CLOSE WINDOW

D4007
བོད་ཡིག

/ //bal po'i paN+Di ta dang / chags lo tsA bas bsgyur ba'o//[ @##/ /rgya gar skad du/ karma A ba ra Ni bi sho d+ha na bi d+hi b+hA Sh+yaM nA ma/ bod skad du/ las kyi sgrib pa rnam par sbyong ba'i cho ga bshad pa zhes bya ba/ sangs rgyas dang byang chub sems dpa' thams cad la phyag 'tshal lo//thub pa dri mas ma gos shing / ye shes dkyil 'khor rab gsal ba/ gsung gi zer gyis 'gro kun gyi/ /sgrib pa med sred nyi ma rgyal/ /dpa' bo gang dag 'gro ba sdug bsngal gyi rgya mtsho yang bar bying ba rnams kyi sems phrogs shing de dag gdon par 'dod pa'i yid can dag gis byang chub la blo gzhol bar bya ste/de thob pa'i lam dam par zhugs la mi nyams par bya zhing ji ltar bya ba de 'phel bar 'gyur ba'i thabs la brtson par bya ste/ gal te rkyen 'ga' zhig gis nyams par gyur na yang de ma thag tu phyir ldang ba'i thabs la 'bad par bya ste/ pham pa'i gnas lta bu'i chos spyad pas sdom pa slar blang ba dang /zag pa 'bring las gyur pa rnams gsum la bshags pa dang / chung ngu las gyur pa rnams gcig la bshags pa dang / de dag las lhag ma rnams rang gi sems kyis bsdom par bya ba rnams ji ltar spyad pa bzhin chos dang mthun par sor chud par bya'o//de dag gis las kyi sgrib pa lhag mar gyur pa dag dang / gzhan yang thog ma med pa'i dus nas kun nas bsags pa'i sgrib pa stug po ji snyed pa rnams kyis byang chub chen po la gegs su mi 'gyur bar bya ba'i phyir thub pas gnang ba'i byang chub sems dpa'i ltung ba bshags pa'i cho ga 'dis nyin mtshan dus drug tu bshags pa la 'bad par bya'o//de la yang gang la bdag gi sgrib pa rnams bshags par bya ba de dag la dpung gnyen du gzung ste/ gus pas phyag 'tshal la gsol ba gdab par bya ba yin pas thog mar skyabs su 'gro ba ni/ bdag ming 'di zhes bgyi ba sangs rgyas la skyabs su mchi'o zhes bya ba la sogs pa ste/yang dag par rdzogs pa'i sangs rgyas dang / chos dang / de'i rjes su sgrub pa'i dge 'dun ni rim pa bzhin 'khor ba las rgal ba'i lam ston pa dang / lam dang / de sgrub pa'i grogs yin pa'i phyir ro/ /gzhan dbyig gi snying po dang / 'phrog byed dang /seng ge dang / mthu bo che la sogs pa dang / ser skya dang / gzegs zan la sogs pa ni ma yin te/ rang nyid srid pa'i btson ra mi bzad par las dang nyon mongs pa'i lcags sgrog dam pos bcings pa la sogs pa'i srin po 'jigs su rung ba bdag gis kun bcom pa'i phyir ro/ /de bas na 'di dag kyang srid pa'i btson ra nas thar pa sangs rgyas kho na la rag las pa'i phyir/sems dang ldan pa su zhig sangs rgyas la sogs pa bor te gzhan la skyabs su 'gro bar byed/ phyag 'tshal ba ni de bzhin gshegs pa dgra bcom pa yang dag par rdzogs pa'i sangs rgyas shAkya thub pa la phyag 'tshal lo zhes bya ba la sogs pa ste/de bzhin gshegs pa sum cu rtsa lnga po 'di dag gis byang chub sems dpa'i spyad pa spyod pa'i tshe bdag cag bla na med pa yang dag par rdzogs pa'i byang chub tu mngon par rdzogs par sangs rgyas pa na/ gang zhig bdag cag gi mtshan 'dzin cing phyag 'tshal ba de dag kyang las kyi sgrib pa zad par gyur cig ces smon lam btab po// smon lam gyi stobs can yin pa'i phyir/ 'di rnams phyag 'tshal ba'i gnas su bkod de/ gzhan rnams la phyag 'tshal bar bya ba ma yin no zhes pa ni mi brjod do/ de la de bzhin nyid rtog pa'am der nges pa'o / /dgra bcom pa ni ar ni dgra'am rtsibs te/de bcom zhing bcag pa dang had do/ /nyon mongs pa bag chags dang bcas shing yang mi skye ba'i chos can du byas pas rten cing 'brel par 'byung ba'i rtsibs bcag pa'i phyir dgra bcom pa zhes bya ste ar had do/ /yang na 'os pa ste/ khams gsum pa thams cad kyis mchod par 'os pa la sogs pa'i phyir ro//yang dag par ram/ mnyam par kun du ma lus pa'i phyir sangs rgyas pas yang dag par rdzogs par sangs rgyas pa 'di dag gis spangs pa dang yon tan gyi che ba gnyis brjod do/ /gzhan gyi yon tan du yang blta'o/ /shAkya thub pa ni shAkya'i rigs su thub pa byung bas de skad ces bya'o//yang dag par rdzogs pa'i sangs rgyas kyi ye shes ni mi phyed pas rdo rje ste/ de'i snying pos 'jig tshogs su lta ba la sogs pa mi mthun pa'i phyogs thams cad 'joms pas rdo rje snying po rab tu 'joms pa'o/ /de bzhin du gzhan rnams la yang yon tan gyi mtshan nyid rjes su 'brangs nas ji ltar rigs par mtshan gyi don bshad par bya ste/yon tan mtha' yas pas re re la thams cad kyi mtshan brjod kyang de'i rgyu mtshan gnas pa'i phyir rang dga'i nyes par 'gyur du dogs pas mi bya'o/ /gsol ba gdab pa ni de dag la sogs te zhes bya ba la sogs pa ste/ bcom ldan 'das ni nyes pa rnams bcom pa'am/dpal la sogs pa'i yon tan dang ldan pa'o/ /ji snyed ni ma lus pa'o/ /bzhugs pa dang 'tsho ba dang gzhes pa ni rim pa bzhin du chos kyi sku la sogs pa gsum gyis so/ /bdag la dgongs pa ni thugs gtad par gsol ba'o/ /bdag gis gsol ba tshul dang mthun pa yin gyi/ sangs rgyas rnams bsnyel ba mi mnga' ba'i chos nyid brnyes pa nam du yang sems can gcig la yang mi dgongs pa mi srid do//de ltar na sems can rnams 'khor ba'i sdug bsngal yang ba 'di dag las ci'i phyir grol bar mi mdzad ce na/ sems can rnams rang rang gi nyes pa ste/ ji ltar nyi mi'i dkyil 'khor gzi brjid dang ldan pa'i 'od kyis phyogs thams cad rgyas par byed pa nyid kyang dmus long dag gis mi mthong ba bzhin no//des na dkon mchog ta la la las kyang / dmus long gis ni nyi ma mi mthong yang / /de med ma yin 'jig rten kun tu 'char / /mig dang ldan pas shar bar shes gyur nas/ /kun kyang so so rang gi las la 'jug /ces bya ba la sogs pa don 'di rgyas par bstan to / /yul de dag gang la bshags par bya ba sgrib pa'i dngos po ni bdag gis byas pa la sogs pa ste/ bdag gis ni byed pa po'o/ /skye ba 'di dang skye ba thog ma dang tha ma ma mchis pa ni byas pa'i dus so/ /'khor ba na 'khor ba'i tshe skye gnas gzhan dag ni byas pa'i gnas so//byas pa'i sdig pa'i rang bzhin spyir brjod pa ni sdig pa'i las zhes bya ba la sogs pa ste/ gang ci yang rung ste/ sdug bsngal gyi rtsa bar 'gyur ba'i las rang gis byas shing gzhan de ltar ma yin yang byas pa la dga' bas rjes su yi rang ba dang / bye brag tu rnam par smin pa lci ba ni mchod rten gyi dkor ram zhes bya ba la sogs pa ste/ ma byin par len pa rnams kyi nang na lci ba sbyin bdag dad pa can rnams kyis gnas chen po brgyad la sogs pa'i mchod rten gyi ched du phul ba'i yo byad dam/ phyogs bzhi'i dge 'dun thams cad dbang ba dang gang zag so so'i bdag gir ma byas pa phrogs pa la sogs pa'o//de dag gis ngan song ngan 'gro rnam pa gsum gyi bar du yang / sdug bsngal mi bzad pa myong bar byed cing sbyang dka' bas rnam par smin pa lci ba'o/ /shin tu sdug bsngal ba'i nyes pa'i rgyu ni mtshams med pa'i las zhes bya ba la sogs pa ste/ pha bsad pa la sogs pa 'di dag gang gis byas pa la sogs pa ni shin tu bzod par dka' ba'i sdug bsngal nyams su 'bab pa'i mnar med pa'i sems can dmyal ba gzhan las sdug bsngal khyad par can du 'gyur bar skye ba la gang gis kyang bar mchod pas mtshams med pa ste/des na 'di dag shin tu sdug bsngal ba'i nyes pa'i rgyu zhes kyang bya'o//gzhi thams cad kyis bsdus pa'i mi dge ba ni mi dge ba bcu zhes bya ba la sogs pa ste/ ngan 'gro gsum ci rigs par rnam par smin pa myong bar 'gyur ba lus la sogs pa gzhi thams cad kyi las te/ lus la brten pa srog gcod pa la sogs pa gsum dang / ngag la brten pa brdzun du smra ba la sogs pa bzhi dang /yid la brten pa gnod sems la sogs pa'o/ /de gsum gyis ni gzhi thams cad bsdus pa mi dge ba'i las kyi lam 'dus pa zhes bya'o/ /de las gzhan pa'i sgrib pa de dang rjes su mthun pa rnams ni las kyi sgrib pa gang gis zhes bya ba la sogs pa'o/ /de dag kyang gang byas na rang dang gzhan gyi don sgrub pa la nus pa med cing bar du chod pa'i skye ba 'dzin pa/sems dmyal yi dags dud 'gro dang / /kla klo 'du shes med lha dang / /log lta sangs rgyas la mi 'dun/ /lkugs pa mi khom gnas brgyad do/ /zhes gsungs pa de dag tu skye bar 'gyur ba'i gnas te/ chos zab mo spong ba dang /ltung ba phra mo dag la mi 'dzem pa dang / ser snas yo byad la sogs pa la zhen te cung zad kyang mi gtong bar sogs pa dang / sangs rgyas la sogs pa la mi gus pa dang / thabs mi mkhas pas 'du shes med pa'i snyoms par 'jug pa yid la byed pa dang / gzhan gyi mig gi dbang po la sogs pa dang bral bar byed pa dang /log par lta ba'i rjes su phyogs pa dang / smon lam ma sbyangs pa ste/ ji ltar rigs par gzhan yang bgrang ba las 'das pa shin tu phra bar 'gyur ba de dag thams cad do/ /dngos po de dag ji ltar bshags pa ni sangs rgyas bcom ldan 'das zhes bya ba la sogs pa ste/sangs rgyas rnams mngon du byas te mthol ba la sogs pa byas te phyis sdom pa'o/ /de la ye shes su gyur pa ni ji lta ba'i rnam pa don dam pa dang / ji snyed pa'i rang bzhin kun rdzob thams cad mkhyen pa'i rang bzhin can no/ /spyan du gyur pa ni spyan lnga rnam par dag pas mkhyen pa'o//dbang du gyur pa ni don thams cad phyin ci ma log par mkhyen pa'o/ /tshad mar gyur pa ni dbang du gyur pa de nyid kyi phyir ro/ /mkhyen pa ni ye shes kyis so/ /gzigs pa ni spyan gyis te de dag gi spyan sngar ro/ /yang na mngon par shes pa drug dang sbyar ro zhes kha cig 'chad do zhes grag go / / mthol ba ni rang gi ngo bos 'di byas so zhes ngag tu brjod pa'o/ /de dag la nyes pa rnam pa du mar lta zhing sems kyis mi mthun par bzung nas nyes pa can du ston pa ni bshags pa'o/ /mi 'chab pa ni bdag gis bgyis pa'i sdig pa rnams gzhan gyis tshor te 'ong ngo snyam nas de'i thabs yid la mi byed pa'o//slan chad kyang sdom pa ni gnyen pos kun nas bzung ste/ snga ma'i rjes su mi 'jug par rgyun kun nas gcod pa'o/ /de dag gis ni bdag gis byas shing bsags pa'i sdig pa'i las zad par 'gyur ba'i stobs bzhi yang bstan te/ rten gyi stobs dang / rnam par sun 'byin pa'i stobs dang / gnyen po kun du spyod pa'i stobs dang / sor chud pa'i stobs so/ /de la gang la sgrib pa rnams bshags par bya ba'i rten dkon mchog gsum dang / de bzhin gshegs pa rnams la skyabs su 'gro ba dang / phyag 'tshal ba ni rten gyi stobs so/ /byas pa'i rnams grangs nye bar rtog cing nyes pa du ma'i 'byung gnas su bzung nas yid la gcags pas bdag nyes pa can du brjod pa ni rnam par sun 'byin pa'i stobs so//gnyen po de dang de dag yid la byas pas yang mi 'byung bar byed pa ni gnyen po kun du spyod pa dang / sor chud pa'i stobs so/ /stobs bzhi po de yid la byas shing sems thag pa nas kha ton du byas na las kyi sgrib pa rnams kun nas bsrabs par 'gyur te/ji skad du/ byams pa chos bzhi po 'di dag ni sdig pa byas shing bsags pa rnams kun nas bsrabs par 'gyur ba ste/ bzhi gang zhe na/ rten gyi stobs dang / rnam par sun 'byin pa'i stobs dang / gnyen po kun du spyod pa'i stobs dang / sor chud pa'i stobs so/ /des ni byang chub sems dpa' gang dag sdig pa'i las zad par 'dod pa dag gis mdo 'di mang du yid la bya'o/ /kha ton du bya'o zhes gsungs pa bzhin no/ /de ltar las kyi sgrib pa rnams bshags nas/ da ni bdag gis byas pa'i dge ba'i rtsa ba rnams yang dag pa'i bsngo bas ma zin pas 'bras bu med pa 'am/yod kyang dman par 'gyur bas srid pa'i rgya mtsho las rgal ba'i phyir dge ba rnams bsngo bar bya ste/ des ni 'byung khungs nas 'dus byas pa'i gser gyi phung po mgar ba mkhas pas rgyan du byas na rang dang gzhan dang nye bar mkho ba'i yan lag tu 'gyur ba bzhin du ji ltar 'dod pa'i 'bras bur 'gyur ro//de la gang gi mdun du bsngo bar bya ba dag la gsol ba gdab pa ni sangs rgyas zhes bya ba la sogs pa'o/ /gang bsngo bar bya ba'i dge ba ni bdag gi zhes bya ba la sogs pa ste/ bdag ces bya ba la sogs pa ni snga ma bzhin no/ /dge ba'i rang bzhin ni rnam pa gsum ste/ sbyin pa las byung ba dang /tshul khrims las byung ba dang / bsgoms pa las byung ba'o/ /de la sbyin pa las byung ba ni/ sbyin pa tha na zhes bya ba la sogs pa ste/ chen por 'gyur ba'i sbyin pa snod du gyur pa la chos kyi sbyin pa dang / 'jigs pa la mi 'jigs pa'i sbyin pa dang / byams pa'i sbyin pa dang / zang zing gi sbyin pa dngos po mig la sogs pa nas yongs su btang ba dang /khyad par du 'phags pa dag la phyi rol du gyur pa'i sems can gyis bsdus pa'i bu la sogs pa btang ba dang / de las gzhan pa gling bzhi la sogs pa btang ba dang / rgyal srid dang / de'i phyed dang / yul 'khor dang / ljongs dang / grong la sogs pa dang /zas dang skom la sogs pa btang ba dang / tha na dud 'gro'i skye gnas su skyes pa la kham gcig tsam byin pa yan chad de/ yul dang dngos po shin tu dman par gyur pa'o / /tshul khrims las byung ba'i dge ba thams cad la so sor thar pa'i sdom pas bsdus pa/ bsnyen par rdzogs pa nas dge bsnyen gyi bar gyi thun mong gi tshul khrims bsrung ba'o//rab tu byung bar gtogs pa kho na ni tshangs par spyod pa kho na la gnas pa'o/ /byang chub sems dpa' kho na'i dbang du byas pa sems can rnams yongs su smin par bya ba dang / byang chub kyi sems kyi dge ba'i rtsa ba ste/ sbyor bas sems can smin par byed pa dang /bsam pas byang chub kyi sems yongs su mi gtong ba kho na byang chub sems dpa'i tshul khrims rnam par dag pa yin pa'i phyir ro/ /de ltar ma yin na dge ba'i las kyi lam bcu la bskal pa bye ba tsam du mi dge ba'i skabs ma phye yang tshul khrims dag pa zhes mi bya la/ bsam pa dang sbyor ba de lta bus brtson na 'dod pa'i yon tan lnga dang 'dre bar spyod kyang tshul khrims rnam par dag pa zhes brjod de/de skad du yang bcom ldan 'das ma las/ byang chub sems dpa' gang zhig 'dod yon lnga spyod kyang / /sangs rgyas chos dang 'phags pa'i dge 'dun skyabs song ste/ /sangs rgyas 'grub bya snyam du kun mkhyen yid byed na//mkhas pa tshul khrims pha rol phyin gnas rig par bya/ /gal te bskal pa bye bar dge ba'i las lam bcu/ spyod kyang dgra bcom rang rgyal nyid du 'dod skyed na/ de tshe tshul khrims skyon byung tshul khrims nyams pa yin/ sems bskyed de ni phas pham pas kyang shin tu lci//zhes gsungs so/ /'di yang gzhan gyi don gtso bor gyur pa yin gyi/ rang gi don 'gog pa ni ma yin no/ /bsgoms pa las byung ba ni bla na med pa'i ye shes kyi dge ba'i rtsa ba zhes bya ba ste/ bla na med pa'i ye shes ni rnam pa thams cad mkhyen pa ste/ kun rdzob kyis bsdus pa ji snyed yod pa dang /don dam pas bsdus pa ji lta bar gnas pa thams cad mkhyen pa nyan thos la sogs pa las phul du byung ba'o/ /de ni chos rnams kyi rang bzhin stong pa nyid dang / sgyu ma lta bu bsgoms pa las byung ba ste/ de dag goms pa phul du phyin pa na spros pa thams cad de / rang bzhin med pa gsal ba rab tu gyur nas ci yang mthong ba med pa'i tshul gyis chos rnams rang bzhin stong pa nyid ji lta ba yul du byed cing sgyu ma lta bu'i don nam mkha' dang mnyam pa rgyu dang 'bras bus bsdus pa'i chos thams cad lag mthil du skyu ru ra gzhag pa bzhin du sgrib pa'i dri ma spangs pa las mngon sum du 'gyur ro//des na slob dpon zhi ba'i lhas kyang /nyon mongs shes bya'i sgrib pa ni/ /mun pa'i gnyen po stong pa nyid/ /myur du thams cad mkhyen 'dod pas/ ci phyir de ni sgom mi byed/ /ces thams cad mkhyen pa'i ye shes kyi rgyu stong pa nyid bsgom pa gsungs te/ de ltar sbyin pa dang tshul khrims dang bsgoms pa las byung ba de thams cad bsngo bar bya'o//ji ltar bsngo zhe na/ bsngo ba'i rnam pa ni gcig tu bsdus shing zhes bya ba la sogs pa ste/ de thams cad blos phyogs gcig tu byas te/ gzhan las phul du byung ba rnams so/ /de la gcig tu bsdus pa ni rang gi ngo bo'i sgo nas so/ /bzlums pa ni bya ba'i sgo nas so/ /bsdoms pa ni nus pa'i sgo nas so//bla na ma mchis pa la sogs pa gsum ni nyan thos dang rang sangs rgyas dang / byang chub sems dpa' las khyad par du 'phags pa ste/ de ltar bsngo ba'o/ /gang du bsngo ba ni bla na med pa zhes bya ba la sogs pa ste gnas skabs der ro/ /thabs gang gis bsngo ba ni ji ltar zhes bya ba la sogs pa ste/'das pa la sogs pa'i bsngo ba ji lta bas so/ /de yang sangs rgyas bcom ldan 'das kyis dge ba'i rtsa ba rnams yang dag par med pa shes bzhin du mdun du byas nas dge ba'i rtsa ba de dag dang / sngo bar byed pa'i sems dang / gang du bsngo bar bya ba'i bla na med pa'i byang chub kyang don dam pa'i mtshan ma cung zad du yang mi 'dzin par sems can gyi ched du bla na med pa'i byang chub tu bsngo bar mdzad pa de bzhin du bdag gis kyang bsngo ba'am/de lta bu'i thabs bdag gis mngon du bya bar ma nus na yang / sangs rgyas bcom ldan 'das kyis dge ba'i rtsa ba ji ltar bsngos pa de bzhin du bdag gi dge ba'i rtsa ba 'di yang bsngo'o zhes tshul de ltar bsngo bar bya ba ni sangs rgyas kyis yongs su gnang ba thabs dang bcas pa'i bsngo ba yin no//de ltar sdig pa bshags pa dang / dge ba bsngo ba gsungs nas/ byang chub chen po thob pa'i thabs bsdus te brjod pa ni sdig pa thams cad ni so sor bshags so zhes bya ba la sogs pa ste/srid pa'i btson rar 'khyams shing byang chub chen po mi 'thob pa'i rgyu ni rang gis sdig pa'i las bsags pa dang / gzhan gyi dge ba la zhe sdang ba dang / sangs rgyas kyi bstan pa med cing de 'jig rten na mi bzhugs pa dang / smon lam phyin ci log btab pa dang / sangs rgyas la ma gus pa dang /de'i skyabs dang bral ba las yin la/ nyes pa de dag rim pa bzhin sdig pa bshags pa la sogs pas byang chub chen po thob par 'gyur ro/ /des na slob dpon dbyig gnyen gyis kyang / byang chub chen po 'thob pa'i rgyu ni/ sdig pa thams cad ni so sor bshags so/ /bsod nams thams cad kyi rjes su yi rang ngo //sangs rgyas thams cad la gsol ba 'debs so/ /bdag gi ye shes bla na med pa'i mchog tu gyur cig ces bya'o zhes gsungs te/ sngar bshad pa bzhin stobs bzhi'i sgo nas rang gis byas shing bsags pa'i sdig pa bshags pa dang / zag pa dang bcas pa dang / zag pa med pa'i dge ba rnams byed pa'i bsam pas phul du byung ba'i dga' ba thob pa dang /sangs rgyas bcom ldan 'das gang dag chos kyi 'khor lo bskor bar mi bzhed cing thugs las chud pa la gzhol bar mdzad pa dang / mya ngan las 'das pa kun du ston pa rnams la 'gro ba rnams kyi don du chos kyi 'khor lo bskor ba dang /mya ngan las mi 'da' bar bskal pa grangs med par bzhugs par gsol ba 'debs pa dang / dge ba gang dang gang byas pa rnams kyis bdag ye shes kyi mchog rnam pa thams cad mkhyen par smon lam 'debs so / /sangs rgyas rnams pa thal mo sbyar ba ni phyag 'tshal ba yin la/ skyabs su nye bar mchi ba ni/'jigs pa thams cad kyi dpung gnyen du gzung ba ste/ des ni sangs rgyas rnams la gus shing skyabs kyi gnas su gzung ba'o/ /de dag gis ni mdo sde gzhan nas phung po gsum zhes gang bstan pa de yang bsdus te/ sdig pa bshags pa ni bshags pa'i phung po'o/ /dge ba'i rtsa ba bsngo ba ni bsngo ba'i phung po'o//byang chub chen po thob pa'i thabs kyis sdig pa ni bshags pas so/ /rjes su yi rang ba ni bsngo ba'i yan lag ste/ rjes su yi rang ba'i dge ba bsngo bas so/ /gsol ba 'debs pa ni gsol ba 'debs pa'i phung po'o/ /smon lam 'debs pa ni bsngo ba'i rang bzhin yin no/ / phyag 'tshal ba dang skyabs su gzung ba ni rten gyi stobs te/ sdig pa bshags pa'i phung por 'dus so/ /de dag sems thag pa nas nyin lan gsum mtshan lan gsum du rgyun mi 'chad par byas na/ byang chub sems dpa' de'i las kyi lam gyi sgrib pa rnams zad nas 'dod pa'i 'bras bu mngon du 'gyur bas 'di la brtson par bya'o//slob dpon zhi ba'i lhas kyang / nyin dang mtshan mo lan gsum du/ /phung po gsum pa gdon bya zhing / /rgyal dang byang chub sems brten pas/ /ltung ba'i lhag ma des zhi bya/ /zhes gsungs so/ /ji ltar byang chub sems dpa'i las kyi sgrib pa rnams 'dis sbyang bar bya ba bzhin du gzhan thams cad kyang ltung ba rnams chos dang mthun par sor chud par byas nas las kyi sgrib pa lhag ma rnams 'dis sbyang bar bya ba kho na'o//gzhan dag las kyi sgrib pa zad par 'dod pa su yang rung ba dag gis kyang 'di la brtson par bya'o/ /de ltar na las kyi sgrib pa rnams zad par 'gyur ro/ /sangs rgyas bcom ldan 'das nyes pa ma lus pa drungs nas phyung zhing ma nor bar rtogs pa'i ye shes can brtse ba chen po gzhan sdug bsngal dang bral bar bzhed pa'i bdag nyid chen po yin pas 'di la yid gnyis cung zad kyang med de/brdzun gsung ba mi srid pa'i phyir ro/ /spyod yul ma yin 'dod chen la/ /rang dang gzhan gyi don gyi ngor/ /bdag gis 'bad bgyis nongs pa la //skye bo mkhas rnams bzod par mdzod/ /'di byas pa las bsod nams ni/ /dam tshig rdo rjes thob gang yin/ /des ni 'khor ba ma lus pa'i/ /ma rig 'thibs por bying 'byin shog /las kyi sgrib pa rnam par sbyong ba'i cho ga bshad pa zhes bya ba slob dpon dI paM ka ra shrI dz+nyA nas mdzad pa rdzogs so/