CLOSE WINDOW

D4000
བོད་ཡིག

@##/ /rgya gar skad du/ Ar+ya a bi kalpa pra be sha d+hA ra NI TI kA / bod skad du/ 'phags pa rnam par mi rtog par 'jug pa'i gzungs kyi rgya cher 'grel pa/ 'jam dpal gzhon nur gyur pa la phyag 'tshal lo/ /log rtog dra ba mang po dag /ma lus bsal la phyag 'tshal te//rnam par mi rtog 'jug pa'i don/ /ci nus rnam par dbye bar bya / /de la mdo ste 'chad par 'dod pas nyan pa'i skye bo dag nan tan gyis len pa la sogs pa la gzud pa'i phyir dang por dgos pa je brjod par bya ste/ dgos pa ma rtogs par ni rtog pa dang ldan pa dag gang la yang 'jug par mi 'gyur ro//de'i 'og tu mdo sde'i don bde blag tu zin par bya ba'i phyir bsdus pa'i don brjod par bya'o/ /de'i 'og tu bsdus pa'i don rtogs par bya ba'i phyir tshig gi don brjod par bya'o/ /de'i 'og tu don la 'brel pa med du dogs pa bsal ba'i phyir tshig gi mtshams sbyar ba bstan par bya'o//de'i 'og tu snga phyi rigs pa dang 'gal ba bsal ba'i phyir rgol ba'i lan brjod par bya ste/ tshul ni de lta'o/ /de la dran pa dang shes rab kyi khyad par gyi mtshan nyid kyis rnam par mi rtog pa'i dbyings la 'jug pa dang / rtog pa'i dra ba ma lus par spang ba ni mdo sde 'di'i dgos pa'o//de nas sa yongs su sbyong ba'i rim gyis thams cad mkhyen pa'i go 'phang 'thob pa'i bar ni dgos pa mthar phyin pa'o/ /de ltar na mdo sde 'di rnam par mi rtog pa'i dbyings la 'jug pa'i thabs yang dag par ston to/ /gang dag thabs gang la phyin ci ma log par gnas pa de dag ni de 'thob pa la the tshom mi skye ste/dper na phyin ci ma log par nad med par sgrub pa la nad pa rnams gnas na nad med par 'gyur ba bzhin no/ /de bas na gang dag mdo sde'i don thos nas de la brten te yang dag par bsgom pa la rtag tu nan tan gyis yun ring por brtson par byed pa de dag ni gdon mi za bar ji skad gsungs pa'i rnam par mi rtog pa'i dbyings la 'jug pa la 'jug par 'gyur ro//des na sgrib pa bsags pa dag ma lus par rim gyis zad de/ sgrib pa med pa'i ye shes shar nas thams cad mkhyen pa'i go 'phang 'thob par 'gyur te/de skad du yang rnam par mi rtog par 'jug pa'i gzungs bzung na/ byang chub sems dpa' myur ba myur bar sangs rgyas kyi chos rnams sgrub zhing rtag tu khyad par du yang 'gro'o zhes gsungs so/ /dgos pa de ni 'di'i ming gis kyang bstan te/ de ltar na 'di la rnam par rtog pa med pas/rnam par mi rtog pa'i chos kyi dbyings zhes bya'o/ /de la gang dran pa dang shes rab kyi khyad par gyis 'jug pa de ni rnam par mi rtog pa la 'jug pa'o/ /de'i stobs kyis byang chub sems dpa' rnams de bzhin gshegs pa thams cad kyis gsungs pa kun 'dzin pas na de nyid gzungs zhes bya'o//tshig kyang de ni rgyur 'gyur bas na de skad bstan te/ dper na sangs rgyas rnams 'byung ba bde'o zhes bya ba lta bu'o/ /mdo sde 'di dngos su ni rnam par rtog pa'i gnyen por gsungs mod kyi/ 'on kyang nyes pa thams cad ni log par rtog pa las 'byung bas na de'i phyir nyes pa ma lus pa'i gnyen po nyid du yang gnas so//de la gzungs 'di'i bsdus pa'i don ni rnam pa bcu bzhi ste/ gleng bzhi dang / gleng bslang ba dang / yang dag par 'dzin du 'jug pa dang / gsol ba 'debs pa dang / 'khor snod du bya ba dang /gnas pa dang / mtshan ma yongs su spang bar yang dag par sbyor ba dang / rnam par mi rtog pa'i dbyings su 'jug pa dang / rnam par mi rtog pa'i dbyings kyi mtshan nyid dang / der zhugs pa'i rtags dang / de'i phan yon dang / de'i las dang dpes rnam par mi rtog pa gcig tu blang ba dang /ji ltar yid la byas pas mtshan ma yongs su spangs te/ rnam par mi rtog pa la 'jug par 'gyur ba thabs dang bcas pa dang bcu bzhi'o/ /de la 'di skad ces bya ba nas bzung ste/ byang chub sems dpa' sems dpa' chen po 'phags pa spyan ras gzigs dbang phyug dang thabs cig go zhes bya ba'i bar 'dis ni gleng bzhi bstan to//de'i 'og tu de nas zhes bya ba nas bzung ste/ chos rnams kyi rnam par mi rtog pa nyid las brtsams te chos ston to zhes bya ba'i bar 'dis ni gleng bslang ba'o/ /de nas zhes bya ba nas bzung ste/rtag tu khyad par du yang 'gro'o zhes bya ba'i bar 'dis ni yang dag par 'dzin du 'jug pa'o/ /de nas zhes bya ba nas bzung ste/ rgya cher ston par 'gyur bar rnam par mi rtog par 'jug pa'i gzungs bshad du gsol zhes bya ba'i bar 'dis ni gsol ba 'debs pa'o/ / de skad ces gsol ba dang zhes bya ba nas bzung ste/ nyes pa dang zhes bya ba'i bar 'dis ni snod du bya ba'o / /bcom ldan 'das kyis zhes bya ba nas bzung ste/ bsam pa gzhag nas zhes bya ba'i bar 'dis ni gnas pa'o/ / rnam par rtog pa'i mtshan ma thams cad yongs su spong ste zhes bya ba nas bzung ste/rnam par mi rtog pa'i dbyings la reg par 'gyur ba tshul bzhin gyi ting nge 'dzin ni yod do zhes bya ba'i bar 'dis ni yang dag par sbyor ba'o/ /de yang dag par zhes bya ba nas bzung ste/ rim gyis yongs su spong do zhes bya ba'i bar 'dis ni rnam par mi rtog pa'i dbyings su 'jug pa'o//ci'i phyir zhes bya ba nas bzung ste/ gnas med pa'i zhes pa'i bar ni/ rnam par mi rtog pa'i dbyings kyi mtshan nyid do/ /byang chub sems dpa' sems dpa' chen po rnam par mi rtog pa'i dbyings la rab tu gnas pas zhes bya ba nas bzung ste/ sprul pa dang mtshungs bar mthong ngo zhes bya ba'i bar 'dis ni der zhugs pa'i rtags so//bde ba chen po zhes bya ba nas bzung ste/ bshad pa chen po la dbang po shin tu rgyas pa yang 'thob po zhes bya ba'i bar 'dis de'i phan yon no/ /dus thams cad du zhes bya ba nas bzung ste/ sangs rgyas kyi mdzad pa lhun gyis grub pa yang rgyun mi gcod do zhes bya ba'i bar 'dis ni de'i las so//rigs kyi bu dag 'di lta ste dper na zhes bya ba nas bzung ste/ rigs kyi bu dag de ltar dpe nye bar bkod pa 'dis rnam par mi rtog pa'i dbyings su 'jug pa khong du chud par bya'o zhes bya ba'i bar 'dis ni dpe'o//tshig lhag ma rnams kyis ni thabs ston to/ /tshigs su bcad pa gnyis kyis ni ji skad gsungs pa'i don bsdu ba ste bsdus pa'i don dang sbyar ro/ /tshig gi don la sogs pa ni gdod brjod par bya ste/ de la bdag la yid ches pa bskyed pa dang / yid brten du rung bas mdo sde gsungs par bstan pas de la gus pa bskyed pa'i phyir yang dag par sdud par byed pas thams cad du thog mar gleng gzhi smos te/de'i phyir yid brten du rung bas gsungs par nges pa sbyin bas na gleng gzhi zhes bya'o/ /de skad ces bya ba ni des ni yang dag par sdud par byed pas mdo sde'i don 'og nas 'byung ba mtha' dag ston te/sgro btags pa dang skur pa spangs pa'i phyir ro/ /bdag gis zhes bya bas ni mngon sum du thob par bstan pa ste/ bdag nyid kyis thos kyi thos pa gcig nas gcig tu brgyud pa ni ma yin pa'o/ /thos pa zhes bya ba 'dis ni bdag gis ma rtogs so zhes bya ba bstan pa ste/thos par zad kyi rtogs pa med par rnam pa gcod pa'o/ /chos kyi dbyings thugs su chud pa 'phags pa 'jam pa'i dbyangs la sogs pa theg pa chen po yang dag par sdud par byed par grags mod kyi/ 'on kyang sangs rgyas dang 'dra bar 'di 'dra ba'i chos rnam pa thams cad du rtogs pa gzhan la mi srid de/de bas na de dag gis kyang / bdag nyid yang dag par sdud par byed par khas blangs pas mdo sde'i don rnam pa thams cad du ma rtogs so zhes ston to/ /gzhan du na ni de nyid ston pa por 'gyur te/ /yang dag par sdud par byed pa ma yin no//de nyid ni yid ches par byed pa'i rgyu ste/ gzhan du na mi srid pa'i don smras na yid ches par mi 'gyur ba'i phyir ro/ /yang na thos zhes bya ba 'dis ni bdag nyid 'chad pa po dgag pa ste/ gzungs 'di yid brten du rung bas gsungs par ston te/ bdag ni de'i tshe na nyen par zad kyi 'chad pa po ni ma yin te/'chad pa po ni bcom ldan 'das so zhes ston pa'i phyir ro/ /'o na yang dag par sdud pa sdud par byed pas/ bcom ldan 'das kyis 'di skad bka' stsal ba zhes ci'i phyir ma brjod ce na/ de skad ces smras pa la yon tan lhag pa ci zhig yod/gal te bcom ldan 'das kyis gsungs pa nyid du bstan par 'gyur ro/ /zhe na/ ma yin te/ bdag gis thos pa zhes bya ba 'dis kyang de bstan par 'gyur te/ ji skad gong du bshad pa bzhin no/ /yang bcom ldan 'das kyis 'di skad bka' stsal pa zhes smras na ni yang dag par sdud par byed pa bdag nyid kyis mngon sum du thos ba ma yin par bstan par 'gyur te/de'i phyir thos pa gcig nas gcig tu brgyud pa las 'ongs pa'i tshig yin par dogs shing yang dag par sdud par byed pa'i tshig la su yang yid ches par mi 'gyur ro//'on te de'i phyir bdag gis thos pa zhes bya ba 'di dang gzhan yang smos na ni de'i tshe tshig mangs par 'gyur ro/ /'di skad bdag gis thos pa zhes bya ba de tsam gyis kyang brjod par 'dod pa'i don rdzogs pa'i phyir bcom ldan 'das kyis bka' stsal pa zhes bya ba'i tshig lhag par 'gyur ro//de bas na bcom ldan 'das kyis kyang yongs su mya ngan las 'das pa chen po la sogs pa'i mdo las 'di skad bdag gis thos pa zhes bya ba la sogs pa'i tshig rnams kyis yang dag par bsdu ba byos shig ces lung phog go/ /de bas na bcom ldan 'das kyi lung dang mthun bar yang dag par sdud par byed pas de bzhin du yang dag par bsdu ba byas par 'gyur te rgol ba 'di ni mi rung ngo //gzhan dag gis 'dir lan du smras pa/ bcom ldan 'das kyi gsung gcig la sems can gyi mos pa sna tshogs kyi dbang gis rnam pa du mar bshad par snang ba'i shes pa skye bas 'di ni bcom ldan 'das kyis 'di skad bka' stsal ba zhes bya bar mi rung ngo //de bas bdag gis thos pa zhes bya ba 'dis ni/ yang dag par sdud par byed pas bdag nyid kyis thos pa'i lam nas 'ongs pa'i rim pa ston pas bcom ldan 'das kyis 'di skad bka' stsal ba zhes mi brjod de/bcom ldan 'das kyis bshad pa de'i yul ma yin pa'i phyir ro/ /de bas na mjug tu de skad ces bka' stsal to zhes brjod kyi 'di skad bka' stsal to zhes ni ma brjod do/ /bcom ldan 'das kyis ni yi ge dang nges pa'i tshig tu brjod pas cung zad kyang ma bshad de/de ni dus thams cad du rnam par mi rtog pa'i phyir ro/ /bcom ldan 'das kyis dbang tsam gyis sems can rnams la de ltar chos ston par snang bar 'gyur te/ de bas na yang dag par sdud par byed pa nyid la rab tu snang ba dang mthun par thos pa thos zhes bya bar smras kyi/bcom ldan 'das kyis 'di skad bka' stsal pa zhes pa ni ma smras te/ bcom ldan 'das kyis yi ge 'bru gcig kyang ma bshad pa'i phyir ro zhe 'o/ /de yang mi rung ste/ gal te yang dag par sdud par byed pas rang gis thos pa'i lam nas 'ongs sam/rang la snang ba tsam las 'ongs so zhes bstan na ni bcom ldan 'das kyis gsungs pa kho na ma yin te/ de'i tshe mdo sde 'di zhal nas gsungs pa nyid du bstan par byas pa ma yin pas ma nyan pa'i skye bo dag 'di la gus par mi skyed par 'gyur ro/ /gal te 'di bdag la snang ba dang mthun par bstan na ni de la de bzhin du snang ba ma skyes pa ni ma yin na/de'i tshe bcom ldan 'das kyis 'di skad bka' stsal ba zhes kyang ci'i phyir ma bstan/ 'on te 'chad par snang ba med na ni de thos so snyam pa'i snang ba'ang mi 'byung bar 'gyur ro/ /bcom ldan 'das chos ston to/ / bcom ldan 'das kyis 'di skad bka' stsal to zhes bya ba la sogs pa yang dag par sdud par byed pas ci'i phyir brjod pa smos shig /gal te gzhan dag dam pa'i chos la gus pa bskyed par bya ba'i phyir rang la snang ba dang mthun par 'di skad smras so zhe na ni/ gal te de lta na de bzhin du dang por yang bcom ldan 'das kyis 'di skad bka' stsal pa zhes ci'i phyir ma brjod gzhan du na sngar ni rang la snang ba tsam gyis bshad par bsgrubs la/phyis ni bcom ldan 'das kyis de skad bka' stsal to zhes mjug tu bcom ldan 'das kyis bka' stsal par bsgrub na ltag 'og 'gal bar 'gyur ro//bcom ldan 'das kyis 'di skad bka' stsal pa zhes bya ba dang / bcom ldan 'das kyis de skad ces bka' stsal ces bya ba'i tshig 'di gnyis ni bsnan pa med par bye brag cung zad kyang med de/ yang dag par sdud par byed pas bdag la snang ba tsam dang mthun pas tshig gnyi ga la bsnan pa dang bcas pas tshig sbyar kyang cung zad kyang mi 'gal na/gang gis na mjug tu de skad ces bka' stsal to zhes brjod kyi/ 'di skad bka' stsal to zhes ni ma brjod do zhes bya ba yang khungs su mi 'gyur te/ de bas na 'di ni cir yang mi rung ngo / /dus gcig na zhes bya ba ni dus gcig gi tshe 'am 'khor 'dus pa na 'di thos so zhes gong ma dang sbyar ro//'dis ni chos 'di thos par dka' bar ston te/ thams cad du thams cad kyis 'di 'dra ba'i chos thos par mi 'gyur ro zhes bstan pa'o/ /yang na bdag nyid mang du bstan pa ste/dus gzhan na ni gzhan yang thos par ston pa'i phyir te/ dus gcig na bcom ldan 'das bzhugs zhes bya ba 'og ma dang sbyar ro/ /'dis ni 'dul ba'i dgos pa mtha' yas pas dus gzhan na ni bcom ldan 'das gzhan na bzhugs su so zhes ston to/ /bcom ldan 'das zhes bya ba 'dis ni de bzhin gshegs pa'i yon tan brjod pa'i sgo nas byung bar bstan pa ste/gzhan la yon tan 'di lta bu mi srid pa'i phyir ro/ /de la bdud bzhi bcom pa'am dbang phyug la sogs pa'i yon tan dang ldan pas bcom ldan 'das te/ dbang dang rab tu ldan pa dang //gzugs dang dpal dang grags pa dang / /ye shes dang ni nan tan dang / /drug dang rab tu ldan phyir ro/ /zhes ji skad gsungs pa lta bu'o/ /yang na srid pa dang mya ngan las 'das pa dang bral ba'am/ srid pa'i 'gro ba las 'das pa'i phyir ro/ /yang na mi 'jigs pa bzhi thob nas 'jigs pa ma lus pa dang bral bas nges pa'i tshig gi tshul gyis bcom ldan 'das zhes bya ste/'phags pa phyir mi ldog pa'i 'khor lo'i mdo las/ /nam mkha' 'dra ba'i chos dag ni/ /lus can rnams la rab ston kyang / /'di la 'jigs pa med pa ste/ / de bas bcom ldan 'das zhes bya/ /zhes ji skad gsungs pa lta bu'o/ /rgyal po'i khab ces bya ba ni/ grong khyer gyi khyad par gyi ming ste/ sngon rgyal po'i ming khang pa'i ming du btags pas mi ma yin pa dag gis ma gtses pas de skad btags zhes grag ste/ de bas na grong khyer de la de skad ces bya'o//'di ni grong khyer thams cad kyi mchog yin pas na der bshad pas de bzhin du mdo sde 'di yang mdo sde thams cad kyi mchog tu ston to/ /bzhugs zhes bya ba ni rnam pa gsum gyis bzhugs pa ste/ spyod lam gyis bzhugs pa dang / chos 'chad cing bzhugs pa dang /nang du yang dag 'jog la bzhugs pa'o/ /khams gsum pa thams cad ces bya ba la sogs pas ni nang du yang dag 'jog la bzhugs pa ston to/ /'dir sgrib pa'i dri ma thams cad dang bral ba'i phyir yid dang bar byed pas na khang bzangs zhes bya ste/ de ni de bzhin gshegs pa'i bsam gyis mi khyab pa'i ting nge 'dzin to//rnam par mi rtog pa'i chos kyi dbyings kyi snying po ni khang pa gang la snying por yod pa de la de skad ces bshad de/ de rtogs pas gnas pa'i phyir de nyid de'i snying po zhes bya'o/ /zag pa med pas khams gsum las 'das pa'i phyir de ni khams gsum pa thams cad las khyad par du 'phags pa yang yin la rnam par mi rtog pa'i chos kyi dbyings kyi snying po yang yin no zhes bsdu'o//yang na khang pa ni gnas kyi khyad par te/ de yang 'jig rten las 'das pa'i dge ba'i rtsa ba las byung bas khams gsum gyi sred pa dag gis bdag gir ma byas pa'i phyir/khams gsum na de lta bu gzhan med pas khams gsum pa thams cad las khyad par du 'phags pa zhes bya'o/ /chos kyi dbyings rtogs pa las byung ba'i phyir rnam par mi rtog pa'i chos kyi dbyings kyi snying po las byung ba'i gnas de la de skad ces bshad do//de yang bsod nams dang ye shes kyi tshogs zab cing rgya che ba gzhal du med pas rnam par sbyangs pa'i ye shes kyi mig can byang chub sems dpa' rnams kyi spyod yul te/ dman pa la mos pa mig ser gyi nad kyis thebs pa lta bu'i ye shes kyi mig can nyan thos la sogs pa dag gis ni ma yin no//de bas na nyan thos kyi mdo sde bstan pa las ni rnam pa 'di lta bu ma gsungs te/ bcom ldan 'das kyi 'byor pa'i rnam pa thams cad la dman pa la mos pa'i sems can rnams kyis ji lta ba bzhin du mos par mi nus te/de bas na mos pa ji lta ba bzhin du sems can gyi bsam pa dang 'tsham par nyan thos la sogs pa dag la bcom ldan 'das nyid kyang spyod pa chung ngu ston to/ /byang chub sems dpa' rnams la ni rgya chen po yang mi 'gal lo/ /gnas dben pa 'di bstan pas kyang bcom ldan 'das nang du yang dag 'jog la bzhugs pa nyid du bstan to//rgyal po'i khab na bzhugs pas ni gzhan gyi don phun sum tshogs pa bstan to / bdag gi don dang gzhan gyi don phun sum tshogs par der bzhugs so/ /de bas na yul gyi khyad par kho na brjod kyi/dus kyi khyad par ni ma yin te/ 'di ltar yul gyi khyad par brjod pas ni/ de na bcom ldan 'das chos 'chad pas bzhugs pa dang / spyod lam gyis bzhugs pa bstan to / /bzhugs pa gnyis pos ni bcom ldan 'das gzhan gyi don mdzad par shes par bya'o/ / 'di ltar chos 'chad cing bzhugs pas ni/ yang dag par bstan pa dang / yang dag par 'dzin du 'jug pa dang / gzings bstod pa dang / rab tu dga' bar mdzad pas ngan 'gro dang 'khor ba las bkrol te/ bde 'gro dang theg pa gsum la rab tu bkod pas bcom ldan 'das sems can gyi don dpag tu med pa mdzad par shes par bya'o//spyod lam gyis bzhugs pas kyang bsod snyoms la rgyu ba la sogs pas na grong gi bud med dang / rgan po dang / nad pa dang / dbul po la sogs pas bcom ldan 'das la bsod snyoms la sogs cung zad kyang phul bas kyang bsod nams dpag tu med pa rab tu 'phel ba'i phyir ro//ngo mtshar sna tshogs rgyun du bstan pas long ba la sogs pas ni mig la sogs pa 'thob pa dang / ma dad pa rnams kyi dad pa bskyed pa dang / dad pa rnams kyi dad pa 'phel bar bya ba'i phyir te/mdo ste las ji skad 'byung ba bzhin no/ /bcom ldan 'das kyi bzhugs pa gnyis kyis ni gzhan gyi don dpag tu med pa nyid du shes par bya'o/ /dus kyi khyad par brjod pas ni phun sum tshogs pa gang yang mi ston pas de bas na de ni gang du yang ma smos te/ yang dang yang gzhan du 'gyur bas dus la nges pa med de/brtag dka' ba'i phyir ro/ /skad cig ma gcig la yang sangs rgyas dang byang chub sems dpa' rnams bskal pa dang / zhag dang / zla ba la sogs pa'i dbye ba du ma ston pa'i phyir ro/ /de bas na dus la nges pa bya bar mi nus pas gang du yang ma smos so//gzhan dag gis lan du smras pa/ dus de nyid kyi tshe/ bcom ldan 'das yul gzhan du yang snang bas yul tha dad pa nas lhags pa rnams dus kyi khyad par brjod pa na de'i tshe na ni bcom ldan 'das nged kyi drung na bzhugs so/ /nged kyi drung na bzhugs so zhes rtsod par 'gyur te/de bas na dus kyi nges pa ni ma byas so zhe'o/ /de la yul gyi khyad par 'di smras pas ci'i phyir rtsod par mi 'gyur ba smros shig /de'i tshe bcom ldan 'das yul gzhan na yang snang ba'i phyir ro/ /'on te bcom ldan 'das kyi mthu'i khyad par bsam gyis mi khyab pa la mos pas de dag der rtsod par mi 'gyur na ni/de lta na gang dus la yang nges par mi 'gyur te 'di ni gyi na'o/ /nang du yang dag 'jog la bzhugs pas ni bdag gi don phun sum tshogs pa bstan te/ don gnyis phun sum tshogs pa'i ston pa la ni skyabs su 'gro bar rigs pa'o//des gsungs pa'i lung ni mi slu bas tshad mar rigs te/ de bas na bcom ldan 'das kyis gsungs pa la gus pa bskyed pa'i phyir phun sum tshogs pa gnyi ga smos so/ /yang 'di la dbang su yod snyam pa la/ chen po zhes bya ba gsungs te/nyon mongs pa bcom pa'i phyir dge slong ngo / /de dag 'dus pa la bdud la sogs pas dbyer mi phyed de 'dus pas na dge 'dun zhes bya'o/ /byang chub sems dpa'i tshogs chen po zhes bya ba ni / thabs cig ces bya ba dang sbyar ro/ /de dag ni sems can rnams la khong du chud par byed pa'am/byang chub la 'jog pa'am/ byang chub sems dpas na byang chub sems dpa'o/ /de dag gi tshogs ni 'dus pa ste/ tshogs gnyi ga yang grangs dang yon tan gnyis kyi chen po'o/ /theg pa chen po la yang nyan thos rnams 'jug par 'gyur ba bstan pa'i phyir/theg pa chen po'i mdo sde bshad pa la nyan thos rnams kyang bshad kyi/ byang chub sems dpa' rnams ni nyan thos kyi mdo ste bshad pa la ma yin te/ de dag der mi 'jug pa'i phyir ro/ /dge slong gi dge 'dun ni rab tu byung bar 'dra ba dang /bya ba byas pa dang / bdag gi don lhur len pas rtag tu bcom ldan 'das kyi zha 'bring byed pa dang / rab tu byung ba rnams la gus pa bya bar brjod pa'i phyir gong du bstan to/ 'di lta ste zhes bya ba la sogs pas byang chub sems dpa' rnams kyi ming brjod pa ni de dag mthu chen por grags pa dang /mdo sde yang de dag gi phyir bshad pa'i phyir ro/ /nyan thos rnams kyi ming ma brjod pa ni de dag de las bzlog pa'i phyir ro/ /sems dpa' chen po zhes bya ba ni/ sems can gyi tshogs chen po bsgral ba'i phyir go cha bgos pa dang /blo che ba dang / gtong ba chen po dang ldan pa dang / mthu chen po'i phyir ro zhes shes rab kyi pha rol tu phyin pa las gsungs pas na sems dpa' chen po'o/ /yang na chos dang / sems bskyed pa dang / bsam pa dang / mos pa dang / tshogs dang / dus dang / yang dag par 'grub pa che bas na sems dpa' chen po'o//de la chos chen po ni/ byang chub sems dpa' rnams kyi shes rab kyi pha rol tu phyin pa stong phrag brgya pa la sogs pa'i chos rab tu rgya che ba'i phyir ro/ /sems bskyed pa chen po ni de dag nyid bla na med pa yang dag par rdzogs pa'i byang chub tu sems bskyed pa'i phyir ro//bsam pa chen po ni sems can thams cad la phan pa dang bde ba bya bar sems pa'i phyir ro/ /mos pa chen po ni zab cing rgya che ba'i chos la mos pa'i phyir ro/ /tshogs chen po ni bsod nams dang ye shes kyi tshogs chen po dpag tu med pa'i phyir ro//dus chen po ni bskal pa grangs med pa gsum du brtson 'grus brtsoms pas byang chub 'thob pa'i phyir ro/ /'di dag thams cad kyis ni rgyu chen po bstan to/ /yang dag par 'grub pa chen po 'dis ni 'bras bu ste/ bla na med pa yang dag par rdzogs pa'i byang chub 'thob pa'i phyir ro//rnam par mi rtog ces bya ba ni phyin ci log tu mi rtog pas rnam par mi rtog ste/ log par rtog pa spangs pa'i phyir ro/ /'di la 'dis rnam par ma brtags pas na rnam par mi rtog pa ste/ de bzhin nyid dang / yang dag pa'i ye shes so/ /des de thob pas/ snang zhing gsal bas na rnam par mi rtog snang ba'o/ /rnam par mi rtog pa ni zla ba bzhin du bsil bar byed pas na rnam par mi rtog zla ba'o/ /rnam par mi rtog pa'i ye shes la dbang thob pa'i phyir de la dpa' bas na rnam par rtog med dpa' ba'o/ /rnam par mi rtog pa'i dbang du byas nas rnam par mi rtog pa'i chos theg pa chen po des mngon sum dang brgyud de bshad pa'i phyir de ston pa la mkhas pa gang yin pa de la de skad ces bya'o//rnam par rtog med ngo bo nyid/ /ces bya ba ni rnam par mi rtog pa'i ye shes kyi bdag nyid du gyur pa'i phyir ro/ /rnam par mi rtog pa'i ye shes la dbang thob pas na/rnam par rtog med dbang phyug go/ /rnam par mi rtog cing dmigs pa med pa'i byams pa chen po la dbang ste dbang thob pas na rnam par rtog med byams pa chen po'i dbang phyug go/ /thugs brtse bas skal ba yod pa dang skal ba med pa'i sems can thams cad la gzigs pa'i dbang po ste dbang thob pas na spyan ras gzigs dbang phyug go//ming lhag ma rnams ni khong du chud par sla bas rnam par ma phye'o/ /ji skad du bshad pa'i ming don dang ldan pa'i byang chub sems dpa' rnams kho na'i ming brjod pa ni de dag gtso bo yin pa'i phyir te//de'i tshe rnam par mi rtog pa las brtsams nas chos ston pa'i phyir ro/ /tshul bzhin ma yin pa yid la byed pa'i rnam par rtog pa rid du spangs pa dag kho nas dam pa'i chos 'di mnyan pa dang mos par nus te/ gzhan gyis ni ma yin no zhes bstan pa'i phyir ro//gleng gzhi bshad zin to/ /gleng bslang ba ste/ de nas zhes bya ba la sogs pa gsungs so/ /yongs su bskor zhes bya ba ni kun nas te/ 'khor de rab tu mang ba'i phyir ro/ /mdun gyis bltas zhes bya ba ni mdun gyis phyogs pa ste/ gus pa bskyed par bya ba'i phyir ro//chos rnams kyi rnam par mi rtog pa nyid las brtsams te zhes bya ba ni chos thams cad ni yod pa dang med pa la sogs pa'i chos las 'das pa ste/ de bas na rnam par mi rtog pa ni brjod du med pa'o/ /chos rnams kyi rnam par mi rtog pa'i chos nyid de brjod pa'i phyir chos ston te/skabs 'dir bcom ldan 'das kyis mdo sde 'di gsungs so/ /de bas na ji skad gsungs pa'i chos ston pa na 'khor snod du rung bar mkhyen nas gzungs 'di nyan du gzhug pa'i phyir bcom ldan 'das kyis yang dag par 'dzin du 'jug pa'o/ / yang dag par 'dzin du 'jug pa bstan pa'i phyir/de nas bcom ldan 'das kyis zhes bya ba la sogs pa gsungs so/ /de nas zhes bya ba ni skabs rgyun chags pa'o/ /'khor la kun du gzigs pa ni 'chad par bzhed pa bstan pa'am/ skal ba yod pa dang / skal ba med pa brtag pa'i don to//gal te bcom ldan 'das ni rtag tu mnyam par gzhag pas de'i phyir gzigs zhes bya ba mi rigs so zhe na/ dus ji lta ba bzhin du skal ba yod pa dang skal ba med pa mkhyen pa dang khyad par mdzad pas de'i phyir rtag tu mnyam par gzhag pa nyid de/ 'di ni ji na'o/ / yang dag par 'dzin du 'jug pa 'di yang tshig gis 'jug par mdzad pa dang / 'bras bu bstan pas so/ /zung shig ces bya ba ni tshig gis 'jug par mdzad pa'o/ /bzung ba de yang tshig dang don dang bsgrub pas so/ /de bzung na zhes bya ba la sogs pas ni 'bras bu bstan pas so//'bras bu de yang / ring ba dang / nye ba ste/ ring ba ni sangs rgyas su 'grub pa'o/ /nye ba ni gang mos pas spyod pa dang / sa la 'jug pa na gong nas gong du dus thams cad du mngon par shes pa la sogs pa yon tan gyi khyad par 'thob pa'o/ /myur ba myur bar zhes bya ba ni skyen pa skyen par ro//sgrub ces bya ba ni skyed pa'o/ /rtag tu khyad par du yang 'gro'o zhes bya ba ni bye brag 'thob par 'gyur zhes bya ba'i tha tshig go/ /kha cig tu ni 'di lta bus 'dul ba'i skye bo dag nye bar gyur pas bcom ldan 'das nyid kyi yang dag par 'dzin du 'dzud do/ /kha cig tu ni zhus kyang mi 'chad de/de na de lta bu'i chos kyi snod du gyur pa med par shes par bya'o/ /da ni gsol ba 'debs pa ste/ de nas zhes bya ba la sogs pa gsungs so/ /gal te bcom ldan 'das 'chad bzhed par shes na bcom ldan 'das la ci'i phyir gsol ba 'debs/de nyid kyi phyir te/ 'di ltar gang gi phyir bcom ldan 'chad pa bzhed par shes pa de nyid kyi phyir byang chub sems dpa' dag gsol ba 'debs te/ ma gsol bar chos 'di lta bu mi 'chad de/ bcom ldan 'das dang / chos rnams kyi che ba'i bdag nyid brjod pa'i phyir ro//byang chub sems dpa' rnam par mi rtog snang ba des chos kyi dbyings nyid khong du chud pas gzungs kyi don rig tu zin kyang chos mnyan pas ngoms par mi bya'o zhes gzhan dag la bstan pa'i phyir gsol ba btab po/ /stan las langs pa la sogs pa'i rgyu ni bcom ldan 'das la gus par bya ba dang /'di bzhin gsol ba thob shig par gzhan dag la bstan pa'i phyir ro/ /thos nas 'dzin pa zhes bya ba 'dis ni gzungs bshad pa'i don chen po ston te/ bdag dang gzhan gyi don sgrub pa'i phyir ro/ /tshul bzhin yid la bgyid pa zhes bya ba ni de'i don ji lta ba bzhin du bsam pa dang bsgom pa'o//bcom ldan 'das thams cad mkhyen pas ji ltar gzungs 'di bshad pas gzhan dag 'di la bdag dang gzhan gyi don chen po 'grub par 'gyur ba mkhyen mod kyi/ 'on kyang gsol ba ma btab pa la bcom ldan 'das don med par cung zad kyang mi 'chad de/bcom ldan 'das las chos thos nas gzungs la sogs pa nan tan gyis sgrubs shig par gzhan dag la bstan pa'i phyir 'di gsol to/ /de skad ces gsol ba btab pa la gnang bar dgongs nas/ bcom ldan 'das kyis 'khor snod du rung bar mdzad pa'i phyir bsdus pa'i don lnga pa ste/de'i phyir zhes bya ba la sogs pa gsungs so/ /nye bar sbyor ba 'di ni spyi yin pas rgyu bstan pa ste/ bshad do zhes bya ba'i tshig de dang sbyar ro/ /yang na nyon zhes bya ba la sogs pa dang ngo / /gal te khyed cag nyan pa la sogs pas sgrub na de'i phyir ngas bshad do zhes bya ba'am/gang gi phyir ngas bshad pa de'i phyir khyed cag nyon cig ces bya ba la sogs pa dang sbyar ro/ /nyon la zhes bya ba ni rna blags te nyan du 'jug pa'o/ /legs par zhes bya ba ni phyin ci ma log par 'dzin du gzhug ba'o//rab tu yid la zung shig ces bya ba ni kun du 'dzin du 'jug gzhug pa'o/ /'dis ni snod khas phub pa dang / mi gtsang ba dang / rdol ba lta bu dgag pa'i phyir go rims bzhin te 'khor snod du rung bar mdzad pa'o/ /bshad do zhes bya ba ni de lta na ngas bshad kyis gzhan du snod khas phub pa dang /mi gtsang ba dang / rdol ba la char bab pa dang 'dra na ni bshad pa don med par 'gyur ro zhes dgongs pa'o/ /yang na nga ni 'chad par zad de/ khyed rnams kyis mnyan pa dang gzung ba la sogs pa la nan tan gyis sgrubs shig par ston to/ / gzhan du na gal te bcom ldan 'das nyid kyis thams cad mdzad par gyur na ni de'i tshe yid du mi 'ong ba'i las la sogs pa'i sgrib pas sems can dmyal ba la sogs par su yang mi smin pa zhig na/ bcom ldan 'das kyis ni thams cad mdzad par mi spyod do/ /de lta bas na sems can de dag lus kyi nyes par spyod pa la sogs pa la mi brten par bya ba'i phyir ci chos bstan par bya ba 'am/'on te de dag gi lus dang sems kyi tshul sgyur/ lus la sogs pa ni rang gi gnas dang 'brel bar 'byung bas gzhan gyi lus la sogs pa'i dngos por bsgyur du btub mi srid do//de'i phyir chos rnams bsgyur du mi rung ba sems can rnams ni las bdag gir bya ba yin no/ /de bas na de bzhin gshegs pa 'chad pa ste/ khyed cag nyid kyis sgrub par byos zhes gsungs so/ /yang sman pas ma nyes sman gyis ma yin te/ nad pa de nyid kyis ni nyes par gyur//ces gsungs so/ /bcom ldan 'das kyi ltar nyan zhes bya ba ni khas blangs pa'o/ /da ni bcom ldan 'das kyis zhes bya bas byang chub sems dpa' nyan pa rnams la gnas pa la sogs pa'i don ston to/ /'di la 'dis rnam par mi rtog pas rnam par mi rtog pa ste/de bzhin nyid dang / rnam par mi rtog pa'i ye shes so/ /de'i ched du chos gang bshad pa de ni rnam par mi rtog pa'i dbang du bya ba'o/ /de ni theg pa chen po mtha' dag ste/ thams cad kyang de bzhin nyid dang / byang chub la gzhol ba'i phyir te/ dgongs pa nges par 'grel ba las/ chos 'di dag thams cad ni de bzhin nyid la gzhol ba/de bzhin nyid la 'bab pa/ de bzhin nyid la bab pa/ byang chub la gzhol ba/ byang chub la 'bab pa/ byang chub la bab pa zhes rgya cher ji skad gsungs pa lta bu'o/ /de'i chos thos te zhes bya ba ni thos pa'i shes rab kyis so/ /rnam par mi rtog pa la bsam pa gzhag nas zhes bya ba ni rnam par mi rtog pa rnam pa gnyis su ji skad gsungs pa la dad pa dang 'dun pa'i mtshan nyid kyis te/bsams pa'i shes rab kyis bsam pa bstan par byas nas des rab tu bstan pa dang / dad pas ni mngon par yid ches pa skye zhing 'dun pas ni mos pa 'phel bar 'gyur ba'i phyir te/rnam par mi rtog pa la bsam pa gzhag pa de las gzhan dag gis bskyod mi nus pa'i don to/ /thos pa dang bsam pa'i shes rab la gnas pa des ni bsdus pa'i don drug pa bstan to/ /de la rab tu gnas pa'i bsgom pa la sbyor bas de'i 'og tu mtshan ma rnams yongs su spong par yang dag par sbyor bas na/mtshan ma thams cad yongs su spong ste zhes bya ba bsdus pa'i don bdun pa gsungs so/ /mtshan ma de yang rnam pa bzhi ste/ mi mthun pa'i phyogs kyi mtshan ma dang / gnyen po'i phyogs kyi mtshan ma dang /gnyen po bsgom pa'i 'bras bu'i mtshan ma'o/ /'di dag ni gong nas gong du yang zhing phra bas na/ gos kyi dri ma bkru ba'i rim pa bzhin du ji ltar rags rim du spang ba'i rim pa bstan pa'i phyir de thog ma nyid du rang bzhin la rnam par rtog pa'i mtshan ma thams cad yongs su spong ngo zhes bya ba gsungs so//thog ma med pa'i dus nas ma rig pa'i dbang gis thams cad kyi rang bzhin yid la mngon par 'du byed pa med par 'jug pa ni rang bzhin gyi mtshan ma rnams so/ /de dag kyang mdor bsdu na gzung ba dang 'dzin pa'i dngos po rnam pa gnyis su 'jug ste/gzung ba'am 'dzin pa yang rung zhes gang gsungs pa'o/ /de la gzugs nye bar len pa'i phung po la ni gzung ba'i dngos por 'jug /phung po lhag ma bzhi la ni 'dzin pa'i dngos por te/ rgyas par ni nye bar len pa'i phung po tha dad pas rnam pa lngar dbye ste/zag pa dang bcas pa'i dngos po ni nye bar len pa'i phung po lnga rnams te zhes bya ba gang gsungs pa ste/ nye bar len pa rnams ni nyon mongs pa rnams so/ /de las byung ba'i phung po rnams ni nye bar len pa'i phung po rnams so/ /gal te thog ma med pa'i dus nas ma rig pa'i dbang gis zhugs pa'i rang bzhin gyi mtshan ma 'di dag byung na de dag spang bar ji ltar nus te/de dag tsher ma dbyung ba bzhin du sems las gsal bar ni mi [(]rud [,]rung [)]ngo snyam du sems pa'i bsam pas de dag ji ltar spang zhes 'dri ba'i lan du 'dir/ mngon du zhes bya ba la sogs pa gsungs te/ mngon du zhes bya ba'i bshad pa ni snang bar 'gyur ba zhes bya ba'o/ /gang gi tshe snang bar 'gyur bas mngon du 'gyur ba de'i tshe yid la mi byed pas spang bar bya'o/ /'dir yid la mi byed pa ni yid la byed pa med pa tsam ni ma yin te/ med pa ni dngos po med pas gang gi rgyu'i dngos por yang mi 'thad pa'i phyir ro//yang dag par so sor rtog pa med par ni snang bar gyur pa'i gzugs la sogs pa'i mtshan ma rnams yid la byed par mi nus pa'i phyir ro/ /yid la byed pa de las gzhan yid la mi byed pa yang ma yin te/ gzugs la sogs pa gzhan gang ci yang rung ba dag kyang yid la mi byed par thal bar 'gyur ba'i phyir te/de dag gi gnyen po ni ma yin no/ /de lta bas na yid la byed pa de dang mi mthun pa yang dag par so sor rtog pa'i mtshan nyid yid la mi byed pa gang yin pa de nyid yid la mi byed par dgongs te/ mi mthun pa'i don gyis dgag pa gzung ba'i phyir mi mdza' ba dang brdzun pa la sogs pa bzhin no/ /yang na yid la mi byed pa ni 'bras bur gyur pa'i phyir yang dag par so sor rtog pa la yid la mi byed pa'i sgrar gdags pas brjod de 'bras bu tsam bstan pas kyang don gyi shugs kyis de la bya bar mngon no//de ltar na mtshan ma rnams yongs su spang bar nus te/ 'di ltar ma rig pa'i dbang gis phyin ci log gi rnam pas gzugs la sogs pa'i mtshan ma snang ba dag rnal 'byor bas so sor brtags na gang gi tshe mi dmigs pa de'i tshe mngon par zhen pa rnams spong ba'i phyir ro//de dag rnam par spangs na mtshan ma med pa yang rab tu rtogs so/ /sgrib pa rnams spangs nas dri ma med pa'i ye shes kyang 'char te 'dod chags la sogs pa'i bag la nyal ba rnams ma lus par spangs pa yang 'thob par 'gyur ro/ /de skad du 'phags pa dkon mchog sprin las kyang /de de ltar skyon la mkhas pas spros pa thams cad dang bral bar bya ba'i phyir stong pa nyid sgom pa la rnal 'byor du byed do/ /de stong pa nyid la sgom pa mang bas gnas gang dang gang dag la sems 'jug cing / sems mngon par dga' ba'i gnas de dang de la rang bzhin yongs su btsal na stong par rtogs so//sems gang yin pa de yang yongs su brtags na stong par rtogs so/ /sems gang gis yongs su brtags pa de yang yongs su btsal na stong par rtogs so/ /de de ltar rtogs pas mtshan ma med pa la rnal 'byor du byed do zhes gsungs so//'phags pa dkon mchog brtsegs pa las kyang / /tshul khrims la ni gnas nas ting nge 'dzin kyang 'thob/ /ting nge 'dzin rnams thob pas shes rab shin tu sgom/ /shes rab kyis ni ye shes rnam par dag pa 'thob/ /ces gsungs so/ /'phags pa dgongs pa nges par 'grel pa las kyang /bsam gtan gyis ni nyon mongs pa rnams rnam par 'jil lo/ /shes rab kyis ni bag la nyal yongs su spong ngo zhes gsungs so/ /'phags pa ting nge 'dzin gyi rgyal po'i mdo las kyang / gal te chos la bdag med so sor rtog /so sor de brtags gal te sgom pa ni//de nyid mya ngan 'das thob 'bras bu'i rgyu/ /rgyu gzhan gang yin des ni zhir mi 'gyur/ /zhes gsungs so/ /'di nyid las kyang / ji ltar gnas pa de dag la nye bar brtags pas rnam par mi rtog pa'i dbyings su 'jug ce na zhes 'og nas gsungs so/ /de lta bas na yang dag par so sor rtog pa'i mtshan nyid ni 'dir yid la mi byed par dgongs so//de ni rnam par rtog pa'i ngo bo nyid yin mod kyi 'on kyang de nyid las byung ba yang dag pa'i ye shes kyi mes de bsreg par 'gyur te/ shing gnyis drud pa las byung ba'i mes shing de gnyis sreg par byed pa bzhin no//de lta bas na rnam par mi rtog pa'i ye shes bskyed par 'dod pas yang dag par so sor rtog pa'i mtshan nyid lhag mthong la thog mar bsgom par bya ste/ des mtshan ma rnams yongs su spong bar 'gyur ro/ /de la rnal 'byor pas bsgom pa'i tshe thog mar bya ba ci yod pa thams cad zin par bya ste/sgra'i tsher ma med yid dang mthun pa'i gnas su 'gro ba mtha' dag ma lus pa gdon pa'i bsam pas snying rje chen po mngon du byas la/ phyogs thams cad bzhugs pa'i sangs rgyas bcom ldan 'das dang / byang chub sems dpa' thams cad la phyag byas nas/gzugs ri mor bris pa 'am gzhan yang rung ste mdun du gzhag la/ de dag la yang ci nus pas mchod de/ sdig pa bshags pa dang / bsod nams kyi rjes su yi rang ba byas nas/ mig gnyis ha cang yang mi dbye bar sna'i rtse mor bltas la lus drang por bsrang ste /skyil mo krung ngam/ skyil mo krung phyed dam gang yang rung ba byas la nang du bsdus pas bskyed pa'i dran pas stan bde ba la 'dug nas so/ /yang na ji ltar 'dod pa'i spyod lam du gnas nas de kho na la bsgom mo/ /der yang ji skad bstan pa'i mtshan ma snang ba la sems gzhag nas bying ba dang rgod pa la sogs pa zhi bar byas te/zhi gnas sgrub pa la yang dag pa'i so sor rtog pa'i mtshan nyid yid la mi byed pa des mtshan ma de dag yongs su spong ngo / /der yang ji skad thos pa dang bsam pa'i don la nges pa'i tshul gyis so sor brtag par byas te/ rten cing 'brel bar 'byung ba bsgom pa'am/'ong ba dang 'gro ba med par so sor brtag pa'am bdag dang gzhan dang gnyi ga las mi 'byung bar dpyad pa 'am/ cha la so sor brtag pa'am/ mdor na ji ltar rtog pas kyang rung ste / dngos po med pa la mos pa skye bar 'gyur ba de ltar so sor brtag par bya'o//de nas de spong ba na brgya la rnal 'byor pa dag 'di snyam du sems te/ gzugs la sogs pa nye bar len pa'i phung po 'di dag /don dam par ma skyes su zin kyang sbyin pa la sogs pa pha rol tu phyin pa dag ni skyes pa kho na yin no/ /gzhan du na ni byang chub sems dpa' rnams kyi ser sna la sogs pa'i gnyen po dang /longs spyod chen po la sogs pa 'thob pa dang / byang chub kyi tshogs su gyur pa de dag bcom ldan 'das kyis ma bstan to snyam nas/ de nas rnam par rtog pa de kun du 'byung bar gyur na rnam par mi rtog pa'i thams cad du song ba la 'jug pa ma yin no//de bas na rnam par rtog pa 'di yang de bzhin du rnal 'byor pas yid la mi byed pas spang bar bya'o zhes ston te/ de rang bzhin la rnam par rtog pa'i mtshan ma de dag rim gyis spong ba na zhes bya ba la sogs pas ni pha rol tu phyin pa 'di dag ni gnyen po ste/ ser sna la sogs pa dang /nyon mongs pa la sogs pa'i sgrib pa'i gnyen por gyur pa'i phyir te/ ji ltar 'os par sbyar ro/ /rnal 'byor du gnas pa na chos thams cad ma skyes pa'i phyir rnal 'byor pas de dag la dngos po nyid du mngon par zhen par mi bya zhing rnam par rtog pa de spang bar gsungs kyi/de dag la brten pa yang dgag par ni ma yin no/ /de bas na mdo las sbyin pa la sogs pa'i sgrib pa thams cad kyi gnyen por gyur pa dang / byang chub kyi tshogs su gyur pa'i phyir byang chub sems dpa' rnams kyis bsten par bya ba nyid do zhes gsungs so/ /gzhan du na bsam gtan dang shes rab kyang mi bsten na sgrib pa rnams ni ci yang /rnal 'byor par yang ji ltar 'gyur/ sa dang pha rol tu phyin pa thams cad la bsten pa bkag na ni mdo sde mang po dang 'gal te/ rgyu med pa'i phyir thams cad mkhyen pa nyid thob par mi 'gyur ro/ / sa rnams dang rnam pa thams cad mkhyen pa nyid la goms par ma byas na byang chub sems dpa' dang sangs rgyas su yang ji ltar rnam par gzhag par 'gyur/ de lta bas na rnam par mi rtog pa'i dbyings su 'jug par bya ba'i phyir/ ting nge 'dzin la gnas pa'i dus na rnal 'byor pas rnam par rtog pa de spang bar 'di gsungs par khong du chud par bya'o//de bas na rnam par rtog pa ni mtshan ma'o zhes thams cad du gsungs te/ de nyid spang bar bstan pa'i phyir ro/ /ngo bo nyid la dpyod pa 'am/ /zhes bya ba ni sbyin pa sogs pa'i rang gi mtshan nyid yod pa nyid do zhes rtog pa'i phyir te/rnam par rtog pa'i mtshan ma kun du 'byung ba gang dag ces bya ba dang sbyar ro/ /de la gzhan dag la mchod pa dang phan gdags par 'dod pas gzhan dag la nor dang mi 'jigs pa dang chos rnams kyis nye bar sgrub pa ni sbyin pa'i ngo bo nyid rnam pa gsum mo//nyes par spyod pa thams cad las ldog pa dang / dge ba thams cad la 'jug pa ni tshul khrims thams cad kyi ngo bo nyid do/ /mi mjed pa dang / ji mi snyam pa dang / shes pa dang gsum ni bzod pa'i ngo bo nyid do/ /dge ba rnams la yang dag par spro ba ni brtson 'grus thams cad kyi ngo bo nyid do//sems rtse gcig pa ni bsam gtan thams cad kyi ngo bo nyid do/ /dngos po rnams la yang dag par rab tu rnam par 'byed pa rnam pa gsum ni shes rab kyi ngo bo nyid do/ /yon tan la dpyod pa'am zhes bya ba ni sbyin pa la sogs pa'i so so'i rgyus longs spyod chen po la sogs pa dang /bdag dang gzhan gyi don du nye bar gnas par rtog pa'i phyir ro/ /de la sbyin pa'i 'bras bu ni longs spyod chen po'o/ /tshul khrims kyi ni lus phun sum tshogs pa ste/ de ni bde 'gro'i rgyu yin pa'i phyir ro/ / bzod pa'i ni kun du mdzes pa dang / g.yog 'khor mang po mi zad par 'gyur ro / /brtson 'grus kyi ni g.yog 'khor mi phyed pa dang / longs spyod rgyun mi 'chad pa'o/ /bsam gtan gyi ni lus la gnod pa med par 'gyur ba'o/ /shes rab kyi ni dbang po thams cad rno ba dang /bde ba dang / yid bde ba mang bar 'gyur ba dang / skye bo'i tshogs phal po che la dbang byed par 'gyur ba'o/ /bdag dang gzhan thams cad rjes su 'dzin pa ni spyi'i 'bras bu'o/ /snying po la spyod pa 'ang rung zhes bya ba ni byang chub chen por yongs su bsngos pa de dag mi zad pa dang byang chub thob pa'i rgyur rtog pa'i phyir ro//gnyen po la rtog pa'i mtshan ma yongs su spong ba ni bshad zin to/ /da ni mtshan ma spang ba gsum pa ste/ des de dag ces bya ba la sogs pa gsungs pa'o/ /yod pa dang med pa la sogs pa spros pa'i dra ba mtha' dag dang bral ba ni de kho na'o//rnal 'byor pa 'di snyam du sems te/ sbyin pa la sogs pa ngo bo nyid med du zin kyang / stong pa la sogs pa don dam par bsdus pa dngos por gyur pa ni rang gi mtshan nyid kyis yod do/ /gzhan du na gal te don dam pa nyid kyang med na ni tshangs par spyod pa yang don med par 'gyur ro snyam du sems na/de'i tshe rnam par rtog pa 'di yang byang chub sems dpas spang bar bya ba nyid do/ /de dag ni gang zag dang chos la bdag med pa tsam gyi mtshan nyid du zad pas stong pa la sogs pa rang gi mtshan nyid kyis dngos por gyur pa ni med do//gzhan du na stong pa la sogs pa dngos po la sogs pa'i ngo bor gyur na/ de la dngos po la sogs pa'i rnam par rtog pa ji ltar ldog par 'gyur/ 'phags pa dkon mchog sprin las/ rigs kyi bu gal te don dam pa med du zin na tshangs par spyod pa don med par 'gyur ro zhes gsungs pa yang de la rang gi mtshan nyid kyi ngo bo dngos por gyur pa don dam pa yod par ston pa ni ma yin te/ji lta zhe na/ sgyu ma lta bu'i chos thams cad la sgro btags pa'i gang zag dang chos la bdag med pa'i mtshan nyid gal te don dam par mi 'gyur na/ de'i tshe ji ltar byis pa'i skye bo yongs su brtags pa bzhin du gang zag dang chos gnyis bden par 'gyur te/de bas na byis pa'i skye bo thams cad ni gang zag dang chos la mngon par zhen pa yin pa'i phyir de kho na mthong bar 'gyur te/ de dag bsgrim mi dgos par thar par 'gyur bas na mya ngan las 'das pa'i mtshan nyid tshangs pa thob par bya ba'i phyir 'phags pa'i lam bsgom pa'i mtshan nyid spyad pa rnams don med par 'gyur ro zhes bya ba'i tshig go//'di lta ste rang gi mtshan nyid la dpyod pa'am zhes bya ba la stong pa nyid la sogs pa rang gi mtshan nyid kyis dngos por gyur pa ni yod do zhes rtog pa'o//yang na sgyu ma lta bu la sogs pa'i chos thams cad la sgro btags pa'i gang zag dang chos kyi bdag nyid dang bral ba nyid stong pa nyid kyi ngo bo nyid do/ /de nyid gzhan ma yin pa'i don yin pas de bzhin nyid do/ / phyin ci ma log pa'i don yin pas yang dag pa'i mtha'o/ /mtshan ma thams cad dang bral ba'i phyir/ mtshan ma med pa'o/ /rnam par mi rtog pa'i ye shes dam pa'i spyod yul yin pas na don dam pa'o/ /sangs rgyas kyi chos thams cad kyi rgyu yin pas chos kyi dbyings te/de bas na 'di dag dngos por gyur pa ni yod pa nyid do zhes de ltar stong pa nyid la sogs pa so so'i tshig gi rang gi mtshan nyid la rtog pa de yang mtshan ma la kun du spyod pa yin no/ /yon tan la spyod pa 'am zhes bya ba ni de dag bsgoms pas sangs rgyas kyi chos la sogs pa'i yon tan ma lus pa 'byung bar 'gyur ro zhes rtog pa'o//snying po la dpyod pa yang rung zhes bya ba ni mi slu ba'i chos can gyi phyir mi 'gyur bar yongs su grub pa'i phyir yongs su grub pa'i ngo bo nyid kyi phyir de thams cad du tshad mas sun ma phyung ba'i phyir tshad mas yang dag par grub pa'i phyir sangs rgyas thams cad kyi chos kyi sku yang des rab tu phye ba'i phyir ro zhes rtog pa'o//yid la mi byed pas yongs su spong ngo zhes bya ba ni yod pa dang med pa la sogs pa'i ngo bor rtog pa'o/ /'di ltar de dag ni gang zag dang chos la bdag med pa'i mtshan nyid tsam du zad pa'i phyir dngos po'i ngo bor yod pa yang ma yin la sgyu ma lta bu'i chos thams cad la gang zag dang chos su sgro btags pa'i bdag nyid dang bral bas na chos nyid du gdags pa'i phyir ri bong gi rwa bzhin du med pa yang ma yin no//de ltar rtogs pa na/ de la ngo bo nyid la sogs pa rnam par rtog pa spang bar bya'o/ / gnyen po la dmigs pa'i rnam par rtog pa'i mtshan ma spang ba bshad zin to/ /da ni mtshan ma yongs su spang ba bzhi pa ste/ des zhes bya ba la sogs pa gsungs pa'o/ /rnal 'byor pa dag 'di snyam du sems te/ sbyin pa la sogs pa dang de dag la dmigs par gyur pa stong pa nyid la sogs pa don dam pa ngo bo nyid med du zin kyang /de dag bsgoms pa las thob pa'i ngo bo nyid la sogs pa'i dngos por gyur pa dag ni 'bras bur gyur pas na yod pa nyid do/ /gzhan du na byang chub sems dpa' rnams sa la sogs pa la ji ltar 'jug par 'gyur snyam du sems na/de'i tshe rnal 'byor pas rnam par rtog pa 'di yang spang bar bya ba nyid do / /sa la sogs pa dag kyang don dam par ma skyes pa'i phyir ro/ /mi skye ba'i chos la bzod pa 'thob pa dang / lung bstan pa dang / sangs rgyas kyi zhing yongs su dag pa 'thob pa ni sa brgyad pa la gnas pa'i byang chub sems dpa'o//sems can yongs su smin par byed pa dang / dbang bskur ba 'thob pa ni de'i gong ma'i sa gnyis la gnas pa ste go rims bzhin no/ /sa 'di rnams ni lhun gyis grub par 'jug pa la sogs pa'i yon tan gyi khyad par dang ldan pa'i phyir sa de ma yin pa gzhan dag pas mchog tu gyur pas na bye brag tu rnam par rtog pa'i mtshan ma gzhan dag gsungs so//sa la sogs pa la rnam par rtog pa'i mtshan ma 'byung ba 'di dag ni las dang po pa'i rnal 'byor pa kho na ste / sa la bzhugs pa'i ni ma yin te/ de la mi srid pa'i phyir ro/ /'di lta ste/ rang gi mtshan nyid la dpyod pa'am zhes bya ba ni/ sa la sogs pa rang gi mtshan nyid kyi dngos por gyur pa ni yod pa nyid do zhes rtog pa 'am/ 'di dag so so rang gi mtshan nyid la rtog pa'o/ /de la sa dang po'i byang chub sems dpa' ni skyon med pa la zhugs pas gang zag dang chos la rmongs pa'i gnyen por rnam par gzhag go//gnyis pa ni tshul khrims rnam par dag pas ltung ba phra mo'i 'khrul pa la rmongs pa'i gnyen por ro/ /gsum pa ni 'jig rten gyi snyoms par 'jug pa la gnas pa'i dbang thob pas 'dod pa'i 'dod chags la rmongs pa'i gnyen por ro//bzhi pa ni byang chub kyi phyogs ji ltar thob pa rnams la mang du gnas pas snyoms par 'jug pa'i chos la sred pa'i rmongs pa'i gnyen por ro/ /lnga pa ni thabs kyis zin pa'i byang chub kyi phyogs la gnas pas bden pa rnams bsgoms te/byang chub sems dpa' 'khor ba dang mya ngan las 'da' ba la shin tu rgyab kyis phyogs pa dang / mngon du phyogs par yid la byed pa'i rmongs pa'i gnyen por ro/ /drug pa ni mtshan ma med par gnas pa mtshan ma med par mang du kun du spyod pa la rmongs pa'i gnyen po dang /'khor bar 'jug pa la rmongs pa'i gnyen por ro/ /bdun pa ni skabs med par mtshan ma med pa la gnas pa thob pas mtshan ma phra mo rnams la kun du spyod pa'i rmongs pa'i gnyen por ro/ /brgyad pa ni lhun gyis grub par mtshan ma med pa la gnas pa thob pas mtshan ma med pa la 'bad cing kun du spyod pa'i rmongs pa'i gnyen por ro//dgu pa ni so so yang dag par rig pa rnams thob pas rnam pa thams cad du chos bshad pa la dbang thob pa'i rmongs pa'i gnyen por ro/ /bcu pa ni sangs rgyas kyi zhing dang 'khor dang sprul pa la sogs pa la dbang thob pas mngon par shes pa chen po la rmongs pa'i gnyen por ro//sangs rgyas kyi zhing ni mdor na chos thams cad la rnam pa thams cad du chags pa med cing thogs pa med pa'i mkhyen pa brnyes pas shes bya thams cad la phra ba'i ye shes thogs pa'i rmongs pa'i gnyen por gzhag go//yon tan la spyod pa 'am zhes bya ba ni ji skad du/ sa dang po la gnas pa'i byang chub sems dpa' ni skad cig thang cig yud tsam cig la ting nge 'dzin brgya rab tu 'thob pa dang / sangs rgyas mthong ba dang / de dag gi byin gyi rlabs kyang yang dag par shes pa dang / 'jig rten gyi khams brgya g.yo bar byed pa dang / zhing brgyar 'gro bar byed pa dang / 'jig rten gyi khams brgya snang bar byed pa dang / sems can brgya yongs su smin par byed pa dang / bskal ba brgyar gnas par byed pa dang / sngon gyi mtha' dang phyi ma'i mtha'i bskal pa brgya la 'jug pa dang /chos kyi sgo brgya 'byed pa dang / lus brgya kun du ston pa dang / lus re re la yang byang chub sems dpa'i 'khor brgya brgya kun du ston pa'i brtson 'grus rnam pa de lta bu rtsom mo/ /sa gnyis pa la ni 'di dag thams cad grangs stong du bsgyur ba'o/ /sa gsum pa la ni grangs 'bum mo//sa bzhi pa la ni grangs bye ba phrag brgya'o/ /sa lnga pa la ni grangs bye ba phrag stong ngo / /sa drug pa la ni grangs bye ba phrag 'bum mo/ /sa bdun pa la ni grangs bye ba khrag khrig phrag 'bum mo/ /sa brgyad pa la ni grangs stong gsum 'bum phrag bcu'i rdul phra rab kyi rdul snyed do//sa dgu pa la ni sangs rgyas kyi zhing grangs med pa 'bum phrag phrag bcu tshang ba'i rdul phra rab kyi rdul snyed do/ /sa bcu pa la ni sangs rgyas kyi zhing brjod du med pa bye ba khrag khrig 'bum phrag bcu'i rdul phra rab kyi rdul snyed do/ /sangs rgyas kyi sa la ni 'jig rten gyi khams su gtogs pa ma lus pa nam mkha'i mtha' klas pa'i rdul phra rab kyi rdul thams cad 'dis yongs su mkhyen/phyogs dang dus thams cad du gtogs pa'i dngos po ma lus pa'i rnam pa thams cad mkhyen to zhes gsungs pa lta bu'o/ /sangs rgyas kyi sa la sogs pa'i yon tan ni dpag tu med de mdo sde las shes par bya'o//snying po la dpyod pa yang rung zhes bya ba ni 'jig rten pa dang 'jig rten las 'das pa'i chos thams cad kyi bla mar gyur pa dang / bdag dang gzhan gyi don phun sum tshogs pa'i rgyur gyur pa'i phyir ro/ /yid la mi byed pas yongs su spang ngo zhes bya ba ni de la dngos por mngon par zhen pa rnams spong ste/chos thams cad don dam par ma skyes par ro gcig pa'i phyir ro/ /de skad du/ de bzhin gshegs pa rtag tu skye med chos/ /chos rnams kun kyang bde bar gshegs dang 'dra/ /byis pa'i blo can mtshan mar 'dzin pa yis/ /'jig rten dag na med pa'i chos la spyod//ces gsungs te / de ltar mtshan ma thams cad yid la mi byed pas yongs su spongs shig pa'o/ /shin tu brtson pa yin te zhes bya ba ni rnam par mi rtog pa'i dbyings la 'jug pa'i lam la mngon du yang dag par zhugs pa'i phyir ro/ /de ltar rnal 'byor pa mos pa'i dbang dang /shes rab kyis yod pa la sogs par rtog pa mtshan ma'i dra ba thams cad spangs la rtog pa med cing dpyod pa dang bral ba/ brjod pa med pa/ ro gcig pa'i yid kyis de kho na nyid de nyid la mos pas mngon par 'du mi byed par shin tu gsal bar bsgom zhing 'dug par bya'o//de la gnas pa'i sems kyi rgyud mi g.yeng bar bya'o/ /gang gi tshe bar skabs su rnam par g.yeng bar gyur na de'i tshe/ de zhi bar byas nas yang de nyid la sems yongs su gtad do/ /gang gi tshe de la sems mi dga' bar gyur par mthong ba de'i tshe ting nge 'dzin gyi yon tan mthong bas de la dga' ba sgoms shig dang /rnam par g.yeng ba'i nyes pa mthong bas mi dga' ba zhi bar 'gyur ro/ /ci ste rmugs pa la sogs pa'i zil gyis non pas rgyu ba mi gsal te/ bying bas sems mi dga' bar gyur par mthong ba de'i tshe rab tu dga' bar 'gyur ba'i dngos po la sogs pa'i yid la bya bas bying ba zhi bar byas te/yang de kho na nyid la rab tu gsal bar gzung ngo / /ci ste gang gi tshe sngon myong ba'i yul sdug pa la sogs pa dran pas bar skabs su sems rgod pa 'am/ rgod du dogs pa mthong ba de'i tshe mi rtag pa la sogs pa skyo bar 'gyur ba 'di dngos po yid la byas nas rgod pa zhi bar bya'o//de nas yang de kho na nyid de nyid la mngon par 'du bya ba med par 'jug par 'bad par bya'o/ /gang gi tshe bying ba dang rgod pa las dben te/ sems mnyam par 'jug par mthong ba de'i tshe rtsol klod de btang snyoms su bya'o//gal te sems mnyam par gnas par gyur ba la brtsal ba byas na de'i tshe sems rnam par g.yeng bar 'gyur ro/ /gal te sems zhum par gyur pa la brtsal ba ma byas na de'i bying ba zhi bar mi 'gyur te/ des na skyes bu dmus long bzhin du de kho na gsal bar zin par mi 'gyur ro//de bas na bying ba'i sems ni gsal bar bya zhing dgod pa zhi bar byas te mnyam pa thob nas btang snyoms su bya'o/ /de nas rnal 'byor pas ji srid 'dod kyi bar du mngon par 'du bya ba med par de kho na nyid bsgom zhing mos pa'i dbang gis 'dug par bya'o/ /de nas ting nge 'dzin las ldang bar 'dod na 'di snyam du bsams te /chos 'di dag thams cad don dam par ma byung du zin kyang sgyu ma la sogs pa lta bur rgyu dang rkyen so sor nges pa la ltos nas 'byung ba ste/ de bas na bdag gis sems can thams cad la phan gdags pa'i phyir sangs rgyas kyi go 'phang 'thob par 'dod pas bsod nams dang ye shes kyi tshogs shin tu rgyas pa dpag tu med pa la brtson par bya'o snyam du bsam mo//de nas sangs rgyas dang byang chub sems dpa' rnams la phyag byas te/ de dag la mchod nas 'phags pa bzang po spyod pa la sogs pa smon lam chen po btab ste ldang ngo //sgyu ma la sogs pa lta bur phyin ci ma log pa bla na med pa yang dag par rdzogs pa'i byang chub tu yongs su bsngos pa'i stong pa nyid dang snying rje dang ldan pa'i sbyin pa la sogs pa bsod nams dang ye shes kyi tshogs sgrub pa mtha' dag la sgyu ma mkhan lta bur brtson par bya'o//de ltar byas na rnam pa thams cad kyi mchog dang ldan pa'i stong ba nyid kyi bsam gtan sgrub par 'gyur te/ 'phags pa gtsug na rin po che las/ de byams pa chen po'i go bgos nas snying rje chen po'i gnas la rab tu gnas te/ rnam pa thams cad kyi mchog dang ldan pa'i stong pa nyid mngon par sgrub pa'i bsam gtan la bsam gtan du byed do//rnam pa thams cad kyi mchog dang ldan pa'i stong pa nyid de gang zhe na/ gang sbyin pa dang ma bral ba/ tshul khrims dang ma bral ba/ bzod pa dang ma bral ba/ brtson 'grus dang ma bral ba/ bsam gtan dang ma bral ba/ shes rab dang ma bral ba/ thabs dang ma bral ba la sogs pa ji skad gsungs pa lta bu'o/ /'phags pa dri ma med par grags pas bstan pa la sogs pa las kyang / thabs dang bral ba'i shes rab 'ba' zhig ston pa ni byang chub sems dpa'i 'ching ba zhes gsungs so//de lta bas na byang chub sems dpa' dus thams cad du snying rje chen po sngon du byas la sbyin pa la sogs pa bsod nams dang ye shes kyi tshogs sgrub pa la nges par brtson par bya'o/ /de nas rnal 'byor pa ji srid du sa la ma zhugs pa de srid du ji skad bshad pa'i cho ga bzhin du mos pa'i dbang gis mos pas spyod pa'i sa na da kho na nyid la bsgom pa na yang dag par sbyor ba dang /yang dag pa'i ting nge 'dzin zhes rnam par gzhag go/ /de rnam par mi rtog pa'i dbyings la shin tu brtson pa yin te/re zhig rnam par mi rtog pa'i dbyings la ni ma reg mod kyi/ rnam par mi rtog pa'i dbyings la reg par 'gyur ba'i tshul bzhin gyi ting nge 'dzin ni yod do zhes bya ba ni rnam par mi rtog pa'i dbyings la reg pa dang mthun pa'i phyir ro zhes ston to/ /de ltar yang dag pa'i sbyor ba bstan nas rnam par mi rtog pa'i dbyings su 'jug pa ste/bsdus pa'i don brgyad pa ston te/ de yang dag par sbyor ba de dang zhes bya ba'o/ /de ltar yang dag par sbyor ba'i thos pa dang / sems pa dang bsgom pa'i rim pa ji skad du bstan pa bzhin du rtag tu gus par byas te/ yun ring por bsgoms nas bskal pa grangs med pa 'das par gyur pa dang /gtsub shing gis gtsubs pa'i me bzhin du yang dag pa'i don la bsgom pa mthar phyin par 'gyur zhing rtog pa'i dran pa mtha' dag dang bral ba spros pa med pa'i chos kyi dbyings rtogs te/ shin tu gsal ba/ dri ma med pa/ mi g.yo ba/ rlung med par gzhag pa'i mar me 'bar ba'i rgyun bzhin du mi g.yo ba/tshad mar gyur pa chos thams cad bdag med pa'i de kho na nyid mngon sum du byed pa mthong ba'i lam gyis yang dag par bsdus pa don dam pa'i byang chub kyi sems kyi ngo bo nyid mngon par 'du bya ba med par 'jug pa 'jig rten las 'das pa'i ye shes mchog 'byung ste/de'i tshe rnal 'byor pa rnam par mi rtog pa nyid du zhugs pa yin/ sa dang po thob pa yang yin te spyir bstan pa'i don to/ /bsten pas rjes su 'gro zhes bya ba ni thos pa'i shes rab kyi rgyu'i dngos por bstan pa ste lung la brten cing kun du bsten pa la bya'o//bsgoms pas rjes su 'gro'o zhes bya ba ni bsams pa'i shes rab ste bsgoms pas 'gro ba zhes bya'o/ /mang du byas pas rjes su 'gro'o zhes bya ba ni bsgoms pa'i shes rab ste/ rnam par mi g.yeng bar rgyun du bsgom pa mang du byed pa'i phyir ro/ /yang dag par yid la bya bas rjes su 'gro ba na zhes bya ba ni shes rab 'di rnams kyis phyin ci ma log par sbyor bas rjes su 'gro bar bstan pa'o//mngon par 'du bya ba med cing zhes bya ba ni lhun gyis grub pa'i khyad par te/ rgyun ma chad par gus par byas nas ring por bsgoms te bsod nams dang ye shes kyi tshogs dpag tu med pa bsags pas las su rung ba'i ting nge 'dzin dam pa'i stobs kyis zhum pa dang rgod pa la sogs pa'i nyes pa dang bral zhing zhi gnas dang lhag mthong zung du 'brel bar 'jug pa'i phyir ro//gang gi tshe mngon par 'du bya ba med par 'jug pa'i lam yang dag par 'byung ba de'i tshe lhun gyis grub pas rnam par mi rtog pa'i dbyings la reg ces bya ba'i don te mngon sum du byas pa'i phyir te/sa dang por zhugs nas de'i gong ma'i sa rnams rnam par sbyang ngo / /yang na bsten pas rjes su 'gro zhes bya ba la sogs pa'i tshig gis bsgom par sbyor ba chung ngu 'bring dang rab dang rab kyi mchog rnams bstan te/nges par 'byed pa'i cha bzhi'i gnas dang go rims bzhin no/ /ci'i phyir zhes bya ba la sogs pa ni rnam par mi rtog pa'i dbyings kyi mtshan nyid de bsdus pa'i don dgu pa ston to/ /dpyad pa'i rnam par brtag pa thams cad las shin tu 'das pa zhes bya ba ni 'di'o//pha ba'i 'o zhes rang gi rnam par rtog pa thams cad kyis brtag mi nus pa'i phyir ro/ /de bas na gzugs med pa'o/ /bstan pa dang dper rnam par brtag pa thams cad las 'das pa zhes bya ba ni gzhan dag la 'di na 'di 'dra'o zhes bstan par mi nus pa'i phyir ro//de bas na bstan du med pa'o/ /dbang por rnam par brtag pa thams cad las shin tu 'das pa zhes bya ba ni mig gi dbang po la sogs pa nang gi skye mched kyi mtshan nyid du rnam par brtag pa thams cad kyi rang bzhin las shin tu 'das pa'i phyir ro//de bas na de ni nang gi skye mched gang la yang mi brten pa'i phyir rten med pa'o/ /yul du rnam par brtag pa thams cad las shin tu 'das pa zhes bya ba ni gzugs la sogs pa phyi'i skye mched kyi mtshan nyid du rnam par brtag pa thams cad kyi ngo bo nyid las 'das pa'i phyir ro//de bas na de ni gzugs la sogs pa yul lta bur snang ba ma yin pas snang ba med pa'o/ /rnam par rig par rnam par brtag pa thams cad las shin tu 'das pa zhes bya ba ni mig la sogs pa'i rnam par rig pa'i mtshan nyid du rnam par brtag pa thams cad kyi ngo bo nyid las shin tu 'das pa'i phyir ro//de bas na rnam par rig pa ma yin pa ste/ de dag gi ngo bo nyid ma yin pa'i phyir ro/ /nyon mongs pa thams cad dang shes bya'i sgrib pa thams cad kyi gnas med pa'i phyir zhes bya ba ni rang bzhin gyis 'od gsal ba'i chos kyi dbyings la glo bur gyi nyon mongs pa dang nye ba'i nyon mongs pa'i sgrib pa thams cad kyi rten med pas gnas med pa'i phyir ro//de bas na 'di la gnas med pa ste/ de la sgrib pa thams cad kyi gnas med pa'i phyir ro/ /de bas na de'i chos thams cad kyi rnam par rtog pa las shin tu 'das pa'i phyir rnam par mi rtog pa zhes bya'o//gang zhe na zhes bya ba ni ci zhes dri bar sems pa ste/ 'di snyam du sems so/ /gal te chos thams cad kyi rnam par rtog pa las shin tu 'das na de la de'i mtshan nyid ces ji skad du bya snyam pa la/ de'i lan du gzugs med pa zhes bya ba la sogs pa gsungs te/'di ni de'i mtshan nyid de/ /gang chos thams cad kyi rnam par rtog pa las shin tu 'das pa'o zhes dgongs pa ste/ gang gi ngo bo gang yin pa rnam pa de lta bu de nyid la mtshan nyid ces bya ste/ de bas na chos thams cad kyi mtshan nyid las shin tu 'das pa de'i mtshan nyid do //de brjod pa ni kun rdzob ces bya'i dngos su ni ma yin te/ de kho na ni thams cad las shin tu 'das pa'i phyir ro/ /tha snyad kyi spyod yul yin na ni de nyid kun rdzob tu 'gyur te/ don dam par mi 'gyur ro/ /de skad du yang 'phags pa bden pa gnyis bstan pa las kyang /lha'i bu gal te don dam par bden pa lus dang ngag dang yid kyi yul gyi dngos por gyur na ni don dam pa'i bden pa zhes bya ba'i grangs su mi 'gro ste/ kun rdzob kyi bden pa nyid du 'gyur ro/ /lha'i bu 'di ltar yang don dam par na don dam pa'i bden pa ni tha snyad thams cad las shin tu 'das pa ste/khyad par med pa/ ma skyes pa/ ma 'gags pa/ brjod par bya ba dang / rjod pa dang / shes bya dang / shes pa dang bral ba'o/ /lha'i bu rnam pa thams cad mkhyen pa'i ye shes kyi yul las 'das pa ste/ lha'i bu de la rtog pa dang rnam par rtog pa rnams mi 'jug go//don dam pa de la pha rol dang tshu rol dang dbus med do/ /lha'i bu 'di sgro btags te/ don dam pa'i bden pa zhes bsnyad kyi/ don dam pa'i bden pa zhes ji skad du bya ba ltar ni ma yin no zhes gsungs so/ /da ni rnam par mi rtog pa'i dbyings su zhugs pa'i rtags te/bsdus pa'i don bcu pa ni/ rnam par mi rtog pa'i dbyings la rab tu gnas pas ni shes bya dang khyad par med pa zhes bya ba gsungs te/ chos thams cad mi dmigs pa'i rnam par zhugs pas shes pa dang shes bya la bye brag mi dmigs pa'i phyir ro//de'i phyir chos thams cad nam mkha'i dkyil dang mtshungs par mthong ste/ rnam pa thams cad du ji skad bstan pa'i mtshan ma thams cad kun du mi 'byung ba'i phyir ro/ /'o na de'i tshe sus mthong / de ni bden te/ don dam par gang zag la sogs pa'i ngo bo rnal 'byor pa'i rang gi rgyud gang yang med pas mthong ba yang med mod kyi/'on kyang ji ltar don dam par ngo bo nyid med kyang kun rdzob tu gzugs la sogs pa yul gyi rnam par 'byung ba tsam gyi shes pa nyid la lha sbyin nam mchod sbyin gyis mthong ngo zhes de lta de ltar 'jig rten na tha snyad 'dogs pa de bzhin du 'dir yang ye shes nyid don dam par ngo bo nyid med mod kyi yang dag pa'i don la bsgoms pa'i stobs kyis chos thams cad ngo bo nyid med par rtogs pa'i rnam pas bdag nyid kyang rang rig pas ngo bo nyid med par rtogs pa skye ba'i tshe rnal 'byor pa'i ye shes kyis mthong ngo zhes bstan to//chos thams cad don dam par ngo bo nyid med mod kyi/ kun rdzob tu rnal 'byor pa'i ye shes las so so skye bo'i shes pa gzhan du mi 'dod dam/ gzhan du na nyan thos dang rang sangs rgyas dang byang chub sems dpa' la sogs pa'i gang zag rnam par gzhag pa ji ltar 'gyur/de skad du yang 'phags pa bden pa gnyis bstan pa las kyang / de don dam par shin tu med kyang gang kun rdzob tu lam bsgom mo zhes gsungs so/ /gang kun rdzob tu yang rgyu med pa de ni thams cad du yang mi skye ste/ kun rdzob tu yang ri bong gi rwa la sogs pa ji lta ba bzhin no//gang yod pa de ni don dam par brdzun yang skye bar 'gyur te/ sgyu ma dang gzugs brnyan la sogs pa bzhin no/ /rten cing 'brel bar 'byung ba de yang don dam par mi rigs te/ sgyu ma la sogs pa yang don dam par 'gyur ba'i phyir ro/ /ci ste sgyu ma la sogs pa dang bye brag med par brtag mi bzod de/sngon dang phyi ma'i mthas stong la dbus kyang gcig dang du ma'i dngos por gzung du med de/ bdag dang gzhan dang gnyi ga las 'byung bar mi 'thad la/ gzhan la rag lus shing 'byung ba'i phyir bdag gi rgyud bdag med par brjod bzhin du don dam par yod do zhes ming 'dogs na ni ci dga' bar ming thogs la zas kyang byin cig /'on kyang sgyu ma la sogs pa las don dam pa'i mtshan nyid de khyad par yod par brjod dgos so/ /sgyu ma la sogs pa yang ma 'khrul bar 'gyur te/ de dag kyang rten cing 'brel bar 'byung ba'i phyir ro/ / gang gis na glang po che la sogs pa'i rnam par da ltar shes pa 'byung bas sgyu ma la sogs pa shes pa'i ngo bor bden par gyur na/ gzhan gyi rnam par gzhan 'byung bar ni mi rigs te/ de nyid dang gzhan gnyis ni 'gal ba'i phyir ro/ /gnyis su med pa'i ye shes ni gnyis kyi rnam par 'byung bar mi 'gyur te yang dag pa ma yin pa gnyis gcig na 'gal ba'i phyir ro//ma byung ba las 'byung zhing byung nas kyang 'jig par mi 'gyur te/ gcig la yod pa dang med pa gnyis rim gyis na yang 'gal ba'i phyir ro/ de skad du/ rang bzhin la ni yod pa dang / /med pa rigs pa ma yin te/ / phan tshun du ni 'gal ba na/ /yod med gcig tu ga la rung / /gal te rang bzhin gyis yod na/ /de ni med pa nyid mi 'gyur/ /rang bzhin gzhan du 'gyur ba ni/ /nam yang 'thad par mi 'gyur ro/ /zhes bshad do/ /de lta bas na ji ltar sman dang sngags la sogs pa'i rkyen tshogs pa'i dbang gis brdzun pa yin yang sgyu ma 'byung ba de ltar las dang nyon mongs pa'i dbang gis ma brtags na dga' ba so so'i skye bo rnams kyi skye bo sgyu ma dang /de bzhin du bsod nams dang ye shes kyi tshogs kyi mthus rnal 'byor pa rnams kyi rnal 'byor pa'i ye shes sgyu ma skye'o/ / rgyu dang rkyen rnams kyang sgyu ma la sogs pa bzhin du ma brtags na dga' ba ste/ thog ma med pa'i rgyu brgyud pas 'brel ba'i rang bzhin yin pas thams cad mi 'gal ba nyid do/ /de'i rjes las thob pa zhes bya ba ni 'jig rten las 'das pa rnam par mi rtog pa'i ye shes kyi rjes las thob pas ni sems can gyi 'jig rten du bsdus pa rnams sgyu ma dang mtshungs par mthong ste/sems can gyi gzugs su snang ba ni sgyu ma byas pa'i glang po che la sogs pa lta bu'i phyir ro/ /snod kyi 'jig rten bsdus pa rnams ni smig rgyu dang mtshungs par te/ smig rgyu bzhin du phyi rol gyi dmigs pa phal che bas brdzun pa nyid du snang ba'i phyir ro//yul dang longs spyod kyi ngo bo rnams ni rmi lam dang mtshungs par te/ rmi lam lta bur brdzun pa de la 'dod pa skye ba'i phyir ro/ /lus kyi las kyi ngo bo nyid rnams ni mig yor dang mtshungs par te/chos thams cad byed pa med kyang mig yor bzhin du lus kyi byed pa snang ba'i phyir ro/ /ngag gi las kyi ngo bo nyid ni brag ca dang mtshungs par te/ brag ca bzhin du brdzun pa yin yang thos pa'i lam du 'jug pa'i phyir ro/ /'dod pa na spyod pa rnams ni gzugs brnyan dang mtshungs par te/sngon gyi las kyi rnam par smin pa'i 'bras bur bsdus pa rnams sngon ji ltar byas pa'i las dang mthun par 'byung ba'i phyir ro/ /gzugs dang gzugs med pa na spyod pa'i ting nge 'dzin du bsdus pa'i las kyi rnam par smin pa'i 'bras bur bsdus pa rnams ni chu zla dang mtshungs par te/ting nge 'dzin ni chu dang 'dra ba'i phyir ro/ /sangs rgyas kyi zhing yongs su dag pa la sogs pas bsdus pa rnams ni sprul pa dang mtshungs par te/ de dag rang gi sems yongs su dag pas sprul pa'i phyir ro/ /yang na nang gi khams drug ni sgyu ma dang mtshungs par te/sems can med kyang sems can la sogs pa'i ngo bor snang ba'i phyir ro/ /rnam par shes pa'i khams drug dang sems las byung ba thams cad ni smig rgyu dang mtshungs par te/ /de dag smig rgyu bzhin du brdzun pa'i rnam par snang ba'i phyir ro//phyi'i khams rnams ni rmi lam dang mtshungs par te/ rmi lam bzhin du gzugs rnams brdzun pa yin yang yul du snang ba'i phyir ro/ /skyes bu chen po'i mtshan la sogs pas brgyan pa'i sangs rgyas kyi gzugs kyi skur bsdus pa rnams ni mig yor dang mtshungs par te / yongs su dag pa'i chos kyi sku'i dbang gis de ltar snang ba'i phyir ro//bstan pa'i chos rnams su bsdus pa dag ni brag ca dang mtshungs par te/ brag ca bzhin du bcom ldan 'das kyi dbang gis thob pa'i phyir ro/ /sngon gyi las kyi 'bras bur bsdus pa rnams ni gzugs brnyan dang mtshungs par te/chos thams cad ni las ji lta ba bzhin du skyes pa'i phyir ro/ /sangs rgyas kyi zhing yongs su dag par bsdus pa rnams ni chu zla dang mtshungs par te/ sgrib pa'i dri ma rnams dang bral ba'i sems kyi chu la zla ba bzhin du snang bar gyur pa'i phyir ro/ /'dus byas kyi chos thams cad ni sprul pa dang mtshungs par te/de dag brdzun pa yin yang ji ltar rang gi rgyu dang rkyen tshogs pas sprul pa snang ba'i phyir ro/ /de ltar chos thams cad la snyoms par zhugs pa'i tshe nam mkha' dang 'dra ba'i ye shes thob pa las langs nas yang sgyu ma la sogs pa dang 'dra ba'i ye shes 'byung ba ni rtags yin pas rnam par mi rtog pa'i dbyings su zhugs par shes par bya'o//da ni de'i phan yon te bsdus pa'i don bcu gcig pa ni bde ba chen po zhes bya ba la sogs pa gsungs so/ /ye shes rnam pa 'di gnyis la phan yon rnam pa bzhi ste/ gong ma gnyis ni bdag gi don phun sum tshogs pa las brtsams pa'o//'og ma gnyis ni gzhan gyi don phun sum tshogs pa las brtsams pa ste/ kha na ma tho ba med cing dam pa mi zad pa'i bde ba la gnas pa mngon sum du bya ba'i dbang thob pas bde ba chen po la gnas pa shin tu rgyas pa yang 'thob po zhes bya ba'o//mngon par shes pa thams cad kyi mchog la sogs pa yon tan gyi khyad par 'byor pa mngon du bya ba'i dbang thob pas sems phun sum tshogs pa chen po shin tu rgyas pa yang 'thob po zhes bya ba ste/ sems zhes bya ba'i sgra ni ting nge 'dzin la bya ba'i phyir ro/ / sems can thams cad kyi mi mthun pa'i phyogs dang / gnyen po dang / 'jug pa dang / ldog pa rnam pa thams cad rab tu 'byed pa la mkhas pas shes rab che zhing shin tu rgyas pa yang 'thob bo/ /sems can skal ba yod pa dang / skal ba med pa rnams yongs su shes pa 'thob pas na ye shes che zhing shin tu rgyas pa yang 'thob po//de dag gi rjes su mthun par rnam pa thams cad du chos bstan pa la 'jug pa'i dbang thob pas bshad pa chen po la dbang ba shin tu rgyas pa yang 'thob bo/ /bsdus pa'i don bcu gnyis pa ste/ phan yon rnam pa bzhi po 'di'i las kyi mtshan nyid ni/dus thams cad du zhes bya ba la sogs pa gsungs pa ste/ gang gi phyir sangs rgyas kyi mdzad pa lhun gyis grub pa yang rgyun mi gcod do/ /de'i phyir dus thams cad du sems can thams cad kyi don gyi rnam pa thams cad kyang byed nus par 'gyur te zhes bya bar sbyar ro//de lta bas na sangs rgyas pa'i dus na sangs rgyas kyi mdzad pa lhun gyis grub par 'jug pa yang rgyun mi 'chad par 'byung bas skal ba ji lta ba bzhin dus thams cad du sems can thams cad kyi don gyi rnam pa thams cad mdzad pa grub pa ni de'i las su bstan pa yin no/ / 'di lta ste zhes bya ba la sogs pa'i dpe nye bar bkod pas ni rnam par mi rtog pa'i dbyings gcig tu blang ba ste bsdus pa'i don bcu gsum pa ston to/ /'dir don gnyis bstan te dpe dang dngos po / /de la brag la sogs pa ni dpe ste/ 'dis nye bar dpags pas na dpe'o/ /kun nas nyon mongs pa la sogs pa'i chos ni dngos so//gcig tu mkhregs zhes bya ba ni phrag med pa'i phyir ro/ /sra ba zhes bya ba ni shin tu sra pa'i phyir ro/ /de bas na gang de'i rang bzhin gcig tu mkhregs pa de ni sra ba ste/ gcig tu mkhregs shing sra ba zhes bya'o/ /'dir rin po che'i gter du gyur pas na gter zhes bya'o//'od gsal bzhes bya ba ni 'bar ba dang ldan ba'o/ /sna tshogs zhes bya ba ni rigs tha dad pa rnam pa sna tshogs so/ /yid bzhin gyi nor bu rin po che zhes bya ba ni ji ltar bsams pa'i don de bzhin du 'grub pa'i rgyur gyur pas so//rko ba'i mngon par 'du bya ba med ces bya ba de ni zhi gnas dang lhag mthong zung du 'brel bar 'jug pas/ rnam par mi rtog pa'i dbyings su 'jug pa lam gyi dpe'o/ /phyug ces bya ba ni bstan pa'o/ /lhag ma ni bshad pa ste/ nor che la zhes bya ba ni/ ji ltar bsags par bya ba'i phyir gser la sogs pa'o//longs spyod che bar 'gyur te zhes bya ba ni kun du spyad pa yo byad la sogs pa'o/ /'du byed kyi rnam pa zhes bya ba ni 'du byed kyi bye brag ste/ de rnam pa sna tshogs pa'i phyir ro/ /kun nas nyon mongs pa dang / gnyis la so sor nye bar gnas pa zhes bya ba ni de nyid kyi bye brag ste/thog ma med pa'i dus nas zhugs pa'i nyon mongs pa dang las dang skye ba'i mtshan nyid kyi kun nas nyon mongs par bsdus pa'i phyir kun nas nyon mongs pa'o/ /chad pa dang rtag pa'i mtha' la sogs pa la mngon par chags pa ni gnyis te/de la so sor nye bar gnas pa ni ma rig pa'i dbang gis 'jig rten pa rnams dus thams cad du mngon par chags pas na gnyis la so sor nye bar gnas pa'o/ /de la 'du byed kyi bye brag 'di ni rang bzhin gyi rnam par rtog pa'i bye brag gis byas pa'i phyir snying po med pas na rdo'i ri dang 'dra'o//thog ma med pa'i dus nas rgyun ma chad par zhugs pa nyon mongs pa dang las dang skye bas bsdus pas kun nas nyon mongs pa'i phyir gcig dang mkhregs pa lta bu'o/ /mtha' gnyis thams cad la mngon par chags pa ni sangs rgyas ma byung bar dbral dka' bas na gnyis la so sor nye bar gnas pa ni sra ba lta bu'o//rnam par mi rtog pa'i dbyings ni yid bzhin gyi nor bu rin po che'i gter dang 'dra ste/ de rtogs pa ni 'dod pa'i don ma lus par 'grub pa'i rgyu yid bzhin gyi nor bu rin po che rnyed pa lta bu ste/ de bzhin gshegs pa'i sku thob pa'i dpe'o// de bas na 'di ni gcig tu blang bar bstan pa yin no/ /de bzhin gshegs pa'i sku yid bzhin gyi nor bu rin po che lta bu ni 'dir gzhag pa dang 'dra bas na/ de ni de'i gter ro/ /su zhig yid bzhin gyi nor bu rin po che'i gter dang / 'dra ba rnam par mi rtog pa'i dbyings la mos shing yid ches te 'dod par gyur la/rang bzhin gyi rnam par rtog pa'i brag las byas pa'i 'du byed kyi ri rko bar spro ba cher skyes pa de ni yid bzhin gyi nor bu rin po che dang 'dra ba'i sangs rgyas su 'grub par 'gyur te/ gzhan ni ma yin no zhes bstan pa'i phyir yid bzhin gyi nor bu rin po che'i gter chen po 'dod pa'i mi zhes bya ba ste byang chub sems dpa'i dpe'o//mu stegs can mtha' dag dang thun mong ma yin pa don che zhing zab pa'i chos 'di lta bu ston pa ni bcom ldan 'das te/ gzhan ni ma yin no/ /de bas na de bzhin gshegs pa la ni skyabs su 'gro ba la sogs pa 'os pa'o zhes bstan pa'i phyir gter chen po mngon par shes pa'i ming zhes bya ste bcom ldan 'das kyi dpe'o//de bzhin nyid du gshegs pas na de bzhin gshegs pa'o/ /yang na ji ltar sngon gyi sangs rgyas rnams bla na med pa'i gnas su gshegs pa de ltar 'di yang gshegs pas na de bzhin gshegs pa'o//chos rnams kyi de kho na de ji ltar gnas pa de bzhin du gsung bas nges pa'i tshig gi tshul gyis na de bzhin gsung pa'o/ /'dod chags la sogs pa'i dgra rnams bcom pa'o / /'jig rten thams cad kyis mchod par 'os pas na dgra bcom pa'o/ /yang dag par kun nas thugs su chud pas na yang dag par rdzogs pa'i sangs rgyas te/'di ni bcom ldan 'das kyis rin po che'i gter chen po mngon par mkhyen to zhes bstan pa'i phyir gsungs pa'o/ /rang bzhin gyi rnam par rtog pa rnams ni gcig tu spang bar bya'o zhes bstan pa'i phyir rdo'i rang bzhin ni dpa'o//ji ltar gzhor la sogs pas rko ba'i thabs yang dag pa yin pas 'grub kyi gzhan gyis ni ma yin pa de bzhin du yang dag par so sor rtog pa'i mtshan nyid kho nas mtshan ma rnams yid la mi byed par yongs su spang bar nus kyi gzhan gyis ni ma yin no zhes bstan pa'i phyir rkos shig ces bya ba ste yid la mi byed pa'i dpe'o//des de sgrub pa bstan pa'i phyir ro/ /rnam par rtog pas yongs su zin pa'i sbyin pa la sogs pa ni dngul la sogs pa ltar chen po ma yin pa'i phyir lha 'am mi phyug po la sogs pa 'byor pa'i rgyur 'gyur gyi yid bzhin gyi nor bu dang 'dra ba'i sangs rgyas kyi go 'phang 'thob pa'i rgyur mi 'gyur te/rnam par mi rtog pa'i ye shes kyis yongs su zin pa de dag ni yid bzhin gyi nor bu dang 'dra ba'i sangs rgyas kyi go 'phang 'thob pa'i rgyur 'gyur ro zhes bstan pa'i phyir gnyen po la sogs pa la rnam par rtog pa'i mtshan ma rnams kyi dpe la/dngul la sogs pa ni rin po che'o/ /rnam par rtog pa'i rang bzhin du bden du zin kyang gnyen po la sogs pa rnam par rtog pas yul gyi dngos po khyad par can du gyur pas gong nas gong du 'bras bu'i khyad par thob pa'i rgyu yod do zhes bstan pa'i phyir/dngul dang gser dang rin po che sna tshogs su snang ba'i rdo rnams ni dpe'o/ /gser la sogs pa'i rin po che ni sa la sogs pa la rnam par rtog pa rnams kyi dpe yin gyi/ sa la sogs pa'i ni ma yin te/ de dag ni dus thams cad du yid bzhin gyi nor bu rin po che'i gter dang 'dra'o zhes bstan pa'i phyir yid bzhin gyi nor bu rin po che'i gter chen po rnyed ces bya ba ste rnam par mi rtog pa'i dbyings la reg pa'i dpe'o//de la rnam par mi rtog pa'i dbyings la reg pa ni sa dang po thob pa'o/ /'jug pa khong du chud par bya'o zhes bya ba ni 'jug pa'i go rims shes par bya'o zhes bya ba'i tha tshig go//da ni thabs kyi mtshan nyid de bsdus pa'i don bcu bzhis bstan pa'i phyir ji ltar na zhes bya ba la sogs pa gsungs so/ /nye bar rtog pa med par mtshan ma rnams yongs su spong bar mi nus la/ mtshan ma rnams yongs su ma spongs par yang rnam par mi rtog pa'i dbyings la 'jug par mi 'gyur te/de lta bas na gdon mi za bar nye bar brtag par bya'o snyam nas ji ltar na yang rnam par rtog pa'i mtshan ma ji skad bstan pa de dag la nye bar rtog cing rnam par mi rtog pa'i dbyings su 'jug ce na zhes 'dri ba'o//gong du yid la mi byed pa zhes bya ba yang dag par so sor rtog pa des mtshan ma rnams yongs su spang ngo zhes ni bshad na ji ltar yang dag par so sor brtag par bya ba de ma bshad pa de bas na thabs ni bstan pa'i phyir rnam par mi rtog pa'i dbyings la rab tu gnas pa ni zhes bya ba 'di brjod de/de ni 'dir sbyor ba'i lam la brtags nas rnam par mi rtog pa'i dbyings zhes sgrar dgongs pa yin te/ rnam par mi rtog pa'i dbyings la gnas pa dngos la ni gzugs la sogs pa'i mtshan ma mngon du gyur pa med pa'i phyir ro/ /'dir ni mtha' gnyis spangs shing ci nas kyang dbu ma'i lam la 'jug par 'gyur ba de ltar so sor brtag par bya'o zhes bstan pa'i phyir sgro 'dogs pa'i mtha'i ngo bo dang /skur pa 'debs pa'i mtha'i ngo bo dang / dbu ma'i lam la 'jug pa ston to/ /de la sgro 'dogs pa'i mtha' ni rnam pa gnyis te/gang zag tu sgro 'dogs pa'i mtha' dang / chos su sgro 'dogs pa'i mtha'o/ /bdag dang gzhan dag gi gzugs zhes bya ba ni gang zag tu sgro 'dogs pa ste/ bdag tu 'dzin pa'i sgo nas gzugs la sogs pa la bdag gir 'dzin pa kun du 'byung ba'i phyir ro//chos su sgro 'dogs pa'i mtha' yang rnam pa gnyis te/ ngo bo nyid du sgro 'dogs pa dang / bye brag tu sgro 'dogs pa'o/ /gzugs 'di yod do zhes bya ba ni ngo bo nyid du sgro 'dogs pa'o/ /tshig lhag ma bzhi po ni bye brag tu sgro 'dogs pa ste/ gzugs la sogs pa ni gzod ma nas ma skyes pa'i phyir don dam par skye ba dang 'gag pa la sogs pa mi srid do//skye bo 'gag go zhes bya ba ni skad cig re re la yang 'byung zhing 'jig pa'i chos can gyi phyir ro/ /kun nas nyon mongs so zhes bya ba ni lugs dang mthun pa'i rten cing 'brel par 'byung ba dang ldan pa'i phyir ro//rnam par byang ngo zhes bya ba ni lugs dang mi mthun pa'i rten cing 'brel bar 'byung ba dang ldan pa'i phyir ro/ /da ni gzugs med ces bya ba la sogs pas skur pa 'debs pa'i mtha' ston te/ ji ltar gzugs la sogs pa'i chos rnams kun rdzob tu gnas pa de ltar gang zag ni ma yin no zhes bstan pa'i phyir gzugs la btags pa nyid kyis yod pa rnams la skur pa 'debs pa'i mtha'o zhes skur pa 'debs pa'i mtha' zhes ston te/gang zag de ni kun rdzob tu yang mi gnas pa'i phyir ro/ / gzugs med ces bya ba ni bstan pa'o/ / lhag ma rnams ni bshad pa'o/ /ngo bo nyid kyis kyang med ces bya ba ni ngo bo nyid la skur pa'o/ /tshig lhag ma lnga po ni bye brag la skur pa'o/ /'di btags pa'i yod pa la skur na skur pa 'debs pa'i mthar 'gyur ro/ /yod par 'dzin pa sngon du 'gro ba ni med par 'dzin pa yin pas de ltar rtog na yod par 'dzin pa nyid du 'gyur ro//de bas na gzugs med ces kyang brtag par mi bya'o/ /rgyur yang med ces bya ba ni rgyu'i ngo bor med pa'o/ /'bras bur yang med ces bya ba ni 'bras bur gyur pa med pa'o/ /las ni rang gi 'bras bu 'phen nus pa'o//ldan pa ni rang gi 'bras bu la sogs pa dang 'brel ba'o/ /'jug pa ni rab tu tha dad pa'o/ /gzugs su snang ba rnam par rig pa yang don dam par ma skyes pas de yang gzugs bzhin du brdzun pa'i phyir de bas na gzugs la rnam par rig pa tsam du mngon par chags pa 'di yang sgro btags pa'i mtha' yin par bstan pa'i phyir/rnam par rig pa tsam zhes bya ba la sogs pa gsungs so/ /kun rdzob tu rmi lam la sogs pa bzhin du gzugs snang ba'i rnam par rig pa gnas pa'i phyir ji ltar zhes bya ba la sogs pas kun rdzob tu rnam par rig pa la skur na skur pa 'debs pa'i mthar 'gyur ro zhes ston to//de ltar mtha' gnyis bstan nas da ni dbu ma'i lam du 'jug pa bstan pa'i phyir rigs kyi bu dag 'di ltar zhes bya ba la sogs pa gsungs te/ gang gis don dam par dpyad na/ rnal 'byor pas gzugs mi dmigs te/ gzugs su snang ba'i rnam par rig pa yang mi dmigs pa de'i phyir 'di la sgro 'dogs par mi byed do zhes bya ba tshig gi rjes so/ /skur ba'i mtha' la yang mngon par zhen pa med do/ /'di ltar rnam par rig pa thams cad kyi thams cad du chud gson pa ni ma yin no zhes bya ba ste/gzugs la sogs pa'i rnam par rig pa chud mi gzon to zhes bya ba'i tha tshig go/ /gzhan du na mthong ba la sogs pa dang 'gal bar 'gyur ro zhes dgongs pa'o/ /rnam par rig pa ma gtogs par chos gang yang mi dmigs zhes bya ba na 'dir rnam par rig pa'i sgra ni thams cad du 'khrul pa la dgongs te/phyin ci log gi don ston pa'i phyir ro/ /de bas na chos thams cad ni 'khrul pa tsam gyis brtags pa'i bdag nyid kyi ngo bor zad de/ de ma gtogs par de dag gi rang bzhin rang gi rgyud ni gang yang med do zhes dgongs pa'o//de skad du 'phags pa lang kar gshegs pa las kyang / dngos po skye ba kun rdzob tu/ /dam pa'i don du rang bzhin med/ /rang bzhin med pa gang bor ba/ /de ni yang dag kun rdzob 'dod/ /ces gsungs so/ /de lta bas na dngos po thams cad ni kun rdzob tu bstan pa yin te/des na rnam par rig pa thams cad kyi thams cad du chud gzon pa ma yin par bsgrubs par 'gyur ro/ /rnam par rig pa de yang dngos po med par yang dag par rjes su mi mthong zhes bya ba 'dis ni chos kyi dbyings dang kun rdzob kyi ngo bo'i rnam par rig pa mi 'dra bar dgag pa ste/chos dang gang zag gi dngos po dang bral ba'i ngo bo nyid chos kyi dbyings la 'dir dngos po med pa'i sgrar gsungs te/ chos dang gang zag gi dngos por sgro btags pa'i rnam par rig pa'i bdag gi ngo bo dang de gnyis mi 'dra ba ni rigs te/yang dag pa dang yang dag pa ma yin pa gnyis 'gal ba'i phyir ro/ /shin tu mi 'dra ba yang rigs pa ma yin no zhes ston to/ /rnam par rig pa ma gtogs par dngos po med par yang dag par rjes su mi mthong zhes bya ba ni/ rnam par rig pa de nyid la chos dang gang zag med pa'i mtshan nyid ni chos kyi dbyings te/de chos nyid du gdags pa'i phyir chos dang chos can don dam par mi 'dra ba med pas shin tu mi 'dra ba yang ma yin no/ /chos kyi dbyings de dang rnam par rig pa de gcig par yang yang dag par rjes su mi mthong ba ni thams cad la rnam par rig pa lta bu yin na ni de yang mngon sum du 'gyur ba'i skyon du 'gyur ro//des na thams cad kyis de kho na mthong bar 'gyur ba dang / chos kyi dbyings bzhin du rnam par rig pa yang bden par 'gyur ba dang / kun nas nyon mongs pa can ma yin pa'i skyon du 'gyur ba dang /rnam par rig pa bzhin du chos kyi dbyings de yang 'dus byas dang / kun nas nyon mongs pa can la sogs pa'i skyon du 'gyur ba'i phyir ro/ /chos kyi dbyings dang rnam par rig pa gnyis tha dad par yang yang dag par rjes su mi mthong pa ni/ rnam par rig pa nyid du kun rdzob kyi ngo bo chos dang gang zag tu sgro btags pa dang bral ba gang yin pa de nyid med pa'i mtshan nyid chos kyi dbyings yin na ji ltar de de dang tha dad par 'gyur/ gal te tha dad par 'gyur na ni de'i tshe'i 'du byed kyi bdag med pa tsam nyid don dam pa'i mtshan nyid du mi 'gyur la/'du byed kyi mtshan mas bcings pa rnams kyang rnal 'byor pas zil gyis non par mi 'gyur te/ de de dang tha dad pas chos kyi dbyings gzhan nyid du rtogs pa'i phyir ro/ /de lta bas na dung la sogs pa dang dkar po la sogs pa bzhin du gcig dang tha dad par brjod du med pa nyid rnam par mi rtog pa'i dbyings so//chos kyi dbyings kyi mtshan nyid med pa de la dngos por yang dag par rjes su mi mthong ba ni/ de la yod pa'i ngo bo gang yang mi dmigs pa'i phyir ro/ /dngos po med par yang yang dag par rjes su mi mthong ba ni dngos po mi dmigs pa'i phyir de rnam par bcad pas 'thob pa dngos po med pa'i ngo bo yang med pa'i phyir ro//yod pa las gzhan pa ni med pa'i mtshan nyid yin pas yod pa ma grub na de yang ma grub pa nyid de/ dper na/ gal te yod pa ma grub na/ /med pa 'grub par mi 'gyur te//yod las gzhan pa'i dngos po ni/ /med pa'o zhes skye bo smra/ /zhes bshad pa lta bu'o/ /rnam par rtog pa thams cad kyi gang rnam par ma brtags pa de rnam par mi rtog pa'i dbyings so zhes de ltar lta na yang rnam par rtog pa la kun du spyod pa ste/ de lta bas na de ltar yang mi blta'o//rnam par rtog pa thams cad ces bya ba ni skye ba med pa dang 'gag pa med pa la sogs par rnam par rtog pa rnams kyis so/ /'di ni 'jug pa'i tshul zhes bya ba ni 'jug pa'i thabs mtha' gnyis spangs pa'i mtshan nyid de/ mtha' gnyis la ji ltar brtag pa ni gong du bstan pa yin no//de ltar na rnam par mi rtog pa'i dbyings la rab tu gnas pa yin no zhes bya ba ni/ ji ltar dbu ma'i lam du 'jug pa'i tshul so sor brtag pa brten pa de ltar de la rab tu gnas pa'o/ /tshor ba la sogs pa'i mtshan ma rnams la yang de bzhin du brtag ste/sgro 'dogs pa dang skur pa 'debs pa'i mtha' gnyis la so sor btags pa dang dbu ma'i lam du 'jug pa'i tshul lo / /'dra ba'i phyir gzugs bzhin du ste/ de bzhin du tshor ba dang zhes bya ba la sogs pa ni bsdus nas sbyor ba'o/ /ji ltar sbyor zhe na/ tshig gi mtha' nas gzung ste sbyor ba'i phyir/ rig kyi bu dag 'di la zhes bya ba la sogs pa gsungs so/ /'khrul pas sgro btags pa'i ngo bo yin pas gzod ma nas ma skyes pa'i phyir nyon mongs pa la sogs pa'i sgrib pa thams cad ni don dam par spang du med de/ mgo lan gnyis su gcad du med pa bzhin no//de bas na spang bar bya ba med pas thams cad mkhyen pa ni spang ba'i phyir ma yin pas na 'di yang sgro 'dogs pa'i mtha' yin pas rnal 'byor pas spang bar bya'o/ /de bzhin du thams cad mkhyen pa nyid gcig tu rnam par byang ba'o zhes spyod na yang rnam par rtog pa nyid de//dag pa dang ma dag pa'i mtha' gnyis su 'dzin pa'i phyir ro/ /de ltar thams cad mkhyen pa nyid rnam par byang ba'o zhes 'dzin pa'i shugs kyis gzhan dag la yongs su ma dag pa'o zhes sgro 'dogs par 'gyur te/ de ni de la ltos pa'i phyir ro//de bas na gnyis su rtog par 'gyur te/ chos thams cad ma skyes pa dang ro gcig pa la dag pa dang ma dag pa la sogs pa dbyer med pas de bas rnal 'byor pas rnam par rtog pa 'di yang mi bya ste/ ji skad du/ yod ces med ces gnyi ga mtha'/ /dag dang ma dag 'di yang mtha'//de bas mtha' gnyis rnam spangs te/ /mkhas pa dbus la 'ang gnas mi byed/ ces gsungs pa lta bu'o/ /lhag ma yang gong ma bzhin du bshad par bya'o/ /tshigs su bcad pa gnyis kyis ni/ /ji skad gong du bstan pa'i don rnams sdud de/bde blag tu zin par bya ba'i phyir ro/ /de la tshigs su bcad pa dang pos ni rnam par mi rtog pa'i rgyu'i dbyings su 'jug pa'i rgyu'i go rims bstan to/ /gnyis pas ni de'i phan yon no/ /dam chos 'di la rgyal ba'i sras/ /rnam par mi rtog bsams gyur na//zhes bya ba ni rnam par mi rtog pa'i dbang du byas pa'i chos thos nas rnam par mi rtog pa la bsam pa gzhag ste zhes gsungs pa de bstan to/ /rnam rtog bgrod dka' rnam 'das te/ /zhes bya ba ni rang bzhin gyi rnam par rtog pa la sogs pas mtshan ma rnam pa bzhi yongs su spang bar sbyor ba bstan to//rim gyis mi rtog 'thob par 'gyur/ /zhes bya ba 'dis ni rnal 'byor pa rim gyis 'jug pas 'jig rten las 'das pa rnam par mi rtog pa'i ye shes 'thob bo zhes bya ba'i tha tshig go/ /yang na rim gyis zhes bya ba ni/ rnam rtog bgrod dka' rnam 'das te/zhes bya ba dang sbyar te/ 'dis ni rnam par mi rtog pa'i dbyings su 'jug pa bstan to/ /de las zhes bya ba ni rnam par mi rtog pa'i ye shes 'thob pa'i rgyu las so/ /rab zhi zhes bya ba ni spros pa mtha' dag dang bral ba'i phyir ro/ /'di dag thams cad ni rnam par mi rtog bde ba zhes bya ba'i bye brag go//mi g.yo zhes bya ba ni mi nyams pas na bstan pa'i phyir ro/ /mchog ces bya ba ni 'jig rten dang 'jig rten las 'das pa'i bde ba de dag las khyad du 'phags pa'i phyir ro/ /dbang byed ces bya ba ni ji ltar 'dod pa dang / ji srid du 'dod pa mngon sum du byed pa'i phyir ro//mnyam la mi mnyam pa zhes bya ba ni/ de ni mnyam la mi mnyam pa ste/ sangs rgyas dang byang chub sems dpa' thams cad kyi thun mong yin pas na mnyam pa'o/ /nyan thos la sogs pa dang thun mong ma yin pas na mi mnyam pa'o/ / yang na chos thams cad mnyam pa nyid du khong du chud pa thob pas na mnyam pa'o/ /de dang 'dra ba'i bde ba'i mchog gzhan med pas na mi mnyam pa'o/ /yang na rab tu zhi bas mnyam pa'o/ /mi g.yo ba la sogs pa'i yon tan dang ldan pas mi mnyam pa'o/ /rnam par mi rtog pa nyid bde ba'am/rnam par mi rtog pa'i 'bras bu yang bde bas na rnam par mi rtog bde ba'o/ /thob par 'gyur zhes bya ba ni rtogs pa'o/ /de skad ces bka' stsal nas zhes bya ba 'dis ni yang dag par sdud par byed pas na bcom ldan 'das kyi bka' bzlas pas gzungs 'di yang bstan du rung ba'i lung nyid du ston to//byang chub sems dpa' la sogs pas mngon par bstod do zhes bya bas ni skye bo phal po ches yongs su gzung bar bstan to/ /rnam par mi rtog gzungs 'di rab tu bshad pa yis / /dge ba phal chen blo chung bdag gis gang thob pa/ /de ni blo ngan sna tshogs skyon gyi mun pa dag /zad par gyur nas myur du rgya chen gnas thob shog / 'phags pa rnam par mi rtog par 'jug pa'i gzungs rgya cher 'grel pa/ slob dpon ka ma la shI las mdzad pa rdzogs so// //rgya gar gyi mkhan po dzi na mi tra dang / dA na shI la dang /