CLOSE WINDOW

D4005
བོད་ཡིག

slob dpon zhi ba lhas mdzad pa rdzogs so// //rgya gar gyi mkhan po d+harma rA dza dang / bod kyi lo tsA ba 'phags pa shes rab kyis bsgyur ba'o//[ @##/ /rgya gar skad du/ bod+hi pat+tideshan br-it+ti /bod skad du/ byang chub kyi ltung ba bshags pa'i 'grel pa/ 'phags pa 'jam dpal la phyag 'tshal lo/ /bcom ldan 'das shAkya thub pa la phyag 'tshal lo/ /bde gshegs gang zhig mi rtog thugs chud rtog med thams cad mkhyen/ /thugs rje chen pos 'gro don mdzad pa'i gau tam phyag 'tshal nas//byang chub sems dpa'i ltung ba dag byed byang chub ltung bshags ni/ /sems can kun la phan phyir lung dang man ngag gis bshad bya/ /rnam pa thams cad mkhyen pa'i sangs rgyas bcom ldan 'das sku gsum dang ldan pa'i sangs rgyas shAkya thub pas sems can thams cad kyi don du dam pa'i chos mang po gsungs pa thams cad bsdus pa ni lung gi chos gsung rab yan lag bcu gnyis su 'dus te/de'i nang nas mdo'i sde zhes bya bar 'dir 'gyur la/ bcu gnyis po yang bsdus pas sde snod gsum ste/ de las 'di ni mdo sde zhes bya bar yang 'gyur la/gtsor ni theg pa chen po'i 'dul ba yin te/ gzhi dang yan lag gnyis ka ston pa'i phyir ro/ /de la sngon byung ni byang chub sems dpa' ltad mo can la sogs pa las dang po pa so lngas rgyal po'i khab tu bsod snyoms la byon pas chang 'tshong ma'i bu 'og tu shi ba'i ltung ba bshags pa'i don du 'phags pa nye ba 'khor la bskur te bcom ldan 'das kyis gsungs pa'o//rjes su 'jug pa ni byang chub sems dpa'i rigs can gyi lam gyi yan lag tu 'gyur ro/ /yang na rgyal po'i khab kyi bram ze khams pa skyes zhes bya bas nya pa so lnga la lam log pa bstan pas nya mgo bo so lnga bar gyur pa'i don du yin no zhes la la nas bshad de//de ni dkon mchog brtsegs pa'i gzhung ma yin no/ /de nyid bshad pa ni dgos pa la sogs pa la sogs pa bzhir shes par bya'o/ /de dag gang zhe na/ dgos pa'i don la ni rnam pa lnga ste/ brjod bya ni byang chub sems dpa'i ltung ba dang de 'dag pa'i thabs so//rjod byed ni gzhung de dag go/ /dgos pa ni ltung ba de dag par byed pa'o/ /dgos pa'i yang dgos pa ni/ des sangs rgyas nyid 'thob pa'o/ /'brel pa ni thabs dang thabs las byung ba ste shugs kyis bstan pa'o/ / bsdus pa'i don ni phung po gsum mam/ bdun dag pa'am/ yang na stobs bzhi kho na yin no/ /zhar la brgal lan la sogs pa gsum yang shes par bya'o/ /man ngag ni mngon par rtogs pa ste/ mtshams med pa la sogs pa byas pa chen pos ni/ bar ma chad par shin tu 'gyod pas stobs bzhi po 'dis zla ba 'am lo la sogs par yan lag lngas sa la gtugs shing bshags pas dag pa'i mtshan ma 'byung zhing dag par 'gyur ro//bar pas ni thun drug du zla ba gcig tu'o/ /tha mas ni thun gsum du zhag bdun du'o/ /ltung ba byung gi dogs pa la ni chos kyi yan lag gcig gis so zhes bya ba ni man ngag gi don yin no//'o na 'di na bdag gis thos pa la sogs pa dang po dang tha ma med pas bka' ma yin no zhe na / de ni ma yin te/ 'phags pa dkon mchog [(]brtsags [,]brtsegs [)]pa chos kyi rnam grangs stong phrag brgya par gleng gzhi la sogs par 'di dag thams cad gsungs pa'i phyir ro//'di ni de'i nang nas dum bur bton pas de med pa la 'gal ba ci yang med do/ /'o na ltung ba'i dngos gzhi med par bshags pa de mi shes so zhe na/ de ni 'di'i dang po dang mjug go/ /sangs rgyas sum cu so lnga kho nar nges pa ni sngon gyi gdul bya so lnga'i don dang sangs rgyas nye ba la dgongs pa ste/gzhan ma byon zhing phyag mi 'tshal ba ni ma yin te/ 'di'i 'og nas de dag la sogs pa gsungs so/ /phyogs chad pa ni med de/ sprul pa'i sku sku tshe ring ba dang de ltar bzhugs pa don mdzad pa 'di'i phyogs bcu na rten pa ste phyogs bcu zhes pa'o //'das pa dang ma 'ongs pa'i sangs rgyas ni dbang por ma bzhag ste/ kun rdzob la 'gal ba'i phyir ro/ /kun la de bzhin gshegs pa med la bzhi smos pa ni don gyis shes par byas la blos dmigs pa ste/ bsnan na ni bka' las 'da' bar 'gyur la/ tshig bsdus nas bstan pa'i phyir ro/ /stobs bzhi kho nas sdig pa 'chags pa ni sangs rgyas kyi chos bzhi bstan pa dang / ma skyes dgra'i 'gyod pa bsal ba'i mdor de bzhi shin tu bsngags pa yin no zhes bya ba ni byang chub sems dpa' gnyis la gdams pa'o/ /de la chos 'di ci zhe na/ 'phags pa nye ba 'khor gyis zhus pa zhes gsungs te/ de'i tshe bcom ldan 'das kyis nye ba'i gnas nye gnas la 'dul ba'i bka' sdud pa por gtad pas dgra bcom pas zhus pas so/ /'dul ba gtan la dbab pa ni theg pa chen po pa'i ltung ba'i gzhi la sogs pa 'dis gtan la 'bebs pa'o//de ni bye brag pa yin la/ spyi ni dkon mchog brtsegs pa zhes smos so/ /'di la phung po gsum pa zhes kyang gsungs te/ phyag 'tshal ba'am bshags pa la sogs pa bsod nams kyi phung po dpag tu med pa la sogs te/ phung po gsum pa chung ngu yin la/ chen po ni ma yin no//byang chub kyi ltung ba bshags pa zhes pa la/ byang chub ni byang chub chen po'i rgyu ste/ de la sems dpa' zhes bya ba ni lhag ma'o/ /yang na byang chub las nyams pas na byang chub kyi ltung ba zhes gsum par sbyar ro/ /de yang byang chub sems dpa' las dang po ba dang /mos pas spyod pa la gnas pa ste/ sa dang po la sogs pa'i byang chub sems dpa' ni ma yin par shes par bya'o/ /de'i ltung ba ni de byung na ngan song du 'gro ba ste/ de yang ltung ba dang / sbom po dang / pham pa dang / nyes byas dang / nyes pa med pa dang / phra mo'i rim pa mdo 'di'i stod dang /gzhan las shes par bya la/ bshags pa'i thabs ni rgyas par/ mdo 'di'i mjug nas shes par bya ste/ 'di ni ltung ba de'i dag byed 'ba' zhig yin no/ /de dag byung na bshags pa ni dag par byed pa'o/ /de yang gnyis te/ don dam gyi bshags pa ni 'gyod pa bsal ba'i mdo ltar chos thams cad rang bzhin med par yid la bya ba ni bshags pa chen po ste/drang por 'dug la yang dag ltos/ /yang dag nyid la yang dag lta/ /yang dag mthong na rnam par grol/ /de ni bshags pa chen po yin/ /zhes bya ba gsungs so/ /kun rdzob kyi bshags pa ni stobs bzhis 'gyod pa dang bcas pa'i shes pas phyag 'tshal ba la sogs pa thams cad bya ba ni sgyu ma lta bu'i blo dang ldan pas bshags pa ni chung ngu'o//de yang dang por 'di zhus pa'i tshe bcom ldan 'das kyis byang chub sems dpa' de dag gi don du 'od zer gyis 'di nas ltos pa'i phyogs bcu'i sangs rgyas sum cu rtsa bzhi dang /de dag la sogs pa mang po spyan drangs te/ 'dir nam mkha' la bzhugs pa la byang chub sems dpa' rnams kyis 'gyod pa dang bcas pas mchod cing sems bskyed nas skyabs su song ste/ phyag 'tshal nas sdig pa bshags pa la sogs pa lan cig byas pas sdig pa thams cad dag ste sa dang po la sogs pa la gnas par gyur to//de'i rjes su zhugs pa ni gnas dben par maN+Dal dang / mchod pa dang 'di rnams kyi bris sku la brten te/ bla ma'i man ngag gis sems bskyed pa la sogs pa byas la bshags pas sdig pa thams cad dag par 'gyur la/'bras bu yang dag par rdzogs pa'i sangs rgyas 'thob par 'gyur ro zhes bya ba ni 'di'i tshul lo/ /de la bshags pa'i thabs dngos la/ dang po rten gyi sgo nas sdig pa bshags pa ni/ bdag ming 'di zhes bya ba zhes bya ba la sogs pas gsungs so//de la rten sangs rgyas sum cu rtsa lnga la sogs pa la mchod pa byas te byang chub kyi sems rnam pa gnyis bskyed pa 'dir shes par byas la/ de nas skyabs su 'gro ba ni gnyis pa'o/ /de la bdag ming 'di zhes bya ba ni/ spyir btang yang dmigs kyis bdag gi tha mal pa'i ming che ge mo zhes brjod par bya ste/ dper na 'jig sde'i nang nas 'jigs byed chen po zhes bya ba lta bu'o/ /gzhan du na bdag tu ma zad de dge ba'i bshes gnyen ni bdag la phan 'dogs pa'o/ /pha ma ni phan 'dogs pa'i zhing ngo / /sems can mtha' yas pa ni nam mkha' khyab pa'i sems can te bdag gis phan gdags pa'i yul lo//de dag dang bcas par skyabs su 'gro ba'o/ /gang la zhe na/ sangs rgyas la sogs pa la'o/ /gang gis she na/ ngag dang yid kyis te skyabs su 'gro ba'i ngo bo la sogs pa yang shes par bya'o//de la sangs rgyas ni ston pa dang 'bras bu ste/ sku gsum bdag nyid can la/ bdag skyabs su 'gro ba ni de la blo gtong pa'o/ /'dir phyag 'tshal ba ni lus dang ngag dang yid kyis te de ltar nges par 'gro'o zhes pa'o/ /de bzhin du chos ni bstan pa dang lam mo/ /de yang lung dang rtogs pa dang don dam pa ste rgyu dang 'bras bu'i bdag nyid do//dge 'dun ni/ sgrub pa po dang rten te mi phyed pas na dge 'dun no/ /de yang byang chub sems dpa' dang nyan thos dang rang sangs rgyas te 'dir byang chub sems dpa'i dge 'dun phyir mi ldog pa'i dge 'dun yin par shes par bya'o/ /de ltar rten gyi stobs bstan nas /da ni rnam par sun 'byin pas kun du spyod pa'i stobs kyi sgo nas sdig pa 'chags pa ni/ de bzhin gshegs pa zhes bya ba la sogs pa gsungs so/ /de yang sdig pa'i dngos po bshags pa'i yan lag tu sangs rgyas sum cu so lnga la phyag 'tshal bas sdig pa dag par gyur pa yin no//de la ma 'ongs pas ni/ sangs rgyas 'di dag bdag gi mdun du pad+ma dang seng ge dang rin po che dang zla ba'i gdan la rab tu byung ba sprul pa'i sku mtshan dang dpe byad 'od dang ldan pa/ sku mdog dang / zhing dang / phyogs dang / mtshams dang / chos gos la sogs pa dang / phyag mtshan dang /rdo rje'i skyil krung can 'khor mang po dang bcas pa 'og nas 'byung ba bzhin du dbus nas brtsams te phyogs bcur rim pa bzhin du bzhugs pa la dmigs te/ lus mang por sprul cing / ngag sgra dang / yid kyi mos pas zhabs la phyag 'tshal bya'o/ /yang na blo dman bas ni thams cad zhal gcig pa/phyag gnyis chos 'chad pa 'am/ bsod snyoms la gshegs pa 'am/ sa gnon pa la sogs pa'i phyag rgyar bsams te/ dkar po la sogs pa gang ltar mos par thams cad mnyam par bsams te phyag bya'o/ /'di dag ni bdag cag gi ston pa gtso bo yin la/de ma gtogs pa rnams ni bskal pa mang por bzhugs pa yin par shes par bya'o/ /de la dang po mi mjed kyi bdag po dbus na bzhugs pa'i sangs rgyas de'i yon tan ni de bzhin gshegs pa zhes gsungs te/ sgra'i stobs las de bzhin nyid gsung ba dang /rtogs pa dang / de bzhin nyid du gshegs shing slar byon pa ste/ 'dis ni thams cad las khyad par du 'phags pa'o/ /dgra bcom pa ni nyon mongs pa dang shes bya'i sgrib pa'i dgra bsad pa'o/ /des ni byang chub sems dpa' las khyad par du 'phags pa'o/ /yang dag par ni phyin ci ma log pa ste/des ni 'khor ba dang theg pa dman pa las so/ /rdzogs pa ni tshogs gnyis dang bdag gzhan gyi don gyi sku gnyis so/ /sangs rgyas ni spangs pa dang ye shes kyi bye brag gis gnyis so/ /de gnyis kyis 'khor ba dang mya ngan las 'das pa'i gang zag thams cad las khyad par du 'phags par bstan to//de'i mtshan nyid ni shAkya thub pa ste/ de ni ye shes dang nus pa dang yon tan no/ /de la ye shes ni shA ni ma lus pa'o/ /kya ni rtog pa'o/ /mu ne ni gnyis su med par bsdoms pa'o/ /thub pa ni shAkya'i rgyal po'i rigs yin pas de don yod cing de las skyes pa'i gdug pa thub pa ste las so//yon tan ni/ shAkya ste khyad par du 'phags pa'o/ /de'i sku dang gsung dang thugs bsdams pa thun mong ma yin pa ni thub pa'o/ /de la phyag 'tshal ba ni dang ba'i dad pas sgo gsum gyis phyag bya ba'o/ /'di yang dbus su gdan la/ ser po chos 'chad par bsam mo//snga ma ltar khyad par lnga dang / bshad pa gsum po ni 'og ma la yang shes par bya'o/ /ye shes la sogs pa ni dpe dang don gyis sgra'i stobs kyis tshang ba dang gnyis dang gcig la yang bshad par bya'o/ /steng nam mkha'i snying po'i zhing na bzhugs pa sngon po rdo rje gnyis bsnams pa ni rdo rje snying pos rab tu 'joms pa'o//de la rdo rje ni rdo rje ltar rtog pa med pa'i ye shes so/ /snying po ni thams cad kyi skye gnas te yon tan no/ /las ni nyon mongs pa la sogs pa thams cad 'joms pa'o/ /rin chen 'od 'phro ni shar phyogs rin chen yod pa'i zhing na dkar po rdo rje dang nyi ma bsnams pa bzhugs so//de la rin chen ni rin po che ltar stobs la sogs pa'i yon tan thams cad 'byung bas na yon tan no/ /ye shes ni 'od de rang bzhin gsal bas mi shes pa'i mun pa med pa'o/ /'phro ba ni las te des sems can thams cad kyi mi shes pa 'joms par byed pa'o//shar lho klu yis khyab pa'i zhing na klu dbang gi rgyal po ste sngon po/ klu shing dang sprul sngon po bsnams pa'o/ /de la ye shes ni klu ste bsil bar byed pa dang gdug pa ltar ye shes kyang nyon mongs pa dang bral ba dang mtshan ma gsod pa'o/ /dbang po ni las te des thams cad la dbang bsgyur ba'o//rgyal po ni yon tan te rgyal po ltar thams cad kyi nang na 'bar zhing mdzes la 'jigs pa dang bral ba'o/ /dpa' bo'i sde ni lho dpa' ba dang ldan pa'i zhing na ser po/ po ti dang ral gri bsnams pa bzhugs pa'o/ /de la dpa' bo ni ye shes te 'gran zla med cing mi tshugs pa'o/ / yang na dpa' bo ni las te sems can gyi 'khor ba'i g.yul thams cad 'joms pa'o/ /yon tan ni sde ste yon tan gyi tshogs mang po mnga' ba'o/ /dpal dgyes ni lho nub dga' ba dang ldan pa'i zhing na/ dmar ser nyi ma dang pad+ma dmar po bsnams pa'o/ /de yang dpal ni ye shes dang las te snga ma bzhin du shes par bya'o//yon tan ni dgyes pa ste thugs rje chen pos sems can gyi don mdzad pa la thugs bzhugs pa'o/ /nub snang ba dang ldan pa'i zhing na dmar po/ rin po che dang me'i dkyil 'khor bsnams pa ni rin chen me ste/ de la rin chen ni ye shes te rtog pa med par don 'byung ba'o/ /yang na yon tan ni rin chen te ting nge 'dzin dang 'jig rten las 'das pa'i phun sum tshogs pa thams cad 'byung ba'o//me ni las te ye shes dang brtson 'grus chen pos sems can gyi don mdzad cing nyon mongs pa la sogs sreg pa'o/ /rin chen zla 'od ni nub byang 'od bzang po'i zhing na dkar po/rin po che dang zla ba bsnams pa'o/ /de la rin chen ni snga ma ltar yon tan no/ /zla ba ni ye shes te ye shes rdzogs shing gsal le shin tu bsil ba'o/ /'od ni las te las dang nyon mongs pa la sogs pa bsal te don gyi chos nyid gsal bar byed pa'o/ /byang phyogs rnga sgra'i zhing na mthong ba don yod ljang gu sangs rgyas kyi spyan gnyis bsnams pa'o//de'i ye shes ni mthong ba ste ye shes ma bsgribs pa'o/ /yang na mthong ba ni yon tan te/ shes rab dang thugs rjes spyan gyis chos nyid dang sems can gyi don gsal ba'o/ /las ni don yod pa ste/ 'dis sems can thams cad mngon par ma thob dang nges par legs pa'i 'bras bu gdon mi za bar yod par mdzad pa'o//rin chen zla ba ni/ byang shar 'od zer can gyi zhing na dkar ljang / rin po che dang zla ba bsnams pa'i sangs rgyas so/ /de'i yon tan ni rin po che'o/ /zla ba ni ye shes dang las te snga ma ltar shes par bya'o//'di'i 'og na thal bas khyab pa'i zhing na dri ma med pa ste dud kha 'am thal pa'i mdog can me long dri ma med pa bsnams pa bzhugs shing 'tsho'o/ /de la dri ma med pa ni ye shes te sgrib pa spangs pa'o/ /nus pa ni gzhan dri ma med par byed pa'o/ /stobs la sogs pa glo bur ba'i dri ma dang bral bas shin tu gsal ba ni yon tan no//de la snga ma ltar phyag 'tshal ba'o/ /de dag ni bcu tshan dang po'o// // yang bcu tshan gnyis pa ni/ /dpa' sbyin zhes bya ba la sogs pa ste/ de la de'i yang steng gi phyogs na dpal dang ldan pa'i zhing na de bzhin gshegs pa dpas byin dkar po shing dpal 'bras kyi sdong bu lo ma 'bras bu dang bcas pa bsnams pa bzhugs nas sems can gyi don mdzad pa yin la/'dir steng du gdan la bzhugs par bsams te bdag gis phyag 'tshal ba byas pas sdig par dag par 'gyur ro/ /de la dpa' ba ni gnyis su med pa'i ye shes kyis rtog pa thams cad 'joms pas so//yang na yon tan ni dpa' ba ste/ gzhan la phun sum tshogs pa thams cad dang bde ba thams cad thogs ba med par mdzad pa'o/ /sbyin pa zhes pas las bstan te/ khams gsum gyi sems can thams cad la ji ltar 'dod pa'i bya ba 'am dgos pa sbyin pa'o//de la sgo gsum dang bas phyag 'tshal bar bya'o/ /shar phyogs sgrib pa dang bral ba'i zhing na dpal changs pa dmar ser pad+ma dang nyi ma bsnams pa'o/ /de la sgrib pa thams cad dang bral ba'i ye shes ni tshangs pa'o/ /yang na tshangs pa bzhin du sems can thams cad 'khor ba nas dag par byed pa ni tshangs pa ste las so//yang tshangs pa ni rang nyid dang gzhan dag par byed pa'i yon tan tshad med pa mnga' bas na tshangs pa ste yon tan no/ /tshangs pas byin ni shar lho mya ngan med pa'i zhing na ser po zla ba dang pad+ma bsnams ba'o/ /de yang tshangs pa ni ye shes dang yon tan te snga ma dang 'dra'o//des sems can thams cad la dag pa'i bde ba sbyin pa ni las so/ /chu lha ni lho phyogs dri ma med pa'i zhing na sngon po chu'i dkyil 'khor na chos 'chad pa'i phyag rgya can no/ /de yang chu ni ye shes te shin tu dri ma med cing dang ba'o/ /yang na las ni thugs rje chen pos dam pa'i chos kyis sems can gyi rgyud brlan par mdzad pas na chu'o//lha ni yon tan te mthu dang rdzu 'phrul la sogs pa dang ldan pa'o/ /lho nub gsal ba'i zhing na dkar po/ chu lha'i dkyil 'khor dang me long bsnams pa ni chu lha'i lha'o/ /de la chu ni ye shes te snga ma bzhin no//las ni lha ste rdzu 'phrul la sogs pas sems can thams cad kyi don mdzad pa'o/ /de'i yang lha ni yon tan no/ /dpal bzang ni nub phyogs bde ba can gyi zhing na bzhugs ba dmar po pad+ma dang dpag bsam gyi shing bu bsnams pa yin la/ dpal ni yon tan te bdag dang gzhan gyi don phun sum tshogs pa'o//bzang po ni ye shes dang las te/ ye shes shin tu mchog tu gyur pa dang / gzhan mya ngan las 'das pa'i lam bzang pos mya ngan las 'das par 'dren par mdzad pa'o/ /nub byang dri bzang pos khyab pa'i zhing na sangs rgyas tsan+dan dpal dmar ser tsan+dan gyi sdong po dang dpal 'bras bsnams pa bzhugs pa'o//de'i ye shes ni tsan+dan te/ ma rig pa la sogs pa'i gdung ba bsil zhing dag pa'o/ /yang na tsan+dan ni yon tan te stobs la sogs pa'i yon tan chen pos thams cad du khyab pa'o/ /dpal ni las te snga ma bzhin du shes par bya'o//gzi brjid mtha' yas ni byang phyogs gzi brjid dang ldan pa'i zhing na dmar po nyi ma gnyis bsnams pa 'khor mang po dang bcas pa bzhugs so/ /de'i ye shes ni gzi brjid de gsal ba'i ye shes kyis gzhan gsal bar mdzad cing zil gyis gnon pa'i nus pa can no/ /mtha' yas ni las dad yon tan te sems can grangs med pa'i don mdzad pa dang /gzugs can dang gzugs can ma yin pa'i yon tan dpag tu med pa dang ldan pa'o/ /byang shar don yod pa dang ldan pa'i zhing na 'od dpal dkar po/ 'od dkar po'i dkyil 'khor bsnams pa bzhugs shing 'tsho skyong ba'o/ / de la 'od ni ye shes te/ nyi ma lta bu'i ye shes des ni rang dang gzhan gyi nyon mongs pa dang shes bya'i sgrib pa'i mun pa sel ba'o/ /dpal ni yon tan dang las te snga ma ltar gnyis su shes par bya'o/ /mya ngan med pa'i dpal ni 'og gi phyogs sgribs pa dang bral ba'i zhing na sku mdog sngo skya shing mya ngan med pa bsnams pa bzhugs te/de yang mya ngan med pa ni ye shes te 'khor ba las 'das shing sgrib pa thams cad dang bral ba'o/ /yang na las ni sems can thams cad kyi mya ngan te sdug bsngal dang 'khor ba bral bar mdzad pas na de dag med pa'o/ /dpa' ni yon tan no/ /de la snga ma ltar sgo gsum dang bas phyag 'tshal bar bya'o//de dag ni bcu tshan gnyis pa'o// // yang bcu tshan gsum pa ni/ de'i yang steng gi phyogs na sred pa dang bral pa'i zhing na sred med kyi bu sngon po/ /ri rab dang pad+ma'i phyag rgya can 'khor la chos 'chad cing sems can rnams la 'tsho skyong ngo / /de yang sred med ni ye shes te rtog pa dang bral ba'o//las ni sred pa med pa ste sems can 'khor ba la chags pa dang bral bar mdzad pa'o/ /de'i bu ni sangs rgyas te de las skyes shing byams pa la sogs pa'i yon tan dang ldan pas na bu zhes bshad do/ /shar phyogs me tog cher rgyas pa zhes bya ba'i zhing na ser po me tog ser po dang shing thog dpal 'bras bsnams pa'i sangs rgyas me tog dpal bzhugs te de'i yon tan ni mtshan la sogs pa rgyas shing mdzes pa dang /ye shes me tog ltar rgyas pa'o/ /dpal ni las te/ de bzhin du phun sum tshogs pa dang ldan par byed pa'o//shar lho tshangs bas khyab pa'i zhing na de bzhin gshegs pa tshangs pa'i 'od zer rnam par rol bas mngon bar mkhyen pa dkar po pad+ma dang 'od phud bsnams pa'o/ /de bzhin gshegs pa ni snga ma ltar te 'dir yang dgra bcom pa la sogs pa'ang snga ma ltar ba lta'o/ /bar 'dir de bzhin gshegs pa gnyis bstan pa ni gang 'og la'ang shes par bya'o//de yang changs pa ste ye shes so/ /'od zer ni nus pa ste/ shin tu gsal zhing nus pa chen po dang ldan pa'o/ /rnam par rol ba ni las te/ rdzu 'phrul la sogs pas sems can gyi don mdzad pa'o/ /thugs kyi ye shes kyis don bya'i thabs la sogs pa gsal bar rtogs pa ni mngon par mkhyen pa'o//lho phyogs pad+ma dang ldan ba'i zhing na de bzhin gshegs pa pad+ma'i 'od zer rnam par rol pa mngon par mkhyen pa dmar po pad+ma dang nyi ma'i phyag rgya can no/ /de la pad+ma ni ye shes te pad+ma nyes bsam gos la ma chags shing rgyas pa'o//'od zer ni yon tan no/ /rnam par rol pa la sogs pa ni las so/ /lho nub nor bu yod pa'i zhing na nor dpal dmar po dkar ba'i mdangs can phyag rgya rin po che gnyis can no de la nor ni ye shes te/ ye shes chen po mi zad pa dang / nor bu'i yon tan dang 'dra ba'i yon tan chen po dang ldan pas 'dod pa thams cad bskang ba ni las so//yon tan ni dpal te gnyis so/ /nub phyogs gsal pa dang ldan pa'i zhing na dran pa'i dpal ser po po ti dang ral gri can no/ /de la dran pa ni ye shes te/ ye shes chen po mi brjed pa'i gzungs dang ldan pa dang / yang yon tan ni dran pa ste/ rnam par thar pa bsam gyis mi khyab pa'i yon tan no/ /las ni dpal lo/ /nub byang mtshan ma med pa'i zhing na ljang gu phyag gnyis kyis de bzhin gshegs pa'i gtsug tor dbu'i steng du 'dogs pa ni mtshan dpal shin tu yongs grags so/ /de la mtshan ni ye shes te/mi zad pa'i ye shes 'dzin pa'o/ /dpal ni las so/ /shin tu yongs grags ni yon tan te/ 'jig rten gyi khams su snyan pa khyab par gyur pa'i grags pa chen po'o/ /byang phyogs dbang po gsal ba'i zhing na dbang po tog gi rgyal mtshan gyi rgyal po ser po rin po che tog dang rgyal mtshan can no//de la dbang po tog ni ye shes te/ dbang pos yul rtogs pa ltar ye shes des chos nyid rtogs shing de nyid mdzes pas na tog go/ /rgyal mtshan ni yon tan te thams cad 'khor ba las rgyal bar byed pa'i yon tan no/ /las ni rgyal po ste bya ba thams cad mdzad pa'o//byang shar rol pa dang ldan pa'i zhing na shin tu rnam par gnon pa'i dpal dkar po sa gnon pa'i phyag rgya can no/ /de la shin tu ni ye shes te yang dag pa'i ye shes so/ /las ni rnam par gnon pa ste/ sems can thams cad kyi bdud dang nyon mongs pa la sogs pa thams cad 'joms pa'o//dpal ni yon tan te snga ma ltar gnyis so/ /'og gi phyogs na nyon mongs pa med pa'i zhing na g.yul las shin tu rnam par rgyal ba ni nag po khrab dang ral gri bsnams pa'o/ /de'i las ni g.yul las rgyal ba ste/ sems can thams cad kyi las dang nyon mongs pa'i g.yul ngo bzlog pa'o//shin tu ye shes so/ /yon tan ni rnam par rgyal ba ste bdag dang gzhan 'khor ba las rgyal ba'i nus pa mnga' ba'o/ /yang de dag gi phyi'i gzhi la shar phyogs dpal dang ldan pa'i zhing na rnam par gnon pas gshegs pa'i dpal dkar pos gnon dang mi 'jigs pa'i phyag rgya can no//de'i las ni rnam par gnon pa ste snga ma bzhin no/ /gshegs pa ni ye shes te mthar thug pa rtogs pa'o/ /yon tan ni dpal te snga ma ltar ro/ /lho phyogs snang ba bkod pa'i zhing na kun nas snang ba bkod pa'i dpal ser po nyi ma dang rin po che'i sdod bu bsnams pa'o/ /de la las ni kun nas snang ba ste/ye shes kyis sems can gyi ma rig pa sel ba'o/ /bkod pa ni ye shes te dpag tu med pa'i ye shes so/ /dpal ni yon tan no/ /nub phyogs dpal dang ldan pa'i zhing na/ /rin chen pad+mas rnam par gnon pa dmar po rin po che dang pad+ma bsnams pa'o/ / de la rin chen ni yon tan no/ /pad+ma ni ye shes te dri ma dang bral ba'o/ /las ni rnam par gnon pa ste snga ma bzhin no/ /byang phyogs rin po che'i zhing na/ de bzhin gshegs pa dgra bcom pa yang dag par rdzogs pa'i sangs rgyas rin po che pad+ma'i gdan la rab tu bzhugs pa'i dbang gi rgyal po bzhugs shing 'tsho skyong ste/de'i gdan pad+ma dang seng ge dang rin po che dang zla ba'o/ /nam mkha' ltar sngo ba phyag gnyis kyis ri rab bteg pa spyan drangs te bshags la/ sgrub pa pos ni de ltar bsams la bshags so/ /de bzhin gshegs pa la sogs pa ni snga ma ltar shes par bya'o//de la rin po che pad+ma ste des ni gdan gyi yon tan dang las dang ye shes bshad de gzhan las gdan 'di shes par bya'o/ /la la las ni zla ba zhes pa yod de de ni las su shes par bya ste/ 'di ni thams cad la shes par bya'o/ /ri dbang ni ye shes dang yon tan te ri'i rgyal po ltar mi bsgul ba'i ye shes dang yon tan ri rab lta bu'o//rgyal po ni las so/ /de la sgo gsum dang bas phyag 'tshal lo/ /zhes pa ni tshig gi don to/ /'di dag ni sngon byon pa ste byang chub sems dpa' la ni ltung ba byung ba med cing bcos ma yin la/ ma 'ongs pa la gdams pa ste bsams la bshags par bya'o//de ltar phyag 'tshal ba bshad nas de dag gi spyan sngar sdig pa bshags te/ de yang sangs rgyas de dag la thugs gtad par gsol ba gdab pa ni de dag la sogs te zhes bya ba la sogs pa gsungs so/ /de la bdag gis pus mo gnyis sa la btsugs lag pa spyi bor thal mo sbyar te gus pas 'di dag brjod pas bdag gi dbang po mdzad par bsam mo//de la de dag ni so so lnga po de dag go/ /de ni gdul bya la dgongs pa ste/ gzhan yang sogs pas ni de dag kyang dbang por byas pa'o/ /shar la sogs pa'i phyogs bcu'i 'jig rten thams cad de nam mkha'i mthar thug pa'i sangs rgyas thams cad dmigs pa'o//de bzhin gshegs pa la sogs pa ni go sla'o/ /ji snyed cig ni bgrang ba las 'das pa'i grangs so/ /'tsho ba ni thugs rje'i spyan gyis sems can gzigs nas skyong ba'o/ / gzhes pa ni bzhugs pa ste 'khor ba ji srid kyi bar du'o/ /bcom ldan 'das ni skal ba dang ldan zhing bdud bzhi bcom pa'o/ /de dag thams cad ni so lnga la sogs pa'o/ /bdag ces pa ni dang bo'i ming brjod par bya'o/ /thugs mi 'gyur bar gsol ba gdab ba ni dgongs su gsol ba'o/ /gnyis pa bshags pa rang gi ngo bo la dus kyi sgo nas bstan pa ni/bdag gi skye ba zhes bya ba la sogs pa'o/ /bdag gi dus 'di tsam du sdig pa byas so zhes sems la bsams nas 'gyod pa bskyed pa'o/ /de la skye ba 'di ni dus 'dir sdig pa byas pa dran par bya'o/ /des mtshon nas skye ba thog ma med pa ste snga ma 'das pa nas dpag tu med pa ste/'khor ba thog ma med pa'i dus can no/ /thog ma med pa ni spyir dgongs pa 'khor ba'i sems can nam mkha' ltar mtha' yas pa'o/ /de dag tu 'khor ba ni zo chun gyi 'khrul 'khor ltar yang nas yang du 'byung zhing 'jig pa'o/ /de yang tshe rabs snga ma la sogs par 'khor ba bzhin 'di dang phyis so//skye gnas gzhan ni byol song la sogs pa drug po'i mngal la sogs par ro/ /gsum pa rang gi ngo bo'i sgo nas sdig pa bshags pa ni/ sdig pa zhes bya ba la sogs pa'o/ /de yang bdag gis sdig pa 'di tsam zhig byas pa zhes 'gyod de/sems sun bton la bshags par bya'o zhes bya ba'i don to/ /sdig pa byas pa yang rgyu ma rig pa bla brten nas rkyen 'dod chags la sogs pa gsum gyi phyed po lus la sogs pa gsum gyis byas so / /de yang gsum ste/ byas la ma bsags pa dang / ma byas kyang bsags pa dang /byas la bsags pa'i sdig pa gsum ste 'di dag ni mdo sde ltar shes par bya'o/ /de la sdig pa ni ngan song du 'gro ba'i snga ltas so/ /'bras bu ngan song skyed cing dam pas smad pas na mi dge ba'o/ /las ni gos shing 'byar ba ste/ lus la sogs pas srog gcod pa la sogs pa bcu'o//lci yang la sogs pa ni gzhan ltar shes par bya'o/ /de yang gsum ste bdag gis dngos su byas pa dang / gzhan bgyid du stsal ba dang / byed pa la rjes su yi rang ba gsum ni rnam par smin pa 'dra ste/ khyad par du ni bgyid du stsal ba ste theg pa chen po pa yin pa'i phyir ro//de dag ni spyi yin no/ /bye brag ni ma byin par len pa la sogs pa'i nang nas lci ba lnga las 'dir gsum ste/ sems can gyi don du mchod rten brgyad po'i gser la sogs pa'i nor ro/ /dge 'dun ni mi phyed pa ste/ byang chub sems dpa' dang nyan thos kyis phye ba'o//de yang dang po ni gnyis la sogs pa'i'o / /gnyis pa ni dge slong bzhi la sogs pa'o/ /de bas kyang lci ba ni phyogs bzhi'i dge 'dun la sogs pa'i mgron po la sogs pa'i nor rku ba dang dngos su 'phrog pa'o/ /shin tu lci ba ni mtshams med pa lnga'o//de yang sdug bsngal dang bar do med par yin te/ 'di'i sdig pa'i 'bras bu la ni tshad med do/ /nyes pa med pa dang chung ba yang shes par bya'o/ /gzhan yang gzhan dag srog gcod pa la sogs pa bcu blangs pa de'i zla la the tshom med par bdag zhugs pa yang shes par bya'o//de dag gi nyes dmigs kyi sgo nas bstan pa ni las kyi sgrib pa la sogs pa'o/ /de yang rnam par smin pa 'di lta bu tsha ba yin la bsams te/ rang gi sems sun bton la/ /shin tu 'gyod pas bshags par bya'o zhes bya ba ni ngag gi don to/ /de yang las de dag gis bsgribs pa ni ye shes mi gsal bar byas pa'o//de dag gi rnam par smin pa cir 'gyur zhe na/ sems can dmyal ba la sogs pa'i mi khom pa brgyad de/ dam pa'i chos kyi go skabs med la/ la la de ltar sdug bsngal dang bcas la/ la la phyis 'gyur bas mi khom pa ste dal 'byor med pa'o//de la dmyal ba ni shin tu sdug bsngal ba ste phal po che dang kha 'thor ba'o/ /de la dang po ni tsha ba dang grang bas bcu drug go/ /gnyis pa ni gnas kyis gnyis te/ 'di dag ni mdo dran pa nye bar gzhag pa chen po las shes par bya ste/ las ngan pa shin tu che ba'i 'bras bu yin no//dud 'gro ni mi shes pa ste/ de'i skye ba'i gnas ni mngal nas skye ba la sogs pa'o/ /de yang gnyis te/ dbyibs kyis ni bzhi'o/ /de ni tha ma'i'o/ /las bar ma ni yi dags te zas la sogs pa bza' ba la sogs pa 'dod la de med pa ste/ de'i yul ni 'dug pa ste/gshin rje'i 'jig rten no/ /de yang gnyis su shes par bya'o/ /yang na ngan song gsum po de dag gi rgyu ni phal cher srog gcod pa dang ser sna dang gti mug las shes par bya'o/ /gsum po de dag ni ngan par song ba yin no/ /las ngan pa shin tu chung ba ni yul mtha' 'khob la sogs pa ste/mi dang lha'i nang nas mi khom pa yin no/ /ngan pa 'di dag ni ngan 'gro yin no/ /mtha' 'khob ni yul gang na chos la sogs pa med pa ste / yul gyi mtha'o/ /kla klo ni glen zhing rmugs pa'i rang bzhin te skad bzang po med pa la sogs pa mi shes pa'o/ / yang na yul mtha' 'khob kyi kla klo zhes pa la dag byed do/ /de dag rgyu des las ngan pa byed pas ngan song du 'gro ba'o/ /lha tshe ring po ni bsod nams che zhing nga rgyal che ba ste ba skal pa dpag tu med par gnas pa lta ba log pa gzugs kyi khams kyi gnas na'o/ /yang na 'gog pa ngan pa sbyangs pas 'du shes 'gog pa yin no zhes kyang 'chad do//de shi nas dmyal bar 'gyur ro/ /mir skyes na gzugs la sogs pa la dbang byed pa'i mig la sogs pa'i dbang po lnga 'am drug pa la skyon zhugs pas dam pa'i chos kyi skal ba med pa yin te/ gcig dang / gnyis dang / gsum dang / bzhi dang / lnga dang / drug ka ma tshang ba srid do/ /shin tu yid kyi dbang po la skyon zhugs pa ni ngan pa'o/ /yang dag pa'i lta ba dang bral ba ste sangs rgyas la sogs pa med do zhes sems pa lta ba phyin ci log ni chad par lta ba ste/ mi dge ba thams cad pas lci ba'o/ /gzhan pa rtag par lta ba la sogs pa yang ngo //de ltar na brgyad do/ /sangs rgyas 'byung ba ni spyir yin te/ de 'jig rten du byon pa la phyag la sogs pa mi byed par skur pa 'debs pa'o/ /yang des mtshon nas sangs rgyas med pa'i gnas su skyes pa ni brgyad pa'o/ /de ltar rang gi ngo bo bstan nas/yul gang la bshags pa ni sangs rgyas zhes bya ba la sogs pa ste 'di kho na dbang po bzang po yin gyi gzhan ni ma yin no/ /de la sangs rgyas bcom ldan 'das ni shAkya thub pa la sogs pa de rnams so/ /de dag ni thams cad mkhyen pas na ye shes so/ /dge sdig gi las la sogs pa gsal bar rtogs pas na spyan no//dbang po ni legs pa dang nyes pa'i khyad par thugs su chud pa'o/ /tshig la sogs pa 'khrul ba med pas na tshad ma ste mi slu ba'o/ /thugs kyis thams cad mkhyen pas na mkhyen pa'o/ /shes rab kyi spyan gyis thams cad gzigs pas na gzigs pa'o//spyan sngar ni da ltar mdun du'o/ /tshul ji ltar bshags pa ni mthol ba la sogs pa ste/ yang dag par yin gyi ngag 'khyal la sogs pa ni ma yin no/ /de la ngag gis brjod pa ni mthol ba'o/ /'chags pa ni yid kyis so sor ro//nyes pa de khas len pas zhi la mi 'chab pa'o/ /mi sbed pa ni dngos su ste / de bzhin gshegs na dag par 'gyur ro/ /de ltar stobs gnyis bstan nas/ de ni nyes pa las kun tu ldog pa'i stobs kyis sdig pa bshags pa ni slan chad kyang gcod cing sdom par bgyid lags so zhes gsungs so//de yang sngar gyi 'gyod cing / da ltar gyi 'chags la/ phyis mi byed pa ni dam pa yin la/ bshags kyang byas na slar 'phel bar 'gyur bas na nad la gnod pa na bza' btung ltar mtshams gcad par bya'o/ /de phan chad kyang mi dge ba bcu la sogs pa'i nyes pa rnams rgyun gcod cing phyis mi byed par bsdams te des ni sdig pa dag par 'gyur ro//de ltar stobs gsum pa bstan nas da ni gnyen po kun du spyod pa'i stobs ni sangs rgyas zhes bya ba la sogs pa'o/ /de la sdig pa de dag slar mi 'phel zhing tshogs bsags pa'i don du rgyud la dge ba bstan pa ni sman lta bur shes par bya'o//de la bsngo ba la sogs pa thams cad ni byang chub sems dpa' la pha rol tu phyin pa drug dang ldan la/ des zin dgos pas pha rol tu phyin pa drug dang 'dra ba yin la de yang gnyis so/ /de la bla na yod pa ni kun dang mthun pa ste/de ni skye ba bzang po blangs par yang shes par bya'o/ /de la khams gsum gyi skye gnas te lha dang mi dag tu'o/ /sbyin ba dang mthun pa ni sbyin pa'i tha ma ste/ des mchog kyang shes par bya'o/ /dud 'gro'i skye gnas ni khyi la sogs pa'o/ /de ni yul chung ba ste chen po yang gzung ngo //kham gcig ni dngos po chung ba ste chen po yang shes par bya'o/ /tshul khrims ni tshul khrims dang mthun pa ste/ sdom pa'i tshul khrims la sogs pa'o/ /rnam par dka' ba bskyed pas ni dge ba'i rtsa ba'o/ /bzod pa dang mthun pa ni tshangs spyod de sdig pa dang bral zhing byams pa la sogs pa la gnas pas gshe ba la slar mi gshe ba la sogs pa dge sbyong gi chos dang ldan pa ste/'dod chags dang bral ba la ni mi bya'o/ /brtson 'grus dang mthun pa ni sems can yongs su smin par byed pa ste/ bdag gis brtson 'grus chen pos sems can thams cad la mngon par shes pa lnga'i sgo nas phyin ci log gi lta ba dang lam las bzlog pa ste yang dag pa la bcug pas rgyud smin par byas pa ste/grol ba dang mthar phyin par shes par bya'o/ /bsam gtan dang mthun pa ni smon pa dang 'jug pa kun rdzob dang don dam pa'i byang chub tu sems bskyed pa ste/de dag la rtse gcig tu gnas pa ni lam phyin ci ma log pa'o/ /bla na med pa'i ye shes ni shes rab kyi pha rol tu phyin pa dang mthun par bsngo ba ste/ de la gong na med pa'i ye shes ni gnyis su med pa'i chos nyid rtogs pa ste ye shes kyi tshogs so/ /de la bzhi ni bsod nams kyi tshogs su 'gyur la/lnga pa ni/ gnyis ka'o/ /drug pa ni cig shos te thams cad kyang gnyis su 'dus so/ /drug po de dag thams cad tshul ji ltar zhe na/ gcig tu bsdus pa la sogs pa ste/ dge ba so so ba dang / dngos po gcig tu byas te bzlums pa ni 'dres par byas pa'o//mi phyed par byas pa ni bsdoms pa ste rang bzhin med par ro/ /gang bsngo zhe na/ bla na med pa la sogs pa'i sangs rgyas su'o/ /de nyan thos las 'phags pa ni bla na med pa'o/ /gong na med pa ni sangs rgyas so/ /gong ma ni 'jig rten pa'i gong na gnas pa gnyis po de yin la/de dag gi gong ma ni byang chub sems dpa'o/ /bla ma ni byang chub sems dpa' rnams yin la/ de'i bla ma ni sangs rgyas te de'i gong na gzhan med pa'o/ /de nyid byang chub sems dpa' chen po ste rnam pa thams cad mkhyen pa'o/ /yongs su bsngo ba ni 'khor gsum yongs su dag pa ste mi dmigs pa'o//de ni byang chub sems dpa'i bsngo ba thun mong ba'o/ /bla na med pa'i sangs rgyas nyid kyi bsngo ba ni thabs mkhas pa ste/ de ltar bsngo ba ni ji ltar zhes bya ba la sogs pa'o/ /bdag gis bsngo ba mi shes pas/de ltar yongs su bsngo ba ni gya nom pa la sogs pas gus pa'o/ /dus gsum gyi sangs rgyas kyis bsngos pa ltar bdag kyang gus pas yongs su bsngo ba ni gdams pa chen po yin no/ /phung po gsum pa dang mthun par bsngo ba ni sdig pa thams cad ni so sor bshags so zhes bya ba la sogs pa'o//de la sdig pa bshags pa'i phung po dang / dag pa dang ma dag pa'i dge ba'i rjes su yi rang ba ni de dag yul du byas na dga' ba'i phung po dang / sangs rgyas thams cad la mya ngan las mi 'da' ba dang / chos kyi 'khor lo bskul ba ni gsol ba 'debs pa'i phung po ste/de gsum gyis bsod nams kyi phung po dpag tu med pa la sogs pa'o/ /de dag gi zhar la smon lam 'debs pa ni sangs rgyas thob par smon pas na ye shes bla na med par gyur cig pa'o/ /sdig pa thams cad kyi gnyen po skyabs su 'gro ba mchog yin pas 'dir yang skyabs su 'gro ba ni mi mchog rgyal ba zhes bya ba la sogs pa'o//de la sngon ni thun mong du bstan la/ da ltar ni skyabs kyi mthar thug pa ni sangs rgyas kho na yin pas gnyis po ni 'dir ma smos pa'o/ /de la mi mchog ni mi'i skye ba zhes pa ste sprul sku'o//yon tan ni sangs rgyas kyi stobs la sogs pa'o/ /bsngags pa ni khyad par du bstod pa'o/ /sum cu rtsa lnga po la sogs pa de dag mtha' yas pa ni mi zad pa'i rgya mtsho dper byas pa ste grangs so/ /thal mo ni lus kyis so/ /skyabs su 'gro ba ni ngag dang sems kyis so//de ltar stobs bzhi dang ldan pas/ sdig pa thams cad dag 'gyur te/ /tshogs rdzogs nas ni sangs rgyas 'thob/ /de bas kun gyis 'dir shes bya/ /'dir ni mdo tsam du bkrol te/ /rgyas par mdo sde las shes bya/ /'di ltar shes byas 'bad pa yis//nus tshad sdig pa bshags par bya/ /rin chen lus 'di thob nas ni/ /le lo snyom las med pa mtshar/ /rang sems kyis ni rang la rtogs/ /yi mug mi 'gyur ngo mtshar che/ /bdag gis snying rje'i shugs kyis sems can don du ni/ /byang chub ltung ba bshags pa'i 'grel pa 'di byas pas//de skyes dge ba dri med de yis sems can rnams/ klu yi rgyal po lta bu'i sangs rgyas 'grub par shog /lta ba thams cad sel mdzad cing / /yang dag lam ni ston pa po / /seng ge lta bu'i bdud 'joms pa'i/ /gau tam de la phyag 'tshal lo//byang chub kyi ltung ba bshags pa'i 'grel pa/ slob dpon chen po 'phags pa klu sgrub kyis mdzad pa rdzogs so// //rgya gar gyi mkhan po shAn+ta rak+Shi ta dang / bod kyi lo tsA ba rnyi ba de ba g+ho Shas bsgyur cing zhus te gtan la phab pa'o//