CLOSE WINDOW

D4010
བོད་ཡིག

@##/ /rgya gar skad du/ Ar+ya sarba d+harma swa b+hA ba sa ma tA bi pany+tsi ta sa mA d+hi rA dza nA ma ma hA yA na sU tra TI ka kIr ti mA la nA ma/ bod skad du/ 'phags pa chos thams cad kyi rang bzhin mnyam pa nyid rnam par spros pa'i ting nge 'dzin gyi rgyal po zhes bya ba theg pa chen po'i mdo'i 'grel pa grags pa'i phreng ba zhes bya ba 'phags pa 'jam dpal gzhon nur gyur pa la phyag 'tshal lo//sangs rgyas thugs dang 'jam dbyangs la sogs rgyal sras rab mchog rnams kyis ji lta bar//mkhyen pa'i de nyid chos lam legs par blo ma sbyangs pa rnams kyis ma shes pa/ /shin tu sbyor ba goms par byas na blo chung rnams la'ang de blo skye bar 'gyur//des na bdag la rtag tu chos kyi de nyid rtogs pa mngon par 'byung bar shog /mdo sde'i dbang po ting 'dzin rgyal po yi/ /'dir ni 'grel pa byed par 'bad pa de/ / blo yangs gyur pa nyid kyis sangs rgyas nas/ /thub pa skyes mchog nyid du 'gyur ba yin/ /'di skad bdag gis zhes bya ba la sogs pas ni 'brel pa dang brjod par bya ba dang / dgos pa dang / dgos pa'i dgos pa rnams nyan pa'i skye bo rnams spro ba bskyed pa'i phyir dang por brjod par bya ba yin no//de yang 'di skad ces bya ba la sogs pa smos nas sdud par byed pas 'di skad bdag gis zhes smras pa yin no/ /de la chos thams cad kyi rang bzhin mnyam pa nyid rnam par spros pa'i ting nge 'dzin gyi rgyal po ni brjod par bya ba'o//de ston par byed pa'i gzhung gi tshogs kyang ting nge 'dzin gyi rgyal po zhes bya ste/ rgyu la 'bras bur btags nas so/ /rjod pa dang brjod bya de dag thabs las byung ba'i mtshan nyid ni 'brel pa yin no//yang dgos pa ni thos pa dang bsams pa dang bsgoms pa las byung ba'i shes pas chos thams cad kyi rang bzhin mnyam pa nyid rnam par spros pa'i ting nge 'dzin gyi rgyal po mngon sum du byed pa'o//de nas ting nge 'dzin de mngon sum du mdzad nas/ bcom ldan 'das mi gnas pa'i mya ngan las 'das pas sems can ma lus pa'i don mdzad pa ni dgos pa'i dgos pa yin no/ /des 'dod pa'i 'bras bu mthar thug pa yongs su rdzogs pas 'dod par bya ba gzhan med do zhes bya ba ni dgos pa mthar thug pa yin no//de la 'di skad ces bya bas ni mdo'i don ma lus pa bsdus pa bstan to/ /bdag gis zhes bya ba ni mngon sum du thos pa'o/ /thos pa zhes bya ba ni mngon sum du byas pa med par sdud pa pos bstan pa yin no//sdud pa po ni kun dga' bo yin te/ kun dga' bo khyod kyis 'di zung shig ces bya ba'i tshig gis so/ /phyag na rdo rje yang yin te/ ji ltar gzhan du bshad pa bzhin no/ /da ni gang gi tshe gang las gang du gang dag dang lhan cig mdo sde rin po che dpe med pa 'di lta bu khyod kyis thos zhes 'dri ba'i lan gdab pa'i phyir dang /rang nyid tshad mar bstan pa'i phyir sdud par byed pas yul la sogs pa bstan pa ni thos pa'i dus gcig na zhes bya ba la dus gcig na/ 'di lta bu'i mdo sde rin po che 'di thos kyi gzhan gyi tshe ni gzhan thos so zhes bya bas ni sman pa'i rgyal po snying rje can bzhin du bdag nyid mang du thos pa yin par sdud pa pos bstan pa yin te/'di lta bu'i mdo sde rin po che thams cad du thos pa yod pa yin no zhes bya ba'i bsam pas so/ /yang na dus gcig na zhes bya ba ni skad cig gcig la rmi lam du lha la sogs pa'i byin gyis brlabs kyis dus thung ngu la lo brgya la sogs pa dmigs pa lta bur chos kyi rgyun gyi ting nge 'dzin thob pa dang /de bzhin gshegs pa'i dang po'i dbang gis skad cig gcig la thos pa mi brjed pa yin pa la 'gal ba med do zhes bya ba ni bsdus pa'i don yin no//bcom ldan 'das zhes bya ba la/ nyon mongs las dang de bzhin skye/ /nyon mongs shes bya'i sgrib de bzhin/ /gang yang mi mthun phyogs chos rnams/ /bcom pas bcom ldan 'das zhes brjod/ /ces bya ba ni gsung rab kyi tshig yin no/ /nges pa'i tshig gi tshul gyis ni nyon mongs pa la sogs pa bcom pas bcom ldan 'das sam/dbang phyug dang ni gzugs bzang dang / dpal dang grags dang ye shes dang / brtson 'grus phun sum tshogs pa ste/ /drug po dag la ldan zhes grub/ /ces bya ba de dag 'di la yod pas bcom ldan 'das te/dbang phyug la sogs pa kun dang ldan pas bcom ldan 'das so/ /rgyal po'i khab na bzhugs zhes bya ba la bzhugs pa ni bzhi ste/ spyod lam gyis bzhugs pa dang / ston pas bzhugs pa dang / mnyam par bzhag pas bzhugs pa dang / nang du yang dag 'jog gis bzhugs pa ste/ gang cung zad sku'i phrin las su bgrang ba de dag thams cad spyod lam gyis bzhugs pa'o/ /gang dag gsung gi phrin las rnams ni ston pas bzhugs pa'o/ /gang dag thugs kyi phrin las rnams ni 'di dag las gzhan pa'i bzhugs pa rnam pa gnyis po yin te/ rtag tu mnyam par gzhag pa nyid dang /ting nge 'dzin la snyoms par zhugs pa ni mnyam par bzhag pas bzhugs pa'o/ /thugs rje chen pos 'jig rten la rnam par gzigs pa dang / lha la sogs pa nye bar 'du ba ni nang du yang dag 'jog gis bzhugs pa'o/ /rgyal po'i khab na bya rgod kyi phung po'i ri zhes bya bas gnas gnyis bstan pa ni khyim pa dang rab tu byung ba'i phyogs gnyis bsdu ba'i phyir ro//rgyal po'i khab ces bya ba ni don dang ldan pa'i ming ngo / /bya rgod kyi phung po'i ri zhes bya ba ni rin po che sna tshogs spungs pa'i rin po che chen po'i ri'i rgyal po ste/ bde bar gshegs pa sras dang bcas pa'i rgyal ba bskyed ma ston pa'i gnas te/dpag tu med pa'i bsod nams dang ye shes kyi tshogs las nges par byung ba'i mngon par byang chub pa'i gnas rdo rje'i gdan bzhin du mngon par mi g.yo ba yin no/ /'khor phun sum tshogs pa bstan pa'i phyir/ dge slong gi dge 'dun chen po dang thabs cig ces bya ba la sogs pa smos te/dge slong gi dge 'dun chen po ni/ nyon mongs sgrib pa spangs pa nyid/ /bdud rnams kun gyis mi phyed pas/ /nyan thos dge 'dun dge 'dun nyid/ /byang chub sems dpa'i dge 'dun ni nyon mongs pa dang shes bya'i sgrib pa dang / bral ba'i phyir dang / nyon mongs pa bcom pa'i phyir dang /theg pa gcig tu bstan pas bsam pa gcig pa nyid kyis mi phyed pa'i phyir dang / tshogs nas sems can gyi don byed pa'i phyir dge 'dun zhes bya'o/ /dge slong dge 'dun rtag gnas pas/ /sngon nyid du ni bstan par byas/ /zhes bya'o/ /byang chub sems dpa' rnams phyis bstan pa ni mdo sde rin po che dpag tu med pa nyan pa'i don dang /de bzhin gshegs pa rnams bzhin du gzhan gyi don byed pa la zhugs pa yin pa'i phyir thams cad du drung na gnas pa med par bstan pa'i phyir ro/ /thabs cig tu zhes bya ba ni lhan cig tu'o/ /yon tan gyis phye ba'i che ba bstan nas/ da ni grangs kyi che ba bstan pa'i phyir/dge slong 'bum du tshang ba zhes bya ba smos te/ grangs 'bum du tshang ba zhes bya ba rnam par bcad pa'o zhes bya ba'i bar du'o/ /byang chub sems dpa' dpag tu med pa 'dus par gyur na yang rab tu grags pa'i byang chub sems dpa' nye bar mtshon par bya ba'i phyir khrag khrig phrag brgyad cu zhes bya ba la sogs pa tshig smos so//thams cad kyang skye ba gcig gis thogs pa zhes bya ba la bar ma chod pa nyid du sangs rgyas nyid mngon du byed pa la sogs pa skye ba gcig gis thogs pa rnams dang thabs cig go zhes bya bar 'brel to/ /mngon par shes pa zhes bya ba ni 'jig rten gyi khams thams cad du rab tu grags pa zhes bya ba'i don to//gzungs dang mdo sde rtogs par khong du chud pa zhes bya ba ba ni sngags kyi gzungs dang / chos kyi gzungs dang / don gyi gzungs dang / mngon par rtogs pa'i gzungs so/ /de la ni sngags kyi gzungs gang zhe na/byang chub sems dpa' rnams kyi byin gyis brlabs dang bcas pa'i ye shes kyi sbyor ba dang / ting nge 'dzin la dbang bas byung ba de ni sngags kyi gzungs zhes brjod do/ /ting nge 'dzin la dbang ba'i stobs kyis sems can gyi gdon dang 'tshe ba zhi bar bya ba'i phyir sngags kyi tshig ting nge 'dzin la dbang thob pa las byung ba 'am/sngon gyi smon lam gyi stobs kyis byung ba yang rung bas mngon par byin gyis rlob te/ sngags kyi tshig 'di dag gis sems can rnams kyi gdon dang / 'tshe ba dang / nye bar 'tshe ba dang / kun nas nyon mongs pa thams cad nye bar zhi bar gyur cig ces brjod pas des de dag la sngags kyi tshig de dag 'grub par 'gyur ro//de ltar na gong ma gong ma'i sa la gnas pa'i byang chub sems dpa' chen po rnams kyi yang sems can rnams kyi don de dang de la dmigs nas byin gyis brlabs pa de lta de ltar yang dag par 'phel bar 'gyur ro/ /de lta bas na de ltar ting nge 'dzin gyi dbang gis byung ba'i sngags 'dzin pas sngags kyi gzungs zhes bya'o//de la chos kyi gzungs gang zhe na/ 'dir sa la bzhugs pa'i byang chub sems dpa' rnams sangs rgyas dang byang chub dpa' rnams las chos nyan pa na sngon goms par ma byas pa dang / sngon ma thos pa'i ming gi tshogs dang /tshig gi tshogs dang / yi ge'i tshogs kyis bsdus pa tshad med pa dpag tu med pa'i chos de dag rnams kyang go rims bzhin du bskal pa rab tu mang por yang mi brjed par dran pa dang shes rab kyis 'dzin pa ni chos kyi gzungs zhes bya'o/ /de la don gyi gzungs gang zhe na/byang chub sems dpa' de dag nyid kyis de ltar gzung ba'i chos gang yang tshad med pa grangs med pa'i don de rnams dus tshad med par mi brjed par dran pa dang shes rab kyis gcig tu byas nas 'dzin pa gang yin pa de ni don gyi gzungs zhes bya'o/ /de la mngon par rtogs pa'i gzungs gang zhe na/ji skad gsungs pa'i chos thams cad mngon par rtogs pa'i don bsgoms pas bstan par gyur pa de nyid la mngon par 'dod cing mngon par mi g.yo ba'i chos nyid la bzod pa'i bzod pa ni mngon par rtogs pa'i gzungs zhes bya'o/ /sa thams cad la yang gzungs so sor thob pa ni yod do//de la byang chub sems dpa'i sa dang po la khyad par du 'phags par byin gyis rlob pa zhes bya ba'i gzungs rab tu thob par 'gyur ro/ /gnyis pa la ni dri ma med pa zhes bya ba'o/ /gsum pa la ni shin tu rab tu gnas pa zhes bya ba'o/ /bzhi pa la ni gzung bar dka' ba zhes bya ba'o/ / lnga pa la ni yon tan gyis sems brgyan pa zhes bya ba'o/ /drug pa la ni ye shes kyi dkyil 'khor gyi sgron ma zhes bya ba'o/ /bdun pa la ni khyad par du 'gro ba zhes bya ba'o/ /brgyad pa la ni rnam par mi rtog pa zhes bya ba'o/ /dgu pa la ni sgo mtha' yas pa zhes bya ba'o/ /bcu pa la ni mi zad pa'i za ma tog ces bya ba ste/de ltar na sa dang sa la gzungs so sor thob cing gzungs rtogs par khong du chud pa'o/ /mdo sde rtogs par khong du chud pa zhes bya ba la/ nges pa dang drang ba'i don gyi mdo sde rnams rtogs pa ni ji lta ba bzhin du rtogs pa'o/ /de'i rab kyi mthar thug pa thob pa ni gzungs dang mdo sde rtogs par khong du chud pa'o//de dag dang thabs cig tu bzhugs zhes bya bar sbyar ro/ /nyon mongs pa med pas mdo sde la sogs pa sbyin zhing rab tu bstan pas sems can thams cad tshim par byed pa'o/ /mngon par shes pa chen po ni mi nyams shing sgrib pa med par yul thams cad 'dzin pa'i shes rab bo//de nyid rgyur gyur pas 'jig rten gyi khams mtha' yas pa rab 'byams rnams su khyab pa'i ngag brjod pa la mkhas pa'o/ /pha rol tu phyin pa thams cad ni sbyin pa la sogs pa pha rol tu phyin pa bcu'o/ /de rnams kyi dam pa'i pha rol te rab kyi mthar phyin pa thob pas so//byang chub sems dpa'i ting nge 'dzin thams cad ni dpa' bar 'gro ba la sogs pa la lhun gyis grub par 'jug pa'o/ /'bad pa dang bcas pas thod rgal la sogs pa la 'jug cing de dag la snyoms par 'jug pa dang ldang ba ji lta ba bzhin du shes pa gang gis shes pa de ni mnyam par gzhag pa dang ldang ba shes pa'o//de la mkhas pa ni des gsal ba'o/ /sangs rgyas thams cad kyis bstod cing bsngags te rab tu bkur ba zhes bya ba la/ sangs rgyas thams cad kyis bstod pa ni yon tan dam pa rnams brjod pa'o/ /bsngags pa ni bsam gyis mi khyab pa'i sems can gyi don byed pa'i sbyor ba'i khyad par rab tu ston pa'o//de'i phyir bkur ba ste bsod nams dang ye shes kyi tshogs kyi sgo nas rab tu bsngags pa'o/ /sangs rgyas kyi zhing thams cad du rdzu 'phrul gyis 'gro ba la mkhas pa zhes bya ba la/ yid kyi shugs kyi rdzu 'phrul gyis dus gcig la sangs rgyas kyi zhing thams cad du bdag gi lus yang dag par ston cing /de bzhin gshegs pa thams cad kyis gsungs pa'i chos nyan pa'i phyir dang / sems can gyi don byed pa'i phyir 'gro ba zhes bya ba ste/ de lta bu la mkhas pa'o/ /bdud thams cad skrag par bya ba'i shes pa la mkhas pa zhes bya ba la shes rab dang /thabs dang / snying rje chen po'i ye shes mkhas pas khams gsum las rnam par rgyal ba la sogs pa'i khro bo chen po sprul par byed pa'o/ /chos thams cad ces bya ba la sogs pa la chos thams cad ni 'dus byas dang / 'dus ma byas so//de dag skye ba med pa la sogs pa'i ngo bor rnam par rig pa ni ji lta ba bzhin du shes pa'o/ /de la mkhas pa ni gsal ba'o/ /sems can thams cad ces bya ba la sogs pa la/ sems can thams cad kyi dad pa la sogs pa'i dbang po chung ngu dang 'bring dang chen po'i dbye ba rnam pa tha dad pa skye ba mchog dang mchog ma yin pa dang 'brel pa de rnams shes nas de dag dang rjes su mthun pa'i chos ston pa'i ye shes la mkhas pa'o//sangs rgyas thams cad la mchod pa zhes bya ba la sogs pa la/ /de bzhin gshegs pa'i mchod pa ni rnam pa gnyis te//sgrub pa'i mchod pa ni ji skad gsungs pa'i bslab pa'i gnas rnams las mi 'da' bar bsrungs pa dang / chos nyid ji ltar gnas pa bzhin du sgrub cing rdzogs par byed pa'o/ /me tog dang spos la sogs pa ni phyi'i mchod pa ste/ de dag gnyis ka mchod pa'i las kyi bya ba'o/ / de dag gi sgrub pa shes pa la mkhas zhes bya ba ni snga ma bzhin no/ /'jig rten pa'i chos thams cad ces bya ba la sogs pa la/ rnyed pa dang ma rnyed pa dang / bde ba dang sdug bsngal ba dang / bstod pa dang smad pa dang / grags pa dang ma grags pa zhes bya ba 'di dag ni 'jig rten gyi chos brgyad de 'di dag gis ma gos pa'o//lus dang ngag dang sems yang dag par brgyan pa zhes bya ba la/ srog chags gsod pa dang / ma byin par len pa dang / mi tshangs par spyod pa mi dge ba'i lam spangs pas lus brgyan pa dang / brdzun du smra ba dang / phra ma dang / tshig 'khyal pa dang /ngag rtsub po med pas ngag brgyan pa dang / brnab sems dang gnod sems dang log par lta ba yongs su spangs pas sems brgyan pa'o/ /yang na mtshan sum cu rtsa gnyis dang / dpe byad bzang po brgyad cu ni lus kyi rgyan yin no/ /yan lag drug cu dang ldan pa'i gsung gis 'jig rten gyi khams mtha' yas pa khyab pa tshangs pa'i dbyangs kyis sems can rnams la chos ston pa ni ngag gi rgyan yin no//sems kyi rnam grangs shes pas sems can gyi sems kyi rgyun gyi bye brag rtogs nas 'dod chags la spyod pa la sogs pa'i sems can rnams 'dul ba ni sems kyi rgyan yin no//de'i phyir lus dang ngag dang sems yang dag par brgyan pa zhes bya'o/ /tshangs pa'i gnas bzhis gnas pa'i dbye ba med pa'i yon tan bstan pa'i phyir/ byams pa chen po dang / snying rje chen po'i go cha bgos pa zhes bya ba gsungs te/ byams pa dang snying rje smos pa ni dga' ba dang btang snyoms mtshon pa'i don to//brtson 'grus kyi pha rol tu phyin pa rab kyi mthar thug pa'i yon tan dang ldan pa bstan pa'i phyir/ bskal pa grangs med par yid mi skyo ba'i brtson 'grus che ba zhes bya ba gsungs te/ bskal pa grangs med pa mang por goms pa bdag gir byas pa nyid kyis brtson 'grus kyi pha rol tu phyin pa chen pos bskal pa grangs med par yid mi skyo bar sems can gyi don byed pas so//'khor thams cad zil gyis gnon pa'i yon tan la sbyor ba bstan pa'i phyir/ seng ge'i sgra chen po sgrogs pa zhes gsungs te/seng ge'i sgra chen po ni chos thams cad bdag med pa'i sgra ste/ ji ltar seng ge'i sgras wa rnams skrag par byed pa de bzhin du bdag med pa'i seng ge'i sgras mu stegs thams cad skrag par byed de/ seng ge'i sgra chen po sgrogs pa'i ngang tshul gang la yod pa de la de skad ces bya'o//bdud dang mu stegs la sogs pa zil gyis mi non pa'i yon tan de dag dang ldan pa nyid du bstan pa'i phyir/ /phyir rgol ba thams cad kyis zil gyis mi non pa zhes bya ba gsungs te/ /so so yang dag par rig pa bzhi rab tu brnyes nas rgyun mi 'chad pa'i spobs pa dang ldan pas de dag gis zil gyis mi non pa yin no//bstan ma thag pa gang yin pa de dag thams cad ni/ phyir mi ldog pa'i phyag rgyas btab pa zhes bya ste/ phyir mi ldog pa nyid du nges pa zhes bya ba'i don to/ /sangs rgyas thams cad kyi chos kyi dbang bskur ba thob pa ni byang chub sems dpa'i sa bcu pa la'o//de'i phyir thams cad kyang sa bcu pa'i dbang phyug yin no/ /'di lta ste zhes bya ba la sogs pa ni ji ltar grangs yongs su bstan pa'i byang chub sems dpa' rnams kyis ming rab tu bstan pa'i phyir/ lhun po dang zhes bya ba la sogs pa smos te/sngon goms par byas pa'i ting nge 'dzin yongs su rdzogs pa'i ngo bo de dang des tha snyad kyi don du ming rab tu bsgrags pa yin no/ /byang chub sems dpa' sems dpa' chen po zhes bya ba la/ gang la byang chub dang sems can la dmigs pa yod pa de la byang chub sems dpa' zhes bya'o//de'i phyir de ni gcig tu gzhan gyi don la zhugs pas sems dpa' chen po zhes bya'o/ /rgyal po chen po bzhi zhes bya ba nas/ tshangs ris kyi lha'i bu zhes bya ba'i bar dang / de las gzhan pa rnams kyis kyang yongs su bskor cing ste/kun nas yongs su bskor ba ni yongs su bskor ba'o/ /mdun gyis bltas nas zhes bya ba la mdun gyis blta ba byas pa ste/ mdun du byas pa la chos ston pa'o/ /khyad par ji lta bu can zhe na/ thog mar dge ba zhes bya ba la sogs pa gsungs te/ thog mar dge ba ste/ thog mar nyan thos kyi theg pa la zhugs pa rnams kyang sangs rgyas nyid thob par 'gyur ba'o//bar du dge ba ni rang sangs rgyas kyi theg pa la zhugs pa rnams kyang mthar sangs rgyas nyid du 'gyur ba'o/ /tha mar dge ba ni theg pa chen po la zhugs pa rnams ni drang po'i rim gyis sangs rgyas nyid thob par 'gyur ba'o//yang na thos pa dang bsam pa dang bsgom pa'i dus su yang tshad ma las byung ba'i don gyis mi slu ba'i phyir ro/ /don bzang po ni chos thams cad bdag med par rab tu sgrub pa'i phyir ro/ /tshig 'bru bzang po ni 'dod pa'i don ma tshang ba med par bde bar rtogs shing sgrub par byed pa'i chos skad sna tshogs kyis ston pa'o//ma 'dres pa ni gnyis su med pa'i chos nyid gsal ba'o/ /yongs su rdzogs pa ni bsod nams dang ye shes kyi tshogs yongs su rdzogs pa'i thabs ston pa'o/ /yongs su dag pa ni nyon mongs pa'i 'dam gyis ma gos pa'o//yongs su byang ba ni gcig tu dag pa'i nges par 'byung ba'i chos ston pa'o/ /tshangs par spyod pa yang dag par rab tu ston to zhes bya ba la/ tshangs pa ni mya ngan las 'das pa'o/ /de'i ched du sbyin pa la sogs pa spyad pa spyod pa'o/ /yang dag pa ni rab kyi mthar thug pa'o//rab tu ston pa ni gsal bar byed pa'o zhes gsungs so/ /de'i tshe 'khor tshogs pa zhes bya ba la sogs pa la/ mdo sde 'dir zla 'od gzhon nur gyur pa nyid gtso bor gyur pa nyid du bstan pa'i phyir/ 'khor tshogs pa de nyid du zhes bya ba la/ sogs pa gsungs te/ 'khor tshogs pa'i nang nas nye ba'i yul du 'ongs nas so/ /'dug par gyur pa ni ji ltar rigs pa'i stan la 'dug nas so/ /sngon gyi rgyal ba la bya ba byas pa zhes bya ba ni sngon gyi de bzhin gshegs pa rnams la sbyin pa la sogs pas bsnyen bkur byas shing /bya ba byas pa'i mtshan nyid gang la yod pa de ni sngon gyi rgyal ba la bya ba byas pa'o/ /de'i phyir dge ba'i rtsa ba bskyed pa'o/ /skye ba dran pa ni sngon gyi de bzhin gshegs pa rnams la bsnyen bkur byas shing bskyed pa'i dge ba'i rtsa ba dran par gyur pa'o/ /spobs pa thob pa ni mi brjed pa'i gzungs kyi spobs pa thob pa'o//theg pa chen po la yang dag par zhugs pa ni/ theg pa chen po'i chos nyid la yang dag par zhugs pa nyid do/ snying rje chen po la brtson pa zhes bya ba ni 'gro ba ma lus pa gdon par 'dod pa'i mtshan nyid can gyi brtse ba chen po la zhugs pa zhes bya ba'i don to//de nas zhes bya ba la sogs pa la/ gus pa dang bcas pas phyag 'tshal ba sngon du 'gro bas yongs su zhu bar byed do zhes shes par bya ba'i phyir ro/ /bdag bcom ldan 'das la zhu bar bgyid do zhes sbyar te/ phyogs 'ga' zhig ces bya ba ni phyogs ma lus pa dus gcig tu zhu ba ni mi srid pa dang /rang gi the tshom spang pa'i don du bdag cung zad cig 'dri bar bgyid do zhes bya ba'o/ /de ltar na yang skabs phye ba mdzad na zhu bar bya ba yin pas gal te zhus nas zhu ba lung bstan pa'i slad du/ bcom ldan 'das kyis bdag la skabs phye na zhes bya ba gsungs te//bcom ldan 'das ni rtag tu mnyam par gzhag pa yin pas sems can gyi spyod pa dang / bsam pa mkhyen pas rtag tu skabs phye ba yin na yang zla 'od gzhon nur gyur pa kho na gus pa bskyed pa'i phyir/ ci 'dod pa dris shig ces bya ba la sogs pa gsungs so//gzhon nu nga ni thams cad mkhyen pa zhes bya ba la sogs pa ni bdag nyid la bstod pa gtso bor byed pa ni ma yin gyi/ 'on kyang nye ba na gnas pa'i gdul bya'i skye bo'i 'khrul pa bzlog pa'i phyir ro/ /thams cad mkhyen pa zhes bya ba'i bshad pa ni thams cad gzigs pa zhes bya ba ste/gang la thams cad gzigs pa'i ngang tshul yod pa de la de skad ces bya'o/ /dngos po'i don ji ltar gnas pa bzhin gzigs pa'o/ /chos thams cad nges par rtogs pa dang / de bzhin gshegs pa'i stobs bcu dang /mi 'jigs pa ste 'jigs pa thams cad dang bral bas de dag gi khyu mchog tu gyur pa ni gtso bor gyur pa'o/ /rjes su thob pa ni thams cad gzigs pa nyid kyi rjes su brnyes pa dang ldan zhes bya ba'o/ /des na shes bya thams cad la sgrib pa med pa'i rnam par thar pa'i ye shes te/rnam pa thams cad mkhyen pa'i ye shes so/ /de dang ldan pa ni de dang bcas pa'o/ /mngon par rdzogs par sangs ma rgyas pa ci yang med de zhes bya ba dang sbyar ro/ /gzhon nu zhes bya ba ni mchod pa'i tshig go/ /'jig rten gyi khams mtha' yas mu med pa'i shes bya'i nang na gang cung zad mi mkhyen pa ci yang mi mnga' ste/des na thams cad mkhyen no zhes bya ba'i don te/ 'dis thams cad mkhyen pa zhes bya ba bshad pa yin no/ /thams cad gzigs pa zhes bya ba'i bshad pa ni mi gzigs pa'am zhes bya ba'o/ /chos thams cad la stobs dang / mi 'jigs pa zhes bya ba'i bshad pa ni mi gsan pa'am/ thugs su ma chud pa'am zhes bya ba'o/ /sgrib pa med pa'i rnam par thar pa'i ye shes dang ldan pa zhes bya ba'i bshad pa ni mngon sum du ma mdzad pa'am/ mngon par rdzogs par sangs ma rgyas pa ci yang med do zhes bya ba ste/thams cad mkhyen pa'i tshig gi bshad par gyur pa tshig lhag ma rnams yin par khong du chud par bya'o/ /de lta bas na dris shig ces bya ba'o/ /dri ba dris pa de dang de lung bstan pas ngas khyod kyi sems rangs par bya'o/ /zhes bya ba ni dga' bar bya'o zhes bya ba'i don to/tshigs su pa bcad pa'i dbyangs kyis 'dul ba'i sems can mgu bar bya ba'i phyir dang / bde blag tu khong du chud par bya ba'i phyir/ tshigs su bcad de gsol pa zhes rang gi sems la rnam par gnas pa 'das pa smra bar 'dod pa yin no/ /da ni the tshom thams cad gcad pa'i phyir/'od mdzad ji ltar spyad pa yis/ /zhes bya ba la sogs pa gsungs te/ ji ltar zhes bya ba ni rnam pa gang gis so/ /sbyin pa la sogs pa la ji ltar zhugs par gyur pas/ bsam gyis mi khyab ye shes 'thob/ /ces bya ba sbyar ro/ /'jig rten mgon po rdzogs sangs rgyas/ /'od mdzad ces bya ba ni bod pa'o//bsam gyis mi khyab ye shes ni rnam pa thams cad mkhyen pa'i ye shes te/ gzhan gyis bsam par bya mi nus pa'i phyir ro/ /lung yang bstan du gsol/ zhes bya ba ni de lta bu la sogs pa 'thob par 'gyur ba bstan du gsol zhes bya ba'i don to//mgon po gsung mchog zhus pa lung bstan gsol/ /zhes bya ba ni lung gi tshig yin te/ i a d+his kha bskang nas lung bstan gsol zhes bya ba'i don to/ /mi dang lhas mchod pa zhes bya ba la sogs pa yang ring por sbyor bas bod pa ste/ ji ltar lhas byin zhes bya ba lta bu'o//de bzhin du thams cad du blta bar bya'o/ /bdag la g.yo ni ma mchis te/ lhag pa'i bsam pas zhu ba lags/ /zhes bya ba la 'ga' zhig slu ba'i bsam pas kyang 'dri ba srid do snyam pa'i som nyi bsal ba'i phyir ro/ /de nyid kyi phyir/ bdag gi dpang ni gzhan ma mchis//zhes bya ba la sems can thams cad kyi bsam pa yongs su mkhyen cing mngon sum du gzigs pa'i phyir bcom ldan 'das kho na dpang du gyur pa yin no zhes bya ba'i don to/ /ji skad bstan pa'i don gzung ba'i phyir/ 'dun dang smon lam rgya cher zhes bya ba la sogs pa smos te/sangs rgyas nyid mngon sum du bya ba'i smon lam dang 'dun pa dang spyod pa ji lta ba bzhin bdag la mchis pa deng khyod kyis mkhyen pa'o/ /shAkya seng ge zhes bya ba la/ shAkya'i rigs su skye ba gzung ba dang / mi mkhyen pa'i 'jigs pa mi mnga' bas shAkya seng ge ste/ bdag la bshad du gsol zhes bya ba'o//bdag ni tshig la gtso bor 'dzin pa ma lags kyis/ /zhes bya ba la bdag ni tshig tsam gtso bor 'dzin pa yang ma lags la/ sgra tsam la lhag par chags pa yang ma lags kyi/ gzhan du na sgrub pa phun sum tshogs par bgyid pas de'i phyir/ mi dbang sgrub pa bdag la myur du gsungs/ /zhes bya ba bstan pa 'bras bu med pa ma lags so zhes bstan pa yin no/ /da ni mngon par 'dod pa nyid zhus pa ni/ yongs su sdud pa'i chos rnams gang / /zhes bya ba la sogs pa la/ gang bdag gis chos rnams bsdus pa'i sangs rgyas kyi theg pa ni theg pa chen po'o//gces spras bgyid pa ni sangs rgyas kyi yon tan ma lus pa skyed par byed pa nyid kyi phyir na gces spras bgyid pa'o/ /de dag gang lags lung bstan du gsol zhes bshad zin to/ /chos rnams kun gyi mthar phyin pa/ /zhes bya ba la chos rnams kun gyi mthar thug par gyur pa de'i phyir bdag zhu'o zhes bya ba dang 'brel to//phan par bgyid pa'i chos rnams bdag la gsungs/ /zhes bya ba la/ phan par byed par gyur pa nye bar mkho ba nyid bdag la gsungs zhes bya ba bstan du gsol zhes bya ba'o/ /ci nas mis bsten te nges par bsten pa'i mi'o//'gyur zhing zhes pa ni shes rab rno bar 'gyur ba'o/ /'di skad bstan par 'gyur te/ chos gang la bsten pas shes rab rno bar 'gyur te/ sangs rgyas kyi chos rnams 'dzin par nus pa'i shes rab mi de la 'byung bar 'gyur ba'o//mi bzad 'jigs dang bral te mi skrag pas/ /zhes bya ba la sogs pa la/ rgyal po dang chom rkun dang me dang mu ge la sogs pa'i 'jigs pas mi skrag pas tshul khrims kyi phung po ji lta na yang gtong bar mi bgyid pa'o/ /ji ltar na grags pa dang zhe sdang dang gti mug dang chags pa dang bral nas byang chub sems dpa'i spyad pa spyod pas nyes pa kun zhi zhing grol bar 'gyur ba'o//dge slong ngam byang chub sems dpa' tshul khrims la sogs pa'i sdom pa/ ji ltar tshul khrims mi gtong zhing / /ji ltar bsam gtan 'dor mi 'gyur/ /zhes bya bas ni mi gtong ba'i rgyu zhus pa yin no//dgon pa la ni ji ltar bstan/ /zhes pas ni sems dben pa'i mtshan nyid 'chad par 'gyur ro/ /bdag gi shes rab ji ltar 'phel/ /zhes bya bas ni shes rab lhag par 'phel bar 'gyur ba'o/ /ji ltar mchog gi tshul khrims la mngon par dga' bar 'gyur/ji ltar tshul khrims kyi phung po skyon med 'gyur/ ji ltar 'dus byas kyi chos rnams kyi rang bzhin 'jal bar 'gyur/ ji ltar lus dang ngag dang yid dag par 'gyur/ ji ltar na lus dang yid kyi las rnams dag par 'gyur/ de dag thams cad bdag la bstan du gsol//zhes bya ba ni bsdus pa'i don yin no/ /de skad ces gsol pa dang / bcom ldan 'das kyis zla 'od gzhon nur gyur pa la 'di skad ces bka' stsal to zhes bya ba la/ zla 'od gzhon nur gyur pas gang zhus pa de bstan par bya ba rnams nye bar dmigs nas 'di skad ces bya ba la sogs pas bstan pa'o//ji skad bstan pa'i zhus pa rnams kyi lan gdab pa'i phyir/ chos gcig dang ldan na zhes bya ba la sogs pa ste/ yon tan 'di dag 'thob par 'gyur zhing myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ / zhes bya ba ni mdor na de thams cad kyi chos nyid ji lta ba bzhin myur du mngon par rtogs par 'gyur ro zhes bya ba'i don to/ /chos gcig po gang zhe na zhes bya ba ni chos du ma yod pas gang yin mi shes so zhes zhus pa'o/ /gzhon nu 'di zhes bya ba la sogs pas ni gsal por ston par mdzad pa'o//sems can thams cad la sems snyoms pa yin zhes bya ba ni snying rje chen pos bu gcig pa la brtse ba lta bu dang ldan pa'o/ /phan pa'i sems dang zhes bya ba ni ma 'ongs pa'i dus na phan par 'gyur ba'i chos la zhugs pa'i phyir ro/ /khong khro ba med pa'i sems ni sems can thams cad la khong khro ba med pa'o//mi mnyam pa med pa'i sems ni chos nyid dang mnyam pa nyid du zhugs pa'o zhes bya ba khyad par rnam pa gsum gyis khyad par can du gyur pa ni gcig nyid yin pas 'di dang ldan na yon tan 'di dag thams cad 'thob par 'gyur zhing zhes bya ba ni bstan pa dang /'chad par 'gyur ba rnams myur du mngon par byang chub par 'gyur ba'i rang bzhin zhes bya ba'i don to/ /don de dag nyid tshigs su bcad pa rgyas par zla 'od gzhon nu la khong du chud par bya ba'i phyir/ de nas bcom ldan 'das kyis zhes bya ba la sogs pa gsungs te/de nas zhes bya ba ni de ma thag tu'o/ /yang zhes bya ba ni tshig gi rgyan no/ /de'i tshe zhes bya ba ni ston pa'i skabs la bab pa'i tshe'o/ /zla 'od gzhon nur gyur pas zhes bya ba la/ byang chub kyi zla ba'i 'od kyis nyon mongs pa ma lus pa'i gdung ba rab tu zhi bar byed cing /sangs rgyas kyi yon tan rin po che'i sman gyi nus pa skyed par byed pa'i 'od de gang la yod pa de la de skad ces bya ba'o/ /skyon thams cad dang bral bas gzhon nur gyur pa zhes bya ba de la gtad nas tshigs su bcad pa gsungs pa/ chos gcig yang dag blangs nas ni/ / byang chub sems dpa' gang gnas pa/ /zhes bya ba la sogs pa ste bshad zin to/ /mnyam pa'i sems la brten pa yis/ rnam par smin pa mnyam par bstan/ /zhes bya ba la/ sems mnyam pa nyid du zhugs pa la rnam par smin pa'i khyad par gyi yon tan de bzhin gshegs pas bstan zhes bya ba'i don te/de bzhin gshegs pa'i zhabs kyi mthil yang mnyam par 'gyur ba'o/ /cho ga spyod yul ma lus pa mnyam par 'gyur zhes bya bar sbyar ro/ /mnyam pa'i sems kyi yon tan bstan nas/ mi mnyam pa ma yin pa'i gsungs pa/ mnyam zhing mi mnyam ma yin sems bsgoms nas//zhes bya ba la sogs pa la/ tha ba'i skyon bral nem nur rab spangs na/ /zhes bya ba la/ tha ba dang 'dra bar yon tan gyi lo tog skye ba dang bral ba'i skyon te/ 'dod chags la sogs pa dang bral ba gang la yod pa de la de skad ces bya zhing / chos rnams kyi de kho na nyid khong du chud pas nem nur rab tu spangs pa gang yin pa de la de skad ces bya'o//de'i rkang lag mthil yang mnyam pa ni snga ma bzhin no/ /mchog tu 'od gsal dag pa ni gser gyi mdog nyid do/ /blta na sdug pa ni kun nas so/ /phyogs bcur lhang nger snang ba ni phyogs bcu rnams su byang chub sems dpa' lhang nger snang ba'o//sangs rgyas kyi zhing mtha' yas par 'od 'phro zhing khyab par byed de/ gzi brjid kyis thams cad zil gyis mnan nas gdul ba'i phyir ro/ /nam des zhi ba'i sa ni thob pa'i tshe/ /zhes bya ba ni spros pa thams cad dang bral ba'i de kho na nyid sangs rgyas kyi yon tan thams cad kyi rten du gyur pa gang yin pa de ni zhi ba'i sa zhes bya ste/sa de thob pa ni brnyes pa'o/ /sangs rgyas mkhyen la sems can mang po dgong / /ces bya ba ni sems can gyi khams bya ba tha dad pa rnams sangs rgyas mkhyen pa ste/ rnam pa thams cad mkhyen pa'i ye shes de la'o//dgod ces bya ba ni rab tu dgod par bya ba ste/ de'i tshe nus pa dang ldan pa'i phyir ro zhes bya ba'i don to/ /gzhon nu de la zhes bya ba la sogs pas ni sngar gsungs pa'i rjes su bstan pas 'bras bu gsung pa ste chos thams cad kyi rang bzhin mnyam pa nyid rnam par spros pa zhes bya ba'i ting nge 'dzin thob par 'gyur ro zhes bya ba la/chos thams cad ni mdor bsdu na 'dus byas dang 'dus ma byas so/ /zag pa dang bcas pa dang zag pa med pa la sogs pa ni 'di dag gi khongs su gtogs pa yin no/ /thams cad kyang yin la chos kyang yin pas chos thams cad do//de dag gi ngo bo rang gi ngo bo ste/ de bzhin nyid kyi ngo bo mnyam pa nyid kyi ngo bo ni mnyam pa nyid do/ /rnam par spros pa ni lus kyi sdom pa zhes bya ba la sogs pas ting nge 'dzin gang bshad pa'o/ /de ni chos thams cad kyi rang bzhin mnyam pa nyid rnam par spros pa'i ting nge 'dzin to//yang na chos thams cad kyi rang bzhin mnyam pa nyid ni snga ma bzhin no/ /de ni spros pa dang / gzhan du bya ba dang / tha dad du dbye ba dang / dum bur bya bar mi nus pa yin te/ rnam par rtog pa'i spros pa thams cad dang bral ba'i ting nge 'dzin la dbye ba med pa'i phyir ro//chos thams cad kyi rang bzhin mnyam pa nyid rnam par spros pa med pa'i ting nge 'dzin zhes bshad par bya'o/ /dang po'i bshad pa nyid dang sbyar ba'i phyir/ gzhon nu chos thams cad kyi rang bzhin mnyam pa nyid ces bya ba la sogs pa gsungs pa la 'di lta ste lus kyi sdom pa dang zhes bya ba la sogs pa brgya phrag gsum gyis ni mdor bstan pa yin la/rgyas par ni bcom ldan 'das nyid kyis 'og nas nges par ston par 'gyur ro/ /de ltar na yang cung zad tsam dgrol bar bya'o/ /de la lus kyi sdom pa ni srog gcod pa dang / ma byin par len pa dang / 'dod pa la log par spyod pa spangs pa'i 'khor gsum yongs su dag pa'o//ngag gi sdom pa ni brdzun du smra ba dang / phra ma dang / tshig rtsub po dang / ngag 'khyal pa spangs pa'o/ /yid kyi sdom pa ni/ brnab sems dang / gnod sems dang / log par lta ba spangs pa'i 'khor gsum yongs su dag pa'o//las yongs su dag pa ni rmi lam lta bu'i chos rnams la mngon par zhen pa med par thams cad du 'jug pa'o/ /dmigs pa las yang dag par 'da' ba zhes bya ba ni sems tsam sgyu ma lta bur rtogs pas phyi dang nang gi gzung ba dang 'dzin pa rjes su mi dmigs pa'o//phung po yongs su shes pa ni gzugs dang / tshor ba dang / 'du shes dang / 'du byed dang / rnam par shes pa'i phung po rnams dbu ba gong bu dang / chu bur dang / smig rgyu dang / chu shing gi sdong po dang / sgyu ma lta bu nyid du yongs su shes pa'o/ /khams mnyam pa nyid ces bya ba ni/khams bco brgyad po rnams sprul pa lta bur mnyam pa nyid do/ /skye mched sel ba dang zhes bya ba ni skye mched bcu gnyis po rnams gzugs brnyan dang 'dra bas rang bzhin med pa nyid du khong du chud pa'o/ /srid pa spong ba dang zhes bya ba ni chos thams cad rang bzhin gyis stong pa nyid la dmigs pa ni rjes su mi dmigs pa'o//mi skye ba mngon sum du byed pa zhes bya ba ni rang dang gzhan dang gnyi ga nyid ngo bo nyid kyis ma skyes pas gdod nas skye ba med pa'i chos kyi dbyings kyi rang bzhin khong du chud pa'o/ /byed pa la 'jug ces bya ba ni chos thams cad skye ba med par rtogs kyang sems can gyi don bya ba mi spong bar brtson 'grus brtsams pas 'jug pa'o//rgyu gsal bar byed pa zhes bya ba ni chos thams cad sgra brnyan lta bur rig nas brag ca lta bu'i sgras byang chub kyi sems dang sbyin pa'i pha rol tu phyin pa la sogs pa ston pa'o/ /las kyi 'bras bu chud mi gson pa zhes bya ba ni rmi lam dang 'dra ba'i las rnams las 'bras bu yang rmi lam dang 'dra ba so sor nges pa nyid yin te/rten cing 'brel par 'byung ba'i chos nyid yin pa'i phyir ro/ /chos mthong ba zhes bya ba ni chos rnams mthong ba med pa nyid ni don dam par chos nyid mthong ba yin pas chos mthong ba zhes bya'o//lam bsgom pa zhes bya ba ni 'phags pa'i lam yan lag brgyad pa'i ngo bo mi dmigs pa nyid kyis mngon par zhen pa med par bsgom par bya ba dang sgom pa po dang bsgom pa rjes su mi dmigs par sgom pa ni lam bsgom pa'o/ /de bzhin gshegs pa la brten pa zhes bya ba ni de bzhin gshegs pa thams cad kyis gsungs pa'i bslab pa yongs su skyong ba dang /chos nyid la nan tan byas pas sangs rgyas la brten par 'gyur ro/ /shes rab rno ba zhes bya ba ni chos thams cad skye ba med pa'i chos nyid zab mo la bzod pa so sor rtog pas sangs rgyas nyid mngon sum du byed pa'i shes rab ni rno ba nyid do//sems can rjes su 'jug pa zhes bya ba ni sems can thams cad kyi bsam pa dang bag la nyal ba dang dbang po mchog dang mchog ma yin pa la 'jug pa'i ye shes so/ /chos shes pa zhes bya ba ni chos thams cad kyi chos kyi sku'i ngo bor yongs su shes pas rjes su mi dmigs pa'i sbyor bas chos thams cad mthong ba ni chos mthong ba'o//so sor yang dag par rig pa la 'jug pa shes pa ni chos dang don dang nges pa'i tshig dang spobs pa so so yang dag par rig pa rnams la sems can rnams chos kyi tshul ji lta ba bzhin du nan tan byed cing 'dzud pa dang /bdag nyid kyang de bzhin du nan tan gyis yang dag par sgrub pa ni so so yang dag par rig pa la 'jug pa shes pa'o/ /yi ge dang tshig rab tu dbye ba shes pa zhes bya ba ni a la sogs pa'i yi ge rnams gdod nas ma skyes pa la sogs par rab tu 'byed pa ni yi ge'i rab tu dbye ba'o//tshig rab tu 'byed pa ni su pa dang dan ta'i dbye bas ming gi tshogs dang tshig gi tshogs dang / yi ge'i tshogs/ pho dang mo dang ma ning la sogs pa 'jig rten gyi tha snyad kyi dbye bas tha dad pa'i rnam grangs du mar yongs su shes pa'o//chos nyid mi 'gyur zhing mi zad pa de ni tshig rab tu gnas par gyur pa'o/ /de ni chos thams cad kyi rab kyi mthar thug par 'byed pas rab tu dbye ba'i ye shes te gnyis su med pa'i ye shes so/ /dngos po rnams las yang dag par 'da' ba zhes bya ba ni mu stegs la sogs pas yongs su brtags pa rdzas dang yon tan dang las dang spyi dang bdag la sogs pa'i rdzas ma lus pa sgro btags pa tsam du shes nas mi zhen par yongs su gtang ba ni dngos po las yang dag par 'da' ba'o//sgra yongs su shes pa zhes bya ba ni brag ca lta bu nyid yin pa'i phyir ngo bo nyid kyis yongs su ma grub par shes pa ni sgra yongs su shes pa'o//dga' ba rab tu thob pa zhes bya ba ni chos thams cad kyi rang gi ngo bo ji lta ba khong du chud pas dga' ba dang yid bde bas nyon mongs pa dang nye ba'i nyon mongs pa dang bral ba nyams su myong ba ni dga' ba rab tu thob ces bya'o//chos kyi dga' ba rjes su myong ba zhes bya ba ni theg pa chen por phan yon mthong ba'i chos rnams la ji lta ba bzhin bslabs shing nan tan byas pa'i dga' bas thams cad du chos kyi dga' ba dang mi 'bral ba ni chos kyi dga' ba rjes su myong ba zhes bya'o//drang ba dang zhes bya ba ni theg pa chen po'i lam gyi bde ba rab tu rtogs nas chos nyid khong du chud pa yin gyi/ nyan thos la sogs pa'i lam gyis ni ma yin te/ sangs rgyas nyid thob par bya ba la nyan thos la sogs pa'i lam ni drang po ma yin pa'i phyir ro/ /des na drang po nyid kyi ngo bo ni drang po'o//shugs drang ba zhes bya ba ni lus dang ngag dang sems la g.yo ba med pas rtog pa med pa'i spyod lam nyid las spyod lam la 'khyogs pa med pa ni shugs drang ba zhes bya'o/ /khro gnyer dang bral ba dang zhes bya ba ni 'dod chags dang zhe sdang dang gti mug rab tu spangs pas/zhe sdang gi cha la gdags pa'i khro ba las kun tu byung ba'i smin ma'i bar na ri mo yon po med pa ni khro gnyer dang bral ba zhes bya'o/ /des pa zhes bya ba la/ des pa nyid ni des pa ste bshes gnyen du gyur pa nyid kyis zhe sdang dang bral ba'i phyir 'grogs na bde ba ni des pa zhes bya'o//'jam pa zhes bya ba ni mngar ba dang / gya nom pa dang / zhim pa dang / gzhan la phan pa'i dngos po dang / sems mnyam pa nyid dang / sems can thams cad la brtse ba nyid ni 'jam pa zhes bya ba'o/ /bzhin 'dzum pa dang gsong por smra ba zhes bya ba la/ gdong gi pad+ma rgyas par byas shing mdzes pas dang po nyid du tshur spyon/bde bar byon nam zhes phebs par smra ba ni bzhin 'dzum pa dang / gsong por smra ba zhes bya'o/ /bla ma la gus pa zhes bya ba ni bla ma dang nye ba na 'jigs pa dang bcas pa dang / gus pa dang bcas pas dge ba'i bshes gnyen gyi 'du shes kyis dus thams cad du rjes su 'jug pa ni bla ma la gus pa zhes bya'o//bla ma la sri zhu che ba zhes bya ba ni dam pa'i chos nyan par 'dod pas bla ma dang nye bar phyin nas nye bar blta ba dang / yongs su spyod pa la le lo med par thams cad du 'jug pa ni bla ma la sri zhu che ba zhes bya'o//skye bas chog shes pa zhes bya ba ni skye ba thams cad kyi rang bzhin rnam par rig pa'i phyir mngon par ma zhen cing / don du mi gnyer la ro mi myang ba nyid du sems can gyi don ched du byed pas 'dor bar yang mi byed pa ni skye bas chog shes pa zhes bya'o/ /chos dkar pos mi ngoms pa zhes bya ba ni sangs rgyas nyid thob par byed pa'i chos rnams nyan pa dang /sems pa dang sgom pas yongs su mi skyo ba dang / dkar po'i chos rnams gong nas gong du bsten pa dang / dge ba gang yin zhes tshol ba ni chos dkar pos mi ngoms pa zhes bya'o/ /'tsho ba rnam par dag pa zhes bya ba ni rigs pas rnyed pas chog shes shing /rnyed pa'i ched du spyod lam bsrungs nas snyan par smra ba la sogs pa yongs su spong ba'i log pa'i 'tsho ba yongs su spangs pa ni 'tsho ba rnam par dag pa'o/ /dgon pa la gnas pa mi gtong ba zhes bya ba ni nyan thos dang / rang sangs rgyas kyi sems dang bral ba'i sems yongs su mi gtong ba dang /yi dam du blangs pa mi spong ba dang / chos dben pa la mngon par dga' ba dang / bsam gtan la rtse gcig pa ni dgon pa la gnas pa mi gtong ba zhes bya'o/ /sa rnam par gzhag pa shes pa zhes bya ba ni nyan thos kyi sa dkar po rnam par mthong ba la sogs pa brgyad/rang sangs rgyas kyi sa dang dgu/ byang chub sems dpa'i sa rab tu dga' ba nas chos kyi sprin gyi bar du bcu'o/ /de dag gi rnam par gzhag pa ni sa gang dag la dus ji srid du gnas nas yon tan ji snyed yod pa ji lta ba bzhin du shes pas rnam pa thams cad shes pa ni sa rnam par gzhag pa shes pa zhes bya'o//dran pa chud mi gson pa zhes bya ba ni nyan thos kyi mi rtag pa dang / sdug bsngal ba dang / stong pa dang bdag med pa la sogs pa yongs su mi mnyam pa'o/ /byang chub sems dpa' rnams kyi ni stong pa nyid dang / mtshan ma med pa dang /smon pa med pa dang / rang bzhin gyis 'od gsal ba rnams dang / pha rol tu phyin pa la sogs pa'i dran pa mi nyams pa'o/ /phung po la mkhas pa zhes bya ba ni phung po dang / khams dang / skye mched rnams rten cing 'brel par 'byung ba nyid du rtogs pa dang / ngo bo med par rtogs pa la mkhas pa ni phung po la mkhas pa zhes bya'o//mngon par shes pa mngon sum du bya ba la 'jug pa zhes bya ba ni rdzu 'phrul gyi rkang pa bzhi mngon sum du byas nas mngon par shes pa lnga nges par sgrub pa'o/ /de las rdzu 'phrul gyi cho 'phrul yang dag par bstan pas sems can dbang du byas pa ni mngon par shes pa mngon sum du bya ba la 'jug pa'o//nyon mongs pa sel ba zhes bya ba ni 'dod chags dang zhe sdang dang gti mug gi rgyun chags pa dang / sdang ba dang rtag par lta ba byung ba'i gnyen po sgom pa ni nyon mongs pa sel ba zhes bya'o/ /bag chags kyis mtshams sbyor ba yang dag par 'joms pa zhes bya ba ni sngon gyi so so'i skye bo'i chos dang /nyan thos dang rang sangs rgyas kyi chos kyi bag chags rtsa ba nas spangs nas byang chub sems dpa' rnams kyi byang chub chen por smon lam btab pa dang / chos thams cad stong pa nyid sgom pa ni bag chags kyis mtshams sbyor ba yang dag par 'joms pa zhes bya'o//khyad par du 'gro ba zhes bya ba ni de bzhin gshegs pa thams cad kyi stobs dang / mi 'jigs pa dang / so so yang dag par rig pa dang / sangs rgyas kyi chos ma 'dres pa rnams nges par sgrub pa ni khyad par du 'gro ba zhes bya'o/ /bsgoms pa'i rgyu mthun pa zhes bya ba ni chos thams cad mnyam pa nyid du bsgoms pa'i stobs kyis rjes su chags pa dang khong khro ba spangs pa ni bsgoms pa'i rgyu mthun pa zhes bya'o//nyes pa las 'byung ba la mkhas pa zhes bya ba la/ so sor thar pa'i 'dul ba las bstan pa'i bslab pa'i gnas kyi bye brag las 'das pa rnams las ldang bar bya ba la mkhas pa ni nyes pa las 'byung ba la mkhas pa zhes bya'o//kun nas ldang ba gnon pa zhes bya ba ni mi dge ba sngon byas pa'i nyes pa 'chags shing yang mi byed pa'i sdom pa yang dag par len pa dang / gnyen po'i phyogs sgom pa ni kun nas ldang ba gnon pa zhes bya'o/ /bag la nyal spong ba zhes bya ba ni khams gsum gyi skye ba la sred cing dga' ba'i 'khri shing rgyas pa rtsa ba nas gcod cing sel ba dang /chos thams cad la sred pa rab tu spangs pa ni bag la nyal spangs pa'o/ /srid pa las yang dag par 'da' ba zhes bya ba ni srid pa'i rgyu ma rig pa dang srid pa yang dag par spangs pa dang /khams gsum pa'i yid la byed pa las yang dag par 'das pa ni srid pa las yang dag par 'da' ba zhes bya'o/ /skye ba dran pa zhes bya ba ni sngon gyi gnas rjes su dran pa'i mngon par shes pa'i stobs kyis skye ba brgyud pa dpag tu med pa mngon par dran pa ni skye ba dran pa zhes bya'o//las kyi rnam par smin pa la nem nur med pa zhes bya ba ni rtag pa dang chad pa'i mtha' gnyis dang bral ba'i rten cing 'brel par 'byung ba'i chos nyid khong du chud pas las dang rnam par smin pa la the tshom med pa ni las kyi rnam par smin pa la nem nur med pa zhes bya'o/ /chos sems pa zhes bya ba ni chos nyid dang /de bzhin nyid dang / yang dag pa'i mtha' rnams ni de bzhin gshegs pa byung yang rung ma byung yang rung chos rnams kyi chos nyid 'di ni de bzhin du gnas pa yin pas chos zhes bya ba'i sgras chos nyid bstan la/ de la sems pa dang sgom pa dang yang dag pa ji lta ba bzhin rab tu rtog pa ni chos sems pa zhes bya'o//thos pa tshol ba zhes bya ba ni nyan thos dang rang sangs rgyas dang byang chub sems dpa'i yon tan rgya cher ston pa'i khyad par rtogs pa tshol zhing / sde snod gsum dang / byang chub sems dpa'i sde snod dang / shin tu rgyas pa rmad ga cad nyan zhing don gyi khyad par tshol ba ni thos pa tshol ba zhes bya'o//ye shes rno ba zhes bya ba ni chos thams cad sgyu ma lta bu dang / rmi lam lta bu dang / rang bzhin gyis stong pa nyid ces bya ba la sogs pa ni ye shes rno ba zhes bya'o/ /ye shes la sred pa zhes bya ba ni gong ma gong ma'i ye shes kyi sa pa'i chos nyid rtogs pa'i ye shes tshol ba ni ye shes la sred pa zhes bya'o//ye shes rjes su rtogs pa zhes bya ba ni bla na med pa yang dag par rdzogs pa'i byang chub mngon du mdzad pa'i ye shes dang / de skyed par byed pa'i lam gyi ye shes rtogs pas rgyu dang 'bras bu'i ye shes rtogs pa ni ye shes rjes su rtogs pa zhes bya'o//cang shes kyi sa dang zhes bya ba la/ cang shes ni lnga ste/ glang po che dang / rta dang / glang dang / seng ge dang / nyan thos rnams te/ 'jigs pa dang bral ba nyid dang / dul ba nyid kyis so/ /byang chub sems dpa' rnams ni cang shes chen po ste/ lam drang po nas 'gro ba nyid kyi phyir dang /'jigs pa thams cad yang dag par spangs pa nyid kyi phyir ro/ /de dag gi sa ni rab tu dga' ba la sogs pa sa bcu'o/ /de dag la bslabs pas yon tan thams cad nges par skyed par byed pas sa ste/ cang shes kyi sa zhes bya'o/ /sems ri lta bu zhes bya ba la/ bdud dang mu stegs pa thams cad kyi mi bskyod pa dang /byang chub chen por sems brtan pa ri'i rgyal po ri rab ltar mi g.yo bar byang chub kyi snying po la bzhugs nas kyang lha'i bu'i bdud la sogs pa bdud bzhis mngon par mi g.yo ba'i thugs de'i ngo bo ni sems ri rab lta bu zhes bya'o/ /mi bsgul ba zhes bya ba ni nyon mongs pa'i rlung thams cad kyis yang dag par mi 'phrogs pas mi bsgul ba zhes bya'o//mi g.yo ba zhes bya ba la/ phyi dang nang gi mtshan ma rnams yid la mi byed pas/ rjes su mi dmigs pa ni mi g.yo ba'o/ /phyir mi ldog pa'i mtshan nyid ces bya ba ni gang gis phyir mi ldog par mtshon pa'i pha rol tu phyin pa drug dang ma bral ba nyid dang /de bzhin gshegs pa thams cad mthong ba dang / bsnyen bkur byas pa dang / des gsungs pa'i chos thos pa dang / bsgom pa dang mi 'bral ba'i byang chub sems dpa'i spyod pa ni phyir mi ldog pa'i mtshan nyid ces bya'o/ /dkar po'i chos mngon par rdzogs par 'byor pa zhes bya ba la dkar po'i chos thams cad yongs su rdzogs pas yang dag par rdzogs pa'i byang chub dang nye bar gyur cing /dkar po'i chos mngon par rdzogs par 'byor pa zhes bya'o/ /sdig pa'i chos la smod pa zhes bya ba ni sdig pa'i chos kyi rnam par smin pa yongs su shes pas dang po nas kyang sdig pa'i las mi byed la/byas pa rnams kyang 'chags shing phyin chad kyang mi byed par yang dag par sdom pa ni sdig pa'i chos la smod pa zhes bya ba'o/ /nyon mongs pa rnams kyi rgyu ba med pa zhes bya ba la ma rig pa dang sred pa dang 'dod chags dang zhe sdang dang gti mug rnams mi skyed pa dang /yid la mi byed pa ni nyon mongs pa rnams kyi rgyu ba med pa zhes bya'o/ /bslab pa yongs su mi gtong ba zhes bya ba ni las dang 'bras bu nges par 'brel par rtogs pas bden pa dang dkon mchog la yid ches pa bstan pa dang / de bzhin gshegs pa la gus pa ni bslab pa yongs su mi gtong ba zhes bya'o//ting nge 'dzin la rnam par 'jog pa zhes bya ba ni sems dang sems las byung ba'i chos rnams skye zhing 'gag pa'i ngo bo la rtogs pa la mkhas pa dang ma tshang ba med pa'i ting nge 'dzin rnams la sems rtse gcig pa ni ting nge 'dzin la rnam par 'jog pa zhes bya'o//sems can rnams kyi bsam pa shes pa zhes bya ba ni dman pa dang 'bring dang mchog gi dbang po'i dbye ba tha dad pa'i sems can rnams kyi bsam pa shes nas de dang rjes su mthun pa'i chos bstan pa'i phyir/ dbang po mchog dang mchog ma yin pa mkhyen pa ni sems can gyi bsam pa shes pa zhes bya'o//skye ba'i khyad par shes pa zhes bya ba ni 'gro ba rigs lnga rnams kyi 'khor bar gang du skyes na sems can rnams kyi don du 'gyur ba der byang chub sems dpa' rnams bsams bzhin du skye ba len pa'i shes pa ni skye ba'i khyad par shes pa zhes bya'o//shes pa mtha' yas pa shes pa zhes bya ba ni 'jig rten dang 'jig rten las 'das pa'i las kyi gnas dang / bzo'i gnas shes pa de'i khyad par nyid dbye ba dpag tu med pa shes pa ni shes pa mtha' yas pa shes pa zhes bya'o/ /tshig gi dgongs pa shes pa zhes bya ba la/ sems can gyi bsam pa la dgongs pa dang /bstan pa la dgongs pa dang / don gzhan la dgongs pa dang / dus gzhan la dgongs pa'o/ /de dang de la dgongs nas bstan pa'i dgongs pa can gyi tshig de dang de rtogs pa'i shes pa ni tshig gi dgongs pa shes pa zhes bya'o/ /khyim na gnas pa yongs su gtang ba zhes bya ba la lus dang ngag dang sems dben pa dang /chags pa thams cad yongs su spangs nas rab tu byung nas nges par 'byung ba'i sems ni khyim na gnas pa yongs su gtang ba zhes bya'o/ /khams gsum la mngon par mi dga' ba zhes bya ba la/ khams gsum gyi rang gi ngo bo rtog pas mngon par zhen pa med pa dang / mi dmigs pa'i sbyor bas khams gsum la mngon par mi dga' ba zhes bya'o/ /sems zhum pa med pa zhes bya ba la/ bsod nams dang ye shes kyi tshogs dpag tu med pa bsags pa'i rgyur gyur pa byang chub kyi sems mi gtong ba dang /rtag tu yang dag par blangs pa mi gtong ba'i sems ni sems zhum pa med pa zhes bya'o/ /chos la mngon par zhen pa med pa zhes bya ba la/ chos thams cad mnyam pa nyid du mthong bas chos thams cad la mngon par zhen pa med par 'jug pa ni chos la mngon par zhen pa med pa zhes bya'o//dam pa'i chos yongs su 'dzin pa zhes bya ba la sangs rgyas kyi byang chub thob par byed pa'i chos rnams mi gtong ba'i sems kyis yang dag par len pa ni dam pa'i chos yongs su 'dzin pa zhes bya'o/ /chos srung ba zhes bya ba la/ dam pa'i chos sun 'byin pa rnams dang / gzhan gyi phyogs ngan par smra ba rnams rigs pas tshar bcad nas rang gi phyogs su 'jog pa ni chos srung ba zhes bya'o//las kyi rnam par smin pa la yid ches pa zhes bya ba ni rang dang gzhan la ngo tsha bas sdig pa'i las spong zhing mi dge bas dmyal ba la sogs par 'gro ba yid ches shing / dge bas lha dang mir skye bar yid ches pas de'i phyir rtag tu chos tshol ba la mngon par sbyor ba ni las kyi rnam par smin pa la yid ches pa zhes bya'o//'dul ba la mkhas pa zhes bya ba ni rang bzhin gyis kha na ma tho ba mi 'byung ba dang / ltung ba'i khyad par dge 'dun gyi lhag ma la sogs pa sbom po'i gnas rtogs pa ni 'dul ba la mkhas pa zhes bya'o//rtsod pa'i gzhi zhi bar byed pa zhes bya ba ni tshogs kyi nang na gnas na ni nges par rtsod pa 'byung bar 'gyur ba ni rtsod pa'i gzhi yod pa'i phyir ro/ /de'i phyir tshogs dang 'du 'dzi rnam par spangs pa ni rtsod pa'i gzhi zhi bar byed pa zhes bya'o/ /'gyed pa med pa zhes bya ba la/'jig rten pa'i 'gyed pa'i gzhi las byung ba'i rnam par spros pa spong zhing 'gyed pa med pa ni mi rtsod pa ste dge sbyong gi chos 'gyed pa med pa zhes bya'o/ /bzod pa'i sa zhes bya ba ni lus dang sems la gnod pa chos nyid kyi stobs kyis bzod pa ni bzod pa'i sa zhes bya'o/ /bzod pa yang dag par 'dzin pa zhes bya ba ni sdug bsngal dang du len pa dang /gzhan gnod pa byed pa la ji mi snyam pa dang chos la nges par rtogs pa'i bzod pa blangs nas rtag tu goms par byed pa dang / gzhan ngan du smra ba dang / ring nas 'ongs pa'i tshig gi lam rnams btang snyoms su byas nas bzod pa ma ral bar byed pa ni bzod pa yang dag par 'dzin pa'o//chos rab tu 'byed pa la mkhas pa zhes bya ba ni phung po dang khams dang skye mched la sogs pa'i dbye ba dang / kun nas nyon mongs pa dang rnam par byang ba'i phyogs kyi rab tu dbye bas mi dmigs pa nyid ni chos rab tu dbye ba la mkhas pa zhes bya'o/ /chos gtan la dbab pa la mkhas pa zhes bya ni chos thams cad brjod du med pa dang /gdod nas ma skyes pa'i rang bzhin du rnam par nges pa'i shes pa ni chos gtan la dbab pa la mkhas pa zhes bya'o/ /chos kyi tshig rab tu dbye ba shes pa zhes bya ba ni phung po dang / khams dang / skye mched dang / rten cing 'brel par 'byung ba dang /rdzu 'phrul gyi rkang pa rnams dang / dbang po dang / stobs dang byang chub kyi yan lag la sogs pa'i rnam par gzhag pa shes pa ni chos kyi tshig rab tu dbye ba shes pa zhes bya'o/ /chos kyi tshig nges par dgod pa la mkhas pa zhes bya ba ni chos rnams kyi tshig rab tu gnas pa ni de bzhin nyid kyi rab tu dbye ba ste/stong pa nyid bcu drug la sogs pa'i rab tu dbye bas rab tu ston pa'i shes pa ni chos kyi tshig nges par dgod pa la mkhas pa zhes bya'o/ /don dang don ma yin pa'i tshig gi dbye ba dgod pa la mkhas pa'i shes pa zhes bya ba la don ni chos so//don ma yin pa ni chos ma yin pa'o/ /don dang don ma yin pa de dag gnyis ka la bsnan pa med cing dbri ba med pa dang / chos nyid mnyam pa nyid la so sor bsnan du med pa nyid ni chos thams cad yongs su shes pa ste/ dbye ba med pa'i gnas ni chos thams cad gnyis su med pa'i de bzhin nyid do//de la mkhas pa ni gsal ba ste/ blang ba dang dor ba'i cha shes pa ni don dang don ma yin pa la mkhas pa shes pa zhes bya'o/ /sngon gyi mtha' shes pa ni sngon gyi mtha' ste rgyu dang byed pa yin no/ /phyi ma'i mtha' ni bya ba ste 'bras bu yin no/ /de la rgyu ni byang chub kyi sems te sangs rgyas kyi chos rnams kyi byed pa'o//'bras bu ni nyan thos dang rang sangs rgyas dang yang dag par rdzogs pa'i sangs rgyas nyid do/ /de'i rang gi ngo bo ji lta ba rig pa ni sngon gyi mtha' shes pa'o/ /phyi ma'i mtha' shes pa zhes bya ba ni rtan cing 'brel bar 'byung ba la sngon gyi mtha'i rang bzhin med cing phyi ma'i mtha'i rang bzhin med par shes pa ni phyi ma'i mtha' shes pa zhes bya'o//dus gsum mnyam pa nyid shes pa zhes bya ba ni 'das pa dang ma 'ongs pa dang da ltar byung ba'i dngos po rnams mi dmigs par mnyam pa nyid du chos thams cad mtshan nyid gcig pa nyid ni dus gsum mnyam pa nyid shes pa zhes bya'o//'khor gsum yongs su dag pa shes pa zhes bya ba ni las dang byed pa po dang bya ba rnams rjes su mi dmigs pa'am/ 'das pa dang ma 'ongs pa dang da ltar byung ba'i chos rnams yid la mi byed pa ni 'khor gsum yongs su dag pa shes pa zhes bya'o//sems gnas pa shes pa zhes bya ba ni dmigs pa dang / dmigs byed ngo bo med pa ni sems dang sems las byung ba'i rang gi ngo bo mthar thug pa nyid ni spros pa thams cad rjes su mi dmigs pa'i rang bzhin gyi gnas skabs te/ sems gnas pa shes pa zhes bya'o//lus gnas pa shes pa zhes bya ba ni rdul phra rabs kyi rang bzhin gyis sam/ bdag dang bdag gi rang bzhin gyis thams cad du yod pa ma yin pas gzugs brnyan dang 'dra ba nyid ni lus gnas pa shes pa zhes bya'o/ /spyod lam srung ba zhes bya ba ni 'khrul pa med pa'i sems kyis lus dang ngag dang sems kyis bsdams pa mi 'khrul pa nyid do//spyod lam mi 'khrugs pa zhes bya ba ni rtag tu mnyam par gzhag pa nyid kyis langs pa dang 'chag pa dang 'dug pa dang nyal ba la sogs pa na rnam par 'gyur ba med pa nyid ni spyod lam mi 'khrugs pa zhes bya'o/ /spyod lam mi 'chos pa zhes bya ba ni rang bzhin gyis bzang bas sdig pa'i rnam par rtog pa yang med pa dang /chos mnyam pa nyid mthong bas ma bcos pa'i spyod lam nyid la gnas pa'i phyir spyod lam mi 'chos pa zhes bya'o/ /dbang po mdzes pa zhes bya ba ni chos thams cad mnyam pa nyid du mthong bas rigs pa dang mi rigs pa'i don rab tu ston pa dang /bsam pa dang rjes su mthun pa'i chos ston pa'i dus na dbang po rab tu mdzes pa ni dbang po mdzes pa zhes bya'o/ /'jig rten shes pa zhes bya ba ni 'jig rten gyi bsam pa'i rjes su mthun par 'jug pa dang / ldog pa'i bye brag yongs su shes pa sngon du 'gro bar chos ston pa ni 'jig rten shes pa zhes bya'o//lhug par gtong ba zhes bya ba ni slong ba la sems zhum pa med pas thams cad gtong ba nyid dang / bdog pa rnams mi sbed pa dang / ser sna med pa nyid ni lhug par gtong ba zhes bya'o/ / lag brkyang zhes bya ba ni rtag tu rab tu sbyin pa'i phyir lag pa brkyang ba dang / chos dang zang zing gi bgo bsha' byed pa'i ngang tshul can ni lag brkyang ba zhes bya'o/ /sems kyis 'dzin pa med pa zhes bya ba ni thams cad la mngon par zhen pa med par gzung bar bya ba'i yul mi dmigs pa la gcig tu dad pa'i phyir dang /sems dri ma med pa ni sems 'dzin pa med pa zhes bya'o/ /ngo tsha shes pa zhes bya ba ni bdag gi dbang du byas nas ngo tsha bas sdig pa'i las la mi 'jug pa dang gzhan gyi sems bsrung ba'i phyir tshig 'khyal pa mi smra ba ni ngo tsha shes pa zhes bya'o//khrel yod pa zhes bya ba ni gzhan gyis dbang du byas nas ngo tsha ba ste/ dpyas med pa'i las rnams la 'jug pa dang / chos gtsor byed pa ni khrel yod pa zhes bya'o/ /mi dge ba'i sems la smod pa zhes bya ba ni mi dge ba'i chos la 'jug pa byis pa so so skye bo'i chos rnam par spangs pas de dag la yid mi gtod pa dang /rtag tu dge ba'i bshes gnyen la nye bar brten pa ni mi dge ba'i sems la smod pa zhes bya'o/ /sbyangs pa'i yon tan mi gtong ba zhes bya ba ni sbyangs pa'i yon tan yang dag par blangs pa nyams par mi byed pa nyid dang / yi dam la brtan pa nyid ni sbyangs pa'i yon tan mi gtong ba zhes bya'o//spyod pa yang dag par 'dzin pa zhes bya ba ni byang chub sems dpa'i spyod pa nyid la rjes su 'jug pa'i phyir/ sbyin pa la sogs pa'i spyod pa la pha rol gnon pas yang dag par 'dzin pa ni spyod la yang dag par 'dzin pa zhes bya'o//dga' bar spyod pa zhes bya ba ni chos nyid nyams su myong ba'i dga' ba dang / bsam gtan nyams su myong ba'i dga' bas thams cad du dga' ba ni dga' bar spyod pa zhes bya'o/ /bla ma rnams la ldang zhing stan 'dings pa zhes bya ba la rmugs pa dang gnyid dang snyom las la sogs pa dang bral bas rtag tu bla ma la bsnyen bkur ba la zhugs pa'i tshe/ngo tsha dang nga rgyal spangs pas bla ma la sogs pa'i g.yog bya ba la ngal ba med pa'i sems kyis bla ma la ldang zhing bsnyen bkur byed pa la mkhas par gyur pa'o/nga rgyal tshar gcod pa zhes bya ba ni gzhan gyis brtags pa'i bdag nye bar mi dmigs pa dang / phung por mngon par zhen pa med pas gzung ba dang 'dzin pa rjes su mi dmigs pas nga rgyal gyi rgyu rjes su ma dmigs pa ni nga rgyal tshar gcod pa zhes bya'o/ /sems yang dag par 'dzin pa zhes bya ba ni phyi rol gyi rnam par g.yeng ba rab tu spangs nas chos bdag med pa la rnam par gzhag ste/bskyed pa dang ma bskyed pa'i dge ba'i chos rnams rnam par mi nyams pa'i shes pa ni sems yang dag par 'dzin pa zhes bya'o/ /sems kyi spro ba shes pa zhes bya ba ni dge ba la 'jug pa'i sems gong nas gong du brtson 'grus brtsam pa la sbyor ba dang /brtson 'grus kyi 'bras bu mngon par mi mnyam pa'i ye shes ni sems kyi spro ba shes pa zhes bya'o/ /don rtogs par shes pa zhes bya ba ni don dam pa dang yang dag par rab tu ldan pa'i dngos po rnams bden pa ji lta ba bzhin rab tu rtogs pa'i shes pa ni don rtogs par shes pa zhes bya'o//ye shes rjes su rtogs pa zhes bya ba la 'jig rten dang 'jig rten las 'das pa'i chos rnams kyi rang bzhin ye shes tsam du rtogs pas phyi rol gyi gzung ba'i don rang bzhin med par rtogs pa ni ye shes rjes su rtogs pa zhes bya'o//mi shes pa med par gyur pa zhes bya ba ni ma rig pa dang bral bas ji ltar gnas pa'i chos nyid kyi de kho na nyid la phyin ci log tu sgro btags pa dang bral ba ni mi shes pa med par gyur pa zhes bya'o/ /sems la 'jug pa shes pa zhes bya ba ni gang zag la bdag med pa rab tu rtogs pas 'phel ba dang 'grib pa shes pa ni sems la 'jug pa shes pa zhes bya'o//spang ba dang nges par sgrub pa la mkhas pa'i shes pa zhes bya ba la/ spang ba ni 'dod pa ste nyon mongs pa kun tu spong ba'o/ /nges par sgrub pa ni dkar po'i chos rnams ji lta ba bzhin du yongs su rdzogs par byed pa'o//de la spang ba dang / yongs su rdzogs par byed pa la mkhas shing gsal ba ni shes rab shin tu bsgoms pa rab tu goms pa las byung ba'i shes rab rnon po nyid ni spang ba dang nges par sgrub pa la mkhas pa'i shes pa zhes bya'o//sgra skad thams cad shes pa zhes bya ba ni nges pa'i tshig so so yang dag par rig pas sems can thams cad kyi skad kyis de dag dang rjes su mthun pa'i chos ston pa'i shes pa ni sgra skad thams cad shes pa zhes bya'o/ /rnam par gzhag pa shes pa zhes bya ba ni nyan thos dang rang sangs rgyas dang /mu stegs la sogs pa'i dbang po'i bye brag rnam par gzhag pa dang / rjes su mthun par chos ston par mdzad par byed pa'i shes pa ni rnam par gzhag pa shes pa zhes bya'o/ /don gtan la dbab par shes pa zhes bya ba la/ don ni 'du byed kyi phung po'o//de'i gtan la dbab pa ni/ 'du byed rnams nyid mi rtag pa/ /skye zhing 'jig pa'i chos can yin/ /skyes nas 'jig par 'gyur ba bas/ /de dag nye bar zhi ba bde/ /zhes bya bas 'du byed nye bar dpyad pa de ni gtan la dbab pa ste/ don gtan la dbab pa shes pa zhes bya'o//gnod pa rnam par spangs pa zhes bya ba la gnod pa ni byis pa rnams kyi 'khor ba'o/ /'khor ba las yang dag par 'da' ba ji lta ba bzhin shes nas gzhan rnams kyang chos ma yin pa spang du bcug nas de las yang dag par 'da' bar byed pa ni gnod pa rnam par spangs pa zhes bya'o//skyes bu dam pa dang 'grogs pa zhes bya ba ni skyes bu dam pa ni sangs rgyas dang byang chub sems dpa' rnams so/ /de dag dang 'grogs pa ni de la skyabs su 'gro zhing / de dag gis gsungs pa'i chos nyan pa dang mi 'bral ba nyid ni skyes bu dam pa dang 'grogs pa'o//skyes bu dam pa dang bsten pa zhes bya ba la/ sangs rgyas dang byang chub sems dpa' rnams dang / nyan thos dang rang sangs rgyas dang dge ba'i bshes gnyen dang bsam pas mi 'bral ba nyid du rtag tu bsten pa ni skyes bu dam pa dang bsten pa zhes bya'o//skyes bu ngan pa rnam par spong ba zhes bya ba la/ skyes bu ngan pa ni gang de bzhin gshegs pa'i bstan pa la mngon par ma dad pa dang / ngan du brjod pa'i bsam pa can/ rgyud zhe sdang gis bsregs pa/ snyom las can chos nyams su len pa la rgyab kyis phyogs pa de dag ni snod du gyur pa ma yin pa zhes de rnam par spong ba nyid ni skyes bu ngan pa rnam par spong ba'o//bsam gtan rnams sgrub pa zhes bya ba la/ sems can gyi khams mtha' yas pa rnam par grol ba'i 'dod pa la rnam par rtog pa la sogs pa dang bral ba'i bsam gtan gyi bde ba dang /yid mi bde ba nyams su myong ba ni bsam gtan rnams sgrub pa zhes bya'o/ /bsam gtan la ro myong bar mi byed par zhes bya ba ni bsam gtan gyi dbang gis khams gsum du skye ba don du gnyer ba dang bral ba nyid de/ sems can gyi don bya ba'i bsam pa dang / gong ma gong ma'i sangs rgyas kyi yon tan rnams nges par sgrub pa'i bsam pas bsam gtan dang bsam gtan gyi bde ba la ro myang ba med pa'o/ /mngon par shes pas rnam par 'phrul pa zhes bya ba ni rtag tu rjes su 'brang ba'i mngon par shes pa lnga la rab tu gnas nas/shin tu shes par dka' ba'i sangs rgyas kyi chos rnams dbang po mchog dang mchog ma yin pa'i shes pas sems can rnams kyi bsam pa shes nas gzhan dag la ston cing rab tu 'byed pa ni mngon par shes pas rnam par 'phrul pa zhes bya'o//ming dang brda zhes bya ba ni/ /ming ni ming gis stong pa ste/ /ming la ming ni yod ma yin/ /chos rnams thams cad ming med pa/ /ming gis kyang ni rab tu bsgrags/ /zhes bya bas gdod nas ma skyes pa'i brda tsam gyis tha snyad kyi don du khas blangs pa ni ming dang brda zhes bya'o//gdags pa'i tha snyad ces bya ba ni 'jig rten gyis btags pa'i skyes pa dang bud med la sogs pa'i ming ste/ de bzhin du tha snyad du 'jug par mi nus so zhes bya bas gdags pa dang tha snyad du dbye ba byas nas khas blangs pa yin no/ /btags pa yang dag par 'joms pa zhes bya ba ni brjod du med pa'i chos nyid nyams su myong bas chos thams cad brjod du med pa'o zhes brjod du med par shes pa ni btags pa yang dag par 'joms pa zhes bya'o//'khor ba las ldog pa zhes bya ba la/ 'khor ba sgrub par byed pa'i las mi byed pa ste/nyes pa thams cad kyi 'byung gnas yin pa'i phyir ro zhes shes nas nyon mongs pa can gyi sems bzlog pa ni 'khor ba las ldog pa zhes bya'i/ spong ba ni ma yin no/ /rnyed pa don du mi gnyer ba zhes bya ba la/ sred pa spangs pa'i phyir ji ltar rnyed pa'i don chung ngu tsam gyis chog pa ni 'dod pa chung ba ste/rnyed pa don du mi gnyer ba ni rang gi don la ltos nas so/ /gzhan gyi don la zhugs pa rnams kyi ni sred pas byas pa med pas 'dod pa chung ba zhes bya'o/ /rnyed pa dang bkur sti dang du mi len pa zhes bya ba la/ sems kyis kyang mi 'dod cing mi sems pas sdig pa'i rgyur gyur pa'i rnyed pa dang du mi len pa ni rnyed pa dang bkur sti dang du mi len pa zhes bya'o//mi snyan pa brjod pas zhum pa med pa zhes bya ba ni gzugs dang tshor ba dang 'du shes dang 'du byed dang rnam par shes pa'i phung po rnams la mngon par zhen pa med pas mi snyan pa ste skyon sgrogs pa la zhum pa med cing spro shi ba med pa ni mi snyan pa brjod pas zhum pa med pa zhes bya'o//bsngags pa yang dag pa la ma chags pa zhes bya ba la/ chags pa ni dang du len pa ste/ yang dag pa'i yon tan gyis bsngags pa brjod kyang rnyed pa dang bkur sti la don du gnyer ba med pa'i phyir dga' bar mi 'gyur la/rnyed pa dang bkur sti ni dge ba'i bar chad byed pa'i rgyu yin pa'i phyir dang / dge ba'i rjes su mthun pa ma yin pas bsngags pa brjod pas dga' bar mi 'gyur bas bsngags pa la ma chags pa zhes bya'o//bkur sti byed pa la btang snyoms pa zhes bya ba la/ las kyi 'bras bu so sor nges pa rtogs pa dang / dus dang dus ma yin pa rtogs pa'i phyir dang / kha cig ni bdag gir byed la/ kha cig la btang snyoms su byed pa ni bkur sti byed pa la btang snyoms pa zhes bya'o//bkur sti mi byed pa la zhum pa med pa zhes bya ba la/ bdag la bkur sti ma byas so zhes sems spro shi bar mi 'gyur ba'o/ /rtag pa nyid du yang rnal 'byor goms par byed pa mi 'dor bas des ni bkur sti mi byed pa la zhum pa med pa zhes bya'o/ /smod pa la khro ba med pa zhes bya ba ni smos pa dang /smad par bya ba rjes su mi dmigs par 'jig rten gyi chos so sor brtags pa'i stobs kyis smod pa la khro ba med do/ /khro ba'i sems mi bskyed ces bya ba'o/ /bstod pa la btang snyoms pa zhes bya ba la/ gcig tu dge ba'i chos la zhugs pas bstod pa la sogs pa la rnam par rtog par mi 'gyur zhing chos tshol ba la sems brtan pa'i phyir bstod pa la sogs pa bden pa yin na yang bstod pa la btang snyoms su byed pa'o//ma rnyed pas zhum pa med pa zhes bya ba la/ sngon byas pa'i las kyi rjes su 'brang ba'i phyir/ 'di ni sbyin pa ma byas pa'i 'bras bu yin no snyam du shes nas ma rnyed pas zhum pa med pa ni ma rnyed pas sems zhum pa med pa zhes bya'o//khyim pa dang mi bsten pa ni rnyed pa'i don du nye bar 'gro ba spangs pa'o/ /rab tu byung ba dag dang mi bsten pa zhes bya ba ni rab tu byung ba dang bre mo'i gtam byed pas bsam gtan dang snyoms par 'jug pa la mi sbyor ba spangs nas mnyam par gzhag pa tshol ba ni rab tu byung ba dag mi bsten pa zhes bya'o//spyod yul ma yin pa spang ba zhes bya ba ni 'dod chags dang / zhe sdang dang / gti mug dang / nga rgyal dang / the tshom la sogs pa nyon mongs pa'i rgyu rnams spyod yul ma yin pa yul du mi byed pa ste/chos nyid kyis mi mthun pa yin pa'i phyir ro/ /des na spyod yul ma yin pa rnam par spong ba zhes bya'o/ /spyod yul du rgyu ba zhes bya ba ni ji skad gsungs pa'i lam sgom zhing / gzhan dag kyang de la sbyor bar byed pa ni spyod yul du rgyu ba zhes bya'o//kun tu spyod pa phun sum tshogs pa zhes bya ba la byang chub sems dpa' rnams kyi spyod lam ma 'khrugs pas gzhan gyi sems mgu bar byas nas/ byang chub kyi lam la sbyor bar byed pa ni/ kun tu spyod pa phun sum tshogs pa zhes bya'o//spyod pa ma yin pa rnam pas spong ba zhes bya ba ni bdag nyid kyang dkar po'i chos thams cad rjes su srung zhing gzhan dag kyang de nyid la rab tu 'god pa ni spyod pa ma yin pa rnam par spong ba zhes bya'o/ /rigs sun par mi byed pa zhes bya ba ni dam bcas pa'i don nges par nyams su len pas de bzhin gshegs pa'i rigs sun par mi byed pa ste/gzhan du dam bcas nas gzhan nyams su len pa ni rigs dang rjes su mthun pa ma yin pas rigs sun par byed pa yin no/ /de sun par mi bya ba'i phyir/ bdag dang gzhan ji skad gsungs pa'i sgrub pa phun sum tshogs pa la rab tu 'god pa'o//bstan pa bsrung ba zhes bya ba ni byang chub kyi sems mi gtong ba dang / rtag tu zab mo'i chos tshol zhing nges pa rdzogs par byed pa dang chos dang chos kyi rjes su mthun par sgrub par byed pa ni de bzhin gshegs pa'i bstan pa bsrung ba yin no//smra ba nyung ba zhes bya ba ni ting nge 'dzin la rab tu dmigs pas rtag tu mnyam par gzhag pa'i phyir/ smra ba la rgyab kyis phyogs pa dang / dgos pa tsam sgrub pa ni smra ba nyung ba zhes bya'o/ /mnyen pa zhes bya ba ni shes rab kyi rgyus bzhus pas be+ems po shing 'dra ba med pa nyid ni mnyen pa zhes bya'o//tshig gi lan glan pa la mkhas pa zhes bya ba ni rigs pa dang grol ba'i spobs pa can yin pa'i phyir lan smra ba'i nus pa yod pas rgol ba dang phyir rgol ba'i lan la mkhas pa yin no/ /phyir rgol ba tshar gcod pa zhes bya ba ni tshad ma dang ldan pa'i chos nyid kyi don rab tu bsgrubs pas rang gi phyogs gzhag pa dang /gzhan gyi phyogs tshad mas gnod pas sun phyung ba'i don rab tu bsgrubs pa ni phyir rgol ba tshar gcod pa zhes bya'o//dus su 'gro bar byed pa zhes bya ba ni dus shes pa'i phyir phan gdags pa dang / tshar gcad pa'i dus ni 'di yin no zhes rjes su mthun pa dang rjes su mthun pa ma yin pa'i dus kyi rnam par dbye ba shes pa'i phyir dus su 'gro bar byed pa zhes bya'o//so so'i skye bo la yid mi rton pa zhes bya ba ni so so'i skye bo rgyus byis pa'i chos kyi skyon mthong bas yid brtan pa'i gnas ma yin par shes nas spong ba ni so so'i skye bo la yid mi rton pa zhes bya'o//sdug bsngal ba rnams la khyad du mi gsod pa zhes bya ba la/ sems can thams cad la sems mnyam pa'i phyir/ dman pa dang lhag pa'i ngo bo med pas brnyas par mi byed pa'o/ /gzhan du na khyad du bsad pas 'dul ba'i don ni ma gtogs so//de dag la nor sbyin pa zhes bya ba la zang zing rab tu sbyin pas rjes su bzung nas chos kyi lam la rab tu 'jog par byed pa ni de dag la sbyin pa'o/ /dbul po rnams la brnyas par mi byed pa zhes bya ba ni snying rje chen pos sems can 'di dag ni sngon gyi tshe rabs su rang gis sbyin pa ma btang bas sdug bsngal nyams su myong ba yin no zhes bsams nas/dbul po rnams la brnyas par mi rigs so/ /tshul khrims 'chal pa la snying brtse ba zhes bya ba la/ ltung ba byung ba'i sems can rnams la ltung ba las ldang ba'i chos bstan nas tshul khrims la rab tu 'god par byed pa ni tshul khrims 'chal pa la snying brtse ba zhes bya'o//phan pa'i dngos po zhes bya ba ni gzhan rnams ma 'ongs pa'i dus su phan pa'i chos kyi lam la nges par sbyor bas phan 'dogs par byed pa ni phan pa'i dngos po zhes bya'o/ /snying brtse ba'i blo zhes bya ba ni sems can thams cad kyi ma 'ongs pa'i sdug bsngal bsal bar spro ba'i blo gang yin pa de ni snying brtse ba'i blo zhes bya'o//chos kyis phan 'dogs pa zhes bya ba ni chos ji lta ba bzhin bstan pas chos kyi lam la 'dzud pa ni chos kyis phan 'dogs pa zhes bya'o/ /zang zing yongs su gtong ba zhes bya ba ni chos la mngon par dga' ba dang /zang zing gi sbyin pas gzhan rjes su sdud pa ni zang zing yongs su gtong ba zhes bya ba'o/ /mi stsogs par gnas pa zhes bya ba ni bsags pa'i nyes pa mthong bas thams cad yongs su gtong ba dang / ser sna'i sems rnam par spong ba ni mi stsogs par gnas pa zhes bya'o//tshul khrims la bstod pa zhes bya ba ni tshul khrims kyi 'bras bu la yid ches pa'i stobs kyis tshul khrims kyi yon tan brjod pa'o/ /'chal pa'i tshul khrims la smod pa zhes bya ba ni tshul khrims 'chal pa rnams ni dmyal ba dang byol song dang yi dags rnams su nges par skye bar 'gyur ro zhes shes nas 'chal ba'i tshul khrims spong ba ni 'chal pa'i tshul khrims la smod pa zhes bya'o//tshul khrims dang ldan pa la g.yo med pas bsten pa zhes bya ba ni tshul khrims la rab tu gnas pa ni 'dod par bya ba'i 'bras bu mtho ris dang thar pa yin no zhes shes nas tshul khrims dang ldan pa ni rnyed dka' ba'i 'du shes kyis bsod nams mngon par 'phel bar bya ba'i phyir g.yo med par bsten pa'o//bdog pa thams cad yongs su gtong ba zhes bya ba ni phyi dang nang gi bdag nyid can gyis yongs su gzung ba'i rdzas rnams mi 'dzin pa dang /bsam pa bzang pos sems can thams cad rjes su gzung ba'i phyir thams cad sbyin pa ni bdog pa thams cad yongs su gtong ba zhes bya'o/ /lhag pa'i bsam pas mgron du gnyer ba zhes bya ba ni lhag pa'i bsam pas sems can thams cad sangs rgyas kyi byang chub dang mya ngan las 'das pa'i bde ba nyams su myong bar bya ba'i don du mgron du gnyer ba ni lhag pa'i bsam pa mgron du gnyer ba zhes bya'o//ji skad smras pa bzhin byed pa zhes bya ba ni/ 'gro la phan phyir sangs rgyas 'grub par shog /ces smon lam btab nas smon lam yongs su rdzogs par ma byas par bar du mya ngan las 'das pa ni ji skad smras pa bzhin byed pa ma yin no//de las bzlog pa ni ji skad smras pa bzhin byed pa zhes bya'o/ /rgyun mi 'chad par bsnyen bkur byed pa zhes bya ba la/ nga rgyal med pas dge ba'i bshes gnyen gyi drung du rtag tu gnas pa dang / dam pa'i chos mnyan pa'i phyir dang / the tshom spang ba'i phyir sangs rgyas dang byang chub sems dpa' rnams la yang dang yang 'dri ba ni rgyun mi 'chad par bsnyen bkur byed pa zhes bya'o//gus par byas te dga' ba nyams su myong bar byed pa zhes bya ba ni lung shes nas phyin ci ma log pa'i de nyid rtogs pa'i dga' ba nyams su myong nas mngon par rtogs pa'i ye shes mngon sum du byas pas lhag par dga' ba nyams su myong ba'o//dpe shes pa zhes bya ba ni sngon byang chub sems dpa'i gnas skabs na 'di ltar sbyin pa la sogs pa la mngon par sbyar bas sangs rgyas nyid thob pa ji lta ba de ltar las dang po pa'i byang chub sems dpa' rnams kyis kyang de bzhin du 'jug par bya'o//zhes 'dra ba'i dpe shes pa dang / mi 'dra ba'i dpe de las bzlog pa'i shes pas ni sangs rgyas nyid mi 'thob po zhes gzhan gyi rgol ba tshar bcad nas chos mthun pa dang mi mthun pa'i dpe dag gis bsgrub bya bsgrubs nas gzhan gyi phyogs sun phyung zhing rang gi phyogs 'jog pa ni dpe shes pa'i dgos pa yin no//sngon byung ba la mkhas pa'i shes pa zhes bya ba ni sngon gyi gnas rjes su dran pa shes par byas pa'i phyir dge ba nyid la 'jug pa dang / gzhan dag kyang de nyid la nges par sbyor ba dang /rtag tu mang du thos pa goms par byed pa ni sngon byung ba la mkhas pa'i shes pa zhes bya'o/ /dge ba'i rtsa ba sngon du 'gro ba zhes bya ba ni lus kyi las dang / ngag gi las 'ga' zhig ma chags pa la sogs pas kun nas bslang ba rnams sangs rgyas kyi byang chub tu yongs su bsngo zhing /gzhan dag kyang dge ba la bskul zhing byang chub tu sems bskyed pa ni dge ba'i rtsa ba sngon du 'gro ba nyid do/ /thabs la mkhas pa zhes bya ba ni sdig pa bshags pa dang / bsod nams la rjes su yi rang ba dang / de bzhin gshegs pa la gsol ba gdab pa dang /dge ba'i rtsa ba yongs su bsngo ba la sogs pa chung ngu yang sems can thams cad dang thun mong du byas pa'i phyir dpag tu med par 'gyur ba ni thabs la mkhas pa zhes bya'o/ /mtshan ma spong ba zhes bya ba ni chos thams cad rmi lam lta bu'o zhes rtogs nas dngos po'i rang bzhin med pas rdzas su gyur pa'i mtshan ma mi dmigs pa ni mtshan ma spong ba zhes bya'o//'du shes zlog pa zhes bya ba la zlog pa ni gtang ba ste/ phyin ci log spong ba ni 'du shes zlog pa ste/ phyin ci log gi rtsa ba las byung ba'i bdag la sogs par mngon par zhen pa zlog pa'o/ /dngos po'i mtshan nyid shes pa zhes bya ba ni phung po dang khams dang skye mched thams cad bya ba'i khyad par gyis mtshon pa yin la/chos thams cad ni nam mkha'i rang bzhin no zhes bya bas mtshan nyid med pa'i mtshan nyid ni dngos po'i mtshan nyid shes pa'o/ /mdo sde mngon par bsgrub pa'i shes pa zhes bya ba la/drang ba'i don dang / nges pa'i don gyi mdo sde yongs su shes pa sngon du 'gro bas chos ji ltar 'byung ba rnams sems can rnams kyi bsam pa dang rjes su mthun par rab tu ston pa dang / dge ba dang mi dge ba dang lung du ma bstan pa rnams kyis rnam par dbye bas/ dpe sna tshogs kyi 'jal bar nye bar dgongs pa'i tshig yang dag par ston pa ni mdo sde mngon par sgrub pa'i shes pa zhes bya'o//bden pa gtan la 'bebs pa zhes bya ba ni mya ngan las 'das pa ni don dam pa'i bden pa ste/ de'i gtan la 'bebs pa ni rnam par shes pa 'gags shing / ming dang gzugs la sogs pa ma skyes pa dang bag chags dang bcas pa'i rgyun spangs kyang 'khor ba yongs su mi spong ba ni byang chub sems dpa'i bden pa gtan la 'bebs pa zhes bya'o//rnam par grol ba mngon du byed pa zhes bya ba ni rnam par grol ba ni nyon mongs pa ma lus pa dang bral bas spang bar bya ba'i ngo bo mi dmigs pa nyams su myong ba ni rnam par grol ba mngon du byed pa zhes bya'o//tshig mgo gcig tu smra ba zhes bya ba ni mu stegs kyi gzhung sna tshogs kyis brtags pa'i lta ba bsal nas chos thams cad bdag med par rab tu sgrub pa ni tshig mgo gcig tu smra ba zhes bya ba'o//mi 'jigs pa thob pa zhes bya ba ni sangs rgyas kyi chos zab mo thos pa la mi 'jigs pa dang / sgrub pa la mi 'jigs pa dang / gzhan rgol ba la mi 'jigs pa dang / mi 'jigs pa thob pa'i 'bras bu nyid yin pas mi 'jigs pa thob pa zhes bstan to/ /tshul khrims dam pa zhes bya ba ni tshul khrims nyams su len pa'i ngo bo dge ba bcu'i las kyi lam yang dag par blangs pa dang /so sor thar pa'i sdom pa blangs pa dang / mi dge ba ma lus pa las ldog pa ni tshul khrims nyid yin te/ ngo bo'i rkyen yin na yang thams cad dang rang gi ngo bo nyid brjod par bya'o//chos gzhan la ni ma yin no/ /snyoms par 'jug pa la gzhol ba zhes bya ba ni khams gsum ma lus pa la mngon par mi dga' zhing bden pa la dga' ba dang / mya ngan las 'das pa la dga' ba dang / thams cad mkhyen pa nyid mngon par 'dod pa ni ting nge 'dzin la snyoms par 'jug pa'i rgyu yin no//shes rab thob pa zhes bya ba la/ pha rol smra ba ma lus pa'i lta ba sun 'don nus pa'i shes pa thob pa dang / dmigs pa thams cad snang ba med pa'i shes pa ni shes rab thob pa zhes bya'o/ /gcig pur dga' zhes bya ba ni 'du 'dzi thams cad spangs nas dkar po'i chos mdor byas pa'i shes rab kyi pha rol tu phyin pa sgom pa ni gcig pu dga' ba zhes bya'o//shes kyi khe chung ngus chog shes pa zhes bya ba la/ nyung ngu tsam shes pa'i shes pa nyid ni shes pa ste/ de'i ngo bo ni shes pa yin gyi/ shes pa zhes bya ba'i sgra rang gi skye bo la ni mi bya ste/ gang gi phyir cung zhig tsam gyis chog shes pa'o zhes phyis 'chad par 'gyur ro/ /sems la rnyog pa med pa zhes bya ba la/ nyon mongs pa dang mi 'grogs pa dang / rang bzhin gyis rnam par dag pa la dmigs pas 'dzin pa med par sbyor ba'i sems ni rnyog pa med pa zhes bya'o//lta bas byas pa rnam par spong ba zhes bya ba la/ 'jig tshogs la lta ba sngon du 'gro ba'i lta ba drug cu rtsa gnyis ni rtsa bar gyur pa'i bdag tu lta ba rnam par spangs pas spangs par 'gyur ro/ /gzungs thob pa zhes bya ba ni ji skad gsungs pa'i gzungs rnam pa bzhi thob pas phyin ci ma log par don ji lta ba bzhin du rab tu ston pa ni gzungs thob pa zhes bya'o//ye shes la 'jug pa zhes bya ba ni rjes su shes pa la sogs pa'i shes pa rnams phan tshun rjes su zhugs pa nyid du khong du chud pa ni ye shes la 'jug pa zhes bya'o/ /gnas zhes bya ba ni dge ba'i chos rnams kyi gnas skabs kyi rten du gyur pa dang /rtsa bar gyur pa ni gnas zhes bya'o/ /gnas skabs zhes bya ba ni chos thams cad ni sems kyis bris pa'o zhes bya bas sems nyid kyi gnas skabs las gzhan pa'i gnas ni med pas so/ /rab tu gnas pa zhes bya ba ni dad pa la sangs rgyas kyi chos rnams gnas pa yin te/dad pa med pa'i mi rnams la/ /dkar po'i chos rnams mi skye ste/ /zhes bya ba ni tshig gis so/ /sgrub pa shes pa zhes bya ba la/ bsgrub par bya bas na sgrub pa ste/ lam goms par byas pas bsgrub bya rdzogs par byed pa'o/ /rgyu zhes bya ba la/ma rig pa ni rgyu ste 'du byed rnams dang / mi dge ba'i chos rnams kyi'o/ /rigs pa zhes bya ba ni thar pa dang thar par 'dren par byed pa'i dge ba rnams so/ /tshul zhes bya ba ni tshul dang lam gang ma rig pa dang sred pa dag dang 'brel ba'i lugs dang ldan zhing don shes pas thar pa thob par byed pa de ni tshul zhes bya'o//sgo zhes bya ba ni thar pa'i grong khyer du 'jug pa'i sgo na thabs la mkhas pa ste/ skyon thams cad spangs nas lam gyi sgo ston pa'i phyir ro/ /lam zhes bya ba la/ gang zag dang chos la bdag med pa la 'jug par bya ba'i phyir mi rtag pa dang / sdug bsngal ba dang /bdag med pa dang / stong pa nyid shes pa dang / chos thams cad rang bzhin gyis stong par rtogs pa ni rnam pa thams cad mkhyen pa nyid kyi grong khyer du 'jug pa'i lam yin no/ /sa zhes bya ba ni rab tu dga' ba la sogs pa'i sa bcu 'bad pa med par thob pa'i gnas skabs la gnas pa'i rten du gyur pa'i phyir sa zhes bya ba ni sgras brjod do//skyed pa dang bral ba zhes bya ba ni 'khor ba sgrub par byed pa'i las dang bral bas las kyis bskyed pa'i skye ba kun tu bcad pa'o/ /ye shes kyi sa zhes bya ba ni bdag la sogs par kun tu rmongs pa dang bral bas chos bdag med pa la 'jug pa ni ye shes kyi sa zhes bya'o//mi shes pa spong ba zhes bya ba ni bdag la sogs par rmongs pa'i ma rig pa ni mi shes pa'o/ /de dang 'gal ba'i bdag med pa mthong bas 'dis rab tu spong bas na spong ba zhes bya'o/ /shes pa la rab tu gnas pa zhes bya ba ni dmigs par bya ba rdzas med pas dmigs pa med pa la rab tu gnas pa ni shes pa de rang bzhin mthar thug pa la gnas te shes pa la gnas pa zhes bya'o//rnal 'byor spyod pa'i sa zhes bya ba la/ bsam gtan dang / rnam par thar pa dang / byang chub kyi phyogs la sogs bsgom pa ni rnal 'byor ro/ / zhi gnas dang lhag mthong gi lam gang la gnas nas kun tu spyod cing goms par byed pa de la rnal 'byor spyod pa'i sa zhes brjod do/ /byang chub sems dpa'i spyod yul zhes bya ba ni spyod yul ni byang chub sems dpa'i yul te/ pha rol tu phyin pa drug dang / sa thams cad dang / sangs rgyas kyi yon tan rnams so//skyes bu dam pa la brten pa zhes bya ba ni sangs rgyas dang / byang chub sems dpa' dang / dge ba'i bshes gnyen mnyes par byed pa nyid dang / de dag dang mi 'bral ba'i sems so/ /skyes bu dam pa ma yin pa spong ba zhes bya ba ni mu stegs can dmigs pa'i lta ba can rnams dang /dam pa ma yin pa'i lam du zhugs pa rnams ni skyes bu dam pa ma yin pa'o/ /de rnams 'dul ba'i dus la bab pa ma yin par shes nas mi brten pa ni skyes bu dam pa ma yin pa spong ba zhes bya'o/ /de bzhin gshegs pas gsungs pa zhes bya ba la/ bden pa zhes bya ba ni lhag mas te/thams cad mkhyen pa'i ye shes kyis nyams su bstar nas thar pa dang / mya ngan las 'das pa'i ming gis bstan pa'o/ /sangs rgyas kyi sa zhes bya ba ni dge ba'i chos thams cad yongs su rdzogs par thob pa'i sa kun du 'od ni sangs rgyas nyid kyi sa yin pas sangs rgyas kyi sa zhes bya'o//mkhas pa rnams kyis rjes su yi rang ba zhes bya ba la/ chos nyid ces bya ba ni lhag mas te/ 'das pa dang ma 'ongs pa dang da ltar byur ba'i sangs rgyas dang byang chub sems dpa' rnams dang / nyan thos dang rang sangs rgyas rnams kyis legs so legs so zhes rjes su yi rang ba'o//byis pa rnams kyis spangs pa zhes bya ba ni shin tu rtogs par dka' ba'i goms par ma byas pa'i chos nyid kyi de kho na nyid do/ /thams cad rang bzhin med pa'i mtshan nyid can gyi mya ngan las 'das pa zhes bya ba la/ 'di ni mya ngan las 'das pa ma yin no zhes spong bar byed pa'o//nyan thos dang rang sangs rgyas rnams kyis shes par dka' ba zhes bya ba la zab cing rgya che ba'i sangs rgyas kyi chos bsam gyis mi khyab pa nyid la goms par ma byas pa'i sems kyi rgyud yin pa'i phyir de kho na nyid kyi chos nyid shes par dka' ba'o/ /mu stegs can thams cad kyis ma yin pa ni bdag dang bdag gir mngon par zhen pa'i brdzun pa'i mngon pa'i nga rgyal gyis thar pa 'dod pa rnams bdag nyid rtag pa la sogs pa'i ngo bor sgom par byed pa de dag gis ma yin pa chos nyid kyi don de kho na nyid ni de dag gi yul ma yin pa'o//byang chub sems dpa' rnams kyis yongs su gzung ba zhes bya ba ni rnyed par dka' ba'i lam chen po la nor bu rin po che'i 'du shes dang /nad thams cad rab tu zhi bar byed pa'i sman gyi rgyal po chen po'i 'du shes kyis mi gtong ba'i sems kyis chos nyid yongs su 'dzin pa'o/ /stobs bcu dag gis yongs su gzung ba zhes bya ba la/sangs rgyas kyi chos ma lus pa yongs su rdzogs par bya ba'i sbyor bas stobs bcu'i bsod nams dang ye shes kyi tshogs yongs su rdzogs pas rjes su ste/ phyi nas sangs rgyas kyis mkhyen pa'o/ /lha rnams kyis mchod par bya ba zhes bya ba la/ dpag tu med cing rgyun mi 'chad pa'i bde ba phun sum tshogs pa ni 'di la mchod pa byas pa nyid las 'byung bar 'gyur ro zhes shes nas/de 'dod pa rnams kyis mchod par bya ba yin no/ /tshangs pas phyag bya ba zhes bya ba ni thar pa ma yin pa la thar pa'i 'du shes can de dag yang dag pa'i thar pa 'byung ba ni 'di nyid yin gyi/gzhan ni ma yin no zhes thar pa 'dod pa rnams kyis phyag bya ba yin no/ /klu rnams kyis phyag bya ba dang zhes bya ba la/ dud 'gro'i skye gnas sgrub par byed pa'i lam gyi bag chags kyi rgyun kun tu bcad pa'i phyir phyag 'tshal ba'o/ /gnod sbyin gyis rjes su yi rang ba zhes bya ba ni dpe med pa'i longs spyod phun sum tshogs pa thob na yang /ngan 'gro'i lam thams cad yongs su bcad pa'i phyir rab tu dga' ba'i sems kyis rjes su yi rang ba'o/ /mi 'am ci rnams kyis bstod par bya ba ni thar par 'dod pa'i rab tu dga' ba dang / rab tu mgu bas chos brjod pa'i dbyangs snyan pas mi 'am ci'i rgyal po ljon pa bzhin du stod par byed pa'o//lto 'phye chen po rnams kyis bsngags par bya ba zhes pa ni drag po chen po'i sems kyis rgyun 'jug pa nye bar bcad pa'i ched du'o/ /byang chub sems dpa' rnams kyis bsgom par bya ba ni rnam pa thams cad mkhyen pa nyid mngon sum du byed pa ni bsgom pa'i lam thob pas yin gyi/tshig tsam gyis ting nge 'dzin rtogs pa ma yin no zhes bya bas so/ /mkhas pa rnams kyis kun chub par bya ba zhes bya ba ni rig par bya ba rig pa ni mkhas pa'o/ /des phyir mi ldog pa'i sa sangs rgyas nyid mngon sum du bya ba'i phyir nye bar bzung nas kun chub par byed pa'o//bla na med pa'i nor zhes bya ba ni ting nge 'dzin zhes bya ba dang 'brel te/ lha dang mir bcas pa'i skye dgu rnams kyi bde ba thams cad kyi rgyur gyur pa dang / thar pa'i bde ba'i rgyur gyur pa ni bla na med pa'i nor zhes bya'o/ /zang zing med pa'i sbyin pa zhes bya ba la/sbyin pa thams cad kyi nang na zang zing med pa'i sems kyis chos sbyin pa ni mi shes pa'i nyon mongs pa thams cad gcod par byed pa'i phyir chos kyi sbyin pa nyid ni sbyin pa'i mchog go/ /nad pa rnams kyi sman du gyur pa zhes bya ba la 'dod chags dang zhe sdang dang gti mug ni 'dan n+wa na ta ri la sogs pas kyang de dag gi rgyu ma shes shing gso ba yang mi shes pas rtag tu na ba de dag gi 'dod chags la sogs pa'i nad rnams rab tu zhi bar bya ba'i gso ba'i sman ni 'di lta bu'i ting nge 'dzin nyid yin no//ye shes kyi mdzod ces bya ba ni ye shes thams cad sdud par byed pa'i ting nge 'dzin gyi rgyal po sgom pa la mngon par sbyor ba ni ye shes mi zad pa'i mdzod yin pas so//spobs pa mi zad pa zhes bya ba ni ji ltar gnas pa'i chos nyid kyi de nyid rtogs pa dang / mi zad pa'i spobs pa ni spobs pa mi zad pa'i rgyu yin pas so/ /mya ngan dang bral ba zhes bya ba ni 'di dag thams cad don med pa dang /sdug bsngal gyi bdag nyid can no zhes shes nas chos thams cad bdag med pa bsgoms pas mya ngan dang bral bar 'gyur ro/ /khams gsum pa yongs su shes pa zhes bya ba ni khams gsum pa 'di dag ni rmi lam dang 'dra zhes bya bar shes nas de lta bu'i sgyu ma lta bu'i sems can thar bar bya ba'i phyir yongs su mi gtong ba ni khams gsum yongs su shes pa zhes bya'o//pha rol tu 'gro ba dag la gzings lta bu zhes bya ba ni lhag pa'i bsam pas yongs su mya ngan las 'da' 'dod pa rnams la mi rtag pa la sogs pa bshad pa dang / chos la bdag med pa la sogs pa bstan pa'o//chu bo'i nang du zhugs pa dag la gru lta bu zhes bya ba ni 'khor ba'i chu klung du lhung zhing rgya mtsho bzhir nub pa rnams sgrol ba'i phyir theg pa chen po'i gru bo che ni mi phyed pa'i gru yin no/ /grags pa 'dod pa dag gi grags pa zhes bya ba ni sangs rgyas kyi chos thams cad mnyan pa dang bsams pa dang bsgoms pa'i stobs kyis 'jig rten gyi khams mtha' yas pa na bzhugs pa'i de bzhin gshegs pa'i sa rnams la mchod pa'i phyir dang /sems can rnams kyi don du rab tu spros pas thams cad du khyab pa ni grags pa yin no/ /sangs rgyas rnams kyis bstod pa zhes bya ba ni de bzhin gshegs pa rnams kyis brnyes pa'i sangs rgyas rnams kyi yon tan mtha' med pa de dag gis sems can gyi khams ma lus pa bskyab pa'i phyir bla na med pa'i chos chen po'i sbyin bdag mdzad pa la dri ma med pa'i yon tan gyis bstod pa'o//de bzhin gshegs pa rnams kyis bsngags pa zhes bya ba ni dka' ba brgya phrag du mas bsgrubs pa'i sangs rgyas nyid thob nas kyang thabs la mkhas pa'i stobs kyis sems can thams cad kyi rgyud la sbyor bar byed pas yon tan thams cad dang thar pa'i bde ba thams cad kyi sbyin bdag nyid ni bsngags pa'o//stobs bcu rnams kyis bstod pa zhes bya ba ni rnyed par dka' zhing rin che ba'i chos rin po che'i sbyin bdag nyid ni gzhan la yod pa ma yin no zhes bya ba ni stobs bcu rnams kyis bstod pa'o//byang chub sems dpa' rnams kyi yon tan zhes bya ba ni theg pa chen po rtogs shing khong du chud pas theg pa gzhan la 'dod pa med pa'i byang chub sems dpa' rnams kyi yon tan thun mong ma yin pa'o//snying rje can dag gi btang snyoms zhes bya ba la/ gcig tu gzhan gyi don la zhugs pa rnams la btang snyoms 'byung ba ma yin te/ btang snyoms ni sems can gyi don la snyoms pa yin no zhe na/ de lta bu ni yod pa ma yin te/sangs rgyas kyi mdzad pa mdzad zin nas de'i tshe gdul bya med pa ni btang snyoms su rigs kyi/ /gzhan du ma yin no/ /nyes pa zhi bar 'dod pa dag gi byams pa zhes bya ba la/ nyes pa ni zhe sdang yin te/ de yang dag par mthong ba rnams kyi gnyen po'i ngo bor nges par sbyar ba'i byams pa chen po'i bdag nyid du byas pa'i rgyud kyi mtsho la zhe sdang gi me chung ngu tsam yang yod pa ma yin no zhes bya bas nyes pa zhi bar 'dod pa dag gi byams pa zhes bya'o//theg pa chen po pa dag gi dbugs 'byin pa zhes bya ba ni gang gi tshe sangs rgyas kyi chos rnams kyi snang ba thob par gyur pa de'i tshe/nges par bsam pa thams cad rdzogs par 'gyur ro zhes dbugs 'byin pa thob par 'gyur ro/ /seng ge'i sgra sgrogs pa rnams kyi nan tan zhes bya ba ni nan tan gyis thams cad kyi mchog sangs rgyas kyi chos mngon sum du mdzad nas bdag med pa'i seng ge'i sgra'i sgra bsgrags pa'i ngang tshul gyis nan tan byed pa'o//sangs rgyas kyi ye shes kyi lam zhes bya ba la/ dge ba'i chos kyi lam thams cad ni lam ste/ rjes su mi dmigs pa'i sbyor bas sangs rgyas nyid 'thob kyi gzhan gyis ni ma yin no/ /chos thams cad kyi phyag rgya zhes bya ba ni gdod nas zhi zhing ma skyes pa'i phyag rgyas btab pa nyid ni chos thams cad do zhes bya bas pha rol dang pha rol ma yin pa'i chos thams cad mnyam pa nyid kyi rgyas btab pa'o/thams cad mkhyen pa'i ye shes yongs su mi 'phrogs pa zhes bya ba la/ mi dge ba'i bag chags rnams dang bral ba'i phyir dang /dge ba'i chos thams cad yongs su rdzogs pa'i phyir bdud dang mu stegs can la sogs pa thams cad kyis mi g.yo ba'i ye shes nyid ni mi 'phrogs pa zhes bya'o/ /byang chub sems dpa' rnams kyi skyed mos tshal du gyur pa zhes bya ba la/ dga' ba dang rab tu dga' ba'i bde ba sems can thams cad la bsngos pa'i rtse mo'i sa ni skyed mos tshal te/mchog tu gyur pa'i theg pa dang dam pa zhes bya ba'i bar du'o/ /bdud kyi sde rnams skrag par byed pa zhes bya ba la/ bag chags dang bcas pa'i nyon mongs pa thams cad rnam par bsal ba dang / rnam rtog bsal ba ni bdud kyi sde rnams skrag par byed pa'o//bde bar 'gro ba rnams kyi rig pa zhes bya ba ni mya ngan las 'das par 'gro ba rnams kyi rig pa ni shes rab kyi pha rol tu phyin pa ste/ lam thams cad kyi gnod pa rnam par sel bar byed pa'i phyir ro/ /don grub pa rnams kyi don zhes bya ba ni sangs rgyas rnams kyi mi gnas pa'i mya ngan las 'das pa ni 'gro ba ma lus pa'i don mdzad pa'i phyir don te dgos pa'o dgra'i nang du song ba rnams kyi skyabs zhes bya ba ni tshad ma dang ldan pa'i chos nyid rab tu bstan pas dmigs par lta ba can thams cad dang /lta ba log pa can thams cad du sun dbyung bas yongs su skyob pa yin gyi/gzhan du na de dag lta ba log par ltung bar 'gyur ro/ /phyir rgol ba rnams chos dang mthun par tshar gcod pa zhes bya ba ni mu stegs kyis khas blangs pa'i chos can mi rtag pa la sogs pa'i chos dang bcas pa la skyon 'di lta bu yod do zhes brjod pas tshar gcod pa'o//mi 'jigs pa rnams kyis bden pa'i rnam pa zhes bya ba la/ 'jigs pa thams cad dang bral ba'i phyir brtan par byas shing rab tu brtan par byas pas mnyam pa nyid mthong bar nus pa nyid ni don dam par na mi 'jigs pa rnams kyi bden pa'i rnam pa zhes bya'o/ /stobs rnams yang dag par tshol ba zhes bya ba ni phyin ci ma log pa'i lam la 'jug pa la rmongs pa zlog pa'i don to//sangs rgyas kyi chos ma 'dres pa bco brgyad kyi snga ltas su gyur pa zhes bya ba ni byang chub kyi sems gtsor byas pa'i dkar po'i chos thams cad kyi byed por 'gyur ba'i yon tan ni snga ltas su gyur pa zhes brjod do//chos kyi sku'i rgyan zhes bya ba ni skyes bu chen po'i mtshan sum cu rtsa gnyis kyis yang dag par brgyan pa'i sku ste/ des de mngon sum du mdzad pas so/ /thar pa 'dod pa rnams kyi dga' ba zhes bya ba ni thog ma dang bar dang tha mar dge ba'i chos nyams su myong bas bla na med pa'i chos la dga' ba ni thar pa thob par byed pa yin no//sras thu bo rnams kyi dga' ba zhes bya ba ni yab sangs rgyas kyi yon tan gyi nor thob pas bde ba dang yid bde ba nyams su myong bas dga' ba'o/ /sangs rgyas kyi ye shes yongs su rdzogs pa zhes bya ba ni sangs rgyas kyi chos rnams ma thob pa thob par bya ba dang /thob pa rnams yongs su mi nyams pa nyid du nye bar 'dzin cing bsrung ba'o/ /nyan thos dang rang sangs rgyas thams cad kyi sa ma yin pa zhes bya ba ni dman pa la mos pa'i nyan thos dang rang sangs rgyas la sogs pa rnams zab cing rgya che ba'i sangs rgyas kyi chos rnams thos pa na 'jigs shing skrag nas ma rtogs pas sa ma yin pa ste yul ma yin pa'i phyir ro//sems rnam par dag pa zhes bya ba ni rnam par rtog pa dang kun tu rtog pa'i dri ma rnams rab tu spangs pas rtog pa med pa'i chos nyid dang / de rtogs pas sems rnam par dag pa'o//lus yongs su dag pa zhes bya ba ni nad thams cad rab tu zhi bar byed pa'i chos kyi sman gyi bdud rtsi 'thungs pas rdo rje lta bu'i sku thob pa ni lus rnam par dag pa'o/ /rnam par thar pa'i sgo rnams yongs su rdzogs pa zhes bya ba la/ stong pa nyid dang / mtshan ma med pa dang /smon pa med pa dang / rang bzhin gyis zhi ba'i chos nyid bsgom pa'i sbyor bas mngon sum du byed pa ni yongs su rdzogs pa zhes bya'o/ /sangs rgyas kyi ye shes kun nas nyon mongs pa med pa zhes bya ba ni snying rje chen po'i chags pas rjes su chags nas sems can thams cad kyi sdug bsngal dbral bar spro zhing zhugs pa ni kun nas nyon mongs pa med pa'i chags pa zhes bya'o//zhe sdang dang bral ba zhes bya ba ni snying rje chen po'i rang bzhin gyi sems kyis 'gro ba la phan pa nye bar bsgrub pa ni zhe sdang dang bral ba zhes bya'o/ /gti mug gis ma yin pa zhes bya ba ni rten cing 'brel par 'byung ba la rnam par lta ba'i chos kyi snang ba shar ba la rmongs pa'i mun pa'i skabs med pa'i phyir ro//ye shes 'byung ba zhes bya ba ni 'jig rten dang 'jig rten las 'das pa'i bzo la sogs pa thams cad la mkhas pa dang le lo med pa ni ye shes 'byung bar 'gyur ba yin no/ /rig pa skye ba zhes bya ba ni ji skad bstan pa'i zab cing rgya che ba'i dam pa'i chos thos pa dang /nang du tshul bzhin yid la byed pa ni rig pa skye ba'i rgyu zhes bya'o/ /ma rig pa spong ba zhes bya ba ni mi dmigs pa'i sbyor bas tshul bzhin ma yin pa yid la byed pa spong ba dang / tshul bzhin yid la byed pa nyid bsgom pa ni ma rig pa spang ba zhes bya'o//rnam par grol ba snying por byed pa rnams kyi tshim pa zhes bya ba ni 'phags pa'i chos 'thob pa'i bdag nyid che ba dang ma bral ba'i dga' ba rjes su 'dzin cing mi gtong ba'o/ /ting nge 'dzin snying por byed pa rnams kyi dga' ba zhes bya ba ni ting nge 'dzin bde ba sems can thams cad dang thun mong du byas nas sems rtse gcig pa dang mi 'bral ba nyid kyi dga' ba'o//blta 'dod pa rnams kyi mig tu gyur pa zhes bya ba ni gzhan gyis brjod du med pa'i chos nyid mngon du byed pa nyid phyin ci ma log par mthong ba'i mig gis blta bar 'dod pa yin gyi/ phyi rol gyi sha'i mig gis ma yin te/de des mngon sum du mi byed pa'i phyir ro/ /rnam par 'phrul par 'dod pa rnams kyi mngon par shes pa zhes bya ba ni rdzu 'phrul dang cho 'phrul sna tshogs kyis rtse zhing 'bad pa med par mi dmigs pa'i ting nge 'dzin la dbang thob pas mngon par shes pa lnga rang gi ngang gis 'jug par 'gyur ba nyid yin no//mngon par sgrub pa 'dod pa rnams kyi rdzu 'phrul zhes bya ba ni ye shes rtog pa med pa nyid dang / sgrib pa dang bral ba'i ting nge 'dzin gyi ye shes mngon sum du byas pas mngon par bsgrubs pa'i rdzu 'phrul gyis sems can thams cad kyi sems 'phrog par nus pa'o//thob par 'dod pa rnams kyi gzungs zhes bya ba ni sngar bstan pa'i gzungs bzhi po de dag thams cad kyis mya ngan las 'das pa dang mnyam pa 'dzin pas na gzungs zhes bya'o/ /dran pa mi brjed pa zhes bya ba ni 'khor bar gtogs pa'i sbyor ba nyid kyis mya ngan las 'das pa la dmigs pas rang bzhin gyis zhi ba nyid kyis dran pa mi brjed pa'o//sangs rgyas rnams kyis byin gyis brlabs zhes bya ba la/ chos kyi skus sems can thams cad kyi sems kyi rgyud la khyab pa mi 'phrogs pa'i sbyor bas byin gyis brlabs pa yin no/ /'dren pa rnams kyi thabs mkhas pa zhes bya ba ni bde ba thams cad kyi zhi bar 'gro ba ni de nas bzung nas nye bar 'gyur ba yin no//phra ba zhes bya ba ni mya ngan las 'das pa ni dmigs par lta ba la mngon par zhen pa rnams kyis shes par dga' ba dang / dmigs pa thams cad las yang dag par 'das pa nyid kyi phyir ro/shes par dka' ba zhes bya ba ni chos kyi sku'i rang gi ngo bo ni rnam par shes pa'i yul las yang dag par 'das pa'i phyir shes par dka' ba'o/ /dka' bas shes pa zhes bya ba ni byis pa rnams kyi sdug bsngal gyis kyang mi shes pa ste/ sngar nyams su ma myong ba dang ma shes pa dang mngon par ma sbyar bas sngar ma skyes pa bskyed pa'i nus pa med pas shes par dka' ba nyid ni shes par dka' ba'o//yi ge rnams ldog pa zhes bya ba ni ngag gi lam thams cad mi dmigs par yi ge thams cad kyi nges pa'i tshig gis ston pa ni yi ge rnams ldog pa zhes bya'o//sgras shes par dka' ba zhes bya ba ni so so rang gis rig par bya ba'i de kho na nyid ni tshig tsam gyis rnyed par bya ba ma yin te/ tshig gis mtshon pa'i don nges par rtogs nas bsgoms pa'i stobs kyis mngon sum du byed pa yin pa'i phyir sgras shes par dka' ba zhes bya'o//rtogs pa rnams kyis kun shes pa zhes bya ba ni lhun gyis grub par rin po che chen po'i 'du shes nyid dang / 'gro ba ma lus pa'i don sgrub pa shes pa ni mkhas pa'o/ /des pa rnams kyis shes pa zhes bya ba ni des pa ni byang chub sems dpa' chen po 'gro ba ma lus pa'i don byed pa dang chos nyid la dga' ba'o//des shes pa ni bkur sti dang gus pas shes pa'o/ /'dod pa chung ba rnams kyis rab tu rtogs pa zhes bya ba ni/ nyan thos dang rang sangs rgyas rnams te/ chos nyid rtogs pa tsam gyis rang gi nyams su myong ba rab tu rig pa la rab tu rtogs pa zhes bya'o//brtson 'grus brtsams pa rnams kyis gzung ba zhes bya ba ni byang chub tu sems bskyed pas sbyin pa la sogs pa la zhugs pa brtson 'grus brtsams pa rgyun mi 'chad par sangs rgyas nyid nye bar 'dzin pa'o/ /dran pa dang ldan pa rnams kyis bcangs pa zhes bya ba ni sngon gyi gnas rjes su dran pa'i stobs kyis byas pa chud mi gson pa ni bcangs pa'o//sdug bsngal zad pa zhes bya ba ni 'dod chags dang zhe sdang dang / gti mug rab tu spangs pas de'i ngo bo med pa'i sdug bsngal zad pa ni sdug bsngal med pa'o/ /chos thams cad skye ba med pa zhes bya ba ni chos thams cad ni sems kyi khongs su gtogs pa yin la/de 'gags pas chos thams cad 'gags pas rang bzhin gyis zhi ba nye bar bzung nas ma skyes pa zhes bya'o/ /theg pa gcig tu bstan pa zhes bya ba ni chos thams cad rmi lam lta bu zhes bya ba dang / dmigs su med pa'o zhes bya ba 'di'i khongs su gtogs pa'i phyir theg pa gcig tu bstan pa zhes bya'o//gzhon nu 'di ni chos thams cad kyi rang bzhin mnyam pa nyid rnam par spros pa'i ting nge 'dzin gyi rgyal po zhes bya'o zhes bya ba la/ de rnam par spros pa zhes bya ba ni lhag ma'o/ /yang bcom ldan 'das kyis bshad pa na zhes bya ba la sogs pas ni ting nge 'dzin bstan pa'i mthong ba'i chos kyi yon tan bstan te/khrag khrig phrag brgyad cus mi skye ba'i chos la bzod pa thob par gyur to zhes bya bar 'brel to/ /gal te sa brgyad pa la mi skye ba'i chos zab mo la bzod pa thob par 'gyur ba ma yin nam/thos pa tsam gyis ci ltar 'gyur zhe na/ de lta bu'i nem nur bsal ba'i phyir/ sngon yongs su sbyang ba byas pa zhes bya ba smras te/ lhan cig byed pa dang bral bas sngon ni thob par ma gyur la/ da ltar ni thob par gyur to zhes brjod par bya'o/ /de bzhin du khrag khrig phrag dgu bcu rtsa drug gis rjes su mthun pa'i bzod pa thob par gyur to zhes bya ba la/rtogs pa dang rjes su mthun pa'i bzod pa ni rjes su mthun pa zhes bya'o/ /sgra'i rjes su 'brang ba ni thos pa'i rjes su 'brang ba'o/ /len pa med par zag pa las sems rnam par grol lo zhes bya ba ni 'dod chags dang bral bar gyur nas nyon mongs pa'i cha tsam yang med pa'o//chos rnams la chos kyi mig rdul med cing dri ma dang bral ba rnam par dag go zhes bya ba ni chos mthong bas rnam par dag pa skyes pa'o/ /dge slong ma rnams kyang 'dod chags dang bral ba thob po/ /dge bsnyen rnams kyis phyir mi 'ong ba'i 'bras bu thob par gyur to//dge bsnyen ma rnams kyis kyang lan cig phyir 'ong ba'i 'bras bu thob par gyur te/ sngon yongs su sbyangs pa'i khyad par nyid dang bsam pa dang rjes su mthun par 'bras bu blta bar bya'o/ /stong gsum gyi stong chen po'i 'jig rten gyi khams 'di yang rnam pa drug tu g.yos zhes bya ba ni bya ba'i bye brag go//de la rnam pa drug ni shar phyogs dma' na nub phyogs mtho ba ni gcig go/ /de las bzlog pa ni gnyis pa'o/ /byang phyogs dma' na lho phyogs mtho ba ni gsum pa'o/ /de dag las bzlog pa ni bzhi pa'o//mtha' dma' na dbus mtho ba ni lnga pa'o/ /de dag las bzlog pa ni drug pa'o zhes bya ba ni rnam pa drug go/ /g.yo ba la sogs pa chung ngu dang 'bring dang chen po'i bye brag gis mtshan ma bco brgyad du 'gyur ro/ /de ltar chos kyi tshig gi bye brag gis ni shin tu gus pa bskyed pa'i phyir dang /chos nyid kyi mthu chen po yang dag par bstan nas 'chad pa ni gleng gzhi'i le'u zhes bya'o/ /sangs rgyas chos rnams gleng gzhi ni/ /byang chub sems la nges par brjod/ /sa dang pha rol phyin pa la/ /de nyid yang dang yang 'byung phyir/ /de ni gleng gzhi'i le'u las//bde gshegs dam pas bka' stsal te/ /gleng gzhi de las thams cad kyang / /blo dang ldan pas shes par bya/ /gleng gzhi'i le'u'i bshad pa rdzogs so// //sA la'i dbang po'i rgyal po'i le'u bshad par 'dod nas/ de'i tshe zhes bya ba la sogs pa gsungs te/zla 'od gzhon nu ni thams cad du gsol ba 'debs pa la dbang bas/ de'i phyir de la bos nas de bzhin gshegs pa grangs med pa rnams la ngas bkur stir byas zhes bya bar 'brel to/ /sngon byang chub sems dpa'i spyad pa spyod pa na 'khor los sgyur ba'i rgyal por gyur te zhes bya ba las/rgyal srid kyi dbang phyug dang ldan pa'i rang gi bde ba la ltos pa med pas ting nge 'dzin 'di 'dod cing ste/ ting nge 'dzin thob par bya ba'i phyir dang / ting nge 'dzin thob nas myur du bla na med pa'i byang chub 'dod pa'i phyir ro/ /bya rgod phung po'i ri 'di nyid la zhes bya ba ni sngon gyi gnas rjes su dran pa'i shes pas bskal pa dpag tu med pa'i skye ba dran pa'i bdag nyid kyi dran pa'i rgyu ston pa'o//bkur stir byas pa ni bkur bar 'os pa la mchod pa'o/ /bla mar byas pa ni bla ma la gus pas bsten pa'o/ /ri mor byas pa ni chen por brtsis pa'o/ /mchod par byas pa ni me tog la sogs pas so//rjed par byas pa ni yon chab dang zhabs bsil la sogs pas so/ /gsol bar byas pa ni de las gzhan pa'i mchod pa'i rnam pas so/ /de dag nyid bstan pa'i phyir rin po che thams cad dang / me tog dang / spos dang zhes bya ba la sogs pa la/gtsug lag khang rnam pa sna tshogs rnam par bkra ba bye ba khrag khrig brgya stong du ma'i bkod pa zhes bya ba ni rten gyi khyad par nye bar mkho ba thams cad dang ldan pas bsnyen bkur byas shing dgyes par byas nas de bzhin gshegs pa de dag thams cad kyi drung nas so/ /chos thams cad kyi rang bzhin mnyam pa nyid rnam par spros pa'i ting nge 'dzin 'di rgyas par thos te zhes bya ba ni mang du mang po dang lhan cig nges par bya ba'i phyir mnyan par byas pa'o//thos nas kyang gzhan dag la rab tu bstan par byas so/ /bdag nyid kyis kyang nyon mongs pa med pa'i sgom pas bsgoms so zhes bya ba ni bdag dang gzhan gyi rgyud la rdul dang 'dra ba'i nyon mongs pa rnams gang bsgoms pas mi skye ba'i byams pa chen po'i rang bzhin gang yin pa de ni nyon mongs pa med pa'i sgom pa ste/bsgom pa de gzhan dag la yang rab tu ston par byed pa'o/ /de dag thams cad kyi tha ma ni de bzhin gshegs pa sA la'i dbang po'i rgyal po zhes bya ba zhig byung ste zhes bya ba la sngar bstan pa'i de bzhin gshegs pa rnams ting nge 'dzin gyi ro myang ba'i phyir bsten pas ma ngoms nas phyi nas yang de bzhin gshegs pa la brten pa/gzhon nu de bzhin gshegs pa sA la'i dbang po'i rgyal po de'i zhes bya ba la sogs pa gsungs te/nyan thos dang byang chub sems dpa' khrag khrig brgya stong gi dge 'dun byung ste zhes bya bas ni mang po dang lhan cig bdag gis thos pa dang / bcom ldan 'das kyi 'khor yang mtha' yas par bstan pa yin no/ /de bzhin gshegs pa de la lo bye ba stong phrag bco brgyad du mchod pa dang bsnyen bkur chen po byas te/ting nge 'dzin gyi rgyal po mnyan pa'i phyir ro/ /de'i tshe'i tshad ni lo bye ba stong phrag bdun cu rtsa drug tu gyur te zhes bya ba ni ji srid sku tshe'i mthar thug par ma gyur gyi bar du mnyan pa dang gzung ba dang bcang bar 'dod pas yongs su mi gtong ba'i sbyor bas bla ma dang nam yang bral bar ma gyur to//bcom ldan 'das de'i drung du rab tu byung nas zhes bya ba ni rnam par g.yeng ba ma lus pa spangs pas thos pa'o/ /mnyan cing gzung ste zhes bya ba la sogs pa ni snga ma bzhin no//de lta bas na zhes bya ba la sogs pas ni skyo ba med pa'i sems kyis ji lta rang de bzhin gshegs pa thams cad la mchod pa dang rim gro dang g.yog bya ba dang ldan pa bzhin du khyod kyis kyang bya'o zhes rab tu bstan pa'i phyir/ gzhon nu de lta bas na ting nge 'dzin 'di 'dod cing myur du bla na med pa yang dag par rdzogs pa'i byang chub mngon par rdzogs par 'tshang rgya bar 'dod na khyod kyis kyang de bzhin du de bzhin gshegs pa thams cad la mchod pa dang /rim gro dang / g.yog bya ba la brtson par bya'o zhes gsungs pa yin no/ /gal te de bzhin gshegs pa rnams la mchod pa dang g.yog byas pas ji ltar bla na med pa yang dag par rdzogs pa'i byang chub thob ces bya ba'i som nyi de ci'i phyir zhe na zhes 'dri ba'i lan gdab pa'i phyir/de bzhin gshegs pa thams cad la mchod pa dang / rim gro dang / g.yog bya ba'i rgyu mthun pas zhes bya ba gsungs te/ gang gi phyir de bzhin gshegs pa la mchod pa dang / g.yog byas pa'i yongs su spyod pa'i rgyu mthun pa nyid dang / mnyam pa dang bsam pa'i rgyu mthun pa'i mtshungs pa'i 'bras bus ni de bas na bla na med pa yang dag par rdzogs pa'i byang chub kyang rnyed dka' ba ma yin pas de la mngon par sbyar bar rigs nas ting nge 'dzin 'di ltar rgyun mi 'chad par bsgoms na nges par bde ba thob par 'gyur ro zhes bya ba'o//gzhon nu de lta bas na zhes bya ba la sogs pas ni nye bar sdud par byed do/ /lhug par bstan pa'i don de tshigs su bcad pas slar yang gsungs pa ni bde bar khong du chud par bya ba'i phyir dang /ston pa la dbang thob par bstan pa'i phyir/ sngon byung ba'i le'u 'di nyid rgya cher zhes bya ba la sogs pas bstan te/ sngar bstan pa las lhag par 'jug pa ni rgya cher zhes bya'o/ /tshigs su bcad pa'i dbyangs kyis te/ yid du 'ongs pa'i dbyangs kyis rgya cher yang dag par rab tu bstan pa'o//bstan to zhes bya ba ni 'das pa'i dus ston pa'o/ /dran pa stobs bcu bye ba drug cu dag /sngon tshe bya rgod phung po'i ri la bzhugs/ /zhes bya ba la/ dran pa ni sngon gyi dus su stobs bcu dang ldan pa bye ba drug cu bya rgod kyi phung po'i ri 'di la bzhugs pa dran par gyur pa'o//de dag gis nga sngon byang chub sems dpa'i spyad pa spyod pa'i tshe ting nge 'dzin 'di bshad par mdzad pa'o/ /de dag thams cad kyi tha mar gyur pa ni de bzhin gshegs pa sA la'i dbang po'i rgyal po zhes bya ba'o/ /de la ngas ting nge 'dzin 'di dris so/ /nga yang rgyal rigs nyid gyur te//rgyal po sa bdag gtso bo yin/ /zhes bya ba la mi'i bdag po thams cad kyi nang na 'khor los sgyur ba gtso bor gyur pa'o/ /nga yi bu yang lnga brgya ste/ /zhes bya ba ni 'khor los sgyur ba la nges par bu lnga brgya las mi nyung ba 'byung bar 'gyur ro/ /sangs rgyas de yi gtsug lag khang //bye ba snyed ni ngas byas te/ /zhes bya ba la/ de bzhin gshegs pa la mchod pa dang / g.yog bya ba'i phyir nye bar mkho ba thams cad ma bral ba/ tsan dan shing dang rin po che'i ka ba la sogs pas mdzes par brgyan pa rnams byas so/ /rgyal po de'i skye bo mang po la dga' zhing yid du 'ong ba ste 'jig rten thams cad kyi 'dod pa'o//'jig rten pa'i bla ma zhes bya ba ste/ des de bzhin gshegs pa la khyad par can gyi mchod pa dam pa dag lo stong phrag bye ba bco brgyad kyi bar du byas so/ /rkang gnyis gtso bo rgyal ba ma smad pa/ /lo ni bye ba stong phrag bdun cu drug /de nyan thos kyi dge 'dun dang bcas pa la mchod pa rnam pa mang po ngas byas so/ /bcom ldan 'das de'i drung du nga btsun mo dang sras dang bcas par rab tu byung nas/ lo bye ba stong phrag bcu bzhir ngas ting nge 'dzin 'di yongs su zhus te/ tshigs su bcad pa khrag khrig stong phrag brgyad cu dang /dkrigs phrag bye ba brgya rnams ngas gzung ngo / /gzhung de dag kyang ting nge 'dzin 'di'i le'u gcig yin no/ /de dag kyang ngas mnyan cing bzung nas gzhan dag la yang rgya cher bstan to/ /de lta bu'i le'u stong phrag brgya'i gzhung grangs med tshad med pa de bzhin gshegs pa'i yul du gyur pa'o//ting nge 'dzin 'di thob par 'dod pas ngas bdog pa'i dngos po ma btang ba ci yang med do/ /de bzhin du de bzhin gshegs pa mtha' yas pa bya rgod phung po'i ri 'di la bzhugs pas ting nge 'dzin 'di rgya cher gzhan dag la bstan to//de dag gi drung du ngas kyang ji ltar thos pa bzhin du bsgoms shing nan tan du byas pas bsgrubs pa ste/ nan tan rnam pa sna tshogs pas bstan to/ /yon tan la rab tu gnas pa dang / ro la ma zhen cing mi brkam pa dang / ser sna dang phrag dog la sogs pa'i skyon thams cad dang bral ba dang /yon tan thams cad kyis brgyan pa la ni ting nge 'dzin 'di rnyed par dka' ba ma yin te/ mdor na mi gang ting nge 'dzin 'di 'dzin pa des ni mtshan sum cu rtsa gnyis dang dpe byad bzang po brgyad cus brgyan pa'i sku dang chos thams cad 'dzin par 'gyur ro zhes bya ba yin no//gang dag ting nge 'dzin 'di 'dzin par byed pa de'i yon tan ni de bzhin gshegs pa dpag tu med pas zhal gyi pad+ma dpag tu med pa nas dpag tu med pa'i ljags kyi khyad par gyis/ gsung gi yan lag tha dad pa dpag tu med pas bskal pa dpag tu med par brjod kyang tshigs su bcad pa gcig tsam brjod pa'i bsod nams kyi cha tsam yang bsgrags par mi 'gyur ro//gang gi phyir 'das pa dang ma 'ongs pa dang da ltar byung ba'i de bzhin gshegs pa de dag thams cad kyis kyang ting nge 'dzin 'di nyid la legs par bslabs pas bla na med pa yang dag par rdzogs pa'i byang chub mngon par rdzogs par sangs rgyas so//de'i phyir ting nge 'dzin 'di 'dzin pa'i yon tan ni dpag tu med par shes par bya'o/ /sngon gyi sbyor ba'i skabs kyis ni/ /shin tu mnyes par bya ba gsungs/ /sangs rgyas 'bras bu 'dod pa yis/ /de bzhin 'jug par bya ba yin//zhes bya ba yin no// //sA la'i dbang po'i rgyal po'i le'u ste gnyis pa'i 'grel pa'o/ /de ni sangs rgyas rjes su dran pa bsgom pa dang ldan pa ni ting nge 'dzin la mngon par phyogs par 'gyur bas/ sangs rgyas rjes su dran pa'i le'u de nas bcom ldan 'das zhes bya ba la sogs pas gsungs te/de lta bas na byang chub sems dpa' gang de bzhin gshegs pa'i yon tan yang dag pa dang / sangs rgyas kyi yon tan brjod pa yang dag par bstan par 'dod pa dang / don dang 'bru mi zad par bya ba ste yongs su rdzogs par 'gyur bar 'dod pa des kyang sems can thams cad kyi don du ting nge 'dzin 'di gzung bar bya zhes bya ba la sogs pa gsungs te/sangs rgyas kyi yon tan yang dag pa de dag gang yin zhe na zhes yon tan dpag tu med pa'i bden pa'i rang bzhin nges par byed pa zhus pa dang / dgon pa na 'dug kyang zhes bya ba la sogs pa gsungs te/thams cad du sangs rgyas rjes su dran pa bsgom pa dang mi 'bral bar goms par bya'o zhes bstan pa yin no/ /da ni yang dag pa'i yon tan brjod par bya ba'i phyir/ 'di ltar bcom ldan 'das zhes bya ba la sogs pa gsungs te/ bcom ldan 'das zhes bya ba ni bdud bzhi bcom pa dang /dbang phyug la sogs pa'i yon tan dang ldan pa'o/ /de bzhin gshegs pa zhes bya ba ni chos ji ltar gnas pa de dag de bzhin du rtogs shing mngon par rdzogs par sangs rgyas pa'am de bzhin ston par mdzad pas de bzhin gshegs pa'o/ / dgra bcom pa zhes bya ba ni nyon mongs pa bag chags dang bcas pa bcom pas mchod par 'os pa 'am/ dgra bcom pa dang ldan pas dgra bcom pa'o/ /yang dag par rdzogs pa'i sangs rgyas zhes bya ba la/ yang dag pa phyin ci ma log pa'o/ /rdzogs pa ni yongs su gang ba ste/bsod nams dang ye shes kyi tshogs ma tshang ba med pa brnyes pa'o/ /rig pa dang zhabs su ldan pa zhes bya ba la/ de la yang dag pa'i lta ba ni rig pa'o/ /yan lag lhag ma bdun ni zhabs zhes bya ste/ de ltar na 'phags pa'i lam yan lag brgyad pa dang ldan pa ni rig pa dang zhabs su ldan pa zhes bya'o//bde bar gshegs pa zhes bya ba ni don gsum gzung bar bya ste/ rab tu grub pas na bde bar gshegs pa ste/ bu mo gzugs bzang mo bzhin no/ /phyir mi ldog par gshegs pas na yang bde bar gshegs pa ste/ rims nad legs par byang ba lta bu'o//ma lus par gang bas na bde bar gshegs pa ste/ bum pa gang ba bzhin te/ des na bde bar gshegs pa zhes bya'o/ /'jig rten mkhyen pa zhes bya ba ni dbang po dang bsam pa ji lta ba bzhin snod dang snod ma yin pa'i bye brag gis 'gro ba drug tu skyes pa'i 'jig rten rnams kyi don skal ba bzhin rig pas na 'jig rten mkhyen pa zhes bya'o//skyes bu 'dul ba'i kha lo sgyur ba zhes bya ba la/ skyes bu gdug pa can gyi dregs pa bsal nas rang gi lam la 'jog par byed pas na skyes bu 'dul ba zhes bya'o/ /de rnams kha lo sgyur ba ni gtso bor gyur pa'o//bla na med pa ni lhag pa'i rang bzhin du gyur pa ste/ des na skyes bu 'dul ba'i kha lo sgyur ba ni de bzhin gshegs pa las gzhan la yod pa ma yin no/ /lha dang mi rnams kyi ston pa zhes bya ba ni zhi ba dang / drag po la sogs pa'i sems can rnams phyin ci ma log par bstan pas 'dul bar mdzad pas ston pa'o//lha ni lha chen po la sogs pa'o/ /mi rnams ni sor mo'i phreng ba la sogs pa'o/ /de lta bu'i yang dag pa'i yon tan dang ldan pa de su yin zhe na/ de'i phyir sangs rgyas bcom ldan 'das zhes bya ba gsungs te/ de bzhin gshegs pa de ni bsod nams dag gi rgyu mthun pa zhes bya ba la/rgyu dang 'dra ba'i 'bras bu ni rgyu mthun pa ste/ sngon gyi bsod nams kyi 'bras bu ni rgyu mthun pa'i 'bras bu ste bcom ldan 'das so/ /dge ba'i rtsa ba rnams chud mi za ba zhes bya ba ni ma chags pa la sogs pa'i dge ba'i rtsa ba'i rang bzhin sngon gyi dus su bskyed pa rnams mngon par mi nyams pa'i 'bras bu ma tshang ba med pa'i sku mthong ba las rjes su dpag par bya ste/dge ba'i rtsa ba ma tshang ba med pa gcig tu bsdus par gyur pa ni bcom ldan 'das so/ /bzod pas brgyan pa zhes bya ba ni rgyan ma lus pa thams cad zil gyis gnon pa'i ngo bo ni bzod pa yin no//brgyan pa zhes bya ba ni rdzogs par thob pa ste shin tu rdzogs par byas pa'o/ /bsod nams kyi gter rnams kyi gzhi zhes bya ba ni bsod nams nyid gter yin te/ phun sum tshogs pa ma lus pa'i rgyur gyur pa'i phyir ro/ /de dag gi gzhi ni skal ba dang ldan pa rnams la mngon sum du gyur pa ni bcom ldan 'das yin pas bsod nams kyi gzhi zhes bya'o//dpe byad bzang po rnams kyis shin tu brgyan pa ni spras nas mdzes par byas pa'o/ /mtshan gyi me tog rgyas pa zhes bya ba la/ byang chub kyi yan lag gi me tog las skyes pa'i skyes bu chen po'i mtshan sum cu rtsa gnyis kyis rnam pa thams cad mkhyen pa nyid kyi 'bras bu thob par bya ba la nye ba'i tshe brgyan pa'o//spyod yul ran par mthun pa zhes bya ba ni ran par mthun pa ni 'dra ba'o/ /de med pa ni ran par mthun pa'o/ /spyod yul ni yul lo/ /yang na spyod lam gyi khyad par yid du 'ong bas thams cad du de dang 'dra ba med pa zhes bya ba'i don to//mthong na mi mthun pa med pa zhes bya ba la/ shin tu gdug pa'i sems dang ldan pa rnams kyis kyang mthong ba'i spyod yul du gyur na mthong bas yid 'phrog par byed pa'i phyir/ nam yang mi mthun pa'i sems 'byung bar mi 'gyur ba'o//dad pas mos pa rnams mngon par dga' ba zhes bya ba ni gang zhig dad pa tsam gyis mos par gyur pa de dag kyang dad pa rgyun chad pa'i rgyu med pa'i phyir de nyid la mngon par dga' bar 'gyur ro/ /des na dad pas mos pa rnams mngon par dga' ba zhes bya'o/ /shes rab zil gyis mi non pa zhes bya ba ni bdud dang /mu stegs dang / kun tu rgyu dang / nyan thos dang / rang sangs rgyas dang / byang chub sems dpa'i shes rab rnams kyi spyod yul de bzhin gshegs pa'i ye shes ma yin pa'i phyir zil gyis mi non pa zhes bya'o/ /stobs rnams la brdzi ba med pa zhes bya ba ni de bzhin gshegs pa'i stobs bcu las lhag pa med pa'i phyir/bdud la sogs pa stobs chung ba rnams kyis brdzi bar mi nus pa'o/ /sems can thams cad kyi ston pa zhes bya ba ni sems can rnams la skal ba ji lta ba bzhin du chos ston pas rjes su ston pa'i phyir ston pa zhes bya'o/ / byang chub sems dpa' rnams kyi yab ces bya ba la byang chub kyi sems bskyed pa la sogs pas bskyed pa'am thabs la mkhas pa'i rang bzhin yin pa'i phyir yab ste/ shes rab pha rol phyin pa ma/ /pha ni thabs la mkhas pa yin/ /zhes bya ba gsung bas so/ /'phags pa'i gang zag rnams kyi rgyal po zhes bya ba la/de bzhin gshegs pas bcas pa'i bslab pa bsrungs shing bslabs pas dgra bcom pa la sogs pa'i 'bras bu thob cing de'i bka' las 'da' bar mi nus pa'i phyir ro/ las dang po pa rnams kyi ded dpon zhes bya ba la/ dge ba'i rtsa ba bcu'i lam brgyags byin nas bgrod dka' ba'i lam las grol ba ni ded dpon gyi las yin pas de sgrub par byed pa'o/ /ye shes dpag tu med pa zhes bya ba ni 'jig rten dang 'jig rten las 'das pa'i shes pas tshad gzung bar mi nus pa'i phyir dpag tu med pa 'am dpag tu med pa'i ye shes dang ldan pas so//spobs pa bsam gyis mi khyab pa zhes bya ba ni sems can thams cad kyi sems kyi spyod pa dang rjes su mthun par rgol ba'i lan gdab pa'i spobs pa bsam gyis mi khyab pa nyid kyi phyir ro/ /gsung rnam par dag pa zhes bya ba ni yan lag drug cu dang ldan pa'i gsung gi dkyil 'khor rnams rnam par dag pa nyid do//dbyangs snyan pa zhes bya ba ni dbyangs snyan pa nges par bsgrags pas sems can thams cad dga' ba bskyed nas ngoms pa med par byed pa'i phyir dbyangs snyan pa zhes bya'o/ /sku byad lta bas chog mi shes pa zhes bya ba ni dang por mthong ba gang du babs pas de las gzhan du blta bar mi 'dod de/bltas shing bltas shing dga' ba ni/ /sar pa sar pa yang yang skye/ /zhes bstan pa lta bu'o/ /sku mtshungs pa med pa zhes bya ba ni yan lag ma lus pa yang dag par rdzogs pas de'i phyir thub pa nyid kyi sku ni mtshungs pa med pa ste/'dra ba yang med pa'i sku zhes bya ba'i don to/ /'dod pa dag gis ma gos pa zhes bya ba la/ 'dod pa'i khams na gnas na yang 'dod pa'i khams dang 'brel ba'i skyon gyis ma gos pa'o/ /de bzhin du gzugs dang gzugs med pa'i khams dang 'brel bas ma gos pa yang ngo //phung po dag las rnam par grol ba zhes bya ba ni sdug pa dang bral ba la sogs par rnam par rtog pa dang bral ba'i phyir dang / sdug bsngal gyi rgyu las grol ba'i phyir sdug bsngal las kyang grol ba nyid do/ /khams rnams dang mi ldan pa zhes bya ba ni sa la sogs pa dang /khams bco brgyad po rnams dang bral zhing ma gos pa'o/ /skyed mched rnams bsdams pa zhes bya ba ni yul dang yul can rnams rang bzhin gyis med pas mngon par zhen pa rab 'byams bsdus pa ste/ rang gi ngo bo mthar thug par gyur ces bya ba'i don to//mdud pa rnams shin tu bcad pa zhes bya ba la/ 'dod pa dang / ma rig pa dang / lta ba'i mdud pa'i 'ching ba rnams de kho na nyid nyams su myong bas nan gyis bcad pa ste/ gang zhe na rnam par 'ching ba ste/ tha dad par byas zhes bya ba'i don to/ /yongs su gdung ba rnams las grol ba zhes bya ba ni 'dod chags la sogs pa'i nyon mongs pa rnams ni sreg par byed pas yongs su gdung ba zhes bya ba ste dge ba'i rgyun rnams sreg par byed pas so//de dag las rnam par grol ba ni rnam pa sna tshogs kyis spangs pa'o/ /sred pa las yongs su grol ba zhes bya ba ni yongs su ni kun nas so//grol ba zhes bya ba ni 'khor ba la mngon par zhen pa'i mtshan nyid can gyi sred pas so/ /chu bo las rgal ba zhes bya ba ni chu bo ni bzhi ste/ 'dod pa dang / srid pa dang / ma rig pa dang / lta ba'i mtshan nyid can no/ /de dag las rgal ba ni pha rol gyi 'gram mya ngan las 'das pa thob ces bya ba'i don te//ye shes yongs su rdzogs pa zhes bya ba la/ rnam pa thams cad mkhyen pa nyid mngon sum du mdzad pa las rnam pa thams cad yongs su rdzogs par mkhyen pa ni gzhan la med pas so/ /'das pa dang / ma byon pa dang / da ltar gyi sangs rgyas bcom ldan 'das rnams kyi ye shes la gnas pa zhes bya ba ni de bzhin gshegs pa thams cad dang mnyam pa nyid kyi ye shes mi gnas pa'i tshul gyis rab tu gnas pa'o//mya ngan las 'das pa la mi gnas pa zhes bya ba ni nyan thos la sogs pa bzhin du mya ngan las 'das pa la mngon par mi zhen la 'khor ba dang mya ngan las 'das pa mnyam pa nyid du dmigs pas gcig la mngon par zhen pa med pa nyid do//yang dag pa nyid kyi mtha' la gnas pa zhes bya ba ni sangs rgyas dang de bzhin nyid rten dang brten pa'i ngo bor med pas de'i bdag nyid du gnas pa ni gnas med pa nyid gnas yin no zhes byas nas so//sems can thams cad la gzigs pa'i sa la bzhugs pa ste/ zhes bya ba ni de rtogs par 'dod pa rnams rab tu zhen pa'i sems gyis thams cad mkhyen pa nyid kyi sa la blta ba ste/ mngon par 'dod pa zhes bya ba'i bar du'o//gzhon du 'di dag ni de bzhin gshegs pa'i sangs rgyas kyi yon tan yang dag pa ste zhes bya ba ni bshad ma thag pa'o/ /sangs rgyas kyi yon tan de dag dang ldan pa ni spobs pa rgyun mi 'chad pas yang dag par rdzogs pa'i sangs rgyas kyi yon tan bsngags pa yang dag par bstan pa na don dang tshig yongs su zad par mi 'gyur ba ni yongs su rdzogs par mi 'gyur ba ste/sangs rgyas kyi yon tan gyi mthu dpag tu med pa'i phyir ro/ /de'i gsung thams cad kyang sangs rgyas kyi yon tan nyid kyis brgyan par gsung bar 'gyur te/chos nyid rab tu sgrub pa la ched du byed pa'i phyir ro/ /lhug pas bstan pa'i don de dag nyid bde bar khong du chud par bya ba'i phyir tshigs su bcad pa'i dbyangs kyis rab tu bstan pa ni ji lta ji ltar 'jig rten rnams la phan pa yang dag par sgrub par byed pa de lta de ltar ston par mdzad pas/bskal pa stong phrag mang por rab bshad kyang / /rgyal ba'i bsngags pa thams cad brjod mi lang / /zhes bya ba la sogs pa ste/ rgyal ba ste bdud rnams las rgyal ba'o/ /yon tan gyi bsngags pa thams cad brjod pa ni bskal pa stong phrag mang por yang mi nus pa'o//de ltar de bzhin gshegs pa de dag gis yon tan bskyed pa de ni brjod par mi nus pa'o/ /ting nge 'dzin thob par bya ba'i phyir dang / yon tan bskyed pa'i dbye ba bstan par bya ba'i phyir/ bu mo gzugs bzang shin tu blta na sdug /ces bya ba la sogs pa gsungs te/ rgyan thams cad kyis brgyan pa mtshan thams cad dang ldan pa yang sngon btang ngo / de bzhin du nor dang / 'bru dang / bran pho dang / bran mo dang / nor bu dang / mu tig dang / byi ru la sogs pa yang byin no/ /gos ni bgo bar bya'o/ /dri mchog dri ldan ni dbyar gyi me tog nyid de ma li ka'o//phul ba ni sbyin pa'o/ /mchod rten ni mchod rten no/ /bla na med pa'i sems ni dri ma med pa'i sems bskyed nas mchod par byas pa'o/ /de bzhin du chos kyi sbyin pa ni zang zing med pa'i sems kyis so/ /chos kyi sbyin pa byin pas nga grags par 'gyur ro snyam pa de 'dra ba'i sems nam yang ma skyes so//sdug pa'i mchog byin pa la bdag nyid kyis spyad par bya'o snyam pa'i sems kyang nga la med de/ 'on kyang sangs rgyas kyi ye shes thob par bya ba'i phyir ro/ /snying rje chen po sngon du 'gro ba'i sbyangs pa'i yon tan dag kyang sangs rgyas nyid thob par bya ba'i ched du'o//ting nge 'dzin thob par bya ba'i phyir phrag dog dang ser sna dang bral ba'i sbyin pa dang / tshul khrims dang / bzod pa dang / brtson 'grus dang / bsam gtan dang shes rab la brtan to/ /gang+gA'i klung gi bye ma snyed kyi 'jig rten gyi khams nor bu rin po ches bkang nas sbyin pa byin pa'i bsod nams las ting nge 'dzin 'di ston par byed pa'i tshig bzhi pa'i tshigs su bcad pa tsam bzung na sangs rgyas nyid dang nye ba'i rgyu yin pa'i phyir bsod nams mang du bskyed par rig par bya'o//gang+gA'i klung gi bye ma snyed kyi bskal par phan yon yongs su bsgrags kyang sangs rgyas nyid kyang mthar thug par brjod par mi spyod do//de bas ni sangs rgyas nyid kyi 'bras bu thob par 'dod pas ting nge 'dzin gyi rgyal po'i mdo sde'i tshigs su bcad pa tsam gzung ba la yang blo dang ldan pas rtag tu 'bad par bya'o/ /snying rje chen po la 'jug pa'i mdo sde nan tan gyis mnyan par bya'i/tshig tsam gyis ni ma yin no zhes bya ba ni mdor bsdus pa'o/ /ji ltar 'das pa la thogs pa med par mkhyen pa bzhin du ma 'ongs pa la yang thogs pa med par mkhyen pa 'jug pa yin no zhes bya bar/ 'jig rten 'dren pa mya ngan 'das/ /zhes bya ba la sogs pa ste/'jig rten 'dren pa mya ngan las 'das nas phyi ma'i dus na dge slong sdom pa med pa mang po dag mang du thos pa mi 'dod pa de dag sgra tsam gyis sbyin pa dang / tshul khrims dang / bzod pa dang / brtson 'grus dang / bsam gtan dang / shes rab la sogs pa'i bsngags pa rjod par byed kyang de dag 'dod pa ni ma yin te/dpe gsungs pa/ ji ltar skyes bu la la dag /tsan dan dag ni 'di 'dra ste/ /zhes bya ba'i dpes ni sgra tsam pa 'jug par gsungs so/ /'tsho ba tsam gyi ched du tshul khrims la sogs pa la bsngags pa rjod par byed pa yin gyi/rang gi ngo bo ni yod pa ma yin no zhes bya bar/ ji ltar skyes bu dbul po la la zhig /skye bo mang pos yongs brnyas gyur pa ste/ /brnyas pa ni smad par gyur pa'o/ /de bzhin du ting nge 'dzin las nyams pa la yang blta bar bya'o/ /ji ltar de nyid kyis phyis nor gyi gter chen po skye bo'i tshogs chen pos 'dod par bya'i gter chen po'i bdag por gyur na skye bo'i tshogs chen pos rim gro byed par 'gyur ro//de bzhin du gang gi tshe ting nge 'dzin 'di thob par gyur pa de'i tshe lha dang bcas pa'i 'jig rten thams cad kyis mchod par 'gyur ro//sangs rgyas su dag phyogs su mya ngan 'das/ /zhes bya ba la sogs pas ni ting nge 'dzin gyi che ba'i bdag nyid gsungs so/ /zla 'od gzhon nu sems dga' nas zhus pa/ skyes bu dam pa mya ngan yongs 'das nas/ /zhes bya ba la sogs pa ste/ /ma rungs dus na bdag gis mdo 'di gzung //zhes bya ba la/ ma rungs pa'i dus ngan pa la bab pa'i tshe bdag gis mdo 'di gzung bar bya'o zhes bya'o/ /zla 'od gzhon nu ji lta bar byang chub sems dpa' lnga brgya mdo sde 'dzin pa la rab tu zhugs par gyur to/ /sangs rgyas rjes dran nges grub pas/ /ye shes dbang phyug cher gyur nas//sangs rgyas sras po brgyas bskor ba/ /'jig rten la grags kun mkhyen gyur/ /sangs rgyas rjes su dran pa'i le'u zhes bya ba ste gsum pa rdzogs so// //de ni ting nge 'dzin gyi le'u bstan par 'dod nas/ de nas zhes bya ba la sogs pa gsungs te/ bcom ldan 'das ga la ba der logs su thal mo sbyar ba btud nas 'di skad gsol to zhes bya ba la/bdag bcom ldan 'das la phyogs 'ga' zhig zhu'o zhes bya ba ni yul thams cad dus gcig tu zhu bar mi nus pa'i phyir ro/ /bcom ldan 'das kyis bdag la skabs phye na zhes bya ba ni zhu ba'i skabs phye nas so//zhu ba lung bstan pa'i slad du zhes bya ba ni lan stsol na zhes bya ba'i don to/ /rtag tu skabs phye yis ci dang ci 'dod pa dris shig ces bya ba ni rtag tu mnyam par gzhag pa'i phyir nam yang skabs med pa ma yin no zhes bya bar dgongs so/ /bcom ldan 'das ting nge 'dzin ting nge 'dzin zhes bya ba'i don ci lags zhes rang gi 'dod pa zhus pa'o//ting nge 'dzin gyi rang gi ngo bo gsungs pa/ ting nge 'dzin ting nge 'dzin zhes bya ba ni 'di lta ste/ sems nges par rtogs pa zhes bya ba la sems nges par rtogs pa ni nges par rnam par rtog pa'i spros pa dang bral ba'i rang rang gi ngo bo mthar thug pa mnyam par mthong ba'i mnyam pa nyid dang blo mnyam par rtse gcig tu gyur pa de la ting nge 'dzin zhes bya ste/gzhan dag go bar bya ba'i phyir yin gyi/ don dam pa nyid du ni ngag gi spyod yul thams cad las 'das pa/ ma skyes pa/ rnam par rtog pa thams cad dang ma 'dres pa/ phyi dang nang gi bdag nyid can gyi mngon par zhen pa dang bral ba/'gog pa la snyoms par zhugs pa bzhin du sgrub pa thams cad dang bral ba yang ma yin pa ste/ ye shes kyi rgyun g.yo ba med pa yang me rlung med pa la 'bar ba'i rtse mo'i rgyun bzhin du 'jug pa ni chos thams cad mnyam pa nyid rnam par spros pa'i ting nge 'dzin gyi rang gi ngo bo zhes ston to//de la rnam par spros pa ni sngar bstan to/ /ting nge 'dzin 'di thob na phung po dang / nyon mongs pa dang / dam bcas pa dang / brtson 'grus kyi khung rnams bor bar 'gyur ro/ /de bzhin gshegs pa'i ye shes ni thams cad mkhyen pa'i ye shes zhes bya'o//sangs rgyas kyi khyu mchog ni sangs rgyas kyi che ba'i bdag nyid do/ /'dod chags dang / zhe sdang dang / gti mug rab tu spangs pa nyid du gyur pa 'di ni ting nge 'dzin 'di'i sngon du 'gro ba'i rgyu yin pas 'di dag dang / /rigs par rnal 'byor du byed pa zhes bya ba ni rigs pa ste tshad ma dang ldan pa'i rnal 'byor gang la yod pa de ni rigs par rnal 'byor du byed pa zhes bya ste/de'i ngo bo ni rigs par rnal 'byor du byed pa'o/ /de las bzlog pa ni mi rigs pa rnam par spang ba'o/ /dge ba'i chos la 'dun pa ni mngon par zhen pa'o//'khor ba las thar bar 'dod pa ni lhag pa'i bsam pa sgrub par byed pa ste/ nam gyi cha stod dang / nam gyi cha smad la mi nyal bar dkar po'i chos la spro ba'o/ /skye bo rnams la yid mi rton pa ni 'khor ba sgrub par byed pa'i chos mi byed pa'o/ /phyi dang nang gi skye mched yid la mi byed pa dang /bdag la mi stod gzhan la mi smod pa dang / khyim la chags pa spong ba dang / so so'i skye bo la yid rton pa spong ba dang / gzhan gyi rkyen gyis mi 'gro ba nas rjes su mthun pa'i bzod pa'i bar rjes su mthun pa'i chos la bzod pa'i ting nge 'dzin gyi rgyu yin pas ting nge 'dzin zhes brjod do//tshigs su bcad pa'i dbyangs kyis zhes bya ba ni bshad zin to/ /ngas ni bdud rtsi'i sgo yang rab tu phye/ /zhes bya ba la/ ngas ni zhes pa ni bdag gis so/ /bdud rtsi ni mya ngan las 'das pa ste thar pa'o/ /de las gzhan pa'i mtshan nyid ni 'chi ba ste de med pa'o//de'i sgo ni ting nge 'dzin 'di yin no/ /phye ba ni ma bsgribs pa'o/ /chos kyi rang bzhin ci 'dra de bzhin bshad/ /chos rnams ngo bo ji ltar gnas pa bzhin du'o/ /de bzhin du skye ba med pa'i chos kyi rang bzhin yang ngas bshad do/ /skye ba dag kyang ci 'dra ste sgyu ma lta bu dang /gzugs brnyan lta bur skye bar 'gyur zhes bya'o/ /mya ngan 'das pa phan yon bcas par bshad de/ phan yon dang bcas par bstan pa'o/ /de lta bas na ngas gang bstan pa'i lam nas 'gro bar bya ste/ sdig pa'i grogs po spangs pa dang / dge ba'i bshes gnyen bsten pa dang /dben pa la mngon par dga' ba dang / sems can thams cad la byams pa chen po bsgom pa dang / yongs su dag pa'i tshul khrims bsrung bar bya ba la sogs pa ni ting nge 'dzin 'thob pa'i rgyu yin no/ /byang chub kyi sems la yang dag par 'dzud pa dang / sangs rgyas kyi ye shes bla na med pa la rab tu bkod nas myur du ting nge 'dzin 'di mngon sum du byed par 'gyur ro//ting nge 'dzin 'di ni stong pa nyid kyi rang bzhin yin pas byis pa rnams kyi spyod yul ma yin no/ /de lta bas na sangs rgyas kyi sku byad khyad par can rjes su dran pa bsgom pa sngar bstan pa yin no//rtag tu mnyam par gzhag pa ji lta ba bzhin gyi spyod lam gyis de la gtad pa'i yid dang ba bsgoms na/ de'i phyir rnam par rtog pa thams cad dang bral ba'i de bzhin gshegs pa thams cad snang bar 'gyur ro/ /de dag gis de la dgongs par yang 'gyur ro/ /de bzhin gshegs pa rnams kyis dgongs pas de nam yang ting nge 'dzin dang bral bar mi 'gyur ro zhes shes nas yon tan dpag tu med pa'i pha rol tu phyin pa'i yon tan thob par 'dod pas ting nge 'dzin 'di bsgom par bya'o//mi de'i sems ni shin tu myos par 'gyur/ /zhes bya ba la sogs pa la/thams cad mkhyen pa ma yin pas ni thams cad mkhyen pa'i yon tan mtha' yas pa shes par nus pa ma yin pas myos par 'gyur ba ste/ sems rnam par g.yeng ba nyid 'thob par 'gyur ro/ /phyogs bcu dag na sems can su yang ni/ /zhes bya ba la sogs pas ni yon tan dpag tu med pa nyid rjod par byed pa yin no//de lta bas na yon tan dpag tu med pa dang ldan pa'i sangs rgyas nyid 'dod pas ji skad gsungs pa'i mtshan nyid can gyi sangs rgyas rjes su dran pas bcom ldan 'das bsgom par bya'o/ /'dus byas dang 'dus ma byas mnyam pa nyid du rtogs nas mtshan ma thams cad dang bral bas mtshan ma med pa'i rnal 'byor pa ni chos thams cad stong pa nyid la 'jug par 'gyur ro//yang de ni chos kyi sku la yang gnas par 'gyur ro/ /gang chos kyi sku la gnas pa de ni chos thams cad dngos po med pa'i ngo bo nyid du shes nas de bzhin gshegs pa gzugs kyi skur mthong bar mi 'gyur te/sangs rgyas rnams ni chos nyid blta/ /'dren pa rnams ni chos kyi sku/ /zhes gsungs pas so/ /ji lta ji ltar mang du mis brtags pa/ /zhes bya ba la/ sku'i rnam pas kyang rung / de las ldog pas kyang rung /rnam par rtog pas yongs su bsgrubs pa'i rang gi ngo bo mthar thug par 'gyur zhing de la gzhol bar 'gyur ba'o/ /de bzhin du sku byad de rnam pas sam ye shes dpag tu med pa ste chos kyi skus kyang rung / langs pa dang / 'gro ba dang / 'dug pa dang / nyal ba la sogs pa'i spyod lam thams cad du sems rnam par g.yeng ba med pas sangs rgyas rjes su dran pa sgom par byed pa de dag gis kyang smon lam dang 'bad pa'i stobs ji lta ba bzhin du mthong bar 'gyur ro//ting nge 'dzin 'di la gnas pa ni mtshan ma dang 'bad pa thams cad dang bral na yang de bzhin gshegs pa yon tan gyis brgyan pa thams cad mthong bar 'gyur ro//bdag dang gzhan gyi rnam par rtog pa dang bral bas nga rgyal yang mi skye'o/ /nam zhig de ni na zhing mi bde nas/ /zhes bya ba la/ gang gi tshe nad chen pos na zhing gnod par gyur pas de la ni 'chi ba la thug pa'i sdug bsngal gyi tshor bas lus la khyab par gyur pa de lta na yang sangs rgyas rjes su dran pa rnam par mi nyams te/rtag tu mnyam par gzhag pa'i phyir dang / chos nyid ji lta ba bzhin du so sor rtogs pa'i stobs kyis so/ /de'i phyir sangs rgyas kyi yon tan dang phan yon dpag tu med pa thos nas sangs rgyas nyid la 'bad pa brtan pos sangs rgyas kyi yon tan rnams nges par bsgrub pa'i phyir 'bad par bya'o//ngas ni rab tu bzang ba'i chos bshad kyang / /zhes bya ba la sogs pa ni/ de bzhin gshegs pa ston pa tsam/ /khyod nyid kyis ni mngon du byas//zhes bya bar dgongs pa'o/ /nad pa sman gyi rkyal pa thogs pa dag /ces bya ba la sogs pa la/ thos pa tsam gyis nyon mongs pa ma lus pa spangs pa'i sangs rgyas nyid thob pa ni ma yin no/ /de lta bas na sangs rgyas nyid thob par 'dod pas sbyin pa la sogs pa dang ldan pa'i ting nge 'dzin bsgom pa la rtag tu 'bad par bya'o zhes de bzhin gshegs pas bslab pa bstan pa yin no//ting 'dzin chos rnams thams cad kyi/ /spros med bdag nyid bsgom pa yin/ /mnyam pa gang du blo mnyam pa/ /chos kyi sku yi ngo bo nyid/ /ces bya'o/ /ting nge 'dzin gyi le'u ste bzhi pa rdzogs so// //de nas yang zhes bya ba la sogs pas ni dbyangs byin gyi le'u bstan pas thams cad gtang bar bstan par bya ba'i phyir/ mgo dang gos la me 'bar ba lta bur zhes bya ba la sogs pa la/ mgo dang gos la me 'bar ba gsod pa la brtson pa'i skyes bu bzhin du nye du'i tshogs la sogs pa spang zhing /rgyal srid kyi longs spyod dang dbang phyug la sogs pa yang spangs la khyim gyi gnas nas nye bar 'byung bar bya'o zhes bya ba ni thams cad btang la rab tu 'byung bar bya'o zhes bya ba'i don to/ /gzhon nu sngon byung ba zhes bya ba la sogs pa la/ dbyangs byin dper byas nas de dag nyid gsal por ston te/ rig pa dang zhabs su ldan pa zhes bya ba la sogs pa sngar bstan zin to/ /de bzhin gshegs pa de'i nyan thos 'dus pa dang po ni bye ba phrag brgyad cu byung ngo zhes bya ba la sogs pa la zag pa zad pa ni nyon mongs pa zad pa'o/ /khur bor ba ni nyon mongs pa dang /phung po dang / dam bca' ba dang / brtson 'grus kyi khur rnams dang bral ba'o/ /rang gi don rjes su thob pa ni de bzhin gshegs pas bstan pa'i lam bsgoms pa'i stobs kyis rang gi don mngon par rtogs pa thob pa'o/ /srid par sbyor ba yongs su zad pa ni ma rig pa la sogs pa srid par sbyor ba dgu yongs su zad pa gang la yod pa de la de skad ces bya'o//yang dag pa'i bkas sems rnam par grol ba ni gang gi sems rnam par grol ba dang / shes rab rnam par grol ba'o/ /yang dag pa'i lam bsgoms pas gang la sems shin tu rnam par grol ba yod pa de la de skad ces bya'o//sems thams cad la dbang thob pa ni gang dag gis nyon mongs pa thams cad rab tu zhi bas rang gi sems la dbang thob pas 'dus par gyur pa zhes bya'o/ /de bzhin du 'dus pa gnyis pa la ni bye ba phrag bdun cu'o//'dus pa gsum pa la ni bye ba phrag drug cu'o/ /byang chub sems dpa' yang grangs med pa 'dus par gyur te/ dam pa'i chos yongs su 'dzin pa zhes bya ba la sogs pas ni 'khor phun sum tshogs pa shin tu che bar bstan pa yin no/ /de'i tshe bcom ldan 'das de'i tshe'i tshad ni lo bzhi khrir gyur to zhes bya ba ni dus chen por bstan pa'o//'dzam bu'i gling 'dir 'byor pa ni nor phun sum tshogs pa'o/ /rgyas pa ni shin tu rgya che bas so/ /bde ba ni nad la sogs pa med pa'o/ /lo legs pa ni lo tog thams cad phun sum tshogs pa'o/ /skye bo thams cad kyi yid la dga' ba ni dga' bar bya ba'o//nyams dga' ba ni bdud la sogs pas gnod pa med pa'o/ /skye bo dang mi mang pos gang ba zhes bya ba ni gnod pa ci yang med par bstan pa yin no/ /de'i tshe 'dzam bu'i gling 'dir rgyal po gnyis byung bar gyur te/ stobs brtan dang / stobs chen zhes bya bas phyed phyed la dbang byed par gyur to//de la stobs chen dbang byed pa'i phyogs der de bzhin gshegs pa dbyangs byin byung bar gyur to/ /de nas de bzhin gshegs pa dbyangs byin nyan thos kyi dge 'dun dang bcas pa/ byang chub sems dpa'i dge 'dun dang bcas pa/ nye bar mkho ba thams cad la rgyal po 'khor dang bcas pa des bsod snyoms la sogs pa la ji ltar bde bar longs spyad pa'i phyir spyan drangs so//de nas de bzhin gshegs pa des rgyal po de 'khor dang bcas pa la tshul khrims dang / gos sbyong la sogs pa'i ram gyis shin tu rnam par dag pa mthar thug pa'i mya ngan las 'das pa la rab tu dgod pa'i phyir chos bstan to zhes bya ba ni mdor bsdus pa'i don yin no//'di dag nyid kyi don tshigs su bcad pa'i dbyangs kyis bstan pa ni snga ma bzhin no/ /sbyin pa rab sbyin gcig la gcig brten pa/ /zhes bya ba la sogs pa la/ longs spyod kyi phyir sbyin pa de ni de bzhin gshegs pas ma bsngags te/sangs rgyas nyid kyi phyir bsgrub pa'i mchod pa gtsor byed pas gang dag sems can thams cad la phan pa'i sems kyis chos ston par byed pa'i chos kyi sbyin pa nyid ni sangs rgyas nyid thob par byed pa'i phyir gtso bo yin no/ /zang zing med pa'i chos la brten pa ni//zhes bya ba la sogs pa la/ don chen 'gyur zhes bya ba ni don chen po sangs rgyas nyid thob par 'gyur ro/ /zhes bya ba'i don to/ /zang zing med pa'i phyir sems kyis chos sbyin pa dang / sems can thams cad la snying rje chen po bskyed pa ni myur ba nyid du sangs rgyas nyid 'grub par 'gyur ro//zhes bstan pa'i phyir ro/ /de 'dra de dag myur du sangs rgyas 'gyur/ /zhes bya ba'o/ /bzlog pa'i sgo nas dben pa bsten pa gtsor bstan pa'i phyir/ 'dod pa dag la rab tu brten byed cing / /zhes bya ba la sogs pa gsungs te/ bu dang bu mo chung ma dang nye du la sogs pa'i sred pa dang ldan pas 'dod pa la rab tu brten pas ni bla na med pa yang dag par rdzogs pa'i byang chub thob par 'gyur ba ni gnas med do zhes bstan pa yin no//de 'dra'i sangs rgyas gang yang sngon ma byung / zhes bya ba ni sngon gyi sangs rgyas gang yang khyim pa nyid du gyur nas bu dang bu mo dang ldan bzhin du bla na med pa yang dag par rdzogs pa'i byang chub mngon par rdzogs par sangs rgyas pa'am/ma 'ongs pa dang / da ltar yang nyon mongs pa can dang / nyon mongs pa med pa'i gnas skabs ni 'gal ba'i phyir ro zhes bya bar dgongs pa'o/ /rgyal srid la sogs pa spangs shing zag pa dang bcas pa'i nyon mongs pa rab tu spangs nas nyon mongs pa'i bdud la sogs pa thams cad las nges par rgyal te bla na med pa'i byang chub 'dus ma byas pa mngon par byang chub par 'gyur ro zhes bya ba ni nges pa yin no//de lta bas na bza' ba dang btung ba la sogs pa nye bar mkho ba'i mchod pa thams cad kyis de bzhin gshegs pa mnyes par mi 'gyur gyis ji ltar rab tu byung nas tshangs par spyod pa bsrung ba la mngon par sbyor bas rtag pa nyid du 'dus byas thams cad la rab tu rtog pa la gcig tu gzhol bas dgon par phyogs te gom pa bdun bor na snga ma de bas bsod nams 'di khyad par du 'phags so zhes rgya cher 'byung ngo //de lta bu'i rab tu byung ba'i bsngags pa brjod pa'i gtam rgya cher thos pa dang / gang gi phyir bdag kyang skra dang kha spu bregs te gos ngur smrig bgos nas dad pas khyim nas khyim med par rab tu 'byung bar bya'o zhes bsams nas/ 'khor dang bcas par de bzhin gshegs pa'i drung du song ste phyin nas rab tu byung bar gyur to//de de ltar rab tu byung nas ting nge 'dzin 'di bzung ste de dge ba'i rtsa ba des ngan 'gro thams cad du log par ltung ba thams cad dang bral bar gyur to/ /sangs rgyas bye ba phrag nyi shu la bsnyen bkur byas so/ /de dag las ting nge 'dzin 'di thos so//bzung ngo / bsgoms so/ /dge ba'i rtsa ba de nyid kyis bla na med pa yang dag par rdzogs pa'i byang chub mngon par rdzogs par sangs rgyas te ye shes dpa' ba zhes bya bar gyur to/ /des sems can dpag tu med pa rnams kyi don byas te/ mya ngan las 'das pas 'dul ba'i skye bo gdul ba'i phyir sangs rgyas kyi mya ngan las 'das pas mya ngan las 'das so//rgyal po stobs chen dang lhan cig de bzhin gshegs pa dbyangs byin gyi drung du 'ongs pa'i 'khor de dag gis kyang ting nge 'dzin 'di thos nas de bzhin du rab tu byung bar gyur to//rab tu byung nas kyang ting nge 'dzin 'di rgya cher thos shing kun chub par byas nas bskal pa 'bum tshang ba dang bla na med pa yang dag par rdzogs pa'i byang chub mngon par rdzogs par sangs rgyas nas de bzhin gshegs pa dpa' brtan zhes bya ba sha stag 'jig rten du byung ste/ de bzhin du sems can gyi don byas nas yongs su mya ngan las 'das so zhes bya ba 'di dag gis ni ting nge 'dzin bsgom pa'i rjes su mthun pa ni rab tu byung ba nyid yin no zhes dgos pa bstan to//khyim dang chung ma la sogs pa yongs su gtong ba yang 'di'i rgyu yin no/ /de nas de'i tshe zhes bya ba la sogs pas ni sngon gyi sbyor ba'i le'u tshigs su bcad pas yang dag par rab tu bstan to zhes bya'o//dgos pa ni sngar bstan pa bzhin du gzung bar bya'o/ /ngas dran bsam gyis mi khyab bskal pa na/ /'das pa'i dus na mi yi gtso bo ni/ /zhes bya ba la sogs pas ni sngon gyi dus na nyams su myong ba bstan to//bsam gyis mi khyab bskal pa zhes bya ba ni grangs las 'das pa nyid kyi phyir bsam par mi nus pa'o/ /bsam gyis mi khyab pa'i bskal pa 'das pa'i dus de'i tshe de bzhin gshegs pa dbyangs kyis byin zhes bya ba la sogs pas ni lhag pa'i gzhung gi don bstan pa nyid tshigs su bcad pas ston pa yin pas rtogs sla ba'i phyir ma bshad do//sngon gyi sbyor ba'i le'u'i gzhung na don gyis rnam brgyan pa/ /thub pa'i dbang po'i 'gro ba rtogs pa'i byang chub sems dpas bstan/ /bsgom pa'i don du sems kyis thams cad gzung byas nas/ /de'i phyir ma lus sems kyis de bzhin bzung la bsgom//zhes bya ba'o/ /dbyangs byin gyi le'u ste lnga pa'i 'grel pa rdzogs so// //ji skad gsungs pa'i ting nge 'dzin nges par bsgrub pa'i phyir ting nge 'dzin yongs su sbyong ba'i las/ de nas yang zhes bya ba la sogs pa gsungs so/ /de la ting nge 'dzin yongs su sbyong ba gang zhe na zhes bya bas ni yongs su sbyong ba la rmongs pa bsal ba'i phyir dris pa'o//gzhon nu 'di la zhes bya ba la sogs pas ni bcom ldan 'das kyis thams cad ston par rtsom pa yin no/ /snying rje chen po la zhugs pa'i sems kyis zhes bya bas ni gzhan gyi don la zhugs pa ni byang chub sems dpar 'gyur ro zhes ston pa yin no//de bzhin gshegs pa bzhugs pa 'am/ yongs su mya ngan las 'das pa rnams la zhes bya ba ni thams cad du bsam pas rab tu bsgyur bas mchod pa de 'grub par 'gyur ro/ /zhes bya bar dgongs pa'o/ /mchod pa bya ba la brtson pa yin te zhes bya ba de nyid bstan pa'i phyir/'di lta ste chos gos dang / bsod snyoms zhes bya ba la sogs pa la/ mchod pa dang bsnyen bkur las byung ba'i rtsa ba de dag kyang ting nge 'dzin thob par yongs su bsngo'o zhes bya ba ni ting nge 'dzin thob na sangs rgyas nyid kyang 'thob par 'gyur ro snyam du dgongs pa yin no//de ni 'dod pa yongs su spyod pa'am/ mtho ris la sogs pa chos cung zad tsam 'dod pas de bzhin gshegs pa la mchod pa ma yin no/ /chos sems par 'gyur gyi gzhan sems pa ma yin no/ /de 'dod na de bzhin gshegs pa chos kyi skur yang mi dmigs pa ste/mngon par zhen pa'i gnas ma yin pa'i phyir ro/ /yang de gzugs kyi skur lta ga la zhig dmigs par 'gyur zhes bya ba yin no/ /chos nyid la nan tan byed pa ni don dam pa'i mchod pa ste/ de bzhin gshegs pa mi mthong ba dang / bdag nyid mi dmigs pa dang / rnam par smin pa gzhan la mi re ba zhes bya ba 'di ni 'khor gsum yongs su dag pa'i de bzhin gshegs pa'i mchod pa'o//mchod pa 'dis de bzhin gshegs pa mchod na byang chub sems dpa' ting nge 'dzin 'di rab tu thob cing myur du bla na med pa yang dag par rdzogs pa'i byang chub mngon par rdzogs par 'tshang rgya ste/rgyu dang 'bras bu rjes su mthun par ni nges pa yin no snyam du dgongs pa yin no/ /don 'di dag nyid tshigs su bcad pas gsungs pa ni tshigs su bcad pa'i dbyangs kyis zhes bya ba la sogs pa ste snga ma bzhin no/ /ye shes mtha' yas pa la spos [(]bul [,]phul [)]bas/ /zhes bya ba la sogs pa la/ ye shes mtha' yas pa gang la yod pa de la de skad ces bya ste/ de bzhin gshegs pa de la dris phul ba nyid kyis bla na med pa'i tshul khrims kyi dri dang ldan par 'gyur ro/ /'khor gsum yongs su dag pa'i dris de bzhin gshegs pa la mchod pa byed pa des ni ye shes kyi rang bzhin rjes su mthun pa'i bzod pa chung ngu skye bar 'gyur ro//bzod pa chen po bsten pa'i mi de la ni mi'i kham tshad tsam du bcad gtubs kyang zhes bya ba ni kham tshad tsam du bcad cing gtubs nas lus dum bur byas kyang bskal pa gang+gA'i klung gi bye ma snyed du yang bla na med pa yang dag par rdzogs pa'i byang chub las de'i sems ldog par mi 'gyur te/gcad bya dang gcod pa po la sogs pa mi dmigs pa'i phyir ro/ /ci'i phyir na bzod pa'i ming du gdags zhes bya bas ni bzod pa la 'jug pa'i phyir rgyu gang gi bzod pa zhes bya zhes dris pa yin no/ /ji ltar rjes su mthun pa zhes kyang bya//gang gi rgyus na phyir mi ldog ces bya/ /ji ltar byang chub sems dpa' zhes kyang brjod/ /ces 'dri na/ chos bdag med pa la sems kyis 'dod cing bzod pa'i rjes su mthun pa'i bzod pa ste/ the tshom thams cad spangs nas sangs rgyas kyi chos rtogs pa la rjes su phan pa'i phyir ro//de'i phyir rjes su mthun pa'i bzod pa zhes brjod do/ /de lta bu'i bzod pa dang ldan pa'i byang chub sems dpa'i drung du bdud sdig can sangs rgyas kyi cha byad kyis 'ongs nas de phyir zlog pa'i phyir tshig 'di skad smra'o/ /bla na med pa yang dag par rdzogs pa'i byang chub ni shin tu rnyed par dka' yis de'i phyir nyan thos nyid du 'byung bar gyis shig ces smra yang de phyir ldog par mi 'gyur ro//byang chub sems dpa'i zhes bya ba'i sgra la 'jug pa'i phyir/ sems can mi mthun lta las rtogs byed cing / /zhes bya ba la/ 'jig tshogs la lta ba sngon du song ba'i lta ba drug cu rtsa gnyis ni lam ngan pa ston pa'i phyir mi mthun pa'i lta ba zhes bya'o//de las bzlog pa'i phyir yang dag pa'i lam ston par byed pa'i chos thams cad bdag med pa ston par byed pa'i lta ba zhes bya bas sems can rnams rtogs par byed cing zhes bya ba ni bsgrub tu 'jug pa'o/ /mi 'chi thob pa'i lam ni 'di min zhes/ /zhes bya la/ de lta bu'i lta ba log par ltung ba'i lam las bzlog nas sems can rnams bdud rtsi 'thob pa'i lam la 'jog par byed pas de'i phyir byang chub sems dpa' zhes bya'o//de bzhin du rjes su mthun pa'i bzod pa dang ldan pa'i lam la rab tu zhugs pa chos kyi rang bzhin bdag med par rtogs pa las sems can dang srog la sogs par lta ba rmi lam gyi nang du yang 'byung bar mi 'gyur ro//bdud rnams bye ba gang+gA'i klung gi bye ma snyed sangs rgyas kyi gzugs su de dag gi drung du 'ongs nas sems can dang srog la sogs pa ni yod do zhes smra na yang de dag la g.yo ba med pa'i sems kyis lan 'di skad 'debs par byed do//tshad ma dang ldan pa'i shes pas bdag med pa rtogs pa'i stobs kyis sems can dang srog la sogs pa med par yang dag par rtogs so zhes smra'o/ /khyod ni sangs rgyas kyang ma yin te/ lam log par ston pa'i phyir ser skya la sogs pa mu stegs pa bzhin no/ /bdud nyid nga'i sems slu ba'i phyir sangs rgyas kyi gzugs su 'ongs pa yin no zhes zer ro//ye shes kyis ni phung po stong par shes/ /zhes bya ba la sogs pa la/ bdag la sogs pa dang bral ba'i phung po lnga stong par shes so/ /shes nas nyon mongs pa rnams dang mi 'grogs na ci ltar na 'jig rten pa la byang chub sems dpar grags she na/tha snyad tsam gyis rnam par dpyod byed cing / /zhes bya ba la sogs pa gsungs te/ tha snyad tsam yin pas don gyis stong ngo / /tha snyad 'di don dam pa ma yin te/ mya ngan las 'das na yang 'jig rten gyi tha snyad du mya ngan las ma 'das pa bzhin du tha snyad du byed do zhes bya bar dpes bstan pa'i phyir/ji ltar skyes bu dag gi bu skyes nas/ /zhes bya ba la sogs pa la/ ji ltar skyes bu 'ga' zhig la bu zhig skyes pa la lha sbyin la sogs par ming btags pa'i ming de ni gang nas kyang 'ongs pa med do/ /de bzhin du byang chub sems dpa' zhes ming btags pa de yang gang nas kyang ma 'ongs te sgro btags pa 'ba' zhig tu zad do//de bzhin du phung po la sogs pa'i rang gi ngo bo gang / ngo bo la nges par brtags shing byang chub sems dpa' sems can dang srog la sogs pa la brtags pa na dmigs par mi 'gyur te/ de nyid byang chub sems dpa' yin gyi/ gzhan ma yin no//rgya mtsho'i dbus nas zhes bya ba la sogs pa la/ rgya mtsho chen po'i dbus su me 'bar ba 'byung ba ni srid kyang byang chub sems dpa' ni nam yang 'jig tshogs la lta ba'am/ srog la sogs par lta ba 'byung ba ma yin no/ /'di la gang yang sems can nam/ skye ba'am/'chi ba'am/ rang bzhin gyis grub pa ni med do zhes bsams nas/ chos thams cad sgyu ma lta bu ngo bo nyid kyis stong pa'o zhes gang gis rtogs pa de la byang chub sems dpa' zhes bya'o/ /de lta bur gyur pa'i chos rnams kyis rang bzhin rtogs pa ni gzhan la yod pa ma yin no zhes bstan pa'i phyir/mu stegs can gyis rnam par rig mi nus/ /zhes bya ba la sogs pa la/ 'jig tshogs kyi lta ba la mngon par zhen pa'i mu stegs pa rnams kyis shes par mi nus pa'o/ /mu stegs pa ma yin pa rnams las kyang kha zas la sogs pa la/ shin tu brkam pa dang / chags pa che ba dang /lhung bzed dang chos gos la sred pa dang / mi brtan pa dang / khengs sems can dang / snyom las dang / gnyid kyis zil gyis mnan pa dang / le lo la sogs pa mngon par rtogs pa dang / 'gal ba yid la byed pa rnams kyis byang chub rtogs par 'gyur ba ma yin no zhes bstan pa yin no//gang la spyod yul dran pa nye bar gzhag /ces bya ba la sogs pas ni rtogs pa dang rjes su mthun pa'i rgyu bstan te/ dran pa ni ting nge 'dzin no/ /gzhag pa ni sems rnam par mi g.yo ba'o/ /dga' ba ni rab tu dga' ba ste mal lo/ /stong pa nyid kyi gos kyis g.yogs pa dang / zas ni bsam gtan gyi bdud rtsi'o//chos thams cad bdag med pa'i dris rjes su byugs pa dang / byang chub kyi yan lag gi me tog gi phreng ba'i rgyan gang la yod pa de bla na med pa yang dag par rdzogs pa'i byang chub thob par 'gyur ro/ /de'i phyir bdag med yon tan chu bo'i gter gyur pa/ /rdzogs pa'i byang chub sems kyis brgyan cing stong pas khyab//don gyi snying po rtog pa nas blo gros mtha' yas sangs rgyas kyis/ /bsam gtan ting 'dzin yongs su sbyong ba'i rgyu yang gsungs/ /ting 'dzin yongs su sbyang ba bya ba'i le'u'i bshad pa ste drug pa rdzogs so// //da ni sdug bsngal dang du len pa dang gzhan gnod par bya ba la ji mi snyam pa dang chos la nges par rtogs pa'i dbye bas bzod pa rnam pa gsum gyi le'u/bzod pa gsum gyi ye shes la mkhas par bya'o zhes bya ba la sogs pa gsungs te/ des bzod pa dang po dang / gnyis pa dang / gsum pa rab tu shes par bya ste/ zhes bya ba ni khyad par shes par bya ba'o/ /gzhon nu de lta bas na zhes bya la sogs pas ni bsad pa gsum gyi le'u la 'jug pa'i chos kyi rnam grangs 'di gzung ba la 'bad par bya'o zhes bstan pa yin no/ /bzod pa gsum gyi rang gi ngo bo tshigs su bcad pa'i dbyangs kyis bstan pa ni/ su dag dang yang rtsod par mi byed cing //zhes bya ba la sogs pa la/ gang dang yang rtsod par mi byed ces bya ba ni 'thab cing rtsod pa spangs nas chos nyid kyi rjes su 'brang bas ni thams cad bzod pa'o/ /'di dag bzod pa dang por bstan pa yin zhes bya ba la sogs pa la/ bzod pa dang po'i rang gi ngo bo rtogs pa thob pa yin no zhes pa bstan pa yin no zhes bya ba'i don to//bzod pa dang po'i rab tu dbye ba'i khyad par bstan pa'i phyir/ chos rnams thams cad sgyu ma 'drar shes te/ /zhes bya ba la sogs pa gsungs te/ chos thams cad sgyu ma lta bur bzod pa'i mtshan nyid can gyi bzod pa mtshan ma spangs pa de ni mdo sde'i tshul thams cad la yang mkhas shing legs par bslabs pas the tshom thams cad dang bral bas bde bar gshegs pas legs par gsungs pa'i phyin ci ma log pa'i chos nyid la de mos par 'gyur ro//de nas nges pa'i don dang drang ba'i don gyi mdo sde'i rnam par dbye ba shes par 'gyur te/gang stong pa nyid sgrub par byed pa de ni nges pa'i don de bshad pa la ltos pa med pa'o/ /gang yang gang zag la sogs pa ston par byed pa ni drang ba'i don te bshad du yod pa'o/ /de'i phyir mnyam pa nyid mthong ba rnams ni mu stegs pa de dag la yang sems sdang ba mi skye la/ yang dag pa la zhugs pa rnams la yang rjes su mi chags so//de nas gzungs rnam pa bzhi'i ngo bo nyid snang bar 'gyur ro/ /de bden pa'i rjes su 'brangs pa'i tshig smra bar 'gyur ro/ /sa la sogs pa'i 'byung ba rnams gzhan du 'gyur yang srid kyi/ 'di lta bu'i bzod pa dang ldan pa ni bla na med pa yang dag par rdzogs pa'i byang chub las ldog par mi 'gyur ro//de ltar bzod pa dang po'i khyad par bstan nas/ zhi gnas stobs kyis bskyod par mi 'gyur zhing / /zhes bya ba la sogs pas ni bzod pa gnyis pa'i khyad par bstan te/ gang gi tshe ting nge 'dzin gyi stobs kyis sems g.yo ba med par gyur cing shes rab kyi stobs kyis sems 'khrug pa med par gyur pa na de'i tshe bzod pa gnyis pa'i khyad par thob pa yin no zhes bstan to//sems can kun gyis 'khrugs par mi nus te/ /zhes bya ba ni gzhan gnod pa byed pa la ji mi snyam pa'i bzod pa'i bdag nyid can du gyur pa dang / rang dang gzhan [(]tu [,]du [)]rtog pa dang bral ba'i phyir spyod lam rnam pa bzhi char la yang sems g.yo ba med par gyur pa na mnyam par gzhag pa nyid kyis 'greng ngam 'dug gam 'gro 'am nyal yang rung / smra yang rung bzod pa'i pha rol tu phyin pa thob pas mngon par shes pa lnga bsgrubs nas sangs rgyas kyi zhing mtha' yas pa na gnas pa'i sems can rnams 'dul ba'i phyir rdzu 'phrul gyis 'gro zhing des nga rgyal yang mi byed la/de las nyams par yang mi 'gyur te/ mngon par 'du bya ba med par 'jug pa'i phyir ro/ /'jig rten gyi khams thams cad kyi sems can thams cad thams cad mkhyen pa'i ye shes dang ldan par gyur nas/sgo sna tshogs nas chos ston par gyur kyang des de dag thams cad de bzhin du 'dzin cing gzhan dag la yang bsam pa'i khyad par ji lta ba bzhin du chos bstan par 'du bar byed do zhes bya ba ni bzod pa gnyis pa'i khyad par yin no zhes bya ba ste/ yon tan zhes bya ba'i don to//bzod pa gsum pa'i khyad par bstan pa'i phyir/ shar dang lho dang nub dang byang phyogs dang / /zhes bya ba la sogs pa gsungs te/ shar dang lho dang nub dang byang dang / steng dang / 'og dang / phyogs mtshams rnams kyi phyogs bcu'i 'jig rten gyi khams na rnam par bzhugs pa'i de bzhin gshegs pa rnams mthong bar 'gyur zhing de dag la chos kyang nyan to//rang nyid las kyang de bzhin gshegs pa rnams sprul nas gdul bya'i sems can rnams gzud pa'i phyir chos ston par yang byed do/ /de la sangs rgyas kyi zhing thams cad du yang mthong zhing sems can thams cad kyi bsam pa thams cad kyang yongs su rdzogs par byed par 'gyur ro//de bzhin gshegs pa thams cad kyi spyod yul du gyur pa'i spyod lam la legs par slob pa'i phyir de bzhin du thams cad sgrub par byed do/ /de dag nyid bstan pa'i phyir/ 'jig rten khams 'di'i sems can ci yod pas//zhes bya ba la sogs pa gsungs te/ sems can thams cad byang chub sems dpa'i yon tan bsngags pa brjod cing bstod pa byed pa na des de dga' ba'am rjes su chags pa skye bar gyur na de bzhin gshegs pa'i bslab pa la legs par bslabs pa ma yin no zhes brjod par bya'o//bsngags pa ma yin pa bsgrags par gyur pa na gal te sems zhum par gyur na de lta na yang sangs rgyas kyi ye shes la slob pa ma yin te/ rjes su chags pa dang / khong khro ba dang bcas pa ni de bzhin gshegs pa'i ye shes la slob pa ma yin no zhes byas nas so//de bzhin du rnyed pa dang ma rnyed pa la sogs pa 'jig rten gyi chos brgyad kyis ri'i rgyal po bzhin du sems mi bskyod cing kun du rtog pa thams cad kyi rlung gis mi g.yo ba ni bzod pa gsum pa'i yon tan gyi khyad par yin no/ /da ni bzod pa gsum gyi rnam pas dbye bas bstan pa'i phyir/sgra yi rjes 'gro bzod pa 'di bstan te/ /zhes bya ba la sogs pa la/ ngan par smra ba la sogs pa'i tshig gi lam la bzod pas na sgra'i rjes su 'jug pa'i bzod pa zhes bya'o/ /thos pa las byung ba dang / bsams pa las byung ba ni mngon par rtogs pa la phan pa'i phyir rjes su mthun pa zhes bya'o//bsgoms pa las byung ba ni skye ba med pa'i chos la bzod pa ste/ mngon par rtogs pa'i ngo bo nyid yin pa'i phyir ro/ /mthong ba'i lam gyi ngo bo yang mngon par rtogs pa'i rang bzhin no/ /bzod pa gsum po 'di lhun gyis grub pa'i rang bzhin du byang chub sems dpa' rnams kyis thob par 'gyur ba'i tshe de bzhin gshegs pa rnams kyis bla na med pa yang dag par rdzogs pa'i byang chub tu lung ston par 'gyur ro//byang chub sems dpa' de lung bstan pa thob nas bdag cag kyang sangs rgyas su 'gyur bar bya'o/ /zhes byang chub tu sems bskyed par 'gyur ro//de ma thag tu sa chen po yang rnam pa drug tu rab tu g.yos so/ /rab tu dga' ba'i sems kyi sa lha la sogs pa yang me tog sna tshogs kyi char yang rab tu 'bebs so/ /sems can dag gis spyos bsdigs brdegs na yang / /zhes bya ba la sogs pa'i don ni bshad zin pas yang brjod par mi bya'o//gang yang sems can rnams mtshon thogs nas de'i lus dang yan lag dum bu dum bu mang du gtubs kyang sems kyi rgyud byams pa chen po bsgoms pa'i phyir de dag la khro ba'i sems sam/ sdang ba'i sems skye bar mi 'gyur gyi/ /bzlog nas snying rje chen po nyid kyis de dag nyid gzung ba'i phyir 'bad par byed do//de phyir byang chub mchog rab bla na med/ /ces bya ba la sogs pas gsungs pa yin no/ /bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas ji skad du gsungs pa'i bzod pa dag bsgom par bya'o zhes bya ba yin no//gang tshe chos la bzod pas skyon spangs nas/ /rnam rtog ma lus zhi ba legs bsgoms na/ /bdud kyi dgra yi tshogs kyang de bzhin zhi/ /bzod med drag tshig mtshon rnon bzod par gyis/ /bzod pa gsum gyi le'u bstan pa ste bdun pa'i bshad pa rdzogs so// // da ni dngos po med pa las byung ba'i le'u/ chos thams cad kyi dngos po med pa'i ngo bo nyid kyi ye shes la mkhas par bya'o zhes bya ba la sogs pa gsungs te/ gzhon nu ji ltar na zhes bya ba la sogs pas ni rang gi ngo bo dris pa'o/ /gzhon nu 'di la zhes bya ba la sogs pas ni lan gyi tshig gsungs pa'o//dngos po med pa'i ngo bo nyid ces bya ba ni gang gis dngos po rnams la gcig dang du ma'i rang bzhin gyis nges par brtags pa na ngo bo nyid nye bar dmigs par mi 'gyur ba'o/ /de'i phyir dngos po med pa'i ngo bo nyid ces bya'o/ /mtshan ma med pa zhes bya ba la/ mtshan ma ni dngos po'i rtags te/mtshan ma dang / rtags dang / rgyu gang dag gis de 'dzin pa nyid do/ /mo gsham gyi bu bzhin du ma skyes pa nyid la ni mtshan ma'i ngo bo med pas mtshan ma med pa nyid do/ /mtshan nyid med pa zhes bya ba ni bya ba'i khyad par gyi phung po thams cad kyi mtshan nyid bstan la/ bya ba de yang gcig pa'am/ tha dad pa'am/ gnyi ga'i ngo bo yang med pas mtshan nyid dang mtshan nyid kyi rang gi ngo bo yongs su ma grub pas de'i phyir mtshan nyid med pa zhes bya'o/ /ma skyes pa zhes bya ba ni rang dang / gzhan dang / gnyi ga dang / rgyu med pa las kyang skye bar mi 'gyur zhes bya ba la sogs pa rgya cher skye ba bkag pa'i phyir ma skyes pa'o//ma 'gags pa zhes bya ba ni skye ba med pa nyid kyis 'gag pa yang med do/ /skyes pa ni 'gag par 'gyur gyis ma skyes pa'i mo gsham gyi bu la 'chi ba med pa bzhin no/ /yi ge med pa zhes bya ba ni mi 'gyur ba brjod du med pa ste/ yi ge'i ngo bo ma yin pas sgra'i tshangs par smra ba rnams kyis yongs su brtags pa'i rang bzhin dang bral ba nyid do//de'i phyir yi ge med pa'o/ /stong pa zhes bya ba ni bstan ma thag pa'i spros pa thams cad kyis ma spros pa bdag dang bdag gi rang gi ngo bo dang bral ba stong pa nyid do/ /gzod ma nas zhi ba zhes bya ba ni skye ba sngon du song ba'i mya ngan las 'das pa yod pa ma yin gyi gzod ma nyid nas mya ngan las 'das pa'o//rang bzhin gyis rnam par dag pa zhes bya ba ni dag par bya ba dang / dag par byed pa dang / dag pa'i rang gi ngo bo dang bral bas chos thams cad rang bzhin gyis dag pa'o/ /ci thams cad du ngo bo med pas de skad brjod par bya'am zhe na/de ni ma yin te chos thams cad de bzhin du yongs su shes par bya'o/ /thams cad du yang mngon par zhen pa ni 'ching ba'i bdag nyid yin pa'i phyir 'khor ba las grol bar mi 'gyur ro/ /sangs rgyas don du gnyer ba rnams kyi zhes bya ba ni lhag ma'o/ /de'i phyir na chos thams cad de lta bur yongs su shes par gyur pa de'i tshe byang chub sems dpa' chos thams cad kyi dngos po med pa'i ngo bo nyid kyi ye shes la mkhas pa zhes bya'o zhes bya ba la/chos thams cad kyi zhes bya ba la sogs pa la/ gzugs dang / sgra dang / dri dang / ro dang / reg bya dang / chos thams cad la 'dod chags par mi byed/ zhe sdang bar mi byed/ gti mug par mi byed ces bya ba ni ngo bo nyid shes pa'i dgos pa'o/ /de ci'i phyir zhe na zhes bya ba ni 'dod chags la sogs pa'i rgyu yod bzhin du 'dod chags par mi 'gyur zhes bya ba la sogs pa rgyu gang gi phyir zhes bsam pa'o//lan gdab pa'i phyir/ des chos de yang dag par rjes su mi mthong zhes bya ba la sogs pa gsungs te/ yang dag par rjes su mi mthong zhes bya ba ni phyi dang nang gi dngos po rnams rjes su dpag pas so/ /ma dmigs pa zhes bya ba ni mngon sum gyis so//de ltar ma dmigs shing rjes su mi mthong bas khams gsum thams cad la chags par mi 'gyur ro/ /thams cad la ma chags pa nyid ni myur du ting nge 'dzin 'di bsgrubs nas mi dmigs pa'i sbyor bas bla na med pa yang dag par rdzogs pa'i byang chub mngon par rdzogs par sangs rgyas par 'gyur ro//tshigs su bcad pas bshad pa/ de la 'di skad ces bya ste zhes bya ba la sogs pa ni bshad par byar med do/ /gzhon nu sngon byung ba 'das pa'i dus na zhes bya ba la sogs pas ni sangs rgyas nges par 'thob par byed pa nyid gsungs pa'o/ /dngos po med pa las byung ba zhes bya ba la sogs pa la/gzhon nu de bzhin gshegs pa de skyes ma thag tu steng gi nam mkha' la ta la bdud tsam du 'phags nas chos thams cad dngos po med pa las byung ba'o zhes tshig tu gsungs te/ sgra des 'jig rten gyi khams thams cad du chos thams cad dngos po med pa las byung ba'o zhes go bar byas so//de bzhin gshegs pa 'di dngos po med pa las byung ba zhes bya bar 'gyur ro zhes bya ba la sogs pa la/ de bzhin gshegs pa de'i gsung rab la rgyal bu gzhon nu snying rje cher sems zhes bya ba zhig byung ngo zhes bya ba ni rtogs pa gcig nas gcig tu brgyud pas rgyun mi 'chad par bstan to//ting nge 'dzin 'di thos nas rab tu dad pa'i sems kyis rab tu byung ngo zhes bya ba la sogs pa dang / de dge ba'i rtsa ba des de bzhin gshegs pa dgra bcom pa yang dag par rdzogs pa'i sangs rgyas don legs par bsams pa zhes bya ba la sogs pa la/ 'di dag gi don tshigs su bcad pas bstan pa ni bstan zin pa las don lhag pa ci yang med pas ma bshad do//dngos med las byung ngo bo nyid/ /dngos po'i ngo bo rnam bsgoms pas/ /bsgoms pa'i stobs kyis byung gyur pa/ /sangs rgyas dngos med las byung dngos/ /dngos po med pa las byung ba'i le'u ste brgyad pa'i bshad pa rdzogs so// //da ni chos zab mo la bzod pa'i le'u/ de nas yang bcom ldan 'das kyis zhes bya ba la sogs pa gsungs te/ gzhon nu de lta bas na zhes bya ba la sogs pa la/ 'di las byung ngo zhes bya ba ni chos thams cad kyi rang bzhin mnyam pa nyid rnam par spros pa'i ting nge 'dzin 'di ni sangs rgyas thams cad bskyed par mdzad pa nyid kyi phyir khyab pa nyid du gsungs pa yin no//de lta bas na byang chub 'dod pas zhes bya ba la/ gang dag byang chub mngon par rdzogs par sangs rgyas par 'dod pas ting nge 'dzin gyi rgyal po zhes bya ba'i mdo sde de bzhin gshegs pa thams cad kyis bstod pa 'di gzung bar bya ste/sems can thams cad gzung bar bya ba'i phyir zhes bya ba'i don to/ /chos zab mo bzod pa la mkhas par bya'o/ /zhes bya ba la rang gi ngo bo yongs su shes pa la mkhas par bya'o/ /gzhon nu ji ltar na chos zab mo bzod pa la mkhas pa yin zhe na zhes bya ba ni rang nyid kyis dri ba sngon du 'gro bas go bar mdzad pa yin no//gzhon nu 'di la byang chub sems dpa' zhes bya ba la sogs pa la/ sgyu ma ni sngags dang sman la sogs pa'i dbang gis yang dag pa ma yin pa'i don snang bas sems can rnams rmongs pa skyed par byed pa'o//rmi lam lta bu ni dge ba dang / mi dge ba la sogs pa'i bag chags tsam gyi stobs kyis bsgos pas snang ba tsam nyid do/ /smig rgyu lta bu ni don bya ba byed pas stong pa'i phyir ngoms pa bskyed pa ma yin pa nyid do/ /brag ca lta bu ni byed pa po med pa'i sgra tsam thos pa'i spyod yul du gyur pa nyid do//mig yor lta bu ni phyi dang nang gi don gyis stong pa skra shad la sogs pa snang ba dang 'dra ba nyid do/ /chu zla lta bu ni skyes pa nyid na mi dmigs pa gnas pa med pa'i ngo bo nyid yin pa'i phyir ro/ /sprul pa lta bu ni rang gi bag chags kyis sprul pa'i 'khyud pa dang / 'khyud bya la sogs pa dang 'dra ba'i phyir ro//gzugs brnyan lta bu ni gzung ba dang 'dzin pa'i rang bzhin med pa nyid kyi rgyur gyur pa'i phyir ro/ /'di dag gi rnam par gzhag pa yang kun rdzob tu yin gyi/ don dam par ni chos thams cad nam mkha' lta bur rab tu shes par bya ste/ spros pa thams cad dang bral ba'i rnam pa can gyi ye shes la ni shes pa po dang /shes bya dang / shes pa'i rang bzhin mi dmigs pa nyid do/ /gzhon nu byang chub sems dpa' chos thams cad de ltar yang dag pa ji lta ba bzhin du shes pa de'i tshe 'di chos zab mo bzod pa la mkhas pa zhes bya'o zhes bya ba la shin tu zab pa'i chos nyid la bzod pa dang ldan pa'i byang chub sems dpa' de ni chags par 'gyur ba la mi chags/de bzhin du mi sdangs mi rmongs pas so/ /de ci'i phyir chags par 'gyur ba la mi chags par yod pa'i dngos po la glo bur du ji ltar 'gyur zhe na/ des chos de yang dag par rjes su mi mthong / chos de mi dmigs te zhes bya ba la/ gang chags par 'gyur ba'i bdag la sogs pa dang / gang la chags par 'gyur ba'i bud med kyi lus la sogs pa dang / chags pa gang yin pa 'dod chags kyi sems te/ byed pa po dang / las dang /bya ba'i rang gi ngo bo mi dmigs pa nyid do/ /rjes su mi mthong zhes bya ba ni rjes su dpag pas so/ /mi dmigs pa zhes bya ba ni mngon sum gyis so/ /de bzhin du zhe sdang dang gti mug la yang sbyar bar bya'o/ /de ltar 'dod chags pa med pa dang / zhe sdang ba med pa dang / gti mug pa med pa dang /sems phyin ci ma log pa de ni mnyam par gzhag pa zhes bya ste/ dmigs pa'i rnam par g.yeng ba ma lus pa dang bral ba'i phyir ro/ /spros pa med pa zhes bya ba ni spros pa thams cad nye bar zhi bar chos nyid nges par rtogs pa'i phyir ro/ /rgal ba pha rol tu phyin pa zhes bya ba ni 'dod chags pa la sogs pa 'khor ba'i rgya mtsho'i pha rol tu phyin pa'i phyir ro//skam sar phyin pa zhes bya ba ni/ chu bo bzhi'i 'jigs pa las rnam par grol ba'i mya ngan las 'das pa'i skam sar phyin pa'i phyir ro/ /bde bar son pa zhes bya ba ni sdug bsngal thams cad dang bral ba'i mya ngan las 'das pa'i lam thob pa'i phyir ro//mi 'jigs pa thob pa ni yang 'khor bar ltung ba'i 'jigs pa dang bral ba'o/ /tshul khrims can zhes bya ba ni ngan 'gro thams cad las bzlog pa'i bsil ba'i ting nge 'dzin gyi tshul khrims kyis brgyan pa'i phyir ro/ /ye shes can zhes bya ba ni rnam pa thams cad mkhyen pa'i ye shes khong du chud pas ye shes la sbyor ba'o//shes rab can zhes bya ba ni phyin ci ma log pa'i chos nyid rab tu rtogs pa'i ngo bo nges par 'byed pa'i shes rab 'di la yod pas zhes byas nas so/ /bsod nams can zhes bya ba ni bsod nams kyi tshogs dang ldan pas so/ /rdzu 'phrul can zhes bya ba ni mngon par shes pa lngas rtse zhing rdzu 'phrul gyi cho 'phrul yang dag par ston pa'o//dran pa can zhes bya ba ni sngon gyi gnas rjes su dran pa dang ldan pa'o/ /blo gros can zhes bya ba ni rigs pa dang grol ba'i spobs pa dang ldan pa'o/ /rtogs pa can zhes bya ba ni bsam pa ci lta ba'i dbang gis bsgrub pa dang rjes su mthun par rtogs pa khong du chud par byed pa nyid do//ngo tsha shes pa dang ldan pa zhes bya ba ni bdag dang gzhan gyi dbang du byas nas sdig pa'i las mi byed pa'o/ /bram ze zhes bya ba ni sdig pa'i chos spangs pas gang gi sdig pa ma lus pa'i gnyen po'i phyogs su gyur pa bzod pa'i ngo bo nges par rtogs pa la bram ze zhes bya'o//khrus byas pa ni nyon mongs pa ma lus pa'i dri ma 'khrud par byed pa'i bzod pa'i chu'i nang du rtag tu zhugs pa'i phyir ro/ /pha rol du song ba zhes bya ba ni rig byed kyi mthar thug pa'i pha rol du song bas so/ /rig par byed ces bya ba ni ji skad gsungs pa'i rang bzhin rig pa'i phyir ro/ / gtsang sbra can ni bya ba ma yin pa thams cad spangs pa dang ldan pa'o/ /sangs rgyas kyi sras zhes bya ba ni de bzhin gshegs pa thams cad kyi rigs skyong bar bzod pa'i phyir ro/ /shAkya'i sras zhes bya ba ni shAkya'i rigs su 'khrungs pa shAkya thub pa las nye bar gdags par 'os pa'o/ /tsher ma dkrugs pa zhes bya ba ni bdud la sogs pa dang nyon mongs pa'i tsher ma snang ba med par byas pa'o//'obs dral ba zhes bya ba ni khro ba la sogs pa'i mtshams bcad pa thag ring du bsal ba byas pa'i phyir ro/ /'obs las brgal ba zhes bya ba ni nyon mongs pa'i sa mtshams las rgal ba'i phyir ro/ / zug rngu phyung ba zhes bya ba la phyung ba ni kun nas so/ /nyon mongs pa'i bag chags ni zug rngu'o/ /phyung ba ni phyung nas bskyur ba'o/ /nad med pa ni nyon mongs pa'i gdug pa'i rims nad thams cad dang bral ba'o/ /nyon mongs pa dang tha dad du gyur pas na dge slong ngo / kun nas dkris pa med pa ni kun nas dkris pa dang bral ba'o//skyes bu zhes bya ba ni thabs nye bar bstan nas skyes bu bsgrub pa'i phyir ro/ /skyes bu dam pa ni sems can thams cad kyi don byed pas so/ /sems can thams cad kyi gtso bor gyur pas na skyes bu mchog ces bya'o/ /'jigs pa thams cad dang bral zhing bdag med pa'i seng ge'i sgra sgrogs pas na skyes bu seng ge'o//thams cad du mnyam par bzhag pas na skyes bu glang po che ste glang po langs kyang mnyam par bzhag ces bya ba'i tshig gis so/ /shin tu dul ba'i phyir dang / nyon mongs pa'i g.yul du 'jigs pa dang bral bas skyes bu cang shes zhes bya'o//khur khyer ba ni lcid khyer ba ste sems can gyi don dang nges par ldan pa la skyes bu lcid khyer ba zhes bya'o/ /bdud bzhi las rnam par rgyal ba'i phyir dpa' ba ni skyes bu dpa' ba'o/ /grogs la ltos pa med par bdud la sogs pa'i stobs 'joms par byed pas skyes bu rtsal po che'o//shin tu dri zhim zhing yid du 'ong ba'i me tog bzhin du yon tan me tog gi rang bzhin du gyur pa ni skyes bu me tog ces bya'o/ /pad+ma bzhin du 'khor ba'i 'dam gyi skyon gyis ma gos pa'i phyir skyes bu pad+ma zhes bya'o/ /de nyid dkar po'i chos kyis yongs su gang bas pad+ma kha bye bas skyes bu pad+ma dkar po zhes bya'o//shin tu gdug pa can gyi sems can rnams 'dul ba mkhyen pa'i phyir skyes bu 'dul ba zhes bya ba'o/ /sems can ma lus pa'i yid du 'ong ba dang bdud rtsi'i 'od 'phro bar byed pas skyes bu zla ba zhes bya ba'o/ /ma smad pa'i yon tan dang ldan pas skyes bu phal pa ma yin pa zhes bya'o//ji skad bstan pa'i mi mthun pa'i phyogs kyi dri mas gos pa med pas mi gos pa zhes bya ste/ chos zab mo la bzod pa'i dge ba zhes brjod par bya'o zhes thams cad la sbyar bar bya'o/ /de nas bcom ldan 'das kyis zhes bya ba la sogs pas ni sngar bstan pa'i don nyid yang tshigs su bcad pas gsungs pa ni/nam zhig 'jig rten khams 'di 'byung ba dang / /zhes bya ba la sogs pa la/ gang gi tshe snod kyi 'jig rten gyi khams 'di chags par 'gyur ba'i tshe nam mkha'i steng du rlung gi dkyil 'khor nas brtsams nas ji srid du chu dang gser gyi dkyil 'khor gyi bar du 'chags par 'gyur ro//nam zhig rim gyis 'jig pa na gzhan med khang la sogs pa thams cad nam mkha'i mthar thug par gyur pas 'jig rten thams cad nam mkhar gyur pa'i tshe zhes gsungs pas 'jig rten 'di nam mkhar 'gyur ro/ /ji ltar sngon bzhin phyis kyang de bzhin te/ / zhes bya ba la/ nam mkha'i rang gi ngo bo tsam la ni gzhan du 'gyur ba med la/ nam mkha' yang rang bzhin med pa'i phyir chos thams cad kyang de ltar rtags par bya'o/ /tshigs bcad gnyis pas kyang don 'di nyid bstan zhes bya'o/ /ji ltar bar snang cung zad sprin med las/ /zhes bya ba la rang bzhin med par snang ba skad cig mar mthong ba las/skad cig tu na sprin gyi dkyil 'khor snang / /zhes bya ba la/ gang nas kyang 'ong ba med cing gar yang 'gro ba med pa'o/ /de bzhin gshegs pa mya ngan 'das pa dag /ces bya ba la sogs pa la/ de bzhin gshegs pa mya ngan las 'das nas da ltar bzhugs pa ma yin na yang gzugs brnyan nam de bzhin gshegs pa'i gzugs yid la byas na sngon ji lta ba bzhin du phyis kyang de bzhin du mthong ba de'i phyir chos thams cad gzugs brnyan lta bu'o zhes bya'o//ji ltar dbu ba mang po rdos pa dag /ces bya ba la sogs pas ni phung po lnga snying po med par ston to//chu bos khyer ba skyes bus nges mthong ste/ /zhes bya ba la sogs pa la ci 'di la snying po yod dam zhes brtags na/ de la brtags na snying po yod mi snang / /zhes bya ba la/ skyes bu des dbu ba'i gong bu de la snying po ci yang mi snang ba zhes bya ba la/snying po ci yang mi mthong ba zhes bya ba'i don te/ gzugs kyi phung po ni dbu ba lta bu ste/ gzugs kyi phung po la snying po yod pa ma yin no zhes bya ba'i don to/ /ji ltar char pa thigs chen babs pa na/ /zhes bya ba la sogs pa ni tshor ba'i phung pos skye ba dang 'gag pa nyid ston par byed do//chu yi chu bur dag ni tha dad 'byung / /zhes bya bas ni/ char gyi rgyun babs na chu bur 'byung bar 'gyur ro/ /de yang mi brtan zhing snying po yod pa ma yin pa bzhin du tshor ba'i phung po rnam pa gsum dang / chos thams cad kyang skyes ma thag tu 'gag cing nyams pa'i rang bzhin no zhes bya ba'o//brda tsam gyi tha snyad la 'jug par byed do/ /zhes bya bas 'du shes kyi phung po rdzas su med par ston pa'o/ /ji ltar 'phrin yig grong gzhan bskur ba las/ /zhes bya ba la sogs pa la/ grong gzhan na gnas pa dag gis 'phrin yig mthong ba las ji ltar bris pa'i dge ba dang mi dge ba'i bya ba la sogs pa sgrub par byed pa mthong yang de sgrub par byed pa'i sgra gzhi der 'phos pa yang med do//de bzhin du 'pho ba med bzhin du brda tsam gyis ma brtags na nyams dga' ba'i bya ba rnams rang gi blo'i rnam par 'khrul pas 'jug par 'gyur ro zhes bya ba yin no//thams cad kyang rang gi sems rnam par 'khrul pa tsam yin gyi/ yang phyi rol gyi dngos po ni yod pa ma yin no zhes bya bar/ ji ltar mi dag chang gis myos nas ni/ /zhes bya ba la sogs pa la/ chang gis sems myos par gyur pa ni chang gi nus pas bdag nyid dang sa yang 'khor ba 'dra bar mthong ngo //de bzhin du mi bden pa la sgro btags pa'i chang gi dbang gis 'khor ba'i 'khor lor 'gro ba drug po 'khor bar 'gyur te/ zo chun gyi 'khrul 'khor bzhin du 'gro zhing 'ongs pas 'khor bar sems kyang don dam pa gang yang 'khor bar yod pa ma yin te/ sa g.yo ba dang 'khor bar shes pa dang 'dra'o//'dod chags kyang mi bden pa la sgro btags pa'i dbang gis med bzhin du snang bar bstan pa'i phyir/ me long ngos dang 'bru mar snod rnams la/ /zhes bya ba la sogs pa la/ me long ngam/ 'bru mar gyi snod du rang gi gdong la bltas pa na thig le dang skra 'khyil bas brgyan pa'i gzugs brnyan de la bden pa'i gdong du sgro btags nas 'dod chags kyi stobs kyis bud med du dmigs nas 'dod pa la zhen pa'i byis pa rgyug par byed na yang gdong gzugs brnyan du 'phos pa yang med la gzugs brnyan gdong du 'phos pa yang ma yin no//gzugs brnyan dang 'dra ba'i chos rnams la rang dang gzhan du rnam par phye zhing bltas nas rang bzhin gyis yod pa ma yin na yang 'dod chags dang / zhe sdang dang / gti mug la sogs pa'i nyon mongs pa rnams kun du 'byung ngo / /sgyu ma dang / smig rgyu dang / dri za'i grong khyer dang /gzugs brnyan dang 'dra ba ngo bo nyid kyis stong pa'o zhes nges par rtog par byed na skye bar mi 'gyur ro/ /yid du 'ong ba'i glu dang sil snyan la sogs pa yang 'dod chags la sogs pa'i rgyu ma yin no zhes bstan pa'i phyir/ ji ltar mi dag nags ri'i khrod 'dug nas/ /zhes bya ba la sogs pa la/ji ltar ri'i gcong rong du zhugs pa'i skyes bu bgad pa dang / ngus pa dang / glu blangs pa la sogs pa'i sgra bsgrags pa na de bzhin du pha rol gyi ri las kyang brag ca'i sgra 'byung bar 'gyur ba dang brag ca'i sgras sgra byas pa bzhin du chos thams cad kyang brag ca dang 'dra bar rig par byas la de dag la mngon par zhen par mi bya'o//rmi lam gyi nang du 'dod pa'i yon tan lnga nyams su myong la/ sad pa na dmigs par mi 'gyur ro/ /de lta na yang byis pa'i blo can rnams rmi lam du dmigs pa de la mngon par zhen par 'gyur ro/ /byis pa thams cad kyang de dang 'dra'o/ / lha'i dbang po dang rgyal srid kyi dbang phyug la sogs pa la yang mngon par zhen par mi bya'o zhes bstan pa'i phyir/ sgyu ma byed pa dag gis gzugs sprul te/ /rta dang glang po shing rta sna tshogs byas/ /zhes bya ba la sogs pa la/ de bzhin du bu dang chung ma la sogs pa brdzun pas sgro btags pa nyid du bsgrub pa'i phyir/ji ltar bu mo gzhon nu'i rmi lam na/ /zhes bya ba la sogs pa gsungs te/ chags pa'i bde ba nam yang ma myong ba'i gzhon nu ma de'i rmi lam gyi mthar mtshan thams cad kyis brgyan pa gzugs bzang ba'i bu zhig skyes par mthong la/ de yang yon tan gyi tshogs ma lus pas brgyan pa'i lang tsho la bab pa'i skabs su gyur la/de'i rjes la shi bar mthong bas bu skyes pas ni dga' zhing shi nas ma mthong bas ni mya ngan du gyur kyang skyes pa yang med la shi ba yang med do/ /sngon dang phyi ma'i mthar rang bzhin ma rig pa'i 'jig rten rnams kyi dga' ba dang mya ngan yang gzhon nu mas rmi lam du bu skyes pa dang shi ba mthong ba dang 'dra ba zhes bya ba yin no//ji ltar mtshan mo'i chu yi zla ba dag /ces bya ba la sogs pa'i don yang rtogs sla'o/ /ji ltar so ga'i nyi ma phyed dus na/ /zhes bya ba la sogs pa la/ so ga'i zla ba phyi ma'i nyi ma phyed kyi dus la bab pa na drag cing tsha bar 'jug pa'i nyi ma'i 'od zer tsha sgo can gyi sa'i cha las bab pa'i smig rgyu g.yo ba la chu'i phung por mthong bar 'gyur ro//skom pas sems la gnod cing gdung bas chu btung bar 'dod pas 'di na chu mthong ngo zhes rab tu rgyug par byed cing de ji lta ji ltar brgyug pa bzhin du smig rgyu de lta de ltar ring du 'gro ba ltar snang ba na de ngal ba dang skom pa dang tsha bas gdungs pa ma yin pa chu'i thigs pa tsam yang mi rnyed de yod pa ma yin pa'i phyir chu de la btung bar lta ga la nus/ma rig pa dang sred pas rmongs pa'i 'jig rten rnams kyang de bzhin du rgyug par byed do zhes bya bas ni 'du shes kyi phung po rang bzhin med par bsgrub pa yin no//da ni 'du byed kyi phung po rang bzhin med pa dang snying po med par brjod pa'i phyir/ ji ltar chu shing rlon pa'i sdong po la/ /zhes bya ba la sogs pa gsungs pa la/ chu shing gi sdong po la snying po brtag par 'dod pas shun pa rnams so sor bsal nas nang ngam phyi rol gang nas kyang snying por gyur pa ci yang mi mthong ngo //de bzhin du 'du byed du rtog pa rnams phra rab tu rnam par phye nas brtags pa na snying por gyur pa'i lhag ma ci yang lus pa med de/ 'dir snying por gyur pa ni chos thams cad kyi stong pa nyid yin no zhes bya ba'o//de'i phyir chos thams cad kyi stong pa nyid bsgoms pas grol bar 'gyur gyi gzugs la sogs pa bsgoms pas ni ma yin no zhes bstan pa'i phyir/ mig dang rna ba sna yang tshad ma min/ /zhes bya ba la sogs pa la/ mig dang rna ba dang / sna dang / lce dang /lus dang / yid kyi rnam par shes pa rang rang gi yul gzugs dang / sgra dang / dri dang / ro dang / reg bya dang / chos rnams 'dzin pa'i dbang po de dag gis yul la de dag dmigs pa de kho na nyid kyi ngo bor gal te gyur na ni sems can thams cad kyang 'bad pa med par grol bar 'gyur ro zhes bstan pa'i phyir/byis pas de nyid rig gyur na/ /de nyid shes pas ci zhig bya/ /zhes bstan pa yin no/ /dbang po dang dbang po'i don rnams ngo bo nyid kyis bems po'o/ /dge ba dang mi dge ba'i 'bras bu ster bar mi nus par lung du ma bstan pa yin no/ /de'i phyir don dam pa'i rgyu ma yin te/don dam par dge ba ni thar pa'o zhes bya ba'i tshig gis so/ /de'i phyir gang mya ngan las 'das pa don du gnyer ba rnams kyis mya ngan las 'das pa thob pa'i mtshan nyid can gyi 'phags pa'i lam sgom pas rang gi dgos pa gyis shig /gzhan du na phyi rol gyi don la mngon par zhen pa rnams la mya ngan las 'das pa med do zhes bya ba'o//don de dag nyid bstan pa'i phyir/ lus la sngon gyi mtha' ma rab brtags na/ /zhes bya ba la sogs pa la/ gzod ma nas zhi ba'i phyir sngon gyi mtha' yang med la/ skye ba yang med pa la nyams pa yang med pas phyi ma'i mtha' yang med do//de dag gnyi ga med pas dbus kyang yod pa ma yin pas de ni 'dus ma byas kyi rigs zhes bya'o/ /chos kyi dbyings 'dus ma byas kyi bsgom pa ni 'phags pa'i gang zag go zhes bstan par bya ba'i phyir/ mya ngan 'das pa'i chos la chos med de/ /zhes bya ba la/ mya ngan las 'das pa'i chos rnams nges par grub pa ste chos rnams nyid ye nas med pas mya ngan las 'das pa yod par ga la 'gyur/yod dang med ces bya bar rtogs pa dang ldan pa rnams kyi sdug bsngal nam yang zhi bar mi 'gyur ro/ /de ltar spyod pa'i sdug bsngal zhi mi 'gyur/ /zhes bya ba la/ de ltar spyod par byed na zhes bya ba'i don te/rgyu ma tshang ba med pa'i 'bras bu nyams par mi rigs so zhes bya ba'i tshul gyis so/ /yod ces pa ni mtha' gcig med pa gnyis zhes bya ba la sogs pa la/ yod pa sngon 'gro med pa ste/ /med pa'ang yod pa sngon 'gro yin/ /de phyir med ces mi brjod cing / yod pa nyid du 'ang brtag mi bya/ /zhes bstan pa yin no/ /de bzhin du/ gtsang dang mi gtsang 'di yang mtha' yin te/ /zhes bya ba la sogs pa la/ yod pa dang / med pa dang / gtsang ba dang / mi gtsang ba la sogs par rtsod par thob par gyur pas ni sdug bsngal nyid rnam par 'phel bar 'gyur ro//de phyir gnyi ga'i mtha' ni rnam spangs nas/ /zhes bya ba la sogs pa la/ rtsod pa'i gzhir gyur pa'i mtha' gnyis rnam par spangs nas dbus la mngon par zhen pa yang spangs te/ chos zab mo la bzod pa ji skad bstan pa bzhin du bsgom par bya'o zhes bya ba ni mdor bsdus pa'i don yin no//dran pa nye bar gzhag pa'i gtam byas te/ /zhes bya ba la sogs pa la/ dran pa nye bar gzhag pa'i gtam byas pa nyid kyis de kho na nyid lus kyi mngon sum du byed par mi 'gyur ro/ /de bzhin du bsam gtan gyi gtam dang / bden pa'i gtam byas pa tsam gyis bsam gtan dang bden pa mthong bar mi 'gyur ro zhes thams cad du dregs pa'i nyon mongs pa'i skyon rnams bkru bar bya'o zhes slob par mdzad pa'o//tshul khrims bsrung zhing de yis snyems mi bya/ /chos rnams mnyan cing des ni mi bsnyems te/ /zhes bya ba la/ bdag ni tshul khrims dang ldan pa'o//bdag ni mang du thos pa'o zhes khengs par mi bya'o zhes bya ba'i bar du'o/ /dregs pa sdug bsngal rtsa ba yin par bstan/ /zhes bya ba la/ bsnyems shing nga rgyal byed pa ni sdug bsngal gyi rgyu ste byed pa yin no/ /rgyags par dregs pas sdug bsngal rab tu 'phel/ /zhes bya ba la/rgyags pas dregs shing khengs par gyur pa ni sdug bsngal nyid 'phel bar 'gyur te/ sdug bsngal dang rjes su mthun pa'i phyir ro/ /bzlog nas rgyags pa dang bral bar gyur na ni sdug bsngal thams cad 'gag par 'gyur te/ sdug bsngal dang 'gal ba'i bde ba'i rang bzhin yin pa'i phyir ro//ji snyed chos mang yongs su chub byas nas/ /zhes bya ba la/ gal te mang du thos pa yin na yang tshul khrims srung bar mi byed cing / bdag ni mang du thos pa yin no zhes nga rgyal byed na tshul khrims nyams pas de ngan 'gror 'gro ba la thos pa mang pos skyob par mi nus so/ /de bzhin du tshul khrims tsam gyis mgu zhing thos pa mang po tshol bar mi byed na de tshul khrims kyi 'bras bu nyams su myong nas de zad pa dang yang ngan 'gror ltung nas sdug bsngal nyams su myong bar 'gyur ro//de bzhin du dmigs pa dang bcas pa'i sgom pas kyang nyon mongs pa zad par mi 'gyur ro zhes bya bar/ 'jig rten pa'i ting nge 'dzin sgom byed kyang zhes bya ba la sogs pa la/ bdag tu mngon par zhen pa sngon du 'gro ba'i 'jig rten pa'i sgom pas kyang / de nyid nyon mongs phyir yang rab tu ldang / /bdag tu 'du shes can la/ bdag yod na ni gzhan du 'du shes shing / /bdag gzhan cha las yongs su 'dzin dang ldang //de nyid dang ni kun tu 'brel pa las/ /nyon mongs thams cad rab tu skye bar 'gyur/ /zhes bstan pas so/ /dpe bstan pa'i phyir/ lhag spyod kyis ni ting 'dzin 'dir bsgoms bzhin/ /zhes bya ba la/ lhag spyod ni phyogs kyi gos can no/ /de 'dod chags dang bral bar rdzu 'phrul gyis nam mkha' la 'gro ba mthong nas de lta bu 'dod pa'i bcos ma'i sems kyis bstan pa 'di la zhugs nas ting nge 'dzin bsgoms pa'i stobs kyis rdzu 'phrul mngon du byas par gyur to//de rdzu 'phrul thob nas phyogs kyi gos can gyi bstan pa la yang 'di lta bu'i rdzu 'phrul yod do zhes yang phyogs kyi 'os can du gyur nas nam mkha' la song ngo //de la dus gzhan zhig na khyod kyis bsgoms pa 'di ni lam ma yin no zhes brtsad pa dang / rdzu 'phrul las nyams nas sa la lhung ste dmyal bar song bar gyur to/ /de lta bas na bdag med pa bsgoms pa las gzhan gyis grol bar 'gyur ba ma yin no zhes bstan pa'i phyir ro//gal te bdag med chos la rab rtog cing / /zhes bya ba gsungs pa la gal te chos thams cad bdag med par sngar ci skad gsungs pa bzhin rnam grangs kyis nges par brtags nas dmigs pa thams cad spangs te/ bsgoms pas chos thams cad bdag med par sgom pa kho na mya ngan las 'das pa 'thob pa'i rgyu yin gyi/rgyu gzhan ni yod pa ma yin no/ /tshul khrims kyi rkang pa dang bral bas 'khor ba las 'bros par 'dod na yang 'gro ba ni med do zhes chom rkun gyi dpe bstan pa'i tshe/ mi zhig chom rkun tshogs kyis rab gtses nas/ /zhes bya ba la sogs pa gsungs te/chom rkun gyis shin tu gtses pas rang gi srog yongs su skyob par 'dod pa dag 'bros par 'dod pa las 'jigs pas bred cing brgyal ba'i rkang pas 'bros pa'i nus pa med par 'gyur ro/ /de bzhin tshul khrims nyams pa rmongs pa'i mi/ /zhes bya ba la sogs pas ni dpe bstan pa la sbyor bar byed do//tshul khrims nyams pa des 'bros par mi nus pa ste/ tshul khrims kyi rkang pa dang bral ba'i phyir 'khor ba'i khams las bdag nyid 'bros par nus pa ma yin no/ /rgas pa dang 'chi ba dang nad la sogs pa rnam pa sna tshogs pa'i nyon mongs pa'i dgras ngan 'gro gsum du lhung bar byed do//yang bdag med pa legs par bsgoms par gyur pa khros sam gshes kyang bdag dang gzhan gyi cha'i rtog pa dang bral ba'i phyir khro ba la sogs pa skye bar mi 'gyur ro zhes bstan pa'i phyir/ stong par shes pa de la 'khrug pa med/ /ces bya ba'o/ / stong pa nyid mi shes pa de la khros pa la sogs pa 'byung ngo zhes bstan pa'i phyir/ 'gro mang phung po stong par ston mod kyi/ /zhes bya ba la sogs pa gsungs so/ /tshig gis sgro btags pa tsam gyis stong pa nyid rtogs par mi 'gyur ro zhes bya ba bstan pa'i phyir ro/ /mi shes de dag gzhan gyis brgal na yang //zhes bya ba la sogs pa la/ gzhan gyis brgal ba na khro bas zil gyis non nas drag cing rtsub pa'i tshig gi mtshon chas gzhan la gnod pa byed pa la 'jug par 'gyur gyis/ ji skad gsungs pa'i stong pa nyid dran par mi 'gyur ro/ /de dag nyid de ma thag pa'i dpes bstan pa'i phyir/mi dag na zhing lus ni sdug bsngal ltar/ /zhes bya ba la sogs pa la/ yun ring po'i dus su nad kyis gnod cing nyam thag par gyur pa'i sdug bsngal gyis zil gyis mnan pa dag nad gso ba'i phyir sman pa la bsten par 'dod nas btsal ba na nad kyi rgyu dang gso ba la mkhas pa gzhan la phan pa byed pa la brtson pa snying rje chen po dang ldan pa'i sman pa yang dag par rnyed nas des kyang nad thams cad zhi bar byed pa'i nus pa'i sman nad pa de la byin na nad pa de nad bsal ba'i phyir bsten par mi byed na gang gis nyes zhes bya bar/sman pas ma lan sman gyis ma nyes te/ /zhes bya ba la/ji ltar rigs pa'i sman bsten na nad sel bar nus kyi ma bsten par ni ma yin no/ /de ni nad pa nyid kyis nyes pa yin te/ sman mi bsten pa'i mtshan nyid can gyi'o zhes bya bas skabs la bab pa dang sbyar ba'i phyir/ de bzhin bstan pa 'di la rab byung ste/ /zhes bya ba la sogs pa la/ de bzhin gshegs pa'i bstan pa 'di la rab tu byung nas stobs dang /byang chub kyi yan lag dang bsam gtan dang / gzugs med pa la sogs pa thob nas sman bsten pa'i gnas lta bu'i sgom pa gang yin pa la sbyor bar mi byed pa ni sgom pa la rjes su sbyor ba dang bral ba'i mtshan nyid can mya ngan las 'das pa'i nad med pa thob par mi 'gyur ro//de lta bas na dngos po med pa stong ba'o zhes don dam pa sgom pa la sbyor bar byed pa ni sangs rgyas kyi sras su 'gyur gyi mu stegs pas yongs su brtags pa'i phyogs gcig stong pa nyid ni yongs su spong bar byed de/ 'khor ba dang rjes su mthun pa'i phyir ro zhes par srid pa thams cad yong ye stong pa ste//zhes bya ba la sogs pa bstan to/ /de ni sems can thams cad kyi nad thams cad rjes su 'dzin pa'i brtse ba chen po dang ldan na yang byis pa'i skye bo spang bar bya ba'i rgyu bstan pa'i phyir/ mkhas pa byis pa dag dang rtsod mi byed/ /ces bya ba la sogs pa la mkhas pa ni blo dang ldan pa ste/ji skad gsungs pa'i gsung rab la mkhas pa'o/ /byis pa ni mi shes pa ste/ de dang rtsod par mi byed de/ bzlog nas ri mor byas nas spong ba ni bdag la brten nas sems gdug pa bskyed pas ngan 'gror 'gro bar 'gyur ro zhes bsam pa'o/ /byis pa'i sems kyi rgyud rig pas grogs por yang mi byed do//grogs po'i grogs po nyid kyang des mi shes te dgra dang 'dra bar 'gyur/ /zhes so so'i skye bo'i grogs la mkhas pa rnams yid rton par mi byed do/ /byis pa dang ni byis par mthun sbyor ba/ /zhes bya ba la sogs pa la/ 'dod pa mthun pa'i phyir/ji ltar mi gtsang ba dang mi gtsang bzhin/ /zhes gsungs te/ mi gtsang ba dang mi gtsang ba chen por 'dra bar 'gyur ro zhes bya ba'i don to/ /mkhas pa dag ni mkhas pa'i skye bo dang / /zhes bya ba la sogs pa la/ yongs su dag pa ni yongs su dag pa dang grogs po zhes bya bar/mthun bzhin 'byor pa mar dang nying khu bzhin/ /zhes gsungs so/ /'khor ba'i skyon ma mthong ba dang / las dang rnam par smin pa ston pa'i de bzhin gshegs pa'i bka' la ma dad pa'i phyir slob pa nyams pa la sogs par 'gyur ro zhes bya bar/ rab tu rnyed dka' mi nyid thob nas ni/ /zhes bya ba la sogs pas ni bslab pa la mi gus pa'i rgyu bstan to//bzo yi gnas dag la ni mkhas mi 'gyur/ /zhes bya ba ni 'tsho ba'i don gyi bzo'i gnas la sogs pa la mi mkhas pa'i phyir dbul por gyur la/ 'tsho ba med pas 'tsho ba'i phyir de bzhin gshegs pa'i bstan pa la rab tu byung nas de lhung bzed dang chos gos la chags par 'gyur zhing sdig pa'i grogs po'i lag tu song bas bslab pa'i gnas la gus par mi byed kyi/bya ba ma yin pa la sbyor ba lus dang ngag dang sems ma bsdams pas brdzun pa'i tshig smra zhing gzhan gyi skyon smra ba la zhugs pa zas la lhag par chags pa zas la tshod zin pa med pa de dag /sangs rgyas bsod nams kyis ni zas rnyed kyang / /zhes bya ba la/ sangs rgyas kyi byin gyis rlabs kyis de ltar gyur pa'i zas rnyed nas yang byas pa mi shes pa yin pa'i phyir sangs rgyas kyi byin gyis rlabs kyis bdag cag gis zas la sogs pa thob bo snyam du mi sems so//de dag kha zas shin tu zhim pa dri dang ro dang ldan pa dag mi rigs pa'i sbyor ba yongs su longs spyod pa/ de dag la ni zas te dug tu 'gyur/ /zhes bya ba la/ de gya nom pa yin na yang dug dang 'dres pa'i zhos bsres pa'i zas za ba dang 'dra bar dge ba'i srog gi bar chad byed pa'i rgyu yin pa'i phyir de dag dug gi don du 'gyur ba yin no//zhes bstan par glang po che phru gu'i dpes/ ba lang phru gus rtsa ba ma bkrus bzhin/ /zhes gsungs te/ ji ltar glang po che phru gus rtsa ba ma bkrus pa ste/ pad+ma'i rtsa ba 'dam dang bcas pa zos na 'chi ba'i rgyur 'gyur ro//de lta bas na bdag la phan pa 'dod pas sdig pa'i grogs po spangs pa dang mtha' gcig tu gzhol ba dang / so so'i skye bo dang 'du 'dzi spangs nas rnal 'byor dang rjes su mthun pa'i dgon par gnas par byas la/ byams pa dang snying rje dang dga' ba dang btang snyoms dang ldan pa'i ting nge 'dzin mngon sum du byas nas snying rje chen po'i thabs kyis sems can thams cad la chos zab mo la bzod pa yang ston to//de dag gis kyang de las thos nas de bzhin du bsgrub pa la/ 'phags pa'i zang zing med pa'i bzod pa 'thob/ /ces bya ba la/ 'phags pa ni chos zab mo mngon par rtogs pa'o/ /zang zing med pa ni nyes pa thams cad dang bral ba'o/ /thob pa ni ldan pa zhes bya ba'o/ /zab mo'i chos tshul rtogs pas rnam par dag pa'i blo/ /snying rjes 'gro ba'i don byed bzod pa rnams bsgom bya/ /shes rab snying rje'i yon tan rang bzhin dam pa 'jam pa'i mgon//de nyid kun la blo rgyas blo yis sangs rgyas 'gyur bar gyis/ /chos zab mo la bzod pa'i le'u ste dgu pa'i bshad pa rdzogs so// //da ni grong khyer du gshegs pa'i le'u le'u snga ma rnams mtshams sbyor sngon du 'gro bas bstan par bzhed nas/ de nas yang zhes bya ba la sogs pa la/nan tan snying por bya'o zhes bya ba ni khyod kyis de ltar bslab par bya'o zhes bya ba nyid do/ /nan tan ni nyams su len pa ste/ sgrub pa gtso bor bya'o zhes bya ba'o/ /bslab par bya ba ni slob pa'i phyir ro/ /de ci'i phyir zhe na zhes bya ba ni/ gang gi phyir nan tan nye bar ston zhe na'o//nan tan snying por byed pa la bla na med pa yang dag par rdzogs pa'i byang chub kyang rnyed par dka' ba ma yin no zhes bya bas ting nge 'dzin ni shin tu rnyed par dka' ba ma yin no zhes bya ba'i bar du'o/ /de nas zla 'od gzhon nur gyur pa stan las langs te bcom ldan 'das ga la ba der logs su thal mo sbyar ba byas nas nan tan gyis ting nge 'dzin la 'jug pa legs par bshad do//zhes bya ba la sogs pa nas/ bdag kyang nan tan snying por bgyid do zhes bya ba'i bar du ste/ lus dang srog la ltos pa med par byas nas yang dag par rdzogs pa'i byang chub sems can thams cad kyi don du nan tan gyis bsgrub par bya'o zhes bya ba ni bsdus pa'i don to//nam mkha' 'dra zhing rdul bral gzugs bzang 'chang / /zhes bya ba la sogs pa la/ nam mkha' 'dra ba ni chos kyi sku ste/ sgrib pa thams cad mi mnga' bas so/ / rdul bral ni phyi dang nang gi 'dod chags kyi rdul dang bral ba'i phyir ro/ /gzugs bzang 'chang ba ni mtshan sum cu rtsa gnyis kyis brgyan pa'i longs spyod rdzogs pa'i sku 'chang ba'i phyir ro/ /lus mi mnga' ni nam mkha' dang mnyam pa'i phyir ro/ /mtshan mi mnga' ni mtshan ma'i mtshan nyid med pa ste/gzugs kyi mtshan nyid med pa'i phyir gzugs kyi sku'i mtshan nyid med pa nyid do/ /shes rab sras po ni gzugs med pa'i mtshan nyid med pa'i shes rab kyi pha rol tu phyin pa bsgoms pa las skyes pa'i phyir ro/ /yang na nam mkha' dang 'dra bas na rdul dang bral lo/ /rdul dang bral ba ni gzugs bzang 'chang ba ste/chos nyid kyi gzugs la gzugs zhes byas nas so/ /gang gi phyir gzugs dang mtshan mi mnga' ba ni shes rab kyi pha rol tu phyin pa'i ngo bo ste/ shes rab pha rol phyin gnyis med/ /ye shes de ni de bzhin gshegs/ /zhes bya ba yin no//goms par byed pa'i dus la ltos nas de'i sras po nyid do/ /de lta bas na thams cad du dman pa la mos pa rnams kyis gting dpag par dka' ba'i phyir dang / shin tu zab pa'i yon tan rnams kyi rten du gyur pa'i phyir/ yon tan rgya mtsho rab zab ces bya ba'o/ /de ltar na sems can gyi don bya ba ji ltar nges par 'grub ces bya na/thugs rje can zhes bya ba gsungs te/ dmigs pa med pa'i thugs rje chen po'i sku yin pa'i phyir dang / sngon sbyangs pa'i nus pa'i stobs kyis sems can gyi don byed pa yang nges par 'gyur zhes bya'o/ /de ltar bstod nas rang gi 'dod pa'i don la gsol ba 'debs pa ni/mtshungs med phyag ni bdag gi spyi bor zhog /ces pa ste/ phyag zhog ces bya ba ni gsol cig ces pa'o/ /bdag gi mgor te spyi bor ro/ /mtshungs med ni 'dra ba med pa'i don to/ /bcom ldan 'das kyis kyang ji ltar gsol ba btab pa'i don yang dag par bsgrub bo zhes bstan pa'i phyir/phyag g.yas pa zla 'od gzhon nur gyur pa'i spyi bor bzhag go zhes bya ba la/ bcom ldan 'das kyis phyag g.yas pa bzhag ma thag tu skad cig de nyid la zla 'od gzhon nur gyur pa la gzugs thams cad nges par ston pa'i ting nge 'dzin te/rnam pa thams cad kyi gzugs thams cad kyi snang ba skyed par byed pa'o/ /yid ltar mgyogs pa'i ting nge 'dzin ni yid kyi bsam pa tsam gyis thams cad du 'gro zhing 'ong ba'i rdzu 'phrul gyi ngo bo'o/ /nam mkha' mdzod ni 'dod pa tsam gyis 'dod pa'i don thams cad nam mkha' las yang dag par 'grub pa'o//rdo rje lta bu ni rnam par g.yeng ba thams cad kyis mi phyed pa nyid do/ /dpa' bar 'gro ba ni ting nge 'dzin thams cad kyi yul non pa'o/ /sgrib pa med pa'i mtha' ni sgrib pa thams cad kyi mthar 'gro ba'o/ /de bzhin gshegs pa thams cad ston pa ni 'jig rten gyi khams mtha' yas pa na bzhugs pa'i de bzhin gshegs pa rnams mngon sum du mthong ba'i ngo bo nyid do//stong pa nyid thams cad kyi dbang bskur ba thob pa ni stong pa nyid thams cad kyi ngo bo shes rab kyi pha rol tu phyin pa mngon sum du byas pa'i shes rab ye shes kyi dbang bskur bas dbang bskur ba'o//de dag la sogs pa ste gtso bor gyur pa'i ting nge 'dzin gyi sgo dpag tu med pa mngon sum du 'gyur ro/ /gzungs kyi sgo dang / dga' ba dang / bde ba gang lha yul gyi dga' ba dang bde ba thob po zhes bya bas ni de bzhin gshegs pa'i phyag gi mthil gyis reg pa'i mthu khyad par du 'phags par rig par bya'o//de dag nyid kyi don tshigs su bcad pas so sor bstan pa'i phyir/ dra bas mdzes 'brel bum pa lcags kyu'i mtshan mnga' zhing / /zhes bya ba la sogs pa la/ bum pa dang / lcags kyu dang / dpal be'u dang / 'khor lo dang / rgyal mtshan dang / nya dang / ba dan la sogs pa'i mtshan gyis brgyan pa/bskal pa mi nyung ba dpag tu med par sbyin pa'i char 'bebs pa la mkhas pa'i phyag g.yas pa gser gyi kha dog can zla 'od kyi mgo la bzhag par gyur pas zla 'od gzhon nu la dpe med pa'i dga' ba dang bde ba dang ldan par gyur pas bcom ldan 'das ga la ba der logs su thal mo sbyar ba btud nas tshul dang mthun pa'i tshigs su bcad pas bstod pa/bla med mi 'jigs sbyin pa khyod la phyag 'tshal lo/ /zhes bya ba la sogs pa la/ sems can thams cad la mi 'jigs pa stsol bas mi 'jigs pa sbyin pa'o/ / sems can thams cad la bu gcig pa sdug pa bzhin du brtse bas sbyin pas na sems can gnyen rtsa'o/ /rnam pa sna tshogs pas sems can gyi don la 'jug pas na bden pa'i rtsal mnga' ba'o/ /mnyam pa med pa'i de bzhin gshegs pa de dag thams cad dang mnyam pas mi mnyam mnyam pa'o//dmigs pa med pa'i snying rje chen po'i rang bzhin gyi sku yin pa'i phyir shin tu thugs rje can no/ /dpa' bo dgra bzhi rnam par btul la phyag 'tshal lo/ /zhes bya ba ni dgra bzhi rnam par btul ba ste/ bdud bzhi'i dgra las rnam par rgyal ba nyid do/ /brtson 'grus kyi stobs kyis don dam pa sangs rgyas nyid mngon sum du mdzad pas na brtson pa'o//chos nyid kyi sku'i bdag nyid kyi phyir sku mchog go/ shin tu yangs pa ni shes rab ste nam mkha'i dkyil 'khor las shar ba snying rje byams pa'i 'od zer stong dang ldan pa'i rgyal ba'i nyi ma mi shes pa'i mun pa sel ba'o//skyabs su mchi zhes bya ba ni gus par phyag 'tshal nas bdag la skyabs gzhan ma mchis pas skyabs su mchi'o/ /zhes bcom ldan 'das la gsol ba 'debs pa'o/ /bcom ldan 'das bdag la thugs brtse ba'i slad du zhes bya ba la/ thugs kyis dgongs la/sang bdag gi sdum par byang chub sems dpa'i dge 'dun dang / nyan thos kyi dge 'dun dang bcas par bshos gsol ba gnang bar mdzad du gsol zhes bya'o/ /de la 'di skad ces bya ste zhes bya ba'i tshigs bcad kyis kyang don de nyid bstan to/ /thugs brtse ba'i phyir zhes bya ba ni thugs kyis so//gnang ba ni bdag gir mdzad pa'o/ /de'i phyir gsungs pa cang mi gsung bar gyur pas zhes bya'o/ /de nas zla 'od kyis cang mi gsung bas gnang bar rig nas stan las langs te/ bcom ldan 'das la mgo bos phyag 'tshal te song nas rgyal po'i khab nas bya rgod kyi phung po'i bar gyi lam thams cad mnyam par byas nas me tog sna tshogs dang /spos dang / na bza' dang / rgyal mtshan dang / ba dan dang / rnam par rgyal ba'i ba dan dang / gar dang / zlos gar la sogs pa dang / rol mo rnam pa sna tshogs brgya stong du ma dang ldan pas/skyes pa dang bud med rnams kyang yang dag par brgyan to/ /lam gyi ngos gnyis su yang 'dzam bu chu klung gi gser las byas pa lha rdzas kyi ta la'i phreng ba rgyan rnam pa sna tshogs kyis brgyan pa rnams bkod/ nam mkha' la yang rin po che sna bdun las byas pa'i shing rin po che sna tshogs kyi khyad par mar me bzhin du gsal bar byed pa rnams btsugs so//sngar bstan pa'i don rnams tshigs su bcad pas rtogs par sla ba'i phyir gsungs pa ni/ lam ni sna tshogs shin tu legs par brgyan/ /zhes bya ba la sogs pa la/ lhug pa'i gzhung bshad pa yin pa'i phyir yang bshad par mi bya'o//de ltar rin po che rnam pa sna tshogs la sogs pas lam brgyan pas rgyal po'i khab gang yin pa dang / rang gi khyim gang yin par song nas rang gi khyim du zhugs nas de'i nub mo mang zhing bzang ba gya nom pa dpag tu med pa'i bza' ba dang bca' ba dang myang bar bya ba rnams mngon par bsgrubs shing lha'i zhal zas ro brgya dang ldan pa yang tshogs par byas nas nang par snga rab kyi dus su rgyal po'i khab kyang de bzhin du brgyan nas de la rang gi khyim yang rgyan sna tshogs pa du mas brgyan cing rin po che'i stan bye ba khrag khrig brgya stong du ma yang bting ngo //de'i dbus su lha rdzas kyi seng ge'i khri lha dang mi las 'das pa bshams so//a ga ru nag po'i dud pas ni bdugs/ me tog sna tshogs kyis brgyan cing rang gi khyim spras so/ /don 'di dag nyid tshigs su bcad pas bstan par 'dod nas/ zla 'od kyis ni khyim mchog yangs pa yang //rgya cher thams cad shin tu brgyan par byas/ /zhes bya ba sogs pa la/ rab kyi mthar thug par brgyan par byas pa'o/ /khyim mchog ni khyim gyi gtso'o/ /zla 'od kyis gus pas zhes bya ba ni lhag ma'o/ /lha rdzas seng ge'i khri ni dbus su btsugs zhes bya ba ni dbus su bkod pa'o//gang la 'jig rten sgron ma bzhugs pa yi/ /zhes bya ba la sogs pa stan bye ba stong phrag mtha' yas pa bting nas byang chub sems dpa'i dge 'dun dang / nyan thos kyi dge 'dun gyi gdan yang bshams so/ /phyogs dang phyogs mtshams thams cad du dris khyab par byed pa'i a ga ru'i bdug pa'i snod kyang bzhag go//me tog rnam pa sna tshogs kyang bkram mo/ /gar byed glu len sil snyan sgra dag gis/ /zhes bya ba la/ 'dus byas pa'i sgra'i sbyor bas ni mtho ris 'thob par 'gyur ro zhes mngon par zhen pa spang ba'i phyir te/ don la brtan par bya'i yi ge la brtan par ni mi bya'o zhes bya ba ste/don dang sgra la 'brel ba grub pa ci yang med pa'i phyir gang su yang rung ba sgra de dag gis sam lag pa la sogs pa'i brda yang rung bas rab tu bsgrubs pa'i don gyi rjes su 'brang bar bya'o zhes rtogs par bya'i rmongs pa sgra la zhen pa rnams kyis yongs su brtags pa'i 'dus byas pa'i sgra la 'bad pa bskyed par mi bya'o zhes bya ba'i don to//gar dang glu dang brdungs pa'i sgras nye bar mdzes par byas pa'i khang pa'i mchog ni lha la sogs pa'i sems kyang ngo mtshar du 'dzin cing lha'i gzhal med khang yang zil gyis mnan pa'i rnam par rgyal ba'i gnas pas lhag par zla 'od kyi khang pa rnams mthong ngo //de nas zla 'od bcom ldan 'das ga la ba der song zhes bya bar sbyar ro/ /nang par shin tu snga ba'i dus su glu dang brdung ba la sogs pa dang bcas par rang gi 'khor gyis yongs su bskor ba'i de bzhin gshegs pa'i byin gyi rlabs kyis byin gyis brlabs pa'i byang chub sems dpa' bye ba khrag khrig brgya stong phrag brgyad cu thams cad kyang lha'i me tog man+da ra bas snyim pa bkang ba'o//de dag las la la ni skye ba gcig gis thogs pa'i zhes bya ba la skye ba gcig gis thogs pa ni nges par skye ba gcig ni bla na med pa yang dag par rdzogs par 'tshang rgya ba zhes bya ba'o//'di lta ste zhes bya ba ni de'i dus na nye bar gnas pa'i grangs nges pa bstan par bya ba'i phyir ro/ /'phags pa spyan ras gzigs dbang phyug chen po nas byams pa'i bar byang chub sems dpa' bcu gnyis ni skye ba gcig gis thogs pa'o//de dag la sogs pa byang chub sems dpa' chen po'i 'khor gyis yongs su bskor cing mdun du bdar te/ rta dang ba glang dang shing rta du ma shin tu brgyan cing ma zhon par khrid pa mang po zhes bya ba la de bzhin gshegs pa la mchod pa dang /bsnyen bkur gyi phyir zhon pa med pa'i gzhon pa'i tshogs de dag dang 'dres nas tshad med pa'i 'khor gyi tshogs chen pos yongs su bskor te/ rgyal po'i khab kyi grong khyer chen po'i chu dron can gyi sgo nas phyir byung ste/ ri'i rgyal po bya rgod kyi phung po ga la ba dang / bcom ldan 'das ga la ba der song ste phyin nas zhes bya ba la/dka' thub kyi stobs kyis yangs shing rgya che ba'i sgo de ni chu dron can gyi sgo'o/ /yang ta po ta zhes bya ba ni bya rgod phung po'i ri'o/ /de la mngon par phyogs pa'i sgo ni chu dron can gyi sgo zhes bya ba'am/ yang na lho phyogs kyi sgo la ming du btags pa'o//phyin nas bcom ldan 'das la lan gsum bskor ba byas nas phyogs gcig tu 'khod pa'o/ /de nas stan las langs te bcom ldan 'das la thal mo sbyar ba btud de/ dus la bab par gsol ba'i phyir/ bcom ldan 'das gdugs tshod la bab bo zhes bya ba la/dge slong rnams kyi zas kyi dus ni snga dro'i dus lags so zhes bya ba ste/ dus ni dus tshod do/ /sbyar lags pa ni nges par kun zin pa'o/ /gtsang ba ni gus par bshams pa'o/ /da de'i dus la bab bo snyam pa'o/ /bcom ldan 'das kyis de ltar dus la bab pa mkhyen te/thugs la dgongs na byang chub sems dpa'i dge 'dun dang bcas par bdag gi sdum par gdugs tshod gsol ba'i dus la bab bo zhes bya ba'o/ /de dag thams cad tshigs su bcad pas bstan par 'dod nas/ bdag gis grong khyer mchog kun rnam par brgyan//zhes bya ba la sogs pa la/ grong khyer dang bdag gi khyim yang legs par brgyan/ zhal zas ro brgya dang ldan pa yang tshogs par bshams shing legs par sbyar te/ gsol ba'i dus la bab kyi bcom ldan 'das sras dang bcas pa grong khyer du gshegs su gsol/ snang byed nyi ma mun pa'i tshogs sel mthor 'phags pas gdugs tshod kyi dus la bab cing nye bar gyur to/ /de'i phyir/ sras dang thabs cig bdag gi sdum par gshegs su gsol/ /zhes bya ba ni lha zhes bya ba'i don gyis bskul ba'o/ /der sems can mang po'i don chen por gyur to//ji ltar mar me mdzad kyis khyod la lung bstan pa/ /de bzhin bdag kyang 'jig rten mngon sum lung ston cig /bdag 'dir lung bstan 'jig rten thos nas ni/ /bla na med pa yang dag par rdzogs pa'i byang chub tu 'gro ba 'di dag thams cad sangs rgyas 'gyur zhes sems bskyed par 'gyur zhing /rim gyis sems can grol ba'i phyir dpag tu med pa'i smon lam gyi go gyon pa'i byang chub sems dpa' dpag tu med pa 'byung bar 'gyur ro/ /de bzhin gshegs pa rnams ni mi gnas pa'i mya ngan las 'das pa yin pa'i phyir/ 'di na snod min sems can gang yang med//ces bya ba ni g.yo ba med pa'i sems kyis byang chub tu sems bskyed par bya'o zhes bya ba'i don to/ /bzhengs shig bzhengs shig ces bya ba ni shin tu rings pas lan gnyis zhus pa'o/ /khyim du gshegs pa'i dgongs pa/ ji ltar bdag gi sdum par khyod gshegs pa//de bzhin byang chub shing dbang drung bdag mchi/ /zhes bya ba la/ ji ltar bdag gi sdum par khyod gshegs pa bzhin du byang chub kyi shing drung du bdag mchi bar bgyi'o/ /byang chub kyi shing drung der bdag mchis la rdo rje skyil mo krung bcings nas rdo rje'i gdan mi phyed cing mi g.yo ba la gnas nas bdud bzhi las nges par rgyal te khyod kyis thob pa bzhin du byang chub thob par bgyi'o//longs shig zla 'od rgyal ba'i sras/ /zhes bya ba la sogs pa la/ khyod kyis mngon par 'dod pa bsgrub par bya'o zhes bya ba'o/ /zan la de ni khyim du 'dong //zhes bya ni de skad gsungs nas dus la bab ste gdan las bzhengs nas sham thabs gsol/ chos gos bgos/ lhung bzed bsnams nas dge slong gi dge 'dun chen po dang thabs cig tu bcom ldan 'das chu dron can gyi sgo nas rgyal po'i khab kyi grong khyer chen por gdugs tshod kyi phyir gshegs so zhes bya bar 'brel to//byang chub sems dpa' dang lha la sogs pas yongs su bskor te mi dang mi ma yin pa rnams kyis ni mchod cing stod par byed pa dang / sangs rgyas kyi mthu chen po dang sangs rgyas kyi byin rlabs chen po dang / sangs rgyas kyi rdzu 'phrul chen po dang / cho 'phrul rnam pa sna tshogs dang ldan pas rnam par mi rtog pa'i spyod lam gyi rdzu 'phrul gyis cho 'phrul nyid bstan pa'i phyir ro/ /'od zer bye ba khrag khrig brgya stong ni rab tu gtong zhes bya ba ste/ sku lus kyi cha shas las zhes bya ba ni lhag ma'o//sil snyan sna tshogs dang / gdugs sna tshogs dang / ba dan la sogs pa'i mchod pa'i khyad par dang / ngang pa dang / khrung khrung dang / ngur ba la sogs pa'i bya'i tshogs dpag tu med pa snyan cing yid du 'ong ba'i sgra skad rnam pa sna tshogs pa sgrogs shing nam mkha'i dkyil nas 'khor zhing bstod pa'i dbyangs sgrogs par byed do//gnod sbyin gyi dbang po gzugs bzang dang / dbang po'i tog la sogs pa gnod sbyin gyi dbang po bye ba khrag khrig brgya stong du ma dag gis lag pa gnyis gtun shing 'dzin cing gdug pa can rnams skrod par byed do/ / phyogs sna tshogs nas lhags pa'i rgyal po dbang che ba/ dbang che bar grags pa rnams rta dang ba lang dang shing rta dang rkang thang rgyan gyis shin tu brgyan pa rnams ma zhon par khrid pas yongs su bskor ba dang / tshangs pa yang bcom ldan 'das kyi g.yas phyogs na mchod pa dang / rim gro dang /bsnyen bkur byed cing 'gro'o/ /g.yon nas ni lha'i dbang po 'gro'o/ /nam mkha'i ngos thams cad bar mtshams med par gang ba'i lha'i bu mchod pa sna tshogs thogs pas lag pa sbrel bas/ nam mkha' gang bar gyur nas bcom ldan 'das la mchod pa'i las kyi phyir 'khod de zhes bya ba ni ji skad bstan pa rnams kyis bskor nas bcom ldan 'das chu dron can gyi sgo nas gshegs so//de la 'di skad ces te zhes bya ba la sogs pas ni sngar bstan pa nyid gsal por bya ba'i phyir/ sangs rgyas de bzhin gshegs pas dus mkhyen nas//zhes bya ba la sogs pa gsungs pa la/ dus mkhyen nas 'od zer gyi cho 'phrul sna tshogs ston pas sangs rgyas kyi zhing dpag tu med pa snang bar mdzad cing gshegs par gyur to/ /bcom ldan 'das de'i g.yon phyogs nas ni spyan ras gzigs dbang phyug dang /mthu chen thob dang / mthong ba don yod dang / spos kyi glang po dang / lag na rin chen dang / lag bzangs dang / rin chen tog dang / 'byung bar dka' ba la sogs pa rnams so/ /g.yas phyogs nas ni byams pa sngon du 'gro ba'i bskal pa bzang po pa rnams so//zla 'od ni mdun nas 'gro bar byed do/ /'jam dpal ni dpag tu med pa'i byang chub sems dpa'i tshogs kyis yongs su bskor nas g.yon phyogs de nyid nas so zhes bya bas ni shes rab dang byams pa dag gis mngon par 'dod pa'i gnas thob par bya ba nyid yin pa'i phyir zhes bya ba yin no//'jam dpal gzhon nur gyur pa dang / byams pa dag g.yon dang g.yas phyogs su gnas par bstan nas 'jam dpal gzhon nur gyur pa'i rjes thogs su ni nyan thos kyi dge 'dun no/ /nyan thos kyi dge 'dun gyi rjes thogs su gau ta ma la sogs pa'i drang srong chen po rnams te/bstan ma thag pa de dag thams cad kyis bcom ldan 'das yongs su bskor ba ni nam mkha' dri ma med pa'i dbus na zla ba'i dkyil 'khor yongs su rdzogs pa la skar ma'i tshogs rnams kyis yongs su bskor ba ltar nye bar mdzes par gyur pas bcom ldan 'das grong khyer du gshegs nas nga gang gi tshe dbang po'i phur bu'i sgo them la bcom ldan 'das kyi zhabs gzhag pa de'i tshe sa chen po rnam pa drug tu g.yos par gyur te/de dag kyang sngar bshad zin to/ /don de nyid yang tshigs su bcad pas bstan pa'i phyir/grong khyer mchog der 'dren pa gshegs pa na/ /zhes bya ba la sogs pa la/ sems can rnams rab tu dga' bar gyur to/ /bkres pa dang skom pa dang bral lo/ /dbang po ma tshang ba rnams kyis ni dbang po tshang ba thob par gyur to/ /yi dags rnams kyang de bzhin gshegs pa'i 'od zer gyis reg pas bde ba thob par gyur to//sa yang rnam pa drug tu rab tu g.yos so/ /'on kyang sems can 'ga' la yang gnod par gyur pa med pa ste/ 'tshe ba med pa'o/ /nam mkha' la 'gro ba'i lha rnams kyang gdugs rnam pa sna tshogs 'dzin par byed do/ / sil snyan bye ba brgya stong du ma dag kyang ma brdungs par nam mkha'i dkyil nas rang sgra snyan pa sgrogs so/ /ljon shing sdong po stong phrag brgya yang de'i tshe me tog rgyas par gyur cing bcom ldan 'das la 'dud par gyur to/ /rta dang / glang po che dang / khyu mchog dang / ri dgas kyi bdag po rnams kyang rab tu dga' ba'i sems kyis snyan cing yid du 'ong ba'i sgra sgrogs so//phyogs sna tshogs nas 'ongs pa'i sa bdag rgyal po rnams kyang spyi bo sa la btsugs nas phyag 'tshal zhing 'dud do/ /kha cig ni mu tig gi phreng ba dang / dpung rgyan dang / rkang gdub dang / cod pan dang /gdu bu dang / rna cha la sogs pa'i rgyan gyi khyad par rnams 'thor bar byed do/ /gang yang mchog tu sdug bsngal bar gyur pa'i sems can gnod pa rnam pa sna tshogs kyis nyam thag cing mya ngan gyi zug rngus zug pa de dag ni skad cig de nyid la bde ba dang ldan par gyur to/ /nam mkha'i dkyil nas 'gro ba'i bya'i tshogs rnam pa sna tshogs rnams kyang snyan cing yid du 'ong ba'i sgra sgrogs so//gang dag gis sgra skad de thos pa de dag kyang 'dod chags dang zhe sdang dang gti mug zhi bar gyur te/ chos zab mo la rjes su mthun pa'i bzod pa thob par gyur to/ /de dag sangs rgyas nyid du yang de bzhin gshegs pas lung ston to//de'i dus na nyon mongs mi 'byung ste zhes bya ba la/ de bzhin gshegs pa'i byin gyi rlabs kyis nyon mongs pa dang bral nas rab tu dang ba'i sems kyis de bzhin gshegs pa la phyag 'tshal nas byang chub tu sems skyed par byed do//ba spu'i khung bu re re nas kyang 'od zer stong phrag brgya stong du ma byung ba'i 'od kyis zil gyis mnan pas nyi ma la sogs pa'i lha rnams kyi 'od shes pa med do/ /mi gtsang ba dang / dri ma dang / nag nog snang ba med par gyur te nyon mongs pa'i dbang gis mi gtsang ba la sogs pa snang bar 'gyur gyi/gzhan du na nyon mongs pa thams cad bag chags dang bcas par spangs pa la mi gtsang ba la sogs pa snang ba'i skabs lta ga la yod/ zla 'od kyis thams cad yongs su sbyangs pa'i yang phyir ro/ /lha rnams kyis gtor ba'i me tog de dag ni sa'i steng du me tog bkram par gyur to//mi rnams kyis gtor ba rnams ni nam mkha' la me tog gi gdugs su gyur to/ /gang gi tshe bcom ldan 'das srang gi dbus nas gshegs pa'i tshe sprul pa spros nas sems can rnams la chos ston to/ /'og min gyi mthar thug pa'i lha rnams mchod pa sna tshogs kyis lag pa 'brel ba yang 'ongs so//de bzhin du gnod sbyin dang / dri za dang / mi 'am ci dang / lto 'phye chen po dang / drang srong rnams tshar gcad pa dang / phan 'dogs pa rnams kyang 'dus nas de bzhin gshegs pa'i zhabs la phyag 'tshal bar byed do//grong dang grong khyer dang / ri dang nags na gnas pa dang / chu klung gi lha rnams kyang lhags so/ /de lta bu la sogs pa'i rdzu 'phrul gyi cho 'phrul gyi khyad par dpag tu med pa bskal pa bye ba brgya stong du yang shes par dka' ba zhes bya ba'o/ / gtso bo'i yon tan dri ma med par 'jug pa'i mthu rnams ni/ /nam mkha' dang mnyam dpag med 'jam dbyangs blo yi yul gyur pa/ /grong mchog gshegs pa'i sgo them zhabs gzhag tshe na bstan/ /bdag gi blo yis de la 'jug par ji ltar nus/ /skye dang 'chi ba dang ldan bems po shin tu sdug bsngal bas//skye ba kun du bdag ni 'di 'dra dang 'brel bar/ /bdag gis bsod nams sa bon 'di dang ldan par ma gyur ces/ /bkral ba yin gyis 'jig rten ngo mtshar gyur pa ci yang med/ /grong khyer du gshegs pa'i le'u ste bcu pa'i bshad pa rdzogs so// // da ni mdo sde 'dzin pa'i le'u bstan pa'i phyir/ de nas bcom ldan 'das zhes bya ba la sogs pa la zla 'od gzhon nu'i khyim du gshegs so/ /gshegs nas kyang gdan bshams pa la bzhugs so/ /byang chub sems dpa'i dge 'dun dang / dge slong gi dge 'dun yang so sor gar 'os pa'i stan la 'khod do//de nas zla 'od gzhon nur gyur pas bcom ldan 'das byang chub sems dpa'i dge 'dun dang dge slong gi dge 'dun bzhugs par rig nas rang nyid kyis sngar 'dus byas pa'i zhal zas ro brgya dang ldan pas tshim par byas nas/ bdar te zhes bya ba ni ci bzhed pa rnams ji ltar bde bar byas nas so//bcom ldan 'das bshos gsol nas lhung bzed bzhag ste phyag bcabs par rig nas chos ston gyi yon du ras bcos bu zung bye ba stong phrag brgya ri ba phul lo/ /byang chub sems dpa' rnams la ni ras zung re re'o/ /dge slong rnams la ni chos gos gsum gsum phul lo//de nas langs te thal mo sbyar ba btud nas bcom ldan 'das la tshul dang mthun pa'i tshigs su bcad pas bstod pa/ skyes pa med cing 'gag pa med/ /ces bya ba la sogs pa la/ sku lus mi mnga' ba ni chos kyi sku la sku med par bstan to/ /ci'i phyir zhe na/ skyes pa med pa'i phyir ro/ /de nyid kyis na 'gag pa med do/ /bsam pa'i yul las yang dag par 'das pa'i phyir/ bsam mi khyab ces bya ste/ chos kyi sku'i sgo nas bstod pa'o/ /gzugs dang mtshan ni phun sum tshogs/ /zhes bya ba ni longs spyod rdzogs pa'i sku'i sgo nas so//shes rab kyis skyes zhes bya ba ni shes rab kyi pha rol tu phyin pa bsgoms pa las nges par byung ba'i phyir ro/ /thabs dang stobs kyi rtsal kyang mnga'/ /zhes bya ba ni dmigs pa med pa'i snying rje chen po'i thabs kyis sems can ma lus pa'i don byed pa'i phyir dang / don dam par nam mkha' dang 'dra ba'i thugs mnga' ba'o//ye shes rgya mtsho zhes bya ba ni rnam pa thams cad mkhyen pa nyid kyi rten la phyag 'tshal ba'o/ /de ltar na gtsug lag khang dang / zhal zas dang / btung ba dang / chos ston pa la sogs pa'i bya ba rnams la ji ltar 'jug ce na/ dran pa nye bar gzhag pa bzhugs pa'i spyod yul te//zhes bya ba la/ gang la dran pa nye bar gzhag pa yod pa de la de skad ces bya'o/ /gzims mal ni dga' ba dang bde ba'o/ /btung ba ni ting nge 'dzin no/ /bshos ni bsam gtan no/ /stong pa nyid ni dgon pa ste/ thams cad du stong pa nyid la gnas pa'i phyir dgon pa la brten pa yin no//de lta bu'i rang bzhin yin na yang gzugs kyi skur yang ston pa'i phyir/ rgyal ba thugs rje bsnyen pas na/ /zhes bya ba la thugs rje'i gzhan dbang du gyur pas bshos gsol ba dang / btung ba 'thung ba la sogs par yang ston te/ / e ma sangs rgyas bsam mi khyab/ /ces bya ba la sogs pas ni mchod pa tsam gyis mya ngan las 'das par gyur pa ngo mtshar che bar bstan to/ /sangs rgyas 'khor dang bcas par bshos gsol ba'i/ /bsod nams bdag gis gang ni bsags pa des/ /ji ltar khyod bzhin bdag kyang sangs rgyas su gyur cig /ces smon lam btab bo/ /yid kyis zhu ba zhus pa ni ngag gi bya ba la ltos pa med par yang tshig 'jug pa yod do zhes bstan pa'i phyir te/ byang chub sems dpa' mkhas pas ci spyad na/ /zhes bya ba la sogs pa la/ ji ltar zhugs na chos rnams ji lta ba bzhin du rab tu shes par 'gyur/ji ltar na 'jug pa'i mtshan nyid bya ba la 'jug par 'gyur/ skye ba dran par ji ltar 'gyur/ 'khor rnams mi phyed par ji ltar 'gyur/ ji ltar spobs pa mtha' yas par 'gyur/ zhes bya ba sogs pa'i zhu ba rnams kyi lan gdab pa'i phyir/zla 'od kyi sems kyi rnam par rtog pa thugs kyis mkhyen nas zla 'od gzhon nur gyur pa la bos nas bka' stsal pa/ chos gcig dang ldan na yon tan 'di dag rab tu thob par 'gyur ro zhes bya ba ni bshad ma thag pa'o/ /chos gcig po gang zhe na/ zhes the tshom bsal ba'i phyir dris pa dang /gzhon nu 'di la zhes bya ba la sogs pas bcom ldan 'das kyis lan 'debs pa'o/ /chos thams cad ming dang bral bar rab tu shes so zhes bya ba ni ming dang skad dang yi ge dang bral bas skye ba dang bral ba/ rgyu dang rkyen dang mtshan nyid mi mthun pa sgro btags pa thams cad las dben pa gnyis su med pa'i ngo bo nyid stong pa nyid dang /mtshan ma med pa dang / smon pa med pa dang / rang bzhin gyis 'od gsal ba'i mtshan nyid can sems dang / yid dang rnam par shes pa dang bral ba/ gzung ba dang / 'dzin pa med par chos thams cad rab tu shes so//don 'di dag nyid tshigs su bcad pas gsal bar mdzad pa'i phyir/ chos rnams bstan pa gcig po ni/ /zhes bya ba la sogs pa la/ chos rnams thams cad mtshan nyid med/ /ces bya ba ni nges par bstan pa gcig go/ /gang gis chos gcig rab tu bstan pa 'di rab tu shes pa des de bzhin gshegs pa'i byin gyi rlabs kyis yang dag pa'i mtha' rab tu shes par 'gyur te/'dir gang gis ci yang brjod du med pa'o/ /gcig gis kyang ni thams cad shes/ /zhes bya ba la sogs pa la/ yang dag pa'i mtha'i ngo bo nyid du gang gis shes pa'o//shes nas ming dang rgyu mtshan la sogs pa la chos thams cad sngon gyi mtha' dang phyi ma'i mtha' med pas ma skyes par shes so/ skye ba dran par ji ltar 'gyur/ /zhes bya ba la sogs pa'i lan ni gang gi tshe skye ba dran pa de'i tshe bya ba thams cad la rmongs par mi 'gyur ro//des na rmongs pa med na yang dag pa'i mtha' yongs su shes so/ /yang dag pa'i mtha' yongs su shes na/ byang chub sems dpa'i 'khor rnams mi phyed par 'gyur ro/ /chos kyi rang bzhin yongs su mi shes pa'i byis pa rnams ni 'khor ba'i sdug bsngal nyams su myong bar 'gyur ro//chos rnams la mi rtog pa ni rang gi rnam par rtog pas bzos sprul pa'i sgyu ma'i dra ba'i rang bzhin la mkhas pa rmongs par mi 'gyur ro/ /de'i phyir/ stong pa rnyog pa med pa'i chos/ /'di ni mkhas pa'i sa yin te/ /zhes bya ba ni 'di ni byang chub sems dpa'i spyod pa'o//sangs rgyas kyi chos rnams kyi rgyan ni bcom ldan 'das kyi bstan pa ste/ rang bzhin gyis stong pa nyid ni nyon mongs pa ma lus pa bag chags dang bcas pa rab tu spong bar byed pa'i phyir ro/ /gang gi tshe byang chub sems dpa' nyon mongs pa bag chags dang bcas pa rab tu spangs par gyur pa de'i tshe gzugs dang /sgra dang / dri dang / ro dang / reg bya dang / chos rnams la zhen par mi 'gyur ro/ /de mi gnas pa'i sbyor bas sangs rgyas kyi rigs la gnas nas dge ba'i bshes gnyen la brten te/ sbyin pa dang / tshul khrims dang / bzod pa dang /brtson 'grus dang / bsam gtan dang / shes rab kyis sangs rgyas nyid thob par 'gyur ro/ /de la lha klu rtag tu bkur sti byed/ /ces bya ba la sogs pas ni chos la gus pa nyid kyis chos nyid la rab tu zhugs pa'i byang chub sems dpa' la thams cad mchod pa byed par 'gyur ro//de bzhin gshegs pa rnams kyang rab tu dgyes pa'i thugs kyis zab cing rgya che ba'i chos rnams rab tu ston par 'gyur ro/ /gang gis stong nyid shes de byang chub sems/ /zhes bya ba ni stong pa nyid la gnas pa'i byang chub sems dpas sems can gyi khams dpag tu med pa 'dul ba'i phyir stong pa nyid dang rab tu ldan pa'i chos ston par 'gyur ro//de thos nas bla na med pa'i sangs rgyas kyi ye shes mngon par bsgrub par bya ba'i phyir 'jug par 'gyur ro/ /de nas de bzhin gshegs pa mthong bar 'gyur ro/ /des kyang de dag la chos ston par 'gyur ro/ /chos kun sgyu ma lta bur shes par gyis//ji ltar bar snang rang bzhin stong pa ltar/ /zhes bya ba la/ gzod ma nas ma skyes pa'i nam mkha' ni thogs pa dang bcas pa'i dngos po'i don byed pa tsam gyi phyir rang bzhin gyis stong pa'o/ /de ltar chos thams cad rang bzhin gyis stong par shes nas zhen pa med pas thams cad du sems can thams cad kyi don byed par 'gyur ro//de dag gi yang rang bzhin de 'drar shes/ /zhes bya ba la/ shes pas gdul bya'i skye bo rnams la mngon par bltas nas sangs rgyas kyi zhing mtha' yas pa'i sems can gdul bya rnams gdul ba'i phyir de bzhin gshegs pa'i sprul pa rnams spros te/de dag tu sangs rgyas kyi mdzad pa mdzad de mya ngan las 'das kyang skye ba dang 'gag pa ci yang med do/ /de ltar chos kun la yang rab brtags te/ /zhes bya ba la/ byang chub tu sems bskyed nas sangs rgyas kyi gdung rgyud mi gcad pa'i phyir zhugs nas mtshan sum cu rtsa gnyis dang /dpe byad bzang po brgyad cus brgyan pa'i sku chen por gyur nas/ bdud thams cad kyis mi g.yo ba'i yid dang / sems can thams cad la bu gcig pa ltar brtse ba'i lhag pa'i bsam pa dang / gsol ba 'debs pa med bzhin rtag tu nye bar gnas pa'i dge ba'i bshes gnyen zhes bya'o//spobs pa mi zad pas mdo sde dpag tu med pa'i don shin tu phra ba rab tu ston pa la mkhas pas nges pa'i tshig so sor yang dag par rig pa'i stobs kyis sems can thams cad gdul ba la mkhas pa'o//ma tshang ba med pa'i stobs kyis shugs 'chang zhing / /zhes bya ba la sogs pa la/ shin tu phra ba'i chos kyi rang bzhin rtogs pa'i phyir ma tshang ba med pa'i stobs te/ stobs bcu thob par 'gyur ro/ /lha dang mi dang lha ma yin du bcas pa'i 'jig rten rnams la yang yid du 'ong bar 'gyur ro zhes bya ba la sogs pa ni mthong ba'i chos kyi phan yon dang yon tan gyi tshogs ston te go sla'o//bskal pa stong mang de yi bsod nams stobs/ /zhes bya ba la sogs pa la/ mdo sde 'dzin pa'i bsod nams ni mtha' yas shing smra bar mi nus te/ dpag tu med pa'i phyir ro//mdo sde 'dzin pa'i bsod nams kyi che ba'i bdag nyid brjod pa'i phyir/ skyes bu la la bsod nams 'dod pas 'dir/ /zhes bya ba la sogs pa la/ ji ltar skyes bu bsod nams 'dod pa 'ga' zhig gis de bzhin gshegs pa rnams la bskal pa bye ba khrag khrig brgya stong dpag tu med par bsnyen bkur dang kun tu spyod pas bsnyen bkur byas la/gzhan bsod nams 'dod pa zhig gis chos zab mo'i tshul 'di las sems shin tu dang bas tshigs su bcad pa gcig cig phyi mi 'dus te dam pa'i chos 'jig pa'i dus su 'dzin na/ de la snga ma'i bsod nams char mi phod//ces bya ba la/ sngar bstan pa'i de bzhin gshegs pa la mchod pa dang bsnyen bkur byas pa'i bsod nams kyi char yang mi phod do zhes bya ba'i don te/ gtso bo nyid du gyur pa'o/ /de phyir bye brag 'di 'phags de 'dra ste/ /zhes bya ba la sogs pas ni nye bar sdud pa'o//bsod nams dpag med dpe las 'das gyur pa/ /nam mkha' dang mnyam 'dir ni thob gyur pas/ /tshig gi bdag po 'jom mchog 'dra gyur pa/ /de ni byang chub sems dpa' de rgyal sras/ /mdo sde 'dzin pa'i le'u ste bcu gcig pa'i bshad pa rdzogs so// //da ni ting nge 'dzin rjes su bslab pa'i le'u/ gzhon nu de la zhes bya ba la sogs pa gsungs te/ mdo sde 'dzin pa'i le'ur phan yon bstan pa sngon du 'gro ba'i tshig gis/ gzhon nu sems ni ngo bo nyid med pa/ gzugs med pa/ bstan du med pa zhes bya ba la sogs pa la/ngo bo nyid med pa'i phyir gzugs med pa'o/ /gzugs med pa'i phyir 'di ni 'di'o 'di ni 'di'o zhes nges par bstan par mi nus so/ /sems ci lta ba sangs rgyas kyi yon tan yang de lta bu'o/ /de bzhin gshegs pa yang de lta bu'o/ /chos thams cad kyang de lta bu'o//zhes bya bar rab tu shes pa'i byang chub sems dpa' gang yin pa de ni nges par brtags pa la mkhas par 'gyur ro/ /de ni khams gsum las byung ba la mkhas pa'o/ /ji skad smras pa de bzhin byed pa'o/ /khams gsum la ma chags pa'o/ /khams gsum las yang dag par 'das pa'o//'dod pa dang / gzugs dang / gzugs med pa dang / nyon mongs pa dang / sgra dang yi ge la mngon par zhen pa dang bral ba de ni chos kyi tshul la mkhas so/ /chos thams cad kyi tshul rnam par dgod pa'i ye shes la mkhas pa'i blo dang yang dag par ldan pa'i phyir gzhan gyis zil gyis non par mi 'gyur ro//chos kyi rnam grangs 'di bshad pa'i tshe/ lha dang mi'i skye dgu sngon yongs su sbyong ba byas pa khrag khrig phrag dgu bcu rtsa brgyad kyis zhes bya ba ni sbyang ba byas pa bye ba brgya stong chos zab mo la bzod pa'i stobs kyis zhes bya ba'i bar du'o//gzungs ni shes rab bo/ /sgrib pa med pa'i bzod pa so sor thob par gyur to/ /de dag bcom ldan 'das kyis lung bstan pa ni sangs rgyas su de bsam pa nges pa'i phyir ro/ /de la 'di skad ces bya ste/ zhes bya ba la sogs pa'i tshigs su bcad pas ni don de nyid slar yang bstan pa'o//byang chub sems dpa' blo ldan gang / /zhes bya ba la sogs pa la byang chub sems dpa' gang bla na med pa yang dag par rdzogs par 'tshang rgya bar 'dod pas chos thams cad chos nyid du mtshan nyid gcig par shes pa'i phyir sna tshogs kyi 'du shes dang bral ba'i sems brten pos chos thams cad kyi rang bzhin mnyam pa nyid rnam par spros pa'i ting nge 'dzin rdzogs par bya ba'i phyir rjes su bslab par bya'o//de bzhin gshegs pa ni chos kyi sku yin gyi gzugs kyi sku ni ma yin te/ sgro btags pa'i rtog pa thams cad rab tu spangs pa'i phyir ro//bsam gyis mi khyab pa'i chos kyi sku mthong ba ni sangs rgyas mthong ba'o/ /ting nge 'dzin mthong ba'o/ /de bzhin du chos thams cad nam mkha'i ngo bo nyid do zhes rnam par rig nas khams gsum la mi brten pa'i sems ni bdud dang rnam par rtog pa thams cad kyis mi bskyod pa'i sems kyis ting nge 'dzin gyi bde ba la gnas pa'o//skye ba med cing 'gag pa med par chos rnams rang bzhin rtogs na yang / de bzhin gshegs pas gsungs pa'i tshul khrims kyi bslab pa'i gnas rnams ma nyams pas gang du sems can gyi don mthong ba der smon lam gyi dbang gis skye bar 'gyur te/tshul khrims dang ldan pa'i smon lam 'grub par 'gyur zhes gsungs pa'i phyir ro/ /bzod pa sgom par byed/ brtson 'grus rtsom par byed/ bsam gtan las mi nyams/chos rab tu 'byed pa'i mtshan nyid can gyi shes rab la slob pa ni ting nge 'dzin la rjes su slob pa yin no/ /ting 'dzin sems la nges rtog pa/ /kun du rnam par mi rtog nyid/ /de la yang dag rjes slob pa/ /bsgrub pa zhes 'dir bshad pa yin/ /ting nge 'dzin la rjes su slob pa'i le'u ste bcu gnyis pa'i bshad pa rdzogs so// //ting nge 'dzin la slob pa'i rjes su ting nge 'dzin gyi rang gi ngo bo nye bar bstan pa'i phyir/ ting nge 'dzin nges par bstan pa la mkhas par bya'o zhes bya ba la sogs pa gsungs te/ gang chos thams cad kyi ji lta ba bzhin nyid dang zhes bya ba ni ji lta ba bzhin ni rang bzhin gyis stong pa nyid bzhin no//de ni mi rtog pa log par mthong ba ma yin pa gang gis kyang nye bar ma bskyed pa ste/ skye ba med cing 'gag pa med pa nyid do/ /sems dang sems las byung ba dang / chos dang chos can dang / las dang bya ba la sogs pa'i yid la byed pa rgyun chad pa/phung po la sogs pa rjes su mi dmigs pa dmigs su med pa'i ngo bo nyid dran pa dang / blo gros dang / rtog pa dang / khrel yod pa dang / brtan pa dang / cho ga dang / spyod yul dang / nan tan gyi gnas su gyur pa/ byang chub sems dpa' thams cad kyi slob pa ting nge 'dzin las rab tu byung ba'o//de bzhin du sangs rgyas kyi yon tan gyi rten du gyur pa la de ni ting nge 'dzin nges par bstan pa zhes bya'o/ /nges par bstan pa 'di la rab tu gnas pa ni ting nge 'dzin dang bral bar mi 'gyur ro/ /sangs rgyas thams cad kyi yon tan dang mngon par mi 'bral te/sems 'khrul pa med pa yin/ lhun gyis grub pa yin/ sems can ma lus pa'i don byed par nus par 'gyur ro zhes bya ba'o/ /de nas zhes bya ba la sogs pas ni bcom ldan 'das kyis ting nge 'dzin gyi rang gi ngo bo gsungs te/ ting 'dzin mnyam pa med pa'i sa//zhes bya ba la sogs pa la/ mnyam pa med pa ni stong pa nyid do/ /zhi ba ni rang bzhin gyis zhi ba'o/ /phra ba ni rags pa la dmigs pa'i blos rtogs par mi nus pa'o/ /de nyid kyi phyir mthong dka'o/ /gang gi phyir 'du shes thams cad bcom pa ste de'i phyir ting nge 'dzin zhes bya'o//stong pa nyid ni spros pa thams cad dang bral ba'o/ /de'i phyir ting nge 'dzin zhes bya'o/ /de dag rgya cher bstan pa'i phyir/ rtog pa med cing rnam rtog med/ /ces bya ba la sogs pa la/ gzung ba dang 'dzin pa'i rnam par rtog pa rnam par spangs pa ni gzhi med pas bstan du med pa'o//sems kyang dmigs pa med pa ste/ /de phyir ting nge 'dzin zhes bya ba la/ mnyam par gzhag par gyur kyang rlom sems med pa ni/ rlom sems med pa ji bzhin pa de ni ting nge 'dzin zhes bsgrags so//chos ni rdul tsam yang yod med pas yod pa ma yin pa la dmigs par ga la 'gyur/ chos rnams dmigs su med pa ste/ /de phyir ting nge 'dzin zhes bya/ /zhes bya ba la/ sems kyis dmigs pa med pa zhes bya ba de yang rnam par rtog pa'o/ /chos de rnam par ma brtags pa//zhes bya ba ni sems dang sems las byung ba'i chos rnams kyang zhes byas nas so/ /sgra yis don rnams rab bstan te/ /sgra de nyid kyang dngos po med/ /mi bden pa yi sgra de yis/ /gang du ci zhig ston par byed/ /sgra ni brag ca lta bu ste/ /'khrul pa 'ba' zhig tsam nyid do//zhes bya'o/ /chos 'di rnams ni mi gnas te/ /zhes bya ba la/ gnas dang / gnas pa dang / gnas pa po rnams mi dmigs pa ni gnas pa med pa nyid gnas pa po zhes bya ba'i sgras brjod do/ /de bzhin du/ 'gro zhing 'chi 'phor brjod pa yi/ /zhes bya ba la sogs pa la/'chi 'pho dang 'gro ba dang bral ba ni ting nge 'dzin gyi ngo bo nyid yin no zhes brjod do/ /mnyam par bzhag pa'o zhes bya ba dang / mnyam par ma bzhag pa'o snyam pa'i rlom sems te/ rlom sems ma lus pa dang bral ba'i byang chub sems dpa' ni shin tu mnyam par gzhag pa nyid kyis bla na med pa yang dag par rdzogs pa'i byang chub thob par byed pa'o//zhi gnas dang lhag mthong mnyam pa nyid du 'jug pa'i byang chub sems dpa' ni ting nge 'dzin bsgom pa dang mngon par ldan pa zhes bya ba'o/ /yi ge dag gis 'jug par mi nus te//zhes bya ba la/ chos nyid la zhugs pa la yi ge'i nyams su myong ba yod par mi 'gyur te/ /yi ge dang skad dang sgra thams cad dang bral ba bsgom pa tsam gyis rtogs par bya ba'o/ /byang chub sems dpa' gang zhig ji skad bshad pa'i ting nge 'dzin bsgom pa la mngon par dga' bas sems gzhan ma yin pa ni nam mkha' dang mnyam pa'i sems so//gal te zhing 'di bskal pas tshig gyur kyang / /zhes bya ba la sogs pas ni ting nge 'dzin gyi nus pa ston pa yin no/ /gal te sangs rgyas kyi zhing 'di bskal pa sreg pa'i mes bsregs pas snod kyi 'jig rten thal ba bzhin du mngon sum du byas par gyur kyang ri'i mchog gi dbus su zhugs pa de mes mi tshig go//ci'i phyir bsreg bya'i dngos po yin na mi 'tshig ce na/ nam mkha' sngon chad nam yang mi 'tshig bzhin/ /zhes bya ba la sogs pa gsungs te/ bskal pa mi nyung bar 'jig pa'i bskal pa'i mes 'jig rten gyi khams 'di bsregs kyang nam mkha' ni tshig par mi 'gyur te/ngo bo nyid med pa'i phyir ro/ /de bzhin du nam mkha' dang mnyam pa'i ting nge 'dzin la snyoms par zhugs pa yang nam mkha' bzhin dmigs pa thams cad dang bral ba la yang bsreg par bya ba'i ngo bo mi dmigs pa'i phyir de tshig par mi 'gyur ro//gal te sangs rgyas zhing 'di 'bar gyur kyang / /zhes bya ba la/ sangs rgyas kyi zhing 'di bskal pa'i mes sreg par byed pa na ting nge 'dzin la gnas pas bskal pa'i me rab tu zhi bar bya ba'i phyir yid kyis sam tshig gis kyang rung /bskal pa bsreg pa'i me rab tu zhi bar gyur cig /ces bya ba brjod pa na skad cig de nyid la ma lus par rab tu zhi bar 'gyur gyi gzhan du ni ma yin no/ /sngags la sogs pa'i stobs kyis 'byung ba chen po bzhi ni gzhan du 'gyur yang srid de/ de'i gnyen po'i phyogs yin pa'i phyir ro//stong pa nyid la ni gnyen po'i phyogs med pa'i phyir/ gzhan du 'gyur ba med do/ /de yi rdzu 'phrul stobs kyang mtha' yas 'gyur/ /zhes bya ba ni ting nge 'dzin gyi mthus sangs rgyas kyi zhing dpag tu med par 'gro ba dang 'ong ba la sogs pa'i mtshan nyid can rdzu 'phrul rnam pa sna tshogs la byang chub sems dpa' de mngon sum du phyogs par 'gyur ro//spobs pa mtha' yas pas chos mtha' yas pa nyan pa dang / sprul pa mtha' yas pa spro bar byed pa dang / yon tan gyi tshogs mtha' yas pa nges par bsgrubs pa'i phyir/de tshe rdzu 'phrul khyad par thob/ /ces bya ba la sogs pa la/ nam zhig nyon mongs med gyur pa/ /de tshe rdzu 'phrul thob 'gyur te/ /gang gi tshe ting nge 'dzin gyi mi mthun pa'i phyogs su gyur pa nyon mongs pa rnam par spangs par gyur pa de'i tshe rdzu 'phrul la dbang thob par gyur pa na ji ltar 'dod pa bzhin rdzu 'phrul gyi cho 'phrul ston par 'gyur bas brtags pa'i dri ma thams cad spangs par gyur pa'i byang chub sems dpa'i ting nge 'dzin la bslab par bya'o//snod kyi 'jig rten rnam pa sna tshogs pa/ /'jig pa'i dus kyi mes bcom phyer byas kyang / nam mkha' bcom zhing phye mar byed mi nus//de bzhin ting 'dzin brtan thob rnal 'byor pa/ /ting nge 'dzin nges par bstan pa'i le'u ste bcu gsum pa'i bshad pa rdzogs so// //da ni lung bstan pa'i mtshan ma 'dzum pa yang dag par bstan pa'i le'u rab tu bsgrub pa'i phyir/ de nas zhes bya ba la sogs pa gsungs pa la/de nas zla 'od gzhon nur gyur pa la bcom ldan 'das kyis skabs phye ba dang / bcom ldan 'das la tshigs su bcad pas bstod pa ni yang dag pa'i yon tan brjod pa sngon du 'gro bas 'dzum pa mdzad pa yongs su zhu ba'i phyir/ sdug bsngal gtses pa'i sems can gzigs nas ni//zhes bya ba la sogs pa la/ 'dod chags dang / zhe sdang dang / gti mug rnams kyis kun nas dkrugs pa'i sems can rnams la gzigs nas de dag nye bar gzung bar bya ba'i phyir byang chub tu thugs bskyed par mdzad de/ sangs rgyas su gyur nas sems can ma lus pa rab tu dgrol bar bya'o zhes bya'o//dpa' bos bskal pa bye ba mang spyad de/ /zhes bya ba la/ sbyin pa dang / tshul khrims dang / bzod pa dang / brtson 'grus dang / bsam gtan dang / shes rab rnams bskal pa mi nyung bar goms par mdzad pa'i sbyin pa re zhig gsungs pa/glang po dang / mgyogs 'gro dang / shing rta'i mchog dang / grong khyer gyi mchog dang / rgyal srid kyi mchog dang / khyim dang / chung ma dang / bu dang / lag pa dang / rkang pa dang / yan lag gi mchog la sogs pa yang byang chub kyi phyir sbyin pa btang ngo //khyed kyi tshul khrims dri med rnam dag ste/ /zhes bya ba la tshul khrims 'chal pa'i dri ma spangs pas/ bdag nyid gtong zhing tshul khrims yongs mi nyams/ /zhes pa ni skyes pa'i rabs bzhin no/ /lus dang ngag dang yid kyang rab tu bsdams/ /bde gshegs sems dul khyod la phyag 'tshal lo//bzod la dgyes shing zhes bya ba la sogs pa la/ /sdug bsngal dang du len pa dang / gzhan gnod pa byed pa la ji mi snyam pa dang / chos la nges pa'i bzod pa rnams la rab tu gnas pa'i phyir lus dum bur byas kyang khro ba mi 'byung ste/bdag tu 'du shes med pa'i phyir ro/ /snying rje chen pos yongs su bsgos pa'i rgyud yin pa'i phyir bcad cing bcad pa nas 'o ma'i rgyun 'dzag par gyur pa'i ngo mtshar che ba khyod la phyag 'tshal lo zhes bya ba'o/ /stobs bcu dang ldan pa'i phyir thogs pa med pa'i ye shes kyis chos thams cad rang bzhin med par rtogs na yang thugs rje chen pos bskul ba'i phyir/sems can 'di dag ni phyin ci log tu zhugs pa'o zhes rjes su brtse ba'o/ /chos thams cad ni bdag dang bdag gi ba dang bral bas stong pa'o zhes rab tu shes na yang 'jig rten rnams de kho na nyid kyi lam las nyams par gzigs nas de dag gi phyin ci log spang bar bya ba'i phyir chos rnams rang bzhin gyis bdag med pa'i lam rab tu bstan nas sangs rgyas kyi byang chub la rab tu 'god par byed do zhes pa ni snying rje'i thabs la mkhas pa zhes gsungs so//zla ba skar mar bcas pa'i mkha' ltung zhing / /zhes bya bas ni phyin ci ma log pa gsungs pa nyid du bstan te/ gal te nam mkha' ltung ba'am sa la sogs pa'i 'byung ba rnams gzhan du 'gyur ba ni srid kyi bcom ldan 'das kyi bka' ni gzhan du gsung bar mi 'gyur te/de'i rgyu rmongs pa mi mnga' ba'i phyir ro/ /dmigs pa'i lta ba la mngon par zhen pa'i sems can gzigs nas de dag gi rmongs pa'i mun pa bsal ba'i phyir zab mo rang bzhin gyis zhi ba stong pa nyid ston par mdzad de/ dmigs pa med pa'i bslab pa la legs par bslabs pa'i phyir ro/ /khyod la 'khrul pa yod mi mnga'/ /zhes bya ba la/ phyin ci log tu ston pa'i 'khrul pa mi mnga' bar gsungs pa ni/ bdag tu 'du shes gang gnas pa/ /de dag 'khrul par 'gyur te/ mi mkhas pa zhes pa rmongs pa yod pa'i phyir ro zhes bya ba'i don to//bdag med pa shes pa rnams ni bdag med pa nyid ston par mdzad de/ de'i phyir yang dag pa gsungs pa/ yang dag pa'i chos la rab tu gnas pa yang dag par bden pa la gnas pa/ yang dag par spyod pa/yang dag par smon pa/ yang dag pa'i rgyu mthun pa/ yang dag pa'i tshig smra ba/ yang dag spyod pa phun sum tshogs/ /yang dag mtha' la shin tu bslabs/ /yang dag bsam pa yang dag spyod/ /yang dag mkhyen la phyag 'tshal lo/ /zhes bya bas yang dag pa gsungs par bstod nas ye shes gsungs pa nyid du bstod pa'i phyir/khyod kyi shes rab mnyam pa med/ /ces bya ba la sogs pa la/ rnam pa thams cad mkhyen pa'i ye shes kyi khyad par gsung ba nyid kyis na/ ye shes gsung la phyag 'tshal lo/ /zhes bya ba yin no//byams pa gtso bor gyur pa nyid du bstod pa/ sems can kun gyi bshes gnyen khyod/ /ces bya ba la sogs pa la/ dmigs pa med pa'i snying rje chen po'i rang bzhin shin tu goms par byas pas 'gro ba ma lus pa'i don bya ba'i phyir rab tu gnas pa'i ri rab bzhin du mi g.yo ba/'khor gyi dkyil 'khor thams cad zil gyis mnan nas bdag med pa'i seng ge'i sgra nges par bsgrags pas mu stegs pa rnams seng ges wa ji lta ba bzhin du gdug pa'i sems dang ldan pa gdul dka' ba drag po chen po yang thabs kyi stobs kyis khyod kyis 'dul zhes bya ba la sogs pa yin no//sngar bstan pa'i don nyid sdud par byed pas tshigs su bcad pas bstan par bya ba'i phyir/ 'khrul pa med pa'i chos tshig khyod ston te/ /zhes bya ba la sogs pa gsungs pa yin no/ /de ltar stobs bcu bden pa gsung la bstod nas ni//zhes bya ba la sogs pa la/ stobs bcu dang ldan pa la bdag gis bstod pa bgyid pa'i bsod nams nye bar bsags pa des shAkya seng ge ji lta ba bzhin du bdag kyang sangs rgyas su gyur cig ces zla 'od kyis smon lam btab pa'o/ /de nas zla 'od kyi bsam pa mkhyen nas bcom ldan 'das 'dzum pa mdzad do zhes bya ba la sogs pa la/stobs bcu'i sras kyi thu bo byams pas de zhus te/ /zhes bya ba la/ byang chub sems dpa' chen po byams pas 'dzum pa mdzad pa'i rgyu zhus pa ni/ 'dren pas gang gi slad du 'di ltar 'dzum pa mdzad//ces bya ba la/ 'dzum pa mdzad ma thag tu sa chen po yang g.yos so/ /lha la sogs pa nam mkha'i dkyil na gnas pa rnams kyang dga' ba'i sems kyis bcom ldan 'das la blta zhing gnas so/ /bde gshegs zil gyis ma non de lung bstan du gsol//zhes bya bas ni zhus pa'o/ /bskal pa mi nyung bar sbyin pa la sogs pa'i pha rol tu phyin pa la goms par byas pas sems can thams cad kyis sems kyi spyod pa mkhyen pa la bcom ldan 'das thogs pa med par 'jug pas de'i phyir lung bstan du gsol/ mi yi gtso bo la ni gang gis mchod/ /ces bya ba la sogs pa la/ bsod nams nye bar bsags pa'i phyir zhus pa'o/ /pad+ma bye ba 'dab ma bye bar ldan/ /zhes bya ba la sogs pas ni byang chub sems dpa'i gdan te/ de la byang chub sems dpa' chos smra ba mang po mchis pas mgon po la de'i slad du zhu'o//gang gis de bzhin gshegs pa la rab tu mchod na su zhig gis mchod par bgyis pas/ sangs rgyas byang chub ji ltar thob par 'gyur/ /zhes bya ba dang / gang gis phra zhing shin tu blta dka'i chos/ /zhes bya ba la sogs pa la gang chos shin tu phra ba stong pa zhi ba'o zhes rig nas bsgom pa de dag gi slad du bdag zhu'o//'das pa dang ma 'ongs pa dang / da ltar gyi sems can thams cad kyi sems kyi spyod pa la 'khrul pa'am bsnyel ba khyod la mi mnga' bas 'dzum pa mdzad pa ci'i phyir gsungs shig pa'o//'jig rten gyi khams sna tshogs nas byang chub sems dpa' thams cad gus pa dang bcas par 'ongs pa la spos kyi glang po ni sangs rgyas mi bskyod pa'i zhing nas so/ /bde ba can nas ni mthu chen thob dang spyan ras gzigs dbang phyug go//rje btsun 'jam dpal la ni yul nges pa bstan pa med de sangs rgyas kyi zhing thams cad kyi de bzhin gshegs pa thams cad kyi spyan snga na chos nyan pa'i phyir bdag nyid kyi lus rab tu ston pas so zhes bya bas so/ /de bzhin du byang chub sems dpa' che ba'i bdag nyid can rnams 'dir 'dus pa la snod ma yin pa ni gang yang ma mchis pas rgyu ma mchis par de bzhin gshegs pa 'dzum pa mi mdzad na 'dzum pa mdzad pa'i dgos pa bcom ldan 'das bshad du gsol/byams pa bskyed cing dga' ba 'phel bar bgyid/ /ces bya ba la sogs pa la/de bzhin gshegs pa'i bka' ni nyon mongs pa thams cad zhi bar byed pa yon tan thams cad skyed par byed pa ste/ de lta bur gyur pa'i gsung gi dbyangs kyis thugs rje can gyis seng ge'i sgra bsgrag tu gsol/ 'jig rten phan pa khyod kyi gsung gcig las zhes bya ba la sogs pa la/gcig cig bstan pa'i sgra las mos pa sna tshogs can rnams la skad sna tshogs kyis sems can thams cad bdag la ston to snyam du rang rang gi bsam pas rtogs so/ /de lta bus na gang gis 'dzum pa mdzad pa khyod kyis gsungs pa'o/ / sems can thams cad kyi nyon mongs pa rab tu zhi bar byed pa'i gsung ni dga' ba skyed par byed kyi 'dod chags ni ma yin no/ /byams pa skyed par byed kyi zhe sdang ni ma yin no/ /shes rab skyed par byed kyi gti mug ni ma yin no/ /sangs rgyas kyi gsung ni 'khor gyi dkyil 'khor las phyi rol du mi 'da' zhing thams cad kyi the tshom gcod pa'o//sa 'di gas par 'gyur yang srid/ rgya mtsho skems par 'gyur yang srid/ zla ba dang nyi ma ni ltung yang srid kyi yang de bzhin gshegs pa'i gsung ni gzhan du 'gyur zhing gsung ba ma yin no/ /bskal pa bye ba brgya stong dpag tu med par sangs rgyas nyid kyis de bzhin gshegs pa'i yon tan brjod kyang mthar thug par mi 'gyur na/gang gi don du 'dzum pa mdzad par gyur/ /ces bya ba'o/ /'dzum pas phye ba'i zhal mdzes rgyas pa don gyi dgongs pa can/ /nam mkha' dang mnyam mi g.yo stong pa gcig tu zhi ba nyid//su yi sems kyis rnam bsgoms thub pa'i dbang pos bstan du gsol/ /sna tshogs kyis stong khyod ni sna tshogs nyid du mthong bar 'gyur/ /'dzum pa mdzad pa bstan pa'i le'u ste bcu bzhi pa'i bshad pa rdzogs so// // 'dzum pa'i rgyu zla 'od lung ston pa gsol ba ni de nas de'i tshe zhes bya ba la sogs pa la/ zla 'od gzhon nur gyur pa 'di nyid kyis/ /zhes bya ba la sogs pa la zla 'od gzhon nur gyur pa 'di ni dri ma med pa'i 'od ces bya ba'i rgyal bar 'gyur ro zhes bya bar sbyar ro yang dag pa'i yon tan gyis bcom ldan 'das la yang dag par bstod pas 'jig rten thams cad kyis rab tu bsngags par 'gyur ro//bya rgod kyi phung po'i ri 'di nyid du sngon sangs rgyas bye ba brgya stong mang po la ting nge 'dzin gyi ngo bo rab tu shes par bya ba'i phyir bsnyen bkur byas so/ /de ni phyi ma'i dus na/ting 'dzin 'di ni shin tu rgyas byed 'gyur/ /zhes bya ba la/ 'di ni zhes pa ni ting nge 'dzin 'di nyid do/ /rgyas byed ces bya ba ni/ rgyas par byed par 'gyur ba'o/ /sangs rgyas bye ba mang pos yongs bzung ste/ /zhes bya ba ni/ de bzhin gshegs pa thams cad kyis rjes su bzung bas nye bar bsags pa'i bsod nams dang ye shes kyi tshogs nyid bstan to//'dren pa rnams la mchod pa mchog byed 'gyur/ /zhes bya ba ni/ mchod pa khyad par du 'phags pa byed par 'gyur ba'o/ /lag mthil skyu ru 'bru lnga bzhag pa bzhin//zhes bya ba ni/ lag mthil na 'dug pa'i skyu ru ra'i 'brus bu bzhag pa dang 'dra bar 'das pa dang ma 'ongs pa dang da ltar byung ba'i shes bya'i dkyil 'khor la phyin ci ma log par lta bar byed do/ /zla 'od gzhon nus ma 'ongs pa na sangs rgyas bye ba phrag stong dang / de'i phyi nas gang+gA'i klung gi bye ma snyed kyi bde bar gshegs pa rnams la mchod pa byas nas zhes bya ba ni mchod pa byas nas bla na med pa'i thams cad mkhyen pa'i ye shes thob nas/ dri ma med pa'i 'od ces bya ba'i de bzhin gshegs par 'gyur ro zhes bya ba'o/ /bdag nyid lung bstan pa thob nas/shing ta la bdun tsam du 'phags nas nam mkha' la 'dug ste/ ched du brjod pa 'di ched du brjod do/ /e ma rgyal ba chos mchog ston mdzad pa/ /zhes bya ba la sogs pa la/ bsam gyis mi khyab pa'i chos ston pa'i phyir dang / ye shes brten pa'i phyir dang /nyon mongs pa'i bag chags dang bcas pa spangs pa'i phyir dang / bdud kyi phyogs las rgyal ba'i phyir bcom ldan 'das la bstod pas bdag nyid rab tu dga' ba bstan pa'i phyir gsungs pa/ gter mchog dam pa bdag gis deng thob ste/ /zhes bya ba la/ gter gyi mchog ni chos kyi gter te mi zad pa'i ye shes kyi gter ro//de bdag gis rnyed pas ngan 'gro log par ltung ba thams cad spangs pa'o/ /the tsom gyi yid bdag la ma mchis so/ /sangs rgyas su 'gyur ram mi 'gyur snyam pa yang ma mchis kyi/ nges par sangs rgyas nyid du 'gyur ba'o//gser gyi kha dog ltar mdzes shing mtshan thams cad kyis brgyan pa'i phyag bdag gi spyi bor rab tu bzhag nas sangs rgyas nyid du bdag dbang bskur ro zhes bya ba'o/ /gang la ri bong 'dzin 'dra'i dri ma med pa'i mdangs mnga' ba/ /gcig tu dri ma rab tu zhi bar byed pas mdzes gyur cing //chos la bdag med rtogs pa'i blo ni dri ma med zhugs phyir/ /de nyid ma lus rig pa sangs rgyas byang chub tu lung bstan/ /'dzum pa lung bstan pa'i le'u ste bco lnga pa'i 'grel pa rdzogs so// //'khor ba'i nyon mongs pa'i nad rab tu zhi bar bya ba nyid la ting nge 'dzin bla na med pa'i sman pa chen po yin no zhes bya bar sngon byung ba'i le'u bstan pa'i phyir/de nas yang bcom ldan 'das kyis zhes bya ba gsungs te/ sems can thams cad srid pa'i sdug bsngal thams cad las thar bar bya bar 'dod pas chos thams cad kyi rang bzhin mnyam pa nyid rnam par spros pa'i ting nge 'dzin gyi rgyal po 'di mnyan par bya zhes bya ba nas/gzhan dag la yang rgya cher yang dag par rab tu bstan par bya zhes bya ba'i bar du sbyar ro/ /de ci'i phyir zhe na zhes bya ba ni gang gi phyir ting nge 'dzin thos pa la sogs pas srid pa'i sdug bsngal las grol bar 'gyur zhes bya ba'i som nyi bsal ba/gzhon nu ting nge 'dzin 'di ni ngan song thams cad las 'da' bar byed pa/ nad thams cad las rab tu thar bar byed pa yin zhes bya ba ni lan no/ /de nas bcom ldan 'das kyis tshigs su bcad pa'i dbyangs kyis sngon byung ba'i gtam bstan pa 'di yang dag par rab tu bstan to zhes bya ba ni sngon byung ba'i gtam gsungs pa ste/sngon chad spyad pa spyod pa dran pa ni/ /zhes bya ba la sogs pa ni sngon byang chub sems dpa'i spyad pa spyod pa nyams su myong ba de nyid dran pa'o/ /de dag nyid bstan pa/ seng ge rgyal mtshan zhes bya ba'i de bzhin gshegs pa'i bstan pa la/tshangs pas byin zhes bya ba'i dge slong mkhas pa chos smra ba chen po byung ngo / /nga ni de'i tshe blo gros rgyal po zhes bya ba'i rgyal po'i bur gyur pa la gso bar dka' ba'i nad kyis yongs su sdug bsngal bar gyur pa ste/ sman pa lnga brgya kun kyang nad dang rgyu dang gso ba la mkhas pa thams cad kyis de'i nad gso ba'i phyir brtson pa'i yid kyis gso bar byed kyang gso bar ma nus so//de nas chos smra ba'i dge slong des nga nad chen pos nyam thag pa thos nas nad 'dri ba'i phyir nga'i drung du 'ongs pa dang / nad 'di ni shin tu mi bzad pa ste sman gyis gso bar mi nus so snyam du rig nas ting nge 'dzin 'ding la bshad par gyur to//de nas ting nge 'dzin thos pa dang nga chos smra ba dang / chos la dga' ba skyes par gyur pas nam mkha' dri ma med pa lta bu chos nyid kyi ngo bo rtogs nas/ sprin dang khug sna la sogs pa dang bral ba ltar nad thams cad dang bral bar gyur to zhes bya ba'i ting nge 'dzin la rnal 'byor du bya'o//de'i tshe chos smra bar gyur pa de ni de bzhin gshegs pa dgra bcom pa yang dag par rdzogs pa'i sangs rgyas mar me mdzad yin no/ /rgyal po'i bu blo gros rgyal por gyur pa de ni bcom ldan 'das shAkya thub pa yin no/ / ting nge 'dzin nyams su myong ba'i mthu gsungs pa/ de bas gzhon nu khyod kyis phyi dus na/ /zhes bya ba la sogs pa la/ ma 'ongs pa'i sems can gyi spyod pa rab tu mthong nas bag yod pa'i gnas pas gnas par bya'o zhes slob par byed do/ /phyi ma'i dus na dge slong mang po dag ces bya ba la/dge slong 'dod pa can/ gdug pa can/ ma bsdams pa/ sdig pa'i sems dang ldan pa mang po dag ting nge 'dzin 'di rab tu spong bar 'gyur ro/ /de bzhin du phrag dog can gzhan gyi rnyed pa mi bzod pa/ dbang po g.yo ba/ dbang po ma bsdams pa'i rang bzhin can/ khyim gzhan la chags pa/rtag tu rnyed pa'i ched du kha gsag dang / tshul 'chos pa ched du byed pa de dag gis ting nge 'dzin 'di rab tu spong bar 'gyur ro zhes thams cad du sbyar bar bya'o/ /lag pa dang ni rkang pa rnam par rdob/ /ces bya ba la/ bya ba ma yin pa la shin tu zhugs pa rnams ting nge 'dzin rab tu spong ba 'byung bar 'gyur ro//gcig la gcig ni mgul 'khyud lag pa sbrel/ /zhes bya ba la/ 'di dag gis ni spyod lam mi 'dra bas 'jug pa nyid du ston par byed do/ /grong du spyod lam gzhan du sgyur bar byed/ /ces bya ba dang / mi rigs sbyor ba'i mtshan nyid 'di dag ste//zhes bya ba la/ mi rigs par sbyor ba'i mtshan nyid ni 'di dag yin no zhes shes par byas la spang bar bya'o/ /gang dag tshul khrims gnas shing yon tan ldan/ /zhes bya ba la sogs pa la/ gang dag tshul khrims la sogs pa'i yon tan thams cad kyis brgyan pa de la yongs su brnyas par 'gyur ro//gang yang gdug pa'i sems dang ldan pa de dag la ni mchod par 'gyur ro/ /de lta bas na gzhon nu khyod kyis so so'i skye bo la yid brten par mi bya'o zhes bya ba'o/ /nga ni yon tan dag gi bsngags brjod na/ /zhes bya ba la/ dge slong dag ni ji skad bstan pa'i yon tan dag la mi spyod de/byang chub po zhes bya ba'i sgra tsam gyis nan tan snying por byed pa dang bral ba'i phyir byang chub mi 'thob kyi/ nan tan snying por byed pa la ni byang chub thob par dka' ba ma yin no zhes bya bas thams cad du nan tan snying por bya'o zhes bya ba'i don to//ting 'dzin ye shes rdo rje yis/ /'dod chags zhe sdang rmongs chen gyi/ /nad rnams phye mar btag bya ba/ /'di la brtag par bya ba med/ /sngon byung ba'i gtam gyi le'u ste bcu drug pa'i 'grel pa rdzogs so// //sangs rgyas mang po mngon sum du bya ba'i sgo'i ting nge 'dzin nye bar bstan par bzhed nas/de nas gtam 'di mthar phyin pa dang zhes bya ba la sogs pa la/ sngon gyi gtam gyi sbyor ba mthar phyin pa dang / byams pas bcom ldan 'das la yid kyis tshigs su bcad pas zhu ba zhus pa zhes bya ba la/ bya rgod kyi phung por mchi bar gnang ba gsol ba'i phyir/rtag tu sangs rgyas gnas par bde gshegs mchi/ /zhes bya ba ni de bzhin gshegs pa mchod pa'i slad du'o/ /de bzhin gshegs pa yang thugs kyis lan 'debs pa ni/ ma pham bdud rnams pham byas khyod song shig/ /ces bya ba la/ ma pham pa zhes bya ba ni byams pa'i ming gi rnam grangs so//der song na 'gro ba ma lus pa'i don chen por 'gyur ro zhes bya ba ste/ bcom ldan 'das kyis byams pa la bskul ba'o/ /yid kyis bskor ba byas nas bya rgod phung po ga la ba der nye bar song ste/ nye bar song nas sngon bzhin du nye bar mkho ba'i mchod pa thams cad kyis brgyan cing sprul nas/skad cig de la zla 'od kyi khyim du zhugs par gyur to/ /zhugs nas bcom ldan 'das la yid kyis bskor ba byas nas rang gi stan la nye bar 'dug nas rig par byed pa ni/ ri yang lha rdzas yangs shing rgya che ba/ /zhes bya ba la sogs pa la/ gang gi phyir bcom ldan 'das kyis bdag brdzangs pa'i don de thams cad bdag gis bsgrubs lags so zhes gsol to//ri yang rin chen sna tshogs rnam par bkram/ /zhes bya ba ni bdag gis ri brgyan pa yang bgyis so/ /dbus su rin chen seng ge'i khri yang btsugs//zhes bya ba'o/ /de nas bcom ldan 'das kyis chos bstan pa'i gtam gyis yang dag par bstan/ yang dag par gzengs bstod/ yang dag par sbyar nas gdan las bzhengs te rdzu 'phrul gang gis gshegs pa de lta bu'i sangs rgyas kyi rdzu 'phrul gyis rgyal po'i khab nas byung ste/chu dron can gyi sgo nas bya rgod kyi phung po'i ri ga la ba der gshegs nas byams pas sprul pa'i seng ge'i khri la bzhugs nas dge slong gi dge 'dun gyis yongs su bskor te 'khor rgya mtsho lta bu la chos ston to/ /de nas zla 'od bcom ldan 'das ga la ba der logs su thal mo sbyar ba btud nas bcom ldan 'das la 'di skad ces gsol to/gal te zhus nas zhu ba lung bstan pa'i slad du zhes bya ba la sogs pa la/ gzhon nu de bzhin gshegs pas khyod la rtag tu skabs phye yis ci dang ci 'dod pa dris shig ces bya ba ni skabs sbyin pa'i tshig go/ /bcom ldan 'das la 'di skad ces gsol to//bcom ldan 'das byang chub sems dpa' chos du dang ldan na ting nge 'dzin 'di thob par 'gyur zhes bya ba la sogs pa la/ chos mang po la the tshom za ba bzlog pa'i phyir zhus so/ /gzhon nu chos bzhi dang ldan na zhes bya bas ni grangs nges pa bstan to/ /de lta na yang ma shes nas/bzhi gang zhe na zhes zhus pa'o/ /gzhon nu 'di la zhes bya ba la sogs pas ni lan yin te/ de yang zhes bya ba ni sems can gyi don dang / de bzhin nyid la shin tu dga' bas zhes byas nas so/ /'grogs na bde ba ni bde ba nyid do/ /dul zhing dul ba'i sa thob pa yin zhes bya ba ni pha rol gyis spyos sam spyos pa'i tshig nyes par smra zhing zhes bya ba la sogs pa thams cad bzod pa'o//rang gi las la lta ba nga rgyal bcom pas chos 'dod pa'o zhes bya ba rnams bsdoms nas chos gcig ces bya'o/ /gzhan yang zhes bya bas ni chos gnyis pa ston par byed do/ /tshul khrims dang ldan pa yin zhes bya bas ni tshul khrims spyir bstan pa yin la/dbye ba khyad par du bstan pa ni/ tshul khrims yongs su dag cing zhes bya ba la sogs pa ste/ tshul khrims dang mi mthun pa med pa rnam par dag pa'i tshul khrims so/ /blangs pa'i bslab pa'i gnas rnams ma nyams pas/tshul khrims ma zhig pa'o/ /ltung ba phra mo yang mi 'byung bas tshul khrims la skyon med pa'o/ /dmigs pa'i lta ba dang bral ba dang khams gsum la rten pa med pa'i phyir mi gnas pa'i tshul khrims zhes bya'o/ /tshul khrims dang brtul zhugs mchog tu 'dzin pa med pa'i phyir mchog tu mi 'dzin pa'i tshul khrims so//'khor gsum yongs su dag pa nyid yin pas/ tshul khrims mi dmigs pa'o/ /de ltar gzhon nur gyur pa'i tshul khrims ni/ 'phags pas bstod pa'i tshul khrims dang / mkhas pas bstod pa'i tshul khrims zhes brjod do/ / chos gnyis po 'di dang ldan na ting nge 'dzin 'di 'thob par 'gyur ro/ /gsum pa ni gzhan yang gzhon nu zhes bya ba la sogs pas gsungs te/ khams gsum la sems skrag pa dang sems dngangs par 'gyur te/ de la zhen pa bzlog pa'i phyir ro/ /sems skyo ba ni de'i phyir don du mi gnyer ro//don du mi gnyer bas mngon par mi dga'o/ /mngon par mi dga' bas ma chags ma zhen pa'o/ /ma chags ma zhen pas khams gsum la yid skyo na yang snying rje chen po yongs su bzung bas khams gsum gyi sems can sdug bsngal can rnams dgrol bar bya'o zhes spro ba bskyed de/ngan 'gror 'gro ba yang byang chub sems dpa' 'dod par bya ba yin no/ /bzhi pa ni gzhan yang zhes bya ba la sogs pa yin te/ dad pa can du 'gyur te/ bden pa dang dkon mchog la sems rab tu dad pa'o/ /dad pa dang ldan pas chos yongs su tshol bas mi ngoms pa yin te/ dad ldan yin phyir chos la brten//zhes pas mang du thos par 'gyur ro/ /shes rab ldan phyir de nyid rig /ces bya bas ci ltar thos pa'i chos rnams gzhan dag la yang dag par rab tu ston to/ /sems can 'di dag gis chos 'di thos na phyir mi ldog par gyur nas bla na med pa yang dag par rdzogs pa'i byang chub par 'gyur zhes bya'o//chos bzhi po 'di dag dang ldan pa'i byang chub sems dpas ting nge 'dzin 'di thob par 'gyur ro/ /myur du bla na med pa yang dag par rdzogs pa'i byang chub mngon par rdzogs par 'tshang rgya'o zhes bya ba la/ yang dag par rdzogs pa'i byang chub dang nye bar 'gyur ba'i rgyu gsungs so/ /de nyid kyi phyir de bzhin gshegs pa mang pos bshad pa ste/ ngas kyang de bzhin gshegs pa mang po'i thad nas thos nas gzhan la rgya cher yang dag par rab tu bstan to zhes bya ba la/ de nas bcom ldan 'das kyis sangs rgyas mang po nges par brjod pa'i ting nge 'dzin gyi sngon byung ba'i gtam bstan pa 'di zhes bya ba ni rang nyid kyis mnyes par byas pa'i de bzhin gshegs pa rnams tshigs su bcad pas bstod pa ni/dran pa bskal pa gzhal med dpag yas na/ /zhes bya ba la sogs pa la/ 'das pa'i dus kyi bskal pa grangs med pa 'das pa na/ dbyangs kyi yan lag sgra zhes bya ba'i de bzhin gshegs pa byung ste/ de'i sku tshe'i tshad brgya phrag drug cur gyur to/ /zhes bya ba ni grangs nges par bstan te/ skyo ba med par bstan pa'i dus bstan pa'i phyir ro/ /de bzhin du gzhan dag gis kyang grangs nges par blta bar bya'o//dbyangs kyi yan lag sgra dang por byas pa nas/ tshangs pa'i snyan pa bskal pa gcig la sangs rgyas nyis brgya byung ngo / /yang mtha' yas dbyangs nas brtsams nas chos kyi rang bzhin 'phags kyi bar du sangs rgyas brgya rtsa brgyad byung ste/de bzhin gshegs pa thams cad kyi sku tshe'i tshad ma bstan yang / tshogs dang chos kyi sku dang ni/ /'gro ba'i don ni spyod pa yis/ /sangs rgyas thams cad mnyam pa ste/ /sku tshe rigs dang tshad kyis min/ /zhes bya ba'i tshig gis yon tan dman par the tshom mi bya'o//byang chub phyir ni 'di dag ngas mchod de/ /zhes bya ba ni bla ma bsten pa dang / chos nyan pa la lhod pa med pa'i brtson 'grus kyis bsgom par bya'o zhes bstan to/ /dgos pa gzhan yang bstan ma thag pa'i chos kyi rang bzhin sangs rgyas 'phags kyi mtshan gang nyan pa de ni myur du ting nge 'dzin thob par 'gyur ro//'di ni mtshan pa yin te/ sangs rgyas gzhan rnams kyi mtshan bsgrags pa yang de bzhin du 'gyur ro/ /sangs rgyas 'di dag gi yang pha rol na/ /zhes bya ba la/ mi dbang dbyangs zhes bya ba'i de bzhin gshegs pa byung ste de bzhin gshegs pa de'i nyan thos kyi dge 'dun ni bye ba brgya phrag gsum mo//byang chub sems dpa'i dge 'dun ni/ bye ba khrag khrig stong phrag brgyad cu yon tan dpag tu med pa dang ldan pa byung ngo / /nyan thos dang / byang chub sems dpa' dang / lha la sogs pa'i 'khor la de bzhin gshegs pa mi dbang dbyangs zhes bya ba de chos ston to//de'i chos bstan pa thos pa rnams phyir mi ldog par gnas par gyur to/ /der rgyal po dpal gyi stobs zhes bya ba byung ste/ de la bu ni lnga brgya'o/ /btsun mo'i 'khor ni bye ba brgya phrag brgyad cu'o/ /bu mo ni bye ba stong phrag bcu bzhi'o//rgyal po de ston zla tha chungs kyi nya la yan lag brgyad pa'i gso sbyong dang ldan pas bu dang btsun mo dang bu mo dang / de las gzhan pa'i 'khor bye ba khrag khrig bcu dang bcas par bcom ldan 'das gang na ba der nye bar song ngo / /nye bar phyin pa dang thal mo sbyar ba byas nas bcom ldan 'das kyi mdun du 'dug pa dang /de'i bsam pa mkhyen nas ting nge 'dzin 'di ston par mdzad do/ /rgyal po des ting nge 'dzin 'di thos pa dang rgyal srid kyi dbang phyug spangs nas ji ltar 'ongs pa'i 'khor rnams dang bcas par rab tu byung bar gyur to/ /de rab tu byung nas kyang lo brgyad kyi bar du 'chag pa la mngon par brten nas/ting nge 'dzin la sogs pa'i sems dang mnyam par gzhag pa nyid kyis dus byas par gyur to/ /rgyal po de'i rigs su byung ba rdzus te skyes pa bzhin du mngal gyi dri mas ma gos pa gcig skyes te/ de'i pha ni brtan pa'i stobs zhes bya'o/ / ma ni blo gros chen mo zhes bya'o/ /rgyal bu gzhon nu de skyes pa tsam nyid na tshig 'di skad ces rgyal ba de chos 'chad dam ci bzhugs sam zhes bya ba ni de ltar 'tsho 'am zhes bya ba'o/ /ting nge 'dzin rab tu 'chad dam zhes bya ba la sogs pa la/ de bzhin gshegs pas de dag gi bsam pa mkhyen nas ting nge 'dzin 'chad dam zhes pa'o//rkyen rnams med pa ni rkyen rnams dang bral ba ste/ rten cing 'brel par 'byung bas ni rkyen dang bral ba'o/ /chos rnams kun zhes bya ba ni chos thams cad chos thams cad kyi rang bzhin mnyam pa nyid rnam par spros pa'i ting nge 'dzin gyi phyag rgyas btab pa nyid de chos nyid kyi ngo bo nyid mi g.yo bar byas pa'o//de lta bu'i ting nge 'dzin de rgyal bas 'chad dam ci zhes thams cad du sbyar bar bya'o/ /byang chub sems dpa'i nor bla na med pa'o/ /lus dang ngag dang yid dang lta ba rnam par dag pa'o//dmigs pa thams cad las yang dag par 'da' ba'o/ /skye ba med pa mngon sum du bya ba la 'jug pa'o/ /so so yang dag par rig pa la 'jug pa'i ye shes so/ /phung po dang khams dang skye mched la mkhas pa'o/ /yi ge rab tu dbye ba shes pa'o/ /rdzas su mngon par zhen pa las yang dag par 'da' ba'o//dga' ba dang rab tu dga' ba 'thob pa zhes bya ba la sogs pa dang gzhan yang de bzhin gshegs pa'i yon tan mang ngo / /ting nge 'dzin bsgoms pa las byung ba'i de bzhin gshegs pas mkhyen pa de dag thams cad ting nge 'dzin gyi mthu yin no zhes bya ba'o//gzhon nu de'i tshigs bcad de thos nas zhes bya ba la sogs pa la/ gzhon nu des de bzhin gshegs pa'i yang dag pa'i yon tan ji lta ba brjod pa'i tshigs su bcad pa thos nas khrag khrig stong phrag brgyad kyis ni sgra'i rjes su 'gro ba'i bzod pa thob par gyur to//de nas rgyal po stobs brtan gyis gzhon nu de la smras pa de bzhin gshegs pa de da ltar yang bzhugs so/ /'on kyang khyod la dri bar bya'o/ /su las khyod kyis ting nge 'dzin 'di thos/ /zhes bya ba la/ gzhon nus gang las thos pa gzhon nus smras pa/ rgyal po gsan du gsol zhes bya ba la sogs pa la/bskal pa gcig la yang de bzhin gshegs pa dpag tu med pa mthong ste de dag la bdag gis bsnyen bkur byas shing ting nge 'dzin yongs su bsgom pa'i phyir ting nge 'dzin gyi rang gi ngo bo yongs su zhus so/ /de nas bzung nas bskal pa bye ba brgya stong du yang skyes so cog tu skye ba dran zhing mngal gyi dri mas ma gos par rdzus te skye bar 'gyur ro//de'i phyir ma rmongs shing dran pa 'dus byas pa'i phyir ting nge 'dzin bsgom pa dang nam yang ma bral lo/ /chos dang chos smra ba la gus pa dang bcas pa dang ri mo dang bcas par byas so/ / gus pa dang bcas pa dang ri mo dang bcas pas gus pa dang ri mor bgyis pas bdag gi snyan pa dang / grags pa dang / yon tan 'phel bar 'gyur ro/ /'thab pa dang / rtsod pa dang / mi mthun pa la yang sems kyi rgyud ting nge 'dzin gyis yongs su bsgos par gyur pas khro ba la sogs pa dang bral nas sbyin pa dang /tshul khrims dang / bzod pa dang / brtson 'grus dang / bsam gtan dang / shes rab kyi pha rol tu phyin pa dang ma bral ba nyid du bzod pa rab tu gnas nas de bzhin gshegs pa sgra'i yan lag dbyangs kyi spyan sngar bdag gis bzod pa'i stobs kyis rtag tu gnas par bgyi'o zhes dam bcas so//rtag tu ni dus thams cad du bzod pa'i stobs kyis gnas par bgyi'o zhes pa'o/ /bdag bzod pa'i stobs de la gnas pa ni bdud kyis bdag la gtse ba rnam pa sna tshogs byas na yang bdag gi sems 'khrugs par ma gyur to//de lta bu'i yon tan dpag tu med pa bsgrags pa yang byang chub 'dod pa'i byang chub sems dpa' de ltar bslab par bya'o zhes bya ba'i don to/ /sngon gyi bskal pa du mar 'di bas ches mang ba'i dka' ba spyad pa ngas dran te/ de dang de brjod par mi nus so/ /da ni bdag bde bar gshegs pa'i drung du mchi'o zhes bya ba la des dus de nyid kyi tshe mngon par shes pa lnga bsgrubs nas rdzu 'phrul gyis de bzhin gshegs pa'i thad du song ste/phyin nas bcom ldan 'das kyi zhabs la mgo bos phyag byas nas mdun du 'dug par gyur te zhes bya ba la sogs pa la/nga ni rgyal po dpal gyi stobs su gyur/ nga'i bu rnams ni chos skyong bar gyur pa de dag go/ /bu mo gang yin pa de dag ni mya ngan las 'das so/ /rgyal po stobs brtan ni zas gtsang ma'o/ /skyed pa'i ma gang yin pa de ni lha mo sgyu ma'o/ /de ltar smon lam gyi stobs kyis de dang der skye ba bzung ngo //ngas de ltar brtson 'grus brtsams pas ting nge 'dzin bsgrubs so/ /byang chub sems dpa' rnams kyis kyang de bzhin du brtson 'grus brtsams la ting nge 'dzin 'di bsgrub par bya'o zhes bya ba yin no/ /sangs rgyas dpag tu med pa nyer bsten nas//ting 'dzin rgyal po nga yis bde bar thob/ /ma bslabs pa dag bslab phyir rab bstan te/ /de nas nga ni bde gshegs thub dbang gyur/ /sangs rgyas mang po las ting nge 'dzin gyi sgo nges par bsgrubs pa'i le'u ste bcu bdun pa'i 'grel pa rdzogs so// // ting nge 'dzin rjes su yongs su gtad pa'i le'u bstan par bzhed nas/ de nas yang bcom ldan 'das kyis zhes bya ba la sogs pa gsungs te/ byang chub sems dpa' gang ting nge 'dzin 'di 'dzin pa dang zhes bya ba nas/ gzhan dag la yang rgya cher rab tu ston pa zhes bya ba'i bar na gnas pa/de la yon tan gyi phan yon bzhir rig par bya ste zhes bya ba la bsod nams zil gyis mi non par 'gyur zhes bya ba ni khams gsum na spyod pa'i sems can rnams kyi bsod nams pas bsod nams lhag pa'i phyir ro/ /bdud dang mu stegs la sogs pa phas kyi rgol ba thams cad kyis mi rdzi ba'i ye shes kun tu rtogs pa'i phyir ro//'di nyid kyi phyir ye shes dpag tu med par 'gyur/ spobs pa mtha' yas par 'gyur te zhes bya ba'o/ /tshigs su bcad pas phan yon rgyas par bstan pa bshad pa'i phyir gsungs pa ni/ bskal pa bye ba mtha' yas dpag tu med//stobs bcus de yi phan yon brjod na yang / /zhes bya ba'i bar du ste/ de bzhin gshegs pa nyid kyi rnam pa thams cad mkhyen pa'i stobs kyis thams cad mkhyen par spyod kyi/ phan yon mthar thug par brjod pa lta zhog cha tsam bgrang bar yang mi nus te/ ji ltar rgya mtsho chen po las chu thigs pa gcig blangs pa bzhin no zhes bya ba la/zla 'od kyis phan yon shin tu rgya che ba thob pas sems shin tu dga' nas thos pa yang shin tu rnyed par dka'o snyam du bsams te/ bcom ldan 'das la zhus pa ni/ /phyi ma'i dus na su dag ni/ /zhes bya ba la sogs pa la/ bcom ldan 'das kyis bka' stsal pa/gzhon nu bshad kyis mnyan par gyis/ /zhes bya ba la sogs pa la/ gang dag chos nyid la nan tan gyis zhugs pa de de bzhin gshegs pa la mchod pa yin/ byams pa'i sems dang ldan pa yin/ bslab pa la gus pa yin te mdo 'di nyid nyan par 'gyur ro//gang dag sngon de bzhin gshegs pa la mchod pa byas pa de dag nyan par 'gyur ro/ /gang yang sngon gyi tshe rabs su mu stegs can du gyur pa de dag ma dad nas spong bar 'gyur ro/ /nga'i bstan pa la rab tu byung ba rnyed pa dang bkur sti 'dod pa de dag kyang rab tu spong bar byed do/ /gang gis 'dzam bu'i gling gi mchod rten thams cad bshig pa bas yang gzhan zhig gis mdo sde 'di spangs na/'di'i sdig khyad par du 'phags shing che'o/ /de bzhin du gang gis gang+gA'i klung gi bye ma snyed kyi dgra bcom pa bsad pa bas gang mdo sde 'di spong bar byed pa de'i sdig pa shin tu che ba yin no//khyed la su dag spro ba yod/ /ces bya ba la/ phyi ma'i dus mi bzad pa na dam pa'i chos 'jig pa'i tshe mdo sde 'di 'chad par spro ba khyed las su yod ces bka' stsal ba dang / zla 'od kyis zhus pa de bzhin gshegs pa mya ngan las 'das nas bdag gi lus dang srog la yang ltos pa med par gcig tu chos la dga' bas/mdo sde 'di rgya cher rgyas par bgyi'o zhes zhus so/ /gzhan byang chub sems dpa' chos smra ba brgyad brgya yang stan las langs te bdag cag gis kyang phyi ma'i dus na mdo sde rin po che 'di gzung bar bgyi'o zhes bya ba'o/ /lha la sogs pa rnams kyang bcom ldan 'das la thal mo sbyar nas bdag cag gis kyang chos 'dzin pa bsrung bar bgyi'o zhes gsol to//mdo sde 'di rab tu bshad pa na gang+gA'i klung gi bye ma snyed kyi grangs dang mnyam pa'i sangs rgyas kyi zhing rab tu g.yos par gyur to/ /sangs rgyas kyi zhing de dag nas 'ongs pa de dag kyang de bzhin gshegs pa'i byin gyi rlabs kyis chos 'di lta bu thos nas sems can bye ba dpag tu med pa sangs rgyas kyi ye shes la rab tu gnas par gyur to//sangs rgyas kyi zhing 'di na gnas pa mang po yang byang chub tu sems bskyed de de bzhin gshegs pa la mchod pa byas nas sangs rgyas nyid du lung bstan pa nges par thob par gyur to//de bzhin du dge slong dang / dge slong ma dang / dge bsnyen dang / dge bsnyen ma rnams kyis kyang mdo sde rin po che 'di thos nas nges par sangs rgyas kyi byang chub tu lung bstan to zhes bya ba yin no/ /gang su dag phyi ma'i dus na mdo sde 'di nyan pa de dag kyang nges par sangs rgyas nyid du 'gyur ro zhes bya ba nyid yin no//ting 'dzin rgyal po ma lus don ldan pa/ /byang chub mchog gtso'i rgyur gyur rab brtan pas/ /rgyal ba kun gyis rjes gdams rab gtad de/ /'gro ba kun gyi dngos grub cher 'byung shog// ting nge 'dzin yongs su gtad pa'i le'u ste bco brgyad pa'i bshad pa rdzogs so// //sangs rgyas kyi chos bsam gyis mi khyab pa nges par bstan pa bshad par bzhed nas/ de nas yang bcom ldan 'das kyis zhes bya ba la sogs pa gsungs te/ gzhon nu de lta bas na byang chub sems dpa' chos thams cad kyi rang bzhin mnyam pa nyid rnam par spros pa'i ting nge 'dzin gyi yon tan gyi rjes su bsngags pa thos nas mi skrag par 'dod pas bsam gyis mi khyab pa'i sangs rgyas kyi chos rnams la mkhas par bya'o//gzhan du na shin tu zab pa'i chos thos na kun du rmongs par 'gyur ro//sangs rgyas kyi chos bsam gyis mi khyab pa thos na mi skrag /mi dngang / dngang bar mi bya'o zhes bya ba la sogs pa la chung ngu dang / 'bring dang chen po'i dbye bas mi skrag pa la sogs pa'i tshig gsum gyi don blta bar bya'o/ /bcom ldan 'das ji ltar na byang chub sems dpa' sangs rgyas kyi chos bsam gyis mi khyab pa la mkhas par 'gyur ba lags zhes bya ba ni zla 'od kyis bcom ldan 'das la zhus pa'o//chos thams cad rang bzhin gyis mnyam pa nyid rnam par spros pa'i ting nge 'dzin 'di nyan cing thos nas zhes bya ba la sogs pa nas gzhan dag la yang rgya cher yang dag par rab tu ston na zhes bya ba'i bar du'o//gzhon nu byang chub sems dpa' de sangs rgyas kyi chos bsam gyis mi khyab pa nges par bstan pa la mkhas par bya'o zhes bya ba'o/ /sangs rgyas kyi chos thams cad bsdus pa'i ngo bo chos thams cad kyi rang bzhin mnyam pa nyid rnam par spros pa'i ting nge 'dzin zhes bya ba 'di lta bu'i mchog tu gyur pa'i phan yon zla 'od kyis thos pas/ting nge 'dzin gyi rgyal po 'di rab tu thob par gyur to/ /byang chub sems dpa' sems dpa' chen po gzhan rab tu mang pos kyang mngon par shes pa'i shes pa thob par gyur to//zhes bya ba la sogs pa la ting nge 'dzin 'di'i mthu lhag par gyur pa'i dbang gis sa g.yo ba dang / lha la sogs pas me tog gi char 'bebs pa la sogs pa'i ngo mtshar ni sems can dpag tu med pa'i don byed par shes par bya'o zhes bya ba'o/ /de nas de nyid du dri za'i bu gtsug phud lnga pa zhes bya ba sil snyan lnga brgya dang bcas par nam mkha'i dkyil nas babs nas bcom ldan 'das kyi spyan sngar 'dug par gyur te bsnyen bkur dang g.yog byed do//bcom ldan 'das kyis rdzu 'phrul mngon par 'du bya ba bstan pa nyid kyis zla 'od kyi sems sangs rgyas kyi chos la gcig tu gzhol bar nges par bstan pa la mkhas pa thob par bya ba dang gtsug phud lnga pa can yang rgyud la mkhas pa thob par bya ba'i phyir ro//de nas pi wang dang sil snyan rnams las bsam gyis mi khyab pa'i sangs rgyas kyi chos 'di la nges par gzhol bar 'gyur ba'i tshigs su bcad pa'i sgra sangs rgyas kyi byin gyi rlabs kyis byung bar gyur te/skra gcig khyon la sangs rgyas mang po ni/ /zhes bya ba la sogs pa la rmi lam gyi nang du lha la sogs pa'i bde ba nyams su myong ba dang / bzhon pa sna tshogs dang / gzhal yas khang la sogs pa mthong yang khyim der de dag zhugs pa yang ma yin de nas phyir byung ba yang med do//de bzhin du rang gi sems tsam las tha mi dad pa'i dngos po don gyis stong pa dmigs su med pa/ rmi lam du snang ba ltar ma rig pa'i bag chags kyis bsgos pa'i sems nyid phyin ci log tu dmyal ba la sogs par rab tu snang ngo //byang chub kyi sems dang / pha rol tu phyin pa'i bag chags kyis bsgos pa'i sems la ni de bzhin gshegs pa la sogs par snang bar 'gyur ro zhes bya'o/ /skra gcig khyon la ste/ spu'i khung bur sangs rgyas mang po gang+gA'i klung gi bye ma'i grangs dang mnyam par rab tu snang ngo //sangs rgyas kyi zhing yang de snyed nyid de phan tshun ltos pa med pa nyid du gnas so/ /'gro ba lngar skyes par gyur pa'i dmyal ba dang / dud 'gro dang / yi dags dang / lha dang / mi rnams kyang ngo / /'dres pa med cing gnod par mi 'gyur te zhes bya ba ni 'dres shing 'dus pa yang med/gcig la gcig gnod pa yang med de/ rang rang gi dbang du snang ba tsam gyis mthar thug pa'i phyir ro/ /ri dang / chu klung dang / nags tshang tshing la sogs pa rnams kyang gcig la gcig dogs pa med par shes so//'gro ba lngar snang ba spyir bstan nas rgyas par so sor bstan pa'i phyir/ de yi gnas su ri bo du ma ste/ /zhes bya ba la sogs pa la/ khor yug dang / khor yug chen po dang / ri dang / ri rab dang / btang bzung dang / btang bzung chen po dang / 'bigs byed dang /bya rgod kyi phung po la sogs pa'i ri rnams kyang ngo / /de bzhin du dmyal ba tsha ba dang / rab tu tsha ba dang / thig nag la sogs pa rnams dang / der skyes pa rnams la sdug bsngal gyi rnam pa rab tu snang zhing sdug bsngal nyams su myong ngo / /de yi gnas na lha yi gzhal med khang //zhes bya ba la/ lha rnams gzhal med khang na gnas shing bde ba nyams su myong ngo / /de yi gnas su sangs rgyas rnams skye zhing / /zhes bya ba la/ sangs rgyas rnams skye zhing chos kyi 'khor lo bskor ba la sogs pa'o/ /ye shes bral ba dag gis de mi mthong / /zhes bya ba ni sangs rgyas mthong ba'i dge ba'i rtsa ba dang bral ba rnams kyis so//de'i gnas nyid na dam pa'i chos nub cing de bzhin gshegs pa mya ngan las 'das par yang thos so/ /de bzhin du/ 'dren pa bzhugs te chos kyang ston zhes bya ba la sogs pa la/ de la kha cig ni dpag tu med par tshe 'du byed pa'o//kha cig ni thung ba nyid du'o/ /gnas der la la 'di snyam du 'du shes te zhes bya ba la/ kha cig ni 'di snyam du bdag gis de bzhin gshegs pa mchod pa byas so zhes 'du shes shing / 'du shes su 'dzin pas dga' ba'i 'du shes 'jug par gyur kyang ma skyes pa la mchod par nus pa ma yin no//mthong ba la sogs pa'i tha snyad rnams ji ltar yin zhe na/ rmi lam gyi dpes thams cad grub bo zhes bya bar/ mi dag bdag gi khyim na rmi lam bzhin/ /zhes bya ba la/ rang gi khyim na nyal ba zhig gis rmi lam du lha la sogs pa'i bde ba nyams su myong zhing 'dod pa'i yon tan lngas ngoms pa med pa nyid las sad par gyur na 'dod pa'i yon tan lnga mthong ba med do//rmi lam du mthong ba de nyid ma skyes pa mi bden pa'o zhes shes so/ /de bzhin du mthong ba dang / nyams su myong ba dang / rnam par shes pa'i tha snyad rnams kyang brdzun pa'i bag chags kyis sprul pa yin gyi don dam pa ni ma yin no zhes bya ba la ting nge 'dzin gyi ngo bo nges par rtogs nas chos nyid de kho na nyid la g.yo bar mi 'gyur ro zhes bya ba'o//yul rnams la sdug pa dang mi sdug pa'i char 'byed pa dang bral ba de ni 'dzin pa dang / dor ba med pas bse ru bzhin du the tshom med par lam gang yin pa de rnam par sgom par byed pa'o//chos thams cad stong pa'o zhes ye shes nges par bsgrub pa/ de yi spobs pa dag ni mtha' yas 'gyur/ /zhes bya ba'o/ /sdug pa dang mi sdug par kun du chags pa med pa de la ni sdug pa dang bral ba'i sdug bsngal dang mi sdug pa dang phrad pa'i sdug bsngal gyi mthar byas 'di gnyis rab tu spangs nas ni chos nyid gcig pu la brten par bya'o//gang zhig chos 'di thos nas chags byed cing / /zhes bya ba la/ mya ngan las 'das pa dang rjes su mthun pa ni chos nyid yin no zhes thos na rjes su chags pa'i dbang gis mngon par zhen no//chos ma yin pa ni dmyal ba la sogs pa'i rgyu yin no zhes khong khro ba skyed par byed do/ /chos dang chos ma yin pa mnyam pa nyid du ma rtogs pas nga rgyal dang rgyags pa'i dbang gis sdug bsngal nyams su myong bar 'gyur zhes bya'o/ /mnyam pa nyid la gnas pa rnams ni sdug pa dang mi sdug pa las grol ba nyid du gnas pa yin no//de dag ni tshul khrims yongs su dag pa dang / bzod pa dang / brtson 'grus dang / bsam gtan dang / shes rab la rab tu gnas pa zhes bya'o/ /gang dag phyin ci log gi lam la zhugs pa de dag ni bdud kyi zhags pas bzung ba zhes blta bar bya'o//zla 'od gzhon nus tshigs su bcad pa'i don khong du chud pas bsam gyis mi khyab pa'i sangs rgyas kyi chos zab mo rnams la gcig tu nges pas nges par brten pa la mkhas pa thob par gyur to/ /dri za'i bu gtsug phud lnga pa can gyis kyang sgra'i rjes su 'jug pa'i bzod pa thob par gyur to//zhes bya ba ni de bzhin gshegs pa'i byin gyi rlabs kyis chos nyid rab tu rtogs par gyur zhes bya ba'i don to/ /ri bong 'dzin pa'i 'od ltar dkar ba'i dka' 'grel grags pa'i mdangs ldan pa/ /'jam dpal dbyangs kyi zhabs kyi pad+ma la gus tsam gyis rab bsgrubs la/mdo sde'i dbang po'i rgyal po las skyes skye bo ma lus phan don du/ /gal te legs par mthong na ye shes pa la brten pa'i don/ sangs rgyas kyi chos bsam gyis mi khyab pa nges par bstan pa'i le'u ste bcu dgu pa'i 'grel pa rdzogs so// //dbang po tog gi rgyal mtshan rgyal po'i le'u nges par bstan par bzhed nas/ de nas yang bcom ldan 'das kyis zhes bya ba la sogs pa gsungs te/ dge ba'i rtsa ba dang / bslab pa dang / yon tan gyi chos gdon mi za zhing tshul khrims shin tu yongs su dag par bya'o zhes bya ba la/tshul khrims la rab tu gnas nas sangs rgyas kyi yon tan thams cad mchog tu mthar thug par nges par sgrub par byed do/ /tshul khrims kyi rab tu dbye ba bstan pa'i phyir/ 'du 'dzi med pa mang zhing zhes bya ba la/ dben pa la dga' ba'i tshul khrims rnam par dag par 'gyur ro//sdig pa'i grogs po yongs su spangs pa dang / dge ba'i bshes gnyen la brten pa dang / dam pa'i chos nyan pa dang / yongs su 'dzin pa dang / 'chang ba dang / mngon par dga' bas snying rje chen pos sems can thams cad nges par gzung ba'i phyir byang chub tu sems bskyed pa la sogs pa thams cad tshul khrims kyi yan lag yin no zhes bya ba'o//brtson 'grus brtsams shing lus dang srog la mi lta bas rgyun mi 'chad par dge ba'i bshes gnyen btsal bar bya'o/ /g.yo med pa ni bcos ma ma yin pa'i sems kyis dge ba'i bshes gnyen las snying rje chen po la 'jug pa'i chos kyi rnam grangs 'di mnyan par bya/gzung bar bya zhes bya ba nas/ gzhan dag la yang rgya cher yang dag par bstan par bya'o zhes bya ba'i bar du'o zhes bya ba la/ gang gi tshe dge ba'i bshes gnyen tshol ba dang /sri zhu bya ba dang / g.yog bya ba la yid mi skyo bar gyur pa de'i tshe bde bar bla na med pa yang dag par rdzogs pa'i byang chub mngon par 'tshang rgya bar 'gyur te/ bla na med pa yang dag par rdzogs pa'i byang chub kyang dge ba'i bshes gnyen la rag las pa nyid yin na snying rje chen po la 'jug pa'i chos kyi rnam grangs 'di lta smos kyang ci dgos zhes bya ba'o//sngon byung ba bstan pa tshigs su bcad pa'i dbyangs kyis yang dag par rab tu bstan zhes bshad pa ni/ 'das pa'i bskal pa bye ba mang po ste/ /zhes bya ba la sogs pa la/ 'das pa'i bskal pa dpag tu med pa na de bzhin gshegs pa dbang po tog gi rgyal mtshan rgyal po zhes bya ba des ting nge 'dzin bshad de/chos thams cad bdag dang / srog dang / gang zag dang / shed las skyes dang / shad bu la sogs pa'i byed pa pos stong pa sgyu ma dang / smig rgyu dang / gzugs brnyan dang / chu'i zla ba dang 'dra ba la 'chi ba'i dus byed pa na sems can dang srog la sogs pa 'jig rten pha rol du 'gro ba yang med la las dang 'bras bu rnam par nyams pa yang med de/ ji ltar me long gi dkyil du bzhin gyi kha dog nag po dang / dkar po dang /thig le dang / 'dab ris la sogs pa mthong ba dang 'dra bas las dang 'bras bu'i snang ba yang sems [(]gyi [,]kyi [)]rgyud la de dang 'dra'o zhes bya ba yin no/ /rigs pa'i tshul gyis sgo ste khyab byed du khas blangs pas skye ba dang / 'chi ba dang / 'jig rten pha rol du 'gro ba dang /byed pa po dang / spyod pa po la sogs pa mi rigs so zhes bya ba yin te/ gang la yi ge'i tshig kyang mi dmigs pas stong pa nyid kyi phyir ro/ /sangs rgyas byang chub nyid na bcom ldan mkhyen/ /zhes bya ba ni de bzhin nyid kyi ting nge 'dzin to/ /de lta bu'i ting nge 'dzin bcom ldan 'das kyis bshad pa'o//de nas bdag gis ting nge 'dzin 'di thos nas nyon mongs pa'i nad ma lus pa rab tu zhi bar byed pa'o/ /byang chub sems dpas bsgrubs pa'i nor yin te/ /zhes bya ba la sogs pas ni ting nge 'dzin gyi yon tan gyi khyad par bstan pas 'bras bu'i khyad par 'dod pa rnams 'jug par bya ba'i phyir ro//de na dge slong chos smra 'dug pa dag /ces bya ba la/ der chos 'chad pa'i tshe tshul khrims kyi spyod pa phun sum tshogs pas chos 'di thos nas sangs rgyas nyid dang rjes su mthun pa'i sems bskyed par gyur to//de'i bsam pa mkhyen nas khyod byang chub tu sems bskyed de/ rim gyis pha rol tu phyin pa thams cad yongs su rdzogs par byas nas sangs rgyas nyid du nges par 'gyur ro zhes chos smra ba'i dge slong lung bstan pa de ni gzhan ma yin gyi nga nyid yin no zhes bya bas ni thams cad du ting nge 'dzin btsal ba dang /dge ba'i bshes gnyen la gcig tu brten par bya'o zhes bstan par 'gyur ro/ /gus pas ting 'dzin thos nas rnam par bsgoms/ /sangs rgyas gyur nas 'gro ba'i don bya zhes/ /de ltar ba sems nas bdag gzhan don gyi blos/ /de yi dka' 'grel don byed grags pas byas//dbang po tog gi rgyal mtshan gyi rgyal po'i le'u ste nyi shu pa'i 'grel pa rdzogs so// //dmigs pa'i lta ba can gyi sdig pa'i grogs po yongs su spang bar bya ba'i ched du sngon byung ba nye bar bstan par bya ba'i phyir/ /de nas bcom ldan 'das kyis zhes bya ba la sogs pa gsungs te/gzhon nu de lta bas na zhes bya ba nas brtsams te sngar bstan pa'i rjes su 'brel bar/ de nas bcom ldan 'das kyis de'i tshe sngon byung ba'i gtam gyi rgyud tshigs su bcad pa'i dbyangs kyis yang dag par rab tu bstan pa zhes bya ba la/ de dag nyid bstan par bya ba'i phyir/sngon byung 'dzam bu'i gling zhes bya ba 'dir/ /zhes bya ba la sogs pa la/ sngon byung ba 'dzam bu'i gling 'dir tshong dpon gyi khye'u gnyis byung ste zhes bya ba ni/ tshong dpon gyi khye'u gnyis de bzhin gshegs pa'i bstan pa la rab tu byung bar gyur to/ /rab tu byung nas kyang 'dzin pa thams cad rnam par spangs nas bse ru ltar bsam gtan dang rjes su mthun pa'i nags su gnas nas bsam gtan gyi dga' ba dang /bde ba nyams su myong nas rdzu 'phrul dang ldan zhing bsam gtan thob par gyur te/ sems can rnams kyi dbang po dang bsam pa rnam par shes nas phan tshun chos kyi 'brel pa'i gtam byed cing gnas so//de nas rgyal po stobs dang bcas pa ri dgas shor du song ba las/ de dag dang nye ba'i dgon par song ngo / /mi'i bdag pos de dag mthong nas rab tu dga' ba skyes so/ /mngon par phyag 'tshal nas mdun du 'dug pa dang /de'i bsam pa dang rjes su mthun pa'i gtam rgyal po de la smras pa rgyal rigs nyon zhes bya ba la sogs pa la/ sangs rgyas 'byung ba mchog tu rnyed par dka'i/ /zhes bya ba la/ sangs rgyas 'byung ba ni shin tu dkon pa yin pas de'i phyir bag yod par gyur pas chos bsrung ba la 'bad par gyis shig ces bya ba'o//tshe 'di ri'i chu bo bzhin du myur du 'gro zhing mi gnas pa bzhin du na ba dang / rga ba dang / 'chi ba dang / mya ngan dang / smre sngags 'don pa dang / sdug bsngal ba dang / yid mi bde bas nye bar gtses pa de'i tshe chos ma gtogs pa'i skyabs gzhan med do//de'i phyir chos skyong bar gyur pas phyi ma'i dus shin du 'jigs su rung ba de'i tshe de bzhin gshegs pa'i bstan pa 'jig pa na/ ji ltar 'jig par mi 'gyur ba de ltar mdzod cig /ces de dag gi rnam pa mang pos mi'i bdag po la gdams so//de nas gdams ngag thos pas dga' ba dang yid bde ba skyes nas de dag gi rkang pa la mngon par phyag 'tshal nas/ rang gi pho brang du song ngo / /gzhan dmigs pa'i lta bas shin tu g.yen spyo ba'i dge slong mang po/ /rnyed pa dang / bkur sti 'dod pa rnams/ de'i khab tu zhugs pa dang /de dag gi dbang po ma bsdams par mthong nas/ mi'i bdag po des de dag la gus par ma byas so/ /de nas dge slong mang po brkam zhing chags/ /zhes bya ba la/ shin tu brkam pa chags pa can/ de bzhin gshegs pa'i bstan pa las nyams pa de dag gis mi'i bdag po de phyin ci log tu 'dzin du 'jug go//chos smra ba gnyis po 'di ni chad par lta ba yin te/ mya ngan las 'das pa'i lam ston pa yang ma yin la/ phung po dang / khams dang / skye mched rnams ston par 'dod pas/ dge ba dang mi dge ba'i las kyang med la/ de med pas/mtho ris dang / ngan song la sogs pa'i 'bras bu nyid kyang ring ba nyid du spangs pa yin no/ /gal te ma bsad na yang yul gzhan du spangs shig /de ltar gyur na de bzhin gshegs pa'i bstan pa ring du gnas par 'gyur ro/ /zhes zer ro/ /de dag gi tshig gis mi'i bdag po the tshom skyes shing bsad pa'i bsam pa yang byung ba dang mi'i bdag po de la rtag tu rjes su 'brel ba'i lha zhig yod pas mi'i bdag po 'di lta bu'i sems ma skyed cig /sdig pa'i grogs po'i tshig gis sdig pa'i sems ma skyed cig /ces bskul ba dang / rgyal po de lha'i tshig gis bskul bas de bzhin gshegs pa'i bstan pa las mi g.yo ba'i dran pa yang byung ngo //de'i spun zla dge slong de dag gis log par 'dzin du bcug pas bsad par bya'o snyam nas de stobs dang bzhon pa dang bcas par gang na chos smra ba gnyis gnas pa der phyin pa dang / nags de na rtag tu gnas pa'i lha dang gnod sbyin la sogs pa rnams kyis so phag gi char phab pas so phag gi char gyis phye mar byas nas mnar med par song bar gyur to//dge slong mang po de dag kyang dmyal bar song bar gyur to/ /de lta bas na chos zab mo spang bar mi bya ste/ dmyal bar 'gro bas 'jigs pa'i phyir ro zhes bya ba yin no//gzhon nu khye'u mchog gnyis po byung ba yang zhes bya ba la sogs pas 'di nyid ston to/ /chos smra ba gnyis po de gzhan yin par mi blta ste/ 'on kyang gcig ni de bzhin gshegs pa mar me mdzad yin no/ /gnyis pa ni nga yin no//rgyal po de ni byams pa yin no/ /lha mo de ni zla 'od yin no/ /de'i nu bo de ni lha sbyin yin no zhes bya ba'o/ /rmongs pa'i dra ba ma lus nyes pa'i gzhi/ /bdag med rdo rjes rnam par brtags pa'i phyir/ /'jig rten bde gshegs sras su 'gro gyis la/ /de nas nyes bral thub pa'i dbang por gyur//sngon byung ba'i le'u ste nyi shu rtsa gcig pa'i 'grel pa rdzogs so// //de bzhin gshegs pa ni chos kyi sku'o zhes bsgrub pa'i phyir/ de nas yang bcom ldan 'das kyis zhes bya ba la sogs pa gsungs te/ byis pa rnams ni rtag tu chags byed de/ / zhes bya ba la/ phyi dang nang rnag gi rang bzhin can gyi lus la mngon par zhen par byas nas byis pa rnams phan pa dang / mi phan pa la yongs su rtog par mi bzod pa g.yo ba'i srog dang bde ba la mngon par zhen pas sdig pa byas nas dmyal bar nges par 'gro bar 'gyur ro/ / gang yang mngon par zhen pa dang bral ba de dag ni bdud dag las rgyal nas byang chub kyi shing chen po'i rtsa bar/ rab tu sad pas byang chub tu mngon par rdzogs par sangs rgyas par 'gyur ro zhes bya ba'o/ /de bzhin gshegs pa la gzugs kyi skur mi blta'o/ /de ci'i phyir zhe na zhes bya ba ni/gzugs kyi skus mngon par rdzogs par sangs rgyas pa yin la/ de'i phyir sku gang gis mngon par sangs rgyas pa de nyid skur blta bar bya'o zhes bya ba'i the tshom yongs su spong bar byed pa ste/ chos kyi skus bsgos pa ni gzugs kyi sku yin la/ chos kyi sku ni gzugs kyi skus bsgos pa ma yin te/de bzhin gshegs pa rnams byung yang rung de bzhin gshegs pa rnams ma byung yang rung / chos rnams kyi chos nyid ni de bzhin du gnas pa'i phyir ro zhes bya bas so/ /gzhon du de la byang chub sems dpa' de bzhin gshegs pa'i sku la smon par 'dod pa dang shes par 'dod pas/ting nge 'dzin 'di nyid gzung bar bya zhes bya ba la sogs pas ni chos kyi sku'i ngo bo nyid ting nge 'dzin 'di yin no zhes bya ba'i don to/ /de bzhin gshegs pa'i sku ni bsod nams brgyas bsgrubs pa'o zhes bstan pa ni gzugs kyi sku zhal gyis bzhes nas gsungs pa yin no zhes bya bar/bsod nams brgya pa las skyes pa'i blo dang don gcig tu bstan pa zhes bya ba gsungs te/ bsod nams brgya pa'i mtshan nyid can gyi rgyu las byung ba'i chos kyi skus bskyed pas na bsod nams brgyas bsgrubs pa zhes brjod do/ /don dam pa ni mtshan ma med pa'i phyir mtshan nyid thams cad dang bral ba nyid do//zab pa ni dmigs pa'i lta ba can rnams kyis rtogs par dka' ba'i phyir ro/ /tshad med pa ni mngon sum dang / rjes su dpag pa dang / lung gi tshad mas rtogs par byar med pa'i phyir ro/ / mtshan ma med pa'i ngo bo nyid ni rang gi mtshan ma yang med pa nyid do/ /mtshan ma thams cad rnam par bsgom pa ni pha rol tu phyin pa la sogs pa thams cad rab tu bsgom pa nyid do/ /mi g.yo ba ni mi gnas pa'i mya ngan las 'das pa'i ngo bo nyid kyis thams cad du nges par gnas pa nyid dang / shin tu nam mkha'i ngo bo nyid do//mig lnga'i yul las yang dag par 'das pa ni mthong ba med pa'o/ /de bzhin nyid dang / yang dag pa'i mtha'i ngo bo nyid ni chos kyi skur rab tu shes par bya ste/ mngon par zhen pa med pa'i rnal 'byor gyis so/ /bsam gyis mi khyab pa ni sems kyi sa las yang dag par 'das pa'i phyir dang /rnam par spros pa thams cad nges par bral ba'i phyir bde ba dang sdug bsngal la sogs pas mngon par mi g.yo ba'o/ /gnas med pa ni gzung ba'i gnas med pa'i phyir ro/ /sangs rgyas kyi ye shes la smon par 'dod pa rnams kyi sgra las shin tu 'das pa zhes bya ba ni sgra'i rjes su 'gro ba'i shes rab la zhen par mi bya ste/so sor rang gi rig pa yin pa'i phyir ro/ /snying po ni 'dod chags la sogs pa'i dri ma'i ngo bo dang bral ba nyid do/ /dbyer mi phyed pa ni zhe sdang gi mtshon chas so/ /brtan pa ni gti mug gi rlung gis mi bskyod pa nyid do/ /'o na ji ltar bsgrub par bya zhe na/stong pa nyid du bstan pas nges par bstan pa zhes bya ba gsungs te/ stong pa nyid ces bya ba'i sgras ni chos kyi sku ston par byed pa yin par shes par bya'o/ /ma skyes pas ni chos kyi sku skyed par byed pa'i rgyu med pas skye ba las yang dag par 'das pa yin no/ /rtag pa ni tha snyad tsam du mi 'gyur ba'i rtag pa nyid do//bye brag med pa ni 'jig rten la bsgrub pa'i phyir mya ngan las 'das pa zhes sgra'i sbyor ba 'byung ba ste/ mya ngan las 'das pa la sangs rgyas dang nyan thos dang / rang sangs rgyas kyi mya ngan las 'das pa'i bye brag med pa nyid do/ /sgras mya ngan las 'das pa ni sgras brjod du med pa'o//dbyangs kyis zhi ba ni brag ca'i sgra dang 'dra bar brjod pa dang / brjod bya'i rnam par rtog pa zhi bas zhi ba'o/ /tha mal pa'i sgras ni dngos po dang dngos po med pa dang / gnyi ga yang rnam par rtog pa tsam nyid kyi phyir brda ste/ brda de brda tsam gyis thams cad du tha snyad du byed pa'o//don dam pa ni ji lta ba'i tshig gis bstan par bya ste/ yang dag pa dang / bden pa dang / de bzhin nyid dang / don dam pa zhes bya ba'i rnam grangs so/ /bsil ba dang yongs su gdung ba med pa zhes bya ba ni nyon mongs pa'i tsha ba'i yongs su gdung ba med pa'i phyir ro//smad du med pa ni gang gis kyang smad du med pa de'i phyir smad du med pa zhes bya'o/ /kha dog bstan pas mu med pa zhes bya ba ni yon tan brjod pa la mtha' med pa'i phyir ro/ /gzhon nu de ni de bzhin gshegs pa'i sku zhes bya'o zhes bya ba ni ngo bo nyid dang / ma bcos pa zhes bya ba'i don to//sku 'di nyid kyi khyad par tshigs su bcad pa'i dbyangs kyis bstan par bya ba'i phyir/ /'di 'dra'i 'jig rten mgon po'i sku/ /zhes bya ba ni yang dag par bden pa'i sku shes par 'dod pa des ting nge 'dzin 'di bsgom par bya ste/ ting nge 'dzin gyi ngo bo nyid ni sku yin pas ting nge 'dzin gyi ngo bo gang gis mthong ba des de bzhin gshegs pa'i sku bsod nams dang ye shes kyi tshogs las nges par byung ba mthong ba yin no//sangs rgyas sku ni dag pa ste/ /'on kyang gsal zhes bya ba la/ rang bzhin gyis 'od gsal ba nyid de/ rmongs pa'i mun pa med pa'i phyir ro/ / bar snang mtshungs pa ni spros pa med pas so/ /gal te mtshan sum cu rtsa gnyis dang ldan pa'i de bzhin gshegs pa'i mngon par byang chub sku mnga' na ji ltar bar snang mtshungs pa'i sku yin zhe na/ sangs rgyas byang chub ci 'dra ba/ /zhes bya ba la sogs pa la/ ci ltar sku gzod ma nas zhi ba yin pa de ltar mtshan rnams kyang yin la sangs rgyas kyi zhing rnams kyang de dang 'dra'o//stobs dang byang chub kyi yan lag la sogs pa rnams kyang chos nyid kyi ngo bo nyid kyis 'di ltar mtshan nyid med par mtshan nyid gcig pa zhes bya'o/ /sus kyang sha yi mig gis ni/ /nam yang mthong bar mi nus so//zhes bya ba la sogs pa la/ mig gi yul gyi spyod yul ma yin pa'i phyir ro/ /mang po dag ni 'di skad smra/ /ngas ni 'jig rten 'dren pa mthong / /zhes bya ba ni sku yang gser gyi kha dog la ste/ de bzhin gshegs pa mthong ngo zhe na/ sangs rgyas dag gi byin rlabs dang //zhes bya ba la/ chos kyi sku'i dbang gis mtshan sum cu rtsa gnyis kyis brgyan pa'i sku mthong bar gyur na yang tshad dang chu dang zheng 'di tsam mo zhes sus kyang gzhal bar mi nus so/ /de'i phyir de bzhin gshegs pa'i sku ni bsam gyis mi khyab pa zhes bya'o/ /gal te tshad kyang rnyed gyur na//zhes bya ba la/ kha dog dang dbyibs so sor nges pa'i bdag nyid yin na lha dang mi la sogs pa dang khyad par med par 'gyur ro/ /mnyam par gzhag pa'i sems kyi ni/ /zhes bya ba ni spros pa thams cad dang nye bar bral ba'i sems ni mnyam par gzhag pa'o/ /de'i rnam par smin pa'i sems kyang de dang 'dra ba ste/dkar po'i chos mang pos nges par bsgrubs pa dge ba'i chos thams cad gcig tu bsdus shing bsdoms pa'i ting nge 'dzin rgya che ba nga'i sku ni mi snang ngo zhes bya ba la/ ting nge 'dzin gyi ngo bo yin pa'i phyir gzhan gyis mi mthong ngo / /gang gi sems ni ci 'dra ba//zhes bya ba la/ gang thams cad la mngon par zhen pa med pa'i sems don rnam par rtog pa med pa'o/ /ming dang gzugs kyang de 'dra ste/ /zhes bya ba phung po lnga'i rang gi rang bzhin yang rnam par dag pa'o/ /de'i phyir sems kyi ngo bo nyid med pas ming dang gzugs kyang ngo bo nyid med pa zhes bya ba'o//sdig pa'i 'du shes gsum po dag /ces bya ba ni 'dod chags dang / zhe sdang dang / gti mug gi bdag nyid can dang / ming dang / rgyu mtshan dang / kun du rtog pa'i bdag nyid can bdag dang / bdag gi dang / gnyi ga'i 'du shes rab tu spangs pas yid bzhin gyi nor bu rin po che bzhin du chos kyi sku las gdul bya'i skye bo rnams la skal ba ci lta ba bzhin du don sgrub par byed pa'o//dpa' bo chen po chos kyi sku/ /zhes bya ba la/ chos nyid kyi bdag nyid yin pa'am byang chub kyi phyogs la sogs pa'i chos kyi bdag nyid kyi sku ni chos kyi sku zhes bya'o//gzugs kyi sku yang de bzhin gshegs pa'i sprul pa'i skus 'gro ba ma lus pa'i don byed pa lta bu'o/ /sprul pa yang sprul pa'i sprul pa lta bu'o zhes bya bas chos thams cad rang bzhin med pa yin na yang sku gsum rnam par gzhag pa dang mi 'gal bar de bzhin gshegs pa ni chos kyi sku'o zhes bya ba 'di nges pa yin par rtogs par bya'o//lhag ma ni go sla'o/ /rab 'byam rgya chen dpag med na/ /chos kyi sku yi byin rlabs las/ /sangs rgyas yid bzhin nor bu ltar/ /'byung ste nam mkha' dag dang 'dra/ /mi shes rab rib kyis bsgribs pa/ /rab rib dregs pa sel byed pa//dri med mig sman dka' 'grel 'di/ /'jam dpal grags pas byas pa yin/ /chos kyi sku'i le'u ste nyi shu rtsa gnyis pa'i 'grel pa rdzogs so// //da ni longs spyod rdzogs pa'i sku yang zab cing rgya che ba yin no zhes bstan pa'i phyir/ gzhon nu de la de bzhin gshegs pa'i sku ni zhes bya ba la sogs pa gsungs te/de bzhin gshegs pa'i sku ni mtshan ma dang las kyis kyang shes par sla ba ma yin te zhes bya ba ni sngon po dang / ser po la sogs pa'i mtshan ma'i bya bas kyang shes par sla ba ma yin no/ /de nyid bstan pa'i phyir sngon po 'am zhes bya ba la sogs pa gsungs so//de la rang bzhin gyis sngon po ni sngon po'o/ /kha dog sngon po zhes bya ba ni sbyor ba las byung ba'i sngon por snang ba'i sngon po'o/ /sngon po lta bur ston pa zhes bya ba ni dpe'i ngo bos bstan par mi nus pa'o/ /sngon po 'byung ba zhes bya ba ni 'od sngon por snang bas so//thams cad du 'am gyi sgra ni phan tshun gyi khyad par yang dag par bstan pa 'am rnam par rtog par blta bar bya'i bsdu ba ni ma yin no/ /de bzhin du ser po la sogs pa la yang brjod par bya'o/ /tshangs pa 'am lha 'am zhes bya ba ni nges par gzung bar mi nus pa'o//de lta na yang kha dog de dang des 'dul ba'i gdul bya'i skye bo rnams la de dang der snang ba skyed par byed do/ /de bzhin gshegs pa'i sku ni dag pa ste/ mtshan ma dag gis bsam par mi nus pa dang / mtshan ma thams cad dang bral bas bsam gyis mi khyab par bstan to//gzugs kyi sku'i nges pa yang yongs su gzung ba dang / tshad gzung bar ni lha dang bcas pa'i 'jig rten gyis kyang sla ba ma yin na yang chos kyi sku lta smos kyang ci dgos/ don de dag nyid tshigs su bcad pas gsal por bstan pa'i phyir/ 'jig rten khams kyi rdul phran dang //zhes bya ba la sogs pa la 'jig rten gyi khams thams cad kyi rdul phra rab ni bgrang bar nus kyang srid/ skra'i rtse mo brgyar gshags pas rgya mtsho chen po'i chu'i thigs pa bgrang bar nus kyang srid kyi de bzhin gshegs pa'i yang dag pa'i yon tan bsngags pa brjod par ni mi nus so//de'i phyir 'jig rten gyi khams ma lus pa'i 'byung ba chen po lnga'i rdul phra rab ji snyed yod pa de bas kyang sems can gcig gi sems kyi spyod pa mang bar mthong ngo / /de bzhin du sems can thams cad kyi sems kyi spyod pa'i khyad par de dag kyang nga'i yang dag pa'i yon tan gyi bsngags pa'i dper bzod pa ma yin no//de bzhin du mtshan ma dang las kyis kyang de bzhin gshegs pa ni 'di lta bu'o zhes shes par nus pa ma yin no/ /gang gi phyir/ sangs rgyas mtshan ma bral ba ste/ /chos kyi sku yis rab tu phye/ /zab cing dpag tu med pa ste//de phyir sangs rgyas bsam mi khyab/ /ces bya ba dang / chos rnams de dag dpag tu med/ /bskal pa bye bar bsnyen pas na/ /de phyir nga yi lus kyang ni/ /'od gsal bsam du med pa grub/ /ces bya ba ni brtags pa thams cad las 'das pa yin na yang gdul bya rnams kyis ni de bzhin gshegs pa ni 'di lta bu'o zhes brtags so//chos dang longs spyod sprul sku yang / /tha snyad du ni nyer brtags nas/ /dbye ba byas kyi chos sku yi/ /ngo bo nyid kyis dbye ba med/ /de bzhin gshegs pa'i sku nges par bstan pa'i le'u ste nyi shu rtsa gsum pa'i 'grel pa rdzogs so// //so so yang dag par rig pas bsgos pa ni ting nge 'dzin to/ /ting nge 'dzin gyis yang dag par bsgos pa ni sangs rgyas kyi byang chub po zhes rab tu bstan pa'i phyir/ de nas yang bcom ldan 'das kyis zhes bya ba la sogs pa gsungs te/ gzhon nu de lta bas na bdag gis so so yang dag par rig pa bzhi mngon sum du bya bar 'dod pa zhes bya ba la//gzhon nu byang chub sems dpa' des ting nge 'dzin 'di gzung bar bya zhes bya bar 'brel to/ /gang gi phyir nye bar bstan par bya ba nyid ni don so so yang dag par rig pa dang / chos so so yang dag par rig pa dang /spobs pa so so yang dag par rig pa dang / nges pa'i tshig so so yang dag par rig pa'o/ /gzhon nu de la chos so so yang dag par rig pa gang zhe na/ mdor ji ltar bstan pa de bzhin du ma bshad kyi chos la don nan tan gyis bsgrub par bya ba'i phyir ro/ /ji srid gzugs kyi tha snyad yod pa de srid du de bzhin gshegs pa'i bsngags pa brjod pa yang de snyed do zhes bya ba la ming dang /gdags pa dang / tha snyad dang / sgra 'jug pa zhes bya ba bye brag go zhes bya ba'i bar du'o/ /de bzhin du tshor ba dang / 'du shes dang / 'du byed rnams dang / rnam par shes pa zhes bya ba la/tshor ba la sogs pa'i tha snyad kyang bsam gyis mi khyab pa'o/ /de bzhin du de bzhin gshegs pa'i bsngags pa brjod pa'i tha snyad kyang zhes bya ba ni de bzhin gshegs pa'i sku ni ngag gi brjod pa'i spyod yul las 'das pa'o zhes bstan pa yin no/ /gzhon nu de ltar 'dus byas la yang nyes pa grangs med/mya ngan las 'das pa la yang phan yon grangs med de zhes bya ba ni de bzhin gshegs pa'i bsngags pa brjod pa zhes bya ba'i don to/ /gang gi phyir 'du byed brjod pa bsam gyis mi khyab pa zhes bya ba la/ sems can dpag tu med pa'i bsam pa yongs su shes pas 'dus byas pa'i 'du byed kyi brjod pa nyid do//dbyangs brjod pa bsam gyis mi khyab pa ni yan lag drug cu dang ldan pa'i gsung ni bsam du mi nus pa'i phyir ro zhes byas nas so/ /kun nas nyon mongs pa bsam gyis mi khyab pa ni kun nas nyon mongs pa sgrub par byed pa'i sbyor ba las byung ba'i sgra bsam gyis mi khyab pa nyid do//rnam par byang ba brjod pa bsam gyis mi khyab pa zhes bya ba la/ kun nas nyon mongs pa'i rgyu 'dod chags la sogs pa bshad pa yang rnam par byang ba'i rgyu yin te/ thabs kyi khyad par la 'jug pa'o zhes brjod pas rnam par byang ba'i dgongs pa bsam gyis mi khyab pa rab tu ston to zhes bya ba'o//gzhon nu de dag ni de bzhin gshegs pa'i bsngags pa brjod pa bsam gyis mi khyab pa brjod pa bzhi'o/ /zhes bya ba ni yon tan ston pa'i rnam grangs so zhes bya ba'i don to/ /bsam gyis mi khyab par bstan pa ste/zhes bya ba ni de dag nyid bzhi pa sgrub pa lnga bcu rtsa bdun gyis rgya cher bstan par bya zhes bya ba'i don to/ /da ni rnam par dbye ba bstan pa'i phyir/ gzhon nu 'di dag ni byang chub sems dpa' rnams kyi tshul bzhi ste zhes bya ba la sogs pa la/ 'du byed kyi tshul bsam gyis mi khyab pa ni 'du byed yongs su shes pa sngon du 'gro bas sems can rnams mya ngan las 'das par 'khrid par byed pas 'du byed kyi tshul gyi lam zhes bya ste/de ni de bzhin gshegs pa las gzhan gyis bsam par mi nus pas bsam gyis mi khyab pa'o/ /'du byed yongs su bshad pa'i tshul bsam gyis mi khyab ces bya ba la/chos bstan pa'i tshul ni yongs su bshad pa'i tshul te/ 'du byed ji ltar gnas pa bzhin yongs su bstan pas khyad par gyis rnam par gzhag pa'i phyir chos ston pa ni yongs su bshad pa'i tshul bsam gyis mi khyab pa zhes bya ste/ snga ma bzhin no/ / kun nas nyon mongs pa'i tshul bsam gyis mi khyab pa zhes bya ba ni nyon mongs pa dang / las dang skye ba'i kun nas nyon mongs pa rnams yang dag pa'i rtog pa la sogs pas spang bar bya ba ci lta ba bzhin du spong bar byed pa de rab tu ston pa'i thabs kyi khyad par gyi tshul lo/ /rnam par byang ba'i tshul bsam gyis mi khyab pa zhes bya ba ni rnam par byang ba'i tshul ni rnam par grol ba'i lam ste/chos thams cad bdag med pa nyid du mnyam par rtogs pa nyid ni grol ba'o/ /der thabs du mas 'dren cing khyer bar byed pas na tshul zhes bya'o/ /bsam gyis mi khyab pa ni snga ma bzhin no//rigs pa bzhi ste zhes bya ba la/ rigs pa ni rjes su dpag pa ste 'dus byas kyi dngos po la rigs pa 'jug gi /'dus ma byas la ni ma yin no/ /de la kun nas nyon mongs pa dang / rnam par byang ba'i bsam pa dang yongs su bshad pa 'jug ste/ rjes su dpag pa dang / mngon sum dang / lung la sogs pa'i bsam pa 'jug gi 'dus ma byas ni ma yin no/ /thams cad du 'du byed kyi yon tan dang / skyon bsam gyis mi khyab pa rab tu bsgrub pa'i phyir rgol ba la sogs pa'i tshig nas nye bar bzung nas sgor 'jug pa'i thabs ni rnam pa bzhi'o/ /nges par bstan pa ni bshad pa'i bye brag yin te/'du byed dang / yongs su bshad pa dang / kun nas nyon mongs pa dang / rnam par byang ba dang bzhi po thams cad du bshad par bya'o/ /sgra ni brjod pa'o/ /tshig gi lam ni dgongs pa can gyi tshig go/ /dgongs te bshad pa bzhi ni sems can la dgongs pa dang /chos nyid la dgongs pa dang / bstan pa la dgongs pa dang / dus la dgongs pa'o/ /lha la nges par rtog pa bzhi la ni/ rnam par dag pa'i lha la rtog pa dang / zag pa med pa'i lha la rtog pa dang / byang chub sems dpa'i lha la rtog pa'o//nges par bsams nas rtog pa ni nges par rtog pa'o/ /mi'i lus thob pa la dmigs nas khyad par can gyi dge ba'i las la kun tu spyod pa ni mi la rtog pa zhes bya'o/ /'di dag thams cad ni ming tsam mo zhes rtog pa ni ming la nges par rtog pa'o/ /rtog pa'i bye brag gis 'jug par bya ba la zhugs pas gong nas gong du shin tu 'das pa'i khyad par ro//rdo rje'i tshig ni mi phyed pa'i gnas la rab tu gnas pas na rdo rje'i tshig go/ /yi ge oM dang swA hA la sogs pa gang dag gis gros su byed cing rab tu sad par byed pas lha mngon du phyogs par byed pas sngags kyi tshig ces bya'o//sbyin pa la sogs pa ni sdud pa sgrub pa'o/ /sdig pa ni spong ste rims nad byang ba bzhin no/ /mdor bstan pas na mdo sde ste/ bsdus te bshad pas don rgyas par ston pa'o/ /mdo sde'i mtha' ni mdo sde ma lus pa'i mthar thug pa zhes bya ba'i don to/ /mdo sde mthar thug pa'i gnas ni thabs zab mo zab mo'i gnas su gyur pa'am don yang rung ba'o//gdags par bya ba la btags pa ni tha snyad kyis nges par rnam par gzhag pa byas pa'o/ /snang ba rab tu sgrub par byed pa'i tshig ni snang ba'i tshig ces bya'o/ /ye shes gsal bar byed pas ni gsal ba'i tshig ces bya'o//spyod pa'i khyad par rab tu bsgrub pa'i tshig ni spyod pa'i tshig ces bya'o/ /spyod pa ni sbyin pa la sogs pa la 'jug pa'o/ /de rab tu sgrub par byed pa ni ngag gi rang bzhin no/ /yi ge'i tshogs ni tshig go/ /tshig gi tshogs ni ngag go zhes bya bas so//bsam pa sna tshogs pa'i tshig rnams shes par dka' bas na bsam gyis mi khyab pa'i tshig ces bya'o/ /sngon gyi mtha'i dang phyi ma'i mtha' dang / dbus med par rab tu sgrub par byed pa'i tshig ni mtha' yas pa'i tshig go/ /su yang gang nas kyang 'gro ba dang / 'ong ba dang / rgyu ba med pa ni rgyu ba med pa zhes bya'o/ /yongs su ni kun du'o/ /de ni mtha' ste/ rtag pa dang chad pa'i mtshan nyid do/ /gang la de dag med pa de ni mtha'o/ /de rjod par byed pa'i tshig de dag ni mu med pa'i tshig ces bya'o/ /'dra bar gyur pa'i chos med pas na yon tan la sogs pa gzhal bar mi nus pa'i phyir gzhal du med pa'i tshig ces bya'o//bgrang bar bya ba med pas grangs kyang med de yul med pa'i phyir des na grangs med pa'i tshig ces bya'o/ /tshad mas yongs su gcad par bya ba ni gzhal bya yin na tshad ma'i yul ma yin pa'i phyir tshad med pa'i tshig ces bya'o//shes pa'i dmigs pa ni shes pa'i tshig ste/ dmigs pa med pa nyid kyi phyir bsam gyis mi khyab pa ste yul med pa nyid kyi phyir ro/ /shes pa bsags pa ni bsod nams dang ye shes kun nas bsdus pa ste/ byang chub kyi sems nas brtsams te sangs rgyas nyid kyi bar du yang dag par bsags pas na bsags pa'o//shes pa'i rigs pa ni shes pa skye ba'i gnas te thos pa dang / bsam pa dang / bsgom pa'i mngon sum du byed pa'i rgyur gyur pa'o/ /sngon yongs su myong ba'i dpag tu med pa'i don rnams bsags pa snang ba ni spobs pa bsags pa zhes bya'o//mdo sde ma lus pa bsdus shing bsags pa ni mdo sde'o/ /'jig rten pa dang / 'jig rten las 'das pa dang / zag pa dang bcas pa dang / zag pa med pa dang / 'jig rten las 'das pa yang drang ba'i don gyi mdo sde dang nges pa'i don gyi mdo sdes bsdus pa dang /bya ba dang / spyod pa dang / rnal 'byor la sogs pa'i dbye bas tha dad pa'i gsang sngags thos pa ni mang du thos pa zhes bya'o/ /tshul khrims dang / thos pa dang / shes rab dang / ting nge 'dzin rnams ni nor bzhi zhes bya'o/ / bslab pa ni bzhi ste/ lhag pa'i tshul khrims dang / lhag pa'i shes rab dang / lhag pa'i sems dang / mi dge ba thams cad spangs pa'i sdom pa'i bslab pa'o/ /spyod yul bzhi ni sa dang / pha rol tu phyin pa dang / thams cad mkhyen pa dang / ting nge 'dzin gyi yul zhes bya'o//las bzhi ni/ lus kyi las dang / ngag gi las dang / yid kyi las dang / sangs rgyas thams cad kyi chos yongs su rdzogs par byed pa'i las dang bzhi'o/ /spobs pa bzhi ni/ myur ba'i spobs pa dang / shin tu myur ba'i spobs pa dang / rgyun mi 'chad pa'i spobs pa dang /rjes su ma bstan pa'i spobs pa'o/ /lam bsgom pa ni bzhi ste/ nyan thos kyi lam bsgom pa dang / rang sangs rgyas kyi lam bsgom pa dang / byang chub sems dpa'i lam bsgom pa dang / de bzhin gshegs pa'i khyad par gyi lam bsgom pa'o/ / kun nas nyon mongs pa shes pa bzhi ni las kyi kun nas nyon mongs pa shes pa dang / skye ba'i kun nas nyon mongs pa shes pa dang / nyon mongs pa'i kun nas nyon mongs pa shes pa dang / 'gro ba'i kun nas nyon mongs pa shes pa'o/ /'bras bu yod pa'i shes pa bzhi ni/ 'chad pa 'bras bu yod pa'i shes pa dang / lung bstan pa 'bras bu yod pa'i shes pa dang / bag la nyal 'joms pa 'bras bu yod pa'i shes pa dang / yang dag par rdzogs pa'i byang chub rtogs pa 'bras bu yod pa'i shes pa'o/ /ma rig pa shes pa bzhi ni/ ma rig pa skye ba shes pa dang /ma rig pa'i rang gi ngo bo shes pa dang / ma rig pa'i 'jug pa shes pa dang / ma rig pa 'gag pa shes pa'o/ /sdug bsngal shes pa bzhi ni/ sdug bsngal gyi sdug bsngal shes pa'i sdug bsngal shes pa dang / yongs su 'gyur ba'i sdug bsngal gyi sdug bsngal shes pa dang /'du byed kyi sdug bsngal gyi sdug bsngal shes pa dang / 'khor ba'i phung po lnga'i sdug bsngal shes pa'o/ /yid mi bde ba shes pa bzhi ni/ rnyed pa med pa'i yid mi bde ba shes pa dang / mi bsngags pa'i yid mi bde ba shes pa dang / mi shes pa'i yid mi bde ba shes pa dang /mngon par rtogs pa ma thob pa'i yid mi bde ba shes pa'o/ /dbul po shes pa bzhi ni/ shes pas dbul ba shes pa dang / tshig gis dbul ba shes pa dang / sgrub pas dbul ba shes pa dang / thabs kyis dbul ba shes pa'o/ /skye ba shes pa bzhi ni/bsams bzhin du skye ba shes pa dang / las kyi skye ba shes pa dang / mngal nas skye ba shes pa dang / mngal ma yin pa nas skye ba shes pa'o/ /nang shes pa bzhi ni/ phung po shes pa dang / skye mched shes pa dang / khams shes pa dang / bde ba dang sdug bsngal gyi tshor ba shes pa'o//phyi rol shes pa bzhi ni/ phyi rol nyid lta bur de dag nyid sgro btags nas phung po la sogs pa bzhi po shes pa'i shes pa'o/ /ngo tsha shes pa'i shes pa bzhi ni bdag la ltos nas 'dzem pa ni ngo tsha shes pa'o/ /des bya ba ma yin pa mi byed pa'i shes pa dang /bya bar 'os pa rnams mi 'dor ba'i shes pa dang / dam bcas pa des bsgrub pa'i shes pa dang / sangs rgyas dang byang chub sems dpa' rnams mi slu ba'i shes pa'o/ /bden pa shes pa bzhi ni/ byang chub tu sems bskyed pa mi 'dor ba'i bden pa shes pa dang / tshogs yongs su rdzogs par byed pa'i bden pa shes pa dang / sems can mi slu ba'i bden pa shes pa dang / sangs rgyas nyid mngon sum du bya ba'i bden pa shes pa'o/ /srid pa shes pa bzhi ni/ 'dod pa'i srid pa shes pa dang / gzugs kyi srid pa shes pa dang / gzugs med pa'i srid pa shes pa dang /ma rig pa'i lta ba'i srid pa shes pa'o/ /dngos po shes pa bzhi ni/ 'dus byas kyi dngos po shes pa dang / 'dus ma byas kyi dngos po shes pa dang / lung du bstan pa'i dngos po shes pa dang / lung du ma bstan pa'i dngos po shes pa'o/ /gang zag shes pa bzhi ni/phung po gang zag tu shes pa dang / brjod du med pa'i gang zag shes pa dang / las 'dzin pa'i gang zag shes pa dang / gang zag 'ba' zhig pa shes pa'o/ /dmigs pa shes pa bzhi ni/ bdag gi dmigs pa shes pa dang / sems can gyi dmigs pa shes pa dang /sred pa'i dmigs pa shes pa dang / chos kyi dmigs pa shes pa'o/ /bsam gyis mi khyab pa'i ye shes 'di dag gis bstan pa yang bsam gyis mi khyab pas mthar phyin par bstan par sla ba ma yin no/ /gzungs bzhi ni/ 'du byed thams cad mtha' yas par bshad pa brjod pa de la gang shes pa 'di ni gzungs dang po'o//dbyangs mtha' yas par brjod pa de la gang shes pa 'di ni gzungs gnyis pa'o/ /kun nas nyon mongs pa mtha' yas par bshad pa brjod pa de la gang shes pa 'di ni gzungs gsum pa'o/ /rnam par byang ba'i yon tan gyi phan yon mtha' yas par brjod pa de la gang shes pa 'dir gzungs bzhi pa ste/tshig gi gzungs dang / don gyi gzungs dang / sngags kyi gzungs dang / mngon par rtogs pa'i gzungs so/ /shes rab dang dran pa gnyis ni gzungs thams cad kyi rgyu yin pa'i phyir gzungs zhes bya'o//tshul bzhi zhes bya ba nas brtsams nas gzungs 'di dag la thug gi bar du 'du byed dang / yongs su bshad pa dang / kun nas nyon mongs pa dang / rnam par byang ba zhes bya ba dag gis thams cad du bstan pa 'di dag ni 'du byed kho na la brten par nges so zhes bya ba'i don to//'di ltar zhes bya ba ni sngar bstan pa rnams so/ /gzungs gang yin pa de ni shes pa'o/ /shes pa ni chos so zhes bya ba la/ chos shes pas nan gyis yang dag par rig pa gang yin pa de ni chos so so yang dag par rig pa'o/ /don gang zhig chos shes pas ji lta ba bzhin du nges par byas pa ni don so so yang dag par rig pa zhes bya'o//chos shes pas nges par byas pa'i don gang yin pa sems can thams cad dga' bar bya ba'i phyir skad sna tshogs kyis nges pa'i tshig gis chos ston pas so so rang gis rig pa'i ye shes skyed pa ni nges pa'i tshig so so yang dag par rig pa zhes bya'o//chos shes pas tha snyad kyis ston par byed pa'i dus su rigs pa dang grol ba'i spobs pa nyid dang / tshig 'dres pa med pa nyid dang / tshig zhum pa med pa nyid dang / spobs pa mtha' yas pa nyid kyis so so yang dag par rig pa ni spobs pa so so yang dag par rig pa zhes bya'o//de ltar so so yang dag par rig pa bzhi rgyas par bstan nas bde bar rtogs par bya ba'i phyir tshigs su bcad pas/ de nas bcom ldan 'das kyis zhes bya ba la sogs pa gsungs te/ sangs rgyas ye shes ji snyed pa/ / gzugs su btags pa'ang de snyed de/ /zhes bya ba la/ de dag thams cad sngar bstan zin pas yang brjod par mi bya'o/ /ngo mtshar bsam gyis mi khyab chos/ /so so yang dag rig dbye bas/ /'gro ba'i mgon po rdzogs sangs rgyas/ /rkang gnyis mchog gis rab tu bstan/ /de bzhin gshegs pa bsam gyis mi khyab pa bstan pa'i le'u ste nyi shu rtsa bzhi pa'i 'grel pa rdzogs so// //so so yang dag par rig pa la 'jug pa'i skabs dbye bas so so yang dag par rig pa'i rnam par dbye ba rgya cher bstan pa'i phyir/ gzhon nu de la byang chub sems dpa' ji ltar chos so so yang dag par rig pa la spyod na zhes bya ba gsungs te/gzugs la sogs pa'i phung po'i ngo bos sam/ de las gzhan pas sam/ de dag gi rang bzhin stong pa nyid kyis spyod na so so yang dag par rig pa lags/ zhes zhus pa'i lan du gzhon nu 'di la byang chub sems dpa' chos rnams la chos kyi rjes su lta bas gzugs las gzhan du byang chub yang dag par rjes su mi mthong zhes bya ba la/ma skyes pa'i gzugs la gzugs kyi ngo bo med pas brtags pa'i gzugs la'am/ gzugs kyis sam/ gzugs las kyang byang chub yang dag par rjes su mi mthong ste/brtags pa'i gzugs ni sgyu ma dang sprul pa'i gzugs dang 'dra bas byang chub yang dag par rjes su mi mthong ngo / /chos nyid kyi gzugs las gzhan du yang byang chub yang dag par rjes su mi mthong ste/ sgro btags pa thams cad dang bral ba'i phyir chos nyid kyi gzugs ni gzugs med pa nyid do//de'i phyir gzugs nyid byang chub byang chub nyid gzugs so zhes bya bas gnyis su med cing gnyis su byar med do/ /de bzhin du tshor ba dang / 'du shes dang / 'du byed dang / rnam par shes pa nyid gzugs so/ /gzugs nyid rnam par shes pa zhes bya'o//gzugs kyi ngo bo gang yin pa dang / de bzhin gshegs pa gang yin pa 'di ni gnyis su med de/ chos nyid kyi gzugs la dbye ba med pa'i phyir ro/ /byang chub sems dpa' sems dpa' chen po de ltar lta na chos so so yang dag par rig pa la spyod do/ /don de dag nyid tshig su bcad pas rgya cher bstan pa'i phyir/de nas bcom ldan 'das kyis zhes bya ba la sogs pa gsungs te/ gzugs kyis kyang ni byang chub bstan/ /byang chub kyis kyang gzugs bstan te/ /zhes bya ba la/ gzugs kyi chos nyid ni byang chub bo/ byang chub nyid kyang gzugs so zhes bya ba'o//mi mtshungs pa yi sgra rnams kyis/ /chos kyi bla ma rab tu bstan/ /zhes bya ba la/ gzugs nyid byang chub po zhes bya ba mi 'dra ba'i sgras bstan na yang gzugs la byang chub med de/ skye ba med pa'i phyir ro/ /chos kyi bla ma rab tu bstan zhes bya ba ni ma skyes pa'i chos ni bstan par bya ba dang /ston pa dang / bstan pa dang / bral ba yin na yang gdul bya'o bsam pa'i dbang gis ston par byed de zhes rjod par byed do/ /gzugs dang byang chub mnyam pa ste/ /tha dad bya ba der mi rnyed/ /ces bya ba la/ sna tshogs su char dbye ba btags pa/dmigs pa rnyed par mi 'gyur ro/ /mya ngan 'das pa zab par yang / /zhes bya ba la sogs pa la/ mya ngan las 'das pa ni dmigs pa thams cad dang bral ba'i ngo bo nyid yin pas shin tu zab pa nyid do/ /de lta na yang sgra yis rab tu ston par byed la/ mya ngan las 'das pa dang sgra yang mi dmigs te/sgra dang mya ngan las 'das pa 'di dag gnyis su med cing tha mi dad do/ /de bzhin stong pa'i chos rnams la/ /mya ngan 'das pa rab tu bstan/ /zhes bya ba ni gzhan du na pha rol la rtogs pa skye bar mi 'gyur ro/ /chos rnams thams cad rang bzhin gyis/ /mya ngan 'das dang mtshungs mnyam pas//zhes bya ba la/ gzod nas zhi zhing ma skyes pa/ /rang bzhin gyis ni mya ngan 'das/ /chos rnams thams cad ces bya bas so/ /sangs rgyas kyi ni sku mthong nas/ /zhes bya ba la sogs pa la/ de bzhin gshegs pa'i gzugs kyi sku mthong ba na de bzhin gshegs pa'i sku mthong ngo zhes smra na yang de bzhin gshegs pa gzugs kyi skur mthong bar nus pa ma yin te/chos kyi skur nges pa'i phyir ro/ /'o na gzugs kyi skur rnam par gzhag pa ji ltar yin zhe na/ gzugs kyi mtshan nyid ci 'dra bar/ / gzugs kyi ngo bo nyid shes te/ /rang bzhin med cing ma skyes pa/ /sgyu ma sprul pa'i gzugs bzhin no/ /gzugs kyi rang bzhin ma shes pas/ /bdag gis lus zhes bdag tu mthong / /de bzhin du phung po lnga po rnams la/ bdag gis chos rnams kyi mtshan nyid mtshan nyid med par mtshan nyid gcig par shes pa ni mtshan nyid do//zhes shes nas/ chos kyi sku la rab tu gnas nas chos ston to/ /chos kyi sku la mi brten par de spros pa thams cad nye bar zhi ba'i rang bzhin nyid yin pas chos nyid de ni sangs rgyas rnams kyis kyang tshig gis brjod par mi spyod do//de bzhin du 'di lta bu'i chos zab mo'i ngo bo mi shes par sangs rgyas kyi sgra thos pas bdag gis de bzhin gshegs pa mthong ngo zhes tshig tsam du smra yang sgra tsam gyis de bzhin gshegs pa mthong ba ma yin no/ /de tsam gyis de bzhin gshegs pa mthong na ni sems can thams cad kyang sangs rgyas kyi sgra thos pas sangs rgyas su 'gyur na de lta bu ni med do//de lta bas na de bzhin gshegs pa chos kyi skur mthong ba des sangs rgyas mthong zhes bya'o/ /de'i phyir chos kyi sku dang / stong pa nyid dang / gzugs thams cad du mtshan nyid gcig pa yin no//des na/ gang gis gzugs rnams rab shes pa/ /des ni stong nyid rab tu shes/ /gang gis stong nyid rab shes pa/ /des ni 'dres pa rab tu shes/ /zhes bya ba la sogs pa dang / rnam pa 'di ni mi shes pas/ /dmigs pa can rnams rab tu brlag / ces bya'o/ /bdag la sogs pa'i dngos po med pa la dngos por 'du shes pa dang / mya ngan las 'das pa don dam par yod pa'i chos nyid kyi gzugs la med par 'du shes pa don ma yin pa la don du mngon par zhen la/ shes kyi khe yis bslus pa dag /'bras bu med pa la 'bras bur mngon par zhen pa dag nga'i bstan pa las shin tu 'khyams nas dge sbyong gi nor dang bral ba don dam pas dbul bas/le lo can tshul khrims nyams pas rnam par gnas pa dag 'di ni sangs rgyas kyi bstan pa ma yin no/ /zhes smra bar byed do/ /la la dag ni 'di skad du//bdag cag byang chub zhugs zhes zer/ /zhes bya ba la/ sgra tsam gyis dga' ba yin gyi yang 'di'i chos nyid la rab tu gnas pa ni ma yin no/ /rnyed pa la dga' bar 'gyur gyi chos 'dod pa ni ma yin no/ /khengs pa dang bag med pas zil gyis mnan pas mchod rten dang gtsug lag khang la sogs pa byed cing /grags pa 'dod pa/ dmigs pa'i lta ba can lta ba la mngon par zhen pa/ gzhan gyi bud med la chags shing brgyal ba/ rab tu byung ba'i bsam pa tsam yang rnyed par dka' ba de dag khyim pa rnams la 'dod pa rnams ni me lce lta bu'o zhes ston par byed cing de dag gi bu mo dang chung ma dag la mngon par chags shing rigs sun par byed par 'gyur ro zhes bya ba la/de dag rnga dang / dung dang / rdza rnga la sogs pas nga la mchod par byed cing bsgrub pa'i mchod pa dang bral ba yin no//de bzhin gshegs pa la bsgrub pa'i mchod pas mchod na mchod par 'gyur ro/ /tshul khrims dang / spyod pa dang / spyod yul phun sum tshogs pa mthong na bdag cag ji lta ba 'di dag kyang de dang 'dra ba yin no/ /tshul khrims kyang de lta bu zhes zer ro/ /tshul khrims kyi bsngags pa brjod pa thos na 'di dag sangs rgyas kyi bka' ma yin no zhes ngo tsha dang bral bas spong bar byed do//sangs rgyas kyi byang chub dang de'i rgyur gyur pa'i chos spangs pas mnar med par mchog tu gzhol bar 'gyur te/ dmyal ba thob par byed pa'i rgyu gang yin pa de sangs rgyas nyid thob par byed pa'i rgyu ni ma yin no//de lta bas na bdag byang chub la gnas par bya'o zhes bya ba'i tshig tsam gyis byang chub sems dpar gyur pa ma yin pa de dag khyed bstan par yang mi bya'o/ /gal te phrad par gyur na smra ba dang / gtam dang rim gro gyis la de dag gi sems bsrung ba'i phyir lo grangs du lon pa dris la de dag rgan par gyur na rkang pa la mgo bos phyag 'tshal ba la sogs pas bsnyen bkur bya zhing khong khro ba cung zad kyang mi skyed de/byams pa'i sems kyis byang chub thob par 'gyur ba yin no/ /gang yang de dag gi 'khrul pa dpag tu med par snang bar gyur na yang de lta na yang brjod par mi bya ste/gang gis las gang ji ltar spyad pa de'i 'bras bu de dang mthun par 'byung ba nyams su myong bar 'gyur ro zhes shes nas/ bzhin gyi zla ba 'dzum bzhin du/ /rgan rabs dang ni gsar bu la//rtag tu gsong por smra ba dang / /des shing nga rgyal bcom par bya/ /rab tu dang ba'i sems kyis sems can thams cad rjes su gzung bar zhugs pas chos gos dang bsod snyoms la sogs pas rjes su gzung bar 'os pa rnams kyis gyis shig ces slob par byed do//khyod la chos mnyan pa'i phyir 'ga' zhig gis gsol ba btab na/ de spro ba bskyed par bya ste khyod nyid mkhas pa chen po yin na khyod kyi drung du bdag gis ji ltar smra bar nus zhes brjod par bya'o/ /gal te de dag gi nang nas 'ga' zhig snod du gyur pa yod na bdag nyid kyis bshad par bya'o//de la tshul khrims 'chal pa mang du gnas par gyur na der tshul khrims kyi gtam mi bya'o/ /sbyin pa'i gtam bya'o/ /gang gis tshul khrims dang spyod pa phun sum tshogs pa mang du gnas par gyur na de'i tshe tshul khrims kyi gtam bya'o/ /gal te 'khor yongs su dag par gyur na sbyin pa dang //tshul khrims dang / bzod pa dang / brtson 'grus dang / bsam gtan dang / shes rab la sogs pa sangs rgyas kyi yon tan thams cad dang ldan pa'i gtam bya'o/ /sbyin pa la sogs pa 'ba' zhig gis mgu bar mi 'gyur na byang chub ni bsam gtan dang /ting nge 'dzin gyis bsgrub par bya'o zhes ting nge 'dzin bsgom pa la mngon par sbyor bar bslab par bya'o/ /bsod nams dang ye shes kyi tshogs yongs su rdzogs par bya ba'i phyir nye bar mkho ba'i mchod pa thams cad kyis sangs rgyas dang byang chub sems dpa' thams cad la mchod par bya'o//de lta bas na byang chub tu sems yang dag par bskyed nas nan tan snying por byed pa sangs rgyas kyi chos thams cad nges par bsgrub pa'i phyir mdo sde 'di don dang gzhung dang bcas par gzung bar bya zhes bya ba yin no//'di'i phan yon rgya cher bstan pa ni snga ma bzhin du shes par bya'o zhes bya ba yin no/ /sangs rgyas dpag med 'byung ba'i chos nyid nyid/ /sangs rgyas kyis bsngags ting 'dzin rgyal po 'dir/ /grags pa cung zhig tsam zhig bdag gis bstan/ /shin tu phra ba bdag 'dra sus rtogs nus//so so yang dag par rig pa la 'jug pa'i le'u ste nyi shu rtsa lnga pa'i 'grel pa rdzogs so// //da ni thabs la mkhas pa bstan par bzhed nas de nas yang bcom ldan 'das kyis zhes bya ba la sogs pa gsungs te/ gzhon nu ji ltar na byang chub sems dpa' thabs la mkhas pa yin zhe na zhes bya ba'i lan gdab pa'i phyir gzhon nu 'di la byang chub sems dpa' zhes bya ba la sogs pa la/sems can thams cad la nye du'i sems nye bar bzhag nas sems can thams cad kyi bsod nams kyi phung po ci yod pa sems kyis mngon par brtags nas shin tu legs so bya bas rjes su yi rang bar bya ste nyin lan gsum/mtshan lan gsum du nyin re bzhin du bsod nams kyi phung po 'dis sems can thams cad sangs rgyas nyid thob par gyur cig /bdag kyang sems can thams cad sgrol bar nus par gyur cig ces bya'o//thabs mkhas pa 'di dang yang dag par ldan pa'i byang chub sems dpas ting nge 'dzin rab tu thob par 'gyur zhing myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro zhes bya ba yin no//don 'di dag nyid tshigs su bcad pas rgya cher bstan par bya ba'i phyir/ sems can 'di dag thams cad bdag gi gnyen/ /zhes bya ba la sogs pa gsungs te/ bu gcig pa sdug pa la brtse bas yongs su 'dzin pa bzhin du sems can 'di dag ni bdag gi gnyen du gyur pa yin la/gnyen rnams la brtse ba btang nas ji ltar nyan thos bzhin du 'khor bas 'jigs shing skrag nas bdag nyid gcig pu yongs su mya ngan las 'da' bar bya zhes snying rje chen pos de dag la dmigs nas sems can thams cad kyi bsod nams kyi phung po thams cad la rjes su yi rang zhing rjes su yi rang ba la brten pa'i bsod nams kyi phung po de yang sems can thams cad la de bzhin du nges par bsngo bar bya'o//bdag nyid kyang sems can thams cad bsgral bar dam bcas pa'i phyir lus dang srog gi phyir yang shin tu rnam par dag pa'i tshul khrims nyams par mi 'gyur zhing mos pa phun sum tshogs pas sangs rgyas dang /chos dang / dge 'dun la mngon par rab tu dang ba dang / byang chub 'dod pas byang chub tu sems bskyed nas dkon mchog gsum la mchod pa la brtson pas sems can thams cad rjes su gzung ba'i phyir nor dang /'bru dang / rin po che dang / rgyal srid la sogs pa yongs su gtong bar byed cing sems kyi rgyud shes rab yongs su bsgoms par gyur pa yin pa'i phyir stong pa nyid thos pa na sems rab tu dga' ba dang /sems can bsdu ba la mkhas pa dang / legs par rab tu byung ba dang / legs par bsnyen par rdzogs pa dang / dben pa dang / dben pa la dga' ba dang / bse ru ltar gnyis su med par spyod pa dang / bag yod pas ni gter rnam pa bzhi rnyed par 'gyur te/ de bzhin gshegs pa'i bstan pa'i gter rab tu rnyed pa dang /rab tu byung ba thob pa dang / mi phyed pa'i dad pa thob pa dang / ting nge 'dzin thob pa ni gter bzhi pa'o/ /de bzhin du thos pa'i gter dang / spobs pa mtha' yas pa'i gter dang / dge ba'i chos thams cad la bag yod pa'i gter ro/ / chos dang chos kyi rjes su nan tan byed pa la/ /rab dga' 'gro la phan gdags phyir ni rab zhugs dang / /rdzogs byang chub dang sems can gyi la yi rang zhing / /bde gshegs nyid kyi rgyu de dag la yi rang ngo / /rjes su yi rang ba'i le'u ste nyi shu rtsa drug pa'i 'grel pa rdzogs so// // bag yod pa'i spyod pa ni byang chub sems dpa'i spyod pa'o zhes rab tu bstan pa'i phyir/ gzhon nu de lta bas na bag yod par bya'o zhes gzhon nu khyod kyis de ltar bslab par bya'o zhes bya ba la sogs pa la/ de ci'i phyir zhe na/ zhes bya ba ni ting nge 'dzin nges par bsgrub par bya ba gzhag nas bag yod pa la nan tan du bya ba gang gi phyir bstan zhe na/gzhon nu bag yod pa'i byang chub sems dpa' la bla na med pa yang dag par rdzogs pa'i byang chub kyang rnyed par mi dka' na ting nge 'dzin lta smos kyang ci dgos te/ shin tu rnyed par dka' ba ma yin no zhes bya ba'i don to//ji ltar na bag yod pa yin zhes dris pa dang / rgyu gsungs pa/ tshul khrims yongs su dag pa yin zhes bya ba la/ bag med pa ni tshul khrims yongs su dag par mi 'gyur bas ji ltar na tshul khrims yongs su dag pa yin zhes bya bas tshul khrims yongs su dag pa'i rim pa dris pa'o//thams cad mkhyen pa'i sems dang ma bral bas pha rol tu phyin pa drug la rtag tu mnyam par gzhag pa ni bag yod pa zhes bya'o/ /sangs rgyas kyi byang chub ni sbyin pa'i gter las yin no zhes bya ba dang por sbyin pa'i phan yon gsungs pa/ gzhon nu byang chub sems dpa' sbyin pa la mos pa'i phan yon ni bcu ste zhes bya ba la bcu gang zhe na zhes the tshom bsal ba'i phyir dris pa dang bcom ldan 'das kyis bka' stsal pa/ de'i ser sna'i nyon mongs pa tshar bcad pa yin/ de'i sems rtag tu gtong ba'i rjes su spel ba yin/rgyal po dang / me dang / chom rkun la sogs pa dang / thun mong pa'i longs spyod las snying po len pa yin/ sbyin pas longs spyod che ba'i rigs su skye ste/ longs spyod chen po 'grub pa phangs pa'i phyir ro/ /des na 'di la skyes ma thag tu gtong ba'i sems mngon du 'gyur ba yin te/sngon goms pa'i phyir ro/ /gtong ba po dang / sbyin bdag yin no/ /zhes sems can thams cad la phangs shing sdug pa yin no/ /'jigs pa med cing zhum pa med pa ste/ 'khor gyi nang du 'gro ba na sbyin pa'i bdag nyid che ba'i stobs kyis thams cad zil gyis mnan pa'o//phyogs dang phyogs mtshams su de'i tshigs su bcad pa'i sgra rgya cher brjod pa'i grags pa mngon par 'byung ste/ phyogs thams cad nas 'ongs pa'i sems can thams cad la thun mong du sbyin pas rab tu bsgrags pa'i phyir ro//rkang lag 'jam zhing gzhon sha can yin te/ sbyin pa'i rgyu mthun pas skyes bu chen po'i mtshan gyis spras pa'i lag pa dang / rkang pa dang ldan pa'i phyir ro/ /rkang mthil mnyam zhing rab tu gnas pa yin te/ sbyin pa la yid dam bcas pa brtan pa'i phyir ro//dge ba'i bshes gnyen dang mi 'bral ba ni sangs rgyas dang byang chub sems dpa' thams cad dang / byang chub kyi snying po la mchis kyi bar du mi 'bral ba'i legs pa ni 'di bcu'o/ /zhes bya ba ni 'das pa rnams so/ /don de dag nyid tshigs su bcad pas bstan pa ni don lhag pa med pas ma bshad do//sbyin pa rnam pa bzhi las 'di bstan pa/ /ma lus bsdus par 'gyur ba'i ngo bo gcig /sbyin pa rnams kyi gtso bor 'di mthong gi /gzhan don zhugs pa rnams la kun kyang gtso/ /sbyin pa'i phan yon bstan pa'i le'u ste nyi shu rtsa bdun pa'i 'grel pa rdzogs so// //sbyin pa'i rjes su tshul khrims bstan par bzhed nas/ gzhon nu tshul khrims yongs su dag pa'i phan yon ni bcu ste zhes bya ba la sogs pa la/ ye shes kyi rjes su bskor cing zhes bya ba ni/ ye shes la tshul khrims la sogs pas yongs su 'phel bar byed pa zhes bya'o//yongs su rdzogs par byed pa ni/ dkar po'i chos rnams kyis so/ /sangs rgyas rnams kyi rjes su slob pa ni de bzhin gshegs pa'i bslab pa dang rjes su mthun pa rnams 'phel bar byed pa'i phyir ro/ /mkhas pa rnams kyis ma smad pa ni smad pa'i las mi byed pa'o//dam bcas pa las mi g.yo ba ni byang chub kyi sems mi gtong ba dang / tshul khrims ma nyams pa'o/ /nan tan la gnas pa ni thams cad nan tan gyis sgrub pa'o/ /'khor ba las grol ba ni 'khor ba la mngon par mi zhen pa tsam yin gyi sems can gyi don la rgyab kyis phyogs pa ni ma yin no//mya ngan las 'das pa thob par byed pa ni mya ngan las 'das pa'i mthar thug pa'i sems dang ldan pa'o/ /kun nas ldang ba med par gnas pa ni nyon mongs pa'i kun nas ldang ba med pa'o/ /ting nge 'dzin rab tu 'thob pa ni rnam par g.yeng ba med pa'i tshul khrims kyis ting nge 'dzin mngon sum du byed pa'i phyir ro//dbul po ma yin par 'gyur ba ni chog shes pa'i nor gyi dbang phyug go/ /zhes bya bas tshul khrims kyi nor bsags pas tshul khrims kyi phung po rab tu gnas pa'i phan yon ni bcu po 'di dag go/ / tshigs su bcad pa rnams ni don lhag pa med pas ma bshad do/ /sangs rgyas yon tan lus pa tshul khrims rgyus byung bas/ /nges par sangs rgyas nyid ni thob 'gyur ba/ /tshul khrims mchog ces sangs rgyas yang dag gsungs/ /brtson 'grus brtsams la rtag tu legs par srungs//tshul khrims nges par bstan pa'i le'u ste nyi shu rtsa brgyad pa'i 'grel pa rdzogs so// //tshul khrims kyi rjes su bzod pa'i phan yon bstan pa'i phyir/ gzhon nu zhes bya ba la sogs pa gsungs te/ mes mi 'tshig /mtshon gyis mi 'chi/ dug gis mi tshugs/chus mi 'chi/ nyam nga ba ma spangs par 'chi ba'i dus byed par mi 'gyur ro/ /lha rnams de la srung bar byed de/ bzod pa dang ldan pa de la rtag tu srung ba'o/ /lus mtshan dang dpe byad kyis brgyan pa thob par 'gyur te/ mtshan rdzogs par byed pa'i rgyu yin pa'i phyir ro//des ngan 'gro'i sgo thams cad bcad par 'gyur te/ bzod thob ngan song ltung mi 'gyur/ /zhes bya ba'i tshig gis so/ /de tshangs pa'i 'jig rten du skye ba rnyed par dka' bar mi 'gyur te/ bzod pa ni tshangs pa'i gnas pa'i ngo bo yin pa'i phyir ro//de bde bar nyin mtshan 'da' bar 'gyur te/ sdug bsngal dang phrad par byas pa'i gnod pa thams cad bzod pa'i phyir ro/ /de'i lus la dga' ba dang bde ba mi 'dor bar 'gyur te/ bzod pa ni bde ba'i ngo bo yin pa'i phyir ro/ /bcu po 'di dag ni bzod pa la rab tu gnas pa'i phan yon yin no//tshigs su bcad pa rnams kyi don ni snga ma bzhin no/ /rdzogs sangs rkang gnyis mchog gyur pas/ /bzod pa rnam pa gsum gsungs pas/ /stong nyid chos la bzod pa las/ /gzhan dag bzod par mi 'gyur ro/ /tshul khrims kyi le'u nas brtsams nas le'u'i grangs med de mthar phan yon bcu ste zhes bya ba'i le'u'i bar du'o//brtson 'grus kyi phan yon bstan pa'i phyir gsungs pa/ gzhon nu phan yon ni 'di bcu ste zhes bya ba la sogs pa ste/ bsnyen par dka' bar 'gyur ba ni brtson 'grus kyi stobs kyis yon tan thams cad shin tu mthar thug par 'gro ba nyid kyis zil gyis mnan par sla ba ma yin pa'i phyir ro//sangs rgyas kyis yongs su gzung ba thob pa ni sangs rgyas rnams kyis dgongs pa'o/ /lhas yongs su gzung bar 'gyur ba ni sgrib pa las srung zhing sbed par byed pa'o//des thos pa'i chos yongs su mi nyams pa ni de rtag tu 'don par byed pa'i phyir ro/ /sngon ma thos pa'i chos rnams thos pa ni brtson 'grus kyis sngon ma thos pa'i chos thos pa'o/ /ting nge 'dzin gyi rigs 'thob pa ni chos gzhan dag kyang thams cad ting nge 'dzin gyi rigs 'thob pa ste/mngon du phyogs par 'gyur ba'o/ /nad nyung bar 'gyur ba ni nad kyi gnyen po'i chos bstan pa'i phyir ro/ /de'i zas rnams kyang bde bar 'ju bar 'gyur ba ni khams mi bde ba med pa'i rgyu chos la brten pa'i phyir ro/ /pad+ma lta bur 'gyur zhing mnga' ste ka ma lta bur mi 'gyur ba zhes bya ba ni rim gyis dkar po'i chos rnams 'phel bar 'gyur zhing 'khor ba'i nyes pa'i 'dam gyis ma gos pa yin gyi lcags mda' ste ka ltar rim gyis zad pa dang /sdug bsngal bskyed pa ni ma yin no/ /'di dag ni brtson 'grus brtsams pa'i phan yon zhes bya'o//don de dag nyid bde bar rtogs par bya ba'i phyir yang tshigs su bcad pas gsungs pa/ bsnyen dka' bar yang rtag tu 'gyur/ /zhes bya ba la sogs pa ste/ snga ma bzhin no/ /de bzhin gshegs pa rnams kyang bskal pa dpag tu med par brtson 'grus brtsams pas bla na med pa yang dag par rdzogs pa'i byang chub po zhes brtson 'grus brtsoms la rnal 'byor la brtson par bya'o//bdag gzhan don ldan byang chub sems mchog gi /brtson 'grus kyis ni bzang po kun 'thob cing //'jig rten 'das pa'i sangs rgyas yon tan kun/ /brtson 'grus brtsams pa'i sbyor bas yang dag 'grub/ /da ni bsam gtan gyi phan yon rab tu bstan pa'i phyir/ /gzhon nu bsam gtan la mos pa'i phan yon ni bcu ste zhes bya ba sogs pa gsungs te/spyod pa la gnas pa ni byang chub sems dpa'i spyod pa las kun du mi 'da' ba'o/ /spyod yul la spyod pa ni sa dang pha rol tu phyin pa la sogs pa la spyod pa nyid do/ /yongs su gdung ba med par gnas pa ni nyon mongs pa'i yongs su gdung ba nye bar zhi bas bsam gtan gyi bde ba la gnas pa nyid do//dbang po sbas par 'gyur ba ni rtag tu mnyam par gzhag pas sbas pa ste dbang po rnams yul las log par 'gyur ba'o/ /dga' ba myong ba ni bsam gtan las skyes pa yin gyi yul dang yul can las ni ma yin no/ /'dod pa las dben pa ni 'dod pa'i sred pa dang bral ba nyid do//bsam gtan gyis tshim pa med pa ni bsam gtan gyi bde bas ngoms pa med pa'o/ /bdud kyi yul las thar ba ni rnam par rtog pa'i rnam par g.yeng ba'i bdud kyis ma g.yos pa nyid do/ /sangs rgyas kyi yul la rab tu gnas pa ni snying rje chen po dang byang chub kyi sems kyis yongs su bzung ba'i bsam gtan bsgom pa nyid do//rnam par grol ba rab tu smin par byed pa ni rnam par grol ba'i ye shes mthong ba yongs su gso ba'o/ /bcu po 'di dag ni byang chub sems dpa' bsam gtan la mos pa'i phan yon no//tshigs su bcad pa rnams ni don tha dad pa med pas ma bshad do/ /sa 'dir byang chub sems dpa' bsam gtan mngon ldan pa/ /dus rnams kun du dga' ba mchog ni nyams su myong / /dpag med yon tan yang dag ldan pa yin//rnam mang sangs rgyas sa 'dir myur du 'gyur/ /shes rab la rnam par gnas pa'i phan yon bstan par bzhed nas/ gzhon nu shes rab spyod pa'i phan yon ni bcu ste zhes bya ba la sogs pa gsungs te/ bdog pa thams cad yongs su gtong ba ni phyi dang nang gi bdag nyid can gyi dngos po yongs su gtong ba'o//sbyin pas dag par rlom sems mi byed pa ni shes rab dang bral ba'i sbyin pa'i 'bras bu ni longs spyod tsam nyid kyi phyir ro/ /tshul khrims ma ral ba ni yongs su rdzogs par byed pa nyid do/ /tshul khrims la mi gnas pa ni chos thams cad gnas med par nyams su myong ba nyid do//bzod pa'i stobs la gnas pa ni chos zab mo bzod pa la gnas pa ni sems can gyi 'du shes dang bral bas sems can gyi 'du shes la mi gnas pa yin no/ /brtson 'grus brtsams pa ni lus dang ngag dang yid kyi brtson 'grus yid la byed pa mi dmigs pa la legs par gnas pa'o//bsam gtan la bsam gtan du byed pa ni thams cad la mi gnas pa'i rnal 'byor pa'o/ /bdud rnams kyis thub par dka' ba ni bdud kyi dkyil 'khor thams cad rnam par 'jig pa'i shes rab kyis rnam par 'byed pa nyid do//pha rol rgol ba thams cad kyis rab tu mi bsgul ba ni 'jig rten las 'das pa'i shes rab kyis pha rol rgol ba thams cad mi dmigs par byas nas legs par gnas pa nyid do/ /snang ba 'thob par 'gyur zhes bya ba ni 'du byed 'jug pa thams cad mi shes pa'i mun pa rnam par sel ba'i shes rab kyi snang ba shar ba nyid kyis sems can thams cad la snying rje chen pos yongs su bzung ba'i shes rab thams cad du 'jug gi /nyan thos dang rang sangs rgyas kyi sa la 'dod par mi 'gyur bas dman pa la mos pa'i sems mi bskyed pa'o//sangs rgyas kyi bsam gtan dang / ting nge 'dzin dang / snyoms par 'jug pa la rab tu 'jug pa ni de la mngon par mos pas rab tu 'jug pa'o/ /tshigs su bcad pa'i don ni tha dad med pas ma bkrol lo/ /byang chub sems dpa' bag yod legs pa'i shes rab snang ba gsal//ye shes snang ba las 'phros snying rjes sems can kun gyi gnyen/ /dngos dang dngos med 'byung dang 'gog pa ma lus 'khrul pa tsam/ /yongs su rtogs nas bde bar gshegs pa'i sangs rgyas nyid du 'gyur/ /da ni mang du thos pa'i phan yon bstan par bya ba'i phyir gzhon nu phan yon ni 'di bcu ste zhes bya ba la sogs pa la/gang zhe na zhes bya ba ni thams cad du nye bar bstan pa'i tshig yin par shes par bya'o/ /kun nas nyon mongs pa dang / rnam par byang ba'i phyogs shes par byas nas kun nas nyon mongs pa'i phyogs spong ba ste/mi dge ba'i las kyi lam bcu ni kun nas nyon mongs pa'i phyogs yin no zhes shes nas spong bar byed pa'o/ /the tshom rnam par 'byed pa zhes bya ba ni sems can rnams la rnam par phye nas bstan pas nges pa bskyed nas the tshom sel bar byed pa'o//lta ba drang por byed pa zhes bya ba ni lta ba ngan pa dbang phyug la sogs pa rgyur lta ba dang / mi mnyam pa'i rgyu gtso bo la sogs pa'i lta ba las bzlog nas yang dag pa'i lta ba la rab tu 'jog pa ste/ de lta bu'i tshul gyis lta ba drang por byed do//lam log pa spong ba zhes bya ba ni gti mug las skyes pa'i mchod sbyin la srog gcod pa la sogs pa spong du 'jug cing bdag nyid kyang mu stegs la sogs pa'i lam las ldog par 'gyur ba'o/ /lam la rab tu gnas pa ni sangs rgyas nyid thob par byed pa'i chos la nan tan byed pas sangs rgyas nyid kyi lam mo//sems can thams cad la snang bar gyur pa ni rmongs pa'i mun pa nye bar sel bar nus pa'i bstan bcos thams cad thos pas gsal bar gyur pa'o/ /ngan 'gro thams cad kyis mi 'jigs pa ni ngan 'gror 'gro bar byed pa'i las mi byed pa'i phyir ro//bcu po 'di dag ni byang chub sems dpa' mang du thos pa'i phan yon yin no/ /ma lus don rnams mdzad pa thub pa'i dbang po bzhin/ /mang du thos shing chos rnams rnam 'byed la mkhas shing / /ma lus bstan bcos don rnams 'byed par bzod pa yis//shin tu dri ma med pa sems can don du byas/ /chos kyi sbyin pa'i phan yon ni gzhon nu chos sbyin pa'i phan yon ni 'di bcu ste zhes bya ba la sogs pa gsungs pa la/ bya ba ma yin pa spong ba ni bya ba ma yin pa'i gnyen po'i phyogs kyi chos ston pa'i phyir ro/ /bya ba la 'jug pa ni yang dag pa'i lam rab tu ston pa'i phyir ro//skyes bu dam pa'i chos la 'god pa ni bdag nyid kyang de lta bur gnas pa'o/ /sangs rgyas kyi zhing yongs su sbyong ba ni sems rnam par dag pas/ sangs rgyas kyi zhing yongs su dag par 'gyur zhes bya ba'o/ /byang chub kyi snying po thob par byed pa ni chos kyi sbyin pas chos kyi sku 'thob par 'gyur ro zhes bya ba'i tshig gis byang chub kyi snying po ni byang chub dam pa ste/chos kyi sku'o/ /thob par byed pa ni sgrub par byed pa'o/ /dngos po yongs su gtong ba ni chos thams cad dngos po med par rtogs pas dngos por mngon par zhen pa yongs su 'dor ba'o//gzhan du na skye ba med pa la gtong ba yang med pa'i phyir zhes bya ba'o/ /nyon mongs pa tshar gcod pa ni nyon mongs pa rnams nus pa thams cad dang bral bar byed pas tshar gcod par byed kyi bcing ba dang dgag pas ni ma yin no//sems can thams cad la skal ba'i shas sbyin pa zhes bya ba ni dge ba'i rtsa ba rnams ma god par sems can thams cad dang thun mong du byas nas lhag pa'i bsam pas sems can thams cad la bsngo ba'o/ /de la dmigs pa'i byams pa bsgom pa ni sems can thams cad nges par gzung ba'i phyir sems can la dmigs pa dang /chos la dmigs pa dang / dmigs pa med pa'i snying rje chen po sgom par byed cing mthong ba'i chos la ni bde ba thob par 'gyur la/ chos sbyin pa dang dus mnyam pa nyid du ni dga' ba dang rab tu dga' ba thob par 'gyur ro//zhes bya ba bcu po ni chos kyi sbyin pa'i phan yon no/ /tshigs su bcad pa'i don ni snga ma bzhin no/ /bde ba dpag med 'byung ba'i rgyur gyur pa/ /dam chos sbyin pa sangs rgyas kyis rab bsngags/ /chos kyi sbyin pa las lhag gzhan med pas//de phyir chos kyi sbyin pa rab tu sbyin par bya/ /byang chub sems dpa' stong pa nyid la gnas pa'i phan yon bstan par bya ba'i phyir/ gzhon nu stong pa nyid la gnas pa'i phan yon ni 'di bcu'o zhes bya ba la sogs pa la/ sangs rgyas kyi gnas pa la gnas pa ni stong pa nyid la gnas pa nyid de/sangs rgyas kyi gnas pa'o zhes byas nas so/ /mi gnas par bsam gtan byed pa ni gnas la dmigs pa med pa nyid do/ /skye ba la mi smon pa ni chos thams cad stong pa'i phyir khams gsum du skye ba dmigs su med pa nyid do//tshul khrims la mchog tu mi 'dzin pa ni bdag ni tshul khrims dang ldan pa'o/ /tshul khrims ni 'di'i don du tshul khrims srung ngo zhes gsum la mchog tu lta ba'i rnam par rtog pa dang bral ba nyid do/ /'phags pa la mi skur ba ni 'phags pa nyan thos dang /rang sangs rgyas kyi rtogs pa la nan tan byed pa yang mngon par mi nyams par mthong bas stong pa nyid la gnas na yang / ci yang med do zhes skur pa mi 'debs pa'o/ /mi 'gal bar gnas pa ni thams cad du chos 'gal ba ma dmigs pa nyid do/ / dngos po mi dmigs pa ni phyi dang nang gi bdag nyid can gyi dngos po rnams rang gi ngo bor yongs su ma grub pa nyid do/ /'du byed thams cad stong pa'o zhes nges par rtogs pa'i phyir ro/ /dben par gyur pa ni nyon mongs pa thams cad kyis dben pa'i stong pa nyid kyi ting nge 'dzin gyis gnas pa'i phyir ro//sangs rgyas la skur pa mi 'debs pa ni bcom ldan 'das kyis chos thams cad stong pa nyid du bstan pa ni dmigs pa med pa'i lta ba yin gyi gang gzhan dag tu gang zag la sogs pa bstan pa ni dgongs pa can ma yin gyi bden pa nyid yin no zhes ston par byed na de de bzhin gshegs pa la skur pa 'debs pa yin no//dam pa'i chos 'dzin pa ni klog pa dang kha ton la sogs pas lung gi chos 'dzin par byed do/ /rtogs pa'i chos ni mngon sum du byed pas 'dzin pa yin pa'i phyir stong pa nyid sgom pa kho na dam pa'i chos 'dzin pa yin no zhes bya ba ni stong pa nyid la gnas pa'i phan yon yin no//ma lus stong par rnal 'byor pas shes kyang / /lus rnams thams cad rjes su mthun par byed/ /dpa' bo khams gsum dag na mi 'jigs pas/ / 'dir ni byang chub rang bzhin sangs rgyas 'gyur/ /da ni nang du yang dag 'jog gi phan yon bstan par 'dod nas/ gzhon nu nang du yang dag 'jog gi phan yon ni 'di bcu ste zhes bya ba la sogs pa gsungs te/ sems rnyog pa med pa ni sems nyon mongs pa'i 'dam gyis ma gos pa nyid do//bag yod par gnas pa ni rtag tu mnyam par gzhag pa'i phyir bag med pa'i gnas spangs pa nyid do/ /sangs rgyas rjes su dran pa ni nang du yang dag 'jog gi sangs rgyas kyi yul mngon par dran pa nyid do/ /chos la dad pa nyid ni lung dang rtogs pa'i mtshan nyid can dag la thams cad du slu ba med pa nyid du dad pa'o//ye shes la nem nur med pa ni rnam pa thams cad mkhyen pa'i ye shes yod dam med dam bdag gis thob bam mi 'thob ces the tshom za ba med pa nyid do/ /sangs rgyas la byas pa gzo ba ni de bzhin gshegs pas bstan pa'i chos rnams thos pa dang bsams pa dang bsgoms pa'i stobs kyis yon tan 'di dag 'byung ngo zhes shes nas de bzhin gshegs pa la blta ba dang /phyag bya ba dang / mchod pa la sogs pa la rtag tu 'jug pa nyid do/ /chos mi spong ba ni chos bstan pa thos na sangs rgyas mthong ba yin no//de'i phyir chos spang bar mi bya'o/ /de spangs pas dkon mchog gsum spangs pa yin pas de la ngan 'gro'i 'gro ba las 'gro ba gzhan yod pa ma yin no zhes shes nas spong bar mi byed pa'o/ /shin tu bsdams par gnas pa ni lus dang ngag dang yid kyi sdom pa blangs pa ma nyams pa nyid do//dul ba'i sa rjes su 'thob pa ni sangs rgyas kyi sa dang rjes su mthun pa'i nang du yang dag 'jog la brten par 'gyur ba'o/ /so so yang dag par rig pa bzhi mngon sum du byed pa ni ji skad gsungs pa'i ting nge 'dzin bsgoms pa nyid kyis mngon sum du byed pa zhes bya ba ste/byang chub sems dpa' nang du yang dag 'jog la mngon par sbyor ba'i phan yon ni bcu po 'di dag go/ /tshigs su bcad pa'i don ni snga ma bzhin no/ /bde bar gshegs pa'i sras kyi so so rang rig pa//rgyal ba kun gyis rab tu bsngags pa'i bsam gtan gyis/ /rtag tu de nyid la ni thim par gyur de 'dir/ /des na de la nang du yang dag 'jog ces bya/ /dgon pa na gnas pa'i phan yon bstan pa'i phyir/ gzhon nu bcu po 'di dag ni zhes bya ba la sogs pa gsungs te/bya ba nyung bar gnas pa ni khyim gyi bya ba mang po spangs pa'i phyir ro/ /'du 'dzi ring du spong ba na mang po tshogs nas bre mo'i gtam byed pa dben pa'i mi mthun pa'i phyogs su byas nas spong ba'o/ /de la rtsod pa med par 'gyur ba ni nags na rtsod pa'i zla med pa'i phyir ro//gnod pa med par gnas pa ni gang la yang mi bzod pa'i sems kyis gnod pa'i sems ma skyes pas gzhan du yang gnod pa'i bsam pa bskyed par mi bya ba'o/ /yang na nad thams cad dang bral ba'i phyir nad kyi rjes su gnod pa med par 'gyur ba'o//zag pa 'phel bar mi byed pa ni 'dod chags dang / zhe sdang dang / gti mug gi rgyu las byung ba'i las dang nyon mongs pa'i rgyu mi byed pa'o/ /rtsod pa'i gzhir mi byed pa ni ltung ba'i rgyu las byung ba'i rtsod pa zhes bya ba ni dgon pa de na 'dul ba 'dzin pa dang / ma mo 'dzin pa med pa'i phyir med pa'o/ /shin tu zhi bar spyod pa ni lus dang / ngag dang / yid kyi gnas ngan len nye bar zhi ba'i phyir dgon pa na nye bar zhi bar spyod pa'o/ /shin tu bsdams par gnas pa ni sdom pa gsum gyi khongs su gtogs pa'i sdom pa thams cad kyis bsdams pa nyid kyi phyir ro/ / thar pa dang mthun pa'i sems kyi rgyud du 'gyur ba ni dus thams cad du mya ngan las 'das pa la zhen pa'i sems kyis gnas pa nyid do/ /rnam par grol ba mngon sum du byed pa ni rnam par grol ba mngon sum du bya ba la zhugs pa'i phyir ro zhes bya'o/ /tshigs su bcad pa'i don ni snga ma bzhin no//stong nyid dgon pa'i dbus gnas pa'i/ /rnal 'byor mchog gzhol rnal 'byor pa/ /rga shi med pa'i sangs rgyas nyid/ /rtag pa'i gnas ni thob par 'gyur/ /bsod snyoms par dam bca' ba'i sbyangs pa'i yon tan gyi phan yon bstan pa'i phyir/gzhon nu phan yon 'di bcu ste zhes bya ba la sogs pa la/ de shes kyi khe 'dod pa ma yin pa ni gnyen bshes la chags pa dang bral ba nyid do/ /snyan pa 'dod pa ma yin pa ni grags pa'i ched du bsod snyoms par yi dam du len cing sbyangs pa'i yon tan len pa ma yin pa'o//rnyed pa dang bkur sti 'dod pa ma yin pa ni gzhan gyi khyim spangs nas bsod snyoms kyis chog shes pa'o/ /'phags pa'i rigs bzhi la gnas pa ni bden pa bzhi bsgom pa dang ldan pa nyid do/ /tshul 'chos pa dang kha gsag med par 'gyur ba ni rnyed pa'i don du dbang po yang dag par bsdams pa dang /tshig snyan pa brjod pa dang bral ba'o/ /bdag la mi stod pa ni bdag ni bsod snyoms tsam gyis chog pa tshul khrims dang ldan la gzhan ni de lta ma yin no zhes zer ba med pa'o/ /gzhan la mi smod pa ni gzhan gyi skyon mi smra ba'o//rjes su chags pa dang / khong khro ba spangs pas gzhan gyi khyim du spyod pa ni rung ba dang gya nom pa'i bsod snyoms ster ba'i khyim gyi rnam par rtog pa spangs nas mnyam pa nyid du rjes su 'jug pa'o/ /zang zing med par chos kyi sbyin pa sbyin par byed pa ni nor la zhen pa med pa nyid do//sbyangs pa'i yon tan yo byad bsnyungs pa la gnas shing chos bstan pa gzung bar 'gyur ba yin zhes bya ba ni/ 'jig rten pa rnams mgu ba'i tshul khrims la rab tu gnas pa'i phyir ro zhes bya ba'i phan yon ni bcu po 'di'o//tshigs su bcad pa'i don ni snga ma bzhin no/ /gzhon nu de lta bu'i sbyangs pa'i yon tan la gnas pa'i bshad ma thag pa'i dgon pa la gnas pa ni sangs rgyas kyi gter rnyed par 'gyur/ chos kyi gter rnyed par 'gyur/ ye shes kyi gter rnyed par 'gyur/dus gsum gyi shes pa'i gter rnyed par 'gyur ro/ /ji ltar sangs rgyas kyi gter rnyed par 'gyur zhe na zhes don nges par dris pa dang / bcom ldan 'das kyis bka' stsal pa/ dben pa la spyod cing dgon pa la gnas nas mngon par shes pa lnga 'thob ste/lha'i mig dang / lha'i rna ba dang / pha rol gyi sems shes pa dang / sngon gyi gnas rjes su dran pa dang / rdzu 'phrul gyi yul te de mi las 'das pa lha'i mig rnam par dag pas phyogs bcu rnams su sangs rgyas bcom ldan 'das grangs med dpag tu med pa rnams mthong ngo //de sangs rgyas mthong ba dang mi 'bral bar 'gyur te/ de ltar na sangs rgyas rnams kyi gter rnyed pa yin no/ /sangs rgyas bcom ldan 'das de dag phyogs bcu na chos gang ci ston pa de yang lha'i rna bas thos te/ de'i phyir de chos nyan pa dang mi 'bral bar 'gyur te/de ltar na chos kyi gter rnyed pa yin no/ /byang chub sems dpa' ye shes gang dang ldan pas chos thams cad 'dzin te/ kun bzung nas mi brjed cing bsam pa dang bag la nyal shes nas sems can rnams la chos ston te/ de ltar na ye shes kyi gter rnyed pa yin no/ /de mngon par shes pas 'das pa dang / ma 'ongs pa dang / da ltar byung ba'i sems can thams cad kyi sems dang spyod pa shes pa la 'jug ste/ de ltar na sngon gyi mtha' dang / phyi ma'i mtha' dang / da ltar byung ba shes pa'i gter rnyed pa yin no//mdor bsdus na sangs rgyas kyi chos rnams kyang rab tu 'thob par 'gyur ro/ /dam pa'i chos kyi yon tan ma lus pa/ /tshig gis brjod pa mi nus bsam par dka'/ /gus pas zhugs par gyur kyang brjod mi nus/ / gzhan gyi don du zhugs pas mi legs min/ /phan yon bcu pa'i le'u ste nyi shu rtsa dgu pa'i 'grel pa rdzogs so// //da ni rab tu byung ba ni legs par rtogs pa'i rjes su mthun pa yin no/ /zhes rab tu bstan pa'i phyir gzi brjid kyi tshogs kyi rgyal po'i le'u/de nas yang bcom ldan 'das kyis zhes bya ba la sogs pa gsungs te/ gzhon nu de lta bas na lha'i 'khor los sgyur ba'i rgyal srid kyi bde ba yang spangs te rab tu byung zhes khyod kyis de ltar bslab par bya'o zhes bya ba nas gzhon nu bdag nyid yongs su gtong bas kyang sems can de dag gi don bya'o zhes bya ba'i bar gyi gzhung gi don ni bshad zin to//de nas bcom ldan 'das kyis sngon byung ba'i le'u 'di tshigs su bcad pa'i dbyangs kyis yang dag par rab tu bstan to zhes bya bar 'brel to/ /'das pa'i bskal pa brgya mang rab dran te//zhes bya ba la sogs pas ni sngon byung ba'i gtam gsungs te/ 'das pa'i bskal pa brgya phrag mang po ngas dran te/ dus de'i tshe de bzhin gshegs pa gzi brjid tshogs kyi rgyal po zhes bya ba de'i bstan pa la mngon par shes pa drug dang ldan pa'i dge slong bye ba phrag bcu byung ste/so so yang dag par rig pa thob pa/ sbyangs pa'i yon tan gyis yang dag par brgyan pa/ sems zhi ba'i dge 'dun byung bar gyur to/ /der grong khyer ni bye ba brgya phrag bdun cu rtsa drug byung ngo / /grong khyer re re la yang dpag tshad lnga brgya yod pa la me tog dang /'bras bu sna tshogs dang ldan pa'i ljon shing mchog gis brgyan cing khyab pa/ bya sna tshogs skad snyan pa 'byin pas gang ba'i skyed mos tshal brgyas brgyan pa na yang rdzing bu pad+ma dang / ut+pa la dang / dri zhim pa dang / dri zhim ldan pa la sogs pas brgyan pa'i chu yan lag brgyad dang ldan pas yongs su gang ba yid du 'ong ba la bya'i tshogs kyis brgyan pas skyed mos tshal ji snyed yod pa de snyed dang mnyam pa'o/ /de'i tshe 'dzam bu'i gling 'dir sa'i bdag po brten pas byin zhes bya ba bu lnga brgyas brgyan pa yid rab tu dga' ba/phas kyi rgol ba dang / mu ge dang / /bdud la sogs pa'i gnod pa dang bral bas 'dzam bu'i gling dang / lha'i gnas la khyad par med pa'i rgyal srid kyi bde ba kha na ma tho ba med pa nyams su myong bar gyur to/ /yang de'i tshe de bzhin gshegs pa gzi brjid tshogs kyi rgyal po khyad par du ting nge 'dzin gyi rgyal po'i che ba'i bdag nyid kyi yon tan nges par ston cing chos ston to//don dam pa'i rang bzhin gsal bar bye ba'i phyir dang / chos thams cad bdag med par rab tu sgrub pa'i phyir/srid pa'i 'gro ba rmi lam lta bu ste/ zhes bya ba la sogs pa gsungs te/ 'gro ba drug gi 'khor bar 'byung bas na srid pa'o/ /der skyes pa ni 'gro ba'o/ /de dag ni rmi lam lta bu ste/ ji ltar rmi lam ni 'gro ba sna tshogs su ltung ba'i sems can rnams skye ba dang /'gag pa dang / bde ba dang / sdug bsngal so sor rang rig pa nye bar dmigs na yang rmi lam gyi dngos po grub pa med pas skye ba dang 'chi ba la sogs pa de dag bden par yod pa ma yin no/ /'di la su yang mi skye 'chi ba med/ / ces bya ba ni skye ba yang med do/ /mo gsham gyi bu bzhin du skye ba med pa'i phyir ro/ /ma skyes pa la 'chi ba yang med pa nyid do/ /sems can ming dang srog kyang mi rnyed de/ /zhes bya ba ni grangs can dag ni sems can zhes bya ba yon tan gsum gyi bdag nyid can gtso bo zhes brjod pa'o//de yongs su gyur pa na 'gro ba yin no zhes zer ro/ /mi rnyed ces bya ba ni tshad mas nges par brtags na nye bar dmigs par mi 'gyur ba ste/ yongs su 'gyur ba mi rigs pa nyid do/ /rtag na ni rang gi ngo bo gzhan du mi 'gyur ba yin pas yongs su 'gyur ba yang ma yin no//skad cig ma yin na yang skad cig gnyis par gnas pa'i skabs med pas yongs su 'gyur ba med ces bya'o/ /srog ni phyogs kyi gos can gyis yongs su brtags pa'i bdag ste/ de yang phung po lnga po las gzhan du dmigs par mi 'gyur ro//ming ni rig byed pa la sogs pas brtags pa'i skyes bu ste sred med kyi bu la sogs pa'o/ /de yang dmigs par mi 'gyur ro/ /de nyid kyi phyir/ chos 'di rnams ni dbu ba chu shing 'dra/ /zhes bya ba la/ dbu ba'i gong bu ni snang ba tsam ste nges par brtags na ci yang med pa'o//phung po lnga po yang dbu ba'i gong bu bzhin du bdag la sogs pa'i ngo bo med pa nyid do/ /chu shing so sor phye na snying po ci yang med pa de bzhin du phung po dang khams dang skye mched la sogs pa'i snying po yod pa ma yin no//de lta bas na sgyu ma lta bu/ nam mkha' ltar rang bzhin med pa/ nyams su myong ba rnams ni sprin lta bu/ glog lta bu/ chu'i zla ba lta bu/ smig rgyu ltar mthong ba nyid na mi dmigs pa'i ngo bo skad cig ma'i ngo bo zhes bya ba'o/ /dpe 'di dag ni gang zag la bdag med par sgrub pa'i phyir bstan te/'ga' zhig la grags pa'i dbang du byas nas yin no/ /bdag med pa gnyi ga bsres nas bstan par bya ba'i phyir srid pa gsum po rmi lam bzhin du stong / myur du 'jig cing mi rtag sgyu 'dra nyid/ /ces bya ba la/ rab tu snang zhing gsal ba yang rmi lam nyid dang 'dra ba'i phyir dang /skad cig ma nyid dang / snying po med pa nyid du rab tu rtogs so/ /'dir gang nas kyang ma 'ongs shing / 'di nas kyang gar yang 'gro ba med pa ni gang gi phyir chos thams cad stong pa nyid dang / mtshan ma med par gyur pa'o//de'i phyir mi dag 'jig rten 'dir yang shi nas ni zhes bya ba la/ mi dag 'jig rten 'di nas shi bar gyur pa yang med la/ 'jig rten pha rol du 'gro ba yang med do/ /'gro ba dang 'ong ba med pas rtag tu khyab pa'i phyir ro/ /skad cig ma nyid yin pas kyang skye ba'i yul de nyid du 'chi bar 'gyur bas 'gro ba med pa nyid do//gal te de lta na ma byas pa dang phrad pa dang / byas pa chud zos par 'gyur ro zhes bya ba'i the tshom bzlog pa'i phyir/ las byas rnams ni nam yang med mi 'gyur/ /zhes bya ba la sogs pa gsungs te/ dge ba dang mi dge ba'i las byas pa'i skyes bu gnyid kyis log pa'i tshe mtho ris dang ngan song la sogs pa'i bde ba dang /sdug bsngal la sogs pa nyams su myong bar gyur pa mthong yang de dag tu song ba'i bya ba med pa dang / 'dir shi bar thal bar 'gyur ba'i phyir ro/ /de lta na ni bde ba dang sdug bsngal nyams su myong bar yang mi 'gyur te/'gro ba med pa'i phyir ro zhe na/ 'jig rten pha rol du 'gro ba'i skyes bu la sogs pa med kyang las dang 'bras bu rnam par nyams pa med do zhes bya ba yin par/ 'khor ba na yang dkar nag 'bras bu ster//zhes bya bas bstan pa yin no/ /rtag pa ma yin chad par mi 'gyur te/ /zhes bya ba la/ gal te rtag pa yin na ngo bo gcig tu gyur pas las dang 'bras bu nyams su myong ba yod par mi 'gyur ro/ /chad par gyur na yang / thams cad yod pa ma yin pas/ / las dang 'bras bu yod par mi 'gyur ro zhes bya bas kho bo cag gi 'dod pa ltar na ni las dang 'bras bur 'brel ba grub pa yin gyi gzhan dag gis yongs su brtags pa'i skyes bu rtag pa dang / chad par lta ba ngan pa'i lam du zhugs pa rnams la ni med do/ /las bsags med cing gnas pa dag kyang med//ces bya ba la/ sngon dang phyi ma phrad pa med pas bsags pa yod par mi 'gyur ro/ /skad cig ma so so rang gi ngo bo so sor 'byung ba na de nyid du gnas pa med na ji ltar las dang 'bras bu nyams su myong ba yin zhe na/ de yang byas nas reg par mi 'gyur min//zhes bya ba la/ gang gis las byas pa des reg par mi 'gyur ba min te/ nyams su myong bar mi 'gyur ba ma yin no/ /de lta na yang nyams su myong bar 'gyur ro zhes bstan pa'i phyir ro/ /gzhan gyis byas pa myong bar 'gyur ba'ang med/ /ces bya ba la/gzhan gyis byas pa gzhan gyis myong ba yang ma yin la/ las gzhan zhig byas nas 'bras bu gzhan zhig myong ba yang ma yin te/ srog gcod pa'i las byas nas sbyin pa'i 'bras bu longs spyod nyams su myong na ni so sor nges pa'i las kyi 'bras bu nyams par thal bar 'gyur ro//'pho ba med cing phyir yang 'ong ba med/ /ces bya ba ni 'jig rten 'di nas 'jig rten pha rol du rtag pa'i bdag 'ga' yang 'pho ba yang med de bdag la sogs pa med pa'i phyir ro/ /'jig rten pha rol la sogs pa nas 'ga' zhig 'dir 'ong ba yang med de 'pho bar smra ba tshad mas gnod pa nyid kyis sun phyung ba'i phyir ro//thams cad yod pa'ang ma yin te/ gzhan gyis yongs su brtags pa thams cad ni ri bong gi rwa bzhin du mi bden pa'i phyir/ med pa'ang ma yin te/ sgyu ma dang 'dra ba'i so sor snang ba la 'jig rten gyi tha snyad 'dogs pas med pa yang ma yin no//lta ba'i gnas kyang ma yin te/ dngos po'i ngo bor yongs su ma grub pa nyid do/ /dag pa yang ma yin te/ sngon ma dag pa las phyis dag par 'gyur ba ma yin pa ni sems can gcig la dag pa dang / ma dag pa ni yongs su brtags pa tsam yin zhes bya'o//de'i spyod pa 'jug pa tsam yang med de/ thams cad du yod pa ma yin pa'i phyir ro/ /de bzhin du 'jug pa dang / 'jug pa med pa zhi ba ni 'jug pa'o/ /gzod nas zhi ba ni 'jug pa'i ngo bo med pa'am sgrub par byed pa'o/ / skye med zhi ba mtshan ma med pa'i gnas/ /zhes bya ba la/ skye ba med pa ni zhi ba'i go 'phang ngo / /skye ba ni nyes pa thams cad kyi gnas yin pa nyid dang / rab tu ma zhi ba nyid do/ /de'i phyir mtshan ma thams cad dang bral ba'i gnas yin no/ /bde gshegs spyod yul zhes bya ba ni gzhan gyi spyod yul ma yin no zhes bstan pa yin no//de lta bu'i rab tu zhi ba dang stong pa nyid nges par rtogs pas sangs rgyas kyi yon tan dri ma med pa bsnyengs pa med pa'i stobs bcu dang / pha rol tu phyin pa bcu dang / ye shes bcu la sogs pa'i sangs rgyas kyi yon tan dpag tu med pa rnam par dag pa rnams 'bad pa med par 'byung bar 'gyur ro//mngon par shes pas rnam par rtse zhing cho 'phrul rnam pa sna tshogs kyi khyad par yang 'bad pa med pa nyid du 'byung bar 'gyur zhes bya'o/ /'gro dang 'jug med mkhas pa'i chos kyi 'gros//zhes bya ba ni chos kyi dbyings kyi rang bzhin ni gar yang 'gro ba med pas mi 'gro ste zhes bya ba de bzhin nyid la 'gro ba dang / 'ong ba med pa nyid kyi phyir ro/ /de 'dra'i 'gro ba 'gro med ces bya ba ni chos nyid kyi 'gros ni mkhas pas nan tan gyis rtogs par bya ba ste/sangs rgyas dang / byang chub sems dpa' rnams kyis rtogs par bya ba'o/ /de dag nyid bstan par bya ba'i phyir/ chos kyi dbyings ni gar yang mi 'gro ste/ /zhes bya ba la/ chos kyi dbyings dang / de bzhin nyid dang / yang dag pa'i mtha' dang / stong pa nyid dang / chos nyid ces bya ba ni rnam grangs kyi sgra zhes bya ba'o/ /zhi ba rab zhi nye bar zhi ba'i 'gros/ /zhes bya ba ni zhi ba ni gzod ma nas zhi ba nyid do/ /rab zhi ni tha ma'i mtha' dang bral ba'i phyir ro/ /nye bar zhi ba ni dbus med pa'i phyir ro/ /rtag tu dngos po'i rang bzhin rjes su song //zhes bya ba ni mi g.yo ba shin tu mthong bar dka' ba'i gnas te/ bde bar gshegs pa'i go 'phang ngo / /de lta bu'i gnas de ni tshig gis brjod par nus pa ma yin no/ /dbyangs kyis bshad kyang dbyangs kyi 'jug pa med/ /ces bya ba la/ dbyangs ni sgra'i ngo bos stong pa nyid yin pas gang nas kyang mi 'ongs gar yang mi 'gro//gar yang gnas pa med pa ste ngo bo nyid kyis stong pa'i phyir ro/ /chos nyid kyi 'gros te 'gro ba kho na dbyangs kyis 'gro ba yin no/ /'gros zhes bya ba'i sgras kyang 'gro ba bstan par mi nus te/ sgrub pa po dang bsgrub bya'i rang bzhin med pa'i rang bzhin gcig pa nyid de sngon gyi mtha' dang /phyi ma'i mtha' dang / dbus kyi ngo bo dang bral ba nges par rtogs pa ni chos nyid kyi 'gros yin no zhes bstan pa ni de bzhin gshegs pa thams cad kyi mnyam pa yin no/ /rdul bral rnam par dag pa don dam gnas//sangs rgyas de nyid yod ces mi gsung ba/ /de nyid rig pa de nyid med mi smra/ /long bar gyur pa'i mu stegs rtsod par byed/ /ces bya ba la/ rdul bral ni 'dod chags la sogs pa'i rdul dang bral ba'o/ /rnam par dag pa ni dri ma'i bag chags dang bral ba'i phyir ro//zhi ba ni rang bzhin gyis stong pa nyid do/ /rtog dang rlom sems med pa rab zhi gnas/ /zhes bya ba ni chos nyid kyis gzugs rab tu zhi ba de la brtag pa yod pa ma yin pas yid kyi rnam par rtog pas kyang brtag par mi nus pa'o//de lta bu'i chos zab mo rgyal ba ste/ bdud las rgyal bas ston par mdzad pa yin no/ /'di la yi ge spyod pa yod ma yin/ /zhes pas ston pa med na yang bstan pa'i rnam pa'i snang ba yang gdul bya'i rgyud la snang bar 'gyur ro/ /de bzhin du/ rin chen chos rnams rdul bral don dam stong //zhes bya ba la/ spros pa ma lus pa dang bral ba'i stong pa nyid kyi de kho na nyid ni don dam pa'o zhes sangs rgyas rnams ston par mdzad do/ /rgyal po brtan byin gyis ni de tshe thos/ /zhes bya ba la/ rang gi pho brang na gnas bzhin du chos bstan pa de thos so zhes bya ste/thos pa dang ldan pa'o/ /de nas dga' ba dang / rab tu dga' ba thob nas 'khor bye ba khrag khrig brgyad cu dang bcom ldan 'das ga la ba der song ste phyin nas bcom ldan 'das kyi zhabs la mgo bos phyag 'tshal nas lag pa thal mo sbyar ba byas te/ bcom ldan 'das kyi spyan sngar 'dug go//mi'i bdag po'i bsam pa mkhyen nas chos thams cad kyi rang bzhin mnyam pa nyid rnam par spros pa'i ting nge 'dzin dam pa 'di bshad do/ /rang bzhin gyis stong pa 'di thos nas mi'i bdag po de la dga' ba mtshungs pa med pa skyes par gyur to//'phags pa'i dga' ba ni zang zing med pa'i chos kyi dga' ba'o/ /de dga' ba dang rab tu dga' ba skyes pas gling bzhi la dbang ba'i rgyal srid kyi dbang phyug rtswa bzhin du spangs nas sangs rgyas nyid thob par bya ba'i phyir rab tu byung bar gyur gyi 'dod pa'i rgyus ni ma yin no/ / bsam pa mi g.yo byang chub rab nges pas/ /rtag tu stong pa'i chos la rab gnas te/ /sangs rgyas sa yi mthar thug rtogs 'gyur zhes/ /bsam pa dag pas mi dbang rab tu byung / /'dzam bu gling pa'i mi de dag thams cad kyang de'i rjes su rab tu byung bar gyur to/ / de tshe stobs bcu'i yon tan rgya che ste/ /zhes bya ba la/ gang gi tshe mi'i bdag po dang lhan cig thams cad rab tu byung bar gyur pas de'i tshe bcom ldan 'das dge slong dang dge slong ma'i 'khor gyis bskor bar gyur to/ /de lta na chos gos dang bsod snyoms la sogs pa ji ltar 'grub par 'gyur zhes the tshom za ba bsal ba'i phyir//de tshe ma rmos ma btab rtsi 'khrungs te/ /zhes bya ba la sogs pa la/ ma rmos shing ma btab pa nyid du rtsi thams cad lha'i bdud rtsi dang 'dra ba bsod nams las byung bar gyur to/ /byin len byed pa dang g.yog dang bsnyen bkur ba yang lha la sogs pa rnams rtag tu nye bar gnas par gyur to//chos gos gsum yang legs par kha dog bsgyur ba/ legs par drubs pa/ legs par bcags pa rnams kyang bsod nams las byung zhing grub par gyur to/ /zad pa'i dus na sems can mang po dag /ces bya ba la sogs pa la/ phyi ma'i dus na mi mang po dag longs spyod chung zhing dbul bzhin du khyim la mngon par zhen pa dag rab tu 'byung bar mi nus la de dag la rgyal po'i chad pas khro ba dang / brdeg pa dang / bsdigs pa dang / bcing ba dang / gnod pa rnam pa dpag tu med pa nyams su myong bar 'gyur ro//de lta na yang 'khor bas skyo bar mi 'gyur zhing bza' ba tsam yang rnyed par mi 'gyur na nor bsag cing 'byor par 'gyur ba lta ga la yod/ nor bsags pa'i rgyu bzo'i gnas kyi cha la mkhas pa yang ma yin no/ /'dod chags dang /khong khro dang / 'dod pas zil gyis mnan par gyur na yang bdag kyang sangs rgyas nyid du 'gyur ro zhes smra bar byed cing mi dge ba bcu'i las kyi lam la rab tu gnas pa'i btsun pa byang chub spyod pa ston ces smra zhes bya ba ni 'di skad du btsun pa byang chub kyi spyod pa bdag la bstan du gsol/bdag nyan par 'tshal lo zhes smra bar byed kyang chos thos pa'i rjes su 'jug pa yang ma yin la/ gang las byang chub sems dpa'i spyod pa thos pa de la yang dge ba'i bshes gnyen gyi 'du shes kyang mi skyed do/ /de dag nyid la slar yang khong khro rab tu bskyed nas 'khrul pa tshol bar byed cing gcig tu skyon smra ba la gnas par 'gyur ro//gzhon nu nga yi tshig 'di thos nas ni/ /zhes bya ba la sogs pa la/ nga'i gsung 'di thos nas/ de dag dang ni ston par ma byed cig /byang chub 'dod pa rnams la sbyangs pa'i yon tan gyi bsngags pa rjod par byed kyang bdag nyid nan tan nyams su len pa la rjes su zhugs pa ni ma yin no//tshul khrims rnam par dag cing rgyags pa dang / nga rgyal dang / ser sna la sogs pa dang / bral ba nan tan snying por byed pa rnams la ni byang chub kyang rnyed par dka' ba ma yin na/ting nge 'dzin 'di lta smos kyang ci dgos zhes bya ba'o/ /mtshan sum cu rtsa gnyis dang / dpe byad bzang po brgyad cu la sogs pa yon tan gyi sgo nas bcom ldan 'das yid la bya ba'o zhes bya bar/ 'chag cing 'dug dang 'greng zhing nyal ba na//mi gang thub pa'i zla ba dran byed pa/ /de yi mdun na rtag tu ston pa bzhugs/ /de ni rgya cher mya ngan 'das par 'gyur/ /zhes bya ba la/ spyod lam bzhi po thams cad du rjes su dran par byed pa ni nges pa kho na yang sangs rgyas kyi byang chub 'thob par 'gyur ro zhes gsungs pas de'i phyir phyi dang nang gi bdag nyid can gyi mchod pa'i khyad par gyis mchog tu gus pa dang /de bzhin gshegs pa la mchod par bya'o/ /sangs rgyas sku gzugs shin tu mdzes pa dag /ces bya ba ni phyi rol gyi sku gzugs la phyag bya ba dang / blta ba dang / mchod pas bsod nams bsag par bya ba'i phyir 'byor pa ji lta ba bzhin du gser dang / dngul dang / zangs dang / sa las byas pa yang rung / mdzes pa mtshan gyis legs par brgyan pa/ bzo legs par byas pa mdun du bzhugs su gsol ba la gdugs dang / rgyal mtshan dang /ba dan la sogs pa dang / zhal zas sna tshogs kyi bshos gtsang gi bye brag gis mchod par bya'o/ /de bzhin du ras ris la sogs par gtogs pa'i ri mo la yang mchod par bya'o/ /sangs rgyas rjes su dran pa bsgom zhing dben par gnas par bya'o zhes bstan pa'i phyir rtag tu nags khrod dben pa bsten par gyis//zhes bya ba la sogs pa la/ grong dang grong khyer la sogs pa la zhen pa spangs nas nags dang / ri'i phug dang / sman ljongs la sogs par gcig pu gnyis su med par bse ru ltar gnas la/ ting nge 'dzin bsgom pa la mngon par dga' bas rtag tu mnyam par gzhag na ting nge 'dzin mngon sum du 'gyur ro zhes bstan pa'i phyir/nga ni chos rje khyod ni nga yi bu/ /zhes bya ba la nga ni chos kyi rje yin khyed rnams ni nga'i sras chos las skyes pa yin no/ /de lta bas na ting nge 'dzin nges par sgrub par 'dod pas nga'i rjes su bslab par bya ba'i phyir zhum pa med pa'i sems kyis 'bad par bya ste/ji ltar mi'i bdag po brtan pas byin gyis rgyal srid kyi dbang phyug spangs nas rab tu byung ste/ rab tu byung nas kyang ting nge 'dzin bsgom pa la mngon par sbyor bar gyur pa bzhin bya'o zhes bya ba la/gang mi'i bdag po brtan pas byin zhes bya ba byung ba thos pa de gzhan ma yin te/ nga nyid de'i tshe de'i dus na mi'i bdag po brtan pas byin zhes par gyur to/ /ngas sangs rgyas dpag tu med pa la mchod pa byas so/ /tshul khrims bsrungs so/ /ting nge 'dzin mchog 'di rjes su tshol ba'i tshe/bu dang / bu mo dang / chung ma dang / rgyal srid kyi longs spyod dang / lag pa dang / rkang pa dang / mig dang / yan lag gi mchog la sogs pa yang ting nge 'dzin 'di'i rgyur zhum pa med pa'i sems kyis sbyin par btang ngo //'bru dang / nor dang / rin po che dang / bran pho dang / bran mo dang / yongs su spyod pa'i g.yog rnams kyang gsol ba 'debs pa rnams la byin no/ /de bzhin du rgyan gyi bye brag rin po che sna tshogs las byas pa dang / gos kyi bye brag shin tu phra ba srin bal gyi 'dab ma ltar reg na 'jam zhing bde ba rnams kyang ting nge 'dzin 'di thob par bya ba'i phyir btang ngo //nga yis rta dang ba glang shing rta tshogs/ /zhes bya ba la sogs pa la/ nga yis zhes bya ba ni bdag nyid kyis so/ /btang zhes bya ba ni byin no zhes thams cad du blta bar bya'o//sems can sdug bsngal gang dag ngas mthong ba de dag ngas nor gyis bde bar byas so/ /ngas sngon skyed mos tshal ni mang po dang / /ces bya ba la sogs pas ni phyi rol gyi nye bar mkho ba sbyin par gsungs te/ me tog dang 'bras bu sna tshogs kyis brgyan pa'i skyed mos tshal dga' ba'i tshal dang 'dra ba brgya stong dag kyang sangs rgyas kyi yon tan ma lus pa bsdus pa'i ting nge 'dzin 'di thob par bya ba'i phyir btang ngo //grong dang grong khyer yul 'khor grong 'dab kyang / /zhes bya ba la sogs pas ni dbang phyug gi longs spyod bdag gir byas pa'i longs spyod kyi dngos po rnams yongs su gtong ba'i sbyin pa gsungs te/grong dang / grong khyer dang / tshong 'dus dang / yul 'khor dang / rgyal po'i pho brang nye bar mkho ba thams cad dang ldan pa 'byor pa yang dag pas brgyan pa rnams byin pas de'i tshe dga' ba dang bde ba dpe med pa rjes su myong ngo //ri rab tshad tsam rin chen sna tshogs rin thang med pa'i sa yi gting na gnas pa dang / rgyal ba'i yon tan bzhin du 'bad pas bsags pa'i rin chen phung po dpag tu med pa dang / /rab tu grags pa'i nor bu'i cod pan rab tu mdzes pa rnam pa gzhan dag kyang //sangs rgyas thob phyir 'gro ba ma lus yid 'phrog rab tu grags pa'i sbyin par byin/ /rin chen phung po ri rab mnyam pa yang / /chos dang ting 'dzin thob phyir nga yis byin/ /rnyed par dka' zhing btang bar dka' ba yang / / byang chub ched du sngon chad nga yis btang / /shin tu dbul ba ngas ni phyug por byas/ /zhes bya ba la/ dbul po gang dag phongs par gyur pa de dag ni ngas phongs pa med cing longs spyod phun sum tshogs pa'i bde ba dang ldan par byas so/ /gang gi tshe nga sa'i bdag por gyur cing longs spyod phun sum tshogs pa dang ldan par gyur pas sdug bsngal mgon med pa mthong bar gyur pa ni ci'i phyir 'di ltar sdug bsngal bar gyur ces 'dri bar byed do//nor med pas so zhes zer na de dag la snying rje chen po'i sems nye bar bzhag nas de dag la rgyal srid sbyin par byed do//gzhon nu ngas ni ngo mtshar byas pa dang / /zhes bya ba la sogs pa la/ gang yang nga yis ting nge 'dzin thob par bya ba'i ched du sdug bsngal nyams su myong ba de dag bskal pa bye ba khrag khrig tu bgrang ba'i sbyor bas bgrang bar nus pa ma yin no zhes bstan to//de bzhin gshegs pa'i spyod pa la dad pa ma thob pa rnams kyis mthar thug pa ma rnyed nas thos pas sems myos shing myos par 'gyur ro/ /gzhon nu khyod la shin tu bsgo bar bya/ /zhes bya ba la sogs pa la/ de bzhin gshegs pa thugs rje can ni gzhan ma yin par gsungs pa yin no//ngas ting nge 'dzin 'di tshol ba na sems can thams cad bla na med pa'i byang chub kyi bde ba la dgod par bya'o zhes bya ba nas ting nge 'dzin 'di tshol ba na sdug bsngal gyi khyad par dpag tu med pa nyams su myong ngo / /gang gi tshe ngas ting nge 'dzin 'di thob par gyur pa na nga la sgrib pa med pa'i ye shes skyed par gyur to//ye shes des 'jig rten gyi khams sna tshogs na bzhugs pa'i de bzhin gshegs pa rnams mthong ngo / /cho 'phrul gyi mngon par shes pa'i rdzu 'phrul gyi khyad par gyis 'jig rten gyi khams sna tshogs na bzhugs pa'i de bzhin gshegs pa rnams kyi thad du nye bar song nas spyi bos phyag 'tshal te/gus pa dang bcas pas gsol ba gdab pa sngon du 'gro bas gal te bdag la skabs phye na som nyi dpag tu med pa mchis pas the tshom 'ga' zhig zhu'o/ /dran pa brjed pa med pas ji ltar thos pa bzhin du bzung nas de bzhin du sems can rnams la bdag gis bstan par bgyi'o//ting nge 'dzin 'di nyid la bdag gis g.yo ba med pa'i blos 'di nyid la rab tu gnas par gyur pa de ltar rab tu gzhag par bgyi'o/ /gang gis sngon gyi de bzhin gshegs pa dag /ces bya ba la sogs pa la/ gang dag sngon de bzhin gshegs pa ma mthong ba dang / ma thos pa de dag gis ting nge 'dzin 'di ji ltar thob par 'gyur zhes bya ba dang / /de bzhin gshegs pa'i thad nas chos bstan pa ma thos pa bsod nams ma byas pa de dag gis ting nge 'dzin 'di la rab tu dang ba'i sems bskyed pa dang /dad par bya ba dang / mnyan pa dang mos par bya ba sla ba ma yin no/ /yang gang dag sngon de bzhin gshegs pa rnams kyi thad nas ting nge 'dzin 'di thos pa de dag ni chos zab mo 'di thos pa na mi skrag mi dngang /dngang bar mi 'gyur te/ de 'jigs pa chung ngu dang / 'bring dang / chen po med pa'i phyir ro/ /byang chub sems dpa' de ni sras thugs las skyes pa nyid de dag gi don du ngas ting nge 'dzin 'di bya dka' ba brgya stong gis yang dag par bsgrubs pa yin no/ /yang gang gis ting nge 'dzin gyi rgyal po 'di lan cig thos pa de yang ngan song du ltung ba'i 'jigs pa nam yang yod pa ma yin no//mi khom pa brgyad spangs pa'i dal ba phun sum tshogs pa 'thob cing thams cad du sangs rgyas mthong zhing bsnyen bkur byed pa dang / chos thos pa dang mi 'brel ba'i sems kyis sangs rgyas khrag khrig shin tu mang po mthong ba ste/gang ting nge 'dzin 'di 'dzin pa des mngon sum du sangs rgyas rnams mthong ba'o/ /rgyal ba byams pa grags pa mtha' yas bzhin/ /zhes bya ba la sogs pa la/ ji ltar byang chub sems dpa' 'phags pa byams pa nga'i rjes thogs nyid du nges par sangs rgyas nas sems can mang po'i don gyis shig ces lung bstan pa bzhin du/blo gros mtha' yas des ni nga lung bstan/ /zhes bya ba la sogs pa la/ gang gi lag tu ting nge 'dzin 'di thob pa de yang de bzhin du rgyal ba nyid du gyur nas sems can ma lus pa'i don byed par 'gyur ro zhes bya ba'o//dran pa dang / blo gros dang / rtogs pa dang / spobs pa dang ldan par 'gyur ro/ mi gang ting 'dzin mchog 'di 'dzin pa ni/ /zhes bya ba la ting nge 'dzin 'di 'dzin pa de la yon tan 'di dag 'dzin par 'gyur zhing / yon tan gzhan yang /lha dang / klu dang / lha ma yin dang / mi 'am ci dang / lto 'phye chen po dang / mi dang mi ma yin pa rnams kyis kyang mchod par 'gyur/ srung bar 'gyur ro/ /dug dang me dang mtshon dang chu la sogs pa rnams kyis nyam nga ba ma spangs par 'chi ba'i dus byed par mi 'gyur ro//nags khrod dang ri dang / sman ljongs dang / brag phug dag tu gcig pu gnyis su med par 'dug na yang ting nge 'dzin gyi mthus lha dang / klu dang / gnod sbyin dang / dri za la sogs pa rnams kyis bsnyen bkur byed par 'gyur ro/ /ye shes dri ma med pa dpag tu med pa/thogs pa med pas de bzhin gshegs pa'i yon tan yongs su sgrogs par byed pa dang / thogs pa med cing nyams pa med pas dpag tu med pa'i thos pa 'dzin pa'i gzungs rab tu thob par 'gyur ro/ /ye shes kyi sgron ma 'dzin cing 'jig rten ma lus pa'i mi shes pa'i ling tog gi rab rib sel ba la mkhas par 'gyur ro//ting nge 'dzin 'di 'dzin pa'i stobs kyis 'jam pa dang / yid du 'ong ba dang / rnar snyan pa'i tshig gis 'khor gyi dkyil 'khor ma lus pa yongs su dga' ba bskyed par nus pa ltar bdud dang mu stegs pa rnams zil gyis gnon pa'i seng ge'i sgra sgrogs par byed do//mi gang ting 'dzin mchog 'di 'dzin pa ni/ /zhes thams cad du sbyar bar bya'o/ /de dag sman pa dpyad mkhan 'dra bar yang / /zhes bya ba ni/ nad ma lus pa gso ba la mkhas pa'i sman pa dpyad mkhan te/sman ster ba'i dus tshod brtsi ba'i skyes bu'i gnas lta bu'i dus nges par byed pa'i sman pa'i mchog tu 'gyur ba'o/ /mang po'i rten dang dpung gnyen skyabs su 'gyur/ /zhes bya ba la/ lam nye bar brten pa ni 'gro ba'o/ /skyon thams cad kyi gnod pa dang bral ba'i gnas su gyur pa ni rten no//'khor bas 'jigs shing skrag pa'i 'jigs pa sel bas dpung gnyen dang / skyabs su 'gyur ro/ /snang bar gyur pa ni mi shes pa'i mun pa sel ba'o/ /thams cad du mtshan ma thams cad yid la byed pa dang bral ba'i phyir rtag tu mnyam par gzhag par 'gyur ro//tha mal pa ma yin pa'i mig thob par 'gyur ro/ /yan lag brgyad cu dang ldan pa'i gsung gi dkyil 'khor gyis brgyan pa'i tshangs pa'i dbyangs thob par 'gyur ro/ /zas la yid kyang chags par mi 'gyur te zhes bya ba la sogs pa la/ bsam gtan la mngon par dga' ba'i phyir zas la zhen pa che bar mi 'gyur ro//lhung bzed dang chos gos la sogs pa'i yo byad la sems chags par mi 'gyur ro/ /bdag nyid la bstod pa dang / gzhan la mi snyan par brjod pas rjes su chags pa dang / khong khro ba dang bral bar 'gyur ro//rtag tu bsam gtan la dga' phra ba'i sems/ /zhes bya ba ni rtag tu bsam gtan la mngon par dga' ba'i sems phra mo nyid rtag tu 'gyur ba'o/ /gzhan gyis 'khrul pa tshol bar yang mi byed cing de la lta bar yang mi byed de/ bdag nyid kyis legs par byas pa dang nyes par byas pa la nges par rtogs pa la zhugs pa'i phyir ro//spyod pa yongs dag sems la nyon mongs med/ /ces bya ba ni sems kyi rgyud ting nge 'dzin bsgoms pas bsgos pa'i phyir lus dang / ngag dang yid kyi kun du spyod pa yongs su dag pa yin no/ /sems sgyu dang g.yo spangs pa yin/thar pa bsgom pa dang mngon par dga' ba yin/ ser sna dang bral zhing sbyin pa la dga' ba yin/ tshul khrims dang yang dag par ldan pa yin/ byad bzhin bzang zhing skyes bu chen po'i mtshan sum cu rtsa gnyis kyis brgyan par 'gyur ro/ /yan lag thams cad yongs su mdzes pas sku lta bas mi ngoms par 'gyur ro//tshangs pa dang / dbang po dang / drag po la sogs pa rnams kyang g.yog bzhin du bka' nyan zhing rjes su rtag tu 'brang bar 'gyur ro/ /ngan 'gror ltung ba'i 'jigs pa ma lus pa dang bral ba yin no/ zab mo'i chos thos shing goms par byas pa'i blo gros dang ldan pa'i phyir/sangs rgyas kyi chos rnams la som nyi med pa yin zhes bya'o/ /gzungs thob pa yin no/ /gang gi tshe 'chi ba'i dus byed pa de'i tshe yang de bzhin gshegs pa 'od dpag tu med pa 'dod chags dang bral ba'i dge 'dun gyi 'khor du mas yongs su bskor ba mthong bar 'gyur ba'o//rab tu dga' ba dang / dri ma med pa dang / 'od byed pa dang / 'od 'phro ba dang / sbyang dka' ba dang / mngon du gyur pa dang / ring du 'gro ba dang / mi g.yo ba dang / legs pa'i blo gros dang / chos kyi sprin zhes bya ba byang chub sems dpa'i sa bcu yang ting nge 'dzin 'di thob na 'bad pa med par thob par 'gyur ro//de bzhin du dbang bcu po tshe la dbang ba dang / las la dbang ba dang / yo byad la dbang ba dang / mos pa la dbang ba dang / smon lam la dbang ba dang / rdzu 'phrul la dbang ba dang / skye ba la dbang ba dang / chos la dbang ba dang /sems la dbang ba dang / ye shes la dbang ba rab tu thob par 'gyur ro/ /mi gang zhig ting nge 'dzin 'di 'dzin pa zhes thams cad du sbyar bar bya'o/ /sems can thams cad bcom ldan snying rje can/ /zhes bya ba la sogs pa la/ sems can thams cad de bzhin gshegs pa thugs rje can du gyur la/de bzhin gshegs pa de dag la rigs kyi bu 'am/ rigs kyi bu mo la la zhig gis bskal pa gang+gA'i klung gi bye ma snyed du gus par byas/ bsnyen bkur du byas/ nye bar mkho ba'i yo byad thams cad kyis mchod par byas la/ dad pa can gang zhig gis ting nge 'dzin 'di la rjes su yi rang ngo zhes tshig tu rjod par byed na rigs kyi bu snga ma de'i bsod nams kyi phung po de bas rjes su yi rang ba las byung ba'i bsod nams kyi phung po rab tu mang bar shes par bya'o zhes bcom ldan 'das kyis gsungs pa de nyid tshad ma yin gyi/gzhan ni tshad ma'i yul ma yin pa'i phyir ro/ /sangs rgyas bdag nyid las byung ye shes me'i/ /'od zer dmar ser steng du 'phros par gyur pa yis/ /srid pa gsum po skad cig tsam gyis thal bar byas/ /gzi brjid tshogs kyi 'od ces sangs rgyas gsungs/ /gzi brjid tshogs kyi rgyal po'i le'u ste sum cu pa'i 'grel pa rdzogs so// //phan yon gyi le'u rab tu bsgrub par bya ba'i phyir/ de nas yang bcom ldan 'das kyis zhes bya ba la sogs pa gsungs te/ gzhon nu de lta bas na byang chub sems dpa' gang ci nas bdag sems can thams cad kyi sgra dang skad shes pas chos ston to zhes bya ba la sogs pa la/mnyam pa'i zhes bya ba ni mngon par 'dod pas so/ /ci nas kyang bdag sems can thams cad kyi sgra ste tha mal pa'i brda'o/ /skad ni tha snyad kyi khyad par sgrub par byed pa'i tshig go/ /dbang po mchog dang mchog ma yin pa rtogs shing brda de dang des kun rdzob tu tha snyad du byed de/chung ngu dang 'bring dang / mchog gi dbang ba dang / bsam pa'i khyad par rig nas gang dang gang 'dod pa de la chos bstan pa'i phyir/ des chos thams cad kyi rang bzhin mnyam pa nyid rnam par spros pa'i ting nge 'dzin 'di mnyan par bya/gzung bar bya/ kun chub par bya zhes bya ba nas/ gzhan dag la yang rgya cher yang dag par bstan par bya zhes bya ba'i bar gyis ni thams cad mkhyen pa'i yon tan yongs su rdzogs pa'i rgyur gyur pa ni ting nge 'dzin 'di yin no zhes bstan par 'gyur ro//tshigs su bcad pas phan yon rgya cher bstan pa'i phyir/ de nas bcom ldan 'das kyis zhes bya ba la sogs pa gsungs te/ des ni 'das pa'i 'dren pa tshad med nams kyang mthong / /zhes bya ba ni gzhan dag la ting nge 'dzin thos pa med pas 'das pa'i de bzhin gshegs pa dpag tu med pa de dag la the tshom thams cad gcad pa'i phyir/mthong ba dang dris pa'i dge ba'i rtsa ba rab mchog rab tu gnas pas ting nge 'dzin 'di la mos shing 'dod na gzung bar bya zhes bya ba nas/ gzhan dag la yang rgya cher yang dag par bstan par bya ba'i bar du blta bar bya'o//lha dang mi yi bde ba gya nom rnyed par 'gyur/ /zhes bya ba ni bsod nams kyi mthus lha dang mi'i bde ba gya nom pa nyon mongs pas ma gos pas mchod par yang 'gyur ro/ /lha rnams kyi dbang po dang / mi'i rgyal po yang rab tu thob par 'gyur ro/ / mi zad pa'i bsam gtan gyi bde ba yang nyams su myong bar 'gyur ro/ /bsngags pa rgya cher thos kyang de ni dga' mi 'gyur/ /zhes bya ba ni 'jig rten gyi chos brgyad kyis rjes su ma gos par bstan pa yin no/ dge zhing snyan par smra la 'jam pa'i tshig dang ldan/ /zhes bya ba ni thams cad du 'jam pa'i tshig dang ldan pa dang /khro gnyer med pa dang / bzhin 'dzum pa dang ldan pa dang / 'grogs na bde ba dang / tshul khrims legs par bsdams pa nyid do/ /mdza' ba'i sems su 'gyur ba ni snying rje chen po'i brtse bas bsgos pa'i rgyud yin pa'i phyir ro/ /'thab pa dang /rtsod pa med pa'i gtam byed pas na spros pa spangs pa dang / bsam gtan gyi bde bas gnas pa dang / rab tu dga' ba'i sems dang / des shing mnyen pa'i sems su 'gyur ro zhes bya ba la sogs pa'o/ /pha rol tu phyin pa thams cad dang ldan pa dang / rtag tu mnyam par gzhag par 'gyur/lha dang / klu dang / gnod sbyin dang / srin po la sogs pa rnams kyis kyang rtag tu gus pas rjes su 'brang zhing srung ba dang / sbed par byed do/ /'gro ba ma lus pa'i yid 'phrog cing yid du 'ong ba'i dbyangs dang tshangs pa'i dbyangs dang ldan par 'gyur ro//thar pa 'dod pa ting 'dzin rdul bral 'di 'dzin na/ /zhes bya ba la sogs pa la/ sa bcu dang / dbang dang / stobs dang / byang chub kyi yan lag la sogs pa sangs rgyas kyi yon tan thams cad yang dag par brjod par 'gyur zhing myur du bla na med pa yang dag par rdzogs pa'i byang chub kyang thob par 'gyur ro//ma lus mdo sde'i yon tan phan yon rnams/ /ting 'dzin rgyal po'i rjes su rab zhugs par/ /sngon gyi rgyal ba kun gyis dbyangs su bsgrags/ /gcig dang du ma'i rnam rtog sna tshogs spangs/ /yon tan dang phan yon bstan pa'i le'u ste sum cu rtsa gcig pa'i 'grel pa rdzogs so// //da ni chos thams cad kyi rang bzhin nges par bstan pa'i le'u bstan par bya ba'i phyir/ de nas bcom ldan 'das kyis zhes bya ba la sogs pa gsungs te/ gzhon nu de lta bas na byang chub sems dpa' chos thams cad kyi rang bzhin shes par bya snyam pa zhes bya ba la/chos thams cad kyi rang bzhin yongs su shes par 'dod pas mdor bsdus nas chos thams cad kyi rang bzhin mnyam pa nyid rnam par spros pa'i ting nge 'dzin 'di mnyan par bya/ gzung bar bya zhes bya ba nas/ gzhan dag la yang rgya cher yang dag par bstan par bya zhes bya ba'i bar la/stong pa nyid ni phyi dang nang gi bdag nyid can gyi chos thams cad kyi rang bzhin no chos thams cad ni stong pa nyid dang mnyam pa ste/ gzod ma nas zhi ba ma skyes pa zhes bya ba'o/ /spros pa med pa nyid ni mngon par rtogs pa la brtags pas rnam par ma spros pas na ma spros pa'o//ma spros pa ni lhag pa med pa ste/ stong pa nyid kyi ting nge 'dzin zhes bya la/ ting nge 'dzin yongs su shes pa ni chos thams cad yongs su shes par 'gyur ro/ /tshigs su bcad pas yon tan gyi sgo nas rang bzhin bstan par bya ba'i phyir/de la 'dod chags ldang ba med cing zhe sdang med/ /ces bya ba la sogs pa gsungs te/ stong pa nyid bsgoms pa dang ldan pa de la/ 'dod chags dang / zhe sdang dang / gti mug dang / nga rgyal dang / ser sna la sogs pa nyon mongs pa dang /nye ba'i nyon mongs pa rnams dran pa'i spyod yul du yang mi 'gyur ro/ /de'i phyir gnod pa med do/ /de ni bde gshegs thugs sras bslab pa yong mi 'dor/ /zhes bya ba la/ byang chub sems dpa' de ni shin tu bzang po'i spyod pa dang ldan pa bsgom pa la brten pa'i phyir bde bar gshegs pa'i bslab pa yong mi 'dor zhes bya ba nam yang 'dor bar mi byed de/ci nas kyang 'dor bar mi byed ces bya ba'i don to/ /bud med dbang du nam yang mi 'gro ste/ de bzhin gshegs pa'i bstan pa la dga' ba dang / rab tu dga' ba thob par yang 'gyur ro/ /chos kyi rang bzhin tshul gyis rigs pa gang shes pa//zhes bya ba ni chos kyi rang bzhin gang gis shes pa des thams cad mkhyen pa'i ye shes kyi cho ga shes pa ste mkhas pa yin no/ /de dang de ni sangs rgyas mtha' yas mu med mthong / /zhes bya ba ni gang dag gis chos kyi rang bzhin ji lta ba bzhin du shes pa des 'jig rten gyi khams dpag tu med pa na bzhugs pa'i sangs rgyas rnams lha'i mig gis mthong bar 'gyur ro//gzungs kyi ye shes kyang thob par 'gyur ro/ /ring por mi thogs par de bzhin gshegs par yang 'gyur ro/ /zhes bya ba ste/ ting nge 'dzin dang / byang chub dang / sangs rgyas kyi ngo bo dbyer med par rtogs pa'i phyir ro/ /de dang de ni sman pa dpyad shes bde ba sbyin par 'gyur/ /zhes bya ba ni gang gis chos thams cad kyi rang bzhin shes pa de ni sman pa'i rgyal po bla na med pa sman pa'i mchog tu 'gyur ro zhes bya ste ma rig pa'i rgyu las byung ba'i nad gso bar byed pa'o//'jig tshogs la lta ba'i zug rngu 'byin par byed pa'o/ /nyon mongs pa'i tsha bas gdungs pa'i sems can mthong nas ting nge 'dzin gyi sman chen po'i btung ba sbyor bar byed pa'o/ /sdug bsngal ba rnams bde bar byed pa'o/ / snying rje chen po'i go cha bgos nas smon lam gyi stobs kyis 'phangs pas rnam pa thams cad kyi sgo nas sangs rgyas kyi tshul la legs par bslabs shing thams cad du sems can thams cad rab tu dgrol bar bya ba'i cho ga la mkhas pa'i bsam pa dang / lhag pa'i bsam pa ji lta ba bzhin du rjes su mthun par chos ston pas btul nas sangs rgyas nyid la rab tu 'jug go//thams cad la chags pa med do/ /stong pa nyid kyi ting nge 'dzin gyi ngo bo la mkhas pa'o/ /'jig rten pa'i tha snyad kyis tha snyad du byed kyang 'jig rten gyi chos kyis kyang mi gos te/ 'jig rten gyi chos rnams kyi ngo bo nyid kyi rang bzhin yongs su shes pa'i phyir ro//gang gis chos thams cad kyi rang bzhin shes pa de bzod pa'i stobs kyis yang dag par 'phags pa ste/ brdeg pa dang / bsdigs pa dang / khu tshur dang / thal lcag dang / mtshon brgyab kyang sems khro ba dang bral ba yin/yan lag dang nying lag bcad kyang bzhin 'gyur ba med pa yin te/ bzod par bya ba'i dngos po rnams kyi rang bzhin la nges par brtags pa na dngos po thams cad rang bzhin gyis stong par rig pa'i phyir ro/ /bdag dang gzhan du 'du shes pa dang bral ba'i phyir rtag tu lus dang ngag dang yid rab tu zhi bas gnas par 'gyur ro//de dang de dag chos kyi rang bzhin dam pa ston/ /zhes bya ba ni byang chub sems dpa' de dang de chos thams cad kyi rang bzhin shes nas rtogs pa ji lta ba bzhin du rjes su mthun pa'i chos ston par byed cing sems can slu bar mi byed do//shes rab dang snying rje dag gis phyin ci ma log par mngon par rtogs pa sngon du 'gro bas smon lam yongs su rdzogs nas sems can ma lus pa nye bar 'dzin par 'gyur ro/ /de de ring por mi thogs bla med byang chub reg /ces bya ba la/ byang chub sems dpa' gang dag gis chos thams cad kyi rang bzhin mnyam pa nyid rnam par spros pa'i ting nge 'dzin mngon sum du byed pa'i bsgom pa la mngon par sbyor ba de dang de byang chub la reg par 'gyur te mngon sum du byed par 'gyur ro//byang chub sems dpa' de la sems rab tu dang bas mchog tu gyur pa'am/chung ba yang rung sbyin pa sbyin par byed do/ /sbyin pa de'i 'bras bu yang sangs rgyas nyid kyi mthar thug par 'gyur te/ sangs rgyas kyi spyod yul du gyur pa yin no/ /de ni mdo sde bye ba mtha' yas 'chad par byed/ /ces bya ni spobs pa dpag tu med pa dang /ye shes dpag tu med pa dang ldan par 'gyur te/ des 'chad par byed pa yin zhes bya'o/ /chos kyi rang bzhin zhi ba gang shes pa/ /zhes bya ba la/ bskal pa bye ba khrag khrig tu ye shes mngon par 'phags pas ri rab ltar mi g.yo bar 'gyur te/ phas kyi rgol ba thams cad kyis zhes bya ba'o//de bzhin gshegs pa thams cad kyis chos bshad pa gang yin pa de dag thams cad nye bar bzung nas de dag las rkang pa tsam yang brjed par mi 'gyur ro/ /chos dang / mi 'jigs pa dang / zang zing dang / byams pa'i sbyin bdag tu gyur nas sems can thams cad la bde ba ster bar byed de/bza' ba dang / btung ba dang / gos dang / rin po che dang / rgyan dang / mdzod dang / bang mdzod la sogs pa phyi dang nang gi bdag nyid can gyi dngos po rnams la ltos pa med pa'i sems kyis yongs su gtong bar byed cing bsams bzhin du 'dzam bu'i gling gi dbang phyug gi rgyal por gyur nas sems can thams cad sbyin pas bsdus nas chos la sbyor bar byed do//byams pa chen po dang / snying rje chen po dang / dga' ba chen po dang / btang snyoms chen po ste/ tshangs pa'i gnas bzhi rtag tu rjes su goms par byas pas mtshan ma med cing lhun gyis grub par gyur pas chos thams cad rang bzhin gyis stong pa gang yin pa yang shes par 'gyur ro//dpa' bo bu dang bu mo bran dag gtong bar byed/ /ces bya ba la sogs pa la/ yid du 'ong ba'i bu sdug pa dang / bu mo rgyan thams cad kyis brgyan pa dang / bran pho g.yog gi las thams cad la mkhas pa dang /bran mo sgeg pa dang / sgrin pa bya ba rnams la mkhas shing yid du 'ong ba dang / lag pa dang / rkang pa dang / mig la sogs pa dang / yan lag gi mchog dang / bdag nyid ltos pa med pa'i sems kyis byin no/ /gang chos thams cad rang bzhin gyis stong par bsgoms pa'i blo can des thams cad stong ste/phyi dang nang gi bdag nyid can gyi dngos po thams cad gtong ngo / des ni 'dren pa rkang gnyis gtso bor mchod par 'gyur/ /zhes bya ba la sogs pa la gang dag gis chos thams cad rang bzhin gyis stong par rtogs nas sgrub pa phun sum tshogs par byed pa des de bzhin gshegs pa thams cad sgrub pa'i mchod pas mchod pa yin no//chos kyi rang bzhin stong pa'i tshul du gang rig pa/ /de ni mkhas pa bde bar gshegs pa'i mdzod 'chang yin/ /zhes bya ba la sogs pa la/ de ni bde bar gshegs pa'i chos kyi phung po'i mdzod 'chang ba yin te/ gzugs rnam pa bzhi la rab tu gnas pa ni ring por mi thogs par de bzhin gshegs par 'gyur ro/ /gang dag ting nge 'dzin gyi rgyal po'i mdo sde 'di zad pa'i dus te/ dam pa'i chos rnam par 'jig pa'i dus su 'dzin pa de dbang po nyams par mi 'gyur ro//mi khom pa brgyad kyi nang du yang skye bar mi 'gyur te/ de dag nas chos thos pa med pa'i phyir/ bde 'gro lha dang mir skyes nas gzugs bzang zhing mdzes pa lus mtshan gyis brgyan cing mngon par shes pa lngas rtse la/ sangs rgyas dpag tu med pa sprul par byed cing //sprul pa'i sangs rgyas de dag kyang sangs rgyas kyi zhing sna tshogs su song nas sangs rgyas kyi mdzad pa mdzad nas/ yang phyir 'ong bar byed do/ /chos thams cad sprul pa lta bur rtogs nas de lta bu nyid du ston par byed do/ /dran pa dang / blo gros dang / rtogs pa dang / yongs su dag pa'i blos chos thams cad la dbang thob cing tshangs pa'i gnas bzhi la gnas nas sa bcu dang / dbang bcu dang / stobs dang / mi 'jigs pa dang / sangs rgyas kyi chos ma 'dres pa yongs su rdzogs par byas nas sangs rgyas su 'gyur te/ ting nge 'dzin bsgoms pa'i stobs thob pa'i phyir zhes bya bas so//nga sngon byang chub sems dpar gyur pa na ting nge 'dzin 'di bsgoms so/ /mang du byas so/ /brtson 'grus nyams pa med pa dang ldan pa'i tshe de bzhin gshegs pa mar me mdzad kyis ma 'ongs pa'i dus na khyod bla na med pa yang dag par rdzogs pa'i sangs rgyas su 'gyur ro zhes lung bstan to//mdo sde 'di la khyed kyang nga'i rjes su slobs zhes bya ba la sogs pa la/ chos thams cad rang bzhin gyis stong pa la mi dmigs pa'i sbyor bas ngas ji ltar ting nge 'dzin 'di la bslabs nas sems can ma lus pa'i don du mngon par rdzogs par sangs rgyas pa bzhin du khyed kyis kyang bslab par bya'o zhes bya ba yin no//mdo sde rin po che 'di la mi slob par spangs nas rmongs pa rnams mnar med par gzhol bar 'gyur ro/ /de lta bas na bdag dang gzhan gyi don byed pa la mkhas pa'i blo gros can gyis bag yod par byas la dam pa'i chos spong ba'i sems rmi lam du yang bskyed par mi bya'o//phyi ma'i dus na gang dag mdo sde rin po che 'di 'dzin pa de dag ni nges par bla na med pa yang dag par rdzogs par byang chub par 'gyur ro/ /sems ni dang por byang chub la ni nges byas nas/ / stong pa rtsol bral don dam yang dag ldan pa yi/ /ngo bo nyid ni yang dag rtogs par byas nas kyang / /skyo ba med pas sbyin pa la sogs spyod pa spyad/ /chos thams cad kyi rang bzhin nges par bstan pa'i le'u ste sum cu rtsa gnyis pa'i 'grel pa rdzogs so// //mdo sde 'dzin pa'i phan yon gyi le'u bstan par bzhed nas de nas yang bcom ldan 'das kyis zhes bya ba la sogs pa gsungs te/gzhon nu de lta bas na byang chub sems dpa' sems dpa' chen po chos thams cad la mngon par shes pa chen po'i byi dor bya ba yongs su sbyang bar 'dod pas ting nge 'dzin 'di mnyan par bya/gzung bar bya zhes bya ba nas gzhan dag la yang rgya cher yang dag par rab tu bstan par bya zhes bya ba'i bar du'o/ /chos thams cad la mngon par shes pa chen po'i byi dor bya ba gang zhe na zhes bya ba ni rang nyid kyis gzhan gyi bsam pa rab tu bstan nas nges par bskyed pa'i phyir dris pa yin no//'di lta ste zhes bya ba ni nye bar bstan pa'i phyir ro/ /chos thams cad la yongs su 'dzin pa med pa ni gzung bar bya ba med pa'i phyir ro/ /mchog tu mi 'dzin pa ni 'dzin pa por mchog tu 'dzin pa med pa'i phyir ro/ /de bzhin du phyi rol gyi gzugs la sogs pa'i phung po lnga po gzung ba dang /'dzin pa dang bral bas mi bden pa nyid du bsgrubs nas tshul khrims la sogs pa'i phung po lnga po rang bzhin med pa nyid du kun du rig par bya ba'i phyir/ /tshul khrims kyi phung por mi 'dzin zhes bya ba la sogs pa gsungs te/ 'di ni tshul khrims so//bdag ni tshul khrims dang ldan pa'o/ /'di'i don du tshul khrims srung ngo zhes bya ba'i rnam par rtog pa dang bral ba ni 'khor gsum yongs su dag pa'i tshul khrims kyi phung por 'gyur ro/ /de bzhin du rgyu ba med par ni ting nge 'dzin gyi phung po ste 'gro ba dang 'ong ba med pa'i phyir ro//stong pa nyid mthong ba ni shes rab kyi phung po ste bdag med par mthong ba'o/ /bden pa mthong ba ni rnam par grol ba'i phung po ste de bzhin nyid mthong ba'o/ /yang dag pa ji lta ba bzhin du mthong ba ni rnam par grol ba'i ye shes mthong ba'i phung po ste/ thams cad dmigs su med par mthong ba'i sbyor ba dang /so sor brtags pa'i 'gog pas gnyis kyi ngo bo dang bral bar mthong ba'o zhes bya'o/ de bzhin du chos thams cad kyi rang bzhin yongs su shes pa de ni mngon par shes pa ste/ gang dag mngon par shes pa de dag dang yang dag par ldan pa'i byang chub sems dpa' sems dpa' chen po ni ting nge 'dzin thams cad la rdzu 'phrul gyi cho 'phrul gyis rnam par rtse zhing sems can thams cad la bsam pa ji lta ba bzhin du chos ston na yang gang la yang mngon par zhen pa med pa de la ni chos thams cad la mngon par shes pa chen pos byi dor byas pa yin no zhes brjod do//tshigs su bcad pas rgya cher rab tu bstan pa ni snga ma bzhin no/ /mngon shes chen po yongs sbyangs pa/ /rtsod pa med par bstan pa ste/ /zhes bya ba ni chos thams cad stong pa nyid kyi phyir rtsod par byed pa med pas rtsod pa med pa'o/ /mngon shes de'i ste mngon sum du byed pa'i shes pa ni shes rab ste//sangs rgyas kyi gnyis su med pa'i ye shes bsam pa thams cad las yang dag par 'das pa'o/ /'dzin pa la ni gang gnas pa/ /de la ye shes yod mi 'gyur/ /zhes bya ba ni gnyis su med pa'i de kho na nyid ni stong pa nyid kyi ye shes te/dngos por 'dzin pa'i 'jug pa de la thams cad du mi 'byung ba zhes bya ba'i don to/ /gang dag sgra yis bstan pa yi/ /chos rnams mang po bsam mi khyab/ /ces bya ba ni sems can bsam pa sna tshogs pa rnams la dgos pa sna tshogs kyis sgra sna tshogs su ston pa'o/ / sgra de la yang gang chags pa/ /dgongs pa'i bshad pa mi shes so/ /zhes bya ba la sgra tsam thos nas/ /ci la dgongs te bshad pa yi/ /dgongs pa dag ni mi shes pa/ /zhes bya ba la rnam par dbye ba'i nus pa med bzhin du chos ma yin pa ni chos su bshad/ chos ni chos ma yin par bshad par byed de/de bzhin gshegs pas gsungs pa'i gsung rab mngon par shes pa'i dge ba'i bshes gnyen la ma bsten pa nyid dang / de bzhin gshegs pa'i gsung rab la ma bslabs pa'i phyir ro/ /'jig rten khams ni stong dag tu/ /zhes bya ba la sogs pa la/'jig rten gyi khams thams cad du ngas gdul bya sna tshogs kyi bsam pa'i dbang gis skad sna tshogs dang / tshig dang / yi ge sna tshogs kyis theg pa gsum la gzhug par bya ba'i phyir mdo sde gang dag rab tu bshad pa de dag thams cad don gcig pa ste stong pa nyid kyi don to//kun kyang mya ngan las 'das pa la gzhol ba'i don dpag tu med cing mtha' med pa thams cad brjod par nus pa ma yin te/ yongs su brjod pa dang / mnyan pa dang / bsam pa dang / bsgom pa'i 'bad pa rab tu mang po la 'jug pa ni shes rab chung bas nus pa ma yin no zhes bya bar tshig gcig rnam par bsgom na ni//de dag thams cad bsgoms par 'gyur/ /zhes bya ba la/ gang gis kun tu dngos po gcig nyid mthong / /dngos kun ngo bo de yis kun tu mthong / /gcig gi stong nyid gang yin pa/ /de ni kun gyi stong pa nyid/ /chos kyi dbyings su ma gtogs pa'i/ /'di ltar chos yod ma yin pas//zhes bya bas chos kyi dbyings kyi ngo bor bsgoms na des thams cad bsgoms shing rtogs par 'gyur ro/ /sangs rgyas ji snyed thams cad kyis/ /zhes bya ba la sogs pa la de bzhin gshegs pa thams cad kyis chos mang po rab tu bstan pa thams cad kyi don ni bdag med pa nyid do//bdag dang / sems can dang / srog la sogs pa ni don ma yin pa zhes gang gis shes nas gang sangs rgyas kyi chos la zhugs pa de ni don la mkhas pa ste don la gsal ba yin no/ /de ltar chos thams cad bdag med pa'i tshig 'di bslabs par gyur pa la/ sangs rgyas chos rnams dkon ma yin//zhes bya ba la/ 'di ni sangs rgyas nyid thob pa'i rgyu nyid yin/ sangs rgyas kyi byang chub rnyed par dka' ba ma yin no/ /gzhan gyis ni rab tu rnyed par dka' ba yin no zhes ston par 'gyur ro/ /chos kun sangs rgyas chos yin te/ /zhes bya ba ni chos nyid kyi ngo bo yongs su shes na chos thams cad kyi ngo bo las mi 'da' ba'o zhes gang chos nyid 'di las mi 'da' bar slob pa de chos nyid dang 'gal bar yang mi byed de/gang gi phyir stong pa nyid ni gang dang yang 'gal ba med pa'i phyir ro/ /chos thams cad rang bzhin gyis stong pa'i phyir/chos thams cad sangs rgyas kyi chos so/ /de bzhin du tshig kun kyang ni sangs rgyas kyi tshig ste/ gang gi phyir dngos po med pa'i tshig byang chub dang rab tu ldan pa ste 'du byed rdzas su med pa'i phyir ro/ /phyogs bcu dag tu btsal na yang / /zhes bya ba la sogs pa yang phyogs bcu po thams cad du sangs rgyas kyi tshig ngo bo nyid kyis med pas dmigs par mi 'gyur te/gzugs la sogs pa'i phung po las ma gtogs pa'i dngos po'i don med pa'i phyir ro/ /gzugs la sogs pa'i rang bzhin med pa nyid ni sngar nyid du rab tu bsgrubs zin to zhes bya ba yin no//bla na med pa'i de bzhin gshegs pa'i tshig 'di ni ma rnyed do/ /mi rnyed do/ /rnyed par mi 'gyur ro/ /chos nyid kyi ngo bo nyid la ni dus gsum du yang 'gyur ba med pa'i phyir ro/ /sangs rgyas tshig ni bla na med/ /ces bya ba ni/ gang na lhag par gyur pa med pa ni bla na med pa'o//phra ba zhes bya ba ni chos ma skyes pa'i phyir ro/ /de lta na yang bla na med pa zhes bya ba'i tshig gis rab tu bstan to/ /chos thams cad rnyed pa med pa ni thob pa med pa ste rjes su ma rnyed pa'o/ /rnyed pa la yang rnyed pa med/ /ces bya ba ni mo gsham gyi bu gzhan du rten dang brten pa'i ngo bor med pa'i phyir ro zhes bya ba yin no//de ltar chos rnams gang shes pa/ /byang chub dam pa rtogs par 'gyur/ /zhes bya ba ni gang gis chos thams cad ma skyes pa/ ma 'gags pa/ rang bzhin gyis stong par yang dag par shes pa ste/ de bla na med pa yang dag par rdzogs pa'i byang chub tu mngon par rdzogs par sangs rgya bar 'gyur ro//mngon par rdzogs par sangs rgyas nas chos kyi 'khor lo bskor bar 'gyur te/ sangs rgyas dang / sangs rgyas kyi chos rnams kyang sgyu ma lta bu'o/ /chos thams cad kyang de lta bu'i rang bzhin no zhes sangs rgyas kyi chos rab tu bstan pas byang chub sems dpa' rnams rtogs par byed cing gnas ngan len gyi spros pa thams cad dang bral ba'i sangs rgyas kyi ye shes bla na med pa 'thob bo//de ltar sangs rgyas kyi ye shes nges par rtogs pa'i byang chub sems dpa' ni sangs rgyas zhes bya ste/don dam par rtogs pa dang / rtogs bya dang / rtogs pa po mi dmigs pa'i ye shes la byang chub dang / sangs rgyas dang / byang chub sems dpa' zhes brjod do/ /dngos po med pa dang / mtshan ma med pa dang / smon pa med pa dang / stong pa nyid kyi rnam par thar pa'i sgo ste thabs dang sgo zhes brjod de/sangs rgyas nyid du 'jug pa la thabs gzhan ni med do zhes bya ba'o/ /de bzhin gshegs pa rnams kyis bstan pa'i lam phyin ci ma log pa nyid yin no zhes bya'o/ /mig dang rna ba sna dag dang / /zhes bya ba la sogs pa la/phung po dang khams dang / skye mched la sogs pa stong pa nyid kyi rang bzhin du shes nas/ rtsod pa med pa'i gnas la gnas te/ blo gros ngan pa dang / the tshom dang / yid gnyis dang bral ba'i byang chub la sems can rnams 'dul bar byed do/ /tshig dang yi ge sna tshogs la mngon par zhen pa spangs pa'i phyir/sangs rgyas sgras ni gang byas pa/ /zhes bya ba la sogs pa gsungs te/ tshul khrims kyi sgra gang yin pa de sangs rgyas kyi sgra yin la/ sangs rgyas kyi sgra gang yin pa de la tshul khrims kyi sgra zhes bya ba gnyi ga'i sgra mtshan nyid gcig pa ste/ 'di lta ste/ ma skyes pa'i mtshan nyid ces bya ba'o/ /sangs rgyas kyi sgra dang / tshul khrims kyi sgra 'ba' zhig tu ma zad kyi/ ji srid sgras bsdus pa dman pa dang / 'bring dang / mchog gis bsdus pa'i dbye bas tha dad pa de dag thams cad sangs rgyas kyi sgra dang mnyam mo zhes bstan to/ /ji ltar mnyam zhe na/gsungs pa/ yul na mi gnas/ mtshams na mi gnas/ skye ba med pa/ 'gag pa med pa/ sna tshogs ma yin pa/ tha dad pa ma yin pa/ 'das pa ma yin pa/ da ltar byung ba ma yin pa/ sngon po dang / ser po dang / dmar po dang / dkar po'i kha dog ma yin pa/chos thams cad gzung du med pa/ brjod du med pa'o/ /de ltar na yang sgras bstan to/ /sgra yang med/ sgras bstan pa yang med/ sgra ston pa po yang med do/ /sgra thams cad sangs rgyas kyi sgra dang mnyam zhes bya'o/ /dbyangs kyis bstan pa'i cho 'phrul gyis dpag tu med pa'i sems can gyi khams rnams phung po lhag ma med pa'i mya ngan las 'das pa'i dbyings su rab tu 'god par byed do zhes bya ba'o//sems can gang yang mya ngan las 'das pa la bkod pa yang med de/ chos thams cad rang bzhin gyis mya ngan las 'das pa'i phyir ro/ /ji ltar nyi ma zla ba dag / ces bya ba la sogs pa la/ ji ltar chu dngas pa'i snod du nyi ma 'am zla ba'i gzugs brnyan gang yang rung ba mthong bar 'gyur la/ de dag 'dir 'ongs pa yang ma yin la/ gzugs brnyan mi snang ba yang ma yin no/ /de bzhin du gdul bya'i rgyud kyi chu dngas pa la sangs rgyas kyi zla ba'i gzugs brnyan snang bar 'gyur la/sangs rgyas de gang nas kyang byon pa med la/ gar yang bzhud pa yang med/ gar yang gnas pa yang med la/ gdul bya'i rgyud la mi snang ba yang ma yin no/ /de bzhin du chos rnams gzugs brnyan dang 'dra bas rang bzhin med par gang gis shes pa des sangs rgyas bcom ldan 'das gzugs kyi sku lus dang ldan par mthong bar mi 'gyur ro//gang gis lus med pa chos nyid kyi bdag nyid du gang gis mthong ba des de bzhin gshegs pa mthong ba yin te/ gang gi phyir/ rdzogs sangs rgyas kyi chos kyi sku//chos dbyings mnyam dang mi mnyam pa/ /shes dang shes bya las grol ba'o/ /'dren pa de yis mthong ba yin/ /de ltar sangs rgyas mthong bar 'gyur/ /gzhan du sangs rgyas mthong ma yin/ /gang gis sangs rgyas ma mthong ba/ /de yis chos nyid mthong ma yin//rten cing so sor bstan pa ste/ /zhes bya ba la sogs pa la/ 'di la brten nas 'di 'byung ngo zhes rten cing 'brel par 'byung ba'i don ston pa yin zhes bya'o/ /dge sbyong nyid ni su 'dod pa/ /'jug pa 'di ni rig par gyis/ /zhes bya ba ni gang las bdag gis dge sbyong gi 'bras bu 'thob po snyam du nga rgyal yod pa des ci yang thob pa med de/mngon pa'i nga rgyal can la chos nyid kyi de kho na nyid rtogs pa med pa'i phyir ro/ /gang gis thob par bya ba dang / thob pa po med pa'i phyir dge sbyong gi 'bras bu ma thob pa de dag sbyong zhes brjod do/ / de ltar rten cing 'brel par 'byung ba'i don rtogs pa de ni dge sbyong du 'gyur zhing dge sbyong gi 'bras bu thob ces bya'o/ /su dag bslabs par ma gyur pa/ /zab mo'i chos 'di dag la smra/ /zhes bya ba la/ ji ltar na 'di lta bu'i chos zab mo 'di dag la smra ste/ tshig gis ji ltar sgrub par nus/gang de skad smra bas des bslabs pa ma yin te/ gang gi phyir zab mo'i sgras chos de nyid ni sgrub par nus pa ma yin pa'i phyir ro/ /phung po lnga ni dngos med de/ /med pa las ni 'di dag byung / /zhes pa ste/ 'di la sbyin pa po yod pa ma yin no/ /gang yang kun nas slong ba po de ni mi bden par yongs su brtag pa'o//de yang rnam par brtags pa na nam mkha'i pad+ma dang 'dra ba brjod du med pa'o/ /phung po lnga'i mtshan nyid gang yin pa yongs su brtags pa'i mtshan nyid do/ /chos thams cad kyi mtshan nyid kyang de lta bu ste/ 'di lta ste/ mtshan nyid med par mtshan nyid gcig pa ste/ nam mkha'i mtshan nyid do//nam mkha'i mtshan nyid ji lta bu yin zhe na/ sngon gyi mtha' dang phyi ma'i mtha' zhes bya ba la sogs pa gsungs te/ nam mkha' la ni sngon gyi mtha' dang / phyi ma'i mtha' dang / da ltar byung ba dmigs par mi 'gyur zhing / thams cad mkhyen pa nyid kyis kyang dmigs par mi 'gyur te/de med pa'i phyir ri bong gi rwa bzhin no/ /chos thams cad kyang gzung ba dang 'dzin pa'i rang bzhin du dmigs par mi 'gyur ro/ /zhes bya ba ni rang bzhin gyi gtan tshigs so/ /de'i phyir chos kyi rang bzhin 'di nyid yin/ /gzung ba med pa nam mkha' 'dra//zhes gsungs pa yin no/ /de lta bur ni chos bstan te zhes bya ni bstan bya dang / ston pa po dang / bstan pa dang bral ba yin na yang gdul bya'i bsam pa'i dbang gis bstan to zhes rjod par byed do/ /su dag chos ni mi mthong ba/ /zhes bya ba la sogs pa la/ gang gis blta bya dang /lta ba po dang / lta ba'i chos thams cad rjes su mi dmigs pa'i sbyor bas srid pa rang bzhin med par bsgoms pa'i bdag nyid can gyi rnal 'byor gyi dbang phyug rnams kyi spyod yul yin gyi gzhan gyis ni ma yin no zhes bya'o/ /de lta bur ni su shes pa/ /zhes bya ba la sogs pa la/gang gis 'di lta bu'i chos kyi rang bzhin mi dmigs par shes pa'i rnal 'byor pa ni chos rnams la mi chags te zhes bya ba mngon par zhen par mi 'gyur ro/ /ma chags par gyur pas chos rnams ming tsam du rtogs so/ /chos rnams ming tsam du shes pas sangs rgyas kyi chos rnams la rlom sems mi byed do//rlom sems med pas sngon gyi mtha' dang phyi ma'i mtha' stong pa nyid du rtogs par 'gyur ro/ /sngon gyi mtha' dang phyi ma'i mtha' stong pa nyid du rtogs pas skyo ba med pa'i chos kyis sems can gyi khams ma lus pa bla na med pa'i sangs rgyas nyid thob par bya ba'i phyir brtson 'grus rtsom par byed do//nam mkha' la ni bya rjes bzhin/ /zhes bya ba la sogs pa la/ ji ltar nam mkha' la bya'i rjes blta bar mi nus pa de bzhin du byang chub sems dpa'i spyod pa dmigs pa dang bral ba gnas med pa yin pa'i phyir nam mkha' dang bya rjes dang /spyod pa dang / byang chub 'di dag thams cad rang bzhin med pa'o/ /byang chub sems dpa' yang rang bzhin med pa'o/ /rang bzhin med pas byang chub mngon par sangs rgyas nas sprul pa'i sku'i gzugs sna tshogs bstan nas sgyu ma lta bu'i sems can rnams dga' bar byed de/ji ltar sgyu ma mkhan gyis sngags dang rdzas la sogs pa'i sbyor bas gzugs sna tshogs pa ston par byed kyang yod pa ma yin pa bzhin du sems kyi sgyu ma la legs par bslabs pa'i byang chub sems dpa' yang de dang 'dra'o/ /sgyu ma la yang sems med la sems la yang sgyu ma med de/gnyi ga yang yongs su ma grub pa'i rang bzhin yin pa'i phyir ro/ /de bzhin chos rnams stong pa la/ /byis pa'i blo yis rnam brtags nas/ /zhes bya ba ni byis pa'i blo can rnams kyi rnam par rtog pas brtags pa'i dge ba dang mi dge ba'i las kyi zhags pa'i gzhan dbang du gyur pa'i sems kyi rgyud gang yin pa rnams la skye ba dang /rga ba dang / 'chi ba dang / mya ngan dang / smre sngags 'don pa dang / sdug bsngal ba dang / yid mi bde bas nye bar rgyas pa'i 'khor bas 'khor bar 'gyur gyis yongs su grol bar mi 'gyur ro//mi sbyor ba dang rab sbyor dang / /las kyi sbyor ba gang gnas dang / /zhes bya ba la sogs pa la/ sbyor ba dang mi ldan pas mi sbyor ba ste/ yang dag par ma zhugs pa'o/ /las kyi lam tsam la gcig tu gzhol bas las kyi rgya mtshor nub cing khyer ba de dag ni thams cad du las ma zad kyi bar du yang dang yang de dag na skye bar 'gyur zhing 'chi bar 'gyur te/de dag na bdud kyi phyogs su gnas pa/ bdud kyis zil gyis mnan pa'o/ /shes rab chung ba de dag phyin ci log gi las kyi blos bsgos pa'i las sna tshogs byas nas las dang rjes su mthun par sdug bsngal nyams su myong bar 'gyur ro//byis pa so so'i skye bo de dag ni long bar gyur pa ste/ lam mthong ba'i yang dag pa'i lta ba dang bral ba'i phyir ro/ /rmongs pas zil gyis mnan cing khro bas zil gyis mnan pas phan tshun rdeg par byed do/ /nga'i bu nga'i nor snyam du zhes bya ba la sogs pa la/bdag dang bdag gir sgro btags nas yod pa ma yin pa la brtags pas 'khor ba 'phel bar byed pa'i so so'i skye bo de dag 'khor ba na 'khor ro/ /las kyi dbang gis so so so sor skye bar 'gyur bas na so so'i skye bo zhes bya'o/ /chos rnams mang po rab tu 'chad//ces bya ba la sogs pa la/ lta ba sna tshogs la brten nas chos sna tshogs rab tu 'chad kyang chos ston pa de chos ma yin la/ de dag chos kyi 'du shes kyis 'jug par 'gyur zhing 'khor ba na 'khor bar 'gyur gyis nam yang grol bar mi 'gyur te/ grol ba'i rgyu de bzhin gshegs pa'i bstan pa la ma brten pa'i phyir ro//'dod pa'i phyir ni byis pa rnams/ /zhes bya ba la sogs pa la/ bud med ni 'dod chags kyi rgyu yin yang de la nye bar brtags pa ni nang ni rul la phyi rol nas pags pas g.yogs pa sdug bsngal gyi rgyu chen po ste/rul bar gyur pa la 'dod pa sten par byed pa de dag ni 'gro ba rul bar 'gro bar 'gyur ro/ /sangs rgyas rnams kyi 'dod pa dang / /bud med bsten pa 'ang ma bsngags so/ /zhes bya ba la sogs pa la/ bud med la rab tu chags pa ni byang chub kyi lam bsgom pa la rgyab kyis phyogs par 'gyur te/bud med kyi zhags pa mi bzad pa ni sdig pa thams cad kyi rgyu yin pa'i phyir sbrul gdug pa bzhin du ring du spong bar byed cing byang chub kyi lam sgom par byed pa nyid ni sangs rgyas nyid du 'gyur zhes bya ste/ rgyu ma tshang ba med pa la nan tan byas na phun sum tshogs pa'i 'bras bu thob par rigs so zhes bya bar dgongs pa'o//bla na med pa'i ye shes legs par bsgoms pa dag ni/ bla med sangs rgyas 'grub par 'gyur/ /zhes bya ba'o/ /gso sbyong dang tshul khrims kyi sdom pa la rab tu gnas nas gzhan dag kyang de la rab tu sbyor bar byed cing de bzhin du sems can dpag tu med pa'i don la rab tu zhugs pa'i byang chub sems dpa' de ni/bdud rtsi'i rnga yang rab tu brdung / /zhes bya ba ni dam pa'i chos kyi bdud rtsi sbyin pa'i rnga bo ches sems can ma lus pa la thun mong du chos bstan pa'i phyir/ rnga'i sgras skul bar byed pa'o//bdud kyi gnas kyang g.yo ba dang / skrag pa dang / 'jigs pa yang dag par bstan nas dbang du byas nas sangs rgyas kyi byang chub la rab tu 'jog par byed pa'o/ /gzhan mu stegs byed rnams kyang rtsod pas pham par byas shing zil gyis mnan te rang gi lta ba 'dor du bcug nas de bzhin gshegs pa'i bstan pa la 'dzud par byed/sa yang rab tu g.yo bar byed ces bya ba la sogs pa ston pa la/ mngon par shes pa lnga nges par bsgrubs nas rdzu 'phrul gyis rnam par rtse zhing 'bar ba dang / char 'bebs pa dang / snang bar byas nas zhing khams bye ba g.yo bar byed pa dang /bdud kyi dkyil 'khor pa rnams skrag pa la sogs pa ston par byed do/ /de bzhin du sprul pa rnams kyis kyang 'dul bar byed de zhes bya bar sbyar ro/ /de dag zhing rnams sprul byed de/ /zhes bya ba la sogs pa la/ rin po che sna tshogs kyi rang bzhin gyi ljon shing rnams me tog dang 'bras bu dri zhim zhing mdzes pas rnam par brgyan pa rnams dang sems can ma lus pa'i yongs su spyad pa'i phyir pho brang dang /khang pa brtsegs pa dang / mda' yab dang / gtsang khang byur bu dang / gnas dang / bzhon pa dang /khang pa la sogs pa rnams nye bar mkho ba thams cad kyis gang ba sprul nas sems can ma lus pas longs spyad pa'i phyir sbyin par byed do/ /rdzing bu yid du 'ong ba dag /ces bya ba la sogs pa la/ chu yan lag brgyad dang ldan pas yongs su gang ba/ sred pa dang / nyon mongs pa'i gdung ba zhi bar byed pa shin tu yid du 'ong zhing nyams dga' ba/ gang dag gis chu de las 'thungs pa de dag phyir mi ldog par 'gyur zhing nges par bla na med pa yang dag par byang chub par 'gyur ro/ /de'i phyir bla na med pa'i ye shes chos la bdag med pa nges par rtogs pa'i byang chub sems dpa'i ni bla na med par zhugs pa/zhi bar zhugs pa/ mya ngan las 'das pa thob par 'gyur zhes bya'o/ /'jug pa 'di ni mi shes pas/ /zhes bya ba la sogs pa la/ chos kyi de kho na nyid mi shes pa dmigs pa'i lta ba can bdag nyid nyams shing gzhan dag kyang phung bar byed pa de dag ni chos zab mo la skur ba btab nas mnar med pa'i bar du 'gro bar 'gyur zhing /der yang tshor ba drag po dpag tu med pa myong bar 'gyur ro/ /ngas ni de dag rab tu shes/ /zhes bya ba la sogs pa dang / bkod pa dag ni sprul par byed//ces bya ba la sogs pa ni rdzu 'phrul gyi cho 'phrul gyi che ba'i bdag nyid gsungs pa yin te/ sangs rgyas kyi zhing ji snyed pa rnams su gzugs la sogs pa'i yon tan phun sum tshogs pa de dag thams cad sangs rgyas kyi zhing gcig tu ston par byed do/ /chos chen gyis ni go bgos te//zhes bya ba ni sems can thams cad skyob pa'i mtshan nyid can gyi snying rje chen po ni chos chen po'o/ /snying rje chen po'i go cha de bgos nas rdo rje'i sku dpa' bo chen po stobs po che khams gsum gyi bdud kyi stobs rab tu 'joms par byed pa'i chen po stong pa nyid kyi rdo rje'i stobs kyis rab tu 'debs pa zhes bya ba'o//chen po stong pa nyid kyi rdo rjes bdud dang mu stegs la sogs pa'i stobs rnams snang ba med par byas pas ji ltar phyis ldang bar mi 'gyur ba de ltar byed do/ /'od zer bye ba stong phrag dag/ /ces bya ba la sogs pa la/sku las 'phros pa'i 'od zer gyis bdud kyi gnas ma lus pa snang ba med par byed pa'o/ /'dod chags dang / 'dod chags dang bral ba dang / rjes su chags pa dang / khong khro ba rnam par spangs pa 'du shes dang kun du rtog pa thams cad bag chags kyis mtshams sbyor ba'i nyes pa rnams stong pa nyid la gnas pa'i byang chub sems dpa' chen pos kun nas bcom pa'i phyir zhes bya ba'o//de dag la ni sdig can bdud/ /bar chad byed par ga la 'gyur/ /zhes bya ba la sogs pa la/ stong pa nyid la gnas pa la bdud sdig can gyis kyang bar chad bya bar mi nus so zhes bya ba'i don to//gang dag lta ba thams cad la rab tu gnas pa/ 'dod chags dang / zhe sdang dang / gti mug dang / dregs pa dang / nga rgyal dang / ser sna la sogs pa'i nyon mongs pa'i dbang du gyur pa de dag nyid bdud dang bdud kyis phyogs su lhung ba zhes bya'o//de dag la bar chad bya ba'i phyir bdud 'jug par mi 'gyur ro/ /de'i phyir lam dam pa nas zhugs pa rnams la bdud bar chad bya ba'i phyir 'jug par 'gyur bas stong pa nyid kyi rdo rjes de dag la rab tu dgag par bya'o zhes snga ma dang sbyar ro//rnam rig tshig dang brda rnams ni/ /zhes bya ba la sogs pa la/ tshig dang brda'i tha snyad sna tshogs kyis sgyu ma dang sprul pa bzhin du brda la yang mngon par zhen pa med par sems can rnams kyi don byed do/ /'du shes 'di ni spang snyam du/ /zhes bya ba la/ 'du shes kyi spros pa la spyod pa de dag 'du shes grol bar mi 'gyur ro//gang dag su'i 'du shes yin/ sus ni 'du shes skyed/ sus ni 'du shes la reg /sus ni 'du shes 'byung / gang gis ni 'du shes bkag /ces bya ba de dag thams cad rang bzhin gyis stong pa'o zhes gang gis shes pa de'i 'du shes thams cad rab tu spong bar 'gyur ro//'du shes kun las rnam grol ba/ /rgyal ba'i chos 'di ston pa'o/ /stong nyid de nyid bsgoms pa yis/ /chos kyi 'du shes kyang yod min/ /gang tshe rnam thar reg pa na/ /bsam pa thams cad bsam pa med/ /ces bya ba la gang gi tshe bsam pa thams cad dang bral bar 'gyur bas rnam par thar pa mngon sum du byas pa de'i tshe las dang po pa'i bsam pa gang yin pa de bsam du med pa ni bsam pa bsam du med pa zhes bya ste/rang bzhin med pa'o/ /de'i tshe bsam pa thams cad dang bral ba'i sangs rgyas ni bsam du med pa zhes bya'o//dkar po'i chos thams cad kyi rnam par smin pa ni bsam gyis mi khyab pa'i ting nge 'dzin to/ /de'i phyir sems can thams cad kyi bsam pa skad cig gcig la shes par 'gyur ro/ /chos thams cad bsam pa dang bral ba'o zhes bya ba ni gcig tu dben par gnas par bya'o zhes bya ba'i bsam pa yod na de ji ltar bsam pa dang bral ba yin zhe na/bsam pa dag ni mi sems na/ /zhes bya ba la sogs pa la/ sangs rgyas ni bsam pa thams cad bral ba'o zhes bsam par bya ba sems na yang 'das pa'i bsam pa nyid 'phel bar 'gyur gyi/bsam pa sems pa des sangs rgyas thob par mi 'gyur ro/ /shi 'phos dus byas shi ba'i tshe/ /gang gi bsam pa rab 'jug pa/ /zhes bya ba la/ 'phos pa ni 'das pa'o/ /shi ba ni sems nyams pa'o/ /dus byas pa ni ma 'ongs par ro/ /gang gi bsam pa rab 'jug pa ni/bsam pa'i rjes su rnam par shes pa rtag tu 'jug pa ste/ bsam las de ni mi thar ro/ /bsam pa de ni bsam pa che/ /zhes bya ba ni bsam pa thams cad dang bral ba'i chos nyid sems pa ni chos kyi bsam pa bla na med pa ste/ ma skyes shing ma 'gags pa/mtshan ma med cing mtshan nyid med/ /ces bya ba ni don dam pa'o/ /bskal pa bye bar bshad kyang ni/ /zhes bya ba la sogs pa la/ bskal pa bye ba stong phrag du mar dngos po thams cad kyi rang bzhin rab tu bshad kyang ngo bo nyid rnam par gzhag pa byas pa ma yin te/ rdzas kyi rang bzhin med pa'i phyir ro//mtshan ma med par bshad pa yin te/ dngos po dang dngos po med pa mnyam pa nyid ni dngos po med pa'i sgras bstan gyi/ dngos po med pa nyid ni bstan par nus pa ma yin no/ /dngos po kun gyi dngos po ni rang bzhin te/ dngos po med ces de bstan to//de ltar dngos po rnams rig na/ /zhes bya ba la sogs pa la/ dngos po rnams kyi rang bzhin de ltar rig par byas nas spros pa thams cad dang bral ba'i dngos po nyid dngos po zhes rab tu bstan te/ dngos po nyid du kun rdzob tu mtshon par byed pa'o/ /'jig rten sangs rgyas bdag 'gyur snyam//zhes bya ba la sogs pa la/ bdag sangs rgyas su gyur cig ces bya bas ni bdag tu mngon par zhen pa dang / bdag gir 'dzin pa la sogs pa yongs su ma btang bas des byang chub thob par mi 'gyur ro/ /de ltar na ji ltar byas na de 'thob ce na/chos ni gang la 'ang smon mi byed/ /ces bya ba la sogs pa la/ sangs rgyas la sogs pa'i mtshan nyid can gyi chos cung zad la yang smon par mi byed de/ chos kyi de kho na nyid rtogs pas rtag tu mnyam par gzhag pa'i phyir ro/ /ci yang med cing dmigs pa med//de ni byang chub brjod pa yin/ /zhes bya ba la/ dngos po thams cad kyi rang bzhin nges par grub pas stong pa nyid ni ci yang med pa'o/ /dmigs pa dang dmigs bya dang bral ba ni dmigs pa med pa'o/ /chos nyid dang de bzhin nyid ces bya ba de dag ni byang chub ste/phyin ci ma log pa'i don rtogs pa ni byang chub ces bya ba'i sgras bstan to zhes bya ba'i don to/ /byang chub tu ni nges zhugs zhes/ /mang du de skad smra mod kyi/ /zhes bya ba la sogs pa la/ chos kyi de kho na mngon par mi shes bzhin du sgra tsam nyid 'ba' zhig gis byang chub sems dpa' zhes zer ba de'i sgra'i rang bzhin gang yin pa de ni shin tu zab pas rtogs par dka' ba'o//de'i phyir sgra tsam 'ba' zhig nyid do zhes bya ba'o/ /mngon shes che la mdo sde 'di/ /nges par bstan zhes bya ba yin/ /zhes bya ba la sogs pa la mngon par shes pa chen po bsgrub par bya ba'i phyir mdo sde 'di rab tu bstan zhes bya ba'o//nyon mongs pa thams cad spangs pa dang ldan pas 'bad pa med par 'jug pa'i smon lam dang / ye shes kyis mngon par 'du byed pa med pa'i rdzu 'phrul la dbang thob pas ji ltar 'dod pa'i sangs rgyas kyi zhing blta bar 'gro ba dang / 'ong ba dang /'chi 'pho ba dang / skye ba la sogs pa rab tu ston pa yang sems tsam gyis 'jug par byed cing ston to/ /nyan thos dang rang sangs rgyas rnams kyi rdzu 'phrul gyi cho 'phrul gang yin pa ni byang chub sems dpa'i lhun gyis grub par 'jug pa'i rdzu 'phrul gyi cha tsam gyis kyang zil gyis mnan nas shes par yang mi 'gyur ro zhes bya ba'o//lha rnams kyis kyang de dag gi /bsam pa shes par mi nus te/ /zhes bya ba la sogs pa la/ nyan thos dang / rang sangs rgyas rnams dang / 'jig rten pa'i lha rnams kyis kyang de'i ye shes kyi khyad par phra bar 'jug pa rnams shes par nus pa ma yin na/bsam gyis mi khyab pa'i rdzu 'phrul gyi cho ga shes pa lta smos kyang ci dgos zhes bya ba'o/ /de dag spyi cer mi 'gyur te/ /zhes bya ba la sogs pa la/ tshe la dbang thob par gyur pas rga ba dang 'chi ba la sogs pa'i sdug bsngal med pa'i phyir ro/ /mdo sde bye ba brgya rnams ni//nyin dang mtshan du de dag tshol te/ zab cing dpag tu med pa'i mdo sde rnams mnyan pa dang / gzung ba dang / bcang ba dang / gzhan dag la yang rab tu bstan pa'i phyir te/ ji ltar mngon par rtogs pa'i ting nge 'dzin bye ba brgya stong yang ston to/ /rgol ba brgya stong la yang lan 'debs so//kun tu rtog pa thams cad kyang spong ngo / /sems can thams cad la sems mnyam pa dang / ye shes yongs su dag pa dang / rjes su mi dmigs pa'i spyod pa dang / chos yang dag par brjod pa la/ de yi tshig kyang don med min/ /chos bstan pa yang 'bras bu yod//ces bya ba la sogs pa'i don ni rtogs sla'o/ /gang gis rin chen mdo 'di las/ /zhes bya ba ni gang dag mdo sde rin po che 'di las tshig bzhi pa'i tshigs su bcad pa tsam 'dzin pa'i byang chub sems dpa' des de bzhin gshegs pa mthong zhes bya'o/ / myur du byang chub tu mngon par byang chub par 'gyur ro/ /de dag sangs rgyas kyi chos rnams la blo gros ngan pa dang the tshom yod par mi 'gyur ro/ /des bya rgod kyi phung po'i ri la de bzhin gshegs pa chos ston pa mthong zhing gus pas rgyal ba la mchod pa byas pa yin no/ /gang dag gis mdo sde rin po che 'di rna ba'i lam du thos par gyur pa des de bzhin gshegs pa byams pa mthong bar 'gyur zhing /mthong nas chos zab mo thos nas nges par sangs rgyas nyid du lung ston par 'gyur ro/ /mdo sde 'di ni rab ston na/ /sangs rgyas rnams kyi mdzod bsrungs te/ /zhes bya ba ni sangs rgyas rnams kyi chos kyi mdzod bsrungs par 'gyur ro//mdo sde 'dzin pa dang len pa dang / bsrung ba 'di ni de bzhin gshegs pa'i bla na med pa'i mchod pa'o/ /de dag sgra yang sgrogs par 'gyur/ /zhes bya ba la sogs pa la/ dpag tu med pa'i sangs rgyas kyi zhing gi 'khor gyi dkyil 'khor du 'dus nas spobs pa dpag tu med pa dang ldan pas dri ba dpag tu med pa dris nas som nyi med pas ji ltar thos pa bzhin bzung zhing blangs nas de bzhin du sems can thams cad la chos ston par byed do//sangs rgyas rnams kyis de lung bstan/ /zhes bya ba la sogs pa la/ mdo sde gang de bzhin gshegs pa thams cad kyi mngon par byang chub pa'i rgyu 'di phyin ci ma log par bsrungs pa de ni lung bstan par 'gyur ro zhes bya ba'o/ /de dag gzugs ni phun sum tshogs/ /zhes bya ba la sogs pa la/ skyes bu chen po'i mtshan sum cu rtsa gnyis kyis yang dag par brgyan pa'i lus yan lag thams cad yongs su rdzogs pas mdzes pa sems can thams cad yang dag par dga' bar byed pa'o//sangs rgyas kyi zhing sna tshogs na bzhugs pa'i de bzhin gshegs pa rnams la mchod pa'i phyir chu las skyes pa dang /thang las skyes pa'i me tog yid du 'ong ba kha dog dang dri dang yang dag par ldan pa rin po che sna tshogs kyi rang bzhin sprul pa dang / de bzhin du sil snyan rnam pa sna tshogs yid las byung ba grangs med pa sprul nas mchod par byed do/ /yon tan phan yon 'di dag ste/ / zhes bya ba la sogs pa la/ bstan ma thag pa'i yon tan dang phan yon dpag tu med pa rnams dang / 'chad par 'gyur ba de thams cad ting nge 'dzin gyi rgyal po'i mdo 'di 'dzin pa yin no zhes bya ba'o/ /bud med kyis kyang mdo sde 'di/ /thos nas tshigs bcad gcig bzung na/ / zhes bya ba la sogs pa la/ mdo sde ma lus pa'am/ tshigs su bcad pa gcig tsam yang 'dzin par byed na/ de bud med kyi lus spangs nas skyes pa'i lus bsgrubs te chos smra bar 'gyur ro/ /rab tu mdzes shing mtshan gyis yang dag par brgyan pa'i lus su 'gyur ro/ /mdo sde mchog rab 'di yi ni//zhes bya ba la sogs pa la/ mchog rab kyi yon tan yang mchog rab nyid do zhes bya ba'i bar du'o/ /sa bdag 'khor los sgyur bar de 'gyur te/ /zhes bya ba la sogs pa la/ 'khor los bsgyur ba'i rgyal por gyur nas de bzhin gshegs pa'i bstan pa la rab tu dang ba'i sems kyis tshigs su bcad pa brgya stong gis de bzhin gshegs pa la bstod nas de bzhin gshegs pa'i bstan pa la rab tu byung ngo //rab tu byung nas kyang tshangs par spyod pa rnam par dag pa la spyod par 'gyur ro/ /de rnam par dag pas ting nge 'dzin bsgrubs te ting nge 'dzin gyi stobs kyis 'jug pa dang / mtshan ma med pa dang / smon pa med pa dang / rang bzhin gyis 'od gsal ba dang / gzod ma nas zhi ba'i chos rab tu ston par 'gyur ro/ /snang bar gyur pas mi shes pa'i mun pa sel bar byed pa la mkhas par 'gyur ro/ /ting nge 'dzin 'di 'dzin par byed pa ni tshangs par spyod pas gtsang bar 'gyur zhing nyon mongs pa'i phyogs thams cad bkrus pas dag par 'gyur ba'i sems kyi rgyud kyis gzhan dag kyang rnam par dag pa'i tshul khrims la rab tu 'god par byed par 'gyur ro//de shes rab rab tu rno bar 'gyur ro/ /bstan bcos ma lus pa yongs su shes pa'i thos pa'i rgya mtshor 'gyur ro//dge ba'i chos rab tu ston pas dge ba'i gtam gyis sems can gyi khams dpag tu med pa 'dul ba la mkhas par 'gyur ro/ /gang yang 'jig rten la grags pa'i las kyi gnas kyi khyad par dang / bzo'i gnas kyi khyad par dang / gso ba dang / sman rnams kyi ro dang / nus pa dang / sman pa'i gnas kyi khyad par de dag la rab kyi mthar thug par thob pa dang / snyan dngags dang / bstan bcos dang / glu dang / rdung ba dang / gar gyi bstan bcos la sogs pa sna tshogs la slob dpon du bkur bar 'gyur ro//'khor dpag tu med pa dang / 'khor mi phyed par 'gyur/ gang cung zad sems la gnod pa byed pa dang / lus la gnod pa byed pa'i nad rnam pa sna tshogs pa de dag de la 'byung bar mi 'gyur te/ ting nge 'dzin bsgoms pa'i sems dang de 'gal ba yin pa'i phyir ro/ /bar snang mkha' la gos pa med pa ltar//zhes bya ba la sogs pa la/ ji ltar nam mkha' rang bzhin gyis rnam par dag pa dang / tshad med pa yin pa de bzhin du ting nge 'dzin bsgoms par gyur pa'i sems kyang nam mkha' bzhin du shin tu rnam par dag pa dang / rang bzhin gyis 'od gsal ba dang tshad med pa ste/tshad kyis yongs su dpyad par mi nus pa'i phyir ro/ /zla ba'i 'od dang zhes bya ba la sogs pa la/ ji ltar zla ba dang nyi ma'i 'od rang bzhin gyis 'od gsal ba yin no/ /de bzhin du sems kyang mi shes pa'i mun pa ma lus pa rnam par bsal na rang bzhin gyis 'od gsal bar 'gyur ro//rdul dang bral ba'i ting 'dzin zhi ba 'di bzung na/ /zhes thams cad du bstan par bya'o/ /ji ltar tshon rtsi thogs nas bar snang nam mkha' la/ /zhes bya ba la sogs pa la/ tshon rtsi sna tshogs kyi cho gas ras dang / rtsig ngos la sogs pa la 'dri ba bzhin du nam mkha' la bri bar nus pa ma yin no//de bzhin du sems la yang gnyis su med pa'i rang bzhin gyi ting nge 'dzin ma gtogs pa rnam par rtog pa sna tshogs kyi tshon sbyar bas bri bar nus pa ma yin no/ /rlung ni ji ltar phyogs bzhi dag nas langs pa dang zhes bya ba la sogs pa la/rlung ni phyogs bzhi nas rgyas bskor zhing zhags pas bcing du rung yang srid kyi/ de'i sems ni shes par nus pa ma yin zhing sems can thams cad kyi sems kyi spyod pa shes par nus pa ma yin no/ /yongs su brtags pa nye bar bzung nas snod sna tshogs kyi chu'i nang du byung ba'i chu'i zla ba ni gzung bar nus kyang srid/glog 'gyu ba lag pas bcang bar nus kyang srid/ sems can thams cad kyi sgra dang skad gcig tu byas nas gzung bar nus kyang srid kyi/ de'i sems kyi spyod pa shes par mi nus pa ma yin no zhes bya bas ting nge 'dzin thob pa'i che ba'i bdag nyid rab tu bstan pa yin no//des ting nge 'dzin de thos nas yang ngan song gsum du las kyi dbang gis ltung bar mi 'gyur gyi/ sems can gyi don du bsams bzhin du srid par skye bar ni 'gyur ro/ /'dod pa dag la mi sred gzugs la mi sred de/ /zhes bya ba la sogs pa la/'dod pa dang / gzugs dang / gzugs med pa la sred pa dang bral bas 'dod pa la sogs pa la mi sred pa'o/ /chung ma dang / bu dang / bu mo dang / gnyen bshes dang / 'khor dang / nor dang / 'bru dang / rin po che dang / mu tig la sogs pa la sred pa med pa yin no//sred pa ni tshor ba dang / don du gnyer ba ste/ shin tu 'dod pas de dang der tshol bas ngoms pa med pa'i sems zhes bya'o/ /de'i tshangs par spyod pa mtho ris kyi phyir ma yin/ lha'i dbang po dang rgyal srid kyi dbang phyug gi phyir ma yin gyi/ gzhan du na 'gro la phan phyir sangs rgyas 'grub par shog ces bya bas sems can ma lus pa bsgral bar dam bcas pa'i phyir ting nge 'dzin sgom par byed do/ /glu la'ang mi sred ces bya ba la sogs pa la/ glu dang / gar dang / sil snyan dang / rjes su mthun pa dri dang / me tog dang / spos dang / phye ma dang / gos dang / bza' ba dang / btung ba dang / mal cha dang / ston tshol ba ched du byed par mi 'gyur ro/ /ting nge 'dzin thob pa'i yon tan 'di dag ste/ rnam pa sna tshogs pa'i rnam par rtog pa'i sbyor ba yongs su spong ba la mkhas par blta bar bya'o zhes bya ba yin no//mig la mi sred ces bya ba la sogs pas ni phung po dang / khams dang / skye mched la mngon par ma zhen par bstan pa yin no/ /khyim la mi sred ces bya ba la sogs pas ni phyi rol gyi nye bar mkho ba la mngon par zhen pa yongs su spangs la ting nge 'dzin bsgom pa la mngon par sbyar bar bya'o zhes bstan par 'gyur ro//sbyin pa la mi sred ces bya ba la sogs pas ni pha rol tu phyin pa drug bsgom pa'i rnam par rtog pa yang ting nge 'dzin thob pa na yod pa ma yin no zhes bstan par 'gyur ro/ /sangs rgyas dag la mi sred ces bya ba la sogs pas ni sangs rgyas dang /chos dang / dge 'dun la yang mngon par zhen pa yod pa ma yin no zhes bstan pa yin no/ /yod la mi sred ces bya ba la sogs pa la/ yod pa nyid dang / med pa nyid dang / mtha' dang ldan pa nyid dang / mtha' dang mi ldan pa nyid dang /dbus nyid la zhen pa la sogs pa yang ting nge 'dzin thob par 'gyur ba la yod pa ma yin no zhes bya ba'o/ /de la 'dod chags nam yang yod ma yin/ /zhes bya ba la sogs pa la/ 'dod chags dang / zhe sdang dang / gti mug gis byas pa'i sems rnam par rmongs par byed pa'i gnod pa yod par mi 'gyur ro//nyon mongs pa dang / nye ba'i nyon mongs pa dang / kun nas nyon mongs pas gnod par mi 'gyur ro/ /des thams cad yongs su btang ba dang / 'jig rten las 'das pa'i stobs dang / mthu dang / brtson 'grus thams cad thob par 'gyur ro//gang tshe 'jig rten du yang 'khor los sgyur ba yi zhes bya ba la sogs pa la/ /de bsams bzhin du gling bzhi'i dbang phyug gi 'khor los sgyur bar 'gyur ro/ /de lta na yang ting nge 'dzin yongs su sgom par byed pa dang / rtag tu sems mnyam par gzhag pa dang /dge ba bcu'i las kyi lam la 'god par byed pa dang / 'gro ba'i don byed par 'gyur ro/ /su dag gtso bor gyur cing rigs che rin chen mchog /ces bya ba la sogs pa la/ gang yang 'dzam bu'i gling na rigs rin po cher brtsis pa longs spyod chen po der skyes nas rnam pa sna tshogs pa'i don gtong bas sems can rnams rjes su bzung nas sangs rgyas kyi byang chub la nges par 'god par byed do//de dag rim gyis sangs rgyas rgyal ba mchog tu 'gyur/ /zhes bya ba la sogs pa dang / tshangs spyod mtshungs med tshul khrims rab tu srung //zhes bya ba la sogs pa la/ sbyin pa dang tshul khrims dang / bzod pa dang / brtson 'grus dang / bsam gtan dang / shes rab la sogs pa'i yon tan gyis brgyan nas rdzu 'phrul gyi rkang pa rnams goms pa mthar thug par gyur nas rdzu 'phrul gyis mos pa sna tshogs pa'i sems can rnams kyi bsam pa dang /lhag pa'i bsam pa dang / rjes su mthun par chos bstan pas dbang du byas nas sangs rgyas kyi byang chub la 'god par byed do/ /mngon par shes pa lnga dang yang dag par ldan pas 'chi 'pho dang / skye ba la sogs pa yongs su shes pa nas las dang 'bras bu so sor nges pa la sogs pa rab tu bstan pas btul nas bla na med pa'i theg pa chen po la rab tu 'god par byed do//de la 'phya bar byed pa na/ /sems can 'du shes mi 'jug ste/ /zhes bya ba ni de la gang dag 'phya bar byed pa na sems can gyi 'du shes dang /srog gi 'du shes 'jug par mi 'gyur te/ bdag dang gzhan du 'du shes pa dang bral ba'i phyir ro/ /stong pa nyid la rnam par gnas nas bdud kyi dkyil 'khor rnam par 'thag par byed do/ /byang chub chen po'i snying po la zhugs nas bdud bzhi pham par byed pa zhes bya bas 'du shes thams cad spangs pa'i byang chub tu mngon par byang chub par 'gyur ro//mngon par byang chub pa'i dus su sa ma lus pa g.yo ba la sogs pa'i rdzu 'phrul gyi khyad par yang 'byung zhes bya ba'o/ /rten cing chos rnams 'byung bar 'gyur/ /zhes bya ba la sogs pa la dngos po gang dag rten cing 'byung ba de rnams rang gi mtshan nyid kyis stong pa zhes bya ba ste/stong pa nyid kyi 'gro bas 'gro ba'o/ /de'i 'gro ba ni 'gro ba'ang med pa ste 'gro ba po dang / bgrod bya dang / 'gro ba med pa'i phyir ro/ /de ni 'gro ba der 'gro ste/ /zhes bya ba la sogs pa la/spros pa thams cad dang bral ba'i chos nyid rtogs pa la 'gro ba med pas rtogs pa med pa mngon par byang chub nas byang chub kyi snying po las bzhengs nas gdul bya'i sems can thams cad gdul bar mdzad cing sems can dmigs par mi 'gyur yang sprul pa lta bur chos rnams rig nas sprul pas sprul pa'i sprul pa lta bur sems can rnams kyi don byed do//sprul pa de dag ji lta ba bzhin du chos ston to/ /theg pa chen po sangs rgyas kyi theg pa bla na med pa zhes bya ba la sogs pa la/ byang chub sems dpa' gang dag kyang / /zhing rnams stong nas lhags pa rnams//zhes bya ba la sogs pa la mchod pa'i khyad par ston pa ni go sla'o/ /pad+ma bye ba bsam mi khyab/ /'dab ma dag ni gser las byas/ /zhes bya ba la sogs pa la/ tsan dan sbrul gyi snying po can gyi ze ba can bai DUr+ya'i sdong po dang / rin po che'i shel gyi 'dab ma dang /rin po che dpal gyi snying po'i ge sar can gyi dpag tu med pa'i pad+ma sprul nas yid du 'ong ba'i dri dang rdul sangs rgyas kyi zhing dpag tu med par khyab pa spros pas sems can thams cad kyi nyon mongs pa 'joms pa'i ngo bo sangs rgyas dang / chos dang / dge 'dun dang /stong pa nyid dang / mtshan ma med pa dang / smon pa med pa la sogs pa'i sgra rnams sprul pa'i pad+ma de dag las byung nas dpag tu med pa'i sems can phyir mi ldog pa la 'god par byed pa zhes bya ba la sogs pa dang / bya rnams kyang sprul par byed do/ /skad snyan pas chos nyid kyi de kho na nyid ston par byed pa dang /rin po che'i shing sna tshogs kyang de bzhin gshegs pa la mchod pa'i phyir sprul par byed do zhes bya ba'o/ /gong ma bzhin du zhes bya ba ni de lta bu'i mchod pa'i khyad par gyis zhes bya ba'i don to/ /dbyangs kyi yan lag rnams 'byin pa//zhes bya ba la sogs pa la/ de bas dbyangs kyang bsam yas te/ /byang chub sems dpa' rlom sems med/ /rlom sems med pa'i chos rnams la/ /byang chub sems dpa' rnam par 'byams/ /mngon shes lnga po shes rab che/ /chos kyi 'khor lo skor ba po//mdo sde rin chen 'di yi bsngags pa rnams/ /zhes bya ba la sogs pa la/ mdo sde 'dzin pa'i phan yon rgya cher thos nas rab tu dga' ba'i sems skyed par byed pa de dag ni bde ba can gyi 'jig rten gyi khams su 'gro bar 'gyur ro zhes bya ba la sogs pa'o//zad dus mi bzad pa la byang chub sems dpa' gang / /bde bar gshegs pas bstan pa'i chos mchog 'di srung ba/ /zhes bya ba la sogs pa la/ phyi ma'i dus na ting nge 'dzin gyi rgyal po klog pa dang / 'don pa la sogs pas gang dag srung bar byed pa de dag nga'i bu chos las skyes pa dang /byang chub sems dpa' chen po yin no/ /sna tshogs chos kyi de nyid yangs pa ston par byed pa mkhas pa'i grags pa dang ldan pa/ /snying rje chen po las spros sems kyi sangs rgyas nyid 'phags sems can kun gyi gnyen gcig pa/ /zab cing rgya che'i sku mnga' 'jam dpal dbyangs kyi zhabs la gus pas rab 'dud bag yod pa//de yis rgyal ba mchog gis gsungs pa'i mdo sde zla ba'i sgron ma 'di ni bshad par bya/ /mdo sde 'dzin pa'i phan yon gyi le'u ste sum cu rtsa gsum pa'i 'grel pa rdzogs so// //brtson 'grus rab tu 'bar bas rang gi lus dang srog la yang ltos pa med par chos kyi rnam grangs 'di la rnal 'byor du bya'o zhes bstan pa'i phyir/de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na zhes bya ba la sogs pa la/ mchod pa rgya cher bya ba la mngon par brtson par bya'o zhes bya ba'i bar ni don go bar zad do//chos thams cad kyi rang bzhin mnyam pa nyid rnam par spros pa'i ting nge 'dzin 'di yid du 'ong ba'i dbyangs dang / tshig dang / yi ge rgyun chags pas gzhan la rgya cher rab tu bstan par bya'o/ / de ci'i phyir zhe na zhes bya ba ni/ chos thams cad la goms par byas na sangs rgyas nyid 'thob par 'gyur ba yin na gang gi phyir ting nge 'dzin gcig pu rab tu bstan par bya zhes som nyi za bar 'gyur/ chos thams cad kyi rtsa ba dang gzhi ni chos thams cad kyi rang bzhin mnyam pa nyid rnam par spras pa'i ting nge 'dzin gyi rgyal po zhes bya ba la/gang gi tshe snying rje chen po dang thabs kyis brtan pa'i brtson 'grus dang ldan pas de bzhin gshegs pa'am/ de bzhin gshegs pa'i mchod rten la mchod pa rgya cher bya ba la brtson par gyur cing / ting nge 'dzin gyi rgyal po 'di gzhan dag la rgya cher rab tu ston pa'i tshe de stong pa nyid dang /mtshan ma med pa dang / smon pa med pa dang / rnam par thar pa'i sgo rnams la rab tu gnas par 'gyur ro/ /des chos cung zad kyang dmigs par mi 'gyur te/ ting nge 'dzin gyi ngo bo nges par rtogs pa'i phyir ro//dmigs pa med pa'i ting nge 'dzin la nges par gnas pa'i byang chub sems dpa' ni bdag dang gzhan sangs rgyas nyid du bya ba'i phyir smon lam thams cad yongs su rdzogs par byed cing / ting nge 'dzin thob par byas nas myur du bla na med pa yang dag par rdzogs pa'i byang chub mngon par rdzogs par 'tshang rgya'o//de'i phyir ting nge 'dzin ni chos thams cad kyi rtsa ba yin no zhes bya'o/ /gzhon nu sngon byung ba 'das pa'i dus na zhes bya ba la sogs pas ni 'das pa'i dus kyi gtam gsungs pa yin te/ de bzhin gshegs pa dbyangs sbyin mya ngan las 'das pa la mchod pa'i phyir mi'i bdag po dpal dbyangs zhes bya bas de bzhin gshegs pa'i ring bsrel gyi snying po can gyi mchod rten bye ba khrag khrig brgya stong phrag brgyad khri bzhi stong byas te/byas nas de dag la mchod pa rgya cher byas so/ /byang chub sems dpa' chen po rnams la yang chos mnyan pa'i phyir bde ba'i yo byad thams cad kyis mchod pa la brtson par gyur to//byang chub sems dpa' de dag thams cad kyang chos smra ba chen pos legs pa'i blo gros la legs par gnas pa'o/ /de nyid kyi phyir spobs pa rgyun mi 'chad pa/ chags pa med pa'i ting nge 'dzin dang /gzungs la rab tu gnas pa/ yongs su dag pa'i sangs rgyas kyi yon tan dpag tu med pas brgyan pa/ chos zab mo bstan pa/ chos thams cad la dbang thob pa sha stag go/ /'khor de na byang chub sems dpa' bde bas byin zhes bya ba gzugs dang lang tsho la sogs pa'i yon tan dang ldan pa zhig kyang gnas so//de'i tshe rgyal po dpal dbyangs kyis byang chub sems dpa'i dge 'dun chen po de la pha rol tu phyin pa drug yang dag par brjod pa dang / byang chub sems dpa'i sde snod yang dag par brjod pa dang / gzhung dang / don dang / chos dang / sngags kyi gzungs chen po rang bzhin can de dag bstan pa'i phyir gsol ba gdab pa byas so/ /gsol ba btab pa dang / thabs mkhas pa ni snying rje chen pos yongs su gzung ba dang / chos thams cad kyang sangs rgyas kyi chos la 'jug pa'i thabs su gyur pa zhes bya ba'o/ /dbang ni dbang bcu ste/bye brag tu bstan na mdo sde dang / mngon pa'i chos dang / 'dul ba dang rnam par 'byed pas rab tu phye nas bstan pa'i phyir byang chub sems dpa' sems dpa' chen po de dag la gsol ba btab nas de'i nub mo ste srod kyi dus te nyal ba'i dus so/ /de'i tshe de bzhin gshegs pa'i ring bsrel gyi snying po can gyi mchod rten gyi mdun du mar me'i yon bye ba khrag khrig brgya stong dag rab tu 'bar bar byas te/ci ltar bka' nyan pa rnams kyis rgyal po'i rjes su spyod pas phun sum tshogs pa rnams dang / rgyal po dpal dbyangs kyi btsun mo'i 'khor gyi skye bo dang lhan cig tu mchod pa'i khyad par rnam pa sna tshogs kyis mchod pa byas nas yang btsun mo'i 'khor dang bcas te khang thog tu song ngo //song nas lha la sogs pa'i 'khor dang bcas par 'dug go/ /de nas byang chub sems dpa' chen po bde bas byin 'di snyam du sems te/ bdag ni theg pa chen po la zhugs pa yin no zhes bya ba la sogs pa la/bdag gis de bzhin gshegs pa la mchod pa lha dang lha ma yin dang bcas pa'i 'jig rten ngo mtshar du 'gyur ba de lta bus mchod pas mchod kyi snang ba thob par bya ba dang / rgyal po dpal dbyangs kyi mchod pa thams cad zil gyis mnan pas ngo mtshar thob par bya ba'i phyir snang ba'i mchod pa bya'o snyam du nges par bsams nas de bzhin gshegs pa'i ring bsrel gyi snying po can gyi mchod rten gyi mdun du 'dug nas lag pa g.yas pa ras kyis dkris nas 'bru mar gyi nang du bcug ste 'bar bar byas so//bsam pa rnam par dag pa dang chos nyid rab tu rtogs pas lag pa de ltar 'bar yang sems dang /bzhin gyi mdog 'gyur ba med pas tshor ba med par mtshon pa dang / chos nyid la dga' bas bzhin gyi mdangs pad+ma rab tu rgyas pa lta bur gyur to/ /byang chub sems dpa'i spyod pa shin tu ngo mtshar che bar bstan pa'i phyir sa chen po 'di yang g.yos par gyur to//lag pa g.yas pa 'bar bar byas pa'i 'od des mar me'i 'od bye ba khrag khrig brgya stong phrag du ma rnams mog mog por byas nas phyogs thams cad du snang bar gyur to/ /chos thams cad kyi rang bzhin mnyam pa nyid rnam par spros pa'i ting nge 'dzin gyi mthu shin tu khyad par du 'phags pas/sum cu rtsa gsum gyi lha rnams kyi bar la chos ston to/ /de dag gis kyang chos kyi dga' bas mchod pa chen po byas so/ /rgyal po dpal dbyangs kyis byang chub sems dpa' bde bas byin gyi lag pa 'bar bar byas pa'i 'od kyis gzhan thams cad kyi 'od zil gyis mnan nas 'bar bar gyur pa mthong nas byang chub sems dpa' chen po 'di na mngon par shes pa chen po thob pa yin no snyam nas rgyal po dpal dbyangs gus pa dang bcas pas btsun mo'i 'khor brgyad cu dang lhan cig tu khang pa'i steng nas bdag nyid mchongs kyang bde bas byin mthong bas sems rab tu dga' ba'i khyad par gyis lha la sogs pas legs par bsrungs pa dang /bsod nams lhag par spyod pa'i che ba'i bdag nyid kyis khru stong phrag brgya tshang ba'i khang pa'i steng nas mchongs na yang de dag gi lus dang sems la gnod pa ci yang ma byung ngo / / de nas byang chub sems dpa' bde bas byin gyi gam du song ba dang / bde bas byin lag pa 'bar bar gyur pa mthong nas dad pa'i shugs kyis cho nges btab po/ /de nas rgyal po dpal dbyangs ngu zhing mchi ma phyung nas bde bas byin gyi mdun na 'dug pa mthong nas bde bas byin gyis rgyal po chen po ci'i phyir bdag gi mdun na bshums shing bzhugs de skad ces smras pa dang /rgyal po dpal dbyangs kyis tshigs su bcad pa'i dbyangs kyis smras pa zhes bya ba ni lan gdab pa'i phyir zhes bya ba'i don to/ /de dag nyid bstan pa'i phyir/ shes rab chen po bde bas byin//zhes bya ba la sogs pa la/ chos smra ba chen po bde bas byin mkhas pa chen po'i ya mtshan pa mthong nas skye bo ma lus pa yid mi bde zhing ngu bar gyur te zhes bya ba yin no/ /dpe med yon tan bang mdzod ye shes phung po mchog gyur pa/ /ri'i dbang lta bu dag pa'i zla ba nyi ma bas lhag cing //ma lus 'byung po kun la sems snyoms pa yi 'od zer gyis/ /nyid sku mdzes pa'i mdangs kyis ci nas gsal mdzad pa'i/ /lag pa nyams par shes nas bdag kyang shin tu sdug bsngal lo/ /zhes bya bas ni ngu ba'i rgyu bstan to/ /khyod kyi lag pa 'bar byas pa/ /zhes bya ba la sogs pas ni 'od kyi khyad par du gyur pa nye bar bstan te/phyogs ma lus pa snang bar byed par mkhas pa khyod las byung ba'i snang bas mar me la sogs pa gzhan gyi 'od mi gsal bar byas pa dang / ngo mtshar bskyed par bya ba'i phyir/ sa 'di rab tu g.yos gyur te/ /zhes bya ba la sogs pa la/khyod kyi sems zhum pa med par mthong nas skyes bu 'di ni tha mal pa ma yin te/ nges par phyir mi ldog pa'i byang chub sems dpa' yin no snyam du bsams nas bdag btsun mo'i 'khor dang bcas pa khang pa'i steng nas mchongs so zhes bya ba la sogs pas byang chub sems dpa' la go bar byas nas legs so zhes bya ba byin pa ni che ba'i yon tan brjod pa'i phyir te/ye shes kyi bdag nyid che ba dang sems kyi bdag nyid che ba dang / brtson 'grus kyi bdag nyid che ba dang / 'gyur ba med pa'i bsam pas chos ston pa'i che ba'i bdag nyid bstan pa'o/ / bdag kyang de bzhin mkhas pa yi/ /smon lam yongs su rdzogs par bgyi/ /zhes bya bas gzhan dag kyang slob tu 'jug pa'o/ /'di ltar yan lag ma tshang ba/ /des ni rab tu sdug bsngal lo/ /zhes bya ba la byang chub sems dpa' bde bas byin yan lag ma tshang ba ma yin par ston pa'i tshigs su bcad pa gzhan gsungs pa ni/gang la lag pa med pa yang / /de ni yan lag ma tshang min/ /zhes bya ba la dge ba'i yan lag la yan lag ces bya ba'i sgras brjod pas lus kyi yan lag ma tshang bar gyur kyang tshul khrims kyi yan lag ma nyams pa ni yan lag ma tshang ba med pa zhes brjod do//su la tshul khrims med pa dag /de ni yan lag ma tshang yin/ /zhes bya ba ni bzlog pa'i sgo nas bstan pa yin no/ /rul ba'i lus 'dis rul pa ma yin pa'i chos kyi sku thob par bya ba'i phyir de bzhin gshegs pa thams cad la mchod par bya'o/ /stong gsum gyi stong chen po'i 'jig rten gyi khams stong phrag brgya rgyan thams cad kyis brgyan cing rin po che sna bdun gyis yongs su bkang nas gang dag gis de bzhin gshegs pa rnams la phul bar gyur pa dang /yang gzhan zhig gis chos nyid stong pa shes nas de bzhin gshegs pa rnams la yan lag dang nying lag la sogs pa phul na snga ma de bas lus kyi yan lag stong pa 'di ni bsod nams kyi phung po dpag tu med pa rab tu thob par 'gyur ro zhes bya ba'o//'jig rten rjes su gzung ba'i phyir bden pa'i byin gyi rlabs byed par rtsom pa ni bden pa'i tshig ni brjod par bgyi zhes bya ba la sogs pa la/bden pa gang gis sangs rgyas su bdag 'gyur na ste/ 'jig rten thams cad la snang ba byed pa dang / sems can gyi khams dpag tu med pa rab tu dgrol bar byed par gyur na bden pa dang bden pa'i tshig des sa chen po 'di rnam pa drug tu g.yos par gyur cig ces brjod pa dang /bden pa'i tshig de brjod ma thag tu sa chen po 'di rnam pa drug tu g.yos so/ /ngo mtshar rmad du byung ba'i ltas de mthong bas lha la sogs pa rnams dga' ba'i sems kyis byang chub tu sems bskyed nas theg pa chen po la rab tu gnas par gyur to/ /yang stong pa nyid kyi bdag nyid che ba bstan par bya ba'i phyir byin gyi rlabs byed pa ni/bden pa gang gis chos de ni/ /lag pa zhes kyang bya med na/ /zhes bya ba la/ don dam par gzugs la sogs pa'i phung po bden pa ma yin te/ stong pa nyid kyi rang bzhin gyi phyir ro/ /bden pa de yis sngon ltar yang //lag pa myur du 'byung bar shog /ces bya ba ni ji ltar sngon ma nyams pa'i dus kyi gzugs bzhin du gyur cig pa'o/ /de bzhin du bde bas byin zhes bya ba'i chos kyang yod pa ma yin no/ /gang gis ston par byed pa'i sgra de yang stong pa'o/ /bden pa dang bden pa'i tshig des 'jig rten thams cad tshig par ma gyur cig /ces gal te bden pa'i byin gyi rlabs byas nas yang thams cad tshig par mi 'gyur ro zhes bya ba yin no/ /sems can thams cad mnyam par gzhag par shog shig /nges par phyir mi ldog par gyur cig ces bya ba phan pa'i bsam pas brjod ma thag pa nyid du mtshan thams cad yang dag par rdzogs par 'gyur ro zhes bya ba yin no//de nas lha dang / klu dang / gnod sbyin dang / dri za dang / lha ma yin dang / mi 'am ci dang / mi dang mi ma yin pa thams cad kyis mchod pa bla na med pa byas so//de bzhin gshegs pa thams cad kyang mthong zhing sangs rgyas kyi zhing de dag tu che ba'i yon tan yang 'khor rnam pa bzhi la bstan pas sems dang ba skyed par byed pa'i phyir ro/ /lha la sogs pa yang bla na med pa yang dag par rdzogs par byang chub par 'gyur ro/ /sangs rgyas shAkya seng ge ni//zhes bya ba la sogs pa la/ nga nyid de'i tshe bde bas byin du gyur pa yin no/ /dpal dbyangs ni byams pa ma pham pa nyid yin no zhes bya ba'o/ /lhag ma ni go sla'o/ /nyes pa kun las rnam grol ba/ /bde ba mya ngan 'das par 'dod/ /sems can kun la bde sbyin pa'i/ / thams cad mkhyen nyid thob pa'i phyir/ /thabs chen man ngag ston mdzad pa'i/ /thub pa gtso bo bde bas byin/ /'jig rten bsam pa'i bye brag gis/ /de nyid gcig pu rnam par bsgyur/ /bde bas byin gyi le'u ste sum cu rtsa bzhi pa'i 'grel pa rdzogs so// //mdo sde 'chad pa'i chos smra ba la rang gi sha dang khrag gis kyang nye bar spyad pas sems can gyi don du bsnyen bkur byas la nad gso bar bya'o zhes bya bar/de nas bcom ldan 'das kyis zhes bya ba la sogs pa gsungs te/ gzhon nu de lta bas na zhes bya ba la sogs pa la/ chos kyi sbyin pa'am zhes bya ba nas mngon par brtson par bya'o zhes bya ba'i bar du ni rtogs sla ba'i phyir ma bkrol lo//sbyin pa de yang bsngo ba bzhis yongs su bsngo bar bya'o zhes bya ba ni yongs su bsngo ba'i khyad par las 'bras bu'i khyad par du 'gyur bas de'i phyir khyad par du 'phags pa'i 'bras bu 'dod pas de bzhin du bsngo bar bya'o zhes bya ba yin no//bzhi po gang dag yin zhes dris pa dang / 'di lta ste zhes bya bas nye bar ston par byed do/ /thabs la mkhas pa gang gis zhes bya ba la sogs pa la/ thabs la mkhas pa gang gis de bzhin gshegs pa de rnams myur du bla na med pa yang dag par rdzogs pa'i byang chub mngon par rdzogs par sangs rgyas nas 'gro ba ma lus pa'i don mdzad par gyur pa de bzhin du thabs la mkhas pa'i khyad par la dmigs nas sbyin pa las byung ba'i dge ba'i rtsa ba bskyed par bya'o zhes bya ba ni bsngo ba dang po'o//dge ba'i bshes gnyen gang las thabs la mkhas pa 'di thos nas gang gis bla na med pa yang dag par rdzogs pa'i byang chub 'thob pa'i dge ba'i bshes gnyen de dag dang bdag rtag tu 'grogs par gyur cig ces de ltar sbyin pa las byung ba'i dge ba'i rtsa ba bskyed par bya'o zhes bya ba 'di ni gnyis pa'o//longs spyod thob pa gang dag 'jig rten thams cad nye bar 'tsho bar 'gyur ba de dag dang /bdag phrad par gyur cig ces sbyin pa las byung ba'i dge ba'i rtsa ba bskyed pa ni gsum pa'o/ /bdag gi lus grub pa gang gis chos dang zang zing rnam pa gnyis kyis sems can thams cad rjes su 'dzin pa de lta bu dang mthun pa'i bdag gi lus grub par gyur cig /ces sbyin pa las byung ba'i dge ba'i rtsa ba bskyed pa ni bzhi pa'o/ /de lta bur yongs su bsngo ba'i sbyin pa ni sangs rgyas nyid sgrub par 'gyur ba'o/ /gzhan yang gzhon nu zhes bya ba la sogs pa la/ byang chub sems dpa' gang dag tshul khrims kyi phung po la rab tu gnas pa de dag la g.yo med pas bsten par bya'o//byang chub sems dpa' gang ting nge 'dzin 'di 'dzin pa'i dge slong nad shin tu mi bzad pas btab nas na bar gyur na rang gi sha dang khrag gis kyang na ba de las bslang ba de la spro bar bya ste/ lhag pa'i bsam pa phun sum tshogs pa dang /sangs rgyas nyid 'dod pas g.yo med pa'i sems kyis rang gi sha dang khrag kyang yongs su btang la chos smra ba'i dge slong nad mi bzad pa de las bslang bar bya'o zhes bya ba yin no/ /sngon byung ba'i gtam gyis lhag pa'i bsam pa g.yo med pa bstan pa'i phyir/ gzhon nu sngon byung ba 'das pa'i dus na zhes bya ba la sogs pa la/ sngon byung ba ni sngar grub pa la sngon byung ba zhes bya ba ste/ 'das pa'i sgras bstan pas chog na grangs med pa la sogs pa ci dgos she na/ grangs kyi nges pa bstan pa ni 'das pa'i shin tu ring por gyur pa bsgrub pa'i phyir bstan to//de bzhin gshegs pa smon lam bsam gyis mi khyab pa khyad par du 'phags pa'i rgyal po zhes bya ba ni smon lam gyi khyad par gyis bskal pa grangs med pa bye ba brgya stong du mas bsgrub par bya'o/ /sems can gyi khams dpag tu med pa yongs su smin par bya ba dang / grol bar bya ba'i mtshan nyid can sangs rgyas kyi mdzad pa rnams nyi ma gcig po de nyid la yang dag par bsgrub par gyur nas sems can rnams theg pa gsum gyis mya ngan las 'das pa la bkod de/bdag nyid kyang nyi ma de nyid kyi mtha' la yongs su mya ngan las 'das par gyur to/ /de yongs su mya ngan las 'das nas dam pa'i chos ni yun ring du gnas par gyur to//lnga brgya tha mar gyur pa na zhes bya ba la/ brgya phrag lnga bsdus pa ni lnga brgya ste/ de bzhin gshegs pa'i dam pa'i chos gnas pa'i dus lo lnga stong gnas so zhes zer ro/ /lo lnga stong la lnga brgya lnga brgya tha dad du byas pa'i dbang du byas nas lnga brgya phrag bcur 'gyur bas dus bcur 'gyur te/re zhig dang por ni mngon par rtogs pa'i dus yin no/ /de nas bsgrub pa'i dus so/ /de nas lung gi dus zhes bya bas dus gsum mo/ /de la mngon par rtogs pa'i dus kyang gsum du 'gyur te/ dgra bcom pa'i dus dang /phyir mi 'ong ba'i dus dang / rgyun du zhugs pa'i dus so/ /bsgrub pa'i dus kyang rnam pa gsum du 'gyur te/ lhag mthong gi dus dang / ting nge 'dzin gyi dus dang / tshul khrims kyi dus so/ /lung gi dus kyang gsum du 'gyur te/ chos mngon pa'i sde snod kyi dus dang / mdo sde'i sde snod kyi dus dang /'dul ba'i sde snod kyi dus so/ /de ltar dus dgu dang / rtags tsam 'dzin pa'i dus dang bcur 'gyur ro/ /de la dus re re la yang lo lnga brgya lnga brgyar 'gyur te/ de ltar dus bcu la lnga brgya phrag bcu yin pas lo lnga stong du 'gyur ro/ /de la lnga brgya phrag dang po la ni dgra bcom pa'o//gnyis pa la ni phyir mi 'ong ba'o/ /gsum pa la ni rgyun du zhugs pa'o/ /bzhi pa la ni lhag mthong ngo / /lnga pa la ni ting nge 'dzin no/ /drug pa la ni tshul khrims so/ /bdun pa la ni chos mngon pa'o/ /brgyad pa la ni mdo sde'o/ /dgu pa la ni 'dul ba'o/ /lnga brgya phrag bcu pa la ni rtags tsam mo//de lta bu la lnga brgya tha ma zhes bya'o/ /lnga brgya zhes bya ba kha cig gzhan du 'don te/ lnga brgya zhes bya ba'i ring po bor ba'o zhes zer ro/ /gzhan dag ni 'di skad smra ste/ mi rnams ni tshe tshad lo brgya yin no/ /de la dang po'i lo lnga bcu la ni kha dog dang / gzugs dang / stobs dang / shes rab la sogs pa 'phel bar 'gyur ba yin no/ /phyed phyi ma'i lnga bcu la ni de dag rim gyis 'grib par 'gyur ba yin no/ /de bzhin du 'jig rten thams cad kyi dus kyi tha ma la bab pa'i tshe phyed phyi ma'i lnga bcu'i tha ma la bab pa 'dra bar tha mar gyur pa dam pa'i chos nub par 'gyur ba'i dus kyi tshe mngon par rtogs pa nub par 'gyur ba'i dus na mngon par rtogs pa yod par mi 'gyur ro//lung gi chos kyang 'dri ba dang / 'drir 'jug pa dang / klog pa dang / 'don pa la sogs pa la nyon mongs pa dang / grogs ngan pa la sogs pas kun nas dkrugs pas 'jig rten rnams 'jug par mi 'gyur ro/ /de lta bur gyur cing nub pa'i tshe dge slong dmigs par lta ba mang po 'byung ste/phung po la sogs pa la mngon par zhen par lta ba ni dmigs par lta ba yin par rig par bya'o/ /de dag 'di lta bu'i mdo sde la 'dod par mi 'gyur te lta ba phyin ci log tu gyur pa'i phyir ro/ /mos par yang mi 'gyur te zab mo'i chos la goms par ma byas pa'i phyir ro//mos pa med pa 'ba' zhig tu ma zad kyi spong zhing skyon 'dogs par byed cing skur pa 'debs so/ /mdo sde 'di lta bu zab mo'i don ston cing 'jug pa dang ldan pa'i/ mdo sde 'dzin pa'i dge slong rnams la gnod pa byed cing srog kyang gcod par byed do//rnyed pa dang bkur sti la chags par 'gyur ba mang po 'byung ngo / /de'i dus na rgyal po ye shes kyi stobs zhes bya ba 'dzam bu'i gling gi dbang phyug stobs kyi 'khor los sgyur ba dam pa'i chos yongs su 'dzin pa 'byung ngo / /yang 'dir dge slong yang dag blo gros zhes bya ba ting nge 'dzin 'di 'dzin pa chos smra ba rgyal po de'i dge ba'i bshes gnyen du gyur pa rgyal po'i pho brang du 'gro zhing phan par 'dod pa de la rgyal po de yang blta ba dang /chos mnyan pa dang / bsnyen bkur bya ba la mkhas par gyur to/ /dge slong chos smra ba de yang zhes bya ba la sogs pa ni chos smra ba'i yon tan rjod par byed pa yin no//sems can rnams kyi spyod lam dang / spyod pa dang / mos pa dang / khams dang / bag chags la mkhas pa ste zhes bya ba la sogs pa la/ de la spyod lam ni spyod lam la zhugs pa'o/ /spyod pa ni sbyin pa la sogs pa la zhugs pa'o/ /mos pa ni nyan thos dang /rang sangs rgyas dang / yang dag par rdzogs pa'i sangs rgyas rnams kyi lam bsgom pa'i rtogs pa'i sems so/ /khams ni bag chags so/ /bag chags ni rang bzhin no/ /de dag la mkhas pa ni nges par rig par gyur pa'o zhes bya ba'i don to/ /dbang po ni dad pa la sogs pa'o/ / stobs kyang dad pa la sogs pa lnga po de dag nyid do/ /brtson 'grus kyi rim pa ni chung ngu dang / 'bring dang / chen po'i rnam pa gsum mo/ /khams dang bag chags shes pa ni shes pa ste/ sdug bsngal shes pa dang / rjes su shes pa la sogs pa'i bag chags la sogs pa'o/ /de dag la mkhas pa ni snga ma bzhin no//bden pa'i mtshams sbyor ba ni dgongs pa'i mtshams sbyar ba'o/ /mtshams bral ba ni rnam par mi sbyor ba'o/ /dgongs pa dang dgongs pa can ma yin pa'i tshig gi lan gdab pa la mkhas pa ni nges pa'i don dang drang po'i don gyi dbye ba la nges par mkhas pa'o/ /spobs pa zab ces bya ba ni theg pa dman pa la zhugs pa rnams bzlog pa'i thabs kyis zab mo'i chos ston pas 'dul ba la mkhas pa'o//gsong por smra zhing bzhin la khro gnyer med pa zhes bya ba ni sems can rnams dang por bsdu ba'i rgyu yin no/ /sems chen por gyur pa la gnas pa zhes bya ba ni rgya chen po la mos pa'i smon lam dang ma bral ba'i sems so//snying rje chen po la brtson pa ni sems can thams cad la snyoms pa'o/ /pha rol gyi rgol ba ngan pa'i tshogs kyi dpon po thams cad tshar gcod pa'i shes rab can yin pas phas kyi rgol ba thams cad kyis zil gyis mi non pa zhes bya ba'o/ / de lta bur gyur pa'i chos smra ba ni chos ston pa la dbang ba yin no zhes bya bas chos smra ba'i yon tan brjod pa'i sgo nas bstan pa yin no/ /de'i tshe rgyal po ye shes stobs kyi bu mo byung bar gyur zhes bya ba ni rgan pa la yang sgra 'jug pas gzhon nu zhes bya ba gzung ngo / /de'i phyir nges pa bstan pa'i phyir lo bcu drug lon pa zhes bya ba smras so//mtshan thams cad kyis brgyan pa ye shes ldan zhes bya ba byung ste/ de'i slob dpon ni dge slong yang dag blo gros zhes bya ba de yin te/ dge ba'i chos rnams yang dag par ston pa zhes bya ba la sogs pa la/ de'i tshe chos smra ba de la brla gnyis su 'brum bu me dbal nag po chen po gso dka' zhing sman dkon pa zhig byung ste/sman pa rnams kyis kyang 'di ni gso bar mi nus so snyam nas bor ro/ /de nas rgyal po ye shes stobs kyi btsun mo'i 'khor dang bcas pa dge slong de na bar mthong nas 'di 'chi bar 'gyur snyam nas rab tu ngu zhing mchi ma phyung ngo //de'i dus na rgyal po ye shes stobs la lha mo sngon snag gi gnyen mtshams su gyur pa zhig yod de zhes bya ba ni snag gi 'brel pa nye du brtse ba can rtag tu rjes su 'brang ba zhig yod pa des rgyal po de la rmi lam gyi nang du bstan pa/ rgyal po chen po gal te dge slong 'di la mi'i sha dang khrag sar pa ma rul ba gnod pa med pa/'brum bu me dbal nag po 'di la byugs te/ mi sha sar pa ma rul ba las ro sna tshogs su g.yos byas te byin na dge slong 'di nad las sos par 'gyur ro zhes bya ba la sar pa zhes bya ba ni srog dang bcas pa la khrag yod kyi gzhan la med pas so//gnod pa med pa zhes bya bas ni gzhan la gnod pa ma byas par bstan te/ khrag ni bsku ba'o/ /sha ni zas su bya ba'o/ /rnyed par ni dka'o snyam pas btsun mo'i 'khor dang rang gi 'khor rnams la bzlas nas spro ba bskyed pa na su yang spro ba ma byung ngo //rgyal po'i bu mo ye shes ldan yang rmi lam de lta bu zhig mthong nas ma la sogs pa'i 'khor rnams la de bzhin du bzlas pa dang / su yang de la sman de ster bar spro ba ma byung ste/ de lta bu'i lhag pa'i bsam pa dang bral ba'i phyir ro/ /de na rgyal po'i sras mo ye shes ldan de dga' zhing mgu la yi rangs shing dga' ba dang /rab tu dga' ba dang / yid bde ba skyes nas 'di ltar su yang don 'di la spro ba med pa ni bdag gi skal ba yin no snyam mo/ /dga' ba ni shin tu dga' ba'o/ /mgu ba ni bde bar ches dga' ba rtse gcig pa'o/ /yi rangs pa ni mngon par 'dod pa'i don rdzogs par 'gyur ba la yid bde ba skyes pa'o//rab tu dga' ba ni sbyin pa la rab tu dga' ba'o/ /dga' ba dang yid bde ba skyes nas zhes bya ba ni sha dang khrag ster ba la nges par byas pa'i dga' ba las skyes pa'i yid bde ba'o/ /'di ltar bdag gis rtsi 'di bdag gi lus las bcad de zhes bya ba ni 'chad par 'gyur ba'i sha dang khrag sbyin par dam bcas pa'o//bdag gis rtsi 'di bdag gi lus las bcad de zhes bya ba dang sbyar te/ ji skad bstan pa bzhin du khrag sar pa dang sha sar pa gnod pa med pa sbyin par bya'o/ /rgyal po'i pho brang 'di na bdag ni thams cad kyi nang na gzhon cing chung ste lus dang ngag dang yid kyi las kyi mtha' nyon mongs pa med pas nyon mongs pa med pa'i ye shes btsal bar bya ba'i phyir zhes bya bas ni phyi dang nang gi dngos po nyon mongs pa can med par bstan pa yin no//nyon mongs pa med pa'i ye shes ni rnam pa thams cad mkhyen pa'i ye shes so/ /'di zhes bya ba ni gang gi don du bdag thams cad du thams cad la zhugs pa 'di zhes bya ba'o//chos smra ba kun nas nyon mongs pa med pa la zhes bya ba ni zang zing med pa'i sems kyis zab cing rgya che ba'i chos ston pa la/ rang gi lus las khrag dang sha nye bar phul te dge slong 'di nad 'di las gso bar bya'o/ / zhes nges par byas nas rang gi gnas su song nas mtshon rnon po thogs te/ chos la zhugs pa'i yid kyis bdag gi brla las sha bcad nas ro sna tshogs dang ldan pa'i gya nom par g.yos byas nas khrag kyang snod du bzung nas slob dpon de'i drung du song ste/ rgyal po ye shes stobs kyi mdun du 'dug nas/khrag gis 'brum bu me dbal nag po de la byugs so/ /g.yos legs par byas pa'i zas de dag dge slong de zar bcug ste tshim par byas shing legs par bstabs so/ /ji ltar bde bar byas te/ ji ltar 'dod pa bzhin du gzung bar byas so/ /de nas dge slong de mi shes ma rig mi dogs pas zas de zos so zhes bya ba ni rgyal po'i sras mo'i sha chen yin no zhes bya ba'i yid gnyis dang rtog pa med pa'o//zas de zos ma thag tu dge slong de'i na tsha thams cad med par gyur te/ nad de thams cad kyang sos so/ /de nas nad dang gnod pa de dang bral nas de lta bu'i chos bstan te/btsun mo'i 'khor de dang grong khyer pa'i skye bo 'dus pa de dag las srog chags khri nyis stong bla na med pa yang dag par rdzogs pa'i byang chub tu sems bskyed do zhes bya ba'o/ /de nas rgyal po ye shes stobs kyis bdag gi bu mo la tshigs su bcad pa 'di dag gis dris so//bu mo khyod kyis khrag 'di gang nas rnyed/ /ces bya ba la sogs pa la/ bu mo khyod kyis khrag 'di gang nas rnyed de bsad pa yin nam/ rang shi ba yin nam/ rang shi na yang khrag kyang yod par mi 'gyur la/ sha sar par yang mi 'gyur ro//rmi lam du yang gnod pa med pa'i khrag dang shas bskus shing zos na sos par 'gyur zhes bstan pa'i phyir ro zhes bya ba'i blos dris pa'o/ /yab kyis bka' stsal pa'i rjes thogs su/ bdag ni ci mchi yab khyod gsan du gsol/ /zhes bya ba la sogs pa la/ rang gis mthong ba'i rmi lam zlos pa la sogs pas yab la go bar byed pa bdag nyid kyi rtsol bas rang gi lus kyi khrag dang sha sbyin pa smra bar byed do//bdag nyid kyi brla las sha bcad nas g.yos su byas te chos smra ba la byin no/ /bdag nyid kyi khrag gis kyang 'brum bu'i nad la rab tu bsku ba byas nas chos smra ba'i dge slong nad las thar bar gyur to zhes bya ba'o//rgyal pos rang gi sras mo la brtse bas khyod rang nyid kyis sha bcad pa na sdug bsngal ji lta bu myong bar gyur zhes dris pa dang / bu mo ye shes ldan gyis yab la smras pa/ sa bdag mi'i rgyal po gson la tshul bzhin du sgrub pa mdzod cig ces bya bar/las kyi rnam smin bsam yas de 'dra bas/ /zhes bya ba la sogs pa la/ sdig pa'i las kyis sems can rnams dmyal bar ltung bar 'gyur ro/ /der sha med par gyur nas yang las kyi dbang gis sha de slar 'byung bar 'gyur yang de dge ba'i las kyis ni ma yin no//ci ste lhag pa'i bsam pas bla na med pa'i chos kyi sku thob par bya ba'i phyir lus bcad cing byin yang bdag la tshor ba mi bde ba med do/ /bdag chos kyi dga' ba la gnas pas sgro btags pas byas pa'i sdug bsngal gyi tshor ba ring du spangs par gyur to//sha bcad bdag la na tsha ma mchis te/ /khrag phyung bdag la g.yo ba yod ma mchis/ /zhes bya ba la sogs pa la/ bdag las khrag phyung ba na sems g.yo zhing 'gyur ba'i mtshan ma bdag la med do/ /bdag gis chos nyid ji ltar thos pa de lta bu'i chos kyi sku la rma yang med la/bcad pa yang med/ sha yang med/ khrag kyang med pa de lta bu gal te rig par gyur na lus thams cad bcad cing dum bur byas pa de lta na yang chos la dga' bas de dag bgrang ba tsam du yang mi shes so/ /bdag gi sha dang khrag chos smra ba la byin pa la bdag gi lus la rma yang med la sdug bsngal yang med de/skad cig de la chos nyid la mos pa'i stobs kyis/ bdag gi sngon gyi lus ji lta ba de lta bu'i lus su gyur to/ /yab gcig u dum wA ra'i me tog bzhin/ /zhes bya ba la sogs pas/ chos smra ba rnyed dka' bar bstan to//'jig rten du u dum wA ra'i me tog brgya lam 'byung bar 'gyur ro/ /de bzhin du 'dzam bu'i gling 'dir yang chos smra ba chos chen po yang rnyed par dka' ste/ 'jig rten gyi khams snyigs ma can yin pa'i phyir ro/ /ji ltar 'dzam bu chu bo'i gser 'bar ba//zhes bya ba la sogs pa la/ ji ltar 'dzam bu'i chu klung gi gser mthong yang ngoms pa med pa de bzhin du chos smra ba'i dge slong mthong bas kyang ngoms par mi 'gyur ro zhes bya bas ni gzugs dang lang tsho phun sum tshogs pa bstan to/ /skye bo skom pa dang ba'i chu 'thungs nas//zhes bya ba la sogs pa la/ ji ltar chu gtsang zhing dang la grang ba skom gyis gdungs pas 'thungs na skom pa'i gdung ba dang bral bar 'gyur ro/ /de bzhin du chos smra ba'i dge slong las chos kyi bdud rtsi 'khor ba'i sems can skom gyis gdungs pas 'thungs na 'khor ba'i sred pa'i gdung ba dang bral bar 'gyur ro//de bzhin du chos smra ba yon tan dpag tu med pa'i phung por gyur pa la/ sha dang khrag la sogs pa gang byin pa ni/ bdag gis sha dang khrag btang ba legs par btang ba yin no zhes bya bas bdag gis sha dang khrag btang ba ni gnas su btang ba yin te/chos smra ba'i nad rab tu zhi bar byed pa'i sman sbyin pa byas pa ni sangs rgyas kyis gsungs pa bzhin byas pa'i phyir ro/ /sbyin pa de yongs su bsngo ba nye bar rtsom par byed do/ /mang du thos shing spyod dang ldan pa ste/ /zhes bya ba la sogs pa la thos pa dang /tshul khrims dang / gtong ba la sogs pa'i sangs rgyas kyi yon tan dpag tu med pa dang ldan pa'i ting nge 'dzin 'di 'dzin pa'i nad gso bar bya ba'i phyir bdag gi sha dang / khrag btang ba'i bsod nams kyis 'di ltar zab cing rgya che ba'i chos ji snyed mnga' ba bdag gis kyang thob par gyur cig ces bya ba'o//ji ltar tsan dan la sogs pa'i dri kun du ldang ba ltar sems can thams cad kyi yid 'phrog pa'i dri ldang ba dang / de bzhin gshegs pa'i ring bsrel gyi snying po can gyi mchod rten 'jig pa bcos pa'i bsod nams dpag tu med pa 'thob pa bzhin du 'gro ba'i chos kyi sku'i mchod rten 'jig pa yang dag par bsrungs pa'i bsod nams kyang dpag tu med do zhes bya ba'o//bdag la phyir yang log ltung 'jigs ma mchis/ /zhes bya ba la sogs pa ni ngan 'gror 'gro ba dang / mi khom par skye ba dang / bud med kyi dngos por mi 'gyur ro zhes bya ba'o//tshigs su bcad pa'i dbyangs kyis yang dag par rab tu bstan to zhes bya ba'i don ni go bar zad do/ /gang gis gang+gA'i bye snyed sangs rgyas zhing / /zhes bya ba la sogs pa la/ gang gis gang+gA'i klung gi bye ma snyed kyi sangs rgyas kyi zhing rnams rin po che sna tshogs kyis yongs su bkang ba byas te de bzhin gshegs pa rnams la phul la gzhan zhig gis sor mo'i rtse mo tsam zhig chos kyi phyir btang na 'di ni de bas ches bsod nams mang du 'byung bar 'gyur ro//bu mo de ni 'di nas shi 'phos nas zhes bya ba ni 'chi ba'i dus byas nas sangs rgyas kyi zhing du skyes nas de bzhin gshegs pa dpag tu med pa mthong bar 'gyur zhing de dag las chos kyang thos la thams cad du rab tu byung nas tshangs par spyod par 'gyur ro//mar me mdzad pa de bzhin gshegs pa yi/ /zhes bya ba la sogs pa la/de bzhin gshegs pa mar me mdzad kyi drung du tshangs par spyod pa spyad de bud med kyi dngos po spangs nas chos smra ba chen por gyur to/ /de'i tshe rgyal po ye shes stobs ni byams pa yin no/ /dge slong chos smra ba de ni de bzhin gshegs pa mar me mdzad du gyur pa yin no//de'i tshe rgyal po'i bu mo ye shes ldan zhes bya ba ni nga yin no/ /rmi lam ston pa'i lha gang yin pa de ni de bzhin gshegs pa mi bskyod par gyur to/ /gang dag dge slong chos smra ba na ba mthong nas mchi ma phyung ba de dag thams cad ni phyir mi ldog par gyur to/ /de dag rtag tu mig kyang na ba med//ces bya ba la sogs pa ni go sla'o/ /de bzhin gshegs pa'i mdzod kyang gzung nas ni/ /zhes bya ba la sogs pas ni ting nge 'dzin 'di 'dzin pa'i yon tan bstan pa yin no/ /sangs rgyas bye ba stong dag mthong bar 'gyur/ /zhes bya ba la sogs pa la/de lta bas na yon tan dpag tu med pa thob par 'dod pas chos smra ba'i dge slong na ba la nye bar spyod pas bsnyen bkur bya'o zhes bya ba yin no/ /rang gi sha ni khrag dang bcas pa dang / /sangs rgyas thob phyir snying rjes btang byas pas/ /chos smra'i dge slong nad las thar byas pa'i/ / ye shes ldan de bcom ldan thub dbang yin/ /ye shes ldan gyi le'u ste sum cu rtsa lnga pa'i 'grel pa rdzogs so// //me tog zla mdzes kyi spyod pa'i gtam rgyud skabs kyi dang po'i rtsom pa bstan pa'i phyir/ de nas tshe dang ldan pa kun dga' bo stan las langs te zhes bya ba la sogs pa gsungs te/rgyu gang lags/ rkyen gang lags zhes bya ba ni/ nye bar len pa'i rgyu ni ci lags/ lhan cig skyes pa'i rgyu ni gang lags zhes zhus pa yin te/ byang chub sems dpa' 'ga' zhig lag pa dang / rkang pa dang / rna ba dang / sna dang / mig dbyung ba dang / mgo bcad pa dang / yan lag dang nying lag bcad pa la sogs pa myong ba dang /sdug bsngal rnam pa sna tshogs pa gzhan dang gzhan dag kyang nyams su myong yang sdug bsngal nyams su myong bas skyo bar yang mi 'gyur zhing bla na med pa yang dag par rdzogs pa'i byang chub las kyang mi nyams pa lags zhes kun dga' bos zhus pa'i lan bka' stsal pa'i phyir ro//bcom ldan 'das kyis bka' stsal pa/ kun dga' bo ngas sngon sdug bsngal ji snyed myong bar gyur pa khyod kyis shes shing de dag dran nas zhes bya ba la sogs pa la/ bla na med pa yang dag par rdzogs pa'i byang chub 'di yang dag par sgrub pa na ngas sdug bsngal gang dag nyams su myong ba de dag khyod nyid kyis rab tu shes bzhin du de dag khyod kyis mi dran nam ci'i phyir yang de bzhin gshegs pa la de dag 'dri bar sems/khyod kyis lan gdab par 'os so zhes dgongs pa'o/ /kun dga' bos lan btab par gyur na gdul bya rnams gus par mi 'gyur ro zhes bya bar bcom ldan 'das kyis lan gdab par bya ba'i phyir/kun dga' bo 'di lta ste/ dper na zhes bya ba la sogs pa gsungs pa la/ 'di la skyes bu la la zhig rkang pa nas spyi bo'i bar du 'bar bar gyur te/ me lce gcig tu gyur pa de la skyes bu la la zhig der nye bar 'ongs te/'di skad du/ kye skyes bu tshur shog /lus las me 'bar ba ma zhi bar 'dod pa'i yon tan lnga dang phrad cing ldan par rtses shig/ /ces bya ba la sogs pa la/ kun dga' bo 'di ji snyam du sems/ skyes bu de lus las me 'bar ba de ma zhi bar 'dod pa'i yon tan lnga dang phrad cing ldan par gyur te/rtse ba dang / dga' ba dang / yongs su spyod par byed dam/ de lta bu ni 'byung yang srid kyi de bzhin gshegs pa sngon byang chub sems dpa'i spyad pa spyod pa na sems can ngan song gsum gyis sdug bsngal bar gyur cing /mi yin yang dbul ba dag mthong nas yid bde ba'am sems dga' ba dag ma byung ngo / /ji lta ba de bzhin du byang chub sems dpa' sems dpa' chen po gang dag sngon byang chub sems dpa'i spyad pa spyod pa na tshul khrims ma nyams pa dang zhes bya ba la sogs pa de la/tshul khrims ma nyams pa zhes bya ba ni bsten pa'i tshig yin te/ nyon mongs pas ral ba med pas tshul khrims ma ral ba'o/ /tshul khrims ma zhig pa ni dri ma phra mos dri ma can du byas pa'i tshul khrims med pa'i phyir ro/ /tshul khrims 'dren ma ma yin pa ni bar bar du tshul khrims med pas 'dres pa ma yin pa'o//tshul khrims mchog tu 'dzin pa ma yin pa ni tshul khrims dang brtul zhugs mchog tu 'dzin pa med pa nyid do/ /tshul khrims ma g.yos pa ni lta ba gzhan la 'jug pa'i bsam pa med pa nyid do//tshul khrims ma brlangs pa ni tshul khrims kyi yan lag thams cad nyams pa med pa nyid do/ /tshul khrims ma 'khrugs pa ni bdud la sogs pa gzhan pha rol po gzhan dag gis 'khrugs pa ste gzhan du bsgyur du mi nus pa nyid do/ /tshul khrims mi yang ba ni brtson 'grus kyi stobs kyis goms par byas pa'i tshul khrims yin pa'i phyir dang /zab mo'i chos la bzod pa yongs su bsgoms pa'i tshul khrims yin pa'i phyir ro/ /tshul khrims gzhan la mi ston pa ni bdag dang bdag gir mngon par zhen pa'i gnyen po'i bdag med pa bsgoms pa'i tshul khrims yin pa'i phyir ro//tshul khrims mi slu ba ni 'bras bu slu ba med pa'i phyir dang / lha dang mi dang bcas pa'i 'jig rten slu ba med pa'i phyir ro/ /tshul khrims drang ba ni bsam pa la g.yo med pa'i phyir ro/ /tshul khrims dam bcas pa bzhin du byed pa ni dam pa'i don rdzogs par byed pa nyid do//tshul khrims sems can rnams la phan 'dogs pa ni gzhan gyi don byed pa'i ngo bo ste/ de lta bu'i rang bzhin gyi tshul khrims dang ldan par gyur pa ni de byang chub sems dpa'i spyod pa dpag tu med pa la spyod pa'i tshe lag pa dang / rkang pa la sogs pa bcad par bgrang ba med de/chos nyid la so sor rtogs par byed pa'i phyir ro/ /tshogs yongs su rdzogs par byed pa'i las kyang nyams par mi 'gyur te/ myur du bla na med pa yang dag par rdzogs pa'i byang chub mngon par rdzogs par sangs rgyas par 'gyur ro/ /de lta bas na chos zab mo bsgom pa yid la byed pa la gnas par bya ba dang /sems can gyi don bya ba gnas skabs thams cad du yongs su gtang bar mi bya'o zhes bstan par 'gyur ro/ /sngon byung ba 'das pa'i dus na zhes bya ba la sogs pa la/ de dag nyid bstan pa'i phyir 'das pa'i dus na de bzhin gshegs pa rin po che'i pad+ma'i zla ba rnam par dag pa mngon par 'phags pa'i rgyal po zhes bya ba bskal pa bye ba khrag khrig phrag dgu bcu rtsa dgur ji skad gsungs pa'i sems can rnams kyi don byas nas mya ngan las 'das par gyur to//bcom ldan 'das de mya ngan las 'das pa'i dam pa'i chos rab tu 'jig par gyur pa'i dus kyi tshe rgyal po dpa' bas byin zhes bya ba zhig byung ngo //de'i pho brang 'khor rin chen ldan zhes bya ba yangs shing rgya che ba zhes bya ba la sogs pa la/ de lta bu'i 'jigs pa chen po'i dus kyi tshe log par lta ba mu stegs kyi gsang sngags yongs su tshol bas rnam par g.yengs pas mun par gyur pa'i tshe de ltar gyur pas 'di lta bu'i mdo sde skye bo mang pos spangs par gyur to//de ltar gyur pas byang chub sems dpa' bdun stong zab mo'i chos rab tu ston par byed pa rnams grong dang / grong khyer dang / grong rdal dang / yul 'khor dang /rgyal po'i pho brang 'khor dang / ljongs nas bskrad nas de dag chos smra ba me tog zla mdzes dang lhan cig kun du bzang po zhes bya ba'i nags khrod der brten cing gnas te/ dge slong de dag la gzungs kyi chos kyi rnam grangs 'di ston to/ /nags khrod de yang dus thams cad du snang ba'i me tog sna tshogs dang /'bras bus brgyan pa yid dang rjes su mthun pa/ shing sna tshogs kyis gang zhing kha dog sna tshogs pa dang / sngon po dang / ser po dang / reg na bde ba'i rtswa sna tshogs dang myu gus brgyan pa sa'i nang nas 'thon te/ brag dang rdo ba sna tshogs kyi phug yangs shing mtho la rin po che'i ri dag gis mdzes par brgyan pa shin tu yid du 'ong zhing chu las skyes pa'i me tog pad+ma dang /ut+pa la sngon po la sogs pas chu dri ma med pas brgyan pa/ sangs rgyas dpag tu med pa bzhugs pa/ drang srong gi tshogs dang /grub pa dang / rig pa 'dzin pa dang / dri za dang / mi 'am ci gnas pa/ bsam gtan dang rjes su mthun pa ka la ping+ka dang / khu byug dang / rma bya dang / ne tso dang / sha ri ka dang / ngang pa rnams kyi sgras rab tu gang ba/ sum cu rtsa gsum gyi dga' ba'i tshal bzhin du shin tu yid du 'ong ba/rnal 'byor dang rjes su mthun pa'i gnas nags khrod chen po kun du bzang po de na byang chub sems dpa' de dag spyod lam rnam pa bzhis rnal 'byor la rjes su brtson pas gnas par gyur to/ /de nas chos smra ba me tog zla mdzes de gcig pu dben par song nas nang du yang dag 'jog la zhugs te/ting nge 'dzin gyi stobs las byung ba'i lha'i mig gis bltas na byang chub sems dpa' bye ba khrag khrig mang po sngon dge ba'i rtsa ba bskyed pa rnams 'jig rten gyi khams sna tshogs nas 'dir skyes so/ /gal te de dag gis gzungs kyi chos kyi rnam grangs 'di mnyan pa rnyed na ni bla na med pa yang dag par rdzogs pa'i byang chub las phyir mi ldog par 'gyur la/gal te mnyan pa ma rnyed na ni phyir ldog par 'gyur ba dag mthong ngo / /de nas chos smra ba me tog zla mdzes ting nge 'dzin de las langs nas byang chub sems dpa'i dge 'dun chen po de dag ga na bar song ste/phyin nas 'di skad ces smras so/ /rigs kyi bu dag kho bo ni zhes bya ba la sogs pa la/ sems kyis ji ltar mthong ba'i sems can yongs su smin par bya ba la bsams te'o/ /de nas byang chub sems dpa'i dge 'dun chen po de dag gis de'i bsam pa mi shes pas bzlog par bya ba la 'bad pa'i phyir/khyod rgyal po'i pho brang 'khor du 'gro ba ni kho bo cag 'dod pa ma yin no zhes bya ba la sogs pa smras te/ de'i rgyu bstan pa'i phyir ci'i phyir zhe na zhes dris pa dang / lhag pa'i nga rgyal can mang po dag byung gis de dag tshe dang ldan pa'i srog gcod par gyur na ma legs so zhes bya ba la sogs pa la/tshe dang ldan pa khyod ni shin tu mdzes shing byad bzhin bzang la blta na sdug te/ mtshan thams cad kyis yang dag par brgyan pa/ mig dang yid 'phrog pa yin pas rgyal po 'am gzhan dag phrag dog dang ser sna'i dbang gis khyod kyi srog bcad par gyur na ma legs so zhes smras so//de skad smras pa dang / de nas chos smra ba me tog zla mdzes kyis byang chub sems dpa'i dge 'dun chen po de la 'di skad ces smras so/ /gal te kho bos bdag nyid bsrung ba byas na zhes bya ba la sogs pa la/bdag nyid mngon par bsrung ba des ni de bzhin gshegs pa'i bstan pa bsrung bar mi 'gyur ro/ /don de dag nyid tshigs su bcad pa'i dbyangs kyis rgya cher bstan par bya ba'i phyir/ bdag tu 'du shes 'di la gnas nas su/ /bstan pa 'di ni bsrung bar yong mi nus//zhes bya la sogs pa la/ bdag 'du shes pa la gnas pas ni bstan pa 'di bsrung bar nus par mi 'gyur ro/ /gang gi phyir de bzhin gshegs pa'i dam pa'i chos bstan pa ni brtson 'grus chen pos bsgrub par bya ba yin te/ bdag la sogs pa la mngon par zhen pa dang /gzugs la sogs pa'i yon tan la chags pa spangs pa dang / de bzhin gshegs pa la bsnyen bkur byas pa rnams kyis bsrung bar nus so/ /dam pa'i chos 'jig par 'gyur ba'i tshe gang dag btang snyoms sgom par byed pa gang yin pa des de bzhin gshegs pa la bkur sti byas par mi 'gyur ro//khyed bde rang gi don gyis la/ /zhes bya ba la sogs pa la/ bdag nyid bsrung ba la 'bad pa gyis la khyed rnams bde bar gnas par gyis shig /de lta na yang de bzhin gshegs pas rab tu bsngags pa'i tshul khrims bsrungs na ni bdag nyid legs par bsrungs par 'gyur ro//chos mchog rin chen sbyin pa sbyin par gyis/ /zhes bya ba la sogs pa la rjes su 'doms par byed do/ /chos kyi sbyin pa nus pa ji lta ba bzhin du sbyin pa gyis shig /rtag tu bzod pa bsgom par gyis shig /dgon pa na gnas pa gtong bar mi bya'o/ /byang chub sems dpa' spyod pa rtag tu brtson 'grus brtan pos rjes su spyad par gyis shig ces rjes su gdams nas/ bdag ni sems can rnams kyang bskyab pa'i phyir/ /grong dang rgyal po'i pho brang 'gro bar bya//zhes bya ba la sogs pa'o/ /blo gros che 'chang sems can dam pa mchog /drang srong de ni 'gro bar byas pa dang / /zhes bya ba la sogs pa la/ de nas chos smra ba des nges par chas par byas pa dang / kha cig ni ngu zhing mchi ma 'byin par byed/ la la snying rje rje ltar ngu bar byed/kha cig ni rkang pa la 'ju zhing 'gro ba 'gog par byed do/ /mkhas pa blo gros chen po ma bzhud par/ /zhes bya ba la sogs pa la/ sngon gyi de bzhin gshegs pa gang yin pa de dag kyang khyim gyi gnas spangs te nags tshal dang brag dang ri'i rtse mor gshegs nas dgon pa la brten te/byang chub sems dpa'i spyod pas sangs rgyas kyis/ khyod kyang de bzhin du slobs la lam de'i rjes su 'brang bar gyis shig ces bya bas nags su gnas par spro ba skyed par byed do/ /lus ni shin tu mdzes pa'i rgyan gyis brgyan/ /zhes bya ba la sogs pa la/ phrag dog gi gzhan dbang du gyur par sdig pa'i blo dang ldan pa dag gnas ma yin pa la khro bar 'gyur ro zhes kha cig smra'o//chos smra ba me tog zla mdzes kyis byang chub sems dpa'i tshogs chen po de la tshigs su bcad pas kun nas bsdus nas phyogs gcig tu lan btab pa/ ji snyed sngon gyi bde gshegs byung ba ni//zhes bya ba la sogs pa la/ bde bar gshegs pa gang dag sngon byung bar gyur pa de dag thams cad kyang 'jig rten rnams kyi don byas so zhes sems can gyi don mdzad pa dang ldan pas byang chub sems dpa'i spyod pa la rab tu gnas nas sems can gyi don la gcig tu gzhol bas byang chub thob nas yang sems can gyi don nyid la 'jug par mdzad pa yin no//de bzhin du bdag kyang nges par sems can rnams kyi don bya'o zhes blos nges par byas nas lhung bzed dang / chos gos blangs nas lam du zhugs so zhes bya bar sbyar ro/ /spyad pa'i dam pa byang chub rgyu spyad de//de dag bsod nams ye shes mchog dang ldan/ /zhes bya ba ni/ byang chub sems dpa' byang chub rgyur spyad de/ /zhes pa byang chub kyi rgyur spyod pa nyid kyis bsod nams dang ye shes kyi tshogs bsags pa nyid las byung ba'i sku/ byang chub sems dpa' chen po khrag khrig de'i rjes su bslabs pa rnams kyis sems can rnams kyi skyabs byed par 'dod pa de dag thams cad kyis chos smra ba de la bskor ba byas nas ngu zhing skad chen po bton te 'dug go//gzhan kha cig ni shing sA la rtsa ba nas bcad pa bzhin du 'gyel nas brgyal lo//la la ni dran pa med bzhin du smre sngags 'don par byed kyang sems can gyi don la 'dod pa'i drang srong de log par ma gyur to/ /drang srong chos gos lhung bzed thogs nas chas/ /ji ltar seng ge ral pa can bzhin du/ /zhes bya ba la sogs pa la/ the tshom thams cad bral zhing skyon dang yon tan la nges par rtog pa dang bral bas gcig tu chos nyid kyi ngo bo bsgoms pa'i blo can ni bdag nyid gcig pu nags na gnas shing rang gi don la ched du byed par ma gyur la/sems can rnams ngan 'gror lhung bar gyur na mi rung ngo zhes shes nas grong khyer gyi mchog tu song bar gyur to//der de 'ongs nas snga dro dang po la srog chags khri phrag dgu bcu rtsa dgu phyir mi ldog pa la bkod do/ /da dung rgyal po'i pho brang der ma phyin nas de mthar gyis rgyal po'i pho brang 'khor rin chen ldan pa der nye bar song ste shing p+lak+sha dang sA la'i drung du 'dug go zhes bya ba ni gnas la zhen pa med par bstan pa'i phyir ro//de'i nub mo 'das pa dang rgyal po'i pho brang 'khor rin chen ldan du zhugs par gyur te/ zhugs nas srog chags bye ba phrag sum cu rtsa drug sangs rgyas kyi chos las phyir mi ldog pa la bkod kyang gcig tu sems can gyi don la blo zhugs pa des da dung zas kyi bya ba ma byas so//de zas bcad pa de cir yang ma brtsis par rgyal po'i pho brang 'khor rin chen ldan nas byung ste/ bcom ldan 'das kyi sen mo'i mchod rten gang na yod pa der song ste/ 'greng bzhin du nyin mtshan 'das par byas so/ /sngon gyi de bzhin gshegs pa'i sen mo'i sku gdung gi za ma tog bcug pa'i mchod rten sems can dpag tu med pa'i bsod nams nye bar bsags pa'i phyir bzhengs pa'i mchod rten ni sen mo'i mchod rten zhes bya'o//'greng bzhin du zhes bya ba ni brtson 'grus kyi stobs kyis rab tu bsgrubs pa'i spyod lam gyis bzhugs pa bstan to//de bzhin du nyi ma lnga pa'i bar du rgyal po'i btsun mo'i 'khor gyi nang du song nas bud med brgyad khri bla na med pa yang dag par rdzogs pa'i byang chub las phyir mi ldog pa la bkod do/ /de bzhin du de nyi ma lnga pa la yang zas bcad nas rgyal po'i pho brang du zhugs te/rgyal po'i bu stong phyir mi ldog pa la bkod do/ /bud med dang rgyal po'i bu grangs bstan pa ni phrag dog gi gnas yin par bstan pa'i phyir ro/ /de snga dro bdun pa la rgyal po'i pho brang 'khor rin chen ldan du zhugs pa dang rgyal po dpa' bas byin skyed mos tshal du 'gro bar mthong ste/gser gyi shing rta la ngos ni dngul/ mda' ni sbrul gyi snying po'i tsan dan/ 'khor lo ni bai DUr+ya/ gdugs dang rgyal mtshan dang / ba dan bsgreng ba yid la 'dod pa bzhin du 'gro ba'i rta'i gnya' bar gnya' shing bkal ba de bu mo gzhon nu brgyad brgyas rin po che'i thi gus btags shing 'dren te zhes bya ba ni gang de 'dren pa de dag kyang kha thur gnyis nas btags pa'i rin po che thi gu'i sna nas sor gdub la sogs pa'i rgyan gyis brgyan pa'i lag pa'i sor mo'i rtse mo tsam du 'dren par byed do//de dag kyang / gzhon nu ma rnams mthong ba tsam gyis 'dod lha'i mda' yis phog pa bzhin//srid pa'i 'khor lo ma lus 'dod pa'i 'khor lor zhugs par gyur pa na/ /'dod pas myos shing mda' rnams myur ba nyid du phye mar rlog byed pa/ /sngon gyi las kyis rab tu bskyed nas shing rta mchog la bzhon par byed/ /rgyal rigs shing sA la chen po lta bu zhes bya ba la sogs pa la/rgyal po'i bu mo lnga brgya yang rin po che'i shing rta'i nang du zhugs nas mdun thog thag tu 'gro ste/ de dag gis dge slong de mthong ma thag tu phyir mi ldog par gyur to/ /btsun mo'i 'khor brgya stong drug cu rtsa brgyad kyang de bzhin du phyir mi ldog par gyur to//rgyal po de dang lhan cig 'ongs pa'i skye bo'i tshogs chen po de dag kyang tshul ji lta ba bzhin du thal mo sbyar te phyag 'tshal zhing 'khod par gyur to/ /bu mo de dag kyang sngon gyi dge ba'i rtsa ba dag gis bskul bas khyogs de dag la babs nas nor bu dang gdu bu rnams bkrol te/ tshul dang mthun par phyag 'tshal nas tshigs su bcad pa 'di dag smras te/ 'di dag rab tu snang bar bgyis/ /zhes bya ba la sogs pa la/ 'char ka'i nyi ma'i dkyil 'khor gyi 'od dang 'dra bar dge slong de der byon pa tsam gyis skye bo'i tshogs chen po ma lus pa de dag chos kyi snang bas snang bar byas so//byin gyis brlabs so/ byang chub sems dpa'i mthus 'dod chags dang / zhe sdang dang / gti mug dang / nga rgyal dang / rgyags pa dang / phrag dog dang / ser sna dang / srid pa la sogs pa'i nyon mongs pa rnams kyis gnod par ma gyur to/ / dge slong de bor nas rgyal po dpa' bas byin pa gang yang lta bar mi byed do/ /ji ltar zla ba nya ba skar ma'i tshogs kyis bskor ba bzhin du dge slong de la rgyal po'i bu la sogs pa ma lus pas yongs su bskor bar gyur to/ /de bzhin du gser gyi gzugs kyi dpe dang / sA la'i rgyal po'i dpe dang /brgya byin dang / tshangs pa dang / rab 'phrul dang / 'thab bral gyi lha'i bu'i dpes 'jig rten ma lus pa zil gyis gnon pa'i gzugs shin tu mdzes pa bstan to/ /sbyin pa dang / tshul khrims dang / bzod pa dang / brtson 'grus dang / bsam gtan dang / shes rab kyi snang bas 'jig rten thams cad zil gyis mnan nas snang bar byas pas nyi ma stong bas lhag pa'i mdangs dang ldan par gnas so/ /chos kyi rgyal po dbang brnyes rnams kyi sras de lags/ /zhes bya ba la sogs pa la/ de bzhin gshegs pa thams cad kyi thugs las skyes pa'i sras/chos kyi sras zhes bya ba la/ de bzhin gshegs pa'i mdzad pa byed pa yin par bstan to/ /dge slong khyod ni mi rtag nam yang ma gyur cig /ces bya ba ni ma 'ongs pa'i don mtshon par byed do/ /chos 'di ji ltar khyod bdag nyid kyis rab rtogs shing //zhes bya ba la sogs pa ni smon lam 'debs par byed pa'i rgyu gsungs pa yin no/ /khyod kyis 'jig rten thams cad la sangs rgyas kyis rjes su snang ba'i spyod pa spyad pa bzhin du bdag cag kyang khyod bzhin du 'jig rten thams cad rjes su 'dzin par nus pa'i bud med kyi dngos po kun spangs te skyes pa'i lus thob nas rab tu byung zhing bsnyen par rdzogs par gyur nas dge slong du gyur cig ces smon lam 'debs shing thal mo sbyar nas gos dang /phreng ba dang / rgyan dang / gdu bu 'phra can dang / dpung rgyan dang / ska rags dang / rkang gdub la sogs pa bkrol nas rab tu dga' ba skyes pas mchod pa'i don du phul lo/ /dbang po zhi zhing stobs bcu ldan pa yi/ /sangs rgyas des pa kun la phyag 'tshal lo/ /zhes bya ba la sogs pa la/ sangs rgyas yon tan dpag tu med pa'i phung po dang ldan pa dang /lha dang / mi dang / lha ma yin du bcas pa'i 'jig rten gyis ma bskor ba'i chos kyi 'khor lo bskor bar mdzad pa de'i sras la phyag 'tshal lo/ /gang gi thugs sras 'di 'dra mnga' ba yi/ /sman rgyal mtshungs med rgyal la phyag 'tshal lo/ /zhes bya ba smras nas mchod pa rnam pa sna tshogs pas mchod pa byas nas rtogs pa thob par bya ba'i phyir rab tu dga' ba'i sems kyis gnas par gyur to//de nas rgyal po dpa' bas byin 'di snyam du sems te zhes bya bas ni phrag dog gis kun nas bslangs pa'i sems kyi rnam par rtog pa bsten pa yin te/kye ma btsun mo'i 'khor 'di dag ni log par zhugs te skye bo'i tshogs kyang log par gyur to snyam nas/ de rgyal po'i srid kyi phyir shin tu dngangs par gyur to/ /blon po dang grong khyer gyi mi thams cad kyang nga bor nas dge slong 'di'i phyogs su song nas gnas so zhes bsams nas shin tu yang 'khrugs par gyur to//dge slong rgyal po'i lam na 'dug pa'i mig du rdul song ba dang / rgyal po de yang brtag pa med pa'i sems kyis dge slong 'dis chags pa'i sems kyis nga'i btsun mo'i 'khor la bltas te mig gis kyang brda byas so snyam mo//cung zhig 'dzum pa'i mig dang chags sems kyis/ /nga yi btsun mo'i 'khor ni 'di dag la/ /bltas pa tsam gyis 'dod lha'i mda' yis brgyab/ /gsad bya min yang 'di ni gsad par bya/ /mi dbang de ni rang gi bu rnams bsgo/ /nga yi bu nyid bdag yod bka' bzhin sgrubs//gdug pa can gyis dge slong 'di sod la/ /nga yi yid bzhin 'dod pa'i don rnams sgrubs/ /de nas gzhon nu de rgyal po dpa' bas byin pa slar ldog go/ /dge slong de'i phyir de dag 'di snyam du sems te/ yab kyis bka' stsal pa/ thams cad sgrub par byed pa yin na yang de dag dge ba'i rtsa ba bsags pa yin pa'i phyir de'i bka' las 'da' bar byed do//de nas rgyal po dpa' bas byin la gsod pa'i gshed ma dga' byed ces bya ba gtum po ste rab tu drag pa'i las byed pa/ bsam pa med pa ni drag pa ste zhes bya ba la sogs pa ste/las dang rjes su mthun pa'i ming ngo / /de rgyal po dpa' bas byin dang ha cang yang mi ring ba zhig na 'dug go zhes bya ba la sogs pa la/ de nas rgyal po dpa' bas byin gyis dga' byed la 'di skad ces smras so/ /khyod la bya dga' cher byin na dge slong 'di srog dang bral bar byed nus sam zhes bya ba la sogs pa la/dga' byed kyis smras pa/ lha shin tu rngo thogs so/ /rgyal pos smras pa/ 'o na da rung ci'i phyir mtshon rnon po thogs la dge slong 'di'i lag pa dang rkang pa chod cig /rna ba dang sna yang chod cig / mig kyang skom pas phyung shig /dga' byed kyis kyang de bzhin du thams cad bsgrub so/ /de nas dge slong de'i mgo dang / rna ba dang / rkang lag bcad par gyur pa las kyang 'od zer bye ba khrag khrig brgya stong du ma yang byung / 'o ma'i rgyun yang byung ste zhes bya ba la sogs pa la/bskal pa mi nyung bar goms par byas pa'i bsod nams dang / ye shes kyi tshogs kyis bsgrubs pa'i lus yin pa'i phyir bcad cing gtubs pa'i 'phro nas sems can rnams 'dul bar bya ba'i phyir 'khor lo la sogs pa'i mtshan snang ba dang /'o ma'i rgyun byung bar gyur to/ /des na 'di lta bu'i byang chub sems dpa' chen po gzhan gyis gnod pa byas pas ji ltar 'chi bar 'gyur zhes gzhan gyis bcad du med de lus dang srog la yang ltos pa med par sems can rnams kyi don bya'o zhes rab tu bstan pa'i phyir dang /de lta bus 'dul ba'i sems can rnams rjes su gzung ba'i phyir gzhan gyi dge ba zil gyis mnan pa'i 'chi bar bstan pa la 'gal ba med do/ /de bzhin du mya ngan las 'das pa la sogs pa la yang brjod par bya'o/ /de nas skye bo'i tshogs chen po des dge slong de lam na bcad gtubs shing 'dug pa mthong nas de dag sdug bsngal zhing yid mi bde ste/ngo mtshar du gyur nas ngu zhing cho nges btab ste smre sngags bton nas phyir yang rgyal po'i pho brang rin chen ldan du song ngo / /de nas rgyal po dpa' bas byin zhag bdun 'das pa dang skyed mos tshal mchog na 'dug pa mi dga' mi brtse yongs su mi spyod de/de zhag bdun 'das nas skyed mos tshal nas log nas rgyal po'i pho brang rin chen ldan du zhugs pa dang / des dge slong de rgyal po'i lam du bor ba shi nas zhag bdun lon yang lus kyi mdog ma 'gyur ba shin tu yid du 'ong ba mthong nas de 'di snyam du sems te/dge slong 'di ni the tshom med par bla na med pa yang dag par rdzogs pa'i byang chub las phyir mi ldog pa yin no snyam nas/ bdag gis shin tu mi zad sdig pa'i las byas pas/ /bdag ni myur du dmyal ba'i sdug bsngal tshor ba dag /stag ltogs sha mthong rgyugs pa ji bzhin du/ /'gro las 'dir ni skyob pa 'ga' ma mchis/ /zhes bsams pa dang / steng gi bar snang las lha'i bu brgyad khris sgra skad mthun par dbyangs gcig tu smras pa/ rgyal po chen po 'di ni de bzhin te/khyod ji ltar sems pa ltar dge slong 'di ni byang chub las phyir mi ldog pa yin no zhes zer ro/ /bar snang las lha dag gi sgra thos nas de shin tu 'jigs shing skrag nas bag tsha zhing spu zing zhes byed de 'gyod cing skyabs med par gyur to/ /de nas rgyal po dpa' bas byin sdug bsngal zhing yid mi bde ste 'gyod par gyur pas de'i tshe cho nges btab nas tshig 'di skad ces smras so//rgyal po'i srid dang rgyal po'i pho brang dang / /nor bu rin chen mu tig gser dbyig spangs/ /rta dang / glang po che dang / shing rta dang / nor bu dang / 'bru dang / mdzod dang / bang mdzod rnams spangs la/ rang nyid dum bu dum bur byas la 'chi bar bya'o zhes zer zhing grong khyer gyi mchog nas 'byung ba'i dus kyi lo rgyus gsal bar byed cing dge slong me tog zla mdzes 'dir byung bar zhes bya ba la sogs pa la/ lus mtshan sum cu rtsa gnyis kyis brgyan pas 'gro ba ma lus pa nges par snang bar byed pa ston gyi zla ba dri ma med pa'i dkyil 'khor ltar yongs su rdzogs shing mdzes pa gshegs pa'i tshe//'dod pa'i longs spyod ngan pas bdag dkrugs te/ /zhes bya ba la/ 'dod pa'i 'dam ni 'khor ba'i sdug bsngal gyi rgyu yin pas ngan pa'o//dkrugs pa ni 'dod pa'i 'dam gyis gos pa ste/ bud med kyi tshogs kyis yongs su bskor nas nges par 'byung ba na shing rta'i mchog la zhon te rgyal rigs kyis yongs su bskor cing 'gro ba'i tshe/ dge slong dri mchog mig bzangs 'di nyid do//dri mchog mig bzang ni ba'i rdzi ma lta bu'i mig ces bya ba'i don to/ /'dir byon dge slong de yang mthong nas su/ /bud med tshogs rnams rab tu dgar gyur cig /ces bya ba ni dge slong mthong bas bud med kyi tshogs rnams rab tu dga' bar gyur pa'o//mos pa skyes nas gser gyi phreng ba 'thor/ /zhes bya ba ni gser gyi phreng ba rnams mgo las phud nas lag pa gnyis kyis bzung ste sor mo bcu'i thal mo sbyar ba byas nas tshigs su bcad pa'i dbyangs kyis gus pa dang bcas pas bstod pas stod par byed pa'o/ / rgyal po de'i glu dang rol mo la sogs pa'i ca co'i sgra rnams kyang rab tu zhi bar gyur nas rang rang gi bya ba rnams bor te dge slong mthong bas mi ngoms pa'i sems su gyur to/ /thams cad rang rang shing rta la zhon nas/ /zhes bya ba ni snga ma bzhin no/ /shin tu gtum pa'i sems kyis gsod du btang //zhes bya ba la/ shin tu gtum pa ni shin tu mi bzad pa ste/ de la gcig zhen cing gzhol bar gyur ces bya ba'i don to/ /phyi dus bdag ni lhung nas mnar med bsreg /ces bya ba ni las des bdag mnar med par tsha ba chen pos gdungs par 'gyur zhing lhung bar gyur pa la ci zhig byar yod ces bya ba'o//dga' byed de ni rgyal po'i lam 'dir gnas/ /zhes bya ba la sogs pa ni snga ma bzhin no/ /bdag gis bka' bzhin de 'dra des bgyis te/ /me tog phreng brgyus 'dra ba'i dge slong gtubs/ /zhes bya la bka' ni bka' stsal pa bzhin du byed pa'o//de byas pas bdag 'di lta bur gyur te dri mi zhim pa'i mtshan nyid can du bdag byas so zhes bstan to/ /yang na gsod pa la dga' bas bdag sdig pa'i las can du byas pas na dga' byed do/ /rin po che'i phreng ba lta bu'i dran pa la gnas pa bcad pas na smad pa'i las la dga' bas na dga' byed do//rgyal po 'di 'dra bka' bzhin bgyir mi rung / /zhes bya ba ni bka' stsal pa bzhin du mi bgyid do zhes bya ba dang sbyar ro/ /yang na dga' byed rgyal po'i lam na 'dug pa la sod cig ces gsod byed du ngas ming du btags pa byas pa yin no//ngas byas zhes bya ba ni ngas byas pa ste/ des me tog phreng brgyus 'dra ba'i dge slong gtubs pa ste/ me tog sna tshogs brgyus pa'i skud pa'i phreng ba gtubs pa ni bcad pa'o/ /de bzhin du mtshan thams cad kyi me tog gi phreng ba chos smra ba yon tan chen po can skyon med pa dum bu dum bur byas so zhes bya'o//nags mchog kun du bzang po dga' ba na/ /zhes bya ba la sogs pa la khyod ni dge slong gi dge 'dun gyi ma lta bur gyur pa yin pas khyod mi bzhugs na de dag ma dang bral ba'i bu chung ngu bzhin du sdug bsngal bar 'gyur ro//de'i phyir dge slong khyod bzhengs la nags su gnas par mdzod cig ces bya ba ni khyod la 'chi ba yod pa ma yin no zhes bya bar dgongs pa'o/ /gang gi don du byon pa de khyod kyis bsgrubs lags kyis pa'o/ /dge slong shin tu snying rjes ngu zhing tshol/ /zhes bya ba ni kun du bzang po'i nags na gnas pa'i dge slong rnams 'ong bar 'chi bas ji srid ma mchis kyi bar du khyod bzhengs shig ces bya ba'o//lag pa g.yas pas me tog rgyal mtshan thogs/ /zhes bya ba la sogs pa la/ g.yon pa dang g.yas kyi phyogs nas rnam pa sna tshogs pa'i gdugs dang /rgyal mtshan dang / ba dan dang / rnam par rgyal ba'i ba dan dang / gos dang / rgyan la sogs pas lam yang legs par brgyan nas mchis pas chos bstan pa'i don du byon pa lags pas bzhengs la rgyal po'i pho brang du gshegs nas chos bstan pa mdzod cig ces gsol ba 'debs pa'o//ji ltar skyes bu mthu chen la la dag /ces bya ba la sogs pa la/ ji ltar rab tu grags pa 'ga' zhig sa'i steng du lhung bar gyur kyang / thams cad zil gyis gnon par 'gyur ro/ /de bzhin du skyon thams cad dang bral ba khyod bsad par gyur pas sa la ltung bar gyur cing dum bu dum bur bcad par gyur kyang mdzes par gnas so//dge slong rab tu snying rjes ngu zhing tshol/ /zhes bya ba la sogs pa la/ dge slong rnams kyis shi ba mthong na thams cad sdug bsngal gyis bcom par 'gyur la/ thos pas kyang mya ngan gyi zug rngus zug par 'gyur ro//shin tu ngo mtshan che bar bstan par bya ba'i phyir/ /me tog zla mdzes ri yi rgyal po ltar/ /zhes bya ba la sogs pa la/ mtshan thams cad kyis legs par brgyan pa'i yon tan gyi phreng ba yang bud med kyi tshogs kyis me tog gi phreng ba gtubs pa bzhin du bdag gis dum bu dum bur byas so//bdag ni sangs rgyas rnams dang ring bas ring / /zhes bya ba ni bdag ni skyabs 'dod pa lags na bu la sogs pa rnams kyis ni skyabs byed par mi nus so zhes bya ba'o/ /'das pa dang / ma byon pa dang / da ltar byung ba'i de bzhin gshegs pa rdo rje ltar sra zhing bstan pa'i sku mnga' ba de dag la skyabs su mchi'o zhes bya ba ni rdo rje ltar mi phyed pa'i sku mnga' ba de dag la'o//der ni dge slong dum bur byas pa mthong nas zhes bya ba la sogs pa la/ lha rnams kyis dge slong de dum bu dum bur bcad pa mthong nas snying rje rje ltar ngu zhing kun du bzang po'i nags tshal du song nas dge slong rnams la go bar byed pa ni/me tog zla mdzes rgyal po'i khab 'dir bsad/ /ces bya ba la sogs pa la/ sbyin pa dang / tshul khrims dang / bzod pa dang / brtson 'grus dang / bsam gtan dang / shes rab la sogs pa'i rang bzhin gyi yon tan gyi bsngags pa brjod cing ngu ba'i sgras lha de dag gis go bar byas pa dang / lha yi cho nge'i snying rje thos nas ni/ /dge slong de kun shin tu sdug bsngal gnas/ /zhes bya ba la sogs pa la/ ngu ba'i sgra thos nas dge slong de thams cad mchog tu sdug bsngal bar gyur nas me tog zla mdzes lta ba'i phyir rgyal po'i pho brang du zhugs so//zhugs pa dang de dum bu dum bur byas pa mthong nas skad chen po bton nas cho nges btab ste ngus nas brgyal te sa la 'gyel to/ /dge slong dge 'dun rgyal po de la smra/ /zhes bya ba la sogs pa la/lha dge slong 'dis nyes pa ci zhig byas zhes nyes pa'i rgyu ci zhig yod dam snyam du dogs nas dris pa'o/ /tshul khrims skyon med shin tu bsdams pa yi/ /zhes bya ba la sogs pa la/ lus dang / ngag dang / yid kyi las phyin ci log med par bstan pa yin te/ sngon gyi gnas rjes su dran pa'i shes pa'i bdag dang gzhan gyis spyod pa shes pa brjed pa med pa la 'jug pa'i phyir dang /stong pa nyid dang / mtshan ma med pa dang / smon pa med pa la sogs pa rnam par thar pa rnams la yang dngos por mngon par zhen pa yod pa ma yin na phyi rol gyi dngos po rnams la lta smos kyang ci dgos/sems can thams cad la bu gcig pa ltar lta ba'i byams pa dang ldan yang chags pas lta ba ni ma yin no/ /'dod pa'i nyes dmigs bstan pa'i phyir/ 'dod pa ngan cing btsog la sdug bsngal skyed/ /ces bya ba la sogs pa la/ mtho ris kyi bgegs su gyur pa dang /dbang phyug thams cad nyams par byed pa dang / pha ma gsod pa dang / tshul khrims ma nyams pa'i tshul khrims dum bu dum bur byed pa'i rgyu ni 'dod pa yin zhes pa'o/ /'dod pas ldongs par gyur cing 'dod pa'i dbang gyur skye bos sdig pa'i lam rnams byed/ / 'dod pa bsten pas rab tu nyams shing myos pa'i stobs kyis byis pa 'du 'dzir gnas/ /'jigs shing shin tu 'jigs par 'jug pa'i ngu 'bod dag dang ngu 'bod chen por 'gro/ /de'i phyir nyes pa mtha' yas yul gyur 'dod pa spangs la dge la 'jug par gyis/ /lus ni sgyu ma gsog dang 'dra ba dang //zhes bya ba la sogs pa la/ lus kyang sgyu ma lta bur rig cing / lag pa dang / rkang pa dang / mig dang / yan lag gi mchog la sogs pa rnams ltos pa med par byang chub sems dpa' chen po byang chub 'dod pas yongs su gtang bar bya zhing / sbyin pa dang / tshul khrims dang / bzod pa dang / brtson 'grus dang / bsam gtan dang / shes rab rab tu bsgoms pa'i sems kyi rgyud yin pa'i phyir/ snying rje chen po dang ldan pa 'gro ba ma lus pa'i don byed pa'i byang chub sems dpa' chen po ni glang po che dang / rta dang / shing rta dang / grong khyer gyi mchog dang /khang bzangs dang / khang pa brtsegs ma dpag tu med pa'i rin po che'i rgyan gyis brgyan pa/ shin tu yid du 'ong ba'i phreng bas rnam par brgyan pa/ gzhon nu mas yongs su bskor ba/ dpe med cing dpag tu med pa'i chung ma dang / bu dang / bu mo rnams kyang gtong bar byed do//dga' nas mchod pa mtshungs pa med pa byed/ /ces bya ba la sogs pa ni/ thams cad gtong ba 'ba' zhig ma zad kyi/ /mchod pa thams cad kyis kyang mchod par byed/ /ces bya ba'o/ /'dod pa'i khams rnams dang ni gzugs kyi khams/ /gzugs med khams la de dag mi gnas te//zhes bya ba la sogs pa la/ gzugs la rab tu gnas pa'i byang chub sems dpa' de ni khams gsum la mngon par zhen pa dang / bdag dang sems can dang srog dang gang zag la sogs pa'i 'du shes dang bral ba dngos po dang / dngos po med pa dang / bde ba dang / mi bde ba dang / mtha' dang /mtha' med pa dang / yod pa dang / med pa dang / bud med dang / skyes pa la sogs pa'i 'du shes dang bral ba'o/ /'dod chags dang / zhe sdang dang / gti mug dang / rgyags pa dang / nga rgyal dang / ma rig pa la sogs pa mi mthun pa'i phyogs dang /gnyen po'i phyogs kyi 'du shes dang bral ba'o/ /su dag gzhan las chos mchog thos nas ni/ /zhes bya ba la sogs pa la/ ngo mtshar du gyur pa dpag tu med pa'i spyod pa thos nas blo dang ldan pa rnams the tshom za bar yang mi 'gyur ro/ /'bru mar gang ba'i snod bzhin dang zhing dag /ces bya ba la sogs pa la/ ji ltar til mar gyi snod kyi nang du nye ba na gnas pa'i gzugs brnyan 'byung ba bzhin du gzhan gyi sems shes pa yin no/ /gzhan gyi sems shes pa dang / gcad pa dang / dbug pa'i rang bzhin nges par rtogs pa'i phyir sems can ma lus pa'i don yang dag par rdzogs par byed pa'o zhes bya ba'o//mdza' ba byas na rjes su chags pa skye/ /zhes bya ba la sogs pa la/ rjes su chags pa dang / khong khro rnam par spangs pa/ phyi dang nang gi dngos po yongs su gtong ba/ sbyin pa dang / tshul khrims la sogs pa'i bde bar gshegs pa'i yon tan ma lus par 'dzin pa'i byang chub sems dpar gyur pa/skyon thams cad dang bral ba'i byang chub sems dpa' chen po me tog zla mdzes khyod kyis ji ltar bsad ces bya ba yin no/ /de nas rgyal po dpa' bas byin gyis dge slong gi dge 'dun las me tog zla mdzes kyi yon tan gyi bye brag rgya chen por gyur pa thos nas las ngan pa byas pas 'jigs shing skrag nas sdug bsngal bar gyur te/byang chub sems dpa'i dge 'dun la tshigs su bcad pa'i dbyangs kyis lan btab pa/ nags khrod chen po kun du bzang po ni/ /zhes bya ba la sogs pa la/ nags khrod stug po kun du bzang po zhes bya ba ni sngar bshad zin pas yang brjod par mi bya'o/ /byang chub sems dpa' thugs rje'i stobs ldan dag /ces bya ba la sogs pa la/ mgon med pa'i sems can bsgral bar dam bcas pa thugs rje chen po'i gzhan dbang du gyur pa khyed kyis shin tu drag pa'i sdig bgyis pa bdag la skyabs mdzod cig ces bya ba'o//de lta bas na kun dga' bo lus dang srog la yang ma chags par bya'o zhes bya ba ni bcom ldan 'das kyis ma 'ongs pa'i skye bo la phan pa'i don du 'jug pa'i rim pa bstan pa yin no/ /ci'i phyir zhe na zhes bya ba ni lus dang /srog la ma chags par bya ba dang / chags pa'i yon tan dang skyon shes nas blang ba dang btang bar bya'o zhes bya ba'i don zhus pa dang / dbye ba gsungs pa/ lus dang srog la chags pa ni mi dge ba'i las rnams mngon par 'du byed par 'gyur ro/ /lus dang srog la ma chags pa ni dge ba'i las mngon par 'du byed par 'gyur zhes bya ba ni rgyal po la dgongs nas bstan pa yin no//de la 'di skad ces bya ste zhes bya bas ni tshigs su bcad pas de dag nyid gsal bar mdzad pa yin no/ /sems can gang dag chags pa ni/ /zhes bya ba la sogs pa la/ gang dag snying po med pa'i lus rma bzhin du rtag tu rnag 'dzag pa dang /srog kyang nges par g.yo ba la chags pa ni shin tu drag pa'i las byas nas 'jigs pa chen po dang ldan pa'i dmyal ba thar bar dka' ba thob par 'gyur ro/ /yang gang dag dbu ba'i gong bu lta bu'i lus dang shin tu myur bar 'gro ba'i srog la mngon par zhen pa med pa de dag ni rtag tu sbyin pa la sogs pa'i bsod nams la zhugs pa de dag dam pa'i 'gro bas 'gro bar 'gyur ro zhes bya ba yin no//sems can thams cad la snying rje chen po'i sems nye bar bzhag nas dben pa na bde bar gnas pa dang / dgon pa dang nags khrod kyi bde ba spangs te/ grong la sogs par gnas nas sems can rnams phyir mi ldog par 'gyur bar de ltar chos bstan par bya'o zhes bya ba la sogs pa la/ sngon byung ba'i gtam bstan pa'i phyir/ /ngas sngon spyad pa dag ni spyod pa na/ /de tshe rgyal po dpa' bas byin du gyur//'dod pa'i rgyu yis dge slong me tog zla mdzes nga yis bsad/ /ces bya bar 'grel to/ /rgyal po'i pho brang rin chen ldan zhes bya/ /zhes bya ba la sogs pa la/ rgyal po'i pho brang nas 'byung ba'i dus su 'khor la sogs pa thams cad kyis mthong bar gyur nas zhes bya ba mtshon pa yin no//gang gi tshe rgyal po'i pho brang nas byung nas shing rta la zhon pa'i tshe shin tu mdzes pa'i dge slong mthong nas 'dis ni bdag gis rgyal srid khyer ba'i dogs pa yod snyam du phrag dog dang ser sna'i dbang gis 'jigs pa'i blo bdag la skyes te/bu dang bu mo dang 'khor rnams kyis kyang bskor bar mthong nas bdag gis phun sum tshogs pa ni phrog par gyur to snyam nas phrag dog dang / ser sna dang / khro bas zil gyis mnan nas dbang phyug rgyags pas bu la 'di skad byas/ mdun na 'dug pa'i dge slong bsad par gyis//zhes bya ba la sogs pa la/ gzhon nu de dag gis 'di skad ces smras so/ /bsod nams bsags pa'i rten du gyur pa'i dge slong 'di mi gsod do zhes smras pa dang / bu rnams kyi tshig thos nas shin tu khros pa'i bzhin gyis gsod pa'i gshed ma dga' byed la smras pa/myur ba myur bar dge slong 'di sod cig /ces bsgo ba dang shin tu drag po'i las can gsod pa'i gshed ma dga' byed kyis dge slong de dum bu dum bur gtubs so/ /bcad pa'i 'phro nas kyang 'o ma'i rgyun 'bab par gyur to zhes bya ba la sogs pa snga ma bzhin no//bdag skyed mos tshal nas phyir log nas phyogs der phyin pa dang / lus dum bu dum bur byas kyang 'gyur ba med pa de mthong nas rgyu ci zhig gis 'gyur ba med par 'dug snyam nas bdag ngo mtshar skyed par gyur to/ /de nas bar snang las lha rnams ngu zhing smre sngags 'don pa'i sgra thos te/khyod kyis sdig pa'i las shin tu mi zad pa byas te/ sdig pa'i las des khyod nges par mnar med par 'gro bar 'gyur ro zhes zer ba thos pas rgyal po de lhas bskul bas/ sdug bsngal zhing yid mi bde ba shin tu skrag pa'i sems kyis mnar med par 'gro ba'i sgra thos pas/bdag gis shin tu mi zad pa'i sdig pa'i las byas te/ byang chub sems dpa' chen po me tog zla mdzes bdag gis bkrongs zhes bya ba la/ de bzhin gshegs pa'i dam pa'i chos kyi mdzod 'dzin pa/ ye shes kyi sgron mar gyur pa/ mi shes pa'i mun pa sel ba la mkhas pa/chos bdud rtsi'i sman sbyin par byed pa'i sman pa'i rgyal po chen por gyur pa bdag gis bkrongs so zhes smre sngags 'don par byed do/ /chos rnams skye dgu dag la gang 'chad cing / /zhes bya ba la sogs pa la/ mang du smre sngags 'don cing / 'das pa dang / ma byon pa dang / da ltar gyi de bzhin gshegs pa rnams la skyabs su 'gro bar bya ba las skyabs gzhan med do snyam mo/ /de nas rgyal po dpa' bas byin gyis zhes bya ba la sogs pa ni yang dag pa'i yon tan snying rje dang bcas pa rgya cher tshigs su bcad pa yang dag par brjod pa/ kun du bzang por 'phags pa'i dge 'dun gyis//khyod la rnam pa mang por bsgo ba bgyis/ /zhes bya ba la sogs pa la/ kun du bzang po'i nags khrod na gnas pa'i dge slong gi dge 'dun gyis rnam pa mang por bsgo ba bgyis zhes bya ba ni rgyal po'i pho brang rin chen ldan du ma bzhud cig ces yongs su bsgo ba byas pa'o//khyod kyi srog gi bar chad byung nga re/ /zhes bya ba smras pa/ khyod kyi dge slong dge 'dun tshig ma bzung / /zhes bya ba la/ dge slong gi dge 'dun gyi bka' bcag nas gang gi don du grong khyer du gshegs pa'i don de da bzhengs la yang dag par rdzogs par mdzod cig pa'o//lha rdzas myu gu sna tshogs brgyan pa'i sa/ /zhes bya ba la sogs pa la/ kun du bzang po'i nags tshal dam pa bor nas/ gang gi don du khyod 'dir byon pa'i don de bdag la 'dir gsungs shig de thos pa dang khyod kyi bka' bzhin du bgyi'o//sangs rgyas sras po bzhengs la bka' stsol cig /bdag ni mgon med khyod la skyabs su mchi/ /zhes bya ba ni dmyal ba mnar med par 'chi ba las gzung du gsol zhes bya ba'o/ /gcig pu ri dgas rgyal po seng ge ltar/ /zhes bya ba la sogs pa'i don ni go bar zad do//bdag gis dpa' bo dum bu dum bur bcad/ /ces bya ba la sogs pa la/ bdag ste bdag gi ji srid dge slong gi dge 'dun 'dir ma byon gyi bar du khyod bzhengs la bdag gis gsol ba btab pa bzhin du mdzad par 'os so/ /me tog zla mdzes mi 'jigs bdag stsol la/ / bzhengs la bdag 'jigs pa chen po las bsgral ba'i phyir zla ba'i dkyil 'khor yongs su rdzogs pa lta bu'i khyod kyi lus mtshan dang cha shas yongs su rdzogs pa yang bzhengs la bdag la mi 'jigs pa stsol cig ces bya ba'o/ /sems can ma lus pa la mi 'jigs pa stsol bar mdzad pa'i lha khyod ni nyes pa las rab tu grol ba chos smra ba chen po khyod kyis bde bar gshegs pas bstan pa'i chos bshad du gsol zhes pa'o//de ring bdag la sna gcig snang bar mdzod/ /ces bya ba la sogs pa la/ bdag gi blo'i mi shes pa'i mun pa bsal ba'i phyir ye shes chen po'i nyi ma shar bar mdzod la/bzhengs su gsol te ye shes chen po'i nyi ma'i snang bar 'jigs pa chen po dmyal bar 'gro ba'i mun pa chen po bsal du gsol zhes gsol ba 'debs pa'o/ /nyon mongs byed pa'i sdig sems ci ru rung / /rgyags pas khengs pa'i rgyal srid ci ru rung //zhes bya ba la/ thams cad du dmyal ba la sogs par 'khrid par byed pa'i sdig pa'i las byed pa'i sems de lta bu ci ru rung / rgyal srid ni rgyal po'i dbang phyug nyid de/ des kyang ci ru rung zhes bya ba sdig pa dang rjes su 'brel pa'i phyir ro/ /thams cad spangs te gcig pu 'gro bar 'gyur//zhes bya ba la/ bu dang bu mo ma yin chung ma 'khor rnams min/ /grong khyer yul 'khor chen po rgyal po'i pho brang min/ /de dag nang nas gcig kyang bdag dang 'gro mi 'gyur/ /'di nas bdag gis snying po ci ma blangs/ /dmyal ba'i rjes mthun sdig pa 'jigs rung ba//ngogs gnyis ring du byed pa rab tu drag pa des/ /bdag nyid gcig pu mnar med khrid par 'gyur/ /bdag gi skye ba thams cad don med byas/ /ha ha bzod dang dka' thub brtul zhugs bzang / /zhes bya ba la sogs pa la/ tshul khrims dang / bzod pa dang / nges pa la sogs pa'i yon tan gyi phung po khyod skyabs ma mchis pa bdag bor nas gang du gshegs zhes bya ba'o//'phags pa khyod kyi lus dang yan lag bcad pa na/ /zhes bya ba la sogs pa la/ khyod kyi yan lag dang nying lag bcad par gyur pa na 'od zer sna tshogs 'byung bar gyur cing 'o ma'i rgyun byung bar gyur pas skye bo ma lus pa ngo mtshar bskyed par mdzad pas/khyod bzhengs shig ces gsol ba 'debs pa'o/ /byams pa dang snying rje chen po'i rang bzhin can/ chos zab mo rab tu ston pa'o/ /sa bcu la rab tu gnas pa'i bdag nyid can/ dbang bcu'i pha rol tu phyin pa thob pas dbang bcu la dbang du gyur pa khyod gang du gshegs da myur du bzhengs shig ces bya ba'o//dmigs pa med pa'i snying rje chen po de yang gang du thal nas thugs rje'i yul du gyur pa bdag la ci ste mi gzigs/ khyod kyis bzod pa'i rang bzhin du mdzad na/ bdag lta bu shin tu rmongs pa la ci'i phyir khro bar dgongs/ / de lta bas na chos smra ba chen po khyod ci'i slad du cang mi gsung bar yun ring du bzhugs/ dus ring por chos mi ston par bzhugs pa mdzes pa ma lags so/ /khyod bzhengs la bdag gi khab tu gshegs la thogs pa med pa'i spobs pas bud med kyi tshogs kyi nang du byang chub sems dpa' chen pos chos bstan du gsol/lha khyod lha yi lus 'di mi shigs kyis/ /zhes bya ba la sogs pa la/ ting nge 'dzin gyi rang bzhin rdo rje ltar mi phyed pa'i sku ni lha la sogs pas kyang bshig par nus pa ma yin pas dum bu ltar snang ba'i sems can rmongs par mdzad pa'i sgyu ma mi mdzes pas bzhengs shig /yang don dam par ni gnyis su med pa'i ye shes kyi sku la dbye ba yod pa ma yin no/ /de lta bas na dum bu dum bur snang ba 'di ni sgyu ma tsam ste/ byang chub sems dpa' sgyu ma mdzad pa mi mdzes so/ /sgyu ma'i rnam par spros pa thong mdzod la bzhengs nas bla na med pa'i chos bstan cing bshad du gsol zhes bya ba ni smre sngags 'don pa'i bye brag go//sgyu ma'i rnam par 'phrul pa'i lus tsam ste/ /sha dang rus pa khrag dang bral zhing dri ma rnam par dag /mtshon dang me dang rdo rje'i tshogs kyis kyang ni mi phyed pa'i/ /khyod kyi sku ni ji ltar gshig par nus pa yin//rang bzhin rnam par dag pa'i chos kyi skur gyur nas/ /skye bo ma lus phan phyir thub dbang gzugs kyi skus/ /'gro ba rnams la chos nyid stong pa'i rang bzhin de nyid ston/ /bde gshegs sras kyi de nyid rdo rje de ni su yis shigs/ /ha ha 'phags pa me tog zla mdzes tshur/ /zhes bya ba la sogs pa la/khams gsum gyis 'dod cing chags par bya ba la ma chags pas ni 'dod chags dang bral ba'o/ /sems can thams cad kyi pha mar gyur pa khyod kyis bdag ji ltar ngan song du 'jug par mi 'gyur ba de ltar ngan song gi sgo bcad du gsol/des na thar pa'i lam rnams ni dbye bar mdzod cig pa'o/ /mgon po khyod ni dgung bdun bshos ma gsol/ /zhes bya ba la sogs pa la/ chos ston pa la zhen pas dus yol bar gyur te/ khyod kyis dgung bdun du bshos ma gsol gyis bdag gi sdum par rgyal po'i pho brang rin chen ldan du gshegs la bshos gsol/chos bstan du gsol/ sems can thams cad la mnyam pa'i sems nyid kyis sangs rgyas kyi chos rab tu bstan pa de lta na smon lam btab pa'i don yod par 'gyur ro/ /khyod nyid kyis mgon dang bcas pa'i dge slong gi dge 'dun de yang khyod med na mgon med par gyur pas/sems can snying po khyod ni myur bzhengs la/ /zhes bya ba la sogs pa ni bzhengs la dge slong gi dge 'dun dbugs 'thon mdzod cig /khyod ni 'jig rten khams gsum gyi sgron mar gyur pa lags pas khyod mi bzhugs na 'jig rten gsum po long ba lta bur 'gyur ro//de'i phyir khyod bzhengs la kun du bzang po'i nags tshal du gshegs nas dge slong gi dge 'dun la bdag nyid ston cig pa'o/ /kye ma zhes bya ba ni brtab pa'i don to/ /kye kye zhes bya ni mi g.yengs par bya ba'o/ /kye kye chos 'dzin yon tan rmad byung che/ /zhes bya ba la sogs pa la/lung dang rtogs pa'i chos 'dzin pa khyod lta bu 'gro ba rnams kyi don du dus thams cad du 'byung ba ma yin te/ a shwat+tha'i me tog lta bu khyod kyi shes rab dang / /snying rje'i spyan gyis dge slong gi dge 'dun la rnam par gzigs la ngag gi spyod yul thams cad las 'das pa'i don dam pa'i gzungs bshad du gsol zhes bya ba'o//bdag rjes su gzung ba'i phyir bzhengs la khro ba med pa bstan du gsol/ gang gi phyir bzod pa dang thugs rje chen po'i pha rol tu phyin pa khyod la khro ba ga la mnga' zhes bya ba'o/ /de'i phyir de ring khyod bzhengs shig ces bya ba ni bzhengs la chos ston cig ces thams cad du blta bar bya'o//sems can thams cad la phan pa'i don du zhugs pas me tog zla mdzes te/ sems can thams cad kyi nyon mongs pa'i gdung ba zhi bar byed pas dpe med pa'i zla ba bzhengs shig /tshul khrims dang / bslab pa dang / brtul zhugs dang / thos pa dang / blo gros dang / rtogs pas rab tu rtogs par mdzad pa/ thugs rje chen po'i tshon gyis kha dog bsgyur ba'i ngur smrig 'chang ba/ nges par 'byung ba la mngon par dga' ba'i bsam pa can/ lus dang / ngag dang / sems rab tu thul ba/ ma thul ba'i sems can rnams 'dul bar mdzad pa dang /gnyid log pa dang / rab tu log pa'i sems can rnams/ chos kyi sgras sad par mdzad nas/ theg pa chen po la rab tu 'jog par mdzad pa'o/ /kye kye sbyin pa yi ni spang leb la/ tshul khrims tha gus 'brel ba'i gru sbyor te/ /zhes bya ba la sogs pas ni theg pa chen po'i gru'i ded dpon du bstan to//sbyin pa'i spang leb la tshul khrims kyi tha gus bcings shing bzod pa'i yon tan gyis bcings pa/ brtson 'grus kyi rlung g.yor btsugs pa/ mngon par 'dod pa'i yul du 'gro ba'i bsam gtan gyi mthun pa'i rlung gis phul nas shes rab kyi skye ba 'dzin pas legs pas bzung nas shin tu brtan pa'i theg pa chen po'i grur zhugs nas 'khor ba'i rgya mtsho chen por ma rig pa dang /sred pa dang / rnam par rtog pa'i rlabs kyis ma lus pa khyab par g.yengs pa'i sems can rnams sgrol bar byed dgos na/ ci'i phyir rab tu gnyid log pa bzhin du sems can gyi don la btang snyoms su mdzad ces bya ba'o//bla na med pa'i sman pa'i rgyal por bstan pa'i phyir gsungs pa/ kye kye sman pa'i dam pa brtul zhugs la/ /zhes bya ba la sogs pa la/ nad kyi rgyu dang / gso ba shin tu mkhas pa'i sman pa'i rgyal po khyod bzhengs la/ 'dod chags dang / zhe sdang dang /gti mug gi nad kyis yongs su mnar bar gyur pa'i sems can rnams la rnam par gzigs te/ nyes pa'i nad thams cad rab tu zhi bar bya ba'i phyir dam pa'i chos kyi bdud rtsi'i sman sbyin pas sems can thams cad nyon mongs pa'i nad thams cad las rnam par thar par byas nas bdud rtsi'i dbyings mya ngan las 'das pa la dgod par bya'o//kye kye mkhas pa ye shes rgya cher bslabs/ /chos kyi rnga dag shin tu rdung ba mdzod/ /ces bya ba la sogs pa la/ sems can rnams la thun mong du chos bstan pa'i rgyu mtshan rab tu bsgrub pa'i phyir rnga dag shin du rdung ba ste chos kyi rnga'o//rdung pa ni chos dang / don dang / nges pa'i tshig dang / spobs pa so so yang dag par rig pa thob pas chos smra ba chen por gyur pas sems can mos pa sna tshogs pa rnams la bsam pa dang / lhag pa'i bsam pa ji lta ba bzhin du rjes su mthun pa'i chos ston pas yang dag pa'i lam la dgod par mdzad pa'i nus pa mnga' bzhin du ci'i phyir btang snyoms su mdzad ces bya ba'o//me tog zla ba mtshan mchog brgyan pa kye/ /zhes bya ba la sogs pa ni bsod nams dang ye shes kyi tshogs yongs su rdzogs par bsags pa'i bdag nyid can la gzhan gyis nye bar bcom pa'i 'chi ba yod par mi 'gyur bas/kye me tog zla ba khyod bzhengs la 'khor ba'i btson rar bsdoms pa'i sems can rnams dgrol du gsol zhes gsol ba gdab pa'i phyir/ /me tog zla ba thugs rje chen po kye/ /zhes bya ba la sogs pa la/ bdag gis gsol ba gdab pa'i tshig gson la dge slong gi dge 'dun dang lhan cig tu bsam gtan dang rjes su mthun pa'i nags khrod du bzhugs la bsam gtan bzhi la bsam gtan pa dang rtag tu sems nang du bsdu ba dang /mdza' ba dang mdza' ba ma yin pa la mnyam pa'i sems kyis ri rab bzhin mi g.yo ba'i thugs mnga' ba khyod bzhengs la tshur spyon/sangs rgyas dang / sangs rgyas ma yin pa'i sems can la rab tu mnyam par bzhugs pa dang / byang chub kyi snying po la nges par bzhugs nas bdud bzhi las rnam par rgyal te/ mngon par sangs rgyas nas chos kyi 'khor lo bskor ba dang / mngon par shes pa lnga yongs su rdzogs par legs par bsgoms pas de dag lhun gyis grub par mnga' bas khyod kyis mi mkhyen pa ci yang mi mnga' yis bdag gi bsam pa phyir zhing gdung bar gyur pa'i me 'di zhi bar mdzad du gsol/bdag gis gsol ba btab pa don yod par mdzad du gsol/ khyod kyi bzhed pa thams cad bdag gis yongs su rdzogs par bsgrub kyis bzhengs su gsol/khyod dum bu dum bur ma bzhugs shig /grong khyer dang / grong dang / tshong dus dang / skye bo'i tshogs dang / blon po dang / bu dang bu mo la sogs pa'i 'khor rnams la bka' stsal pa/ a ga ru dang / tsan dan dang / gur kum dang /ga pur dang / gla rtsi la sogs pa'i dri zhim po rnam pa sna tshogs dang me tog dri zhim pos yongs su bkang ba'i sgrom bu myur du gyis la gang du chos smra ba'i pur sreg pa der khyer cig ces bsgo nas/ 'bru mar dri zhim po sna tshogs kyis bsgos pa'i a ga ru dang tsan dan dang / lha shing rnams las me sbar nas sgrom du de'i pur bcug nas nyon mongs pa dang bral ba'i dge slong rnams kyis me sbar nas sreg pa'i cho ga byas so/sreg pa'i cho ga ni shing phran bcug nas me sbar ba'o/ /de nas chos smra ba de'i lus las de bzhin gshegs pa'i sku bzhin du sku gdung gi phung po byung bar gyur to//rgyal po des ni mchod rten byas nas su/ /'di la ngas ni mchod pa bya zhes zer/ /zhes pa la/ ngas 'di'i mchod rten sku gdung gi snying po can byas la las ngan pa byas pa zad par bya ba'i phyir mchod pa rnam pa sna tshogs pa me tog dang / phreng ba dang / byug pa dang / phye ma dang / gdugs dang /rgyal mtshan dang / ba dan dang / rnam par rgyal ba'i ba dan dang / sil snyan bye ba khrag khrig brgya stong du ma dang bcas pas dus gsum du song nas mchod pa byed par gyur to/ /de mchod rten gyi mdun du 'dug nas dus gsum du mi shes pas byas pa'i sdig pa rnams bshags par byed do/ / slan chad kyang mi bgyid par sdom par byed pa de lta bus/ lo stong bye ba phrag ni dgu bcu lngar/ /nyes pa byas pa dag kyang rab bshags shing / /zhes bya ba ni lo bye ba stong phrag dgu bcu rtsa lngar nyes pa byas pa'i las rnams zad par bya ba'i phyir tshul khrims ma nyams pa dang / ma ral ba dang / ma 'dres pa dang /dri ma med pa bsrungs par gyur to/ /gso sbyong dag kyang de tshe rab gsos te/ /zhes bya ba la/ 'di la gso ba yod pas na gso sbyong ste/ gso sbyong la lo stong phrag dgu bcu rtsa lngar gnas so/ /de ltar byas kyang lus zhig nas de mnar med par lhung bar gyur te/ 'dod pa'i phyir snying rje med pa'i las byas pas/sdug bsngal mang po nyams su myong bar gyur to/ /sangs rgyas rnams kyang bdag gis mnyes par ma byas so/ /lo bye ba phrag dgu bcu rtsa lngar nga long bar yang gyur to/ /bskal pa bye ba khrag khrig drug cu rtsa gnyis su nga'i mig bcar bar gyur to/ /lag pa dang /rkang pa dang / rna ba dang / sna dang / mgo yang bcad do/ /mi'i 'gro bar skyes kyang rung / 'gro ba gzhan du skyes kyang rung ste/ de dag thams cad sdug bsngal gyis non par gyur cing skyabs med pa'i sdug bsngal nyams su myong bar gyur to/ /de lta bas na 'dod pa'i phyir shin tu mi zad pa'i las byed pa spang bar bya'o/ / byang chub thob par bya ba'i phyir/ lag pa dang / rkang pa dang / mgo dang / bu dang / bu mo dang / chung ma shin tu yid du 'ong zhing yid 'phrog pa rnams dga' ba'i sems kyis byin par gyur kyang sngon gyi las zad par ma gyur te/ las shin tu drag po byas pa ni zad par dka' ba'i phyir ro/ /kun dga' de ltar bskal pa mtha' yas spyod//ces bya ba la sogs pa la/ de tshe sdug bsngal 'di dag sngon myong gyur/ /zhes bya ba la/ nga byang chub sems dpa'i spyad pa spyod pa na de dang der de lta bu'i sdug bsngal nyams su myong bar gyur to/ /yang gang dag gzungs la rab tu gnas shing / byams pa la gnas pa dang /de bzhin gshegs pa la bsnyen bkur byed pa la gzhol ba de lta bu dag ni nam yang ngan song du 'gro bar mi 'gyur ro/ /de'i phyir byang chub 'dod pas tshul khrims la rab tu gnas nas chos kyi sbyin pa la mngon par dga' bar bya'o zhes bya ba yin no/ /nga ni de tshe rgyal po dpa' byin yin/ /zhes bya ba la/nga nyid de'i tshe rgyal po dpa' bas byin zhes bya bar gyur gyi gzhan ma yin no/ /sdig pa zad par bya ba dang / bsod nams 'phel bar 'gyur ba'i las de lta bu byas pas byang chub mngon par thob par 'gyur ro/ /nga yi bu rnams phyi dus chos skyong ba/ /zhes bya ba la sogs pa la/ nga'i bur gyur pa gang dag yin pa de dag ni byang chub sems dpa'i spyod pa spyad nas chos skyong ba'i de bzhin gshegs par gyur to//me tog zla mdzes kyang pad+ma'i bla ma zhes bya ba'i de bzhin gshegs par gyur to/ /gshed ma dga' byed kyang de bzhin gshegs pa zhi ba'i rgyal po zhes bya bar gyur to/ /skyes pa dang / bud med dang / rgyal rigs dang /khyim bdag dang / grong khyer gyi dpon dang / tshong dpon la sogs pa gang yin pa de dag thams cad kyang bla na med pa yang dag par rdzogs pa'i byang chub mngon par rdzogs par sangs rgyas nas sems can rnams kyi don mdzad de yongs su mya ngan las 'das par gyur to zhes bya ba yin no/ / kun du bzang po stong nyid ngo bo nyid/ /stong nyid bdag med phyir ni de nyid gnas/ /pha rol phyin bcu'i bdag nyid kun rdzogs pa/ /kun du bzang po'i nags tshal zhes de brjod/ /zla ba thub dbang tshogs kyis rab gsungs ting nge 'dzin/ /byang chub yan lag tshogs ni me tog tshul khrims dri/ /sangs rgyas sras po sangs rgyas yon tan gcig la gzhol//me tog zla mdzes srid pa gsum na snying po gcig /dri med chos kyi bdag nyid grags pa gtsor gyur pa/ /'gro ba'i don grub byed pa sangs rgyas thob bya'i phyir/ /ser sna'i nyes pa rab spangs nas ni 'bad pa yis/ /'dod pa'i lha yi gnas 'byed pa yis bshad pa byas//me tog zla mdzes kyi le'u ste sum cu rtsa drug pa'i 'grel pa rdzogs so// //ting nge 'dzin gyi yon tan dang / gzungs kyi phan yon bstan par bya ba'i phyir/ de nas yang bcom ldan 'das kyis zla 'od gzhon nur gyur pa la bka' stsal pa zhes bya ba la sogs pa la/de lta bas na zhes bya ba nas brtsams nas/ tshul khrims kyi phung po la yang rab tu gnas par bya'o zhes bya ba'i bar gyi don ni go bar zad do/ /ting nge 'dzin dang gzungs kyi yon tan dang / phan yon tshigs su bcad pas rgya cher rab tu bstan par bya ba'i phyir gsungs pa/ byang chub sems dpa' gang zhig tshul khrims tshogs gnas shing //zhes bya ba la sogs pa la/ byang chub sems dpa' gang zhig tshul khrims kyi phung po la rab tu gnas pa bdag la phan par 'dod pa bdag dang gzhan gyi don bsgrub pa'i phyir byang chub sems dpa'i spyad pa spyod pa de dag ni de bzhin gshegs pa mi bskyod pa'i sangs rgyas kyi zhing mngon par dga' bar skye bar 'gyur zhing chos zab mo la bzod pa thob ste/rim gyis bla na med pa yang dag par rdzogs pa'i byang chub mngon par rdzogs par sangs rgyas par 'gyur ro/ /de'i phyir gnod sems med cing kun mthun gyis/ /zhes bya ba la sogs pa la/ kun mthun zhes bya ba ni bsod nams dang ye shes kyi tshogs yongs su rdzogs par 'gyur ba'o//'dod chags zhe sdang gti mug la sogs pa'i nyes pa kun dang bral ba'i sems kyis/ gzhan la phan pa byed pa la gcig tu gzhol bas de bzhin gshegs pa thams cad la bsnyen bkur byas nas sangs rgyas nyid thob par gyis shig ces bya'o//de phyir phan yon mchog 'di thos nas ni/ /zhes bya ba la sogs pa la tshul khrims kyi yon tan dang ldan pa'i dge slong mthong nas gus pa dang bcas pas de la bsnyen bkur bya'o/ /yid bzhin gyi nor bu dang / pad+ma rA ga dang / in+d+ra nI la dang / mar ka ta dang / pu sha ra ga dang / karke ta dang / mu sa la gal pa la sogs pa'i rin po che'i khyad par gyis yongs su bkang ba'i 'jig rten gyi khams gang+gA'i klung gi bye ma snyed yod par gyur la/ byang chub sems dpa' sbyin pa la mos pa gang zhig gis rin po che de dag blangs nas bskal pa gang+gA'i klung gi bye ma snyed du sbyin pa btang ba bas/gang gzhan dag gis chos thams cad kyi rang bzhin mnyam pa nyid rnam par spros pa'i ting nge 'dzin gyi rgyal po 'di 'dzin par byed na bsod nams kyi phung po sbyin pa las byung ba de bas bsod nams kyi phung po 'di nyid mang du 'phel bar rig par bya ste/sbyin pa'i 'bras bu ni gtong ba dang longs spyod pa yin la/ ting nge 'dzin gyi 'bras bu ni dpag tu med pa'i ye shes kyi tshogs rdzogs nas sangs rgyas nyid thob par 'gyur ba'o zhes bya ba yin no/ /de lta bas na ting nge 'dzin 'di 'thob par gyur na chos chen po mi zad pa'i chos kyi mdzod du 'gyur ro//thos pa'i rgya mtsho thob par 'gyur ro/ /chos kyi mchog rnams bsam gyis mi khyab pas/ /shin tu rgyas byas byang chub sems dpar brjod/ /ces bya ba ni ting nge 'dzin thob pa'i byang chub sems dpa' la mchog dang / rab mchog dang / bsam gyis mi khyab pa dang / dpe med pa dang /legs par bsdams pa zhes brjod do/ /gang gis ting nge 'dzin 'di sgom par byed pa de ni de bzhin gshegs pa'i bsod nams ma gtogs pa bsod nams gzhan thams cad zil gyis gnon par 'gyur ro/ /bsod nams dang / ye shes dang / brtson 'grus dang / stobs kyis de bas lhag pa yod pa ma yin la/mnyam pa yang yod pa ma yin no/ gzhon nu ci ste chos de gzugs yod na zhes bya ba la sogs pa la/ des bskyed pa'i bsod nams kyi phung po de gal te chos gzugs can zhig yin na ni 'jig rten gyi khams thams cad yongs su gang bar 'gyur zhing nam mkha'i khams su yang shong bar mi 'gyur ro//de'i phyir bsod nams kyi phung po dpag tu med pa yongs su 'dzin par 'dod pa dang / 'das pa dang / ma byon pa dang / da ltar byung ba'i de bzhin gshegs pa rnams la mchod pa dang / bsnyen bkur yongs su spyad pa dang / sems kyis mnyes par byed par 'dod pas kyang ting nge 'dzin gyi rgyal po 'di gzung bar bya'o//byang chub ces bya ba ni ting nge 'dzin mngon sum du byed pa 'di nyid la byang chub ces bya'o/ /gzhon nu nga yi tshig la dad par gyis/ /zhes bya ba la thams cad mkhyen pa'i gsung gis byang chub kyi ngo bo nges par rtogs par bya'o//de lta bas na de bzhin gshegs pa'i bka' ni gzhan du mi 'gyur ba'o zhes bya bar shes par byas la/ dad par gyis shig pa de la dad pa dang ldan par gyis shig pa'o/ /ngas ni bdag tu lta ba 'dir sbyangs so/ /zhes bya ba la sogs pa la/ byang chub spyad pa mchog 'di spyod par byed pa na bdag dang bdag gir lta ba rnam par spangs nas ngas ting nge 'dzin 'di btsal ba'i tshe g.yeng ba med pa'i sems kyis btsal bar gyur pa na rnyed par gyur pa ni byang chub pa yin te/ting nge 'dzin nyid byang chub po zhes byas nas so/ /de'i phyir mdo sde 'di mnyan par bya'o/ /'di las mdo sde bye ba khrag khrig 'byung //zhes bya ba ni kun gyi lung du gyur pa ste/ mdo sde thams cad bsdus pa'i gzugs can yin pa'i phyir ro/ /'di ni mdo sde kun gyi dam pa'i mdo/ /zhes bya ba ni mdo sde thams cad kyi rab mchog tu gyur pa ste/ gang gi phyir chos de rnams la mtha' thug pa rnyed par mi 'gyur ba de dag gi'o//stong chen dag ni bcad cing bshig nas su/ /zhes bya ba la sogs pa la/ rdul phra rab kyi mthar thug par bgrang bar nus kyang srid kyi/ gang ting nge 'dzin 'di thob pa dag mdo sde gang dag ston pa de dag ni bgrang bar mi nus so/ /stong gsum gyi stong chen po'i 'jig rten gyi khams kyi sems can thams cad kyi dbugs dbyung ba dang 'jug pa bgrang bar mi nus kyang srid kyi/byang chub sems dpa' ting nge 'dzin thob pa'i mdo sde ston pa ni shes par mi nus so zhes bya bas ni spobs pa dpag tu med par bstan pa yin no/ /sangs rgyas kyi zhing gang+gA'i klung gi bye ma snyed cig sems can de dag bgrang bar nus kyang srid/de bzhin du rgya mtsho chen po'i bye ma ni tshad gzhal bar nus kyang srid/ de bzhin du skra'i tshal pa brgyar bshags pa'i dum bu'i rtse mos rgya mtsho chen po chu blangs pa bgrang bar nus kyang srid kyi/ chos smra ba de'i dbyangs kyi yan lag ni shes par mi nus so//'das pa'i sems can gang dag ji snyed pa de ni bgrang bar nus kyang srid kyi/ des shes pa'i mdo sde ni shes par mi nus so zhes bya ba'o/ /sems can thams cad kyi sgra dang skad kyi tshad ni shes par nus kyi/ gang mdo sde 'di 'chad pa de'i skad dang / sgra'i mthar thug pa ni shes par mi nus so zhes bya ba'o//byang chub sems dpa' ting nge 'dzin thob pa ni nges pa'i tshig dang / bstan pa'i don ma lus pa la mkhas shing gtan la dbab pa la mkhas pa dang / rnam par dag pa'i blo gros bsam gyis mi khyab pa dang / shin tu phra ba'i don la yang 'jug cing shes pa dang / gzod ma nas ma skyes pa'i ngo bor sgra rnams rnam par rig pas de la yang mngon par zhen pa med par chos ston par byed do/ /thogs med de ni chos smrar brjod pa ste/ /'gro ba kun la ston kyang chags mi 'gyur/ /zhes bya ba la/ sems can thams cad kyi skad thams cad legs par nges pa'i blo dang ldan pa'i phyir thams cad la ma chags shing mngon par zhen pa med par chos kyi de kho na nyid dang ma bral bas sems kyi rgyud chos nyid las mi g.yo'o//kun rdzob la zhen pa'i sems can rnams la yang de dang de lta bu'i chos ston par byed do zhes bya ba'o/ /dri ba nges par ston pa brgya la mkhas//zhes bya ba la sogs pa la/ sems can dpag tu med pas rgol ba yang dpag tu med pa 'byung la/ de dag la lan 'debs pa la mkhas pa ni mkhas pa nyid do/ /chos thams cad kyi rang bzhin yongs su rtogs pas chags pa med pa ste kun du ma zhen pa'o/ / mdo sde gcig gi phyogs kyang bye ba snyed/ /ces bya ba la sogs pa la/ gdul bya'i sems can dpag tu med pa byang chub kyi lam la dgod pa'i phyir spobs pa dpag tu med pas bskal pa dpag tu med par mdo sde gcig gi phyogs gcig tsam zhig bstan pas dga' bar bya ba'i phyir dpag tu med pa'i chos bstan kyang yi ge'am/sems can nam/ ston pa la yang rung / chags pa med pas des ston chags pa med do/ /'khor gyi nang du chags pa med par ston pas na chags par mi 'gyur te/ dmigs pa la mngon par zhen pa med pa'i phyir ro/ /ting 'dzin 'di la legs par gang gnas pa//zhes bya ba la sogs pa la/ ting nge 'dzin la legs par gnas pa'i byang chub sems dpa' ni brag gi rang bzhin gyi ri rab bzhin du phas kyi rgol ba'i smra ba rnams kyis rab tu g.yos par mi 'gyur ro/ /rgol ba ma lus pa la dus gcig tu lan btab pas de dag thams cad zil gyis mnan nas mi smra bar sdod par gyur nas rang gi phyogs la 'jog par byed do zhes bya ba'o//su dag stong pa nyid la rtag brtson pa/ /sangs rgyas gnas su nges pa de yin te/ /zhes bya ba la sogs pa la/ sangs rgyas rnams dang byang chub sems dpa' rnams ni stong pa nyid la gnas pa'o/ /gang gis chos thams cad stong pa nyid du rab tu shes pa de ni pha rol gyi rgol ba thams cad kyis bskyod par nus pa ma yin no//de'i phyir mi 'khrugs pa dang / mi bskyod pa dang / zil gyis ni mi non par 'gyur te/ byang chub sems dpa' chen po ting nge 'dzin bsgoms pa'i bdag nyid chen po mthu chen po dang ldan pa'i rang bzhin can yin no zhes bya ba'o//de yis stong nyid rtogs par khong du chud/ /ces bya ba la sogs pa la/ byang chub sems dpa' stong pa nyid rtogs par khong du chud nas chos thams cad la nem nur dang / the tshom dang / yid gnyis yod par mi 'gyur ro/ /de bzhin gshegs pa'i stobs bcu dang /byang chub kyi yan lag bdun dang / so so yang dag par rig pa bzhi dang / rdzu 'phrul gyi rkang pa bzhi dang / mngon par shes pa lnga la sogs pa ni ting nge 'dzin thob na thob par 'gyur ro zhes bya ba'o/ /stobs la sogs pa rnams sngar bshad zin pas yang bshad par mi bya'o/ / de bzhin gshegs pa dpag tu med pa mthong ba dang rtag tu mi 'bral ba dang / chos nyan pa la gcig tu zhen pa'i ye shes bla na med pa dang yang dag par ldan pa dang dpag tu med pa'i ting nge 'dzin la dbang thob pa dang / dpe med pa'i ting nge 'dzin dpag tu med pa'i cho ga shes pa la mkhas pa de'i bsod nams kyi mtha' ni shes par sla ba ma yin no zhes bstan pa'i phyir/nor bu rin chen dag gis gang gyur kyang / /zhes bya ba la sogs pa la/ stong gsum gyi stong chen po'i 'jig rten gyi khams 'og gi sa gzhi nas bzung nas srid pa'i rtse mo'i bar du rin po che sna tshogs kyis yongs su bkang nas de bzhin gshegs pa rnams la bskal pa dpag tu med par sems can thams cad kyis sbyin par byed pa dang /gang chos kyi bdag nyid can zhig stong pa nyid la dga' bas de bzhin gshegs pa la phyag 'tshal bar byed na snga ma'i bsod nams kyi phung po des bye ba'i char yang mi phod do zhes bya ba ni bsod nams kyi phung po shin tu rgya chen po la 'jug pa'i rgyu ni ting nge 'dzin no//sangs rgyas kyi yon tan thams cad nges par sgrub par gyur pa'o/ /bsod nams thams cad ni 'di'i brgya'i char yang nye bar mi 'gyur ro zhes bstan pa yin no/ /ting nge 'dzin dang bral ba'i sbyin pas ni myur du sangs rgyas nyid thob pa ma yin no//ting nge 'dzin nyan pa dang / sems pa dang / bsgom pa yang dag par ldan pas ni myur du thob par 'gyur ro zhes bya ba'o/ /gang gis 'di lta bu yi gter rnyed pa/ /zhes bya ba la sogs pa la/ sangs rgyas kyi zhing dpag tu med pa khyab par nor thams cad kyis yongs su gang ba'i gter rnyed pa na yang de phul du byung ba'i mdzod chen po can zhes mi bya'o//ting nge 'dzin thob pa de ni phul du gyur pa'i mdzod thul bar dka' ba thob par 'gyur ro/ /rgyal srid thob pas kyang dga' bar mi 'gyur te/ ngoms pa skyed pa ma yin pa'i phyir ro/ /ji ltar ting nge 'dzin thob par gyur na ni shin tu tshim par 'gyur ro//de dang de dag sangs rgyas kun mkhyen gyi/ /chos rnams rtag tu 'dzin par byed pa yin/ /zhes bya ba la sogs pa la/ gang chos thams cad bsdus pa'i ngo bo thams cad mkhyen pa'i ye shes kyi sgron ma ting nge 'dzin gyi rgyal po sgrub pas 'dzin pa de de bzhin gshegs pa'i chos kyi mdzod 'dzin pa yin no//de dag ni sems can thams cad dga' bar byed pa'i rgyu glu'i dbyangs snyan pas chos ston pa la mkhas pa yin/ tshul khrims kyi nor can yin/ bslab pas phyug pa yin/ don dam pa'i chos la mngon par dga' bas ngur smrig dmar po'i chos gos 'chang ba yin/khams gsum nas nges par 'byung ba'i bsam pa can yin/ rtag tu mnyam par gzhag pa/ shin tu dul ba/ gdul dka' ba'i sems can thams cad 'dul bar byed pa'o/ /shin tu bag med pa rab tu gnyid kyis log pa'i sems can gyi khams rnams chos bstan pa'i sgras rab tu sad par mdzad pa'o//zab mo'i sgras rab tu sad par byas nas theg pa gsum la rab tu 'god par byed pa'o/ /ser sna med pa'i sbyin bdag chen po'o/ /sems can thams cad la bde ba dang / yid bde ba skyed par byed pa'i longs spyod phun sum tshogs pa sbyin par byed pa'o//chos kyi rnga'i sgras sems can thams cad bsdus nas sems can thams cad kyi the tshom gyi 'khri shing rgyas par gyur pa ye shes kyi ral gris gcod pa la mkhas pas the tshom thams cad bcad nas the tshom med pa'i chos kyi dbyings la rab tu dgod pa'i phyir nges par 'byung ba'i chos ston par byed pa'o//chos la gus pa chos la dga' bas phyin ci log la zhugs pa'i sems can rnams 'khor ba'i 'dam du zhugs par mthong nas de dag la snying rje chen po'i sems bskyed nas 'phags pa'i lam yan lag brgyad pa nye bar ston par byed pa'o/ /'khor ba'i rgya mtsho chen por 'khyams pa'i sems can rnams bsgral ba'i phyir chos kyi gru legs par sbyar nas zag glan byas te/mdo sde sna tshogs kyi skud pas yang dag par bcings nas/ shes rab skya ba 'dzin pas legs par bzung ba/ sbyin pa dang / tshul khrims dang / bzod pa dang / brtson 'grus kyi rlung gis bskyod nas ded dpon chen po'i mgon dang bcas pas mngon par 'dod pa'i pha rol gyi 'gram lta ba'i ye shes kyi tshogs dang /lam gyi mchog la yang dag par zhon nas mgon med pa'i sems can thams cad theg pa chen po'i gru der bcug nas gnod pa thams cad dang bral ba yon tan thams cad kyi 'byung gnas mya ngan las 'das pa'i grong khyer pha rol gyi 'gram du phyin par byed de/chos thams cad kyi rang bzhin mnyam pa nyid rnam par spros pa'i ting nge 'dzin gyi rgyal po thob pa'i byang chub sems dpa' zhes bya ba'o/ /de nyid sman pa'i rgyal po bla na med pa'i dbang po chos kyi sman byin pas thams cad kyi nad gso bar byed pa de ni 'jig rten las 'das pa'i rig pas rgol ba rnams pha rol tu song ba/phas kyi rgol ba thams cad 'joms par byed pa/ rgol ba'i dbang po/ rgol ba'i dbang phyug /thams cad mkhyen pa'i ye shes kyi shes pas dpa' ba/ bdud kyi sgra'i stobs 'joms pa'o//sems can thams cad kyi skyabs dang / dpung gnyen dang / mgon dang / gling dang / snang bar gyur pa'o/ /dam pa'i chos nyan pa dang / sems pa dang / sgom pa yongs su skyo ba med pa'i brtson 'grus dang / sems can thams cad yang dag par rab tu dga' bar byed pa'i sgrib pa med pa'i chos ston par bsam pa thams cad yongs su rdzogs par byed pa'o//sems can thams cad kyi sems kyi spyod pa shes pa la mkhas pa'o/ /bdud kyi dkyil 'khor thams cad 'joms shing byang chub kyi snying por nye bar 'gro ba dang chos kyi 'khor lo bskor ba la sogs pas rdzu 'phrul sna tshogs yang dag par ston pas sems can rnams 'dul bar byed kyang sems can gyi 'du shes kyang bskyed par mi 'gyur ro//yongs su brtag pa nye bar bzung na 'jig rten gyi khams thams cad kyi sems can thams cad sangs rgyas su gyur la/bskal pa bye ba khrag khrig brgya stong du mar ting nge 'dzin gyi yon tan ma lus pa brjod par brtsams pa de dang ldan yang yon tan gyi mtha' shes par mi 'gyur ro zhes bya bas ni ting nge 'dzin gyi yon tan ni dpag tu med pa'o zhes bstan to/ /ting 'dzin rgyal po yon tan rgya mtsho yi/ /yon tan ma lus rab kyi mthar thug pa//dpag med sangs rgyas kyis kyang brjod mi spyod/ /thams cad mkhyen pa'i blo bzhin mtha' mi shes/ /ting nge 'dzin gyi yon tan dang gzungs kyi phan yon bstan pa'i le'u ste sum cu rtsa bdun pa'i 'grel pa rdzogs so// //de nas yang bcom ldan 'das kyis zhes bya ba nas/gzhan dag la yang rgya cher rab tu bstan par bya ba'i bar du ni bshad zin to/ /des bzod pa'i stobs bsgom par bya zhes bya ba la sogs pas ni 'chad par 'gyur ba mtshon pa yin no/ /bstan par bya ba ni rtag tu goms pa'i sbyor bas so/ /mang du bya ba ni bstan par bya ba'o/ /chos don du gnyer ba dang zhes bya ba la sogs pa la/chos la don du gnyer ba ni chos nyan pa'i phyir dge ba'i bshes gnyen la brtan pa'o/ /chos 'dod pa ni bsgom pa la mngon par brtson par gyur pa'o/ /chos yongs su 'dzin pa ni chos nyid mngon sum du byed pa'o/ /chos dang rjes su mthun pa'i chos la zhugs pa ni sangs rgyas mchod pa la brtson pa dang ldan pa'o//de ltar rab tu zhugs pas gnas gsum la brtson par bya'o/ /gsum gang zhe na 'di lta ste zhes bya ba ni nye bar bstan pa'i tshig yin no/ /nyon mongs pa zad pa ni byas pa dang ma byas pa'i sdig pa rnams spong zhing zad par byed pa'o//bsod nams kyi dbang du gyur pa ni bsod nams kyi stobs bdag por gyur pas 'jug par bya'o/ /sangs rgyas kyi ye shes 'dod pas ma chags pa'i dge ba'i rtsa ba la sogs pa rnams bskyed par bya ba'i 'jig rten gyi bde ba la reg par mi bya'o/ /don de dag gsal bar bstan pa'i phyir/sngon gyi sbyor ba'i tshigs su bcad pa'i dbyangs kyis gdul ba'i skye bo rnams 'dun par bya ba'i phyir/ bskal pa stong du ji ltar ngas spyad pa/ /zhes bya ba la sogs pa la/ mnyan par gyis zhes bya ba ni rna gtod du gzhug pa'o/ /ting nge 'dzin 'di tshol ba'i tshe ngas sngon bskal pa stong phrag mang por sangs rgyas brgya stong phrag mang po la mchod pa byas so//sangs rgyas kyi zhing dpag tu med pa'i rdul gyi tshogs pas mang ba'i bskal pa yang 'das pa na de bzhin gshegs pa tshogs kyi dbang phyug ces bya ba byung ngo / /de bzhin gshegs pa de'i dge slong gi dge 'dun ni bye ba stong phrag drug cu byung ngo //de'i tshe sa chen po 'di yang bde zhing lo legs pa la sogs pa'i yon tan dang ldan par gyur to/ /de la gnas pa'i sems can thams cad kyang bde ba dang ldan par gyur to/ /des shing brtul zhugs bzang la nyon mongs chung //zhes bya ba ni bde ba thams cad dang ldan du zin kyang de bzhin gshegs pa'i bdag po'i dbang gis nyon mongs pa dang bral bar gyur cing tshul khrims la sogs pa'i yon tan gyis brgyan par gyur to/ /de yi dus nas bdag byung ba ni/ /zhes bya ba la sogs pa la de'i dus na sa chen po'i bdag po'i rgyal po'i sras me tog mchog ces bya ba byung ngo //de'i bu yang lnga brgya yod de/ gzugs bzang zhing lta na sdug pa skyes bu'i mtshan thams cad kyis brgyan pa'o/ /de nas rgyal po des de bzhin gshegs pa de la me tog dang 'bras bu sna tshogs dang ldan pa'i skyed mos tshal stong phrag brgya snyed longs spyod dang yongs su spyad pa'i phyir phul lo//'chag pa la sogs pa'i sar yang gos rnam pa sna tshogs bting ngo / /rgyal po'i bu de dge ba bcu'i las kyi lam dang yang dag par ldan pas me tog dang / spos dang / mar me dang / dri dang / byug pa dang / phye ma dang / chos gos dang /gdugs dang / rgyal mtshan dang / ba dan rnam pa sna tshogs pa dang / sil snyan gyi khyad par rnam pa sna tshogs pas bcom ldan 'das de la mchod pa byas te/ thal mo sbyar nas mdun du 'dug par gyur to/ /de nas dge slong rnams dang / lha la sogs pa yang ci zhig ston par 'gyur snyam pa la/zab mo'i chos ston par 'gyur ro snyam nas dga' bar gyur to/ /sa'i bdag po de'i bla na med pa'i lhag pa'i bsam pa mkhyen nas chos thams cad kyi rang bzhin mnyam pa nyid rnam par spros pa'i ting nge 'dzin 'di ston par mdzad do/ /chos bstan pa'i byin gyi rlabs kyis sa chen po 'di rnam pa drug tu g.yos par gyur to//nam mkha'i dkyil nas yang yid du 'ong ba'i me tog sna tshogs kyi char bab par gyur to/ /sa chen po 'di las rin po che sna tshogs kyi rang bzhin pad+ma'i khyad par mang po byung bar gyur to/ /de nas de'i bsam pa lhag par bzang ba'i ngo bo thugs su chud nas bla na med pa yang dag par rdzogs pa'i byang chub tu lung bstan to//bcom ldan 'das kyis ting nge 'dzin 'di yang bshad do/ /don de'i tshig rnams te don dang tshig gi dbye ba rnams phye nas/ de yi don tshig rnams kyang mnyan par gyis/ /zhes bya ba la sogs pa la/ don ni don dam pa'o/ /tshig ni rab tu gnas pa ste/mi gnas pa'i mya ngan las 'das pa'o zhes bstan par bya ba'i phyir/ srid pa thams cad srid pa med pa ste/ /kun brtags srog dang smig rgyu 'dra ba yin/ /zhes bya ba gsungs te/ srid pa thams cad de/ 'byung bar 'gyur bas na srid pa'o/ /de dag 'byung bar 'gyur ba ma yin te ma skyes pa'i phyir/rang dang gzhan dang gnyi ga dang rgyu med pa las skye ba med pa nyid do/ /de la brtags pa'i ngo bos ma skyes pa'o/ /brtags pa yang gzung ba dang 'dzin pa'i rnam pa'o/ /gzhan gyi dbang gi ngo bos ni don dam pa'i skye ba yod do zhes bye brag tu smra ba dang /mdo sde pa dang / rnal 'byor spyod pa pa rnams zer ro/ /don 'di shes par byed 'dod pa ni/ kun du brtags pa'i ngo bo yis/ /chos rnams thams cad ma skyes pa/ /gzhan gyi dbang la brten nas ni/ /mi rnams kyi ni rnam rtog skye/ /zhes gsungs so zhes zer na/ de ni mi rigs te/gzhan gyi dbang yang skye ba med par sgrub par byed pa'i mdo sde yod pa'i phyir ro/ /de yang 'phags pa dgongs pa nges par 'grel ba'i mdo las/ mtshan nyid ngo bo nyid med pa dang / skye ba ngo bo nyid med pa dang / don dam pa'i ngo bo nyid med pa la dgongs nas ngas chos thams cad rang bzhin med pa dang /ma skyes pa dang / ma 'gags pa dang / gzod ma nas zhi ba/ chos thams cad rang bzhin gyis mya ngan las 'das pa'o zhes gsungs pa yin no/ /chos rnams kyi mtshan nyid ngo bo nyid med pa gang zhe na/ gang kun brtags kyi mtshan nyid gang yin pa'o/ /de ci'i phyir zhe na/ gang gi phyir ming dang brdas rnam par gzhag pa'i mtshan nyid de ni rang gi mtshan nyid ma yin te/phung po dang / khams dang / skye mched la sogs pa 'dus byas dang / 'dus ma byas dang / rang gi mtshan nyid dang / spyi'i mtshan nyid kyis stong pa'i phyir mtshan nyid ngo bo nyid med pa zhes brjod do/ /de la chos rnams kyi skye ba ngo bo nyid med pa ni chos rnams kyi gzhan gyi dbang gi mtshan nyid do//de ci'i phyir zhe na/ gang gi phyir de ni gzhan gyi rkyen gyis 'byung bar 'gyur gyi/ rang gi ngo bos ni ma yin no/ /rang gi ngo bor med pa de ni ma skyes pa'o/ /ma skyes pa ni rang gi ngo bor med pa'o zhes bya bas skye ba ngo bo nyid med pa zhes brjod do//don dam pa'i ngo bo nyid med pa gang yin zhe na/ chos rnams kyi yongs su grub pa'i mtshan nyid de/ de nyid la don dam pa ngo bo nyid med pa zhes brjod do/ /de ci'i phyir zhe na/ chos rnams kyi bdag med pa gang yin pa de ni don dam pa'o/ /de'i ngo bo nyid med pa zhes bya ba gang yin pa de ni don dam pa ngo bo nyid med pa zhes bya ba'o//dper na nam mkha' ji lta bu ni mtshan nyid ngo bo nyid med pa'o/ /sgyu ma byas pa ji lta bu ni skye ba ngo bo nyid med pa nyid do/ /ji ltar nam mkha' gzugs thams cad kyis stong pa tsam dang / thams cad du 'gro ba yin pa de bzhin du don dam pa ngo bo nyid med pa nyid blta ste/chos bdag med pas rab tu bsgos pa'i phyir dang / thams cad du 'gro ba'i phyir zhes bya ba'o/ /lung 'ba' zhig tsam gyis de skad smra ba ma yin gyi rigs pas kyang ji ltar skye ba med pa yin pa de ltar bsgrub par bya yis/ rna ba gtod la shes rab kyi rjes su 'brang ba rnams nyon cig /'bras bu 'byung ba na rgyu'i ngo bor 'byung ngam/ gzhan zhig 'byung ngam/ rang dang gzhan gnyis las 'byung ngam/ rgyu'i bya ba la ma ltos par skye bar 'gyur ram/ yod pa 'am/ med pa 'am/ gnyi ga'i ngo bo 'am/ rgyu du ma las 'bras bu gcig gam/ du ma zhig skyed pa 'am/yang na du mas du ma skyed par byed/ yang na gcig gis gcig skyed la/ du ma yang skyed dam/ rgyu zhig pa las 'bras bu 'byung bar 'gyur ram/ yang rgyu ma zhig pa las 'bras bu 'byung bar 'gyur zhes bya ba'i rnam par rtog pa 'byung bar 'gyur na de lta bu'i phyogs de dag thams cad kyang rang gi phyogs la gcig tu chags pas bsgos pa'i rtogs pas snying po med pa la snying por brtags par yang dag par mtshon par bya'o//de lta na yang 'bras bu rgyu'i rang bzhin du gyur na 'bras bu yang rgyu bzhin du 'grub pa'i phyir de skyes pa ma yin te rgyu'i rang gi ngo bo bzhin no/ /skyes pa dang bral bar khyod rang 'dod pas 'bras bu'i bdag nyid du gyur pa'i gtso bo ni rgyu nyid yin pa'i phyir zhes bya bas so//de yang ma skyes pa'i phyir bong bu'i rwa bzhin du rgyu nyid du mi rigs so/ /rang dngos bzhin du de gzhan min/ /rgyu ni rgyu ma yin par 'gyur/ /ma skyes nyid phyir gang gi ci/ /rgyu ma yin pa gang rgyur 'gyur/ /zhes bya ba yin no//gzhan dag kyang gnyis pa la ltos pas brjod par bya ba yin/ gnyis pa dang 'bras bu'i rdzas yin na de yang rgyu yod pa'i dus na de med la/ de yod pa'i dus na ni rgyu med pa de ci la ltos nas gzhan nyid yang dag par khas len par byed/ ba lang gi rwa la ltos nas rta'i rwa gzhan zhes brjod par ni mi nus so//mngon par 'dod pa'i rgyus mngon par 'dod pa'i 'bras bu skyed par byed pa yang gzhan nyid yin te/ mi mthun pa'i dngos po'i don yin no/ /'dod pa'i 'bras bu yang 'dod pa'i rgyu las ma yin te/ gzhan yin pa'i phyir de las gzhan pa bzhin no/ /smras pa ngo bo nyid kyi dngos med na//gang phyir gang la gzhan zhes brjod/ /ba lang rwa dang mi yi rwa/ /rta ru gzhan zhes brjod mi nus/ /gang yang mig la sogs pa'i rkyen/ /mig gi rnam shes skyed pa la/ /gzhan dag yang dag skyed min te/ /gzhan phyir re lde la sogs bzhin/ /'dod pa'i mig gi blo yi rgyu//mig blor mi 'dod gzhan nyid bzhin/ /snga nas yod pa ma yin bzhin/ /ji ltar bum pa gos sogs bzhin/ /gnyi ga las skye bar yang mi rigs te/ /yod pa dang med pa'i ngo bo dag ni phan tshun spangs te gnas pa'i mtshan nyid can yin pas lhan cig mnyam du gnas pa mi srid do//de nyid kyis na brjod du med pa'i phyogs kyang 'thad pa ma yin te/ brtags pa ma yin pa'i rang bzhin la tha dad pa dang / tha dad pa ma yin pa'i rnam par rtog pa ma spangs pa dang / gang yang 'di ma yin zhes bya bar gyur pa ni de yin zhes bya bar 'gyur bas gcig spangs par 'gyur ba de ni tha dad pa zhes bya'o//de spangs pas ni tha mi dad par 'gyur ro zhes bya ba yin no/ /dngos po rnams kyi gnas pa gzhan ji lta bu zhig gang na yod pa yin/ gang rgyu med pa las skye ba yang rigs pa ma yin te/ rgyu med gzhan la mi ltos phyir/ /rtag tu yod pa 'am med par 'gyur//zhes bya ba dang / de lta bas na/ bdag las ma yin gzhan las min/ /gnyi ga las min rgyu med min/ /dngos po gang dag gang na yang / /skye ba nam yang yod ma yin/ /zhes bya ba la bdag las skye bar ni grangs can 'dod do/ /gzhan las skye bar ni bde bar gshegs pa kha cig dang bye brag pa la sogs pa'o//gnyi ga las skye bar ni spyod pa pa dang / phyogs kyi gos can pa dag 'dod do/ /rgyu med pa las skye bar rang bzhin rgyur smra ba 'dod do/ /da ni 'bras bu rang gi ngo bo spyad par bya'o/ /yod pa skye ba yang ma yin te/ yongs su rdzogs pa yang skye ba'i don dgos pa ma yin te nges par grub zin pa'i ngo bo bzhin no/ /gzhan du yod pa de yang skye bar 'gyur na ni skyes zin pa nyid yang skye bar 'gyur ba'i phyir ro/ /med pa las skye bar yang rigs pa ma yin te/ nges par brtags pa na bong bu'i rwa bzhin du skye ba 'jug pa'i gnas med pa'i phyir ro//gzhan du na med pa thams cad gang ci yang rung ba las skye bar 'gyur bas des na rgyu dang 'bras bu nges pa med par 'gyur ro/ /so sor nges pa'i nus pa yod pas de ltar ma yin no zhe na de ni bden na dngos po'i nus pa so sor nges pa de dag kyang 'ga' zhig las 'ga' zhig 'byung bar 'gyur gyi/thams cad ni ma yin pas med pa dang khyad par med do zhes bya ba yin no/ /gang gi rgyu ni yod pa las/ /'byung phyir med las 'byung ma yin/ /zhes pa'o/ /gang yang med pa'i 'bras bu dang rgyu rkyen phrad cing reg pa med pas de'i phyir de dag las so sor nges pa'i 'bras bu dang 'brel pa med pas 'bras bu gang la nus pa nges par 'byung bar 'gyur zhes bya ba'o//dus dang mtshams nges pa'i nus pa yod pa ma yin no zhes bya bas thams cad las thams cad skye bar 'gyur ba ni bzlog par dka' ba yin no/ /yod pa dang med pa'i phyogs gnyi ga la brjod pa'i skyon dang ldan par 'gyur bas gnyi ga las skye ba yang rigs pa ma yin no//gcig la rang bzhin gnyis yod pa ni mi srid pas gnyi ga dang gcig ni phan [(]tshul [,]tshun [)]'gal ba yin no/ /de yang / yod las ma yin med las min/ /rkyen ni don la mi rigs te/ /med na'ang rkyen gyis ci zhig bya/ /yod na'ang rkyen gyis ci zhig bya//yod min med min gnyi ga yang / /gang tshe chos ni 'byung med pa/ /skyed byed rgyu ni de lta na/ /ji lta bur na rigs pa yin/ /bsdus pa dang ni so so yi/ /rkyen la de 'bras yod ma yin/ /rkyen dag la yang de ci ltar/ /gang yang rkyen la de yod min/ /zhes bstan pa yin no/ /gal te rgyu mang pos 'bras bu gcig skyed par byed na yang /de lta ni ngo bo tha dad pa'i rang bzhin can rgyu rnams las 'bras bu'i rang bzhin gcig pu zhig 'byung ba na lhan cig byed pa'i rgyus 'bras bu gcig skyed par byed pa na rgyu'i dbye bas 'bras bu'i dbye ba thob par mi 'gyur ro/ /de lta bas na dbye ba med par 'gyur te/rgyu la dbye ba yod na yang 'bras bu'i dbye ba 'thob par mi 'gyur ro/ /gang yang dbye ba yod pa las dbye ba 'byung bar 'gyur na ni dbye ba med pa las kyang dbye ba med par 'byung bar rigs te/ med na mi 'byung bar nges pa'i phyir ro/ /'dir ni de ltar mi 'gyur te/tha dad pa dang tha dad pa ma yin pa'i sna tshogs pa rnams rgyu med par 'gyur ro/ /de ma yin pa'i dngos po gzhan ni gang yang yod pa ma yin no zhes bya bas dngos po thams cad rang dbang du 'byung bar thal bar 'gyur ro/ /yang gal te rgyu'i rang bzhin tha dad pa dag las 'bras bu'i rang bzhin tha dad pa dag 'byung bar 'gyur te/rgyu'i bya bas ma dris pa bsgrubs pa'i 'bras bu'i ngo bo'i khyad par de lta bur 'gyur te/ ji ltar yul dang / dbang po dang / yid la byed pa'i tshogs pa las rnam par shes pa 'byung ba na yul gyis ni rnam pa skyed par mi byed kyi dbang pos kyang ma yin yid la byed pas kyang ma yin no//dbang pos ni yul so sor nges par 'dzin te/ gzhan gyis ni ma yin no/ /de bzhin du de yid la byed pas ni rtogs pa'i ngo bor 'gyur gyis gzhan gyis ni ma yin no/ /rgyu'i byed pa'i khyad par tha dad du zin kyang 'bras bu'i ngo bo tha dad par mi 'gyur te/ dbye ba med pa'i ngo bo yin pa'i phyir ro zhe na/de ni gang gi tshe mi'i gzhung khas blangs nas gnas pa rnams dang 'dra bas ji ltar na 'bras bu'i ngo bo gcig pu tha mi dad pa khyad par sna tshogs par 'gyur ba yin/ sna tshogs pa dang / gcig nyid ni phan tshun 'gal ba'i phyir ro/ /yul gyi rnam par snang ba yang rnam par shes pa las tha mi dad pas yul la sogs pas ji ltar byed pa de bzhin du de las tha mi dad pa'i yid la byed pas kyang de dag dang 'dra bar de dang tha mi dad pa'i yid la byed pa'i rtogs pa skyed par byed do//de dag kyang ma 'dres par gnas pa yin no/ /de bas na skyon 'di yod na mi rung ngo zhes 'bras bu las tha dad pa'i bye brag rnams su 'gyur ro zhe na/de lta na yang rgyu'i bya ba'i khyad par gyi sbyor ba dang ldan pas de'i 'bras bu rgyu med par thal bar 'gyur ro zhes bya ba yin no/ /'bras bu las ni yin pa yis/ /khyod ni khyad par 'dod par byed/ /dbye ba de ni gzhan min te/ /des na dbang phyug ci zhig byed//rtogs pa'i dngos las gzhan min phyir/ /gzugs las de ni byung ma yin/ /rnam pa las gzhan ma yin na/ /yang de'i gzugs las 'byung bar 'gyur/ /'byung dang 'byung ba ma yin dang / /skyed dang skyed pa ma yin nyid/ /gcig nyid las ni dus gcig tu/ /'byung ba mi 'gal khyod kyis smros//'on te 'di dag gzhan min nyid/ /rnam par dbye ba ji ltar rigs/ /smras pa'i skyon du thal 'gyur bas/ /glang chen gyi ni khrus dang 'dra/ /zhes bya ba'o/ /gang yang rgyu gcig gis 'bras bu gcig skyed par byed do zhes zer na/ de ltar na ni thams cad long ba dang 'on pa'i skyon du thal bar 'gyur te/mig la sogs pa rang gi rigs mthun par skyed pa'i skad cig la rnam par shes pa skyed par byed pa ma yin la/ gang gi tshe rnam par shes pa skyed pas skad cig la rang gi rigs mthun pa mi skyed pas skad cig gnyis pa la mig la sogs pa med pas de long ba la sogs par thal bar 'gyur ba bzlog par dka'o//dbang phyug la sogs pa byed pa'i rgyu gcig gis 'bras bu du ma nyid skyed par 'dod pa de yang tshad ma thams cad kyis gnod pa yin te/ rgyu tshogs pa'i rim gyis 'bras bu 'byung bar mthong ba'i phyir ro/ / gal te rgyu zhig pa'i rjes la 'bras bu 'byung bar 'gyur ro zhe na/ de lta na ni rgyu med par thal bar 'gyur te zhig pa ni nam mkha'i me tog dang 'dra ba yin pas rgyur rung ba ma yin no/ /ma zhig pa las skye bar 'gyur zhe na/ de lta na yang rgyu dang 'bras bu dus mnyam pa nyid du 'byung bar thal bar 'gyur ro//ba lang gi rwa g.yas g.yon bzhin du dus gcig tu byung ba la rgyu dang 'bras bu'i ngo bo yod pa ma yin no/ /med pa'i sngon du nus med la/ /nus pa'i dus su 'bras bu'ang yod/ /rgyu dang 'bras bu dus gcig tu/ /'byung ba gsal por 'gal ba yin/ /zhes bya ba yin no/ /yang na skyes par gyur pa'i rdzas la phyis 'bras bu dang dus mnyam du yang dmigs pa yin no zhes 'dod pas dus mnyam par gnas pa mi 'gal lo zhe na/de lta na ni/ 'dus byas thams cad skad cig ma/ /zhes gsungs pas skad cig ma gnod pas shin tu yang 'bras bu skyed par rigs pa ma yin no/ /'on te rgyu 'gag par 'gyur ba'i dus su 'bras bu skye bar 'gyur ba la skyon 'di yod pa ma yin no zhes dam 'cha' bar byed na de la yang brjod par bya ste/rgyu'i 'jig pa zhes bya ba gang yin/ ci'i rgyu'i ngo bo nyid yin nam/ skad cig las mi gnas pa'i chos zhig pa yin zhes bya ba yin nam/ yang na rgyu thams cad du dmigs par ma gyur pa yin nam/de lta na ci nyes she na/ rgyu'i ngo bo nyid yin na ni de lta na yang rgyu dang 'bras bu dus gcig pa nyid du thal bar 'gyur ro/ /'on te rgyu zhig pa nyid yin no zhe na/ 'bras bu dang dus mnyam pa nyid ga la yod/ yang dngos po med pa zhes bya ba res 'ga' ba yin no zhe na/de yang rigs pa ma yin te res 'ga' ba nyid du gyur pa ni rgyu dang bcas pa nyid dang / rdzas nyid du thal bar 'gyur te rnam par shes pa bzhin no/ /yang smras pa/ re zhig nyams pa'i rgyu las kyang / /'bras bu 'byung bar mi rigs la/ /ma nyams las min rmi lam dang //'dra bar khyod kyis 'byung bar 'dod/ /ma zhig pa las 'bras skye na/ /de tshe 'bras bu ci ste med/ /zhig par gyur las 'bras skye na/ /de tshe 'ang 'bras de gang las byung / /zhes bya ba yin no/ /de lta bas na dngos po'i don rnams kyi skye ba brtags pa ji lta ji ltar dpyad pa byas pa de lta de ltar rigs pa bzod pa ma yin no//de'i phyir rgyu dang bcas pa'i srid pa rnams snying po med pa dngos po med pa/ ma skyes pa yin na skye ba la sogs pa'i tha snyad ji ltar rung zhe na/ smras pa/ kun brtags te mi bden pa'i kun du brtags pa tsam/dngos po rnams brtags pa tsam du byung ba'o/ /de'i phyir/ gsog dang smig rgyu 'dra ba yin/ /zhes bya ba gsungs te/ gsog ni smig rgyu la chu yod pa ma yin pa'o/ /de dang 'dra ba'i gzugs la sogs pa'i dngos po thams cad dngos po med pa'i ngo bo nyid do/ /sgyu ma ste sprul pa dang /nam mkha'i me tog gi dri dang 'dra ba yin no/ /glog dang sprin 'dra ste g.yo ba dang / stong pa nyid de/ de dag ji lta ba bzhin du brtags pa na yang g.yo ba dang / glog ltar skad cig ma'i rang bzhin dang / sprin bzhin du yongs su ma grub pa'i ngo bo nyid kyi phyir stong pa'o//gang zag la bdag med par bstan pa'i sgo nas skye ba med par bsgrubs pas chos la bdag med pa yang bsgrub par 'gyur ro zhes bstan par bya ba'i phyir/ bdag dang sems can srog kun med/ ces bya ba ni chos thams cad bdag med pa dang / sems can med pa dang / srog med pa zhes bya ba ni ji lta bu zhig bdag la sogs pa rdzas su gyur pa rnams yod de/rigs pa pa dang / bye brag pa dang / spyod pa pa dang / grangs can la sogs pa'i bar dang / phyogs kyi gos can la sogs pa rnams yod pa ma yin pa'i bdag la sogs pa khas blangs nas de bsgrubs pa'i phyir rigs pa smra ba bcom par byed do//de dag las rigs pa smra ba pas smras pa/ gang yang bdag med na las dang 'bras bu dag dang / byed pa po dang / spyod pa'i rnam par gzhag pa rnyed par mi 'gyur te/ byed pa po gcig nyid med na byas pa chud zos pa dang / ma byas pa dang phrad par thal bar 'gyur ro/ /de dag gi yod pa nyid dang /rtag pa nyid dang / khyab pa nyid dang / byed pa po nyid dang / spyod pa po nyid sgrub par byed pa'i tshad ma rjod par byed do/ /yod pa nyid ni re zhig legs ldan byed tshad ma 'god pa ni yod pa la sogs pa drug po'i khyad par yul du gyur pa dang / yul du gyur pa ma yin pa mngon sum dang /rjes su dpag pa dang / nye bar 'jal ba dang / sgra las byung ba dang / dran pa dang / so so shes pa dang / grub pa'i lta ba dang / grub pa'i shes pa dang / yid gnyis dang / phyin ci log dang / so sor ma brtags pa dang / rmi lam gyi rmi lam ste bdag gi shes pa'i khyad par rnams kyis lus las tha dad pa'i rig par bya ba rig par 'gyur te/rang gi rgyu las byung ba'i skye ba yin pa'i phyir/ skyes bu gzhan gyi shes pa bzhin no/ /chos mi mthun pa ni zhig pa'i bum pa la sogs pa bzhin no/ /de la yod pa la sogs pa khyad par drug ste/ yod pa dang / mi rtag pa dang / rdzas dang ldan pa dang / 'bras bu dang / rgyu dang / spyi'i khyad par zhes bya ba las drug po de dag gi yul la rdzas dang / yon tan dang / las rnams ni yul du gyur pa'o/ /yul du ma gyur pa ni spyi dang / khyad par dang / 'du ba'o/ /'di dag gnyi ga yang shes bya ste yul lo/ /gang dag mngon sum la sogs pa la de skad ces bya'o//grub pa'i lta ba ni rtsis kyi bstan bcos dang 'brel pa ste/ grub pa rnams kyi lta ba yin pa'am/ grub par byed pa'i lta ba yin pas grub pa'i lta ba zhes bya'o/ /spobs pa'i shes pa ni grub pa'i shes pa zhes bya ba ste/ sang nga'i phu bo 'ong ngo zhes bya ba lta bu'o//yang na ni drang srong rnams kyi shes pa yin pas grub pa'i shes pa zhes bya'o/ /yid gnyis ni the tshom mo/ /phyin ci log ni phyin ci log tu gyur pa'o/ /rmi lam ni dang po'i rmi lam gyi gnas skabs kyi rkyen gyi rmi lam mo/ /rmi lam gyi rmi lam ni rmi lam gyi nang du rmi lam gzhan byung ba'o//'di dag bud med rnams dang dmangs rigs rnams ngo mtshar bskyed pa'i phyir rna ma phug pas bstan pa yin no/ /snang bar byed pa bas tshad ma 'god pa ni lhas byin ngas yid ches pas rab tu sbyor bar byed de/ gzugs dang / ro dang / dri dang / reg pa'i rkyen gcig pa dang / du ma'i mtshan ma can yul sna tshogs kyi rkyen de dag nyid la mtshan ma gcig dang rab tu sbyor ba'i mtshan ma gcig pu gang yin pa de ni bdag ces bya'o//bdag ces bya ba'i tshig ni lus dang / dbang po dang / yid dang / blo dang tshor ba la sogs pa bsdus pa las tha dad gyur pa'i yul te/ sgra gcig pa'i phyir bum pa bzhin no zhes bya ba'o//de bzhin du 'tsho ba dang bcas pa'i lus 'di ni bdag med pa ma yin te/ srog la sogs pa dang bral bar thal bar 'gyur ba'i phyir bum pa bzhin no zhes bya ba'o/ /de ltar yod par smra ba'i tshad ma brjod nas/ rna ma phug pas rtag pa nyid dang khyab pa nyid kyis tshad ma brjod pa'i phyir smras pa/ngas dang po ma'i mngal nas byung ma thag pa'i yul rig pa'i shes pa de nyid phyi ma'i dus tha ma'i yul rig pa'i shes pa yang de nyid yin te/ rang gi shes pa yin pa'i phyir dang po'i rang gi shes pa bzhin no zhes zer ro/ /khyab pa'i tshad ma yang de nyid yin te/ sa dang chu dang /me dang / rlung dang / yid ces bya ba rnams ni rtsod pa'i yul du gyur pa yin te/ ring du gyur pa na gnas na yang nga yi bdag dang 'brel ba yin te/ thogs pa dang bcas pa nyid dang / shugs dang bcas pa nyid dang / gzhan nyid dang / gzhan ma yin pa nyid dang /phan tshun yang dag par sbyor ba'i rnam par dbye ba nyid kyi phyir bdag nyid kyi la sogs pa bzhin zhes bya ba'o/ /de dag gis ni yod pa nyid dang / rtag pa nyid dang / khyab pa nyid du bsgrubs pa yin no/ /gal te de ltar rtag pa nyid dang / khyab pa nyid yin na yang byed pa po nyid dang / spyod pa po nyid dang /skye ba dang / rga ba dang / 'chi ba dang / srog dang / gsod pa la sogs pa 'gal bar mi 'gyur ro/ /de ltar na yang shes pa dang / byed par 'dod pa dang / 'bad pa rnams bdag med la mnyam du tshogs pa ni byed pa po zhes bya ba'o/ /bde ba dang sdug bsngal yang dag par rig pa mnyam du tshogs pa ni spyod pa po zhes bya'o//de yang bde ba dang sdug bsngal gyi rkyen ni longs spyod do/ /de bdag nyid la mnyam du tshogs pa ni spyod pa po nyid do/ /skye ba ni lus dang dbang po dang blo dang tshor ba la sogs pa rigs rnam par dag pa rnams su sngon ma thob par mngon par sbyor ba'o/ /sngon gyi de dang bral ba ni 'chi ba'o//lus dang bcas pa'i bdag dang / yid sbyor ba chos dang chos ma yin pa la ltos pa ni srog ces bya ba'o/ /dgos pa'i rten dang byed pa'i rgyun la gnod pa byed pa ni gsod pa zhes bya'o/ /de'i don ni 'di yin te/ sems can 'chi ba med pa'i chos can la bde ba la sogs pa yang dag par myong ba'i tshor ba 'bras bu'i rten lus dang /yul nye bar dmigs pa'i byed pa po dbang po rnams kyi rgyun gcod pa la gsod pa zhes rnam par 'jog par byed do/ /de dag la lan gdab par bya'o/ /gang rtag pa la sogs pa'i sbyor bas tshig gi don drug gis yul nyid la mngon sum la sogs pa gsungs pa de ma grub pa yin te/mngon sum gyi rdzas dang / yon tan dang / las dang / spyi dang / khyad par dang / 'du ba rnams mi 'dzin pa'i phyir ro/ /mi 'dzin pa yang mig la sogs pa ni yul so sor nges pa'i phyir ro/ /de yang mig gis gzugs nyid 'dzin gyi ro la sogs pa ni ma yin te/ dbang po lhag ma rnams don med par 'gyur ba'i phyir ro/ /de bzhin du rna bas sgra nyid 'dzin gyis gzugs la sogs pa ni ma yin no/ /de bzhin du lhag ma rnams kyang rang rang gi yul 'dzin par nges pa yin no/ /gang gis gzugs la sogs pa de dag la tha dad pa'i rdzas la sogs pa gzung bar 'gyur/ gal te rjes su dpag pas bsgrub par bya'o zhes zer na/ de lta na yang mngon sum sngon du 'gro ba yin pas de med par ji ltar de la 'jug pa spro bar byed/ bdag gi shes pa'i khyad par rnams kyis lus las tha dad pa'i rig par bya ba rig par 'gyur te zhes bya ba ni grub pa sgrub pa yin te/ khyod kyi yul las tha dad pa'i thams cad mkhyen pa dang /'dod chags dang bral ba'i rnal 'byor pas rig pa'i phyir ro/ /gang yang skyes bu gzhan gyi shes pa bzhin no zhes chos mthun pa'i dper bstan pa de yang bsgrub byas stong pa yin te/ rnam par shes pa thams cad rang rig pa'i bdag nyid can nyid do//shes pa gzhan gyis rig par 'dod pa'i phyogs ltar na thug pa med par thal bar 'gyur ba bsgrub pa med pa'i skyon du 'gyur ro/ /gang dag ma lus pa 'di dag ni rnam par shes pa nyid do/ /rang rig pa'i mthar thug pa'i phyir de las gzhan dag yod pa ma yin no zhes bya ba'i lta ba ltar na ni gsal po nyid du grub pa sgrub pa'i skyon du 'gyur ba'o//de bzhin du gzhan dag la yang gtan tshigs kyi gzhan dbang du gyur pa'i skye ba dang ldan pa la grub pa sgrub pa'i skyon brjod par bya'o/ /gang yang snang bar byed pas smras pa'i lhas byin gzugs la sogs pa dang so sor sbyor ba'i shes pas bdag gis mthong ngo //bdag gis thos so zhes bya bas byed pa po gcig nyid go bar byed pa yin pas gang dang so sor sbyor ba de nyid bdag yin no zhes zer ba de ni rig pa ma yin te/ rtag pa dang / thams cad du rtog pa dang / gcig pu nyid de lta bu dang so sor sbyor ba ma mthong ba'i phyir mi srid pa nyid do//rtag pa dang / thams cad du rtog pa dang / byed pa po dang / spyod pa po dang / rjes su sbyor ba nyid la sogs pa rjes su 'gro ba dang med na mi 'byung ba med pa'i phyir/ mo gsham gyi bu bzhin du brtags pa tsam mo/ /de lta na gang dang so sor sbyor bar byed ce na/ sems skad cig ma nyid la thog ma med pa'i dus kyi ma rig pas gcig pa nyid du sgro btags nas so sor sbyar ba'i rnam par 'khrul pas dngos po dang ma reg pa ni dngos po'i de kho na nyid dang so sor mi sbyor bar byed ce na/de lta bas na bdag yod par rtog pa ni shin tu sdig pa can yin no/ /tshig gcig nyid kyis zhes bya ba'i bsgrub par bya ba yang bdag gi mi mthun pa'i phyogs sgrub par byed pa yin te/tshig gi brjod bya ni spyi yin la/ bdag ni spyi ma yin pas so/ /gzhan sel ba'i yul can yin pa'i phyir tshig gi yul ni med pa'o/ /des ni bdag ni ma yin no zhes bsgrub par 'gyur ro/ /gang yang srog dang bcas pa'i lus 'di ni bdag med pa ma yin te/srog la sogs pa med pa ltar thal bar 'gyur ba'i phyir shin tu yang 'brel pa med pa yin te/ srog la sogs pa dang bdag la 'brel pa grub pa med pa'i phyir ro/ /de'i bdag nyid kyi 'brel pa ni ma yin te tha dad kyi dbye ba khas blangs pa'i phyir ro/ /de las byung ba'i 'brel pa yang ma yin te rtag pa ni rim dang cig car/don bya ba byed pa 'gal ba'i phyir ro/ /de la re zhig rim gyis skyes pa'ang mi rigs te/ skyed par byed pa dang / skyed par byed pa ma yin pa'i rang bzhin gnyis dus gcig tu gcig la 'gal ba'i phyir ro/ /lhan cig byed pa stong gis kyang 'gyur ba med pa la lhag par phan gdags par nus pa mi srid pas lhan cig byed pa la ltos pas rtags la ci zhig dgos/cig car skyed par byed pa yin na yang skad cig gcig la thams cad skyed par byed do zhes bya bas skad cig gnyis pa la bya ba med pas dbugs dbyung 'jug rgyun chad pa'i 'chi ba'am/ yang na dngos po thams cad mi dmigs pa'i grol ba thob par 'gyur ro/ /yang med na mi 'byung ba'o zhes rtog na yang rjes su mthun pa ma yin no/ /gang yang rtag pa nyid dang / khyab pa nyid du sgrub par byed pa'i gtan tshigs gnyis nye bar bkod pa de dag kyang shing tu 'brel pa med pa yin te/ chos can med pa nyid de bdag ni chos can du ma grub pa'i phyir ro//'on te lus phyogs su byas nas dang po'i rnam par shes pa skyed par byed pa de nyid kyis dus phyi mar byung ba'i rnam par shes pa yang skyed par byed do zhes zer ba de yang rig pa ma yin te/ de nyid las 'di yang skyes so zhes bya ba la tshad ma yod pa ma yin no//de la re zhig mngon sum ni sngon dang phyi ma'i dngos po la 'jug pa ma yin no/ /rjes su dpag pa yang mngon sum sngon du 'gro ba nyid yin pas de med na de 'jug pa ma yin no/ /rjes su dpag pa nyid sngon du 'gro ba yang thug pa med par 'gyur ro/ /sbyor ba gnyis pa gzugs dang ldan pa'i phyir bdag gi lus bzhin no zhes bya ba'i dpe nyid bdag dang 'brel par ma grub pa yin na thams cad du 'gro ba dang khyab pa nyid lta ga la yin/byis pa'i tshig bzhin 'brel pa med par 'gyur ro/ /byis pas smras pa sun 'don pa'i phyir rgal ba'i lan brjod par bya ste/ gang la skye ba med pa de la 'gag pa yang med pa'i phyir de la sems can yang med de ri bong gi rwa bzhin no//gzhan gyis 'dod pa'i bdag la ni skye ba yang med/ 'gag pa yang med do zhes bya ba ni khyab par byed pa mi dmigs pa yin no/ /de bzhin du gang rim gyis sam/ cig car yang rung / don bya ba byed pa de ni rtag pa yang ma yin/khyab pa yang ma yin/ med pa yang ma yin pa'i phyir/ mar me dang / sa bon dang / myu gu dang / 'khri shing la sogs pa bzhin no/ /rim gyis sam/ cig car yang rung / don bya ba byed pa las log pa de ni rtag pa nyid dang / khyab pa nyid med pa ma yin pa las log pa'i phyir med pa ma yin pa dang 'gal ba'i yod pa nye bar dmigs pas khyab par byed pa 'gal ba dmigs pa yin no//yang na gang rim gyis sam/ cig car yang rung bas don bya ba byed pa ma yin pa de ni yod pa ma yin te/ ri bong gi rwa dang / rus sbal gyi spu la sogs pa bzhin no/ /rim gyis kyang rung /cig car yang rung bas don bya ba byed pa bdag rtag pa la yod pa ma yin no/ /rim gyis sam/ cig car gyi mtshan nyid kyis don bya ba byed pa rtag pa las log pas khyab par bya ba sems can yang ldog pa zhes bya ba ni khyab par byed pa mi dmigs pa yin no/ yang na gang yang rdzas nyid dang /yod pa nyid dang / byed pa po nyid dang / skye ba dang / ldan pa nyid la sogs pa'i chos dang ldan pa de dag thams cad bdag med pa'i phyir phyi rol gyi bum pa la sogs pa bzhin no/ /rdzas nyid la sogs pa'i chos dang ldan pa'i nang gi bdag nyid can gyi srog dang bcas pa'i lus dang /yid dang / blo dang / bde ba dang / sdug bsngal la sogs pa yang zhes bya ba ni rang bzhin gyi gtan tshigs so/ /rim pa 'di nyid kyis spyod pa pa la sogs pa la yang mngon sum la sogs pa'i tshad mas gnod pas bdag la sogs pa khas len pa'i rgol ba rnams kyang sun phyung bar 'gyur ro//de lta na yang chung zad tsam bstan par bya'o/ /de la spyod pa pa ni rjes su 'gro ba dang ldog pa'i rang bzhin gyis sems pa bde ba dang / sdug bsngal la sogs pa'i ngo bor rjes su song ba bdag gi de kho na nyid khas len par byed de gcig tu med par gyur na ni byas pa chud zos pa dang /ma byas pa dang phrad par 'gyur ro/ /gcig tu skyes bu rtag par gyur na ni byed pa po'i rang gi ngo bo ma btang bas spyod pa po nyams par 'gyur ro zhes bya ba'o/ /de yang gzhon nu ma len gyis/ de'i phyir gnyi ga spangs nas ni/ /ldog dang rjes 'gro'i bdag nyid kyi//skyes bu khas blang bya ba ste/ /bskyil la sogs pa'i sbrul dang 'dra/ /zhes smras pa yin no/ /byed pa po dang / spyod pa po nyid ni bdag la brten pa yin gyi/ gnas skabs la brten pa ni ma yin no/ /de nyid ni byed pa po dang / spyod pa po nyid du shes pa stobs kyis rnam par 'jog par byed do//de ni bdag nyid mngon sum du byas pa na rtag pa 'das pa dang / ma 'ongs pa dang / da ltar byung ba'i rnam pa bdag gi yul yin pa'i phyir bdag shes pa dang ldan no/ /bdag gis shes par 'gyur ro/ /bdag gis shes so zhes yul gcig gnyis su nges par byed do zhe na/de lta bu ni shin tu tshad ma la mkhas pa'i bram ze rnams la srid pa yin no/ /de yang mngon sum ni gnyis ka'i bdag nyid can 'das pa dang / ma 'ongs pa la sogs pa'i dus la khyab pa'i dngos por rab tu shes pa'o zhes bya bas ni 'di skad bstan par 'gyur te/ 'das pa zhes bya ba ni nyams pa'o//ma 'ongs pa ni da dung ma byung ba'o/ /de dag mngon sum gyis rab tu rig go zhes smras pas yod pa dang rab tu sbyor ba'i mdo'i rtsa bas gnod par 'gyur ba ni/ ma 'ongs pa ni ma mthong bas/ /mngon sum gyur pa ci yang med/ /ces bya ba la sogs pas 'das pa dang / ma 'ongs pa la sogs pa'i yul la sbyor bas 'jug pa la rtsod pa'i skyes bus byas pa ma yin pas bsgrubs pa'i 'bad pa 'bras bu med par 'gyur te/de'i phyir mngon sum ni da ltar byung ba'i yul tsam 'dzin par nges par shes par bya'o/ /de ltar na sngon dang phyi ma dang bral ba'i da ltar byung ba'i ngo bo tsam gyis bdag rang rig par bya bar shes par bya'o zhes bya bas rnam par shes pa nyid dang /sngon dang phyi ma'i rjes su 'gro ba dang bral ba skad cig ma rang rig par bya ba'i bdag nyid khas blangs pa ni bdag ces ming gi rnam pa gzhan brtags par zad do/ /gal te rjes su dpag pas bdag rtag pa nyid du sgrub par byed do zhes bya zhe na/de lta na yang mngon sum sngon du 'gro ba'am/ rjes su dpag pa sngon du 'gro ba na rjes su dpag pa sngon du 'gro ba yin na ni thug pa med par 'gyur ro/ /mngon sum la 'jug pa sngon du ma song bar yang ji ltar rjes su dpag pa la 'jug par nus par 'gyur/ gzhan yang bdag tu nga rgyal ba'i stobs kyis bdag sgrub par byed na yang lus la dmigs nas bdag rid do/ /tsho'o/ /dmar ser ro zhes spyi'i dbang du byas nas smra yi/ bdag ni bdag gi spyi'i dbang du byas nas ni ma yin no/ /des na 'di skad smras par 'gyur te/ mig la sogs pa'i bdag nyid can lus tsam la dmigs nas bdag ces bya bar rtogs par 'gyur ro//de la 'gal ba med de/ ming tsam du byas nas byed pa po nyid la sogs pa yang rnam par shes pa skad cig ma'i khyad par can gyi rgyu dang 'bras bu'i ngo bo las gzhan ni med do/ /byas pa chud zos pa dang /ma byas pa dang phrad par 'gyur ro zhes rtsod pa de yang rtsod pa ma yin pa nyid do/ /de lta bas na spyod pa pas brtags pa'i bdag ni btags pa 'ba' zhig kho na'o/ /phyogs kyi gos can pa ni mngon sum nyid kyis 'jug pa dang / ldog pa'i ngo bo shes pa'i bdag nyid kyis bdag nye bar dmigs so zhes smras pa de ltar na yang bde ba dang sdug bsngal la sogs pa'i gnas skabs kyi dbye bas phye ba yod kyang gang yang gnas skabs can ni gnas skabs thams cad du rtogs pa'i ngo bor nye bar dmigs te/de yang rdzas su yod pa'o/ /rnam grangs kyang rim gyis goms pa las bde ba dang / sdug bsngal gyi gnas skabs dbye ba yin la/ de yang mngon sum gyis grub pa yin no/ /de lta na yang yul dang dus dang ngo bo nyid dbye ba med pa chos dang chos can gyi dbye ba med do/ /grangs dang / ming dang / mtshan nyid dang / 'bras bu'i dbye bas ni dbye ba yod de/ dper na bum pa dang / gzugs la sogs pa bzhin no zhes bya bas bum pa dang /de'i gzugs la sogs pa dang / yul la sogs pa dbye ba yod do/ /gang yang yul bum pa'i yul dang / dus dang / ngo bo nyid ni gzugs la sogs pa'o/ /grangs la sogs pas ni bum pa'i gzugs la sogs pa la dbye ba yod do/ /de yang bum pa ni gcig go/ /gzugs la sogs pa ni mang po'o zhes bya ba ni grangs kyi dbye ba'o//gdu bu dang / rna cha dang / rkang gdub dang / kham phor zhes bya ba ni ming gi dbye ba'o/ /rjes su 'jug pa'i mtshan nyid ni rdzas so/ /ldog pa'i mtshan nyid ni gzugs la sogs pa'o zhes bya ba ni mtshan nyid kyi dbye ba'o/ /bum pa'i dgos pa ni chu len pa'i dgos pa/ gzugs la sogs pa'i ni rang dang rjes su mthun par bsgyur ba'i 'bras bu'o zhes bya ba ni 'bras bu'i dbye ba'o zhes zer na de la brjod par bya'o//gang yang rtogs pa'i ngo bo'i bdag nyid rdzas kyi rnam grangs dang sbyor bar byed pa na ci sngar gyi rang gi ngo bo dang sbyor bar byed dam/ yang na sngar gyi ngo bo yongs su gtong bar byed ces rnam par rtog par byed na/ de la rtog pa dang po ltar sngon dang phyi ma'i gnas skabs su khyad par med pas rtogs pa de yongs su gyur pa ma yin zhes bya ba ji lta bu yongs su gyur pa zhes bya ba ni sngon gyi gnas skabs yongs su btang nas gzhan zhig yongs su gzung ba la brjod do//de la mi 'gyur ba'i rang bzhin med pas tshig tsam gyis yongs su gyur par rigs pa ma yin no//sbyor ba ni gang la sngon dang / phyi ma'i gnas skabs su khyad par med pa de ni yongs su 'gyur ba ma yin te nam mkha' bzhin no/ /rtogs pa la yang sngon dang phyi ma'i gnas skabs khyad par med pa zhes bya ba ni khyab par byed pa mi dmigs pa'o/ /gal te rnam par rtog pa gnyis pa ltar na yang sngar gyi rang gi ngo bo yongs su btang nas gzhan gyi ngo bor skye bar 'gyur te/thag pa las ras yug byung ba bzhin zhes bya bas ji ltar de yongs su gyur pa yin/ sbyor ba ni gang gi tshe mi 'gyur ba'i ngo bor gnas pa ma yin par gang gyur pa de ni yongs su gyur pa ma yin te/ mi 'gyur ba'i rang bzhin gyi bum pa yod bzhin du ras yug byung bar gyur pa bzhin no//sngar gyi rang gi ngo bo yongs su bor bas ngo bo gzhan zhig tu gyur pa zhes bya ba ni khyab par byed pa'i 'gal ba dmigs pa'o/ /gang yang gnyi ga'i bdag nyid yin pas gcig tu rdzas kyi rnam grangs la dbye ba yod pa yang ma yin/ dbye ba med pa yang ma yin no/ /de lta na yang tha dad pa dang /tha dad pa ma yin pa dang gnyi ga yang rung ji skad bstan pa'i skyon yod pa ma yin no zhe na/ de lta na yang mdzes pa ma yin te/ gal te rdzas kyi rnam grangs kyi dbye ba med par khas len par byed na/ de ltar na bdag nyid thams cad kyis dbye ba med pa'i phyir de las zlog pa'i dbye ba yod par ji ltar 'gyur/gcig la dus gcig tu dgag pa dang sgrub pa phan tshun 'gal ba rigs pa ma yin no/ /sbyor ba ni gang dbye ba med pa der de dang 'gal ba'i dbye ba dmigs par mi 'gyur te/ ji ltar de'i rnam grangs kyi rdzas rnams la thun mong ma yin pa'i rang gi ngo bo so sor nges pa bdag nyid kyi ngo bo de'i rang bzhin ni dbye ba med la/dbye ba med pa'i rdzas kyi rnam grangs gang yin pa de ni nges par gnas so zhes bya ba ni 'gal ba dmigs pa'o/ /yang na ldog pa dang ldan pa rang gi ngo bo las tha mi dad pa de ni ldog pa dang ldan pa'i phyir/ ji ltar rnam grangs kyi rang gi ngo bo las ldog pa dang ldan pa'i rang bzhin las tha mi dad pa'i rdzas zhes bya ba ni rang bzhin gyis gtan tshigs so//yang na gang rjes su 'gro ba'i bdag nyid can gyi gzugs las tha mi dad pa'i phyir de ni rjes su 'gro ba'i bdag nyid kho na ste/ rdzas kyi rang bzhin no/ /rjes su 'gro ba'i bdag nyid can gyi ngo bo las tha mi dad pa'i rang bzhin gyi bde ba dang /sdug bsngal la sogs pa'o zhes bya ba ni rang bzhin gyi gtan tshigs so/ /gzhan du chos 'gal ba'i gnod pa yod par gyur na yang dbye ba med pa yin te/ dbye ba med pa'i phyir dbye ba yang yod par mi 'gyur te/ dbye ba dang dbye ba med pa'i tha snyad du rgyun chad pas 'gro ba rnams kyang 'jug pa dang ldog pa med par 'gyur ro zhes bya ba ni ldog na gnod pa can gyi tshad ma yin no//de lta bas na rjes su 'gro ba dang ldog pa'i ngo bo dang bral ba sngon dang phyi ma'i rang bzhin gyis dben pa/ da ltar byung ba tsam gyi dngos po nye bar 'dzin pa/ rang rig pa'i bdag nyid ni mngon sum zhes bya bas bdag med pa mngon sum du grub pa yin no/ /mngon sum gyis grub kyang rjes su dpag pa nye bar 'god pa ni bdag med pa rnams la pha rol po rnams kyi rang gi bya bas rgol ba rnams bzlog pa'i phyir yin pas 'di la mngon par zhen par mi bya'o snyam du dgongs pa'o//bdag tu lta ba mthug po 'dzings pa'i nang du zhugs pa'i mu stegs tshad ma ngan pa'i rlung gis shing bal bzhin bdas la/ zhi shes brag ri phye mar rlog pa'i thog lhung bas/ /bye mar brlag pas phyis 'byung bar ni ga la 'gyur/ /de ltar na chos thams cad bdag med pa/sems can med pa/ srog med pa'o zhes bshad pa yin no/ /gzod ma nas ni stong zhing ma 'ongs chos/ /zhes bya ba la sogs pa la/ gal te phyi rol gyi dngos po'i don med pa dang / bdag med pas bdag med pa rnam par gzhag pa yin na yang / de ltar na yang gang zag la bdag med pa yin gyi/chos thams cad la bdag med pa ni ma yin te/ rnam par shes pa'i chos sun ma [(]byung [,]phyung [)]ba'i phyir ro zhes bya ba'i the tshom dang bral ba'i gzod ma nas ni stong zhing zhes bya ba la sogs pa'i don ni gzod ma nas zhi ba dang ma skyes pa dang zhes bya ba la sogs pa ste/gzugs dang / tshor ba dang / 'du shes dang / 'du byed rnams dang / rnam par shes pa'i phung po rnams ma skyes pas na gzod ma nas zhi ba'o/ /ji ltar phyi rol med pa de bzhin du rnam par shes pa yang ma skyes pa'i phyir gzod ma nas zhi ba zhes bya'o/ /phung po lnga stong pa nyid du bsgrubs pas chos thams cad stong pa nyid du bsgrub pa yin pa'i phyir des na gang nas kyang 'ongs pa med/gar yang song ba med/ gang du yang gnas pa med pa ste/ rang bzhin gyis gnas pa med pa'i phyir ro/ /sgyu ma'i rang bzhin rtag tu snying po med/ /ces bya ba la/ snying po med pa ste/ thams cad du phyi dang / nang gi dngos po rnams la bdag la sogs pa'i snying por gyur pa'i rdzas ci yang med pa'o/ /sgyu ma'i rang bzhin te/ gzugs brnyan tsam gyi byis pa rnams rnam par rmongs par byed do/ /don dam par ni/ thams cad dag cing rnam dag nam mkha' bzhin/ /zhes bya ba ni dag pa ste rang bzhin gyis rnam par dag pa'i phyir sprin dang /khug rna la sogs pa lta bu dang bral bas chos thams cad rnam dag nam mkha' bzhin zhes bya ba'o/ /mi sngo mi ser dkar po ma yin te/ /zhes bya ba la sogs pa la/ sngon po dang / ser po dang / dkar po la sogs pa'i kha dog dang bral ba'i phyir te/sngon po la sogs pa'i yon tan ni rdzas la brten pa'i phyir rdzas kyi rang bzhin med na de la brten pa rnams shin tu yang ring thung med pa kho na'o zhes bya bas ming 'ba' zhig tsam mo/ /de yang nang na yang med/ phyi rol na yang med/ gnyi ga'i bar na yang mi dmigs zhes bya ba la sogs pas sun phyung ba nyid yin no//de'i phyir sems ni dben zhing ste/ sems kyis bsam par bya ba ma yin pa'o/ /thams cad sgra dang bral ba ni brjod du med pa'o/ /skad cig ste brdar bya ba yod pa ma yin pas phyi dang nang gi bdag nyid thams cad sgra dang bral ba'o//bshad pa na yang yi ge 'pho ba med/ /ces bya ba la sogs pa la bshad kyang rung / ma bshad kyang rung / yi ge rnams la 'pho ba med pa ste/ gzhan du 'gro ba yang med pa zhes bya bas yul gzhan du 'gro yang rung / mi 'gro yang rung / bshad kyang rung / ma bshad kyang rung bar yi ge'i ngo bo ni mi zad par bstan pa yin no//de ltar na gang gis yi ge'i rang bzhin mi zad pa ste/ chos kyi dbyings kyi rang bzhin ji lta ba bzhin rab tu shes pa de ni mi zad pa'i chos kyi dbyings kyi rang bzhin du 'gyur ro/ /sangs rgyas brgya stong dag ni gang 'das pa/ /zhes bya ba la sogs pa la/gang sangs rgyas brgya stong grangs med pa 'das pa rnams kyis chos brgya stong phrag mang po rab tu bstan kyang chos dang yi ge la zad pa yod pa ma yin te/ skyes pa med pa la 'gags pa yang med pa'i phyir ro/ /skye ba med pa ji lta bu ni sngar bstan pa yin no/ /mdo sde brgya stong dag ni bshad byas kyang //zhes bya ba la sogs pa la/ mdo sde dpag tu med pa gdul bya rnams dang mthun par bshad kyang chos thams cad yi ge med par yang shes la rnam par rtog pas de la chags par yang mi 'gyur ro/ /bdag med pa dang / sems can med pa la sogs pa'i chos bstan kyang zad par mi 'gyur te nyams pa med pa'o//mkhas pa de ni tshig kun smra byed kyang / /zhes bya ba la/ skad thams cad kyis sems can thams cad la nges pa'i tshig bsgrubs pas chos ston kyang de'i sems 'phrog par yang mi 'gyur ro/ /de sems can thams cad la gnas pa med pa'i phyir ro//tshig rnams thams cad ri yi brag ca bzhin/ /zhes bya ba la sogs pa la/ sgra thams cad ni ri'i gcong rong dang phug gi nang gi brag ca dang 'dra bas rang bzhin med pa'o zhes bya bar shes nas de dang de la mngon par zhen pa mi 'byung zhing chags par mi 'gyur ro/ /tshig des ni zhes bya ba ni sgra gang dag gis chos thams cad yongs su bsgrags kyang de'i skad cig ma yin pa'i phyir brtan pa ma yin no//ji ltar sgra skad cig ma yin zhing mi brten pa ltar chos thams cad mi brtan pa nyid do/ /mtshan med ni mtshan nyid dang mtshon par bya ba dang bral ba nyid do//dben pa ni dben pa nyid kyi phyir rnam par dag pa'o/ /rnam par dag pa'i phyir stong pa'o zhes bstan par 'os pa yin no/ /'dus byas dang / 'dus ma byas kyi dbye ba'i rnam par rtog pa drang srong de dag ste/ de bzhin gshegs pa rnams dang / byang chub sems dpa' chen po rnams la med pa'o//de 'gro ba thams cad du skyes par gyur pa'i sems can rnams 'dul ba la mkhas pa yin no/ /'dus ma byas pa'i 'gro ba'i 'gro bar gyur pas lta bas byas pa'i nyon mongs pa'i 'dam thams cad las brgal ba'o/ /ting nge 'dzin la dbang bar gyur pas 'bad pa med pa nyid du 'gro ba'i don sgrub par byed pa'i tshig gi rang bzhin shes pa'o//shes rab kyi stobs kyis mngon par shes pa lnga nges par bsgrubs nas thabs la mkhas pa'i stobs kyis so so yang dag par rig pa la 'jug cing mngon par bsgrubs nas nges pa'i tshig gis ngag gi spyod yul thams cad las 'das pa zhi ba rab tu zhi ba ston to zhes bya ba yin no//btags pa tsam du btags nas brjod pa yin/ /zhes bya ba la sogs pa la/ khams gsum pa thams cad sems dang sems las byung bas brtags pa yin pas brtags pa tsam zhes brjod do/ /de ni brtags pa tsam nyid yin pa'i phyir rdzas ni phra mo tsam yang yod pa ma yin no//gzhan gyi dbang gang yin pa de la ni mtha' med de/ sngon gyi mtha' dang phyi ma'i mtha' stong pa'i phyir skye ba dang 'jig pa'i ngo bos stong pa nyid kyi dbus kyang med pa'o zhes bya bas/ 'khor ba la ni mtha' ma mi rnyed de/ /zhes bya ba bshad pa yin no//yongs su grub pa yang / gang dag sngon byung mtha' ni mtshan nyid med/ /ces bya ba la sogs pa la sngon gyi mtha' ni rgyu ste/ skye ba'i mtha' nyid med pas mtshan nyid med pa'o/ /de la ltos nas ma 'ongs pa dang / da ltar gyi mtshan nyid kyang med pa'o/ /de'i phyir kun brtags pa dang /gzhan gyi dbang dang / yongs su grub pa'i mtshan nyid stong pa nyid kyi phyir rnam par shes pa smra ba sun phyung nas dbu ma nyid du bsgrub pa ni chos rnams stong pa zhes bya ste/ de ltar chos thams cad stong pa nyid dge ba dang / mi dge ba'i las dang / de'i 'bras bu rnam par gzhag pa ji ltar grub ce na/brjod par bya'o/ /dge ba dang / mi dge ba'i las dang 'bras bu rnam par gzhag pa ni rmi lam ji lta ba bzhin no zhes bya ba gsungs la/ las dang bya bas de ltar zhugs gyur te/ /zhes bya ba ni dman pa dang / rab dang / bar ma'i dbye bas 'bras bu myang bar 'gyur ba'i dbye ba yang 'byung bar 'gyur ro//chos rnams rtag tu dben zhing rang bzhin stong / /zhes bya ba la sogs pa la/ bdag la sogs pas stong pa ji ltar sa bon dang / myu gu dang / 'khri shing la sogs pa'i rgyu dang 'bras bu yang dmigs pa yin no/ /de dang 'dra bar nang gi bdag nyid kyi lus kyi mig la sogs pa yang blta'o zhes bya ba ni rang bzhin gyis gtan tshigs so//kun rdzob tu ni rgyal bas chos bshad de/ /zhes bya ba la sogs pa la/ 'dus byas dang / 'dus ma byas kyi chos rnams ni kun rdzob ces bya ba'i sgras brjod do/ /don dam par ni brjod du med pa zhes bya'o//'gro ba kun gyi mtshan nyid de 'dra'o/ /zhes bya ba la/ 'dus byas dang 'dus ma byas las ma gtogs pa'i chos gzhan med pas mtshan nyid 'di nyid do/ /las dkar nag gi 'bras bu bdag nyid kyis byas pa rnams rgyud gcig tu mngon par zhen pas nyams su myong bar 'gyur bas 'bras bu rgyu med pa yang ma yin te/las dang rjes su mthun pa'i 'bras bu yod pa'i phyir ro/ /srid pa thams cad sgyu ma dbang med pa/ /zhes bya ba ni rgyu dang 'bras bu'i dngos por brtags pa'i so sor nges par snang ba'i rgyu thams cad sgyu ma dang / smig rgyu dang 'dra ba brdzun pa stong pa'o zhes bstan pa yin no//dngos po rnams 'di lta bu shes pa de'i tshul khrims kyi phung po rnam par dag par 'gyur te/ lhag pa'i shes rab kyi tshul khrims yin pa'i phyir ro/ /chos thams cad skye ba med par bzod pa'i stobs dang ldan pa'i phyir cung zad tsam la yang rtogs par mi byed do/ /byang chub sems dpa' rtag tu sems mnyam par gzhag pa ni mnyam par gzhag pa zhes bya'o//rgyal po des ni ji tsam chos rig pa/ /zhes bya ba la sogs pa la/ de bzhin gshegs pas chos ji snyed cig gsungs pa de thams cad des don dang / tshig dang bcas pa thams cad 'dzin par nus shing brjod par yang mi 'gyur ro//don ji lta ba bzhin nges par rtogs pas rgyal po de 'khor dang bcas pa rab tu byung nas tshul khrims ma nyams par bsrungs so/ /rgyal po'i bu rnams kyang ting nge 'dzin 'di thos nas legs par gsungs pa la mngon par dga' nas yid rab tu mgu bas bde bar gshegs pa sras dang bcas pa la phyag 'tshal nas ting nge 'dzin rab tu rtogs pas mi skye ba'i chos la bzod pa so sor thob par gyur to zhes gsungs pa yin no//der yang srog chags stong phrag brgyad cu dag /ces bya ba la sogs pa la/ der chos bstan pas skye ba med pa'i chos la bzod pa so sor thob par gyur to zhes bya bar 'brel to//chos kyi rang bzhin bzang po 'di thos nas/ /zhes bya ba la/ chos kyi rang bzhin zab mo 'di thos nas ting nge 'dzin yang dag pa 'di don dam pa ste/ phyin ci ma log pa'i bden pa 'di bcom ldan 'das kyis nges par bstan to zhes bya ba'o//ji lta bu'i mi skye ba zhig ce na/ skyes bu la ni skye dang 'gag pa med/ /ces bya ba la sogs pa la/ skyes bu ste bdag la skye ba dang 'gag pa med pa'o/ /de bzhin chos 'di ste gzhan dag kyang rtag tu snga nas te thams cad du gzod ma nas dben pa dang zhi ba ni mi skye ba'i chos zhes bya'o//de lta bu'i chos kyi rang bzhin nges par rtogs nas rgyal pos mi skye ba'i chos la bzod pa thob par gyur to/ /mi skye ba'i chos la bzod pa thob par gyur pas rgyal srid yongs su spangs nas de bzhin gshegs pa'i bstan pa la rab tu byung bar gyur to/ /bu dang bcas pa'i 'khor gzhan de'i rjes su 'brang ba rnams kyang chos 'dod pas de'i rjes su rab tu byung bar gyur to//lo ni brgya phrag nyi shu yongs tshang bar/ /zhes bya ba la sogs pas ni chos rab tu bstan pa dang / thos pa'i dus nges par bstan pa yin no/ /de nas dus kyang gzhan du gyur pa'i tshe/ /zhes bya ba la sogs pa la/ de bzhin gshegs pa de yang mya ngan las 'das/nyan thos rnams kyang mya ngan las 'das nas de'i chos nyam chung bar gyur/ yongs su 'dzin pa yang nyung bar gyur pa na rgyal po de'i bu rgyal tshab de bzhin gshegs pa'i bstan pa la rab tu dad par gyur pa cig byung ba de'i khab tu rtag tu 'ong ba'i dge slong zhig yod pa des ting nge 'dzin 'di rab tu bstan to//yang dag par bshad do/ /de yang yid du 'ong ba shin tu 'jam pa snyan par smra ba'o/ /sngon gyi 'brel par gyur pa'i lha zhig rtag tu de'i bsngag pa rjod par byed do/ /de yang dran pa dang / blo gros dang rtogs pa dang / bstan pa phun sum tshogs pa'i phyir sems can thams cad dga' bar byed pa'i tshig gis phung po dang /khams dang / skye mched dang / rten cing 'brel par 'byung ba ston pa la mkhas pas chos gos dang / lhung bzed dang / na ba'i gsos sman dang / yo byad rnams mang du rnyed pa dang ldan pas grags pa dang ldan pa'i 'od kyis phyogs thams cad du khyab pa'i 'od 'di la yod pas dge slong de'i ming snyan pa'i 'od ces bya'o//gzhan dge slong mang pos de'i bsod nams kyi stobs ma bzod nas dmigs pa'i lta ba can de dag la phrag dog gi mtshon rnon po snying la phog par gyur pas de ma dad pa'i sems skyes par gyur to/ / dge slong de yang bsod nams dang / ye shes dang / tshul khrims dang / ting nge 'dzin gyi stobs kyis 'jig rten thams cad las 'phags par gyur cing / 'jig rten thams cad kyi mig 'phrog par byed pa mchod par byed pa'i dge slong chos smra ba de la dge slong gzhan dag gdug pa'i sems skyes par rig nas chos smra ba de bsrung ba'i phyir go cha dang /ya lad legs par bgos la/ lag na mtshon sna tshogs thogs pa skyes bu rnams la bka' stsal pas de bskor nas dogs pa dang / bag tsha ba dang bral bas stong pa dang / mtshan ma med pa dang / don dam pa mya ngan las 'das pa rab tu ston pa'i chos rab tu ston to//dmigs pa'i lta ba can gang dag yin pa de dag ni stong pa nyid bstan pa la spro ba med do/ /dge slong dag ni lag na mtshon thogs 'ongs/ /zhes bya ba la sogs pa la/ rang dang rjes su mthun pa'i chos ston par byed pa dgra 'di gsad par bya ba'i phyir lag na mtshon cha sna tshogs thogs pas 'brel pa'i lag pa dang bcas pas langs/dge slong 'di ni chos min rab ston gyis/ /zhes bya ba la sogs pa la/ dge slong 'di ni bdag cag gi 'dod pa dang mi mthun pa'i phyin ci log gi chos ston gyis 'di bsad na bsod nams nyid mang du 'phel bar 'gyur gyis/bdag cag la bsod nams ma yin par ni mi 'gyur ro zhes nges par bsams nas brdeg par brtsams pa dang / mthong nas dge slong mtshon gyis mi 'jigs te/ /zhes bya ba la sogs pa la/ mtshon cha sna tshogs rdeg par byed pa de dag mthong ba yang 'chi ba'i 'jigs pa med pas bag tsha ba ci yang med kyis stong pa nyid rjes su dran zhing /gang bsad pa dang / gang gis gsod pa dang / cis gsod pa de dag stong pa nyid kyis stong pa nyid bsad du med de/ 'chi bar 'gyur ba yang med pa'i phyir su zhig 'chi bar 'gyur zhes nges par sems pa'i blos de bzhin gshegs pa thams cad la phyag 'tshal nas bden pa'i byin gyi rlabs rtsom par byed do//chos thams cad stong pa nyid yin pa'i bden pa dang / bden pa'i tshig 'dis mtshon cha 'di dag man+dA ra ba'i me tog tu gyur cig ces brjod ma thag tu ngo mtshar rmad du byung ba'i ltas byung bar gyur te/mtshon cha de dag kyang me tog man+dA ra bar gyur/ ri dang nags tshal dang bcas pa'i sa chen po yang g.yo bar gyur to/ /mtshon cha 'dzin pa'i dge slong de dag kyang 'jigs shing skrag pa'i yid kyis yang de dang nye bar 'gro bar ma nus so/ /su dag thub dbang la ni dad mos shing //zhes bya ba la sogs pa la/ sems can gang dag stong pa nyid la mos pa de dag ni thub pa'i dbang po de la dad cing mos par gyur te/ de dag a la la stong brjod nas su/ /zhes bya ba la sogs pa la/ a la la zhes bya ba ni sdig pa can la smad pas dge slong sdig pa can gyi spyod pa smad pa dang /chos smra ba la sems dang ba bskyed pas lan stong snyed brjod pa'o/ /ras bcos brgya yis dge slong mngon par g.yogs/ /zhes bya ba la/ chos smra ba'i dge slong de rang bzhin gyis bzang ba nyid dang / bdag nyid kyis byams pa chen po'i bdag nyid can du gsal bar bstan pa'i phyir 'jig rten thams cad kyi mdun du tshig 'di skad ces rjod par byed do//sems can su dag nga la sdang byed pa/ /zhes bya ba la sogs pa la/ gang dag bdag gsad par bya ba'i phyir sdang ba'i sems kyis zhugs pa de dag nges par mnar med par 'gro bar 'gyur bas de dag gzung bar bya ba'i phyir bdag gis byang chub sems dpa'i spyod pa nyams su blang bar bya'i/gzhan gyis ni gzung bar nus pa ma yin no zhes smras nas/ dge slong des lo brgyad cur bcom ldan 'das kyis gsungs pa'i stong pa nyid kyi mdzod bshad do//dge slong gang dag sdang bar gyur pa de dag ni pham par gyur cing 'jig rten thams cad kyis smad cing brnyas par gyur to/ /dge slong de ni gzhan dag gshe ba'i tshig drag po mtshon cha dang 'dra bas snad cing zher 'debs par byed kyang dge slong sdig pa can gyi yul de dag la yang bzod pa la goms pa'i stobs kyis bzhin gyi pad+ma'i mdangs gzhan du gyur pa med do zhes bya ba yin no//de nas dge slong de la rgyal po'i bu bsod nams blo gros kyis 'di skad ces smras so/ /bdag gis slob dpon de la gang su dag gis yid mi bde ba'i rgyu sems la gnod pa ci zhig ma byas sam zhes smras pa dang /bzod pa la goms par byas pa'i stobs kyis sems 'khyams pa chen po shin tu brtan pa ring du goms par gyur pas khro ba dang 'khrug pas bskyed pa'i gnod pa ma mchis so zhes so/ /gang gis bskal pa brgya stong du byang chub sems dpa'i spyad pa spyod pa'i tshe bzod pa legs par bsgoms pa'i bdag nyid du byas pa'i dge slong snyan pa'i 'od ces bya ba gang yin pa de ni bcom ldan 'das shAkya thub pa yin no//gang gis chos smra ba'i dge slong snyan pa'i 'od srung bar byed pa'i rgyal po'i bu bsod nams blo gros gang yin pa byams pa 'di yin te/ de yang de bzhin gshegs par 'gyur ro zhes lung bstan to//gang de bzhin gshegs pa tshogs kyi dbang phyug la mchod pa byas pa'i rgyal po me tog mchog ces bya ba de ni de bzhin gshegs pa dgra bcom pa yang dag par rdzogs pa'i sangs rgyas pad ma'i mchog ces bya bar gyur to zhes lung bstan to/ /de lta bur bskal pa dpag tu med pas chos mnyan pa dang /bsam pa dang / bsgom pas mngon sum du bya ba'i phyir bzod pa rnam pa gsum mngon sum du byas so/ /de ltar ngas sngon bzod pa'i stobs bsgrubs pa bzhin du gzhon nu khyod kyang rjes su slobs shig ces zla 'od gzhon nu la gdams pa'o/ /nga mya ngan las 'das par gyur nas dam pa'i chos rnam par 'jig par gyur pa'i tshe mu stegs kyi gzhung la brtson zhing zhen pa'i dge slong mang po 'byung bar 'gyur te/de dag nga'i dam pa'i chos stong pa nyid lta ba ngan pa thams cad 'jig par byed pa 'di spong bar byed par 'gyur te/ de dag ni rmongs pa'i mun nag mthug por zhugs pas bdag nyid phung bar byas nas gzhan dag kyang phung bar byed pa yin no zhes bya bas de'i bag yod par bya'o//gang yang nad thams cad zhi bar byed pa'i bdud rtsi 'thung ba bzhin du stong pa nyid la mos pa de ni nga'i bstan pa la rab tu byung ba zhes bya'o/ /dge slong gi dngos por bsnyen par rdzogs te/gso sbyong gi las la sogs pa yang rung ba kho na'o/ /de lta bas na lus dang srog la'ang ltos pa med par byas la/ chos thams cad kyi rang bzhin mnyam pa nyid rnam par spros pa'i ting nge 'dzin stong pa nyid de bzhin nyid kyi bdag nyid bsgom par bya'o/ /de bzhin gshegs pa thams cad la mchod pa dang bsnyen bkur gyi phyir ngal ba med pa'i sems kyis pha rol tu phyin pa rnams dang /sa rnams nges par sgrub par byed pa'i dge ba'i rtsa ba rnams nye bar bsgrub par bya'o zhes bya ba yin no/ /mchod pa thams cad dang / lugs sku la sogs pa yang 'di dag nyid kyi khongs su gtogs pas ma spros so//gang gi tshe stong pa nyid bsgom pas 'dod chags la sogs pa rnam par bsal bar mi nus pa de'i tshe 'dod chags la mi sdug pa dang zhe sdang la byams pa dang / gti mug la shes rab ni gnyen po yin no zhes bya bas mi sdug pa la sogs pa bsgom par bya ba la sogs pa ni man ngag go zhes thams cad du sbyar bar bya'o//'jig rten gyi chos brgyad rnam par spangs pa'i sems kyis chos nyid kyi de nyid kho na nyid rjes su tshol ba la gcig tu mngon par zhen pas tshul bzhin du bsgoms na sangs rgyas nyid du 'gyur gyi tshig tsam gyis ni ma yin no zhes bstan to/ /sangs rgyas sras po bde gshegs 'od kyi phreng bas phreng brgyus pa'i//ma lus 'khor lor de yi snyan pa'i 'od kyis khyab par gyur/ bsod nams ye shes dag gis de nyid ma lus gsal byas nas/ /de ni yang 'dir shAkya'i mgon po shin tu mgon por gyur/ /snyan pa'i 'od ni de nyid shes pa'i mchog /ting 'dzin rgyal po yon tan ldan par grags/ /snyan pa'i 'od kyis shin tu gsal bar byas/ /snyan pa'i 'od 'dir thub pa'i dbang por gyur/ /snyan pa'i 'od kyi le'u ste sum cu rtsa brgyad pa'i 'grel pa rdzogs so// //da ni byang chub sems dpa' lus dang / ngag dang / yid kyi sdom pas bsdoms pa ni sangs rgyas kyi yon tan thams cad sdom pa gsum las nges par byung ba yin pas nges par bla na med pa yang dag par rdzogs par sangs rgyas par 'gyur bas de la mngon par brtson par bya'o zhes bya ba yin no//de la lus kyi sdom pa nye bar bstan pa'i phyir/ de nas bcom ldan 'das kyis zhes bya ba la sogs pa gsungs te/de la lus kyi sdom pa yang rnam pa gnyis te/ don dam pa pa dang / kun rdzob pa'o/ /don dam pa pa'i lus ni chos kyi sku'o/ /de mngon sum du byed pa dang / srung ba'i lus kyi sdom pa zhes bya'o/ /yang dag pa'i mchog dang / gtso bo zhes bya ba ni sdom pa ste/lus kyi sdom pa'o/ /'di nyid bstan par bya ba'i phyir/ lus kyi sdom pa gang dang ldan pa byang chub sems dpa' chen po chos thams cad la chags pa med par 'gyur ba de ni lus kyi sdom pa zhes bya'o zhes bya ba la sogs pa gsungs te/ chos kyi sku nyid chos thams cad la chags pa med pa'i ye shes su gyur pa ni de thob pa'o//longs spyod rdzogs pa'i sku yang don dam pa pa yin no zhes bya bar/ lus kyi sdom pa gang dang ldan pas dpe byad bzang po brgyad cu'i bar thob par 'gyur ba de ni zhes bya ba la sogs pa yin te/ ngo bo nyid longs rdzogs pa dang / /de bzhin gzhan ni sprul pa dang //chos sku zhes bya ba la/ chos kyi bdag nyid can gyi sku ni chos kyi sku'o zhes bstan pa'i phyir/ lus kyi sdom pa gang dang ldan pas de bzhin gshegs pa'i stobs bcu 'thob pa zhes bya ba la/ de la dang por byang chub sems dpa'i stobs bcu ni lhag par mos pa'i stobs dang / so sor brtags pa'i stobs dang / bsgoms pa'i stobs dang / bzod pa'i stobs dang / ye shes kyi stobs dang / spong ba'i stobs dang / spobs pa'i stobs dang / thos pa'i stobs dang / bsod nams kyi stobs dang / sgrub pa'i stobs te/ 'di dag gi bshad pa rgyas pa ni mtshan yang dag par brjod pa'i 'grel pa nas shes par bya'o//de bzhin gshegs pa'i stobs bcu ni gnas dang gnas ma yin pa mkhyen pa'i stobs dang / las dang rnam par smin pa mkhyen pa'i stobs dang / khams sna tshogs mkhyen pa'i stobs dang / mos pa sna tshogs mkhyen pa'i stobs dang /dbang po rnam pa dbye ba mkhyen pa'i stobs dang / thams cad du 'gro ba'i lam mkhyen pa'i stobs dang / bsam gtan dang rnam par thar pa dang ting nge 'dzin la snyoms par 'jug pa mkhyen pa'i stobs dang / sngon gyi gnas rjes su dran pa mkhyen pa'i stobs dang / 'chi 'pho ba dang skye ba mkhyen pa'i stobs dang /zag pa zad pa mkhyen pa'i stobs so/ /'di dag gi bshad pa yang / de nyid nas shes par bya'o/ /mi 'jigs pa bzhi zhes bya ba la bzhi gang zhe na/ kye ma bdag yang dag par rdzogs pa'i sangs rgyas so zhes dam bcas pa na chos 'di mngon par rdzogs par sangs ma rgyas so zhes bya bar bdag la gang gis kyang chos dang ldan par rgol bar 'gyur ba'i rgyu dge sbyong dang bram ze'i nang nas yang dag par rjes su ma mthong ste/rgyu yang dag par rjes su ma mthong bas bdag bde ba thob pa dang / bag tsha ba med pa thob pa dang / 'jigs pa med pa thob pa 'di ni dang po'o//de bzhin du bdag zag pa zad do zhes dam bcas pa na zag pa 'di rnams zad par ma gyur to zhes bya ba dang / de bzhin du bdag gis nges par 'byung ba'i lam bstan pa na 'di ni sdug bsngal zad pa yang ma yin nges par 'byung ba yang ma yin zhes zer ba'i gnas med do zhes bya ba dang / gang yang bdag gis bar du gcod par 'gyur ba'i chos bshad pa ni 'di ni bar du gcod pa ma yin no zhes chos dang ldan par rgol ba dge sbyong dang bram ze'i nang nas zhes bya ba snga ma bzhin no/ /sangs rgyas kyi chos ma 'dres pa bco brgyad thob pa zhes bya ba ni gang gi nub mo de bzhin gshegs pa mngon par rdzogs par sangs rgyas pa nas nye bar bzung nas/gang gi nub mo yongs su mya ngan las 'das pa'i bar du de bzhin gshegs pa la 'khrul pa mi mnga'o/ /ca co mi mnga'o/ /dgongs pa nyams pa mi mnga' 'o/ /thugs mnyam par ma bzhag pa mi mnga'o/ /'du shes sna tshogs mi mnga'o/ /kun tu ma brtags pa'i btang snyoms mi mnga'o//'dun pa nyams pa mi mnga'o/ /brtson 'grus nyams pa mi mnga'o/ /dran pa nyams pa mi mnga'o/ /ting nge 'dzin nyams pa mi mnga'o/ /shes rab nyams pa mi mnga'o/ /rnam par grol ba nyams pa mi mnga'o/ /sku'i phrin las thams cad ye shes sngon du 'gro ba ye shes kyi rjes su 'brang ba'o//gsung gi phrin las thams cad ye shes sngon du 'gro ba ye shes kyi rjes su 'brang ba'o/ /thugs kyi phrin las thams cad ye shes sngon du 'gro ba ye shes kyi rjes su 'brang ba'o/ /'das pa'i dus la ma thogs ma chags pa'i ye shes gzigs pa 'jug pa dang /ma 'ongs pa'i dus la ma thogs ma chags pa'i ye shes gzigs pa 'jug pa dang / da ltar byung ba'i dus la ma thogs ma chags pa'i ye shes gzigs pa 'jug pa zhes bya ba ste/ 'di ni gzhon nu lus kyi sdom pa zhes bya'o zhes bya ba ni/ thams cad du chos kyi bdag nyid can gyi sku ni lus kyi sdom pa zhes gzung bar bya'o//stong pa nyid dang / mtshan ma med pa dang / smon pa med pa'i rnam par thar pa'i sgo gsum ni lus kyi sdom pa'o/ /byams pa chen po dang / snying rje chen po dang / dga' ba chen po dang / btang snyoms chen po ni lus kyi sdom pa'o/ /chos dang / don dang / nges pa'i tshig dang / spobs pa so so yang dag par rig pa bzhi ni lus kyi sdom pa'o/ /dran pa nye bar gzhag pa bzhi ste/ lus dang / tshor ba dang / sems dang / chos kyi dran pa nye bar gzhag pa dang bzhi'o/ /yang dag par spong ba bzhi ni sdig pa byas pa rnams spangs pa dang /ma byas pa rnams mi byed pa dang / dge ba byas pa rnams spel bar byed pa dang / ma byas pa rnams byed pa la 'dun pa bskyed ces bya ba la sogs pa'o/ /'dun pa dang / brtson 'grus dang / sems dang / dpyod pa ste rdzu 'phrul gyi rkang pa bzhi dang / dad pa dang / brtson 'grus dang /dran pa dang / ting nge 'dzin dang / shes rab ces bya ba dbang po lnga dang / gzhan de dag nyid stobs dang ldan par gyur pa'i stobs lnga po dang / dran pa yang dag byang chub kyi yan lag dang / chos rab tu rnam par 'byed pa yang dag byang chub kyi yan lag dang / brtson 'grus yang dag byang chub kyi yan lag dang /dga' ba yang dag byang chub kyi yan lag dang / shin tu sbyangs pa yang dag byang chub kyi yan lag dang / ting nge 'dzin yang dag byang chub kyi yan lag dang / btang snyoms yang dag byang chub kyi yan lag ste byang chub kyi yan lag bdun dang / 'phags pa'i lam yan lag brgyad ni/yang dag pa'i lta ba dang / yang dag pa'i rtog pa dang / yang dag pa'i ngag dang / yang dag pa'i las kyi mtha' dang / yang dag pa'i 'tsho ba dang / yang dag pa'i rtsol ba dang / yang dag pa'i dran pa dang / yang dag pa'i ting nge 'dzin ni lus kyi sdom pa'o zhes bya bas ni don dam pa'i lus kyi sdom pa bstan to//da ni kun rdzob kyi lus kyi sdom pa brjod par bya'o/ /lus kyi sdom pa gang dang ldan pas byang chub sems dpa' srog gcod pa spong bar 'gyur ba dang zhes bya ba la sogs pa ni dge ba bcu'i las kyi lam srung ba dang / mi dge ba bcu'i las kyi lam rnam par spong ba ni lus kyi sdom pa'o//gzhan yang mi dge ba'i bye brag rnams bstan pa'i phyir srang la g.yo byed pa dang zhes bya ba la/ srang la g.yo byed pa ni srang mtho dman du byed pa'o/ /tshad la g.yo byed pa ni bre phul mtho dman du byed pa la sogs pa'o/ /nor la g.yo byed pa ni bcos ma'i gser la sogs pa byed pa'o//chags pa dang / zhe sdang dang / gti mug gis kun nas bslang ba'i sems kyis bcings pa ni lcags sgrog la sogs pas bsdams pa'o/ /gzung ba ni bcing ba'i gnas su bcug nas 'dzin pa'o/ /rdeg pa ni dbyig pa la sogs pas so/ /bsdigs pa ni 'di bzhin gyis shig /mi byed na khyod gnyen dang bcas pa 'chi bar bya'i zhes bya ba la sogs pas 'bros par rtsom pa'o/ /gcad pa ni lag pa dang / rkang pa dang / rna ba dang / sna la sogs pa la gcod pa'o/ /dbug pa ni mdung la bskyon pa'o/ /zhe la gnon pas ni gzhan gnod pa byed pa la mi bzod pa'o//de dag las ldog pa ni lus kyi sdom pa'o zhes bya ba'o/ /lag pa rgod pa dang rkang pa rgod pa ma yin zhes bya ba la sogs pas kyang don 'di nyid bstan pa yin no/ /bshad pa rnam pa gnyi ga yang lus kyi sdom pa ste/ sngon gyi de bzhin gshegs pa rnams kyis kyang gsungs pa yin no zhes bstan pa'i phyir gzhon nu sngon byung ba 'das pa'i dus na zhes bya ba la sogs pa la/lus kyi sdom pa'i ting nge 'dzin gyi sgor 'jug pa tshigs su bcad pa'i dbyangs kyis yang dag par rab tu bstan to zhes bya ba ni/ ji ltar bar snang nam mkha' rnam dag ste/ /chos nyid kyi bdag nyid can gyi sku ni shin tu rnam par dag pa rang bzhin gyis 'od gsal ba ste/de lta bu'i rnam par dag pa ni lus kyi sdom pa'o/ /de ni sgras bstan par nus pa ma yin te/ tshig gi spyod yul las 'das pa'i phyir ro/ /ji ltar lus kyi sdom pa dben zhing stong pa yin pa ltar lus kyang stong pa ste/lus kyi mtshan nyid ni nam mkha'i mtshan nyid yin pa'i phyir ro/ /lus dang sdom pa dag mtshan nyid gcig pa'i phyir kun rdzob tu nam mkha' zhes gdags pa'i tha snyad kyis 'jug par 'gyur ro/ /de bzhin du lus dang / sdom pa zhes bya ba'i gdags pa'i tha snyad kyang 'jug par 'gyur ro zhes bya ba'o//sdom pa'i mtshan nyid de 'drar sus shes pa/ /zhes bya ba la sogs pa la/ sdom pa'i mtshan nyid 'di lta bu sus shes pa de la sdom pa nam yang med mi 'gyur te/ nam yang sdom pa las ma gtogs pa'i sdom pa ma yin pa rjes su mi dmigs pa'i phyir ro/ / chos thams cad kyi rang bzhin mnyam pa nyid thob pa'i zag pa med pa la nyon mongs pa'i 'jug pa 'byung bar ga la 'gyur/ 'dod chags dang / zhe sdang dang / gti mug gi dbang du gyur pas ni lus kyi sdom pa 'di mngon du shes par mi nus te/ 'dod chags la sogs pa dang 'gal ba yin pa'i phyir lhan cig gnas pa 'gal ba bzlog par dka' ba yin no//zag pa med pa'i lus kyi sdom pa gang gis shes pa de ni nyon mongs pa'i dbang gis 'khor bar skye bar mi 'gyur ro/ /nyon mongs pa dang bral bar gyur kyang smon lam gyi dbang dang / bsams bzhin du srid par skye ba len pa la ni 'gal ba med do//dgra bcom pa yi chos ni de 'dra ste/ /zhes bya ba la sogs pa la/ ji ltar dgra bcom pa rnams las dang nyon mongs pa'i dbang gis len par mi 'gyur ba bzhin du gang dag khams gsum la chags pa med pa de dag kyang de bzhin te/ des lus kyi sdom pa shes pa zhes bya'o//lus kyi sdom pa 'di ni zhes bya ba la sogs pa la/ don ni don dam pa ste chos kyi sku'o/ /chos thams cad mnyam pa nyid kyi rnam pa thams cad mkhyen pa nyid kyi ye shes yang dag pa gang yin pa ni yongs su gang ba'i phyir rab ni mchog ste sdom pa zhes bya'o/ /don dam par ni tshig gis brjod du med pas ji ltar bshad par nus nas/ji ltar lus kyi sdom pa zhes bya zhe na/ gsungs pa/ don la zhugs la ngas ni don bstan te/ /zhes bya ba la/ kun rdzob kyang rang gi ngo bo la mngon par zhen pa med pa don dam pa la zhugs pa rnams la ngas bstan te/ /chos kyi sku'i dbang gis skal ba dang ldan pa rnams la bshad pa'i rnam pa'i snang ba yang 'byung bar 'gyur ro zhes bya'o//don med rnam spangs don la gnas pa rnams/ /zhes bya ba la sogs pa la/ /gang don dang mngon par ldan pa de don ma yin pa spangs nas lus kyi sdom pa la gnas par 'gyur ro/ /rgyal ba'i bstan la don du gang brjod dang //zhes bya ba ni blo dman pa rnams kyi the tshom bsal ba'i phyir dris pa/ don ni gang zhig yin ji ltar ni shes par bya zhes bya ba'o/ /chos thams cad stong pa rang bzhin gyis 'od gsal ba zhes bya bas de bzhin nyid kyi don ni don to/ /ji ltar shes par 'gyur zhe na ye shes kyi rang gi ngo bo bstan pa yin no//don tshul rang bzhin gang gis shes pa ni/ /zhes bya ba la sogs pa la gang gi don gyi tshul gyis rang bzhin shes pa de ni lus kyi sdom pa shes pa yin no/ /gang gis stong pa nyid dang / mtshan ma med pa dang / smon pa med pa'i rnam par thar pa'i sgo nas bdag med pa dang gsog shes par bya ste/des ni lus kyi sdom pa shes par 'gyur ro/ /dngos po thams cad kyi dngos po med pa'i ngo bo med pa gang rig par gyur pa de ni dngos po thams cad la chags par mi 'gyur te mngon par zhen par mi 'gyur ro/ /de mngon par zhen pa med pas mtshan ma med pa'i ting nge 'dzin rab tu thob par 'gyur ro//ting nge 'dzin rab tu thob pas lus dang / ngag dang / yid kyi gnas ngan len sdom pa ma yin pa'i mtshan nyid 'byung bar mi 'gyur ro/ /gzugs dang / sgra dang / dri dang / ro dang / reg bya rnams la mtshan mar 'dzin pas bzung nas mngon par zhen pas phyin ci log sgro btags pas sdom pa ma yin pa 'khor ba'i rgyu 'byung bar 'gyur ro//grog ma kun gyis g.yos shing 'gul mi nus/ /zhes bya ba la sogs pa la yang dag pa'i tshul la rab tu gnas pa ri rab ltar mi g.yo ba'i rang bzhin can de la ji ltar grog mas ri rab ltar 'dod chags la sogs pas g.yo bar mi 'gyur ro//mi srid par bstan pa'i phyir yongs su brtags pa nye bar bzung nas/ nam mkha' la ri mo bri bar nus shing / lag pas nam mkha' la bzung bar nus par 'gyur srid kyang ting nge 'dzin la gnas pa ni 'dod chags la sogs pas bskyod par mi nus so/gang yang sems can thams cad kyi sgra thams cad sgrom du bcug nas bcings par nus kyang srid/ de bzhin du nyi ma'i 'od dang / glog dang / rlung rnams rgya'i nang du bzung nas bcings par nus kyang srid ces bya ba la sogs pas ni thams cad du mi srid par bstan pa'i phyir gsungs pa yin no//spyod yul gang gnas lus kyi sdom pa ni/ /zhes bya ba la sogs pa la/ byang chub sems dpa' gang dag lus kyi sdom pa la gnas pa de la ni 'jig rten gyi chos thams cad dang / nyon mongs pa dang nye ba'i nyon mongs pa 'byung bar mi 'gyur ro/ /dug dang mtshon la sogs pas kyang gnod par mi 'gyur ro//de bzhin du ting nge 'dzin la gnas pas 'jigs pa dang skrag pa thams cad spangs pa yin/ 'gro ba ma lus pa'i don byed pa yin/ zhi ba dang rab tu zhi ba'i ting nge 'dzin la dbang rab tu thob pa ni 'jigs pa dang / skrag pa dang kun nas 'khrugs pa dang /phrag dog dang / ser sna la sogs pa'i nyon mongs pa'i rnam par rtog pa las rnam par grol ba yin no/ /gang gi phyir lus kyi sdom pa la legs pa bslabs pa ni bdag dang bdag gi 'du shes dang bral zhing / 'jigs pa thams cad dang bral bas bdud bye ba brgya stong gis kyang bskyod par mi nus so//byang chub sems dpa' rnams la phan pa'i phyir sdom pa gang brjod pa ni gzhung gi sgo nas so/ /bshad pa ni bsgom pa'i khyad par gyi man ngag bstan pa'o/ /rab tu bstan pa zhes bya ba ni bdud dang mu stegs la sogs pa pha rol rgol ba ma lus pas rab tu sbyar ba'i tshad ma ngan pa sun dbyung ba'i phyir bde bar gshegs pa pa'i gzhung gi 'dod pa la sbyor ba'i tshad ma dang ldan pa'i chos bdag med par rab tu bsgrubs nas gzhung dang /don rab tu bstan pa'i phyir/ chos rnams kun la ye shes thogs pa med/ /ces bya ba la sogs pa la/ thogs pa thams cad dang bral ba'i de bzhin gshegs pa thams cad kyi rnam pa thams cad mkhyen pa'i ye shes mngon par byang chub nas mtshan sum cu rtsa gnyis dang /dpe byad bzang po brgya cus brgyan pa'i de bzhin gshegs pa'i sku thun mong ma yin pa nges par sgrub par 'dod pas ji skad gsungs pa'i lus kyi sdom pa bsgom par bya'o//lus kyi sdom pa dang yang dag par ldan pa la bla na med pa yang dag par rdzogs pa'i byang chub kyang rnyed dka' ba ma yin no/ /drang srong chen po'i chos 'di gang 'dod pa/ /zhes bya ba la sogs pa la/ gang dag sangs rgyas kyi chos bsam gyis mi khyab pa rtogs par 'dod pa des kyang lus kyi sdom pa la bslabs na/sems can gyi khams thams cad kyi mchod rten du gyur pas phyag bya ba'i gnas su 'gyur ro/ /stobs bcu la sogs pa'i sangs rgyas kyi chos rnams ni bshad zin pas yang bshad par mi bya'o/ /'di 'dra'i lus kyi sdom pa thos nas ni/ /zhes bya ba la sogs pa la/ rgyal po khyad par sems des lus kyi sdom pa thos nas dga' ba dang / rab tu dga' ba thob nas rab tu byung ngo / /rab tu byung nas kyang lo bye ba phrag bcu tshangs par spyod pa spyad do/ /tshangs pa'i gnas bzhi yang bsgoms nas de bzhin gshegs pa dpag tu med pa la bsnyen bkur byas so/ /tshul khrims rnam par dag pa skyon med 'gyur//zhes bya ba la sogs pa dang / gzhon nu gzhan zhig yin nam sems gyur na/ /zhes bya ba la sogs pa la de'i tshe de'i dus kyi rgyal po khyad par sems gang yin pa de ni gzhan zhig yin snyam na de ltar mi lta ste shAkya thub pa nga nyid de'i tshe rgyal po khyad par sems zhes bya bar gyur to zhes gsungs so//de ni lus kyi sdom pa'i phan yon bstan pa'i phyir de nas yang bcom ldan 'das kyis zhes bya ba la sogs pa la/ de lta bas na lus kyi spyod pa yongs su dag par bya'o zhes/ gzhon nu khyod kyis de ltar bslab par bya'o zhes bya ba ni ma 'ongs pa'i skye bo la ltos nas slobs shig ces bstan pa'o//de ci'i phyir zhe na zhes bya ba ni rgyu gang gi phyir lus kyi spyod pa yongs su dag pa la kun du spyad par bya zhes som nyi za ba'i phyir lus kyi spyod pa yongs su dag pa'i byang chub sems dpa' chen po ni sems can dmyal ba dag la mi 'jigs zhes bya ba la sogs pa la/dmyal ba dang / yi dags dang / dud 'gro'i skye gnas su skye bar 'gyur ba'i rgyu yod pa ma yin no/ /dug dang / me dang / chu dang / mtshon dang / seng ge dang / glang dang / stag dang / gnod sbyin dag gis kyang 'jigs par mi 'gyur te/ 'jigs pa'i rgyu mi dge ba med pa'i phyir dang /gcig tu dge ba'i rang bzhin gyis lus kyi sdom pa la mi dge ba phra mo tsam gyi gnas kyang yod pa ma yin no/ /yang lus kyi spyod pa yongs su dag pa'i byang chub sems dpa' ni/ stong gsum gyi stong chen po'i 'jig rten gyi khams 'di lag mthil tu bzhag ste/ ta la gcig tsam mam/ta la bdun tsam gyi bar du steng du 'phen par byed do zhes bya bas ni stobs rnams kyi mthar thug pa thob pa'i bar yang lus kyi sdom pa legs par bsdams pa la rnyed dka' ba ma yin no zhes bstan par 'gyur ro/ /rdzu 'phrul dang cho 'phrul mchog gi pha rol tu phyin pa yin te zhes bya bas ni lus kyi sdom pa ni yon tan thams cad kyi rten nyid du brten pa yin no//kun tshogs pas na rdzu 'phrul lo/ /cho 'phrul ni yang rdzu 'phrul gang dang yang dag par ldan pas rdzu 'phrul gyi yul sna tshogs pa nyams su myong ba de gcig tu gyur cing mang por yang 'gyur ro zhes bya ba la sogs pa rgyas par 'byung ba ste/gzugs bstan pas 'dus pa'i sems can rnams 'dun par bya ba'i phyir/ gcig tu gyur ces bya ba ni mdor bsdus pa'i gzugs bstan pas 'dul ba'i sems can rnams gdul ba'i phyir ro/ /snang bar gyur pa ni gzugs gsal ba nyid do//mi snang bar gyur pa ni gzugs mthong ba med pa nyid do/ /rtsig pa la yang thad kar 'gro zhes bya ba la sogs pa la/ rtsig pa dang / ra ba dang / brag la sogs pa la thogs pa dang bcas pa'i rdzas rnams la thogs pa med par 'gro ba'o/ /des na thams cad la thogs pa med par 'gro ba zhes bya'o//nam mkha' la yang ji ltar 'dod pa bzhin du 'gro bar byed la/ sa la yang steng du 'byung bar byed/ byi'u zul yang byed de/ dper na chu la bya ba bzhin no/ /chu la yang sa la bya ba bzhin mi 'bying bar 'gro ba'o/ /cho 'phrul zung ston cing 'bar ba dang / char 'bebs pa'i mtshan nyid ston te/bskal pa sreg pa'i me lta bu'i me'i phung po lus kyi phyogs gcig nas ston par byed do/ /'jig pa'i dus kyi sprin gyi char gyi rgyun bzhin du lus kyi phyogs gcig nas chu'i phung po 'bebs par byed do/ /bskal pa sreg pa'i me'i phung po gang yin pa yang kha'i dbugs gcig gis zhi bar byed do//tshangs pa'i 'jig rten gyi bar du lus kyi skyil mo krung gcig gis dbang sgyur ro/ /don 'di dag nyid tshigs su bcad pa'i dbyangs kyis bstan pa ni ma bshad do/ /rdzu 'phrul gyi cho ga bstan nas da ni lha'i rna ba la sogs pa bshad par 'dod pas/ gzhon nu de lta bas na zhes bya ba la sogs pa la/lus kyi spyod pa yongs su dag pa'i byang chub sems dpa' ni lha'i rna ba'i khams mi'i las 'das pas lha'i dang / gzhan dag gi sems can thams cad kyi sgra thams cad thos te/ gang thag ring ba dang gzhan dag kyang rung / phra ba dang rgya che ba yang thos so zhes bya ba'o/ /de bzhin du lha'i sna'i dbang po/mi'i las 'das pas 'jig rten gyi khams thams cad kyi dri'i khyad par yid du 'ong ba dga' ba dang / bde ba dang / yid bde ba'i rgyu de dag thams cad tshor ro/ /mig dang / rna ba dang / yid kyi dbang po rnams ni mnga' thob pa'i yul can yin la/ gsum ni gzhan no zhes bya ba'i tshig gis bstan na ji ltar 'jig rten gyi khams dpag tu med pa'i dri rnams sna'i dbang pos 'dzin par nus zhes zer na/de ni de bzhin gshegs pa rnams dang byang chub sems dpa' chen po rnams ma gtogs pa gzhan rnams kyi dbang du byas nas bstan pa yin no/ /de bzhin gshegs pa rnams kyi dbang po rnams ni yul thams cad kyi yul can te/don thams cad kyang spyod yul pa'o zhes bya ba'i tshig gis so/ /sems tsam so sor snang ba la bar chad la sogs pa ni kun du rtog pa'i bzos bsgrubs pa 'jig rten gyi tha snyad tsam du zad kyi don dam par ni ma yin no/ /sna'i dbang po dang / ro'i dbang po dang / reg pa'i dbang po rnams kyis thams cad shes zhes bya ba ste/thams cad kyang thams cad kyi yul can yin pa nyid du gal te rnam par 'jog par byed na mi gtsang ba la sogs pa'i ro la sogs pa yang myong ba thob par 'gyur ro zhes rgol ba'i lan gdab par dka'o zhe na/ rgol ba 'di ni lan gdab par 'os par yang ma yin te/gzhon nu ma lan gyi tshig mi shes pas kun nas bskyed pa yin no/ /de yang sgyu mas sprul pa'i dngos po nyams su myong ba bzhin du phan tshun sems rnam par 'khrul pa tsam du zad kyi/ gang du cung zhig kyang nyams su myong ba ni med de/ rdzas su grub pa med pa'i phyir ro/ / gzhan gyi rnam par rmongs pa bzlog pa tsam de'i dgongs pa yin no zhes pa de bzhin du rab tu bstan pa'i phyir kun rdzob tu dngos po thams cad gzung bar bya'i/ don dam par ni gzod ma nas zhi ba skye ba med pa'o zhes bya bar gnas so/ /sems kyi rnam grangs shes pa bstan pa'i phyir gsungs pa/sems can pha rol dang zhes bya ba la sogs pa la/ sems can pha rol zhes bya ba ni sems can gyi spyi bstan pa yin no/ /gang zag pha rol zhes bya ba ni so sor nges pa'i sems can gyi khyad par ro/ /sems kyi rnam par rtog pa dang dpyod pa yang dag par ji lta ba bzhin du rab tu shes te zhes bya ba la sogs pa la/'dod chags dang bcas pa dang / 'dod chags dang bral ba dang / zhe sdang dang bcas pa dang / zhe sdang dang bral ba dang / gti mug dang bcas pa dang / gti mug dang bral ba dang / nyon mongs pa dang bcas pa dang / nyon mongs pa med pa'i sems kyang yang dag pa ji lta ba bzhin du rab tu shes so zhes bya ba'i bar du'o//sngon gyi gnas rjes su dran pa'i mngon par shes pa gsungs pa/ des sngon gyi gnas rnam pa du ma rjes su dran te/ skye ba gcig kyang rjes su dran pas bskal pa bye ba khrag khrig brgya stong du ma'i skye ba'i bar du yang rjes su dran no/ /'jig pa'i bskal pa dang / 'chags pa'i bskal pa gcig nas 'jig pa dang /'chags pa'i bskal pa bye ba khrag khrig brgya stong du ma'i bar du yang rjes su dran te/ bdag sngon gnas che ge mo zhig tu skyes te ming ni 'di zhes bya/ rus ni 'di zhes bya/ rigs ni 'di zhes bya/ kha dog ni 'di 'dra ba zhig /zas ni 'di lta bu zhig za za/ bdag gi 'tsho ba ni 'di 'dra/tshe'i tshad ni 'di tsam zhig thub/ yun ni 'di srid gcig tu gnas gnas/ bde ba dang sdug bsngal ni 'di lta bu zhig myong myong / de nas shi 'phos nas ni che ge mo zhig tu skyes/ de nas shi 'phos nas ni 'dir skyes so zhes rnam pa dang bcas pa dang / yul phyogs dang bcas pa dang / gzhi ci las gyur pa dang bcas par sngon gyi gnas rnam pa du ma rjes su dran no zhes bya ba ni rtogs sla ba'i phyir ma bshad do/ /lha'i mig gi mngon par shes pa gsungs pa/ de lha'i mig rnam par dag pa mi'i las 'das pas sems can 'chi 'pho ba dang / skye ba yang 'chi 'pho dang skye ba shes pa rnam par dag pa'i khyad par gyis mthong ngo //kha dog bzang ba dang / kha dog ngan pa la sogs pa yang ji lta ba bzhin du yang dag par rab tu shes so/ /sems can 'di rnams ni lus kyi nyes par spyod pa dang ldan pa/ ngag gi nyes par spyod pa dang ldan pa/ yid kyi nyes par spyod pa dang ldan pa'o/ /lus kyi nyes par spyod pa yang rnam pa gsum mo//ngag gi nyes par spyod pa ni rnam pa bzhi'o/ /yid kyi nyes par spyod pa ni rnam pa gsum ste/ mi dge ba bcu'i las kyi lam dang yang dag par ldan pa ste bcas pa'o/ /'phags pa la skur pa ni 'phags pa'i lam sun 'byin par byed pa'o/ /log par lta ba ni las dang 'bras bu med par lta ba la zhugs pa'o//log par lta ba'i chos kyi las yang dag par 'dzin pa'i rgyus lus zhig nas shi ba'i 'og tu ngan song ngan 'gro sems can dmyal ba rnams su skyes so zhes bya ba yin no/ /de dag las bzlog pa'i lam la nan tan byas pas ni bde 'gro mtho ris kyi 'jig rten lha rnams su skye bar 'gyur ro zhes bya ba yin no//mngon par shes pa lnga'i go rims 'chol ba ni/ 'dir mdo ji lta ba bzhin du bshad pa yin pas brtag par bya ba med do/ /de ltar rim gyis mngon par rtogs pa nges par bstan nas skad cig gcig gis mngon par byang chub pa bstan pa'i phyir/ /gzhon nu lus kyi spyod pa yongs su dag pa'i byang chub sems dpa' sems dpa' chen po ni skad cig gcig dang ldan pa'i shes rab kyis gang cung zad shes par bya ba dang /blta bar bya ba dang / mnyan par bya ba dang / mngon par rdzogs par sangs rgyas par bya ba dang / rnam par 'phrul par bya ba de thams cad yang dag pa ji lta ba bzhin du rab tu shes so//thos so/ /mthong ngo / /mngon par rdzogs par sangs rgyas so/ /don de dag nyid tshigs su bcad pas gsungs pa/ /byang chub sems dpa' skyob pa yi/ /mngon par shes pa'i rim pa bstan/ /zhes bya ba la sogs pa la/ mngon par shes pa'i rim pa nges par bstan pa ni byang chub sems dpa'i rtogs pa la mkhas pa shes par bya ba'i phyir/ting nge 'dzin la gnas pas na/ /byang chub sems dpa' zhes kyang bya/ /zhes bya ba ni ting nge 'dzin 'ba' zhig la gnas pas kyang de la byang chub sems dpa' zhes bya ba yin na yang gang yang rna bas kyang rnam par sbyang ba'i phyir/de dag rna ba rnam sbyangs te/ /lha yi rna ba bsam mi khyab/ /ces bya ba la sogs pa la/ de lha'i rna bas sangs rgyas thams cad kyis gsungs pa'i chos nyan to/ /de stong gsum gyi stong chen po'i 'jig rten gyi khams kyi dri'i khyad par rnams ji ltar 'di na 'dug pa bzhin du lha'i snas snom mo zhes bya ba la sogs pa'o//de bzhin du gzhan gyi sems shes pa dang / sngon gyi gnas rjes su dran pa'i shes pa rnams skad cig gcig dang ldan pa'i shes pas lus kyi sdom pa rnam par dag pa la gnas nas nges par sgrub par byed do/ /ma lus rnam dag nam mkha' lta bu'i chos kyi lus//bdag nyid rdzogs sangs rgyas kyi sku ru gsungs/ /de yi sdom pa byang chub mchog gtso rtogs gyur pa/ /sangs rgyas zhes bstan de ni chos kyi dbyings/ /lus kyi sdom pa'i phan yon bstan pa'i le'u ste sum cu rtsa dgu pa'i 'grel pa rdzogs so/ / lus kyi sdom pa'i rjes la ngag gi sdom pa rab tu rtogs par bya ba'i phyir/ de nas bcom ldan 'das kyis zhes bya ba la sogs pa la/ gzhon nu de la ngag gi sdom pa gang zhe na/ ngag gi sdom pa gang dang ldan pas byang chub sems dpa' sems dpa' chen po rnam pa drug cu dang ldan pa'i sangs rgyas kyi gsung dbyangs thogs pa med pa/bsam gyis mi [(]khyad [,]khyab [)]pa rab tu thob par 'gyur ro/ /rnam pa drug cu ni mnyen pa dang / 'jam pa dang / yid du 'ong ba dang / yid 'thad pa dang / dag pa dang / dri ma med pa dang / gsal ba dang / snyan cing 'jebs pa dang / mnyan par 'os pa dang / mi tshugs pa dang /snyan pa dang / dul ba dang / mi rtsub pa dang / rnam par byang ba dang / mi brlang ba dang / rab tu dul ba dang / rnar snyan pa dang / lus tshim par byed pa dang / sems tshim par byed pa dang / snying dga' bar byed pa dang / dga' ba dang bde bskyed pa dang / yongs su gdung ba med pa dang /kun du shes par bya ba dang / rnam par rig par bya ba dang / rnam par gsal ba dang / dga' bar byed pa dang / mngon par dga' bar byed pa dang / kun shes par byed pa dang / rnam par rig par byed pa dang / rig pa dang 'brel ba dang / zlos pa'i skyon med pa dang / seng ge'i sgra'i shugs dang /glang po che'i sgra'i skad dang / 'brug gi dbyangs dang / klu'i dbang po'i sgra dang / dri za'i glu dbyangs dang / ka la ping+ka'i sgra dbyangs dang / tshangs pa'i sgra dbyangs dang / shang shang te'u'i sgra dbyangs su grags pa dang / lha'i dbang po'i sgra dbyangs ltar snyan pa dang / rnga'i sgra dang /ma khengs pa dang / mi dma' ba dang / sgra thams cad kyi rjes su zhugs pa dang / tshig zur chag pa med pa dang / ma tshang ba med pa dang / ma zhum pa dang / mi zhan pa dang / rab tu dga' ba dang / khyab pa dang / tha ba dang bcas pa'i ched dang / rgyun chags pa dang / 'brel pa dang /sgra thams cad rdzogs par byed pa dang / dbang po thams cad tshim par byed pa dang / ma smad pa dang / mi 'gyur ba dang / ma brtabs pa dang / 'khor kun du grags pa dang / rnam pa thams cad kyi mchog dang ldan pa zhes bya ba rnams ni gzhon nu ngag gi sdom pa zhes bya ba'o/ /ngag gi sdom pa gang dang ldan pas byang chub sems dpa' tshig btsun pa thob par 'gyur ba dang /skyes bu chen po'i mtshan sum cu rtsa gnyis dang / dpe byad bzang po brgyad cu dang / de bzhin gshegs pa'i stobs bcu dang / mi 'jigs pa bzhi dang / sangs rgyas kyi chos ma 'dres pa bco brgyad rab tu thob par 'gyur ba de ni ngag gi sdom pa zhes bya ste/sangs rgyas kyi yon tan thams cad nges par sgrub pa'i phyir dang ting nge 'dzin la mnyam par gzhag pa'i tshig yin pa'i phyir ro zhes bya ba ste 'di dag ni lus kyi sdom pa'i skabs su rgyas par bshad pas yang bshad pa ma byas so/ /gzhan yang ngag gi sdom pa gang dang ldan pas byang chub sems dpa' srog gcod pa spong bar 'gyur ba dang /ma byin par len pa dang / mi tshangs par spyod pa dang / brdzun du smra ba dang / phra ma'i tshig dang / tshig rtsub po dang / 'khyal par smra ba spangs par gyur pa dang / pha ma dang slob dpon gang smra bar bya bar bya ba ma yin pa'i tshig mi smra ba dang / sangs rgyas dang / chos dang / dge 'dun la mi smod pa dang / tshig gzhan gang nyes pa dang ldan pa'i tshig de dag spangs pa yin te tshig de dag la yang mi dmigs te mi rtog /rlom sems su mi byed/ mi lta/ mngon par chags par mi byed de zhes bya bar sbyar te/ gang gi phyir brag ca lta bu dang / sprul pa lta bu dang /smig rgyu lta bu dang / mig yor lta bu dang / sgyu ma lta bu'o zhes shes nas dngos po med pa nyid kyi phyir nye bar de dmigs par mi 'gyur ro/ /mi rtog pas na mngon par mi zhen pas de dag gi sdom pa zhes brjod do/ /ngag gi spyod pa yongs su dag pa'i byang chub sems dpa' ni ngan song thams cad kyis mi 'jigs zhes bya ba ni snga ma bzhin no//don 'di dag nyid tshigs su bcad pa'i dbyangs kyis bstan pa ni go sla bas ma bkrol lo/ /chos kyi nges tshig rtog pa ngag gi sdom pa ste/ sangs rgyas gsung rnams thams cad rnam par dag /ting 'dzin rang bzhin ting 'dzin dngos por gsungs/ /gang phyir tshig gis bstan pas rnam par spros//ngag gi sdom pa'i le'u ste bzhi bcu pa'i 'grel pa rdzogs so// //ngag gi sdom pa'i rjes la yid kyi sdom pa bstan pa'i phyir gsungs pa/ gzhon nu de lta bas na yid kyi sdom pas bsdam par bya'o zhes bya ba la sogs pa la/ yid kyi sdom pa gang dang ldan pa byang chub sems dpa' sangs rgyas kyi chos rnams la mi 'jigs pa thob par 'gyur ba zhes bya ba ni 'jigs pa thams cad dang bral ba ni chos kyi sku'i ngo bo nyid do//chos ni sangs rgyas kyi rang bzhin can gyi chos so/ /'thob par 'gyur ba ni mngon sum du byed pa'o/ /mi 'khrugs pa'i sems rnam par grol ba rab tu thob par gyur pa ni nyon mongs pa dang /bdud dang rnam par rtog pas bskyod par mi nus pas rnam par grol ba ste/ nyon mongs pa thams cad spangs pa'i mtshan nyid can gyi mthar thug pa thob par gyur pa la yid kyi sdom pa zhes bya ba'o/ /rdo rje lta bu'i ting nge 'dzin thob par 'gyur ba zhes bya ba la/ting nge 'dzin gang la gnas pas bdud la sogs pas mi phyed cing mi bskyod pa ste/ sems las ma gtogs pa'i bdud kyi ngo bo med pa 'di lta bur rtogs shing sems kyi rang bzhin du rtogs pa ni yid kyi sdom pa zhes bya ba'o/ /'bar ba'i bye brag dang 'dra ba/ /zhes bya ba'i ting nge 'dzin thob par 'gyur zhes bya ba ni 'bar ba ni sprul pa'i 'od zer gyi tshogs so//ting nge 'dzin gang las tha dad pa lta bur snang ba'i 'bar ba'i tshogs 'phro ba de lta bu 'thob pa'o/ /gzhung la la las ni 'od zer 'thob par 'gyur zhes zer ba de ni ting nge 'dzin gyi rgyus byung ba'i phyir ting nge 'dzin nyid 'od zer gyi sgras nye bar btags pa yin no//yan lag drug cu dang ldan pa'i gsung dbyangs phun sum tshogs pa thob par 'gyur zhes bya ba ni bstan zin to/ /yid kyi sdom pa gang dang ldan par byang chub sems dpa' tshig btsun pa thob par 'gyur zhes bya ba ni tshig gzung bar 'os par 'gyur ba'o/ /yid kyi sdom pa zhes bya'o zhes pa thams cad du sbyar ro//mtshan sum cu rtsa gnyis zhes bya ba nas brtsams nas ji srid du phan par 'dod pa dang / spyod lam dang spyod pa la 'jug pa thob par 'gyur zhes bya ba'i bar ni sngar bshad zin pas yang bshad par mi bya'o/ /gzhan yang gzhon nu zhes bya ba la sogs pas ni yid kyi sdom pa rnam pa gzhan bshad par bya'o zhes bya ba'i don to//log par lta ba spang ba'i phyir log par lta ba dang 'grogs par mi byed ces bya ba ni log par lta ba'i bag chags spang ba'i don to/ /de bzhin du brnab sems spang ba'i phyir zhes bya ba la sogs pa la/ brnab sems ni gzhan gyi rdzas la mi rigs pa'i 'dod pas bdag gir gyur cig ces 'dod pa'o//gnod sems ni sems can la sdang ba'o/ /gnod sems spang ba'i phyir gnod sems dang 'grogs par mi byed ces bya ba ni snga ma bzhin no/ /le lo spang ba'i phyir le lo'i sems dang 'grogs par mi byed ces bya ba la/ le lo ni snyom pa'o/ /bla ma rnams la g.yo'i sems mi bskyed ces bya ba ni slu ba'i sems mi bskyed pa ste/ dge ba'i phyogs kyi mi mthun pa'i phyogs yin pa'i phyir ro/ /de bzhin du pha dang / ma dang / slob dpon rnams la g.yo'i sems mi bskyed pa'o/ /'dod chags dang / zhe sdang dang / gti mug gi sems mi bskyed pa ste chags par mi byed do/ /'dod chags la sogs pa dang mi 'grogs pa dang / byang chub kyi sems gtang bar mi bya ba dang / lhag pa'i sems kyang 'khrugs par mi byed pa ni phyin ci log tu sgro btags pas mi g.yo ba'o/ /nyon mongs pa dang nye ba'i nyon mongs pa thams cad dang yang dag par ldan pa'i kun du rtog pa spang bar 'gyur ba yin te/de ni yid kyi sdom pa zhes bya'o/ /yid de yang sgyu ma lta bu'o zhes bya ba la 'jug go zhes bya ba ni sems rnam par rmongs pa'i rang bzhin can gyi byis pa rnams rang gi rang bzhin 'dzin pa'i shes rab dang bral ba'i phyir de lta bu'i byis pa rnams khams gsum pa 'di dag ni sems tsam mo zhes blo 'byung bar 'gyur te/sems kyi rang bzhin ji lta ba ma shes pa'i phyir ro/ /byang chub sems dpa' chen po rnams ni ji ltar sgyu ma'i rang gi ngo bo nyid ni ma skyes pa'o/ /gang ngo bo nyid kyis ma skyes pa de ni skye ba med pa 'gag pa med pa ste de'i ngo bo nyid med pa'o//gang gi ngo bo nyid med pa de rang bzhin med pa'o/ /rang bzhin med pa'i phyir dmigs su med de shes pa zhes bya ba 'am/ rnam par shes pa zhes bya ba 'am/ mi shes pa zhes bya ba'am/ yod ces bya ba'am/ med ces bya bar rnam par rtog pa mi 'byung ngo / /gal te de lta na tha snyad gzhag pa ji lta bur 'gyur zhe na/tha snyad la brtags pas dgos pa ci zhig yod/ /gal te tha snyad rnam par gzhag pa med par gnas par mi nus so zhe na/ de lta na skye ba dang 'gag pa ni rmi lam lta bu'o/ /chu ltar snang ba ni smig rgyu lta bu'o/ /bu dang bu mo la sogs pa'i tha snyad ni sprul pa lta bu'o//de dag thams cad kyang gang nas kyang 'ongs pa med/ gar yang 'gro ba med la de lta na yang gzhi med bzhin du tha snyad nyid zhugs par gyur cing 'jug par 'gyur ro/ /de bzhin du rnam par shes pa'i tha snyad kyang khyad par med par blta bar bya'o/ /yid kyi sdom pas yang dag par bsdams pa'i byang chub sems dpa'i yid de yang mi dmigs so//de'i phyir mi rtog go/ /de'i phyir rlom sems su mi byed do/ /de nyid kyi phyir dmigs par mi 'gyur te/ gang gi phyir cung zad tsam yang mi mthong ngo / /des na thams cad la mngon par mi zhen te/ kun rdzob tu ni chos kyi dbyings kyi ngo bo las mi g.yo ba ni yid kyi sdom pa zhes bya'o zhes bya ba ni tha snyad du brjod pa'o//tshigs su bcad pa rnams la ni lhag pa med pas ma bshad do/ /sangs rgyas yon tan yongs su rdzogs par sdom pa la zhugs shing / /rdzogs sangs rgyas kyi gzugs ldan rtogs pa 'di ni rab 'dod cing //thams cad mkhyen pa'i nyi ma'i 'od kyi tshogs kyi dkyil zhugs na/ /sgrib pa ma lus rnam par bsal nas rab tu sad pa'i sems/ /yid sdom pa zhes de bshad chos rnams thams cad legs bsdus pas/ /chos nyid las gzhan min gzugs phyir ni sdom pa chos kyi sku/ / yid kyi sdom pa'i le'u ste bzhi bcu rtsa gcig pa'i 'grel pa rdzogs so// //tshig sum brgya po 'di dag ni gleng gzhi'i le'ur bshad pas yang brjod par mi bya'o/ /rgya che ba ni sangs rgyas kyi chos yangs par gyur pa'o/ /ste ni gang gi phyir te gang gi phyir rgya che ba de'i phyir bstan pa yang rgya che ba ste tshul sna tshogs dang /sgo sna tshogs nas bstan pas sems can gyi khams dpag tu med pa byang chub chen po la rab tu bkod nas dpag tu med pa'i bsod nams dang ye shes 'thob par 'gyur bas 'di ni nam mkha' bzhin rgya che ba'o/ /rin chen 'od zer rgya che gang //zhes bya ba ni sangs rgyas dkon mchog dang / chos dkon mchog dang / dge 'dun dkon mchog rnams dpag tu med pa'i spyod pa rgya che ba dang / bstan pa rgya che ba ni rgya che ba zhes brjod do/ /chos thams cad kyi rang bzhin mnyam pa nyid rnam par spros pa'i ting nge 'dzin nges par bstan pa'i chos kyi rnam grangs 'di bcom ldan 'das kyis bshad pa na skal pa ji lta ba bzhin du kha cig ni byang chub tu sems bskyed do//kha cig ni phyir mi ldog pa nyid du'o/ /gzhan dag ni sangs rgyas kyi byang chub tu sems bskyed do/ /yang gzhan dag ni dgra bcom pa'i 'bras bu thob par gyur te zhes bya bas bcom ldan 'das kyis chos bstan pa ni 'bras bu dang bcas pa yin no zhes bstan par 'gyur ro//stong gsum gyi stong chen po'i 'jig rten gyi khams 'di yang rnam pa drug tu g.yos shing ltas chen po bco brgyad du g.yos pa ni/ g.yos so/ /rab tu g.yos so//kun du g.yos so/ /'gul to/ /rab tu 'gul to/ /kun du rab tu 'gul to/ /ldeg go/ /rab tu ldeg go/ /kun du rab tu ldeg go/ /'ur 'ur/ rab tu 'ur 'ur/ kun du rab tu 'ur 'ur ro/ /chem chem/ rab tu chem chem/ kun du rab tu chem chem mo/ /shig shig /rab tu shig shig /kun du rab tu shig shig go zhes bya ba ni de la rnam pa drug tu g.yos pa ni g.yo ba dang / mtho ba dang / dma' ba dang / steng du 'gro ba dang / 'og tu 'gro ba dang / sgra rjes su sgrogs pa'o/ /ltas chen po bco brgyad ni drug po de dag nyid kyi rnam par 'gyur ba rnams kyis g.yo ba la sogs pa chung ngu dang /'bring dang / chen po'i dbye bas go rims ji lta ba bzhin du rigs par bya'o/ /snod kyi 'jig rten yang rnam pa gnyis te/ /'dus byas pa dang / 'dus ma byas pa'o/ /sems can gyi 'jig rten yang rnam pa gnyis te/ sems can mi dge ba la spyod pa dang / lha tshogs la mos pa dang / nga rgyal can dang rig pa dang ldan pa rnams kyi dbang du byas nas chung ngu dang / 'bring dang / chen po'i dbye bas g.yos so zhes bya ba nas kun du shig shig ces bya ba'i bar du tshig bco brgyad kyis don bstan pa yin par shes par bya'o/ /yang na gzhan du bshad par bya ste/rnam pa drug tu g.yos pa dang / ltas chen po bco brgyad ces bya ba ni g.yos pa dang / 'gul ba dang / ldeg pa dang / chem chem pa dang / 'ur 'ur ba dang / shig shig pa ni rnam pa drug go/ /de dag nyid so sor chung ngu dang / 'bring dang / chen po'i dbye bas phye na ltas chen po bco brgyad du 'gyur ro/ /phyogs drug la mtho ba dang / dma' ba'i dbye bas phyogs kyi 'gyur ba bcu gnyis su 'gyur la/ de dag kyang sngar bstan zin to/ /de la rgyu gnyis kyis g.yo ba la sogs pa 'di dag 'byung bar 'gyur te/ mthu chen po dang ldan pa'i lha rnams kyis dam pa'i chos thos pa las byung ba'i dga' ba rab kyi mthar thug par gyur pa las byung bas kun du 'khor bar gyur pa las 'khrugs pa'o//brtan pa'i 'jig rten yang thams cad las 'das pa'i de bzhin gshegs pa'i bstan pa'i chos nyid kyi dbang por gyur pa nyid du bstan pa dang /chos nyid kyi mthus chos kyi bdag nyid kyi che ba khong du chud par bya ba'i phyir ro/ /de la phyogs gcig par bar du 'gul ba ni g.yo ba'o/ /shing rnams bzhin du bdag nyid thams cad g.yo ba ni 'gul ba'o/ /mgal me'i 'khor lo bzhin du 'khor ba ni ldeg pa'o/ /chem chem pa ni sgra rgyun chags su 'byung ba'o//'ur 'ur ni 'khrugs pa'o/ /shig shig pa ni shin tu zab pa'i sgra'o/ /yang na g.yo ba ni sa'o/ /'gul ba ni shing thams cad do/ /ldeg pa ni ri thams cad do/ /chem chem pa ni lha'i rnga'i sgra la sogs pa'o/ /'ur 'ur ba ni rgya mtsho la sogs pa'o//shig shig pa ni 'brug gi sgra ltar sgrogs pa'o/ /de dag kyang dang po'i gnas skabs tsam pa'i dus na ni chung bar 'byung la/ bar du ni 'bring du 'byung / tha mar ni che bar 'byung ngo zhes bya bas bco brgyad du 'gyur ro/ /phyogs thams cad du yang mtho ba dang / dma' ba la sogs pa rnam pa gcig tu mnyam du 'byung bar 'gyur na ni bcad nas gtor ba bzhin du shin tu 'khrugs par 'gyur na rim gyis mtho ba dang /dma' ba la sogs par 'gyur ro/ /de la gang gi tshe shar phyogs kyi sa chen po ri dang shing du bcas pa shin tu 'khrugs par gyur pa de'i tshe shar phyogs mtho ba lta bur snang ba 'gyur ro//de'i tshe nub phyogs rang gi rang bzhin du gnas kyang dma' ba lta bur snang bar 'gyur ro/ /de'i phyir shar phyogs mtho na nub phyogs dma' ba zhes bstan pa yin no/ /gang gi tshe nub phyogs kyi sa chen po ri dang shing du bcas pa shin tu 'khrugs par gyur pa de'i tshe/ nub phyogs mtho ba ltar snang bar 'gyur ro zhes thams cad du sbyar bar bya'o//cho 'phrul dang bcas par bstan pa yang cho 'phrul bstan pas sems can rnams 'dul ba ni dgos pa yin no/ /chos nyid kyi bdag nyid che ba nyid kyis g.yo ba la sogs pa yin no zhes shes nas chos kyi de kho na nyid goms par bya ba la rtag tu nan tan bya'o zhes bya ba yin no//gzhan yang lha'i me tog la sogs pa'i char 'bab pa la sogs pa rnams kyang chos nyid kyi stobs su blta bar bya'o/ /kun dga' bo chos kyi rnam grangs 'di khyod kyis zung zhig ces bya ba la sogs pas ni yang dag par gtod par byed pa yin no//de nas bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das chos kyi rnam grangs 'di'i ming ci lags zhes bya ba ni ming gzung ba tsam gyis bsod nams kyi phung po chen por 'gyur ro zhes bstan pa yin no/ /ji ltar gzung bar bgyi zhes bya ba ni tha snyad du byed pa'i dus su the tshom med par tha snyad du bya ba'i don to//bcom ldan 'das kyis bka' stsal pa/ snying rje chen po la 'jug pa zhes bya bar zung shig ces bya ba ni 'dis dmigs pa med pa'i snying rje chen po'i ngo bo nges par byas pa zhes bya ba'o/ /chos thams cad kyi rang bzhin mnyam pa nyid rnam par spros pa zhes bya ba'i ting nge 'dzin zhes bya bar yang zung zhig ces bya ba ni/de bzhin gshegs pa'i bka' ni shin tu 'da' bar dka'o zhes bya'o/ /kun dga' bos gsol pa bcom ldan 'das chos kyi rnam grangs 'di bdag gis bzung lags so zhes bya ba ni 'phags pa kun dga' bos khas blangs par gyur pa'o//bcom ldan 'das kyis de skad ces bka' stsal pa dang zhes bya ba ni mdo sde 'di gsungs par gyur pa na'o/ /yi rangs pa ni gdul bya rnams kyi bsam pa dang / lhag pa'i bsam pa yongs su rdzogs par gyur pas shin tu yang bzung bas yi rangs pas bcom ldan 'das kyang thugs rangs pa'o//zla 'od gzhon nur gyur pa yang yi rangs pa'o/ /tshe dang ldan pa kun dga' bo yang yi rangs pa'o/ /'khor bzhi po de dag kyang yi rangs pa'o/ /gnas gtsang ma'i lha'i bu du ma yang yi rangs pa'o//lha dang mi dang lha ma yin dang dri zar bcas pa'i 'jig rten rnams kyang yi rangs pa'o/ /bcom ldan 'das kyi thugs phyin ci ma log pa'i sems kyis yang dag par mnyes par byas pa gang yin pa de thams cad bcom ldan 'das kyis gsungs pa la mngon par bstod do zhes bya ba ni legs so legs so legs par gsungs so zhes bya bas mngon par dga' ba dang ldan pa'o//shin tu yid 'ong shin tu snyan pa'i tshig gi tshogs kyi 'od zer dang / /'jam pa'i dbyangs kyi zhabs kyi pad+ma rnam bsnyen 'gro ba yi/ /srid par gtogs pa'i rab rib tshogs rnams ma lus sel byed pa//bde bar gshegs pa'i tshul gyis gnas gyur rnam par 'grel la rab mkhas shing / bde bar gshegs pa'i chos rnams bsgom bya ma lus bsgoms gyur gang yin pas/ tshul rnams sna tshogs brnyes pa'i gnyen dang ma chags pa dag gis/ /bde bar gshegs pa'i gsungs gi snying por gyur pa rab gnas pa//ma bkrol bzhag pa bdag la skal ba cung zad tsam zhig yod pa yin/ /sems can don la brtson pa'i sems ldan snying rje rnam par 'phro ba sems can gnyen gcig pa/ /sa stengs rigs mang ldan par grags pa 'jam dpal grags pa zhes bya brtul zhugs can//des ni mdo sde rin po che 'di'i 'grel pa grags pa'i phreng ba zhes bya byas/ /de ni bsgom bya bsgoms na bde gshegs kyis gsungs de nyid gcig tu zhi ba snang bar 'gyur/ /chos rnams thams cad mnyam nyid rnam spros pa/ / ting 'dzin rgyal po de nyid 'jam dbyangs mchog /chos rnams kun gyi lugs la mkhas gyur pa/ /ngo bo nyid kyis dag pa'i chos sku mchog /rgyal ba'i yon tan kun gyis brgyan pa'i mdo sde'i rgyal po'i 'grel pa ji bzhin byas pa las/ /bsod nams mkha' ltar mtha' med ston ka'i skar ma'i bdag po'i ma dngas 'dra bdag gis gang thob pa//de dag gis ni 'khrul pa med pa'i sems kyis gcig tu gzhan phan sems can kun gyi don byas nas/ /'jam pa'i dpal gyi grags ldan rgyal ba'i sras mchog byang chub sems dang sangs rgyas gyur par shog /'jam pa'i dbyangs kyi byin gyi rlabs kyis grags pa'i grags pa shin tu rab rgyas nas/ /nam mkha' dri med steng nas 'gro ba'i nyi ma'i 'od kyis mun pa sel zhing rab rgyas pa/ /sangs rgyas gdung la gcig tu zhen pas thams cad mkhyen pa'i rten gyi sar gyur 'di yi 'grel byas pas//bshad pa dpag med byed pas yul dang dus kyi mthar gnas shog /ting nge 'dzin rgyal po'i 'grel pa grags pa'i phreng ba zhes bya ba slob dpon 'jam dpal grags pas mdzad pa rdzogs so// //dpal lha btsun pa byang chub 'od kyi bka' lung gis rgya gar gyi mkhan po zhi ba bzang po'i zhal snga nas dang /