'i chos 'dzin par 'gyur ro/ /mdo las de la ma pham pa de'i sras blo gros la sogs pa zhes pa nas mngon par sangs rgyas nas zhes pa'i bar du ni 'jug par nus pa'i rgyu bstan te/mchod pa dang rim gro ni chos dang zang zing gi spyod pas so/ /mdo las de dag gi tha ma mar me mdzad de bzhin gshegs pa dgra bcom pa yang dag par rdzogs pa'i sangs rgyas yin no zhes pa nas rim gror byas so zhes pa'i bar du ni dran pa'i rgyu dang bstan pa'i rgyu dang dag pa'i rgyu bstan to//mdo las ma pham pa khyod de'i dus na zhes pa nas chos smras pa yin no zhes pa'i bar du mthun pa'i don gyis lan btab pa dang / sngon gyi lugs las lan btab pa ste 'di ni nga'i yin no zhes pa ni gtan tshigs kyi rgyu smras so/ / mdo las gang yang grags 'dod byang chub sems dpa' zhes pa nas snyam byed do zhes pa'i bar du ni spyir bsdus te lan btab pa'o/ /mdo las de nas 'jam dpal zhes pa nas mtha' yas bye ba stong rnams shes pa'i bar du ni 'di man chad tshigs su bcad pa bzhi bcu rtsa gsum gyi don snga ma rnams bzlas te snga ma'i lugs kyi ltas bstan to//mdo las de'i tshe rgyal po de'i sras su gyur pa de'i zhes pa nas thams cad rab tu byung ngo zhes pa'i bar du ni 'di man chad tshigs bcad sum cu rtsa brgyad kyis don mthun pa'i lugs bstan te/ rgyu lnga pa dang sbyar ro/ /tshigs su bcad pa nyi shu rtsa dgus ni longs spyod kyi rgyu che ba bstan/tshigs su bcad pa dgus ni rgyu bzhi po bstan/ dang po la'ang rnam pa bzhi ste/ dang po'i tshigs su bcad pa nyi shus ni ltas mthun pa bstan/ de'i 'og ma tshigs su bcad pa bzhis ni mya ngan las 'das pa mi mthun pa bstan/ yang phyed dang gsum gyis ni lung bstan pa bstan/tshigs su bcad pa gnyis kyis ni mya ngan las 'das pa bstan to/ /dang po la'ang rnam pa drug ste 'khor phun sum tshogs pa dang dus phun sum tshogs pa dang / spyod lam phun sum tshogs pa dang / rgyu phun sum tshogs pa dang / thos pa phun sum tshogs pa dang /lam phun sum tshogs pa'o/ /tshigs bcad dang po gnyis kyis ni khyim na gnas pa bstan/ de'i 'og ma gnyis kyis ni rab tu byung ba bstan to/ /mdo las/ 'jig rten mgon po de yis chos bshad pa/ /zhes pa nas/ /srog chags stong phrag bye ba dag las bshad//ces pa'i bar du ni dus phun sum tshogs pa bstan to/ /mdo las rnam par 'dren pa zhes pa nas bzhugs nas bsam gtan mdzad ces pa'i bar du ni spyod lam phun sum tshogs pa bstan te/ de la tshigs bcad gcig gis ni bsam gtan la 'jug pa bstan/ de'i 'og ma gnyis kyis ni snod dang bcud kyi 'jig rten bstan to/ /mdo las rdzu 'phrul gyi me tog ces pa nas/ zhing rnams thams cad de ma thag tu g.yos/ /zhes pa'i bar du 'dis ni snod dang bcud kyi 'jig rten bstan te/ de la yang snyoms par 'jug pa dang me tog gi char 'bab pa dang /mchod pa bstan pas g.yo ba la sogs pa bstan pa'o/ /mdo las/ de ni ngo mtshar rmad du gyur/ /ces pa nas/ rab tu snang bas 'jig rten thams cad mdzes/ /zhes pa'i bar du ni rgyu phun sum tshogs pa ste/ 'od gtong ba dang yul snang bar byas pa dang / sangs rgyas kyis kyang mngon du snang ba ste/'di ni dang po'o/ /mdo las/ sems can rnams kyi shi 'pho skye ba ston/ /zhes pa nas des mngon du mthong ba bstan te/ dang po tshigs bcad phyed dang drug gis ni 'gro ba drug bstan/ tshigs bcad gsum gyis ni sangs rgyas mthong ba bstan/ gcig gis ni chos thos pa bstan/gcig gis ni 'khor bzhi mthong ba bstan/ tshigs bcad bzhis ni byang chub sems dpa' mthong ba bstan te 'di ni dang po'o/ /'gro ba ni las dang rgyu rnams kyis 'gro bar byed pa'o/ /mdo las/ 'di ltar de na la las rin chen zhing / /zhes pa nas/ / rnam par 'dren pa'i 'od zer de yi mthus / /zhes pa'i bar ni sangs rgyas mthong ba bstan te/ zhing mthong ba dang mchod pa mthong ba dang sangs rgyas mngon du mthong ba dang gsum ste 'di ni dang po'o/ /shAkya thub pa'i 'od kyis ni gser gyi kha dog tu snang bar byas/ nyi zla sgron ma'i 'od kyis shel dang bai DUr+ya'i 'od du snang bar byas te/theg pa chen po 'di gzhan dang ma 'dres pa nyid dam pa yin par bstan pa'i phyir ro/ /mdo las/ lha dang mi dang de bzhin gnod sbyin klu/ /zhes pa nas/ gser gyi mchod sdong lta bu lta na mdzes/ /zhes pa'i bar du ni 'khor brgyad rnams kyis mchod nas de bzhin gshegs pa mthong ba'o//mdo las/ bai DUr+ya yi dbus na gser gzugs bzhin/ /zhes pa nas/ chos 'di rab tu gsungs zhes pa'i bar du ni chos thos par bstan to/ /mdo las/ so so'i zhing du rnam par 'dren pa yi/ /zhes pa nas/ 'di'i ci zhig ces ni phan tshun 'dri//zhes pa'i bar du 'khor rnam bzhi bstan pa dang / byang chub sems dpa' rnams kyis chos rtogs shing mos pa skye ba dang khyim na gnas pa dang rab tu byung ba gnyi gas byang chub kyi spyod pa thob pa dang / pha rol tu phyin pa la dbang du gyur par bstan to/ /mdo las/gnod sbyin lha mis de mchod ma thogs par/ /zhes pa nas/ nga yi chos mdzod 'di la khyod mngon sum/ /zhes pa'i bar du ni lan btab pa phun sum tshogs pa ste/ tshigs bcad dang po gcig gis ni bshad pa'i rgyu bstan/ phyi ma gnyis kyis ni yun ring thung bstan/ ting nge 'dzin las bzhengs ma thag tu sems can rnams byang chub la 'dzud ces pa'i don to//mdo las/ ji ltar srog chags phan phyir ngas bstan pa/ /zhes pa nas/ /de tshe rgyal bas chos rab 'di gsungs pa/ /bar gyi bskal pa drug cu tshang bar de/ /zhes pa'i bar du ni dus ring ba bstan pa dang /ltas mthun pa bstan pa dang / brtson 'grus kyis 'byung bar bstan pa dang / de bzhin gshegs pa yang bskal par ting nge 'dzin las mi bzhengs nas sems can ma rabs nyon mongs pa spong bar mi rtsol ba mi rigs par bstan pa dang / sems can la thugs rje zhing phan gdags par dgongs pa dang dus la bab pa rnams lung bstan zhing mya ngan las 'das pa'i bde ba la 'jog pa dang longs spyod che ba'i rgyu bstan te chos 'dzin cing dge ba'i rgyu la 'jug par bstan pa'o//mdo las/ /de yi slob mar gyur pa brgyad brgya dag /ces pa nas/ /de dag sangs rgyas bye ba mang po mthong //zhes pa'i bar du 'dis ni de bzhin gshegs pa shin tu bstan pa'i chos kyi rgyu bstan pa ste/ theg pa chung ngu'i tshul du bskal pa grangs med pa gsum ni lugs las bzlog pa bstan pa'o/ /bskal pa dang po'i tshe sangs rgyas shAkya thub pa mthong /de'i 'og tu sangs rgyas khrag khrig bdun cu rtsa lnga mthong / bskal pa gnyis par sangs rgyas rin chen gtsug phud mthong ste/ yang sangs rgyas khri phrag bdun cu rtsa drug mthong / bskal pa gsum par sangs rgyas mar me mdzad mthong ste/ sangs rgyas khri phrag bdun cu rtsa bdun mthong ngo //mdo las/ drang srong chen po de dag bkur sti byas/ /zhes pa nas/ /byang chub mchog tu gcig gis gcig lung bstan/ /zhes pa'i bar gyis ni 'jug par 'gyur ba'i rgyu bstan te/ kun gyis byang chub chen po thob ces pa'i don to/ /mdo las/ sangs rgyas de dag rim gyis 'byung ba yin //zhes pa nas/ /srog chags bye ba stong yang dul bar byas/ /zhes pa'i bar du tshigs bcad drug gis ni dran pa'i rgyu bstan te/ tshigs bcad dang po gcig gis ni rgyal bu brgyad la dgongs pa bstan/ de'i 'og ma lngas ni 'khor brgyad brgya la dgongs pa bstan to//mdo las/ /gang sngon bde bar gshegs pa de yi sras/ /zhes pa nas/ /phyogs rnam par grags zhes pa'i bar du ni 'khor rnams la dgongs pa bstan te/ tshigs bcad phyed dang gsum gyis nyon mongs pa'i rgyu bstan/ yang tshigs bcad phyed dang gsum gyis ni dag pa'i rgyu bstan te/'di ni dang po dang sbyar ro/ /khe dang grags pa dang cho rigs la chags pa thos par rtsol ba'i chags pa de dag grags par 'dod pa'o/ /mdo las/ de yang dge ba rnams kyis las de dag /ces pa nas/ /srog chags stong phrag bye ba 'dul bar 'gyur//zhes pa'i bar gyis ni rnam par dag pa'i rgyu bstan to/ /mdo las/ /de'i tshe le lo can du gang gyur pa/ /zhes pa nas/ /chos smra ba ni kho bo yin / /zhes pa'i bar du ni don gzhan las gleng ba rnams bstan nas sngon gyi lugs dang sbyar ba bstan pa ste/ tshigs bcad dang pos ni gang zag bstan//de'i 'og mas ni chos bstan/ de'i 'og mas ni bsdu ba ste 'di ni dang po'o/ /mdo las/ ye shes 'di yi ltas snang 'gyur/ /zhes pa nas byang chub gang 'dir zhugs zhes pa'i bar du ni chos bstan pa dang / ltas bstan nas gzengs bstod pa dang / chos zab mo la sems su gzhug pa'i phyir lha'i 'od kyis bstan pa dang /chos kyi char pa phab pas dge ba'i myu gu bskyed pa dang / byang chub tshol ba rnams the tshom bcad pa'o// // dam pa'i chos puN+Da rI ka'i 'grel pa/ bam po gsum pa/ 'di man chad thabs mkhas pa'i le'u ston te/de yang gdags pa'i gtan tshigs dang ming dgrol ba dang / rang bzhin bstan pa'o/ /'di la yang le'u brgyad gzhung yang dag par 'grel pa ste/ pad+ma chu las skyes pa dang kha 'byed pa'i don gyis dam pa'i chos kyi 'bras bu rtogs par ston te theg pa gcig po ston pa yang theg pa rnam pa gnyis bstsal nas dbang po rnam gsum lung bstan pa dang the tshom bstsal ba'i phyir dpe dang thabs rnam pa sna tshogs ston pas thabs mkhas pa'i le'u ston par dgongs pa dang /yang na le'u bcu dgu pa yang dag pa'i gzhung nyid ston pa la thabs mkhas pa'i le'u 'di man chad le'u bcu gnyis kyis theg pa gcig po ston pa'i dmigs pa ston pa dang /bde ba la gnas pa dang sa'i rum nas 'thon pa'i le'u gnyis kyis theg pa gcig po'i spyod pa bstan pa dang / de bzhin gshegs pa'i tshe'i tshad kyi le'u dang / rtag tu mi brnyas pa'i le'u dang /spyir le'u lngas theg pa gcig po'i 'bras bu bstan pa ste/ dmigs pa bstan pas ni theg pa 'di'i drang ba dang nges pa'i don mtshon nas nyan thos pa rnams de rtogs pa lung bstan pa'o/ /de la yang dang po'i le'u brgyad kyis ni drang ba dang nges pa'i don dngos po bstan pas dbang po rnam gsum lung bstan pas thob pa dang /le'u gsum gyis chos dang gang zag la bstod cing mdo 'di la gzud pa dang le'u gcig gis bkri ba'i don spangs te nges pa'i don la 'jug pa'o/ /'grel pa las 'di man chad rgyu dang 'bras bu'i mtshan nyid ston te/ gleng gzhi'i le'u bshad pa'i rjes la gzhung nyid bstan pa'i phyir rgyu dang 'bras bu ston pa'i mtshan nyid rnam pa gsum ste/ de bzhin gshegs pa rnams kyi ye shes bla na med pa'i 'bras bu'o/ /ye shes kyi 'bras bu ni mtshon par byed pa'i rgyu'o/ /phugs su 'gro ba sgo nas 'jug pa bzhin bstan pa'i lung 'di la gnas te yang dag pa'i 'bras bu len par byed pa zhes pa'i don to//de yang mdo sde 'di nyid kyi gzhung dang lugs su bstan pa yang dag pa'i ye shes kyi sgo dbye ba dang / de bstan pa dang de rtogs pa dang / de chud pa ste/ de nyid rgyu dang 'bras bur blta'o//theg pa rnam pa gsum gyi gzhung thos/ theg pa rnam pa gcig gi tshul la zhugs pa de nyid kyi 'bras bu thob pa ni chos kyi pad+mo zhes pa'i don to/ /'di ming bshad pa ni de bzhin gshegs pa'i ye shes la rnam pa gnyis te/ yang dag pa'i ye shes dang sbyor ba'i ye shes so/ /yang dag pa'i ye shes kyang 'dus byas dang 'dus ma byas kyi ye shes dang gnyis su dbye ba la/'dir ni zag pa med pa'i ye shes rtsa ba dang rgyab nas thob pa'i ye shes gnyis dang sbyar ro/ /sbyor ba ni yang dag pa'i ye shes la sbyor zhing 'jug pa'i phyir kun rdzob kyi ye shes te thabs nyid do/ / thabs de yang bdag dang gzhan gyi don sgrub pa la sbyor ba/ sgrub pa la mkhas pa de thabs zhes gdags so/ /de yang 'og ma 'dres pa dang / bla ma la sbyar ba'o/ /ji ltar mdo las snod mi gtsang ba 'dzin cing gos mi gtsang ba gyon pas mngon par byang chub pa ni lus kyi thabs so/ /bden pa bzhi la sogs pa chos kyi 'khor lo bskor ba dang /theg pa chen po la 'jug pa'i mdo ston pa ni/ ngag gi thabs mkhas pa'o/ /sngon gyi de bzhin gshegs pas mdzad pa dang 'dra bar thabs mkhas pa rnam pa sna tshogs dgongs pa ni yid kyi thabs mkhas pa'o/ /yang na 'dren pa'i thabs mkhas pa ste phyi rol gyi drug spyod pa'o//bsngo ba la thabs mkhas pa ste nang du drug spyod pa'o/ /'di rang bzhin ni shes rab kyi rang bzhin te/ rnam par mi rtog pa'i ye shes so/ /yang na phyis thob pa'i ye shes te gzhan la phan 'dogs pa'i phyir spyod pa dam pa dang ldan pa'i phyir zhes kyang 'chad do//mdo las de nas bcom ldan 'das dgongs pa dang ldan zhing zhes pa nas rang sangs rgyas thams cad kyis shes par dka'o zhes pa'i bar du ni 'di man chad tshig rkyang pas rgyas par bshad pa dang / tshigs su bcad pas bsdus te bstan pa'i don ni dam pa'i chos kyi don chud par bya ba de bzhin gshegs pa nyag gcig gis mkhyen pa de ston te/bcom ldan 'das dgongs pa dang mkhyen bzhin du ldan zhes pa ni yang dag pa'i ye shes kyis gzigs shing ting nge 'dzin las bzhengs pa'o/ /ting nge 'dzin de las bzhengs pa yang chos la mnga' brnyes pa'i don dang / bcom ldan 'das ting nge 'dzin du bzhugs pa la gzhan gyis bzhengs par bskul mi nus kyi bcom ldan 'das nyid de las bzhengs shing 'byung ba dang 'jug pa la mnga' brnyes pa ston to//de las bzhengs nas yang dag pa'i don de bzhin la bka' mi stsol gyi / shA ri'i bu zhes bos te bka' stsal pa ni shes rab mchog tu rno bas chos dam pa'i mchog snod du 'gyur ba dang 'phags pa nyan thos pa rnams gzengs bstod cing dam pa'i chos 'di 'phags pa nyan thos pa rnams kyi ched du gsungs pa dang nyan thos pa rnams byang chub chen po la gzhol zhing 'bras bu bla na med pa la gzud pa dang 'phags pa nyan thos pa rnams snying rje zhan pa yin pas byang chub sems dpa' la bka' stsal nas chos 'di la nyan thos pa rnams skal ba med pa dang don du ma bshad ces 'jug tu mi btub pa'i phyir shA ri'i bu la bka' stsal nas 'phags pa nyan thos pa gzhan yang mdo 'di la 'jug par sems bskyed pa dang blta ba dang /rtogs par dka' ba ni ye shes dang ye shes kyi sgo'o/ /'grel pa las kyang shin tu zab pa rnam pa gnyis te/ rtogs pa shin tu zab pa dang gzhung shin tu zab pa'o/ /rtogs pa ni shes rab po/ /gzhung ni shes rab kyi sgo'o/ /shes rab ces pa ni thams cad mkhyen pa dang /rnam pa thams cad mkhyen pa ste/ thams cad mkhyen pa ni yul mkhyen pa'o/ /rnam pa thams cad mkhyen pa ni gang yod pa dang med pa dang / 'dus byas dang 'dus ma byas dang zag pa dang zag pa med pa la sogs pa ste / rnam pa thams cad thugs su chud pa'o/ / shes rab kyi sgo ni gzhung shin tu zab pa ste/ de bzhin gshegs pas gsungs pa'i tshig dang don thams cad de bsam gyis mi khyab pa'i chos ye shes rnam pa lnga'i spyod yul du gyur pa'o/ /rtogs par dka' ba ni theg pa rnam gcig rang bzhin gyis shin tu zab pa bla na med pa ste/yang dag pa nyid kyi don to/ /yang zab pa ni dngos po dam pa yin pa dang chud par dka' ba'o/ /dngos po dam pa ni rtogs pa shin tu zab pa lnga'o/ /chud par dka' ba ni nyan thos dang rang sangs rgyas kyis shes par mi nus pa'o/ /shin tu zab pa lnga ni don zab pa ste don tha dad pa dang /rang bzhin zab pa ste ngo bo nyid kyi phyir dang / rang gi rig pa zab pa ste/ yang dag pa'i ye shes kyi rang rig pa'i ye shes gzhan gyis shes par mi nus pa dang / gnas zab pa ste/ chos kyi dbyings chos nyid ni de bzhin gshegs pa rnams kyi gzhi yin pa dang bla na med pa'i zab pa ste dngos po dam pa'i phyir zab pa'o//mdo las de ci'i phyir zhe na zhes pa nas shes par dka' ba'i chos shes pa rnams so zhes pa'i bar du ni 'dir gzhung las shin tu zab pa brgyad 'byung ba bstan te/ ci'i phyir zhes dris pa ni theg pa rnam gsum rnam par grol ba thob par 'dra na khyad par ci yod ces pa la shin tu zab pa 'di dag gis 'phags pa nyan thos pa las khyad par du bstan pa'i phyir shin tu zab pa'i tshig gi don rnam pa brgyad ston te/sangs rgyas mang po la bsnyen bkur zhes pa ni gzung zhing 'dzin pa dang / klog cing 'don pa shin tu zab pa bstan te/bcom ldan 'das sngon bskal ba grangs med pa gsum gyi bar du sangs rgyas chu bo gang gA'i bye ma snyed la bsnyen bkur byas shing lung mnos pa'i phyir shin tu zab pa'o/ /byang chub kyi spyad pa spyod ces pa ni mngon par sgrub pa shin tu zab pa ston pa ste/ de bzhin gshegs pa rnams bsod nams dang ye shes kyi tshogs gnyis rdzogs pas mngon par byang chub pa ston gyi nyan thos pa rgyu sgrub pa tsam du zad pa ma yin par bstan pa'i phyir shin tu zab pa 'di bstan to//brtson 'grus spyad pa rnams zhes pa ni 'bras bu sgrub pa shin tu zab pa ston te / brtun pa'i brtson 'grus kyis skyo ba dang dub pa med par bsgrubs pas 'bras bu dam pa 'thob pa ni 'bras bu shin tu zab pa'o//ngo mtshar dang zhes pa ni bsod nams spel ba'i sems shin tu zab pa ste/ byang chub sems dpa' de dka' ba spyod cing brtson pa mi gtong ba'i sems phyogs thams cad du grags pa gzhan gyis thos te ngo mtshar du gyur pa shin tu grags pa zab pa'o//rmad kyi chos dang ldan pa zhes pa ni chos dam pas tshim pa'i sems shin tu zab pa ste/ sngon ma thob pa'i chos dam pa mngon du gyur pas sems dga' ba dang mos pa skyes pa shin tu zab bo/ /shes par dka' ba'i chos shes pa ni bla na med pa shin tu zab pa ste/shes par dka' ba'i chos de dag de bzhin gshegs pa nyag gcig gis thugs su chud pas bla na med pa'i zab pa'o / /ldem po dag shes par dka'o zhes pa ni 'jug pa shin tu zab pa ste/ ming dang tshig dang / don shin tu shes par dka' ba'i phyir de bzhin gshegs pa rang gis rig pa ste/de yang shin tu 'jug par dka' ba dang / bsnyad par dka' ba'o/ /'jug pa ni bdag nyid 'jug pa'o/ /bshad pa ni gzhan la bshad par dka' ba ste/ de gnyi ga de bzhin gshegs pa nyag gcig gis spyod ces pa'o/ / nyan thos dang rang sangs rgyas kyis shes par dka' ba ni gnas pa shin tu zab pa bstan pa ste/ phyi nang gi spyod pa thun mong ma yin pa bstan pa'o/ /mdo las shA ri'i bu de bzhin gshegs pa zhes pa nas rnam pa sna tshogs kyi thabs mkhas pa dang / ye shes dang mthong ba dang / rgyu dang gzhi dang /dmigs pa dang / nges pa'i tshig dang zhes pa'i bar du ni sngar bshad pa dang chud par bya ba'i chos dam pa bstan/ de'i 'og tu de bzhin gshegs pas dgongs pa dang ston pa'i chos smra ba nyid kyi yon tan 'chad de/ de bzhin gshegs pa ston pa'i rgyu phun sum tshogs pa'o/ /thabs mkhas pa dang /ye shes mthong ba dang rgyu dang nges pa'i tshig ces pa tshig 'og mas gong ma 'brel te/ bcom ldan 'das mngon par byang chub nas sems can drang ba'i ched du gnas de dang de dag tu dpe dang thabs rnam pa sna tshogs kyis chos bstan te/ sems can chags pa'i gnas las dgrol bar mdzad do//dang po tshig de bzhi so sor dgrol ba dang de'i 'og tu tshig rnams lan gsum tsam du bzlas te 'chad pa'o/ /de yang de bzhin gshegs pa'i yon tan rnam pa bzhi rdzogs par bya ba ste/ sems can bsgral ba'i phyir byon pa dang bzhud pa ston cing thabs mkhas pa rdzogs par mdzad pa ste/dang po dga' ldan gnas na gnas pa dang mya ngan las 'das par gshegs pa'i bar du sems can la phan pa'i don rnam pa sna tshogs mdzad pa ni thabs mkhas pa'o/ /ye shes mthong ba zhes pa ni chos rnam par dag pa'i rgyu bstan pa ste/ ye shes dang gzigs pa mnga' ba'i phyir chos rnam par dag pa gzigs shing mkhyen par 'os pa ste/ sngar ni lus kyi sgo nas sems can gyi don mdzad pa bstan/ 'dir ni rigs pa dang bshad pa'i sgo nas ston pa'o/ /ye shes mthong ba zhes pa ni yon tan phun sum tshogs pa'i mtha' bstan te/ chos ston pa la dbang po dang mthun pa ci dang cis 'dul ba mkhyen pa gzigs shing chos ston pa'o/ /nges pa'i tshig ces pa ni so so yang dag par rig pa bzhis ci rigs par chos ston pa ste/ de la dang po sprul pa'i skus thabs sna tshogs kyis chos ston pa bstan/ de'i 'og mas ni chos rnam par dag pa'i rigs pas sems can gyi don mdzad pa bstan/de'i 'og mas ni yang dag pa ji lta ba bzhin du chos ston pa'i mthar phyin pa bstan/ de'i 'og mas ni so so yang dag par rig pas so so'i yid dang mthun par chos ston pa ni de bzhin gshegs pa nyag gcig gis go bar bstan pa'o//yang na tshig de bzhi yang sprul ba'i sku dang longs spyod rdzogs pa'i sku dang / chos kyi sku dang / spobs pa mtha' yas pa dang ldan pas ston pa zhes sbyar ro/ /mdo las rnam par bstan pa rnams kyis yang dag par ston te/ thabs mkhas pa de dang des/ sems can de dang de la chags pa'i rnams rab tu 'grel to zhes pa de gong gi tshig de bzhi yang dang yang du bzlas te dgrol zhing bshad pa la 'di ni thabs mkhas pas ston te/thabs mkhas pa ni mu stegs can gyi rnams thabs sna tshogs kyis yang dag pa'i bstan pa la 'dzud par mkhas pas thabs mkhas pa ste/ mu stegs can de dag kyang dge ba la 'dzud pa dang /the tsom bcad pa dang / ye shes dam pa la gzud pa dang / bsdu ba rnam pa bzhis bsdu zhing rnam par grol ba thob par mdzad pas thabs mkhas pa ste/ gong ma bzhi dang rim pa bzhin du sbyar ro/ /yang na thabs sna tshogs kyis drang zhing chags pa las dgrol ba ste/khams la chags pa dang / sa la chags pa dang / phyogs la chags pa dang / theg pa la chags pa'o/ /khams la chags pa ni khams gsum la chags pa'o/ /sa la chags pa ni tshul khrims dang / brtul zhugs dang / bsam gtan dang / ting nge 'dzin gyi sa la chags pa'o//phyogs la chags pa ni khyim pa'i phyogs dang / rab tu byung ba'i phyogs la ste las dang 'tsho ba sna tshogs dang khe dang grags pa la chags pa'o/ /theg pa la chags pa ni theg pa che chung gi lta ba la gtsor 'dzin cing chags pa'o/ /mdo las shA ri'i bu de bzhin gshegs pa zhes pa nas rmad du byung ba'i chos dang ldan te zhes pa'i bar du ni gong ma'i ye shes mthong ba zhes pas ston te/chen po ni bla na med pa mchog ces pa ni dam pa'o/ /de kun kyang ye shes rnam gnyis kyi 'khor te/ thogs pa med pa ni spobs pa so so yang dag par rig pa bzhi'o/ /stobs ni stobs bcu'o//mi 'jigs pa ni mi 'jigs pa bzhi'o/ /ma 'dres pa ni bco brgyad do/ /dbang po dang stobs ni lnga lnga'o/ /byang chub kyi yan lag ni bdun no/ /bsam gtan ni bzhi'o/ /rnam par thar pa ni brgyad do/ /ting nge 'dzin ni gsum mo/ /snyoms par 'jug pa ni dgu'o/ /de dag gi mtshan nyid dang rnam grangs bshad pa ni mdo dang gtsug lag las rgyas par bshad pa bzhin no//mdo las rmad du byung ba'i chos dang ldan pa zhes pa nas yang dag par ston pa rnams so zhes pa'i bar du ni nges pa'i tshig ston te/ 'grel pa las ston pa phun sum tshogs pa rnam pa bdun ston pa la 'di dang po ste/'jig rten dang 'jig rten las 'das pa'i chos rnams shin tu zab mor 'jug pa'o/ /mdo las shA ri'i bu zhes pa nas gyis shig ces pa'i bar du ni tshig phun sum tshogs pa dang / ming dang mtshan ma phun sum tshogs pa ston te/ de bzhin gshegs pas gsung snyan pa yid du 'ong bas chos ston te/de ni 'brug sgra ltar shin tu zab pa gsung gsal zhing dag pa rgyang du sgrog cing thos pa rnams dga' ba skye ba dang / sems la zhen par dad cing gus pa skye ba'i gsung dang / bde ba'i don go sla ba'i gsung dang / nyan pa rnams mi skyo zhing chos rnam par 'byed pa la mkhas pa'i gsung ngo //ming dang mtshan nyid phun sum tshogs pa ni de tsam gyis chog gis zhes pa ste/ sems can chos kyi snod du gyur pa rnams smin par gyur zin pa'i phyir te/ chos kyi snod la yang yang dag pa dang yang dag pa ma yin pa rnam pa gnyis te/yang dag pa ni shA ri'i bu la sogs pa'o/ /yang dag pa ma yin pa ni nga rgyal can rnams so/ /chos yang dag pa'i snod du gyur pa ni 'phags pa rnams ni dam pa'i chos kyi dga' bas sems rgyas par gyur pa'i phyir mchog ces bka' stsal pa dang / chos yang dag pa ma yin pa'i snod can rnams kyang rang gi 'phags pa'i sems thob pa tsam du sems shin tu rnam par grol ba'i chos thob pas chog par sems pas chog ces gsungs pa'o//mdo las shA ri'i bu de bzhin gshegs pa zhes pa nas ngo mtshar rab tu thob pa ste zhes pa'i bar du ni 'di bshad par 'os pa ston te/'phags pa shA ri'i bu la sogs pa dbang po smin pa rnams yon tan rmad kyi chos rnams bshad par 'os pa'i phyir ngo mtshar rab tu thob pa'o/ /mdo las shA ri'i bu de tsam zhes pa nas shA ri'i bu de bzhin gshegs pa nyid mkhyen to zhes pa'i bar du ni tshad med pa'i rnam pa phun sum tshogs pa ston te/de bzhin gshegs pa'i snying po ni mi 'gyur bas chos kyi sku'i rang bzhin te/ 'dus byas dang 'dus ma byas kyi chos thams cad mkhyen pa'i phyir rnam pa tshad med pa mkhyen pa'o/ /tshig de dag gis gong du smos pa'i thabs mkhas pa dang ye shes mthong ba la sogs pa'i tshig gi don rnams mdo sde nyid kyis bkrol ba dang bcas su bstan te/go rims bzhin du sbyar zhing chud par bya'o/ /mdo las chos de dag gang yin pa dang zhes pa nas de bzhin gshegs pa nyid mngon sum ste/ mi mngon pa ma yin no zhes pa'i bar du ni de bzhin gshegs pa yang chos thams cad mngon du gzigs shing mkhyen nas chos ston to//tshig gi don rnam pa lnga po de ni lan bzhir bzlas te bshad par bya'o/ /de la chos gang yin zhes pa ni theg pa rnam gsum la 'jug pa bkri ba'i don bsal te nges pa'i don gang yin pa la 'jug pa dang / chos de dag ji lta bu yin pa ni theg pa gcig pu la don rnam pa sna tshogs su ston pa'o//chos de dag ci 'dra ba zhes pa ni theg pa rnam gsum gyi sgor zhugs pa la spyod pa rnam par dag pa bsgrub pa'o/ /mtshan nyid ji lta bu yin pa ni theg pa rnam pa gsum gyi mtshan nyid gcig tu bstan pa'o/ /ngo bo nyid ci yin pa ni mthar theg pa gcig tu zad de gnyis dang gsum gyi ngo bo nyid med par bstan pa'o//yang 'di man chad tshig de dag las gzhan du grol na chos de dag gang yin zhes pa ni 'dus byas dang 'dus ma byas pa'i chos so/ /chos de dag ji lta bu yin pa ni rgyu dang rkyen gyis bskyed pa dang / rgyu dang rkyen gyis ma bskyed pa ste/de la rgyu dang rkyen gyis bskyed pa ni 'dus byas kyi chos so/ /rgyu dang rkyen gyis ma bskyed pa ni 'dus ma byas pa'i chos so/ / de dag ji 'dra ba ni rtag pa dang mi rtag pa'i chos te/ de yang rkyen gyis ma bskyed pa ni rtag pa'i chos so/ /rkyen gyis bskyed pa ni mi rtag pa'i chos so/ / mtshan nyid ji lta bu yin pa ni skye ba dang / gnas pa dang 'jig pa'i chos kyi mtshan nyid do / /mtshan nyid de gsum dang ldan pa ni 'dus byas mi rtag pa'i chos so/ /mtshan nyid de gsum dang bral ba ni 'dus ma byas rtag pa'i chos so/ /ngo bo nyid ci yin pa ni phung po lnga'i ngo bo nyid dang phung po lnga dang bral ba'i ngo bo nyid kyi chos te/phung po lnga ni skye ba la sogs pa'i mtshan nyid do/ /phung po lnga dang bral ba ni skye ba med pa la sogs pa'o/ /yang bshad pa gsum ni tshig de lnga las dang po'i gnyis ni gong du bshad pa dag dang 'dra/ chos de dag ci 'dra zhes pa ni rang bzhin med pa ste rten cing 'brel te 'byung ba'i chos so//mtshan nyid ji lta bu yin pa ni bltar rung ba'i mtshan nyid kyi chos rnams so/ /ngo bo nyid ji lta bu yin pa ni phung po lnga gzung ba dang 'dzin pa'i chos te/ kun 'byung gi ngo bo nyid dam lam gyi bden pas gzung ba'o/ /yang chos de dag la bshad pa bzhi ste/ chos ston pa'i byed pa la brten te bshad pa ni chos de dag gang yin zhes ba ni ming dang tshig dang 'byung ba'i tshogs kyi bshad pa'i chos so/ /chos de dag ji lta bu yin pa ni de bzhin gshegs pa'i chos rnams la brten te bshad pa'i chos rnams so/ /chos de dag ci 'dra ba zhes pa ni 'dul ba gdul bar bya ba'i sems can rnams so//mtshan nyid ji lta bu yin pa ni tshig gi sgra la brten nas chud par byed pa ste/ tshig gi sgra la 'jug pa'i mtshan nyid do/ /ngo bo nyid ci yin pa ni ngo bo tsam la brten nas chos yang dag pa la 'jug pa nges pa ma yin te/ de la chags shing zhen pa yang yod de/ chos kyi ngo bo nyid tshig gi tha snyad dang bral ba'i ngo bo nyid du rtogs pas 'jug pa bstan pa'o/ /mdo las de nas bcom ldan 'das kyis de nyid kyi don rgya cher bstan pa zhes pa nas sus kyang shes par mi nus so zhes pa'i bar du ni 'di man chad tshigs su bcad pa nyi shu rtsa gcig la rnam pa gnyis su phye ste/tshigs bcad phyed dang bco brgyad kyis ni gong gi dam pa gnyis bstan/ de'i 'og ma tshigs bcad phyed dang bzhis ni dad pa'i sems skye ba dang yang dag pa'i don ston pa bshad do/ /dang po la yang rnam pa gnyis su dbye ste/gong ma gnyis kyis ni dam pa gnyis bstan/ de'i 'og ma tshigs bcad phyed dang bcu drug gis ni dam pa gnyis kyi dbye ba bstan te 'di dang po'o/ /tshigs bcad dang pos ni ston pa'i yon tan bstan/ de'i 'og ma gcig gis ni chos kyi bsngags pa bstan to/ /mdo las/ sngon chad bsnyan cing spyad pa ni//zhes pa nas/ shes dka' shin tu lta bar dka'/ /zhes pa'i bar du ni 'di man chad tshigs bcad bco lngas dam pa gnyis kyi dbye ba ston te/ de yang rnam pa gnyis so/ /tshigs bcad bcu bzhis ni chos dam par bsngags/ de'i 'og ma gcig gis ni chos smra ba dam par bsngags pa'o//de'i dang po la yang rnam pa lngar dbye ste/ tshigs bcad dang po gcig gis ni klog cing 'don pa dang grub cing spyod pa'i shin tu zab pa gnyis bstan/ de'i 'og ma tshigs bcad gcig gis ni 'bras bu spyod cing yon tan rnam par 'phel bas sems bde ba'i dam pa thob ste shin tu zab pa gsum bstan/yang tshigs bcad gcig gis ni bla na med pa'i zab pa bstan/ yang phyed dang gnyis kyis ni 'jug pa shin tu zab pa bstan/ yang tshigs bcad phyed dang dgus ni theg pa rnam pa gnyis dang thun mong ma yin par 'dzin pa shin tu zab pa bstan te 'di ni dang po'o//mdo las/ de ltar spyad pa spyod pa ni/ /zhes pa nas/ de ni ci 'dra ba yang mthong / /zhes pa'i bar du ni tshigs bcad 'di gcig gis ni 'bras bu spyod pas bsod nams rnam par 'phel ba ston te/ sems dga' ba'i dam pa thob pa yang brtson 'grus bskal pa grangs med par spyad pas 'bras bu dam pa thob ste/ci yang mkhyen cing gzigs pa'i dam pa thob pa'o/ /mdo las/ de ni nga yis rab tu shes/ /zhes pa nas/ /de yi mtshan nyid ci 'dra ba/ /zhes pa'i bar du ni 'dis bla na med pa'i shin tu zab pa bstan te/ de'i ngo bo nyid dang gzhung ci 'dra bar de bzhin gshegs pas rab tu mkhyen ces pa'o//mdo las/ de ni bstan du mi nus te/ /zhes pa nas/ /rnam dag gang rnams dad la gnas pa'o/ /zhes pa'i bar du ni 'jug pa shin tu zab pa bstan te/ de bzhin gshegs pa'i chos ston pa ming dang tshig dang yig 'brus chos ston pa 'jug pa dang shes bar dka' bas 'jug pa shin tu zab pa'o//yang na de bzhin gshegs pa nyid zab mo 'di la gnas shing zhugs pa'i phyir mu stegs can las khyad par du bstan te/ mu stegs can lta bu rang gi chos spyod kyang chos nyid ma rtogs pa lta bu ma yin te/ rten cing 'brel par 'byung ba zab mo tshig gi tha snyad dang bral ba sems can rnams kyis 'jug par mi nus kyi/byang chub sems dpa' dad pa brtan pa la gnas pa nyag gcig gis mkhyen ces pa'o/ /byang chub sems dpa' sa dang po la gnas pa yan chad chos bzhi la dad pa'i phyir mi nur ba rnams kyi chos 'di la bzod pas bshad par 'os kyi gzhan la ma yin zhes pa'o//chos bzhi ni dkon mchog gsum dang tshul khrims la yid ches shing phyir mi nur ba'o/ /mdo las gang de 'jig rten gyis mkhyen pa'i phyir rnam par shes pa nas/ de dag yul med rgyal ba'i ye shes la/ /zhes pa'i bar du ni 'di man tshigs bcad phyed dang bcus theg pa rnam pa gnyis dang thun mong ma yin pa ston te/gnas shing 'dzin pa shin tu zab pa dang sbyar ro/ /de yang rnam pa gsum du dbye ste/ dang po tshigs bcad bzhis ni nyan thos dang thun mong ma yin pa bstan/ tshigs bcad gnyis kyis ni rang sangs rgyas dang thun mong ma yin pa bstan/tshigs bcad phyed dang bzhis ni byang chub sems dpa' dang thun mong ma yin par bstan to/ /tshig rkyang pa las ni theg pa rnam pa gnyis dang thun mong ma yin pa nyi tshe bstan/ tshigs su bcad pa las ni byang chub sems dpa' dang thun mong ma yin pa'ang ston to//nyan thos dang thun mong ma yin pa'ang dbang po rnon po shA ri'i bu lta bu dang thun mong ma yin pa dang / 'khor gzhan dang yang thun mong ma yin pa bstan pa las 'di ni dang po dang sbyar ro/ /zag pa zad pa 'phags pa dgra bcom pa'i lus thob pa'i ye shes kyis kyang mi skrun ces pa'o//mdo las gal te 'jig rten 'di dag thams cad du zhes pa nas de'i bde gshegs ye shes mi nus zhes pa'i bar du 'dis ni dbang po rnon po 'phags pa shA ri'i bu'i ye shes kyis kyang shes par mi nus pas de bzhin gshegs pa'i ye shes shes pa dang chud par dka' ba bstan to/ mdo las/ gal te khyod 'drar mkhas pa rnams kyis su/ /zhes pa nas/ thams cad 'dus par shes par mi nus te/ /zhes pa'i bar du ni phyogs bcu'i gang shes rab rnon por gyur pa 'phags pa shA ri'i bu lta bu dang / gzhan yang dbang po rno ba rnams kyi ye shes gcig tu bsdus pa'i shes rab kyis kyang shes par mi nus zhes bstan to//mdo las/ ji tsam tshad med ye shes ngas shes pa/ /zhes pa nas/ de yi yang dag don ni yongs mi shes/ /zhes pa'i bar du ni rang sangs rgyas dang thun mong ma yin pa bstan te/ rang sangs rgyas la yang bse ru bzhin du gcig pur gnas pa dang /mang po khyus lding ba ste chos rnam par 'byed pa lam zhugs pa ni gcig pu gnas pas sgrub pa'o/ /chos rnam par 'byed pa la zhugs pa ni khyus lding ba 'grub pa ste/ rnam par grol ba'i cha ma skyes pa dang rnam par grol ba'i cha skyes pa'i bye brag gis dbye'o/ /mdo las/ byang chub sems dpa' theg pa gsar zhugs rnams/ /zhes pa nas/ /'di la de dag gi yang yul med do/ /zhes pa'i bar du ni byang chub sems dpa' dang thun mong ma yin pa bstan pa ste/ byang chub kyang byang chub sems dpas mi dpogs pa dang / byang chub sems dpa' chen pos mi dpogs pa dang gnyis te/'di ni dang po'o/ /sems gsar du bskyed ces pa ni yon tan drug dang ldan pa ste/ bsnyen bkur byed pa/ don rtogs pa 'chad mkhas pa 'khor mang ba sems gcig tu gyur pa rnams kyis kyang mi dpogs zhes pa'o/ /mdo las/ phyir mi ldog pa'i byang chub sems dpa' gang //zhes pa nas/ /'di la de dag gi yang yul med do/ /zhes pa'i bar du ni dbang po rnon po'i byang chub sems dpa' chen po rnams kyis kyang mi rig par ston te/ phyir mi ldog pa'i sa brgyad pa yan chad do/ /mdo las/ zab cing shin tu phra ba'i chos shes pa/ /zhes pa nas//yun ring bshad kyang mchog gi don yin no/ /zhes pa'i bar du ni 'di man chad tshigs su bcad pa phyed dang bzhis dad pa'i sems bskyed par bskul ba ste/ de yang tshigs bcad phyed dang gnyis kyis ni shA ri'i bu la mchog gi don bstan te bskul/ 'og ma tshigs bcad gnyis kyis ni theg pa rnam gnyis kyis 'khor mang po la thabs kyis bskul ba bstan te/bcom ldan 'das kyi bstan pa 'di la dad pa bskyed cig pa'o/ /mdo las / bsgo'o nyan thos 'di dag thams cad dang / /zhes pa nas/ theg pa gsum rnams nye bar bstan pa ni/ /zhes pa'i bar du ni tshigs su bcad pa gnyis kyis theg pa gnyis pa'i 'khor la theg pa chen po bstan zhing bla na med par gtang ba'i phyir theg pa gsum pa bstan to//mdo las de nas 'khor de na zhes pa nas de dag thams cad 'di snyam du sems so zhes pa'i bar du ni 'khor bzhi po rnams kyi the tsom du gyur pa ched du glengs te bcom ldan 'das la don de dgrol bar yid kyis bsams pa'o//mdo las kye ma gang gi rgyu ci'i phyir zhes pa nas shes par dka'o zhes pa'i bar du ni the tsom gyi don nyid glengs te / theg pa rnam pa gnyis dang byang chub sems dpa' rnams kyis shes par dka' ba'i don de dngos su gang yin zhes pa'o/ /mdo las de ltar bcom ldan 'das kyis rnam par grol ba gcig go zhes bka' stsal pa zhes pa nas ma rig go snyam pa'i bar du ni 'di nyid the tsom gyi don nges pa ste/mya ngan las 'das pa thob pa yan chad ni bsam gtan gyi don la the tshom za ba/ 'phags pa nyan thos pa rnams lta ba zab mo la gzud pa dang /mya ngan las 'das pa chen po la brten pa'i phyir shes pa dang chud par dka' ba'i don zhes smos so/ /mdo las de nas tshe dang ldan pa shA ri'i bus zhes pa nas yang dang yang gsungs pa de bcom ldan 'das kyis dge bar bshad du gsol zhes pa'i bar du ni 'phags pa shA ri'i bus the tshom glengs pa sngar ni tshig rkyang pas gsol/de'i 'og tu ni tshigs su bcad pas bsdus te gsol pa'o/ /de yang sngar ni the tshom gyi don glengs/ de'i 'og tu ni the tshom bcad par gsol ba'o/ /the tsom gyi don ni theg pa rnam gsum gyis rnam par grol ba so so'i bye brag dang / khyad par yod pa yang bstan/theg pa rnam gsum rnam par grol gcig ste/ /rnam par grol ba'i khri gcig la bzhugs so/ /zhes kyang bstan pa de nyid rgyu la the tsom du gyur to/ /de ni shes rab kyi pha rol tu phyin pa ye shes kyi mtshan nyid dang / chos kyi sku gnyis su med pa las dgongs pa dang / mya ngan las 'das pa chen po las rnam pa gsum bstan pa bzhin ci rigs par chud par bya'o//ci'i rgyu zhes pa ni don ci las glengs pa'o/ /ci'i phyir zhes pa ni dngos po'o/ /dngos po gang las dris zhes pa'i don to/ /mdo las de nas tshe dang ldan pa shA ri'i bu zhes pa nas/ de dag tshad med ngas thob dang / /zhes pa'i bar du ni tshigs su bcad pa bcu gcig la rnam pa bzhir dbye ste/dang po tshigs su bcad pa phyed dang bzhis ni bcom ldan 'das la thabs mkhas shing shin tu zab pa'i sgo nas bstod pa dang / yang tshigs su bcad pa gsum gyis ni 'khor bzhi po rnams kyi the tshom glengs pa dang / tshigs bcad phyed dang gnyis kyis the tshom de lta bu sngon ma thos pa glengs pa dang /yang tshigs bcad gsum gyis bcom ldan 'das la yang don de bshad par gsol ba'o/ /de dag la yang de bzhin gshegs pa nyid kyis dgongs shing mkhyen pa zab cing rgya che ba dang / thogs pa med par 'jug pa bstan to/ /nyi ma zhes pa ni bcom ldan 'das kyi yon tan gyi dpe ste/nyi ma des mun pa sel ba dang / bya ba la 'jug pa slong ba dang / bya mang po skad 'byin pa dang / gdung ba bskyed pa bzhin bcom ldan 'das 'jig rten du byung ba bas kyang ma rig pa'i mun pa sel ba dang / bsod nams kyi bya ba byed pa ston pa dang / 'khor mang po la chos sgrog pa dang /bdud dang mu stegs gdung ba bskyed pa'o/ /mdo las/ snying po byang chub brjod mdzad pa/ /zhes pa nas/ /ma dris par yang gsung mdzad pa/ /zhes pa'i bar du ni tshigs bcad gong ma gnyis kyis ni mngon par byang chub pa dang / mya ngan las 'das pa shes pa bstan/ 'og ma gnyis kyis ni gong ma de nyid theg pa rnam gnyis kyis ni mi shes te/ ye shes zab mo'i spyod yul du bstan pa'o/ /mdo las/ nyid kyi spyod pa kun kyang brjod/ /zhes pa nas/ thub pa chen po lung bstan gsol/ /zhes pa'i bar du ni de la dang po'i tshigs bcad gcig gis ni bcom ldan 'das ting nge 'dzin las bzhengs shing chos nyid kyis bsgrags pa dang /de'i 'og mas ni 'khor bzhi rnams kyi the tshom gleng zhing dgrol bar gsol ba'o/ /mdo las/ ji snyed 'khod pa'i nyan thos ni/ /zhes pa nas/ 'on te bdag la spyod bstan tam/ /zhes pa'i bar du ni 'bras bu thob pa de 'bras bu nyid mngon du gyur pa'am/rgyu mngon du gyur pa yin/ 'bras bu mngon du gyur pa yin na ni mngon par bstod kyang ci dgos/ rgyu mngon du gyur pa yin na ni rgyu bsgrubs pas gzod 'bras bu rtsom pa yin pa'i phyir 'khor rnams kyis thob par nges pa'i sems bskyed de/ de nges pa'i don med pas shA ri'i bu the tsom du gyur pa bstan to//mdo las/ /rnga mchog dbyangs kyis rab tu sgra phyung ste/ /zhes pa nas/ kye ma ji ltar spyod rdzogs byas/ /zhes pa'i bar du ni 'phags pa nyan thos pa'i 'khor rnams kyis chos bshad par gsol ba dang / phyi'i 'khor rnams kyis chos bshad par gsol ba'o/ /de bzhin gshegs pas bstan pa'i thugs las skyes pa'i sras pos/mngal nas skye ba la sogs pa gsol ba'o/ /mdo las de skad ces gsol pa dang zhes pa nas sdang bar 'gyur zhes pa'i bar du ni 'di la dum bu gnyis su dbye ste/ sngar dgag pa dang phyis gsol ba ste/ 'di ni mi bshad par dgag pa'o/ / yang 'chad cing lung ston pa yang rnam pa bzhi ste/ nges par lung bstan pa la sogs pa'o/ /yang lung bstan pa yang rnam pa gsum ste sngon 'das pa'i dus na 'khor rnams kyis legs nyes ci byas pa ston pa dang / skyes bu chen po sangs rgyas su lung ston pa dang / ldem po ngag gi don nges par ston pa'o//yang 'grel pa las don rnam pa bzhi la brten te/ sems nges pa dang / lung ston pa'i rgyu dang lung nod pa dang / lung dpog par gsol ba ste/ sems nges pa la ni de bzhin gshegs pa'i rang bzhin nges par yod pa las dgongs te mi bshad par dag pa'o//sdang ba la rnam pa lnga ste/ skur bas sdang ba dang sgrub dka' ba'i phyir sdang ba dang / phyin ci log du sdang ba dang / 'gyod pas sdang ba dang / dogs pas sdang ba'o/ /skur pas sdang ba ni thos pa'i sgras sdang ba ste nyan thos kyi mya ngan las 'da' ba nyid yang dag pa'i mtha' yin par sems pa la theg pa chen po'i mya ngan las 'da' ba thos pas gnyis ka la skur cing sdang ba dang /sgrub dka' ba'i phyir sdang ba ni byang chub sems dpa'i spyod pa bskal pa grangs med par bsgrubs pas gdod 'grub pa las sems nur zhing sdang ba dang / phyin ci log gis sdang ba ni dbang po ma smin pa'i sems can ma rabs kyi rigs can nyon mongs pa stug pa bdag dang bdag gir 'dzin pa la zhen pa la chos zab mo bstan na phyin ci log tu 'dzin cing sdang ba dang /'gyod pa'i sdang ba ni 'phags pa shA ri'i bu lta bu theg pa chung ngu la gnas pa'i sems la 'gyod cing dngang bas theg pa chen po la 'jug pa lta bu'o/ / dogs pas dngang ba ni lhag pa'i nga rgyal can te/ de yang nyan thos kyi rigs la ni rigs nges pa dang ma nges pa gnyis so/ /sems can ma rabs la ni ma thob pa thob par sems pa dang / nyon mongs pa stug po dang ldan pa'o/ /byang chub sems dpa' la ni phyir ldog pa dang mi ldog pa la gnas te nges pa'i rigs can gyi nyan thos ni skur bas dngang ngo //ma nges pa'i rigs can ni 'gyod pas dngang ngo / /ma thob pa thob par sems pa ni dogs pas dngang ngo / /nyon mongs pa stug pa ni phyin ci log gis dngang ngo / /phyir ldog pa'i byang chub sems dpa' ni sgrub par dka' bas dngang ngo //phyir mi ldog pa'i byang chub sems dpa' ni dngang ba rnams dang bral ba ste/ theg pa gcig po bshad par 'os pa'i snod du gyur pa'o/ /yang mi bshad par dgag pa ni gang zag rnam pa gnyis kyi don te/ de bzhin gshegs pa'i snying po la nges pa'i sems pa dang sgrub par dka' ba las lhag par sems pa gnyis kyi phyir ro//yang mi bshad par dgag pa ni lha dang mi la sogs pa don ma rtogs par dngang ba dang / 'khor mang po don zab mo tshol du gzhug pa dang / gus shing rin che bar sems su gzhug pa dang / lhag pa'i nga rgyal can rnams gdul ba'i phyir ro//mdo las yang tshe dang ldan pa shA ri'i bus zhes pa nas bde bar gshegs pa bshad du gsol zhes pa'i bar du ni 'das pa'i de bzhin gshegs pa grangs med pa rnams kyis sems can gyi don mdzad par ston pa ste/ 'di chos bshad par gsol ba gnyis pa sngar ni tshig rkyang pas gsol/de'i 'og tu ni tshigs su bcad pas bsdus pa ste/ 'di ni dang po'o/ /mdo las de ci'i slad du zhe na zhes pa nas yid ches pa dang 'dzin pa mchis so zhes pa'i bar du ni 'di bstan par 'os pa'i rgyu bstan pa ste/ sngon de bzhin gshegs pa mthong ba'i rgyu bzang po yod pa shes rab rno zhing dbang po gsal ba don zab mo la mkhas pa'i 'khor rnams zhes sbyar ro//mdo las de nas tshe dang ldan pa shA ri'i bu zhes pa nas khyod kyis chos bstan gang gis 'tshal bar 'gyur zhes pa'i bar du ni tshigs su bcad pas bsdus pa'o/ /mdo las de ni bcom ldan 'das kyis zhes pa nas g.yang sa chen por lhung bar 'gyur ro zhes pa'i bar du ni dgag pa gsum pa ste/thos pa'i rgyu dang mi ldan pa'i nga rgyal can rnams 'jig rten pa'i bsam gtan bzhi la gnas pa dgra bcom pa'i 'bras bu ma thob pa thob par sems pa'i 'chi ba'i dus kyi tshe na 'phags pa'i lam med do zhes skur pas sems can dmyal ba'i g.yang sa chen por lhung ngo zhes pa'o//mdo las de nas bcom ldan 'das kyis zhes pa nas sman pa dang bde bar 'gyur ro zhes pa'i bar du ni chos bshad par gsol ba gsum pa ste/ bshad par gsol ba dang chos kyi snod du rung ba'i gtan tshigs smos te/'phags pa shA ri'i bu bdag nyid tshe rabs kyang dran la gzhan gyi dbang po'ang rtogs pa yin pas chos kyi snod du 'gyur ba'i gtan tshigs kyis gsol to/ /mdo las de nas tshe dang ldan pa shA ri'i bus de'i tshe zhes pa nas/de dag khyod kyis chos bshad dad par 'gyur/ /zhes pa'i bar du ni tshigs su bcad pa bzhi la dang po tshigs bcad gcig gis ni shA ri'i bu nyid sras kyi thu bo yin pa'i sgo nas chos bshad par gsol ba dang / de'i 'og gi tshigs bcad phyed dang gnyis kyis ni sngon de bzhin gshegs pas byin gyis brlabs pa sha stag go zhes gzhan la glengs te gsol ba dang /de'i 'og gi tshigs bcad phyed dang gnyis kyis ni bdag dang gzhan gnyi ga las glengs te gsol ba las 'di ni dang po'o/ /rkang gnyis kyi gtso bo zhes pa ni lha dang mi chos kyi snod du gyur pa yin la de'i gtso bo bas na bcom ldan 'das rkang gnyis kyi gtso bos gsungs so//mdo las/ gang du khyod kyis rtag par sngon 'khor na/ /zhes pa nas/ gang dag dang 'gyur khyod kyis chos 'di la/ zhes pa'i bar du ni rgyu smin pa las glengs te/ chos bshad par gsol pa'o/ /mdo las/ 'di dag bdag 'dra brgya phrag bcu gnyis te/ /zhes pa nas/ de dag dga' ba'i mchog kyang bskyed du gsol/ zhes pa'i bar bu ni bdag dang gzhan gnyi ga las glengs te chos bshad par gsol ba'o/ /mdo las de nas bcom ldan 'das kyis zhes pa nas ngas khyod la bshad do zhes pa'i bar du ni lung bstan pa rnam pa bzhi las nges par lung ston pa dang /khas blang zhing lung ston pa ste de yang sngar ni lung bstan pa rnam gnyis glengs/ de'i 'og tu ni snyigs ma rnam pa lnga dang sbyar/ the tshom rnam bzhi bstsal ba la 'di ni dang po ste/ khas blangs pas lung bstan pa yang bcom ldan 'das kyis bshad par gnang ba dang /nga rgyal can gyi rnams bsal bar ston to/ /legs par shin tu nyon la yid la zung shig pa ni dbang po bsdus te bka' nyan du gzung ba'o/ /mdo las bcom ldan 'das kyis tshig de gsungs ma thag tu zhes pa nas 'khor de nas dong ngo zhes pa'i bar du ni nga rgyal can gyi rnams dong ba bstan to//mdo las 'di ltar nga rgyal can gyi zhes pa nas 'khor de nas dong ngo zhes pa'i bar du ni nga rgyal can de dag ci'i phyir dong ba'i gtan tshigs bstan te/ thob par dka' ba rnams snga ste/ mi'i lus thob pa dang yul gyi dbus su skye ba dang dbang po tshang ba dang /de bzhin gshegs pa 'jig rten du byung ba mthong ba dang / dam pa'i chos thos pa 'di dag dka' ba las rnyed pa yin na nga rgyal can gyi 'khor 'di rnams ci'i phyir stan la langs te dong ngo zhes pa'o/ /de ni rnam pa gnyis kyi phyir sdig pa'i rnam par smin pa stug pa dang /nga rgyal can du gyur pa'i phyir te/ sdig pa stug ches pa ni nyon mongs pa'i sgrib pa dang / las kyi sgrib pa dang rnam par smin pa'i sgrib pa ste/ de nyid rang gi skyon du gyur pa'o/ /skyon de gsum gyi sgrib pas 'phags pa'i 'bras bu mi thob ces pa'o/ /nga rgyal zhes pa ni nga rgyal rnam pa bdun las 'di ni lhag pa'i nga rgyal dang /ma thob pa thob par sems shing log pa'i nga rgyal dang ldan pa'o/ /'phags pa'i 'bras bu ma thob pa dang / 'dus ma byas ma rtogs pas snod du ma gyur pa'i phyir langs te dong ngo zhes sbyar ro/ /mdo las bcom ldan 'das cang mi gsung bar bzhugs so zhes pa ni nges pa'i 'bras bu smin pa ni bcom ldan 'das kyi mthus kyang bstang ba mi mdzad pa bstan to//mdo las de nas bcom ldan 'das kyis zhes pa nas de'i don bshad do zhes pa'i bar du ni 'khor ma brtags pa bsal te/ snod du gyur pa 'khor dam pa nyi tshe la chos bshad par dgongs pa'o//mdo las bcom ldan 'das la slar nyan to zhes pa nas brgya lam na res 'ga' 'byung ngo zhes pa'i bar du ni 'di man chad ma thos pa thos par bya ba dang / 'di bshad par bya ba'i chos shes par dka' ba bstan pa dang / de bzhin gshegs pas gsungs pa'i thabs la sogs pa la bsten pa dang /theg pa gcig po la gnas par bya ba dang / 'dzin pa rnam gnyis bstsal ba ston te/ 'dis ni ma thos pa thos par bya ba dang / thos par dka' ba dang de'i dpe bstan to/ /'khor los sgyur ba'i rgyal po nam byung ba'i tshe rgya mtsho bri bar gyur pas me tog u dum bA ra 'di 'byung ba bzhin sangs rgyas bcom ldan 'das 'jig rten du byung bas 'khor ba'i rgyud bsrabs shing theg pa chen po'i don gsal bar 'gyur zhes pa'i don to//mdo las shA ri'i bu de bzhin du zhes pa nas nga ni gzhan du mi smra'o zhes pa'i bar du ni de bzhin gshegs pa'i gsung la yid ches par bya ba bstan to//mdo las shA ri'i bu de bzhin gshegs pa'i ldem po dag ni chud par dka'o zhes pa ni bshad par bya ba bstan to/ /mdo las de ci'i phyir zhes pa nas de bzhin gshegs pas mkhyen pa'o zhes pa'i bar du ni bshad par bya ba'i don mtshon par bya ba ste/brtag pa dang rtogs pa'i spyod yul las 'das pa ni de bzhin nyid bden pa'i don te/ tshig gi tha snyad thams cad las 'das pa yin na bcom ldan 'das thabs mkhas pa dang ldan pas yi ge dang tshig 'bru'i sgo nas theg pa rnam pa gsum gyi don mtshon pa'o//mdo las de ci'i phyir zhen zhes pa nas 'jig rten du byung ste zhes pa'i bar du ni gang la brten par bya ba'i don ston te/ de yang bya ba gcig pa de sngar gleng ba dang phyis dgrol ba la 'di ni dang po'o/ /gang la brten par bya ba ni bcom ldan 'das nyag gcig gis mkhyen pa'i chos te shes par dka' ba'i don to//don de sems can rnams la phan gdags pa'i phyir so so'i dbang po dang sbyor zhing chos ston pa mdzad do/ /mdo las de ltar na shA ri'i bu zhes pa nas ye shes mthong ba'i lam du 'jug go zhes pa'i bar du ni 'di man chad bstan par bya ba'i chos rgyas par dgrol ba ste/don chen po bya ba gcig pa zhes pa ni/ de bzhin gshegs pa'i mkhyen pa gzigs pa ste de yang dbye ba dang bstan pa dang / chud par bya ba dang / 'jug pa dang 'di bzhi ston to/ /rnam pa 'di bzhis de bzhin gshegs pa'i mkhyen pa gzigs pa rtogs par byed do//ye shes de'i byed pa dang / rang bzhin gnyis ka la mkhyen pa gzigs pa zhes bya ste/ don dam pa dang kun rdzob gnyi ga'i spyod yul la 'jug pa'o/ /de la dbye ba la ni bla na med pa'i don bstan pa ni mthun pa'i don ni rtogs par bya ba ni mi shes pa shes par bya ba'i don la 'jug pa ni phyir mi ldog pa'i sar 'jug cing ye shes kyi las tshad med par ston pa'o//bla na med pa'i byang chub dang mya ngan las 'das pa gnyis ka gzhan las 'phags pa'i phyir bla na med pa zhes gdags so/ /bstan pa mthun pa'i don ni theg pa rnam gsum kun las chos kyi skus 'dra bar khyab pa'i phyir mthun pa zhes gdags so//rtogs par bya ba ni theg pa rnam gnyis pa dag yang dag pa'i ngo bo mi shes shing theg pa rnam gcig gi don la mi gnas pa'i phyir de bzhin gshegs pas mi shes pa shes par bya ba'i phyir 'di bstan pa dang / 'jug par bya ba ni mtshan nyid gsum po gang du bstan pa de la 'jug pa dang / thob par bya ba'i thabs bstan to/ /de bzhin gshegs pa 'jig rten du byung ste chos ston pa yang rim dang cig car dang che chung gi rnam pa mi mthun gyis kyang sems can thams cad ye shes de mthong ba dang 'jug par bya ba las gzhan mi ston to//ye shes mthong ba dang 'jug pa la mthong ba ni mngon du rtogs pa shes pa ni rnam par shes pa lnga dang ldan pa ste/ chos mngon pa las kyang mkhyen la mi gzigs pa dang / gzigs la mi mkhyen pa dang / mkhyen kyang mkhyen la gzigs kyang gzigs pa ste rnam pa gsum mo//mkhyen la mi gzigs pa ni zad pa'i ye shes dang / mi skye pa'i ye shes so/ /gzigs la mi mkhyen pa ni bzod pa brgyad dang 'jig rten pa'i yang dag par lta ba'o/ /mkhyen kyang mkhyen la gzigs kyang gzigs pa ni ye shes lhag ma gzhan dag go/ /rna bas thos pa lta bu ni mkhyen pa dang sbyar ro//mig gis mngon du mthong ba ni gzigs pa dang sbyar ro/ /yang don chen po zhes pa ni de bzhin gshegs pa'i rang bzhin bstan pa ste/ ma rig pa'i sgrib pas bsgribs pa'i sems can rnams la yang dag pa'i rang bzhin mtshon pa ni dbye ba'o/ /de nyid rnam par phye ste dgrol ba ni bstan pa'o//yang na rnam pa thams cad mkhyen pa'i ye shes ma gtogs par don gzhan med do zhes gsungs te thams cad mkhyen pa ni chos dang gang zag la bdag med par mkhyen pa'o/ /ye shes ni rnam pa thams cad mkhyen pa'i ye shes te/ de gnyis las 'da' ba'i chos gzhan med pa'i phyir bla na med pa'o//de la dbye ba dang bstan pa dang rtogs pa 'di gsum gyis ni bla na med pa'i 'bras bu bstan/ 'jug par bya bas ni sgrub pa'i rgyu bstan to/ /mdo las shA ri'i bu zhes pa nas ye shes mthong ba'i lam du 'jug go zhes pa'i bar du ni de bzhin gshegs pa'i mkhyen pa dang /gzigs pas sems can rnams la ston pa ste/ theg pa rnam pa gnyis pa dag bla na med pa'i skal ba med pa tsam du sems pa de dag 'bras bu de la gzud pa'i phyir rnam pa de bzhin bstan to/ /mdo las shA ri'i bud ni theg pa gcig las brtsams te zhes pa nas gnyis sam gsum zhes bya ba chung zad kyang med ces pa'i bar du ni lung bstan pa'i nang ni theg pa gcig brtsams pa la gnas pa ste/theg pa gcig brtsams pa 'di sems can rnams la chos ston gyi rang sangs rgyas theg pa gnyis pa'am/ nyan thos zhes theg pa gsum pa'i khyad par rim par bkod pa med de/de la zab pa'am mi zab pa'am dka' ba'am sla ba las rim par bkod pa yang ma yin no/ /skabs 'dir theg pa gnyis bsal te theg pa chen po gcig bstan pa'i don ston to/ /mdo las shA ri'i bu phyogs bcu'i 'jig rten thams cad kyi don yang de'o zhes pa ni chos la gnas pa ste/da ltar bzhugs pa'i sangs rgyas shAkya thub pa yang sangs rgyas thams cad kyi chos lugs la brten te 'gro ba mang po la dad pa bskyed cing bdag dang 'dra bar bya ba'i phyir sngar thabs tsam bstan nas phyis yang dag pa gang yin pa ston te/sngar ni phyogs bcu'i sangs rgyas kyi chos lugs kyang 'di'o/ /dus gsum gyi sangs rgyas bcom ldan 'das kyi chos lugs kyang 'di'o/ /da ltar ngas bstan pa'i chos lugs kyang 'di'o zhes bstan pa ste/ 'di ni phyogs bcu'i sangs rgyas kyi chos lugs bstan pa'o//dus gsum las phyogs bcu zhes bya ba gzhan pa med la phyogs bcu las dus gsum zhes bya ba gzhan yang med mod kyi chu zheng las khyad par du bshad do/ /mdo las de ci'i phyir zhes pa nas theg pa gcig las brtsams te chos bshad pa de yang thams cad mkhyen pa'i mtha'i bar du zhes pa ni dus gsum gyi sangs rgyas kyi chos lugs bstan pa ste 'di la yang rnam pa gnyis so//sngar dus gsum gyi chos so sor bstan pa thams cad dang mthun pa ste snga ma la yang rnam pa gsum ste/ 'das pa dang ma 'ongs pa dang da ltar dang gsum mo/ /gsum po la yang gnyis gnyis te/sangs rgyas kyi chos bstan pa'i chos lugs mthun pa dang / sems can gyi don byas pa'i 'bras bu mthun pa ste/ 'di ni 'das pa'i sangs rgyas kyi chos lugs dang mthun par bstan pa'o/ /sngar rgyu rkyen rnam pa mang pos thabs su bstan pa ni phyis sangs rgyas kyi theg pa gcig thob par bya ba'i phyir bstan to//'grel pa las thabs ni sbyor ba ste theg pa chung ngu'i phung po dang khams dang / skye mched la rtog cing sdug bsngal las skyo ba dang sdug bsngal spang ba dang / rnam par grol ba thob par byed pa theg pa chen po'i pha rol tu phyin pa rnams dang / bsdu ba rnam bzhis bdag dang gzhan gyi don byed pa gnyen po'i chos rnams so//rgyu zhes bya ba ni 'grel pa las sngar don drug smos pa las gnyis pa'i nang nas bshad pa bzhin no/ /sngar rgyu dang rkyen rnam pa sna tshogs zhes smos pa ni theg pa gsum yang tshig dang ming du btags pa tsam du zad de yang dag pa'i don yod pa ma yin la/yang dag pa'i don la bshad du med ces bya ba'i don to/ /dpe zhes bya ba ni dper na ba la 'o ma dang zho dang mar dang zhun mar dang mar gyi snying po yod pa dang 'dra ste/ de la theg pa chung ngu ni 'o ma lta bu yin no/ /theg pa chen po ni mar gyi snying po lta bu yin no//dpe 'dis na theg pa chen po bla na med pa bstan te/ nyan thos la sogs pa yang theg pa chen po bla na med pa dang mthun par bstan to/ /nyan thos dang mthun pa bstan pa ni sangs rgyas bcom ldan 'das kyi chos kyi sku nyid sems can dang rang sangs rgyas la sogs par chos kyi skur mnyam zhing khyad par med par bstan pa ste/dpe 'di dang sbyar na sems can ni ba lta bu nyan thos ni 'o ma lta bu/ rang sangs rgyas ni zho lta bu/ byang chub sems dpa' ni mar lta bu/ byang chub sems dpa' chen po ni zhun mar lta bu/ sangs rgyas bcom ldan 'das ni mar gyi snying po lta bu ste/ mar gyi snying po mchog dam pa yin pa ltar sangs rgyas kyi theg pa gcig kyang de dang 'dra ste/ ba'i 'o ma gcig las mar gyi snying po'i bar du 'gyur ba'i phyir sems can las sangs rgyas kyi bar du mtshan ma tha dad kyang rang bzhin ni mnyam ste gnyis su med do/ /mdo las de ni sems can rnams zhes pa nas byang chub thob par gyur to zhes pa'i bar du ni 'das pa'i sems can gyi don byas pa'i 'bras bu mthun par bstan pa ste/sngar theg pa gnyis kyis don byas nas phyis sangs rgyas su rnam pa thams cad mkhyen pa'i ye shes 'thob pa bstan te/ rnam pa thams cad mkhyen pa'i ye shes ni sangs rgyas kyi yang dag pa'i ye shes so//rnam pa zhes bya ba ni chos kyi rnam pa thams cad mkhyen pa ste/ yang dag pa ni glang po'i shing rta lta bu/ mdo las 'di ltar shA ri'i bu ma 'ongs pa'i dus zhes pa nas thams cad mkhyen pa'i mtha'i bar du zhes pa'i bar du ni ma 'ongs pa'i sangs rgyas rnams kyi chos lugs mthun pa bstan to//mdo las de ni sems can rnams zhes pa nas byang chub thob par 'gyur ro zhes pa'i bar du ni ma 'ongs pa'i sems can gdul bar 'gyur ba'i 'bras bu mthun par bstan pa'o/ /mdo las shA ri'i bu da ltar gyi dus na zhes pa nas thams cad mkhyen pa'i chos 'chad do zhes pa'i bar du ni da ltar gyi sangs rgyas bcom ldan 'das chos lugs mthun par bstan pa ste/don dang phan pa dang bde ba ni bde bar byed pa'i don te/ bde ba ni bde ba byin pa'o/ /sdug bsngal las bton te bde ba byin pa dang ye shes dang bsod nams byin pa dang /'jig rten dang 'jig rten las 'das pa'i 'bras bu byin pa dang / 'bras bu chung ngu dang chen po byin par go rims bzhin sbyar ro/ /mdo las shA ri'i bu nga yang zhes pa nas thams cad mkhyen pa zhes pa'i bar du ni da ltar gyi sems can thams cad 'bras bu thob pa mthun par bstan pa'o//mdo las de ni sems can rnams zhes pa nas byang chub thob par 'gyur ro zhes pa'i bar du ni sems can rnams la chos 'chad pa yang theg pa gcig las brtsams te de bzhin gshegs pa'i ye shes mthong ba nyid la 'dzud pa dang ston pa dang 'jug pa dang chud par byed pa'i phyir ro//'dzud pa ni mu stegs can dag log par lta ba las bzlog ste yang dag pa'i chos la zhugs pa'o/ /chud par byed pa ni nyan thos pa dag byang chub chen po chud par byed cing / chung ngu las bzlog nas chen po chud par byed pa'o/ /'grel pa las 'dzud pa ni bla na med pa'i don to//ston pa ni mthun pa'i don te the tsom yod na bsgom zhing spyod pa'o/ /'jug pa ni mi shes pa'i don te/ sems ma bskyed pa bskyed pa dang mu stegs can dag dam pa'i don la gzhug pa'i phyir ro/ /chud par byed pa ni phyir mi ldog pa'i sa la chud par byed pa dang sems bskyed pa dag chos chud pa dang nyan thos pa dag byang chub chen po chud par byed pa'o//mdo las de ni sems can rnams zhes pa nas byang chub thob par 'gyur ro zhes pa'i bar du ni nga yang chos lugs 'di la brten te/ thams cad kyi chos kyang de'o zhes bstan pa ste/sangs rgyas nyag gcig la sna tshogs mkhyen pa'i stobs mnga' bas sems can gyi dbang po sna tshogs mkhyen cing ye shes kyi stobs shin tu mos pa mkhyen te mos pa'i ni spyod pa la mos pa'o/ /khams sna tshogs mkhyen pa'i stobs mnga' bas rang bzhin mkhyen te/ rigs ma nges pa'i khams su gtogs pa mos pa bskyed pa'i phyir sngar theg pa gsum thabs tsam du gsungs nas/phyis mthar phyin pa'i theg pa gsungs te/ so so'i skye bo dag sangs rgyas kyi theg pa gcig thob pa dang rnam pa thams cad mkhyen pa'i ye shes thob par bya ba'i phyir mdo las theg pa gcig las brtsams te thams cad mkhyen pa'i mtha' bar du gsungs so//mdo las shA ri'i bu zhes pa nas theg pa gnyis su gdags pa yang med na gsum du lta ci smos zhes pa'i bar du ni rang sangs rgyas kyi theg pa gnyis pa yang med na nyan thos kyi theg pa gsum pa yod pa lta ci smos zhes bstan pa ste/mdo las ra'i shing rta dang ri dgas kyi shing rta dang / glang po che'i shing rta 'dod pa'i phyir me 'bar ba'i grong khyer las byung ba ni theg pa gnyis bsal bar zad kyi glang po che'i theg pa yang bsal ba ma yin te de bas ni 'di la theg pa gnyis kyi mya ngan las 'da' ba dang mthar phyin pa med do zhes gsungs so//'grel pa las theg pa gnyis med pa ni theg pa gnyis kyi mya ngan las 'da' ba med pa ste/ sangs rgyas bcom ldan 'das nyag gcig gis mya ngan las 'das pa chen po brnyes te/ ye shes thams cad yongs su rdzogs pa'i mthar phyin pas mya ngan las 'das pa chen po zhes bya'o//de yang dngos po gsum yongs su rdzogs te theg pa gnyis pa ltar brtags te 'gog pa la ltos pa ma yin/ ye shes chen po'i chos kyi sku yod pa ma yin/ mya ngan las 'das pa chen po yod pa ma yin te/ sangs rgyas kyi theg pa 'ba' zhig la mnga'o/ /'grel pa las lung bstan pa'i nang nas don rnam pa drug gis chos gang bstan pa la sogs pa don rnam pa lnga bstan pa la / chos gang la sogs pa zhes bya ba ni ma thos pa thos par bya ba ste/ sngon ma byung ba'i chos bstan nas thos par byed pa'o//chos gang dag ces bya ba ni sna tshogs bsgrub par bshad pa dang / rgyu dang gzhi rnam pa tha dad pa bstan pa dang / dmigs pa dang nges pa'i tshig gis thabs la mkhas pa bstan pa'o/ /chos ji lta bu zhes bya ba ni gang la brten zhe na bya ba'i don chen po gcig gi phyir zhes smos pa'o//chos kyi mtshan nyid ji lta bu zhes pa ni theg pa gcig la gnas nas sems can gyi dbang po ji lta ba bzhin du sangs rgyas kyi rang bzhin yod de/ sangs rgyas kyi chos la gnas pa'o/ /ji lta bu'i rang bzhin zhes pa ni theg pa gnyis kyi rang bzhin bsal te/ theg pa gcig gi rang bzhin 'ba' zhig go zhes smos pa de dag ni sangs rgyas bcom ldan 'das rnams kyi chos kyi sku mnyam pa'o//mdo las 'on kyang de bzhin gshegs pa zhes pa nas tshe'i rnyog ma la byung na zhes pa'i bar du ni 'dir yang dag pa'i mtshan nyid bstan pa ste/ 'di man chad the tshom rnam pa bzhi 'grel pa las don rnam pa ldas ston te/the tshom rnam pa bzhi gang zhe na nam zhig ston par 'gyur ba dang / nga rgyal gyi dbang du gyur pa ji ltar shes pa dang / bstan pa'i snod du ji ltar 'gyur ba dang ji ltar na brdzun du mi 'gyur ba dang bzhi'o/ /skabs 'dir the tshom dang po bsal ba bstan te/ 'grel pa las sangs rgyas bcom ldan 'das nam zhig gi dus na thabs tsam du bstan pa ston par 'gyur ba dang / sangs rgyas bcom ldan 'das nam zhig gi dus na sngar theg pa gnyis thabs tsam du bstan te/ phyis theg pa gcig pa yang dag pa bstan par 'gyur zhes smos pa la yang rnam pa gnyis te/sngar rnyog pa lnga'i dus byung ba bstan pa dang / phyis ci'i phyir bstan pa ste rnyog pa la yang rnam pa lnga'o/ /ming bstan pa dang / mtshan nyid bstan pa dang gnyen po dang bzhag pa dang gzugs dang gcig gis gcig bsdu ba dang lnga'o/ /de la ming bstan pa ni rnyog pa ste/ rnyog ces bya ba ni dri ma'ang mi gtsang ba'i don to//dper na kha zas mi gtsang ba dri ma can ni btsog pa ste rnyog pa zhes bya'o/ /mdor na bskal pa skye ba'i tshe bskal pa gsum ni bags gyis dmas/ nyon mongs pa ni khad kyis bsrabs te/ sems can dag dge ba la phyogs shing log par lta ba nyung bas tshe'i dbang po ni phyi phyir ring /bzang zhing legs pa ni phyi phyir skye ba dang sems can sdug bsngal ba med cing sangs rgyas sprul pa 'jig rten du ma byung ba'i dus ni gtsang ma zhes bya'o/ /sangs rgyas sprul pa 'jig rten du byung na bskal pa 'grib pa'i dus 'byung du nye ste/ bskal pa chung ngu gsum yang bags kyis 'byung /nyon mongs pa yang phyi phyir skye/ sems can yang nyes pa la dga' zhing lta ba la phyi phyir zhen pa dang / tshe'i dbang po phyir zhing thung ba dang / phyi phyir zhing ngan la btsog pa'i dus ni rnyog pa zhes bya'o/ /lnga zhes pa ni grangs bstan pa'o/ /de la mtshan nyid bstan pa ni 'grel pa las da ltar gyi mi rnams rab tu tshe thung ste lo brgya las mi 'da' ba ni tshe'i rnyog pa zhes bya ste/kun gzhi'i rnam par shes pa la bag chags kyi rnam pas las tha dad par gyur pa ni tshe'i dbang po'i mtshan nyid do/ /dge ba'i las kyi 'bras bu'i mthu zhan par gyur te/ tshe'i dbang phyi phyir thung bar gyur ba ni srog gcod pa'i las kyi dbang gis gyur to//sems can gang pha mar mi shes pa dang dge sbyong dang bram ze dang bla mar mi shes pa dang / chos mi shes pa dang / 'jig rten 'di dang 'jig rten pha rol las kyi rnam par smin pas mi 'jigs mi skrag pa dang / sbyin pa mi byed bsod nams mi byed cing /tshul khrims mi bsrung ba ste/ mdor na sdig pa byed cing dge ba med pa ni sems can gyi rnyog pa zhes bya'o/ /sems can gang chos ma yin pa la chags pa mtshon cha dang / sems can la gnod par 'gyur ba'i yo byad sbyin pa dang / 'thab cing rtsod pa la dga' ba dang /brdzun dang g.yo sgyu byed pa dang / log pa'i chos 'dzin cing dge ba'i chos ma yin pa spyod pa ni nyon mongs pa'i rnyog pa zhes bya ste/ lta ba lnga ma gtogs pa nyon mongs pa thams cad dang nye ba'i nyon mongs pa thams cad ni nyon mongs pa'i rnyog pa'i mtshan nyid ces bya'o//chos ma yin pa'i 'dod chags kyi mtshon cha la sogs pa byin te gsod du bcug pa dang / nor rdzas la chags te mtshon cha byin pas 'thab cing rtsod pa'i gzhir gyur pa dang / gzhan yang sdig pa mi dge ba'i chos su gtogs pa nyon mongs pa dang / nye ba'i nyon mongs pa bag chags kyi dbang gis nyon mongs pa skye ba dang /'jig rten na dam pa'i chos nub ste/ nam gzugs brnyan tsam la spyad pa log par lta ba skyes pa ni lta ba'i rnyog pa zhes bya'o/ /mu stegs can ngan par lta ba mang du byung ste/ mu ge'i bskal pa dang nad kyi bskal pa dang / mtshon gyi bskal pa byung ba ni bskal pa'i rnyog pa zhes bya'o//de la gnyen po ni spyod pa las gnyen po bstan te/ 'grel pa las grub pa'i mtha' rnam pa bzhi dang / rnyog pa lngar sbyar ro/ /grub pa'i mtha' bzhi ni 'jig rten gyi grub pa'i mtha' dang / dbang po so so'i grub pa'i mtha' dang / gnyen po'i grub pa'i mtha' dang /don dam pa'i grub pa'i mtha'o/ /de la bskal pa'i rnyog pa dang sems can gyi rnyog pa'i gnyen po ni 'jig rten gyi grub pa'i mtha'o/ /tshe'i rnyog pa'i gnyen po ni dbang po so so'i grub pa'i mtha'o/ /nyon mongs pa'i rnyog pa dang / lta ba'i rnyog pa'i gnyen po ni gnyen po'i grub pa'i mtha'o//grub pa'i mtha' gsum gyis rnyog pa lnga bcom nas don dam par zhugs te yang dag pa nyid ni rig pa'o/ /de la gzugs pa dang gzhig pa ni dris pa/ ci'i phyir rnyog pa lnga las mi mang mi nyung zhe na/ lan btab pa/ sems can la rnam pa gnyis te/sdig pa spyod pa khyim pa skye bo dang log par lta ba ste rab tu byung ba'i mu stegs can no/ /khyim pa shis pa med pa nyon mongs pa bskyed pa ni nyon mongs pa'i rnyog pa zhes bya'o/ /mu stegs can la log par lta ba don med pa tshol ba ni lta ba'i rnyog pa zhes bya'o/ /gzhan yang dbang po rtul po ni nyon mongs pa'i rnyog pa zhes bya/dbang po rnon po ni lta ba'i rnyog pa zhes bya ste/ rgyu rnam pa gnyis kyis ma 'ongs pa'i 'bras bu thob pa'i tshe bsdu ba dang dbye ba mi mthun pas rnyog pa rnam gnyis su phye ste nang gi 'bras bu gnyis dang spyir bsdu ba ni sems can gyi rnyog pa zhes bya'o/ / sems can sdig pa phyi'i 'bras bu gnyis dang spyir bsdus pa ni bskal pa'i rnyog pa zhes bya'o/ /rtsa ba bstan pa'am/ nang gi mi dge ba'i 'bras bu ni tshe'i rnyog pa zhes bya/ phyi rol gyi mi dge ba'i 'bras bu ni bskal pa'i rnyog pa zhes bya/ sdig pa'i rgyu dang 'bras bu sems can sdig pa las yod par 'gyur bas sems can gyi rnyog pa zhes bya ste de bas na rnyog pa lnga'i mtshan nyid bstan pas de la skyo bar bya ba'i phyir rnyog pa lnga bshad do//de la gcig gis gcig bsdu ba ni mdo dag las rnyog pa bcu gnyis gsungs te/ bskal pa'i rnyog pa bstan pa dang / dus kyi rnyog pa bstan pa dang /sems can gyi rnyog pa bstan pa dang / nyon mongs pa'i rnyog pa bstan pa dang / tshe'i rnyog pa bstan pa dang / theg pa gsum gyi khyad par gyi rnyog pa bstan pa dang / yongs su ma dag pa'i zhing gi rnyog pa bstan pa dang / sems can gdul dka' ba'i rnyog pa bstan pa dang / nyon mongs pa sna tshogs bstan pa'i rnyog pa bstan pa dang /mu stegs can 'khrug pa'i rnyog pa bstan pa dang / bdud kyi rnyog pa bstan pa dang / bdud kyi las kyi rnyog pa bstan pa dang bcu gnyis so/ /rnyog pa bcu gnyis po 'di sprul pa'i sangs rgyas kyi zhing na theg pa chen po pa 'ba' zhig la yod do/ /rnyog pa lnga'i yongs su ma dag pa'i zhing na theg pa che chung gnyi ga la yod do//bskal pa dang dus ni bskal pa'i rnyog pa sems can dang gdul dka' ba'i sems can ni sems can gyi rnyog pa nyon mongs pa dang nyon mongs pa sna tshogs pa ni nyon mongs pa'i rnyog pa/ tshe ni tshe'i rnyog pa/ mu stegs can 'khrug pa ni lta ba'i rnyog pa ste/brgyad po 'di ni rnyog pa rnam pa lnga'o/ /lhag ma bzhi po ni theg pa gsum gyi khyad par du bstan to/ /yongs su ma dag pa'i zhing na bdud dang bdud kyi las ni rnyog pa lngar mi bsdu'o/ /'grel pa las rnam par dag pa ni rnyog pa ma yin pa'i don te/ rnyog pa la yang rnam pa drug ste/rnyog pa 'di dang bral na rnam par dag pa zhes bya'o/ /drug gang zhe na chags pa'i rnyog pa dang / spyod lam gyi rnyog pa dang / sgrib pa'i rnyog pa dang / mtshan ma tha dad pa'i rnyog pa dang / yon tan dang mi ldan pa'i rnyog pa dang / gti mug gi rnyog pa dang drug go/ /gnyen po'i phyir le lo spang ba'i phyir dag pa'i phyir bstan pa'i phyir bsod nams dang ldan pa'i phyir/ye shes dang ldan pa'i phyir gnyen po 'di drug dang zag pa drug go rims su sbyar ro/ /chos nyid sangs rgyas ni rnyog pa lnga'i tshe 'jig rten du gshegs te de bas na sangs rgyas bcom ldan 'das ni rnyog pa lnga'i dus su 'jig rten du gshegs so//ci'i phyir byams pa ni tshe lo brgyad khri'i dus su gshegs la shAkya thub pa ni tshe lo brgya'i dus su gshegs par gyur / smras pa/ smon lam ni tha dad kyi gnyi ga yang rnyog pa lnga'i dus su gshegs par 'dra bar sngar theg pa gsum thabs tsam du bstan nas phyis yang dag pa bstan te//sprul pa'i sku la 'dra'o/ /gal te bsod nams kyi sku dang / sprul pa'i sku la theg pa gnyis po la 'dul ba mi mdzad na nges par rnyog pa ma yin pa'i dus su gshegs nas theg pa gnyis po la gdul bar mdzad pas nges par rnyog pa'i dus su gshegs so//rnyog pa zhes bya ba ni 'grib pa'i bskal ba las 'jug ste rnyog pa lnga khad kyis skye bas de la rnyog pa zhes bya'o/ /sangs rgyas byams pa gshegs pa'i tshe lo brgyad khri las khad kyis bri bas de la yang rnyog pa'i dus zhes bya ba'i tshe lo bcu'am nyi shu las mi thub pa'i bskal pa chung ngu 'byung ba 'ba' zhig la rnyog pa zhes bya ba ma yin no//de bas na bskal ba 'grib pa'i tshe sangs rgyas 'jig rten du gshegs la bskal pa skye ba'i tshe 'khor los sgyur ba'i rgyal po 'byung ngo / /de ltar bskal pa 'grib pa'i tshe sangs rgyas gshegs la bskal pa skye ba'i tshe 'khor los sgyur ba'i rgyal po 'byung na ci'i phyir rgyal po dung zhes bya ba sangs rgyas byams pa dang cig car byung la gal te rab tu ma byung na 'khor los sgyur ba'i rgyal por 'gyur zhing sangs rgyas mar me mdzad kyi sras brgyad car gling bzhi la dbang bar 'gyur zhes gsungs/lan btab pa rgyal po dung zhes bya ba bskal ba skye ba'i tshe byung ba ni bden na tshe ring bas byams pa dang phrad par zad kyi sangs rgyas byams pa bskal pa 'grib pa'i dus ma yin par gshegs pa ni ma yin no//sangs rgyas rab tu byung nas 'khor los sgyur ba'i rgyal por 'gyur zhes bstan pa yang nges par lung bstan pa ma yin no//sangs rgyas mar me mdzad kyi sras brgyad kyang snga ma dang 'dra ste/ bsod nams kyi sku yin pas de 'dra'i skyon med du nges so/ /gser gyi 'khor los sgyur ba'i rgyal po ni bskal pa yar skye ba'i tshe 'jig rten du nges par 'byung gi /dngul dang zangs dang lcags kyi 'khor los sgyur ba'i rgyal po 'byung ba'i dus su ni nges pa med de/de bas na rgyal po d+harmA a sho ka sangs rgyas mya ngan las 'das nas lo brgya lon pa'i 'og tu 'byung ngo // //dam pa'i chos puN+Da rI ka'i 'grel pa/ bam po bzhi pa/ mdo las shA ri'i bu 'di lta ste zhes pa nas theg pa gsum du bshad de bstan to zhes pa'i bar du ni sangs rgyas rnyog pa lnga'i dus su ci'i phyir 'byung ba bstan pa'i phyir 'di ltar bskal pa dang /'khrug pa'i rnyog pa dang / dri ma mang po dang brkam pa'i sems can dge ba'i rtsa ba chung bdag la bcom ldan 'das thabs mkhas pa rnam pa gsum du ston to//mu ge'i bskal pa dang mtshon gyi bskal pa dang nad kyi bskal ba byung ba'i tshe/ sems can 'khrug pa'i rnyog pa dang / dri ma mang zhes bya'o/ /dri ma ni rnyog pa'am mi gtsang ba'i don mang po ni gzhig dka' ba'i don to / /dri ma la rnam pa drug ste/ 'tshe ba dang / khon du 'dzin pa dang /'khrug pa dang / g.yo dang / brdzun du smra ba dang / nga rgyal dang drug go/ /de la gang / sems can la gnod par byed pa dga' ba ni 'tshe ba zhes bya'o/ /khong khro ba'i dbang gis zhe la 'dzin pa ni khon du 'dzin pa zhes bya'o/ /nyes pas rkyen byas te/ smre sngags 'don pa ni 'khrug pa zhes bya ste/'di gsum ni zhe sdang gi rang bzhin no/ /bdag gi nyes pa 'chab cing pha rol po'i skyon rtog pa dang gzhan gyi yid dang sbyor te tshul 'chos pa ni g.yo zhes bya'o/ /bkur sti'i phyir yon tan sgyus ston pa ni brdzun zhes bya ste 'di gnyis ni 'dod chags dang gti mug gi rang bzhin no//dar cing rgyags pa la chags par byed pa ni nga rgyal zhes bya ste 'dod chags kyi rang bzhin no/ /sems can dag dri ma drug po mang ba'i phyir dge sbyong du mi shes/ dge ba'i chos mi spyod pa ni sems can gyi rnyog pa'o/ /ser sna dang 'jungs pa dang / phrag dog ni nyon mongs pa'i rnyog pa ste/ chos dang zang zing bdog pa gtong mi phod pa ni ser sna zhes bya'o//ma thob pa'i zang zing la thob par byed pa'i thabs sbyor te chags shing re ba ni brkam pa zhes bya'o/ /dge ba'i rtsa ba chung zhes bya ba ni 'dod chags dang zhe sdang dang gti mug mi dge ba'i rtsa ba'o/ /de ltar na sems can dge ba chung bas lha dang mi ni 'grib /ngan song ni 'phel zhing skye ste/ sems can dag theg pa chen po la cig car dgod par dka' bas sangs rgyas rnams thabs mkhas pas sangs rgyas kyi theg pa gcig po de las theg pa gsum du bcad de bstan to/ /mdo las shA ri'i bu de ltar zhes pa nas sangs rgyas kyang ma yin par rig par bya'o zhes pa'i bar du ni de bzhin gshegs pas nga rgyal gyi dbang du gyur pa la mi ston to zhes the tshom du gyur pa 'gro ba ste de dag nga rgyal gyi dbang du gyur pa ji ltar shes she na de la rnam pa gsum ste/yang dag pa ma yin pa theg pa gnyis kyi 'phags pa'i mtshan nyid bstan pa dang / nga rgyal gyi dbang du gyur pa'i mtshan nyid bstan pa dang /yang dag pa'i 'phags pa bsdus pa'i mtshan nyid do/ /'dir ni yang dag pa ma yin pa bstan pa ste/ nyan thos dang rang sangs rgyas 'phags pa yang dag par rab tu zhi ba la zhugs pa ni/ sangs rgyas dang phrad kyang phal cher theg pa chen po'i chos dang mi phrad do//gang rigs ma des shing sems bskyed pa ni thos ma thag tu nyan pa dang / 'jug pa dang / khong du chud par gyur te / de ni 'phags pa yang dag pa'o/ /gang de ltar mi shes pa de ni sangs rgyas kyi nye gnas ma yin te/ 'phags pa yang dag pa ma yin par rig par bya'o/ / mdo las 'di ltar shA ri'i bu zhes pa nas nga rgyal can du shes par bya'o zhes pa'i bar du ni nga rgyal gyi dbang du gyur pa'i mtshan nyid bstan pa ste/ ma rabs bsam gtan bzhi pa thob pa 'bras bu gsum gyi nyon mongs pa ma zad pa dgra bcom pa'i 'bras bu phung po nang gi tha ma mya ngan las 'da' ba thob snyam ste/sangs rgyas mi 'dod pa ni nga rgyal can zhes bya'o/ /mdo las de ci'i phyir zhes pa nas gnas ma yin no zhes pa'i bar du ni yang dag pa'i 'phags pa bsdus pa'i mtshan nyid bstan pa ste/ 'phags pa yang dag pa dang phrad pa rab tu zhi ba la zhugs pa na phal cher chos dang phrad do de dag spyod mi nus kyang dad cing yid ches par byed do//gang rigs ma nges pa ni thos nas kyang 'jug cing spyod par byed de de bas na de bzhin gshegs pa dang mngon sum du gyur te chos 'di thos nas dad par mi 'gyur ba'i skabs med de gnas ma yin no zhes smos so/ / mdo las de bzhin gshegs pa mya ngan las 'das pa ni ma gtogs so zhes pa ni skabs 'dir ji ltar chos kyi snod du 'gyur zhes ba'i the tshom bstan pa ste/ la la ni sangs rgyas las chos thos nas skur ba'i sems skye ste/ ci'i phyir na de bzhin gshegs pas kha cig la sangs rgyas su mi 'gyur pa dang chos kyi snod du mi 'gyur ba zhes bstan pa the tshom skyes te/de ltar snod du ma gyur pa'i sems can la chos ston pa mi mdzad na thams cad mkhyen pa'i ye shes zhes bya bar rung ngam zhes pa'i dogs pa bsal ba'i phyir de bzhin gshegs pa mya ngan las 'das pa ni ma gtogs so zhes smos so//mdo las de ci'i phyir zhes pa nas mi 'byung zhes pa'i bar du ni mya ngan las 'das nas thabs mi mkhas pa rab tu zhi ba la zhugs pa chos 'di dang phrad kyang mdo sde 'di lta bu 'dzin pa'am 'chad pa mi 'byung ngo zhes smos so/ /mdo las shA ri'i bu zhes pa nas the tshom med par 'gyur ro zhes pa'i bar du ni gang chos dang phrad pa ni nga mya ngan las 'das kyang sangs rgyas gzhan dang phrad de thabs mkhas pas bstan na chos 'di la the tshom med par 'gyur ro zhes smos so//mdo las shA ri'i bu zhes pa nas sangs rgyas kyi theg pa'o zhes pa'i bar du ni sngar theg pa gsum bstan pa las/da theg pa gcig bstan zhes pa'i the tshom bcad pa ste/ sngar bstan pa dang phyis gsungs pa mi mthun yang brdzun du mi 'gyur ba ni nga 'ba' zhig gis mkhyen gyi khyed mi shes pas dad par gyis shig /yid ches par gyis shig /khyed thog ma sems bskyed pas rtogs par gyis shig /dgra bcom pa'i sems bskyed nas bskal pa stong phrag nyi shu 'das na gdod bskal pa grangs med pa gsum du spyod pa'i dad pa'i sems dang 'dra bas khyed the tshom ma byed par yid ches par gyis shig dang ngas gsungs pa la brdzun med do theg pa gcig tu zad do zhes smos pa yin no//mdo las de nas bcom ldan 'das zhes pa nas dge bsnyen ma rnams la dad do zhes pa'i bar du ni 'di man chad tshigs bcad tshig brgya nyi shu rtsa gcig la gnyis su dbye ste/ tshig brgya rtsa bco brgyad ni rkyang pa bzlas so/ /tshig gsum ni gzhung 'og ma dang mtshams sbyor ba'o//snga ma la yang rnam pa gnyis su dbye ste tshig brgya rtsa bco lngas ni sngar lung bstan pa rnam pa gnyis po ston to/ /tshig gsum gyis ni the tshom bzhi bsal ba bstan pa ste snga ma la yang rnam pa gnyis so/ /snga ma'i tshig bzhis ni lung bstan pa las ngan pa skyon can phyir dong ba bstan to//tshig brgyad cu rtsa gcig gis ni lung bstan pa bstan to/ /tshig snga ma bzhi po las tshig sngar smos pa gcig gis ni nga rgyal gyi dbang du gyur pa bstan to/ /tshig gsum gyis ni mi dge ba'i rtsa ba che ba bstan to/ /tshigs bcad 'dis ni nga rgyal gyi dbang du gyur pa bstan te/ rab tu byung ba ni tshul la gnas pa yin na ma thob pa thob ces smra bas nga rgyal can no/ /khyim na gnas pa dge bsnyen pa yang nga zhes pa la zhen pas nga rgyal gyi sems skyes te/ nga rgyal can dge bsnyen ma ni nga zhes pa'i lto med kyang khyim thab kyi rjes su nga zhes pa bskyed pas nga rgyal can zhes smos so/ /mdo las/lnga stong las ni mi nyung ba/ /zhes pa nas/ /de dag snying po rab tu gnas/ /zhes pa'i bar du ni tshig gsum ni mi dge ba'i rtsa ba che ba bstan pa ste/ skyon sped pa ni tshul khrims nyams nas nyes pa 'chab pa'o/ /nyams pa ni tshul khrims las shas kyis nyams pa'o/ /ma thob par thob ces smra ba ni tshul khrims kyi rtsa ba med pa ste de la tshul khrims kyang med pa rnam par dag pa yang ma yin/ting nge 'dzin kyang mngon du mi 'gyur ro/ /snyigs ma zhes bya ba ni cir yang dgos pa med pa ste/ byis pa'i blo can dag sangs rgyas kyi mthus dong ba yang ci ste dam pa'i chos thos na de la skur ba 'debs pas sdig pa skye bar 'gyur te/phan pa med pa'i phyir phyir dong ngo / /mdo las/ 'di 'dra nga la nyon cig shA ri'i bu/ /zhes pa nas thabs la mkhas pa brgya phrag du ma zhes pa'i bar du 'di man chad ni tshig brgya rtsa bcu gcig gis lung bstan pa brjod de/ sngar mdo las rnam pa drug tu phye ba ltar 'dir yang rnam pa drug tu dbye ste tshig drug gis ni ci'i phyir bshad pa bstan to//tshig phyed dang brgyad kyis ni gnas pa bstan to/ /tshig phyed dang gnyis kyis ni bcas pa bstan to/ /tshig phyed dang dgus ni don gang la brten pa bstan to/ /tshig bdun cu rtsa gcig gis chos bsdu ba bstan to//tshig bdun gyis ni ma thos pa thos par bya ba bstan te/ mdo las 'grel pa las bshad pa dang ltag 'og ni mi mthun no/ /tshig drug gis ci'i phyir bshad pa las yang rnam pa gnyis su dbye ste/ tshig phyed dang lngas ni ci'i phyir bya ba bstan to / /tshig phyed dang gnyis kyis ni dbang po ji bzhin du bshad pa bstan to//de la tshigs bcad gcig gis rgyu sna tshogs bstan to/ /tshig gnyis kyis ni gdon mi za ba'i tshig dang rgyu dang dpe sna tshogs bstan to/ /tshig phyed dang gnyis kyis ni chos sna tshogs bstan pa ste/ tshigs bcad 'dis ni dbang po ji bzhin du rgyu sna tshogs bstan pa'o//mdo las/ de yi bsam pa spyod pa ji 'dra mkhyen/ /zhes pa nas/ /ci nas sems can thams cad mgu bar byas/ /zhes pa'i bar du ni gdon mi za ba'i tshig dang rgyu dang dpe rnam pa sna tshogs bstan pa'o/ /khong du chud pa ni byang chub rtogs pa'o/ /dad pa sna tshogs ni mos pa'i mchog ces bya ba'i don to//bsam pa dang sbyor ba ni dge ba dang mi dge ba'i las so/ /de ltar bsam pa dang dpyod pa dang dad pa sna tshogs mkhyen pas gdon mi za ba'i tshig dang rgyu dang dpe mang po bstan pas thams cad mgu bar gyur to/ /mdo las de bzhin mdo sde zhes pa nas gtan la phab kyang de bzhin bshad cas pa'i bar du ni skabs 'dir mdo sde bcu gnyis bstan te/de la yang rnam pa gsum mo/ /mtshan nyid bstan pa dang / ming bstan pa dang / khyad par bstan pa'o/ /mdo sde'i mtshan nyid la yang rnam pa gnyis te/ spyi'i mtshan nyid dang rang gi mtshan nyid do//de la spyi'i mtshan nyid ni 'di skad bdag gis thos pa nas mngon par dga'o zhes pa'i bar du ni tshig gi don gang brjod pa de dag thams cad ni spyi'i mtshan nyid ces bya'o/ /'grel pa dag las mdo sde'i tshigs su bcad de gsungs pa ma gtogs par tshig rkyang pa las tshig gi don mtshon te brjod pa ni rang gi mtshan nyid ces bya'o//dbyangs kyis bsnyad pa la yang rnam pa gnyis te/ phyis 'ongs pa la phan gdags pa dang rkyang pa las don ma nges pa nges par bstan pa'o/ /'grel pa dag las mdo sde la la snga phyi mi mthun te rkyang pa las smos pa'i 'og tu tshigs su bcad de bzlas pa ni phyis 'ongs pa la phan pa'o//rkyang pa las don ma nges pa dag tshigs su bcad de bzlas pas don gsal bar bya ba'i phyir don ma nges pa nges par bstan pa zhes bya'o/ /lung bstan pa la rnam pa gsum ste/ nye gnas kyi skye shi'i rgyu dang 'bras bu lung bstan pa dang /nges pa'i don la gsal bar lung bstan pa dang / byang chub sems dpa' la sangs rgyas su lung bstan pa dang gsum mo/ /'phags pa'i nye gnas dag la khyod 'das pa'i dus legs pa dang nyes pa 'di lta bu zhig byas te skye ba'i gnas kyi khyad par lung bstan pa ni skye shing rgyu dang 'bras bu lung bstan pa'o//mdo sde ma nges pa nges pa'i don du lung bstan pa ni/ nges pa'i don zab mor lung bstan pa'o/ /ma pham pa khyod ma 'ongs pa'i dus rgyal po dung zhes bya ba de'i tshe byams pa zhes bya ba'i sangs rgyas su 'gyur ro zhes lung bstan pa ni sangs rgyas su lung bstan pa'o//tshigs su bcad pa ni mdo sde dag la tshig rkyang pa las mi smos par tshigs su bcad pa gnyis sam gsum mam bzhi'am lnga'am drug la sogs pa don gang brjod pa tshigs su bcad de gsungs pa ni tshigs su bcad pa'i sde zhes bya'o/ /ched du brjod pa ni mdo sde las gsol ba ma btab par yang dag pa'i chos dang bstan pa dang yun du gnas par bya ba'i phyir gsol ba gdab mi dgos par gsungs pa ni ched du brjod pa'i sde zhes bya'o//gleng gzhi la yang rnam pa gsum ste gsol ba btab nas bstan pa dang nyams pa las tshul khrims bcas pa bstan pa dang /gleng ba yod pas chos bstan pa dang gsum mo/ /'grel pa dag las glengs nas bstan pa ni gsol ba btab nas bshad pa'o/ /bslab tshig bcas pa ni bcas pa'o/ /mdo sde dag las pha rol pos glengs te dper na mnyan du yod pa na mi zhig gis bya zhig bzung nas phyir yang btang ba las glengs te bcom ldan 'das kyis sngon gyi rgyu yang glengs nas bstan pa ni glengs nas bstan pa zhes bya'o//dpe ni mdo sde dag las dpe rnam pa mang pos chos bstan pa'o/ /da ltar 'das pa'i sde ni skyes pa'i rabs ma gtogs par sngon 'das pa'i gang zag dang chos kyi rgyus bstan pa'o//skyes pa'i rabs kyi sde ni bcom ldan 'das sngon 'das pa'i dus na che ge mo zhig na skye ba dang 'chi 'pho ba byang chub sems dpa'i spyod pa dka' ba spyod pa dang / mdo sde dag la 'das pa'i dus na sha ba dang dred mo dang / ri bong dang bya nam mkha' lding la sogs pa'i lus byas pa bstan pa ni skyes pa'i rabs zhes bya'o//shin tu rgyas pa la rnam pa gnyis te/ byang chub sems dpa'i lam la ston pa dang / rgya che la dus yun ring ba'o/ /nyan thos la'ang shin tu rgyas pa yod de/ 'dir ni gnyi ga la shin tu rgyas pa zhes bya'o/ /rmad du byung ba ni mdo sde dag las sangs rgyas dang nye gnas 'phags pa 'khor brgyad kyi yon tan thun mong dang thun mong ma yin pa ya mtshan ngo mtshar du gyur pa bstan pa ni rmad du byung ba zhes bya'o//gzhan yang mdo sde las sangs rgyas btsas ma thag tu gom pa bdun bdun gshegs pa dang / 'od zer chen pos phyogs bcu snang bar byas pa dang /spre'us sbrang rtsi phul ba dang / khyi dkar pos chos nyan pa la sogs te/ ngo mtshar rmad du byung ba'i chos rnams ni rmad du byung ba zhes bya'o/ /gtan la phab par bstan pa zhes bya ba la rnam pa gnyis te/ sangs rgyas nyid kyis bstan pa dang / 'phags pa nye gnas kyis bstan pa'o//'grel pa dag las mdo sde gang ltag 'og gtan la phab pa ni gtan la phab par bstan pa zhes bya'o/ /gang mdo sde nges par bstan pa la yang gtan la phab pa zhes bya'o/ /de la ming bstan pa ni mdo sde bcu gnyis kyi ming bstan pa'o/ /de la khyad par la yang rnam pa gnyis te rang bzhin gyi khyad par dang /bstan pa'i khyad par ro/ /rang bzhin gyi khyad par ni dbyangs kyis bsnyad pa'i nang na tshigs su bcad pa med la/ tshigs su bcad pa'i nang na dbyangs kyis bsnyad pa med de snga phyi dang / rkyang pa dang bzlas pa tha dad pa'i phyir ro/ /mdo sde dag las thog ma 'di skad bdag gis thos pa nas tha ma rjes su spyad pa'i bar du mdo sde zhes smos pas sde bcu gnyis kyang bsdus te/mdo sde ni tshig rkyang pa 'ba' zhig la bya bas dbyangs kyis bsnyad pa dang tshigs su bcad pa ma gtogs par sde bdun po kun la bcu gnyis tshang bar yod par shes par bya'o/ /bstan pa'i khyad par zhes bya ba ni theg pa chen po la tshang bar yong la theg pa chung ngu la dgu las med de/'di'i skabs su theg pa chung ngu smos pas lung bstan pa dang / ched du brjod pa dang shin tu rgyas pa dang gsum ma smos te/ 'di ni khyad par bstan pa'o/ /mdo las mi mkhas ngan la chags par gang gyur zhes pa nas de las mya ngan 'das pa nye bar bstan zhes pa'i bar du tshig phyed dang gnyis kyis dbang po ji lta ba bzhin du rtogs par dka' ba bstan pa ste/'di la rnam pa lnga'o/ /dbang po rtul bas go dka' ba dang chung ngu la mos shing chen pos skrag pa dang 'khor ba la chags shing 'jig rten las 'das pa la ma dad pa dang /skal ba yod kyang mi spyod pa dang / sdug bsngal mang pos mngon du gzir ba ste / de dag la mya ngan las 'das pa nye bar bstan pa'o/ /dbang po rtul zhing mi mkhas la ngan te 'khor ba la chags pas sangs rgyas rnams dang phrad kyang theg pa chen po'i chos zab mo mi spyod de sdig pa mi dge ba spyod pas sdug bsngal myong bar 'gyur te/sdug bsngal thar bar bya ba'i phyir theg pa gnyis kyi mya ngan las 'das pa bstan to/ /mdo las/ de ltar rang byung ba ni thabs mdzad pa/ /zhes pa nas khyed cag sangs rgyas su yang 'grub po zhes pa'i bar du 'di man chad tshig phyed dang brgyad kyis gnas par bya ba bstan pa ste/de la tshig gcig ni spyir bstan to/ /tshig gcig ni bshad pa'o/ /tshig bzhis bsdus pa'o/ /tshig gcig ni gnas par bskul ba'o/ /'di ni spyir bstan pa ste/ gnyis thabs tsam du bstan nas mthar sangs rgyas kyi ye shes theg pa gcig la 'jug pa bstan pa'o//mdo las ci'i phyir zhe na skyob pa dus la sdod ces pa nas yang dag gdon mi za ba bshad do zhes pa'i bar du ni 'dir spyir bstan pa las dmigs te/ sngon khyod kyi dbang po ma smin pas theg pa chen po mi rtogs te bstan pa'i snod du ma gyur to/ /da ni dbang po smin pas dus la bab ste gdon mi za ba'i don bshad do zhes bstan to//mdo las/ nga yis bstan pa sde dgu de rnams kyang / /zhes pa nas/ /rab tu gzhug pa'i phyir ni ngas bshad do/ /zhes pa'i bar du ni 'di man chad tshig phyed dang ldas bsdus pa bstan pa ste/ de la yang gsum du dbye'o/ /tshig gcig gis ni chos chung ngu yang dag pa ma yin te/chen po ni yang dag pa'o zhes bstan pa'o / /tshig gcig gis ni chos chen po dam par bstan te skyes bu dam pa la bshad pa bstan pa'o/ /tshig gnyis kyis ni chos dang gang zag bstan pa ste/ 'di ni thog ma sems bskyed pa'i mthu stobs ji lta ba bzhin du bstan pa sde dgu bshad de/mthar phyin pa ma yin pas chen po la rab tu gzhug go zhes bstan to/ /mdo las/ 'di ltar rtag tu rnam par dag 'gyur ba/ /zhes pa nas/ /de la shin tu rgyas pa'i mdo sde bshad/ /ces pa'i bar du ni skabs 'dir chos chen po dam pa skyes bu dam pa la bshad pa bstan te/mdor na byang chub sems dpa'i chos spyod pa thams cad la sangs rgyas kyi sras zhes bya'o/ /sangs rgyas kyi sras kyang yon tan lnga dang ldan ba'o/ /lnga gang zhe na bsam pa rnam par dag pa ste theg pa chen po'i sangs rgyas kyi ye shes 'ba' zhig tshol ba dang /mnyan nges pa ste nges pa'i sems kyis theg pa chen po la brtson pa dang dbang po rno ba ste sdug bsngal las 'don cing bde ba byin pa dang / tshad med pa ste sangs rgyas mang po la bsnyen bkur byed pa dang / shin tu zab mo spyod pa ste bsod nams dang ye shes kyi tshogs la nan tan byed pa'o//de yang byang chub tu sems bskyed pa ste/ chos bcu po 'di dang ldan na byang chub tu sems bskyed pa zhes bya'o/ /gang zhe na dge ba'i bshes gnyen la bsnyen bkur byed pa dang / sangs rgyas mang po la bya ba byed pa dang / dge ba'i rtsa ba spyod pa dang / chos mchog tshol ba dang /sems mnyen zhing nges pa dang / sdug bsngal la bzod pa dang / snying rje shas che ba dang / bsam pa dag pas snyoms pa dang / theg pa chen po la mos pa dang / sangs rgyas kyi ye shes tshol ba dang bcu ste/ yon tan 'di dag dang ldan na sangs rgyas kyi sras zhes bya ste theg pa chen po ston par 'gyur ro//mdo las/ 'di ltar de dag bsam pa rdzogs pa dang / /zhes pa nas/ /shin tu rgyas pa'i mdo sde rab tu bshad/ /ces pa'i bar du ni yon tan lnga dang ldan pa'i gang zag ma 'ongs pa'i dus su 'tshang rgya bar 'gyur ro/ /de yang sangs rgyas dran pa'i bsam pa rdzogs pa dang /rnam par dag pa'i tshul khrims dang ldan pa'o/ /sangs rgyas dran pa la rnam pa gnyis te sems kyis dran pa dang tshig gis brjod pa'o/ /tshul khrims dang ldan pa bslab pa gsum rdzogs pa la lung ston par 'gyur te/ de dag thos nas shin tu dga' bar 'gyur zhes smos so/ /mdo las/ 'di ltar 'dren pa'i nyan thos de dag las/ /zhes pa nas/ /thams cad byang chub 'gyur bar the tsom med/ /zhes pa'i bar du ni dad pa skyed par bskul ba ste/ chos 'di thos sam gzung yang rung theg pa chen po la gnas par 'gyur ba bstan pa'o/ /mdo las/ theg pa gcig ste gnyis su med//ces pa nas/ /theg pa sna tshogs mngon par bstan/ /zhes pa'i bar du ni tshig phyed dang gnyis po 'dis gnyis su med pa bstan pa ste/ gnyis su med pa ni rang sangs rgyas kyi theg pa med ces pa'i don to/ /gsum du med pa ni nyan thos kyi theg pa med pa ste/ sangs rgyas kyis thabs su gsungs pa ma gtogs par theg pa chen po las gnyis dang gsum du med ces bstan to//mdo las/ sangs rgyas ye shes bstan pa'i phyir/ /zhes pa nas/ /theg pa chung ngus mi 'dren sangs rgyas kyi / /zhes pa'i bar du ni 'di man chad tshigs bcad phyed dang bcu dgus don gang la gnas par bya ba bstan pa ste/de la tshig phyed dang gnyis kyis ni bya ba chen po gcig bstan pa'o/ /tshig bcu bdun gyis ni 'dzud pa dang ston pa dang / 'jug pa dang chud par byed pa bstan pa'o/ /sangs rgyas 'jig rten du byung ba ni bya ba gcig gi phyir te/ sangs rgyas kyi theg pa gcig ste gnyis su yod pa ma yin no//mdo las/ rang byung bdag nyid gcig la gnas pa dang / /zhes pa nas/ /de dag la yang sems can so sor 'jog/ /ces pa'i bar du 'di man chad tshigs bcad bcu bdun gyis 'dzud pa dang ston pa dang / 'jug pa dang chud par bya ba bstan pa ste/ thog ma'i tshig gcig gis 'dzud pa bstan to//tshig lngas ni 'jug pa bstan to/ /tshig gcig gis ni chud par bya ba bstan to/ /tshig bcus ni ston pa bstan pa ste/ gnas pa ni brten pa'i don te mya ngan las 'da' ba dang / byang chub la bde bar gnas pa'o/ /stobs dang bsam gtan tshad med pas brgyan te bsod nams dang ye shes kyi tshogs su 'gyur ba'i yon tan thams cad chos 'di gnyis kyi nang du 'du ste/sems can thams cad de la 'jog pas 'dzud pa zhes bya'o/ /mdo las/ ser sna'i nyes pa nga la yod par 'gyur/ /zhes pa nas/ /sems can gcig kyang rung ste nga mi dge /zhes pa'i bar du 'di man chad tshigs bcad lngas ni 'jug pa bstan pa ste/ de la yang gsum du dbye'o/ /tshigs bcad phyed dang gnyis kyis ni mnyam pa bstan to/ /tshig phyed dang gsum gyis ni yon tan gyi khyad par bstan to/ /tshig gcig gis ni 'jug pa nyid bstan te/ byang chub mchog rab ces bya ba ni bla na med pa'i theg pa chen po don dam pa'o//sangs rgyas kyi bla na med pa'i theg pa mnyam pa brnyes na de la bdag gam pha rol zhes tha dad par ga la zhig 'byed de/ nang gi ye shes mi mnyam na bdag 'ba' zhig theg pa chen po la 'jug par byed phyi rol gyi ye shes mi mnyam na pha rol po theg pa chung ngu la 'jog par 'gyur/sgrib dang ma bral na bla na med pa'i theg pa chen por ga la rung ste/ de bas na ser sna'i nyes pa nga la yod na mi dge zhes smos pa yin no/ /mdo las/ nga la ser sna dag ni chung zad med/ /zhes pa nas/ /'gro ba kun rig de bsang sangs rgyas//zhes pa'i bar du ni yon tan gyi khyad par bstan pa ste/ de la tshig phyed dang gnyis kyis nga 'dod chags dang bral bas 'jigs pa med pa'i yon tan bstan to/ /tshig 'og ma gcig gis ni phyi rol gyi rgyan dang yang dag pa'i chos kyi yon tan bstan te/ser sna med ces bya ba ni theg pa chen po bcabs te/ theg pa chung ngu ston cing sems can bslu ba'am/ sngar theg pa chen po sbyin par bya ba las phyis ma sbyin pa ma yin pas ser sna med do/ /sems can gyis theg pa chen po rig cing chud kyis dogs pa'i thugs mi mnga' bas phrag dog med do//sdig pa'i chos ni gang nyon mongs pa'i las dang bcas pa sdug bsngal ba 'khor ba'i chos yongs su bcad pas nyes pa'i skyon gang yang med de/ yang dag pa'i ye shes rdzogs nas phyogs bcur seng ge'i sgra bsgrags te 'jigs pa mi mnga' bas/ 'gro ba kun rig nga sangs rgyas//zhes bya'o/ /mdo las/ ji ltar mtshan rnams kyis ni nga brgyan te/ /zhes pa nas/ /chos kyi rang bzhin phyag rgya 'di bshad do/ /zhes pa'i bar du ni phyi rol gyi mtshan gyis brgyan pa bstan pa ste/ mtshan bzang pos brgyan pa'i sku'i 'od dang / ye shes kyi 'od kyis snod kyi 'jig rten dang bcud kyi 'jig rten snang bar byas nas srog chags kun gyis nga la bkur sti byas so//nang na nyon mongs pa med pas phyi rol gyi mtshan gyis brgyan te chos kyi rang bzhin gyi phyag rgya 'di bshad do/ /phyag rgya ni stong pa gnyis kyi theg pa chen po'i phyag rgya ste/ phyag rgya 'dis btab pa ni theg pa chen po'i chos yang dag pa zhes bya'o//mdo las/ de ltar ngas bsams shA ri'i bu/ /zhes pa nas/ /bdag 'od rang byung 'jig rten rig par ro/ /zhes pa'i bar du ni go bar bya ba bstan pa ste theg pa chen po yang dag pa'i ye shes ngas ji ltar rig pa bzhin du sems can thams cad la yang bstan zhes pa'i don to//mdo las/ ji ltar mthong zhing ji ltar bsams pa dang / /zhes pa nas/ /dur sa de dag phyi phyir skye bar 'gyur/ /zhes pa'i bar du tshigs bcad gcig gis chud par byed pa bstan pa ste/ /sngon gyi smon lam yongs su rdzogs nas smon lam bzhin du byang chub la dgod de/byang chub ni rgyu'i don to/ /sa dang po nas sa brgyad kyi bar du chud par byed de/ phyir mi ldog pa thob pas sangs rgyas su 'gyur ba'i rgyu'o/ /'di man chad tshig bcus ni ston pa 'grel pa ste/ de la thog ma'i tshig brgyad kyis mi mthun pa ston to/ / tshig phyi ma gnyis kyis ni phyis mthun par 'gyur ba bstan pa ste/ de la gang shes pa dang ldan pas ni de bzhin du 'dzin par 'gyur gyi gang mi shes pa rnams ni de la myos te skur pa 'debs so/ /'di man chad tshig drug gis mi mthun pa'i mtshan ma bstan te/ de la yang rnam pa gnyis so//thog ma tshig gcig gis ni dge ba med la sdig pa dang bcas pas mi mthun pa bstan to/ /'og ma tshig lngas ni sdig pa dang bcas la dge ba med pas mi mthun pa bstan to/ /spyod pa ma spyad tshe rabs snga ma la/ /zhes pa ni 'jig rten las 'das pa'i dge ba'i rtsa ba ma bskyed pa ste/cung zad bskyed pa yang zag pa med pa'i rgyur 'gyur ba ma yin gyi 'dod pa lnga'i yon tan gyi rgyur 'gyur bas 'di lnga la chags shing zhen te/ gti mug gi las byas pas sred pa skyes te/ skye shi'i sdong po phyi phyir skye bar gyur to/ /'di man chad tshig lngas sdig pa dang bcas la dge ba med pas mi mthun par bstan te/de yang rnam pa gnyis so/ /de la snga ma tshig bzhis ni sdig pa dang bcas pas mi mthun pa bstan to/ /'og ma tshig gcig gis ni dge ba med pas mi mthun pa bstan to/ /snga ma la yang rnam pa gnyis te/ 'dod pa lnga'i yon tan la chags shing zhen pas mi mthun pa dang /bslab pa myos shing 'khrul pas mi mthun pa ste/ 'dod pa'i dbang gis mi dge ba'i las 'ba' zhig spyad pas ngan 'gror lhung zhes bya'o/ /las 'dren mar spyad pa 'gro ba drug tu nyon mongs par 'gyur ro/ /skye ba rnam bzhir las dang 'grogs pas sdug bsngal gsum dang lnga dang brgyad kyis gdungs pas btsir ba zhes bya'o//phyi phyir skye bar 'gyur ba ni 'khor ba'i rgyun mi 'chad pa'o/ /mdo las/ bsod nams chung bas sdug bsngal kun gyis btsir / /zhes pa nas/ /tshe rabs skye ba stong phrag du ma'o/ /zhes pa'i bar du 'di man chad tshig phyed dang gnyis kyis bslab pa 'khrugs pas mi mthun pa bstan pa ste/thog ma'i tshig phyed dang gnyis kyis ni 'jig tshogs su lta ba dang mthar lta bas lta ba drug cu rtsa gnyis su 'gyur ba bstan to/ /phyi ma tshig gcig gis ni lta ba bsnyems pa dang tshul khrims bsnyems pa'i rgyur 'gyur ba dang /de ma yin pa gzhan yang skye ba bstan to/ /sems can thog ma med pa nas bsod nams dang ye shes kyi tshogs chung bas sdug bsngal gyis btsir bar gyur to/ /de dag kyang thar pa'i lam 'dod mod kyi yang dag pa dang log pa ma rtogs te mu stegs can du gyur na log par lta ba la slob pa dang /spyod pa 'khrul pas log par lta ba zhes bya'o/ /lta ba la rnam pa mang ste gang sems can gyi 'byung ba'i lam gyi bar du gcod cing rnam par grol bar mi 'gyur ba la lta ba stug po zhes bya'o/ /yod pa dang med pa zhes bya ba ni lta ba lnga la bzhi ni yod par lta ba'o//ngan par lta ba ni med par lta ba'o/ /gzhan yang lta ba sna tshogs ni yod med ces bya'o/ /gzhan yang yod pa ni bdag gi phung po phyi ma yod par 'dzin pa ste/ rtag par lta ba'o/ /med pa ni bdag gi phung po phyi ma med par 'dzin pa ste chad par lta ba'o/ /mthar lta ba dang log par lta ba las lta ba drug cu rtsa gnyis su 'dzin pa ni yod med ces bya'o//de ltar ngar 'dzin par lta ba drug cu rtsa gnyis la sogs par 'dzin cing chags te gtong du mi btub pas log par byed par nga rgyal can zhes bya'o/ /'di man chad tshig gcig gis ni dge ba med pas mi mthun pa bstan te/gang dge ba dang ldan pa ni bsnyen pa bzhi la bsnyen par bya'o / /dge ba'i bshes gnyen la brten pa dang yang dag pa'i chos nyen pa dang tshul bzhin yid la byed pa dang / thos pa bzhin du nan tan byed pa'o/ /byis pa g.yo byed pa sdig pa can ni tshe rabs du mar sangs rgyas kyi mtshan yang mi thos na dge ba'i bshes gnyen dang gang zhig phrad de/de ltar sangs rgyas kyang mi mthong / chos kyang mi thos te/ chos thos pa'i skal ba med pa / yid la byed pa dang nan tan du spyod par ga la zhig 'gyur te/ de ni shin tu gdul dka' bas thog ma nas theg pa chen po bstan par dka'o//mdo las/ nga'i thabs kyis de la shA ri'i bu/ /zhes pa nas de dag mya ngan las 'da' ba nye bar bstan zhes pa'i bar du ni mi mthun pa bsdu ba bstan pa ste/ ngas sngar thabs kyi mya ngan las 'das pa sdug bsngal zhi ba tsam bstan to/ /mdo las/ 'di ltar rtag tu ngas bshad mya ngan 'das//zhes pa nas/ theg pa 'di ni gcig ste gnyis su med/ /ces pa'i bar du ni 'di man chad tshigs bcad bdun cu rtsa phyed dang gcig gis chos la gnas pa bstan pa ste/ de la rnam pa gsum mo/ /tshig phyed dang gnyis kyis ni phyogs bcu'i sangs rgyas kyi chos bstan to//bar gyi tshigs bcad sum cu rtsa phyed dang dgus ni dus gsum gyi sangs rgyas kyi chos bstan to/ /tha ma tshigs bcad sum cu rtsa phyed dang gcig gis ni nga yang de bzhin no zhes pa bstan to/ /'di ni phyogs bcu'i sangs rgyas kyi chos bstan pa ste/ mdo las/ theg pa gcig ste gnyis su med//ces 'byung na gsum med par bya ste/ gcig tu bsdur ga la zhig rung / mdo las/ sngon gyi de bzhin gshegs pa gang byung ba/ /zhes pa nas/ /de dag tshad bzung du ni yod med pa/ /zhes pa'i bar du ni 'di man chad tshigs bcad sum cu rtsa phyed dang dgus dus gsum kyi sangs rgyas kyi chos bstan pa ste/de la yang rnam pa gsum mo/ /thog ma'i tshig nyi shu rtsa phyed dang brgyad kyis ni sngon 'das pa bstan to/ /bar gyi tshig drug gis ni ma 'ongs pa bstan to/ /tha ma'i tshig bzhis ni da ltar bstan te 'das pa bstan pa la rnam pa gnyis te/ thog ma'i tshig phyed dang lngas ni sangs rgyas kyi chos bstan pa thog mar bkri ba'i thabs tsam bstan nas phyis yang dag pa bstan pa'o//tshig nyi shu rtsa gsum gyis ni sems can rnams chos thos nas mthar thams cad mkhyen pa'i ye shes thob pa bstan pa'o/ /snga ma la yang bzhi ste/ tshig gcig gis ni sangs rgyas mang ba bstan to//tshig gcig gis ni thabs tsam bstan to/ /tshig gcig gis ni yang dag par bstan to/ /tshig phyed dang gnyis kyis ni ci'i phyir thabs dang yang dag pa bstan pa brjod do/ /mdo las/ skyes bu dam pa de dag thams cad kyi/ /zhes pa nas/thabs la mkhas pa brgya phrag du ma yis/ /zhes pa'i bar du ni thabs tsam du bstan pa brjod pa'o/ /mdo las/ de dag kun gyi theg pa gcig tu bstan/ /zhes pa nas/ /srog chags du ma bsam gyis mi khyab rnams/ /zhes pa'i bar du ni yang dag pa bstan pa'o//mdo las/ rgyal ba'i thabs gzhan rnam pa tha dad pas/ /zhes pa nas/ de bzhin gshegs pas 'jig rten lhar bcas la / /zhes pa'i bar du ni ci'i phyir rgyal bas thabs tsam bstan pa dang / yang dag pa bstan pa brjod pa ste/ sems can mang po cig car theg pa gcig la 'jug mi nus te de bas na dbang po dang sbyar te/sngar thabs rnam pa tha dad pa bstan te/ phyis theg pa gcig tu bstan to/ /mdo las/ sems can gang gis de la mngon sum der/ /zhes pa nas/ /de dag thams cad byang chub thob par 'gyur/ /zhes pa'i bar du ni 'di man chad tshig nyi shu rtsa gsum gyis sems can mang po chos thos nas mthar thams cad mkhyen pa'i ye shes thob par bstan pa ste/de la yang rnam pa gsum mo/ /thog ma'i tshig gnyis kyis ni sangs rgyas da ltar bzhugs pa brjod do/ /tshig nyi shus ni 'das pa'i sangs rgyas brjod do//tshig gcig gis ni bsdu ba bstan to/ /'di ni thog ma ste sangs rgyas dang phrad nas chos thos pas pha rol tu phyin pa drug dang bsdu ba bzhi la sogs pa ni bsod nams rnam pa tha dad pa zhes bya ste/ sangs rgyas kyi rgyur 'gyur ba bsgom zhing byang chub sems dpa'i spyad pa spyod pas de dag thams cad byang chub thob par 'gyur ro//mdo las/ mya ngan las 'das rgyal ba de dag gi/ /zhes pa nas/ /de dag thams cad byang chub thob par 'gyur/ /zhes pa'i bar du 'di man chad tshigs bcad nyi shus sangs rgyas 'das pa bstan pa ste / de la rnam pa lnga'o//tshig gcig gis ni byang chub sems dpa' bstan to/ / tshig gcig gis ni byams pa bstan to / /tshig phyed dang lngas ni mchod rten byas pa bstan to/ /tshig phyed dang bdun gyis ni sku gzugs byas pa bstan to/ /tshig bdun gyis mchod pa byas pa bstan to/ /tshig gcig gis ni sangs rgyas brjod pa bstan to//'di ni thog ma ste/ bzod kyang zhi la dul ba med dam/ zhi la dul yang bzod pa med na byang chub kyi sems zhes mi bya ste/ gang bzod cing zhi la dul ba ni byang chub kyi sems zhes bya ste/ tshul bzhin du phan pa'i don du 'gyur ba la rab tu zhi zhing dul na de dag byang chub thob par 'gyur ro//'di'ang sangs rgyas mya ngan las 'das nas phyi ma gdul dka' ba rnams kyi spyod pa yin gyi sangs rgyas bzhugs pa'i tshe spyod pa 'dis rgyur bya ba ma yin no/ /pha rol tu phyin pa drug kyang sangs rgyas mya ngan las 'das nas thun mong du spyod pa yin te/de dag kyang byang chub thob par 'gyur ro/ /mdo las/ gang gis ring bsrel la ni mchod byed pa/ /zhes pa nas/ /de dag gis kyang byang chub thob par 'gyur/ /zhes pa'i bar du ni 'di man chad tshigs bcad phyed dang lngas mchod rten byas pas byang chub thob pa bstan pa ste/de la yang rnam pa gnyis so/ /thog ma'i tshigs bcad bzhis ni mchod rten byas pa bstan to/ /'og ma'i tshigs bcad phyed kyis ni mdor bsdus pa bstan to/ /thog ma'i tshigs bcad la rnam pa gsum ste/ thog ma'i tshig gnyis kyis ni mchod rten mang po la rin po ches brgyan pa bstan to//tshig gcig gis ni rnam pa las mchod rten byas pa bstan to/ /tshig gcig gis ni rtsed mo'i phyir bye ma las mchod rten byas pa bstan pa ste/ gang gis mchod rten byas na tshangs pa'i rgyal po'i bsod nams dang mnyam mo/ /tshangs pa'i bsod nams ni gling bzhi dang /'dod pa'i khams drug gi lha'i bsod nams dang mnyam ste mchod rten byas nas byang chub thob par 'gyur ro/ /mdo las/ gang gis mchod rten rdo yi snying las byas/ /zhes pa nas/ rgyal ba'i mchod rten dga' bzhin byas pa dang / /zhes pa'i bar du tshig gcig gis ni rnam pa dgu la mchod rten du byas pa bstan pa'o //mdo las/ de'i phyir rdul gyi phung po dag las kyang / /zhes pa nas/ de rnams kyis kyang byang chub thob par 'gyur/ /zhes pa'i bar du tshig gcig gis ni rtse ba'i phyir dngos po rin chung ba la mchod rten byas kyang byang chub tu 'gyur ro zhes bstan te/bye ma las phung po byas te/ rgyal ba'i mchod rten byas na byang chub thob par 'gyur ba ni gang byang chub tu sems bskyed pa/ byang chub sems dpa'i spyad pa spyod pa/ dge ba'i rtsa ba gang byas kyang byang chub thob par byed pa la bya ba'i ma rabs ma nges pa'i rigs can nyan thos sam byang chub tu sems ma bskyed pa ni thob par 'gyur ba ma yin no//de'i tshul du chung ngu nas thal mo sbyar te btud pa tsam yang byang chub thob par 'gyur zhes brjod pa yang de bzhin du sbyar ro/ /mdo las/ la las de bzhin rin chen gzugs byas pa//zhes pa nas/ de dag thams cad byang chub thob par 'gyur / /zhes pa'i bar du tshig drug gis sku gzugs byas pa bstan te / de la yang rnam pa gnyis so/ /tshig lngas ni sku gzugs byas pa bstan/ tshig phyed dang gnyis kyis ni mdor bsdus pa bstan to/ /sku gzugs byed pa yang gzhog pa dang ri mor bri ba la sogs pa'o//mdo las/ la las de ni rin chen sna bdun dang / /zhes pa nas/ de dag thams cad byang chub thob par 'gyur/ /zhes pa'i bar du tshig gnyis kyis rin po che la sogs pas sku gzugs byas pa bstan pa'o/ /mdo las/ gang gis rtsig ngos sku gzugs bris pa ste//zhes pa nas/ de dag thams cad byang chub thob par 'gyur/ /zhes pa'i bar du tshigs bcad 'dis ni sku gzugs ri mor bris pa bstan pa'o/ /mdo las/ la la de ni slob pa'i tshe na'ang rung / /zhes pa nas / de dag thams cad byang chub thob pa yin//zhes pa'i bar du tshigs bcad 'dis ni rtsed mo las sku gzugs bris pa bstan pa'o/ /mdo las/ de dag thams cad snying rje can du 'gyur/ /zhes pa nas/ byang chub sems dpa' mang po rab tu 'dzud/ /zhes pa'i bar du tshigs bcad 'dis ni mdor bsdus pa bstan pa ste/ gang snying rje chen po'i sems dang ldan pa ni dge ba ci byed kyang snying rje'i sems dang bcas pas pha rol tu phyin cing byang chub thob par 'gyur ro/ /mdo las/ de bzhin gshegs pa rnams kyi ring bsrel dang / /zhes pa nas/ de la me tog dang ni spos gsol te/ /zhes pa'i bar du ni 'di man chad tshigs bcad bdun gyis mchod pa bya ba bstan te/de la tshigs bcad phyed dang drug gis ni mchod pa bya ba bstan to/ /phyed dang gnyis kyis mdor bsdus pa bstan to/ /de la tshigs bcad gcig gis ni dngos po bzhis mchod pa bya ba bstan/ tshigs bcad gcig gis ni rol mos mchod pa bya ba bstan/tshigs bcad gcig gis ni dbyangs kyis mchod pa bya ba bstan/ tshigs bcad gcig gis ni lus kyi las kyis mchod pa bya ba bstan to / /me tog gis mchod pas byang chub kyi yan lag bdun gyi me tog 'thob po/ /spos phul bas chos kyi sku'i gsung thob po//ba dan phul bas gzungs thob cing sdig pa las bzlog par 'gyur ro/ /gdugs phul bas tshad med pa bzhis sems can 'gebs par 'gyur ro/ /mdo las/ der ni gang gis sil snyan brdung bcug pa/ /zhes pa nas/ chu la brdabs dang thal mo brdabs / /zhes pa'i bar du ni rol mos mchod pa bya ba bstan pa ste/mdo las rol mo dang na chung bzang mo pha rol gyi sems 'phrog pas sbyin par mi bya'o zhes 'byung ste/ sangs rgyas la mchod na 'gal ba med do/ /mdo las/ bde bar gshegs pa de la mchod pa'i phyir/ /zhes pa nas/ ring bsrel de la rnam pa mang pos mchod//ces pa'i bar du ni tshigs bcad 'dis dbyangs dang glu snyan pas mchod pa byas pa bstan pa ste/ tshangs pa'i dbyangs thob par 'gyur ro/ /mdo las/ bde gshegs ring bsrel la ni cung zad kyis/ /zhes pa nas/ de dag rim gyis sangs rgyas bye ba mthong //zhes pa'i bar du ni me tog gi mchod pa bya ba bstan pa ste/ sngar dngos po bzhis mchod pa las me tog gi mchod pa dang ci mi 'dra zhe na/ 'di ni 'khrug bzhin pa'i sems kyis mchod pa la bya'o/ /mdo las/ mchod rten de la gang gis thal mo sbyar/ /zhes pa nas/ de bzhin lan cig lus kyang btud pa dang //zhes pa'i bar du tshigs bcad 'dis ni lus kyi las kyis mchod pa bya ba ste/ glu dang dbyangs kyis mchod pa ni ngag gi las so/ /de ltar mchod pa bya bar bsams ba ni yid kyi las so/ /'di las gzhan pa ni phyi rol gyi zang zing gi mchod pa zhes bya'o/ /mdo las/ phyag 'tshal sangs rgyas lan cig smras pa dang / /zhes pa nas/ de dag kun gyis byang chub thob par 'gyur/ /zhes pa'i bar du tshigs bcad 'dis ni sangs rgyas kyi mtshan brjod pas byang chub thob par bstan pa ste/ sangs rgyas kyi mtshan lan gcig brjod pas byang chub mchog thob na lan mang du brjod pa lta ci smos//mdo las/ de'i tshe bde bar gshegs pa de dag ni/ /zhes pa nas/ /de dag thams cad byang chub thob par 'gyur/ /zhes pa'i bar du tshigs bcad 'dis ni sems can chos thos nas thams cad mkhyen pa'i ye shes thob pa bstan pa'o/ / mdo las/ phyis 'byung sangs rgyas bye ba mang po rnams/ /zhes pa nas/ thabs 'di yang ni rab tu 'chad par 'gyur/ /zhes pa'i bar du 'di man chad tshigs bcad phyed dang bdun gyis ma 'ongs pa'i chos bstan pa ste/ de la tshigs bcad byed dang bzhis ni da ltar bshad pa dang mthun no zhes bstan to//tshigs bcad gsum gyis ni don snga ma bzlas te bstan to/ /snga ma la yang gnyis te/ tshigs bcad gcig gis ni thabs tsam du mthun pa bstan pa dang / tshigs bcad phyed dang gnyis kyis ni yang dag pa bstan to/ /tshigs bcad gcig gis ni ci'i phyir bshad pa bstan to//mdo las/ thabs la mkhas pa dag ni mtha' yas pa/ /zhes pa nas/ chos 'di thos nas sangs rgyas mi 'gyur ba/ /zhes pa'i bar du tshigs bcad 'dis ni yang dag par 'grub par 'gyur ba bstan pa ste/ de ltar chos thos pa thams cad kyis sangs rgyas su mi 'gyur ba med do//mdo las/ de bzhin gshegs pa rnams kyi smon lam ni/ /zhes pa nas/ byang chub phyir du spyad nas spyad par 'jug /ces pa'i bar du tshigs bcad 'dis ni ci'i phyir bshad pa bstan pa ste/ de yang sngon gyi smon lam gyi dbang ngo zhes bstan to/ /mdo las/ bye ba stong phrag du ma chos kyi sgo//zhes pa nas/ de bzhin gshegs pa nyid du chos rnams bshad/ /zhes pa'i bar du 'di man chad tshigs bcad gsum gyis don snga ma bzlas te bstan to/ /de la tshigs bcad gcig gis ni sngar thabs tsam du bstan pa yang theg pa gcig tu zad pa dang / tshigs bcad gnyis kyis ni mtshan nyid gsum gyi khungs bstan to//mdo las/ 'di ltar rtag tu chos kyi tshul gnas pa/ /zhes pa nas/ thabs la mkhas pa shin tu ston par 'gyur/ /zhes pa'i bar du tshigs bcad 'dis ni mtshan nyid gsum gyi khungs bstan to / /theg pa gcig ni yongs su rdzogs pa'i mtshan nyid la bya ste sngar bshad pa bzhin no//chos kyi gnas nyid ni chos thams cad la yang dag par gnas pas chos kyi gnas nyid do/ /chos la nyon mongs pa dang / rnam par dag pa yod de nyon mongs pa spangs nas rnam pa thob pa ni chos mi 'gyur pa nyid do/ /yang dag pa'i mtshan nyid rtag tu gnas pas mi g.yo bar gnas pa'o//snying po byang chub la bzhugs shing chos thams cad la thabs mkhas pas shin tu ston to/ /chos thams cad la rnam pa gnyis te stong pa nyid dang yod pa nyid do/ /stong pa la khyad par med pas mtshan nyid gcig ste/ kun tu rtog pa zhes bya'o//yod pa la khyad par yod de rnam pa gnyis so/ /rtag pa dang mi rtag pa ste rtag pa ni yongs su rdzogs pa'i mtshan nyid do/ /mi rtag pa ni gzhan gyi dbang las kyi mtshan nyid do/ /de la yang gnyis te zag pa dang bcas pa dang zag pa med pa'o/ /zag pa dang bcas pa ni gzhan gyi dbang las mtshan nyid do//zag pa med pa ni yongs su rdzogs pa'i mtshan nyid de/ de bas na yongs su rdzogs pa'i mtshan nyid kyi dbang du byas te / de la theg pa gcig ces bya'o/ /theg pa gcig gis yang dag pa nyid rig pas chos kyi gnas nyid dang chos mi 'gyur ba nyid de/ de la mi g.yo bar gnas nas sems can la thabs mkhas pas chos ston to//mdo las/ lha mi kun gyi mchod pa phyogs bcu na/ /zhes pa nas/ de dag rnams kyang theg pa mchog 'di 'chad/ /ces pa'i bar du 'di man chad tshigs bcad phyed dang lngas da ltar gyi don ston to/ /mdo las/ thabs la mkhas pas rab tu 'chad pa dang //zhes pa nas/ dad pa zhi ba'i sa 'di rig nas so/ /zhes pa'i bar du tshigs bcad 'dis ni sngar thabs tsam bstan pa la phyis yang dag par bstan pa'o/ /mdo las/ lus can kun gyi spyod pa rig pa dang / /zhes pa nas/ sna tshogs mngon par bsgrub pa rab tu bstan//zhes pa'i bar du tshigs bcad 'dis ni ci'i phyir sngar thabs tsam bstan la phyis yang dag pa bstan pa nyid ston pa ste/ lus can kun gyi spyod pa ni sems kyi spyod pa'i mtshan nyid do/ /ci bsams pa ni kun tu 'gro ba'i mtshan nyid do/ /mthu ni las kyi mthu'o/ /stobs zhes kyang bya ste sems can gyi dbang po sna tshogs shes pa'i stobs so//brtson 'grus ni gnas dang gnas ma yin pa'i stobs so/ /de ltar sems can gyi dad pa rig nas dpe dang gzhi rnam pa mang po sems can gyi dbang po bzhin du sna tshogs mngon pa ston te/ ma byon pa'i sangs rgyas rnams kyang mtshan nyid gsum rig par 'gyur ro//da ltar bzhugs pa yang sems can gyi dbang po mkhyen pas sngar thabs tsam bstan nas phyis yang dag par ston to/ /mdo las/ 'dren pa'i dbang po rgyal ba nga yang 'dir/ /zhes pa nas/ de ni nga yi rang rig ye shes stobs/ /zhes pa'i bar du 'di man chad tshigs bcad sum cus nga yang de bzhin no zhes pa bstan pa ste/de la tshigs bcad gnyis kyis dngos su dmigs te bstan to/ /nyi shu rtsa brgyad kyis ni rgyas par bstan to/ /mdo las/ nga yis mthong ba'i sems can dbul po rnams/ /zhes pa nas/ 'dod pas 'di dag rtag tu ldongs par byas//zhes pa'i bar du tshigs bcad 'dis ni rgyas par bstan pa ste/ thog ma'i tshig nyi shu rtsa phyed dang gcig gis ni sngar theg pa gsum thabs tsam du bstan pa ste/ tshig rkyang pa las sems can gyi mos pa sna tshogs mkhyen no zhes bstan pa'o/ /tshigs bcad bdun gyis ni da ltar yang dag pa nyid du bstan pa brjod de /sngar sangs rgyas kyi theg pa gcig pu rnam pa thams cad mkhyen pa'i ye shes thob par bya ba'i phyir bstan pa'o/ /snga ma la yang rnam pa bzhi ste tshigs bcad phyed dang bzhis ni skye ba'i gnas su bgegs las thar bar bya ba bstan to/ /tshigs gsum gyis ni grol bar bya bar mi nus pa sems pa bstan pa'o//tshig phyed dang bcu gnyis kyis ni thabs tsam du bstan par dgongs so/ /tshig phyed dang bzhis ni theg pa gsum sprul pa bstan to/ /snga ma la yang gnyis te tshig gcig gis ni dge ba med pa bstan to/ /tshig phyed dang gsum gyis ni sdig pa yod par bstan to//nga yis mthong ba zhes bya ba ni spyan lnga'i nang nas sangs rgyas kyi spyan gyis gzigs so/ /shes rab dang bsod nams spong ba ni 'gro ba drug gi sems can thog ma med pa nas bsod nams dang yi shes kyi rgyur 'gyur ba mi byed 'phags pa'i nor bdun dang mi ldan lha dang mi'i chos kyi nor bdun dang /pha rol tu phyin pa drug dang thabs mkhas pa med pa ni shes rab dang bsod nams spangs pa'o/ /'di man chad tshigs bcad phyed dang gsum gyis ni sdig pa yod par bstan pa ste/ de la tshig phyed dang gnyis kyis ni da ltar gyi dus na 'khor bar nub cing sdug bsngal skye ba bstan to//tshigs bcad gcig gis ni grol bar 'dod kyang log par lta ba spyod pa bstan to/ /'jig rten na g.yag rnga ma la chags pa bzhin du sems can dag kyang 'dod pa lnga la chags nas sdug bsngal gyis gdungs te ngan song du lhung bar 'gyur ro / /mdo las/ sangs rgyas mthu chen rnams kyang yongs mi tshol//zhes pa nas/ nga yi snying rje stobs chen de dag la/ /zhes pa'i bar du tshigs bcad 'dis ni grol bar 'dod la log par lta ba spyod pa bstan pa ste/ sangs rgyas kyi mthu chen po dang ye shes kyis sdug bsngal gcod pa ni mu stegs can gyi lta ba dang 'dra bar ngan pa lta bar lhung ste/lus sdug bsngal bar byas nas 'khor ba'i sdug bsngal las grol bar 'dod pa ni mi gsha'o/ /lo drug gi bar du nas 'bru re las ma zos kyang byang chub ma thob na tsher phung gi steng na nyal bas byang chub ga la zhig thob ste/ khyi rdol bsnyegs pa dang 'dra ba'i seng ge ltar mi bsnyegs pa ma yin no//'di man chad tshig gsum gyis grol bar bya mi nus pa sems pa bstan pa ste/ de la yang gsum mo/ /tshigs bcad phyed kyis ni sngon spyod pa'i rgyu sems pa bstan pa ste/ tshig gcig gis ni 'bras bu thob nas kyang sems pa bstan to/ /tshig phyed dang gnyis kyis ni mi nus par sems pa bstan to//'di ni dang po ste sems can dag rgyu 'di gnyis dang ldan pas nga'i snying rje stobs che de dag la'o zhes bstan to/ /mdo las/ de dag ngas bsams byang chub snying po der/ /zhes pa nas/ de yi drung na phan tshun 'chag cing gnas / zhes pa'i bar du tshigs bcad 'dis 'bras bu thob nas dgongs pa bstan pa ste/mngon par sangs rgyas nas shing rgyal gyi drung du phan tshun 'chag cing sems can gyi don ji ltar bya ba dgongs pa'o/ /gzhan yang sdong po brtag pa ni don la thugs bzhag pa bstan to/ /'chag pa ni sems can gyi don mdzad pa'o/ /sdong po la brtag pa ni skye ba rnam bzhi'i skyabs mdzad par dgongs pa'o//'chag pa ni bsod nams dang ye shes sbyin par dgongs pa'o/ /mdo las/ ye shes 'di ni dam pa ngo mtshar che/ sems can 'di dag mi mkhas gti mug ldongs/ /zhes bya ba ni thar bar byar mi rung bar dgongs pa ste rgyu rnam bzhi'i phyir ro//chos zab pas shes par dka' ba dang / dbang po rtul bas shes par dka' ba dang / 'dod pa la chags pas gtong mi phod pa dang / gti mug gis ldongs pas thar bar byar mi rung ngo snyam du dgongs so/ /mdo las/ de tshe nga la gsol ba tshangs pa dang / /zhes pa nas/ thams cad thal mo sbyar nas gus par 'khod//ces pa'i bar du 'di man chad tshigs bcad phyed dang bcu gnyis thabs tsam du bstan par dgongs pa bstan pa ste/ de la yang rnam pa bzhi'o/ /dang po ni tshig gnyis kyis ni lha rnams kyi chos bshad par gsol ba btab pa bstan to/ /tshig gsum gyis ni dgongs pa bstan to//tshig phyed dang lngas ni skal pa dang ldan pa bstan to/ /tshig gnyis kyis ni thabs tsam gyis bstan pa bstan to/ /'di ni tshangs pa'i rgyal po la sogs pas gsol ba btab nas theg pa gsum gyi chos bstan pa ste chos nyid kyis gsol ba ma btab par chos mi ston to/ /mdo las/ dor rnams ji ltar bya bar rab tu bsam//zhes pa nas/ nga deng zhi bar mya ngan 'da' bar shog /ces pa'i bar du 'di man chad tshig gsum gyis dgongs pa bstan pa ste/ 'di la yang rnam pa gnyis so/ /tshig gnyis kyis ni theg pa chen po'i sems can la gnod par 'gyur ba bstan to/ /tshigs bcad gcig gis ni theg pa gsum gyi sems can la phan par 'gyur ba bstan pa ste/sems can 'di dag sdug bsngal gyis mngon sum du gzir bas khyim nas byung ba yang chos ma yin pa'i sdug bsngal spyod pas de dag la cig car theg pa chen po'i chos bstan na yid ches par mi 'gyur te/ byis pa'i blo can dag skur bas ngan song du lhung bar 'gyur te/khyim pa rnams ni sdug bsngal gyis gzir bas yid ches par mi 'gyur/ rab tu byung ba phyi rol pa rnams ni chos bshad pas yid mi ches te/ de bas na chos ma bshad par myur du mya ngan las 'das kyang sla'o snyam dgongs so/ /mdo las/ mngon pa na dga' ba sngon gyi sangs rgyas dang / /zhes pa nas/ rnam pa gsum du phye ste rab tu bshad/ /ces pa'i bar du ni theg pa gsum gyis sems can la phan pa ste/ sangs rgyas rnams dang mthun pa'i phyir ro/ /mdo las/ nga yis don de de ltar bsams pa ni/ /zhes pa nas/ 'jig rten 'dren pa rnams kyi rjes thob pa//zhes pa'i bar du 'di man chad tshig phyed dang lngas ni skal ba dang ldan pa la 'dul bar 'gyur ba bstan pa ste/ tshig phyed dang gnyis kyis ni da ltar gyi sangs rgyas bsngags pa bstan pa'o/ /tshig phyed kyis ni sangs rgyas rnams dang mthun pa bstan to/ /tshig phyed dang gsum gyis ni phyi ma bden gyi snga ma thabs tsam du bstan to zhes dbang du gyur pa bstan to//mdo las/ ngas kyang dam pa'i gnas rig de yi tshe/ rnam pa gsum du phye ste rab tu bshad/ /ces pa ni bdag dpang 'gyur ba bstan te / thabs tsam du theg pa gsum bshad ces pa'i don to/ / mdo las/ mkhas pa ma yin dad pa chung ba'i mi/ /zhes pa nas/ byang chub sems dpa' mang po gzud par bya/ /zhes pa'i bar du ni byis pa'i blo can dad pa chung ba dag chung ngu la mos pas 'tshang rgya bar 'gyur ba'i don chen po la yid mi ches pas sngar theg pa gsum thabs tsam du bstan pa ste /byang chub sems dpa' gzud par byed do/ /mdo las/ de yi sgra thos pa ni dga' gyur pa / /zhes pa nas/ drang srong che mchog gdon mi za ba gsung / /zhes pa'i bar tshigs bcad gnyis kyis thabs tsam du 'dren pa bstan pa ste/ sgra thos te dga' bas bstod pa dang de'i rjes su spyod pa dgongs pa bstan pa'o//mdo las/ bdag kyang de bzhin kun tu spyad pa ni/ /zhes pa nas/ sems can rnyog pa can gyi nang du skyes/ /zhes pa'i bar du ni rjes su spyod pa bstan bar dgongs pa ste/ skal ba dang ldan pa la rnyog pa can gyi nang du skyes kyang de'i rjes su spyod pa dgongs pa'o/ / mdo las de ltar nga zhes pa nas ni shA ri'i bu zhes pa nas thabs kyis rab tu zhi ba'i chos bshad ces pa'i bar du 'di man chad tshigs bcad phyed dang bzhis theg pa gsum sprul par yang dag par bstan pa ste/ de la rnam pa gsum mo/ /tshig phyed dang gnyis kyis ni thabs tsam du bstan to// gcig gis ni dkon mchog gsum byung ba bstan to/ /tshig gcig gis ni da ltar dang 'das pa grub pa bstan to/ /bA rA NA sIr ni ri dgas la mi 'jigs pa byin pa'i gnas so/ /gnas der thog mar rten lnga po la chos bstan te thabs kyis rab tu zhi ba'i chos bstan to/ / mdo las/ de nas nga ni chos kyi 'khor lo bskor/ /zhes pa nas / der ni dge 'dun sgra yang de bzhin byung / /zhes pa'i bar du ni dkon mchog gsum byung ba bstan pa ste/ chos kyi 'khor lo bskor ba ni lan gsum du tshul bcu gnyis kyis bskor ba'o/ /'khor lo zhes bya ba ni 'khor cing mi gnas pa'i don to//'phags pa'i lam gyi yan lag brgyad dang ci rigs su sbyar ro/ /'phags pa'i lam bstan pas pha rol 'bras bu thob pas bskor ba zhes bya'o/ /de ltar 'phags pa'i lam 'jig rten du byung bas dkon mchog gsum gyi sgra yang 'jig rten du byung bar gyur to/ /sangs rgyas nyid ni sangs rgyas dkon mchog mya ngan las 'das pa dang /'bras bu dang chos bstan pa ni chos dkon mchog go/ /rten lnga la sogs pa ni dge 'dun dkon mchog go/ /mdo las/ lo yi grangs ni mi nyung bar yang bshad/ /ces pa nas/ de bzhin rtag par dus gsum ngas smras so/ /zhes pa'i bar du da ltar dang sngon yang grub pa bstan pa ste/da ltar gyi dus 'di 'ba' zhig tu mya ngan las 'da' ba bstan pa ma yin gyi lo'i grangs mi nyung bar sdug bsngal gyi mtha' zad kyi bar du bshad cing bstan to/ /mdo las/ nga ni de yi tshe na shA ri'i bu/ /zhes pa nas/ thabs la mkhas pa rnam pa mang po'o//zhes pa'i bar du 'di man chad tshigs bcad bdun gyis chos 'di bshad pas thams cad mkhyen pa'i ye shes thob po zhes bstan pa ste/ 'di la yang rnam pa bzhi'o/ /thog ma'i tshig gnyis kyis ni dbang po smin pas phrad pa bstan to/ /tshig gcig gis ni don bya bar dgongs pa bstan to//tshig gsum gyis ni yang dag par bshad pa bstan to/ /tshig gcig gis ni chos kyi don bstan to/ /ngas thabs tsam du bstan pa yang sngon gyi rgyal ba dag las thabs tsam du bstan pa thos pas dge ba'i rtsa ba dang ldan zhing nga dang phrad pa las chos bshad par dgongs pa bstan pa'o //mdo las/ de ma thag tu ngas ni 'di snyam bsam/ /zhes pa nas/ byang chub mchog de 'dir ni rab tu bshad/ /ces pa'i bar du don bya bar dgongs pa bstan pa ste/ dbang po smin pa rnams la sangs rgyas ye shes bshad de byang chub mchog la ci phyir dgongs par mi bya snyam dgongs te/dus la bab par bstan pa'o/ /mdo las/ de ring 'di la dad par dka' ba ni/ /zhes pa nas/ mi mkhas pa dang nga rgyal ldan pa'o/ /zhes pa'i bar du 'di man chad tshigs bcad gsum gyis yang dag par bshad pa bstan pa ste/ de la tshig gcig gis ni mi mkhas pa byis pa'i blo can 'dzin mi nus pa bstan to//tshig gnyis kyis ni dbang po rnon po blo dang ldan pas 'dzin nus pa bstan to/ /chos 'dzin mi nus pa'i skyon rnam pa lnga ste/ dbang po rtul pos chos thos kyang don mi go ba dang / byis pa'i blo can shes pa chung ba dang / mtshan mar 'du shes pa steng pa dang /yod pa'i mtshan ma gnyis su 'dzin pa dang / nga rgyal can longs spyod kyis rgyags pa dang dregs pa mi mkhas pas nyon mongs pa dang bcas pa'o/ /mdo las/ de la nga yang 'jigs med rab tu dga'/ /zhes pa nas/ 'di dag thams cad 'jig rten sangs rgyas 'gyur/ /zhes pa'i bar du 'dzin nus pa bstan pa ste/dga' ba ni dga' ba tshad med pas sems can 'tshang rgya ba la phrag dog med pa'o/ /'jigs pa med pa ni gdon mi za ba'i don ni seng ge'i sgra sgrogs pa la gdon mi za ba'o/ /rnam pa kun spangs pa ni thabs tsam du gsum du bstan pa'o/ /sar ma phyin pa'i byang chub sems dpa' ni bdag byang chub sems dpa' thob par 'dzin te/nyan thos la skal ba med par 'dzin pa dang / rigs ma nges pa dag bdag kyang skal pa med par sems pas chung dur phyir nur bdag gi phyir chos 'di bstan pas the tshom dang bral ba bstan pa'o/ /nyan thos brgya phrag bcu gnyis kyang 'tshang mi rgya bar sems pas de dag gi phyir yang chos bstan to//mdo las/ 'di ltar snga ma'i skyob pa de dag dang / /zhes pa nas/ de ltar khyod la de ring ngas bshad do/ /zhes pa'i bar du ni chos bsdus pa bstan pa ste/ theg pa chen po'i don dam par ni ngo bo nyid kyi rnam par rtog pa spangs te/theg pa gsum la tha dad pa med pas thams cad 'tshang rgya bar 'gyur ro zhes bstan to/ /mdo las/ ras 'ga' gang du ci yi 'jig rten du/ /zhes pa nas/ gang gis chos mchog thos nas dad pa'o/ /zhes pa'i bar du 'di man chad tshigs bcad bdun gyis ma thos pa thos par bya ba bstan pa ste/'di la yang rnam pa bzhi'o/ /de la tshig gnyis kyis shin tu dka' ba bzhi bstan to/ /tshigs bcad phyed dang gsum gyis ni dpe rnam pa gnyis shin tu dka' ba bstan to/ /tshigs bcad phyed dang gnyis kyis ni dad pa bskyed par bskul ba bstan to/ /tshigs bcad gcig gis ni don bsdus pa bstan to//dka' ba bzhi la sangs rgyas 'byung bar dka' ba dang / chos bshad par dka' ba dang / chos thos par dka' ba dang nyan par dka' ba'o/ /de la sangs rgyas 'byung bar dka' ba ni bskal pa bzang po'i sangs rgyas stong 'byung ba lta bu'o/ /de bzhin du bskal pa du mas sangs rgyas 'byung zhing sangs rgyas 'od srungs lta bu zhag bdun las mi bzhugs pas sangs rgyas 'byung ba de ltar dka' ba'o//de ltar sangs rgyas 'byung bar dka' ba mi khom pa brgyad kyis bskal te/ sangs rgyas dang phrad par dka' bas chos thos par dka'o/ /chos mi thos pas spyod pa'ang shin tu dka'o//mdo las/ u dum bA ra'i me tog rnyed par dka' ba bzhin/ /zhes pa nas/ sangs rgyas thams cad mchod pa byas par 'gyur/ /zhes pa'i bar du tshigs bcad 'dis ni dpe gnyis kyis rnyed par dka' ba bstan pa ste/ de la tshig gcig gis ni chos 'byung bar dka' ba bstan/tshig phyed dang gnyis kyis ni thos nas bstod par dka' ba bstan to / /chos 'byung ba dang thos nas bstod par dka' ba yang u dum bA ra'i me tog dang 'dra'o zhes bstan to/ /mdo las/ 'di ltar the tshom som nyi rnam par spongs/ /zhes pa nas/ 'di na nga la nyan thos gang yang med//zhes pa'i bar du ni dad pa bskyed par bskul te/ the tshom spongs shig par bstan pa'o/ /mdo las/ shA ri'i bu khyod 'di yang gsang bar gyis/ /zhes pa nas/ nga yi gsang ba 'di rnams thub par gyis/ /zhes pa'i bar du ni sangs rgyas rnams kyi gsang bar bsngags pa bstan pa'o//mdo las/ ji lta zhe na rnyog pa lnga yi tshe/ /zhes pa nas/ de dag rnams kyang byang chub sems mi skye/ /zhes pa'i bar du 'di man chad spyir tshigs bcad gsum gyis the tshom bzhi bsal ba bstan te/ de la yang rnam pa gsum mo/ /thog ma tshigs bcad gcig gis sangs rgyas nas 'jig rten du 'byung zhing theg pa gsum gyis rnyog pa lnga'i tshe 'byung bar 'gyur ba bstan to//tshigs bcad gcig gis ni ji ltar na nga rgyal gyi dbang du gyur pa dgra bcom pa'o zhes brjod cing chos 'di la yid ches pa'i chos med par bstan to/ /tshigs bcad gcig gis ni ji ltar ston par 'gyur snyam pa ston to/ / mdo las/ /nga yi theg pa gcig po 'di thos pa/ /zhes pa nas/ mdo sde skur pas sems can dmyal bar 'gro/ /zhes pa'i bar du tshigs bcad 'dis ni ma 'ongs pa'i dus na sems can sdig pa can nga rgyal gyi dbang du gyur pa sems can dmyal bar 'gro bar bstan to/ /mdo las/ mdzes shing gtsang bar 'gyur ba'i sems can dag /zhes pa nas/ theg pa gcig gis bsngags pa mtha' yas so/ /zhes pa'i bar du tshigs bcad 'dis ni ji ltar bstan par 'gyur ba bstan te/ 'dzem pa ni khrel ba dang ngo tsha dang ldan pa'i don to/ /mdo las/ 'dren pa rnams kyis bshad pa de lta bu//zhes pa nas/ sangs rgyas 'gyur gyis dga' ba rab tu skyed/ /ces pa'i bar du tshigs bcad 'di gsum gyis ni dga' ba'i sems dang ldan pa nges par 'tshang rgya bar bstan pa ste/ tshig phyed dang gnyis kyis ni sangs rgyas kyi chos rnams mi mthun te ma bslabs na mi rtogs par bstan to/ / tshig phyed dang gnyis kyis ni dga' ba'i sems bskyed pas 'tshang rgya bar 'gyur bar bstan to// // dam pa'i chos puN+Da rI ka'i 'grel pa/ bam po lnga pa/ 'di man chad dpe'i le'u ste rnam pa gsum du dbye'o/ /ci'i phyir bstan pa dang / le'u'i ming bstan pa dang / dogs pa bsal ba'o//ci'i phyir bstan pa la yang gnyis te/ shA ri'i bu dbang po rnon pos thos pa tsam gyis rtogs pa dang / gang zag bzhi po dbang po 'bring pos dpe bstan pas shes par 'gyur ba ste/ dbang po 'bring po'i phyir dpe'i le'u 'di bstan to/ /'grel pa las 'di man chad nyon mongs pa dang bcas pa'i skye bo bdun po'i phyir dpe rnam pa bdun gyis nga rgyal rnam pa bdun dang nyon mongs pa gsum gyi gnyen por bstan to//de le'u'i ming bstan pa ni dpe'i le'u ste/ dpe zhes bya ba ni 'jig rten gyi mngon sum gyis 'jig rten las 'das pa'i don zab mo rtogs par byed pa'i don to//de la dogs pa bsal ba ni dris pa las 'dir ni dpes don bstan pas le'u yang dpe'i le'u zhes gdags su rung na le'u snga ma las chos 'ba' zhig ston na de la chos kyi le'u zhes gdags sam / lan btab pa snga phyi 'brel bas gzhung gis de lta bu yin yang ming gdags pa la so so ste/thabs zhes bya ba ni bye brag tu dbye'o/ /dpe ni spyir snyegs te tha dad pa med do/ /mdo las de nas tshe dang ldan pa shA ri'i bu zhes pa nas dga' ba thob zhes pa'i bar du 'di man chad le'u 'di la spyir rnam pa gnyis dbye ste/ shA ri'i bu chos thos nas dga' rangs te lung bstan pa thob pa dang dpes dbang po 'bring po la chos bstan pa'o//'di man chad shA ri'i bu chos thos nas dga' rangs pa la rnam pa gnyis te/ tshig rkyang pa la smos pa dang / tshigs su bcad de bzlas pa'o/ /ji ltar re ba bzhin du yid dang mi 'gal ba thos pas dga' ba dang spro ba'o/ /bshad par gsol pa gdab pas thal mo sbyar ro//bshad pa'i lan 'dod pas bcom ldan 'das la blta'o / /'di lta bu'i sgra zhes pa ni theg pa chen po'i gsung rab po/ /sngon ma thos pa thos pas ngo mtshar rmad du gyur to/ /gzhan yang don rnam pa gsum gyis dga' ba thob po/ /sangs rgyas las thos nas sems rab tu bde zhing bdud ma yin par rtogs pa dga' ba dang /yang dag pa gcig thob pas snga ma gsum po thabs tsam du bstan par shes pas dga' ba dang / sangs rgyas kyis dgra bcom pa brgya phrag phyed dang bcu gsum yang sangs rgyas su lung bstan pa thos pas dga' ba thob pas /mdo las de ci'i slad du zhes pa nas yongs su gdung bar gyur to zhes pa'i bar du 'di man chad ni ci'i phyir dga' ba bstan te/ de la yang rnam pa bzhi'o/ /chos chen po las nyams pas gdung bar gyur pa dang / theg pa chung ngus bton pas 'gyod pa dang / thos pas mya ngan zad pas dga' ba dang sangs rgyas kyi sras rnams byang chub thob par rtogs pa'o//'di ni chos chen po nyams pas gdung bar gyur pa bstan pa ste/ bdag cag gis sngon byang chub sems dpa' la lung bstan pa thos kyang lung bstan pa ma thob po snyam nas gdung bar gyur pa dang / de bzhin gshegs pa'i ye shes dang gzigs pa las nyams pas gdung bar gyur to//mdo las bcom ldan 'das zhes pa nas she dag gis spyod do zhes pa'i bar du ni theg pa chung ngus bton pas 'gyod pa bstan pa ste/ 'di la yang rnam pa gnyis so/ /chung ngus gnas pas 'gyod pa dang / log par gyur pas 'gyod pa'o//chos kyi dbyings ni gang zag la bdag med pa yang dag pa nyid de/ de la byang chub sems dpa' dang bdag cag zhugs par mtshungs na ci'i slad du bcom ldan 'das kyis bdag cag theg pa chung ngus bton snyam du 'gyod do/ /mdo las bcom ldan 'das zhes pa nas de snyam du sems so zhes pa'i bar du ni 'dir bdag 'gyod pa bstan te/nongs zhes bya ba ni sdig pa la bya'o / /mdo las ci'i slad du zhes pa nas bton par 'gyur zhig na zhes pa'i bar du ni ci'i phyir zhes bya ba bstan te/ de yang bla na med pa'i byang chub tu brtsams pa'i rgyu byang chub kyi phyogs dang pha rol tu phyin pa dang mngon par shes pa dang sems can yongs su smin par byed pa'o//bsdad pa ni re ba'i don te de bas na bdag cag gis bla na med pa'i byang chub kyi rgyur gyur pa re ba'i sems kyis bsdad na ni theg pa chen po'i chos la bton par 'gyur ba zhig na bdag cag la re ba med pas na theg pa chen po la dgod par ma gyur to snyam du 'gyod do//byang chub kyi sems la rnam pa gsum ste / 'dus byas las skye ba dang / byang chub tshol ba dang sems can la shin tu dgongs pa'o/ /mdo las bcom ldan 'das zhes pa nas dgra bcom pa thob po zhes pa'i bar du ni shin tu 'gyod pa bstan te / bcom ldan 'das kyis ldem po ngag tu gsungs pa na ma rig pa nas thabs tsam du bstan pa thos ma thag tu gzung ba dang / bsgoms pa dang / bsams pa dang / yid la byas pas theg pa chen po lam bkod pa ni bdag cag gis nongs so snyam du 'gyod par gyur to/ /de la thos nas mya ngan zad pas dga' ba ni sngon theg pa chen po'i rnam par grol ba la skal ba med snyam du 'dzin te/de bcom ldan 'das la theg pa chung ngu gnyis nges pa'i don ma yin te/ sangs rgyas kyi byang chub la skal ba yod par rtogs pas mya ngan zad nas dga' ba dang bsil ba thob pa gyur to/ / de ltar the tshom med pas bde ba dang bsil bar gyur to/ /mdo las bcom ldan 'das kyi sras thu bo zhes pa nas yongs su gdung ba dang bral lo zhes pa'i bar du ni sangs rgyas kyi sras rnams byang chub thob par rtogs pa bstan pa ste/ 'phags pa'i ye shes thob cing sangs rgyas kyi thugs las byung bas sras thu bo'o//so so'i skye bo las gzhan pa ni thugs las byung ba'o/ /chos kyi gsung rab las byung bas zhal nas skyes pa'o/ /chos kyi rjes su tshul bzhin yid la byed pa ni chos las skyes pa'o/ /chos kyi sku'i rjes su de dang 'dra ba'i chos thob pa ni chos kyi sprul pa'o/ /chos kyi nye mtshams chos kyis grub pa ni zag pa med pa'i chos rin po che la longs spyod pa ste/chos ni chos dkon mchog dang 'phags pa'i nor bdun no/ /sangs rgyas dang byang chub sems dpa' rnams kyis ji ltar chos la longs spyod pa dang 'dra bar bdag kyang chos kyi nor la longs spyod par bya'o zhes pa'i don to//sangs rgyas kyi sras zhes bya ba ni 'jig rten gyi skyon dang bcas pa mi gtsang ba'i mngal nas skyes pa las bzlog pa'o/ /thugs las byung ba ni pha ma'i khu ba mi gtsang ba las 'byung ba ma yin par bstan pa'o/ /zhal nas skyes pa ni chos ma yin pa'i 'dod chags las 'byung ba ma yin par bstan pa'o//chos las skyes pa ni chos kyi sku'i rigs 'tshob pa bstan pa ste/ ji ltar bram ze dag rigs 'tshob pa bzhin no/ /chos kyi sprul pa ni chos kyi nor la longs spyod pa ste ji ltar 'jig rten na pha'i nor la bu dag spyod pa bzhin no/ /mdo las de nas tshe dang ldan pa zhes pa nas/ theg pa mchog 'dir bdag ni yongs smin mdzad/ /ces pa'i bar du 'di man chad tshigs bcad kyis bstan te/ tshigs bcad nyi shu rtsa phyed dang drug la rnam pa gnyis te/ thog ma'i tshig phyed dang gsum gyis ni gleng ba bstan to/ /tshigs bcad nyi shu rtsa gsum gyis ni bshad pa bstan to/ /gleng pa bstan pa la yang gnyis te/thog ma'i tshig gcig gis ni the tsom med pas rab tu dga' ba bstan to/ /tshig phyed dang gnyis kyis ni the tsom dang mya ngan zad pas ngo mtshar du gyur pa bstan to/ /mdo las/ bde bar gshegs pa'i gsung de ngo mtshar gyur/ /zhes pa nas/ gsung thos pa yis thams cad med par gyur//zhes pa'i bar du the tsom dang mya ngan zad pas ngo mtshar du gyur pa bstan to/ /sngon theg pa chen po ma thos pa the tshom dang mya ngan du 'gyur ba las da theg pa chen po thos pas the tsom dang mya ngan slos pa bsal zhes smos so/ /mya ngan slos pa zhes bya ba ni sangs rgyas su mi 'gyur du dogs pa'o//mdo las/ gdugs la spyod cing phan tshun 'chi ba dang / /zhes pa nas/ kye ma sdig gi sems kyis bdag bslus pas/ /zhes pa'i bar du 'di man chad ni 'gyod pa bstan pa ste/ kye ma zhes bya ba ni shin tu 'gyod pa'i tha tshig ste/ sngar theg pa chung ngu la gnas pas theg pa chen po la skal ba med pa tsam du 'dzin pas sdig pa'i sems kyis bslus pa zhes bya'o//mdo las/ zag pa med pa'i chos su 'dra ba la/ /zhes pa nas 'chad par mi 'gyur ro zhes pa'i bar du tshig 'di ni cis 'gyod pa bstan pa ste/ zag pa med pa'i chos kyi dbyings yang dag pa nyid de/ shes pa med pa dag ni ma 'ongs pa'i dus su sangs rgyas su 'gyur zhing chos 'chad par mi 'gyur ro zhes bstan to/ /mdo las/ bdag ni sum cu rtsa gnyis mtshan las nyams/ /zhes pa nas bdag rmongs so zhes pa'i bar du 'di man chad tshigs bcad phyed dang drug gis chos chen po las nyams pas 'gyod pa bstan pa ste 'di la yang rnam pa gnyis su dbye'o//de la yang tshig phyed dang bzhis ni chos chen po gang nyams pa bstan te/ tshigs bcad gnyis kyis ni bdag 'gyod pa bstan to/ /chos gang nyams pa bstan pa la yang rnam pa gnyis su dbye ste/ thog ma'i tshigs bcad gnyis kyis ni phyi nang gi mtshan gyis brgyan pa'i yon tan bstan to//tshig phyed dang gnyis kyis ni grags pa dang rnyed pa'i yon tan bstan to/ /mtshan gyis brgyan pa la yang rnam pa gnyis te/ tshigs bcad gcig gis ni mtshan rdzogs pas bdud btul ba'i yon tan bstan to/ /tshigs bcad gcig gis ni dpe byad rdzogs pas ma 'dres pa'i yon tan bstan pa ste/'dir ni mtshan rdzogs pa'i yon tan no/ /mtshan sum cu rtsa gnyis zhes bya ba ni shes rab kyi pha rol tu phyin pa chen po las rgyas par bshad pa bzhin no/ /mdo las/ thub pa chen po'i dpe byad bzang po gang / /zhes pa nas/de las bdag cag nyams shing ches bslus so/ /zhes pa'i bar du ni dpe byad bzang po rdzogs pas ma 'dres pa'i yon tan bstan pa ste/ dpe byad bzang po brgyad cu yang shes rab kyi pha rol tu phyin pa chen po las rgyas par bshad pa bzhin no/ /sangs rgyas kyi chos ma 'dres pa bco brgyad kyang 'grel pa las rgyas par bshad pa bzhin te/theg pa chung ngu gnyis la med pas ma 'dres pa zhes bya'o/ /mdo las/ 'jig rten phan pa thugs brtse khyod mthong nas/ /zhes pa nas/ kye ma bdag ni bslus zhes rnam par sems/ /zhes pa'i bar du ni grags pa dang rnyed pa'i yon tan bstan to//de ltar bdag bslus pas sangs rgyas kyi yon tan las nyams te chung ngus chog par 'dzin to/ /mdo las/ ma chags ye shes bsam gyis mi khyab las/ /zhes pa nas/ /rnam par 'dres pas bstan pa'o/ /zhes pa'i bar du ni bdag 'gyod pa bstan pa ste/ de la tshigs bcad gcig gis ni theg pa chen po las nyams ma nyams zhes dris pa'o//tshigs bcad gcig gis ni bdag rtag tu sangs rgyas mthong yang byang chub sems dpa' la ni bsngags shing bstod kyi bdag cag la ma bstod do snyam sems pa'o/ /mdo las/ sangs rgyas gsung 'di bdag gis thos pa ni/ / zhes pa nas/ byang chub snying por gsung zhes pa'i bar du 'di man chad tshigs bcad bcu bzhis ni thos nas dga' bas mya ngan zad pa bstan te/ de la gnyis su dbye'o/ /tshig phyed dang bcu gsum gyis ni the tsom dang mya ngan bsal ba bstan to/ /tshig phyed dang gnyis kyis shin tu bde ba thob pa bstan to//snga ma la gnyis te/ tshig lngas ni sngon gyi mya ngan zad pa bstan to/ /tshig phyed dang brgyad kyis ni da ltar gyi the tshom du gyur pa bstan to/ /snga ma la yang gnyis te tshig gcig gis ni ci'i phyir the tshom bsal ba bstan to/ /tshig bzhis ni the tshom bsal ba dngos bstan to/ /'dir ni chos thos pas mya ngan zad pa bstan to//sangs rgyas kyis gsungs pa 'di thos pas zag pa med pa'i ye shes dpag dka' ba byang chub kyi snying por 'gyur ba thos pas mya ngan dang bral te/ mya ngan dang bral bas zag pa med pa zhes bya'o/ /mdo las/ sngon chad bdag ni lta la chags gyur pa/ /zhes pa nas/ bdag gis stong pa nyid kyi chos thob ste/ /zhes pa'i bar 'di man chad tshig bzhis mya ngan bsal ba bstan te/ de la yang gnyis su dbye'o/ /tshig phyed dang gnyis kyis ni sngon ngan par lta ba las phyis yang dag par gyur pa bstan to/ /tshig phyed dang gsum gyis ni da theg pa chung ngur rtogs nas theg pa chen po la 'jug pa bstan to//'dir ni ngan par lta ba las yang dag par lta ba bstan pa ste/ sngon mu stegs can gyis ston pa las 'khor brgya dang bcas te sangs rgyas kyi bstan pa la rab tu byung nas gang zag la bdag med par chud de dgra bcom par gyur pas stong pa nyid kyi chos thob ces bya'o/ /mdo las/de phyir bdag ni mya ngan 'das snyam bgyid/ /mya ngan 'das zhes bya ba de ma lags/ /zhes bya ba ni theg pa chung ngur rtogs nas theg pa chen po la 'jug pa bstan pa ste/ de la yang gnyis so/ /tshig gcig ni theg pa chung ngur rtogs pa dang tshig gcig ni chen po las nyams pa zhes bya'o/ /mdo las/nam zhig sangs rgyas sems can gtsor gyur te/ /zhes pa nas/ gsung thos de ring bdag ni mya ngan 'das/ /zhes pa'i bar du ni yang dag pa'i 'gog pa rtogs shing mngon par byang chub pa bstan te/ mtshan dam pas sku brgyan pas sems can mang po 'du ba'i gnas su gyur pa nyid skye ba rnam pa gnyis spangs shing zag pa med pa brnyes pa'i phyir theg pa chen po mya ngan las 'das pa thob po//mdo las/ gang tshe bdag ni byang chub mchog lung bstan/ /zhes pa nas/ bdag ni bag tsha ba yi mthu skyes pa/ /zhes pa'i bar du ni 'di man chad tshigs su bcad pa phyed dang brgyad la bag tsha ba'i the tshom bsal ba bstan te/sngar tshigs bcad gcig gis the tshom gyi gzhi gleng pa bstan/ de'i 'og mas ni the tshom bsal ba'i gtan tshigs bstan/ de'i 'og ma gzhan gyis ni dngos su the tsom bsal ba bstan te 'di ni dang po'o/ /mdo las/ thog mar rnam par 'dren gyi gsung thos nas//zhes pa nas/ gang tshe rgyu dang gzhi yi rnam pa dang / /zhes pa'i bar du ni the tshom dngos su bsal ba bstan te/ de la yang dang po'i tshigs bcad 'dis ni the tsom skye ba'i gtan tshigs bstan/ 'og ma phyed dang drug gis ni the tsom dngos su bsal ba bstan to//sngon bcom ldan 'das kyis theg pa rnam pa gsum bshad de/ de so so'i 'bras bu yang thob pa'i rjes la da theg pa gcig go zhes gsungs pa 'di sngar gsungs pa dang mi 'gal ba'i phyir gzhung la the tshom med kyang smra ba'i tshig 'di bdud kyis bshad pa ma yin nam zhes the tshom du gyur pa'o//mdo las/ dpe rnams bye ba khrag khrig snyed kyis bstan/ /zhes pa nas/ de nas bdag ni chos thos the tshom bral/ /zhes pa'i bar du ni the tshom dang bral ba dang dngos su bstan pa ste/ 'di man chad thabs mkhas pas dpe dang don gsal ba'i phyir the tshom dang bral ba dang /dus gsum gyi de bzhin gshegs pa thabs mkhas pa ston pa mthun pa'i phyir the tshom dang bral ba dang / de bzhin gshegs pa'i gsung rab dang / bdud kyi tshig dang mi mthun pa'i phyir the tshom dang bral ba ste/ 'di ni dang po'o/ /bcom ldan 'das chos ston pa yang dpe'i sgo nas chos ston pa dang /don dngos su bstan pa'i phyir chos ston pa la dpe dang don du sbyar ba la mi 'gal ba'i phyir the tshom dang bral ba'o/ /mdo las/ de ltar bdag la sangs rgyas bye ba stong / /zhes pa nas/ shin tu ston par 'gyur zhing da ltar 'chad/ /zhes pa'i bar du ni 'dis dus gsum gyi de bzhin gshegs pa thabs mkhas pas chos ston pa la lugs mthun pa ston te/tshig dang po ni 'das pa dang sbyar/ de'i 'og ma ni ma 'ongs pa dang da ltar gyi dang sbyar te/ dus gsum gyi de bzhin gshegs pa chos ston pa la drang ba dang nges pa'i don ston pa gzhung lugs mthun pa'i phyir the tshom dang bral ba'o//mdo las/ de ltar khyod ni spyod pa ci 'dra ba/ /zhes pa nas/ chos kyi 'khor lo ci 'dra khyod kyis mkhyen/ /zhes pa'i bar du ni dus gsum gyi sangs rgyas kyang mtshungs pa'i sgo nas the tshom bral ba ston te/ dang po bltams pa dang khab nas byung ba'i bar du ni sku'i spyod pa bstan to//'phags pa'i lam brnyes pas ni thugs kyi spyod pa bstan to/ /chos kyi 'khor lo bskor bas ni gsung gi spyod pa bstan to/ /de ltar ston pa la 'khrul pa dang 'gal ba med pa'i phyir the tshom bsal to/ /mdo las/ ji ltar khyod kyis chos bshad gnas pa las//zhes pa nas/ bdag nyid de ltar sems la the tshom skyes/ /zhes pa'i bar du ni de bzhin gshegs pa'i gsung rab dang / bdud kyi tshig mi 'du ba las the tshom dang bral ba bstan to/ /mdo las/ gang tshe 'jam zhing zab mo snyan pa yi/ /zhes pa nas/ the tshom dang bral ye shes gnas//zhes pa'i bar du ni 'dis nyon mongs pa zad pas dga' ba skye ba bstan te/ thugs rjes 'dren pa'i gsung ni 'jam pa'o/ /'brug sgra lta bus rgyang du thos par byed pa ni zab pa'o/ /ka la ping ka'i sgra lta bu yid du 'ong ba ni snyan pa'o/ /drang ba'i don bsal te nges pa'i don la gnas pa ni ye shes la gnas pa'o//mdo las/ de bzhin gshegs par bdag 'gyur the tshom med/ /zhes pa nas/ byang chub sems dpa' mang po yang dag 'dzud/ /zhes pa'i bar du theg pa chen po la phyogs pa'i rgyu chen po bskyed pas sangs rgyas su 'grub cing lha dang mi la sogs pas mchod pa dang /byang chub sems dpa' mang po bla na med pa'i gnas su 'jog par 'gyur ba bstan pa'o/ /mdo las de skad ces gsol pa dang bcom ldan 'das kyis tshe dang ldan pa shA ri'i bu la 'di skad ces bka' stsal to zhes pa nas nga'i rjes su slob par gyur to zhes pa'i bar du 'di man chad 'phags pa shA ri'i bu'i sngon gyi spyod pa bstan pa dang da ltar de bzhin gshegs pa dang phrad pa dang /phyis kyang yang dag pa nyid la gnas par 'gyur ba ston pa la 'di ni dang po'o/ /shA ri'i bu sngon sangs rgyas bye ba khrag khrig mang po'i thad du byang chub sems dpa'i spyod pa spyad pa las bram zes mig bslangs te/mig byin pa dang / mig sa la brdzis te don med par byas pa dang / sems chen po las nur te theg pa chung ngu la zhugs pa sngon gyi spyod pa bstan pa'o/ /mdo las shA ri'i bu khyod byang chub sems dpa'i man ngag dang zhes pa nas nga'i gsung rab 'di las skyes par gyur to zhes pa'i bar du ni da ltar gyi dus nas sangs rgyas dang phrad pa bstan te/sngon spyod pa chen po las nyams pa dang thabs kyis bsgyur te stong pa zag pa med pa'i ye shes rtogs shing theg pa chen po'i chos la gnas par gyur pa 'di nyid de bzhin gshegs pa'i gsung las skyes pa'o//mdo las shA ri'i bu khyod 'di ltar zhes pa nas mya ngan las 'das so snyam du sems te zhes pa'i bar du ni phyis yang dag pa nyid la gnas par 'gyur ba bstan te/ mi dran nas zhes pa ni drang ba'i don la brten cing nges pa'i don brjod pa'o/ /'phags pa nyan thos pa'i ye shes dang mya ngan las 'das pa nyid mthar phyin pa'i gnas tsam du gnas shing theg pa chen po'i ye shes dang mya ngan las 'das pa mi 'grub pa'o//mdo las shA ri'i bu ngas khyod kyi spyod pa dang zhes pa nas nyan thos pa rnams la yang dag par bstan to zhes pa'i bar du sngon theg pa chen po spyod pa'i sems dran pa dang bskul ba ste/dam pa'i chos dang bsam gyis mi khyab pa byang chub sems dpa' la gdams pa dang / sangs rgyas kyis yongs su gzung ba ni mdo sde 'di nyid kyi rnam grangs te/ 'di theg pa chen po la 'jug pa'i thabs dang spyod pa thob par 'gyur ba bstan to/ /mdo las shA ri'i bu khyod ni 'di ltar ma 'ongs pa'i dus zhes pa nas 'di dag yongs su rdzogs par byas nas zhes pa'i bar du ni 'di man chad dum bu bzhir dbye ste/sngar lung bstan pa dang / lha dang mis mchod cing bstod pa'o/ /dang po la yang gnyis te/ rgyu'i sgo nas lung bstan pa dang / 'bras bu'i sgo nas lung bstan pa'o//de'i dang po la yang bzhi ste/ bskal pa tshad med ces pa ni dus bstan pa'o/ /de bzhin gshegs pa bye ba khrag khrig ces pa ni bshes gnyen dam pa bstan pa'o/ /dam pa'i chos 'dzin pa dang / sems can mang po la phan pa sna tshogs byas nas bla na med pa'i sangs rgyas su 'grub ces pa'o//mdo las pad mo'i 'od ces bya ba zhes pa nas 'jig rten du 'byung ngo zhes pa'i bar du ni 'bras bu dngos su lung bstan pa ste/ de yang tshig rkyang pa dang tshigs su bcad pa dbye'o/ /tshig rkyang pa la yang rnam pa drug ste/ nang gi yon tan phun sum tshogs pa dang /phyi'i zhing rgyan dam pa dang ldan pa dang / chos ston pa'i lugs gcig pa dang bskal ba'i ming mi mthun pa dang / 'khor bzang ngan dang chos gnas pa'i yun ring thung dang drug las 'di ni dang po'o/ /sangs rgyas kyi mtshan 'dogs pa yang la la ni sngon gyi sangs rgyas mthong ba las dras te mtshan btags pa dang sems bskyed pa'i sgo dang /mtshan ma las mtshan 'dogs pa dang / yul dang sems can gyi don mdzad pa las mtshan 'dogs pa ste/ 'phags pa shA ri'i bu mngon par byang chub pa'i mtshan pad+mo'i 'od ces btags pa ni me tog gi char bab cing 'od kyis snang bar mdzad pas de bzhin gshegs pa pad+mo'i ye shes 'od kyis snang bar mdzad pa las pad+mo'i 'od ces gdags pa dang /dam pa'i chos kyi ro myong bas ye shes kyi 'od shar te/ theg pa rnam pa gnyis la snang bar mdzad pa'i pad+mo'i 'od ces btags so/ /de la lung ston pa yang rnam pa bzhi ste/ ci'i phyir lung ston pa dang /sus lung ston pa dang / dogs pa bsal ba dang bzhi'o/ /ci'i phyir lung bstan pa yang rnam pa lnga ste/ 'phags pa nyan thos pa'i rnams nges pa'i sems bskyed pa ste/ nyan thos pa'i chos nyid ma yin pa dang / bdag med pa dang rnam gnyis nyan thos pas chud par bya ba ma yin par sems pa dag sems nges pas theg pa chen po la bzhugs pa'i phyir lung bstan pa dang /de bzhin gshegs pa'i chos kyi sku mnyam pa nyid 'dus byas kyi dbye ba tsam du zad kyi theg pa rnam gsum yang dag pa'i gzhung mi mthun pa med par lung bstan pa dang / byang chub sems dpa' 'phags pa nyan thos pa rnams theg pa chen po'i mya ngan las 'das pa gtan mi 'thog pa tsam du sems pa'i the tshom bcad pa'i phyir lung bstan pa dang /lung bstan pa 'dis kun la sangs rgyas su 'grub pa'i rgyu yod par bstan pas sangs rgyas kyi spyod pa la mang po gzud pa'i phyir lung bstan pa dang /theg pa gcig po 'di rtogs pas lung bstan pa dang lnga'o/ /sus lung ston pa ni rnam pa gsum du dbye ste/ ci la gnas pa dang lung ston pa'i rang bzhin dang / lung ston pa'i las so/ /ci la gnas te lung ston pa ni lung ston pa rnam pa drug las/ lnga ni bcom ldan 'das nyag gcig gis mkhyen cing lung ston/gcig ni byang chub sems dpas lung ston te/ de bzhin gshegs pas lung ston pa lnga ni bye brag tu lung ston pa dang / mthun par lung ston pa dang / phyis lung ston pa dang / bkol ba med pa'i lung ston pa dang / spyod pa las lung ston pa'o/ / byang chub sems dpas ni rgyu dang ldan pa tsam la lung ston te/ /ji ltar rtag tu mi brnyas byang chub sems dpa' sems can thams cad de bzhin gshegs pa'i rang bzhin can no zhes lung ston pa ste/ lung ston par nus pa de gnyis las gzhan med do zhes pa'o/ /lung ston pa'i rang bzhin ni phyis thob pa'i ye shes dang /kun rdzob kyi ye shes so/ /lung ston pa'i las ni tshig gis spyod pa ste/ sprul pa'i sku la sogs pa la ldan pa dang bcas pa'o/ /sus lung ston pa ni gang la brten pa dang rang bzhin no/ /gang lung bstan par bya ba nyid gang la brten pa ste/ lung bstan par bya ba rnam pa drug la/'phags pa shA ri'i bu la sogs pa nyan thos chen po bzhi so sor phye ste lung bstan pa dang / 'phags pa gang po la sogs pa dge slong lnga brgya mtshan gcig pa la sogs pa spyir mthun par lung bstan pa dang / slob pa dang mi slob pa la sogs pa dbang po zhan pa rnams phyis lung bstan pa dang /lhas byin lta bu lung bstan pas bkol ba med par lung bstan pa dang / spyod pa las lung bstan pa ste/ dge slong ma dang lha'i bu mo la sogs pa lung bstan pa dang / rgyu dang ldan pa tsam las lung bstan pa ste/ sems can thams cad la sangs rgyas kyi rang bzhin yod par lung bstan pa ste/zhib tu mdo 'di nyid kyi so so'i le'u las 'byung ba bzhin du sbyar ro/ /dogs pa bsal ba ni 'phags pa nyan thos pa rnams lung bstan pa nges par sangs rgyas su 'grub pa yin nam/ thabs kyis bstan/ de ste nges par 'grub pa yin na ni byang chub sems dpa'i spyod pa rlabs po che de snyed spyad kyang ci dgos/de ste nges par 'grub pa ma yin na ni 'grub par ci'i phyir lung bstan/ de ni 'phags pa nyan thos pa rnams theg pa chen por nges pa'i sems bskyed pa la dgongs te lung bstan gyi grub zin pa'i rang bzhin las lung bstan pa ma yin pa dang / yang de bzhin gshegs pas theg pa gsum mnyam pa ste/theg pa gcig por bsdu zhing chos kyi sku dang / 'phags pa nyan thos pas lus su yang mnyam pa nyid pas lung bstan pa yin gyi/ spyod pa dang yon tan thams cad rdzogs pa'i sgo nas lung bstan pa ma yin no/ /mdo las shA ri'i bu de'i tshe na zhes pa nas lha dang mi mang pos rab tu gang zhes pa'i bar du ni phyi'i zhing rgyan dam pa dang ldan pa ste /zhing rnam par dag pa'o/ /de la yang dga' ba 'ba' zhig gis bskyed pa'i phyir rdul med pa'i phyir zhing zhes bya ste/ dri ma'i skyon med pa'o/ /nga rgyal gyi sems spangs pas na mnyam zhing mtho dman med pa dang / sems can gyi sems rnam par dag pa phyir zhing rnam par dag pa rgyan sna tshogs kyis brgyan pa dang / gsod pa dang 'phrog pa'i sems dang bral ba'i phyir bde ba skyid pa nad dang mu ge med pa'i zhing dang / sdig pa'i bshes gnyen dang bral ba'i phyir lha dang mis yongs su rgyas pa'o/ /mdo las baiDUr+ya las byas pa zhes bya ba nas me tog 'bras bur ldan no zhes pa'i bar du ni sems kyi skyon dang bral ba'i phyir zhing bai DUr+ya ltar rnam par dag pa stong pa brgyad la gnas shing 'phags pa'i lam brgyad sgrub pa'i phyir gser gyi thig gis phyogs brgyad du re'u mig bris pa'o//gzungs gzhi la gnas pa'i phyir skyed mos tshal dang ldan pa/byang chub kyi yan lag bdun spyod pa'i phyir rin po che'i shing me tog dang / 'bras bur ldan pa'o/ /mdo las shA ri'i bu pad+mo'i 'od de bzhin gshegs pa zhes pa nas theg pa gsum nyid brtsams te chos ston zhes pa'i bar du ni sngon gyi de bzhin gshegs pa dang chos ston pa'i lugs mthun pa bstan pa ste/de la sngar ni lugs mthun pa bstan/ de'i 'og tu ni de'i gtan tshigs bstan te/ zhing rnam par dag pa zhes smos pa nyid sprul pa'i zhing du lta'o/ /mdo las gzhan yang shA ri'i bu zhes pa nas smon lam gyi dbang gis chos ston par 'gyur ro zhes pa'i bar du ni de'i gtan tshigs bstan te/shAkya thub pa de bzhin gshegs pa yang thabs la mkhas pa'i smon lam gyi dbang gis 'jig rten rnyog pa'i dus su byung zhing chos ston pa bzhin pad+mo'i de bzhin gshegs pa yang sngon gyi smon lam gyi mthu bzhin drang ba dang nges pa'i don gyi sems can rnams la chos ston to//mdo las shA ri'i bu bskal ba de'i ming zhes pa nas byang chub sems dpa' rnams ni rin po che zhes bya ste zhes pa'i bar du ni bskal pa mi mthun pa bstan pa'o/ /mdo las de'i tshe de'i dus zhes pa nas mang por byung ste zhes pa'i bar du ni 'khor gyi khyad par bstan te/ de yang so sor smos pa dang /spyir bsdu ba la/ dang po la rnam pa bcu ste/ 'di ni grangs dpag tu med pa ji ltar tsan dan gyi tshal tsan dan gyis bskor ba bzhin no/ /mdo las de bzhin gshegs pas bgrangs ba ni zhes pa nas rin po che'i pad+mo'i steng nas 'gro ba zhes pa'i bar du ni rin po che pad+mo'i steng nas 'gro ba ston te/de yang sems rnam par dag pa dgu la rtag tu gnas pa'i phyir te rnam par dag pa dgu ni tshul khrims dang sems dang ldan pa dang the tshom dang bral ba dang lam shes pa dang spyod pa shes pa dang smon lam shes pa dang / mi dmigs par 'gog pa dang zhing rnam par dag pa ste dgu dang ldan pa'i phyir ro//dge ba'i rtsa ba dman pa she dag pa las thob pa ma yin pa'o/ /mdo las dge ba'i rtsa ba yun ring po nas spyad pa zhes pa nas de bzhin gshegs pas yongs su bstod pa zhes pa'i bar du ni de yang yon tan gnyis te/ yun ring po nas smon lam chen po btab pa'i dbang gis thos pa phun sum tshogs shing mang po kun gyis shes pa'i phyir ston pa'o//mdo las sangs rgyas kyi ye shes la brtson pa zhes pa nas zhing de yongs su gang bar 'gyur zhes pa'i bar du ni bla na med pa'i mos pa dang ldan pa/ snying rje chen pos 'gro ba 'dren par sems pa bsam bdag pas g.yo dang sgyu med pa/ sems spyod pa phyir ma nur pa nyon mongs pa mi bskyod pa'i phyir dran pa dang ldan pa dag gis zhing de yongs su gang zhes sbyar ro//mdo las shA ri'i bu 'di ltar yang zhes pa nas bskal pa brgyad du 'gyur ro zhes pa'i bar du ni bcom ldan 'das de'i bstan pa gnas pa'i yun ring thung yod par bstan te/ de bzhin gshegs pa'i sku tshe'i tshad dang skye ba dang sangs rgyas su grub pa lung bstan pa dang /bstan pa ji srid du gnas pa bstan pa la 'di ni dang po'o/ /bcom ldan 'das shAkya thub pa ni sems can bsod nams dang shes rab chung bas bcom ldan 'das kyi sku tshe yang thung bar bstan pad+mo'i 'od de bzhin gshegs pa'i zhing na sems can bcom ldan 'das kyis ma bstan ma bshad kyang dge ba la rab tu rtsol zhing bsod nams shes rab che ba sha dag pas sku tshe yang ring ba bstan to//mdo las shA ri'i bu pad+mo'i 'od ces pa nas/ byang chub tu lung bstan nas zhes pa'i bar du ni ma 'ongs pa na sangs rgyas su 'grub pa bstan pa ste/de yang dang por dus bstan/ de'i 'og tu dngos su lung bstan/ de'i 'og tu zhing bstan pa'o/ /mdo las yongs su mya ngan las 'das te zhes pa nas 'jig rten du 'byung ngo zhes pa'i bar du dngos su lung bstan te/ dam pa'i chos 'di thos pas mngon par byang chub pa'i phyir stobs brjid pa pad+ma 'dor ba nyid du khyu mchog gi 'gros lta bur de bzhin gshegs par 'gyur ro//mdo las shA ri'i bu zhes pa nas de dag 'dra ba nyid du 'gyur ro zhes pa'i bar du ni de bzhin gshegs pa de'i zhing pad+mo'i de bzhin gshegs pa'i zhing dang 'dra bar rgyu dam pa nyid kyis bskyed pa'o//mdo las yang shA ri'i bu zhes pa nas gzugs brnyan gnas par 'gyur ro zhes pa'i bar du ni bcom ldan 'das mya ngan las 'das nas de'i bstan pa yun ji srid du gnas pa ston te/ yang dag pa'i bstan pa ni lung dang spyod pa dang mngon par grub pa dang bcas pa'o/ / chos kyi gzugs brnyan ni mngon par grub pa med de/ lung dang spyod pa tsam du zad pa la bstan pa de yang med par gyur pa'i dus na lung nyi tshe bzhugs so/ /bcom ldan 'das shAkya thub pa'i bstan pa yang dag pa ni yun thung / chos kyi gzugs brnyan ring ste / bud med rab tu byung ba las yang dag pa'i bstan pa lo lnga brgyas thung bar 'gyur ro//pad+mo'i 'od de bzhin gshegs pa'i yang dag pa'i bstan pa dang / chos kyi gzugs brnyan dus mnyam par gnas so/ /mdo las de nas bcom ldan 'das kyis zhes pa nas srog chags bye ba phrag stong rnam par 'dul zhes pa'i bar du 'di man chad tshigs bcad phyed dang bcu gcig la tshigs bcad bcus ni gong du lung bstan pa la bzlas tshig gcig gis ni bsdus te dbye ba'i tshul gong ma dag dang 'dra bar sbyar ro//kun du spyan zhes pa ni thams cad mkhyen pa dang rnam pa thams cad mkhyen pa gnyis dang ldan pa'o//mdo las/ sangs rgyas bye ba mang la bkur sti byas/ /zhes pa nas/ byang chub dam pa'i mchog kyang thob par 'ong / /zhes pa'i bar du ni rgyu'i sgo nas lung bstan pa la sngon bshes gnyen dam pa la brten pa dang / byang chub kyi spyod pa rdzogs par byas pa bstan to//mdo las/ tshad med bsam gyis mi khyab bskal pa na/ /zhes pa nas/ /blta na sdug pa me tog 'bras bus brgyan/ /zhes pa'i bar du ni sangs rgyas su 'grub pa nyid bstan te/ 'di man chad bskal pa'i ming bstan pa dang / zhing gi rgyan bstan pa dang / 'khor bzang ngan bstan pa dang / sku tshe'i tshad bstan pa la 'di ni dang po'i gnyis so/ /phyi'i zhing gi rgyan bstan pa yang ming dang dag pa'i mtshan nyid dang / sa gzhi dang lam dang rin po che'i shing dang / me tog dang 'bras bu la sogs pa bstan pa'o/ /mdo las/ dran ldan byang chub sems dpa' de ma mang / /zhes pa nas/de dag sangs rgyas zhing der skye bar 'gyur/ /zhes pa'i bar du ni 'khor gyi khyad par bstan te phyir mi ldog pa sprul te 'ong ba dge ba'i bshes gnyen dang bsten pa rgyu dam pa bskyed pa sha stag ces sbyar ro/ /mdo las/ rgyal ba de yi tha ma'i lus kyi tshe/ /zhes pa nas/ de dag de na tshe yi tshad du gyur//zhes pa'i bar du ni sku tshe'i tshad dang 'khor rnams kyi tshe'i tshad dang yang dag pa dang gzugs brnyan gyi bstan pa yun ji srid du gnas pa rnams ston te/ skye ba thams cad kyi tha ma rgyal bur gyur cing khyim nas byung ba nyid bla na med pa'i byang chub 'grub pa'i dus bstan to/ / mdo las/ rgyal ba de ni mya ngan 'das nas kyang / /zhes pa nas/ zil gyis mi non rkang gnyis gtso bo ste/ /zhes pa'i bar du ni dam pa'i chos dang gzugs brnyan gyi bstan pa ji srid du gnas pa dang / bsdus pa bstan to/ /mdo las de nas 'khor bzhi'i dge slong dang zhes pa nas rang rang gi gos bcom ldan 'das la mngon du gsol to zhes pa'i bar du ni lung bstan pa'i tshe lha rnams kyis mchod pa dang bstod pa bstan to//sngar ni 'khor bzhi dang brgyad kyis mchod/ de'i 'og tu ni lha rnams kyis mchod pa la 'di ni dang po'o/ /gos ni 'gebs pa'i don te bla na med pa'i 'bras bu chen po brnyes pa 'gro ba mang po la thugs rjes 'gebs pa'i don tam/dam pa'i chos 'di 'dzin pa de bzhin gshegs pa'i na bzas g.yogs pa'o zhes 'byung ba nyid dang yang sbyar ro/ /mdo las lha'i dbang po brgya byin dang zhes pa nas 'phrul gyi gos mngon du gsol to zhes pa'i bar du ni lha rnams kyis mchod pa dang bstod pa bstan te me tog mang por 'thor ba ni dam pa'i chos 'di don rtogs par ston pa'o//mdo las 'phrul gyi me tog dang zhes pa nas bar snang la bun long du gyur to zhes pa'i bar du ni ngo mtshar du gyur pa bstan te bar snang la gnas pas chos 'di thos pas 'gro ba rnam bzhi las khyad par du gyur pa bstan to//mdo las lha rdzas kyi sil snyan brgya stong dang zhes pa nas mngon par phab nas zhes pa'i bar du ni lha'i rol mos mchod pa bstan te chos kyi sgra thos pas don rtogs pa'i phyir rol mo sil snyan gyi mchod pa bstan to/ /mdo las 'di skad smra'o zhes pa nas chos kyi 'khor lo bskor to zhes pa'i bar du ni mngon par bstod pa yang tshig rkyang pa dang tshigs su bcad pa dbye ste bstan pa gzhan dag la ltos nas drang ba dang nges pa'i don du ldan pa'i chos kyi 'khor lo bskor ba 'di nyid bla na med pa'o//mdo las/ lha yi sras po de rnams kyi//zhes pa nas/ 'di la gzhan gyis dad par dka'/ /zhes pa'i bar du ni tshigs su bcad pa phyed dang bdun la bzhir dbye ste tshigs bcad dang po gnyis kyis sngon bshad pa'i don chung / da 'dir bshad pa ni don che bar bstan pa dang / de'i 'og tu tshigs bcad phyed dang gnyis kyis ni don dam pa'i chos la rjes su yi rang bar bstod pa dang /tshigs bcad gnyis kyis ni gzhan rtogs pa bskyed pas bdag nyid kyang sangs rgyas su 'grub par bstan pa dang / tshigs bcad gcig gis ni bsngo ba ston te 'di ni dang po'o/ /phung po lnga'i skye ba dang 'jig pa smos pas bden pa bzhi'i don ston te/drang ba'i don spang zhing nges pa'i don la 'jug pa bstan pa'o/ /mdo las/ rnam par 'dren pas deng bshad do/ /zhes pa nas/ dpa' bo bdag cag rjes yi rang / /zhes pa'i bar du ni chos dam pa la rjes su yi rang zhing spyod pa chen po la gzhol ba bstan to//mdo las/ ldem ngag drang srong zhes gsungs te/ /zhes pa nas/ byang chub tu yang smon par shog /ces pa'i bar du ni gzhan rtogs pa bskyed pa'i sgo nas bdag nyid byang chub pa dang bsngo ba bstan to/ /mdo las de nas tshe dang ldan pa shA ri'i bu zhes pa nas som nyi dang bral bar gyur to zhes pa'i bar du ni sngar dbang po rnon po la drang ba dang nges pa'i don bstan te/don du gyur pas dbang po bar ma la dpe'i sgo nas bstan pa'i phyir 'di ston te/ 'phags pa shA ri'i bu don rtogs te lung bstan pa thos pas yang bcom ldan 'das la gsol ba ni bdag dang gzhan la phan gdags pa dang /de bzhin gshegs pa'i dgongs pa dang mthun par bya ba'i phyir shA ri'i bus gsol te/ mdo las bcom ldan 'das gang 'di dag ces pa nas the tshom 'tshal bar gyur na zhes pa'i bar du ni gzhan gyi dogs pa gleng ba ste/ 'byung bar lta ba dang / 'jig par lta ba zhes pa ni yod med du lta ba'i mtha'o//bdag tu lta ba ni log par lta ba'o/ /lta ba de dag gi mu stegs can gyi lta ba drug cu rtsa gnyis der 'dus te de las 'phel ba'o/ /lta ba de dag gi skyon dang bral ba'i phyir 'di ltar bstan to/ /yang na lta ba de gsum gyi nyon mongs pa thams cad bskyed pa'i phyir bcom ldan 'das kyis lta ba de dag dang bral ba'i phyir nyon mongs pa'i rgyu bkag na 'bras bu yang mi skye bar 'gyur ro//de ltar theg pa chung ngu'i mya ngan las 'das pa'i mthar phyin pa dag yang nges pa dang drang ba'i don 'di bstan pas the tshom du gyur ba'o/ /mdo las bcom ldan 'das ci nas 'khor bzhi po 'di dag ces pa nas bde bar gshegs pa bka' stsal du gsol zhes pa'i bar du ni the tshom bsal bar gleng pa la sngar ni gtan tshigs gsol de'i 'og tu ni rigs par zhi ba'o//mdo las de skad ces gsol ba dang zhes pa nas byang chub sems dpa'i theg pa nyid la 'dzud do zhes pa'i bar du ni bcom ldan 'das kyis don chen po ston par bzhed pa la mdor bsdus te glengs pa'i lan btab pa dang /grong khyer gyi dpe bstan pa dang / dpe dang don du sbyar ba dang gsum mo/ /de yang 'phags pa nyan thos pa rnams byang chub sems dpa'i theg pa la gzud cing so so'i dad pa bzhin ston pa'i phyir rgyu dang dpe sna tshogs kyis sngar ni drang ba'i don bstan/phyis 'dir ni nges pa'i don ston pa nyid du shes par bya'o/ /mdo las 'di ltar yang shA ri'i bu zhes pa nas dpes don shes par 'gyur ro zhes pa'i bar du bcom ldan 'das kyis the tshom dgrol bar dgos pa'i dper gleng pa'o/ / mdo las shA ri'i bu 'di lta ste zhes pa nas dgog tu phyin pa zhes pa'i bar du ni dpe 'di la tshig rkyang pa dang tshigs su bcad pa gnyis su dbye'o/ /tshig rkyang pa la sngar dpe bstan/ de'i 'og tu don ston to/ /dpe yang sngar ni drang ba'i don gyi dpe/ phyis ni nges pa'i don gyi dpe'o/ /drang ba'i don gyi dpe la yang khams gsum na sangs rgyas bzhugs pa'i dpe dang /'gro ba rnam lnga yang za ba'i dpe dang / khyim bdag phyug pos me 'bar ba chen po mthong bas thabs kyis 'dren pa'i dpe dang / bu rnams kyis khyim bdag de'i tshig mnyan pas sdug bsngal de las thar ba'i dpe'o/ / dpe dang po la yang rnam pa drug tu dbye ste/ de'i gnas dang de'i bdag po dang / de'i rgan gzhon dang / de'i 'byor ba dang / de'i khang khyim dang / de'i skar khung dang / drug tu dbye'o/ /grong khyer dang grong rdal dang ljongs zhes pa ni gnas so/ /theg pa rnam gsum stong pa nyid sprul pa'i sangs rgyas su mngon te/de nyid stong gsum gyi 'jig rten gyi khams na mnga' mdzad pa'i bdag po ste/ ded dpon phyug po grong khyer gyi bdag po byed pa bzhin no/ /dgog tu phyin pa zhes pa ni rgan gzhon bstan pa ste/ bcom ldan 'das mkhyen pa sna tshogs kyis bgres shing mthar phyin pa zhes pa'o/ /mdo las phyug po rin po che zhes pa nas sgo gcig pa zhes pa'i bar du ni 'byor ba bstan te/phyug cing rin po che mang ba ni 'phags pa'i nor bdun dang ldan pa'o/ /khang pa zhes pa ni rnam par smin pa'i rnam par shes pa nyid khang khyim lta bur blta'o/ /yang na 'jig rten gyi rgyal po chen po ngos bzhi la dbang byed pa bzhin bcom ldan 'das kyang sems can mang po'i gnas dang bdag por gyur pa'o//sgo gcig pa zhes pa sgo ni 'byung ba dang 'jug pa'i dgos pa byed pa bzhin theg pa gcig po'i bstan pa 'dis sems can thams cad mya ngan las 'da' ba'i gnas su 'dis 'jug pa'i phyir sgo zhes bya'o//mdo las zhig la thug pa rtswas g.yogs pa zhes pa nas srog chags brgya phrag gcig gam gnyis sam lnga'i bar du de na gnas zhes pa'i bar du ni 'gro ba rnam lnga g.yang za ba'i dpe ste/ 'di man chad srog chags mang du gnas pa dang khang khyim rnyings pa dang phyogs bzhi nas me 'bar ba dang /bu mang po de na gnas pa'i dpe ston pa la 'di ni dang po'o/ /mdo las khyims rnams kyang 'drums pa zhes pa nas gogs par gyur pa'i khang pa de la zhes pa'i bar du ni gnas rnying pa bstan te/ dpe rnam pa bzhi zhing ston to/ /khang pa'i dpe ni gzugs kyi dpe'o/ / rtsig pa ni 'du shes kyi dpe'o/ /ka ba'i rtsa ba rul pa ni 'du byed kyi dpe'o/ /gdung ma g.yo ba ni tshor ba'i dpe'o/ /spyir khang pa g.yo ba ni rnam par shes pa'i dpe ste/ phung po bzhi rnam par shes pa la brten zhes pa'i don to/ /mdo las glo bur du me'i phung po chen po ngos thams cad nas rab tu 'bar bar gyur la zhes pa la me kun nas 'bar zhes pa ni skye ba dang 'jig pa'i mtshan nyid bzhi po dag gis phung po lnga 'joms zhes pa'i don to//glo bur zhes pa ni lugs dang rgyu med par nyon mongs pa'i mtshan nyid skad cig gcig la skye zhing 'byung zhes pa'i don to/ /kun nas zhes pa ni skye ba dang rga ba dang na ba dang shi bas 'joms pa'o//mdo las skyes bu de la yang zhes pa nas phyi rol tu byung bar gyur na zhes pa'i bar du ni 'gro ba rnam lnga'i sems can thams cad la bcom ldan 'das sras dang 'dra ba'i phyir bu zhes bka' stsal to/ /mdo dag las theg pa rnam pa gsum so so'i spyod pa dang /rigs las byang chub sems dpa' ni grangs bcu dang sbyar/ rang sangs rgyas ni grangs nyi shu dang sbyar/ nyan thos ni grangs sum cu dang sbyar zhes 'byung ngo / /mdo las de nas shA ri'i bu skyes bu de zhes pa nas sems mi dga' bar gyur to zhes pa'i bar du ni drang ba'i thabs sbyor ba'i dpe ston te//'dis bcom ldan 'das thugs rje chen pos sems can la dgongs shing 'dren pa'i dpe ston pa la me dang kun las 'bar ba'i don ni gong du bstan pa yin no/ /mdo las 'di ltar bdag ni me'i phung po 'di zhes pa nas phyir 'byung bar yang yid la bya ba mi bskyed do snyam du sems so zhes pa'i bar du ni 'dis bcom ldan 'das thugs rjes sems can rnams la phan 'dogs par dgongs pa'i dpe ste/'bar ba'i sgo zhes pa ni theg pa gcig pu ston pa dam pa'i chos la skur ba 'debs shing ma dad pa rnams nyon mongs pa phrag dog gi sems kyis mdo sde 'di la 'jug pa stong pa rnam pa gnyis dang phan pa rnam gnyis kyi spyod pa sreg ces pa'i don to//rtse dga' zhes pa ni gnas dang khams dang theg pa la sogs pa la chags shing bag med par spyod pa'i don to/ /mi shes khong du mi chud pa ni mngon sum dang rjes su dpog pa'i sgo nas mi 'jug pa'o//yang na mi dang mi 'jigs skye zhing spong bar mi byed ces pa'i don to/ /phyir 'byung bar yid la mi byed pa ni theg pa chen po'i mya ngan las 'da' ba mi tshol ba'o/ /mdo las shA ri'i bu skyes bu de zhes pa nas 'byung ngo snyam du bsams pa dang zhes pa'i bar du ni theg pa chen po 'dir gzud pa yang theg pa chen po'i 'bras bu bstan te/gzud pa dang rgyu bstan te gzud pa dang / theg pa chen po'i spyod pa bstan te gzud pa dang / chen po la reg pa bskyed de gzud pa la 'di ni dang po'o/ /theg pa chen po'i 'bras bu ni ye shes rnam gnyis dang ldan pa'o//stobs dang ldan pa ni yang dag pa'i ye shes rnam gnyis sku lta bur lta ba de dang ldan pa'o/ /stobs che ba zhes pa ni mngon par shes pa drug dang ldan pa'i sku'i yan lag lta bur blta bas de gnyis dang ldan pa'i phyir theg pa rnam gnyis pa theg pa chen po la mngon du dad pa med kyis kyang yon tan de gnyis kyi mthus bsgyur zhing theg pa chen po la 'dzud ces pa'o//theg pa bar ma ni bcom ldan 'das kyi ye shes rnam gnyis kyi mthus 'dzud do/ /nyan thos pa rnams ni bus pa mang du blangs te sgor 'byin pa bzhin mngon par shes pa'i mthus theg pa chen po la 'dzud do//mdo las de yang 'di snyam du sems te khang pa 'di srang gcig la sgo yang dog ces pa ni theg pa chen po'i rgyud bstan te 'dzud pa ste/ de las rgyu bstan pa yang theg pa chen po'i spyod pa chen po la brten pa dang / skur ba'i sems skyes na ngan song du ltung bar bstan pa dang /dka' ba sna tshogs ston cing theg pa chen po nyid gsangs te smon pa dang gsum las 'di ni dang po'o/ /khams gsum nas 'byung ba'i srang theg pa chen po gcig yin pa'i phyir srang gcig ces pa dang byang chub sems dpa'i spyod pa la nyan thos pa'i spyod pas mi chud pa'i phyir sgo yang dog pa zhes smos te/rgya mtsho shin tu yangs kyang mi ro zhag tu mi 'jog pa bzhin no/ /mdo las khye'u 'di dag kyang zhes pa nas byis pa de dag la 'bod de zhes pa'i bar du ni gang 'di la ma dad pa rnams ngan song du ltung ba bstan pa ste/ sems can rnams 'jig rten las 'byung ba'i rgyud yod du zin gyis kyang 'byung bar rtsol ba med pas na byis pa zhes bya'o//ji ltar byis pa legs nyes kyi bye brag mi shes pa bzhin theg pa chen po 'di'i yon tan ma rtogs shing / skur pa'i sems bskyed pa rnams sdug bsngal sna tshogs myong ba yang ji ltar me'i phung po las byol bar mi sems pa'i byis pa bzhin no//mdo las khyim 'di la zhes pa nas tshur sheg phyir 'byung zhes pa'i bar du ni sems can rnams la theg pa chen po gsangs te bstan pa'i dpe dang / theg pa chen po'i spyod pa bstan te 'dzud pa ston pa la de yan chad rgyu dang 'bras bu dang spyod pa la gzud pa'i dpe bstan to//mdo las de ltar phan par 'dod pa'i skyes bu des zhes pa nas khyim 'di nas gdon to snyam zhes pa'i bar du ni phung po lnga la chags shing nyon mongs pa sna tshogs kyi mes gdung bar byed pa'i phyir tshul bzhin ma yin pa'i mes tshig ces pa'i don to/ / snyam pa ni ji ltar de bzhin gshegs pa rnams mya ngan las 'das pa'i bde ba brnyes pa'i sa na bzhugs pa bzhin sems can thams cad kyang sa der gdon cing 'jog ces pa'i don to//mdo las skyes bu des byis pa de dag gi bsam pa shes zhes pa nas rnam pa du ma yin na zhes pa'i bar du ni theg pa rnam gsum dngos su bshad pa'i dpe ston par gleng pa la sngar so so'i dbang po shes pa dang /phyis dngos su ston pa la 'di ni dang po'o/ /byis pa de dag gi bsam pa dang dad pa rig nas zhes pa ni theg pa rnam gsum gyi rigs shes pa ste/ dbang po mtho dman shes pa'o/ /mdzes pa dang sdug pa dang yid du 'ong ba dang zhes pa ni theg pa rnam gsum gyi don to//mdo las de dag dkon par gyur te zhes pa nas myur du brgyugs te shog shig ces pa'i bar du theg pa rnam gsum gyi dpe shing rta rnam gsum dang sbyar te ston la sngar sbyin no bya bar gleng pa dang / rnam gsum gyi ming bstan pa dang /dngos su byin pa dang gsum du bgo ste/ 'di ni dang po'o/ /theg pa rnam pa gsum gyi mthu dang spyod rlabs khyad par yod pa'i phyir dpe yang bzang ngan gsum du bkod do/ /phyi sgor bkod ces pa ni 'jig rten gyi dge ba'i rtsa ba sna tshogs dang ting nge 'dzin gyi yon tan thams cad theg pa de gsum gyi sgo nas 'jug cing 'thob pa'i phyir sgo zhes bya'o//bstan pa 'di la brten te theg pa rnam gsum gyis mya ngan las 'da' ba'i 'bras bu phyis thob par byed pa'i phyir phyi sgor bkod ces bya ste/ rgyu la brten te 'bras bu 'thob pa'i phyir ro/ /theg pa 'di rnam gsum yang skyed pa dang phyin par byed pa'i don du 'dra bas ji ltar shing rta yang mang nyung skyed pa la mi 'dra yang spyir shing rta zhes ming gcig ste/'dus ma byas la dbye ba med mod kyi 'dus byas kyi sgo nas che chung rim par dbye ba'i phyir glang dang ra dang ri dgas kyi shing rta zhes smos so/ /mdo las de nas byis pa de dag ces pa nas de nas myur du phyir 'thon to zhes pa'i bar du ni bcom ldan 'das kyi gsungs rab la brten pas khams gsum las thar pa'i dpe bstan te/de yang bus pa rnams nyon mongs pa las thar ba dang / pha bde bar 'dug pa'i dpes sems can rnams theg pa rnam gsum la bkod pas bcom ldan 'das dgyes zhes pa'i don to//gcig gis gcig bdas shing brgyugs te zhes pa ni brtson 'grus chen po rtsol ba bstan to/ /mdo las de nas skyes bu des zhes pa nas 'jigs pa med pa thob par gyur te zhes pa'i bar du/ dpong sa bzhi mdo zhes pa ni/ bden pa rnam bzhi'i don bstan pa'o/ /'phags pa nyan thos pa rnams lhag ma dang bcas pa'i mya ngan las 'das pa thob pas nyon mongs pa las rnam par grol ba dang / byang chub sems dpa' lhag ma ma lus pa'i mya ngan las 'das pa thob pa shes bya'i sgrib pa las rnam par grol ba'i phyir skyabs dang sgrib pa med pa ni bla gab med par gnas pa bzhin no//mdo las de nas byis pa de dag ces pa nas bdag cag stsal du gsol zhes pa'i bar du ni dpe snga mas ni drang ba'i don bstan/ dpe 'dis ni nges pa'i don ston te/ de yang bu rnams kyis sbyin par byas pa de bslangs pa dang /phas gcig byin pa bstan pa dang / phas bsams pa'i don dang bus pa rnams kyi bsam pa dang 'gal ba dang bzhir dbye ba la 'di ni dang po'o/ /theg pa rnam pa gnyis pa dag ni phung po dang bral ba'i rnam par grol ba thob du zin gyis kyang mya ngan las 'das pa chen po ma thob pa dang /byang chub sems dpa' ni rnam pa thams cad mkhyen pa'i ye shes ma thob pa de gnyis kyi dper bus pa phyir 'thon pa rnams pha la so so nas sngar byin par bya ba de bslangs zhes par sbyar ro/ /yang na lhag ma dang bcas pa'i mya ngan las 'das pa thob tu zin gyis kyang lhag ma ma lus pa'i mya ngan las 'das pa ma thob pa'i phyir sbyin par byas pa de blangs so//mdo las de nas shA ri'i bu skyes bu des zhes pa nas bdag gi bu rnams la rlung ltar mgyogs shing mthu dang ldan pa'i glang po che'i shing rta byin te zhes pa'i bar du ni phas kun la 'dra bar byin pa bstan te de yang shing rta byin pa dang /de'i rgyan dang glang de'i mtshan dang de'i 'khor bstan pa la 'di ni dang po'o/ /glang po che'i shing rta ni theg pa chen po'i 'bras bu bstan te rnam pa thams cad mkhyen pa'i ye shes kyi rang bzhin can nam ye shes bzhi dang lnga'i dngos po'o//mdo las kyang de bzhin nyid kyi ngo bo ni dpes shing rta bzhin no zhes 'byung ba lta bu ste/ glang de yang rlung bzhin du mgyogs pa'i dpes theg pa chen po 'di la gnas pas phyir mi ldog pa'i sa la myur du son par byed pa'i phyir mgyogs par bstan to/ /de bzhin gshegs pas chos ston pa yang sems can la dbye ba dang rim pa mi mdzad mod kyi so so'i snod ji bzhin pa las mya ngan las 'da' ba thob pa'ang khyim bdag des bu rnams la 'dra bar glang po che'i shing rta byin pa'i dpe bstan to//mdo las rin po che bdun las byas pa logs dang ldan pa dril bu mang pos rab tu dbyangs pa mtho zhing brtan pa zhes pa ni shing rta de'i rgyan bstan te/de la yang rnam pa bcu yod pa la 'dir bzhi zhig ston te/ de'i tshad dang rgyan dang kha lo sgyur ba dang 'phyang ba mang po ston to/ /mtho zhing brtan pa ni tshad de de bzhin gshegs pa'i ye shes kyi dpe ste/ phyogs thams cad du gzigs shing 'phags par gyur ces pa'i don to/ /rin po che mang po ni de'i rgyan te yon tan thams cad kyis brgyan par bya ba ni bcom ldan 'das kyi ye shes nyid do/ /logs dang ldan pa zhes pa ni kha lo sgyur ba dang ldan pa ste gzungs rnam bzhis brtan zhes pa'i don to//dril bu rab tu dbyangs zhes pa ni sbyang par bya ba'i rgyan te spobs pa rnam pa bdun la sogs pas spobs pa'i rgyan zhes pa'i don te / /mdo las rin po che ngo mtshar rmad du byung ba'i rgyan gyis brgyan zhes pa ni rgyan de ni gdugs kyis 'gebs pa'i rgyan te/ 'gro ba mang po la tshad med pa bzhi'i gdugs kyis 'gebs zhes pa'i don to//mdo las rin po che'i phreng bas mdzes par brgyan pa zhes pa nas rten pa dmar ba gnyis su bzhag pa zhes pa'i bar du ni 'di la rgyan bzhi ste/ phreng ba dang me tog dang gding ba dang rgyab rten dang bzhi la phreng ba ni smon lam rgya chen po bzhi'i don te/bzhi'i ni byang chub sems dpa' dge ba ci brtsams pa rnams sems can thams cad la bsngo ste/ sems can sdug bsngal las thar bar gyur cig /bde ba ma thob pa rnams bde dang ldan par shog shig /sdig pa spong dge ba la 'jug pa'i byang chub kyi sems ma bskyed pa rnams sems de bskyed par gyur cig /bla na med pa'i byang chub kyi 'bras bu ma thob pa rnams thob par gyur cig ces smon lam 'debs pa'o/ /rin po che'i me tog gi phreng ba zhes pa ni bsdu ba rnam bzhi'i don te/ sbyin pa dang tshig snyan pa dang phan par spyod pa dang don mthun pa'o/ / gding ba ni yang dag pa'i 'tsho ba ste rgyu dang log par spyod pa sgo gsum nas mi rgyu zhes pa'i don to/ /rten dmar po zhes pa ni mya ngan las 'da' ba'i bde ba la brten nas zhes pa'i don te/ zag pa med pa'i 'gog pa la gnas shing 'phags pa'i lam 'phel bar byed pa'i don tam/dad pa'i dbang po la sogs pa dbang po lngas brten zhes pa'i don to/ /mdo las glang dkar po rab tu dkar zhing zhes pa nas byis pa rnams la re re byin te zhes pa'i bar du ni glang dkar po rtsa ba'i ye shes dang sbyar ro/ /glang zhes pa ni shing rta 'dren pa'i don te / 'gro ba mang po 'dren pa'o//dkar po zhes pa ni kha dog thams cad kyi gzhi ste pad+mo dkar po dang 'dra'o/ /yang glang de la yon tan rnam pa gsum ste/ dgra 'dul ba'i don te sgrib pa rnam gnyis 'joms pa'o/ /mdzes pa'i don te 'phags pa'i yon tan thams cad kyis brgyan pa'o/ / 'degs pa'i don te bdag dang gzhan dgrol ba'o/ /yang na glang gis drang ba'i shing rta ni ra dang ri dwags kyis drang ba'i shing rta las khyad par du bstan te theg pa chen po 'di yang theg pa rnam pa gnyis las 'phags zhes pa'i don to/ /stobs dang ldan pa zhes pa ni yang dag pa'i ye shes te/ nang gi yon tan phun sum tshogs pa'o/ /kha dog dkar ba zhes pa ni sgrib pa thams cad bsal te tshul khrims kyi yon tan dang ldan pa bstan to/ /yang mdzes pa zhes pa ni mtshan dang dpe byad bzang pos brgyan pas lha dang mis mchod par 'os pa bstan to/ /yang stobs dang ldan pa ni mnga' ba phun sum tshogs pa bstan te/rnam pa thams cad kyis mi bsnyengs zhes pa'i don to/ /rlung bzhin du mgyogs pa zhes pa ni thugs rjes sems can 'dren pa dang yod pa dang med pa'i chos gzigs pa la thogs pa med par 'jug pa'i don te/ mdo las shA ri'i bu de ci'i phyir zhe na zhes pa nas des 'di snyam du bsams so zhes pa'i bar du ni pha de'i bsam pa bstan te/bang mdzod dang nor mang po dag ni 'dus byas dang 'dus ma byas pa'i yon tan no/ /bang mdzod ces pa ni sde snod gnyis dang gsum du ldan pa'o/ /mdo las bdag gis byis pa 'di rnams bzhon pa ngan pa byin te ci zhig bya snyam zhes pa nas 'di dag thams cad la snyoms par bsam gyi mi snyoms par mi bya'o zhes pa'i bar du ni byang chub tu sems ma bskyed pa phyir bus pa zhes gdags so//theg pa chen po la zhugs pa'i phyir nga'i bur 'dra'o zhes smas so/ /thugs rjes dgongs pa gnyis su mi mdzad pa'i phyir snyoms pa'o//mdo las bdag kyang bang mdzod mang gi zhes pa nas bdag gi bu rnams lta ci smos zhes pa'i bar du ni bcom ldan 'das thugs rje chen po dang ldan pas 'gro ba lngar skyes pa'i sems can thams cad dang rigs med pa dang rigs nges pa rnams la yang snyoms par ston na theg pa chen po'i rigs can dang rigs ma nges pa rnams la lta ci smos zhes pa'i don to//mdo las de'i tshe byis pa de dag kyang zhes pa nas de ji snyam du sems zhes pa'i bar du ni rnams kyis sngar bsam pa'i re ba las 'gal ba bstan te/ sngar theg pa rnam gsum bstan la phyis theg pa chen po 'ba' zhig bstan pas/'gal zhes pa'i don to/ /mdo las skyes bu des byis pa de dag la zhes pa nas/ de brdzun du smras par mi 'gyur ram zhes pa'i bar du ni sngar ni nges pa'i don gyi dpe bstan phyis the tshom dgrol ba'i dpe bstan te gong du bcom ldan 'das ni bden par gsung ba yang dag pa nyid du gsung pa'o zhes 'byung ba la theg pa rnam gsum bstan pa 'dir theg pa chen po gcig tu bsdus na gsung dam par gyur ces pa'i don to//mdo las shA ri'i bus gsol pa/ bcom ldan 'das de lta ma lags so zhes pa nas srog dang ldan par bgyis pa'i slad du'o zhes pa'i bar du ni dris pa'i lan btab pa ste/sngar gleng ba dang phyis dgrol ba'o/ /nyon mongs pa las ston pa dang ngan 'gro gsum las thar par byas pa ni srog dang ldan par byas pa'o/ /mdo las de ci'i slad du zhe na zhes pa nas skyes bu de sho be+e mchi bar mi 'gyur ro zhes pa'i bar du ni khams gsum 'bar ba'i khang pa dang 'dra ba las thar bar byas pa'i phyir brdzun du mi 'gyur ba dang /skyes bu de thabs mkhas pa dang ldan pas/ chen po sbyin pa'i bsam pas chung ngur brjod de chen po thob par byas pas 'gal ba med pa'i phyir ro/ / mdo las de ci'i slad du zhe na bcom ldan 'das skyes bu de sho be+e mchi ba ma lags so zhes pa'i bar du ni theg pa chen po bstan pa'i phyir brdzun du mi 'gyur ba bstan pa'o/ /mdo las de skad ces gsol pa dang / bcom ldan 'das kyis tshe dang ldan pa shA ri'i bu la 'di skad ces bka' stsal to//shA ri'i bu legs so legs so/ /de de bzhin te/ ji skad smras pa bzhin no zhes pa ni don de nyid yin par bcom ldan 'das kyis kyang bstan par byas so / /mdo las shA ri'i bu de bzhin du zhes pa nas de bzhin gshegs pa'i ye shes dang zhes pa'i bar du ni dpe dag kyang snga ma ni drang ba'i don gyi dpe/phyi ma ni nges pa'i don dang sbyar ba'o/ /de la de'i gnas dang khyim bdag dang / rgan dang 'byor pa dang / khyim gyi rtags dang / sgo dang / drug gcig cig ston te/ 'jig rten zhes pa ni gnas so/ /khyim bdag ces pa ni bdag po'o/ /'jig rten yang snod dang bcud du dbye'o//'jigs pa thams cad bsal ba zhes pa ni 'byor pa bstan te/ 'jigs pa ni rnam pa lnga ste/ 'tsho ba mi 'byor bas 'jigs pa dang / gtam ngan gyis 'jigs pa dang / 'chi bas 'jigs pa dang / ngan song gis 'jigs pa dang / 'khor gyi nang du spa gong bas 'jigs pa'o//'chi ba dang 'khrug pa zhes pa ni mi bde ba'i sdug bsngal sna tshogs so/ /de dag ni 'khor ba'i 'jigs pa dang sbyar ro/ /yid mi bde ba dang / ma rig pa la sogs pa ni nyon mongs pa'i rtsa ba gti mug ste sdug bsngal gyi rgyu yin pas dug gsum dang sbyar ro/ /yang na dkon mchog gsum ma rig pa yang sbyar ro//nyon mongs pa de dag ma lus pa spangs pas yon tan thams cad dang ldan pa'i de bzhin gshegs pa nyid sems can thams cad kyi pha yin par sbyar ro/ /mdo las stobs dang mi 'jigs pa zhes pa nas ye shes dam pa'i mchog thob pa zhes pa'i bar du ni 'byor pa bstan to//stobs dang mi 'jigs pa dang sangs rgyas kyi chos ma 'dres pa la sogs pa nang gi yon tan phun sum tshogs pa'i phyir phyug cing nor mang ba lta bur bstan to/ /rdzu 'phrul ni bran g.yog 'khol ba dang 'dra bar des dbang dang sems can gyi don byed pa'o//mdo las snying rje chen po mi skyo ba'i yid kyis phan par 'dod pa zhes pa nas zhig pa'i khang pa dang 'dra bar sems can zhes pa'i bar du ni sems can la phan 'dogs pa la thugs rje chen po skyo mi mkhyen par bstan pa ston te/ spong ba phun sum tshogs pa dang / ye shes phun sum tshogs pas bdag dang gzhan gyi don rdzogs par mdzad pa dang /khang pa me 'bar ba dang 'dra bar khams gsum gyi sems can 'gro ba lngar skye ba rnams la phan 'dogs shing 'jig rten du gshegs te / de las byung ba bstan pas theg pa rnams gcig gi don spyod pa la gzud par thabs mkhas pa chen pos phan 'dogs pa bstan pa'o//mdo las skye ba dang rga ba dang / na ba dang / 'chi ba zhes pa nas bla na med pa yang dag par rdzogs pa'i byang chub tu gzud pa'i phyir 'byung ste zhes pa'i bar du ni sems can 'gro ba lngar skyes pa rnams 'khor ba g.yang za ba na gnas pa'i dpe ste/de yang de na rab tu mang bar gnas pa dang / khang khyim zhig pa dang / phyogs thams cad nas me 'bar ba bus pa rnams de na gnas par ston pa la rab tu mang ba gnas pa'i sems can mang po zhes pa'i don to/ /skye ba dang rga ba dang na ba dang 'chi ba la sogs pa ni khang pa rnying pa dang 'dra bar sbyar ro//ma rig pa'i mun pa zhes pa la sogs pa ni gdug pa gsum gyi me phyogs bzhi nas 'bar ba bstan to/ /byang chub la gzud ces pa ni bu rnams la thugs rje skye zhing nyon mongs pa'i gnas nas 'don zhes pa'o/ /phung po bzhi la mi rtag pa la sogs pas 'joms pa dang / skye rga na 'chis rnyings par byed pa ni khang pa rnyings pa lta bu'o//mdo las de byung ma thag tu sems can rnams zhes pa nas sdug bsngal rnam pa mang po rab tu myong ba zhes pa'i bar du ni de yang bcom ldan 'das thugs rje skye ba ston pa la thugs rje skye ba dang / thugs rje skye ba'i dngos po rnam gnyis ston te/sems can rnams zhes pa ni thugs rje skye'o/ /skye rga na 'chi ba la sogs pa ni thugs rje skye ba'i dngos po'o/ /de 'dra ba'i sdug bsngal sna tshogs pa la sems can 'di dag gnas so zhes bcom ldan 'das thugs rje skye ba'o/ /de yang sngar ni 'dod pa'i khams kyi sdug bsngal bdun bstan/sdug bsngal rnam pa mang po zhes pa ni gzugs dang gzugs med pa'i khams kyi sdug bsngal bstan to/ /'dod pa'i khams kyi sdug bsngal yang 'du byed kyi mtshan nyid bzhis 'joms pa dang / 'dod pa rnam lngas bsregs pa dang rgyud rnams su 'khor ba'o//de yang snga ma gsum ni tshe 'di'i sdug bsngal lo/ /gcig ni tshe phyi ma'i sdug bsngal lo / /yang na snga ma gnyis ni 'dod pa mi rnyed pa'i sdug bsngal lo/ /'khor bar 'khor ba ni sdug pa dang bral ba dang mi sdug pa dang phrad pa'i sdug bsngal lo/ /rnam pa sna tshogs zhes pa ni nye bar len pa'i phung po lnga rnams la sdug bsngal bar gyur pa'am/sdug bsngal brgyad la sogs pa rnams bsdu'o/ /dbang po lnga dang mngon par 'gyur ba ni sdug bsngal ba'o/ /yid kyi dbang po dang phrad pa ni 'khrug pa la sogs pa'o/ /mdo las da ltar gyi tshe la tshol ba'i phyir yongs su bsags pa'i phyir zhes pa nas sdug pa dang bral ba'i sdug bsngal rab tu myong ba zhes pa'i bar du ni 'dod pas gdungs pa dang /'khor bar 'khor ba bstan te/ ma rnyed pa tshol ba dang / rnyed pa yongs su sog pa'i phyir sdug bsngal skye'o/ /dbul phongs pa'i sdug bsngal ni mi dang sbyar ro//mi sdug pa dang phrad pa dang sdug pa dang bral ba'i sdug bsngal ni lha dang mi gnyi ga dang sbyar ro/ /lha dang mi la sdug bsngal de rab tu che ba'i phyir gzhan las bkar te smos so/ /mdo las de nyid du sdug bsngal gyi phung por 'khor zhing zhes pa nas yid la bya ba mi bskyed par gzigs so zhes pa'i bar du ni sdug bsngal de dag la gnas kyang spong zhing skye bar mi sems te rjes su dpog pa'i sgo nas rig pa mi bskyed /mngon sum gyi sgo nas tshor bar mi byed/ 'bras bu la mi 'jig pa dang rgyu la mi grag pa de dag kun la skyo ba mi bskyed 'byung bar mi sems te de la gzhol der rgyugs ces pa'i don to//mdo las shA ri'i bu nga ni sems can 'di dag gi pha ste zhes pa nas de ltar gzigs so zhes pa'i bar du ni 'di theg pa chen po la re ba bskyed pa bstan te/ de yang theg pa chen po'i 'bras bu sems su bcug ste gdul ba dang theg pa chen po'i rgyu bstan te gdul ba dang theg pa chen po'i spyod pa gsang ba bstan te gdul ba dang theg pa chen po mngon du chud par bya ba ston pa dang bzhi la 'di ni dang po dang sbyar ro//mdo las de la shA ri'i bu zhes pa nas sems can de dag chos de dag gis 'byung bar mi 'gyur ro zhes pa'i bar du ni theg pa chen po'i rgyu sems su gzhug pas gdul ba ste/gong du khang pa de yang gcig la zhes 'byung ba de dang sbyar te/ sgo de las byang chub sems dpa'i theg pa 'ba' zhig gis 'byung gi gzhan gyis 'byung nus pa ma yin pa bstan te/ stobs dang rdzu 'phrul sogs pa rgya chen po bstan pas theg pa rnam gnyis snod chung ngu can spyod pa zhan pa 'dor zhing theg pa chen po la zhugs pas 'dod khams gsum la 'byung gi gzhan gyi thabs dang spyod pa la gnas pas 'byung bar mi nus pa zhes pa'i don to//mdo las de ci'i phyir zhe na sems can 'di dag ni zhes pa nas de bzhin gshegs pa de ltar gzigs so zhes pa'i bar du ni re ba med par chen po thob pa bstan te/de bzhin gshegs pa'i ye shes zab mo de bstan par mi nus pa'i phyir re ba med ces pa'i don to/ /mdo las de shA ri'i bu zhes pa nas theg pa gsum mngon par ston pa'i bar du ni ji ltar 'byung ba'i thabs sbyor ba bstan pa dang sbyar te/stobs la sogs pa rdzu 'phrul gyi rnam gzhag ste gsung gi thabs mkhas pas sems can rnams me 'bar ba'i khang pa las thar bar byas nas gdod theg pa chen po ston zhes pa'o/ /bcom ldan 'das ji ltar sman pa mkhas pa nad thabs dang sbyor zhing sman gtong ba bzhin sems can gyi dbang po dang sbyor zhing chos ston zhes pa'o//mdo las khyed cag 'bar ba'i khyim dang 'dra ba'i zhes pa nas/ khams 'di nas byung la zhes pa'i bar du 'di ni theg pa rnam gsum dngos su bstan pa ste/ de yang khams gsum la skyo ba bskyed pa dang / theg pa rnam pa gsum la gzud pa dang /mngon du chud pa rnams kyi dpe dang / theg pa chen po'i bsngags pa dang bzhi zhig ston pa la 'di ni dang po dang sbyar ro/ /'dod pa lnga ni phyi'i yul lo/ /gdung ba zhes pa ni nang gi dmigs pa ste/ de gnyis spong ba la khams gsum nas 'byung ba'i lam tshol cig pa'o//mdo las nyan thos kyi theg pa dang zhes pa nas thob par gyis shig ces pa'i bar du ni theg pa rnam gsum thob pa stsol du gzhug pa'o/ /mdo las nga ni gnas 'di la khyed kyi snying rje ba ste zhes pa nas brtson 'grus gyis shig ces pa'i bar du ni/ 'phags pa rnams kyis mngon du chud pa'i dpe bstan te/ theg pa rnam gsum gyi don 'phags pa rnams kyis mngon du gzigs pa'i phyir bslu ba ma yin no zhes ston pa'o/ /mdo las kye ma sems can dag zhes pa nas/ kun tu rgyug par 'gyur gyis zhes pa'i bar du ni theg pa chen po'i yon tan bsngags pa ste/sngar ni 'khor ba dang mi mthun pa bstan/ de'i 'og tu ni theg pa gzhan las khyad par du gyur pa las bsngags pa ste/ 'di ni dang po'o/ /'jig rten gyi 'khor ba ni nyon mongs pas bcings pa rang dbang med pa yin na/ 'phags pa rnams kyis gzigs shing brnyes pa'i theg pa ni zag pa med pas dga' ba chen po dang ldan pa'o//mi phongs par rtsen zhes gzhan la rag lus pa med pa'i phyir ro/ /mi phongs pa ni mi tshol ba'i don te tshol ba rnam gsum spangs pa'o/ /tshol ba rnam gsum ni 'dod pa'i tshol ba dang / srid pa'i tshol ba dang / log pa'i spyod pas tshol ba'o/ /mdo las dbang po dang stobs dang / byang chub kyi yan lag dang zhes pa nas yid bde ba chen po dang ldan par byos shig ces pa'i bar ni 'dis theg pa'i dmigs pa'i yon tan bstan te theg pa chen po de stobs dang / mi 'jigs pa dang byang chub kyi yan lag bdun dang /'phags pa'i lam yan lag brgyad dang / bsam gtan bzhi dang / snyoms par 'jug pa dgu dang / rnam par thar pa brgyad dang / ting nge 'dzin gsum la sogs pa la dmigs shing gnas pa'i phyir bde ba dang yid bde ba skye zhes pa'i don to/ /mdo las de la shA ri'i bu sems can gang mkhas par 'gyur zhes pa ni byis pa kha cig ri dgas kyi shing rta 'dod de 'byung ba bzhin zhes pa'i bar du ni 'di man chad de bzhin gshegs pa'i gsung rab la brten te/theg pa rnam gsum so sor grol ba thob par ston pa la/ 'di nyan thos kyi theg pa dang sbyar te dpe dang don du sbyar bar dbye'o//mkhas par gyur pa zhes pa ni mthu rnam bzhi ston te mkhas pa ni rgyu dang ldan pa'i mthu'o/ /de bzhin gshegs pa zhes pa ni dge ba'i bshes gnyen gyi mthu'o/ /pha rol gyi sgra thos zhes pa ni yid la byed pa'i mthu'o/ /brtson par byed ces pa ni tshogs pa'i mthu'o //de bzhin gshegs pa 'jig rten du byung ba dang phrad de/ rigs kyi rgyu bzhin du sems bskyed la dad pas chos nyan cing brtson pas tshig stsogs pa'o/ /brtson pa ni spyod pa thams cad sdud pa'i gtso bo yin no/ /bdag yongs su mya ngan las 'das zhes pa ni spyod pa zhan pas gzhan gyi don mi byed pa'o//pha rol las thos zhes pa yang 'phags pa'i man ngag pas 'bras bu rnyed par 'gyur gyi gzhan gyis ma yin zhes pa'o/ /mdo las sems can gzhan slob dpon med pa'i ye shes dang zhes pa nas byis pa kha cig ra'i shing rta 'dod pa de 'byung ba bzhin no zhes pa'i bar du ni 'di ni mthu rnam gsum gyis 'byung bar byed pa de'i rgyu mi dgos par rang bzhin gyi shes pas sangs rgyas mi bzhugs pa'i 'jig rten du 'bras bu thob par byed pa ste/'phags pa nyan thos ltar bcom ldan 'das kyi gsung mngon du thos pas lam thob pa ltar ma yin te/ rten cing 'brel te 'byung ba'i don zab mo rtogs pas 'bras bu thob ces pa'o//de yang bse ru bzhin gnas pa dang khyus lding pa'o/ /sngar bcom ldan 'das kyi bstan pa la zhugs pa la phyis 'bras bu thob pas na rang gis rig zhes pa'o/ /mdo las sems can gzhan yang thams cad mkhyen gyi ye shes zhes pa nas bus pa kha cig glang gi shing rta 'dod de 'byung ba yin no zhes pa'i bar du ni theg pa chen po dang byang chub sems dpa'i theg pa zhes dbye zhing ston te/thams cad mkhyen pa ni stong pa mkhyen pa'i ye shes so/ /theg pa rnam gsum kun la yang ye shes mnga' mod kyi dngos po la gzigs pa'i ye shes ni bcom ldan 'das nyag gcig la mnga' ba dang rang rig pa'i ye shes nyid ni rang byung gi ye shes so//gzhan la ltos pa med par mkhyen pa ni mkhan po med pa'i ye shes so/ /yang na de ye shes kyi rang bzhin ni rang byung gi ye shes so/ /ye shes kyi mtshan nyid ni mkhan po med pa'i ye shes so//ye shes de gnyis kyi 'khor ni stobs dang mi 'jigs pa la sogs pa nang gi yon tan dag go/ /yon tan de dag gis 'gro ba rnams byams pa dang thugs rjes phan pa dang bde bar mdzad cing sems can sgrol bas theg pa chen po zhes bya'o//byang chub zhes pa ni theg pa rnam gsum thun mong gi ming ste de dag la khyad par du bstan pa'i phyir sems dpa' chen po zhes smos so/ /mdo las shA ri'i bu 'di lta ste dper na zhes pa nas bus pa de dag la bzhon pa chen po gcig byin pa de bzhin du zhes pa'i bar du ni yang dag pa nyid ston pa la rnam pa gnyis su dbye ste/yang dag la bstan pa dang / the tshom dgrol ba'o/ / de yang bu rnams kyi re ba las 'gal ba bstan pa dang / dpe dang don du sbyar ba'o/ /dpe la yang bu'i phyir thon pa mthong ba dang / pha'i yid rangs pa bstan pa ste/ mdo dang ci rigs par sbyar ro/ /mdo las shA ri'i bu de bzhin gshegs pa zhes pa nas mya ngan las 'das pa'i bde ba thob par gzigs na zhes pa'i bar du ni pha'i bsam pa bstan te khams gsum g.yang zab me 'bar ba'i khang pa lta bu las 'gro ba mang po bton nas de bzhin gshegs pa'i bstan pa yang dag pa'i sgor gzud pa dang /mya ngan las 'da' ba'i bde ba dam pa la yongs su bkod de 'jigs pa dang 'tshe ba thams cad las thar zhes pa'i don to/ /mdo las shA ri'i bu de dag la de'i tshe zhes pa nas yongs su mya ngan las 'da' bar byed kyi zhes pa'i bar du ni theg pa rnam gnyis dang byang chub sems dpa' las sras su 'dra bas gzud pa'i phyir de gnyi ga yang theg pa chen po'i mya ngan las 'da' ba la dgod kyi gzhan la mi gsung zhes pa'i don to//mdo las sems can gang la yang zhes pa nas dga' bar 'gyur ba thams cad kha dog gcig pa sbyin par mdzad do zhes pa'i bar du ni de yang theg pa'i rang bzhin dang theg pa'i yon tan ston pa la 'di ni dang po'o//ma nges pa'i rigs can dang / byang chub sems dpa'i rigs dang nyan thos pa'i rigs rnams la dge ba thams cad rdzogs par bstan pa'i phyir theg pa rnam gcig byin pa bstan to/ /kha dog gcig pa bde ba dam rtsen pa/ /zhes pa ni theg pa'i yon tan bstan te/rgyu dang 'bras bu thams cad nyon mongs pa dang ma 'dres pa ni yon tan thams cad kyi gzhir gyur pa'o/ /zag pa med pa'i chos can 'phags pa rnams kyis bsngags par bya'o / /mdo las shA ri'i bu 'di lta ste thams cad la byin pa'i phyir brdzun du smra ba ma yin pa de bzhin du zhes pa ni the tshom bsal ba bstan te/dpes gleng ba dang / dogs pa bsal ba dang / dris pa dang / de'i lan la sogs pa ci rigs pa dang sbyar ro/ /mdo las shA ri'i bu de bzhin gshegs pa zhes pa nas yongs su mya ngan las zlo ba'i phyir brdzun du smra ba ma yin no zhes pa'i bar du ni go sla bas ma bshad do//mdo las de ci'i phyir zhe na zhes pa nas bang mdzod mang po dang ldan te zhes pa'i bar du ni theg pa gcig po 'di yon tan bsam gyis mi khyab pa dang ldan te/ sems can rnam pa sna tshogs kyi rigs can thams cad kyis de la longs spyod du zin gyis kyang mi zad pa bstan to//mdo las sems can kun thams cad mkhyen gyi ye shes dang ldan pa'i chos zhes pa nas gzhung 'dis kyang de lta bur rig par bya'o zhes pa'i bar du ni 'dis bsdus pa bstan te theg pa gcig po ston pa'i rigs pa dang / rgyu dang rkyen gyi theg pa rnam gsum du ston pa'i bye brag dang gtan tshigs bstan pas 'bras bu bla na med pa ni gcig tu zad par bshad pa yin no// //dam pa'i chos puN+Da rI ka'i 'grel pa/ bam po drug pa/ mdo las de nas bcom ldan 'das kyis de'i tshe tshigs su bcad pa 'di dag gsungs so zhes pa nas/ ka ba'i rtsa ba rul bar 'gyur//zhes pa'i bar du ni 'di man chad tshigs bcad brgya dang drug cu rtsa lnga zhig yod pa las dum bu gnyis su dbye ste/ dang por tshigs bcad brgya dang drug cu rtsa phyed dang lngas ni chos dang dper sbyar ba sngar smos pa rnams bstan te/ shA ri'i bu khyod la sogs pa thams cad nga'i sras yin zhes pa la sogs pa'o//de'i 'og tu tshigs bcad brgyad cu zhig 'byung ba de bzhin gshegs pa'i ye shes la dad pa bskyed cing gzud pa'i don du bstan pa'o/ /dang po la yang rnam pa gsum ste/ tshigs bcad drug cu rtsa lngas ni dpe bstan/ de'i 'og gi tshigs su bcad pa brgyad kyis ni dpe dang don du sbyar/de'i 'og ma tshigs su bcad pa gcig gis bsdus pa'i don bstan pa'o / /dang po'i tshigs su bcad pa drug cu rtsa lngas dpe bstan pa la yang rnam pa gnyis te/ tshigs bcad lnga bcu rtsa gsum gyis ni bkri ba'i dpe bstan/ de'i 'og ma tshigs su bcad pa bcu gnyis kyis ni nges pa'i don bstan/dang po la yang rnam pa bzhir dbye ste/ dang po tshigs su bcad pa phyed kyis ni 'jig rten gsum na de bzhin gshegs pa bzhugs pa'i dpe bstan/ de'i 'og tu tshigs su bcad pa sum cu rtsa phyed dang gsum gyis 'gro ba lnga rnams g.yang za zhing bag tsha ba'i dpe bstan/de'i 'og ma tshigs su bcad pa bcu bzhis ni thabs rnam pa sna tshogs bshams pa'i dpe bstan/ de'i 'og gi tshigs bcad phyed dang bcu bdun gyis ni gsung rab la brten nas nyon mongs pa'i sa nas 'byung ba'i dpe bstan te/ 'di la khyim chen po zhes pa ni ji ltar sngar don rnam pa gsum du bstan pa bzhin te/tshigs su bcad pa sum cu rtsa phyed dang gsum gyis ni 'gro ba lnga g.yang za ba bstan pa la sngar tshig lhug pas rnam pa bzhir phye ste/ da 'dir tshigs su bcad pa la rnam pa gsum du dbye'o/ dang po'i tshigs bcad gsum gyis ni khang pa 'drums shing rul pa bstan/de'i 'og gi tshigs bcad phyed kyis ni de na gnas pa mang bar bstan/ de'i 'og ma'i tshigs bcad nyi shu rtsa dgus ni phyogs thams cad nas gnod pa sna tshogs g.yo ba bstan/ khang pa 'drums pa la yang rnam pa gnyis su phye ste/ tshigs su bcad pa bcu bzhis ni khams gsum dang phung po lnga rnams mi rtag pa bstan/de'i 'og gi tshigs bcad lngas ni gzugs kyi phung po mi rtag pa dang / bdag med pa dang mi gtsang ba dang stong pa'i don bstan/ khang pa rnying pa 'drums zhes pa ni rnam par shes pa'i phung po skad cig ma gcig la skye zhing 'jig pa sgyu ma dang 'dra ba'i don bstan to//khang khyim che zhes pa ni gzugs kyi phung po mi rtag pa dbu ba'i gong bu dang 'dra'o/ /ka ba'i rtsa ba rul pa zhes pa ni 'du byed kyi phung po skad cig ma gcig la skye zhing 'jig pa bya ba btang bas med pa la gnas pa ni chu shing gi sdong po dang 'dra'o/ /khyams rnams zhig ces pa ni tshor ba'i phung po mi rtag pas bde ba dang bral ba ste chu bur dang 'dra bar bstan pa'o//mdo las/ khang thog dang ni skar khung skabs rer bral/ /zhes pa nas/ /rtswas g.yogs thams cad 'brul zhing 'dzag /zhes pa'i bar du ni 'du shes kyi phung po mi rtag pa bstan te/ tshigs su bcad pa 'di lngas kyang gzugs kyi phung po mi rtag pa la sogs pa bstan pa'i phyir te/tshigs bcad gsum gyis ni mi rtag pa bstan/ tshigs su bcad pa gcig gis ni bdag med pa bstan/ yang gcig gis ni mi gtsang ba bstan te/ de gsum gyi phyir stong pa nyid du bstan to/ /skyong nul zhig zhes pa ni sha dang bral ba'i don/re lde ni pags pa dang bral ba'i don/ kha ran rnyings zhes pa ni rus pa dang chu rgyus su bral ba'i don/ gtsug lag dang mdo gzhan dag las kyang / lus 'di ni mkhar dang khang pa 'dra bar gnas pa ste/ rnam par shes pa brgyad ni mkhar lta bu'o/ /chu rgyus ni gzungs lta bu'o/ /sha ni skyong nul lta bu'o//shing dang rdo la sogs pa ni rus pa lta bur gnas pa'o/ /'dod chags dang zhe sdang dang gti mug dang ma rig pa la sogs pas glags shing brtan par gnas pa'o/ /mdo las brgya phrag lnga dag las ni mi nyung ba/ de na de dag gi yang gnas gyur la zhes pa ni mang du gnas pa'i don bstan to//mdo las/ khang phran mang po shin tu dog pa rnams/ /zhes pa nas/ rab rtsig pa dag kyang de bzhin zhig /zhes pa'i bar du ni 'dis ni dbang po med cing mi gtsang ba'i gnas lus 'di rdzas sum cu rtsa drug gis glags shing khyab par byas pa'i don bstan to/ /mdo las/ de gnas bya rgod bye ba dag dang ni//zhes pa nas/ mi ma yin mang gnas dang gnas dag na/ /zhes pa'i bar du ni tshigs su bcad pa nyi shu rtsa dgus phyogs sna tshogs nas gnod pa'i ltas ngan pa mang du 'byung ba bstan te/ de la yang rnam pa gsum du dbye'o/ /dang po tshig phyed dang bco brgyad kyis ni 'dre dang srin bu rnams bstan/de'i 'og tu tshig phyed dang bcu gcig gis ni de dag 'byung ba'i gnas bstan/ tshigs bcad gcig gis ni bsdus pa'i don bstan te/ de dag kyang nyon mongs pa bcu'i mtshan nyid ltas ngan gyi don du bstan te/ 'gro ba rnams de la 'jigs shing skyo ba dang / spong du gzhug pa'i phyir bstan to/ / srog chags snga ma'i ltas kyis ni gdug pa chung zhing gnod pa bags kyis byed pa'i don te/ 'dod chags la sogs pa lnga dang sbyar ro/ /de'i 'og ma 'dre gdon mthu che la gnod pa myur bar byed pa'i dpes ni lta ba rnam pa lnga bstan to/ /de'i 'og gi tshigs bcad phyed dang gnyis kyis ni nyes pa'i skyon bsdu ba bstan/de la yang rnam pa gnyis su phye ste/ tshig phyed dang drug gis ni so so'i mtshan nyid ci 'dra ba bstan/ de'i 'og ma tshigs bcad phyed kyis ni bsdus pa'i don bstan/ dang po la yang rnam pa lngar dbye ste/ dang po'i tshigs bcad phyed kyis ni 'dod chags kyi dpe bstan/ de'i 'og ma tshigs bcad phyed dang gnyis kyis ni zhe sdang gi dpe bstan/de'i 'og ma tshigs bcad gcig gis ni gti mug gi dpe bstan/ de'i 'og ma gcig gis ni the tshom gyi dpe bstan/ gcig gis ni nga rgyal gyi dpe bstan to/ /'dod chags la rnam pa bzhi ste mngon du chags pa dang / chags par 'gyur ba dang /chags pa dang zhen pa gnyis dang ldan pa dang / yul de dang de la dga' zhing chags pa rnam pa bzhi ste/ bya rgod dang phug ron la sogs pa rim par sbyar ro/ /bya de dag 'dod chags che ba'i phyir 'dod chags bzhi dang brgyad du sbyar ro/ /zhe sdang la yang dpe rnam pa bcu gcig ste/ sbrul la sogs pa rnams so//de la zhe sdang rnam pa bcu ni de'i lus kyi phyir zhe sdang ba dang / yid du 'ong ba'i sems can gyi phyir zhe sdang ba dang / yid du mi 'ong ba'i phyir zhe sdang ba dang / 'das pa'i dgra la zhe sdang ba dang / da ltar gyi dgra la zhe sdang ba dang / ma 'ongs pa'i dgra la zhe sdang ba dang / yid du mi 'ong ba'i spyod yul la zhe sdang ba dang /phrag dog pa'i phyir zhe sdang ba dang / sngon gyi bag chags kyi phyir zhe sdang ba dang / gzhan gyi nyon mongs pa mthong bas zhe sdang ba'o/ /mdo las/ bshang gcis rab tu sme bar byas/ /zhes pa dag ni rdzas sum cu rtsa drug gis glags pa gti mug gi phung po yin pa ste/ skyo ba dang spang bar bya ba yin gyi dga' ba'i gnas ma yin par bstan pa'o//sbyang ki dang khyi dang wa ni khams gsum mam dus gsum du sbyar ro/ /mdo las/ mi yi rol rab tu za/ /zhes pa ni nga rgyal bstan te/ nga rgyal gyis rnyed pa la 'thab cing rtsod ces pa'i don to/ /mdo las/ gnas dang gnas na rnam par 'cha' zhing za/ /'thab mo byed de rab tu sgra yang 'byin//rnam pa de 'dras khyim de shin tu 'jigs/ /shin tu sems gtum gnod sbyin de na 'khod/ mi yi ro dag la yang rnam 'dren zhing / /zhes pa ni tshig 'di dag gis nam mkha' la gnas pa'i 'dre gdon gyi dpe lta ba rnam lnga bstan te/ de la tshig dang po gsum gyis ni log par lta ba'i dpe bstan/de'i 'og ma tshig phyed kyis ni tshul khrims dang brtul zhugs kyi dpe bstan/ de'i 'og mas ni 'jig tshogs la lta ba'i dpe bstan/ de'i 'og mas ni lta ba bsnyems pa'i dpe bstan/ de'i 'og mas mthar lta ba bstan to/ /yang lta ba de dag la dang por lta ba spyi'i mtshan nyid bstan/de'i 'og tu lta ba so so'i mtshan nyid dang spyod pa bstan/ gnod sbyin la sogs pa sems gtum po de dag log par lta bas dge ba de dag thams cad kyi rtsa ba med par byed pa nyid gnod sbyin mi'i rol 'brang ba bzhin no/ /mdo las/ sbrul dang rkang brgya pa dang gcan gzan rnams/ /zhes pa nas/ zhig pa'i khyim der ni yang gnas 'cha' ste/ /zhes pa'i bar du ni log par lta bas nyon mongs pa thams cad bskyed pa'i phyir dper sems can gtum po gdug pa de dag gis bstan te/ skye zhing 'phel ba'i gnas su gyur pa phru gu glog pa zhes smos so/ /mdo las/ ji tsam gnod sbyin de dag 'grangs gyur pa//zhes pa nas/ 'khang du bcug pa de la dga' bar byed/ /zhes pa'i bar du ni log par lta ba la sogs te lta ba rnam lngas rgyas shing 'phel bar gyur pa nyid 'grangs par gyur pa ste/ sgo gsum nas spyod pa rnam pa gzhan gyis 'jigs su rung ba'i phyir dang / tshul khrims dang brtul zhugs bsnyems pa dang /brtul zhugs bsnyems pas sems can gtses pa'i 'khang pas bdag dga' bar byed pa bzhin du tshul khrims dang / brtul zhugs bsnyems pas mtho ris bgrod pa'ang de dang 'dra'o/ /mtho gang tshad dang de bzhin khru gang tshad/ /zhes pa ni tshul khrims bsnyems pa dang / brtul zhugs bsnyems pa gtso yin par 'dzin pas 'jig rten las 'das pa'i don tshol ba nyid do/ /mdo las/ de dag khyi rnams rkang nas bzung nas ni/ /zhes pa nas/ 'khang du bcug pa de la dga' bar byed/ /zhes pa'i bar du ni spyod pa'i mtshan nyid so sor dbye ba ste/ mu stegs can thar pa tshol ba ni yang dag pa'i chos ma yin te/spyod pa khyi lta bus tshul khrims dang brtul zhugs bsnyems pa ni khyi'i rkang pa nas 'dzin pa'o/ /rab tu mgrin dgag cas pa ni tshul khrims dang brtul zhugs kyis mya ngan las 'das pa'i gnas bde ba la gnas par sems pa nyid khyi'i mgrin pa la rdzib dang 'dra'o//log pa'i brtul zhugs kyis rnam par grol ba'i dga' ba tshol ba ni khyi 'khang pas dga' bar byed pa bzhin no/ /mdo las/ gcer bu gnas shing nyam chung rid pa yi/ /zhes pa nas/ rab tu bkres te kha zas kun tshol zhing / /zhes pa'i bar du ni 'jig tshogs su lta ba'i dpe ste/lhan cig skyes pa dang brtags te skyes pa ni che zhing ring ba'o/ /dge ba'i rgyu med par 'dzem pa dang / ngo tsha ba med pa ni gcer bu lta bu'o/ /ma rig pa dang bcas pas sgrib pa ni gnas pa yang dag pa'i gzhung gi shas chung ba'i phyir rid pa'o/ /phung po lnga la dam du 'dzin pa'i phyir der gnas pa'o//nyon mongs pa'i chos rnams kyi rgyus bdag tu 'dzin pa skye zhing 'phel bar gyur pas gnas dang gnas su bdag tu lta ba 'phel bar byed pa ni rab tu bkres te zas tshol ba'o/ /mdo las/ la la ba lang gdong la khab kyi kha/ /zhes pa ni lta ba bsnyems pa'i dpe ste/ gzhan gyi lta ba bzang po mi chud mi lom zhes pa'i don to//mdo las/ mi tsam dang ni de bzhin khyi tsam dang / /zhes pa 'di ni mthar 'dzin pa bstan te/ ji ltar glang gi mgo la rwa gnyis yod pa dang 'dra bar lta ba bsnyems pa rnams la 'dzin pa gnyis 'byung ste/ rtag par 'dzin pa dang / chad par 'dzin pa gnyis te/ chad par 'dzin pa ni rgyu dang /'bras bu thams cad spangs pa'i phyir sdig pa can mi'i sha za ba bzhin no/ /rtag par 'dzin pa ni sdig pa de tsam du mi che ba'i phyir khyi sha za ba bzhin no/ /mdo las/ lhug pa'i sgra de bshig cing sgra yang 'phyin/ /zhes pa nas/ zas la sred pas rab tu gdungs pa'i phyir/ /de na phyogs bzhir rab tu lta bar byed//zhes pa ni spyod pa gzhan rnams kyi dpe bstan te/ mthar lta ba 'di gnyis la mu stegs kyi lta ba sum cu rtsa bdun zhig 'dir bskyed pa'i phyir skra 'dzings pa lta bu'o/ /yang dag pa'i lung gi zas dang bral ba yang dag pa'i gzhung gi chu ma rnyed pa bkres pa dang skom pas nang gi sems gdungs pa'i phyir phyogs bzhir lta zhing sgra 'byin pa'o//mdo las/ rtag tu skar khung dang mthangs dag nas kyang / /zhes nas kyang zhes pa nas/ de ltar khyim de mi bzad 'jigs 'gyur la/ /zhes pa'i bar du ni bsdu ba bstan te/ mu stegs can rnams phyin ci log sna tshogs kyis log par lta ba ni dper gnod sbyin la sogs pa'i gdon lta bu ste/yang dag pa'i lta ba spangs shing shes pa med pas log pa la zhen pa rnams sred cing kha zas kyi mnar ba lta bu ste/ skye rga na 'chis 'jigs pa las nam du yang mi thar zhes pa'o/ /mu stegs kyi spyod pas yang dag pa'i lam la lta ba ni skar khung nas nam mkhar la lta ba tsam mo//mdo las/ che la mtho zhing rab tu mi brten no / /zhes pa nas/ me lce stong snyed kun tu 'bar bar gyur/ /zhes pa'i bar du ni 'dre gdon sna tshogs dang / ltas sna tshogs gnas pa'i sa bstan pa ste/ mi gcig cig ni yongs su dbang 'gyur la zhes pa ni byang chub sems dpa' mos pas spyod pa'i sa nas bla na med pa'i byang chub thob pa'i bar du 'jig rten la gnas shing 'gro ba sgrol ba'i dpe ste/mi de khyim gyi phyi rol tu byung zhes pa yang ji ltar khyim bdag med pa'i khang pa bcos shing lta ba med pa 'drums shing zhig par gyur pa bzhin/ bcom ldan 'das mya ngan las 'das pa'i 'og tu 'jig rten na chos kyi bdag po med pas khams gsum stongs zhes pa'i don to//me lce 'bar zhes pa yang nyon mongs pa sna tshogs mched pas skye rga na 'chi'i bar du bzhi mched ces pa'i don to/ /mdo las/ 'od ma dang ni shing dag mes tshig ste/ /zhes pa nas/ / ka ba dang ni rtsig pa de bzhin 'bar/ /zhes pa'i bar du ni gdung ma ni tshor ba'i phung po'i don/ gral bu ni rus pa'i don gzugs kyi phung po ni ka ba'i don te/ skye ba la sogs pa phung po lnga khyab pa'i phyir rtsig pa'i don to/ /'jig pa ni 'du byed kyi phung po mi rtag pa'i don te/ spyir na phung po lnga po 'di 'jigs su rung ba mi brtan pa skye ba dang /rga ba dang / na ba dang / shi bas nam du yang 'jigs par 'gyur zhes pa'i don to/ /khang pa'i nang na me dang srog chags gnas pa'i dpe 'di gnyis la bye brag ci yod ce na/ lus dang sems tshig par byed pas me'i dpe bstan/ ma rig pa la sogs pas nyon mongs pas glo bur du byung ba ni srog chags sna tshogs kyis 'jigs par byed pa'i dpe ste/rnam par shes pa ni phung po bzhi rnams kyi gnas su gyur pa'i phyir khang pa lta bur blta'o/ /mdo las/ gnod sbyin yi dags 'di dag sgra yang 'byin/ /zhes pa nas/ de na sha za mang po phan tshun rgyu//zhes pa'i bar du ni 'dod pa dang gzugs kyi khams na ltas ngan dang 'dre gdon sna tshogs bstan pa ste/ 'dod pa'i khams na mu stegs can khyim nas byung ba dang khyim nas ma byung ba gnyi ga yang sred pa'i nyon mongs pas las dang 'jig rten gyi zang zing la rtsod cing sgra 'byin pa dang / log par lta ba'i nyon mongs pas lus tshig cing gdug pa sna tshogs kyis gtses zhes pa'i don to/ /mdo las/ bsod nams med pa me yis kun tshig nas/ /zhes pa nas/ tshig par gyur pa dag la khrag gis 'thor/ /zhes pa'i bar du ni gnas de na dag pa'i bsam gtan gyis nyon mongs pa choms pa'i phyir nyon mongs pa mi skye mod kyi yang dag pa'i bsod nams can ma yin pas bsod nams zhan pa ste/nyon mongs pa 'dod chags dang gti mug dang / nga rgyal dang the tshom dang / 'jig tshogs su lta ba la sogs pa'i nyon mongs pas bsregs pa'i phyir nyon mongs pa ma spangs pas gzugs med pa'i khams na'ang gnod pa yod pa'i phyir phan tshun sos 'debs zhes pa dang /rang gi lta ba dam por 'dzin pa ni khrag gis 'thor ba lta bu'o/ /mdo las/ de na dus byas shi la spyang ki dag /zhes pa nas/ 'jig rten dag na phyogs bzhir rab tu 'thul/ /zhes pa'i bar du ni nyon mongs pa las thar bar tshol yang lta ba dam por 'dzin pa'i phyir mi 'thor ba'i don du bstan pa'i dpe ste/spyang ki dag ces pa ni 'dod pa'i khams kyi nyon mongs pa gzhan dag kyang bsdu ba ste/ gzugs kyi khams na 'dod pa la sogs pa'i nyon mongs pa ni/ phan tshun za ba 'dra bar bstan/nyon mongs pa'i dring ba phyogs bzhir 'thul ba ni bsam gtan bzhi pa rnams kyi nyon mongs pa'i dpe bstan to/ /mdo las/ srin bu rkang brgya pa dag 'bros gyur pa/ zhes pa nas/ bkres pa dang ni bsregs pas shin tu gdungs/ /zhes pa'i bar du ni 'dis kyang gzugs med pa'i khams kyi nyon mongs pa bstan pa ste/gzugs med pa'i khams 'og ma gsum gyi 'gog pa'i bsam gtan gyi mes khams gong mar rgyu zhes pa'i don to/ /grul bum zhes pa ni mu stegs can gyi lta ba mang po dam du bzung bas bla ma bla ma'i sa tshol bar sems pa ste/ lta ba ngan pa'i zan zos pas nyon mongs pa phyir zhing 'phel zhes pa'i don to//me lce stong snyed rab tu 'bar/ /zhes pa ni srid pa'i rtse mo la gnas pa'i mu stegs can yang dag pa'i bstan pa'i zas dang skom gyis gdungs pas nyon mongs pa'i mes tshig ces pa'i don to/ /mdo las/ khyim 'di'i bdag po mi de ni/ /sgo nas 'dug cing shin tu rnam par lta//zhes pa ni 'di man chad tshigs bcad rtsa ba bcu bzhis drang ba'i don bstan pa'i dpe dang / sdug bsngal ba rnams la snying rje skye ba'i dpe dang / ngo mtshar bstan pa'i dpe dang / sdug bsngal gyis nas gdon pa'i dpe dang / theg pa gsum bshad pa'i dpe la/ 'di ni sdug bsngal ba rnams la snying rje skye ba'i dpe ste/sdug bsngal ba bstan pa tshig gnyis la yang tshig gong mas ni sangs rgyas 'jig rten du 'byung ba bstan pa'i dpe/ de'i 'og ma tshig phyed dang gnyis kyis ni sems can sdug bsngal ba rnams la snying rje bar bya ba'i don bstan pa'o/ /sgo na 'dug ces pa ni/ sdod pa dang 'dug ces pa'i don te/khang pa de'i nang na gnas pa'i bu rnams gdon pa'i sems kyis 'dug pa dang / skyabs bya ba'i sems kyis sdong pa dang / dbang po smin ma thag tu phan gdags par sems pas sdod pa dang / nyon mongs pa'i gnas nas bslangs te/ grub pa'i gnas bde ba la dgod par sems pa'o//mdo las/ des thos de na de yis bdag gi bu/ /zhes pa nas/ de ltar ba bdag ni mi shes phyir/ /zhes pa'i bar du dpe 'dis ni sems can nyon mongs pa'i sa na sdug bsngal ba bstan pa ste/ zhib tu tshig lhug pa'i nang du bstan pa yin no/ /thos pa zhes pa'i dus gsum gyi de bzhin gshegs pas sems can sdug bsngal gyis na gnas par bshad pa thos pa dang /bdag nyid kyis sems can sdug bsngal bar mthong ba'o/ /thog ma med pa'i dus nas 'dzem pa dang / khrel ba med pas nyon mongs pa sna tshogs la bag med par spyod pa de nyid byis pa mi shes pa'o//mdo las/ des thos de nas myur du der song ste/ /zhes pa nas/ sdug bsngal chen po dag ni gcig phyir gcig /zhes pa'i bar du ni snying rje skye bar bstan pa ste/ sems can 'khor ba na gnas pa ni me'i khang par zhugs pa bzhin te/ myur du mi thar ces pa'i don to//de la khyim gyi nyes pa des brjod 'di/ /sdug bsngal 'di dag mi bzad rigs kyi bu/ /zhes pa ni sdug bsngal 'jigs pa chen po dang ldan par bstan pa ste/ theg pa chen pos bskyed cing gdon zhes pa'i don to/ /gcig phyir gcig ces pa ni thog ma med pa'i dus nas gcig gis gcig sdud cing nyon mongs pa'i gnas na skye ba dang rga ba dang na ba dang shi ba rgyun mi 'chad ces pa'i don to//mi bzad ces pa ni mu stegs can gyi khyim nas byung ba dang khyim na gnas pa gzhan slu bar byed pa mi bzad ces pa'i don to / /mdo las/ sprul dang gnod sbyin gtum sems dang / /zhes pa nas/ me med zin kyang rab tu 'jigs/ /zhes pa'i bar du ni/ sprul ni zhe sdang ngo / /gnod sbyin ni las ngan par spyod pa'o/ /grul bum ni tshul khrims ngan pa la gnas pa'o/ /wa ni the tshom dang sbyar ro/ /khyi ni nga rgyal dang sbyar ro/ /bya rgod ni 'dod cing brkam pa dang sbyar ro/ /de lta bu'i nyon mongs pa sna tshogs kyis gzir zhes pa'i don to//mdo las/ /de 'dra'i sdug bsngal 'ba' zhig ste/ /zhes pa nas/ de tshe de yi thabs bsams pa/ /zhes pa'i bar du ni thugs rjes phan 'dogs pa nyid dang sbyar ro/ /mdo las/ byis pa de dag rtse la chags/ /zhes pa nas/ dga' bar lhan cig phyir 'thon/ zhes pa'i bar du ni/ 'di man chad theg pa rnam gsum dang sbyar te/ ri dgas dang ra dang glang gi bzhon pas theg pa rnam pa gsum dang sbyar te bstan pa'o/ /de la yang dang por bzhon ba byin par khas blang ba dang / bzhon pa khyim gyi phyi rol na yod par bstan pa dang / bzhon pa nyid ci dang ci 'dra bar bstan pa'o//bzhon pa nga la yod ces pa ni bzhon pa sbyin par khas blangs pa'o/ /ri dgas dang ra dang glang zhes pa ni phyi rol na yod pa dang dngos bstan pa'o/ /'bras bu ni rgyu'i sgo nas byung / gzhung nyid ni bstan pa las phyi rol bas phyi rol na yod ces smras so/ /bla na med pa'i gnas khams gsum las 'das pa'i phyir phyi rol na yod ces bstan to//khyed cag gi phyir ngas byas zhes pa ni bzhon pa'i dgos pa bstan te/ mya ngan las 'das pa'i gnas dam pa ni 'dus ma byas pa yin mod kyi theg pa nyid 'dus byas yin pa'i phyir byas zhes smras so/ /mdo las/ bzhon pa de 'dra yod par shes nas su//zhes pa nas/ sdug bsngal dag las thar te stong par 'dug /ces pa'i bar du ni gsung rab la brten nas sdug bsngal las thar bar bstan te/ de yang bu rnams sdug bsngal gyis nas 'thon pa dang pha bde bar gnas pa ste/ 'dis ni bu rnams sdug bsngal gyis nas 'thon pa bstan to//stong par 'dug ces pa ni sgrib pa gsum dang bral ba'i gnas bslab pa med pa'i sa dang po la gnas pa'o/ /mdo las/ mi des byis pa 'thon pa mthong nas su/ /zhes pa nas/ pha de bde bar 'dug par rig nas su/ /zhes pa'i bar du ni bu rnams thon nas pha bde bar gnas pa bstan te/dpong sa bzhi mdor zhes pa ni/ bden pa bzhi'o/ /seng ge'i khri la bzhugs zhes pa ni mi 'jigs pa'i sa la gnas pa ste/ sngon byang chub sems dpa'i spyod pa mdzad pa na sems can thams cad sgrol ba'i thugs dam dang bcas pas sems can 'khor ba'i gnas nas thon pas dgongs pa grub pa'i phyir bde bar bzhugs zhes smras so//mdo las/ bu rnams dong ste 'di skad smras/ /zhes pa nas/ de dag dus deng stsal du gsol/ /zhes pa'i bar du ni de yan chad ni drang ba'i don bstan 'di man chad ni nges pa'i don bstan te/ bdag cag stsol zhes pa ni dbang po smin zhes pa'i don to//mdo las/ mi de mdzod kyi mthu ldan pa/ /zhes pa nas/ gang la rin chen shing rta bcas/ /ces pa'i bar du ni mi de mdzod kyi mthu dang ldan pa ni 'dus byas dang 'dus ma byas kyi mdzod dang ldan pa'o/ /yul 'khor thams cad kyang mi la byin na yang mi zad pa'i nor dang ldan pa yin na/ byis pa rnams la byin pas gang la zad par 'gyur ba ni yon tan gyi chos mang po dang ldan pa'o/ /rnam pa thams cad mkhyen pa'i ye shes zag pa med pa'i phung po lnga dang ldan pa'i sku ste/ shing rta zhes pa ni de bzhin nyid kyi chos la bya'o/ /rgyan sna tshogs kyis brgyan pa'i shing rta de yang kha lo sgyur ba dang dril bu dang /g.yer ka dang / gdugs dang / lhab lhub dang / mu tig gi dra ba dang / gser gyi phreng ba dang / gding ba 'jam po la sogs pa'i rgyu ni rnam par dkar ba sgrib pa gnyis dang bral ba'i rkyen spyod pa dam pa dang ldan pa 'tsho ba rnam par dag pa'i gdan la bzhugs zhes pa'i don to//glang dkar po tshol bzang ba ni/ gcig tu dkar ba/ gcig tu tsho zhing stobs dang ldan pa gcig tu 'bad pa/ gcig tu mdzes pa dang ldan zhes pa'i don to/ /mdo las/ skyes bu du mas rab khrim pa/ /skyes bu de yis de 'dra byin/ /zhes pa nas/ phyogs dang phyogs mtshams rtse bar dong / /zhes pa'i bar du ni/phyogs dang phyogs mtshams zhes pa ni phyogs bzhir skye ba rnam bzhis skye ba'i sems can gyi don la rol pa'o/ /rtse zhes pa nas rdzu 'phrul gyis rol pa'o/ /mdo las/ de bzhin nga yang shA ri'i bu/ /zhes pa nas/ skye rga na ba du ma brgya / /zhes pa'i bar du tshigs bcad drug cu rtsa lngas ni dpe bstan/bco brgyad kyis ni don dang sbyar ba bstan te/ de la dang po tshigs bcad bcu gcig gis ni drang ba'i don bstan/ tshigs bcad bdun gyis ni nges pa'i don bstan/ drang ba'i don la yang tshigs bcad gsum gyis bstan/ khams gsum gyis ni khams gsum na sangs rgyas bzhugs pa dang sbyar/de'i 'og ma tshigs bcad gsum gyis ni 'gro ba rnam lnga g.yang za ba'i gnas su sbyar/ de'i 'og ma tshigs bcad lngas ni drang ba'i don gyi dpe bstan to/ /mdo las/ khams gsum nas ning thar zhing / /zhes pa nas/ mi ldog byang chub sems dpa' zhes pa'i bar du ni drang ba'i thabs kyi dpe bstan pa dang /sdug bsngal ba rnams la thugs rje skye ba dang / don chen po bstan kyang mi dngang ba dang / bdag nyid khams gsum gyi gnas las byung bar bstan pa dang / gnas de nyid sangs rgyas kyi yin pa bstan pa'o/ /nags tshal dben pa'i gnas zhes pa ni yon tan mang po'i tshal du sbyar ro//phyir mi ldog zhes pa ni sa dang po la gnas pa yan chad do/ /drug shes pa ni dgra bcom pa'o/ /gsum rig pa ni sngon gyi gnas dran pa dang / lha'i spyan dang / zag pa zad par mkhyen pa'o/ /mdo las/ mkhas pa rnams la dpe mchog 'di / /zhes pa nas/ mi mchog thabs mkhas ma gtogs so//zhes pa'i bar du ni/ theg pa mchog yin par bstod cing bsngags pa ste/ theg pa de yang tshigs bcad dang po gcig gis ni theg pa de yon tan bzhi dang ldan par bstan/ de'i 'og ma gcig gis ni 'phags pa rnams kyi bsngags pa bstan/ de'i 'og ma gcig gis ni longs spyod dam pa dang ldan pa bstan/de'i 'og ma gnyis kyis ni dga' ba'i mchog yin par bstan to/ /de la yon tan bzhi ni dam pa khyad par can sgrib pa med pas rnam par dag pa dang / mchog dam pa yin pa dang / bla na med pa dang zla med pa'o/ /yangs pa'i dngos po phyag gi gnas/ /zhes pa ni 'phags la rnams kyi bsngags pa'o//'phags pa rnams de ltar na ma rabs rnams la ci smos zhes sbyar ro/ /bsam gtan dang stobs dang ting nge 'dzin zhes pa ni longs spyod kyi gnas dam pa yin par bstan pa'o/ /nub dang nyin par lo dang bskal pa 'da' bar byed/ /zhes pa ni/ theg pa gcig po 'di la gnas pa ni gnas pa'i dam pa yin par bstan te/bla na med pa'i byang chub kyi snying po la reg par 'gyur zhes pa'i don to/ /de yan chad bstan pa dang / gzhung dang spyod pa dang / 'bras bu thams cad theg pa chen po dang ldan par bstan to/ /mi mchog thabs mkhas ma gtogs zhes pa ni de bzhin gshegs pa thabs mkhas pa dang ldan pas sems can rnams rim gyis theg pa gcig po la drang zhing gzud pa'i phyir phyogs bcu gang du yang thabs kyis rol pa ma gtogs par theg pa gnyis dang gsum du ma bshad do//mdo las/ khyod kyi pha nga yi bu khyod/ /zhes pa nas/ byang chub sems dpa' gang mang 'dul//zhes pa'i bar du ni 'di man chad mos bskyed cig par bstan pa ste/ sngar tshigs bcad bcu bzhis drang ba dang nges pa'i don la 'jug par bstan/ de'i 'og ma tshigs bcad drug cu rtsa drug gis ni bslab par bya ba'i gnas bstan to/ /dang po la pha bu la byams pa'i dpes sdug bsngal las 'don pa bzhin nges pa dang drang ba'i don dngos su ston pa'o//'di ltar mya ngan las 'das pa ngas bstan kyang zhes pa ni/ bcom ldan 'das kyis yang dag pa'i don sngar drang ba'i tshul gyis bstan du zin gyis de mya ngan las 'das pa chen po ma yin pas/ nga mya ngan las 'das pa nyid bstan pa'i phyir nges pa'i don bstan to /kun nyon nga yi sangs rgyas tshul/ /zhes pa'o/ /tshul ni chos kyi sku nyid do/ /sgrib pa rnam gnyis dang bral ba'i phyir mya ngan las 'das pa chen po'i mdo las/ byang chub sems dpa' gang mang 'dul/ /zhes pa nas/ lam rnams bsgoms nas thar bar 'gyur//zhes pa'i bar du ni de ltar drang ba dang / nges pa'i don bstan pa yang bden pa bzhi dang sbyar te bstan pa'i phyir tshigs su bcad pa 'di dag gsungs so/ /dang po'i tshigs bcad gnyis kyis ni sdug bsngal gyi bden pa bstan/ de'i 'og ma phyed dang gnyis kyis ni kun 'byung gi bden pa bstan/yang phyed dang gnyis kyis ni 'gog pa'i bden pa bstan/ de'i 'og ma gcig gis ni lam gyi bden pa bstan te/ 'dod ngan de la chags par gyur pa ni phyi nang gi yul la dga' bar bya ba de thams cad sdug bsngal nyid yin par bstan pas 'jig rten gyi bden pa ma spangs par yang dag pa'i bden pa nyid la gzud pa'o//gang rnams mi shes sdug bsngal gyi/ /zhes pa la sogs pa ni kun 'byung gi bden pa bstan te/ sdug bsngal gyi rgyu kun 'byung las 'byung zhes pa'i don to/ /sdug bsngal 'byung ba sred 'dus pa/ /zhes bya ba la sogs pa ni 'gog pa'i bden pa bstan te/ sdug bsngal skye bar byed pa'i rtsa ba sred pa yin na/sred pa de yang 'gog pas btsal zhes bya ba'i don to/ /gang gis thar zhes pa la sogs pa ni lam gyi bden pa bstan te/ lam bsgoms pas 'gog pa 'grub ces pa'i don to/ /mdo las/ ci thar zhe na shA ri'i bu/ /zhes pa nas/ 'jig rten 'dir skye bde bya'i phyir/ / zhes pa ni drang ba dang nges pa'i don gyi bden pa bzhi bstan pa yang 'di man chad tshig bzhis ni dris/ tshig bzhis ni lan btab pa ste/ bden pa bzhi dang ci rigs pa dang sbyar ro/ /mya ngan las 'da' ba dang / ma 'das pa yang drang ba'i don gyi theg pa rnam gnyis la bstan pa dang / nges pa'i don gyis bla na med pa'i lam dang sbyor ba'o//de ltar dgongs te chos rgyal zhes pa'ang nges pa'i don la mngon sum du gzud pa'i phyir 'jig rten la bde ba'i phyir zhes pa dang sbyar ro/ /chos rgyal zhes pa ni sems can rnams la so so'i dbang po la sbyor zhing chos la mnga' brnyes pa'i phyir chos rgyal zhes bya'o/ /mdo las/ 'di nga'i chos rgyal shA ri'i bu/ /zhes pa nas/ khyod kyi mi de mi ldog gzung / /ces pa'i bar du de ni/ snod ma rtogs par chos ma gtod cig par bstan pa ste/ chos kyi phyag rgya zhes pa ni/ theg pa gcig po'i gzhung dam pa nges pa nyid la bya'o/ /rjes su yi rang zhes pa ni mos pa che ba'i phyir mi ldog ces pa ste/yun ring po nas dge ba'i rtsa ba bskyed pa sa la gnas par gyur pa'o/ /theg pa rnam gnyis lta bu las khyad par du bstan pa'o/ /mdo las sngon gyi de bzhin gshegs pa des mthong zhes pa nas/ sangs rgyas kyis 'di mi shes pa'i bar du de dag gis ni sngon de bzhin gshegs pa'i bstan pa la zhugs shing thos pa'i rgyus 'di la 'jug nus par bstan pa dang /mdo 'di la dad cing 'jug pa ni des nga dang nga'i dge 'dun mthong zhes pa yang dkon mchog gsum tha mi dad pa'i mtshan nyid bstan pa'o/ /shes pa chung ba dang dge ba'i rtsa ba zhan pa rnams kyis 'jug par mi nus pa'i phyir byis pa myos gyur pa zhes gsungs so//theg pa rnam gnyis su rigs nges pa rnams kyis kyang 'jug pa'i phyir nyan thos dang rang sangs rgyas kyis ma yin zhes gsungs so/ /mdo las/ shA ri'i bu khyod dang 'brang na zhes pa nas/ 'di dag rang rig ye shes med/ /ces pa'i bar du ni rigs ma nges pa'i nyan thos rnams kyang nga'i gsung 'di thos nas gdod dad pa skye zhing rjes su 'brang bar 'gyur na gzhan lta ci smos zhes bstan pa'o//mdo las/ khyed kyi khengs pa dang ni nga rgyal can/ mi rigs zhugs pa dag la 'di ma bstan/ /zhes pa ni tshigs su bcad pa sum cu rtsa drug gis mi shes pa dad pa med pa sdig pa can bzhi dang /bdun dag la bstan du mi rung bar gsungs pa ste/ de la sdig pa can bzhi ni khengs pa/ nga rgyal can/ le lo can/ bdag tu lta ba'i mu stegs can rnams so/ /mdo las/ bus pa 'dod las rtag tu rab mos shing / chos bstan mi shes pas na spong bar byed/ / ces pa ni sdig can gsum la mi bshad pa ste/ shes pa chung ba log pa'i shes rab can dang / 'dod pa rnam lngas myos shing nyon mongs pa stug pa rnams dang / rigs med pa'i sems can thos kyang 'jug par mi nus pa rnams so/ /mdo las/ nga yi thar pa 'di ni spong ba ni/ /'jig rten rtag nas sangs rgyas tshul yang spang //zhes pa'i don te/ de yang ma dad pas sdig pa mi dge ba'i rgyu bskyed pa dang / sdug bsngal ba'i 'bras bu len pa'o/ /zag pa med pa'i rgyu spong ba ni sangs rgyas kyi rigs gcod pa'o/ /zag pa dang bcas pa'i rgyu spong ba ni 'jig rten gyi dge bas mtho ris spong ba ste/mdo sde 'di la ma dad pas de gnyis spangs zhes pa'i don to/ /mdo las/ khro gnyer byas shing theg pa spangs pa yi/ /zhes pa nas/ de dag rnam smin mi bzad nga la nyon/ /zhes pa'i bar du ni mdo sde 'di la ma dad pas sdig pa skye bar bstan pa ste/ khro gnyer byas zhes pa ni lus dang sems ma dad pa'i tshul ston pa'o//mdo sde 'di 'dra ba klog pa'i dge slong la ngan byas na zhes pa ni chos spyod pa rnam pa bcu'i bar chad byas pa'o/ /ngan byas pa ni brnyas pa smad pa phrag dog byas pa khon du gzung ba'o/ /mdo las/ mi las shi 'phos bstir med pa de yi/ /zhes pa nas/ bus pa shi shing 'phos nas der yang ltung //zhes pa'i bar du ni/ mdo sde 'di lam dad pa rnams sdug bsngal myong ba'i 'bras bu bstan pa ste/ tshig dang po nyi shu brgyad kyis ni ma dad pa rnams kyi 'bras bu bstan/ de'i 'og ma gnyis kyis ni bsdu ba bstan te/ 'di ni dang po'o/ /de la yang tshig nyi shu gnyis kyis ni ngan song rgyud gsum gcig nas gcig tu 'pho ba rnam par smin pa bstan/tshig drug gis ni 'gro ba bzhir rnam par smin pa bstan/ de la tshig dang po gcig gis ni sems can dmyal ba myong ba bstan/ tshig bcus ni byol song gi 'bras bu myong ba bstan/ de'i 'og ma tshig bcus ni mi'i nang na tha mar skye ba bstan/ 'dir yi dags ma smos pa ni yi dgas sred pa'i dbang gis skye ba'i phyir 'dir ma smos so//de dag kyang rnam pa drug gis dbye bar bya ste/ de'i ming dang / de'i lus dang / de bsdu ba dang / de'i gnas dang / de'i 'bras bu dang / de'i tshe'i tshad de/ grang ba brgyad dang tsha ba brgyad la sogs pa gzhan dag las 'byung ba bzhin shes par gyis shig /mdo las/ sems can dmyal las nam zhig 'phos na yang / /zhes pa nas/ 'di 'dra ba yi mdo sde 'dis spangs pa/ /zhes pa'i bar du ni byol song du gyur pa rnams kyi sdug bsngal sna tshogs myong bar bstan pa'o/ /khyir gyur pa ni rnam par smin pa bcu ste/ skam pa/ rid pa/ mdog nyams pa/rngos nyen pa/ gzhan gyis gtse ba/ shes pa med pa/ bkres pa/ skom pas nyen pa/ brdeg pa dang / gzhu ba'i gnas su gyur pa'o/ /rnga mo'i rnam par smin pa ni khur lci bas mnan pa/ zas kyis gdungs pa/ gzhu brdeg gi gnas su gyur pa/ shes pa'i blo med pa'o/ /war gyur ba'i rnam par smin pa ni rngos 'khongs pa mi gzhar ba/brdeg pa'i gnas su gyur pa'o/ /sbrul du gyur pa'i sdug bsngal ni lus ha cang che ba rna ba 'on pa/ shes pa med pa'o/ /mdo las/ nam zhig mi yi lus thob gyur kyang ni/ /zhes pa nas/ mgon med gyur cing 'jig rten dag na rgyu/ /zhes pa'i bar du ni mdo sde 'di spong ba'i rnam par smin pas mi zhig tu skyes na yang /ma rabs dbang po ma tshang ba skyon sna tshogs kyis mnar bar skye ste/ lus kyi skyon ni dbang po rtul ba/ ha cang thung ba/ mtshan du mi sdug pa/ zha bor gyur pa/ grum por gyur pa/ long ba 'on pa sgur por gyur pa/ tshig smras pa mis yid mi ches par gyur pa/ kha nas rul ba'i dri mnam pa 'dre gdon gyis gtse ba/ dbul ba/ dman pa/ gzhan gyis bkol ba/ nad mang ba/ reg par gyur pa ste/ lus dang / ngag dang / yid dang / gsum gyi sgo nas sdig pa byas pa'i rnam par smin pa yin par sbyar ro/ /mdo las/de na gang la de yis nyer bsnyen kyang / /zhes pa nas/ byin na yang ni myur du mi za ste/ /zhes pa'i bar du ni mdo sde 'di la ma dad pa'i phyir gzhan la brten kyang des skyabs mi byed ces pa'i don to/ /mdo las/ de dag 'di 'dra sdig gi 'bras bu ni/ /zhes pa nas/ nam yang de yi nad rnams mthar mi sos//zhes pa'i bar du ni mdo sde 'di la skur pa btab pas bsod nams chung bar bstan pa'o/ /mdo las/ gzhan gyi rkun po byas par gyur pa yang / /zhes pa nas/ sdig pa'i las can de la 'du shes 'bab/ /zhes pa'i bar du ni mdo sde 'di la skur pas nyes pa glo bur 'ong zhes pa'i don to//mdo las / des kyang 'jig rten mgon po yang mi mthong / /zhes pa nas/ /de dag sems mi dran zhing 'on par gyur/ /zhes pa'i bar du ni mdo sde 'di spangs pas nam du yang sangs rgyas mi mthong ba dang / chos mi thos pa dang / dbang po nyams par 'gyur ba la 'di ni dang po gnyis dang sbyar ro//mdo las/ byang chub 'di 'dra ba 'di spangs pas na/ /zhes pa nas/ blun zhing yan lag dag ni tshang mi 'gyur/ /zhes pa'i bar du 'dis ni dbang po nyams par bstan to/ /mdo las/ des ni mdo sde 'di spangs sdig gi 'bras/ / zhes pa nas/ de na de dag rtag tu de gnas 'gyur / /zhes pa'i bar du ni des ngan song bzhi myong bar bstan pa ste/ sems can dmyal ba dang / yi dags dang / byol song dang / mi ma rabs su 'gyur ba rim bzhin ci rigs par sbyar ro/ /mdo las/ de dag mi yi lus su gyur na yang / /zhes pa nas/de tshe de yi rgyan ni de dag ste/ /zhes pa'i bar du ni mi ma rabs su gyur pa rnam par smin pa bstan te/ rgyan ngan pas brgyan pa dang / rten ngan pa dang brten pa dang / mi mdzes par gyur pa dang / spyod pa ngan par gyur pa ste/ 'og nas 'byung ba dang sbyar ro/ /mdo las/ nad rnams de yi lus la bye ba khrag khrig rma//zhes pa nas/ de ni byol song skye gnas de rtag dga'/ /zhes pa'i bar du ni 'dis mi mdzes par gyur ba dang / spyod lam ngan par gyur pa bstan to/ /mdo las/ de ring gal te ngas deng shA ri'i bu/ /zhes pa nas/ 'di 'dra'i mdo sde ma bshad cig ces bsgo//zhes pa'i bar du ni mdo sde 'di la ma dad pa'i rnam par smin pa mdor bsdus te bshad pa'o/ /mdo las/ 'di ltar gang dag gsal zhing mang thos dang / /zhes pa nas/ de la khyod kyis don dam 'di der sgrogs/ /zhes pa'i bar du tshig bcu dgu po 'dis ni bshad par 'os pa rnams kyi mtshan nyid bstan te/sngon byang chub tu sems bskyed du zin gyis de bzhin gshegs pa'i rigs can bshad par 'os pa dang / byang chub tu sems kyang bskyed la pha rol tu phyin pa drug spyod spyod pa'i bag chags can 'og nas 'byung ba rnams la bshad par 'os pa ste/ de bzhin gshegs pa'i rigs kyi rtags yod pa ni dbang po rno ba/shes rab can legs nyes rtogs pa/ mi rmongs pa'i rang bzhin can mang du thos pa/ sems gsal zhing rtul phod pa/ dam pa'i chos 'di nyan par dga' zhing thos pa gzhan mi tshol ba ni de bzhin gshegs pa'i rigs su nges pa ste/ bshad par 'os pa'o//mdo las/ gang gis sangs rgyas bye ba mang po mthong / /zhes pa nas/ de la khyod kyis don dam 'di sgrogs shig /zhes pa'i bar du ni byang chub tu sems bskyed pa pha rol tu phyin pa drug gi bag chags can ni 'di dag ste 'di ni sangs rgyas mang po mthong zhing sbyin pa rgya chen po byas shing dge ba'i rtsa ba bskyed pa ste/sbyin pa'i bag chags can dang sbyar ro/ /mdo las/ gang rnams brtson 'grus gang ldan rtag byams sems/ /zhes pa nas/ de dag la ni mdo sde 'di mngon shod/ /ces pa'i bar du brtson 'grus dang bsam gtan du sbyar ro/ /mdo las/ phan tshun rtog cing rim gro bcas pa can//zhes pa nas/ de mdun mdo sde bzang po 'di smros shig /ces pa'i bar du ni shes rab dang tshul khrims kyi bag chags rim pa bzhin du sbyar ro/ /mdo las/ rtag tu khro ba med cing gang dran pa/ /zhes pa nas/ de yi mdun du mdo sde mchog 'di smros / / zhes pa'i bar du ni bzod pa'i bag chags dang sbyor ro/ /mdo las/ gang dag 'khor gyi dbus su chos ston cing / /zhes pa nas/ de la khyod kyis mdo sde 'dir bsgrogs/ /zhes pa'i bar du ni mdo sde 'di tshol ba dang rim gror byed pa rnam pa gnyis la gzhan gyi bstan pa thams cad spangs te/ theg pa chen po'i mdo sde 'ba' zhig tshol ba'i phyir tshol ba bstan to//mdo las/ ji ltar de bzhin gshegs pa'i gdung 'dzin pa/ /zhes pa nas/ de dag mdun du mdo sde mchog 'di smros/ /zhes pa'i bar du ni mdo sde 'di la rim gro bskyed pa dang / bshad par 'os pa rnams kyi mtshan nyid kyi bsdu ba bstan to// //'di man chad dad pa'i le'u bstan te/ gong du drang ba dang nges pa'i tshul rtogs par bya ba'i phyir dpes don mtshon pas dbang po rno ba 'phags pa shA ri'i bu lta bu dang / dbang bo bar ma 'phags pa bzhi po yang dpe de nyid kyis don go bar gyur pas zab mo nyid la mos pa skyes pa'i phyir dad pa'i le'u bstan to//'phags pa'i nyan thos pa rnams spyod yul dam pa'i mthar ma phyin par phyin pa tsam du sems shing theg pa chen po ba dang khyad par med pa tsam du bsnyems pa de'i don du sprang po dang 'dra bar bstan pa'i phyir 'di'i nang nas sprang po'i dpe bstan to/ /dad pa zhes pa ni chos ji bzhin par bzod pa sems rnam par dag pa'i mtshan nyid do//mdo las de nas tshe dang ldan pa rab 'byor zhes pa nas shin tu dga' bar gyur to zhes pa'i bar du ni 'phags pa de bzhin dga' bar gyur pa dang / 'phags pa de bzhin byas pa gzo bas drin bsab pa ste/de la dang pos dga' ba'i mtshan nyid bstan pa dang / gus pa'i mtshan nyid bstan pa ste 'di ni dang po'o/ /tshe dang ldan pa zhes pa ni 'jig rten pa lus ring du 'tsho ba'i tshe dang 'phags pa rnams ye shes kyi srog gis 'tsho ba'i tshe gnyi ga dang ldan pas tshe dang ldan pa zhes bya'o//'phags pa gzhan ni rus las btags pa dang / chung ngu las dga' ba ltas bzang po las btags pa ste/ ci rigs par sbyar ro/ /sngar dpe las don rtogs par gyur cing bla na med pa'i lung bstan pa thos pas shin tu dga' bar gyur pa'o/ /mdo las de'i tshe stan las langs te zhes pa nas bcom ldan 'das la 'di skad ces gsol to zhes pa'i bar du ni gus pa'i tshul bstan te/tshul de yang rnam pa dgur dbye'o/ /stan las langs pa ni theg pa rnam gnyis las 'phags shing sems chen po bskyed pa'i don to/ /gos tshags bcos zhes pa ni byang chub sems dpa'i sdom pas brgyan zhes pa'i don to//phrag pa gcig tu gzar zhes pa ni theg pa rnam gcig la zhugs shing bkra shis pa'i tshul ston pa'o/ /pus mo g.yas pa'i lha nga sa la btsugs zhes pa ni theg pa rnam gnyis 'dzin pa'i sems thul zhes pa'i don to/ /sems gcig tu byas pa ni theg pa chen po gcig po tshol gyi gzhan mi sems pa'i don to//thal mo sbyar zhes pa ni sems sangs rgyas la 'dud pa drang ba dang nges pa'i don bstan par mos pa'i don dang / lus dang ngag dang yid gsum dga' bar dmigs pa'i don to/ /mngon du lta zhing zhes pa ni/ lung dang gzhung gi tshul rtogs par 'dod ces pa'i don to//gsol to zhes pa ni dad pa'i mtshan nyid bstan to/ /mdo las bcom ldan 'das bdag cag rgas zhes pa nas brtson 'grus brtsams pa'i rdo mi thogs kyi zhes pa'i bar du ni/ 'phags pa bzhi pos slar gsol pa ste/ sngar ni tshig lhug pas gsol/de'i 'og tu ni tshigs su bcad pas gsol/ tshig lhug pa la yang rnam pa gsum ste/ chos las gleng ba dang / dpes gleng ba dang / gnyi ga bsdus te gleng ba'o/ /de yang sngon chos 'di thos pas ma sngangs te de mngon sum du chud pa'o/ /de yang sngar ni bsdus te bstan/ phyis ni rgyas par bstan to/ /gsol ba la yang dge 'dun gyi nang na gral mtho ba dang / na so rgan pa dang / byang chub thob bzhin pa tsam du sems pa dang / yang bla na med pa'i byang chub chen po tshol bar mi sems pa'o/ /mdo las nam bcom ldan 'das kyis chos ston cing zhes pa nas/ bdag cag gis mos pa ma bskyed do zhes pa'i bar du ni/sngar chos kyi don gleng / 'og tu ni dgongs pa'i don bstan te/ 'di ni dang po dang sbyar ro/ /'phags pa nyan thos pa rnams rang gi spyod pa bsgrub cing sngon bcom ldan 'das kyis shes rab kyi pha rol tu phyin pa bshad pa na stong pa nyid dang / mtshan ma med pa dang /smon pa med pa nyid la sems mi 'jog /theg pa chen po'i chos byang chub kyi chos rnams la mi sems so/ /sngon bcom ldan 'das kyis byang chub kyi phyogs kyi chos rnams ston pa'ang bdag cag lus dang yan lag bro 'tshal bar gyur zhes smras pa yin te/ stong pa ni bdag med pa'i spyod yul lo//mtshan ma med pa ni 'gog pa'i spyod yul lo/ /smon pa med pa ni mya ngan las 'das pa'i 'dus ma byas so/ /'dus byas kyi chos thams cad ni smon pa med pa ste/ zag pa dang bcas pa dang / zag pa med pa'i shes rab kyis bsdus pa'o/ /byang chub sems dpa'i chos zhes pa ni/byang chub kyi phyogs rnams kyi chos te/ dran pa nye bar gzhag pa bzhi dang / yang dag par spong ba bzhi dang / rdzu 'phrul gyi rkang pa bzhi dang / dbang po lnga dang / stobs lnga dang / byang chub kyi yan lag bdun dang / 'phags pa'i lam yan lag brgyad pa'o/ / byang chub sems dpa' ni rnam par rol pa yang rnam pa bcu ste/ lha'i sku tshe spang ba dang / gzhan du skye ba ston pa dang / mngon du btsas te dgyes rol pa dang / khab nas byung ba dang / dka' thub mdzad pa dang / byang chub kyi shing drung du gshegs pa dang / bdud 'dul ba dang / ting nge 'dzin gyi dga' ba la bzhugs shing /lha'i yang lhar grub pa ston pa dang / chos kyi 'khor lo bskor ba ston pa dang / mya ngan las 'das pa ston pa'o/ /sangs rgyas kyi zhing gi rgyan dag ces pa ni/ mdo las rgyu rnam pa brgyad de/ bla na med pa'i byang chub tu sems bskyed pas/ / yid gcig tu mos pa lhag pa'i spyod pa la mkhas pas bla na med par mos pa'i yid dang / pha rol tu phyin pa drug spyod pa'i sems dang ldan pa dag go/ /tshad med pa bzhi dang / bsdu ba rnam bzhi dang / thabs mkhas pas byang chub kyi phyogs rnams spyod pa thams cad bla na med par bsngo ba ni byang chub tu sems bskyed pa'o//mdo las de ci'i slad du zhe na/ bcom ldan 'das zhes pa nas mos pa'i sems gcig kyang bskyed par ma gyur te zhes pa'i bar du ni gtan tshigs smos pa ste/ lam mngon du gyur pas sdug bsngal mi skye ba dang / rgas pas spyod pa gzhan la 'jug mi nus zhes pa'i don to/ / mdo las bcom ldan 'das bdag cag gis bcom ldan 'das kyi drung nas zhes pa nas 'di lta bu'i rin po che 'di thob ste zhes pa'i bar du ni 'dir theg pa chen po'i don rtogs par bstan te/ lung bstan pa thos pa dang / chos bshad pa'i dga' bas ngoms pa dang / theg pa chen po'i chos rin po che thob pa'o//mdo las bcom ldan 'das 'di lta ste dper na mi la la zhig 'di ltar zhes pa ni tshig dang po des ni/ byang chub tu sems bskyed pa'i dper bstan pa las/ logs shig tu song zhes pa ni 'khor bar 'khor ba'i dpe bstan/ nar son te zhes pa ni/ phyis sangs rgyas su grub pa'i dpe bstan/ phas bu dran yang zhes pa ni theg pa chen po la 'jug tu mi btub pa'i dpe bstan/ phas rgyang nas mthong zhes pa ni theg pa gnyis kyi dpe bstan/ khyim bdag de la mdzod dang nor mang du yod ces pa ni theg pa chen po'i dpe bstan to / /de na gzhon zhes pa ni bla na med pa'i byang chub tu sems ma bskyed pa la bya'o/ / mdo las pha'i gnas nas logs shig tu mchis la zhes pa nas lo lnga bcur gnas te zhes pa'i bar du ni 'jig rten dang 'khor ba'i dpe ste/ mdo las dbang po rnon po byang chub tu sems bskyed pa ji ltar yun ring du 'khor bar 'khor yang ngan song du mi ltung ste/ phyis kyang byang chub kyi sems skye zhes pa'i don to/ / las kyi sgrib pas zin te yid gcig tu nges pas sangs rgyas mi tshol ba'i phyir pha las logs shig tu song zhes bya'o/ /yul phyogs gzhan zhes pa ni sangs rgyas kyi yul las gzhan du gyur pa rnams so/ /lo nyi shu dang sum cu zhes pa ni rgyud rnam lngar 'khor zhes pa'i don to/ /mdo las bcom ldan 'das de nas mi des chen po zhig tu lags la zhes pa nas/yul phyogs zhig tu phyin te zhes pa'i bar du ni sangs rgyas dang phrad pa'i dpe bstan te/ byang chub kyi sems ma stor ba'i phyir theg pa chen po thos shing sangs rgyas su grub pa zhes pa'i don to/ /de yang bu nar son te yul 'khor du phyin pa na /phas kyang snga nas btsal ba las phyir phrad ces par sbyar te/ 'di ni dang po'o/ /dang po la yang rnam pa drug tu dbye ste/ dbang po khad kyis smin pa ni nar son pa dang sbyar/ shes rab ma bsgoms pa ni dbul por gyur zhes pa dang sbyar te / 'khor bar 'khor ba ni phyogs dang phyogs mtshams su son pa dang sbyar/skye zhing sdug bsngal las 'byung bar rtsol ba ni 'tsho ba tshol ba dang sbyar/ shes rab rnam gsum gyi las spyod pa ni khad kyis khyim du nye ba dang sbyar ro/ /mdo las de'i pha de yang zhes pa nas 'tsho ba yang mang du gyur te zhes pa'i bar du ni 'di man chad rnam pa gsum du bsdus te/ sngon tshol tshol ba'i bu mkhar du slar phyin pa dang /nor dang 'tsho ba mang bar gyur pa dang / g.yog dang yul chen por gyur pa ste/ de la pha zhes pa ni sprul pa'i sku ste/ de bzhin gshegs pa ni sems can gyi don dang 'dren pa mdzad du zin gyis kyang / sems can so so'i las kyi dbang gis de bzhin gshegs pa la mi phyogs pa dang /nor sna tshogs mang zhes pa ni rin po che sna bdun te/ 'phags pa'i nor bdun dang sbyar/ mdzod dang bang ba ni 'dus ma byas kyi chos kyi mdzod dang ldan zhes pa'i don to / /nyon mongs pa rnams kyi dbang du gyur pa'i phyir bran dang 'dra'o/ /thabs mkhas bas spyod pa ni g.yog dang 'dra'o//smon lam dang stobs la sogs pa ni las byed pa'i mi dang sbyar ro/ /mngon par shes pa lnga ni glang po che dang rta dang sbyar/ theg pa rnam lnga ni shing rta dang sbyar/ spyod pa brgyad khri bzhi stong ni/ ba lang dang lug mang po dang ldan pa dang sbyar/ don dam pa dang kun rdzob kyi bstan pa ni kha 'du zhing 'phel ba dang sbyar ro//de bzhin gshegs pa'i bstan pa sgrogs pa ni 'tsho ba mang ba zhes sbyar ro/ /de nas bcom ldan 'das mi dbul po de zhes pa nas/ der phyin par gyur te zhes pa'i bar du ni/ theg pa rnam gsum gyi spyod pa ni grong dang grong khyer zhes pa'i don te/de la chos bshad pa dang / rdzu 'phrul bstan pa'i don ni ljongs dang rgyal po'i pho brang dang sbyar ro/ /ji ltar gnas thams cad du 'khyams kyang rgyal po'i pho brang du phyin pa bzhin bstan pa sna tshogs la zhugs kyang rigs ma 'gyur te/ de bzhin gshegs pa'i rigs kyi gnas su 'khor cing /yab sangs rgyas bcom ldan 'das dang phrad ces pa'i don to/ /mdo las de nas bcom ldan 'das mi dbul po'i pha de zhes pa nas gzhan su la yang mi smra bar/ 'di snyam du bdag ni zhes pa'i bar du ni theg pa chen po la phyogs su mi btub pa'i dpe ste/lo lnga bcu zhes pa ni rgyud rnam lngar 'khor ba'i don to/ /nang du gdud ba ma gtogs par gzhan su lam smra zhes pa ni theg pa chen po'i don 'di 'khor mang po'i nang du ma gsungs zhes pa'i don to/ /gdung ba zhes pa ni 'gro ba rnams theg pa gcig pu 'di'i snod du ma gyur pas gdung ba zhes sbyar ro//mdo las rgas shing 'khogs te 'dug na zhes pa nas 'di la spyod par gyur na ni bdag mya ngan med par sems na zhen pa'i bar du ni/ theg pa chen po la gnas par yun ring ba dang / spyod pa rdzogs pa'i phyir rgas 'khogs zhes pa'i don to/ /bsod nams dang ye shes kyi tshogs zad mi shes pa'i phyir nor zas dang bang mdzod mang zhes pa'i don to//byang chub sems dpa' rnams bzhugs kyang da rung nyan thos pa rnams kyis sangs rgyas kyi gdung 'tsho ba'i phyir bu med pa zhes pa'i don to/ /sangs rgyas nam zhig mya ngan las 'da' bar ston pa na/ theg pa chen po'i nor rdzas dbang po ma smin pa rnams la gtad du med pa'i phyir thugs rjes mya ngan du dgongs pa zhes sbyar ro//mdo las de nas bcom ldan 'das mi dbul po de zhes pa nas gang na bder mchis te zhes pa'i bar du ni 'di man chad bu des pha mthong ma thag tu skrag nas bros pa dang / pha'i sgo drung du phyin pa dang zhes pa la tshol zhing song song zhes pa ni 'byung ba'i don tshol ba'o//ched du btsal ba ma yin par gnas der son pa ni theg pa chen po'i rigs can du 'gyur bar smin pa'i dus la bya'o/ /pha'i gnas der phyin zhes bya ba ni lung dang rigs pa'i sgo nas spyod pa la zhugs zhes pa'i don to/ / gnas gang na bder phyin zhes pa ni theg pa chen po'i phyogs la bsnyen zhes pa'i don to/ /'gron bu dang gser dang / 'bru mdzod mang du yod ces pa ni theg pa chen po rin po che thams cad kyi 'byung gnas su gyur pa nyid la bya'o/ /mdo las de nas bcom ldan 'das mi dbul po de'i pha zhes pa nas/brgyan pa la mchi ste zhes pa'i bar du ni 'dis pha mthong ba bstan pa la yang pha bde bar 'dug pa dang 'khor mang pos bskor ba'o/ /mthong zhes pa ni rgyang ma nas mthong zhes pa'i don te / theg pa chen po'i spyod pa la da dung ring zhes pa'i don to/ /khri ni mi 'jigs pa bzhi'i khri dang / bsam gtan bzhi'i khri'o/ /rgyan sna tshogs kyis brgyan zhes pa ni gdug pa gsum dang bral ba'i rgyan gyis brgyan pa'o/ /lhag pa'i tshul khrims ni bram ze dang sbyar ro/ /lhag pa'i shes rab ni rgyal rigs dang sbyar ro/ /lhag pa'i bsam gtan ni rje'u rigs dang sbyar ro/ /mdo las 'gron bu bye ba brgya stong gis spyod pa bgyid de zhes pa nas longs spyod chen pos mchis pa zhes pa'i bar ni rgyan de la yang rnam pa gnyis te/dran pa nye bar gzhag pa rnams kyis lus brgyan pa dang / stobs dang mi 'jigs pa la sogs pas 'khor byas pa dang / nyon mongs pa thul ba nyid bran du byas pa dang /bsdu ba rnam bzhi'i sems rtag tu 'dzin pa rnga yab byas pa/ tshad med bzhi'i bla re byes pa/ rnam par dag pa'i yan lag bdun gyi me tog dang / de la sogs te spyod pa dam pa thams cad kyis brgyan pa'i gnas na 'dug ces pa'i don to/ /bu des pha mthong nas bros pa ni rdzogs longs spyod pa'i sku mthong zhes pa'i don to//mdo las bcom ldan 'das mi dbul po des zhes pa nas 'di snyam sems so zhes pa'i bar du mthong zhes pa ni mngon du rtogs pa ma yin te/ thos pa dang bsam pa'i sgo nas dpog pa'o/ /longs spyod che zhes pa ni stobs dang mi 'jigs pa la sogs pa'i mthu che bas longs pa'o//de 'dra ba'i longs spyod chen po bdag gis ma bsgrubs na mi 'thob pas skrag ces pa'i don to/ /mdo las rgyal po'i blon po 'di dang zhes pa nas phrad par 'gyur du mi 'ong ngam snyam zhes pa'i bar du/ rgyal po zhes pa ni chos kyi sku'o/ /blon po zhes pa ni rdzogs longs spyod pa'i sku'o//dbul po'i gnas su 'gro zhes pa ni theg pa rnam gnyis kyi spyod pa la 'jug pa'o/ /zas dang gos kyis nyon mi mongs zhes pa ni bsod nams dang ye shes kyi tshogs der yang bsgrags su yod ces pa'i don to/ /tshams zungs su zun par mi 'gyur ram zhes pa ni theg pa chen po'i spyod pa la dbang med par zhugs par mi 'gyur ram zhes pa'i don to//mdo las de nas bcom ldan 'das mi dbul po de zhes pa nas/ brgyal te sa la 'gyel nas myos par gyur la zhes pa'i bar du ni myur du bros zhes pa ni rang gi nyams las spyod pa chen po la 'jug par mi nus nas ldog ces pa'i don to//phas myur du 'dzin du bcug pa ni theg pa chen po la 'jug pa'i rgyu smin par gzigs nas dgyes pa skyes shing 'dzin du bcug pa'o/ /sred pas gdungs zhes pa ni thugs rje chen pos 'gro ba mang po la 'dren par dgongs pa ji ltar sred pas gdungs pa bzhin no/ /'di dag 'dzin du bcug ces pa ni tshig gi don mtshon pa bsnyems pa ma yin pa'i phyir mi dag 'dzin du bcug ces pa'i don to//spyod pa chen po la 'dzem pas 'jigs shing skrag pa dang / spyod pa de la yid kyis 'jug par mi 'dod pa ni dngangs pa'i sgra drag pos ku co 'don pa dang / theg pa chen po la dbang med par bcug pa ni mi rung bar byas par sems pa'o//rings par myur du zhes pa ni thugs rje'i sems gsol ba'o/ /gzud de zhes pa ni chung ngu las chen por bskyur ba'o/ /ma rung bar bya zhes pa yang byang chub kyi spyod pa dka' ba la btsud pa'o/ /brgyal te sa la 'gyel zhes pa ni 'khor ba la sbyor bar sems pa'o/ / mdo las de'i pha de yang nye ba zhig na mchis nas zhes pa nas gzhan mi 'chi ste zhes pa'i bar du ni 'di man chad theg pa rnam gnyis drang zhing gzud pa la dang por sems bskyed pa dang / mi dbul po dga' bar bya ba dang / rin po che blangs pa dang / dge ba'i rtsa ba la gzud pa dbul po'i ming btags pa dang /thabs bstan pa'o/ /ma gzud par zhes pa ni thabs kyis drang ba la gzud cing phyis chen po bstan pa'i don to/ /gdong du chus gtor zhes pa ni sgrib pa dang rmongs pa bsal ba'i don to/ /mdo las ci'i slad du zhe na zhes pa nas 'di bdag gi bu yin zhes su la yang mi smra ste zhes pa'i bar du ni nyan thos pa rnams theg pa chen po la dad pa skye ba'i skal ba chung ba la thabs mkhas pas khad kyis drangs nas de bzhin gshegs pa'i rigs su 'gyur bas de'i bu yin yang su la yang ma smra zhes pa'i don to//mdo las de nas bcom ldan 'das khyim bdag des zhes pa nas/gar dga' bar 'gro la rag go zhes bgyis pa nas/ 'tshal ma dang rang pa 'tshol ba'i slad du mchis te zhes pa'i bar du ni theg pa chung ngu de dag so so'i dbang po dang sbyar nas theg pa chen po la gzud pa'i dus la ma bab ste thabs kyis drang ba'i phyir slar btang zhes pa'o/ / ngo mtshar rmad du gyur zhes pa ni dang po sems bskyed nas theg pa rnam pa gnyis la zhugs pa'o/ /dbul po'i gnas su song zhes pa ni theg pa rnam gnyis kyi yon tan chung ngu la zhugs pa'o/ /zas tshol zhes pa ni zag pa med pa'i chos la zhugs pa'o/ /mdo las de nas khyim bdag des mi dbul po de dgug pa'i slad du zhes pa nas las byed du chug ces pa'i bar du ni dran pa nye bar gzhag pa la sogs pa bsgom du gzhug cing rnam par grol ba thob par bya ba'i phyir ro//mi gnyis zhes pa ni theg pa rnam gnyis kyi bstan pa la gzud pa'o/ /theg pa rnam gnyis kyi bstan pa rgya chung zhing nges pa'i don ma yin pas mdog mi sdug la mdangs ngan zhes sbyar ro//yang na bstan pa phyogs gcig pa'i mdog mi sdug pa dang / gzhung ma rdzogs pa'i phyir mdangs ngan zhes sbyar ro/ /mdo las de la gal te 'di skad du las ci bya zhes pa nas smos shig ces pa'i bar du phyag dar gyi phung po zhes pa ni nyon mongs pa'i tshogs so//mdo las de nas mi de gnyis kyis dbul po de btsal nas zhes pa nas mi dbul po de yang khyim bdag de la phar 'du shes zhes pa'i bar du ni mi de gnyis kyi bka' mnyan te zhes pa ni theg pa rnam gnyis pa nyon mongs pa spong ba la zhugs zhes pa'i don to//slar yang mi ngan pa'i las byed cing zhes pa ni theg pa rnam gnyis dang po byang chub tu sems bskyed pa rnams kyang thos pa dang / sems pa'i shes rab la 'jug pa'o/ /de nye bar bsnyen pa dang / thabs kyis drang ba'i phyir khyim bdag de bsnyen cing tshig spras pa'o//mdo las khyim bdag de skar khung gi gseb nas bu phyag dar byed pa mthong nas/ gos dang rgyan phud de bu'i gan du phyin zhes pa ni lus kyi tshul 'dra ba bstan pa yang dang po nas theg pa chen po la gzud pa'i dbang po dang mi ldan pas bags kyis thabs kyis drang ba dang /bsnyen zhes pa'i don te/ bsod nams dang ye shes ma rdzogs pa'i phyir rgyang ma nas mthong zhing rgyan med pa'o/ /zhing rnam par dag pa na bzhugs shing / rgyan thams cad kyis brgyan pa'i sku bstan na skrag cing nyer mi bzod pa'i phyir yul khams ngan pa dang / rgyan med pa'i lus kyis gdul bar 'os pa'i phyir gos dri ma can gyon cing la gan phyag dar gyi skon pa thogs pa bzhin drang ba'i don gyis nyon mongs pa sel ba'i phyir las kyis gzhan 'debs par ston cing /de dang smra bar byed pa ni/ thugs rje'i thabs kyis 'dren cing / rnam par dag pa'i phyogs la brtson par gzhan 'debs pa'o//gla gzhan pas skyed de sbyin no zhes pa ni sngar thos pa dang bsams pa'i shes rab las dge ba'i rtsa ba rnam pa bzhir spang ba/ gzhan du ma 'gro shig pa yang lta ba ngan pa gzhan las zlog pa'i don to/ /ci dang ci dgos pa thams cad sbyin no zhes pa ni rnam par grol ba'i mthu las byung ba tshad med pa bzhi la sogs pa'i rgyus bskyed pa 'phags pa'i yon tan thams cad do//bum pa dang / phru ba dang / shing dang / lan tsha zhes pa ni zag pa dang bcas pa'i ye shes rnam gnyis kyis zin pa 'phags pa nyan thos rnams kyi rdzu 'phrul dang / stobs dang mngon par zhes pa dag go/ khyod kyi pha ji lta ba bzhin zhes pa ni 'phags pa nyan thos rnams nyon mongs pa spangs shing 'phags pa'i gnas su son pa'i phyir bu zhes bka' stsol/ yang dag pa'i bden pa nyid mi mthong ba'i phyir ni bu dang 'dra ba zhes smos so/ /sgyu'am gya gyu'am/ g.yo zhes pa ni lus dang ngag dang yid gsum gyi dri ma spong zhes pa'i don to//mi dbul po de bu zhes ming du btags pa zhes pa ni 'phags par gyur zhes pa'i don to/ /'bras bu dang po la gnas pa'o/ /mdo las lo nyi shu 'das pa dang zhes pa nas spyil po de nyid na gnas shing mchis pa la zhes pa'i bar du ni/ bsgom pa'i lam la gnas pa'o//nyi shu zhes pa ni zag pa med pa'i chos bcu spyod pas khams gnyis kyi nyon mongs pa spong ba'o/ /spyil po de nyid na gnas pa ni rdo rje lta bu'i ting nge 'dzin la gnas pas ting nge 'dzin nas mi slob pa'i lam la gnas pa gang zag la bdag med par rtogs pa'i rnam par grol ba thob pa ste/sems can sgrol ba la 'jigs pa dang / thogs pa med par gnas pa/ 'bras bu chen po sgrub pa la mi 'jigs pa'i phyir/ spyil po de nyid na gnas zhes pa'o/ /mdo las de nas bcom ldan 'das khyim bdag de bro 'tshal bar gyur te zhes pa nas de thams cad khyod kyis shes par 'dod do zhes pa'i bar du ni don chen po la dga' ba'i don bstan te/khyim bdag de na bar gyur zhes pa ni/ bcom ldan 'das mngon par rdzogs par sangs rgyas nas/ lo bcu gnyis lon pa dang sems can rnams nyon mongs pa phyir zhing 'phel bar gyur pas sems can nyon mongs pa'i nad kyis btab pa na/bcom ldan 'das kyang bsnyung ba zhes pa'i don to/ /dam pa'i chos 'di bshad pa'i dus ni bcom ldan 'das mya ngan las 'da' ba'i dus dang nye bas sems can ma bsgral ba rnams bsgral zin pa'i phyir khyim bdag gum pa'i dus la bab par mthong zhes bya'o/ /sangs rgyas byang chub sems dpa' rnams 'dus byas dang 'dus ma byas kyi yon tan thams cad ni bang mdzod mang po'i nor zhes bya'o//de la yang theg pa chen po ni shas che theg pa chung ngu ni shas chung zhes so/ /sbyin pa dang sba bar bya zhes pa ni blang ba ni bdag gi don to/ /sbyin pa ni gzhan gyi don zhes pa'o//shes par byos shig ces bya ba ni theg pa chen po'i gzhung mi shes pa shes par bya ba dang / sems ma bskyed pa skyed cig par bstan pa'o/ /mdo las de ci'i phyir zhen zhes pa nas chud ma gzan zhes pa'i bar du ni 'dis theg pa chen po la mos pa bstan pa ste / ji ltar 'jig rten na pha dang bu spyod pa mthun pa ltar/de bzhin gshegs pa dang / theg pa rnam gnyis kyang rnam par grol ba dang / de bzhin nyid mthun par bstan pas chos chen po la gzhug cing / don mnyam par gyis shig par bstan pa'o/ /mdo las de nas bcom ldan 'das mi dbul po de zhes pa nas chung zad kyang re ba med do zhes pa'i bar du ni re ba med par bstan te/theg pa rnam gnyis kyi de ltar theg pa chen po'i chos thos su zin kyang da cung sems zhan pa sngon gyis 'dzin cing / spobs pa mi che ba'i dpe'o/ /mdo las spyil po der gnas shing zhes pa nas de nyid kyi rjes su sems so zhes pa'i bar du ni sems zhan pa da dung ma spangs zhes bsdus pa'o//mdo las de nas bcom ldan 'das zhes pa nas/ gnyen bshes mang po dang phrad de zhes pa'i bar du ni des thob pa'i dpe bstan te/ de yang dus la bab pa dang / mang po bsdus te gtod pa'o/ /shes rab kyi pha rol tu phyin pa nas dam pa'i chos 'di bstan pa'i bar du ni khad kyis dbang po 'bogs pa'i phyir yongs su smin par shes pa'o//shes pa ni stong pa rnam gnyis kyi don shes pa'o/ /nyam nga zhing ngo tsha ba ni sngon gyi spyod pa zhan pa theg pa chung ngu la zhugs pa'i sems so/ /'chi ba'i dus la bab pa zhes pa ni yongs la gtad pa ste/dam pa'i chos 'di bshad pa nas bcom ldan 'das mya ngan las 'das pa'i bar du lo lnga zhig lus pa'i phyir 'chi ba'i dus la bab pa'o/ /gnyen bshes mang po zhes pa ni 'phags pa nyan thos chen po dag go/ /rgyal po dang blon po zhes pa ni byang chub sems dpa'i rigs rnams so//mdo las khyod nyon cig 'di ni kho bo'i snying gi bu kho bos bskyed pa ste zhes pa ni sngon gyi rgyal bu bcu drug gi tshe na nga'i bstan pa 'di la sems bskyed de dge ba'i rtsa ba btsugs pas nga'i gsung las skyes pa nga'i chos kyis bskyed pa yin pas yang dag pa'i sras zhes bya'o//mdo las grong khyer gyi ming 'di 'khyams nas lo lnga bcu lon te zhes pa ni 'khor bar 'khor ba bstan te/ grong khyer zhes pa ni theg pa chen po'o/ /theg pa chen por rigs nges pa dang / dbang po rnon po rnams ni lan cig sems bskyed pas phyir ldog par yang mi 'gyur na/ dbang po zhan pa dang / rigs ma nges pa rnams ldog cing ltung bar 'gyur ba yod do bar bstan to/ /mdo las 'di'i ming ni 'di zhes bya zhes pa nas de kun kyang 'di nyid shes so zhes pa'i bar du ni sngon yang de bzhin gshegs pa nga'i bstan pa la zhugs pa las rab tu 'khyams pa dang / de yang theg pa chen po la zhugs zhes pa'i don te /ji ltar 'phags pa shA ri'i bu bskal pa drug cu'i bar du theg pa chung ngu spyod spyod pa las da theg pa chen po la zhugs pa nyid grong khyer de na gnas pa zhes bya'o/ /tshol zhes pa ni thugs rjes dgongs pa'i don to/ /byang chub dang mya ngan las 'das pa'i nor thams cad ni 'di la gtad pa dang /bdag gi don du 'gyur ba dang / gzhan la phan 'dogs pa'i yon tan thams cad 'di la gtad do zhes pa'o/ /mdo las de nas bcom ldan 'das zhes pa nas mang po rnyed snyam sems so zhes pa'i bar du ni bus thob pa rnams bstan te/ sangs rgyas kyi yon tan phun sum tshogs par re ba med pa las rnyed ces pa'i don to//mdo las de bzhin du bcom ldan 'das bdag cag ni zhes pa nas ji lta ba bzhin no zhes pa'i bar du ni ma rabs kyis nas sems bskyed pa tsam la gnas pa'i phyir sras dang 'dra zhes smras so/ /dam pa'i chos 'di thos shing dbang po smin par gyur pas/sras yang dag ces pa'i don to/ /mdo las bcom ldan 'das bdag ni sdug bsngal gsum gyis gzir to zhes pa nas sdug bsngal lo zhes pa'i bar du ni theg pa chen po las ldog pas 'khor ba'i rgyu bstan pa'o/ /sdug bsngal ba'i yang sdug bsngal ni gnas dang / mtshan nyid dang /spyod yul dang / dbang po dang ldan pa'i chos thams cad sdug bsngal te/ phung po lnga'i phyogs gcig ni sdug bsngal ba'i yang sdug bsngal ba ste/ yid dang 'gal ba mi mthun pa myong ba ni sdug bsngal ba'o/ /sdug bsngal brgyad la lnga ni sdug bsngal ba'o/ /bde bar 'tsho ba'i bdag nyid bde bar 'tsho ba'i rjes su 'brang ba yul lam dbang po'am ldan pa'i chos rnams 'gyur bas sdug bsngal bskyed pa ste//phung po lnga'i cha gcig ni 'gyur ba'i sdug bsngal te/ sdug bsngal brgyad las mdza' ba dang bral ba dang / 'dod pa mi rnyed pa'i sdug bsngal ni 'gyur ba'i sdug bsngal lo//btang snyoms kyi tshor ba'i rang bzhin dang / de'i rjes su 'jug pa yul dang dbang po dang ldan pa'i chos rnams mi rtag par gnas pa'i 'du byed kyi sdug bsngal te/ zag pa dang bcas pa'i phung po la thams cad ni 'du byed kyi sdug bsngal bas nye bar len pa'i phung po lnga rnams kyang 'du byed kyi sdug bsngal lo zhes gsungs so//mdo las 'khor ba na chung ngu la dad pas bdag cag bcom ldan 'das kyis chos ngan pa mang po phyag dar gyi phung po dang 'dra ba'i sems su bcug ste zhes pa ni chung ngu la phyogs shing chen po bsgrub par mi nus pa'o/ /mdo las de rnams la zhes pa nas 'tsho zhing gsol te zhes pa'i bar du sems su bcug ces pa ni bsgom pa la sems pa'o//phyag dar gyi phung po zhes pa ni nyon mongs pa'i sgrib pa'o/ /rtsol ba ni brtson 'grus kyi sems kyis gcig tu 'bad pas gzod mya ngan las 'das pa thob ces pa'i don to/ /nyin gcig gis sla zhes pa ni mya ngan las 'das pa chen po ni bskal pa grangs med pa gsum gyis thob pa yin na/bskal pa drug cus bsgrubs pa'i rnam par grol ba ni nyi ma gcig gis sla tsam mo yang yang mya ngan las 'das pa las nyon mongs pa'i sgrib pa spangs shing ye shes chen po thob pa ma yin zhes pa'i don to/ /mdo las bcom ldan 'das bdag cag mya ngan las 'das pa de snyed ces pa 'dis ma bstan te zhes pa'i bar du ni 'di man chad theg pa chen po re ba'i sems med pa rnam gsum ste/sngar nyan thos pa chos chung ngu la dga' ba'i phyir bcom ldan 'das kyis ma bshad pas re ba med pa dang / nyan thos pa'i mya ngan las 'da' ba thob pa nyid kyis chog par sems pa'i phyir re ba med pa dang /theg pa chen po byang chub sems dpa'i ched du bshad kyi nyan thos pa bdag cag gi ched du ma bshad do zhes re ba med pa dang gsum las 'di ni dang po'o/ /bags kyis bzhag ste zhes pa ni chung ngu la mos pa'i sems ma spangs shing dbang po ma smin pa'i phyir re zhig bzhag ces pa'i don to//mdo las bcom ldan 'das thabs mkhas pa zhes pa nas bdag cag gis mang du byas par shes so zhes pa'i bar du ni nyan thos kyi mya ngan las 'da' ba thob par re ba med pa bstan te thabs mkhas pas ye shes kyi mdzod kyi nye mtshams su bkod pa ni dang po drang ba'i don gyis bstan nas yang dag pa'i ye shes mthong ba dang nye bar bzhag ces pa'i don to//mdo las bcom ldan 'das de bdag cag gis zhes pa nas/ de mi 'dod do zhes pa'i bar du ni theg pa chen po byang chub sems dpa'i ched du bstan gyi nyan thos kyi ched du ma bshad pas re ba med pa bstan te/byang chub sems dpa'i ched du bcom ldan 'das kyi byin gyi rlabs kyis shes rab kyi pha rol tu phyin pa bshad pa yang nyan thos pa'i ched du ma yin pas mi 'dod do zhes pa'i don to/ /mdo las de ci'i phyir zhe na zhes pa nas sras yang dag pa zhes gsungs pa'i bar du ni sngon nyan thos pa'i rnams la shes rab kyi pha rol tu phyin pa gsal ba nyid du ma bstan mod kyi de bzhin gshegs pa'i rang bzhin dang rigs yod pas sngon yang thabs kyis bstan to zhes pa'o//mdo las bcom ldan 'das kyi zhes pa nas de bzhin gshegs pa'i sras 'di dag bzhin no zhes pa'i bar du ni de bzhin gshegs pa'i sras su gyur te/de bzhin gshegs pa'i sras nyid thob ces pa bstan to/ /de yang bcom ldan 'das chos 'chad pa mi mdzad pa dang / mya ngan las 'das pa nyid theg pa chen pos thob par bstan pa yang de dag gi don bsdu ba'o//de la 'di ni dang po dang sbyar ro/ /rgya chen pos byang chub 'dzud pa ni gnyis pa dang sbyar ro/ /thams cad mkhyen pa'i rin po che thob ste/ de bzhin gshegs pa'i sras 'di dag bzhin no zhes pa ni gsum pa dang sbyar ro/ /de bzhin gshegs pa'i sras 'di dag bzhin no zhes pa yang ji ltar byang chub sems dpa' theg pa gcig gi rgyus 'bras bu chen po thob pa bzhin 'phags pa nyan thos pa rnams kyang de bzhin du 'gyur zhes pa'i don to// //dam pa'i chos puN+Da rI ka'i 'grel pa/ bam po bdun pa/ mdo las de nas tshe dang ldan pa 'od srungs chen pos de'i tshe tshigs su bcad pa 'di dag gsol to zhes 'phags pa nyan thos chen po bzhis don 'di chud pa dang /dris par 'dra na 'dir 'od srungs gcig pu smos pa de ci'i phyir zhe na/ 'od srungs sku bgres pa'i phyir gtsor smos pas so/ /'di man chad tshigs bcad brgyad cu rtsa drug cig yod pa la/bdun cu rtsa gsum gyis ni bcom ldan 'das kyi bka' drin chen po la sogs pa bstan/ tshigs bcad bcu gsum gyis ni bcom ldan 'das kyi bka' drin zab pa bstan to/ /dum bu dang po la yang gsum du dbye ste/ dang po tshigs bcad gnyis kyis ni don bstan/de'i 'og gi tshigs bcad bzhi bcu rtsa gcig gis ni dpe bstan/ de'i 'og ma tshigs bcad sum cu rtsa gcig gis ni dpe dang don du sbyor ba bstan to / /de yang thos pa nyi tshe smos kyi tshig gzhan ma smos so/ /de la yang tshig phyed dang gnyis kyis ni don rnam pa gnyis bstan/ tshigs bcad phyed kyis ni dpe bstan/mdo las ji ltar skyes bu bus par gyur pa zhig /'gro ba'i byis pa rnams kyis bslus pa ste zhes pa ni 'di man chad tshigs bcad bzhi bcu rtsa gcig gis dpe 'chad de / de la yang gnyis su dbye'o/ /tshigs bcad sum cu rtsa bzhis ni sngar re ba med pa bstan/ tshigs bcad bdun gyis ni 'di thob pa bstan to//de la yang dang po'i tshigs bcad phyed kyis ni sems bskyed pa'i dpe bstan/ de'i 'og ma gcig gis ni 'khor bar ldog pa'i dpe bstan/ de'i 'og ma bdun gyis ni sangs rgyas mthong ba'i dpe bstan/ de'i 'og ma bcu bzhis ni chen po sgrub tu mi btub pa'i dpe bstan/ de'i 'og ma phyed dang bcus ni theg pa rnam gnyis drang ba'i dpe bstan/ de'i 'og ma gnyis kyis ni chen po la re ba med pa'i dpe bstan te 'di ni dang po'o/ /mdo las/ pha yi gnas nas gal te song ba ni/ /zhes pa nas/ lo ni lnga bcu las kyang mi nyung bar zhes pa'i bar du ni 'khor bar log pa'i dpe bstan/ lnga bcu ni 'gro ba rnam lnga'i dpe ste/ gzhan du 'khyams zhes pa'i don to/ /mdo las/ des ni de lta bu de tshol ba na/ /zhes pa nas/ de bzhin phyugs dang ba lang lug rnams te/ /zhes pa'i bar du 'dis ni sangs rgyas mthong ba dang / de bzhin gshegs pa'i thugs rje skye ba'i dpe bstan te/ phyogs dang phyogs mtshams su phyin zhes pa ni 'khor bar 'khyams zhes pa'i don te/ grong khyer chen por phrad ces pa ni theg pa chen po'i gnas su son pa'i don/ khyim brtsigs zhes pa ni thugs rje chen pos bskyab zhes pa'i don/ 'dod pa rnam lnga la sogs pa longs spyod pa ni chos rnam par dag pa'i dbyings la longs spyod pa shing rta dang bzhon pa rnams ni theg pa'i don to//mdo las/ 'phel zhing 'du ba dang ni de bzhin zhing / /zhes pa nas/ 'di ltar bdag la mdzod ni mang du yod/ /ces pa'i bar du ni 'jig rten gyi khams thams cad du dge ba sna tshogs kyis sems can sdud pa ste/bsdu ba dang 'phel ba'i khe 'tshol ba'o/ /kun gyis gus par bya zhing bkur bas sems can don byed pa bstan pa'o/ /rgas la zhom zhing zhes pa ni theg pa chen po'i chos la gnas shing zhes pa'i rgyas rgan pa thugs rje chen pos nyin mtshan gcig la lan drug drug sems can gyi khams su gzigs pas gdung bar gyur pa'o//mdo las/ bdag ni 'chi ba'i dus la nye bar gyur/ /zhes pa nas/ la la skyed dang sbogs kyang rab tu gtong / /zhes pa'i bar du ni chos kyi zas kyis rab tu phongs pa'i phyir bkres pa'o/ /spyod pa dam pa ma rdzogs pa'i phyir rid pa'o/ /lta ba ngan pas bsgribs pa'i phyir g.yan pa byung ba lta bu'o//lhag pa'i sdom pas ma bsdams pa'i phyir skam pos g.yogs pa lta bu'o / /mthar gyis rgyu zhes pa ni yang dag pa'i don tshol ba'o/ /pha'i khyim du phyin zhes pa ni theg pa chen po dbu ma'i lam du zhugs pa zhes pa'i don to/ /sgo na 'dug ces pa ni 'bras bu'i sgo ni rgyu yin/don dang bstan pa ni phugs dang sgo lta bur blta'o/ /bgrang ba ni 'phags pa'i nor rnams sems pa'o/ /skyed dang spogs gtong zhes pa ni phyi nang gi spyod pas phan 'dogs pa'o/ /mdo las/ de nas dbul po des ni de mthong ba/ /zhes pa nas/ khyod ni gla yang nyis 'gyur sbyin par byas//zhes pa/ 'dir ni nyes par gyur na mi rung ste/ /zhes pa yang sngon gyi spyod pa dang bral te chen po spyod du ma bcug gam zhes dogs pa skye'o / /zhar ba 'theng grum can zhes pa ni theg pa rnam gnyis kyi bden pa ston pa gzhung ma rdzogs pa'i dpe'o/ /mdo las/ mi des 'di lta bu yi sgra thos nas//zhes pa nas/ nga yi bu yin yang dag gdon mi za/ /zhes pa'i bar du ni nyon mongs pa'i phyag dar byas shing phung po lnga'i khang pa gtsang mar byas pa dang / rkang pa bsku zhes pa/ rkang pa ni rdzu 'phrul gyi rkang pa bzhi'o/ /bsku ba ni sdom pa 'dzin pa'i spyod lam mo/ / mdo las/ de ni khad kyis bags kyis khyim du bcug /zhes pa nas/ bags kyis mi de des yid rnam par phab/ /ces pa'i bar du ni 'dis 'phags pa'i gnas su son pa bstan te/ lo nyi shu zhes pa ni tshig lhug pa'i nang nas bstan zin to/ /mdo las/ de ni shel lam 'gron bu mu tig kyang //zhes pa nas chung ngu la dad pa'i yon tan te/ bkol ba de snyed de ring shin tu bde/ /zhes pa'i bar du ni rin po che sna tshogs bstan pa yang chen po bstan kyang re ba med pa'i phyir ro/ /dbul po'i bsam pa rjes su shes pa la sogs pa ni rnyed pa chen po rnyed pa'i dpe'o/ /'og nas lo nyi shu zhes pa ni slob pa dang mi slob pa'i 'bras bu thob pa zhes kyang sbyar ro//shin tu bde zhes pa ni 'bras bu chen po thob pa'i phyir yon tan phun sum tshogs pa kun dang ldan pa'o/ /mdo las/ de bzhin rnam par 'dren pas bdag cag rnams/ /zhes pa nas/ khyed kyi nyan thos nga yi bu yin na//zhes pa'i bar du 'di ni dpe dang don du sbyar te bstan pa'o/ /chung ngu la dad pas re ba med pa bstan pa yang de bzhin gshegs pas ye shes pa'i bskal pa bstan pa ste/ zag pa med pa'i gnas nyid kyis chog par sems pas re ba med pa'o/ /mdo las/ bdag la 'jig rten mgon gyis bka' stsal pa//zhes pa nas/ gang gis lam goms sangs rgyas 'gyur ba'o/ /zhes pa'i bar du ni byang chub sems dpa' phyed du bstan gyi nyan thos pa'i don du ma bstan pas re ba med pa bstan te/ gang shes rab kyi pha rol tu phyin pa la zhugs pa rnams la shod cig par sbyar ro/ /mdo las/ de phyir bde bar gshegs pas bka' stsal nas/ /zhes pa nas/ bdag gis bla na med pa'i lam bstan nas/ /zhes pa'i bar du ni theg pa rnam gnyis kyang de bzhin gshegs pa'i gsung la brten zhes pa'o/ /mdo las/ de phyir bde bar gshegs pas bka' stsal nas/ /zhes pa nas/ / lung ni mya ngan 'da' ba mthar thug pa/ /zhes pa'i bar du ni de bzhin gshegs pa rnams kyis lung bstan pa ste/ ji ltar gcig gis lung ston pa bzhin gzhan dag kyang de bzhin du gsungs zhes pa'o/ /chos kyi mdzod rnams yang dag gsungs pa ni rgyal ba'i sras te/ byang chub sems dpa' rnams bstan pa'o//rgyal ba'i ye shes rab tu bshad med kyi/ /zhes pa ni dpe dang don du sbyar ba'o/ /'gog pa dang skye ba rnam par spangs na theg pa chen po la dad par ma gyur pa ni nyan thos kyi zhi ba mya ngan las 'das pas chog par sems pa'o/ /bdag cag nam yang 'di la mi smon pa/ /zhes pa ni stong pa nyid dang mtshan ma med pa dang smon pa med par rim pa bzhin du ston te/theg pa chen po'i ye shes la mi re zhes pa'i don to/ /mdo las/ yun ring stong pa nyid la yongs su bsgoms/ /zhes pa nas / de la nam yang bdag cag 'dod pa med/ /ces pa'i bar du ni nyan thos kyi mya ngan las 'da' ba rnyed pas de bzhin gshegs pa'i drin bsab pa'i phyir gzhan gyi chos bshad pa thos kyang re ba med pa ni lhag ma dang bcas pa'i mya ngan las 'das pa la gnas pa'i phyir ro//mdo las/ bdag cag 'jig rten slob dpon rang byung gi /zhes pa nas/ /brtul nas ye shes 'di dag rab tu byin //zhes pa'i bar du ni bcom ldan 'das kyis nyan thos pa'i ched du 'di ma bstan to zhes tshig brtul ba ste/ dbang po ma smin pa'i phyir ro/ /ji ltar nor mang du bdog pa'i skyes bu chung ngu la dad pa rnams thabs mkhas pas bags kyis brtul zhing sbyin pa ni dpe dang don gnyi ga sbyar te phyis thob par 'gyur ba bstan pa'o//mdo las/ de ring bdag cag 'phral la ngo mtshar gyur/ /zhes pa nas/ tshangs par spyod pa mchog rab rnam dag gang / /zhes pa'i bar du ni/ re ba med pa las 'bras bu chen po thob par bstan pa dang / de yang lam bsgoms pa dang tshul khrims rnam par dag pa'i rgyu las 'bras bu de thob ces pa'o//mdo las/ 'dren pa'i bstan pa rnams la shin tu bsnyen/ /zhes pa nas/ 'di 'dra ba yi dka' ba gang mdzad pa/ /zhes pa'i bar du ni 'bras bu chen po mngon du thob ste/ 'phags pa nyan thos su nges pa gzhan la phan 'dogs par 'os pa mchod pa'i gnas su gyur pa bstan pa'o//de bzhin gshegs pa'i drin gyi lan ldon pa ni gzhan gyis ma yin gyi 'di 'dra ba thob pa zhes so/ /mdo las/ mgo dang lag pa dang ni rkang pas kyang / /zhes pa nas/ de la nams kyang lan ldon ma gyur to/ /zhes pa'i bar du ni/ nang gi rdzas drug dang / phyi'i spyod pa rnam pa bzhi 'di dag gang byas kyang lan mi lon zhes pa'o/ /mdo las/ nyid kyi che chos mtshungs pa med pa'i mthu/ /zhes pa nas/ mchan ma spyod pa rnams la chos bshad de/ /zhes pa'i bar du ni 'di man chad ci phyir lan dka' ba'i gtan tshigs rnam pa gsum zhig 'chad pa las sangs rgyas bcom ldan 'das spyod pa zhan pa mtshan mar 'dzin pa rnams la yid dang mthun par chos ston pa dang /so so'i mos pa dang / dad par mthun par chos ston pas dka' ba mdzad pa dang / dbang po smin pa dang / ma smin pa rnams la chos ston pa ste/ rnam pa gsum gyi phyir lan glan dka' ba'o//'di ni dang po dang sbyar te sku dag pa rdzogs longs spyod pa'i yon tan spangs shing sprul pa'i sku 'jig rten rnyog pa can du gshegs pa dang yang dag pa'i gzhung dam pa bsri ste tshig mang po'i sgo nas don ston pa dang / zhing rnam par dag pa spangs te/ phyogs ma dag par gshegs shing ma rabs kyi yid dang mthun par chos ston cing 'dren pa de lan glan dka' ba ma yin nam/mdo las/ chos kyi dbang bo 'jig rten kun la mnga'/ /zhes pa nas/ brgya phrag stong gi bar du chos bshad do/ /zhes pa'i bar du ni/ so so'i mos pa dang dad pa bzhin du chos ston pa dang sbyar ro/ /mdo las/de bzhin gshegs pas spyod pa rab mkhyen nas/ /zhes pa nas/ byang chub mchog rab 'di ni shin tu bstan/ /zhes pa'i bar du ni dbang po smin pa dang / ma smin pa dang dbang po dul ba dang / ma dul ba dang / bkri ba dang / nges pa'i don gang gis gdul bar 'os pa rnams la mthun mthun du chos ston pa'o// // 'di man chad sman gyi rtsi shing las dpe bstan pa'i le'u ste/ de la yang ci'i phyir btags pa dang / ci las btags pa rnam pa gnyis so/ /gong du dbang po rtul po'i ched du dpe dang don du sbyar te bstan pas 'phags pa shA ri'i bu la sogs pa chos rtogs shing lung bstan pa dang yang 'dir dbang po bar ma'i ched du dpes chos ston cing /lung bstan par bzhed pa'i phyir dpe 'di gsungs pa las bshad pa dang 'grel pa las kyang / le'u 'di ni theg pa chen po la nga rgyal du 'dzin pa dgongs pa'i phyir theg pa gcig las logs shig na gnyis dang gsum med do bar bstan pa'i phyir te/dang por khang khyim tshig pa'i dpes sems can ma rabs rnams thabs kyis drangs te lha dang mi'i bde ba la dgod pa dang / dad pa'i le'u bstan pa'i nang du theg pa rnam gnyis de bzhin gshegs pa'i theg pa dang mnyam par sems shing theg pa chen po sgrub tu mi btub pa theg pa chen po bsgrub tu gzhug pa dang /le'u 'di'i nang nas ni theg pa chen po pa gcig tu nga rgyal gyi theg pa gsum spong gis so so na yod pa'i sems pa'i nga rgyal gzhom par theg pa gcig po bstan pa'i phyir char pa gcig bab pa'i rlan gyis shing rtsi mi mthun par skye ba bzhin du de bzhin gshegs pa'i gsung gcig gis dge ba'i rtsa ba so sor smin pa bzhin te/'phags pa mya ngan las 'das pa chen po'i mdo las kyang / de bzhin gshegs pa chos ston pa na theg pa gcig pa lam gcig pos ston te zhes 'byung ste/ bstan pa gcig las dbang po so sor dbye bar bstan pa'o/ /thabs mkhas pa'i le'u las ye shes dang sgo bstan pa gnyi ga yang shin tu zab pa theg pa gcig tu sbyar ba'o//bden pa bzhi la dbang po mi mthun pas so sor go ba bzhin no/ /ming ni sman gyis nad 'tsho bar byed pa bzhin bla na med pa'i sman dam pa 'dis kyang nyon mongs pa'i nad thams cad 'tsho bar byed pa'i phyir lung dang /gzhung dang spyod pa dang / 'bras bu ni sman dam pa zhes bya'o/ /sman nad che chung so sor phan pa bzhin bla na med pa'i theg pa 'di yang theg pa rnam gsum gcig tu smin pa'i phyir ro/ /mdo las de nas bcom ldan 'das kyis tshe dang ldan pa zhes pa nas de dag gi mtha' bde bar mi rtogs so zhes pa'i bar du ni le'u 'di la dang por bstod pa dang /'od srungs kyis shes par byos shig pa dang / don gyi mdo bsdus te lung bstan pa la 'di ni dang po'o/ /de bzhin gshegs pa'i yon tan brjod par dka' bas mtha' med ces par bsdus pa'o/ /mdo las/ 'od srungs de bzhin gshegs pa ni/ /zhes pa nas/ /de dag de bzhin du 'gyur ro/ /zhes pa'i bar du ni de bzhin gshegs pa 'jig rten du 'byung ba dang / 'gro ba mang po la phan pa mdzad pa dang / chos kyi don rtogs pa ni mi mthun pa dang / bdag nyid kyis rig par dka' ba ston pa la 'di ni dang po ste//de bzhin gshegs pa'i bka' phun sum tshogs pa mi brdzun par bstan pa'o/ /mdo las 'od srungs de bzhin gshegs pas chos thams cad rig par 'jog ste zhes pa nas de ltar 'jog go zhes pa'i bar du ni chos bshad pas phan 'dogs pa ste/ de bzhin gshegs pa thugs rje chen po dang /thabs mkhas pa dang ldan pas mtshan ma dang bral ba'i chos ston pas 'gro ba smin par byed de/ lung ni rigs pa can rig pa'i gzhung bsgrubs pas 'bras bu thob par byed pa nyid ye shes kyi sa la 'jog pa'o/ /mdo las chos thams cad kyi don gyi rim pa la zhes pa nas dam pa'i mchog thob ste zhes pa'i bar du ni chos ston pa'i rim pa gsum du mi mthun pa'i phyir sems can rnams ni yod pa dang med par lta ba gnyis las mi 'da' ba dang /yang dag pa'i don gyi mtha' dang / sems can rnams kyi sems kyi spyod pa mi mthun pas skyed pa ste/ mdo las kyang yod pa dang med pa'i phyogs la 'dzud cing mos pa dang mtshan nyid gsum gyis yang dag pa'i mtha' la 'jug pa'o zhes 'byung ste/spyod pa thams cad dang mthun par 'jug pa la mkhas pas mkhyen pa thogs pa med pa'i phyir sems can gyi sems kyi rim pa bzhin du chos ston pa'o/ /mdo las 'od srungs de bzhin gshegs pa dgra bcom pa yang dag par zhes pa nas ye shes la mngon par 'jog go zhes pa'i bar du ni sems can rnams kyi de bzhin nyid yang dag pa ji lta ba bzhin rang gis mi shes pa'i phyir de bzhin gshegs pa gdon mi za ba'i mtha' mkhyen pa sems can gyi dbang po'i rim pa mkhyen pas sems can rnams la de bzhin gshegs pa ye shes bstan te/ma bstan par ni bdag dang gzhan gyi mtshan nyid mi shes pa'o/ /yang chos ston pa ni snga phyi'i mtshan nyid ston pa la mnga' brnyes pa'i phyir ston pa dang / yang na thabs mkhas pa'i ye shes kyis so so'i mtshan nyid ston pa'o/ /de la yang rnam pa bzhi ste/byang chub dang mya ngan las 'da' ba'i mtshan nyid 'byed pa la mkhas pa thabs mkhas pa'i ye shes kyis sems can rnams kyi spyod pa 'byed pa la mkhas pa dang / de bzhin nyid kyi mtshan nyid sems can rnams la ston par mkhas pa dang / byang chub kyi ye shes dang 'bras bu sems can rnams kyis rtogs par byed pa la thogs pa med par 'dzud pa dang /bdag nyid sngon de 'dra ba'i spyod pa la zhugs pa'i phyir gzhan yang ye shes de la 'jog pa'o/ /yang de dbye ba la rnam pa bzhi ste/ chos rnams kyi bden pa nyid la thug pa dang / yod pa dang med pa la mkhas pa dang / ye shes skye ba la sems dga' ba dang /bkri ba dang nges pa'i don ston pa la mkhas pa'o/ /yang thabs mkhas pa'i ye shes ni bden pa nyid ni tha snyad dang bral ba na tshig gis mtshon cing ston pa ni thabs mkhas pa'i ye shes so/ /ye shes kyis zhes pa ni brten pa'i don te/ sangs rgyas kyi ye shes gzigs pa'i gnas ni yang dag pa'i mtha'o//yang na lung ni rigs pa la gzhol ba/ rigs pa ni spyod pa dang mthun pa/ spyod pa ni 'bras bu dang 'brel pa de sangs rgyas kyi sa zhes brjod do/ /de bzhin gshegs pas gzigs te zhes pa ni yod pa dang med pa'i chos rnams gzigs te/ chos rnams ni kun brtags pa dang /gzhan gyi dbang dang / yongs su grub pa'i mtshan nyid de gsum mo/ /sems can rnams kyi lhag pa'i bsam pa mkhyen pa ni sems can rnams kyi spyod pa dang / de'i lhag pa'i mos pa dang 'jug pa thogs pa med par mkhyen pa'o/ /chos rnams kyi mtshan nyid yang dag pa ji lta ba bzhin du gzigs pa de sems can rnams la yang de bzhin du ston pa'o//de 'dra bar ston pa nyid gdon mi za ba'i ye shes te/ de 'dra ba'i brnyes pas sems can rnams la chos gcig ston pas dbang po mi mthun pa theg pa rnam lngar gyur pa rnams gcig ste/ gnyis dang gsum du med do/ /mdo las 'od srungs 'di lta ste dper na zhes pa nas ji snyed skyes pa zhes pa'i bar du ni/dpe de dag la yang rnam pa gnyis su dbye ste/ spyi'i dpe dang / so so'i dpe'o/ /'di ni dang po ste/ ri dang sa zhes pa sa yan chad ni bskyed par bya'o/ /stong gsum gyi stong chen po zhes pa ni bskyed pa'i gzhi'o / /shing rtsi de dag kyang 'jig rten dang /'jig rten las 'das pa'i dge ba'i chos rnams kyi sa bon gyi dpe ste/ sman dang nags zhes pa theg pa rnam lnga'i sa bon so so mi mthun par gyur pa'i dpe'o/ /mdo las sprin chu chen po rgyas pa langs zhes pa nas/ stong chen po'i 'jig rten gyi khams zhes pa'i bar du ni dpe de dag rnam pa bzhir dbye ste chos kyi rgyal po 'jig rten du byung ba'i dpe dang bstan pas phyogs su brlan pa'i dpe dang 'bras bu mi mthun par smin pa'i dpe dang de ltar brlan par mi sems pa'i dpe dang bzhi'o//sprin rgyas par langs zhes pa ni dpe dang po dang sbyar/ de'i 'og ma ni gnyis pa dang sbyar te/sprul pa'i skus phan pa'i don mang po la khyab par khebs pa ni sprin gyi don to/ /sprin de yang yon tan bcu dang ldan pa ni tshigs su bcad pa'i nang nas ston to/ /sprul pa'i sku gcig gis 'jig rten gyi khams thams cad du smon cing khyab par snang bas khebs zhes pa'i don to//dus gcig tu char mnyam par phab zhes pas ni 'bras bu so sor smin zhes pa'i don dang gsung gcig gis chos ston pa'i don to/ /mdo las 'di'i rtswa dang / shing phrad po dang zhes pa nas 'phel zhing rgyas par 'gyur ro zhes pa'i bar du ni 'bras bu so sor smin pa'i dpe ste/ de la'ang dngos brlan te smin pa dang /zhar la smin pa'o/ /de la 'di rigs rnam gsum yod pa'i phyir theg pa'ang rnam gsum du 'gyur te/ de la yang mdo las dper na mi nad pa gsum zhig yod pa la gcig ni sman pa mkhas pa dang phrad kyang rung ma phrad kyang rung nges par 'tsho ba dang / nad pa gcig ni sman pas gsos na 'tsho'i ma gsos na mi 'tsho ba dang /gcig ni sman pas gsos kyang mi 'tsho ba ste/ 'bras bu che chung gi rim pa'ang de bzhin du sbyar ro/ /sdong bu chen po dang bar ma dang / chung ngu la smos pa yang lung dang / gzhung dang / spyod pa dang / 'bras bu'i dpe ste/ 'bras bu rim pa bzhin du sbyar ro//chu ro gcig pas chung ngu bangs pa ni mi ldog pa'i sa la gnas pa rnams so/ /cher bangs pa ni rnam pa gnyis te sa bdun pa man chad chung ngu bangs pa/ brgyad pa yan chad ni cher bangs pa'o/ /de yangs dang po man chad ni gcig tu zag pa dang bcas pa'i bsgrub pa'o//sa bdun pa man chad ni zag pa med pa gnyis ka'i bsgrub pa'o/ /sa brgyad pa yan chad ni gcig tu zag pa med pa'i bsgrub pa'o/ /yang na sa dang po man chad ni chung ngu bangs pa/ sa dang po yan chad ni mi ldog pa'i sa ste cher bangs pa'o/ /mdo las de bzhin du me tog dang zhes pa nas ming thob bo zhes pa'i bar du ni lung dang 'bras bu so sor bstan pa ste/bstan pa gcig las 'bras bu mi mthun par grub ces pa'i don to/ /char pa gcig gis brlan pa las me tog dang 'bras bu so sor skye ba bzhin te/ dang po thos pa dang bsams pa'i shes rab ni me tog lta bur blta'o / / bsgrub na 'bras bu thob pa'i dpe 'di ni 'bras bu'i dpe'o/ /char pa ro gcig gis zhes pa ni gsung rab gcig gis zhes pa'i don to/ /lhag pa'i tshul khrims dang / shes rab dang / ting nge 'dzin kyang so so'i dbang po las theg pa che chung gis so sor mthong ba'ang de dang 'dra'o/ /mdo las sa gcig la gnas pa'i sman mang po dang zhes pa nas bangs pa de bzhin du zhes pa'i bar du ni so so nas de ltar byas par mi sems pa'i dpe ste/theg pa rnam gsum gyi rigs kyang yang dag pa'i gzhung gcig la brten pa ni/ sa gcig la gnas pa dang 'dra/ de bzhin gshegs pa gcig gis bstan pa las go ba ni char pa'i ro gcig gis bangs pa bzhin te/'bras bu so sor smin pa dang / shing rtsi sna tshogs su 'gyur ba yang mi sems mi shes so/ /mdo las 'od srungs de bzhin gshegs pa zhes pa nas gsung gcig gis 'jig rten gyi khams thams cad khebs pa zhes pa'i bar du ni de bzhin du dpe don du sbyar ba ste/mdo las 'byung ba bzhin du go bar gyis shig /mdo las 'od srungs de bzhin gshegs pa zhes pa nas yang dag par rdzogs pa'i sangs rgyas zhes pa'i bar du ni 'bras bu brlan pa mi mthun pa'i dpe ste/ sngar ni don bstan/ phyis ni mi mthun pa'i dpe dang sbyar ba'o/ /dang po'ang de bzhin gshegs pa nyid las gleng pa ste/don rnam pa gsum mo/ /yon tan gyi mtshan las gleng pa dang / don mdzad pa las gleng pa dang / mkhyen gzigs pa las gleng pa ste/ 'di ni dang po'o/ /mdo las ma rgal ba bsgral lo zhes pa nas mya ngan las bzla'o zhes pa'i bar du ni don mdzad pa las gleng pa ste/smon pa bzhi yongs su rdzogs par byed pa'o/ /sdug bsngal las bsgral ba dang / sdig pa mi dge ba'i las las dgrol ba dang / bde ba ma thob pa rnams bde ba la bzhag pa dang / mya ngan las 'das pa ma thob pa thob par bya ba ste/ sdug bsngal shes pa dang / kun 'byung spangs pa dang / lam bsgom pa dang / 'gog pa mngon du bya ba ste/ rim pa bzhin no / /mdo las nga ni da ltar gyi 'jig rten 'di dang zhes pa nas lam bsgom pa la mkhas pa'o zhes pa'i bar du ni thams cad mkhyen pa dang / thams cad gzigs pa ston te/ de yang rig pa gsum dang / ye shes gnyis dang /chos shes pa dag gsum ston to/ /rig pa gsum ni dus gsum rig pa'o/ /ye shes gnyis ni don dam pa'i ye shes dang / kun rdzob kyi ye shes so/ /yul rab tu shes pa spyod pa rab tu 'chad pa/ 'bras bu rab tu rig pa'o/ /shes pa ni yang dag pa dang / yang dag pa ma yin pa shes pa/'chad pa ni dge ba dang mi dge ba 'chad pa/ mkhas pa ni bsgom pa dang bsgrub pa la mkhas pa'o/ /yang na theg pa rnam gsum rim bzhin du sbyar ro/ /mdo las de ltar 'od srungs srog chags mang po zhes pa nas mthu ji lta ba bzhin du 'jug go zhes pa'i bar du/ dbang po dang zhes pa ni dbang po rnon po'i ched du theg pa chen po bstan/dbang po rtul po la ni theg pa rnam gnyis bstan/ dbang po rnon po'i ched du sdong bu'i sman chen po bstan/ dbang po rtul po la ni sman chung ngu bstan/ brtson 'grus can la ni sgrub pa'i spyod pa bstan/ le lo can la ni sangs rgyas rjes su dran pa ston to/ / sems can rnams tshe 'di la bde bar gyur cing mthar gyis thams cad mkhyen pa'i chos la stobs dang mthu ji lta ba bzhin du 'jug go zhes pa ni sems can rnams chos thos pa tsam gyis bde ba thob ste/ de yang 'jig rten gyi bde ba dang / 'jig rten las 'das pa'i bde ba'o/ /'jig rten gyi bde ba ni tshe 'di la spyod pa yid du 'ong ba dang ldan zhing dge ba'i spyod pa bsgrubs pas bde ba'i 'bras bu thob pa'o//'jig rten las 'das pa'i bde ba ni sgrib pa byang bas chos nyid la zhugs te/ byang chub sems dpa'i lam mo/ /de yang lhag pa'i mos pas bskyed pa'i lam dang / nges pa'i lam ste sgrib pa rnam pa gnyis spangs pa la rim pa bzhin du 'jug go//mdo las 'di lta ste/ 'od srungs dper na zhes pa nas bdag bdag gi rigs dang tshad du skye'o zhes pa'i bar du ni dpe dang don du sbyar te/ 'bras bu mi mthun par gyur pa'o/ /mdo las 'od srungs de bzhin gshegs pa zhes pa nas bdag gis bdag shes pa'am rig pa'am/ rtogs pa med do zhes pa'i bar du ni dpe phyi ma dang don du sbyar ba ste/ro gcig ces pa ni mtshan ma med par ro gcig pa/ mtshan ma med pa'i ro dang / zag pa med pa'i ro dang / rnam par grol ba'i ro gcig pa'o/ /de ltar ro gcig gis so sor smin pa dang / shing dang 'bras bu so sor brlan pa yang bdag so so nas sems pa med do//mdo las de ci'i phyir zhe na/ 'od srungs zhes pa nas ji lta ba bzhin du gzigs so zhes pa'i bar du ni de la'ang sems can gyi spyod pa spyir mkhyen pa dang / so sor mkhyen pa dang / mkhyen pa de gnyis bsdu ba'o/ /sems can de dag ci lta ba bzhin du mkhyen pa ni 'dus byas sam/ 'dus ma byas kyi tshul du'am/spyod pa'am/ sems kyi sgo nas ji lta ba bzhin du mkhyen pa'o/ /ci la sems zhes pa dag ni mkhyen pa so sor smos pa ste/ shes rab rnam gsum gyi sgo nas rang bzhin mkhyen pa dang / spyod pa dang / dngos po mkhyen pa dang / spyod pa gang gis 'bras bu ci 'thob pa dang / lung gang gis 'bras bu ci sgrub pa ste/chos de bzhi'i rim pa bcom ldan 'das kyis mkhyen zhes pa'o/ /mngon sum du gzigs pa dang / ji lta ba bzhin du gzigs pa ni mkhyen pa de dag bsdu ba ste/ sems can gyi gzhi dang / sems kyi spyod pa mtshan ma dang / dngos po dang / rang bzhin ma lus par gzigs pa'i phyir gzigs pa'o/ / mdo las de dang de dag na gnas pa'i sems can de rnams zhes pa nas thams cad mkhyen pa'i ye shes glo bur du mi ston to zhes pa'i bar du ni de bzhin gshegs pa'i mkhyen pa dang / sems can gyi mkhyen pa shes pa de gnyis bsdu ba'i khyad par bstan pa ste/ de bzhin gshegs pa'i ye shes zab pa dang / sems can gyi shes pa chung bar gyur pas/de bzhin gshegs pa'i bstan pa zab mo'i gnas ma yin par bstan pa'o/ /mdo las 'od srungs de bzhin gshegs pas ldem po ngag ni bshad pa la zhes pa nas ldem po ngag ni shes par dka'o zhes pa'i bar du ni 'od srungs chen pos zab mo 'di shes kyi gzhan gyis mi shes te/ mtshan nyid ni 'og nas ston to/ /mdo las de nas bcom ldan 'das kyis de'i tshe zhes pa nas shin tu dad pa shes nas su zhes pa'i bar du ni 'di man chad tshigs su bcad pas don gong ma rnams bzlas te ston pa la/ tshigs bcad lnga bcu rtsa gcig gis ni gong ma'i don bzlas 'og ma gcig gis ni bsdus pa'i don bstan to//chos rgyal zhes pa ni chos la mnga' brnyes pas chos ci ston pa 'khrul pa mi mnga' ba'i phyir chos kyi rgyal po'o/ /'byung ba 'joms zhes pa ni 'jig rten gsum 'joms pa'am/ srid pa bzhi dang lnga 'joms zhes pa'i don to/ /yang na tshigs bcad bzhi po 'di la chos kyi sku dang / rdzogs pa longs spyod pa'i sku dang / sprul pa'i sku rim pa bzhin du sems can gyi don mdzad par sbyar ro/ /mdo las/ dbang po chen po blo bstan pa/ /zhes pa nas/ srog chags rnams la mi smra'o/ /zhes pa'i bar du ni de bzhin gshegs pa chos ston pa ngo mtshar du bya ba ste/ bkri ba dang nges pa'i don bshad pa la so so'i dbang po dang sbyar te/gzod 'chad kyi glo bur du mi gsung zhes pa'i don to/ /mdo las/ ye shes de ni chud dka' ba/ /zhes pa nas/ /de lta bas na 'khor ba'o/ /zhes pa'i bar du ni so so nas the tshom dang / dogs pa skye bas chud dka' bsam bshad ces pa'i don to/ /mdo las bshad pa tshig 'dra yul dang zhes pa nas/lta ba dag ni drang por bya/ /zhes pa'i bar du ni sems can rnams de bzhin gshegs pa'i gsung dang byin gyi rlabs kyis ma bstan par rang gis rig pa'i blo mi skye bas yang dag pa'i don bcom ldan 'das kyis rnam par phye bas sems can rnams dbang po ji lta ba bzhin du don rtogs shing rig pa skye zhes pa'i don to//mdo las/ 'od srungs sprin ni ji lta bu / /zhes pa nas/ thams cad du ni chu yang gtong / /zhes pa'i bar du ni de bzhin gshegs pa 'jig rten du 'byung ste/ chos ston pa yang ji ltar 'jig rten du byung ste char 'bab pa klu'i rgyal pos zhag bdun gyi bar du sprin bsdus nas char 'be+ebs pa bzhin du thugs rje chen po'i sprin phyogs bcu thams cad du khebs par mdzad de/sems can gyi dbang po smin pa'i dus dang sbyor zhing chos ston to/ /sprin de yang glog gi phreng ba dang bcas pa 'brug gi sgra grag pa nyi ma'i 'od sgrib pa/ dkyil 'khor thams cad bsil bar byed pa lag gis brnyab tu rung ba 'dra bar 'dug pa bzhin de bzhin gshegs pa'i 'od kyis phyogs bcur snang bar mdzad pa/chos kyi 'brug sgra sgrogs pas bdud dang log par lta ba rnams dngang bar mdzad pa/ thugs rje'i sprin gyis phyogs thams cad du khebs pas 'gro ba dga' bar mdzad pa/ log pa'i nyi ma 'char ba zil gyis gnon pa/sdug bsngal gyi gnas thams cad bsal te/ mya ngan las 'das pa'i gnas bsil bar mdzad pa/ thugs rje'i lhun lus dang sems 'dun pa'i lag gis brnyab tu rung ba tsam du sems pa'o/ /mdo las/ de ni snyoms par 'bebs pa yang / /zhes pa nas/ sdong por gyur pa gang yang rung / /zhes pa'i bar du ni so sor smin par byed pa la yon tan gyi char 'bebs pa dang / dngos po so sor skyes pa dang / skyes pa rnams don du 'gyur bar mdzad pa ste/ mtho dman med par snyoms pa'i thugs rjes kun gyi don mdzad ces par sbyar ro/ /mdo las/ de dang sman ljongs rnams nas sam//zhes pa nas/ 'bras bu me tog rnams kyang de bzhin 'phel / /zhes pa'i bar du ni brlan par bya ba'i dngos po bstan te/ de yang spyi dang khyad par du dbye ba'o/ /theg pa rnam gsum rigs so sor smin pa ni sdong po dang yal ga me tog bzhin no/ /mdo las/ sprin gyi char gyis mang po sman rnams la//zhes pa nas/ de ni char pa ro gcig phab pa'o/ /zhes pa'i bar du ni brlan par bya ba rnams don du sgrub ste/ so sor smin par byed pa'i dpe'o/ /mdo las/ de bzhin 'od srungs sangs rgyas 'jig rten 'dir/ /zhes pa nas/ srog chags la ni yang dag spyod pa ston / /zhes pa'i bar du ni dpe dang don du sbyar ba ste/tshig dang po gnyis kyis ni sbyor ba bstan/ gzhan gyis ni 'bras bu mi mthun pa bstan te/ 'di ni dang po'o/ /mdo las/ de ltar drang srong chen po yang dag sgrog /ces pa nas/ ngas ni 'dod dang mya ngan 'da' ba sbyin/ /zhes pa'i bar du 'dis ni 'bras bu so sor brlan pa bstan te/ 'di man chad ched du bsgrags pa dang / 'khor bsdu ba dang phan gdags shing drang ba thos pa rnams phan pa 'thob pa dang / de thos nas 'du ba ste 'di ni dang po'o/ /rigs yod du zin gyis kyang dam pa'i chos kyis ma brlan pa'i phyir lus bskams pa'o/ /mdo las/ lha dang mi tshogs rnams kyang nga la nyon/ ngal lta ba'i phyir ni nye bar gshegs/ /zhes pas 'khor bsdu ba'o/ /mdo las/ nga ni de bzhin gshegs pa bcom ldan 'das/ /zil gyis mi non zhes pa nas/ /de ni rnam grol mya ngan 'das pa'o/ /zhes pa'i bar du phan gdags pa ste/ dam pa'i chos ston pa dang / theg pa chen po'i rgyu ston pa dang /chos snyoms par ston pa dang / gcig tu phan gdags pa'i phyir dang / bzang ngan bkol ba med pa ste 'di ni dang po'o/ /mdo las/ byang chub gzhug pa'i phyir ni rtag par de/ /zhes pa nas/ dbyangs gcig gis ni rab tu chos bshad de/ /zhes pa'i bar du ni theg pa chen po'i rgyu ston pa ste/drang po'i don rnam pa gnyis ka yang theg pa chen po'i don te/ rnam pa thams cad mkhyen pa'i rgyur gyur pa'o/ /mdo las/ de ni snyoms pa'i yid kyis ma snyoms med/ /ces pa nas/ sems can gcig bzhin 'gro ba gzhan la'o/ /zhes pa'i bar du ni 'di snyoms par ston pa'o / /bdag dang bdag gi ba dang bral ba dang /byams sdang spangs pa dang / nye ring gi sems med pa dang / chos 'chab pa med pa dang / phrag dog med pas thams cad la 'dra bar chos ston pa'o/ /mdo las/ las gzhan mi byed rab tu chos 'chad de/ /zhes pa nas/ sprin gyis char pa mngon par phab pa bzhin/ /zhes pa'i bar du ni gcig tu phan 'dogs shing chos 'chad pa ste/bzhud ces pa ni mya ngan las 'das pa'o/ /byon zhes pa ni mngon par byang chub par ston pa'o/ /bzhugs zhes pa ni chos 'chad cing phan 'dogs pa'o/ /langs zhes pa ni sems can gyi dbang po smin pa la bzhengs pa ste/ thugs rje chen pos nam yang sems can gyi don mdzad pa la skyo ba mi mnga' ba'o//mdo las/ 'phags pa dang ni ma rabs mtshungs pa'i blo/ /zhes pa nas/ skyo ba thams cad rab tu rnam spangs nas/ /zhes pa'i bar du ni bzang ngan bkol ba med par chos ston pa ste/ dge ba'i rtsa ba la gzigs shing chos ston pa'o/ /mdo las ngas ni yang dag chos kyi char pa phab//ces pa nas/ rnam pa mang po'i sa la gnas 'gyur ba/ /zhes pa'i bar du ni sems can rnams su thos pas bde ba rnyed pa ston te/ dang po'i tshig dgus ni dpe dang don du sbyar / de'i 'og ma tshig phyed dang bzhis ni 'bras bu dang me tog rgyu mi mthun pa'i dpes 'bras bu dang sbyor ba bstan/sngar tshig brgyad kyis ni don bstan / yang tshig phyed kyis ni dpe bstan/ tshig dang po la yang gnyis su phye ste/ sngar tshig gcig gis ni spyir gleng / tshig bdun gyis ni so sor phye ste bstan pa la 'di ni dang po'o/ /sa la gnas 'gyur ba zhes pa ni theg pa chen po'i sa bcu dang rigs kyis dang / brgyad pa dang /de bzhin gshegs pa'i sa'i bar du so sor phye ste bstan pa'o/ /mdo las/ lha mi'i nang nas yid du 'ong ba dang / /zhes pa nas/ de dag rab tu phra zhing phra ba'i sman/ /zhes pa'i bar du ni dpyad na rigs med pa'i dpe ste/ ji ltar rtsa ba rab tu phra la char gyis brlan pa bzhin no/ /'phags pa nyan thos rnams ni sman par ma bzhin no//'phags pa byang chub sems dpa' rnams ni sman gyi sdong po chen po bzhin no/ /mdo las/ de dag chung ste 'jig rten 'di na gang / /zhes pa nas/ de ni sman gyi mchog ces bya ba yin/ /zhes pa'i bar du ni sman gyi sdong po'i dpe rnam pa gnyis bstan pa ste/ sangs rgyas su de 'dra ba'i spyod pa can sangs rgyas su nges zhes pa'i don to//byang chub sems dpa' sa bdun pa man chad ni sman chung ngu zhes bya/ sa brgyad pa yan chad ni/ sman gyi sdong po chen po zhes bya ste spyod pa mi nyams pa zhes pa'i don to/ /mdo las/ bde bar gshegs pa'i sras po gang bzhugs pa/ / zhes pa nas/ de lta bu yid dpe dag bstan pa yis/ /zhes pa'i bar du ni rigs can gyis nas theg pa chen po'i 'bras bu thob pa dang / mya ngan las 'das pa'i bar du 'bras bu che chung thob pa dang / grub pa'i dpe bstan pa yin no/ /mdo las/ de bzhin gshegs pa'i thabs rnams shes par gyis / / zhes pa nas/ phyogs bcu kun na ji ltar mdzes pa bzhin/ /zhes pa'i bar du ni 'bras bu so sor smin cing thob pa khyad par du gyur pa dang dpe don du sbyar te rgyas par bstan pa'o/ /mdo las/ 'di na rtag tu 'jig rten phan pa'i chos/ /zhes pa nas/ ngoms par byed ces pa'i bar du ni lha dang mi rnams la phan pa'i don byas pa'o//mdo las 'jig rten thams cad ngoms par byas nas ni zhes pa nas sdong po chen po zhes pa ni de dag bya zhes pa'i bar du ni 'bras bu che chung las theg pa che chung gi rim pa bstan pa'o/ /mdo las/ 'od srungs 'di lta bu yi chos bshad pa/ /zhes pa nas/ nga yi nyan thos thams cad sangs rgyas 'gyur//zhes pa'i bar du ni don bsdu ba ste/ sngar bkri ba'i don bstan/ phyis nges pa'i don bstan pa dang / 'bras bu thob pa'i phyir lung bstan pa ste/ 'phags pa nyan thos pa rnams kyi spyod pas sangs rgyas su 'gyur bar lung bstan pa'ang 'grub pa la dgongs te lung bstan pa yin no//byang chub sems dpa'i spyad pa spyod pa dang / byang chub kyi spyod pa las nyams pa'ang / phyis byang chub tu sems bskyed cing / dge ba'i rtsa ba ma nyams na bla na med pa'i 'bras bu thob ces bstan to// //'di man chad lung bstan pa'i le'u ste/ de ci'i phyir lung bstan pa zhes gdags pa dang /ming bshad pa dang rnam pa gnyis so/ / de la gtan tshigs ni 'phags pa shA ri'i bu dbang po rnon po yin pas chos thos pa tsam gyis go ba'i phyir lung bstan pa dang / gzhan dbang po bar ma rnams don dpes mtshon te bstan pas go ba'i phyir lung bstan pa'o/ /yang nang rgyal can rnams spa bkong ba'i phyir theg pa thams cad gcig ste/che chung med pa'i phyir lung bstan pa'o/ /de yang lung bstan pa'i chos rnam pa gsum ste/ rang bzhin yod pa'i phyir lung bstan pa dang / khyad par yod pa'i phyir 'bras bu yod pas lung bstan pa dang / che ba'i bdag nyid can rnams la che ba'i gzhung 'os pa dang /rgyu che ba rnams la 'bras bu chen por 'os pas lung bstan pa dang gsum mo/ /rang bzhin gyis yod pa yang lung bstan par 'os pa dang / lung bstan par mi 'os pa ni ma rig pa la thog ma yod dam med ces 'dri ba la lung mi bstan pa lta bu'o/ /rgyu khyad par can rnams ni lung bstan par 'os pa'o//rgyu che ba dang / 'bras bu che ba yang lung bstan par 'os pa'o/ /rgyu chung ba dang 'bras bu chung ba rnams ni lung bstan par mi 'os pa'o/ /dge ba'i rtsa ba smin pa rnams myur du lung bstan pa dang / ma smin pa rnams phyis lung bstan pa dang / 'khor ba spong zhing 'bras bu myur du thob par 'dod pa rnams la myur du lung bstan pa dang /thugs rje che bas 'khor bar sbyor ba rnams bags kyis lung bstan pa'o/ /yang spyir lung bstan pa dang / so sor phye ste lung bstan pa'o/ /ming dgrol ba ni rgyu ci byed pa 'bras bu de thob ste/ de so sor ston pa'i phyir lung ston pa zhes bya'o/ /mdo las de nas bcom ldan 'das kyis tshigs su bcad pa 'di gsungs nas zhes pa nas ngan pa'i chos 'dzin par 'gyur zhes pa'i bar du ni 'phags pa nyan thos bzhi mngon du lung bstan pa la sngar ni tshig brgyad pas bstan/'og tu ni tshigs su bcad pas bsdus te bstan/ de yang 'phags pa 'od srungs dang por lung bstan/'phags pa gzhan de'i 'og tu lung bstan to/ /de dag kyang so so'i dbang po las kha cig sngar 'phags pa'i 'bras bu thob la/ sangs rgyas su phyis grub pa yang yod de/ ji ltar dge slong lnga brgya khyad par med pa las sangs rgyas su snga phyir grub ste/ gcig gis gcig lung bstan pa lta bu dang /theg pa chen po las kyang slob pa dang mi slob pa rnams khyad par yod pa las/ dus gcig tu sangs rgyas su grub pa dang / kha cig sngar 'phags pa thob la phyis de bas phyi ba rnams sangs rgyas su 'grub pa lta bu ste/ 'phags pa 'od srungs chen pos sangs rgyas khri phrag sum brgyal bsnyen bkur byas/'phags pa rab 'byor gyis sangs rgyas bye ba khrag khri gsum brgya la bsnyen bkur byas/ 'phags pa kA t+yA ya nas sangs rgyas bye ba khrag khrig brgya la bsnyen bkur byas/ phyis khrag khrig gnyis la bsnyen bkur byas/ 'phags pa maud gal chen pos sngar sangs rgyas brgyad stong la/ bsnyen bkur byas/ phyis khrag khrig nyis brgya la bsnyen bkur byas te/ sangs rgyas su lung bstan pa yang sangs rgyas la bsnyen bkur byas pa lan mang du yod mod kyi spyod pa rgya chen po ldog pa rnams drang ba'i phyir bstan te/ so sor dbang po rno rtul las snga phyir lung bstan pa yin no/ /mdo las de lus tha ma'i tshe rgyan chen po zhes bya ba'i bskal pa la zhes pa nas sangs rgyas bcom ldan 'das te zhes pa'i bar du ni 'bras bu thob pas lung bstan pa ste/yang dag pa'i chos mthong ba'i snang bas mdzes pa'i phyir 'od zer rab tu snang zhes btags so / /mdo las de'i tshe tshad ni zhes pa nas me tog gi gtor ba zhes pa'i bar du ni zhing 'od zer snang ba thob pa'i yon tan la btags pa dang /bskal pa spyod pa sna tshogs kyis brgyan pa'i rgyan las btags pa dang / zhing gi rgyan de dag kyang rgyan dam pa dang ldan pa/ sdig pa mi dge ba med pa / mnyam pa rin po che bzhi las gzhi byas pa/ shing rin po ches brgyan pa'i thig gis re'u bres pa/me tog sna tshogs bkram pa'i rgyan dang ldan pa'o/ /mdo las der byang chub sems dpa' brgyad stong mang po 'byung bar 'gyur ro zhes pa nas chos kun 'dzin la brtson par 'gyur ro zhes pa'i bar du ni 'khor mang po thams cad kyis dam pa'i chos bsrung ba dang /yongs su 'dzin zhes pa'o/ /mdo las de nas bcom ldan 'das zhes pa nas/ bla na med pa'i ye shes 'di bsgrub ste zhes pa'i bar du ni tshigs bcad de rnams kyi ni dang po gleng ste sgo ba dang / lung mngon du bstan pa dang bsdu ba'o/ /mdo las/ de ni tha ma'i lus tshe 'jig rten mgon//zhes pa nas/ mnyam zhing bzang la blta na sdug par gyur/ /zhes pa'i bar du ni de la yang tshigs bcad dang po phyed kyis ni rang bzhin bstan/ de'i 'og ma tshigs bcad gsum gyis ni ngo mtshar nyid bstan/ de'i 'og ma gsum gyis ni 'khor bstan/ de'i 'og ma tshigs bcad phyed kyis ni tshe'i tshad bstan/ngo mtshar gyi mtshan nyid ni mi dge ba med pa la sogs pa rnam par dag pa'i zhing rgyan brgyad do/ /spos dri yid du 'ong ba 'byung ba ni tshig rkyang pa'i nang nas mi 'byung ste/ tshul khrims kyi dri dam pa dang sbyar ro/ /mdo las/ de ni byang chub sems dpa' bye ba stong / /zhes bya ba nas/bskal pa 'bum gyi ye shes kyi grangs kyang / /zhes pa'i bar du ni 'khor rnams ston te/ byang chub sems dpa' dang 'khor rnams kyi don to/ /mdo las/ de ni bar gyi bskal pa bcu gnyis gnas / /zhes pa nas/ 'od zer bar snang de yi rgyan 'di 'dra/ /zhes pa'i bar du ni/ tshigs bcad phyed kyis ni tshe tshad bstan/phyi mas ni bsdus pa'o/ /mdo las de nas tshe dang ldan pa gnas brten maud gal gyi bu chen po dang zhes pa nas 'di skad gsol to zhes pa'i bar du ni 'dis 'phags pa nyan thos chen po gsum gyis lung bstan par gsol ba dang / bcom ldan 'das kyis dngos su lung bstan pa'o//lus 'dar zhing mig mi 'dzums par blta zhing zhes pa ni gcig tu 'dun pa'i sems so/ /mdo las/ dgra bcom zhing ni cher dpa' ba/ /zhes pa nas/ rgyal bas bdag cag lung ston cig /zhes pa'i bar du ni tshig de dag la bstod de gsol ba dang dpe las glengs te gsol ba dang /gsol ba'i mdo bsdus pa dang gsum ste/ 'di ni bcom ldan 'das la yon chen po'i sgo nas bstod de gsol ba'o/ /mdo las mu ge byung tshe la la'i zhes pa nas thub pa chen po mthar 'gyur ro zhes pa'i bar du ni/ mu ga byung tshe zhes pa ni dpe las glengs te gsol ba ste/ nyan thos pa rnams theg pa chen po'i chos kyis bkres pa'i phyir mu ge zhes pa'o//bcom ldan 'das kyis lung bsgo ba la/ ltos shing theg pa chen po 'jug pa la mi spobs pa yang dpe de dang 'dra'o/ /dpa' bo chen pos lung ston cig /ces pa ni gsol ba'i mdo bsdus pa'o/ /mdo las de nas bcom ldan 'das kyis zhes pa nas byang chub bsgrub par 'gyur ro zhes pa'i bar du ni 'di man chad nyan thos chen po gsum so sor lung bstan pa ste/dang po tshig rkyang pas spro ba dang / de'i 'og tu tshigs su bcad pas bsdu ba'o/ /tshig rkyang pa la yang rnam pa gnyis te/ sngar ni rgyu bstan/ de'i 'og tu 'bras bu bstan te/'di ni rgyu'o/ /mdo las de lta bu'i lhag pa'i bya ba byas te lus tham la zhes pa nas/ sangs rgyas bcom ldan 'das zhes pa'i bar du ni 'bras bu bstan pa ste/ lung bstan pa'i mtshan nyid dgu ste/ rang bzhin gyis lung bstan pa la sogs pa'o/ /mdo las sangs rgyas kyi zhing ni rin po che 'byung ba zhes bya bar 'gyur ro zhes pa nas nyan thos brgya stong mang po 'dul lo zhes pa'i bar du ni de bzhin gshegs pa'i zhing rgyan sna tshogs kyis brgyan pa na 'khor phyi nang rnam gnyis dang bzhugs pa bstan to//mdo las de nas bcom ldan 'das kyis de'i tshe na zhes pa nas rab tu rig par bya'o/ /nga las nyon zhes pa'i bar du ni 'di man chad tshigs su bcad pa bcu gnyis la gnyis su dbye ste/dang po tshig gcig gis ni bsgo ba bstan/ de'i 'og ma bcu gcig gis ni dngos su bstan pa ste/ 'di ni dang po'o/ /mdo las/ nga yi nyan thos gnas brtan rab 'byor 'di/ /zhes pa nas/ drang srong chen po gser gyi sdong po 'dra//zhes pa'i bar du ni 'dis dngos su bsgo ba ste/ rgyu dang 'bras bu sbyar te bstan pa dang / ngo mtshar bdun dang / 'khor dang tshe'i tshad la sogs pa ston te/ 'di ni dang po'o/ /mdo las/ 'jig rten rnams la phan zhing thugs brtser 'gyur/ /zhes pa nas/ srog chags bye ba khrag khrig sgrol bzhin du//zhes pa'i bar du ni ngo mtshar ba'i mtshan 'di bstan pa'o/ /mdo las/ de nas byang chub sems dpa' mthu chen mang / /zhes pa nas/ rdzu 'phrul stobs ni bsam gyis mi khyab 'gyur / /zhes pa'i bar du ni 'khor rnams ston te/ /byang chub sems dpa'i 'khor dang / nyan thos pa'i 'khor rnams ci rigs par sbyar ro//mdo las/ byang chub mchog der rab tu bshad pa na / /zhes pa nas/ de la rtag tu thal mo sbyar bar 'gyur/ /zhes pa'i bar du ni de bzhin gshegs pas sprul pa dang chos nyan pa'i 'khor rnams bstan to/ /mdo las/ de na par gyi bskal ba bcu gcig gnas//zhes pa nas/ rkang gnyis mchog gi'o zhes pa'i bar du ni tshe'i tshad bstan pa'o/ /mdo las de nas bcom ldan 'das kyis dge slong gi dge 'dun thams cad la bka' stsal pa zhes pa nas gso ba byed par 'gyur ro zhes pa'i bar du ni 'phags pa kA t+yA yan lung bstan pa ste dbye ba dang sa bcad pa gong ma dag 'dra bar sbyar ro//mdo las sangs rgyas bcom ldan 'das de dag yongs su mya ngan las 'das nas yang zhes pa nas lha dang mi'i mkhan po sangs rgyas bcom ldan 'das de zhes pa'i bar du ni 'phags pa kA t+yA ya na des sngon gyi dus de bzhin gshegs pa mang po la dngos su bsnyen bkur bgyis pa dang /de mya ngan las 'das pa'i 'og tu yang rin po che'i mchod rten byas pa dang / mchod rten de la mchod pa sna tshogs byas pa ste/ byang chub sems dpa'i spyod pa mang du byas te 'dir lung bstan te/ 'phags pa de nyid sngon dge 'dun gyi gnas khang phyag dar byas pa las tshe rabs thams cad du lus gser gyi kha dog can du gyur te spyod lam mdzes pa 'od dang ldan par gyur pa las 'di sangs rgyas su grub pa lung bstan pa'o//mdo las sangs rgyas de'i zhing yongs su dag pa zhes pa nas me tog gis chal par bkang zhes pa'i bar du ni de bzhin gshegs pa'i zhing gi rgyan sna tshogs bstan pa'o//mdo las sems can dmyal ba dang zhes pa nas chos kyi gzugs brnyan gnas par 'gyur ro zhes pa'i bar du ni zhing de na ngan song gsum med pa/ lha dang mi mang ba dang / phyi nang gi 'khor mang du 'dus pa dang / sku tshe'i tshad bstan pa'o/ /mdo las de nas bcom ldan 'das kyis de'i tshe na zhes pa nas gzhan du ma yin pa'i tshig smra zhes pa'i bar du ni 'di yan chad ston pas lung bsgo ba'o/ /mdo las nga'i nyan thos gnas brtan kA t+yA ya na 'di zhes pa nas dri dang me tog rnams kyis mchod par 'gyur zhes pa'i bar du ni rgyu las glengs te lung bstan pa'o//mdo las/ de yis tha ma'i lus thob nas/ /zhes pa nas/ lhar bcas 'jig rten rnams kyis bkur sti byas/ /zhes pa'i bar du ni lung bstan pa'i 'bras bu ste/ de yang zhing gi mtshan nyid dang / bsod nams kyi mtshan nyid do/ /mdo las/'od byed gtso bo bcom ldan 'das 'gyur ba/ /zhes pa nas/ kun kyang 'byung spangs 'byung ba med pa yin/ /zhes pa'i bar du ni tshig dang po gnyis kyis ni rang bzhin bstan/ tshig phyi mas 'khor bstan to/ /mdo las de nas yang bcom ldan 'das kyis dge slong gi dge 'dun thams cad la bka' stsal pa zhes pa nas gsol ba byed par 'gyur ro zhes pa'i bar du ni 'phags pa maud gal lung bstan pa ste/tshul dbye ba ni gong ma dang 'dra'o/ /lung bstan pa yang snga ma'i dus dang phyi ma'i dus so/ /snga ma'i dus la yang sangs rgyas mngon du bzhugs pa dang / mya ngan las 'das pa ste/ 'di ni sngon du bzhugs pa dang sbyar ro/ /mdo las sangs rgyas bcom ldan 'das de dag yongs su mya ngan las 'das nas kyang zhes pa nas rnam pa mang pos mchod pa byed do zhes pa'i bar du ni/ mya ngan las 'das pa'i 'og tu bkur sti byed pa ste/ sngar mchod rten brtsigs pa dang / de'i 'og tu mchod pa byas pa'o//mdo las de'i pha rol gyi yang pha rol tu zhes pa nas gsol bar byed do zhes pa'i bar du ni phyi ma'i rgyu bstan to/ /mdo las de'i 'og tu lus tha ma la zhes pa nas sangs rgyas bcom ldan 'das te zhes pa'i bar du ni dngos su 'bras bu bstan pa'o/ /mdo las de'i sangs rgyas kyi zhing yid mngon par dga' ba zhes bya bar 'gyur zhes pa nas me tog sil ma gtor ba zhes pa'i bar du ni bskal pa'i ming dang /rgyu'i ming dang / zhing gi mtshan nyid kyi rgyan bstan pa'o/ /mdo las zhing mang pos rab tu gang zhes pa nas/ dam pa'i chos kyi gzugs brnyan gnas par 'gyur ro zhes pa'i bar du ni dge ba mang po bskyed pa dang /'khor dang / tshe'i tshad dang grangs bstan pa'o/ /mdo las de nas bcom ldan 'das kyi de'i tshe zhes pa nas sil snyan gyis ni 'jig rten phan skyong ba'o zhes pa'i bar du ni 'dis yongs su lung bstan pa ste/ sngar ni rgyu bstan phyis ni 'bras bu bstan to//rgyu bstan pa la yang sangs rgyas 'jig rten na bzhugs pa dang / 'jig rten nas 'das pa la mchod pa byed pa'o/ /mya ngan las 'das zhes pa ni mya ngan las 'das pa'i 'og tu mchod pa byed pa'o/ /de nas 'di ltar tha mar lus kyi tshe zhes pa nas 'di man chad bshad pa'i tshul gong ma dag dang 'dra bar dbye'o// //'di man chad sngon byung ba'i le'u 'chad de/ sngon de bzhin gshegs pas sangs rgyas kyi mdzad pa mdzad cing theg pa chen po'i don spyod pa de bstan na rjes su 'jug pa bskyed pa'i phyir rgyu de bstan cing mos pa skye bar bya ba'i phyir le'u 'di bstan to//'di ci las btags pa dang / de'i ming dang / de dris pa'i lan rnam pa gsum zhig ston te/ 'di'i nang nas sngar dbang po rnon po dang bar ma chos thos pas rtogs pa skyes te lung bstan/ dbang po tham rnams chos thos kyang da dung rtogs pa ma skyes pa rnams sngon theg pa chen po'i spyod pa la zhugs pa rnams ji ltar spyod pa'i dpe bstan na/rtogs pa skye bar 'gyur bas sprul pa'i grong khyer gyi dpe bstan pa dang / 'grel pa las sems can nga rgyal can bdun yod de/ nga rgyal gyi nyon mongs pa de spang ba'i phyir 'di gsungs te/ nga rgyal de bdun las kyang bzhi pa lta bu bsam gtan spyod cing 'jig rten gyi ting nge 'dzin la gnas pa nyid mya ngan las 'das pa tsam du sems pa de'i gnyen por sprul pa'i grong khyer gyi dpe bstan/ting nge 'dzin la gnas shing 'bras bu chung ngus chog par sems pa de la theg pa chen po'i mya ngan las 'das pa'i grong khyer chen po la thabs kyis gzud pa'i phyir sngon gyi gtam gyi grong khyer gyi dpe bstan na/slob pa la gnas pa'i ma rabs rnams sprul pa'i grong khyer bsti ba'i gnas tsam du bstan nas kyang mya ngan las 'das pa'i grong khyer chen po rin po che'i 'byung gnas nyid du gzud pa'i phyir dpe 'di bstan to/ /bla na med pa bcu bstan pa'i nang nas gnyis pa ste/sngon gyi spyod pa bla na med pa ston pa dang sbyar na de bzhin gshegs pa mngon par shes pa chen po'i ye shes kyi zil gyis gnon pa zhes bya ba byang chub kyi spyod pa dga' ba spyod pa'i tshe bskal pa mang po zhig tu spyad nas gzod mngon par sangs rgyas pa dang sbyar na theg pa pa'i byang chub tu nye bas thob pa nyid bsti ba'i gnas yin par bstan pa'o//yang bla na med pa bcu'i gsum pa las lhag pa'i brtson 'grus kyi mthus bskyed pa dang sbyar ni tshong dpon gyi dpes dka' ba sna tshogs spyad nas don grub pa bzhin de bzhin gshegs pa'i 'bras bu thob pa yang de dang 'dra bar sbyar ro//le'u 'di'i nang nas de bzhin gshegs pa mngon par shes pa chen po'i ye shes kyi zil gyis gnon pa'i spyod pa ston na bcom ldan 'das de'i mtshan las le'u 'di'i ming du gdags pa'i rigs nas sprul pa'i grong khyer dang sngon byung ba zhes ci'i phyir gdags/ de ni lhag pa'i nga rgyal can dag mya ngan las 'das pa nyid thob par sems pa'i gnyen por grong khyer gyi dpes ched du bzlog pa'i phyir de bstan pas don la dris te btags so//mdo las dge slong rnams sngon 'das pa'i dus na byung ba zhes pa nas pha rol gyi yang pha rol na zhes pa'i bar du ni 'dis dbang po tha ma la bstan pa'i gleng ba ste/sngar tshig rkyang pas rgyas pa bstan/ de'i 'og tu tshigs bcad kyis bsdu ba ste/ de la yang dang por phyogs su bsgo ba dang / de'i 'og tu dris pa'i lan no/ /dang po la yang rnam pa bzhi ste/ dus dang / yun dang / yul dang / bskal pa ste 'di ni dang po'o/ / mdo las 'di ltar sngon de'i tshe de'i dus zhes pa nas sangs rgyas bcom ldan 'das so zhes pa'i bar du ni dngos su bstan pa'o/ /mdo las dge slong dag de bzhin gshegs pa de byung nas zhes pa nas sa'i khams de thams cad btags na zhes pa'i bar du ni 'di man chad dris pa dang / lan gdab pa ste/'di ni dris pa'o/ /mdo las dge slong rnams de yid la ji snyam zhes pa nas bcom ldan 'das de ma lags so zhes pa'i bar du ni dris pa'i lan btab pa'o/ /mdo las bcom ldan 'das kyi zhes pa nas yongs su mya ngan las 'das pa bzhin no zhes pa'i bar du ni 'dis ni mngon par shes pa chen po ston te/ye shes kyi gzigs pas mkhyen zhes pa'o/ /yang de dgongs shing mkhyen pa yang dgongs pa rnam bzhi'i tshul gyis mkhyen te/ mnyam pa la dgongs pa dang / dus tha dad pa la dgongs pa dang / don tha dad pa la dgongs pa dang / sems can gyi mos pa la dgongs pa'o//mdo las de nas bcom ldan 'das kyi zhes pa nas/ mngon shes ye shes zil gnon thub chen po/ /zhes pa'i bar du ni/ dus kyi mtha' bstan pa dang / mkhyen gzigs bstan pa ste/ de la yang sngar ni sgo/ /phyis ni bskal pa'i grangs bstan pa ste/'di ni dang po'o/ /mdo las/ de'i tshe bla med rgyal bar gyur/ /zhes pa nas/ bskal pa mang po de snyed zad par gyur/ /zhes pa'i bar du ni bskal pa'i grangs bstan pa'o/ /mdo las/ de ltar 'dren pa mya ngan las 'das pa / /yun ring zhes pa nas/ dran pa phra zhing zag pa med pa po//zhes pa'i bar du ni mkhyen gzigs bstan to/ /mdo las dge slong 'di ltar yang mngon par shes pa chen po'i ye shes kyi zil gyis gnon pa zhes pa nas lnga bcu rtsa bzhir gyur to zhes pa'i bar du ni dris pa'i don nyid 'og nas ston to/ /'di ni de bzhin gshegs pa'i tshe'i tshad dang / chos rnyed par dka' ba dang / chos mngon du rnyed pa dang gsum ste/ 'di ni dang po'o/ /mdo las bcom ldan 'das de bla na med pa zhes pa nas des chos mngon du ni ma gyur to zhes pa'i bar du ni 'dis chos rnyed par dka' ba bstan pa ste/ de mngon du bya bar ston pa dang / 'dug tu bcug pa dang /me tog gis gtor ba dang / mngon du dga' ba bstan pa'o/ /'grel pa las kyang 'dis byang chub thob par dka' ba bston pa ste/ mdo dag las don rnam pa bcus byang chub kyi snying po la gnas par 'gyur zhes gsungs te/ sa thams cad g.yo bar mdzad pa nas sems can thams cad bsdu bar mdzad nas gdod byang chub kyi snying po la bzhugs so//bdud btul ba yang sangs rgyas shAkya thub pa ni sngar mngon par byang chub ste/ phyis bdud btul zhes kyang 'byung / mdo gzhan dag las sngar bdud btul te phyis mngon par byang chub ces kyang 'byung /sangs rgyas byams pa ni nam rab tu byung ba'i nyin par byang chub kyi snying po la reg par 'gyur/ sangs rgyas shAkya thub pa ni lo drug gi bar du ni dka' ba spyad nas gzod sangs rgyas bcom ldan 'das 'di bskal pa bcu'i bar du gzhes shing chos mngon du ma gyur te zhes gsungs so/ / mdo las 'di ltar yang dge slong bcom ldan 'das de zhes pa nas seng ge'i khri chen po 'phang du dpag tshad brgya pa bshams zhes pa'i bar du ni bzhugs pa bstan te/ lha thams cad kyis bcom ldan 'das kyi gdan bshams zhes pa'i don to/ /mdo las bcom ldan 'das de byang chub kyi snying por bzhugs ma thag tu zhes pa nas bcom ldan 'das de la mngon par bab po zhes pa'i bar du ni bcom ldan 'das de la me tog gi phung po ri rab tsam spungs te mchod pa dang sbyar na longs spyod pa'i sku yin par mngon no//mdo las rgyal chen bzhi'i ris kyi lha'i sras po zhes pa nas rgyun mi 'chad pa rab tu bsil to zhes pa'i bar du ni rol mos dgyes pa bskyed cing mchod pa'o//mdo las de na dge slong rnams la zhes pa nas mngon par sangs rgyas so zhes pa'i bar du ni 'bras bu brnyes pa bstan to/ /mdo las de ltar mngon par sangs rgyas ma thag tu zhes pa nas ye shes 'byung gnas zhes bya bar gyur to zhes pa'i bar du ni 'di man chad chos kyi 'khor lo bskor ba bstan te/sngar mchod pa byas nas chos kyi 'khor lo bskor bar gsol ba dang / phyis kyang de bzhin gshegs pas phyogs bcu'i lha dang tshangs pa la bshad par gnang ba ste/ dang po la yang sngar rgyal bu bcu drug gis mchod de chos bshad par gsol ba dang /phyis lha tshangs pas mchod de gsol ba'o/ /de yang gnyen rnams mngon du gyur pa dang / mngon du ma gyur pa'o/ /chos bshad par gsol ba yang sngar bcom ldan 'das kyi drung du dong ba dang / phyis bstod de mngon par gsol ba'o//bcom ldan 'das kyi gan du 'gro ba yang so so'i 'khor dang gnyen du bcas te dong ba bstan to/ /mdo las 'di ltar dge slong rnams rgyal bu gzhon nu bcu drug po de dag ces pa nas gang na ba der dong ngo zhes pa'i bar du ni bcom ldan 'das kyi gan du chas pa bstan to//mdo las bcom ldan 'das 'di la bkur sti byas zhes pa nas/ khyod ni rab zhi zag pa med la gnas nas zhes pa'i bar du ni phyag 'tshal ba ni lus kyis phyag 'tshal ba dang / ngag gis bstod de phyag 'tshal ba'o/ /bcom ldan 'das la bstod pa yang dgongs pa'i smon lam rdzogs pa'i sgo nas bstod pa dang /sngon mdzad pa'i yon tan gyi sgo nas bstod pa'o/ /stan gcig de la bzhugs te zhes pa ni rnam pa bcu ste/ 'khor los sgyur ba'i rgyal po'i tshul du bzhugs pa ste dge ba bcu la gnas pa dang / rgyal po bzhi'i tshul du bzhugs pa ste/ 'jig rten pa thams cad kyis de bzhin gshegs pa'i chos spyad pa la rang dbang yod par mos pas gnas pa dang / brgya byin gyi tshul du bzhugs pa ste sems can thams cad la dbang du gyur pas bzhugs pa dang / tshangs pa'i tshul gyis bzhugs pa ste / bdag dang gzhan gyis sems la dbang du gyur pas bzhugs pa dang /seng ge bzhin zab mo ston pa la bsnyengs pa med pas bzhugs pa dang / yang dag pa'i chos la bzhugs pa ste/ gzungs dang mthu ston par bzhed pas bzhugs pa dang / shin tu brtan pa'i ting nge 'dzin du bzhugs pa ste/ byang chub chen po'i mtha' la bzhugs pa dang /thugs rje chen po la gnas pas sems can thams cad dga' ba bskyed pa dang / thugs rje chen po la bzhugs pa ste/ nyon mongs pa'i sdug bsngal thams cad bzod par bzhugs pa dang / rdo rje la bzhugs pa ste/ bdud dang log par lta ba thams cad 'joms pas bzhugs pa'o//de la 'di ni shin tu brtan pa'i ting nge 'dzin dang rdo rje la bzhugs pa dang sbyar ro/ /zhi ba zhes pa ni sems zhi ba'o/ /mi g.yo ba zhes ba ni lus mi g.yo ba'o/ /mdo las/ dge ba dang ni bde ba dga' ba dang / /zhes pa nas / mi dbang seng ge bdag cag dge bar skyes/ /zhes pa'i bar du ni bcom ldan 'das mngon par byang chub pas 'gro ba thams cad dga' ba skyes zhes pa'i don to//mdo las/ skye dgu 'di kun mgon med sdug bsngal ba/ zhes pa nas/ de na rgyal ba'i sgra yang thos pa med/ /ces pa'i bar du ni sems can rnams sdig pa'i grogs po dang bsten pa dang / dge ba'i bshes gnyen dang phrad par ston to/ /sdug bsngal zhes pa ni sdug bsngal gyi bden pa'o/ /mi shes zhes pa ni lam gyi bden pa'o/ /mun gang zhes pa ni kun 'byung gi bden pa'o/ /thar pa zhes pa ni 'gog pa'i bden pa ste/ de ma spangs te mngon du ma byas zhes pa'i don to/ / mdo las/ 'jig rten rig pa khyod kyis deng thob pa/ /zhes pa nas/ mgon po khyod la rab tu skyabs su mchi/ /zhes pa'i bar du ni dge ba'i bshes gnyen dang phrad pa bstan pa'o/ /mdo las de ltar dge slong rnams zhes pa nas tshigs su bcad pa'i 'di skad gsol to zhes pa'i bar du ni chos kyi 'khor lo bskor bar gsol ba'o//phan pa zhes pa ni legs pa bstabs pa'o/ /bde ba zhes pa ni sdug bsngal las gdon pa'i phyir chos bshad du gsol zhes pa'o/ /mdo las bsod nams brgya'i mtshan can zhes pa nas 'jig rten rnams la shod cig ces pa'i bar du ni bcom ldan 'das la phyi nang gi yon tan thams cad tshang pa'i phyir chos bshad par gsol ba dang /phan ba chen po thob pa dang / de bzhin gshegs pa'i mkhyen pa bsgrags pa'i phyir chos bshad par gsol ba'o/ /mdo las bdag cag rnams dang zhes pa nas sems can 'di rnams kyis ni thob par ro zhes pa'i bar du ni phan pa chen po thob pa'i phyir chos bshad par gsol pa'o//mdo las kun mkhyen pa ni zhes pa nas dam pa rab tu bskor zhes pa'i bar du ni de bzhin gshegs pa'i mkhyen pa bsgrags pa'i phyir gsol ba ste/ mos pa sna tshogs mkhyen pa dang / lam sna tshogs mkhyen pa dang /dbang po rab 'bring mkhyen pa dang / sngon gyi gnas mkhyen pa la sogs te mkhyen pa 'di dag dang ldan zhes pa'o/ /mdo las de nas dge slong rnams zhes ba nas snang ba chen pos khyab par gyur to zhes pa'i bar du ni tshangs pa'i rgyal pos mchod de chos kyi 'khor lo bskor bar gsol ba'o//de'i tshe nas g.yo ba dang / 'od kyis snang bar byas pa'o/ /mdo las 'jig rten thams cad kyi bar gyi 'jig rten na zhes pa nas phan tshun du smra'o zhes pa'i bar du 'khor yug chen pos bskor ba'i ri brags kyi phugs na gnas pa'i sems can snang bar byas pa'o/ /mdo las 'jig rten gyi khams de thams cad dang zhes pa nas snang ba chen po byung bar gyur to zhes pa'i bar du tshangs pa'i gzhal med khang la sogs pa g.yo bar byas pa'o//mdo las de nas shar phyogs kyi 'jig rten gyi khams zhes pa nas tshigs su bcad de smras pa zhes pa'i bar du ni de dag chos nyan pa yang dang po 'od kyis bskul ba dang /bcom ldan 'das kyi gan du phyin pa dang / chos bshad par gsol ba dang / cang mi gsung bar gnang bar shes pa ste/ bsam gtan la gnas pa'i lha thams cad lhags zhes pa'o/ /mdo las/ bdag cag thams cad de ring shin tu dga'//zhes pa nas/ 'di ltar phyogs bcu kun tu deng dpal 'bar/ /zhes pa'i bar du ni lha rnams kyis bstod de chos bshad par gsol ba'o/ /mdo las de nas dge slong rnams zhes pa nas/ nub phyogs su dong nas mthong ba zhes pa'i bar du ni 'od gang nas 'byung ba logs su tshol zhing dong ba bstan to //mdo las de nas dge slong rnams zhes pa nas gzhal med khang bcom ldan 'das de la phul zhes pa'i bar du ni lha'i gzhal med khang bzhes par gsol pa dang / bcom ldan 'das cang mi gsung bas gnang bar shes pa dang / tshangs pa rnams gzengs bstod cing dge ba la dgod pa ste/'os 'os su sbyar ro/ /mdo las/ tshad med rgyal ba ngo mtshar 'gyur / /zhes pa nas/ 'jig rten rig pa ji ltar dgyes bzhin spyod/ /zhes pa'i bar du ni gzhal med khang dbul ba dang / bstod de phyag 'tshal ba'o/ /mdo las de nas dge slong rnams tshangs pa chen po de dag ces pa nas de bzhin gshegs pa la gsol ba lags zhes pa'i bar du ni chos kyi 'khor lo bskor bar gsol ba'o//mdo las dge slong dag de nas tshangs pa chen po zhes pa nas/ de nas dge slong rnams bcom ldan 'das des tshangs ba de rnams la cang mi gsung bar de na bzhugs so zhes pa'i bar du ni chos bshad par gnang ba'o//de nas yang dge slong rnams zhes pa nas phan tshun dong zhing smra'o zhes pa'i bar du ni tshangs pa rnams la bskul ba'o/ /de nas dge slong rnams zhes pa nas gdon mi za bar 'byung bar 'gyur zhes pa'i bar du ni lha rnams kyis gsol ba'o//de nas dge slong rnams tshangs pa bye ba khrag khrig ces pa nas gshegs su gsol zhes pa'i bar du ni chos bshad par gsol ba dang / mchod par gsol ba'o/ /de nas dge slong rnams tshangs pa chen po de dag gis zhes pa nas phyag kyang 'tshal zhes pa'i bar du ni bstod de phyag 'tshal ba'o//mdo las/ ngo mtshar gyur pa brgya la 'jig rten du/ /zhes pa nas rtag tu mnyam par gyur zhes pa'i bar du ni 'jig rten du gshegs pa dkon pa bstan pa'o/ /mdo las bskal pa khrag khrig brgyad cu zhes pa nas/ bsod nams kyis ni 'jig rten zhes pa'i bar du ni spyan du gyur pa dang skyabs su gyur ba bstan to//mdo las de nas dge slong rnams zhes pa nas dul zhing zhi la rab tu bde bar 'gyur zhes ba'i bar du ni de bzhin gshegs pa la bstod pa dang / zhi zhing dul bas 'phags pa'i lam bsgrub pa bstan to/ /mdo las de nas dge slong rnams bcom ldan 'das de zhes pa nas mi gsung bar bzhugs so zhes pa'i bar du ni gnang ba bstan to//mdo las de nas yang dge slong rnams zhes pa nas yang na 'dir ni sangs rgyas mngon par byung zhes ba'i bar du ni gong ma dang 'dra bar sbyar ro/ /chos bshad par gsol ba'o/ /mdo las de nas dge slong rnams 'jig rten gyi khams zhes pa nas/bdag cag la ni brtse phyir yongs su spyod/ /ces pa'i bar du ni bshad pa'i tshul gong ma dag dang 'dra bar sbyar ro/ /mdo las de nas dge slong rnams tshangs pa chen po de dag ces pa nas byang chub mchog la reg par ro zhes pa'i bar du ni lam 'di sdig can zhes pa ni khyim na gnas pas sdig pa spyod pa mu stegs can spyod pa ngan pa la gnas pa sdig spyod pa'o//bde ba'i 'du shes ni gnyen pos gnas pa ste/ sdug bsngal skad cig tsam zhi ba la bde bar sems pa la bde ba de nyid kyang stor zhes pa'o/ /mdo las de nas dge slong rnams tshangs pa chen po de dag gis zhes pa nas bskal pa bye ba stong du bsgrubs pa'o zhes pa'i bar du ni bstod de bshad par gsol ba'o//mdo las de nas dge slong rnams bcom ldan 'das mngon par shes pa chen po'i ye shes kyi zil gyis gnon zhes pa nas rnam pa bcu gnyis su bskor ba zhes pa'i bar du ni de ltar chos bshad par gnang nas bshad do zhes pa dang /gzhan gyis mi nus zhes pa dang / bshad pa'i dus dang / bshad pas phan pa thob pa dang bzhir dbye ste/ 'di ni dang po'o/ /chos kyi 'khor lo gsum du bzlas te zhes pa ni bdag gi don dang / gzhan gyi don la 'di ni gzhan gyi dang sbyar ro/ / sdug bsngal zhes pa ni sdug bsngal gyi bden pa ste/ mtshan nyid de bstan pa'i phyir chos kyi 'khor lo bskor ba'o/ /'khor lo'i don ni gong du bstan pa yin/ 'khor lo de bskor bas zag pa med pa'i ye shes skye bar 'gyur ba'i phyir bstan to/ /lan gsum bzlas pa yang de gcig cing yang mtshan nyid bcu gsum dang ldan par ston pa'o//dge sbyong dang / tshangs pa gzhan gyis bskor mi nus kyi bcom ldan 'das thams cad mkhyen pa nyag gcig gis zhes pa'o/ /mdo las 'di lta ste 'di ni sdug bsngal lo zhes pa nas 'gro ba bsgrub pa'i bden pa'o zhes pa'i bar du ni chos kyi 'khor lo bskor ba yang bden pa bzhi la brten te bskor ba dang /rten cing 'brel par 'byung ba bcu gnyis la brten te bskor ba'o/ /sdug bsngal ba ni 'jig rten rnam gnyis kyi chos zag pa dang bcas pa thams cad do/ /kun 'byung ni sdug bsngal skye zhing 'byung ba'i rgyu 'byin pa las dang nyon mongs pa'i rang bzhin can no//'gog pa ni yang dag pa dang brtags te 'gog pa dang / mi g.yo ba dang / 'dus ma byas 'gog pa'i bden pa ste/ yang dag pa'i lam gyis sdug bsngal mi skye bar gyur pa'o/ /lam ni zag pa med pa'i phung po lnga ste/tshogs sogs pa'i lam dang / lhag par spyod pa'i lam dang / mthong ba'i lam dang / bsgom pa'i lam dang / mthar gyur pa'i lam ste/ lam gyi 'khor rnams thams cad ni lam gyi bden pa'o/ /bden pa zhes pa ni 'phags pa rnams kyis chud pa'i chos pas 'phags pa'i bden pa'o//mdo las rten cing 'brel par 'byung ba zhes ba nas 'gag par 'gyur ro zhes pa'i bar du ni rten cing 'brel par 'byung ba lugs las bzlog pa bstan pa ste/ nyon mongs pa dang / rnam par byang ba'i tshul ci rigs par sbyar ro/ /ma rig pa zhes pa ni nyon mongs pa mi shes pa'i rang bzhin can/'du byed ni lus dang ngag dang yid gsum gyi sgo nas dge ba dang mi dge bar 'jug pa'o/ /rnam par shes pa zhes pa ni rnam par smin pa'i rang bzhin can sa bon gyi bag chags su gnas pa'i rnam par shes pa'o/ /ming dang gzugs zhes pa ni de'i 'og ma'i rkyen gsum spangs pa thams cad ni ming dang gzugs so//skye mched drug ni rnam par smin pa'i dbang po drug can no/ /reg pa ni rnam par smin pa'i reg pa myong ba nyid reg pa'o/ /tshor ba ni rnam pa gsum myong ba'o/ /sred pa ni phyi nang gi yul la che chung rnam pa gsum du zhen pa'o/ /len pa ni nyon mongs pa'i bdag nyid can gzung ba dang 'dzin pa'i chos kyi nyon mongs pa'i phung po len pa'o//srid pa ni rnam par smin pa'i 'bras bu 'khor ba len cing khams gsum du 'byung zhes pa'i don to/ /skye ba ni rgyus 'phags nas 'bras bu len pa'o/ /rgas pa ni 'bras bu'i mthar gyur pa'o/ /slos ba'i mya ngan zhes pa ni 'chi khar yid kyis gdung ba'o//smre sngags 'don zhes pa ni tshig tu 'don pa'o/ /yid mi bde ba dang 'khrug pa ni nang gi gdung ba ste/ zhib tu chos mngon pa dang / rnal 'byor spyod pa las 'byung ba bzhin du chos kyi 'khor lo bskor ba'o/ /mdo las de ltar dge slong rnams zhes pa nas bsam gtan byed par gyur to zhes pa'i bar du ni so so nas bde ba thob pa bstan to//len pa zhes pa ni chags pas te/ chos rnams la chags pa med pa nyid rnam par grol ba'o/ /mdo las de nas yang mthar gyis zhes pa nas rnam par grol lo zhes pa'i bar du ni de'i 'og ma rnams kyang de bzhin du rnam par grol ba thob po zhes pa'o//mdo las de'i 'og tu dge slong pha rnams zhes pa nas grangs bsgrang ba las 'das par gyur pa'o zhes pa'i bar du ni nyan thos pa rnams kyi 'khor bstan to/ /mdo las de nas dge slong rnams yang de'i tshe zhes pa nas byang chub 'dod pa zhes pa'i bar du ni rjes su chos ston pa ste/rgyal bu bcu drug gi yon tan ni 'khor ba'i dra ba gcod pas rab tu byung ba chos thos bas dbang po rno ba/ rang bzhin gsal bas shes rab rno ba/ sngon de bzhin gshegs pa la bsnyen bkur byas pas dge ba'i bshes gnyen dang phrad pa dang /tshul khrims gtsang mas 'bras bu chen po la re ba'o/ /mdo las de nas dge slong rnams dge sbyong de dag gi zhes pa nas bdag cag gi bsam pa yang mkhyen te zhes pa'i bar du ni sngar nyan thos pa rnams de dang mthun pa'i chos bshad/ byang chub sems dpa'i rigs can rnams la theg pa chen po bshad du gsol zhes pa'o//mdo las de nas de dag dge slong rnams de'i tshe na zhes pa nas rab tu byung bar gyur to zhes pa'i bar du ni de dang mthun pa'i 'khor rnams rab tu byung ba'o/ /mdo las de nas dge slong rnams zhes pa nas de dag thams cad la rgyas par bshad do zhes pa'i bar du ni 'dis ni sems can gyi dbang po smin pa'i phyir bskal pa stong phrag nyi shu'i 'og tu bshad pa'i dus la bab pa dang /bshad par bya ba'i chos gang yin pa bstan pa'o/ /mdo las de nas yang dge slong rnams zhes pa nas khong du chud do zhes pa'i bar du ni dge slong rnams kyis chud par bstan to //mdo las de nas dge slong rnams zhes pa nas the tshom zab thob par gyur to zhes pa'i bar du ni 'dis dbang po'i rim pa ston te/ dbang po rnon po dang bar mas rnam par grol ba thob pa dang / dbang po tha ma the tshom du gyur pa ste/ chos 'di go dka' bar ston to //mdo las de nas dge slong rnams bcom ldan 'das zhes pa nas gtsug lag khang du zhugs so zhes pa'i bar du ni sras rnams dbang po smin cing sems can sgrol nus par bstan pa'i phyir bcom ldan 'das ting nge 'dzin du zhugs pa bstan pa'o/ /mdo las de nas dge slong rnams dge sbyong de dag gi zhes pa nas rgyas par bshad do zhes pa'i bar du ni sras rnams chos ston pas 'gro ba rnams kyi bde ba rnyed pa bstan pa'o//mdo las byang chub sems dpa' re res kyang zhes pa nas yongs su smin par byas so zhes pa'i bar du ni/ bden pa dngos bstan pa dang /mos pa rnyed pa rnams spro bar byas pa dang / nyams kyis dogs pa rnams gzengs bstod de dga' bar byas pa dang / 'bad pa rnams bstod cing byed du gzhug pa zhes pa'o/ /mdo las de nas dge slong rnams zhes pa nas brgya stong mang po la chos ston to zhes pa'i bar du ni dge sbyong drug cu po de dag la bstod pa dang lung bstan pa ste/bstod pa yang ngo mtshar du gyur pa dang / dbang po rno ba dang / rig pa dang ldan pa dang / 'phags pa rnams la bsnyen bkur byas pa dang / dka' ba spyod pa dang / de bzhin gshegs pa'i ye shes 'dzin pa dang / sems can rnams la chos ston pa'o//mdo las 'di lta ste dge slong rnams zhes pa nas sangs rgyas so zhes pa'i bar du ni sangs rgyas de dag ni nyon mongs pas mi bsgul ba dang / yon tan 'phags pa dang / seng ge bzhin sgra mi 'jigs pa sgrogs pa dang / bdud kyi dpung 'joms pa la btags so/ /mdo las lho phyogs na zhes pa nas/sangs rgyas so zhes pa'i bar du sangs rgyas kyi mtshan de dag nyon mongs pa 'joms pa dang / yon tan gyi mtshan nyid la gnas pa dang / bdag dang gzhan gyi don mdzad pa las btags pa las zhes par bya'o/ /mi mjed ces pa ni 'jig rten gyi khams de sdug bsngal sna tshogs spyod pa la ji mi snyam pa'i phyir mi mjed pa dang /shAkya thub pa'i sangs rgyas kyi zhing ngo / /mdo las dge slong rnams zhes pa nas ye shes de la mos par dka'o zhes pa'i bar du ni mdo sde 'di la 'jug par dka' ba'i phyir sngar drang pa'i don bstan/ phyis nges pa'i don bstan cing mos pa skyes pa'o//mdo las de ci'i phyir zhe na zhes pa nas dge slong rnams nga byang chub sems dpar gyur to zhes pa'i bar du ni bsdus pa'o/ /mdo las nga mya ngan las 'das nas zhes pa nas mya ngan las 'da' bar 'gyur ro zhes pa'i bar du ni 'phags pa nyan thos pa rnams mthar bla na med pa'i sangs rgyas su grub par 'gyur ro zhes pa ni sangs rgyas bzhugs te/dge ba'i bshes gnyen gyis bla na med pa'i gnas su bsgyur ba bzhugs na ni de ltar yang rung na sangs rgyas mi bzhugs pa'i khams su nyan thos la sogs pa'i rigs su sems bskyed pa rnams byang chub sems dpa' spyod pa rgya chen po ma thos pa'i rnams thal byung nyan thos pa'i rigs su ltung zhing lhag ma ma lus pa'i mya ngan las 'das par mi 'jug gam zhes pa'i dogs pa bsal ba'i phyir 'di smras pa ste/de la yang dang po gleng ba dang / de yang sangs rgyas su grub pa dang / de grub pa'i gtan tshigs te/'di ni dang po'o/ /mdo las yang dge slong rnams 'jig rten gyi khams gzhan du zhes pa nas ye shes tshol zhing skye'o zhes pa'i bar du ni de sangs rgyas su grub pa bstan te/ bcom ldan 'das khams 'dir mya ngan las 'das pa ston kyang yul khams gzhan du sems can gyi don mdzad par nyan thos rnams kyang der skye ba dang /der skye ba yang nyan thos kyi bskal pa smin pa dang / de bzhin gshegs pa'i thugs rjes kyang skyabs te/ der skye bas sangs rgyas su lung ston to/ /mdo las de nas yang de bzhin gshegs pa'i zhes pa nas yin par rig par bya ba zhes pa'i bar du ni de grub pa'i gtan tshigs bstan te/theg pa de gnyis kyang mthar theg pa chen por 'du ste/ mya ngan las 'das par 'gyur gyis logs shig na mya ngan las 'das pa med de/ gnyis dang gsum bstan pa yang sems can gyi dbang po mi mthun pa las thabs kyis bshad par zad kyi nges par gnyis dang gsum du med do//mya ngan las 'das pa chen po'i mdo las kyang / mya ngan las 'das pa ni ji lta bu/ mya ngan las 'das pa chen po ni ji lta bu zhes dris pa dang / nyan thos dang rang sangs rgyas bskal pa brgyad khri'am/ drug khri'am/ bzhi khri'am/ nyi khri'am/ khri gcig gi bar du bzhugs pa'i gnas de ni mya ngan las 'das pa'o//'phags pa chos kyi rgyal po'i gnas de ni mya ngan las 'das pa chen po zhes gsungs so// // dam pa'i chos puN+Da rI ka'i 'grel pa/ bam po brgyad pa ste tha ma / mdo las dge slong rnams gang gi tshe na zhes pa nas bsam gtan chen po dang ldan pa gzigs na zhes pa'i bar du ni rnam pa gsum du dbye ste/don dang / dpe dang / bsdu ba'o/ /dang po la yang rnam pa gnyis te/ sngar ni nges pa'i don bstan phyis ni drang ba'i don bstan yang spyir ni rnam pa gnyis te/ dbang po smin pa'i dus dang / theg pa gcig tu bshad pa'o//dbang po smin pa yang mya ngan las 'da' ba'i dus su bstan pa dang / nyon mongs pa zad cing rnam par byang ba bstan pa dang / theg pa rnam pa gsum nyon mongs pa las 'byung bar bstan pa dang stong pa nyid rtogs pa dang / ting nge 'dzin la mnyam par 'jog pa ste/ ting nge 'dzin ni bsam gtan bzhi dang /dgu las ldang ba dang / 'jug pa bstan to/ /mdo las dge slong rnams de bzhin gshegs pa zhes pa nas gsum du lta smos pa'i bar du ni theg pa gcig po'i don bstan te/ dgongs pa nges par 'grel pa las ni theg pa rnam bzhir bstan pa ni nges pa'i don te/theg pa gcig pu ston pa ni bkri ba'i don zhes ston te/ 'dis ni byang chub kyi sems las log pa rnams zlog pa'i don du ston pas 'dir theg pa gcig pu 'di nges pa'i don du ston to/ /mdo las dge slong rnams 'di ni zhes pa nas mya ngan las 'da' ba 'chad do zhes pa'i bar du ni 'dis dang ba'i don gyi gtan tshigs bstan te/sems can dad pa mi mthun pa rnams so so'i yid dang mthun par thabs kyi chos ston te/ sems can dbang po zhan pa 'dod pa rnam lnga las zlog pa'i don tsam du 'khor ba las zlog pa bstan/ de las bzla ba'i phyir theg pa gcig po rin po che'i 'byung gnas su 'dzud do//mdo las 'di lta ste dge slong rnams dpe las zhes pa nas lhag par gyur to zhes pa'i bar du ni dpe 'dis ni sngar drang ba'i don gyi dpe bstan/ phyis ni nges pa'i don gyi dpe ston te/ de drang ba'i don la yang dpe rnam pa bzhi ste/ mya ngan dgon pa las bsgral ba'i dpe dang /'khor rnams sems nur ba'i dpe dang / tshong dpon thabs mang po ston pa'i dpe dang / gling du lta ba ston pa'i dpe dang / 'di ni dang po'o/ /dpag tshad lnga brgya zhes pa ni 'gro ba rnam lngar 'khor ba'o/ /rin po che'i gling zhes pa ni mya ngan las 'das pa'i gling ngo / / mdo las de dag las mya ngan las 'das pa'i mtshan ma gcig po zhes pa nas de dag sgrol lo zhes pa'i bar du/ mtshan ma zhes pa ni sangs rgyas bcom ldan 'das te / de'i yon tan yang lnga'o/ /gsal ba zhes pa ni dbang po rno ba'o/ /mkhas pa zhes pa ni dge ngan 'byed pa'o/ /rig pa zhes pa ni don dam pa dang kun rdzob rig pa'o//dge ba zhes pa ni yon tan thams cad dang ldan pa'o/ /lam la sgrol ba ni 'gro ba rnam lnga las sgrol ba'o/ /mdo las de dag 'gro ba mang po zhes pa nas slar ldog go zhes pa'i bar du ni 'dis ldog pa'i dpe bstan te/ theg pa chen po'i sgrub pa bskal pa drug cu'i bar du dka' ba spyod pa byang chub sems dpa' spyod pas dub pa dang /'phags pa'i spyod pas skrag cing 'bras bu chung ngu la gzhol bar sems pa'o/ /mdo las de nas dge slong rnams zhes pa nas grong khyer mngon par sprul zhes pa'i bar du ni sprul pa'i grong khyer bstan pa'i dpe ste/de la yang sems su gzhug pa dang / grong khyer bstan pa dang / der 'jog pa dang / grong khyer de'i yon tan bstan pa dang bzhi ste/ 'di ni dang po'i gnyis pa dang sbyar ro/ /theg pa chen po bsdus pa las kyang ji ltar lha'i rnga ched du bsams pa med pa 'bad pa med par sgra 'byung ba bzhin de bzhin gshegs pa'i thugs rjes sems can rnams la nyin lan gsum mtshan lan gsum gzigs pa yang lhun gyis grub pa'i dbang gis dgongs zhes pa'i don to//dpag tshad brgya 'am nyis brgya zhes pa ni 'khor ba'i gnas dang sdug bsngal gyis ci rigs par sbyar ro//grong khyer zhes pa ni bsam gtan dang ting nge 'dzin gyi grong khyer te/ theg pa chen po'i mya ngan las 'das pa nyid dang sbyar ro/ /mdo las des skyes bu de dag la zhes pa nas rin po che'i gling der dong ngo zhes pa'i bar du ni der gnas pa dang / 'jigs pa med pa dang /grong khyer der zhugs pa'i yon tan bstan to/ /der 'jug pa'i yon tan yang bde ba thob pa dang / sdug bsngal zhi bar gyur pa'o/ /mdo las de nas dge slong rnams zhes pa nas bsil bar 'du shes so zhes pa'i bar du ni dub pa rnams bsti ba'i dpe bstan pa ste/ de la yang rnam pa gnyis so//sngar slob pa rnams sems bsdu zhing brtson pa bskyed pa dang / phyis mi slob pa rnams rnam par grol ba'i lam la gzud cing lhag ma dang bcas pa'i mya ngan las 'das par 'gyur ba'i 'chi 'pho las ma bral ba'i phyir grong khyer du zhugs pa'i bsam pa bskyed pa dang /mi slob pa'i sa thob pa 'gog pa dang / lam gyi mthar phyin pa dag kyang rgal ba dang bsil ba'i 'du shes bskyed pa'o/ /mdo las mtshan mas ngal sos par shes nas zhes pa nas khyed 'dod ngo zhes pa'i bar du ni/ dpe rnam pa gnyis la 'di ni nges pa'i don bstan te/sngar ni sprul pa bstan/ phyis ni yang dag pa bstan te/ sprul pa'i grong khyer zhes pa ni theg pa rnam pa gnyis kyi gnas te bsti ba'i gnas de bsti ba'i gnas dang 'dra bar bstan pa yin gyi/ theg pa chen po rin po che'i 'byung gnas de nas nye zhes par dpe smras pa yin no/ /mdo las de bzhin du dge slong rnams zhes pa nas spang bar bya'o zhes pa'i bar du ni don phyi ma deng sbyar ba ste/sngar ni drang ba dang sbyar phyis ni nges pa dang sbyar te/ 'khor ba dang sdug bsngal las rgal ba dang spangs pa'o/ /mdo las de nas sems can 'di dag ces pa nas mi rung gi zhes pa'i bar du ni 'dis ni byang chub sems dpa'i spyod pa dka' ba la sems zhum pa bstan pa'o//mdo las de bzhin gshegs pas zhes pa nas sa gnyis bstan to zhes pa'i bar du ni dpe dang don du sbyar ba ste/ sa gnyis zhes pa ni dbang po gnyis kyis bslab par bya ba dang / ye shes gnyis pas chud par bya ba'i sa'o//mdo las dge slong rnams gang gi dus na zhes pa nas thabs mkhas pa'o zhes pa'i bar du ni dpe 'og mas nges pa'i don dang sbyar ba ste/ bya ba ma byas zhes pa ni skye ba'i lhag ma lus pa'o/ /gang skye ba'i lhag ma lus pa ni tshangs par spyod pa ma spyad pas mthar ma phyin pa dang sbyar ro//ltos shig rtogs shig pa ni sdug bsngal dang kun 'byung gi ye shes la 'jug pa'o/ /mdo las de nas bcom ldan 'das kyis zhes pa nas rgyal ba de la mchod cing bkur sti byed ces pa'i bar du ni 'di man chad tshigs su bcad pa bzhi bcu rtsa dgu las sum cu rtsa phyed dang gcig gis ni sngon gyi rgyu bstan/de'i 'og ma rnams kyis ni da ltar gyi 'bras bu bstan to/ /mdo las/ de nas rgyal bas sdug bsngal ba/ /zhes pa nas/ tshangs pa'i gzhal med khang rnams rab tu bskyod/ /ces pa'i bar du ni chos bshad par gsol ba ste ci rigs par sbyar ro//mdo las shar phyogs su bye ba stong phrag ni zhes pa nas/ mi yi 'chi bdag de yang shes par bya/ /zhes pa'i bar du ni chos bshad par gsol ba dang / yang dag par ston pa 'chad pa dang / sems can rnams kyis phan pa thob pa'o/ /mdo las/ de yi chos rnams bshad ma thag tu ni//zhes pa nas de dag mthar mi phyin zhes pa'i bar du ni sems can gyi phan pa thob pa bstan to/ /mdo las/ rgyal bu bcu drug de dag kyang / /zhes pa nas/ ji ltar dpa' bo spyan gtsang khyod bzhin du/ /zhes pa'i bar du ni chos kyi sras kyi rgyud bsam pa bstan te/ mdo las 'byung pa bzhin du go bar gyis shig /mdo las/ rgyal ba des ni de dag bsam mkhyen nas/ /zhes pa nas/ dge slong gnas brtan 'jigs par ma byed cig /ces pa'i bar du ni tshig lhug pa dang sbyar zhing go bar gyis shig /mdo las/ ji ltar dgon pa ma rungs 'jigs par 'gyur //zhes pa nas/ dgon pa mya ngan rab tu 'jigs pa yi / /zhes pa'i bar du ni 'di man chad tshigs bcad bcu dgus 'bras bu thob pa dang / bkri ba'i don spangs shing nges pa'i don la 'jug pa bstan to/ /gcan gzan 'jigs pa las sgrol ba ni nyon mongs pa'i las sna tshogs so//chu zhes bya ba ni de bzhin gshegs pa'i bstan pas dbugs 'byin zhes pa'o/ /mdo las srog chags bye ba stong po dag skye'o zhes pa nas/ ldog par dga' zhes pa'i bar du ni ldog pa'i dpe bstan to/ /mdo las/ de nas mkhas shing rtogs pa de yin zhes pa nas phyir zlog pa zhes pa'i bar du ni sprul pa'i grong khyer shom pa'i dpe'o//mdo las/ 'di ltar nga yi rdzu 'phrul stobs kyis deng / /zhes pa nas/ skyes pa bud med mtshungs med ldan/ /zhes pa'i bar du ni grong khyer mngon par sprul pa nyid bstan te/ grong khyer zhes pa ni mya ngan las 'das pa'i grong khyer ro//khang pa zhes pa ni stong pa nyid kyi mtha' ste/ mdo dag las kyang don dam pa'i stong pa nyid ni khang pa/ byang chub kyi yan lag ni me tog gi rgyan/ gzungs ni skyed mos kyi ra ba/ chos chen po ni tshal/ bsam gtan dgu ni chu'o/ /rnam par thar pa brgyad ni rdzing bu/ rnam par thar pa gsum ni sgo khang / mtho ba dang mdzes par brgyan pa ni mu stegs can las 'phags pa'i dpe yang dag pa/ bden pa'i chos ni stong pa nyid kyi ye shes/ snying rje chen po ni bu mor blta'o/ /mdo las/ sprul pa byas nas de la 'di skad smra/ /zhes pa nas/ zhugs te don rnams rab tu myur bar byos//zhes pa'i bar du ni 'jug par gzhon gdab pa'o/ /mdo las/ mya ngan 'das shing sems ni dga' bar byos/ /zhes pa nas/ de nas de dag thams cad mthar 'gro ba/ /zhes pa'i bar du ni dub pa bsti ba'i dpe bstan to/ /mdo las/ thams cad ngal sos pa yi tshul rig nas//zhes pa nas/ gling du 'gro ba'i phyir ni brtson 'grus bskyed / /ces pa'i bar du ni nges pa'i don ston pa'i dpe'o/ /mdo las/ dge slong de bzhin nga yang 'dren pa ste/ zhes pa nas khyed cag bya ba byas zhes pa'i bar du ni/ 'di man chad dpe dang don du sbyar ba dang / bkri ba'i don dang /nges pa'i don ston te/ 'di ni dang po'o/ /mdo las/ dus su nam zhig gnas 'dir 'dug pa yi/ /zhes pa nas/ chos 'di ji bzhin yang dag don bshad do/ /zhes pa'i bar du ni yang dag par ston pa'i gleng ba'o/ /mdo las/ drang srong chen pos theg pa gsum bstan pa/ / zhes pa nas/ sangs rgyas gyur nas mya ngan 'das pa yin/ /zhes pa'i bar du ni drang ba'i don bor la/ nges pa'i don la zhugs zhes par bstan pa'o/ /mdo las/ 'dren pa rnams kyis bstan pa 'di 'dra'o/ /zhes pa nas/ thams cad mkhyen pa'i ye shes thob par byed/ /ces pa'i bar du ni bsdus pa bstan to// //'di man chad dge slong lnga brgya lung bstan pa'i le'u ste/ gtan tshigs dang / ming dang / dris pa'i lan dang gsum du dbye'o/ /le'u 'di'i ming gdags pa'i gtan tshigs kyang rnam pa bzhi ste/ dbang po'i rim pa bzhin du lung ston pas dbang po rnon po rnams lung bstan pa'i 'og tu lung ston pa 'di 'byung ba dang /lhag pa'i nga rgyal can bsam gtan spyod pa med pa dag sems g.yeng ba bsdus pa'i don theg pa chen po'i dge ba'i rtsa ba yod par mi shes pa'i dper lus la rin po che thogs pa'i dpe bstan te/ ting nge 'dzin dang theg pa chen po la gzhug pa'i phyir le'u 'di ston pa dang /bla na med pa bcu las shes par bya ba bla na med pa bstan pa'i phyir theg pa chen po'i dge ba'i rtsa ba yod pa bstan pa'i phyir le'u 'di bstan pa dang / lung ston pa rnam pa drug la mnyam pa las dgongs te lung ston pa nyid bstan pa'i phyir le'u 'di bshad pa'o//lnga brgya ni grangs so/ /dge slong zhes pa ni dngos po'o/ /lung bstan zhes pa ni don de las mang du btags pa'o/ /le'u 'di'i nang nas rin po che lus la thogs pa'i dpes don ston na ming de las mi gdags par ci'i phyir lung bstan pa'i le'u zhes gdags zhes dri ba dang de ni dbang po smin pa sems skyes pa rnams sngar lung bstan te/de'i 'og tu dpe ston pa'i phyir ming der btags kyang nyes pa med do/ /yang 'khor der dge slong stong nyis brgya lung bstan pa thob na 'dir lnga brgya nyi tsher smos pa ci'i phyir dris pa dang / dge slong de rnams 'khor de nyid na 'dug gi gzhan de na mi 'dug pas mngon du gyur pa rnams lung bstan pa dang /stong nyis brgya ni spyir lung bstan gyi/ 'di ni phye ste lung bstan pa'i phyir zhes kyang 'chad do/ /mdo las de nas tshe dang ldan pa gang po mai tri'i bu zhes pa nas 'di dag thos nas zhes pa'i bar du ni bcom ldan 'das la dang por gus pa bstan pa dang /de'i 'og tu bka' dam pa mnos pa ste/ de'i dang po la yang gus pa'i tshul dang / mnos pa'i don to/ /mnos pa'i don yang nges pa'i don dang / drang ba'i don to/ /bcom ldan 'das kyi che ba nyid ces pa ni/ chos ston par dgongs pa'i ltas 'od kyis khyab par mdzad pa dang /sa g.yo ba dang me tog 'brul bas 'khor gyi rnam pa bskul ba dang gzengs bstod pa la sogs pa mdzad pa'o/ /mdo las ngo mtshar du gyur pa nas zhabs la phyag 'tshal nas zhes pa'i bar du ni bcom ldan 'das la gus pa'i tshul bstan to/ /mdo las ngo mtshar to bcom ldan 'das zhes pa nas mig mi 'dzums par blta'o zhes pa'i bar du ni 'dis sems can gyi bsam pa mkhyen pa bstan to //sngar ni de bzhin gshegs pa'i yon tan bsam gyis mi khyab pa bstan/ de'i 'og tu ni sems kyi rnam pa ci dang cir dgrol ba mkhyen gzigs pa ston pa de yang sangs rgyas nyag cig gis mkhyen gyi/gzhan gyis ni mi nus so zhes par sbyar ro/ /mdo las de nas bcom ldan 'das kyis zhes pa nas mai tri'i bu ltos shig ces pa'i bar du ni bcom ldan 'das kyis dris pa bstan te/ mngon du gyur pa 'di ltos shig ces pa bstan to/ /mdo las 'di ni ngas dge slong gi zhes pa nas mang pos bstod do zhes pa'i bar du ni da ltar gyi yon tan ston te/yon tan de yang sngar ni yon tan gyi spyi bstan/ de'i 'og tu ni yon tan gyi khyad par bstan to/ /mdo las rnam pa mang pos nga'i bstan pa 'di la zhes pa nas gzhan gyi mthar phyin par mi nus so zhes pa'i bar du 'dis ni yon tan gyi khyad par bstan to//mdo las dge slong rnams 'di yid la ji snyam du sems zhes pa nas sangs rgyas bdun po de dag gi tha ma ni nga yin de dag gi yang chos 'chad pa'i mchog tu gyur to zhes pa'i bar du ni yon tan gyi khyad par de dag la yang de bzhin gshegs pa'i bstan pa 'dzin pa dang /'khor dga' zhing phan pa bskyed pa dang / de bzhin gshegs pa'i chos sgrogs pa la mkhas pa dang / tshangs pa mtshungs par spyod pa rnams la phan btags pa dang / spobs pa khyad par can du gyur pa'o/ /stong pa nyid kyis 'gros su zhes pa ni dge ba'i blo gros kyi sa la gnas pa ste/the tshom thams cad spangs pa'o/ /yongs su smin par byas so zhes pa ni chos kyi sprin gyi sa la gnas pas sems can mang po la phan thogs zhes pa'o/ /sangs rgyas kyi zhing yongs su dag par byed pa ni/ lhag ma ma lus pa'i mya ngan las 'da' ba rnams byang chub tu sems bskyed de/theg pa chen po la bkod pas bla na med pa'i byang chub tu bsgyur to/ /byang chub tu bsgyur ba de nyid gzhan gyi don byed pa ste/ sangs rgyas kyi mdzad pa des zhing brgyan zhes pa'o/ /mdo las dge slong rnams bskal pa bzang po 'di la zhes pa nas yongs su smin par byed do zhes pa'i bar du ni de bzhin gshegs pa'i chos 'dzin pa dang /byang chub sems dpa'i spyod pa bstan pa'o/ /mdo las rtag tu rgyun mi gcod do zhes pa nas sangs rgyas bcom ldan 'das te zhes pa'i bar du ni sems can gyi don byed pa dang / byang chub sems dpa'i spyod pa'i lam bstan pa dang /dngos 'bras bu mtshon te lung bstan pa'o/ /mdo las sangs rgyas kyi zhing 'dir zhes pa nas yongs su gang bar 'gyur ro zhes pa'i bar du ni de bzhin gshegs pa'i zhing gi rgyan ston te/ rgyan de yang rin po che las byas pa dang mnyam pa zhes par bsdu'o/ /mdo las lha'i gzhal med khang dang zhes pa nas bud med kyang med de zhes pa'i bar du ni de na dge ba 'ba' zhig ces pa'i don te /lha dang nye ba gcig gis gcig mthong ba/ ngan song gsum med pa/ 'dod chags kyi gzhi med pas rdzus te skye ba sha stag go bar sbyar ro/ /mdo las rdzus te skye ba tshangs par spyod pa zhes pa nas lus brgyan par 'gyur ro zhes pa'i bar du ni lha dang mi'i mtshan nyid ni rdzu 'phrul dang ldan pa/lus 'od can nam mkha' la 'gro ba/ yid brtan pa/ brtson 'grus dang ldan pa/ shes rab can mtshan dang ldan pa zhes dbye'o/ /mdo las dge slong rnams yang de'i dus na zhes pa nas bsam gtan gyi dga' ba'i zas so zhes pa'i bar du ni lus cis bzung ba'i don ston te/mdo las zas rnam pa bzhi dang / dgu dag tu gsungs pa la spyir rnam pa gnyis te/ 'jig rten dang 'jig rten las 'das pa'i zas sam/ zag pa dang bcas pa dang /zag pa med pa'i zas dang / 'jig rten gyi zas ni kham gyi zas dang / reg pa'i zas dang / sems pa'i zas dang / rnam par shes pa'i zas so/ /'jig rten las 'das pa'i zas ni bsam gtan gyi zas dang / smon lam gyi zas dang / dran pa'i zas dang / rnam par thar pa brgyad kyi zas dang /dga' ba'i zas te/ zas de lnga las gtsor smos pa 'di gnyis kyi tshe 'dis 'dzin pa'i don to/ /mdo las/ de'i byang chub sems dpa' zhes pa nas bsam gtan pa sha stag go zhes pa'i bar du 'dis ni byang chub sems dpa' nyan thos rnams kyi 'khor te/ yon tan gsum dang ldan pa sha stag dang sbyar ro/ /mdo las sangs rgyas kyi zhing de de lta bur tshad med pa'i yon tan dang ldan par 'gyur ro zhes pa nas ji ltar byang chub spyod pa 'di spyad pa zhes pa'i bar du ni sangs rgyas kyi zhing gi rgyan gyi don bsdus pa'o/ /bskal pa ni zhes pa nas/ yang ston pa 'di skad gsung ngo zhes pa'i bar du ni/bskal pa dang zhing dang / sku tshe'i tshad dang / mchod rten bstan pa'o/ /mdo las/ dge slong don 'di ngal ston/ /zhes pa nas/ byang chub sems dpa' mang po smin par byed/ /ces pa'i bar du ni tshigs bcad nyi shu rtsa phyed dang gnyis su dbye ste/ dang po'i tshig bcu gnyis kyis ni de bzhin gshegs pas glengs pa/tshig dgus ni sngon du lung bstan pa/ tshig gong ma la yang rnam pa gnyis te/ tshig bdun gyis ni da ltar gyi yon tan bstan/ tshig lngas ni phyi ma'i yon tan bstan pa'o/ /mdo las 'di skad smras pa bdag cag nyan thos zhes pa nas sems can lta ba la chags pa rig pas na zhes pa'i bar du ni nyan thos pa'i gnas de bzhin gshegs pa'i sa las ring ba dang /sems can gyi don byed pa chung ba dang / gnas dang zhing chung ngu na dag par ston pa'o/ /mdo las/ de yi bstan pa rnams la nye bar gnas/ /zhes pa nas/ mi mkhas mi rnams shin tu myos par 'gyur//zhes pa'i bar du ni bsdus pa'o/ /mdo las/ de yi spyod pa thams cad rab bstan pa/ /zhes pa nas/ mang du thos shing 'jigs med sna tshogs 'chad/ /ces pa'i bar du 'di ni 'das pa'i dus kyi yon tan bcu smos pa la tshig lhug pa las ma byung ba chos smra ba khyad par du 'phags pa/mang du thos pa/ shes rab dang ldan pa 'dir smos so/ /mdo las/ rtag tu mi skyo yang dga' rab tu byed/ /ces pa nas/ bdag gi zhing mchog rnam par dag par byed/ /ces pa'i bar du 'dis don rnam pa bdun zhig ston te/ ston mkhas pa mngon par shes pa dang ldan pa/yang dag par rig pa brnyes pa/ dbang po rig pa/ chos kyi mchog ston pa/ phan pa chen po byed pa/ sangs rgyas kyi zhing dag par byed pa'o/ /mdo las ma 'ongs pa'i dus na de bzhin du zhes pa nas/ rtag tu 'dzin par 'gyur ro zhes pa'i bar du ni 'dis lung ston pa ste/sngar tshig gnyis kyis ni rgyu bstan/ tshig bdun gyis ni 'bras bu bstan te/ sangs rgyas rnams la mchod pa dang / chos ston pa dang / sangs rgyas kyi zhing dag par byed pa dang / sems can la phan 'dogs pa'o/ /mdo las/ 'jig rten du ni rang byung sangs rgyas gyur/ /zhes pa nas/ ngan song dang ni ngan 'gro'i 'jigs pa med//ces pa'i bar du ni 'bras bu bstan te de yang de'i rang bzhin dang / de'i zhing dang de'i bskal pa'i ming dang / zhing gi rgyan dang / byang chub sems dpa'i 'khor rnams te/ gong du bshad pa rnams dang 'dra bar sbyar ro/ /mdo las/ de 'dra ba yi dam pa'i zhing du 'gyur//zhes pa nas/ 'di ni cung zad tsam zhig bshad pa yin/ /zhes pa'i bar du ni byang chub sems dpa' sa brgyad pa yan chad nas rdzogs longs spyod pa'i sa'i bar du ni yin par sbyar ro/ /mdo las/ de ni dbang du gyur pa zhes pa nas rmad du 'gyur ro zhes pa'i bar du ni 'di man chad dge slong lnga brgya lung bstan pa ste/sems kyi re ba dang / bcom ldan 'das kyis gnang ba dang / mngon du lung bstan pa dang / rjes su 'dzin pa'o/ /de nas bcom ldan 'das kyis zhes pa nas/ lung bstan to zhes pa'i bar du ni bcom ldan 'das kyis gnang ba dang sbyar ro/ /mdo las de la 'od srungs chen po zhes pa nas sangs rgyas bcom ldan 'das te zhes pa'i bar du mngon du bstan pa ste /de yang tshig rkyang pa dang tshigs su bcad par dbye'o/ /mdo las 'od srungs de ni zhes pa nas dbang du gyur pa lnga brgya'o zhes pa'i bar du ni dge slong lnga brgya lung bstan pa ste/ de la kha cig na re lnga brgya po 'di stong nyis brgya'i grangs su gtogs zhes kyang zer/logs shig tu ston pa yang yod do/ /mdo las/ de nas bcom ldan 'das kyis de'i tshe/ /zhes pa nas/ byang chub dam pa mchog kyang ston par 'gyur/ /zhes pa'i bar du ni mngon du bstan pa ste/ de la dang po tshig drug gis ni 'phags pa cang shes kyi phyir glengs/de'i 'og mas ni gzhan gleng ste/ 'di ni dang po'i rang bzhin bstan pa'o/ /mdo las/ byang chub sems dpa' brtson pa rnams/ /zhes pa nas/ lha dang mi rnams sdug cing bsam par 'ong / /zhes pa'i bar du ni zhing dang / 'khor dang / tshe'i tshad bstan pa'o//mdo las/ rgyal ba de dang mi mthun 'gyur ba ni/ /zhes pa nas/ ji ltar 'jig rten thams cad ngas bstan bzhin/ /zhes pa'i bar du ni dge slong lnga brgya lung bstan pa'i rang bzhin du bsdus pa bstan pa'o/ /mdo las/ de ltar de dag 'od srungs khyod kyis deng / /zhes pa nas/ de bzhin sgo'o zhes pa'i bar du ni 'khor 'dir ma 'dus pa rnams brgyud de lung bstan pa'o//mdo las de nas dgra bcom pa lnga brgya po de dag ces pa nas nyes pa de dag bdag cag gis bshags so zhes pa'i bar du ni dga' ba'i sems kyis bka' yang dag pa mnos pa dang sngar sems zhum pa gnod pa glengs pa'o//mdo las bcom ldan 'das 'di ni zhes pa nas chung ngus chog go snyam zhes pa'i bar du ni sngar ni mos pa chung bas glengs/ de'i 'og tu ni chung ba ston pa'o/ /mdo las/ de 'di lta ste zhes pa nas gos kyi tha mar phur to zhes pa'i bar du 'dis ni drang ba'i don gyi dpe bshad do / /de la nyam nga ba la dbral ba mi de myos par gyur pa dang /yul gzhan du song ba dang / dub pa lta bar gyur pa ste/ de ni dang po dang sbyar ro/ /khyim du phyin zhes pa ni theg pa chen po'i bstan dang phrad pa'o/ /ra ro zhes pa ni ma rig pa ma spangs zhes pa'o/ /nyal ba ni 'khor ba na gnas pa'o/ /rin po che zhes pa ni theg pa chen po ste/ji ltar yid bzhin gyi rin po che dgos pa sna tshogs 'byung ba bzhin theg pa gcig pu la phyogs pa'i byang chub sems dpa' yid bzhin du 'grub ces pa'o/ /gos kyi mthar phur zhes pa ni sngon gyi theg pa chen po pa'i bshes gnyen dang phrad pa'i bag chags so/ /mdo las/ de nas bcom ldan 'das de skyes bu zhes pa nas de mgu rab tu dga'o zhes pa'i bar du ni sems nur ba'i rnams sprul pa'i grong khyer bstan pa bzhin gzhan du song ste zhes pa ni spyod pa gzhan la zhugs pa'o/ /theg pa chen po'i don dang chos kyi ros phongs pa ni kha zas dang gos tshol ba'o/ /mdo las de nas bcom ldan 'das zhes pa nas 'di skad smras so zhes pa'i bar du ni nges pa'i don ston pa'i dpe'o//mdo las skyes bu khyod zas dang skom zhes pa nas chog par 'dzin tam zhes pa'i bar du ni nges pa'i don ston pa ste/ 'dod pa zhes pa ni bde ba sdug pa rnam pa lnga ste/ rang bzhin bde ba dang /rgyu bde ba dang / spong ba bde ba dang / nyon mongs pa'i gnyen pos bde ba dang / gnod pa med pa'i bde ba ste/ de bzhin gshegs pa'i chos kyi dbyings rnam par dag pa dang / ye shes bzhi dang lnga yang bsgrub par bya ba'i bde ba zhes gdags pa dang / zag pa med pa'i phung po lnga yang bde bar bya ba nyid pas bde ba zhes gdags so//mdo las kye skyes bu khyod ces pa nas bya ba thams cad byos shig ces pa'i bar du ni theg pa chen po la zhugs pas yon tan thams cad rdzogs te/ ji ltar yid bzhin gyi rin po che bsgyur ba bzhin zhes par sbyar ro/ /mdo las de bzhin du bcom ldan 'das zhes pa nas sems bskyed par gyur pa zhes pa'i bar du ni dpe dang nges pa'i don du sbyar ba ste/sbyong nga ba'i yon tan dang sbyar ro/ /mdo las de bdag gis ma rtogs ma chud pa zhes pa ni sems bskyed pa las ldog pa bstan to/ /mdo las bcom ldan 'das de'i slad du zhes pa nas rtag tu ma nyams pa zhes pa'i bar du ni 'phags pa dgra bcom pa de spyod pa dka' ba'i rnams chud zos pa dang theg pa chen por smon lam btab pas ye shes chung ngus chog par 'dzin zhes pa'o//mdo las de nas bcom ldan 'das bdag zhes pa nas thabs mkhas pa ste zhes pa'i bar du ni nges pa'i don dang sbyar ba mya ngan las 'das pa'i mtshan nyid bstan pa'o//mdo las de ltar bcom ldan 'das te zhes pa nas chog par 'dzin pa bde gshegs bstan pa zhes pa'i bar du tshigs su bcad pa phyed dang bcu gsum gyis ni nyes par gnod bkur ba dang / shes pa skyes pa bstan to/ /mdo las ji lta bur na skyes bu la la zhig zhes pa nas 'dod pa'i yon tan lnga dang shin tu ldan zhes pa'i bar du ni dpe de yang dang po sems bskyed pa'i dpe dang /bar du sems nur ba'i dpe'o/ /stong pa nyid bstan pa dang / stong pa de chud pas bla na med pa'i bde ba chen po dang ldan pa'i dpe bstan to/ /mdo las/ de bzhin bcom ldan bdag cag 'di lta bur//zhes pa nas/ bdag cag mya ngan 'das tsam mchog tu gzung / /zhes pa'i bar du ni sngar ni drang ba'i don bstan pa la yang spong ba'i yon tan dang / bar du ldog pa'i dpe bstan pa'o/ /mdo las/ bla med de ni mi 'dod mi tshol lo/ /zhes pa nas/ mgon po gcig la gcig lung bstan pa'i phyir/ /zhes pa'i bar du ni drang ba dang nges pa'i don bsdus pa ste ci rigs par chud par bya'o// // 'di man chad dge slong nyis stong lung ston pa'i le'u 'chad de/ de yang rnam pa gnyis su dbye'o/ /le'u 'di ci las btags pa'i gtan tshigs dang / le'u 'di'i ming bshad pa'o/ /de'i gtan tshigs kyang rnam pa gnyis te/ dbang po rnon po rnams sngar lung bstan pa'i rjes la 'di dag lung ston par 'os pa dang / lung bstan pa rnam pa bzhi las lung bstan pa tha ma dang sbyar ba'i phyir le'u 'di bstan to/ /ming bshad pa ni slob pa dang mi slob pa rnams 'di'i nang du lung ston pa'i phyir dge slong gzhan nyis stong lung bstan pa'i phyir ro//mdo las/ de nas tshe dang ldan pa dga' bo zhes pa nas rnam par sems te smon zhes pa'i bar du ni rnam pa gnyis te/ 'khor re ba'i sems skyes pa dang / bcom ldan 'das kyis re bskong ba'o/ /'khor re ba yang sngar ni skyes bu gnyis kyis gsol/de'i 'og tu ni 'khor nyis stong gis gsol ba ste/ 'di ni dang po'o/ /mdo las stan las langs te zhes pa nas skabs dbyer gsol zhes pa'i bar du ni skyes bu de gnyis kyis lung bstan par gsol ba'o/ /mdo las bcom ldan 'das bdag gi zhes pa nas bcom ldan 'das la blta zhing 'dug ste zhes pa'i bar du ni lung bstan par gsol pa'i rigs pa dang tshul gsol ba'o//mdo las 'di nyid sems shing rnam par sems zhes pa nas 'jig rten du byung ste zhes pa'i bar du ni bcom ldan 'das kyis dngos su lung bstan pa ste/ de yang sngar ni dga' po lung bstan/de'i 'og tu ni sgra gcan 'dzin lung bstan/ de'i 'og tu ni dge slong nyis stong lung bstan dang po la yang rnam pa brgyad du dbye ste/ sangs rgyas kyi mtshan dang / sngon gyi spyod pa bstan pa dang / sems can la phan 'dogs pa dang yul gyi ming dang / zhing gi rgyan dang / bskal pa'i ming dang / tshe'i tshad dang /mngon par bstod pa'o/ /mdo las sangs rgyas bye ba phrag zhes pa nas/ khrag khrig brgya stong gi bsngags pa brjod par 'gyur ro zhes pa'i bar du ni gong du smos pa'i brgyad po dang ci rigs par sbyar ro/ /mdo las de'i dus na bcom ldan 'das kyis zhes pa nas ma 'ongs pa'i dus kyi tshe la rgyal bar 'gyur zhes pa'i bar du 'dis rgyu las dgongs te lung bstan pa'o//mdo las/ bde gshegs bye ba brgyad cu mchod byas na / /zhes pa nas/ sangs rgyas byang chub 'di la rgyu yang skyed / /ces pa'i bar du 'bras bu las dgongs te lung bstan pa la mtshan dang / zhing gi rgyan dang /yul gyi ming dang / phan 'dogs pa dang / rjes su bsngags pa dang / sku tshe'i tshad dang / sems can la phan 'dogs pa dang / de bzhin gshegs pa'i spyod pa'i rgyu sgrub pa ste/ 'di ni tshig dang po dang sbyar ro/ /mdo las de nas 'khor de na zhes pa nas ci'i rkyen du 'gyur zhes pa'i bar du ni 'khor gyi the tshom mo//mdo las/ de nas bcom ldan 'das kyis zhes pa nas byang chub tu sems bskyed de zhes pa'i bar du ni sngon gyi rgyu bstan pa dang / de'i 'og tu 'phral gyi spyod pa bstan pa dang / bsdu ste lung ston pa la 'di ni dang po'o/ /mdo las de na rigs kyi bu 'di ni zhes pa nas byang chub tu lung bstan pa thos zhes pa'i bar du ni spyod pa phyi ma bstan pa dang /mdor bsdus te lung bstan pa'o/ /mdo las/ bdag gis sangs rgyas kyi zhing gi zhes pa nas/ sngon gyi smon lam dran no zhes pa'i bar du ni dga' bos mngon du rtogs pa bstan to/ /mdo las de nas tshe dang ldan pa dga' bos zhes pa nas/dam pa'i chos 'dzin pa ni byang chub kyi phyir zhes pa'i bar du ni dga' bos rang gi yon tan bsgrags pas gzhan de 'dra ba byed du gzhug pa'o/ /mdo las de nas bcom ldan 'das kyis zhes pa nas 'tshang rgya bar 'gyur ro zhes pa'i bar du ni 'dis gnyis pa lung bstan pa'o//mdo las de nas bcom ldan 'das kyis de'i tshe na zhes pa nas/ 'gyur ba byang chub tshol ba na zhes pa'i bar du ni/ 'di man chad bzhir dbye ste/ rtag tu de bzhin gshegs pa'i sras su gyur pa dang / de bzhin gshegs pa gzhan gyi sras su yang ston pa dang / rgyud ma pa 'chad pa dang rnam pa bzhi ste/'di ni dang po'o/ /mdo las mi shes spyod pa sgra gcan 'di zhes pa nas/ de ltar byang chub kyi phyir gnas so zhes pa'i bar du ni mya ngan las ma 'das te 'jig rten 'di ni bzhugs pa bstan pa'o/ /mdo las de nas bcom ldan 'das kyis zhes pa nas gsol ba mthong zhes pa'i bar du ni slob pa dang mi slob pa nyis stong lung bstan pa ste/de la dris pa dang / lan btab pa dang / mngon du lung bstan pa dang / mngon par dga' ba dang / bzhir dbye ba la 'di ni dang po'o/ /'jam pa zhes pa ni sems dul ba'o/ /mnyen pa zhes pa ni dbang po smin pa'o/ /mdo las bcom ldan 'das zhes pa nas dam pa'i chos kyang mnyam par gnas par 'gyur ro zhes pa'i bar du ni lan btab pa dang /rgyu dang 'bras bu bstan pa dang / mtshan mthun par bstan to/ /mdo las de nas slob pa dang mi slob pa zhes pa nas lung bstan pa dang / 'di thos pa zhes pa'i bar du ni 'khor rnams kyi dga' ba'i tshig go// //'di man chad chos smra ba'i le'u ston te/ le'u 'di'i gtan tshigs dang / ming dang / dogs pa bsal ba'o/ /gtan tshigs ni mdo sde 'di dang por ni gleng gzhi'i le'u bstan/ de'i 'og tu le'u brgyad kyis ni gzhung nyid bstan te/ gzhung ni theg pa gcig pu thabs dang dpe rnam pa sna tshogs kyis ston cing theg pa rnam gnyis dang rigs ma nges pa rnams kyi ched du bstan pa dang /lung ston pa'o/ /de man chad le'u bcu dgus ni rjes su 'dzin pa ston te/ mdo sde 'di rgya che zhing zab la dbang po zhan pa rnams mos par dka' ba'i phyir mdo sde 'di gzhan dang mi 'dra ba bsngags pa dang / rjes su 'dzin pa'i yon tan mang du bshad do//yang rjes su 'dzin pa'i don ston pas/ spyir rjes su 'dzin par gdags pa dang / mdo sde 'di'i gzhung ston pa'i le'u bcu dgu yod pa la bcu gnyis kyis ni theg pa gcig po'i spyod yul ston te / le'u snga ma brgyad kyis ni drang ba dang nges pa'i don dbye ba dang / dbang po rnam gsum po rim par lung bstan pa ston/ de'i 'og ma bzhis ni chos dang gang zag gnyi ga'i yon tan ston pas 'di yang rjes su 'dzin pa nyid du bsdu ba dang / yang mdo 'di 'grel pa las dpe rnam pa bdun dang / mnyam pa gsum dang / bla na med pa bcu ston pa la/ 'dir bcu pa ste/ stobs bla na med pa khyad par can ston to//stobs la yang rnam pa gnyis te/ chos kyi stobs dang spyod pa'i stobs so/ /chos kyi stobs kyang rnam pa lnga ste/ chud pa dang / mos pa dang / mtshams chod pa dang / chos nyid thob pa dang / klog cing 'dzin pa'o/ /spyod pa'i stobs kyang rnam pa bdun te/ rjes su 'dzin pa dang /chos 'chad pa dang / dka' ba spyod pa dang / sems can 'dul ba dang / sems can rnams kyi sdug bsngal bton pa dang / yon tan khyad par can dang / chos 'don pa'o/ /'dzin pa'i stobs la le'u gsum sdud de/ chos smra ba'i le'u dang / bde ba la gnas pa dang / rjes su 'dzin pa'i le'u'o/ / le'u 'di'i nang du gzung ba dang / 'dzin pa dang / gang zag dang chos gnyi ga ston to/ /ming ni chos smra ba zhes pa chos 'don pa dang lung smra ba'i gang zag de chos smra ba yin pas chos smra ba'i le'u'o/ /dogs pa bsal ba ni chos smra ba zhes pa 'di sangs rgyas 'jig rten du bzhugs pa dang / mi bzhugs pa gang gi tshe na chos smra ba zhes gdags/de gnyi ga yang chos smra ba yin mod kyi sangs rgyas 'jig rten na bzhugs pa'i tshe ni slob pa la gnas pas 'khor brgyad po zhes gdags kyi/ bcom ldan 'das mya ngan las 'das pa'i 'og tu chos ston pa de chos smra ba zhes gdags so/ /le'u 'di'i nang nas kyang lung ston pa 'byung na lung bstan pa'i le'u zhes ci'i phyir mi gdags she na/gtso bo las dras pa'i phyir mi gdags so/ /mdo las de nas bcom ldan 'das kyis zhes pa nas byang chub tu lung ston to zhes pa'i bar du ni le'u 'di yang tshig rkyang pa dang tshigs su bcad pa gnyis su dbye'o//chos smra ba yang rnam pa gnyis te/ sangs rgyas 'jig rten na bzhugs pa'i tshe chos smra ba dang / mi bzhugs pa'i tshe chos smra ba gnyis las 'di ni dang po'o/ /sman gyi rgyal po sngon gyi dus na mdo sde 'di 'dzin pa'i phyir/ sman gyi rgyal po zhes ched du bkar te bka' stsal to/ /chos spyod pa bcu la rjes su bsngags zhes pa ni rjes su yi rang ba'o//rjes su yi rang ba'i tshig gcig gis bla na med pa'i byang chub chen po'i gzhir gyur zhes pa'o/ /mdo las sman gyi rgyal po gang la la zhes pa nas byang chub tu lung bstan to zhes pa'i bar du ni sangs rgyas mngon du mi bzhugs pa'i chos smra ba'i yon tan ston te/de yang rjes su yi rang ba dang / mngon du spyod pa rnam gnyis la 'di ni dang po'o/ /rjes su yi rang ba tsam gyis kyang 'di lta na mngon du spyod pa lta ci smos/ mdo las/ sman gyi rgyal po rigs kyi bu'am/ rigs kyi bu mo zhes pa nas thal mo sbyar ba'i las kyi mchod zhes pa'i bar du ni 'dis chos mngon du spyod pa ston pa la 'dir chos spyod pa rnam pa drug ston/dbus dang mtha' rnam par 'byed pa las ni chos spyod pa bcu ston to / /'di'i drug po la 'dzin pa dang / klog pa dang / 'don pa dang / mos pa dang / 'dri ba dang / mchod pa'o/ /mchod pa ni phyi nang gi mchod pa'o//chos spyod pa de la ji ltar bcom ldan 'das mngon du mthong ba dang 'dra bar dad pa dang / gus pa'i las bskyed pa'o/ /mdo las sman gyi rgyal po rigs kyi bu dang / rigs kyi bu mo gang la la zhes pa nas/ 'jig rten du 'byung ngo zhes pa'i bar du 'di ni thugs rje dang smon lam gyi dbang gis der skyes pa dang rgyu dam pas 'jig rten du 'byung ba'o//mdo las/ de ci'i phyir zhe na zhes pa nas/ phyag 'tshal zhing btud pa lta ci smos zhes pa'i bar du ni sngar gang zag gi yon tan bstod cing mchod par 'os pa dang / yon tan che bas thugs rje dang smon lam gyis 'dir skye zhing phan pa chen po byed pa'o//mdo las sman gyi rgyal po zhes pa nas skyes par rig par bya'o zhes pa'i bar du ni yon tan chen po dang ldan pa ste/ thugs rjes 'dir skye bar bstan pa dang / chos 'di ston pa yang 'phags pa yin par bstan pa dang / theg pa rnam gnyis las dgar ba'i phyir/byang chub sems dpa' sems dpa' chen po zhes smos pa dang / sangs rgyas kyi zhing yangs par mi skye ba yang thugs rjes sems can la phan 'dogs pa'i phyir/ lha dang / khams bla ma gnyis su mi skye bar 'dir skye ba ston to/ /phyir mi ldog pa'i byang chub sems dpa' chos la mos pa'i rtags ni chos thos pa tsam gyis sgra dang ba spu ldang ba dang gdung bas mchi ma 'byung ba de ni byang chub sems dpa'i rtags so//mdo las sman gyi rgyal po rigs kyi bu'am zhes pa nas de bzhin gshegs pas skye bar rig par bya'o zhes pa'i bar du ni chos smra ba rnam pa drug la gus pa dang / btsun par bya ba bstan te/ gus par bya ba la 'chad pa ni sangs rgyas kyi pho nya lta bur blta'o/ /smod pa ni de bzhin gshegs pa la skur pas sdig pa che bar bstan pa dang / klog pa dang / 'don pa ni de bzhin gshegs pa la rgyan gyis brgyan pa bzhin bzhugs pa'i gnas ni mchod cing phyag bya ba'i gnas su bstan te/mchod pa rnam bzhis mchod par bya'o/ /pho nya zhes pa ni de bzhin gshegs pa'i dgongs pa dang mthun pa/ skye ba zhes pa ni gsung dang mthun pa/ bya ba byed pa zhes pa ni sku'i phrin las dang mthun pas/ de bzhin gshegs pa'i mdzad pa thams cad byed pa'o/ /mdo las yang sman gyi rgyal po sems can gang la la zhes pa nas shin tu sdug par bshad do zhes pa'i bar du ni ches smra ba la smod pa sdig che bar bshad pa ste/de ni bcom ldan 'das la ngan sems kyis smad pa ni phan par spyod pa rnam gnyis nyams par mi 'gyur ba ni bcom ldan 'das la 'khrug pa mi mnga' ba'i phyir ro//chos smra ba la smad pas ni phan par spyod pa gnyis nyams shing 'khrug pa skye ba'i phyir ro/ /yang sangs rgyas la smad pas ni byams sdang gi thugs mi dgongs te sems can mi spong gi chos smra ba ni de lta ma yin no/ /sangs rgyas 'jig rten na bzhugs pa'i tshe/ sems can dbang bo brtan pas 'ga' zhig smod pa yod kyang gzhan gyi sems nur bar mi 'gyur gyi/deng sang gi chos smra ba la smad pas gzhan gyi sems ldog pa'i phyir bdag dang gnyi ga la gnod do/ /mdo dag las kyang byang chub sems dpa'i sems dkrugs pa ni sems can thams cad chos kyi snang ba sgrib par byed pas mnar med pa lnga byas pa bas kha na ma tho ba 'di che bar bshad do//byang chub kyi sems dkrugs zhes pa yang sangs rgyas kyi chos 'jig pa'o/ /mdo las/ de ci'i phyir zhe na/ sman gyi rgyal po zhes pa nas/ de bzhin gshegs pa phrag pa la thogs pa yin no zhes pa'i bar du ni dam pa'i chos 'di 'don pa yon tan thams cad kyi rgyan gyis brgyan pa'i phyir sdong pos brgyan pa las byang chub sems dpa'i rgyan rnam pa bcus brgyan pa'am/de bzhin gshegs pa'i rgyan thams cad kyis brgyan pa'o/ /mdo las de gang du 'gro ba der zhes pa nas yongs su rdzogs par 'gyur ro zhes pa'i bar du ni dam pa'i chos 'di shin tu zab pa'i phyir 'phags pa dga' bo la ma gtad kyi/byang chub sems dpa' sman gyi rgyal po la sogs pa la gtad pa yang ji ltar sman pa chen pos dug sman du bsgyur ba bzhin sman pa mi mkhas pas mi nus so/ /de bzhin du chos 'di byang chub sems dpa' la gtad par 'os kyi nyan thos pa rnams la ma yin te/byang chub sems dpa' ni thos pa tsam gyis mthar phyin par 'gyur ba dang bdag dang gzhan gyi don 'grub par 'gyur ba'i phyir ro/ /mdo las/ de nas bcom ldan 'das kyis de'i tshe zhes pa nas 'dzin pa la bkur sti bya zhes pa'i bar du ni 'di man chad tshig bcu drug la rnam pa gsum du dbye ste/tshig dang po gnyis kyis ni chos smra ba'i yon tan dang mchod par 'os pa glengs/ tshig bcu gsum gyis ni chos smra ba'i yon tan nyid glengs/ tshig gcig gis ni chos khyad par can bsdu ba bstan to/ /tshig dang po de la yang rnam pa gnyis te/ tshigs bcad gcig gis ni lhun gyis grub pa'i ye shes thob pa bstan te/yang dag pa'i ye shes dang / stong pa nyid kyi ye shes so/ /de'i 'og mas ni yang dag pa'i ye shes kyi mtshan nyid ston te/ rnam pa thams cad mkhyen pa'i ye shes dang / phyis thob pa'i ye shes dang / rtsa ba'i ye shes so/ /su mdo 'di 'dzin pa dang / mchod pa dang / bsti stang du byed pa ye shes de dag 'thob pa la the tshom med ces bya bar sbyar ro/ /mdo las/ 'jig rten mgon gyi skye ba ste/ /zhes pa nas/ bla na med pa'i mdo sde 'di/ /zhes pa'i bar du ni tshigs bcad bcu gsum gyis chos smra ba'i yon tan ston te/ de la yang tshigs bcad gsum gyis ni chos smra ba'i khyad par bstan/tshigs bcad bcus ni btsun pa dang gus par bya ba bstan/ dang po'i tshig gsum gyis ni de bzhin gshegs pas bsngags pa dang / skye ba bzang po bstan pa dang / smon lam gyi dbang gis skye ba bstan to/ /mdo las/ 'phrul gyi me tog bkur sti bya/ /zhes pa nas/ chos smra de la rin chen 'thor//zhes pa'i bar du ni tshigs bcad bcus mchod pa dang gus par bya ba bstan te/ de la yang tshigs bcad bzhis ni chos smra ba la rim gro bkur sti bya ba bstan/ tshigs bcad phyi ma drug gis ni bsod nams kyi khyad par bstan te/ gus pa skye ba bstan/ dang po'i tshigs bcad bzhi la yang /dang po'i tshig gcig gis ni chos smra ba nyid bstan/ 'og ma gsum gyis ni 'dzin pa bstan te 'di ni dang po'o/ /chos smra ba de 'bras bu dam pa thob pa'i phyir ro/ /mdo las/ de dag rtag tu thal sbyar te/ /zhes pa nas/ de bzhin gshegs kyi bya ba byed/ /ces pa'i bar du ni 'dis 'dzin pa bsod nams che ba bstan te/gus pa dang / mchod pa dang / gsung mnyan pa dang / 'don zhing kha ton byed pa'o/ /mdo las/ mi rung 'byung na ngas de btang / /zhes pa nas/ sdig pa shin tu de mang bshad/ /ces pa'i bar du ni tshigs bcad gnyis kyis ni sdig pa'i khyad par bstan/ tshig bzhis ni dge ba'i khyad par bstan to//mdo las/ mi gang nga la mngon bstod pa/ /zhes pa nas/ de la bsod nams ches mang rnyed/ /zhes pa'i bar du ni bsod nams kyi khyad par bstan to/ /mdo las/ dga' skyes nga la bstod pa ni/ /zhes pa nas/ ngo mtshar chen po des thob 'gyur/ /zhes pa'i bar du ni chos thos pa'i bsod nams dang /phyi nang mchod pa rnam gnyis kyi khyad par bstan pa'o/ /mdo las/ sman gyi rgyal po khyod mos par bya zhes pa nas bshad par bya'o zhes pa'i bar du ni chos 'di khyad par can du bstan pa'o/ /mdo las/ sman gyi rgyal po chos kyi gzhung 'di dag /ces pa nas/ dad par mi 'gyur ro zhes pa'i bar du ni chos smra ba nyid ston to sngar ni tshig rkyang pas bstan/'og tu tshigs su bcad pas bsdus te/ tshig rkyang pa la chos chud par dka' ba dang / 'don pa'i gnas te mchod rten du gyur pa bstan pa dang / 'khor rnams kyi tshul bstan pa'o/ /mdo las/ sman gyi rgyal po 'di ni zhes pa nas lta ci smos zhes pa'i bar du ni bcom ldan 'das zhal bzhugs pa na yang gsangs te/ kun la bstan pa ma yin pa'ang chud dka' ba'i phyir ma 'ongs pa'i dus na dbang po ma rtogs pa rnams la bstan na skur ba 'debs pa'i phyir ma ston cig par bstan pa'o/ /mdo las 'di ltar sman gyi rgyal po zhes pa nas de bzhin gshegs pa'i phyag gis byug par 'gyur ro zhes pa'i bar du ni chos 'di'i mthus 'don pa'i gang zag yon tan can du 'gyur ba bstan te/de bzhin gshegs pa'i na bza' ni bzod pa/ zhi ba/ dul ba/ byams pa dang snying rjer ldan pa/ ngo tsha ba dang 'dzem pa spangs pa ste/na bza' des bkab par gyur pa dang / dbang po smin pa'i phyir/ de bzhin gshegs pa rnams kyis dgongs shing skyob par 'gyur ba dang / mos pa che bar 'gyur ba dang / smon lam dang dad pa btsan pa'i rang bzhin can du 'gyur ba dang / dge ba'i rtsa ba can du 'gyur ba dang /stong pa nyid dang snying rje'i khyad par bcom ldan 'das dang 'dra bar 'jug pa dang / de bzhin gshegs pa'i phyag gis byug cing gnas 'tshob par lung bstan pa 'thob pa'o/ /mdo las sman gyi rgyal po zhes pa nas mchod par bya'o zhes pa'i bar du ni chos kyi sku dang / ring bsrel mchod par 'os pa bstan te/de la dang po chos kyi sku dang / ring bsrel bstan pa dang / 'di la brten te chos smra ba yon tan can du 'gyur ba bstan to/ /chos de dang ring bsrel mchod par 'os pa ni gzhung dang ye shes ldan pa'i phyir te/ sems can rnams la yang dag pa'i ye shes phye ba dang /bstan pa dang rtogs shing 'jug par 'gyur ba'i phyir ro/ /mdo las yang sman gyi rgyal po zhes pa nas shin tu nye bar gyur par rig par bya'o zhes pa'i bar du ni chos 'di la brten nas chos smra ba yon tan can du 'gyur ba bstan te/ byang chub tu bsnyen pa dang / spyod pa dam pa la gzhol ba dang / byang chub chen po 'grub par 'gyur ba bstan to//mdo las/ de ci'i phyir zhe na zhes pa nas nye bar gnas pa yin no zhes pa'i bar du ni chos 'di thos pas spyod pa dam pa la gzhol ba'i rgyu bstan te/ mthong ba dang / thos pa dang / klog pa dang / 'don pa dang / 'dri ba dang / 'dzin pa dang / mchod pa'o/ / de dag kyang dpe dang / don dang / bsdu ba dang gsum mo/ /yang mthong ba dang / bsam pa dang / bsgom pa'i shes rab ci rigs par sbyar ro/ /mdo las/ 'di lta ste dper na sman gyi rgyal po zhes pa nas chu 'di ni thag nye'o snyam zhes pa'i bar du ni dpe bstan te/ slob pa 'byung ba rtsol ba 'khor ba la gnas shing yang dag pa'i lam tshol ba'o//yang na 'grel pa las kyang chu ni de bzhin gshegs pa'i rang bzhin no/ /rko zhes pa ni yang dag pa'i shes rab sngon du btang bas lus dang / ngag dang yid gsum gyi las kyis 'bad pa'o/ /sa skam po mthong ba ni theg pa rnam gnyis kyi bstan pa drang ba'i don du bshad pa dang sbyar ro//sa gsher ba mthong zhes pa ni shes rab kyi pha rol tu phyin pa theg pa chen po'i bstan pa dang phrad pa ste/ bla na med pa'i byang chub dang nye zhes pa'i don to/ /'grel pa las kyang mdo 'di 'dzin pa'i gang zag de de bzhin gshegs pa'i rang bzhin gyi chu dang phrad pas bla na med pa'i byang chub dang nye zhes pa'i don to//mdo las de bzhin du sman gyi rgyal po zhes pa nas bla na med pa yang dag par rdzogs pa'i byang chub skye'o zhes pa'i bar du ni 'dis dpe dang don du sbyar ba ste/ shes rab rnam gsum dang chos spyod pa bcu dang ci rigs par sbyar ro/ /mdo las de ci'i phyir zhe na zhes pa nas gsang ba'i gnas bshad do zhes pa'i bar du ni 'dis gtan tshigs ston te/byang chub chen po'i chos 'di rgyu dang bcas pa / 'bras bu dang bcas pa/ nye ba'i rgyu dang ldan pa/ ring ba'i rgyu dang ldan pa/ lung dang gzhung dang / spyod pa dang / 'bras bur bcas pa ye shes kyi mtshan nyid dang ye shes kyi rang bzhin dang /ye shes rnam lnga kun kyang mdo 'di las skye/ mdo 'di las thob pa'o/ /ldem po ngag mchog 'grel pa ni drang ba dang nges pa'i don 'grel pa'o/ /mdo las sman pa'i rgyal po byang chub sems dpa' la la zhes pa nas yang dag par ston na zhes pa'i bar du ni/ chos ji ltar bshad pa'i tshul bstan te/de la yang bshad pa'i tshul dang / bka' bzhin du mnyan pas de bzhin gshegs pas rjes su skyob pa'o/ /tshig dang po la yang dris pa dang / bshad pa dang / bsdus pa ste/ 'di ni dris pa'o/ /mdo las sman gyi rgyal po byang chub sems dpa' des zhes pa nas yang dag par bshad do zhes pa'i bar du 'di ni bstan pa'o//mdo las sman gyi rgyal po zhes pa nas chos kyi gzhung 'di 'khor bzhi la yang dag par bstan pa'o zhes pa'i bar du ni dngos su bstan pa ste/ byams pa dang snying rje la sku dang thugs rtag tu gnas pa'i phyir gnas lta bur blta'o / / yang na theg pa chen po nyid mthar phyin pa'i gnas nyid do/ /zhi zhing dul ba dang bzod cing byams pas lus mdzes par byas pa'am/ de'i dgos pas phyi rol gyi gnod pas mi brdzi ba'i phyir gos lta bur blta'o/ /chos stong pa nyid du bstan pa yang mdo dag las kyang bsam gtan bzhi ni gdan te zhes pa stong pa nyid dang mtshan ma med pa la gnas pa nyid gdan lta bur blta'o//mdo las byang chub sems dpa' mi zhan pa'i sems kyis zhes pa nas yang dag par bshad par bya'o zhes pa'i bar du ni gsum pa ste bsdus pa'o/ /mdo las/ sman gyi rgyal po nga 'jig rten gyi khams zhes pa nas kha ton byed pa nas slar 'thon to zhes pa'i bar du ni tshig de dang mthun par byas na de bzhin gshegs pa yang rjes su skyob cing nyan du 'dzud/mthong bar byed mi brjed par byed do/ /sprul pas sprul pa bsdu zhing chos ston pa'o/ /mdo las bcom ldan 'das kyis de'i tshe zhes pa nas shin tu dad pa rnyed par dka' zhes pa'i bar du ni tshigs su bcad pa bco brgyad la rnam pa gsum du bgos te/tshigs bcad dang po gcig gis ni mos par dka' ba dang / kun la bsnyad du mi rung ba bstan/ tshigs bcad bzhis ni chos kyi sku dang ring bsrel la mchod pas byang chub tu nye bar bstan pa dang /tshigs bcad bcu gsum gyis ni chos 'chad pa'i tshul bstan te/ 'di ni dang po'o/ /mdo las/ ji ltar la la chu 'dod pa/ /zhes pa nas/ 'di nas chu la'ang ring ma yin/ /zhes pa'i bar du ni tshigs su bcad pa 'di bzhis ni chos kyi sku ring bsrel du bsgyur ba la bsti stang byas pas byang chub tu nye ba bstan pa ste/dpe dang don ci legs par sbyar ro/ / mdo las/ de bzhin de dag rgyang ring ba/ /zhes pa nas/ chu dang me zhes bya ba bzhin/ /zhes pa'i bar du ni sbyar ro/ /mdo las/ sems can rnams la zhes pa nas mchod pa byed ces pa'i bar du ni tshigs bcad bcu gsum po 'dis chos 'chad pa'i tshul bstan te/de la tshigs bcad bcu gcig gis ni tshul nyid bstan/ tshigs bcad gnyis kyis ni nyan pa dang 'chad pa bstan to/ /mdo las 'khor rnams la yang zhes pa nas sangs rgyas mthong zhes pa'i bar du ni de bzhin gshegs pas rjes su gzung ba bstan te/ tshig gcig gis ni bzod pa spyod pa bstan/tshigs bcad gsum gyis ni gzhan gyi sprul pas mchod pa dang 'khor byed pa bstan/ tshigs bcad gcig gis ni skyo zhing bsrung ba bstan/ tshigs bcad gnyis kyis ni lus mngon du bstan te/ dmigs pa dran par byas pa bstan/ tshig gcig gis ni yon tan dang ldan pa la mngon du ston pa bstan/tshig gcig gis ni 'khor brgyad rnams chos nyan pa bstan te/ de dag ci rigs par sbyar ro// // 'di man chad rin po che'i mchod rten bstan pa'i le'u 'chad do/ / de yang rnam pa gsum du dbye'o/ /le'u 'di'i gtan tshigs dang de'i ming dang /dogs pa bsal ba'o / /gdags pa'i gtan tshigs la yang rnam pa bzhi ste/ nyon mongs pa med pa'i gang zag gis nga rgyal rnam pa gsum spang pa'i phyir te/ de gsum ni theg pa thams cad tha dad par mos pa dang / 'khor ba dang mya ngan las 'das pa tha dad par mos pa dang /sku tha dad par mos pa la mnyam pa gsum gyis de sel bar byed de/ mnyam pa nyid gsum ni theg pa mnyam pa dang / 'khor dang / mya ngan las 'das pa mnyam pas/ de bzhin gshegs pa'i rin po che'i mchod rten bstan pa dang / sku tha dad par mos pa rnams rin chen mang de bzhin gshegs pa'i sku nyid de bzhin gshegs pa thams cad kyi sku yang de yin te/bye brag med par bstan pa dang / 'grel pa las bla na med pa bcu bstan pa'i nang nas zhing rnam par dag pa bstan pa bla na med pa ni de bzhin gshegs pa rin chen mang dang mchod rten byung bas de bzhin gshegs pa'i sprul pa'i sku thams cad der 'dus shing /de nas 'od gcig btang bas phyogs thams cad du khyab par mdzad cing zhing ma dag pa dang / dag pa bye brag med par de bzhin gshegs pa'i zhing dag pa nyid du bstan pa'i phyir dang / dam pa'i chos 'di ston cing bzhugs pa'i sa thams cad sngon byung ba dang 'dra bar rin po che'i mchod rten nyid du bstan cing /dam pa'i chos la rim gro bskyed pa'i phyir le'u 'di bstan to/ /ming bshad pa ni rin po che las byas pa'i mchod rten yin pas na rin po che'i mchod rten no/ /yang na de bzhin gshegs pa rin chen mang gi mchod rten yin pas na rin po che'i mchod rten no//dogs pa bsal ba le'u 'di'i phyogs bcu'i de bzhin gshegs pa 'dus shing rnam par dag pa bstan pa yin na ci'i phyir ming der mi gdags/ /mchod rten de nam mkha' la 'phags shing ngo mtshar du gyur pa zhing rnam par dag pa ston pas dpe gtsor byas te ming du btags pas nyes pa med do//mdo las/ de nas bcom ldan 'das kyis zhes pa nas bar snang la 'dug ste zhes pa'i bar du ni 'di man chad tshig rkyang pa ston pa la rnam pa gnyis te mchod rten bar snang la 'phags te byung ba bstan pas dam pa'i chos 'di khyad par can du bstan to/ /rin po che'i mchod rten de kha phye ste bstan pa ni 'khor rnams dad pa dang /bsti stang bskyed pa'i phyir ro/ /sngar ni rin po che'i mchod rten bstan pa nyid kyis yid ches par bsgrubs/ de'i 'og tu sku gdung mngon par bstan pas ni lung la yid ches pa bstan to/ /rin po che'i mchod rten de las sil snyan sna tshogs byung ba ni mchod rten mthong bar bstan pa dang /che chung gi tshad bstan pa dang / nam mkha' la 'phags pa bstan pa dang / de'i rgyan bstan pa'o/ de'i dang po la yang yon tan rnam pa gsum ste/ bla na med pa bcu'i nang nas zhing rnam par dag pa bla na med pa bstan to/ /de bzhin gshegs pa rin chen mang gi mchod rten bstan pa yang don rnam pa dgu ste/de bzhin gshegs pa thams cad kyi zhing rnam par dag pa dang de'i mchod rten dang / mchod rten de'i tshad dang / mdo bstan pa dang / de 'dzin cing brten pa dang / de bzhin gshegs pa grangs med pa ston pa dang / zhing ma dag pa rnam par spong ba dang /rin chen mang ba dang / gdan gcig la bzhugs pa ston pa ste/ de dag ni 'og nas 'byung ba'i dkyus dang sbyar ro/ /mchod rten de'i nang nas ring bsrel 'byung ba bstan pa ni de bzhin gshegs pa'i chos kyi sku mdo sde 'di la gnas pa bstan pa'o/ /mchod rten nam mkha' la 'phags pa yang de bzhin gshegs pa'i zhing rnam par dag pa yang 'jig rten pa'i dge ba'i rtsa ba las khyad par du bstan pa'o//lnga brgya la yang nam mkha' la 'phags pa ni de bzhin gshegs pa 'khor ba thams cad las 'das te mya ngan las 'das pa'i dbyings la gnas pa bstan to/ /yang na theg pa gcig po 'dir theg pa gnyis pa las khyad par du 'phags pa bstan to//nam mkha' bar snang zhes pa ni yang dag pa stong pa nyid la gnas pa bstan to/ /mdo las sna tshogs blta na sdug ces pa nas 'jig rten gyi khams thams cad khyab par gyur to zhes pa'i bar du ni rgyan gyi mtshan nyid bstan te/ rgyan brgyad dang /gdugs dang / ba dan la sogs pa'o/ /mchod rten rgyan thams cad kyis brgyan pa bzhin de bzhin gshegs pa'i sku dang dam pa'i chos 'di yon tan thams cad kyis brgyan par sbyar ro/ /rgyan thams cad ni yon tan sna tshogs kyi dpe'o/ /kha ran lnga stong ni dad pe brtson 'grus dang dran pa dang ting nge 'dzin dang shes rab kyi dpe'o//rtab bas stong phrag mang po zhes pa ni bsam gtan dang ting nge 'dzin to/ /rgyal mtshan dang ba dan zhes pa ni ye shes dang gzungs su blta'o/ /phreng ba ni dran pa nye bar gzhag pa dang sbyar ro / /dri dang spos dam pa ni de bzhin gshegs pa'i sku rnams dang / nyon mongs pa thams cad sel ba yang dag pa de bzhin nyid do//mdo las de'i gdugs kyi phreng bzhes pa nas/ kar ke ta na'o zhes pa'i bar du ni rin po che sna bdun 'phags pa'i nor bdun dang sbyar ro/ /mdo las/ mchod rten de la zhes pa nas thal mo sbyar te 'khod do zhes pa'i bar du ni mthong zhing 'phags pas 'gro ba las khyad par du bstan pa dang /ya mtshan du gyur pas 'khor rnams dad pa skyed pa dang / rdzu 'phrul mdzad pa'i yon tan gyis mdo sde 'di dam pa yin par bstan pa dang / mchod rten phyung bas gus pa bskyed pa dang / 'khor rnams kyi bsam pa rig nas the tshom mngon par gsol ba ste/ de yan chad ci rigs par sbyar ro/ /mdo las de nas de'i tshe spobs pa chen po zhes bya ba nas 'di lta bu'i sgra 'byin pa su zhes pa'i bar du ni don dris pa'o//mdo las/ de skad ces gsol ba dang zhes pa nas des sgra 'di phyung ngo zhes pa'i bar du ni bcom ldan 'das kyis bka' stsal pa ste/ dang por gleng ba dang dngos su bstan pa dang bsdus pa'o/ / 'grel pa las stug por gnas so zhes pa ni de bzhin gshegs pa rnams kyi chos kyi sku mnga' brnyes pa bzhugs pa'am/ sprul pa'i sku gser gyi mdog can mnga' brnyes par bzhugs te/ mdo 'di nyid dang sbyar ro/ /mdo las spobs pa chen po shar phyogs su zhes pa nas/ sangs rgyas rin chen mang zhes bya ba byung ste zhes pa'i bar du ni de yang rnam pa bzhi ste/de bzhin gshegs pa'i sku dang sngon gyi smon lam dang / lung bsgo ba dang / smon lam bzhin mdzad pa'o/ /rin chen zhes pa de bzhin gshegs pa gcig gam mang du bzhugs 'grel pa las mdo bstan pa la de bzhin gshegs pa rin chen mang gi sku gcig bstan pa'i nang du de bzhin gshegs pa thams cad kyi sku 'dus pas sku mnyam par bstan pa dang /theg pa gcig po bstan pa yang theg pa thams cad bsdu ba dang / rin po che mang yang rin po che'i rang bzhin mtshungs pa bzhin/ sprul pa dang rdzogs longs spyod pa'i sku yang sku mtshungs pa ste/ lung dang gzhung rnam par dag pa la gnyis su med ces pa'o/ /mdo las bcom ldan 'das de'i smon lam 'di lta bu zhes pa nas yongs su rdzogs par gyur to zhes pa'i bar du ni sngon gyi smon lam bstan pa'o//mdo las yang spobs pa chen po bcom ldan 'das zhes pa nas mchod rten chen po gcig byos shig ces pa'i bar du ni lung bsgo ba'o/ /mdo las mchod rten gzhan ni nga'i phyir bya'o zhes pa nas dge'o zhes bya ba byin no zhes pa'i bar du ni smon lam bzhin grub par mdzad pa'o//mdo las spobs pa chen po de lta bas na zhes pa nas dge'o zhes bya ba byin no zhes pa'i bar du ni mdor bsdus te bsgo ba'o/ /mdo las de nas spobs pa chen po zhes pa nas de bzhin gshegs pa'i sku mthong ngo zhes pa'i bar du ni sngar gleng ba dang mchod rten dbye ba ste/de la yang gsol ba dang / lan btab pa dang / bzlas te gsol ba dang / dbye bar snang ba'o/ /mdo las/ de skad ces gsol ba dang / bcom ldan 'das kyis zhes pa nas 'dir dgug par bya'o zhes pa'i bar du ni sprul pa'i sku slar bsdu ba ste/ de 'dri ba na re de bzhin gshegs pa'i sprul pa ni sum stong las mi 'da'o zhes gsungs nas/'dir phyogs bcu'i 'jig rten gyi khams sku mang pos khyab ces gsungs pa ci'i phyir dang po sprul pa mthong ba rnams la grangs bstan par zad kyi yon tan tshad med pa'i phyir sku sprul pa yang grangs med pa dang / sku tha mi dad pa'i phyir sprul pa thams cad ni nga'i sku zhes par sbyar ro//mdo las de nas spobs pa chen po zhes pa nas/ bdag cag gis phyag bgyi'o zhes pa'i bar du ni bzlas te gsol ba'o/ /mdo las de nas de'i tshe bcom ldan 'das kyi zhal gyi mdzod spu nas zhes pa nas/ de dag thams cad snang ngo zhes pa'i bar du ni dbye ba snang ste/ sngar sprul pa'i sku rnams bsdu ba dang /mchod rten dngos su phye ba'o/ /de'i tshig dang po la rnam pa bzhi ste/ 'od kyis snang bar mdzad pa dang / sprul pa'i sangs rgyas slar gshegs pa dang / de bsu ba dang / mgon po de la me tog 'bul ba'o/ /sprul pa'i sku de dag 'phags pa dgongs pa dag pa rnams 'od kyis bskul mi dgos par byon par 'os na ci'i phyir 'od kyis bskul/de ni 'jig rten pa rnams de bzhin gshegs pa'i rdzu 'phrul bsam gyis mi khyab par bstan pa'i phyir 'od kyis sbran te byon par bstan pa'o/ /'od zer btang zhes pa ni theg pa gcig po bstan pa'i don to/ /sangs rgyas mang po snang bar mdzad pa ni de bzhin gshegs pa rnams kyi mdzad pa mthun pa bstan pa'o//mdo las sangs rgyas kyi zhing de dag ni shel las byas pa zhes pa nas gser gyi dra bas g.yogs par snang ngo zhes pa'i bar ni 'di'i nang du don rnam pa gsum ston te/ zhing gi mtshan nyid dang / 'khor dang / bla re chen po ci'i phyir zhing rnam par dag pa'i tshul du ston zhe na/ bcom ldan 'das rnams kyi yang dag pa'i spyod yul du rin po che rgyan sna tshogs snang bar bstan pa dang /theg pa gcig po'i nang du yon tan thams cad bsdu bar bstan pa'o/ /mdo las de dag na sangs rgyas bcom ldan 'das zhes pa nas yongs su gang bar snang ngo zhes pa'i bar du ni chos ston pa'o/ /mdo las/ de bzhin du shar dang lho phyogs zhes pa nas gshin rje'i 'jig rten yang med ces pa'i bar du ni phyogs gzhan du phyin pa dang de bzhin gshegs pa gzhan yang der byon pa dang /bsu ste gshegs pa bstan to/ /'jig rten gyi khams spo ba dang / de bzhin gshegs pa bzhugs pa dang / der bzhugs nas kyang rdzu 'phrul chen po bstan pa'o/ /'jig rten gyi khams spo ba yang rnam par dag pa'i zhing du bstan te/ri dang / chu dang / nags la sogs pa gsal bar bstan pa 'dis ni zhing rnam par dag pa mnyam pa nyid bstan to/ /dang po rin chen mang gi mchod rten zhing ma dag pa na bzhugs pa bstan pa ni/ theg pa rnam pa gnyis drang ba'i don to/ /sprul pa'i sku 'dus nas zhing rnam par dag par gyur pa ni byang chub sems dpa'i don du bstan pa'o//yang na dang po zhing ma dag pa ni ma rabs kyis bstan to/ /de'i 'og tu stong chen po gcig gis bsgyur ba ni 'phags pa nyan thos pa'i dpe'o/ /de'i 'og tu bsgyur ba ni 'phags pa rang sangs rgyas pa rnams kyi dpe'o/ /yang de'i 'og tu bsgyur ba ni theg pa chen po yongs su rgyas pa'i dpe'o//mdo las/ de'i tshe mi mjed kyi khams na zhes pa nas de ltar de bzhin gshegs pa de dag thams cad kyi rang rang gi zham 'bring ba bkye'o zhes pa'i bar du ni rgyas par bsgyur zhing spo ba ste/ de yang gcig gis bsgre zhing bsgyur ba dang / brgyar bsgre zhing bsgyur ba ni de bzhin gshegs pa tha dad pas so/ /de bsgyur ba yang dang po ni zhing bsgyur/de'i 'og tu ni sems can bsgyur ba dang / dag pa'i mtshan nyid bsgyur ba dang / ma dag pa bsal ba dang / rgyan gyis brgyan pa'o/ /'od kyis snang bar mdzad pa ni phyogs bcu'i de bzhin gshegs pa bskul ba'o/ /sems can dmyal ba med ces pa ni sems can bsgyur ba'o/ /ri dang mtsho la sogs pa med par byas pa ni zhing bsgyur ba'o//'di bzhag ste zhes pa ni 'khor 'di dag chos kyi snod du gyur pa bstan pa'o/ /sangs rgyas kyi zhing gcig tu byas zhes pa ni rgyan gyis brgyan pa bstan to / /mdo las de nas bcom ldan 'das shAkya thub pas zhes pa nas nam mkha' bar snang la bzhugs so zhes pa'i bar du ni mchod rten dbye bar dgongs pa ste/de yang don grub nas nam mkha' la bzhugs pa dang / 'khor bzhi po langs nas zhal du blta ba dang / mchod rten mngon par phye ba'o/ /mdo las 'khor bzhi po de dag stan las langs nas thal mo sbyar te/ bcom ldan 'das lags su blta zhing 'khod do zhes pa ni 'khor langs pa bstan pa'o//mdo las de nas bcom ldan 'das kyi zhes pa nas/ sa ler byas so zhes pa'i bar du phyag g.yas pa zhes pa ni bkra shis par bya ba'o / /mdo las de bzhin gshegs pa'i zhes pa nas kho bo 'dir 'ongs so zhes pa'i bar du ni mchod rten phye bas 'chad pa dang / nyan pa rnams spro bar bya ba'i gtan tshigs bstan te/ sku mngon par ston cing gsung smra ba dang /me tog 'thor ba gnyis las 'di ni dang po'o/ /mdo las de nas 'khor bzhi po de dag gi zhes pa nas/ rin po che'i phung pos gtor to zhes pa'i bar du ni me tog 'thor ba bstan to/ /mdo las de nas bcom ldan 'das rin chen mang zhes pa nas 'dir bzhugs te de skad gsung ngo zhes pa'i bar du ni 'khor mang po la mchod cing yongs su gtad pa ston pa'o//mdo las de nas bcom ldan 'das shAkya thub pa zhes pa nas bzhugs par snang ngo zhes pa'i bar du sku gsum don chen po mdzad par 'dra bar bstan pa'i phyir sangs rgyas de gnyis gdan gcig la bzhugs pa dang theg pa gcig la 'du bar bstan pa'i phyir gdan gcig la bzhugs pa'o//mdo las de na 'khor bzhi po de dag ces pa nas bar snang la 'phags par bya'o snyam du sems so zhes pa'i bar du ni thams cad stong pa'i mtshan nyid gnas par bya ba bstan to/ /mdo las de nas bcom ldan 'das kyis zhes pa nas/ bar snang la bkod do zhes pa'i bar du ni theg pa chen po thos pas bla na med pa'i 'bras bu 'grub pa bstan to//mdo las/ bcom ldan 'das shAkya thub pa zhes pa nas/ yongs su mya ngan las 'das pa bzhed do zhes pa'i bar du ni yongs su gtad pa bstan to/ /mdo las/ de nas bcom ldan 'das kyis de'i tshe na zhes pa nas/ chos kyi phyir du brtson 'grus mi skyed zhes pa'i bar du ni 'di man chad tshigs bcad bzhi bcu rtsa brgyad la gnyis su dbye ste/tshigs bcad bcu gnyis kyis ni mchod rten mngon par 'byung ba bstan/ chos thos pa'i gtan tshigs kyis dam pa bstan/ de'i 'og gi tshigs bcad sum cu rtsa drug gis ni 'khor rnams mdo 'di thos par mos pa dang /yongs su gtad pa bstan to/ /mdo las/ tshig dang po la yang rnam pa gnyis su dbye ste/ tshigs bcad phyed dang gnyis kyis ni mchod rten mngon par byung bas 'khor rnams spro ba bskyed/ de'i 'og gi tshig phyed dang bcu gcig gis ni mchod rten phye ste 'khor la chos ston pa bstan to/ / mdo las/ bskal pa bye mang mya ngan las 'das kyang / /zhes pa nas yongs su rgyu ba phyogs bcu thams cad ces pa'i bar du ni mchod rten phye ste 'khor rnams spro ba bskyed pa la tshig dang po gnyis kyis ni gleng gzhi bstan/ phyi ma phyed dang dgus ni mchod rten phye ste mngon par ston pa bstan to/ /mdo las/ 'di dag thams cad nga yi lus gzugs te//zhes pa nas/ rdzu 'phrul gyis ni yongs su dag par byas/ /zhes pa'i bar du ni/ 'di man chad zhing bsgyur ba dang / sangs rgyas bzhugs pa dang / sku las spos kyi dri 'byung ba dang / sems can gyi don la 'jig rten na bzhugs pa'o/ /mdo las/ 'di lta bur ni 'di dag ngas bshad pa/ /zhes pa nas/mun nag chen po'i nang na me bzhin no/ /zhes pa'i bar du ni sangs rgyas bzhugs pa bstan to/ /mdo las/ phyogs bcu rnams su yid du 'ong ba'i dri/ /zhes pa nas/ chos kyi gzhung yang 'dzin pa ni zhes pa'i bar du ni dri 'byung ba dang / sems can la chos 'chad pa ston to/ /mdo las/ myur du tshig rnams rab smos shig /ces pa nas 'dren pa mang po bye ba 'dir lhags zhes pa'i bar du ni 'khor rnams mdo 'di thos par mos pa dang /yongs su gtad pa'o/ /de yang gsum du dbye ste/ tshigs bcad phyed dang bcus ni 'khor chos nyan pa mos pa bstan/ de'i 'og ma tshig bcu dgus ni khyad par bstan yang tshig phyed dang brgyad kyis ni spyod pa dam pa bsdus pa bstan/dang po la yang rnam pa gsum ste/ /tshig phyed dang bzhis ni 'dzin pa dang klog pa dang 'don par mos pa bstan/ tshig bzhis ni chos bsrung ba rnams yi dam gyi mthar phyin pa bstan/ yang tshig gnyis kyis ni chos 'chad par mos pa rnams bsam pa bzhin du grub par ston te 'di ni dang po'o/ /mdo las/ brtson pa nyan par bya ba rgyal ba'i bu//zhes pa nas/ de yis sa 'di mdzes shing rnam par bkra/ /zhes pa'i bar du ni chos bsrung bar mos pa rnams yi dam gyi mthar phyin pa bstan pa'o/ /mdo las/ de dag la yang mchod pa rgya che mtha' yas pa/ /zhes pa nas/ spro ba byed pa 'dren pas so/ /zhes pa'i bar du ni chos 'chad par mos pa rnams de bzhin gshegs pa mthong bar ston pa'o//mdo sde stong phrag mang po yang / /zhes pa'i bar du ni klog pa dang / 'don pa dang / 'dzin pa la sogs pa'i khyad par bstan pa dang / chos spyod pa rnam pa bcu'i khyad par bstan nas bsdus pa dang de bzhin gshegs pa'i dgongs pa dang mthun par bstan pa dang / yang dag pa'i spyod pa la gzhol ba bstan pa dang /de bzhin gshegs pa'i sras kyi gral 'tsho ba bstan pa dang / 'jig rten pa 'di dag la phan pa chen po mdzad pa bstan pa ste/ de dag ni mdo'i tshig dang ci rigs par sbyar ro/ /dam pa'i chos pad+ma dkar po'i 'grel pa yul seng ga la'i slob dpon sa'i rtsa lag gis byas pa rdzogs s+ho // //