CLOSE WINDOW

D4009
བོད་ཡིག

/ //rgya gar gyi mkhan po chen po dI paM ka ra shrI dz+nyAn dang / lo tsA ba dge slong tshul khrims rgyal bas bsgyur ba'o//[ ]@##/ /rgya gar skad du/ Ar+ya mahA rat+na kU Ta d+harma par+ya ya pa ri bar+t+ta sha tas ha sri ka kA sh+ya pa pa ri bar+t+ta TI kA / bod skad du/ 'phags pa dkon mchog brtsegs pa chen po chos kyi rnam grangs le'u stong phrag brgya pa las 'od srungs kyi le'u rgya cher 'grel pa/ 'jam dpal gzhon nur gyur pa la phyag 'tshal lo/ /'jig rten mgon po sdug bsngal mtsho rgal ba/ /thugs rje che dang ldan la phyag 'tshal te/ /yang dag don gyi rgyan gyis mdzes byas pa/dkon mchog brtsegs pa'i bshad pa brjod par bya/ smras pa/ khyod dkon mchog brtsegs pa 'chad 'dod do zhes zer na/ /chos kyi rnam grangs 'di dkon mchog brtsegs pa zhes btags pa ci/ dgos pa de nyid je bshad dgos so/ /smras pa/ theg pa chen po'i chos dkon mchog gi rnam pa thams cad bsdus pa'i phyir ro//theg pa chen po'i chos dkon mchog la chos dkon mchog gi rnam pa ji snyed pa de bsdus pa na/ dkon mchog brtsegs pa zhes bya'o/ /brtsegs pa ni spungs pa dang / phung po dang / bcer ba zhes bya ba dang / don tha dad pa ma yin no/ /de la bcom ldan 'das kyis byang chub sems dpa' rnams las brtsams nas theg pa chen por rnam pa bcu drug gis chos bstan te/ji ltar byang chub sems dpa' sgrub pa na log par zhugs par 'gyur ba log par sgrub pa'i rnam pa dang / ji ltar byang chub sems dpa' sgrub pa yang dag par zhugs par 'gyur ba yang dag par sgrub pa'i rnam pa dang /yang dag par sgrub pa'i legs pa'i rnam pa dang / byang chub sems dpa' yang dag par sgrub pa la gnas pa/ chos spyod pa/ mnyam par spyod pa/ dge ba spyod pa/ chos la gnas pa'i tshul gyi rnam pa dang / byang chub sems dpa' la gnod par sems pa dad pa yang dag par bskyed pa'i phyir dpe'i rnam pa dang /byang chub sems dpa' yang dag par sgrub pa la gnas pa'i bslab pa'i rnam pa dang / nyan thos kyi bslab pa dang / byang chub sems dpa'i bslab pa'i khyad par gyi rnam pa dang / byang chub sems dpa'i bslab pa la shin tu bslabs pa'i byang chub sems dpa'i 'jig rten pa dang 'jig rten las 'das pa'i ye shes kyis gzhan gyi don bya ba'i rnam pa dang /byang chub sems dpa'i sde snod kyi gdams ngag de la nyan thos kyi bslab pa'i rnam pa dang / dge sbyong legs par ma bslabs pa'i rnam pa dang / dge sbyong legs par bslabs pa'i rnam pa dang /brda'i sdom pa la gnas pa'i rnam pa dang / don dam pa'i sdom pa la gnas pa'i rnam pa dang / de bzhin gshegs pas 'dul ba'i thabs kyi rnam pa dang / ldem po dag tu smras pa'i rnam pa dang / byang chub sems dpa'i sde snod gdams ngag la mos pa'i legs pa'i rnam pa ste/ bcom ldan 'das kyis byang chub sems dpa' rnams las brtsams nas theg pa chen po rnam pa bcu drug po 'di dag gis chos bstan te/rnam pa 'di dag thams cad kyang chos kyi rnam grangs 'di la snang ngo / /de bas na theg pa chen po las gsungs pa'i chos dkon mchog gi rnam pa thams cad bsdus pa'i phyir dkon mchog brtsegs pa zhes bya'o//smras pa/ ji ltar na theg pa chen po las gsungs pa'i rnam pa de dag thams cad mdo sde 'dir bsdus/ smras pa/ chos bzhi po 'di dag ni byang chub sems dpa'i shes rab yongs su nyams par 'gyur ro zhes bya ba nas/ brtsams te nag po'i phyogs su bsdus pa'i bzhi pa phrag brgyad po dag ni log par sgrub pa'i rnam par bsdu bar rig par bya'o//chos bzhi po dag ni shes rab chen por 'gyur ba'o zhes bya ba nas brtsams te/ dkar po'i phyogs kyi chos su bsdus pa bzhi pa phrag brgyad po dag ni/ yang dag par sgrub pa'i rnam par bsdu bar rig par bya'o/ /bzhi po 'di dag ni byang chub sems dpa'i gter chen po rnyed pa'o zhes bya ba nas brtsams te/bzhi pa phrag bzhi po dag ni yang dag par sgrub pa'i legs pa'i rnam par bsdu bar rig par bya ste/ de ltar bzhi phrag nyi shu po de dag gis ni kun nas nyon mongs pa dang / rnam par byang ba dang / legs par bsdu bar yongs su bstan pa yin no//'od srungs byang chub sems dpa' ni ming tsam gyis byang chub sems dpa' zhes mi bya ste zhes bya ba nas brtsams te/ chos sum cu rtsa gnyis po dag ni tshul khrims kyi rnam par gzhag par rig par bya'o/ /'od srungs khyod la dper bya ba bstan to zhes bya ba nas brtsams te/ dpe bcu dgu po dag ni/dpe'i rnam par bsdu bar rig par bya'o/ /'od srungs de bas na byang chub sems dpa'i dkon mchog brtsegs pa chen po'i chos kyi rnam grangs 'di la slob par 'dod pas zhes bya ba nas brtsams te/ yang dag par sgrub pa la gnas pa'i bslab pa'i rnam par bsdu bar rig par bya'o/ /'od srungs 'di lta ste/dper na nam mkha' las sa bon rnams mi 'byung ngo zhes bya ba nas brtsams te/ nyan thos kyi bslab pa dang byang chub sems dpa'i bslab pa'i khyad par gyi rnam par bsdu bar rig par bya'o/ /de nas bcom ldan 'das kyis yang tshe dang ldan pa 'od srungs chen po la bka' stsal pa zhes bya ba nas brtsams te/'jig rten pa dang 'jig rten las 'das pa'i ye shes kyis gzhan gyi don bya ba'i rnam par bsdu bar rig par bya'o/ /'od srungs nang du yongs su tshol cig /phyi rol du ma rgyu gcig ces bya ba nas brtsams te/ byang chub sems dpa'i sde snod kyi gdams ngag de la nyan thos kyi bslab pa'i rnam par bsdu bar rig par bya'o//'od srungs dge sbyong dge sbyong zhes bya ba 'od srungs ji tsam gyis ni/ dge sbyong ni bzhi po 'di dag go zhes bya ba la dge sbyong gong ma gsum po ni dge sbyong legs par ma bslabs pa'i rnam par bsdu bar rig par bya'o/ /bzhi pa ni dge sbyong legs par bslabs pa'i rnam par bsdu bar rig par bya'o//'od srungs bzhi po 'di dag ni ngang tshul ngan pa can tshul khrims dang ldan pa 'dra ba ma yin te zhes bya ba tshul khrims dang ldan pa 'dra ba bzhi po dag ni brda'i sdom pa la gnas pa'i rnam par bsdu bar rig par bya'o/ /'od srungs tshul khrims tshul khrims zhes bya ba ni gang la bdag med pa dang / bdag gi ba med pa zhes bya ba nas brtsams te/don dam pa'i sdom pa la gnas pa'i rnam par bsdu bar rig par bya'o/ /de nas bcom ldan 'das la tshe dang ldan pa 'od srungs chen pos 'di skad ces gsol to/ /bcom ldan 'das dge slong bsam gtan thob pa lnga brgya po 'di dag stan las langs te mchis so zhes bya ba nas brtsams te/de bzhin gshegs pas 'dul ba'i thabs kyi rnam par bsdu bar rig par bya'o/ /de nas tshe dang ldan pa rab 'byor gyis dge slong de dag la 'di skad ces smras so/ /tshe dang ldan pa dag gar dong dong / gang nas lhags zhes bya ba nas brtsams te/ ldem po'i ngag tu smras pa'i rnam par bsdu bar rig par bya'o//de nas bcom ldan 'das la tshe dang ldan pa 'od srungs chen pos 'di skad ces gsol te/ bcom ldan 'das ji tsam du dkon mchog [(]btsegs [,]brtsegs [)]pa'i chos kyi rnam grangs 'di rigs kyi bu 'am rigs kyi bu mo theg pa chen po la yang dag par zhugs pa rnams la phan 'dogs par gyur pa ni ngo mtshar to zhes bya ba nas brtsams te/byang chub sems dpa'i sde snod kyi gdams ngag la mos pa'i legs pa'i rnam par bsdus par rig par bya ste/ theg pa chen po las gsungs pa'i chos dkon mchog gi rnam pa bcu drug po 'di dag bsdu ba'i phyir chos kyi rnam grangs 'di dkon mchog brtsegs pa zhes btags par rig par bya'o//bcom ldan 'das rgyal po'i khab na bzhugs zhes bya ba gnas brjod pa ci dgos she na/ smras pa/ bcom ldan 'das gnas 'di na bzhugs zhes bya ba ni sems can bsod nams lhur len pa rnams la yul de mchod rten gyi dngos pos bsod nams bskyed pa'i phyir gnas brjod par rig par bya'o//'o na chos kyi rnam grangs 'di ci'i phyir rgyal po'i khab tu bshad kyi gzhan dag tu ma bshad ce na/ smras pa/ chos kyi rnam grangs 'di chos kyi rgyal po'i gnas su bstan pa'i phyir te/ ji ltar rgyal po'i khab rgyal po'i gnas su gyur pas rgyal po'i khab ces bya ba brjod pa de bzhin du chos kyi rnam grangs 'di chos kyi rgyal po'i gnas su gyur pa bstan pa'i phyir rgyal po'i khab nyid du bshad do//'o na ci'i phyir bya rgod kyi phung po'i ri la bshad kyi yul gzhan du ma yin zhe na/ smras pa/ nyan thos dang rang sangs rgyas kyi theg pa las theg pa chen po brtsegs pa ltar khyad zhugs par bstan pa'i phyir te/ji ltar zhe na/ bdag dang gzhan gyi don sgrub pa'i dbang du byas pa'i phyir ro/ /dge slong brgya stong dang byang chub sems dpa' stong phrag bcu drug ces bya ba la/ smras pa/ de la byang chub sems dpa'i ched kyi phyir bstan pa 'di la byang chub sems dpa' smos pa ni rigs na nyan thos kyi dge 'dun smos pa ci dgos/smras pa/ nyan thos kyi dge 'dun smos pa ni nyan thos theg pa chen po la the tshom za ba rnams kyi the tshom bsal ba dang / ma nges pa rnams yid ches par bya ba dang / rnam par dag pa rnams bdag la nga rgyal byed pa spang ba'i phyir te/ nyan thos gang dag nyon mongs pa thams cad spangs pas 'di lta ste/nyon mongs pa'i sgrib pa spangs pa ni bstan pa la rnam par dag pa'i yan lag tu bya ba 'di tsam du zad do snyam nas bdag la nga rgyal bskyed pa'i mngon pa'i nga rgyal de dor ba'i phyir te/ byang chub sems dpa' rnams las brtsams nas nyon mongs pa dang /shes bya'i sgrib pa spang ba'i rgyur gyur pa chos kyi rnam grangs 'di las bstan pa'i phyir nyon mongs pa dang shes bya'i sgrib pa spangs pa dpe las 'das pa'i nyan thos dang rang sangs rgyas thams cad las bye brag tu 'phags pa'i 'bras bu ston to/ /nyan thos rnams pas byang chub sems dpa' 'di dag ji ltar ci'i phyir mang bar 'gyur snyam du ma 'ongs pa'i skye bo dag gi dogs pa bsal ba'i phyir ro//sangs rgyas kyi zhing tha dad pa nas 'dus pa zhes sdud par byed pa smos so/ /skye ba gcig gis thogs pa sha stag ces pa ni gtam 'di'i snod du gyur pa'o zhes bya ba'i tha tshig go/ /gang gi tshe sangs rgyas kyi zhing de dag na yang sangs rgyas bcom ldan 'das dag chos ston bzhin du sangs rgyas kyi zhing tha dad pa dag nas byang chub sems dpa' rnams sangs rgyas kyi zhing 'dir 'ong ci dgos she na/smras pa/ sems can yongs su smin par bya ba ni dgos pa ste/ sangs rgyas kyi zhing 'di na yod pa'i sems can rnams byang chub sems dpa' de dag gis sngon yongs su smin par byas pas/skal ba mnyam pa gang yin pa de dag nyid las nyan par sems pa dang / sangs rgyas kyi zhing gzhan dag na yang sangs rgyas bzhugs par bstan pa'i phyir ro/ /bstan pa ci dgos she na/ smras pa/ de dang mtshungs par spyad pa rnams sangs rgyas kyi zhing de dag tu sangs rgyas la lta 'dod pa skyed pa dang /sangs rgyas mang bar brjod pa dang / /sems can gzhan dag kyang sangs rgyas su 'grub par spro ba bskyed pa'i phyir te/ bcom ldan 'das shAkya thub pa nyid kyis sngon yongs su smin par mdzad pa'i phyir de dang skal ba 'dra bas sangs rgyas kyi zhing gzhan dag nas bcom ldan 'das la lta ba'i phyir lhags so//smras pa/ ci'i phyir nyan thos dag pas byang chub sems dpa' ches mang / smras pa/ byang chub sems dpa' mang ba ni de dag gi sgrub par gtogs pa'i phyir ro/ /smras pa/ ci'i phyir nyan thos kyi dge 'dun ni gong du smos/smras pa/ de byin gyis brlabs nas bstan pa rtsom pa'i phyir ro/ /smras pa/ ci'i phyir sangs rgyas kyi zhing tha dad pa nas 'dus pa dang / 'di lta ste/ bla na med pa yang dag par rdzogs pa'i byang chub tu skye ba gcig gis thogs pa zhes smos/ smras pa/ sangs rgyas kyi zhing tha dad pa nas 'dus pa dang /skye ba gcig gis thogs pa zhes smos pa ni chos mnyan pa don du mi gnyer ba dang / le lo dang nga rgyal gyi dbang gis mi 'ong ba de'i gnyen po'i phyir te/ bdag nyid chos nyan pa don du gnyer bas/ gzhan dang gzhan dag nas lhags kyi/ gzhan gyi rjes su 'brang ba ma yin pa dang / 'jig rten gyi khams thag ring po gzhan dag nas kyang lhags pa dang /sangs rgyas kyi chos la dbang bskur ba thob pa dag kyang lhags na gzhan lta smos kyang ci dgos kyi/ ci'i phyir 'dong bar mi bya ba snyam pa ste/ de ltar de'i gnyen po'i phyir ro/ /de nas bcom ldan 'das kyis tshe dang ldan pa 'od srungs chen po la bka' stsal pa zhes bya ba ci'i phyir bcom ldan 'das kyis 'od srungs chen po las brtsams te chos ston la byang chub sems dpa' rnams la ma yin zhe na/smras pa/ 'od srungs chen po la bka' stsal pa ni bstan pa'i nus pa brjod pa'i phyir te/ ma rtogs pa dang ma mos pa dag kyang theg pa chen po'i yid ches par bya ba'i phyir ro/ /de la log par sgrub pa bsdus pa sngar bstan pa bzhi pa phrag brgyad po dag ni gong nas gong du mngon par sgrub pas go rims su rig par bya ste/bzhi pa dang po ni ye shes kyi tshogs yongs su nyams par 'gyur ba'i phyir log par sgrub pa'o/ /gnyis pa ni ye shes kyi tshogs yongs su nyams pa dran pa nyams pa'i phyir ro//gsum pa ni dran pa nyams pa dkar po'i chos yongs su zad par 'gyur ba'i phyir ro/ /bzhi pa ni dkar po'i chos yongs su zad pas byang chub sems dpa'i cha ma yin pa yid mi mnyam pa kun du 'byung ba'i phyir ro/ /lnga pa ni yid mi mnyam pa kun du 'byung ba gdul dka' ba'i phyir ro/ /drug pa ni gdul dka' ba lam ma yin par 'gro ba'i phyir ro//bdun pa ni lam ma yin par 'gro ba dam pa ma yin pa dang / kun du 'du ba'i phyir ro/ /brgyad pa ni dam pa ma yin pa dang / kun du 'du ba'i don ji lta ba bzhin gyi byang chub sems dpa' ma yin pa'i phyir log par sgrub pa'o/ /de las bzlog pa yang dag par sgrub par bsdus pa bzhi pa phrag brgyad po sngar bstan pa rnams kyang gong nas gong du mngon par sgrub pas go rims su rig par bya ste/bzhi pa dang po ni ye shes kyi tshogs yongs su skong ba'i phyir yang dag par sgrub pa'o/ /gnyis pa ni ye shes kyi tshogs yongs su rdzogs pa dran pa nyams par mi 'gyur ba'i phyir ro//gsum pa ni dran pa ma nyams pa dkar po'i chos mngon par 'phel ba'i phyir ro/ /bzhi pa ni dkar po'i chos mngon par 'phel ba byang chub sems dpa'i cha yid mnyam pa kun du 'byung ba'i phyir ro/ /lnga pa ni yid mnyam pa kun du 'byung ba gdul sla'i phyir ro/ /drug pa ni gdul sla ba yang dag pa'i lam du 'gro ba'i phyir ro//bdun pa ni yang dag pa'i lam du 'gro ba dam pa dang kun du 'du ba'i phyir ro/ /brgyad pa ni dam pa dang kun du 'du ba byang chub sems dpa'i don ji lta ba bzhin yin pa'i phyir yang dag par sgrub pa'o/ /yang dag par sgrub pa'i legs par bsdus pa sngar bstan pa bzhi pa phrag bzhi po dag kyang gong nas gong du mngon par sgrub pa'i go rims su rig par bya ste/bzhi pa dang po ni byang chub sems dpa' yang dag par zhugs pa'i bsod nams dang / ye shes kyi tshogs stsog pa'i phyir ro/ /bzhi pa gnyis pa ni bsod nams dang ye shes kyi tshogs stsog pa la brten nas sgrib pa rnam par dag pa'i phyir ro//bzhi pa gsum pa ni sgrib pa rnam par dag pa la brten nas dkar po'i chos kyi sgo thams cad kun du 'thob pa'i phyir ro/ /bzhi pa'i bzhi pa ni dkar po'i chos kyi sgo thams cad kun du thob pa la brten nas rnam pa thams cad du sems can gyi don la sbyor ba dang / bsod nams dpag tu med pa bskyed pa'i phyir ro//bzhi pa phrag nyi shu po'i go rims ni bshad zin to// //da 'di man chad ni de dag nyid kyi tshig gnyer bshad pa brjod par bya'o/ /'od srungs chos bzhi po 'di dag byang chub sems dpa'i shes rab yongs su nyams par 'gyur ba'o zhes 'di ci'i phyir brtsams she na/smras pa/ theg pa chen po la yang dag par zhugs pa bla na med pa'i byang chub thob par bya ba'i thabs la rmongs pa rnams la bstan pa dang / bag med pa rnams yang dag par 'dzin du gzhug pa dang / zhum pa rnams gzengs bstod pa dang / yang dag par zhugs pa dga' bar bya ba'i phyir ro//'od srungs zhes bka' stsal pa ni nyan pa rnams la 'dun par sbyor ba'o/ /chos zhes bya ba ni gang zag bsal ba'i phyir chos zhes bya ba smos te/ chos kyi sgra ma smos na ci chos yin nam/ 'on te gang zag yin zhes the tshom du 'gyur ro/ /smras pa/ rang gi sgra brjod pa'i phyir bzhi zhes grangs smos pa ni don med do//smras pa/ bzhi zhes grangs smos pa ni rgya che bar dogs nas de nyan mi 'dod pa rnams spang ba dang / grangs smos pa dag kyang dran par bya ba dang / gzung sla ba'i phyir te/ me tog brgyus pa bzhin no/ /ci'i phyir bzhi nyid de/ mi mang mi nyung zhe na/ la la na re ha cang skyon du 'gyur bas klan kar mi 'gyur ro zhes so//gzhan dag ni shes rab kyi tshogs rnam pa gsum yongs su nyams pa bsdus pa'i phyir bzhi'o zhes zer ro/ /mdor na shes rab ni rnam pa gsum ste/ thos pa'i dang / bsam pa'i dang / bsgom pa'i'o/ /de la tshig dang po gong ma gsum po dag gis ni shas cher thos pa'i ye shes kyi tshogs yongs su nyams par ston to//tshig bzhi pa thams ni shas cher bsam pa dang / bsgom pa'i ye shes kyi tshogs phyir zhing yongs su nyams par ston te de bas ni bzhi nyid do/ /'di dag ces bya ba ni chos nye ba 'di dag nyid kyi so sor rnam par dbye ba'i bshad pa bstan to/ /byang chub sems dpa' zhes bya ba la/byang chub sems dpa'i don brjod par bya ba ste/ theg pa chen po la yang dag par zhugs pa rnams kyi rnam grangs mang yang / byang chub sems dpa' smos pa ni rnam pa gsum po 'di dag gis rig par bya ste/ mos pa dang / sbyor ba dang / khong du chud pa'o/ /mos pa ji lta bu zhe na/shes bya zab mos rtogs pa la mos pa'o/ /sbyor ba ji lta bu zhe na/ bdag dang gzhan yang dag par rdzogs pa'i byang chub kyi rgyur sbyor ba'o/ /khong du chud pa ji lta bu zhe na/ shes rab kyi stobs kyis byang chub khong du chud pa'o/ /shes rab las yongs su nyams par 'gyur zhes bya ba ni thob pa dang /ma thob pa las yongs su nyams pa'o/ /thob pa dang ma thob pa las yongs su nyams pa gang zhe na/ yongs su nyams pa gang gis yongs su nyams pa ste/ zag pa med pa ni ma thob pa las yongs su nyams pas so/ /gzhan ni gnyi ga bye brag med pas so/ /shes rab las yongs su nyams pa'i tshig gis ni bye brag med pa'i phyir gal te zag pa med pa las gtogs pa'i skyon du 'gyur ro zhe na/ma yin te/ bshad zin pa'i phyir ro/ /shes rab kyi tshogs yongs su nyams pa zhes brjod pa ni rgyu la 'bras bu gdags par byas nas brjod pa'o/ /shes rab las yongs su nyams pa zhes bya ba ci'i phyir zhe na/zag pa dang bcas pa'i shes rab ni/ zag pa med pa'i shes rab kyi tshogs su gyur pa yin te/ de bas na zag pa dang bcas pa ni thob pa dang ma thob pa las yongs su nyams pas yongs su nyams so/ /zag pa med pa ni ma thob pa las yongs su nyams pa nyid kyis te/ zag pa med pa la ni thob pa las yongs su nyams pa med do//smras pa/ ji ltar na mi gus pa la sogs pa'i chos rnams kyis shes rab las yongs su nyams par 'gyur/ smras pa/ khong khro bas na mi gus so/ /mi gus pas na mi nyan to/ /mi nyan pas na byang bar mi 'gyur ro/ /ma byang bas ni tshe 'di nyid la shes rab las yongs su nyams par 'gyur ro//chos la ser sna byed cing / slob dpon chos 'chad pas ni mi ston to/ /mi ston pas na tshe rabs gzhan na rkyen dang mi ldan par 'gyur ro/ /rkyen dang mi ldan pas shes rab las yongs su nyams par 'gyur ro/ /gang zag chos 'dod pa rnams la chos kyi bar chad byed par chos nyan pa la sgrib par 'gyur ro//nyan pa la sgrib pas gti mug par 'gyur te/ bsod nams ma yin pa skyed do/ /de bas na tshe rabs gzhan na yang rmongs par 'gyur ro/ /rmongs pas na shes rab las yongs su nyams par 'gyur ro/ /bdag stod cing gzhan smod pa na phyin ci log tu mngon par zhen pas log par ston to//phyin ci log tu mngon par zhen te log par ston pas tshe rabs gzhan na phyin ci log tu 'gyur ro/ /phyin ci log tu gyur pas shes rab las yongs su nyams par 'gyur ro/ /smras pa/ gang gi dus na yongs su nyams par 'gyur/ smras pa/ dus gnyis te/ tshe 'di dang / tshe rabs gzhan na'o/ /smras pa/ gang gi tshe rabs gzhan 'o/ /smras pa/ gang gi tshe sbyin pa la sogs pa yongs su nyams par 'gyur ba'i rgyu ser sna la sogs pa'i chos rnams kyang yod na ci'i phyir shes rab las yongs su nyams par 'gyur ba'i rgyu nyid bstan gyi/sbyin pa la sogs pa yongs su nyams par 'gyur ba ma yin/ smras pa/ gtso bo'i phyir te shes rab kyi ngo bo nyid ni byang chub bo/ /de las gzhan pa'i pha rol tu phyin pa rnams ni shes rab la gnas so/ /shes rab la log par zhugs pa'i byang chub sems dpa' ni byang chub dang byang chub thob par byed pa'i chos rnams la log par zhugs pa yin no//shes rab la yang dag par zhugs na byang chub dang byang chub thob par byed pa'i chos rnams la yang dag par zhugs pa yin no/ /de bas na shes rab las yongs su nyams par 'gyur ba'i rgyu nyid bstan gyi/ sbyin pa la sogs pa las yongs su nyams par gyur pa'i rgyu ni ma yin no//mi gus pa la sogs pa shes rab yongs su nyams par 'gyur ba'i rgyu tshig bzhi po 'di dag gis mi nyan pa la sogs pa'i chos bzhi yongs su ston te/ mi gus pas ni mi nyan par yongs su ston to/ /chos la ser sna byed cing slob dpon chos 'chab pas ni mi ston to//chos kyi bar chad byed pas nyan pa la sgrib pa'o/ /mngon pa'i nga rgyal gyis ni phyin ci log tu mngon par zhen pas ston pa'o/ /ye shes kyi tshogs yongs su nyams par 'gyur ba'i mi nyan pa la sogs pa'i chos bzhi po 'di dag la brten nas tshe 'di dang tshe rabs gzhan na ye shes dang mi mthun pa'i chos bzhi po gzhan dag 'byung bar 'gyur te/bzhi gang zhe na/ byang bar mi 'gyur ba dang / rkyen dang mi ldan pa dang / gti mug par 'gyur ba ste/ bsod nams ma yin pa skyed pa dang / phyin ci log go/ /mi nyan pa la brten nas tshe rabs 'di la byang bar mi 'gyur ro/ /mi ston pa la brten nas tshe rabs gzhan na rkyen dang mi ldan par 'gyur ro//nyan pa la sgrib pa la brten nas tshe rabs gzhan na gti mug par 'gyur te/ bsod nams ma yin pa skyed do/ /phyin ci log tu mngon par zhen pas ston pa la brten nas tshe rabs gzhan na phyin ci log tu 'gyur ro/ /chos dang chos smra ba la mi gus pa yin zhes bya ba'i tshig gnyis po bye brag ci yod ce na/smras pa/ tshig gnyis kyis ni nyan pa'i rgyu yongs su rdzogs par ston te/ la la ni chos la gnod par sems pas mi nyan kyang chos smra ba la gus pas nyan/ la la ni chos smra ba la gnod par sems pas mi nyan kyang chos la gus pas nyan to/ /gang gnyi ga las gnod par sems pa de ni yang mi nyan to//de bas na brjod pa gnyis kyis mi nyan pa'i rgyu yongs su rdzogs par bstan pa yin no/ /chos la ser sna byed cing slob dpon chos 'chab pa yin zhes bya ba'i tshig 'di gnyis bye brag ci yod/ smras pa/ gzhan gyis shes pa bas bdag lhag par mngon par bsnyems pas chos la ser sna byed do//gzhan gyi brnyas kyis 'jigs pa'i phyir slob dpon chos 'chab bo/ yang na bye brag med par chos thams cad mi ston pa'i phyir chos la ser sna byed do/ /kha cig ston kha cig mi ston pa'i phyir slob dpon chos 'chab bo/ /yang na chos la ser sna byed de/ chos yongs su mi ster bas bsam pa la log par 'jug go//slob dpon chos 'chab pa ni chos la ser sna byed pa'i bsam pa las byung ba'i sbyor ba log par 'jug go/ /gang zag chos 'dod pa rnams la chos kyi bar chad byed/ mos pa zlog par byed/ rnam par 'khrug par byed de/ mi ston cing rab tu 'chab pa yin zhes bya ba'i tshig 'di dag la bye brag ci yod ce na/de la chos kyi bar chad byed ces bya ba de ni bstan pa'i tshig go/ /ji ltar chos kyi bar chad byed/ mos pa zlog par byed/ rnam par 'khrug par byed de/ mi ston cing rab tu 'chab ces bya ba dang ji ltar mos pa zlog par byed ce na/ chos dang gang zag la mi snyan pa brjod pa'i phyir te/ chos dang gang zag gang las nyan par 'dod par gyur pa'i chos de dang /gang zag de la med pa'i gnod par byed pa dang ldan pa'i tshig gis ci nas nyan par mi 'gyur ba de lta de lta bur mi snyan pa brjod pa'o/ /ji ltar rnam par 'khrug par byed ce na/ bya ba ngan pas rnam par g.yeng bar byed pa ste/ ci nas kyang nyan pa med par 'gyur ba de lta de lta bur bya ba ngan pas nyan pa la rnam par 'khrug par byed pa'o//ji ltar mi ston ce na/ mi 'chad pa dang / mi 'chol ba dang / mi ston pa ste/ chos don du gnyer ba gzhan dag gis dris te/ chos smros shig ces bya ba nas chos la ser sna byed pas mi 'chad do/ /chos smra ba gzhan la mi 'chol/ dris kyang skabs mi 'byed pa'o//ji ltar rab tu 'chab ce na/ nyan pa'i bsngags pa ma yin pa brjod pa ste/ chos 'di ni zab la khyod ni shes rab zhan pas chos 'di khyod kyis shes par mi nus so zhes nyan pa la mi snyan pa brjod pas chos bstan pa rab tu 'chab par byed do/ /de ltar chos kyi bar chad byed pas mi khom par skye ste/tshogs yongs su rdzogs par mi byed do/ /mngon pa'i nga rgyal gyis bdag bstod cing gzhan smod pa yin zhes bya ba'i tshig de dag gi don gang yin zhe na/ mngon pa'i nga rgyal zhes bya ba de ni bstan pa'i tshig go/ /ji ltar na mngon pa'i nga rgyal yin zhe na/ gang bdag la bstod pa dang gzhan la smod pa yin no//bdag la bstod pa ji lta bu yin zhe na/ log par rtogs pa dang / bsgoms pa dang / bshad pa dag la legs par rtogs pa dang / bsgoms pa dang / bshad par mngon par zhen pa'o/ /gzhan la smod pa ji lta bu yin zhe na/ gzhan dag gis legs par rtogs pa dang /bsgoms pa dang bshad pa dag la log par rtogs pa dang / bsgoms pa dang bshad par mngon par zhen pa ste/ mngon pa'i nga rgyal gyi nyes pas de kho na mngon par rdzogs par byang chub par byed pa'i shes rab dang chos mngon par rtogs pa'i mthar thug par 'gro bas bsdus pa'i shes rab mi 'thob po//mdor bsdus na gang las yongs su nyams pa dang / ji lta ba dang gang gi dus dang / chos ji snyed cig gis yongs su nyams par 'gyur ba de yongs su bstan to/ /gang las yongs su nyams she na/ shes rab las so/ /ji lta ba zhes bya ba ni rnam pa gang gis yongs su nyams par 'gyur ba ste/ sngar bshad pa yin no//gang gi dus na zhe na/ tshe 'di dang tshe rabs gzhan no/ /chos ji snyed cig gis she na/ mi gus pa la sogs pa'i chos bzhi po dag gis so/ /shes rab las yongs su nyams par byed pa mi mthun pa'i phyogs su gyur pa'i mi gus pa la sogs pa chos bzhi po 'di dag gi gnyen por chos bzhi bstan te/ 'od srungs chos bzhi po 'di dag ni byang chub sems dpa'i shes rab chen por 'gyur ba yin te/ bzhi gang zhe na/ chos dang chos smra ba la gus pa dang bcas pa yin zhes bya ba la sogs pa'o/ /gus pa dang bcas pa yin zhes bya ba la sogs pa chos bzhi po 'di dag yang dag par blangs pa'i rgyus byang chub sems dpa'i shes rab chen po'i rgyur gyur pa shes rab rnam pa bzhi rab tu 'thob ste/byang bar byed pa dang / yongs su smin par byed pa dang / tshogs yongs su rdzogs par byed pa dang / mngon par rdzogs par byang chub par byed pa'o/ /gus pa dang bcas pas chos nyan pas byang bar byed pa'i shes rab rab tu 'thob po/ji ltar thos pa dang / ji ltar khong du chud pa'i chos rnams gzhan dag la rgya cher yang dag par rab tu ston pas bdag dang gzhan gyi rgyud [(]yangs [,]yongs [)]su smin par byed pa'o/ /mang du thos pa las shes rab 'byung bar shes te/ mgo 'am thod la me 'bar ba bzhin du thos pa yongs su tshol te/ ji ltar thos pa'i chos rnams kyang 'dzin to//thos pa yongs su tshol zhing 'dzin pas tshogs yongs su rdzogs par byed do/ /sgrub pa snying por byed pa yin gyi/ smra ba dang brjod pa'i tshig dam par 'dzin pa ma yin zhes bya ba ni sgrub pa snying por byed pas mngon par rdzogs par byang chub par byed pa'i shes rab rab tu 'thob bo//de la chos dang chos smra ba la gus pa dang bcas pa yin zhes bya ba ni/ mi gus pa las bzlog pa ste/ gus pa dang bcas par rig par bya'o/ /ji ltar thos pa dang ji ltar khong du chud pa'i chos rnams gzhan dag la yang rgya cher yang dag par rab tu bstan to/ /zang zing med pa'i sems kyis mi re ba ni thob pa dang /bkur sti dang tshigs su bcad pa thams cad la zang zing med pa'i sems kyis te/ 'thob pa dang bkur sti ni chos la ser sna byed pa'i rgyu'i phyir ro/ /'thob pa ni chos gos la sogs pa'o/ /bkur sti ni phyag 'tshal ba la sogs pa'o/ /tshigs su bcad pa ni bsngags pa 'don pa'o/ /mang du thos pa las shes rab 'byung bar shes te/mgo 'am thod pa la me 'bar ba bzhin du thos pa yongs su tshol ba ni thos pa yongs su 'tshal ba'i phyir rab tu gus pas bya ba yongs su ston to/ /'di lta ste dper na/ skyes bu zhig gi mgo 'am thod la me 'bar na/ bya ba thams cad btang ste/ mgo 'am thod la me 'bar ba bsal ba'i phyir rab tu 'bad par rtsom pa ltar byang chub sems dpa' yang de bzhin te/thos pa ni shes rab kyi rgyu yin pa dang / shes rab kyang thams cad mkhyen pa 'thob pa'i bar gyi rgyu yin pa'i phyir ro/ /gus pa dang ldan na thos pa yongs su tshol lo/ /bdag dang gzhan la phan par 'dod pas ji ltar thos pa'i chos rnams 'dzin to//gang thos pa'i don ji lta ba bzhin du bsgrub pa ni sgrub pa snying por byed pa yin no/ /sgrub pa snying por byed pas de'i rigs pa'i rjes su 'brang ba'i shes rab skye'o/ /smra ba dang brjod pa'i tshig dam par 'dzin pa ma yin zhes bya ba la smra ba'i tshig dam par 'dzin pa ma yin/brjod pa'i tshig dam par 'dzin pa ma yin pa ni smra ba dang brjod pa'i tshig dam par 'dzin pa ma yin pa ste/ thos pas chog par 'dzin pa ma yin/ 'chad pas chog par 'dzin pa ma yin no zhes bya ba'i tha tshig go/ /yang na mi dgos pa dang don med pa'i tshig dam par byed pa ma yin zhes bya ba'i tha tshig go//'di dag gi go rims ni chos la mi gus pas chos kyi rjes su mthun pa'i chos mi sgrub ste/ chos la ser sna byed pas gang zag chos 'dod pa rnams la chos kyi bar chad byed do/ /de shes rab kyi rgyu rnam pa gsum po de las yongs su nyams te/ shes rab 'chal bas mngon pa'i nga rgyal can yin no/ /dkar po'i phyogs ni de las bzlog pa ste/chos la gus pa dang bcas pas chos kyi rjes su mthun pa'i chos la 'jug go/ /chos kyi rjes su mthun pa'i chos la zhugs pas chos la ser sna byed pa dang bral te/ ji ltar thos pa'i chos rnams gzhan dag la rgya cher yang dag par rab tu ston to/ /chos ston par 'dod pa'i phyir mang du thos pa yongs su tshol lo//mang du thos nas bdag dang gzhan dag la phan gdags pa'i rgyu sgrub pa snying por byed pa yin gyi/ smra ba dang brjod pa'i tshig dam par 'dzin pa ma yin no/ /shes rab ni byang chub kyi sems kyi rtsa ba'o/ /byang chub kyi sems ni thams cad mkhyen pa'i rtsa ba ste/ byang chub kyi sems mi brjed par bya ba'i don du byang chub kyi sems las nyams pa dang /mi nyams pa'i rgyu'i chos ston pa'i phyir/ bcom ldan 'das kyi 'od srungs byang chub sems dpa' chos bzhi dang ldan pa'i byang chub kyi sems nyams par 'gyur ro zhes gsungs so/ /smras pa/ ci'i phyir nyams pa'i rgyu bzhi nyid de mi mang mi nyung / smras pa/ nyams pa rnam pa bzhi'i phyir ro//de las mdor bsdu na nyams pa ni rnam pa bzhi ste/ ma brjod pas nyams pa dang / byang chub kyi sems la skyon du lta ba'i phyir log par brjod pas nyams pa dang / yang dag par blangs pa'i brda'i sems nyams pa dang / chos nyid kyis thob pa'i sems nyams pa ste/ nyams pa'i chos rnam pa 'di bzhi'i rgyu nyams pa bzhi nyid de/go rims bzhin du rig par bya'o/ /slob dpon dang bla ma dang sbyin gnas la slu zhes bya ba ni/ bla ma rnams la bdag gi yang dag pa ji lta ba bzhin du mi smra'i/ brdzun gyi tshig gis bslu ba'i phyir bla ma rnams la slu ba yin no/ /de la slob dpon ni gleng ba dang nye bar ston pa yin te/gang nyes pa 'di lta bu byung ngo zhes gleng zhing 'di ni bya ba ma yin pa zhes nyes pa las 'byin pa'i thabs ston la/ 'di ltar gyis shig ces ston pa'o/ /bla ma ni phan par 'dod pa nyid do/ /sbyin gnas ni grangs su ma gtogs kyang yon tan dang ldan pa'o/ /de dag gis snying brtse ba'i phyir gleng ba na bdag gi 'das par gyur pa brdzun gyi tshig gis mgo rmongs par byed de/des las kyi sgrib pa chen po sogs so/ /las kyi sgrib pa che ba'i phyir ma brjod pas byang chub kyi sems las nyams par rig par bya'o/ /mgo rmongs par byed ma nus su zin kyang / brdzun la goms pa'i nyes pa'i sgrib pas kyang /byang chub kyi sems las nyams par gyur pa ste/ 'di ni rgyu dang po'o/ /gzhan 'gyod pa med pa la 'gyod par byed pa zhes bya ba ni tshangs pa mtshungs par spyod pa rnams 'gyod pa med pa'i gnas la phyin ci log skyed pa'i phyir te/ tshangs pa mtshungs par spyod pa yang dag pa'i bslab pa la nye bar gnas pa rnams bslab pa'i tshig rnams la mgo rmongs par byed pas/'di ltar tshangs pa mtshungs par spyod pa la lhag pa'i bsam pa ma yin pa la zhugs pa'i phyir sgyu dang g.yos bslab pa'i tshig rnams la mgo rmongs par byed de/ las kyi sgrib pa mi bzad pa sogs so/ /de bas na byang chub kyi sems la skyon du lta ba'i phyir log par brjod pas de byang chub kyi sems las nyams par 'gyur ro//mgo rmongs par byed ma nus su zin kyang nyes pa'i sgrib pas de byang chub kyi sems las nyams par 'gyur te/ 'di ni rgyu gnyis pa'o/ /theg pa chen po la yang dag par zhugs pa'i sems can rnams la bsngags pa ma yin pa dang / mi snyan pa dang / brjod pa ma yin pa'i sgra tshigs su bcad pa 'byin zhes bya ba ni chos don du gnyer ba rnams gang las chos thos par 'gyur ba de las phyir phyogs par byed pa'i phyir te/ gang dag theg pa chen po la mos par 'dod pa'am/ sgrub par 'dod par gyur pa dag de las mos pa bzlog pa'i phyir theg pa chen po la yang dag par zhugs pa'i sems can rnams la bsngags pa ma yin pa smra ba'o//dmigs ma phye ba dang / dmigs kyis phye ba dang rnam par phye nas nyes par brjod do/ /de la dmigs ma phye bar nyes pa yongs su brjod pa ni bsngags pa ma yin pa'i sgra tshigs su bcad pa 'byin pa ste/dper na ngang tshul ngan pa can zhes bya ba lta bu'o/ /dmigs kyis phye nas nyes pa brjod pa ni mi snyan pa'i sgra tshigs su bcad pa 'byin pa ste/ dper na mi gtsang bar spyod ces bya ba lta bu'o/ /rnam par phye nas nyes pa brjod pa ni brjod pa ma yin pa'i sgra tshigs su bcad pa 'byin te/ rnam pa 'di dang 'dis zhes bya ba'o//de ltar byang chub sems dpa' rnams la dmigs ma phye ba dang / dmigs kyis phye ba dang rnam par phye nas nyes pa brjod pa'i phyir theg pa chen po sgrub par 'dod pa rnams la mgo rmongs par byed do/ /de de ltar byang chub sems dpa' rnams la mi gus pa skyes te/ yon tan yang dag par bcabs pas las kyi sgrib pa mi bzad pa sogs so//sgrib pa des ni de'i yang dag par blangs pa'i brda'i sems nyams par 'gyur ro/ /byang chub sems dpa'i yon tan yang dag par bcabs par ma nus su zin kyang nyes pa'i sgrib pas de'i sems nyams par 'gyur te/ 'di ni rgyu gsum pa'o//sgyu dang / g.yos gzhan la nye bar spyod kyi/ lhag pa'i bsam pas ma yin zhes bya ba ni chos smra ba rnams kyi gsang ba'i gnas rnam par 'byed pas mgo rmongs par bya ba'i phyir ro/ /de la sgyu zhes bya ba ni/ bcos pas nyes par spyod pa'o/ /de la g.yo zhes bya ba ni sems gya gyu ba'o/ /lhag pa'i bsam pas ma yin [(]zhas [,]zhes [)]bya ba ni rang bzhin ma yin pa'i rjes su zhugs pas chos smra ba'i gang zag rnams kyi gsang ba'i gnas rnam par 'byed pas sbyor ba ste/byang chub sems dpa' chos smra ba rnams las gsang ba'i gnas dag thos nas theg pa chen po sgrub par 'dod pa rnams mos pa bzlog par bya'o zhes de ltar sbyor bas las kyi sgrib pa chen po bsags te/las kyi sgrib pa des chos nyid kyis 'thob pa'i sems las ring du gyur pa'i tshul gyis nyams par 'gyur ro/ /mos pa bzlog ma nus su zin kyang de'i nyes pa'i sgrib pa de lta bus kyang sems nyams par 'gyur ro/ /mdor bsdu na gang las nyams par 'gyur zhe na/sems las so/ /gang gi tshe 'gyur zhe na/ tshe 'di dang tshe rabs gzhan pa'o/ /ji ltar 'gyur zhe na/ sgrub pa dag na slob dpon la sogs pa dag la log par byed pas so/ /ji snyed cig gis she na/ rgyu bzhi po dag gis te 'di ni bshad zin to/ /de'i gnyen po ni dkar po'i phyogs su rig par bya ste/srog gi phyir yang shes bzhin du brdzun gyi tshig mi smra zhes bya ba ni bden pa rjes su bsrung ba/ lus dang srog la mi lta'o/ /tha na bzhad gad kyi phyir yang zhes bya ba ni kha na ma tho ba phra rab rnams la yang 'jigs par lta'o/ /sgyu dang g.yo med pas sems can thams cad kyi drung na lhag pa'i bsam pas gnas pa zhes bya ba la/lhag pa'i bsam pa zhes bya ba ni/ rang bzhin dang mthun pa'o/ /sgyu med pa zhes bya ba de ni bcos ma ma yin pa nye bar spyod pa kun du ston pa'o/ /g.yo med pa zhes bya ba de ni gya gyu dang bral ba'o/ /byang chub sems dpa' thams cad la yang ston par 'du shes bskyed cing / de dag gi yang dag pa'i bsngags pa phyogs bzhir brjod pa zhes bya ba ni gang las chos thos pa de bsngags pa'i phyir ro/ /nyi tshe ba'i theg pa mi 'dod pa'i phyir sems can gang rnams yongs su smin par byed pa de dag thams cad kyang bla na med pa yang dag par rdzogs pa'i byang chub yang dag par 'dzin du 'jug pa zhes bya ba ni mchog gi don du spyod pa bsdu ba'i dngos pos yongs su smin par byed par sems pa'o//de dag gi go rims ni/ slob dpon la sogs pa slu bas slob dpon la sogs pa la ni gus te/ bslab pa la mi gus pas bdag 'gyod pa med de/ gzhan 'gyod pa med pa la rnam par gtse ba'i bsam pas 'gyod par byed do//'gyod pa med pa'i phyir theg pa chen po las yang dag par zhugs pa'i sems can rnams la bsngags pa ma yin pa smra ba'o/ /byang chub sems dpa' la khong khro bas byang chub kyi sems las byung ba'i gzhan la phan par bya ba las byung ba med pas sgyu dang g.yos gzhan la nye bar spyod pa'i lhag pa'i bsam pa ma yin no//yongs su nyams par mi 'gyur ba'i rgyu rnams kyi go rims ni byang chub kyi sems chud za bar mi 'gyur ba'i rgyu bden pa'i tshig goms par byas pas byang chub kyi sems las yongs su mi nyams pa'i byang chub sems dpa' sgyu dang / g.yo med pa'i phyir byang chub kyi sems las byung ba gzhan la phan par bya ba/lhag pa'i bsam pas sems can thams cad kyi drung na gnas so/ /byang chub kyi sems las byung ba'i gzhan la phan par bsam pa las byung ba'i chos shin tu rmad du byung ba dang / dpag tu med pa dag rang gi rgyud la dmigs nas byang chub kyi sems la gus pa dang /byang chub kyi sems kyang thams cad mkhyen pa'i rgyu yin pa'i phyir byang chub sems dpa' thams cad la ston par 'du shes bskyed do/ /nyi tshe ba'i theg pa mi 'dod pa'i phyir byang chub kyi sems la gus pas sems can gang dag yongs su smin par byed pa de dag thams cad bla na med pa yang dag par rdzogs pa'i byang chub yang dag par 'dzin du 'jug go//byang chub kyi phyir sems pa ni/ byang chub kyi sems te/ byang chub kyi rgyu zhes bya ba'i tha tshig go/ /smras pa 'di ltar dang por byang chub kyi sems bskyed de/ sangs rgyas su gyur cig ces bya ba'i rang bzhin gang / tshul gang / gang la dmigs/ yon tan gang / khyad par gang / gang gis bsdus/ gang gi rtsa ba/ gang gi 'bras bu/ gang gi gnas/ smras pa/ dang por yang dag par smon pa ni rang bzhin no/ /yid kyis smon pa ni tshul lo/ /byang chub la dmigs shing sems can gyi don la dmigs so/ /thams cad mkhyen pa'i rgyu yin pa'i phyir yon tan dpag tu med do//'jig rten pa dang / nyan thos dang / rang sangs rgyas thams cad kyi smon lam las mchog tu gyur pas khyad par du 'phags so/ /mos pa spyod pa'i sas bsdus so/ /bla na med pa yang dag par rdzogs pa'i byang chub kyi rtsa ba'o/ /snying rje'i 'bras bu'o/ /byang chub sems dpa'i bslab pa'i gnas so//dang po byang chub kyi sems bskyed pa de yang mdor bsdu na/ 'byung ba dang / mi 'byung ba dang / 'byung ba ni gang skyes nas rgyun mi 'chad par rjes su 'jug pa yin pa'o/ /de'i ldog pa yang rnam pa gnyis te/ rgyun chad pa pa dang rgyun mi 'chad pa'o/ /de la rgyun chad pa ni gang lan cig log nas yang mi skye ba'o//rgyun mi 'chad pa ni gang log kyang yang skye'o/ /sems de yang rkyen bzhi dang / rgyu bzhi dang / stobs bzhi po dag gis skye ste/ rkyen bzhi po dag gang zhe na/ de bzhin gshegs pa'i cho 'phrul shin tu rmad du byung ba mthong ngam thos pa dang / bla na med pa yang dag par rdzogs pa'i byang chub las brtsams pa'i chos thos pa dang /sems can la snying brtse bar nye bar bzung nas byang chub sems dpa' dam pa'i chos yun ring du gnas par byed pa dang / dus ngan pa'i sems can shin du sdug bsngal ba dag mthong ba'o/ /rgyu bzhi po gang zhe na/ rigs phun sum tshogs pa dang /bshes gnyen dam pa phun sum tshogs pa dang / snying rje dang / 'khor ba'i sdug bsngal dus ring ba sna tshogs pa mi bzad pa/ mtshams med pas mi 'jigs pa'o/ /stobs bzhi po dag gang zhe na/ rang gi stobs dang / gzhan gyi stobs dang / rgyu'i stobs dang / sbyor ba'i stobs so//de rang gi mthus bla na med pa yang dag par rdzogs pa'i byang chub 'dod pa ni rang gi stobs so/ /gzhan gyi mthus bskyed par 'dod pa ni gzhan gyi stobs so/ /sngon chad theg pa chen po dang rab tu ldan pa'i dge ba'i chos goms par byas pa ni rgyu'i stobs so/ /tshe 'di la skyes bu dam pa la brten pa dang /dam pa'i chos nyan pa dang / sems pa la sogs pas dus ring por dge ba'i chos goms par byas pa ni sbyor ba'i stobs so/ /rkyen bzhi po dang rgyu bzhi po tshogs pa'am/ ma tshogs pa dag la brten pa de la gal te/ rang gi stobs dang rgyu'i stobs te/ stobs gnyis tshogs pas sems gang skye ba de ni de ltar brtan pa dang /snying po yod pa dang / mi g.yo bar skye ba'o/ /gzhan gyi stobs dang sbyor ba'i stobs kyis sems de skye ba ni mi brtan par skye bar rig par bya'o/ /de'i log pa'i rgyu yang rnam pa bzhir rig par bya ste/ rigs phun sum tshogs pa ma yin pa dang / sdig pa'i grogs pos yongs su zin pa dang /sems can rnams la snying rje chung ba dang / 'khor ba'i sdug bsngal gyis 'jigs pa'o/ /byang chub kyi sems ma nyams pa'i byang chub kyi sems de nyid la gnas par byas nas bsod nams dang / ye shes kyi tshogs kyis yongs su zin pa'i dge ba'i chos rnams la sbyor ro//de ltar sbyor ba de'i dge ba'i chos yongs su zad pa dang / 'phel ba'i rgyu'i chos ston to/ /bcom ldan 'das kyis 'od srungs byang chub sems dpa' chos bzhi dang ldan na dge ba'i chos skyes shing byung ba rnams yongs su zad par 'gyur ro zhes rgya cher gsungs pa'o/ /smras pa/ ci'i phyir dge ba'i chos yongs su zad par 'gyur ba'i rgyu'i chos bzhi nyid de/mi mang mi nyung / smras pa/ dge ba'i chos yongs su zad par 'gyur ba rnam pa bzhi'i phyir te/ 'di la mdor bsdu na byang chub sems dpa'i dge ba'i chos yongs su zad par 'gyur ba rnam pa bzhi ste/ mi skye bas yongs su zad par 'gyur ba dang /mi 'phel bar yongs su zad par 'gyur ba dang / rtsa ba nas bcom pas yongs su zad par 'gyur ba dang / rgyang bsrings pas yongs su zad par 'gyur ba'o/ /de la dkar po'i chos rnams mi skye bas yongs su zad par 'gyur ba'i rgyu ni mngon pa'i nga rgyal gyis 'jig rten rgyang pan pa'i brjod pa tshol ba ste/byang chub sems dpa'i sde snod pha rol tu phyin pa drug dang ldan pa mngon par mi shes pa'i byang chub sems dpa' mngon pa'i nga rgyal gyis zin pa ni 'thob pa dang / bkur sti la lta bas gzhan dang 'gran pa'i dbang du byas te/ 'jig rten rgyang pan pa'i brjod pa yongs su tshol ba'i phyir dkar po'i chos rnams kyi skye mched ma yin pa la sbyor ba na dkar po'i chos rnams mi skye ba'i yongs su zad pas yongs su zad par 'gyur ro//sngon thob pa rnams kyang bya ba gzhan la chags te/ nyan pa la g.yel ba mi 'phel bas yongs su zad par 'gyur ba'i rgyu ni 'thob pa dang / bkur sti la chags te khyim la lta'o/ / de 'thob pa ni chos gos la sogs pa'o/ /bkur sti ni phyag 'tshal ba la sogs pa'o/ /'thob pa dang bkur sti la chags pa ni/ 'thob pa dang bkur sti la chags pa'o/ /'thob pa dang bkur sti la chags pas log par yongs su spyod pa bstan pa yin no/ /khyim la lta bas ni 'du 'dzi mang bar bstan pa yin no//smras pa/ 'di gnyis gang las byung / smras pa/ yang dag par 'ongs pa'i thob pas chog par mi 'dzin te/ tshul 'chos pa la sogs pa la gnas pa dang / 'phags pa'i rigs rnams la mi gnas pa las byung / 'di ltar 'thob pa dang bkur sti la chags pas khyim rnams la lta ba de 'du 'dzi mang ba'i phyir thos pa la sogs pa dge ba'i chos rnams ma 'phel lo//thos pa la sogs pa mi 'phel bas thos pa la sogs pa dge ba'i chos mi 'phel ba'i yongs su nyams pas yongs su nyams par 'gyur ro/ /rtsa ba nas 'joms pas yongs su zad par 'gyur ba'i rgyu ni byang chub sems dpa' la khro zhing skur pa 'debs pa ste/byang chub sems dpa' rnams la nyes par lta ba ni khro ba'o/ /byang chub sems dpa' la khro ba nyid kyi phyir byang chub sems dpa' la skur pa 'debs pa ste/ 'khrul pa'i nyes pa gzhan tshol zhing byang chub sems dpa' rnams kyi nyes pa byung ba'am/ ma byung ba gleng bas las kyi sgrib pa rgya chen po sogs te/gdon mi za bar de'i dge ba'i chos rnams rtsa ba nas 'joms pa'i yongs su zad pas yongs su zad par 'gyur ro/ /rgyang bsrings pas yongs su zad par 'gyur ba'i rgyu ni ma thos pa dang / ma zin pa'i mdo sde rnams spong ba ste/ ma thos pa zhes bya ba ni thos pa'i lam du ma gyur pa'o//ma zin pa zhes bya ba ni thos pa'i lam du gyur kyang ma zin pa ste/ nges pa'i don gyi mdo sde rnams spong zhing / 'di las dgongs nas bcom ldan 'das kyis mdo 'di gsungs so zhes bya ba ste/ chen po bstan pa chos nyid las dgongs te gsungs pa'i don de bzhin gshegs pa'i dgongs pa la su log pas 'jal ba de'i dam pa'i chos la skur pa cher btab pas gnod pa thob ste/de'i dkar po'i chos rnams rgyang bsring ba'i yongs su zad pas yongs su zad par 'gyur ro/ /de las bzlog pa ni dkar po'i phyogs su rig par bya ste/ 'od srungs byang chub sems dpa' chos bzhi dang ldan na/yongs su mi 'bri ba'i chos can du 'gyur te/ khyad par du 'gro'o/ /bzhi gang zhe na/ 'di lta ste/ 'di ltar byang chub sems dpa'i sde snod pha rol tu phyin pa drug dang ldan pa yongs su tshol ba las brtsams nas/ legs par thos pa tshol gyi nyes par thos pa ma yin zhes bya ba la sogs pa'o/ / de la legs par thos pa tshol zhes bya ba ni byang chub sems dpa'i sde snod pha rol tu phyin pa drug gis bsdus pa ni legs par thos pa tshol ba'o/ /nyes par thos pa ma yin zhes bya ba la/ 'jig rten rgyang pan pa'i brjod pa'i dbang du byas pa rnams mi nyan pa ni nyes par thos pa ma yin pa'o/ /sems can thams cad la nga rgyal med pa'i phyir khyi dang 'dra ba'i sems yin zhes bya ba la nga rgyal gyis zin pa rnams ni 'jig rten rgyang pan pa'i brjod pa tshol bar 'gyur te/'thob pa dang bkur sti'i rgyur gyur pa 'jig rten rgyang pan pa'i brjod pa tshol ba yongs su btang ba dang / byang chub sems dpa'i sde snod pha rol tu phyin pa drug btsal ba'i phyir 'jig rten rgyang pan pa'i brjod pa tshol ba'i rgyu las bzlog pa ston to//chos kyi thob pas tshog par 'dzin te/ log par tshol ba thams cad yongs su spangs shing 'phags pa'i rigs la dga' ba yin zhes bya ba ni de yang dag par 'ongs pa'i 'thob pas tshim pa'i phyir chos kyi thob pas chog par 'dzin to//tshul 'chos pa la sogs pa'i nyes pa yongs su btang ba'i phyir log pas 'tsho ba thams cad yongs su spangs so/ /mi srid pa'i rang bzhin can du gyur pa'i phyir 'phags pa'i rigs la dga'o/ /de ltar yang dag par zhugs par rang gi bya ba dam par 'dzin pa nyes pa byung ba yang gzhan gyis rjes su bsrung bas gzhan gyis mi gleng na nyes pa gzhan dang 'khrul pa tshol ba lta ga la 'gyur/byang chub sems dpa'i sde snod pha rol tu phyin pa drug tshol ba la brtson pa de'i blos/ chos gang dag mi rtogs pa de la de bzhin gshegs pa nyid kyis mngon sum du gzigs pa'i phyir mngon sum mo zhes mi spong ngo //ci'i phyir zhe na/ sangs rgyas kyi byang chub mtha' yas pa dang / mos pa tha dad pa la bltas nas chos bstan pa'i phyir ro/ /mdor bsdu na gang dag yongs su zad par 'gyur ba dang / ji ltar yongs su zad par 'gyur ba dang / gang gi dus dang / chos ji snyed cig gis yongs su zad par 'gyur ba de bstan te/gang dag yongs su zad par 'gyur zhe na/ dge ba'i chos rnams so/ /ji ltar yongs su zad par 'gyur zhe na/ mngon pa'i nga rgyal la brten nas 'jig rten rgyang pan pa'i brjod pa tshol ba la sogs pa'i rim gyis so/ /gang gi dus she na/ tshe 'di dang tshe rabs gzhan na'o/ /chos ji snyed cig gis she na/chos bzhi po dag gis so/ /dkar po'i phyogs la yang dge ba'i phyogs gang dag skye bar 'gyur/ /ji ltar skye bar 'gyur/ gang gi dus na skye bar 'gyur/ /chos ji snyed cig gis skye bar 'gyur zhes bzlog ste yongs su bstan to/ /chos bzhi po 'di dag gi go rims ni mngon pa'i nga rgyal gyis zin to//'thob pa dang bkur sti la lta bas 'jig rten rgyang pan pa'i brjod pa tshol lo/ /btsal bar bya ba khyim gang dag nas 'thob par byed pa'i khyim de dag la lta'o/ /'thob pa dang bkur sti la chags pas phrag dog dang ser sna la sogs pa'i sems kyis khyim der gtogs pa'i byang chub sems dpa' gzhan dag la khro zhing skur pa 'debs so//de la khros pa nyid kyi phyir dam pa'i chos spong ngo / /dkar po'i phyogs kyi go rims ni nga rgyal la sogs pa'i nyes pa rnams med pas pha rol tu phyin pa drug gis bsdus pa yang dag par nyan pa la brtson pa'i byang chub sems dpa'i rjes su mthun pa'i chos sgrub pa na 'thob pa dang bkur sti la chags pa skur pa 'debs pa'i rgyu med pas chos kyi 'thob pas chog par 'dzin te/log pas 'tsho ba de dag spangs shing 'phags pa'i rigs la dga' ba yin no/ /byang chub sems dpa' la gnod par sems pa med pas nyes pa byung ba dang ma byung ba las gzhan la mi gleng ngo / /thar pa 'dod pas dam pa'i chos mi spong ngo //dkar po'i chos yongs su zad par 'gyur ba'i rgyu'i chos rnams spangs pa dang / dkar po'i chos yongs su nyams par mi 'gyur ba'i rgyu'i chos rnams yang dag par 'dzin pa'i byang chub sems dpa' byang chub sems dpa'i cha ma yin pa yid mi mnyam par kun tu 'byung ba spang bar bya ba dang /byang chub sems dpa'i cha yid mnyam pa kun du 'byung ba yang dag par 'dzin du gzhug pa'i don du yon po dang / yon po ma yin pa'i sems bskyed pa nye bar bstan pa'i phyir/ bcom ldan 'das kyis 'od srungs bzhi po 'di dag ni yon por sems bskyed pa ste/ de dag byang chub sems dpas yongs su spang bar bya'o zhes rgya cher gsungs pa'o//smras pa/ ci'i phyir bzhi nyid de/ mi mang mi nyung / smras pa/ la la na re ha cang skyon du 'gyur bas klan kar mi 'gyur ro zhes zer ro/ /yo ba rnam pa bzhi'i dbang du byas pa yin no/ /yo ba rnam pa bzhi'i dbang du byas nas yon por sems bskyed par rig par bya ste/ theg pa chen po la yo ba dang yongs su smin par byed pa la yo ba dang /bsod nams kyi tshogs la yo ba dang / ye shes kyi tshogs la yo ba'o/ /de la theg pa chen po la yo ba'i rgyu ni sangs rgyas kyi chos rnams la som nyi dang / yid gnyis dang / the tshom za ba ste/ ston pa la yid mi ches na bslab pa la mi gus pa'i phyir sangs rgyas kyi chos rnams la som nyi za ba la sogs pa nye bar bzung nas theg pa chen po la khyad du gsod par zhugs pa yin te/de la sangs rgyas kyi chos rnams yod pa la ni som nyi za'o/ /che ba nyid la ni yid gnyis za'o/ /ye shes 'thob pa la ni the tshom za'o/ /yongs su smin par byed pa la yo ba'i rgyu ni/sems can rnams nga rgyal dang / rgyags pa dang / 'chab pa dang / khro ba dang / gnod par sems pa'o/ /nga rgyal la sogs pas zil gyis non na sems can khyad du gsod pas sems can rnams yongs su smin par mi byed de/ nga rgyal dang / rgyags pa dang / 'chab pa dang / khro ba dang /gnod par sems pa ni bla ma rnams dang / slob ma rnams dang / gleng ba rnams dang / gnod par byed pa rnams dang / gnod par mi byed pa rnams la go rims bzhin du rig par bya'o/ /bsod nams kyi tshogs la yo ba'i rgyu ni/ gzhan gyis 'thob pa rnams la phrag dog dang ser sna byed pa'o/ /de la gzhan gyi 'thob pa mthong nas sems kyi khyad par 'khrugs pa ni phrag dog go//de la smon pa ni ser sna'o/ /phrag dog dang ser sna de nyid las sems song ste/ bsod nams kyi tshogs rnams la khyad du gsod par 'jug pa ni bsod nams las yongs su nyams par 'gyur ro/ /ye shes kyi tshogs la yo ba'i rgyu ni byang chub sems dpa' rnams la bsngags pa ma yin pa dang /mi snyan pa dang / brjod pa ma yin pa'i sgra tshigs su bcad pa 'byin pa'o/ /bsngags pa ma yin pa la sogs pa'i don ni sngar bshad pa yin no/ /byang chub sems dpa' rnams la bsngags pa ma yin pa brjod pas theg pa chen po spong bar rig par bya'o/ /theg pa chen po spangs nas byang chub sems dpa' ye shes kyi tshogs rnams la khyad du gsod par 'jug pa yang ye shes kyi tshogs rnams las yongs su nyams par 'gyur ro//de las bzlog pa ni dkar po'i phyogs su rig par bya'o/ /yon po'i gnyen por drang po'i mtshan nyid bstan te/ 'od srungs bzhi po 'di dag ni byang chub sems dpa' drang po drang ba'i mtshan nyid yin te/bzhi gang zhe na/ nyes pa byung ba mi 'chab ces bya ba la sogs pa'o/ /de la nyes pa byung ba mi 'chab ces bya ba ni bstan pa'i tshig go/ /rnam par 'byed ces bya ba ni dngos po yongs su brjod pa'o/ /'chags pa zhes bya ba ni nyes pa so sor 'chags pa'o//ci nas kyang 'gyod par mi 'gyur ba de ltar 'thob pa ni kun nas ldang ba med pa yin no/ /rgyal srid stor ba'am/ nor yal ba'am zhes bya ba ni/ bden pa'i bsam pas longs spyod la mi lta bar yongs su ston to/ /srog gi bar chad du 'gyur yang zhes bya ba ni srog la mi lta ba'o/ / gzhan nas gzhan du bsgyur ba'i tshig mi smra zhes bya ba ni/ don gzhan du sbyor ba'i don btang ste mgo rmongs par mi byed pa'o/ /gzhan gyis gnod par byas pa/ khro ba dang / gshe ba dang / smod pa dang / spyo ba dang / brdeg pa dang / bsdigs pa dang / gsod pa dang / bcing ba byas pa thams cad la bdag gis nyes par sems zhes bya ba'i tshig 'di rnams la bye brag ci yod ce na/de la khro ba ni kha na ma tho ba ma byung ba brjod pa'o/ /gshe ba ni kha na ma tho ba byung ba brjod pa'o/ /smod pa ni rigs la sogs pa'i nyes pa brjod pa'o/ /spyo ba ni kha na ma tho ba byung bas rnam par 'joms pa'o/ /bsdigs pa ni lus kyi tshul gyis bsdigs pa'o//brdeg pa ni lus kyi yan lag lag pa la sogs pas so/ /gsod pa ni lag pa la sogs pa dang 'brel pa mtshon cha la sogs pas so/ /bcing ba ni thag pa la sogs pas so/ /de la sogs pa gzhan gyis gnod par byas pa rnams la bdag gis nyes par sems pa'o/ / las kyi rnam par smin pa'i phyir 'brang bas gzhan dag las mi 'khrugs zhes bya ba ni khro ba'i kun nas bskor ba ldang bar mi byed pa'o/ /khon du 'dzin pa med ces bya ba ni mdud par 'dzin pa med pa'o/ /de dad pa la rab tu gnas pa yin te/ bsam pa yongs su dag pa'i phyir thams cad dad par mi 'gyur ba'i sangs rgyas kyi chos la mngon par dad ces bya ba ni theg pa chen po la lhag pa'i bsam pas mos par yongs su bstan pa yin no//tshig 'di dag gi go rims ni sangs rgyas kyi chos rnams la the tshom za bas tshul khrims la mi gus te/ sems can rnams la log par sgrub po/ /log par sgrub pas 'thob pa la ser sna byed pa'o//ser sna'i zil gyis non pas byang chub sems 'thob pa dang ldan pa mthong ngam thos na/ byang chub sems dpa' rnams la bsngags pa ma yin pa smra'o/ /dkar po'i phyogs kyi go rims ni tshul khrims dang ldan pas bden pa rjes su bsrung ngo / /bden pa rjes su bsrung bas bzod pa dang ldan pa yin no//bzod pa dang ldan pas bsam pa rnam par dag ste/ sangs rgyas kyi chos la mngon par dad do/ /mdor bsdu na yon po gang zhe na/ sems kyis khyad du gsod pa'o/ /gang la yo zhe na/ sangs rgyas kyi chos rnams dang / sems can rnams la'o/ /gang gi tshe zhe na/'di la goms par byas pas ma 'ongs pa na yang ngo / /chos ji snyed cig gis she na/ ji skad smos pa'i chos bzhi po dag gis so/ /drang po gang yin pa dang / don gang drang ba dang / gang gi tshe dang / chos ji snyed cig gis zhes dkar po'i phyogs kyang bzlog ste rig par bya'o/ /yon por sems bskyed pa dang bral ba'i byang chub sems dpa' dag ni/byang chub sems dpa' drang po rnams kyi drang ba'i mtshan nyid du gsungs te/ byang chub sems dpa' drang po rnams yang dag par 'dul ba'i phyir dang / dmu rgod du byed pa'i chos yongs su spong ba dang / dmu rgod ma yin pa yang dag par 'dzin du gzhug pa'i don du dmu rgod dang /dmu rgod du byed pa ma yin pa'i chos rnams bstan pa'i phyir/ bcom ldan 'das kyis 'od srungs bzhi po 'di dag ni byang chub sems dpa' dmu rgod do zhes rgya cher gsungs so/ /smras pa/ ci'i phyir bzhi kho na zhe na/ dmu rgod rnam pa bzhi'i rgyu'i phyir ro/ /dmu rgod rnam pa bzhi gang zhe na/ gnas la dmu rgod pa dang /'jug pa la dmu rgod pa dang / yongs su spyod pa la dmu rgod pa dang / 'grogs pa la dmu rgod pa'o/ /de la dmu rgod ces bya ba ni/ gdul dka' ba ste rta dmu rgod bzhin no/ /dmu rgod du byed pa'i chos bzhi po 'di dag byang chub sems dpas bsgoms na sgrib par 'gyur ba'i phyir dmu rgod du byed pa zhes bya'o//de la thos pas g.yeng ba'i chos su gnas pa ni gnas la dmu rgod pa'i rgyu ste/ dper na rta dmu rgod sems ma zhi ba rang gi gnas su bzhag na 'dug tu mi btub pa de bzhin du/ byang chub sems dpa' dmu rgod kyang thos pa dam par 'dzin pas thos par g.yengs te/ sems ma zhi bas dge ba'i bshes gnyen rnams kyis chos kyi rjes su mthun pa'i chos sgrub pa la bzhag na 'dug tu mi btub po//rjes su bstan pa la g.yeng ba'i chos su gnas pa ni 'jug pa la dmu rgod pa'i rgyu ste/ dper na rta dmu rgod lam bde bar bcug na dmu rgod du gyur pas lam mi bde bar 'jug pa de bzhin du byang chub sems dpa' dmu rgod kyang dge ba'i bshes gnyen rnams kyis chos kyi rjes su mthun pa'i chos sgrub pa'i rjes su bslabs shing bstan na phyin ci log tu rtogs pas gdams ngag log par 'dzin pa yin no//dang bas byin pa log par ltung bar byed pa ni yongs su spyod pa la dmu rgod pa'i rgyu ste/ dper na rta dmu rgod ni rta cang shes kyi nang du bcug na rta cang shes rnams dang yongs su spyod pa mi 'dra ba yin te/de bzhin du byang chub sems dpa' dmu rgod kyang byang chub sems dpa' cang shes kyi nang du son na tshul khrims la skyon yod pas dad pas byin pa za ba la 'gyod de/ byang chub sems dpa' cang shes dang skal ba mi mnyam par rig par bya'o//byang chub sems dpa' dul ba cang shes pa rnams la mi gus pa ni grogs la dmu rgod pa ni sdug bsngal gyi rgyu ste/ dper na rta dmu rgod ni dmu rgod du gyur [(]bas [,]pas [)]rta cang shes pa rnams dang 'grogs pa na sdug bsngal bar gnas so/ /de bzhin du byang chub sems dpa' dmu rgod rang gi lta ba bsnyems pa la gnas pa yang byang chub sems dpa' dul ba cang shes pa rnams dang 'grogs na sdug bsngal bar gnas la/byang chub sems dpa' dul ba cang shes pa rnams kyang dmu rgod kyis sdug bsngal bar gnas so/ /de la dul ba ni dbang po sdom pa bye brag tu 'phags pa'i phyir ro//de las bzlog pa ni dkar po'i phyogs su rig par bya ste/ 'od srungs bzhi po 'di dag ni byang chub sems dpa' cang shes pa'o/ /bzhi po gang zhe na zhes bya ba la sogs pa'o/ /legs par thos pa nyan te de la nan tan du byed cing don gyi phyir 'brang gi/ yi ge'i phyir 'brang ba ma yin pa zhes bya ba ni skyon gdags pa dang /bag rkyong ste/ de skad brgal ba legs par lta bas chos nyan pa ma yin no zhes bya ba'i tha tshig go/ /byang chub sems dpa' de ltar sgrub pa ni dge ba'i bshes gnyen chos 'dzin pa la mi slu ba'o/ /rjes su bstan pa la mthun par 'dzin cing bka' blo bde ba la legs par byed pa'i las byed cing /bla ma la nyan par gyur pa yin zhes bya ba tshig de dag gi don ci zhe na/ de la rjes su bstan pa la mthun par 'dzin pa zhes bya ba ni bstan pa'i tha tshig go/ /bka' blo bde zhes bya ba ni tshig bzod pa'i phyir ro/ /legs par byed pa'i las byed ces bya ba ni dus thams cad du nyes pa med pa'i phyir ro//bla ma la nyan par gyur pa yin zhes bya ba ni gdams ngag la gus pa dang bcas pa'i phyir ro/ /byang chub sems dpa' de ltar sgrub pa ni dge ba'i bshes gnyen dgon pa la mi slu'o/ /tshul khrims dang ting nge 'dzin ma nyams te/ cang shes pas zas kun za zhes bya ba ni bslab pa la shin tu gus pas dad pas byin pa yongs su spyod par bstan to//tshul khrims dang / ting nge 'dzin ma nyams zhes bya ba ni 'dir tshul khrims nyid ting nge 'dzin gyi sgrar rig par bya'o/ /byang chub sems dpa' de ltar sgrub pa ni dge ba'i bshes gnyen bsod nams bya ba brtson pa la mi slu'o/ /byang chub sems dpa' dul ba cang shes pa rnams mthong na gus pa dang bcas/zhes dang bcas shing de la gzhol/ de la 'bab/ de la bab nas de de'i yon tan la re ba yin zhes bya ba tshig de dag la bye brag ci yod ce na/ de la dul ba dang cang shes kyi don sngar bstan pa yin no/ /gus pa dang bcas pa ni gus pa bskyed pa'i phyir ro//de la gzhol ba ni lta 'dod pa'i phyir ro/ /de la 'bab pa ni bsnyen bkur byed 'dod pa'i phyir ro/ /de la bab pa ni nyan 'dod pa'i phyir ro/ /de'i yon tan la re ba ni rjes su mthun pa'i chos sgrub 'dod pa'i phyir ro/ /byang chub sems dpa' de ltar sgrub pa ni dge ba'i bshes gnyen 'khor dang 'dug pa la mi slu'o//mdor bsdu na dmu rgod gang yin pa dang / ji lta ba dang / gang gi tshe dang ji snyed cig gis shes te yongs su bstan te/ de la dmu rgod ni gdul dka' ba'o/ /ji ltar 'gyur zhe na/ thos pa dam par 'dzin pa la sogs pa'i rgyu rnams kyis so/ /gang gi tshe zhe na/ 'di dang tshe rabs gzhan na ste/goms par byas pa'i phyir ro/ /ji snyed cig gis she na/ thos pa la g.yeng ba'i chos su gnas pa la sogs pas so/ /dkar po'i phyogs ni de las bzlog par rig par bya'o/ /de dag gi go rims ni thos pa la g.yeng ba'i chos su gnas pas chos kyi rjes su mthun pa'i chos mi sgrub ste/de bstan pa la g.yeng ba'i chos su gnas pa yin no/ /bstan pa la g.yeng ba'i chos su bstan pa ni dad pas byin pas log par ltung bar byed do/ /de ltar nyon mongs pa can ni sgyu can te/ byang chub sems dpa' dul ba cang shes pa thob pa rnams la mi gus pa yin no/ /de las bzlog pa ni dkar po'i phyogs kyi go rims su rig par bya'o//dmu rgod du byed pa'i chos rnams dang bral te/ dmu rgod du byed pa ma yin pa'i chos rnams yang dag par 'dzin du bcug nas dmu rgod du byed pa ma yin pa'i chos la rnam par gnas pa rnams kyi 'khrul ba'i chos yongs su spang ba dang / ma 'khrul ba'i chos yang dag par 'dzin du gzhug pa'i don du 'khrul ba dang /ma 'khrul ba'i chos bstan pa'i phyir ro/ /bcom ldan 'das kyis 'od srungs bzhi po 'di dag ni byang chub sems dpa'i 'khrul pa'o zhes rgya cher gsungs so/ /smras pa/ ci'i phyir bzhi kho na smras pa/ byang chub sems dpa'i 'khrul pa ni 'khrul pa rnam pa bzhi'i dbang du byas par rig par bya ste/ma byas pa'i 'khrul pa dang / ha cang byas pa'i 'khrul pa dang / ngan par byas pa'i 'khrul pa dang / nyes par byas pa'i 'khrul pa'o/ /de la ma byas pa'i 'khrul pa ni sems can yongs su smin par ma byas pa rnams la yid rton pa ste/ sems can rnams yongs su smin par bya bar brtsams la yongs su smin pa'i mthar ma phyin pa ste/dad pa ma zhen pa'i sems can rnams la bar skabs su bshad pa'i rgyun gcod pa ni byang chub sems dpa'i 'khrul pa'o/ /ha cang byas pa'i 'khrul pa ni sems can snod du gyur pa rnams la sangs rgyas kyi chos rgya chen po bstan pa ste/sems can theg pa chung ngu ba/ theg pa chen po 'dod pa rnams la mi 'tshal ba bshad pa'o/ /ngan par byas pa'i 'khrul pa ni rgya chen po la mos pa'i sems can rnams la theg pa chung ngu bshad pa ste/ theg pa chen po pa theg pa chung ngu 'dod pa rnams la cha ma yin pa bshad pa'o/ /nyes par byas pa'i 'khrul pa ni sems can yang dag pa la rab tu gnas pa/tshul khrims dang ldan pa/ dge ba'i chos can la ri mo byed pa ste/ ngang tshul ngan pa/ sdig pa'i chos sdud cing sdom pa la gnas pa dang / sdom pa la mi gnas pa rnams la phyogs la 'dod chags mi snyoms par ston to/ /de la rnam pa gsum gyis sdom pa la gnas par rig par bya ste/nyes pa med pa'i las kyi mtha'i phyir yang dag pa la rab tu gnas pa dang / tshul khrims la skyon med pa'i tshul khrims dang ldan pa dang / bslab pa la gus pa dang bcas pa'i phyir dge ba'i chos can no/ /rnam pa gnyis sdom pa la mi gnas par rig par bya ste/ tshul khrims nyams pa'i phyir ngang tshul ngan pa'o/ /bslab pa la mi gus pas ni sdig pa'i chos can no/ /theg pa chung ngu la mos pa'o/ /de la 'khrul pa ni sems can rnams la lam log par gtang bar rig par bya'o/ /'khrul pa bzhi po 'di dag gis chos bzhi po yongs su bstan pa ste/ mi 'chad pa dang / mi 'tsham pa 'chad pa dang / cha ma yin pa 'chad pa dang / mi snyoms par 'chad pa'o/ /mi 'chad pa ni snga phyir bshad pas skyo ste/ sems mi mnyam pa'o/ /mi 'tsham pa 'chad pa ni/ bshad pa'i thabs mi shes pa'o/ /cha ma yin pa 'chad pa ni theg pa chung ngu la mos pa'o/ /mi snyoms par 'chad pa ni zang zing dang bcas pa'i sems kyis 'khor la rjes su ston par sbyor ba'o//de la sems mi mnyam pas mi ston te/ dge ba'i rtsa ba yongs su rdzogs par mi byed pas sems can rnams la slu'o/ /bshad pa thabs mi shes pa'i phyir dge ba'i rtsa ba rgya chen po yongs su mi 'dzin pa dang / theg pa chung ngu la mos pa'i phyir dge ba'i rtsa ba rgya chen po yongs su 'dor ba dang / zang zing dang bcas pa'i sems kyis 'khor la rjes su ston par sbyor bas bsod nams ma yin pa bskyed de/ sems can rnams la slu'o/ /de'i gnyen po ni dkar po'i phyogs su rig par bya ste/ 'od srungs bzhi po 'di dag ni byang chub sems dpa'i lam mo//bzhi gang zhe na zhes rgya cher gsungs pa'o/ /sems can thams cad la sems mnyam pa zhes bya ba ni bdag dang gzhan du sems mnyam pas sems can dad pa ma zhen pa rnams yongs su smin par bya ba yongs su rdzogs kyi bar du chos 'chad pa'i phyir ma byas pa'i 'khrul pa yongs su spong bar rig par bya'o//sems can thams cad la mthun par chos ston ces bya ba la/ chos mtshungs pa ni mthun pa'i chos te/ sems can snod du ma gyur pa theg pa chung ngu pa theg pa chen po 'dod pa rnams la ci rigs par chos 'chad par ha cang byas pa'i 'khrul pa yongs su spang bar rig par bya ste/snod ji lta ba bzhin du bshad pa'i phyir ro/ /sems can thams cad sangs rgyas kyi ye shes yang dag par 'dzin du 'jug ces bya ba ni sems can rgya chen po la mos pa theg pa chen po pa/ theg pa chung ngu 'dod pa rnams sangs rgyas kyi ye shes yang dag par 'dzin du 'jug pa'i phyir ngan par byas pa'i 'khrul pa sel bar rig par bya'o//sems can thams cad la yang dag par sbyor ba zhes bya ba ni zang zing med pa'i sems kyis sdom pa la gnas pa dang / sdom pa la mi gnas pa'i sems can rnams la phyogs la 'dod chags dang bral bar sbyor bas nyes par byas pa'i 'khrul pa sel bar rig par bya'o//lam log par 'gro ba'i phyir byang chub sems dpa' dam pa ma yin pa dang / 'du ba'i rgyu las bzlog ste/ dam pa dang 'du ba la dam pa ma yin pa dang 'du ba'i rgyud bstan pa'i phyir/ bcom ldan 'das kyis 'od srungs bzhi po 'di dag ni byang chub sems dpa'i grogs po ngan pa zhes rgya cher gsungs so//smras pa/ ci'i phyir bzhi kho na smras pa/ grogs po ngan pa bzhi'i dbang du byas na grogs po ngan pa bzhir rig par bya ste/ theg pa'i grogs po ngan pa dang / gnas pa'i grogs po ngan pa dang / bstan pa'i grogs po ngan pa dang / chos kyi grogs po ngan pa'o/ /nyan thos kyi theg pa can dag la phan pa'i phyir zhugs pa ni rang gi bsam pa dang 'dra ba sgrub pas theg pa chen po las byang chub sems dpa'i mos pa zlog par byed de/theg pa chen po las yongs su nyams pa'i rgyu'i dngos po'i dus na theg pa chen po'i grogs po ngan par rig par bya'o/ /sangs rgyas kyi theg pa can don chung zhing bya ba nyung ba ni sems can gyi don du sbyor ba la mi phyogs pas sems can gyi don du sbyor bar gnas pa las mos pa zlog par byed de/sems can gyi don sbyor bar gnas pa las yongs su nyams pa'i rgyu'i dngos po'i dus na gnas pa'i grogs po ngan par rig par bya'o/ /'jig rten rgyang pan pa'i brjod pa sna tshogs kyi spobs pa can ni bstan pa las mos pa zlog par byed de/bstan pa las yongs su nyams pa'i rgyu'i dngos po'i dus na bstan pa'i grogs po ngan par rig par bya'o/ /gang la bstan pas 'jig rten gyi zang zing kun sdud par 'gyur gyi chos kun mi sdud pa ni dge ba'i chos rnams rgyun du bsgom pa yongs su nyams par gyur pa'i dbang du byas te/dge ba'i chos yongs su nyams pa'i rgyu'i dngos po'i dus na chos kyi grogs po ngan par rig par bya'o/ /de'i gnyen po dkar po'i phyogs su rig par bya ste/ 'od srungs chos bzhi po 'di dag ni byang chub sems dpa'i dge ba'i bshes gnyen no/ /bzhi po gang zhe na zhes rgya cher gsungs pa'o//de la byang chub kyi lam ston pa'i phyir slong ba byang chub sems dpa'i dge ba'i bshes gnyen zhes bya ba ni theg pa chen po las nyams par 'gyur ba'i gnyen po'i phyir slong ba ni dge ba'i bshes gnyen du rnam par gzhag par rig par bya'o/ /'di la byang chub sems dpa' 'di snyam du sems te/slong ba la brten nas bdag gis bsod nams mang du byas te/ byang chub kyi phyir bsngos pa don med par 'gyur du 'ong snyam nas theg pa chung ngu mi 'dod do/ /sbyin pa ni byang chub kyi lam ston pa'i phyir dge ba'i rtsa ba byas pas theg pa chen po las yongs su mi nyams so/ /thos pa'i shes rab ston pa'i phyir chos smra ba byang chub sems dpa'i dge ba'i bshes gnyen zhes bya ba ni gnas pa las rab tu nyams pa'i gnyen por mang du thos pas gzhan dag la chos ston par 'dod pa ste/gang gi phyir spro ba chung ba ma yin par gnas pa dang sten pa'o/ /thos pa'i shes rab kyis brten pa'i phyir 'khor ba'i 'jigs pas yongs su nyams par mi 'gyur ro//dge ba'i rtsa ba thams cad ston pa'i phyir rab tu 'byung ba yang dag par 'dzin du 'dzud pa byang chub sems dpa'i dge ba'i bshes gnyen zhes bya ba ni bstan pa las rab tu nyams par 'gyur ba'i gnyen por rab tu 'byung ba yang dag par 'dzin du 'dzud pas log pa'i bstan pa las ring du gyur pa yin te/dge ba'i rtsa ba thams cad kyis brtan pas gzhan gyi don bya bar nus pa las yongs su nyams par mi 'gyur ro/ /sangs rgyas kyi chos thams cad ston pa'i phyir/ sangs rgyas bcom ldan 'das rnams byang chub sems dpa'i dge ba'i gshes gnyen zhes bya ba ni sangs rgyas kyi chos las rab tu nyams par 'gyur ba'i gnyen por sangs rgyas las gdams ngag don yod pa'i bye brag thob par mthong bas zang zing la gdu ba ma yin te/zang zing la gdu ba de ni sangs rgyas kyi chos rnams las yongs su nyams par 'gyur na sangs rgyas kyis chos bstan pa'i phyir dge ba'i rtsa ba mang po las yongs su nyams par mi 'gyur ro//dam pa ma yin pa dang 'du ba las bzlog ste/ dam pa dang 'du ba na byang chub sems dpa' don ji lta ba bzhin du 'dzin du gzhug par bzhed nas sangs rgyas kyis don ji lta ba bzhin du byang chub sems dpa'i mtshan nyid bstan pa'i phyir/ 'od srungs bzhi po 'di dag ni byang chub sems dpa'i gzugs brnyan no zhes rgya cher gsungs so/ /smras pa/ ci'i phyir bzhi kho na/ smras pa/ byang chub sems dpa'i gzugs brnyan rnam pa bzhi'i dbang du byas nas byang chub sems dpa'i gzugs brnyan rnam pa bzhir rig par bya ste/ mang du thos pa'i gzugs brnyan dang /dgon pa la gnas pa'i gzugs brnyan dang / bsod nams bya ba la sbyor ba'i gzugs brnyan dang / tshogs yongs su sdud pa'i gzugs brnyan no/ /'thob pa dang bkur sti 'dod pa ma yin kyi/ chos 'dod pa ma yin zhes bya ba ni byang chub sems dpa' dang bar chad byed par 'dod pa chos 'dzin kyang don ji lta ba bzhin du ma yin te/don ji lta ba bzhin du ma yin no/ /brjod pa'i sgra tshigs su bcad pa 'dod kyi/ yon tan 'dod pa ma yin zhes bya ba ni sgra 'dod pa'i byang chub sems dpa' dgon pa par gyur kyang don ji lta ba bzhin du ma yin te/ don ji lta ba bzhin du ma yin no/ / bdag bde bar 'dod kyi sems can gyi sdug bsngal sel bar 'dod pa ma yin zhes bya ba ni zang zing gi 'bras bu dang 'brel pa'i sems kyis byang chub sems dpa'i bsod nams bya ba la sbyor yang don ji lta ba bzhin du ma yin te/ don ji lta ba bzhin ma yin no/ /'khor gyi tshogs 'dod kyi bden pa 'dod pa ma yin zhes bya ba ni/gang g.yog dang yongs su spyod pa dang / brjod pa dang 'bral ba'i sems kyis byang chub sems dpa'i 'khor dang 'dug kyang don ji lta ba bzhin du ma yin te/ don ji lta ba bzhin ma yin no/ /byang chub sems dpa' de ltar sgrub pa ni chos 'dzin pa'am/ dgon pa'am/ bsod nams bya ba la sbyor ba'am/'khor dang 'dug kyang rung ste/ bdag ma rung bar byed do/ /de'i gnyen por byang chub sems dpa'i yang dag pa'i yon tan rig par bya ste/ 'od srungs bzhi po 'di dag ni byang chub sems dpa'i yang dag pa'i yon tan no/ /bzhi gang zhe na zhes rgya cher gsungs pa'o/ /de la stong pa nyid la/mos pas 'thob pa dang bkur sti 'dod pa ma yin no/ /las kyi rnam par smin pa la yid ches pas chos don du gnyer te/ chos kyi rgyu bsod nams mang du sogs pa'i phyir ro/ /bdag med pa la bzod pas/ brjod pa'i sgra tshigs su bcad pa 'dod pa yin no/ /snying rje bas byang chub sems dpa' yon tan 'dod pa yin no//bsam pas mya ngan las 'das par song bas bdag bde bar 'dod pa ma yin no/ /sbyor ba 'khor bar song bas sems can gyi sdug bsngal sel bar 'dod pa ma yin no/ /sems can yongs su smin par byed pa la lta ba'i sbyin pas 'khor gyi tshogs 'dod pa ma yin no//rnam par smin pa la mi re bas dben pa 'dod pa yin no/ /dkar po'i phyogs la stong pa nyid la mos pa la sogs pa'i chos rnams las brtsams pa ci dgos/ smras pa/ sbyin pa la sogs pa lam gyi tshogs nyan thos dang / rang sangs rgyas dang thun mong bar sems shing byang chub sems dpa'i lam gyi khyad par nyan pa la dga' bar gyur pa rnams la nyan thos dang /rang sangs rgyas dang thun mong ma yin pa sangs rgyas su sgrub pa byang chub sems dpa'i chos mngon par brjod pa'i phyir/ bcom ldan 'das kyis bzhi zhes gsungs so/ /smras pa/ ci'i phyir bzhi kho na ste/ mi mang mi nyung / smras pa/ la la na re ha cang skyon du 'gyur bas klan kar mi 'gyur ro zhes zer ro/ /yang rmad du byung ba'i chos kyi rgyu bstan pa'i phyir bzhi ste/ stong pa nyid yun ring por shin tu bsgoms pa'i phyir thams cad mkhyen pa nyid thob pa'i stong pa nyid bsgom pa'i rgyu 'dra bas skye dgu ma rig par gyur pa rnams kyi ma rig pa gdul ba'i phyir chos bstan pa na gus par 'gyur ro//nga rgyal med pa bdag med pa shin tu bsgoms pas/ skye dgu nga rgyal dang ldan pa rnams kyi nga rgyal gdul ba'i phyir chos bstan pa na gus par 'gyur ro/ /bsam pa mya ngan las 'das pa rab tu zhi ba shin tu bsgoms pas skye dgu ma zhi ba rnams nye bar zhi bar bya ba'i phyir chos bstan pa la gus par 'gyur ro//ser sna'i gnyen po chos dang zang zing gi sbyin pa shin tu bsgoms pas skye dgu len pa la dga' ba rnams kyi len pa kun du gzhom pa'i phyir chos bstan pa na gus par 'gyur ro/ /yang na byang chub sems dpa'i tshogs thams cad bsdus pa'i phyir bzhi ste/mdor bsdu na byang chub sems dpa' rnams kyi byang chub sems dpa'i tshogs gnyis te/ ye shes kyi tshogs dang bsod nams kyi tshogs so/ /de ltar stong pa nyid dang / bdag med pa la mos pa dang / bsam pa mya ngan las 'das pa ni ye shes kyi tshogs so/ / las kyi rnam par smin pa la yid ches pa la sogs pa tshig lhag ma rnams kyis ni bsod nams kyi tshogs so/ /pha rol tu phyin pa drug gis tshogs su bsdus pa'i phyir bzhi ste/ de la sems can yongs su smin par byed pa la lta zhing / rnam par smin pa la mi re ba'i chos dang / zang zing gi sbyin pas ni sbyin pa'i pha rol tu phyin pa'i tshogs so//bsam pa mya ngan las 'das pas ni tshul khrims kyi pha rol tu phyin pa'i tshogs te/ bsam pa mya ngan las 'das pa'i byang chub sems dpa' 'khor bas skyo nas ngang tshul ngan pa'i rgyu nyon mongs pa rnams rnam par sel ba rang bzhin gyi tshul khrims nyid kyis sa bon gyi chos rab tu 'thob po//bdag med pa'i bzod pas ni bzod pa'i pha rol tu phyin pa'i tshogs te/ bdag med pa'i bzod pa dang ldan pa'i byang chub sems dpa' sems can du 'du shes pa'i gnas nyon mongs pa rnams rnam par bsal ba'i phyir sems can gyi nyes pa rnams kyis mi 'khrugs pa yin no/ /las kyi rnam par smin pa la yid ches pa dang /sbyor ba 'khor bar song bas ni brtson 'grus kyi pha rol tu phyin pa'i tshogs te/ bsod nams dang ye shes kyi tshogs kyi 'bras bu thams cad mkhyen pa la yid ches pa'i byang chub sems dpa' ni 'khor ba'i sdug bsngal mi zad pas nyen pa'i sems can rnams la lta ba dang bstan pas 'khor ba'i sdug bsngal la ji mi snyam pa'i 'khor ba nyid du sbyor ba ni dge ba'i rtsa ba mngon par spel ba'i phyir brtson 'grus chen po rtsom mo//snying rje che bas ni bsam gtan gyi pha rol tu phyin pa'i tshogs te/ snying rje chen po ni rtsa ba'i bsam gtan du gtogs pa'i phyir ro/ /stong pa nyid la mos pas ni shes rab kyi pha rol tu phyin pa'i tshogs so//byang chub kyi sems yongs su mi gtong ba'i byang chub sems dpa'i bden pa'i gnas te mi slu ba'i phyir ro/ /de'i grogs ni snying rje chen po dang las kyi rnam par smin pa la yid ches pa dang / sbyor ba 'khor bar song ba ste/ sems can gyi bya ba mthar thug par byed pas phyin ci ma log par 'jug go//de lta bas na snying rje chen po dang / las kyi rnam par smin pa la yid ches pa dang / sbyor ba 'khor bar sang bas ni byang chub kyi sems yongs su mi gtong ba'i rgyu yin pa'i phyir chos 'di dag ni bden pa'i gnas su blta'o/ /bden pa yang byang chub sems dpa' rnams kyis byang chub kyi sems yongs su mi gtong bar gnas so//rnam par smin pa la mi re ba'i chos dang zang zing gi sbyin pa ni gtong ba'i gnas te/ gtong ba ni byang chub sems dpa' rnams kyi chos dang zang zing la ser sna byed pa tshar gcod par 'gyur ro/ /bsam pa mya ngan las 'das pa ni/nye bar zhi ba'i gnas te/ nye bar zhi ba ni byang chub sems dpa' rnams kyi nye bar ma zhi ba tshar gcod pas bsam gtan la sogs pa ste 'grub pa'i rgyu'o/ /stong pa nyid dang bdag med pa la mos pa ni shes rab kyi gnas te/ shes rab kyi byang chub sems dpa' rnams kyis nyon mongs pa rnams rnam par gnon pas spong ba'i gnyen por gyur pa'i phyir sangs rgyas su grub kyi bar du byang chub sgrub pa'i dge ba'i rtsa ba rnams rnam par sbyor ba 'phel bar byed do//rnam par smin pa la mi re ba'i chos dang zang zing sbyin pa ni byams pa ste/ gzhan dag la phan 'dogs par 'jug pa'i phyir ro/ /snying rje bas ni snying rje nyid do//snying rje chen po sngon du 'gro ba'i phyir las kyi rnam par smin pa la yid ches par 'khor bar sbyor ba na sems can gyi don bya ba la gzhol ba gzhan la phan pa 'grub pa'i phyir sems rab tu dga' ba ni dga' ba'o/ /yang na bsam pa ni mya ngan las 'das pa'i phyir nyon mongs pa rnam par bstsal te/nyon mongs pa'i gdung ba med pas sems rab tu dga' ba ni dga' ba'o/ /yang na 'du byed rnams la bdag med pas dpyod pa ni chos kyi rjes su 'gro ba'i dad pa rab tu thob pas/ bcom ldan 'das kyi yon tan gyi tshogs rjes su dran nas/ sems rab tu dga' ba ni dga' ba'o/ /yang na 'byung ba mthong bas rang gi mthu thob ste/'khor ba'i 'dam du bying ba'i 'jig rten la brtags nas 'khor ba'i 'dam chen po ma rig pa las 'jig rten bton te/ mya ngan las 'das pa zhi ba'i dbyings su 'jog nus so snyam pa'am sems can gyi tshogs bsgral ba la lta bas gzhan la phan par bya bar nus pa ni gzhan la phan par sbyor ba ste/phan par sbyor ba'i phyir/ gzhan la phan par byed pa'am/ nus pa'am/ sems can gyi tshogs bde bar gyur pa nyid mthong nas sems can rab tu dga' ba ni dga' ba'o/ /'du byed stong pa rnams la rab tu rtog pa ni/ rjes su chags pa dang / khong khro ba med pas mnyam pa nyid thob ste/sems can gyi las rnam par gzhag pa'i chos rnams la lhun gyis grub nas btang snyoms yang dag byang chub kyi yan lag bzhin du btang snyoms so/ /rnam par smin pa la mi re ba ni sbyin pa'o/ /chos dang zang zing sbyin pa ni snyan par smra ba'o/ /snying rjes sems can gyi bya ba sgrub pa ni don dpyod pa'o//tshig lhag ma rnams ni sems can la phan pa sgrub par zhugs pa'i phyir don mthun pa'o/ /de bas na byang chub sems dpa'i tshogs thams cad yongs su bsdus pas bzhi zhes bya ba'o/ /ston pa nyid kyi don brjod dgos so/ /smras pa/ shes rab kyis rab tu brtags nas 'du byed rnams kyi rang bzhin mi dmigs pa ni stong pa nyid do//smras pa/ kye ci shes rab kyis 'du byed rnams 'jig gam/ smras pa/ ma yin no/ /ci'i phyir zhe na/ rnam par shes pa ni mtshan ma'i spyod yul gyi phyir rnam par shes pa'i yul don dam par med pa/ yang dag pa ma yin par sgro btags par gnas pa/yang dag pa ma yin pa'i dngos po yongs su sbyang ba'i sa la rnam par shes pa dang / lhan cig skyes pa'i shes rab bzod pa chung ngu nas bzung ste/ rigs kyi sa'i dus kyi bar du chen po dang / 'bring dang / phra mo rab tu 'byed pa'i rim gyis rnam par bshig nas zag pa med pa'i shes rab kyi rkyen du 'gyur bas 'gag go//des na don dam pa mthong ba'i bar du gcod pa'i rgyu mtshan ma'i spyod yul gyi rnam par shes pa rkyen med pas don dam pa'i yul yin pas zag pa med pa'i shes rab kyis mtshan ma med pa'i dbyings mthong ngo / /chos kyi dbyings mthong bas skyon med pa la 'jug ste/ rang gi mtshan nyid mthong bas ni ma yin no//rang gi mtshan nyid kyi yul lam yin na ni/ rnam par shes pa dang bye brag med pa'i phyir chos kyis de kho na de mtshungs pas 'jig rten ni rnam par shes pas don byas pa'i phyir lam bsgom pa don med pa'i skyon du 'gyur ro/ /gal te rnam par shes pa la shes rab ces zer na ni mi rung ste/rang gi mtshan nyid 'dzin pa'i phyir ro/ /de ni 'di ltar 'gyur te/ shes rab kyi mtshan nyid kyi phyir shes pa ni rnam pa yin te/ shes rab kyis ni rang gi mtshan nyid mi rtag pa la sogs par rab tu shes so/ /rnam par shes pa ni dngos po so sor rnam par rig pa'i mtshan nyid do/ /rnam par shes pa'i don byas pa'i de bas na rnam par shes pa dang bye brag med pa yin no zhe na/de rigs te/ ci'i phyir zhe na/ rang gi mtshan nyid 'dzin pa'i phyir ro/ /gal te rab tu shes pa'i mtshan nyid yin pa'i phyir/ /shes rab kyi yul ni spyi'i mtshan nyid yin te/ des rang gi mtshan nyid 'dzin par ni mi 'thad do//ci ste rang gi mtshan nyid kyang 'dzin na ni rang gi mtshan nyid ma bor bas dngos po rnam par rig pa'i mtshan nyid du 'gyur te/ rnam par shes pa bye brag med pa'i skyon du 'gyur ro/ /gal te rnam par shes pa'i rjes su 'jug ces [(]zar [,]zer [)]na yang mi rung ste/ 'gal ba'i phyir ro/ /de ni 'di ltar 'gyur te/shes rab ni rnam par shes pa dang lhan cig skyes pa'i rkyen yin te/ de ni dngos po'i spyod yul lo/ /de rjes su 'jug pa'i phyir shes rab kyis rang gi mtshan nyid mi rtag pa la sogs pas 'dzin to zhes bya ba ni de yang mi 'thad do/ /ci'i phyir zhe na 'gal ba'i phyir ro/ /rang dang spyi'i mtshan nyid mi mthun pas gzugs nyid mi rtag pa nyid yin no//gal te gzugs nyid mi rtag pa nyid yin na ni shes rab kyis 'dzin par 'gyur na ma yin te/ de bas na shes rab ni rang gi mtshan nyid mi 'dzin to/ /rnam par shes pa yang shes rab kyi rjes su 'jug pas de'i rang bzhin du 'gyur te/ don dam pa'i yul yin pas rang gi mtshan nyid 'dor ba'i skyon du 'gyur ro//de bas na rang gi mtshan nyid shes rab kyi yul lam/ don dam pa rnam par shes pa'i yul du 'gyur ba med do/ /smras pa/ kye ci stong pa nyid la mos pas las kyi rnam pa la yid ches pa la gnod de/ des na las kyi rnam par smin pa la yid ches pa zhes de skad brjod dam/smras pa/ srid pas so sor brjod pa la nyes pa med do/ /'di la shes rab kyis 'du byed rnams rab tu rnam par bshig nas sems can mi dmigs pa ni 'du byed rnams la rang bzhin med pa dang / g.yo med par rig nas/ rkyen 'di la mi mkhas pa ni 'du byed rnams gnas pa med la g.yo ba med na byed pa ni gang 'bras bu dang 'brel ba ni gang zhes kun du gti mug par 'gyur ro//kun du gti mug pas las kyi rnam par smin pa la yid mi ches par 'gyur ro/ /bcom ldan 'das kyis kyang 'od srungs gang zag tu lta ba la gnas pa ri rab tsam bla'i/ mngon pa'i nga rgyal can stong pa nyid du lta ba ni de lta ma yin no zhes gsungs so//de skad du/ stong nyid lta ba thams cad kyi/ /'byung bar rgyal ba rnams kyis gsungs/ /gang dag stong pa nyid lta la/ /de ni sgrub tu med par bshad/ /stong pa nyid la lta nyes pa/ /blo zhan rnam par 'jig par byed/ /dper na sbrul la bzung nyes dang / /rig sngags nyes par bsgrubs pa bzhin/ /blo zhan rnams kyis chos 'di ni//rtogs par dka' bar thugs chud na/ /de'i phyir thub pa rnams kyi thugs/ /bshad pa las ni rab tu ldog/ /ces bshad do/ /kun rdzob dang don dam pa la mkhas pa'i byang chub sems dpa' 'du byed rnams la rnam par 'byed pa ni rten cing 'brel par 'byung ba zab mo yongs su shes pa dang /dus ring po nas bsgoms pa dang / rkyen gyi tshul shin tu yongs su shes pa'i phyir kun du gti mug par mi 'gyur ro/ /de 'di snyam du sems te/ 'di ltar gzhan gyi dbang du gyur pa'i phyir 'du byed rnams ni yongs su bsgrub pa'i rang bzhin ma yin pa dang / g.yo ba med pa ste/ de bas na rnam par rtog pa sna tshogs kyi rjes su 'gro ba thabs la mkhas pas yongs su zin pa mngon par 'du byed pa rnams kyis mngon par 'du byed pa na rnam par sgrub pa la rab tu gnas pa'i phyir rim gyis thams cad mkhyen pa nyid 'thob par 'gyur ro snyam mo//de ltar mngon par yid ches pa'i byang chub sems dpa' ni brtson 'grus chen po rtsom mo//de bdag med par bzod pa zhes bya ba la bdag med pa'i bzod pa'i don brjod dgos so/ smras pa/ sems can du 'du shes pa rnams rnam par bshig pa ni rnam par shes pa'i yul kun rdzob tu yod pa'i rnam par shes pas bskyed pa'i shes rab kyis rnam par gzhags na sems can mi dmigs nas 'di snyam du sems te/'di ni chos tsam ste sgyu ma dang 'dra ba g.yo ba med pa rang dbang med pa ste/ phan tshun gyi rkyen stobs kyis bskyed pa'i phyir las dang nyon mongs pa'i shing la brten pa/ mar me'i 'od 'phro ba'i rgyun dang 'dra ba sngon gyi las kyis 'phangs pa 'dra ba'i rgyun gyi tshul gyis skye'o/ /de skye ba na yang gang nas kyang mi 'ong /'gag pa na yang gang du yang mi stsogs so snyam mo/ /de ltar gang rab tu 'dod pa de ni bdag med par bzod pa'o/ /smras pa/ gang gi tshe byang chub sems dpa' bdag med pa'i bzod pa sems can mi dmigs pa na sems can gyi bya ba la rgyab kyis phyogs par 'gyur na ci'i phyir de'i bdag med bzod pa bshad/smras pa/ sems can gyi dgos pa bya ba'i nus pa bskyed pa'i phyir te/ sems can gyi dgos pa bya ba'i nus pa bskyed pa'i don du byang chub sems dpa'i bdag med pa'i bzod pa bstan to/ /bdag med pa'i bzod pa des nyon mongs pa rnam par bsal ba'i byang chub sems dpa' sems can du 'du shes pa rnam par bshig pa dang /'du byed rnams g.yo ba med pa dang / rkyen la rag lus par shes nas sems can gyi nyes pa dang / 'du byed kyi nyes pa rnams kyis gnod par gyur pa na yang byang chub kyi sems yongs su mi gtong ngo / /sems pa nyid la gnas te/ sems can la lta bas shes rab dang snying rje sgrub pa phun sum tshogs nas sangs rgyas su sgrub kyi bar du thams cad mkhyen pa nyid thob par byed pa'i dge ba'i rtsa ba sna tshogs sog go//smras pa/ stong pa nyid la mos pa dang / bdag med pa'i bzod pa gnyis la bye brag ci yod/ smras pa/ stong pa nyid la mos pa ni 'du byed thams cad la rab tu rnam par 'byed par 'jug pa'i phyir chos kyi rtogs pa'i rgyu'o//bdag med pa'i bzod pa ni rang gi mtshan nyid kyi spyod yul ba ste/ de ni sems can [(]kyi [,]gyi [)]rdzas rab tu 'byed par zhugs pa'i phyir chos tsam du mthong ba'i rgyu'o/ /stong pa nyid la mos pas ni chos la ngo bo nyid du 'dzin pa zlog par byed do/ / bdag med pa'i bzod pas ni sems can la ngo bo nyid du 'dzin pa zlog par byed do/ /smras pa/ gang gi tshe sems can du 'du shes pa snying rje chen por rig na ci'i phyir byang chub sems dpa' la snying rje chen po'i gnyen po bdag med par mos pa bshad/ smras pa/ snying rje chen po'i rgyu'i phyir te/ chos thams cad bdag med par yongs su shes nas byang chub sems dpa' sems can gyi khams la dmigs te/kye ma'o chos su bsdu ba sems can zhes bya ba ma rig pas ldongs pa bdag med pa'i chos rnams la med pa las sems can du 'du shes par sgro btags nas nga dang bdag tu mngon par zhen pa 'di dag ni srid par 'gyur ba'i las rnams sogs te/gang dag gis 'di dag 'khor ba na skye ba 'ching ba de dag bdag gis chos nyid de la gzud par bya'o zhes bya ba byang chub sems dpa' shin tu snying rje skye'o/ /de bsam pa mya ngan las 'das par bsngo zhes bya ba mya ngan las 'das pa'i don brjod dgos so/ /smras pa/ las dang nyon mongs pa'i shing med pas len pa med de/phung po'i rgyun 'gag pa ni mya ngan las 'das pa ste/ me'i rgyun gyi rgyu 'gag pa bzhin no/ /yang na ye shes kyi mes yongs su bsregs pa'i phyir ro/ /rnam par shes pa'i sa bon len pa med pa 'gag pa'i 'og tu ma 'ongs pa na rkyen tshogs kyang yang srid pa'i myu gu mngon par mi 'grub po//mes yongs su bsregs te 'gag pa'i 'og tu srid pa'i myu gu mngon par mi 'grub pa gang yin pa ste/ mes yongs su bsregs pa'i sa bon 'gag pa'i 'og tu myu gu mngon par mi 'grub pa bzhin no/ /yang na nyon mongs pa'i me 'gag pa nyid don dam par mya ngan las 'das pa ste/ shing rtsa ba nas bton pa bzhin no//de yang rnam pa gnyis te phung po'i lhag ma dang bcas pa dang / phung po lhag ma ma lus pa'o/ /de la phung po'i lhag ma dang bcas pa ni nyon mongs pa spangs pa'o/ /phung po lhag ma ma lus pa ni len pa med pa'i phyir sdug bsngal gyi mtshams sbyor ba med pa'i 'gag pa'o/ /mya ngan las 'das par song ba ni mya ngan las 'das par song ba ste/mya ngan las 'das pa la gnas so zhes bya ba'i tha tshig go/ /smras pa/ bsam pa mya ngan las 'das pa zhes bya ba'i don gang yin/ smras pa/ 'khor ba'i nyes pa mthong ba'i phyir nam zhig na nyon mongs pa zad pa zhi ba'i gnas thob pa gyur zhig gu snyam du mya ngan las 'das pa 'dod pa la sogs pa'i rnam par shes pa dang lhan cig tu skyes pa'i dge ba'i chos rnams kyis sems bsgom pa gang yin pa 'di ni mya ngan las 'das pa'i bsam pa zhes bya'o//sbyor ba 'khor bar song ba zhes bya ba la 'khor ba'i don gang yin/ smras pa/ nyon mongs pa dang / las kyi dngos po rnams kyi phan tshun gyi rkyen thog ma med pa nas rjes su 'brel pa ni 'khor ba ste/'khor bar song ba ni der 'khor ba la sbyor bar 'jug ces bya ba'i tha tshig go/ /nyes pa mthong bas 'khor ba las bsam pa bskyod pa'i byang chub sems dpa' ni sems can la lta bas 'khor bar song ba'i sbyor ba rtsom mo/ /smras pa/ gang gi tshe bsam pa dang 'dra bar sbyor ba rtsom ste/ dkar po las dkar po/ nag po las nag por gyur na de ji ltar byang chub sems dpa'i bsam pa mya ngan las 'das pa dang / mi 'dra bar 'khor ba na sbyor ba rtsom par 'gyur/ smras pa/ gzhan la phan pa'i bsam pa shin tu bsgom pa'i phyir te/ byang chub sems dpa'i bsam pa mya ngan las 'das pa ni gzhan la phan pa'i bsam pas zil gyis non pas 'khor ba gnod pa mang por shes nas 'khor bas skyo ba'i byang chub sems dpa' bsam pa mya ngan las 'das kyang snying rje dang ldan pa'i phyir sems can la lta bas 'khor bar sbyor ba rtsom mo//de 'di snyam du sems te/'dus byas la gnas pa'i byang chub sems dpa' la ni byang chub sems dpa'i chos rnams mi 'khrung ste/ 'dus byas pa la gnas nas so/ /de bas na byang chub sems dpa' chos la lta bas byang chub sems dpa' 'khor ba mthong yang yongs su 'dzin to/ /dper na bcom ldan 'das kyis kyang /'od srungs 'di lta ste/ dper na nam mkha' las sa bon rnams mi 'khrung ngo zhes bya ba rgya cher gsungs pa lta bu'o/ /sems can yongs su smin par bya ba'i phyir yang sbyin pa zhes bya ba la sems can yongs su smin par bya ba'i don du bshad dgos so/ /smras pa/ nyon mongs pa'i chu'i rlan gyis sems can gyi bsam pa'i zhing brlan par gyur pa rnams la thos pa dang /sems pa la sogs pa yongs su sbyor ba nges par 'byed pa'i cha dang mthun pa'i drod kyi sbyor ba nges par rtogs pa'i phyogs kyi dge ba'i rtsa ba'i me'i dugs kyis bsam pa ji lta ba bzhin du zag pa med pa'i dge ba'i rtsa ba'i sa bon rab tu gzhag pa'i phyir te/sems can gyi bsam pa'i zhing rnams kun du smin par byed pas yongs su smin par byed pa'o/ /don du gnyer ba'i byang chub sems dpa' snying rje dang thabs la mkhas pa phun sum tshogs pa ni sems can gyi rgyud yongs su smin par bya ba'i phyir chos dang zang zing gi sbyin pas sems can rnams sdud do/ / bsdus nas kyang bsam pa dang 'tsham par theg pa gsum po dag la ci rigs par yongs su smin par byed de/ smras pa/ sbyin pa zhes bya ba de ci zhig /smras pa/ ma chags pa dang / lhan cig skyes pa'i sems pa ste/ byung ba dang lhan cig pa/ 'bras bu gcig pa rnams kyis sbyin pa'i chos kyi gnas la 'jug pa ni sbyin pa'o//rnam par smin pa la yang mi re zhes bya ba ni de la rnam pa sna tshogs su smin pa ni rnam par smin pa ste/ 'bras bu sna tshogs zhes bya ba'i tha tshig go/ /rnam par smin pa la mi re ba ni rnam par smin pa la mi re ba ste/ bdag bde ba la mi lta ba'i phyir 'bras bu la mngon par 'dod pa med do zhes bya ba'i tha tshig go/ /smras pa/sems can yongs su smin par bya ba la lta ba'i sbyin pas rnam par smin pa la mi re ba nyid du bstan pa ma yin nam/ ci'i phyir yang rnam par smin pa la mi re ba'i zhes zlos par brjod/ smras pa/ sems can yongs su smin par byed pa la lta ba'i sbyin pa la yang rnam par smin pa la yang mi re ba srid do/ /so sor bshad pas nyes pa med par 'gyur ro//gang yang 'di lta ste/ byang chub kyi phyir sems bskyed nas sems can thams cad la dmigs te/ sems can yongs su smin par bya ba la lta bas sbyin pa byin pa ni 'khor ba na 'bras bu rgya che ba yin te/ tha mar thams cad mkhyen pa nyid kyang thob par 'gyur ba'i thabs 'di ni 'bras bu rgya che ba'o snyam pa sems can la mngon par phyogs pa'i sbyin pa yang bsam pas don dam par rig nas de bzlog pa dang /byang chub sems dpa'i yang dag pa'i yon tan la gzud pa'i phyir rnam par smin pa la mi re ba zhes de skad du gsungs so/ /de ni 'di skad du/ bsam pa phun sum tshogs pa byang chub sems dpa' ni bdag gi bde ba la lta bas sbyin pa la sogs pa'i chos rnams rang gi rgyud la rnam par smin par smon pa med do//ci'i phyir zhe na/ rgyu dang 'bras bu la mi lta ste/ gzhan gyi don nyid du dge ba'i rtsa ba rnams sangs rgyas su grub par bya ba'i phyir yongs su bsngo'o zhes ston to/ /de ni 'di snyam du sems te/gal te srid na ni thams cad mkhyen pa bsgrubs te/ sems can re re la yang sbyin pa zhig na 'di na chos rnams kyi chos nyid de rang gi sems la 'bras bu grub mod kyi/ 'on kyang bdag gis thams cad mkhyen pa ni gzhan gyi don nyid de/ thabs de gzhan la phan par nus pa'i phyir ro snyam mo/ /de ltar byang chub sems dpa' de'i bsam pa rnam par dag par bya ba'i phyir thams cad mkhyen pa nyid thob par byed pa sbyin pa la sogs pa'i chos rgyur gyur pa gang yin pa dag dang /thams cad mkhyen pa dang 'brel pa 'bras bu gyur pa/ stobs la sogs pa gang yin pa thams cad gzhan la phan par bya ba'i bsam pa gang yin pas de'i gzhan la phan par bya ba la mngon par phyogs par 'gyur ro//de bas na de nyan thos dang / rang sangs rgyas rnams dang thun mong ma yin pa'i phyir byang chub sems dpa'i yang dag pa'i yon tan zhes bya ba ste/ 'di ltar nyan thos dang rang sangs rgyas kyi lam gyi tshogs kyi sbyin pa ni rgyud yongs su smin par bya ba'i phyir sbyin pa sbyin no//'di las phyi rol pa dag ni 'bras bu 'dod do/ /log par sgrub pa'i gnyen por yang dag par sgrub pa la gnas pa'i legs pa bzhi'i dbang du byas nas bzhi phrag bzhir rig par bya'o/ /legs pa rnam pa bzhi gang zhe na/ gter chen po rnyed pa'i phyir phyug pa dang /bdud las shin tu 'das pa'i phyir phyir rgol ba med pa dang / tshul 'chos pa med par dgon pa la gnas pa la sogs pas longs spyod pa kha na ma tho ba med pa dang / bsod nams kyi tshogs dpag tu med pas bsod nams kyi tshogs mi zad pa'o/ /legs pa 'di rnams kyi go rims ni thog ma kho nar gter rnyed pas bsod nams dang ye shes kyi tshogs sog ste/de la sangs rgyas su 'byung ba mnyes par byed pa ni bsod nams kyi tshogs bsags pa'o/ /tshig lhag ma gsum po dag ni ye shes kyi tshogs bsags pa'o/ /bsod nams kyi tshogs sogs pa la brten nas bzhi pa gnyis pas bdud las shin tu 'da' ba'i phyir sgrib pa rnam par dag go//bsgom pa rnam par dag pa la brten nas bzhi pa gsum pa dge ba'i chos thams cad sdud pa'i phyir sgo thams cad nas dkar po'i chos 'thob po/ /sgo thams cad nas dkar po'i chos thob pa la brten nas bzhi pa bzhi pas bsod nams dpag tu med pa 'thob pa'i phyir rnam pa thams cad du sems can gyi don du sbyor te/bsod nams tshad med pa bskyed par rig par bya'o/ /gter chen po rnyed pa bzhi ni/ skyes bu dam pa la brten pa dang / dam pa'i chos nyan pa dang / tshul bzhin yid la byed pa dang / chos kyi rjes su mthun pa'i chos sgrub par rig par bya'o/ /de la sangs rgyas 'byung ba mnyes par byed pa ni/skyes bu dam pa la brten pa'o/ /pha rol tu phyin pa drug nyan pa ni dam pa'i chos nyan pa'o/ /khong khro ba'i sems med par chos smra ba la ni tshul bzhin du yid la byed pa'o/ /bag yod par dgon pa la gnas par dga' ba ni chos kyi rjes su mthun pa'i chos sgrub pa'o/ /de la sangs rgyas 'byung ba mnyes par byed pa ni de bzhin gshegs pa la mchod pa dang /rim gro byed pas bsod nams kyi tshogs sog go/ /tshig lhag ma gsum po dag ni thos pa rnam par dag pa dang / sems can rnam par dag pa dang / bsgom pa rnam par dag pas ye shes kyi tshogs so/ /'jig rten gyi 'byor ba'i dngos po dang 'dra ba'i chos kyi gter chen po rnyed pa la sogs pa rnam pa bzhir rig par bya ste/'jig rten gyi dngos po bzhi ni blta ba'i longs spyod bro dang / gar la sogs pa dang / mnyan pa'i longs spyod glu'i dbyangs la sogs pa dang / dran pa'i longs spyod bang ba dang / mdzod la sogs pa dang / /reg par bya ba'i longs spyod bza' ba dang bca' ba la sogs pa ste/de ltar sangs rgyas la lta ba dang / thos pa dang / sems pa dang / bsgom par rig par bya'o/ /bdud las shin tu 'da' ba'i chos bzhi po dag ni bdud bzhi dbang du byas nas bdud las shin tu 'da' ba'i chos bzhir rig par bya ste/ bdud bzhi ni theg pa chen po la sbyor ba'i bar du gcod pa byang chub kyi sems 'dor ba dang /sems can yongs su smin par byed pa'i sbyor ba'i bar du gcod pa sems can thams cad la khong khro ba'i sems dang / ma nor bar sbyor ba'i bar du gcod pa lta bar gyur pa thams cad la mi rtog pa dang / yongs su rtog par sbyor ba'i bar du gcod pa'i sems can thams cad la mngon pa'i nga rgyal can no//de las bzlog pa ni bdag nyid theg pa chen po las mi g.yos pa dang / sems can thams cad la mi sgrub pa'i gzhi yongs su spong ba dang / log par sgrub pa'i gzhi rnam par spong ba dang / yongs su rdzogs par mi 'gyur bar yang dag par sgrub pa'i gzhi yongs su spong bas bdud las shin tu 'da' bar rig par bya'o//chos bzhi po 'di dag ni byang chub sems dpa'i dge ba'i rtsa ba thams cad sdud par 'gyur ro zhes bya ba ni dge ba rnam pa bzhi'i dbang du byas nas chos bzhi po dag dge ba'i chos sdud par 'gyur bar rig par bya ste/ mnyam par bzhag pa'i sa pa ste/ bsgom pa'i rjes su 'gro ba dang / mnyam par ma bzhag pa'i sa pa la rnam pa gsum ste/sems can yongs su smin par byed pa'i rjes su 'gro ba dang / bya dka' ba spyod pa'i rjes su 'gro ba dang / thos pa dang sems pa'i rjes su 'gro ba'o/ /tshul 'chos pa med par dgon pa la gnas te bsgom pas ni bsgom pa'i rjes su 'gro ba'i dge ba ston to/ /lan du phan 'dogs par re ba med par sems can smin par byed par sbyor bas ni sems can yongs su smin par byed pa'i rjes su 'gro ba'o//sems can thams cad la lus dang srog gtong zhing dam pa'i chos yongs su tshol ba'i rtsom pas ni dka' ba spyod pa'i rjes su 'gro ba'o/ /thos pa dang don gyis ngoms mi myong zhing / dge ba'i rtsa ba'i chos thams cad yang dag par sdud pa'i brtson 'grus kyis ni thos pa dang /sems pa'i rjes su 'gro ba'o/ /byang chub sems dpa'i bsod nams kyi tshogs dpag tu med pa bzhi ste/ bzhi gang zhe na/ zhes bya ba ni sems can rnams gnas bzhi las rnam par gnon pa'i dbang du byas nas bzhi pa'o//bzhi po gang dag las she na som nyi dang yid gnyis dang / the tshom dang / ngan song dang ngan 'gro log par ltung ba dang / theg pa chung ngu la mos pa dang / bstan pa la gnod par sems shing khong khro ba las so/ /de la zang zing med pa'i sems kyis chos byin pas na som nyi dang / yid gnyis dang /the tshom las bzlog go/ /ngang tshul ngan pa rnams la cher snying rje bas ni ngan song ngan 'gro log par ltung ba las bzlog go/ /sems can thams cad la byang chub kyi sems ston pas ni theg pa chung ngu la mos pa las bzlog go/ /nyam chung ba rnams la bzod pas sten pas ni bstan pa la gnod par sems shing / khong khro ba las bzlog ste/nyam chung ba rnams rjes su ma srung bas bstan pa la khong khro ba'o/ /'od srungs byang chub sems dpa'i ni ming tsam gyis byang chub sems dpa' zhes mi bya ste zhes bya ba ni yang dag par sgrub pa'i rab tu dbye ba bstan pa'i phyir mdo sde'i mtshams sbyor ba rtsom mo/ /chos spyod pa la sogs pa smos pas ni khyad par dang / khyad par med pa dang / gtogs pa dang thabs bstan pa'i phyir ro/ /chos spyod pa ni nyan thos pa la sogs pa las so/ /byang chub sems dpa'i spyod pa khyad par du ston to/ /snyoms par spyod pas ni bdag dang gzhan mnyam pa nyid pas sems can thams cad la byang chub sems dpa'i spyod pa khyad par med pa ston to/ /dge ba sbyor bas ni byang chub sems dpa'i spyod pa gtogs par ston te/dge ba shin tu rnam par dag pa mthar phyin pas sangs rgyas su 'grub par gtogs pa'i phyir ro/ /chos la gnas pas ni byang chub sems dpa'i spyod pa 'di'i thabs ston to/ /de la byang chub sems dpa'i chos spyod pa ni khyad par rnam pa lngas nyan thos la sogs pa las khyad par du 'phags par ston te/sems can thams cad la phan pa dang bde ba'i bsam pa zhes bya ba ni bsam pa'i khyad par te/ bsam pa dag pa'i byang chub sems dpa' bdag dang 'dra bar sems can thams cad la phan pa dang bde bar bsam pa yin te/ nyan thos la sogs pa ni ma yin no/ /sbyor ba'i khyad par rnam pa bzhi ste/ thams cad mkhyen pa'i ye shes la 'dzud ces bya ba la byang chub sems dpa' ni sems can rnams thams cad mkhyen pa nyid la 'dzud kyi nyan thos la sogs pa ni ma yin no/ /bdag ci re zhes yongs su 'jal zhing bdag gi shes pa la mi smod ces bya ba la/ byang chub sems dpa' rnams ni bdag dang nyan thos la sogs pa'i bye brag mkhyen gyi/nyan thos la sogs pas ni byang chub sems dpa'i bye brag mi shes so/ /nga rgyal med ces bya ba ni byang chub sems dpa' rnams chos la bdag med pa rab tu rtogs pas de rnam par 'jig pa'i phyir nyon mongs pa can ma yin yang / nga rgyal med pa yin gyi/ nyan thos rnams ni bdag cag sbyin gnas kyi bye brag yin no snyam mo//lhag pa'i bsam pa brtan pa zhes bya ba la/ byang chub sems dpa' rnams ni sems can gyi don sbyor ba la lhag pa'i bsam pa brtan pa yin gyi/ nyan thos rnams ni sems can gyi don btang nas yongs su mya ngan las 'da' ba'i phyir ro/ /de la snyoms par spyod pa ni byang chub sems dpa'i mnyam pa nyid brgyad kyis ston to//mdza' ba mnyam pa ni gsum du dbye ste/ bsam pa dang / sbyor ba dang / dus kyi bye brag go/ /bcos pa ma yin par byams pa zhes bya ba ni zang zing med pa'i bsam pa ston to/ /mdza' ba dang mi mdza' ba la sems snyoms zhes bya ba ni phan 'dogs pa dang / gnod pa byed pa rnams la snyoms par sbyor ba bstan to/ /mya ngan las 'das pa'i mtha'i bar du rab tu mdza' ba zhes bya ba ni dus thams cad du mdza' bar ston to/ /tshig tshod 'dzin cing 'dzum pa'i bsam pas bzhin gyis gsong por smra ba zhes bya ba ni/ rab tu dga' bar byed pa mnyam par ston te/ sems dang bas rab tu dga' bar byed pa'i phyir ro//khur blangs pa rnams mi 'dor ba zhes bya ba ni grogs su gyur pa mnyam par ston te/ khur ji ltar blangs pa mi 'dor ba'i phyir ro/ /sems can thams cad la snying rje chen po yongs su ma bcad pa zhes bya ba ni snying rje mnyam par ston to/ /phyogs su ltung bas khur blangs pa yin pa'i phyir ro/ / yid yongs su mi skyo ba zhes bya ba ni/ yid yongs su mi skyo ba mnyam par ston te/ yid mi bde ba med par khur sgrol ba'i phyir ro/ /dam pa'i chos yongs su tshol ba'i phyir ro/ /thos pa dang don gyis ngoms mi myong ba zhes bya ba ni thabs mkhas pa mnyam par ston te/ thos pa dang don la mkhas pas 'dul ba ji lta ba bzhin du 'dul ba la mkhas pa'i phyir ro//bdag gi 'khrul pa rnams la nyes par lta zhing gzhan gyi 'khrul pa rnams la ni gshe bar bsgo zhes bya ba ni bsgo ba mnyam par ston te/ gang bdag gis nyes pa mthong la/ 'khrug pa'i tshig gis bsgo na ni bsgo ba mnyam par mi 'gyur ro/ / spyod pa thams cad du byang chub kyi sems yongs su spyod pa zhes bya ba ni bsngo ba mnyam par ston to/ /dge bar bya ba thams cad mtshungs par byang chub chen por yongs su bsngo ba'i phyir ro/ /dge ba spyod pa ni rnam par smin pa la mi re ba'i gtong ba zhes bya ba la sogs pa pha rol tu phyin pa drug po dag gis ston te/ pha rol tu phyin pa re re'i mi mthun pa'i phyogs kyi gnyen po brjod pa'i phyir sbyin pa la sogs pa'i rang gi mi mthun pa'i phyogs dang bral ba rnams ni pha rol tu phyin par yongs su ston to//srid par skye ba thams cad la mi gnas pa'i tshul khrims ma yin pa yang yod pas de'i phyir/ srid par skye ba thams cad la mi gnas pa'i tshul khrims zhes bya ba gsungs so//sems can thams cad la bzod pa ni lus dang ngag gis bzod kyi/ khong khro ba med pa'i sems kyis bzod pa ma yin pa yang yod pas de'i phyir sems can thams cad la khong khro ba med pa'i bzod pa zhes gsungs so/ /dge ba'i rtsa ba thams cad yang dag par sdud pa'i brtson 'grus zhes pa ni theg pa gsum pa dang rab tu ldan pa'i dge ba'i rtsa ba yang dag par sdud pa'o//gzugs med pa'i khams dang bral ba'i bsam gtan zhes bya ba ni gzugs med pa'i khams su skye ba dang bral ba'i bsam gtan du rig par bya ste snyoms par 'jug pa ni ma yin no/ /gzugs kyi khams su skye ba'i byang chub sems dpa' rnams ni bdag gi sangs rgyas kyi chos rnams yongs su smin par byed par 'gyur te/'jig rten gyi khams gzhan gyi sangs rgyas la bsnyen bkur byed pa'i phyir ro/ /'dod pa'i khams su skye ba ni sems can yongs su smin par byed par 'gyur te/ gzugs med pa'i khams su skye ba ni de lta ma yin no/ /thabs la mkhas pa'i bsdu ba'i dngos po bzhi dang rab tu ldan pa'i thabs kyis zin pa'i shes rab ces bya ba la/de ni bsdu ba'i dngos po bzhi po dag gis ston to/ /chos la gnas pa ni sbyor ba dang rang bzhin dang 'bras bus yang dag par ston to/ /sbyor ba ni rnam pa gsum ste/ tshul khrims dang ldan pa dang / ngang tshul ngan pa can rnams la gnyis su med pa'i byams pa zhes bya ba ni gdams ngag 'doms pa 'di ni sdom pa la gnas pa 'di ni sdom pa la gnas pa ma yin zhes gdams ngag 'doms pa rnams kyi yon tan dang nyes pa la mi rtog par gdams ngag don du gnyer ba gdams ngag 'doms pa'i gan du 'gro ba'o//bsti stang du byas te chos nyan par byed ces bya ba ni bsti stang du byas nas gdams ngag yongs su 'dzin pa'o//bsti stang du byas te/ dgon pa la gnas pa la mngon par dga' ba zhes bya ba ni lus kyis mi 'dre zhing rab tu dben par gnas pa ste/ tshig de gsum gyis ni sbyar ba ston te/ gsum po gang dag gis rang bzhin ston ces 'jig rten gyi sna tshogs pa dag la mi dga' zhes bya ba ni sems kyis mi 'dre zhing rnam par g.yeng ba med pa'o//theg pa chung ngu mi 'dod cing / theg pa chen po'i legs pa la lta ba zhes bya ba ni nyan thos kyi theg pa dang rab tu ldan pa'i yid la byed pa las shin tu 'das nas theg pa chen po dang rab tu ldan pa yid la byed pa phun sum tshogs pa'o/ /sdig pa'i grogs po yongs su spong zhing /dge ba'i bshes gnyen la brten pa zhes bya ba ni rab tu dben pa la brtson pa 'dor ba'i sems can dang mi 'grogs la/ /de ma yin pa dag dang 'grogs pa ste/ grogs phun sum tshogs pa'o/ /chos la gnas pa gang yin zhe na/ zhi gnas dang lhag mthong las rnam par g.yeng ba med pas bsdus pa dang /gang gis she na/ yid la byed pa dang / gang dag gis she na/ grogs po dag gis te/ 'di ni chos la gnas pa'i rang bzhin no/ /'bras bu ni rnam pa gnyis te/ sems rnam par dag pa dang / sems can yongs su smin par byed pa'o/ /de la sems rnam par dag pa ni shes rab rnam par dag pa ste/'jig rten pa dang / 'jig rten las 'das par rig par bya'o/ /tshangs pa'i gnas pa bzhi sgrub pa dang / mngon par shes pa lngas rnam par rtsen pas ni 'jig rten pa'i ye shes rnam par dag pa la brten nas bsod nams kyi tshogs chen po dang / mthu bsgoms pa'i 'bras bu myong bas 'jig rten pa'i shes rab rnam par dag par rig par bya'o//ye shes kyi phyir 'brang ba ni 'jig rten pa'i shes pas chog par mi 'dzin te/ 'jig rten las 'das pa'i shes rab yongs su rab tu tshol zhing rnam par sbyor bas 'jig rten las 'das pa'i shes rab rnam par dag par rig par bya'o/ /sems can yongs su smin par byed pa ni tshig rnam pa bzhis yongs su ston te/sgrub pa dang log par sgrub pa la gnas pa'i sems can rnams kyi mi gtong ba zhes bya ba ni 'khrug par mi 'gyur ba la bzod pa'i nyes pa spangs nas 'khrug pa la ji mi snyam pa'o/ /gcig tu chad par smra ba zhes bya ba ni gzung bar 'os pa'i tshig ste/gang gzhan du bstan la/ yang gzhan la smra ba ma yin no/ /bden pa la btsun par 'dzin zhes bya ba ni mdza' ba dang / gus par bya ba rjes su srung bas ji skad smras pa de bzhin byed pa'o/ /byang chub kyi sems sngon du 'gro ba zhes bya ba ni zang zing med pa'i sems kyis byang chub 'thob pa'i dbang du byas pa'o/ /de ltar yang dag par sgrub pa'i rab tu byed pa'i byang chub sems dpa'i yon tan gyi khyad par brjod pa'i phyir dpe bstan pa mdzad do//'od srungs 'di lta ste dper na sa chen po 'di sems can thams cad kyi 'tsho ba yin te/ 'gyur ba med cing phyir bya ba med pa de bzhin du/ 'od srungs byang chub sems dpa' sems dang po bskyed pa yang byang chub pa'i snying po'i mtha'i bar du sems can thams cad kyi 'tsho ba yin te/'gyur ba med cing phyir bya ba med do zhes bya ba des nye bar gzhag pa dang pos ni byang chub sems dpa' sems can rnams kyi mngon par 'byung ba'i don las brtsams nas skye ba'i lo tog yid du 'ong ba rnam pa sna tshogs kyi gnas su ston to/ /'gyur ba med cing phyir bya ba med ces bya ba la/gnod par byed pa la ni 'gyur ba med do/ /phan 'dogs pa la ni phyir bya ba med de/ khong khro ba dang rjes su chags pas sems ma zin pa'o/ /'od srungs 'di lta ste dper na chu'i khams rtswa dang / shing gel ba dang / sman dang / nags tshal thams cad 'khrung par byed pa de bzhin du/ 'od srungs byang chub sems dpa' bsam pa dag pa yang sems can thams cad la byams pas khyab par gnas nas sems can thams cad kyi dkar po'i chos thams cad skye bar byed do//'od srungs 'di lta ste/ dper na me'i khams lo tog thams cad yongs su smin par byed pa de bzhin du/ 'od srungs byang chub sems dpa'i shes rab kyang dkar po'i chos thams cad yongs su smin par byed do//'od srungs 'di lta ste dper na rlung gi khams sangs rgyas kyi zhing thams cad rnam par sgrub pa de bzhin du/ 'od srungs byang chub sems dpa'i thabs la mkhas pa yang sangs rgyas kyi chos thams cad rnam par sgrub pa zhes bya ba dpe gnyis pa dang /gsum pa dang / bzhi pa dag gis ni gdon mi za bar legs pa'i don brtsams te sems can rnams kyi dge ba'i rtsa ba bskrun pa dang / yongs su smin par byed pa dang / mthar thug par 'gro ba'i rgyu nyid du ston to/ /'od srungs 'di lta ste/ dper na zla ba'i dkyil 'khor yar gyi ngo la skye zhing gang bar 'gyur ba de bzhin du byang chub sems dpa' bsam pa dag pa yang dge ba'i chos thams cad kyis skye zhing rdzogs par 'gyur ro zhes bya ba dpe lnga pas ni rang gi don las brtsams te/bdag gi byang chub kyi tshogs rnam par 'phel bar ston to/ /'od srungs 'di lta ste/ dper na nyi ma'i dkyil 'khor gyi 'od zer gcig btang bas sems can thams cad la snang bar byed pa de bzhin du/'od srungs byang chub sems dpa'i shes rab kyi 'od zer gcig btang bas sems can thams cad la ye shes snang bar byed do zhes bya ba dpe drug pas ni bdag dang gzhan gyi rgyud la shes rab kyi snang bar byed pas gnyis ka'i don du sgrub pa'i rgyu nyid du ston to//'od srungs 'di lta ste/ dper na ri dgas kyi rgyal po seng ge gang nas gar 'gro ba thams cad du mi 'jigs mi skrag par 'gro ba de bzhin du/ 'od srungs byang chub sems dpa' tshul khrims dang bslab pa dang / sbyangs pa'i yon tan dang / yo byad bsnyungs pa la gnas pa yang gang nas gar 'gro ba thams cad du mi 'jigs mi skrag par 'gro ba'o zhes bya ba dpe bdun pas ni 'khor ba dang mya ngan las 'das pas mi skrag pa'i phyir de gnyi ga la mi gnas par ston to//'od srungs 'di lta ste/ dper na bal gyi glang po che shin tu dul ba khur thams cad khyer bas mi skyo ba de bzhin du/ 'od srungs byang chub sems dpa' sems shin tu dul ba yang sems can thams cad kyi don gyi phyir phung po lnga'i khur khyer bas yongs su mi skyo'o zhes bya ba dpe brgyad pas ni 'khor ba na khur gyis yongs su mi skyo bar ston to//'od srungs 'di lta ste/ dper na pad+mo chu las skyes kyang chus mi gos pa de bzhin du/ 'od srungs byang chub sems dpa' 'jig rten gyi nang du skyes kyang 'jig rten gyi chos kyis mi gos so zhes bya ba dpe dgu pas ni 'khor ba na kun nas nyon mongs pa med par ston to//'od srungs 'di lta ste/ dper na shing yal ga bcad kyang rtsa ba ma nyams na slar yang skye ba de bzhin du/ 'od srungs byang chub sems dpa' thabs la mkhas pa yang nyon mongs pa bcad kyang dge ba'i rtsa ba ma nyams na slar yang khams gsum du skye'o zhes bya ba dpe bcu pas ni kun nas nyon mongs pa med kyang ji ltar yongs su mya ngan las mi 'da' ba ston to//'od srungs 'di lta ste/ dper na phyogs dang phyogs mtshams tha dad pa nas klung chen po'i chu'i phung po rgya mtsho chen por bab na 'di lta ste lan tshwa'i ro thams cad ro gcig par 'gyur ba de bzhin du/'od srungs byang chub sems dpa'i dge ba'i rtsa ba sgo tha dad pa nas bsags pa byang chub tu bsngos pa yang 'di lta ste thams cad mkhyen pa'i ror thams cad ro gcig par 'gyur ro zhes bya ba dpe bcu gcig pas ni dge ba'i rtsa ba rnams la sbyor ba bsngo bas yongs su zin pas byang chub kyi rgyur ston to//'od srungs 'di lta ste/ dper na ri rab la rgyal chen bzhi'i ris dang / sum cu rtsa gsum pa'i lha rnams rab tu gnas pa de bzhin du/ 'od srungs byang chub kyi sems kyi dge ba'i rtsa ba la byang chub sems dpa'i thams cad mkhyen pa gnas par blta'o zhes bya ba dpe bcu gnyis pas ni nyan thos dang mthun pa'i mya ngan las 'das pa yongs su 'dor te/de dag ni rang gi smon lam dang dge ba'i rtsa ba la yang bor nas yongs su mya ngan las 'da'o/ /byang chub sems dpa' dag ni yongs su mya ngan las 'das kyang rang gi smon lam mi 'dor la/ dge ba'i rtsa ba sbyor yang thob par ston to//'od srungs 'di lta ste/ dper na blon pos yongs su zin pa'i rgyal po rnams rgyal srid kyi bya ba thams cad byed pa de bzhin du/ 'od srungs byang chub sems dpa'i shes rab dang thabs kyis zin pa yang sangs rgyas kyi bya ba thams cad byed do zhes bya ba dpe bcu gsum pas ni yongs su mya ngan las 'das pa dag ji ltar sems can gyi bya ba byed ces bya ba rab tu sgrub pa ston to//'od srungs 'di lta ste dper na sprin chen po las byung ba'i char gyi rgyun lo tog thams cad la mngon par 'bab pa de bzhin du/ 'od srungs byang chub sems dpa'i snying rje chen po dang mang po thos pa'i chos kyi sprin las byung ba'i byang chub sems dpa'i dam pa'i chos kyi char yang sems can thams cad la mngon par 'bab po zhes bya ba bcu bzhi pa dang /'od srungs 'di lta ste dper na 'khor los sgyur ba'i rgyal po gang du byung ba der rin po che bdun byung ba de bzhin du/ 'od srungs byang chub sems dpa' gang du byung ba der byang chub kyi phyogs kyi chos sum cu rtsa bdun po dag 'byung ngo zhes bya ba dpe bco lnga pas ni ci'i phyir rtag tu mi ston pa dang /mi 'byung ba dus la sdod pa ston to/ /'od srungs 'di lta ste dper na gang du nor bu rin po che bai DUr+ya 'byung ba'i sgor gyur pa der kAr ShA pa Na brgya stong 'byung ba'i sgor 'gyur ba de bzhin du/ 'od srungs gang du byang chub sems dpa' 'byung ba'i sgor 'gyur ba der nyan thos dang rang sangs rgyas brgya stong mang po 'byung ba'i sgor 'gyur ro zhes bya ba dpe bcu drug pas ni nyan thos la sogs pa dang mthun pa'i yongs su mya ngan las 'das pa la nyes par ston te/nyan thos la sogs pa de nyid ni mi 'byung bar ston to/ /'od srungs 'di lta ste dper na lha sum cu rtsa gsum pa 'dres pa'i tshal du zhugs pa rnams kyi longs spyod dang /yongs su spyod pa rnams mtshungs par gnas pa de bzhin du 'od srungs byang chub sems dpa' bsam pa dag pa yang sems can thams cad la yang dag par sbyor ba yin zhes bya ba dpe bcu bdun pas ni nyan thos la sogs pa la de'i nus pa med pa'i rgyur ston te/chos mngon par rtogs pa'i khyad par gyis byang chub sems dpa'i bdag dang gzhan mnyam pa nyid pas sems can thams cad la yang dag par sbyor ba'i phyir ro/ /'od srungs 'di lta ste dper na sngags dang sman gyis yongs su bzung ba dug gis 'chi mi nus pa de bzhin du 'od srungs byang chub sems dpa' shes rab dang thabs la mkhas pas yongs su bzung ba yang nyon mongs pa'i dug gis 'chi bar byed mi nus so zhes bya ba dpe bco brgyad pa dang /'od srungs 'di lta ste dper na grong khyer chen po'i lud de ni bu ram shing gi zhing dag dang / rgyan gyi zhing dag las phan par 'gyur ba yin te/ de bzhin du 'od srungs byang chub sems dpa'i nyon mongs pa'i lud kyang thams cad mkhyen pa la phan par 'gyur ba yin no zhes bya ba dpe bcu dgu pas byang chub sems dpa' nyon mongs pa ma zad kyang nyan thos la sogs pa las khyad par du 'phags par ston to//de'i nyon mongs pa nyes par mi 'gyur ba dang / yon tan chen po byed pa'i phyir ro//dpe 'di rnams kyi go rims ni snga ma las phyi ma bye brag tu rnam par gzhag par rig par bya'o/ /de yang ji lta bu zhe na/ smras pa/ byang chub sems dpa' sems dang po bskyed pa nas bzung ste thog ma dang / bar ma dang / tha ma dag tu sems can thams cad kyi dge ba'i rtsa ba mngon par sgrub pa'i gnas su gyur pas phan 'dogs pa dang gnod pa byed pa thams cad kyis sems ma zin pa'i phyir sems dang mtshungs pa yin no//de lta mod kyi ji ltar yal bar 'jog pa'i sa la brten nas sems can rnams rang gi rtsal gyis de la nye bar 'tsho bar byed pa lta bu ni ma yin te/ byang chub sems dpa' ni dge ba'i rtsa ba bskyed pa'i phyir dad pa dang dga' bar byed pa'i rlan gyis brlan par byed pas chu dang 'dra ba yin no//de lta mod kyi ji ltar chus lo tog yongs su smin par byed pa dang 'gal ba lta bu ni ma yin no/ /de ni dge ba'i rtsa ba yongs su smin par bya ba'i phyir skyo bar bya ba'i chos rnams la skyo bas kun du gdung bar byed pas me dang mtshungs pa yang yin no//de lta mod kyi ji ltar me sangs rgyas kyi zhing rnam par sgrub pa dang 'gal ba lta bu ma yin te/ de ni dge ba'i rtsa ba yongs su smin pa rnams rnam par grol ba la reg par bya ba mngon par bsgrubs pa rnam par sgrub pa dang / yang dag pa'i gdams ngag nye bar sgrub pas rlung dang mtshungs pa yang yin no//de lta mod kyi ji ltar rlung mngon par langs nas med par gyur pa de lta bu ni ma yin no de ni rang gi dge ba'i chos mngon par 'phel ba'i phyir zla ba lta bu yang yin no/ /de lta mod kyi ji ltar zla ba yar gyi ngo la snang la/ mar gyi ngo la mi snang ba lta bu ma yin te/byang chub sems dpa' de ni spyi'i mtshan nyid kyis dkar po dang nag po'i phyogs kyi chos thams cad la ye shes snang bar byed pas nyi ma dang mtshungs pa yang yin no/ /de lta mod kyi ji ltar nyi ma gza' spyang kis 'jigs pas yongs su 'gyur ba lta bu ma yin te/ byang chub sems dpa' de ni 'gro ba rnams su nyon mongs pa thams cad kyi gzas 'jigs pa'i 'gyur ba med pas seng ge lta bu yang yin no//de lta mod kyi ji ltar seng ge khur chen pos 'tsher ba lta bu ni ma yin no/ /de ni sdug bsngal gyi khur thams cad khyer ba'i phyir glang po dul ba lta bu yang yin no/ /de lta mod kyi ji ltar glang po rnyed pa dang / ma rnyed pa dang /tshig 'jam pa dang rtsub pa'i bde ba dang / sdug bsngal spong bas rjes su chags pa dang / khong khro bas gos pa lta bu ni ma yin te/ byang chub sems dpa' de ni 'jig rten pa'i chos thams cad la rjes su chags pa dang / khong khro ba thams cad kyis mi gos pa'i phyir pad+ma lta bu yin no/ /de lta mod kyi ji ltar pad ma sdong bu bcad na mi skye ba lta bu ma yin te/byang chub sems dpa' de ni nyon mongs pa bcad kyang dge ba'i rtsa ba'i stobs bskyed pas 'khor bar yang skye ba'i phyir rtsa ba nyams pa'i shing lta bu yang ma yin no/ /de lta mod kyi ji ltar shing tha mar rtsa ba 'jig pa lta bu yang ma yin no/ /byang chub sems dpa' de ni mya ngan las 'das pa dang /byang chub chen por dge ba'i rtsa ba yongs su spong ba'i phyir chu bo'i rgyun rgya mtshor bab pa lta bu yang yin no/ /de lta mod kyi ji ltar chu bo'i rgyun rgya mtshor bab na rgya mtsho nyid 'gyur ba lta bu ni ma yin te/ byang chub sems dpa' de ni mya ngan las 'das pa dang / byang chub chen po la brten pa'i dge ba'i rtsa ba rnams kyis rnam par rtsen pa'i phyir ri rab la lha gnas pa lta bu yang yin no//de lta mod kyi ji ltar ri rab la gnas pa'i lha dag rang gi bya ba la bag med par dga' ba lta bu ni ma yin te/ byang chub sems dpa' de ni thabs dang shes rab kyis yongs su zin pas sangs rgyas kyi mdzad pa thams cad sgrub pa'i phyir blon pos yongs su zin pa'i rgyal po lta bu yang yin no//de lta mod kyi ji ltar blon pos yongs su zin pa'i rgyal po rang gi don du skye dgu yongs su skyong ba lta bu ma yin no/ /de ni rang gi don la mi lta bar skye dgu'i phyir rin po che lta bu yang yin no/ /de lta mod kyi ji ltar sprin chen po lo tog yongs su sgrub pa gcig tu ma nges pa lta bu ni ma yin te/byang chub sems dpa' de ni byang chub kyi phyogs kyi chos shin tu bskrun pa'i phyir 'khor los sgyur ba 'byung ba lta bu yin te/ de lta mod kyi ji ltar 'khor los sgyur ba skyes bu chen po dag dang zla med pa lta bu ni ma yin te/ byang chub sems dpa' de ni rnam par grol ba thun mong ba du ma dang lhan cig 'byung ba'i phyir nor bu rin po che kAr ShA pa Na dang shin tu mi 'dra ba lta bu ni yin te/byang chub sems dpa' de ni zag pa med pa'i dbyings su chud kyang de dag dang bya ba dang / bde ba'i longs spyod mtshungs pa'i phyir 'dres pa'i tshal du zhugs pa'i lha lta bu yang yin no/ /de lta mod kyi ji ltar 'dres pa'i tshal du zhugs pa'i lha rnams nyon mongs pa 'phel nas ma 'ongs pa na log par ltung ba lta bu ni ma yin te/byang chub sems dpa' de ni nyon mongs pa bcad nas log par mi ltung ba'i phyir dug bstsal ba lta bu'i nyon mongs pa yang yin no/ /de lta mod kyi ji ltar dug bstsal na gnod pa med pa tsam du zad de/su la yang yon tan du mi 'gyur ba lta bu ni ma yin te/ byang chub sems dpa' de ni rang gi nyon mongs pas sems can thams cad la phan 'dogs pa'i phyir grong khyer chen po'i lud lta bu'i nyon mongs pa yang yin no/ /de ltar byang chub sems dpa' 'jig rten grags pa'i dngos po lta bu'i yon tan gyi dpe dang /yon tan gyis khyad par du 'phags pas yon tan 'dra ba med pa yin te/ de ltar na byang chub sems dpa' yon tan 'dra ba med par rig par bya'o/ /yang dag par sgrub pa'i rab tu dbye ba dang / yon tan gyi khyad par bshad zin to/ / yang dag par sgrub pa rang bzhin ni ma bshad do/ /de ni dbu ma'i lam gyis ston te/ mtha' gnyis yongs su spangs pas dbu ma'i lam du rig par bya'o/ /mtha' gang zhe na mu stegs can gyi mtha' ni bdag tu 'dzin pa dang / de la rtag par 'dzin pa phung po dang / khams dang / skye mched rnams la sgro btags te/de ni gang 'og nas mdor bsdus te/ rtag ces bya ba de ni mtha' gcig go bdag ces bya ba de ni mtha' gcig go zhes 'byung ngo / /nyan thos dang rang sangs rgyas kyi theg pa can gyi mtha' ni gang phung po la sogs pa la mi rtag par 'dzin pa dang / bdag med par 'dzin pa ste/ de yang gang 'og nas mdor bsdus te/mi rtag ces bya ba de ni mtha' gnyis bdag med ces bya ba de ni mtha' gnyis zhes 'byung ba'o/ /mtha' de gnyis kyi dbus gang yin pa de ni zhes bya ba de ni rnam par mi rtog pa'i ye shes te/ de rnam par brtag tu med pas dpyad du med pa'o/ /brjod du med cing bshad du med pas bstan du med pa'o//rnam par shes pa'i gnas ma yin pas rten ma yin pa'o/ /gzung ba'i don du gzung ba med pas snang ba med pa'o/ /'dzin pa'i don rnam par rig pa tsam du gzung du med pas rnam par rig par med pa'o/ /'khor ba dang mya ngan las 'das pa la mi gnas pas gnas med par rig par bya'o//de la mu stegs can rnams kyis sgro btags te/ gang bdag tu 'dzin pa de'i gnyen por gang la bdag med par so sor rtog pa zhes bya ba la sogs pa gsungs so/ /sgro btags nas gang rtag par 'dzin pa de'i gnyen por gang gzugs la rtag par yang mi rtog/ /mi rtag par yang mi rtog pa zhes bya ba la sogs pa gsungs so//nyan thos dang rang sangs rgyas kyi theg pa can gyi sgro btags te/ phung po dag la sogs pa la gang gi rtag par 'dzin pa dang / bdag med par 'dzin pa de'i gnyen por gang gzugs la mi rtag par yang so sor mi rtog ces bya ba la sogs pa gsungs so//mi rtag par 'dzin pa ni bdag med par 'dzin pa'i rgyu yin pa'i phyir mi rtag par 'dzin pa bkag pas bdag med par 'dzin pa yang bkag par rig par bya'o/ /gzung ba'i don la rnam par rtog pa mtha' yin par bstan nas/ 'od srungs sems yang dag pa zhes bya ba ni mtha' gcig go zhes rgya cher 'byung bas ni 'dzin pa'i don la rnam par rtog pa mtha' nyid du ston to//de la sems yang dag par ni gang sngar bstan pa'i mi rtag pa dang / bdag med par rnam par rtog pa dang ldan pa'o/ /yang dag pa ma yin pa ni gang rtag pa dang / bdag tu rnam par rtog pa'o/ /gang la sems med pa zhes bya ba ni las mngon par 'du byed pa'i gnas so//sems med ces bya ba ni las mngon par 'du byed pa nyid do/ /yid med ces bya ba ni gang sems las byung ba des yongs su bsgos pa'o/ /rnam par shes pa med ces bya ba ni de'i rnam par smin pa'o/ /dge ba dang mi dge ba'i chos rnams ni gti mug med pa dang / gti mug dang rab tu ldan pa ste/de nyid 'bras bu yid du mi 'ong ba dang / de las bzlog pa'i don gyi kha na ma tho ba dang bcas pa dag dang / kha na ma tho ba med pa dag go/ /kha na ma tho ba med pas ni 'jig rten pa dang / 'jig rten las 'das pa dag go/ /'jig rten pa dag ni zag pa dang bcas pa dag go/ /'jig rten las 'das pa dag ni zag pa med pa dag go//zag pa med pa ni 'dus byas dang 'dus ma byas rnams so/ /de dag las nag po'i phyogs ni kun nas nyon mongs pa'o/ /dkar po'i phyogs ni rnam par byang ba'o/ /de las sems yang dag pa dang / sems yang dag pa ma yin pa zhes bya ba'i mtha' gnyis gang yin pa de dang gang yang de dang rab tu ldan pa'i chos dge ba dang mi dge ba rnams nas kun nas nyon mongs pa dang rnam par byang ba zhes bya ba'i bar gyis mtha' gnyis gang yin pa de khas mi len cing mi brjod mi smra ba de ni 'od srungs dbu ma'i lam ste/chos rnams yang dag par so sor rtog pa zhes bya ba de la khas mi len pa ni de lta ba'o//mi brjod pa ni bdag nyid de mi brjod pa'o/ /mi smra ba ni gzhan gyis dris kyang mi smra ba'o/ /rnam grangs gzhan du na dge ba dang mi dge ba'i chos rnams zhes bya ba ni bstan pa'o/ /'og nas 'og ma tshig lhag ma rnams ni bshad par rig par bya'o//mu stegs can dang nyan thos rnams kyi mtha'i gnyen por dbu ma'i lam bshad nas byang chub sems dpa'i mtha'i gnyen po ston to/ /de la mu stegs can rnams kyi bdag dang rtag par sgro 'dogs pa'i mtha' gang las 'byung zhe na/ long ba mthong ba lta bu ste bshad mi dgos so/ /nyan thos dang rang sangs rgyas kyi theg pa can gang zag la bdag med par mthong bar sbyor ba rnams ni 'du byed tsam du dmigs pas 'du byed rnams ni mi rtag pa dang bdag med pa'o snyam ste/chos la bdag med pa mi mthong ba'i sngon rol du 'du byed la gnas nas mi rtag pa dang / bdag med par 'dzin par 'byung ngo //byang chub sems dpa' chos la bdag med par gzigs par sbyor ba rnams ni chos la bdag med par rab tu rtogs pa'i sngon rol du sgro 'dogs pa 'byung ba'i phyir sgro 'dogs pa rnam pa gsum gyi dbang du byas nas gnyen po ston to/ /yod pa dang med par rang gi mtshan nyid la sgro 'dogs pa la yod ces bya ba 'di ni mtha' gcig go//med ces bya ba ni mtha' gnyis so zhes gsungs pa'i phyir ro/ /ma rig pa dang rig par mi mthun pa'i phyogs dang gnyen por sgro btags pa la/ ma rig pa'i rkyen gyis 'du byed rnams nas ma rig pa 'gags pas 'du byed 'gag ces bya ba'i bar dag gsungs pa'i phyir ro/ / de las gzhan pa'i yan lag dang / de 'gag par 'dus byas dang / 'dus ma byas su sgro 'dogs pa la 'du byed rnams dang 'du byed 'gag ces bya ba la sogs pa'i tshig dag gis so/ /de dag gi gnyen por de dag gnyis ma yin zhes bya ba ni/ kun du brtags pa'i ngo bo nyid med pa'o/ rnam pa gnyis su dbyer med ces bya ba ni ma rig pa bskyed par bya ba yang med/ma rig pa 'gag par bya ba yang med/ 'du byed la sogs pa spang bar bya ba yang med/ 'gag pa thob par bya ba yang med de/ kun brtags pa'i ngo bo nyid med pa'i phyir ro/ /'di la shes pa gang yin pa de zhes bya ba ni skur pa 'debs pa'i mtha' spong ba ste/rig pa med pa nyid kyang ma yin la/ rig pa yod pa yang ma yin no zhes bya ba la sogs pa'o/ /gang stong ba nyid kyis chos rnams stong par mi byed mtshan ma med pas chos rnams mtshan ma med par mi byed ces bya ba la sogs pas ci ston zhe na/ stong pa nyid la sogs pa zhes bya ba 'di rig pa 'dis rten cing 'brel bar 'byung ba'i chos rnams kun du brtags pa'i rang bzhin nam/yongs su grub pas stong par mi byed do/ /de ci'i phyir zhe na/ 'di ni chos rnams kyi chos nyid de/ gang kun du brtags pa'i rang bzhin nam/ yongs su grub pas chos rnams ston te/ de bzhin du ngo bo nyid med pa'i bar du'o//des ni rig pa yod pa dang / de'i mi mthun phyogs yod par kun du brtags pa dang / yongs su grub pa'i rang bzhin dang bral bar yongs su bstan par skur pa 'debs pa'i mtha' spangs pa yin no/ /de la mi mthun pa'i phyogs rnam pa bdun gyi gnyen por rig par stong pa zhes bya ba nas/ngo bo nyid med ces bya ba'i bar du'o/ /mi mthun pa'i phyogs bdun las lta ba de'i gnyen po ni stong pa nyid do/ /'dod chags dang / zhe sdang dang / gti mug gi mtshan ma skye ba yang srid pa'i las 'du byed pa de'i gnyen po ni mngon par 'du mi byed pa'o/ /de'i 'bras bu skye ba de'i gnyen po ni skye ba med pa'o//skyes nas bde ba dang sdug bsngal 'byung ba de'i gnyen po ni 'byung ba med pa'o/ /stong pa nyid mthong bas nga'o snyam pa'i nga rgyal de'i gnyen po ni chos nyid kyi ngo bo nyid med ces bya ba'o/ /de la bdag med par so sor rtogs pas ni gang zag med pa la gang zag tu 'dzin pa bkag go/ /rnam pa gnyis su dbyer med ces bya ba'i bar du lhag ma rnams kyis chos med pa la chos su 'dzin pa bkag go//'od srungs gang zag rnam par gzhig pa'i phyir stong pa nyid ma yin gyis/ stong pa nyid stong pa'o zhes bya ba ni med pa las gang zag dang / chos su 'dzin pa dgag pa byed de/ gang zag tu rnam par gzhig pa'i phyir stong pa nyid bsgom par bya ba ma yin no//stong pa zhes bya ba ni med pa la chos su 'dzin pa gzhig pa'i phyir zhes bya bar ston te/ kun du brtags pa'i rang bzhin gyis stong pa nyid kyang stong na chos thams cad lta smos kyang ci dgos te/ kun du brtags pa'i chos kyi rang bzhin med pa 'dzin pa bkag go//de ltar na kun du brtags pa'i rang bzhin med pa'i phyir stong pa nyid yod pa yang ma yin no/ /yongs su grub pa'i rang bzhin med pa yang ma yin no/ /stong pa nyid ji lta bar chos thams cad kyang de bzhin te/ chos med pa la 'dzin pa bkag pas ni chos kyi rang bzhin med par ston to//stong pa nyid de'i yongs su grub pa de yod par bstan pa'i phyir sngon gyi mtha' stong zhes rgya cher gsungs te/ so so'i skye bo dang slob pa dang mi slob pa'i dus na dus thams cad du de bzhin du yod par yongs su ston pa'i phyir ro/ /stong pa nyid kyi phyir 'brang bar bya zhes bya ba ni don gyi phyir 'brang bas stong pa nyid kyi don rab tu rtogs pa'i thabs ston to//gang zag la ma yin zhes bya ba ni yi ge'i phyir 'brang ba las bzlog pa'o/ /de'i phyir 'brangs na yi ge'i phyir 'brang ba yang yin te/ gang zag tu btags pa gang yin pa dang / gang la 'dogs pa de gnyi ga la yang gang zag ces gsungs so/ /gang dag stong pa nyid la dmigs zhes bya ba ci ston zhe na/kun du brtags pa stong pa nyid kyi rang bzhin la dmigs pas stong pa nyid kyi phyir 'brang bar mi bya ste/ de ltar 'brangs na sngar ni gang zag tu 'dzin pas nyams la phyis ni chos su 'dzin pas nyams te/ shin tu ma rung ba'i phyir ro/ /de byas na shin tu ma rung bar 'gyur ba rab tu sgrub pa'i phyir/'od srungs ri rab tsam gang zag la lta bar gnas pa bla zhes gsungs so/ /stong pa nyid la dmigs pas ni/ stong pa nyid yongs su mi shes la/ mngon pa'i nga rgyal gyis don dam par khong du mi chud do/ /khong du ma chud na skur pa 'debs so/ /de bas na gang zag tu lta ba bor yang gsor mi rung bar 'gyur te/dper na sman gyis nad kyi nyes pa bskyod de/ ltor song ba zhes bya ba lta bu ste/ de lta bu las byung ba ni stong pa nyid na zhes bya ba kun du brtags pa de'i rang bzhin la mngon par zhen pa'am/ thams cad thams cad med pa tsam du mngon par zhen zhes bya ba'i tha tshig go/ /nam mkha'i dpe ni 'gyur ba med pa la 'dzin pa yongs su spong ba'i phyir te/su stong pa nyid du lta ba de stong pa nyid des gzugs la sogs pa med par 'dod pa na med pa la rtog ste/ de ni de'i 'gyur ba med pa la 'dzin pa'o/ /gzugs la sogs pa de dag ni rang bzhin gyis med na nam mkha' sel bar 'dod pa dang 'dra bar sems can dag ni chos nyid kyis stong pa nyid la spyod na yod par yongs su rtog nas de nyid kyis mi skrag go//gal te gzugs la sogs pa med du zin na rtsom pa don med par 'gyur ro snyam pa'i skyon du 'gyur ba yongs su spang ba'i phyir ri mo mkhan gyi dpe bstan te/ dper na gnod sbyin yod pa ma yin na ri mo mkhan gyi rang gi rnam par rtog pas khas bub du 'gyel ba de bzhin du gzugs la sogs pa ngo bo nyid med pa la byis pa rnams rang gi rnam par rtog pa log pas 'khor bar 'khyam ste/mi shes pa de dang 'bral ba'i phyir rtsom pa don med pa ma yin no/ /gong mas ni log pa bkag go/ /'di ni rtsom pa don med pa dgag par rig par bya'o//gal te 'di dag ni sems kyi nor pa tsam du ji ltar sems de nyid kyis sems de nyid yongs su shes zhes rgol ba spang ba'i phyir sgyu ma mkhan gyi dpe bstan to/ /de la sgyu ma mkhan lta bu ni yid la byed pa tsam gyi shes pa'o/ /sprul pa lta bu ni don med par shes par bya'o//za ba lta bu ni yid la byed pa tsam yang med par shes pa ste/ gsog la sogs par snang ngo / /'phags pa'i shes rab kyi dbang pos yang dag pa ji lta ba bzhin du mthong ba med na yang dag pa ji lta ba bzhin du ma mthong bas ji ltar 'jig rten las 'das pa'i ye shes skyes zhes rgol ba spang ba'i phyir/ shing gnyis kyi dpes bstan te/shing gnyis lta bu ni tshul bzhin so sor rtog pa'o/ /gtsubs pa las me 'byung ba lta bu ni/ shes rab kyi dbang po 'byung ba ste/ byung nas tshul bzhin so sor rtog pa de yang spong bar ston to/ /ci ye shes skyes pa 'am/ 'on te ma skyes pa mi shes pa'i gnyen por 'gyur zhes rgol ba spang ba'i phyir/mar me'i dpe bstan te/ ye shes byed pa med kyang / skyes ma thag tu mi shes pa'i gnyen por gyur pa ston to/ /thog ma med pa'i dus kyi kun nas nyon mongs pa ji ltar thog ma yod pa'i dus kyi gnyan pos spong zhes rgol ba spang ba'i phyir/ mar me'i dpe gnyis bstan te/ dbu ma'i lam mdor bstan to//rgya cher rnam par dbye ste/ byang chub sems dpa' yang dag par sgrub pa la gnas pa'i bslab pa rnam par gzhag pa rig par bya'o/ /byang chub sems dpa' chos la gnas pa ni kun rdzob kyi bden pa'i tshul du bshad pa rnam par gzhag pa'i bden pa'i tshul ston pa dang / drang ba'i don la sgra ji bzhin du mi 'dzin te/ rgyu de gnyis kyis nyan thos kyi theg pa dang rab tu ldan pa'i mdo sde'i phyir mi 'brang ste/ 'das nas de la sbyang mkhas par bya ste/ de las theg pa chen po dang rab tu ldan pa'i chos zab mo stong pa nyid dang rab tu ldan par rnam par bzhag pa dang / rnam par ma bzhag pa'i bden pa'i tshul bsdus pa'i phyir kun rdzob dang don dam pa'i bden pa'i tshul bstan pa'i chos kyi dbyings tshul gcig tu ston pas nges pa'i don gyi gzhir gyur mkhas par gyur te/ rgyu de nyid kyi phyir 'brang bar sbyor bas tshul bzhin du rab tu sbyor zhes bya'o/ /tshul bzhin du sbyor bas dbu ma'i lam du zhugs pa yin no//'di ltar dbu ma'i lam ni rnam pa bcu gsum du ston te/ gang zag stong pa nyid du ston pa dang / gang zag la bdag med pa dang chos stong pa nyid dang / chos la bdag med pa dang / sgro 'dogs pa'i mtha' dang / skur pa 'debs pa'i mtha' dang / chos mngon par rtogs pa dang / de yang byang chub chen por yongs su bsngo ba dang / de ltar zhugs pa nyon mongs pa dang / sdug bsngal gnyis kyis sems ma zin pa dang / bdag med pa gnyi ga la mos pa'i khyad par dang / bdag med pa snga ma bdag med pa phyi ma'i rgyur gyur pa dang / stong pa nyid kyi mthar thug pa dang / de nyid kyi mthu ston pa'o//de la ji ltar gang zag stong pa nyid du ston ce na/ rnam pa gcig gis mi dmigs par yongs su ston te/ gang zag la bdag med par so sor rtog ces 'byung ba'i phyir ro/ /sems can gyi dngos po phung po rnams dang / de'i sna tshogs kyi dngos po khams dang / de'i longs spyod kyi dngos po skye mched rnams te/dngos po rnam pa gsum la bdag mi dmigs te/ nang dang phyi dang gnyi ga med pa'i bar nas kyang byis pas yongs su brtags pa'i bdag mi dmigs so zhes mi dmigs par yongs su ston pas gang zag stong pa nyid du yongs su ston to/ /ji ltar gang zag la bdag med par ston ce na/ rnam pa gcig gis dmigs pa yongs su ston te/ de la dmigs pa 'di ni rtag par yang mi rtog ces gsungs pa'i phyir ro/ /dngos po gsum po byis pas yongs su brtags pa'i rten cing 'brel bar 'byung ba de nyid la rtag par mi dmigs pa'i phyir byis pas yongs su brtags pa'i bdag dang mi 'dra bas phung po rnams kyi mi rtag pa nyid dmigs so zhes bdag med pa'i rang bzhin yongs su brjod pas dngos po la gnas pa'i gang zag la bdag med par ston to//ji ltar chos stong pa nyid du ston ce na/ rnam pa gcig gis mi dmigs par yongs su ston te/ mi rtag par yang mi rtag ces gsungs pa'i phyir ro//de la mi dmigs pa 'di ni/ brjod du med pa'i dngos po la mi rtog go zhes sgro btags pa byis pas yongs su brtags pa'i tha snyad can gyi rang bzhin gang yin pa mi rtag pas zin pa'i dngos po de nyid la nang dang / phyi dang / gnyi ga med pa'i bar nas kyang mi dmigs pa ste/ de ltar chos stong pa nyid du ston to//ji ltar chos la bdag med par ston ce na/ rnam pa gcig gis dmigs par yongs su ston to/ /de la dmigs su med pa 'di ni dngos po de nyid la gang dmigs pa ste/ 'phags pa'i ye shes kyi spyod yul de dag gi so sor rang gis rig pa gzhan gyis brjod du med pa'o/ /de ni rnam pa drug gis byis pas yongs su brtags pa'i tha snyad kyi ngo bo nyid dag dang mi 'dra bar dmigs te/rnam pa drug gang zhe na/ 'od srungs rtag ces bya ba de ni mtha' gcig go/ /mi rtag ces bya ba de ni mtha' gnyis so/ /'od srungs mtha' de gnyis kyi dbus gang yin pa de ni dpyad du med pa/ bstan du med pa/ rten ma yin pa/snang ba med pa/ rnam par rig pa med pa/ gnas pa med pa ste/ de ni dbu ma'i lam chos rnams la yang dag par so sor rtog pa zhes bya'o/ /zhes gsungs pa gang yin pa ste/ de la dpyad du med pa'i zhes/ zhes bya ba ni 'di dang 'di'o zhes rang gi rtog pas brtag par mi nus pa'i phyir ro/ / bstan du med pa zhes bya ba de nyid gzhan dag la bstan par mi nus pa'i phyir ro/ /rten ma yin zhes bya ba ni dbang po gzugs can rnams kyi spyod yul las shin tu 'das pa'i phyir dbang po gzugs can rnams de la mi gnas so/ /snang ba med pa zhes bya ba ni mtshan ma'i rang bzhin ma yin pa'i phyir ro/ /rnam par rig pa med pa zhes bya ba ni yid kyi rnam par shes pa'i yul ma yin pa'i phyir ro//gnas pa med pa zhes bya ba ni nyon mongs pa'i gnas su ma gyur pa'i phyir ro/ /de ltar byis pas yongs su brtags pa tha snyad can gyi rang bzhin dang mi mthun pa'i rnam pa drug gis 'phags pa'i ye shes su dmigs par yongs su ston pas chos bdag med par ston to//ji ltar sgro 'dogs pa'i mtha' ston ce na/ bye brag tu sgro 'dogs par yongs su ston pa dang / ngo bo nyid du sgro 'dogs par yongs su ston pa rnam pa gnyis kyis so/ /de la bye brag tu sgro 'dogs pa gang zhe na/ de gong nas gong du rnam pa brgyad du rig par bya ste/dngos po de nyid la rtag par 'dzin par sgro 'dogs pa dang / mi rtag par 'dzin par sgro 'dogs pa dang / rtag par sgro btags pa la brten nas bdag tu 'dzin par sgro 'dogs pa dang / mi rtag par 'dzin par sgro btags pa la brten nas bdag med par sgro 'dogs pa dang /bdag med par 'dzin pa la sgro btags pa la brten nas sems yang dag par 'dzin par sgro 'dogs pa dang / bdag tu 'dzin par sgro btags pa la brten nas sems yang dag pa ma yin par sgro 'dogs pa ste/ de yang nges pa dang / yongs su tshol ba'o/ /dngos po de nyid la rtag par 'dzin par sgro 'dogs pa ni/'od srungs rtag ces bya ba de ni mtha' gcig go zhes gsungs pa'i phyir ro/ /mi rtag par 'dzin par sgro 'dogs pa ni mi rtag ces bya ba de ni mtha' gnyis so zhes gsungs pa'i phyir ro/ /rtag par sgro btags pa la brten nas bdag tu 'dzin pa la sgro 'dogs pa ni 'od srungs bdag ces bya ba de ni mtha' gcig go zhes gsungs pa'i phyir ro//mi rtag par 'dzin par sgro 'dogs pa la brten nas bdag med par 'dzin par sgro 'dogs pa ni bdag med ces bya ba de ni mtha' gnyis so zhes gsungs pa'i phyir ro/ /bdag med par 'dzin pa sgro btags pa la brten nas sems yang dag par 'dzin par sgro 'dogs pa ni 'od srungs sems yang dag par zhes bya ba de ni mtha' gcig go zhes gsungs pa'i phyir ro//bdag tu 'dzin par sgro btags pa la brten nas sems yang dag pa ma yin par sgro 'dogs pa ni sems yang dag pa ma yin pa zhes bya ba de ni mtha' gnyis so zhes gsungs pa'i phyir ro/ /sems yang dag par 'dzin par sgro 'dogs pa de yang nges pa dang yongs su tshol ba'o//yongs su tshol ba ni yongs su rtog pa de'i gnas dang / yongs su rtog pa de dang rab tu ldan pa'o/ /sems yang dag pa ma yin par 'dzin par sgro 'dogs pa la brten pa'i mi dge ba la sogs par 'dzin par sgro 'dogs pa nas kun nas nyon mongs par 'dzin par sgro 'dogs pa'i bar du'o//mi mthun pa'i phyogs kun nas nyon mongs pa'i chos rnams kyi nyes pa lnga ste/ phyin ci log gi nyes pa dang / sprod pa'i nyes pa dang / nyes par spyad pa las byung ba'i chos rnams dang / gnas ngan len gyi nyes pa dang / mi rtag pa'i nyes pa'o//sems yang dag pa la sgro 'dogs par brten pa ni gang la sems med pa dang / sems pa med pa dang / yid med pa dang / rnam par shes pa med pa de ni 'od srungs dbu ma'i lam chos rnams la yang dag par so sor rtog pa zhes bya ste/ dge ba dang / mi dge ba rnams dang /'jig rten pa dang / 'jig rten las 'das pa rnams dang / kha na ma tho ba dang bcas pa dang / kha na ma tho ba med pa rnams dang / zag pa dang bcas pa dang / zag pa med pa rnams dang / 'dus byas dang / 'dus ma byas pa rnams te/ chos thams cad kyang de bzhin no zhes bya'o/ /de la nges pa de'i gnyen por sems med ces bya ba gsungs so//yongs su tshol ba de'i gnyen por sems pa zhes bya ba gsungs so/ /yongs su rtog pa'i gnas de'i gnyen por yid med pa zhes bya ba gsungs so/ /yongs su rtog pa de dang rab tu ldan pa de'i gnyen por rnam par shes pa med pa zhes bya ba gsungs so//mi mthun pa'i phyogs kun nas nyon mongs pa dag las mi dge ba rnams ni phyin ci log gi nyes pa 'jig rten pa dag gis spros pa'i nyes pa kha na ma tho ba dang bcas pa dag ni nyes par spyod pa las byung ba'i nyes pa zag pa dang bcas pa dag ni gnas ngan len gyi nyes pa 'dus byas dag ni mi rtag pa'i nyes pas so//de ltar de ni sems yang dag pa ma yin pa mi dge ba la sogs par 'dzin par sgro 'dogs pa nas kun nas nyon mongs par sgro 'dogs pa'i bar du ste/ 'od srungs kun nas nyon mongs pa zhes bya ba de ni mtha' gcig go zhes gsungs pa gang yin pa'o/ /sems yang dag par 'dzin par sgro btags pa de'i gnyen po rnam par byang ba'i chos dge ba dang /'jig rten las 'das pa dang / kha na ma tho ba med pa dang / zag pa med pa dang / 'dus ma byas rnams la dge ba la sogs pa sgro 'dogs pa nas rnam par byang bar sgro 'dogs te/ rnam par byang ba zhes bya ba de ni mtha' gnyis so zhes gang gsungs pa'o//brgyad po 'di dag ni bye brag tu sgro btags pa yin te/ byang chub sems dpa' ni bye brag tu sgro 'dogs pa brgyad po de dag mngon par zhen pa'i tshul gyis khas mi len to/ /gzhan dag yang dag par 'dzin du 'jug pa'i tshul gyis mi brjod do/ /gzhan dag la kun du bsnyad pa'i tshul gyis mi smra ste/'od srungs mtha' de gnyi ga khas mi len cing mi brjod mi smra ba gang yin pa de ni dbu ma'i lam chos rnams la yang dag par so sor rtog pa'o zhes gsungs pa'i phyir ro/ /go rims bzhin no/ /brgyad po 'di dag ni bye brag tu sgro 'dogs pa'o/ /de la ngo bo nyid du sgro 'dogs pa ni gang bye brag tu sgro 'dogs pa rnam pa brgyad po de'i gnas byis pas yongs su brtags pa rnams la tha snyad kyi ngo bo nyid du sgro 'dogs te/sngar smos pa'i dngos po gsum po de nyid la yod do zhes sgro 'dogs pa ste/ 'od srungs yod ces bya ba de ni mtha' gcig go zhes gsungs pa'i phyir ro//de lta na sgro 'dogs pa'i mtha' ston to/ /ji ltar skur pa 'debs pa'i mtha' ston ce na/ rnam pa gcig gis dngos po yod pa la skur pa 'debs par yongs su ston to/ /de la 'di ni dngos po yod pa la skur pa 'debs pa ste/ ji ltar chos la bdag med par log par mos pa ste/rnam pa thams cad du chos thams cad mtshan nyid med par zhan pa yin te/ med ces bya ba de ni mtha' gnyis so zhes gsungs pa'i phyir ro/ /de yang mdor bsdu na sgro 'dogs pa dang / skur pa 'debs pa'i mtha' dang bral ba'i rnam pa drug gis dbu ma'i lam yongs su bstan pa'o/ /ji ltar chos mngon par rtogs par ston ce na/rig pa dang ma rig pa 'di dag gnyis ma yin zhing rnam pa gnyis su dbyer med de/ 'od srungs 'di la shes pa gang yin pa de ni dbu ma'i lam chos rnams la yang dag par so sor rtog pa zhes bya ba'o/ /tshig 'dis ni rnam pa gsum gyis mngon par rtogs par ston te/ sngar bstan pa'i dngos po de nyid dang / dngos po bzhi gang zhe na/ rten cing 'brel bar 'byung ba mi mthun pa'i phyogs dang / gnyen po dang / 'dus byas dang / 'dus ma byas su rnam par gzhag pa gang ngas khyed rnams la bstan pa ma rig pa'i rkyen gyis 'du byed ces bya ba nas skye ba'i rkyen gyis rga shi dang /mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams 'byung ste/ de ltar sdug bsngal gyi phung po chen po 'di 'ba' zhig 'byung bar 'gyur ro zhes gang gsungs pa mi mthun pa'i phyogs dang 'dus byas rnam par gzhag pa dang / 'di lta ste ma rig pa 'gags pas 'du byed 'gag ces bya ba nas skye ba 'gags pas rga shi dang /mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams 'gag ste/ de la sdug bsngal gyi phung po chen po 'di 'ba' zhig 'gag par 'gyur ro zhes gang gsungs pa gnyen po dang /'dus ma byas rnam par gzhag pa la ngo bo nyid mi dmigs par yongs su brjod pa dang bye brag mi dmigs par yongs su brjod pa dang / de goms par byas pas yang dag pa ji lta ba bzhin du shes pa'i bar du rtogs pa yongs su brjod pas so/ /de la ngo bo nyid mi dmigs pa 'di ni gang rig pa dang /ma rig pa gnyis byis pas yongs su brtags pa'i ngo bo nyid du mi dmigs pa ste/ 'od srungs de la rig pa dang ma rig pa de dag gnyis ma yin zhing zhes bya ba dang / de bzhin du 'du byed pa dang / 'dus ma byas dang / rnam par shes pa dang / rnam par shes pa la 'gag pa zhes bya ba nas rga shi dang /rga shi 'gag pa de dag gnyis ma yin zhes gsungs pa'o/ /de la bye brag mi dmigs par 'di ni gang byis pas yongs su brtags pa'i ngo bo nyid de 'gag pa dang / skye ba kun du 'thob pa rnam pa gnyis su med par mi dmigs pa ste/ rnam pa gnyis su dbyer med ces gang gsungs pa'o//de la shes pa'i rab tu rtogs pa 'di ni/ 'od srungs 'di la shes pa gang yin pa de ni dbu ma'i lam chos rnams la yang dag par so sor rtog pa zhes bya ba'o zhes gsungs pa ste/ de dang de'i gnas kyi mtshan ma yid la mi byed par sbyor ba dang / mi brjod par sbyor bas so sor rang gi ye shes kyi chos bdag med par rab tu rtogs pa ste/de ltar chos mngon par rtogs par ston to/ /ji ltar chos mngon par rtogs pa byang chub chen por yongs su bsngo bar ston ce na/ 'od srungs gzhan yang dbu ma'i lam chos rnams la yang dag par so sor rtog pa ni gang stong pa nyid kyis chos rnams stong par mi byed ces bya ba la sogs pa tshig bdun po dag gis so//byang chub sems dpa' sems can la snying brtse bas stong pa nyid kyis chos rnams stong par mi byed de/ nyon mongs pa rnams ni mi spong ngo zhes bya ba'i tha tshig go/ /de bzhin du smon par byed smon pa med par mi byed/ mtshan ma med pas mtshan ma med par mi byed/ mngon par 'du mi byed pas mi srid pa can gyi las dang skye ba'i rgyun dang / skad cig gis skye ba'i rgyun dang / 'du byed thams cad ngo bo nyid med pas mya ngan las 'das pa dang / 'khor ba'i rgyun te/ de ltar chos mngon par rtogs pa byang chub sems dpa' stong par ston to//de ltar zhugs pa ji ltar nyon mongs pa dang / sdug bsngal gnyis kyis sems ma zin pa ston ce na/ rnam pa gcig gis te/ chos nyid stong pa zhes bya ba nas/ chos nyid ngo bo nyid med ces bya ba'i bar du tshig rnam pa bdun po dag gis so/ /mi mthun pa'i phyogs kyi chos rnams ma spangs kyang yang dag pa ji lta ba bzhin du rab tu rtogs pa'o//de la yang dag pa ji lta ba bzhin du rab tu rtogs pa 'di chos la bdag med pa la sbyor ba la mi mthun pa'i phyogs su gyur pa'i chos de dag nyid rang bzhin gyis nyon mongs pa can ma yin pa dang / sdug bsngal med par yang dag par rjes su mngon pa ste/de ltar na de ltar zhugs pa nyon mongs pa dang / sdug bsngal gnyis kyis sems ma zin par ston to/ /ji ltar khyad par ston ce na/ rnam pa bzhi po dag gis te/ mthong ba'i bye brag yongs su ston pa dang / de dag thag ring po nas dam pa'i bye brag yongs su ston pa dang / spong ba rnam par 'khrul pa'i bye brag yongs su ston pa dang /sems rnam par 'khrul pa'i bye brag yongs su ston pas so/ /de mthong ba'i bye brag 'di ni 'od srungs gang zag rnam par gzhag pa'i phyir stong pa nyid ma yin zhes bya ba ste/ gang zag med par mthong ba tsam stong pa nyid ma yin no zhes bya ba'i tha tshig go/ /de ci'i phyir zhe na/ gang zag la bdag med pa gnas kyi/ chos la bdag med pa ma mthong ba dang / 'du byed du gyur pa gzung ba la yongs su ma brtags pa dang / 'khor bar gtogs pa bdag med par shes pa'i 'dzin pa tha snyad kyi rang bzhin dang bral ba stong pa nyid kyis bsdus pa 'das pa dang / ma 'ongs pa dang / da ltar gyis dus rnams la yongs su ma brtags pa ste/shes bya la shin tu ma brtags pa'i phyir chos kyi bdag nyid can ni mya ngan las 'das pa la ma 'ongs pa na chad par mngon pa'i nga rgyal du gyur to/ /stong pa nyid ces bya ba ni yongs su brtags pa tha snyad can gyi chos kyi bdag la mngon par zhen par 'dzin pas stong pa nyid kyi phyir 'brang gi chos la bdag med pa don dam pa stong pa nyid la ma yin te/de sngar ni gang zag tu 'dzin pa ma spangs la/ phyis ni chos su 'dzin pa byung bas na gsung rab 'di la nyams/ rab tu nyams te/ byang chub sems dpa' ni de ltar ma yin no/ /de bas na byang chub sems dpa'i lam la sbyor ba khyad par du bya ba'i don du chos la bdag med pa rab tu bstan pa'i phyir bcom ldan 'das kyis 'od srungs stong pa nyid kyi phyir 'brang bar bya'i/gang zag la ma yin no zhes gsungs te/ de ltar mthong ba'i bye brag ston to/ /de la thag ring pos dma' ba 'di ni gang zag bdag med pa la gnas pa dag so so'i skye bo bdag tu lta ba dma' bas kyang ches dma' bar 'gyur te/sdug bsngal las rnam par grol ba dang / sdug bsngal dang gnas pa rnam pa gnyis kyi phyir ro/ /de ni rgyu gcig ste/ 'od srungs gang zag tu lta ba la gnas pa ri rab tsam bla'i/ mngon pa'i nga rgyal can stong pa nyid du lta ba ni de lta ma yin no/ / de ci'i phyir zhe na/ lta bar song ba thams cad las byung ba ni stong pa nyid na gang stong pa nyid du lta ba de ni gsor mi rung ngo zhes nga mi 'chad do zhes bya ba'i tshig 'dis don 'di bstan te/ /gang zag tu lta ba ri rab tsam bla zhes bya ba ni gang zag tu lta ba gnyen po dang bcas pa'i phyir spong nus par ston to/ /mngon pa'i nga rgyal can stong pa nyid du lta ba de ni lta ba ma yin no zhes bya ba ni chos la bdag med pa mthong bas bdag gi stong pa nyid kyis 'du byed rnams stong par mthong ngo snyam pa'i mngon pa'i nga rgyal can du rig par bya'o//kun du brtags pa'i ngo bo nyid kyis stong pa nyid kyang stong na brjod du med pa'i bdag nyid kyis stong pa nyid la stong ngo zhes kun du brtags pa'i rang bzhin du sgro 'dogs pa ni phyin ci log tu rab tu gnas te/sgro 'dogs pa'i lta bas stong pa nyid du lta ba ma yin no/ /gang stong pa nyid du lta ba ma yin pas gsor mi rung bar rig par bya'o/ /gsor mi rung ba'i phyir skye ba la sogs pa'i sdug bsngal las yongs su mi grol lo/ / dus thams cad du nyon mongs pa'i gdung ba dang ldan pas sdug bsngal dang gnas te/ nad pa gsor mi rung ba bzhin no/ /sngon dang phyi mar rnam pa gnyis kyis rnam par 'jig pa ni rgyu gnyis pa ste/ 'od srungs 'di lta ste dper na skyes bu nad pa de la sman pa des sman byin na zhes bya ba'i dpe 'dis ston to//de 'di lta ste dper na nad pas chos bzhin legs par ma byas pas nyes par spyod pas nad rnams mi 'byung ba dang / nad dang ldan pa'i rgyu las byung ba'i phyir snga phyi tshor ba rnam pa gnyis myong ba de bzhin du gang zag la bdag med par lta ba la rab tu spyod kyang bdag tu lta ba ma spangs pas stong pa nyid la chos kyi bdag tu 'dzin pa 'byung bas nyon mongs pa'i nad dang ldan te/snga phyi 'dzin pa gnyis kyis rnam par 'jig pas rab tu nyams par 'gyur ro/ /byang chub sems dpa' ni de lta ma yin te/ 'di ni thag ring po dma' ba'i bye brag go/ /de la spong ba rnam par 'khrul ba'i bye brag 'di ni/ 'od srungs 'di lta ste dper na skyes bu la la zhig nam mkhas 'jigs skrag ces rgya cher gsungs pa'o//dper na la la zhig rang gi rnam par rtog pa las byung ba'i nam mkha' la 'ga' zhig tu sgro 'dogs pa'o/ /sgro btags nas des 'jigs skrag ste/ nam mkha' 'di sol zhes zer ba de bzhin du gang zag la bdag med pa la gnas la chos la bdag med pa nyid [(]tu [,]du [)]mngon par zhen nas skrag ste/nam mkha' lta bur brjod du med pa'i dngos po las med pa las kun du brtags nas gzugs la sogs par sgro 'dogs so sgro btags nas bsam gtan pa'i mgo'i thod pa bzhin du de nyid la chags par yongs su tshol lo//byang chub sems dpa' ni de lta ma yin te/ 'di ni spong ba rnam par 'khrul pa'i bye brag go/ /de la sems rnam par 'khrul pa'i bye brag 'di ni 'di lta ste/ dper na skyes bu ri mo mkhan bdag nyid kyis gnod sbyin gyi gzugs 'jigs 'jigs lta zhig bris na zhes rgya cher gsungs so/ /de bzhin du spong ba rnam par 'khrul pa gang zag la bdag med pa la gnas pa yang rang gi rnam par rtog pa las byung ba'i yul rnams las 'du shes phyin ci log la sogs pas phyin ci log ste/byang chub sems dpa' ni de lta ma yin no/ /'di ni sems rnam par 'khrul pa'i bye brag ste/ de ltar rnam pa bzhis bye brag tu ston to//ji ltar rgyu ston ce na/ sgyu ma mkhan gyi dpe dang / shing gnyis kyi dpe dang dpe gnyis kyis so/ /dpe dang pos ni 'dzin pa la so sor rtog pa yongs su bstan te/ gang zag la bdag med pa'i ye shes 'du byed tsam du 'dzin pa la chos la bdag med pa'i ye shes kyis so sor rtog go//de bas na chos la bdag med pa'i ye shes ni 'dzin pa la so sor rtog pa zhes bya'o/ /de yod na yod pa'i phyir gang zag la bdag med pa'i ye shes ni chos la bdag med pa'i ye shes kyi rgyu yin te/ dper na sgyu ma mkhan ni sgyu ma'i sprul pa'i rgyu yin pa bzhin te/ ji ltar sgyu ma sprul pas sgyu ma mkhan zos pa bzhin du rnal 'byor spyod pa'i chos la bdag med pa'i ye shes kyis gang zag la bdag med pa'i ye shes zos so//tha snyad can gyi rang bzhin dang bral bas stong pa'o/ /de yongs su rtog pa dang bral bas gsog go/ /spang bar bya ba'i mtshan nyid yin pas gsob po/ /skad cig pa min pas snying po med do//so sor rtog pa ni za ba lta bu'o/ /dpe gnyis pa 'di lta ste/ yang dag par rab tu rtogs par yongs su ston to/ /de la 'di lta ste/ yang dag par rab tu rtogs pa 'di ni gzung ba dang 'dzin pa las yongs su rtog pa tshul bzhin yid la byed pa gnyis kyis rjes su 'gro ba las/ so so rang gis rig pa nges pa'i ye shes skye ba gang yin pa'o//de la gzung ba la rtog pa ni gang zag la bdag med pa'i ye shes so/ /'dzin pa la rtog pa ni chos la bdag med par sbyor ba'i ye shes so/ /gtsub gtan dang / gtsub shing gnyis gnyis lta bu'i tshul bzhin yid la byed pa de gnyis kyi yid la byed pa'i rjes su 'gro ba las/so so rang gis rig pa nges pa'i ye shes skye ba ni yang dag pa ji lta ba bzhin du rab tu rtog pa zhes bya'o/ /shing gnyis kyi dpe 'dis ni rgyu nyid du ston to/ /ji ltar shing gnyis gtsubs pa las me byung nas shing de gnyis tshig nges pa de bzhin du gang zag la bdag med pa dang / chos la bdag med pa'i ye shes la sbyor ba'i rgyu las 'byung ba chos la bdag med pa'i ye shes so so rang gis rig pa nges pa'i ye shes skyes pas sbyor ba'i ye shes gnyis po yongs su brtags pa'i rang bzhin gang yin pa de la yang dag pa ji lta ba bzhin du so sor rtog pa tshig pa dang 'dra ste/de ltar de gnyis kyis rgyu nyid tu ston to//ji ltar stong pa nyid kyi mthar thug pa ji ltar ston ce na/ rnam pa gcig gis te/ de yang chos la bdag med pa'i ye shes ji lta ba bzhin du kun du bstan te/ 'od srungs 'di lta ste/ dper na mar me phyung na mun pa mun nag thams cad med par 'gyur ro zhes bya ba'i dpe 'dis so//de la yang dag pa ji lta ba bzhin du mthong ba 'di ni mi shes pa dang shes pa mtshungs pas tha snyad can gyi rang bzhin dang bral ba'i phyir stong pa'o/ /de ltar mngon par zhen pa med pa'i phyir gzung du med pa'o/ /skad cig ma'i phyir byed pa med pa ste/ de ltar stong pa nyid kyi mthar thug pa ston to//ji ltar stong pa nyid de'i mthu ston ce na rnam pa gcig gis te/ las dang nyon mongs pa spong ba'i gnyen po yongs su bstan pas so/ /'od srungs 'di lta ste/ dper na khyim mam/ khang pa 'am/ khang phran lo brgya stong 'das par len 'ga' yang mar me ma lus pa zhes bya ba'i dpe 'dis so//de la spong bas yongs su bstan pa 'di ni ye shes kyi snang ba skyes pa'i skad cig des thog ma med pa'i dus nas zhugs pa'i las dang nyon mongs pa spong ba ste/ de ltar na stong pa nyid kyi mthu ston pa'o/ /de ltar tshul bzhin la zhugs pa ni dbu ma'i lam du zhugs pa yin no/ /gal te de ltar nyon mongs pa myur du spong na ni ci'i phyir byang chub sems dpa' yun ring du 'khor zhe na/'bras bu thob pa'i khyad par te/ dpe gnyis kyis ston te/ 'di lta ste/ dper na nam mkha' las sa bon rnams mi 'khrung ngo zhes bya ba dang / lud kyis gang ba'i sa las sa bon rnams 'khrung ngo zhes bya ba'i dpe gnyis kyis de ston to//byang chub sems dpa' bsam pa mya ngan las 'das kyang / sems can la lta bas sangs rgyas kyi chos thob par bya ba'i phyir 'khor ba yongs su gzung bas dge ba'i rtsa ba rnams yongs su bsngo ste/ yun ring por 'khor ro/ /de lta 'dus ma byas kyi mya ngan las 'das pa ni nam mkha' lta bu ste/de la gnas na sangs rgyas kyi chos rnams mi 'khrung gi snying rje'i gnas la gnas pa'i byang chub sems dpa' rnams nyon mongs pa'i lud kyis gang ba'i sems can gyi 'jig rten gnas pa lud kyis gang ba'i sa lta bu de la gnas nas byang chub sems dpa'i sangs rgyas kyi chos rnams 'khrung ngo //smras pa/ ji ltar 'dus byas dma' ba'i gnas las byang chub sems dpa'i sangs rgyas kyi chos dam pa skye zhe na/ pad mo de'i dpes rab tu sgrub ste/ 'di lta ste/ dper na lud yod pa'i 'dam rdzab nas pad mo 'khrung ba de bzhin du nyon mongs pa'i lud yod pa'i 'dam rdzab log pa nyid du nges pa'i sems can rnams la byang chub sems dpa'i sangs rgyas kyi chos rnams 'khrung ngo //smras pa/ de lta na go byang chub sems dpa' rnams las nyan thos rnams kyi khyad par rnam pa bcu gnyis med par 'gyur te/ grol ba'i dge ba'i rtsa ba mngon par 'du byed pa'i khyad par dang / rnam par grol ba'i 'bras bu zad pa dang /mi skye ba shes pas sdud pa'i ye shes mngon par 'du byed pa'i khyad par dang / rnam par grol ba'i spyi'i khyad par dang / bdud dang phyir rgol ba bcom pa'i khyad par dang / mi slob pa'i khyad par dang / mchod par 'os pa'i phyir mchod par 'os pa'i khyad par dang / skyes bu zung bzhi dang /gang zag brgyad kyi dbang du byas nas dge 'dun gyi mchog tu btags pa'i khyad par dang / tshe 'di la mya ngan las 'das pa thob ste/ chos smra bar gyur pas chos smra ba'i mchog tu btags pa'i khyad par dang / sems can ji snyed pa dang / sems can gyi gnas dgu po ji snyed las sems can gyi mchog tu btags pa'i khyad par dang /mchog tu bsil ba'i dngos po thob pa'i khyad par dang / sems can la dbang byed pa'i khyad par dang / sdug bsngal yang mi skye ba'i khyad par te/ klan ka dag yongs su spang ba'i phyir dpe rig par bya'o/ /de la grol ba'i dge ba'i rtsa ba mngon par 'du byed pa'i khyad par yongs su spang ba'i phyir rgya mtsho chen po dang /thigs pa chung ngu'i dpe gnyis te/ skye bo mang po nye bar 'tsho ba dang nye bar 'tsho ba ma yin pa'i mthun pa'i chos kyis so/ /ye shes mngon par 'du byed pa'i khyad par yongs su spang ba'i phyir gnyis te/ byang chub sems dpa'i ye shes ni bdag dang gzhan sems can mtha' yas pa'i rgyu rnams sgrib pa'i gnyen por gyur pa'i phyir ro//rnam par grol ba'i spyi bo khyad par yongs su spang ba'i phyir gnyis te/ de la btsun mo dam pa lta bu ni rnam par grol bar rig par bya'o/ /skyes bu dbul po lta bu ni nyan thos kyi theg pa'i smon lam mo/ /bran mo lta bu ni sems can la lta ba'o//rgyal po lta bu ni theg pa chen po'i smon lam mo/ /bdud dang phyir rgol ba bcom pa'i khyad par yongs su spang ba'i phyir 'khor los sgyur ba'i mtshan dang ldan pa stong gi dpe ste/ de bzhin gshegs pa'i sras su zhal gyis mi bzhes pa'i phyir ro/ /mi slob pa'i khyad par yongs su spang ba'i phyir btsun mo dam pa de'i mngal du gzhon nu 'khor los sgyur ba'i mtshan dang ldan pa zhugs pa 'khor los sgyur ba'i dpe gnyis pa ste/sangs rgyas kyi gdung 'tshob par rab tu gnas pa'i phyir mchod par 'os pa'i khyad par yongs su spang ba'i phyir/ btsun mo dam pa de las gzhon nu mtshan dang ldan pa btsas pa 'khor los sgyur ba'i dpe gsum pa ste/thams cad mkhyen pa nyid kyi rgyu yang dag par 'dzin pa'i phyir ro/ /dge 'dun gyi mchog tu btags pa'i khyad par yongs su spang ba'i phyir nor bu rin po che baiDUr+ya'i dpe ste/ sa dang pos bsdus pa'i byang chub kyi sems rab tu thob pa'i phyir ro//chos smra ba'i mchog tu btags pa'i khyad par yongs su spang ba'i phyir sman gyi dpe ste/ sems can thams cad kyi nyon mongs pa'i nad zhi bar byed pa'i phyir ro/ /sems can gyi mchog tu btags pa'i khyad par yongs su spang ba'i phyir zla ba'i dkyil 'khor btang ste/ su yang zhes bya ba'i dpe ste/sems can thams cad la ye shes kyi snang ba byed pa'i phyir ro/ /mchog tu bsil ba'i dngos po khyad par yongs su spang ba'i phyir/ zla ba tshes pa'i dpe ste/ sangs rgyas su 'grub pa'i bsod nams dang / ye shes kyi tshogs rnams yang dag par sgrub pa'i phyir ro/ /sems can la dbang byed pa'i khyad par yongs su spang ba'i phyir/mching bu'i nor byas pa'i dpe ste/ byang chub sems dpa' thams cad mkhyen pa nyid kyi 'bras bu 'thob pa'i phyir ro/ /sdug bsngal yang mi skye ba'i khyad par yongs su spang ba'i phyir nor bu rin po che baiDUr+ya byi dor byas pa'i dpe ste/ nyan thos kyi yon tan sems la dbang byed pa'i khyad par thob pa la sogs pa rnams kyi gnas ni byang chub sems dpa' yin pa'i phyir ro//de ltar mdor bsdus te dpe de rnams kyis byang chub sems dpa' rnams nyan thos rnams las khyad par du ston to/ /'di man chad ni rgya cher bstan par bya'o/ /nyan thos ni du/ nyan thos kyi bslab pa dang /byang chub sems dpa'i bslab pa khyad par ci yod ce na/ nyan thos ni bzhi'o/ /nyan thos kyi bslab pa dang / byang chub sems dpa'i bslab pa'i khyad par ni rnam pa bcu gsum gyis rig par bya'o/ /sprul pa'i nyan thos dang / mngon pa'i nga rgyal can gyi nyan thos dang / byang chub tu 'gyur ba dang /zhi ba gcig tu bgrod pa'o/ /de la sprul pa'i nyan thos ni sems can rnams 'dul ba'i phyir byang chub sems dpa' 'am/ de bzhin gshegs pa rnams kyis sprul pa gang yin pa'o/ /de la mngon pa'i nga rgyal can gyi nyan thos ni gang zag la bdag med pa'i ye shes tsam dang / chos la bdag med pa la log par mngon par zhen pa'i ye shes kyis yang dag par 'dzin pa gang yin pa'o//de la byang chub tu 'gyur ba ni thog ma med pa nas snying rje'i rigs shin tu chung ba yin te/ de bzhin gshegs pa dang nye bar gnas pas sangs rgyas kyi chos rgya chen po rnams la yon tan du 'du shes pas yongs su bsgos pa'i rgyun du 'gyur te/de'i mthar phyin nas zag pa med pa'i dbyings la gnas pa la sangs rgyas rnams yang dag par bskul lo/ /'dzud do/ /thabs nye bar ston to/ /de rgyu des na/ byang chub chen po mngon par bsgrub pa gang yin pa ste/ de de ltar byang chub chen po mngon par sgrub kyang / zhi ba la mngon par dga' ba'i phyir/de sbyor ba de la 'jug pa shin tu zhen pa yin te/ de lta bu ni sems dang po bskyed pa'i sangs rgyas kyi rigs ma yin te/ de la zhi ba gcig tu bgrod pa ni thog ma nyid nas snying rje'i rigs shin tu chung ba dang / sems can don la rab tu rgyab kyis bltas pa dang / sdug bsngal gyis 'jigs pa'i phyir mya ngan las 'das pa la gnas pa'i bsam pa nyid du 'gyur ba ste/byang chub chen po mngon par sgrub pa'i skal ba med pa'o/ /'di lta ste dper na rgyal po'i bu skye ba'i gnas 'dra ba las skyes pa gnyis shig 'dra bar rgyal po'i bde ba la yongs su spyod de/ de la gcig ni rgyal po'i gtsug lag dang /rang bzo dang / bzo ba'i gnas la mkhas la/ cig shos ni de lta ma yin na/ de gnyis yan lag des khyad par du gyur pa yin gyi/ rgyal po'i bde ba'i longs spyod kyis ni ma yin no/ /de bzhin du zag pa med pa'i dbyings la byang chub sems dpa' dang / zhi ba gcig tu bgrod pa'i nyan thos gnyis par bya'o//de gnyis kyi khyad par ni/ rnam pa bcu gsum gyis rig par bya'o/ /bsam pa las rig par bya ba dang / dkar po'i chos yang dag par sgrub pa dang / ye shes yang dag par sgrub pa dang / rjes su 'gro ba dang / rigs dang rigs kun du 'dzin pa dang / sbyor ba dang / mthu dang / sgrub pa dang / khyad par can rnams las kyang khyad par du 'phags pa dang / rgyu dang 'bras bu dang / skye ba la brten pas rig par bya'o/ /'od srungs 'di lta ste dper na/ nam mkha' las sa bon rnams mi 'khrung ngo zhes bya ba dang / 'brog dgon pa ro skam dag nas pad ma mi 'khrung zhes bya ba dang /lud yod pa'i 'dam rdzab nas pad mo 'khrung zhes bya ba'i dpe de dag gis ni zhi ba gcig tu bgrod pa'i nyan thos dang / byang chub sems dpa'i bsam pa'i khyad par ston to/ /zhi ba gcig tu bgrod pa'i nyan thos ni lud kyis gang ba'i sa lta bu nyon mongs pa can gyi 'du byed rnams dang /lud yod pa'i 'dam rdzab lta bu nyon mongs pa dang bcas pa'i sems can rnams las phyir phyogs pa'i nam mkha' dang 'dra ba'i mya ngan las 'das pa'i dbyings dang / ro skam gyi sa lta bu'i sems can gyi khams rnam par dag pa la gcig tu zhi bar bya ba'i bsam pa can du 'gyur ro/ /de las bzlog pa ni byang chub sems dpa'i mya ngan las mi 'da' ba'i bsam pa dang /rnam par dag pa'i sems can la gnas pa'i bsam pa ste/ kun nas nyon mongs pa'i sems can rnams rnam par grol bar bya ba lta bus 'du byed nyon mongs pa can rnams dang sems can rnams yongs su 'dzin to//chu'i thigs pa dang mar sar gyi dpe gnyis kyis ni dkar po'i chos yang dag par sgrub par byed pa'i khyad par bstan te/ nyan thos ni bdag skyed pas dkar po'i chos rnams chung ngo / /byang chub sems dpa'i ni tshad med de/ sems can thams cad la phan pa dang / bde ba skyed de/ dper na pha mas mar sar gyis rang gi bu rnams skyed pa de bzhin du byang chub sems dpa' yang mar sar lta bu'i rang gi dge ba'i rtsa ba dpag tu med pas byang chub sems dpa' las dang po pa lta bu rnams skyed do/ /yungs 'bru dang nam mkha'i dpe gnyis kyis ni/ ye shes yang dag par sgrub pa'i khyad par ston to//nyan thos ni 'dus ma byas pa'i ye shes kyis nyon mongs pa rnams kyis bdag gsog dang gsob tu byed do/ /byang chub sems dpa' ni phyogs bcu'i sems can thams cad la snying brtse bas mngon par rtogs pa'i ye shes kyi byang chub kyi phyir yongs su bsngo'o/ /btsun mo dam pa dang /bran mo'i dpes ni rjes su 'gro ba'i khyad par bstan te/ nyan thos ni rnam par grol ba'i mchog btsun mo dam pa lta bu'i ma dang / dmigs pa chung ngu yid la byed pa skyes bu dbul po lta bu'i phas yang dag par bsgrubs pas sangs rgyas kyi sras ma yin no/ byang chub sems dpa' ni so so'i skye bo rang bzhin gyis dma' ba bran mo lta bu'i ma la dmigs pa rgya chen po yid la byed pa rgyal po lta bu'i phas yang dag par bsgrubs pas sangs rgyas kyi sras yin no//'khor los sgyur ba'i dpe dang pos ni rigs kyi khyad par ston te/ ji ltar 'khor los sgyur ba'i rgyal po bu stobs phun sum tshogs/mgyogs pa'i shugs phun sum tshogs/ mthu phun sum tshogs kyang 'khor los sgyur ba'i mtshan rnams dang mi ldan pa'i phyir 'khor los sgyur ba thob par yongs su mi nus pa de bzhin du/ nyan thos kyang brtson 'grus brtsams pas stobs phun sum tshogs/ bde ba la mkhas pas mgyogs pa'i shugs phun sum tshogs/sems mnyam par gzhag pas mthu phun sum tshogs kyang / sangs rgyas kyi rigs kyi mtshan dang ldan pas sangs rgyas rnams kyis de ltar yongs su mi 'dzin to/ /byang chub sems dpa' ni de las bzlog pa'o/ /'khor los sgyur ba'i dpe gnyis pas ni rigs kun du 'dzin pa'i khyad par ston te/nyan thos ni mthar phyin kyang ma 'ongs pa na sangs rgyas kyi rigs kun du 'dzin mi nus so/ /byang chub sems dpa' ni sems dang po bskyed pa'i skad cig de nyid kyis mi nus so/ /'khor los sgyur ba'i dpe gsum pas ni sbyor ba'i khyad par ston te/ nyan thos ni mthar phyin pa'i phyir dbang po yongs su smin kyang ma 'ongs pa na sangs rgyas kyi mdzad pa byed mi nus kyi/byang chub sems dpa' ni sems bskyed pa'i skad cig de nyid kyis nus so/ /de bas na nyan thos kyi mthar phyin kyang ji ltar byang chub sems dpa' las dang po pa la sbyor ba/ de ltar lha dang mis mchod cing bsngags par mi 'gyur ro//nor bu rin po che baiDUr+ya'i dpes ni mthu'i khyad par ston te/ byang chub sems dpas mthar ma phyin kyang sa dang po nas nye bar bzung ba'i mthu dang ye shes kyis nyan thos dang / rang sangs rgyas thams cad zil gyis gnon to/ /gangs can gyi dpes ni sgrub pa'i khyad par ston to//nyan thos kyi ye shes kyi sman ni bdag gi nyon mongs pa'i nad zhi ba yongs su grub kyang sems can rnams kyi nad zhi bar byed pa ma yin no/ /byang chub sems dpa' ni de las bzlog pa ste/ gzhan gyi don la zhugs pa'i phyir ro/ /skar ma'i dpes ni sbyin gnas kyi khyad par ston te/nyan thos mthar phyin kyang sems can rnams la ye shes kyi snang ba mi 'byed pas ji ltar byang chub sems dpa' nyon mongs pa ma zad kyang lha dang bcas pa'i 'jig rten gyi sbyin gnas su gyur pa de ltar sbyin gnas su gyur pa ma yin no/ /zla ba tshes pa'i dpes ni khyad par can rnams las kyang khyad par du 'phags pa ston te/nyan thos pas de bzhin gshegs pa rnams rtag par khyad par du 'phags pa khyad par du na de dag pas kyang byang chub sems dpa' ches khyad par du 'phags te/ de las de dag 'thob po/ /rgyu gnyis kyis de las ches khyad par du 'phags par rig par bya ste/ de dag gis ni ji ltar byang chub kyi 'bras bu grub pa dang /ji ltar sems can yongs su smin par mdzad pa rnams rnam par grol ba de ltar sems can yongs su smin par mdzad pa dang sangs rgyas kyi chos kyang yongs su smin par mdzad pa'o/ /'di lta ste dper na/ sgrub pa dang 'tshed pa la ngo mtshar gyi blor gyur pa de ltar za ba ma yin te/dri yang de ltar rig par bya'o/ /'di lta ste dper na/ lha dang bcas pa'i 'jig rten gyis 'ching bu'i nor la byi dor byas kyang zhes bya ba'i dpe des rgyu dang 'bras bu'i khyad par ston te/ nyan thos kyis gcig tu rnam par dag pa'i las kyi rgyu yang dag par blangs la/ dge ba'i bshes gnyen du mas yongs su gzung yang byang chub chen po'i 'bras bu mngon par mi sgrub po//byang chub sems dpa' ni de las bzlog pa ste mngon par sgrub pa'o/ /nor bu rin po che baiDUr+ya byi dor byas pa'i dpes ni skye ba la brten pa'i khyad par ston to/ /byang chub sems dpa' la brten nas nyan thos 'byung gi/ nyan thos la brten nas byang chub sems dpa' 'byung ba ni ma yin no//sems can gyi don la brtson par bya'o zhes bya ba mtshams ji ltar sbyar zhe na/ 'di man chad ni 'bras bu 'thob pa'i khyad par don chen por yongs su ston te/ nyon mongs pa'i lud yod pa'i 'dam rdzab kyis gang ba'i sems can rnams la byang chub sems dpa' sangs rgyas kyi chos rnams 'khrung ngo zhes gang sngar gsungs pa de la gal te de dag rgyud rnams las kyang mi 'khrung la/byang chub sems dpa' de dag gis kyang de dag gi rgyud rnams la ma bsgrubs/ de dag gi las ji ltar mi 'khrung bar 'gyur ba de dag gi don byed pa la rab tu brtson pa'i byang chub sems dpa' ni bskrun pa'i phyir de dag las 'khrung bar bstan pa'i don du mdo sde mtshams sbyar ba brtson te/'od srungs byang chub sems dpa' sems can gyi don la brtson par bya'o zhes rgya cher gsungs so/ /phyogs bzhir song nas zhes bya ba ni 'jig rten gyi khams thams cad na byang chub sems dpa' thams cad sems can gyi don mdzad par sbyor ba ston to//yang dag par gsol bar bya'o zhes bya ba la/ gang sman pas lus gso ba byas pa dang / gang mu stegs can gyis nyon mongs pa gso ba byas pa de ni brda tsam dang phyin ci log tu gyur pas yang dag pa'i gso ba ma yin no//de la sman pa lta bu ni/ byang chub sems dpar rig par bya'o/ /nad pa lta bu ni sems can rnams so/ /nad lta bu ni 'dod chags la sogs pa'o/ /sman lta bu ni mi sdug pa la sogs pa'o/ /ji ltar rgyu gsum gyis khams mi mnyam pa'i mtshan nyid du lus kyi nang du 'gyur te/ la la ni nyes pa brtsams pas/la la ni mi 'phrod pa bsten pas/ la la ni yal bar 'dor bas so/ /de bzhin du rgyu gsum gyis sems mi mnyam pa'i mtshan nyid sems kyi nang du 'byung ste/ la la ni 'dod chags la sogs pa'i nyon mongs pa brtsams pas te/ 'dod chags la sogs pa yun ring po nas goms par byas pa'i phyir ro//la la ni lta ba la sogs pa mi 'phrod pa bsten pa ste/ lta ba la sogs pa phal cher de ltar byung ba'i sbyor bas bskyed pa'i phyir ro/ /la la ni phyin ci log tu kun du 'byung ba yal bar 'dor bas so/ /de la nyon mongs pa'i nad dang po'i gnyen po ni mi sdug pa la sogs par rig par bya ste/'dod chags la gnyen po mi sdug pa/ zhe sdang la byams pa/ gti mug la rten cing 'brel bar 'byung ba zhes gsungs pa'i phyir ro/ /gnyis pa'i gnyen por ni stong pa nyid la sogs pa ste/ de lta ba la mngon par zhen pa dang /snyoms par 'jug pa'i ro myong ba dang / skye ba 'dod pa dang / thar pa ma yin pa la thar par 'du shes pa sems can rnam pa bzhi'i dbang du byas pa'o/ /de la lta ba la mngon par zhen pa'i dbang du byas nas stong pa nyid de/ lta bar song ba thams cad la stong pa nyid kyis gso ba'o zhes gsungs pa'i phyir ro//snyoms par 'jug pa'i ro myong ba'i dbang du mdzad nas mtshan ma med pa ste/ rtog pa dang / rnam par rtog pa dang / dmigs pa yid la byed pa thams cad la mtshan ma med pas zhes gsungs pa'i phyir te/ rtog pa dang rnam par rtog pa thams cad kyis snyoms par 'jug pa'i ro myong ba bstan to//skye bar 'dod pa'i dbang du byas nas smon pa med pa'o/ /'dod pa'i khams dang gzugs kyi khams dang / spang ba'i phyir smon pa med pas zhes gsungs pa'i phyir ro/ /thar pa ma yin pa la thar par 'du shes pa'i dbang du byas nas phyin ci log pa bstan to/ /phyin ci log thams cad spang ba'i phyir phyin ci ma log pa bzhi zhes gsungs pa'i phyir te//rtag pa la sogs pa mthong bas thar pa ma yin pa la thar pa'i 'du shes 'byung ste/ phyin ci log kun du 'byung ba yal bar 'dor ba'i phyir tha ma'i dbang du byas nas phyin ci log rnam pa bzhi po 'dus pa dang / ma 'dus pa rnams kyi gnyen por rig par bya'o//tha ma ni so so'i skye bo rnam pa drug ste/ 'jig tshogs la lta ba de'i gnyen por dran pa nye bar gzhag pa rnams so/ /nyon mongs pa dang 'dres pa de'i gnyen por yang dag pa'i spong ba rnams so/ /phan tshun du nga rgyal gyis mngon par zin pa de'i gnyen por rdzu 'phrul gyi rkang pa rnams so/ / dge ba'i phyogs dang mi ldan pa de'i gnyen por dbang po rnams dang / stobs rnams so/ /bden pa la kun du rmongs pa'i gnyen por byang chub kyi yan lag rnams so/ /ngo mtshar dang / bkra shis la sogs par lta ba de'i gnyen por lam gyi yan lag rnams so/ /ji ltar lus kyi rjes su lta yang bdag tu lta bar mi ltung zhe na/gang bdag gis mthong ngo snyam du rlom sems med pa'o/ /ma dad pa la sogs pas dge ba'i chos rnams mi phyogs par rig par bya ste/ de'i gnyen por dbang po dang / stobs rnams so/ /'od srungs 'dzam bu'i gling na sman pa dang sman pa'i slob ma ji snyed pa de dag gi nang na 'tsho byed ni mchog ces bya'o//stong gsum gyi stong chen po'i 'jig rten na sems can ji snyed pa de dag thams cad sman pa'i rgyal po 'tsho byed dang 'dra bar gyur ces bya ba ni 'tsho byed dang de 'dra ba'i sems can rnams kyis gtsug lag la mkhas pa'i sgo mang po dang / spobs pa kun tu ston to/ / lta ba dang 'gyod pa smos pa ni lta ba dang 'gyod pa gso dka' ba'i phyir ro/ /de la lta ba ni rnam par grol ba 'dod pa'i sems mnyam par gzhag pa la bar chad byed de/ dper na tshe dang ldan pa mos pa can gyi gnas brtan pa dag ni 'di snyam du sems te/ 'di ltar gzugs mi rtag pa'i bar du mod kyi 'on kyang 'o na go bdag gi bdag ga la yod snyam nas khong dogs pa'i phyir bdag 'du byed thams cad zhi ba/stong pa nyid/ mi dmigs pa/ sred pa zad pa/ 'dod chags dang bral ba/ 'gog pa/ mya ngan las 'das pa la sems 'jug par mi 'gyur rnam par grol bar mi 'gyur te/ bdag gi yid ldog go snyam du sems so zhes smra ba de ni 'di skad du bstan pa yin te/de'i tshe de shes rab kyis mya ngan las 'das pa'i bsam pa yid la byed pa na 'jig tshogs la lta ba ma spangs pas bdag med par 'gyur ro snyam nas yid mi bde ba'i phyir mya ngan las 'das pa las yid ldog ste/ 'o na go bdag gis bdag la ga la yod ces bya bas so/de ni 'du byed tsam du zad na 'di la su zhig med par 'gyur snyam du de ltar mi sems te/ de dus de na 'jig rten gyi lam gyis gsor mi rung ba'i phyir gsor mi rung zhes bya'o/ /'gyod pa ni 'khrul pa'i rgyu yin pa'i phyir 'gyod pa ni khams mnyam par 'dod pa'i sems mnyam par gzhag pa la bar chad byed do//sangs rgyas bcom ldan 'das rnams dang byang chub sems dpa' rnams kyis 'gyod pa sel bar shin tu spyod de/ de bas na lta ba dang / 'gyod pa smos so/ /shes par mi nus zhes bya ba ni yid kyis so/ /bstan pa'am/ bsgo ba zhes bya ba'i tshig gis te/ bstan pa dang bshad pa gnyis kyis so/ /tshogs kyi lam shin tu yongs su brtsal nas rtog pa dang bcas pa'i sems kyis yongs su tshol bas 'jig rten las 'das pa'i lam btsal bar bya'o/ /rtog pa de yang gang zag la bdag med pa las brtsams te/ rnam pa gnyis su rig par bya'o//chos la bdag med pa las brtsams na rnam pa gcig ste/ rkyen la 'jug pa'i ye shes la sogs pa'o/ /sogs pa'i sgras ni bdag med pa'i chos rnams la mos pa'i ye shes so/ /de la thos par mos pa sngon du 'gro ba'i ye shes ni mos pa'i ye shes so/ /sems dus rnam par chad pa dang /byed pa med pa dang / bdag med par yongs su tshol ba ni rten cing 'brel bar 'byung ba dang / gang zag la bdag med par rab tu rtogs par ston te/ nang dang phyi'i skye mched rnams dang / de la gnas shing dmigs pa'i rnam par shes pa rnams la kun du brtags pa'i rang bzhin du sems mi dmigs pa'i phyir ro//dpyad du med pa la sogs pa'i mtshan nyid yongs su grub pa'i rang bzhin mi dmigs pa'i chos la bdag med par rab tu rtogs par ston to/ /yongs su grub pa'i rang bzhin de sems nyid du yod do zhes med pa la 'dzin pa spangs pa'i phyir sangs rgyas thams cad kyis kyang dus gsum du ma gzigs zhes bya ba gsungs kyi/lhun gyis grub pa'i gzigs pa ma yin te/ chos nyid kyis de ltar gnas par yongs su bstan pa'i phyir sangs rgyas thams cad kyis dus gsum du yang ma gzigs zhes gsungs so/ /de ltar kun du brtags pa'i rang bzhin med kyang kun du brtags pa'i de'i rgyu gzhan gyi dbang gi rang bzhin yod par yongs su brtags pa'i phyir sems kyi dbang du byas nas/log par ltung ba'i 'du shes las chos rnams 'byung ba ma gtogs par gang sangs rgyas thams cad kyis kyang ma gzigs mi gzigs gzigs par mi 'gyur ba de'i rgyu ci 'dra zhe na zhes bya ba gsungs so//chos rnams ni 'dir sems dang sems las byung ba zhes bya bar bzhed do/ /gal te log par ltung ba'i 'du shes tsam du zad de/ ji ltar 'khor ba na 'chi 'pho dang / skye bar 'gyur snyam pa la sgyu ma dang mtshungs par rab tu sgrub po/ /sems gcig po kho na zhig 'khor ro snyam pa la 'bab chu'i rgyun dang mtshungs par rab tu sgrub po//de ltar sems la 'dod chags dang bral na ci'i phyir thar par mi 'gyur snyam pa la rlung dang mtshungs par rab tu sgrub bo/ /de la ring du 'gro ba ni don gyi rnam pa thams cad de'i ngo bo nyid du rig par bya'o/ /de ltar yongs su shes par dka' na ji ltar thar par 'gyur snyam pa la mar me'i 'od 'phro ba dang mtshungs par rab tu sgrub ste/ma rig pa'i rkyen gyi dbang gis 'byung la de zad na mi 'byung bar yongs su bstan pa'i phyir ro/ /gal te sems nyon mongs pa'i dbang gis nyon mongs pa can du 'gyur na nyon mongs pa bzhin du de rnam par dag par mi rung ste/ thar bar mi 'thad do snyam pa'i nyes pa spang ba'i phyir nam mkha' dang mtshungs par ston to//nam mkha' ltar mi 'gyur ba'i nyes pa spang ba'i phyir glog dang mtshungs par ston te/ skad cig par 'dzin pa dang / 'dod chags la sogs pa la mi gnas pa'i phyir mi rtag cing 'gyur bar yongs su ston pa'i phyir ro/ / sems rnam par dag kyang skad cig tu 'jig pas nyes pa spang ba'i phyir spre'u dang mtshungs par ston te/ de la yul rnam pa sna tshogs 'dod pas rnam par g.yeng ba ni ma yin gyi/ 'di ltar 'dod chags la sogs pa dang ldan pas mi gnas par 'gyur ro/ /rnam par g.yeng bar 'gyur na ci'i phyir thams cad mthun par mngon par mi 'gyur bar mi 'gyur snyam pa la ri mo mkhan dang mtshungs par rab tu sgrub po//ci'i phyir dus thams cad du rang bzhin gcig pa'i lam mngon par 'du mi byed snyam pa la mi gnas par rab tu sgrub ste/ khams gsum pa'i nyon mongs pa'i dbang gis 'byung bar ston pa'i phyir ro//ci'i phyir mngon par 'du byed pa thams cad kyi dbang gis cig car du mi skye snyam pa la gcig pu rgyu bar rab tu sgrub po/ /ci'i phyir da ltar byung ba'i las zil gyis mnan te/ res 'ga' sngon mngon par 'du byas pa'i dbang gis skye snyam pa la rgyal po dang mtshungs par rab tu sgrub ste/las gang gis stobs dang ldan pa'i bsgom pa de sems la bsgoms pas dbang thob pa yin no zhes yongs su ston pa'i phyir ro/ /gal te rgyal po dang 'dra na ci'i phyir bdag la sdug bsngal skyed snyam pa la mi mdza' ba dang mtshungs par rab tu sgrub po/ /ci'i phyir bdag la mi 'dza' ba dang mtshungs par byed snyam pa la bye ma'i khyim dang /nya'i mchil pa dang / rmi lam dang / sbrang ma sngon po dang mtshungs par rab tu sgrub ste/ lus la sogs pa la phyin ci log rnam pa bzhi dang ldan pa la sogs pa yongs su ston pa'i phyir ro/ /de ltar na go ci'i phyir bde bar skye ba rnams skye ba bsgrub snyam pa'i nyes pa spang ba'i phyir rgol ba dang mtshungs par ston te/sdug bsngal rnam pa gsum gyi sdug bsngal gyis der yang sdug bsngal 'grub par yongs su ston pa'i phyir ro/ /de de ltar sdug bsngal na ci'i phyir sdug bsngal gyi gnyen por lam mi bsten snyam la gnod sbyin mdangs 'phrog pa la sogs pa dang mtshungs pa'i rgyur ston te/snyoms par 'jug pa'i ro myang ba dang / yongs su nyams par yongs su bstan pa'i phyir te/ go rims bzhin no/ /ci'i phyir gnyen po la mi dga' snyam pa la rkun po dang mtshungs pa'i rgyu ston te/ dge ba'i rtsa ba'i tshogs la rku ba'i phyir ro//gal te sdug bsngal la yang yon tan du rtogs nas dga' na de ltar gyur pa la nyes pa ci yod snyam pa la/ phun sum tshogs pa dang / rgud pa dang ldan pas rjes su chags pa dang / khong khro bas gnod pa ston to/ /gal te gnod par byed na ci'i phyir dga' snyam pa la gzugs la sogs pa la dga' ba'i phyir phyi byi zho la'i mig dang /g.yul gyi rnga dang / phag dang / bran mo zas kyi lhag ma za ba dang / sbrang ma dang mtshungs par ston te/ 'od srungs sems ni kun du btsal na mi rnyed do zhes bya ba mtshams ji ltar sbyar zhe na/ gzhan gyi dbang gi rang bzhin gyi rgyu bstan nas ji ltar gzhan gyi dbang gi rang bzhin te/yongs su tshol ba na kun du brtags pa dang / yongs su grub pa'i rang bzhin tshol ba de kun du ston te/ kun du brtags pa'i rang bzhin gyi sems de btsal na don du mi dmigs so/ /gang mi dmigs pas rab tu phye ba de ni yongs su grub pa'i rang bzhin gyi sems te/ de ni 'dus ma byas su 'og nas ston par bzhed nas de dus gsum du mi 'byung bar ston te/ ji ltar 'gog pa la snyoms par zhugs pa nas de ma thag tu sems med pa'i phyir dus gsum du mi 'byung ba de ltar mi 'byung ba na ma yin par rig par bya ste/ dus gsum las 'das par kun du ston to/ / de ni dus gsum las ma 'das pas langs pa na yang sems 'byung ba'i phyir ro/ /gang dus gsum las 'das pa de med par log par 'dzin pa spang ba'i phyir bzlog ste/ yod pa dang med pa ma yin par ston te/ kun brtags dang gzhan gyi dbang gi rang bzhin gyis ni med la yongs su grub pa'i rang bzhin gyis ni yod par yongs su ston pa'i phyir ro//de ni ma byung ba'o zhes bya ba ni rgyu'i dngos por ro/ /de la ngo bo nyid med do zhes byas pas ni sems can dmyal ba la sogs pa'i 'gro ba'i so sor nges pa'i rgyu'i ngo bo nyid do/ /de la skye ba med do zhes bya ba ni skye ba'i rgyu med pa'o/ /de la 'gag pa med do zhes bya ba ni 'chi 'pho ba'o//de 'bral ba med do zhes bya ba ni spong ba'o/ /de 'bral ba med pa la zhes bya ba ni spang bar bya ba med pa la'o/ /de la 'du byed gang yang med do zhes bya ba ni phung po rnams so/ /de ni 'dus ma byas so zhes bya ba ni/ de brjod par bya ba'i phyir de thams cad gsungs so//de ni 'dus ma byas de rnam par bzhag ste/ de ni 'phags pa rnams kyi rigs so zhes bya ba ni de la dmigs pas 'phags pa'i dngos po rnyed pa dang / des rab tu phye ba ni 'phags pa rnams so/ /rigs de yang phung po'i lhag ma dang bcas pa dang / phung po lhag ma ma lus pa'i mya ngan las 'das pas rab tu phye ba dang /byang chub sems dpa'i mya ngan las 'das pas rab tu phye ba'o/ /de la phung po'i lhag ma dang bcas pa'i mya ngan las 'das pa'i dus byas nas/ bslab pa yang med/ bslab pa las 'das pa yang med ces bya ba gsungs so/ /legs par bslab pa'i phyir ro/ / rgyu ba med pa ni phung po spangs pa'i phyir ro/ /mi rgyu ba med pa ni phung po spangs pa'i lhag ma dang bcas pa'i phyir ro/ /rab tu rgyu ba yang med pa ni nyon mongs pa rnams so/ /de la sems med kyang sems las byung ba'i chos rnams kyang med do zhes bya ba ni nyon mongs pa can rnams so/ /de la las kyang med ces bya ba ni yang srid pa'i las kyi rgyu las byung ba'o//las kyi rnam par smin pa yang med ces bya ba ni phung po lhag ma ma lus pa'i mya ngan las 'das pa'i dbang du byas nas gsungs pa'o/ /de bas na de ltar bde ba yang med/ sdug bsngal ba yang med pa de ni/ 'phags pa rnams kyi rigs so zhes bya ba yang snga ma bzhin no//rigs de la ni las kyang med/ las mngon par 'du byed pa yang med do/ /rigs de las lus kyi las byed pa med do/ /ngag gi las ma yin/ yid kyi ma yin no zhes bya ba ni mdo'i tshig gsum po dag gis ni las dbye ba rab tu dgag par byed do//bya ba dang bslab pa dang de'i sbyor ba'i dbang du byas nas/ rigs de la tha ma dang 'bring dang mchog tu rnam par gzhag pa yang med de zhes bya bas sems can gyi dbye ba rab tu dgag par byed de/ byang chub sems dpa'i mya ngan las 'das pa'i dbang du byas nas/ rigs de ni snyoms pa'o zhes bya ba gsungs te/bdag dang gzhan la phan par 'jug pa snyoms pas de'i khyad par ston to/ /rigs de ni khyad par med pa'o zhes bya ba ni byang chub kyi phyogs kyi chos thams cad chad pa med pas byang chub sems dpa' rnam par dag pa rnams dang / de khyad par med par ston te/rigs de ni dben pa'o/ /zhes bya ba ni de dag gi rgyud tha dad pa med par ston to/ /rigs de ni mya ngan las 'das pa dang mthun pa'o zhes bya ba ni gzhan gyi rgyud la las de'i khyad par ston to/ /rigs de ni dri ma med pa'o zhes bya ba ni rnam par grol ba thun mong yin du zin kyang bag chags spong ba'i khyad par ston to//rigs de ni nga'i ba med do zhes bya ba ni zhing rnam par dag pa rnams la so sor nges pa med pa ston to/ /rigs de ni mnyam pa med pa'o zhes bya ba ni las de mya ngan las 'das pa dang / 'khor ba'i yon tan dang / nyes pa la rnam par mi rtog pas mnyam pa nyid ston to/ /yang dag pa dang yang dag pa ma yin pa'i mnyam pa las 'byung ba zhes bya ba la bden pa'i don gyis yang dag pa ni mya ngan las 'das pa'o//brdzun pa'i don gyis yang dag pa ma yin pa ni 'khor bar rig par bya'o/ /rigs de ni don dam pa'i bden pa yin pas bden pa'o zhes bya ba gdams ngag de slu ba ma yin pas gzhan mu stegs can rnams dang thun mong ba ma yin par ston to//rigs de ni mi zad pa'o zhes bya ba ni phung po lhag ma ma lus par mya ngan las 'das kyang sems can gyi don bya ba rgyun mi gcod par ston to/ /de ni rab tu ma skyes pa zhes bya ba ni las dang nyon mongs pa'i dbang gis mi skye'i 'byor pa 'thob pa'i dbang gis de ston pa'i phyir ro/ / de rigs de ni rtag pa'o zhes bya ba ni mya ngan las 'das pa dang 'khor ba'i dus na yang gzhan ma yin par ston te/ de'i phyir bde ba dang / dge ba dang / bdag med pa zhes bya ba'o/ /rigs de ni rnam par dag pa'o zhes bya ba ni shes bya rnam par dag par ston te/ rnam par sbyang bar bya zhing bsam pa rnam par dag pa yang de tsam du yongs su ston pa'i phyir te/'di nas 'jig rten las 'das pa'i bar gyi gnyen po rnam par gzhag pa don chen por rig par bya'o/ /'di ni mtshams sbyar ba dang / go rims bzhin yin no/ /'od srungs byang chub sems dpa' sems can gyi don la brtson par bya ste/des dge ba'i rtsa ba thams cad yang dag par bsdus par bya'o/ /dge ba'i rtsa ba thams cad yang dag par bsdus nas sems can thams cad la btang ngo / /ye shes kyi sman gang sdud pa des zhes bya ba ni 'jig rten dang / 'jig rten las 'das pa'i ye shes kyis gzhan gyi don byed par ston to//phyogs bzhir song ste zhes bya ba la phyogs gang zhe na/ sems can 'dul ba'i phyir khams nas 'pho ba ste/ rdzu 'phrul gyi stobs kyis 'jig rten gyi khams nas 'jig rten gyi khams gzhan du 'gro ba dang / 'jig rten gyi khams de nyid nas yul gzhan du 'pho ba dang / skye bas 'pho ba ste/ de gnyi gar skye ba yongs su 'dzin pa dang /gzhan las tshol ba ste/ sems can gang byang chub sems dpa' gang gis 'dul bar 'gyur ba de'i phyir tshol ba'o/ /sems can rnams la yang dag par gso bar bya'o/ /yang dag par gso bas sems can rnams gso'o zhes bya ba ni nyon mongs pa'i 'byung po la gso ba ste/ nyon mongs pa'i 'byung po'i gdon gyis zin pa'i sems can rnams gso ba'i byang chub sems dpa' ni bslab pa rnam pa gsum gyis rnam par dag pa'i lam ston pas sman pa bla na med pa yin te/sman pa'i rgyal po 'tsho byed la sogs pas ni lta ba la gnas pa dang 'gyod pa la gnas pa gso bar mi nus so/ /yang na yang dag pa'i gso ba zhes bya ba ni de kho na nyid kyis gso ba ni yang dag pa'i gso ba ste/yang dag pa dang de kho na nyid ni don tha dad pa ma yin no/ /de kho na'i gso ba de yang 'jig rten las 'das pa'i lam gyi bag la nyal kun du 'joms pa'i phyir ro/ /de la 'jig rten pa'i ye shes ni rnam pa gnyis te/che long dang / 'bring ngo / /de la che long ni rab tu sel ba'i gnyen po'o/ /'bring ni rnam par gnon pa'i gnyen po'o/ /de la yang dag pa'i gso ba gang zhe na/ gang 'di 'dod chags la mi sdug pas gso ba nas phyin ci log thams cad spang ba'i phyir phyin ci ma log pa bzhi zhes bya ba'i bar dag ni kun nas nyon mongs pa che long rab tu sel ba'i gnyen po'o//dran pa nye bar gzhag pa bzhi nas 'phags pa'i lam yan lag brgyad pa'i bar dag ni kun nas nyon mongs pa 'bring rnam par gnon pa'i gnyen po'o/ /de la kun nas nyon mongs pa che long mngon du gyur na ni yul la 'dod chags la sogs pa kun du 'byung ngo //bzlog pa ni 'bring du rig par bya'o/ /de la rnal 'byor spyod pa'i 'jig rten pa'i ye shes rang gi mtshan nyid kyi yul can gyi kun nas nyon mongs pa rab tu bsal rnam par mnan nas spyod pa rnam par sbyong ngo / /de la spyod pa'i rab tu dbye ba ni khyim pa rnams ni phal cher 'dod chags dang /zhe sdang dang / gti mug la spyod do/ /rab tu byung ba rnams ni phal cher lta ba la gnas te/ de la gnas pa ni tshul bzhin ma yin pa yid la byed pa la gnas pas ngo bo nyid la rnam par rtog pa dang / yang srid pa la smon par rnam par rtog pa dang / phyin ci log rnam pa bzhi po 'dus pa dang /ma 'dus pa dag gis thar pa ma yin pa la thar par mngon par zhen cing gnas so/ /de la spyod pa rnam par sbyong ba'i gnyen po ni 'dod chags la mi sdug pa dang / zhe sdang la byams pa dang / gti mug la rten cing 'brel par 'byung ba dang / lta bar song ba thams cad la stong pa nyid dang / tshul bzhin ma yin pa yid la byed pas/bsdus pa'i ngo bo nyid kyi khyad par la rtog pa mtshan ma med pa ste/ rnam par rtog pa dang / dmigs pa yid la byed pa thams cad la mtshan ma med pas gso ba'o zhes gsungs pa'i phyir ro/ /yang srid pa la smon pa la ni smon pa med pa ste/ 'dod pa'i khams dang / gzugs kyi khams dang /gzugs med pa'i khams thams cad la gnas pa la smon pa med pas zhes gsungs pa'i phyir ro/ /thar pa ma yin pa la thar par mngon par zhen pa ni phyin ci log ste/ dper na tshangs pa'i gnas te de ni rtag go zhes bya ba lta bu ste/ phyin ci log thams cad la phyin ci ma log pa bzhis gso ste/mi rtag pa la rtag par 'du shes pa la 'du byed thams cad mi rtag pa dang / sdug bsngal la bde bar 'du shes pa la 'du byed thams cad sdug bsngal ba dang / bdag med pa la bdag tu 'du shes pa la chos thams cad la bdag med pa dang / mi sdug pa la sdug par 'du shes pa la mya ngan las 'das pa zhi bas zhes gsungs pa'i phyir ro//kun nas nyon mongs pa 'bring gang zhe na/ rang rang gi gnyen po la brten nas kun nas nyon mongs pa che long rab tu bsal ba'i yul la 'dod chags dang / zhe sdang dang / gti mug gis kun nas nyon mongs par 'gyur ba gnas pa ste/ mngon du gyur pa'i yul rnams la 'dod chags la sogs pa'i nyes pa kun du mi 'byung zhes bya ba'i tha tshig go//de spang ba'i phyir dran pa nye bar gzhag pa la sogs pa byang chub sems dpa' chos rnams bsgom mo/ /de la dran pa nye bar gzhag pa bsgoms pas ni yang dag pa'i dmigs pa la 'dod chags pa sems mnyam par ma bzhag par sbyor yang sgom pa des bdag dran pa nye bar gzhag pa bsgom mo//zhes bdag tu mi 'dzin to/ /lus dang / sems dang / chos la gnas pa la dran pa nye bar bzhag pa bzhi po dag gis gso ste/ de lus la lus kyi rjes su lta ba la gnas kyang / lus kyi lta bas bdag tu lta bar mi ltung /tshor ba rnams la tshor ba'i rjes su lta ba la gnas kyang / tshor ba'i rjes su lta bas bdag tu lta bar mi ltung / sems la sems kyi rjes su lta ba la gnas kyang sems kyi rjes su lta bas bdag tu lta bar mi ltung / chos rnams kyang chos kyi rjes su lta ba la gnas kyang chos kyi rjes su lta bas bdag tu lta bar mi ltung zhes gsungs pa gang yin pa'o//de ltar dran pa nye bar gzhag pa rnams kyi dmigs pa la sems btags pas yang dag pa'i spong ba rnams kyis yang dag par sbyor te/ yang dag par spong ba bzhis ni mi dge ba'i chos rnams spong ba dang / dge ba'i chos thams cad yongs su rdzogs par 'gyur ba'o zhes gsungs pa gang yin pa'o//de nas rdzu 'phrul gyi rkang pa rnams kyis gnas pa yongs su 'dzin te/ gnas pa yongs su bzung nas lus dang sems la skyes pa dang bud med kyi 'du shes su ril por 'dzin pa la rtog pas rab tu rnam par 'byed pa ni kun nas nyon mongs pa 'bring rnam par mnan pa yin te/rdzu 'phrul gyi rkang pa bzhis ni lus dang sems la ril por 'dzin pa 'dor bar 'gyur ro zhes gsungs pa gang yin pa'o/ /de bas zag pa med pa'i shes rab kyis sbyor ba'i lam na 'jig rten las 'das pa'i chos kyi mi mthun pa'i phyogs ma dad pa la sogs pa spangs nas gnyen po dad pa la gnas so//dbang po de dag nyid stobs rnams kyis brtan par byed do/ /dbang po lnga dang / stobs lngas ni ma dad pa dang / le lo dang / dran pa nyams pa dang / rnam par g.yeng ba dang / shes bzhin med pa rnams gso ba'o zhes gsungs pa gang yin pa'o//de nas rten cing 'brel bar 'byung ba la kun du rmongs pa dang / gang zag la bdag med pa la kun du rmongs pa dang / chos la bdag med pa la kun du rmongs pa ni byang chub kyi yan lag rnams kyis rnam par gnon te/ byang chub kyi yan lag bdun gyis ni chos thams cad la shin tu gti mug cing /mi shes pa gso ba'o zhes gsungs pa gang yin pa'o/ /de ni lam ngan pa dang lam ni lam gyis nges par 'gyur te/ 'phags pa'i lam yan lag brgyad pas ni 'chal ba'i shes rab dang / pha rol rgol ba thams cad dang / lam ngan par zhugs pa rnams gso ba'o/ /zhes gsungs pa gang yin pa ste/rnam pa de dag gis kun nas nyon mongs pa che long dang 'bring gi gnyen por gyur pa rab tu sel ba dang / rnam par gnon pa'i ye shes gang yin pa de ni 'jig rten pa'i ye shes zhes bya'o/ /de yang 'od srungs 'di ni yang dag pa'i gso ba'o/ /'od srungs byang chub sems dpa' yang dag pa'i gso ba 'di la brtson par bya'o zhes bya bas bstan to//'od srungs 'dzam bu'i gling na sman pa dang sman pa'i slob ma ji snyed pa de dag gi nang na 'tsho byed ni mchog ces bya'o/ /stong gsum gyi stong chen po'i 'jig rten gyi khams kyi sems can ji snyed pa de dag thams cad sman pa'i rgyal po 'tsho byed dang 'dra bar gyur kyang de dag thams cad lta ba dang /'gyod pa la gnas pa gso ba'i sman gang yin zhes ris nas de dag gis shes pa 'am bstan pa 'am/ bsgom par mi nus so/ /de la byang chub sems dpas 'di ltar bdag ni 'jig rten gyi sman tsam gyis chog par mi bya'i/ bdag gis 'jig rten las 'das pa'i ye shes kyi sman yongs su btsal bar bya/dge ba'i rtsa ba thams cad kyang yang dag par bsdu bar bya'o snyam du brtag par bya'o/ /de ltar brtags nas 'jig rten las 'das pa'i ye shes kyi sman gang yin tshol ba des phyogs bzhir song ba sems can rnams la yang dag pa'i gso ba bya ste/ yang dag pa'i gso bas sems can rnams gso'o zhes bya ba la 'jig rten las 'das pa'i ye shes kyi sman gang zhe na/de ltar 'dod chags dang / zhe sdang dang / gti mug gis kun nas bskor ba'i kun nas nyon mongs pa rnam par dmad nas gang kun nas nyon mongs pa phra mo bag la nyal gyi gnyen por gyur pa'i ye shes so//de gang zhe na/ rnam par gnon pa gnyen por gyur pa de yod na gnas gsum la mkhas te/ gang 'di rkyen gyi ye shes zhes bya ba ni rten cing 'brel bar 'byung ba la mkhas pa'o/ /bdag med pa dang / sems can med pa dang / gso ba med pa dang / gang zag med pa'i chos rnams la mos pa'i ye shes zhes bya ba ni gang zag la bdag med par mos pa'o//stong pa nyid mi dmigs pa'i chos rnams la mi lta ba zhes bya ba ni chos la bdag med pa'o/ /sems yongs su tshol ba'i brtson 'grus zhes bya ba ni gang kun nas nyon mongs pa ma lus pa las bzla ba'i phyir man ngag la mi ltos par mi shes pa rnam pa bzhi ste/spyi'i mtshan nyid mi shes pa dang / rang gi mtshan nyid dang / kun nas nyon mongs pa'i mtshan nyid dang / rnam par byang ba'i mtshan nyid mi shes pa'i gnyen pos nang du rang gi sems la brtags pa'i phyir rab tu 'bad pa'o/ /de la sems kyi spyi'i mtshan nyid ni rnam pa gsum du rig par bya ste/de 'di ltar sems yongs su tshol lo/ /'dod chags par 'gyur ba 'am/ zhe sdang bar 'gyur ba 'am/ gti mug par 'gyur ba'i sems gang yin/ ci 'das pa 'am/ ma 'ongs pa 'am/ da ltar byung ba 'am/ de la sems 'das pa gang yin pa de ni zad pa'o/ /ma 'ongs pa gang yin pa de ni ma phyin pa'o//da ltar byung ba ni gnas pa med do snyam mo zhes bya ba la 'das pa dang / ma 'ongs pa'i sems rten cing 'brel bar 'byung ba la bkol te/ byed pa med par rtog pa dang / da ltar gyi la skad cig pa ste/ byed pa med par rtog pa dang / 'dod chags la sogs pa la rang gi rkyen las byung gi/sems kyis byas pa ma yin par rtog pa'o/ /sems kyi rang gi mtshan nyid kyang rnam pa gsum gyis rig par bya ste/ 'od srungs sems ni nang na yang med phyi rol na yang med/ gnyi ga med par yang mi dmigs so zhes bya ba ni snga ma bzhin du tha snyad kyi rang bzhin gyis mi dmigs pa dang 'od srungs sems ni dpag tu med/bstan du med pa/ rten ma yin pa/ snang ba med pa/ rnam par rig pa med pa/ gnas pa med pa zhes bya ba yang ma yin bzhin du rnam pa drug gis de bzhin nyid dmigs pa dang / 'od srungs sems ni sangs rgyas thams cad kyis kyang ma gzigs mi gzigs gzigs par mi 'gyur ro//log par ltung ba'i 'du shes las chos rnams 'byung ba ma gtogs par sangs rgyas thams cad kyang ma gzigs mi gzigs gzigs par mi 'gyur ro/ /nga yin pa de'i rgyu ba ji ltar lta zhe na zhes bya ba 'phags pa thams cad kyi ye shes khyad par med par dmigs pa'o//sems kyi kun nas nyon mongs pa'i mtshan nyid kyang rnam pa gsum gyis rig par bya ste/ 'grub pa dang / 'byung ba dang / rgyu ba'o/ /'od srungs sems ni sgyu ma dang mtshungs te/ yang dag pa ma yin pa kun du brtags pas skye ba rnam pa mang po yongs su 'dzin to zhes bya ba ni 'gro ba rnams su lus sna tshogs 'grub pa ste/'grub pa'i kun nas nyon mongs pa'o/ /'od srungs sems ni 'bab chu'i rgyun dang mtshungs te/ mi gnas pa skyes nas 'jig cing 'ju ba'o zhes bya ba ni grub pa de nyid skad cig pa'i rgyun gyis 'byung ba'o/ /'od srungs sems rlung dang mtshungs te/ ring du 'gro zhing gzung du med par rgyu'o zhes bya ba ni thams cad la dmigs pa dang gzung dka' bar 'byung ba'o//'od srungs sems ni mar me'i 'od 'phro ba dang mtshungs te/ rgyu dang rkyen las 'byung ba'o zhes bya ba ni srid pa'i snum gyi dbang gis 'byung ba ste/ 'byung ba'i kun nas nyon mongs pa'o/ /gang du rgyu ba dang ji ltar rgyu ba'i kun nas nyon mongs pa ste/gang du rgyu zhe na/ 'od srungs sems ni glog dang mtshungs te/ skad cig tu 'jig cing mi gnas pa'o zhes bya ba ni glog par 'ga' 'byung ba ltar dge ba'i sems 'byung ba'i phyir res 'ga' dge ba la rgyu ba'o/ /'od srungs sems ni nam mkha' dang mtshungs te/ nyon mongs pa dang nye ba'i nyon mongs pa glo bur rnams kyis nye bar nyon mongs pa'o zhes bya ba ni nam mkha'i nye ba'i nyon mongs pa glo bur res 'ga' mi dge ba la'o//'od srungs sems ni spre'u dang mtshungs te/ yul thams cad la 'dod pa'o zhes bya ba ni res 'ga' yul la'o/ /'od srungs sems ni las rnams sna tshogs mngon par 'du byed pa'i phyir ri mo mkhan dang mtshungs so zhes bya ba ni res 'ga' las mngon par 'du byed pa'o//'od srungs sems ni nyon mongs pa tha dad pa 'byung ba'i phyir mi gnas pa'o zhes bya ba ni res 'ga' yul rnams la rgyu ste/ 'dod chags dang zhe sdang la sogs pa ni mi gnas par rgyu ba'o//'od srungs sems gnyis pa mtshams sbyor ba med pa'i phyir sems ni gcig pu rgyu ba ste/ gnyis su med pa'o zhes bya ba ni de nyid 'dod chags dang bcas par 'gyur la/ 'dod chags dang bral bar 'gyur ba yang ma yin la/ 'dod chags dang bcas par yang 'gyur ba ma yin zhes bya ba la sogs pa'o//'od srungs sems ni chos thams cad la dbang byed pa'i phyir rgyal po dang mtshungs zhes bya ba ni bde bar 'gyur ba'i chos rnams la dbang thob ste rgyu ba'o/ /'od srungs sems ni sdug bsngal thams cad bskyed pa'i phyir mi mdza' ba dang mtshungs zhes bya ba ni bde ba spangs nas bdag la sdug bsngal kun du bskyed pa'o//'od srungs sems ni mi rtag pa la rtag par 'du shes pa'i phyir bye ma'i khyim dang mtshungs so/ /'od srungs sems ni sdug bsngal la bde bar 'du shes pa'i phyir nya'i mchil pa dang mtshungs so/ /'od srungs sems ni bdag med pa la bdag tu 'du shes pa'i phyir rmi lam dang mtshungs so//'od srungs sems ni mi gtsang ba la gtsang bar 'du shes pa'i phyir sbrang ma sngon po dang mtshungs so zhes bya ba de yang bdag tu mngon par chags pas bdag la sdug bsngal bskyed pa ni ma yin gyi/ phyin ci log gis so/ /'od srungs sems ni gnod pa mang po byed pas phyir rgol ba dang mtshungs so zhes bya ba ni bdag la sdug bsngal bskyed pas ngoms mi myong ba'o//'od srungs sems ni rtag tu klan ka tshol ba'i phyir gnod sbyin mdangs 'phrogs pa dang mtshungs so zhes pa ni dge ba la sbyor ba de dor bar bya ba'i skabs tshol ba'o/ /'od srungs sems ni rtag tu glags lta bas dgra dang mtshungs so zhes bya ba ni mi dge ba kun du spyad par bya ba'i glags lta ba'o//'od srungs sems ni rjes su chags pa dang / khong khro ba dang ldan pas rtag tu mtho dman can no zhes bya ba ni 'byor pa dang / rgud pa dang / rjes su chags pa dang khong khro ba gnyis kyis gnod pa'o//'od srungs sems ni dge ba'i rtsa ba thams cad rku bas rkun po dang mtshungs so zhes bya ba ni bag med pa'i dbang du song bas dge ba'i rtsa ba byas shing byas pa thams cad zad par byed pa'o/ /'od srungs sems ni gzugs la dga' ba'i phyir phyi byi zho la'i mig dang mtshungs so/ /'od srungs sems ni dgra la dga' bas g.yul gyi rnga dang mtshungs so//'od srungs sems ni phag mi gtsang ba'i dri la dga' ba bzhin du dri la dga'o/ /'od srungs sems ni ro la dga' bas zas kyi lhag ma za ba'i bran mo dang mtshungs so/ /'od srungs sems ni reg pa la dga' bas sbrang ma 'bru mar gyi snod la chags pa dang mtshungs so zhes bya ba ni/gzugs dang / sgra dang / dri dang / ro dang / reg bya'i yul la mngon par dga' ba'i phyir yang shin tu phan par bdud rtsi'i khams la so sor brtags te/ so sor brtags nas rnam par bzhag dka' ba yin no/ /sems kyi rnam par byang ba'i mtshan nyid kyang gsum gyis reg par bya ste/thob pa dang mi thob pa'i mtshan nyid dang 'dus byas pa'i mtshan nyid dang / rigs kyi mtshan nyid do/ /'od srungs sems ni kun du btsal na mi rnyed do/ /gang mi rnyed pa de ni mi dmigs pa'o zhes bya ba ni tha snyad can gyi rang bzhin kun du btsal na mi rnyed pa'o/ /gang mi rnyed pa de ni mi dmigs pa'i zhes bya ba ni de lta bu'i rnam pas sems la rab tu rtog na sems de rnam par dag pa'i rgyu'o//de las gzhan du na ni tshul bzhin ma yin pa dang rab tu ldan pas sems rnam par 'dod kyang thob par mi 'gyur ro/ /de ltar tshul bzhin rab tu sbyor na thob par mi 'gyur ro/ /'di ni thob pa dang mi thob pa'i mtshan nyid do//de ltar chos la bdag med pa la sbyor bar sbyor ba ni shes rab kyi sems de bzhin nyid kyi mtshan nyid du mthong ngo / /sems de bzhin nyid kyi mtshan nyid de yang rnam pa dgus 'dus byas kyi mtshan nyid dang mi 'dra bas na 'dus ma byas su rig par bya ste/ gang mi dmigs pa de ni 'das pa yang ma yin/ma 'ongs pa yang ma yin/ da ltar byung ba yang ma yin no/ /gang 'das pa yang ma yin/ ma 'ongs pa yang ma yin/ da ltar byung ba yang ma yin pa de ni dus gsum las shin tu 'das pa'o zhes bya ba ni dus gsum gyi lam du mi rgyu ba'o/ /ji ltar 'gog pa la snyoms par 'jug pa las langs nas de yang skye ba ltar ni ma yin no//gang dus gsum las shin tu 'das pa de ni yod pa yang ma yin/ med pa yang ma yin zhes bya ba ni tha snyad can gyi rang bzhin du mi dmigs pa dang / de bzhin nyid kyi mtshan nyid du mi dmigs pas gnyis su med pa'i mtshan nyid do/ / gang yod pa yang ma yin/ med pa yang ma yin pa de ni ma skyes pa'o zhes bya ba ni skye ba med pa'i mtshan nyid do/ /gang ma skyes pa de la che long nyid med do zhes bya ba de ni skye ba'i rgyu'i mtshan nyid las shin tu 'das pa'i mtshan nyid do/ /gang ngo bo nyid med pa de la 'byung ba med do zhes bya ba ni ma 'ongs pa na skye ba las shin tu 'da'o//gang 'byung ba med pa de la 'gag pa med do zhes bya ba de ni 'chi ba'i 'chi 'pho ba las shin tu 'da' ba'o/ /gang la 'gag pa med pa de la 'bral ba med pa'o zhes bya ba de ni skad cig gcig nas gcig tu 'byung ba'i 'bral ba las shin tu 'da' ba'o/ /gang 'bral ba med pa de la 'ong ba yang med/'gro ba yang med/ 'chi 'pho ba yang med/ skye ba yang med ces bya ba ni 'gro ba na 'gyur ba ldog pa las shin tu 'das pa'o/ /gang la 'gro ba yang med/ 'ong ba yang med/ 'chi 'pho yang med/ skye ba yang med pa de la 'du byed gang yang med do/ /gang la 'du byed gang yang med pa de ni 'dus ma byas pa'o zhes bya ba ni las dang nyon mongs pa las shin tu 'das pa'o//gang 'dus ma byas pa de ni 'phags pa rnams kyi rigs so zhes bya ba ni rigs kyi mtshan nyid de/ 'dus ma byas kyi dbyings kyi mtshan nyid du blta'o/ /de la mthong bas rab tu phye ba'i phyir 'phags pa nyid de/de'i tshe 'di la dngos po lnga las shin tu 'das pa'o/ /'phags pa rnams kyi rigs gang yin pa de la bslab pa yang med ces bya ba de ni shin tu 'das pa'o/ /bslab pa las 'das pa yang med do zhes bya ba ni mi byed pa las shin tu 'das pa'o/ /rgyu ba yang med ces bya ba ni bya bar sbyor ba las shin tu 'das pa'o//mi rgyu ba yang med ces bya ba ni mi sbyor ba las shin tu 'das pa'o/ /rab tu rgyu ba yang med ces bya ba ni/ mi bya ba la sbyor ba las shin tu 'das pa'o/ /tshe rabs gzhan na dngos po drug pa las shin tu 'das te/ gang la rgyu ba yang med/ mi rgyu ba yang med/ rab tu rgyu ba yang med pa de la sems kyang med sems las byung ba'i chos rnams kyang med do zhes bya ba ni yang srid par 'gyur ba'i 'du byed 'byung bar byed pa las shin tu 'das pa'o/ /gang sems kyang med/ sems las byung ba'i chos rnams kyang med pa de la las kyang med do zhes bya ba de ni 'du byed las shin tu 'das pa'o//las kyi rnam par smin pa yang med do zhes bya ba de ni de'i 'bras bu grub pa las shin tu 'das pa'o/ /gang la las kyang med/ las kyi rnam par smin pa yang med pa de la bde ba yang med/ sdug bsngal ba yang med do zhes bya ba de ni de la brten pa'i 'byor pa dang rgud pa las shin tu 'das pa'o//gang la bde ba yang med/ sdug bsngal yang med pa de ni 'phags pa rnams kyi rigs te/ 'phags pa rnams kyi rigs gang yin pa de la ni las kyang med/ las mngon par 'du byed pa yang med pa'o/ /rigs de la ni lus kyi las byed pa med de/ngag gi ma yin/ yid kyi ma yin no zhes bya ba ni bde ba dang sdug bsngal gyi gnas dang / lung du ma bstan pa thams cad kyi kun du g.yo ba rnams la ste/ de la las kyang med ces bya ba ni bslab pa las shin tu 'das pa'o/ /las mngon par 'du byed pa yang med ces bya ba ni smon pa las shin tu 'das pa'o//rigs de la lus la sogs pa las rnams byed pa yang med do zhes bya ba ni rjes su sbyor ba las shin tu 'das pa'o/ /rigs de la tha ma dang 'bring dang / mchog rnam par gzhag pa yang med do zhes bya ba ni de'i gnas lus sna tshogs las shin tu 'das pa'o/ / rigs de yang dus rnam pa bzhi dang mtshan nyid rnam pa dgur rig par bya ste/ rnam par ma dag pa'i dus dang / rnam par dag pa'i dus dang / rab tu rtogs pa'i dus dang / yongs su mthar phyin pa'i dus so/ /rigs de ni nam mkha' dang mtshungs pa'i phyir snyoms pa'o zhes bya ba ni rnam par ma dag pa'i dus na mtshan ma thams cad la mtshungs par rjes su song bas nam mkha' lta bu ste ji ltar nam mkha' gzugs thams cad la mtshungs par rjes su song ba de bzhin du rnam par ma dag pa'i dus na rnal 'byor pas de bzhin nyid mtshan ma thams cad mnyam par rjes su song bar mthong ba ste/de ni rnam par dag pa'i dus kyi rnam pa ste gcig go/ /rigs de ni chos thams cad ro gcig pa'i phyir khyad par med pa'o/ /rigs de ni lus dang sems dben pa'i phyir dben pa'o zhes bya ba ni rnam par dag pa'i dus te/ ro gcig pa'i dang / lus dang / sems dben pa zhes bya ba ni rnam par dag pa'i dus gnyis su rig par bya'o//rigs de ni mya ngan las 'das pa dang mthun pa'o/ /rigs de ni nyon mongs pa thams cad kyi dri ma dang bral ba'i phyir dri ma med pa'o zhes bya ba ni rab tu rtogs pa'i dus te/ 'di ltar mthu dang 'di ltar dri ma med pa de'i phyir mthar thug pa'i rjes su mthun pa'i rab tu rtogs pa'i dus kyi rnam pa dang /rigs de ni ngar 'dzin pa dang / nga yir 'dzin pa med pa'i nga'i bar med pa'o zhes bya ba ni 'jig tshogs la lta ba las shin tu 'das pa ste/ de gnyis kyi rnam pa gnyis pa'o/ /rigs de ni yang dag pa dang / yang dag pa ma yin pa mnyam pa las 'byung ba ste/ mi mnyam pa med pa'o zhes bya ba ni de'i rtsa ba las byung ba mi mnyam par lta ba las shin tu 'das pa'o/ /de gnyis kyi rnam pa gsum pa'o/ /rigs de ni don dam pa'i bden pa yin pas bden pa'o zhes bya ba ni yongs su mthar phyin pa'i dus te/ dus de na rtogs pa'i phyir yongs su grub pa'i bde ba ste/ 'gyur ba rnam pa gsum las shin tu 'das pa'o//de la 'gyur ba ni gsum po 'di dag ste/ rga shi la sogs pa'i 'gyur ba dang / phyin ci log gi gnas 'gyur ba dang / rnam par dag pa las yongs su nyams pa'i 'gyur ba'o/ /rigs de ni rab tu ma skyes pa'i phyir mi zad pa'o zhes bya ba ni rga shi la sogs pa'i 'gyur ba las shin tu 'das pa ste/yongs su grub pa'i dus kyi rnam pa dang po'o/ /rigs de ni rtag tu chos thams cad de bzhin nyid kyi phyir rtag pa'o/ /rigs de ni mya ngan las 'das pa mchog gi phyir bde ba'o/ /rigs de ni rnam pa thams cad dri ma med pa'i phyir dge ba'o/ /rigs de ni bdag yongs su btsal te ma rnyed pa'i phyir bdag med pa'o zhes bya ba ni phyin ci log gi gnas kyi 'gyur ba'i las shin tu 'das pa ste/de nyid kyi rnam pa gnyis pa'o/ /rigs de ni rab tu rnam par dag pa'o zhes bya ba ni rnam par dag pa'i las yongs su nyams pa'i 'gyur ba las shin tu 'das pa ste/ de nyid kyi rnam pa gsungs pa'o//de bas na 'jig rten dang / 'jig rten las 'das pa'i lam gyis gzhan gyi don byed par bstan to/ /'od srungs nang du yongs su tshol ba zhes bya ba mtshams sbyor ce na/ ji ltar rigs des rab tu phye ba ni rnam par dag pa'i 'phags pa ste/ de ni ji ltar de las 'phags pa rnams skye ba de dang gdams ngag don chen por ston to//byang chub sems dpa' dag ni ci nas kyang 'jig rten pa dang / 'jig rten las 'das pa gnyen po rnam pa gnyis rnam par gzhag ste/ de las gzhan pa'i theg pa la 'phags pa la sbyor ba las brtsams nas 'dams te/ sems yongs su btsal ba de nyid kun du ston to//'od srungs ma 'ongs pa'i dus na dge slong khyi rdo la bsnyegs pa dang mtshungs pa dag 'byung ngo zhes bya ba de ni khyi lta bu ni phyi rol tu rgyug pa rnams so/ /rdo lta bu ni gzugs la sogs pa yul lnga po dag go/ /'phel ba lta bu ni sems so/ /gzugs dang / sgra dang / dri dang / ro dang / reg byas 'jigs shing skrag ces bya ba ni yul gyis 'jigs skrag par ston to/ /yul gyis 'jigs skrag pa de dag ni 'jigs pa'i rgyu yongs su mi shes pas rnam pa bzhis yul la rgyug par ston to/ /yul mchog tu khyad par du 'phags pa 'dod pa dang yul dran pa'i kun du rtog pa dang du len pa dang / yang slar ldog pa dang /mtho ris su skyes pa'i mtha' ltung ba ste/ dgon pa'i gnas rnams na gnas zhes bya ba ni yul mchog tu khyad par du 'phags pa'i phyir dgon pa na gnas par khas len to/ /de dag na gcig pu gnyis su med par lus rab tu dben par 'dug ste/ chags par 'gyur ba'i gzugs dang / sgra dang / dri dang / ro dang / reg bya rnams snang bar gyur na de dag de la btang snyoms su 'jog cing nyams rangs su sbyor ba dang ldan par gnas kyi nang du so sor rtog pa las mi brtson te zhes bya ba ni yul dran pa'i kun du rtog pa dang du len to/ /de la gzugs dang / sgra dang / dri dang / ro dang / reg bya rnams la cis 'byung ba mi shes shing khong du mi chud do//ma shes khong du ma chud pas/ grong khyer dang / grong rdal dang / yul 'khor dang / rgyal po'i pho brang 'khor dag tu song nas yang gzugs dang sgra dang dri dang ro dang reg bya rnams kyis g.yen spyo bar 'gyur ro zhes bya ba ni yang slar ldog pa'o/ /gal te dgon par song ba las 'chi ba'i dus byas par gyur na 'jig rten pa'i sdom pa la gnas pa de dag mtho ris kyi 'jig rten du skye bar 'gyur te/der yang de dag lha'i 'dod pa'i yon tan lnga po dag gis g.yen spyo bar 'gyur ro/ /de dag de nas shi 'phos nas ngan song bzhi las yongs su ma grol bar 'gyur te/ sems can dmyal ba dang /byol song gi skye gnas dang / gshin rje'i 'jig rten dang / lha ma yin no zhes bya ba la mtho ris su skyes pa'i mtha' ni log par ltung ba'o/ /sred pa la spyod pa'i dbang du byas nas nag po'i phyogs su bstan par rig par bya'o/ /lta ba la spyod pa'i dbang du byas nas dkar po'i phyogs su bstan par rig par bya ste/gang zag la bdag med par bstan pa'i phyir te/ 'di la gshe ba'am/ khros pa 'am/ brdeg pa'am/ bsdigs pa 'am/ smad pa'am/ mtshang brus pa gang yin snyam du so sor rtog go/ /'od srungs de ltar na khyi rdo la bsnyegs pa dang 'dra ba ma yin no zhes gsungs pa'i phyir ro/ /de las bzlog pa ni dkar po dang /nag po'i phyogs gnyi gar grub par rig par bya'o/ /de ltar sbyor ba la brtson pas sems mnyam par ma bzhag pa ni mnyam par gzhag par bya/ sems mnyam par bzhag pa ni rnam par grol bar bya ste/ de bas na rta'i 'dul sbyong la mkhas pa'i dpes ni sems mnyam par ma bzhag pa sems mnyam par bzhag pa'i thabs te zhi gnas rab tu 'dzin pa dang /btang snyoms kyi nye bar nyon mongs pa rnams kyis zhi gnas la sogs pa'i mtshan ma la 'khrug pa'i sems tshar bcad pa bstan pa'i phyir ro/ /lkog ma na ba'i nad dang / skyes bu bcings pa'i dpe gnyis kyis ni sems mnyam par gzhag pa rnam par grol bar bya ba'i thabs ston te/mthong ba dang / bsgom pas spang bar bya ba'i nyon mongs pa spang ba'i thabs kun du ston pa'i phyir ro/ /de'i bar du gcod pa 'jig tshogs la lta ba dang snyoms par 'jug pa la sred pa lkog ma na na bcings pa ltar shes pas bden pa mngon par rtogs pa'i dus na yang 'jig rten las 'das pa'i shes rab kyi srog gi bar chad byed pas 'jig tshogs la lta ba ni lkog ma na ba'i nad lta bur rig par bya ste/de ltar brtson pa ni de dang mi mthun pa'i chos spang ba'i phyir dge ba'i phyogs dang / gnas la gnas pa las brtsams nas nam mkha' yongs su chags pa gnyis ston te/ 'jig rten rgyang pan pa'i brjod pa tshol ba dang /lhung bzed dang / gos lhag par 'chang ba'o/ /chos de gnyis ni rnam pa gnyis kyis bcing bar byed de/ lta bar gyur pa'i 'ching ba dang / 'thob pa dang / bkur sti'i 'ching ba ste go rims bzhin no/ /'ching ba rnam pa gnyis ni dge ba'i chos ma skyes pa rnams nye bar bzung nas bar chad byed pa'i chos gnyis byed de/khyim pa'i phyogs la brten pa dang / 'phags pa'i phyogs la gnod par sems pa'o/ /dge ba'i chos rnams yongs su nyams pa dang dri ma can du bya ba'i phyir dri ma gnyis byed de/ nyon mongs pa la mi brjed pa dang / mdza' ba'i khyim dang / zas sbyin pa'i khyim yongs su 'dzin pa'o//dge ba'i chos rnams rtsa ba nas bcad pa'i phyir ser ba 'bab pa gnyis byed de/ dam pa'i chos spong ba dang / tshul khrims nyams kyang dad pas byin pa yongs su spyod pa'o/ /tshe 'di la yang de la phyir sbyor ba'i skal ba med par bya ba'i phyir rma gnyis byed de/ pha rol gyi nyes pa la so sor rtog pa dang bdag gi nyes pa 'chab pa'o//tshe 'di sdug bsngal bar gnas par bya ba'i phyir yongs su gdung ba gnyis byed de/ /rnyog pa dang bcas par ngur smrig 'chang ba dang / tshul khrims dang ldan pa yon tan dang ldan pa las bsnyen bkur bya ba bdag gir byed de ma 'ongs pa na 'khrung ba'i skal ba med par bya ba'i phyir gsor mi rung ba'i nad gnyis byed de/mngon pa'i nga rgyal gyis sems la nges par rtog pa dang / theg pa chen po la yang dag par zhugs pa'i sems can rnams kyi mos pa bzlog pa'o/ /byang chub sems dpa'i gdams ngag la nyan thos kyi bslab pa'i dbang du byas nas gzhan du mtshams sbyor ba ni 'di rig par bya'o//'od srungs nang du yongs su tshol du ma rgyug cig /'od srungs ma 'ongs pa'i dus na dge slong khyi rdo la bsnyegs pa mtshungs pa dag 'byung ngo / /'od srungs ji ltar na dge slong khyi rdo la bsnyegs pa dang mtshungs pa yin zhe na/ 'od srungs 'di lta ste/ dper na khyi rdo la ni skrag la/ rdo'i phyir bsnyegs kyi/rdo de sus 'phangs pa de la ni mi bsnyegs so/ /'od srungs de bzhin du 'di la dge slong dang / bram ze kha cig gzugs dang / sgra dang / dri dang / ro dang / reg byas 'jigs shing skrag nas dgon pa'i gnas rnams na gnas shing / de dag de na gcig pu gnyis su med par rab tu dben par 'dug ste/chags par gyur pa'i gzugs dang / sgra dang / dri dang / ro dang / reg bya rnams snang bar gyur na de dag de ni btang snyoms su 'jog cing / nyams rangs su sbyor ba dang ldan par gnas kyi/ nang du so sor rtog pa la mngon par mi brtson te/ de dag gzugs dang / sgra dang / dri dang / ro dang / reg bya rnams las cis mi 'byung ba mi shes khong du mi chud do/ /ma shes khong du ma chud pas grong dang grong khyer dang /[ (]grang [,]grong [)]rdal dang / yul 'khor dang / rgyal po'i pho brang 'khor du song na yang / gzugs dang / sgra dang / dri dang / ro dang / reg bya rnams kyis g.yen spyo bar 'gyur ro/ /gal te de dag dgon par song ba las 'chi ba'i dus byas par gyur na/'jig rten pa'i sdom pa la gnas pa de dag mtho ris kyi 'jig rten du skye bar 'gyur te/ der yang de dag lha'i yon tan 'dod pa lnga po dag gis g.yen spyo bar 'gyur ro/ /de dag de nas shi 'phos nas ngan song bzhi las yongs su ma grol bar 'gyur te/sems can dmyal ba dang / byol song gi skye gnas dang / gshin rje'i 'jig rten dang lha ma yin no/ /'di ltar gshe yang slar mi gshe/ khro ba las kyang slar mi khro/ rdeg kyang slar mi rdeg/ mtshang brus kyang slar mtshang mi 'bru ste/ de la gshe ba 'am/ rdeg pa 'am/ mtshang brus pa gang yin pa snyam du nang du sems nges par rtog cing so sor rtog pa ni gnyen po bstan pa'i mi mthun pa'i phyogs kyang bstan par 'gyur ro//de ltar khyi rdo la bsnyegs pa dang mtshungs pa yin no/ /'od srungs ji ltar dge slong khyi rdo la bsnyegs pa dang 'dra ba ma yin zhe na/ gang gshe yang slar mi gshe/ khros kyang slar mi khro/rdeg kyang slar mi rdeg/ mtshang brus kyang slar yang mtshang mi 'bru ste/ 'di la gshe ba'am/ khros pa 'am/ brdegs pa 'am/ mtshang brus pa gang yin snyam du nang du sems la nges par rtog cing / so sor rtog ces bya ba ni 'di ltar dgon par song nas chags par 'gyur ba'i gzugs la sogs par snang bar gyur na de dag la btang snyoms su mi 'jog cing nang du so sor rtog pa'i rnal 'byor dang ldan pas gzugs dang sgra dang dri dang ro dang reg bya rnams las cis 'byung ba shes te/de de dag gis g.yen spyo bar mi 'gyur ro/ /de dag las grol bar 'gyur ro/ /mi mthun pa'i phyogs bstan pas gnyen po'i don kyang bstan par 'gyur ro//de ltar na khyi rdo la bsnyegs pa dang 'dra ba ma yin no/ /de ltar chags sems dang mi bde ba 'dul ba'i phyir lhag pa'i tshul khrims kyi bslab pa la sbyor ba'o/ /'od srungs 'di lta ste dper na rta'i 'dul sbyong la mkhas pas rta de gang dang gang du g.yo byed cing /ma byang ba de dang der rab tu sbyor ba de bzhin du 'od srungs dge slong rnal 'byor spyod pa yang gang dang gang du sems 'gyur ba mthong ba de dang der rab tu 'chos pa la 'jug ste/ de ci nas phyis 'khrug par mi 'gyur ba de ltar sems rab tu 'chos so zhes bya ba de'i 'dul sbyong la mkhas pa'i dpe des ni skyo ba yid la byed pas lhag pa'i sems kyi bslab pa la sbyor ba'o//'od srungs 'di lta ste/ dper na lkog ma'i nad kyis srog gi dbang po nyams par 'gyur ba de bzhin du lta bar song ba thams cad kyi nang na bdag tu 'dzin pa ni chos kyi srog gi dbang po nyams par byed do zhes bya ba lkog ma'i nad kyi dpe dang / 'od srungs 'di lta ste dper na skyes bu gang dang gang du bcings pa de dang de las dgrol bar bya ba yin te/'od srungs de bzhin du gang dang gang la sems chags par gyur pa de dang de las grol bar bya ba yin no zhes bya ba skyes bu bcings pa'i dpe des ni gang zag la bdag med pa dang / chos la bdag med pas lhag pa'i shes rab kyi bslab pa la sbyor ba'o/ / gang gi tshe chags sems dang yid bde ba 'dul ba lhag pa'i sems kyi bslab pa la sbyor bar gsungs na ci'i phyir mdo 'di las lhag pa'i tshul khrims kyi bslab pa la sbyor bar brjod pa smras pa/ chags sems dang yid mi bde ba ni nyes pa 'byung bar byed pa'i phyir te/ nyes pa ni phal cher 'dod chags dang / zhe sdang las 'byung ngo //de bas na chags pa dang yid mi bde ba 'dul ba/ lhag pa'i tshul khrims la bslab pa la sbyor bar bshad do/ /ji ltar na chags sems dang / yid mi bde ba las nyes pa 'byung bar 'gyur zhe na/ rnam pa gnyis kyi phyir te/ ji ltar mi sel ba dang / ji ltar bstsal ba yin no/ /ji ltar mi sel ce na/dper na 'di la dge sbyong dang / bram ze kha cig kun nas nyon mongs pa'i rgyu yongs su mi shes pas gzugs la sogs pa yul gyis 'jigs nas dgon pa'i gnas rnams su gnas te/ rang gi sems tshul bzhin ma yin pa yid la byed pa las byung ba'i chags sems dang / yid mi bde ba ni yul dang gzhan la yang nga rgyal gyis rlom sems su byed pas chags sems la sogs pa dang rjes su 'brel pa yin te/khyi rdo 'phangs nas rdo la bsnyegs pa de bzhin du chags sems la sogs pa mi sel bas/ gal te grong la sogs pa dang 'dre ba na mngon sum du byed de/ de ltar na ma bsal ba yin no//de las bzlog pa ni sel ba dang bstsal ba yin no/ /ci'i phyir na/ nag po'i phyogs la chags sems bstsal ba bstan gyi/ gnod sems ni ma yin dkar po'i phyogs la yang gnod sems bstsal ba bstan gyi/ chags sems ni ma yin/ smras pa/ gnyi ga yang 'dod pa'i khams kyi yin pas/gzhan ma bsal bas gzhan yang ma bstsal pa ltar gzhan bstsal pas gzhan yang bstsal bar blta'o/ /gal te dgon par son pa las 'chi ba'i dus byas par gyur na zhes bya ba ni de ltar mi sel bas sdom pa la gnas kyang lhag pa'i tshul khrims las log par zhugs pa yin no/ /sdom pa la mi gnas pa lta ga la 'gyur/'di lta ste dper na rta lam log par rgyu ba ni sgrub pa zhes bya'o/ /de bzhin lhag pa'i sems kyi bslab pa la sbyor ba'i rnal 'byor spyod pa yang / dmigs pa la rnam par g.yengs pa ni rnam par 'khrugs pa zhes bya'o/ /dper na lkog ma na ba'i nad kyis srog gi dbang po nyams par 'gyur ba de bzhin du 'jig tshogs la lta ba yang gang zag la bdag med pa las brtsams te/lhag pa'i shes rab la sbyor ba'i srog gi dbang po nyams par byed do/ /dper na skyes bu gang dang gang du bcings pa de dang de las grol bar bya ba yin te/ de bzhin du chos la bdag med pa las brtsams te/ lhag pa'i shes rab la sbyor bas so//gang dang gang du zhes bya ba ni ngo bo nyid dang bye brag la yongs su rtog pa rnams las sems dgrol bar bya ba yin no/ /bslab pa 'di gsum bsgom pa bslab pa dang mi mthun pa'i chos brgyad de/ de la slob pa dang mi mthun pa'i don byed pa la chags pa ni/ 'od srungs 'di gnyis ni rab tu byung ba'i nam mkha' la yongs su chags pa ste/gnyis gang zhe na/ 'jig rten rgyang pan pa'i brjod pa tshol ba dang / lhung bzed dang / gos lhag pa 'chang ngo zhes gsungs pa gang yin pa de mi dgos pas nam mkha' la yongs su chags pa bzhin no/ /yongs su chags pa yang 'og nas 'ching ba gnyis 'byung ba'i rgyu yin te/'jig rten rgyang pan pa'i brjod pa yongs su tshol bas ni lta bar gyur pa'i 'ching ba'o/ /lhung bzed dang / gos lhag pa 'chang bas ni thob pa dang bkur sti dang / tshigs su bcad pa'i 'ching ba ste/ 'od srungs 'di gnyis ni rab tu byung ba'i bcing ba dam pa'o//gnyis gang zhe na/ lta bar gyur pa'i 'ching ba dang / 'thob pa dang / bkur sti dang tshigs su bcad pa'i 'ching ba'o zhes gsungs pa gang yin pa'o/ /'ching ba yang bar du gcod pa 'og nas 'byung ba'i rgyu yin te/ lta bar gyur pa'i 'ching ba ni 'phags pa'i phyogs la gnod par sems pa 'thob pa dang / bkur sti dang / tshigs su bcad pa'i bcing ba ni khyim pa'i phyogs la bstan te/ 'od srungs 'di gnyis ni rab tu byung ba'i bar du gcod pa'i chos so/ /gnyis gang zhe na/ 'phags pa'i phyogs la gnod par sems pa dang / khyim pa'i phyogs la brten pa'o zhes bya ba gsungs pa gang yin pa'o/ /bar du gcod pa yang 'og nas 'byung ba dri ma'i rgyu yin te/'phags pa'i phyogs la gnod par sems pas ni nyon mongs pa la mjed/ khyim pa'i phyogs dang / bsten pas ni mdza' ba'i khyim dang / zas sbyin pa'i khyim yongs su 'dzin te/ 'od srungs 'di gnyis ni rab tu byung ba'i dri ma'o/ /gnyis gang zhe na/ dam pa'i chos spong ba dang /tshul khrims las nyams kyang dad pas byin pa yongs su spyod pa'o zhes gsungs pa gang yin pa'o/ /dri ma yang 'og nas 'byung ba sol ba 'bab pa'i rgyu yin te/ nyon mongs pa la mi mjed pa ni dam pa'i chos spong ba'i mdza' bo'i khyim dang / zas sbyin pa'i khyim yongs su 'dzin pa ni ngang tshul ngan pa'i rkyen la bsten cing /tshul khrims las nyams kyang dad pas byin pa yongs su spyod pa ste/ 'od srungs 'di gnyis ni rab tu byung ba'i ser ba 'bab pa'o/ /gnyis gang zhe na/ dam pa'i chos spong ba dang / tshul khrims las nyams kyang dad pas byin pa yongs su spyod pa'o zhes gsungs pa gang yin pa'o/ / ser ba yang 'og nas 'byung ba rma'i rgyu yin te/ dam pa'i chos yongs su spong bas ni pha rol gyi nyes pa las so sor rtog/ tshul khrims las nyams kyang dad pas byin pa yongs su spyod pas ni rang gi nyes pa 'chab ste/ 'od srungs 'di gnyis ni rab tu byung ba'i rma'o/ /gnyis gang zhe na/ pha rol gyi nyes pa la so sor rtog pa dang /bdag gi nyes pa 'chab pa'o zhes gsungs pa gang yin pa'o/ /rma yang 'og nas 'byung ba yongs su gdung ba'i rgyu yin te/ pha rol gyi nyes pa la so sor rtog pas ni rnyog pa dang bcas pas ngur smrig 'chang / bdag nyid nyes pa 'chab pas ni tshul khrims dang ldan pa yon tan dang ldan pa las bsnyen bkur bya ba bdag gir byed de/'od srungs 'di gnyis ni rab tu byung ba'i yongs su gdung ba'o/ /gnyis gang zhe na/ rnyog pa dang bcas pas ngur smrig 'chang ba dang / tshul khrims dang ldan pa yon tan dang ldan pa las bsnyen bkur bya ba bdag gir byed pa'o zhes gsungs pa gang yin pa'o/ / yongs su gdung ba yang 'og nas 'byung ba na ba gsor mi rung ba gnyis kyi nad kyi rgyu yin te/ rnyog pa dang bcas pas ngur smrig 'chang bas mngon pa'i nga rgyal gyi sems la nges par rtog /bsnyen bkur bya ba bdag gir byed pas ni theg pa chen po la yang dag par zhugs pa'i sems can rnams kyi mos pa bzlog ste/'od srungs 'di gnyis ni rab tu byung ba'i na ba gsor mi rung ba'o/ /gnyis gang zhe na/ mngon pa'i nga rgyal gyis sems la nges par rtog pa dang / theg pa chen po la yang dag par zhugs pa'i sems can rnams kyi mos pa bzlog pa'o zhes gsungs pa gang yin pa'o/ /de las bzlog pa ni dkar po'i phyogs su rig par bya'o//gang zag de gnyis la dang po ni lta ba la spyod pa/ gnyis pa ni sred par rig par bya'o/ /'od srungs dge sbyong dge sbyong zhes bya ba 'od srungs ci tsam gyis na dge sbyong dge sbyong zhes bya zhe na/ 'od srungs bzhi po 'di dag ni dge sbyong zhes bya ba mtshams ji ltar sbyar zhe na/ji ltar bslab pa dang mi mthun pa'i chos nyid de dag la brten pa'am/ spangs pa las gang zag gi nyes pa'am/ gang zag gi yon tan bsgrubs nas rnal 'byor yid la byed pa'i bgegs su 'gyur ba dang / mi 'gyur ba kun du bstan no/ /de la gang zag gi nyes pa ni gang zag rnam pa gsum las brtsams te rig par bya ste/kha dog dang rtags kyi dbyibs kyi dge sbyong ni sbyor ba dang bsam pa log par zhugs pa'i sdig pa 'dod pa las brtsams pa'o/ /cho ga bsrung zhing tshul 'chos pa'i dge sbyong dang brjod pa'i sgra tshigs su bcad pa'i dge sbyong ni sbyor ba phun sum tshogs kyang bsam pa log par zhugs pa dang /'dod pa che zhing 'dod pa rnam gnyis las brtsams pa'o/ /de la sdig pa 'dod pa ni gang dge sbyong du khas 'che ba yang dge sbyong yang ma yin pa'o/ /'dod chags gang yon tan bdog pas lhag par bdag la yid ches par 'dod pa'o/ /'dod pa can ni/gang mtshungs par yid ches par 'dod pa'o/ /dang po sbyor ba log par zhugs pa ma lags pa gnyis te/ lhag ma dang bcas pa dang / lhag ma ma lus pa'o/ /lhag ma dang bcas pa ni bzhi las brtsams nas rig par bya'o/ /yang dag par blangs pa nyams pa las brtsams te/ de la lus kyi las yongs su ma dag pa spyod pa dang /ngag gi las yongs su ma dag pa spyod pa dang / yid kyi las yongs su ma dag pa spyod pa'o zhes gang gsungs pa gang yin pa'o/ /de gsum las ma dul ba dang / ma sbags pa dang / ma byung ba 'byung ste/ go rims bzhin du ston te/ zas kyi phyir rgyu ba las brtsams te 'tsho ba yongs su ma dag pa'o//'dod chen can zhes bya ba ni yongs su spyad pa las brtsams pa ste/ 'dod chen can ni 'jog cing yongs su spyod pa'o/ /le lo can zhes bya ba ni dge ba'i phyogs las brtsams nas le lo can no/ /ngang tshul ngan pa can zhes bya ba ni tshul khrims ma lus par zhig ste/rtsa ba la thug pa'i nyes pa byung ba'o/ /sdig pa'i chos can zhes bya ba ni bsam pa log par 'jug pa ste/ sdig pa'i chos kyi nyes pa la 'chab pa'o/ /gnyis pa ni sbyor ba phun sum tshogs pa ste/ cho ga dang / 'tsho ba dang / tshul khrims dang yongs su spyod pa dang / dge ba'i phyogs rnams nas brtsams par rig par bya'o//de la cho ga phun sum tshogs pa zhes bya ba ni cho ga las brtsams pa'o/ /spyod yul phun sum tshogs pa zhes bya ba ni 'tsho ba las brtsams pa'o/ /spyod pa phun sum tshogs pa yin zhing spyod lam bzhir shes bzhin du spyod ces bya ba ni tshul khrims las brtsams pa'o/ / zas dang skom ngan pa za zhing 'phags pa'i rigs bzhi po dag gis chog par 'dzin ces bya ba ni yongs su spyod pa las brtsams pa'o/ /khyim na gnas pa dang rab tu byung ba rnams dang mi 'dre zhes bya ba ni dge ba'i phyogs las brtsams so/ /tshig nyung zhing smra ba nyung zhes bya ba ni tshig bden pa dang yang dag pa'i gtam gyis dga' bar byed pa las brtsams par rig par bya'o//de'i spyod lam de dag kyang tshul 'chos pa dang / gcam gyis brtags pa yin zhes bya ba ni bsam pa log par 'jug pa'o/ /de yang cho ga la sogs pa'i sbyor ba las brtsams nas/ tshul 'chos dang / gcam du rig par bya'o/ /dmigs par lta ba yin te/ngar 'dzin pa dang nga yir 'dzin pa la gnas zhes bya ba ni gang zag la bdag med pa las brtsams pa ste/ bdag tu lta ba kun tu 'byung ba'i bag la nyal ma spangs pa'o/ /stong pa nyid mi dmigs pa'i chos rnams la g.yang sar 'du shes zhes bya ba la sogs pas ni chos la bdag med pa las brtsams pa ste/stong pa nyid mi dmigs pa dang / de la smra ba rnams la g.yang sa dgrar 'du shes pa'o/ /gsum pa ni sbyor ba phun sum tshogs pa ste/ rnal 'byor gyi gzhi dang / dmigs pa dang / gnas dang / rnal 'byor gyi rjes su mthun pa'i chos rnams las brtsams par rig par bya'o//de la gzhi ni tshul khrims te/ de las brtsams nas so sor brtags pas tshul khrims bsrung zhes gsungs pa'i phyir ro/ /dmigs pa 'thob pa ste/ thos pa la dmigs nas rnal 'byor 'grub pa'i phyir te so sor brtags nas thos pa 'dzin ces gsungs pa'i phyir ro/ /gnas ni dgon pa na gnas pa ste/rnal 'byor dang mthun pa'i phyir te/ so sor brtags nas dgon pa la gnas zhes bya ba gsungs pa'i phyir ro/ /rnal 'byor rjes su mthun pa'i chos rnams ni 'dod pa chung zhing chog shes pa dang / rab tu dben par 'gyur te zhes bya'o/ /bsam pa log par zhugs pa ni ye shes kyi 'dod par rig par bya ste//ji tsam du gzhan la nye bar bstan pa'i phyir yin gyi/ skyo bar bya ba'i phyir ma yin/ 'dod chags dang bral ba'i phyir ma yin/ 'gog par bya ba'i phyir ma yin/ nye bar zhi bar bya ba'i phyir ma yin/ rdzogs pa'i byang chub par bya ba'i phyir ma yin/ dge sbyong gi phyir ma yin/tshangs pa'i phyir ma yin/ mya ngan las 'das pa'i phyir ma yin zhes bya ba'o/ /de la nye bar zhi bas ni skyo ba dang / 'dod chags dang bral bar ston to/ /ji ltar zhe na/ de'i phyir mi mthun pa'i phyogs dga' ba can gyi 'dod chags nye bar zhi ba'i phyir ro/ / rdzogs par byang chub pas ni 'gog pa'o/ /rdzogs par byang chub pas ni dge slong dang tshangs pa dang / mya ngan las 'das pas bsdus pa la lam dang de'i 'bras bu bstan to/ /gang zag bzhi pa ni gnyi ga phun sum tshogs pa'i phun sum tshogs pa ni rnam pa dgur rig par bya ste/ rtag tu sbyor ba phun sum tshogs pa dang / nyan pa phun sum tshogs pa dang /'dod pa phun sum tshogs pa dang / tshul bzhin yid la byed pa phun sum tshogs pa dang / yang dag par lta ba phun sum tshogs pa dang / yongs su shes pa phun sum tshogs pa dang / spong ba phun sum tshogs pa dang / sgom pa phun sum tshogs pa dang / mngon sum du byed pa phun sum tshogs pa'o//lus dang srog la yang mi lta ba yin zhes bya ba ni lus dang srog la mi lta bas rtag tu sbyor ba phun sum tshogs par rig par bya ste/ dang po stong pa nyid dang / mtshan ma med pa dang / smon pa med pa'i chos rnams thos na dga' zhing de bzhin du zhugs pa yin zhes bya ba ni stong pa nyid la sogs pa thos na dga' bas thos pa phun sum tshogs pa ste gnyis pa'o//mya ngan las 'das pa yang 'dod pa med par chags pa spyad pa spyod na khams gsum pa la mngon par dga' ba lta smos kyang ci dgos pa dang / stong pa nyid du lta ba yang mi 'dod pa yin na zhes bya ba ni chos rnams kyang spang bar bya ba ni zhes bya ba'i phyir de'i 'bras bu dang de'i yan lag ste/mya ngan las 'das pa la yang 'dod pa med pa dang / stong pa nyid du lta ba yang mi 'dod pas 'dod pa phun sum tshogs pa ste gsum pa'o/ /don gyi phyir 'brang gi /yi ge'i phyir 'brang ba ma yin/ nyon mongs pa rnams las rnam par thar pa nang du tshol gyi phyi rol du rgyug pa ma yin zhes bya ba la don gyi phyir 'brang ba ni 'jig rten pa'i sems dang /bsgom pa las rnam par thar pa nang du tshol bas tshul bzhin yid la byed pa ste/ phun sum tshogs pa ste bzhi pa'o/ /chos thams cad shin tu yongs su dag pa rang bzhin gyis kun nas nyon mongs pa med par mthong bas bdag nyid gling yin te/gzhan gling ma yin zhes bya ba ni/ so so rang gi rig pas mi slob pa dang / 'jig rten las 'das pa'i chos rang bzhin gyis kun nas nyon mongs pa can ma yin par mthong bas yang dag par lta ba phun sum tshogs pa ste lnga pa'o/ /de bzhin gshegs pa la chos nyid du yang mi lta na zhes bya ba nas brtsams te/mang du 'dus pa lta smos kyang ci dgos zhes bya ba'i bar dag ni 'jig rten las 'das pa'i ye shes kyis don dam pa'i dkon mchog gsum la rnam par mi rtog ste/ dkon mchog mi mthong bas yongs su shes pa phun sum tshogs pa ste drug pa'o/ /chos gang spang bar bya ba'i phyir rtsom pa ma yin zhes bya ba ni spang bar bya ba spangs pa'i spong ba phun sum tshogs pa ste bdun pa'o//bsgom par bya ba'i phyir ma yin zhes bya ba ni bsgom par bya ba bsgoms pa'i phyir sgom pa phun sum tshogs pa ste brgyad pa'o/ /'khor bar yang mi skye/ mya ngan las 'das pa la yang mngon par dga' ba ma yin/ thar pa yang mi dmigs/bcings pa yang ma yin la/ chos thams cad rang bzhin gyis yongs su mya ngan las 'das par rig nas/ kun du mi 'khor zhing yongs su mya ngan las mi 'da' ba zhes bya ba la 'khor ba'i rgyu ni spangs/ mya ngan las 'das pa ni thob pa'o/ /'khor bar yang mi skye yongs su mya ngan las 'das pa la yang mngon par dga' ba ma yin no//'chi ba dang 'tsho ba la mngon par dga' ba ma yin pas/ thar pa yang mi dmigs bcings pa yang ma yin no/ /nyon mongs pa rnams spangs pa dang / phung po lhag ma dang bcas pa'i phyir kun du mi 'khor zhing yongs su mya ngan las mi 'da'o/ /rang bzhin gyis yongs su mya ngan las 'das pa zhes bya ba ni 'dir zad pa dang mi skye ba shes pa la sogs pa mi slob pa'i chos rnams su rig par bya'o//'di ni dgu pa ste/ mngon sum du byed pa phun sum tshogs pa'o/ /dge sbyong gsum po dag gis dge sbyong gi ming gi don med pa dang / mi 'tsham par kun du bstan pa'i phyir ming gis gnod pa ste/ skyes bu dbul po'i dpes ston to/ /ji ltar ming gis gnod par 'gyur zhe na/ dge sbyong gi ming gi sgo nas dad pas byin pa la log par yongs su spyod pa'i phyir ro/ /'di man chad du yang dag pa ma yin par sgrub pa'i dge sbyong rnams dang / yang dag par sgrub pa'i dge sbyong shes pa dang tshul khrims kyis mngon pa'i nga rgyal can du gyur pa de'i phyin ci log tu yongs su shes par bya ba'i phyir dpe rnams dang tshul khrims dang ldan pa rnams kyang ston to//thos pa dang bsam pa'i shes rab kyis de'i mngon pa'i nga rgyal las brtsams nas dpe gnyis pa ste/ 'od srungs 'di lta ste dper na skyes bu la la zhig rgya mtsho'i chus khyer la chus skom bzhin du 'chi ba'i dus byed pa de bzhin du 'od srungs 'di la dge sbyong dang bram ze kha cig chos mang po blangs te/yongs su chub par byas kyang 'dod chags kyi sred pa mi sel/ zhe sdang gi sred pa mi sel/ gti mug gi sred pa mi sel ba de dag chos kyi rgya mtshos khyer la nyon mongs pa'i skom pas 'chi ba'i dus byas par 'gyur te/ngan 'gror 'gro bar 'gyur ro zhes bya ba'i dpe des na thos pa'i shes pas mngon pa'i nga rgyal byed par ston te/ 'od srungs 'di lta ste dper na/ sman pa sman sgro thogs te/ phyogs dang phyogs mtshams su rgyu ba de nad gcig gis btab nas nad de gso bar mi nus pa de bzhin du/'od srungs mang du thos pa'i nyon mongs pa'i nad blta ste/ gang thos pa des bdag nyon mongs pa'i nad las gso bar mi nus na de'i thos pa ni don med pa yin no zhes bya ba 'dis ni bsam pa'i shes pas so/ /so so'i skye bo 'dod chags dang bral ba snyoms par 'jug pa'i ro myong bar byed pa dang slob pa thob pa dang /bkur sti la chags pa dang / nyes pa dang bcas pa'i 'gyod pas bsgom pa'i ye shes la log pa sbyor yang dag par sbyor ba mngon pa'i nga rgyal byed pa las brtsams te/ dpe lhag ma bzhi dang go rims bzhin du sbyar ro/ /'od srungs 'di lta ste/ dper na skyes bu na ba zhig la rgyal po la 'os pa'i sman btang la cho ga bzhin du ma byas pas 'chi ba'i dus byas pa de bzhin du mang du thos pa'i nyon mongs pa'i nad du blta ste/gang sdom pa med pa des 'chi ba'i dus byed pa'o zhes bya ba'i dpe 'di ni dang po'i'o/ /'od srungs 'di lta ste/ dper na nor bu rin po che mi gtsang ba'i nang du lhung na smad par 'gyur ba de bzhin du mang du thos pa 'thob pa dang bkur sti'i mi gtsang ba'i nang du lhung bar blta ste/ci yang med pa la ni lha dang mi rnams dga' bar 'gyur ro zhes bya ba nor bu rin po che'i dpe 'di ni gnyis pa'i'o/ /'od srungs 'di lta ste/ dper na ro la gser gyi phreng ba btags pa de bzhin du ngang tshul ngan pa can ngur smrig gyon par blta'o zhes bya ba ro'i 'di ni gsum pa'i'o//'od srungs 'di lta ste/ dper na tshong dpon gyi bu shin tu khrus byas te/ rab tu rnam par byugs la skra dang sen mo bregs nas gos dkar po bgos te/ tsan dan sa mchog gis bskus pa'i mgo la tsam pa ka'i me tog gi 'phreng ba thogs pa de bzhin du tshul khrims dang ldan zhing mang du thos pa ngur smrig gyon par blta'o zhes bya ba yang gsum pa 'di nyid kyi'o//tshul khrims kyis de mngon pa'i nga rgyal byed pa las brtsams nas tshul khrims dang ldan pa 'dra ba bzhi ston to/ /'od srungs bzhi po 'di dag ni ngang tshul ngan pa can tshul khrims dang ldan pa 'dra ba yin te/bzhi gang zhe na zhes bya ba la sogs pa'o/ /dang po ni yang dag par blangs pa'i tshul khrims te/ 'od srungs 'di la dge slong tshul khrims dang ldan pa yin te/ so sor thar pa'i sdom pas bsdams shing gnas/ cho ga dang spyod yul phun sum tshogs pa kha na ma tho ba rnams la 'jigs par lta/yang dag par blangs te bslab pa'i gnas rnams la slob/ lus dang ngag dang yid kyi las yongs su dag pa dang ldan par gnas pas 'tsho ba yongs su dag kyang de bdag tu smra ba yin te/ 'od srungs de ni ngang tshul ngan pa can tshul khrims dang ldan pa 'dra ba yin no zhes gsungs pa'i phyir yang dag par blangs pa'i tshul khrims so//gnyis pa ni 'od srungs gzhan yang 'di la dge slong kha cig 'dul ba 'dzin zhing 'dul ba la zhugs pa 'dul ba'i tshul la gnas pa yin yang / 'jig tshogs la lta ba las ma bskyod pa yin te/ de ni ngang tshul ngan pa can tshul khrims dang ldan pa gnyis pa'o zhes gsungs pa'i phyir bya ba'i tshul khrims so//gsum pa ni 'od srungs gzhan yang 'di la dge slong kha cig byams pa la gnas pa yin te/ sems can la dmigs pa'i byams pa dang ldan yang 'du byed thams cad la skyes pa med pa thos na skrag pa kun du rab tu skrag par 'gyur ba de ni 'od srungs ngang tshul ngan pa la tshul khrims dang ldan pa zhes bya ba ste/byams pa la gnas pas mi mthun pa'i phyogs ngang tshul ngan pa 'joms pa'i phyir mi mthun pa'i phyogs 'joms pa'i tshul khrims so/ /bzhi pa ni 'od srungs gzhan yang 'di la dge slong kha cig sbyangs pa'i yon tan bcu gnyis yang dag blangs kyang dmigs par lta ba yin te/ngar 'dzin pa dang / nga yir 'dzin pa gnas pa de ni ngang tshul ngan pa can tshul khrims dang ldan pa bzhi pa'o/ /'od srungs bzhi po 'di dag ni [(]ngan tshul ngang [,]ngang tshul ngan [)]pa can tshul khrims dang ldan pa 'dra ba yin no zhes bya ba ni sbyangs pa'i yon tan bcu gnyis yang dag par blangs pas yo byad bsnyungs pa'i tshul khrims so//de la gong ma gnyis ni lta ba'i nyes pas ngang tshul ngan pa'i gnyen po 'joms pa dang / ngang tshul ngan pa'i rgyu dang ldan pas ngang tshul ngan pa can du rig par bya'o/ /de yang bdag tu smra ba yin zhes bya ba dang / 'jig tshogs la lta ba las ma bskyod pa yin pa zhes gsungs pa'i phyir go rims bzhin du rig par bya'o//'og ma gnyis ni ngang tshul ngan pa dang tha dad pa ma yin pa'i phyir te/ de gnyis ni gcig las chos thams cad med na thos na skrag par 'gyur zhes sngar gsungs pa'i phyir mya ngan las 'das pa la skrag nas ngang tshul ngan pa 'joms pa'i gnyen po mi rtsom pa'o/ / gnyis pa ni dmigs par lta ba yin zhes gsungs pa'i phyir ro/ /mngon pa'i nga rgyal can ni bdag grol lo snyam du bdag la dmigs nas de'i gnyen por yang dag pa'i don gyi tshul khrims kyis ston te/ de yang spong bas rab tu phye ba dang / lam gyis rab tu phye ba'o/ /de ni tshul khrims dang po ni nang gi skye mched yin gyi phyi rol gyi ma yin te/'od srungs tshul khrims tshul khrims zhes bya ba ni/ gang la bdag med cing bdag gi ba med pa'o zhes bya ba gsungs pa'o/ /gnyis pa ste bya ba med pa ni nyon mongs pa can gyi las so/ /mi bya ba med pa ni dge ba'i las so/ /byed pa med pa ni lus la sogs pa gang gis kyang nyon mongs pa can gyi las mi byed pa'o//byed pa med pa ni gang gis dge ba'i las byed pa'o/ /rgyu ba ma yin pa mi rgyu ba ma yin pa zhes bya ba ni zas kyi phyir rgyu ba las brtsams pa ste/ nyon mongs pa can dang / nyon mongs pa can ma yin pa'o/ /rab tu byed pa med pa rab tu spyod pa ma yin pa zhes bya ba ni yongs su spyod pa las brtsams pa ste/nyon mongs pa can dang nyon mongs pa can ma yin pa'o/ /ming med pa gzugs med pa zhes bya ba ni phung po lhag ma ma lus pa'i mya ngan las 'das pa'o/ /mtshan ma med pa mtshan ma med pa ma yin pa zhes bya ba ni mtshan ma med pa la gnas pa ni mtshan ma thams cad yid la mi byed pa dang /mtshan ma med pa'i dbyings yid la byed pa'i phyir ro/ /rab tu zhi ba rab tu zhi ba ma yin pa zhes bya ba ni mi slob pa la gnas pa na phung po lhag ma dang bcas pa dang nyon mongs pa rnams so/ /'dzin pa med pa gtong ba med pa zhes bya ba ni rtag par gnas pa la yid bde ba dang /yid mi bde ba med pa dang / btang snyoms dang dran pa dang / shes bzhin yod pa'i phyir ro/ /gzung ba med pa gzung ba med pa ma yin pa de nyid la de'i gnas su 'gyur ba'i yul yid bde ba dang / yid mi bde ba gnyis kyis mi 'dzin pa dang / btang snyoms dang dran pa dang shes bzhin gyis 'dzin pa'i phyir ro//sems can med pa sems can du 'dogs pa med pa tshig med pa tshig tu 'dogs pa med pa sems med pa sems su 'dogs pa med pa zhes bya ba ni bka' lung brda sprod pa las brtsams pa ste/ spong ba'i tshul khrims kyi tshe gang brda sprod par byed pa dang / gang brda phrad pa dang / gang gis brda sprod pa'o//'jig rten med pa 'jig rten med pa ma yin pa zhes bya ba ni snod kyi 'jig rten na ljongs rgyu ba las brtsams pa ste nyon mongs pa can dang / nyon mongs pa can ma yin pa'o/ /brten pa med pa brten pa med pa ma yin pa zhes bya ba ni grong dang zhing las brtsams pa ste/ nyon mongs pa can dang / nyon mongs pa can ma yin pa'o/ /bdag gi tshul la mi ltos pa dang / gzhan ngang tshul ngan pa can du mi smod pa zhes bya ba ni khyim du 'gro ba la sogs pa'o/ /tshul khrims kyis rlom sems su mi byed ces bya ba ni tshangs pa mtshungs par spyod pa dang 'grogs pa las brtsams pa'o/ /tshul khrims la mi rtog rnam par mi rtog ces bya ba ni bdag ni tshul khrims dang ldan pa bdag gi tshul khrims ni 'di lta bu'o snyam du de'i ngo bo nyid dang /bye brag la mi rtog pa'i phyir ro/ /de ni 'phags pa rnams kyi tshul khrims zag pa med pa mi ldan pa khams gsum pa dang bral ba rten thams cad med pa zhes bya ba ni 'jig rten pa'i spong ba la zag pa med kyang ldan pa yod pas bye brag tu bya ba'i phyir mi ldan pa smos so//de yang gang khams gsum pa'i 'bras bu ma yin pa dang / khams gsum pa'i rgyu yang ma yin zhes tshig gnyis kyis ston to/ /bslab pa dang mi mthun pa dang / mthun pa'i chos las brtsams te/ dge slong legs par ma bslabs pa dang /dge slong legs par bslabs pa rnam par gzhag pa 'di ni gzhan du mtshams sbyor ba'o/ /dge sbyong legs par ma bslabs pa gang zhe na/ de dag ni gsum du rig par bya ste/ kha dog dang rtags kyi dbyibs kyi dge sbyong ni dge sbyong nyid dang mi 'tsho ba ste/cha byad dang rtags 'dra yang cho ga dang 'tsho ba dang yongs su spyod pa dang rtsom pa dang / tshul khrims dang / lta ba dang bsam pa mi 'dra ba'o/ /de la kha dog dang rtags kyi dbyibs zhes bya ba ni kha dog gi dbyibs dang rtags kyi dbyibs so/ /de la kha dog gi dbyibs kyi dge sbyong gang zhe na/ 'di la dge sbyong kha cig kha dog dang rtags kyi dbyibs dang ldan par 'gyur te/chos gos sbyar ma gyon ces bya'o/ /sbyor ba bgos pas ni cha byad 'dra bar ston te/ rtags kyi dbyibs ni mgo bregs te lag tu lhung bzed thogs zhes bya ba ste/ mgo bregs pa dang lag na lhung bzed thogs pas ni rtags 'dra'o/ /de lus kyi las yongs su ma dag pa spyod/ngag gi las yongs su ma dag pa spyod/ yid kyi las yongs su ma dag pa spyod ces bya ba ni lus dang ngag dang yid kyi las yongs su ma dag pa kun du spyod pas cho ga mi 'dra bar rig par bya'o/ /'tsho ba yongs su ma dag pa zhes bya ba ni 'tsho ba yongs su ma dag pas 'tsho ba mi 'dra'o//'dod chen can zhes bya ba ni 'dod chen byed pas yongs su spyod pa mi 'dra ba'o/ /le lo can zhes bya ba ni le lo byed pas brtson pa mi 'dra ba'o/ /ngang tshul ngan pa can zhes bya ba ni ngang tshul ngan pas tshul khrims mi 'dra ba'o/ /sdig pa'i chos can zhes bya ba ni sdig pa'i chos can pas lta ba mi 'dra ba'o//ma dul ba ma sbas pa ma byang ba zhes bya ba ni ma dul ba ma sbas pa ma byang bas bsam pa mi 'dra ba'o/ gnyis pa cho ga bsrung zhing tshul 'chos pa'i dge sbyong ni yo byad la gzhol bar rig par bya ste/ lhag pa'i tshul khrims kyi rtags 'dra/ lhag pa'i sems dang / lhag pa'i shes rab kyi rtags 'dra yang de bsgrub pa'i bsam pa mi 'dra ste/de la cho ga bsrung zhing tshul 'chos pa'i dge sbyong gang zhe na/ 'di dge sbyong kha cig cho ga spyod yul dang / spyod pa phun sum tshogs zhes bya'o/ /cho ga dang 'tsho ba dang spyod pa phun sum tshogs pas lhag pa'i tshul khrims kyi rtags 'dra ba'o/ /spyod lam bzhir shes bzhin du spyod zas dang skom ngan pa za ba 'phags pa'i rigs bzhi po dag gis chog par 'dzin/khyim na gnas pa dang / rab tu byung ba rnams dang mi 'dra ste zhes bya ba ni shes bzhin du byed pa nas/ mi 'dra ba'i bar gyis lhag pa'i sems kyi rtags 'dra ba'o/ /tshig nyung smra ba nyung zhing zhes bya ba ni tshig nyung zhing smra ba nyung bas lhag pa'i shes rab kyi rtags 'dra ba'o//de'i spyod lam de dag kyang tshul 'chos pa dang / gcam gyis yongs su brtags pa yin te/ sems yongs su dag par bya ba'i phyir ma yin/ dul bar bya ba'i phyir ma yin/ nye bar zhi bar bya ba'i phyir ma yin la dmigs par lta ba yin te/ ngar 'dzin pa dang / nga yir 'dzin pa la gnas pa stong pa nyid mi dmigs pa'i chos rnams la g.yang sar 'du shes pa yin/stong pa nyid smra ba'i dge sbyong rnams la dgrar 'du shes pa yin zhes bya ba ni tshul 'chos pa la sogs pas lhag pa'i shes rab sgrub pa'i bsam pa mi 'dra ba'o/ /gsum pa brjod pa'i sgra tshigs su bcad pa'i dge sbyong ni sgra la gzhol bar rig par bya ste/zhi gnas kyi yan lag 'dra/ lhag mthong gi yan lag 'dra/ de gnyi ga bsgom pa'i yan lag 'dra/ de gnyi ga'i tshogs kyi yan lag 'dra yang bsam pa mi 'dra ba'o/ /de la brjod pa sgra tshigs su bcad pa'i dge sbyong gang zhe na/ ji ltar bdag tshul khrims dang ldan par gzhan gyis shes par 'gyur snyam du so sor brtags nas tshul khrims bsrung zhes bya'o//de la tshul khrims ni ting nge 'dzin gyi rgyu yin pas tshul khrims ni zhi gnas kyi yan lag 'dra ba'o/ /ji ltar na bdag mang du thos par gzhan gyis shes par 'gyur snyam du so sor brtags nas thos pa 'dzin zhes bya ba la/thos pa ni zag pa med pa'i shes rab bskyed pas thos pa ni lhag mthong gi yan lag 'dra ba'o/ /ji ltar bdag dgon pa bar gzhan gyis shes par 'gyur snyam du so sor brtags nas thos pa 'dzin zhes bya ba la/ dgon pa na gnas pa ni bsgom pa'i rgyu yin pas dgon pa pa ni de gnyi ga bsgom pa'i yan lag 'dra ba'o//so sor brtags nas 'dod pa nyung zhing chog shes pa dang rab tu dben par 'gyur te zhes bya ba la/ 'dod pa nyung ba la sogs pa ni de'i tshogs su gyur pa'i phyir 'dod pa nyung ba la sogs pas ni de gnyi ga'i tshogs kyi yan lag 'dra ba'o/ /ji tsam du gzhan la nye bar bstan pa'i phyir yin gyi/skyo bar bya ba'i phyir ma yin/ 'dod chags dang bral bar bya ba'i phyir ma yin/ 'gag par bya ba'i phyir ma yin/ nye bar zhi bar bya ba'i phyir ma yin/ rdzogs par byang chub par bya ba'i phyir ma yin/ dge sbyong gi phyir ma yin/ tshangs pa'i phyir ma yin zhes bya ba la/ gzhan la nye bar bstan pa la sogs pa ni bsam pa mi 'dra bar rig par bya ste/'di ni brjod pa'i sgra tshigs su bcad pa'i dge sbyong zhes bya'o/ /dge sbyong legs par bslabs pa gang zhe na/ rnam pa bzhir rig par bya ste/ sbyor ba dang bsam pa dang / rab tu rtogs pa dang / mthar phyin pa'o/ /de la yang dag par sgrub pa'i dge sbyong gang zhe na/'od srungs lus dang srog la yang mi lta ba yin na 'thob pa dang / bkur sti dang tshigs su bcad pa la lta smos kyang ci dgos zhes bya ba gang yin pa ste/ lus dang srog la mi lta bas tshe 'di la skyo ba sbyor ro/ /stong pa nyid dang / mtshan ma med pa dang / smon pa med pa'i chos rnams thos na dga' zhes bya ba ni stong pa nyid la sogs pa thos na dga' bas tshe rabs snga ma la rgyud yongs su smin pas sbyor ba ste/'di ni sbyor ba phun sum tshogs par rig par bya'o/ /de bzhin nyid du zhugs pa yin zhes bya ba ni chos la bdag med par mos pa'i bsam pa can gyi phyir ro/ /mya ngan 'das pa yang 'dod pa med par tshangs par spyad pa spyod pa na khams gsum pa la mngon par dga' ba la lta smos kyang ci dgos/stong pa nyid du lta ba yang mi 'dod pa yin na bdag dang / sems can dang / srog dang / gso ba dang / gang zag tu lta ba la lta smos kyang ci dgos zhes bya ba la/ mya ngan las 'das pa la 'dod pa med pa dang /stong pa nyid la 'dod pa med pas gang thob par bya ba dang / gang gis thob par bya ba tha snyad can gyi ngo bo nyid de gnyi ga la mngon par zhen pa med pa'o/ /don gyi phyir 'brang gi yi ge'i phyir 'brang ba ma yin zhes bya ba ni dgongs pa'i don tshol ba'o/ /nyon mongs pa rnams las rnam par thar pa nang du tshol gyi phyi rol du mi rgyug ces bya ba ni sgra tsam gyi rjes su mi 'brang ba ste/'di ni bsam pa phun sum tshogs par rig par bya'o/ /chos thams cad shin tu dag cing rang bzhin gyis kun nas nyon mongs pa med par mthong bas bdag nyid gling yin te/ gzhan gyi gling ma yin zhes bya ba ni gzhan gyi dring la mi 'jog pa'i ye shes kyis chos kyi de bzhin nyid rang bzhin gyis kun nas nyon mongs pa med par rab tu rtogs pa'o//de de bzhin gshegs pa la chos nyid du'ang mi lta na/ gzugs kyi skur lta smos kyang ci dgos chos la 'dod chags dang bral bar yang mi lta na smra ba'i tshig gis lam nas brjod pa lta smos kyang ci dgos/ 'phags pa 'dus ma byas pa'i dge 'dun la yang mi lta na mang po 'dus par lta smos kyang ci dgos/ chos gang spang bar bya ba'i phyir yang brtson pa ma yin/ bsgom par bya ba'i phyir yang ma yin/ 'khor bar yang mi skye mya ngan las 'das pa la yang mngon par dga' ba ma yin/ thar par yang mi dmigs bcings pa yang ma yin zhes bya ba de la dkon mchog gsum la sogs pa thar pa'i mtha' rnams kyang brda'i ngo bo nyid de/dmigs su med pas 'di ni rab tu rtogs pa phun sum tshogs par bya'o/ /chos thams cad rang bzhin gyis yongs su mya ngan las 'das par rig nas kun du mi 'khor zhes bya ba ni nyon mongs pa thams cad kyi gnyen po shin tu bsgom pa'i phyir ro//yongs su mya ngan las 'da' zhes bya ba ni de bzhin nyid chad pa med cing 'jigs pa med pa'i phyir te/ 'di ni mthar phyin pa phun sum tshogs par rig par bya ste/ 'di ni yang dag par sgrub pa'i dge sbyong zhes bya'o/ /'od srungs yang dag par sgrub pa'i dge sbyong gi phyir sbyor bar bya'i/ming gis gnod par 'gyur bar mi bya'o/ /zhes bya ba 'di ni bzhi pa dge sbyong legs par bslabs pa yin te/ 'od srungs bzhi po 'di dag ni dge sbyong zhes bya'o/ /'od srungs 'di lta ste dper na skyes bu dbul po zhig la mdzod 'byor ba zhes ming gdags na 'od srungs de ji snyam du sems/ skyes bu dbul ba de ming de dang 'tsham pa yin nam/gsol pa bcom ldan 'das de ni mi 'tsham mo/ /bcom ldan 'das kyis bka' stsal pa/ 'od srungs de bzhin du dge sbyong dang bram ze zhes bya ba gang dag dge sbyong dang bram ze'i yon tan dang mi ldan pa de dag ni skyes bu dbul po zhes nga 'chad do zhes bya ba skyes bu dbul po'i dpe 'dis ni dge sbyong legs par ma bslabs pa'o//de la yang rnam pa gsum gyis ming gi don ji lta ba bzhin du ma yin par rig par bya ste/ bsam pa log par zhugs la sbyor ba phun sum tshogs pa dang / bsam pa phun sum tshogs pa la sbyor ba log par zhugs pa dang / bsam pa log par zhugs la sbyor ba yang log par zhugs pa'o//de la bsam pa log par zhugs la sbyor ba phun sum tshogs pa ni rnam pa gsum gyis rig par bya ste/ thos pa de tsam gyis chog par 'dzin pa dang / smra ba de tsam gyis chog par 'dzin pa dang / 'jig rten pa'i ting nge 'dzin thob pa de'i ro myong ba de tsam gyis chog par 'dzin pa'o//'od srungs 'di lta ste dper na skyes bu la la zhig rgya mtsho'i chus khyer la zhes bya ba la sogs pa rgya mtsho'i chu'i dpe des ni bsam pa log par zhugs la sbyor ba phun sum tshogs pa ste/ thos pa la dam par 'dzin par rig par bya'o/ /'od srungs 'di lta ste dper na sman pa sman sgro thogs te/rgyu zhes bya ba la sogs pa'i dpe des ni de nyid smra ba dam par 'dzin par rig par bya'o/ /'od srungs 'di lta ste dper na skyes bu na ba zhig la rgyal po la 'os pa'i sman btang la cho ga bzhin ma byas pas 'chi ba'i dus byas zhes bya ba la sogs pa na ba'i dpe des ni 'jig rten pa'i bsam gtan thob pa'i ro myang ba tsam la dam par 'dzin par rig par bya'o//de la gang rgyal po la 'os pa'i sman lta bu ni 'jig rten pa'i ting nge 'dzin to/ /cho ga bzhin ma byas pa lta bu ni de'i ro myang ba lta bu'o/ /des 'chi ba'i dus byas pa lta bu ni/ ting nge 'dzin de las yongs su nyams par rig par bya'o/ /'od srungs 'di lta ste dper na nor bu rin po che mi gtsang bar lhung na smad par 'gyur zhes bya ba la sogs pa nor bu rin po che'i dpe des ni bsam pa phun sum tshogs pa la sbyor ba log par zhugs par rig par bya'o//'od srungs 'di lta ste/ dper na mi ro la gser gyi phreng ba btags pa zhes bya ba la sogs pa ro'i dpes ni bsam pa yang log par zhugs la sbyor ba yang log par zhugs par rig par bya'o//'od srungs 'di lta ste dper na tshong dpon gyi bu shin tu khrus byas te rab tu rnam par byugs la skra dang sen mo bregs nas gos dkar po bgos te/ tsan+dan sa mchog gis byugs pa'i mgo la tsam pa ka'i me tog gi phreng ba thogs pa zhes bya ba la sogs pa tshong dpon gyi bu'i dpe des ni/bsam pa yang phun sum tshogs la sbyor ba yang phun sum tshogs pa ste/ rnam pa gcig pus ni dge sbyong legs par bslabs par rig par bya'o/ /'od srungs bzhi po 'di dag ngang tshul ngan pa can tshul khrims dang ldan pa 'dra ba yin te/ bzhi gang zhe na zhes bya ba la sogs pa mtshams ji ltar bya zhe na/don dam pa'i dge sbyong gis don dam pa'i sdom pa bstan nas tshul khrims dang 'dra ba rnams kyis brda'i sdom pa ston to/ /brda'i sdom pa la gnas pa gang zhe na/ bzhi po 'di dag rab tu rig par bya'o/ /de dag kyang bdag tu 'dzin pa la sogs pas rgyun nyams pa'i phyir brda'i sdom pa la gnas pa rnams zhes bya'o//dang po ni yan lag drug pa'i tshul khrims dang ldan yang gnod pa gnyis kyis gnod pa'i tshul khrims so/ /yan lag drug po gang zhe na/ 'od srungs 'di la dge slong kha cig tshul khrims dang ldan pa yin te/ so sor thar pa'i sdom pas bsdams shing gnas/ cho ga phun sum tshogs/spyod yul phun sum tshogs pa kha na ma tho ba phra rab rnams las yang 'dzin pa dang / gang zag tu 'dzin pa 'dod pa de'i gnyen por 'dzin pa med pa gtong ba med pa zhes bya ba gsungs so/ /gang zag la bdag med pa de la gzung ba med pa dang / gzung ba med pa de'i gnyen por gzung ba med pa ma yin pa zhes bya ba gsungs so//des gzugs la sogs pa la sems can du 'dzin pa dang / der 'dogs pa la legs par 'dzin pa de'i gnyen por sems can med pa sems can du 'dogs pa zhes bya ba gsungs so/ /der 'dogs pa'i ngag dang / der 'dogs pa la legs par 'dzin pa de'i gnyen por tshig med pa tshig tu 'dogs pa med pa zhes bya ba gsungs so//der 'dogs par byed pa'i sems dang / der 'dogs pa la legs par 'dzin pa de'i gnyen por sems med pa sems su 'dogs pa med pa zhes bya ba gsungs so/ /der sdom pa la gnas pa gsum pa la ni 'jig rten gong mar skye ba dang / 'jig rten med pa 'og ma yongs su gtong ba ste/de'i gnyen por 'jig rten med pa 'jig rten med pa ma yin pa zhes bya ba gsungs so/ /snyoms par 'jug pa la brten pa dang / 'dod pa la brten pa de'i gnyen por brten pa med pa brten pa med pa ma yin pa zhes bya ba gsungs so/ /bdag gi tshul khrims yang dag par rab tu 'dzin pa dang gzhan gyi tshul khrims la rlom sems su byed pa de'i gnyen por bdag gi tshul khrims la mi bstod gzhan gyi tshul khrims la mi smod pa zhes bya ba gsungs so//sdom pa la gnas pa bzhi pa la ni bdag tshul khrims dang ldan no snyam du rlom sems pa ste/ de'i gnyen por tshul khrims kyis rlom sems su mi byed ces bya ba gsungs so//de'i ngo bo nyid dang bye brag la yongs su rtog pa rnams kyis tshul khrims la yongs su rtog pa de'i gnyen por tshul khrims la mi rtog ces bya ba gsungs so/ /zag pa med pa'i tshul khrims la ni spros pa'i chos rnams zhi ba yin no/ /'di ni 'phags pa rnams kyi tshul khrims zag pa med pa zhes bya'o zhes bya ba ni bstan pa'i tshig go//mi ldan pa ni 'jig rten las 'das pa'i phyir ro/ /bral ba ni nyon mongs pa thams cad dang mi ldan pa'i phyir ro/ /brten pa thams cad med pa ni khams gsum pa'i gnyen por gyur pa'i phyir ro/ /de la tshigs su bcad pa ni tshul khrims rnam par dag pa'i khyad par bstan par rig par bya ste/des na bcom ldan 'das kyis de'i tshe tshigs su bcad pa 'di dag gsungs so/ /tshul khrims ldan pa dri ma med cing ci yang med/ /ces bya ba tshigs su bcad pa rtsa ba dang pos ni dri ma dang bral ba'i phyir ngo bo nyid rnam par dag pa dang / 'dod chags la sogs pa ci yang med pa'i phyir de'i gzhi rnam par dag pas tshul khrims kyi ngo bo nyid gzhi dang bcas pa rnam par dag pa yongs su ston te/rtsa ba lhag ma gsum pos ni tshul khrims de nyid kyis grogs gzhi dang bcas par rnam par dag par yongs su ston to/ /de la ngang tshul ngan pa'i grogs gzhi dang bcas pa rnams kyi gnyen por tshul khrims kyi grogs gzhi dang bcas pa rnams rnam par gzhag par rig par bya'o//de la ngang tshul ngan pa'i grogs po ni gsum ste/ rgyags pa gzugs la sogs pa la brten pa'i gzhi dang bcas pa de'i gnyen por/ tshul khrims ldan la rgyags pa med de brten pa med//ces bya ba gsungs so/ /rnam par rmongs pa'i bdag nyid mun pa lta bu'i lta ba snyoms par 'jug pa'i ro myang ba'i 'ching ba'i gzhi dang bcas pa de'i gnyen por 'jigs par lta/ bslab pa'i gnas rnams yang dag par blangs te slob/ lus dang ngag dang yid kyi las yongs su dag pa dang ldan pas gnas la 'tsho ba yongs su dag kyang zhes bya ba'o//gnod pa gnyis po dag gang zhe na/ bdag tu smra bar gyur pa zhes bya ba 'jig tshogs la lta ba'i kun nas bskor ba dang / nyes pa las 'byung ba ma byang ba'o/ /gnyis pa ni nyes pa de gnyi ga rnam par spangs pa ste/ 'od srungs gzhan yang 'di la dge slong kha cig 'dul ba 'dzin pa zhes bya ba'am/ngang tshul ngan pa can tshul khrims dang ldan pa 'dra ba gnyis pa'o zhes bya ba la sogs pa'i bar dag go/ /nyes pa de gnyi ga rnam par spangs zhes bya ba ni 'dul ba 'dzin pa nyes pa las 'byin pa la mkhas pa dang / 'jig tshogs la lta ba'i kun nas bskor ba rnam par spangs pa'o//de lta mod kyi 'on kyang 'jig rten pa'i rnam par dag pa ma thob pas 'jig tshogs la lta ba'i lhan cig skyes pa rnam par ma mnan to/ /gsum pa ni chos 'di la zhugs pa ste/ gzhan yang 'di la dge slong kha cig byams pa la gnas pa yin te zhes bya ba nas 'di ngang tshul ngan pa can tshul khrims dang ldan pa 'dra ba gsum pa'o zhes bya ba'i bar dag ste/'jig rten pa'i rnam par dag pa'i sdom pa rnyed nas 'jig tshogs la lta ba lhan cig skyes pa rnam par mnan kyang gtan nas ma phyin pas chos la bdag med pa ma rig pa ste/ 'jigs pas gnod pa'i tshul khrims so/ /bzhi pa ni de las gzhan pa'i nyes pa thams cad rnam par spangs pa ste/gzhan yang 'di la dge slong kha cig sbyangs pa'i yon tan bcu gnyis yang dag par blangs kyang dmigs par lta ba yin te/ ngar 'dzin pa dang nga yir 'dzin pa la gnas pa zhes bya ba nas/ bzhi po 'di dag ni ngang tshul ngan pa tshul khrims dang ldan pa 'dra ba yin no zhes bya ba la sogs pa'i bar dag ste/chos la bdag med pa la log par mos pas mngon pa'i nga rgyal gyis gnod pa'i tshul khrims so/ /sdom pa la gnas pa bzhi po dag las spros pa'i chos gang dag dmigs pa de dag rab tu zhi ba'i mtshan nyid de ni zag pa med pa'i tshul khrims su rig par bya'o/ /spros pa'i chos rnams gang zhe na/sdom pa la gnas pa dang po la ni bdag tu 'dzin pa dang / bdag gir dmigs pa ste/ de'i gnyen por 'od srungs tshul khrims zhes bya ba ni gang la bdag gi med pa zhes bya ba gsungs so/ /nyes pa med pa dang / de mi byed pa'i de'i gnyen por bya ba med pa mi bya ba med pa zhes gsungs so/ / bsam pa bzhin du byed pa la sbyor ba dang / de la mi sbyor ba de'i gnyen por byed pa med pa byed pa med pa ma yin pa zhes bya ba gsungs so/ /shes bzhin du rgyu ba dang des mi rgyu ba de'i gnyen por rgyu ba med pa rgyu ba med pa ma yin pa zhes bya ba gsungs so/ /dran pa nyams pa rab tu spyod pa dang / des rab tu mi spyod pa de'i gnyen por rab tu spyod pa med pa ma yin pa zhes bya ba gsungs so//sdom pa la gnas pa gnyis pa la ni 'jig tshogs la lta ba'i phyogs gnas ngan len dang ldan pa'i ming dang gzugs dmigs te/ de'i gnyen por ming med pa gzugs med pa zhes bya ba gsungs so/ /ma 'ongs pa na skye ba'i mtshan ma dang /de na mtshan ma med pa de'i gnyen por mtshan ma med pa/ mtshan ma med pa ma yin pa zhes bya ba gsungs so/ /kun nas bskor ba rab tu zhi ba dang / de'i bag la nyal ma zhi ba de'i gnyen por rab tu zhi ba ma yin pa rab tu ma zhi ba ma yin pa zhes bya ba gsungs so/ /gang zag la bdag med par tshul khrims ldan la mun pa med cing 'ching ba med ces bya ba gsungs so//log par 'tsho ba dang ldan pa'i rnam par rtog pa rdul lta bu bdag la chags pa'i skyon gyi gzhi dang bcas pa de'i gnyen por/ tshul khrims ldan pa rdul rnams med de nyes pa med/ /ces bya ba gsungs te/ 'di tshigs su bcad pa dang po'i tshig gi don to//zhi ba rab tu zhi ba nye bar zhi ba'i yid/ /rtog dang rnam par rtog dang bral zhing nyon mongs med/ /g.yo ba dang ni rlom sems kun dang rnam bral ba/ /de ni 'od srungs sangs rgyas bstan la tshul khrims ldan/ /zhes bya ba'i tshigs su bcad pa gnyis pa ni tshul khrims de'i rnam pa thams cad rnam par dag pa las brtsams par rig par bya'o//de la ngo bo nyid dang / grogs nyes pa gzhi dang bcas pa'i gnyen por so sor thar pa'i sdom pa rnam par rig par bya ste/ de la tshul khrims rang bzhin la log par zhugs pa'i dri ma nyes pa'i gzhi dang bcas pa'i gnyen por zhi ba'o/ /grogs rgyags pa'i nyes pa gzhi dang bcas pa'i gnyen por rab tu zhi ba'o//lta ba'i nyes pa gzhi dang bcas pa'i gnyen por nye bar zhi ba'i yid do/ /log par 'tsho ba dang ldan pa'i rnam par rtog pa'i nyes pa gzhi dang bcas pa'i gnyen por rtog pa dang rnam par rtog pa dang bral ba ste/ de ltar na sdom pa rnam par dag par bya'o//nyon mongs pa med pas ni bsam gtan gyi sdom pa rnam par dag pa'o/ /g.yo ba dang ni rlom sems kun dang rnam bral ba/ /zhes bya ba lhag mas ni zag pa med pa'i sdom pa rnam par dag pa'o/ /de ni 'od srungs sangs rgyas bstan la tshul khrims ldan/ /zhes bya ba ni ji skad gsungs pa rnams bye brag med par tshul khrims dang ldan par ston to//lus la mi lta srog la phangs par 'dzin mi byed/ /srid pa rnams su skye ba kun la 'dod pa med/ /yang dag zhugs shing de nyid tshul khrims rab gnas pa/ /de ni 'od srungs sangs rgyas bstan la tshul khrims ldan/ /zhes bya ba tshigs su bcad pa gsum pa ni tshul khrims nyid kyi nyes pa med pa'i rnam par dag pa las brtsams par rig par bya'o//nyes pa ni rnam pa lnga ste/ de dag kyang gang zhe na/ 'thob pa dang bkur sti'i zil gyis non pa'i nyes pa dang / lus la lta ba dang bcas pas le lo'i nyes pa dang / lta ba la rnam par rtog pas srog la phangs par 'dzin te/smon lam btab nas tshangs par spyod pa la gnas pa'i nyes pa dang / srid par skye ba thams cad la gnas pas tshul khrims tsam gyis chog par 'dzin pa'i nyes pa dang / tshul khrims las gong du ting nge 'dzin dang / shes rab bsgom pa la yang dag par ma zhugs pas mi 'byung ba'i nyes pa ste/dper na gzhan mu stegs can rnams kyi yang dag pa ma yin pa'i tshul khrims lta bu'o/ /nyes pa lnga po de dag dang bral bas nyes pa med pa'i rnam par dag par rig par bya'o/ /'jig rten ma gos 'jig rten dag la gnas pa med/ /snang ba thob cing bdag gi med de ci yang med/ /bdag tu 'du shes med cing gzhan du 'du shes med//'du shes yongs su shes pas tshul khrims rnam par dag /ces bya ba tshigs su bcad pa bzhi pa ni nyon mongs pa med pa'i rnam par dag pa las brtsams pa'o/ /de la 'jig rten ma gos zhes bya ba ni kun 'byung ba'i bden pas bsdus pa/ dga' ba can gyi 'dod chags dang ldan pa/de dang der mngon par dga' ba'i srid pa spangs pas 'jig rten gyi chos kyis mi gos pa'i phyir ro/ /'jig rten dag la gnas pa med/ /ces bya ba ni yang srid pa 'byung ba'i srid pa spangs pas 'jig rten la mi gnas pa'i phyir ro/ /snang ba thob ces bya ba ni mthong ba'i lam gyis snang ba thob pa'i phyir ro//bdag gi med de ci yang med/ /ces bya ba ni bsgom pa'i lam ni ma rig pa la sogs pa dang / de las gzhan pa zag pa dang bcas pa'i gnyen po yin pas bdag gi med de ci yang med pa'i phyir ro/ /bdag tu 'du shes med cing gzhan du 'du shes med/ /'du shes yongs su shes pas tshul khrims rnam par dag /ces bya ba ni mi slob pa'i lam gyis bdag dang gzhan du 'du shes med pa'i phyir ro/ /gang la tshu rol med cing pha rol dbus kyang med/ /tshu rol pha rol dag la nams kyang mi chags shing / /bcings dang chags med tshul 'chos med cing zag med pa/ /de ni 'od srungs sangs rgyas bstan la tshul khrims ldan//zhes bya ba tshigs su bcad pa lnga pa ni mngon pa'i nga rgyal med pa'i rnam par dag pa las brtsams par rig par bya'o/ /de la/ gang la tshu rol med cing pha rol dbus kyang med/ /ces bya ba ni mtshan ma med pa la gnas pa na tshu rol dang pha rol dang dbus zhes brjod pa nang dang /phyi'i skye mched dang / rnam par shes pa drug gi mtshan ma kun du mi 'byung ba'i phyir ro/ /tshu rol pha rol dag la nams kyang mi chags shing / /zhes bya ba ni rtag tu gnas kyang 'dod pa la yid bde ba la sogs pa tha dad pa nas mi chags pa'i phyir ro/ /bcings dang chags med tshul 'chos med cing zag med pa//zhes bya ba ni bag la nyal dang bcas pa'i kun nas bskor ba spangs pas nyon mongs pa spangs pa na tshul 'chos pa med pa dang / mngon pa'i nga rgyal med par rnam par gzhag pas zag pa med pa'i phyir ro/ /de ni 'od srungs sangs rgyas bstan la tshul khrims ldan/ /zhes bya ba ni de nyid kyi don sngar bshad zin to//ming dang gzugs rnams la ni chags pa med pa'i yid/ /de ni mnyam par gzhag cing shin tu dul ba'i sems/ /gang la bdag med bdag gir 'dzin pa med pa ni/ /de tsam gyis ni tshul khrims gnas zhes brjod pa yin/ /zhes bya ba tshigs su bcad pa drug pa ni rab tu rnam par dag pa las brtsams par khong du chud par bya'o//de la/ ming dang gzugs rnams la ni chags pa med pa'i yid/ /ces bya ba ni ming dang gzugs la chags pa med pas yang srid pa la mi smon pa'i phyir ro/ /de ni mnyam par gzhag ces bya ba ni tshul khrims tsam gyis chog par mi 'dzin pas sems mnyam par gzhag pa'i phyir ro//shin tu dul ba'i sems zhes bya ba ni sems shin tu dul bas ting nge 'dzin tsam gyis chog par mi 'dzin pa'i phyir ro/ /gang la bdag med bdag gir 'dzin pa med pa zhes bya ba ni bdag gi dang bral bas srid pa'i rtse mo'i bar gyi 'jig rten pa'i shes rab kyis chog par mi 'dzin pa'i phyir ro/ / de tsam gyis na tshul khrims gnas zhes brjod pa yin/ /zhes bya ba ni tshul khrims zhes bya ba'i tshig gi tshul khrims rab yin par ston to/ /so sor thar pa slob pa rlom sems byed pa med/ /des ni 'di na de la chags par mi 'gyur te/ /de yi gang du 'phags pa'i lam rnams tshol byed pa/ /de ni tshul khrims rnam par dag pa'i mtshan ma'o//zhes bya ba'i tshigs su bcad pa bdun pa ni 'jig rten pa'i rnam par dag pa las brtsams par blta'o/ /so sor thar pa slob pa rlom sems byed pa med/ /des ni 'di na de la chags par mi 'gyur te/ /zhes bya bas ni tshul khrims tsam gyis khengs par mi 'dzin pa dang / chog par mi 'dzin pa ston to//de yi gong du 'phags pa'i lam rnams tshol byed pa/ /de ni tshul khrims rnam par dag pa'i mtshan ma'o/ /zhes bya ba ni ting nge 'dzin tsam gyis chog par mi 'dzin pas 'jig rten las 'das pa'i lam tshol ba'i phyir ro/ /tshul khrims gtso bo ma yin ting 'dzin der chags med/ /de yi gong du shes rab bsgom pa yongs su tshol//dmigs pa med pa 'phags pa rnams kyi rigs yin te/ /tshul khrims de ni bde bar gshegs pas rab tu bsngags/ zhes bya ba tshigs su bcad pa brgyad pa ni 'jig rten las 'das pa'i rnam par dag pa las brtsams par rig par bya'o/ /de la tshul khrims gtso bo ma yin zhes bya ba ni tshul khrims tsam gyis chog par mi 'dzin pa'i phyir ro//ting 'dzin der chags med ces bya ba ni ting nge 'dzin gyi ro myang bar mi byed pa'i phyir ro/ /de yi gong du shes rab bsgom pa yongs su tshol/ /dmigs pa med pa 'phags pa rnams kyi rigs yin te/ dmigs pa med pas bsdus pa'i lhag pa'i shes rab bsgom pa'i phyir ro//bde bar gshegs pas rab tu bsngags/ /zhes bya ba'i tshig ni de'i pha rol na rab tu bsngags pa med pa'i phyir ro/ /'jig pa'i tshogs la lta las rnam par grol ba'i yid/ /de 'dir nga dang nga yi snyam du 'gyur ba med/ /sangs rgyas spyod yul stong pa nyid la lhag par mos//de yi tshul khrims de ni mnyam pa med pa'o/ /zhes bya ba tshigs su bcad pa dgu pa ni slob pa dang mi slob pa dang / slob pa yang ma yin mi slob pa yang ma yin pa rnam par dag pa las brtsams par rig par bya'o/ /de la/ 'jig pa'i tshogs la lta las rnam par grol ba'i yid/ /ces bya ba ni 'jig tshogs la lta ba rnam par brtags pa spangs pa'i phyir slob pa rnam par dag pa ston to//de 'dir nga dang nga yi snyam du 'gyur ba med/ /ces bya ba ni 'jig tshogs la lta ba lhan cig skyes pa spangs pa'i phyir mi slob pa rnam par dag pa ston to/ /sangs rgyas spyod yul stong pa nyid la lhag par mos//zhes bya ba ni stong pa nyid lhag par mos pa'i phyir slob pa yang ma yin mi slob pa ma yin pa rnam par dag pa ston to/ /de yi tshul khrims de ni mnyam pa med pa'o/ /zhes bya ba ni slob pa la sogs pa gsum rnam par dag pas tshul khrims dang 'dra ba'am/ lhag pa med pa'i phyir bla na med pa nyid du ston to/ /tshul khrims la ni gnas nas ting nge 'dzin kyang thob/ting nge 'dzin rnams thob nas shes rab shin tu bsgom/ /shes rab kyis ni ye shes rnam par dag pa 'thob/ /ye shes rnam par dag pas tshul khrims phun sum tshogs/ /zhes bya ba'i tshigs su bcad pa bcu pa ni thog ma dang tha mar rnam par dag pa las brtsams par rig par bya'o//de la/ tshul khrims la ni gnas nas ting nge 'dzin kyang thob/ /ting nge 'dzin rnams thob nas shes rab shin tu bsgom/ /zhes bya ba ni/ 'phags pa dgyes pa'i tshul khrims thob pa ni tshul khrims thob pa rnam par dag par ston/ shes rab kyis ni ye shes rnam par dag pa 'thob/ /ye shes rnam par dag pas tshul khrims phun sum tshogs//zhes bya ba ni 'phags pa dgyes pa'i tshul khrims 'thob pa na tha mar tshul khrims rnam par dag pa ston to/ tshigs su bcad pa mngon par sgrub pa 'di gsungs pa'i tshe dge slong brgyad brgya ni len pa med par zag pa rnams las sems rnam par grol lo/ /srog chags stong phrag sum cu rtsa gnyis ni chos rnams la chos kyi mig rdul med cing dri ma med pa rnam par dag go zhes bya ba ni de ltar gdams ngag 'di nges par 'byung ba don chen por bstan nas da ni mi slob pa dang /slob pa thob pa'i phyir 'dul ba rnams kyi 'bras bu don chen po ston to/ /dge slong bsam gtan thob pa lnga brgya stan las langs nas dong ngo zhes bya ba ni de nyid kyis 'dul ba dka' ba don chen por ston to//chos bstan pa zab mo 'di la mi 'jug ste/ ma rtogs ma mos zhes bya ba la rnam pa gnyis kyis mi 'jug ste/ ma rtog pa na dad pas chos la mi mos pa dang / ma mos na shes rab kyis don mi rtogs pa'o/ / de nas bcom ldan 'das la tshe dang ldan pa 'od srungs chen pos 'di skad ces gsol to/ /bcom ldan 'das dge slong bsam gtan thob pa lnga brgya po 'di dag chos bstan pa 'di la mi 'jug ste/ ma rtogs ma mos nas stan las langs te mchis so/ /bcom ldan 'das kyis bka' stsal pa/ 'od srungs 'di ltar dge slong mngon pa'i nga rgyal can 'di dag ni tshul khrims rnam par dag pa zag pa med pa 'di la mi 'jug ste/ma rtogs ma mos so/ /'od srungs tshigs su bcad pa mngon par sgrub pa zab ces bya ba ni don shes par dka' ba'o/ /sangs rgyas bcom ldan 'das kyi byang chub zab ces bya ba ni dgongs pa shes par dka'o//dge ba'i rtsa ba ma bskrun pa sdig pa'i grogs pos yongs su zin pa dang / ma dad pa mang ba dag gis mos par mi nus so zhes bya ba ni sdig pa'i grogs pos yongs su zin pa dang / ma dad pa mang bas dge ba'i rtsa ba bskrun par rig par bya'o/ /'od srungs dge slong lnga brgya po 'di dag ni de bzhin gshegs pa 'od srungs kyi gsung rab la gzhan mu stegs can gyi nyan thos su gyur te/de dag de bzhin gshegs pa 'od srungs las brgal ba'i bsam pas chos bstan pa gcig thos so/ /thos nas dad pa'i sems gcig snyed de/ de 'di ltar de bzhin gshegs pa dgra bcom pa yang dag par rdzogs pa'i sangs rgyas 'od srungs kyis 'jam zhing snyan par gsungs pa ngo mtshar to zhes de dag dad pa'i sems gcig snyed pa sems des 'chi ba'i dus byas nas sum cu rtsa gsum pa'i lha rnams kyi nang du skyes so//rgyu de nyid kyis 'dir nga'i bstan pa la rab tu byung ste/ 'od srungs dge slong lnga brgya po lta ba la chags pa 'di dag chos bstan pa zab mo 'di la mi 'jug ste/mi rtogs mi mos so/ /yang 'di dag ni bstan pa 'dis yongs su sbyang ba byas te/ phyis ngan 'gro log par ltung bar 'gro bar mi 'gyur zhing phung po 'di dag nyid kyis yongs su mya ngan las 'da'o/ /slob dpon chos kyi bdag pos tshigs su bcad pa'i don bstan pa las brtsams te/ gzhan du rnam grangs gzhan gyis brjod do//tshigs su bcad pa gong ma'i don tshigs su bcad pa phyi ma phyi mas mngon par sgrub ste/ 'dren pas tshigs su bcad pa mngon par sgrub pa zhes bya'o/ /de la tshigs su bcad pa dang pos ni nyes pa gzhi dang bcas pa spangs pa'i phyir lhag pa'i tshul khrims kyi bslab pa rnam par dag par yongs su ston to//tshul khrims ldan la dri ma med cing ci yang med/ /ces bya ba la/ de yang ji ltar zhe na/ dri ma ni nyes pa'o/ /ci yang ni nyes pa'i gzhi'o/ /tshul khrims ldan la rgyags pa med de brten pa med/ /ces bya ba ni ro myong ba gzhi dang bcas pa spangs pas lhag pa'i sems kyi bslab pa rnam par dag par yongs su bstan te/rgyags pa ni bzhi'o/ /gnas pa ni ro myang ba'o/ /tshul khrims ldan la mun pa med de 'ching ba med/ ces bya ba ni las dang nyon mongs pa gzhi dang bcas pa spangs pas lhag pa'i shes rab kyi bslab pa rnam par dag pa ste/ mun pa ni ma rig pa'i bdag nyid do//'ching ba ni las te gzhi'o/ /tshul khrims ldan la rdul rnams med de nyes pa med/ /ces bya ba la rnam par rtog pa'i bdag nyid ni rdul lo/ /nyes pa ni nyon mongs pa ste/ nyon mongs ni gzhi'o/ /bslab pa 'di gsum rnam par dag na legs pa ci zhig tu 'gyur snyam pa la/ zhi ba rab tu zhi ba nye bar zhi ba'i yid//ces bya ba gsungs te/ sdug bsngal ldog pa dang go rims bzhin du sbyar ro/ /sdug bsngal gsum ni ngan song gi sdug bsngal dang / shes pa la sgrib pa'i sdug bsngal dang / skye ba la sogs pa sdug bsngal lo/ /bslab pa rnam par dag pa legs pa dang bcas pa 'di ji ltar thob snyam pa la/ rtog dang rnam par rtog dang bral zhing zhes bya ba gsungs te/ phyi rol gyi rnam par rag pa mtshan ma rnam par rig pa tsam du 'dzin pas rtog pa dang bral ba'o/ /rnam par rig pa tsam de la yang mi 'dzin pas rnam par rtog pa dang bral ba ste/ mi dmigs pas de'i thabs yongs su bstan to/ /bslab pa rnam par dag pa legs pa dang bcas pa de yod par ji ltar rig par bya zhe na/de ni mnyam par ma bzhag pa'i dus na nyon mongs pa med pa ste/ sdig pa 'dod pa'i nye bar spyod pa med pas nyon mongs pa med pa'i mdo sde bzhin no/ /mnyam par bzhag pa'i dus na ni g.yo ba dang rlom sems kun dang rnam par bral ba zhes bya'o//de ni tshul khrims ldan zhes bya ba la/ tshul khrims ni bslab pa gsum goms par byed pa ste/ 'di ni tshul khrims su bzhed de/ bslab pa gsum rnam par dag pa'i legs pa dang / thabs dang rtags yongs su bstan pa'i phyir tshigs su bcad pa'i don 'di ni tshigs su bcad pa snga ma mngon par sgrub pa'o//zhi ba rab tu zhi ba nye bar zhi ba'i yid/ /ces bya ba de ni lus la lta ba dang bcas pa ma yin te/ gang lta ba ni thob pa dang bkur sti la mngon par brtson par 'gyur ro/ /srog la phangs par 'dzin mi byed ces bya ba la gang phangs par 'dzin pa ni rnam par rtog pa la gnas nas/ bsam gtan gyi ro myong bar byed cing dus ring por dge ba'i chos bsgom pa la mi brtson par 'gyur ro//srid par skye ba kun la gnod pa med/ /ces bya ba la/ gang 'dod pa ni smon nas tshangs par spyad pa spyod par 'gyur ro/ /de la ni mngon par brtson pa'i nyes pa dang / mngon par mi brtson pa'i nyes pa dang / smon nas tshangs par spyod pa la gnas pa'i nyes pa ste/nyes pa gsum med do/ /rtog pa dang rnam par rtog pa dang bral bas yang dag par zhugs pa yin no/ /nyon mongs pa med pas yang dag pa'i tshul la gnas pa yin no/ /gang lus la lta ba dang bcas pas ma yin pa de ni phyi rol gyi 'jig rten nye bar gzung ste/ 'jig rten gyis mi gos so//gang srog la phangs par mi 'dzin pa de ni nang gi 'jig rten nye bar gzung ste/ 'jig rten la mi gnas so/ /gang srid par skye ba thams cad mi 'dod pa de ni srid par skye ba thams cad yongs su shes pas snang ba thob pa'o/ /gang yang dag par zhugs pa de bdag gi ba med do/ /yang dag pa'i tshul khrims pa de ci yang med do//ji ltar ci yang med ce na/ bdag tu 'du shes med cing gzhan du 'du shes med/ /ces bya ba dang / 'du shes yongs su shes so/ /gang 'jig rten ma gos 'jig rten dag la gnas pa med pa de'i ma 'ongs pa na pha rol dang / tshu rol dang dbus te/ nang dang phyi'i skye mched dag la dga' ba can gyi 'dod chags kyis bsdus pa med par 'gyur ro//tshe 'di la nang gi skye mched dang / phyi'i skye mched kyis bsdus pa la tshu rol dang / pha rol la ma chags so/ /gang snang ba thob pa de ma bcings so/ /gang bdag gi ba med pa ni mi chags so/ /gang ci yang med pa de ni mngon pa'i nga rgyal med pas tshul 'chos pa med do//dgra bcom pa thob pas zag pa med do/ /ming dang gzugs rnams la ni chags pa med/ /ces bya ba ni ji ltar de tshu rol dang / pha rol dang / dbus med pa dang / pha rol dang tshu rol nas kyang chags pa med ces bya ba de ston to/ /de ni mnyam par gzhag ces bya ba ni de bcings pa dang chags pa med pa de ston to//shin tu dul ba'i sems zhes bya ba ni ji ltar de tshul 'chos pa med pa dang / zag pa med pa de ston to/ /ji ltar shin tu dul ba'i sems zhes bya zhe na/ gang la bdag med bdag gir 'dzin pa med/ /ces bya'o/ /de ltar 'gyur bas de go rims bzhin du sbyar ro//so sor thar pa slob pa rlom sems byed pa med/ /des ni 'di na de la chags par mi 'gyur te/ /de yi gong du 'phags pa'i lam rnams tshol byed pa/ /zhes bya ba ni yon tan bye brag can mngon par sgrub pa'i phyir 'phags pa rnams kyis lam gang yin pa de yongs su tshol lo/ /de nyid kyis don gsal bar byed pa'i phyir/tshul khrims gtso bor ma yin ting 'dzin der chags med/ /de yi gong du shes rab bsgom pa yongs su tshol/ /zhes bya ba gsungs so/ /shes rab bsgom pa ji lta bu snyam pa la/ dmigs pa med pa 'phags pa rnams kyi rigs yin te/ /zhes bya ba gsungs so/ /ji ltar tshul khrims gtso bor ma yin snyam pa la//'jig pa'i tshogs la lta las rnam par grol ba'i yid/ /ces bya ba gsungs so/ /ci'i phyir ting nge 'dzin der chags pa med ce na/ /'jig tshogs la lta ba de nyid spangs pa'i phyir ro/ /ting nge 'dzin de la ni 'dir nga dang nga yi snyam du 'gyur ba med pa'o/ /ji ltar dmigs pa med pa yongs su tshol snyam pa la/sangs rgyas spyod yul stong pa nyid la lhag par mos/ /zhes bya ba gsungs so/ /go rims gang gis 'jig tshogs la lta ba rnam par grol ba'i yid du 'gyur snyam pa la/ tshul khrims la ni gnas nas ting nge 'dzin kyang thob/ /ting nge 'dzin rnams thob nas shes rab shin tu sgom//zhes gsungs te/ nges par rtogs pa'i phyogs kyis bsdus pa'i shes rab kyis ni 'jig rten las 'das pa'i ye shes rnam par dag par 'gyur ro/ /ye shes rnam par dag pas tshul khrims phun sum tshogs so/ /de ltar na tshigs su bcad pa dang pos ni bslab pa gsum rnam par dag pa'o/ /lhag ma rnams kyi tshigs su bcad pa phyi ma phyi ma'i don 'dren pas bslab pa gsum rnam par dag par mngon par sgrub pa yongs su bstan to//byang chub kyi phyogs bsgom pa rnam par dag pa las brtsams te/ rnam grangs gzhan du'o/ /lus dang ngag gi las nyes par spyod pa gzhi dang bcas pa spangs pa lus dran pa nye bar gzhag pa bsgom pa rnam par dag pa dang /tshor ba yongs su 'dzin pa'i ro myang ba spangs pas tshor ba dran pa nye bar gzhag pa bsgom pa rnam par dag pa dang / ma rig pa dang 'du byed spangs pas sems dran pa nye bar gzhag pa bsgom pa rnam par dag pa dang / dge ba'i chos rnams la nga dang nga'i zhes bya ba la sogs pa'i rnam par rtog pa spangs pa dang /nyon mongs pa can gyi chos spangs pa'i phyir chos dran pa nye bar gzhag pa bsgom pa rnam par dag pa yongs su ston to/ /zhi bas ni yang dag pa'i spong ba bsgom pa dang po rnam par dag pa'o/ /rab tu zhi bas ni gnyis pa'o/ /nye bar zhi ba'i yid/ rtog dang rnam par rtog dang bral zhing nyon mongs med//ces bya bas ni gsum pa'o/ /g.yo ba dang ni rlom sems kun dang rnam bral ba/ /zhes bya bas ni bzhi pa'o/ /lus la mi lta srog la phangs par 'dzin mi byed/ /srid pa rnams su skye ba kun la 'dod pa med/ /ces bya bas ni rdzu 'phrul gyi rkang pa'i ting nge 'dzin gyi rtags te/des na thob pa dang bkur sti 'dod pa ma yin dge bar sbyor ba la mi brtson pa ma yin/ yang srid pa la chags pa ma yin/ yang dag par zhugs pa ni mos pa la sogs pa'i ting nge 'dzin rnam pa bzhis yang dag pa'i spong ba bzhi la sbyor ba'i phyir ro/ /yang dag pa'i tshul la gnas pa ni spong ba'i 'du byed dang ldan pa'i phyir ro//'jig rten mi gos pa ni dad pa'i dbang pos mya ngan las 'das pa'i yon tan la mngon par yid ches pa'i phyir ro/ /'jig rten dag na gnas pa med pa ni/ brtson 'grus kyi dbang pos da ltar byung ba'i yul rnams la'o/ /snang ba thob cing bdag med de ci yang med pa ni dran pa dang / ting nge 'dzin dang /shes rab kyi dbang po rnams kyis so/ /bdag tu 'du shes med cing gzhan du 'du shes med/ 'du shes yongs su shes pas zhes bya bas ni ci yang med pa nyid ston to/ /gang la tshu rol med cing pha rol dbus kyang med/ /ces bya ba ni dad pa'i stobs kyis ma 'ongs pa na de mi 'jigs par 'dod pa'i tshul khrims so//tshu rol pha rol dag la nams kyang mi chags shing / /zhes bya ba ni brtson 'grus kyi stobs kyis da ltar byung ba rnams la ma chags pa'i phyir ro/ /bcings pa med pa chags pa med pa ni dran pa dang / ting nge 'dzin gyi stobs so/ /tshul 'chos pa med cing zag pa med pa zhes bya ba ni shes rab kyi stobs kyis so//nges par rtogs pa'i phyogs rnams kyis zag pa med pa'i phyir ro/ /ming dang gzugs rnams las ni chags pa med pa'i yid/ /ces bya bas ni byang chub kyi yan lag 'jig rten las 'das pa'i lam thob pa'i phyir ro/ /de ni mnyam par gzhag ces bya ba ni dran pa yang dag byang chub kyi yan lag thob pa'i phyir ro//shin tu dul ba'i sems ni byang chub kyi yan lag lhag ma rnams kyis so/ /so sor thar la slob pa rlom sems byed pa med/ /ces bya ba ni yang dag par lta ba'i lam gyi yan lag thob pas chos nyid kyis thob pa'i tshul khrims rab tu thob pa'i phyir ro/ /des ni 'di na de la chags par mi 'gyur te//zhes bya ba ni chos nyid kyis so sor thar pa'i bslab pa rgyun gcad pa'i phyir ro/ /de yi gang du 'phags pa'i lam rnams tshol byed pa/ /zhes bya ba ni yang dag par rtog pa rnams kyis yang dag pa'i lta bar rnam par 'jog pa'i phyir ro/ /tshul khrims gtso bor ma yin pa ni yang dag pa'i ngag dang / las kyi mtha' dang / 'tsho ba'i lam gyi yan lag thob pa'i phyir te/ de las gzhan pa'i tshul khrims ni rlom sems med pa'i phyir ro/ /ting nge 'dzin der chags med ces bya ba ni de'i 'gyod pa med pa la sogs pa'i rim gyis skyes pa bsam gtan gyi ro myang ba med pa'o/ /de'i gong du shes rab bsgom pa yongs su tshol ba ni yang dag pa'i rtsol bas so//'jig pa'i tshogs la lta las rnam par grol ba'i yid/ /ces bya ba rgya cher 'byung ba ni yang dag pa'i dran pas so/ /tshul khrims la ni gnas nas ting nge 'dzin kyang 'thob/ /ces bya ba ni yang dag pa'i ting nge 'dzin to/ /ting nge 'dzin rnams thob nas shes rab shin tu bsgom//zhes bya ba ni kun du sbyor ba lhag ma yongs su spong ba'i phyir ro/ /shes rab kyis ni ye shes rnam par dag pa 'thob/ /ces bya ba ni zad pa shes pa dang mi skye ba shes pa'o/ /de ltar tshigs su bcad pa mngon par sgrub pa 'dis byang chub kyi phyogs rnam par dag pa bsgom pa yongs su bstan to/ /las kyi lam rnam par dag pa las brtsams nas rnam grangs gzhan du'o//mi mthun pa'i phyogs spangs pa dang / gnyen po rnam par dag pas srog gcod pa las phyir ldog pa rnam par dag pa yongs su bstan to/ /de la mi mthun pa'i phyogs spangs pa ni/ srog gcod pa'i bag chags dang de'i gzhi spangs pa'o/ /gnyen po ni rnam par dag pa gsum ste/de las phyir log pa las chog mi shes pa rnam par dag pa dang / sgrib pa med pa rnam par dag pa dang / rnam par smin par nges pa yongs su mi 'dzin pas kun du sbyor ba ma lus par rnam par dag pa'o/ /ma byin par len pa'i rkyen 'jigs pa dang / kha na ma tho ba dang / dgra rnams spangs pa dang / rku ba dang / yongs su spyod pa dang / mngon par 'du byed pa spangs pa dang / de'i gzhi'i nyon mongs pa spangs pa dang / de ma byin par len pa'i ngal ba dang / gsad pa dang / bcing ba la sogs pa'i gnod pa spangs pa dang / de 'byor pa'i nga rgyal spangs pas ma byin par len pa las phyir ldog pa rnam par dag pa yongs su bstan to//bud med kyi lus la mi lta bar rab tu byung ba dang / rab tu byung ba de'i mya ngan las 'ching bar 'gyur zhes log par smra ba'i gzhi spangs pa dang / mi smon par tshangs par spyad pa spyod pa dang / dbang po dag pa'i sgor gyur pa dang / spyod yul ma yin pa yongs su spong ba dang /mi sdug pa la sogs pa gnyen po bsgom pas 'dod pas log par g.yem pa las phyir ldog pa rnam par dag pa yongs su bstan to/ /zang zing gi phyir ram/ 'jigs pa'i gzhi gang gis brdzun du smra ba zer ba de spangs pa dang / de'i gnyen por thos pa la sogs pa'i shes rab dang ldan pa dang / gzhi gang gis bdag dang gzhan la gnod par 'gyur ba brdzun gyi tshig smra ba de spangs pas brdzun du smra ba las phyir ldog pa rnam par dag pa yongs su bstan to/ /rang gi nyes pa yongs su spang ba'i phyir yul gyi phyir dga' bar bya ba'i phyir phra ma byed pa de gang las med pa dang / de'i nang nas phyi'i skye mched la chags pa med pa dang /de med pas gang 'dum par mi byed pa dang / bye ba la mi rnon pa dang / mi mthun par mi dga' mi mthun par mi mos/ mi mthun par 'gyur ba'i tshig mi smra ba yin/ de 'byung bar byed pa chags pa la sogs pa nyon mongs pa las 'gro bas de'i phra ma las phyir log pa rnam par dag pa yongs su bstan to/ / mi bzod pa'i gzhi med pa dang / bzod pa'i gzhi yod pa tshig rtsub pa las phyir log pa rnam par dag pa yongs su bstan to/ /de la mi bzod pa'i gzhi ni ming dang gzugs la chags pa'i yid do/ /bzod pa'i gzhi ni so sor brtags pa'i stobs dang / sems 'chos shing rtse gcig tu bsgoms pa'i stobs kyis nyon mongs pa med pa ni rang bzhin gyis bzod pa'o//tshig thun tshags smra ba rnam pa gsum spangs pas tshig thun tshags smra ba las phyir ldog pa rnam par dag pa yongs su bstan to/ /tshig thun tshags smra ba rnam pa gsum ni bdag la bstod cing gzhan la smod pa dang ldan pa dang / log par smod pa dang ldan pa dang /rang gi lta ba bsnyems pa dang ldan pa'o/ /chags sems rnam gsum spangs pas chags sems las phyir log pa rnam par dag pa yongs su bstan te/ chags sems rnam pa gsum ni mtho ris kyi gnas dang / gzhan yid ches par bya ba'i gnas dang / bslab pa'i 'thob pa dang bkur sti'i gnas so//gnod sems kyi gzhi spangs pas gnod sems las phyir ldog pa rnam par dag pa yongs su bstan te/ de'i gzhi'i 'jig tshogs la lta ba ste/ bdag la gnod pa byas so/ /'di ni bdag la gnod pa byed pa'o zhes gnod sems kun du bskyed do/ /de spangs pa'i mtshan nyid ni rnam pa gnyis te/yul rnams la spyod pa na bdag tu 'dzin pa dang / bdag gir 'dzin pa kun du mi 'byung ba dang / chos yid la byed pa na sangs rgyas kyis mngon par rdzogs par sangs rgyas pa'i stong pa nyid la mos pa'o/ /gnyen po rnam par dag pa log par lta ba las phyir log pa rnam par dag pa yongs su bstan to//de'i gnyen por ni tshul khrims la brten nas ting nge 'dzin to/ /ting nge 'dzin la brten nas 'jig rten pa'i yang dag pa'i lta ba ste/ nges par rtogs pa'i phyogs su bsdus pa'o/ /de nas 'jig rten las 'das pa'i yang dag pa'i lta ba'o/ /de ltar las kyis rnam par dag pa'i tshul khrims phun sum tshogs par rig par bya'o//tshigs su bcad pa'i don bstan pas rnam grangs gzhan du'o/ /de la tshigs su bcad pa 'di dag gis so sor bsdus pa'i don ni dang pos ni bar du gcod pa rnam par spong bas tshul khrims rnam par dag pa'o/ /gnyis pas ni g.yeng ba dang / rlom sems kun nas rnam par dag pa'o//gsum pas ni sred pa dang / lta ba dang / kun nas nyon mongs pa spong ba rnam par dag pa'o/ /bzhi pas ni 'du shes yongs su shes pa rnam par dag pa'o/ /lnga pas ni zag pa med pa rnam par dag pa'o/ /drug pas ni ting nge 'dzin yongs su dag pa rnam par dag pa'o/ /bdun pas ni sbyor ba rnam par dag pa'o//brgyad pas ni bslab pa rnam par dag pa'o/ /dgu pas ni mi slob pa rnam par dag pa'o/ /bcu pas ni de bzhin gshegs pa'i ye shes rnam par dag pa'o/ /de la tshul khrims kyi bar du gcod pa ni bzhi pa'o/ /nyams pa ni bar gcod pa ste/ de'i gnyen por tshul khrims ldan la dri ma med cing ci yang med ces bya ba gsungs so//ngang tshul ngan pa'i nyes pa'i mtshan nyid ni dri ma'o/ /'dod chags la sogs pa nyon mongs pa ci yang zhes bya ba ni gzhi ste/ 'di ni tshul khrims nyams pa bar du gcod pa'o/ /khyad par du 'gro ba bar du gcod pa de'i gnyen por/ tshul khrims ldan la rgyags pa med de brten pa med//ces bya ba gsungs te/ tshul khrims tsam la yon tan du lta zhing de la brten pa de'i gzhi ni rgyags pa ste/ 'di ni khyad par du 'gro ba'i bar du gcod pa'o/ /rtogs par 'gyur ba'i bar du gcod pa'i gnyen por/ tshul khrims ldan la mun pa med cing 'ching ba med/ / ces bya ba gsungs te/ ma rig pa ni gzhi'o/ /lta ba ni 'ching ba ste/ 'di ni de kho na rtogs par 'gyur ba'i bar du gcod pa'o/ /tshe 'di la bde bar gnas pa'i bar du gcod pa de'i gnyen por/ tshul khrims ldan la rdul rnams med de nyes pa med/ /ces bya ba gsungs te/ mi dge ba la sems pa ni rdul to/ / 'thob pa dang bkur sti la chags pa'i nyes pa ni gzhi ste/ 'di ni tshe 'di la bde bar gnas pa bsam gtan rnams kyi bar du gcod pa'o/ /gnyis pa las ni g.yo ba dang rlom sems kun las rab tu thar pa rnam par dag pa ste/ mtshan ma dang / gnas ngan len dang / de las byung ba'i sdug bsngal spangs pa dang /gnyen por rnam par mi rtog pa'i shes rab dang ting nge 'dzin phun sum tshogs pa'o/ /de la mtshan ma spangs pas zhi ba'o/ /gnas ngan len spangs pas rab tu zhi ba'o/ /de las byung ba'i sdug bsngal spangs pas nye bar zhi ba'i yid do/ /gzugs la sogs pa'i chos kyi ngo bo nyid dang de'i khyad par skye'o/ / 'gog go zhes bya ba la sogs par rtog pa dang / rnam par rtog pa dang bral ba dang / g.yo ba med pa dang / ting nge 'dzin las mi g.yo ba'i phyir/ gnyen po rnam par mi rtog pa'i shes rab dang ting nge 'dzin phun sum tshogs pas g.yo ba dang rlom sems thams cad las rab tu thar pa phun sum tshogs so/ /gsum pa las ni srid pa dang lta ba dang /kun nas nyon mongs pa spangs pa rnam par dag pa ste/ tshe 'di dang tshe rabs gzhan gyi sred pa spangs pas/ lus la mi lta srog la phangs par 'dzin mi byed/ /srid pa rnams su skye ba kun la 'dod pa med/ /ces bya ba'o/ theg pa chen po'i chos dang don la phyin ci ma log pas/yang dag par zhugs pa dang / yang dag pa'i tshul la gnas pa zhes bya'o/ /bzhi pa las ni 'du shes yongs su shes pa rnam par dag pa ste/ 'jig rten gyi chos kyi 'du shes yongs su shes pas 'jig rten gyis ma gos pa zhes bya'o/ /'jig rten gyi 'du shes yongs su shes pas 'jig rten dag la dmigs pa zhes bya'o//bden pa la yid gnyis dang the tshom za ba'i 'du shes yongs su shes pas snang ba thob pa zhes bya'o/ /lus dang longs spyod kyi 'du shes yongs su shes pas bdag gi ba med ces bya'o/ /'dod chags dang zhe sdang dang / gti mug gi mtshan ma'i 'du shes yongs su shes pas ci yang med ces bya'o//bdag dang gzhan gyi 'du shes yongs su shes pas bdag tu 'du shes med cing gzhan du 'du shes med ces bya'o/ /lnga pa las ni zag pa med pa rnam par dag pa ste/ phung po lhag ma ma lus pa'i mya ngan las 'das pa'i dbyings yongs su 'dzin pas/ gang la tshu rol med cing pha rol dbus kyang med//ces bya'o/ /de la nang dang / phyi'i skye mched drug dang / de las byung ba'i rnam par shes pa rnams ni tshu rol dang / pha rol dang / dbus zhes bya'o/ /phung po'i lhag ma dang bcas pa'i mya ngan las 'das pa'i dbyings la rab tu gnas pas chags pa spangs pa dang dngos po'i 'ching ba las thar pa dang /dge ba mi spyoms pas/ tshu rol dag la nams kyang mi chags shing / /bcings dang chags med tshul 'chos med/ /ces bya ste/ dngos po la chags pa spangs pas dngos pos bcings pa las rnam par grol gyi/ dngos po las rnam par grol ba ni ma yin no/ / ma bcings pa ni grol ba zhes bya ste/ dper na dge slong khyed mig la dga' ba'i 'dod chags gang yin pa de spongs shig /de spangs na mig de spangs par 'gyur ro zhes bya ba gsungs pa lta bu'o/ /tshul 'chos med ces bya ba ni 'thob pa dang bkur sti la chags pa med pas phyi rol gyi dngos po la mi chags par ston to//drug pa las ni ting nge 'dzin yongs su 'dzin pa rnam par dag pa ste/ dag pa can gyi ting nge 'dzin yongs su 'dzin pas/ ming dang gzugs rnams la ni chags pa med pa'i yid/ /ces bya'o/ /tha ba med pa can gyi ting nge 'dzin yongs su 'dzin pas de ni mnyam par gzhag cing shin tu dul ba'i sems zhes bya ste/rtsa ba'i bsam gtan gyi ting nge 'dzin thob pas mnyam par gzhag pa zhes bya'o/ /'jig rten las 'das pa'i ting nge 'dzin yongs su 'dzin pas/ gang la bdag med bdag gir 'dzin pa med/ /ces bya'o/ /bdun pa las ni sbyor ba rnam par dag pa ste/ so sor thar pa'i sdom pa tsam gyis rlom sems su mi byed pas/so sor thar pa slob pa rlom sems byed pa med/ /ces bya'o/ /de tsam gyis chog par mi 'dzin pas/ des ni 'di na de la chags par mi 'gyur te/ /de yi gang du 'phags pa'i lam rnams tshol byed pa/ /de ni tshul khrims rnam par dag pa'i mtshan ma'o/ /zhes bya ba'o//brgyad pa las ni slob pa rnam par dag pa ste/ tshul khrims dang / ting nge 'dzin gyis chog par mi 'dzin pas/ /tshul khrims gtso bo ma yin ting 'dzin der chags med/ /ces bya'o/ /'jig rten pa'i shes rab tsam gyis chog par mi 'dzin pas/ de kho na rtogs te/ mi dmigs pa'i ye shes thob pa ni/de yi gong du shes rab sgom pa yongs su tshol/ /dmigs pa med pa 'phags pa rnams kyi rigs yin te/ /tshul khrims de ni bde bar gshegs pas rab tu bsngags/ /zhes bya'o/ /dgu pa las ni mi slob pa las ni dag ste/ mthong ba'i lam na 'jig tshogs la lta ba las rnam par grol bas/ 'jig pa'i tshogs la lta las rnam par grol ba'i yid//ces bya'o/ /bsgom pa'i lam na nga'o snyam pa'i nga rgyal las rnam par grol bas/ de 'dir nga dang nga yi snyam du 'gyur ba med/ /ces bya'o/ /de'i rjes las thob pa'i ye shes kyi/ de bzhin gshegs pa'i spyod yul zab mo stong pa nyid la mos pas/ sangs rgyas spyod yul stong pa nyid la lhag par mos/de yi tshul khrims de ni mnyam pa med pa'o/ /zhes bya'o/ /bcu pa las ni de bzhin gshegs pa'i ye shes rnam par dag pa ste/ byang chub sems dpa'i tshul khrims la gnas nas theg pa rlabs po che'i ting nge 'dzin bsgoms pas/ tshul khrims la ni gnas nas ting nge 'dzin kyang thob/ /ces bya'o/ / ting nge 'dzin la gnas te shes rab bsgom mo/ /bsgoms pas ting nge 'dzin rnams thob nas shes rab shin tu bsgom/ /zhes bya'o/ /shes rab zab mo bsgom pa la gnas te thams cad mkhyen pa'i ye shes thob pas/ shes rab kyis ni ye shes rnam par dag pa 'thob/ / ces bya'o/ /de ltar tshul khrims phun sum tshogs pas/ ye shes rnam par dag pas tshul khrims phun sum tshogs zhes bya'o/ /yang gnod pa 'joms pa rnam par dag pa dang bslab pa rnam gsum rnam par dag pa dang / sbyor ba'i lam rnam par dag pa dang / mthong ba'i lam rnam par dag pa dang /bsgom pa'i lam rnam par dag pa dang / mthar phyin pa'i lam rnam par dag pa dang / sdom pa gsum rnam par dag pas/ tshigs su bcad pa 'di dag gis lus rnam par gzhag par bya'o zhes slob dpon gzhan dag tshigs su bcad pa 'di dag gi don de skad du brjod do/ /de nas bcom ldan 'das kyis tshe dang ldan pa rab 'byor la bka' stsal pa/rab 'byor song la dge slong de dag kun shes par byos shig /rab 'byor gyis gsol pa/ bcom ldan 'das nyid kyis 'di dag la bshad na yang mthun par mi bgyid na bdag gis lta smos kyang ci 'tshal zhes bya ba la/ 'di la rab 'byor la bka' stsal pa ni/de bzhin gshegs pa rnams kyis 'dul ba'i don mdzad pa'i nus pa nyan thos rnams las khyad par du brjod pa'i phyir ro/ /'di man chad ni brda dang don dam pa'i sdom pa rnam par gzhag par rig par bya'o/ /de nas bcom ldan 'das kyis de'i tshe dge slong de dag lam gang nas dong ba'i lam der dge slong gnyis shig sprul pa sprul to zhes bya ba ni de bzhin gshegs pa'i 'dul ba'i thabs ston to//rnam pa gnyis kyis sprul pa rab tu bstan te/ rtags dang mos pa mthun par kun tu bstan pa ste/ dge slong de dag bsdus nas gdams pa'i phyir ro/ de nas dge slong lnga brgya po de dag sprul pa'i dge slong gnyis po lam gang nas dong ba'i lam der dong ste phyin pa dang 'di skad ces smras so//tshe dang ldan pa dag gar 'gro/ /de gnyis kyis smras pa/ kho bo cag ni dgon pa'i gnas rnams su bsam gtan gyi bde ba la reg par gnas par bya bar 'dod do/ /de ci'i phyir zhe na/ kho bo cag ni bcom ldan 'das kyis chos bstan pa gang yin pa'i chos bstan pa de la mi 'jug ste/mi rtog mi mos shing skrag kun du skrag kun du rab tu skrag par gyur nas kho bo cag dgon pa'i gnas rnams su bsam gtan gyi bde ba la reg par gnas pa rnams kyis gnas par bya'o/ /dge slong lnga brgya po dag gis 'di skad ces smras so/ /tshe dang ldan pa dag kho bo cag kyang bcom ldan 'das kyis chos bshad pa la mi 'jug ste/ma rtog ma mos shing skrag kun du skrag kun du rab tu skrag par gyur to/ /de'i phyir kho bo cag kyang dgon pa'i gnas rnams su bsam gtan gyi bde ba la reg par gnas pa rnams kyis gnas par bya'o/ /sprul pa gnyis kyis smras pa/ tshe dang ldan pa dag de'i phyir bdag cag yang dag par 'gro bar bya'o//rtsod par mi bya'o/ /rtsod pa med pa dam par byed pa ni dge sbyong gi chos so/ /tshe dang ldan pa dag gang 'di yongs su mya ngan las 'das pa zhes bya ba gang / yongs su mya ngan las 'da' bar 'gyur ba'i chos de gang / de lus 'di la bdag gam sems can nam/skye ba po 'am/ skyes bu 'am/ gang zag gam/ shed las skyes pa 'am/ shed bu 'am/ gang yongs su mya ngan las 'da' bar 'gyur/ gang zad pas yongs su mya ngan las 'da'/ de dag gis smras pa/ 'dod chags zad/ zhe sdang zad/ gti mug zad pas yongs su mya ngan las 'da'o//sprul pa gnyis kyis smras pa/ tshe dang ldan pa dag 'dod chags dang / zhe sdang dang / gti mug yod pas yin nam/ ci na de dag zad par bya/ de dag gis smras pa/ de dag gi nang na yang med/ phyi rol na yang med/ gnyi ga med pa la yang mi dmigs te/ de dag ni yongs su ma brtags pa las kyang mi skye'o zhes bya ba ni de dag mya ngan las 'das pa las log par 'dzin pas mngon pa'i nga rgyal gyis skrag pa las yongs su mya ngan las 'das par byed pa'i sems can de gang yang med la/'dod chags la sogs pa yod pa las zad par 'gyur ba ma yin te/ ma skyes pa de dag nyid kyi skye ba med pa tsam la mya ngan las 'das pa'o zhes yongs su bstan pas yang dag pa ji lta ba bzhin du mya ngan las 'das pa la yid ches par 'gyur ba'o//sprul pa gnyis kyis smras pa/ tshe dang ldan pa dag de lta bas na ma rtog rnam par ma rtog shig ces bya ba ni nang dang phyi'i skye mched rnams la nga dang nga'i zhes bya ba dang / go rims bzhin du sbyar ro/ /tshe dang ldan pa dag nam mi rtog rnam par mi rtog pa de'i ni chags par yang mi 'gyur zhes bya ba ni 'dod chags skye ba med pa'i phyir ro//chags pa dang bral bar yang mi 'gyur zhes bya ba ni skye ba med pa la 'bral ba med pa'i phyir ro/ /chags pa med cing chags pa dang bral ba yang med pa gang yin pa de ni zhi ba zhes bya'o zhes bya ba la ma zhi bar gyur pa las zhi bar 'gyur ro snyam du 'dzin pa yongs su btsal ba'i phyir ro//tshe dang ldan pa dag tshul khrims ni mi 'khor zhing mya ngan las mi 'da'o/ /tshe dang ldan pa dag ting nge 'dzin dang / shes rab dang / rnam par grol ba dang / rnam par grol ba'i ye shes mthong ba la yang mi 'khor zhing yongs su mya ngan las mi 'da'o//tshe dang ldan pa dag chos de dag gis yongs su mya ngan las 'das pa ston pa na chos de dag kyang stong pa/ dben pa gzung du med pa'o zhes smras pa ni/ gang dag gis gang zag zhi ba zhes bya'o/ mi 'khor ba ni nyon mongs pa can ma yin pa'i phyir ro//yongs su mya ngan las mi 'da' ba ni/ rang bzhin gyis yongs su mya ngan las 'das pa'i phyir te/ de dag la ni sngon ma zhi bar gyur pa las zhi bar 'gyur ba gzhan med do/ /tshe dang ldan pa dag dngos po ci yang med pas 'di lta ste/ mya ngan las 'das so snyam pa'i 'du shes spongs shig /bdag yongs su mya ngan las 'das par bya'o snyam pa'i 'du shes kyis mya ngan las 'das pa la 'du shes su ma byed cig /'dod chags la sogs pa'i 'du shes kyis mya ngan las 'das pa la 'dod chags la sogs pa med pa ni mya ngan las 'das pa'o zhes mya ngan las 'das pa'i 'du shes la yongs su shes par ma byed cig /'dod chags la sogs pa med pa ni mya ngan las 'das pa'o/ /de ni de'i 'du shes kyis bcings pa yin no zhes bya ba ni mtshan ma med pa la gnas pa'i bar chad du gyur pa'i phyir ro/ /zag pa zad par bya ba'i thabs bstan nas de'i 'og tu tshe 'di la bde bar gnas par bya ba'i thabs 'gog pa'i snyoms par 'jug pa mngon par sgrub pa ston to//tshe dang ldan pa dag 'du shes dang / tshor ba 'gog pa'i snyoms par 'jug pa la zhugs shig /tshe dang ldan pa dag 'du shes dang tshor ba 'gog pa'i snyoms par 'jug pa las gong na bya ba med do zhes 'chad do zhes gang gsungs pa'i phyir ro//yang na 'di ni don gzhan yin te/ de la dge ba'i rtsa ba ma bskyed pa dag gis mos par mi nus zhes bya ba ni bsod nams dang / ye shes kyi tshogs dang mi ldan pa'i phyir shin tu rdul dang ldan pa rnams so zhes bya ba'i tha tshig go//sdig pa'i grogs pos yongs su zin pa dag gis ma yin no zhes bya ba ni skyes bu dam pas yongs su ma zin pa'i phyir rab tu ma rung bar 'gyur ba rnams kyis so zhes bya ba'i tha tshig go/ /ma dad pa mang ba dag gis ma yin no zhes bya ba ni ye shes kyi tshogs dang mi ldan pas zab mo'i chos rnams la mos pa rnams kyis zhes bya ba'i tha tshig go//mi 'jug ces bya ba ni bstan pa'i tha tshig go/ /mi rtog ces bya ba ni chos gnas pa'i ye shes ma rtogs pa'i phyir ro/ /mi mos zhes bya ba ni de kho na shes pas nges pa med pa'i phyir ro/ /de bzhin gshegs pas 'dul ba'i thabs de rnam pa gnyis su blta ste/sprul pa dag gis mngon pa'i nga rgyal can gyi bdag nyid dang 'dra ba dang / mos pa 'dra bas ni bka' la sems nye bar gzhag pa'i phyir 'dra ba bstan pa dang / gdams ngag de nges par 'byung ba can yin pas yang dag par rnam par dag pa'i thabs nye bar bstan pa'o/ / gdams ngag kyang rnam pa bzhir rig par bya ste/ rnam par byang ba dang / kun nas nyon mongs pa gnyis la skrag par 'byung ba'i gnas bstan pa dang / kun nas nyon mongs pa'i gzhi yongs su spang bar bstan pa dang / rnam par byang ba la skrag pa'i gzhi yongs su spang bar bstan pa dang / tshe 'di la mchog tu bde ba gnas pa'i thabs bstan pa'o/ /de la tshe dang ldan pa dag gang 'di yongs su mya ngan las 'das pa zhes gang yongs su mya ngan las 'das par 'gyur ba'i chos de yang / gang lus la bdag gam zhes bya ba ni bdag tu lta ba dgag pa'i phyir rnam par byang ba dang kun nas nyon mongs pa gnyis la skrag pa 'byung ba'i gnas bstan pas bdag med par 'gyur ro snyam ste/skrag pas kun nas nyon mongs par 'gyur te/ 'di ni rnam pa dang po'o/ /sprul pa gnyis kyis smras pa/ de tshe dang ldan pa dag de lta bas na ma rtog rnam par ma rtog shig ces bya ba ni kun nas nyon mongs pa'i gzhi rnam pa gnyis ston to//tha snyad can gyi ngo bo nyid du kun nas nyon mongs pa'i ngo bo nyid la mngon par zhen pa'i yongs su rtog pa de'i dbang du byas nas ma rtog shig ces bya ba smras so/ /de'i yon tan dang nyes pa'i bye brag la mngon par zhen pa'i yongs su rtog pa de'i dbang du byas nas rnam par ma rtog shig ces bya ba smras te/'di ni rnam pa gnyis pa'o/ /tshe dang ldan pa dag ni mi rtog rnam par mi rtog pa de na zhes bya ba de nas rgya cher de ni de'i 'du shes kyis bcings pa yin no zhes bya ba'i bar dag ni rnam par byang ba ste/mdor bsdu na rnam pa gnyis su rig par bya ste/ rnam par dag pa'i lam dang / mya ngan las 'das pa rnam par dag pa'i lam la skrag pa'i gzhir rig par bya ste/ tshe dang ldan pa dag tshul khrims la sogs pa ni mi 'khor zhing yongs su mya ngan las mi 'da'o zhes bya ba la tshul khrims la sogs pa'i de bzhin nyid shin tu rnam par dag pa'i phyir sngon dang phyi mar kun nas nyon mongs par rtog pa dang /kun nas nyon mongs pa dang bral ba'i rtog pa mi 'thad na de rnam par dag pa'i lam de la kun nas nyon mongs pa dang / kun nas nyon mongs pa dang bral bar rtog pas rnam par dag pa'i lam la skrag go//rnam pa gnyis kyis mya ngan las 'das pa rnam par dag pa la skrag pa'i gzhir rig par bya ste/ tshe dang ldan pa dag 'di lta ste mya ngan las 'das pa'i 'du shes spongs shig ces bya ba ni tha snyad can gyi ngo bo nyid la mngon par zhen pas so//'du shes la yang 'du shes su ma byed cig ces bya ba ni mya ngan las 'das pa zhes bya ba ni tshig bla dgas kyi 'du shes la sems las byung ba'i 'du shes su byed pas so/ /'du shes la 'du shes kyis yongs su shes par ma byed cig ces bya ba ni sems las byung ba'i 'du shes kyis zhi ba'o zhes bya ba ni tshig bla dgas kyi 'du shes la yongs su shes par byed pas so//gzhi rnam pa 'di gnyis med na mya ngan las 'das pa la skrag par mi 'gyur te/ 'di ni rnam pa gsum par rig par bya'o/ /gzhi de gnyis yongs su spangs pa ni mchog tu gnas par bya ba'i thabs bstan par rig par bya ste/tshe dang ldan pa dag 'du shes dang tshor ba 'gog pa'i snyoms par 'jug pa la snyoms par zhugs shig /tshe dang ldan pa dag 'du shes dang tshor ba 'gog pa la snyoms par zhugs na de'i gong na bya ba med do zhes gang smras so/ / gzhi de gnyis yongs su spangs pa yang kun nas nyon mongs pa'i gzhi yongs su spangs pa dang / rnam par byang ba la skrag pa'i gzhi yongs su spangs te/ 'di ni rnam pa bzhir rig par bya ste/ 'di yan chad ni de bzhin gshegs pas 'dul ba'i thabs su rig par bya'o/ /'di man chad ni dngos po drug las brtsams nas bka' lung brda sprod pa don chen por rig par bya ste/mya ngan las 'das pa'i dngos po dang / gnas kyi dngos po dang / sgra'i dngos po dang / tshul bzhin yid la byed pa'i dngos po dang / gdams ngag gi dngos po dang / chos kyi rjes su mthun pa'i chos sgrub pa'i dngos po'o//de dag sems rnam par grol nas bcom ldan 'das kyi zhabs la mgo bos phyag 'tshal te phyogs gcig tu 'khod do/ /de nas tshe dang ldan pa rab 'byor gyis dge slong de dag la 'di skad ces smras so/ /tshe dang ldan pa dag gar dong dang gang nas lhags zhes dris pa dang /de dag gis smras pa/ btsun pa rab 'byor gang du yang 'gro ba med/ gang nas kyang 'ong ba med pa'i phyir bcom ldan 'das kyis chos bstan to zhes bya ba ci las brtsams te de skad smras she na/ dang po ste mya ngan las 'das pa'i dngos po'i dbang du byas pa'o//ci'i phyir zhe na/ 'di ltar 'khor ba lta bur de la ni 'gro ba dang / 'ong ba med pa'o/ /tshe dang ldan pa dag khyed kyi ston pa gang yin zhes dris pa dang / smras pa/ gang ma skyes shing yongs su mya ngan las mi 'da'o zhes bya ba ci las brtsams te de skad smras she na/ gnyis pa gnas kyi dngos po ste/gzugs kyi sku'i dbang du byas so/ /ma skyes shing yongs su mya ngan las mi 'da' zhes bya ba ni mya ngan las 'das pa'i rang bzhin gyi phyir te/ smras pa/ khyed kyis ji ltar chos thos zhes dris pa dang / smras pa/ bcing ba'i phyir yang ma yin thar pa'i phyir yang ma yin no zhes bya ba ci las bsams te de skad smras she na/gsum pa sgra'i dngos po ste/ chos bstan pa'i dbang du byas so/ /bcing ba'i phyir yang ma yin zhes bya ba ni/ chos gos la sogs pa la sred pa skye ba'i gnyen po'i phyir ro/ /thar pa'i phyir yang ma yin zhes bya ba ni/de dag grol ba'i phyir ro/ /smras pa/ khyed ji ltar rab tu brtson zhes dris pa dang / smras pa ma rig pa spang ba'i phyir yang ma yin rig pa bskyed pa'i phyir yang ma yin no zhes bya ba ci las brtsams te smras she na/ bzhi pa tshul bzhin yid la byed pa'i dngos po'i dbang du byas so/ /ma rig pa spang ba'i phyir ma yin pa ni ma rig pa nyon mongs pa can ma yin pa'i dbang du byas pa ste/nyan thos rnams la de kun du 'byung ba'i phyir ro/ /ma rig pa bskyed pa'i phyir yang ma yin pa ni skyes zin pa'i phyir ro/ /smras pa khyed su'i nyan thos zhes dris pa dang / smras pa gang gis thob pa med cing mngon par rdzogs par sangs rgyas pa med de zhes bya ba ci las bsams te de skad smras she na/lnga pa gdams ngag gi dngos po'i dbang du byas pa ste/ /dge slong gi gzugs su sprul pa gang gis rtogs par bya ba'i phyir ro/ /drug pa chos kyi rjes su mthun pa'i chos sgrub pa'i dngos po ni don bcu'i dbang du byas par rig par bya ste/ phung po lhag ma ma lus pa'i mya ngan las 'das pa dang /phung po'i lhag ma dang bcas pa'i mya ngan las 'das pa dang / mthong bas spang bar bya ba'i nyon mongs pa spangs pa dang / bsgom pas spang bar bya ba'i nyon mongs pa spangs pa dang / sdug bsngal spong ba dang / ston pa la phyir bya ba dang / sbyin bdag la lan glan pa dang / 'phags pa ma yin pa'i sa las shin tu 'das pa dang /'phags pa'i sa la rab tu gnas pa dang / rnam par grol ba thun mong du gyur pa'o/ /smras pa tshe dang ldan pa dag khyed kyi tshangs pa mtshungs par spyod pa gang zhes dris pa dang / smras pa/ gang dag khams gsum na mi rgyu ba dag go zhes bya ba ci las bsams te de skad smras she na/ma 'ongs pa ni phung po lhag ma ma lus pa'i mya ngan las 'das pa ste/ dus de na mthun pa'i chos nyid kyis lhan cig 'grogs pa'i phyir ro/ /smras pa/ tshe dang ldan pa dag khyed ji srid cig na yongs su mya ngan las 'da' zhes dris pa dang / smras pa/ nam de bzhin gshegs pa'i sprul pa yongs su mya ngan las 'da' ba na'o zhes bya ba ci las bsams te de skad smras she na/ phung po lhag ma dang bcas pa'i mya ngan las 'das pa ste/ gzhan gyi dbang dang mthun pa'i chos kyis sngon gyi las kyis sprul pa'i phyir te/ de'i 'phen pa zad pa'i zad na de las gzhan pa dag dang lhan cig gnas pa'i phyir ro//smras pa/ tshe dang ldan pa dag khyed kyi nyon mongs pa zad dam zhes dris pa dang / smras pa/ chos thams cad shin tu zad pa'i phyir ro zhes bya ba ci las bsams te de skad smras she na/ mthong bas spang bar bya ba'i nyon mongs pa spangs pa ste/chos thams cad shin tu zad pa'i phyir ro/ /zhes bya ba ni ngan song ba rnams so/ /smras pa/ khyed kyis bya ba byas sam zhes dris pa dang / smras pa/ ngar 'dzin pa dang / nga yir 'dzin pa yongs su shes so zhes bya ba ci las bsams te de skad smras she na/bsgom pas spang bar bya ba'i nyon mongs pa spangs pa ste/ 'jig tshogs la lta ba lhan cig skyes pa spangs pa'i phyir ro/ /smras pa/ khyed kyis bdud btul tam zhes dris pa dang / smras pa/ phung po'i bdud mi dmigs pa'i phyir ro zhes bya ba ci las bsams te de skad smras she na/ sdug bsngal spong ba ste/phung po'i bdud mi dmigs pa zhes bya ba ni ma 'ongs pa na de'i skye ba mi dmigs pa'i phyir ro/ /de nyid kyi phyir bdud thams cad 'dul bar rig par bya ste/ phung po rnams med na de las gzhan pa'i bdud mi 'byung ba'i phyir ro/ /smras pa/ khyed kyis ston pa'i g.yog byas sam zhes dris pa dang /smras pa/ lus kyis kyang ma byas/ ngag gis kyang ma byas/ sems kyis kyang ma byas so zhes bya ba ci las bsams te de skad smras she na/ ston pa'i phyir bya ba ste/ lus la sogs pas ni ma yin gyi/ mya ngan las 'das pa rtogs pas de'i g.yog byed pa'i phyir ro//smras pa/ khyed kyis sbyin pa'i sa sbyangs sam zhes dris pa dang / smras pa/ 'dzin pa med cing sdud pa med pa'o zhes bya ba ci las bsams te de skad smras she na/ sbyin bdag la lan glan pa ste/ 'dzin pa med pa dang / sdud pa med pa ni lta ba dang 'jog pa'i nyes pa dang bral ba ste go rims bzhin no/ / smras pa/ khyed cag 'khor ba las brgal tam zhes dris pa dang / smras pa/ chad pa med cing rtag pa med pa'i phyir ro zhes bya ba ci las bsams te de skad smras she na/ 'phags pa ma yin pa'i sa las shin tu 'das pa ste/ chad pa med pa ni 'khor ba bri bar ma byas pa'i phyir ro//rtag pa med pa ni mya ngan las 'das pa yod pa'i phyir te/ /de dag gis ni 'bri ba med pa dang / 'phel ba med par bstan to/ /smras pa/ khyed cag sbyin gnas kyi sar zhugs sam zhes dris pa dang / smras pa/ 'dzin pa thams cad las rnam par grol ba'i phyir ro zhes bya ba ci las bsams te de skad smras she na/'phags pa'i sa la rab tu gnas pa ste/ 'dzin pa thams cad las rnam par grol ba'i phyir zhes bya ba ni spangs pa ma byas kyi med pa la 'dzin pa tsam dang bral ba'i phyir ro/ /smras pa/ tshe dang ldan pa dag gar 'gro zhes dris pa dang / smras pa/ de bzhin gshegs pa'i sprul pa gang du bzhud par ro zhes bya ba ci las bsams te de skad smras she na/rnam par grol ba'i thun mong du gyur pa ste/ de bzhin gshegs pa dang bye brag med par de mthun pa'i chos kyi rnam par grol ba'i thun mong du gyur pa nyid du bstan to/ /yang na rigs kyi bu yang dag pa'i bkas sems shin tu rnam par grol ba dag ni rnam grangs gang dang cis kyang bka' lung brda sprod de/tshe dang ldan pa de dag gis ldem po ngag tu smras pa ngag gis bka' lung brda sprod pa don chen por rig par bya'o/ /ldem po ngag tu smras pa gang zhe na/ gnyis su med pa'i mtshan nyid kyi ye shes te/ ldem po ngag thams cad la 'jug pa'i rgyu'o//gnyis su med pa'i mtshan nyid gang zhe na/ gang brjod pa'i tshig gnas su gyur pa'i dngos po de yang ngo bo nyid med la/ brjod pas yongs su bsgos pa'i 'du shes kyi spyod yul ni ngo bo nyid kyis yod pa gnyis su med pa'o/ /gnyis su med pa de la gnyis su mngon par zhen pa ni kun nas nyon mongs pa'o//gnyis su med par zhen pa ni rnam par byang ba'o/ /brjod pa thams cad kyi tshig gi gnas su gyur pa'i dngos po de yang tha snyad kyi dngos pos yongs su bsgos pa'i 'du shes kyi spyod yul te ngo bo nyid kyis yod pa'i phyir gnyis su med do//gnyis su med pa de la/ gnyis su mngon par zhen pa kun nas nyon mongs pa'o/ /gnyis su med par zhen pa med pa ni rnam par byang ba'o/ /de ltar na de ni gnyis su med pa'i mtshan nyid de/ de bzhin gshegs pa rnams kyi ldem po ngag thams cad la 'jug par rig par bya'o//de la ston pa phun sum tshogs pa rnam pa lnga dang / des de'i gdams ngag gis btags pas 'bras bu phun sum tshogs pa lnga dang / 'bras bu'i legs pa phun sum tshogs pa rnam pa lnga la gnas nas ldem po ngag tu smras par rig par bya'o//ston pa'i phun sum tshogs pa rnam pa lnga gang zhe na/ gang gi phyir ston pa dang / ston pa gang yin pa dang / gang ston pa dang / ci ltar ston pa dang / gang la ston pa ste/ de'i phun sum tshogs pa'i phyir ston pa phun sum tshogs par rig par bya'o/ /de gang gi phyir ston ce na/mya ngan las 'das pa de mngon sum du bya ba'i phyir ston pa ste/ de nas tshe dang ldan pa rab 'byor gyis dge slong de dag la 'di skad ces smras so/ /tshe dang ldan pa dag gar dong dong gang nas lhags/ de dag gis smras pa/ btsun pa rab 'byor gang du yang 'gro ba med pa dang /gang nas kyang 'ong ba med pa'i phyir bcom ldan 'das kyis chos bstan to zhes bya ba gang smras pa ste/ skye mched drug 'gags pa las lhag par de'i dbyings yod do zhes bya ba la sogs pa'i spros pa rnams kyis ma spros dang / chos rnams g.yo ba med pa'i phyir ro/ /'chad pa gang yin pa'i ston pa de gang yin pa dang /de'i mtshan nyid ci yin pa ni smras pa/ tshe dang ldan pa dag khyed kyi ston pa gang yin smras pa/ gang ma skyes shing yongs su mya ngan las 'das pa'o zhes bya ba gang yin pa ste/ chos kyi sku skye ba med cing 'jig pa med pa las bsams nas de skad ces smras so/ /ci ston pa ni smras pa/khyed kyis ji ltar chos bstan smras pa/ bcing ba'i phyir yang ma yin/ thar pa'i phyir yang ma yin/ zhes smra ba gang yin pa ste/ bcing ba dang grol ba ngo bo nyid kyis med pa dang / don khong du chud par bya ba'i phyir ro/ /ji ltar ston pa rnam pa gang gis ston pa ni smras pa khyed ji ltar rab tu ston/ smras pa/ ma rig pa spangs pa'i phyir yang ma yin/rig pa bskyed pa'i phyir yang ma yin zhes bya ba gang yin pa ste/ rig pa dang ma rig pa gnyis tha snyad kyi ngo bo nyid pas dmigs su med pa'i phyir ro/ /gang gis gang la ston pa ste/ su zhig su la ston ce na/ smras pa/ khyod su'i nyan thos/ smras pa/ gang gis thob pa med cing mngon par rdzogs par sangs rgyas pa med pa'o zhes bya ba gang yin pa ste/ gang gis gang dag gis thob pa med cing mngon par rdzogs par sangs rgyas pa med de/ mngon par rdzogs par byang chub pa las/ lhag pa de med pa'i phyir ro/ /de ltar gnyis su med pa'i mtshan nyid phun sum tshogs pas ston pa de/ston pa de nyid phun sum tshogs pa yin no/ /'bras bu phun sum tshogs pa gang zhe na/ phung po lhag ma ma lus pa'i mya ngan las 'das pa'i dbyings te/ smras pa/ khyed kyi tshangs pa mtshungs par spyod pa gang / smras pa/ gang khams gsum na mi rgyu ba dag go zhes bya ba gang yin pa ste/phung po'i lhag ma ma lus pa'i mya ngan las 'das pa'i dbyings kyi dus na de bzhin nyid rnam par dag pa tsam du gnas pa la bsams te de skad ces smras so/ /phung po lhag ma dang bcas pa'i mya ngan las 'das pa'i dbyings ni/ smras pa/ khyed ji srid cig na yongs su mya ngan las 'da'/smras pa/ nam de bzhin gshegs pa'i sprul pa mya ngan las 'das pa na'o zhes bya ba gang yin pa ste/ don dam par chos thams cad rang bzhin gyis yongs su mya ngan las 'das kyang kun rdzob tu mya ngan las 'das pa las bsams te/ de skad smras so/ / 'phags pa'i lam yongs su rdzogs par byed pa ni/ smras pa/ khyed kyis bya ba byas sam/ smras pa/ ngar 'dzin pa dang / nga yir 'dzin pa yongs su shes so zhes bya ba gang yin pa'o/ /bya ba byas pas bya ba byas te/ ngar 'dzin pa dang nga yir 'dzin pa gnyis kyis chos la bdag med par rab tu rtogs pa las brtsams te de skad smras so//nang gi dgra las rnam par rgyal ba ni/ smras pa/ khyed kyis nyon mongs pa zad dam/ smras pa/ chos thams cad shin tu zad pa'i phyir ro zhes bya ba gang yin pa ste/ nyon mongs pa'i dgra rnams ni nang gi yin pas chos la bdag med par rab tu rtogs na shin tu zad pa las bsams te de skad smras so//phyi rol gyi dgra las rnam par rgyal ba ni/ smras pa/ khyed kyis bdud btul lam/ smras pa/ phung po'i bdud mi dmigs pa'i phyir ro zhes bya ba gang yin pa ste/ phung po'i bdud mi dmigs pa'i phyir ro zhes bya ba ni gang dag gis phyi rol gyi skye mched kyis bsdus pa'i phung po de dag gis ni phyi rol gyi dgra'i sgrar rig par bya ste//de las rnam par rgyal ba ni kun du brtags pa'i phung po'i ngo bo nyid mi dmigs par rig par bya'o/ /de la 'bras bu'i legs pa phun sum tshogs pa ston pa la bsnyen bkur byed pa ni/smras pa/ khyod kyis ston pa'i g.yog byas sam/ smras pa/ lus kyis kyang ma byas/ ngag gis kyang ma byas/ sems kyis kyang ma byas zhes bya ba gang yin pa ste/ lus la sogs pas ni ma yin gyi/ chos nyid kyis g.yog byed pa'i phyir ro//dad pas byin pa yongs su sbyangs par gyur pa ni smras pa/ khyed kyis sbyin pa'i gnas kyis sbyangs sam/ smras pa/ 'dzin pa med cing sdud pa med pas so zhes bya ba gang yin pa ste/ sbyin pa'i gnas kyis sbyangs pa ni chos thams cad mi 'dzin pa'i phyir ro/ /'khor ba'i sdug bsngal las rgal bar gyur pa ni smras pa/khyed 'khor ba las brgal tam/ smras pa/ chad pa med cing rtag pa med pa'i phyir ro zhes bya ba gang yin pa ste/ 'khor ba las rgal ba ni chos la bdag med pa la/ chad pa med cing rtag pa med pa'i phyir ro/ /sbyin pa'i gnas kyi dngos po las yongs su mi nyams pa ni/smras pa/ khyed sbyin pa'i sar zhugs sam/ smras pa/ 'dzin pa thams cad las rnam par grol ba'i phyir ro zhes bya ba gang yin pa ste/ sbyin pa'i gnas kyi sar zhugs pa ni chos su 'dzin pa las rnam par grol ba'i phyir ro/ / chos kyis sprul pa ni de bzhin gshegs pa'i sras yin no zhes de bzhin gshegs pa la brten pa ni/ smras pa/ tshe dang ldan pa dag gar dong / smras pa/ de bzhin gshegs pa'i sprul pa gang bzhud par ro zhes bya ba gang yin pa ste/ gang du yang mi 'gro ba'i phyir de bzhin gshegs pa'i sprul pa byon pa lta bu'o//de ltar tshe dang ldan pa rab 'byor gyis kun dris te/ dge slong de dag gis lan btab nas 'khor de'i dge slong brgyad brgya ni len pa med par zag pa rnams las rnam par grol lo/ /srogs chags sum khri nyis stong gis ni chos rnams la chos kyi mig rdul dang bral zhing dri ma med par rnam par dag go zhes bya ba ni bka' lung brda sprod par 'di'i don chen po ste/'di ni slob pa dang mi slob pa thob par byed pa so so'i skye bo yongs su ma smin pa rnams slob par 'dod pa dang / yongs su smin pa rnams mi slob pa thob par byed pa'o//de nas bcom ldan 'das la tshe dang ldan pa 'od srungs chen pos 'di skad ces gsol to/ /ci tsam du dkon mchog brtsegs pa chen po'i chos kyi rnam grangs 'di rigs kyi bu 'am/ rigs kyi bu mo theg pa chen po la yang dag par zhugs pa rnams la phan 'dogs par gyur pa ni bcom ldan 'das ngo mtshar to//bde bar gshegs pa ngo mtshar to zhes bya ba 'di man chad kyis ni chos kyi rnam grangs 'di bshad pa'i don chen po ste/ sangs rgyas kyi chos dang sems can yongs su smin par bya ba sgrub pa'i phyir byang chub sems dpa' rnams la phan 'dogs par gyur pa ste/dbu ma'i lam dang gdams ngag go rims bzhin du sbyar ro/ /bcom ldan 'das dkon mchog brtsegs pa chen po'i chos kyi rnam grangs 'di las tshigs su bcad pa gcig tsam bstan na rigs kyi bu'am rigs kyi bu mo de la bsod nams ji tsam skye bar 'gyur zhes bya ba ni byang chub sems dpa'i sde snod kyi gdams ngag la mos pa'i legs pa dri ba'o//de skad ces gsol pa dang / bcom ldan 'das kyis tshe dang ldan pa 'od srungs chen po la 'di skad ces bka' stsal to/ /'od srungs rigs kyi bu'am rigs kyi bu mo la las 'jig rten gyi khams gang gA'i klung gi bye ma snyed rin po che sna bdun gyis rab tu gang bar byas te/zhes bya ba la sogs pa'i tshig 'di dag ni rnam pa lngas mos pa'i legs pa yongs su ston to/ /zhing dang / rten dang / dus chen po dang / phyug po'i bdag por 'gyur ba'i rgyu zil gyis gnon pa dang /lus 'gyur ba dang / de la gnas pa'i yul snod du bya ba dang / chad pa snod du bya ba dang / lus 'dor ba'i dus na mthong ba dang / las rnam par dag pa mthong ba'o/ /de la zhing chen po ni sangs rgyas rnams dang / de'i nyan thos rnams dang / mchod rten rnams so/ /rten pa ni rin po ches gang ba'i khams dang / chos gos la sogs pa'o/ dus ni bskal pa grangs med pa'o/ /de rnam pa la phyug pa'i bdag por 'gyur ba'i rgyu zil gyis gnon par rig par bya'o/ /dpag tu yod pa dang / dpag tu med pa'i 'bras bu la ltos pa dang /zad pa dang / mi zad pa'i chos nyid dang / bde ba rgya chen por ma yin pa dang / rgya chen por sgrub par byed pa dang / ye shes kyi tshogs dang / de'i ngo bo nyid dang / des de sgrub pa'i phyir ro/ /gzhan yang rnam pa lngas phyug pa'i bdag por gyur pa'i rgyu zil gyis gnon par rig par bya ste/bde ba chung ba'i rgyu dang / bde bar gcig tu nges pa med pa'i rgyu dang / shin tu bde ba ma yin pa'i rgyu dang / phyin ci log tu spyod pa bde ba'i rgyu dang / sdug bsngal ba'i lus kyi yongs su spyod pa bde ba'i rgyu'i phyir ro/ /de ni 'od srungs rigs kyi bu 'am rigs kyi bu mo gang la las 'jig rten gyi khams gang gA'i klung gi bye ma snyed rin po che sna bdun gyis rab tu gang bar byas te/de bzhin gshegs pa dgra bcom pa yang dag par rdzogs pa'i sangs rgyas rnams la sbyin pa byin pa dang / sangs rgyas bcom ldan 'das gang gA'i klung gi bye ma snyed rnams las de bzhin gshegs pa re re'i gtsug lag khang gang gA'i klung gi bye ma snyed brtsigs pa dang /sangs rgyas bcom ldan 'das gang gA'i klung gi bye ma snyed rnams la de bzhin gshegs pa re re'i nyan thos rnams kyi dge 'dun dpag tu med pa dag la bskal pa gang gA'i klung gi bye ma snyed du bde ba'i yo byad thams cad kyis rim gror byas pa dang /de dag yongs su mya ngan las 'das pa de dag gi mchod rten rin po che sna bdun las byas pa bas ni rigs kyi bu'am rigs kyi bu mo gang gis dkon mchog brtsegs pa'i chos kyi rnam grangs 'di las tshigs su bcad pa gcig tsam bstan te/bstan nas mi spong na de ni de bas bsod nams ches mang du bskyed do zhes bya ba'o/ /bud med gang la la zhig la bstan na de nam du yang log par ltung bar mi 'gro ste/ de nyid de'i bud med kyi lus kyi tha ma'o zhes bya ba ni lus 'gyur ba'o//sa phyogs gang du chos kyi rnams grangs 'di bshad pa 'am/ bstan pa 'am/ yi ger 'dri ba 'am/ glegs bam du byas te/ gzhag pa'i sa phyogs de lha dang bcas pa'i 'jig rten gyi mchod rten du gyur pa yin no zhes gang gsungs pa de ni de gnas pa'i yul snod du bya'o//smras pa/ gang las thob pa dang / yi ger 'dri ba de las 'di lta ste/ de bzhin gshegs pa la gus par bya ba bzhin du bya'o/ /'od srungs rigs kyi bu'am/ rigs kyi bu mo gang de bzhin gshegs pa'i chos smra ba la bkur sti byed pa dang / btsun par byed pa dang /rim gror byed pa dang / mchod par byed pa de la bla na med pa yang dag par rdzogs pa'i byang chub tu lung bstan to/ /zhes gang gsungs pa ni 'chad pa snod du bya ba'o/ /'chi ba'i dus kyi tshe na yang / de bzhin gshegs pa mthong bar 'gyur te/ lus dang / ngag dang / yid kyi las yongs su dag pa thab par 'gyur ro zhes bya ba ni lus 'dor ba'i dus na mthong ba rnam par dag pa dang / las rnam par dag pa thob pa'o/ /lus kyi las yongs su dag pa bcu 'thob par 'gyur te/ bcu gang zhe na/ zhes gang gsungs pa ni/ lus 'dor ba'i dus nyid na/rnam par dag pa 'thob pa'o/ /tshor bas sems kun du ma zin par 'chi ba'i dus byed pa zhes bya ba ni/ tshor ba mya ngan gyi rgyu med pa'i phyir mya ngan gyis zil gyis ma non pa'i phyir ro/ /de'i mig 'khrul par mi 'gyur zhes bya ba ni 'dris pa yongs su shes pa'i phyir ro/ / lag pa g.yob par mi byed pa dang / rkang pa phra bar mi byed pa zhes bya ba ni spyod lam phun sum tshogs pa'i phyir ro/ /ngan skyugs mi 'byung ba dang / gcin mi stor ba dang / de'i snying khar rdul mi 'byung zhes bya ba ni 'jigs pa med pa'i phyir ro/ /khu tshur ma 'chang ba dang / nam mkha' la mi bsnyegs pa zhes bya ba ni/ 'chi ba'i ltas kyi nyes pa med pa'i phyir ro/ /ji ltar 'dug pa de bzhin du tshe'i 'du byed 'dor bar 'gyur zhes bya ba ni lus las su rung ba'i phyir te/ lus kyi las yongs su dag pa bcu po de dag 'thob par 'gyur ro/ /de la lus kyi tshul nyes pa drug spangs par rig par bya ste/nyes pa drug gang zhe na/ dang pos ni mya ngan gyi nyes pa'o/ /gnyis pas ni 'dris pa yongs su mi shes pa'i nyes pa'o/ /gsum pa dang / bzhi pas ni spyod yul gyi nyes pa'o/ /lnga pa dang / drug pa dang / bdun pa dag gis ni 'jigs pa'i mtshan ma'i nyes pa'o/ / brgyad pa dang / dgu pas ni 'chi ba'i ltas kyi nyes pa'o/ /bcu pas ni lus las su mi rung ba'i nyes pa ste/ de dag ni nyes pa drug go/ /ngag gi las yongs su dag pa bcu thob par 'gyur te/ bcu gang zhe na/ 'di lta ste/ gdangs snyan pa'i tshig ces bya ba ni/ 'jigs pas brtags pa'i nyes pa med pa'i phyir ro//mnyen pa'i tshig ces bya ba ni/ rtsub pa'i nyes pa med pa'i phyir ro/ /'jam pa'i tshig ces bya ba ni tshig 'jam pas sangs rgyas bcom ldan 'das rnams kyi sangs rgyas kyi bka' brjod pa'i phyir ro/ /dga' ba'i tshig ces bya ba ni stong pa brjod pa'i phyir ro/ / snum pa'i tshig ces bya ba ni chos dang mthun pa'i brjod pa 'byin pa'i phyir ro/ /ma 'chal ba'i tshig ces bya ba ni dran pa nyams pa med pa'i phyir ro/ /gzung bar 'os pa'i tshig ces bya ba ni tshig snga phyi mi 'gal ba'i phyir ro/ /mnyan par 'os pa'i tshig ces bya ba ni rigs pa dang mi 'gal ba'i phyir ro//lhas yongs su gzung ba'i tshig ces bya ba ni bstan pa la [(]dang [,]dad [)]pa'i lhas yongs su gzung ba'i phyir ro/ /sangs rgyas kyis yongs su gzung zhes bya ba ni de bzhin gshegs pas yongs su gzung ba ste/ ngag gi las yongs su dag pa bcu po de dag rab tu 'thob po/ /rab tu dga' ba byed pa'i dus na ngag gi tshul nyes pa lnga rnam par spangs par rig par bya ste/nyes pa lnga gang zhe na/ dang pos ni 'jigs pas brtabs pa'i nyes pa'o/ /gnyis pas ni rtsub pa'i nyes pa'o/ /gsum pas ni sangs rgyas kyi bka' bor te rdzogs pa'i sangs rgyas ma yin pa'i brjod pa'i nyes pa'o//bzhi pas ni de bzhin gshegs pa la bstod pa mi byed pa'i nyes pa'o/ /lnga pas ni chos dang mthun pas mi bsgo ba'i nyes pa'o/ /bka' lung brda sprod pa'i dus na ngag gi tshul nyes pa rnam pa lnga spangs te/ nyes pa lnga gang zhe na/ drug pas ni rtogs par bya ba la dran pa nyams pa'i nyes pa'o//bdun pas ni tshig snga phyi 'gal ba'i nyes pa'o/ /brgyad pas ni rigs pa dang 'gal ba'i nyes pa'o/ /dgu pas ni bstan pa la dga' ba'i lha mi dga' ba'i nyes pa'o/ /bcu pas ni de bzhin gshegs pa mi mnyes pa'i nyes pa ste/ de dag ni dus gnyis kyi ngag gi nyes pa'o/ /yid kyi las yongs su dag pa bcu thob ste/bcu gang zhe na 'di lta ste/ khro bar mi 'gyur zhes bya ba ni da ltar byung ba'i gnod pa byed pa la ci mi snyam pa'i phyir ro/ /khon du 'dzin pa med pa zhes bya ba ni 'das pa na gnod pa byas pa la ci mi snyam pa'i phyir ro/ /'chab par mi 'gyur zhes bya ba ni sdig pa mi 'chab pa'i phyir ro/ /'tshig par mi 'gyur zhes bya ba ni/'gyod pas yongs su gdung ba med pa'i phyir ro/ /nyes pa la mi dga' ba zhes bya ba ni 'dod pa'i longs spyod 'dod pa med pa'i phyir ro/ /'khon par mi dga' zhes bya ba ni dgrar 'gyur ba la mi dga' ba'i phyir ro/ /'du shes phyin ci log tu mi 'gyur zhes bya ba ni/ bslab pa'i gnas rnams la lta ba ngan pas yongs su mi 'dzin pa'i phyir ro//spong ba la bag yod pa zhes bya ba ni/ spong ba sems ma 'khrul ba'i phyir ro/ /ma zhum pa'i sems kyis sangs rgyas kyi zhing yongs su dag pa 'dzin par 'gyur zhes bya ba ni bdag yi ma bsad par sangs rgyas dang byang chub sems dpa' bzhugs bzhugs pa'i sangs rgyas kyi zhing rgya chen po yongs su 'dzin pa'i phyir ro//nga rgyal dang che ba'i nga rgyal med par sangs rgyas kyi chos thams cad mngon par sgrub pa'i ting nge 'dzin rab tu 'thob ces bya ba la nga rgyal dang che ba'i nga rgyal med ces bya ba ni/ 'jig rten pa'i ting nge 'dzin dang snyoms par 'jug pa bsam pa phra mos kyang khyad par du 'phags so snyam pa'i rlom sems med de/ de 'dod pa med pas sangs rgyas kyi chos thams cad mngon par sgrub pa'i rgyu chos thams cad las khyad par du 'phags pa'i ting nge 'dzin rab tu 'thob pa'o//de la yid kyi tshul nyes pa lnga spangs par rig par bya ste/ 'di ltar bzhi po dag ni tshe 'di'i don las brtsams pa'o/ /lnga pas ni tshe rabs gzhan las brtsams pa'o/ /nyes pa lnga gang zhe na/ dang po dang gnyis pas ni mi bzod pa'i nyes pa'o/ /gsum pa dang bzhi pas ni sdig pa 'chab pa'i nyes pa'o//lnga pa dang drug pas ni 'dod pa'i nyes pa'o/ /bdun pa dang / brgyad pas ni dran pa nyams pa'i nyes pa'o/ /dgu pa dang bcu pas ni smon lam gyi nyes pa ste/ de dag ni nyes pa lnga'o/ /byang chub sems dpa' sde snod kyi gdams ngag la mos pa'i legs pa dpag tu med/grangs med pa bas de'i rnam par 'byed pa'i bstan pa rnam par 'byed pa la mos pa'i legs pa ches dpag tu med cing grangs med par reg par bya'o/ /'chi ba'i dus kyi tshe sgrub pa don chen por ston pa/ slob dpon gyi chos kyi bdag pos rnam pa gzhan gyis brjod do/ /de bzhin gshegs pa mthong bas dge bar 'chi ba dang /bde bar 'chi ba dang bde 'gro'i 'chi ba'i phyir ro/ /las gsum rnam par dag pa la/ lus kyi las yongs su dag pa las gcig gis ni mya ngan gyi rgyu med pa'i phyir rab tu dga' ba la gnas pa ston to/ /gnyis pas ni so sor mngon par shes pa'i phyir dran pa nyams pa med par ston to//gsum pa dang bzhi pas ni rkang lag mi g.yo ba'i phyir gnad du gnod pa med pa'o/ /lnga pa dang drug pa dang bdun pa rnams kyis ni ngan skyugs la sogs pa med pas 'jigs pa med pa'o/ /brgyad pa dang dgu pas ni khu tshur 'chang ba la sogs pa med pas 'chi ba'i ltas med pa'o/ /bcu pas ni nyam chung ba med pas 'dug bzhin du tshe'i 'du byed dag 'dor ba'o//ngag gi las yongs su dag pa brgyad po dag gis ni tshig gcom chung ba ma yin pa dang / tshig rgyun chad pa ma yin pa dang / tshig skad zhom pa ma yin pa dang / tshig rtsub pa ma yin pa dang / tshig 'khrug pa ma yin pa dang / tshig 'khrul pa ma yin pa dang /chos dang ldan pa'i tshig tu ston to/ /dgu pa dang bcu pas ni tshul 'chos pa'i tshig ste/ bde 'gror 'gro ba dang / sangs rgyas dang / byang chub sems dpa' dang phrad pa'i dbang du byas pa'o/ /yid kyi las yongs su dag pa rnams las bskyod pa dang / gleng ba dang / smon pa'i dbang du byas te gnyis gnyis su rig par bya'o//de la nyes pa la mi dga' ba ni 'dod pa la mi smod pa'i phyir ro/ /'khon la mi dga' ba ni phyir rgol ba'i dngos po mi tshol ba'i phyir ro/ /tshul khrims rnam par dag pa'i dbang du byas nas gcig go/ /rnam par g.yeng ba'i dbang du byas nas spong ba la bag yod pa'o//zhing yongs su dag par skyes te bag tsha ba med pa'i dbang du byas nas gcig go/ /nga rgyal dang che ba'i nga rgyal gyis byang chub sems dpa' rnams dang / bdag yongs su 'jal ba dang / de dang der sbyor ba mthun pa'i dbang du byas nas gcig go/ /lhag ma rnams kyis ni zang zing gi mchod pa bya bas chog par 'dzin pa rnams yongs su gzung ba'i mchod pa bya ba la gzung ba ste/'od srungs gang la la zhig bde ba'i yo byad thams cad kyis de la bkur sti byed par 'dod pa dang / mchod pa thams cad kyis mchod par 'dod pa des/ dkon mchog brtsegs pa chen po'i chos kyi rnam grangs 'di kun chub par gyis shig /yi ger bris shig /lhogs shig /long shig /'od srungs de bzhin gshegs pa dgra bcom pa yang dag par rdzogs pa'i sangs rgyas rnams la bla na med pa'i mchod pa byas par 'gyur ro zhes gang gsungs pa'o/ / bcom ldan 'das dgyes shing de skad ces bka' stsal te/ tshe dang ldan pa 'od srungs chen po dang / byang chub sems dpa' de dag dang / lha dang mi dang lha ma yin dang / dri zar bcas pa'i 'jig rten yi rangs te bcom ldan 'das kyis gsungs pa la mngon par bstod do zhes bya ba ni yang dag par sdud par byed pa'i byang chub sems dpa' gnas brtan 'od srungs chen po la sogs pa'i dga' bar bstan pas don ji lta ba bzhin du ming btags pa'i chos kyi rnam grangs chen po 'di yongs su rdzogs par ston to//rgyal ba'i blo gros kyis ni byed bcug ste/ /dkon mchog brtsegs pa bshad pa byas pa yis//bsod nams bdag gis thob pa gang yin pa/ des ni 'gro ba rgyal ba thob gyur cig /'phags pa dkon mchog brtsegs pa chen po'i chos kyi rnam grangs le'u stong phrag brgya pa las/ 'od srungs kyi le'u rgya cher 'grel pa slob dpon blo brtan gyis mdzad pa rdzogs so// //